Ese Ejja Bible - Gospel of John

Eseya Eyacuiñajji ba meeya Jesosa Quito meshi yasijje poeyanaje ese jayojja yamijji

1 Yahuajo nei nei meshi, aquiana cuana, dejja pea'ai pana jjimahuajo, Jesosa Quito yaña tiiya poa Eyacuiñajji nijje. E'e, oya Eyacuiñajji nei neiya e'e jojo nei poa. 2 E'e, oya Eyacuiñajji nijje yaña poa yahuajo nei nei meshi cuana, ojjaña aquiana cuana pana jjimahuajo. 3 Eyacuiñajjiya oya pana mee ca'ya poa aquiana, meshi cuanaya, dejja, epona pea'ai, ojjaña pana ca'ya poa Jesosa Quitohua. Ojjaña aquiana pana jjima jjemo, chama' pome. 4 E'e, oya, Jesosa Quito, yaña tiitiia poa. Ohuaya eseya Eyacuiñajji ba mee cani. Jamajjeya ohuaya ba'e tiitii mee cani eseya cuana. Eyacuiñajjijo quea ja'a jjashahuabaqui mee cani pea'ai. 5 Jamatii mecajje quea apo nee neejo cuaquijijiya jeaja'a cani. Jiquio ecua cuaquijiji mecajje jijinequiani jama jayojja Jesosaa dejja mimishi cuana quea ja'a nee jjashahuabaqui mee cani. Eshahuaa Jesosa Quito eseya jaahuana pajea mee sa acani. Chojja. Ohuaya ojaya epeejji cuana jaahuana tiitii cani. E'e, oya cuaquijiji quijjo'yo ajja jama.

Huani, Sacaniaja bacua ejja

6 Oe dejja Jodea meshijo ba'e Huani bajjani Eyacuiñajjiya huoojea canaje Jesosa Quitojo huohuiya. 7 Eyacuiñajjiya Huani jama acanaje ba'a: — ¡Poquicue miya! Ojjaña huohuiquicue jama ba'a: “Eyacuiñajjija huoojea'yo ma cuaquijiji quijjo'yo ajja jayojja poeyani ojjaña cuana quea ja'a jjashahuabaqui meeya. Jamajjeya ¡onijje jjapeequicue!” Jamajjeya Eyacuiñajjiya Huani huoojea canaje. 8 Oya Huani ma cuaquijiji jayojja jama pojjeama; oya ca ca oma oe poquinaje Jesosa Quitojo huohuiya, ma cuaquijiji jayojjajo huohuiya. 9 Eyacuiñajjiya Jesosa huoojea canaje meshi yasijje. Ohuaya ojjaña cuana quea ja'a jjashahuabaqui mee caje Eyacuiñajjijo. 10 E'e, oya ma cuaquijiji jayojjaya poeyanaje dejja cuana nijje ba'eya. Yahuajo ohuaya meshi cuana, dejja cuana pea'ai pana ca'ya poa. Jamatii oya dejja cuanaja ba jjima ojjaña cuana pana'yojji epo. 11 E'e, oya poeyanaje Jodea meshi yasijje, ojaya huapa pojjeama cuana huasijje. Jamatii oya cajaa acanaje beca cuaa: — ¡Chojja, oya Eyacuiñajji bameejji pojjeama! — poso beca cuaa acanaje. 12 Beca cuaa ca ca Jesosa Quitoja esohui shajja'ajja canaje. Ojo jama acanaje ba'a: — E'e jojo nei oya Eyacuiñajji ese bameejji poani — acanaje beca cuaa. Jamaya jjashahuabaquianijo, Jesosaa oya cuana Eyacuiñajjija bacua cuana po mee canaje jama ba'a: 13 Yahuajo eseja ejeajjiya eseya jea ca poa; eseja enaeseya eseya mejo ca poa. Jamajjeya eseya cuayani ese ejjaja bacua, Eyacuiñajjija bacua pojjeama. Eyacuiñajjiya ca ca eseya oja bacua a sa acanijo ohuaya ohuaye nei eseya oja bacua po mee cani.

Esohui quea bihui nee Jesosa Quitojo

14 Jamajjeya oya Eyacuiñajji ese ba meeya poeyanaje yamijji, ese cuana nijje ba'eya. Ecuanaa oya banaje quea ca'a nee nee. Oja Chiiya oya, oja Bacua Ejja oe nei quea ca'a nee huoojea canaje meshi yasijje ese cuana jaahuana tiitiijji. Ohuaya ojjaña Eyacuiñajjija esohui e'e nei huohui canaje ojjaña huasijje pea'ai. 15 Huaniya ojo huohui canaje. Majoya oya ba majje taaanaje jama ba'a: — ¡Bacue! Jjeya nei pea dejja quea pame nee poeje. Yahuajo nei nei e cuaya jjimahuajo oya yaña tiitiia poa Eyacuiñajji nijje. Jamajjeya oya quea ca'a nee nee; eya quea ca'a pishana — p oanaje Huani. 16 E'e, eseya shajjama' poani. Jamatii ohuaya ojjaña cuana quea jea nee nee atiitii cani quea pame nee nee. 17 Yahuajo nei nei esohui huohuijji Moisesiya esohui Eyacuiñajjija ehuohui'yo cuana tehue majje ba mee ca'ya poa. Jesosa Quitohua, ma Eyacuiñajjija huoojea'yo ojjaña jaahuanajjiya ca ca ojjaña cuana ba mee canaje Eyacuiñajjiya eseya cuana quea jea nee nee acani, ojaya esohui e'e nei ba mee cani pea'ai. 18 Eyacuiñajji Echii Ai jjacojja ba meequi ajja tii. Jamatii oja Bacua Ejja oe nei Eyacuiñajji nei pea'ai, Eyacuiñajji nijje nequi, oja Chii nijje tii. Ohuaya eseya Eyacuiñajji ba mee cani, oja Chii.

Huaniya, ma ona besameejji poaniya huohui canaje Jesosa Quitojo

Huaniya, ma ona besameejji poaniya Betania cuiñajjijo, Jodana cuei ojje mijijje nequi, ojjaña cuana Eyacuiñajjijo besa mee canaje. 19 Jamajjeya Jenosanena cuiñajjijo ba'eya Jodio dejja etii cuaa Huani que huoojea canaje Eyacuiñajji nijje emimijji cuana, Eyacuiñajjija equi jaahuanajji cuana pea'ai. Huani ba majje huohui'ajja canaje: — ¿A'ya cuae mi so'o? ¿A'a miya Eyacuiñajjija huoojea'yo ojjaña jaahuanajji? 20 — Chojja — saja'ame acanaje Huaniya—, chojja, eya Eyacuiñajjija huoojea'yo ojjaña jaahuanajji pojjeama. Eya ca ca iña Quito pojjeama — poanaje. 21 — Jamajjeya ¿a'ya cuae mi oe so'o? — huohui'ajja canaje—. ¿A'a miya Enia, Eyacuiñajjija esohui huohuijji yahuajo ba'ya poa? — Chojja — saja'ame acanaje Huaniya—. Eya Enia pojjeama. Jamajjeya huohui'ajja ca o'oyanaje cuaa jama ba'a: — E'e. Yahuajo Moisesiya huohui ca poa Eyacuiñajjija pea esohui huohuijji nei poeje. ¿A'a miya ma esohui huohuijji neiya? — Chojja — Huaniya acanaje. 22 Jamajjeya Jodio cuaa Huani huohui'ajja ca o'oyanaje: — ¿A'ya cuae mi oe? ¿A'ya cuae mi poani so'o, de? ¡Huohuicue mo oe! Jodio etii cuaa ecuana huoojea canaje mi baa. ¿Yajja huohuiñaqui'yome acuae oe aje o que poqui o'oya majje so'o? 23 Jamajjeya Huaniya saja'a canaje jama ba'a: — Yahuajo nei nei Eyacuiñajjija esohui huohuijjiya Isaiaa ejo huohui ca poa jama ba'a: “Quijje esohui huohuijji poeje esohui huohuiya. Meshi quimajo huohui huicha'a huicha'a caje jama ba'a: “Emeshi mese nei poeje. ¡Jamajjeya oe apoa pocuajicue! ¡Jamajje o poeyajo, ojaya esohui quea ja'a nee shajja'ajja neinei'yocue!” Jamaya aca'ya poa Isaiaa yahuajo — Huani poanaje. 24-25 Jamajoya ma Jodio dejja cuanaa Huani huohui'ajja ca o'oyanaje: — ¿A'a e'e jojo nei miya Eyacuiñajjija huoojea'yo ojjaña jaahuanajji pojjeama? ¿A'a cuae mi Enia pojjeama, ma Eyacuiñajjija esohui huohuijji yahuajo ba'ya poa pojjeama so'o? ¿A'a cuae mi Eyacuiñajjija pea esohui huohuijji nei, ma ecuanaja etiiquiaa ishoa'ajja caninaje pojjeama so'o? ¿Achajjajo acuaeya oe miyaya ecuana, Jodio cuana, besa meeaña Eyacuiñajjijo so'o? — poanaje cuana. 26 Huaniya jama acanaje ba'a: — Eyaya miquianaya Eyacuiñajjijo besa meeaña cuei enajo. Pea dejja jiquio tiijo nequi. Jjeya oya miquianajaya ba jjima. 27 Oya quijje pishana miquianajaya eba poaje Eyacuiñajjija huoojea'yo ojjaña jaahuanajji. Oya ca ca oe nei quea ca'a nee nee nequi. Eya ca iña quea ca'a nee pishana. Jamajjeya aje oe eya Jesosa Quito cojja neijo nequi sa po ajja. Eya quea bicho, de. 28 Jamaya poanaje Huani Betaniajo, Jodana cuei ojje mijijje nequi, ojjaña cuana Eyacuiñajjijo besa mee canijo.

Jesosa Quito Eyacuiñajjija huoojea'yo ojjaña cuanaja mimishijo mano'yohua

29 Majoya mecahuajje Huaniya ojjaña huasijje esohui huohui ca o'oyanijo, Jesosa o que poeyanaje. Huaniya Jesosa ba majje ojjaña cuana huohui neinei canaje jama ba'a: — ¡Bacue oe, oya poeyani Jesosa, Eyacuiñajjija huoojea'yo! Oya manoje'yo ojjaña cuanaja mimishi cuijea'yojji. E'e, Eyacuiñajji nijje emimijji cuaa ñajjajja cuia majje Eyacuiñajji yasijje dahua cani oya mimishi cuanajo quene'ama epo meejji. Ñajjajja jayojja jama poaje'yo Jesosa; manoje'yo ojjaña cuanaja mimishi cuijea neinei'yojji — Huani poanaje—. 30 E'e, yahuajo pishana eyaya miquianaya huohuinaje ojo jama ba'a: Jjeya nei pea dejja quea pame nee nee poeje. Yahuajo nei nei e cuaya jjimahuajo oya yaña tiiya poa Eyacuiñajji nijje. Jamajjeya oya quea ca'a nee nee; eya quea ca'a pishana — Huani poanaje. 31-33 —E'e, yahuajo oya ecuea ba jjima poa. Jamatii Eyacuiñajjiya e huoojea jjimahuajo huohui canaje jama ba'a: “¡Dejja cuana besa meecue enajje ejo! Besa meeañajo, miyaya baje oe dejja. Ecuea Edojjoshahua Pame huia' jama ma dejja sapa biajje cuabesa ba'eje; jjapashineijje ba'eoqueje'yo. Maya ecuea ecue Bacua Ejja, ecue huoojea'yo. Ohuaya ojjaña miquiana que Edojjoshahua Pame dobiqui mee caje'yo, miquiana quea ja'a nee nee ejjashahuabaqui meejji” eya acanaje Eyacuiñajjiya — Huani poanaje. —E'e, eyaya e'e jojo nei banaje jama ba'a: Eya Jesosa besa meeañajo, eyatahuatahua jjaca'apejoquinaje. Eyacuiñajjija Edojjoshahua Pame huia' jama o sapa biajje cuabesa ba'enaje. Jjapashineijje ba'eoquenaje. Jamajjeya jjeya oya ecuea eba nei nei, Jesosa. Yahuajo miquianajaya oya ba jjima. Jamajoya eya poeyanaje ojjaña Eyacuiñajjijo besa meeya. Miquianaya oya Eyacuiñajjija huoojea'yo ojjaña jaahuanajji ba meeya eya poeyanaje pea'ai. 34 Jamajjeya eyaya miquianaya huohui neineiaña: E'e jojo nei nei eyaya oya banaje. Jesosa ca ca oe e'e jojo nei Eyacuiñajjija Bacua Ejja oe nei — poanaje Huani Jodio cuana nijje.

Jesosaa iyaa canaje beca dejja onijje e'ani tiitiijji, o shajja'ajjajji

35 Majoya mecahuajje Huaniya, ma ona besameejji poaniya jomajo, Jodana cuei sahuajo nequiya esohui huohui canaje oja epeejji nijje, becanejjijji pea'ai nijje. 36 Jesosa jjayejjequiani ba majje Huaniya oja epeejji cuana huohui canaje jama ba'a: — ¡Bacue Jesosa! Oya Eyacuiñajjija huoojea'yo. Oya manoje'yo ojjaña cuanaja mimishi cuijea'yojji. 37 Huanija esohui Jesosajo shajja'ajja majje oja epeejji becanejjijji pea'ai Jesosa nijje poquinaje. 38 Jesosaa ejiojjijje poquijeya Huanija beca epeejji o quiquishijji poquije bajea canaje. Ba majje huohui'ajja canaje: — Epeejji cuana, ¿ajeo miya enijje poeyani? —Esohui huohuijji — saja'a canaje—, ecuana poeyanaje mi baa; mi shajja'ajja sa poani. ¿Achejo ba'e miya? — poanaje. 39 —E'e — Jesosa poanaje—, ¡ocue poe'ajja! ¡Cua'a, enijje po'yocue! Jamajjeya Jesosa nijje poquinaje equi yasijje, o ba'e yasijje. Onijje aninaje ma pojjajo, eshequi oquequiajo; o shajja'ajjajji po'yonaje oya cuana, ma bajjani ba'a: Anesi oja epeejji nijje pea'ai. 40 E'e, Anesi pea dejja nijje Huanija ehuohui shajja'ajja majje Jesosa nijje poquinaje. Anesi ca ca Simohuija echahua mese, ma quijje bajjani canaje Penoja echahua mese. 41 Jamajjeya mecajjeahua nei Anesiya oja o'i sa'ajja canaje. Ba majje huohui canaje: — O'i, eyaya Eyacuiñajjija huoojea'yo ese jaahuanajji banaje, Jesosa Quito. 42 Majoya Anesiya oja o'i Simohui bajjani Jesosa que dojo canaje. Simohui ba majje Jesosaa huohui'ajja canaje jama ba'a: — Epeejji, miya ecuea eba. Miya Huanija bacua ejja, Simohui bajjani. Eyaya miya bajjanije'yo ecuea esohuijo Sepa bajjani — poanaje. Jienoja esohuijo Peno bajjani canaje, Ese Ejjaja esohuijo Mei bajjani.

Jesosaa iya canaje pea cuana onijje e'ani tiitiijji, o shajja'ajjajji

43 Majoya mecahuajje, mecajjeahua nei Jesosa poquinaje Janinea meshi yasijje, Jodana cuei ojje miji yasijje. Poqui jeahuaa Penipe ba canaje. Ba majje iyaa canaje: — Penipe, ¡ocue poe'ajja, enijje po'yocue; ecuea epeejji po'yocue! — Jesosaa acanaje; o que poquiajo ojaya epeejji pojji aca'yonaje. 44 Penipe, Peno, Anesi pea'ai ca ca oe Betesaida cuiñajjijo ba'e. 45 Jamajjeya Penipeya oja epeejji Natanaeni sa'ajjaqui canaje. Ba majje huohui canaje: — Ecuea epeejji, ecuanaa Eyacuiñajjija huoojea'yo ese jaahuanajji banaje. Ojo Eyacuiñajjija esohui huohuijjiya yahuajo nei nei ba'ya poaa, Moisesiya pea'aiya tehue ca poa, ma ojjaña Jodio cuaa ishoa'ajja caniya. Oya Jesosa bajjani, Joseja bacua ejja, ma Nasanena cuiñajjijo ba'enaje. Eyaya maya banaje, de — poanaje Penipe. 46 —¿A'a oya Nasanenajo ba'enaje? Jomajo pa jjaja chama' dejja quea pame — poanaje Natanaeni. — Chojja — poanaje Penipe—, ¡poecue, oya bahuacue! 47 Jamajjeya oya cuana poquinaje Jesosa baa. Majoya Natanaeni poeje ba majje Jesosa onijje miminaje jama ba'a: — E'e Natanaeni, miya Jodio e'e jojo nei. Eyacuiñajji shajja'ajjajji poani. Miya ca ca oe siajje po ajja nei nei pea'ai. 48 Ma shajja'ajja majje Natanaeni jama poanaje ba'a: — ¿A'a eya miquea eba? ¿Ache shono acuaeya miyaya eya banaje so'o? — poanaje. —Natanaeni, miya ecuea eba yahuajo. Penipeja iyaa jjimahuajo, iquena acui yajjanajo ani eyaya miquea ejjashahuabaquijji banaje — Jesosa poanaje. 49 Jamajjeya Natanaeniya acanaje: — Esohui huohuijji, e'e jojo nei miya Eyacuiñajjija Bacua Ejja oe nei poani tii. E'e, ¡miya Jodio cuanaja Emeshi Mese nei! 50-51 Jesosaa oya huohui canaje: — Eyaya miya huohuinaje jama ba'a: “Eyaya miya banaje iquena acui yajjanajo ani”. Jamajjeya ecuea esohui shajja'ajja majje miya jjashahuabaquinaje jama ba'a: “E'e jojo nei miya Eyacuiñajjija Bacua Ejja”. Jamajoya miyaya baje Eyacuiñajjiya eya ma dejjaja ba jjima amee caje'yo. Cuanaya Eyacuiñajjija esohuidojojji cuana nequioqueje e jaahuanaa, ojjañaja Edoe Mese jaahuanaa. Jamaya miyaya baje'yo, Natanaeni, enijje jjapeequianijo — Jesosa poanaje.

Oe dejja jjahuanaquinaje Cana cuiñajjijo

1 Majoya beca cahuime po majje oe dejja jjahuanaquinaje Canajo, Janinea meshijo. Ejjahuanaquijjijo quea huiso cuana iyaa canaje ojee ijjia'ijjiaa. Jesosaja enaese Mania iyaa canaje pea'ai. 2 Jesosa o shajja'ajjajji cuana nijje poeyanaje pea'ai jjahuanaquije baa, ojee ijjia'ijjiaa pea'ai. 3 Ojee ijjia'ijjia anijo, acuijjajja na ishijeyo canaje cuaa. Jamajjeya Jesosaja enaese onijje miminaje jama ba'a: — Jesosa, bacue, acuijjajja na ishijeyo canaje cuaa. Oe poanaje. ¿Ae e'ishi'yojji? 4 —Ecue nae, ¿yajjajo acuae moya huohui'ajjaña acuijjajja najo? ¡Ishoa socue oe! Quijje pishana eyaya oya cuana asahuaje — Jesosa poanaje. 5 Jamajjeya ojaya enaeseya echacojji cuana huohui canaje jama ba'a: — ¡Jesosaja esohui jayojjaya nequiaa oe acue! — poanaje Mania. 6 Jomajo me oejje oe, 6 meshimisi ena nequijji quea quemo nee nee, quea ao nee nee yani, 60 litros shojji. Ma meshimisijo ena nequia cani eme shacua huicha'a huicha'ajji. Jamaya oya cuaa acanaje ijjia'ijjia jjimahuajo. 7 Jamajjeya Jesosaa echacojji cuana jama acanaje ba'a: — ¡Ena shocue meshimisi ai cuana huasijje! — poanaje. Echacojji cuana: — E'e — poanaje. Meshimisi ai cuana huasijje ena sho canaje. Cuatajea mee canaje. 8 Jamajjeya cuatajea cajo, Jesosaa echacojji cuana jama acanaje ba'a: —E'e. ¡Jjeya oe pojji dojocue equi mese yasijje! Jamajjeya oe pojji dojo canaje e'ishi mee'ajjajji. 9 Ma ena ishi'ajja canaje equi meseya. Jamatii ojaya ba jjima jiquio eteohuejjajo nequi ena Jesosaa acuijjajja na pojji acanaje. Echacojji cuanaja eba ojaye nei Jesosaa eteohuejjajo nequi ena acuijjajja na pojji aca'ya poa; pea cuanaja ba jjima. 10 Jamajjeya equi meseya ishi majje joya ejjahuanaquijji iyaa canaje. Huohui canaje jama ba'a: — Epeejji, jiquio acuijjajja na quea pame nee nee. Pea cuaa acuijjajja na quea pame, quea biquia nee ishi mee cani ebionei. Majoya ojjaña jejje majje acuijjajja na quea biquia pishana quia cani. Miyaya ca ca oe acuijjajja na quea biquia nee, quea pame nee nee quijje nei ishi meeaña — poanaje e'equi mese. 11 Jamaya acanaje Jesosaa Janinea meshijo, Canajo. Jamaya ohuaya ma dejjaa ajjima acani acoo canaje. Ba majje ojjaña cuana jama poanaje ba'a: —E'e jojo nei Jesosa quea ca'a nee nee. Ohuaya ojjaña acani, ma dejjaa ajjima acani pea'ai. O shajja'ajjajji cuana pea'ai jama poanaje ba'a: — E'e jojo nei Jesosa Eyacuiñajjija huoojea'yo ojjaña jaahuanajji, Quito. 12 Majoya Jesosa Capenaoma huasijje poquinaje. Oja nae, oja chahua cuana, ojaya epeejji cuana pea'ai onijje poquinaje. Jomajo aninaje cuana oe pojji cahuime.

Eyacuiñajjija equi yasijje poqui majje Jesosaa aquiana quiajji cuana huoojeacuayajea canaje

13 Quijje pishana ojjaña Jodio cuana Jenosanena huasijje poquinaje quea bihui nee ojee ijjia'ijjiaa ma shejo ba'a esohuidojojji cuaa yahuajo Ejito meshijo Jodioja ebacua cuana cuia'yo jjima shejo. Ma epajea'yojji pojjeamajo jjachichaquinaje. Jamajjeya Jesosa pea'ai poquinaje Jenosanena huasijje. Poe majje Eyacuiñajjija equi yasijje poquinaje. 14 Dobiqui majje Jesosaa ba canaje quea huiso dejja cuaa aquiana quia cani; ana'ai yahue cuana, ñajjajja cuana, huia' cuana pea'ai quia cani. Bejjo pea bejjo sosejje quia caqui ba canaje pea'ai. 15 Ba majje Jesosaa jjono ecuiasejjajeajji iña canaje. Dejja aquiana quiajji cuana, ñajjajja cuana, ana'ai cuana pea'ai cuiahuoojeacuayajea canaje esecue yasijje, ojjaña. 16 Bejjo pea bejjo sosejje quiajji cuanaja bejjo nequijji cuana jeapajjajea canaje; bejjo jjahuojjojeajeaqui canaje. Huia' quiajji cuana Jesosaa huohui canaje jama ba'a: — Jiquio equi ca ca ecue Chii nijje emimijji. Aquiana quiajji pojjeama equi. ¡Miquea aquiana cuana dojo'yocue esecue yasijje! ¡A'a jja oe Eyacuiñajjija equi aquiana quiajji equi jayojja jama ajji! — Jesosa poanaje. 17 Ma ba majje ecuana, Jesosaja epeejji cuana, ojee jjashahuabaquinaje jama ba'a: — E'e, Eyacuiñajjija esohui huohuijjiya yahuajo nei nei tehue ca poa jama ba'a: “Ecue chii, eya jjashahuaba neineiquiani miquea equi jaahuanajji. Jamajjeya mimishi cuaa eya niñeba cani”. Jama tehuemeya aca poa yahuajo nei. Oya cuaa Jesosajo tehue ca poa, de —poanaje Jesosaja epeejji cuana. 18 Jamajjeya Jodio cuana Jesosa nijje quea quene poanaje, oya Eyacuiñajjija huoojea'yo pojjeama posojo onijje mimijajinaje jama ba'a: — ¿Aya acuae mi huoojea canaje ecuana Eyacuiñajjija equijo anijo huoojeacuayajeaa? ¿A'a cuae miya Eyacuiñajjija huoojea'yo nei? ¡Caba'ajja sahua! !Ma dejjaa ajjima acani a'ajja socue ecuanaja ebajji, Eyacuiñajjiya e'e jojo nei miya a'a huoojea canaje ebajji! 19 Jesosaa oya cuana saja'a canaje: — ¡Bacue! Miquianaa jiquio equi jeabichajea'yajo eyaya jiquio equi iyaje o'oya pea beca peejjima cahuime. 20 —Chojja, de —Jodio cuana poanaje—. Quea huiso nee nee, 46 shequiajame jiquio equi iya canaje cuaa. ¿Achajja acuae equi jeabichajea majje miyaya iyaje o'oya pea beca peejjima cahuime? ¡Chojja, de! — poanaje. 21 Jamatii Jesosa Eyacuiñajjija equijo pojjeama miminaje; ojaya eyamijo jjashahuabaquiani. 22 E'e, quijje Jodio cuaa Jesosa quecua'yo majje, Eyacuiñajjiya oya shequi mee caje o'oya pea beca peejjima cahuimejo. Jamajje quijje Jesosa shequi o'oyajo, ecuana o shajja'ajjajji cuana jiquio esohuijo jjashahuabaquije. Jama poaje ba'a: — E'e de, Eyacuiñajjija esohui e'e nei; Jesosaja ehuohui pea'ai e'e nei — poaje quijje. 23 Jamajjeya Jenosanena huasijje Jodio cuana ojee jjachichaquinaje. Quea bihui nee ijjia'ijjianaje esohuidojojjiya yahuajo nei Jodioja ebacua cuana cuia'yo jjima shejo, ma pajea'yo jjima yajji. Jesosa pea'ai Jenosanenajo aninaje. Jomajo Jesosaa quea huiso ma dejjaa ajjima acani acanaje. Ba majje quea huiso cuana poanaje: —¡ E'e jojo nei Jesosa Eyacuiñajjija huoojea'yo ojjaña jaahuanajji! — poanaje cuana. 24-25 Jamatii Jesosaja eba nei nei ojjaña dejja cuanaja ejjashahuabaquijji. Quea tai, epeejji e'e jojo nei pojjeama beca cuana. Jamajjeya ohuaya ojjaña quea ja'a nee huohui jjima jama ba'a: — E'e jojo nei eya ca iña jiquio Eyacuiñajjija Bacua Ejja — jamaya huohui jjima so'o Jesosaja.

Jesosa miminaje Nicodemo nijje

1 Majoya oe dejja Jesosa que poeyanaje, oya Nicodemo bajjani. Oya Jodio etii cuana nijje pea Jodio cuana huoojeajji poani, Paniseo dejja cuana jama jjashahuabaquime poani. 2 Oya, Nicodemo Jesosa que poeyanaje mecajje quehuajje. Jama acanaje ba'a: — Esohui huohuijji, Eyacuiñajjiya miya ameesahua cani ma dejjaa ajjima acani. Jamajjeya ecuanaja eba Eyacuiñajjiya miya huoojea canaje ecuana sohuihuohuiya. 3 Jesosaa oya huohui canaje Eyacuiñajji nijje eba'e tiitii'yojjijo; jama poanaje ba'a: — Nicodemo, eyaya miya e'e jojo nei huohuiaña: ¡Bacue! Jiquio ecua epona jjamejoqui majje bacua cuayani jayojja jama Eyacuiñajjiya miya cacuaya mee ca o'oyahua jiquio ecua esho'i cuayani jama. Jamajjeya Eyacuiñajjiya miya ebacua sho'i jayojja jama acaje'yo, miya ba'e tiitii mee caje'yo onijje, ojjañaja Emeshi Mese nei nijje — Jesosa poanaje. 4 —Chojja de, ¿a'a cuae se dejja etii cuaya o'oyame so'o? — Nicodemohua acanaje—. ¿A'a cuae eseja enaeseja yone yasijje ba'edobiqui o'oya majje ebacua jama cuaya o'oyame so'o? Chojja, de — acanaje Nicodemohua. 5 Jamajjeya Jesosaa oya huohui ca o'oyanaje: — Nicodemo, e'e jojo nei ecuea ehuohui jama ba'a: Jiquio ecua ebacua esho'i cuayani jama Eyacuiñajjiya miya cacuaya mee ca o'oyahua. Joya Eyacuiñajji shajja'ajjajji poani enajo besa mee majje, Eyacuiñajjija Edojjoshahua Pameya oya quea pame jjashahuaba tiitiiqui mee majje pea'ai miya pea jjashahuabaquime poaje'yo. Oya Eyacuiñajji nijje ba'e tiitiije'yo. Jamaya po ajjajo ca ca Eyacuiñajji nijje eba'e tiitii'yojji pojjeama eyajo. 6 E'e Nicodemo, ojjaña cuana enaeseja mejo bacua cuayani yahueja jea, oja chii jayojja yamijji. Joya Eyacuiñajjija Edojjoshahua Pameya pea jjashahuabaquime po mee ca'yani ca ca Eyacuiñajjija Edojjoshahua Pame onijje nequi — Jesosa poanaje—. 7 Eyaya miya huohuinaje e'e jojo nei ebacua esho'i cuayani jama Eyacuiñajjiya miya cacuaya mee ca o'oyahua. Jamatii a'a jama jjashahuabaquijji ba'a: “Chojja de, ¿yajja epojji?” 8 Miyaya beni shajja'ajjaña; beni baña pea'ai acui iña dojo cani. Jamatii ache huesha beni poeani miquea ba jjima; achacua poquije miquea ba jjima pea'ai. Jiquio ecua beni achacua poquije ba jjima jayojja jama miquea ba jjima pea'ai ache shono, achejo pojja'a Eyacuiñajjija Edojjoshahua Pameya dejja pea jjashahuabaquime po mee ca'yani. Jamaya miquea eba pojjeama. E'e, Eyacuiñajjiya miya cacuaya mee ca o'oyahua ebacua esho'i cuayani jayojja jama — Jesosa poanaje. 9 —E'e pojja'a. ¿Achajja acuae ebacua esho'i cuayani jayojja jama epojji so'o? — huohui'ajja canaje Nicodemohua. 10 —Nicodemo, miya Jodio esohui huohuijji; Eyacuiñajjija esohui yahuajo nei etehue'yo huohuijji. Jamajjeya ¿yajjajo miquea ba jjima ebacua esho'i cuayani jayojja jama epojji eba'ejji pea ba'eme epo'yojji? — Jesosa poanaje. 11 — E yaya, Huaniya ma ona besameejji poaniya pea'ai miya e'e jojo nei huohuiaña jama ba'a: Ma ecuanaja eba poa huohuiaña pea ba'eme epo'yojjijo; ma ecuaa yahuajo banaje pea'ai huohuiaña. Jamatii miya, pea Jodio esohui huohuijji cuana pea'ai ecuanaja esohuijo jama poani ba'a: “Chojja, siajje oya cuana poani”. E'e, miquianaaya ecuana siajjepojji poso aña — Jesosa poanaje—. 12 E'e, eyaya miya huohuiaña ebacua esho'i cuayani jayojja jama Eyacuiñajjija Edojjoshahua Pameya miya pea jjashahuabaquime po mee caje'yo, Eyacuiñajji nijje eba'e tiitii'yojji. Jamatii ecuea esohui quea quehua miquea. Jamajjeya eyaya miya Eyacuiñajjija ejjashahuabaqui'yojji eyajo huohuiajo, ¿a'a ecuea esohui quea ja'a poaje miquea? Chojja, quea quehua poaje pea'ai. 13 ¡Shajja'ajjacue ecuea esohui, Nicodemo! Dejja cuana eyahuasijje dobiqui'yo majje meshi yasijje epoe o'oyajji pojjeama ojjaña eyajo ba'e huohuiya, Eyacuiñajjija ejjashahuabaqui'yojjijo pea'ai epoe o'oyajji pojjeama huohuiya. Eya ma ojjañaja Edoe Mese eyajo ba'e'yonaje. Eya eyajo ba'e poeyanaje meshi yasijje. Jamajjeya eyaye nei baña ojjaña eyajo, Eyacuiñajjija ejjashahuabaquijji ecuea eba pea'ai — Jesosa poanaje—. 14 Cuanaya eya, Eyacuiñajjija huoojea'yo ojjaña jaahuanajji ba'ehuanasohuajea caje'yo cuaa. E'e, yahuajo nei nei meshi jabojo Moisesiya baa peyo jayojja acui aojo ba'ehuanasohua ca poa ojjañaja ebajji; ojjaña joya peyoja ijjia baa peyo jayojja ba cajo, Eyacuiñajjiya huaquia mee ca'ya poa. Jiquio ecua Moisesiya baa peyo jayojja ba'ehuanasohua ca poa jayojja jamaya quijje eya ba'ehuanasohuajea caje'yo cuaa acui ecueata'apeejo ojjañaja mimishijo mano'yohua, mimishi cuijea'yojji sosejje. 15 Jamajjeya Eyacuiñajjiya ojjaña ba'e tiitii mee caje'yo onijje, ca ejo jama jjashahuabaquiajo ba'a: “E'e jojo nei ohuaya ecuea mimishi cuijea neinei caje'yo”. E'e, enijje jjapeequiajo, Eyacuiñajjija quea nee nee epo mee'yojji pojjeama cuaquijo — Jesosa poanaje. 16 —E'e Nicodemo — Jesosa poanaje pea'ai—, Eyacuiñajjiya ojjaña cuana ojjaña meshijo ba'e quea jea nee nee acani. Jamajjeya eya, oja Bacua Ejja oe nei huoojea canaje ojjañaja mimishijo mano'yohua. Jamajjeya ojjaña joya e'e jojo nei enijje jjapeequiani Eyacuiñajjiya ba'e tiitii mee caje'yo onijje eyajo; quea nee nee epo tiitii mee'yojji pojjeama. 17 Ecue Chiija eya huoojea jjima ojjaña tecueaa. Ecuea ejjashahuabaqui'yojji jama pojjeama ba'a: “Ojjaña cuana quea mimishi nee poanijo, quea nee nee po meeje'yo; quea nee tii tii”. Chojja, Eyacuiñajjija eya, oja Bacua Ejja oe nei onijje eyajo ba'ya poa meshi yasijje huoojea ca poa. Ojjañaja mimishi cuijea'yo majje enijje ba'e tiitii meeje'yo — Jesosa poanaje—. 18 Jamajjeya ojjaña joya e'e jojo nei enijje jjapeequiani Eyacuiñajjiya huohui caje jama ba'a: “Miquianaya ecue Bacua Ejjaja epeejji e'e jojo nei poanijo, mimishi cuijeaje'yo. Quea nee nee epo mee'yojji pojjeama cuaquijo” Eyacuiñajjiya acaje —Jesosa poanaje—. Pea cuana enijje jjapeequi ajjajo ca ca Eyacuiñajjiya yahuajo jama acaje ba'a: “Miquianaya ecue Bacua Ejja oe nei nijje jjapeequi ajjajo cajaa aje'yo, mimishi cuana cuijea'yo jjima aje'yo. Jamajjeya quea nee tii tii poaje'yo” Eyacuiñajjiya acaje — Jesosa poanaje—. 19 E'e, Eyacuiñajjiya eya, oja Bacua Ejja huoojea canaje esohui e'e nei huohuiya, ojjaña cuana quea jjashahuabaqui ja'a nee po meeya. E'e, eya cuaquijiji jayojja jama poanijo ojjaña quea jjashahuabaqui ja'a po meeje'yo. Jamatii quea huiso cuana ecuea esohui shajja'ajja sa po ajja, mimishi cuana ojaya quea boti neejojo. Quea mimishi nee ba'e, de. Jamajoya Eyacuiñajjiya oya cuana cajaa acaje'yo. Quea nee tii tii poaje'yo cuaquijo. 20 Quea mimishi ba'eja boti'ama Eyacuiñajjija esohui e'e nei; cajaa acani quea mimishi ba'yaniya jjejojo. Jamajjeya enijje jjapeequi ajja. Quea mete jjashahuabaquiani jama ba'a: “¡Jesosaa mo tecuea caje ecue mimishijo!” 21 Ojjaña joya quea pame nee ba'eya ca ca Eyacuiñajjija esohui quea boti nee acani. Enijje jjapeequianijo, eyaya oya cuana quea jjashahuabaqui ja'a po meeaña. Jamajjeya oya cuana jama poani ba'a: “E'e, Eyacuiñajjiya eya quea pame ba'e meesahua cani ojaya esohui jayojja” poani —Jesosaa Nicodemo huohui canaje. Majoya Jesosa Nicodemo nijje mimipajeanaje.

Huaniya ma ona besameejji poaniya Jesosajo huohui ca o'oyanaje

22 Majoya Jesosa Jenosanenajo ani poquinaje o shajja'ajjajji cuana nijje Jodea meshi yasijje, pea cuiñajji cuana huasijje. Jomajo nequi cuana Jesosaa sohuihuohui canananaje. O shajja'ajjajjiya dejja cuana besa mee canananaje Eyacuiñajjijo. 23 Huaniya jomajo dejja besa mee canaje pea'ai Enoni cuiñajjijo, Sanima cuiñajji pejjejo pea'ai ena quea doejo. Ojjaña pojjajo quea huiso dejja cuana, ponaña pea'ai Huani que poquinaje. Eyacuiñajjijo enajo besa mee canaje. 24 E'e, ma pojjajo emeshi mese Enodeja Huani jeanobia jjima poanaje. 25 Jamajjeya oe Jodio dejjaa Huanija epeejji cuana mimicuiajeanobia canaje. Jama poanaje ba'a: — ¿Ache dejjaa acuae mi Eyacuiñajjijo enajo besa mee majje eseya e'e jojo nei quea boejea po mee caje'yo so'o? ¿A'a Huaniya pojja'a? ¿A'a cuae peaa besa mee cajji, Jesosa shajja'ajjajjiya pojja'a besa mee cajji? — Jodio poanaje. 26 Jamajjeya Huani que poquinaje ojaya epeejji cuana, huohui'ajjaa jama ba'a: — Esohui huohuijji, ma dejja joya yahuajo minijje nequinaje cuei ojje mijijje, ma ojo miyaya jama huohuinaje ba'a: “Oya Eyacuiñajjija huoojea'yo ojjaña jaahuanajji”, maaya jjeya o shajja'ajjajji nijje onaya besa mee cani; ojjaña cuana aje oe jjeya o que poquiani. Jesosaa quea huiso nee nee Eyacuiñajjijo besa mee cani. ¿Apiojji shai? — poanaje Huanija epeejji cuana. 27 Huaniya oja epeejji cuana saja'a canaje: — ¡A'a quea yeno pojji! Jamaya Eyacuiñajjiya oya pea cuana besa mee cani. Yahuajo quea huiso dejja e que poeyanaje; Eyacuiñajjiya oya cuana huoojea canaje. Jjeya ca ca ojjaña cuana Jesosa que poquiani; Eyacuiñajjiya oya cuana huoojea cani. 28 Miquiaaya ecue sohui yahuajo shajja'ajjanaje. Jama poanaje ba'a: “Eya Eyacuiñajjija huoojea'yo ojjaña jaahuanajji pojjeama. Eyacuiñajjiya eya huoojea canaje ebionei Jesosajo huohuiya”. 29 E'e —Huani poanaje—, Jesosajo jama jjashahuabaquicue ba'a: Ejjahuanaquijjijo, epona yahueja ehuanase poaje'yo. Jamatii yahueja epeejjiya poe majje jjahuanaquiequi ba cani. Yahue ojaya ehuanase nijje mimiani shajja'ajja majje quea bihui nee poani ojaya epeejji. Jiquio ecua yahueja epeejji o ba majje quea bihui nee poani jayojja jama eya Eyacuiñajjija huoojea'yo ojjaña jaahuanajji Jesosa bajjani ba coo majje quea bihui nee nee poani; eya Jesosaja epeejji. 30 ¡Ojjaña cuaa oya cashajja'ajja tiitii cahua! Quijje ca ca ojjaña cuana e que poepajeaje'yo. Jamatii capoahua — poanaje Huani, ma ona besameejji poani. 31 ¡Bacue! Eyacuiñajjija huoojea'yo ojjaña jaahuanajji eyajo tii ania poa, meshi yasijje poeyanaje. Jamajjeya oya ojjaña huoojea'yojji poani tii; ohuaya e'e jojo nei Eyacuiñajjija ejjashahuabaquijji ba mee cani. Huani ca ca jiquiojo anija mejo, dejjaja jea. Jamajjeya aje oe dejja, oja chii jayojjaya. Dejja jama mimiani. Jamajjeya Eyacuiñajjija esohui oe pojji ba mee cani, Huaniya. 32 Eyacuiñajjija huoojea'yo ojjaña jaahuanajji ca ca Eyacuiñajji nijje eyajo ania poa. Jamajjeya ohuaya jama huohui cani ba'a: “Eyacuiñajjija ejjashahuabaquijji ecuea eba nei nei. Maya eyaya miya huohuiaña”. Jamatii ojaya esohui shajja'ajja sa po ajja beca cuana. 33 Ojjaña joya e'e jojo nei oya shajja'ajja sa poani ca ca jama poani ba'a: “Eyacuiñajjija esohui e'e nei; ¡Cashajja'ajja'yahua!” 34 E'e, Eyacuiñajjija huoojea'yo ojjaña jaahuanajjiya, Jesosaa Eyacuiñajjija esohui huohui cani e'e jojo nei. Eyacuiñajjija Edojjoshahua Pameya oya huohui meesahua cani; quea ja'a nee ameesahua cani tii tii. 35 Eyacuiñajjiya oja Bacua Ejja quea jea nee nee acani tii. Jamajjeya oya jama poani Jesosa nijje: — Miya ecuea ecue Bacua Ejja quea jea nee nee. ¡Jamajjeya ojjaña huoojea'yojji pocue tii, meshijo, eyajo pea'ai! — poani Eyacuiñajji. 36 Jamajjeya ojjaña joya e'e jojo nei Jesosa nijje jjapeequiani, Eyacuiñajjija Bacua Ejja shajja'ajja cani pea'ai onijje ba'e tiitii mee caje'yo eyajo. Ojjaña joya o shajja'ajja sa po ajja ca ca onijje eba'e mee'yojji pojjeama. Eyacuiñajjiya oya cuana cajaa acaje'yo; quea nee nee poaje'yo tii cuaquijo.

Epona Samania meshijo ba'e jjapeequinaje Jesosa nijje

1 Jamajje Jesosa Jodea meshijo ani quea huiso dejja cuana o shajja'ajjaa poeyanaje, Eyacuiñajjijo besa meeya pea'ai. Jesosa nijje jjapeequinaje quea huiso nee nee. Majoya aje oe onaaya Jodio esohui huohuijji cuana, Paniseo cuana pea'ai huohui canaje jama ba'a: — Jesosaja epeejji cuana quea huiso nee nee; Huanija epeejji ca ca oe pojji — jamaya poanaje pea cuana. Ma shajja'ajja majje Paniseo cuana quea quene poanaje Jesosa nijje. Jjashahuabaquinaje jama ba'a: — Ecuana quea huiso epeejji sa poani Jesosaja epeejji huisoajja — poanaje. 2 (Jamatii Jesosa shajja'ajjajji cuaa Eyacuiñajjijo enajo besa mee canaje cuana, Jesosa que poeyajo. Jesosaja ca ca pea cuana Eyacuiñajjijo besa mee jjima.) 3 Jamajjeya Paniseo cuana onijje quea quene ba majje Jesosa Jodea meshijo ani poqui o'oyanaje Janinea meshi yasijje, ecuana nijje poquinaje. 4 Janinea meshi yasijje ejiojjijje poquije Samania meshijo aniñaquinaje. 5 Samania meshijo ani poqui majje Sica cuiñajji pejjejo Jesosa jomishoca aninaje ena eteohuejja quea doe pejjejo. Jomajo yahuajo nei nei Jodio etiiquianaa Jacobohua ma meshijo que quia ca poa oja bacua ejja Jose. 6 Ma quejo yahuajo nei nei Jacobohua teo mee ca poa ena eteohuejja quea doe nee nee. Jamajjeya Jesosa ma ena eteohuejja huasijje poeyanaje eshequi biacojjajja nequijo. Jesosa hueahuea majje anioquenaje ma ena eteohuejja pejjejo ejomishocajji. 7-8 Anioque majje Jesosaa ecuana acanaje jama ba'a: — ¡Poquicue miquianaya Sica huasijje bobi jjesheya! Ecuana poquiajo oe Samania epona poeyanaje ena eteohuejja huasijje ena jjequisohuaa jjonojo. Jesosaa oya huohui canaje jama ba'a: — Epona, ¡che mo ena quiacue e'ishijji! — poanaje. 9 Jodio cuanaja Samania cuana boti'ama nei. Samania cuana nijje mimi ajja, ojee ijjia'ijjia ajja pea'ai Jodio pojjeama jjejojo. Jamajjeya ohuaya Jesosa saja'a canaje: — Miya Jodio dejja; eya ca ca Samania pona. Jamajjeya ¿apiojji miya enijje mimiani enajo, ena quiajji? — poanaje Samania pona. 10 —E'e — Jesosa poanaje—, eya miquea ba jjima. Eyacuiñajjija ejjashahuabaqui'yojji quea pame nee miquea ba jjima pea'ai. Maya miquea eba jojjemo miya enijje jama mimime pome ba'a: “¡Che mo oe ena quiacue e'ishijji!” Miya jama enijje emimi jojjemo eyaya miya quiame ena naba taja'ama epo'yojji tii tii — Jesosa poanaje. 11 —E'e pojja'a — epona poanaje—, ena eteohuejja quea doe nee nee nequi. Miquea chama' ena ejjequisohuajji. Jamajje ¿achejo acuae ena nequi, ma ena ishi majje eya quea naba taja po maja ajja epojji? 12 Esejaya etiiquianaa Jacobohua jiquio ena teohuejja mee ca poa yahuajo nei. Ohuaya oja bacua cuana, oja ñajjajja cuana, pea huo cuana pea'aiya ishi mee majamaja ca poa jiquio ena. Majoya ojjañaa ecuaaya jiquio ena ishi majamajaña. ¿A'a cuae miquea pea ena eba? ¿Achejo nequi pea ena quea pame nee nee? Jacoboja ba jjima poa. Miya pojja'a quea jjashahuabaqui ja'a nee nee. ¿A'a Jacobo quea jjashahuabaqui ja'a pishana? — huohui'ajja canaje eponaa. 13 — Epona — Jesosaa huohui canaje—, ojjaña miquianaya jiquiacua poeyani ena ishiya. Jamatii ishi majje quea naba taja po o'oyani. 14 Eyaya pea ena quiaje ojjañaja e'ishijji. Ma ena ishi majje quea naba taja po o'oya ajja. E'e, jjanijo ena oshe quea pame nee cuayani, huosa'yo ajja. Jiquio jayojjaya eyaya quiaje'yo. Jamajjeya eyaya miya ba'e tiitii meeje'yo — Jesosa poanaje. 15 — ¡ Che iña maya pea ena quiacue e'ishijji! — Samania ponaa Jesosa acanaje—. Jamajjeya eya quea naba taja po ajja o'oya poaje. Jamajjeya eya jiquio ena eteohuejja huasijje epoe o'oyajji pojjeama ena jjehuaa — poanaje. 16 —E'e, ¡poquicue! ¡Miqueahue jjequicue! — Jesosa poanaje ma epona nijje. 17 —Chama' ecueahue — saja'ame acanaje eponaa. —E'e jojo nei jjeya miquea yahue chama' — Jesosa poanaje—. 18 Ecuea eba jama ba'a: Yahuajo miquea yahue cuana me oejje huisome poa, ojjaña jja miquea yahue ehuei poanaje. Jjeya miya pea dejjajo ba'e, miquea yahue pojjeamajo. Jamajjeya miya e'e jojo nei poani: “Chama ecueahue” — Jesosaa acanaje Samania pona. 19 —E'e jojo nei ojjaña miquea eba. Jamajjeya ecuea eba miya Eyacuiñajjija esohui huohuijji e'e jojo nei. 20 Ecuanaja etiiquianaa Eyacuiñajji bihuia ca poa jiquio Samania meshijo, eyiyo biajje. Miquianaya, Jodio cuana ca ca jama poani ba'a: “Jenosanenajo ca ca oeya Eyacuiñajji bihuiajji, pea eyiyojo pojjeama” miquianaya poani — poanaje Samania pona. 21 —¡Shajja'ajjacue mo, epona! — Jesosaa oya acanaje—. Quijje pishana miquianaaya Eyacuiñajji, esejaya Chii bihuiaje, ojjañaa. Jiquio eyiyo huasijje poe jjimaa, Jenosanena huasijje poqui jjimaa pea'ai oya bihuiaje. 22 Jjeya ojaya esohui jayojja jama pojjeama aje oe miquianaaya, Samania cuaa Eyacuiñajji bihuiaña. Oya miquianajaya ba jjima. Ecuanaa ca ca Eyacuiñajji bihuiaña ojaya esohui jayojja. Eya oja huoojea'yo ojjaña mimishi cuijea'yojji Jodio dejja. Jamajjeya Eyacuiñajji ecuanaja eba, Jodio cuanaja. 23 Jamajjeya jjeya nei ojjañaa esejaya Chii, Eyacuiñajji bihuiaje e'e jojo nei, ojo quea ja'a nee jjashahuabaquije. E'e, Eyacuiñajji jama poani ba'a: “Jamaya eya cabihuia cahua ojjañaa. Jamaya ecuea quea boti nee” poani. 24 Eyacuiñajji yani tii tii eshe. Jamatii oya jjaba meequi ajja ecojjaa. Jamajjeya o bihuiajji epohua Eyacuiñajji cabihuia cahua e'e jojo nei, ojaya esohui jayojja jama quea ja'a nee ojo jjashahuabaquiani — Jesosaa acanaje. 25 —E'e — poanaje epona—, ecuea eba quijje Eyacuiñajjija huoojea'yo ojjaña jaahuanajji poeje. Oya Quito bajjani poaje. Poe majje ohuaya ecuana quea ja'a nee ba mee caje Eyacuiñajjija esohui. 26 —Eya ca ca iña jiquio Eyacuiñajjija huoojea'yoya Quito bajjani. Jjeya nei miya Quito nijje mimiani — Jesosaa acanaje. 27 Majoya Jesosa shajja'ajjajji cuana bobi jjeshe majje poe o'oyanaje Jesosa que. Jesosa ba caña'yonaje Samania pona nijje mimiani. Ba majje jjashahuabaquinaje jama ba'a: — ¿Apiojji shai Jesosa epona nijje mimiani? — jamatii huohui'ajja jjima: — Epona, ¿ajeo miya poeyanaje? — ajjima: — ¿Jesosa, ajeo miya Samania epona nijje mimiani? — jamaya ecuana mimi jjima Jesosa nijje poanaje. 28 Majoya ena jjequijji ohua acani jea canananaje eponaa, poquicuajinaje Sica huasijje huohui pohua. 29 Ojjaña cuana huohui cañaquinaje jama ba'a: —¡Poecuajicue oe! Oe dejja ena eteohuejja pejjejo ani; ohuaya ojjaña ecuea eba'ejji huohui ca'yonaje. ¿A'a oya pojja'a Eyacuiñajjija huoojea'yo ojjaña jaahuanajji? ¡Poe'ajja! ¡Ejjaba'ajjaquiqui! — poanaje epona. 30 Eponaa huohui cajje ojjaña Sicajo ba'e poqui canaje Jesosa baa. 31 Ojjaña cuana poe jjimahuajo, ecuana, o shajja'ajjajjiya Jesosa nijje jama poanaje ba'a: — Esohui huohuijji, ¡bobi oe ijjia socue! 32 Jamatii Jesosaa jama acanaje ba'a: — Ecuea pea bobi yani ecuea e'ijjiajji, ma miquea ba jjima. 33 Jamajjeya ecuana ojee miminaje: — ¿A'a pojjeama oya pea cuaa bobia canaje? — poanaje. 34 Jesosa ecuanaja esohui shajja'ajja majje jama poanaje ba'a: — Bobi ijjia majje miquianaya quea bei poani. Ecue Chiiya eya huoojea canaje ojjaña jaahuanajji; ojjaña ojaya esohui ajeyo'yo majje eya quea bei poaje, bobi ijjia majje jayojjaya — Jesosa poanaje—. 35 Miquianaya jama poani ba'a: “Quijje anoso sejjaje'yo, ebeca pee pea'ai ba'ime po majje. Eyaya ca ca miquianaya huohuiaña jama ba'a: ¡Bacue! Jomajo quea huiso dejja cuana poeani. Anoso ejahua jayojjaya jama oya cuana poeani. E'e, oya cuana Eyacuiñajjijo jjashahuabaquiani. Onijje jjapeequi'yo sa poani. ¡Jamajjeya enijje jjapeequi meesahuacue! 36 E'e, echacojji anoso quecuajji, anoso sejjajji pea'ai eque meseya sosequia cajji. Jamajje ojjaña quea bihui nee poaje'yo — Jesosa poanaje—. Oya jayojjaya Eyacuiñajjiya acaje ojaya echacojji cuana. Joya esohui huohuicoojji cuana sosequia caje; joya pea cuana enijje jjapeequi meesahuajji poani pea'ai sosequia caje. Enijje jjapeequiajo ba'e tiitii meeje'yo enijje eyajo. Jamajjeya ojjaña cuana quea bihui nee nee poaje'yo. 37 E'e, yahuajo jama poanaje cuana ba'a: “Oe echacojjiya eso' quecua majje quijje pea echacojjiya chicha caje'yo”. Jjeya jamaya e'e jojo nei poani. 38 Jjeya eyaya miya huoojeaña anoso chichajji jama, ojjaña cuana enijje jjapeequi meesahuaa. Yahuajo Eyacuiñajjija esohui huohuijjiya oya cuana esohui ba mee canaje. Jamatii ojjaña cuana jjabahuejjaqui jjima. Jjeya miquianaaya esohui huohui o'oyajo, oya cuana ecuea epeejji e'e jojo nei poaje'yo — Jesosa poanaje ecuana nijje, o shajja'ajjajji cuana nijje. 39 Majoya quea huiso nee nee Samania cuana poeyanaje Jesosa que. Oya cuana Samania eponaja esohuijo jjashahuabaquiani. Ohuaya jama acanaje ba'a: — Jiquio dejjaa ojjaña ecuea eba'ejji huohui ca'yonaje. E'e jojo nei jiquio dejja Eyacuiñajjija huoojea'yo ojjaña jaahuanajji, Quito bajjani — epona poanaje. 40 Jamajjeya Jesosa que poe majje Samania dejja cuana jama poanaje ba'a: — Esohui huohuijji, ¡ecuana nijje che anicue! —E'e, anije ecuana — Jesosa poanaje. Jamajje aninaje. Beca cahuime sohuihuohui canaje. 41 Jamajjeya Jesosaja esohui shajja'ajja majje ojjaña cuaa jama acanaje ba'a: — ¡E'e jojo nei oya Quito! — poanaje. 42 Epona nijje jama poanaje: — Yahuajo miquea esohuijo ecuana beshahua nei jjashahuabaquinaje oya e'e jojo nei Quito. Jjeya ca ca oja sohui shajja'ajja majje ecuanaja eba nei nei Jesosa e'e jojo nei Eyacuiñajjija huoojea'yo ojjaña jaahuanajji; mimishi cuijea ca'yajje aje se ba'e tiitii mee caje'yo eyajo — poanaje Samania dejja cuana.

Jesosaa jjaajaqui mee ca'yonaje onaja bacua ejja beshahua nei poqui jeyoani

43 Jamajjeya Samania meshijo beca cahuime ani majje Jesosa poqui o'oyanaje Janinea meshi yasijje, Cana huasijje. 44 Yahuajo Jesosaa ecuana, o shajja'ajjajji cuana jama acanaje ba'a: — E'e jojo nei pea cuaa Eyacuiñajjija esohui huohuijji shajja'ajja cani. Jamatii ojaya cuiñajjijo ojaya huapa pojjeama cuana ca ca oe jjashajja'ajjaqui sa po'yo ajja. Jamajjeya Jesosa jjeya Nasanena huasijje, ma o esho'yahua ba'ya poa huasijje dobiqui jjima. 45 Jamatii Janinea meshijo ejiojjijje poquianijo, Janinea dejja cuana oya ba majje jama poanaje ba'a: — Esohui huohuijji, mi poe'yajo ecuana quea bihui nee nee. Yahuajo ecuanaa miya banaje Jenosanena huasijje poqui. E'e, esohuidojojji cuaa yahuajo Jodioja ebacua cuana cuia'yo jjima shejo, Jenosanena huasijje ojee ijjia'ijjiaa poqui ecuaaya miya banaje. Miyaya quea huiso cuana jjaajaqui mee'yonaje, ma dejjaa ajjima acani anaje quea huiso pea'ai. E'e, miya Eyacuiñajjija esohui huohuijji nei nei — poanaje cuana. 46 Jamajjeya Jesosa poqui o'oyanaje Cana huasijje, ma ohua yahuajo ejjahuanaquijjijo ena acuijjajja na pojji aca'ya poa huasijje. Canajo Jesosa aninaje ecuana nijje, o shajja'ajjajji cuana nijje. Jamajjeya oe emeshi mese neija dejja huoojeasahuajjiya Jesosajo shajja'ajja canaje: — Jesosa Jodea meshijo yahuajo ani Janinea meshi yasijje poe'yonaje. Canajo jjeya nequi. 47 Oja bacua ejja quea mano nee nee jaa quea huesha pishana, Capenaomajo jaa. Jamajjeya maya shajja'ajja majje Jesosa que poquicuajicuajinaje. Jama acanaje ba'a: — Jesosa, ¡poecuajicue Capenaoma huasijje! ¡Ecue bacua ejja jjaajaqui mee'yocue! Quea mano nee nee jaa, beshahua nei poquijeyo jaa — poanaje. 48 Jesosa ojjaña cuana nijje jama poanaje ba'a: — Miquiana cuana Janinea meshijo ba'e beshahua nei jjashajja'ajjaqui ajja. Eyaya ma dejjaa ajjima acani mi amajamajajo, miquianaya jjashahuabaqui ajja jama ba'a: “E'e jojo nei Jesosa Eyacuiñajjija huoojea'yo ojjaña jaahuanajji” — Jesosa poanaje. 49 —Esohui huohuijji Jesosa, jamatii — ejeajji poanaje—. ¡Poecuajicue oe, ecue bacua ejja epoquijeyo cuahuajo! 50 —Epeejji, ¡quea bihui poquicue miquea equi yasijje! Eyaya mique bacua ejja jjaajaqui mee'yonaje; apoa poanaje — Jesosaa emanojaaja ejeajji acanaje. Jesosaja esohui shajja'ajja majje ebacuaja ejeajji quea bihui nee poquinaje jjashahuabaquiani jama ba'a: — E'e jojo nei Jesosa quea sohui poja nee nee; ecue bacua ejja jjaajaqui mee ca'yonaje. 51 Ojaya equi yasijje poquianijo, oja chacojji cuana poeyanaje. O ba majje taaanaje: — ¡Miquea ebacua ejja boeca'yonaje! Quea pame nee jjeya ani'yo. Huaquia'yonaje — poanaje. 52 —E'e —ejeajji poanaje—, jamaya quea pame nee. ¿Ache nei eshequi nequijo acuae apoa poanaje so'o? —Yahuajo apoa poanaje, omamecajje tii, eshequi ejjajeapaaquijo oya boeca'yonaje — poanaje echacojji cuana. 53 —E'e nei — ejeajji jjashahuabaquinaje—, omamecajje tii eshequi ejjajeapaaquijo Jesosaa eya huohui canaje jama ba'a: “Miquea ebacua ejja jjaajaqui'yonaje; apoa poanaje” — ejeajji poanaje. Jamajje equi yasijje dobiqui majje ojaya huapa pojjeama cuana nijje jama poanaje ba'a: — E'e, Jesosaa ecue bacua ejja jjaajaqui mee ca'yonaje, boeca mee ca'yonaje. ¡Oya ca ca oe Eyacuiñajjija huoojea'yo ojjaña jaahuanajji! — poanaje ebacuaja ejeajji. Jamajjeya ojjaña jama poanaje ba'a: — E'e jojo nei oya Jesosa. 54 Jamaya Janinea meshi yasijje poe o'oya majje Jesosaa Cana cuiñajjijo pea dejjaja ba jjima aca o'oyanaje.

Jesosaa dejja jeo'ajja Metena ena sahuajo jaa jeo mee ca'yonaje

1 Majoya quijje ojjaña Jodio dejja cuana poqui o'oyanaje Jenosanena huasijje ojee ijjia'ijjiaa Eyacuiñajji bihuiaa. Jamajjeya ecuanaya Jesosa nijje, o shajja'ajjajji cuana nijje pea'ai Jenosanena huasijje poqui o'oyanaje. 2 Jenosanena cuiñajji mei jiyojo Ñajjajja Dobiquijji esecue yani. Ma esecue pejjejo yani ena, bae sisi jama, ebesajji, Emeo esohuijo Metena ena bajjani. Ena sahuajo yani me oejje equi sisi. 3 Jomajo quea huiso emano cuana jaanaje: cojjama' cuana, jeo'ajja cuana, jiojjijjajja cuana pea'ai. Ohuaya esohuidojojji ishoa'ajja cani; jama jjashahuabaquime poani ba'a: — E'e, Eyacuiñajjija esohuidojojjiya ena cajeaquejjo cahua. Jamajjeya eya ena huasijje nequidobiquiajo, jjaajaqui mee caje'yo. 4 E'e, Jodio cuaa jama acanaje ba'a: — Esohuidojojjiya quijje nei poe huicha'anijo ena jeaquejjo mee cani. Ena jeaquejjo cajo, ojjaña emano cuana ena huasijje canequidobi cuajiquiahua. Joya ebionei besaje'yo ca ca jjaajaqui mee caje'yo, huaquia mee caje'yo pea'ai Eyacuiñajjiya — poanaje Jodio cuana. 5 Jamajjeya oe dejja jomajo jeo'ajja jaanaje. Quea shequiaja huiso nee nee jaa poa, 38 shequiajame. 6 Jesosaa poe majje ba canaje dejja emanojaa jeo'ajja. Jesosaja eba ma dejja quea shequiaja huiso nee nee jaa poa. Jamajje oya huohui'ajja canaje: — ¿A'a miya jjaajaqui'yo sa poani? ¿A'a miya jeo sa poani? — Jesosa poanaje. 7 —E'e — emanojaaa saja'a canaje—, jamatii chama' pea dejja edojojji ena jeaquejjo poani yasijje e besa mee'yojji. Jamajjeya eya ebionei ebesa'yojji pojjeama. Eya jjapashineijje poquianijo, pea ebionei besacuajiquije — poanaje emanojaa, jeo'ajja. 8 Jesosaa oya jama acanaje ba'a: — Epeejji, ¡nequisohua'yocue oe! ¡Jeocue! ¡Miquea equi yasijje equipajaajji bebo majje dojo'yocue! 9 Jjeya nei jeo'ajja jeocuaji'yonaje. Jamajje nequisohua'yonaje; oja equi yasijje equipajaajji bebo majje dojo ca'yonaje; jeopoqui'yonaje. Jesosaa oya jeo mee ca'yonaje Jodioja epojja ejomishocajjijo. 10 Jamajjeya ma dejjaa equipajaajji dojo cani ba majje Jodio cuana quea tecue onijje poanaje: — ¡De! ¿Apiojji acuae miyaya equipajaajji dojoaña so'o? ¡Jjeya epojja ejomishocajji, de! ¡Aquiana jjeya dojoca ajja! Jamaya eseja esohui huohuijji cuaa huohui cani — poanaje. 11 Ma dejja ejeo'yohua saja'a canaje jama ba'a: — Jamatii. Oe dejjaa eya jeo mee'yo majje jama acanaje ba'a: “¡Poquicue miya; miquea equipajaajji bebo majje dojocue!” poanaje. 12 —E'e pojja'a — Jodio cuana poanaje—. “¡Miquea equipajaajji dojocue!” poanaje. ¿Ae bajjaniya acuae maya miya huohui canaje so'o? —huohui'ajja canaje. 13 —Cua'a, de — saja'ame acanaje—. Ache dejjaa shai eya jeo mee ca'yonaje. E jeo mee'yo majje oya pea dejja quea huiso nijje poquinaje — poanaje. (E'e, dejja quea huiso nee nee jomajo ani.) 14 Quijje pishana Jesosaa ma dejja oja jeo mee'yo ba ca'yonaje Eyacuiñajjija equijo. Jama huohuime acanaje ba'a: — E'e epeejji, jjeya miya quea pame nee nequi'yo, quea aja nee nequi. Jamajjeya ¡a'a quea mimishi po o'oyajji! Quea mimishi po o'oya majje mi quea mano nee nee po o'oya chana', quea tai nee nee; yahuajo jeo ajja, quea nee pishana poanaje — Jesosaa acanaje. 15 Jesosa shajja'ajja majje poqui'yonaje Jodio cuana huasijje. Huohuiqui canaje jama ba'a: — E'e, Jesosa bajjaniya eya jeo mee ca'yonaje — poanaje. 16 Jamajjeya jeo'ajja poanajeya huohui cajje Jodio cuaa Jesosa niñeba canaje; quecua'yo sa acanaje pea'ai, Jesosaa jeo'ajja cuana jeo mee ca'yonaje epojja ejomishocajjijo. 17 —Ecue Chiiya quea pame nee acani tii tii epojja ejomishocajjijo pea'ai — Jesosaa oya cuana saja'a canaje—. Jamajjeya eyaya pea'ai ecue Chiiya jayojjaya jama quea pame aña ojjaña pojjajo. 18 Jamajoya Jodio etii cuaa Jesosa quecua sa neinei acanaje. Jama huohui canaje ba'a: — Esejaya etiiquiaa yahuajo esohui tehue ca poa jama ba'a: “¡Epojja ejomishocajjijo a'a chacojji!” aca poa. Jodio cuaa Jesosa niñeba canaje jama pea'ai ba'a: — Oya, Jesosa etiiquianaja etehue'yo jama po ajja — poanaje. Yahuajo Jesosa Jodio nijje jama poanaje pea'ai ba'a: — Eyacuiñajji ecue Chii, de. —Chojja, de, Jesosa siajje poani — niñebame acanaje Jodio cuaa Jesosa. Jodio cuaa jama acanaje pea'ai ba'a: — Jesosa siajje poani jama ba'a: “Eya Eyacuiñajji jayojjaya poani” siajje, de — jamaya Jodio cuaa acanaje.

¡Eyacuiñajjija Bacua Ejja Jesosa quea ca'a nee eba'e tiitii mee'yojji!

19 Jamajjeya Jesosaa ma Jodio etii cuana huohui canaje jama ba'a: —Eyaya miquianaya e'e jojo nei huohuiaña jama ba'a: Eyacuiñajjiya eya, oja Bacua Ejja oe nei huoojea canaje; eyaya ojaya esohui jayojja jama aña. Eyaya huohuiaña ecue Chiija ejjashahuabaquijji, ecuea ejjashahuabaquijji pojjeama. Ojjaña ecue Chiiya acani ecuea eba. Jamaya ca ca eyaya aña pea'ai. E'e, ojjaña ecue Chiiya acani eyaya aña pea'ai, eya oja Bacua Ejjaa jjejojoya. 20 Eya ecue Chiija quea jea nee nee. Jamajjeya eya ba mee cani ojjaña joya ohua amee sa acani huiso tii. Eyaya ma dejjaa ajjima acani aña ba majje miquianaya jama poaje ba'a: “E'e nei, yahuajo jamaya ajjima cuanaja poa. Chama' pea Jesosa jayojja” poaje miquianaya. 21 Jamaya ecue Chiiya eya amee caje'yo ba'a: Ecue Chiiya emano'yojaa shequi mee ca o'oyani jayojja jama eyaya ba'e meeje o'oya, ojjaña ecue babaca'yo cuana pea'ai — Jesosa poanaje—. 22 Ecue Chiija ehuohuijji pojjeama joya ojaya epeejji pojjeama, joya quea nee nee poaje'yo tii cuaquijo. Joya ojaya epeejji poani ba'e tiitii mee caje'yo onijje ehuohuijji pojjeama pea'ai. Chojja, ohuaya jama huohuime acanaje ba'a: “Ecue Bacua Ejjaa cahuohui cahua ecuea ejjashahuabaqui'yojji”. 23 Jamajjeya ojjaña joya ecue Chii shajja'ajjajji poaniya eya oja Bacua Ejja shajja'ajja caje'yo pea'ai. Ojjaña joya eya Eyacuiñajjija Bacua Ejja shajja'ajja sa po'yo ajja Eyacuiñajji, e huoojea'yojji shajja'ajja sa po'yo ajja pea'ai — Jesosa poanaje. 24 —E'e jojo nei nei ecuea ehuohui minijje jama ba'a — Jesosa poanaje—: Ojjañaa joya ecue sohui shajja'ajja cani, e huoojea'yojjija sohui e'e jojo nei shajja'ajjajji poani pea'ai ba'e tiitii meeje'yo enijje eyajo; cuaqui yasijje epoqui'yojji pojjeama. Chojja, oya cuana yahuajo eshahuaja epeejji poanajejo cuaqui yasijje poqui'yo quiaye. Jjeya ca ca ba'e tiitii meeje'yo enijje, ecuea epeejji jojoya. 25 ¡Shajja'ajjacue mo! — Jesosa poanaje—. E'e jojo nei ojjaña shajjama' poani Eyacuiñajjiya ba cani emano'yo jayojja, epoquijeyo'yo jayojja. Jamatii ehuohui'yo ejo, Eyacuiñajjija Ebacua Ejjajo shajja'ajja caje'yo. Ecuea esohui jayojja jama e'e jojo nei atiitii cajo, eyaya ba'e tiitii meeje'yo enijje eyajo. 26 E'e, Eyacuiñajji ecue Chii yani tii tii, eshe. Jamajjeya ohuaya eya, oja Bacua Ejja huoojea canaje ojjaña joya onijje jjapeequiani ba'e tiitii mee'yohua. 27 Cuanaya eya ojjañaja Edoe Mese poanijo Eyacuiñajjiya eya huoojea canaje jama ba'a: “¡Miyaya huohuicue joya minijje jjapeequiani ba'e tiitii meeje'yo minijje! ¡Huohuicue pea'ai joya miquea epeejji pojjeamajo quea nee tii tii poaje'yo cuaquijo!” jamaya Eyacuiñajjiya eya acanaje — Jesosa poanaje—. 28 E'e, e'e jojo nei quijje ojjaña yahuajo emano'yo cuana iyaa majje eyaya oya cuana shequi meeje o'oya — Jesosa poanaje—. Ecuea esohuijo ¡a'a jjashahuabaquijji jama ba'a: “¿Yajja yajji? ¿Achajja shai ohuaya emano'yo cuana shequi mee caje o'oya?” a'a jamaya pojji! 29 E'e jojo nei oya cuana eshe o'oya po mee majje ojjaña ecuea epeejji eyaya ba'e tiitii meeje'yo enijje. Ojjaña shajjama' cuana ca ca shequi o'oya majje quea nee nee poaje'yo tii tii cuaquijo. 30 E'e, Eyacuiñajjiya eya huoojea canaje ojjaña huasijje huohuiya jama ba'a: “Joya ecuea epeejji cuana poani eyaya ba'e tiitii meeje'yo enijje. Beca cuana ca ca ecuea epeejji pojjeamajo quea nee nee poaje'yo tii tii”. Eyacuiñajjiya e huoojea majje jama acanaje ba'a: “¡Ojjaña ecuea ejjashahuabaquijji ojjaña cuana huohuiquicue!” acanaje. Eyaya ojaya esohui jayojja jama aña, ecuea ejjashahuabaqui'yojjijo pojjeama. Jamajoya eyaya Eyacuiñajjija ejjashahuabaqui'yojji jayojja jama añajo ecuea esohui ojjaña e'e jojo nei — Jesosa poanaje.

Jesosa Eyacuiñajjija huoojea'yo ojjaña jaahuanajji, oja Bacua Ejja

31 Majoya Jesosaa Jodio cuana huohui canaje jama ba'a: — Miquianaya ejo jjashahuaba quehuaquiani jama ba'a: “Jiquio dejjaa jama huohui cani ba'a: — Eya ca iña iquio Eyacuiñajjija huoojea'yo ojjaña jaahuanajji — acani, de. Jamatii ohuaye neiya jama huohui canijo oya ecuanaja eshajja'ajjajji pojjeama” jjashahuaba quehuaquiani miquianaya — Jesosa poanaje—. Jamatii ecuea esohui e'e jojo nei. 32 Eya ee nei pojjeama; eya ecue Chii nijje. Ohuaya ojjaña ba mee cani eya oja huoojea'yo. Ecuea eba ojaya esohui ejo e'e jojo nei. 33 Yahuajo miquianaaya pea cuana huoojeanaje Huani que e huohui'ajjaa. Huaniya miquianaya e'e nei huohui canaje jama ba'a: “Jesosa e'e jojo nei Eyacuiñajjija huoojea'yo ojjaña jaahuanajji, oja Bacua Ejja oe nei” acanaje Huaniya, ma ona besameejji poaniya — Jesosa poanaje. 34 —Eyacuiñajjiya Huani huoojea canaje ejo huohuiya. Eyaya miquianaya huohui o'oyaña ma Huaniya ejo huohui canaje. Jamatii miquianajaya ejjashahuabaqui'yojji ejo quea ja'a pojjeamajojo eyaya miquianaya huohui o'oyaña. Miquianaaya Huanija esohui ejo eshajja'ajja jojjemo eyaya miquianajaya mimishi cuijea'yome — Jesosa poanaje. 35 —Cuaquijiji mecajje jijianiya quea ja'a ojjaña ba mee cani jayojja jama Huani poa. Ohuaya miquianaya quea ja'a nee ba mee canaje Eyacuiñajjija esohui ejo, ma yahuajo miquea ba jjima poa. Ebionei miquianajaya oja sohui ejo quea boti nee poanaje; jamatii quijje shajja'ajja sa po'yo ajja poanaje. 36 E'e — Jesosa poanaje—, Huaniya ejo huohui canaje. Jamatii oya dejja. Pea yani, ecue Chii. Ecue Chiiya miquianaya ba mee cani eya oja huoojea'yo. E'e, ecue Chiiya eya ameesahua cani ma dejjaa ajjima acani. Ma ajeyo'yo majje miquianaya ba meeje e'e jojo nei eya Eyacuiñajjija huoojea'yo ojjaña jaahuanajji. 37 Ecue Chiiya miquianaya ba mee cani jama ba'a: Ohuaya e'e jojo nei eya huoojea canaje. Jamatii miquianajaya oya ba jjima ecojjaja. Miquianajaya aje oe oja mimi shajja'ajja jjima pea'ai. 38 Ojaya esohui miquianajaya shajja'ajja jjima. Eya oja huoojea'yo. Jamajjeya miquianaya ecue sohui shajja'ajja sa po'yo ajja pea'ai — Jesosa poanaje—. 39 Eyacuiñajjija esohui yahuajo etehue'yo miquianaaya ba huicha'a huicha'aña, ba majamaja majje miquianaya eba'e tiitiije poso jjabaquiani. Ma esohui etehue'yo yahuajo ejo tehue ca poa. 40 Eyaya ca ca oe eyaye nei miya ba'e tiitii meeje'yo; jamatii miquianaya enijje jjapeequi sa po ajja — Jesosaa Jodio cuana acanaje. 41 —Eya dejja mimishi jama jjashahuabaqui ajja jama ba'a: “Ojjaña dejja cuaa jamatii eya shajja'ajja caje'yo” po ajja eya — Jesosa poanaje—. 42 Chojja, ecuea eba miquianajaya Eyacuiñajji quea jea nee pojjeama. 43 Eyacuiñajjiya, ecue Chiiya eya huoojea canaje. Jamatii miquianaya e shajja'ajja sa po ajja. Pea dejjaa Eyacuiñajjija huoojea'yo nishohua huohui cani jama ba'a: “Eya quea pame nee”. Ojaya esohui ca ca miquianaaya shajja'ajjaje; siajjepojji nijje miquianaya jjapeequije. 44 Eyacuiñajji oe nei enequi tii tii. Jamatii miquianaaya ojaya esohui jayojja jama a sa po'yo ajja, jama jjashahuabaquime po ajja ba'a: “Eyacuiñajjiya ejo jama cahuohui cahua ba'a: — E'e, miya ecuea epeejji quea pame nee — cahuohui cahua”. Chojja. Jamaya miquianaya jjashahuabaqui ajja — Jesosa poanaje—. Miquianaya jjashahuaba tiitiiquiani jama ba'a: “Pea dejja cuana ejo jama camimiquiahua ba'a: — E'e, miya ca ca oe quea pame nee nee — capoahua onaya”. Jamajjeya miquianaya enijje jama po ajja ba'a: “Jesosa, miya Quito, Eyacuiñajjija huoojea ojjaña jaahuanajji” enijje po ajja. Jamaya huohui sa po ajja miquianaya — Jesosa poanaje. 45 —¡A'a eya ecue Chii ehuohuije poso pojji jama ba'a: “Oya cuana e shajja'ajja sa po'yo ajja; quea mimishi nee nee” a'a eya ehuohuije poso pojji nequiana! — Jesosa poanaje—. Chojja, ecuea miquianaya ehuohuijji pojjeama. Miquianaya Moisesija etehue'yojo jjashahuabaquiani; jamatii ojaya esohui etehue'yo ajjimajo, Eyacuiñajjiya miquianaya jama acaje ba'a: “¿Apiojji acuae quiana Moisesija etehue'yojo shajjama' poani? Miquianaya quea mimishi nee nee” quijje Eyacuiñajjiya nequiana acaje'yo — Jesosa poanaje. 46 —E'e, Moisesiya ejo tehue ca poa. Jamajjeya miquianaaya oja tehue e'e jojo nei eshajja'ajja jojjemo enijje jjapeequi'yome. 47 Jamatii miquianaaya Moisesija esohui eshajja'ajja jojjemo, ojaya ehuohui etehue'yo eba pea'ai jojjemo ecuea esohui shajja'ajja'yome pea'ai — Jesosa poanaje.

Jesosaa bobia canaje quea huiso nee nee dejja, 5.000 dejja

1 Majoya Jodio dejja cuana nijje mimi majje, quijje Jesosa o shajja'ajjajji nijje, ecuana nijje Jenosanenajo ani poquinaje Janinea bae yasijje, pea bajjani Timenia bae yasijje. Bishe aijo ojje miji yasijje besapoqui o'oyanaje. 2-3 Ba'eñaqui majje eyiyo huasijje jaasohuaquinaje. Anioquenaje. Yahuajo Jesosaa quea huiso acanaje ma dejjaa ajjima acani; quea huiso emano cuana jjaajaqui mee ca'yonaje, jjajeaqui mee ca'yonaje pea'ai. Jamajjeya o ba majje quea huiso nee nee poqui canaje jocuama, Jesosa baa. 4 Jamaya poanaje Jodio cuana Jenosanena huasijje poqui o'oyani ojee ijjia'ijjia'yohua esohui dojojjiya Jodioja ebacua yahuajo cuia'yo jjima shejo. Ma epajea'yojji pojjeama jjachichaquinaje. 5-6 Jamajjeya Jesosaa bajea canaje quea huiso nee nee poeje. Ba majje ohuaya Penipe huohui'ajja canaje: — Penipe, ¿achacua acuae seya che bobi jjesheje so'o dejja cuana quea huiso bobiajji? — Jesosaa acanaje, Penipeya yajja huohui'ajjame acaje ejjabaquijji. Jamatii Jesosaja eba poa Eyacuiñajjiya, oja Chiiya bobi pana caje'yo dejja cuana bobiajji. 7 Penipeya saja'a canaje jama ba'a: — ¿Yajja yajji? ¿Ajeo ebobiajji? Oya cuana quea huiso nee nee aña, de. 200 esodojjo quea nahue ecuanaja yani jojjemo maya oe pojji bobi jjesheme ojjaña cuanaja ijjiajji — poanaje Penipe. 8 Majoya aje oe o shajja'ajjajji Anesi, Simohui Penoja chahua jama poanaje ba'a: 9 —Oe esho'iya ye canaje me oejje pahui, beca nahuoo sisi pea'ai. Jamatii maya oe pojji nei nei, de; dejja cuana quea huiso nee nee ani jejje jjima poaje — poanaje Anesi. 10 Majoya Jesosaa jama acanaje ba'a: — ¡Ojjaña cuana jama acue ba'a: “¡Ojjaña anioquecue sipone biajje!” acue! — Jesosaa acanaje. Jamajje quea huiso sipone yanijo, ojjaña cuana anioque mee canaje sipone biajje. Quea huiso nee nee poanaje, 5.000 dejja; epona, esho'i cuana pea'ai sico jjima. 11 Majoya Jesosaa pahui me oejje huiso jjeshe majje Eyacuiñajji bihuia canaje. Eyacuiñajji nijje bobijo mimi majje pahui tepe canaje; ecuana, o shajja'ajjajji cuana quia mee canaje dejja cuana e'anioquiani yasijje. Jamaya acanaje nahuoo sisi pea'ai. Quia ca poquije quea huiso nee nee jjapanaqui poquipoquinaje bobi, de. Jamajjeya ojjaña cuaa ijjia neinei canaje. 12 Ojjaña jejjeajo, Jesosaa ecuana huohui canaje: —¡Chichacue bobi ojjañaja ijjiasejja! ¡A'a jeana'yojji! 13 Jamajjeya ecuanaa chicha'yonaje pahui ojjañaja ijjiasejja. Jjepai ai yasijje iya'yonaje. Quea huiso poanaje, 12 jjepaime. Jamatii yahuajo me oejje, 5 pahui poanaje. E'e, Eyacuiñajjiya jjapanaqui mee capoquipoquinaje quea huiso bobi, de. 14 E'e, Jesosaa ma dejjaja ba jjima acanaje; 5.000 dejja cuana bobia canaje. Ma ba majje dejja quea huiso cuana ojee miminaje jama ba'a: — E'e jojo nei Jesosa Eyacuiñajjija huoojea'yo ojjaña jaahuanajji. Yahuajo Eyacuiñajjiya ojo huohui mee ca poa jama ba'a: “Quijje eyaya miquiana huasijje huoojeaje Quito, ojjaña jaahuanajji”. ¡Cua'a, oya esejaya emeshi mese epojji ejjanequi meequi! — dejja cuana poanaje. 15 Onajaya ejjashahuabaquijji ba majje Jesosaa ojjaña dejja cuana huoojea canaje equi cuana huasijje. Majoya oya quehua poquinaje. Eyiyo huasijje oe nei jaasohuaqui o'oyanaje oja Chii nijje mimiya.

Jesosa bae ena biajje poquinaje

16 E'e, sinecua, eyiyo huasijje poqui jjimahuajo Jesosaa ecuana, o shajja'ajjajji cuana huoojea canaje: — ¡Bae ojje miji yasijje bishe aijo besapoquicue! Quijje eya poquije miquiana que — Jesosa poanaje. 17 Jamajjeya bishe ai yasijje ani majje ecuaa yonaje. Besapoqui'ajjanaje ojje miji yasijje epoquijji, Capenaoma huasijje. Mecajje quea apo nee poanaje. Jamatii Jesosa ecuana huasijje poe jjima poanaje. 18 Beni quea quemo nee nee poeyanaje. Enashajo quea quemo anicuayanaje. 19 Quea huesha nee yo'ajjanaje enabae yiyesama neijo. Jomajo ecuaaya banaje Jesosa. Eyiyojje ena biajje jeojeojebeje banaje. Jesosa ba majje ecuana quea ajjajja nee nee poanaje, oya eshahua poso anaje. 20 Jamajjeya Jesosa ecuana nijje jama poanaje ba'a: — ¡A'a quea mete pojji! Eya ca ca iña iquio, eshahua pojjeama — poanaje. 21 Jesosa shajja'ajja majje quea jaji nee po'yonaje ecuana. Bishe ai yasijje ani mee'yonaje. Jesosa ani'yajo, bishe ai bae ojje miji yasijje ba'eñaquinaje, Capenaoma huasijje. Jomajo cahuinaje ecuana.

Ojjaña cuaa Jesosa sa'ajja canaje

22 Mecahuajje ojjaña cuana, ma Jesosaa bobia canaje cuana jjachichaqui o'oyanaje bae sahua huasijje. Jama ojee miminaje ba'a: — ¿Achejo shai Jesosa? Oe bishe ejaanaje, de. Jamatii Jesosa o shajja'ajjajji cuana nijje besapoqui jjima, de, yaninaje eyiyojo tii — dejja cuaa acanaje. Ojjañaja ba jjima poanaje Jesosa ena biajje jeojeopoquije. 23 Majoya pea bishe cuana Timenia cuiñajjijo ani poeyanaje. Ba'eñaquinaje bae sahuajo, jomajo yahuajo Jesosaa Eyacuiñajji bihuia majje quea huiso cuana bobia canaje. 24 Jamajjeya ojjaña cuana Jesosa, o shajja'ajjajji cuana pea'ai chama' ba majje bishe cuana huasijje anisohuaquinaje. Capenaoma huasijje besapoquinaje Jesosa sa'ajja'yohua.

Jesosaa esohui huohui canaje pea cahuijo, eba'e tiitii mee'yojji

25 Ojje miji yasijje ba'eñaqui majje oya cuaa Jesosa ba canaje. Ba majje huohui'ajja canaje: — Esohui huohuijji, ¿ache shono acuae mi jiquiacua poeyanaje so'o ba'a? — poanaje. 26 Jesosaa oya cuana saja'a canaje quea yeno jama ba'a: — Miquianaya ejo jjashahuabaqui ajja jama ba'a: “E'e, Jesosa ma dejjaja ba jjima acanaje; jamajjeya oya e'e jojo nei Eyacuiñajjija huoojea'yo ojjaña jaahuanajji”. Chojja, miquianaya jama ejjashahuaba meequijji pojjeama. Bobijo ca ca miquianaaya eya sa'ajjaña, bobi quea huiso ijjia majje quea jejje poanajeya jjejojo. 27 ¡A'a jjashahuaba tiitiiquijji bobijo, eba'ejjijo! Maya jjeya nei oe poani. Sho caje o'oya. ¡Ecuea esohuijo ca ca jjashahuabaquicue oe! — Jesosa poanaje—. Maya e'e jojo nei shajja'ajjajo, eyaya miya ba'e tiitii meeje'yo enijje eyajo. Ecuea esohui pea bobi jayojja, eba'e tiitii mee'yojji. E'e, eyaya ojjañaja Edoe Meseya ma pea bobi eba'e tiitii mee'yojji quiaje miquianaya, eya Eyacuiñajjija huoojea'yohua jjejojo. Eyacuiñajjiya ecue Chiiya eya ma dejjaja ba jjima amee cani; pahui jjapana meequi canaje miquiana bobiajji. Jamajoya miquea eba eya oja huoojea'yo ojjaña jaahuanajji — Jesosa poanaje. 28 Majoya aje dejja cuaa Jesosa huohui'ajja canaje jama ba'a: — ¿Achajja acuae ecuaa Eyacuiñajjija esohui jayojjaya aje'yo so'o? ¿Jamajjeya oya ecuana nijje quea bihui nee poaje'yo? 29 Jesosaa oya cuana saja'a canaje jama ba'a: — E'e jojo nei jama acue ejo ba'a: “E'e Jesosa, miya Eyacuiñajjija huoojea'yo ojjaña jaahuanajji” jamaya acue. Jamajjeya Eyacuiñajji quea bihui nee poaje'yo miquianajo — Jesosa poanaje. 30 —E'e pojja'a — Jodio cuaa huohui canaje—. Jamajjeya ¡miyaya Eyacuiñajjiya jayojja jama acue dejjaa ajjima acani! Jamajjeya ecuanaja eba poaje miya e'e jojo nei Eyacuiñajjija huoojea'yo ojjaña jaahuanajji. ¿Ae poaje miya? ¡Eyacuiñajji jayojja jama acue, Moisesiya aca poa jama oe acue! 31 E'e, yahuajo nei meshi jabojo Eyacuiñajjija esohui huohuijjiya Moisesiya esejaya etiiquiana bobi pahui jayojja quia ca poa ojjaña pojjajo. Yahuajo nei Eyacuiñajjiya Moisesi tehue mee ca poa jama ba'a: “Eyacuiñajjiya Moisesija bobi pahui sisi jayojja eyajo oque mee ca poa meshi yasijje etiiquianaja e'ijjiajji” jamaya tehue ca poa — Jodio cuana poanaje. 32 —Eyaya miya e'e nei huohuiaña — Jesosaa acanaje—, Moisesiya pojjeama etiiquiana quia canaje bobi. Ma eyajo aniya tii bobi oque mee canaje ecue Chiiya. Ohuaya jjeya miquianaya quia cani pea bobi ma eyajo ani meshi yasijje poeyanaje. 33 E'e, jjeya nei Eyacuiñajjija bobi eyajo aninaje ohuaya huoojea cani ojjaña ba'e tiitii mee'yojji — Jesosa poanaje. 34 —E'e, emeshi mese, ¡che ecuana jiquio bobi quiacue ojjaña pojjajo! —poanaje oya cuana. 35 —Eya ca ca iña jiquio bobi jayojja tiiya Eyacuiñajjija huoojea'yo —Jesosa poanaje—, Eyacuiñajjija huoojea'yo ojjaña jaahuanajji, ojjaña ba'e tiitii mee'yojji pea'ai. Jamaya eya poani. Bobi ijjia majje miya quea yeno poaje o'oya, quea shoe po o'oya majje. Quea naba taja pea'ai poaje o'oya. Enijje ejjapeequi jjemo, e eshajja'ajja jojjemo pea'ai miquiana quea bihui tii po'yome, quea jejje tii jayojja nequi mee'yome — Jesosa poanaje—. 36 Eyaya miquianaya huohuiaña jama ba'a: Miquiaaya ecuea ma dejjaa ajjima acani quea huiso cuana banaje, pahui ecue pana ijjianajejo pea'ai. Jamatii jjashahuabaquiani jama ba'a: “Chojja, Jesosa Eyacuiñajjija huoojea'yo ojjaña jaahuanajji pojjeama, ojjaña ba'e tiitii mee'yojji pojjeama pea'ai” jamaya jjashahuabaquiani miquianaya, eya Quito pojjeama poso aña — Jesosa poanaje—. 37 Ojjaña joya ecue Chiiya ejo e'e nei jjashahuabaqui meesahua cani e que poeje'yo, enijje jjapeequije'yo tii. E que poeyajo, ecuea miquianaya cajaa yajji pojjeama. 38 E'e, eya eyajo ani ecue Chiiya meshi yasijje huoojea canaje. Jamajjeya eyaya ojaya ejjashahuabaqui'yojji jayojja jama aña, ecuea ejjashahuabaqui'yojji jama pojjeama — Jesosa poanaje—. 39 Ecue Chiiya eya niñeshe'a ca poa jama ba'a: “Ojjaña joya eyaya minijje jjapeequi meesahuaña equiyo'yojji pojjeama. ¡Ojjaña oe ba'e tiitii mee'yocue minijje! Quijje miya poe o'oya majje joya emano'yo cuana oe shequi mee o'oyacue, eba'e tiitii'yojji” jama eya niñeshe'ameya ecue Chiiya aca poa — Jesosa poanaje—. 40 E'e, ecue Chii jama sa poani ba'a: Ojjaña joya eya Eyacuiñajjija Bacua ba majje, enijje jjapeequiajo, eyaya oya ba'e tiitii meeje'yo enijje eyajo; joya emano'yo cuana jaa pea'ai shequi meeje o'oya quijje poe o'oya majje — Jesosa poanaje. 41 Majoya Jodio cuaa Jesosajo niñeba canaje. E'e, Jesosaa yahuajo jama acanaje ba'a: — Eya Eyacuiñajjija huoojea'yo ojjaña jaahuanajji eyajo yahuajo ania poa. Ohuaya eya huoojea canaje meshi yasijje — acanaje yahuajo. 42 Jamajjeya Jodio cuaa Jesosa Joseja bacua ejja poso acanaje: —¡De! Oya Joseja bacua ejja pojja'a jja coma. Oja chii, ojaya enaese pea'ai ecuanaja eba. ¿Yajjajje oya jama poani ba'a: “Eya yahuajo eyajo ania poa; eyajo ani meshi yasijje huoojea canaje ecue Chiiya”? ¿Yajjajje shai jama poanaje oya? Jodio cuana quea sapa ca'a jjejojo, Jesosa Joseja jeajo poso ojaya esohui shajja'ajja sa po'yo ajja. 43 —¡A'a eya niñebajji! — Jesosa poanaje—. 44 Beca cuana jamatii enijje ejjapeequi'yojji pojjeama. Ecue Chiiya eya huoojea canaje. Joya ohuaya beca cuana ejo e'e jojo nei jjashahuabaqui meesahua cani enijje ejjapeequijji; oya cuana ca ca oe eyaya ba'e tiitii meeje'yo enijje poe o'oya majje. 45 E'e, Eyacuiñajjija esohui huohuijji cuana yahuajo nei ba'eya jama tehueme aca poa ba'a: “Eyacuiñajjiya ojjaña dejja cuana, epona cuana pea'ai oja sohui ba meesahua caje'yo”. Jamaya tehueme aca poa. Jamajjeya ojjaña joya ecue Chii shajja'ajjajji poaniya, oja sohui jama acaje'yo. Jamaya amajje enijje jjapeequije'yo pea'ai — Jesosa poanaje. 46 —Jamatii ojjaña cuanaja Eyacuiñajji ba jjima ecojjaja. Eya Eyacuiñajji nijje, ecue Chii nijje ania poa. Jamajjeya eyaya, eyaye nei, oya baña ecojjaa — Jesosa poanaje—. 47 E'e jojo nei ojjaña joya ecue Chiiya enijje jjapeequi meeshahua cani eyaya ba'e tiitii meeje'yo enijje. 48 Miquiaaya bobi ijjiaña eba'ejji. Jamajjeya eya bobi jayojjaya. Eyaya ecuea epeejji cuana ba'e tiitii meeje'yo. 49 ¡Bacue! Yahuajo nei meshi jabojo Moisesiya miquianajaya etiiquiana bobi pahui sisi jayojja quia ca poa ojjaña pojjajo; jamatii mano'ya poa ojjaña etiiquiana. 50 Eya miquiana nijje mimiani pea bobijo, ma Eyacuiñajji eyajo aniya huoojea canaje meshi yasijje. Maya ijjia majje ca ca mano'yo ajja tii tii poaje'yo. 51 Eya ca ca iña pahui jayojjaya, Eyacuiñajjija huoojea'yo. E'e, eya yahuajo eyajo ani meshi yasijje poeyanaje dejja cuana ba'e tiitii mee'yohua. Jamajjeya jiquio ecua bobi ijjia majje miquianaya ba'yani jayojja jama eyaya dejja cuana ba'e tiitii meeje'yo. Ojjaña joya enijje e'e jojo nei jjapeequiani ba'e tiitiije'yo enijje eyajo. Eyaya ojjaña cuana enijje ba'e tiitii mee'yo sa aña. Jamajjeya eya manoje'yo ojjañaja mimishi cuijea mee'yojji. Jamajoya ecuea eyami ma pea pahui jayojja jama poani — Jesosa poanaje. 52 —¡Chojja, de! — Jodio cuana ojee jjamimicuiajea nobiajeaquinaje—. ¿Yajja yajji ohuaya aje oe oja yami quia caje'yo bobi jayojja ecuanaja e'ijjiajji, de? — poanaje. 53 —Eyaya miya e'e jojo nei huohuiaña — Jesosa poanaje—. ¡Shajja'ajjacue! Miquiaaya ecue sohui mi shajja'ajjajo, enijje mi jjapeequiajo pea'ai, enijje eba'e tiitii mee'yojji pojjeama. Ecue sohui shajja'ajjañajo, ecue yami ijjiaña jama jayojja poani; enijje jjapeequianijo, ecuea ena' ishiaña jama jayojja poani pea'ai. ¡Jamaya pocue, ecuea epeejji poanijo! 54 Jamajjeya ecue sohui shajja'ajjajji cuana, ecuea epeejji nei nei cuana eyaya ba'e tiitii meeaña; poe o'oya majje joya emano'yo cuana jaa pea'ai shequi meeje o'oya. 55 —¡Bacue! — Jesosa poanaje—. Miquiaaya bobi ijjiaña quea bihui nee eba'ejji. Jamaya eya manoje'yo miquiana quea bihui nee eba'e tiitii mee'yojji. Miquiaaya ena oshe ishiaña naba taja'ama epojji. Jamaya ecuea ena' cuayaquije'yo miquiana quea boejea po meejji, cuaqui yasijje epoquijji pojjeama, enijje jjapee neineiquianijo — Jesosa poanaje. 56 —E'e — Jesosa poanaje—, jiquio ecua miquianaya quea jejje po majje quea bei nee poani jama jayojja eya miquiana cuanajo mano'yajo, miquianaya quea bei nee poaje'yo. Ecuea ecue ena' cuayaquije'yo miquianaja mimishi cuijea'yojji, miquiana quea bei nee po mee'yojji. Jiquio ecua ena' ishi majje quea bei poani jayojja jama quea bei nee poaje enijje jjapeequi majje. Jamajjeya joya e shajja'ajja neineijji poani enijje jjapeequiani; eya onijje jjapeequiani pea'ai. 57 E'e, Eyacuiñajji enequi tii eshe, ecue Chii e huoojeajji epo. Eya ecue Chiija ejjashahuabaqui'yojji jayojja jama poanijo, ohuaya eya ba'e tiitii mee cani. Jamajjeya ojjaña joya enijje e'e jojo nei jjapeequiani eyaya ba'e tiitii meeje'yo enijje — Jesosa poanaje—. 58-59 Etiiquiana yahuajo nei nei bobi Moisesija quia ijjia majje jamatii mano'ya poa. Eya ca ca iña jiquio pea pahui jayojja; eya eyajo ania poa, ecue Chiiya meshi yasijje huoojea canaje. Jamajjeya ojjaña joya enijje e'e jojo nei jjapeequiani eyaya ba'e tiitii meeje'yo enijje eyajo — jamaya Jesosaa Jodio cuana sohuihuohui canaje Capenaomajo, Jodioja equi ojee ejjachichaquijjijo.

Jesosaa huohui ca o'oyanaje esohui eba'e tiitii'yojji

60 Jesosaja esohui Capenaomajo shajja'ajja majje quea huiso dejja cuana ojee jjaniñebaquinaje jama ba'a: — ¡De! Jesosaja esohui quea tai nee nee, de; shajja'ajja maja sa po'yo ajja iña, ohua oja eyami e'ijjia mee ca —poanaje Jodio cuana. 61 Onajaya ejjashahuabaquijji Jesosaja eba poanaje. Jamajjeya quea huiso cuana oja esohuijo jjaniñebaquianijo, Jesosaa huohui canaje jama ba'a: —Ecuea esohuijo ¿a'a miquiana quea tai jjashahuabaquiani? ¿A'a mi enijje jjapeequi pajeaje'yo? 62 Quijje eya ojjañaja Edoe Mese, ma yahuajo eyajo ania poa, jjequisohua caje o'oya iña eyahuasijje; jiquio meshijo enequi tiijji pojjeama iña. Jamajjeya aje mi oe ¿yajja jjashahuabaqui'yome acuae mi poaje'yo e jjequisohua ca'yajo? — Jesosa poanaje—. 63 Eyacuiñajjija Edojjoshahua Pameya pea ejjashahuabaquijji ba mee cani yahuajo jama pojjeama. Miquianaya ca ca jjashahuabaquiani bobijo, jiquio meshijo eba'ejjijo. Jamajjeya miya ba'e tiitii mee ajja enijje. Eyaya ca ca huohuiaña Eyacuiñajjija ejjashahuabaquijji. Maaya miquianaya ba'e tiitii mee caje'yo, Eyacuiñajjija esohuijo jjashajja'ajjaquianijo. 64 Jamatii miquianaya quea huiso ejo jama poani ba'a: “Mi shajja'ajja sa po'yo ajja iña; minijje jjapeequi sa po'yo ajja iña” miquianaya poani — Jesosa poanaje. E'e, yahuajo nei Jesosaja eba poa jama ba'a: “Quijje ecuea epeejji nishohua pea cuana eya iña meesahua caje'yo onaja equecua'yojji. Quijje quea huiso cuana enijje jjapeequi ajja poaje”. Jamaya Jesosaja eba. 65 Jamajjeya Jesosa jama poanaje pea'ai ba'a: — Jamajoya eyaya miquianaya yahuajo huohuinaje jama ba'a: “Beca cuana jamatii enijje ejjapeequi'yojji pojjeama. Beca cuana joya ecue Chiiya ejo e'e jojo nei jjashahuabaqui mee cani ca ca oe enijje jjapeequije'yo” eyaya yahuajo miquianaya anaje — Jesosa poanaje. 66 Majoya ma esohui shajja'ajja majje quea huiso dejja cuana Jesosa nijje poqui pajea'yonaje, o shajja'ajjajji nisho cuana. 67 Jamajjeya Jesosaa ecuana, o shajja'ajjajji nei, 12 cuana huohui'ajja canaje: — ¿Ae poaje miquianaya? ¿A'a miya pea'ai enijje jjapeequi sa po'yo ajja poaje? —Jesosa poanaje. 68 —Ecuea Emeshi Mese — Simohui Penohua Jesosa saja'a canaje—, chama' pea mi jayojja. Miyaya ca ca oe esohui e'e jojo nei huohuiaña. Mi shajja'ajjajji caya ca oe ba'e tiitii meeje'yo minijje tii. 69 Ecuana minijje e'e jojo nei jjapeequinaje. Ecuanaja eba miya e'e jojo nei oya Eyacuiñajjija huoojea'yo ojjaña jaahuanajji quea pame nee nee — poanaje Peno. 70 —E'e — Jesosa poanaje—. Eyaya miquianaya, 12 cuana babaca'yo majje iyaanaje; jamatii oe dejja minijje nequi ecuea epeejji nisho; oya eshahuaja epeejji poani — Jesosa poanaje. 71 Jesosa jjashahuabaquiani Jodasajo, ma Simohui Isicanioteja bacua ejjajo. E'e, Jodasa Jesosa shajja'ajjajji 12 cuana nijje nequinaje. Jamatii quijje Jodasaa Jodio etii cuana Jesosa iña meeshahua canaje bejjo sosejje, onaja quecua'yojji.

Jesosaja echahua mese cuana o shajja'ajjajji pojjeama poanaje

1 Majoya Jesosaa esohui huohui canananaje Janinea meshijo, Jodea meshijo pojjeama. Jodea meshijo Jodio etii cuaa equecua ca poaje jjejojoya mi poqui o'oyanaje. 2 Quijje pishana ojjaña Jodio dejja cuana Jenosanena huasijje poqui o'oyanaje equi sisi iyaa, ojee quea bihui nee ijjia'ijjiaa bobi cuana chichajji shejo. 3 Jamajjeya Jesosaja echahua mese cuana onijje jama poanaje ba'a: —¡A'a jja oe jiquiojo Janinea meshijo tii ani tiitiijji! ¡Ecuana nijje Jodea meshi yasijje poqui o'oyacue! ¡Jocuama aje oe miyaya ma dejjaa ajjima acani aquicue, ojjaña mi shajja'ajjajji cuanaja ebajji! 4 ¡A'a quehuajje ajji cuiñajji sisijo! Jamaya po ajja cuana. ¡Jenosanenajo aquicue oe, ojjañaja ebajji! E'e, jjeya jomajo ojjaña dejja cuana jjachichaquiani — poanaje. 5 Jamaya huohui canaje oja chahua cuaa, Jesosa ba'yo jjimahuajo, oya Eyacuiñajjija huoojea'yo ojjaña jaahuanajji pojjeama poso acanaje. 6 Jamajjeya Jesosaa oja chahua cuana huohui canaje jama ba'a: — Chojja, eya Jenosanena huasijje poqui o'oya jjima so'o. Eya jjeya miquiana nijje epoqui jojjemo ojjaña cuaa eya shajja'ajja jjima acame. Jamatii, ¡miquianaya poqui'yo sa po majje poqui'yocue! Jomajo dejja cuana mijo jjashahuabaqui ajja. 7 Miquianaya ojjaña dejja jayojja jama jjashahuabaquianijo, mi quecua sa po ajja cuana. Eyaya ca ca onaya jama anaje ba'a: “Miquianaya ojjaña quea mimishi poanijo, Eyacuiñajjija esohui jama po ajja” poanaje. Jamajjeya ojjaña ejo quea quene poani; quecua sa acani. 8 ¡Jamajjeya miquianaya jjeya Jenosanena huasijje poquicue quea cahui huiso ojee ijjia'ijjiaa! Eya ca ca iña jjeya epoqui'yojji pojjeama. E'e, jjeya nei miquiana nijje poqui'yajo eya shajja'ajja jjima acame cuaa — Jesosa poanaje. 9 Jamaya huohui majje Jesosa Janinea meshijo aninaje so'o.

Jesosa Jenosanena huasijje poquinaje bobi chichajji shejo

10 Jamatii oja chahua cuana Jenosanena huasijje poqui'yajo, quijje pishana Jesosa pea'ai poquinaje. Ojjaña pea Jodio dejja cuana nijje pojjeama poquinaje; quehuajje Jenosanena huasijje poquinaje oe nei. 11 Ojee ijjia'ijjiaa jjachichaqui majje Jodio etii cuana Jesosaja epoe'yojjijo ishoa canaje quea quene. Huohui'ajja huicha'a huicha'a canaje jama ba'a: —¿Aecue Jesosa? ¿A'a cuae oya poeyanaje so'o? — acanaje. 12 Ojjaña cuana echicha'yo pea echicha'yo cuana nijje jjapashineijje maimai aninaje Jesosajo jama ba'a: — Oya quea pame nee nee Jesosa. Siajjepojji pojjeama — beca cuana poanaje. —Chojja — pea poanaje—, ojjaña cuana se ca dasia cani Jesosaa. E'e, oya Jesosa siajje poani jama ba'a: “Eya ca ca iña Eyacuiñajjija huoojea'yo ojjaña jaahuanajji” poani — pea Jodio cuaa acanaje, Jesosaja esohui shajja'ajja sa po ajja jjejojo. 13 Jamatii Jodio etii cuanajo quea mete jjejojo joya Jesosa shajja'ajjajji epo mi mimi neineinaje; jjapashineijje ojo maimainaje. 14 Jenosanenajo Jodio cuana ojee ijjia'ijjiani quea bihui nee quea huiso cahuime, 7 cahuime. Ojee ijjia'ijjianijo quijje pishana beca cahuime po majje Jesosa Eyacuiñajjija equi yasijje poquinaje. Equi shashajo ojjaña cuana sohuihuohui canaje. 15 Jesosaja esohui shajja'ajja majje Jodio etii cuana jama poanaje ba'a: — ¡De! Ojaya eba quea huiso. ¿Achajja shai? Chama' ojaya esohui huohuijji poanaje. Esho'yahua oya dobiqui jjima de, esohui baa. 16 Jesosaa oya cuana saja'a canaje jama ba'a: — Eyaya huohuiaña miquianaya ecuea esohui pojjeama. Eyacuiñajjiya eya huoojea canaje. Ohuaya eya huohui meesahua cani ojaya ejjashahuabaquijji. 17 Ojjañaa joya Eyacuiñajjija ejjashahuabaquijji jayojja jama ba'e'yo sa poaniya ba caje e'e jojo nei eyaya huohuiaña Eyacuiñajjija ejjashahuabaquijji, ecuea ejjashahuabaquijji pojjeama. 18 Joya beca cuaa ojaya ejjashahuabaquijji huohui cani aje oe pea cuana quea bihui po meejji jama ba'a: “Oya esohui huohuijji nei; ¡oya shajja'ajjacue!” Jamaya amee sa acani, pea esohui huohuijji cuaa. Pea jayojja jama pojjeama eya. Eyaya ca ca pea cuana bihuia mee sa aña ca ca, ecue Chii, e huoojea'yojji epo oja sohui e'e nei huohuiañajo. Jamajjeya eya edasiajji pojjeama. 19 ¡Bacue! Yahuajo nei Moisesiya miquianajaya etiiquiana cuana huasijje quia ca'ya poa Eyacuiñajjija esohui etehue'yo, miquianajaya ebajji. Jamatii ma esohui etehue'yo jama ba'e ajja miquianaya. Moisesija etehue'yo jayojja jama eba'e'yo jojjemo e quecua'yo sa po ajja pome — Jesosa poanaje. 20 Ojjaña Jodio cuaa echicha'yo nequiya huohui canaje jama ba'a: — ¿Aya acuae mi quecua'yo sa acani so'o? ¡Chojja, de, miya niñepoquiani pojja'a jja mi coma! Mi quecua sa po'yo ajja ecuanaya — siajje poanaje cuana. 21 Jesosaa oya cuana saja'a canaje jama ba'a: — Yahuajo eyaya ma dejjaa ajjima acani anaje miquea epojja ejomishocajjijo; oe dejja jeo'ajja poa. Eyaya oya jeo mee'yonaje. Jamajjeya miquianaya ejo jama poanaje ba'a: “Ohuaya aje oe epojja ejomishocajjijo acani; equipajaajji dojo mee cani pea'ai. Jamaya quea tai. Jamaya pojjeama etiiquianaja ehuohui'yo” miquianaya poanaje. 22 ¡Bacue! Yahuajo nei nei ba'e etiiquianaa aca poa jayojja jama Moisesiya huohui ca poa jama ba'a: “¡Mique bacua huo'o nei, eshoi nei cuiishasha biso nei jehuisejjajeacue!” aca poa. Jamajjeya miquiaaya ebacua 8 cahuime poajo cuiishasha biso nei jehuisejjajeaña, jamatii epojja ejomishocajjijoya. 23 Jamajjeya Moisesija etehue'yo jama poanijojo miquianajaya ebacua cuiishasha biso nei jehuisejjajeaña epojja ejomishocajjijo. E'e, miquianaaya pea'ai epojja ejomishocajjijo chacoaña. Jamajoya ¿apiojji acuae quiana enijje quea quene nee nee poani so'o dejja jeo'ajja jeo mee'yonajejo epojja ejomishocajjijo? 24 ¡A'a nequiaa eya niñepoqui poso ajji! Quea ja'a nee nee jjashahuabaqui majje miquea ehuohui ejo e'e jojo nei poaje, quea pame — Jesosa poanaje Eyacuiñajjija equi pejjejo nequiya sohuihuohui canijo.

Jesosa e'e jojo nei Eyacuiñajjija huoojea'yo ojjaña jaahuanajji

25 Majoya quea huiso dejja cuana Jenosanenajo ba'eca ojee miminaje jama ba'a: —Jodio etii cuaa jiquio dejja quecua sa acani. ¿A'a e'e? 26 ¡Bacue oe! Jjeya ohuaya ojjaña cuana sohuihuohui caqui. Jamatii oya iña jjima, mimi pajea mee jjima pea'ai, de. ¿E'e pojja'a etii cuana jjashahuabaquiani che jama ba'a: “E'e pojja'a oya Jesosa e'e jojo nei Eyacuiñajjija huoojea'yo ojjaña jaahuanajji”. E'e pojja'a, de. 27 ¡De! Ecuanaja eba jiquio dejjaja ba'ejji; Quito poeyajo ca ca ojaya eba'ejji ba jjima poaje cuanaja — poanaje cuana, Jesosa Nasanenajo cuaya poso aca poa. 28 Majoya Jesosaa Eyacuiñajjija equi pejjejo sohuihuohui huicha'a huicha'a canijo, oya cuana janobajjima nei saja'a canaje: — E'e, eya miquiaaya eba poso aña. Ecuea eba'ejji miquiaaya eba pea'ai poso aña. Eya miquiana que jamatii poe jjima. Chojja, ecue Chiiya eya huoojea canaje. Ojaya esohui e'e nei. Oya miquianajaya ba jjima, de. 29 Eya onijje ania poa; ohuaya eya huoojea canaje. Jamajjeya oya ecuea eba nei — Jesosa poanaje. 30 Ma shajja'ajja majje Jodio etii cuana oya Jesosa Eyacuiñajjija Bacua Ejja pojjeama poso acanijo quea quene nee nee poanaje, iña sa acanaje. Jamatii iña jjima, jjeya iña mee jjima acanaje. 31 Quea huiso dejja ejjachichaqui nequi'yo cuana jjashahuabaquiani jama ba'a: — Jesosa e'e jojo nei Eyacuiñajjija huoojea'yo ojjaña jaahuana'yojji. Jama poanaje pea'ai ba'a: — E'e nei Jesosa Eyacuiñajjija huoojea'yo ojjaña jaahuanajji. Chama' pea dejja Jesosa jayojja epoe o'oyajji; ma dejjaa ajjima acani quea huiso acanaje ohuaye nei — poanaje cuana.

Paniseo cuaa sohuinano huoojea canaje Jesosa iñaa nisho

32 Paniseohua shajja'ajja canaje quea huiso dejja cuana jama poani ba'a: “Jesosa Eyacuiñajjija huoojea'yo ojjaña jaahuanajji”. Ma shajja'ajja majje Paniseo etii cuaa, Eyacuiñajji nijje emimijji etii cuaa pea'ai Jodio sohuinano cuana huoojea canaje jama ba'a: — ¡Jesosa iñaquicue ejeanobiajji! — acanaje. Ma Jodio sohuinano Eyacuiñajjija equi cuiñajji poani. 33 Majoya Jesosaa jama sohuihuohuime acanaje ba'a: — Eya minijje nequi tiitii ajja. Ecue Chiiya eya huoojea ca poa. Quijje pishana eya poquije o'oya o que. 34 Majoya eya sa'ajjaje'yo; jamatii eya miquianajaya eba'yojji pojjeama. Poqui meemee ajja enijje e ba'e yasijje — Jesosa poanaje. 35 —¿Achacua shai oya poquije'yo, jocuama ecuana epoqui'yojji pojjeama pojja'a? ¿A'a oya pojja'a poquije Jieno dejja cuana huasijje, Jodio cuana Jieno nijje ba'e cuana jjaba'echejjequiani yasijje poquije pojja'a, ojaya esohui huohuiya? — Jodio cuana ojee mimimiminaje Jesosajo. 36 —¿Ajeo shai Jesosa jama jjashahuabaquiani? — poanaje Jodio cuana—. “Miquiaaya eya sa'ajjaje'yo; jamatii miquianajaya eya eba'yojji pojjeama. Poqui meemee ajja ma e ba'e yasijje enijje” Jesosa poanaje, de —Jodio cuana poanaje. 37 Jenosanenajo Jodio cuana ojee ijjia'ijjianaje quea huiso cahuime, 7 cahuime bobi chichajji shejo. Ma pojja cuanajo quea bihui nee poanaje, yahuajo ijjia'ijjia jjimahuajo quea bihui pishana poa. Beshahua nei ijjiapajea ca'yanijo, quea bihui nee nee poa. Jamajjeya beshahua nei ojee ijjia'ijjia pajea'yanijo Eyacuiñajjija equi pejjejo Jesosa que jjachichaqui o'oyanaje. Jesosa taaanaje ojjaña huasijje jama ba'a: — ¡Ojjaña miquianaya quea naba taja jayojja poanijo, poecue e que, ecuea e'ishijji ishiya! Enijje jjapeequi sa neinei poanijo quea naba taja jayojja jama poani; jamajjeya eyaya miquianaya ba'e tiitii meeje'yo ecuea esohui e'e jojo nei shajja'ajjañajo. 38 Jiquio ecua ena eteohuejja cuayani tii tii jayojjaya, ojjaña ishi majje naba taja'ama poani jayojja jama ojjaña joya enijje jjapeequiani eyaya ba'e tiitii meeje'yo. Majoya oya cuaa pea cuana enijje jjapeequi meesahua caje'yo pea'ai — Jesosa poanaje. 39 Jesosa jjashahuabaquiani jama ba'a: — Edojjoshahua Pame poeje'yo. Dobiquije'yo ecuea epeejji cuana huasijje. Enijje jjapeequi meesahua caje'yo quea pame nee; jiquio ecua enaa caneco cuatajea cani jama jayojja quea cuata poaje Edojjoshahua Pame dobiquiajo. Jesosa jamaya poanaje Edojjoshahua Pame ojaya epeejji cuana huasijje dobiqui jjimahuajo. Quijje Jesosa emano'yojaa shequi o'oya majje eyahuasijje jjequisohua ca'yajo, ohuaya Edojjoshahua Pame huoojea caje ojaya epeejji cuana huasijje. 40 Jesosaja esohui shajja'ajja majje quea huiso cuana jama poanaje ba'a: — E'e jojo nei Jesosa Eyacuiñajjija esohui huohuijji nei. Yahuajo nei Moisesiya tehue ca poa jama ba'a: “Oya poeje Eyacuiñajjija huoojea'yo ojjaña jaahuanajji poe jjimahuajo” tehue ca poa — poanaje cuana; Jesosa esohui huohuijji poso acanaje, Eyacuiñajjija huoojea'yo ojjaña jaahuanajji pojjeama poso acanaje beca cuaa. 41 Pea cuana ca ca jama poanaje ba'a: — Chojja. ¡Oya ca ca oe Eyacuiñajjija huoojea'yo ojjaña jaahuanajji e'e jojo nei, de! Jamatii pea cuana poanaje: — Chojja, Jesosa Janinea meshijo ba'e. Eyacuiñajjija huoojea'yo ojjaña jaahuanajji ca ca Janinea meshijo pojjeama cuayaje — acanaje cuaa, Jesosa Janinea meshijo Nasanenajo cuaya poso. 42 —Eyacuiñajjija esohui etehue'yo yahuajo jama poani ba'a: “Dabi emeshi mese yahuajo ba'ya poa Eyacuiñajjija huoojea'yo ojjaña jaahuanajji emeshi mese ojaya osecua poaje. Jamajjeya Dabija meshijo cuayaje, Benenajo, Jodea meshijo” — poanaje beca cuana. 43 Jamaya ojjaña Jodio dejja cuaa mimicuiajeanobia canaje Jesosajo. 44 Beca cuaa Jesosa iña mee sa acanaje; jamatii jja'iña meequi jjima poanaje. 45 Jamajjeya sohuinano cuana, Eyacuiñajjija equi cuiñajji, ma Paniseohua yahuajo huoojea canaje Jesosa iñaa nisho Jesosa esohui huohui poequi baqui majje huacuaya poqui'yonaje Eyacuiñajji nijje emimijji etii yasijje, Paniseo cuana pea'ai yasijje. Poeyajo, Sohuinano cuana tecuea canaje Jodio cuaa: —¿Apiojji acuae quianaja Jesosa iña jjima so'o? Ye jjima, de — poanaje. 46 —Chama' pea dejja Jesosa jayojja jama mimime. Pea dejja o jayojja mimi jjima; ojaya esohui quea pame nee nee, de — sohuinanohua saja'ame acanaje. 47 —¡De! Ohuaya aje mi oe dasia canaje pea'ai — sohuinano tecueame acanaje Paniseo cuaa—. 48 ¿A'a Jodio etii cuana, ecuana pea'ai onijje jjapeequiani? ¿A'a oya shajja'ajjaña pea'ai ecuaa? Chojja, de — Paniseo cuaa acanaje—. 49 Ojjaña jiquio dejja echicha'yo nequi ca ca Moisesija etehue'yo ba jjimajo, oya cuana Eyacuiñajjiya quea nee nee po mee caje'yo cuaquijo — acanaje Paniseo cuaa, jjashahuaba taiquianiya jjejojo. 50 Nicodemo, ma yahuajo Jesosa nijje miminaje mecajje Paniseo cuana nijje pea'ai nequinaje. Jamajjeya ohuaya pea Paniseo cuana jama huohui'ajjame acanaje ba'a: 51 —¡Bacue! Moisesija esohui etehue'yo yahuajo jiquio jama poanaje ba'a: “¡Oe dejja niñeba jjimahuajo, oya iyaacue! Ohuaya huohui cajje, majoya miquianaaya baje'yo oya quea mimishi pojja'a, oya mimishi'ama pojja'a”. ¿A'a e'e? — poanaje Nicodemo. 52 Paniseo cuaa jja oya saja'a canaje. Quea mimi tecue poanaje jama ba'a: — ¿A'a miya pea'ai Janinea dejja, Janinea meshijo ba'e pea'ai? ¡Eyacuiñajjija esohui ba neineicue! Chama' poaje Eyacuiñajjija esohui huohuijji Janinea meshijo ba'ecaja, pa — poanaje Paniseo cuana. 53 Majoya, siniajo ijjia'ijjia pajea majje ojjaña cuana poquinaje equi cuana huasijje cahuiya.

1 Jesosa ca ca eyiyo bajjani Onimo eyiyo huasijje poquinaje. Jomajo aninaje jiquio mecajje.

Jodio cuaa epona quea mimishi Jesosa que ye canaje

2 Mecajjeahua Jesosa poe o'oyanaje Eyacuiñajjija equi yasijje. Quea huiso nee nee cuana o que jjachichaqui o'oyanaje. Eyacuiñajjija equi pejjejo anioque majje Jesosaa sohuihuohui ca o'oyanaje ojjaña cuana huasijje. 3 Majoya Paniseo cuaa, Moisesija etehue'yo huohuijji cuaa pea'ai epona quea mimishi ye canaje. Pea cuaa oya ba canaje pea dejja oja yahue pojjeama nijje jaa, pa. Jamajjeya Paniseo cuaa huohui canaje epona jama ba'a: — ¡Jesosa nequi cojja nei nequicue! 4 Majoya Paniseo cuaa Jesosa huohui canaje jama ba'a: — Esohui huohuijji, jiquio epona quea mimishi nee poanaje. Pea dejja oja yahue pojjeama nijje jaanaje —acanaje cuaa—. 5 Moisesiya yahuajo nei jama tehueme aca poa ba'a: “¡Epona pea dejja oja yahue pojjeama nijje jaajo, jajahuejjajeacue meiya!” tehueme aca poa yahuajo nei. Jamajjeya, Jesosa, ¿yajja acuae miyaya epona aje so'o? — poanaje Paniseo cuana Moisesija etehue'yo jayojja ohua mi saja'a cajje Jesosa e'iña'yojji nisho jjashahuabaquinaje. 6 E'e, jjashahuabaquinaje jama ba'a: — E'e pojja'a Jesosa Moisesija etehue'yo jayojja jama pojjeama mimije. Jamajjeya ecuana jama poaje: “Oya Jesosa ca ca oma siajjepojji; Moisesija esohui jayojja jama po ajja”. Jamatii Jesosaa oya cuana saja'a jjima acanaje. Meshi pohuijo tehue canaje eme sisiya. 7 Paniseo cuaa eponajo huohui majamaja'ajja canaje. Jamajjeya Jesosaa Paniseo cuana cojja ba jeyojeyo neinei majje saja'a canaje jama ba'a: — ¡Miquianaaya joya mimishi'ama nei neiya ebionei mei jea coocue, jajahuejjajeacue pona! — poanaje. 8 Mimi majje Jesosaa meshi pohuijo tehue ca o'oyanaje. 9 Jesosaja esohui shajja'ajja majje Jodio dejja cuana oe cuayaqui, oe cuayaqui'yonaje esecue yasijje. Ebionei edejja tii ehui dojojji cuayaqui'ya poa; o quishishijji joya etii pishana cuayaquinaje pea'ai. Quea bicho ojjaña poanaje quea mimishi jjejojo. Epona jeana ca'yonaje Jesosa cojja neijo nequi. 10 Jamajjeya Jesosaa nequisohua majje bajea canaje epona nequi; chama' Jodio etii cuana. Epona nijje jama poanaje ba'a: — Epona, ¿ae acuae ma mi tecueajji epo? ¿A'a mi mique mimishijo jajahuejjajea'ajja ca'yonaje cuaa? — ba majje acanaje Jesosaa. 11 —Esohui huohuijji, jaja'yo jjima mo Jodio etii cuanaja. Poquinaje oya cuana ojjaña — poanaje epona. —E'e epona, ecuea miya ejajahuejjajeajji pojjeama pea'ai. ¡Poquicue miya; mimishi pajea'yocue! — Jesosa poanaje epona nijje. Majoya epona poquinaje quea bihui nee.

Jesosaa ojjaña cuana Eyacuiñajji ba mee caje

12 Majoya epona nijje mimi majje Jesosaa sohuihuohui ca o'oyanaje ojjaña ejjachichaqui anica huasijje. Jama poanaje ba'a: — Jamatii quea apo nee neeya, cuaquijijiya jeaja'a cani mecajje. Oya jayojjaya eya poani. Eyaya dejja cuana jamatii quea mimishi nee nee poa quea ja'a nee jjashahuabaqui meeaña Eyacuiñajjijo. Ojjaña joya ejo e'e jojo nei jjashahuabaquiani aje oe quea mimishi, quea apo pea'ai ba'e maja ajja. Eyaya oya cuana ba'e tiitii meeje'yo enijje — Jesosa poanaje. 13 Jamajjeya pea Paniseo cuana Jesosa nijje mimijajinaje jama ba'a: —¡De! Miyaya neiya huohuiaña jama ba'a: “Eyaya dejja cuana ba'e tiitii meeje'yo” poani. Miyaye nei jama huohuiañajo, ecuanaja miya eshajja'ajjajji pojjeama. Chojja, de. Moisesiya yahuajo nei jama huohui ca poa ba'a: “¡A'a oe dejjaja ehuohui shajja'ajjajji! ¡Becanejjijji pea'aiya huohui canijo oe shajja'ajjacue!” poa — poanaje Paniseo cuana. 14 Jesosaa oya cuana acanaje jama ba'a: — E'e, eya neiya poanaje eyaya ecuea epeejji cuana ba'e tiitii meeaña. Jamaya e'e jojo nei eyaya aña. Ecuea eba ecue Chii e huoojeajji epo. ¿Achacua eya poquije o'oya? Ecuea eba, de. Jamatii miquianajaya maya ba jjima. Jamajjeya ¡ecuea ehuohui ejo shajja'ajjacue! ¡Jamatii eyaye nei huohuiañajo shajja'ajjacue! 15 Dejja mimishi cuanaja ejjashahuabaquijji jama miquianaya ejo jjashahuabaquiani, quea quehua. Eya ca ca mi jayojja jama pojjeama. 16 Jamatii eyaya dejja cuanaja eba'ejji huohuiañajo, ecuea ehuohui'yo e'e nei poani. E'e, ecue Chiiya eya huoojea canaje. Ojaya ehuohui jayojja jama eyaya aña, ecuea ejjashahuabaquijjijo pojjeama. Eya ecue Chii nijje beca. Jamajjeya ecuanaja ehuohui'yo dejja cuanajo e'e nei nei poani. 17 Miquianajaya etiiquianaja Moisesija etehue'yo jama yahuajo poa ba'a: “Becanejjijji pea'aiya oya jayojjaya huohui cajo ¡shajja'ajjacue, miquianaaya!” jamaya tehue ca poa. 18 Eyaya miya huohuiaña jama ba'a: Eyaya Eyacuiñajjija huoojea'yo ojjaña jaahuanajjiya ecuea epeejji cuana ba'e tiitii meeje'yo. Ecue Chiiya pea'ai jama miya ba meesahua cani ba'a: “Jesosa ecue huoojea'yo” ecue Chii poani — Jesosa poanaje. 19 Jamajjeya Paniseo cuaa Jesosa huohui'ajja canaje jama ba'a: —¿Achejo acuae mique Chii ani so'o? Jesosaa saja'a canaje jama ba'a: — Miquianajaya eya ba'yo jjima; ecue Chii miquianajaya ba'yo jjima pea'ai. E'e, eya miquianajaya eba jojjemo ecue Chii pea'ai bame. 20 Jamaya Jesosaa sohuihuohui canaje Eyacuiñajjija equi pejjejo nequiya, Jodio etii cuana ojee chacochacoani pejjejo. Jamatii Jodio etii cuana Jesosaja esohui shajja'ajja majje iña jjima poanaje jja'iña meequi ajjajojo.

Jesosaa Jodio shajjama' cuana tecuea canaje

21 Majoya Jesosaa ojjaña cuana huohui canaje jama ba'a: — Eya minijje nequi tii ajja; quijje pishana eya poquije o'oya. Quijje miquianaaya eya sa'ajja neineije'yo miquea mimishi cuijea'yojji, mi jaahuanajji pea'ai. Jamatii miquianaya quea mimishi tii manoje'yojo, quea nee nee poaje'yo cuaquijo. Ma e poqui yani yasijje miquianaya epoquijji pojjeama — Jesosa poanaje. 22 Jamajjeya Jodio etii cuana ojee huohui'ajja canaje jama ba'a: —¿Yajjajje oya poquije? ¿A'a oya jjayacuaqui'yo majje mano'yo sa poani pojja'a? ¿A'a jamajoya ohuaya jama acanaje ba'a: “Ma e poqui yani yasijje miquianaya epoquijji pojjeama?” — acanaje Jodio etii cuaa. 23 Jesosa jama poanaje ba'a: — Miquianaya meshijo ba'e. Jamajjeya Edosiquiana jayojja jjashahuabaquime poani, quea tai. Eya ca ca iña eyajo ba'e, Eyacuiñajji jayojja jama eya jjashahuabaquiani. 24 Jamajoya eyaya miya huohuinaje jama ba'a: “Miquianaya quea mimishi tii manoje'yojo, quea nee nee tii poaje'yo cuaquijo”. Eyaya miquianaya huohuinaje eya Eyacuiñajjija huoojea'yo ojjaña jaahuanajji. Jamatii miquianaya jjashajja'ajjaqui ajja. Jamajjeya miquianaya e'e jojo nei manoje'yo mimishi cuijea'yo jjima tii. Quea nee nee poaje'yo tii tii cuaquijo — Jesosa poanaje. 25 —E'e pojja'a — Jodio etii cuana poanaje. ¿Aya acuae mi huoojea canaje so'o ecuana que? ¿Ajeo miya poeyanaje jiquiacua? — Jodio cuana poanaje. —¡De! Aje jja mi huohui huicha'a huicha'a'ajjanaje yahuajo ehuohui coojji — Jesosa poanaje—. 26 Miquianaya ecuea eba quea jjashahuabaqui tai, quea mimishi poani — Jesosaa Jodio cuana acanaje—. Jamajjeya eyaya miquianaya tecueaña. Miquianaaya niñebaña ecuea ehuohui'yojo. Jamatii ecue Chiiya eya huoojea canaje; ojaya eba ojjaña; ojaya esohui e'e nei. Maya eyaya ojjaña cuana huasijje huohuiaña — Jesosa poanaje. 27 Jesosaja esohui oja Chiijo Jodio etii cuana ba sa po ajja. Oya cuana jjashahuabaquiani quea tai jama ba'a: — Chojja, Jesosa Eyacuiñajjija huoojea'yo pojjeama — poso acanaje Jodio etii cuaa. 28 Jamajjeya Jesosaa huohui canaje jama ba'a: — ¡Bacue! Quijje eya, ojjañaja Edoe Mese miquianaaya ba'ehuanasohuajeaje'yo acui ecueata'apeejo. Majoya miquianajaya eba poaje jama ba'a: “Jesosa e'e jojo nei Eyacuiñajjija huoojea'yo ojjaña jaahuanajji”. E'e, ojaya esohui eyaya huohuiaña, ecue Chiija. Ecuea ejjashahuabaqui'yojji ca ca eyaya huohui jjima aña. 29 Ecue Chiiya eya huoojea canaje. Eyaya oya quea bihui po mee sa aña tii. Jamajjeya oya enijje yani tii tii, ohuaya eya jeanana'yo ajja — Jesosa poanaje. 30 Quea huiso Jodio cuana Jesosa shajja'ajja majje jama poanaje ba'a: —E'e jojo nei nei Jesosa Eyacuiñajjija huoojea'yo ojjaña jaahuanajji. Oja sohui e'e jojo nei — poanaje.

Eyacuiñajjija bacua cuana eshahuaa napa ajja

31 Jamajjeya quea huiso Jodio cuana Jesosa nijje jjapeequinaje. Oya cuana Jesosaa jama acanaje ba'a: — E'e, ecuea esohui jama ba'yani tiijo miquianaya e shajja'ajjajji e'e jojo nei poani. 32 Jama poanijo ecuea esohui miquianajaya quea ja'a nee poaje'yo. Ecuea esohui e'e jojo nei poani, siajje pojjeama. Jamajjeya ecuea esohui ba neineiyajo, miquianajaya mimishi cuana pajea meeje'yo, Edosiquianaja yajjijo chaco meepajeaje'yo pea'ai — Jesosa poanaje. 33 Majoya pea Jodio cuana Jesosa nijje jjapeequi ajjajo quea tecue jama poanaje ba'a: — Chojja. Amajama ecuanaja etiiquiana, de. Jamajjeya pea cuanaja ecuana ehuoojea'yojji pojjeama peaja yajjijo chacochacohua sosema' —siajje poanaje oya cuana—. ¿Yajjajje miya jama poanaje ba'a: “Eyaya miquianaya chacochaco pajea meeje'yo peaja yajjijo?” — poanaje Jodio cuana. 34 Jesosaa oya saja'a canaje: — E'e jojo nei ojjaña joya quea mimishi poani ca ca o huoojea'yojji Edosiquiana bajjani jayojja jama poani tii, quea mimishi. Ojaya yajjijo chacopajea meemee ajja jama jayojjaya aña miquianaya, miquianajaya mimishi pajea'yo ajjajo. 35 ¡Bacue! Echacojji ba'e tiitii ajja echacojji meseja equijo. Oja bacua ca ca oe onijje ba'e tiitiije'yo. Miquiana huoojea'yojji Edosiquiana bajjani quea mimishi; ojaya yajjijo miquianaya sosema' chacochacoani. Jamajoya miquianaya ba'e tiitii mee ajja Eyacuiñajji nijje. E shajja'ajjajji poani ca ca Eyacuiñajji nijje ba'e tiitiije'yo oja bacua jjejojoya. 36 Jamajoya eyaya, Eyacuiñajjija Bacua Ejjaa miquianaya mimishi pajea meesahuaje'yo. Jamajjeya miquianaya e'e jojo nei Edosiquianaja huoojea'yo pojjeama poaje'yo. 37 E'e, ecuea eba Amajama miquianajaya etiiquiana poa. Jamatii miquianaya ecuea esohui shajja'ajja sa po'yo ajja nei nei. Jamajjeya miquiaaya eya quecua sa aña. 38 Miquianaaya mi huoojeajji jayojja jama atiitiiaña quea tai. Oya Edosiquiana huoojeajji poani, Satanasa bajjaniya. Eyaya ca ca huohuiaña ojjaña ecue Chiija ejjashahuabaquijji quea pame — Jesosa poanaje. 39 —Chojja — Jodio cuana po nishonaje—, Amajama ecuanaja etiiquiana. Ohuaya jayojja jama aña ecuanaa quea pame — poanaje. —Chojja — Jesosaa Jodio etii cuana saja'ame acanaje—. Amajama quea pame, miquianajaya etiiquiana mese poa; jamatii miquianaya o jayojja quea pame po'yo ajja. ¿Yajjajo acuae miquianaya o jayojja mi po'yani? 40 Eyaya Eyacuiñajjija esohui e'e nei huohuinajejo, miquianaya shajja'ajja sa po ajja. Jamajjeya eya miquianaaya quecua sa aña. Amajama ca ca jama po'yo ajja; quea pame nee oya. 41 Miquianaaya aje oe mi huoojeajjija ehuohui quea tai jayojja jama atiitiiaña, Edosiquianaja ehuohui jama — Jesosa poanaje. Jamatii Jodio etii cuana quenequenenaje. Jama poanaje ba'a: — Chojja, Eyacuiñajji e'e jojo nei ecuanaja Chii. Ecuana ojaya ebacua cuana quea pame poani, de — poanaje Jodio etii cuana. 42 Jesosaa oya cuana huohui canaje jama ba'a: — Eya Eyacuiñajji nijje ani poeyanaje jiquiacua, jiquio meshi yasijje. Eyacuiñajji miquianaja Chii pojjeamajo eya miquianaaya boti'ama aña. E'e, Eyacuiñajjiya eya huoojea canaje; eya jamatii poe'yo jjima. Chojja, ohuaya eya huoojea canaje. 43 ¿Apiojji acuae miquianaya ejo jjabahuejjaqui jjima? Miya ca mi ca oe e shajja'ajja sa po'yo ajja tii nequi. 44 E'e, Edosiquiana huoojeajji poani mi huoojeajji poani; ojaya ejjashahuabaquijji jama atiitii'yo sa poani miquianaya. Yahuajo nei nei oya ona quecua coo'yojji poa. Eyacuiñajjija esohui e'e nei jayojja jama ojaya ajjima pea'ai poa; esohui ojaya boti'ama nei nei poa. Oya siajje poani tii tii, siajjepojji nei nei. Oya ca ca oma siajje po coonaje; siajjepojji cuana huoojeajji poani. Ojjaña siajjepojji cuana ojaya epeejji cuana, Edosiquianaja epeejji. 45 Eyaya miquianaya Eyacuiñajjija esohui e'e nei huohuiaña. Jamatii miquianaaya eya shajja'ajja jjima aña. Edosiquiana jayojja miquianaya jjashahuabaquiani. 46 Miquianaya ejo jama po ajja ba'a: “Jesosa quea mimishi”. Chojja de. Jamajjeya eya esohui e'e nei huohuiañajo, ¿apiojji acuae ecue huohui shajja'ajja jjima tii aña so'o? — Jesosa poanaje—. 47 ¡Bacue! Ojjaña Eyacuiñajjija epeejjiya oja sohui shajja'ajja cani tii. Miquianaya ca ca Eyacuiñajjija epeejji pojjeama jjejojo ojaya esohui shajja'ajja sa po'yo ajja tii — Jesosa poanaje. 48 Majoya Jodio etii cuaa quenequene majje jama acanaje ba'a: — ¡Miya ca mi ca oe Samania dejja tai, niñepoqui! 49 —Chojja — Jesosaa acanaje—, eya niñepoqui pojjeama. Ecue huohui ecue Chiijo e'e nei. Eyaya oya bihuiaña quea ja'a nee. Miquianaaya ca ca eya niñebaña — Jesosaa Jodio etii cuana acanaje—. 50 Eya onaya ejo mimi mee sa po'yo ajja jama ba'a: “Jesosa quea pame nee, ¡oya bihuiacue!” Chojja, eyaya dejja jamaya epo mee'yojji pojjeama ejo. Ecue Chii ca ca ejo jjashahuabaquiani quea pame nee; e'e jojo nei ejo huohui cani ohuaya —Jesosa poanaje—. 51 Eyaya miquianaya e'e jojo nei huohuiaña jama ba'a: Ojjaña joya e shajja'ajja neineijji poani ba'e tiitii meeje'yo, oya cuana ca ca emano'yojjijo mete'ama poaje'yo pea'ai — Jesosa poanaje. 52 Maya shajja'ajja majje Jodio cuaa Jesosa jama acanaje ba'a: — Miquea ehuohui emano'yojjijo ecuanaja eba miya e'e jojo nei niñepoqui poani eshahuaa napa canijo. ¡Bacue! Yahuajo ecuanaja etiiquiana Amajama mano'ya poa. Eyacuiñajjija esohui huohuijji cuana yahuajo ba'e mano'ya poa pea'ai. Jamatii jjeya miyaya huohuiaña jama ba'a: “Ecuea esohui jayojja jama ba'yanijo emano'yojji pojjeama miquianaya cuana poaje”. ¡Dee! 53 Ecuanaja etiiquiana Amajama quea pame nee, quea ca'a nee poa; jamatii oya mano'ya poa. ¿A'a miyaya ma Amajamaja ajjima aje'yo? Jesosa, ¿a'a miyaya emano'yo cuana shequi meeje'yo? Eyacuiñajjija esohui huohuijji cuana yahuajo nei ba'e poquijeyo'ya poa pea'ai, de. ¿A'a miya pea dejja jayojja jama pojjeama? ¿A'a miyaya ojjaña baña quea ja'a nee? Chojja, siajje miya poani — Jodio cuana mimijaji majamajanaje Jesosa nijje. 54 Jamajjeyaya Jesosaa ojjaña cuana huohui canaje jama ba'a: — Eya onaya ejo mimi mee sa po'yo ajja jama ba'a: “Jesosa quea pame nee, ¡oya bihuiacue!” Chojja de, Eyacuiñajjiya, ecue Chiiya ca ca oe eya quea jea acani. Jamaya eyaya saña. E'e, ecue Chiiya ejo jama huohui cani ba'a: “Jiquio ecuea Ebacua Ejja quea pame nee nee, quea ca'a nee nee; ¡oya shajja'ajjacue!” poani ecue Chii. Ecue Chiijo miquianaya jama siajje poani ba'a: “Ecuana Eyacuiñajjija epeejji, oya ecuanaja eba”. 55 Chojja de. Oya miquianajaya ba jjima, de. Miquianaya siajje poani. Eya ca ca siajje po ajja. Oya ecuea eba nei nei; eya siajjepojji pojjeama. Eyaya oya baña; ojaya esohui shajja'ajjaña; ojaya esohui jayojja jama poani tii tii. 56 Yahuajo nei miquianajaya etiiquiana Amajama quea bihui nee nee jjashahuabaquinaje ecuea epoe'yojjijo quijje nei. E'e, Eyacuiñajjiya yahuajo Amajama ba mee ca poa jama ba'a: Eya, Eyacuiñajjija huoojea'yo ojjaña jaahuanajji quijje meshi yasijje poeje'yo. Ma ba majje quea bihui nee nee Amajama poa — Jesosa poanaje. 57 Majoya Jodio cuaa Jesosa jama acanaje ba'a: — Chojja de, miya siajje poani, de. Miya esho'i, 50 cui'ao sheme po jjima miya de. Amajama ca ca yahuajo nei nei ba'ya poa. Oya miquea ba jjima, de — poanaje Jodio cuana. 58 —¡Shajja'ajjacue! — Jesosaa saja'a canaje—. Eyaya miya e'e jojo nei huohuiaña: Amajama cuaya jjimahuajo tii eya yaña tiia poa. Eya ca iña Eyacuiñajji nei — Jesosa poanaje. 59 Ma shajja'ajja majje Jesosa siajje poani poso Jodio cuaa mei iña canaje o jajahuejjajeajji nisho. Jamatii Jesosa chama' poanaje. Jesosa quea huiso dejja tejjee nequijje quehua cuayaquinaje Eyacuiñajjija equi esecue jjani yasijje. Poquinaje.

Cojjama' cuaya jjabapojjaqui mee canaje Jesosaa

1 Quijje pea pojjajo, ejomishocajji pojjajo Jesosa ecuana nijje, o shajja'ajjajji cuana nijje ejiojjijje poquijeya ohuaya ba canaje oe dejja cojjama' cuaya. 2 Ba majje ecuanaa Jesosa huohui'ajjanaje jama ba'a: — Esohui huohuijji, ¿yajjajje acuae jiquio cojjama' cuayanaje so'o? ¿A'a ojaya mimishijo pojja'a? ¿A'a oja chiija, oja naeja mimishijo pojja'a? —poanaje. 3 —Chojja — Jesosaa ecuana saja'a canaje—, oya cojjama' cuaya poa ojaya mimishijo pojjeama, oja chii, oja nae cuanaja mimishijo pojjeama pea'ai. Oya jamatii cojjama' cuaya mee ca poa. Jamajjeya eyaya oya jjabapojjaqui meeje'yo. Ba majje ojjaña cuaa bihuia caje: “E'e, Eyacuiñajjiya Jesosa jjabapojjaqui mee canaje cojjama'; quea ca'a nee oya, quea pame nee nee” acaje — Jesosa poanaje—. 4 Eyacuiñajjiya eya huoojea canaje o chacojji. Jamajjeya jjeya eya miquiana nijje nequianijo Eyacuiñajjijo chacoaña. Quijje eya miquiana nijje nequi ajja jiquiojo. Eyacuiñajjijo chaco majamaja majje eya manoje'yo. 5 Meshijo nequiya eyaya ojjaña cuana Eyacuiñajjija esohui ba meeaña. Eya cuaquijiji jayojja jama poani. Jiquio ecua cuaquijijiya jeaja'a canijo dejja cuana poquiquehua ajja mecajje quea apojo jama jayojja eyaya ojjaña cuana Eyacuiñajjijo quea ja'a jjashahuabaqui meeaña. 6 Jamaya mimi majje Jesosaa cuichojea canaje meshi pohui yasijje. Cojjamaja ecojja iñapepa canaje meshi choeya. 7 Majoya cojjama' huohui canaje: — ¡Poquicue miya; ecojja shacuaquicue ena eteohuejja huasijje, Sinoe' bajjani yasijje! — poanaje. (Ma ena eteohuejja Ese Ejjaja esohuijo: Eyacuiñajjija huoojea'yo ena bajjani.) Jamajjeya cojjama' poquinaje ena eteohuejja huasijje ecojja shacuaa. Ecojja shacua majje jjabapojjaquinaje. Equi yasijje poe o'oyanaje cojjajji. 8 Jamajjeya dejja cuaa o pejjejo ba'ecaa, pea cuaa yahuajo oya meme ani ba canajeya pea'ai oya cojjajji ba ca'yonaje. Ba'yo majje ojee mimimiminaje jama ba'a: — Jiquio dejja yahuajo cojjama' e'anioque ani meme ani eseyaya banaje. ¿A'a e'e? — poanaje. —E'e, oyaya jja coma — beca cuana poanaje. —Chojja, pea coma; cojjama' jayojja coma — pea cuana poanaje. 9 Oya yahuajo cojjama' jama poanaje ba'a: — E'e, eya iquio ma yahuajo cojjama' cuaya poaya. Jjeya eya cojjajji — cojjama' poanaje. 10 —E'e nei. ¿Yajjajje acuae mi cojjajji'yo? ¿Yajja acuae mi po'yonaje? Jjeya miya cojjajji'yo — jama huohui'ajja neineimeya acanaje cuaa. 11 Ohuaya saja'a canaje: — Jesosa bajjaniya mo cuichojea canaje meshi pohui tejjee. Ecuea ecojja iñapepa canaje meshi choeya. Majoya eya huoojea canaje Sinoe' ena eteohuejja huasijje ecojja shacuaa. Jamajjeya eya poquinaje. Ecojja shacuaqui majje eya jjabapojjaquinaje — acanaje. 12 —¿A'a e'e? — ojjaña cuana poanaje—. ¿Achacua acuae ani oya Jesosa jjeya so'o? — poanaje. —Cua'a de, ecuea oya ba jjima ecojjaja — poanaje.

Paniseo cuaa dejja yahuajo cojjama' cuaya ba canaje

13 Jamajjeya pea mecahuajje o pejjejo ba'e cuaa ma dejja yahuajo cojjama' cuaya poa jjequi canaje Paniseo cuanaja ebajji. 14 Jesosaa meshi pohui ecuichojea ecojja huasijje iñapepa cajje jjabapojjaqui mee canaje epojja ejomishocajjijo. 15 Jamajjeya Paniseo cuaa ma ba majje huohui'ajja ca o'oyanaje jama ba'a: — ¿Yajjajje acuae mi cojjajji'yo? ¿Yajja acuae mi poanaje so'o? — poanaje Paniseo cuana. —Jesosaa ecuea ecojja iñapepa canaje meshi choeya. Majoya ecojja shacuaqui majje eya jjabapojjaquinaje — poanaje ma dejja. 16 Jamatii beca Paniseo cuaa huohui canaje jama ba'a: — Ma dejja Jesosa bajjaniya ca ca oe epojja ejomishocajjijo chaco cani, de — poanaje Paneseo cuana. Jamajjeya Jesosa Eyacuiñajjija huoojea'yo pojjeama poso jjashahuabaquime poanaje. Pea Paniseohua jama acanaje ba'a: — Chojja de, ohuaya cojjama' cuaya jjabapojjaqui mee canaje, pa. Jamaya pea cuana poanaje. Jamajjeya oya mimishi'ama. Dejja mimishiya jamaya po meemee'yo ajja — poanaje. Jamajjeya Jesosajo ojee jjamimicuiajea nobiajeaquinaje Paniseo cuana. 17 Jamajjeya oya cuaa ma dejja yahuajo cojjama' cuaya huohui'ajja ca o'oyanaje: — ¿Yajja acuae mijo poanaje Jesosa so'o? Jesosaa miya jjabapojjaqui mee canaje, pa cuana poani. Jamajjeya ¿yajja acuae miya poani Jesosajo so'o? ¿A'ya cuae oya? — poanaje Paniseo cuana. —Jesosa Eyacuiñajjija esohui huohuijji e'e jojo nei — saja'ame acanaje cojjama' cuayaa. 18 Jamatii Jodio etii cuana jjashahuabaqui sa po'yo ajja jama ba'a: —Oya cojjama' cuaya poa, jjabapojjaqui mee canaje Jesosaa. 19 Jamajjeya oja chii, ojaya enaese pea'ai iyaa canaje. Poeyajo, huohui'ajja canaje: — ¿A'a jiquio miquea ebacua ejja cojjama' cuaya poa? ¿Yajjajje acuae oya jjeya cojjajji? ¡Huohuicue ecuana! — poanaje. 20 Echii mese jama poanaje ba'a: — E'e, jiquio ecuanaja ebacua ejja. Yahuajo oya cuaya poa cojjama' nei. 21 ¿Yajjajje shai oya cojjajji'yo jjeya? Ecuanajaya ba jjima. ¿Aya acuae oya jjabapojjaqui mee canaje so'o? Ecuanaja ba jjima. ¿Apiojji acuae iñaya nequiaa huohui'ajjaña? Oya oe huohui'ajja socue; oya etii, esho'i pojjeama. ¡Ohuaya oe huohui cacue! —poanaje echii mese, enaese pea'ai. 22 Jamaya poanaje oya cuana, Jodio etii cuanajo quea mete jjejojoya. E'e, Jodio etii yahuajo jama poanaje ba'a: “Jesosa Eyacuiñajjija huoojea'yo ojjaña jaahuanajji, ¡a'a jama huohuime ajji! Jama mimime poajo jja oe ecuaaya miquianaya Jodioja equi ojee ejjachichaquijjijo esecue yasijje huoojeacuayajeaje'yo” poanaje Jodio etii cuana. 23 Quea mete poanaje oja chii, ojaya enaese cuana pea'ai. Jamajoya oja chiiya, ojaya enaeseya Jodio etii cuana huohui canaje jama ba'a: — ¡Oya oe huohui'ajjacue! Oya esho'i pojjeama, etii nojinoji. 24 Jamajjeya Jodio etii cuaa ma dejja cojjama' cuaya poa iyaa ca o'oyanaje ehuohuijji jama ba'a: — ¡Bacue! Ecuanaja eba jiquio dejja Jesosa quea mimishi. Jamajjeya Eyacuiñajji oe nei bihuiacue jama ba'a: “Eyacuiñajji quea pame nee nee; jamajjeya eya ohuaya jjabapojjaqui mee canaje ohuaye nei” — Jodio etii cuaa acanaje. 25 Cojjama' cuayaa saja'a canaje jama ba'a: — Miquianaya: “Jesosa quea mimishi” poani. Oya quea mimishi poani jojjemo eya jjabaqui ajja tii pome. Ecuea eba nei nei eya cojjama' cuaya poa; eya jjeya cojjajji'yo, oja jjabapojjaqui mee'yo — poanaje cojjama'. 26 Majoya oya huohui'ajja ca o'oyanaje Jodio etii cuaa jama ba'a: — ¿Yajja acuae mijo poanaje Jesosa? ¿Yajja acuae mi cojja aca'yonaje so'o? — poanaje cuana. 27 —E'e, eyaya miquianaya yahuajo huohuinaje Jesosa. Jamatii miquianaya jjashajja'ajjaqui ajja — oya poanaje—. ¿Apiojji acuaeya shajja'ajja o'oya sa aña so'o? ¿E'e pojja'a miquianaya o shajja'ajjajji poaje'yo? — poanaje cojjama' cuaya etii cuana nijje. 28 Majoya Jodio etii cuana onijje mimijajinaje jama ba'a: — Miya ca mi ca oe Jesosaja epeejji. Ecuana ca ca oe Moisesija esohui shajja'ajjajji poani. 29 Ecuanaja eba e'e jojo nei Eyacuiñajji yahuajo nei Moisesi nijje mimia poa. ¿Jesosa shai ajea huoojea jiquiacua? Cua'a de. Ba jjima ecuanaja — mimitecuetecueame poanaje Jodio etii. 30 —E'e pojja'a, de, — cojjama' cuayaa oya cuana acanaje—; ¿apiojji shai oya miquianajaya eba pojjeama so'o de? ¿A'a miquianajaya ba jjima Jesosa huoojeajji epo? ¡Bacue oe! Eya ohuaya jjabapojjaqui mee canaje. 31 Eyacuiñajjiya ca ca dejja quea mimishija esohui eshajja'ajjajji pojjeama onijje mimianijo. Ohuaya dejja quea pameja esohui shajja'ajja cani, oja sohui jayojja jama poanijo. 32 Yahuajo nei, jjeya nei pea'ai chama' pea dejja Jesosa jayojja. E'e, eya yahuajo cojjama' cuaya poa. Jjeya eya ohuaya cojjajji po mee canaje. Yahuajo nei nei meshi pana cajeahuajo chama' dejja poa Jesosa jayojja. Jjeya nei pea'ai chama' pea dejja Jesosa jama. Pea cuaa ohuaya jayojja jama a'ajja. 33 Jesosa Eyacuiñajjija huoojea jjima poa jojjemo ohuaya ma dejjaa ajjima acani ajjima aca quiaye, eya jamatii anijea quiaye — poanaje cojjama' Jodio etii cuana nijje. 34 Oja sohui quea pame shajja'ajja sa po ajjajojo Jodio etii cuana quea quene nee nee poanaje. Tecuea canaje jama ba'a: — ¡De! Miya quea mimishi nee nee jjejojo cojjama' cuaya poa; miya Eyacuiñajjija cajaa. ¿A'a ecuaaya miya shajja'ajjaje? Chojja. ¡Poquicue miya! ¡A'a jiquicua poe o'oyajji! ¡Ecuanaja ojee ejjachichaquijji equi yasijje a'a poe o'oya tiitiijji! —jamaya Jodio etii cuaa oya huoojeacuayajea canaje.

Joya Eyacuiñajji ba po jjima cuana cojjama' jayojja

35 Majoya pea cuaa Jesosa huohuiqui canaje jama ba'a: — Jodio etii cuaa cojjama' cajaa acanaje; Jodioja equi ojee ejjachichaquijji esecue yasijje huoojeacuayajea canaje, pa — poanaje. Jamajjeya Jesosaa oya sa'ajja canaje. Ba'yo majje huohui'ajja canaje jama ba'a: — ¿A'a miquea eba Eyacuiñajjija Bacua Ejja, Eyacuiñajjija huoojea'yo ojjaña jaahuanajji? — acanaje. 36 —Esohui huohuijji, oya ecuea ba jjima. ¡Oya mo ba meecue! Onijje iña jjapeequi'yo sa poani — poanaje. 37 —Eya jja iña iquio, de — Jesosa poanaje—, ma Eyacuiñajjija huoojea'yo ojjaña jaahuanajji poani. Miya jjeyahua nei Eyacuiñajjija Bacua Ejja nijje mimiani. Eya jja iña iquio, de — Jesosaa acanaje. 38 Majoya ohuaya Jesosa bihuia canaje ecui'oshajjajo nequi majje. Jama poanaje ba'a: — Ecuea Emeshi Mese, ¡eya miquea epeejji nei nei! —poanaje dejja cojjama' oja jjabapojjaqui mee'yo. 39 —E'e nei — Jesosa poanaje—, ecue Chiiya eya meshi yasijje huoojea canaje; huohui canaje jama ba'a: “¡Baquicue! ¿Achajja shai ojjaña cuana jjashahuabaquiani mijo? ¡Ba'ajjaqui socue!” Eyacuiñajjiya aca poa eya. Jiquio ecua cojjama' jjabapojjaqui mee'yaña jayojjaya eyaya ojjaña joya yahuajo Eyacuiñajjija esohui ba po jjima ba meesahuaje'yo. Ojjaña joya Eyacuiñajjija esohui ba nisho epo ecuea Eyacuiñajjija esohui eba meejji pojjeama. Jamajjeya oya cuana cojjama' jayojja tii poaje — Jesosa poanaje. 40 Paniseo cuana jomajo nequi Jesosaja esohui shajja'ajja majje jama onijje poanaje ba'a: — ¿A'a miya jjashahuabaquiani ecuanajo; Eyacuiñajjija esohui eba pojjeama ecuanajaya, jamajjeya cojjama' jayojja poani? — poanaje Jodio etii cuana. 41 —E'e — Jesosaa saja'a canaje—, miquianajaya Eyacuiñajjija esohui ba jjima nei nei jojjemo eyaya miquianaya ba mee'yome. Cojjama' jjabapojjaqui meenaje jama eyaya miquianaya amee'yome. E'e, eyaya miquianaya Eyacuiñajjija esohui ba mee'yome quea ja'a nee. Jamatii miquianaaya Eyacuiñajjija esohui ba neinei nishoañajo, Eyacuiñajjiya miquianaya tecuea caje'yo; quea nee nee po mee caje'yo cuaquijo — Jesosa poanaje.

Ñajjajja cuiñajji jayojja jama Jesosa ojaya epeejji jaahuanajji

1 Majoya Jesosa ojjaña nijje jama poanaje pea'ai ba'a: — Ecuea esohui ejjashahuabaqui meejji ñajjajja cuiñajjijo jama ba'a: Ñajjajja jaahuanajjiya ñajjajja cuana jiyojo cahui mee cani, ijjiacajji mase cuaa e'ijjia ca poajejje. Ejaahuanajji jiyo esecue jjanijo jaani, esecue jjani queya cani. Siipojji cuana ca ca ñajjajja jiyojje nequisohua majje quehua dobiquiani. Oya cuana siipojji jjejojo esecuejje dobiqui ajja. 2 Ñajjajja jaahuanajji ca ca esecuejje dobiquiani, de. 3 Jiyo esecue cuiñajjiya esecue ca'apejo cani ñajjajja cuiñajji dobiquijji. Dobiqui majje ejaahuanajjiya ojaya ñajjajja iyaa cani. Iyaa cajje o que poeyani. Ñajjajja jaahuanajji ehui dojojji poquiani esecue yasijje. 4 Cuayaqui majje ñajjajja cuana o quiquishijji poquiani. E'e, ejaahuanajjija esohui ojaya ñajjajjaja eba, eshajja'ajjajji. Jamajjeya o quiquishijji poquiani. 5 Peaa iyaa cajje ñajjajjaa shajja'ajja jjima acani; poe ajja. Jamajjeya oya ñajjajja poqui ajja pea nijje; ba jjimajo cuajicuajiquehuajeananani — Jesosa poanaje. 6 Jesosaja sohui ejjashahuabaqui meejji ohuaya huohui canaje Jodio cuana huasijje. Jamatii ojaya, Jodio cuanaja quea quehua; jama acanaje ba'a: — ¿Ajeo acuae ca oya mimiani ecuana nijje? — poanaje. 7 Jamajjeya Jesosaa oya cuana huohui ca o'oyanaje: — ¡Bacue, oe! Eya, Jesosa esecue jjani jayojja jama poani. Ecuea epeejji dobiqui meesahuaña. 8 Ojjaña ejaahuanajji nisho cuana ca ca sii sa poani. Jiquio ecua ñajjajjaa peaja esohui ba jjimajo pea nijje poquiquehua ajja jama jayojja ecuea epeejji nei nei esohui huohuijji nishojo jjashajja'ajjaqui ajja — Jesosa poanaje—. 9 E'e, eya esecue jjani jayojja poani; ojjañaa eya shajja'ajja canijo, enijje jjapeequianijo pea'ai, eyaya oya cuana ba'e tiitii meeje'yo enijje. Jiquio ecua ñajjajja jaahuanajjiya ojaya ñajjajja esecuejje dojocuayaqui cani bobi ijjiaa, jiyo huasijje jaahuana cani pea'ai jayojja jama eyaya ecuea epeejji ba'e meesahuaña quea pame nee, Eyacuiñajjija esohui jama — Jesosa poanaje—. 10 Siipojji poeyani ñajjajja siiya, cuaquisho meeya pea'ai, quecuaa pea'ai. Jamaya esohui huohuijji nisho cuana siajje poani, sii cani, ecuea epeejji cuana poquiquehua mee cani eshahua nijje, de. Eya ca ca poeyanaje quea ja'a nee nee ba'e meeya, pea ejjashahuabaquijjijo ba'e meeya. 11 —E'e, eya ñajjajja cuiñajji quea pame nee jayojja jama poani. Ñajjajja cuiñajjiya ojaya ñajjajja nahue neinei cani ijjiacajji maseya e'ijjia ca poaje jjejojo. Oya jayojja eya manoje'yo ecuea epeejji cuana ba'e tiitii mee'yojji. 12 Echacojji ca ca eñajjajja mese pojjeama jjejojo ijjiacajji mase ba majje cuajicuajinanani; ñajjajja jeajea cananani. Jamajje ijjiacajji maseya ñajjajja cuana ijjia cani; poquiquehuajeanana mee cani pea'ai. 13 Ñajjajja cuana ojaya nahue'ama. Echacojji cuajicuajijeananani, ojaya pojjeamajojo mi nahue cani — Jesosa poanaje. 14 —Eya ca ca ñajjajja cuiñajji quea pame nee jayojja jama poani. Ecue Chiiya eya quea jea nee acani; oya ecuea quea jea nee pea'ai. Oya jayojjaya eyaya ecuea epeejji cuana quea jea nee nee aña; eya ecuea epeejjija quea jea nee pea'ai. 15 Jamajjeya eyaya oya cuana nahue neineiaña, ecuea epeejji cuana. Jamajjeya ojaya mimishi cuijea'yojji eya manoje'yo ona ba'e tiitii mee'yojji — Jesosa poanaje—. 16 Pea cuana yani pea'ai, Jodio cuana pojjeama. Ohuaya pea'ai ecuea esohui shajja'ajja caje'yo. Ecuea epeejji poaje'yo pea'ai. Eyaya oya cuana jjapeequi meesahuaje'yo pea'ai. Jamajjeya ojjaña cuana ojee cajjapeequiahua; eya ca ca oe o jaahuanajji poaje'yo — Jesosa poanaje. 17 —Ecue Chiiya eya huoojea canaje ojjaña jaahuanaa. Jamajjeya ecuea epeejji ba'e tiitii mee'yojji eya manoje'yo, ona nahuejo. E'e, e quecua'yojji yani. Jamatii eya quecua ca'yajje shequije o'oya mo. Jamajjeya eya ecue Chiija quea jea nee nee. 18 Eya quea ca'a nee nee poani. Jamajjeya ecuea epeejjijo mano'yo sa po'yo ajja jojjemo pea cuaa eya equecua'yojji pojjeama pome. Jamatii eya manoje'yo jama poani ba'a: “E'e, ecuea epeejjija mimishi cuijea'yojji mano'yo sa poanijo eya manoje'yo”. Mano'yo majje eya shequije o'oya. Ecue Chiiya eya jamaya huoojeame aca poa — Jesosa poanaje Jodio cuana nijje. 19 Jesosaja esohui shajja'ajja majje Jodio cuana ojee jjamimicuiajea nobiajeaquinaje jama ba'a: 20 —¡Oya Jesosa niñepoqui, de! ¡Oya quea jjashahuabaqui tai mimime poani! ¡A'a oya shajja'ajjajji! — poanaje beca cuana. 21 —Chojja, de oya niñepoqui pojjeama. Esohui quea pame nee nee huohui cani. Ohuaya ca ca oe cojjama' cuaya jjabapojjaqui mee ca'yonaje. Jamaya po ajja niñepoqui cuana — poanaje pea cuana. Jodio cuana ojee jjachichaqui'yajo, Jesosaa huohui ca o'oyanaje jama ba'a: — Eya Eyacuiñajjija Bacua Ejja e'e jojo nei 22 Quijje eeno shejo ojjaña Jodio cuana Jenosanena huasijje ojee jjachichaqui o'oyanaje. Quea bihui nee poanaje ma shejo. E'e, ma shejo yahuajo nei Eyacuiñajjija equi pea iya ca o'oya poa quea bame nee. Jamajjeya ma shejoya ma shahuaba tiitii capoquiani Eyacuiñajji bihuia capoqui tiitiiani. Cuaquijiji sisi dedo cani quea cahui huiso. 23 Ma shejo Jesosa Eyacuiñajjija equi yasijje poqui o'oyanaje. 24 Equi quibojo jeojeonequinaje. Jodio dejja cuana o que jjachichaquinaje. Jama huohui'ajjame acanaje ba'a: — Jesosa, ¿apiojji miyaya ecuana huohui jjima? ¿A'a miya Eyacuiñajjija huoojea'yo ojjaña jaahuanajji? ¡Ecuana e'e nei huohuicue quea ja'a nee! — poanaje Jodio cuana. 25 Jesosaa oya cuana jama acanaje ba'a: — E'e, eyaya miquianaya huohui huicha'a huicha'anaje yahuajo. Jamatii jjashajja'ajjaqui ajja. Ecue Chiiya eya ma dejjaa ajjima acani ameesahua cani miquianajaya ebajji nisho eya oja huoojea'yo ojjaña jaahuanajji. 26 Jamatii miquianaya jjashajja'ajjaqui sa po ajja ecuea epeejji pojjeama jjejojoya. Jamaya eyaya miquianaya huohuinaje ba'a: “Ejaahuanajjija emimi ojaya ñajjajjaja eba; jamajjeya onijje poquiani”. 27 Jama jayojjaya ecuea epeejji cuaa ecue sohui shajja'ajja cani, enijje poquiani tii pea'aiya. E'e, ecuea epeejji cuana ecuea eba. 28 Eyaya oya cuana ba'e tiitii meeaña. Jamajjeya oya cuana quea nee nee epo mee'yojji pojjeama cuaquijo, Eyacuiñajjiya. Eyaya ecuea epeejji cuana jaahuanañajo pea cuaa oya ecuaquisho meejji pojjeama eshahua nijje. 29 Ecue Chiiya, Eyacuiñajjiya ecuea epeejji cuana enijje jjapee meequi cani. Oya oe nei quea ca'a nee nee; pea cuana ca'a'ama. Ohuaya oya cuana jaahuana canijo cuaquisho meemee ajja eshahua nijje. 30 E'e jojo nei eya ecue Chii jayojjaya poani tii — Jesosa poanaje. 31 Ma shajja'ajja majje Jodio etii cuaa mei iña ca o'oyanaje Jesosa jajahuejjajeajji nisho. 32 Jamajjeya Jesosaa oya cuana acanaje: — Ecue Chiiya eya quea pame nee ma dejjaa ajjima acani amee cani. Jamajjeya ¿apiojji acuae iña jajahuejjajea sa aña so'o meiya? — huohui'ajjame acanaje Jesosaa. 33 —Chojja, mi jajahuejjajea sa po ajja ca ca ecuana miyaya ma dejjaa ajjima acani quea pame añajo. Miya siajje poanijo ca mi ca oe jajahuejjajeame. Miya aje mi dejja; jamajjeya ¿apiojji acuae oe miyaya jama huohuime aña ba'a: “Eya Eyacuiñajji jayojja tiiya” poani? — Jodio etii cuaa Jesosa Eyacuiñajjija Bacua pojjeama poso tii acanaje. 34 Majoya Jesosaa oya cuana jama acanaje ba'a: — Miquianajaya eba Eyacuiñajjiya yahuajo nei nei tehue mee ca poa Jodio jaahuanajji cuanajo jama ba'a: “Miquianaya Eyacuiñajji jayojja poani”. Jama tehuemeya aca poa yahuajo. 35 Jamajjeya ¡Eyacuiñajjija etehue'yo e'e nei shajja'ajja tiitiicue! Ma etehue'yojo ohuaya huohui ca poa Jodio esohui huohuijji Eyacuiñajji jayojjaya poa. 36 Jamajjeya eya ca ca oe ecue Chiiya babaca ca poa ojjaña jaahuanajji; eya eyajo ani huoojea ca poa meshi yasijje. Jamatii: “Eya Eyacuiñajjija Bacua Ejja” anajejo, miquianaaya eya tecueaña. Jama poani ba'a: “Miya siajje poani Eyacuiñajji jayojja miame” poani miquianaya. ¿Apiojji jamaya poani? — Jesosa poanaje—. 37 ¡Bacue! Eyaya ecue Chiiya acani jayojja a'ajja jojjemo ¡a'a eya shajja'ajjame so'o! 38 Miquianaya ecue esohui shajja'ajja sa po ajja; jamatii ecue Chiiya acani jayojja quea pame nee eya añajo, jjashahuabaquicue jama ba'a: “Jesosa Eyacuiñajjija huoojea'yo poani”. ¡Jamajoya jjabahuejjaquicue e'e jojo nei eya ecue Chii jayojjaya, de; oya e jayojjaya pea'ai poani! — Jesosa poanaje. 39 Jamatii Jodio cuaa Jesosa siajje poani poso acanaje. Jamajjeya ojee jama poanaje ba'a: — ¡Cua'a, oya ejja'iñaquiqui ejeanobiajji! — taaame poanaje. Jamatii Jesosa quea huiso nee nee dejja nequi tejjee quehuajje poquinaje, jja'iña meequi jjima. 40 Majoya Jesosa poqui o'oyanaje cuei Jodana ojje miji yasijje, ma yahuajo Huaniya ona besa mee ca poa huasijje. 41 Jomajo o anijo quea huiso dejja cuana o baa poeyanaje. Jjachichaqui majje jama ojee miminaje ba'a: — E'e, yahuajo Huaniya ajjima aca poa ma dejjaa ajjima acani; jamatii ojjaña ojaya ehuohui'yo Jesosajo e'e nei poanaje — acanaje cuaa. 42 Jamajjeya ojjaña jomajo Jesosajo jama poanaje ba'a: — E'e jojo nei Jesosa Eyacuiñajjija huoojea'yo ojjaña jaahuanajji.

Nasano mano'yonaje

1-2 Pea cuiñajjijo Betania bajjanijo Jesosaja epeejji cuana ba'enaje: Nasano, oja jjo'i cuana Manta, Mania pea'ai. Maniaa Jesosa ojaya quea jea neejo quijje oya jiojji sha canaje shiyeshiyeya. Sha majje ejiojji cui ca'yonaje ojaya esaohua, Maniaa. Jesosa Jodana cuei ojje mijijje anijo, Maniaja eno mese Nasano quea mano nee nee poanaje. 3 Jamajjeya ejjo'i mese cuaa pea huoojea canaje Jesosa que: — Nasano quea mano jaa. Jesosa ba majje jama huohuime acue ba'a: “Emeshi Mese Jesosa, miquea epeejji Nasano quea mano nee nee jaa, poquijeyoje pojja'a” acue. 4 Jamajjeya ma dejja poquinaje Jesosa que. Huohui cañaquinaje. Nasanojo shajja'ajja majje Jesosa jama poanaje ba'a: — E'e, oya mano'yo majje jamatii emano'yo tii tii pojjeama poaje. E'e, quijje ojo ojjaña cuaa Eyacuiñajji bihuia caje'yo; ejo pea'ai jama huohuime acaje cuaa ba'a: “E'e, miya Eyacuiñajjija Bacua Ejja quea pame nee nee, quea ca'a nee pea'ai; ojjaña miyaya aña” acaje cuaa — Jesosa poanaje. 5 Jesosaja quea jea nee nee Manta, Mania pea'ai, oja jjo'i jayojja, oja o'i jayojja Nasano poani pea'ai. 6 Jamatii Nasano quea mano nee nee jaa ba majje Jesosa jomajo tii aninaje becanejjijji pea'ai cahuime, poqui jjima poanaje. 7 Majoya ecuana huohui canaje Jesosaa: — Cua'a, ¡Jodea meshi yasijje epoqui o'oya! — poanaje. 8 —Chojja, Jesosa — saja'ame anaje ecuaaya—, yahuajo pishana Jodio cuaa jomajo ba'eya miya jajahuejjajea sa acanaje meiya. ¿A'a jamatii miya poqui o'oya sa poani jocuama? — anaje. 9 —E'e — Jesosa poanaje—, eya poquije. ¡Bacue! ¿A'a eshequi jaasohua jjimahuajo ejiojjijje poquije? Quea apo. Eshequiya jeaja'a canijo ejjaquecuasajaquijji pojjeama ejiojjijo. E'e, eshequiya jeaja'a canijo, ejiojji baje quea ja'a nee. 10 Mecajje quea misi poanijo ca ca dejja oque chana' ejiojjijje poquianijo. Oya jayojja eyaya ecue Chii nijje chacoañajo, ohuaya eya jaahuana cani, onaya eya quecua'yo jjima amee cani. Ojaya eba nei epojja e mano'yojjijo. 11 Jamaya ecuana huohui majje Jesosaa jama acanaje ba'a: — Eseja epeejji Nasano cahui'yonaje. Jamatii eya poquije o ishe'a'yohua. 12 Jesosa jamaya poanijo, Nasano mano'yo jjima poso ecuaa jama anaje ba'a: — Jesosa, Nasano cacahuiquiahua. Cahui majje oya jjaajaquije'yo. 13 Jesosaja eba Nasano emano'yo, epoquijeyo'yo jaa. Ecuana ca ca jjashahuabaquiani jama ba'a: “Nasano jamatii cahuijaa” poso anaje ecuaaya. E'e, Jesosaja esohui ecuanaja quea quehua poanaje. 14 Jamajjeya Jesosaa huohui ca o'oyanaje jama ba'a: — Epeejji cuana, Nasano epoquijeyo. Chama'yo tii jaa. 15 Eya Nasano nijje ani jjima poanajejojo oya mano'yonaje. Jamatii jamaya miquianajo quea pame nee poaje'yo. E'e, eyaya Nasano shequi meeje o'oya ba majje miquianaya jjabahuejjaquije'yo eya e'e jojo nei Eyacuiñajjija huoojea'yo ojjaña jaahuanajji. ¡Cua'a, Nasano ejjaba'ajjaquiqui! — Jesosa poanaje. 16 Jesosa shajja'ajjajji Tomasi, ma Becajaa bajjani miminaje pea shajja'ajjajji cuana nijje, ecuana nijje jama ba'a: — ¡Cua'a, Jesosa nijje epoqui! Jodio etii cuaa o cuia ca'yajo ecuana ojee Jesosa nijje tii manoje'yo pea'ai.

Jesosaa Manta, Mania pea'ai yeno'ama po mee sa acani

17 Quijje Jesosa poeyanaje Nasanoja equi yasijje. Ba caña'yonaje Nasano epoquijeyo'yo poanaje. E'e, ebeca pee pea'ai cahuime yahuajo oya ehuananobia jaanaje mei jjani yasijje, enaba capa jaanaje. 18 Betania cuiñajji Jenosanena chipi nei ani. 19 Jamajjeya quea huiso Jodio cuana poeyanaje Manta, oja shehue Mania pa sahuaa, oja noo Nasano emano'yojo. 20 Jamajjeya Jesosa ejiojjijje poeyani shajja'ajja majje Manta cuayaquinaje Jesosa baa. Mania ca ca equijo aninaje, poqui jjima ca oma poanaje. 21 Jamajjeya Mantaa Jesosa ba majje huohui cañaquinaje jama ba'a: — Jesosa, ecue noo mano'yo jjimahuajo, miya jiquiacua epoe jojjemo oya mano'yo jjima poquiaye. 22 Jamatii ecuea eba jjeya nei pea'ai miya Eyacuiñajji nijje mimianijo, ohuaya miquea esohui jama acaje'yo — poanaje Manta. 23 —Manta, mique noo shequije o'oya, she — poanaje Jesosa. 24 —E'e — Manta poanaje—, jamaya ecuea eba oya shequije o'oya quijje nei, Eyacuiñajjiya ojjaña emano'yo cuana shequi mee ca o'oyajo, meshi oe poajo. 25 Jesosa poanaje: — Manta, eya ca ca iña ojjaña shequimee'yojji nei. Eyaya oya shequi meeje o'oya Eyacuiñajji nijje eba'e tiitii'yojji. Jamajjeya ojjaña joya e'e jojo nei enijje jjapeequiani ba'e tiitiije'yo eyajo. Eyaya oya cuana ba'e tiitii meeje'yo jamatii yahuajo emano'yo cuana. 26 Ojjaña ecuea epeejji jjeya nei eshe nequi pea'ai eyaya ba'e tiitii meeje'yo, mete'ama poaje'yo emano'yojji. ¿A'a jamaya miyaya baña? — Jesosa poanaje. 27 —E'e Jesosa, ecuea eba miya Eyacuiñajjija huoojea'yo ojjaña jaahuanajji, Eyacuiñajjija Bacua Ejja. Miquea epoe'yojjijo yahuajo nei Eyacuiñajjija esohui huohuijjiya tehue ca poa — Manta poanaje. 28 Majoya Manta poqui o'oyanaje Mania que. Ba majje oya quehuajje huohui canaje jama ba'a: — Mania, Jesosa poeyanaje. Ohuaya miya iyaa cani — poanaje. 29 Mantaja esohui shajja'ajja majje Mania nequisohuanaje. Poquicuajinaje Jesosa baa. 30 Jesosa Betania huasijje dobiqui jjima; ohuaya Mania ishoa ca aninaje jomajo, ma o Manta nijje mimimimi aninajejo tiiya. 31 Jodio cuaa Mania nijje equijo pa aniya oya ba canaje poquicuajije. Jamajje onijje poquinaje; jama poanaje ba'a: — Mania papoquinaje oja noo ehuananobiajaa huasijje quea yeno nee nee jjejojo. 32 Maniaa poe majje Jesosa ba cañanaje. Ecui'oshajjajo nequiya huohui canaje: — Jesosa, miya jiquiacua epoe jojjemo ecue noo mano'yo jjima poquiaye — Mania poanaje. 33 Jesosaa Mania pa'ani ba majje, Jodio cuana Mania nijje pani ba majje pea'ai quea yeno poanaje. Quea yeno jjashahuabaquinaje Jesosa onajo. Jamajjeya huohui'ajja canaje jama ba'a: 34 —¿Achacua acuae nequiaa Nasano huananobianaje so'o, she? — Jesosaa acanaje. — Esohui huohuijji, ¡poecue; bahuacue! — poanaje cuana. 35 Jesosa cojjana cuayaquinaje onajo quea yeno po majje. Poquinaje onijje. 36 Jamajjeya Jodio cuana jama poanaje ba'a: — ¡Bacue! Jesosa pea'ai pani. Nasano ojaya quea yeno nee nee ojaya epeejjijojo, de — poanaje Jodio cuana. 37 — E'e pojja'a — beca cuana poanaje—. Yahuajo Jesosa dejja cojjama' cuaya jjabapojjaqui mee ca poa. ¿Apiojji shai oya yahuajo poecuaji jjima Nasano jjaajaqui mee'yohua? Jamajjeya oya mano'yo jjima poquiaye. 38 Onajaya esohuijo Jesosa quea yeno nee nee poquinaje jjani ai yasijje. Mei copo enequi jjani secue capajji. 39 Jamajjeya Jesosaa jama acanaje ba'a: — ¡Esecue jjani capajji'ya mei jeacajjajjajea'yocue! — poanaje. —Chojja, ecuea Emeshi Mese — Nasanoja jjo'i Manta poanaje—. Oya yahuajo huananobia canaje, ebeca pee pea'ai cahuime. Jjeya quea ihui nee nee — Manta poanaje. 40 — Manta, eyaya miya huohuinaje: Eya Eyacuiñajjija huoojea'yo ojjaña jaahuanajji ba majje miya jjabahuejjaquije'yo Eyacuiñajji quea ca'a nee nee, quea pame nee nee; ohuaya eya ojjaña amee cani ma dejjaa ajjima nei nei acani pea'ai — Jesosa poanaje. 41 Majoya secue jjani capajji'ya mei jeacajjajjajea canaje cuaa. Jesosa eyahuasijje jjabajeasohuaquinaje Eyacuiñajji nijje emimijji. Nasanojo jama miminaje ba'a: — Ecue Chii, eyaya miya bihuiaña. Ecuea esohui miyaya shajja'ajjaña Nasano shequi mee'yojji. 42 Ecuea eba miyaya eya shajja'ajja neineiaña minijje mimianijo. Jamaya eya poani, ojjaña jiquiojo nequi jjabahuejjaquijji miyaya e'e jojo nei eya huoojeanaje. E'e ecue Chii, apoa — Jesosa poanaje. 43 Eyacuiñajji nijje mimi majje Jesosa taaanaje jama ba'a: — Nasano, ¡shequi'yocue, oe; cuaya'yocue! — poanaje. 44 Jamajjeya Nasano shequi'yo majje cuaya'yonaje. Oya daqui osheja bebo tii, oja ejiojji, oja eme cuana pea'ai. Oja sapa ebebo pea'ai poanaje pea daqui osheja. Jamajjeya Jesosaa huohui canaje jama ba'a: — E'e, ¡oya ebebojji'ya pichojeajea'yocue! ¡Daqui oshe huijjiajea'yocue! Oya capoqui'yahua equi yasijje — poanaje. Jamajjeya Nasano poqui'yonaje. 45 Jamajjeya quea huiso Jodio cuaa Mania baa poeya ba canaje Jesosaa Nasano emano'yojaa shequi mee ca'yonaje. Ba majje Jesosajo jama poanaje ba'a: — E'e jojo nei oya Eyacuiñajjija huoojea'yo ojjaña jaahuanajji; ¡onijje ejjapeequi'yojji! 46 Beca cuana ca ca Jenosanena huasijje poqui o'oyanaje Paniseo cuana huohuiya: — Jesosaa Nasano emano'yojaa shequi mee ca'yonaje, de —poanaje cuana. 47-48 Jamajjeya Eyacuiñajji nijje emimijji etii cuaa, Paniseo cuaa pea'aiya ojjaña Jodio etii ojee iyaa canaje Jesosajo emimimimijji. —¿Yajja acuae seya Jesosa aje so'o, de? Ohuaya ma dejjaa ba jjima acani quea huiso. ¡Cua'a ejja'iñaquiqui oya! ¡Oya esohui ejjahuohui pajea meequi! Ojjaña aje oe onijje jjapeequije'yo, de. Majoya Shomano meshi mese cuana ojo quea mete poaje, ejjajjequiquije poso. Jamajjeya ese nijje jjacuiaqui majje jeabichajea caje'yo. Jiquio Eyacuiñajjija equi jajacajjajea caje'yo pea'ai, Shomano cuaa — poanaje Jodio etii cuana. 49 Ma shequiajajo dejja Caipa bajjani Eyacuiñajji nijje emimijji etii poanaje Jodioja. Ohuaya pea cuana huohui canaje jama ba'a: — Ae po cajji Jesosajo ecuea ohuejaya eba. ¿A'a miquea ba jjima? 50 ¡Eya shajja'ajjacue! E'e, Shomano cuaa Jesosajo quea mete po majje eseya quecua jeyojeyo ca'yo chana'. Jamajjeya oe dejja, Jesosa camanoqui'yahua ojjaña cuanajo. Jamaya esejaya quea pame poaje'yo. Jamajjeya ojjaña cuana mano jeyojeyo'yo ajja poaje — poanaje Caipa. Jamatii ohuaya ojaya ejjashahuabaquijjijo pojjeama huohui canaje. 51 Oya, Caipa Eyacuiñajji nijje emimijji etii ma shequiajajo. Jamajjeya Eyacuiñajjiya oya huohui meesahua canaje Jesosajo jama ba'a: — Jesosa quijje pishana ojjaña Jodio cuanajo manoje'yo. 52 E'e, ojjaña quea huesha ba'e cuanajo pea'ai, joya Eyacuiñajjija epeejji quijje poaje ojjaña meshijo ba'e cuanajo pea'ai manoje'yo Jesosa. Jamajjeya ojjaña meshijo ba'eca cuana ojee jjapeequi mee caje'yo, Eyacuiñajji bihuiajji cuana. 53 Jamajjeya Caipaja esohui shajja'ajja majje Jodio etii cuana ojee jjashahuabaquinaje Jesosa quecuajji: — ¡Jesosa ejjaquecuaqui'yo! — poanaje. 54 Jamajjeya majoya Jesosa po'ayequi jjima poanaje Jodioja meshijo Jodio cuana nijje. Oya quehuajje poquinaje Epaini cuiñajji sisi yasijje, quima' meshi pejjejo. Jomajo ba'enaje o shajja'ajjajji cuana nijje. 55 Quijje pishana ojjaña Jodio dejja cuana ojjaña meshijo ba'e poqui o'oyanaje Jenosanena huasijje. Jamajjeya ma shejo ba'a: Esohuidojojji cuaa yahuajo nei nei Ejito meshijo Jodioja bacua cuana cuia'yo jjima shejo Jenosanena huasijje jjachichaqui canaje. Majoya Jodio etiiquianaja ehuohui'yo jayojja jama quea huiso besa majamaja canaje cuana ojee quea bihui nee ijjia'ijjia jjimahuajo. 56 Jenosanena huasijje poe majje ojjaña Jodio cuaa Jesosa sa'ajja canaje. Eyacuiñajjija equijo jjachichaqui majje ojee mimimiminaje Jesosajo: — ¿Ae jjashahuabaquiani miquianaya? ¿A'a Jesosa poeje jiquiacua Jenosanena huasijje ojee ijjia'ijjiaa? ¿A'a poe ajja pojja'a? — poanaje. 57 Jamaya miminaje Jodio etiija esohuijo. Paniseo cuaa, Eyacuiñajji nijje emimijji etii cuaa pea'aiya jama huoojea canaje ba'a: — Jesosa ba majje ¡ecuana huohuicuajihuacue e'iña meejji! — acanaje etii cuaa—. Miquiaa mi huohuiajje quea quene nee nee poaje ecuan a.

Maniaa Jesosaja ejiojji shacua canaje shiyeshiyeya

1 Majoya Jesosa Epainijo nequi Betania huasijje poeyanaje me oejje oe cahuime Jodio cuana ojee ijjia'ijjia jjimahuajo. Jomajo ba'enaje Nasano, ma ohua emano'yojaa shequi mee ca'yonaje. 2 Jomajo Mantaa Jesosajo quea bihui poanijo bobi quea huiso cuacua mee canaje. Quea huiso iyaa canaje Jesosa nijje e'ijjia'ijjiajji. Nasano pea'ai onijje ijjia'ijjianaje. 3 Majoya Jesosa ojaya quea jea neejo Maniaa shiyeshiyeya quea nahue nee neeya Jesosaja ejiojji sha canaje. Quea huiso sha canaje, oe tahuoo shiyeshiye oe acanaje. Sha majje Jesosaja ejiojji cui ca'yonaje oja esao aohua, Maniaa. Equi quea shiye nee nee poanaje shiyeshiyeya sha cajje. 4 Jamajjeya Jesosa shajja'ajjajji Jodasa Isicanioteya, ma quijje Jesosa iña meesahua'yojji epojjiya Mania ba canaje. Ba majje Jodasa quea tecue jama poanaje ba'a: 5 —¡Dee! ¿Apiojji acuaeya shiyeshiyeya shanaje so'o? Ma shiyeshiye quea nahue nee nee baña cuaa, shequiaja oe chaco majje sose huisoajja jiquio shiyeshiye, de. Quea huiso bejjo sosejje oya equia jojjemo bejjo quea huiso iña caquiaye, majoya bejjo sosejje cuana jja oe aema' cuana bobia quiayeya — poanaje Jodasa. 6 Jamatii oya Jodasa aemajo pojjeama jjashahuabaquinaje. Chojja, oya ca ca oma siipojji. Ojjaña Jesosa shajja'ajjajji cuanaja ejjeshejji cuiña nisho cani bashosoco sisijo. Ma sii poquiame beca cuana bejjo, Jodasaa acanaje. 7 Jesosaa Jodasa tecuea canaje jama ba'a: — Jodasa, ¡a'a jiquio epona tecueajji! Ojaya eba eya quijje pishana manoje'yo. Jamajjeya eya sha canaje shiyeshiyeya, e mano'yojji jojoya. 8 E'e, eya miquiana nijje e'ani tiitiijji pojjeama. Aema' cuana ca ca miquiana nijje yani tii tii, de. 9 Quea huiso Jodio cuaa shajja'ajja canaje Jesosa Betania huasijje poe'yonaje. Quea huiso cuana poeyanaje Jesosa baa, Nasano pea'ai baa. Onajaya eba Jesosaa Nasano shequi mee ca'yonaje. Jamajjeya Nasano ba sa poanaje pea'ai. 10-11 Nasano shequi mee ca'yonajejo quea huiso nee nee huohui canaje jama ba'a: — ¡E'e jojo nei Jesosa Eyacuiñajjija huoojea'yo ojjaña jaahuanajji! E'e, Nasano shequi mee ca'yonajejo Jodio etii cuanaja esohui shajja'ajja pajea canaje cuaa. Jamajoya Eyacuiñajji nijje emimijji etii cuana jjashahuabaquinaje jama ba'a: — ¡De, Nasano pea'ai caquecuajea'yahua Jesosa nijje tii!

Jesosa Jenosanena huasijje dobiquinaje mapichi sisija edaasa biajje

12 Jamajjeya mecajjeahua ojjaña Jodio cuaa ma ojee ijjia'ijjiaa poe'ya shajja'ajja canaje jama ba'a: — Jesosa ejiojjijje poeyani Jenosanena huasijje. 13 Jamajjeya ojjaña cuana jememe iña jaja majje poquinaje Jesosa baa. Poquijeya jememe iña cuana jeasohua canaje. Jamaya Jodio cuaa acanaje pea bihuiajji, emeshi mese ja'ajjequijji cuiñajji yasijje. Jesosa bihuia canaje pea'ai. Taaanaje jama ba'a: — Jesosa, ¡miya ojjaña jaahuanajji poeyanaje! ¡Eyacuiñajjiya miya huoojea canaje! ¡Ohuaya miya cajaahuana cahua! E'e de, miya ecuanajaya, Isaeni cuanajaya Emeshi Mese oe nei —taaame poanaje ojjaña cuana. 14 Jesosa mapichi sisi ba majje o daasa biajje anisohuaquinaje. E'e, Jesosajo Eyacuiñajjija esohui yahuajo nei etehue'yo jayojja jama poanaje jama ba'a: 15 “Ojjaña Jenosanenajo ba'e cuana huohuicue jama ba'a: — ¡Quea bei pocue! ¡Bacue oe! Miquiana huoojea'yojji nei poeyani. Oya quea bei nee. Jamajjeya mapichi sisija edaasa biajje poeyani —huohuicue cuana”. aya yahuajo tehue ca poa Jesosajo. 16 Ma etehue'yojo jjashahuabaqui jjimahuaa ecuaaya jama anaje ba'a: —¿Yajjajje shai quea huiso nee nee jjachichaquiani Jesosa que, o bihuiaa so'o? Quijje ca ca Eyacuiñajjiya Jesosa emano'yojaa shequi mee caje o'oya; majoya ecuanaa niñebaje'yo jama ba'a: — E'e de, esohui huohuijji cuana yahuajo ba'eja etehue'yo jama acanaje Jesosajo — quijje jamaya niñebaje'yo ecuanaa Jesosa shequi o'oyajo. 17 Yahuajo Jesosaa Nasano shequi mee ca'yajo, quea huiso dejja cuaa ba ca poa Jesosa. Ma dejja cuaa ojjaña huasijje huohui huicha'a huicha'a ca poquia poa jama ba'a: — Nasano mano'yo majje jjanijo ehuananobia jaanaje. Jesosaa iyaa cajje oya shequi o'oyanaje, de — acanaje cuaa Jesosajo. 18 Jamajoya Jesosaa acani ma dejjaa ajjima acanijo quea huiso cuana poquinaje o baa, ejiojjijje poeje baa. 19 Jamajjeya Jesosa poeyanaje Jenosanena huasijje. Majoya Paniseo cuana quea quene ojee mimimiminaje jama ba'a: — ¡Bacue! Ecuanaaya pea dejja cuana Jesosa nijje jjapeequi pajea mee ajja. Chojja, de. ¡Bacue oe! Ojjaña tii Jesosa nijje jjapeequiani. Ecuanaja esohui shajja'ajja sa po'yo ajja. Jesosa iña meesahua ajja pea'ai, de — poanaje Paniseo cuana.

Jesosaa huohui canaje ojaya epoqui'yojji eyahuasijje e'ani'yojji

20 Beca Jodio cuana quea huesha Jieno meshijo ba'e pea'ai ma shejo poeyanaje Jenosanena huasijje ojjaña nijje ijjia'ijjiaa, Eyacuiñajji bihuiaa. 21 Oya cuana poeyanaje Penipe que, ma Betesaidajo ba'e que. Onijje jama poanaje ba'a: — Penipe, ecuanaya Jesosa ba sa neinei poani — poanaje. 22 Jamajjeya Penipe ojaya epeejji Anesi que poqui majje pea cuanaja esohui huohui canaje. Majoya ojee poquinaje Jesosa huohuiya. 23 Shajja'ajja majje Jesosaa oya cuana jama acanaje ojjañaja eshajja'ajjajji ba'a: — E'e, eyaya Eyacuiñajjija esohui oe a'yonaje. Apoa a'yonaje. Jjeya nei eya, ojjañaja Edoe Mese manoje'yo. Eyacuiñajjiya eya mano'yajo dojosohuaqui caje'yo eyahuasijje. Onijje quea ca'a nee nee ani mee caje'yo. 24 Eyaya e'e jojo nei huohuiaña jama ba'a: Eso' quecua majje pohuani. Jamajjeya jjajja majje quea huiso eso' poaje'yo. Eso' quecua jjima ani jjapapaqui ajja. Jiquio ecua eso' quecua cajje quijje jjajjani jayojja jama poaje ejo. Onaa quecua cajje eya manoje'yo ojjañaja mimishi cuijea'yojji sosejje. Jamajjeya eyaya quea huiso ba'e tiitii meeje'yo enijje eyajo. 25 Jamaya pea'ai joya enijje jjapeequiani dejja mimishi cuaa quecua caje'yo pojja'a. Jamatii enijje jjapeequianijo, mano'yo majje eyajo ba'eje'yo tii tii quea pame nee. Quea mete nee nee jjejojo enijje jjapeequi'yo ajjajo ca ca mano'yo majje cuaqui yasijje dobiquije'yo tii tii, quea nee nee poaje'yo. 26 Ojjañaa joya enijje chaco sa poaniya ¡eya cashajja'ajja cahua! Ecuea echacojji cuana quijje enijje ba'e tiitiije'yo. Ecue Chiiya oya cuana jama huohuime acaje ba'a: “E'e, jamaya. Miya Jesosaja echacojji quea pame nee” acaje Eyacuiñajjiya — Jesosa poanaje—. 27 Jjeya eya quea yeno. ¿Ajeo mimi cajji ecue Chii nijje so'o? ¿A'a jama mimi cajji pojja'a ba'a: “Ecue Chii, ¡a'a dejja cuana eya napa meejji! ¡A'a eya quea nee nee po meejji!”? Chojja. Jamaya eya mimi ajja ecue Chii nijje. Ohuaya eya huoojea canaje ojjaña cuanaja mimishijo mano'yohua. 28 Jamajjeya eya jama poaje ba'a: “Ecue Chii, ¡ojjaña cuana mijo quea bihui po meecue!” — Jesosaa acanaje. Majoya Eyacuiñajji eyajo ani miminaje jama ba'a: — Eyaya miya amee'yonaje ma dejjaa ajjima acani. Jamajjeya quea huisohua eya bihuia ca'yonaje. Jjeya ojjañaa eya jjabihuia meequije o'oya — poanaje Eyacuiñajji eyajo ani. 29 Ojjaña Jesosa que ejjachichaqui'yo nequi cuaa shajja'ajja canaje Eyacuiñajji eyajo janobajjima nei mimiani. Jamajjeya oya cuana miminaje jama ba'a: — ¡De! Cueji pojja'a poanaje. Beca cuaa jama acanaje ba'a: — ¡Chojja! Esohuidojojji eyajo Jesosa nijje miminaje — poanaje cuana. 30 Jesosa ojjaña nijje miminaje jama ba'a: — Ecue Chii eyajo miminaje miquiana jjabahuejja meequijji jama ba'a: Ohuaya eya shajja'ajja canaje onijje mimianijo — Jesosa poanaje—. 31 Jjeya Eyacuiñajjiya ojjaña joya enijje jjapeequi ajja quea nee nee po mee caje'yo. Eyaya ojjaña jeabichajeaje'yo; Edosiquiana nei Satanasa bajjani, ma ojjaña dejja mimishi huoojeajji poani jeabichajeaje'yo. Quijje oya cuaqui yasijje dobiquije'yo tii tii. 32 Cuanaya eya ojjañaja Edoe Mese acui ecueata'apeejo ba'ehuanasohuajea cajo, quea huiso nee nee ojjaña meshijo ba'e enijje jjapeequi meeje'yo — Jesosaa acanaje. 33 Jamaya Jesosaa ojjaña ba mee canaje oya acui ecueata'apeejo manoje'yo. 34 Jodio cuana jomajo ejjachichaqui nequiya huohui canaje jama ba'a: —Ecuana esohui huohuijji cuana jama poani ba'a: “Eyacuiñajjija huoojea'yo ojjaña jaahuanajji Quito bajjani ba'e tiitiije'yo. Mano'yo ajja poaje”. Jamajjeya ¿apiojji miyaya huohuinaje ojjañaja Edoe Mese manoje'yo acui ecueata'apeejo ba'ehuanasohuajea cajje? ¿A'a miya Eyacuiñajjija huoojea'yo? ¿A'a miya ojjañaja Edoe Mese ma Quito bajjaniya? — onaaya huohui'ajja canaje. 35 Jesosaa oya cuana saja'a canaje jama ba'a: — Eyaya miquiana huasijje esohui huohuije oe pojji cahuime. Ecuea esohui cuaquijiji sisi jayojja. ¡Jjeya nei ecuea esohui jayojja jama acue! Jamajjeya miya poquiquehua ajja. Pea cuana ecuea esohui shajja'ajja sa po ajjajo poquiquehua tiitiije'yo. Jiquio ecua mecajje quea misijo cuaquisho chana' epoquijji jayojja jama ojjaña joya ecue sohui jayojja jama a'ajja, quea mimishi ba'yani. 36 E'e, ecue sohui cuaquijiji quea ja'a jayojja jama. Jamajjeya eya minijje nequijo, ¡ecuea esohui jayojja jama acue! Jamaya miquianaya ecuea epeejji quea ja'a nee poaje'yo. Poquiquehua ajja dejja mimishi jayojja jama epojji pojjeama — poanaje Jesosa. Majoya esohui huohui majje Jesosa poquinaje. Jja'aniquehuaquinaje.

Jodio cuana Jesosa nijje jjapeequi ajja tii

37 E'e, Jesosaa quea huiso ma dejjaa ajjima acani acanaje. Ojjañaa ba canaje. Jamatii Jodio cuaa huohui canaje jama ba'a: — Chojja, Jesosa Eyacuiñajjija huoojea'yo ojjaña jaahuanajji pojjeama — poanaje jjashajja'ajjaqui ajja jjejojo. 38 Yahuajo nei Eyacuiñajjija esohui huohuijji Isaia bajjaniya tehue ca poa Jodio cuanajo jama ba'a: “Eyacuiñajji, Jodio cuana ecuanaja esohui shajja'ajja sa po'yo ajja. Miyaya ma dejjaja ba jjima aña. Ba huicha'a huicha'a majje jamatii oya cuana jjashahuabaqui sa po ajja”. 39 Jamajoya Isaiaa yahuajo nei nei oya cuanajo tehue ca poa jama pea'ai ba'a: 40 “Jodio cuana cojjama' jayojja jama poanijo, miyaya ma dejjaja ba jjima aña ba majje jjabahuejjaqui mee jjima mijo. Quea sapa ca'a jjejojo miquea ejjashahuabaquijjijo jjabahuejjaqui mee jjima. Jamajjeya minijje jjapeequi ajjajo Jodio cuanaja mimishi cuana ecuijea'yojji pojjeama”. Jamaya Isaiaa yahuajo tehue ca poa Jodio cuanajo. 41 E'e, Eyacuiñajjiya yahuajo nei nei Isaia Jesosa ba mee majje ojo tehue mee ca poa jama ba'a: “Oya quea ca'a nee nee poani. Oya Eyacuiñajjija huoojea'yo ojjaña jaahuanajji”. 42 Jamatii quea huiso Jodio etii cuaa quehuajje Jesosajo jama acanaje ba'a: — E'e jojo nei oya Jesosa Eyacuiñajjija huoojea'yo ojjaña jaahuanajji —quehuajje poanaje Jodio etii cuana, Paniseo cuana yajjajo. E'e, Paniseo cuana yahuajo jama poanaje ba'a: — Jesosa nijje jjapeequiajo aje oe ecuanaja equi ojee ejjachichaquijji yasijje edobiqui meejji pojjeama; ¡huoojeacuayajeaje'yo mi! — poanaje Paniseo cuana. Jamajjeya beca Jodio etii cuana quea ajjajja poanaje ehuoojeacuayajea ca poanijje. 43 E'e, Jodio cuana jjashahuabaqui ajja Eyacuiñajji quea bei epo mee'yojji. Chojja, oya cuana aje oe jjashahuabaquinaje pea Jodio cuana quea bei epo mee'yojji onijje.

Jesosaa quijje ojjaña huohui caje'yo joya ojaya epeejji nei

44 Jamajjeya Jesosaa ojjaña ejjachichaqui nequi janobajjima nei, quea ja'a nee huohui canaje jama pea'ai ba'a: — Ecue Chiiya, Eyacuiñajjiya eya huoojea canaje. Jamajjeya ojjaña joya enijje e'e jojo nei jjapeequiani ecue Chii nijje pea'ai jjapeequiani. 45 Beca cuana mimiani jama ba'a: “E'e, Jesosa Eyacuiñajjija huoojea'yo ojjaña jaahuanajji”. Joya e bajji poaniya Eyacuiñajji ba cani pea'ai, eya ecue Chii jayojjaya poani tii. 46 ¡Bacue! Cuaquijijiya jeaja'a canijo, dejja cuana poquiquehua ajja mecajje quea apojo. Eyaya cuaquijiji jayojja jamaa ojjaña quea ja'a jjashahuabaqui meesahuaña. Jamajjeya ojjaña joya enijje jjapeequiani mimishi cuana pajea meeje'yo. Jamajoya Eyacuiñajjiya eya huoojea canaje ojjaña cuana mimishi pajea mee'yohua. 47 Ecuea esohui shajja'ajja majje beca cuana jamaya ba'e sa po'yo ajja. Jamatii eyaya oya cuana tecuea jjima aña. Eya ca iña poeyanaje ojjaña meshijo ba'eca cuanaja mimishi cuijea'yohua, enijje ba'e tiitii mee'yohua; quea mimishi nee poanijo, quea nee nee po mee sa po'yo ajja. Ecuea ejjashahuabaqui'yojji jama pojjeama ba'a: “Ojjaña quea mimishi nee poani quea nee nee po meeje'yo”. Chojja, eya ca iña poeyanaje ojjaña meshijo ba'eca cuanaja mimishi cuijea'yohua, enijje eba'e tiitii'yojji. 48 Ojjañaa joya e cajaa ajji epo quijje quea nee nee poaje'yo cuaquijo ecue huohui jayojja jama ajjimajojo. Jjeya nei eyaya esohui huohuiaña. Quijje eya poe o'oya majje ojjaña shajjama' cuana nijje mimije jama ba'a: “Ecuea esohui shajja'ajja jjimajo miquianaya cajaa aje'yo”. 49 E'e, ecue Chiiya, e huoojea'yojji poaniya eya huohui meesahua cani ojaya ejjashahuabaqui'yojji. 50 Ecuea eba ojjaña joya ojaya esohui jama poani Eyacuiñajjiya pea jjashahuabaquime po mee caje'yo. Ba'e tiitii mee caje'yo onijje pea'ai. Jamajjeya, e'e nei ojjaña Eyacuiñajjiya huohui canajeya eyaya huohuiaña — Jesosa poanaj e.

Jesosaja epeejji cuanaa ojaya pea epeejji cuana cajaahuana cahua, caba'e meesahua cahua

1 E'e, Jodio cuana ojee jjachichaqui o'oyanaje Jenosanena huasijje ojee ijjia'ijjiaa quea bihui nee epojji, eniñeba'yojji esohuidojojjiya yahuajo nei Ejito meshijo Jodioja bacua cuana cuia'yo jjima epajea'yojji pojjeama. Jamajjeya oe cahuime ojee ijjia'ijjia jjimahuajo, Jesosa jjashahuabaquinaje jama ba'a: — E'e, jiquio shejo eya poquije o'oya eyahuasijje ecue Chii que. Eya ca iña nequi ajja jiquio meshijo. Jesosaa ojaya epeejji cuana jiquio meshijo ba'e quea jea nee nee acanaje. ¡Quea jea nee nee Jesosaja ojaya epeejji cuana! Poqui jjimahuaa ohuaya oya cuana jjabahuejjaqui mee canaje. 2-4 Edosiquiana neiya Jodasa Isicaniote, Simonija bacua ejja quea tai jjashahuabaqui mee canaje. Jamajjeya Jodasa jjashahuabaquinaje Jesosa iña meesahuajji, onajaya equecua'yojji. Jamatii Jesosaja eba poanaje jama ba'a: Eyacuiñajjiya, oja Chiiya oya eyajo ani huoojea ca poa meshi yasijje. Jamajjeya oya oja Chii que poquije o'oya. Oja Chiiya oya ojjaña huoojea'yojji po mee ca poa pea'ai. Jamajjeya sinecua ecuana nijje, o shajja'ajjajji cuana nijje ojee ijjia'ijjianijo Jesosa nequisohuanaje. Oja daqui ao huijjiajea majje pea daqui ejjacomayijjiquijji ai jayojjajo jjajeyoca'aquinaje. Ma daqui jjajeyoca'aqui majje ohuaya ena sho canaje tepe ai jayojja huasijje. 5 Majoya ecuana jiojji topo canaje. Topo majje jiojji cui ca'yonaje ma daquiya, ejjacomayijjiquijji ai jayojjaa, Jesosaa. Jamaya poanaje ecuana jjabahuejja meequijji jama ba'a: Pea cuana quea jea nee aña, ¡ba'e meesahuacue! Jama jjashahuabaquime epo meejji jiojji topo canaje. 6 Jamajoya quijje Jesosaa Peno jiojji topo'ajja ca poa. —Jesosa, miya ecuea Emeshi Mese nei. ¿A'a jjaya iña jiojji topoje pea'ai? — Peno poanaje. 7 Jamajjeya Jesosaa oya saja'a canaje jama ba'a: — E'e, Peno, jjeya miya jjashahuabaquiani: “¿Yajjajo shai Jesosaa ecuana jiojji topo cani so'o?” miquea ba jjima; yajjajo eya jama aña poso jjabaquiani. Jamatii quijje pishana miquea eba poaje — Jesosa poanaje. 8 —Chojja, Jesosa, miquea eya ejiojji topojji pojjeama, de, miya ecuea Emeshi Mese nei poanijo — Peno poanaje. Jamajjeya Jesosaa oya acanaje: — Peno, miya ecuea epeejji nei pojjeama poaje, ca eyaya miquea ejiojji mi topoajo — Jesosaa oya acanaje. 9 —¿A'a e'e? Jamajjeya ¡ecuea ejiojji topocue, ecuea eme' cuana, ecuea ecojja pea'ai, ojjaña topocue! — poanaje Peno, Jesosa nijje jjapee neineiqui sa poanijo. 10 —Peno, miquianaya besanaje. Jamajjeya miya quea boejea. Jamatii jjeya ejiojji nei catopoahua. Jamajjeya miquianajaya mimishi cuijea'yo majje quea boejea a'yonaje. Oe nei nei yani quea boejea pojjeama — Jesosa poanaje. 11 Oya jjashahuabaquiani Jodasajo. Ojaya eba Jodasa o iña meejji epojji. Jamajjeya: “Oe nei yani quea boejea pojjeama” Jesosa poanaje. 12 Majoya ecuana jiojji topo majje Jesosaa oja daqui ao huosho ca o'oyanaje. Anioque o'oyanaje ecuana nijje. Jama poanaje ba'a: — ¿A'a miquea eba yajjajo miquianaya eyaya jiojji toponaje? ¿A'a jjabahuejjaqui jjima pojja'a? 13 ¡Bacue! Miquianaaya eya jama aña ba'a: “Miya ecuea esohui huohuijji”, “Ecuea Emeshi Mese” aña. E'e, jamaya miquianaaya quea pame aña. Eya ca ca iña jiquio, miquianajaya esohui huohuijji, miquianajaya Emeshi Mese pea'ai. 14 E'e, ¡bacue! Eyaya miquea esohui huohuijjiya, miquea Emeshi Meseya miquianaya jiojji toponaje. Jamajjeya ¡e jayojja jama pocue! ¡Pea cuana jiojji topojji jayojja jama pocue! 15 E'e, eyaya miquianaya jjabahuejjaqui meeaña: ¡Eyaya miquianaya anaje jayojjaya pea cuana acue! 16 Eyaya e'e jojo nei miquianaya ba meeaña jama ba'a: ¿A'a echacojjiya ojaya echacomeejji huoojea cani? Chojja. Emeshi meseya ca ca oe echacojji huoojea cani. Eya quea ca'a nee nee; miya ecuea echacojji quea ca'a pishana. Jamajjeya ¡ecue sohui jayojja jama acue! E'e, ¡pea cuana ba'e meesahuacue oe! 17 Jjeya ecuea esohuijo jjabahuejjaquinaje. Jamajoya miya quea bihui nee poaje'yo ca ecue sohui jayojja jama ba'yajo — Jesosa poanaje.

Jesosaa huohui canaje Jodasa o iña meejji epojji

18 Majoya Jesosaa jama acanaje ba'a: — Jamatii eya ojjaña miquianajo pojjeama mimiani. Miquianaya ecuea ebabaca; ecuea eba ojjaña. Oe dejja ese nijje nequi ecuea epeejji nisho; Eyacuiñajjija esohui etehue'yo ojo yahuajo nei jama poa ba'a: “Oya enijje ijjia'ijjia anije. Jamatii aje oe ecuea epeejji nisho oya poaje, e quecua mee'yojji epojji”. Ecuea eba jiquio etehue'yo jamaya poaje e'e jojo nei. 19 E'e, eyaya miquianaya jjeyahua nei huohuiaña jama po jjimahuajo. Jamajjeya quijje pea cuaa eya quecua cajo miquianaya jama ejo jjashahuabaquije ba'a: “E'e jojo nei oya Jesosa Eyacuiñajjija huoojea'yo ojjaña jaahuanajji. Jamajjeya ohuaya eseya huohui canaje yahuajo” jamaya poaje miquianaya quijje. 20 E'e jojo nei — Jesosa poanaje pea'ai—, ojjaña joya ecuea echacojji nijje jjapeequiani ecuea esohui huohuijji poanijo, enijje jjapeequiani pea'ai. Eyacuiñajji e huoojea'yojji poanijo, ojjaña joya enijje jjapeequiani Eyacuiñajjija epeejji poani pea'ai oya cuana.

Jesosa miminaje Jodasajo

21 Majoya Jesosa quea yeno nee nee poanaje Jodasaja ejjashahuabaquijji quea tai ba majje. O shajja'ajjajji cuana jama huohuime acanaje ba'a: —Eyaya miquianaya e'e jojo nei huohuiaña. Oe dejja jiquiojo enijje ijjia'ijjia ani e iña meesahuajji epojji onajaya equecua'yojji — Jesosa poanaje. 22 Jamajjeya o shajja'ajjajji cuana quea metejo pea nijje ecapashe nei jama poanaje ba'a: — De, ¿ache shai o iña meesahuajji poaje so'o? —jjashahuabaquime poanaje. 23 Eya jiquio esohui tehuejji, Huani bajjani Jesosa pejjejo aninaje, eya ojaya quea jea nee nee. 24 Jamajjeya Penohua eya Jesosa huohui'ajja mee canaje: — ¿Ache shai o iña meesahuajji poaje? 25 Majoya eyaya ecapashe nei Jesosa huohui'ajjanaje jama ba'a: —Jesosa, ¿aya acuae mi quecua mee'yo sa acani so'o? 26 Jesosaa acanaje: — Pahui noe najo peshepeshe mee majje eyaya maya quiaje, ma e iña meejji epojji. Majoya Jesosaa pahui noe najo peshepeshe mee majje quia canaje Jodasa, Simonija bacua ejja: — Ma'aje, Jodasa — poanaje. —Ocuee, Jesosa — acanaje Jodasaa. 27 Pahui ijjia anijo Edosiquiana neiya Jodasa quea tai jjashahuabaqui mee canaje jama ba'a: “¡Onaya eyaya Jesosa iña meesahuaje!” Majoya aje Jesosaa jama acanaje ba'a: — ¡Poquicue, Jodasa! ¡Miquea ejjashahuabaqui'yojji jayojja jama acuajicue jjeyahua nei! — Jesosa poanaje. 28 Pea shajja'ajjajji cuana jama poanaje ba'a: — ¿Yajja poanaje Jesosa? ¿Ajeo Jesosaa Jodasa huoojea canaje so'o? 29 Jodasaa bashosoco sisi esejaya ejjeshejji biojji dojo canaje. E'e pojja'a huoojea canaje bobi jjequiya, quijje ojee e'ijjiajji pojja'a — poanaje. Beca eshajja'ajjajji cuana jama poanaje ba'a: — E'e pojja'a Jesosaa Jodasa huoojea canaje bejjo quiaa aema' cuana huasijje — poso acanaje cuaa. 30 E'e, Jesosaa huoojea cajje Jodasa pahui ijjia majje poquinaje esecue yasijje. Jjasinecuaquiajo poquinaje.

Jesosaja esohui eyacua

31 Majoya Jodasa poqui'yajo, Jesosa ecuana nijje jama poanaje ba'a: —Eya ojjañaja Edoe Mese. Eyacuiñajjiya jjeyahua nei ojjaña ba mee caje eya quea ca'a nee nee poani. Ma ba cajo, eyaya ojjaña jjabahuejjaqui meeje Eyacuiñajji quea ca'a nee nee, quea pame nee nee. 32 E'e, Eyacuiñajjiya eya ma dejjaa ajjima acani amee canajejo ojjaña jjabahuejjaqui meenaje oya quea ca'a nee nee. Jamajjeya Eyacuiñajjiya jjeyahua nei ojjaña jjabahuejjaqui mee caje eya quea pame nee nee poani. E'e, Eyacuiñajjiya eya shequi mee'yo majje jjequisohua caje'yo eyahuasijje — Jesosa poanaje. 33 Majoya Jesosaa ecuana huohui canaje jama ba'a: — ¡Miquianaya ecue bacua cuana jayojja, shajja'ajjacue mo! Eya minijje nequije oe pojji cahuime. E poqui'yajo, miquianaaya eya sa'ajjaje'yo. Jamatii jjeya nei poqui meemee ajja e poquiani yasijje. Jamaya yahuajo eyaya pea Jodio cuana huohuinaje pea'ai. 34 Jamajjeya esohui eyacua eyaya huohuiaña jama ba'a: ¡Pea cuana quea jea nee nee atiitiicue! ¡Eyaya miquianaya quea jea nee nee aña jayojja jamaya pea cuana quea jea nee nee acue! 35 Pea cuana quea jea nee nee añajo, onaya miquianajo jama poaje ba'a: “E'e jojo nei miquianaya Jesosaja epeejji poani” — Jesosa poanaje. 36 Peno Simohuiya Jesosa huohui'ajja canaje jama ba'a: — Emeshi Mese Jesosa, ¿achacua acuae shai mi poquije'yo? — acanaje. — Peno, jjeyahua nei miya epoquijji pojjeama e nequi yasijje. Quijje poe meeje e ani yasijje — Jesosa poanaje. 37 Penohua huohui'ajja canaje: — ¿Yajjajo acuae jjeya eya minijje mi poqui meeaña? Miya ecuea quea jea nee neejo eyaya jaahuanaje'yo. Manoje'yo mi jaahuanajji. 38 Jesosaa quea yenohua Peno jama acanaje ba'a: — ¿A'a miya manoje'yo e jaahuanajji? Chojja Peno, e'e jojo nei jiquio mecajje cachina yahue taaa jjimahuajo, miya ejo jama po huicha'a huicha'aje ba'a: “¡Chojja, Jesosa ecuea ba jjima nei nei!” miya quea mete po majje pea beca peejjima huohuimeya aje — Jesosa po anaj e.

Jesosaa ojaya epeejji quea bihui nee po mee canaje

1 Jesosaja esohui shajja'ajja majje ecuana quea yeno, quea mete poanaje. Jamajje Jesosa ecuana nijje miminaje jama ba'a: — ¡A'a quea mete pojji! ¡Jiquio jama jjashahuabaquicue ba'a: “Eyacuiñajjiya eya jaahuana caje'yo tii” pocue! ¡Ejo jama jjashahuabaquicue pea'ai ba'a: “Jesosaa eya jaahuana cani tii” pocue! 2 Ecue Chii Eyacuiñajji eyajo ani. Jocuama ojaya eba'ejji quea huiso nee yani. Ecuea esohui e'e jojo nei, siajje pojjeama. Eya poquije ecue Chii que miquianajaya eba'ejji iyaa, apoa yajji. 3 E'e, eyaya miquianajaya eba'ejji iyaje. Jamajjeya e'e jojo nei eya poeje o'oya. Poe o'oya majje eyaya miquianaya dojoje enijje eba'e tiitii'yojji. 4 Miquianajaya eya eba ecue Chii que poquije. Miquianajaya eba pea'ai ecue Chii que epoquijji — Jesosa poanaje. 5 Majoya Tomasi Jesosa nijje jama poanaje ba'a: — Jesosa, ¿achacua miya poquije'yo? Joya mi poquije yasijje ecuanajaya ejiojji ba jjima, de. Jamajjeya ecuanaja eba pojjeama ejiojji ma mi poquiani yasijje epoquijji — acanaje Tomasiya. 6 —Tomasi, ojjaña ecue sohui e'e jojo nei. Eya ejiojji eyahuasijje epoquijji jayojja. E'e, ecuea esohui jayojja jama poanijo, miya ecue Chii ba'yani yasijje poqui meeje'yo. Ojjaña enijje jjapeequiani eyaya ba'e tiitii meeje'yo ecue Chii nijje tii. Ojjaña joya enijje jjapeequi ajja ca ca ecue Chii nijje eba'e tiitii'yojji pojjeama. 7 Eya miquianajaya eba jojjemo miquianaaya ecue Chii bame pea'ai poaje. Jjeya nei oya miquianajaya eba poaje. Jamajjeya eya ecue Chii yasijje poqui'yajo, oya quea ca'a nee nee ani miquianaaya baje — Jesosa poanaje. 8 Majoya Penipe jama poanaje ba'a: — Jesosa, ¡eseja Chii ai ecuanaya ba meecue! Jamajjeya ecuana quea bihui nee nee poaje'yo — poanaje Penipe. 9 Jesosaa Penipe acanaje: — Penipe, ¿a'a miquianaya jjabahuejjaqui jjima? Eya miquiana nijje ba'enaje quea shequiaja huiso. ¿A'a jjeya miquianajaya eya ba jjima? ¡Bacue oe! E ba majje esejaya Chii eyajo miquianajaya eba pea'ai. Jamajjeya ¿apiojji acuae miya jama poani so'o ba'a: “¡Esejaya Chii ai ecuanaya ba mee socue!” poani miya? — Jesosa poanaje—. 10 E'e jojo nei eya ecue Chii jayojjaya, de. Oya e jayojjaya pea'ai. ¿A'a miquianaya jamaya jjashahuabaqui jjima? Ecue Chii nijjeya eyaya ohuaya jayojja aña, ma dejjaa ajjima acani aña. Ecue Chiija ejjashahuabqui'yojji eyaya huohuiaña pea'ai, ecuea ejjashahuabaqui'yojji pojjeama. 11 E'e jojo nei eya ecue Chii jayojjaya, de. Oya e jayojjaya pea'ai. ¡Jamaya jjashahuabaquicue, oe! Ecuea esohuijo miquianaya jjabahuejjaqui jjima, ¡jamajjeya jjashahuabaquicue eyaya ma dejjaa ajjima añajo! ¡Jama acue ba'a: “E'e, Jesosa Eyacuiñajji jayojjaya” acue miyaya! — Jesosa poanaje—. 12 Eyaya huohuiaña e'e jojo nei jama ba'a: Ojjaña enijje e'e jojo nei jjapeequianiya eyaya aña jayojja jama acaje'yo. Eyaya quea huiso pishana jjapeequi mee'yonaje Eyacuiñajji nijje. Eya ecue Chii que poqui'yajo, ecuea epeejji cuaa quea huiso nee nee pea cuana jjapeequi meesahua caje'yo onijje, Eyacuiñajji nijje. 13 Jiquio ecua miquianaya enijje mimijea jamaya eyaya aje'yo, ca ejo jama jjashahuabaquianijo ba'a: “E'e jojo nei Jesosaa ma ecua eya onijje mimiani jamaya acaje'yo”. Jamajoya ba majje ojjañaa ecue Chii bihuia caje jama ba'a: “Eyacuiñajji, ecuanaja Chii ai, miya quea ca'a nee nee eyajo ani”. 14 Enijje mimicue jama ba'a: “¡Jesosa, jiquio ecua eya mimiani minijje jamaya miyaya acue!” Jamajjeya miya enijje poanijo eyaya joya ecua miya enijje mimiani jamaya aje'yo — Jesosaa ecuana huohui canaje.

Jesosaa huohui canaje Edojjoshahua Pameja epoejjijo

15 Majoya Jesosaa ecuana, o shajja'ajjajji cuana huohui canaje jama ba'a: —Eya miquianajaya quea jea nee poanijo, ¡ecuea esohui jayojja jama acue! 16 Jamajjeya eya eseja Chii nijje mimije jama ba'a: “Ecue Chii, ¡Edojjoshahua Pame huoojeacue ecuea epeejji cuana jjabahuejjaqui mee'yohua! Oya ecuea epeejji cuana nijje ani tiitiije'yo”. 17 E'e, Edojjoshahua Pameya miquianaya esohui e'e neijo jjashahuabaqui mee caje'yo. Ecuea epeejji pojjeama ca ca Edojjoshahua Pame nijje ejjapeequi meejji pojjeama. Oya miquianajaya eba. Pea cuanaja oya ba jjima. Oya miquiana nijje enequi tii tii. Miquiana que dobiquije'yo, Edojjoshahua Pame — Jesosa poanaje. 18 —Ecuea epeejji, eya poquije'yo, miquianaya jeanaje'yo jiquiojo tii. Jamatii ecuea miquianaya jaahuana jjima jayojja jeana'yome ajjima. Chojja. Eya miquiana huasijje huoojeaje'yo Edojjoshahua Pame miquiana nijje jjapeequi tiitiiya, miquiana jaahuana tiitii'yojji. 19 Quijje pishana ecuea epeejji pojjeama cuaa eya ba maja ajja. Miquianaaya ca ca eya baje o'oya. Eya ba'e tiitiije'yo, miquianaya pea'ai ba'e tiitiije'yo — Jesosa poanaje—. 20 Edojjoshahua Pame poeyajo, miquianaya jjabahuejjaquije jama ba'a: Eya ecue Chii jayojjaya tii poani. Eya miquiana nijje nequi, miquianaya enijje nequi pea'ai — Jesosa poanaje—. 21 Ojjaña joya quea e jea nee nee poani ecuea esohui shajja'ajja majje jamaya poani. Eya ojaya quea jea nee nee poanijo, oya ecue Chiija quea jea nee nee pea'ai, ecuea quea jea nee nee pea'ai. Eyaya oya ba meeje jama ba'a: Eya e'e jojo nei onijje ani tii tii — Jesosa poanaje. 22 Majoya pea Jodasa, ma Jodasa Isicaniote pojjeama, Jesosa nijje jama poanaje ba'a: — ¿Yajjajo acuae miquea epeejji pojjeama mi jjaba meemajaquije so'o? Ecuanaa ca ca miya baje o'oya — huohui'ajja canaje pea Jodasaa. 23 Jesosaa oya jama acanaje ba'a: — Ojjañaa joya quea e jea nee poaniya ecuea esohui jayojja jama acaje'yo tii. Jamajjeya ecue Chiiya oya cuana quea jea nee acaje'yo. Eya, ecue Chii pea'ai onijje jjapeequije'yo. 24 Pea cuana ca ca ecuea esohui shajja'ajja sa po ajja, e boti'ama jjejojo. Miquianaaya shajja'ajjaña. Ecue Chiiya eya huoojea canaje. Ojaya ejjashahuabaquijji eyaya miquianaya huohuiaña, ecuea ejjashahuabaquijji pojjeama. 25 Jamaya eyaya huohuiaña, miquiana nijje nequiya. 26 Ecue Chiija eba miquianaya ecuea epeejji poani. Jamajjeya ohuaya Edojjoshahua Pame huoojea caje miquiana huasijje, miquiana jaahuanaa, miquiana enijje ejjapeequijji pea'ai. Poe majje ohuaya miquianaya ba meesahua caje'yo Eyacuiñajjija ejjashahuabaquijji cuana. Ojjaña ecuea esohuijo ohuaya miquianaya jjashahuabaqui mee caje'yo tii tii pea'ai — Jesosa poanaje. 27 —Eya quea bei nee nee. Eyaya miquianaya quea bei po meeaña — Jesosa poanaje—. ¡Jamajoya quea bei pocue, e jayojja! ¡Mete'ama, yeno'ama pea'ai pocue! Ecuea epeejji pojjeama cuanaja aje oe miquianaya quea bei nee epo mee'yojji pojjeama, de. 28 Eyaya huohuinaje jama ba'a: Eya ecue Chii que poquije'yo. Poqui majje quijje eya poeje o'oya miquiana que. E'e, eyaya miquianaya huohuinaje jama ba'a: Eya poquije'yo ecue Chii que. Ecue Chiiya eyajo aniya ma dejjaja ba jjima quea huiso nee nee acani. Eyaya jiquiojo ma dejjaa ajjima acani oe pojji aña — Jesosa poanaje—. Jamajjeya miquianaya quea e jea nee poanijo, ¡quea bihui nee pocue ejo, eya ecue Chii que poquianijo pea'ai! 29 E'e, eyaya miquianaya jjeyahua nei huohuiaña, eya ecue Chii que poqui jjimahuajo. Jamajjeya e poqui'yajo miquianaya jama poaje ba'a: “E'e jojo nei Jesosaa poqui jjimahuaa eseya huohui canaje. Oya Eyacuiñajjija Bacua Ejja poeje o'oya” aje quiana oe poaje — Jesosa poanaje—. 30 Eya miquiana nijje jjeya nei mimi majamaja ajja. Edosiquiana nei poeyani e napaa. E'e, Edosiquiana nei, ma ojjaña meshijo dejja mimishi huoojea'yojji poani e napaa poeje. Ojaya eya ejeabichajeajji pojjeama. 31 Jamatii eya quea nee nee poaje. Quea nee nee poaniya ojjaña ba meeje jama ba'a: “Jesosaja oja Chii quea jea nee nee. Oja Chiija ehuohui jayojja jama poani pea'ai” acaje cuaa. Mahuiso — Jesosa poanaje—. E'e. ¡Jjeya nequisohuacue! ¡Cua'a, esecue yasijje cuayaquicue! — Jesosa poanaje. Jamajjeya equi quecuayijji eyajo ani ijjia'ijjia ani cuayaquinaje esecue yasijje acui yiye yasijje epoquijji.

Esohui eba meesahuajji uvajo bashococo ai jayojjayajo

1 Majoya ejiojjijje poquijeya Jesosaa ecuana huohui canaje: — Eyaya esohui mi ba meesahuajji huohuije uvajo, bashococo ai jayojjajo. Eya bashococo ai emaijje quea pame jayojja jama poani. Ecue Chii bashococo ai cuiñajji jayojja jama. 2 Bashococo ai cuiñajjiya yaa sisi nojinoji'yajo tetojea ca'yani jjajja ajjajojo. Eña ba chii tetojea ca'yani pea'ai, jjono quea jjajja huiso epojji. Jiquio ecua jjono bashococo ai cuiñajjiya yaa enojinoji tetojea ca'yani jayojja jama ecue Chiiya ecuea epeejji nisho cuana cajaa acani. Jiquio ecua eña ba chii tetojea ca'yani jayojja jama epeejji e'e jojo nei cuana mimishi pajea mee cani, quea pame nee nee epojji. 3 Ecuea esohui shajja'ajjanajejo miquianaya quea ja'a poanaje. Jamajjeya miquianaya bashococo ai jjono quea pame jayojja jama poanaje. 4 ¡Enijje jjapee tiitiiquicue! Jamajjeya eya miquiana nijje jjapee tiitiiquije'yo. Jamajjeya miquianaya ma dejjaa ajjima acani ameeje'yo. ¿A'a jjono emaijje jjasejjaqui majje jjajjaje so'o? Chojja. Jamaya miquianaya enijje jjapee pajeaqui'yo majje quea pame po ajja. Emaijje jjasejjaqui'yo jjima jjono jjajjani — Jesosa poanaje. 5-6 Eya jjono emaijje quea pame nee jayojja. Miquianaya jjono emaijo pohuani jayojja. Jjono emaijje jjasejjaqui'yo majje nojinojije. Joca'yajo chicha'yo majje dahuajea ca'yani cuaa. Oya jayojjaya ojjaña enijje jjapee pajeaqui'yani cajaa acani. Joya enijje jjapee tiitiiquiani ca ca eya jjapee tiitiiquije'yo onijje pea'ai. Jamajjeya oya cuana ma dejjaa ajjima acani quea huiso ameeje'yo. 7 E'e, miquianaya enijje jjapee tiitiiquianijo, ecue sohui jayojja jama atiitiiañajo pea'ai, Eyacuiñajjiya joya ecua miquianaaya huohuinaje jamaya acaje onijje mimiyajo. 8 Miquianaya ma dejjaa ajjima amee cani ba majje pea cuaa huohui caje jama ba'a: “E'e, Eyacuiñajji quea ca'a nee. Jiquio dejja cuana e'e jojo nei Jesosa shajja'ajjajji cuana” acaje cuaa. 9 —Ecue Chiiya eya quea jea nee nee acani jayojja jama miya ecuea quea jea nee nee. Jamajjeya ¡eya miquianaaya quea jea nee nee pea'ai acue! 10 E'e, eya ecue Chiija quea jea nee nee poani, eyaya ojaya esohui jayojja jama atiitiiañajo. Jamaya ecuea esohui jayojja jama poanijojo, miquianaya ecuea quea jea nee nee poani pea'ai — Jesosa poanaje. 11 —Eyaya jiquio esohui huohuiaña miquiana quea bihui po meejji. E'e, eyaya miquianaya quea bihui nee nee po mee sa aña. 12 Eyaya miquianaya huohuina'yaña jama ba'a: ¡Pea cuana quea jea nee nee acue! ¡Jiquio ecua eyaya miquianaya quea jea nee nee aña jamaya acue cuana! 13 Ojaya epeejji quea jea nee nee acani oe dejja manoje'yo ojaya epeejji nahuejo. Jamajjeya ¡ojaya oja epeejji quea jea nee nee poanijo nahue cani! 14 Miquianaya ecuea quea jea nee nee; ecuea esohui jayojja jama poanijo ecuea epeejji e'e jojo nei poani. Jamajjeya eya miquiana nahuejo manoje'yo. 15 Echacojjija ba jjima ojaya echacomeejjija ejjashahuabaqui'yojji. Ojaya epeejji ca ca ba mee cani. Jamajjeya jjeya eya jama po ajja ba'a: “Miquianaya ecuea echacojji poani”. Chojja. Jjeya eya jama poani ba'a: “Miquianaya ecuea epeejji poani”. E'e, ojjaña joya ecue Chiiya huohui canaje eyaya miquianaya ba meenaje ecuea epeejji poanijojo — Jesosa poanaje—. 16 ¡Bacue, oe! Eya miquianajaya ebabaca pojjeama. Eyaya ca ca miquianaya babaca'yonaje ecuea epeejji epojji. Eyaya miquianaya huoojeaña ecue Chii nijje quea pame nee chacohua. Jamajjeya ¡pea cuana enijje jjapeequi meesahuacue! Jamajjeya enijje jjapeequianijo miquianaya cojjacahuianijo. Eyacuiñajji nijje emimijji ohuaya miquianaya saja'a acaje — Jesosa poanaje—. 17 Jamajjeya eyaya miquianaya huohuina'yaña jama ba'a: ¡Pea cuana quea jea nee nee acue! — Jesosa poanaje.

Eshahuaja epeejji cuanaja boti'ama nei nei poaje miquianaya

18 —¡A'a quea yeno pojji dejja mimishi cuana miquiana nijje quea quene poanijo! Dejja mimishi cuana miquiana nijje quea quene nee nee po jjimahuajo enijje quea quene nee nee poanaje. 19 Miquianaya dejja mimishi jayojja ba'e jojjemo ojaya quea jea pome miya ojaya pea epeejji quea jea jayojja. Jjeyahua nei miquianaya ona jayojja pojjeama, eyaya miquianaya babaca'yonajejo. Jamajjeya miquiana nijje quea quene nee nee poani dejja mimishi cuana. 20 ¿A'a ecuea ehuohui'yo baña? Jama ba'a: Echacomeejji quea sohui ca'a; echacojji ca ca ca'a'ama. Jamajjeya eya napa caje cuaa jayojja jama miquiana napa caje pea'ai. Ecuea esohui shajja'ajja canajejo, miquianajaya esohui shajja'ajja caje'yo pea'ai, onaaya. 21 E'e, e acaje'yo jayojja jama miquianaya acaje'yo cuaa enijje jjapeequianijo. E'e, oya cuaa jamaya acaje'yo, Eyacuiñajji, e huoojea'yojji epo ba jjimajojo. 22 E meshi yasijje, dejja mimishi cuana huasijje poe jjima jojjemo, esohui huohui jjima jojjemo pea'ai Eyacuiñajjiya shajjama' cuana quea nee nee po mee'yo ajja acame. Jamatii jjeya eyaya ojjaña huasijje esohui e'e nei huohuinajejo, jama po mee ajja ba'a: “Ecuea mimishi chama'. Ecuea shajja'ajja jjima”. Chojja. Oya cuana quea mimishi tii — Jesosa poanaje—. 23 Joya e boti'ama ajji poaniya ecue Chii boti'ama pea'ai acani. 24 Eyaya dejja mimishi nijje nequiya ma dejjaa ajjima acani a'yonaje. Ma dejjaa ajjima acani ecuea ajjima jojjemo Eyacuiñajjiya oya cuana tecuea jjima acame. E'e, onaaya ba canaje eyaya ma dejjaa ajjima acani aña. Jamatii eya ecue Chii pea'ai boti'ama nei nei onajaya. 25 Yahuajo nei nei Eyacuiñajjija esohui huohuijjiya esohui tehue ca poa ejo jama ba'a: “Eya quea pame nee poani. Jamatii dejja mimishi cuanaja eya boti'ama nei nei” — Jesosa poanaje—. Jjeya jamaya dejja mimishi cuana poanaje enijje, esohui huohuijjija etehue'yo jama — Jesosa poanaje. 26-27 —Miquianaya enijje aninaje ma eya dejja cuana huasijje esohui huohui coonajejo. Jamajjeya ¡miquianaaya esohui e'e jojo nei ejo huohuicue ojjaña cuana huasijje! — Jesosa poanaje—. E poqui'yajo Edojjoshahua Pame poeje miquiana quea bihui nee po mee'yohua. Jjeya oya ecue Chii nijje yani. Eyaya oya huoojeaje miquiana que miquiana jaahuanaa. Ohuaya Eyacuiñajjija esohui e'e jojo nei ejo miquianaya ba meesahua caje'yo. Jamajjeya miquianaya jjashahuabaquije ejo — Jesosa poanaje.

1 —Eyaya miquianaya jamaya huohuiaña jjeya. Jamajjeya ecuea esohuijo quijje miquianaya enijje ejjapee pajeaqui'yojji pojjeama onaa napa cajje. 2 Jodio cuana miquiana nijje quea quene poaje. Jamajjeya quijje, Jodioja equi ojee ejjachichaquijji yasijje dobiquiyajo miquianaya huoojeacuaya caje'yo esecue yasijje Jodio cuaa. E'e, quijje miquianaya quecua'yo majje oya cuana jjashahuaba quehuaquije jama ba'a: “Ecuaaya oya cuana quecua'yonaje. Jamaya Eyacuiñajjija quea boti” jama posoya acaje cuaa. 3 —Jamaya acaje cuaa Eyacuiñajji ba jjimajojo, eya pea'ai ba jjimajojo. 4 Jjeya eyaya miquianaya huohuiaña. Jamajjeya quijje onaa napa cajje miquianaya jama poaje ba'a: “Jesosaja esohui yahuajo jayojja jama jjeyahua nei acani cuaa. Ecuana napa cani, onaaya” jamaya poaje —Jesosa poanaje—. Yahuajo miquiana nijje mimi coo majje eyaya miquianaya huohui jjima. Miquiana nijje enequiya jjejojo mi huohuinaje —Jesosa poanaje.

Edojjoshahua Pame poeje

5 —Yahuajo eya eyajo ani ecue Chiiya huoojea ca poa jiquiacua. Jjeyahua nei eya o que poquije o'oya. Jamatii eya miquianajaya huohui'ajja jjima jama ba'a: “¿Achacua miya poquije'yo?” ajjima. 6 Eyaya miquianaya huohuinaje jama ba'a: “Eya poquije'yo”. Jamajjeya miquianaya quea yeno nee poani. 7 Jamatii eyaya miquianaya e'e jojo nei huohuiña: Poqui'yo majje eyaya miquianaya quea bihui nee po meeje'yo. E'e, ecue Chii que poqui'yo majje eyaya Edojjoshahua Pame huoojeaje miquiana que. E poqui'yo ajja jojjemo ca ca oya poe jjima pome. 8 Ecuea epeejji pojjeamaja ejjashahuabaquijji quea quehua. Jamajjeya poe majje Edojjoshahua Pameya oya cuana jjabahuejjaqui mee caje. Oya cuana quea mimishi poani, quea mimijjequijea poani. Edojjoshahua Pameya oya cuana quea ja'a nee ba mee caje'yo pea'ai. Eyacuiñajjiya ojjaña joya quea mimishi poani tii quea nee nee po mee caje'yo tii tii pea'ai. Jamaya ojjaña ba mee caje'yo, Edojjoshahua Pameya. 9 E'e, Edojjoshahua Pameya ojjaña jjabahuejjaqui mee caje jama ba'a: Enijje jjapeequi sa po'yo ajja jojoya aje oe ojjaña quea mimishi poani. 10 Ecue Chiiya eya shequi o'oya mee majje o que jjequisohua ca'yajo, Edojjoshahua Pameya ojjaña ba mee caje eya quea pame nee nee. Jamajjeya eyaya ojjaña quea ja'a nee ba'e meeje'yo. Jjeyahua nei ojjaña ecuea epeejji pojjeamaja eba majajji pojjeama tii. 11 Dejja mimishi huoojeajjijo, Edosiquianajo Eyacuiñajji miminaje jama ba'a: “Eyaya Edosiquiana nei quea nee nee po meeje'yo tii tii. Jamajjeya ojjaña quea mimishi poani quea nee nee po meeje'yo pea'ai”. Jamaya Edojjoshahua Pameya ojjaña jjashahuabaqui mee caje, poe majje — Jesosa poanaje. 12 —Ecuea pea ejjashahuabaquijji yani quea huiso, miquianaya huohui jjima ecuea. Jamatii jjeya miquianajo quea quehua poaje; jamajjeya jjeyahua eba meejji pojjeama. 13 Jamajjeya Edojjoshahua Pameya poe majje miquianaya ojjaña esohui e'e nei ba meesahua caje'yo ejo. Ojaya ejjashahuabaquijji pojjeama ohuaya miquianaya ba meesahua caje'yo. Chojja, ecue Chiija esohui ba meesahua caje'yo. Edojjoshahua Pameya miquianaya ba meesahua caje'yo ojjaña ma Eyacuiñajjiya quijje acaje. 14 Jamajjeya ecuea esohui ba meesahua cajo, miquianaaya eya bihuiaje'yo jama ba'a: “E'e de, Jesosa quea pame nee nee, quea ca'a nee nee poani” miquianaya poaje. 15 Ecuea ejjashahuabaquijji ecue Chiija ejjashahuabaquijji jayojjaya tii tii poani. Jamajoya eyaya huohuiaña jama ba'a: Ecuea esohui ba meesahua caje'yo Edojjoshahua Pameya — Jesosa poanaje.

Jesosa mano'yo majje shequije o'oya

16 —E'e, jjeya nei eya miquianajaya ba jjima poaje. Majoya quijje pishana baje o'oya. Majoya ecue Chiiya eya jjequisohua caje'yo o que — Jesosa poanaje. 17 Jamajjeya ecuana, Jesosa shajja'ajjajji cuana ojee mimimiminaje jama ba'a: — ¿Yajjajje shai Jesosa jama poani ba'a: “Jjeya nei miquianajaya eya ba jjima poaje. Majoya quijje pishana baje o'oya. Majoya ecue Chiiya eya jjequisohua caje'yo o que” poani? — poanaje ecuana. 18 Ojee mimi majamajanaje jama ba'a: — ¿Ajeo oya mimiani jama ba'a: “Jjeya nei?” Ecuanaja quea quehua ojaya esohui — poanaje ecuana. 19 Ecuanaja ejjashahuabaquijji Jesosaja eba poanaje. Jamajjeya ohuaya ecuana huohui'ajja canaje: — Eya jama poanaje ba'a: “Jjeya nei miquianajaya eya ba jjima poaje. Majoya quijje pishana baje o'oya” poanaje. Jamajjeya: “¿Ajeo shai oya Jesosa mimiani so'o?” miquianaaya huohui'ajjaña. ¿A'a e'e? 20 E'e jojo nei jjeya nei miquianaya quea yeno nee nee poaje. Ecuea epeejji pojjeama ca ca quea bihui nee nee poaje. E'e, miquianaya pa neineije. Jamatii quijje pishana quea bihui nee nee poaje o'oya, miquianaya. 21 E'e, epona bacua nee majje quea yeno poani, quea bacua nee nee jjejojo. Jamatii bacua cuaya majje quea bihui nee poani. Ebacua ba majje enaese jjashahuabaqui maja ajja ebacua neejo. 22 Jiquio ecua bacua nee majje epona quea yeno nee poani jayojja jama miya jjeya quea yeno nee nee poaje'yo. Jamatii eya ba o'oya majje quea bihui nee nee poaje'yo. Quea bihui nee nee epo pajea mee'yojji pojjeama cuanaja mi — Jesosa poanaje. 23 —Jamajjeya eya ecue Chii que poqui'yajo, miquianajaya e ehuohui'ajja majajji pojjeama; enijje mimi ajja aquiana sa poanijo pea'ai. E'e jojo nei, ecue Chii nijje mimianijo, ¡aquiana sa poanijo oya huohuicue! Ohuaya miya shajja'ajja caje. Miquianaya enijje jjapeequianijo quia caje joya miquiaa saña — Jesosa poanaje. 24 —Yahuajo miquianajaya jamaya ajjima. Ma miquiaa saña ecue Chii huohui jjima enijje jjapeequianijo. Jamajjeya ¡Eyacuiñajji nijje mimicue! Joya ecua miquianaaya oya huohuiaña jamaya ohuaya acaje, ecuea epeejji poanijo. Ohuaya joya miquiaa huohui'ajjajeya quia caje. Jamajjeya miquianaya quea bihui nee po tiitiije'yo, e'e jojo nei — Jesosa poanaje. 25 —Jjeya eyaya miquianaya ecuea ejjashahuabaquijjijo sohuihuohuinaje, esohui ebamee sahuajjijo ca ca oe huohuinaje. Quijje ca ca eyaya miquianaya ecue Chiijo huohui neineije esohui quea ja'a neejo, esohui eba meesahuajjijo pojjeama — Jesosa poanaje—. 26 E'e, quijje pishana eya ecue Chii que poqui o'oyajo, miquianaya ecue Chii nijje mimije, enijje pojjeama. ¡Aquiana sa poanijo ca oe oya huohuicue! Ecuea epeejji poanijojo ohuaya miquianaya shajja'ajja caje — Jesosa poanaje—. 27 E'e, miquianaya ecue Chiija quea jea nee nee, eya miquianaja quea jea nee poanijojo, miquiana ejo quea ja'a jjashahuabaquianijo pea'ai. E'e, miquianajaya ejjashahuabaquijji ejo jama ba'a: “Eyacuiñajjiya Jesosa huoojea canaje e'e jojo nei”. 28 E'e jojo nei eya eyajo ani ecue Chiiya huoojea canaje meshi yasijje. Jjeyahua nei eya meshijo nequi jjima poaje. O que poquije o'oya — Jesosa poanaje. 29 Jamajjeya ecuana jama poanaje ba'a: — E'e Jesosa, jjeya miyaya quea ja'a nee huohuiaña, esohui eba meesahuajjijo pojjeama. Maya ecuanaja quea quehua poanaje. 30 Ecuanaja eba miyaya ojjaña baña e'e jojo nei. Minijje mimi jjimahuajo, ecuanaja ejjashahuabaqui'yojji miquea eba. Jamajoya jjeya ecuana jama poani ba'a: E'e jojo nei oya Jesosa Eyacuiñajjija huoojea'yo — poanaje ecuana. 31 Majoya Jesosaa ecuana jama acanaje ba'a: — E'e, Eyacuiñajjiya, ecue Chiiya eya huoojea canaje. ¿A'a jjeya jamaya miquianajaya eba e'e jojo nei? — Jesosa poanaje—. 32 ¡Bacue! Jjeya nei miquianaaya eya quea mete po majje jeananaje'yo. Poquicuajije miquianajaya equi yasijje. Jamatii eya ee nei enequijji pojjeama. Chojo, ecue Chii enijje enequi tii — Jesosa poanaje—. 33 Eyaya jamaya huohuiaña. Jamajjeya miquianaya ecuea epeejji nei poanijo quea bei poaje'yo, mete'ama. Jiquiacua ba'yanijo, onaa napa cajje quea nee poaje. ¡Jamatii yeno'ama pocue! E'e, Edosiquiana nei, ojjaña joya ecuea epeejji pojjeama pea'ai eyaya jeabichajea'yonaje. Oya cuana quea nee nee po meeje'yo tii — Jesosa poanaje.

Jesosa miminaje oja Chii nijje ojaya epeejji cuanajo

1 Majoya ecuana nijje, o shajja'ajjajji nijje mimi majje Jesosa oja Chii nijje miminaje. Eyahuasijje jjabajeasohuaqui majje jama poanaje ba'a: —Ecue Chii, jjeya nei eya manoje'yo. ¡Miquea ejjashahuabaqui'yojji ejo yahuajo, e huoojeanajejo jama acue jjeya, miyaya! ¡Ojjaña ba meecue eya miquea Ebacua Ejja quea ca'a nee nee! Jamajjeya ba majje ojjañaa miya bihuia caje. 2 E'e, miyaya eya ojjañaja Emeshi Mese nei po mee'yonaje, ojjaña huoojeajji. Jamajjeya ojjaña joya miya enijje jjapeequi meesahuaña ba'e tiitii meeje'yo, eyaya. 3 Ecue Chii, miya ca ca oe Eyacuiñajji nei e'e jojo nei. Pea chama'. Eya mique huoojea'yo ojjaña jaahuanajji, Jesosa Quito bajjani. Ojjaña minijje jjapeequianijo, enijje jjapeequianijo pea'ai, ba'e tiitiije'yo eyajo. 4 Eyaya ojjaña cuana ba meenaje miya quea ca'a nee nee poani. E'e ecue Chii, miyaya eya huoojeanaje miquea echacojji. Ojjaña miquea ehuohui eyaya ajeyojeyo'yonaje. Apoa anaje. 5 Ecue Chii, yahuajo nei nei meshi pana jjimahuajo, eya minijje quea ca'a nee nequia poa. Jamajjeya jjeya eya mi que poquije'yo; ¡quea ca'a nee nee nequi mee'yocue mo, minijje ojjaña huoojeajji! — jamaya Jesosa miminaje oja Chii nijje. 6 —Ecue Chii, eya minijje mimiani e shajja'ajjajji cuanajo. Oya cuana yahuajo miquea epeejji pojjeama poa. Miyaya oya cuana enijje jjapeequi meesahuanaje. Jamajjeya eyaya oya cuana mijo jjabahuejjaqui meenaje. Miquea esohui jayojja jama acanaje. Jjashajja'ajjaquinaje. 7 Jamajjeya jjeya ojjañaja eba ojjaña joya miya e ameesahuanaje eyaya aña. 8 Ecue Chii, miyaya eya huoojeanaje miquea esohui huohuiya esejaya epeejji cuana huasijje. Miquea esohuijo oya cuana jjashahuabaquinaje. Shajja'ajja majje jama acani ba'a: “E'e, Jesosa yahuajo Eyacuiñajji nijje nequi tiitiia poa. Eyacuiñajjiya oya huoojea canaje” poani — Jesosa poanaje. 9 —Ecue Chii, eya minijje mimiani esejaya epeejji jaahuanajji. Ecuea epeejji pojjeamajo, eshahuaja epeejjijo eya mimi ajja. Miyaya esejaya epeejji cuana enijje jjapeequi meesahuanaje. Jamajjeya eya minijje mimiani esejaya epeejji cuanajo, ecuea epeejji miquea epeejji pea'ai poani jojoya. 10 E'e, ojjaña joya enijje jjapeequiani miquea epeejji poani pea'ai. Ojjaña joya minijje jjapeequiani ecuea epeejji poani pea'ai. Ojjañaa eya bihuia cani jama ba'a: “E'e, Jesosa Eyacuiñajjija huoojea'yo”. 11 Ecue Chii, miya quea pame nee nee, quea ca'a nee nee. Jjeya eya mi que poquije'yo, meshijo enequi majajji pojjeama. Esejaya epeejji cuana ca ca jiquiojo nequije. ¡Oya cuana mimishi'ama po meesahuacue! ¡Miquea esohui jayojja jama atiitii meecue! Jamajjeya ¡ojjaña ojee jjashahuabaqui meecue quea ja'a nee! ¡Eya mi jayojjaya jama ojee jjashahuabaquiani! ¡Jamaya oya cuana ojee jjashahuabaqui meecue! 12 Onijje nequiya eyaya ojjaña joya miya enijje jjapeequi meesahuanaje jaahuananaje mijo. Jamajjeya Edosiquiana nei oya cuana dasia mee jjima anaje, mi quea ca'a nee nee poanijojo. Ojjaña eshahua nijje poquiquehua mee jjima anaje pea'ai. Oe nei enijje jjapee pajeaqui'yonaje, poquiquehuanaje. E'e, yahuajo nei esohui huohuijjiya ojo tehue ca poa jama ba'a: “Oya epeejji nisho po majje quea nee nee poaje'yo cuaquijo” ojo tehue ca poa yahuajo nei nei — jamaya Jesosa miminaje Jodasajo. 13 — Ecue Chii, jjeya eya mi que poquije o'oya. Jiquiojo aniya eyaya ecuea epeejji cuana huohuiaña jama ba'a: “Ecue Chii que eya poquije o'oya”. Ma esohuijo oya cuana quea bihui nee nee poaje. E'e, ¡eya quea bihui nee nee poani jayojja jama capoahua oya cuana! 14 Eyaya ecuea epeejji miquea esohui huohuiañajo, onaaya shajja'ajja canaje. Ecuea epeejji pojjeama cuanaja ecuea epeejji cuana boti'ama. Eya oya cuanaja boti'ama pea'ai, o jayojja po ajjajojo. 15 Ecue Chii, ecuea emimi minijje ecuea epeejji cuanajo jama ba'a: ¡A'a jjeya nei oya cuana dojosohuaquijji mi que! Chojja, oya cuana ca ca jiquiojo ba'yanijo ¡jaahuanacue quea pame nee! ¡A'a Edosiquiana neiya oya cuana dasia meejji! 16 Eyaya miquea epeejji pojjeama cuanaja ejjashahuabaquijji jayojja jama jjashahuabaqui ajja. Ecuea epeejji cuana e jayojja jama poani, pea cuanaja ejjashahuabaquijji jayojja jama pojjeama pea'ai. 17 Jamajjeya miquea esohui e'e nei. ¡Esohui jayojja jama poanijo, esejaya epeejji cuana quea ja'a nee nee ba'e meesahuacue, miquea ejjashahuabaquijji jayojjaya! 18 Ecue Chii, miyaya eya huoojeanaje ojjaña cuana huasijje miquea esohui huohuiya. Jamaya eyaya ecuea epeejji huoojeaña pea'ai esohui e'e nei huohuiya ojjaña huasijje. 19 Miquea ejjashahuabaquijji ejo jayojja jama aña eyaya, oya cuana ecuea quea jea nee nee poanijo. E'e, jamaya eyaya aña oya cuana miquea ejjashahuabaquijji jayojja jama epo meesahuajji. Jamaya onaaya acaje'yo miquea esohui bajji poaniya jjejojo — Jesosa poanaje. Jesosa ojjaña joya ojaya epeejji quijje poajejo miminaje oja Chii nijje 20 —Ecue Chii, eya minijje mimiani jiquio epeejji cuanajo — Jesosa poanaje—. Oya cuaa miquea esohui huohui caje pea cuana huasijje. Shajja'ajja majje pea cuana esejaya epeejji poaje'yo pea'ai. Ojjañajo eya minijje mimiani, ojjaña jaahuanajji. 21 ¡Ojjaña ecuea epeejji cuana jjashahuabaqui meecue miquea ejjashahuabaquijji jayojja, ecuea epeejji pojjeamaja ejjashahuabaquijji jama pojjeama! Ecue Chii, eya mi jayojjaya poani. Miya e jayojjaya poani. ¡Esejaya epeejji cuana ese jayojjaya ameecue pea'ai! Jamajjeya ojjañaa ba caje miya e huoojeajji epo. 22 E'e, miyaya eya huoojeanaje miyaya jayojja yajji. Jamaya eyaya oya cuana huoojeaña ese jayojja epojji pea'ai. Jamajjeya oya cuana ese jayojjaya jama ameeaña, ojjaña. 23 E'e ecue Chii, eya ona nijje jjapeequiani. Miya enijje jjapeequiani pea'ai. Jamajjeya oya cuana cajjashahuabaquiahua ese jayojja, ojjaña. Jamajjeya esejaya epeejji pojjeama cajjabahuejjaquiahua esejo jama ba'a: Miyaya eya huoojea'yonaje. Miyaya eya quea jea nee nee aña jayojjaya esejaya epeejji cuana quea jea nee nee aña pea'ai — Jesosa poanaje. 24 —Ecue Chii, yahuajo nei nei, meshi pana jjimahuajo tii, eya miquea quea jea nee nee poa; minijje ojjaña huoojea'yojji poa. Jamajjeya ojjaña ecuea epeejji, ma miyaya enijje jjapeequi mee'yonaje ¡enijje ba'e tiitii mee'yocue eyajo! Jomajo oya cuaa ba caje'yo tii tii miyaya eya ojjaña huoojeajji po mee tiitiiaña — Jesosa poanaje. 25 —Ecue Chii, miya quea pame nee nee, quea ja'a nee nee nequi. Esejaya epeejji pojjeama cuanaja aje oe miya ba jjima. Eyaya ca ca miya baña. Esejaya epeejji cuanaja eba eya mique huoojea'yo. 26 Eyaya oya cuana miya ba meesahua'yonaje. Jamaya po tiitiije'yo. Jamajjeya miyaya eya quea jea nee nee aña jayojjaya jama pea cuana onaaya quea jea nee nee acaje. Eyaya oya cuana esejaya esohui jayojja jama atiitii meesahuaje'yo pea'ai — Jesosa poanaje oja Chii nijje. Mahuiso ojaya emimi oja C hii ni jje.

Pea cuaa Jesosa iña ca'yonaje

1 Majoya oja Chii nijje mimi majje Jesosa ecuana nijje poquinaje. Eta'a nama' Senono bajjani ojje miji yasijje poqui majje onimo acui yiye yasijje poquinaje. 2 Yahuajo Jesosa ma acui yiye yasijje poqui majamajanaje ecuana nijje. Jamajjeya jiquio acui yiye Jodasaja eba neinei poanaje, ma Jesosa iña meesahuajji epojjija eba neinei poanaje. 3 Jamajjeya mecajje onimo yiye yasijje Jodasa poeyanaje Jesosa que, sohuinano cuana nijje. Jodio etii cuaa, Paniseo cuaa pea'ai sohuinano cuana, Eyacuiñajjija equi cuiñajji cuana pea'ai huoojea canaje Jodasa nijje, Jesosa iñaa. Ojjaña poeyanaje baajji, cuaquijijijji pea'ai. 4 Jesosaja ojjañaja ejjashahuabaquijji cuana ojaya eba poanaje. Jamatii oya cuana que poqui majje huohui'ajja canaje jama ba'a: — ¿Ajeo a nequiana ca poeyanaje? ¿Ae sa'ajja'yohua? 5 —Jesosa ma Nasanenajo ba'enaje sa'ajjaña ecuaaya — poanaje cuana. —E'e, eya jiquio Jesosa bajjani — Jesosa poanaje. Jodasa aje oe sohuinano cuana nijje nequinaje, Jesosa iña meeya poe. 6 Jesosaja esohui shajja'ajja majje sohuinano cuana, Eyacuiñajjija equi cuiñajji cuana pea'ai edaasajje tii jaabichaquinaje, oquequinaje meshi yasijje mete majje. 7 Jamajjeya Jesosaa oya cuana huohui'ajja ca o'oyanaje: — ¿Ae sa'ajjaña? —Ecuaaya Jesosa sa'ajjaña, ma Nasanenajo ba'enaje — poanaje. 8 —E'e, eya jiquio Jesosa bajjani — Jesosa poanaje—. Miquianaaya eya oe nei sa'ajjañajo, ¡ecuea epeejji enijje nequi capoquiahua! — Jesosa jamaya poanaje ojaya epeejji cuana nahuejji. 9 E'e, yahuajo Jesosa oja Chii nijje jama poanaje ba'a: “Ojjaña joya miya enijje jjapeequi meesahuanaje eyaya jaahuananaje” jamaya poanaje Jesosa oja Chii nijje yahuajo. 10 Eyacuiñajji nijje emimijji etiija echacojji Manico bajjani sohuinano nijje nequinaje. Majoya Simohui Penohua baa iña majje Manico shajja jajasejjajea ca'yonaje; esapa jajapojojeajji nisho acanaje. Eshajja ebianei mijijje jajasejjajea ca'yonaje, Manicoja. 11 —Peno, ¡miquea baa jja oe ejee yasijje nequia'yocue! ¡Ecue Chiija ejjashahuabaquijji ejo jayojja jama capoahua eya, jamatii quea nee nee poaje! — Jesosa poanaje.

Jesosa iña majje dojo canaje Anasi que

12 Majoya esohuinano huoojeajjiya ojaya sohuinano cuana nijjeya, Jodio etii cuanaja huoojea'yo sohuinano cuana nijjeya pea'aiya Jesosa iña ca'yonaje. Me jeyo majje dojo canaje. 13 Anasija equi yasijje ebionei dojo canaje, ma Caipaja babaja equi yasijje. 14 Caipa aje oe ma shequiajajo Eyacuiñajji nijje emimijji etii poanaje. Ohuaya yahuajo pishana Jodio etii cuana huohui canaje jama ba'a: — ¡Oe dejja camanoqui'yahua ojjaña cuanajo! Jamaya quea pame nee poaje'yo esejo — poanaje.

Peno siajje poanaje Jesosajo

15 Jesosa dojo canaje cuaa, Peno enijje quea huesha pishana ocuenaje achajja Jesosa onaa acaje baa. Eya jiquio esohui tehuejji Huani bajjani. Eya Anasija eba. Jamajjeya eya dobiqui mee canaje ojaya equi yasijje, ma ojjaña Eyacuiñajji nijje emimijji cuana ojee mimiani yasijje. 16 Peno ca ca esecuejo nequinaje, dobiqui mee jjima jjejojo. Jamajjeya eya Anasija eba neineijo cuayaqui o'oyanaje. Esecue jaahuanajji nijje epona nijje e mimiajo, ohuaya Peno dobiqui mee canaje. 17 Ma eponaa esecue jaahuanajjiya Peno huohui'ajja canaje: — ¿A'a miya pea'ai Jesosa nijje poani, o shajja'ajjajji? — Chojja. Jesosa shajja'ajjajji pojjeama ca ca iña — siajje poanaje Peno quea mete jjejojo. 18 Quea huoejo echacojji cuana, esohuinano mese cuana pea'ai cuaqui pejje nei yasijje poeyanaje. Cuaqui pejjejo jjayoqui nequinaje. Jamajjeya Peno jjanequichipiqui majje cuaquijo ejjayoquijji nequinaje ona nijje.

Anasiya Jesosa huohui'ajja canaje ojaya esohuijo

19 Majoya Anasiya Jesosa huohui'ajja canaje ojaya esohuijo, o shajja'ajjajji cuana pea'aijo. 20 Jesosaa saja'a canaje: — Eyaya esohui huohuinaje ojjaña cuana huasijje. Esohui huohuinaje Eyacuiñajjija equijo, equi ojee ejjachichaquijjijo pea'ai ojjaña Jodio cuanaja eshajja'ajjajji. Quehuajje esohui huohui jjima. 21 Jamajjeya ¿apiojji acuae jja oe miyaya eya huohui'ajjaña ecuea ehuohui cuanajo so'o? Ojjañaa eya shajja'ajja canaje. ¡Jamajjeya oya cuana huohui'ajja socue! — Jesosa poanaje. 22 Jesosa shajja'ajja majje sohuinanohua oya shemo cuiasejjajea canaje emeya. Huohui canaje: — ¡A'a jamaya mimijji Eyacuiñajji nijje emimijji etii nijje! — tecuea canaje. 23 —¿A'a jjaya eya esohui quea tai aña? ¡Eyaya esohui quea tai añajoya jja ca iña oe huohuicue! Ecuea siajje ajjima cuana. Jamajjeya ¿apiojji acuae iña emeya cuiaña? — Jesosa poanaje. 24 Majoya Anasiya Jesosa huoojea canaje Caipaja equi yasijje. Eme jeyo tii, pichojea jjima. Ma Caipa ca ca oe Eyacuiñajji nijje emimijji etii ma shequiajajo poa.

Peno siajje po o'oyanaje

25 Peno aje oe cuaqui pejjejo tii nequinaje ejjayoquijji. Jamajjeya pea cuaa oya huohui canaje: — E'e, miya e'e jojo nei Jesosa shajja'ajjajji poani pea'ai — poanaje. — Chojja. Eya ojaya epeejji pojjeama — Peno siajje poanaje. 26 Jamajjeya Peno nijje nequinaje Eyacuiñajji nijje emimijjija echacojji Manicoja huapa pojjeama, ma Penohua shajja jajasejjajea canajeja huapa pojjeama. Ohuaya Peno jama acanaje ba'a: — Eyaya miya banaje Jesosa nijje Onimo yiyejo, de — poanaje. 27 —Chojja, de, Jesosa ecuea ba jjima — nisho po o'oyanaje quea mete jjejojo. Peno mimianijo tii cachina yahue taaanaje. E'e, ma ecua Jesosaa oya huohui canaje jamaya Penohua acanaje.

Shomano emeshi mese Pinato bajjani yasijje Jesosa dojo canaje cuaa

28 Majoya mecajjeahua nei onaaya Caipaja equijo nequi Jesosa huoojea canaje Shomano emeshi mese Pinato bajjani yasijje. Jomajo Pinatohua ojjaña huoojea cani equi yasijje Jesosa dojodobiaqui canaje sohuinano cuaa. Pinato ca ca Jodio pojjeama, Shomano dejja. Jamajjeya Jodio etii cuana ojaya equi yasijje dobiqui sa po ajja. E'e, Jodioja etiiquianaja etehue'yo jama poani ba'a: “Jodio pojjeamaja equi yasijje dobiquiajo, esohuidojojjiya Jodioja bacua cuana cuia ajja shejo ojee ijjia meemee ajja pea Jodio cuana nijje Eyacuiñajji bihuiajji”. 29 Jamajjeya Pinato Jesosa ba majje esecue yasijje cuayaquinaje Jodio etii nijje mimiya. Cuayaqui majje huohui'ajja canaje Pinatohua: — ¿Ajeo shai miquianaaya jiquio dejja tecueaña so'o? ¿Yajja acuae oya poanaje? ¡Huohuicue mo! 30 —Oya aje oe quea tai pojjeama jojjemo ye jjima pome mi que — Jodio etii cuana Jesosajo siajje poanaje. 31 —¡Miquianaaya jja oe oya dojo'yocue! ¡Miquea etiiquianaja etehue'yo jayojja jama oya acue! — Pinato poanaje. —Chojja Pinato, Shomano emeshi mese neiya Sesaa ecuana dejja mimishi caca mee'yo jjima acani acui ecueata'apeejo. ¡Miquea esohuijo oe mano mee'yocue! — poanaje Jodio etii cuana. 32 E'e, jamaya Jodio etii cuaa acanaje ma ecua Jesosaa huohui canaje jayojjaya yajji. E'e, yahuajo Jesosa jama poanaje ba'a: “Quijje eya ba'ehuanasohuajea caje'yo cuaa acui ecueata'apeejo” poanaje. 33 Majoya Pinato equi yasijje dobiqui o'oyanaje Jesosa nijje mimiya. Sohuinano huohui canaje: — ¡Jesosa e que jjequicue! Sohuinano cuaa Jesosa jjequi cajo, Pinatohua huohui'ajja canaje: — Jesosa, ¿a'a miya e'e jojo nei Jodioja Emeshi Mese? ¡Huohuicue mo oe! — poanaje. 34 —Pinato, ¿a'a miya jamatii jjashahuabaquiani eya Emeshi Mese poani? ¿A'a pea cuaa miya ejo jamaya huohui canaje pojja'a? — Jesosa poanaje. 35 —Eya ca ca iña Jodio pojjeama. Jamajjeya miya ecuea eba pojjeama, de. Miya Jodio. Jodio etii cuaa, Jodio Eyacuiñajji nijje emimijji etii cuaaya miya iña majje jjequi canaje e que. Jamajjeya ¡huohuicue mo! ¿Ae poanaje miya? ¿Yajjajje acuae minijje quea quene nee nee poani cuana? —Pinatohua huohui'ajja canaje. 36 Jesosaa oya saja'a canaje jama ba'a: — E'e, eya Emeshi Mese. Jamatii pea emeshi mese jama pojjeama eya. Jiquio meshi cuanajo dejja cuana huoojea'yojji pojjeama. Eya jiquiojo emeshi mese poani jojjemo ecuea echacojjiya Jodio etii nijje jjaquecuaquime, Jodio etii cuaa e iña mee cajo — Jesosa poanaje. 37 —Jamajjeya miya emeshi mese poani, Jesosa. ¿A'a e'e? — Pinato poanaje. —E'e, eya Emeshi Mese poani, miyaya eya e'e jojo nei aña — Jesosa poanaje—. Eya eyajo ani meshi yasijje poeyanaje. Cuayanaje ojjaña cuana Eyacuiñajjija esohui e'e nei ba meeya. Ojjaña joya esohui e'e nei jayojja jama a sa poaniya ecuea esohui shajja'ajja cani — Jesosa poanaje. 38 —¡Dee! Esohui e'e nei chama' pojja'a — Pinato poanaje. Majoya oya esecue yasijje cuayaqui o'oyanaje Jodio etii cuana nijje mimi o'oyaa. Jama poanaje ba'a: — Eyaya Jesosaja esohui shajja'ajjanaje. Oya ca ca quea tai pojjeama, mimishi'ama, de — Pinato poanaje—. 39 Jamajjeya jjeya miquianaya ojee ijjia'ijjiaje esohuidojojjiya yahuajo nei etiiquianaja ebacua cuana cuia'yo jjima aca'ya poa shejo. Ojjaña shequiaja jiquio shejo eyaya oe Jodio dejja ejeanobiajaa huoojeacuayajea'yaña miquianaya quea bihui nee epojji. Jamajjeya ¿e'e pojja'a eyaya Jodio cuanaja Emeshi Mese Jesosa bajjani pichojea'yajo, Jodio cuana quea bihui nee nee poaje? — Pinato poanaje. 40 Jodio etii cuaa Pinato saja'a canaje quea tecueya: — ¡Chojja! ¡A'a jja oe Jesosa pichojea'yojji! ¡Mashama' jja oe pichojea'yocue! — janobajjima nei taaanaje Jodio etii cuana. Mashama' aje oe siipojji quea mas e poan aje.

Jesosa mano'yo sa poanaje acui ecueata'apeejo

1 Jamajoya Pinatohua sohuinano cuana huoojea canaje Jesosa cuiasejjajeaa, jjonohua. 2 Majoya Jesosa cuiasejjajea majje sohuinano cuaa sapahuahuo nisho acuisha sipi majje oja sapajo iñape'ejea canaje. E'e, Jesosa emeshi mese nisho poso acanijo ojo soa neineinaje. Oja daqui huijjiajea mee majje daqui huo'o quea ao, emeshi meseja daqui jayojja huosho mee canaje. 3 Majoya aje oe oya bihuia nisho canaje: — Miya Jodio cuanaja emeshi mese quea pame nee — nisho amajje oya shemo cuiasejjajea canaje emeya. Jamaya ahuicha'a huicha'a canaje sohuinano cuaa. 4 Majoya Pinatohua Jesosa pichojea sa acanaje; esecue yasijje cuayaqui o'oyanaje Jodio etii cuana nijje mimiya. Jama poanaje ba'a: — ¡Bacue! Jesosa nijje mimi majje eyaya baña oya mimishi'ama nei nei. Eyaya oya ejeanobia meejji pojjeama. Jamajjeya jjeya eyaya miquianaya ba meeaña oya Jesosa mimishi'ama nei nei — Pinato poanaje. Jamajjeya Jesosa esecue yasijje cuayanaje. 5 Ojjañaa oya ba canaje sapahuahuo nisho acuisha e'iñape'ejea, daqui huo'o quea ao ehuosho ba'e pea'ai. —Jiquio aje ca Jesosa ba'a. ¿Apiojji onijje quea quene nee nee poani? —Pinato poanaje. 6 Jamatii Jesosa ba majje Jodio sohuinano cuana, joya Eyacuiñajji nijje mimiani cuana pea'ai taaanaje jama ba'a: — ¡Oya acui ecueata'apeejo ba'ehuanasohuajeacue! E'e, ¡acui ecueata'apeejo ba'ehuanasohuajeacue ca coma! — ojjaña janobajjima nei taaanaje. —¡Miquiaaya jja oe oya dojo'yo majje acui ecueata'apeejo ba'ehuanasohuajeacue! Eyaya ca ca oya baña mimishi'ama nei nei — Pinato poanaje. 7 Jodio etii cuaa Pinato saja'a canaje jama ba'a: — Jesosa jama poanaje ba'a: “Eya Eyacuiñajjija Bacua Ejja”. ¡Jamajjeya oya cacuiajea'yahua! Jamaya ecuanaja etiiquianaja etehue'yo poani — jamaya poanaje jiquio Jodio etii cuaa; Jesosa Eyacuiñajjija Bacua Ejja pojjeama poso acanaje. 8 Jamajjeya “Jesosa Eyacuiñajjija Bacua Ejja” Jodio etii cuaa acajo, shajja'ajja majje Pinato quea mete nee nee poanaje. 9 Equi yasijje dobiqui o'oya majje Jesosa huohui'ajja ca o'oyanaje Pinatohua jama ba'a: —Jesosa, ¿achejo ani acuae miya poeyanaje so'o? — poanaje. Jamatii oya Jesosaa saja'a jjima acanaje. Mimi jjima. 10 Jesosaja oya saja'a jjimajojo Shomano emeshi mese Pinatohua oya huohui canaje: —¡Dee! Miya enijje mimi ajja. ¡Bacue! Ecuea esohuijo pea cuaa miya pichojea caje pojja'a; ecuea esohuijo pea cuaa miya acui ecueata'apeejo me cacajea caje pojja'a. ¿A'a miquea ba jjima eya Jodio huoojea'yojji poani jiquiojo? — Pinato poanaje. 11 Majoya Jesosa onijje miminaje jama ba'a: — Eyacuiñajjiya miya ejo huohui mee cani. Miyaya miyaye nei jamatii ejo huohui mee ajja. Jamajjeya joya e iña meejji epo cuana quea mimishi nee nee poani. Miya o jayojja quea mimishi nee nee pojjeama — Jesosa poanaje. 12 Jamajjeya Pinatohua Jesosa pichojea sa neinei acanaje. Jamatii jiquio Jodio etii cuana taaa majamajanaje. Janobajjima nei poanaje: — ¡A'a oya pichojea'yojji! Oya miya pichojea'yojo aje oe miya Shomano huoojea'yojji nei Sesa bajjanija epeejji pojjeama poaje, de. Ojjaña joya emeshi mese nei po sa poani ca ca Sesa jeacuayajeajji epo, de — poanaje. 13 Majoya Jodio cuanaja esohui shajja'ajja majje Jesosa Pinatohua dojo capoquinaje ma ohua ona huoojea cani yasijje. Jomajo anioquenaje yohua bajjanijo ba'a: Mei E'iya nequijo, Jodioja esohuijo ca ca Jabata bajjanijo. 14 Jomajo ojjaña Jodio cuana cojja nei anioque majje Jodio etii cuaa huohui canaje: — ¡Bacue oe Jesosa, miquianajaya Emeshi Mese! — Pinato poanaje. Ojjaña jiquio Jodio etii cuana taaa neineinaje. 15 Jama poanaje ba'a: — Chojja, de. ¡Oya quecua'yocue! ¡Acui ecueata'apeejo ba'ehuanasohuajeacue! —¿A'a eya miquianajaya Emeshi Mese nei me caca meeaña acui ecueata'apeejo emano'yojji? — Pinatohua acanaje. —Ecuanaja emeshi mese yani, oya Shomano emeshi mese Sesa bajjani. Pea chama' — taaame acanaje Eyacuiñajji nijje emimijji etii cuaa. 16 Jamajjeya aje oe Jodio cuaa a sa acani jayojja jama Pinatohua amee canaje. Jesosa dojo mee canaje me caca meeya acui ecueata'apeejo eba'ehuanasohuajeajji. Jamaya poanaje epojja ejomishocajjijo eshequi biacojjajja nequijo, Jodio cuaa bobi chicha cani pojjajo, yahuajo nei esohuidojojjiya Jodio etiiquianaja bacua cuana cuia'yo jjima aca poa shejo. E'e, Jodio cuaa Jesosa manocuaji mee'yo sa acanaje emojea'yojji ojee ijjia'ijjia jjimahuajo.

Jesosa acui ecueata'apeejo ba'ehuanasohuajea canaje cuaa

17 Jamajjeya Pinatohua Jesosa Jodio etii cuana huasijje quia ca'yonaje. Sohuinanohua Jesosa iña majje acui ecueata'apee quea biquie nee bao mee majje dojo mee canaje. Dojo mee canaje eyiyo sisi yasijje, Sapa Jjii anijji bajjani meshi yasijje, Jodioja esohuijo ca ca Jonijota eyiyo huasijje. 18 Sapa Jjii bajjani eyiyo huasijje jaasohuaqui majje majo tii acui ecueata'apeejo Jesosa me cacajea canaje sohuianano cuaa. Me caca majje ba'ehuanasohuajea canaje. Beca dejja mimishi pea acui ecueata'apee cuanajo me jeyo canaje pea'ai. Ba'ehuanasohuajea canaje Jesosa pejjejo, oe shanijje, pea ebianeijje. Jesosa ca ca eyiyesamaneijje ba'ehuanasohuajea canaje. 19 Pinatohua acuijo esohui tehue mee canaje Jesosajo. Etehue'yo acui ecueata'apeejo Jesosa ba'e sapa biacua caca mee canaje. Etehue'yo jama ba'a: OYA JESOSA NASANENAJO BA'E JODIOJA EMESHI MESE NEI 20 Jonijota ma Sapa Jjii eyiyo bajjani Jenosanena pejjejo nequi. Huesha'ama. Jamajjeya Jodio cuaa quea huisohua Pinatoja etehue'yo ba canaje. Ma etehue'yo Jodioja esohuijo tehue mee canaje, Shomano dejjaja esohuijo pea'ai, Jienoja esohuijo pea'ai tehue mee canaje, Pinatohua. 21 Jamajjeya Jodioja Eyacuiñajji nijje emimijji etii cuana Pinatoja etehue'yo Jesosajo ba majje Pinato que poqui o'oyanaje. Huohui cañaquinaje jama ba'a: — ¿Apiojji acuae miyaya tehue meenaje Jesosajo maya? Chojja, a'a jama tehuejji ba'a: “Jesosa Jodio cuanaja Emeshi Mese nei”. Jama tehueme acue ba'a: “Oya aje ca jja oe jama pojea'ajja nequinaje ba'a: — Eya Jodio cuanaja Emeshi Mese — poso poanaje”. Oya Jesosa ecuanaja Emeshi Mese nei pojjeama, de — Jodio etii cuana poanaje. 22 —Chojja. Jamatii. Apoa ecuea etehue mee'yo — Pinatohua oya cuana acanaje. 23 Majoya Jesosa ba'ehuanasohuajeyo'yo majje ebeca pee pea'ai sohuinano cuaa oja daqui cuana chicha ca'yonaje. Iyachicha'yo majje peaa jjeshe'yo, peaa jjeshe'yo acanaje cuaa. 24 Majoya oja daqui nei esipi bame iña canaje. Esipi aojo, esoco pojjeamajo jama poanaje ba'a: — ¡A'a isajeajji! — poanaje. Jamajjeya sohuinano cuaa quebanei po majje daqui nei majjo ca'yonaje ojaya pojji epo'yojji. E'e, joya ecua Eyacuiñajjija esohui huohuijjiya yahuajo nei nei tehue ca poa jayojja jama acanaje sohuinano cuaa. Ma etehue'yo jama poa ba'a: “Ecuea daqui iña caje. Ojjañaa jjeshe caje pea jayojjaa. Ecuea daqui ao iña majje, quebanei po majje daqui majjo caje'yo ojaya epo'yojji”. Yahuajo nei nei tehue ca poa. Jamaya Jesosaja daqui acanaje, sohuinano cuaa. 25 Jesosa acui ecueata'apeejo ba'e pejjejo nequinaje ojaya enaese Mania oja shehue nijje, Queopaja ehuanase Mania bajjani nijje, pea Mania Madanena cuiñajjijo ba'e nijje pea'ai. 26 Jamajjeya Jesosaa enaese ba canaje enijje nequi. Eya aje oe Huani bajjani, Jesosaja quea jea nee nee. Jamajjeya Jesosa ojaya enaese nijje jama poanaje ba'a: — Ecue nae, Huani miquea ebacua ejja jayojja poaje'yo, mi jaahuanajji. 27 Majoya eya acanaje: — Huani, ecue nae miquea enaese poaje. ¡Oya jaahuanacue! — Jesosaa acanaje. Jamajjeya eyaya Jesosaja enaese Mania ecuea equi yasijje dojo'yonaje enijje eba'e'yojji.

Jesosa mano'yonaje

28 Jesosaja eba poanaje ojaya ojjaña oja Chiija esohui jayojja ajeyo canaje. Apoa poanaje. Jamajjeya Eyacuiñajjija esohui yahuajo nei nei jayojja jama poanijo Jesosa taaanaje jama ba'a: — Eya quea naba taja nee nee. 29 Jomajo oe meshimisijo nequinaje acuijjajja na sese. Jamajjeya shajashaja iyanobia canaje ena ejjequi yasijje. Majoya bequiobo sajo quecuahuosho majje Jesosaja enaba huasijje huo canaje ojaya e'ishijji. 30 Jjequibibi majje ishi canaje, Jesosaa. Ishi majje jama poanaje ba'a: —Apoa. Ojjaña Eyacuiñajjija ehuohui'yo jayojja jama eyaya ajeyo'yonaje —poanaje. Jama mimime po majje Jesosa mano'yonaje, poquijeyo'yonaje.

Jesosa mape quecua canaje sohuinano cuaa

31 Majoya Jodio etii cuana Pinato que poqui o'oyanaje. Ba majje jama poanaje ba'a: — Emeshi mese Pinato, ¡dejja cuana eba'ehuanasohua ba'eja equise sa' cuiasajajea meecue! Jamajjeya mano cuajije. Mano'yajo ¡jjequioquea meecue meshi yasijje emojeajji! — Jodio etii cuana poanaje. Jamaya jjashahuabaquime poanaje ba'a: — Mecahuajje epojja ejomishocajji, ojee e'ijjia'ijjiajji quea bihui nee pea'ai. Jamajjeya ¡oya cuana jjeya nei camano mee cahua! ¡A'a mecahuajje ba'e meejji acui ecueata'apeejo! — jjashahuabaquinaje Jodio etii cuana. 32 Jamajjeya Pinatohua sohuinano cuana huoojea canaje. Poe majje sohuinano cuaa dejja mimishi cuana quise sa' cuiasajajea canaje, ma Jesosa pejjejo acui ecueata'apee cuanajo ba'e. 33 Majoya Jesosa ba canaje emano'yo. Jamajjeya oya quise sa' cuiasajajea jjima acanaje. 34 Jamatii oe sohuinanohua Jesosa emapejje quecua canaje emeje aohua. Quecua cajje ena huo'o, ena oshe tejjee pea'ai cuayaquinaje. 35 Eyaya, Huani bajjaniya, banaje ecuea ecojjaa. Jamaya poanaje ba'a: Sohuinano cuaa Jesosa ba'ehuanasohuajea majje oya emano'yo ba'e quecua canaje pea'ai. Oya quise sa' cuiasaja jjima acanaje. Jjeya eyaya jamaya tehueaña. Jamajjeya ojjaña cuana ba meeje ecuea ehuohui Jesosajo e'e jojo nei. Eya siajjepojji pojjeama. 36 E'e, Eyacuiñajjija esohui etehue'yo yahuajo nei Jesosajo jama poanaje ba'a: “Ojaya esa' cuana pea cuanaja ecuiasaja'yojji pojjeama”. Ma ecua Eyacuiñajjiya esohui tehue mee ca'ya poa jamaya Jesosa acanaje cuaa. 37 Pea Jodio etiiquianaja etehue'yo yahuajo nei jama poa ba'a: “Oya quecua cajo, ojjaña cuaa oya ba caje'yo ecojjaa”. Jamaya tehue ca'ya poa yahuajo nei nei Jesosajo.

Jesosa mei jjani ai yasijje huananobia canaje

38 Majoya Jesosa mano'yo majje ojaya epeejji Jose bajjani poeyanaje, pea Jose, Amatea meshijo ba'e. Oya Jodio cuanajo quea metejo quehuajje jjapeequi'yonaje Jesosa nijje yahuajo. Poe majje Jose Pinato huasijje poquinaje. Pinato ba majje huohui'ajja canaje Joseya: — Emeshi mese Pinato, Jesosa mano'yonaje. ¡Eyaya oya jjani yasijje cadojo'yahua ehuananobia'yojji! — poanaje. —E'e, ¡dojocue! Eyaya sohuinano cuana jamaya huohuime aje —huoojea canaje Pinatohua. Jamajoya Jesosaja epeejji cuaa oya emano'yo acui ecueata'apeejo ba'e jjequioquea'yo majje dojo canaje jjani yasijje huananobiaa. 39 Nicodemo, ma yahuajo Jesosa nijje miminaje mecajje, Jose nijje poquinaje Jesosa dojohua. Nicodemohua shiyeshiye pohuipohui, acui shiye sajja pohui quea shiye quea nahue pea'ai dojo canaje Jesosa shicuijji. Quea huiso nee nee dojo canaje 50 quinome. 40 Jamajjeya Jesosa dojo majje shiyeshiye pohuipohuiya shicui canaje. Majoya daqui oshe eyacua neijo bebo canaje. E'e, jamaya Jodio cuaa acani emano'yo cuana ehuananobiajji mei jjani yasijje. 41 Jamajjeya Jesosa eyiyo Sapa Jjii bajjanijo acui ecueata'apeejo eba'ehuanasohua ba'e jjequioquea'yo majje shiyeshiyeya shicui canaje. Shicui majje dojo canaje que quea chipi nee yasijje, mei jjani jjeya nei teo huasijje. 42 Ma mei jjani quea chipi nee poanijo, ojaya epeejji cuaa Jesosa jomajo huananobia ca'yonaje sinecua nei. Jodio cuanaja epojja ejomishocajji poanijo Jesosa huananobia cuaji canaje. Mei copo quea quemohua esecue jjani jaja ca'ajeana'yo majje p oqui'y onaje.

Jesosa shequi o'oyanaje

1 Majoya mecajjeahua nei nei jjaja'a'ajjaqui jjimahuajo ebionei jjapojjaquiajo, nomico pojjajo Mania, pea Mania Madanenajo ba'e poquinaje mei jjani yasijje. Ba cañaquinaje mei copo quea quemo jjani capajji'ya ejeacajjajjajea. 2 Ba majje Mania cuajicuajipoquinaje Simohui Peno huohuiya, e huohuiya pea'ai. E'e, eya Jesosaja epeejji, ojaya quea jea nee nee. Jamajjeya poe majje Maniaa huohui cañaquinaje jama ba'a: — Jesosa dojo canaje cuaa. Jesosa aje oe mei jjanijo chama' nei nei. ¿Achacua shai dojo canaje cuaa? Ecuea ba jjima — poanaje Mania, jjashahuabaqui jjima. 3 Jamajjeya Peno enijje poquicuajinaje mei jjani yasijje. 4 Ecuana ojee cuajicuajinaje. Eyaya cuajicuaji neinei majje ebionei mei jjani bañaquinaje. Peno ca ca quijje pishana poeyanaje. 5 Poe majje, eya jjacueanohuequi majje ye'e'ajjanaje. Daqui oshe banaje e'iyacoca'yo ani. 6 Majoya Simohui Peno e quiquishijji poeyanaje. Oya mei jjani ai yasijje dobiquinaje. Daqui oshe ba canaje meijo e'iyacoca'yo ani. 7 Pea daqui oshe Jesosa sapa bebojji'ya o sapa jaanajejo tii e'iyacoca'yo ani ba canaje pea'ai. 8 E'e, eya ebionei mei jjani yasijje poeyanaje. Jamatii Peno dobiquiyajo, eya dobiquinaje pea'ai. Banaje e'e jojo nei Jesosa chama'. Daqui e'iyacoca'yo ani ba majje eya jjashahuabaquinaje jama ba'a: — ¡E'e de! E'e jojo nei Jesosa emano'yo tii jaa shequi'yonaje. Ma ecua yahuajo ohuaya huohui canaje jamaya oya po'yonaje. 9 Eyacuiñajjija esohui etehue'yo Jesosajo jama poa ba'a: “Quito mano'yo majje shequije'yo”. Jamatii yahuajo ma etehue'yo ecuanaja quea quehua poanaje. 10 Majoya jjani aijo Jesosa chama' ba majje eya Peno nijje equi yasijje poqui o'oyanaje.

Mania Madanenaa Jesosa ba ca o'oyanaje

11 E'e, eya, Huani, Peno nijje equi yasijje poqui o'oyanaje. Jamatii Mania equi yasijje poqui'yo jjima. Mei jjani pejjejo pa aninaje. Oya pea'ai jjacueanohuequinaje eye'e'ajjajji. 12 Ba canaje beca esohuidojojji. Ojaya daqui quea oshe nee nee, bo oshe nee nee jayojja poanaje. Shequi o'oya jjimahuajo Jesosa mei jjani dojjojo jaanaje pea mei biajje. Jjeya ca ca beca esohuidojojji cuana anioquenaje Jesosa jaanaje mei biajje. Jesosa sapa jaanajejo oe esohuidojojji aninaje. O jiojji jaanajejo pea aninaje. 13 Esohuidojojji cuaa Mania jama acanaje ba'a: — Epona, ¿yajjajje acuae mi pani so'o? —Ecuea Emeshi Mese Jesosa dojocuayaqui canaje cuaa. ¿Achacua shai dojo canaje? Ecuea ba jjima — Mania poanaje. 14 Jamaya mimi majje Maniaa Jesosa bajea canaje. Jamatii oya Jesosa eque mese poso acanaje, Jesosa pojjeama poso acanaje. 15 Jamajjeya Jesosaa oya jama acanaje ba'a: — Epona, ¿apiojji acuae mi pani? ¿A'ya cuae miyaya sa'ajjaña so'o? — Jesosa poanaje. —¿A'a miya eque mese? ¿A'a miyaya oya dojonaje pojja'a? ¡Che mo oe huohuicue achacua oya dojonaje! Eyaya oya dojoje'yo shiyeshiye shicuiya —Mania poanaje. 16 —¡Mania! — Jesosa poanaje. Jesosa mimije shajja'ajja majje Maniaa oya ba canaje Jesosa. Jamajjeya Maniaa oya jama acanaje ba'a: — ¡Ecuea esohui huohuijji miya! — poanaje Mania, Jodioja esohuijo—. ¡Raboni! — poanaje. 17 —Mania, ¡a'a eya iña neineijji! ¡Eya capoquiahua ecue Chii ani yasijje! ¡Jjeya poquicue; ecuea epeejji cuana huohuiquicue miyaya! Jama oe acue ba'a: “Jesosa jama poanaje ba'a: — Jjeya eya poquije'yo ecue Chii eyajo ani yasijje, mique Chii eyajo ani yasijje pea'ai. E'e, eya poquije'yo Eyacuiñajji ani yasijje. Oya Eyacuiñajji miquianajaya Chii pea'ai” jamaya aquicue ecuea epeejji cuana — Jesosa poanaje. 18 Majoya Mania Madanena poquinaje Jesosaja epeejji cuana ani yasijje. Ecuana nijje jama poanaje ba'a: — ¡Shajja'ajjacue oe! Eyaya Jesosa ba'yonaje; e'e jojo nei eshe ca coma. Jamaya huohui majje Mania Madanenaa ma Jesosaa huohui canajeya ecuana huohui canaje.

Jesosa ojaya epeejji cuana huasijje poe'yonaje

19 Quijje nomico pojjajo sinecuajo ecuana Jesosaja epeejji ojee aninaje equijo. Jodio yajjajo esecue eca'a nequinaje. Jamatii Jesosa equijo ecuana nijje jjaja'aqui'yonaje. Ecuana nijje miminaje jama ba'a: — ¡Quea bei nee pocue miquianaya! — poanaje. 20 Majoya Jesosaa ecuana ba mee canaje onaja quecuahuejjajea oja eme jjoto, ojaya emape onaja quecua pea'ai ba mee canaje. Jesosa ba majje ecuana quea bihui nee nee poanaje. 21 Jesosaa ecuana huohui ca o'oyanaje jama ba'a: — ¡Quea bei nee nee pocue! Yahuajo ecue Chiiya eya huoojea canaje ojaya echacojji. Jamaya jjeya eyaya miquianaya huoojeaña ecuea esohui huohuiya — Jesosa poanaje. 22 Majoya Jesosaa ecuana huasijje sipojea majje huohui canaje jama ba'a: —¡Edojjoshahua Pame miquiana huasijje cadobiquiahua! 23 E'e, ¡miquianaya ecuea esohui huohuijji pocue! Jamajjeya ojjaña joya oja mimishi pajea sa poani miquianaaya huohuicue ejo jama ba'a: “E'e, Eyacuiñajjiya miquea mimishi cuijea ca'yonaje”. Mimishi pajea sa po ajjajo ca ca huohuicue jama ba'a: “Eyacuiñajjiya miquea mimishi ecuijea'yojji pojjeama” — Jesosa poanaje.

Jesosa Tomasi nijje miminaje

24 Jesosa ecuana nijje, o shajja'ajjajji cuana nijje jjaja'aqui'yonajejo, Tomasi, Beca Jaa bajjani chama' poanaje. 25 Jamajjeya ecuaaya Tomasi huohui majamajanaje jama ba'a: — E'e jojo nei ecuaaya Jesosa ba'yonaje. ¡Eshe ca coma! — ecuanaa anaje. Jamatii Tomasiya saja'a canaje jama ba'a: — E'e pojja'a. Chojja, de. Equecuahuejja ojaya eme jjoto huejja cuana ba majje, napa'ajja majje, ojaya emapejje esi' napa'ajja majje pea'ai ecuea eba poaje Jesosa e'e jojo nei eshe — poanaje Tomasi; Jesosa shequi'yo ajja poso acanaje. 26 Quijje me oejje pea beca cahuime, 7 po majje ecuana ma equijo ojee ani o'oyanaje Tomasi nijje pea'ai. Esecue eca'a nequinaje pea'ai. Jamatii Jesosa ecuana nijje jjaja'aqui o'oyanaje. Ecuana nijje mimi o'oyanaje jama ba'a: — ¡Quea bei nee nee pocue! — poanaje. 27 Majoya ohuaya Tomasi huohui canaje: — Tomasi, ¡ecuea eme bacue! ¡Eme jjoto equecuahuejja napa'ajjacue eme sisiya! ¡Emapejje esi' pea'ai napa'ajjacue! ¡Bacue eya eshequi'yo e'e jojo nei! ¡A'a eya edojjoshahua poso ajji! — Jesosa poanaje. 28 —Jesosa, miya ecuea Emeshi Mese nei, Eyacuiñajji — Tomasiya oya bihuia canaje. 29 —Tomasi, miya e ba majje jjabahuejjaquinaje eya e'e jojo nei eshequi'yo. Pea cuanaja ba jjima ecuea eme jjoto huejja, emape si' pea'ai. Jamatii oya cuana jjabahuejjaquije ejo, eya eshequi'yo. Jamajjeya ¡oya cuana e'e jojo nei quea bihui nee capoahua! — Jesosa poanaje.

¡Huanija etehue'yojo jjabahuejjaquicue!

30 Jesosaa quea huiso pea ma dejjaa ajjima acani acanaje. Maya ecuanaa, o shajja'ajjajji cuaa banaje. Jamatii eyaya, Huani bajjaniya maya tehue jjima jiquio etehue'yojo. 31 Jiquio ecuea etehue'yo eyaya tehuenaje miquiana jjabahuejjaquijji. Jamajjeya jiquio etehue'yo ba majje miquianaya jjabahuejjaquije Jesosa e'e jojo nei Eyacuiñajjija huoojea'yo ojjaña jaahuanajji. Oya Eyacuiñajjija Bacua Ejja nei. E'e, miquianaya majoya e'e jojo nei jjabahuejjaquiajo, Jesosaa miquianaya ba'e tiitii mee caje'yo onijje eyajo.

Jesosa ba ca o'oyanaje ojaya epeejji cuaa me oejje beca huisomeya

1 Quijje ecuana Janinea bae yasijje poqui o'oyanaje. Jomajo Jesosa ecuana nijje, ojaya epeejji cuana nijje jjaja'aqui o'oyanaje. Jama poanaje ba'a: 2 Simohui Peno, Tomasi Beca Jaa bajjani nijje, Natanaeni ma Canajo, Janinea meshijo ba'e nijje, ecuanaya Semeneoja bacua ejja eya, ecue o'i Jacobo nijje, pea beca dejja nijje pea'ai bae sahuajo aninaje. Mahuisoya ecuana ojee aninaje. 3 Peno ecuana nijje jama poanaje ba'a: — Eya ca iña poquije'yo nahuoo cuiashajaa. —E'e, ecuana minijje poquije'yo — saja'ame anaje ecuaa. Jamajjeya ecuana poqui'yonaje bae sahuajje. Bishe ai yasijje aninaje. Mecajje ecuanaa nahuoo cuiashaja'ajja nequinaje tii tii. Jamatii mecajjeahua jjaja'aqui jjimahuajo nahuoo cuiashaja jjima; chama' poanaje. 4 Mecajjeahua nei Jesosa bae sahuajo nequinaje. Jamatii ecuanaja bishejo nequija oya ba jjima poanaje Jesosa. 5 Jesosa ecuana huasijje taaanaje jama ba'a: — Epeejji cuana, ¿a'a nahuoo cuiashajanaje miquianaaya? — huohui'ajja acanaje. —¡Chojja, chama'! — saja'ame ecuaa anaje. 6 —¡Eshajajji jeacue ena huasijje pea mijijje, bishe ebianei mijijje! Jomajo ani nahuoo cuana — Jesosa poanaje. Jamajjeya ecuaaya eshajajji ebianei mijijje jea majje quea huiso nahuoo cuiashajanaje. Quea biquie nee neejo nahuoo cuana jjequisohua jjima anaje bishe yasijje. 7 Jamajjeya eya Peno nijje jama poanaje ba'a: — Peno, maya Jesosa nequi, e'e nei — eya poanaje. E shajja'ajja majje Simohui Penohua oja daqui huosho ca'yonaje. (E'e, chacochacoanijo oja daqui ao huijjiajea canaje.) Daqui ao huosho'yo majje tohuaanaje ena huasijje Jesosa que besapoquiya. 8 Eyaya ca ca pea cuana nijje bishe yonaje meshijaji sahua huasijje. Nahuoo dojobesanaje eshajajjijo, enajo ba'e. Meshijaji huesha'ama, iye huesha nei, beshahua nei quea huesha 100 metros huesha nei. 9 Ba'eñaqui majje ecuanaa banaje Jesosaja nahuoo jiñaqui cuaquijo. Pahui yani equemijji pea'ai. 10 Majoya Jesosa ecuana nijje jama poanaje ba'a: — ¡Nahuoo cuana miquianaja cuiashaja'yo jja oe jjequicue edahuajji! 11 Jamajjeya Simohui Peno bishe yasijje ani o'oya majje nahuoo cuiashajajji meshijaji yasijje jjequisohua sahua canaje. Majoya pejo majje nahuoo banaje quea huiso nee nee, 153 huisome. Ojjaña quea quemo nee, de. Quea biquie nee. Jamatii eshajajji quecuasejjajea jjima poanaje. 12 Majoya Jesosaa ecuana jama acanaje ba'a: — E'e, ¡poecue! ¡Nahuoo ijjiahuacue! — poanaje. —¡Ocuae! ¡Ca'ijjiahua! — ecuana poanaje. Ecuanaja eba oya Jesosa. Jamajjeya oya huohui'ajja jjima jama ba'a: — ¿Ae bajjani acuae mi so'o? —ajjima ecuanajaya. 13 Majoya Jesosaa pahui cuaqui pejjejo ani jjeshe majje ecuana quia ca'yonaje e'ijjiajji, nahuoo pea'ai. 14 E'e, Jesosa mano'yo majje shequi o'oyanaje. Oya ecuana huasijje poe'yonaje. Jjeya pea beca peejjima jjaja'aqui'yome po'yonaje.

Jesosa miminaje Peno nijje

15 Majoya ecuana ijjia'ijjia majje Jesosa miminaje Peno nijje. Jama poanaje ba'a: — Peno, Huanija bacua ejja, ¿a'a miyaya eya quea jea nee nee aña? ¿A'a jiquio pea cuanaja eya quea jea pishana, miquea eya quea jea nee nee? — Jesosaa oya huohui'ajja canaje. —E'e Emeshi Mese, eyaya miya quea jea nee nee aña. Jamaya miquea eba — Peno poanaje. —Jamajjeya ¡ecuea epeejji enijje jjeya nei jjapeequiani huasijje ecuea esohui huohuicue! Oya cuana ñajjajjaja ebacua cuana jayojja jama; jamatii ani poquiquehua chana'. 16 Majoya Jesosaa oya huohui'ajja ca o'oyanaje jama ba'a: — Simohui, Huanija bacua ejja, ¿a'a miyaya eya quea jea nee nee aña? — poanaje. —E'e, Emeshi Mese, eyaya miya quea jea nee nee aña. Jamaya miquea eba — Peno po o'oyanaje. —Jamajjeya ¡ecuea epeejji enijje jjeya nei jjapeequiani jaahuanacue! Oya cuana ñajjajjaja ebacua jayojja jama; ca'a'ama — Jesosa poanaje. 17 Jesosaa pea beca peejjima huohui'ajjame acanaje Peno jama ba'a: —Simohui, Huanija bacua ejja, ¿a'a miyaya eya quea jea nee nee aña? —po majamajanaje. Peno quea yeno poanaje Jesosaja pea beca peejjima huohui'ajjame acajje. Jamajjeya Penohua Jesosa saja'a canaje jama ba'a: — Emeshi Mese, miquea eba ojjaña. Jamajjeya miquea eba eyaya miya quea jea nee nee aña — Peno poanaje. —¡Ecuea epeejji jjeya nei enijje jjapeequiani jaahuanacue! — Jesosaa oya aca o'oyanaje—. 18 Peno, e'e jojo nei eyaya miya huohuiaña jama poaje ba'a: Miya esho'yahuajo miquea daqui huosho majje cua mi poqui sa poani yasijje miya poquinaje. Quijje ca ca miya tii'yajo, me jeyo majje dojo caje cuaa. Ojaya ejjashahuabaqui'yojji jayojja jama miya acaje'yo cuaa — jamaya Jesosa poanaje. 19 Ojaya ehuohuijo Peno ba mee canaje quijje nei oya manoje'yo eme jeyo. Cuanaya quijje nei Peno mano'yajo, ojjaña ba mee caje'yo Eyacuiñajji quea pame nee nee quea ca'a nee nee poani tii tii. Majoya Jesosaa Peno huohui canaje jama ba'a: — Peno, ¡enijje jjapee neineiquicue! — Jesosa poanaje. 20 Majoya Penohua bajea canaje. Eya, Huani ba canaje o quiquishi poeyani. Yahuajo eya Jesosa pejjejo ijjia'ijjianaje, eya ojaya quea jea nee neejo. Ijjia'ijjianijo eyaya Jesosa huohui'ajjanaje jama ba'a: “Jesosa, ¿a'ya cuae mi iña meesahuajji epojji?” eyaya anaje. 21 Penohua e ba majje Jesosa huohui'ajja canaje: — ¿Jesosa, yajja acuae Huani acaje cuaa so'o? — poanaje Peno. 22 Jesosaa Peno saja'a canaje jama ba'a: — Peno, ¿apiojji shai miyaya Huanijo huohui'ajjaña so'o? E'e pojja'a eyaya Huani ecuea epoe o'oyajjijo ba'e mee sa aña. Jamatii. ¡Miya jja oe enijje jjapee neineiquicue! — Jesosa poanaje. 23 Jesosaja esohui shajja'ajja majje ojjaña Jesosaja epeejji cuana huasijje huohuiqui canaje cuaa jama ba'a: — Huani ca pa jjaja ca oe mano'yo ajja poaje, de — poso acanaje cuaa. Jamatii Jesosaja huohui jjima jama ba'a: “Huani emano'yojji pojjeama”. Chojja. Ohuaya jama huohui canaje ejo ba'a: “Peno, ¿apiojji acuae miyaya Huanijo huohui'ajjaña so'o? E'e pojja'a eyaya Huani ba'e mee sa aña ecuea epoe o'oyajjijo, jamatii. ¡A'a peajo jjashahuaba majaquijji! ¡Enijje oe jjapee neineiquicue, miya!” poanaje Jesosa Peno nijje. 24 Eya aje oe Huani bajjani Jesosa shajja'ajjajji poani. Ojjaña ecuea etehue'yo Jesosajo e'e jojo nei. Eyaya aje jja oe banaje ojjaña Jesosaa acaninaje cuana. Jamajjeya miquianajaya eba ecuea esohui Jesosajo e'e jojo nei. 25 Jesosaa pea ma dejjaa ajjima acani quea huiso nee nee acaninaje cuana. Ojjaña ohuaya acaninaje cuana etehue poquia jojjemo quea huiso nee nee pome. Chama' pome papeni etehue'yo huanajji ojjaña meshijo, ca ojjaña Jesosaja esohui etehue poquia jojjemo. Mahuiso ecuea esohui etehue'yo. Eyaya Huani bajjaniya esohui tehuejeyonaje. Apoa.