Deuxu Rybe Wihikỹ Tỹmyra, Joaõ Tyyritidỹỹdu
1-2 Ibutu aõna aõnakõu, Jesuisi rarehyymy raremyhỹ. Tii rybehyymy raninira. Tii Deuxu-wana ihỹre. Ihãre tahe tii Deuxule rare. 3 Tii ibutuhukỹlemy riwinyre. Tiiõhyykeki tahe, aõ releõtyhy. 4 Umytuedeõna wahidỹỹdu tii ihỹre kia-di iny mahãdu rayky ritoosònymyhỹre ritỹnynymyhỹre wahe. Kia loosòna heka bede luru ludu loosòna rare. 5 Bede luru tỹnyna loosòna rare. Loosòna ròtamyhỹre, bede luru tahe ròanodỹỹmyhỹre. 6 Deuxu teòduõ diteònyde, Joaõ inire. 7 Tii loosònamy rarybekremy nade. Kia rybe-di roholamyhỹreki, ibutumy iny rityhynyrenykremy. 8 Joaõ loosòna aõkõ rare. Urile tuu rarybekemy nade. 9 Jesuisile loosònatyhy rare. Tii bede-ò nadeu, ibutumy iny rayky ritoosònyre. 10 Tii bede-ki raremyhỹ, bede widỹỹdu rare, ihãre tahe iny rieryõhyyre mobo tii ihỹre. 11 Tasỹ mahãdu-ò dehemynyde, judeu mahãdu-ò wahe. Ihãre tahe ridyõhyyre, rityhynyõhyyre urile teramy reare. 12 Iu inyõ Jesuisi rityhynymy ridyreu. Deuxu riòreõlemy risỹdỹỹnyre inimy rityhynyreki. Kia-ò tahe ruru tamy riwahinyre. 13 Kia ityhydỹỹdu tahe Deuxudeewilemy tule iriòreõmy roirekemy. Hãlubu-ribi aõkõ ratybienyre, urariribike aõkõ, hãbudeewike aõkõ. Deuxudeewilemy iny ihỹmyhỹrenyre. 14 Rybe tahe umyõ rimyre, demy rexiijenyre, inyyreny-ki rasỹnymyhỹre. Tii tỹxihikỹlemy Deuxu loosòna-di ratximyhỹre, ruxetòena-di inatyhyna-di nade. Inyboho tuu robirenyre. Deuxu Riòre delamy ratximyhỹre, sohojihyyre. 15 Joaõ Jesuisimy rarybere kia wese: —Kiamy heka adeereny rarybere. Tii wahewomy kanakre heka waratyre awityhyre. Tii dori wako-ki rarehyymyhỹ waribi juhuutyhy wahe. 16 Inyboho dori sõwemy ruxetòena iribi ritarenyre. Luuna sõwetyhymy tawo-ribi Jesuisi inydeereny diwahinyde. 17 Deuxu bede ywina tahe Moisesi òraru-ki nade inydeereny. Ruxetòenamy tahe inatyhyna Jesuisi Kristu òraru-ki nade. 18 Inyõ heka tiu Deuxumy robiõtyhy. Deuxuriòre delale heka itỹnydỹỹdu rare. Tuunatyhy-di taãxiòti-ki rimyre. Tiile iny-ò Deuxu ditỹnynyde. 19 Judeu mahãdu Jerusalẽ-ribi xiwena wahidỹỹdu mahãduõ diteònyde Joaõ dỹỹraxidỹỹmy. Levita mahãduõ tule diteònyde. Tahe roirenyre ritỹỹraxinykemy mobo tii raremy. 20 Tahe Joaõ-ò rỹỹraxirenyre aõhereriwe mobo atxiteri. Joaõ dirawyònyde inatyhymy rexitxiõnyreri: —Jiarỹ Kristu Deuxu deòdỹỹna aõkõ jiarỹ rare. 21 Tai tahe ixityre tamy rarybere: —Mobo tahe atxiteri, Elia aõbo. Aõkõre, Joaõ rarybere. Tahe Deuxu dee rybedu atxiteri inyboho riraòrenyreriõ wahe? Joaõ rarybere aõkõremy. 22 Tamy tahe ixityre raryberenyre: —Wakoreny bedelyyke mobo atxiterimy. Tai iny deòdỹỹdu mahãdu-ò arelyyrenykre. Aõmybo iximy manarybeke? 23 Tahe Joaõ rarybere: —Jiarỹ Isaia Deuxumy rybedu wesele adeereny ararybekre. Jiarỹ rybeterenaduõ jiarỹ rare. Jiarỹ bederahy-ki iny-ò rarywãhã. Inynyrỹ-ò ryõ biòbitinyke. 24 Fariseu mahãdu-ribi kia mahãdu roirenyre. 25 Tai tamy rarybere: —Kai Kristu aõbo tate? —Aõkõre. Elia aõbo? —Aõkõre. Deuxu dee rybedu aõbo? —Aõkõre. —Aõhereki tahaka iny teratysebenyteri? 26 Joaõ dirawyònyde: —Jiarỹ bedi iny reratysebenyreri. Inyõ tahe ayrenykile ratxireri. Tii tahe teeryõmahãtenyte. 27 Tii wahewo-ribi kanakre. Jiarỹ raixỹrumy watxireri iwataana ese-ki, tii waratyrereki. 28 Kia ibutumy aõhebo rotỹỹnyre Betỹnia hãwã bede-ki. Jordaõ bero kowa weribi ijà-ki ihỹre. Tai iule Joaõ iny riratysybenymyhỹre. 29 Txubiòwau tahe Jesuisi Joaõ-ò kedehemynykemy nade. Tahe rarybere: —Beteheke, kowa Deuxu budoeni naderi. Tii òraru-ribi iny ritakremynade. 30 Tuu jiarỹ rarybereu, inyõ wahewomy kanakre. Tii waratyre awityhy rare. Tii dori wako-ki rarehyymyhỹ waribi juhuure. Kia rarybereu tule jiarỹ tuurarybemahã. 31 Reeryõre heka tii, ihãre tahe anade tii aritỹnykemy judeu mahãdu-ò. Tai tahe anade iny bedi reratysebenymahãremy. 32 Tahe Joaõ tamyreny relyyre: —Jiarỹ Deuxu Tyytybytyhymy rabire tamy dobehede-ò. Bòtòe wesemy ityre-ò desede. 33 Deuxu riwateònyre bedi iny ariratysebenykemy. Tahe riwateònyreu tahe wadee rarybere: —Aõmy kai bobikre? Deuxu Tyytybytyhy ronymy resekele inyõtyre-ò. Tii sohojile tahe Deuxu Tyytybytyhy-di iny riratysebenykre. 34 Jiarỹ tuu rabire, tai tahe reeryre, tule taheka relyywãhãre, tii inatyhymy Deuxu Riòre raremy. 35 Itxubiòwau tahe Joaõ taerydỹỹna inatxiõ-wana raremyhỹ. 36 Tahe Jesuisi nadeò tuu robire. Tahe tamahãdu-ò rarybere: —Kowa tahe Deuxu Budoeni naderi. 37 Kia rybe-ò tiiboho roholareu, tahe ròirenyre Jesuisi riheludunyrenykremy. 38 Jesuisi tahe tuu robire ihemy roirerimy. Tahe tamyreny rarybere: —Aõbo teijetenyteri. Tahe dirawyònyde: —Rabi (kia rybe tahe irybereny-ki, erydỹỹdu rare), titxibo kai tasỹnymahãte. 39 Jesuisi rirawyònyre: —Bòdòibedenyke betehebenykemy. Tahe tii-wana roirenyre, tamy reteherenyre. Tahe txioromy tii-wana ihỹmyhỹ. 40 Joaõ rybe-ò ijohonaduõ, Jesuisi helududỹỹduõ, Andre rare. Tii Simaõ Pedro seriòre rare. 41 Andre tahe taseriòre Simaõ aõwesele rioryre. Tahe tamy rarybere: —Mesia-ki inyboho rahamy ratximyhỹrenyre. (Ka rybe, Mesia, heka. Kristumy rare, Deuxu deòdỹỹna rare.) 42 Tahe Andre Jesuisi-ò Simaõ didyde. Jesuisi Simaõ-ò retehere urihimyò idi tamy rarybere: —Kai Simaõ tate, Joaõ riòrere. Iribi tahe ani Sefamy rarekre (Kani heka Pedro rare.) 43 Itxubiòwau Jesuisi Kalileia-ò rakremy ixi-di rõhõtinyre. Tahe Filipi riijere. Tamy rarybere: —Wahemy manakekõ aõbo. 44 (Filipi tahe Besaida hãwã luduõ rare Pedro, Andre-wana ihãwãluduõle rare.) 45 Filipi tahe Natanaeli witxi reare. Tamy rarybere: —Moisesi bede ywina tyyriti-ki inyõmy rarybere: —Tule Deuxu dee rybedu tyyriti-ki rarybere. Taile rahare. Jesuisi ihỹre. Nazare hãwã luduõ rare. Jyje riòre rare. 46 Tahe Natanaeli ritỹỹraxinyre: —Aõwihikỹ aõkàbo Nazare hãwã-ribi kadòhònykre. Filipi rirawyònyre: —Manake betehekemy. 47 Jesuisi Natanaelimy robire naderimy tahe tuu rarybere: —Kowa judeu mahãduõ inatyhy rare. Tii hãbu òbiti rare. 48 Tahe Natanaeli rarybere: —Timykibo tiwaeryteri. Jesuisi rirawyònyre: —Figueira òra-ki tanyteò, umy rabire. Filipi aòrysymy raõreule, umy rabire. 49 Natanaeli rimasajuamy rirawyònyre: —Kai Deuxu Riòre tate Inyerydỹỹdu tate. Kai judeu mahãdu Iòlò tate. 50 Jiarỹ adee rarybera: —Figueiraòra-ki umy rabireki. Kiakile aõbo, tiwatyhynyteri. Iratyre aõna aõna wiwihikỹ adee ariteòsinykre. 51 Inatyhytyhymy adee araybekre: —Biuwetyy riranykre. Jiarỹ biuloosòna hãbu jiarỹ rare. Ỹjuboho Deuxu-ribi wadee doideò kai bobikre. Idi waribi roireò bobikre.
1 Inataõ txu-di tỹmyra herina txumy reare. Kana hãwã-ki Kalileia bede-ki. Jesuisise tai ratximyhỹre. 2 Jesuisi tule ritobinyre tamy rakremy taerydỹỹna mahãdu-wana. 3 Lisinaube tya-ki vĩĩ mona ituere. Tai Jesuisise Jesuisi-ò rarybere: —Vĩĩ mona ituere, imona kõre. 4 Jesuisi rarybere: —Nadi, aõhebo arotỹỹnykre. Aõka wawidỹỹkõna wabededỹỹnanamy aõkõka bede rỹireri. 5 Tahe Jesuisise deòdu mahãdu-ò rarybere: —Anowidỹkỹmy adekereny tiki rarybekeki, ibutumy biwinybenyke. 6 Debòsohoji reurò mana butxi nihikỹ tai rỹimyhỹ judeu mahãdu ibe-di brebu òraru-ki aõna aõna risuhòmyhỹre worana bedehesinau. Mana butxi sohoji sohoji 80 urihixina ratyre rimyre. 7 Jesuisi tamyreny rarybere: —Ibutumy bedi bitỹxinybenyke. Tahe ibutumy ijà ratyre ritỹxinyrenyre. 8 Katahe iribi bitake. Worana bedehesi wedu-ò biwybenyke imona. Tahe riwyrenyre. 9 Kia bee heka Jesuisi riwitxiranyre vĩĩ monamy. Tahe iwedu riurihire, rieryõre tiribibo nade. Deòdu tahe rieryre juhuu bee rare. Tahe iwedu rarybere weryrybò heridu-ò: 10 —Katahe awityhyre. Kai ijõ-ribi iwitxiratyhymy tewinyteri. Ijõ iny heka awityhy iko-ò ritxiwimyhỹ. Ihewomy tahe awiriòre ritxiwimyhỹre. Kai tahe awityhy ikonana-ò teyrubunyta. 11 Katahe aõna aõna wiwihikỹ iny itxerenamy juhu ludu rare. Kana hãwã-ki Kalileia bede-ki ihỹre. Tii tarurutere riteòsinymyhỹre taerydỹỹna mahãdu-ò. Tai ierydỹỹna mahãdu rityhynyre. 12 Iribi tahe Kafanaõ hãwã-ò Jesuisi dobehede tadi, taseriòre, taerydỹỹna mahãdu tii-wana roirenyre. Ijõtxumy tahe tai bede tỹnyna rỹira. 13 Pascoa worana bedehesi iòhòmy rỹireu, Jerusalẽ rotuore kia tahe judeu mahãdu worana bedehesina rare. 14 Tai Jesuisi Deuxu dohodỹỹna hetowo-ò ralore. Tahe iwo-ki itxi reare sõwemy aõna aõna-di rohonyreriò, broreni-di ijohodu-txi, budoeni-di ijohodu-txi, bòtòe-di ijohodu-txi, tule nieru witxira witxira wibydỹỹdu mahãdu-txi reare tai ronymyhỹki. 15 Jesuisi reroti awaru hãtena wesemy riwinyre. Idi tahe dohodỹỹna hetowo-ribi ibutumy riòlòdỹỹre, budoeni, broreni-wana, tahe nieru wibydỹỹdu mahãdu oworubesedỹỹ-di Jesuisi rehure, tai nieru rejuxunyre. 16 Tahe rare bòtòe-di ijohodu-ò. Tamy rarybere: —Biòlòdỹỹnyke wa. Waha heto dori aõ-di ijohona aõkõ rare. 17 Tahe Jesuisi erydỹỹna mahãdu tõhõti-txi reare aõbo Deuxu Tyyriti-ki roiretxi: —Waha heto yrubudỹỹna-ki dori riwasamyhỹre. Ariyrubunykemy dori watxireri, tai riwasareri. 18 Judeu mahãdu Jesuisi-ò rỹỹraxire: —Aõherekibo kai teòlòdỹỹnyteri. Mobo he arateranyreri tuu biwinykemy. 19 Tahe Jesuisi rirawyònyre: —Deuxusỹ-di behuke tahe inataõ txu-di aditamadỹỹnykre. 20 Tahe judeu mahãdu rarybere: —Ka heto 46 beòra-di relere, timykibo kai inatãõ txu-di biwinykemy. 21 Jesuisi tahe Deuxusỹmy taumylemy rarybere. 22 Iribi tahe iu rubu-ribi iixixana-txi tõhõtireny reare, kia tuu rarybere-txi. Tai heka iritina rityhynyre, tule Jesuisi rybe rityhynyre. 23 Jerusalẽ-ki Jesuisi Pascoa worana bedehesidỹỹna riwyre. Aõna aõna wiwihikỹ inyy-ki ritxienyre riwinyre. Tai sõwemy iny inityhy rityhynyre. 24 Jesuisi tahe urihimyòle iny rityhynyre. 25 Tii dori ibutumy iny rayky rierymyhỹre. Inyõ timy iny raremy tiu tamy aõna relyyõtyhy tii ibutumy aõerydu rareki.
1 Nikodema fariseu mahãduõ rare. Tii judeu mahãdu weduõ rare. 2 Tii rudimy Jesuisi roramy rara. Tahe tamy rarybere: —Wanyrỹ, reeryrenyre kai Deuxu-ribi erydỹỹdu tate. Inyõ Deuxu-diõkeki tii aõ wiwihikỹ riwinyõtyhy. Iwese aõ wiwihikỹ kai tewinyte wese. 3 Tahe Jesuisi rirawyònyre: —Inatyhytyhymy adee ararybekre: —Inyõ ixityre reakõkeki, tiu Deuxu Òlònasỹmy robiõtyhy. 4 Nikodema rỹỹraxire: —Timykibo matuari ixityre reakemy. Timyrabo, ixyby tadiwo-ò iny ralòkeki aõbo ixyby iny raumynyke. 5 Tahe Jesuisi rirawyònyre. Inatyhytyhymy rarybere. Inyõ bera-ribi ratybienyõkeki Deuxu Tyytybytyhy-ribi ratybienyõkeki, tiu ralòõtyhy Deuxu Òlòna-ò. 6 Deribi tybie heka dee rare. Deuxu Tyytybytyhy-ribi tybie tasỹ tyytyby rare. 7 Idi wanaòtaõmy aõmybo rarybereridi ixityre ijiranamy. 8 Tiò tiò yhy ribonymyhỹre: —Iwodỹỹ taholate, tahe tiribibo namyhỹde teeryõmahãte tiòhe ramyhỹre teeryõte, kia wesele iny Deuxu Tyytybytyhy-ribi tybie iny rỹire. 9 Tahe Nikodema rỹỹraxire: —Timyrebohe kia ratxike. 10 Jesuisi dirawyònyde: —Kai judeu bede erysydỹỹdu tate ihãrele teeryõte aõbo. 11 Inatyhytyhymy adee rarybere aõmybo reeryre, aõmybo rabire. Ihãrele tahe kia tetyhynyõte. 12 Bede aõmydỹỹnanamy rarybere tahe tetyhynyõte. Timybo bityhynyke biu aõmydỹỹnanamy ararybekeki. 13 Iny sohojile biu-ò raòwònyre, Deuxu Riòre Hãbutyhyhykỹ rare. Tiile iribi juhu dobehede. (Tiile isỹre. Taile isỹ roire.) 14 Iwese Moisesi bederahy-ki womati hemylala ritamadỹỹnyre wese, Kiawesele jiarỹ, Deuxu Riòre Hãbutyhyhykỹ, wadi kidiwatamadỹỹnykre. 15 Tahe inyõ wadi rityhynykeki, umytuedeòna tuu ritamy rỹihyy rakre. 16 Deuxu Riòre sohojihyyle rare. Deuxu bede ludu mahãdu ibutumy iluutyhyre. Tai tahe tariòre diteònyde iny rityhynykremy. Inyõ tii rityhynyre-wana, umytueõnahakỹ ritakre. Tii ruruõtyhy rubu bina bede-ò. 17 Deuxu taRiòre bede-ò diteònyde bede iny mahãdu tarasadumy rarekemy. Aõ iny ywisidỹỹna-ò rirutykemy aõkõ. 18 Inyõ rityhynymyhỹreki, tii ywisidỹỹdu idi rehuõtyhy. Iny rityhynyõmyhỹreki tiihe aõhõkỹmy dỹỹnana-txi riteònykremy Deuxu idi ratximyhỹre, tii dori Jesuisi rityhynyõhyymyhỹre, Deuxu Riòre dela wahe. 19 Ibinatyhymy iny aõmydỹỹnana bede bedemy rỹira, tai bede luru-ki rira tamy awira. Tuu loosòna nadeu, tamy ibinare. Tai tahe Deuxu riteònykemy idi ratximyhỹre. 20 Inyõ aõbinahakỹ rotỹỹnymyhỹre, loosòna dera heka tuu rỹira; loosòna-ò rehemynyõtyhy, rehemynyre-wana, iny taaõbina bina rierymyhỹre. 21 Iny tahe awiwihikỹle rotỹỹnymyhỹre-wana tii tahe loosòna-ò rehemynykremy rỹira, taaõmydỹỹnana dori Deuxudeewimy ririmyhỹre, ibutu iny rierykremy ririre. 22 Iribi tahe Jesuisi taerydỹỹna mahãdu-wana Judeia bede-ò ròirenyre. Tai heka bededỹỹnanaõ riwyre. Tiiboho iny ityhydỹỹdu mahãduõ tai riratysebenyrenyre. 23 Joaõ iribi iòhòmy ratxireri. Iny riratysebenymyhỹre. Tii Eno hãwã-ki Salĩ hãwã-ribi iòhòmy roire. Tai riratysebenyre sõwemy bee tai roimyhỹreki. Sõwemy iny tamy ratysebenymy rare. 24 (Joaõ iu rotenamy ralòõlemy ratximyhỹ.) 25 Judeu mahãduõ, Joaõ erydỹỹna mahãdu-wana rybetere txiõdỹỹna ròhònyra, bede ywina òbiti aõmydỹỹnanamy wahe. 26 Tahe Joaõ erydỹỹna Joaõ-ò doidenyde rarybekremy: —Waerydỹỹdureny. Kai hãbumy telyymy tatemahã, kia Jordaõ kanawe-ribi ijà-ki umy-wana raremyhỹ, tii ròratysebenyreri. Sõwemy iny tamy wirotyre. 27 Tahe Joaõ tamy rarybere: —Kia wadee awire aõ aõkõ iny ritamyhỹre, biu-ribi kanakekile tahe iny aõ ritake. 28 Jiarỹ heka Jesuisi nonanamy ijyymy diwateònyde wahewo-ribi kanakremy. Jiarỹ tii aõkõ rare. Tii tahe Kristu tyhy rare. Jiarỹ kiamy juhuu rarybewãhãre: —Kia tahe teerytenyte. 29 Inatyhymy tahe hãbumy heridu wesemy Jesuisi rare. Ibutumy iny tuu robikemy tamy wiirotyre. Ibiòwa weselemy jiarỹ rare. Tahe irybe-ò raholareu, reysamy rarewãhã. 30 Tai wadee awire iny tii rieryreki, waribi tahe nohõti rosakemy idi watxiwãhãre. 31 Tii biujuxahakỹ-ribi nadeki ibutu ratyremy ratximyhỹre. Bede-ribi jiarỹ anadeki, tahe bede ludu jiarỹ rare, bede aõmydỹỹnanamy rarybewãhãre. 32 Tii rarybere aõmybo roholare, robire, tahe ijõ iny rityhynyõhyyre irybe. 33 Inyõ tahe rityhynykeki, tii tule ijõ-ò rarybere, Deuxu inatyhy rare wahe. 34 Deuxu deòdỹỹna heka irybelemy rarybere Deuxu dori Tatyytybytyhy ibutumy tamy diwahinyde. 35 Tyby taRiòre luure, tai tahe ibutu aõmydỹỹnana ywisidỹỹmy tamy diwahinymy diteònyde. 36 Iny Jesuisi rityhynymyhỹreki, umytuedeònahakỹ-di iny rỹira. Inyõ tamy ratxiõkeki, tiu umytuedeõna robiõtyhy, Deuxu ykarana dori tii-wana ratximyhỹre.
1-4 Inyõ fariseu mahãdu-ò rarybere: —Jesuisi Joaõ-ribi iny sõwemy diratysebenymyhỹde. Sõwemy iny ritamyhỹre ierydỹỹmy. Tahe Jesuisi aõkõ ròratysebedỹỹmyhỹre, ierydỹỹnale tahe riratysebenymyhỹre. Iu Jesuisi kiamy rieryreu tahe, Judeia-ribi rexitare. Roirenyre Kalileia bede-ò ritehemynykemy. Roirenyreu tahe Samaria bededihyyle riòhòrenyre. 5 Samaria bede hãwãõ-ò tahe ritehemynyre. Sika inire. Ijaò riòresu-ribi iòhòmy ròira, tariòre Jyje-ò riwahinyre wahe. Ijaò behãloo tai rỹimyhỹ. 6 Txutyeu tahe Jesuisi elerihynymy ronymyhỹ tatilemy nadeki berysyna werora-ki. 7 Tahe Samaria mahãdu hãwyyõ dobehede beitxemy. Jesuisi tamy rarybere: —Beõ inihe wadee bidiõke. 8 Jesuisi erydỹỹna mahãdu tahe juhuu roirenyre hãwã-ò rỹsỹna itxemy. Tai Jesuisi riraòmy ronymyhỹ. 9 Tahe hãwyy rarybere: —Kai judeu mahãdu tate, jikarỹ samaria mahãdu rare. Anoherekibo wadeke texitòenyteri bemomomy. (Judeu mahãdu Samaria mahãdu-wana wiymy reaõhyymyhỹre. Widi òludu wesemy rare.) 10 Tahe Jesuisi rirawyònyre: —Kai heka teeryõhyyteri mobo jiarỹ rare wahe. Tule, Deuxu wahisidỹỹna teeryõte. Tiwaeryteriwana kai bedexitòenyke, tahe bee irumy ihỹre adee ariwahinyke. 11 Hãwyy rarybere: —Wahĩ, timybo bee irumy ihỹre wadeke kanakre. Kai ahynakõre, hãloko heka behekỹre bee irehere. Timybo bee iru kumy-wana ratxireri. 12 Kai anobohe inytyby Ijaò ratyrere. Tiki heka behãloko wedu juhuku rare; idi riwahinyre inydekereny. Iribile iritxiòre riõmyhỹre tiki-wana, ibroreni riõmyhỹre. 13 Jesuisi tahe tarybetyhy-di rarybere: —Inyõ kahãloobemy riõkeki, ixityre bemomomy ruruke. 14 Jiarỹ bee ariwahinyke. Inyõ tahe kiabemy riõke-wana, tiu bemy tamy umytuedeõnahakỹ riwahinyhyymyhỹre. 15 Tahe hãwyy rarybere: —Wahĩ bee tuedekõdu ikuny tuu kariõke. Tai kakò kanakõtyhy berysymy. 16 Tahe Jesuisi rarybere: —Maa hỹny, ahãbu biòryke, tahe manake. 17 Hãwyy dirawyònyde: —Anokõre, wahãbukõre. Jesuisi rarybere: —Inatyhymy tarybeteri ahãbuõremy. 18 Kai heka iruyre ahãbu tate. Wijina tahe ahãbu aõkõ rare atỹhibiòwale wahe. Kia tahe inatyhymy tarybeteri. 19 Wahĩ, wiji tahe arakeryra, kai Deuxu rybeduõ tate. 20 Wahareny Deuxumy reàlàmyhỹre kahãwãlò-ki. Amahãdu anokõ, tamy tahe Jerusalẽ Deuxu deàlàna rare. 21 Tahe Jesuisi rarybere: —Lerỹ, warybe bityhynyke. Kanakre itxu kahãwãlò-ki aõkõ, Jerusalẽ-ki aõkõ Waha Deuxu deàlàna rarekre. 22 Kaiboho aõmybo teàlàte teeryõtenyte. Jiarỹboho tahe aõmybo reàlàre, reeryrenyre, tarasana dori judeu mahãdu-ribi nade. 23 Kia bededỹỹnanamy reara. Inyõ Waha Deuxu àlànamy ratximyhỹreki Deuxu Tyytybytyhy-di, inatyhyna-di reàlàmyhỹke. Tuu deàlàna mahãdu Deuxu riijemyhỹre. 24 Deuxu Tyytyby rare: —Tai tahe tudeàlànadu tatyytyby-ki inatyhyna-ki tuu reàlàmyhỹre. 25 Kia tahe jikarỹ rekeryre, Mesia kanakre, Deuxu dekòdỹkỹnamy wahe, Kristu inire. Tiki kanakreku wahe, ibutumy inydekereny anona anonamy relykykre. 26 Jesuisi rarybere: —Jiarỹ tahe tiire, umy-wana wiji rarybereri wahe. 27 Tahe Jesuisi erydỹỹna mahãdu rehemynyre. Hãwyy-wana rarybereriki tahe ribedeòtiidỹỹnyrenyre. Tahe inyõ tamy rỹỹraxiõhyyre. Aõmybo tamy rỹỹraxire, ada aõherekibo tamy rarybereriki. 28 Iu tahe hãwyy tabutxi ririre, hãwã-ò rara. Tahe tahãwã mahãdu-ò rarybere: 29 —Bodoibedenyke wahemy. Betehebenykemy hãbu-kò. Tiki wakoku relykyre ibutumy anohebo ratỹkỹnymahãremy. Tiki kòsana Kristu ratxireri. Deuxu dekòdỹkỹna rare. 30 Hãwã-ribi roirenyre Jesuisi-ò. 31 Iu hãwyy hãwã-ki rareamyhỹreu, tahe ierydỹỹna Jesuisi-ò rarybere: —Iny erydỹỹdureny rỹsỹnaõ birỹsỹke. 32 Tahe Jesuisi rarybere: —Warỹsỹnadire wahe. Kaiboho heka kia rỹsỹna teeryõtenyte. 33 Tahe widee raryberenyre: —Inyõ kõaõboka tamy rỹsỹnaõ riwyreri. 34 Jesuisi rarybere: —Wadeòdỹỹdu deewimy ariwinykemy idi watxireri. Kia tahe warỹsỹnare, iaõmysỹdỹỹna arihukemy wahe. 35 Maixõmo butuna inaubiòwa ahãdu-di bidiòrarunybenykremy kaiboho tahõtinytenyteri. Tahe aõkõre adeereny ararybekre. Betehebenyke bedero-ò. Maixõmo redenamy rỹire. 36 Kia maixõmo butudỹỹdu iòwy ritake, tahe umytuedeõnahakỹ-ò iny ributunyre. Tahe wiwanale riwodeysanymyhỹre ibròdỹỹdu ibutudỹỹdu-wana. 37 Iwese inyõ rarybere wese, inatyhy rare. Ijõ tahe ibòròdỹỹdu rare. Iwitxira tahe ibutudỹỹna rare. 38 Jiarỹ kaiboho arateònymahãre. Aõbo tebòrònyõtenyte tahe bibutunyke. Juhuu inyõ raaõmysỹdỹỹre: —Kaiboho tahe iraty temytenyte. 39 Tahe hãwyy òraru-ki sõwemy Samaria hãwã mahãdu rityhynyre. Hãwyy rarybere juhuu: —Tiki wakoku relykyre ibutumy anohebo ratỹkỹnymahãre walananonanamy relykyre. Kia rybe òraru-ki tahe rityhynyrenyre. 40 Samaria hãwã mahãdu tahe Jesuisi-ò rexitòenyre tii-wana roirekemy. Tahe Jesuisi tii-wana inatxi txumy riwyre. 41 Sõwemy tahe rityhynyre Jesuisi Rybe òraru-ki. 42 Tahe hãwyy-ò rarybere. Wiji tahe arybe òraru-ki aõkõ retyhynyreri. Tamy tyhy-ò jiarỹle raholare, tahe reeryre tii bede iny tarasadu tyhymy raremy. 43 Inatxitxu-di tahe Samaria-ribi rare Kalileia bede-ò. 44 Jesuisile dori rarybere: —Deuxu rybeduõ uladumy ijirana bede-ki iny rityhynyõhyymyhỹ. Tiu tamy wowydynaõ riwahinyõtyhy. 45 Kalileia mahãdu juhuu Jerusalẽ-ò tule roirenyre, worana bedehesi rỹimyhỹraò. Ibutumy aõbo Jesuisi riwinyra heka tiiboho reteherenyre. Tai Jesuisi tasubede-ò rehemynyre tiiboho awimy ridyrenyre. 46 Tahe ixityre Jesuisi rehemynyre Kana hãwã-ò. Juhuu tai bee riwitxiranyre vĩĩ monamy wahe. Bede dinodu aõmysỹdỹỹdu Kafanaõ-ki rasỹnyre. 47 Jesuisi Kana hãwã-ki ratxirerimy hãbu roholareu, tamy rara. Tariòre dori ibinamy roire taheto-ki. Jesuisi-ò hãbu rarybere: —Manakekõ aõbo waheto-ò wariòre biteytekemy. 48 Jesuisi rirawyònyre: —Kaiboho bede aõmydỹỹnana wiwihikỹ tetehetenyteule tetyhynytenyte. 49 Hãbu heka Jesuisi-ò rarybere: —Wanyrỹ, wylemy manake wariòre rurukreko-txi. 50 Jesuisi rarybere: —Bòòseke, ariòre dori awimy relera. 51 Tahe tii Jesuisi rybe rityhynyra tai ròòsere taheto-ò rakemy. Ijõ txu tahe ryro-ki teòdu-wana witxi reare. Tii rarybere: —Ariòre reytera ahetokile. 52 Hãbu ritỹỹraxinyre tiubo reytera. Tahe relyyre. Kaule, txutyeu reytera. 53 Jesuisi rarybereu, kiaule iriòre reytera. Hãbu rieryre. Tai tahe idi ibutumy hãbu sỹmahãdu Jesuisi rityhynyre. 54 Kia tahe Jesuisi inatxina aõna aõna wiwihikỹ iny itxeranamy riwinyre Kalileia bede-ki.
1 Iribi tahe judeu mahãdu worana bedehesimy rỹimyhỹ. Tai tahe Jesuisi rare Jerusalẽ-ò. 2 Hãwãy-ki tahe hãloo ibedỹỹ roimyhỹ budoeni ryijò iòhò-ki rỹimyhỹ. Beteta inire, hebraika rybe ini rare, judeu rybe wahe. Iruyre iwòtena ube iwerora-ki rỹire. 3 Sõwemy webinadu ube-ò wii rotyre, iny ruetà ijõre, iny tiere ijõre, inytibina ijõre. 4 Tiiboho ỹjuõ riraòmyhỹre. Ỹju beò rerireu tahe raukỹre. Mobo juhu itxi resekeki tahe, tii reytemyhỹre. 5 Hãbuõ 38 beòramy ibinamy roimy raremyhỹ. 6 Jesuisi tamy retehereu, rieryre tiwesebeòrabo ibinamy roimy rare myhỹ. Tahe tamy rarybere: —Kai aõbohe beytekekõ. 7 Hãbu dirawyònyde: —Aõkõre Wanyrỹ, wawiòhedỹỹduõre. Bee rexiukỹnyrau, ijõ wako-ò ralòmyhỹre. 8 Jesuisi tamy rarybere: —Myikewa, abyre bimyke, mariake. 9 Aõwesele hãbu rỹimy reare, awimy. Tabyre rimyre tahe rariare. Kia txu tahe sabado txu rare. Kia txu tahe judeu aõmysỹdỹỹna txu aõkõ rare. 10 Tai tahe judeu mahãduõ tamy rarybere: —Abyre-di riraõmy, sabado txu dori òbiti aõkõ rareki. 11 Tahe dirawyònyde: —Wadeytedỹỹdu wadee rarybere wabyre arimykemy. 12 Tahe tamy rỹỹraxire: —Mobo adee rarybere abyre bimykemy idi mariakemy. 13 Tahe hãbu deytedu rieryõre mobo rare. Jesuisi dori dexitade iribi. Sõwemy iny tai rỹimyhỹ. 14 Deuxu dohodỹỹna heto-ki Jesuisi idi hãbu-ki rahara. Tamy rarybere: —Kai teyteta, inatyhy. Tai tahe aòraruna biixãwidinyke, aõbinatyhy aõhe adee rotỹỹnyheny. 15 Hãbu tahe rare. Judeu mahãdu-ò rarybere, mobo teytedỹỹdu raremy, Jesuisi wahe. 16 Tai tahe judeu mahãdu Jesuisi ibinamy rexidelenymy rarybere, sabado txuu kia riwinyreki. 17 Jesuisi tahe rarybere tamyreny: —Waha, Deuxu aõu raaõmysỹdỹỹre, jiarỹ tulere. 18 Tai tahe sõwemy irubudỹỹmy rurumyhỹre. Sabado txu bede ywina-ribi tii riywinyõre. Tule Jesuisi Deuxu wesemy rexioire, Wahamy dori rarybemyhỹreki. 19 Tai tahe Jesuisi tamyreny rarybere: —Jiarỹ ixi-di aõkõ aõmydỹỹnanamy ratỹỹnymahãre aõbo Waha riwinymyhỹre, jiarỹ tule rewinywãhãre iweselemy. 20 Waha Deuxu dori waluure. Aõbo riwinyre wadee riteòsinyre, tai tahe aõruxerahakỹtyhymybo bobibenykre, idi bede biòtiinybenykre. 21 Waha Deuxu dori rubu-ribi iny riixixanymyhỹre. Tai tule jiarỹ iny areixixanyke ixideewikeki. 22-23 Ibutumy iny hitxidỹỹna Waha wadee tuu rarybera, tii dori iny rihitxidỹỹnyõtyhy. Jiarỹle tahe iny ywisidỹỹdumy aròhònykre, tai iwese Deuxu iny riwowydynymyhỹre wesele iny riwawowydynymyhỹkre. Adeereny Deuxu diwateònyde. Tai inyõ riwawowydynyõkeki, tii Deuxu riwowydynyõreri. 24 Inatyhytyhymy adeereny ararybekre. Inyõ warybe roholakeki, wateòdỹỹdu rityhynykeki, tii wijityhyle umytuedeõna ritake, ywisidỹỹduko-ò ròhònyõtyhy, rubu ryribi ròhònyre umy irumy ihỹre ryò iny ralòmyhỹre. 25 Inatyhytyhymy adee arelyykre: —Bededỹỹnana-ki kòhòra, bede dỹỹnanamy reara. Tahe rubu mahãdu Deuxu Riòre rybe-ò roholakre. Roholamy rỹikeu tahe irumy rỹike. 26 Tyby dori iumyõnanaõhyyre wese tule iRiòre rare. Umytuedeõna wedu rare. 27 IRiòre heka hitxidỹỹna wedumy relere. Tii dori Deuxu Riòre Hãbutyhyhykỹ tii rare, jiarỹ wahe. 28 Bedeòtiidỹỹõmy tahe bededỹỹnanamy he reare. Rubu mahãdu wabedey-ki warybe-ò roholakre, tai iribi ròhònykre. 29 Ibutumy aõwibo riwinyre mahãdu kedexixakre umytuedeõnahakỹ-di. Kia ibinamy riwinymyhỹre mahãdu ywisidỹỹdu-ò rexixakre. 30 Jiarỹ ixi-di aõkõ aõmydỹỹnanamy ratỹỹnywãhãre. Iwese Waha-ò raholare wese iny ywisidỹỹmy aròhònykre. Waywisidỹỹna heka òbiti rare. Wadee wimy aõkõ dori tuu watxiwãhãre. Waha wadeòdudeewimy tuu watxiwãhãre. 31 Iximy ararybekeki, inyõ riwatyhynyõtyhy. 32 Iwitxira heka tuu rarybereri wamy wahe. Reeryre inatyhy raremy. 33 Kaiboho inywitxira teteònytenyte. Joaõ ratysebedỹỹdu-ò rỹỹraxikemy ibutumy kia wamy rarybere inatyhy rare jiarỹ inatyhy rare. 34 Iny wamy rarybemyhỹre, tahe jiarỹle kia reijeõhyymahãre inyle rieryõre wamy rybe, wahe. Tahe kiamy adee relyywãhãre kaiboho ritamy rỹikemy. 35 Joaõ tahe loosòna wesemy raremyhỹ. Tii urihimyò bededỹỹnana ritoosònymy raremyhỹwesemy tahe kaiboho atximahãtenyte. Idi urihimy-ò teysatenyte iloosòna-di, idi iribi kaiboho terarenyre. 36 Jiarỹ Waha òraru-ki aõmydỹỹnana wiwihikỹ, rewinymahãre. Kaheka inatyhymy urihixina rare. Joaõ wamy rarybere ratyre heka kaa roire, Deuxu Waha inatyhymy wadeòdu raremy riteòsinyre. 37 Waha wadeòdu wamy tule relyyre. Kaiboho irybe-ò taholaõtenyte tule tii tabiõtenyta. 38 Kaiboho tamy taholaõhyymahãtenyte, tiwatyhynyõteki, jiarỹ dori iteòdỹỹna rare. 39 Tyyriti-ò tetehetenyte iwo-ki dori umytuedeõna-ki mahakemy tahõtinytenyte. Ritidỹỹnakile wamy relyymyhỹre. 40 Ihãrele tahe wadee taõmahãte adeereny umytuedeòna ariwahinykemy. 41-42 Aõmybo wamy iny rarybemahãkeki, aõ aõkõ rare wadee, jiarỹ dori reeryre Deuxu luuna-di aõkõ atxitenyteri. 43 Jiarỹ Wahani-di anade, tahe kaiboho tiwatyhynyõmy wadi ahãte. Inyõ ixideewilemy kanakeki, kaiboho bityhynybenykre. 44 Tai heka tetyhynyõmahãtenyte. Widee dori kaiboho tewowydynymahãtenyte, tahe Deuxu-ribi wowydyna ritakemy terarenyre, sohojihyyre heka Deuxu. 45 Kiamy tahe Waha-ò arelyyõkre, Moisesi tahe relyykre. Moisesi bede ywina dori, araròsònyreny rare. 46 Inatyhymy Moisesi tetyhynymahãte-wana tule jiarỹ biwatyhynymahãke, wamy dori Moisesi ròratidỹỹre. 47 Irybe bityhynyõkeki, timybo warybe bityhynyke.
1 Iribi tahe Jesuisi Kalileia aho-ki ixyby reurore, Teberiade ahoniõre. 2 Tahe sõwemy iny riheludunyre tuu robireki, aõna aõna wiwihikỹ, deytedỹỹna wiwihikỹ robireki. 3 Tahe hãwãlòratyy-ò Jesuisi raòwònyre taerydỹỹna mahãdu-wana — rorukurenyre tai. 4 Judeu mahãdu worana bedehesi rexidelenykemy iòhòre. 5-6 Tahe Jesuisi retehere inysõwehekỹ-ò, tamy rehemynyreriò. Tai Filipi-ò riurihimy rarybere: —Tikibo orotxu tamyreny rikiõbranyke riyrenykemy. Jesuisi rierymyhỹre aõbo riwinykremy ratxireri ihãrele tahe Filipi-ò kia rarybere. 7 Filipi tahe dirawyònyde: —Inyõ sohoji sohoji orotxu yre sohoji riykeki, 200 prata womati nieru rakahurenyke ihãre rimyõtyhy. 8 Andre Jesuisi erydỹỹna-ò rare, Simaõ Pedro seriòre rare. Tii tahe Jesuisi-ò rarybere: 9 —Weryryboõ kaki ihỹmyhỹ. Iruyre cevada orotxu idi ratximyhỹ, utura inatxi. Kia tahe aõ aõkõ rare inysõwe-ò. 10 Tahe Jesuisi taerydỹỹna-ò rarybere: —Tamy marybebenyke ranyrenykemy asityrekile. Tahe rorukurenyre ibutumy. Hãbu 5000 ronyre ijõ inyõ tahe sõwetyhymy rorukure. 11 Jesuisi orotxu rimyre. Deuxumy reàlàre, idi tahe tamyreny riwahinyre. Tule utura-wana wiwesele risỹnymy. Tuu rotỹỹnyre. Ibutumy heka ixideewina rirỹsỹrenyre. 12 Rihydyrenyreu, Jesuisi rarybere taerydỹỹna mahãdu-ò: —Bibutunybenyke rauhenyra uritere ixinamy itxiwixirenyõkemy idi watxireri. Uritere idi dehurenyõmy. 13 Tahe ributunyrenyre iuhe waòinatxi reuròmy weriri ritỹxinyre orotxu yrere-di. 14 Jesuisi aõwiwihikỹ widỹỹnamy robirenyreu kiamy tahe raryberenyre. Tii inatyhymy Deuxu Rybedutyhy rare. Juhuu dori tuu rarybere kabede-ò kanakemy. Inyboho tii riraòmyhỹre. 15 Rõhõtinyrenyre: —Jesuisi inyiòlòrenymy rikimyrenykre. Tamy ròkòirenykre. Iu Jesuisi kia rieryreu, ixisohojilemy rexitare ixyby, hãwãlò-ò. 16-17 Ibedesou aho ijà-ò ierydỹỹna mahãdu riberenyre riraòkemy. Bede rurunyre tahe Jesuisi rehemynyõhyyre. Tai hãwòõ rimyrenyre idi reuròkemy ijõwe-ribi ijà-ò, Kafanaõ hãwã-ò. 18 Tahe yhy deborehekỹ tiribi tiribi rebonymyhỹ. Òbò tahe resemyhỹ. 19 Sohoji urihixina iòhòmy ròireny tahe Jesuisimy robirenyre. Tii betyredile tamyreny nariamy nade. Tiiboho ruberunihikỹrenyre. 20 Jesuisi tamyreny rarybere: —Jiarỹle wa rare, breburenyõmyke. 21 Tai tahe hãworo-ò Jesuisi ronykemy tiiboho disỹnydenyde. Aõ wesele tahe rehemynyrenyre tiòbo ròirenyraò. 22 Itxubiòwamy sõwemy iny wii ributunyre aho kanawe-ribi ijà-ki. Hãwò sohojile tahe tai roire aho-ki. Jesuisi erydỹỹna mahãdu roirenyremy rieryrenyre. Tahe Jesuisi aõkõ idi rare. 23 Tahe hãwòõ dehemynydenyde. Teberiade hãwã-ribi Jesuisi tai ratximyhỹ iòhò-ò. Tai juhu Jesuisi rexitòenymy rỹimyhỹ tahe orotxu tamy riwahinyre. 24 Jesuisi iõre tai, ierydỹỹna mahãdu iõre. Kia tahe iny sõwemy robirau, hãwò-ò rimyrenyre. Iòrysymy roirenyre, Kafanaõ-ò. 25 Kanawe-ribi ijà-ò rehemynyreu, tii-wana witxi reare. Tahe tamy rỹỹraxire. Waerydỹỹdureny, tiubo kaò tadehemynyte. 26 Aõwiwihikỹ rewinyremy aõkõ tiwaijetenyteri, rỹsỹna adeereny rewahinyrakile, tehydymy terỹsỹtenytakile. 27 Rỹsỹna tyhy ituemyhỹre kiaòle aõkõ maaõmysỹdỹỹbenyke, tahe iwitxira rỹsỹnaõ-ò maaõmysỹdỹỹbenyke, kia ituedeõna-di aõkõ rare. Deuxu Riòre Habutyhyhykỹ dori adee riwahinykre. Kia rỹsỹna umytuedeõnahakỹ wesemy rare. Taile tahe Deuxu Waha riwateònyreri. 28 Tahe Jesuisi-ò rỹỹraxire: —Timybo iny Deuxudeewimy arotỹỹnyrenykemy. 29 Jesuisi dirawyònyde: —Kialemy, biwatyhybenyke: —Deuxu dori wateòdỹỹdumy rare. 30 Tahe raryberenyre tamy: —Aõwiwihikỹbo inyko-ò biitxeredỹỹnyke. Aõhebo botỹỹnykre, iny aratyhynykremy. 31 Inytybyreny orotxu riyrenyre bederahy-ki. Kia wese Tyyriti-ki roire: —Moisesi tamy orotxu riwahinyre biu-ribi. 32 Jesuisi rirawyònyre: —Inatyhy tyhymy Moisesi aõkõ tamy riwahinyre. Waha dori biu-ribi orotxu tyhy adee riwahinyre. 33 Deuxu orotxu tahe irutyhymy inydee riwahinymyhỹre, biu-ribi diwahinymyhỹde. 34 Tahe raryberenyre: —Wanyrỹ, tiu kia orotxu bidiwahinymahãkre. 35 Jesuisi iximy rarybere: —Jiarỹ orotxu irutyhymy rare. Inyõ wadee kanakeki, tiu rama risaõtyhy. Inyõ riwatyhynykeki, tiu bee risaõtyhy. 36 Adeereny heka rarybere: —Wamy tabitenyte, ihãrele tiwatyhynyõtenyte. 37 Ibutumy iny Waha wadee riwahinymyhỹre wadee kanakre. Tiu ixi-ribi ariteònyõtyhy. 38 Adobehede dori aõ ixideewimy aõma arotỹỹnykemy aõkõ. Wadeòdỹỹdudeewimy arotỹỹnykemy watxiwãhãre. 39 Tiu ariõnonyõtyhy wadee diwahinydeò kiaboho ibutumy ikonana txuu rubu-ribi ariixixanykre. Kia tahe wadeòdỹỹdu deewimy rare. 40 Inatyhymy Waha deewimy kia rare. Iny iRiòremy robireu, rityhynykeu, umy tuedeõna ritake. Ikonana txuu tahe rubu-ribi ariixixanykre. 41 Jesuisi rarybere: —Jiarỹ biu ludu orotxu rare. Tai tahe judeu mahãdu aõbina binahakỹlemy rarybemyhỹre. 42 Kia wese rarybemyhỹre: —Kaa Jesuisile rare. Jyje riòre rare. Tyby he ijoi eryna rare ise tule. Aõherekibo tii rarybereri biu-rubu nademy. 43 Tahe Jesuisi dirawyònyde: —Tuu wamy ryberenyõmyke ayludurenymy. 44 Wadeòdỹỹdu iny wadee rayky-ò rarybemyhỹre namyhỹde. Kia wesele iny wadee kedehemynykre, ikonana txuu tiiboho rubu-ribi ariixixanykre. 45 Deuxu rybedu Tyyriti-ki kia rybe rỹire: —Deuxu ibutumy iny ribedeerydỹỹnykre. Tai tahe Waha-ribi iny rierymy roholamyhỹre, tii tahe wadee rehemynykre. 46 Inyõ Wahamy robiõhyymyhỹre jiarỹle tahe tuu rabimahãre, iribi anadeki. 47 Inatyhytyhymy adee rarybemahãre. Inyõ riwatyhynykeki, umy tuedeõnahakỹ tiiwanale ratxireri. 48 Jiarỹ orotxu wesemy jiarỹ rare. Umytuedeõna wahidỹỹdu jiarỹ rare. 49 Boreny dori biu-ribi orotxu riyre bederahy-ki. Irabihyy ibutumy tiiboho ituerenyre. 50-51 Jiarỹ tahe biu ludu orotxu wese rare, inyõ tahe kia orotxu riykeki, tiu ruruõtyhy. Waumy ariwahinykre rubu-ò ibutumy iny òraruna òwydỹỹmy. Tamyreny umytuedeõna riwahinykre rubu-ò ibutumy iny òraruna òwydỹỹmy. Tamyreny umytuedeõna riwahinykre. 52 Judeu mahãdu tahe txiõdỹỹna rybemy widee raryberenyre: —Timybo tadelemy inyboho riòwenyrenykemy wahe. 53 Jesuisi rirawyònyre: —Inatyhytyhymy adee ararybekre. Kaiboho Deuxu Riòre Hãbutyhyhykỹde biròõbenykeki, umytuedeõna bitabenyõtyhy. Ihãlubu biõbenykeki, umytuedeõna-di aõkõ atxitenyteri. 54 Inyõ waderòdu wahãlubumy momodu tii umytuedeõna-di ratxireri. Tii tahe ikonana txuu rubu-ribi adiixixanykre. 55 Wade heka juhu irònatyhy rare, wahãlubu tu monatyhy rare. 56 Inyõ wade rirokeki, wahãlubu riõkeki, wawana tiuhyy ratxireri. Jiarỹ tule tii-wana watxihyyreri. 57 Waha irumy ratxireri. Tii wadeòdỹỹdu rare iòraru-ki warumy watxireri. Tule waderòdu irumy ratxike waòraru-ki. 58 Jiarỹ biu ludu orotxu inatyhy jiarỹ rare. Iwese bederahy orotxu heka boreny riyrewesemy aõkõ jiarỹ rare. Ihãrele tahe ituerenyre. Inyõ riwaykeki, rexixahyymy rarekre. 59 Kia ibutumy Jesuisi rarybere Kafanaõ judeu dohodỹỹna-ki, rierynanymyhỹreu. 60 Iribi tahe Jesuisi-ò ijohona mahãdu rarybere: —Kia isira tyhyre iny rieryke. Inyõ heka kia rityhynyõtyhy. 61 Jesuisile heka rexierymyhỹre tiiboho tuu rarybemyhỹreki, tahe tamy rỹỹraxire: —Kaa aõbohe arabinadỹỹnyrenyke. 62 Tahe jiarỹ Deuxu Riòre Hãbutyhyhykỹ, ixyby biu-ò aròòsekeki, timybo marybebenyke, kaiboho wamy bobibenykeki. 63 Deuxu Tyytybytyhyle umytuedeõna riwahinymyhỹre. Umydetyhy umytuedeõna-di aõkõ rare. Urile adee rarybemahãre Deuxu Tyytybytyhymy rybena rare, adeereny umytuedeõna rare. 64 Tahe inyõ ayreny ludu riwatyhynyõreri. Jesuisi tahe juhuu-ribi rierymyhỹre mobo rityhynyõmyhỹre, tule mobo tatxiõdỹỹdumy rarekremy. 65 Jesuisi raryberehyymy tii-wana: —Jiarỹ juhuu rarybewãhãre. Inyõ Waha wadee riteònyõkeki tiu wadee kanaõtyhy. Tai heka tuu adee jiarỹ rarybere. 66 Kia rybe òraru-ki sõwemy taerydỹỹna mahãdu ririrenyre. Tahe roirenyre. 67 Tahe Jesuisi rỹỹraxire taerydỹỹna waòinatxi reurò mahãdu-ò. Ka bexe boibenyõkre aõbo biwaribenyõkre aõbohe. 68 Tahe Simaõ Pedro rirawyònyre. Wanyrỹ moobo aròirenykre. Kaile heka umytuedeõna rybe-di atxiteri. 69 Jiarỹboho ka aratyhynymahãrenyre. Araeryrenyre ka, kai Deuxu-ribi hãbu òbitityhymy atximahãte. 70 Jiarỹ aratarenyre waòinatxi reurò inymy erydỹỹna mahãdumy. Ihãre tahe inyõ ratximyhỹre diaboõ heka tii rare. 71 Jesuisi tahe Judasi Isariòmy rarybereri. Iwò inatxinamy wahe. Simaõ-Isariò riòre tii rare. Judasi dori Jesuisi riwahinykremy ratxireri iòludu mahãdu-ò.
1 Judeu mahãdu Jesuisi rubudỹỹmy rurumyhỹre. Tai tahe Judeia bede ludu hãwã-ò ralòõmyhỹre. Kalileia bede hãwãdile rariamyhỹre. 2 Tahe judeu mahãdu worana bedehesi iòhòmy rỹimyhỹ. Kiani tahe heto riòre worana bedehesi rare. 3 Tahe Jesuisi seriòreboho tamy rarybere: —Make wa karibi Judeia mahãdu bede-ò aerydỹỹna mahãdu dori aõwiwihikỹ kai tewinyteò tuu robikemy. 4 Aõwiwihikỹmy tewinyteri, tai tahe ixinamy iny tuu ibutumy robikre. Ibutumy iny ixierysymy tahõtinyteri-wana urile iny lau iwòteõmy aõna aõna wiwihikỹ. 5 Jesuisi seriòre mahãdu tule rityhynyõre. 6 Jesuisi tahe dirawyònyde: —Wiji araõkre wabededỹỹnanamy dori tuu reaõmy ratxireri. Kaiboho tahe adohotalemy bòike. 7 Bede ludu mahãdu iny dori aluurenyre, tahe waderamy rekoarenyre. Iòrarunamy dori jiarỹ tamy rarybemahãre, ibinatyhyremy. 8 Kaiboho boibenyke worana bedehesi-ò. Jiarỹ tahe wiji araõkre, wabededỹỹnanamy reaõmy doimyhỹde. 9 Kia tahe Jesuisi tamyreny rarybere. Tahe Kalileia-ribi Jesuisi ròhònyõmy rỹimyhỹre. 10 Tahe iseriòre roirenyre worana bedehesi-ò. Idi tahe tule tii rare iherenymy itỹnymy aõkõ wahe, wasimy inyõ tuu robiheny. 11 Judeu mahãdu tahe Jesuisi riijemyhỹre worana bedehesi òrake-ò. Rarybemyhỹre: —Titxibo tahe tii ratximyhỹre. 12 Jesuisimy rybe ixitxiõdỹỹna ròhònyre inysõwehekỹy-ki. Inyõ heka awimy tuu rarybemyhỹre. Ijõ tahe ibinamy tuu rarybemyhỹre, tii iny itxenadỹỹdu raremy. 13 Inyõ tuu rarybeõhyymyhỹre ibutumy ijohonamy judeu mahãdu lau ruberureki. 14 Worana bedehesi tya-ki Jesuisi Deuxu dohodỹỹna heto-ò ralore ribedeerynykemy. 15 Ribedeerynyreu tahe judeu mahãduõ ijõ-ò rarybere: —Timykibo he kia ritidỹỹna rierymy tuu rarybemyhỹre. Rierykõ ihãrele iny rierynanymyhỹre. 16 Tahe Jesuisi dirawyònyde: Waerydỹỹna-di aõkõ rebedeeryre, Deuxu wateòdỹỹdu rybe-di wahe. 17 Inyõ Deuxudeewimy ratxikeki, tii rierykre aõerydỹỹnabo òbitimy ratxireri. Tii rieryke Deuxu-ribi aõbo rarybereri ada ixi-ribi rarybereri. 18 Iny ixi-ribi rarybekeki, tiile rexiloosònanyke. Tahe iny iteòdỹỹdumy rarybekeki, tii tahe inatyhy rare. Tii inatyhymy òbiti rare. 19 Moisesi adee bede ywina riwahinyre: —Tahe kaibohoõ tetyhynyõhyymahãtenyte. Tai tahe aõherekibo biwarubunykemy atxitenyteri. 20 Tamy inyõ dirawyònyde. Kaita itxỹteteri. Inyõ ka ararubunykemy aõkõ ratxireri. 21 Jiarỹ inyõ reteytenyre sabado txuu tahe kaiboho wadi bede teòtiinytenyte. 22 Boholake, Moisesi bede ywina arateònyke ariòre ritõtyky aròkemy resynanykemy. (Boboho tahe kia tuu ritelenyre Moisesi aõkõ.) Tahe notyky resyna txu rỹikeki, tuu tewinyte sabado txu hãrele. 23 Kia sabado txu biwinybenykeki Moisesi bede ywina riywinykemy, tahe aõherekibo wadee taykarananyteri hãbu sabado txu reteytenyreki. 24 Aõ òbitimy aõkõ rare, òbitimy tahõtinyterikile. Òbitinale-di maraykynybenyke. 25 Ijõ Jerusalẽ hãwã ludu mahãduõ rarybere: 26 —Kia rarybemy rỹirerile, tii irubudỹỹmy rexinohõtinyreri. Beteheke. Butumy ijohonanamy kia rarybemyhỹre. Ihãrele taheka inyõ tamy rarybeõhyymyhỹre. Wedu mahãdu rõhõtinymyhỹre: —Ina aõkàbo Kristumy inatyhymy tii rare. 27 Inyboho tahe rierymyhỹre titxiribibo tiò namyhỹde. Kristu Deuxu deòdỹỹna tahe kanakeu, inyõ tahe rieryõtyhy titxiribibo kanake. 28 Jesuisi tahe Deuxu dohodỹỹna heto-ki ribideerynymyhỹreu rarybere: —Kaiboho tiwaerytenyte, titxiribibo anade tule teerytenyte. Tahe wateòdỹỹdu teeryõtenyte. Teròwymy heka jiarỹ anade. Tule tii inatyhytyhymy rare. 29 Iribi jiarỹ anade Tii riwateònyre, tai jiarỹ tii reeryre. 30 Inyõ riijemyhỹ riròtenykemy. Tahe rimyõhyyre ruberureki, ibededỹỹnanamy aõkõ bede rỹireki. 31 Iny sõwehekỹ-ribi sõwemy iny rityhynyre. Tahe inyõ rarybere: —Kristu Deuxu deòdỹỹna iratyre aõna aõna wiwihikỹ riwinykemy tahõtinyteri. Aõkõre, tii dori inatyhymy Kristu rare. 32 Fariseu mahãdu kia-ò roholareu, tahe wii ributunyre xiwe wahidỹỹdu wedu mahãdu-wana. Tahe tiiboho soldadu mahãduõ riteònyrenyre Jesuisi rimykemy. 33 Jesuisi tahe tamyreny rarybere: —Urihimyò umyreny-wana watxikre, idi ta aròòsekre wateòdỹỹdu-ò ixyby. 34 Kiaboho biwaijebenykre, waki mahabenyõtyhy. Titxibo watxireri kia-ò heka bitehemynyõtyhy. 35 Judeu mahãdu tahe widee rarybere: —Titxiwexe tii rakremy ihỹre, tuu rokobirenyõtyhy tai rakaharenyõtyhy, myỹ rarybemyhỹre wahe: judeukõdu mahãdu bede-ò aõbo rakremy ixi-di ratxireri. Tai ribedeerynykemy, judeu mahãdu-wana rasỹnykremy. 36 Timybohe rarybere: —Waki mahabenyõtyhy, titxibo watxireri-ò behemyhyõtyhy, myỹ rarybereri. 37 Ihewotxu worana bedehesi aõnihikỹtyhy rare. Jesuisi iu rexiukỹnyre rarybekemy: —Inyõ bemomy risakeki, wadee kanake, riõke. 38 Inyõ riwatyhynykeki, Tyyritina-ki kia wese rybe rỹire: —Iwo-ribi benihikỹ iru ròhònyke. 39 Iu Jesuisi kia rarybereu, Deuxu Tyytybytyhy aõmy dỹỹnanamy rarybere. Iny dori rityhynykeki, iwo-ò Deuxu Tyytybytyhy ralòke. Urile tahe Deuxu Tyytybytyhy riwahinyõmy rỹire. Jesuisi dori ròòseõre biu-ò. 40 Tahe roholare mahãdu tahe rarybere: —Ka heka hãbu Deuxu Rybedutyhy rare. 41 Ijõ tahe rarybere: —Tii Kristu rare. Ijõ tahe rarybere: —Kristu aõkõ Kalileia bede-ribi dori tii rareri. 42 Tyyritina rybe-ki roire: —Kristu, Davi sỹ-mahãdu ribi kanakremy. Belẽ hãwã-ribi; titxibo Davi rasỹnyre-ribi. 43 Tai tahe wiwese wese aõkõ rõhõtinyrenyre Jesuisi-di. 44 Inyõ riròtenykemy ixi-di ratximyhỹ, ihãrele tahe inyõ rimyõhyyre. 45 Tahe soldado mahãdu ròòsemy rare rimyõhyylemy fariseu mahãdu-ò xiwewahidỹỹdu mahãdu wedu-ò. Tahe soldado-ò rỹỹraxirenyre: —Aõherekibo tedyõteri. 46 Tahe dirawyònyde: —Timybo inyõ kowa hãbu wesemy rarybeõhyyre rybe iwitxira wihikỹmy tii rarybere. 47 Tahe fariseu mahãdu rarybere: —Kaiboho aõbo tule araitxenanyrenyra. 48 Inyboho mahãdu reny-ribi moõ rityhynyõhyymyhỹre, fariseu mahãdu wahe, wedu mahãdu wahe. 49 Inyõ rityhynyre, tahe tiiboho Moisesi bede ywina rieryõre tai Deuxu aõhõkỹmydỹỹnana-txi idi rehukre. Aõhõkỹmydỹỹnana-ò ritamadỹỹnykre. 50 Nikodema iyreny-ki ratximyhỹ. Fariseu mahãduõ tii rare, juhuu Jesuisi raraò rare wahe. Tii heka rarybere imahãdu-ò. 51 Juhuu roholamyhỹre aõhebo rotỹỹnyraò wahe idi tahe ibinakeki riròtenykremy riijemyhỹre. Kia tahe iny bede ywinareny rare. 52 Tahe rirawyònyrenyre: —Kai wa tule Kalileia mahãduõ atxiteri. Tyyriti-ò beteheke timybo rarybereriò: —Kalileia-ribi rybeduõ ròhònyõtyhy wahe.
1 Tahe ibutumy he tasỹ-ò reareare. Iu tahe Jesuisi rare Oliveira hãwãlò-ò. 2 Biura-di tahe dòòsede Deuxu dohodỹỹna heto-ò ixyby. Sõwemy iny tamy rare; Jesuisi ronyre; ribedeerynyre. 3 Hãwyyõ ratximyhỹ hãbu witxiraõ-wana wasimy ratximyhỹ. Tahe inywitxiraõ itxireny reare. Tai tahe Deuxu rybe erydỹỹdu mahãdu fariseu mahãdu-wana hãwyy didyde Jesuisi-ò. Tahe hãwyy-ò rarybere rỹikemy iny sõwehekỹy-ki. 4 Tahe raryberenyre Jesuisi-ò: —Bede erydu: —Kahãwyy tỹwe rare inyõ itxi reara. 5 Iny bede ywina Moisesi riwawahinyré tahe rarybere mana-di rurumyhỹkemy. Tahe aõmybo kai mynarybeke. 6 Tiiboho kiamy rarybere Jesuisi riurihire timybo rarybekemy. Tai tahe ibinamy tamy rarybekemy idi ratxireri. Jesuisi tahe suò resera ròritidỹỹkremy tebò-di suki riritinyra. 7 Tahe ritỹỹraxinyhyy ihỹmyhỹ. Tahe Jesuisi rỹire; rarybere: —Inyõ òrarukõmy ratxirerile, tii mana-di juhuu tamy rehukre. 8 Ixityrele sỹ Jesuisi ròritidỹỹre suò. 9 Kia rybe-ò roholarenyreu, tahe rexitarenyre sohoji sohojilemy, tarayky dori ribinadỹỹnyrenyra. Matuari mahãdu tahe juhuu rexitare. Ikonanatyhy dori rare, tahe Jesuisi hãwyywanale tai rỹire. 10 Jesuisi retehere: —Hãwyy sohojilemy robire rỹỹraxire tamy: —Hãwyy, titxibo mana-di arubudỹỹmy rybedu mahãdu rirahura. Inyõ aõhe arasỹnyõhyyra. 11 Tahe dirawyònyde: —Anokõre, Wahĩ. Tahe Jesuisi rarybere: —Jiarỹ tulere! Mahe, òraruna-txi tahe ixyby ixeõmy. 12 Ixityre Jesuisi rarybere tamy: —Jiarỹ wabede loosòna rare. Inyõ wahemy kanakeki, bede luru-ki rariaõtyhy. Tii heka loosòna-di tarayky-ki rarekre. 13 Tahe fariseu mahãdu tamy rarybere: —Aõkõre, kai wa iximy tarybeteri tai tahe arybe inatyhymy aõkõ rare. 14 Jesuisi dirawyònyde: —Inatyhymy iximy rarybereri jiarỹ, tahe warybe inatyhy rare, jiarỹ dori reeryre titxiribibo anade, tule tiobo arakre reeryre. Kaiboho tahe kia teeryõtenyte. 15 Kaiboho waywisidỹỹmy tadiòlònyte, ihãre tahe òbitimy tiwaywinytenyõte tiwaerytenykõteki. Tahe jiarỹ inyõ reywinyõreri. 16 Jiarỹ inyõ ariywinykeki, waywisidỹỹna tahe òbiti rare. Jiarỹ dori ixiwanale aõkõ rare. Waha, wadeòdỹỹdu wawana raremyhỹ. 17 Abede ywina-ki kia rybe riritinymy rỹimyhỹre: —Inatxi hãbumy wiwesehyylemy rarybekeki kia tahe inatyhy rare. 18 Jiarỹ iximy rarybemahãre tule Waha wadeòdỹỹdu wamy adeereny rarybemyhỹre. 19 Tahe tiiboho Jesuisi-ò rỹỹraxirenyre: —Titxibo boo ratximyhỹre. Jesuisi rarybere: —Kaiboho tiwaerykõmahãtenyte, Waha tule teeryõmahãtenyte. Kai biwaerybenyõkeki, tule Waha bierybenyõtyhy. 20 Kia Jesuisi rarybere Deuxu dohodỹỹna hetowo-ki, iubeweri yrubudỹỹna ube-ki. Tahe inyõ rimyõhyyre, ibededỹỹnanamy aõkõ bede rỹireki. 21 Iribi tahe ixityre tamy rarybere: —Jiarỹ he arakre karibi. Kaiboho biwaijebenykre tahe aòrarurenydile burubenykre. Boiõtyhy titxibo arakre-ò. 22 Tai tahe judeu mahãdu widee raryberenyre: —Inatyhymy aõbo tii rexirubunykre. Tii raryberaki: —Titxibo arakremy boiõtyhy, myki tuu idi rõhõtinyrenyre. 23 Tahe Jesuisi rarybere: —Kaiboho kaludu toite; jiarỹ aõkõre, biu ludu rare. Kaiboho bede ludu toite, jiarỹ tahe kabede ludu aõkõ jiarỹ rare. 24 Tai heka adeereny rarybereri aòrarureny-di burubenykremy. Inatyhymy jiarỹ tii rare: —Iwese rarybere wesemy. Tahe kia warybe bityhynyõbenykeki, aòrarureny-di burubenykre. 25 Tahe tiiboho rỹỹraxirenyre Jesuisi-ò: —Mobo he tate. Jesuisi dirawyònyde: —Timybo adeereny rarybewãhãre, juhuu wahe. 26 Jiarỹ sõwemy rỹire aõna aõnamy umyreny ararybeke umyreny ariywinyke ta ararybekre Waha tuu wadee rarybelemy. Tii diwateònyte tii inatyhymy rare. Irybelemy bede iny-ò ararybekre. 27 Rieryõhyyre tamyreny rarybere, tybymy. 28 Kaiboho heka biwatamadỹỹnybenykreu, bierybenybenykre mobo jiarỹ rare. Tule ixi-ribi aõkõ aõna aõna rewinywãhãre bierybenykre; tule iwese Waha riwaerynanymyhỹre wese, rarybemahãre. Kia tule bierybenykre. 29 Wateòdỹỹdu wawana raremyhỹ. Iximy riwariõtyhy, jiarỹ tamy wimy rewinyhyymahãreki. 30 Kiamy tarybe rahudi tahe, sõwemy iny rityhynyre. 31 Judeu ityhydỹỹdu mahãdu-ò Jesuisi rarybere: —Kaiboho warybe tyhy-di mohõtinybenyhyykeki, inatyhymy watyhydỹỹdu waheludumy boibekre. 32 Inatyhyna tahe bierybenykre. Kia dori aratarenyke, deòdumy aõkõ boibekre. 33 Dirawyònydenyde aõkõre inyboho Abraõ riòkòre roire, tiu heka modeòdumy roirekõmahãre. Timybo tarybeta: —Deòdu-ribi riwatakemy. 34 Tahe Jesuisi tamy rarybere inyõ òraru-di hyy rexiòrarunykeki, tii òraruna deòdu wese hyyle rare. 35 Deòdu heka heto wedu ijoihyymy aõkõ rarekre. Iwedu ixinamy rakre. Riòre tahe iijoihyymy rare. 36 Tahe Deuxu Riòre heka ixinamy arateònykeki, tiu òraruna deòdu wesemy ixyby bonybenyõtyhy. 37 Abraõ riòkòre inatyhymy toite. Kia tahe reeryre. Ihãrele tahe biwarubunybenykemy atxitenyteri warybe dori araykywo-di aõkõ ratxireri. 38 Waha-wana ranymahãu, aõmybo rabire, wiji tuu rarybereri. Kaiboho tule boo-ribi tabitenyte tuu tewinytenyteri. 39 Rirawyònyrenyre: —Wahareny heka Abraõ rare. Jesuisi rarybere: —Abraõ riòremy inatyhymy toite-wana, Abraõ aõmydỹỹnana iwesemy biwinybenyke. 40 Katahe warubudỹỹmy wadi atxitenyteri. Inatyhyna Deuxu-ribi raholaremy, adeereny rarybemahãre, tai tahe warubudỹỹmy atxitenyteri. Abraõ tahe tiu tahe tuu rotỹỹnyõtyhy. 41 Kaiboho heka borenytyhy wesele tatỹỹnymahãtenyte. Dirawyònyde: —Aõkõre, jiarỹboho waxiriòre aõkõ roire. Deuxuhyyle iny tybyreny rare. 42 Tahe Jesuisi rerawyònyre: —Deuxu boo inatyhymy rare-wana inihe kaiboho waluurenyre. Jiarỹ dori Deuxu-ribi anade. Ixidee wimy aõkõ anade tii diwateònyde. 43 Aõherekibo teerytenyõte warybe. Isiratyhyre aõbo ijohona. Aõkõre, ityhydỹỹ isirare adeereny. 44 Kaiboho Diabo riòre toite tamywimy biwinykemy atxitenyteri. Tii juhuu rubudỹỹdu hyy rare. Tii heka raruireri inatyhywesehekỹle wahe. Tii ruidu rare. Ruiwedu tii rare. 45 Kaiboho heka tiwatyhynyõhyymahãtenyte inatyhyna dori jiarỹ rarybemahãre. 46 Inyõ inihe wamy rarybeõtyhy jiarỹ òrarudu raremy. Adeereny inatyhynamy rarybereri. Aõherekibo tiwatyhynyõteri. 47 Iny Deuxu-ribi ratxireri, Deuxu rybe roholamyhỹre. Kaiboho Deuxuhõrõ aõkõ toite. Teòdu aõkõ toite. Taita warybe-ò taholaõteri. 48 Jesuisi-ò tiiboho dirawyònydenyde: —Inatyhymy rarybewãhãrenyre. Kai Samaria mahãdu tate. Kaludu mahãdu aõkõ tate. Kai tyytybybina dire. 49 Jesuisi rirawyònyre: —Aõkõre, tyytybybina-di aõkõ watxireri. Waha tahe rewowydynywãhãre. Kaibohole tiwabinadỹỹnymahãtenyte. 50 Wowydyna ixi-di aõkõ reijereri. Waha tahe kia aõmydỹỹnanamy riywinykre, tii rierymyhỹre. 51 Inatyhytyhymy adee ararybekre: —Inyõ warybemy reòbykeki, tiu rubumy tii robiõtyhy. 52 Tai judeu mahãdu rarybere: —Katahe inatyhymyhe inydeereny aerysydỹỹna rỹira tyytybybina-di tate wahe. Abraõ tahe rurure; Deuxu rybedu tule. Tahe timybo kai tarybeta: —Inyõ warybemy reòbykeki tiu rubu urihixinamy roiõtyhy tamy. 53 Kai aõbo inytybyreny Abraõ ratyre awikemy aõbo ixi-di tahõtinymahãte. Abraõ rurure Deuxu rybemy rybenadu amahãdu tule rurure. Mobo raremy he tahõtinymahãte. 54 Tahe Jesuisi rirawyònyre: —Jiarỹ ixi-di wowydyna ariijekeki, tahe wawowydyna aõ aõkõmy rareke. Waha tahe riwawowydynymyhỹke aDeuxumy raremy tu tarybeteri. 55 Tahe aõkõ teeryõtenyte. Jiarỹ tate reerymahãre. Jiarỹ reeryõmahãremy ararybekeki, tai ruidumy rareki, iwese kaiboho toite wesele wahe. Tahe reerywãhãre, tule irybemy reòbymahãre. 56 Boreny Abraõ, wamy dobide, wabededỹỹnana kanakremy tuu dobide, wabededỹỹnana kanakremy tuu dobide tai tahe reysatyhymy rare. 57 Tahe judeu wedu mahãdu rarybere: —Kai 50 beòramy aõkõ atxiteri timyrekibo tarybeta Abraõ tabitemy. 58 Jesuisi dirawyònyde: —Abraõ reaõule, Jiarỹ rarehyymahã. 59 Tahe manadile rimymy reserenyre idile rirabunykemy. Jesuisi tahe rexiwòmy iribi ròhònymy rare, dohodỹỹna heto-ribi.
1 Jesuisi rariamy rareu, tii robimy rare hãbu ruetàmy. Tii iruetàhàkỹmy ratohouãmy herinanyre. 2 Ierydỹỹna mahãdu rỹỹraxire tamy. Erydỹỹdu, aõherekibo hãbu ratohouãnyra iruetymy, ise tyby iòrarudireki aõbo ada taòrarumy aõbo. 3 Tahe Jesuisi rirawyònyre: —Tahe aõkõre tyby ise-ke aõkõ tiike aõkõ. Deuxu ruru wiji riteòsinykremy tahe tii kiawesemy rohonyre. 4 Wateòdỹỹdu aõmydỹỹnanamy arotỹỹnyrenykemy watxiwãhãrenyre. Inyboho rikiwinyrenyke ibededỹỹnanamy rỹikreu, iwese txumy rỹikre wese tahe rumy heka kanakre tai raaõmysỹdỹỹõmyhỹre. 5 Kabede-ki watxiwãhãreòle tahe jiarỹ bede ludu mahãdu loosònatyhymy jiarỹ rare. 6 Tarybe rahudi tahe rarybexinyre suò idi tahe subororomy ritxienyre. Idi ta hãbu rueyre-ò subororo ritidire. 7 Tahe hãbu ruetà-ò rarybere: —Make wa bexisuhòke Silòe ahobe-di. Silòemy ninadu heka iny rybe-ki deòdỹỹna wesemy rare. Hãbu tahe rare, risuhore, dòòsede robimy. 8 Tahe ierydu mahãdu, tuu robire idi itxeredu mahãdu raryberenyre widee: —Kabe hãbu ixitòedỹỹdu rare, nierumy kowa-ki rexitòenymy ronymyhỹrele rare. 9 Ijõ rarybere tule rare. Ijõ rarybere: —Aõkõre, iwesele tahe iwitxirari. 10 Rỹỹraxirenyre tamy: —Timykibo arue reytera. 11 Rirawyònyre: —Hãbuõ Jesuisi inire. Tii tahe suboro borole riwinyra warue-ò ritidire. Tahe wadee rarybera: —Make Silòe ahobe-ò aõ bisuhòke. Tahe rare, resuhore, tai rabimy watxireri. 12 Rỹỹraxirenyre titxibo tahe tii rara. Rirawyònyra: —Reeryõre. 13-14 Kia ruedeytena Jesuisi riwinyre sabado txuu, judeu aõmysỹdỹỹna txu aõkõ. Tahe tiiboho hãbu ridyrenyre fariseu mahãdu-ò. 15 Ixityre hãbu-ò rỹỹraxirenyre: —Timykibo riteytenyra. Tahe rirawyònyre: —Subororole waruetyre-ò ritidira, idi resuhòra, iule tahe retehera. 16 Tai tahe fariseu mahãdu-ò narybede: —Ka hãbu Deuxu-ribi aõkõ nade. Kakỹny sabadotxu bede ywina riywinyõhyyre. Tahe ijõ imahãduõ rarybere: —Hãbu òraruduõ tiu deytenawiwihikỹõ kia wesemy riwinyõtyhy. Tai tahe wiribi hitximy raraykynyrenyre. 17 Tahe ixityre hãbu-ò rỹỹraxire: —Tii arue arue riteytenyra: —Tai tahe timybo tuu marybekre. Hãbu rarybere: —Tii Deuxu rybemy rybeduõ rare. 18 Tahe judeu mahãduõ rarybere: —Ise-wana tybywana widee ararybekekile, arityhynykre. Tai riteònyre tybybohoòrysymy. 19 Rehemynyreu, tahe tamy rarybere: —Kaa aõbo ariòre rare. Inatyhymy aõbo iruetàmy reare. Timykibo tahe wiji robira. 20 Tahe tybyboho rirawyònyre. Inatyhymy wariòrereny rare. Iruetàlemy ka reare. 21 Reerykõrenyre timykibo retehera. Irue riraynyre dori, reeryõhyyre. Tamy marybebenyke. Ibeòra dire ka, iximy relyyleke. 22-23 Tybyboho ruberumyhỹrenyre judeu mahãdu lau. Judeu mahãdu dori, rarybemyhỹre: —Inyõ Jesuisimy rarybekeki, tii Kristu Deuxu deòdỹỹna raremy rarybekeki, tahe dohodỹỹnawo-ribi riteònykemy idi rỹira. Tai tahe hãbutybyboho kia wesemy raryberenyre. Tii ibeòra dire: —Tamy marybebenyke. 24 Juhuu iruetàmy raremyhỹò ixityre ròtedỹỹmy rarybere. Òbiti rybe-di marybeke. Inydeereny tahe ka dori òrarudu rare. Tai tahe Deuxu biwowydynyke. Tahe tii rarybere: 25 —Tii òrarudu rare, reerykõre. Sohoji aõmydỹỹnana reeryre. Juhuu waruetàle heka reeryre, wiji tahe retehereri. 26 Tahe ixityre tamy rỹỹraxire: —Aõbo tii riwinyre. Timybo arue roire. 27 Hãbu rarybere: —Adeereny tuu rarybere tahe taholaõhyytenyta. Aõherekibo ixityre ijohonamy tarybetenyteri. Ierydỹỹnamy boibekemy aõbo atxitenyteri. 28 Tuu raryberenyre aõbina binalemy. Kai heka iijoiõ atxiteri. Jiarỹboho Moisesi erydỹỹna jiarỹboho roire. 29 Deuxu Moisesi-ò rarybemyhỹre. Kiamy reeryrenyre. Ka hãbumy tahe aõmy raholaõmahãreny, tiludubo rare. 30 Kia wa riwateytenyra bedeòtiidỹỹna urenana tii rare. Ihãrele tahe kaiboho teeryõmy tuu tarybetenyteri. Wadee kia ajuedena rare. 31 Deuxu wa òrarudu ixitòedỹỹna-ò roholaõtyhy. Kia reeryrenyre. Tahe inyõ Deuxu rityhynykeki tamywimy rỹirakeki, kia-ò Deuxu roholakre. 32 Bede rexidelenyreu, inyõ roholatyhy iruetàmy raumynyre heka reytere. Inyõ tiu riwinyõre, wiji tahe diwinyde. 33 Kia hãbu Deuxu-ribi nokõduõ aõkõkeki tiu aõ riwinyõtyhy. 34 Tahe fariseu mahãdu aõbinahakỹlemy tuu rarybere: —Kai uladumy teateu, òrarudutyhymy tate. Kai aõmybo biwabedeerynybenykremy aõbo wadireny tahõtinyteri. Tahe riteònyre dohodỹỹna heto-ribi. Ihyymy riteònyre. 35 Kia-ò Jesuisi roholareu hãbu riijere tahe rỹỹraxire tuu: —Kai Deuxu Riòre Hãbutyhyhykỹ aõbo tetyhynyte. 36 Hãbu rarybere: —Mobo tii rare, Wanyrỹ, arityhynykemy watxireri. 37 Wamy wa tabita, jiarỹleheka watxireri. Adee rarybererile watxireri. 38 Tahe rarybere: —Wanyrỹ aratyhynyra he. Tahe hãbu Jesuisi riwowydynyre. 39 Jesuisi rarybehyyra: —Jiarỹ anade kabede-ò iny ruetà aritobixidỹỹnykemy; tule robimyhỹre mahãdu ariruetàdỹỹnykre. Iny òwydỹỹnamy anade. 40 Fariseu iòhòmy iribi rỹimyhỹ roholare irybe-ò. Tahe tamy rỹỹraxire. Inatyhykõ aõbo ka jiarỹboho tule waruetàrenyre. 41 Jesuisi rarybere: —Aruetàmy ahãtenyteki, aòraruna-di aõkõ toite. Tahe tarybetenyte reerywãhã, rabiwãhãre. Tai aòraruhyy-di toite.
1 Inatyhytyhymy adeereny ararybekre: —Inyõ budoeni yrubudỹỹna ijòtòbòna-di, ralòõkeki, tii tahe wasidu ixiwatxidỹỹdumy rare, raòwònymy heka ralòmyhỹre. 2 Ijòtòbòna-di ròtedu, tii budoeni-di itxeredutyhy rare. 3 Iu ijòtòbòna-ò rehemynymyhỹreu, ijòtòbòna ludu tamy riraynymyhỹre. Tule budoeni irybe rierymyhỹre. Sohoji sohoji-ò ininimy tamy ryrymyhỹre, tahe idi ròhònymy ridymyhỹre. 4 Ihõrõ ahana-ò ridyreu, tii iko-ò rỹimy idi ramyhỹre. Riheludunymy idi raremyhỹ rierymyhỹreki irybe. 5 Budoeni ieryõdu riheludunyõtyhy, irybe rieryõreki. Iny ieryõdu-ribi rahenykre. 6 Jesuisi tamy kia bede eryna ijyymy relyyre. Tiiboho tahe rieryõhyyrenyre timybo ibede erydỹỹnamy rororerimy. 7 Tahe Jesuisi ritỹnynyre tamyreny: —Jiarỹ budoeni ijòtòbòna wesemy rãimahãre. 8 Ibutumy iny wakõule rehemynyre wasidu ixiwatxidỹỹdumy rỹiramyhỹ. Wabudoeni ityhydỹỹdu wesemy rỹirerimy ihỹre. Tiiboho wasidurybe-ò roholaõhyymyhỹrenyre. 9 Jiarỹ ijòtòbòna wesemy rãiwãhãre. Inyõ wamy ralòkeki, tii heka tarasanaõmy rarekre. Iwese wabudoeni ralòmyhỹre idi ròhònymyhỹre asi wiwihikỹmy riroximyhỹre wesemy, tule ityhydỹỹdu mahãdu rỹirakre, bedeòbyna wiwihikỹ ritakremy. 10 Wasidu heka rubudỹỹmy nade, bedehudumy wasimy, jiarỹ tahe anade inyõ umytuedeòna ariwahinykremy, irutyhytyhy wihikỹmy wiji rỹirakremy. 11 Jiarỹ budoeni-di itxeredu wihikỹ rare. Ihyy ta waumy ariwahinykre teròwyrenymy. 12 Inyõ budoeni-di itxeredumy deòdumy risỹnykeki, tii riwisinanyõtyhy, tii dori budoeni wedu aõkõ rare, deòdule rareki. Tahe iròdu brebunaõ tamy kanakeki tahe rahenyke iribi, tai ijõ rimyke, ihona tahe raòrunyke. 13 Deòdu heka rahenyke tii iwedu aõkõ rareki, tii aõmy aõkõ idi rõhõtinymyhỹre, iòwydimy aõkõ. 14-15 Jiarỹ heka itxeredu wihikỹ rare wabudoeni riwaerymyhỹre. Jiarỹ tule tii mahãdu reerywãhãre. Waha riwaeryre, tule tii reeryre. Iwesetyhyle wabudoeni-wana wii reerynyre. Iòraru-ki tahe waumy ariwahinykemy idi wãhãre. 16 Jiarỹ wabudoeniõ-di watxiwãhãre. Aõ kabede-ki aõkõ. Ibutumy aributunykemy idi watxireri. Tai tahe sohoji ijoihyylemy heka roikre. Ibutu-di itxeredumy ararekre. 17 Tai heka Waha waluure, waumy ariwahinykreki wahe. Ihãrele tahe ixyby idi arexiumydỹỹnykre. 18 Inyõ heka ixideewiõkeki riwarubunyõtyhy. Arexiwahinykre tamyreny riwarubunyrenykremy. Ixideewikreu, arexiwahinykre, tule waumy arimymy arexiixixanykre. Waha dori wadee rarybere tii ariwinykremy. 19 Kia rybe òraru-ki judeu mahãdu rybe rexijeijeinyre. 20 Sõwemy iny ritxiõnymy rarybere: —Tii tyytybybina-di ratximyhỹre ada raitxỹtemy aõbo ihỹre. Aõherekibo tamy taholamahãtenyte. 21 Ijõ tahe rarybere: —Aõ tyytybybina-di aõkõ rarybemyhỹre. Tyytybybina aõbo hãbu ruetà riruedỹỹnyõtyhy. 22 Jerusalẽ hãwã-ki heka beòrahyy rare. Worana bedehesi hetxina Tỹmyradỹỹna rỹire. 23 Salomaõ Ube-ki, Deuxu dohodỹỹna heto ubeõ-ki. 24 Jesuisi rariamy ihỹmyhỹ. Tahe judeu mahãdu rirurawonyre itỹỹraxidỹỹmy. Tiwese bededỹỹnanymybo nohõtidihyy bede ariwyrenykre. Kai inatyhymy Kristumy tate-wana, tahe manarybeke itỹnymy. 25 Jesuisi dirawyònyde: —Rarybere wahe, tahe kaiboho tiwatyhynytenyõhyyte. Inatyhymy ierysymy mohõtinybenykeki, waaõmydỹỹnana wiwihikỹ rewinymahãre-di betehebenyke. Wahani-di kia rewinymahãre. 26 Kaiboho tahe tiwatyhynyõlemahãtenyte, wabudoeni wesemy aõkõ toite. 27 Wabudoeni warybe rierymyhỹre, riwaheludunymyhỹre; jiarỹ heka ibutumy wabudoeni reerymahãre. 28 Tamy umytuedeõna rewahinywãhãre tiu heka ruruõtyhy. Inyõ waribi ridyõtyhy. 29 Waha wadee riwahinyre. Tii heka ibuturatyre rare. Inyõ iribi ritaõtyhy. 30 Jiarỹ Waha-wana sohojihyyle watxiwãhãre. 31 Ixityre tahe judeu mahãdu mana-di rirubunykre idi rỹire. 32 Tahe Jesuisi tamyreny rarybere: —Jiarỹ sõwemy bedeòbyna inydee rewinywãhãre Waha ruru-di. Aõòrarukibo biwarubunybenykre. 33 Tahe judeu mahãdu rirawyònyre: —Kai aõmydỹỹnana wiwihikỹle tewinyte. Kia òraru-ki aõkõ ijoi adi rỹireri mana-di arubudỹỹmy Deuxumy binatyhymy tarybeteriki. Kai dori hãbu tate, ihãrele Deuxumy texininiteri. 34-35 Jesuisi rarybere: —Abede ywina-ki ryberiti rỹire. Deuxu Rybe òbitihyymy raritinymy rỹire. Kiamy: —Jiarỹ rarybere: —Kaiboho Deuxu toite. Deuxu Rybe heka inyõ-ò diteònyde. Kia mahãdu tahe Deuxulemy rininire. 36 Deuxumy tiiboho rininirenyre-wana, aõherekibo wadee takyarananyteri jiarỹ tule Deuxu Riòrelemy rexininireki. Waha dori, riwatamy diwateònyde. Timykibo kaiboho tarybetenyteri Deuxumy ibinamy jiarỹ rarybererimy 37-38 Waha-ribi bedeòbyna ariwinyõkeki, biwatyhynybenyõtyhy. Tahe ariwinykeki, aõbo rewinyre-wana bityhynybenyke, biwatyhynybenyõke hãrele. Tai tahe bityhynybenymy boibeke jiarỹ Waha-wana wãhãre tule Waha wawana ratximyhỹre. 39 Kabedeu ixityre riijere Jesuisi rimykemy tii rexitamy rexihedỹỹnyre. 40 Jesuisi ixityre Jordaõ bero kowa weribi-ò reurore. Joaõ juhuu ròsebedỹỹmyhỹò rare. Taile tahe tii raremyhỹ. 41 Tahe sõwemy iny tamy roirenyre. Tamy rarybere: —Inatyhymy Joaõ bedeòby iny itxerenamy riwinyõre. Tahe ibutumy tii Jesuisimy rarybemyhỹre, inatyhy rare. 42 Sõwemy heka taile Jesuisimy rityhynymyhỹre.
1-2 Lazaru ibinamy roimyhỹ Betỹnia hãwã-ki. Marie, Marta-wana iseriòrereny rare. Juhuu Marie Jesuisi-wana raremyhỹu, tii Jesuisiwa tyre-ò tarinalỹnyrehekỹõ ritxiwire, idi tahe tarade-di rirubudỹỹnyre. 3 Lazaru ibinamy roimyhỹki tahe tiiboho riteònyre Jesuisi-ò rarybekremy: —Wahĩ, abiòwa tyhy binanihikỹmy roireri. 4 Jesuisi kiamy roholareu rarybere: —Kabinana hãwã Deuxu wowydynamy tamy nade. Tule riwawowydynykemy jiarỹ dori Deuxu Riòre rare. Kabinina tahe rubuhyymy aõkõ tamy rỹike. 5 Jesuisi heka ibutumy iluurenyre, Marta, Marie, Lazaru-wana. 6 Iu Jesuisi rieryreu Lazaru webinaduna, tahe taile ratximyhỹre, rerihãrele inatxitxumy. 7 Iribi tahe rarybere taerydỹỹna mahãdu-ò: —Ròkòirenyke ixyby Judeia bede-ò. 8 Tahe ierydỹỹna mahãdu tamy rarybere: —Erydỹỹdu aõherekibo ixybynomy tamy tarybeteri judeu mahãdu adi heka riwisỹnymy rỹimyhỹ mana-di arubudỹỹmy. 9 Jesuisi dirawyònyde: —Txu heka waòinatxi òra bededỹỹnanamy rare. Aõhe inatyhy. Inyõ txumy rariakeki, tiu aõ òraru-ki reseõtyhy loosònamy dori ibutumy robimyhỹre. 10 Bede lurumy rariakeki tahe, aõ òraru-ki reseke, loosòna dori ihoõreki wahe. 11 Tahe ijõmy Jesuisi tamyreny rarybere: —Iny biòwareny rõrõmy roireri. Tamy arakre ariixixanykremy. 12 Tahe imahãdu rarybere: —Wanyrỹ tii rõrõmy roireri-wana bohe, reytekre. 13 Jesuisi heka rarybemyhỹ Lazaru rubumy roirerimy. Tiiboho tahe rõhõninyrenyre urile rõrõmy roirerimy. 14 Tahe Jesuisi ritỹnynytyhyra tamyreny: —Lazaru rurure. 15 Jiarỹ wa aòrarureny-ki wadeysamy watxireri tai watxiõraki. Ka tahe biwatyhynybenykre. Ròkòirenykre tamy. 16 Tome ierydỹỹna mahãduõ rare. Didimomy iniõre. Tamahãduõ rarybere: —Ròkòirenyke, tule tii-wana rukururenykremy. 17 Jesuisi rehemynyreu, Lazaru inaubiòwatxumy hãloo iwòdỹỹwo-ki roimyhỹ. 18 Betỹnia Jerusalẽ hãwã-ribi sohoji urihixinamy roire. 19 Judeu mahãduy-ribi sõwemy doidenyde Marta Marieboho wotòenamy, iseriòrereny rurureki. 20 Marta Jesuisi kanakre rieryreu, tahe ròhònyre tii-wana witxi reakemy. Marie tahe tahetokile ronymyhỹ. 21 Tahe Jesuisi-ò Marta rarybere: —Wahĩ, kakile atxiberi-wana waseritxòre rurukõhykyra ikuny. 22 Ihãrele tahe rekeryre ibutumy Deuxu-kò bexitòenykeki, tiki adeke kidiwahinykre. 23 Jesuisi tahe tamy rarybere: —Aseriòre wa rubu-ribi kedexixakre. 24 Tahe Marta rarybere: —Rekeryre jikarỹ ikokunanatxu-ku rubu-ribi rexixakre, ibutumy ixixanatxu-ku. 25 Jesuisi rarybere: —Jiarỹ waixixanadỹỹdu rare, umytuedeõna wahidỹỹdu rare. Inyõ riwatyhynykeki, tii rubu-ki roire hãrele, kedexixakre. 26 Ibutumy irumy roirekeki, tiu rururenyõtyhy, tii dori riwatyhynyreki. Kai aõbohe kia tetyhynyteri. 27 Tii dirawyònyde: —Kohe, Wahĩ, aratyhynywãhãre. Kai Kristu tate, Deuxu ritxòretyhy. Deuxu tuu rarybereki, bede-kò kanatekònyde wahe. 28 Tahe Marta ròòsere Marie taseriòre-ò rarybere: —Inyhĩ rehemynyreri, kai makremy rarybereri. 29 Kiamy roholareu, tahe, wylemy rỹimy reare tamy rare. 30 Jesuisi dori hãwã-ò ralòõlemy raremyhỹ Marta tamy raryberekile raremyhỹ. 31 Tii rỹimy ròhònyreu, judeu mahãdu tuu robire. Tahe riheludunyre, wabede-ò robukremy raresỹny tamy roholare. 32 Marie rehemynyre Jesuisi-ò. Tahe tii tuu robireu, resere iko-ò, tahe rarybere: —Wahĩ, kaki atxiberi-wana ikuny waseritxòre rurukõhykyra. 33 Jesuisi Marta ibru-di tule judeu mahãduhi-di retehereu tule tii rabedewonihikỹre. 34 Iule Jesuisi rỹỹraxire: —Titxiwexe tii tetiditenyte. Tiiboho rirawyònyre: —Wanyrỹ, manake itxeremy. 35 Jesuisi tahe rahinyre. 36 Tai tahe judeu mahãduõ rarybere: —Betehebenyke sõwemy heka tii Lazaru luure. 37 Ijõ tahe rarybere: —Tii iny ruetà riteytenyre. Aõherekibo Lazaru irumy ratxireriule riteytenyõra. 38 Jesuisi ixyby tawo-ki bederiòtiinyre. Tahe rariamy rare wabede-ò Lazaru suiwodỹỹwo-ò roire. Mana-di tahe ritxiotòbònyre. 39 Tahe Jesuisi rarybere: —Mana bitake Marta tahe iseriòre rarybere: —Wahĩ, rarònyreri wahe inakubikòwa txumy dokuri txuu idi rỹira. 40 Tahe Jesuisi rarybere: —Rarybere taheka, bityhynykeki, Deuxu rurumy bobike. 41 Tahe mana iribi ritarenyre. Jesuisi retehere biu-ò rexitòenyre: —Umy reàlàmy wahe watxireri kai wadee taholataki. 42 Wadee taholahyy atxiteri mahãte: —Kia reeryre, kata inysõwehekỹ òraru-ki kiamy rarybera adee, tai tiiboho rityhynyrenykemy wahe, kai tiwateònyteki. 43 Kia rexihureu tahe ryryre: —Lazaru, bodohonyke wa ahana-ò. 44 Kia rurumy roimyhỹ-ribi tahe dòhònyde. Iwa heka tebò-wana widee ritỹtenylemy roimyhỹ. Irati tahe tyybese-di ritỹtenymy ihỹmyhỹ. Jesuisi rarybere: —Biesebenyke wa ixinamy rake. 45 Tahe judeu mahãduy-ribi, Marie Martaboho roraludu mahãdu, aõbo Jesuisi riwinyremy robireu tahe, rityhynyre. 46 Ijõ tahe fariseu mahãdu-ò roirenyre tamy relyykemy aõbo Jesuisi riwinyremy. 47 Iribi tahe xiwe wahidỹỹdu wedu, fariseu wedu mahãdu-wana heka ywisidỹỹna mahãdu ributunyre. Dohodỹỹna mahãdu wedu heka imahãduni rare. Tahe inyõ rarybere: —Ka hãbu heka aõwiwihikỹ sõwemy diwinymyhỹde. Aõhebo he rokotỹỹnyrenykre. 48 Tiihyyle riwinymy rarekeki, heka ibutumy rityhynykre. Idi tahe Roma hãwã mahãdu soldadu kanakre iny riòlòdỹỹnyke inysỹ rahurenykre. 49-50 Kaifa imahãduõ rare. Kabeòrau tahe tii ibutu xiwena wahidỹỹdu wedu rare. Tahe tii rarybere: —Kaiboho aõ teeryõhyytenyte. Hãbuõ tahe rurukre ibutu inydee. Tai tahe ibutu iny itueõtyhy. 51 Kia heka irayky-ribi aõkõ ròhònyre. Deuxu irayky-ò ritidire, tii dori xiwena wedu tyhy rare kabeòrau. 52 Kiamy rarybereu, tahe Jesuisi rubunamy rarybereri. Jesuisi dori ibutumy judeu mahãdu dee rurukre. Tamy sohojile aõkõ rurukre. Tahe sohoji mahãduòle rabutukre Deuxu riòre bede bedemy rỹira mahãdu wahe. 53 Itxuule tahe Jesuisi rubudỹỹmy rõhõtinyrenyre. 54 Tai tahe ihãwãy-ki rariaõre, Judeia mahãduy-ki. Tahe iribi rexitare bederahy-ò iòhòmy. Hãwãõ-ò heka rare, Efraĩ heka inire. Taile taery mahãdu-wana ihỹmyhỹ. 55 Judeu mahãdu worana bedehesi iòhòmy rỹimyhỹ Pascoa heka inire. Ritelenykõule heka sõwemy roirenyre Jerusalẽ hãwã-ò, tai rexiywinyrenykemy iwese bede ywina rarybere wese Pascoakomy wahe. 56 Sõwemy iny Jesuisimy robikemy rỹimyhỹ. Tahe Deuxu dohodỹỹna hetowo-ki widee rarybemyhỹre tahe rarybere: —Kanakre aõbo Jesuisi worana bedehesi-ò. 57 Xiwena wedu fariseu-wana juhuu inyõ rarybemahãre: —Inyõ Jesuisimy robikeki, tuu wadeereny kanarybekre, tii ramykremy wahe.
1 Jesuisi rare Betỹnia hãwã-ò Pascoa worana bedehesi rỹikrekoki. Debòsohoji txumy rauhenymy rỹimyhỹ tamy. Tai heka Lazaru rasỹnymyhỹre rubu-ribi rexixare-ribi wahe. 2 Martaboho tahe rỹsỹna wiutàdàna riwinyrenyre Jesuisideewina. Lazaru Jesuisi-wana riroxikremy ronymyhỹ. Tahe Marta tamyreny rỹsỹna riwymyhỹ. 3 Marie tahe sõwemy aderòna lỹnyre-di ratximyhỹ, iòwyhykỹre heka. Tahe tii Jesuisiwatyre ritxiwire idi tahe taradedile risuhore. Heto tahe tỹnyrehekỹlemy roire. 4 Judasi Isariò tule Jesuisi erydỹỹnaõ rare tii tai ratximyhỹ. Tii Jesuisi rityhenykremy tii raremyhỹ ihewo-ribi. Tii tahe rarybere: 5 —Kaa aderòna heka iòwyhykỹ rare. Aõherekibo idi tahonyõte nieru idi bitakemy iny aõkõ mahãdu-ò nieru biwahinykemy. 6 (Judasi heka iny aõkõ mahãdu luu aõkõ rare. Erydỹỹna mahãdu nieru rubudỹỹdu tii rare. Kia nieruõ tahe ixideele ritosinymyhỹre. Tai tahe aderòna òwy ixidee ributunykemy idi ratximyhỹ). 7 Tahe Jesuisi rarybere: —Ixinamy wawatyre ritxiwike, wahãloo-ò waherina heka riryrymy tuu ritxiwireri. 8 Kaiboho heka aõu biwiòhenanymy ahãbenyke iny aõkõ mahãdu awanareny dori rarehyymy rarekre. Jiarỹ tahe kaki aratxihyyke aõkõ rare. 9 Judeu mahãdu Jesuisi rehemynyreriò roholare. Tahe sõwemy iny tamyreny nade itxeremy. Tule Lazaru-ò itxeremy nade rubu-ribi rexixareki. 10 Tai tahe xiwewahidỹỹdu mahãdu wedu tule Lazaru rubudỹỹmy rarybere. 11 Lazaru òraru-ki dori sõwemy judeu wedu Jesuisi rityhynyre. 12 Itxubiòwau tahe Jesuisi nade Jerusalẽ-ò kia-ò tahe roholare ibutumy worana bedehesi ludu mahãdu. 13 Tai tahe roirenyre tii-wana witxi reakemy horeru riwyre ityre-di kanakre. Ryryrenyre Jesuisi-ò: —Waiòlòreny, kai arawowydynyreri, kai bedeòbydỹỹdu tateki! Kai Deuxuni-di tateri. Kai judeu Iòlòtyhy tate. 14 Jesuisi nade jumenta riòre tyre-ki, tuu dori ihetxina tyyriti-ki roire wesemy. 15 Kiamy wahe roire: —Judeu riòre mahãdu uritere brebuõmy atximahãbeny aiòlòreny dori kanakre jumenta riòre tyre-ki. 16 Iery mahãdu kia rieryõhyyre juhuu. 17 Iribi tahe tõhõti itxi reare ritidỹỹna hetxina-ki roiremy, Jesuisi biu-txi ròòsemy rareu wahe tõhõtireny itxi reare. Tule sõwemy iaõmydỹỹnana rybe hetxina-ki riritinymy rỹimyhỹre. Kia-di tahe idi tõhõtireny reare. 18 Inyõ itxeredu heka Lazaru ixixanamy relyyre. Tai tule iny sõwemy doidenyde. Kia Jesuisi riwinyreò heka roholarenyre. 19 Tai tahe fariseu mahãdu widee raryberenyre: —Ibutumy ihemy roirenyre. Timyõre, aõhe heka rikisỹnyrenyõtyhy. 20 Inyõ worana bedehesi-ki grego rybedu mahãduõ ratximyhỹ. Tii tai Deuxu reàlàkemy ratximyhỹ. Tii Besaida hãwã ludu-ò Kalileia bede luduõ ratximyhỹ. 21 Tahe grego rybe mahãdu tamy rarybere: —Wanyrỹ, jiarỹboho, Jesuisimy arobikemy watxirenyreri. 22 Filipi tahe Andre-ko relyyre. Ta wiwana roirenyre Jesuisi-ò. 23 Jesuisi rarybere: —Aõkõra, Wabededỹỹnana iòhòra Deuxu Riòre Hãbutyhyhykỹ rubuna-ò, wahe. 24 Inatyhymy adeereny ararybekre: —Jiarỹ alòbòròna rijuxunymyhỹre wesemy aresekre suò, arurukremy. Aruruõkeki ixiwanahyyle ararekre. Arurukre-wana sõwemy araratynykre. 25 Inyõ ixiluukeki heka, ruruke. Kabede-ki tahe ixiluuõkeki, tii rexiywinymy umytuedeõna-ò ratxike. 26 Inyõ wadeòdumy ratximyhỹkeki, tii riwaheludunyke. Tai titxibo aratxikeò tii wawana ratximyhỹke. Inyõ wadeòdumy rareke-wana, tii Waha riwowydynykre. 27 Katahe wabedewonihikỹmy watxireri. Timybo ararybekre, Waha, kia rubu aõmydỹỹnana-ribi biwatake. My òsana arexitòenykre. Aõkõre, kiaòle heka kabede-ò anade. 28 Waha, anityhy-ò iny riwowydynykemy watxireri. Iule tahe rybeõ-ò roholarenyre: —Kia rotỹỹnyre ihãre ta ixityre tuu rotỹỹnykre. 29 Tahe iny sõwehekỹ kia rybe-ò roholare. Tahe rarybere: —Biumytxyle rare. Tahe ijõ rarybere. Aõkõre ỹju rare. 30 Tahe Jesuisi rarybere: —Waòraru-ki aõkõ kia rybe rỹireri, aõrarureny-ki, tamy boholabenykemy. 31 Wiji tahe ywisidỹỹna kỹnyikre, bedemy iny rỹira mahãdu-ò. Kia mahãdu iòlò, Satanasi, kanahitxidỹỹkre. 32 Iu jiarỹ itxeò-ki riwaukokreu, ibutumy iny heka ixidee adiwiutàdànykre riwatyhynykremy. 33 Iu tii kia rarybereu, tarubuna ritỹnynyre timybo rurukre. 34 Iny sõwehekỹ dirawyònyde: —Jiarỹboho raholarenyre bede ywina-ò. Tii rarybere: —Tiiemy Kristu rarehyymy rarekre. Timybo kai tarybeteri: —Biwaukokremy. Mobo tahe Deuxu Riòre Hãbutyhyhykỹmy tuu tarybeteri. 35 Tahe Jesuisi dirawyònyde: —Urihimyòle loosòna awana rariamy ratxireri. Idi atxiteriule idi mariake, bede luru atxi kanakelau. Inyõ bede luruki rariakeki, tiobo rake rieryõhyyre. 36 Waloosòna atxiteriule, biwatyhynyke waloosònamy, taile waloosòna mahãduõmy boibeke. Kiarybe rahu-di tahe Jesuisi iribi rexitamy rexiwore. 37 Tii sõwemy bedeòtiidỹỹna ikoreny-txi riwinyre. Ihãrele tahe sõwemy rityhynyõre. 38 Kia tahe Isaia tyyriti-ki roire, tahe iwesele tuu rarybere wese wiji rỹira rotỹỹnyre: —Wanyrỹ, Iny rybe tỹnydỹỹnareny tiiboho rityhynyõhyyre, Deuxu taruru tamy riteòsinyrehãrele rityhynyõre. 39 Tai rityhynyõhyyre. Isaia, Deuxu rybedu ijõmy ròritidỹỹre: 40 —Deuxu riruetànyre, irayky riteredỹỹnyre. Tai rieryõhyymy robiõhyymyhỹre. Tiu heka Deuxu rityhynyõhyyre. Tiu riteytenyõhyyre. 41 Isaia Jesuisi loosònamy robire. Tai tahe tuu ròritidỹỹre. 42 Ihãrele tahe dohodỹỹna mahãdu wedule sõwemy rityhynyre. Urile fariseu mahãdu òrarukile, ijõ-ò tuu rarybeõre, dohodỹỹna mahãduy-ribi riòlòdỹỹnyheny. 43 Tiiboho dori Deuxu wowydyna luurenyõre inywowydynale luurenyre. 44 —Iny riwatyhynymyhỹkeki, wadeòdỹỹdule rityhynymyhỹre. 45 Inyõ wamy robikeki, iule wadeòdỹỹdumy robike. 46 Jiarỹ loosòna wesemy anade bede-ò. Tai tahe iny riwatyhynykeki, bede luru ribi ròhònyke. Tai heka anade. 47 Inyõ warybe-ò roholake hãrele riywinyõkeki, tahe jiarỹ tii wiji ariywidỹỹnyõke. Jiarỹ dori tarasaduhyylemy anade. 48 Inyõ riwatyhynyõkeki, warybe-ò roholaõkeki, ikonana txuu tahe ywisidỹỹna-ò ralòke, warybe-ò rityhynyõmyhyreki aõhõkỹmy dỹỹnana-ò heka kia ralokre. 49 Jiarỹ ixi rayky-ribi aõkõ rarybemahãre. Wahale rybe wadee riwahinymyhỹre. Kia wesele relyymahãre. 50 Deuxu rybe bede ywina-di diwateònyde umytuedeõna wahidỹỹna kia rare. Kiale heka reeryre.
1-3 Pascoa worana bedehesi txumy txuu rỹire. Tahe Jesuisi rexieryre ixyby tyby-ò ròòsekremy ihỹre, ibededỹỹnana iòhòmy roireki. Tule rexieryre tyby ibutumy tamy riwahinyremy. Tii tyby-ribi nade tule ixybyle tamy rakemy. Txioro roxinau Jesuisi taerydỹỹna mahãdu-wana riroximyhỹreny. Judasi Isariò (Simaõ riòre) taile ratximyhỹ. Juhuu diabo tamy rarybere iruule Jesuisi rityhenykemy. 4 Jesuisi sõwemy taerydỹỹna mahãdu luure. Tai tahe rỹire, tatyytyre ludu ritare òsuròna rimyre, idi rexiwetyataare. 5 Hynaro-ò bee ritxiwire taerydỹỹna mahãduwaa risuhokremy tahe òsuròna-di tawetya-ki ihỹmyhỹ-di iwa rirubudỹỹnyre. 6 Tahe Jesuisi rehemynyre Simaõ Pedro-ò, Pedro rarybere: —Aõkõre kai wawareny suròdòõmyke. 7 Jesuisi rirawyònyre: —Kai heka teeryõte aõherekibo resuhòreri. Ihewo-ribi tahe bierykre. 8 Pedro rarybere: —Aõkõre, wawasuròdòdỹỹõmy. Jesuisi rirawyònyre: —Arisuhòõkeki wawanahyy aõkõ mabeke. 9 Pedro rarybere: —Wawasohojile aõkõ bisuhokre, wadebò warati-wana tule wahe. 10 Tahe ritỹnynyre Jesuisi; inyõ rõhõre-wana iwale rasuhòke. Iuhe ibutumy tyralemy rỹimyhỹre. Kaiboho yralemy toite. Sohoji tahe aõkõre. 11 Jesuisi tatyhedỹỹdu rayky rierymyhỹre. Tai tahe rarybera, ibutumy aõkõ tyraremy. 12 Jesuisi iwasuròdò rexihureu, tatyytyre ludu retyynyra roxina-ò ròòsere. Tamyreny rỹỹraxire: —Kaiboho teerytenyte. Aõhebo jiarỹ kia ratỹỹnyra. 13 Adeereny aritỹnynykre. Kaiboho tiwaninitenyte anyrỹmy, aõhe inatyhy? Aerydỹỹdumy, inatyhy heka jiarỹ rare tahe òbitimy tarybetenyte. 14 Jiarỹ aerydỹỹdureny anyrỹreny heka awareny resuhore. Tai tahe kaiboho wiwa bisuhòbenykre. 15 Iwese jiarỹ rexideòsinyre wese kaiboho biwinybenyke. 16 Inatyhymy adeereny ararybekre. Deòdu dori tawedu ratyre aõkõ rare. Rybe-ò ijohonadu dori rybedutyhy ratyre aõkõ rare. 17 Kia warybe teerytenyte. Tahe biywinybenykeki bedeòbynatyhy adeereny kanakre. 18 Ibutumy umyreny aõkõ rarybereri jiarỹ araeryrenyre, aratarenyreki, wahe. Rybe tyyriti-ki roire kiamy: —Kia wawana riroximyhỹrele heka riwatyhenykre. Ele elemy tuu rotỹỹnykre. 19 Wiji rarybereri heka wylemy kia tuu rotỹỹnykre. Tuu rotỹỹnykreule, kaiboho bierybenykre òbitimy raryberé wahe; jiarỹ biwatyhynybenykemy wahe. 20 Inatyhytyhymy ararybekre: —Inyõ adee aditeònykre. Inyõ tii rityhynymy kididykeki, tii riwadymyhỹre. Inyõ kidiwadykeki wadeòdỹỹdu ridymyhỹre, Deuxu rityhynymyhỹre wahe. 21 Tahe Jesuisi rabedewonihikỹmy ronymyhỹ. Tahe rarybera: —Iny sohojiõ ayreny-ribi riwatyhenykre. 22 Tahe wii riijeriijerenyre. Mokobo rarekremy rõhõtinyrenyre. 23 Jiarỹ, Joaõ Jesuisi weribi ranywỹhỹ, tii dori sõwemy waluure. 24 Tahe Pedro wadee narybewasidi: —Tamy inihe myỹraxike mobo raremy. 25 Tahe jiarỹ retorunyre: —Wanyrỹ, mowexe ratxireri. 26 Jesuisi rarybere wadee: —Kia orotxu ituudỹỹ tamy ariwahinykrele tiikre. Tahe Jesuisi orotxu yre rituunyre idi tahe Judasi Isariò-ò riwahinyre. Tii Simaõ riòre rare. 27 Tahe Judasi riyre. Iribi tahe Satanasi aõwesele tamy ralore. Jesuisi heka Judasi-ò rarybere: —Aõhebo botỹỹnykre wylemy makre biwinykremy. 28 Tahe riroximy rỹimyhỹ mahãdu rieryõre aõmybo Jesuisi rarybemyhỹ. 29 Judasi Isariò dori nieru hyna yrubudỹỹdu heka rare. Tai tahe rõhõtinyrenyre Jesuisi worana bedehesi aõna aõna riwykemy riteònyre, ada iny aokõdu mahãdu-ò nieruõ riwahinykemy. 30 Judasi orotxu yre riymy rahudi tahe ròhònymy rare bede luru-txi. 31 Judasi ròhònymy rahudi tahe Jesuisi rarybere: —Wiji tahe Deuxu Riòre Hãbutyhyhykỹ loosònamy iny robimyhỹre taraykywo-ki. Tii heka jiarỹ rare. Deuxu-ò waòraru-ki wowydyna riwahinykre. 32 Deuxu loosònamy tahe waki iny robikeki, Deuxu riwatoosònyreri aõwesele ibutumy iny tuu robike. 33 Waluudu mahãdu wariòre wesemy atximahãtenyte, umywanareny urihimyòle ararekre, idi tahe arakre. Tahe biwaijebenyhãrele waki mahabenyõtyhy. Iwese judeu mahãdu-ò rarybere wesele adeereny ararybekre: —Titxibo arakre-ò kaiboho boibenyõke. 34 Bede ywina tỹmyra wese adeereny ariwahinykre kiamy wahe: —Wiluurenykemy wahe: —Iwese jiarỹ aluurenyre wese tule kaiboho wiluurenyke. 35 Wiluurenykeki ibutumy iny rieryrenykre kai waerydỹỹna mahãdumy tate. 36 Tahe Simaõ Pedro ritỹỹraxinyre: —Wanyrỹ, titxibo kai makre. Jesuisi dirawyònyde: —Titxibo arakre-ò wiji kaiboho boibenyõke, iribi tahe wahemy bodoikre. 37 Tahe Pedro rarybere: —Wanyrỹ aõherekibo araõkre wiji ahemy waumy kie aõraru-ki ariwahinykemy watxireri. 38 Inatyhymy aõbo aumy biwahinykre waòraru-ki. Inatyhytyhymy ararybekre: —Hãnie hãbu robukõule kai biwatxiõnykre inataõmy.
1 Kaiboho bedeòtiidỹỹrenyõmyke bedewona-ki. Kaiboho Deuxu tetyhynytenyte, tai tahe biwatyhynykre. 2 Wahasỹ-ki sõwemy sỹỹ rỹimyhỹre kialemyre heka tai. Kaweseõkeki adee inatyhymy rarybemahãre. Jiarỹ tahe arakre sỹỹ adeereny ariwinykemy. 3 Ariwinymy arahudi tahe ixybyle aòrysymy adòòsekre. Tahe aradyrenykre titxibo-txi aratxireriò kaiboho tule matxibenykre. 4 Kaiboho dori teerytenyte titxibo wasỹry roire. 5 Tahe Tome rarybere tamy: —Wanyrỹ, titxibo makreò reerykõrenyre. Tai tahe timykibo asỹry reeryrenykemy. 6 Jesuisi dirawyònyde: —Jiarỹ wa ryy rare. Deuxu inatyhyna jiarỹ rare. Umytuedeõna wahidỹỹdu jiarỹ rare. Inyõ waòrarukile Waha dee rakre. 7 Kaiboho tiwaerytenyte-wana tule Waha teerytenyte. Wiji tyhyule Deuxu teerytenyte, tuu tabitenyte. 8 Idi Filipi rarybere: —Wanyrỹ, boo inydee biteòsinyke, tai tahe awike. 9 Tahe Jesuisi rarybere: —Filipi, sõwemy bededỹỹnana umy-wana rewyre. Ihãrele tahe tiwaeryõte. Inyõ wadee kanakeki, Wahamy robike. Aõherekibo wadee tarybeta boo wadee biteòsinykemy. 10 Jiarỹ Waha-ki watxiwãhãre tule Waha waki ihỹre. Kia aõbohe tetyhynyõte rarybewãhãre, kia iximy aõkõ rarybewãhãre. Waha waki ratximyhy tii taõmydỹỹnanamy rotỹỹnyre waumy-ribi. 11 Waha-ki watxiwãhãre, tule tii waki ihỹre, kia bityhynybenyke. Aõwiwihikỹ rewinywãhãre òraru-ki biwatyhynybenyke. 12 Inatyhytyhymy adee ararybekre: —Inyõ riwatyhynykeki, wawesele aõwiwihikỹ riwinykre. Tahe watyreleaõ riwinykre. Jiarỹ dori Waha-ò arakre. 13 Tai wanimy aõmy bexitòenybenykeki, tii tahe ariwinykre. Iny Waha-ò wowydyna riwahinykemy idi watxireri, iRiòre wahe jiarỹ rare. 14 Tai aõma wani-ò bexitòenybenykeki, tii tahe riwinykreadeereny. 15 Inyõ waluukeki tii wabede ywina riywinytyhyke. 16 Waha-ò arexitòenykre ijõ wiòhedỹỹdu adeereny kiditeònykremy waderòwymy. Tii aõu aõu adeereny hyyle rarekre. 17 Tii Deuxu Tyytybytyhy rare. Tii inatyhynamy rieryrenyre, iny bede bede mahãdu wahe. Deuxu Tyytybytyhy ixidee ridykemy. Tuu dori robiõtyhy rieryõtyhy. Kaiboho tahe teerytenyte. Tii dori umywanareny ratximyhỹre, aworeny-ki ratxikremy. 18 Jiarỹ heka ixisohojimy ararisidỹỹnyõtyhy. Jiarỹle adee adoosekre. 19 Wijile arurumy arakre bede-ribi. Bede bede mahãdu tiu wamy robiõtyhy. Kaiboho tahe wamy bobilebenykre, jiarỹ dori ixityre rubu-ribi adexixamy ararekre. Tai tahe tule kaiboho rubu-ribi bexixamy boibekre. 20 Kia txuu kaiboho bierybenykre jiarỹ heka Waha-ki watxiwãhãremy. Kaiboho tasỹ waki ahãtenyte. Jiarỹ tule akireny watxiwãhãre. 21 Inyõ wabede ywinareny dikeki tahe, riywinykeki, waluudu rare. Waha tule iluukre. Jiarỹ tule iluutyhyre. Tamy tule arexideòsinykre. 22 Judasi tamy rarybere: (aõ Isariò aõkõ kỹny, iwitxiraõ.) —Wanyrỹ, aõhekremybo wadeereny bedexideòsinykre tahe bede bede ludu mahãdu-ò aõkõ wahe. 23 Jesuisi rarybere: —Inyõ waluukeki, wabede ywina riywinytyhyke. Waha, heka iluutyhykre. Jiarỹboho tamy adoidenykre tamysỹmy. 24 Iny waluuõkeki, warybe tiu rityhynyõtyhy. Aõ warybe-di aõkõ heka rarybereri. Waha wadee riwahinyredi heka rarybereri. 25 Tai arakrekoki tuu rarybereri adeereny. 26 Tahe Deuxu Tyytybytyhy, awiòhedỹỹdu, tii araerynanykre ibutumy aõna aõnamy. Timybo jiarỹ adeereny raryberemy akananohõtiijaranydenykre. 27 Ywina adeereny adiwahinykre waywina wahe. Iwese bede bede ludu mahãdu riwahinymyhỹre wese aõkõ ariwahinykre. Uritere nohõtiyreõmy brebuõmy. 28 Rarybere dori arakremy tule adoosekremy. Waha waratyre rare. Tamy he arakre. Kaiboho waluukeki, beysabenykre tamy arakreu. 29 Kaa bede reakoki tuu rarybereri. Tuu reakreu tahe, kaiboho biwatyhynybenykre. 30 Sõwemy heka adeereny ararybeõkre, bede dinodu dori tehemynysỹ iòhòmy ihỹre, Satanasi wahe. Tii heka wadee iruruõhyyre, riwateònyõtyhy. 31 Jiarỹ Waha luure. Rewinywãhãre aõbo Waha ariwinykemy riwateranymyhỹre. Botamanyke: —Ròkòirenyke.
1 Hãjutò òwòna wese wihikỹ jiarỹ rare. Waha tahe bede rade wysydỹỹdu wese rare. Bede òbebure iratyõkeki iò riòròke. Iratydikeki iòsõmo iribi risihere. Tai tahe sõwetyhymy nihikỹmy raratynyke. 2 Kaiboho bede rade-ò wesemy toite. Warybe-di aòsõmoreny aribireny resihemahãre. Katahe òbitimy toite bederatymy raratynykemy. 3-4 Kaiboho biwamymy wadi myikre. Iwese bede radeõ raòròõmyhỹkeki irulemy rỹikre raratynyke. Aõkõkeki ruruke. Kaiboho iwesele toite. Waki beàrenyõbenymyhỹkeki, tiu Deuxudeewimy atxibenyõtyhy. 5 Jiarỹ hãjutò òwòna wese rare. Kaiboho ibede radeò wese toite. Waki beerenybenykeki, jiarỹ aki ararike, tai bederaty wese sõwemy maratynyke. Wahoõkeki tiu aõ biwinybenyõtyhy. 6 Inyõ waki rariõkeki, iwese iny bede rade rubu-di rahuleke, tii iwesele inyõ rahukre. Juhuu rimyre, idi heòty-ò rehure, tai roomyhỹre. 7 Kaiboho waribi boibenyõkeki, warybe õhõti-ribi rosaõtyhykeki, aõtaxina wadee bexitòenybenykre, tai ibutumy adee ariwahinykre. 8 Iwese bede rade sõwemy raratynymyhỹre wese, kaiboho, aõna aõna wiwihikỹ biwinybenyke Deuxu dee. Kiakeki tahe Deuxu deàlàna sõwemy ritakre. 9 Iwese Waha waluure wese jiarỹ aluurenyre waluuna-ribi boibenyõke. 10 Wabede ywina inyõ riywinykeki, tii waluuna-ribi raõtyhy. Iwese Waha bede ywina reywinymyhỹre wese tahe Waha luuna-ribi jiarỹ tiu rahònyõhyyre. 11 Wadeysana awo-ki ratxikemy jiarỹ adi watxireri. Eysana sõwemy mabekemy adi watxiwãhã. Tai tahe warybe adee rarybere. 12 Wabede ywina heka kaa rare: —Wiluukemy. Iwese jiarỹ aluure wese wiluurenykemy. 13 Inyõ taery dee rurukeki taluunadireki, tii luunatyhy ijõdire. 14 Kaiboho wadeewi biwinybenykewana tai inatyhymy wabiòwa toite. 15 Tahe aõ wadeòdumy aõkõhe araninirenykre. Kaiboho wabiòwa toite jiarỹ dori Waha-ribi raholare adee tuu relyywãhãre. 16 Kaiboho tahe tiwatatenyõhyyte, jiarỹ tahe aratarenyre kaiboho boibenykemy. Sõwemy aõna aõna wiwihikỹ botỹỹnybenyke. Tule kia aõna aõnamy tule roihyykemy. Tai tahe aõmy Waha-ribi wani-di bexitòenybenykeki, adee riwahinyhyy rareke. 17 Wiluubenyke: —Kia tahe wabede ywina adeereny adiwahinyde. 18 Bede ludu iny mahãdu eramy reakeki myỹ uritere nohõtiõmy juhuu dori waderamy waluuõre. 19 Kai bede ludu iny tate-wana iny aluuke, tahe aõkõre. Tai tahe iny eramy reamyhỹre. Bede ludu mahãdu ribi jiarỹ aratara. Bede ludu mahãdu aõkõ tate urenana. 20 Adee heka rarybere aõmybo. Uritere iribi nohõti lusaõmy kia wahe: —Deòdu tawedu ratyre aõkõ rare. Tai wadee aõbina binamy iny rotỹỹnymyhỹre. Adeereny tule aõmy rotỹỹnykremy wahe. Tiiboho warybe riywinyrenykeki, arybe tule tiiboho riywinyrenykre. 21 Kia tahe adee ratỹỹnymyhỹre wanimy rybe òraru-ki, tiiboho dori wadeòdỹỹna rieryõreki. 22 Tuu ararybeõre wana inihe tiiboho òrarudiõhyyrenyre. Katahe rarybere tai tahe tiiboho rarybeõtyhy rieryõremy. 23 Inyõ waluuõkeki, tule Waha luuõtyhy. 24 Jiarỹ heka ibutuko-ò wowydyna iitxerenarenymy rewinyõrewana, tiiboho iòrarudiõhyyre inihe. Tahe rewinymahãre, tuu robimyhỹrenyre, ihãrele tahe waluuõre tule Waha luuõre. 25 Kiamy heka rotỹỹnyre bede ywina ritidỹỹna-ki roireki. Tai heka tuu rotỹỹnymyhỹre. Kiamy wahe ritidỹỹna-ki roire: —Tii heka bede òraru aõkõ rare, ihãrele tahe iluuõrenyre. 26 Deuxu Tyytybytyhy adee ariteònykre. Tii, wiòhedỹỹdu rarekre inatyhynamy rierynanykre. Tahe, tii kedehemynykreu wamy rarybekre. 27 Tule kaiboho wamy marybebenykre, wawana hyy ahãtenyteki.
1 Kiamy adee rarybemahãre òraruna-txi ixeõkemy. 2 Tiiboho heka anatakre tohodỹỹna hetowo-ribi. Kobe, bede dỹỹnana iòhòmy kadeakreu inyõ anarubunykeki, kia Deuxudeewimy tuu konohõtinykre. Tii Deuxu wiòhedỹỹdu raremy ixi-di kõnohõtinykre. 3 Tiiboho Waha rieryõhyymyhỹrenyre tule riwaeryõmyhỹre. Tai tahe kiamy adeereny rotỹỹnymyhỹrenyre. 4 Iu adeereny aõmydỹỹnana kedehemynykreu, õhõtireny itxi reake timybo adeereny relyyretxi. Tiu heka tuu rarybeõhyyre, umywanarenyhyy dori wãhãre. 5 Katahe arakre wadeòdỹỹdu-ò. Kaiboho bỹỹraxibenykekõ aõbo tiobo arakre-ò. 6 Kaiboho heka tabedewomy toite kamy rarybereriki. 7 Ihãrele tahe inatyhymy adeereny ararybekre: —Adeereny awikre arakreki wahe. Jiarỹ araõkeki awiòhedỹỹdu, Deuxu Tyytybytyhy kanaõkre. Arakeki tahe tii aditeònykre adeereny. 8 Iu kanakreu, tii inydee kiditeòsinykre irayky binadiremy, iòbitina-di aõkõremy, iòrarunadiremy. Deuxu dori òrarudu riywisidỹỹnykre. 9 Taòraruna ixidee kiditeòsinykre tiiboho riwatyhynyõrenyriki. 10 Tahe ixidee kiditeòsinykre. Jiarỹ iratyre waòbitina direki. Waha-ò dori arakre, wamy bobibenyõtyhykemy. 11 Deuxu ixiywisidỹỹna ixidee kiditeòsinykre kabede dinodu dee rarybere tii rexihukremy. 12 Jiarỹ heka sõwemy adee ararybekemy watxireri, ibutumy tahe isiramy ixidee boholabenyke. 13 Txiòhe rare. Deuxu Tyytybytyhy kanakreu, inatyhymy adeereny rarybekre inatyhyna-di ibutumy. Tarybe-di tahe rarybeõkre. Deuxu-ribi aõmybo roholaremy tahe rarybekre. Tule timybo aõna aõna rarekremy kanarybekre. 14 Tii waaõmydỹỹnana adeereny ritỹnynykre. Tai kidiwatoosònanykre. 15 Ibutumy Wahahõrõ heka wahõrõ rare. Tai heka tuu adeereny rarybereri waaõmydỹỹnana adeereny kiditỹnynykremy. 16 Urihimyò riòre heka waõkre, idi tahe ixityre wamy bobibenykre. 17 Tahe ijõ ierydỹỹna mahãduõ widee rarybere: —Timybo tii rarybere: —Urihimyò iõkremy tii rarybereri, tule ixiryre wamy bobibenykremy. Tule Waha-ò arakre. Timybo heka rieryrenyõhyyre aõmybo rarybera. 18-19 Tiiboho Jesuisi-ò rỹỹraxirenykremy ratxirenyreri. Tahe Jesuisi rierymyhỹre tuu rỹỹraxikre. Tahe Jesuisi tamyreny rỹỹraxire: —Kaimy ixidee tỹỹraxitenyteri. Wananamy waòkesenalemy. 20 Inatyhymy adeereny ararybekre: —Iny bede mahãdu urile reysakre, kaiboho tahe araeryrenyra urile mahinybenykre, birajuabenykre, mabedewobenykre. Idi tahe kaiboho beysabenykre. 21 Iwese hãwyy iijera iòhòreki, rabedewomyhỹre, taaõhõkỹmydỹỹnana-di rõhõtinymyhỹre. Idi tahe reamyhỹre. Iu tahe tõhõti rosamyhỹre tohouã tỹmyradile reysamyhỹre. 22 Iwesele kaiboho mabedewobenykre, ixityre wamy bobebenykreu tahe, kaiboho beysabenykre. Inyõ heka deysana aribireny ritaõtyhy. 23 Kiatxu tahe uritere watỹỹraxidỹỹõmykre inatyhymy adeereny rarybereri. Waha-ribi aõmy bexitòenybenykeki. Tii adeereny kidiwahinykre wani òraru-ki. 24 Tiu heka aõmy texitòenytenyõmahãte wani-di. Bexitòenybenyke, tai bitabenykre. Tai tahe kaiboho beysabenykre. 25 Ibutumy rybewòtemy adeereny rarybewãhãre wahe. Idi tahe tuu adeereny ararybeõkre. Idi tahe itỹnytyhymy Waha aritỹnynykre adeereny. 26 Kiatxu tahe bexitòenybenykre wani-di jiarỹ ararybeõkre umyreny Waha-ò. 27 Waha dori aluurenyre, kaiboho waluurenyreki, Deuxu-ribi anade tetyhynytenyteki. 28 Waha-ribi anade, bede-ò adehemynyde ihãrele bede-ribi arakremy Waha-ò. 29 Jesuisi ierydỹỹna mahãdu rarybere: —Wiji tahe itỹnytyhymy tarybeteri. Rybewòte-di aõkõ tarybeteri. 30 Kai ibutumy teeryte. Inyõ dỹỹraxiõmy adee. Kai inatyhymy Deuxu-di tanate. Kia jiarỹboho retyhynyrenyre. 31 Tahe Jesuisi tamy rỹỹraxire. Inatyhymy wijityhyle tetyhynytenyta. 32 Wabededỹỹnanamy heka reara. Kaibohoõ sohoji sohojimy tasỹ tasỹ-ò rakre. Biwaribenykre ixi sohojilemy arỹikre. Tahe ixi-wana aõkõ watxikre, Wahawanale arỹikre. 33 Kaheka aõna aõnamy adeereny rarybere ywina-di araykyreny-ki boibekre. Bede-ki kaiboho aõhõkỹmy botỹỹnybenykre. Ihãrele beysabenyke, Jiarỹ heka Deuxu òludu mahãdu-di ròtara.
1 Jesuisi rarybemy rahudi tahe retehere biu-ò rarybere: —Waha, wabededỹỹnanamyhe reara. Ariòre watxiwãhãre. Wowydyna wadee biwahinyke tai tahe adee wowydyna adee ariwahinykre. 2 Kai, Waha, ibutumy wadee ruruna tewahinyta iny deòdỹỹnamy. Tai umytuedeõna ariwahinykre biu-ò hedu mahãdu-ò. 3 Kia heka umytuedeõna rare: —Deuxu inatyhy tate sohojihyy tate. Tii araeryrenykeki tahe eòdỹỹna Jesuisi Kristu rieryrenykeki. Kia umytuedeõna rare tamyreny. 4 Aõ aõmysỹdỹỹnabo wadee tewahinyte, ibutumy adee rewinyre. Tai heka arawowydynyra kabede-ki. 5 Iu bede rexidelenyreu umywanahyy rarewãhã. Sõwemy loosòna nihikỹ-di rawãhãre. Tahe wiji, Waha, kia loosònale ixityre bidiwahinykre umywanahyymy ararekre. 6 Kai iny mahãduõ wadee tewahinyte bede mahãdu-ribi. Tamyreny umy rarybemahãre. Juhu tiiboho ahõrõ roire. Idi wadee tewahinyte. Tiiboho arybe riywinymyhỹre. 7 Ibutumy waaõmydỹỹna aribi retamahãre. Kia heka wiji tiiboho rieryrenyra ibutumy aribi nade. 8 Aõrybebo wadee tewahinytamy tamy rarybemahãre. Tiiboho rityhynyrenyre, rieryrenyre aribi jiarỹ anade, kai wateòdỹỹdu tate. 9 Iòraru-ki adee rexitòenyre. Tiiboho amahãdu roire. Wadee tewahinyte, bede mahãdu-ò raru-ki aõkõ adee rexitòenyre. 10 Ibutumy wahõrõ, ahõrõ rare. Tule ahõrõ, wahõrõ rare. Tai heka iny mahãdu riwatoosònanymyhỹre. 11 Jiarỹ adee arakre tai kaki arareõkre. Tiiboho heka kaki rarirenykre. Tiiboho biyrubunykre, Waha, ani òbiti-di biyrubunyke, wadee tewahinyteki. Tai tahe iraykyreny wiwesehyymy roirekre. 12 Tiiboho-wana rarewãhãu ani òraru-ki reyrubunymahãre, wadee tewahinyteki. Timy heka reõnonyõhyyre ijõ, sohojile tahe reõnonyre. Juhuu dori Ritidỹỹna roire ijõ sohojiõ ariõnonykremy. Ihyy tahe reõnonyre, Judasi Isariò õnodỹỹduhyymy rarekre. 13 Ka tahe arakre arora-ò. Tii heka inyõ rarybemahãre ibutumy wadeysana iworeny-ò ralòmyhỹkemy. 14 Jiarỹ arybe tamyreny rewahinymahãre. Bede mahãdu iny dori terarenyre, tiiboho bede mahãdu iny aõkõ roireki. Iwese jiarỹ bede ludu hãbu aõkõ rare wese. 15 Bede-ribi tarasamy aõkõ heka adee rexitòenyreri. Urile ibina bina widỹỹ-ribi biyrubunykemy. 16 Tiiboho tahe wiji ijõ bede witxira ludu roire, iwese jiarỹ rare wese, wahe. 17 Arybe-di tiiboho biòbitinyke, tai ahõrõ mahãdumy rarekre. Arybe dori òbitityhy rare. 18 Iwese bede iny-ò tadiwateònyte wesemy, Jiarỹ tiiboho reteònyre bede ludu mahãdu-ò rarybekremy. 19 Tamyreny xiwena wesemy adee arexiwahinykre. Òbitihyymy ararekre, tai tiiboho òbitihyymy roirekremy inatyhyna-di. 20 Aõ tamy sohojile aõkõ heka rexitòenyreri. Ibutumy kia rityhynymy rỹirakre-ò dori rexitòenyreri. 21 Tai tahe ibutumy wiwese wesemy rõhõtinyrenykre. Iwese, Waha, kai waki atxiteri wesemy tule aki watxireri wesemy tiiboho iny-ki roirekre. Tai bede iny mahãdu rityhynykre ateòdỹỹna watxireri urenana. 22 Kai loosòna wadee tadiwahinyte, tahe tamyreny rewahinyre. Tiiboho sohojihyy weselemy roirekremy, iwese iny sohojihyy rare wesemy. 23 Jiarỹ taireny wãhãre, kai waki ahãte. Tai tahe inyboho butuhyymy rokoirekre. Wii riòbitinymyhỹrenykre. Tai bede mahãdu rierykre tadiwateònyteki. Tule wamahãdu luu tate urenana Waha, iwese waluure wese. 24 Waha, titxibo ararekre, tiiboho wawanahyymy roirekre, wamahãdumy wadee tewahinyteki. Tai tiiboho waloosònamy robikre. Kai dori bede ihokõule waluure, tahe loosòna wadee tewahinyte. 25 Waha òbiti, bede mahãdu araeryõre Jesuisi tahe araeryre. Wamahãdu tule rieryre tadiwateònyte. 26 Jiarỹ tiiboho reerynanyre ani-di. Ihãre ta arierynanykre. Tai aluuna iwese waki ratxireri wesemy taireny rarekre, tule jiarỹ taireny ararekre.
1 Jesuisi rexitòenymy rahudi tahe roirenyre taerydỹỹna mahãdu-wana Cedrõ beàwe-ribi kowa ijà-ò heka reuròrenyre, tahe bederaty oworuro-ò rirònyrenyre. 2 Judasi heka Jesuisi tyhedỹỹdu heka ibede rieryre, Jesuisi dori taerydỹỹna mahãdu-di tamy rahyymyhỹre. 3 Tahe Judasi, soldado mahãduõ tadinodu-wana ributunyre. Fariseu mahãdu-ribi xiwena wedu wahidỹỹdu-ribi Judasi soldado yrubudỹỹdu mahãdu rihitxinyre tule xiwena deòdu mahãduõ rihitxinyre tii-wana rakremy roirenyre. Tahe tamy ritehemynyrenyre tòbòra heòty-wana. 4 Jesuisi rexieryre ibutumy aõmybo tamy kodotỹỹnykre. Tahe iny mahãdu-ò rexidorunyre. Tahe rỹỹraxire tamy: —Mowe teijetenyteri. 5 Tahe dirawyònyde: —Jesuisi Nazare hãwã ludu reijereri. Tahe Jesuisi rarybere: —Jiarỹ wa tiile rare. Tahe Judasi ityhedỹỹdu tii mahãdu wanale nade. 6 Jesuisi tamyreny rarybereu, tahe rexilòhòrarienyre iribi, tahe suòle reserenyre. 7 Ixityre Jesuisi tamy rỹỹraxire: —Mowe teijeteri. 8 —Jesuisi Nazare hãwã ludu, tiiboho dirawyònyde. —Rarybera tahe jiarỹ raremy wahe. Tiwaijeteri-wana tahe biwadyke urile ixinamy waijoi rirahuke. 9 Kawesemy wahe irybe hitxina wadee tewahinyteõ heka tiu reõnonyõhyywãhãre. Jesuisi, kiamy rarybere tamyreny irybe hitxina wesemy ibutumy tuu rotỹỹnykremy. 10 Tahe Pedro tamaydese ritamy reare tahe xiwena wedu deòdu riwotõmonyre. Malòò heka inire. Pedro Malòò nohõti riorore ruruwe-ribi ludu wahe. 11 Jesuisi rarybere Pedro-ò: —Amaydese birutyke. Jiarỹ Waha deewimy aõhebo arotỹỹnykrekõ aõbo wadi tahõtinyteri. Aõhõkỹmy arotỹỹnyõkemy aõbo wadi tahõtinyteri. 12 Tahe soldadu, tadinodu-wana, judeu yrubudỹỹdu-wana Jesuisi rimyre ritaataamy ridyre. 13 Kia beòra Kaifa xiwena wedu tyhy rare. Anasi iriòre labie rare. Tai tahe juhuu Ana-ò ridyre. 14 Kaifa tahe juhuu judeu mahãdu-ò rarybere: —Wiji beòramy hãbuõ iny mahãdu òraru-ki rurukremy rahõtinyreri. 15 Simaõ Pedro inyõ-wana rare Jesuisi hewomy. Kia Pedro-wana rare, kia xiwena wedutyhy eryna rare. Tai tahe ralore òtity ijòrore-di. 16 Pedro tahe ahanakile rỹire. Kia Pedro-wana rare. Rohonyre hetowo-ribi hetoijò-di itxeredu-ò rarybere, tahe Pedro ridyre hetowo-ò. 17 Kia ijadòma, heto ijò-di itxeredu rarybere Pedro-ò: —Kai Jesuisi erydỹkỹna mahãdunokõ anobo tate. Tahe Pedro dirawyònyde: —Aõkõre. 18 Tahe soldado yrubudỹỹdu tai rahetòmy rỹimyhỹ, heto ludu deòdu mahãdu-wana txutàtà riki. Pedro iyrenykile rỹimyhỹ rahetòmy. 19 Tahe xiwena wedu tahe Jesuisi-ò rỹỹraxire. Aõhebohe aerydỹỹna mahãdu-wana tadotỹỹnymahãte. Timybohe tebedeerynymahãte. 20 Tahe Jesuisi ritỹnynyre: —Ibutumy inyko relyymahãre iwasimy aõkõ heka relyymahãre. Judeu dohodỹỹna hetokile relyymahãre Deuxu dohodỹỹna heto-wana. Titxibo judeu mahãdu ributunymyhỹremy relyywãhãre. 21 Tai aõherekibo wadeele tỹỹraxiteri. Myỹraxike wadee ijohonadu-ò. Tiiboho ka rieryrenyre aõmybo rarybere. 22 Jesuisi kia rarybereu, soldadu itxereduõ rihetenyre. Tahe rarybere: —Tu heka rybeõmyke xiwena wedutyhy-ò. 23 Jesuisi dirawyònyde: —Jiarỹ ibinamy aõmybo rarybera-wana, manarybeke tuu. Aõkõkeki, awimy rarybera-wana aõherekibo tiwahetenyte. 24 Anasi tahe Jesuisi ridykemy riteònyre tataanadihyyle Kaifa-ò, xiwena wedutyhy wahe. 25 Kowa tahe Simaõ Pedro ratximyhỹre rahetòmy rỹimyhỹ. Inyõ rỹỹraxire: —Kai aõbo ierydỹỹna mahãduõ tate. Tahe rexitxiõnyre. Jiarỹ ijõ aõkõ rare. 26 Xiwena wedu deòduõ Pedro-ò rỹỹraxire: —Tii heka Pedro ritõhõtiorore ijoiõ rare. Tahe tamy rarybere: —Umy taheka rabire tii-wana bederaty oworuro-ki atximahã-ò. 27 Pedro ixityre rexitxiõnyre. Aõwesele tahe hãnie hãbu robure. 28 Idi tahe Kaifa heto-ribi Jesuisi ridyrenyre ywisidỹỹna-ò bede dinodu heto-ò rudiulere. Tiiboho rirònyõhyyre brebuna-di rexisunyrenyheny. Rirònyrenykeki, tahe Pascoa worana bedehesi rỹsỹnaõ rirỹsỹõtyhy. Tiiboho dori rõhõtinyre rirònykeki, brebuna raremy. 29 Tahe Pilato ròhònyre tamy rarybekremy: —Tahe Jesuisimy tamy rỹỹraxire kia hãbumy terajuatenyteri aõhebohe rotỹỹnyra. 30 Tahe dirawyònyde: —Aõbibina binamy rotỹỹnykõhyyra wana inihe aridyrenyõhyyreri. 31 Tahe Pilato rirawyònyre: —Bidyke abede ywina rybe-di biywinyke. Tahe judeu mahãdu rarybere: —Wabede ywina rybe warubudỹỹmy rybe aõkõ rare. Inyõ heka arirubunyrenyõtyhy. 32 Kia rybe tahe Jesuisi rybe wesemy rare. Tii dori iximy rarybere timybo rurukremy. Tai timybo irybe hitxina wesemy raryberemy ibutumy rarekre. 33 Ixityre Pilato ralore ywisidỹỹna-ò Jesuisi-ò rỹỹraxire: —Kai aõbo judeu mahãdu Iòlò tate. 34 Jesuisi ritỹỹraxinyre: —Ỹraxina aõbo ahõrõ rare ada ijõ aõbo wamy kia rarybere. 35 Tahe Pilato rarybere: —Jiarỹ wa judeu mahãdu aõkõ wãhãre. Aõbinatyhymy aõbo he tewinyte. Judeu mahãdu wadee tiwadyte. 36 Jesuisi dirawyònyde: —Waiòlòna hãwã bede ludu aõkõ rare. Waiòlòna kaki ratxikeki wamahãdu wadee raaõbinanyke. Tai tahe judeu mahãdu-ò riwawahinykemy aõkõ watxiwãhãre. Tahe aõkõre kabede ludu aõkõ Waiòlòna rare. 37 Pilato tahe rarybere: —Kai aõbo inatyhy iòlòmy tate. Tahe Jesuisi dirawyònyde: —Kai ka wamy tarybeta. Kia-ò uludumy anade. Kia-ò anade, inatyhynamy arelyykemy. Inyõ inatyhynamy luukeki warybe-ò roholamyhỹre. 38 Tahe Pilato rỹỹraxire: —Aõbo inatyhyna rare. Ta rybe rahudi tahe judeu mahãdu-ò rarybekemy rare. Tiu kỹny kahãbu-ki aõ ibinamy tai rahaõhyyra. 39 Inyõ ariteònykemy watxireri kaiboho wadi tõhõtinyhyytenyteri ka woranabedehesi-ki. Tahe judeu Iòlò aõbohe ka ribi ariteònykre ywihyyle. 40 Tahe ixityre ibutumy ryryrenyre: —Kia hãbu aõkõre, Baraba biteònyke (Baraba heka hãbu debore wasidu rare.)
1 Idi tahe Pilato Jesuisimy rerotiyhyta-di raòhòtekremy soldado mahãdu riteranyre. 2 Soldado mahãdu edehekỹ rataanadile ira-ò ritidire, iumy tahe tylỹrehekỹ-di rityynyre iòlòtyywesekemy. 3 Tamy rehemynymyhỹre: —Aõherebo iòlòtyhy wesena, tahe rihetenyrenyre. 4 Pilato tahe ixityre ròhònymy iny-ò rarybekemy: —Ixityresỹ adeereny redyreri. Bierybenyke. Aõ heka tai ibinaõhyymy idi retehewãhãre. 5 Tahe Jesuisi ròhònyre ede rataana-di tylỹrehekỹ-di. Tahe Pilato tamy rarybere: —Kakỹnyhe tiire. 6 Tahe xiwena wedu mahãdu, yrubudỹỹdu mahãdu tuu robireu, ryryrenyre birubunybenyke, itxeò dee bitamadỹỹnyke. Pilato rarybere: —Kaibohole itxeò-di bitamadỹỹnybenyke. Jiarỹ tahe tai ibinamy aõki rahaõhyymahãre. 7 Tahe judeu mahãdu rarybere: —Jiarỹboho kỹny wabede ywina renydire. Rurukemy heka tuu bede ywina roireri, tii dori Deuxu Riòremy rexininimyhỹre. 8 Pilato kia-ò roholareu tahe, ruberutyhyre. 9 Ixityre ralore ywysidỹỹna heto-ò: —Rarybere Jesuisi-ò, tiribi wexe tanate. Jesuisi rirawyònyõhyyre. 10 Tahe Pilato rarybere: —Bidiwarawyònyõkre aõbo. Jiarỹ warurudire anarubunyke aõbo ada arateònyke aõbo. 11 Jesuisi rirawyònyre: —Aruru-di aõkõ tate. Deuxu kidiwahinykekile tahe biwateònyke ada biwarubunyke. Tai tahe adee wawahidỹỹdu aratyre iòraru dire. 12 Tai tahe Pilato iteòdỹỹmy rurure. Tahe judeu mahãdu tamy ryryre: —Kai biteònykeki tahe, Iòlò Cesar biòwa aõkõ tate. 13 Kiarybe-ò Pilato roholareu tahe, Jesuisi diòlòdỹỹnyde ahana-ò. Pilato tahe ywisidỹỹna ryna-ò rexisỹnyre. Kia ubeni heka Rirana Ijàti inire. Tahe judeu rybe-ki heka Kabata inire. 14 Pascoa worana bedehesitxu sexta feira rỹire. Txutye iòhòmy tahe bede rỹire. Tahe Pilato rarybere judeu mahãdu-ò: —Betehebenyke aiòlòreny-ò. 15 Tahe tiiboho ryryrenyre. Bidybenyke! Itxeònihikỹ-ò birubunybenyke. Pilato tahe tamy rarybere: —Aiòlò aõbo, birubunybeny. Tahe xiwena wedu rirawyònyre: —Iny iòlòreny sohojile wa rare: —Cesar heka inire. 16 Tahe Pilato Jesuisi tamyreny riwahinyre rirubunyrenykemy. 17 Tiiboho heka Jesuisi ridyrenyre. Iitxeò tamy riwahinyre idi retyykremy. Tahe Kalvariu-ò idi ridymy rare. Kalvariu heka Kòkòta inire judeu rybe-ki. 18 Tai itxeò nihikỹ dee ritamadỹỹnyre ijõ hãbu inatxiõ-wana Jesuisi itxeònihikỹ itya-ki rỹire. Hãbu wiò wiòmy idi rỹire. 19 Pilato riritinyre ritidỹỹna-ò Jesuisi tyre-ò ritidire. Kawesemy ritidỹỹna roire: —JESUISI, NAZARE HÃWÃ LUDU, JUDEU MAHÃDU IÒLÒ. 20 Hãwã-ribi ireheriòremy roire. Tai tahe sõwemy judeu mahãdu tuu robire iritidỹỹnamy. Inataõ rybemy witxira riti heka inataõmy roire. Judeu rybe ijõre, latim rybe ijõre, grego rybe ijõre. 21 Judeu xiwena wedu mahãdu Pilato-ò rarybere: —Judeu mahãdu Iòlò rarybere: —Iritidỹỹõmyke wa. Kawesemy biritinyke: —Tii rarybere judeu mahãdu Iòlò raremy. 22 Tahe Pilato dirawyònyde: —Iwese reritinyre wesemy rarehyykre. 23 Soldado Jesuisi itxeònihikỹ-ò ritamadỹỹnymy rahudi tahe, ityy ritxuatxuakremy diwyde. Inaubiòwa heka riywinyra. Wirarea riwykremy soldado mahãdu idi rỹireri. Iyhyitxena tahe iretydyna-di aõkõ rare. 24 Tahe ijõ widee rarybere: —Iyreyredỹỹrenyõmyke wa urile ta idi rikihurenykre mobo ritakremy. Kia ryberiti-ki tuhyy roire: —Watyy ritxuatxuare ijõ yre wimy riywinyrenyre. Tule wayhyitxena tyre-ki rehurenyre mobo ritakremy. Tahe iwese Tyyriti rarybere wese, soldadu mahãdu ibutumy aõhebo risỹnyre. 25 Inaubiòwa hãwyy retehemy rỹimyhỹ Jesuisi itxeònihikỹ iòhòmy. Jesuisise taseriòre-wana, Marie Madalena ijõre, Klopa hãwyy ijõre. 26 Jesuisi tadimy robireu, Joaõ, taerydỹỹna luunadu bire-ki, tahe rarybere: —Nadi beteheke wa kowa ariòre rare. 27 Tahe Joaõ-ò rarybere: —Kaa adi rare. Ierydỹỹna Joaõ tahe ridyre taheto-ò tai rasỹnykemy. 28 Jesuisi tahe rieryre ibutumy rexihuramy tahe rarybere: —Ariõkemy watxireri. Kaimy heka rarybere aõbo Ritidỹỹna-ki roire riwinykemy. 29 Tai tahe vĩĩ mona silỹnyhỹkỹ-ki raharenyre. Tahe Jesuisi-ò iwereheni wese-ò rituunymy idi riteònyre iry-ò teòdimy. 30 Jesuisi tuu riõre idi tahe rarybere: —Ibutumy Waha aõmysỹdỹỹna rexihumy roire. Tahe ròtiòròmy resere iule ta rurure. 31 Kia sabadotxu heka worana bedehesitxu nihikỹõ rare, brebuna rare. Tai tahe hãbu rubu itxeò-ki ririkõkemy tuu rarybemyhỹre. Tai Pilato-ò judeu mahãdu rexitòenyre hãbuti riòròmy riteònykemy, itxeò-ribi ritakemy. 32 Tahe soldado mahãdu hãbuti wiòle riorore. 33 Jesuisi tahe rurumy roireki iti riòròõre. 34 Soldadoõ tahe Jesuisi-ki rojyre iweki tahe hãlubule rohonyre bewana. 35 Kia tuu rabire tahe òbitimy tuu jiarỹ rarybere, Joaõ wahe. Waritidỹỹna inatyhy raremy, reeryre. Kaiboho bityhynybenykemy, adireny watxireri. 36 Kaheka ibutumy iritina hetxina tuu rarybere heka ibutumy tuu rotỹỹre. Kia wesemy roire: —Iti riòròõkre, sohoji aõkõ. 37 Ijõ iritinaõ kawesemy roire: —Rirorenykre tõnori-di idi reteherenykre tamy. 38 Jyje heka Arimatea hãwã luduõ rare. Idi tahe tii Pilato-ò rexitòenyre Jesuisi umymy rituunykremy. Tii heka Jesuisi heluduõ rare. Judeu mahãdu lau ruberumyhỹ tai Pilato-ò rare wasimy. 39 Pilato tahe awiremy rarybere. Tahe Jesuisi umy riwyre. Nikodema tule rare Jyje-wana. Tii juhule rumy Jesuisi-wana widee raryberele rare. Tii òwòrutyby òwòruòbru-wana aderòna wesemy diwyde sõwemy, 45 urihixinamy riutxienanyre. 40 Tahe Jesuisi umy tyky jurarehe-wana ritỹtenyre aderòna wanahyyle. Kawesemy dori judeu mahãdu iny rituunymyhỹre. 41 Itxeòalamana-ribi bederaty oworu iòhòmy roire. Ityi-ki tahe wabede tamyra roire. Mana hãloo rỹire tai heka moo rawabedenyõhyyre. 42 Tai tahe rawabedenyre iòhòreki, tule judeu worana bedehesina txumy roireki.
1 Semana juhu ludu txu Marie Madalena rehemynyre wabede-ò, rudile wahe. Mana ijòtòbòna iraylemy rỹiremy idi retehere. 2 Tahe raijaranyre Simaõ Pedro-ò, ijõ Jesuisi luunaduõ wahe, Joaõ-ò, jiarỹle wahe. Tahe wadeereny rarybere: —Wahĩ tahe hãlokowoku-ribi ritakarenyra. Titxibo ritidira, rekerykõre. 3 Pedro tahe ròhònyre, Joaõ-wana wabede-ò roire. 4 Wiwana raijaranyre tahe jiarỹ Pedro ratyre raijaranyre tamy. Jiarỹle heka juhu tamy rehemynyre. 5 Tahe rawebesere iwo-ò itxeremy. Irahanalemy rabire. Ta ralòõhyyre tamy. 6 Idi Pedro rehemynyre ralore tamy. Tule irahanamy robire. 7 Jesuisi rati rasirahana rihitxinymy roire ixiwanale. 8 Tahe jiarỹ juhu rehemynyre tahe Pedro hewomy ralore. Tuu robire, retyhynyre. 9 Tiiboho dori ritina rieryrenyre ihãre tahe rierytyhykõlerenyre. Jesuisi rubu-ribi rexiixixanykemy ritina roire. Tii tahe rierytyhykõlerenyre. Tahe wiji rieryrenyra. 10 Tahe ixyby raòkeserenyre inyhetoreny-ò. 11-12 Marie tahe robumy wabede-ribi iòhòmy rỹire. Rawebesere tahe wabedewo-ò itxeremy. Inatxi ỹjumy robire iwo-ki itykyuramy roimyhỹ. Ijõ heka rỹmy ronymyhỹ Jesuisi ratiherina tyre-ki. Ijõ tahe iwaherina-ki ronymyhỹ. Jesuisi umy tahe iõre. 13 Tahe ỹju Marie-ò rỹỹraxire: —Hãwyy, aõherekibo tabureri. Rirawyònyre: —Wahĩ kumy dokuri riwymy ramyhỹre. Rekerykõre titxibo ritidira. 14 Iu rarybereu tahe tahewoòle roosere. Jesuisimy robire rỹimyhỹò. Tii heka rieryõhyymyhỹ tii Jesuisi raremy. 15 Tahe Jesuisi rỹỹraxire: —Hãwyy aõmybo tabuteri, mobo teijeteri. Bederaty oworu ywidỹỹdu raremy heka tii rõhõtinyre: —Tahe dirawyònyde: —Wahĩ, kai anobo karibi tetakata-wana wakoku tuu belykyke. Tahe jikarỹ karikorykremy. 16 Tahe Jesuisi tamy ryryre: —Marie! Marie rokesemy reare riijemy: —Wahĩ, erydỹkỹdu! (Tii hebraika rybe tuu rarybere: —Raboni, wahe.) 17 Jesuisi rarybere tamy: —Waroorehedỹỹõmyke wa. Waha-ò dori raõlemy wãhãre tahe arakre. Kai tyhydỹỹdu seriòre-ò makre tamy rybemy. Jesuisi rarybere kawesemy: —Arakre inytybyreny-ò, iny Deuxureny-ò. 18 Idi tahe rarybere erydỹỹna mahãdu-ò Wanyrỹmy rabira. Marie Madalena relyyre timybo raryberamy. 19 Semana juhu ludu txuu, txioromy heka Jesuisi erydỹỹna mahãdu wii ributunymy rỹimyhỹ hetowoõ-ki. Ibutumy ijò ritòbòtòbònyra judeu mahãdu lau brebumy. Jesuisi tahe nade iyreny-ò rexitỹnynyre. Rarybere: —Ywina araykywo-ki atxikemy idi watxireri. 20 Kia rarybereu tahe tebò rurena riteòsinyre, tawerurena tule riteòsinyre tamy. Iule tahe reysarenyre Jesuisimy robireki wahe. 21 Ixyby tamy Jesuisi rarybere: —Ywina araykywo-ki rarekemy idi watxireri. Iwese Waha diwateònyde wese tule arateònykre. 22 Iu tahe ribunymy rarybere: —Deuxu Tyytybytyhy tetateri. 23 Inyòrarunaõ biixãwididỹỹnykeki tule kia òraruna ariixãwidinyke. Tule aõkõkeki, ijõ òraruna biixãwididỹỹnyõkeki, kia tule ariixãwididỹỹnyõke. 24 Tome (Inatxina iniõre) tii waòinatxi reurò mahãduõ rare, tahe tairenyõre heka Jesuisi nadeu. 25 Jesuisi erydỹỹnaõ rarybere: —Wanyrỹmy rabirenyra. Tahe Tome tamyreny rarybere: —Retyhynyõre kỹnyhe. 26 Semana sohoji bededỹỹnanamy idi rỹire, ixyby wii ributunyre Jesuisi erydỹỹna mahãdu. Iu tahe Tome tii mahãdu-wana ratximyhỹ. Ijò ritòbòtòbònymy rỹimyhỹ. Tahe Jesuisi nade iyreny-ò. Tamyreny rarybere: —Ywina-di araykywo-ki atxikemy idi watxireri. 27 Tahe Jesuisi Tome-ò rarybere: —Betehe inihe wadebòrurena-ò ebò inihe tamy biditidike. Tule wawerurena-ò ebò biditidikre. Itxiõdỹỹõmyke wa, bityhynyke. 28 Tome tai dirawyònyde: —Wanyrỹ, waDeuxu. 29 Tahe Jesuisi rarybere: —Tome, kai aõbo biwatyhynykre wamy tabiterikile. Sõwemy deysana inyõ kanakemy wãhãre tiiboho dori wamy robiõre hãrele riwatyhynyrenyre. 30 Jesuisi heka sõwemy aõwiwihikỹbo riwinyre. Ierydỹỹna mahãdu heka kia aõmybo robire. Kia aõmydỹỹnana heka ihoõre kaki iritina-ki. 31 Kaa ritidỹỹna reritinyre Jesuisi Kristumy rare. Deuxu deòdỹỹna rare. Kia bityhynybenykemy wahe, Deuxu Riòre wahe tetyhynyteri-wana tahe umytuedeõna bitakre, ini òraru-ki wahe.
1 Iribi tahe Jesuisi rexitỹnynyre Tiberiade ahohokỹ ijà-ki. Kia wesemyre heka. 2 Ibutumy heka juhu rỹimyhỹ: —Simaõ Pedro, Tome Didimo iniõre, Natanaeli. Tii Kana hãwã ludu rare, Kalileia bede-ki. Zebedeu riòreboho ijõre, inatxi Jesuisi ierydỹỹnaõ ijõre. Rarekie. 3 Tahe Simaõ Pedro rarybere tamyreny: —Rià teredỹỹmy arakre. Imahãdu rarybere: —Jiarỹboho aroirenykre ahemy. Tahe roirenyre hãwò-di. Aõhomy aõkõ ruu idireny nade. 4 Tahe bede ratỹnyrau heki Jesuisi ỹnyrakile ratximyhỹ. Ierydỹỹna mahãdu tahe rieryõhyymyhỹre. 5 Jesuisi ryryre tamyreny rỹỹraxire: —Ijoi moõ rokoreny. Utura aõbo temytenyta? Rirawyònyre: —Aõkõre wa. 6 Kaiboho biterebenyke rurunawe-ribi taita bimybenykre. Tahe riterenyre sõwemy rautxienyre irià heka ritusinyõhyymyhỹrenyre utura sõwereki. 7 Kia ierydỹỹnaõ Jesuisi luunaduõ rare jiarỹ, Joaõ wahe. Jiarỹ tahe Pedro-ò rarybere: —Inynyrỹle wa rare. Pedro Jesuisi raramy roholareu, tatyky tawetyamy ritaamy tamy resere, tade hekỹlemy rareki. Tahe resere bera-txi tamy rakremy. 8 Ijoi mahãdu rià-di narurunymy nade utura sõwereki. Tahe 100 urihixinamy ỹnyra-ribi ratximyhỹreny. 9 Ỹnyra-ò rejuxunyreu tahe, robirenyre heòtymy obiurawo-ki. Orotxu tule tai rỹire. 10 Jesuisi tamy rarybere: —Uturaõ bidiwybedenyke wiji temytenytaõ. Simaõ Pedro hãwororibile rià-di rarurunyre. Sõwemy heka tai utura nihikỹ rỹimyhỹ, 153 wahe. Ihãre tahe rià raòròõhyyre. 11 Tahe Jesuisi rarybere: —Manake hewa biroxibenyke. 12 Ibutumy ierydỹỹna mahãdu rieryre tii inynyrỹreny raremy. Tai tahe inyõ rỹỹraxiõhyyre: —Mobo tii raremy. 13 Tahe Jesuisi orotxu rimyre. Tamy riwahinyre. Ixiyrubule utura tamy riwahinyre. 14 Kia tahe ihewotyhymy Jesuisi rexideòsinyre taerydỹỹna mahãdu-ò, rubu-ribi dexixade hewomy wahe. 15 Riroximy rahudi tahe Jesuisi Pedro-ò rỹỹraxire: —Simaõ, Joaõ riòre, kahãbu mahãdu waluure. Kai tahe iratyre aõbo waluure. Tii rirawyònyre: —Kai tiwaeryte, aluure. Tahe Jesuisi rarybere: —Wabudoeni riòre bidiòwenyke. 16 Ixityre rỹỹraxire: —Simaõ, Joaõ riòre, kai aõbo waluure. Tahe Pedro rirawyònyre: —Kohe, Wanyrỹ aluure jiarỹ, tiwaeryta. Tahe Jesuisi rarybere: —Bidyke wabudoeni biòwenykemy. 17 Ihewotyhymy tahe Jesuisi rỹỹraxire: —Simaõ, Joaõ riòre, kai aõbo waluure. Iu tahe Pedro rabedewomy ronyre, ixityremy rỹỹraxireki. Tahe dirawyònyde: —Wanyrỹ, ibutumy teeryte aõna aõna. Aluure heka, tiwaeryta. Tahe Jesuisi rarybere: Wabudoeni biòwenyke. 18 Inatyhymy adee ararybekre. Iu ijoi morõkõmy tatemahãu, ixiwanale texityynymahãte ixidee wimy titxibo tamahãte. Iu tahe mamatuarinykre inywitxira aratyynykre, Ebò biteòsinykre iny arataataanykre tahe inyõ aradykre titxibo noderamy beakreò. 19 Kiamy heka Jesuisi rarybere ritỹnynykremy timybo Pedro rubu-ò rỹikremy. Tai Deuxu riwowydynykre. Idi tahe Jesuisi rarybere: —Biwaheludunyke wa. 20 Tahe Pedro retehere Joaõ Jesuisi hemy rareriò, Joaõ Jesuisi luumy raremyhỹ. Joaõ ihetxiu Jesuisi-ò iòhòmy rỹỹraxire jiarỹ wahe: —Mobo iwahisidỹỹdukremy, ihewo ludu roxina rỹireu. 21 Tahe Pedro Joaõmy robireu, rỹỹraxire Jesuisi-ò Joaõmy. Aõbo he tamy rotỹỹnykre. 22 Tahe Jesuisi rirawyònyre: —Tii rurukõlemy adòòsekemy idi watxikeki, timybo tahõtinyte. Adee tahe biwaheludunykekile awike. 23 Ierydỹỹna mahãdu rarybemy raremyhỹ: —Kiamy wahe Joaõ rurukõlemy Jesuisi rarybere. Tahe kiamy aõkõ Jesuisi rarybere. Jesuisi juhuu rarybere: —Tii rurukõòle adoosekre-wana, timybo tahõtinytenyteri. 24 Jiarỹ tahe kia aõmydỹỹnanamy relyymahãre, Joaõ wahe, reritinymahãre. Inatyhymy kia tuu rare, jiarỹ tuu relyymahãre. 25 Sõwemy aõmydỹỹnanamy tahe Jesuisi riwinyre. Inyõ ibutumy riritinykeki, iritina heka bede ritỹxinykre tyyriti sõwekre-wana.