Jate jẽ́kkaldaxa izhukkajã saldiñga gauwa guane jiṹñgulde (Génesis 1-2)

Kasak zaiguéñki Jate jẽ́kkaldaxa izhukkaki kukkagálde aldéñgaba izhukka na naldá. Ahezuañgaba ni jikka jiyagga naldakí na izhoxá. "Alnoba, kagi, kággaba gauwa gualdikue nzha," na jañguapaná. Jañguñguákna amakbé gauwá na gua.

Gauwagá noxéñgaki jikka naldakí na naldá. Kagi jiyagga naldakí, ni jiyagga naldakí, gexá jiyagga naldakíñga, mama jiyagga naldakíñga na naldá. Jikka jikka jiyagga zhekualdakíñgaba, kággaba jiyagga isʉ́ñga na naldá. Níbuni jiyagga naldakí na naldá.

Jikka naldazhé tuñguák na gauwaldixa jañguapaná. Guñgueni jañguanaldamakbé kagi gauwaldá na gua. Ni jiyagga naldakí nalgué gauwapanatshákke ni maxé na zekkuá. Ni maxé zaldatshák zʉk zaldakí na naldá. Tuañ zaldatshák ni muñshi zalda jiyagga naldakí na nalda.

Tuañ zaldé na ekí nuxa na guaxá: — Múñzeg shiguí — nuxa na guaxá.

Guaggatshákke amakbéñga muñzég na gua. Guatshákke janshibé na zekka tũwá. Guakke muñshí zalda na tuañ zalda na izhgajuekuá na gua. Ekí atshatogatshákke attiũwiñ zéxashi na atshatoxá.

Guñgueni muttiũwiñ zéxashi zeggatshák zʉná ekí nuxa na guaxá: — Ni muan gas zhigbena shiguí — na guaxá. Guaggatshákke amakbéñga ni zhigbená na gua. Amak zhigbenatshákke muanki mateldi, muanki kagizhi na izhgajuekuá. Ekí izhgajuekueni na mateldi neki alnoba axete na gua. Ekí atshatogatshigákke muttiũwiñ zéxashi na atshapaná.

Guñgueni máigldiũwi zéxashi atshatogatshák zunákke ekí na guaxa: — Níbuniki ázbuangaba akbana shiguí, Kagi zʉk shizeshi na guaxá.

Guaggatshákke amakbéñga kagi zʉk zeg na gua. Zʉk zeggatshákke janshibé na zekká tũwá. Guakna ekí nuxa na guaxá. — Kagiki saldiñga zhulda akbuna shiguí — na guaxá —. Kaldá zula zhena gualdixa, kaldi zula zhena gualdixa. Zhenaldiáuxa akbuna shiguí — ekí nuxa na guaxá.

Guaggatshákke amakbéñga munaldá na gua. Saldiñga munaldiáuxa muná na gua. Ekí munatshák janshibéñgaba na zekka tũwá.

Guñgueni makkaiwã niũwi zéxashi zeggatshák zʉna ekí nuxa na guaxá: — Mataxa zʉtualdixa gauwa axaldiyá gualdikue nzha — na guaxá.

Guaggatshákke mataxa zhinig amak jai stualdá na gua. Guakna niũwiki niũwisʉñ zʉtualdixa, saxaki sesʉñ zʉtualdixa, zumẽyaki saxa na zʉtũwi nẽyatoxaldixa nuxa na guaxá. Mitsá zeggatokka tuakualdiámak na gauwa axaldiyá na gua. Axaldiyá guatshákke janshibé zexaldixa na tũwá.

Guñgueni jatshiwã niũwi zeggatshák zʉnákke ekí nuxa na guaxá: — Nikke saldiñga aggatshé noxaldiáuxa aggatshena shiguí — na guaxá —. Mataxaki, nubá itshé noxaldiáuxa itshena shiguí — na guaxá.

Ekí guaggatshákke amak saldi zhenaldá na gua. Níbunizhi zaldakkuẽ jiyagga nuk gauwá. Nubákkuẽ jiyagga nuk gauwá. Guatshákke janshibé na zekká tũwá. Tuñguákna ekí nuxa na guaxá. Ilteshiñgaba gualdixa nuxa na guaxá.

Guñgueni tezhuwã niũwi muñzeggatshák zʉnákke ekí nuxa na guaxá. — Kagikke saldiñga saldiñga kagig zhigbekua nalda shizhekualdapaní — na guaxá.

Guaggatshákke amak zhenaldá na gua. Kagig zaldagabaki nuk gauwá. Saldiñga jikka jikka nalda, bakka, nabbikkuẽ, jikkuẽ, saldiñga nuk gauwá na gua.

Guñgueniki ekí nuxa na jañguá: "Nas gaunugáuxa neki janshibe zeggatiũwi," na jañguá. "Saldiñga alnoba, kagi, saldiñga muna gualdiáuxa, saldiñga zhe noxaldiáuxa, gaunugáuxa neki janshibé zhenatiũwi," na jañguá.

Jañguñgueni kággaba gauwaldixa jañguá. "Kaigaki kággaba gauwa gualdikue nzha. Jai kagixa jikka jikkakkuẽ numañ tualdixaki isʉ́ñga nzha. Mieldejã áxaldeg zhekualdaldixa isʉ́ñga nzha. Nas zañga ni izhokkú. Guatshák kaigaki kággaba jiyagga, kagixa izhoxaldixa jiyagga gauwa gualdikue nzha" na jañguá.

Guatshák aldéñki ezuamé nega naldatshígak maiguã na izhók. Izhoxé na ekí guaxá: — Nasʉñ kággaba ezua gauwa kuizguí. Nauwĩjana alduna áxaldeg gualdixa gauwa kuizguí. Ekíki muldetua ishkazguaggakualdiámak gauwa kuizguí — na guaxá —. Jikkakkuẽ, saldiñga, pikkáukkuẽ, jikkuẽ, nabbikkuẽ, jikkuẽ ẽjã agubiya gualdixa. Ubiya guanegaba izhoxaldixa gauwa kuizguí — na guaxá.

Ekí guaggueniki amak gauwapaná na gua. Guñgueniki kagi nãuwa guxa guñgueniki sigí tuñgatse gauwa na gua. Kagigga na sigí gauwá. Sáñkalda, gulda, janáñkalda, kalda, kasa gauwa na gua. Aggatsámak gauwatshákke alduna axaldeggagáldega na tũwá. Tuñguák zʉnákke junúkkaldak jui jui axaldeggatshákke ajanañga alduna axaldegshá na gua. Izhoxaldiáuxa alduna axaldegshá na gua. Axaldegshatshákke sigí kasak zalda izhoxaldá na gua. Aldán axezhukka na izhogapaná.

Guñgueni ai sigíki ezua kagi Edén axezhogéñka íte na gua. Saldiñga kaldi jumaldekka nixanéñka íte na gua. Guñgueni saldiñga zhena gualdiáuxa muñguapaná. Saldiñga kaldi zhulda nauxa ga guakue naldáuxa muñguapaná na gua. Kaldi ai muñguá gueniki sigí ai gauwaneg akbẽyá na gua:

—Saldiñga kaldi jai muñgua guanugáuxaki gakuegaba nzha. Janshibéñga makkaldixakkuẽ nzha. Guatshák ezuamé za na gasʉ́ñze nzha. Ai kaldi gasʉ́ñzega ga guakí maldaldiákke janshibéñga mizhoxaldixa nzha. Akze kaldi ai gasʉ́ñze jiyagga ga makkualdiák zʉnákke shã alduna migldegshaldixa nzha. Gualdini miggisaldí mashuigldá nzha. Nakna kaldi ẽga ga guabaldáldi — na akbẽyá.

Guakke: — Wa — na akiyokkuá.

Guiyaba ekí akbẽyeniki jañgualdá na gua. "Sigí jalde gaunugeki, ¿ahezua za izhoxaldixa ne?" na jañguá. "Sigí zañki muldetua agukuaggakí tiũwi" na jañguá. "Agapakualdaldixa juezháñga ni gũ. Jalde sigí aggaunexaldixa juezháñga ni gũ" na jañguá.

Jañguñguákna axaldĩyaldixa jañgualdá na gua. Guñgueni jikka gaunaldáuxa sigíg akuldák. Alnobaxa itshenaldáuxa, kagig zhenaldáuxa akuldák. Nuk akuldák tũ guatshígak sigí axazãuwakka naldakíñgaba na tũwá.

Tuñguákke munzhi aggakkauwaldixa na jañguá. "¿Mẽ agapa izhoxaldixa shi tuñkú? ¿Mẽ na shi izhoxaldixa tuñkú?" Jañguñguákna, "Sigí, aldéñ na izhoxaldixa aggakkáu gualdikue nzha." Jañguñgueni na ai sigí kabakshá guñguenikki maggi ezua agguxa. Agguxa guñguenikki ai na munzhi aggakkauwá na gua. Munzhiki Eba axeizhukka gauwá na gua. Ekí tuatshígak na sigíjã, "Aa, nají zaldáxaldaga neki nagapá noxaldixa nzha" na jañguá.

Guñgueni Jatejã ekí na kakbẽyá: — Sukkua matshuwi miñkaldexaldixa nzha. Mimitukkuakkuẽ matshuwi miñkaldeggatshigákke, aikkuẽki ezua tukkuaxa, ezua tukkuaxa aldẽyanatákkuẽ nzha — na kakbẽyá — Nubá jiyagga agubijiñga, saldiñga kaldeldi zaldakkuẽ jiyagga agubiyaminegaba mizhekuanatá nzha. Ekí nuxa miñkazãuwaldixa nzha. Mimizhaguáñ akzégaba zhekualdaldixa nzha. Guatshákke maiñga agubiya guaminegaba mizhekuanatá nzha. Matshuwi milteggatshákke ubijiñgaba guaminatá nzha — na kakbẽyá.

Guñgueni gauwatonáuxa tuatshákke janshibéñgaba zekká na tũwá. Tuatshákna zeñ na akldexá. "Nas gaunugekkuẽ janshibé zekká nakbatṹ" na jañguá.

Anuñka anuñka me atshatogatshákke alnoba jiyagga, kagi jiyagga, zhe noxaldiáuxa jiyagga gauwá na gua. Anuñkabé me gauwatogatshákke kuguã niũwi na itsexá. Itsexákna zhigsekkualdá na gua. Ekí gauwa gueni tũ guatshákke janshibé zhekualdaldixa na tũwá. Guñguenigna iyaté na gua. "Janshibé zhekualdaldiáuxa gauwá ni gukú" jañguñgueniki iyaté na gua. Iyaldagguenig na señgaba ité nuxa na noxá.

Aldán na Eba na kakbenaldámak nukka guakue nalgué nukkazhá guane jiṹñgulde (Génesis 3)

Guatshák Aldán na Eba na Edén axezhogéñka na ashekualdapaná. Jatejã jikka numañ atiũwi akuiyakshaktoxaldiámak kajañgui na exa kaiténe nalgué na exa ashekualdapaná.

Guatshákke takbiki akldé ishkué na naldá. Nalgué na attiũwiñ zeggatogguéñki jiséjã takbi aksaneg guane naldé na naldagálde axazguaxaldá na gua. Nalguákna takbijã munzhig akldukká na gua: — ¿Namak shi Jatejã kaldi saldiñga gabináldixa miñméne na? — na akldukkajá —. Kalwẽ́ jai zalda gasʉ́ñzegaba miñméne naldashá — ekí na takbijã akldukkajá.

Guñguákke munzhijã akiyṍ na gua: — Saldiñgaki gakuegaba nzha — na akbẽyá —. Kaldi ezuamé na Jatejã gasʉ́ñze zʉñméne nzha. Kaldi ai ga guakualdiákke shuizha guakualdixa. Azhi ai jugua guakualdiák jiyagga shuigakualdixa zʉñméne nzha — na guaxá.

Akbeñguákke takbijañki: — Naldagálde. Shuixabináldixa nzha — na munzhig akbẽyá —. Jate jiyagga ekíga akkué naldashá. Kaldi aide ga miñguatshák miñgakí aldéñ janáñga nuxa muldetua "jaldeki shane, jaldeki jánshizhe shakldá" mijañgualdiámak — munzhig ekí na naldagálde akbẽyá.

Ekí akbẽyatshákke munzhijã ai kaldi tũ guatshákke aklduná na gua. "Ẽ ga gualdatshákke saldiñga netshi Jate jana alduna jañgualdikue nzha" — akldegguákke ai akwatti ga.

Guñgueni ají sigíg jiyagga nãuwa akkã́u na gua. Ai axañgueni atṹ akuatshákke tubá aggatse na atũwá. Atuatshákke jiwak kakzexákna kalkẽ́ nuxa iyawatti izhigbá na akuá.

Aildiṹwañga niũwi maldá zeggatshigákke saldiñga netshi Jate naggaté aldukkajákke saldi iyaldakuí na gua, shã axajanashane katũwiñguakuak. Guñguákna Jatejã sigí ixauldá na gua: — ¿Mani shi mizhekuá? — na axaldexá. Ixauldatshákke akiyṍ na gua: — Jexaga ni izhokkú — na akbẽyá — Naggaté maldukkakuákna nakuikuá. Tubá naggatse atuñkuákna mizhakuí na gukuá — na akbẽyá.

Gunguákke Jatejã ekí na akbẽyá: — ¿Mẽjañki "tubá miñgatse nzha" shi miñmẽyá? Miñmẽyákshi amak jiwak migzeggatók. Kaldi gabaldáldi migbénuge naldé jiyagga ga makkué nukkabaldá — na akbẽyá.

Guñguákke ekí na akbẽyá: — Munzhi naggémaldejã nakkã́u guñguákke ga guanuge nzha — na akiyokkuá.

Guñguákke Jatejã munzhig akldukká na gua: — ¿Jinak ekí atshámalde ne? — na akldukkajá.

Guñguákke akiyṍ na gua: — Takbi naldagálde zukkuakkájã "ga makkualdi" nakbẽyákke amak ga guanuge nzha — na akbẽyá.

Guñguákke Jatejã takbig ekí na guiyaba akbẽyá: — Kaiga zhinikki kagig jilbeni nẽyaté maldoná nzha, naldagálde neg makkuxá shaldá — na axaldexá — Munzhitshi atukkua jiyagga sáñkaldak mitani nẽyaté noná nzha. Guatshák ma zhinig jiyagga ají kasa gajĩ nẽyaté maldoná nzha — nuxa na axaldexá.

Guatshákke ezuajã takbi sáñkaldak itanká jana atshákke ekí guashi. Ezua munzhitshi atukkuajã naggatshák jiyagga aijañki jiség agubiya gualdixa guashi na eki akbeyá.

Takbi jiyagga kasa zaté noxaldixa akbẽyatshákke ekí guashi. Jiséja jiyagga ai munzhitshi atukkua aggisalshaldixa guashi na ekí akbẽyá.

Guñgueni munzhijã jiséjã akbéne naldé nukka guane naldé shalda na Jatejã ekí axaldexá: — Mañki jiséjã mixaldéglde nukka makkuxa shalda na somá mabushi mixaldeggaté noná nzha — na axaldexá —. Misewá za míxaldeg mizhoxaldixa nzha. Mijí sáñkalda jana migsáneg guxa nuxa mizhoxaldixa nzha — na munzhig akbẽyá.

Guñguenig sigíg ekí na guiyaba akbẽyá: —Ma jiyagga miggatsáñga nzha. Ma jiyagga munzhi axaldukka kalwẽ́ ga guamalde nakna kaiga zhinikki jibañ akzaldi ishkibuñguaté maldoxaldixa nzha. Jikka nixa guamaldáuxa kausúbaldagaba ishkibuñguaté maldoxaldixa nzha — na akbẽyá —. Kagiga nuxa mazhigwashekkuánuge nakna mokue kagiga maldexaldixa nzha. Shuizha makkualdiák kagiga maldexaldixa nzha — na akbẽyá.

Gueni béyakzetshi kuizhu na zhakuá kaggakkauwá guñgueniki kaggé na gua. Munzhitshi na, sigítshi na izhajualdiyaldixa na kaggé na gua. Guñgueni ekí na guaxá: — Kaiga zʉná kággaba nasʉñ nauwĩjana aggatség ni gũ. Ekí guakna kaiga zhinikki nauwĩjana "jaldeki shane shakldá, jaldeki jánshizhe shakldá" jañguapanaldixa, Ekí jañgualdiákke amak shane nuxa izhogapanaldixa ne tiũwi. Guatshák ezua axautshi kaldi jai muñguanuge nalgué, ai kaldi shuixabálde maizhokshakue nalgué, aiki ga gualdiák ekí shuigazhíta shane nuxaga izhoxaldixaga ne tiũwi. Gasha gualdikuákke shuixa naldakí. Nakna amak gasha guazháldikue nzha — na guaxá.

Guñguákna kággaba ai zhinig neñshá na gua, ai kaldi gajiñguakuak. Guñgueniki ají dulda uldeñkakkuẽ mozhua Edén juldunéñka mashá na gua. Ekíki kággaba mokue kaldi jánshizhe nogéñ julduniñguakuak na mashá.