Nivacleesh cava Dios Lhasinôc
1 Nich'a chitôlhesh'e pava matas ti p'alha' ti caaj pa Ya'clish. Pa lhech Ya'clishesh yi'jop pa Dios lhech lhavaatsha pa Dios. 2 Côque lhjunash lhapesh ti nich'a ti yi'jop pa Dios. 3 Lhacôm'a nava matas tô'lha ti yivclanjat cô lhech Ya'clish; ca ama lhôn cô lhech pa tanca navclantaj nava vaclan nôqueesh. 4 Lhavaatsha ti yi'shi' pa vatmônlhajayash pa lhech vatmônlhajayash lhqu'isjuyajesh papi yiey na cotsjaat. 5 Pa lhech vatqu'isjuyaj yitujatsham pa tulhitaj, lhan'e pa tulhitaj pa tanca namcat pa lhech. 6 Caaj ja ve'lha nivacle nichen pa Dios, jô lhech lhey Juan. 7 Ti nam pa lhech pa tanyôjijayesh ti nôclich'e ti tasinôyesh pa vatqu'isjuyaj, jaspa chinuesha lhacôm'a pava yit'esh'in pa lhech. 8 Pa Juan nilhetaja ca vatqu'isjuyajeesh, tsi'sha ti chincheneshnee ti tanyôjijayesh ca nasinôqui pa lhech vatqu'isjuyaj. 9 Pa lhech yijô' vatqu'isjuyaj pan nôclit'apee lhacôm'a papi nivacle ti namey na cotsjaat. 10 Jô lhech jan Ya'clishesh p'alha ti yiey na cotsjaat; pa tanefeneshelh pa Dios ti yisnatshelh lhacôm'a na tuc'a'ey na cotsjaat. Taj ti napi yiey na cotsjaat ninteesh ca nach'ana jô lhech. 11 Natajeshey japin yitsôt'ajesh taj japu lhech ninteesh ca natcuumjulh. 12 Taj ti papi yit'esh ti t'acuumjulh pa nincacuesh shta, papi lhech yamey ti lhclesesh pa Dios. 13 Papi lhech lhclesesh pa Dios nintô'lhesham pa lhjunash papi nivacle ti nivat'as vooy pa Dios tôlhesha ti yicts'ôyanesh papi lhech. 14 Jô lhech Ya'clish nivacleesh, jan yi'jotshiin shta muc, yamqu'een pa lhencheyash shi' shta pava yijô'. Javanshelh ja lhasnôycheyash ti yivi'sinatesh ja Lhaôs ti yijutem pa Lhtata. 15 Ja Juan yinôôclhanita ti nifac pa yit'esh ti yisitsenesh: “Lhech nôque, nan jaychayjulh'in ti jayeetsha ti nijooylhayich'e na lhech yaashyitapee, lhayaash ti apis ti caajyic'oya.” 16 Shtatôôlhsha pava isis lhcufayjates ti nijutjooy yajatesh. 17 Chiyjuteyjoom lhapesh pa Moisés pava vatyôjijates; vooy vitsha pa vatencheyash shi' pa yijô' tô'lha ja Jesucristo. 18 Ampapu ca ve'lhaa ca nivan lhapesh pa Dios, ve'lha ja Lhaôs, jan Diosesh shta, lhech jô lhech shintôyjata pa lhjunash pa Dios.
Pa Juan Vatnayjayash lhavo' vancatôyjata pa lhjunash pa Jesucristo
19 Japi judíos, Jerusalén lhavos, yicheney japi vatcasinôc shi' japi levitas ja Juan jaspa niyôsesh'in ts'ivee pan tôlhshi'. 20 Pa tanôôclhanite'ma ti yit'esh: —Ni yalhecha ja Cristo. 21 Pa niyôsesh'in shta ts'ivee: —¿Pa a she ajalh? ¿A lhech nataney pa chiytôyjata pava ti vaclan lhey Elías? Pa yicuulh ja Juan pa yit'esh: —Am, ni yalhecha. Pa lhechesh pa niyôsesh ts'ivee shta: —¿A lhech nataney pa chiytôyjata pava ti vaclan pan chiyaya'julh'in? Pa yicuulh pa yit'esh: —Am. 22 Pa lhechesh pa yit'esha shta ts'ivee: —¿A she ajaalh? Anfacleelhyam, jaspa janfacle'lhem jayu vitsha japin tsichenelh'ay. ¿Ta lhteesh'avne avaatsha? 23 Yicuulh shta ja Juan: —Yivaatsha vat'ôjôjyish jan yie' ja cotsjaat ti ampapu ca nôv'e' ti yit'esh: ‘Atsôôtjatelhc'oya pa lhnôyish pa Lhcaanvacle’, yiey pa t'ônashesh lhapesh pa chiytôyjata pava ti vaclan lhey Isaías. 24 Japin tô'lha japi fariseos japi lhech tasinôyelh ja Juan, 25 pa yit'esh ts'ivee ti niyôsesh: —¿Pa ta t'e lhayaash ti lhavancanajayan? ca tin'e lhteesh ti ni a Cristoa, ni alhecha shta pa Elías, ni a lhecha shta pa'elh chiytôyjata pava ti vaclan. 26 Yicuulh ja Juan pa yit'esh: —Yivaatsha javancanajayanesh pa yinôôt; taj ti nan yi'shi' acaavjuelh, pa tanca antôfaacshelh avaatsheelh. 27 Lhech jayu lhavaatsha ja nijooylhayich'e, jô lhech ti vatjutsaeshyic'oya. Lhech jô lhech nivanajulhjatsham ca nuqueem'e pava lhavtes pava t'acfiyis. 28 Cavôque matas vaclan'e ja Betábara yiey ja pachamey ja tovôc Jordán lhum'ôcjinucjulh, yiey jan yiesh'e ja Juan ti vancanajayan.
Pa Jesús tashinshtajesh lhclôesh pa Dios
29 Vooy ti nalhu pa lhechesh pa yivanjulh ja Juan ja Jesús ti nachey pan yie', pa yit'esh: —Ovalhelhjulh, nôquejulh ana nan yivômjatemch'e jayu papi nivacle pava lhsasch'esha'ne. Na lhech tashinshtajesh vatcufayjat'esh, vooy pa Dios tcufayesh. 30 Lhech na lhech jasinôqui lhapesh ti jayeesh: ‘Nijooylhayich'e jayu pa ve'lha nivacle ya'sheshyic'oya ti t'un'in, lhayaash ti p'alha ti caaj lhapesh, lhan'e pa ya ch'apaey'in ca nascat'aj.’ 31 Yivaatsha ni apisa ca nastôfa'clesh; pa nôquen lhayaash janatshina pa javancanajayanesh pa yinôôt, pa jaspa nitôfaclesh jayu napi Israel lhcles. 32 Pa lhechesh pa tanôôclhaniteshlhavne shta ja Juan pa yit'esh: —Ja'van ja Espíritu Santo vatjôney ja ofo tôlheychisham na vôôs pa nacheyshicham jô lhech pa mônlhashi. 33 Jôjjeclay ninastôya jôque, taj ti vooy jan tsicheneshnee ca javancanajayanesh pa yinôôt, lhech jô lhech yit'eshyi: ‘Ca avantajesh ja Espíritu pa ve'lha nivacle ca nôôvtaj'apee, lhech jô lhech vancanajayanesh jayu ja Espíritu Santo.’ 34 Ja'van tane jô lhech, pa janôôclhanitsha ti yijô' ti Dios Lhaôs.”
Papi vatjutsa' Jesús t'eyjatsjanjas
35 Vooy ti nalhu lhech yielh'e shta ja Juan shi' japi napu' t'eyjatsjanjas. 36 Pa meelh ti yivanch'e jô lhech ja Jesús ti naashjop, pa yit'esh ja Juan: —¡Ovalhelhch'e côcôô tashinshtajesh lhclô'esh pa Dios! 37 Meelh ti yipe'ya japi napu' t'eyjatsjanjas ja Juan ti nôque yit'esh, pa lhechesh pa voqu'e ts'ivee japi lhech ja Jesús. 38 Pa yovalheyt'ôyiish ja Jesús pa yivanjulh japuque yijoqu'esha'ne, pa yit'esh ja Jesús ti niy'ôs: —¿She pa lhnachelhey? Pa yicuulh ts'ivee japuque pa yit'esh: —Vanqu'eyjatsjan, ¿Ta lhôv'e'in? 39 Pa yicuulh ja Jesús pa yit'esh: —Atalhunelh ca avanelhey. Pa lhechesh pa voqu'e ts'ivee pa yivaney pan yie'in, pa yaajlheesh ti mônlhajop ts'ivee japuque pa lhech nalhu, eem ti pa lha nuut na jumcuclaay. 40 Japi lhech napu' vat'eyjatsjanjas japin yipe'ya java lhclishay ja Juan, jô'tajesh ti voqu'e ts'ivee shta ja Jesús, ve'lha jô lhech lhey Andrés, lhch'inish ja Simón Pedro. 41 Lhech jô lhech Andrés vooysha'nejop tatsha ja lhchecla' Simón pa yit'esh: —Nich'a javanelh ja Mesías (nôque yich'e' Cristo.) 42 Pa lhechesh pa yô'yaney ja Andrés ja Simón jan yie' ja Jesús. Pa meelh ti yamey ts'ivee pa yovalhsha'ne chin ja Jesús, pa yit'esh ti yiyôjaa: —Avaatsha a Simón, atata ja Jonás, avaatsha ey jayu nôqueesh Cefas (nôque yich'e' shta Pedro.)
Pa Jesús tôney pa Felipe shi' pa Natanael
43 Vooy ti nalhu shta pa yeetajesh ca natjuyey ja Jesús ja Galilea, pa lhechesh pa yi'van ja Felipe, pa yit'esh ti yiyôjaa: —Atatvoyich'e. 44 Ja Felipe lhavtsat'esh ja Betsaida, jan lhavtsat'esh yitsha ja Andrés shi' ja Pedro. 45 Lhan'e ja Felipe vooysha'ne vitsha ja Natanael, pa yit'esh ti yiyôjaa: —Javanelh ja nivacle jan yi'sesh'e lhapesh pa Moisés jan yi'shi' java vatyôjijates, jan yi'sesh'e shta papi chiytôyjata pava ti vaclan. Jô lhech lhanquey Jesús, José lhô'sesh, Nazaret lhavo'. 46 Pa yit'esh ja Natanael ti yicuulh: —¿Nitôôlhtaj'e t'ejô ja Nazaret pa lhech lhjunash issha'ne? Pa yit'esh ja Felipe ti yicuulh: —Anachey ca a'van vitsha. 47 Meelh ti yivanjulh ja Jesús ja Natanael ti nachey, pa yit'esha ti yasinôqui: —Naô ana nan yijô' ti Israel lhavo', ampa ca lhjôts'ôclônjayasha lhavaatsha. 48 Pa lhechesh pa niy'ôs ja Natanael pa yit'esh: p —¿Ta yie' ti lhasvan ti lhantôfaacyish? Pa yicuulh ja Jesús pa yit'esh: —P'alha ti c'avan'ay ti lhôv'ôcji lhja higoyuc, ti jôjjeclay nitôn'ay ja Felipe. 49 Yicuulh ja Natanael pa yit'esh: —Vanqu'eyjatsjan, avaatsha a Dios Lhaôs, avaatsha lhanvacleash napi Israel lhavos. 50 Yicuulh yitsha ja Jesús pa yit'esh: —¿Tam'ey t'e ti jaspa niascacu ti janfacl'am nalhche ti c'avan'ôcji lhja higoyuc? Taj ti a'lheesh côque yaash jayu apee java matas ca c'avanjayintajesh. 51 Pa yit'esh shta ja Jesús: —Yijô' ti jayeetshelh'a, lhavanelh jayu na vôôs ca camamtajeey. Lhavanelh jayu shta ca natajeyshicham'in na Nivacle Lhô'sesh japi lhángeles ja Dios, shi' ca napectajchishamch'een.
Pa vatajayayash yiey pa yitsaat Caná yi'shi' pa Galilea
1 Nôjeshch'e pava pu'jana nalhus pa vaclan'e pa vatajayayash ja yitsaat Caná yi'shi' ja Galilea. Lhech yie' shta lhja Jesús lhamimi. 2 Jô'tajesh ti chit'alheyjop shta pa vatajayayash ja Jesús shi' japi t'eyjatsjanjas. 3 Lhechesh ti yimshi' pa ôtjayetas t'i'. Pa yit'esh lhja Jesús lhamimi ti yiyôjaa ja lhaôs: —Lha pa ampa ca ôtjayetas t'i'a. 4 Yit'esh ja Jesús ti yicuulh: —Ma, ¿ta lhayaash ti lhanfacyam côque? Jôjjeclay ninameyjop pa yinc'ôplhu. 5 Pa yiyôjaa lhja lhamimi japi vatcavosesh pa yit'esh: —Anc'ashamshelhem yiinsha pa ca niteetajeshelh'a. 6 Pa lhech jô'nee pa yie' pava ve'lhayama tô'lhôsiy utesesh. Pava lhech yijuyjatlhavne papi judíos ti vatcleesha'nec'oyaan pa Dios. Pava lhech tô'lhôsiy ti ve'lha ts'ivee ochenta ja't'ajesha pava cien litros pa yinôôt. 7 Pa yit'esh ja Jesús ti yiyôjisham japi vatcavosesh: —Aponteshelhch'eshane pa yinôôt navôque tô'lhôsiy. Pa yiponteshch'esha'ne jum ts'ivee. 8 Pa lhechesh pa yit'esh ja Jesús: —ôtsjôye'lheyshi pa chama pa achaajshelhey jan yiclôvalh ja vatôc. Pa jô taney ti chiychajeshey. 9 Meelh ti yic'alhtanshi jan yiclôvalh ja vatôc pa lhech yinôôt ti yalhatajesh ti ôtjayetas t'i'esh, pa nintô'ya pan tô'lha; tsi'sha japi lhcavos yitô'ya ti tô'lha pa yinôôt ti yôtsjôyeyshi'in. Pa lhechesh pa tônshey jan lhavo'esh pa vatôc ja nich'a tjayaay 10 pa yit'esha: —Lhacôm'a na cotsjaat yiyô'yesh ti yijutsjat ti yijutshey pa acôjji ôtjayetas t'i', vooy ti pitojesh ti yijô'ji papi chit'alheyjop, pa lhechesh pa nijutshey shta pa'elh a'lheesh ca acôjjashi. Vooy avaatsha vena afanishesh lhanjooylhajat na acôjji ôtjayetas t'i' ti lhjutshey. 11 Lhech cavôque lhfanishesh ja Jesús ti yie' ja yitsaat Caná, yi'shi' ja Galilea, ti nich'a tôlhesh'e ti yivclanjat cava nimatasa papu ca nitô'yish. Pa nôquen lhayaash pa tanôôclhaniteshlhavne pa lhasnôycheyash, pa lhech côque pa jaspa nincacuesh japi t'eyjatsjanjas ti Cristo lhavaatsha. 12 Pa lhech tôlh'e ts'ivee shta ti t'ajuyey ja Capernaum, tanaôycheelh lhja lhamimi, japi lhch'injavot shi' japi t'eyjatsjanjas; taj ti nicajuach'e ca nôv'e' ts'ivee.
Pa Jesús yisclan'ôcji pa vatishjanjavat
13 Lhapa shalhac'oya pa lhpascua lhapesh papi judíos, pa lhech t'aplhuqu'e ti yichey ja Jesús ja Jerusalén. 14 Lhechesh ti yivan'ôcji ja uj vatishjanjavat papi lhavcashanjasesh pava vacôc shi' pava tashinshtas, shi' papi tcashayesh'in pava ofos, shi' papi lhavosesh pava pesoc ti yuyjat'ôcji pav'elh pesoc. 15 Pa lhechesh pa yisnatesh ja Jesús pa lhc'ônjat niycônilh, pa yisaasfach'ec'oya ja uj vatishjanjavat papi lhech, shi' pava vacôc shi' pava tashinshtas. Yivôm'inc'oya shta pava pesoc papi pesoc lhavostajesh, yaflitch'e shta pava t'ajuyish'apee pava tcashayesh'in. 16 Vooy papi tcashayesh'in pava ofos pa yit'esha ti yiyôjaa: —¡Ayjatelhnee navôque! ¡Ya aj ca acashavat'eeshelh na lhajpôyich ja Tata! 17 Pa lhechesh pa yaychavalhch'e japi t'eyjatsjanjas pava Vani'sesh'e lhapesh ti yit'esh: “Tsicô'jejat na yichavatjayashesh na ajpôyich.” 18 Pa lhechesh pa niyôsesh japi judíos pa yit'esh: —¿She t'e pa nôclit ca lhtanôclhanitshelhyam ti caaj'am pa unajjop cava afanish'avach? 19 Pa yicuulh ja Jesús pa yit'esh: —Avômjatelhsha'ne nôque vatishjanjavat pa jasnatesh jayu shta, pu'jana jayu pava nalhus pa javaclhitesh. 20 Pa lhechesh pa yit'esha japi judíos ti yicuulh: —Nôque vatishjanjavat cuarenta y seis pava yincôpes ti chiyisnatesh pa vacalhesh; ¿pa vooy avaatsha pa lhteetajesh ca pu'janaa atesha pava nalhus ca avaclhitesh? 21 Catin'e vooy pa lhavu'vat vatishjanjavat'esh lhech jô ti vanasinôquiesh. 22 Lhe'naa ti meelh ti nitshaamshi capi vafsha'ne, pa yivoych'e lhcachi' japi t'eyjatsjanjas côque pan t'ônasha, jô'tajesh ti ninatcacujanesh pava Vani'sesh'e lhapesh ti chitatômjalhesh ti chiyasinôqui.
Pa Jesús nitôfaclesh lhacôm'a
23 Meelh ti yie' ja Jesús ja Jerusalén ti chivatc'usinatesh'in pa pascua, pa lhechesh pa aclôj japi t'ujanesh ca lhey, lhayaash ti yivanesh ts'ivee ti yivclanjat pava nimatasa papu ca nitô'yish. 24 Taj ti ninantôvaclujulh ja Jesús japi nivacle, lhayaash ti nitôfacshamsha'ne lhacôm'a. 25 Nôquen lhayaash nisuyeeshi ca natfacjanem papu; lhayaash ti lhavaatsha ti p'alha ti yitô'ya pa lhjunash pa tasham papi lhech nivacle.
Pa Jesús shi' pa Nicodemo
1 Caaj lhapesh ja ve'lha fariseo lhey Nicodemo, lhanvacleesh japi judíos. 2 Lhech jô lhech nachey ja Jesús ti tulhey, pa yit'esh ti yiyôjaa: —Vanqu'eyjatsjan, tsitô'yelh'a ti nachen pa Dios pa jaspa ats'eyjatsjaneshelh cavôque. Ampapu ca ajunasheeshjulh ti lhtanôclhanitshelhyam pa unajesh pava nimatasa papu ca nitô'yish. Tanca nitô'yish lhavaatsha papu ca nintô'lheesha pa Dios. 3 Pa yicuulh ja Jesús pa yit'esh: —Yijô' ti jayeesh'a, papu ca ninachajtajeesh shta ca nanvat'aj pa tan jayu ca nivaney ja Dios lhanvacleyash. 4 Yit'esh ja Nicodemo ti niyôs: —¿Ta t'e ca lhjunashtaja ca nanvat'aj shita pa nivacle ti lhapa nitaôvclajaesh? ¿Tam'e ti istajajop ajalh ca napecsham pa nivacle pa lhcachi' lhpa lhamimi pa nanvat'aj t'e shta? 5 Yicuulh shta ja Jesús pa yit'esh: —Yijô' ti jayeesh'a, papu ca ninanvat'ajtajashi pa yinôôt shi' ja Espíritu, pa tanca namey jayu ja Dios lhanvacleyash. 6 Papu ti nivat'ajshi pa vat'asjan, pa vat'asjanesh jô vitsha; vooy papi nivat'ajshi pa vatsôc'ôclit, pa vatsôc'ôclit'esh vitsha. 7 Ya aj ca naqu'imjat cava jayeesh'a: ‘Alhacôm'aelh ca asuyeeshelhshi ca achajelhec'oya ca anvat'aselhsha'ne shta.’ 8 A'va, na lhaviim t'ajuyshi pa ti yit'esh ti t'ajuyshi; taj ti avaatsha lhpe'ya atesha pa t'ôjôj taj ti ninatô'ya pa tôlhshi' shi' pa ti t'ajuyshi, pa lhech lhjunash papi nivat'ajshi ja Espíritu., 9 Pa vapeclesha ja Nicodemo ti niyôs: —¿Ta t'e lhjunash jayu côque? 10 Pa yicuulh ja Jesús pa yit'esh: —¿Lhnôôclheesha avenna ti t'eyjatsjan napi Israel lhavos, pa ninatôyc'oya côque? 11 Yijô' ti jayeesh'a, janfaclelh'am nava tsitô'yelha jô'tajesh ti jatônôclhanitshelhyivne pa ti javanelh, taj ti naat'eshelh ca acumelhjulh ca ujaneshelh cava jatônôclhanitshelhyivne. 12 Vena ti niujaneshelh ti janfactajelh'am cava matas vaclan'e na cotsjaat, tam'ey ti tanca anu'tajeshelh'yi ca yasinôquielh'am java yi'shi' ja vôôs. 13 Lhayaash ti ampapu ca nôqueychisham ja vôôs, lhech na'lhech ve'lha nan tôlheychisham ti nachshicham lhech na lhanquey Nivacle Lhaôs nan lhavtsat'esh ja vôôs. 14 Jan lhfanishesh lhapesh ja Moisés ti yanchishamnee pa tos ti yiey pa cotsjaat ti ampapu ca nôv'e', pa lhech lhanfanash jayu na Nivacle Lhaôs ca chinantajchishamnee jayu. 15 Jôcl'esh ca chinjutey pa lhamônlhajayash ôyjôlhôyech lhacôm'a papi nincacuesh na lhey. ,
Pa lhencheyasha pa Dios napi yiey na cotsjaat
16 “Nôque lhjunash ja Dios ti yen lhacôm'a napi yiey na cotsjaat, pa yijutey na ve'lha Lhaôs, jaspa tanca nac'oyesh pant'ajôôj papi nincacuesh na'lhech, vooy pa lhamônlhajayash ôyjôlhôyech pa nicaajem. 17 Lhayaash ti ninteesh ja Dios ti nichen na Lhaôs ca niclôyit napi yiey na cotsjaat, vooy jô ca nalhjen napi yiey na cotsjaat na lhech. 18 Pan yie' papu nincacu na Lhaôs ja Dios, pa tanca chinclôyit jayu. Taj ti papi nint'ujanesh pa'lha ti yi'shi' pa lhanclôyitsjayash, lhayaash ti nint'ujanesh na ve'lha Lhaôs ja Dios. 19 Papi nint'ujanesh chiyclôyit jayu, lhayaash ti meelh ti namey na vatqu'isjuyaj na cotsjaat pa yashjat ti yen pa tulhitaj, lhayaash ti nisa' pa lhfanishlhavach ts'ivee. 20 Lhacôm'a papi yisnatesh pa niysa' yapun nôque vatqu'isjuyaj, pa ninen ca nôvji' na lhech vatqu'isjuyaj, pa jaspa tanca chinvanesh pa niysa' ti yisnatesh. 21 Lhan'e vitsha papi tajulhemey pa yijô' pa yi'shi na vatqu'isjuyaj, pa chiyvanesh jayu ti is pa lhfanishlhavach ti tôlhesha ja Dios.
Pa Juan Vatnayjayash lhavo' chaych'e shta pa Jesús
22 Pa lhech t'aplhuqu'e ja Jesús ti t'ajuyelhsham japi t'eyjatsjanjas ja cotsjaat Judea pa nicajuach'e ti yie ts'ivee pa vancanajayansha'ne. 23 Jô'tajesh ja Juan ti vancanajayan'e vitsha ja Enon, shalhee'ma ja Salím, lhayaash ti lhech yie' ja uj yinôôt; papi nivacle yichey'in pa yiyôjaalhavach ca najayansha'ne. 24 Côque vaclan ti yujeey ca chinan'ôcji ja Juan lhpa vatvanc'ôcfajayte. 25 Lhech t'aplhuqu'e ti tavayshelhvanôcji japi tanaôycheelh ja Juan japi judíos pa lhjunash pa vat'isi. 26 Pa lhechesh pa yichey ts'ivee ja Juan pa yit'esha: —Vanqu'eyjatsjan, ja nivacle yi'ajop ca'na ti yiey pacham ja Jordán, ja lhnôôclhanita, lhech jô lhech vancanajayan vitsha, vooy lhavaatsha pa lhacôm'a ti voqu'evatich'e. 27 Yicuulh ja Juan pa yit'esh: —Amapapu ca isaemjop ca nicaajem pa'na ca ninjutajeem ja Dios. 28 A lhechelh avaatsheelh lhpe'yeelh ti jasclaneelhsha'ne'am ti ni yalhecha ca ya Cristoa, jô'lhaa ti ya'lhech ti chitsichenee ti jatanôyinc'oya jô lhech. 29 Papu ti caajem lhpa ôcjeclô ti lhanjuyjascheesh, lhech pôque chiyit'esha lhanjuyjatsech; pa lhan'e pa lhc'utsfaaesh pa lhanjuyjatsech, pa uj ti nishamesh ti yipe'ya pava lhclishay pan lhc'utsfaesh. Pa lhech yijunashesh nôqueesh cavôque lhapa c'ôfisch'e na yishamitjayash. 30 Lhech jayu lhavaatsha ca na'shesh pa lhjunash, lhan'e vitsha pa japecleshch'e yayshivo ti ya tiqu'in'esh jayu pa ca yijunasha.
Papu ti tôôlhchishamnee
31 Papu ti tôlheychisham pa vôôs yash'apee lhacôm'a. Lhan'e vitsha papu ti tô'lha na cotsjaat yitsôt'ajesh vitsha na cotsjaat. Pa lhan'e papu ti tôlhey pa vôôs yash'apee lhacôm'a. 32 Lhavaatsha tanôôclhaniteshlhavne pant'ajôôj pava yi'van shi' pava yipe'yach'e; taj ti ampapu ca niteesh ca natcumeshjulh ca nuesha. 33 Lhan'e yitsha papi yit'esh ti yuesha, lhech ti nifac lhavaatsha ti yit'eshlhavne ti yijô' ti yit'esh pa Dios. 34 Eem ti pôque nichen pa Dios yit'esh cava Dios lhclishay ti niyalhat'ônashaan, lhayaash ti Dios ninatsjulhey pa ca nit'ôs'esh'esha'ne pa Espíritu ti tcufayesh. 35 Pôque Dios lhenach'esh na Lhaôs, lhe'naa ca nashjat'apee lhacôm'a pava yitsôt'ajesh. 36 Papu ca nu'tajesha jôque Lhaôs lhecha papi nôvji' pa vatmônlhajyash ôyjôlhôyech; lhan'e vitsha papu ca natcacujantajesh jôque Lhaôs, pa tan jayu ca nivan pa lhamônlhajayash, pa vo'ya jayu pa lhclôyitsjayashesh pa Dios nô'veem.
Pa Jesús shi' lhpa ôcjeclô Samaria lhavoque
1 Yaya'sha japi fariseos ti ya'shesh lhôn ja Jesús japi t'eyjatsjanjas, acloj lhôn shta japi yinajayansha'ne a'lheesh ja Juan. 2 Lha'ma nilhecha ja Jesús ca ninajayan, vooy japi t'eyjatsjanjas. 3 Meelh ti yayaesh'lhavne ja Jesús cavôque, pa tay'e ja Judea pa vapecley shta ja Galilea. 4 Taj ti istaa ti yitsavalhey ja cotsjaat Samaria. 5 Pa yamey ja yitsaat yie' ja Samaria lhey Sicar, pan shalheema ja lhcôvjiyanjavat lhapesh pa Jacob pan nôyojem pa lhaôs José ti tisesh. 6 Lhech yie' shta lhja Jacob lhqu'itsech. Lhan'e ja Jesús pa yulhjôt ja t'ôtayjayash, pa istaa ti t'ichayjop lhôjôque t'itsech. Isc'oya ca nalhcachia. 7 Pa lhechesh pa nam lhja ôcjeclô Samaria lhavoque, nachey lhja t'itsech ca nueyshi pa yinôôt. Lhech lhjô lhech yiyôjaa ja Jesús pa yit'esh: —Anjuteshyicum na yinôôt. 8 Lhan'e japi t'eyjatsjanjas pa yitshaam ja yitsaat tcashayey java lhacôs ts'ivee. 9 Pa yicuulh lhja ôcjeclô Samaria lhavoque pa yit'esha ja Jesús: —¿Ta t'e lhayaash ti lht'aalhtajeshyi pa ca ayô'ji, ca tin'e a judío avenna avaatsha, pa ya lhan'e ya Samaria yivoque vitsha? Yit'esh cavôque, lhayaash ti ninancôtsetayelhvach japi Samaria lhavos japi judíos. 10 Pa yicuulh ja Jesús pa yit'esh: —Ca natô'ya lhôn jan yijutaj'ay ja Dios, shi' nan t'a'lhesh'a na yinôôt, pa yijô'a jayu vitsha ca a'lhesh'yi pa yinôôt, pa jajut'am vitsha pa yinôôt yi'shi' pa vatmônlhajayash. 11 Pa yit'esh lhja ôcjeclô ti yicuulh: —Lhcaanvacle, ca tin'e pa ampa ca ôtsjayesheyshi lha t'itsech, lhayaash ti tojeyshi jum na yinôôt. ¿Pa ta t'e ca atôôlhtajesh'e pa yinôôt yi'shi' pa vatmônlhajayash? 12 ¿T'ashesh'apee ajalh pa ajunash ca tataelh Jacob, ca nanjutelhyiy anôque lhqu'itsech, lhan yiyôelhshi lhapesh papi lhcles shi' pava lhclôy? 13 Yit'esh ja Jesús ti yicuulh yitsha: —Lhacôm'a papu ca niyô'tajshi nôque yinôôt vapecleyjop jayu shta ca nanyôjayu; 14 lhan'e yitsha papu ca niyô'tajshi pa yinôôt tsitsôt'ajesh, pa tanca nicaajem pa lhavinjayu pa cat'elheesh. Lhayaash pôque yinôôt ca jaycufaaytajesh jayu pa ninachfach'ee pa tanca nim, pa lhech nitô'lha pa vatmônlhajayash ôyjôlhôyech. 15 Pa lhechesh pa yit'esha lhpa ôcjeclô: —Lhcaanvacle, anjutyiy vitsha pôque yinôôt jôcl'esh ca ya aj ca nasyôjayu pa cat'elheesh, pa jaspa tanca nachey t'ôyish'e lha t'itsech. 16 Yit'esh ja Jesús ti yicuulh: —Alhun, meey pa ach'acfa ca nôque anachelh'e. 17 Yicuulh vitsha lhja ôcjeclô pa yit'esh: —Ampa yich'acfaa. Pa yit'esh ja Jesús ti yicuulh: —Jech yijô' ca lhteesh ti ampa ach'acfaa. 18 Eem ti lha pa ve'lhanôjesh taj japi ajayastajesh lhavatvômelh'in, jôque ajayataj shta ninatsôt'ajesh. Navo'yeshch'e ca lhteesh na. 19 Meelh ti yipe'yach'e cavôque, pa yit'esh lhja ôcjeclô: —Lhcaanvacle, javan'atsham ti natô'ya pava ti vaclan. 20 Papi yicchevot'elh Samaria lhavos p'alha lhapesh ti yiesh'e anôque utiyuc ti t'a'lhey ts'ivee pa Dios, lhan'e avaatsheelh ajudíoselh lhteetshelh vitsha ca veeshelh'e ja Jerusalén ca chint'aalhtaj'in. 21 Yit'esh ja Jesús ti yicuulh: —Ocjeclô, anueshyi, caaj jayu pa nalhu ca navclantaj ti tanca veeshelhnee shi' ja Jerusalén ca aalhtajelhey ja Tata. 22 Avaatsheelh Samaria avoselh tanca antôfaacshelh ja Tata jan lht'aalhtajelhey'in; lhan'e yivaatsheelh tsitôfacleshelh jan jaya'lhelhey'in, lhayaash ti tô'lha napi judíos pan qu'ilhjey jayu. 23 Taj ti nam na nalhu, pa lhech tôlhesh'e nôqueesh, napi yijô' ti t'a'lhey ja Tata, napu lhech t'a'lhey jô ja Tata jan t'ônashem ja Espíritu Santo ti yeyjatsjanesh. Pa nôque lhjunash papi yen ja Tata ca nit'aalhtajey. 24 Ja Dios lhavaatsha ti Espíritu, lhe'naa papu ca nit'aalhtajey jô', isjop ca nit'a'lhesh jan t'ônashem ja Espíritu Santo ti yeyjatsjanesh. 25 Pa yit'esh lhja ôcjeclô ti yicuulh: —Pôque tsitô'ya ti nam jayu lhech pa Mesías (pa lhey jayu shta Cristo); lhech pôque lhôn ca namtaj pa nanfacleelhyam jayu lhacôm'a cavôque matas. 26 Yicuulh ja Jesús pa yit'esh: —Ya lhech yivaatsha, nan lhtasinôyelh'in. 27 Pa lhech t'aplhuqu'e ti tapecl'in japi t'eyjatsjanjas, pa yivanesh ti tasinôyelh'in lhja ôcjeclô, pa uj ti tamp'oyeshem ts'ivee. Taj ti ampapu ca nifiiyshem ca niyôsesh pan yie' pan yeetajesh ja't'ajesha pan yasinôquielh. 28 Pa lhechesh pa nôôy lhja ôcjeclô lhja lhôjque, pa tsisha ti vapecsham pa yitsaat pa yit'esha papi lhchifas ti yiyôjisham. 29 —Atalhunelh ca anjôchielhey ja enôcôô nivacle yitô'ya na yijunash lhapesh. ¿Ni lhecha t'e jôque pa Cristo? 30 Tôlh'e ts'ivee pa yitsaat ti yicheyvatich'e ja Jesús. 31 Lhan'e japi t'eyjatsjanjas yiyôjitajaan ja Jesús pa yit'esha: —Vanqu'eyjatsjan, atsaccun cum. 32 Jô lhech pa yit'esh: —Caaj na yôc, taj ti tanca natô'yelha. 33 Pa taniyôsesh japi t'eyjatsjanjas pa yit'esh ts'ivee: —¿Tam'ey ti caaj t'e papi nicha'jey na pa lhôc? 34 Pa yit'esh ja Jesús ti nifaclem: —Jayeetsha ti yô'clesh ca jasnatajesh na yit'esh ja Dios jan tsichennee, shi' shta ca javaclhiteshem na lhcumjat lhavaatsha. 35 Lhteetshelh avaatsheelh: ‘Jôjjeclay amc'oya pava yitshatjulh jive'clas ca nôquen'e na vatcavcalhech’; taj ti yivaatsha jayeetshelh'a: A'van, ovalhqueelhey ajaalh na vatcôvjiyanach ti p'alha ti yôquen'e ca chint'ovôseshch'e. 36 Papu ca naôvtaj'e ca nit'ovôstajeshch'e lhecha jayu papin nitôts'ôtey'ocji, lhayaash pava chiyisclansha'ne tô'lha pa vatcavcalhech t'ajuya pa vatmônlhajayash ôyjôlhôyech. Pa nôque lhjunash pa c'useemvatsham'in jayu papin yicôvjiyan shi' papin yit'ovôsch'een. 37 Lhayaash ti nôque lhjunash ti yivoych'e jayu jum ca t'ônashch'e: ‘Nôque yicôvjiyan vooy nap'elh yit'ovôseshch'e.’ 38 Yivaatsha c'achenelh'ay ca at'ovôseshelhch'e jan naacôvjiyanelh. Vooy jap'elh t'acum'e lhapesh, vooy avaatsheelh pa anc'ayôôjelh pa lhcumjayash jaspa avaclhiteshelhem. 39 Pa nôquen lhayaash acloj japi Samaria lhavos yuesha pa yit'esh'in ja Jesús lhayaash ti chayeshlhach'e lhja ôcjeclô ti yit'esh: “Nifacyam lhacôm'a nava yifanishyivach'in lhapesh.” 40 Meelh ti namey japi Samaria lhavos ja Jesús pa yiyôjaa ca amônlhaajop cum. Pa napu' java nalhus ti lhech mônlheejop. 41 Acloj japi nincacuesh, lhayaash ti yipe'ya pava yit'esh'in lhclishay. 42 Pa lhechesh pa yit'esha ts'ivee lhja ôcjeclô: —Nôqueesh nitsishaa cava lhanfaclelhch'eyam ca lhecha ca tôlheshelha ti niycacuelh nôque. Am, nôqueesh pa nôclhaa ti jape'yeelh vitsha, pa nôquen lhayaash ti tsitôyjatelha ti lhech nôque lhanquey Cristo, Lhavqu'ilhjenajesh napi yiey na cotsjaat.
Pa Jesús yivatsjanchat pa lhaôs pa lhcaanvacle lhcavo
43 Vooy ti yôfisch'e java lhech napu' nalhus pa tay'e ja Jesús ja Samaria pa t'ajuyey ja Galilea. 44 Eem ti yit'esha lhavaatsha ja Jesús: Pa nivacle chiytôyjata pava ti vaclan tanca lhnôclôjech'eesh ti yitaj'e pa lhavtsaat. 45 Meelh ti yamey ja Jesús ja Galilea pa tatsha ti yivanjulh'in ti yanlhavcop japi Galilea lhavos, lhayaash ti p'alha ti nitônt'ajesha ts'ivee pava yivclanjat'in ti yie' ja Jerusalén ti lhech yiesh'e ja chivatc'usinatesh'in, eem ti yichey ts'ivee vitsha., 46 Pa lhechesh pa vapecley shta ja Jesús ja Caná yi'shi ja Galilea, yiey pan yiesh'een ti yanshijop'in pa yinôôt pa ôtjayetas t'i'. Lhech t'aplhuqu'e ti tayyashay ja lhaôs ja lhcavo ja lhcaanvacle tôlh'e' ja Capernaum. 47 Lhech jôqueey meelh ti tpeeycheyesh ja Jesús ti nam jan tôlh'e' ja Judea ti namey ja Galilea, pa yichey tatsha pa yiyôjaajop ca nôquemey cum pa lhaôs, lhayaash ti yujeey ca nivaf. 48 Pa yicuulh ja Jesús pa yit'esh: —Tanca ujanelh ca niavanchayeeshelh cava chiivclanjat'in cava nimatasa papu ca nitô'yish shi' pava chinôôclhanita. 49 Yit'esh ja lhcaanvacle lhcavo ti t'a'lha ja Jesús: —Lhcaanvacle, anach tatsha ameesh ca acôvôjlhaaey ca p'alha ca nivaf ja yaôs. 50 Yit'esh ja Jesús ti yicuulh: —Alhun ca mapecley pa ajpôyich; ti lha pa mônlha pa aôs. Pa lhech nivacle nincacuesh pava yit'esha ja Jesús, lhech tôlh'e ti vapec. 51 Meelh ti vapecley pa lhajpôyich pa yichjuulh papi lhcavos pa nifaclem tatsha ti vacutesh pa yit'esh: —Lhapa mônlha ja aôs. 52 Meelh ti yamey jô lhech papuque yiclôvalh pa lhaôs pa niyôsesh pa t'elhesh ti vatsjanesh pa lhjunashtaj. Pa yit'esh ts'ivee: —Vooy can'ut ti tanjuyshicham na jumcuclaay lhechesh pa vô'mesh ca lhclôjut. 53 Pa lhechesh pa yaychavalhch'e pa lhtata eem ti lhech yie' na jumcuclaay ti yit'esh ja Jesús ti yiyôjaa: “Tanca nivaf jayu pa aôs”. Pa nôquen lhayaash jô lhech shi' lhacôm'a pan t'ajôôjjam ti nincacu ts'ivee ja Jesús. 54 Côque nich'a napuesh nôqueesh ti yivclanjat'e ja Jesús ja Galilea pava nimatasa papu ca nitô'yish, jan t'aplhuqu'e ti tay'e shta muc ja Judea.
Pa Jesús yivatsjanchat pa ancooc, Betesda lhavo'
1 Pa lhechesh pa vaclan ja vatc'usinatesh'in japi judíos, pa vapecley vitsha ja Jesús ja Jerusalén. 2 Shalheema ja Jerusalén ja lhanquey lhashieshc'oya pava Tashinshtas, lhja vishiniesh lhqueyesh japi judíos lhcliish Betesda. Lhech jôque ve'lhanôjesh java jpôyjey. 3 Java lhech jpôyjeyjop yiôcji ts'ivee papi acloj aôytesvatsham'in: papi taclujuy, papi ancojoy, shi' papi aôytes pava lhcafofis. Lhech papuque tach'anjop pa yinôôt ca nitatvaych'aclajtajshi. 4 Lhayaash pa ti t'elhesh ti nacheyshicham'in pa ángel lhpa lhech vishiniesh pa yinayuuyjat'in pa yinôôt. Yamsha'in papu ti vatjutsasham'in lhpa lhech vishini ti canoin pa yinôôt, pa lhechesh pa vatsjanesh tatsha pa ti lhjunash pa ti lhayyashataj. 5 Pa lhech yie' pôque ve'lha nivacle lhapa treinta y ocho lhôn pava lhnincopisesh ti aôytej'in. 6 Meelh ti yi'van ja Jesús jô lhech, tpeeycheyesh shta ti cajuqu'e ti yijônsha'ne pa lhayyasha, pa niyôsesh ja Jesús pa yit'esh: —¿lhteesh t'e ca avatsjan? 7 Pa yicuulh jô lhech aôytej'in pa yit'esh: —Lhcaanvacle, ampa nivaclea ca nits'efenesh ca naschaajsham na yinôôt ti nayuuynayuy'in, vacjô' jamtajaan ti p'alha ti yitsham'in paelh nivacle. 8 Pa lhechesh pa yit'esh ja Jesús ti yiyôjaa: —Aneetsham, ca acum'ôcji na amôjovat'esh ca mô'. 9 Pa lhechesh pa vatsjan tatsha jô lhech nivacle, pa t'acum'ôcji ja lhmôjovat pa yich. Taj ti yivo'yeshc'oya ja nalhu ti chit'ichayshi ti lhech lhfanishesh ja Jesús. 10 Pa yit'esha japi judíos ti yiyôjaa ja nich'eesh ti vatsjan: —Nôque nalhu ti chit'ichayshi; tanca chinvashan'am ti lhtilhôj na amôjovat'esh. 11 Pa yicuulh jô lhech nivacle pa yit'esh: —Lhech yit'eshyi jan tsivatsjanchat. Yit'esh ti niyôjiyiy: ‘Acum'ôcji na amôjovat ca mô'.’ 12 Pa niy'ôsesh ts'ivee pa yit'esh: —¿She nivacle pôque lhech yit'esh'a: ‘Acum'ôvji na amôjovat ca mô'’? 13 Taj ti ninantôfaclesh yitsha jô lhech nich'a vatsjan pan yivatsjanchat, lhayaash ti t'astaayshiin ja Jesús japi ninapu'a nivacle ti yich. 14 Vooy ti chinch'e pa yivan'ôcji ja Jesús ja uj vatishjanjavat ja nivacle yivatsjanchat, pa yit'esh ti yiyôjaa: —A'va, nôqueesh lhavatsjan, ya aj ca mapecla pa sasch'e ti lhasnatesh, jaspa tanca navclan'am pa yaash ti vatcloyitsjayashesh. 15 Lhech tôlh'e' ti yitshaam jô lhech nivacle japi judíos ti nifaclem pa yit'esh: Lhech t'ema ja Jesús tsivatsjanchat. 16 Pa lhech tôlhesh'e japuque judíos ti vo'tajch'e ts'ivee ja Jesús ca niclôn, lhayaash ti yivclantajshi ja nalhu ti chit'ichayshi. 17 Pa yicuulh ja Jesús pa yit'esh: —Ja Tata yajateshch'e ti t'acum'in pa yamja shta nôqueesh, pa lhech yijunash vitsha mônlhaesh ti jaycum'in. 18 Pa lhechesh pa yijô' ti ujesh ti nivôncaclônjatsutajesh japi judíos, lhayaash ti nitsishaaesh nôqueesh ca nutshem ti t'acumjiin ja nalhu ti chit'ichayshi, lhayaash shita ti yit'eshlhavne ca Lhtataaesh pa Dios, jô'tajesh ti vatjôney pa Dios.
Pa t'unaj pa Dios Lhaôs
19 Pa lhechesh pa yit'esha ja Jesús: “Yijô' ti jayeetshelh'a na Lhaôs ja Dios nintô'lha pa ca nasnatesh lhavaatsha; tsisha java yivanesh ja Lhtata ti yisnatesh. Lhacôm'a java yisnatesh ja Lhtata yisnatesh vitsha na Lhaôs. 20 Lhayaash ti nôque lhjunash ja Vatata ti yen na Vataôs pa nôclitem lhacôm'a java yisnatesh; pa nôclitem jayu shta pava ya'shesh ti us, pa natôyiyjateshelh jayu avaatsheelh. 21 Lhech lhjunash ja Vatata ca nenjatajchisham papi vafsha'ne pa yijutem pa lhamônljajayash, lhech lhjunash shta na Vataôs yijutem jayu pa lhamônlhajayash papu ca naôvtaj'e ca nijutajey. 22 Jô lhech Vatata tanca nivalha papu, vooy na Lhaôs yijuteyjop pa t'unaj ca nivalha papu, 23 jaspa lhacôm'a ca nijutem na Lhaôs pa lhôclôjqueyash ve'lheelhsham ja Lhtata. Papi ninôclôj na Vataôs ninôclôj shta ja Lhtata jan nichenshicham. 24 “Yijô' ti jayeetshelh'a papu ca nu'tajesh'yi na jayeesh, pa nuesha shta jan tsichenshicham, pa nicaajem pa lhamônlhajayash ôyjôlhôyech; pa tan jayu ca chinclôyit, lhayaash ti tayshi pa lhavafi pa namey pa lhamônlhajayash. 25 Yijô' ti jayeetshelh'a: Nam jayu pa nalhu, pa lha nam nôqueesh na t'aplhu' ti yipe'ya jayu capi vafsha'ne na t'ôjôj na Dios Lhaôs; vooy papu ca nanc'ashamtajem pa mônlhaa jayu shta. 26 Lhayaash na Vatata iseemjop lhavaatsha ca nijutem papu pa lhamônlhajayash, lhech lhjunash shta ti chiyjuteyjop na Vataôs pa t'unajjop ca nijutem pa lhamônlhajayash papu. 27 Jô'tajesh ti yijutem pa t'unajjop jaspa lhavoesh jayu ca nasclanvatich'e, eem ti Nivacle Lhô'sesh lhavaatsha. 28 Ya aj ca natamp'oyanelh navôque, lhayaash ti nam jayu pa nalhu ti yipe'ya jayu lhacôm'a capi vafsha'ne na t'ôjôj 29 pa tôlhch'e' jayu pava lhnivalhjey ca natajfach'ee. Papi yivo'yeshch'e pa lhfanishlhavach pa neeychisham jayu pa lhamônlhajayash; lhan'e vitsha papi yisnatesh pa niysa' neeychisham jayu vitsha pa uj lhnivalhcheyash.
Tanôôclhanitsha pa t'unaj pa Jesús
30 Tanca nitôlhyi pa ca yisnatesh. Jajôneshch'e jayu ca jasclantajvatich'e pa ca lhjunashtaja pa ca jape'yatajch'e. Uj ti tsivo'yeshch'e jayu pa ca yônashtajeesh, lhayaash ti niyalhecha ca nitôlhyi pa ca yit'esh, vooy jô' jan yit'esh ja Tata jan tsichenee. 31 Ca yalhecha lhôn ca tanôôclhaniteshyivne na yijunash, pa cha'lheesh jayu ti jatônôclit. 32 Taj ti caaj jeelh tsinôôclhanita, nôquen lhayaash tsitô'ya jum ti nicha'lhaaesh cava tsinôôclhanitsha jôque. 33 Avaatsheelh lhavancachenjanelhey ja Juan, pa lhech t'aplhuqu'e ti yinôôclhanita pa yich'e' ca yijô' jum. 34 Taj ti yivaatsha nisuyeeshi pa nivacle ca nasnôôclhanita; tsi'sha ti jayeetshelh'a jaspa isa'jop ca chinalhjeneelh jayu. 35 Lhan'e yitsha jô lhech Juan itôtajesh chitseclô'lhey pjumtsej shta; lhan'e avaatsheelh pa muc ti nashamitjatelh ja lhqu'isjuyaj. 36 Pa lhan'e yivaatsha ca nitôlhyi ti janôôlhanita yash'apee ca yinôôclhanita ja Juan, lhayaash ti caaj cava niyôjeeshyi ja Tata ca jasnatesh. Lhech cavôque tsinôôclhanitsha shta ti tsichenee ja Tata. 37 Jô lhôn p'alha lhapesh ti tsinôôclahnita ja Tata jô lhech jan tsichenee. Taj ti avaatsheelh nape'yeelh pa ca t'ôjôja pa tanca avanelh shta. 38 Taj ti ninôvelh'atshi cava lhasinôc, lhayaash ti lhcacueshelh na lhech nan nichentajelh'ay ja Lhtata. 39 Yijô'taj ti lhavôntôyitshelh jum nava Vani'sesh'e, lhentajelh ca atôôlhshelha pa vatmônlhajayash ôyjôlhôyech, pa teya ti tsinôôclhanita shta nava lhech Vani'sesh'e. 40 Taj ti naat'eshelh avaatsheelh ca anachelhyiy ca nôvelh'ay pa amônlhajayashelh. , 41 Niyit'esh ca yicuumjulh ca nitsôclôj papi nivacle. 42 Lhayaash ti tsitôôyshelh'a jum ti amelh'am ca nôvelh'atshi ja Dios lhencheyash. 43 Yivaatsha janacheshnee ca lhey ja Tata, taj ti naat'eshelh ca acuumjelhyijulh; vooytaja lhech peelh nivacle ca nachelh'ay pa yitsôt'ajesh lhey pa lhechtaja lhech lhavaatsha ca acuumjelhjulh. 44 ¿Ta ajalh ca lhjunashtaja ca u'janelh, lhayaash ti tsishaesh ti lhtanôclôjelhsha'ne avaatsheelh, taj ti tanca avoolhey pa lhnôclôjqueyash ja ve'lha Dios? 45 Ya aj ca alheclôjeshelh ca yalhecha jayu ca nifaclem ja Tata na ajunashelh ti ninavooyshelhch'e; am, caaj neelh nafacshelh ja lhey ja Moisés jan acaclectajelha. 46 Lhayaash ca yijô'a lhôn ca niacacuaeshelh jô lhech Moisés pa tan ca ascacutajeshelh vitsha, lhayaash ti yalhech yivaatsha ts'isesh'e lhapesh jô lhech Moisés. 47 Taj ti ca niutajeeshelha ja Moisés, ¿pa ta ajalh ca lhjunashtaja yitsha ca anu'jelhyi?
Pa Jesús yicunjansha'ne papi cinco mil nivacle
1 Nôjeshch'e cavôque, pa yicheypacham ja Jesús ja lhjôvcha Galilea lhalhetsham ja Tiberias. 2 Acloj japi nivacle voqu'eetsham, lhayaash ti yivanesh ts'ivee pa lhfanishesh ti yivatsjanchatsha'ne japi aôytesvatsham'in, yicheneshjop cava nimatasa papu ca nitô'yish. 3 Ja Jesús yichelh'apee japi t'eyjatsjanjas lhja utiyuc, pa lhech yielh'e. 4 Taj ti lha pa yujeey ca navclan ja lhc'usiyashesh'in japi judíos pa lhanquey Pascua. 5 C'oya ti yovalhsham ja Jesús japi acloj nivacle, pa yit'esh ti yiyôjaa ja Felipe: —¿Ta t'e ca shtatô'lhesh'e ca shtacashayey pa vatôc ca shtacunjansha'ne napuque nivacle? 6 Taj ti lhech lha t'ônash ja Jesús, yichesh'e ca nitôôysha ja Felipe pa ca t'ônasheem, lhayaash ti p'alha ti yitô'ya ja Jesús pa lhfanishlhavach jayu. 7 Yicuulh ja Felipe pa yit'esh: —Tanca nitajulhsham pava docientos lhtinshanja (denarios) ca nuy'ôcji pava yucuvec, tanca nitajulh'apee pava t'iyas. 8 Pa lhechesh pa yit'esh jaelh t'eyjatsjanach lhey Andrés, lhch'inish ja Simón Pedro: 9 —Yiey nôcôô ja necjôôc yichaj'in java ve'lhanôjesh yucuvec shi' java napu' sajech, taj ti tanca nitajulhsham japi lhech jant'ajôôj. 10 Pa yit'esh ja Jesús ti yiyôjaa japi t'eyjatsjanjas: —Ayôjeelha napi nivacle ca nôvqu'esha'ne. Eem ti lhech yie' lhôn pa uj yitjataj. 11 Lhan'e ja Jesús pa t'acum'e java yucuvec pa yijutey pa t'ishamiesh pa Dios. Vooy ti yivaclhitesh pa yijutshey japi t'eyjatsjanjas pa tiseshch'e lhacôm'a jant'ajôôj japi yich'esha'ne. Pa lhech lha lhfanishesh lhacôm'a java sajech ti tcufayesh'in. 12 Vooy ti yapeesha'ne lhacôm'a japu lhech, pa yit'esh ja Jesús ti yiyôjaa japi t'eyjatsjanjas: —Ant'ôelhch'e lhacôm'a nava yalhanashch'e vatcat'iyas, secl'esh ca ya aj ca chinvôm'in. 13 Pa jôtaney ti nit'ôqu'e ts'ivee java yalhanashch'e vatcat'iyasesh java yucuvec yiponteshch'esha'ne java doce sisenlhiy. 14 Meelh ti yivanesh japi nivacle ja Jesús ti yivclanjat pava nimatasa papu ca nitô'yish pa yit'esh ts'ivee: —Yijô' t'emma t'ôyiy ti lhech nôque chiytôyjata pava ti vaclan taneeyjayjulh'in lhapesh ca nameyshicham na cotsjaat. 15 Taj ti yitô'ya tatsha ja Jesús pan yaychavalhtaj'e japi nivacle, lhe'naa ca nivoqu'e ts'ivee shta, yeetajesh ca natcum'elhatam ja Jesús ca nimaj'e ca lhecha ca lhanvacleaesh. Taj ti ve'lha ti tayshi ja Jesús.
Pa Jesús ti t'ôtay'apee pa yinôôt
16 Lhapa tulh'in yich'ôcjilhavôôj japi t'eyjatsjanjas ja Jesús ja lhjôvcha. 17 Meelh ti yamey ts'ivee lhja lhôvjatshi pa t'ôsshaamsha'ne pa t'ajuyshey ja Capernaum. Taj ti lha pa tulh'in lhan'e ja Jesús ch'apac'oya ca natpec. 18 Pa lhech t'aplhuqu'e ti tanu' ja uj lhaviim pa natay'eva'ne pa yinôôt. 19 Palha pitôjesh ve'lhanôjesh kilometros pa yam'e pa lhechesh ti yivanjulh ja Jesús ti nachjuulh lhja lhôvjatshi, vaclech'apee ja yinôôt. Pa uj ti nijovayem japi t'eyjatsjanjas. 20 Pa yit'esh ja Jesús ti yiyôjaa: —¡Ya lhech, ya aj ca anjo'vayelhyam! 21 Pa lhechesh pa yeetajesh ca nanshi ts'ivee ja Jesús lhja lhôvjatshi, taj ti lhapa yamey pacham ts'ivee yiey pan t'ajuyshi.
Papi nivacle ti vooysha'ne pa Jesús
22 Vooy ti nalhu pa yovalheyshiin japi nivacle japi mônlheey pacham ja lhjôvcha, yivaneyshi ti ve'lha lhja lhôvjatshi lhjan yi'shi' japi t'eyjatsjanjas ja Jesús. Yitô'ya shta ti ninôveyshi ja Jesús japi t'eyjatsjanjas, tsisha japuque ti yichesh ts'ivee lhja lhôvjatshi. 23 Pa lhech nalhu yamey'in pav'elh vatôvjatshiyis pa yitsaat Tiberias. Lhech pavôque chiytsavalhshey pan yie' ja Jesús ti t'alh'apee java yucuvec ti yicunjanesh japi nivacle. 24 C'oya ti nitônt'ajtajesh japi nivacle ca nivan ja Jesús shi' japi t'eyjatsjanjas, pa jaspa t'ôsshaamsha'ne ts'ivee shta java lhôvjatshiyis pa yicheypacham ts'ivee yicheyshi ja Capernaum pa nôôclhaa ti vooysha'ne ts'ivee ja Jesús.
Pa Jesús yucuveesh tô'lha pa vatmônlhajayash
25 Meelh ti yameypacham ts'ivee pa lhech yivan'e japuque ja Jesús pa yit'esh ti niyôs ts'ivee: —Vanqu'eyjatsjan, ¿ta t'elhesh ti nôque lhnam'e? 26 Pa yit'esh ja Jesús ti yicuulh: —Yijô' ti jayeetshelh'a, nilhecha ca avojelhyiysha'ne ca natô'yelhc'oya ca lhasvaneshelh nimatasa papu ca nitô'yish. Vooy cava yucuvec lhancashclôjeshelh ti nape'shelhsha'ne. 27 Ya aj ca acumjayasheeshelh pa vatôc vôôm. Vooy pa vatôc tô'lha pa vatmônlhajayash ôyjôlhôyech. Cô lhech vatôc yijutelh'ay jayu na Nivacle Lhô'sesh, lhayaash ti yinôôclhanitshajop tatsha ja Vatata Dios na lhech. 28 Pa yit'esh ts'ivee ti niyôsesh: —¿Ta t'e ca yifanishaeshelh jaspa jasnatshelh jayu pava shincumjataj'e pa Dios? 29 Pa yicuulh vitsha ja Jesús pa yit'esh: —Nava yen ja Dios ca asnatshelhem ca ueshelha nan nichenelh'ay. 30 Yit'esh ts'ivee ti yicuulh: —¿She t'e pa ca avclanjatelhyam ca javanelh ca c'ueshelh'a? ¿She t'e pa ca asnatesh? 31 Papi vatjutsa' yicchevot'elh tuj lhapesh lhôn pava maná ti yie' pa cotsjaat ti ampapu ca nôv'e' can t'ônashch'esha'ne cava Vani'sesh'e ya'clishay ti yit'esh: ‘Yijuteyshicham ja Dios nava yucuvec lhey maná tô'lhey ja vôôs pa tujts'ivee.’ 32 Pa yit'esh yitsha ja Jesús ti yiyôjaa: —Yijô' ti jayeetshelh'a ti nilhecha ja Moisés ca nitô'lheshchishamnee pava yucuvec. Am, vooy jôcl'esh ja Tata yijutelh'ay jan yijô' ti yucuve tô'lhey ja vôôs. 33 Lhayaash lha lhech yucuve tô'lha ja Dios ti yijutey, lhech nan namjicham, na lhech nitôôlhsha pa lhamônlhajayash napi yiey na cotsjaat. 34 Pa yit'esh vitsha japi lhech ti yiyôjaa: —Lhcaanvacle, istaa ca yajateesh ca anjuteelhyi lhpa lhech yucuve. 35 Pa yit'esh ja Jesús ti yicuulh: —Ya lhech ya yucuveesh tô'lha pa vatmônlhajayash. Papu ca ninachtajyiy tanca niyipcun pa cat'elheesh, papu shta ca ninascacutaja tan pa cat'elheesh ca nanyôjayu jayu. 36 Lha'ma apistaj ti jayeetshelh'a taj ti naat'eshelh ca anu'jelhyi ti lhasvaneelh. 37 Lhacôm'a cava nijutyiy ja Tata namyiy jayu; pa nôquee papu ca nachtajyiy tanca yicavoyjulh jayu. 38 Lhayaash ti jatôlheychisham ja vôôs ti janachshicham, taj ti nilhecha ca nacheyshicham pa ca yifanishayivach ca nitôlhyi, am, vooy nan tsichenshicham jasnatshem nava tô'lha. 39 Côque tô'lha ja Tata jan tsichenshicham ca ya aj ca nac'oyesh papu ca ve'lhaa napi nijutyiy, jôcl'esh ca janenjatchishamch'e jayu jan yôj'esha'ne nalhu. 40 Lhayaash ti côque tô'lha jô lhech tsichenshicham, lhacôm'a jayu papi yovalhey na Lhaôs ja Dios shi' ca nincacutajeesh, pa lhecha papuque pa nicaajem pa lhamônlhajayash ôyjôlhôyech. Lhan'e yivaatsha pa janenjatchisham jayu jan yôj'esha'ne nalhu. 41 Pa lhechesh pa yit'oyita japuque judíos ja Jesús, lhayaash ti yit'eshlhavne: “Ya lhech ya yucuveesh jatôlheychisham ja vôôs.” 42 Pa yit'esh ts'ivee: —¿Ta ca lhecha nôque Jesús, lhaôs ja José? Shtantôfa'clesh ja lhtata shi' lhja lhamimi. ¿Ta t'e lhayaash ti yit'esh na: Jatôlheychisham ja vôôs? 43 Pa lhechesh pa yit'esh ja Jesús: —Ya aj ca nat'ô'yelhshi. 44 Sasemjop jayu papu ca nachyiy ca ninantojontajeesh ja Tata jan tsichenshicham; pa lhecha jayu ca janenjatchisham jayu jan yôj'esha'ne nalhu. 45 Yit'esh cava lhqu'isjayanjas lhapesh japi chiytôyjata pava ti vaclan: ‘Pa Dios yeyjatsjanesh jayu lhacôm'a.’ Papu ca nanch'anjayutaja cava lhclishay ja Tata ca niteetajesh ca nantôychiyutajesh, pa lhecha ca ninachyiy. 46 Papu ca nôv'e' ca nivan lhôn ja Vatata; ve'lhajop nan yi'van lhech nan nichenshicham ja Dios. 47 Yijô' ti jayeetshelh'a, papu ca nit'ujantajyish pa nicaajem pa vatmônlhajayash ôyjôlhôyech. 48 Ya lhech ya yucuveesh tô'lha na vatmônlhajayash. 49 Vooy capi acchevot'elh tuj lhapesh java maná ti yie' ja cotsjaat ti ampapu ca nôv'e', capu lhech lhacôm'a vafsha'ne. 50 Taj ti jayasinôyesh lha yucuve tôlheychisham ja vôôs, lhayaash papu ca nitujtaj tanca nivaf jayu. 51 Ya lhech yivaatsha ya yucuveesh tô'lha na vatmônlhajayash, lha lhech yucuve tôlheychisham ja vôôs. Papu ca nitujtaj lhajôque yucuve caajem jayu na vatmônlhajayash ôyjôlhôyech. Lhajôque yucuve jaycufa'yesh jayu, lhech na yivu'vat. Javaatjutey jaspa nimônlhanit napi yie' na cotsjaat. 52 Pa tavayeshvanôcji japi judíos ti yit'eshvatsham'in: —¿Ta t'e ca lhjunasha ca nanjutjooy nôque na t'asjaan ca shtatuj? 53 Pa yit'esh ja Jesús: —Yijô' ti jayeetshelh'a, ca na atujtajeelh na t'asjaan na Nivacle Lhô'sesh, shi' ca naayôtajeelhshi nava lhavoyey pa ameelh'am pa vatmônlhajayash. 54 Lhan'e yitsha papu ca nitujtaj na yisjaan shi' ca niyô'tajshi nava yivoyey pa lhecha ca nicaajem pa vatmônlhajayash ôyjôlhôyech; jô'tajesh ti janenjatchisham jayu jan yôj'esha'ne nalhu. 55 Lhayaash ti vatôclesh jô na yisjaan, jô'tajesh ti yijô' ti chiyôji' shta nava yivoyey. 56 Papu ca nitujtaj na yisjaan shi' ca niyô'tajshi nava yivoyey, pa lhecha jayu papi mônlhaayitshi, lhan'e yitsha pa jôvji' jayu. 57 Ja Vatata jan tsichenshicham, caajem pa lhamônlhajayash, pa tsimônlhanit shta jô lhech. Pa lhech lhjunash papu ca nastujtaj pa jamônlhanit jayu vitsha. 58 Yasinôqui lhapôque yucuve tôlheychisham ja vôôs. Lhapôque yucuve nilhjunashajulh java maná javan tuj lhapesh capi acchevot'elh, papi lhech apis ti vafsha'ne lhacôm'a. Lhan'e yitsha papu ca nitujtaj lhajôque yucuve, ôyjôlhôyech'esh jayu pa lhamônlhajayash. 59 Cavôque matas vanqu'eyjatsjanesh ja Jesús ti yiesh'ôcji ja vatvanqu'eyjatsjanjavat yiey ja Capernaum.
Pava ya'clishayjop pa vatmônlhajayash ôyjôlhôyech
60 Acloj japi tanaôycheelh ja Jesús yipe'yach'e cavôque pa yit'esh ts'ivee: —Côque pa tavijataych'e ca chinatcuumjulh. ¿She t'e papu ca isa'emjop ca natcuumjulh? 61 Taj ti yitô'ya tatsha ja Jesús ti lhech t'ônashvatsham'in japi tanaôycheelh ti clishamatvatsham'in, pa yit'esh ti niyôsesh: —¿Nasuyinatelh'in cavôque? 62 ¿Ta ajalh ca ajunashtajeelh ca avantajelh na Nivacle Lhô'sesh ca napectajey jan yie'in lhapesh? 63 Pa vat'sôc'ôclit ti vancamônlhanit, vooy pa vatvuvaat ampa ca nitô'lha. Cava jayeetshelh'am yijo'qu'esha'ne ti vat'sôc'ôclit'esh tô'lha na vatmônlhajayash. 64 Taj ti caaj napi yielh'atshi ninteesh ca nit'ujansha'ne. Nôque lhjunash ja Jesús p'alha ti yitô'ya pan yie' papi ninteesh ca nit'ujanesh, yitô'ya shta pan yie' papi vanqu'eeyjatesh jayu pa cat'elhtajeesh. 65 Pa yit'esh shta ja Jesús: —Lhe'naa can jayeetshelh'a tanca lhavaatshaa papu ca nachyiy, vooy ca nitôôlhtaja ja Tata ca niyôjitaja pa jaspa isa'jop ca nachyiy. 66 Pa lhech tôlhesh'e ti acloj japi t'eyjatsjanjas vômeshch'e, nit'ôyish'ee ca nivoqu'esha'ne. 67 Pa lhechesh pa niyôs ja Jesús japi doce t'eyjatsjanjas pa yit'esh: —¿Lhôquelh'inyic'oya shta? 68 Pa yicuulh ja Simón Pedro pa yit'esh: —Lhcaanvacle, ¿ta ajaalh ca jôqueelhshi? Nava aclishay yi'shi' pa vatmônlhajayash ôyjôlhôyech. 69 Vooy yivaatsheelh nic'acacueshelh, jô'tajesh ti tsitô'yelh'a jum ti a'lhech avaatsha ti a Cristo, Lhôs'ash pa Dios pan mônlha. 70 Pa yicuulh ja Jesús pa yit'esh: —¿Ta ca adoceaelh avaatsheelh c'avoelh'ayshitaj? Taj ti ve'lha na yielh'atshi tsich'e'esh. 71 Catin'e lhech ja Judas Iscariote yasinôqui ja Jesús, jô lhech lhaôs ja Simón. Lhayaash ti lhech jayu lhavaatsha ja Judas vanqu'eeyjatesh jayu pa cat'elhtajeesh, lha'ma tôôlhtajsham japi doce t'eyjatsjanjas.
Pa lhcacujayash papi Jesús lhch'injavot
1 Pa lhech tôlh'e' ja Jesús ti t'ôtaych'e shta ja Galilea, jô'lhaa ti ninteesh ca nôv'e' ja Judea, lhayaash ti tafjuntaja japi judíos ca niclôn. 2 Lhapa yujac'oya ca navclan ja lhc'usiyash'in japi judíos, jan t'aplhu'in ti lhajpôyjeyesh pava t'aclôôc. 3 Pa lhechesh pa yiyôjaa japi lhch'injavot pa yit'esh ts'ivee: —Aynee cum, meeycum shta ja Judea jôcl'esh ca navanesh vitsha japi lhech yie' eyjatsjanjas pava lhavclanjatnee nava nimatasa papu ca nitô'yish. 4 Papu ti yen ti chintôfaacsha, pa tanca niniistanjatesh pava ti yisnatesh. Ti apis ti lhasnatesh cavôque lhavclanjat pa asnatesh'e lhacôm'a yiey t'ajuyish napi yiey na cotsjaat. 5 Lhech t'ônashtaja japi lhch'injavot, taj ti ninuesha. 6 Pa lhechesh pa yit'esh ja Jesús ti yicuulh: —Jôjjeclay ninameyjop ja yinc'ôplhu' jayu, vooy avaatsheelh tajulhelhey'am nava nalhus. 7 Lhayaash ti tanca ayya'sheelh ca nacônitshielh napi nivacle yie' na cotsjaat; lhan'e yivaatsha pa tsicônitshi eem ti janôôclhanite'ma ti ojiyis nava lhfanishlhavach ts'ivee. 8 Meelhey avaatsheelh pa vatc'usiyashesh'in, vooy yivaatsha jôjjeclay tanca yichey, lhayaash ti jôjjeclay ninameyjop jan yinc'ôplhu jayu vitsha. 9 Tifeshch'e cavôque ti yit'esha pa mônlhee ja Galilea. Pa Jesús yiey pa vatc'usiyashesh'in ti vatajpecleytesesh pava t'aclôôc. 10 Vooy ti apis ti nôjey'in japi lhch'injavot ja vatc'usiyashesh'in, pa yijuyjateshch'e vitsha ja Jesús yichey ja vatc'usiyashesh'in, taj ti nintônôclit'in, pa vaniistanjat. 11 Lhan'e japi judíos ven'etajesha'ne ti vo'tajeshsha'neen ja Jesús, pa yit'esh ts'ivee: —¿Ta t'e yie' ja nivacle? 12 Uj ti tavayeshvanôcji japi judíos ti chaya. Caaj japi yit'esh: “Issha'ne jô lhech nivacle;” vooy jap'elh yit'esh vitsha: “Yaash ca isa'sha'ne, yicôjôsjat atesha napi nivacle.” 13 Taj ti ampapu ca nifi'yeshlhtapee ca nôveyshi japi acloj ca nasinôqui, lhayaash ti nijovayem ts'ivee japi judíos. 14 Lhapa lhcachivat'eshi java nalhus ti chivatc'usinatesh'in, pa lhechesh pa yichey ja Jesús ja vatishjanjavat pa vanqu'eyjatsjan'ôcji. 15 Tamp'oyeshem jum japi judíos pan t'ônash ja Jesús pa yit'eshvatsham'in: —¿Ta t'e lhayaash nôque nivacle ti yitô'yish jum cava Vani'sesh'e, catin'e nichineyjatsjan avenna. 16 Pa yit'esh ja Jesús ti yicuulh: —Cavôque javanqu'eyjatsjanesh nintôlhyi' tô'lha jan tsichenshicham. 17 Papu ca niteetajesh ca nu'tajesha cavan yit'esh ja Dios, pa jaspa nitô'ya jayu ti yijô' ti tô'lha ja Dios nava jayeesh'in, ja't'ajesha ca yatsishaaesh ca yiclishaya navôque. 18 Vooy papu ti tasinô'yesh pava tô'lha vooy ca lhnôclôjech'eesh pava yit'esh'in. Lhan'e papu ti voomey pa lhôclôjqueyasha jan yichen, na lhech tasinô'yesh pava yijô', pa amji pa vatjôtsôclônjayash. 19 ¿Ninjutelh'ay nataney ja Moisés cô lhech vatyôjijat? Pa nive'lhaa papu ca nijôneshch'e can t'ônashch'e. ¿Pa ta t'e lhayaash ti lhtsachantajelh ca asclôneelh? 20 Pa yicuulh japi nivacle pa yit'esh: —Tam'ey ti yiatshi pa tsich'e'; ampapu ca nitafjuntaj'a ca naclôn. 21 Yicuulh shta ja Jesús pa yit'esh: —Ve'lha ca javclanjatshi ja nalhu ti chit'ichayshi ca nimatasa papu ca nitô'yish, pa lhech côque lhtamp'oyeshelhyam. 22 Vooy ja Moisés yijutelh'ay pa lhfanishesh papu ti chiyseej (taj ti nilhecha ja Moisés ca nitô'lha, caaj shta lhapesh japi catsicchevot lhech lhfanishesh shta), pa nôquen lhayaash naayôytaneshelh vitsha ja nalhu ti chit'ichayshi ti lhsejelh pa taôvclaj. 23 Catin'e pa chivashan ca chinseej pa taôvclaj pa nalhu ti chit'ichayshi, ti nichin'aminatshi java lhayôjijates ja Moisés, ¿pa ta t'e lhayaash ti lhnuteshelhyam ja nivacle ti javatsjanchatshi jan tuc'a' ja lhavu'vat ja nalhu ti chit'ichayshi? 24 Ya aj ca pachama papu ca ivalhelha pava ca lhfanishtaja lhavach ca asclantajeshch'e. Istaa ca asclanelhch'evatjuulh pa avoyjatelhvatjulh. ,,
Pa Jesús yasinôqui pan tô'lha
25 Pa lhechesh pa niyôsesh japi napu' Jerusalén lhavos pa yit'esh: —¿Lhech t'e apee nôque chiyovalhtajc'oya ca'na ca chinclôn? 26 Vacjô' pa ninasinôqui papu ti yiesh'e na clayôy'e nava lhasinôc. ¿Tam'ey ti yitôôysha t'e nôqueesh napi lhcaanvaclesesh ti lhech lhavaatsha ti Cristo? 27 Taj ti shtantô'yavatam na apee japin tô'lha nôque. Lhan'e yitsha ca natajshicham pan yijô' ti Cristo, tanca nitô'ya papu pa ca nitôôlhtajshi. 28 Meelh ti vanqu'eyjatsjan'ôcji ja Jesús ja uj vatishjanjavat pa lhech t'aplhuqu'e ti yisitsenesh pa yit'esh: —¡Yijô' atesha ti lhantôfa'clelhyish jô'tajesh ti natô'yelha shta japi jatô'lha! Taj ti tanca yivaatsha ca nitôlhyi ti nôque janatshi, caaj jôque tsichenshina uj ti yijô' lhavaatsha, taj ti tanca antôfaacshelh avaatsheelh. 29 Lhan'e yivaatsha pa tsitôfaclesh, lhayaash ti jatô'lha vitsha jô lhech jan tsichenee. 30 Pa lhechesh pa tanachantajesh ts'ivee ca nôcfa' jôque, taj ti ampapu ca nama; eem ti jôjjeclay ninameyjop pa lhanc'ôplhu. 31 Jô'lhaa ti acloj japi nivacle japi yit'esh ti nincacuesh, pa lhech japuque ti yit'esh ts'ivee: —Tam'ey ca ninamtaj pa Cristo, ¿pa nashesh'apee t'e ca navclanjataj pava nimatasa papu ca nitô'yish nôque nivacle?
Papi fariseos yicheney papi c'afoquelhay jaspa yôcfa' pa Jesús
32 Lhan'e japi fariseos pa yipe'yeeshch'een japi nivacle ti yasinôqui jô lhech Jesús, pa lhechesh pa yicheney japi lhcavos japi vatcasinôc lhanvacles ja vatishjanjavat shi' japi lhech fariseos, yichentajey ca nôcfa ts'ivee ja Jesús. 33 Pa lhechesh pa yit'esh ja Jesús: —Jôjjeclay tiqu'in'esh jayu ca yamônlhaaelh'ajop'in, pa lhecheesh pa japecley jayu jan tsichenshicham. 34 Avaatsheelh lhavoelhyisha'ne, taj ti tanca asvaneelh, lhayaash ti tanca amelhey jayu jan jôv'e'in. 35 Pa lhechesh pa yit'eshvatsham'in japi judíos ti taniyôsesh ts'ivee: —¿Ta t'e t'ajuyshi jayu nôque ca nishtavana t'ôyish'e? ¿Yichey jayu nataney japi judíos japin vacôtsônshiin japi griegos ca jaspa neyjatsjan? 36 ¿Ta t'e yich'e' ca yit'esh'in nalhche: ‘Avaatsheelh lhavoelhyisha'ne jayu, taj ti tanca asvaneelh, lhayaash ti tanca amelhey jan jôv'e'in’?
Pava lhajôyshay tô'lha pa yinôôt tcamônlhay
37 Meelh ti vaclan ja nalhu jan yôj'esha'ne ja vatc'usiyasesh'in pa lhechin yijô' ti ya'shesh ti chivatc'usinatesh'in. Pa lhech t'aplhuqu'e' ti vatsavat ja Jesús pa yisitsenesh ti yit'esh: —Papu ca nanyôjayutaj pa anachyiy ca niyô'. 38 Papu pa ca naôvtaj'e ca niteetajesh ca ninascacutaja can yit'esh cava Ya'clishay Vani'sesh'e ti nôque t'ônashyish, papu lhech tôlhshaam jayu pava lhcachic pava lhajôyshay tô'lha pa yinôôt tcamônlhay. 39 Côque t'ônashesh ja Jesús pa yie' papu ca nincacutajeesh pa nitats'ôteyesh jayu pa Espíritu Santo. Taj ti pa Espíritu Santo ti jôjjeclay ninam, lhayaash ti jôjjeclay nichinjutey ja Jesús pa lhasnôycheyash.
Vanicatsônjat papi nivacle
40 Lhech t'aplhuqu'e ti nayie' japi nivacle, pa lhech japuque yipe'yach'e java lhclishay pa yit'eshvatsham'in: —Yjô' t'emma t'oyiy ti lhech nôque nivacle chiytôyjata pava ti vaclan chitatômjalhesh ti chinchen. 41 Vooy jap'elh yit'esh: —Lhech nash'ey Cristo. Taj ti yit'esha pap'elh: —Tan ca nitô'lhey ja Galilea pa Cristo. 42 Yit'esh avenna cava Vani'sesh'e Ya'clishay: Tô'lha jayu pa Cristo papi ve'lheelhsham pa David, ca nitôlh'eshicham jayu shta pan yie' pa lhavaatjavat pa David yie' pa Belén. 43 Pa nôque lhjunash ti vanicatsônjat japuque nivacle tôlh'ejop ja Jesús. 44 Taj ti caajtaj japi tanachantajesh ca nôcfa' ja Jesús, taj ti ampapu ca nifi'yeshlhtapee.
Papi lhcaanvacles yicacu pa Jesús
45 Lhan'e yitsha japi lhcavos japi vatcasinôc lhanvacles shi' japi fariseos vapecl'in. Meelh ti yamey japi lhanvaclesesh pa yit'esh ti niyôsesh ts'ivee: —¿Ta lhayaash naanchajeelh? 46 Pa yit'esh japi c'afoquelhay ti yicuulh: —¡Ca nôv'e papu ca nôque t'ônasha ti tasinôy jôque nivacle! 47 Pa lhechesh pa yicuulh vitsha japi fariseos pa yit'esh ts'ivee: —¿Tam'ey ti chinacôjôsjatelh vitsha? 48 ¿Tam'ey ti caaj papu yuesha napi casvacles ja't'ajesha napi fariseos? 49 Amlhacaa napi nivacle nintô'ya ca vatyôjijat niyafsha'neyaam. 50 Pa lhechesh pa tasinôy ja Nicodemo, lhech jô lhech yichey lhapesh ti tulhey ja Jesús jô lhech fariseoesh shta; pa yit'esh: 51 —Ninteesh cava vatyôjijates shtantsôt'ajesh ca chalheesh ca shtivalha pa'na pa ve'lha nivacle ti jôjjeclay nishtantô'yish ca shtapeyeesh pa ca lhfanishalhavach. 52 Pa yiculhch'e japuque ti yit'esh: —¿Lhtô'lhey jô avaatsha ja Galilea? Ay'ôtsjanesh'in cum jô java Vani'sesh'e secl'esh ca natô'ya ca amtaja papi chiytôyjata pava ti vaclan ca nitô'lhey ja Galilea.
Lhpa ôcjeclô vômcavômjanja
53 Pa lhechesh pa vapecley ts'ivee pava lhajpôyjey.
1 Lhan'e vitsha ja Jesús pa t'ajuyey lhja utiyuc yie' ja Olivochat. 2 Vooy ti nalhu pa vachiyofey ti vapecley ja vatishjanjavat. Pa acloj japi nivacle ti yichey'in, lhan'e jô lhech yi'sha'nejop ti yeyjatsjansha'ne. 3 Pa lhech t'aplhuqu'e ti yicha'jey japi vanqu'eyjatsjanesh pava lhfanishlhavach shi' japi fariseos ja Jesús lhja ve'lha ôcjeclô vôncatôyjatesh ti vômcavômjanja. Chilhayishlheeshey ti chiyanshi' lhcachivat japi nivacle, 4 pa yit'esha ts'ivee ti yiyôjaa ja Jesús: —Vanqu'eyajatsjan, anôque ôcjeclô tsitôyiyjateshelh ti yivôôm ja lhch'acfa. 5 Yit'eshelhyiy cava Moisés lhayôjijates ca chinôôtjatesh'in pava utes papi ti lhech lhfanishlhavach. ¿Pa ta ônashesh vitsha? 6 Côque t'ônash ti niyôstajjop ts'ivee ja Jesús, lhayaash ti yiclantajeshc'oya pa jaspa nicaajtajem pa ca nitôlhjateyjop atesha. Lhan'e ja Jesús pa tanjuyshicham pa yisesh'een lhja lhpasche na cotsjaat. 7 Vooy ti yachajemeyc'oya shta ti niyôstaj, lhayaash ti nachantajesh jum ts'ivee, pa lhechesh pa tpoychisham ja Jesús pa yit'esh ti yicuulh: —Ca naôvtajelh'atshi pa ve'lha nivacle ninasnatesh pa sasch'e, pa lhecha ca nivatjutsaesha ca nôôtjatesh lhpa utej anôque. 8 Yameshch'e atesha cavôque ti yit'esh, pa tanjuyshicham shta pa yisesh'een shta na cotsjaat lhja lhpasche. 9 Meelh ti yipe'yach'e ts'ivee cavôque ti yit'esh ja Jesús pa vatjutsa japi lhcaanvaclesesh ti yichfach'eeen pa nijooylhach'e jap'elhcha. Pa ve'lha ja Jesús shi' lhjô lhech ôcjeclô lhjan vatsavatshi lhcachivat japi nivacle. 10 Pa lhechesh pa tpoychisham shta ja Jesús, pa yi'van ti nôj'in lhacôm'a japi nivacle, ve'lha lhja ôcjeclô mônlhaelh'e, pa yit'esh ja Jesús ti yiyôjaa: —Ocjeclô, ¿Ta yie' japuque nafactajesh pa ajunash? ¿Ampapu ca nivalh'a? 11 Pa yit'esh yitsha lhjô lhech ti yicuulh: —Am, Lhcaanvacle, ampapu. Pa lhechesh pa yit'esh ja Jesús ti yiyôjaa: —Yivaatsha yitsha tanca yivalh'a jayu; nôqueesh mapec ca ya aj ca mapecla pa sasch'e.
Pa Jesús vatqu'isjuyajeshjop napi yiey na cotsjaat
12 Pa yiyôjisham shta ja Jesús japi nivacle, pa yit'esh: —Yivaatsha ya vatquisjuyajshem napi yiey na cotsjaat; papu ca nanjotajyich'esha'ne tanca nit'ôtayshi pa tulhitaj, vooy ja itôtaj tô'lha pa vatmônlhajayash yi'jop jayu. 13 Pa lhechesh pa yit'esh ts'ivee japi fariseos ti yicuulh: —Pa lhnequetsenesh ti lhtônôclhanitsha; côque niyijôa. 14 Pa yicuulh ja Jesús, pa yit'esh: —Yijô' na jayeesh na yitônôclhanitjayasha. Lhayaash ti tsitô'ya na jatôôlhshi, tsitô'ya shta na jayjuyshi jayu; lhan'e avaatsheelh ninatô'yelha na jatôôlhshi, tanca natô'yelha shta na jajuyshi jayu. 15 Avaatsheelh lhivalhelha pa'na papu ti lhasclantajelhvatjulh, vooy yivaatsha tanca yivalha pa'na papu ca jasclantajvatjulh. 16 Apasha lhôn ca jasclantajsha'ne papu pa ujesh ti tsivo'yeshch'e jayu, lhayaash ti tanca ya ve'lhaajop ca jasclantajsha'ne, yampuelhjop jayu ja Tata jan tsichenshicham ca jasclantajelhsha'ne papu. 17 Yit'esh avenna cava Vanisesh'e anyojijatiselh: Papu ca napu'tajajop ca t'ônashtajeeshch'evatjulh pa'na, pa lhech lhjunash ti yijô'. 18 Pa lhech yijunash nôqueesh jatônôclhanita shta. 19 Pa lhechesh pa yit'esh ts'ivee ti niyôs: —¿Ta yie' pa Atata? Pa yicuulh ja Jesús, pa yit'esh: —Avaatsheelh naantôfa'clelhyish, pa tanca antôfaacshelh shta ja Tata; ca antôfaacyishelh lhôn, pa antôfaactajeshelh ja Tata. 20 Cavôque ya'clishay yasinôqui ja Jesús ti jôjjeclay mônlhaôcji ja vatishjanjavat, vatsavatch'etsham lhja vatcatinôjjop pava chiyuqu'een pesoc. Taj ti ampapu ca niteesh ca natcum'e ja Jesús, lhayaash ti jôjjeclay ninameyjop pa lhc'aplhu jayu.
Yiey nan jôcji jayu, tanca amelhey jayu
21 Yit'esh shita ja Jesús ti yiyôjaa: —Jôc jayu yivaatsha, lhan'e avaatsheelh pa avoolhyisha'ne jayu, lhavafshelh jayu pava sasch'esha'ne afanishelh'avach. Yiey nan jôcji' jayu, tanca amelhey jayu avaatsheelh. 22 Pa lhechesh pa yit'esh ts'ivee japi judíos: —¿Tam'ey ti vatvômjat jayu t'e nôque, lhe'naa ca niteesh: Yiey nan jôcji, tanca amelhey jayu avaatsheelh? 23 Pa lhechesh pa yit'esh ja Jesús: —Avaatsheelh lhtôlhelhnee, vooy yivaatsha jatôôlhchishamnee; avaatsheelh natsôt'ajeshelh na cotsjaat ti avtsat'eshelh, lhan'e yitsha pa ninastsôt'ajesh ca yivtsat'aesh nôque cotsjaat. 24 Lhe'naa ca yit'eshelh'a ti lhavafshelh jayu pava sasch'esha'ne afanishelh'avach; lhayaash ca ni anu'tajeeshelhyi ti ya lhech ya Mesías, pa nôquen lhayaash lhavafshelh jayu pava sasch'esha'ne afanishelh'avach. 25 Pa lhechesh pa niyôsesh ts'ivee pa yit'esh: —¿A she avaatsha? Yit'esh ja Jesús ti yicuulh: —Apis avenna ti janfaclelh'am ti nich'a jayasinôyelh'ac'oya. 26 Jôjjeclay aclojtaj nava yeetajesh ca c'ayôjeeshelh'aan, shi' nava ca c'asclaneshelhsha'ne shta; taj ti uj ti yijô' na t'ônash jô lhech tsichenshicham pa nôquen lhayaash pa tsisha ti jayeetshem napi yie' na cotsjaat cava jape'yeesh yitsha jô lhech. 27 Taj ti nintôyc'oya ts'ivee ti yasinôquitajem ja Lhtata. 28 Nôquen lhayaash jayeetshelh'a: —Vooy pa nalhu ca antajelhchishamnee na Nivacle Lhô'sesh pa lhechesh pa antôfaacyishelh ti ya lhech, nintôlhyi yivaatsha cava jasnatesh'in; tsisha java jape'yeesh ja Tata janfacch'e yitsha. 29 Lhayaash ti yi'yijop jan tsichenshicham; ni'nasve'lhayansha'ne ja Tata, lhayaash ti yajatesh ti jaycumem'e nava yen. 30 Meelh ti yit'esh cavôque ja Jesús pa acloj japi yit'esh ti nincacuesh.
Papi lhclesesh pa Dios shi' papi lhcumtesesh pa sasch'e
31 Pa lhechesh pa yit'esha ja Jesús japi judíos japi nincacuesh: —Ca aniyitajeshelhyam cava jayeetshelh'a, pa ayijôaelh ca qu'eyjatsjanjaseeshelh jayu; 32 lhantôfaacshelh jayu na yich'e' na yijô', pa lhech côque yijô' nanuqueeshelh jayu. 33 Pa yicuulh ts'ivee pa yit'esh: —Lhcleselhyish na apee pa Abraham, jôjjeclay tanca na apee ca lhcumteseelhyish papu. ¿Pa ta t'e lhayaash ti lhteesh ca nich'aaesh ca jatanuqueeshelhch'e jayu? 34 Pa yicuulh ja Jesús pa yit'esh: —Yijô' ti jayeetshelh'a, papu ti yie' ti yisnatesh pa sasch'e pa lhech papuque ti t'acumtesesh pa sasch'e. 35 Pa lhancumeet sasjop ca nivôôtsôtjatesh papi vatanavot; lhan'e jôcl'esh pa vataôs yajatesh ti yitsôt'ajshi papi lhnavot. 36 Pa nôque lhjunash ca nanuquetajshelh na Vataôs, pa yijô' jayu jum ti lhtanuqueeshelh pa sasch'e. 37 Tsitô'ya yitsha ti lhtôlhelha lhapesh ca Abraham; pa teya na ti lhentajelh ca asclôneelh, lhayaash ti tanca acuumjelhyijulh cava jayeetajeshelhaam. 38 Yivaatsha jasinôqui cava javanesh ja Tata; lhan'e avaatsheelh pa lhasnatshelh yitsha pava lhpe'yeeshelh lhapesh pa atataelh. 39 Pa yicuulh ts'ivee pa yit'esh: —¡Ja tataelh lhech pa Abraham! Taj ti yit'esh ja Jesús ti yicuulh: —Ca yijôa ca lhclesaelh'ash ca Abraham, pa acuumtajelh'e yitsha cava lhcumjatesesh lhapesh. 40 Lha'mataj ti yeetajeshelh'am cava yijô' ti tô'lha ja Dios cavan ts'eyjatsjanesh ti lhenelh ca asclôneelh. ¡Cavôque ni lhech lhfanishaesh pa cat'elheesh ca Abraham! 41 Avaatsheelh lhjônshelhch'e pa lhcumjayash'in papi atataclelh. Pa yit'esh ti yicuulh japuque: —Yivaatsheelh nivaclanelh atesha; caaj ja ve'lha tataelh, lhech pa Dios. 42 Pa yit'esh ja Jesús ti yicuulh shita: —Ca yijôa lhôn ca atataeeshelh ja Dios, pa atsentajelh yitsha, lhayaash ti jatô'lha ja Dios pa janamelh'ayshicham. Taj ti nintôlhyi ti nôque janatshi, vooy ja Dios nôque tsichenshi. 43 ¿Ta t'e lhayaash ti ninatô'yelhc'oya cava yiclishay? Lhayaash ti saselhjop'am ca ach'anelhch'e ca yasinô. 44 Avaatsheelh atataelh ja tsich'e'; lhe'naa ti aiyelhch'een pa ti nishamitjat lhavaatsha yitsha. Pa tsich'e' p'alha lhapesh ti vôncaclônjanajesh'in, jô'tajesh ti cuts'aaj, lhayaash ti ninôvji' pa yijô'. Vooy ti tasinôytaj pa tsisha pava lhcuts'ajinôc ti yit'esh; lhayaash ti cuts'ajitaj jô'tajesh ti lhtata pa vatcuts'aji. 45 Lhan'e yivaatsha pa jayeetajeshelh'a na yich'e na yijô', taj ti na at'eshelh ca anu'jelhyi. 46 ¿Ta yie' avaatsheelh papu ca nôclityam ti ve'lheesh ti jasnatesh pa sasch'e? Lhama ca jayeetshelh'a ca yijô', ¿ta t'e lhayaash na anu'jelhyi? 47 Papu ti tô'lha ja Dios, tach'anch'e shta cava lhasinôc ja Dios; taj ti avaatsheelh na atô'lhelha ja Dios, lhe'naa ti naat'eshelh ca ach'anelhch'e nava lhclishay.
Apis ti caaj pa Cristo ti jôjjeclay ch'apaey'in pa Abraham
48 Pa lhechesh pa yit'esha japi judíos: —Tsivooyshelh'ocji ti jayeetshelh'a ti a Samaria avo', ti yiatshi shta pa tsich'e' lhechin ninacajôyshiyan. 49 Yicuulh ja Jesús pa yit'esh: —Ninôôvyitshi aven pa tsich'e'; pa ti jasnatesh jôclôjeshey ja Tata, vooy avaatsheelh lhasjuvanshelh'in. 50 Ni'vooysha'ne pa yinôclôjquiyash, taj ti caaj ja ve'lha vooysha'ne, pa lhech jayu lhavaatsha ca nasclanvatich'eyam jayu. 51 Yijô' ti jayeetshelh'a, papu ca nu'tajeshyi nava jayeesh, ôyjôlhôyech'esh jayu ca ninvana pa lhavafi. 52 Pa yicuulh japi judíos pa yit'esh: —Nôqueesh pa tsitôôyshelh'a ti yiatshi pa tsich'e'. Lhayaash ti vaf pa Abraham, vafsha'ne shta papi chitôyjata pava ti vaclan; pa lhan'e avaatsha pa lhteesh: ‘Papu ca nu'tajeshyi nava jayeesh, ôyjôlhôyech'esh jayu ca ninvana pa lhavafi.’ 53 ¿T'ash'apee ajalh pa tataelh Abraham shi' papi chitôyjata pava ti vaclan, capuque lhacôm'a ti vafsha'ne? ¿She t'e papi lheclôj'avach avaatsha? 54 Yicuulh ja Jesús pa yit'esh: —Ca javooyitam lhôn pa yinôclôjquiyash, pa cha'lhatajeesh pa yinôclôjquiyash. Vooy ja nijutyi pa lhôclôjquiyashyish lhech ja Tata, lhech jô lhech lhteetajeshelha ca a Diosaelh. 55 Taj ti naantôfaacshelh avaatsheelh. Lhan'e yivaatsha pa tsitôfaclesh; ca yit'esh lhôn ca ninastôfa'cleesh pa yacuts'aajtaja nan ajunashelh. Taj ti uj ti tsitôfaclesh, pa c'uesha pa ti yit'esh lhavaatsha. 56 Ca Abraham, ca atataelh lhapesh, lhavaatsha uj ti vats'ôe ti yi'van jayu ca yinalhu; jech jôtaney ti yi'van, pa nôque lhjunash uj ti nishamesh jum. 57 Pa lhechesh pa yit'esh japi judíos ja Jesús: —Jôjjeclay avenna ni amjeyshi pava ca cincuenta ca anincôpesaesh. ¿Pa lhteesh ca avan lhôn pa Abraham? 58 Yicuulh ja Jesús pa yit'esh: —Yijô' ti jayeetshelh'a, ti p'alha ti yacaaj ti jôjjeclay ninam ca Abraham. 59 Lhechesh pa t'acum'e ts'ivee pava utes pa yeetajesh ca nôôtjatesh'in ja Jesús; lhan'e lhavaatsha pa vant'ôfichc'oya pa yuyshi lhcaavju japi judíos, ti tay'ôcji ja vatishjanjavat.
Pa Jesús yovalhjat'in pa ve'lha nivacle pa tacluqu'esh tatsha ti nich'a nivat'aj
1 Meelh ti yich ja Jesús pa yi'van ja ve'lha nivacle tacluqu'esh tatsha ti nich'a nivat'aj. 2 Yit'esh japi t'eyjatsjanjas ti niyôsesh: —Vanqu'eyjatsjan, ¿ta lhayaash t'em ti tacluqu'esh tatsha nôque nivacle ti nich'a nivat'aj? ¿Tameneshlhavach nataney pava sasch'esha'ne lhfanishesh papi lhnavot, jô'tajesh nataney ca nitôôlhsha pa lhfanishlhavach? 3 Pa yicuulh ja Jesús pa yit'esh: —Nilhecha ca nitôôlhsha pa ca lhfanishalhavach ca sasch'e taj ti nilhecha shta ca nitôôlhsha pa ca lhsasach'e papi lhnavot; tacluqu'esh tatsha ti nich'a nivat'aj jaspa tanôôclhaniteshlhavne ja Dios nava yitô'yish. 4 Jôjjeclay caaj na nalhu ca jaycumem'e na lhcumjayash jan tsichenshicham, lhayaash ti nam jayu pa tulh pa tanca natcum'in papu. 5 Jôjjeclay jôv'ein na cotsjaat, pa yavatqu'isjuyajshem napi yiey na cotsjaat. 6 Tifeshch'e cavôque ti yit'esh, pa t'ach'iyshi pa cotsjaat ja Jesús, pa yit'ôlhanatshi na cotsjaat, pa yinem'apee java lhtôsjey ja tacluuc. 7 Pa lhechesh pa yit'esh: —Meey ca avôômcôji lha vishini, lhey Siloé. Pa yichey ja tacluuc pa vômcôji', meelh ti tapec pa yalhatajesh ti yivan'in. 8 Pa lhechesh pa yit'esh japi lhchifas shi' japi yi'van ti jôjjeclay tacluqu'esh: —¿Nilhecha t'e nôcôô ana ja yi'shaneen ti t'alhaan pa ca chintisesh? 9 Caaj japi yit'esh: —Lhech nash'ey. Jap'elh yit'esh: —Nilhecha; lhjunashjulh jayu atesha. Taj ti yit'esh lhavaatsha: —Ya'lhech. 10 Pa lhechesh pa niyôsesh ts'ivee pa yit'esh: —¿Ta t'e lhjunash ti lhovalh'in shta? 11 Yicuulh lhavaatsha pa yit'esh: —Jô lhech nivacle, lhey lhôn Jesús, yit'ôlhanatshi ca cotsjaat pa yip'aclanesh'apeeyam nava yitôsjey, pa yit'esh ti niyôjiyi: ‘Meey lhja vishini Siloé ca avôômcôji.’ Pa jôquey, pa javôômcôji, pa yalhatajesh ti javan'in shta. 12 Pa lhechesh pa niyôsesh ts'ivee pa yit'esh: —¿Ta yie' pôque nivacle? Pa yit'esh ti yicuulh: —Ni'nôstô'ya.
Papi fariseos niyôs'in pan tacluuctajesh ti yovalh'in
13 Pa lhechesh pa chiychajey t'ajuyish japi fariseos ja nivacle tacluuctajesh. 14 Yivoyjatesh ja nalhu ti chit'ichayshi ti yisnatesh ja Jesús ja cotsjaat t'ôôlhshi pa yivatsjanchatesh ja tacluuc, 15 Pa vapeclesha ti niyôsesh'in shta japi fariseos jô lhech nivacle pan lhjunashesh nôqueesh ti yovalh'in shta. Yit'esh lhavaatsha ti yicuulh: —Yip'aclanesh'apeeyam nava yitôsjey ca t'ôôlhshi cotsjaat, pa javôômcôôj shta, pa nôqueesh pa jovalh'in. 16 Pa lhechesh pa yit'esh jap'elh fariseos: —Jôque nivacle lhech lhfanishesh sasjop ca nitô'lha pa Dios, lhayaash ti ninasclaneshi ca nalhu ti chit'ichayshi. Vooy jap'elh pa yit'esh: —¿Ta t'e ca lhfanishtajeesh pa ve'lha sasch'e lhavo' ca nasnatesh pava nimatasa papu ca nitô'yish, ca lhech lhaya'sha ca sasch'e lhavoeesh? Pa nôque lhjunash pa vanicatsônjatshan ts'ivee, 17 Pa vapeclesha shta ti niyôsesh'in ja tacluuctajesh pa yit'esh: —¿Pa ta lhteetsha vitsha jô lhech nivacle navatsjanchatesh nava atôsjey? Yit'esh lhavaatsha ti yicuulh: —Jayeetsha yitsha ti nichen pa Dios. 18 Taj ti japi judíos pa tcacujanesh ca nitacluc'aaesh pa lhech pan yovalh'in, pa jaalhpa tôneyjop papi lhnavot, 19 pa niyôsesh ts'ivee pa yit'esh: —¿Lhech nôque ô'selh, na lhteetshelha ti tacluqu'esh tatsha ti nivat'aj? ¿Ta t'e lhayaash ti yovalh'in nôqueesh? 20 Yicuulh japi lhnavot pa yit'esh: —Tsitô'yelha ti yô'selh na lhech, tsitô'yelha shta ti tacluqu'esh tatsha ti nich'a nivat'aj; 21 taj ti ninôstôyeshelha pan lhayaash ti yovalh'in nôqueesh, ninôstôyeshelha shta papi yovalhjat'in. Aniyôseshelh lhavaatsha, lhayaash ti nitaôvclaja, isjop ca nasinôquiesh lhavaatsha. 22 Cavôque yit'esh japi lhnavot, lhayaash ti nijovayeshlhtapee, lhayaash ti yitôôysha japi judíos ti apis ti vatpeyaesha'ne ti yayjat'ôcji jayu ja vatvanqu'eyjatsjanjavat papi ca niteetajesha ja Jesús ti Cristo. 23 Lhe'naa ti yit'esh japi lhnavot: “Aniyôseshelh lhavaatsha, lhayaash ti nitaôvclaja.” 24 Pa lhechesh pa ve'lheeshcum ti tôney ts'ivee shta ja nivacle ja tacluuctajesh pa yit'esha ti yiyôjaa: —At'eshelhayam pa yijô', lhayaash ti shnôv'e t'ajuyish pa Dios; yivaatsheelh tsitôôyshelha ti uj ti sasch'e lhavoesh jô lhech. 25 Pa lhechesh pa yicuulh lhavaatsha pa yit'esh: —Ninastôyesha ti sasch'e lhavo' t'e jô lhech. Ve'lha ca tsitôôysha ti yatacluqu'esh ti tsovalhjat'in nôqueesh. 26 Yachajeyc'oya shta ti niyôsesh: —¿Ta jôque lhfanish'ash lhôn? ¿Ta lhfanish'ash ti lhovalhesh'in shta nava atôsjey? 27 Pa yicuulh ti yit'esh: —Apis aven ti jayeetshelhaam, taj ti naat'eshelh ca ach'anshelhyi; ¿Lhteetshelh jô shta ca janfaclelh'am shta? ¿Lhteetshelh nataney ca avoelhch'esha'ne vitsha? 28 Pa lhechesh pa yitsôyeeshem'in, pa yit'esha ts'ivee —Vooy avaatsha lhavoqu'esha'ne na lhech, vooy yivaatsheelh javoelhch'e vitsha ca Moisés. 29 Yivaatsheelh tsitô'yelha ti tasinôyelh lhapesh pa Dios pa Moisés; jôque ninôstôye'lha pa tôlh'e'. 30 Pa lhechesh pa yicuulh jô lhech nivacle nich'eesh ti chiyovalhjat'in shta: —¡Naô t'e pa lhayaash caalhaa! Ti ninatô'yelha pa tôlhshi' lhavaatsha, ca tin'e pa tsivatsjanchatesh nava yitôsjey. 31 Shtantôye'lha aven ti tanca nach'aney pa Dios papi sasch'e lhavos; tsisha ti tach'aney japi yôclôj shi' japi t'acumem'e java tayôjijanesh.32 Ampapu lhapesh ca chinpeya'esh ca niteetsha ca lhjunashajulh jôque ca novalhjat'in pa ve'lha tacluqu'esh tatsha ti nich'a nivat'aj. 33 Jôque nivacle ca nintô'lhaa lhôn pa Dios, pa tanca nitôôytajesh pa na ca navclanjat. 34 Pa lhechesh pa yit'esh ts'ivee: —Avaatsha ti uj ti lht'amcayesh ti lhanvat'ajshi pa sasch'e ¿lhteetajesh ca ats'eyjatsjanelh? Pa lhechesh pa yanfach'ee ts'ivee.
Tacluqu'esh pa tasham
35 Yayaesh ja Jesús ti chiysasfachee ja tacluuc; vooy ti vacutesh pa yit'esh ti yiyôjaa: —¿Na acacujanesh na Dios Lhaôs? 36 Pa yit'esh ja nivacle: —Lhcaanvacle, anfacyam pa yie' pa lhech, jôcl'esh ca nicacujaneesh. 37 Yit'esh ja Jesús ti yicuulh: —Apis ti lhavan, ya lhech nan lhtasinôyelh'in. 38 Pa lhechesh pa t'acjatsuy'e t'ajuyish ja Jesús jô lhech nivacle, pa yit'esh: —Nic'acu Lhcaanvacle. 39 Pa nijooylhach'e ti yit'esh shta ja Jesús: —Janacheyshicham napi yie' na cotsjaat jaspa jasclanvatich'e; jaspa yovalhvatsham'in jayu japi taclujuy, pa vooy japi yovalhtajvatsham'in taclujuyesh jayu. 40 Meelh ti yipe'ya cavôque japi fariseos, japi lhech yiejop, pa niyôsesh ts'ivee pa yit'esh: —¿Tam'ey t'e ti yataclujuyelh vitsha? 41 Pa yicuulh ja Jesús pa yit'esh: —Ca ataclujuyeelh lhôn, pa tanca amenelh'avach, teya ti lhteetshelh ti lhovalhelhvatsham'in pa lhatmenelh'avach jayu pa chinaclôyitelh jayu.
Ja chiyovalheyjop atesha pa tashinshtas lhc'ovat
1 Yit'esh ja Jesús: “Yijô', yijô', ti jayeetshelh'a, papu ca ninuytajeey na lhashi na tashinshtas lhc'ovat, ca vo'ya ca nivôlh'apee, pa lhech cutsjanaj, ninatcajôyshay shta. 2 Lhan'e yitsha papu ca nuytajey na lhashi na tashinshtas lhc'ovat, pa lhech jôcl'esh ti tashinshtas lhavoesh. 3 Pa tashinshtas lhavo' nic'at'emeyc'oya ja lhashi jaspa yitshaam ja lhc'ovat, lhan'e pava tashinshtas pa nichafacla pa t'ôjôj. Pa yetônjop pan lhqueyesh pava lhclôy tashinshtas ti yichenfach'ee. 4 Vooy ti tifach'ee lhacôm'a pava lhclôy tashinshtas, pa lhechesh pa vanôyinc'oya, lhan'e yitsha pava tashinshtas yijoqu'esha'ne, lhayaash ti nichafacch'e pa t'ôjôj. 5 Lhan'e papi ninantôfa'clesh tanca nivoqu'e, pa niclôtsjôtaj'in atesha, lhayaash ti ninanchafacch'e pa t'ôjôj papi ninantôfa'clesh. 6 Côque yit'eshajop ti yijôney ja Jesús, taj ti nintô'yishc'oya pa yichesh'e.
Pa Jesús issha'ne tashinshtaj lhavoesh
7 Pa yachajemeyc'oya ja Jesús ti yit'esha: —Yijô' ti jayeetshelh'a: “Yivaatsha ya lhech ti ya lhashieshc'oya nava tashinshtas. 8 Lhacôm'a japi vatjutsayic'oyataj lhech japi lhech cutsjanjasesh, jô'tajesh ti vôncaclônjanjasesh; taj ti ninach'aney nava tashinshtas. 9 Ya lhech yivaatsha ya lhashieshc'oya, papu ca nuytajyiyijop, pa lhecha ca chinalhjen jayu. Pa lhjunashjulh jayu nava tashinshtas ti yitshaam lha lhc'ovat ti tapecfach'ee shta pa vooysha'ne pa lhôc pa yi'van. 10 “Lhan'e yitsha ja cutsjanaj vooy pa lhcutsjayash shi' pa lhavôncaclônjayash shi' ca nicavômesh; lhan'e yitsha ca janamjey ca nicaajem pa lhamônlhajayash, secl'esh ca na'shem pa lhamônlhajayash. 11 Ya issha'ne tashinshtaj yivoesh. Pa issha'ne tashinshtaj lhavo' ninshiyanem pa lhamônlhajayash ti yijutem pava lhclôy tashinshtas. 12 Lhan'e yitsha papu ti tashay'ôcji ti yiclôvalh pava tashinshtas, meelh ti yivanjulh pan yicôvfachi, pa vacumajc'oya pa yivô'mem pava tashinshtas, eem ti nitashinshtaj lhavoeesh, jô'tajesh ti nintsôt'ajesh pava tashinshtas. Lhan'e pan yicôvfachi pa vi'sesh ti t'ecletsham'in pa vanuesha'ne pava tashinshtas, pa yicatsônjat'in shta. 13 Vacumaj pa nivacle, lhayaash ti tsi'sha pa lhasha' ti t'acum'apee, tanca niteesh ca ninô'yesh pava tashinshtas. 14 -15 “Lhan'e yitsha ya issha'ne tashinshtaj yivo'. Nanlhjunashyish ja Tata nitôfacyish, lhech yijunashesh ja Tata tsitôfaclesh, pa lhech yijunashesh shta tsitôfaclesha'ne nava yiclôy tashinashtas, vooy lhavaatsha nitôfacyish yitsha. Yivaatsha jajutem nava yiclôy tashinshtas na yimônlhajayash. 16 Caaj shta jav'elh yiclôy tashinshtas, java ninôvji' anôque lhc'ovat, taj ti jayeesh ca janamjatey jayu shta. Java lhech niqu'ishamyam jayu, pa jave'lhansham jayu pava tashinshtas, pa ve'lhaa jayu shta pa lhavoesh.,, 17 “Tsen ja Tata, lhayaash ti jaycufa'yesh na yimônlhajayash eem ti chinachajyam jayu shta. 18 Ampapu jayu ca nasjôclesh na yimônlhajayash, vooy yivaatsha ti jayeesh ti jaycufa'yesh. Isjopyam ca jaycufa'yesh na yimônlhajayash, isjopyam shta ca janachajyivne. Cavôque niyôjieshyi ja Tata ca lhech yifanishayivach. 19 Meelh ti yipe'yach'e cavôque japi judíos pa vapecleyc'oya shta ti nit'ônasheeshvatjulh ts'ivee. 20 Acloj japi yit'esh vitsha: —¿Naô t'e pa lhayaash ti lhanch'anjayuelha? nôque yi'shi' pa tsich'e', lhe'naa ca nincôjôyshiyana? 21 Vooy jap'elh yit'esh yitsha: —Ampapu ca lhech t'ônasha ca nitasinôy ca nôvji' pa tsich'e'. ¿Isjop ajalh ca novalhjat'in shta pa tsich'e' pa tacluuc?
Papi judíos yicônitshi pa Jesús
22 Yiesh'e ja Jerusalén ja vatc'usiyash'in pa chit'alheyjop pa Dios ja uj vatishjanjavat ti clop'esh. 23 Ja Jesús t'ôtaych'e ja vatishjanjavat yiey ja lhcaavjuva'ne chitsayjatesh'e pa Salamón. 24 Pa lhechesh pa t'afayjop japuqueey judíos pa yit'esh ti yiyôjia ts'ivee: —¿Ta t'e ca t'elheesh ca atatfacleshelhyam nava jentajelh ca nastôye'lha? Ca yijô'taja ca a Cristotaja, pa anôôclhanitelhch'eyam ca anfacleelhyam. 25 Pa yicuulh ja Jesús pa yit'esh: —Apis ti janfactajelh'am taj ti lhascacu'jelh. Cava matas ti jasnatesh jacheneshjop ja t'unaj ja Tata, lhech cava lhech tsinôôclhanitsha jum; 26 taj ti avaatsheelh naat'eshelh ca anu'jelhyi, lhayaash ti na alhecheelh java yiclôy tashinshtas, jan yônashesh nalhch'e ti janfactajelh'am. 27 Java yiclôy tashinshtas tach'ana ca yôjôj, jô'tajesh ti tsitôfaclesha'ne vitsha, jô'tajesh ti tavo'yich'esha'ne. 28 Jajutey ts'ivee ca vatmônlhajayash ôyjôlhôyech, pa tan pa cat'elheesh ca chinvôôm, jô'tajesh ti tanca nitôlhesham yipôcôt ca nôsjôclesh papu. 29 Nijutyiy ja Tata, jan ya'shesh ti uj, pa tanca nicaaj papu ca nitôlhesham lhpôcôt ca nanjôclesh. 30 Yivaatsha shi' ja Tata yave'lheeshelhsham na yijunashelh. 31 Pa lhechesh pa t'acum'e japi judíos java utes pa yeetajesh ca nôôtjatesh'in. 32 Pa yit'esh ja Jesús ti yiyôjaa: —Acloj avenna cava matas lhasvaneshelh ti ts'efenesh ja Tata ti javclanjat; ¿Pa ta yie' pavôque lhnivalhelhyi jayu ca ats'ôôtjateshelh'in nava utes? 33 Yicuulh japi judíos pa yit'esh: —Tanca lhecha ca c'ôôtjatelh'apee pa is afanish'avach, lhayaash ti sasch'e ca lhasinôquiesh pa Dios. Lhayaash ti anvacle atesha, taj ti lhteesh'avne ca a Diosaesh. 34 Pa yit'esh ja Jesús ti yiyôjaa: —Vani'sesh'e cava anyôjijateselh, ti yit'esh ja Dios: ‘Avaatsheelh a diosicleshelh.’ 35 Shtantôyesh ti sasjop ca chintanchatesh na t'ônash pava Vani'sesh'e lhapesh; Dios lhqueyesh dios'esh japi lhech t'acuumjulh java lhasinôc. 36 Tsivenchat ja Dios pa tsicheneyshicham na cotsjaat; ¿ta t'e lhayaash ti lhteetshelh ca sasach'e pa ca jayeetsha ja Dios na ti jayeesh Lhaôsyish ja Dios? 37 Ca niyisnatajeesh nava yisnatesh ja Tata, pa ya aj ca anu'jelhyi. 38 Jô'lhaa ca jasnatajesh lhama ca na at'eshelh ca ueshelhyi, vooy pava ca jasnatajesh pa ueshelha, jôcl'esh ca natô'yelha jum ti yi'yitshi ja Tata, pa jôvji' yitsha ja Tata. 39 Pa yeetajesh ca nôcfa' ts'ivee shta, taj ti yiclôtc'oya ja Jesús. 40 Pa lhech tôlh'e' pa yicheypacham ja tovôc pa lhech yie'in, yiey pa yiesh'e lhapesh pa Juan Vatnayjayash lhavo' ti vancanajayan'in. 41 Acloj japi nivacle yijôchiey, pa yit'esh ts'ivee: —Yijô' pa Juan, ti nive'lhaach'e pa ca navclanjat cava nimatasa papu ca nitô'yish, taj ti lhacôm'a cava yasinôquiesh nôque nivacle uj ti yivooyjulh. 42 Pa acloj japi yuesha japi lhech yie'.
Ti vaf pa Lázaro
1 Ve'lha ja nivacle, lhey Lázaro aôytej'in lhavaatsha, yiey ja yitsaat lhey Betania, lhavtsat'esh lhja María shi' lhja lhch'injô Marta. 2 Lhech lhjô lhech María yip'aclaneshemch'e ja Lhcaanvacle java lhafoc ca lhshachivo acôjji, jô'tajesh ti yiclôjôjinatesha'ne java lhayees. Lhech lhjôqueey lhch'injô ja Lázaro jan aôytej'in. 3 Lhech t'aplhuqu'e ti vancachenjaney japi lhch'injavot ja Jesús, nôque yit'esh ts'ivee: , —Lhcaanvacle, aôytej'in na ac'utsfa. 4 Meelh ti yipe'yach'e cavôque ja Jesús, pa yit'esh: —Côque lhayyasha tanca nivôômji jayu pa lhavafi, jô'lhaa ti t'ajuya jayu ti chinôclitesh ja lhasnôycheyash ja Dios, shi shta ja lhasnôycheyash na Lhaôs ja Dios. 5 Ja Jesús yen jum lhja Marta shi' lhja lhchita' shi' ja Lázaro; 6 meelh ti yaya'tajesh ja Jesús ti tayyashay ja Lázaro, taj ti ninôquey tatsha, napu' java nalhus ti mônlhee jan yie' 7 Vooy ti nôjeshch'e cava nalhus, pa yit'esh ti yiyôjaa japi t'eyjatsjanjas: —Shtajuyey cum ja Judea. 8 Pa yit'esh japi t'eyjatsjanjas ti yicuulh: —Vanqu'eyjatsjan, nichinach'e ca'na ti yeetajesh ca nôôtjatesh'in java utes japi judíos, ¿pa nôqueesh lhteesh ca meey shta? 9 Pa yit'esha ja Jesús ti yicuulh: —¿Niyijô'a t'e pa nalhu ti doce horas? Eem ti nint'eclet'a pa'na papu ti t'ôtaayshi na nalhu, lhayaash ti yi'van na lhqu'isjuyaj nash'apee na cotsjaat; 10 lhan'e yitsha papu ti t'ôtaayshi pa tulh, t'ecletsham'in pa'na, eem ti ampa lhqu'isjuyaja. 11 Pa yit'esh ti tasinôyc'oya ja Jesús: —Ja catsic'utsfa Lázaro yimô' nôqueesh; taj ti jôquey jayu ca janjat'ôtsjan. 12 Pa lhechesh pa yit'esh japi t'eyjatsjanjas: —Lhcaanvacle, vatsjan jayu t'e shta jô lhech, lhayaash ti yimô'. 13 Ca tin'e ja Jesús yasinôqui pa lhavafi ja Lázaro, lhan'e japi t'eyjatsjanjas yilheclôjtajesh ca nasinôquiem pa ca lhanjôtia. 14 Pa lhechesh pa yinôôclhanitemch'e ja Jesús japi t'eyjatsjanjas pa yit'esh: —Apis ti vaf ca Lázaro. 15 Ts'ishamshelh'a ti nilhech yie', lhayaash ti nôque lhjunash tajulhelhey'am, jaspa tanca ascacu'jelh jayu. Taj ti shnôquey ca shtavanelh. 16 Pa lhechesh pa yit'esh ja Tomás, chiyit'eshaan shta Napu'ji, lhech jôqueey yit'esh jap'elh lhneyjatsjanjafas: —Shtavoelhch'e yitsha na Vanqu'eyjatsjan, jôcl'esh ca shtavafelhsha'nevatjuulh.
Pa Jesús vatneetshamjayashesh pa vatmônlhajayashesh shta
17 Meelh ti yamey ja Jesús ja yitsaat, lhech t'aplhuqu'e' ti yichatjulhch'e pava nalhus pa Lázaro ti vaf. 18 Shalhee'ma ja Betania ja Jerusalén, napu'ji yeclô' nôquee pa lhch'alhu'esh. 19 Acloj japi judíos yichey lhja Marta shi' lhja María jaspa nishamitjatey, lhayaash ti yitacshinch'e pa lhchecla' ti vaf. 20 Meelh ti tpeeycheyesh lhja Marta ti shalhajulh ja Jesús, pa yichjuulh; vooy lhja María pa mônlheey ja lhajpôyich. 21 Lhja Marta yit'esh ja Jesús: —Lhcaanvacle, lhan'e ca ve'nee, pa tanca nivaftaj ca checla'. 22 Taj ti tsitô'yish'a ti nijut'ay lhacôm'a pa Dios pa ca lhjunashtaja pa ca aalhtajeshey. 23 Yit'esha ja Jesús: —Ja achecla' vapecleyc'oya jayu shta ca mônlhaa. 24 Yicuulh lhja Marta pa yit'esh: —Jech, tsitô'ya ti vapecleyc'oya jayu shta ca mônlhaa pa cat'eelhtajeesh ca netajchishamch'e capi vafsha'ne, ca nôjtajeshch'e na nalhu. 25 Pa yit'esh ja Jesús: —Ya lhech, tôlhyi' pa vatneetshamjayash shi' pa vatmônlhajayash. Papu ca ninascacu'taja lha'ma ca nivaf lhôn, mônlha jayu shta; 26 lhacôm'a papi caajem pa lhamônlhajayash shi' ca ninatcacujantajayish, papi lhech tanca nivaf jayu pa cat'elheesh. ¿Naascacuesh cavôque? 27 Yicuulh lhavaatsha pa yit'esh: —Jech, Lhcaanvacle, niyicacujan'ash ti alhech a Cristo, Lhôs'ash pa Dios, na chiyit'esha ti nameyshicham na cotsjaat.
Pa Jesús yiesh'elhavooj pa Lázaro lhanvalheech ti yip'in
28 Meelh ti tifeshch'e cavôque ti yit'esh, pa yichey lhja Marta lhja lhch'injô María, pa yiyôjaa ts'am pa yit'esh: —Natshina na Vanqu'eyjatsjan pa tayôjijan'ash ca meey lhôn. 29 Meelh ti yipe'yach'e cavôque lhja María pa netshaam tatsha pa yifaclitey ja Jesús. 30 Ja Jesús jôjjeclay ninamjam ja yitsaat; jôjjeclay mônlhee pan vatcutesh'e lhja Marta. 31 Meelh ti chiyivan lhja María ti netshaam pa yifaclit, pa netshamch'e yitsha japi judíos, japi yi'tajeshjop ca nishamitjat, lhech japuqueey yijuyjateshch'e shta, lhayaash ti yilheclôjtajesh ca nôquey ja lhanvalheech ja lhchecla' ca lhech nôvesh'e ca nap'in. 32 Meelh ti yamey lhja María ja Jesús, pa t'acjatsuy'e t'ajuyish pa yit'esh: —Lhcaanvacle, ca nôque amônlhaae ca'na, tanca lhayaashtaja ca nivaf ca checla'. 33 Meelh ti yi'van ja Jesús ti yip'in lhavaatsha, shi' japi judíos tanaôychitajelh, pa yalhatajesh ti yitacshin'in yitsha 34 pa niyôsesh: ¿Ta chitish'ec'oya côque? Pa yit'esh ts'ivee: —Lhcaanvacle, anachey ca aclôvalh. 35 Yip'in ja Jesús. 36 Pa yit'esh japi judíos: —A'va, nôôclha ti yen t'e lhapesh jumje. 37 Caaj jap'elh yit'eshvatsham'in: —Nôque ana yovalhjat'in lhapesh ja tacluuc, ¿sasemjop t'e pa ca lhfanisheesh ca ya aj ca nivaf ca Lázaro?
Pa lhneetshamhayash pa Lázaro
38 Yachajeyc'oya shta ja Jesús ti yitacshin'in, pa tac'uya ja nivalhech. Pa camamqu'e tatsha lhapesh, jôlhaa lhja utej ti chip'oojey ja lhashiesh. 39 Pa yit'esh ja Jesús: —Ayjatelh'e lha utej. Yit'esh lhja Marta, lhja lhch'injolhtapee ca vaf: —Lhcaanvacle, nôqueesh pa yiclat, lhayaash ti palha yitshatjulh java lhnalhusch'e ti vaf. 40 Taj ti yit'esh ja Jesús: —¿Apis aven na jayeesh'a ca niascacu'taja pa avan jayu ja lhôclôjqueyash ja Dios? 41 Pa lhechesh pa chiyayjat'e lhja utej chip'otajesheyshi can vaf. Pa yovalheshchisham ja Jesús java lhtôsjey pa yit'esh: —Tata, jajut'ay na yishamiash lhayaash ti lhach'anyiy. 42 Tsitô'ya ti yajatesh ti lhach'anyiy, taj ti lhech lhayônashem napuque yi'nee, jaspa tanca natcacujanesh jayu ti lhaschenshicham. 43 Vooy ti tifeshch'e cavôque, pa yit'esh ti yisitsenesh: —¡Lázaro, anachfach'ee! 44 Pa nachfach'ee jan vaftaj, chiyclôpjalheshch'e java t'itjuy shi' java lhafoc ja sivôclôclhayeech, shi' ja lhshatech chiyclôpjalheshch'e ja vatac'ôcle. Tayôjijanesh ja Jesús pa yit'esh: —Anuqueeshelhch'e nava chiyclôpjalheshch'e pa an'ateelh ca nôc.
Chiyasinôqui vatam pa Jesús ca chinôcfa'
45 Lhech cavôque tôlh'ejop ti acloj japi judíos ninatcacujanesh ja Jesús, japi tanaôycheelh lhja María ti yivanesh ts'ivee pa lhfanishesh ja Jesús. 46 Caaj jap'elh yichey japi fariseos pa nifaclemch'e ja lhfanishlhavach ja Jesús. 47 Pa lhechesh pa tayvane japi fariseos shi' japi lhanvaclesesh japi vatcasinôc shi' jap'elh lhcaanvacles pa yit'esh ts'ivee: —¿Ta casfanishcatsivach jayu? Jôque nivacle acloj nôqueesh nava yivclanjat nava nimatasa papu ca nitô'yish. 48 Ca shtan'atetajesh nôque lhfanishlhavach, pa nôja jayu lhacôm'a ca nincacuaesh, pa niyetsesjooy jayu japi Roma lhavos pa shintifch'een jayu lhacôm'a, shi' na uj vatishjanjavat yivômjat jayu. 49 Ve'lha ja lhcaanvacle yicshenshi, lhey Caifas, jô lhech lhanvacleesh japi vatcasinôc jô lhech yincôôp, lhech jôqueey yit'esh: —Avaatsheelh ampa ca natô'yelha. 50 Aychavalhcaelhey ajaalh yitsha, tajulhtajeyjoom ca ve'lha ja nivacle ca nivafem napi catsichifas, ojeytajesh ca caslhecha ca shtanôjqu'een. 51 Taj nilhecha ja Caifas ca nitô'lha ca lhaychavalhjayasha côque ti yit'esh, taj ti lhayaash ti lhanvacleesh japi vatcasinôc ti lhech t'aplhuqu'e, lhech lhavaatsha pa Dios tô'lha ti nifaclem ti chiyclôneem jayu ja Jesús japi lhchifas judíos. 52 Taj ti nive'lhaaeshey japi judíos shi' shita ti jaspa nayjatva'ne lhacôm'a japi lhclesesh pa Dios papi vacôtsônvatc'oya. 53 Lhech t'aplhuqu'e ti yivo'yeshvatjulh ts'ivee japi lhcaanvacles ja Jesús ca niclôn. 54 Lhech t'aplhuqu'e ti nintônôclitem t'ôyish'e ja Jesús japi judíos, pa tay'e ja cotsjaat Judea pa yichey ja yitsaat lhey Efraín yiey ja tavayjulh jan nintôlh'e pa'na. Lhech mônlheelh'e japi t'eyjatsjanjas. 55 Lha pa shalhac'oya ca lhc'usiyash'in japi judíos ca lhanquey Pascua, acloj japi nivacle tôlhey ts'ivee java yitsates tatômjalhey'in ja Jerusalén, jaspa yijutsjat ti vat'isinatc'oya pa Dios ti yujeey pa Pascua. 56 Vooysha'ne ts'ivee ja Jesús, meelh ti yiôcji ts'ivee ja vatishjanjavat pa taniyôseshch'e ti yit'esh: —¿Ta t'e lhteetshelh yitsha? ¿Tan t'e ca nachey na vatc'usiyash'in jô lhech? 57 Tayôjijanesh japi fariseos shi' japi lhanvaclesesh japi vatcasinôc ca nayjateshey tatsha papu ca nivantaj lhôn ja Jesús, jaspa nic'ôôjlhanit ca nôcfa' ts'ivee.
Lhpa ve'lha nivacche ti p'aclanshi pa Jesús pa vatshachivo
1 Ve'lhayama java nalhus tavaya ja Pascua, ti yichey ja Jesús ja Betania, yiey jan yie' ja lhajpôyich ja Lázaro, jan yinenjatchisham ti vaftaj. 2 Lhech'e ti yisnatshem ts'ivee ca is lhôc ja Jesús; lhja Marta lhavoqueesh ja vatsaccunjavat, vooy ja Lázaro ve'lha yielh'e ja Jesús ti tsaccunelh. 3 Pa lhechesh pa nicha'jesh yitsha lhja María ja medio litro vatshachivo tô'lha pa nardo, pa lhech uj ti t'un'e', pa yôtsiyapee java lhafoc ja Jesús, pa yiclajôjinatesh java lhayees. Tif ja lhajpôyich ti nifuj'ôcji. 4 Pa lhechesh pa yit'esh ja Judas Iscariote, lhaôs ja Simón, jô lhech tô'lha japi Jesús t'eyjatsjanjas, jô lhech vanqu'eeyjatesh ja Jesús jaelh nalhu, yit'esh jôqueey: 5 —Tajulhtajey ca chincasha'yesh jô na vatshachivo ca nuy'ôcji pava trescientos tinshanjay (denarios), pa lhetaja ca chinjutey papi ts'aclaaysha'ne. 6 Ja Judas yit'esh atesha cavôque taj ti tanca natcavts'aclayesh papi ts'aclaaysha'ne, cutsjanaj lhavaatsha, lhayaash ti tacutesh'in pava pesoc pava chiyclôvalhchiyintajesh'in. 7 Pa lhechesh pa yit'esh ja Jesús: —An'ateeshelh; lhayaash ti apis ti yisclsanjop ca chinasp'otaj'e. 8 Vooy japi ts'aclaaysha'ne yajatesh'in ca nôvelh'ajop'in, vooy yivaatsha tanca yajateesh ca yielh'ajop'in.
Chitafjunc'oya pa Lázaro ca chinclôn
9 Acloj japi judíos yayaesh ti yie' ja Jesús ja Betania, pa lhech t'ajuyshiin, taj nive'lhaa ja Jesús ca nanvanchatsuesh ts'ivee shi' shita ja Lázaro yen shta ca nivan, jan yinenjatchisham ja Jesús. 10 Taj ti apis ti vatpeya'esha'ne japi lhanvaclesesh japi vatcasinôc ca niclôn ts'ivee shta ja Lázaro, 11 tôlh'ejop japi acloj judíos tanu'tajc'oya ti nincacuesh ts'ivee nôqueesh ja Jesús.
Pa Jesús yitshaam pa yitsaat Jerusalén
12 Acloj japi nivacle yichey ja vatc'usinatesh'in lhey Pascua yiesh'e ja Jerusalén; vooy ti nalhu chiyaya'esh ja Jesús ti yamjam ja Jerusalén. 13 Pa lhechesh pa yit'ovosch'e pava ftsuuc lhsashay pa yichjuulh ts'ivee ja Jesús, pa tôneshvatsham'in ts'ivee pa yit'esh: —¡Tanshamiiy pa Dios! ¡Chiy'isiyan nan nameshjooy pa lhey pa Lhcaanvacle! ¡Chiy'isiyan na Lhanvacle napi Israel lhavos! 14 Pa yivanesh ja Jesús ja cuvôyutaj ti yi'apee, jan t'ônashesh ca Vani'sesh'e: 15 “Ya aj ca anjovay'in na yitsaat Sión; ovalhjulh nôquejulh Anvacle, yi'apee na cuvôyutaj.” 16 Vooy ti nich'a nintôyc'oya japi t'eyjatsjanjas cavôque matas; taj ti vooy ti chiyôclôj ja Jesús, pa yalhatajesh ti yaychavalhch'e, lhayaash ti apis ti vaniisshem'e cavôque lhacôm'a, ti yijô' t'emma t'ôyiy ti vaclan cavôque lhacôm'a. 17 Chayeshch'e japi nivacle ja Jesús ti tôneyshi ja Lázaro ti yich'e' ja nivalhech ti yinenjatchishamshi papi vafsha'ne. 18 Lhe'naa ti yichjuulh japi nivacle ca nivan ja Jesús, lhayaash ti tpeeycheyesh jan yivclanjat pa nimatasa papu ca nitô'yish. 19 Pa yit'eshvatsham'in japi fariseos: Lhavanelh nôqueesh ti tanca acôôjelh'e. A'va, lhacôm'a napi nivacle voqu'evatich'e.
Vooysha'ne papi griegos pa Jesús
20 Yicshenshi japi napu' griegos japi nivacle tishjaney ja Jerusalén. 21 Japi lhech yichey ja Felipe, ja Betsaida lhavo', yie' ja Galilea, t'aalhsha ts'ivee pa yit'esh: —Lhcaanvacle, uj ti jayeetajeshelh ca javanelh pa Jesús. 22 Pa yich ja Felipe pa nifaclem ja Andrés; pa lhechesh pa yichelhey ja Jesús pa nifaclemch'e. 23 Pa lhechesh pa yit'esh ja Jesús: —Lhapa yameyjop na t'aplhu' ti chiyôclôj na Nivacle Lhô'sesh. 24 Yijô' ti jayeetshelhaam, ca nichincôvjiyantaja lhpa trigo lhtôsej pa vaf jayu, pa tanca ve'lhaa lhpa ca lhaa; taj ti ca chincôvjiyantaj pa lhecheesh pa nitô'lha pa vatcavcalhech lhpa ve'lha lhtôsej. 25 Papu ca nentaj pa lhamônlhajayash pa yac'oyesh jayu. Lhan'e yitsha papi yapun pa lhamônlhajayash yiey na cotsjaat, pa chiyisclaneemsha'ne pa lhamônlhajayash ôyjôlhôyech 26 Ca nicaajtaj papu ca niteetajesh ca natcuumtajyam'in pan tatvoyich'esha'ne; pa ca jaôvtaj'e yivaatsha, lhech yie'jop jayu vitsha papi yit'esh ti t'acuumyam'in. Ca nicaajtaj papu ca natcuumtajyam'in, pa lhecha pa nôclôj jayu ja Tata. ,
Pa Jesús nifac pa lhavafi
27 “¡Nôqueesh uj ti nic'usiyam'in! ¿pa t'e ca jayeesh? ¿Jayeesh jayu t'e: ‘Tata, ats'ilhjenesh navôque yinfanash jayu nôqueesh? ¡Lhechin janachey cavôque! 28 Ta, atônôclôjesh ca ey. Pa lhechesh pa chiypeya' pa vat'ôjôj tôlhshaam na vôôs ti yit'esh: —“Apis ti jatônôclôj, taj ti jatônôclôj jayu shita.” 29 Japi nivacle, japi lhech yie'jop ti tach'ana, lhech japuque yit'esh ca cuucte'na, vooy jap'elh yit'esh: —Tasinôyshicham pa ángel. 30 Pa lhechesh pa yit'esh ja Jesús: —Côque vat'ôjôj niyalhecha ca navclanyam, vooy avaatsheelh vaclanelh'am. 31 Nôqueesh chiyisclanvatich'e jayu napi yie' na cotsjaat, jô'tajesh ti chiysasfach'ee jayu shta nôqueesh na tsich'e' nan lhcaanvacletajesh nôque cotsjaat. 32 Vooy ca chintsantajchisham, pa jajutyivne jayu lhacôm'a japi tsitsôt'ajesh. 33 Cavôque yit'esha ti tatfaclesh ti vafeshchisham jayu lhpa cruz. 34 Yicuulh japi nivacle pa yit'esh: —Yit'esh yitsha java yiqu'isjayanjaselh java yi'shi' java yinyôjijateselh ti tan lhôn ca nitay pa cat'elheesh pa Cristo. ¿Pa ta t'e lhayaash ti lhteesh ca chineshchisham jayu pa Nivacle Lhô'sesh? ¿She t'e pa Nivacle Lhô'sesh? 35 Pa lhechesh pa yit'esh ja Jesús: —Jôjjeclay yielh'atshi muc na vatqu'isjuyaj. Otaayshelhsha'ne neshiy, lhayaash ti vec'aj ti caaj na catisitaj, jaspa tanca natôyiyjatelh jayu pa vatqu'isjuyaj; lhayaash papu t'ôtaayshi pa tulh nintô'ya pa ti nash'e. 36 Ya aj ca acacujanshelh nôque vatqu'isjuyaj, lhayaash ti jôjjeclay yielh'ajop, jaspa lhclesaelh'ash jayu na vatqu'isjuyaj. Vooy ti tifeshch'e ja Jesús cavôque ti yit'esh, pa yich pa vant'ôfichc'oya.
Pan lhayaash ti tcacujanesh papi judíos pa Jesús
37 Ca tin'e pa aclojtaj clee cava yivclanjatem ja Jesús cava nimatasa papu ca nitô'yish, taj ti ninyôytanesh ti yicacu ts'ivee; 38 cavôque yôfisch'e, lhayaash ti apis ti t'ônashem pa chiytôyjata pava ti vaclan, lhey Isaías, ti yit'esh ti yi'sesh'e: “Caanvacle, ¿she papi yuesha cava yiclishay? ¿She papi nôclitem pa Lhcaanvacle pa t'unaj?” 39 Lhe'naa ca saseemjop ca nit'ujansha'ne, lhayaash ti apis ti yi'sesh'e lhapesh shta ja Isaías: 40 “Yitaclujuyansha'ne pa Dios, yit'uniyanemsha'ne shta pava lhcachic, jaspa tanca novalhesh'in pava lhtôsjey, jô'tajesh ti tanca nitôyc'oya pava lhcachic, pa tanca nitatvaych'aclaja pa isch'e ca yivatsjanchat ts'ivee. 41 Pa Isaías jaspa lhech t'ônash ti yi'van pa lhasnôycheyash ja Jesús, pa lhe'naa ca nitatômjalhesh ti yasinôqui. 42 Ca tin'e pa aclojtaj japi judíos nincacutaj ja Jesús, shi' japi lhcaanvaclesesh, taj ti tatfunesh ts'ivee ca chintôyesha lhayaash ti nijovayeshem japi fariseos ca nitôôysha, eem ti nayjataj'ôcji ja vatvanqu'eyjatsjanjavat. 43 Lhayaash ti ya'shesh'apee ti yen ca nôclôj papi nivacle, ninteesh ca lhechiyan pa Dios ca nenesh ca nôclôj jayu.
Cava lhasinôc pa Jesús yivalha jayu papi nivacle
44 Yisitsenesh ja Jesús ti yit'esh: “Papu ca niteetajesh ca ninu'tajesh'yi, taj ti tanca ya ve'lhaa yivaatsha shi' jayu shta ja Tata jan tsichenshicham. 45 Papi tsivan yi'van jayu shta jan tsichenshicham. 46 Yivaatsha ya vatqu'isjuyajeshjop na cotsjaat ti janameyshicham, jôcl'esh ca ya aj ca nit'ôtayshi pa tulhitaj papu ca nu'tajesh'yi. 47 Taj ti ca nicaajtaj papu ca nipe'yataj cava yasinôc ca ninteetajeesh ca nanlhatshi, taj ti tanca yalhecha yivaatsha jayu ca yivalha. Lhayaash ti nilhecha ca nachesheyshicham na cotsjaat ca yivalhjan'in. Am, janachey jô ca c'alhjen napi nivacle yie' na cotsjaat. 48 Papu ca nitsapuntaj, shi' ca ninu'tajaesha cava yasinôc, pa lhech p'alha ti caajem papi yivalha jayu, lhech cava yiclishay cava jayeesh'in yivalha jayu p'alha ca nôjtajeshch'e na nalhu. 49 Lhayaash ti ni'yalhecha ca nitôlh'yi ca yasinôcla. Am, vooy ja Tata jan tsichenshicham, lhech jô lhech niyôjeesh'yi nava jayeesh'in. 50 Jô'tajesh ti tsitô'ya jum shta cava lhayôjijates ja Tata t'ajuya ja vatmônlhajayash ôyjôlhôyech. Jô'tajesh nôqueesh nava jayeesh'in, jayeesh nan t'ônashyam ja Tata.
Pa Jesús yicleesha'ne pava lhafoc papi t'eyjatsjanjas
1 Lhapa ve'lha ja nalhu tavaya ca vatc'usiyash'in pa Pascua. Lhechesh ti p'alha ti yitô'ya ja Jesús ti yameyjop pa lhc'aplhuesh jayu ca nivô'mesh na cotsjaat pa napecleychisham jayu pa Lhtata; taj ti yajatesh ti yen papi yitsôt'ajesh yie' na cotsjaat, pa vooy nôqueesh pa ya'shesh ti nôclitem ti yensha'ne jum. 2 -4 Meelh ti tsaccunch'e pa p'alha ti yanshi' lhcachi' pa tsich'e' ja Judas Iscariote, lhaôs pa Simón, pa ca lhfanishaesh ca nivanqu'eyjatajesh ja Jesús. Ja Jesús p'alha ti yitô'ya ti yijutey lhacôm'a nava matas pa Lhtata, jô'tajesh ti yitô'ya shta ti tô'lha lhavaatsha pa Dios. Pa yitô'ya shta ti vapecleychisham jayu pa Dios. Lhapa tsaccunch'e ti netshaam ja Jesús pa tatclaneshi lhja t'uyjatshiy pa vooy pa vatvôômcôjavo pa vanôôcfeesh. 5 Pa lhechesh pa t'acuumjey pa yinôôt pa yôtsiysham pa lhech yie' vatvôômcôjatshiy pa yicleshemsha'ne java lhafoc japi t'eyjatsjanjas, vooy jan vanôôcfeesh vatvôômcôjavo yiclajôjinatesha'ne java lhafoc. 6 Meelh ti yamja ja Pedro ti yeetajesh ca nicleesha'ne java lhafoc, pa yit'esh ja Pedro: —Lhcaanvacle, ¿lhcleesha'neyam jayu t'em nava yifoc? 7 Yicuulh ja Jesús pa yit'esh: —Nava yifanishesh tanca natôyc'oya nôqueesh, taj ti vooy peelh nalhu natôyc'oya jayu vitsha. 8 Taj ti yit'esh ja Pedro ti yicuulh: —Tanca aclesha'neyam pa cat'elheesh nava yifoc. Yicuulh ja Jesús pa yit'esh: —Ca niycleeshtajasha'ne, pa tanca isa'jop jayu ca vi'yijop. 9 Pa lhechesh pa yit'esh ja Simón Pedro: —Ya taney Lhcaanvacle, ya aj ca ve'lhaa ca acleesha'ne nava yifoc acleesha'ne shta nava yipôcôtôy shi' na yishatech. 10 Taj ti yit'esh ja Jesús ti yicuulh: —Papu ti apis ti vanay nisuyeeshi ca vôômcô t'ôyish'e, ve'lheey jayalha pava lhafoc ca nicleesha'ne, lhayaash ti apis ti is lhavaatsha. Avaatsheelh apis ti aisiselh, taj ti naalhacôm'aaelh. 11 Yit'esh: “Naalhacôm'aaelh ca aisisaelh”, lhayaash ti yitô'ya papi yie' papi vanqu'eeyjatesh jayu. 12 Vooy ti yivaclhitesh ti yicleesha'ne java lhafoc, pa vapecch'e shita ja Jesús lhja t'uyjatshiy, pa yi'sha'nejop shta ja vatsaccunjavat, pa yit'esh: —¿Natô'yelhc'oya cavôque yifanisheshelh'am na? 13 Avaatsheelh lhteetshelh'yi Vanqu'eyjatsjan, Lhcaanvacle shita, navooyshelh'ôcji, lhayaash ti lhech yijunash. 14 Lha'ma yivaatsha, Javanqu'eyjatsjan ya Lhcaanvacletajesh shta, taj ti niyôytanesh ti jacleshelhsha'ne'am nava afoclelh, pa nôquen lhayaash lhtanyôjijayeshelh vitsha ca acleshelhsha'nevatam nava afoclelh. 15 Lhayaash ti lhech jôquesh'e jajutsaeshelh'ac'oya, secl'esh ca anjônshelhyich'e yifanishelh'ash. 16 Yijô' ti jayeetshelh'a, nive'lhaa pa vatcavo ca nash'apee pa lhanvacle, nive'lhaa shta pa vatcachenach ca nash'apee papin yichen., 17 Ca natôôytajelhc'oya cavôque, ca ajôntajeshelhch'e, pa uj ti c'uselh'am'in jayu. 18 “Tanca alhacôm'aaelh ca c'asinôquielh; lhayaash ti tsitô'ya japi javooyshiyitam. Taj ti nôque lhjunash jaspa yôfisch'e cava Vani'sesh'e ti yit'esh: ‘Jô lhech jaytsaccunelh, vanequetsenyijulh ti tanjuyijulh.’ 19 Nôqueesh jatatômjalheshelh'a ti janfaclelh'am tatsha, jôcl'esh ca meelh ca navclantaj, pa jaspa tanca ascacu'jelh ti ya lhech yivaatsha. 20 Yijô' ti jayeetshelh'a papu ca natcuumtajulhyam papu ca janchentaj, lhech jayu pa natcuumyijulh yitsha; vooy papi t'acuumyijulh, t'acuumjulh shta jan tsichenshicham.,
Pa Jesús nifac pa Judas ti vanqu'eeyjatesh jayu
21 Meelh ti tifeshch'e cavôque pa yit'esh ja Jesús, pa yalhatajesh ti yitacshin'in, pa yit'esh ti yinôôclhanita: —Yijô' ti jayeetshelh'a, ve'lha jayu na tôlhelh'atsham vanqu'eeyjatyish jayu. 22 Lhechesh pa vanovalh ts'ivee japi t'eyjatsjanjas, yistan'in ts'ivee pa yie' papu ca nitasinô'yesh. 23 Ve'lha ja t'eyjatsjanach, jô lhech ya'shesh ti yen ja Jesús, tavayelhvatjulh ti tsaccunch'e ts'ivee. 24 Pa lhech pôque t'acutsha ja Simón Pedro ti niyôsesh pan yie' papi yasinôqui ti lhech lhfanishlhavach jayu. 25 Pa lhechesh pa t'a'vuya jôqueey ja Jesús, pa yit'esh ti niyôsesh: —Lhcaanvacle, ¿she papuque lhech lhfanishlhavach jayu? 26 Pa yicuulh ja Jesús pa yit'esh: —Javayit cum lha yucuve, papu ca jajutajey jayu vinsha, pa lhecha jayu lhavaatsha. Pa lhechesh pa yivayit lhja yucuve pa yijutey ja Judas Iscariote, ja lhaôs pa Simón. 27 Meelh ti t'acuumjulh ja Judas lhja yucuve, pa tatshaesh ti yitshaam pa tsich'e'. Pa lhechesh pa yit'esha ja Jesús ti yiyôjaa: —Asnatesh clap nôqueesh pan lhancumjayue. 28 Taj ti ampapu ca nitôyc'oya cavôque japin t'ajôôj japi yie' ja vatsaccunjavat pa yichesh'e ja Jesús ti lhech yit'esh. 29 Lhayaash ti yitôôysha ti peso lhavoesh lhavaatsha, pa nôquen lhayaash yilheclôjtajesh jap'elhcha ca niyôjiesha ja Jesús ca natcasha'yey pa ca natjuya ja vatc'usiyash'in, ja't'ajesha ca nitisesh papi ts'aclaaysha'ne. 30 Pa nôque lhjunash pa tuj ja Judas lhja yucuve pa yichfach'ee. Lha pa tulh'in.
Pa nich'a vatyôjijat
31 Meelh ti yichfach'ee ja Judas, pa yit'esha ja Jesús: —Nôqueesh chinôclit na lhnôclôjqueyash na Nivacle Lhô'sesh, vooy ja lhnôclôjqueyash ja Dios pa nôclit vitsha na lhech. 32 Ca ninôclitaj na Nivacle Lhô'sesh na lhnôclôjqueyash ja Dios, pa ninôclitesh jayu vitsha ja Dios ja lhôclôjqueyashesh na Lhaôs, taj ti tanca clet'ac'oya. 33 Napi yicles, tanca cajuach'e ca yamônlhaaelh'ajop'in jayu. Lhavoelh'yisha'ne jayu, jan yônashem japi judíos lhech yônashelh'am jayu nôqueesh: Tanca amelhey jayu nan jayjuyshi jayu. 34 Jajutelh'ay jayu nôqueesh na nich'a yiyôjijatelh'am: Anenelh lhacôm'a. Nan yijunashelh'ash uj ti qu'enelhsha'ne, lhech ajunasheelhvach jayu ca anenelhsha'ne.35 Ca anentajelhsha'ne pa yitô'ya jayu lhacôm'a napi yie' na cotsjaat ti qu'eyjatsjanjaselh. , Pa Jesús nifac pa Pedro ti vantanesh jayu 36 Ja Simón Pedro niyôsesh ja Jesús ti yit'esh: —Lhcaanvacle: ¿ta lhatjuyshi jayu? Pa yicuulh ja Jesús pa yit'esh: —Yiey na jôcji jayu, sasjop ca antatvoyich'e nôqueesh, taj ti ats'ôfislha paelh nalhu. 37 Pa lhechesh pa yit'esh ja Pedro: —Lhcaanvacle, ¿ta t'e lhayaash ti sasjop ca javoach'e nôqueesh? Tajulheyyam ca jajut'ay na yimônlhajayash. 38 Pa yicuulh ja Jesús pa yit'esh: —¿Yijô'taja t'e ca nitajulhey'am ca anjutyiy pa amônlhajayash? Yijô' ti jayeesh'a ti jôjjjeclay tanca nit'eyshey pa votôjôj, ca p'alhaa ca pu'janaaesh ca avantanyish.
Pa Jesús nôyisheshjop pa Lhtata
1 “Ya aj ca anjova'yelh'atshi. Acafiyanelhey ja Dios pa ascafiyanelh shta. 2 Yiey ja lhajpôyich ja Tata aclojesh'e java jpôyjeyesh; ca ni lhech lhjunashaa pa apistaja ca yit'eshelh'a, pa jayeetshelh'a nôqueesh. Janôyinelhey'ac'oya ca jasclanelh'eam pava ca ajpôyjeyeelh. 3 Vooy ca joctaj ca javaclhitajesh ca jôyintajelh'am pava ajpôyjeyelh. Pa jatpeclelh'ay jayu shita pa c'achajelh jayu; pa lhôvelh'e jayu avaatsheelh jan jôv'e' yitsha. 4 Avaatsheelh natô'yelha na jayjuyshi jayu, lhantôfaacshelh shta na nôyish t'ajuyey. 5 Pa yit'esh ja Tomás: —Lhcaanvacle, ninastôye'lha pa lhatjuyshi jayu; ¿pa ta t'e ca lhjunasha ca nastôye'lha pa lhech nôyish? 6 Pa yicuulh ja Jesús pa yit'esh: —Ya lhech yivaatsha ya nôyishesh, jô'tajesh ti ya yijô', ya vatmônlhajayash shta. Tanca namey papu ja Tata ca nintôôlhtajaayijop.7 Ca antôfa'clelhyish, pa lhantôfaacshelh jayu shta ja Tata; vooy nôqueesh pa lhantôfaacshelh, jô'tajesh ti lhavanelh shta. 8 Pa yit'esh vitsha ja Felipe: —Lhcaanvacle, anôclitelhyam pa Atata, pa yashaneeshelh jayu. 9 Yicuulh ja Jesús pa yit'esh: —Felipe, cajuque avenna ti jôvelh'ajop'in nava nalhus, ¿pa jôjjeclay naantôfaacyish? Papi tsivan, yi'van shta ja Tata; ¿pa ta t'e lhayaash ti lhteesh anôclitelhyam pa Atata? 10 ¿Lhatcacujanesh t'ejum ti jôvji' ja Tata shi' ti yi'yitshi yitsha ja Tata? Cava yiclishay lhaspeya'shelh'in niyalhecha ca nitôlh'yi. Lhech jôcl'esh ja Tata jan yi'yitshi, lhech jô lhech yivclanjat cavôque matas. 11 Ya aj ca ascacu'jelh ti jôvji' ja Tata, yi'yitshi yitsha ja Tata; ja't'ajesha shta ca ujanesh cava jasnatesh'in. 12 Yijô' ti jayeetshelh'a, papu ca ninascacu'taja yisnatesh jayu yitsha nava jasnatesh. Nôquee pava yaash vatcumjavshay yisnatesh jayu, lhayaash ti jôquey jayu shta ja Tata. 13 Lhacôm'a pa ca etôntajelhjop ca yey ca aalhtajeshelhey ja Tata pa jasnatshelh'am jayu, jaspa ninôclesh na Lhaôs na lhôclôjqueyash ja Lhtata. 14 Pa ca lheytaja ca aalhtajelha ca etôntajelhjop ca yey, pa jasnatshelh'am jayu.
Pa Jesús nifac pa Espíritu Santo ti nichenshicham jayu
15 “Ca atsentajelh, pa anc'ashamshelh jayu cava yiyôjijates. 16 Vooy yivaatsha jayaalhsha jayu ja Tata, ca nanchenelh'ay jayu jeelh ca nunitjatelh, jô lhech ja Espíritu tô'lha pa yijô', jôcl'esh ca ya aj ca nitayelh'ajop pa cat'elheesh. 17 Vooy papi tô'lha nava yiey na cotsjaat, sasjop ca nitats'ôteyesh jayu, lhayaash ti ninvan ts'ivee ninantôfaclesh shta. Vooy avaatsheelh apis ti lhantôfaacshelh shta, eem ti mônlheelh'ajop jô'tajesh ti yielh'atshiin jayu nava nalhus. 18 Niyit'esh yivaatsha ca yalha c'avômelhch'een, janachelh'ay jayu shta ca jôvelh'ajop'in. 19 Tiqu'in pa amc'oya pa tanca nasvan t'ôyish'e napi nivacle yie' na cotsjaat, vooy avaatsheelh lhasvanelh'in jayu, lhayaash ti yamônlha, pa lhech ajunashelh jayu vitsha amônlhaaelhsha'ne jayu vitsha. 20 Caaj jayu pa nalhu ca natô'yelha jayu vitsha ti jôvji' ja Tata, vooy avaatsheelh pa lhôveelhyitshi, pa vooy yivaatsha pa jôvelh'atshi vitsha. 21 Papu ca nitôôytaja shi' ca nanc'ashamtajesh cava yiyôjijates, papi lhech tanôôclhaniteshlhavne ti yijô' ti tsen. Ya chi' shita jen jayu, jô'tajesh ti jatônôclitem jayu. 22 Pa yit'esh ja Judas, taj ti nilhecha ja Iscariote, ti yit'esh: —Lhcaanvacle, ¿ta t'e lhayaash ti yavo'yelh ti lhnôclitelhyam'in pa amjop napi yiey na cotsjaat? 23 Pa yicuulh ja Jesús pa yit'esh: —Papu ca niteetajesh ca nitsentaj, niqu'ishamesh jayu cava jayeesh; vooy yitsha ja Tata pa yen jayu, pa lhecheesh pa jatônôycheelhey jayu ja Tata ca jôveelhjop'in. 24 Papu nintsen, tanca nasnateh nava jayeesh. Cavôque ya'clishay navan lhpe'yeelhch'e nôqueesh, nintôlh'yi; vooy ja Tata jan tsichenshicham tô'lha cavôque. 25 Cavôque matas jayeetshelhaam nôqueesh, lhayaash ti jôjjeclay jôvelh'ajop'in. 26 Taj ti caaj jayu ja Espíritu Santo, ca nanchentajelh'ay ja Tata tsicôyôjatey, jaspa nunitjatelh jayu, jaspa neyjatsjanelh jayu jô'tajesh ti naychavalhjatelhch'e jayu lhacôm'a cava jayeesh'in. 27 “Janô'yelh'ajop jayu na yicanoyash, taj ti jayeesh ti c'amônlhanitshelh na yicanoyash, tanca yijunashajulh napi yiey na cotsjaat ti tcufayesh pa vatcanoyash. Ya aj ca natôyiyjatelh pa'na, ya aj shta ca anjova'yelh'in. 28 Avaatsheelh apis ti lhaspeya'elh ti jôc jayu, taj ti jatpeclelh'ay jayu shita. Ca ayijô'tajeelh ti lhtsenelh, pa anshameshelh ti jôquey jayu ja Tata; lhayaash ti yaashyitapee lhavaatsha. 29 Jatatômjalheshelh'a nôqueesh ti janfaclelh'am cavôque ti jôjjeclay ninavclan, jôcl'esh ca ya aj ca acacujanshelh ca navclantaj. 30 “Lhapa tanca cajuach'e jayu ca shtasinôyelhch'e, ti lhapa shalhac'oya ca namjoo ja lhanvacleesh napi yie' na cotsjaat. Lha'ma amtajyijop pa t'unaj. 31 Lhech chiychesh'eyam tatsha jaspa nantôyesh'yi napi yiey na cotsjaat ti uj ti jen ja Tata, jô'tajesh ti jasnatshem cava niyôjeeshyiy. Aneelhchishamch'e clap, ca shtayelhnee.
Lhpa yijô' ôtjayetayuc
1 “Yivaatsha ya yijô' ti ya ôtjayetayuqu'esh, vooy ja Tata vatcôvjiyanjavat lhavoesh yitsha. 2 Lhavaatsha yit'ovôsch'e java yit'oy nintô'lha pava lhay; lhan'e yitsha java yit'oy tô'lha pava lhay ti yisclanch'esha'ne, yit'ovôs'apee shta jaspa ya'shesh jayu jum ca nitaay. 3 Vooy avaatsheelh apis ti aisiselhsha'ne, lhtôôlhshelha cava jayeetshelhaam. 4 At'eshelh ca amônlhaaelhyitshi, lhech yijunashelh'ash yamônlhaelh'atshi. Sasjop ca nitaay lhavaatsha pa lht'oycha lhaôs ti tayesh lhpa lhtatsuc. Pa lhech ajunashelh vitsha tanca nicaajelh'am pava ayelh ca aytajelhyitshi. 5 “Ya lhech yivaatsha ya lhtatsuqu'esh, lhan'e avaatsheelh pa c'at'oyshelh. Papu ca mônlhatajayitshi, pa yamônlhaashi yitsha, lhech jayu lhavaatsha ti taay jayu jum; pa nôque lhjunash sasjop pa ca asnatshelh avaatsheelh ca ya ama lhôn. 6 Vooy yitsha japi ninteesh ca mônlhayitshi pa chicacha'yesh jayu jan lhanfanash java ôtjayetacuy lht'oy ti vafch'esha'ne, pa chint'ôqu'e pa chiyu'jamsha'ne pa itôj pa yichesh. 7 “Ca eetajeshelh ca amônlhatajeelhyitshi, ca niantovaclutajaeshelhch'e cava qu'eyjatsjaneshelh'in, pa aalhshelhyi pa'na pa lhjunash pa lhenelh, pa chinajutelh'ay jayu. 8 Chiyôclôjesh jayu ja Tata ca aclojtaja pava ayelh, ca lhech ajunashtajeelh ca yijô'tajeelh ca atônôclitajeshelh ti qu'eyjatsjanjaselh. 9 Qu'enelh avaatsheelh, nan lhjunashyish ja Tata ti tsen; amônlhaaeshelh na yencheyashelh'ash. 10 Ca anc'ashamtajeshelh cava yiyôjijates, pa lhôveelhshi jayu na yencheyashelh'ash, nan yijunashesh tsiqu'ishamesh cava lhayôjijates ja Tata jô'tajesh ti jôveelhshi ca lhencheyashyish. 11 “Cavôque jayeetshelh'a, jaspa yielh'atshi na yishamitjayash, nôque ajunasheelh anamjatelhch'een pa ashamitjayashelh. 12 Nôque yich'e' na yiyôjijat: Anenelhsha'ne pap'elh, nan yijunashelh'ash avaatsheelh ti qu'enelh. 13 Ampapu ca na'sheshc'oya na lhech pa uj lhencheyash ti ve'lha ti yijutem pa lhamônlhajayash papi lhc'utsfas. 14 A'lhechelh c'ac'utsfaseshelh jayu ca asnatajeshelh nava jayiyôjijanesh. 15 Niyit'eshelh'a yicavos, lhayaash ti papi ti vatcavoesh tanca nitôôysha pa lhfanishlhavach pa lhanvacle. Jayeetshelh'a jô yic'utsfas, lhayaash ti janfaclelh'am lhacôm'a cava yit'eshyam ja Tata. 16 Avaatsheelh naavoelhyishi; vooy yivaatsha javoelh'ayshi, c'ayôjeeshelh'a shita ca acloja pava ca ayeeshelh, jô'tajesh ti ya aj ca nitay pava lhech ayelh. Pa nôque lhjunash jaspa nijutelh'ay jayu ja Tata ca etôntajelhjop ca yey ca aalhtajelhey. 17 Lhech côque c'ayôjeeshelh'a: Ca anenelhsha'ne pap'elh.
Napi yie' na cotsjaat yicônitshi pa Jesús shi' papi yitsôt'ajesh
18 “Ca nacônitshitajelh napi yiey na cotsjaat, pa natô'yelha ti apis ti lhech lhjunashyish ti tsicônitshi. 19 Ca atanuelhch'e lhôn napi yiey na cotsjaat, pa jaspa nenelh jayu nan lhjunashesh napi yitsôt'ajesh. Taj ti c'anjôcleshelhey napi lhech napi yiey na cotsjaat, pa lhe'naa ca nacônitshielh, lhayaash ti nintsôt'ajelh'ash. 20 Aychavalhelhch'e cava jayeetshelh'a lhapesh: “Ca nôv'e' pa vatcavo ca nash'apee pa lhanvacle.” Lhavaatsha ts'ivee apis ti tsicôvfachi, pa nacôvfachielh jayu vitsha; ca nanc'ashamtajesh cava yiyôjijates, pa niqu'ishamelh'am jayu vitsha. 21 Cavôque lhech lhfanishelh'ash jayu; lhayaash ti ninantôfa'clesh jan tsichenshicham. , 22 “Lhavaatsha amtajeem pa lhsasch'e ca ninameey lhôn ti jasinôquiem. Taj ti vooy nôqueesh sasemjop ca nôôlhjônyam'in pava lhfanishlhavach ts'ivee; 23 Japi tsicônitshi, tsaclôfjaneshch'e ja Tata ti yicônitshi. 24 Tanca ninôôctajem pa lhsasch'e ca niyvanjayineesh java nimatasa papu ca nitô'yish nava jasnatesh; ca tin'e tsivantajesh ts'ivee ti lhe ti pa ti tsicônitshi, pa tsaclôfjaneshch'e ja Tata ti yicônitshi. 25 Côque vaclan yôfisch'e ti apis ti vani'sesh'e java lhanyôjijates ts'ivee ti yit'esh: “Ampa ca nitôôlhtajeyjop ti tsicônitshi ts'ivee.” 26 Taj ti nam jayu jan nefenelh pa nashantelh jayu, jan lhey Espíritu tô'lha pa yijô'. Jan jatôôlhsha jayu ja Tata ca janchenelh'ay, jô lhech tsasinôquielh'ac'oya jayu. 27 Avaatsheelh shta lhtsasinôquielh jayu, lhayaash ti lhtôlhjateshelh'e ti lhôvelhyijop'in ti nich'a.
1 “Cavôque ana apis ti jasinôquieshelhch'eam jaspa tanca nacôjôselhsham pava matas. 2 Chinasaselhfach'eec'oya jayu java vatvanqu'eyjatsjanjavtes jô'tajesh ti yamjeyshi jayu ca naychavalhey ca nanshamesha ja Dios côque lhcumjat. 3 Cavôque lhech lhfanishesh jayu, lhayaash ti ninantôfa'clesh pa cat'elheesh ja Tata, ya chi' ninantôfaacyish. 4 Cavôque jayeetshelh'a nôqueesh, jôcl'esh ca natô'yelha tatsha ca navclantaj cavôque ti apis ti janfaclelh'am.
Pa lhfanishlhavach pa Espíritu Santo
“Cavôque niyit'eshelh'a canumlhu, lhayaash ti jôvelh'ajop'in. 5 Taj ti vooy nôqueesh japecley jayu jan tsichenshicham lhapesh; lhan'e avaatsheelh tanca ve'lhaa t'ôyish'e papu ca atsiyôselh ca niteesh: ¿ta lhôcji' jayu? 6 Pa namelh'ach'een pa atacshinjayashelh jayu, lhayaash ti jayeetshelh'a cavôque. 7 Taj ti jayeetshelh'a na yich'e' na yijô'; tajulhelhey'am ca jôc jayu. Lhayaash ca ni'yichtaja, pa tanca ninamtajshicham jan nefenelh jayu jaspa yielh'ajop jayu; taj ti ca jôctaj, pa janchen jayu lhavaatsha. 8 Ca namtaj, pa nitôyjata napi yiey na cotsjaat ti sasch'e lhavosesh, yitôyjata jayu shta ti caaj ja nôyish uj ti yijô' ti yivo'yeshch'e, jô'tajesh ti yisclanvatich'e jayu pa cat'eelhtajeesh ja Dios. 9 Lhsasch'eesh papu ninteesh ca nit'ujanyish. 10 Chiytôyjata jayu pa nôyish yivo'yeshch'e, ca jôctajey ja yiey ja Tata, vooy avaatsheelh tanca asvaneelh t'ôyish'e; 11 chiytôyjata jayu shta ca nasclantajvatich'e ja Dios, lhayaash ti p'alha ti tanivalhchay nan lhanvacleesh na cotsjaat. 12 “Jôjjeclay aclojtaj nava yeetajesh ca yit'eshelh'a, taj ti saselhjop'am ca natô'yelhc'oya nôqueesh. 13 Taj ti vooy ca namtaj ja Espíritu tô'lha pa yijô', lhech jayu lhavaatsha ca neyjatsjaneshelh lhacôm'a ja yich'e' ja yijô'; taj ti tanca lhclishaya lhavaatsha pava ca niteetajeshelh'a, tsi'sha ti yit'eshelh'am jayu pant'ajôôj pava tpeeychayesh'in, nifaclelh'am shta pava vaclan jayu. 14 Lhavaatsha tsôclôj jayu, lhayaash ti tôlhesh'yi jayu nava tsitsôt'ajesh yitsha; lhe'naa ca lhech yit'esha ti tôlhesh'yi jayu ja Espíritu nava tsitsôt'ajesh, ca nanfactajelh'am. 15 Lhacôm'a java yitsôt'ajesh ja Tata, tsitsôt'ajesh yitsha; lhe'naa ca lhech yit'esha ti tôlhesh'yi jayu ja Espíritu nava tsitsôt'ajesh, ca nanfactajelh'am.
Pa vatacshinjayash nicôyôjey pa vatshamitjayash
16 “Jôjjeclay tiqu'in pa amc'oya pa tanca asvaneelh jayu; taj ti tiqu'in pa amc'oya shta pa asvaneelh jayu shita, lhayaash ti jôquey jayu jan yie' ja Tata. 17 Lhechesh pa nayie' japi t'eyjatsjanjas pa taniyôseshelh jap'elh: —¿Naô t'e pa yichesh'e nôqueesh ti yit'esh? Jôjjeclay tiqu'in pa amc'oya pa tanca asvaneelh jayu, pa tiqu'in pa amc'oya shta pa asvaneelh jayu shita, pan lhayaash ti yit'esh ca nôquey jayu pan yie' pa Lhtata. 18 ¿Naô t'e pa yichesh'e nôque ti yit'eshjoo ‘jôjjeclay tiqu'in pa amc'oya’? Nishtantôyc'oya pa yasinôquitaj. 19 Ja Jesús apis ti yitô'ya lhavaatsha ti yentaj japi t'eyjatsjanjas ca niyôsesh: —Jayeetshelh'a na ti jôjjeclay tiqu'in pa amc'oya pa tanca asvaneelh jayu, taj ti tiqu'in pa amc'oya shta, pa asvaneelh jayu shta. ¿Lhech cavôque lhteetajeshelh ca atsiyôseshelh? 20 Yijô' ti jayeetshelh'a, avaatsheelh lhapeelhvatsham'in jayu pa lhtacshinelhvatsham'in jayu shta, taj ti nishamesh jayu napi yiey na cotsjaat. Lha'ma ca atacshinelh'in, taj ti chincayôjatey jayu pa atacshinjayashelh pa ashamitjayashelh. 21 Meelh ti nicavatjatsu lhpa nivacche pa ninc'usiyan'in, lhayaash ti yameyjop pa t'aplhu' ti vaclanem pa t'aôyte, vooy ti apis ti nivat'aj pa lhaôs, pa nit'ôyisheey ca naychavalhch'een pa t'aôyte, eem ti nishamesh ti nich'a nivat'aj pa taôvclaj. 22 Pa lhech ajunashelh nôqueesh ti lhtacshinelhvatsham'in; taj ti jatpeclelh'ay jayu ca c'avanelh shta, pa lhecheesh pa anshameelhvatsham'in jum, tanca nanjôcleshelh papu pa lhech ashamitjayashelh. 23 “Pa lhech nalhu tanca t'ôyi'sheey ca atsiyôseshelh pa'na. Yijô' ti jayeetshelh'a, ca aalhtajeshelha pa'na ja Tata, ca atsetôntajelhjop, pa chiyjutelh'ay jayu. 24 Vooy nôqueesh jôjjeclay nive'lhaaesh ca atsetônelhjop pa ti lhta'lhelhey; a'lhelh, pa lhtôts'ôteyelh jayu, pa nôquen lhayaash pa namelh'ach'een jayu pa ashamitjayashelh jô.
Pa Jesucristo yash'apee na cotsjaat
25 “Cavôque jôjjeclay jayeetsha ti jajônelhey'ajop atesha. Taj ti nam jayu pa nalhu pa tanca t'ôyi'sheey ca yit'esha ca jajônelhey'ajop pa'na ca jayeetshelh'a; jasclaneelhsha'ne'am jayu jô ca jasinôquitaj ja Tata. 26 Pa lhech nalhu pa lhtsetônelhjop jayu pa ca aalhtajeshelhey ja Tata; taj ti niyit'eshelh'a nôqueesh ca vatants'aclanelhaam ja Tata, 27 lhayaash ti uj ti nenelh yitsha ja Tata. Nenelh, lhayaash ti yitôôyshelh'a ti lhtsenelh yitsha, jô'tajesh ti naacacujanshelh ti jatô'lhey ja Dios. 28 Yivaatsha jatôôlhjop ja Tata ti janameyshicham na cotsjaat; taj ti nôqueesh jayay'e jayu na cotsjaat pa japecleychisham jayu shta ja Tata. 29 Pa lhechesh pa yit'esh ts'ivee japi t'eyjatsjanjas: —Jech nôqueesh pa lhnôôclhanitelhch'esha'neyam cava lhteesh'in, pa nit'ôyisheey ca ajônelheyyijop pa'na. 30 Nôqueesh tsitôôyshelh'a jum ti natô'ya lhacôm'a nava matas, pa tanca naniyôsesh jayu shta pa'na papu. Lhe'naa ca nicacueeshelh ti lhtô'lhey pa Dios. 31 Yicuulh ja Jesús pa yit'esh: —¿Nôqueesh na acacujanelhyish? 32 Palha yameyjop na yincôplhu' pa lhech atô'lhelh'e ca acatsônelh'in, pa ave'lhaaelh ts'ivee pa ca meeelhshiin, pa yave'lhaa jayu ca asvômeelh. Taj ti tanca yave'lhaa, caaj ja Tata yi'yijop jayu. 33 Cavôque lhacôm'a jayeetshelh'a, jaspa atôôlhshelhyiy pa yicanoyash, lhayaash ti naacacujanelhyish. Vooy na cotsjaat lhtôôlhshelha jayu pa atacshinjayashelh'in; taj ti avatfiyitelh, lhayaash ti apis ti c'ash'apee lhacôm'a napi yiey na cotsjaat.
Pa Jesús t'alhem papi t'eyjatsjanjas
1 Vooy ti tifeshch'e cavôque ti yit'esh, pa yovalhesheychisham ja Jesús na vôôs pa yit'esh: —Ta, lhapa yameyjop na t'aplhu'. Ca ôclôj nôqueesh na Aôs, jôcl'esh ca nôclôj jayu vitsha na Aôs. 2 Eem ti lhjutey na Aôs pa t'unajjop napi yiey na cotsjaat, ca jaspa nijutem pa lhamônlhajayash ôyjôlhôyech lhacôm'a napin lhtisesh. 3 Nôque vatmônlhajayash ôyjôlhôyech lhech lhôqueshem'e ca jaspa nantôfacl'ash, ti ave'lheey a yijô' a Dios, shi' na Jesucristo, nan lhanchenshicham. 4 “Apis ti c'ôclôj yiey nôque cotsjaat, jô'tajesh ti apis ti javaclhitesh shta nava lhniyôjeeshyiy ti jasnatesh. 5 Vooy nôqueesh, Ta, anyijop na yiisiyash nan caajyam lhapesh ti jôv'ajop ti jôjjeclay ninavclan na cotsjaat. 6 “Apis ti jatôyjatc'oya napi nivacle jan ajunash, napin lhastisesh, lhavooyshiatam lhtô'lhesham napi yiey na cotsjaat. Apis ti natsôt'ajesh napin lhastisesh. Napi lhech qu'eyjatsjanesh nava lhteesh. 7 Nôqueesh yitô'ya ts'ivee ti tôlh'a' lhacôm'a cava lhanjutyiy; 8 lhayaash ti jajutey yitsha cava lhanjutyiy aclishay, uj ti yit'esh ti t'acuumjulh ts'ivee. Pa nôquen lhayaash uj ti yijôem ti jatôlh'aychisham, jô'tajesh ti ninatcacujanesh ti lhaschenshicham avaatsha. 9 “Jaya'lhem ts'ivee nôqueesh; taj ti nilhecha napi nivacle napi lhjunashjulh nan lhjunash napi yiey na cotsjaat, tsisha napi lhanjutyiy, lhayaash ti natsôt'ajesh. 10 Lhacôm'a nava tsitsôt'ajesh natsôt'ajesh yitsha, vooy nava natsôt'ajesh tsitsôt'ajesh yitsha. Lhech napuque pa chinvaneshey na yinôclôjqueyash. 11 “Palha tanca yie'in na cotsjaat; vooy lhavaatsha jôjjeclay mônlhee ts'ivee na cotsjaat, lhan'e yivaatsha pa jôc'ay jayu. Issha'ne Tata, acheneshjop na unaj ca anujumatsenesh napi lhanjutyiy, jôcl'esh ca ve'lhaasham jayu vitsha nan casjunashvach casvaatsha. 12 Vooy ti jôjjeclay jôvjop'in ti yiey na cotsjaat, pa jacheneshjop na unaj ti janujumatsenesh ts'ivee napi lhanjutyiy. Ampapu ca nasc'oyesh ts'ivee, jô'lhaa taney ja ve'lha vacuclôn'in, taj ti jaspa yôfisch'e ca t'ônashch'e ca Vani'sesh'e lhapesh. 13 “Jôc'aychisham jayu nôqueesh; jô'lhaa cavôque ti janfac, lhayaash ti jôjjeclay yamônlhee na cotsjaat, pa c'ôôjlhayam ca jayeetsha cavôque pa jaspa namqu'een jum na vatc'usiyash'in nan caajyam. 14 Yivaatsha jajutey ts'ivee cava asinôc, taj ti napi yiey na cotsjaat yicônitshiesh napi lhech, lhayaash napi lhech nintsôt'ajesh na cotsjaat, nan yijunash niyivtsat'a na cotsjaat. 15 Taj ti niya'lhemey ca ayjat'e ts'ivee na cotsjaat, jaya'lhemey jô ca anujumatseneshjulh pa tsich'e'. 16 Nan yijunash ti nitô'lha na cotsjaat. 17 Aisiyanem avaatsha ca ajutajey pa yijô'; yijô' lhavaatsha cava asinôc. 18 Nan ajunashyish ti lhaschensham napi yiey na cotsjaat, lhech yijunashesh nôqueesh ti jachensham yitsha napi yiey na cotsjaat. 19 Pa tôlheshyiy ts'ivee ti javat'isiyan jôcl'esh ca nitôôlhsha yitsha na yich'e' na yijô' ca isisasha'ne vitsha. 20 “Taj ti nitsi'shaa napuque ca ya'lhem, jaya'lhem shta papi ca niteetajesh ca ninascacutaja jayu, ca nipe'yatajesh napuque. 21 Jaya'lhesh'ay ca ve'lhaasham jum ts'ivee; jôcl'esh ca casve'lhaaelhsham, nan ajunash Tata ti lhôôvyitshi lhech c'ajunash'ash ti jôv'atshi. Jôcl'esh ca ve'lhaasham jum ts'ivee jaspa tanca natcacujanesh jayu napi yiey na cotsjaat ti lhaschenshicham lhapesh. 22 Jajutey ts'ivee vitsha can lhanjutyiy yinôclôjqueyash, jôcl'esh ca ve'lhaaesham, nan casjunashvach casve'lhasham. 23 Yivaatsha jôvji' ts'ivee, lhan'e pa lhôôvyitshi vitsha, pa nôquen lhayaash yamjam ti yijô' ti ve'lhasham ts'ivee, pa lhecha jayu ca nitôyjata napi nivacle napi yiey na cotsjaat ti lhaschenshicham lhapesh, jô'tajesh ti uj ti lhen shta ts'ivee nan ajunashyish ti lhtsen. 24 “Ta, napuque lhanjutyiy, jayeetajesh ca nôv'e' jan jôv'e' jayu, jôcl'esh ca nasvanesh jayu pa yinôclôjqueyash jan lhanjutyiy; lhayaash ti p'alha lhapesh ti lhtsen ti jôjjeclay ninavclan na cotsjaat. 25 Ta, navo'yeshch'e pa'na ti afanish'avach, napi nivacle napi yiey na cotsjaat ninantôfacl'ash, taj ti vooy yivaatsha tsitôfacl'ash, shi' napuque yitô'yishyiy ti lhaschenshicham. 26 Ya lhech yivaatsha ti jatôyjata pa ajunash taj ti tanca javô'mesh ti jatôyjata jayu, jôcl'esh ca nôvji' ts'ivee ca encheyashyish, jôcl'esh shta ca jôvji' ts'ivee jayu.”
Chiyôcfa' pa Jesús
1 Vooy ti tifeshch'e cavôque ti yit'esh'in ja Jesús, pa yichelheypacham japi t'eyjatsjanjas ja tsuyeshch'e lhôjôyish lhey Cedrón. Lhech yie' ja ve'lha vatcôvjiyanjavat, yicheelhsham ja Jesús japi t'eyjatsjanjas. 2 Yitô'yey tatsha jô lhech ja Judas, jan vanc'ôyanjaney jayu, lhayaash ti aclôjesh ti lhech yielh'e ja Jesús japi t'eyjatsjanjas. 3 Nôque lhjunash ti yameyshi c'oya ja Judas jan yie' ja Jesús, japi vôncaclônjanjas shi' jap'elh c'afoquelhayeshjop'in ja vatishjanjavat, lhech japuque lhcachenjasesh japi lhanvaclesesh japi vatcasinôc shi' japi fariseos. 4 Taj ti nan lhjunash ja Jesús apis ti yitô'ya pa vaclanem jayu, pa yicuulh pa niyôsesh: —¿She papuque lhavoelhey? 5 Pa yicuulh ts'ivee pa yit'esh: —Vooy pa Jesús, Nazaret lhavo'. Pa yicuulh ja Jesús pa yit'esh: —Ya lhech yivaatsha. Lhan'e ja Judas, jan vanc'ôyanjaney yi'shi' japuque. 6 Meelh ti yit'esh ja Jesús: “Ya lhech”, pa tac'uyc'oya pa nicôtch'esha'ne. 7 Pa yachajeyc'oya shta ja Jesús ti niyôsesh: —¿She papuque lhavoelhey? Pa yicuulh ts'ivee pa yit'esh: —Vooy pa Jesús, Nazaret lhavo'. 8 Pa lhechesh pa yit'esh ja Jesús: —Apis ti jayeetshelh'a ti ya lhech yivaatsha. Ca avo'tajelhyisha'ne pa an'ateelh napuque ca nôqu'in. 9 Cavôque vaclan jaspa yôfisch'e cava yit'esh ja Jesús, ti tanca nac'oyesh papi yijutem pa Lhtata. 10 Pa lhechesh pa nitsooji ja lhclesataj ja Simón Pedro, pa yit'ovôseyc'oya lhca lhfayishey lhacfe' ja ve'lha lhcavo ja lhanvacleesh japi vatcasinôc, lhey Malco. 11 Taj ti yit'esha ja Jesús ja Pedro: —Achajch'e na lhashiy na aclesataj. Ca nanchentajyi ja Tata nôque t'apôôyshi, ¿pa sasjopyam jayu t'e ca c'ayô'ji?
Pa Jesús yie' t'ajuyish ja lhanvacleesh papi vatcasinôc lhey Anás
12 Pa lhechesh pa t'acumeshva'ne japi vôncaclônjanjas shi' japi c'afoquelhayesh ja Jesús, jô'tajesh ti yôcfa' ts'ivee. 13 Lhech t'aplhuqu'e ti yicha'jey ts'ivee ja lhajpôyich ja Anás, jan lhcactech'esh ja Caifás, lhecheshch'e ti lhanvacleesh japi vatcasinôc. 14 Lhech jô lhech Caifás yit'esha lhapesh japi judíos ti tajulhey ca nivafem napi judíos pa ve'lha ca natjuya napi lhchifas.
Pa Pedro vantanesh ca ninantôfa'cleesh pa Jesús
15 Ja Simón Pedro shi' jaelh t'eyjatsjanach yijoqu'esha'ne ja Jesús. Jaelh t'eyjatsjanach nitôfaclesh ja lhanvacleesh japi vatcasinôc; pa nôquen lhayaash pa yicheelhsham ja Jesús ja clayôych'e lhavoj'e ja lhajpôyich ja lhcaanvacle, 16 lhan'e ja Pedro mônlhafach'ee. Pa lhechesh pa yichfach'ee ja t'eyjatsjanach jan nitôfaclesh ja lhanvacleesh japi vatcasinôc, pa yichey lhja lhashi lhavoque pa tasinô'yelh'in jaspa yitshaam yitsha ja Pedro. 17 Pa lhechesh pa yit'esh lhja lhashi lhavoque ti yiyôjaa ja Pedro: —¿Na'alhecha t'e t'eyjatsjanach'ash nôcôô nivacle? Pa yicuulh ja Pedro ti yit'esh: —Am, ni'yalhecha. 18 C'uy jô'lhechesh, pa yilhônem ja itôj japi vatcavosesh shi' japi c'afoquelhay pa vatsavatjop ti yi'jop ts'ivee. Pa lhech yie'jop shta ja Pedro japi lhech yijop ja itôj.
Pa lhanvacleesh papi vatcasinôc niyôs pa Jesús
19 Ja lhanvacleesh japi vatcasinôc niyôsesh'in ja Jesús japi t'eyajtsjanjas shi' pa t'ônashch'e pa vanqu'eyjatsjanesh. 20 Yit'esh ja Jesús ti yicuulh: —Yajatesh aven ti japjôclônesh napi nivacle ti jayasinôy'e t'ajuyish; pa yajatesh ti javanqu'eyjatsjan'ôcji java vatvanqu'eyjatsjavtes shi' ja vatishjanjavat, jan tc'aevaneen japi judíos; pa ampa ca vaniistanjatesh ti jayeetsha. 21 ¿Ta t'e lhayaash ti lhtsiyôsesh? Aniyôsesh japin tsipe'yeesh'in, jôcl'esh ca nanfac lhavaatsha cava javanqu'eyjatsjanesh. Yitô'ya ts'ivee cava jayeesh'in. 22 Meelh ti yit'esh cavôque ja Jesús, pa lhech yie' ja ve'lha c'afoquelhayeshjop pa vatishjanjavat, lhech jôqueey yipôcôj ja Jesús pa yit'esh: —¿Lhech ônashem na lhanvacle napi vatcasinôc? 23 Pa lhechesh pa yit'esh ja Jesús: —Ca sastajach'e na cava jayeesh'in, pa anfacyam pan yie' pa sasch'e; jô pa ca istajach'e nava jayeesh, ¿pa ta t'e lhayaash ti lhaspôcôôj? 24 Pa lhechesh pa yicheney ja Anás ja Jesús ja Caifás, ja lhanvacleesh japi vatcasinôc.
Pa Pedro vantanesh shta pa Jesús
25 Vooy ja Pedro jôjjeclay vatsavatjop'in ja itôj; ti niyôsesh ts'ivee ti yit'esh: —¿A lhech jô t'eyjatsjanach'ash yitsha na lhech nôcôô nivacle? Ja Pedro vantanesh, pa yit'esh: —Am, ni'yalhecha. 26 Pa lhechesh pa yit'esh ja ve'lha lhcavo ja lhanvacleesh japi vatcasinôc, lhech jôque lhavelh jan yit'ovôsey lhacfe' ja Pedro: —¿C'avan t'e apee yitsha na ti lhôvjop ti yiey ja vatcôvjiyanjavat? 27 Pa ve'lheesh shta pa vantanesh ja Pedro pa lhechesh pa t'eyshey pa votôjôj.
Pa Jesús ti yie' t'ajuyish pa Pilato
28 Pa lhechesh pa tôlhesh'e ts'ivee ja lhajpôyich ja Caifás ja Jesús ti yicha'jey ja lhajpôyich ja uj lhcaanvacle. Lhapa nalhuin jayu, taj ti ninteesh ca nôc'ôcji japi judíos ja lhajpôyich, eem ti nichavat'eshlhavne ca nivat'sasinatesh jayu pa Dios. Pa nôquen lhayaash pa tanca nitujtaj pa vatôc chiyisnateshjop pa Pascua. 29 Lhe'naa ca nôqueyfach'ee ja Pilato pa tasinôyelhsha'ne pa yit'esh ti niyôsesh: —¿She t'e pa tameneshlhavach nôque nivacle? 30 Yicuulh ts'ivee pa yit'esh: —Tanca nichaajtajelh'ay ca ninasnateesh lhôn nôque pa niysa'. 31 Pa lhechesh pa yit'esh ja Pilato: —Acha'jelh yiinsha, pa asclaneshelhsha'ne pan t'ônash pava ayôjijateselh. Yicuulh japi judíos pa yit'esh ts'ivee: —Taj ti yivaatsheelh ya judioselh, ninvooyjulh ca yiclônelh papu. 32 Pa nôque lhjunash yôfisch'e pa t'ônashesh ja Jesús pa lhjunash jayu pa lhavafi. 33 Pa vapec'ôcji shta ja Pilato ja lhajpôyich, pa tôney ja Jesús pa niyôsesh: —¿A'lhech t'e lhanvacleash napi judíos? 34 Yit'esh ja Jesús ti yicuulh: —¿Tôlh'a' avaatsha cavôque lhtsiyôsesh, ja't'ajesha ca nanfac'am pap'elhcha? 35 Yicuulh ja Pilato pa yit'esh: —¿Ya judío ajalh yivaatsha? Vooy napi achifas shi' japi lhanvaclesesh japi vatcasinôc lhech nachaajshina. ¿Ta t'e afanish'avach? 36 Pa lhechesh pa yicuulh ja Jesús pa yit'esh: —Niyijunashajulh napi lhcaanvacles napi yiey na cotsjaat, lhayaash ti ninôque nôv'e' ja yinvacleyash. Lhan'e ca lhech lha'ya'sha ca nôque nitôlh'e', pa ma lhôn pa nivatclôntajyitapee japi tavoyich'esha'ne jaspa tanca nitsamataj napi judíos. Taj ti ninôque nôv'e' ja yinvacleyash. 37 Pa lhechesh pa yit'esh ja Pilato: —¿Yijô' t'emma t'oyi ti alhcaanvacle? Yicuulh ja Jesús pa yit'esh: —Ya lhcaanvacle, nan ônashesh. Tsivat'aj yivaatsha janachey na cotsjaat jaspa janfac ja yich'e' jan yijô'. Lhacôm'a papi yit'esh ti t'ujanesh pa yijô', tach'anch'e cava jayeesh'in. 38 Yit'esh ja Pilato: —¿Ta t'e yich'e' pa yijô'?
Pa Jesús chitculhjanesh ca chinclôn
Vooy ti tifeshch'e ti niyôsesh cavôque, pa yichfach'ee shita ja Pilato yiey pa tay'eva'ne japi judíos, pa yit'esh ti yiyôjisham: —Nôque nivacle ampa ca nôstôyesha pa ca lhjunasha ca ninvoyeeshch'e pa ca lhfanishalhavach. 39 Taj ti avaatsheelh nafayjaneshelh ti lhniyôjeeshelhyiin ca januqueesh pa ve'lha vanôôcfa ti nôque t'aplhu' ti vatc'usiyashesh'in pa Pascua; ¿lhteetshelh t'e ca januqueeshelh'am na lhanvacleesh napi judíos? 40 Pa lhechesh pa tôneshvatsham'in ts'ivee lhacôm'a: —¡Vooy na lhech ya aj na! ¡Anuqueesh jô ja Barrabás! Côque Barrabás vôncaclônjanajesh.
1 Pa lhechesh pa tayôjijanesh ja Pilato ja Jesús ti chiyc'ôn'in. 2 Vooy japi c'afoquelhay yuyjatsham ja lhshatech java c'utjanis chiychamayan, jô'tajesh ti yuyjayanch'e lhja t'uyjatshiy yuc. 3 Lhech t'aplhuqu'e ti yit'esha ts'ivee: —¡Chinshamesh na Lhanvacle napi judíos! Pa yipôcôjvatam ts'ivee. 4 Pa lhechesh pa yichfach'ee shita ja Pilato pa yit'esh: —Anovalhelhey, janchajelh'ayfach'ee shita lhayaash ti ni'nastôyesha pa ca lhjunasha pa ca natmeneshlhavach. 5 Ja Jesús nacheshfach'ee, pava chiyuyjatsham pa lhshatech c'utjanis pa chiyuyjach'e lhja t'uyjatshiy yuc. Pa lhechesh pa yit'esha ja Pilato: —¡Janamjatelh'ay nôque nivacle! 6 Meelh ti yivaney japi lhanvaclesesh japi vatcasinôc shi' japi c'afoquelhay, pa lhechesh pa tôneshvatsham'in pa yit'esh: —¡Aclônshelh'e lhpa cruz! ¡Aclônshelh'e lhpa cruz! Yit'esh ja Pilato ti yiyôjia: —Acha'jelh t'em ca aclônshelh'e lhpa cruz avaatsheelh, lhayaash ti ninôstôyesha yivaatsha pa ca lhjunasha ca natmeneshlhavach. 7 Taj ti yiculhch'e japi judíos pa yit'esh: —Yivaatsheelh caajelhyam ja yinyôjijat'elh, lhech t'ônashelhyam ca chinclôn, lhayaash ti yit'eshlhavne ca lhô'seesh pa Dios. 8 Meelh ti yipe'yach'e côque ja Pilato, pa ujesh ti nijovayshi; 9 pa vapec'ôcji shta ja lhajpôyich pa niyôsesh shta ja Jesús: —¿Ta lhtôlh'e avaatsha? Taj ninteesh ca nicuulh t'ôyish'e ja Jesús. 10 Pa lhechesh pa yit'esh ja Pilato: —¿Na at'esh ca ascuulh? ¿Ni'natôya t'e ti isjopyam ca yiyôjijan'ash ca chinaclônesh'e lhpa cruz, taj ti isjopyam shta ca yiyôjijan'ash ca atanuqueesh? 11 Pa yicuulh ja Jesús pa yit'esh: —Tanca lhayaashtaja ca aashyitapee ca ninjutaay'ajop ja Dios; lhe'naa ca na'shesh'ac'oya ti tameneshlhavach jan tsichaajnee. 12 Pa lhech tôlhesh'e ti vo'tajey pa ca lhfanishaesh ja Pilato ca nitanuqueesh shta ja Jesús; taj ti tôneshvatsham'in japi judíos: —¡Ca anuquitajesh nôque, pa tanca ac'utsfaaesh jayu ja uj lhcaanvacle! —¡Lhacôm'a papu yit'eshlhavne ca lhcaanvaclea, lhech pa yicônitshi ja uj lhcaanvacle Roma lhavo'! 13 Meelh ti yipe'yach'e cavôque ja Pilato, pa tayôjijanesh ca chinchaajfach'ee ja Jesús, pa lhechesh pa yiesha'ne ja lhc'o'vat yie' ja yiejop'in papu ti yisclanvatich'e, jô lhech lhqueyesh japi hebreos Gabata, côque yich'e' Utinilh. 14 Lhapa nalhcachi ja jumcuclaay jô lhech nalhu tavaya pa Pascua. Pa lhechesh pa yit'esh ja Pilato ti yiyôjia japi judíos: —¡Nôque anvacleelh! 15 Taj ti tôneshvatsham'in ts'ivee ti yit'esh: —¡Aclônelh! ¡Aclônelh! ¡Aclônshelh'e lhpa cruz! Pa yit'esh ja Pilato: —¿Ta t'e lhayaash ca jaclônesh'e lhpa cruz na anvacleelh? Taj ti yicuulh japi lhanvaclesesh japi vatcasinôc pa yit'esh: —Ampapu caelh ca yinvacleaeshelh ti ve'lha ja uj lhcaanvacle Roma lhavo'. 16 Pa lhechesh ti'ma pa yijutey ja Pilato ca niclônesh'e ts'ivee lhpa cruz, pa yichaaj ts'ivee.
Ti chiyinesh lhpa cruz pa Jesús
17 Pa lhechesh pa yicheshfach'ee ti'ma ja Jesús lhja cruz ti tilhooj, t'ajuyshey lhja utiyuc lhey Vatshatjes yie', lhqueyesh ca hebreos lhcliish Gólgata. 18 Lhech yiesh'e ti chiyinesh lhja cruz. Lhtinclônchifasesh shta jap'elh napu' chiyclônesh'e shta ts'ivee java cruz, vooy ti chiytsimajeshch'e pa chivayjatshi lhcachivat ja Jesús. 19 Tayôjijanesh ja Pilato ca chini'sesh'e cavôque vatca'niscôtey ca chiney lhôtôj lhja cruz, pava lhech ya'clishay yit'esh: “Jesús, Nazaret lhavo', Lhanvacle napi judíos.” 20 Acloj japi judíos yetônch'e cavôque ya'clishay vani'sesh'e, eem ti shalheemey pa uj'e yitsaat pa chiyiclôn'e ja Jesús. Cava lhech chiyi'sesh'e chiyanshijop ca lhcliish japi hebreos, shi' ca lhcliish japi griegos lhavos ca lhcliish japi Roma lhavos (lhey latín). 21 Lhe'naa ca niteetajesha japi lhanvaclesesh japi vatcasinôc ti yiyôjia ja Pilato: —Ya aj ca i'sesh'e “Lhanvacle japi judíos”; i'sesh'e jôcl'esh ti yit'eshlhavne ca lhanvacleaesh japi judíos. 22 Taj ti yit'esh ja Pilato ti yicuulh: —Cava qu'isesh'e tanca nivô'mesh ti vani'sesh'e. 23 Meelh ti yivaclhitesh japi c'afoquelhay ja Jesús ti yiclônesh'e lhja cruz, pa nayjatva'ne java t'uyjatshiyis pa yitshatjulhesh'e pa yôclôpjue java t'uyjatshiyis, velhee ts'ivee japi c'afoquelhay ti vacôtsônesh java chiyôclôpju. Vooy ja lhavuyet pi'clô ampa ca chinuevatjulh. 24 Pa yit'esh japi c'afoquelhay: —Ya aj ca shtac'asatshi; cha'pa naôvlhee yiin papi nôvey ca shtu'tajjop java t'ajuya. Nôque lhjunash ti yôfisch'e cava Vani'sesh'e ya'clishay ti yit'esh: “Tanaatsjulhesh ts'ivee java yuyjatshiyis, vooy ja yivuyet yiey japi yivo'yeyshi lhja yu'jop ts'ivee”. Pa lhech lhfanishesh japi lhech c'afoquelhay. 25 Vatsavatch'etsham lhja cruz ja Jesús lhamimi, shi' lhja lhch'injô lhja lhamimi, shi' lhjaelh María Cleofas lhch'acfa, shi' lhja María Magdalena. 26 Meelh ti yi'van ja Jesús lhja lhamimi, ti ve'lha vatsavat'elh'e ja ve'lha t'eyjatsjanach jô lhech uj ti yen, pa yit'esh ti yiyôjia lhja lhamimi: —Ma, nôcôô ana ô'sesh nôqueesh. 27 Pa yit'esha shta ja t'eyjatsjanach: —Anôcôô ana amimiesh nôqueesh. Pa lhech t'aplhuqu'e ti yanlhavcop jô lhech t'eyjatsjanach.
Lhavafi pa Jesús
28 Nôjeshch'e côque pa yitô'ya ja Jesús ti palha yam'apee lhacôm'a. Pa nôque lhjunash yôfisch'e shta cava Vani'sesh'e ya'clishay, ti yit'esh: —Ts'iyôjayu. 29 Lhech yie' lhja ve'lha tnôjque tapooj ca nivayshi; lhech jôquee chijucjeeshi lhja lhech ti vichiti, nôcôsjop ts'ivee ca hisopo lht'oycha pa yijucjujam pa yicchiesheychisham ja Jesús lhashi. 30 Pa yifinsham ja Jesús ca nivayshi pa yit'esh: —Lhapa javaclhitesh lhacôm'a. Pa lhechesh pa tanjuyshicham ja lhshatech pa vaf. Ve'lha pa c'afoquelhay yitsefeshesham lhavlhi' pa lhcôpje pa Jesús 31 Jô lhech nalhu tavaya ja Pascua, lhech t'aplhuqu'e ti ninteesh japi judíos ca mônlhaaeshchishamch'e java crusec capi vafsha'ne ja nalhu ti chit'ichayshi, lhayaash ti ya'shesh ti chivatc'usinatesh'in jô lhech nalhu. Lhe'naa ca nôqueyshey ts'ivee ja Pilato pa yiyôjiesha ts'ivee ca nitayôjijanesh ca chinpôcjetshisha'ne pava lht'oy japi chiyinesh java crusec, shi' ca chinayjat'e pan yie'. 32 Pa lhechesh pa yichey japi c'afoquelhay pa yipocjetshisha'ne pava lhcaclôy pa vatjutsa, shi' shta jaelhcha ja chiyclôneshelh'evatjuulh ja Jesús. 33 Vooy ti yama ts'ivee ja Jesús pa yi'van ti p'alha ti vaf, pa jaspa ninteesh ts'ivee ca nipocjetshisha'ne java lhcaclôy. 34 Taj ti ve'lha ja c'afoquelhay yitsefeshesham lhavlhi' pa lhcôpje, pa nachfach'ee tatsha pava lhavoyey shi' pa yinôôt. 35 Jan nifacch'e cavôque yivanesh jô, jô'tajesh ti yijô' pa t'ônashesh; eem ti yitô'ya jum ti tsisha pa yijô' ti nifac, jaspa tanca acacueshelh jayu vitsha. 36 Cavôque vaclan yôfisch'e cava Vani'sesh'e ya'clishay ti yit'esh: “Tan jayu ca nipôcjetshi pa ca ve'lhaa pa ca lhanua.” 37 Caaj shta jaelh Vani'sesh'e ti yit'esh: “Yi'van jayu ts'ivee jan yitsefesham.”,
Ciyp'o'e pa Jesús
38 Vooy ti nôjeshch'e cavôque, pa José, Arematea lhavo' yicheshey ja Pilato ti t'aalhsha ca nijutey ja lhavu'vat ja Jesús. Lhech jôque José vatfich'esh ti voqu'esha'ne ja Jesús, lhayaash ti nijovayem jap'elh judíos. Pa yivashanem ja Pilato jôqueey José, pa yichey ja lhavu'vat pa yichaaj. 39 Shi' ja Nicodemo, ja yichey lhapesh ti tulhey ja Jesús. Lhech jôqueey yicha'jesh pa lhcafetasesh treinta pa lhcaclecli. Pa lhech lhfetas vanacshenelh pa mirra shi' pa áloes. 40 Pa nôque lhjunash pa t'acum'e ja José shi' ja Nicodemo ja lhavu'vat ja Jesús. Pa yiclôpjalheshch'e ts'ivee java sivôclôclhayjey javan yôtsiych'e java lhcafetatsiyesh, nan lhfanishesh yitsha japi judíos papu ti vaf. 41 Shalheema ja vatcôvjiyanjavat ca chiynesh'e ja Jesús ti chiyclônesh'e lhja cruz. Jô lhech vatcôvjiyanjavat lhech yie' ja nich'a nivalhech, jôjjeclay ampapu ca chinanch'e'. 42 Lhech yan'e ts'ivee ja lhavu'vat ja Jesús, lhayaash ti shalhaa ja nivalhech, eem ti shalhac'oya ja nalhu ti t'ichayshi japi judíos.
Pa lhneetshamjayash pa Jesús
1 Ja vatjutsa' lhnalhu lha semana, lhech t'aplhuqu'e ti vachiyôfey lhja María Magdalena ja nivalhech, jôjjeclay tulh'in; yi'van ti tay'e lhja utej lhja vatp'otajeshey ja nivalhech. 2 Pa lhechesh pa yichey ti vacumajey jan yie' ja Simón Pedro shi' jaelh vat'eyjatsjanach, jô lhech ya'shesh ti yen ja Jesús, yit'esh ti yiyôjia: —Chiyayjach'e ja lhanvalheech ja Lhcaanvacle, nishtantô'ya nôqueesh pa chiyan'e'. 3 Pa lhechesh pa yichey yitsha ja Pedro shi' jaelh vat'eyjatsjanach ja nivalhech. 4 Vacumajeyvatich'e ts'ivee; vooy jaelh pôtsej lhavaatsha t'ôn'e ja Pedro, lhech jôque vatjutsa' ti yamey. 5 Vanu'janejop pa yovalhch'e tasham ja nivalhech pa yivaneyshi java sivôclôclhayjey, taj ti ninameyshi. 6 Pa nijooylheey yitsha ja Simón Pedro ti yamey, pa yich'ôcji lhavaatsha ja nivalhech. Yi'van yitsha java sivôclôclhayjey ti lhech ti chiyan'e'; 7 Jô'tajesh ti yi'van shta ja vatac'ôcleesh ja chiyclôpjalheshch'e lhshatech ja Jesús, lhech jô lhech nive'lha nôvelh'e jav'elh sivôclôclhayjey, vena ja yie' yitsha chiyclôpjalhsham. 8 Pa lhechesh pa yameyshi shta jaelh vat'eyjatsjanach, jô lhech vatjutsa' ti yamey ja nivalhech; pa yi'van pava vaclan, pa ninatcacujanesh. 9 Lhayaash ti jôjjeclay nintôyc'oya nava Vani'sesh'e ti yit'esha ja Jesús ti netshaam jayu ca nivaftaj. 10 Pa lhechesh pa vapecley ts'ivee ja lhajpôyich.
Pa Jesús tanôclitem lhpa María Magdalena
11 Lhan'e lhja María yie' lhavôôj ja nivalhech, pa yip'in. Mônlheesh ti yip'in pa vônc'ôtsilhjatjop ja nivalhech ti yovalhch'e tasham, 12 pa yivaneyshi papi napu' ángeles, climsha'ne pava t'uyjatshiyis. Papi lhech yiech'esha'ne pan chiyantaj'e ja Jesús pa lhavu'vat. Ve'lha pa yie'sha'ne jan tavayshi ja lhshatech, paelh yie'sha'ne ja tajulh'e java lhafoc. 13 Pa niyôs ts'ivee papi ángeles pa yit'esh: —Ôcjeclô, ¿ta lhayaash ti lhap'in? Pa yicuulh lhavaatsha pa yit'esh: —Lhayaash ti chiychaaj ja Yinvacle, ey ca nôstô'ya pa chiyan'e'. 14 Tifeshch'e atesha cavôque ti yit'esh, meelh ti tatvaych'aclaj pa yivantaj ja Jesús, taj ti ninantôfa'clesh. 15 Pa lhechesh pa niyôsesh ja Jesús pa yit'esh: —Ôcjeclô, ¿ta lhayaash ti lhap'in? ¿She papuque lhavooysha'ne? Vooy lhavaatsha yilheclôjtajesh ca lhech pa vatcôvjiyanjat lhavo', pa yit'esh: —Lhcaanvacle, ca alhechtaja ca achaaj jô lhech, pa anfacyam pa lhan'e' ca jachaaj yiin. 16 Pa yit'esh ja Jesús ti yiyôjia: —¡María! Pa tatvaych'aclajjulh tatsha pa yishi'jop ca hebreo lhcliish ti yit'esh: —¡Raboni! (Côque yich'e': “Vanqu'eyjatsjan”). 17 Pa yit'esha ja Jesús ti yiyôjia: Ya aj ca anajay'yi, lhayaash ti jôjjeclay niycheychisham jan yie' ja Tata. Taj ti mapec nôqueesh pa anfacleem japi yich'injavot, ti jôqueychisham jayu ja Tata jan Atataeshelh yitsha, jan yi Diosesh jan a Diosshelh yitsha. 18 Pa lhechesh pa yayjateshey lhja María Magdalena japi t'eyjatsjanjas ti yi'van lhavaatsha ja Lhcaanvacle shi' ti yit'esha cava lhech ya'clishay.
Pa Jesús tanôclitem papi t'eyjatsjanjas
19 Lhechsham jô lhech vatjutsa' lhnalhu lhja semana ti tulhey pa yiôcji japi t'eyjatsjanjas ja jpôyich, yip'oey ts'ivee java lhashic, lhayaash ti nijovayjulh japi judíos. Pa lhech t'aplhuqu'e ti yameyshi ja Jesús yi'shi' lhcachivat ts'ivee pa yicjuesh ti yit'esh: —Acaatjatelh pa acanoyashelh. 20 Meelh ti tifeshch'e pava yit'esha, pa nôclitem java lhpôcôtôy shi' ja chiytsefesh'esham ja lhavlhi'. Pa uj ti nishamesh japi t'eyjatsjanjas ti yi'van ja Lhcaanvacle. 21 Pa yit'esha shta ja Jesús: —Acaatjatelh pa acanoyashelh. Jan lhjunashyish ja Tata ti tsichennee, lhech yijunasheelh'ash ca c'achentajelh vitsha. 22 Lhechesh pa yifuyuesh'apee japi lhech pa yit'esh: —Chiyjutelh'am nôqueesh ja Espíritu Santo. 23 Ca avômjatajelhemch'e papu pa lhsasch'e pa yijô' ti chiyvômjatemch'e; jô pa ca niavômjatajeelhemch'e pa lhsasch'e papu, pa tanca nivô'memch'e.
Yi'van pa Tomás pa Lhcaanvacle ti netshaam
24 Taj ti ve'lha ja t'eyjatsjanach, lhey Tomás, lhanquey shta Napu'ji, lhech jô lhech ampa ti nam ja Jesús. 25 Pa vooy jap'elh t'eyjatsjanjas nifaclem ti yit'esh: —Apis ti javanelh ja Lhcaanvacle. Taj ti yit'esh ja Tomás ti yicuulh: —Ca niyvantajeesh java chiyuyjat'esham java clavos java lhpôcôtôy, ca niyajaytajaa, ca niyajaytajaa shta ja chiytsefesh'esham ja lhavlhi', pa tanca yu'janesh. 26 Vooy ti nôjeshch'e java pu'janayama nalhus pa tay'eva'ne shta japi t'eyjatsjanjas ja jpôyich. Lhecheshch'e ti yieyshi shta ja Tomás. Lha'ma t'untajey java lhashic, ti yalhatajesh ti yi'shi' lhcachivat japi t'eyjatsjanjas ja Jesús, pa yit'esh ti yicju': —Acaatjatelh pa acanoyashelh. 27 Lhech t'aplhuqu'e ti yit'esha ja Tomás: —Ajaya ca aclôvalh nava yipôcôtôy; pa ajayesh'apee na apô'côt na yivlhi'. Pa ya aj ca acacujanesh t'ôyish'e, pa ujanesh jô. 28 Pa lhechesh pa yicuulh ja Tomás pa yit'esh: —¡Na Yinvacle na yi Dios shta! 29 Pa yit'esh ja Jesús ti yicuulh: —Tomás, nôqueesh naacacujanyish, lhayaash ti lhasvan. Nishamesh apee papi ninatvanchay ca ninatcacujantaja.
Pa t'ajuya nôque vatqu'isjayanach
30 Aclojtaj jav'elh yivclanjat ja Jesús nimatasa papu ca nitô'yish java yivanjayinesh japi t'eyjatsjanjas, javan nichini'sesh'e nôque vatqu'isjayanach. 31 Taj ti navan chiyisshelh'eam, atôôlhshelha ca ujaneshelh ja Jesús ti Cristo, Lhaôs ja Dios, jôcl'esh ca ôyjôlhôyech'eesh papu pa lhamônlhajayash ca ninatcacujantajeesh.
Pa Jesús tanôclitem papi siete t'eyjatsjanjas
1 Nôjeshch'e shta côque pa vooy ti yiey ja lhjôvcha lhey Tiberias, pa tanôclitem shta ja Jesús japi t'eyjatsjanjas. Nôque lhfanishesh: 2 Ve'lha yielh'e ja Simón Pedro, ja Tomás, lhanquey shta Napu'ji, shi' ja Natanael, tôlhey yitsha ja Caná yiey ja Galilea, japi lhcles ja Zebedeo shi' jap'elh napu' t'eyjatsjanjas. 3 Yit'esh ja Simón Pedro ti yiyôjia: —Javooy jayu pava sajech. Pa yit'esh ts'ivee jap'elh: —Javoelh'ach'e jayu vitsha. Pa yich'in ts'ivee pa yamey lhja lhôvjatshi pa yi'shi', taj ti tifesh atesha jô lhech tulh ti ampa ca nicôjôyesh ts'ivee. 4 Meelh ti yujeey ca nalhua pa vatsavat'e ja Jesús ja lhavôj'e ja lhjôvcha; taj ti ninantôfa'cley japi t'eyjatsjanjas ja Jesús. 5 Pa lhechesh pa yit'esh ti yiyôjia: —Yicles, ¿ampa ca nacôjôyeshelh? Yicuulh ts'ivee pa yit'esh: —Ampa. 6 Pa lhechesh pa yit'esh ja Jesús ti yiyôjia: —Uelhey afayishelh; pa sasjop ca nantojoneshfach'ee lhja s'chaat, lhayaash ti acloj pava sajech. 7 Pa lhechesh pa yit'esh ja t'eyjatsjanach, jan ya'shesh ti yen ja Jesús, pa yiyôjia ja Pedro: —¡Lhech na Lhcaanvacle! Meelh ti tpeeycheyesh ja Simón Pedro ti lhech ja Lhcaanvacle, pa yuych'e neshi lhja t'uyjatshiy (eem ti tatclantajshi), pa yitshaam ja yinôôt. 8 Vooy jap'elh t'eyjatsjanjas yamesh'ôcji lhavôôj lhja lhôvjatshi, nitojonesh ts'ivee lhja s'chaat pava sajech, cien metros pa t'aplhueshem'ôcji lhavôôj. 9 Meelh ti tayshi ts'ivee lhja lhôvjatshi, pa yi'van ts'ivee ja itôj vantsemajeshjop ja sajech, chiyanjop shta lhja yucuve. 10 Pa yit'esh ja Jesús ti yiyôjia: —Anchajeelh shta nava lhneelhfach'ee sajech. 11 Ja Simón Pedro yi'shi' shta lhja lhôvjatshi pa yitojonesh'ôcji lhavôôj lhja s'chaat, tapooj pava sajech lhanôc, ciento cincuenta y tres pava sajech; lha'ma aclojtajshi ti ninc'aseshch'e lhja s'chaat. 12 Pa yit'esh ja Jesús ti yiyôjia: —Ata'lhunelh ca atsaccunelhch'e cum. Taj nive'lhaa japi t'eyjatsjanjas ninteesh ca niyôsesh pa lhey jôqueey, eem ti apis ti yitô'ya ts'ivee ti lhech ja Lhcaanvacle. 13 Vooy ti yivaclhitlhavach ts'ivee, pa yichey ja Jesús, pa t'acum'e lhja yucuve pa yijutch'e japi lhech, pa lhetlha lhfanishesh shta pa sajech. 14 Nôqueesh lha pa pu'janaesh ti tanôclitem ja Jesús japi t'eyjatsjanjas jan t'aplhuqu'e ti netshaam shta.
Pa Jesús tasinô'yelh pa Simón Pedro
15 Meelh ti yivaclhitesh ti tsaccunch'e, pa yiyôjia ja Jesús ja Simón Pedro: —Simón, Jonás lhaôs, ¿ya'shesh t'e ti lhtsen a'lheesh napuque? Yicuulh ja Pedro pa yit'esh: —Jech, Lhcaanvacle, natô'ya ti qu'en. Yit'esh ja Jesús: Acunjanyam t'em nava yiclôy tashinshtas lhcles. 16 Yachajemeyc'oya shta ti niyôs: —Simón, Jonás lhaôs, ¿lhtsen? Yicuulh ja Pedro ti yit'esh: —Jech, Lhcaanvacle, natô'ya ti qu'en. Yit'esh ti yiyôjia: —Aclôvalhyam nava yiclôy tashinshtas. 17 Pu'janaesh nôqueesh ti niyôs ti yit'esh: —Simón, Jonás lhaôs, ¿lhtsen? Nôqueesh yitacshin'in ja Pedro, lhayaash ti pu'janaesh ti niyôsesh ca nen; yit'esh ti yicuulh: —Lhcaanvacle, avaatsha natô'ya lhacôm'a. Natô'ya shta ti qu'en. Yit'esh ja Jesús: —Acunjanyam nava yiclôy tashinshtas. 18 Yijô' ti jayeesh'a, lhapesh ti jôjjeclay anich'ayech, pa lhnijôtjat jum pa ti lhetônshi; taj ti vooy ca niataôvclajtajaa, pa lht'ajayeshchisham jayu java atjuy pa vooy pap'elh nijôtjat jayu, pa natojoneshey pan yiey pa nietôntajshi. 19 Meelh ti yit'esh ja Jesús côque ti nifaclem pa lhavafi jayu ja Pedro. Ca nôque lhfanisheesh shta ca nôclôjtajey ja Dios. Pa lhechesh pa yit'esh ti yiyôjia: —¡Anjoyich'esha'ne!
Pa lhnenach vat'eyjatsjanach
20 Meelh ti tatvaych'aclaj ja Pedro pa yivanjulh ti yijoqu'esha'ne ja vat'eyjatsjanach jan ya'shesh ti yen ja Jesús, jô lhech ve'lha yielh'e ja Jesús ti tsaccunch'e, jôlhechesh ti niyôsesh ti yit'esh: “Lhcaanvacle, ¿she papuque vanc'oyanjan'ay jayu?” 21 Meelh ti yivanjulh ja Pedro pa yit'esh ti niyôsesh ja Jesús: —Lhcaanvacle, ¿ta t'e lhjunash jayu nôque nivacle? 22 Yicuulh ja Jesús pa yit'esh: —Ca yit'esh lhôn ca mônlhaa nôque pa namtaja ca jatpectaj, ¿pa ta t'e lhjunash'am avaatsha? Vooy avaatsha atatvoyich'e. 23 Pa lhechesh pa yamey lhac'o' papi lhavelhavot ti yaya'sha ti tanca nivaf jayu jô lhech vat'eyjatsjanach. Taj ni lhech t'ônashaesh ja Jesús ca ninvafa jayu pa cat'elheesh, ca tin'e: “Pa yit'esha lhôn ca mônlhaa nôque pa namtaja ca jatpectaj, ¿pa ta t'e lhjunash'am avaatsha?” 24 Lhech côque vat'eyjatsjanach yisnatesh nôque vatqu'isjayanach, yasinôqui cavôque matas. Shtantô'ya shta ti yijô' nava yit'esh. 25 Caajtaj jav'elh matas ti yisnatesh ja Jesús, ca chinisesh'e ts'ivee lhôn lhacôm'a cavôque, pa tan t'e ca nifajulhtaj napi yiey na cotsjaat pava vatqu'isjayanjas. Amén.