Enlhit nic nat intomjaclhac Dios Appayvam
1 Apnec nic nat siclhoc anco apvisay Appayvam. Apnec nic nat apnaclha Dios Ingyapam apvisay Appayvam. Apnoc nic nat poc apvisay Appayvam najan Dios Ingyapam. 2 Apnec nic nat siclhoc anco apnaclha Dios Inyapam. 3 Apquillanac nic nat Dios Ingyapam aclhamoclhojo asoc, ayinyema apquillanescama apvisay Appayvam. Am nic nat collanalhcac lhama asoc mepqui apvisay Appayvam. 4 Acyimnatem apnenyic nic nat innac maa. Ayinyema ilhnic nat acyimnatem ingnenyaoc. Eyca as acyimnatem apnenyic apquilsascasquic alhta olhma enlhitaoc. 5 Apquilsascasquic alhta olhma naysicsa yatescamalhma. Am alhta covanac yatescamalhma cosponsic ayitsayolhma. 6 Apvaac alhta enlhit apvisay Juan. Dios Ingyapam alhta apcapajascama. 7 Apvaac alhta aptomja apvitaycamco, yoyam elngacsic acvisay ayitsayolhma. Apquiltamjoc alhta yoyam eltimjic melyasquiyam enlhitaoc actemaclha aplhanma. 8 Jave alhta apquilsasquiscama olhma apanco Juan. Apvamlha aptomja apvitaycamco, yoyam elngacsic acvisay ayitsayolhma. 9 Apquilhyacme aptomja apquilsasquiscama olhma aptomja nasoc anco. Apquilsascasquic alhta olhma aplhamoclhojo enlhit. 10 Apnec alhta as nalhpop apvisay Appayvam. Dios Ingyapam nic nat apquillanay as nalhpop, ayinyema apquillanescama apvisay Appayvam. Am alhta eyicpilcacpoc nipyesicsa enlhitaoc as nalhpop. 11 Apvaac alhta as nalhpop actomja apanco. Am alhta emacpoc tacja nipyesicsa apnaymacoc. 12 Apquilmec alhta tacja moclhama enlhit aptomja melyasquiyam. Apquilasinaquic alhta eltimjic Dios apquitquic. 13 Jave apquiltamongvoyam apanco. Jave appaliyam ayinyema enlhit. Jave najan enlhit ayinyema apquiltimesquiscama. Dios Ingyapam eyca apquiltimesquiscama apquitquic. 14 Enlhit apanco alhta aptomjaclhac apvisay Appayvam. Apnactac alhta ningyesicsa. Ningvitac alhta gloria aptamila apanco. Eycaso actomja gloria aptamila apanco Ingyapam Apquitca apvamlha pac lhama, am colhno moc gloria actamila anco. Inlanoc alhta apvalhoc singamliyam najan aptomja nasoc anco. 15 Aplingasquic alhta Juan aplhena apvisay. Apyimnatasquic alhta appayvam: —Eyca as enlhit siclhena alhta, yoyam elhingmac netamin coo. Aptomja apyimtalhnamo, am olhnoc coo. Aptiyasam nic alhta apmamyi motyaycamlha coo. 16 Ningillhovamquic ninlhamoclhojo singaycaoc, cotlaycaoc singaycaoc. Ayinyemaclha acyitnamaclha cotlaycaoc asoc. 17 Singanamaclha ayinyema ilhnic nat Moisés. Eyca singaycaoc najan amyaa actamila ayinyema Jesucristo. 18 Am nic nat etamacpoc Dios Ingyapam acvocmo ningvamlha nac jay. Apvamlha pac lhama Apquitca aptomja apyipitcayo Apyap, aptomja singillhicmoscama aptemaclha apanco Dios Ingyapam —alhta aptomjac Juan.
Aplingascama Juan apvisay Jesucristo
19 Eycaso actomja alhta Juan aplingascama amyaa. Apnam alhta judíos tingma Jerusalén. Apquilapajasquic alhta sacerdotes najan levitas apnaclha Juan. Apquiltomjac alhta apquilanya: —¿Soc enlhit lhip qui? —alhta apquiltomjac. 20 Appeyvasoc alhta aplhanma. Apcatingmavoc alhta Juan: —Jave coo Cristo —alhta aptomjac. 21 Apquiltomjac alhta mocjam apquilanya: —¿Soc enlhit lhip qui? ¿Naso ya lhquip Elías profeta Dios aplingascama? —alhta apquiltomjac. Apcatingmavoc alhta Juan: —Jave coo —alhta aptomjac. Natamin apquililmalhnaclho alhta mocjam: —¿Naso ya lhquip profeta aplhenamap yoyam eva? —alhta apquiltomjac. Apcatingmavoc alhta: —Jave coo —alhta aptomjac. 22 Apquiltomjac alhta mocjam apquilanya: —¿Soc enlhit lhip qui? Ningilanyalhquic lhac ongiltimnasquiclha apquiltomja singilapajascama. ¿Jalhco sat etnejic elhenacpojo apanco lhip? —alhta apquiltomjac. 23 Apcatingmavoc alhta Juan: —Aplhanma ilhnic nat Isaías profeta Dios aplingascama: Coo nac enlhit appameteycam aptomja apquilpalhamaycam yoclhilhma actamopeycaoc: “Ellanesquis amay, yoyam eyacsic Visqui ingac” —nic nat intomjac appayvam. 24 Fariseos alhta apquilapajascama enlhit, yoyam elpamejitsic Juan. 25 Apquiltomjac alhta apquilanya Juan: —¿Soctomja apyapascasamco nac lhip yingmin? Jave nac lhip Cristo, jave najan Elías, jave najan profeta aplhenamap —alhta apquiltomjac. 26 Apcatingmavoc alhta Juan: —Acyapascasamqui inyicje yingmin enlhitaoc. Apne inyicje lhama nipyesicsa quellhip. Am eyca elyicpilcac mocjam quellhip. 27 Eyca as enlhit aptomja aplhingayam netamin coo. Aptiyasam nic alhta apmamyi. Acyaponcanalhquic ollicsic alhataoc tiyayipeoc apác —alhta aptomjac. 28 Eycaso actomjaclha alhta amyaa yoclhilhma Betábara, tap vatsam Jordán actiyapmaclha acnim. Apyapascasamquic alhta yingmin enlhitaoc Juan maa.
Nipquesic apquitcoc apquinyema Dios Ingyapam
29 Moc acnim alhta intomjac. Apvitac alhta Juan aplhingacmo Jesús. Aptomjac alhta Juan apquilanya enlhitaoc: —Quip elanojo. Aptomja sat apmascoscama melyascalhma enlhit lhalhma anco, malha nipquesic apquitcoc apquilmesomap enlhitaoc. Eyca as aptomja nipquesic apquitcoc Dios apmescama. 30 Eycaso siclhena alhta: “Elhingmac sat lhama enlhit netamin coo. Aptiyasam nic alhta apmamyi. Aptomja apyimtalhnamo molhno coo”. 31 Am alhta oyicpilcac coo lha. Acyapascasamquic yingmin enlhitaoc, yoyam etacpoc Cristo nipyesicsa enlhitaoc Israel —alhta aptomjac. 32 Aplingasquic alhta mocjam Juan: —Acvitac alhta Espíritu Santo apquinyema netin. Malha valhaay alhta intomjac apvayventamo tacjaplhit Jesús. 33 Am alhta oyicpilcac siclho coo. Eyasinaquic alhta Dios Ingyapam oyapasquisamcoc yingmin enlhitaoc. Aptomjac alhta seyanya aptomja seyapajascama: “Apvitac sat ancoc lhip Espíritu Santo apvayventamo tacjaplhit lhama enlhit, eyca as aptomja yoyam eyapasquisamcoc Espíritu Santo”. 34 Acvitac alhta coo. Aclingasquic coo apvisay aptomja Dios Apquitca —alhta aptomjac.
Jesús apquiltamsoycaoc siclhoc anco
35 Moc acnim alhta intomjac. Apnec alhta mocjam Juan maa najan apcanit apquillhalhmaa. 36 Apvitac alhta Juan aplhingacmo Jesús. Aptomjac alhta Juan apquilanya enlhitaoc: —Quip elanojo Nipquesic apquitcoc apquinyema Dios Ingyapam —alhta aptomjac. 37 Apquillingac alhta apquillhalhmaa Juan appayvam. Apquilyiplaclhec alhta Jesús. 38 Yejemoc alhta appaycacpo Jesús. Apvitac alhta apquilyiplacmo. Aptomjac alhta apquilanya: —¿Soc apquiltingyamco yi? —alhta aptomjac. Apquilatingmavoc alhta: —Singillhicmoscama, ¿jalhco acpayjo apmaclha? —alhta apquiltomjac. 39 Aptomjac alhta Jesús apquilanya: —Noc, eltiyaningvomjo —alhta aptomjac. Apquilyiplaclhec alhta. Apquilvitac alhta apmaclha. Apquilnacmec alhta lhama, ayinyemaclha malha las cuatro alhta intomjac. 40 Apcanit enlhit alhta apquillinga Juan appayvam. Apquilyiplaclhec alhta Jesús. Lhama alhta apvisay Andrés, Simón Pedro apipma. 41 Lhama alhta apvita apyalhing. Aptomjac alhta Andrés apcanya apyalhing: —Ningvitac nincoo Mesías —alhta aptomjac. Actemaclha judíos apquiltimem. Ningiltimem nincoo Cristo. 42 Yejemoc alhta apyantamaclho Andrés apyalhing apnaclha Jesús. Apquilanoc alhta Jesús, aptomja apcanya: —Lhip nac Simón, Jonás apquitca. Iltamjacpoc sat apvisay Cefas, apquiltimem Pedro, ningiltimem nincoo mataymong —alhta aptomjac.
Jesús apquevoycam Felipe najan Natanael
43 Moc acnim alhta intomjac. Apquiltamjoc alhta Jesús emyaclhac yoclhilhma Galilea. Aptajanyavoc alhta Felipe. Aptomjac alhta apcanya: —Jeyiplaclha sat —alhta aptomjac. 44 Co Betsaida alhta Felipe, tingma pac Andrés najan Pedro. 45 Yejemoc alhta apquitama Felipe Natanael. Aptomjac alhta apcanya: —Ningvitac lhac nincoo enlhit aplhanma ilhnic nat Moisés singanamaclha actalhesomalhca. Najan apquillhanma ilhnic nat apnatalhescama profetas Dios apquillingascama. Apvisay Jesús, José apquitca, tingma pac Nazaret —alhta aptomjac. 46 Apcatingmavoc alhta Natanael: —¿Avanqui ya cotyapoc asoc actamila Nazaret nac maa? —alhta aptomjac. Apcatingmavoc alhta Felipe: —Quip ityaningvomjo —alhta aptomjac. 47 Lhama alhta apvita Jesús aplhingacmo Natanael. Aptomjac alhta apcanya: —Quip elanojo, aplhingacmo nac maa israelita apanco mepqui apyinimseycam —alhta aptomjac. 48 Aptomjac alhta Natanael: —¿Jalhco setayaclha seyicpilco nac? —alhta aptomjac. Apcatingmavoc alhta Jesús: —Acvitac lhac lhip coning higo yamit yicpintama apquevoycam Felipe —alhta aptomjac. 49 Aptomjac alhta mocjam Natanael: —Singillhicmoscama, lhip nac aptomja Dios Apquitca. Lhip aptomja enlhitaoc Israel Apvisqui apancaoc —alhta aptomjac. 50 Apcatingmavoc alhta Jesús: —¿Am ya lhquip eyascacmoc ayinyema siclhena lhac: Sicvita lhac apna lhip coning higo yamit? Etac sat lhip asoc alyiviy, colhno aso —alhta aptomjac. 51 Aptomjac alhta mocjam Jesús: —Actomjac coo silanya quellhip: Naso, elvitangvomoc sat quellhip acyaptomalhca netin. Elvitangvomoc sat quellhip Dios ángeles apancaoc. Elmiyaclhac sat mataa netin najan elvayventac sat nalhpop tecjelhit sicvisay Sictiyam Sictomja Enlhit —alhta aptomjac.
Alyimjapma tingma Caná yoclhilhma Galilea
1 Natqui acnim alhta intomjac. Alyimjapma alhta intomjac tingma Caná yoclhilhma Galilea. Innec alhta Jesús inquin maa. 2 Apcanyacpec alhta Jesús najan apquiltamsoycaoc eltasomoc alyimjapma ato. 3 Inquilyamasalhquic alhta uva yingmenic. Intomjac alhta inquin ayanya Jesús: —Inquilyamasalhquic lhac uva yingmenic —alhta intomjac. 4 Apcatingmavoc alhta Jesús: —Meme, ¿soctomja actomja nac seyanya coo? Am covocmoc mocjam acnim sictamjaycamcaclha —alhta aptomjac. 5 Intomjac alhta inquin alanya apquilancam: —Elyejiclhojo sat Jesús apquilanem ellanac asoc —alhta intomjac. 6 Apnamquic alhta maa seis yatingvalhva. Apquiltemaclha alhta judíos yoyam elcamco yingmin actemaclha comasis apyimpeoc. Malha cien litros alhta innamcoc yingmin apvalhoc moclhama yatingvalhva. 7 Aptomjac alhta Jesús apquilanya apquilancam: —Ellanamcojo sat yingmin yatingvalhva nac maa —alhta aptomjac. Apquillanamcoc alhta yatingvalhva. 8 Aptomjac alhta mocjam Jesús: —Elyavó siclho. Elsaclhes sat apquimja apmamyi caya —alhta aptomjac. Apquilsaclhesquic alhta. 9 Yejemoc alhta apyipcona yingmin quilhvo actomjayclha uva yingmenic apquimja apmamyi caya. Am alhta eyasamcoc ayinyemaclha uva yingmenic. Apquilvamlha apquilyasamcoc apquilancam apquilyajayam. Yejemoc alhta apquevamcaa apquimja apmamyi quilhva alyimjapma. 10 Aptomjac alhta apquimja apmamyi caya: —Amamyi anco inyicje ningilyatimcascaoc mataa actamila uva yingmenic. Avanjec sat ancoc apyinaycaoc uva yingmenic, ongilyatimsic sat mocjam yamactamila. Apmiyovquic inyicje lhip actamila uva yingmenic —alhta aptomjac. 11 Siclhoc anco alhta aptomjac Jesús aptamjaycam sinpilapquiscama tingma Caná yoclhilhma Galilea. Aplhicmosquic alhta Jesús actemaclha gloria mayayo apanco. Am alhta elyascacmoc apquiltamsoycaoc aptomja Cristo. 12 Natamin alhta apmiyaclho Jesús tingma Capernaum. Inquin alhta aplhalhma najan apquilyalhinga najan apquiltamsoycaoc. Malha anit acnim alhta intomjac apnaycam maa.
Jesús apcalhnascama tingma apponquinomap
13 Camquitvocmec alhta pascua judíos caya apancaoc. Apmiyaclhec alhta Jesús tingma Jerusalén. 14 Apvitac alhta congne tingma apponquinomap enlhitaoc apquilhacjam vayqui najan nipquesic najan yamvalhaay. Apnam alhta najan apquilyanmonquiscama moc solyayem. 15 Lhama alhta apvita Jesús. Apquillanac alhta navá quilyicpilhquitma vayqui ayimpejic. Yejemoc alhta apquilantipsa tingma apponquinomap aplhamoclhojo najan nipquesic najan vayqui. Apquilhacasquic alhta solyayem apancaoc aptomja apquilyanmonquiscama moc solyayem. Apquilyaninsamquic alhta mesa apancaoc. 16 Aptomjac alhta Jesús apquilanya aptomja apquilhacjam yamvalhaay: —Elsaclha mocjay asoc apancaoc. Noeltimesquis nasa alyanmomalhquilha coo Tata tingma pac —alhta aptomjac. 17 Apquilyasingvoclhec alhta apquiltamsoycaoc aclhanma ilhnic nat actalhesomalhca: “Masquec sicyimnaa aclheneycam evalhoc Tata tingma pac” —nic nat intomjac vaycajac. 18 Apquilatingmavoc alhta judíos. Apquiltomjac alhta apquilanya Jesús: —¿Soc ayanem lhip ellanac as asoc? ¿Jalhco actema asoc monquinatquiscama pa jinlhicmocsic? —alhta apquiltomjac. 19 Apcatingmavoc alhta Jesús: —Elnatovas sat as tingma apponquinomap. Natqui acnim sat otnescasiclha mocjam apjalhnancoc —alhta aptomjac. 20 Apquiltomjac alhta judíos apquilanya Jesús: —Cuarenta y seis años nic nat apquillanomap as tingma apponquinomap. ¿Natqui acnim ya pa etnescasiclha lhip apjalhnancoc as tingma apponquinomap? —alhta apquiltomjac. 21 Apyovoclhojo apanco alhta aplhenac Jesús, apyitsacpo tingma apponquinomap. 22 Natamin aplhaticjangviyam alhta Jesús nipyesicsa apquilmasquingvaycmo apquilyasingvayclho actemaclha aplhanma Jesús. Am alhta elyascacmoc apquiltamsoycaoc actemaclha actalhesomalhca vaycajac najan Jesús appayvam aplhena nac lha.
Apyicpilquemo Jesús aplhamoclhojo enlhit
23 Lhama alhta apna Jesús tingma Jerusalén. Caya alhta intomjac apquiltimem pascua. Apquilvitac alhta aptamjaycam sinpilapquiscama. Am alhta elyascacmoc apvisay Jesús aplhamoclhojo enlhit. 24 Am alhta coyacmoc apvalhoc Jesús yoyam epalhavomoc. Ayinyemaclha apyicpilcoc aplhamoclhojo enlhit. 25 Coymalhquejec alhta Jesús colhic altimnasa actemaclha apvalhoc enlhit. Ayinyemaclha apyicpilcoc Jesús actemaclha apvalhoc moclhama enlhit.
Jesús najan Nicodemo
1 Apnec alhta lhama fariseo apvisay Nicodemo. Aptomja alhta lhama nipyesicsa apquilimja apmamyi judíos. 2 Alhtaa alhta intomjac apmiyacmo apnaclha Jesús. Aptomjac alhta Nicodemo: —Singillhicmoscama, ningyasamcoc nincoo. Dios Ingyapam aptomja apcapajascama lhip, yoyam jingillhicmocsic nincoo. Apvanquic lhip ellanac aptamjaycam sinpilapquiscama. Copvanqueje eyca poc enlhit elhnasojoc actemaclha lhip aptamjaycam mepqui aplhalhma Dios Ingyapam —alhta aptomjac. 3 Apcatingmavoc alhta Jesús: —Actomjac coo siyanya lhip: “Naso, am sat ancoc etyacmoc mocjam enlhit ayinyema Dios Ingyapam, metangvomejec sat Dios apquilnancascama” —alhta aptomjac. 4 Aptomjac alhta mocjam Nicodemo: —¿Apvanqui ya enlhit apvanyam etyamoc mocjam? Copvanqueje inyicje etalhniclhac mocjam avalhoc inquin, yoyam etyimiclhac mocjam —alhta aptomjac. 5 Apcatingmavoc alhta Jesús: —Actomjac coo siyanya lhip: “Naso, am sat ancoc etyacmoc mocjam enlhit ayinyema yingmin najan Espíritu Santo, metangvomejec sat Dios apquilnancascama. 6 Acno lhama apitic incanayc najan ayitquic. Acno lhama ingjangaoc najan ayitquic. Acno lhama Espíritu najan ayitquic. 7 Nocotlapquis nasa aplinga sicpayvam siyanya lhip: “Incaymalhquic quellhip etyamoc mocjam apjalhnancoc. 8 Inquilhcajacme anco lhcajayam. Aplinga inyicje lhip ayilhtingyovam. Am eyca eyasamcoc ayinyemaclha, am najan eyasamcoc acyasaclha. Eycaso acno enlhit aptimesomap apjalhnancoc ayinyema Espíritu Santo” —alhta aptomjac. 9 Apquilmalhnaquic alhta mocjam Nicodemo, aptomja apcanya: —¿Jalhco sat cotnejic as asoc? —alhta aptomjac. 10 Apcatingmavoc alhta Jesús: —Lhip inyicje aptomja apquillhicmoscama nipyesicsa enlhitaoc Israel. ¿Am ya lhquip eyasamcoc as asoc? 11 Actomjac coo siyanya lhip: Naso, ninlhenquic mataa asoc ningyascamco. Ninlingasquic mataa acvisay asoc ningvitay. Am eyca colmac apquilvalhoc quellhip amyaa ninlingascama. 12 Altimnasquic lhac inyicje asoc as nalhpop. Apquilyascacme eyca quellhip. Altimnasquic sat ancoc asoc alinyema netin, ¿melyascameje ya sat quellhip? —alhta aptomjac. 13 ‘Aptomjac alhta mocjam: Paj mocjam lhama enlhit apvaycmo netin. Apvamlha pac apvaycmo maa aptomja apvayveyquinta as nalhpop. Apmaclha maa netin apvisay Aptiyam Aptomja Enlhit. 14 Apmiyaseclhec nic nat netin nimisma yoclhilhma actamopeycaoc Moisés. Sat cotnejic colhic acyaseclho netin apvisay Aptiyam Aptomja Enlhit. 15 Moclhama aptomja meyasquiyam apvisay apanco metvasacpejec sat. Colhic sat acyimnatem apnenyaoc cotmongvoycamlha nelha —alhta aptomja Jesús. 16 Aptomjac alhta Jesús: Dios Ingyapam apquilasicjayo enlhit lhalhma anco ‘Avanjec anco acliclamo apvalhoc Dios enlhit lhalhma anco. Apcapajasquic alhta Apquitca apvamlha pac lhama, yoyam metvasacpejec sat moclhama aptomja melyasquiyam Apquitca. Colhic sat acyimnatem apnenyaoc cotmongvoycamlha nelha. 17 Apcapajasquic alhta Dios Ingyapam Apquitca as nalhpop. Am eltamjoc eyanmongsiclha apquiltemaclha enlhit lhalhma anco. Apquiltemoc elvomsic tap enlhit lhalhma anco. 18 ‘Metvasacpejec sat enlhit aptomja meyasquiyam Dios Apquitca. Aptovasacpe nac enlhit aptomja apyasquiyam Dios Apquitca. Ayinyemaclha apyascacmec apvisay Dios Ingyapam Apquitca aptomja apvamlha pac lhama. 19 Invaac ayitsayolhma nipyesicsa enlhit lhalhma anco. Ayinyemaclha apquilasicjavoc yatescamalhma, colhno ayitsayolhma. Ayinyemaclha apquilyiplovcasquic asoc almasomcaa. 20 Apquiltanovquic ayitsayolhma enlhit apquiltomja apquilyiplovquiscama asoc almasomcaa. Am elyoctac ayitsayolhma. Apquililtamjoc am colvitalhca apquiltemaclha apancaoc. 21 Apquilyoctac mataa ayitsayolhma enlhit apquiltomja apquilyiplovquiscama actomja nasoc anco. Apquililtamjoc yoyam colvitalhca apquiltemaclha altamila ayinyema Dios Ingyapam —alhta aptomjac.
Juan aplhenayclha apvisay Jesús
22 Natamin alhta as asoc aplhinga Jesús najan apquiltamsoycaoc. Apquilmiyaclhec alhta yoclhilhma Judea. Apnacmec alhta lhama apquiltamsoycaoc. Apyapascasamquic alhta yingmin enlhitaoc. 23 Juan alhta najan apquilyapascasamco yingmin tingma Enón, ayamquitilha tingma Salim. Ayinyemaclha avanjec alhta yingmin maa. Apquilvaac alhta enlhitaoc. Innec alhta acyapascasamco yingmin. 24 Am alhta covocmoc, yoyam colhic acnescacmo singilpilhtetomaclha Juan. 25 Apquilatingmacpec alhta judíos Juan apquillhalhmaa. Apquillhenquic alhta actemaclha ninliclama comasis ingyimpejic. 26 Yejemoc alhta apquilyoctamo apnaclha Juan. Apquiltomjac alhta apquilanya: —Singillhicmoscama, quip ilanojo enlhit aplhalhma alhta lhip tap vatsam Jordán. Singiltimnasa alhta lhip apvisay Jesús. Quilhvoc aptomja apquilyapascaseycaoc yingmin enlhitaoc. Apquilyacmec aplhamoclhojo enlhitaoc maa —alhta apquiltomjac. 27 Apcatingmavoc alhta Juan: —Mongvanquejec ongmoc inganco lhama asoc. Acvamlha anco aptomja singilmescama Dios Ingyapam. 28 Apquillingac alhta quellhip siltimnascama sicvisay: Jave coo Cristo. Coo eyca sictomja siyapajasomalhca emamyi. 29 Enlhit acma apponcanma apvisay quilhva alyimjapma. Coo eyca aptimem poc quilhva alyimjapma. Siyinmaycamo lhama nac, acjalhnoc najan appayvam, payjeclhec najan evalhoc. Eycaso invocmec acpayjayclha evalhoc. 30 Incaymalhquic coyangvomoc apyimtalhnamo Cristo. Coo eyca comascoc sat sicyimtalhnamo —alhta aptomjac Juan.
Enlhit apquinyema netin
31 Aptomja eyca apyimtalhnamo apquinyema netin. Eyca aptomjaclhec coning aptomja apquinyema nalhpop. Aplhenquic mataa asoc as nalhpop. Aptomja eyca apyimtalhnamo apquinyema netin. 32 Aplingasquic mataa asoc apvitay najan aplingay alhta. Apquilyascacmec mataa enlhitaoc actomjaclha appayvam. 33 Am sat anco ongilyascacmoc nincoo appayvam aplhanma, ontimjic sat ninpeyvescasquiclha actomja nasoc anco actemaclha aplhanma Dios Ingyapam. 34 Enlhit apcapajasomap apquinyema Dios Ingyapam apquiltimnam mataa Dios appayvam. Ingmesquic nincoo Dios Ingyapam Espíritu Santo cotlaycaoc, mepqui apquilyipsateycaoc. 35 Apcasicjavoc mataa Ingyapam Apquitca. Apmescama apmopvan Apquitca, yoyam eltamilsic aclhamoclhojo asoc apancaoc. 36 Am sat ancoc ongilyascacmoc Apquitca, colhic sat acyimnatem ingnenyaoc cotmongvoycamlha nelha. Am sat ancoc ongilyajaclhoc Apquitca, mongvityejec sat acyimnatem ingnenyaoc. Yimtilhec sat cotnejic acyanmongayclha ayinyema Dios Ingyapam.
Jesús najan quilvana co Samaria
1 Apquilyasingvocmec alhta fariseos actemaclha Jesús aplhamasayclha apquillhalhmaa melhno Juan. Najan apquilyapascascaoc yingmin aplhamoclhojo enlhit melhno Juan. 2 Am alhta elyapascasamcoc yingmin enlhitaoc Jesús. Apquiltamsoycaoc alhta eyca apquilyapascasamcoc yingmin enlhitaoc. 3 Lhama alhta aplingangvocmo amyaa Jesús. Yejemoc alhta aplhinga Jesús. Apyamyaclhec alhta yoclhilhma Judea. Apmiyaclhec alhta mocjam yoclhilhma Galilea. 4 Incaymalhquic alhta Jesús epeyvojo, yoyam eyeycajangvoclha yoclhilhma Samaria. 5 Apvoclhec alhta Jesús tingma Sicar yoclhilhma Samaria. Ningatoc maa apquilcacjam pac nic nat José. Apyap Jacob nic nat apmesayclha. 6 Yitnec yamilquit Jesús. Apyampavoc alhta aplhingam. Apnacmec alhta nicja yamilquit. Ingyitsicso acnim alhta intomjac. 7 Yejemoc alhta acvactamo lhama quilvana co Samaria acyajayam. Aptomjac alhta apcanya Jesús: —Jeyacves sat coo lha yingmin —alhta aptomjac. 8 Tingma alhta apquilyasac apquiltamsoycaoc, yoyam elmoc aptoycaoc. 9 Incatingmavoc alhta quilvana co Samaria: —¿Soctomja selmalhna nac yingmin? Co Judea nac lhip, co Samaria nac coo —alhta intomjac. Eycaso aclhanma alhta, ayinyemaclha am alhta elpasmac mataa lhama asoc co Judea najan co Samaria. 10 Apcatingmavoc alhta Jesús: —¿Inyasamco ya lhca Dios Ingyapam apcaycaoc? ¿Jeyicpilco ya coo siyanya lhac jeyacvesic yingmin? Ayanayc coo am jeyicpilcac lhiya. Jeyicpilcoc sat ancoc lhiya, quilhvoc sat jeyanic, yoyam omquesic lhiya yingmin actemaclha mongitsepma —alhta aptomjac. 11 Intomjac alhta ayanya quilvana: —Visqui, paj nac lhip apyacvom yingmin. Congnoc as yamilquit. ¿Jalhco lha acyitnaclha yingmin actemaclha mongitsepma aplhena lhac lhip? 12 Ningilyeyjamcaa Jacob singmescama ilhnic nat as yamilquit. Apyamquic nic nat as yingmin, najan apquitquic najan apnatoscama. ¿Apyimtalhnamo ya lhquip melhno ningilyeyjamcaa Jacob? —alhta intomjac. 13 Apcatingmavoc alhta Jesús: —Jingajiclhac sat mocjam acnim ningiltomja ningyam as yingmin. 14 Mejingajiclhejec sat mataa acnim ningiltomja ningyam yingmin ayinyema sicmescama coo. Eycaso yingmin sicmescama coo cotnejic sat actiyapmaclha mataa yingmin ingvalhoc ingac. Yoyam colhic sat acyimnatem ingnenyaoc cotmongvoycamlha nelha —alhta aptomjac. 15 Intomjac alhta ayanya quilvana: —Visqui, jimques siclhoc as yingmin actemaclha mongitsepma. Mejeyajejec sat mataa acnim. Moyjangvomejec sat mataa as yamilquit —alhta intomjac. 16 Apcatingmavoc alhta Jesús, aptomja apcanya: —Ingva, coltimnasquiclha siclho atava. Covota sat mocjam —alhta aptomjac. 17 Incatingmavoc alhta quilvana: —Paj coo etava —alhta intomjac. Aptomjac alhta mocjam Jesús: —Calha, nasoc lhiya actomjaclha acpayvam: Paj coo etava. 18 Cinco alhta inyicje anatamcaa lhiya. Apnec maa metnaja atava anco lhiya tingma ac. Naso nac lhiya acpayvam —alhta aptomjac. 19 Lhama alhta aclinga appayvam. Intomjac alhta ayanya: —Visqui acyicpilcangvocmec lhip. Profeta nac lhip Dios aplingascama —alhta intomjac. 20 Apquilpayasoc nic nat Dios Ingyapam ningilyeyjamcaa co Samaria aso netin inquilhe. Apquilanayquic mataa quellhip co Judea, yoyam ongilpayicsojo Dios Ingyapam tingma Jerusalén —alhta intomjac. 21 Apcatingmavoc alhta Jesús: —Lhiya, nojeyasquim nasa coo. Comoc sat acnim, yoyam ongilpayicsojo Ingyapam. Mongilvotayc sat as netin inquilhe. Mongilmiyaclhejec sat najan tingma Jerusalén. 22 Am elyasamcoc quellhip co Samaria Ingyapam naysicsa apquilpayescama. Nincoo eyca co Judea ningyasamcoc actemaclha ningilpayescamo Ingyapam. Co Judea inquinyemac actomja ningilvomsomalhca tap. 23 Comoc sat acnim, quilhvo inyicje invaac, yoyam ongilpayicsojo Ingyapam actemaclha nasoc anco ayinyema Espíritu Santo. Apquiltamjoc mataa Ingyapam, yoyam ongilpayicsojo actema nac jay. 24 Dios Ingyapam nac apvanmoncama, mongvita apyovoclhojo. Incaymalhquic ongilpayicsojo Ingyapam actemaclha nasoc anco ayinyema Espíritu Santo —alhta aptomjac. 25 Intomjac alhta ayanya quilvana: —Acyasamcoc coo yoyam evac sat Mesías apvisay Cristo. Apvaac sat ancoc, jingiltimnacsic sat aclhamoclhojo asoc —alhta intomjac. 26 Apcatingmavoc alhta Jesús: —Coo nac sicvisay Cristo sicpamejitsa lhcac lhiya —alhta aptomjac. 27 Yejemoc alhta apquilvactamo apquiltamsoycaoc. Pilapcasquic alhta apquilvita Jesús appamejitsa lhama quilvana. Am alhta elpamejitcasac apquiltamsoycaoc: ¿So aptingya yi? najan ¿soctomja appamejitsa nac as quilvana? 28 Yejemoc alhta acpiquina yatingvalhva quilvana. Inmiyaclhec alhta tingma. Intomjac alhta alanya enlhitaoc: 29 —Ingva, eltiyaningvomjo siclho lhama enlhit. Eltimnasquic lhac aclhamoclhojo sictemaclha ajanco. ¿Jave ya lhaja Cristo? —alhta intomjac. 30 Yejemoc alhta apquilantepa tingma enlhitaoc. Apquilyasquic alhta apnaclha Jesús. 31 Yicpintama apquilvoy enlhitaoc apquiltomjac alhta apquiltamsoycaoc: —Visqui, ilyintamap etovc —alhta apquiltomjac. 32 Apcatingmavoc alhta Jesús: —Yitnec coo sictom. Am elyasamcoc quellhip —alhta aptomjac. 33 Yejemoc alhta apquilpamejitsacpo apquiltamsoycaoc: —¿Inne ya acsantimquisa aptom? —alhta apquiltomjac. 34 Aptomjac alhta apquillhicmosa Jesús: —Eycaso actomja coo sictom. Altamjoc otnejic actomja apmayjayoclha Ingyapam aptomja seyapajascama. Altamjoc openasquisojoc aptamjaycam Ingyapam. 35 Apquiltomja inyicje quellhip: “Cuatro piltin sat cotnejic acnaclhamalhquilha acyilhna”. Actomjac coo silanya: Quip elanojo quellhip. Elinmelhojo apquinaycaoc lhalhma anco. Innamatamquic acyilhna, invocmec acnaclhamalhquilha acyilhna. 36 Aplhocac acyanmongam enlhit aptomja apnaclhama acyilhna. Apcansaclhec enlhitaoc malha acyilhna, yoyam cotmongvomeje nelha acyimnatem apnenyaoc. Elsovacsojoc sat lhama aptomja apcanma najan aptomja apnaclhama. 37 Nasoc anco actemaclha aclhenomalhca: “Lhama aptomja apquinayclha, poc eyca aptomja apnaclhama acyilhna”. 38 Alapajasquic quellhip, yoyam elnalhvomoc acyilhna cotnaja apquilquinayclha. Apquiltamjam alhta siclho apnaymacoc. Apquilyamoncasquic quellhip apnaymacoc apquiltomja apquiltamjaycam apmamyi. Quellhip apquiltomja apnaclheycaoc acyilhna —alhta aptomjac. 39 Am alhta elyascacmoc Jesús aplhamoclhojo co Samaria apnaycam as tingma. Ayinyema alhta quilvana altimnascama siclhoc amyaa: Eltimnasquic lhac aclhamoclhojo sictemaclha ajanco. 40 Lhama alhta apquilvactamo co Samaria apnaclha Jesús. Apcanyacpec alhta, yoyam elhojoc lhama. Apnacmec alhta Jesús anit acnim. 41 Melyasquiyam apquiltomja aplhamoclhojo enlhit apquillinga actomjaclha appayvam Jesús. 42 Apquiltomjac alhta apquilanya quilvana: —Quilhvo ningiltomja mongyasquiyam, jave ayinyema lhiya acpayvam. Ayinyema eyca ninlingay inganco appayvam apanco. Ningyasamcoc nincoo aptomja nasoc anco Cristo, apquilvomquiscama tap enlhit lhalhma anco.
Aptamilquisquiyam Jesús yatapvisqui apquitca
43 Anit acnim alhta intomjac. Apquimpaclhec alhta yoclhilhma Samaria. Apmiyaclhec alhta yoclhilhma Galilea. 44 Aplhenacpec alhta apanco Jesús: —Apvinacpec profeta Dios aplingascama nipyesicsa enlhitaoc aptomja apquilaoclha apanco —alhta aptomjac. 45 Lhama alhta apvoclho yoclhilhma Galilea. Apmacpec alhta tacja Jesús, colhno siclhoc alhta. Eyca ayinyemaclha acvitalhco aptamjaycam Jesús nipyesicsa caya tingma Jerusalén. Apquilpasmec alhta caya co Galilea. 46 Apvoctac alhta mocjam Jesús tingma Caná yoclhilhma Galilea. Tingma Caná actomjayclha alhta siclho yingmin uva yingmenic. Apnec alhta tingma Capernaum lhama enlhit aptomja yatapvisqui. Ningmasquem alhta incajac apquitca. 47 Lhama alhta aplinga yatapvisqui apvactamo Jesús yoclhilhma Galilea. Yoclhilhma Judea alhta apquinyicta. Yejemoc alhta aptiyaningvocmo apnaclha Jesús. Apcanyacpec alhta Jesús eyacsic yatapvisqui tingma pac. Apquiltamjoc alhta yatapvisqui, yoyam etamilquiscomoc apquitca. Pac alhta ingyitsapoc apquitca. 48 Apcatingmavoc alhta Jesús: —Am sat ancoc elvitac quellhip ollanac asoc monquinatquiscama najan asoc sinpilapquiscama, elyascomoc mataa quellhip —alhta aptomjac. 49 Aptomjac alhta apcanya yatapvisqui: —Visqui, ipecjesam etyaningvomjo yicpintama ingyitsapoc sictamongvoyam —alhta aptomjac. 50 Apcatingmavoc alhta Jesús: —Ingva, itajiclha tingma pac. Aptamalvocmec lhac apquitca —alhta aptomjac. Am alhta eyascacmoc as enlhit aplinga Jesús appayvam. Aptajaclhec alhta tingma pac. 51 Nalhit amay alhta apquiltajanyac apquilancam. Apquiltomjac alhta apquilancam apquilanya yatapvisqui: —Aptamalvocmec alhta apquitca —alhta apquiltomjac. 52 Yejemoc alhta apquilmalhna yatapvisqui acvamlha hora aptamalvocmo apquitca. Apquilatingmavoc alhta apquilancam: —Ingyitsicso acnim alhta intomjac acmasca acmelhanma apyimpejic apquitca —alhta apquiltomjac. 53 Apyasingvoclhoc alhta yatapvisqui, inpayjoc alhta acvamlha hora aplhenaclha Jesús: “Aptamalvocmec lhac apquitca”. Yiplovcoc alhta aptimem meyasquiyam as enlhit najan aplhamoclhojo apmolhama. 54 Eycaso anit aptomjayclho alhta sinpilapquiscama actemaclha monquinatquiscama. Eycaso apquillanay Jesús natamin aptajingvoyam yoclhilhma Judea najan apvactamo yoclhilhma Galilea.
Jesús aptamilquisquiyam enlhit apquilyelcomap poncalhva Betesda
1 Natamin aptimesquiscama alhta Jesús as asoc, apmiyaclho tingma Jerusalén. Caya alhta apquiltomjac co Judea. 2 Yitnec alhta poncalhva napocja tingma Jerusalén acpayjo atong acvisay Nipquesic. Poncalhva acvisay hebreo appayvam Betesda. Cinco alhta apquilpaclheneycaoc nicja poncalhva. 3 Apnamquic alhta congne tingma aplhamoclhojo actomjaycaoc ningmasquem: mepqui apataoc najan apquilyateyaycam najan apquilyelcomap. Apquiljalhnec alhta mataa alpatiyapma yingmin. 4 Apquilanayquic alhta mataa etalhningvotac yingmin lhama ángel Dios apcasinancama elpatipsic yingmin. Aptamalvocmec alhta mataa moclhama acmasca apyimpejic aptomja aptalhningvoyam apmamyi yingmin. 5 Apyitnec alhta maa enlhit meyimnatem. Treinta y ocho años actimem meyimnatem. 6 Lhama alhta apvita Jesús. Aplingangvocmec alhta apyitnama nano as enlhit. Aptomjac alhta apcanya: —¿Apquiltamjo ya lhquip etamalvomoc? —alhta aptomjac. 7 Apcatingmavoc alhta meyimnatem: —Visqui, paj coo emoc, yoyam jeyaynamcoc nayingmin naysicsa alpatiyapma yingmin. Altamjo inyicje mataa otalhningvomoc congne. Epoctimcasquic mataa poc enlhit —alhta aptomjac. 8 Aptomjac alhta apcanya Jesús: —Itnimiclha netin, ima aptajanma, ilhing maa —alhta aptomjac. 9 Yejemoc alhta aptamalvocmo as enlhit. Apmec alhta aptajanma, aplhinquic alhta. Acnim ningnayclha alhta intomjac aptamilquiscacmo. 10 Apquiltomjac alhta judíos apquilanya aptamalviyam: —Acnim ningnayclha intomjac. Copvanquejec lhip esovm aptajanma acnim nac jay —alhta apquiltomjac. 11 Apcatingmavoc alhta as enlhit: —Aptomjac lhac seyanya aptomja setamilquisquiyam: “Ima aptajanma, ilhing maa” —alhta aptomjac. 12 Apquiltomjac alhta apquilanya enlhitaoc: —¿Soc lhac enlhit appayvam: “Ima aptajanma, ilhing maa? —alhta apquiltomjac. 13 Apvonquipquic alhta Jesús. Ayinyemaclha aplhamoc alhta enlhitaoc. Am alhta eyasamcoc as enlhit aptomja aptamilquisquiyam. 14 Aptajanyavoc alhta Jesús congne tingma apponquinomap as enlhit. Aptomjac alhta Jesús apcanya: —Quip ilanojo, aptamalvocmec lhip. Am sat ancoc elvatasac meyascalhma, coyangvomoc sat apmapsom —alhta aptomjac. 15 Yejemoc alhta aplhinga enlhit. Apquiltimnasquiclhec alhta judíos apvisay Jesús aptomja aptamilquisquiyam. 16 Aptanovacpec alhta Jesús. Apquililtamjoc alhta elajic Jesús, ayinyemaclha apquilvita actemaclha aptamilquisquiyam acnim ningnayclha. 17 Aptomjac alhta Jesús: —Aptamjaycam nic nat mataa coo Tata najan quilhvo nac jay. Sictamjaycam coo lha —alhta aptomjac. 18 Inyangvocmec alhta apquillom enlhitaoc. Apquililtamjoc alhta elajic Jesús. Jave acvamlha ayinyema aptovascama acnim ningnayclha. Eyca ayinyema najan aplhanma aptomja apyap apanco Dios Ingyapam. Apquilanayquic alhta elhnesacpoc apanco Dios Ingyapam.
Dios Apquitca aptomja apyimtalhnamo
19 Aptomjac alhta Jesús apquillhicmosa enlhitaoc: —Actomjac coo silanya quellhip: Movanquejec otnajam elhapco sicvisay Dios Apquitca. Acvajanamquic coo mataa sicvita actemaclha aptamjaycam Tata. Moclhama aptamjaycam coo Tata acnasoc coo lha sicvisay Apquitca. 20 Eyasicjavoc coo Tata. Elhicmosquic coo aclhamoclhojo actemaclha aptamjaycam apanco. Jelhicmocsic sat mocjam asoc alyiviy, yoyam cotlapsic sat quellhip apquilvitay. 21 Apnalhaticjascacmec coo Tata enlhit apquilmasquingvaycmo. Apquilyimnatescasquic apnenyaoc. Acno coo lha, evanquic olyimnaticsic apnenyaoc enlhitaoc siltamjoclha olmesic. 22 Meyanmongsiclheje coo Tata apquiltemaclha enlhitaoc. Eyasinaquic alhta otnejic silyicpilquemo enlhitaoc. 23 Apquiltamjoc coo Tata, yoyam jelavojoc aplhamoclhojo enlhitaoc, acno apquilayo mataa coo Tata. Acvinalhquic sat ancoc coo, evinacpoc najan coo Tata aptomja seyapajascama. 24 ‘Actomjac coo silanya quellhip: Naso, colhic sat acyimnatem apnenyic moclhama enlhit aptomja apjalhenmo sicpayvam najan aptomja meyasquiyam coo Tata aptomja seyapajascama. Metvasacpejec sat as enlhit, ayinyemaclha aptipquic naysicsa ningitsepmaclha, apvocmec acyimnatamaclha ingnenyic. 25 Actomjac coo silanya quellhip: Covac sat acnim, invaac quilhvo nac jay, yoyam ellingac sat enlhit apquilmasquingvaycmo coo sicpayvam sicvisay Dios Apquitca. Colhic sat acyimnatem apnenyaoc apquiltomja apquilyajayquiclho sicpayvam. 26 Apmopvan innac coo Tata elmesic acyimnatem apnenyaoc enlhitaoc. Najan emcasquic coo lha sicmovan, yoyam olmesic acyimnatem apnenyaoc enlhitaoc. 27 Emcasquic sicmovan otnejic silyicpilquemo enlhitaoc, ayinyemaclha coo sicvisay Sictiyam Sictomja Enlhit. 28 Nocotlapquis nasa quellhip apquillinga. Covac sat acnim, yoyam ellingac sat sicpayvam apquilmasquingvaycmo. 29 Elanteypoc sat tacjalhpopayc. Enalhaticjangvomoc sat enlhit apquilyiplovquiscama mataa asoc altamila. Colhic sat acyimnatem apnenyaoc. Enalhaticjangvomoc sat enlhit apquilyiplovquiscama mataa asoc almasomcaa. Elnatovasacpoc sat —alhta aptomjac Jesús.
Maclingascama apvisay Jesús aptomja apyimtalhnamo
30 Aptomjac alhta mocjam Jesús: —Movanqueje coo otnajam elhapco. Elhicmosquic mataa coo Tata actemaclha yoyam oyicpilcojo. Inpeyvoc mataa sicyicpilquemo. Am oyiplovcasac mataa actomja sicmayjayoclha ajanco. Acyiplovcasquic mataa actomja apmayjayoclha coo Tata aptomja seyapajascama. 31 Aclingasquic sat ancoc coo sicvisay ajanco, alhtoc sat cotnejic siclingascama. 32 Apnec eyca poc aptomja aplingascama sicvisay. Acyasamcoc coo actomja nasoc anco aplingascama sicvisay. 33 Apquilapajasquic alhta quellhip yoyam elmalhnacpoc Juan. Apcatingmavoc alhta Juan, aplingasquic alhta actomja nasoc anco. 34 Evanquic coo am colhic aclingasa sicvisay ayinyema enlhit. Altimnasquic lha inyicje amyaa, yoyam elvomsacpoc tap quellhip. 35 Malha calevascama ayitsasquiscama olhma alhta aptomja Juan. Apquililtamjoc alhta quellhip elitsovacsojo acyavataclhojo naysicsa ayitsayolhma apanco. 36 Emcasquic coo Tata sictamjaycam seyanya openacsojo. Eyca as sictamjaycam actomja actamila aclingascama sicvisay, colhno aplhanma alhta Juan. Inlingasquic mataa amyaa sictamjaycam actomja naso siyinyema coo Tata aptomja seyapajascama. 37 Aplingasquic sicvisay coo Tata aptomja seyapajascama. Am eyca ellingac quellhip appayvam apanco Tata. Am najan elvitac quellhip apyovoclhojo apanco coo Tata. 38 Am najan coyitnac mataa apquilvalhoc coo Tata appayvam. Elyascacmec mataa quellhip siyinyema coo Tata aptomja seyapajascama. 39 Apquilinlhanacmec mataa quellhip apquilyipsateycaoc Dios appayvam actalhesomalhca. Apquililtamjoc elvitangvomoc acyimnatem apnenyaoc. Eycaso actalhesomalhca actomja aclingascama sicvisay. 40 Am colyacmoc quellhip jelyotac, yoyam colhic acyimnatem apnenyaoc. 41 ‘Am oltamjoc coo yoyam jelavojo enlhit. 42 Alyicpilcoc quellhip, ayinyemaclha am coyitnac apquilvalhoc ningasicjayo Dios Ingyapam. 43 Acvaac coo siyinyema coo Tata aptomja seyapajascama. Am eyca jelmac tacja quellhip. Apvaac sat ancoc poc aptomja apvoy apanco, quilhvoc sat elmoc tacja quellhip. 44 Colapvanquejec quellhip eltimjic melyasquiyam. Ayinyemaclha apquiltingyac apquilayo nipyesicsa quellhip. Am colhenac apquilvalhoc elavojo Dios Ingyapam aptomja apvamlha pac lhama. 45 Nocolavojo nasa apnenyaoc olhenic apquiltemaclha quellhip napato coo Tata. Apquililjalhnec mataa quellhip Moisés, yoyam etnejic apmasma. Apnec maa Moisés aptomja aplhanma apquiltemaclha quellhip. 46 Am nat ancoc elyascacmoc quellhip Moisés, mejelyascamejec coo lha. Aptalhosquic nic nat Moisés actemaclha selhanma coo. 47 Apquilyascacmec sat ancoc quellhip Moisés apnatalhescama, elyascomoc sat najan quellhip sicpayvam —alhta aptomjac Jesús.
Jesús apmescama aptoycaoc cinco mil enlhitaoc
1 Natamin alhta aplhinga Jesús. Apmiyaclhec alhta tap acyayengviyam acvisay Tiberias yoclhilhma Galilea. 2 Apquilyiplaclhec alhta aplhamoclhojo enlhit. Ayinyemaclha apquilvita alhta asoc sinpilapquiscama naysicsa apquiltamilquisquiyam Jesús acmasca apyimpeoc. 3 Yejemoc alhta apquinatveclho netin inquilhe. Apnacmec alhta lhama apquiltamsoycaoc. 4 Camquitvocmec alhta pascua, judíos caya apancaoc. 5 Lhama alhta appaycacpo Jesús. Apvitac alhta aplhamoclhojo enlhit apquillhingacmo. Aptomjac alhta Jesús apcanya Felipe: —¿Jalhco sat ontingyangvomoc quilpasmongam, yoyam eltovamcoc enlhitaoc? —alhta aptomjac. 6 Apquiltamjoc alhta Jesús eyipconic Felipe. Ayinyemaclha apyasamcoc alhta Jesús yavamlha etnejic. 7 Apcatingmavoc alhta Felipe: —Ningyinyovquic sat ancoc doscientos solyayem ontingya quilpasmongam, memenmalhacpejec sat enlhitaoc. Moc napocja sat ellhovamcoc quilpasmongam —alhta aptomjac. 8 Apnec alhta maa Jesús aptamescama apvisay Andrés, Simón Pedro apipma. Apcatingmavoc alhta Andrés: 9 —Apnec aso lhama apyimnanic. Apyitnec cinco quilpasmongam najan anit quilasma. Malha metovcamco sat cotnejic. Aplhamoc as enlhitaoc —alhta aptomjac. 10 Apcatingmavoc alhta Jesús: —Elane sat elhnam enlhitaoc —alhta aptomjac. Yejemoc alhta apnamcaa naysicsa paat. Apvocmec alhta cinco mil enlhitaoc apnaycam. 11 Apmec alhta quilpasmongam Jesús. Gracias alhta aptomja Jesús Dios Ingyapam. Apquilmesquic alhta apquiltamsoycaoc apquilanya elyipcanmojo. 12 Lhama alhta apquilyipcanacmo. Aptomjac alhta Jesús apquilanya apquiltamsoycaoc: —Elansiclha sat quilpasmongam napocjaa, yoyam am colhic altacmo —alhta aptomjac. 13 Apquilansaclhec alhta quilpasmongam napocjaa apquilaymomap. Apquillanamcoc alhta doce nintom alhanaoc. Ayinyema alhta siclho cinco quilpasmongam. 14 Lhama alhta apquilvita enlhitaoc aptamjaycam sinpilapquiscama. Apquiltomjac alhta enlhitaoc: —Naso nac aptomja profeta Dios aplingascama aplhenamap, yoyam evac as nalhpop —alhta apquiltomjac. 15 Apyasamcoc alhta Jesús yavamlha eltimjic enlhitaoc. Apquililtamjoc alhta elpatjetic Jesús, yoyam eltimesquisic apvisqui. Aplhinquic alhta mocjam Jesús. Apquinatveclho alhta netin inquilhe, yoyam elhic aplhapco.
Jesús aplhingam netin yingmin
16 Alhtaa alhta intomjac. Apquilmiyaclhec alhta Jesús apquiltamsoycaoc niyava acyayengviyam. 17 Apquilquinamtec alhta barco. Apquiltamecac alhta apquiltamsoycaoc moc nicja acyayengviyam. Tingma Capernaum alhta apquilmiyaclha. Inyatasquic alhta olhma. Am alhta evoctac mocjam Jesús. 18 Yejemoc alhta apquilhcajacmo piyam apvanyam. Inyangvocmec alhta alyayajayam yingmin. 19 Apquilvoclhec alhta yingmin malha cinco kilómetros, tap lhaja. Pilapcasquic alhta apquilvita Jesús aplhingacmo netin yingmin. Apyipitcangvavoc alhta barco. Apquilacac alhta apquiltamsoycaoc. 20 Aptomjac alhta Jesús apquilanya: —Nojela nasa, coo nac aso —alhta aptomjac. 21 Apquililtamjoc alhta inyicje elquinatsic barco. Pilapcasquic alhta apquilvoclho niyava yingmin yavamlha elanteypoc.
Apquitamomap Jesús
22 Moc acnim alhta intomjac. Apquiltamopamquic alhta napocja enlhit moc nicja acyayengviyam. Apquilyasamcoc alhta as enlhitaoc apquillhingam alhta moc lhapcavo Jesús apquiltamsoycaoc. Am alhta etacpoc Jesús. 23 Yejemoc alhta alvactamo moc barco. Tingma Tiberias alhta inquilinyectac. Inquilvoctac alhta barco aptomacpilha quilpasmongam, acpayjo aptemaclha gracias alhta Jesús. 24 Apquilquitamquic alhta enlhitaoc Jesús najan apquiltamsoycaoc. Am alhta elvitac. Yejemoc alhta apquilquitama barco apquilmiyaclho tingma Capernaum. Apquililtamjoc alhta elvita Jesús.
Jesús apyitsomap nintom acyimnatescama ingnenyic
25 Apquilvoclhec alhta enlhitaoc tap acyayengviyam. Apquilvitac alhta Jesús. Apquiltomjac alhta enlhitaoc apquilanya: —Visqui, ¿quilhvo ya apvoctac lhip aso? —alhta apquiltomjac. 26 Apcatingmavoc alhta Jesús: —Actomjac coo silanya quellhip: Selquitamsama inyicje quellhip, ayinyemaclha apquiltovcamco alhta nintom. Apquilyipcanacmec alhta. Am eyca colhenac apquilvalhoc asoc sinpilapquiscama sillanay alhta. 27 Noeltingya nasa quellhip nintom anco as nalhpop. Eltingya sat quellhip nintom actomja acyimnatescama ingnenyic cotmongvoycamlha nelha. Evanquic olmesic quellhip as nintom. Ayinyemaclha coo sicvisay Sictiyam Sictomja Enlhit. Dios Ingyapam aptomja selcajascama sictomja Apquitca —alhta aptomjac. 28 Apquiltomjac alhta enlhitaoc apquilanya Jesús: —¿Soc asoc ongillanac nincoo, yoyam colcojoc apvalhoc Dios Ingyapam? —alhta apquiltomjac. 29 Apcatingmavoc alhta Jesús: —Apquiltamjoc coo Tata aptomja seyapajascama, yoyam mejelyascamejec quellhip. Nojelyasquim nasa coo —alhta aptomjac. 30 Apquiltomjac alhta mocjam enlhitaoc: —¿Co lha actema asoc monquinatquiscama pa jingillhicmocsic, yoyam mongilyascamejec sat ongvita? ¿Soc asoc pa ellanac lhip? —alhta apquiltomjac. 31 Apquiltovcamquic nic nat ningilyeyjamcaa nintom maná yoclhilhma actamopeycaoc. Innoc actomja aclhanma Dios appayvam actalhesomalhca: “Apquilmesquic nic nat Dios Ingyapam nintom maná ayinyema netin” —alhta apquiltomjac. 32 Apcatingmavoc alhta Jesús: —Actomjac coo silanya quellhip: Naso, jave ayinyema Moisés apquilmescama nintom actomja nasoc anco ayinyema netin. Coo eyca Tata aptomja apquilmescama quellhip nintom actomja nasoc anco ayinyema netin. 33 Nintom actomja nasoc anco ayinyema netin singmescama Dios Ingyapam apvisay apvoy as nalhpop. Aptomja apmescama acyimnatem apnenyaoc enlhitaoc lhalhma anco —alhta aptomjac. 34 Apquiltomjac alhta enlhitaoc apquilanya: —Visqui, jingilmes mataa nintom aplhena nac lha —alhta apquiltomjac. 35 Aptomjac alhta apquillhicmosa Jesús: —Coo nac sicvisay nintom acyimnatescama ingnenyic. Cajejec sat mataa mayc aptomja seyoycta. Cajejec sat mataa acnim aptomja mejeyasquiyam. 36 Altimnasquic inyicje quellhip: Elvita inyicje quellhip, elyascacmec eyca. 37 Jelyotac sat moclhama enlhit aptomja selmescama Tata coo. Molantipsejec sat moclhama enlhit aptomja selyoycta. 38 Netin coo ayinyemac. Motnejec coo sicmayjayo ajanco, sat eyca otnejic apmayjayoclha coo Tata aptomja seyapajascama. 39 Apquiltamjoc yoyam molhnanimsic lhama aptomja selmescama. Apquiltamjoc yoyam onalhaticjascomoc actamongvomlha nelha acnim. 40 Eycaso actomja apmayjayoclha coo Tata aptomja seyapajascama. Apquiltamjoc yoyam colhic acyimnatem apnenyaoc moclhama aptomja selaneyo sicvisay Dios Apquitca najan aptomja mejeyasquiyam. Onalhaticjascomoc sat actamongvomlha nelha acnim —alhta aptomjac. 41 Apquilmalyevam alhta enlhitaoc, ayinyemaclha apquillinga Jesús appayvam: “Coo nac sicvisay nintom ayinyema netin” —alhta apquiltomjac. 42 Apquiltomjac alhta enlhitaoc apquilanya: —¿Jave ya José apquitca as enlhit apvisay Jesús? Ningyicpilcoc nincoo apyap najan inquin. ¿Soctomja aplhena nac apquinyema netin? —alhta apquiltomjac. 43 Apcatingmavoc alhta Jesús: —Noelmalyovam nasa. 44 Copvanquejec jeyotac enlhit, acvamlha aptomja apyantamayquinta coo Tata aptomja seyapajascama. Olhaticjascomoc sat actamongvomlha nelha acnim. 45 Alhta intomjac apnatalhescama profetas Dios apquillingascama: “Dios Ingyapam sat ellhicmocsic aplhamoclhojo enlhitaoc” —nic nat intomjac vaycajac. Jeyotac sat moclhama enlhit apquiltomja apquiljalhenmo coo Tata najan apquiltomja apquilyasingvoyam. 46 ‘Am etamacpoc mocjam coo Tata. Sicvamlha sicvitay coo, ayinyemaclha siyinyemay coo Tata. 47 Actomjac coo silanya quellhip: Yitnec acyimnatem apnenyic enlhit aptomja mejeyasquiyam. 48 Coo nac sicvisay nintom acyimnatescama ingnenyic. 49 Apquiltovcamquic nic nat apquilyeyjamcaa nintom maná yoclhilhma actamopeycaoc. Apquilitsepmec nic nat. 50 Eycaso siclhanma nintom ayinyema netin. Aptovquic sat ancoc enlhit, mengyitsepejec sat. 51 Coo nac sicvisay nintom ayinyema netin. Aptovquic sat ancoc enlhit as nintom, mengyitsepejec sat cotmongvoycamlha nelha. Nintom sicmescama coo actomja sicyovoclhojo ajanco. Momyovalhcoyc co ajanco, yoyam colhic acyimnatem apnenyic enlhit lhalhma anco —alhta aptomjac. 52 Yejemoc alhta apquillova enlhitaoc. Apquilatingmacpec alhta poc nipyesicsa: —¿Jalhco sat etnejic jingilmesic apyovoclhojo apanco, yoyam ontovamcoc apjapitic? —alhta apquiltomjac. 53 Apcatingmavoc alhta Jesús: —Actomjac coo silanya quellhip: Naso, am sat ancoc eltovcamcoc quellhip ejepitic sicvisay Sictiyam Sictomja Enlhit. Am sat ancoc elyinamcoc quellhip ema ajac, colhejec sat acyimnatem apnenyaoc. 54 Aptovquic sat ancoc enlhit ejepitic, apyinquic sat ancoc ema ajac, colhic sat acyimnatem apnenyic cotmongvoycamlha nelha. Olhaticjascomoc sat actamongvomlha nelha acnim. 55 Nintom actomja nasoc anco acvisay sicyovoclhojo ajanco. Ningyam actomja nasoc anco acvisay ema ajac. 56 Aptovquic sat ancoc enlhit ejepitic, apyinquic sat ancoc ema ajac, jeyipitcojoc sat coo najan oyipitcojoc sat coo lha as enlhit. 57 Acyimnatem apnenyic innac coo Tata aptomja seyapajascama. Acyimnatem enquenyic coo lha innac ayinyema coo Tata. Elhojoc sat enlhit aptomja aptom ejepitic. Colhic sat acyimnatem apnenyic ayinyema coo. 58 Eycaso siclhanma nintom ayinyema netin. Eyca as nintom am colhno nintom maná. Apquiltovcamquic nic nat apquilyeyjamcaa quellhip. Apquilitsepmec nic nat. Aptovquic sat ancoc enlhit as nintom, colhic sat acyimnatem apnenyic cotmongvoycamlha nelha —alhta aptomjac Jesús. 59 Apquillhicmosquic alhta Jesús as amyaa congne apcaneyquiclhilha tingma Capernaum.
Apquillhicmoscama Jesús actemaclha acyimnatem ingnenyic
60 Apquillingac alhta apquillhicmoscama Jesús aplhamoclhojo apquillhalhmaa. Apquiltomjac alhta apquilanya Jesús: —Ingliclacmec appayvam aplhena nac lha. Mongvanquic ongilaylhojo —alhta apquiltomjac. 61 Apyicpilcoc alhta Jesús actemaclha apquilmalyevoycam apquillhalhmaa. Aptomjac alhta Jesús apquilanya: —Apquilnatjavo inyicje quellhip as asoc. 62 Coyangvomoc sat apquilnatjemo quellhip jelvitac sicvisay Sictiyam Sictomja Enlhit sicmiyaclho sat netin siyinyemayaclha —alhta aptomjac. 63 Ningvanmoncama eyca ayinyema acyimnatem ingnenyic. Am conyemac ningyovoclhojo acyimnatem ingnenyic. Altimnasquic lhac quellhip sicpayvam. Eyca as sicpayvam actomja nasoc anco ayinyema Espíritu Santo aptomja apyimnatescama ingnenyic. 64 Moclhama apquilyascacmoc mocjam quellhip —alhta aptomjac. Apyasamcoc alhta Jesús siclhoc anco apquiltomja mataa apquilyasquiyam. Apyasamcoc alhta Jesús enlhit aptomja sat apcanem emacpoc. 65 Aptomjac alhta Jesús apquilanya: —Altimnasquic lha inyicje: Copvanquejec jeyotac enlhit, acvamlha aptomja apyantamayquinta coo Tata —alhta aptomjac. 66 Yejemoc alhta apquilvatsamco napocja apquillhalhmaa. Masquec alhta apquiltomja apquillhalhmaa. 67 Aptomjac alhta Jesús apquilanya doce apquiltamsoycaoc: —¿Apquililtamjo ya quellhip lha ellhong? —alhta aptomjac. 68 Apcatingmavoc alhta Simón Pedro: —Visqui, ¿soc enlhit ongyamejic nincoo? Apvamlha lhip inyitnac appayvam actema nac cotmongvoyam nelha acyimnatem ingnenyic. 69 Mongilyascacmoc nincoo, ningyasamcoc najan aptomja lhip Cristo, Dios apponquinomap —alhta aptomjac. 70 Apcatingmavoc alhta Jesús: —¿Jave ya alhta silyacyescama quellhip doce? Lhama eyca nipyesicsa quellhip aptomja malha yavey —alhta aptomjac. 71 Judas Iscariote, Simón apquitca alhta aplhenacpoc. Judas sat etnejic apcanem emacpoc Jesús. Aptomja alhta apquilvisayo lhama apóstoles (apquiltamsoycaoc).
Apquilyasquiyam Jesús apquilyalhinga
1 Natamin alhta as asoc aplhinga Jesús. Aptiyasam alhta yoclhilhma Galilea. Am alhta eltamjoc elhic mocjam yoclhilhma Judea. Ayinyemaclha judíos alhta apquililtamjoc elajic Jesús. 2 Camquitvocmec alhta judíos caya apancaoc las chozas, ningiltimem nincoo jamilh apancaoc. 3 Apquiltomjac alhta apquilyalhinga apquilanya Jesús: —Ingyimpeclha mocjam. Iyas sat yoclhilhma Judea. Apnam maa lhip apquiltamsoycaoc, yoyam elvitac actemaclha lhip aptamjaycam. 4 Apquiltomjac sat ancoc enlhit etnejic apyimtalhnamo, copvanquejec eyilhasquisojo actemaclha aptamjaycam. Apvanquic sat ancoc lhip ellanac as asoc, ilhicmosacpojo apanco nipyesicsa enlhitaoc lhalhma anco —alhta apquiltomjac. 5 Alhta ayinyemaclha apquilyascacmo mocjam apquilyalhinga. 6 Aptomjac alhta Jesús apquilanya apquilyalhinga: —Am covocmoc acnim, yoyam olhicmosalhcojo. Apvancaac quellhip ellhicmosacpojo mataa. 7 Am eltanovacpoc mocjam quellhip nipyesicsa enlhitaoc lhalhma anco. Coo eyca actanovalhcac, ayinyemaclha aclingasquic coo apquiltemaclha almasomcaa enlhit lhalhma anco. 8 Elyas sat quellhip caya. Moyacseje mocjam coo. Am covocmoc mocjam acnim, yoyam olhicmosalhcojo —alhta aptomjac. 9 Natamin apquiltimnascama as asoc apnaclho mocjam yoclhilhma Galilea.
Jesús nipyesicsa caya ningiltimem jamilh apancaoc
10 Lhama alhta apquilvonquepa apquilyalhinga. Apquilimjamquic alhta Jesús apyasa caya. Am alhta apalhaveclha apnaymacoc. Apyilhacpoc alhta apvoclho nipyesicsa caya. 11 Apquitamacpec alhta Jesús maa. Judíos alhta apquilquitamac. Apquiltomjac alhta apquilanya: —¿Co laa apnaclha as enlhit? —alhta apquiltomjac. 12 Apquilmalyevasacpec alhta aplhamoclhojo enlhitaoc. Jesús alhta aplhenacpoc. Apquiltomjac alhta napocja enlhit: “Am inyicje etamilac maa, apquilyinimsam mataa enlhitaoc” —alhta apquiltomjac. 13 Am alhta elhenacpoc napato. Judíos alhta apquilacpoc. 14 Nipyesicsa caya alhta apvoclho tingma apponquinomap Jesús. Apquillhicmosquic alhta enlhitaoc. 15 Pilapcasquic alhta judíos apquillinga apquiltimnaycam. Apquilpamejitsacpec alhta: —¿Jalhco ayinyema apyascamco Dios appayvam as enlhit? Mepqui mallhicmoscama alhta vaycajac —alhta apquiltomjac. 16 Apcatingmavoc alhta Jesús: —Jave sillhicmoscama ajanco, eyca ayinyema coo Tata aptomja seyapajascama. 17 Apquiltamjoc sat ancoc enlhit eyiplovcasojo apmayjayoclha Ingyapam, metnatsejec sat sellhicmoscama. Naso nac ayinyema Dios Ingyapam, jave ayinyema sillhicmoscama ajanco. 18 Apquiltamjoc mataa ingyajacpojo enlhit aptomja apquillhicmoscama ayinyema apvalhoc apanco. Coo eyca mataa ongvavojo coo Tata aptomja seyapajascama. Nasoc anco siclhanma, am coyitnac evalhoc actemaclha sicyinimquiscama. 19 ‘Apquilmesacpec quellhip singanamaclha Dios. Moisés nic nat apquilmescama. Am eyca elyiplovcasac quellhip singanamaclha Dios. ¿Soctomja apquililtamjo nac jelajic? —alhta aptomjac Jesús. 20 Apquilatingmavoc alhta enlhitaoc: —Meyascamcolhma nac lhip. Am ongiltamjoc ongilajic lhip —alhta apquiltomjac. 21 Aptomjac alhta Jesús apquilanya enlhitaoc: —Pilapcasquic alhta quellhip apquilvita lhama anco asoc sillanay acnim ningnayclha. 22 Moisés nic nat ayinyema apcanama, yoyam collanalhca asoc monquinatquiscama ingyimpejic. Jave ayinyema apcanama Moisés, eyca ayinyema ilhnic nat ningilyeyjamcaa. Apquillanac quellhip asoc monquinatquiscama apyimpejic sicaa acnim ningnayclha. 23 Apquilyiplovcasquic quellhip singanamaclha Moisés. Apquillanac quellhip asoc monquinatquiscama apyimpejic acnim ningnayclha. ¿Soctomja seltanovasquisa nac sictamilquisquiyam enlhit acnim ningnayclha? 24 Noelyiplovcasojo nasa apquilvalhoc actemaclha apquilyipilquemo poc. Elpeyvacsojo siclho actemaclha apquilyascamco naysicsa apquilyicpilquemo —alhta aptomjac.
Aplhanma Jesús apquinyemayaclha siclhoc anco
25 Apnam alhta enlhit apquilinyema tingma Jerusalén. Apquilpamejitsacpec alhta: —¿Jave ya enlhit apquitamacpo, yoyam alhta ematong? —alhta apquiltomjac. 26 Quip elanojo, am eyilhacpoc apquiltimnamcaa as enlhit. Paj lhama enlhit apcatingmoctamo. ¿Apquilyicpilcangvocme ya apquilviscaa apquilpamejitsomap, aptomja nasoc anco Cristo? 27 Ningyasamcoc nincoo apquinyemayaclha as enlhit. Apvaac sat ancoc Cristo apanco, mongilyasamquejec sat apquinyemayaclha —alhta apquiltomjac. 28 Lhama alhta aplinga Jesús. Apyimnatasquic alhta appayvam apquiltimnasamcaa: —Elyicpilcoc coo quellhip, apquilyasamcoc najan siyinyemayaclha. Jave sicvoy ajanco. Eyapajasquic alhta coo Tata aptomja nasoc anco. Am elyicpilcac quellhip. 29 Acyicpilcoc coo, ayinyemaclha siyinyemay coo Tata aptomja seyapajascama —alhta aptomjac. 30 Apquililtamjoc alhta enlhitaoc elmoc Jesús. Am alhta emacpoc, ayinyemaclha am alhta covocmoc acnim, yoyam emacpoc. 31 Am alhta elyascacmoc aplhamoclhojo enlhitaoc. Apquiltomjac alhta nipyesicsa: —Apvaac sat ancoc Cristo apanco, ¿pa ya ellanac aclhamoclhojo asoc monquinatquiscama, melhno as enlhit? —alhta apquiltomjac.
Apquilapajascama fariseos apquilancam, yoyam elmoc Jesús
32 Lhama alhta apquillinga fariseos actemaclha apquilmalyevoycam enlhitaoc aplhenacpo Jesús. Yejemoc alhta apquilpamejitsacpo fariseos najan apquilimja apmamyi sacerdotes. Apquilapajasquic alhta apquiltamilquiscama tingma apponquinomap, yoyam elmoc Jesús. 33 Aptomjac alhta mocjam Jesús: —Olhic sat mocjam acyavataclhojo nipyesicsa quellhip. Otajojoc sat mocjam apnaclha coo Tata aptomja seyapajascama. 34 Jelquitmoc sat quellhip, mejelviticlhejec sat mocjam. Melvomejec sat quellhip sicnaclhilha —alhta aptomjac. 35 Yejemoc alhta apquilpamejitsacpo enlhitaoc (judíos): —¿Jalhcojo sat eyacsic, yoyam mongilviticlhac nincoo? ¿Apquiltamjo ya eyacsic as enlhit nipyesicsa judíos apquilhpaneycam? ¿Apquiltamjo ya elhicmocsic griegos maa? 36 Ayinyemaclha aptomjac lhac singilanya: “Jelquitmoc sat quellhip, mejelviticlhejec sat mocjam. Melvomejec sat quellhip sicnaclhilha” —alhta apquiltomjac.
Yingmin almilaneycaoc malha vatsam
37 Invocmec alhta acnim actamila anco actomjaclha nelha caya. Yejemoc alhta apquinmaclho netin Jesús. Apyimnatasquic alhta appayvam: —Apquilyamacac sat ancoc quellhip, jelyota coo. 38 Elyinaoc sat apquiltomja mejelyasquiyam coo. Innoc actemaclha aclhanma Dios appayvam actalhesomalhca: Cotyapoc sat apquilvalhoc yingmin almilaneycaoc malha vatsam —alhta aptomjac. 39 Espíritu Santo alhta aplhenac Jesús. Enlhit apquiltomja melyasquiyam Jesús ellhovamcoc sat Espíritu Santo. Am alhta evac mocjam Espíritu Santo. Ayinyemaclha am alhta covocmoc, yoyam coyangvomoc apyimtalhnamo Jesús.
Apquilhpanma nipyesicsa enlhitaoc
40 Lhama alhta apquillinga Jesús appayvam napocja enlhitaoc. Apquiltomjac alhta enlhitaoc: —Naso nac aptomja profeta Dios aplingascama aplhenomacpo nac lha —alhta apquiltomjac. 41 Apquiltomjac alhta poc enlhit: —Cristo nac lha —alhta apquiltomjac. Apquiltomjac alhta mocjam poc enlhit: —Am ingyinyema Cristo yoclhilhma Galilea. 42 Yitnec actemaclha aclhanma Dios appayvam actalhesomalhca, yoyam ingyinyemac Cristo tingma Belén, apvisqui David tingma pac nano., Ayinyemaclha apvisqui David aptavin sat etnejic Cristo —alhta apquiltomjac. 43 Apquilhpanec alhta enlhitaoc. Jesús alhta ayinyemaclha aplhenacpo. 44 Apquililtamjoc alhta napocja enlhit elmoc Jesús. Am alhta emacpoc.
Apquilyasquiyam enlhit apquilyimtalhnamo
45 Yejemoc alhta apquiltajavo apquiltamilquiscama tingma apponquinomap. Apquilmiyaclhec alhta apquinmamcaclha fariseos najan apquilimja apmamyi sacerdotes. Apquiltomjac alhta apquilyimtalhnamo apquilanya: —¿Soctomja melyantamacmo as enlhit? —alhta apquiltomjac. 46 Apquilatingmavoc alhta apquiltamilquiscama tingma apponquinomap: —Am colngamalhcac cotnejic apquiltimnaycam enlhit actema nac jay —alhta apquiltomjac. 47 Apquilatingmavoc alhta fariseos: —¿Apquilvajanamco ya quellhip lha actemaclha apyinimquiscama? 48 Apquilyascacmec maa apquiltomja apquilyimtalhnamo najan maa fariseos. 49 Melyasquiyam apquiltomja apquilvamlha enlhit melyascamco singanamaclha Dios. Apquilmapsomcaa nac as enlhitaoc —alhta apquiltomjac. 50 Apnec alhta nipyesicsa fariseos Nicodemo, aptomja apyoyam alhta apnaclha Jesús alhtaa. Aptomjac alhta Nicodemo apquilanya: 51 —Yitnec nincoo singanamaclha Dios. Mongvanquejec ontovacsic enlhit mepqui ningyascamco apsilhnanomap apanco —alhta aptomjac. 52 Apquilatingmavoc alhta: —¿Lhip ya najan co Galilea? Ilyipsit siclho Dios appayvam actalhesomalhca. Metangvomejec sat aclhanma profeta Dios aplingascama, yoyam ingyinyema yoclhilhma Galilea —alhta apquiltomjac.
Quilvana alanatama
53 Apquiltajaclhec alhta moclhama tingma apancaoc.
1 Apmiyaclhec alhta Jesús inquilhe acvisay Olivos. 2 Inquitsacac alhta, alhtooc anco aptalhningvactamo mocjam tingma apponquinomap. Apquilyavectac alhta aplhamoclhojo enlhit. Apnaclhec alhta Jesús. Apquillhicmosquic alhta enlhitaoc. 3 Apquilvaac alhta apquilyascamco apquiltemaclha najan fariseos. Apquilyantamentac alhta quilvana alanatama. Invitalhquic alhta naysicsa acpatjeteycam. Apquilnesquic alhta naysicsa. 4 Apquiltomjac alhta fariseos apquilanya Jesús: —Visqui, inmalhquic lhac as quilvana naysicsa acpatjeteycam enlhit. 5 Yitnec nincoo singanamaclha Moisés. Aptomjac singilanya Moisés: Elyicna sat mataymong quilvana actema nac lha —ilhnic nat aptomjac. ¿Jalhco aptomja lhip? —alhta apquiltomjac. 6 Apquililtamjoc alhta elyipconic Jesús, yoyam eltipsic apvisay. Yejemoc alhta apjalhingvocmo Jesús. Apopejic alhta aptalhesamcoc lhopactic. 7 Apquilinlhanacmec alhta fariseos apquilmalhnaycam. Yejemoc alhta appeyveclho Jesús. Aptomjac alhta apquilanya: —Apnec sat ancoc lhama nipyesicsa quellhip mepqui meyascalhma, ima sat apmamyi mataymong. Iyicna sat as quilvana —alhta aptomjac. 8 Apjalhingvoclhec alhta mocjam Jesús. Aptalhesquic alhta mocjam nalhpop. 9 Lhama alhta apquillinga appayvam. Apquilantipquic alhta moclhama. Apquilmamyi alhta apquilantiyapma apquilvanyam. Apsovjacpo alhta apquilantepa. Lhapcoc alhta aptamopamcoc Jesús najan quilvana ayinmamcaa lhapco. 10 Yejemoc alhta appeyveclho Jesús. Aptomjac alhta Jesús apcanya quilvana: —Lhiya, ¿jalhco apquilyasa enlhitaoc? ¿Paj ya lhama enlhit aptimesquiscama acmasom? —alhta aptomjac. 11 Incatingmavoc alhta quilvana: —Visqui, paj lhama enlhit —alhta intomjac. Aptomjac alhta apcanya Jesús: —Motnesquiseje coo lha acmasom. Colhing maa, colvates sat coyascalhma lhiya —alhta aptomjac.
Jesús aptomja ayitsayolhma lhalhma anco
12 Yejemoc alhta apquiltimnasamcaa mocjam Jesús: —Coo sictimem siyitsasquiscamalhma enlhit lhalhma anco. Seyiploycam sat ancoc enlhit, colhic sat ayitsayolhma. Colhic sat acyimnatem apnenyic ayinyema ayitsayolhma. Metyisamejec sat mataa acyinatesaclhilhma. 13 Apquilatingmavoc alhta fariseos: —Lhip aptomja aplingascama apvisay apanco, aptimec apanco —alhta apquiltomjac. 14 Aptomjac alhta mocjam Jesús: —Aclingasqui inyicje sicvisay ajanco. Nasoc anco actomja siclingascama. Acyasamcoc coo siyinyemayaclha, acyasamcoc najan sicyasaclha. Am elyasamcoc quellhip siyinyemayaclha najan sicyasaclha. 15 Quellhip jellhenquic sicmasom acno apquiltemaclha enlhit lhalhma anco. Coo eyca motnesquisic apmapsom enlhit. 16 Inpeyvoc mataa sicyicpilquemo apquiltemaclha enlhit. Jave sicyicpilquemo elhapco. Acyicpilcoc coo lhama Tata (incanit) aptomja seyapajascama, ongilyicpilcojo apquiltemaclha enlhit. 17 Yitnec quellhip singanamaclha actalhesomalhca: Am sat ancoc coyeycac moc apquillhanma apcanit enlhit apquiltomja apquilvitaycamco, mongilyascamejec sat. 18 Incanit nincoo ninlhanma sicvisay. Aclingasquic coo sicvisay ajanco. Aplingasquic sicvisay coo Tata aptomja seyapajascama —alhta aptomjac. 19 Apquiltomjac alhta fariseos apquilanya Jesús: —¿Jalhco apnaclha Apyap? —alhta apquiltomjac. Apcatingmavoc alhta Jesús: —Am jelyicpilcac quellhip coo. Am najan elyicpilcac quellhip coo Tata. Elyicpilcoc ancoc coo, elyicpilcojoc sat najan coo Tata —alhta aptomjac. 20 Apquiltimnasamcaa alhta Jesús as amyaa congne tingma apponquinomap. Apquinmam alhta Jesús nicja yamit aysicsic acninquinomalhquilha solyayem. Am alhta emacpoc Jesús. Ayinyemaclha am alhta covocmoc acnim, yoyam emacpoc.
Melvomejec sat quellhip yavamlha oyacsic
21 Aptomjac alhta mocjam Jesús apquilanya judíos: —Pac olhong sat coo. Jelquitmoc sat quellhip. Elmasquingvomoc sat quellhip acyiplomo melyascalhma apancaoc. Melvomejec sat quellhip yavamlha oyacsic —alhta aptomjac. 22 Apquilatingmavoc alhta judíos: —¿Pa ya ingyajacpoc apanco? Ayinyemaclha aplhena nac: Melvomejec sat quellhip yavamlha oyacsic —alhta apquiltomjac. 23 Aptomjac alhta Jesús apquilanya: —Am elinyemayac netin quellhip. Coo eyca siyinyemay maa netin. Quellhip apquilinyemaclha apanco as nalhpop. Am ongvinyemac coo as nalhpop —alhta aptomjac. 24 Eycaso ayinyema sictomja lhac silanya quellhip: Elmasquingvomoc sat quellhip acyiplomo melyascalhma apancaoc. Apquilyascacmec sat ancoc quellhip sictomja Cristo, elmasquingvomoc sat quellhip acyiplomo melyascalhma. 25 Apquiltomjac alhta judíos apquilanya Jesús: —¿Soc enlhit lhip qui? —alhta apquiltomjac. Apcatingmavoc alhta Jesús: —Coo nac Cristo, acno siltimnascama alhta siclho quellhip. 26 Acyasamcoc coo aclhamoclhojo apquiltemaclha apancaoc quellhip. Aclingasquic coo amyaa lhalhma anco acvamlha siclingay ayinyema coo Tata aptomja nasoc anco —alhta aptomjac. 27 Am alhta elyasamcoc judíos actemaclha aplhenamap Ingyapam netin. 28 Aptomjac alhta mocjam Jesús: —Coo sicvisay Sictiyam Sictomja Enlhit. Jelmiyasiclhac sat netin coo. Natamin jelyicpilcangvomoc sat quellhip sictomja Cristo. Melquinatsejec sat quellhip cotnaja siclingascama ajanco. Aclingasquic mataa amyaa aptomja selhicmoscama coo Tata. 29 Epasmec mataa coo Tata aptomja seyapajascama. Mejeyinyovejec sat coo Tata —alhta aptomjac. 30 Lhama alhta apquillinga Jesús appayvam. Yiplovcoc alhta apquiltimem melyasquiyam aplhamoclhojo enlhit.
Apquillhenamap Dios apquitquic najan enlhit almam melyascalhma
31 Aptomjac alhta Jesús apquilanya judíos quilhva apquiltimem melyasquiyam: —Apquilyiplovcasquic sat ancoc quellhip sicpayvam, eltimjic sat siltamsoycaoc. 32 Elyasingvomoc sat quellhip actomja nasoc anco. Actomja nasoc anco ayinyema ningmiyovmalhquilha —alhta aptomjac. 33 Apquilatingmavoc alhta: —Abraham aptovana niptamin nincoo. Am ongilmomalhcac mataa nincoo. ¿Soctomja aptomja nac singilanya, yoyam ongilmiyovalhca? —alhta apquiltomjac. 34 Aptomjac alhta Jesús apquilanya: —Actomjac coo silanya quellhip: Naso, moclhama enlhit apquillanay melyascalhma aptomja apmomap, mongilyascalhma acmam. 35 Enlhit apmomap metnejec mataa apvisqui apmolhama. Apvisqui apquitca aptomja eyca mataa apmolhama. 36 Nasoc sat cotnejic apquilmiyovmap quellhip ayinyema apquilmasma Visqui Apquitca. 37 Acyasamcoc coo, quellhip jelajic, ayinyemaclha am colmac apquilvalhoc coo sicpayvam. 38 Aclingasquic coo mataa amyaa, aptomja selhicmoscama coo Tata. Apquillanac mataa asoc quellhip ayinyema apquilyap apquiltimnascaoc —alhta aptomjac. 39 Apquilatingmavoc alhta judíos: —Abraham nincoo ningilyeyjamcaa —alhta apquiltomjac. Apquiltomjac alhta apquiltamsoycaoc apquilanya Jesús: —Nasoc sat ancoc quellhip apquiltomja Abraham aptovana niptamin, elvajanamcoc sat actemaclha aptamjaycam. 40 Naso, apquililtamjoc quellhip jelajic, ayinyemaclha altimnasquic quellhip amyaa actomja nasoc anco, ayinyema coo Tata Dios. Am nic nat etnemac mataa Abraham apquiltomjaclha nac quellhip. 41 Apquilyiplovcasquic quellhip apquiltemaclha apquilyap —alhta aptomjac. Apquilatingmavoc alhta judíos: —Jave ningilvisay quipyap. Apnec nincoo Ingyapam Dios apvamlha pac lhama —alhta apquiltomjac. 42 Aptomjac alhta mocjam Jesús: —Nasoc sat ancoc quellhip apquiltomja apquilyap Dios, jelasicjojoc sat coo lha. Ayinyemaclha acvaac coo, siyinyema Dios Ingyapam. Jave sicvoy ajanco, Dios apvamlha pac lhama aptomja seyapajascama. 43 ¿Soctomja melyasamco nac quellhip coo sicpayvam? Am colyacmoc quellhip elaylhojo coo sicpayvam. 44 Innec quellhip apquilyap acvisay yavey diablo. Quellhip apquiltomja ayitquic. Apquililtamjoc mataa elvajanamcoc quellhip actemaclha ayitsepma inquenyic apquilyap. Siclhoc anco nic nat acvocmo quilhvo nac jay actomja ticyovam inyap. Am coyitnac mataa actimem nasoc anco. Jave nasoc anco actemaclha. Intimec mataa acmovan amyaa, ayinyemaclha yavey diablo acvisay acmovan amyaa inyap. Actemaclha anco acmovan amyaa. 45 Altimnasquic coo mataa quellhip amyaa actomja nasoc anco. Eyca elyascacmec mataa quellhip. 46 ¿Soc enlhit apvita lhama moyascalhma ajanco? Altimnasquic sat ancoc amyaa actomja nasoc anco, ¿soctomja selyascacmo nac quellhip? 47 Apjalhnoc mataa Dios appayvam enlhit aptomja Dios apquitca. Am eliltamjoc quellhip elaylhojo Dios appayvam. Ayinyemaclha meltomja quellhip Dios apquitquic —alhta aptomjac.
Cristo aptiyascam nic nat netin metyaycamlha nic nat Abraham
48 Apquilatingmavoc alhta judíos: —Naso nac ningillhena alhta nincoo: Lhip nac co Samaria. Meyascamcolhma nac lhip —alhta apquiltomjac. 49 Aptomjac alhta mocjam Jesús: —Jave coo moyascamcolhma. Ayacoc coo Tata. Quellhip eyca am jelaco. 50 Am otnajac coo siyajamalhco ajanco. Apnec coo Tata aptomja seyayo, aptomja seyicpilquemo. 51 Actomjac coo silanya quellhip: Naso, apyiplovcasquic sat ancoc enlhit coo sicpayvam, mengyitsepejec sat mataa cotmongvoycamlha nelha —alhta aptomjac. 52 Apquilatingmavoc alhta judíos: —Quilhvoc ningyasamcoc nincoo, meyascamcolhma nac lhip. Apquitsepmec nic nat Abraham. Apquilitsepmec nic nat profetas Dios apquillingascama. Lhip eyca aptomja singilanya: Apyiplovcasquic sat ancoc enlhit sicpayvam, mengyitsepejec sat cotmongvoycamlha nelha. 53 ¿Apyimtalhnamo ya lhquip, am ya elhno ningilyeyjamcaa Abraham? Apquitsepmec nic nat Abraham. Apquilitsepmec nic nat profetas Dios apquillingascama. ¿Soc enlhit lhip qui aplhenacpo apanco? —alhta apquiltomjac. 54 Aptomjac alhta mocjam Jesús: —Ayajemo sat cotnejic siyajamalhco ajanco. Coo Tata eyca aptomja seyayo. Apquiltimem inyicje quellhip apquilyap coo Tata. 55 Am elyicpilcac quellhip Dios Ingyapam. Coo eyca acyicpilcoc. Actomjac sat ancoc ongvanic quellhip: Am oyicpilcac Dios Ingyapam, sicmovan amyaa sat otnejic. Olhojoc sat quellhip apquilmopvan amyaa. Nasoc anco, acyicpilcoc coo Dios Ingyapam. Acyiplovcasquic mataa appayvam. 56 Apquitsovasoc nic nat apquilyeyjamcaa Abraham. Apquiltamjoc nic nat etamcojo acnim, yoyam ovac as nalhpop. Apvitac nic nat as acnim. Payjeclhec nic nat apvalhoc Abraham —alhta aptomjac. 57 Apquilatingmavoc alhta judíos: —Am evocmoc mocjam lhip cincuenta años. ¿Apvitayo ya lhquip Abraham ningilyeyjamcaa nic nat? —alhta apquiltomjac. 58 Aptomjac alhta Jesús apquilanya: —Actomjac coo silanya quellhip: Naso, sictiyascam nat coo, metyaycamlha nic nat Abraham —alhta aptomjac. 59 Yejemoc alhta apquilma mataymong judíos. Apquililtamjoc alhta elajic Jesús. Apyilhacpoc alhta aptepa tingma apponquinomap Jesús.
Jesús aptamilquisquiyam enlhit mepqui apataoc
1 Naysicsa aplhingam alhta Jesús aptajanyavo enlhit mepqui apataoc. Ayenmo congne mepqui apataoc. 2 Apquiltomjac alhta apquiltamsoycaoc apquilanya Jesús: —Visqui, ¿so actema ayenmo nac congne mepqui apataoc as enlhit? ¿Naso ya ayinyema meyascalhma apanco? ¿Inlhoyqui laa ayinyema meyascalhma apyap najan inquin? —alhta apquiltomjac. 3 Apcatingmavoc alhta Jesús: —Am conyemac meyascalhma apanco. Am conyemac najan meyascalhma apyap najan inquin. Eyca ayinyema, yoyam cotalhca actemaclha aptamjaycam Dios Ingyapam apmopvan etamilquiscomoc. 4 Acnim anco mocjam. Incaymalhquic ollanac aptamjaycam aptomja seyapajascama. Cotnejic sat alhtaa, mongvanquejec yoyam ongiltamjam. 5 Coo sicvisay ayitsayolhma lhalhma anco naysicsa sictamjaycam as nalhpop —alhta aptomjac. 6 Natamin appamejitquiscama alhta Jesús apquilpotsam apyamanong nalhpop. Apquillanac alhta yelpa apyamanong. Apquiltilhnasamquic alhta apataoc as enlhit. 7 Aptomjac alhta Jesús apcanya: —Ingva, iyapasquim yingmin poncalhva acvisay Siloé, ningiltimem nincoo “Apcapajasomacpilha” —alhta aptomjac. Apyasquic alhta as enlhit. Apyapascacmec alhta yingmin. Yejemoc alhta apvitaclho olhma aptajingveclho. 8 Yejemoc alhta apquilpamejitsacpo apnaymacoc apquiltomja apquilvitaycamco apquilanjingvoyam: —¿Jave ya enlhit apquilanjingvoyam alhta mataa? —alhta apquiltomjac. 9 Poc alhta apquiltomjac mataa: —Calha —alhta apquiltomjac. Poc alhta apquiltomjac: —Jave lhaja, apmo lhaja —alhta apquiltomjac. Yejemoc alhta aplhenacpo apanco: —Coo nac, apquillhena nac lha —alhta aptomjac. 10 Apquiltomjac alhta apquilanya enlhitaoc: —¿Jalhco actomja altamilaclho nac apataoc? —alhta apquiltomjac. 11 Apcatingmavoc alhta enlhit: —Jesús lhac apvisay enlhit aptomja setamilquisquiyam. Yelpa lhac aptomja seltilhnascasamco ajataoc. Aptomjac lhac seyanya: Ingva, iyapasquim yingmin poncalhva Siloé —lhac aptomjac. Acyasquic lhac coo. Acyapascacmec lhac yingmin. Yejemoc lhac sicvitaclho olhma —alhta aptomjac. 12 Apquiltomjac alhta apquilanya: —¿Jalhcojo apyasa as enlhit? —alhta apquiltomjac. Apcatingmavoc alhta enlhit: —Lhaja, moyasamcoc coo —alhta aptomjac.
Apquilmalhnayclho fariseos enlhit aptamalviyam
13 Yejemoc alhta apquilyantamaclho apnamcaclha fariseos enlhit aptamalviyam, mepqui apataoc alhta. 14 Acnim ningnayclha alhta intomjac apquillanay yelpa Jesús, yoyam elyapitsiclha apataoc. 15 Yejemoc alhta apquililmalhnamcaa fariseos: —¿Jalhco actomja apvitaclho olhma lhip? —alhta apquiltomjac. Apcatingmavoc alhta enlhit: —Yelpa lhac eltilhnascasamcoc ajataoc. Acyapasquic lhac yingmin. Yejemoc lhac sicvitaclho olhma —alhta aptomjac. 16 Apquilatingmavoc alhta fariseos: —Jave Dios Ingyapam apcapajascama as enlhit. Am etamilcasac acnim ningnayclha —alhta apquiltomjac. Apquiltomjac alhta poc: —Meyascalhma nac as enlhit. ¿Jalhco actomja apcopvanco nac ellanac aptamjaycam sinpilapquiscama? —alhta apquiltomjac. Am alhta colhnoc moc apquilvalhoc. 17 Apquiltomjac alhta mocjam apquilanya enlhit aptamalviyam: —¿Co lhcac aptomja apcanya lhip enlhit aptomja aptamilquisquiyam apataoc? —alhta apquiltomjac. Apcatingmavoc alhta aptamalviyam: —Ayanayc coo profeta, Dios aplingascama —alhta aptomjac. 18 Apquilyascacmec alhta judíos aptimem mepqui apataoc siclho najan apvitayclho olhma quilhvo. Yejemoc alhta apquilevamcaa apyap najan aptomja aptamalviyam. 19 Apquiltomjac alhta judíos apquilanya apyap: —¿Lhip ya apquitca aso? ¿Naso ya ayenmo congne mepqui apataoc? ¿Co lha actomja apvitaclho olhma mocjam? —alhta apquiltomjac. 20 Apcatingmavoc alhta apyap najan inquin: —Ningyasamcoc nincoo aptomja nintamongvoyam. Ayenmo congne alhta aptimem mepqui apataoc. 21 Am ongilyasamcoc nincoo actomjaclha apvitaclho olhma. Am ongilyasamcoc najan enlhit aptomja aptamilquisquiyam. Elilmalhna sat quellhip. Apyimnanic aptomja, apvanquic ingyatingmojo apanco —alhta aptomjac apyap. 22 Am alhta coyacmoc elhenic apyap najan inquin. Apcacac alhta apquiltemaclha judíos. Am alhta coyeycajalhcac moc apquilvalhoc judíos. Apquililtamjoc alhta mataa elantipsic apcaneyquiclhilha moclhama enlhit aptomja aplhanma apvisay Jesús aptomja Cristo. 23 Eycaso ayinyema apyap appayvam: “Elilmalhna quellhip, apyimnanic aptomja.” 24 Yejemoc alhta apquilevamcaa mocjam enlhit aptamalviyam, mepqui apataoc alhta. Apquiltomjac alhta apquilanya: —Ipeyvacsojo sat aplhanma napato Dios Ingyapam. Ningyasamcoc nincoo, enlhit meyascalhma nac maa —alhta apquiltomjac. 25 Apcatingmavoc alhta aptamalviyam: —Nasoc lhaja meyascalhma as enlhit, paj lhaja. Moyasamcoc coo. Lhama asoc coo acyasamco. Motay olhma alhta coo, quilhvo eyca sicvitaclho olhma mocjam —alhta aptomjac. 26 Apquiltomjac alhta mocjam apquilanya: —¿Co lha aptomjaclha apquilyapitseclho apataoc? —alhta apquiltomjac. 27 Apcatingmavoc alhta aptamalviyam: —Altimnasquic lha inyicje. Am eyca eljalhnoc quellhip. ¿Apquililtamjo ya ellinga mocjam lhama? ¿Apquililtamjo ya quellhip eltimjic apquilyiploycam Jesús? —alhta aptomjac. 28 Apquilnatjavoc alhta judíos. Apquiltomjac alhta apquilanya: —Lhip eyca aptomja apyiploycam as enlhit. Nincoo eyca ningyiploycam Moisés. 29 Ningyasamcoc nincoo Dios Ingyapam aptomja appamejitquiscama ilhnic nat Moisés. Eyca mongilyasamcoc nincoo apquinyemayaclha as enlhit —alhta apquiltomjac. 30 Apcatingmavoc alhta aptamalviyam: —Pilapcasquic coo siclinga actemaclha melyascaoc quellhip apquinyemaclha as enlhit. Nasoc anco aptomja selyapitcasquiclha ajataoc —alhta aptomjac. 31 Ningyasamcoc nincoo, am ingyajalhnoc Dios Ingyapam enlhit meyascalhma appayvam. Apvamlha enlhit aptomja apquilyajayquiclho najan apyiplovquiscama apmayjayoclha, ingyeylhojoc sat Dios Ingyapam. 32 Am nic nat colngamalhcac amyaa lhalhma anco apvisay enlhit apmopvan etamilquiscomoc ayenmo congne mepqui apataoc. 33 Am alhta ancoc ingyinyemac Dios Ingyapam as enlhit, copvanquejec ellana lhama asoc —alhta aptomjac. 34 Apquiltomjac alhta mocjam apquilanya: —Ayenmo congne meyascalhma nac lhip. ¿Apquiltamjo ya lhquip jingillhicmocsic nincoo? —alhta apquiltomjac. Aptipsacpec alhta enlhit aptamalviyam.
Cotay olhma apquilvalhoc enlhit
35 Aplingangvocmec alhta amyaa Jesús aptipsomap mepqui apataoc aptamalviyam alhta. Lhama alhta aptajanyaclho Jesús. Aptomjac alhta apcanya: —¿Am ya lhquip eyascacmoc Dios Apquitca? —alhta aptomjac Jesús. 36 Apcatingmavoc alhta enlhit: —Visqui, ¿soc enlhit aplhena nac lha? Moyascamejec sat coo —alhta aptomjac. 37 Aptomjac alhta Jesús: —Apvitac alhta inyicje lhip. Coo nac sicvisay Dios Apquitca sicpamejitsa lhac lhip —alhta aptomjac. 38 Apcatingmavoc alhta enlhit: —Visqui, moyascacmoc coo —alhta aptomjac. Yejemoc alhta apquilticlha aptapnaoc apquinmamcaclha Jesús. 39 Aptomjac alhta Jesús apquillhicmosa amyaa: —Acvaac coo as nalhpop, yoyam olyicpilcojo apquiltemaclha enlhit. Yoyam elviticlha olhma enlhit mepqui apataoc. Yoyam etniclhac mepqui apataoc enlhit apvitay olhma —alhta aptomjac. 40 Apquillingac alhta appayvam napocja fariseos apcanaycam maa. Apquiltomjac alhta apquilanya Jesús: —¿Nincoo ya najan mepqui ingataoc? —alhta apquiltomjac. 41 Apcatingmavoc alhta Jesús: —Apquiltimec lhac ancoc ellhenic quellhip: Mepqui ingataoc nincoo, melsilhnanacpejec sat quellhip. Apquiltomjac lhac quellhip: Ingataoc innac nincoo. Naso, elsilhnanacpoc sat quellhip —alhta aptomjac.
Apyitquiscama Jesús nipquesic aplhancoc
1 Actomjac coo silanya quellhip: Naso, am sat ancoc etalhningvoctac enlhit atong nipquesic aplhancoc. Apcaplhinquic sat ancoc apjalhtam, eyca as aptomja apminyilhma. 2 Aptalhningvoctac sat ancoc enlhit atong nipquesic aplhancoc, eyca as aptomja apquilancam nipquesic. 3 Apvoctac sat ancoc apquilancam nipquesic, yejemoc sat ellicsic aptamilquiscama atong. Apquiljalhnoc apnatoscama actemaclha apquevoycam apvitip. Apquiltimec mataa apvisay moclhama apnatoscama. Apnalaclhec mataa apnatoscama tap apjalhtam. 4 Apquilantipcasquic sat ancoc aplhamoclhojo apnatoscama, apquinimcasquic mataa amamyi, yoyam enaliclha. Apquilyiplovquic mataa apnatoscama, ayinyemaclha apquilyicpilcoc actemaclha apquevoycam apvitip. 5 Melyiplovejec mataa cotnaja inlhojo apvitip. Elinyajamcoc sat mataa, ayinyemaclha am elyicpilcac actemaclha apquevoycam cotnaja apvitip —alhta aptomjac Jesús. 6 Apquiltimnasam alhta Jesús actemaclha apyitquiscama. Am alhta elyasamcoc enlhitaoc actomjaclha aplhanma Jesús.
Jesús aptomja apquilancam nipquesic aptamalma
7 Yejemoc alhta apquiltimnasamcaa mocjam Jesús: —Actomjac coo silanya quellhip: Coo sictimem malha nipquesic aplhancoc atong. 8 Apquilvoy apquilmamyi aplhamoclhojo apquiltomja apquilminyilhma. Am eljalhnoc mataa apquilevoycam. 9 Coo sictimem atong. Aptalhningvaac sat ancoc enlhit, evomsacpoc sat tap. Etnejic sat enlhit malha nipquesic. Etalhningvotac sat aplhancoc najan etyapvoclhac sat mataa. Etangvomoc sat mataa aptom. 10 ‘Apvoctac sat ancoc apminyilhma apquiltamjoc eminyilhic najan elnapoc najan enatovacsic nipquesic. Acvaac coo, yoyam colhic acyimnatem apnenyaoc enlhit, yoyam coyangvomoc acyimnatem apnenyaoc. 11 Coo sictimem apquilancam nipquesic aptamalma. Apyinyovquic apanco acyimnatem apnenyic apquilancam nipquesic aptamalma acyanmongam apnatoscama nipquesic. 12 Apnec poc apquilancam nipquesic cotnaja apvitip. Cotnaja apnatoscama nipquesic. Apvitac sat ancoc acvaa asoc navjac aclom, quilhvoc sat eyinyoc nipquesic, ingyinyejic sat. Ayinyemaclha jave apquilancam nipquesic apanco. Jave apnatoscama nipquesic. Natamin colnapoc sat asoc navjac aclom, colhpansic sat nipquesic. 13 Apquinyec anco cotnaja apvitip. Am etamilcasac mocjam nipquesic, ayinyemaclha metnaja quilancam nipquesic apanco. 14 -15 Coo sictimem apquilancam nipquesic aptamalma. Eyicpilcoc coo Tata, acyicpilcoc coo lha coo Tata. Acno coo lha, acyicpilcoc coo sicnatoscama. Elyicpilcoc coo lha sicnatoscama. Pac oyinyoc acyimnatem enquenyic acyanmongam sicnatoscama. 16 Apquilyancac mocjam poc nipquesic. Jave apquilyanca nac aso congne apjalhtam. Incaymalhquic onalovsingvoclha nipquesic. Elilyejiclhojoc sat sicpayvam. Acvamlha lhama sat cotniclha apquilyinatamaclha. Apvamlha pac lhama sat etnejic apquilancam nipquesic. 17 ‘Eyasicjavoc coo Tata, ayinyemaclha sicyinyova sicyimnatem, yoyam omiclhac sat mocjam. 18 Mejeyinyovsejec coo sicyimnatem enlhit, eyca sicyamasma ajanco sicyimnatem. Emcasquic coo sicmovan coo Tata. Evanquic oyinyoc sicyimnatem. Evanquic najan omiclhac mocjam sicyimnatem. Eycaso ayinyema coo Tata seyanya otnejic —alhta aptomjac Jesús. 19 Lhama alhta apquillinga enlhitaoc Jesús appayvam. Apquilnatjavoc alhta napocja. 20 Apquiltomjac alhta apquilpayvam aplhamoclhojo enlhit: —Meyascamcolhma nac as enlhit, ayanem nac. Noelaylhojo nasa appayvam —alhta apquiltomjac apquilpamesma. 21 Apquiltomjac alhta poc enlhitaoc: —Am cotnemac appayvam enlhit meyascamcolhma actema nac lha. ¿Avanqui ya somquic quilyicjamo colyapitsiclha apataoc enlhit mepqui apataoc? —alhta apquiltomjac.
Aptanovmap Jesús nipyesicsa judíos
22 Apquiltomjacpec alhta caya dedicación tingma Jerusalén, ningiltimem “apquilmalhnesquiscama Ingyapam tingma apponquinomap.” Eyquey alhta intomjac (piyam alhta). 23 Aptiyasam alhta Jesús congne tingma apvisay Salomón. 24 Apvocjingvoctac alhta judíos apquinmamcaclha Jesús. Apquiltomjac alhta apquilanya: —¿Soctomja apquilquitamsa nac ingvalhoc? Lhip ya anco Cristo, jingiltimnas siclho nincoo. Noyilhacpojo nasa lhip —alhta apquiltomjac. 25 Apcatingmavoc alhta Jesús: —Altimnasquic alhta inyicje sicvisay. Apquilyascacmec alhta quellhip. Actamjam coo ayinyema apvisay coo Tata. Coo sictamjaycam actomja acyascasingvoyam sicvisay. 26 Apquilyascacme eyca quellhip, ayinyemaclha jave quellhip nipquesic apquiltomja sicnatoscama. 27 Apquiljalhnoc mataa sicnatoscama nipquesic actemaclha siyevoycam. Alyicpilcoc coo sicnatoscama. Elyiplovquic mataa coo sicnatoscama. 28 Olmesic sat acyimnatem apnenyaoc cotmongvoycamlha nelha. Melnatovasacpejec sat mataa. Acmiyovquic coo sicnatoscama. Copvanquejec enlhit jelnatamoc sicnatoscama. 29 Apmeyjec coo Tata aptomja selmescama sicnatoscama, am elhnoc aplhamoclhojo enlhit. Copvanquejec enlhit elnatamoc, ayinyemaclha apquilmiyovquic coo Tata sicnatoscama. 30 Inlhama nincoo Tata najan coo —alhta aptomjac. 31 Yejemoc alhta apquilma mataymong judíos. Apquililtamjoc alhta elajic Jesús. 32 Aptomjac alhta Jesús apquilanya judíos: —Allhicmosqui inyicje quellhip aclhamoclhojo sictamjaycam altamila alinyema coo Tata. ¿Soctomja apquililtamjo nac jelajic? —alhta aptomjac. 33 Apquilatingmavoc alhta judíos: —Am ongiltamjoc ongilajic lhip actamila inlhojo aptamjaycam. Eyca ayinyemaclha aptipsamcaa lhip apvisay Dios Ingyapam. Enlhit apanco nac lhip, aptimesacpo inyicje apanco Dios —alhta apquiltomjac. 34 Aptomjac alhta Jesús apquilanya: —Yitnec quellhip singanamaclha actalhesomalhca actemaclha aplhanma ilhnic nat Dios Ingyapam: “Quellhip nac apquiltomja diosaoc” —nic nat aptomjac. 35 Ningyasamcoc nincoo actemaclha Dios appayvam actalhesomalhca. Mongvanquejec ontimesquisic acmovan amyaa. Apquiltomjacpec nic nat ancoc enlhitaoc apquilvisay diosaoc ingilyap apquiltomja apquiljalhenmo Dios appayvam. 36 ¿Soctomja apquilanya nac quellhip otipsic coo apvisay Dios Ingyapam? ¿Inlhoyqui laa siclhena lhac: Coo sictimem Dios Apquitca? Eponquincasquic coo Tata. Eyapajasquic coo as nalhpop. 37 Am sat ancoc ollanac coo Tata aptamjaycam, jelyasquim sat coo. 38 Allanac sat ancoc coo Tata aptamjaycam naysicsa selyasquiyam quellhip, noelyasquim nasa sictamjaycam coo. Yoyam elyicpilcangvomoc quellhip, yoyam najan melyascamejec quellhip, aptomja seyipitcayo coo Tata najan sictomja sicyipitcayo coo Tata —alhta aptomjac. 39 Apquililtamjoc alhta judíos elmoc mocjam Jesús. Apquilpoctacmec alhta. 40 Apmiyaclhec alhta Jesús tap vatsam Jordán. Apnaclhec alhta maa apyapascascamcolha alhta siclho yingmin Juan. 41 Apquilvoclhec alhta aplhamoclhojo enlhit apnaclha Jesús. Apquiltomjac alhta apquilanya: —Am alhta ellanac Juan aptamjaycam sinpilapquiscama actemaclha monquinatquiscama. Nasoc anco aplhanma mataa Juan as enlhit apvisay Jesús —alhta apquiltomjac. 42 Am alhta elyascacmoc aplhamoclhojo enlhit apnaycam maa.
Apquitsepma Lázaro
1 Ningmasquem alhta intomjac lhama enlhit apvisay Lázaro. Tingma Betania alhta tingma pac. Ayaoclha alhta María najan inyalho Marta. 2 Eycaso quilvana acvisay María, actomja ayatsisquiscama alhta asoc masis apmancoc Visqui ingac. Inlicasquic alhta najan naváyc ava apmancoc. Ningmasquem alhta intomjac inyalhing Lázaro. 3 Inquilapajasquic alhta amyaa Lázaro apquilyalho, yoyam colhic altimnasa Jesús: —Visqui, ningmasquem lhac intomjac lhip aptimem poc —alhta intomjac amyaa apcanyacpo. 4 Lhama alhta aplinga Jesús, aptomja apquilanya: —Jave ningmasquem, yoyam cajic as enlhit. Eyca yoyam cotalhcac sat Dios Ingyapam gloria actemaclha apyimtalhnamo. Eyca as ningmasquem ayinyema, yoyam colhic ayaco Dios Apquitca —alhta aptomjac. 5 Apcasicjavoc alhta Jesús Marta najan inyalhing najan Lázaro. 6 Lhama alhta aplinga Jesús amyaa actomja ningmasquem Lázaro. Am alhta epecjesam etyaningvoclhojo. Apnaclhec alhta mocjam anit acnim. 7 Aptomjac alhta Jesús apquilanya apquiltamsoycaoc: —Noc, ongilmiyaclha mocjam yoclhilhma Judea —alhta aptomjac. 8 Apquilatingmavoc alhta apquiltamsoycaoc: —Visqui, apquililtamjoc alhta judíos elajic lhip. ¿Apquiltamjo ya lhquip emyaclha mocjam maa? —alhta apquiltomjac. 9 Aptomjac alhta Jesús apquilanya: —Yitnec doce horas ayenmo actiyapma acnim acvocmo actalhna acnim. Metlapmejec enlhit aptomja aptiyascam acnim anco. Ayinyemaclha yitnec ayitsasquiscama olhma as nalhpop. 10 Etlapmoc sat enlhit aptomja aptiyascam alhtaa. Ayinyemaclha incaymalhquic ayitsasquiscama olhma —alhta aptomjac. 11 Aptomjac alhta mocjam Jesús: —Aptinquic nintimem ingmoc Lázaro. Pac otyaningvoclhojo, yoyam olhaticjacsic aptenaclha —alhta aptomjac. 12 Apquiltomjac alhta apquiltamsoycaoc apquilanya Jesús: —Visqui, aptinquic lhac ancoc Lázaro, etamalvomoc sat —alhta apquiltomjac. 13 Apquitsepma alhta aplhena inyicje Jesús Lázaro. Apquilanayquic alhta apquiltamsoycaoc elhenac actemaclha nintiyanma. 14 Yejemoc alhta appeyvescasiclho appayvam Jesús: —Apquitsepquic alhta Lázaro —alhta aptomjac. 15 Am inyicje olhnac apquitsepaclha. Eyca ayitsovasoc coo, ayinyemaclha aclhena mataa evalhoc quellhip, yoyam eltimjic quellhip melyasquiyam. Noc, ontiyaningvoclhojo —alhta aptomjac. 16 Apnec alhta Tomás, moc apvisay Gemelo, ningiltimem Apcanit aptomja Jesús apquiltamescama. Aptomjac alhta Tomás apquilanya apnaymacoc apquiltamsoycaoc: —Noc, ongimiyaclha nincoo lha. Ongilitsapojoc sat lhama Lázaro —alhta aptomjac.
Jesús apvisay ningnalhaticjangviyam najan acyimnatem ingnenyic
17 Lhama alhta apvoclho Jesús apquitsepmaclha Lázaro. Aplingac alhta amyaa acvocmo cuatro acnim apcatongnomap. 18 Ningatoc alhta tingma Jerusalén apyitnaclha tingma Betania, malha dos kilómetros y medio. 19 Apquilvoctac alhta aplhamoclhojo judíos tingma ac Marta najan María. Apquililtamjoc alhta elpayesiclhac avalhoc quilvanaa. Ayinyemaclha apquitsepquic alhta inquilyalhing. 20 Lhama alhta aclinga amyaa Marta apquilhyacmo Jesús. Yejemoc alhta actepa alamyilhamco. Innaclhec alhta María congne tingma ac. 21 Intomjac alhta Marta ayanya Jesús: —Visqui, apnec alhta ancoc lhip asi, mengyitsepejec alhta eyalhing. 22 Acyasamcoc coo, apquilmalhnaquic sat ancoc lhip Dios Ingyapam, elhcac sat asoc apquilmalhnaycam —alhta intomjac. 23 Apcatingmavoc alhta Jesús: —Elhaticjangvomoc sat mocjam lhiya inyalhing —alhta aptomjac. 24 Intomjac alhta Marta: —Naso, acyasamcoc coo. Elhaticjangvomoc sat eyalhing acvocmo sat ningnalhaticjangvoycamlha actamongvomlha nelha acnim —alhta intomjac. 25 Apcatingmavoc alhta Jesús: —Coo sictimem siclhaticjasquiyam najan sicyimnatescama apnenyaoc enlhitaoc. Apquitsepquic sat ancoc enlhit aptomja mejeyasquiyam coo, coyimnavomoc sat apnenyic. 26 Mengyitsepejec sat mataa enlhit aptiyascam mocjam aptomja mejeyasquiyam coo. ¿Am ya coyascacmoc lhiya? —alhta aptomjac. 27 Intomjac alhta Marta: —Eje, Visqui. Moyascacmoc coo lhip aptomja Cristo Dios Apquitca, yoyam evac as nalhpop —alhta intomjac.
Jesús apvinama apcatongnomacpilha Lázaro
28 Natamin acpamejitquiscama alhta Jesús actajavo mocjam Marta. Inyilhalhcoc alhta altimnasquiclho inyalhing María. Intomjac alhta ayanya: —María, apvoctac lhac Visqui ingac. Lhiya lhac apquiltamjoc eta —alhta intomjac. 29 Lhama alhta aclinga amyaa María. Quilhvoc alhta inquinmaclhac netin, acyoclho apnaclha Jesús. 30 Am alhta evoctac mocjam Jesús tingma. Apnec alhta mocjam tap tingma actajanyaclha alhta Marta. 31 Apnam alhta judíos tingma ac, yoyam eltamilquiscomoc avalhoc. Pilapcasquic alhta apquilvita ayinmaclho netin actepa. Apquilyiplaclhec alhta judíos. Apquilanayquic alhta, yoyam cotyaningvoclho María tacjalhop, yoyam coliclhangvom. 32 Yejemoc alhta acvoclho María apquinmamcaclha Jesús. Inquilticlhiquic alhta atapnaoc nalhpop. Intomjac alhta María ayanya Jesús: —Visqui, apnec alhta ancoc lhip aso, mengyitsepejec alhta eyalhing —alhta intomjac. 33 Lhama alhta apvita Jesús acvinama María. Apyipcalhquic alhta najan judíos allhalhmaa. Intiyacmec alhta apvalhoc Jesús, invinec alhta apvalhoc. 34 Aptomjac alhta Jesús apquilanya: —¿Co lha acpayjo apcatongnomacpilha? —alhta aptomjac. Apquilatingmavoc alhta: —Visqui, ityaningvomjo —alhta apquiltomjac. 35 Apvinec alhta Jesús. 36 Apquiltomjac alhta judíos: —Quip elanojo, avanjec alhta apcasicjayo lha —alhta apquiltomjac. 37 Apquiltomjac alhta napocja enlhit: —Apquilyapitseclhec alhta apataoc mepqui apataoc. ¿Am ya copvanac alhta Jesús etnesquisic mengyitsepma Lázaro? —alhta apquiltomjac.
Aplhaticjangviyam Lázaro
38 Invinec alhta mocjam apvalhoc Jesús apvocmo tacjalhop. Avalhoc mataymong alhta apquilatongnomacpilha. Mataymong acyiviy alhta mayapma atong. 39 Aptomjac alhta Jesús apquilanya enlhitaoc: —Ellic siclho mataymong mayapma atong —alhta aptomjac. Apyalho niptamin acvisay Marta. Intomjac alhta ayanya Jesús: —Visqui, aptajapquic lhaja. Cuatro acnim intomjac apquitsepma —alhta intomjac. 40 Apcatingmavoc alhta Jesús: —Nocolvonquim nasa sictomjaclha alhta siyanya: Am sat ancoc coyascacmoc lhiya, cotac sat Dios gloria actemaclha apyimtalhnamo —alhta aptomjac. 41 Yejemoc alhta apquillica mataymong. Apsicjaclho alhta netin Jesús. Aptomjac alhta apquilmalhnancama Ingyapam: —Lhip Tata. Gracias actomjac coo, ayinyemaclha apjalhnoc lhip silmalhnancama. 42 Acyasamcoc coo, apjalhnoc mataa lhip silmalhnancama. Acpamejitcasquic coo lhip, yoyam melyascomoc as enlhitaoc nac jay, aptomja lhip seyapajascama coo —alhta aptomjac. 43 Yejemoc alhta apyimnatesa appayvam. Aptomjac alhta Jesús: —Lázaro, ityip —alhta aptomjac. 44 Yejemoc alhta aptepa tacjalhop Lázaro, enlhit apquitsepma alhta. Yiplovcoc alhta apmeoc najan apmancoc apava macpilhtetem. Apava napocja alhta macpilhtetem napaat. Aptomjac alhta Jesús apquilanya: —Elliquis apava, elyamyiclha. Elhong sat apác lha —alhta aptomjac.
Apquilpamejitsomap judíos, yoyam elmoc Jesús
45 Am alhta elyascacmoc aplhamoclhojo judíos apvisay Jesús. Apquiltomja alhta apquilvoyam María tingma ac. Apquilvitamcoc alhta actemaclha aptamjaycam Jesús. 46 Apquilyasquic alhta napocja judíos apnamcaclha fariseos. Apquilyilhacpoc alhta apquiltimnasquiclho acvisay aptamjaycam Jesús. 47 Yejemoc alhta apcaneclho fariseos najan apquilimja apmamyi sacerdotes, yoyam elpamejitsacpoc apquilviscaa apquilpamejitsomap. Apquiltomjac alhta: —¿Jalhco sat ontimjic? Apquillanac mataa aptamjaycam sinpilapquiscama as enlhit. 48 Am sat ancoc ontanovascasac aptemaclha as enlhit, elhamac sat apquiltimem melyasquiyam enlhitaoc. Elvac sat najan apquilviscaa co Roma. Elnatovacsic sat tingma (apponquinomap) ingac najan aplhamoclhojo ingnaymacoc. 49 Apnec alhta nipyesicsa as año nac jay lhama apquimja apmamyi sacerdote apvisay Caifás. Aptomjac alhta Caifás apquilanya enlhit: —Paj lhama asoc apquilyascamco quellhip. 50 Am colhenac apquilvalhoc quellhip. Intasi nac ingyitsapoc lhama enlhit acyanmongam apnaymacoc, am colhno yoyam elnatovasacpoc aplhamoclhojo ingnaymacoc —alhta aptomjac. 51 Jave alhta aplhanma apanco Caifás. Eyca ayinyema Dios Ingyapam aptimesquiscama, yoyam elhenic as amyaa. Ayinyemaclha Caifás aptomja alhta apquimja apmamyi sacerdote as año nac jay. Aplhenquic alhta, yoyam ingyitsapoc Jesús acyanmongam enlhitaoc. 52 Jave acvamlha acyanmongam enlhitaoc judíos. Eyca najan yoyam ingyansiclhac Jesús aplhamoclhojo Dios apquitquic apquilhpaneycam lhalhma anco. 53 Am alhta coyeycajalhcac apquilvalhoc judíos as acnim nac jay, yoyam elajic Jesús. 54 Inmasquec alhta aptiyascam Jesús nipyesicsa judíos, ayinyemaclha apquililtamjoc alhta elajic. Aptipquic alhta yoclhilhma Judea. Apmiyaclhec alhta acpayjo yoclhilhma actamopeycaoc. Apnaclhec alhta lhama apquiltamsoycaoc tingma Efraín. 55 Camquitvocmec alhta pascua caya apquilyeycajaycaoc, judíos caya apancaoc. Yicpintama caya alhta apquilmiyaclho aplhamoclhojo enlhitaoc tingma Jerusalén, yoyam elalhnasiclha apyimpeoc (actemaclha comasis apyimpeoc). 56 Apquitamacpec alhta Jesús. Apquilpamejitsacpec alhta enlhit apnaycam congne tingma apponquinomap: —¿Evota ya sat Jesús nipyesicsa caya? ¿Jalhco apquiltomja quellhip? —alhta apquiltomjac. 57 Apquilpayesquic alhta amyaa apquilimja apmamyi sacerdotes najan fariseos. Apquiltomjac alhta apquilanya: —Apquillingac sat ancoc amyaa quellhip apnaclha Jesús, jingiltimnasquita nincoo. Ningiltamjoc ongilmoc sat Jesús —alhta apquiltomjac.
Ayatsisquiscama apmancoc Jesús lhama quilvana
1 Seis acnim alhta intomjac yicpintama eltamjacpoc pascua caya apquilyeycajaycaoc. Apmiyaclhec alhta Jesús tingma Betania. Lázaro tingma pac, aplhaticjasquiyam alhta Jesús nipyesicsa apquilmasquingvaycmo. 2 Inquillanalhquic alhta nintom, yoyam etasomoc Jesús najan maycaa. Innincanvoctac alhta Marta nintom netin mesa. Apnec alhta Lázaro nipyesicsa maycaa apnaycam nicja mesa. 3 Yejemoc alhta acsantamo María nardo ayingmenic acmasis anco, malha medio litro. Acmamnave anco nardo ayingmenic. Incatsiscasquic alhta María apmancoc Jesús. Inlicasquic alhta naváyc ava apmancoc Jesús. Inpayjeclhec alhta acpaniyam asoc masis congne tingma. 4 Apnec alhta Judas Iscariote, Simón apquitca. Aptomja apquilvisayo lhama apquiltamsoycaoc Jesús. Aptomja apcanem sat, yoyam emacpoc Jesús. Aptomjac alhta Judas Iscariote: 5 —¿Soctomja actovasa nac asoc masis? Ingvanqui inyicje ongyinyoc acyanmongam trescientos solyayem, yoyam ongilmesic acyanmongam enlhit mepqui apquilnatam —alhta aptomjac. 6 Aptime apanco alhta Judas. Am alhta colhenac apvalhoc enlhit mepqui apquilnatam. Aptamilcasquic mataa Judas solyayem acninquinomalhca. Apyilhacpoc mataa apquilma nicja solyayem. Ayinyemaclha Judas aptomja enlhit apminyilhma. 7 Aptomjac alhta Jesús apcanya: —Cotnejic ac lha. Cotnejic sat ayatsisquiscama emancoc yicpintama ongvatongnalhca. 8 Apnaycam mataa nipyesicsa quellhip enlhit mepqui apquilnatam. Coo eyca molhejec mataa nipyesicsa quellhip —alhta aptomjac.
Apquilpamejitsomap judíos, yoyam elajic Lázaro
9 Apquillingac alhta amyaa aplhamoclhojo judíos apna Jesús tingma Betania. Apquilvoctac alhta, yoyam elvita Jesús najan yoyam elvitac Lázaro. Jesús alhta aplhaticjasquiyam nipyesicsa apquilmasquingvaycmo. 10 Apquilpamejitsacpec alhta apquilimja apmamyi sacerdotes. Apquililtamjoc alhta elyipitcasiclhojo elajic Lázaro. 11 Alhta ayinyemaclha apquilmiyaclho mataa aplhamoclhojo judíos apnaclha Lázaro. Yiplovcoc alhta najan melyasquiyam Jesús.
Aptalhningvoyclha Jesús tingma Jerusalén
12 Moc acnim alhta intomjac. Apquilmiyantac alhta aplhamoclhojo enlhitaoc tingma Jerusalén. Apquililtamjoc alhta elpasmoc pascua, caya apquilyeycajaycaoc. Apquillingac alhta amyaa, yoyam najan evotac Jesús tingma. 13 Yejemoc alhta apquilyatemenamco alha ava. Apquilamyilhamquic alhta Jesús apquilpalhamamcaa: —Sas, tasic anco. Ningilayo aptomja apquilhyam aplhanma apvisay Visqui ingac. Ningilayo aptomja Israel Apvisqui apancaoc —alhta apquiltomjac apquilpamesma. 14 Apvitac alhta yamelyeyjaycoc ayitcoc Jesús. Yejemoc alhta apquinamta. Acno aclhanma Dios appayvam actalhesomalhca: 15 Noela nasa quellhip co Sión. Quip elanojo apquilhyam Apvisqui apancaoc. Yamelyeyjaycoc ayitcoc apquinamtem —nic nat intomjac appayvam. 16 Am alhta elyasamcoc siclho apquiltamsoycaoc actomjaclha as asoc. Apquilyasingvoclhoc alhta natamin aplhaticjangviyam actemaclha mayayo Jesús. Actemaclha aplhenamap nic nat Jesús acno actomjaclha alhta apquilvitay. 17 Apquillhenquic alhta enlhitaoc apvisay Jesús apquiltomja alhta apquilvitaycamco. Apquiltomjac alhta: —Aplhaticjascacmec alhta Lázaro nipyesicsa apquilmasquingvaycmo. Apcanyacpec alhta Lázaro etyapoc tacjalhop —alhta intomja amyaa aplhenacpo. 18 Apquilyasamcoc alhta enlhitaoc actemaclha Jesús aptamjaycam sinpilapquiscama. Eycaso ayinyemaclha apquilamyilhamco enlhitaoc. 19 Apquilpamejitsacpec alhta fariseos: —Quip elanojo quellhip. Mongvanquejec nincoo ongilyacsilhma. Apyasingvocmec aplhamoclhojo enlhitaoc lhalhma anco —alhta apquiltomjac.
Apcanit griegos apquilquitamsama Jesús
20 Apquilmiyaclhec alhta caya tingma Jerusalén, yoyam elpayicsojo Dios Ingyapam. Apquilpalhavocmec alhta napocja enlhit apquilvisay griegos. 21 Apquilyoclhec alhta griegos apnaclha Felipe apquinyema tingma Betsaida yoclhilhma Galilea. Apquiltomjac alhta apquilanya: —Visqui, ningiltamjoc nincoo ongvita Jesús —alhta apquiltomjac. 22 Apmiyaclhec alhta Felipe apquiltimnasquiclho Andrés. Yejemoc alhta apquilmiyaclho apcanit apquililtimnasquiclho Jesús. 23 Aptomjac alhta apquiltimnasamcaa Jesús: —Invocmec acvamlha acnim, yoyam colhic seyaco sicvisay Sictiyam Sictomja Enlhit. 24 Actomjac coo silanya quellhip: Naso, am sat ancoc ecnacpoc lhopactic motajap apactic, comascoc sat apvisay motajap apactic. Meylhejec sat mataa. Masquec sat ancoc apvisay motajap apactic, ingyictong sat. Elhamiclhac sat apyilhna. 25 Apmiyovquic sat ancoc enlhit acyimnatem apnenyic apanco, comascoc sat. Aptanovquic sat ancoc enlhit acyimnatem apnenyic apanco, colhic sat acyimnatem apnenyic cotmongvoycamlha nelha. 26 Apquiltamjoc sat ancoc enlhit jelanam coo, incaymalhquic yoyam jeyiplovjo. Jelhojoc sat lhama sicnaclha selancam coo. Colhic sat ayaco selancam coo, ayinyema coo Tata —alhta aptomjac.
Aplhanma Jesús yoyam ematong
27 ‘Aptomjac alhta mocjam Jesús: —Avanjec coo actamjaycam evalhoc. ¿Jalhco sat otnejic? ¿Pa ya ongvanic coo Tata, yoyam jevomsic tap actomjaclha quilhvo nac jay? Paj. Acvaac coo, yoyam otac actomjaclha quilhvo nac jay. 28 Tata, ingyane sat colhic ayaco lhip apvisay —alhta aptomjac. Yejemoc alhta ayinyema netin lhama appayvam: —Innec ayaco coo sicvisay, colhic sat mocjam ayaco coo sicvisay —alhta aptomjac. 29 Apquillingac alhta enlhitaoc apcanaycam maa. Apquiltomjac alhta: —Quilhtingyavocme —alhta apquiltomjac. Apquiltomjac alhta poc enlhit: —Appamejitcasquic lhac lhama ángel Dios apcasinancama —alhta apquiltomjac. 30 Apcatingmavoc alhta Jesús: —Jave coo siyanyomalhca olngac appayvam ayinyema netin. Quellhip eyca apquilanyacpec ellinga. 31 Quilhvoc olyicpilcojo apquiltemaclha enlhit lhalhma anco. Quilhvoc sat colhic actipsa avisqui ac as nalhpop. 32 Innec sat ancoc seyasiclha netin, onalaclhac sat sicnaclhilha aplhamoclhojo enlhit —alhta aptomjac. 33 Apquitsepma alhta aplhenac Jesús. Apquiltamjoc alhta eyascasingvomoc enlhitaoc actemaclha yoyam ematong. 34 Apquilatingmavoc alhta enlhitaoc: —Ninlingac nincoo actemaclha aclhanma singanamaclha Dios, yoyam cotmongvomeje nelha apma Cristo. ¿Soctomja apcanya nac lhip colhic sat acyaseclho netin apvisay Aptiyam Aptomja Enlhit? ¿Soc enlhit apvisay Aptiyam Aptomja Enlhit? —alhta apquiltomjac. 35 Aptomjac alhta Jesús apquilanya: —Am covanco apnaycamo lhama quellhip ayitsayolhma. Ayitsayolhma innac mocjam quellhip, eltiyasam sat quellhip. Lha eyqui nasa covac yatesaclhilhma. Aptiyasam sat ancoc enlhit yatescamalhma, meyasamquejec sat apyasaclha (elhnanmoc sat). 36 Ayitsayolhma innac mocjam quellhip. Noelyasquim nasa ayitsayolhma, yoyam eltimjic quellhip ayitsayolhma ayitquic —alhta aptomjac. Lhama alhta apsovja aplhanma as asoc. Aplhinquic alhta Jesús. Apyilhacpoc alhta apna.
Apquiltemaclha judíos apquilyasquiyam Jesús
37 Inlhamoc alhta aptamjaycam sinpilapquiscama apquillanay Jesús napatavo enlhitaoc. Apquilyascacmec alhta mataa enlhitaoc. 38 Incaymalhquic yoyam cotmongvomoc nelha appayvam aplhanma nic nat Isaías profeta Dios aplingascama: Visqui, ¿soc enlhit etnejic meyasquiyam amyaa ninlingascama? ¿Soc enlhit etac sat apmopvan apanco Visqui ingac? —nic nat intomjac amyaa. 39 Eyca ayinyemaclha apquiltomja alhta apquilyasquiyam enlhitaoc, acno moc apayvam aplhanma ilhnic nat Isaías profeta Dios aplingascama: 40 Inquilmec apataoc enlhitaoc ayinyema Dios Ingyapam. Apquilyimtalhnescasquic Dios Ingyapam apquilvalhoc enlhitaoc. Apquiltamjoc Dios Ingyapam, yoyam melvityeje olhma enlhit acna apataoc. Apquiltamjoc najan, yoyam colhenejec apquilvalhoc elyasingvomoc amyaa. Yoyam colhenejec apquilvalhoc enlhitaoc elyanmongsic moc apquilvalhoc, yoyam eltamalvomoc ayinyema siltamilquisquiyam —nic nat intomjac appayvam. 41 Eycaso ilhnic nat Dios appayvam aplhanma Isaías. Ayinyemaclha invitac nic nat apvanmoncama gloria actemaclha apyimtalhnamo Jesús. Aplhenacpec nic nat Jesús. 42 Am alhta elyascacmoc aplhamoclhojo judíos najan lha napocja apquilimja apmamyi. Apquilyilhacpoc alhta apquiltimem melyasquiyam. Fariseos alhta ayinyemaclha. Incacoc alhta apnenyaoc, yoyam elantipsacpoc apcaneyquiclhilha. 43 Apquilyispaquic alhta mataa mayayo ayinyema enlhit, am colhno mayayo ayinyema Dios Ingyapam.
Jesús appayvam actomja acyicpilquemo apquiltemaclha enlhitaoc
44 Apyimnatasquic alhta appayvam Jesús: —Am sat ancoc jeyascacmoc coo enlhit, meyascamejec sat najan coo Tata aptomja seyapajascama. 45 Jetac sat ancoc coo enlhit, etac sat najan aptomja seyapajascama. 46 Coo sictimem ayitsayolhma. Acvaac coo as nalhpop, yoyam melhnam yatescamalhma enlhit apquiltomja mejelyasquiyam. 47 Am sat ancoc eyiplovcasac enlhit apjalhenmo coo sicpayvam, motvacsejec sat coo. Acvaac coo as nalhpop. Am oltamjoc olnatovacsic enlhitaoc lhalhma anco. Altamjoc eyca olvomsic tap aplhamoclhojo. 48 Acvinalhquic sat ancoc coo, am sat ancoc colmac apquilvalhoc sicpayvam elnatovasacpoc sat. Coo sicpayvam ayinyemaclha acsilhnanoncama apquilyasquiyam. (Etvasacpoc sat actamongvomlha nelha acnim.) 49 Jave siltimnaycam ajanco. Coo Tata aptomja seyapajascama, yoyam oltimnam najan olhicmocsic enlhitaoc. 50 Acyasamcoc coo apcanamaclha coo Tata. Apquiltemoc cotmongvomeje nelha acyimnatem ingnenyic. Acyiplovcasquic coo quilhvo siltimnaycam nac aso, actemaclha seyanama coo Tata, yoyam otnejic —alhta aptomjac.
Apliquiscama yingmin apmancaoc apquiltamsoycaoc Jesús
1 Invocmec alhta acnim yicpintama pascua caya apquilyeycajaycaoc. Apyasamcoc alhta Jesús acvocmo acnim, yoyam elvaticsic aptiyascam as nalhpop, yoyam eyoclhac sat mocjam apnaclha Apyap. Apquilasicjavoc alhta mataa apnaymacoc apnaycam as nalhpop. Inyangvocmec alhta Jesús apquilasicjayo acvocmo nelha aptiyascam as nalhpop. 2 -4 Intalhnec alhta yavey diablo apvalhoc Judas, Simón apquitca, yoyam etnejic apcanem sat emacpoc Jesús. Apyasamcoc alhta Jesús aptomja apquinyemay Dios Ingyapam najan yoyam etajojoc mocjam apnaclha Dios Ingyapam. Apmesquic alhta Apyap aclhamoclhojo asoc, yoyam etnejic apyimtalhnamo Jesús. Naysicsa aptoycaoc alhta intomjac. Apquinmaclhec alhta netin Jesús. Apyinyovquic alhta apcalomap. Appilhtitquic alhta niplhit toalla apava ninliclama ingmeoc. 5 Yejemoc alhta apyatma yingmin asoc payjem. Aplicasquic alhta yingmin apmancaoc apquiltamsoycaoc. Aplicasquic alhta apmancaoc toalla apava ninliclama ingmeoc appilhtetem niplhit. 6 Yejemoc alhta apvoclho Jesús apnaclha Simón Pedro, yoyam elcoc yingmin apmancoc. Aptomjac alhta Pedro apcanya Jesús: —Visqui, ¿lhip ya jelquisic yingmin emancoc? —alhta aptomjac. 7 Apcatingmavoc alhta Jesús: —Am eyasamcoc lhip quilhvo sictomjaclha. Yejemoc sat eyasamcojo —alhta aptomjac. 8 Aptomjac alhta mocjam Pedro: —Visqui, mejelicsejec sat mataa yingmin emancoc —alhta aptomjac. Apcatingmavoc alhta Jesús: —Am sat ancoc olcasac yingmin lhip, copvanquejec jepasmoc coo —alhta aptomjac. 9 Aptomjac alhta Pedro apcanya Jesús: —Visqui, jave acvamlha emancoc. Jeliquis sat najan emeoc najan epatic —alhta aptomjac. 10 Aptomjac alhta apquillhicmosa Jesús: —Enlhit apyapascasomap yingmin aptomja apcalhnayo apyovoclhojo. Incaymalhquic elcoc yingmin acvamlha apmancoc. Alalhnayo apyimpeoc quellhip, eyca jave apquilanomacpo —alhta aptomjac. 11 Apyasamcoc alhta Jesús lhama enlhit, yoyam etnejic apcanem yoyam emacpoc. Alhta ayinyemaclha aptomja appayvam: “Jave apquilanomacpo alalhnayo apyimpeoc” —alhta aptomjac. 12 Lhama alhta appenesa Jesús apliquiscama yingmin apmancaoc. Apcalacpec alhta mocjam apcalomap. Apnaclhec alhta mocjam nicja mesa. Aptomjac alhta Jesús apquilanya: —¿Apquilyasamco ya quellhip sictomjaclha lhac? 13 Inyicje apquiltomjac mataa quellhip sellhena: Singillhicmoscama, moc najan: Visqui. Inpeyvoc sellhena quellhip, coo nac sicvisay. 14 Coo sictimem Visqui najan Sillhicmoscama. Aclicasquic lhac yingmin apmancaoc quellhip. Elvajanaoc sat quellhip lha. Elliquis sat quellhip lha yingmin apmancaoc moclhama nipyesicsa quellhip. 15 Elvajanaoc sat quellhip sictomjaclha lhac. Allhicmosquic lhac quellhip actemaclha, yoyam elvajanamcoc. 16 Actomjac coo silanya quellhip: Naso, apyimtalhnamo nac apvisqui, am elhno apquilancam. Apyimtalhnamo najan apcapajascama, am elhno apcapajasomap. 17 Apquilyasamcoc sat ancoc quellhip, elyiplovcasojo actema nac jay. Copayjiclhac sat apquilvalhoc quellhip. 18 ‘Am olhenac quellhip apquilanomacpo. Acyasamcoc coo apquiltomja silyacyesaycam nipyesicsa quellhip. Incaymalhquic cotmongvomoc nelha actemaclha Dios appayvam actalhesomalhca: Enlhit sictomo lhama nintom aptomja setanongvoyam, etnejic sat malha cotnaja emoc. 19 Eycaso siltimnascama quellhip yicpintama covac as asoc. Invaac sat ancoc, elvitac sat quellhip. Altamjoc coo, yoyam elinlhanmojoc quellhip melyasquiyam sictomja Cristo coo. 20 Actomjac co silanya quellhip: Naso, apquilmec sat ancoc tacja quellhip enlhit apcapajasomap, coo siyapajascama, acno selmam tacja coo lha. Jelmec sat ancoc tacja coo, acno apquilmam tacja coo Tata aptomja seyapajascama —alhta aptomjac.
Aplhanma Jesús apvisay Judas aptomja apcanem emacpoc
21 Lhama alhta apsovja apquiltimnaycam Jesús. Inpilhyinimquic alhta apvalhoc. Aptomjac alhta Jesús apquilanya apquiltamsoycaoc: —Actomjac coo silanya quellhip: Naso, lhama nipyesicsa quellhip etnejic sat apcanem omalhca —alhta aptomjac. 22 Apquilanoc alhta poc apquiltamsoycaoc. Am alhta elyasamcoc aptomja aplhenamap. 23 Apyipitcavoc alhta lhama apquiltamescama aptomja apcasicjayo. Aptovcamcoc alhta lhama. 24 Apyilhacpoc alhta Simón Pedro apquevamcaa as apquiltamescama: Ilmalhna sat Jesús, ¿soc enlhit aplhena yi? —alhta aptomjac. 25 Yejemoc alhta apyilhacpo apquiltamescama. Apyipitcangvocmo alhta apquilmalhna: —Visqui, ¿soc lha enlhit qui? —alhta aptomjac. 26 Apcatingmavoc alhta Jesús: —Otnajamcoc sat quilpasmongam napocja. Omquesic sat enlhit siclhanma lhac —alhta aptomjac. Yejemoc alhta aptamjamco quilpasmongam napocja. Apmesquic alhta Jesús, yoyam etovc Judas Iscariote, Simón apquitca. 27 Lhama alhta apma quilpasmongam Judas. Yejemoc alhta actalhna apvalhoc yavey Satanás. Aptomjac alhta Jesús apcanya Judas: —Ipecjicsojo sat elana actomjaclha aclhanma apvalhoc —alhta aptomjac. 28 Am alhta elyasamcoc apquiltamsoycaoc actomjaclha appayvam Jesús. 29 Judas aptomja alhta aptamilquiscama solyayem. Apquilanayquic alhta napocja apquiltamsoycaoc, Jesús sat ingyapajacsic Judas yoyam eyanmongsic nintom. Apquililtamjoc alhta cotovalhca caya. Apquilanayquic alhta poc, Jesús ingyapajasac Judas, yoyam elmesic solyayem enlhit mepqui apquilnatam. 30 Aptovquic alhta Judas quilpasmongam apmescama Jesús. Yejemoc alhta aptepa. Alhtaa alhta intomjac.
Singanamaclha alhnancoc
31 Lhama alhta apvonquepa Judas. Aptomjac alhta Jesús apquilanya apquiltamsoycaoc: —Quilhvoc sat cotalhca actemaclha sicyimtalhnamo sicvisay Sictiyam Sictomja Enlhit. Cotalhcac sat actemaclha apyimtalhnamo Dios Ingyapam ayinyema siclhanma coo. 32 Invitalhquic sat ancoc actemaclha apyimtalhnamo Dios Ingyapam ayinyema siclhanma coo sicvisay Sictiyam Sictomja Enlhit. Natamin cotalhcac sat actemaclha sicyimtalhnamo sicvisay Apquitca ayinyema Dios Ingyapam. Quilhvoc sat etasquisic actemaclha sicyimtalhnamo. 33 Quellhip apquiltomja malha eyitquic. Acyavataclhojo mocjam sicnaycamo lhama quellhip. Jelquitmoc sat quellhip. Innoc siltimnasa alhta judíos, sictomjaclha nac silanya quellhip lha: Melvomejec sat quellhip sicnaclhilha. 34 Pac olmesic quellhip singanamaclha alhnancoc: Elasicjacpojo nipyesicsa quellhip. Altamjoc coo yoyam elasicjacpojo nipyesicsa quellhip, acno coo silasicjayo mataa quellhip. 35 Apquilasicjacpoc sat ancoc nipyesicsa quellhip, melquinatsejec sat enlhit lhalhma anco apquiltomja quellhip siltamsoycaoc —alhta aptomjac Jesús.
Jesús aplhanma etnejic apyinimquiscama Pedro
36 Aptomjac alhta Pedro apcanya Jesús: —Visqui, ¿jalhcojo sat eyacsic? —alhta aptomjac. Apcatingmavoc alhta Jesús: —Copvanquejec lhip jeyiplaclha quilhvo nac jay sicmiyaclhilha. Jeyimjaoclhac sat eyca —alhta aptomjac. 37 Aptomjac alhta Pedro apcanya Jesús: —Visqui, ¿soctomja movanco nac oyiplaclha lhip quilhvo nac jay? Oyinyoc sat coo sicyimnatem acyanmongam lhip —alhta aptomjac. 38 Apcatingmavoc alhta Jesús: —¿Naso ya pa eyinyoc lhip apyimnatem seyanmongam coo? Actomjac coo siyanya lhip: Naso, yicpintama copayo tataa, natqui sat etnejic lhip: Moyasamcoc coo as enlhit —alhta aptomjac
Jesús aptomja malha amay acyascama Ingyapam
1 Aptomjac alhta mocjam Jesús: —Nocoltamjam nasa apquilvalhoc. Noelyasquim nasa Dios Ingyapam. Nojelyasquim coo lha. 2 Avanje olhma coo Tata tingma pac. Am nat ancoc coyova olhma coo Tata tingma, pac alhta oltimnacsic quellhip: Olaningvoclhesic sat apnaycamcaclha quellhip. 3 Alaningvoclhesquic sat ancoc apnaycamcaclha, ovotac sat mocjam. Onalaclhac sat quellhip, yoyam elhnam sat quellhip sicnaclha coo. 4 Apquilyasamcoc quellhip amay yavamlha oyacsic —alhta aptomjac. 5 Aptomjac alhta Tomás apcanya Jesús: —Visqui, mongilyasamcoc nincoo yavamlha eyacsic. ¿Jalhco sat ontimjic ongilyasamcojo amay? —alhta aptomjac. 6 Apcatingmavoc alhta Jesús: —Coo sictimem amay najan actomja nasoc anco najan acyimnatem ingnenyic. Am sat ancoc jeyotac coo enlhit, copvanquejec eyoclhac apnaclha coo Tata. 7 Elyicpilcoc alhta ancoc quellhip coo, elyicpilcojoc alhta najan coo Tata. Apquilyicpilcoc quellhip coo Tata quilhvo. Apquilvitac alhta quellhip —alhta aptomjac. 8 Aptomjac alhta Felipe apcanya Jesús: —Visqui, jinlhicmos nincoo Apyap. Lhama sat cotnejic acvamlha aclhanma ingvalhoc —alhta aptomjac. 9 Apcatingmavoc alhta Jesús: —Felipe, acvoncaclhojo inyicje sicma nipyesicsa quellhip. ¿Am ya jeyicpilcac mocjam coo? Etac alhta lhip coo, apvitac alhta najan coo Tata. ¿Soctomja aptomja nac lhip seyanya: “Jinlhicmos nincoo Apyap?” 10 ¿Apyascacme ya lhquip sictomja sicyipitcayo coo Tata najan seyipitcayo coo lha Tata? Jave sicpayvam ajanco siltimnascama mataa quellhip. Aptamjam mataa coo Tata, ayinyemaclha eyipitcavoc mataa coo. 11 Nojelyasquim nasa quellhip sictomja sicyipitcayo coo Tata najan seyipitcayo coo lha Tata. Apquilyascacmec sat ancoc quellhip sicpayvam, noelyasquim nasa apquilvita sictamjaycam —alhta aptomjac. 12 Actomjac coo silanya quellhip: Naso, am sat ancoc jeyascacmoc enlhit, elhnasojoc sat actemaclha sictamjaycam. Ellanac sat najan asoc alyiviy, am colhno aso. Ayinyemaclha omyaclhac sat apnaclha coo Tata. 13 Elmalhnaquic sat ancoc quellhip moclhama asoc naysicsa apquillhanma sicvisay, olyejiclhojoc sat coo. Yoyam colhic ayaco coo Tata ayinyema coo sicvisay Apquitca. 14 Elmalhnaquic sat ancoc quellhip asoc naysicsa apquillhanma sicvisay, olyejiclhojoc sat coo —alhta aptomjac.
Jesús aplhanma ingyapajacsic Espíritu Santo
15 ‘Aptomjac alhta mocjam Jesús: —Nasoc sat ancoc apquiltomja selasicjayo quellhip, elyiplovcasojoc sat siyanamaclha. 16 Olmalhnesquisic sat coo Tata, yoyam ingyapajacsic sat apvisay Aptamilquisquiyam Ingvalhoc, yoyam epasmoc quellhip. Moc apvisay Espíritu aptomja nasoc anco. Elhojoc sat lhama quellhip cotmongvoycamlha nelha. 17 Colapvanquejec enlhit lhalhma anco ellhovac Espíritu nac maa. Colapvanquejec elvita najan elyicpilcojo. Quellhip eyca apquilyicpilcoc, ayinyemaclha elhojoc sat mataa lhama quellhip. Elhic sat najan apquilvalhoc quellhip. 18 Meltimjic sat quellhip apquilyeyjeycam netamin. Ovotac sat mocjam, yoyam olhojoc lhama quellhip. 19 Quilhvoc sat ovonquepoc coo. Mejelviticlhejec sat mocjam enlhit lhalhma anco. Quellhip eyca jelvitac sat mataa. Colhic sat acyimnatem apnenyaoc, ayinyemaclha cayjec coo enquenyic. 20 Elyasingvomoc sat quellhip acvocmo sat acnim sictomja sicyipitcayo coo Tata. Najan lha quellhip apquiltomja selyipitcayo coo. Najan lha coo sictomja sicyipitcayo quellhip. 21 Aplingac sat ancoc najan apyiplovcasquic sat ancoc enlhit siyanamaclha coo, eyca as aptomja nasoc anco seyasicjayo. Coo Tata ingyasicjojoc sat enlhit aptomja seyasicjayo. Ongvasicjojoc sat coo mataa najan olhicmosalhcojoc sat ajanco —alhta aptomjac. 22 Aptomjac alhta Judas (jave Iscariote) apcanya Jesús: —Visqui, ¿pa ya elhicmosacpojo apanco acvamlha ningyesicsa nincoo? ¿Soctomja melhicmosacpeje apanco nipyesicsa enlhitaoc lhalhma anco? —alhta aptomjac. 23 Apcatingmavoc alhta Jesús: —Eyasicjavoc sat ancoc enlhit, eyiplovcasojoc sat sicpayvam. Ingyasicjojoc sat coo Tata. Ongnam sat lhama as enlhit, coo Tata najan coo. 24 Am sat ancoc jeyasicjac enlhit, meyiplovsejec coo sicpayvam. Jave inyicje sicpayvam ajanco amyaa apquiljalhenmo mataa quellhip. Eyca appayvam coo Tata aptomja seyapajascama. 25 ‘Altimnasqui inyicje quellhip as amyaa naysicsa sicmo lhama quellhip. 26 Evac sat Espíritu Santo, yoyam epasmoc quellhip. Coo Tata sat ingyapajacsic actemaclha aplhanma sicvisay. Elyascasingvomoc sat Espíritu Santo aclhamoclhojo asoc. Elyasingvoclhojoc sat quellhip actemaclha siltimnascama mataa quellhip. 27 ‘Altamjoc coo coltamilam apquilvalhoc netamin coo. Ellhovac sat quellhip ayinyema coo actamilaycam evalhoc. Intasi nac actamilaycam ingvalhoc ayinyema coo, am colhno ayinyema enlhit lhalhma anco. Nocoltamjam nasa apquilvalhoc, noela nasa quellhip. 28 Apquillinga inyicje siclhena lhac: Pac coo olhong. Ovotac sat mocjam nipyesicsa quellhip. Nasoc sat ancoc selasicjayo quellhip coo, coyiplovjoc sat acpayjayclha apquilvalhoc sicmiyaclho apnaclha coo Tata. Apyimtalhnamo coo Tata, molhno coo. 29 Altimnasquic lha inyicje yicpintama covac as asoc, yoyam elinlhanmojoc sat melyasquiyam quellhip apquilvita sat. 30 ‘Inmasquec quilhvo sicpamejitquiscama quellhip. Inlhingacmec quilhvo avisqui ac as nalhpop, eyca paj acmovan tecjelhit yoyam oyiplovjoc (yoyam jesilhnana). 31 Naso, covac sat as asoc. Elyasingvomoc sat enlhitaoc lhalhma anco actemaclha siyasicjayo coo Tata. Acvajanamquic coo mataa actemaclha selhicmoscama coo Tata. Elaniclha netin. Noc, ongillhong —alhta aptomjac Jesús.
Uva avjac najan actingaoc
1 Coo sictimem malha uva avjac actomja nasoc anco. Coo Tata aptomja malha aptamilquiscama uva avjac. 2 Apquilyatemenquic moclhama actingaoc coyilhnama. Apcalhnascasquic moclhama actingaoc acma acyilhna, yoyam colhamiclha acyilhna. 3 Apquilalhnayo inyicje quellhip ayinyema coo sicpayvam siltimnascama mataa quellhip. 4 Elinlhanmojo selyipitcaycam coo, acno silinlhanyacmo silyipitcaycam quellhip. Covanquejec coylhic actong mepqui avjac. Noc moc quellhip, am sat ancoc elinlhanacmoc selyipitcaycam, colhejec sat apyilhna quellhip. 5 ‘Coo sictimem uva avjac, quellhip maa actingaoc. Apquilinlhanacmec sat ancoc quellhip selyipitcaycam coo acno silyipitcaycam quellhip, colhamiclhac sat apyilhna quellhip. Colapvanquejec quellhip ellanac lhama asoc mepqui coo. 6 Am sat ancoc elinlhanacmoc quellhip selyipitcaycam coo, malha ningyamasma sat etnejic. Elhojoc sat actema nac uva actong ningyamasma yoyam coyma. Colhic sat ayansaclho, colvatnalhcac sat natilh. 7 ‘Apquilinlhanacmec sat ancoc quellhip selyipitcaycam coo, innamquic sat ancoc sicpayvam apquilvalhoc quellhip. Natamin ellhovac sat quellhip moclhama asoc selmalhnaycam coo. 8 Inlhamaclhec sat ancoc apyilhna quellhip, colhic sat ayaco coo Tata. Eltimjic sat quellhip siltamsoycaoc ajanco. 9 Alasicjavoc coo quellhip, acno coo Tata aptomja seyasicjayo coo. Elinlhanmojo quellhip actemaclha silasicjayo. 10 Apquilyiplovcasquic sat ancoc siyanamaclha quellhip, elinlhanmojoc sat actemaclha silasicjayo. Acno coo lha. Acyiplovcasquic coo mataa apcanamaclha coo Tata. Alinlhanacmec coo mataa actemaclha seyasicjayo coo Tata. 11 ‘Altimnasquic lha inyicje as asoc, yoyam elitsovacsojoc sat lhama coo. Coyangvomoc sat alpayjayclha apquilvalhoc quellhip. 12 Eycaso actomja siyanamaclha coo: Elasicjacpojo nipyesicsa quellhip, acno coo silasicjayo mataa quellhip. 13 Apyinyovquic sat ancoc enlhit acyimnatem apnenyic acyanmongam apnaymacoc, eycaso actomja acyiviy anco apcasicjayo. 14 Apquilyiplovcasquic sat ancoc siyanamaclha quellhip, oltimjic sat enaymacoc quellhip. 15 Jave quellhip selancam, ayinyemaclha am eyasamcoc mataa apquilancam yoyam ellanac apvisqui pac. Altimec coo quellhip enaymacoc, ayinyemaclha acyascasingvocmec quellhip aclhamoclhojo asoc siclingay ayinyema coo Tata. 16 Jave quellhip selyacyescama alhta coo. Coo eyca sictomja silyacyescama quellhip. Alasinaquic coo quellhip, yoyam ellhong quellhip, yoyam colhamojo apyilhna quellhip. Coytic sat mataa apyilhna quellhip. Apquililmalhnaquic sat ancoc asoc coo Tata naysicsa apquillhanma sicvisay, elmesacpoc sat quellhip. 17 Actomjac coo silanya quellhip: Elasicjacpojo nipyesicsa quellhip —alhta aptomjac.
Aptanovmap Jesús najan apnaymacoc nipyesicsa enlhit lhalhma anco
18 Apquiltanovacpec sat ancoc quellhip nipyesicsa enlhitaoc lhalhma anco, elyasamcojo sat: actanovalhquic alhta coo lha emamyi. 19 Apquilvajanamquic sat ancoc quellhip apquiltemaclha enlhit lhalhma anco, malha apquilpalhaviyam, elasicjacpojoc sat quellhip. Inmasquec apquilpalhaviyam quellhip, ayinyemaclha alyacyesquic alhta coo quellhip nipyesicsa enlhit lhalhma anco. Eycaso ayinyema apquiltanovmap quellhip nipyesicsa enlhit lhalhma anco. 20 Collhen apquilvalhoc (colyit apatic) quellhip sictomjaclha alhta silanya: “Apyimtalhnamo nac apvisqui, am elhno apquilancam.” Actovasalhquic alhta coo, elnatovasacpoc sat quellhip lha nipyesicsa enlhit lhalhma anco. Apquilyiplovcasquic alhta enlhit coo sicpayvam, colhic sat acyiplovcaso actemaclha apquilpayvam quellhip. 21 Eltajanyac sat quellhip aclhamoclhojo as asoc, coo eyca ayinyemaclha sicvisay. Ayinyemaclha am elyicpilcac enlhitaoc coo Tata aptomja seyapajascama. 22 ‘Am alhta ancoc ovac coo, am alhta ancoc oltimnasac amyaa, colhenalhquejec alhta melyascalhma apancaoc. Quilhvo eyca apquilyasamcoc as enlhitaoc actemaclha melyascalhma apancaoc. Colapvanquejec eltimjic jelanic as enlhitaoc: Am jingiltimnasac enlhit acvisay mongilyascalhma. 23 Actanovalhquic ancoc coo nipyesicsa enlhitaoc, aptanovacpec najan coo Tata. 24 Am alhta copvanac poc enlhit ellanac aptamjaycam sinpilapquiscama. Am alhta ancoc ollanac coo sictamjaycam sinpilapquiscama, colhenalhquejec alhta melyascalhma apancaoc. Apquilvita eyca as enlhitaoc aclhamoclhojo asoc. Actanovalhquic coo, aptanovacpec najan coo Tata nipyesicsa as enlhitaoc. 25 Invocmec alhta nelha aclhanmaclha Dios appayvam actalhesomalhca: “Actanovalhquic coo mepqui acvisay” —nic nat intomjac appayvam. 26 Coo Tata apquinyemac apvisay Singilmalhnesquiscama aptomja nasoc anco. Ongvapajacsic sat apvisay Singilmalhnesquiscama sicvaclho sat apnaclha coo Tata. Apvaac sat ancoc Espíritu yoyam epasmoc quellhip, elngacsic sat sicvisay. 27 Ellingacsic sat quellhip lha coo sicvisay, ayinyemaclha quellhip apquiltomja alhta sepasmom siclhoc anco —alhta aptomjac Jesús.
LOS HECHOS 1 1 Aptomjac alhta mocjam Jesús: —Altimnasquic lha inyicje as asoc. Altamjoc yoyam elinlhanmojoc quellhip actemaclha melyasquiyam (yoyam metlhinganingvomeje). 2 Elantipsacpoc sat quellhip apcaneyquiclhilha. Covac sat acnim, yoyam eticyo quellhip. Apquilanayquic mataa ticyovam inyapmayc acvisay ningayo Dios actemaclha apquilajem quellhip. 3 Elvajanamcoc sat apquiltemaclha apancaoc. Ayinyemaclha am elyicpilcangvocmoc Dios Ingyapam. Am najan jelyicpilcangvocmoc coo lha. 4 Altimnasquic lha inyicje as asoc, yoyam colvac sat. Altamjoc coo, yoyam elyasingvoclhojoc quellhip siclhanma amamyi alhta —alhta aptomjac.
Actemaclha aptamjaycam Espíritu Santo
‘Aptomjac alhta mocjam Jesús: —Am oltimnasac siclho quellhip as asoc, ayinyemaclha sicnaycamo lhama quellhip. 5 Quilhvo eyca pac omyaclhac apnaclha coo Tata aptomja seyapajascama. Am eltamjoc quellhip jelanic: ¿Jalhco apyasa? 6 Nasoc anco alyitnocjavo apquilvalhoc quellhip, ayinyemaclha siltimnasa lhac as asoc. 7 Nasoc anco sicpayvam silanya quellhip. Tasic anco yoyam omyaclhac maa. Am sat ancoc omyaclhac maa, mevjejec sat apvisay Singilmalhnesquiscama yoyam epasmoc quellhip. Acmiyaclhec sat ancoc quilhvo, ongvapajacsic sat apvisay Singilmalhnesquiscama yoyam epasmoc quellhip. 8 Apvaac sat ancoc apvisay Singilmalhnesquiscama, elyascasingvomoc sat enlhitaoc lhalhma anco. Ellhicmocsic sat actemaclha mongilyascalhma najan actemaclha acpeyvomo najan actemaclha yoyam elyicpilcojo Dios Ingyapam apquiltemaclha apancaoc. 9 Actemaclha selyasquiyam enlhitaoc —acvisay apquilsilhnanomap apancaoc. 10 Siclhanma alhta, yoyam omyaclhac apnaclha coo Tata, mejelviticlhejec sat mocjam —acvisay actemaclha acpeyvomo. 11 Intovasalhquic nalhpop avisqui ac —acvisay apyicpilquemo Dios Ingyapam, yoyam elyicpilcojo apquiltemaclha apancaoc. 12 Yitnec coo mocjam aclhamoclhojo amyaa, yoyam oltimnacsic quellhip. Colapvanquejec elyasingvomoc quellhip quilhvo. 13 Apvaac sat ancoc Espíritu apvisay Singilmalhnesquiscama aptomja nasoc anco, elyascasingvomoc sat aclhamoclhojo asoc actomja nasoc anco. Jave sat aplhanma apanco, elngacsic sat acvisay asoc actomja aplingay ayinyema coo Tata. Elyasingvomoc sat quellhip asoc yoyam colvac sat. 14 Colhic sat seyaco ayinyema Espíritu apvisay Singilmalhnesquiscama. Ayinyemaclha elhcac sat amyaa ajanco, yoyam ellhicmocsic quellhip. 15 Aclhamoclhojo coo Tata asoc apancaoc actomja coo lha asoc ajancaoc. Eycaso ayinyema siclhena lhac: Elhcac sat Espíritu apvisay Singilmalhnesquiscama amyaa ajanco, yoyam ellhicmocsic quellhip —alhta aptomjac.
Acyitnocjayo ingvalhoc acyanmongayclha acpayjaclha ingvalhoc
16 ‘Acyavataclhojo sat cotnejic mejelvitay quellhip. Ovotac sat jayqui mocjam, jelviticlhac sat quellhip. Omyaclhac sat apnaclha coo Tata —alhta aptomjac. 17 Apquilpamejitsacpec alhta apquiltamsoycaoc: —¿Soctomja aptomja nac singilanya: Acyavataclhojo sat cotnejic mejelvitay quellhip. Ovotac sat jayqui mocjam, jelviticlhac sat quellhip. Omyaclhac sat apnaclha coo Tata? —alhta apquiltomjac apquilpamejitsacpo. 18 Apquiltomjac alhta apquiltamsoycaoc apquilanya Jesús: —¿Soctomja aplhena lhac “acyavataclhojo sat”? Mongilyasamcoc nincoo actomjaclha appayvam —alhta apquiltomjac. 19 Apyasamcoc alhta Jesús actomjaclha apquilvalhoc apquiltamsoycaoc, yoyam elilmalhnac lhama asoc. Aptomjac alhta Jesús apquilanya: —¿Soctomja alquitama nac apquilvalhoc actomjaclha sicpayvam: Acyavataclhojo sat cotnejic mejelvitay quellhip. Ovotac sat jayqui mocjam, jelviticlhac sat quellhip? —alhta aptomjac. 20 Actomjac coo silanya quellhip: Naso, elyipcalhic sat quellhip. Elinlhanmam sat najan quellhip. Eyca elitsovacsojoc sat enlhitaoc lhalhma anco. Naso, colyitnocjojoc sat apquilvalhoc quellhip. Comascoc sat eyca acyitnocjayo apquilvalhoc. Colpayjiclhac sat apquilvalhoc quellhip. 21 Ayovsec mataa quilvana yicpintama cotimsic ayitca. Invocmec anco acmasquilha avalhoc. Aptiyacmec sat ancoc ayitca, quilhvoc sat colvoncomoc actemaclha acmasca. Copayjiclhac sat avalhoc acvita sat ayitca aptiyam. 22 Innoc najan quellhip. Apyovsecac quellhip quilhvo nac jay. Otangvotac sat mocjam quellhip. Colpayjiclhac sat apquilvalhoc quellhip. Comascosalhquejec sat acpayjayclha apquilvalhoc. 23 ‘Invocmec sat ancoc acnim, mejelmalhnamejec sat lhama asoc. Actomjac coo silanya quellhip: Naso, apquililmalhnaquic sat ancoc quellhip asoc coo Tata, actemaclha apquillhanma sicvisay, elmesacpoc sat quellhip. 24 Am alhta elilmalhnac mataa quellhip coo Tata actemaclha apquillhanma sicvisay. Elilmalhna anco, ellhovamcoc sat quellhip, (coyangvomoc sat acpayjayclha apquilvalhoc) —alhta aptomjac.
Jesús aptomja apyimnatem apanco as nalhpop
25 Altimnasquic alhta mataa amyaa actemaclha sicyitquiscama. Comoc sat acnim, yoyam moltimnacsejec sat mocjam actemaclha sicyitquiscama. Moyilhalhcoyc sat coo olngacsic aptemaclha coo Tata. 26 Elilmalhnac sat quellhip coo Tata acvocmo sat acnim, actemaclha apquillhanma sicvisay. Actomjac coo silanya quellhip: Molmalhnesquiseje coo Tata quellhip. 27 Ayinyemaclha coo Tata aptomja apquilasicjayo quellhip. Ayinyemaclha quellhip apquiltomja selasicjayo coo mataa. Am alhta elyascacmoc quellhip ayinyema coo Tata. 28 Nasoc anco coo siyinyemay coo Tata. Acvaac coo as nalhpop. Oyamyiclhac sat mocjam as nalhpop, yoyam omyaclhac mocjam apnaclha coo Tata —alhta aptomjac. 29 Apquiltomjac alhta apquiltamsoycaoc apquilanya Jesús: —Visqui, am eyilhacpoc lhip singiltimnasa mocjam amyaa. Am jingiltimnasac mocjam actemaclha apyitquiscama. 30 Quilhvoc ningyasamcoc nincoo, lhip apyasamcoc aclhamoclhojo asoc. Ingvanquic nincoo mongilmalhnac lhip asoc. Naso, mongilyascacmoc nincoo lhip apquinyema Dios Ingyapam —alhta apquiltomjac. 31 Apcatingmavoc alhta Jesús: —¿Naso ya apquiltomja melyasquiyam quellhip? 32 Quip elanojo. Comoc sat acnim, invaac najan quilhvo nac jay, yoyam ingyilhpanic quellhip. Moc amay sat elmiyaclhac mataa poc. Jelyinyoc sat coo. Molhejec sat elhapco, apnec coo Tata aptomja siclhalhma. 33 Altimnasquic lha inyicje as asoc, yoyam eltamilsojoc apquilvalhoc quellhip apquiltomja selyipitcayo. Ellingamcoc sat acmasca quellhip naysicsa apquileyvam as nalhpop. Elyimnaticsojo apquilvalhoc. Coo nac sicyimnatem, am olhno enlhit lhalhma anco —alhta aptomjac.
Jesús apquilmalhnesquiscama apquiltamsoycaoc
1 Lhama alhta apsovja apquiltimnascama Jesús. Apsicjaclho alhta netin appamejitsa Ingyapam: —Tata, invocmec acvamlha acnim. Jitne sat seyayo sicvisay lhip Apquitca. Altamjoc coo lha otnesquisic siyayo lhip. 2 Eyasinaquic lhip otnejic sicyimtalhnamo nipyesicsa aplhamoclhojo enlhitaoc. Yoyam olmesic aclhamoclhojo asoc ayinyema lhip: Acvisay acyimnatem ingnenyic cotmongvoycamlha nelha. Ellhovac sat aplhamoclhojo enlhit selmescama lhip. 3 Apquiltamjoc lhip, yoyam elyicpilcangvomoc enlhitaoc, lhip aptomja Dios Ingyapam apvamlha pac lhama aptomja nasoc anco. Yoyam elyicpilcangvomoc sicvisay Jesús sictomja Cristo aptomja lhip apcapajascama. Eyca as acvisay acyimnatem ingnenyic cotmongvoycamlha nelha. 4 ‘Actimec coo siyayo lhip Tata naysicsa sictiyascam as nalhpop. Acpenasquic coo sictamjaycam siyanyomalhca ollana. 5 Lhip Tata, acnec nat coo apnaclha lhip yicpintama allanomalhquilha as nalhpop. Yitnec nat coo gloria sictamila ajanco netin. Jitnesquis sat gloria sictamila ayinyema netin napato lhip, sictemaclha nat gloria sictamila ajanco netin. 6 ‘Elmesquic lhip coo enlhitaoc aso nalhpop. Allhicmosquic alhta as enlhitaoc lhip apvisay. Lhip alhta apancaoc as enlhitaoc, selmescama coo. Apquilyiplovcasquic alhta mataa lhip appayvam. 7 Apquilyasingvocmec quilhvo as enlhitaoc, alinyema lhip aclhamoclhojo asoc selmescama coo. 8 Altimnasquic alhta mataa lhip appayvam simquescama coo. Inquilmec alhta apquilvalhoc lhip appayvam. Apquilyasingvocmec alhta as enlhitaoc siyinyema coo lhip. Am alhta elyascacmoc as enlhitaoc, lhip aptomja seyapajascama. 9 ‘Almalhnescasqui quilhvo lhip as enlhitaoc. Molmalhnesquiseje lhip enlhitaoc lhalhma anco. Almalhnescasquic lhip apquilvamlha as enlhitaoc selmescama alhta lhip. Lhip apancaoc apquiltomja as enlhitaoc. 10 Aclhamoclhojo asoc ajancaoc actomja lhip apancaoc. Najan lhip asoc apancaoc actomja coo lha asoc ajancaoc. Yitnec apquilvalhoc as enlhitaoc gloria sictamila ayinyema netin, yoyam elpayecsic lhalhma anco. 11 ‘Molhejec sat coo mocjam as nalhpop. Elhnam sat mocjam as enlhitaoc as nalhpop. Oyoclhojoc sat coo apnaclha lhip. Tata appeyvomo, imyov sat lhip actemaclha apmopvan as enlhitaoc selmescama alhta. Altamjoc yoyam eltimjic apquilpasmeyquiclha, yoyam colhojoc moc apquilvalhoc, acno nincoo inlhama, lhip najan coo. 12 Altimnasquic alhta mataa as enlhitaoc actemaclha lhip apmopvan naysicsa sicnaycamo lhama. Acmiyovquic alhta mataa as enlhitaoc. Am alhta etvasacpoc lhama enlhit. Apvamlha lhama enlhit aptomja aplhinganyam, apcanyomap alhta elhnanmoc. Yoyam cotmongvomoc nelha actemaclha aclhanma Dios appayvam actalhesomalhca. 13 ‘Quilhvo pac oyoclhojo apnaclha lhip. Altimnasquic coo as asoc naysicsa sicma mocjam as nalhpop. Altamjoc coo, yoyam coyangvomoc acpayjayclha apquilvalhoc, yoyam colhojoc sat actemaclha acpayjayclha evalhoc coo. 14 Altimnasquic alhta mataa lhip appayvam. Apquiltanovacpec as enlhitaoc nipyesicsa enlhitaoc lhalhma anco. Cotnaja apquilaoclha as nalhpop, acno coo lha cotnaja siyaoclha as nalhpop. 15 Am ongvanayc lhip, yoyam elyinyovsic as enlhitaoc apnaycam as nalhpop. Altamjoc coo, yoyam elmeyvoc lhip as enlhitaoc naysicsa acvoycta mataa somquic quilyicjamo. 16 Cotnaja apquilaoclha as nalhpop, acno coo lha cotnaja siyaoclha as nalhpop. 17 Ilponquinquis as enlhitaoc ayinyema actomja nasoc anco. Lhip appayvam actomja nasoc anco. 18 Lhip alhta aptomja seyapajascama nipyesicsa enlhitaoc lhalhma anco. Acno coo lha, alapajasquic as enlhitaoc nipyesicsa enlhitaoc lhalhma anco. 19 Acponquinalhquic coo ajanco, eyca ayinyemaclha as enlhitaoc. Altamjoc colhic alponquinsa as enlhitaoc ayinyema actomja nasoc anco. 20 ‘Jave acvamlha silmalhnesquiscama as enlhitaoc. Almalhnescasquic najan enlhit, yoyam eltimjic melyasquiyam ayinyema apquilyajayquiclho apquilpayvam as enlhitaoc. 21 Altamjoc eltimjic lhama apquilpasmeyquiclha as enlhitaoc, acno lhip Tata aptomja seyipitcayo najan coo lha sictomja sicyipitcayo lhip. Yoyam ongiltimjic nincoo lha ninpasmeyquiclha as enlhitaoc. Elyicpilcangvomoc sat enlhitaoc lhalhma anco, aptomja seyapajascama lhip. 22 Almesquic alhta as enlhitaoc gloria sictamila ayinyema netin, simquescama alhta siclhoc anco lhip. Altamjoc yoyam eltimjic apquilpasmeyquiclha, acno nincoo lha ninpasmeyquiclha. 23 Coo sictomja sicyipitcayo as enlhitaoc najan lhip aptomja seyipitcayo coo. Altamjoc yoyam eltimjic lhama apquilpasmeyquiclha apquilanomacpo. Elyicpilcangvomoc sat enlhitaoc lhalhma anco, aptomja lhip seyapajascama. Najan aptomja apquilasicjayo lhip as enlhitaoc, acno lhip seyasicjayo mataa coo. 24 ‘Tata, altamjoc coo jelhojoc lhama as enlhitaoc selmescama alhta lhip. Elvitangvomoc sat gloria ajanco simquescama alhta lhip. Eyasicjavoc nat lhip siclhoc anco, yicpintama yoyam collanalhcac as nalhpop. 25 Tata appeyvomo, am eyicpilcacpoc lhip nipyesicsa enlhitaoc lhalhma anco. Coo eyca acyicpilcoc lhip. Apquilyicpilcoc as enlhitaoc lhip aptomja seyapajascama. 26 Alyascasingvocmec alhta as enlhitaoc lhip apvisay. Olinlhanmojoc sat mocjam, yoyam olyascasingvomoc. Altamjoc yoyam colmoc apquilvalhoc lhip apcasicjayo, acno siyasicjamalhco coo. Altamjoc elyipitcojoc mataa as enlhitaoc —alhta aptomjac apquilmalhnancama.
Apmomap Jesús
1 Natamin apquilmalhnancama alhta aplhinga mocjam Jesús. Apquillhalhmaa alhta apquiltamsoycaoc. Apquilmiyaclhec alhta tap alvata acvisay Cedrón. Yitnec alhta maa yoclhilhma (amyip). Apvoclhec alhta Jesús najan apquiltamsoycaoc. 2 Apyasamcoc alhta najan as amyip Judas, aptomja apcanem emacpoc Jesús. Ayinyemaclha apcaneyclhec alhta mataa maa Jesús najan apquiltamsoycaoc. 3 Lhama alhta apquilanyamcaa Judas lhama tropa singilpilhtetemo najan apquiltamilquiscama tingma apponquinomap, apquilinyema fariseos najan apquilimja apmamyi sacerdotes. Apquilsovquic alhta apquiltotseycaoc apmamyi talha najan calevascama najan apquilmaycam (sovo acvinatem najan moc apquilmaycam). Apquilvoclhec alhta maa amyip. 4 Apyasamcoc alhta Jesús aclhamoclhojo asoc, yoyam cotnejic. Apquilamyilhamquic alhta Jesús. Aptomjac alhta apquilanya: —¿So apquiltingya yi? —alhta aptomjac. 5 Apquilatingmavoc alhta singilpilhtetemo: —Jesús co Nazaret ninquitamac —alhta apquiltomjac. Apcatingmavoc alhta Jesús: —Coo nac aso —alhta aptomjac. Apcanvocmoc alhta lhama apquillhalhmaa Judas, aptomja apcanem yoyam emacpoc Jesús. 6 Lhama alhta apquillinga singilpilhtetemo Jesús appayvam: “Coo nac aso.” Yejemoc alhta apquilalhingaoclho apnalhpolintamo nalhpop. 7 Yejemoc alhta apquilmalhna mocjam Jesús: —¿So apquiltingya yi? —alhta aptomjac. Apquilatingmavoc alhta: —Jesús co Nazaret ninquitamac —alhta apquiltomjac. 8 Aptomjac alhta inyicje: Coo nac aso. Selquitamsama sat ancoc coo, elane sat eltajiclha sellhalhmaa —alhta aptomjac. 9 Invocmec alhta acvamlha aplhanmaclha Jesús: “Am alhta alhnanacmoc lhama enlhit selmescama alhta coo Tata.” 10 Yejemoc alhta aplica sovo acvinatem apmaycam Simón Pedro. Apticponquic alhta Pedro. Apyatemenquic alhta apaycoc actamilaclha enlhit apvisay Malco. Apquimja apmamyi sacerdote apquilancam alhta Malco. 11 Aptomjac alhta Jesús apcanya Pedro: —Ingyitsiclha alhancoc sovo acvinatem. ¿Apcanayqui ya lhquip movanqueje oynic asoc acmasca ayinyema coo Tata, seyanem alhta yoyam oynic? —alhta aptomjac.
Jesús napato apquimja apmamyi sacerdote
12 Yejemoc alhta appasmacpo singilpilhtetemo najan judíos apquilancam. Apmacpec alhta Jesús. Apquilpilhtetacpec alhta. Aplhalhma alhta singilpilhtetemo apvisqui. 13 Apquilyantamaclhec alhta Jesús Anás tingma pac. Caifás apipyata Anás. Apquimja apmamyi sacerdote alhta Caifás as año nac jay. 14 Eyca as Caifás aptomja alhta apquilanya siclho judíos: “Intasi nac ingyitsapoc lhama enlhit acyanmongam apnaymacoc lhalhma anco.”
Apyinimquiscama Pedro
15 Innec alhta apyantama Jesús. Apyiplaclhec Simón Pedro najan poc apquiltamescama. Aptalhningvocmec alhta Jesús najan poc apquiltamescama Caifás tingma pac, apquimja apmamyi sacerdote. Ayinyemaclha apyicpilcoc alhta Caifás, malha aptimem poc alhta. 16 Apquiningvocmec alhta Pedro apatong tingma. Yejemoc alhta aptepa apquiltamescama aptomja apyicpilquemo Caifás. Appamejitcasquic alhta siclho quilvana actamilquiscama atong. Apcanayquic alhta, yoyam etalhningvota Pedro. 17 Yejemoc alhta actomja quilvana actamilquiscama atong ayanya Pedro: —¿Jave ya lhquip Jesús apquiltamescama? —alhta intomjac. Apcatingmavoc alhta Pedro: —Jave coo —alhta aptomjac. 18 Eyquey alhta intomjac. Apquilvatnec alhta talha. Apcanam alhta nicja talha apquilancam najan singilpilhtetemo. Apquilhtamquic alhta talha. Appalhavocmec alhta maa Pedro. Apquilhtangvocmec alhta lhama talha.
Jesús napato apquimja apmamyi sacerdote
19 Aptomjac alhta apquimja apmamyi sacerdote apcanya Jesús: —¿Soc enlhit lhip apquiltamsoycaoc qui? ¿Jalhco actema apquillhicmoscama lhip? —alhta aptomjac. 20 Apcatingmavoc alhta Jesús: —Am oyilhalhcoc coo siltimnascama amyaa enlhit lhalhma anco. Allhicmosquic coo mataa amyaa apcaneyquiclhilha judíos. Congne tingma apcaneyquiclhilha najan congne tingma apponquinomap. Am oyilhalhcoc alhta siltimnascama amyaa. 21 ¿Soctomja selmalhnamcaa nac coo? Ilmalhna sat lhip enlhitaoc apquillingay alhta siltimnaycam. Apquilyasamcoc actemaclha siltimnascama alhta —alhta aptomjac. 22 Lhama alhta apquiltimnasa Jesús. Yejemoc alhta apticponga napaat lhama singilpilhtetemo apquinmaycamo lhama. Aptomjac alhta singilpilhtetemo apcanya Jesús: —¿Intasi ya apcatingmoctama lhip actema nac jay napato apquimja apmamyi sacerdote? —alhta aptomjac. 23 Apcatingmavoc alhta Jesús: —¿Asomco ya actomjaclha sicpayvam? Ilhen sat lhip acvisay acmasom. ¿Intasi ya actomjaclha sicpayvam? ¿Soctomja seticponga nac lhip? —alhta aptomjac. 24 Apcanayquic alhta Anás elpilhtetacpoc Jesús. Apcapajasquic alhta apnaclha Caifás, aptomja apquimja apmamyi sacerdote.
Apyinimquiscama mocjam Pedro
25 Apquilhtec alhta mocjam talha Pedro. Yejemoc alhta apquiltomja apquilanya Pedro: —¿Jave ya lhquip lha Jesús apquiltamescama? —alhta apquiltomjac. Apcatingmavoc alhta Pedro actemaclha apyinimquiscama: —Jave coo —alhta aptomjac. 26 Apnec alhta maa apquilancam apquimja apmamyi sacerdote. Aptomja alhta apmolhama apyatemenquiscama alhta Pedro apaycoc. Aptomjac alhta apquilancam apcanya Pedro: —Acvitac alhta lhip aplhalhma Jesús yoclhilhma maa —alhta aptomjac. 27 Aptomjac alhta Pedro actemaclha mocjam apyinimquiscama. Yejemoc alhta acpayva tataa.
Jesús napato Pilato
28 Apnec alhta mocjam Jesús tingma pac Caifás. Yejemoc alhta apquilyantamaclho Jesús tingma pac aptomja yatapvisqui co Roma. Acmopeyam congne alhta intomjac. Am alhta elantalhningvocmoc judíos Pilato tingma pac. Incacoc alhta apnenyaoc judíos eltimjic comasis apyimpeoc napato Dios. Ayinyemaclha apquililtamjoc alhta eltovamcoc pascua aptom actemaclha actamila apquilvalhoc. 29 Yejemoc alhta aptepa Pilato. Aptomjac alhta apquilanya: —¿Soc asoc acmasom pa ellhenic quellhip? —alhta aptomjac. 30 Apquilatingmavoc alhta enlhitaoc: —Paj ancoc aptamjaycam acmasom as enlhit, mongvanquejec nincoo ongyantamentac apnaclha lhip —alhta apquiltomjac. 31 Aptomjac alhta Pilato apquilanya enlhitaoc: —Elyantamiclha sat quellhip maa. Yitnec quellhip apquilanamaclha apancaoc. Elpeyvasiclhojo sat aptemaclha as enlhit —alhta aptomjac. Apquilatingmavoc alhta enlhitaoc: —Nincoo ningilvisay judíos. Mongvanquejec nincoo ongilanic, yoyam ematong lhama enlhit —alhta apquiltomjac. 32 Invocmec alhta aplhanmaclha Jesús actemaclha yoyam ematong. 33 Yejemoc alhta aptalhningvoclho mocjam Pilato congne tingma. Apcanyam alhta Pilato Jesús. Aptomjac alhta apcanya: —¿Lhip ya judíos apvisqui apancaoc? —alhta aptomjac. 34 Apcatingmavoc alhta Jesús: —¿Selmalhnaycam apanco ya lhquip, inlhoyqui laa ayinyema apquiltimnascama apnaymacoc? —alhta aptomjac. 35 Aptomjac alhta Pilato apcanya Jesús: —Jave coo judío. Apquilyantamentac lhac lhip apnaymacoc najan apquilimja apmamyi sacerdotes. ¿Jalhco lhac aptomjaclha lhip? —alhta aptomjac. 36 Apcatingmavoc alhta Jesús: —Am conyemac coo silnancascama as nalhpop. Intimec sat ancoc silnancascama as nalhpop, elnapacpoc sat singilpilhtetemo ajancaoc, yoyam jelmeyvoc coo. Colapvanquejec jelmoc judíos. Jave coo silnancascama as nalhpop —alhta aptomjac. 37 Aptomjac alhta mocjam Pilato: —¿Naso ya aptomja lhip Apvisqui? —alhta aptomjac. Apcatingmavoc alhta Jesús: —Naso coo sictomja Visqui. Acvaac coo aso nalhpop ayinyema sictiyam alhta sictomja enlhit. Altamjoc olngacsic amyaa actomja nasoc anco. Apquiljalhnoc mataa sicpayvam enlhit apquiltomja apquilyajayquiclho amyaa actomja nasoc anco —alhta aptomjac. 38 Aptomjac alhta Pilato apcanya Jesús: —¿Soc asoc actomja nasoc anco? —alhta aptomjac.
Aplhenamap Jesús yoyam ematong
Natamin appamejitquiscama Pilato aptiyapveclho mocjam tingma. Aptomjac alhta Pilato apquilanya enlhitaoc: —Am coo otac apmapsom as enlhit —alhta aptomjac. 39 Yitne inyicje apquiltemaclha quellhip, yoyam oyamyiclhac lhama enlhit apquilpilhtetomap nipyesicsa caya. ¿Apquililtamjo ya quellhip oyamyiclha judíos apvisqui apancaoc? —alhta aptomjac. 40 Yejemoc alhta apquilpalhamamcaa enlhitaoc: —Jave eyqui lha, Barrabás eyca —alhta apquiltomjac apquilpamesma. Barrabás eyca aptomja enlhit apminyilhma.
1 Apcanayquic alhta Pilato, yoyam elyicpilhquetacpoc Jesús. 2 Apquillanescasquic alhta singilpilhtetemo appocanma amaoc. Apquilpiquincaseclhec alhta apcatic Jesús. Apquilantalhnaseclhec alhta aptalhnama apvinatem. Apyapamatem alhta apava. 3 Yejemoc alhta apquilpalhamamcaa singilpilhtetemo: —Jajay, lhip nac anco judíos apvisqui apancaoc —alhta apquiltomjac apquilpamesma. Apquilticpongam alhta singilpilhtetemo napaat Jesús. 4 Aptiyapvoctac alhta mocjam Pilato. Aptomjac alhta apquilanya enlhit: —Quip elanojo quellhip. Acyantimquic coo as enlhit. Elyasingvomoc sat quellhip, am otaac apmapsom yoyam esilhnanacpoc as enlhit —alhta aptomjac. 5 Yejemoc alhta aptepa Jesús. Yiplovcoc alhta amaoc appocanma apcatic najan apcalomap apyilhvasem. Aptomjac alhta Pilato apquilanya enlhitaoc: —Quip elanojo, enlhit nac lha —alhta aptomjac. 6 Lhama alhta apquilvita apquilimja apmamyi sacerdotes najan apquilancam. Apquiltomjac alhta apquilpalhamamcaa: —Iyipitquis asoc timyescama. Iyipitquis asoc timyescama —alhta apquiltomjac apquilpamesma. Aptomjac alhta Pilato apquilanya enlhitaoc: —Quellhip sat elyipitquis asoc timyescama. Am otaac coo apmapsom yoyam esilhnanacpoc as enlhit —alhta aptomjac. 7 Apquilatingmavoc alhta enlhitaoc: —Yitnec nincoo singanamaclha. Inpeyvoc aclhanma singanamaclha ematong as enlhit. Ayinyemaclha aptimesacpec apanco Dios Apquitca —alhta apquiltomjac. 8 Lhama alhta aplinga Pilato. Intiyacmec alhta apvalhoc. 9 Aptalhningvoclhec alhta mocjam congne tingma. Aptomjac alhta Pilato apcanya Jesús: —¿Jalhco apquinyema lhip? —alhta aptomjac. Am alhta ingyatingmavoc Jesús. 10 Aptomjac alhta Pilato apcanya Jesús: —¿Mejeyatingmameje ya lhquip? ¿Am ya jeyicpilcac coo sictomja sicyimtalhnamo? Evanquic coo ongvanic elyipitsic lhip asoc timyescama. Evanquic najan oyamyiclha lhip —alhta aptomjac. 11 Apcatingmavoc alhta Jesús: —Am ancoc conyemac netin lhip apmopvan, copvanquejec ingyanic lhip yoyam omatong. Avanjec apmapsom yoyam esilhnanacpoc as enlhit aptomja apcanem yoyam omalhca, am elhnoc lhip —alhta aptomjac. 12 Apquilinlhanacmec alhta Pilato eyamyiclha Jesús. Apquilpalhamam alhta mocjam enlhitaoc: —Apyamyaclhec sat ancoc lhip as enlhit, comascoc sat etnejic lhip aptimem poc apvisqui co Roma. Cotnaja aptimem poc apvisqui co Roma enlhit aptomja apyimtalhnesomacpo apanco, yoyam etnejic apvisqui —alhta apquiltomjac. 13 Lhama alhta aplinga Pilato. Apyantamacpec alhta Jesús acyiviy olhma, yoyam colhic acpeyvasiclho aptemaclha. Apnacmec alhta Pilato netin mataymong apvisqui aptajanem. Acpayjo acyiviy olhma acvisay macninquinaycaoc mataymong. Apquiltimec alhta hebreo appayvam acvisay Gabata. 14 Ingyitsicso acnim alhta intomjac. Secaseclha eyca pa eltamjacpoc pascua caya apquilyeycajaycaoc. Aptomjac alhta Pilato apquilanya enlhitaoc: —Quip elanojo quellhip Apvisqui apancaoc —alhta aptomjac. 15 Apquilpalhamam alhta eyca enlhitaoc: —Ingyaa. Ingyaa. Iyipitquis asoc timyescama —alhta apquiltomjac apquilpamesma. Aptomjac alhta Pilato apquilanya: —¿Pa ya oyipitsic asoc timyescama quellhip apvisqui apancaoc? —alhta aptomjac. Apcatingmavoc alhta apquilimja apmamyi sacerdotes: —Paj nincoo poc visqui ingac, apvamlha apvisqui co Roma —alhta apquiltomjac. 16 Yejemoc alhta apvajaneclho Pilato apquiltomjaclha judíos. Aptomjac alhta appayvam, yoyam eyipitsacpoc asoc timyescama. Apquilyantamaclhec alhta Jesús.
Jesús apyipitsomap asoc timyescama
17 Aptipquic alhta Jesús. Appatmaoclhec alhta asoc timyescama apanco. Inquilhe apquiltimem hebreo appayvam Gólgota. 18 Apquilyipitcasquic alhta asoc timyescama Jesús. Apquilyipitcasquic alhta mocjam asoc timyescama apcanit enlhit napocja Jesús. Naysicsa alhta apquilhnacpoc Jesús. 19 Apcanayquic alhta Pilato, yoyam elyipitsic netin asoc timyescama actalhesomalhca actomjaclha appayvam: “Jesús co Nazaret, judíos Apvisqui apancaoc” —alhta intomjac actalhesomalhca. 20 Apquilyipsatquic alhta mataa aplhamoclhojo judíos. Ningatoc alhta tingma Jerusalén apyipitsomacpilha asoc timyescama Jesús. Yitnec alhta actalhesomalhca natqui altemaclha: hebreo appayvam najan griego appayvam najan latín appayvam. 21 Apquiltomjac alhta apquilimja apmamyi sacerdotes najan judíos apquilanya Pilato: —Notalhos nasa: “Judíos Apvisqui apancaoc.” Eyca italhos sat actemaclha aplhenamap apanco: “Coo nac judíos Apvisqui apancaoc” —alhta apquiltomjac. 22 Apcatingmavoc alhta Pilato: —Coytic sat actomjaclha sictalhescama —alhta aptomjac. 23 Lhama alhta apquilyipitsa asoc timyescama Jesús. Yejemoc alhta apquilma singilpilhtetemo apquilantalhnama Jesús. Apquilmilasquic alhta moclhama singilpilhtetemo lhama aptalhnama. Cuatro alhta apquilantalhnama Jesús. Apcaymacpec alhta lhama aptalhnama apyovoclhojo mepqui apyitnamap. 24 Apquilpamejitsacpec alhta singilpilhtetemo: —Mongilyaptec sat. Sicas sat ontovacsic. Emoc sat aptomja apmetsovjam —alhta apquiltomjac. Invocmec alhta nelha aclhanma Dios appayvam actalhesomalhca: “Apquilmilascacpe nac silantalhnama. Apnatovasquic sicas apmetsovjacpo sictalhnama” —nic nat intomjac actalhesomalhca. Apquilvajanamquic alhta singilpilhtetemo actemaclha aclhanma nic nat actalhesomalhca. 25 Innec alhta coning asoc timyescama Jesús inquin najan inquin inyalhing najan María Cleofas aptava najan María Magdalena. 26 Lhama alhta apvita Jesús ayinmamcaa inquin najan apquiltamescama. Apcasicjavoc mataa Jesús as apquiltamescama. Aptomjac alhta Jesús apcanya inquin: —Lhiya, cotne sat lhiya ayitca —alhta aptomjac. 27 Aptomjac alhta Jesús apcanya apquiltamescama: —Lhip, itne sat lhip inquin —alhta aptomjac. Yejemoc alhta apyantamaclho tingma pac as apquiltamescama, yoyam colhic mataa.
Apquitsepma Jesús
28 Apyasamcoc alhta Jesús actomja acpensomalhca aptamjaycam. Invocmec alhta nelha aclhanmaclha Dios appayvam actalhesomalhca. Ayinyemaclha aptomjac alhta Jesús: —Acnim coo eyajac —alhta aptomjac. 29 Yitnec alhta maa ingjaycoc aclaneyo uva yingmenic actajapma. Yejemoc alhta apnateta yatepepa acmoc navá yamamoc. Apquillovsa alhta congne uva yingmenic actajapma. Innec alhta acyipitsa apatong Jesús navá yamamoc. 30 Natamin appitsisma Jesús apyimnatesa appayvam: —Acpenasquic coo aclhamoclhojo asoc —alhta aptomjac. Natamin appayvam apvayvesantamo apcatic apquitsepa.
Apquilyiplhaquic alhta sovjeva napocja Jesús
31 Acnim ningnayclha alhta intomjac, yicpintama eltamjacpoc pascua caya apquilyeycajaycaoc. Am alhta eltamjoc judíos elyilhic apquilitsepma netin asoc timyescama acnim ningnayclha. Caya apvanyam alhta intomjac as acnim ningnayclha. Apquilmiyaclhec alhta judíos apnaclha Pilato. Apquiltomjac alhta apquilanya Pilato: —Ingyane sat colhic alintasa apilhquipcoc enlhit apticyovam. Ingyane sat colhic aljalhyovasa netin asoc timyescama —alhta apquiltomjac. 32 Yejemoc alhta apquilvoclho singilpilhtetemo. Apquilintasquic alhta apilhquipcoc lhama najan poc apquilyipitsomacpo lhama Jesús asoc timyescama. 33 Yejemoc alhta apquiltiyoningvocmo Jesús. Apquilvitac alhta apquitsepa. Am alhta elintasac apilhquipcoc. 34 Yejemoc alhta apquilyiplha sovjeva lhama singilpilhtetemo napocja Jesús. Intipquic alhta ema najan ayingmenic. 35 Aclingasquic coo as amyaa sictomja sicvitaycamco alhta. Nasoc anco actomja siclingascama. Acyasamcoc maa actomja nasoc anco as amyaa, yoyam melyascomoc quellhip lha. 36 Eycaso actomja alhta as asoc, yoyam cotmongvomoc nelha aclhanmaclha Dios appayvam actalhesomalhca: “Am colhejec sat ayintasa lhama apilhcapoc.” 37 Najan moc aclhanmaclha Dios appayvam actalhesomalhca: “Colhic sat alano apquilyiplhamap” —nic nat intomjac actalhesomalhca.
Apcatongnomacpilha Jesús
38 Apnec alhta lhama enlhit aplhalhma alhta Jesús apvisay José. Tingma Arimatea alhta apquinyemac. Apyilhacpoc alhta José, ayinyemaclha judíos alhta apcacac. Apmiyaclhec alhta apnaclha Pilato. Apquilmalhningvoclhec alhta yoyam elcoc Jesús apyovoclhojo. Apquilyajaclhoc alhta Pilato. Apliquic alhta José. 39 Apvaac alhta Nicodemo, aptomja alhta apyoyam apmamyi apnaclha Jesús alhtaa aysicso. Apsantac alhta malha treinta kilos panatem acpalhacsomalhca yamit ayingmenic acmasis najan yamit anic acmasis. 40 Apquilmec alhta José najan Nicodemo apyovoclhojo Jesús. Apquilpilhtetquic alhta apava apmopoy. Apquilyiplovcasoc alhta panatem acpalhacsomalhca acmasis. Apquiltemaclha alhta judíos, yoyam elatongnic enlhit apquitsepma. 41 Yitnec alhta amyip acpayjo apquilyipitquiscamaclha asoc timyescama. Yitnec alhta as amyip tacjalhop alhnancoc. Am alhta ingyatongnacpoc mocjam enlhit apquitsepma. 42 Yejemoc alhta apcatongnacpo Jesús, ayinyemaclha ningatoc alhta tacjalhop. Inquitlhincasquic alhta comoc acnim ningnayclha, judíos acnim apancaoc.
Aplhaticjangvoycamlha Jesús
1 Ayenmoclha semana alhnancoc alhta intomjac. Alhtooc anco yicpintama actiyapma acnim acmiyaclho María Magdalena apcatongnomacpilha Jesús. Am alhta cotac mataymong mayapma atong tacjalhop. 2 Yejemoc alhta actajavo anincaclho apnaclha Simón Pedro najan apnaclha poc apquiltamescama aptomja mataa apcasicjayo Jesús. Intomjac alhta ayanya: —Apminyilhacpe nac Visqui ingac congne tacjalhop. Am ongilyasamcoc apquilpicanvomlha —alhta intomjac. 3 Yejemoc alhta apmiyaclho Pedro najan poc apquiltamescama acyitnaclha tacjalhop. 4 Apnateymaoclhec alhta apcanit. Apmeyjec alhta poc. Apvoyclha apmamyi alhta intomjac poc. Am alhta colhnoc apquinyem Pedro. 5 Yejemoc alhta aptiyongnamco congne tacjalhop. Apvitac alhta apvamlha apava macpilhtetem alhta apnamco maa. Am alhta etalhnac congne. 6 Lhama alhta apvocmo tacjalhop Pedro. Yejemoc alhta aptalhningvocmo tacjalhop. Apvitac alhta najan apava macpilhtetem apnamco maa. 7 Apvitac alhta najan apava apquitcoc mayalascama apcatic Jesús. Am alhta eyipitsacpoc apava. Nicja alhta apyitnac apava apquitcoc appatjapomap. 8 Yejemoc alhta aptalhningvocmo poc apquiltamescama aptomja apvoyam apmamyi tacjalhop. Am alhta eyascacmoc apvita. 9 Am alhta eyascacmoc actemaclha aclhanma Dios appayvam actalhesomalhca. Actemaclha yoyam elhaticjangvomoc Jesús nipyesicsa apquilmasquingvaycmo. 10 Yejemoc alhta apquiltajaclho tingma apancaoc apcanit apquiltamsoycaoc.
Jesús aplhicmosacpo María Magdalena
11 Innec alhta María nicja tacjalhop. Invinec alhta. Naysicsa acvinama actiyongnamco congne tacjalhop. 12 Invitac alhta apcanit ángeles Dios apquilasinancama. Apquilmopoy alhta apquilantalhnama. Apnec alhta lhama ángel nipvaje Jesús. Apnec alhta poc nipmancoc macpicanmaclha alhta apyovoclhojo Jesús. 13 Apquiltomjac alhta ángeles apquilanya quilvana: —Lhiya, ¿soctomja acvina nac lhiya? —alhta apquiltomjac. Incatingmavoc alhta quilvana: —Apminyilhacpec coo Visqui ajac. Am oyasamcoc apquilpicanvomlha —alhta intomjac. 14 Naysicsa aclhanma alhta acpaycalhco quilvana. Invitac alhta apquinmamcaa Jesús. Am alhta coyicpilcac Jesús. 15 Aptomjac alhta Jesús apcanya quilvana: —Lhiya, ¿soctomja acvina nac lhiya? ¿Soc ayitama yi? —alhta aptomjac. Incanayquic alhta quilvana aptomja aptamilquiscama amyip. Intomjac alhta quilvana ayanya Jesús: —¿Apsaclhe ya lhquip, Visqui? Jeltimnas sat appicanvomlha, yoyam ovoclhac sat coo —alhta intomjac. 16 Aptomjac alhta Jesús apcanya quilvana: —María —alhta aptomjac. Yejemoc alhta acpaycalhco. Incatingmavoc alhta hebreo appayvam: —Raboni —alhta intomjac. Ningiltimem nincoo Singillhicmoscama. 17 Aptomjac alhta Jesús apcanya quilvana: —Avanquic lhiya jemamcoc coo. Am omyaclhac mocjam netin apnaclha coo Tata. Coltimnasquiclha sat elyalhinga. Cotne sat canic lhiya: Omyaclhac sat apnaclha coo Tata aptomja najan apquilyap quellhip. Apnaclha Dios ajanco najan quellhip Dios apancaoc —alhta aptomjac. 18 Yejemoc alhta actajavo María Magdalena altimnasquiclho apquiltamsoycaoc. Intomjac alhta alanya: —Acvitaclhec coo Visqui ingac —alhta intomjac. Inquiltimnasquic alhta actomjaclha appayvam Jesús.
Jesús apquillhicmosomacpo apquiltamsoycaoc
19 Ayenmoclha semana alhnancoc alhta intomjac. Intalhnacmec alhta. Apquilapeclhec alhta apatnaoc tingma apnamcaclha apquiltamsoycaoc. Judíos alhta apquilacac. Yejemoc alhta aptalhningvoclho Jesús. Apquiningvoclhec alhta nipyesicsa apquilpamejitsa: —Colpayjiclha apquilvalhoc —alhta aptomjac. 20 Lhama alhta aplhena. Yejemoc alhta aplhicmosa apmeoc najan napocja. Payjeclhec alhta apquilvalhoc apquilvitaclho Apvisqui apancaoc. 21 Aptomjac alhta mocjam Jesús apquilanya apquiltamsoycaoc: —Colpayjiclha apquilvalhoc quellhip. Pac olapajacsic quellhip acno coo lha seyapajascama coo Tata —alhta aptomjac. 22 Natamin aplhanma alhta apvatipnapsa apquiltamsoycaoc. Aptomjac alhta Jesús apquilanya: —Colma apquilvalhoc Espíritu Santo. 23 Apquilmascosquic sat ancoc quellhip melyascalhma enlhitaoc, colmascosalhcac sat. Am sat ancoc elmascosac quellhip melyascalhma enlhitaoc, colmascosalhquejec sat —alhta aptomjac.
Apvitay Tomás aplhaticjangviyam Visqui ingac
24 Am alhta epalhcac apnaymacoc apquiltamsoycaoc Tomás, moc apvisay Gemelo. Am alhta etac apvactamo Jesús. 25 Apquiltomjac alhta apquiltamsoycaoc apquilanya Tomás: —Ningvitaclhec nincoo Visqui ingac —alhta apquiltomjac. Apcatingmavoc alhta Tomás: —Am sat ancoc otac alyimsem apmeoc (lava alyancalhcatma), yoyam opatningvomjo. Am sat ancoc cotac emic napocja apyimsem Jesús, oyascomoc sat coo —alhta aptomjac. 26 Ocho acnim alhta intomjac apquilaneyclho mocjam apquiltamsoycaoc congne tingma. Tomás alhta najan apquillhalhma. Apquilapeclhec alhta apatnaoc tingma. Yejemoc alhta apquiningvactamo Jesús nipyesicsa. Aptomjac alhta Jesús apquilanya: —Colpayjiclha apquilvalhoc —alhta aptomjac. 27 Yejemoc alhta aptomja Jesús apcanya Tomás: —Iyasingma apmic. Ipatningvojo emeoc. Iyasingma apmic. Ipatningvojo nejicja. Notne nasa apyasquiyam —alhta aptomjac. 28 Apcatingmavoc alhta Tomás: —Visqui ajac nac lhip najan Dios ajac —alhta aptomjac. 29 Aptomjac alhta Jesús apcanya: —Am eyascacmoc lhip, ayinyemaclha setaa coo. Apquilinyejemo nac enlhit aptomja meyasquiyam, aptomja mejetay coo —alhta aptomjac. 30 Inlhamoc alhta moc asoc sinpilapquiscama apquillanac Jesús napatavo apquiltamsoycaoc. Am coyitnac mocjam as vaycajac acnatalhesomalhca. 31 Innatalhesalhqui inyicje asoc sinpilapquiscama as vaycajac, yoyam melyascamejec quellhip Jesús aptomja Cristo Dios Apquitca. Colhic sat acyimnatem apnenyaoc quellhip apquiltomja melyasquiyam apvisay apanco.
Jesús aplhicmosomacpo siete apquiltamsoycaoc
1 Aplhicmosacpo alhta apanco mocjam apquiltamsoycaoc niyava acyayengviyam acvisay Tiberias. 2 Eycaso actomja alhta aplhicmosomap: Apquilpasmec alhta Simón Pedro najan Tomás, moc apvisay Gemelo, najan Natanael apquinyema Caná de Galilea najan Zebedeo apquitquic apcanit najan mocjam poc apcanit apquiltamsoycaoc. 3 Aptomjac alhta Simón Pedro apquilanya apnaymacoc: —Quilasma pac otingya coo —alhta aptomjac. Apquilatingmavoc alhta apnaymacoc: —Nincoo sat najan —alhta apquiltomjac. Apquilquinatvoclhec alhta barco. Apquillhinquic alhta. Am alhta elmac lhama quilasma alhtaa nac jay. 4 Alhtooc anco alhta apvitacpo Jesús apquiningvaa niyava yingmin. Am alhta eyicpilcacpoc Jesús. 5 Aptomjac alhta Jesús apquilanya apquiltamsoycaoc: —¿Quilasma ya innac, quilyimnanic? —alhta aptomjac. Apquilatingmavoc alhta: —Paj —alhta apquiltomjac. 6 Aptomjac alhta Jesús apquilanya: —Elyamyintam sat yamyamayin nayingmin, nicja barco actamilaclha. Colantilhic sat quilasma —alhta aptomjac. Yejemoc alhta apquilyamyantamo yamyamayin. Pilapcasquic alhta aclano yamyamayin quilasma. Am alhta colapvancaac elyasiclhac netin quilasma. 7 Apnec alhta maa apquiltamescama aptomja alhta Jesús apcasicjayo. Aptomjac alhta as apquiltamescama apcanya Pedro: —Visqui ingac nac maa —alhta aptomjac. Lhama alhta aplinga Simón Pedro. Yejemoc alhta apcalacpo apava. Ayinyemaclha mepqui apava alhta Pedro. Apnilhtinquic alhta congne yingmin. 8 Apquilyantamaclhec alhta barco poc apquiltamsoycaoc. Apquilyinyovasquic alhta yamyamayin aclaneyo quilasma. Ningatoc alhta inquilhe, malha cien metros. 9 Lhama alhta apquilantepa apquiltamsoycaoc. Apquilvitac alhta talha najan quilasma alquinomalhca najan quilpasmongam nicja talha. 10 Aptomjac alhta Jesús apquilanya: —Elsanta siclho quilasma quilhvo apquilmam —alhta aptomjac. 11 Apquinatveclhec alhta barco Pedro. Apyinyovasentac alhta yamyamayin netin inquilhe. Inlanoc alhta quilasma alyiviy. Invocmec alhta ciento cincuenta y tres quilasma. Am alhta coyaptac yamyamayin. 12 Aptomjac alhta Jesús apquilanya: —Ellhing, eltovaoc siclho —alhta aptomjac. Am alhta elilmalhnam apquiltamsoycaoc apvisay Jesús. Ayinyemaclha apquilyicpilcoc alhta aptomja Apvisqui. 13 Yejemoc alhta apma quilpasmongam Jesús najan quilasma. Apmilasquic alhta nipyesicsa apquiltamsoycaoc. 14 Natqui alhta intomjac aplhicmosomacpo apanco Jesús nipyesicsa apquiltamsoycaoc natamin aplhaticjangviyam nipyesicsa apquilmasquingvaycmo.
Jesús appamejitquiscama Simón Pedro
15 Natamin aptoycaoc aptomjac alhta Jesús apcanya Simón Pedro: —Simón, Jonás apquitca, ¿licavo ya apvalhoc coo, am elhno apnaymacoc? —alhta aptomjac. Apcatingmavoc alhta Pedro: —Eje, Visqui. Apyasamcoc lhip sictomja siyasicjayo —alhta aptomjac. Aptomjac alhta Jesús apcanya Pedro: —Ilmes sat aptoycaoc sicnatoscama nipquesic apquitcaoc —alhta aptomjac. 16 Anit alhta intomjac apquilmalhnaycam Jesús: —Simón, Jonás apquitca, ¿naso ya acliclamo apvalhoc coo? —alhta aptomjac. Apcatingmavoc alhta Pedro: —Eje, Visqui. Apyasamcoc lhip sictomja siyasicjayo —alhta aptomjac. Aptomjac alhta Jesús apcanya Pedro: —Ilmes sat aptoycaoc sicnatoscama nipquesic —alhta aptomjac. 17 Natqui alhta intomjac apquilmalhnaycam Jesús: —Simón, Jonás apquitca. ¿Eyasicjavo ya lhquip? —alhta aptomjac. Inyitnocjavoc alhta apvalhoc Pedro, ayinyemaclha actomja natqui apquilmalhnayclho Jesús. Apcatingmavoc alhta Pedro: —Visqui, apyasamcoc lhip aclhamoclhojo asoc. Apyasamcoc najan actemaclha siyasicjayo lhip —alhta aptomjac. Aptomjac alhta mocjam Jesús: —Ilmes sat aptoycaoc sicnatoscama nipquesic —alhta aptomjac. 18 Aptomjac alhta Jesús: —Actomjac co siyanya lhip: Naso, apcalacpec lhip apanco aptemaclha apquitcoc alhta. Aptiyasam alhta lhip apmayjayoclha apanco etyisam. Apvanacmec sat ancoc lhip, elyasiclhac sat netin apmeoc lhip. Poc enlhit sat ingyalacsic lhip. Colhic sat acyantamaclho lhip coyoycamlha eyacsic —alhta aptomjac. 19 Apquitsepma alhta aplhenac. Apquiltamjoc alhta Jesús eyascasingvomoc Pedro actemaclha yoyam ingyitsapoc. Yoyam colhic ayaco Dios Ingyapam actemaclha apquitsepma. Aptomjac alhta Jesús apcanya Pedro: —Noc, jeyiplaclha coo —alhta aptomjac.
Apquiltamescama apcasicjamacpo
20 Yejemoc alhta appaycacpo Pedro. Apvitac alhta apyiplovcamcaa poc apquiltamescama aptomja Jesús apcasicjayo. Aptomja alhta apyipitcaycam Jesús naysicsa aptoycaoc. Aptomja alhta najan apyilhomacpo apquilmalhnaycam Jesús: “Visqui, ¿soc lha enlhit etnejic apcanem, yoyam emacpoc lhip?” —alhta aptomjac apquiltamescama. 21 Lhama alhta apvita Pedro aptomja apcanya Jesús: —Visqui, ¿jalhco sat cotnejic nelha as apquiltamescama? —alhta aptomjac. 22 Apcatingmavoc alhta Jesús: —Altamjoc sat ancoc etyisam acvocmo sicvactamo mocjam, ¿soctomja apquiltamjo nac eyasamcojo lhip? Jeyiplovjo eyca lhip —alhta aptomjac. 23 Yejemoc alhta acpayjeclho as amyaa nipyesicsa apquilyalhinga. Apcanyacpec alhta mengyitsepeje as apquiltamescama. Am alhta etnajac Jesús apcanya: “Mengyitsepeje sat maa.” Eyca aptomjac alhta Jesús apcanya: “Altamjoc sat ancoc etyisam acvocmo sicvactamo mocjam, ¿soctomja apquiltamjo nac eyasamcojo lhip?” 24 Eycaso apquiltamescama aptomja lhac aplhenamap. Aptomja aplingascama as amyaa najan aptalhescama as vaycajac. Ningyasamcoc nincoo actomja nasoc anco amyaa aplingascama alhta. 25 Yitnec mocjam aclhamoclhojo moc asoc apquillanay Jesús. Innatalhesalhquic sat ancoc aclhamoclhojo amyaa moclhama vaycajac, am colhejec acyitnaclha lhalhma anco ningninquinaycaoc vaycajac, yoyam colhic acnatalhesamco. Amén.