Mataco


/1 Dios yam kalelhaj ta 'naihumnhen, tsi ta kamaj 'nahapehen iyhaj ta 
lhach'isukyajay i'namejen, wet Cristo 'yil lhatapehen.
Hap ifwala ta tumejla Pascua, wet Jesus ihanej ta nech'e nichate t'at lewhay 
ta yikch'oye honhatna yamlek ihoye hap Lajcha. Wet hap lehumnhayaj ta itiyej 
hap lechufwenkay ta ihonhatena pajtha nichate t'at ifwala ta lakapes.
Jesucristo, Dios laka silatwo ta matche, t'ichun ta inupha ta talho tseyhay, 
niyatej niyatey ta i'pe honhat. Cristo wuj ta 'naihumnhen, itsayp'antehcha 
le'woyis ta ifwayhat 'namejen lhasukyajay.
Hap 'nohumnhayaj ta lha'ye lhip ta wuj hape t'at ta hi'no iwomej,pe lakala'yis 
hap lham le'watshancheyaj.
Dios wuj ta ihumnhen hap wichi ta i'pe honhat, wet hi'wenho Lhas ta weihalha, 
wet hapkhilek elh at che hape che t'ekhaye lham, 'yinhit'ala, mat ikatej 
le'watshancheyaj ta t'un.
Jehova lhai'nalit p'ante 'noyej wet ifwel 'noho ta yok: O'wente amho 
ohumnhayaj ta laj lepesa, hap ta tamenej ta o'yisejpej lhip op'altseyaj ta oti 
amej.

/2 Akamlelhaj ta lhachayaj hape 'mak ta wuj. Tsi Dios hi'nalit 'namejen 'mak 
ta nitafwnhatayej p'ante wichi ta pajche, oyok, hap ta Cristo lhayen hi'noya, 
wet Dios ap inuhatpha ta talho tseyhay wet ikalelhat ta hape Lhawuk, wet angel 
lhayis hi'wen'pe, wet o'wo silatayej wichi ta i'pe honhat wet lhamel ichaye, 
wet ta o'han puleye nech'e ikatej lewujyaj ta isilataj.
Ta nech'enyaya, pajche p'ante iche 'Nolhamet, wet 'Nolhamettso iyej Dios wet 
hape t'at Dios.
Wet 'Nolhamet lhayen hi'noya wet i'namejen, wet hap 'mak ta matche lha'ye 
lehumnhayaj tapoyej hap lham. Wet olhamel o'wen t'at hap lewujyaj ta isilataj 
ta Lajcha hi'wenho, tsi tajlhamat lham ta hape Lhas.
Hap ta malhyejp'antetso ta lhaimatitchehen Lhawuk Lhamtes ta ifwenhomche 
p'ante hap laka profeta lhayis, ta yok: Lhek yahinya, atsinha lhutsha ta kamaj 
ka'noch'efwaya, hich'otsanhila, iwohla lhasa, wet lhas lheyla Emanuel, 
'nolhamet ta yok: Dios i'namejen.
Olham lha'ye Ojcha olhamel oweihalhahcha.

/3 Angel nichulho wet yok: Hap Espiritu Santo ihohla atape wet Dios 
lakhajyhayaj lepeyak hip'ohla atape. Hap ta tamenej taha'nafwaj ta nech'e 
ihichela oyenla lheya 'Not'amajchet, Dios Lhas.
Nichatcha 'namho ha'nafwaj, Dios ta hi'wen 'namho Lhas, hape t.at Niyat, wet 
lhey hapkhila 'Nochufwenyajwo ta Lha'ye Lhip ta Is, Dios ta Takhajay, Lhajcha 
ta 'Nilataj, Lhatamsek Lakaniyat.
Ta kamaj Pedro yamhoplhi Jesus, nam pule ta isi ta nichat'pe lhamel, wet 
'nopak tumho ta yok: Hap tajtsi Olhas ta ohumin, lha'ye ta okajejlhi. Is chik 
wuj ta letach'ahuyaye.
Elh at che hape che yok: Jesus hape Dios Lhas, ihi Dios wet Dios ihi t.at 
lham.
Jesus yok: Le'wen t'at(Dios Lhas). Hap hi'no ta yamlhi amho, ohape t'at.
Tsi nilhokej hap 'mak ta hape Dios imalhewek ta yen le'wetahi Cristo.
Jesus nichulho wet yok: Tsi elh ta hi'wen'no hi'wen t'at Ojcha. Chipte ta 
lhok: Payen 'noyehen Ajcha? Ha lekachu ta olham oihi t'at Ojcha wet ap lham 
it'nohi, hatet iwoye ta otefwaj'atni?

/4 Jesus ifwenho lhamel wet yok: Amel ha'wet t'at ta tumchana, olham o'wet ta 
tumpha. Amel letalh honhate, olham tek otalh honhate.
Jesus yok: Matche, matche olhamet, olham pajche oiche t'at ta kamaj Abraham 
newache.
Jesus yok: Olham ohape t'at pan ta iwo 'no'watshancheyaja. Wet elh che iho 
'noye, nemla nichuyu, wet ap elh che t'ekha 'noye, nemla ap ichim.
Atsinha yok: Olham ohanej ta namlapa 'Nofwaythi ta Dios Chenek, wet che nam 
hapkhilek ikalelhat 'nohohen nilhokej 'mayhay. Jesus nichulho wet yok: Hap 
hi'no ta lhametso, hape t'at ta yamlhi amho, tsi ohape t'at.
Ta kamaj oihi t'at honhatna, ohape t'at laka isi.
Jesus yachajo ta tahuyej wichi wet yok: Matche, matche olhamet, olham ohape 
t'at lepe ta tso'natas tiyajche.
Jesus tahuyej wet yok: Olham ohape t'at tseyhay le'watshancheyaj lha'ye ta 
inukwepha. Elh at che hape che ichay 'noye, tej che 'yil, mat ilayla t'at.
Lhek tetsan olhamet, ta amel lhamay 'noye ta lhok Rabi, wok lhok Iwuk, wet 
matche, tsi ohape t'at.

/5 Jesus ne'tek wichi ta wuj tatachepha'pe hup, wet nech'e tachuma hap pan ta 
ihi cinco lha'ye wahat takwfwas, wet iyahin puleye, wet iwo graciasayej Dios, 
ta ileyej wet hich'esajen pan wet hi'wenhomche lechufwenkay, wet lhamel 
hi'wenhomche wichi ta wuj. Wet nilhokej t'ekhen yak yipsejen, wet lechufwenkay 
t'akwe lhak lhipey ta imalhehi wet o'hanche doce lehis ta tapokwe.
Simon nichulho wet yok: Rabi, honatsi imalhewek ta olhamel otchumwetha, mat 
tek wo 'mak che olhamel osakanej. Mat athana owoye amet, lhek othatiyela inat 
hap owot. Ta lhamel iwoye tajtso, wujpey wahat ta isakanej wet eyte 
hikw'esiche lewot.
Iche asnamis takwfwas ta tatachepha p'ante ihi 'nayij lhip, wet ta ilate wichi 
ta yame ta Jesus nekche 'nayij, wet nech'e t'anhen ta yok: Iwuk, David lhayis 
elh, p'altsen 'nohen! (Jesus yok:) Atsi 'mak ta let'uyaylak owoyej amehen? 
Lhamel yok: Iwuk, owatlak o'wenche honhat. Wet Jesus wuj ta hip'altsenhen, 
tachumche'pe tatelhoy, wet lhamel hi'wenchehen honhat, ta hi'wenchehen honhat 
lhamel yikche Jesus.

/6 Dios ta yenlhi nilhokej 'mayhay, hap ta isej Jesucristo.
Jesucristo hape t'at ta Dios yenejlhi nilhokej 'mayhay, hap 'mak ta iche 
puleye lha'ye honhat, hap 'mayhay ta 'nal lha'ye ta ni'nala, tej ta 
'nokhajyhayajay ta iche puleye ta hapehen 'nowujyajay lha'ye 'no'nohyajay. 
Lham t'at ta Dios yenejlhi nilkokej 'mayhay yamthilek lham ta Lewuk.
Wet hape t'at ta Dios yenejlhi nilhokej 'mayhay ta iche, wet niwohit elh 
'mayhay ta iche chik nitalhayejo hap lham.
Ifwalasna ta lepese Dios yamlhi 'namhohen hap ta isej Lhas. Hape t'at lham ta 
Dios yenejlhi nilhokej 'mayhay ta iche, wet yen hapeya elh ta Lewukla.
Ta malhyejtso oyok, is che nilhokej amel ta Israel lhayis wuj ta lehanayej ihi 
ta Jesustso ta amel lene'tayenaj che ohp'ajtej cruz, Dios yen hapeya Lechenek 
ta 'Nofwaythi, Lhawuk.
Wet tajtso hap ta tamenej ta 'yil hap Cristo wet ap yachajo ta ilay: yamlek 
hape wichi ta 'yinhen lha'ye iyhaj ta ilayhen Lewuk.

/7