Juan 1

Jeso'me lenaxat l'aqtac ñi' Dios, jeso'me taỹá'a da' siỹaxaua

1 Joca'li ỹímta qoỹí'et ỹima jen' chaqáina, chi'ena da' 'uo so' lenaxat l'aqtac ñi' Dios. Qana'chi jeso'me lenaxat l'aqtac ñi' Dios, jeso'me huet'aguet ñi' Dios, qataxa jeso'me naqaiso so' qan'étoqo't. 2 Joca'li maliaxa qaỹa jen' chaqáina, jeso'me chi'ena da' huet'aguet ñi' Dios. 3 Joca'li ñi' qan'étoqo't ỹímta ỹ'étetaquéna, qana'chi ỹachiỹoxochíchiỹi jeso'me ỹima jen'me l'onatacpi; ỹima jen'me 'uo qaỹa ga' sa chiỹaqaỹi jeso'me. 4 Na'chiso jeso'me 'me chiỹaqaỹi da' nec'alaxa, qana'chi naqaida nec'alaxa na'chida da' ỹ'oqotelégue qa'en na' siỹaxadipi. 5 Jeda'me ỹ'oqóchiiñi, naqaida 'me ỹicoỹadóoue na' n'álaxa, qataxa na' n'álaxa sa ỹañoxot da' ỹalamat. 6 'Uo so' siỹaxaua 'me lamaxasec ñi' Dios, jeso'me lenaxat Juan. 7 Jeso'me janac, qaidi ỹ'axat dójo' ỹ'oqóchiiñi, qaidi ỹima na' siỹaxadipi d'amaqtenataxan, chiỹoqóchiỹi da' l'aqtaxanaxac jeso'me. 8 Jeso' Juan sa na'chiso jeso'me ỹ'oqóchiiñi, qá'a jeso'me qonamaq, qaidi ỹ'axat dójo' ỹ'oqóchiiñi. 9 Jeso'me ỹátaqta 'eesa da' ỹ'oqóchiiñi 'me ỹicoỹadelégue ỹima na' siỹaxadipi, jeso'me ma'le nadíit'a da' nivíta jen' 'aléua. 10 Jeso'me lenaxat l'aqtac ñi' Dios, jeso'me huetalégue jen' 'aléua. Qana'chi, temaqaidi ñi' Dios ỹachiỹoxotaỹi jeso'me joca'li ỹí'et jen' 'aléua, qaláxasa jen'me huetalégue jen' 'aléua sa ỹaateton. 11 Jeso'me naỹa jen' mai'chi lalémaxaset l'acháqa', qaláxasa na' mai'chi lalémaxasetpi laỹi sa ỹaconguet. 12 Qaláxasa taqadíta 'uo na' ỹaconguet qataxa ỹ'amaqten jeso'me, qana'chi na'chína ỹanem da' ỹátaqchiiñi lec'oqtepi ñi' Dios. 13 Jen'me sa 'ená'am da' lañoxoc na' lec'oqtepi na' ỹ'oqóchiỹi siỹaxadipi, 'me da' niỹíñi, qaláxasa chiỹoqóchiỹi da' loqopichidíỹaxac 'uootaxa da' leenataxac jen'me siỹaxadipi, qá'a jen'me ỹátaqta lec'oqtepi ñi' Dios. 14 Jeso'me lenaxat l'aqtac ñi' Dios, jeso'me taỹá'a da' lasoxoc na' ỹ'oqóchiỹi siỹaxaua, qana'chi jeso'me qo'mi huetaavlo, qaláxasa ỹátaqta saqáchiỹi da' lauo'chi qataxa jeda'me 'eesa lasoxoc. Qo'mi sauanáqchiỹi da' li'ỹoxodic, jeda'me ni'ỹoxodic 'me mai'chi lalémaxaset li'ỹoxodic jeso'me 'oonolec lec'óxot ñi' qadet'a Dios. 15 Qana'chi so' Juan ỹ'axátetac joca'li jeso'me, 'enaaco': —Naqaida da' s'axátet'aguet ca'li seet'oi: “'Uo qomle ga' jaỹim nec'atetalégue, qaláxasa jega'me jaỹim nec'atetalégue, jega'me jaỹim napacalégue, qá'a chi'ena da' 'uo jocalia'cho' maliaxa jaỹim qaỹa.” 16 Ỹima da' qo'mi saconaxaguet da'me 'chi huáñi lesaliaxa, da'me lichoxodénataxanaxac 'me naquétetalégue da' qo'mi ỹanema. 17 Na' naqátaxacpi joca'li qoỹan, qaláxasa chiỹoqóchiỹi qoỹin so' Moisés; qaamaxa da' nauotaxadic qataxa da'me 'eesa lasoxoc, jedaa'me chiỹoqóchidiỹi so' Jesucristo. 18 Ñi' Dios qaỹa ga' ỹiloỹi, qaláxasa jeso'me 'oonolec lec'óxot 'me ỹátaqta net'asop jiñi'me, jeso'me naqaiso so' qo'mi ỹaatetonaxanaxanque ñi' qadet'a.

So' Juan 'me chiláxanataxanaxaic ỹ'axátet'aguet so' Jesucristo

19 Na' judiopi 'me l'acháqa' di' Jerusalén ỹamaq na' netaxaỹáxanaxanecpi da' qodetaxaỹapégue' ñi' Dios qataxa jen'me Leví lec'oqtepi 'me lecochaxau'pi jen'me da' denataxana so' Juan da' jái'chogamaxa jeso'me. 20 Qana'chi jeso'me ỹátaqta nichoxotetela't, 'enaaco': —Jaỹim sa na'chaỹim ga' qoỹ'axátet'aguet net'a nec'alaxaqui. 21 Qana'chi ỹitaxa qov'iỹílaxalégue da' qoỹinat, qoỹinaaco': —¿Jái'chi 'amóna? ¿Séetapega na'chi'am so' n'aqtáxanaxanec Elías 'me ỹiuen da' ỹitaxa naỹa'quéna? Qana'chi so' Juan 'enaaco': —'Axai', sa jaỹim Elías. Qana'chi ỹitaxa qov'iỹílaxalégue da' qoỹinat, qoỹinaaco': —¿Séetapega na'chi'am jega'me n'aqtáxanaxanec 'me qoỹ'axátet'aguet da' naỹa'quéna? Qana'chi jeso'me ỹ'at, 'enaaco': —'Ai', sa naqaỹim. 22 Qana'chi qoỹinapego', qoỹinaaco': —¿Jái'chi 'amóna? Qá'a qo'mi sétaaque da' 'uo ga' qadí'ỹac 'ad'aqtac da' sedáxa jidi'me qo'mi nama'. ¡Ỹa qo'mi 'au'aqtaxanema toqo' jái'chogamaxa 'onéta! 23 Qana'chi so' Juan 'enaaco': —Qaa'le na'chaỹim 'me jaỹim sachimqatapeelégue di' totelégue 'aléua. Da' ỹiỹáxanaxac seet'oi: “Ỹa 'auqátaxañiita't qomle ga' ỹátaqta chimaqáteegue ladic ñi' qadesaliaxanec” —qá'a jeda'me na'chida da' 'enaac joca'li so' l'aqtáxanaxanec ñi' Dios lenaxat Isaías. 24 Jeso' ỹinatétac so' Juan, jeso'me lamaxa'spi na' fariseopi. 25 Qana'chi jeso'me ỹinatétac so' Juan, 'enaaco': —Qaa'le ¿jái'chi 'amóna da' 'auachiláxanataxan, da' sa na'chi'am jega'me net'a nec'alaxaqui, qataxa sa na'chi'am so' Elías, 'uootaxa ga'me n'aqtáxanaxanec 'me qoỹíitapega naỹa'quéna? 26 Qana'chi so' Juan 'enaaco': —Jaỹim sachiláxanataxana na' noxop. Qaláxasa da' 'oñíita 'uo jeda'me 'ami huetaavlo 'me sa 'auaatetoñii. 27 Jeda'me jaỹim nec'atetalégue, temaqaidi jeda'me chi'ena da' 'uo joca'li maliaxa jaỹim qaỹa. Sa saiỹet da' ñaqa't naua' lapela'te leque'te. 28 Ỹima dójo' huá'ña di' 'aléua lenaxat Betábara 'me p'aiỹi da' liiséguem jaso' c'atena di' ñáchi Jordán, di'me huá'ña joca'li dachiláxanataxáatac so' Juan.

So' Jesús na'chiso so' n'aanaxate lec'óxot 'me chiỹoqo'ot ñi' Dios

29 So' nolo' laqáỹa, qana'chi so' Juan ỹila'aguet so' Jesús da' taỹaxaso'ma jeso'me, qana'chi jeso'me 'enaaco': —Ỹa 'auloi'ỹaguet, jena' cha'aguet na' sega'me n'aanaxate lec'óxot 'me chiỹoqo'ot ñi' Dios, jena'me deuootáxanec qomle ỹima jen' jaloicpi na' siỹaxadipi huetalégue jen' 'aléua. 30 Jaỹim s'axátetac jen'me joca'li seet'oi: “'Uo na' jaỹim nec'atetalégue, jena'me chi'ena 'uo jocalia'cho' maliaxa jaỹim qaỹa, qá'a jena'me na'chi 'eeta't da' 'uo.” 31 Jaỹim sa saateton ca'li jena'me. Qaláxasa jaỹim sequet'ot da' sachiláxanataxáatapega na' noxop, qaidi jena'me lec'oqtepi so' Israel ỹaateton jena'me. 32 Nataq'en so' Juan 'enaaco': —Jaỹim sauaat'eguet so' Espíritu Santo da' chiỹoqot'ot di' piỹem, 'ená'am jen' doqoto', qana'chi natelégue jeso'me. 33 Jaỹim maliaxa sona'li saateton jái'chogamaxa siỹaxaua. Qaláxasa ñi' jaỹim namaq da' sétaaque sachiláxanataxana na' noxop, jiñi'me jaỹim 'enapéga ca'li 'enaaco': “Qomle 'am 'auauáachiỹi so' Espíritu Santo da' 'uootaxa janac da' nalégue ga' siỹaxaua, qana'chi jega'me siỹaxaua, na'chiga qomle ga' dachiláxanataxana so' Espíritu Santo.” 34 Jaỹim ma'le sauáachiỹi naỹi jeso'me, tadeeto' s'axátetac jeso'me na'chiso so' lec'óxot ñi' Dios.

Jesaa'me 'uáichidiñi lapaxaguenataqa so' Jesús

35 So' nolo' laqáỹa, qana'chi so' Juan ỹitaxa huét'a di' 'aléua, qataxa saua' dos nauégaxa'u. 36 Joca'li ỹila'ague so' Jesús, qana'chi 'enaaco': —Ỹa 'auloi'ỹague, jeso' cha'ague, jeso'me n'aanaxate lec'óxot 'me chiỹoqo'ot ñi' Dios. 37 Qana'chi saua' dos nauégaxa'u so' Juan joca'li demachíta dójo', qana'chi quetegue so' Jesús. 38 Qana'chi so' Jesús joca'li neselcaaco', qana'chi ỹila'agueta jesaa'me da' nec'atetralégue, qana'chi ỹinatet'apo', 'enaaco': —¿Jái'chi ga'me 'anmichíitaaque? Qana'chi jesaa'me 'enapega'to': —'Am 'me 'am paxaguenataxanaxaic, ¿jái'chi ga' hua'ague ga' 'onéta'ña? 39 Qana'chi so' Jesús 'enaaco': —'Aỹaláỹi, ỹa 'auc'atenaxañíiỹa. Qana'chi jesaa'me jéque' da' dec'atenaxata, qana'chi ỹamaxatec ga' néta'ña jeso'me. Qana'chi huetr'asop jeso'me so' jávit, qá'a sóxote ỹauaqáñi jaso' c'atena. 40 So' 'oonolec saua' demachítapegalo joca'li so' Juan, qana'chi ỹic'átai'ilo so' Jesús, jeso'me na'chiso so' Andrés, 'me lanogaxaua so' Simón Pedro. 41 Qana'chi so' Andrés joca'li ỹátaqta ỹ'áuaxaachiiñi da' ỹic'áta so' lanogaxaua Simón, qana'chi 'enapego', 'enaac: —Qo'mi ñauanáxai' jiñi'me qoỹíitapega Mesías —dójo' nenaxat náỹi da' Cristo, net'a nec'alaxaqui. 42 Ỹim, qana'chi so' Andrés ỹauec so' Simón da' ỹauéga ga' néta'ña so' Jesús. Qana'chi so' Jesús joca'li ỹila'aguet jeso'me, qana'chi 'enapego', 'enaac: —'Am Simón, 'me 'am lec'óxot so' Jonás, naỹi 'am qoỹatámatec da' nenaxat Cefas —dójo' nenaxat náỹi da' Pedro, qa'.

So' Jesús ỹiỹáxana so' Felipe qataxa so' Natanael

43 So' nolo' laqáỹa, qana'chi so' Jesús sétaaque da' taiỹi di' 'aléua Galilea. Qana'chi natée'sa so' Felipe, qana'chi 'enapéga, 'enaac: —Jaỹim 'oquegue qomle. 44 Qana'chi so' Felipe, jeso'me mai'chi l'acháqa' di' noic Betsaida, 'me nataq'en l'acháqa't saua' Andrés qataxa so' Pedro. 45 Qana'chi so' Felipe jec da' nimitáaque so' Natanael. Qana'chi d'aqtaxanem, 'enaac: —Qo'mi sóxote ñauanáxai' jiñi'me siỹaxaua 'me ỹidíñi josii'cho' so' Moisés naua' laqátaxaco jena'me nedetralégue jan' lede. Jiñi'me nataq'en ỹidíñi josii'chi so' l'aqtáxanaxanecpi ñi' Dios. Jiñi'me na'chiñi ñi' Jesús, 'me lec'óxot so' José 'me l'acháqa' di' noic Nazaret. 46 Qana'chi so' Natanael 'enaaco': —¿Séetapega ỹisétodamaxa 'uo ga' 'ónaxaic da' lasoxoc da' chiỹoqóchii'ña di' Nazaret? Qana'chi so' Felipe 'enaaco': —'Aỹala, ỹa 'auc'aten jiñi'me. 47 Qana'chi so' Jesús joca'li ỹila'aguet so' Natanael da' naỹá'uo, qana'chi 'enapéga, 'enaac: —Jenójo' na' ỹátaqta 'eesa da' lec'óxot so' Israel, jena'me sa qovínaxanaxaic. 48 Qana'chi jeso' Natanael denataxan, 'eet'oỹo': —¿Hua'ague joca'li da' jaỹim 'auaateton? Qana'chi so' Jesús 'enaaco': —Jaỹim 'am selótapega ca'li maliaxa sa 'am ỹiỹáxana da' Felipe, cana'le 'ouet'ot jada' higo lichidic. 49 Qana'chi jeso' Natanael 'enaaco': —'Am 'me 'am paxaguenataxanaxaic, na'chi'am lec'óxot ñi' Dios, qataxa na'chi'am let'a na' Israel lec'oqtepi. 50 Qana'chi so' Jesús 'enaaco': —¿Séetapega jaỹim 'au'amaqten, ỹasouaxat da' senaac da' 'am selótapega ca'li 'ouet'ot jada' higo lichidic? Qaláxasa naỹi 'am senapéga da' ỹátaqta let'ádaic qomle ga' 'adeuoqtaxanaxac, sa 'ená'am dójo'. 51 So' Jesús nataq'en 'enaaco': —Ỹátaqta 'eesa dójo' 'ami s'axatema naỹi, 'ami 'aulói'ỹa qomle na' piỹem qomle n'ouáteegue, qana'chi na' namaxasec piỹem lé'ecpi taỹasee'mequeda, qataxa naỹá'ña jen'me siỹaxaua lec'óxot.

Juan 2

So' n'onáxac 'me huá'ña di' Caná 'me huá'ña di' Galilea

1 Joca'li ma'le ỹinoxodéegue saua' tres noloqo'te, qana'chi 'uo so' n'onáxac huá'ña di' noic Caná 'me huétaaue di' 'aléua Galilea. Jaso' lat'e so' Jesús na'chi huét'a jidi'me. 2 Qana'chi so' Jesús qataxa saua' lapaxaguenataqa, jesaa'me nataq'en qoỹip'iỹenalo da' qaidi huétraaue jeso'me n'onáxac. 3 Joca'li ỹiméta so' latáxa, qana'chi jaso'me lat'e so' Jesús 'enapego' jeso'me, 'enaac: —Sóxote ỹiméta so' latáxa. 4 Qana'chi so' Jesús 'enapego' jaso'me, 'enaaco': —'Am ỹauo, ¿tóoqo'chi 'onét'ec dójo' da' jaỹim 'auenapéga? Qá'a jaỹim sonaliaxa da' ỹivíta di' ỹalóqo'. 5 Qaláxasa jaso'me 'enapéga jeso'me neuálaxaitapegue'pi, 'enaac: —'Av'íchii qomle ỹima ga'me 'enapéga jeda'me. 6 Huo'oi saua' seis jáco'nal qa' 'me lai't naale na' noxop 'me liỹóxonaxat na' judiopi da' ỹí'et da' mai'chi n'onataguec da' ỹiỹo na' niqui'ỹáxaquipi. Jañi' 'oonole jesaa'me jáco'nal, jen' lé'ec ỹóvi' ochenta litros na' noxop, 'uootaxa cien. 7 Qana'chi so' Jesús 'enapego' jeso' neuálaxaitacpi, 'enaac: —'Amichiiỹilo qomle na' noxop ñaua' jáco'nal. Qana'chi qoỹimichiilo jesaa'me, ỹátaqta saqachiilo qoỹi'n. 8 Qana'chi so' Jesús ỹitaxa 'enapegalo jesaa'me, 'enaac: —Naỹi qataxa 'uo qomle ga' 'anaqchiiséguem na' noxop. Ỹim, qana'chi 'auedói'uo jiñi'me ỹilot'ague jena'me n'onáxac. Qana'chi qoỹí'et da'me 'enaac jeso'me. 9 Qana'chi jeso' ỹilotalégue so' n'onáxac joca'li ỹapiỹen jeso'me noxop 'me taỹá'a na' latáxa, 'me sa ỹaỹáten ga' chiỹaqaỹi, na'chisóta so'me neuálaxaitacpi 'me ỹaỹáten, qá'a jeso'me naqadiséguem ca'li jeso'me noxop. Qana'chi jeso'me ỹilot'ague so' n'onáxac ỹiỹáxana so' sétaaque da' huó'on. 10 Qana'chi 'enapéga, 'enaac: —Ỹima na' siỹaxadipi ỹ'áuaxaachiiñi naale da' niỹómaxanỹi na' nó'in latáxa na' namaxasóxoicpi; da' naale qaỹa'ague da' niỹómaxac, qana'chi ỹitaxa qonỹómaxanỹi na' latáxa 'me sa 'eesa'me n'óosa. Qaláxasa 'am 'chi ỹivíde'ta naỹi da' ỹa 'aviỹamaxatétac na' 'ónaxaic latáxa. 11 Dójo' ỹí'et so' Jesús huá'ña jidi' noic Caná 'me huáaue di' 'aléua Galilea. Jeda'me na'chida da' 'uáichiiñi na'me ỹí'etpi n'anec 'me sa qoỹauanápiỹi joca'li ỹaloxon da' li'ỹoxodic. Qana'chi so' lapaxaguenatacpi ỹátaqta ỹ'amaqten jeso'me. 12 Joca'li ỹim dójo', qana'chi jeso'me taỹa di' noic lenaxat Capernaum, liquiáxaua jaso' lat'e, nataq'en saua' laqáỹa', qataxa saua' lapaxaguenataqa. Qana'chi ỹátaqta huo'oi saua' noloqo'te da' huét'a jidi'me.

So' Jesús d'otaxaalégue jeso' tamnaxaqui

13 Joca'li ma'le sa qaỹáaque so' lalóqo' so' judiopi hueenata so' nolo' joca'li cá'ai qoỹin di' Egipto, qana'chi so' Jesús ỹic'áte'uo di' noic let'ádaic Jerusalén. 14 Joca'li ỹivíde'uo jeso' tamnaxaqui let'ádaic, qana'chi ỹilalégue so' ỹiméetac so' huacapi qataxa jaso' n'aanaxate, qataxa so' doqoto'. Nataq'en ỹilalégue na' ñíchiiñi, dasotalégue na' lemenaxanaxala' da' nemena't qa'en jana' naicaua na' siỹaxadipi. 15 Joca'li ỹilalégue jen'me, qana'chi so' Jesús ỹacona so' ñic da' ỹa'uo lalaqáinaxanaxat. Qana'chi ỹ'odéegue ỹima so' menaxaicpi, cápegue' qa'en jana' lemena n'aanaxatepi qataxa na' huacapi. Qataxa ỹicodéegue jan' naicaua na' nemena't qa'en jana' naicaua so' siỹaxadipi, qataxa ỹamaxañi na' nemenaxanaxala'pi. 16 Qana'chi 'enapego' na' ỹiméetac so' doqoto'pi, 'enaaco': —¡'Anaqachiỹíiỹi qomle ỹima jena'me! ¡Sa 'te da' 'av'íchiic na' l'emec ñi' ỹit'a da' 'aviñii menaxaqui! 17 Qana'chi saua' lapaxaguenataqa hueenatalo saua' nidii's l'aqtaqa ñi' Dios, 'me 'eet'oi: “Ỹátaqta sega'me savic da' séeta let'ádaic na' 'ad'emec.” 18 Qana'chi na' judiopi ỹinatétac so'me, 'enaac: —¿Jái'chogamaxa n'anec da' qo'mi 'aualoxonalo, da' qaidi ỹañoxot da' 'am s'amaqténaq da' ỹátaqta 'eesa 'uo ga' qonec da' 'aué'et dójo'? 19 Qana'chi so' Jesús 'enaaco': —Qomle qonoláxachiñi jena' tamnaxaqui, qana'chi jaỹim ỹitaxa ñ'oxoséguem qomle; tres noloqo'te, qana'chi ỹitaxa semat. 20 Qana'chi na' judiopi 'enaaco': —Ỹovi't naua' cuarenta y seis 'uóidi da' qon'oxóotapiiseguem jenójo' tamnaxaqui, qana'chi qoỹimat. ¿Qalqaiga 'onapéga dii' tres noloqo'te, qana'chi 'aumat da' 'an'oxoséguem? 21 Qaláxasa jeso' tamnaxaqui 'me detaqátapega so' Jesús, na'chida da' mai'chi lalémaxaset ló'oquiaxac. 22 Chan'eesa so' Jesús joca'li ma'le nec'aliséguem, qana'chi saua' lapaxaguenataqa tachiilo lai'li dójo' l'aqtac jeso'me. Huá'a, qana'chi ỹátaqta ỹ'amaqte'n naua' nedétrañi l'aqtaqa ñi' Dios qataxa naua' l'aqtaqa jeso'me. So' Jesús ỹaateto'n naua' leenataxaco na' siỹaxadipi 23 So' Jesús joca'li huét'a di' Jerusalén da' huétaaue so' nolo' 'me huétooue da' qoueenata joca'li qodíc'ai di' Egipto, qana'chi ỹátaqta sa nalóta na' ỹ'amaqten jeso'me ỹasouaxat da' ỹauáatapiỹi na' ỹí'et n'anecpi 'me sa qoỹauanápiỹi. 24 Qaláxasa so' Jesús sa 'te da' ỹátaqta ỹiỹamaxaden jeso'me siỹaxadipi, qá'a ỹaỹáten da' leenataxac ỹima jeso'me. 25 Sa ỹiuen da' 'uootaxa 'uo ga' ỹ'axátem jeso'me da' lasoxoc na' siỹaxadipi, qá'a jeso'me mai'chi ỹaatetóotac na' leenataxacpi jen'me.

Juan 3

So' Jesús qataxa so' Nicodemo

1 'Uo so' siỹaxaua ỹalquétaaue na' fariseopi, lenaxat Nicodemo. Jeso'me lasoxola' na' judiopi. 2 Jeso'me Nicodemo 'uo so' pí'ỹaq, qana'chi jeso'me ỹic'áta so' Jesús da' 'enapéga, 'enaac: —'Am 'me 'am paxaguenataxanaxaic, qo'mi saỹátenaq da' 'am namaq ñi' Dios da' qo'mi 'auapaxague'n. Qá'a qaỹa ga' ỹaqanatet da' ỹí'et na' 'au'étetac n'anecpi 'me ỹaloxon da' 'ad'añaxac. Na'chigáta jega'me huet'aguet ñi' Dios. 3 Qana'chi so' Jesús 'enapéga jeso'me, 'enaac: —Já'a, ỹátaqta 'eesa dójo' 'am s'axátem, da' ga' siỹaxaua da' sa v'iỹílaxalégue da' ỹitaxa niỹíñi, qaa'le sa ỹañoxot da' ỹilá'a da' l'onataxanaxac ñi' Dios 'me ỹimata'a'téna. 4 Qana'chi jeso'me Nicodemo denataxan, 'enaaco': —¿Hua'ago' ga' 'éet'ec ga' siỹaxaua, da' 'uootaxa sóxote ỹ'axaic, da' ỹitaxa v'iỹílaxalégue da' niỹíñi? ¿Séetapega ỹañoxótodamaxa v'iỹílaxaaue na' lauel jaga' lat'e da' ỹitaxa niỹíñi? 5 Qana'chi so' Jesús 'enaaco': —Já'a, ỹátaqta 'eesa dójo' 'am s'axátem, jega'me sa 'te da' nañan da' qonachiláxan qataxa nañanot so' Espíritu Santo da' ỹadálaxat, qana'chi jega'me sa ỹaqanatet da' ỹinoxoneuó'o da' l'onataxanaxac ñi' Dios 'me ỹimata'a'téna. 6 Ga' chiỹoqóchiỹi da' lañoxoc ga' ỹ'oqóchiỹi siỹaxaua, jega'me ỹipaquíchiỹi da' 'chi siỹaxaua. Qaláxasa jega'me chiỹaqaỹi da' lañoxoc jeso' Espíritu Santo, jega'me ỹáatañi da' n'óiỹaxac 'me chiỹoqo'ot jeso'me. 7 'Ena't qomle da' 'am ỹipeláxat dójo' 'am s'axátetapeguem, da' ỹima na' siỹaxadipi ỹiuen da' táaue jeda'me dálaxaic nañoxoc. 8 Jen' laỹat da' ỹaseedíñi, qaa'le mai'chi ỹoiquíitac jega'me taiỹi. Qaláxasa 'am 'amachítapega da' lesamaxa, qaláxasa sa 'auañoxot da' 'auaỹáten jega'me chiỹoxogue qataxa jega'me taiỹi. Qana'chi 'éeta nataq'en ỹima na' chiỹoqo'ot da' lañoxoc so' Espíritu Santo. 9 Qana'chi jeso'me Nicodemo ỹitaxa v'iỹílaxalégue da' lenataxanaxac, 'enaaco': —¿Hua'ago' ga' 'éeta ga' lasoxoc dójo'? 10 Qana'chi so' Jesús 'enaaco': —'Am 'me 'auapaxaguéetac na' lec'oqtepi so' Israel, qalqaiga ¿tóoqo'chi sa 'auaỹáten dójo'? 11 Já'a, ỹátaqta 'eesa dójo' 'am s'axátem, da' qo'mi s'axátaqtac jega'me saỹátenaq qataxa ga'me sauanáqchiỹi, qaláxasa 'ami sa qo'mi 'au'amaqchíñii'. 12 Qá'a 'ami da' sa jaỹim 'au'amaqchíñii da' 'uootaxa 'ami s'axátetapeema jen'me huetalégue na' 'aléua, qana'chi ¿hua'ague toqo' da' jaỹim 'au'amaqchíñii da' 'ami s'axatema jega'me huet'ague da' piỹem? 13 Qaỹa 'te 'uo ga' taiỹi da' piỹem, na'chigáta jega'me chiỹoxogue da' piỹem, 'me na'chínata jen'me siỹaxaua lec'óxot 'me na'chi 'eeta't da' net'ague da' piỹem. 14 Qana'chi naqaida da' 'éeta joca'li jeso' Moisés da' ỹanaséguem so' l'onatac nanaic liquí'i joca'li huetalégue jeso'me totelégue 'aléua, qana'chida da' 'éet'ec nataq'en jen'me siỹaxaua lec'óxot jen'me ỹiuen da' qoỹanaséguem, 15 qaidi ỹima jen'me ỹ'amaqten jen'me, qana'chi sa ỹileu, na'chidáta da' 'uo jeda'me lec'alaxa 'me qaỹa 'te loiquiaqa'.

Jeda'me loqopi'chi ñi' Dios ỹima na' siỹaxadipi

16 Qá'a jiñi'me Dios ỹátaqta sa lec'óxotolec da' loqopi'chi na' siỹaxadipi, tadeno' ỹan jen'me 'oonolec lec'óxot, qaidi ỹima jen'me ỹ'amaqten jen'me, qana'chi sa ỹileu. Na'chidáta da' 'uo da'me lec'alaxa 'me qaỹa 'te loiquiaqa'. 17 Jiñi'me Dios sa namaxa jen' lec'óxot jen' 'aléua, qaidi ỹa'uo ga' ne'uaxánaguec jen'me siỹaxadipi. Na'chidáta da' naga da' nec'alaxatéegue jen'me siỹaxadipi. 18 Jega'me ỹ'amaqten jen'me lec'óxot ñi' Dios, qana'chi jega'me sa qoỹa'uo ga' ne'uaxánaguec. Qaláxasa jega'me sa ỹ'amaqten jen'me, qana'chi sóxote huetalégue da' 'uo da' ne'uaxánaguec qoỹin, ỹasouaxat da' sa ỹ'amaqten jen'me 'oonolec lec'óxot ñi' Dios. 19 Jega'me sa d'amaqtenataxan, qana'chiga ga' qoỹa'uo ga' ne'uaxánaguec. Qá'a joca'li janac jeso'me ỹ'oqóchiiñi da' naỹa jen' 'aléua, qaláxasa jega'me ỹágueegue da' loqopi'chi jen'me l'álaxa, qá'a jega'me ỹ'étetac jen'me sa nó'in. 20 Ỹima jega'me ỹ'étetac jen' sa nó'in, jega'me ỹátaqta liquiỹáxat jeso'me ỹ'oqóchiiñi, qataxa sa ỹic'áte'uo jeso'me, qá'a sétaaque da' sa ỹ'oqotelégue jen'me ỹ'étetac sa nó'in. 21 Qaláxasa jen'me natees'aguet da' lasoxoc jeda'me 'eesa lasoxoc, qana'chi jen'me ỹic'áte'uo jedójo' ỹ'oqóchiiñi, qaidi qoỹilá'a da' ỹima jen'me ỹ'étetacpi ỹátaqta chiỹoqot'ot ñi' Dios. So' Juan 'me chiláxanataxanaxaic ỹitaxa v'iỹílaxalégue da' ỹ'axátetac so' Jesús 22 Joca'li ỹim dójo', qana'chi so' Jesús jec, liquiáxa'u saua' lapaxaguenataqa da' ỹic'ádeta di' 'aléua Judea. Qana'chi ỹátaqta huo'oi saua' noloqo'te da' huétraaue jeso'me da' dachiláxanataxáatac. 23 So' Juan nataq'en dachiláxanataxáatac, huét'a di' Enón 'me sa qaỹáaque di' Salim, qá'a ỹátaqta jalcote na' noxop. Qana'chi na' siỹaxadipi janac, qana'chi qonachiláxatac. 24 Qana'chida da' 'éeta joca'li sona'li da' qoỹanáaue jaso' cointáxanaxaqui so' Juan. 25 Qana'chi 'uo na' nesoxonaqapi so' Juan 'me necotátac, necotátapegue' na' judiopi, qoncotátapiỹi da' lasoxoc da' n'onataguec da' nesola't ga' siỹaxaua. 26 Qana'chi jesaua' nesoxonaqa ỹic'átre'uo so' Juan da' qod'aqtaxanem, qoỹiit'oi: —'Am 'me 'am paxaguenataxanaxaic, ỹa 'auc'aten da' 'am huet'aguet so' nolo' laqáỹa 'me huet'ague da' c'atena liiséguem jidi'me ñáchi Jordán, jeda'me siỹaxaua 'me qo'mi 'au'axátetapeema joca'li, jeda'me naỹi dachiláxanataxáatac. Qana'chi ỹima na' siỹaxadipi quétapegue'. 27 Qana'chi so' Juan 'enapegalo jesaa'me, 'enaaco': —Qaỹa ga' siỹaxaua mai'chi nachiỹoxola't da' 'uo ga' ỹí'et, da' 'uootaxa sa ỹanem ñi' Dios jega'me ỹí'et. 28 'Ami mai'chi 'anaquiáxañiitapega jaỹim ca'li s'axátetac da' jaỹim sa na'chaỹim da' jaỹim net'a nec'alaxaqui, na'chidáta da' jaỹim qon'áuaxaat'ague jen' ladic jega'me 'me net'a nec'alaxaqui. 29 Da' 'uootaxa 'uo ga' n'onáxac, qana'chi jega'me ỹátaqta 'uoneguet jaga'me nauonaxaua, qana'chiga jega'me nauonaxaua. Qataxa jega'me nauotaxaua jega'me huonaxaua, jega'me qouet'aguet, qana'chi da' naquiáxatac, qana'chi jega'me ỹátaqta mátac qa'en da' naquiáxatac. Qana'chi 'éeta nataq'en naỹi jaỹim ỹátaqta saqáchiỹi da' ñitónaxac. 30 Jega'me 'me ỹátaqta ỹiuen da' nichíctaseguem da' l'amaqchic, qaláxasa jaỹim qaa'le nichíctañi da' ỹ'amaqchic.

Jega'me chiỹoxogue di' piỹem

31 Jega'me chiỹoxogue di' piỹem, jega'me napacalégue ỹima na' siỹaxadipi. Jega'me 'me chiỹaqalégue jen' 'aléua, jega'me ỹipaquíchiỹi da' 'chi 'aléua lé'ec. Da' detaqa, qaa'le ỹ'axátetac jen' huetalégue jen' 'aléua. Qaláxasa jega'me chiỹoxogue da' piỹem, jega'me napacalégue ỹimaquéna. 32 Jega'me, da' detaqa, qaa'le ỹ'axat jen'me ỹauáachiỹi qataxa jen'me naquiáxachiỹi. Qaláxasa sa 'te da' 'uo ga' ỹ'amaqten jega'me ỹ'axátetac. 33 Qaláxasa da' 'uo ga' ỹ'amaqten jega'me, qana'chi jega'me d'amaqtenataxan ỹátaqta 'eesa qa'en jega'me 'enaac ñi' Dios. 34 Qá'a jega'me 'me namaq ñi' Dios, jega'me ỹ'axa't naua' l'aqtaqa ñi' Dios, qá'a jiñi'me ỹátaqta ỹimato'ot jeso'me lepaqal da' ỹanem jega'me. 35 Qá'a jiñi'me let'a Dios ỹátaqta ỹauotec so' lec'óxot, qalaxaso'chi qá'a ỹátaqta ỹimato'ot ỹima jen'me lalémaxasetpi. 36 Jega'me ỹ'amaqten jeso'me nec'óxot, qana'chiga 'me 'uo da' lec'alaxa 'me qaỹa 'te loiquiaqa'. Jega'me sa 'te ỹ'amaqten, qana'chiga 'me sa taỹot dójo' nec'alaxa, na'chidáta da' huetalégue ga'me jeda'me qaỹa ga' 'ená'am da' lichic le'uáanaxanaxac ñi' Dios.

Juan 4

So' Jesús qataxa jaso' ỹauo 'me l'acháqa' di' Samaria

1 So' fariseopi ma'le ỹaỹáten so' Jesús nichíctaiỹi na' lasoxoñiisecpi qataxa napacalégue so' Juan na' lachiláxanatacpi. 2 Temaqaidi so' Jesús sa na'chiso so' dachiláxanataxáatac, qá'a na'chiso jeso'me lapaxaguenatacpi 'me dachiláxanataxáatac. 3 Joca'li ỹaỹáten dójo' so' Jesús, qana'chi cá'ai di' Judea, v'iỹílaxague di' Galilea. 4 Qá'a dójo' l'iỹílaxasoxoc jeso'me tatelégue di' 'aléua Samaria. 5 Joca'li ỹivíta so' noic ná'ña di' Samaria, lenaxat Sicar, jeso'me sa qaỹáaque di' 'aléua 'me ỹanem jocalia'cho' so' Jacob jeso'me lec'óxot José. 6 Qana'chi ná'ña jeso'me Jesús jaso' nesede 'me nópi'ỹaxaqui 'me qoỹinapéga lesede so' Jacob. Qá'a so' Jesús sóxote ma'le niliiñi, sóxote nadíit'a laiñi so' nolo', qana'chi jeso'me netalégue joca'li na' lai jaso' nópi'ỹaxaqui. 7-8 Saua' lapaxaguenataqa tadóoue so' noic da' neuodéedaaque ga' jalo'. Qana'chi nividaxasomo' jaso' ỹauo 'me l'acháqa' di' Samaria da' naỹaxasó'ma jaso' nópi'ỹaxaqui da' sétaaque da' naqadiséguem so' noxop. Qana'chi so' Jesús 'enapego' jaso'me, 'enaaco': —'Aua'uo qomle ga' ỹáquip. 9 Qana'chi jaso' ỹauo 'me Samaria lase 'enaaco': —¿Tá'nooqo'chi 'am, da' 'am judío lé'ec, qalqaiga da' jaỹim 'aviỹaxanot da' 'am sanem ga' 'adáquip, da' jaỹim Samaria lase? (Qá'a na' judío lé'ec sa ỹisetaxat da' detaxaỹapégue' jen'me Samaria lé'ec.) 10 Qana'chi so' Jesús 'enaaco': —Na'chi'am toqo' 'auaateton jega'me ỹan ñi' Dios, qataxa jen'me 'am ỹiỹáxatapecot da' 'aua'uo ga' láquip, qana'chi di'ỹoqóta taa'le 'am 'auañoxot da' jaỹim 'aviỹaxanot, qana'chi jaỹim toqo' 'am sanem ga' noxop 'me nec'alaxaqui. 11 Qana'chi jaso' ỹauo 'enaaco': —'Am ỹasoxola', qaỹa ga' 'adañic da' 'anaqadiséguem ga' noxop, qataxa jan'me nópi'ỹaxaqui ỹátaqta soqoỹoqóchi'nỹi. ¿Jái'chogamaxa hua'ague ga' 'auachiỹoxot'ague ga' noxop 'me nec'alaxaqui da' jaỹim 'auanem? 12 Jeso'me huá'au qadet'a Jacob joca'li qo'mi n'ónaxat'agueta jan'me jánjo' lópi'ỹaxaqui. Jan'me na'chána joca'li jan'me niỹómtapiỹi qataxa so' lec'oqtepi, qataxa so' lalopi. ¿'Am séetapega 'anapacalco' josomaxa? 13 Qana'chi so' Jesús 'enaaco': —Ỹima jen'me niỹómtapiỹi jan'me jánjo', jen'me siỹaxadipi ỹitaxa v'iỹílaxalégue da' 'uo na' láquip. 14 Qataxa jega'me niỹómỹi ga' noxop 'me sanem, jega'me sa ỹitaxa ỹiliinquip. Qá'a ga' noxop 'me sanem, jega'me ỹátaqta nec'alaxaqui, 'ená'am ga' l'auáxac 'me p'átauo jega'me. Qana'chiga jega'me ỹivídaxa'ta ga' nec'alaxa 'me qaỹa 'te loiquiaqa'. 15 Qana'chi jaso' ỹauo 'enapego' jeso'me, 'enaaco': —'Am ỹasoxola', jaỹim 'auanem toqo' jegójo' noxop, qaidi jaỹim sa ỹitaxa 'uo ga' ỹáquip lamaic qataxa sa souen da' ñ'iỹílaqtaxasó'ma jánjo' qadópi'ỹaxaqui, da' ñaqadiséguem na' noxop. 16 Qana'chi so' Jesús 'enapego' jaso'me, 'enaaco': —'Auquelólta qomle, 'av'iina'ta ga' 'adoua, 'anauegaxasó'ma jénjo'. 17 Qana'chi jaso' ỹauo 'enaaco': —Jaỹim qaỹa 'te ỹoua. Qana'chi so' Jesús 'enaaco': —Ỹátaqta 'eesa dójo' 'auenaac da' 'auéetapega qaỹa ga' 'adoua. 18 Qalqaiga 'am 'uo so' cinco joca'li so' 'adóuadipi. Qataxa ñi'me 'onet'aguet naỹi taqadíta sa ỹátaqta 'adoua. Qana'chi dójo' 'auenaac, da'me ỹátaqta 'eesa. 19 Qana'chi joca'li demachíỹa dójo' jaso' ỹauo, qana'chi 'enaaco': —'Am ỹasoxola', jaỹim selá'a da' ỹátaqta 'eesa da' 'am l'aqtáxanaxanec ñi' Dios. 20 Jeso'me huá'au qadet'alpi joca'li 'me l'acháqa' na' Samaria, jeso'me joca'li da' netamenot ñi' Dios, qaláxasa hualégue qa'en jiñi'me qasoxonaxa. Qaa'le 'ami judío lase' 'oñíỹapega da' na'chidi di' Jerusalén jidi'me huá'ña da' qo'mi ñitamnoqot ñi' Dios. 21 Qana'chi so' Jesús 'enaaco': —'Am ỹauo, jaỹim 'au'amaqten qomle, péga, ma'le nadíit'a di' lalóqo' da' 'ami sa ỹiuen da' 'auc'áchiisee'ma jiñi'me qasoxonaxa, 'uootaxa di' Jerusalén, da' 'antamiñiỹot ñi' Dios. 22 'Ami Samaria lase', 'ami sa 'auaỹáchiñii jega'me 'antamiñiitapecot. Qo'mi, qaamaxa ỹátaqta saỹátenaqta jiñi'me ñitamnaqatapecot. Qá'a da' nec'alaxa, jeda'me chiỹoqótooue na' judiopi. 23 Qaláxasa ma'le ỹivíta di' lalóqo', na'chína naỹi na' huétooue da' jen'me ỹátaqta 'eesa da' ỹi'ỹoxodéetac ñi' qadet'a Dios da' ỹi'ỹoxoden jiñi'me, qaláxasa da' li'ỹoxodénataxanaxac qochiỹoxotaỹi so' lepaqal ñi' Dios qataxa ỹátaqta 'eesa. Qá'a ñi' qadet'a na'chidáta da' 'éetapeec da' qoỹi'ỹoxoden. 24 Ñi' Dios, 'ená'am nepaqal. Tadeno' jega'me ỹi'ỹoxoden jiñi'me, qaa'le ỹiuen ga' l'añaxac 'me chiỹoxotaỹi so' lepaqal ñi' Dios qaidi ỹátaqta 'eesa da' ỹi'ỹoxoden. 25 Qana'chi jaso'me ỹauo 'enaaco': —Jaỹim saỹáten da' janac qomle ga' Mesías —'me náỹi da' Cristo, net'a nec'alaxaqui. Qomle ỹivíta da' nóvi', qana'chi jega'me qo'mi ỹ'axatema qomle ỹima na' lasoxocpi. 26 Qana'chi so' Jesús 'enapego' jaso'me, 'enaaco': —Jega'me 'au'axátetac, na'chaỹim 'me 'am setaqátapegue'. 27 Qaachaxa mai'chi nivididi't saua' lapaxaguenataqa, qana'chi jesaa'me ỹátaqta 'uo da' ỹ'aalátr'ec da' ỹauo jaso' detaqátapegue' so' Jesús. Qaláxasa sa 'te da' 'uootaxa 'uo ga' ỹinat jeso'me da' jái'chogamaxa 'éetapeec jaso'me, 'uootaxa jega'me n'aqtaxáatrapiỹi jesaa'me. 28 Qana'chi jaso' ỹauo n'ónaxachichiiñi jaso' náco'na da' jec da' ỹic'áte'uo so' noic. Qana'chi d'aqtaxáatapeguem so' siỹaxadipi, 'enaaco': 29 —Ỹa 'auanaquíỹi qomle, ỹa 'auc'atenaxañiỹí'ỹa da' siỹaxaua 'me ỹ'axátetac ỹima jen'me sé'etpi ca'li. ¿Séetapega naqaida da'me qoỹ'axátet'aguet net'a nec'alaxaqui? 30 Qana'chi janac jen'me chiỹaqá'uo di' noic, qana'chi qoỹic'átaxasó'ma so' huét'a so' Jesús. 31 Qana'chi saua' lapaxaguenataqa ỹipitaqteedaac da' nachoxodéetrapecot jeso'me, 'enapega'salo: —'Am 'me 'am paxaguenataxanaxaic, ỹa cada'acolec 'auqué'e qomle. 32 Qaláxasa so' Jesús 'enaaco': —Jaỹim 'uo jen' janoq 'me 'ami sa 'auaỹáchiñii. 33 Qana'chi saua' lapaxaguenataqa nenatétapega't, 'enapega'salo: —¿Di'ỹoqóta da' 'uo jogamaxa sóxote nedói'ỹa ga' jaloq jeda'me? 34 Qaláxasa so' Jesús 'enaaco': —Jega'me janoq, na'chidáta da' 'éetapeec jiñi'me ỹit'a 'me jaỹim namaq, qaidi tetoqo' semat da'me l'onataxanaxac. 35 'Ami 'aviñíỹapega naale da' 'ad'aqtaquii: “Maliaxa gaua' cuatro 'auóxoiqa da' ỹivíta ga' lalóqo' da' qonapoc jan' jala na' nañiisecpi.” Qaláxasa jaỹim 'ami senapegalo: Ỹa 'anloiséguem qomle, qataxa 'auloilégue na' nañiisecpi, da' sóxote ỹi jan' jala, tetoqo' qonapoc. 36 Jega'me dapogaxáatac, jega'me ỹaconguet qomle ga' neseeténataguec. Qaláxasa jan'me jala na' nañiisec 'me napoquétac, jan'me náỹi da' nec'alaxa 'me qaỹa 'te loiquiaqa', qaidi tetoqo' jega'me danaxáatac qataxa jega'me dapogaxáatac ỹañoxot da' na'chi 'eeta'salo da' netootapiỹi'salo. 37 Qá'a ỹátaqta 'eesa dójo' 'enaac da' n'aqtac naale, 'me 'enaaco': “'Uo ga'me danaxáatac, qataxa 'uo ga' dapogaxáatac.” 38 Jaỹim 'ami sama' da' qaidi 'anapoquii jan' jala na' nañiisec 'me sa 'te joca'li da' 'auañíitapiiñi. Ỹaqá'a joca'li jeso'me d'onataxáatacpi, qana'chi 'ami 'chi 'auacoñiitelégue da'me l'onataxanaxac jeso'me ỹátaqta l'onatac joca'li. 39 Ỹátaqta jalcote jen'me Samaria lé'ec l'acháqa' di' noic Sicar 'me ỹ'amaqten so' Jesús ỹasouaxat so' l'aqtaxanaxac jaso' ỹauo joca'li 'eet'oi: “Jeso'me ỹ'axáta'uo ỹima jen'me sé'etpi ca'li.” 40 Qana'chi jeso'me l'acháqa' di' Samaria 'me nec'áte'uo so' Jesús, nachoxodéetapecot jeso'me da' maliaxa huétaaue jeso'me. Qana'chi so' Jesús ỹivídaxatetreegue saua' dos noloqo'te da' huétaaue jeso'me Samaria lé'ecpi. 41 Qana'chi lamá'asa da' nichíisaiỹi jeso'me siỹaxadipi 'me ỹ'amaqten jeso'me joca'li da' mai'chi naquiáxatapega da' l'aqtaxanaxac. 42 Qana'chi qoỹinapego' jaso' ỹauo, qoỹinaaco': —Naỹi 'ena't da' na'chidáta da'me 'ad'aqtaxanaxac da' s'amaqténaq, qá'a qo'mi nataq'en mai'chi ñaquiáxanaqtapega jeso'me, qataxa saỹátenaqta jeso'me ỹátaqta 'eesa na'chiso jeso'me qoỹ'axátet'aguet net'a 'me lec'alaxaqui jen'me siỹaxadipi 'me huetalégue jen' 'aléua.

So' Jesús ỹiméegue qa'en so' lec'óxot so' lecochaxaua so' net'a

43 Joca'li ma'le ỹinoxodéegue saua' dos noloqo'te, qana'chi so' Jesús cá'ai di' Samaria, qana'chi taỹa di' 'aléua Galilea. 44 Qá'a jeso'me na'chi 'enaaco' joca'li ga' l'aqtáxanaxanec ñi' Dios, jega'me da' 'uo ga' ni'ỹoxodénataguec jega'me mai'chi lalémaxaset l'acháqa'. 45 Joca'li ma'le ỹivíta di' Galilea, qana'chi jen'me l'acháqa' jidi'me 'aléua ỹátaqta 'uo da' loqochoxo da' ỹilo'oguet jeso'me. Qá'a so' siỹaxadipi nataq'en ỹalquétauo di' Jerusalén, ỹalquéta'uo jeso' nolo' 'me huétooue da' qoueenata so' nolo' joca'li qodíc'ai jidi' Egipto. Qataxa so' siỹaxadipi ỹauáachiỹi ỹima jen'me ỹí'et so' Jesús jeso'me nolo' 'me nemáxaqui. 46 Qana'chi jeso'me ỹitaxa ỹic'áta di' noic Caná 'me huáaue jidi'me Galilea, jidi'me huá'ña joca'li taỹá'a qa'en latáxa so' noxop. Qana'chi 'uo so' ỹ'oxodaq lecochaxaua so' net'a, jeso'me 'uo so' lec'óxot ỹilhuaac, huét'a di' Capernaum. 47 Jeso'me necochaxaua joca'li p'iỹíỹa so' Jesús da' chiỹoxogue da' Judea da' ỹivíta di' Galilea, qana'chi ỹic'áta jega'me huét'a, qana'chi nachoxodéetapecot jeso'me, da' qaidi ỹic'áta ga' l'acháqa' da' ỹiméegue qa'en so' lec'óxot 'me ỹamtaa'le ỹileu. 48 Qana'chi so' Jesús 'enapego' jeso'me, 'enaaco': —'Ami sa 'au'amaqtenataxañii ỹasouaxat da' sonaliaxa 'auauañíichiỹi na' n'anecpi qataxa jen'me sa qoỹauanápiỹi. 49 Qaláxasa jeso'me necochaxaua 'enaaco': —'Am ỹasoxola', ỹátaqta sa 'anỹáloxoden qomle da' 'oc, ỹatemaliaxa di' ỹalec da' sona'li ỹileu. 50 Qana'chi so' Jesús 'enaaco': —'Aue, 'av'iỹílaxa qomle ga' 'ad'acháqa'; ga' 'ac'óxot sóxote nec'aléegue. Qana'chi jeso'me siỹaxaua ỹátaqta ỹ'amaqte'n naua' l'aqtaqa so' Jesús. Qana'chi jec. 51 Joca'li ma'le nadíite'uo so' l'acháqa', qana'chi so' lamaxa'spi ca'aguet jeso'me, qana'chi qod'aqtaxáatapeguem, qoỹiit'oi: —Di' 'ac'óxot sóxote nec'aléegue. 52 Qana'chi jeso'me denataxanec da': “¿Nái'chogamaxa ná'ña jaso' c'atena da' ỹiméegue ñi' ỹalec?” Qana'chi qod'aqtaxanem, qoỹiit'oi: —Secait dasíiñi jaso' c'atena, qana'chi qaỹa so' lauaq. 53 Qana'chi jeso'me let'a ỹaỹáten da' na'chiso so' huétooue ca'li so' Jesús 'enapéga jeso'me, 'enaac: “Ga' 'ac'óxot sóxote nec'aléegue.” Qana'chi jeso'me qataxa ỹima so' lec'oqtepi ỹ'amaqten so' Jesús. 54 Naqaida da' laqáỹa n'anec 'me sa qoỹauanápega 'me ỹí'et so' Jesús joca'li chiỹoqotelégue di' Judea da' taỹa di' Galilea.

Juan 5

So' Jesús ỹiméegue qa'en so' sa d'añiiỹi huét'a so' lai jaso' noxop lai't lenaxat Betesda

1 Joca'li ỹim dójo', qana'chi na' judiopi ỹitaxa 'uo so' nolo' da' di'ỹoxodenataxan, qana'chi so' Jesús ỹitaxa v'iỹílaxa'uo di' Jerusalén. 2 Qana'chi 'uo jeso'me som 'me qoỹimatá'ac nasom jan' n'aanaxate. Jeso'me som na'chi sa qaỹáaque jaso'me lai't na' noxop 'me jenaa'me l'aqtaqa na' hebreo lé'ecpi ỹimatá'ac Betesda. Jaso'me ỹivi't cinco naua' n'iinaxaqui' naua' lail. 3 Jaso'me na'chi huet'asop na' jalcote leuaxaicpi: 'uo na' qanam, qataxa 'uo na' ñ'ídeuo naua' lichil qataxa jen' sa d'añiiỹi. Ỹima 'chi ỹiuatét'a da' 'uootaxa d'iqui jen' lé'ec noxop jaso'me. 4 Qá'a 'uo naale ga' nolo' da' janac jeso'me Dios lamaxasec piỹem lé'ec da' naỹa jaso'me lai't jen' noxop da' ỹidáxat jen' lé'ec. Qana'chi jega'me 'uáiñi da' tánỹi jaso'me da' 'uootaxa ỹim da' qoỹidáxat jen' lé'ec, qana'chi jega'me ỹañoxot da' ỹiméegue, temaqaidi ga'me 'éeta ga' leleuaxa. 5 'Uo so' siỹaxaua huet'asop jaso'me 'me sóxote ỹivi't saua' treinta y ocho huó'e da' leleuaxa. 6 So' Jesús joca'li ỹilá'a jeso'me, qana'chi ỹaỹáten da' ma'le qaỹa'dailo saua' 'uóidi da' na'chi 'eeta't dójo' jeso'me. Qana'chi ỹinat jeso'me, 'enaaco': —¿Séetapega sétaaque da' 'am 'ademéegue? 7 Qana'chi jeso'me leuaxaic 'enaaco': —'Am ỹasoxola', qaỹa ga' jaỹim ỹasaxánỹi jañi' lai't na' noxop da' ỹivíta naale da' qoỹidáxat na' noxop. Qá'a naale sétaaque da' sánỹi jañi'me, qana'chi sóxote da' 'uo na' 'uáiñi da' tánỹi jañi'me. 8 Qana'chi so' Jesús 'enapego' jeso'me, 'enaaco': —'Oñíseguem qomle, qana'chi 'aunana't na' 'adetala', qana'chi 'oc qomle. 9 Huá'a, qana'chi jeso'me siỹaxaua ỹiméegue, ỹinana't so' letala', qana'chi ỹiuoỹapiỹe't. Qana'chi ỹasouaxat so' nolo' mataxaqui, 10 tadeeto' na' judiopi 'éetapega jeso'me siỹaxaua 'me ỹiméegue, 'enaaco': —Jen' nolo', jen'me mataxaqui, sa qoỹasen da' 'am 'auachitalégue na' 'adauágue na' 'adetala'. 11 Qana'chi jeso'me siỹaxaua 'enaaco': —Jeso'me jaỹim ỹiméegue qa'en, 'me jaỹim 'enapéga, 'eet'oi: “'Aunana't qomle na' 'adetala', ỹim, qana'chi 'oc.” 12 Qana'chi qoỹinatétac jeso'me, qoỹiit'oi: —¿Jái'chogamaxa 'am 'enapéga joca'li da' 'eet'oi: “'Aunana't qomle na' 'adetala', qana'chi 'oc qomle?” 13 Qaláxasa jeso'me siỹaxaua sa ỹaateton joca'li jega'me ỹiméegue qa'en jeso'me, qá'a jeso'me Jesús sa niỹáloxoden da' taiỹi jeso' jalcote siỹaxadipi 'me huét'a jidi'me. 14 Qana'chi so' Jesús joca'li ỹilalégue jeso'me huétaaue jeso' tamnaxaqui, qana'chi 'enapego': —Naỹi sóxote 'ademéegue, qaláxasa sa 'te qomle da' ỹitaxa 'uo ga' 'adasouaxaset, péga qomle ỹitaxa lamá'asa ga' 'adeleuaxa. 15 Qana'chi jeso'me siỹaxaua jec da' ỹ'axátem na' judiopi da' na'chiso so' Jesús jeso'me ỹiméegue qa'en so'me joca'li. 16 Chan'eesa na' judiopi ỹicáatac so' Jesús da' sétaaque ỹalaat, ỹasouaxat jeso'me da' datadénataxanỹi so' nolo' mataxaqui. 17 Qaláxasa so' Jesús 'enapego' so' judiopi, 'enaaco': —Ñi' ỹit'a na'chi 'eeta't d'onataxáatac, qana'chi jaỹim nataq'en s'onataxáatac. 18 Chan'eesa na' judiopi nichíỹaxadisaiỹi da' sétaaque ỹalaat so' Jesús, qá'a sa na'chidáta da' sa ỹalaxalégue da' lasoxoc di' nolo' mataxaqui, qaláxasa nataq'en 'éetapega da' 'ená'am ñi' qan'étoqo't joca'li 'éetapega da' ỹátaqta let'a jiñi'me.

Da' l'añaxac so' lec'óxot ñi' Dios

19 Qana'chi so' Jesús 'enapego' so' judiopi, 'enaaco': —Ỹátaqta 'eesa dójo' 'ami s'axatema, da' jen'me lec'óxot ñi' Dios, jen'me qaỹa ga' ỹí'et da' 'uootaxa mai'chi nedotelégue, qá'a jen'me ỹí'et ga'me ỹauáachiỹi da' ỹí'et ñi' let'a. Ỹima jen' ỹí'et ñi' let'a, nataq'en ỹí'et jen'me lec'óxot. 20 Qá'a ñi'me let'a ỹátaqta ỹauotec jen'me lec'óxot, tadeeto' ỹaloxóna ỹima jen'me ỹí'etpi qataxa maliaxa quet'ot da' ỹátaqta let'ádaic qomle na' ỹaloxonpi jen'me, qana'chi ỹátaqta ỹañoxot qomle da' ỹí'et da' 'ad'aalqai. 21 Qá'a dójo' 'éeta ñi' ỹit'a da' ỹañoxot da' ỹitaxa nec'alaxadiséguem ga' napa'lpi, qana'chi ỹanem da' lec'alaxa, qana'chi 'ená'am nataq'en jen'me lec'óxot da' ỹañoxot da' ỹanem da' lec'alaxa jega'me tatelégue da' qoỹanem. 22 Nataq'en ñi' ỹit'a, jiñi'me qaỹa ga' ỹa'uo ga' ne'uaxánaguec, na'chidáta da' ỹanem na' lec'óxot ỹima da' l'añaxac da' ỹa'uo ga' ne'uaxánaguec ga' siỹaxaua, 23 qaidi ỹima na' siỹaxadipi ỹi'ỹoxoden na' lec'óxot, 'ená'am qa'en da' 'éeta da' ỹi'ỹoxoden ñi' let'a. Jega'me sa ỹi'ỹoxoden na' lec'óxot, nataq'en sa ỹi'ỹoxoden jiñi'me let'a 'me namaq jen'me. 24 Ỹátaqta 'eesa dójo' 'ami s'axatema, ga' naquiáxana dójo' s'axátetac, qataxa ỹ'amaqten jiñi'me jaỹim namaq, qana'chi jega'me 'uo da' lec'alaxa 'me qaỹa 'te loiquiaqa'. Qana'chi sa qoỹa'uo qomle ga' ne'uaxánaguec, qá'a sóxote da' cá'ai da' neleuaxa da' ỹinoxoneuó'o da' nec'alaxa. 25 Ỹátaqta 'eesa dójo' 'ami s'axatema, da' naỹi ma'le ỹivíta di' lalóqo', qana'chína naỹi na' huétooue da' jen'me napa'lpi, da' 'uootaxa demachíỹa da' laviliỹáxac jen'me lec'óxot ñi' Dios, qana'chi jega'me ỹalaq, qana'chi nec'aléegue. 26 Qá'a ñi'me let'a 'uo da' l'añaxac, da' tetoqo' mai'chi ỹan da' nec'alaxa, nataq'en ỹanem na' lec'óxot da' l'añaxac da' ỹan da' nec'alaxa. 27 Qataxa ỹanem da' l'añaxac, qaidi ỹa'uo ga' ne'uaxánaguec ga' siỹaxaua, qá'a na'chína jen'me siỹaxaua lec'óxot. 28 Sa 'te qomle da' 'au'aaláit'ec dójo', qá'a 'uo qomle ga' lalóqo' da' ỹima na' napa'lpi, da' demachíỹa da' laviliỹáxac jen'me, 29 qana'chi chiỹoqóchiiñiilo naua' napa'léte' da' ñíseguem. Qana'chi jen'me ỹ'étetac ga' ỹiỹamqáchiiñi qana'chi ñíseguem, qaidi 'uo da' lec'alaxa; qaláxasa jen'me ỹ'étet'ape naua' sa ỹiỹamadídiñi, jen'me ñíseguem, qaláxasa qaidi qoỹa'uo ga' ne'uaxánaguec.

Jeda'me ỹátaqta di'ỹoq qa'en da' l'añaxac so' Jesús

30 Jaỹim sa mai'chi jaỹim ñachiỹoxola't da' 'uootaxa 'uo ga' sé'et. Qá'a da'me 'uootaxa sé'et ga' lasouaxaset ga' siỹaxaua, qaláxasa jaỹim selotelégue ga' ñ'aqtaguec chiỹoqo'ot ñi' Dios, qana'chi sa depatenáxan ga'me sé'et. Qá'a jaỹim sa sé'et ga'me mai'chi séetapeec, na'chigáta ga' 'éetapeec ñi' ỹit'a 'me jaỹim namaq, na'chigáta sé'et. 31 Qá'a da' 'uootaxa jaỹim mai'chi ñ'axátetapeela't, qana'chi jega'me ỹ'aqtaxanaxac sa 'te da' ỹátaqta 'eesa qa'en jega'me s'axátetac. 32 Qaláxasa 'uo ñi' laqáỹa 'me jaỹim ỹ'axátetac, qaa'le saỹáten ga' 'enaac jiñi'me, jega'me ỹátaqta 'eesa. 33 'Ami 'uo joca'li so' 'adamaxasíquii da' denataxana so' Juan, qana'chi jeda'me 'enaac jeso'me ỹátaqta 'eesa. 34 Qaláxasa jaỹim sa 'te da' 'chi souetapeelégue ga' l'aqtaxanaxac ga' siỹaxaua da' 'uootaxa jaỹim ỹ'axátetac. Senaac dójo', qaidi 'ami 'auañoxochii da' 'adec'aliỹíiỹi. 35 So' Juan, jeso'me 'ená'am jaga' coỹadáxanaqte 'me 'edétanỹi. Qana'chi 'ami joca'li ỹátaqta 'uo da' 'antóñiỹapeec dójo' lecoỹadáxanaxac, qaláxasa sa cop'a da' 'antónaxaquii. 36 Qaláxasa jaỹim 'uo da' ñ'aqtaguec 'me ỹátaqta napacalégue da' l'aqtaxanaxac so' Juan. Qá'a jen'me sé'etpi na'chína na' jaỹim ỹamaxalégue ñi' ỹit'a. Na'chína na' ỹátaqta ỹichoxot da' 'eesa jaỹim namaq jiñi'me. 37 Nataq'en ñi' ỹit'a 'me jaỹim namaq, jiñi'me ỹátaqta 'eesa qa'en dójo' ñ'aqtaguec. Temaqaidi da' 'ami sa 'auauañíỹapega da' 'amachíichiỹi ga' laviliỹáxac jiñi'me, qataxa sa 'auaatetoñii ga' latáxasoxoc. 38 Qaláxasa jeda'me l'aqtac jiñi'me sa 'te da' 'ami taavlo, qá'a 'ami sa 'au'amaqchíñii jen'me namaq jiñi'me. 39 'Ami 'me ỹátaqta 'uo da' 'adoouoqoi da' 'anapaxaguiñiỹalo naua' nedétrañi l'aqtaqa ñi' Dios, qá'a 'uo da' 'anaquitaxaquii da' 'ami taỹoto da' nec'alaxa 'me qaỹa 'te loiquiaqa'. Qaama'le jenaa'me n'aqtaqa 'me nedétrañi, jenaa'me jaỹim ỹ'axátetrac. 40 Qaláxasa 'ami sa 'te da' jaỹim 'auanaiuó'o da' qaidi 'ami taỹoto dójo' nec'alaxa. 41 Jaỹim sa saconguet da' li'ỹoxodénataxanaxac na' siỹaxadipi da' séeta. 42 Qataxa jaỹim ỹátaqta saỹáteeta da' 'oñíita da' sa 'te da' 'auauochíỹic ñi' Dios. 43 Jaỹim ỹátaqta sachiỹoqot'ot ñi' ỹit'a, qaláxasa 'ami sa 'te da' jaỹim 'auacoñiiỹet. Qaláxasa da' 'uootaxa janac ga' mai'chi náictapegue' ga' 'éetapeec, qana'chiga jega'me 'auacoñiiỹet. 44 ¿Táalia'chi toqo' da' 'ami jaỹim 'au'amaqchíñii, da' ñi' 'oonolec da' 'oñíita mai'chi ỹaconguet ga' li'ỹoxodénataxanaxac ga' mai'chi 'ená'am laqáỹa, qataxa sa 'anmichiỹáaque ga' ni'ỹoxodic 'me chiỹoqo'ot ñi' 'oonolec qan'étoqo't? 45 Sa 'aviñíitapega qomle da' na'chaỹim 'me s'axátem qomle ñi' ỹit'a da' jái'chogamaxa 'adasouaxasíchii, qá'a jeso'me Moisés naqaiso so' ỹ'axat ga' 'adesómaxaquii, jeso'me 'auachiit'ot da' 'anaquitaxaquii. 46 Cha'li toqo' da' 'ami 'au'amaqchíñii jega'me 'enaac so' Moisés, nataq'en táxa da' jaỹim 'au'amaqchíñii, qá'a so' Moisés na'chaỹim 'me jaỹim ỹidíñi joca'li. 47 Qaláxasa da' 'ami sa 'au'amaqchíñii jeda'me ỹidíñi jeso'me joca'li, qana'chi ¿huá'a toqo' da' 'au'amaqchíñii ga'me senaac?

Juan 6

So' Jesús ỹiqui'ỹáxan so' cinco mil siỹaxadipi

1 Joca'li ỹim dójo', qana'chi so' Jesús tai'ta di' lasego jaso' peróna lat'édai 'me huá'ña di' Galilea qataxa di' noic Tiberias. 2 Ỹátaqta sa lec'óxotolec so' siỹaxadipi 'me quétapegue' jeso'me ỹasouaxat da' ỹauáatapiỹi jen' ỹ'étetac n'anecpi 'me sa qoỹauanápiỹi da' natadéetac na' leuaxaicpi. 3 Qana'chi so' Jesús ỹic'ádisee'mec so' qasoxonaxa. Huá'ña, qana'chi ñíiñi qataxa saua' lapaxaguenataqa. 4 Qá'a ma'le sa qaỹáaque jeso'me nolo' 'me lemáxaqui na' judiopi da' hueenategue joca'li qodíc'ai di' Egipto. 5 Qana'chi joca'li naxaséguem so' Jesús, qana'chi ỹila'agueto' so' sa lec'óxotolec siỹaxadipi da' nec'átetalégue jeso'me. Qana'chi 'enapéga so' Felipe, 'enaaco': —¿Jái'chogamaxa sachiỹoxotaqa'ague ga' ñiuodénaxa jaloq, qaidi dequé'e ỹima jen'me siỹaxadipi? 6 Qaláxasa so' Jesús 'enaac dójo', qá'a sétaaque da' ỹaỹáten ga' l'aqtac so' Felipe, qá'a jeso'me mai'chi ỹaỹáteetac ga' lasoxoc jega'me ỹí'et. 7 Qana'chi so' Felipe 'enaaco': —Da' doscientos jaga' denariopi da' qoneuodéna jaga' pan, qaláxasa taqadíta sa nalóỹi qomle da' 'chi cat'oñooc ga' ỹalic ñi' 'oonolec siỹaxaua. 8 Qana'chi so' Andrés 'me na'chiso so' 'oonolec saua' lapaxaguenataqa, jeso'me lanogaxaua so' Simón Pedro, jeso'me 'enaaco': 9 —'Uo da' nootolec huét'a jénjo'. Jeda'me huo'oi daua' ỹachít'ape cincole paa'ñi chiỹaqaỹi na' cebada, qataxa daua' doosolqa níỹa' lec'óqo'tolqa. Qaláxasa ¡qaỹa ga' nesédaaque, jedaa'me sa naloteguet na' sa lec'óxotolec siỹaxadipi! 10 Qana'chi so' Jesús 'enaaco': —'Aviñíỹapega qomle ỹima na' siỹaxadipi da' ñíiñi. Qá'a ỹátaqta 'uo so' jalcote 'auaqapi jeso'me qouét'a. Qana'chi ñíiñi ỹima so' siỹaxadipi, ỹóvi' so' cinco mil l'imdipi. 11 Qana'chi so' Jesús ỹaconalo saua' paa'ñi. Qaláxasa joca'li ỹimat da' ỹanem da' netónaxac ñi' Dios, qana'chi ỹanoovlo saua' lapaxaguenataqa. Jesaa'me na'chi ỹaadóoue ỹima so'me ñíchiiñi. Qana'chi ỹadénaxachichiilo nataq'en saua' níỹaxadi da' ỹaadóoue ỹima jeso'me siỹaxadipi, cha ỹivíd'a da' nodáxaicpi. 12 Joca'li ma'le ỹóno' so' siỹaxadipi, qana'chi so' Jesús 'enapegalo' saua' lapaxaguenataqa, 'enaaco': —'Alapoñiỹa't qomle ỹima na' n'iỹoxotpi, qaidi qaỹa ga' ne'ueela't. 13 Qana'chi qoỹiỹaxa't jeso'me, qana'chi ỹóvi' jaso' doce canasto jaso' saqáchiỹi jeso'me n'iỹóxot saua' cincole paa'ñi 'me chiỹaqaỹi na' cebada. 14 Qana'chi jeso'me siỹaxadipi 'me ỹauáachiỹi dójo' n'anec 'me sa qoỹauanápiỹi 'me ỹí'et so' Jesús, qana'chi jeso'me siỹaxadipi 'enaaco': —Ỹátaqta 'eesa da' naqaida jeda'me l'aqtáxanaxanec ñi' Dios 'me qoỹ'axátet'aguet joca'li da' naỹa jen' 'aléua. 15 Qaláxasa so' Jesús joca'li nóm'a da' sétaaque qoỹaconé'uo da' qoỹin net'a, qana'chi jeso'me ỹitaxa cá'ai jeso'me siỹaxadipi, ỹic'ádisee'ma so' qasoxonaxa, qaidi nedóteegue.

So' Jesús petalégue so' noxop

16 Joca'li ma'le pí'ỹaq, qana'chi saua' lapaxaguenataqa so' Jesús, jesaa'me tadaxasó'ma jaso' peróna lat'édai. 17 Qana'chi huenóchidinỹi jaso' nilicota, qana'chi p'áidinỹi jaso' peróna da' qoỹic'ade'ta di' noic Capernaum. Ma'le ỹátaqta n'áliñi, qaláxasa so' Jesús maliaxa sona'li nividaxasom. 18 Qana'chi janac so' laỹat let'ádaic, ỹátaqta 'uo so' lepáxa so' noxop. 19 Qana'chi joca'li ma'le qaỹat'ai'ilo jesaa'me, qana'chi qoỹila'aguet so' Jesús da' naỹá'a jaso' nilicota, petalégue na' noxop, qana'chi jesaa'me ỹátaqta 'uo da' loqolánaqa'. 20 Qaláxasa jeso'me 'enapegalo jesaa'me, 'enaaco': —¡Naqaỹim, sa 'au'óiỹi qomle! 21 Qana'chi jesaa'me ỹátaqta 'uo da' lidiáqa' da' huenóchiinỹi jeso'me jaso' nilicota. Huá'a, qana'chi sa huaỹáloq da' qoỹivíde'ta so' lasego jidi'me qoỹic'ade'ta 'aléua.

So' siỹaxadipi nimitétaaque so' Jesús

22 Joca'li so' nolo' laqáỹa, qana'chi so' siỹaxadipi 'me qapiỹa'ta so' lasego jaso' peróna, jeso'me nómt'a saua' lapaxaguenataqa so' Jesús da' ỹisamachi joca'li huenóchidinỹi jaso' 'oonole nilicota, so' Jesús sa náicapee'to jesaa'me. 23 Qaláxasa ỹitaxa huo'oi saua' nilicota laqáỹa' nivididi't, chiỹoqodá'a di' noic Tiberias, nivídet'a jidi'me sa qaỹáaque 'me huá'ña joca'li qoỹalic jaso' pan joca'li ỹim da' ỹan da' netónaxac so' qadasoxola'. 24 Qana'chi jeso'me siỹaxadipi joca'li ỹilá'a da' sa huet'edi so' Jesús qataxa saua' lapaxaguenataqa, qana'chi jeso'me siỹaxadipi huenóchiinỹilo saua' nilicotal da' ỹic'ade'ta di' Capernaum da' qonmitáaque jeso'me.

So' Jesús naqaiso so' pan 'me chiỹaqaỹi da' nec'alaxa

25 Qana'chi so' siỹaxadipi joca'li ỹivíd'ata da' lasego jaso' peróna, qana'chi qoỹilalégue so' Jesús. Qana'chi qoỹinatétac, qoỹinaaco': —'Am 'me 'am paxaguenataxanaxaic, ¿jái'chi 'éeta joca'li da' 'anvíta jénjo'? 26 Qaláxasa so' Jesús 'enapego' so' siỹaxadipi, 'enaaco': —Ỹátaqta 'eesa dójo' 'ami senapegalo, da' 'ami jaỹim 'anmichíitaaque, qá'a 'ami 'au'quíỹi, qana'chi 'ami nodáxaiqa; sa naqaido' da' ỹasouaxat da' 'ami 'auaỹáchiñii ga' náỹi jen' n'anecpi 'me sa qoỹauanápiỹi. 27 'Ena't qomle da' 'au'onataxañiitapeelégue ga' nalic 'me taỹá'a da' ỹiméta, na'chigáta jega'me nalic 'me sa ỹiméta, qataxa chiỹaqaỹi ga' nec'alaxa 'me qaỹa 'te loiquiaqa'. Jega'me nalic 'me 'ami ỹanema qomle jen' siỹaxaua lec'óxot. Qá'a ñi' ỹit'a Dios na'chína na' ỹiquíchiỹi da' ỹiỹamaxadéeta. 28 Qana'chi qoỹinatétac jeso'me, qoỹiit'oi: —¿Hua'ago' ga'me senqát'ec, da' tetoqo' qo'mi sañoxotaq da' s'étaq ga'me 'éetapeec ñi' Dios da' s'étaq? 29 Qana'chi so' Jesús 'enaaco': —Da' 'éetapeec ñi' Dios sétaaque da' 'ami 'au'amaqchíñii jen'me namaq jiñi'me. 30 Qana'chi qoỹinat jeso'me, qoỹinaaco': —¿Jái'teeto' ga'me n'anec da' 'auañoxot da' qo'mi 'aualoxonalo, qaidi sauanáqchiỹi, qana'chi sañoxotaq da' 'am s'amaqténaq? ¿Jái'chogamaxa 'aué'et? 31 Jeso'me huá'au qadet'alpi joca'li ỹalíctac jaso'me maná joca'li huetalégue so' totelégue 'aléua, qá'a 'enapegalo naua' nedétrañi n'aqtaqa, 'eet'oi: “Ñi' Dios ỹiqui'ỹáxanec so' siỹaxadipi jaso' pan 'me chiỹoxogue di' piỹem.” 32 Qana'chi so' Jesús 'enaaco': —Já'a, ỹátaqta 'eesa dójo' 'ami s'axatema, da' sa naqaiso so' Moisés, jeso'me 'ami ỹanema jaso' pan 'me chiỹoxogue di' piỹem, na'chiñíta ñi' ỹit'a 'me naqaiñi jiñi'me 'ami ỹanema jaga'me pan 'me ỹátaqta 'eesa 'me chiỹoxogue da' piỹem. 33 Qá'a jaga' pan 'me ỹan ñi' Dios, na'chaga jaga'me chiỹoqot'ot di' piỹem 'me janac da' ỹanem da' lec'alaxa jen' siỹaxadipi. 34 Qana'chi so' siỹaxadipi 'enaaco': —'Am qadasoxola', n'óota taa'le na'chi 'eeta't da' qo'mi 'auanema jaga' pan. 35 Qana'chi so' Jesús 'enaaco': —Na'chaỹim 'me jaỹim pan 'me chiỹaqaỹi da' nec'alaxa. Ga' jaỹim nauó'o, qana'chi sa nauá'ne' qomle da' loqouáxa; qataxa ga' jaỹim ỹ'amaqten, qana'chi sa nauá'ne' qomle da' ỹiliinquip. 36 Qaláxasa jaỹim ma'le ỹim da' 'ami senapegalo da' 'ami sa jaỹim 'au'amaqchíñii, temaqaidi da' jaỹim 'auloit'ot. 37 Ỹima jen'me jaỹim ỹanem ñi' ỹit'a, jen'me jaỹim nauó'o; qataxa jen'me jaỹim nauó'o, qaláxasa sa se'uoỹápeeguet. 38 Qá'a jaỹim sa sachiỹoqot'ot na' piỹem da' ñanac da' sé'et ga' mai'chi séetapeec, na'chidáta da' ñanac da' sé'et ga' 'éetapeec jiñi'me jaỹim namaq. 39 Qataxa da'me 'éetapeec ñi' ỹit'a 'me jaỹim namaq, sétaaque da' jaỹim qaỹa ga' saqataqtet jen' jaỹim ỹanem jiñi'me, na'chidáta da' ñic'alaxadiséguem qomle ỹivíta ga' p'áteegue nolo'. 40 Da' 'éetapeec jiñi'me jaỹim namaq, sétaaque da' ỹima jen'me ỹilot'ot jen' lec'óxot ñi' Dios qataxa ỹ'amaqten jen'me, qana'chi 'uo da' lec'alaxa qaỹa 'te loiquiaqa', qataxa ñic'alaxadiséguem qomle ỹivíta ga' p'áteegue nolo'. 41 Huá'a, qana'chi so' judiopi jec da' dapetétapega so' Jesús ỹasouaxat joca'li da' 'eet'oi: “Jaỹim 'me pan sachiỹoqo'ot di' piỹem.” 42 Qana'chi so' judiopi 'enaaco': —¿Jeda'me sa na'chido' da' Jesús, jeda'me lec'óxot so' José? Qo'mi saatetonaq so' let'a José qataxa jaso' lat'e. ¿Táalia'chi toqo' da' 'enapeela't chiỹoxogue di' piỹem? 43 Qana'chi so' Jesús 'enapéga jeso'me siỹaxadipi, 'eet'oi: —Ja'ñi qomle da' jaỹim 'auapichíitapega. 44 Qaỹa ga' ỹañoxot da' 'chi jaỹim nauó'o da' 'uootaxa sa nauéeuo ñi' ỹit'a 'me jaỹim namaq; qana'chi jega'me ñic'alaxadiséguem ga' p'áteegue nolo'. 45 Naua' nedétrañi l'aqtaqa jeso'me l'aqtáxanaxanecpi ñi' Dios, jenaa'me 'eet'oi: “Ñi' Dios ỹapaxaguen qomle ỹima na' siỹaxadipi.” Chan'eesa ỹima jen'me naquiáxana jiñi'me ỹit'a qataxa lapaxaguenatac jiñi'me, qana'chi jen'me jaỹim nauó'o. 46 Sa ỹañoxot da' 'uootaxa 'uo ga' ỹiloỹi da' latáxasoxoc ñi' ỹit'a; na'chínata jen'me chiỹoqo'ot jiñi'me, 'me na'chínata ỹaateton jiñi'me. 47 Ỹátaqta 'eesa dójo' 'ami s'axatema, da' jega'me jaỹim ỹ'amaqten, qana'chi 'uo da' lec'alaxa 'me qaỹa 'te loiquiaqa'. 48 Jaỹim na'chaỹim pan 'me chiỹaqaỹi da' nec'alaxa. 49 So' huá'au 'adet'aipi jocalia'cho' quetalégue so' totelégue 'aléua, qana'chi jeso'me ỹalíctac jaso' pan chiỹaqséguem, lenaxat maná, qaláxasa na'chi 'ená'am ỹileu jeso'me. 50 Qaláxasa jaỹim s'axátetac jaso' pan 'me chiỹoqo'ot di' piỹem, da' ga' ỹalic jaso'me, qana'chi sa ỹileu. 51 Jaỹim 'me na'chaỹim pan 'me ñic'alétaiỹi, qataxa sachiỹoxogue di' piỹem. Ga' ỹalic jan'me jánjo' pan, qana'chi 'uo da' lec'alaxa qaỹa 'te loiquiaqa'. Jánjo' pan 'me sanéegue, na'chida da' mai'chi ỹó'oquiaxac. Jeda'me sanéegue, qaidi nec'aléegue na' siỹaxadipi. 52 Qana'chi so' judiopi mai'chi p'aỹa't da' necotátapega't, 'enapega'to': —¿Hua'ago' ga' 'éeta da'me dójo', da' qo'mi ỹanema da' mai'chi ló'oquiaxac da' salíinaq? 53 Qana'chi 'enapéga so' judiopi so' Jesús, 'enaaco': —Já'a, ỹátaqta 'eesa dójo' 'ami s'axatema, da' 'uootaxa sa 'te da' 'aualíquii da' ló'oquiaxac jen' siỹaxaua lec'óxot, qataxa da' sa 'te da' 'anỹómiiỹi jan' letauo', qana'chi sa 'auañoxochii da' 'adec'aliỹíiỹi. 54 Ga' ỹalic da' ỹó'oquiaxac qataxa niỹómỹi jan'me ỹitauo', qana'chi 'uo da' lec'alaxa 'me qaỹa 'te loiquiaqa'. Qana'chi jega'me ñic'alaxadiséguem ga' p'áteegue nolo'. 55 Qá'a da' ỹó'oquiaxac, na'chida da' ỹátaqta 'eesa nalic, qataxa jan' ỹitauo', na'chána jan' ỹátaqta 'eesa náquip. 56 Ga' ỹalic da' ỹó'oquiaxac qataxa da' niỹómỹi jan' ỹitauo', qana'chi jega'me na'chi 'eeta't da' jaỹim ỹoqotet'aguet, qataxa na'chi 'ená'am jaỹim soqotet'aguet jega'me. 57 Jiñi'me ỹit'a 'me jaỹim namaq, jiñi'me 'uo da' lec'alaxa, qana'chi dójo' ỹic'alaxa chiỹoqo'ot jiñi'me. Qana'chi naq'áita nataq'en ga' jaỹim ỹalic, qana'chi jega'me jaỹim ỹachiỹoxot'ot da' lec'alaxa. 58 Jaỹim s'axátetac jaso' pan 'me chiỹoxogue da' piỹem. Jaso'me pan sa 'ená'am jaso' maná 'me ỹalíctac joca'li so' huá'au 'adet'aipi, qaláxasa na'chi 'ená'am ỹima jeso'me ỹileu. Ga'me ỹalic jaso'me pan 'me s'axátetac, qana'chi jega'me na'chi 'eeta't da' nec'alétaiỹi. 59 Na'chida dójo' dapaxaguenataxáatapeec so' Jesús joca'li huétaaue so' lemáxaqui so' judiopi 'me ná'ña di' Capernaum.

Da' n'aqtac 'me chiỹaqaỹi da' nec'alaxa 'me qaỹa 'te loiquiaqa'

60 Joca'li qodemachíỹa dójo' lapaxaguenataxanaxac jeso'me, qana'chi ỹátaqta sa lec'óxotolec so'me quétapegue' so' Jesús 'me 'enaaco': —Dójo' 'enaac, jeda'me ỹátaqta 'uo da' laqalaic da' qoỹaconguet; ¿jái'chogamaxa ỹañoxot da' naquiáxana dójo'? 61 Qana'chi so' Jesús ỹaatetoná'uo da' leenataxac jeso' judiopi da' dapetétapeelégue dójo' l'aqtac jeso'me. Qana'chi jeso'me ỹinatétac so' judiopi, 'enaaco': —¿Séetapega 'ami ỹasáxadiñi dójo'? 62 ¿Hua'ago' ga' 'aviñíit'ec qomle da' 'uootaxa 'ami 'aulói'ỹa jen' siỹaxaua lec'óxot da' v'iỹílaxasee'ma jidi'me huét'a joca'li? 63 Jeso'me lepaqal ñi' Dios, naqaiso so' chiỹoqo'ot da' nec'alaxa; jeda'me di'ỹoqóchiỹi napáchiỹaxac, jeda'me qaỹa 'te chiỹaqaỹi. Qaláxasa jeda'me senaac, 'me ỹátaqta 'eesa qataxa chiỹoqo'ot so' lepaqal ñi' Dios, qataxa jeda'me chiỹaqaỹi da'me nec'alaxa. 64 Qaláxasa taqadíta 'uo da' 'oñíita na' sa jaỹim ỹ'amaqten. 'Enaac dójo' so' Jesús, qá'a chi'ena da' ỹaỹáten joca'li ỹímta da' d'onataxan jen'me chi'ena sa d'amaqtenataxan qataxa jeso'me sétaaque joca'li da' ỹaneuo jeso'me. 65 Qana'chi 'enaaco': —Tadeeto' jaỹim 'ami senapegalo ca'li da' qaỹa ga' ỹañoxot da' 'chi jaỹim nauó'o, da' 'uootaxa sa 'te da' na'chiñi ñi' ỹit'a da' jaỹim nauée'uo jega'me. 66 Huá'a, qana'chi ỹátaqta jalcote so'me quétapegue' so' Jesús da' ỹaxañi da' 'equegue jeso'me. 67 Qana'chi so' Jesús ỹinatét'ape saua' doce lapaxaguenataqa: —¿'Ami séetapega nataq'en sétaaque da' 'oquíỹi? 68 Qaláxasa jeso'me Simón Pedro 'enaaco': —'Am ỹisaliaxanec, ¿jái'chogamaxa qolaxague laqáỹa? Qá'a na'chi'améta 'me naua' 'ad'aqtaqa jenaa'me chiỹaqaỹilo da' n'óiỹaxac 'me qaỹa 'te loiquiaqa'. 69 Qo'mi ma'le sóxote da' s'amaqténaq, qataxa saỹátenaq da' na'chi'am 'me 'am ga' qoỹ'axátet'aguet net'a nec'alaxaqui 'me 'am ga' lec'óxot ñi' qantamnaxala' 'me na'chi 'eeta't da' nec'alétaiỹi. 70 Qana'chi so' Jesús 'enaaco': —¿Sa na'chi'amiijo' doce da' 'ami ỹiquiỹáqa? Qalqaiga da' 'oonolec da' 'oñíita ỹáatañi da' lasoxoc so' paiỹac 'me qadó'o. 71 Na'chiso so' Judas Iscariote jeso'me detaqátapega so' Jesús, jeso'me lec'óxot so' Simón. Qá'a so' Judas, na'chiso joca'li so' ỹaneuo jeso'me, temaqaidi so' Judas na'chiso so' 'oonolec saua' doce lapaxaguenataqa.

Juan 7

Saua' laqáỹa' so' Jesús sa ỹ'amaqte'n jeso'me

1 Joca'li ỹim dójo', qana'chi so' Jesús coléetapiỹi di' 'aléua Galilea. Jeso'me sa ỹic'áta di' Judea, qá'a so' judiopi 'me l'acháqa' jidi'me sétaaque da' ỹalaat jeso'me. 2 Qaláxasa ma'le sa qaỹáaque so' lemáxaqui so' judiopi da' qonaavlo naua' nepele'te. 3 Tadeeto' saua' laqaỹadésoda 'éetrapega jeso'me, 'enapega'to': —'Ena't qomle da' 'ouét'a jénjo'. N'óota da' 'auc'áta di' Judea, qaidi jen'me 'am quétapegue' 'me huét'a jidi'me ỹañoxot da' nataq'en ỹauáachiỹi jen'me 'aué'etpi. 4 Qá'a ga' siỹaxaua da' sétaaque da' qoỹaateton, qana'chi sa nañoxótetapiiñi da' 'uo ga' ỹí'et. Qá'a 'am ma'le sóxote da' 'au'étetac dójo' 'ad'onataxanaxac, n'óota da' 'am 'analoxóna ỹima jen' siỹaxadipi. 5 Cha ỹivid'alo joca'li saua' mai'chi laqaỹadésoda da' sa ỹ'amaqte'n jeso'me. 6 Qana'chi so' Jesús 'enaaco': —Jaỹim sona'li da' ỹivíta di' ỹalóqo'. 'Ami, qaa'le gamachaqaiga nolo' qana'chi 'ená'am 'ónaxaic 'aviñii. 7 Jen'me siỹaxadipi 'me huetalégue jen' 'aléua, jen'me sa 'ami niquiỹa'alo. Jaỹim, qaamaxa ỹátaqta jaỹim niquiỹá'a, qá'a jaỹim ỹátaqta s'axátetem jen'me naua' ỹ'étet'ape sa ỹiỹamadídiñi. 8 'Oquíỹi qomle, 'auc'áchii'uo ga' nemáxac. Jaỹim, qaamaxa sa sec'áta, qá'a maliaxa sa ỹivíta di' ỹalóqo'. 9 Joca'li ỹim dójo' 'enaac, qana'chi jeso'me qapiỹá'ña di' Galilea. So' Jesús huétaaue so' nemáxac 'me huétooue da' qonaavlo naua' nepele'te 10 Qaláxasa joca'li ma'le ỹoxoguelo saua' laqáỹa', qana'chi so' Jesús nataq'en ỹic'áte'uo jeso'me nemáxac. Qaláxasa jeso'me sa 'te ỹátaqta naloxon. 11 Qana'chi so' judiopi nimitétaaque jeso'me joca'li huétaaue so' nemáxac. Qana'chi denataxáatac, 'enaaco': —¿Jái'chogamaxa huet'ague jega'me siỹaxaua? 12 Qana'chi jalcote so' siỹaxadipi da' n'aqtaxáatapiỹi jeso'me. 'Uo na' 'enaac: “Sójo' siỹaxaua, jeso'me n'óota da' lasoxoc.” Qaláxasa 'uo na' laỹi 'eet'oi: “Jeso'me sa nó'in da' lasoxoc; jeso'me 'chi ỹoqovíitac na' siỹaxadipi.” 13 Qaláxasa jen'me sa ỹátaqta ỹimachaqtet ỹima so' siỹaxadipi da' 'éetapega jeso'me, ỹasouaxat da' d'óitapega so' judiopi. 14 Qaláxasa joca'li ma'le laiñi so' nemáxac, qana'chi so' Jesús táaue so' tamnaxaqui let'ádaic, qana'chi quet'ot da' lapaxaguenataxanaxac. 15 Qana'chi so' judiopi 'uo da' ỹ'aalát'ec jeso'me, qana'chi 'enaaco': —¿Jái'chogamaxa hua'ague ga' 'éeta jeda'me, da' ỹátaqta jalcote na' ỹaỹáten? Qamaale sa napaxaguen joca'li. 16 Qana'chi so' Jesús 'enaaco': —Da' ỹapaxaguenataxanaxac, jeda'me sa ỹalémaxaset, jeda'me chiỹoqo'ot ñi'me jaỹim namaq. 17 Da' 'uo ga' qaỹa ga' ỹasápiỹi da' ỹí'et jega'me 'éetapeec ñi' Dios, qana'chi jega'me ỹañoxot da' ỹaỹáteete' naua' ỹapaxaguenataxanaxaco da' ỹátaqta chiỹoqo'to ñi' Dios, 'uootaxa da' 'chi mai'chi jaỹim chiỹoqo'to. 18 Ga' siỹaxaua da' 'uootaxa mai'chi nachiỹoxola't ga' mai'chi letaxaỹaxac, ga'me 'éet'ec dójo', qá'a sétaaque na' siỹaxadipi qoỹi'ỹoxoden. Qaláxasa jega'me ỹátaqta nepogoxóitapegue' da' qaidi qoỹi'ỹoxoden jega'me namaq, jega'me naqaiga ga' ỹátaqta 'eesa ga' l'aqtaxanaxac, sa 'chi doqovínaxaatac. 19 ¿Séetapega sa 'eeso' so' Moisés da' 'ami ỹanema so' laqátaxacpi? Qaláxasa taqadíta qaỹa ga' 'oonolec da' 'oñíita da' ỹalaxalégue jeso'me naqátaxacpi. ¿Tá'nooqo'chi da' 'ami sétaaque jaỹim 'aualaachii? 20 Qana'chi so' siỹaxadipi 'enaaco': —'Am 'uo ñi' 'adé'ec nataqtáqaic; ¿jái'chogamaxa sétaaque da' 'am ỹalaat? 21 Qana'chi so' Jesús 'enaaco': —Jaỹim 'oonolec ca'li sé'et ca'li huétooue so' nolo' mataxaqui, qana'chi ỹima da' 'oñíita ỹátaqta 'au'aalqáitapeguem. 22 Qaláxasa so' Moisés 'ami ỹanema joca'li da' 'auauóỹaaque ga' n'anaxat ga' siỹaxaua (temaqaidi da' sa na'chiso jeso'me da' ỹátaqta chiỹoqo'ot, qá'a jeda'me chiỹoqot'ot joca'li jeso'me huá'au 'adet'aipi). Tadeeto' 'ami 'auañoxochii da' 'av'íchii ga' n'anaxat ga' nootolec, temaqaidi da' huétooue ga' nolo' mataxaqui. 23 Qá'a 'ami sétaaque da' 'apagaqchiñíichiỹi jen' laqátaxacpi so' Moisés, qana'chi 'ami 'auañoxochii 'av'íchii ga' n'anaxat ga' nootolec, te'me huétooue ga' nolo' mataxaqui, qaláxasa ¿tóoqo'chi da' jaỹim 'aualematáitapega ỹasouaxat da' ỹiméegue da' l'óiỹaxac so' siỹaxaua da' ñataden so' nolo' mataxaqui? 24 'Ami 'ena't qomle da' 'aulóitaỹi ga' ỹ'oqóchiỹi da' 'anmichii. Da' 'uootaxa 'uo ga' 'anmichii, qaláxasa ỹátaqta 'auachimaxachíiteegue 'aviñii da' 'admitaxanaxaquii.

So' Jesús ỹ'axat jega'me chiỹoqóchii'ña

25 Qana'chi 'uo na' néta'ña di' Jerusalén na' denataxáatac, 'eet'oi: —¿Séetapega na'chido' jeda'me dójo' qonmitétaaque da' sétaaque da' qoỹalaat? 26 Qá'a jeda'me ỹátaqta naloxóota da' detaqa, qaláxasa qaỹa ga' ỹañoxot da' 'enapéga jeda'me. Ỹ'oqóta da' séetapega nataq'en na' qadet'alpi da' ỹ'amaqten jeda'me, da' na'chida jeda'me ga' qoỹ'axátet'aguet net'a nec'alaxaqui. 27 Qaláxasa qo'mi saỹátenaqta da' chiỹoxogue jeda'me. Qá'a qomle ỹivíta da' nóvi' jega'me net'a nec'alaxaqui, qaláxasa qaỹa ga' ỹañoxot da' ỹaỹáten ga' chiỹoxogue. 28 Joca'li demachíchiỹi dójo' so' Jesús 'me dapaxaguenataxáatapooue so' tamnaxaqui, qana'chi ỹátaqta netenec da' l'aqtac, 'enaaco': —¡Qa'chi jaỹim 'auaatetoñiỹo' qataxa 'auaỹáchiñii jega'me sachiỹoxogue! Qaláxasa jaỹim sa mai'chi ñachiỹoxola't da' ñanac, qá'a jaỹim lamaxasec jiñi'me ỹátaqta 'eesa, jiñi'me sa 'auaatetoñii. 29 Jaỹim, qaamaxa saateton, qá'a sachiỹoqo'ot jiñi'me, qataxa jaỹim namaq. 30 Huá'a, qana'chi sétaaque da' qoỹaconé'uo jeso'me da' qoỹicoñi'. Qaláxasa qaỹa ga' nañoxot da' ỹaconé'uo jeso'me, qá'a jeso'me maliaxa da' ỹivíta ga' lalóqo'. 31 Qaláxasa ỹátaqta sa lec'óxotolec na' ỹ'amaqten jeso'me. Qana'chi 'enaaco': —Qomle ỹivíta da' nóvi' ga' net'a nec'alaxaqui, ¿séetapega ỹágueegue jen'me ỹí'et n'anecpi 'me sa qoỹauanápiỹi da' napacalégue jeda'me dójo' siỹaxaua?

So' fariseopi namaq so' huataxanaq da' ỹicoñi' so' Jesús

32 So' fariseopi joca'li demachítapegooue so' siỹaxadipi da' 'éetapega so' Jesús, qana'chi jeso'me fariseopi qataxa so' lasoxola'pi na' netaxaỹáxanaxanecpi ỹamaq so' huataxanaq 'me ỹilolégue so' tamnaxaqui, da' qaidi ỹaconé'uo jeso'me da' ỹicoñi'. 33 Qana'chi so' Jesús 'enaaco': —Jaỹim maliaxa cada'acolec da' 'ami souetaavlo. Qomle ỹim, qana'chi jaỹim s'iỹílaxa jiñi'me jaỹim namaq. 34 Qaláxasa 'ami qomle jaỹim 'anmichíitaaque, qaláxasa sa jaỹim 'auañíỹa, qá'a sa 'auañoxochii da' 'avídi'ỹa jega'me souét'a. 35 Qana'chi jeso' judiopi mai'chi nenatétapega't, 'enaaco': —¿Jái'te hua'ago' ga' taiỹi jeda'me, da' qaidi qo'mi sa sañoxotaq da' sauanáxa? ¿'Uootaxa ỹic'áta di' judiopi 'me nelagaxatétac, jidi'me nétaaue jen'me sa judío lé'ec, da' qaidi ỹapaxaguen jen' sa judiopi lé'ec? 36 ¿Jái'chogamaxa náỹi dójo' l'aqtac 'me 'eet'oi: “Jaỹim 'anmichíitaaque qomle, qaláxasa sa jaỹim 'auañíỹa, qá'a sa 'auañoxochii da' 'avídi'ỹa jega'me souét'a?”

Ga' noxop 'me chiỹaqaỹi da' nec'alaxa

37 Jeso'me p'áteegue nolo' saua' nemáxaqui' 'me ỹátaqta ỹágueegue da' ni'ỹoxodénataguec. Qana'chi jeso'me nolo' nichaachiñi so' Jesús, qana'chi ỹátaqta neten da' detaqa, 'enaaco': —Ga' 'uo ga' ỹiliinquip, qaa'le 'ónaxaic da' jaỹim nauó'o, qaidi niỹom. 38 Qá'a na'chi 'enapega't naua' nidii's n'aqtaqa da' ga' jaỹim ỹ'amaqten, qana'chi jaga' liquidiaqte chiỹoqótooue ga' noxop 'me 'ená'am ga' l'auáxac 'me nec'alaxaqui. 39 Dójo' 'enaac so' Jesús, jeda'me náỹi ga' ỹ'amaqten jeso'me, qana'chi jega'me ỹaconguet so' lepaqal ñi' Dios. Qá'a so' lepaqal ñi' Dios maliaxa joca'li da' janac, qá'a so' Jesús maliaxa da' ỹivíta ga' lalóqo' da' qoỹi'ỹoxoden.

So' siỹaxadipi ỹodapecachi da' leenataxac

40 Qana'chi 'uo na' siỹaxadipi 'me demachíchiỹi joca'li dójo', 'enaaco': —Dójo' siỹaxaua ỹátaqta 'eesa da' naqaida da' l'aqtáxanaxanec ñi' Dios 'me qoỹ'axátet'aguet jocalia'cho' da' naỹa'quéna. 41 Qataxa 'uo na' laỹi 'enaac: —Jeda'me naqaida da' net'a nec'alaxaqui. Qaláxasa 'uo na' laỹi 'eet'oi: —¿Táalia'chi toqo' da' chiỹaqá'ña di' Galilea ga' net'a nec'alaxaqui? 42 Qá'a naua' nidii's l'aqtaqa ñi' Dios, jenaa'me ỹ'axa't jega'me net'a nec'alaxaqui, jega'me qoỹinapéga da' lec'óxot jeso'me net'a David, qataxa qoỹinapéga chiỹoqóchii'ña di' Belén 'me l'acháqa' joca'li so' David. 43 Qana'chi so' siỹaxadipi ỹodapecachi da' leenataxac ỹasouaxat so' Jesús. 44 Qataxa 'uo so' sétaaque da' ỹaconé'uo jeso'me da' ỹicoñi', qaláxasa qaỹa ga' nañoxota da' ỹaconé'uo jeso'me.

So' net'alpi sa ỹ'amaqten so' Jesús

45 Qana'chi jeso'me huataxanaq 'me ỹilotalégue so' tamnaxaqui n'iỹílaxa so' huét'a so' fariseopi qataxa jeso'me lasoxola'pi na' netaxaỹáxanaxanecpi. Qana'chi jeso'me net'alpi denataxáatac, 'enaaco': —¿Tóoqo'chi da' sa 'anavíquiiuo jega'me? 46 Qana'chi so' huataxanaq 'enaaco': —¡Ỹátaqta qaỹa da' 'uo ga' 'ená'am dójo' siỹaxaua da' letaxaỹaxac! 47 Qana'chi so' fariseopi 'enaaco': —¿Qa'chi nataq'eno' da' 'oñíita 'anasiñíit'a da' 'chi 'ami qoỹoqovi'n? 48 ¿Séetapega 'uo' ga' 'oonolec na' qadasoxola'pi, 'uootaxa jen'me fariseopi, da' 'uootaxa ỹiỹamaxaden jeso'me? ¡Qaỹa! 49 Qaláxasa jénjo' siỹaxadipi 'me sa ỹaỹáten na' naqátaxacpi 'me chiỹoqo'ot so' Moisés, jen'me taỹá'a qomle da' ỹi'uaxan ñi' Dios. 50 Qana'chi so' Nicodemo 'me 'uo joca'li so' pí'ỹaq da' huet'asop so' Jesús, jeso'me na'chi ỹalquétaaue so' fariseopi. Qana'chi 'enaaco': 51 —Jenaa'me naqátaxaco 'me qo'mi qoỹanema ca'li, jenaa'me ỹ'axa't da' qo'mi sa s'étaq ga' ne'uaxánaguec ga' siỹaxaua, da' 'uootaxa maliaxa sona'li ñaquiáxanaxa, qaidi saỹátenaq jega'me ỹí'et. 52 Qana'chi qoỹinapego' jeso'me, qoỹinaaco': —¿'Am séetapega nataq'en 'am Galilea lé'ec? Ỹa 'anapaxaguenalo qomle naua' nedétrañi l'aqtaqa jiñi'me Dios, qaidi 'aulá'a da' qaỹa ga' l'aqtáxanaxanec jiñi'me da' 'uootaxa chiỹoqóchii'ña joca'li di' Galilea.

Jaso' ỹauo 'me queséeguetaxai

53 Qana'chi ñi' 'oonolec jeso'me taỹapee'ualo naua' l'achaqa'te.

Juan 8

1 Qaláxasa so' Jesús ỹic'ádisee'mec so' qasoxonaxa 'me nanaqa' jan' 'epaq 'olívo. 2 Qana'chi so' maliaxa néte'ta so' nolo' laqáỹa, qana'chi jeso'me ỹitaxa v'iỹílaxa'ỹa jeso' tamnaxaqui. Qana'chi ỹima so' siỹaxadipi nichíi'uo jeso'me, qana'chi jeso'me ñíiñi, qana'chi quet'ot da' lapaxaguenataxanaxac. 3 Qana'chi jen'me dapaxaguenataxáatapeec na' naqátaxacpi qataxa na' fariseopi nauécta'uo jaso'me ỹauo 'me qoỹisomalégue da' necachítapegue' so' sa loua. Qana'chi qonchaalataxanánỹi so' laiñi so' siỹaxadipi 'me huet'asop jeso'me. 4 Qana'chi qoỹinapego' so' Jesús, qoỹinaaco': —'Am 'me 'am paxaguenataxanaxaic, jadójo' ỹauo, jada'me qoỹisomalégue da' nichíuatetapegue' so' sa loua. 5 Naua' laqátaxaco so' Moisés qo'mi ỹamaxalóo'te da' sauoqót'ai na' qa' da' salaataq na' ỹauodipi, da' 'uootaxa 'ená'am jada'me. Qaláxasa 'am, ¿jái'chogamaxa 'éeta ga' 'ad'aqtac? 6 Jeso'me net'alpi 'enaaco' dójo', da' 'chi ỹ'iỹen so' Jesús, da' qaidi ỹañoxot da' qoỹa'uo ga' lasouaxaset. Qana'chi so' Jesús naxañi, qana'chi ỹidétapeelégue so' 'aléua, dedáxatapega jaso' liaxata. 7 Qaláxasa jeso'me net'alpi na'chi quet'ot da' denataxáatac. Qana'chi jeso'me naxaséguem, qana'chi 'enapéga jeso'me net'alpi, 'enaaco': —Da' 'uo ga' 'oonolec da' 'oñíita da' qaỹa ga' loic, na'chiga qomle ga' 'uailégue da' ỹasaxac ga' qa' jada'me. 8 Qana'chi ỹitaxa v'iỹílaxalégue da' naxañi, qana'chi ỹitaxa ỹidétac so' 'aléua. 9 Qaláxasa jeso'me joca'li demachíỹa dójo', qana'chi ỹátaqta ỹima nepecoq jeso'me, qana'chi noqonaxatétaiỹi, 'uáuteegue so' ỹ'axaicáchiipi. Joca'li ỹima jeso'me da' jec, qana'chi so' Jesús qapiỹa'asop jaso' ỹauo 'me qapiỹá'ña jidi'me qouéta'ña. 10 Qana'chi so' Jesús naxaséguem. Joca'li qaỹa ga' ỹilá'a, na'chasóta jaso' ỹauo, qana'chi ỹinatétaco' jaso'me, 'enaaco': —'Am ỹauo, ¿jái'chogamaxa huet'ague ga'me sétaaque da' ỹa'uo ga' 'ane'uaxánaguec? ¿Séetapega qaỹo' ga' ỹañoxot da' 'am ỹalaat? 11 Qana'chi jaso'me 'enaaco': —'Ai', qaỹa, 'am ỹasoxola'. Qana'chi so' Jesús 'enapego' jaso'me, 'enaaco': —Jaỹim nataq'en sa 'am 'te salaat. Naỹi 'am 'oc. Qaláxasa 'ena't qomle da' ỹitaxa 'aua'uo ga' 'adoic.

So' Jesús na'chiso so' ỹicoỹadetalégue jen' 'aléua

12 Qana'chi so' Jesús ỹitaxa 'enapéga so' siỹaxadipi, 'enaaco': —Jaỹim, na'chaỹim 'me secoỹadetalégue jen' 'aléua. Ga' jaỹim 'equegue, qana'chi jega'me 'uo jaga' lecoỹadáxanaqte 'me ỹí'et da' lec'alaxa jega'me. Huá'a, qana'chi jega'me sa nauá'ne' da' huétaaue ga' n'álaxa. 13 Qana'chi so' fariseopi 'enapéga jeso'me, 'enaaco': —'Am mai'chi 'an'axátetapeela't, qana'chi dójo' 'ad'aqtaxanaxac qaỹa 'te laso'vi. 14 Qana'chi so' Jesús 'enaaco': —Jedójo' ỹ'aqtaxanaxac, jeda'me ỹátaqta 'eesa, temaqaidi da' 'uootaxa jaỹim mai'chi ñ'axátetapeela't. Qá'a saỹáteeta di' sachiỹoqchii'ña qataxa jeda'me sat'ague. 'Ami, qaamaxa sa 'auaỹáchiñii ga' sachiỹoxogue qataxa jega'me sat'ague. 15 'Ami da' 'anmichiỹáaque ga' nasouaxaset, qaláxasa 'aupagaqchiñíichiỹi ga' mai'chi leenataxac ga' ỹ'oqóchiỹi siỹaxadipi. Jaỹim, qaamaxa sa ñimitáaque ga' nasouaxaset. 16 Qaláxasa da' 'uootaxa ñimit ga' nasouaxaset, qaláxasa da' ỹimitaxanaxac ỹátaqta chimaqáteegue, qá'a sa ñidóteegue da' 'uo ga' ñimit. Qá'a jiñi'me ỹit'a 'me jaỹim namaq, jiñi'me jaỹim lecochiỹa da' 'uo ga' ñimit nasouaxaset. 17 Jen'me naqátaxacpi 'me 'ami qoỹanema joca'li nedétañi da' 'uootaxa huo'oi gaua' dos da' 'uootaxa 'uo ga' ỹ'axa't, da' nateet'a'salo gaua' l'aqtaxanaxa'j, qana'chi jegaa'me ỹiuen da' qoỹ'amaqte'n. 18 Huá'a, qana'chi jaỹim mai'chi ñ'axátetapeela't, qataxa jiñi'me ỹit'a 'me jaỹim namaq, jiñi'me nataq'en jaỹim ỹ'axátetac. 19 Qana'chi qoỹinatetaco' jeso'me, qoỹiit'oi: —¿Hua'ago' ga' net'ague ga' 'adet'a? Qana'chi so' Jesús 'enaaco': —'Ami sa jaỹim 'auaatetoñii, na'chi 'ená'am ñi' ỹit'a sa 'auaatetoñii. Ma'chaxa taa'chi da' jaỹim 'auaatetoñii, qana'chi nataq'en 'auaatetoñii jiñi'me ỹit'a. 20 Qana'chi so' Jesús 'enaaco' dójo' joca'li maliaxa huétaaue jeso' tamnaxaqui let'ádaic da' dapaxaguenataxáatac, huét'a jidi'me ná'ña jaso' lai't jana' nachítaqtaxanaqte. Qaláxasa qaỹa ga' ỹañoxot da' ỹaconé'uo jeso'me da' ỹicoñi', qá'a jeso'me maliaxa sa ỹivíta ga' lalóqo'.

Jega'me saiỹi, 'ami sa 'auañoxochii da' 'auañíỹa

21 So' Jesús ỹitaxa v'iỹílaxalégue da' detaqa, 'eet'oi: —Jaỹim sec, qana'chi 'ami qomle jaỹim 'anmichíitaaque, qaláxasa 'ami 'adeliviitalóo'te qomle naua' 'adoicódii'. Qá'a jega'me jaỹim sat'ague, qaa'le 'ami sa 'auañoxochii da' 'avídi'ỹa. 22 Qana'chi so' judiopi 'enaaco': —¿Séetapega mai'chi nalaatela't jeda'me qomle, tadeeto' 'enaac da' sa sec'átaxa ga' taỹa? 23 Qana'chi so' Jesús 'enapéga so' judiopi, 'enaaco': —'Ami 'auachiỹoqoỹalégue jénjo' nep'aỹáñi; jaỹim, qaamaxa sachiỹoxogue da' p'áseguem. 'Ami mai'chi 'ad'acháqadii jénjo' 'aléua; jaỹim, qaamaxa sa ỹ'acháqa' jénjo' 'aléua. 24 Tadeno' jaỹim senaac da' 'ami 'adeliviitalóo'te qomle naua' 'adoicódii'. Qá'a da' sa 'au'amaqchíñii da' jaỹim 'me na'chaỹiméta, qana'chi 'ami 'adeliviitalóo'te naua' 'adoicódii'. 25 Qana'chi qoỹinatétac jeso'me, qoỹinaaco': —¿Jái'chi 'am? Qana'chi so' Jesús 'enaaco': —Sóxote maiñaxa da' 'ami s'axátetapeema so' 'uáichiiñi. 26 Jaỹim ỹátaqta maliaxa jalcote na' ỹ'aqtaxanaxac da' 'ami senapegalo qataxa da' ñimit ga' 'adasouaxasíchii. Qaláxasa jiñi'me jaỹim namaq, jiñi'me ỹátaqta 'eesa da'me l'aqtac, qataxa ỹima jen'me s'axátem jen' huetalégue jen' 'aléua, na'chína na' semachíỹa l'aqtacpi jiñi'me. 27 Qaláxasa jeso'me siỹaxadipi sa ỹaỹátenguet jeso'me da' na'chiñi jiñi'me let'a 'me detaqátapega. 28 Tadeeto' so' Jesús 'enapéga jeso'me siỹaxadipi, 'enaaco': —'Ami qomle ỹivíta da' 'auañíỹaseguem jen'me siỹaxaua lec'óxot, qana'chi huá'a qomle 'auañoxochii da' 'auaỹáchiñii da' jaỹim 'me na'chaỹiméta, qataxa da' sa 'chi mai'chi ñachiỹoxola't ga' sé'et, na'chidáta da' jaỹim s'axat ga'me jaỹim ỹapaxaguenec ñi'me ỹit'a. 29 Qá'a jiñi'me jaỹim namaq, jiñi'me jaỹim huet'aguet; jiñi'me ỹit'a sa jaỹim nedoqtéeteegue, qá'a jaỹim na'chi 'eeta't da' sé'et jega'me ỹiỹamaxadéeta jiñi'me. 30 Qana'chi joca'li 'enaac dójo' so' Jesús, qana'chi ỹátaqta jalcote so' ỹ'amaqten jeso'me. Jen'me lec'oqtepi ñi' Dios qataxa jen'me le'uaquíñiisecpi da' n'etaxalóxoc 31 Qana'chi so' Jesús 'enapego' so'me judiopi 'me ỹ'amaqten jeso'me, 'enaaco': —'Ami qomle ỹátaqta 'av'íchii dójo' 'ami s'axatema, qana'chi ỹátaqta 'eesa qomle da' 'ami ỹapaxaguenataqa. 32 Qana'chi 'ami qomle ỹátaqta 'auaatetoñii da' 'eesa lasoxoc, qana'chi dójo' 'eesa ỹátaqta lasoxoc, na'chida da' ỹátaqta 'ami huesóchidiñi qa'e'n. 33 Qana'chi so' judiopi 'enaaco': —Qo'mi mai'chi qo'mi lec'oqtepi so' Abraham; ỹátaqta na'chi 'eeta't qo'mi qaỹa ga' lelatáqa. Qalqaiga ¿tóoqo'chi da' 'am 'auéetapega da' qo'mi huesóchidiñi qomle? 34 Qana'chi so' Jesús 'enapego' jeso'me judiopi, 'eet'oi: —Ỹátaqta 'eesa dójo' 'ami s'axatema, da' ỹima jen'me ỹ'étetac da' l'etaxalóxoc, jen'me 'ená'am da' lelatacpi dójo' n'etaxalóxoc. 35 Jega'me 'chi nelatac, jega'me sa ỹañoxot da' na'chi 'eeta't da' ỹalquétaaue jega'me nec'óqo'tepi. Jega'me nec'óxot, qaláxasa na'chi 'eeta't da' ỹalquétaaue jega'me nec'óqo'tepi. 36 Tadeeto' jen'me lec'óxot ñi' Dios da' 'ami huesóchidiñi qa'e'n, qana'chi ỹátaqta 'eesa da' 'ami huesóchidiñi. 37 Jaỹim ma'le sóxote da' saỹáten da' mai'chi 'ami lec'óqo'te so' Abraham. Qaláxasa 'ami sétaaque jaỹim 'aualaachii ỹasouaxat da' sa 'au'amaqchíñii jeda'me senaac. 38 Jaỹim s'axátet'ape naua' jaỹim ỹaloxonalo ñi' ỹit'a. Qataxa 'ami na'chi 'ená'am 'av'íchiit'ape naua' l'aqtaqa so' 'adet'ai. 39 Qana'chi jeso'me judiopi 'enaaco': —Qo'mi qadet'a so' Abraham. Qana'chi so' Jesús 'enapéga jeso'me, 'enaac: —'Ami da' ỹátaqta 'eesa da' 'adet'ai so' Abraham, qana'chi 'av'íchii toqo' jen'me ỹí'etpi jeso'me. 40 Qaláxasa 'ami, te'me da' 'uootaxa 'ami s'axátetapeema jen'me 'eesa lasoxocpi 'me jaỹim ỹapaxaguenec ñi'me ỹit'a Dios, qaláxasa taqadíta 'ami sétaaque da' jaỹim 'aualaachii. ¡Qaamaxa so' Abraham ỹátaqta qaỹa da' 'uo ga' ỹí'et 'ená'am dójo'! 41 'Ami, qaamaxa na'chi 'auadénaxachiichiỹi jen'me ỹí'et so' 'adet'ai. Qana'chi jeso'me judiopi 'enaaco': —Qo'mi sa 'chi qo'mi chíuaxase'te nec'óqo'te; qo'mi 'oonolec ñi' qadet'a Dios. 42 Qana'chi so' Jesús 'enapéga jeso'me, 'enaaco': —Da' ỹátaqta 'eesa da' 'adet'ai ñi' Dios, qana'chi 'ami toqo' ỹátaqta jaỹim 'auauochíỹic. Qá'a jaỹim na'chi sachiỹoqot'ot jiñi'me, qana'chi naỹi 'ami souetaavlo. Jaỹim sa mai'chi ñachiỹoxola't da' ñanac, qá'a jiñi'me jaỹim namaq. 43 ¿Tóoqo'chi 'ami sa 'auaỹáchiñii jeda'me 'ami s'axátetapeema? Qá'a ỹasouaxat da' séetapega sa 'anaquiáxañiỹa jeda'me ỹ'aqtaxanaxac. 44 Jeso'me 'adet'ai na'chiso jeso'me paiỹac 'me qadó'o. Jeso'me 'ami lalémaxase'te, tadeeto' 'ami sétaaque da' 'av'íchii jega'me 'éetapeec jeso'me. Jesójo' qadó'o, jeso'me ỹátaqta laataxanaxaic. Qana'chi chiỹoqóchii'ña joca'li ỹímta qoỹí'et jénjo' 'aléua, jeso'me sa huet'ot ga' 'eesa lasoxoc, chan'eesa sa 'eesa ga' l'aqtac. Jeso'me da' 'uootaxa nasaxáiỹi ga' loqovínaxanaxac, qana'chi ỹátaqta ỹipaquíchiỹi da' mai'chi lasoxoc. Qá'a jeso'me ỹátaqta pecaic, qataxa na'chiso so' let'a da' nesepegaxanaxac. 45 Qá'a jaỹim s'axátetac jeda'me ỹátaqta 'eesa lasoxoc, qana'chi 'ami sa jaỹim 'aviỹamaxadíñii. 46 ¿Jái'chogamaxa 'oonolec da' 'oñíita da' ỹañoxot da' ỹ'axat da' 'uootaxa 'uo ga' ỹasouaxaset? Qataxa da' 'uootaxa s'axátetac jeda'me 'eesa lasoxoc, qalqaiga ¿tóoqo'chi sa jaỹim 'au'amaqchíñii? 47 Jega'me chiỹoqot'ot ñi' Dios, jega'me naquiáxanalo naua' l'aqtaqa jiñi'me. Qaláxasa 'ami, da' sa 'auachiỹoqoit'ot jiñi'me, chan'eesa sa 'te da' 'anaquiáxañii.

So' Jesús chi'ena 'uo joca'li maliaxa qaỹa so' Abraham

48 Qana'chi so' judiopi 'enapéga jeso'me Jesús, 'enaaco': —Qo'mi ỹátaqta 'eesa dójo' qad'aqtac joca'li 'am senqátapega 'chi 'am Samaria lé'ec qataxa 'uo ñi' 'adé'ec nataqtáqaic. 49 Qana'chi so' Jesús 'enaaco': —Jaỹim qaỹa ga' ỹí'ec nataqtáqaic. Qá'a jeda'me s'étetac, si'ỹoxodéetac ñi'me ỹit'a, qaláxasa 'ami sa jaỹim 'avi'ỹoxodíñii. 50 Jaỹim sa sañoxot da' sétaaque da' jaỹim qoỹi'ỹoxoden, qaláxasa 'uo jiñi'me sétaaque da' jaỹim qoỹi'ỹoxoden, qana'chiñi jiñi'me ỹí'et ga' ne'uaxánaguec ga' siỹaxaua. 51 Ỹátaqta 'eesa dójo' 'ami s'axatema, ga' ỹalaxaguet da'me senaac, qana'chi jega'me sa nauá'ne' da' ỹileu. 52 Qana'chi so' judiopi 'enapego' jeso'me, 'enaaco': —Qo'mi naỹi saỹátenaqta da' 'am 'uo ñi' 'adé'ec nataqtáqaic. Qá'a so' Abraham qataxa ỹima so' l'aqtáxanaxanecpi ñi' Dios, jeso'me joca'li ỹileu, qalqaiga 'am 'onapeela't: “Ga' ỹalaxaguet jega'me senaac, qana'chi jega'me sa nauá'ne' da' ỹileu.” 53 ¿'Am séetapega 'anapacalégue jeso' qadet'a Abraham? Jeso'me joca'li ỹileu, qataxa ỹima jeso'me l'aqtáxanaxanecpi ñi' Dios. Qalqaiga ¿jái'chi 'amo'? 54 Qana'chi so' Jesús 'enaaco': —Da' 'uootaxa jaỹim mai'chi ñi'ỹoxodéetapeela't, qana'chi dójo' ñi'ỹoxodénaxac, jeda'me qaỹa ga' náỹi. Qaláxasa jiñi'me jaỹim ỹi'ỹoxodéetac, na'chiñi jiñi'me ỹit'a jiñi'me 'aviñíitapega nataq'en 'adet'ai Dios. 55 Qaláxasa 'ami sa 'auaatetoñii jiñi'me; jaỹim, qaamaxa saateton jiñi'me. Qá'a da' 'uootaxa da' jaỹim senaac da' sa saateton, qana'chi jaỹim 'chi soqovínaxaatac, qana'chi sena'ama 'ami. Qaláxasa jaỹim ỹátaqta saateton jiñi'me, qataxa salaxaguet ga' 'enaac. 56 Jeso'me Abraham 'me 'adet'ai, jeso'me joca'li ỹátaqta 'uo da' netónaxac da' ỹilóchiỹi ga' nolo' 'me ỹalóxoqui. Joca'li ỹilóchiỹi, qana'chi jeso'me ỹátaqta saqáchiỹi da' netónaxac. 57 Qana'chi so' judiopi 'enapego' so' Jesús, 'enaaco': —'Am sona'li da' 'auovi't gaua' cincuenta 'uóidi, qalqaiga ¿qonapeela't da' 'auauana so' Abraham? 58 Qana'chi so' Jesús 'enaaco': —Jaỹim ỹátaqta 'eesa dójo' 'ami s'axatema, joca'li maliaxa qaỹa so' Abraham, qaa'le chi'ena da' jaỹim 'uo. 59 Huá'a, qana'chi qoỹacona na' qa' da' qaidi qoỹasaxac so' Jesús. Qaláxasa jeso'me nañoxóchiñi, cá'ai so' tamnaxaqui, táaue so' siỹaxadipi, qana'chi jec.

Juan 9

So' Jesús nataden jeso'me nacai'ỹi joca'li da' laqanamaxa

1 Joca'li quéta so' Jesús, qana'chi ỹisomalégue so' siỹaxaua 'me nacai'ỹi da' laqanamaxa. 2 Qana'chi saua' lapaxaguenataqa ỹinatétrac jeso'me, 'enapega'to': —'Am 'me 'am paxaguenataxanaxaic, ¿tá'nooqo'chi jiñi'me jiñíjo' siỹaxaua da' nacai'ỹi da' laqanamaxa? ¿Séetapega ỹasouaxat da' 'uo ga' lasouaxase't gaua' let'al, 'uootaxa ỹasouaxat ga' mai'chi lasouaxaset jiñi'me? 3 Qana'chi so' Jesús 'enapegalo jesaa'me, 'enaaco': —Sa ỹasouaxat ga' mai'chi lasouaxaset jiñi'me, 'uootaxa ga' lasouaxase't gaua' let'al. Qá'a jeda'me na'chi qoỹiná'ac, qaidi qoỹilá'a jega'me ỹaqanatet da' ỹí'et ñi' Dios da' chiỹoqóchiỹi jiñi'me. 4 Qá'a ỹatemaliaxa naỹi da' maliaxa 'uo jen' nolo', qana'chi jaỹim sé'et da' l'onataxanaxac ñi'me jaỹim namaq. Qá'a náta ga'me pí'ỹaq 'me huáỹi da' qaỹa 'te 'uo ga' qoỹí'et. 5 Naỹi da' jaỹim maliaxa souét'a jen' 'aléua, qaláxasa jaỹim 'me na'chaỹim lecoỹadáxat jen' 'aléua. 6 Joca'li ỹim da' 'enaac dójo', qana'chi so' Jesús natóxo'ña na' 'aléua, qana'chi ỹí'et so' senal, qana'chi ỹiỹoxolóo'te naua' l'ai'te jeso'me qanam. 7 Qana'chi 'enapego' jeso'me, 'enaaco': —'Aue qomle, 'anapi'l, 'auc'átaxasó'ma jañi' lai't na' noxop lenaxat Siloé —dójo' nenaxat Siloé náỹi da' Namaxasec. Qana'chi jeso'me qanam jec da' napi'l. Joca'li n'iỹílaq, qana'chi nauáachiiñi. 8 Qana'chi jen'me leseecpi qataxa jen'me ỹamaxac jeso'me joca'li da' qanam, jen'me 'enaaco': —¿Séetapega sa naqaida dójo' jeda'me ñíchiiñi naale da' dasélaxaatac? 9 Qana'chi 'uo jen'me 'eet'oi: —Já'a, naqaida. Qataxa 'uo na' 'enaac: —'Ai', sa naqaida, jeda'me 'chi latáxasoxoua. Qaláxasa jeso'me siỹaxaua mai'chi n'axátetapeela't, 'enaaco': —Já'a, na'chaỹim. 10 Qana'chi qoỹinatétac, qoỹiit'oi: —¿Hua'ago' ga' 'éeta da' 'am sóxote da' 'anauáachiiñi? 11 Qana'chi jeso'me 'enaaco': —Jeso'me siỹaxaua lenaxat Jesús, jeso'me ỹí'et so' senal. Ỹimat, qana'chi ỹ'ameelóo'te naua' ỹ'ai'te. Qana'chi jaỹim 'enapéga, 'eet'oi: “'Auc'átaxasó'ma qomle jañi' lai't na' noxop, lenaxat Siloé, qana'chi 'anapi'l.” Qana'chi jaỹim sec, qana'chi cana'le semat da' ñapilódaxac, qana'chi sañoxot da' ñauáachiiñi. 12 Qana'chi qoỹinatétac jeso'me, qoỹinaaco': —¿Hua'ague ga' huet'ague jega'me siỹaxaua? Qana'chi jeso'me 'enaaco': —Neegue't.

So' fariseopi ỹinatétac so' qanam 'me nauáachiiñi qoỹin

13 Qana'chi qoỹauée'uo so' fariseopi jeso'me siỹaxaua 'me qanam joca'li. 14 Qá'a ỹasouaxat da' mataxaqui so' nolo' 'me huétooue da' ỹí'et so' senal so' Jesús da' nataden jeso' qanam, 15 chan'eesa so' fariseopi ỹitaxa v'iỹílaxalégue da' ỹinatétac so' siỹaxaua da' jái'chogamaxa hua'ague ga' 'éeta da' 'auañoxot da' 'anauáachiiñi. Qana'chi jeso'me 'enaaco': —Jeso'me ỹ'ameelóo'te naua' ỹ'ai'te so' senal. Ỹimat, qana'chi ñapi'l, qana'chi naỹi sañoxot da' ñauáachiiñi. 16 Qana'chi 'uo so' fariseopi na' 'eet'oi: —Sójo' siỹaxaua 'me ỹí'et dójo', jeso'me sa chiỹoqo'ot ñi' Dios, qá'a sa ỹalaxalégue di' nolo' mataxaqui. Qaláxasa 'uo na' 'eet'oi: —¿Hua'ago' ga' 'éeta da' ỹañoxot da' ỹí'et dójo' n'anec 'me sa qoỹauanápiỹi, da' 'uootaxa 'itaxalóxoic jeso'me? Huá'a, qana'chi ỹodapecachi da' leenataxac sójo' siỹaxadipi. 17 Qana'chi ỹitaxa qov'iỹílaxalégue da' qoỹinatétac jeso'me siỹaxaua 'me qanam joca'li, qoỹinaaco': —'Am, ¿hua'ague ga' 'éeta ga' 'ad'aqtac jeso'me siỹaxaua 'me ỹauo'oi naua' 'ad'ai'te? Qana'chi jeso'me 'enaaco': —Jaỹim senaac da' jeso'me l'aqtáxanaxanec ñi' Dios. 18 Qaláxasa so' judiopi sa ỹ'amaqten jeso'me siỹaxaua da' qanam joca'li qataxa naỹi nauáachiiñi. Qana'chi cha ỹivid'alo da' qoỹiỹáxanalo jesaa'me let'al jeso'me qanam qonataden. 19 Qana'chi qoỹinatét'ape jesaa'me, qoỹiit'oi: —¿Séetapega na'chida da' 'ac'óxochii dójo', jeda'me 'aviñíitapega da' nacai'ỹi da' laqanamaxa? ¿Hua'ague ga' 'éeta jeda'me da' ỹañoxot da' nauáachiiñi? 20 Qana'chi saua' let'al 'enapega'to': —Qo'mi saỹátenaq jeda'me, da' na'chida da' qochalec 'me nacai'ỹi joca'li da' laqanamaxa. 21 Qaláxasa qo'mi sa saỹátenaq jái'chogamaxa hua'ague ga' 'éeta da' nauáachiiñi, qataxa sa saỹátenaq jái'chogamaxa natade'n naua' l'ai'te jeda'me. N'óota da' 'aunachii da'me, qá'a jeda'me sóxote da' ỹ'axaic, jeda'me ỹañoxot da' mai'chi 'ami d'aqtaxanema. 22 'Eedápega dójo' saua' let'al, ỹasouaxat da' 'uo da' loqolánaqa', qá'a so' judiopi sóxote da' qonmachiỹi da' qoỹ'odédaiỹi da' 'uootaxa huétaaue jega' lemáxaqui na' judiopi gamachaqaiga siỹaxaua da' 'uootaxa 'éetapega so' Jesús da' naqaiso so' net'a nec'alaxaqui. 23 Na'chidáta da' 'uo da' saua' let'al 'enapega'to': “'Aunachii jeda'me, qá'a jeda'me ma'le ỹ'axaic.” 24 Qana'chi so' judiopi ỹitaxa v'iỹílaxalégue da' ỹiỹáxanee'ga so' siỹaxaua 'me qanam joca'li. Qana'chi qoỹíitapega, qoỹiit'oi: —Naỹi qo'mi ỹauaachiilo ñi' Dios, ỹa qo'mi 'au'aqtaxanema, qá'a qo'mi saỹátenaq sójo' siỹaxaua, jeso'me 'itaxalóxoic. 25 Qana'chi jeso'me 'enaaco': —Jaỹim sa saỹáten jeso'me 'itaxalóxoic, 'uootaxa sa naq'áita. Na'chidáta da' jaỹim saỹáten da' jaỹim qanam joca'li, qaláxasa naỹi ñauáachiiñi. 26 Qataxa qov'iỹílaxalégue da' qoỹinatétac, qoỹinaaco': —¿Hua'ago' joca'li ga' 'am 'éet'ec jeso'me? qataxa ¿hua'ague ga' 'éeta joca'li ỹauo'oi naua' 'ad'ai'te? 27 Qana'chi jeso'me 'enaaco': —Sóxote ỹim maiñaxa da' 'ami s'axátetapeema, qalqaiga sa jaỹim 'au'amaqchíñii. ¿Tá'nooqo'chi sétaaque da' ỹitaxa 'ami s'aqtaxanema? ¿'Uootaxa nataq'en 'ami sétaaque da' 'oquiỹiỹi jeso'me? 28 Qana'chi jeso'me judiopi ỹi'uena't jeso'me, qana'chi qoỹíitapega, qoỹinaac: —'Am séetapega 'oquétapegue' jeso'me siỹaxaua; qo'mi, qaamaxa qolqatalégue so' Moisés. 29 Qo'mi saỹátenaqta so' Moisés detaqátapegue' joca'li ñi' Dios; qaamaxa jeso'me siỹaxaua qo'mi sa 'chi sanómaxa ga' chiỹoxogue. 30 Qana'chi jeso'me siỹaxaua 'enaaco': —¡Ỹátaqta ỹoxosá'a dójo'! ¡Qa'chi 'ami sa 'auaỹáchiñiỹo' ga' chiỹoxogue jeso'me! ¡Qaláxasa jeso'me ỹañoxot da' ỹauo'oi naua' ỹ'ai'te! 31 Qo'mi saỹátenaqta da' ñi' Dios sa demachíỹa na' 'itaxalóxoicpi; na'chínata jen'me ỹi'ỹoxodéetac qataxa ỹí'et jega'me 'éetapeec jiñi'me, na'chína na' demachíỹa. 32 Qá'a ỹátaqta qaỹoogamaxa qodemachíỹapeelégue da' 'uootaxa 'uo ga' nauáachiiñi qa'en ga' siỹaxaua da' 'uootaxa nacai'ỹi da' laqanamaxa. 33 Jeso'me siỹaxaua da' 'uootaxa sa chiỹoqo'ot ñi' Dios, qana'chi sa ỹañoxot taa'le 'uo ga' ỹí'et. 34 Qana'chi qoỹinapego' jeso'me, qoỹinaaco': —'Am 'me ỹátaqta 'auanacai'ỹi na' 'adasouaxasetpi, qalqaiga ¿tóoqo'chi sétaaque da' qo'mi 'auapaxague'n? Huá'a, qana'chi qoỹamaxáiỹi jeso'me jeso'me lemáxaqui so'me judiopi.

Jen'me sa di'ỹoq da' laqanamaxa

35 So' Jesús p'iỹíỹa da' qoỹamaxáiỹi so'me qanam joca'li. Qana'chi joca'li nauá'ne', qana'chi 'enapéga, 'enaaco': —¿'Am séetapega 'au'amaqten so' lec'óxot ñi' Dios? 36 Qana'chi so' siỹaxaua 'enaaco': —'Am ỹasoxola', ỹa jaỹim 'au'axátem nái'chosomaxa, qaidi s'amaqten so'me. 37 Qana'chi so' Jesús 'enaaco': —Ma'le sóxote da' 'aulot'ot jen'me. Na'chaỹim 'me jaỹim 'autaqátapegue'. 38 Qana'chi jeso'me siỹaxaua ỹisocoto naua' liliictel so' Jesús, qana'chi 'enapéga, 'enaaco': —'Am ỹasoxola', 'am s'amaqten. 39 Ỹim, qana'chi so' Jesús 'enaaco': —Jaỹim ñanaỹa jen' 'aléua, da' qaidi qoỹa'uo ga' lasouaxaset ga' siỹaxaua, tetoqo' jega'me sa nauáañi, qaa'le nauáachiiñi, qataxa jega'me nauáachiiñi, qaláxasa sa nauáañi qoỹin. 40 'Uo na' fariseopi na' huétauo, qana'chi naquiáxachiỹi dójo', qana'chi denataxáatac, 'enaaco': —¿Qo'mi séetapega maiñaxa nataq'en sa ñauanáxañi? 41 Qana'chi so' Jesús 'enaaco': —'Ami toqo' sa 'anauañíiñi, qana'chi qaỹa ga' 'adasouaxasíchii. Qaláxasa 'ami 'aviñíitapega da' 'anauañíichiiñi, chan'eesa 'uo da' 'adasouaxasíchii.

Juan 10

Qodaloqtenaxana jaso' n'aanaxate lai't

1 Ỹátaqta 'eesa dójo' 'ami s'axatema, ga' sa taa'uet ga' nasom jaga' n'aanaxate lai't da' 'uootaxa ỹinoxoneuo, na'chidáta da' tauó'o na' lai, qa'chi na'chiga jega'me cacháxaic qataxa huódaxanaxaic. 2 Qaláxasa jega'me tato'uet ga' som, qana'chi naqaiga jega'me n'aanaxate nouatoqo't. 3 Qana'chi jega'me som ló'o ỹ'ouateguet jega'me, da' qaidi p'áuo, qataxa jan'me n'aanaxatepi ỹaateton da' laviliỹáxac jega'me. Qana'chi jega'me ỹiỹaxat'aguet na' lenaxatpi jan'me n'aanaxate, qana'chi chiỹoxotáaue jaso' lai't. 4 Da' ỹimat da' naqatéegue ỹima jaso' lalopi n'aanaxate, qana'chi jeso'me 'uáuta. Qana'chi jan'me n'aanaxatepi ỹic'atetalégue, qá'a jan'me ỹaateton da' laviliỹáxac jeso'me. 5 Qana'chi jan'me sa 'equegue jega'me sa ỹaateton. Na'chidáta da' dasói'ỹem jega'me, qá'a sa ỹaateton da' laviliỹáxac jega'me ỹaqá'a. 6 So' Jesús ỹí'et dójo' daloqtenaxana, qaláxasa so' fariseopi sa ỹaỹátenguet jeda'me 'enaac jeso'me.

So' Jesús na'chiso so' 'ónaxaic n'aanaxate nouatoqo't

7 Qana'chi so' Jesús ỹitaxa v'iỹílaxalégue da' d'aqtaxan, 'enaaco': —Ỹátaqta 'eesa dójo' 'ami s'axatema, 'enaac: Jaỹim 'me na'chaỹim som 'me jaỹim ladíiuo jana' n'aanaxate. 8 Ỹima jen'me n'áuteuo joca'li maliaxa sa ñanac, jen'me cacháxaicpi qataxa huódaxanaxaicpi, qaláxasa jan'me n'aanaxatepi sa ỹoqo'cha jen'me. 9 Jaỹim 'me na'chaỹim som. Ga' jaỹim tato'uet, qana'chi jega'me nec'aléegue. Qana'chi jega'me 'ená'am jaga' n'aanaxate da' p'áuo qataxa p'áiỹi jaga' lai't, qana'chi ỹauana ga' jaloq 'auaqapi. 10 Ga' cacháxaic da' janac, qaa'le na'chidáta da' 'uo ga' decachíỹa qataxa 'uo ga' ỹalaat qataxa 'uo ga' noláxachiñi. Jaỹim, qaamaxa ñanac, da' qaidi 'uo da' lec'alaxa jan' n'aanaxate, qataxa da' 'chi tatelégue dójo' lec'alaxa. 11 Jaỹim 'me na'chaỹim 'ónaxaic n'aanaxate nouatoqo't. Ga' 'ónaxaic n'aanaxate nouatoqo't, jega'me ỹaalégue da' l'óiỹaxac jan'me n'aanaxate. 12 Qaláxasa jega'me 'chi d'onataxáatapiỹi jaga' laso'vi, jega'me da' 'uootaxa ỹila'aguet jega'me di'quiỹaac, qana'chi jega'me 'etelégue jaga'me n'aanaxatepi da' dasóiỹi, qá'a jega'me sa ỹátaqta nouatoqo't jan'me n'aanaxate, qataxa sa ỹátaqta lalémaxasete jan'me. Qana'chi jega'me di'quiỹaac ỹaconóoue jan'me n'aanaxatepi qataxa ỹilagaxatapíỹi. 13 Jesójo' siỹaxaua dasóiỹi, qá'a jeso'me 'chi d'onataxáatapiỹi jaga' laseete, tadeno' sa ỹitená'a jan' n'aanaxate. 14-15 Jaỹim 'me na'chaỹim 'ónaxaic n'aanaxate nouatoqo't. Dójo' 'éeta ñi' ỹit'a da' jaỹim ỹaateton, qataxa da' jaỹim saateton jiñi'me, na'chidáta da' 'éeta da' jaỹim saateton jan'me ỹilo n'aanaxate, qataxa jan'me nataq'en ỹátaqta jaỹim ỹaateton. Qataxa jaỹim sanéegue da' ỹ'óiỹaxac ỹasouaxat jan'me. 16 'Uo nataq'en jan'me ỹilo n'aanaxate 'me sa ỹaleeguet jan'me nétaaue jañi' lai't jana' n'aanaxatepi. Jan'me ỹiuen nataq'en da' ñauéeuo. Jan'me qomle ỹátaqta jaỹim ỹalaxaguet, huá'a, qana'chi 'oonole jaga' neuataisepi n'aanaxate, qataxa 'oonolec jega'me nouatoqo't. 17 Ñi' ỹit'a ỹátaqta jaỹim ỹauotec, qá'a jaỹim sanéegue da' ỹ'óiỹaxac. Qaláxasa qomle ỹim da' sanéegue, qana'chi ỹitaxa ñ'iỹílaxatela't. 18 Qaỹa ga' ỹañoxot da' deuootáxanec dójo' ỹ'óiỹaxac, qaláxasa mai'chi jaỹim chiỹaqaỹi da' san jeda'me. Jaỹim 'uo da' senec da' san jeda'me, qataxa da' ñ'iỹílaxatela't. Naqaida da'me jaỹim ỹamaxalégue ñi'me ỹit'a. 19 Qana'chi so' judiopi joca'li demachíỹa dójo' l'aqtac jeso'me, qana'chi ỹitaxa v'iỹílaxalégue da' ỹodapecachi da' leenataxac. 20 Qana'chi jalcote jeso'me siỹaxadipi na' 'enaac: —¿Tóoqo'chi da' 'aualáqaitapeeguet jeda'me? Qá'a 'uo ñi' lé'ec nataqtáqaic, qataxa jaláxaic. 21 Qaláxasa 'uo jeso'me laỹi 'me 'enaac: —Qaỹa ga' siỹaxaua da' 'uootaxa 'uo ga' lé'ec nataqtáqaic da' 'éeta dójo' da' letaxaỹaxac. Qá'a ¿séetapega ỹañoxot ga' 'uo ga' lé'ec nataqtáqaic da' nauáachiiñi qa'en ga' qanam?

So' judiopi sa ỹ'amaqten so' Jesús

22 Ma'le jó'om joca'li so' néta'ña di' Jerusalén 'uo so' lemáxac da' qoueenata so' nolo' 'me huétooue joca'li qoỹanot ñi' Dios jeso' tamnaxaqui. 23 So' Jesús huétaaue so' tamnaxaqui, huét'a jeso'me qoỹimatét'ac nasoxoc so' Salomón. 24 Qana'chi so' judiopi ỹimá'uo jeso'me. Qana'chi qoỹíitapega, qoỹinaaco': —¿Jái'chi ga' 'éeta, da' ỹátaqta qo'mi 'anachimaxade'to? Da' ỹátaqta na'chi'am 'me qoỹ'axátet'aguet net'a nec'alaxaqui, qana'chi n'óota toqo' da' ỹátaqta qo'mi 'au'aqtaxat'ema, qana'chi ja'ñi. 25 Qana'chi so' Jesús 'enaaco': —Sóxote maiñaxa da' 'ami s'aqtaxáatapeema, qalqaiga sa jaỹim 'au'amaqchíñii. Jen'me s'étetacpi, na'chína jen' jaỹim ỹamaxalégue ñi' ỹit'a, na'chína na' 'ená'am da' 'ami d'aqtaxanema. 26 Qaláxasa sa 'au'amaqtenataxañii, qá'a sa na'chi'ami jan'me ỹiloise n'aanaxate. Jeda'me sóxote da' 'ami s'axatema joca'li. 27 Qá'a jan'me n'aanaxate 'me ỹiloise, jan'me ỹaateton da' ỹaviliỹáxac, qataxa jaỹim saateton jan'me, qataxa jan'me jaỹim quétapegue'. 28 Jaỹim sanem jan'me da' lec'alaxa 'me qaỹa 'te loiquiaqa'. Huá'a, qana'chi sa ỹileu, qataxa qaỹa ga' ỹañoxot da' n'oláiỹi jen' ỹouaq. 29 Jan'me jaỹim ỹanem ñi' ỹit'a 'me napacalégue ỹima, qataxa jan'me sa 'te 'uo ga' n'oláiỹi da' louaq jiñi'me. 30 Jaỹim qataxa ñi' ỹit'a qo'mi 'oonolec da' qadasoxoc. 31 Qana'chi so' judiopi ỹitaxa ỹacona na' qa' da' ỹasaq jeso'me. 32 Qana'chi so' Jesús 'enaaco': —Jaỹim ỹátaqta jalcote na' sé'et ỹiỹamqáchiiñi da' 'ami 'auauañíichiỹi, chiỹoqóchiỹi da' l'añaxac ñi' ỹit'a. ¿Jái'chogamaxa sasoilégue jen'me da' 'uo da' 'ami sétaaque da' jaỹim 'auasaqáiỹi? 33 Qana'chi jeso'me judiopi 'enaaco': —Sa 'am sasaxásoxoc na' qa' ỹasouaxat jega'me ỹiỹamqáchiiñi 'au'étetac. 'Am sasaxásoq, ỹasouaxat naua' 'ad'aqtaqa ỹátaqta nep'aguee'to ñi' qan'étoqo't. Qamaale 'am 'chi 'am siỹaxaua, qalqaiga qonapeela't da' 'am qan'étoqo't. 34 Qana'chi so' Jesús 'enapego' jeso'me, 'enaaco': —Na' naqátaxacpi 'me 'ami qoỹanema joca'li, nedétrañi l'aqtaqa ñi' qan'étoqo't 'me 'enáacjo': “'Ami, 'me 'ami n'étoqo'tpi.” 35 Qo'mi saỹátena' naua' nedétrañi l'aqtaqa ñi' qan'étoqo't, jenaa'me sa qoỹoqolgue't, qataxa ñi' qan'étoqo't ỹimatá'ac da' n'étoqo'tpi so'me siỹaxadipi 'me ỹaconguet da' l'aqtac. 36 Qataxa da' 'uootaxa ñi'me qan'étoqo't jaỹim ỹiỹotá'a joca'li, qana'chi jaỹim namaxa jen' 'aléua, ¿tóoqo'chi 'ami 'aviñíitapega da' nep'aguee'to naua' ỹ'aqtaqa jiñi'me, ỹasouaxat da' séetapega da' jaỹim lec'óxot jiñi'me? 37 Da' 'uootaxa sa sé'et jeda'me l'onataxanaxac ñi' qan'étoqo't, qana'chi sa jaỹim taa'le 'au'amaqchíñii. 38 Qaláxasa da' 'uootaxa s'étetac jeda'me, qana'chi temaqaidi táxa da' sa jaỹim 'aviỹamaxadíñii, qaláxasa 'aviỹamaxadíñii jen'me ỹ'onatacpi, qaidi ỹima 'auaỹáchiñii da' ñi' ỹit'a jaỹim huet'aguet, qataxa jaỹim souet'aguet jiñi'me. 39 Huá'a, qana'chi ỹitaxa sétaaque da' qoỹaconé'uo da' qoỹicoñi', qaláxasa so' Jesús nelotaxan. 40 Qana'chi so' Jesús taiỹi jeda'me p'aiỹi da' liiséguem jaso' c'atena jidi'me ñáchi Jordán, jidi'me 'aléua 'me huét'a joca'li dachiláxanataxáatac so' Juan. Qana'chi huét'a jidi'me. 41 Ỹátaqta jalcote so' siỹaxadipi 'me ỹic'átetapega so' huét'a jeso'me. Qana'chi jeso'me siỹaxadipi 'enapega'to': —Ỹátaqta 'eesa joca'li jeso' Juan qaỹa 'te ỹí'et ga' n'anec 'me sa qoỹauanápiỹi, qaláxasa ỹima joca'li jen'me ỹ'axátetac, cana'le ỹ'axátet'aguet jiñi'me siỹaxaua, ỹátaqta ỹipaquíchiỹi. 42 Qana'chi ỹátaqta jalcote so' ỹiỹamaxaden so' Jesús joca'li huá'ña jeso'me 'aléua.

Juan 11

Ỹileu so' Lázaro

1 'Uo so' siỹaxaua, lenaxat Lázaro, jeso'me ỹilhuaac. Jeso'me l'acháqa' di' Betania di'me noic 'me l'acháqa' jaso' María qataxa jaso' laqáỹa Marta. 2 Jasójo' María, 'me laqáỹa so' Lázaro jeso'me ỹilhuaac, naqaso jaso'me ỹicodelóo'te joca'li saua' lapia'te so' Jesús jeso'me codáxaqui, qana'chi daqaqa qa'en so' laỹoxot. 3 Qana'chi jesaua' dos naqáỹa' ỹamaxalo joca'li da' l'aqta'j so' Jesús, 'enapega'to': —'Am qadesaliaxanec, jidi'me 'anauotaxaua, jidi'me ỹilhuaac. 4 Qana'chi so' Jesús joca'li demachíỹa dójo', qana'chi 'enaaco': —Dójo' neleuaxa, jeda'me sa taỹá'a ga' neleuaxa. Na'chidáta da' qaidi jeda'me ỹañoxot da' chiỹaqaỹi da' li'ỹoxodic ñi' Dios, qataxa qaidi dójo' neleuaxa chiỹaqaỹi nataq'en da' li'ỹoxodic jen' lec'óxot ñi' Dios. 5 Temaqaidi da' so' Jesús ỹátaqta nauotaxaua jaso' Marta, qataxa jaso' laqáỹa, qataxa so' Lázaro, 6 qaláxasa joca'li qoỹ'axátem so' Lázaro da' ỹilhuaac, qaláxasa jeso'me maliaxa coovlo saua' dos noloqo'te da' maliaxa huét'a jega'me néta'ña. 7 Joca'li ỹim, qana'chi 'enapegalo saua' lapaxaguenataqa, 'enaaco': —Ỹitaxa s'iỹílaxasoxogue qomle da' Judea. 8 Qana'chi saua' lapaxaguenataqa 'eedapego' jeso'me, 'enapega'to': —'Am 'me 'am paxaguenataxanaxaic, maliaxa ỹímta da' na' judiopi 'me l'acháqa' jidi'me 'aléua sétaaque da' 'am ỹalaat, da' 'am ỹidó'oc na' qa', qalqaiga ¿tóoqo'chi da' 'am ỹitaxa sétaaque da' 'aỹa jidi'me? 9 Qana'chi so' Jesús 'enaaco': —¿Qo'li sa 'eesa di' 'oonolec nolo' da' ỹóvi' na' doce hora? Já'a, qá'a ñi' 'oonolec siỹaxaua da' 'uootaxa ỹiuoxóotac di' nolo', qaláxasa sa 'te chiỹaqséguem, qá'a jega'me ỹilot'egue na' ỹ'oqóchiiñi jen' 'aléua. 10 Qaláxasa ga' 'oonolec da' 'uootaxa ỹiuoxóotac di' pí'ỹaq, qana'chi jega'me ỹañoxot da' chiỹaqséguem, qá'a qaỹa ga' ỹ'oqóchiiñi. 11 Joca'li ỹim, qana'chi so' Jesús 'enaaco': —Di' qanauotaxaua Lázaro, jidi'me d'ochítac, qaláxasa jaỹim sec'áta qaidi ñoqtoxon. 12 Qana'chi saua' lapaxaguenataqa 'eedápega: —'Am qadesaliaxanec, jega'me da' 'chi d'ochítac, qa'chi 'eesa di'ỹoqóta qomle da' ỹiỹamaxañi. 13 Qaláxasa so' Jesús 'éetapega da' so' Lázaro ỹátaqta ỹileu, qaláxasa saua' lapaxaguenataqa 'éetrapega da' jeso'me detaqátapega da' ỹátaqta n'ochaxa. 14 Qana'chi so' Jesús ỹátaqta d'aqtaxanema jesaa'me, 'enaaco': —Jidi' Lázaro, jidi'me sóxote ỹileu. 15 Qaláxasa jaỹim ỹátaqta 'uo da' ñitónaxac da' sa souét'a di'me. Qá'a jeda'me ỹátaqta ỹiỹamqáchiiñi ỹasouaxat da' 'oñíita, qaidi 'au'amaqtenataxañii. Qaláxasa qolaq qomle, sec'átaxa qomle. 16 Qana'chi jeso'me Tomás, 'me qoỹimatá'ac da' huadiáxaic, 'enapegalo saua' laqáỹa' 'me napaxaguenaxa'u, 'enaac: —Qolaq nataq'en qo'mi, qaidi nataq'en qadeleuaxaua jeda'me.

So' Jesús na'chiso so' nec'alaxadiséguem jen' napa'lpi qataxa na'chiso so' nec'alaxa

17 Joca'li ỹivídeuo so' Jesús, qana'chi ỹisomalégue so' Lázaro sóxote cuatro saua' noloqo'te da' qoỹisiiñi. 18 Jidi'me Betania, sa qaỹáaque di' Jerusalén, ỹóvi' dos kilómetros y medio di' sequé'ta. 19 Qataxa ỹátaqta jalcote so' judiopi 'me ỹic'áta jaso' Marta qataxa jaso' María da' qoỹ'añaqtet'ape jesaa'me, ỹasouaxat di' laqáỹa' 'me qaỹa. 20 Jaso' Marta joca'li ỹaỹáten so' Jesús da' sóxote nóvi', qana'chi quet'aguet; jaso' María, qaamaxa qapiỹá'ña so' l'acháqa'. 21 Qana'chi jaso' Marta 'enapego' so' Jesús, 'enaaco': —'Am ỹisaliaxanec, da' 'uootaxa 'ouét'a jénjo', qana'chi sa ỹileu toqo' di' ỹaqáỹa. 22 Qaláxasa jaỹim saỹáten jiñi'me Dios 'am ỹanem ỹima jega'me 'aviỹáxanaaque. 23 Qana'chi so' Jesús 'enapéga jaso'me, 'eet'oi: —Di' 'adaqáỹa ỹitaxa nec'aléegue qomle. 24 Qana'chi jaso' Marta 'enaaco': —Jaỹim saỹáten jidi'me da' ỹitaxa nec'aléegue qomle qonec'alaxadiséguem na' napa'lpi jega'me p'áteegue nolo'. 25 Qana'chi so' Jesús 'enapego' jaso'me, 'eet'oi: —Jaỹim 'me na'chaỹim ñic'alaxadiséguem ga' napa'l, qataxa na'chaỹim nec'alaxa. Ga' jaỹim ỹ'amaqten, te'me ỹileu, qaláxasa ỹañoxot da' nec'aléegue. 26 Qataxa ỹima jen'me maliaxa nec'alétaiỹi naỹi 'me jaỹim ỹ'amaqten, qana'chi jen'me sa nauá'ne' qomle da' ỹileu. ¿Séetapega 'au'amaqten dójo'? 27 Qana'chi jaso'me 'enaaco': —Já'a, s'amaqten, 'am ỹisaliaxanec, séetapega da' na'chi'am net'a nec'alaxaqui, 'me 'am lec'óxot jiñi'me Dios, 'me 'am qoỹ'axátet'aguet ca'li da' 'auanaỹa jénjo' 'aléua.

So' Jesús noỹen joca'li huét'a so' lai jaso' lai't so' Lázaro

28 Joca'li ỹim dójo' l'aqtac jaso' Marta, qana'chi jec da' ỹiỹáxana jaso' laqáỹa María. Qana'chi nesoxot'ot da' 'enapéga, 'enaaco': —Jeda'me paxaguenataxanaxaic huét'a jénjo', jeda'me 'am niỹáxana. 29 Joca'li 'chi demachíỹa dójo' jaso' María, qana'chi sa niỹáloxoden da' ñíseguem, qana'chi ỹic'átee'ga so' Jesús. 30 So' Jesús maliaxa joca'li da' ỹinoxoneuó'o so' noic. Maliaxa huét'a ga'me huéta'ña joca'li huada'aguet jaso' Marta. 31 Joca'li qoỹilá'a da' sa niỹáloxoden da' ñíseguem jaso' María, qana'chi jec, qana'chi so' judiopi 'me huét'a ga' l'acháqa' jaso'me da' ỹ'añaqtétac, jeso'me ỹic'átet'ague, qá'a 'éetapega da' jaso'me taỹái'ỹa jaso' napa'lai't da' huá'ña da' noỹen. 32 Qana'chi jaso' María joca'li ỹivídee'ga ga' huét'a so' Jesús, qana'chi ỹisocoto naua' liliictel, qana'chi 'éetapega, 'eet'oi: —'Am ỹisaliaxanec, da' 'uootaxa 'am 'ouét'a jénjo', qana'chi sa ỹileu toqo' di' ỹaqáỹa. 33 Qana'chi so' Jesús joca'li ỹilá'a da' noỹíitac jaso' María qataxa so' judiopi 'me náictapegue', qana'chi jeso'me ỹátaqta 'uo da' laquicoxo, qataxa nomt'eguet da' 'éeta let'ádaic da' laviliỹáxac. 34 Qana'chi ỹinat jeso'me siỹaxadipi, 'enaaco': —¿Jái'chogamaxa hua'ague ga' qoỹachá'ña jega'me joca'li qoỹisiiñi? Qana'chi qoỹinapego', qoỹinaac: —'Am qadasoxola', 'aỹala, ỹa 'auc'atenaxanée'ga. 35 Qana'chi so' Jesús noỹíitac. 36 Qana'chi so' judiopi 'enaaco': —Cha' píiỹa, jeda'me ỹátaqta lauotaxat jidi'me. 37 Qaláxasa jeso'me judiopi 'uo na' 'enaac: —Jedójo' siỹaxaua ỹañoxot da' ỹauo'oi naua' l'ai'te na' qanam, qalqaiga ¿táalia'chi toqo' da' sa ỹa'uo ga' 'éet'ec, da' qaidi sa ỹipaca'aguet qa'en da' ỹileu joca'li di' Lázaro?

Da' qoỹíit'ec da' qonec'alaxadiséguem so' Lázaro

38 Qana'chi so' Jesús ỹitaxa nomt'eguet da' 'éeta let'ádaic, qana'chi nichíi'uo jaso' napa'lai't. Jaso'me nai't 'ená'am na' 'chi jauac, qataxa 'uo so' lapadénaxat qa' jeso'me niiuo. 39 Qana'chi so' Jesús 'enaaco': —Ỹa 'anaqachii na' qa'. Qana'chi jaso' Marta 'me laqáỹa jidi'me qaỹa, jaso'me 'enaaco': —'Am ỹisaliaxanec, jidi'me sóxote 'uo na' laita, qá'a ma'le ỹivi't naua' cuatro noloqo'te da' qaỹa. 40 Qaláxasa so' Jesús 'enaaco': —¿Sa 'eeso' da' 'am séetapega ca'li da' 'uootaxa 'au'amaqtenataxan, qana'chi 'auañoxot da' 'auauáachiỹi da' li'ỹoxodic ñi' Dios? 41 Qana'chi qonaqatéegue so' qa'. Qana'chi so' Jesús ỹilosée'ma di' piỹem, qana'chi 'enaac: —'Am ỹit'a, 'am ñitóotapeec, qá'a jaỹim 'amachítapega. 42 Qá'a jaỹim saỹáteeta da' 'am na'chi 'eeta't naale jaỹim 'amachítapega. Qaláxasa jaỹim senaac dójo' ỹasouaxat jen'me siỹaxadipi 'me huét'a jénjo', qaidi jen'me ỹ'amaqten da' 'eesa jaỹim 'adamaxasec. 43 Joca'li ỹimat da' nasaxáiỹi dójo', qana'chi diỹáxan, 'eet'oi: —¡'Am Lázaro, ỹa 'anp'áiỹi! 44 Qana'chi jidi'me napa'l nep'áiỹi, jeso'me qoỹaxata'aguelo naua' loua' qataxa naua' lichil jeso'me laanaxat, qataxa qoỹaxatelégue na' latáxasoxoc so' 'uáloq. Qana'chi so' Jesús 'enapéga so' siỹaxadipi, 'eet'oi: —Ỹa 'ausoỹíiỹi jeda'me, qana'chi 'amachíi'ỹa da' ỹiuoỹapiỹe't jeda'me.

Sétaaque da' qoỹaconé'uo so' Jesús

45 Huá'a, qana'chi ỹátaqta sa lec'óxotolec so'me ỹ'amaqten so' Jesús jen' judiopi 'me nec'áta jaso' María da' ỹ'añaqtet joca'li ỹauáachiỹi jeda'me ỹí'et so' Jesús. 46 Qaláxasa jeso'me judiopi 'uo na' jec da' ỹic'áte'uo so' fariseopi, qana'chi ỹ'axátem jeda'me ỹí'et so' Jesús. 47 Qana'chi so'me fariseopi qataxa jeso'me lasoxola'pi so' netaxaỹáxanaxanecpi da' qodetaxaỹapégue' ñi' Dios, ỹima jeso'me ỹí'et so' lemáxac, huaxaiỹet na' net'alpi 'me loiquenatac na' nasoxocpi, da' detaxaỹapega't. Qana'chi jeso'me 'enapega'to': —¿Hua'ague ga' senqáta? Qá'a jesójo' siỹaxaua ỹátaqta jalcote na' ỹí'et n'anecpi 'me sa qoỹauanápiỹi. 48 Qá'a qo'mi da' semacháqa'ta da' na'chi 'eeta't dójo', qana'chi ỹima qomle na' siỹaxadipi ỹ'amaqten jeso'me. Qana'chi jega'me net'alpi 'me l'acháqa' di' Roma janac qomle da' ỹoláxachiỹi jiñi' qantamnaxaqui qataxa jen'me qad'acháqa' lé'ecpi. 49 Qaláxasa 'uo so' 'oonolec jeso'me net'alpi, jeso'me lenaxat Caifás. Jeso'me na'chiso jeso'me 'oonolec lasoxola' na'me netaxaỹáxanaxanecpi da' qodetaxaỹapégue' ñi' Dios jeso'me huó'e. Jeso'me 'enaaco': —'Ami qaỹa ga' 'auaỹáchiñiỹaac. 50 Qataxa sa 'auaỹáchiñiỹo' da' nataq'en ỹiỹamqáchiiñi da' 'oonolec ga' siỹaxaua da' ỹileualégue na' l'acháqa' lé'ecpi, qataxa sa 'te da' 'uootaxa qoỹoláxachiỹi ỹima na' qad'acháqa' lé'ecpi. 51 Qaláxasa jeso' Caifás sa 'te da' 'uootaxa mai'chi nedotelégue dójo' 'enaac, qá'a jeso'me na'chiso so' lasoxola' na' netaxaỹáxanaxanecpi jesójo' huó'e. Qana'chi ñi' Dios ỹ'aqtáxanaxanec jeso'me so' Jesús da' jeso'me ỹileualégue ỹima jen'me judiopi; 52 qaláxasa sa na'chínata jen' judiopi, qá'a nataq'en qaidi lapona't ỹima jen'me lec'oqtepi jiñi'me Dios 'me nelagaxataac. 53 Huá'a, qana'chi jesójo' nolo' chiỹoqóchii'ña da' na' lasoxola'pi na' judiopi detaxaỹapíỹi da' lasoxoc, da' qaidi qoỹalaat jeso' Jesús. 54 Chan'eesa so' Jesús ma'le sa 'te da' ỹátaqta naloxóota da' huétaaue na' judiopi. Na'chidáta jeso'me cá'ai di' 'aléua Judea da' ỹic'áta jidi'me noic Efraín 'me ỹauaqa'aguet di'me totelégue 'aléua. Huá'a, qana'chi náictapee'to saua' lapaxaguenataqa. 55 Ma'le sa qaỹáaque so' nolo' 'me lemáxaqui na' judiopi da' qoueenata so' nolo' joca'li qocá'ai di' Egipto. Qana'chi ỹátaqta jalcote na' siỹaxadipi 'me na'ñalo naua' noiqa laqáỹa' da' qotaỹa di' Jerusalén, da' qaidi qoỹí'et da' n'onataguec da' liỹóxot ga' siỹaxaua, da' ỹamtaa'le nivídeuo jeso'me nolo' nemáxaqui. 56 Qoỹilótaaque so' Jesús, qana'chi joca'li qouét'a so' tamnaxaqui, qana'chi nenatétapega'to' jeso'me siỹaxadipi, 'enaaco': —¿Nái'chaqaiga ga' 'éeta ga' 'ad'aqtaquii? ¿Séetapega sa 'te da' janac jogamaxa, 'uootaxa 'ai'? 57 Jen' fariseopi qataxa na' lasoxola'pi na' netaxaỹáxanaxanecpi da' qodetaxaỹapégue' ñi' Dios, jen'me ỹan da' l'aqtac da' 'uootaxa 'uo ga' ỹaỹáten ga' huét'a so' Jesús, qana'chi ỹ'axat, qaidi qoỹaconé'uo jeso'me da' qoỹicoñi'.

Juan 12

Jaso' ỹauo ỹicodelégue so' Jesús so' codáxaqui

1 Maliaxa gaua' seis noloqo'te da' ỹivíta so' nolo' 'me huétooue da' qoueenata joca'li qocá'ai di' Egipto. Qana'chi so' Jesús taỹa di' Betania 'me néta'ña so' Lázaro, jeso'me nec'alaxadiséguem joca'li jeso'me. 2 Qana'chi qoỹí'et so' nalic da' qode'quelégue so' Jesús. Qana'chi jaso'me Marta neuálaxaitapegue', qataxa so' Lázaro huétauo, dasotalégue so' niqui'ỹáxala' da' liqui'ỹáxaua so' Jesús. 3 Qana'chi jaso' María nedóuo jaso' medio litro na' codáxaqui 'me lenaxat nardo. Jeso'me ỹátaqta qaỹá'uo jan' laso'vi. Qana'chi ỹicodelóo'te saua' lapia'te so' Jesús. Ỹimat, qana'chi diỹóxona na' laỹoxot da' ỹaqaxaỹaxa't. Ỹima jeso'me 'emec ỹátaqta colnapíỹi so' laita so' codáxaqui. 4 Qana'chi so' Judas Iscariote, 'me lec'óxot so' Simón, jeso'me 'oonolec saua' lapaxaguenataqa so' Jesús 'me taỹá'a da' ỹaneuo jeso'me, jeso'me 'enaaco': 5 —¿Tóoqo'chi da' sa qoỹimeno' dójo' codáxaqui trescientos denariopi qoỹin, da' qaidi qoỹañoxot táxa da' qoỹitauánec na' choxodaqpi? 6 So' Judas 'enaac dójo', qaláxasa sa naqaida da' 'uootaxa ỹichoxodéetac na' choxodaqpi. Qá'a jeso'me 'chi cacháxaic, qataxa na'chiso jeso'me huet'ot jaso' lai't jaso'me laicaua, qana'chi jeso'me decachítapega jan'me qoỹasaqátanỹi jaso'me. 7 Qana'chi so' Jesús 'enaaco': —'Amachíi'ỹa jada'me, qá'a jada'me ỹiỹamaxatétac joca'li dójo' codáxaqui, da' qaidi leuóteta qomle ỹivíta ga' nolo' da' jaỹim qoỹisiiñi. 8 'Ami na'chi 'eeta't da' 'oviit'aguet na' p'ióxoicpi; jaỹim, qaamaxa sa na'chi 'eeta't da' jaỹim 'oviit'aguet.

Sétaaque da' qoỹalaat so' Lázaro

9 Ỹátaqta jalcote na' judiopi na' demachítapeelégue so' Jesús huét'a di' Betania, qana'chi qoỹic'áta jidi'me. Sa na'chisóta so' Jesús da' sétaaque da' qoỹilo'ot, qá'a nataq'en so' Lázaro, jeso'me nec'alaxadiséguem joca'li jeso' Jesús. 10 Qana'chi jen'me lasoxola'pi na' netaxaỹáxanaxanecpi, jen'me detaxaỹapíỹi joca'li nataq'en da' sétaaque da' qoỹalaat so' Lázaro, 11 qá'a ỹasouaxat da' chiỹoqóchiỹi jeso'me da' ỹátaqta jalcote na' judiopi cá'ai jeso'me nasoxola'pi da' ỹ'amaqten so' Jesús.

So' Jesús ỹinoxoneuó'o di' Jerusalén

12 Ỹátaqta jalcote so' siỹaxadipi 'me taiỹi di' Jerusalén da' taỹá'a so' nemáxac da' qoueenata so' nolo' joca'li qocá'ai di' Egipto. So' nolo' laqáỹa, qana'chi qoỹaỹáten so' Jesús da' ma'le nadíite'uo so' noic let'ádaic. 13 Qana'chi qoỹiquesoxóiỹi jan' chaic laua, qana'chi qouaqatet'aguet so' Jesús. Qana'chi qoỹ'alqatalégue, qoỹinaaco': —¡Si'ỹoxodénaq ñi' qan'étoqo't! ¡Ỹátaqta 'ónaxaic da' ladíquiaxac jen'me naquétaaue da' lenaxat jiñi'me 'me qadesaliaxanec! ¡'Ónaxaic da' ladíquiaxac na'me let'a na' Israel lec'oqtepi! 14 So' Jesús ỹauana so' 'asenolec, qana'chiso nalégue jeso'me, ỹipaquíchiilo naua' 'enapegalo naua' nedétrañi l'aqtaqa ñi' Dios, 'eet'oi: 15 Sa 'te qomle da' 'au'óiỹi, 'ami 'me 'oñíita'ña jénjo' noic Sión; ỹa 'auloiỹet na' 'adet'ai, jena' cha'aguet netalégue na' 'ásena. 16 Joca'li ỹímta, qana'chi saua' lapaxaguenataqa sa ỹaỹáte'n ga' náỹi dójo'. Qaláxasa joca'li qaỹat'ague dójo', joca'li ma'le ỹim da' qoỹanáỹi da' li'ỹoxodic so' Jesús, qana'chi qoueenatalo ỹiméda jenaa'me nedétrañi 'me ỹ'axa't da' ladíquiaxac jeso'me, da' ỹima ỹipaquíchiỹi. 17 Qana'chi so' siỹaxadipi 'me huétaaue so' Jesús joca'li ỹiỹáxane'uo so' Lázaro joca'li huétaaue jaso' napa'lai't da' nec'alaxadiséguem, jeso'me siỹaxadipi ỹ'axátetac da'me lauanáxanaxac. 18 Qana'chi so' siỹaxadipi huaqátet'aguet so' Jesús, qá'a ỹaỹáten jeso'me ỹí'et n'anec 'me sa qoỹauanápiỹi. 19 Qana'chi jeso'me fariseopi mai'chi detaqátapega't, 'eet'oi: —Ỹa ñiloxola't da' qo'mi qaỹa 'te ga' qadesáaque, qá'a ỹima na' siỹaxadipi quétapegue' jeso'me.

'Uo jeso' griego lé'ecpi nimitétaaque so' Jesús

20 'Uo so' ỹalcapíỹi griego lé'ec naua' l'aqtaqa jeso'me siỹaxadipi 'me ỹic'áta di' Jerusalén so' nolo' nemáxaqui da' qoỹi'ỹoxoden ñi' Dios. 21 Qana'chi jeso'me griegopi nichíi'uo so' Felipe, 'me l'acháqa' di' noic Betsaida jidi'me huáaue di' Galilea. Qana'chi nachoxodéetapecot jeso'me, 'eet'oi: —Qo'mi sétaaque ñauanáxai' ga' Jesús. 22 Qana'chi so' Felipe jec da' d'aqtaxanem so' Andrés, qana'chi jesaa'me jéque' da' d'aqtaxáatem so' Jesús. 23 Qana'chi so' Jesús 'enapegalo jesaa'me, 'enaaco': —Naỹi ma'le ỹivíta di' lalóqo' jen' siỹaxaua lec'óxot da' qoỹa'uo da' li'ỹoxodic. 24 Ỹátaqta 'eesa dójo' 'ami s'axatema, jaga' jala na' trigo, da' 'uootaxa sa táaue jen' 'aléua qaidi ỹilhuáaue, qana'chi jaga'me na'chi 'eeta't da' 'oonole. Qaláxasa jaga'me da' 'uootaxa ỹileu, qana'chi ỹátaqta jalcote jan' jala da' qonaqat. 25 Ga' ỹauotec da' mai'chi l'óiỹaxac, qana'chi daqat, qaláxasa jega'me sa ỹauotec da' l'óiỹaxac naỹi da' maliaxa huetalégue jen' 'aléua, qana'chi naqaiga 'me qoỹiỹamaxat qomle da' l'óiỹaxac, da' qaidi qaỹa 'te loiquiaqa'. 26 Da' 'uo ga' sétaaque jaỹim d'onataxanot, n'óota da' jaỹim 'equegue, qana'chi jega'me sona'ague, qana'chi jega'me nataq'en néta'ña. Da' 'uo ga' jaỹim d'onataxanot, qana'chi jiñi'me ỹit'a ỹi'ỹoxoden jega'me.

So' Jesús ỹ'axátetapeegue da' nalaataguec

27 Naỹi ỹátaqta let'ádaic da' séeta; ¿jái'chogamaxa hua'ago' ga' séet'ec ga' ỹ'aqtac? ¿Séetapega seet'oi; “'Am ỹit'a, 'ónaxaic toqo' da' jaỹim 'anec'alaxatee'guesop jeda'me souápiỹi 'me jaỹim naỹá'a?” Qaláxasa jaỹim saỹáten da' na'chida da' tadeeto' ñanac. 28 'Am ỹit'a, ỹa 'aué'et qomle da' li'ỹoxodic da' mai'chi 'adenaxat. Huá'a, qana'chi qodemachíỹa jeso'me naviliỹáxac, chimaqpecot di' piỹem, 'enaaco': —Sóxote da' ỹ'oxodaq qasen jeda'me ỹinaxat, qaláxasa naỹi ỹitaxa s'iỹílaxalégue da' ỹ'oxodaq qasen. 29 Qana'chi jen'me siỹaxadipi 'me naquiáxatac, jen'me 'éetapega da' demachíchiỹi so' nalimáxa, qataxa 'uo na' 'éetapega: —Namaxasec piỹem lé'ec so' netaxaỹapíi'ña jeda'me. 30 Qana'chi so' Jesús 'enapego' jeso'me siỹaxadipi, 'enaaco': —Sa na'chaỹim, na'chi'ami tadeeto' qodemachíỹa jeso'me naviliỹáxac. 31 Naỹi ma'le ỹivíta di' lalóqo' na' huetalégue jen' 'aléua qoỹa'uo ga' lasouaxac, qataxa qoỹamaxáiỹi jeso'me damaxasóxonaac 'me qadó'o. 32 Qomle ỹivíta da' jaỹim qoỹanaséguem, qochiỹoxotáaue jen' 'aléua, qana'chi jaỹim mai'chi ñaueela't ỹima na' siỹaxadipi. 33 Dójo' 'enaac, jeda'me náỹi da' 'éeta da' nalaataguec qomle. 34 Qana'chi so' siỹaxadipi 'enapego' jeso'me, 'enaaco': —Qo'mi semacháqtapega naale da' qoỹitaxaỹaxáatac jan'me nede 'me lemalate' naua' naqátaxaco, jega'me net'a nec'alaxaqui qoỹíitapega na'chi 'eeta't da' nec'alétaiỹi. Qalqaiga ¿tá'nooqo'chi 'am 'onapeela't jega'me siỹaxaua lec'óxot, jega'me qoỹanaséguem? ¿Jái'chogamaxa siỹaxaua lec'óxot? 35 Qana'chi so' Jesús 'enapéga so' siỹaxadipi, 'enaaco': —Maliaxa cada'acolec da' 'ami huetaavlo jen'me lecoỹadáxat jen' 'aléua, qaláxasa sa ỹodédeegue gaua' noloqo'te da' 'ami huetaavlo. Chan'eesa 'aueuóitac qomle, ỹatemaliaxa 'uo jen' ỹ'oqóchiiñi, qaidi sa 'te qomle da' 'ami ỹipeláxa't ga' n'álaxa. Qá'a jega'me quétapiỹi na' l'álaxa, jega'me sa ỹaỹáten jega'me taiỹi. 36 Ma'chaxa 'au'amaqchíñii qomle jen'me ỹ'oqóchiiñi, ỹatemaliaxa 'ami huetaavlo, tetoqo' 'ami 'aviñí'ỹam jen'me ỹ'oqóchiiñi. Qana'chi joca'li ỹim dójo' 'enaac so' Jesús, qana'chi jec da' nañoxóchi'ña so' siỹaxadipi.

Da' 'éeta so' judiopi da' sa ỹ'amaqten so' Jesús

37 Temaqaidi so' Jesús ỹátaqta jalcote na' ỹí'et n'anecpi 'me sa qoỹauanápiỹi 'me ỹauáachiỹi qa'en so'me siỹaxadipi, qaláxasa taqadíta sa qoỹ'amaqten jeso'me. 38 Ỹátaqta ỹipaquíchiỹi jeda'me l'aqtaxanaxac jeso'me l'aqtáxanaxanec jiñi'me Dios, lenaxat Isaías, 'me 'eet'oi: 'Am ỹasoxola', ¿jái'chogamaxa ỹ'amaqten da' qad'aqtaxanaxac? Qataxa ¿jái'chogamaxa ỹaloxóna da'me l'añaxac ñi' qadasoxola'? 39 Tadeeto', na'chi qaỹa 'te 'uo ga' d'amaqtenataxan. Qá'a jeso'me Isaías nataq'en ỹidíñi jocalia'cho' da' 'eet'oi: 40 Ñi'me Dios ỹ'étec da' 'en qanampi so' siỹaxadipi qataxa ỹátaqta sa nedámchiilo qa'e'n naua' liquidiaqtel, qaidi sa nauaadíñi naua' l'ai'te, qataxa qaỹa ga' ỹaỹáten jan' liquidiaqte, qataxa da' sa jaỹim n'iỹílaxa qaidi ñataden. 41 So' Isaías 'enaaco' joca'li dójo', qá'a ỹasouaxat da' ỹauáachiỹi da' li'ỹoxodic so' Jesús. Huá'a, qana'chi ỹ'axátetac jeso'me. 42 Qaláxasa taqadíta ỹátaqta jalcote so' judiopi jen' ỹ'amaqten so' Jesús, cha ỹivíd'a jen'me ỹátaqta 'amaqtáqaicpi. Qaláxasa jen'me judiopi sa 'te da' ỹátaqta naloxóota, ỹasouaxat da' d'óitapega so' fariseopi da' 'uootaxa ỹamaxáiỹi da' 'uootaxa ỹinoxonóoue jeso' nemáxaqui, 43 qataxa ỹasouaxat so' judiopi noqopita da' mai'chi li'ỹoxodénataxanaxac na' siỹaxadipi, da' sa ỹipacapégue' jeda'me li'ỹoxodic 'me ỹanem ñi' Dios. Naua' l'aqtaqa so' Jesús naqainaua da' ỹ'e't da' ne'uaxánaguec jen' siỹaxadipi 44 Qana'chi so' Jesús ỹátaqta neten da' detaqa, 'eet'oi: —Ga' jaỹim ỹ'amaqten, jega'me sa na'chaỹiméta da' jaỹim ỹ'amaqten, nataq'en ñi'me ỹit'a 'me jaỹim namaq. 45 Qataxa ga' jaỹim ỹilá'a, jega'me nataq'en ỹilá'a jiñi'me jaỹim namaq. 46 Jaỹim 'me jaỹim lecoỹadáxat jen' 'aléua. Ñanaỹa jen'me, da' qaidi ga' jaỹim ỹ'amaqten, qana'chi jega'me sa huétaaue na' n'álaxa. 47 Qaláxasa da' 'uo ga' 'chi naquiáxatapegalo naua' ỹ'aqtaqa, qaláxasa sa ỹ'e't, qana'chi sa na'chaỹim qomle da' sé'et ga' ne'uaxánaguec jega'me; qá'a jaỹim sa ñanaỹa jen' 'aléua da' sa'uo ga' ne'uaxánaguec na' siỹaxadipi; na'chidáta da' jaỹim ñanac, da' qaidi ñic'alaxatéegue jen'me. 48 Jega'me jaỹim ỹ'otan, qataxa sa ỹ'e't naua' ỹ'aqtaqa, jega'me sóxote da' 'uo qomle jiñi'me ỹí'et ga' ne'uaxánaguec. Qá'a naua' ỹ'aqtaqa 'me ñasaxádeegue, na'chinaua qomle naua' ỹ'e't ga' ne'uaxánaguec na' siỹaxadipi jega' p'áteegue nolo'. 49 Qá'a jaỹim jenaa'me ỹ'aqtaqa sa 'te da' mai'chi chiỹoqodaise; qá'a jiñi'me ỹit'a 'me jaỹim namaq, jiñi'me chiỹoqo'ot jega'me ỹ'aqtac qataxa jega'me sapaxaguenataxanec. 50 Jaỹim saỹáten da' lamaxasóxonaxac jiñi'me ỹit'a, jeda'me chiỹaqaỹi da' nec'alaxa 'me qaỹa 'te loiquiaqa'. Naqaida da' 'éeta jega'me ñasaxáiỹi ỹ'aqtac, qaláxasa na'chiga ga' jaỹim ỹamaxalégue jiñi'me ỹit'a.

Juan 13

Jeso'me Jesús ỹiỹoi' naua' lapia'te so' lapaxaguenatacpi

1 Qana'chi so' nolo' laqáỹa jeso'me huétooue jeso'me nemáxac da' qoueenata jeso' nolo' joca'li qodíc'ai di' Egipto. So' Jesús ma'le ỹaỹáten da' ỹivíta di' lalóqo' da' cá'ai jen' 'aléua da' v'iỹílaxa ñi' let'a. Jeso'me na'chi 'eeta't da' lauo'chi so' lalémaxasetpi 'me huetalégue jen' 'aléua, qana'chi naỹi ỹaloxóna so' lalémaxasetpi da' 'éeta da' let'ádaic loqopi'chi. 2-4 So' paiỹac 'me qadó'o, jeso'me ma'le sóxote da' ỹacháỹi da' leenataxac jaso' liquidiaqte so' Judas Iscariote, jeso'me lec'óxot so' Simón, da' qaidi ỹaneuo so' Jesús. Qaláxasa so' Jesús sóxote ỹaỹáten da' chiỹoqot'ot ñi' Dios qataxa ỹaỹáteeta da' v'iỹílaxa jiñi'me qataxa ñi' let'a ỹanem jeso'me ỹima da' l'añaxac. Qana'chi joca'li ma'le di'quiỹá'ai jeso'me lapaxaguenatacpi, qana'chi so' Jesús nichaachiñi, qana'chi naqat so' lapoto, qataxa nesáachiỹi so' liỹóxonaxat huáloq lai. 5 Qana'chi ỹicodínỹi so' noxop so' coqui, qana'chi ỹiỹoi' saua' lapia'te so' lapaxaguenatacpi qataxa da' ỹaqaxaỹaxa't, ỹauót'ai so' liỹóxonaxat huáloq lai 'me nesáatetaỹi. 6 Qana'chi taỹá'a so' Simón Pedro da' sétaaque ỹiỹoi' saua' lapia'te, qana'chi jeso'me 'enaaco': —'Am ỹisaliaxanec, ¿séetapega sétaaque 'aviỹoi' naua' ỹapia'te? 7 Qana'chi so' Jesús 'enaaco': —Naỹi 'am sa 'auaỹáten jeda'me s'étetac, qaláxasa qomle qaỹat'ague jeda'me, qana'chi ỹímta 'auaỹáten da' s'étetac. 8 Qaláxasa so' Pedro 'enaaco': —'Axai', sa 'am sasenema da' 'aviỹoi' naua' ỹapia'te. Qana'chi so' Jesús 'enapego' jeso'me, 'enaaco': —Da' sa 'am siỹo, qana'chi 'am qomle sa 'am 'te ỹapaxaguenatac. 9 Qana'chi so' Simón Pedro 'enaaco': —Qama'chitáxa, 'am ỹisaliaxanec, qaláxasa sa na'chináate' qomle naua' ỹapia'te da' 'aviỹoi', nataq'en naua' ỹiua' qataxa jen' ỹaqaic. 10 Qaláxasa so' Jesús 'enaaco': —Ga'me ỹímta náchil, jega'me sa ỹiuen da' ỹitaxa niỹo, qá'a na'chináate' naua' lapia'te ỹiỹoi', qá'a jega'me sóxote ỹoqovíta. 'Ami sóxote 'ami ỹoqovíte', temaqaidi da' sa ỹima da' ỹátaqta 'ami ỹoqovíte'. 11 Jeso'me 'enaaco' dójo', 'eet'oi: “Sa ỹima da' ỹátaqta 'ami ỹoqovíte',” qá'a jeso'me ỹaỹáten da' 'uo jeso'me sétaaque ỹaneuo jeso'me. 12 Qana'chi joca'li ỹimat da' ỹiỹoi' saua' lapia'te jeso'me lapaxaguenatacpi, qana'chi so' Jesús ỹitaxa ỹaañi so' lapoto, qana'chi ñíiñi da' dasoỹalégue so' niqui'ỹáxala', qana'chi 'enaaco': —¿'Ami séetapega 'auaỹáchiñii dójo' 'ami s'eteque? 13 'Ami naale jaỹim 'aviỹáxañiiỹa, qaa'le 'oñiit'oi da' jaỹim paxaguenataxanaxaic qataxa jaỹim 'adesaliaxanquii. Qana'chi jeda'me sa ñoqolguet, ỹátaqta 'eesa. 14 Qá'a jaỹim 'me paxaguenataxanaxaic qataxa jaỹim 'adesaliaxanquii, qá'a siỹot'ape naua' 'adapia'chídii', qaláxasa naỹi n'óota ñi' 'oonolec da' 'oñíita nataq'en ỹiỹoi' naua' lapia'te ga' laqáỹa. 15 Jaỹim 'ami saloxonalo dójo', qaidi tetoqo' 'auloilégue, qaidi 'auloilégue da' 'av'íchii dójo' 'ami s'eteque. 16 Ỹátaqta 'eesa dójo' 'ami s'axatema, da' qaỹa ga' 'chi nelatac da' napacalégue ga' ladípa, qataxa qaỹa ga' namaxasec da' napacalégue jega'me ỹamaqátac. 17 'Ami da' 'auaỹáchiñiita dójo', qataxa da' 'uootaxa 'av'íchii, qana'chi ỹátaqta 'ami madet'ape qomle. 18 Jaỹim sa 'adimíỹa da' 'oñíita da' 'ami setaqátapeelóo'te, qá'a jaỹim saỹáteeta jen'me ỹátaqta ỹiquiỹacpi. Qaláxasa ỹátaqta ỹipaquíchiỹi qomle da' 'enapega't naua' nidii's n'aqtaqa 'me 'eet'oi: “Jega'me mai'chi ỹiqui'ỹáxaua, qaláxasa jega'me jaỹim dasoỹa'aguet da' jaỹim nep'agué'ne'.” 19 Jaỹim 'ami s'axatema dójo', qaidi qomle ỹivíta da' ỹipaquíchiỹi, qana'chi 'ami 'au'amaqchíñii da' jaỹim 'me na'chaỹiméta. 20 Ỹátaqta 'eesa dójo' 'ami s'axatema, da' ga' ỹaconguet ga'me ỹamaxasec, jega'me na'chaỹim 'me jaỹim nataq'en ỹaconguet. Qataxa ga' jaỹim ỹaconguet, jega'me ỹaconguet jiñi'me jaỹim namaq.

So' Jesús ỹ'axát'a so' Judas da' ỹaneuo jeso'me

21 Joca'li ỹimat da' nasaxáiỹi dójo' l'aqtac, qana'chi so' Jesús nomt'eguet da' sa maỹíñi jañi' liquidiaqte. Huá'a, qana'chi ỹátaqta ỹ'axátet'a dójo', 'enaaco': —Ỹátaqta 'eesa jedójo' 'ami s'axatema da' 'oonolec da' 'oñíita ñi' jaỹim ỹaneuo qomle. 22 Qana'chi so' lapaxaguenatacpi jeso'me nelapega't, qá'a sa qoỹaỹáten jái'chogamaxa qoỹíitapega jeso'me. 23 Qaláxasa 'uo so' 'oonolec jeso'me lapaxaguenatacpi so' Jesús, jeso'me ỹátaqta nauotaxaua, jeso'me néta'ñi' da' liqui'ỹáxaua. 24 Qana'chi so' Simón Pedro ỹatecapéga jeso'me, qaidi ỹinat so' Jesús da' jái'chogamaxa 'éetapega jeso'me. 25 Qana'chi jeso'me ỹátaqta nichíi'uo so' Jesús, qana'chi ỹinat, 'enaaco': —'Am ỹisaliaxanec, ¿jái'chogamaxa? 26 Qana'chi so' Jesús 'enaaco': —Jaỹim qomle sesomiñi jen' pan lai, qana'chi jega'me sanem, qana'chi naqaiga. Ỹim, qana'chi jeso'me ỹisomiñi so' pan lai, qana'chi ỹanem so' Judas Iscariote, jeso'me lec'óxot so' Simón. 27 Joca'li copát'a da' ỹaconguet so' pan lai so' Judas, qana'chi so' qadó'o paiỹac Satanás táaue jaso' liquidiaqte jeso'me. Qana'chi so' Jesús 'enapego' jeso'me, 'eet'oi: —Jega'me sétaaque 'aué'et, n'óota qomle da' 'auỹalapégue' da' 'aué'et. 28 Qaláxasa qaỹa da' 'uo ga' 'oonolec jeso'me liqui'ỹáxau'pi 'me dasotalégue so' niqui'ỹáxala' da' 'uootaxa ỹaỹáten tóoqo'chi 'enaac dójo'. 29 Qá'a so' Judas, jeso'me na'chiso so' ỹilotalégue jaso' lai't jaso' laicaua, chan'eesa 'uo jen' 'éetapega da' qoỹíitapega jeso'me da' 'uo ga' neuodénaaque nalic ỹasouaxat jeso' nemáxac, 'uootaxa 'uo ga' ỹanem so' choxodaqpi. 30 Qana'chi so' Judas joca'li ỹimat da' ỹaconguet so' pan lai, qana'chi p'áiỹi. Qalaqa'chi ma'le sóxote pí'ỹaq.

Da' dálaxaic namaxasóxonaxac

31 Joca'li ma'le p'áiỹi so' Judas, qana'chi so' Jesús 'enaaco': —Naỹi qoỹaloxon da' li'ỹoxodic jen' siỹaxaua lec'óxot qataxa da' li'ỹoxodic jiñi'me Dios qoỹaloxon da' chiỹaqaỹi qoỹin jen'me. 32 Qataxa jen'me siỹaxaua lec'óxot da' ỹaloxon da' li'ỹoxodic ñi' Dios, qana'chi ñi' Dios ỹaloxon qomle da' li'ỹoxodic jen'me, qataxa ma'le sa huaỹáloq qomle da' ỹaloxon jeda'me. 33 'Ami ỹalqolqa, ma'le sa licaac da' 'ami souetaavlo. 'Ami qomle jaỹim 'anmichíitaaque, qaláxasa na'chi 'ená'am dójo' ỹ'aqtac ca'li séetapega na' judiopi da' 'ami naỹi senapegalo, seet'oi: Sa 'auañoxochii qomle da' 'auc'áchiỹa jega'me saỹa. 34 Naỹi 'ami sanema jeda'me dálaxaic namaxasóxonaxac, 'eet'oi: Ñi' 'oonolec qomle da' 'oñíita ỹátaqta ỹauotec ga' laqáỹa. 'Oñíit'em jaỹim da' ỹátaqta 'ami sauoteque, qana'chida qomle 'oñíit'ec ñi' 'oonolec da' 'oñíita ỹátaqta ỹauotec ga' laqaỹaỹáxac. 35 Ga' 'oonolec da' 'oñíita da' ỹátaqta ỹauotec ga' laqáỹa, qana'chi ỹima qomle na' huetalégue jen' 'aléua ỹaỹáten da' ỹátaqta 'eesa da' 'ami ỹapaxaguenataqa. So' Jesús ỹ'axát'a so' Pedro 'enapeela't sa ỹaateton jeso'me 36 Qana'chi so' Simón Pedro ỹinat so' Jesús, 'enaaco': —'Am ỹisaliaxanec, ¿jái'chogamaxa hua'ague qomle ga' 'aiỹi? Qana'chi so' Jesús 'enaaco': —Jega'me saiỹi naỹi, 'am sa 'auañoxot qomle da' 'aiỹi. Qaláxasa qomle ma'le cop'a, qana'chi 'am qomle jaỹim 'oquegue. 37 Qana'chi so' Pedro 'enaaco': —'Am ỹisaliaxanec, ¿tóoqo'chi da' sa 'am sequegue naỹi? Qaỹa 'te sega da' 'am saalégue da' ỹ'óiỹaxac. 38 Qana'chi so' Jesús 'enapego' jeso'me, 'enaaco': —¿Ỹátaqta 'eesa séetapega 'am qaỹa 'te 'auega da' jaỹim 'auaalégue da' 'ad'óiỹaxac? Ỹátaqta 'eesa dójo' 'am s'axátem naỹi, da' qomle taỹá'a da' noỹen ga' 'olégaxa, qana'chi sóxote qomle ỹivid'alo tres da' 'av'iỹílaxalégue da' 'onapeela't jaỹim sa 'auaateton.

Juan 14

So' Jesús na'chiso so' naq'aic 'me ỹilót'a ñi' qadet'a

1 'Ena't qomle da' liitapiilo naua' 'adai'lídii'. Na'chidáta da' 'aup'íi'ỹa ñi' qan'étoqo't, nataq'en jaỹim. 2 Qá'a di' l'acháqa' ñi' ỹit'a ỹátaqta jalcote na' 'emecpi. Da' sa 'te 'éeta dójo', qana'chi sa 'ami táxa s'axátetapeema. Tadeeto' jaỹim sec, qaidi tetoqo' saqátaxata't ga' 'ad'acháqadii. 3 Qana'chi qomle ma'le ỹim da' sec da' saqátaxata't ga' 'ad'acháqadii, qana'chi ỹitaxa ñ'iỹílaq da' 'ami saue'j, qaidi 'ami na'chi 'eeta't da' jaỹim 'oviit'asop jega'me soná'ña. 4 'Ami ma'le 'auaỹáchiñii da' saiỹi, qataxa ma'le 'auaỹáchiñii so' naq'aic. 5 Qana'chi 'enaaco' so' Tomás, 'eet'oi: —'Am ỹisaliaxanec, qo'mi sa saỹátenaq jega'me 'aiỹi; ¿huá'a toqo' da' sauanáxa ga' naq'aic? 6 Qana'chi so' Jesús 'enapego' jeso'me, 'enaaco': —Jaỹim 'me na'chaỹim naq'aic, qataxa na'chaỹim 'eesa lasoxoc, qataxa na'chaỹim nec'alaxa. Qaỹa 'te laqáỹa nadíiuo da' qoỹinoxoneuó'o ñi' ỹit'a, na'chaỹiméta. 7 Da' 'ami jaỹim 'auaatetoñii, qana'chi nataq'en 'auaatetoñii ñi' ỹit'a. Naỹi ma'le sóxote da' 'auaatetoñii, qá'a ma'le sóxote 'auloit'ot jiñi'me. 8 Qana'chi so' Felipe 'enaaco': —'Am qadesaliaxanec, ỹa qo'mi 'aualoxonalo qomle ga' qadet'a, qaidi na'chidáta qomle 'oonolec da' s'iỹílaxasoxolégue. 9 Qana'chi so' Jesús 'enapego' jeso'me, 'enaaco': —Felipe, jaỹim mai'chi sóxote huo'oi saua' noloqo'te da' 'ami souetaavlo, ¿qalqaiga maliaxa da' sa jaỹim 'auaateton? Qá'a ga' jaỹim ỹilá'a, jega'me nataq'en ỹilá'a ñi'me ỹit'a, qalqaiga ¿tóoqo'chi da' jaỹim 'aviỹáxatapecot da' 'ami saloxonalo ñi' ỹit'a? 10 ¿Sa 'au'amaqteno' ñi' ỹit'a da' jaỹim huet'aguet qataxa jaỹim souet'aguet jiñi'me? Naua' ỹ'aqtaqa 'me s'axátetrapegueegue, jenaa'me sa mai'chi ñachiỹoxola't, qá'a ñi' ỹit'a 'me jaỹim nichaatétaỹi, na'chiñi jiñi'me ỹí'et jega'me mai'chi l'onataxanaxac. 11 'Au'amaqchíñii qomle da' jaỹim souet'aguet ñi' ỹit'a qataxa jiñi'me jaỹim huet'aguet, 'uootaxa jaỹim 'au'amaqchíñii ỹasouaxat da'me s'étetac ỹ'onataxanaxac. 12 Ỹátaqta 'eesa dójo' 'ami s'axatema, ga' jaỹim ỹ'amaqten, qana'chi nataq'en ỹí'et jen'me ỹ'onatacpi, qataxa ỹátaqta ỹágueegue da' let'ádaic jega'me ỹí'et. Qá'a jaỹim naỹi saỹa di' néta'ña ñi' ỹit'a. 13 Ỹima qomle jen'me 'aviỹáxañiỹaaque da' 'oviilégue da' ỹinaxat, qana'chi jaỹim sé'et, qaidi jen'me lec'óxot ñi' Dios ỹaloxon da' li'ỹoxodic ñi'me let'a. 14 Qana'chi jaỹim sé'et qomle gamachaqaiga 'aviỹáxañiỹaaque da' 'oviilégue da' ỹinaxat.

So' Jesús ỹ'axat'aguet da' namaq ga' Espíritu Santo

15 Da' 'eesa da' jaỹim 'auauochíỹic, qana'chi 'aualaqailóo'te naua' ỹamaxasóxonaxaco. 16 Qana'chi jaỹim ñachoxodenot ñi' ỹit'a, da' qaidi 'ami namaxalo jega'me laqáỹa 'me 'ami lecochiỹalo qataxa 'ami ỹ'añaqte't, qaidi jega'me na'chi 'eeta't da' 'ami huetaavlo, 17 jega'me nepaqal 'me ỹátaqta 'eesa. Jen'me siỹaxadipi 'me huetalégue jen' 'aléua, jen'me qomle sa ỹañoxot da' qoỹaconguet jega'me, qá'a sa ỹilá'a qataxa sa ỹaateton. 'Ami, qaamaxa 'auaatetoñii, qá'a 'ami huet'aita qataxa jega'me na'chi 'eeta't qomle da' 'ami huetaavlo. 18 Jaỹim sa 'ami seca'ai; jaỹim ñ'iỹílaq qomle, qaidi 'ami souetaavlo. 19 Ma'le ỹamtaa'le ỹivíta di' lalóqo' na' siỹaxadipi qomle sa jaỹim ỹilá'a, qaláxasa 'ami qomle jaỹim 'aulói'ỹa. Qataxa 'ami 'adec'alíitaỹi, qá'a jaỹim ñic'alétaiỹi. 20 Qana'chi jega'me nolo' 'aulói'ỹa qomle da' jaỹim sonet'ot ñi' ỹit'a, 'ami nataq'en jaỹim 'oviit'aguet, nataq'en jaỹim 'ami souetaavlo. 21 Ga' ỹaỹáteet'eguet qataxa ỹalaxaguet na' ỹamaxasóxonaxacpi, jega'me di'ỹoq da' ỹátaqta 'eesa da' jaỹim ỹauotec. Qana'chi jiñi'me ỹit'a ỹauotec jega'me jaỹim ỹauotec, qataxa jaỹim nataq'en ỹátaqta sauotec jega'me, qataxa ñaloxóna. 22 Qana'chi so' Judas (jeso'me lenaqteua so' Iscariote) 'enaaco': —'Am qadesaliaxanec, ¿tóoqo'chi da' na'chiqo'míite' da' qo'mi 'analoxonalo, qaláxasa sa 'analoxóna nataq'en jen'me siỹaxadipi 'me huetalégue jen' 'aléua? 23 Qana'chi so' Jesús 'enaaco': —Ga' jaỹim ỹauotec, jega'me ỹalaxaguet da' senaac; qana'chi ñi' ỹit'a ỹauotec jega'me. Qana'chi ñi' ỹit'a qataxa jaỹim ñanaguénaq da' souqat'aguet jega'me. 24 Jega'me sa jaỹim ỹauotec, jega'me sa jaỹim ỹalaxaguet jega'me senaac. Dójo' ỹ'aqtaxanaxac 'me 'anaquiáxañiitapega, jeda'me sa ỹalémaxaset; jeda'me chiỹoqo'ot ñi' ỹit'a 'me jaỹim namaq. 25 'Ami s'axatema naỹi ỹima dójo', ỹatemaliaxa da' 'ami souetaavlo. 26 Qaláxasa jega'me Espíritu Santo, 'me ñi' ỹit'a 'ami namaxalo qomle, naquétaaue qa'en da' ỹinaxat, qaidi 'ami lecochiỹalo qataxa 'ami ỹ'añaqte't, jega'me qomle 'ami ỹapaxaguenque ỹima na' lasoxocpi, qataxa 'ami ỹiinataxanaxanque ỹima jen'me ỹ'aqtacpi 'me 'ami sanoovlo. 27 Naỹi 'ami seca'aaỹóna, qaláxasa na'chidáta da'me n'emáxac. Dójo' ỹ'imáxac 'ami sanema, qaláxasa sa 'ami sanema da' 'uootaxa sená'am da' 'éeta jen'me huetalégue jen' 'aléua da' 'uootaxa ỹan da' l'emáxac. 'Ena't qomle da' 'uo ga' tatapiilo naua' 'adai'lídii', qataxa sa 'au'óiỹi. 28 Ma'le jaỹim 'amachíitapega da' jaỹim sec, qataxa ñ'iỹílaq, qaidi ỹitaxa 'ami souetaavlo. Da' ỹátaqta 'eesa jaỹim 'auauochíỹic, qana'chi 'eesa toqo' da' 'ami madet'ape da' 'auaỹáchiñii da' jaỹim sec'áta jiñi'me ỹit'a; qá'a jiñi'me jaỹim napacalégue da' l'amaqchic. 29 Jaỹim naỹi 'ami s'axatema dójo', qaidi qomle ỹivíta da' ỹipaquíchiỹi, qana'chi jaỹim 'au'amaqchíñii. 30 Naỹi sa jalcote na' s'axat da' 'ami s'axatema, qá'a ma'le janac jen'me damaxasóxonaac 'me qadó'o. Qaláxasa jen'me qaỹa 'te ga' l'añaxac da' jaỹim ỹaconé'uo. 31 Qaláxasa jeda'me na'chi ladíquiaxac, qaidi jen'me huetalégue jen' 'aléua ỹaỹáten da' jaỹim ỹátaqta sauotec jiñi'me ỹit'a, qataxa salaxaguet da' sé'et ga' jaỹim ỹamaxalégue jiñi'me. 'Oñíiseguem qomle. Qolqá'ai jénjo'.

Juan 15

Jaga' nañiise uva lichidic qataxa jan' lepeepi

1 Jaỹim 'me sená'am jaga' ỹátaqta 'eesa nañiise uva lichidic, jiñi'me ỹit'a qaa'le 'ená'am jega'me ỹilot'ague jaga' nañiise. 2 Jiñi'me ỹiquesoxóiỹi jagamachaqaga jana' ỹipeepi da' 'uootaxa qaga 'te jala, qataxa jiñi'me naqat jana' lolelaxai jan'me ỹipeepi 'me 'uo jan' jala, qaidi jalcote jan' 'uo jan' jala. 3 'Ami sóxote da' 'ami ỹoqovíte' ỹasouaxat naua' ỹapaxaguenataxanaxaco 'me 'ami sanema. 4 Qana'chi 'eeta't qomle da' jaỹim 'auqochiit'aguet, qana'chi 'ená'am da' 'ami soqotet'aita. Qá'a jaga'me lepee sa mai'chi 'uo jan' jala, da' sa ỹátaqta nesócta'uo jaga'me lamo. Qana'chi 'éeta nataq'en da' sa mai'chi 'uo ga' jaláỹaxac da' 'oñíita, da' 'uootaxa sa jaỹim 'auqochiit'aguet. 5 Jaỹim 'me sená'am jaga' nañiise, qataxa 'ami na'chi'ami ỹipeel. Jega'me na'chi 'eeta't da' jaỹim nesócta'uo qataxa soqotet'aguet, qana'chi jega'me ỹátaqta jalcote da' jaláỹaxac, qá'a 'ami qaỹa 'te 'adisíỹaaque da' 'uootaxa sa jaỹim 'auqochiiuó'o. 6 Jega'me sa jaỹim ỹoqoteuó'o, qana'chi jega'me qoỹasaxáiỹi, qana'chi daqaqa, 'ená'am jana' lepee 'me qolapona't, qana'chi qoỹasaxánỹi ga' dóle' qaidi qoỹigóoue. 7 'Ami da' na'chi 'eeta't da' jaỹim 'auqochíita'uo, qataxa sa 'auapalaxachíit'a jen' ỹapaxaguenataxanaxacpi, da' 'uo ga' 'aviỹáxañiỹaaque, qana'chi 'ami qoỹanema. 8 Ñi' ỹit'a 'uo da' ni'ỹoxodénataguec da' 'uootaxa ỹátaqta jalcote da' jaláỹaxac da' 'oñíita, qana'chi 'ami ỹátaqta 'avídi'ỹa da' 'ami ỹapaxaguenataqa. 9 Jaỹim ỹátaqta 'ami ỹauotaqa'te, sená'am da' 'éeta jiñi' ỹit'a da' ỹátaqta jaỹim lauotaxat. 'Ami qomle ỹátaqta 'oquiit'egue da' 'éeta da' 'ami sauoteque. 10 Da' 'aualaqaiỹet na' ỹamaxasóxonaxacpi, qana'chi 'ami 'oquiit'egue da' 'éeta da' 'ami ỹauotaqa'te, 'ená'am qasen da' ỹátaqta salaxaguet jen' lamaxasóxonaxacpi ñi' ỹit'a, qataxa sequet'egue da' 'éeta da' lauochidíỹaxac jaỹim jiñi'me. 11 Séet'ec dójo' da' 'ami senapegalo, qaidi 'ami jaỹim 'antónaxauai, qana'chi 'ami ỹátaqta 'ami saqachiilo da' 'antónaxaquii. 12 Jeda'me ỹamaxasóxonaxac 'me 'ami sanema 'eet'oi: Ñi' 'oonolec da' 'oñíita ỹátaqta ỹauotec ga' laqáỹa, 'ená'am da' séet'ec da' ỹátaqta 'ami ỹauotaqa'te. 13 Jeda'me nauo'chi 'me ỹátaqta let'ádaic 'eet'oi: Ga' siỹaxaua ỹaalégue da' l'óiỹaxac ga' nauotaxau'pi. 14 'Ami na'chi'ami ñauotaxa'u, da' 'av'íchii da'me 'ami samaxalóo'te. 15 Naỹi sa 'ami semata'aque da' 'ami nelatáqa, qá'a ga' 'chi nelatac sa ỹaỹáten jega'me ỹí'et jega' ladípa. Naỹi 'ami semata'aque da' 'ami ñauotaxa'u, qá'a 'ami saatetonaxanaxanque ỹima jen'me l'aqtacpi ñi' ỹit'a 'me jaỹim ỹanem. 16 'Ami joca'li sa jaỹim 'adiquiỹáquii, jaỹim 'me 'ami ỹiquiỹáqa. Qana'chi 'ami senapegalo, qaidi ỹátaqta sa lec'óxotolec da' jaláỹaxac da' 'ad'óiỹaxaquii, qataxa dójo' jaláỹaxac da' 'ad'óiỹaxaquii, jeda'me na'chi 'eeta't. Qaidi ñi' ỹit'a 'ami ỹanema ỹima jen'me 'aviỹáxañiitaaque da' 'uootaxa 'oviilégue da' ỹinaxat. 17 Naqaida qomle da' 'ami samaxalóo'te, 'eet'oi: Ñi' 'oonolec qomle da' 'oñíita ỹátaqta lauotaxat ga' laqáỹa.

Jen'me huetalégue jen' 'aléua ỹátaqta liquiỹáxat so' Jesús qataxa jen' lalémaxasetpi

18 Jen'me siỹaxadipi 'me huetalégue jen' 'aléua, da' 'ami liquiỹaqa'te, qaláxasa 'ami 'auaỹáchiñii da' jaỹim 'me jaỹim s'auguet da' jaỹim niquiỹáxat. 19 'Ami da' 'uootaxa 'ami lase' jen' 'aléua, qana'chi jen'me siỹaxadipi 'me huetalégue jen' 'aléua, jen'me 'ami lauotaqa'te, 'ená'am da' 'éeta da' ỹauotec jen'me lalémaxasetpi. Qaláxasa jaỹim 'ami ỹiquiỹáqa, 'ami sachiỹoxotaavlo jen'me huetalégue jen' 'aléua. Tadeeto' jen'me ỹátaqta 'ami niquiỹa'alo, qá'a 'ami sa 'ami lase' jen' 'aléua. 20 'Aueenachíit'a qomle da' ỹ'aqtac 'me 'ami sanema ca'li, senaaco': “Qaỹa ga' nelatac da' 'uootaxa napacalégue ga' ladípa.” Da' 'uootaxa jaỹim qoỹicáatac joca'li, nataq'en da' 'oñíita 'uo da' 'ancanáguiquii. Da' ỹátaqta qoỹalaxalégue da' ỹapaxaguenataxanaxac, nataq'en qomle ỹátaqta qoỹalaxaguet da' 'adapaxaguenataxanaxaquii. 21 Qana'chi ỹima qomle jen'me 'ami qoỹ'eteque ỹasouaxat jaỹim, qá'a jen'me siỹaxadipi sa ỹaateton jiñi'me jaỹim namaq. 22 Jen'me taa'le qaỹa 'te 'uo ga' lasouaxaset, da' 'uootaxa sa ñanac da' setaxaỹapégue', qaláxasa jen'me siỹaxadipi naỹi sa qoỹoqolguet da' 'uo da' lasouaxaset, 23 qá'a ga' jaỹim niquiỹá'a, jega'me nataq'en niquiỹá'a ñi'me ỹit'a. 24 Jen'me taa'le qaỹa ga' lasouaxaset, da' sa laiñi qasen jen'me da' sé'et jen'me qaỹa ga' ỹañoxot da' ỹí'et; qaláxasa jen'me sóxote da' ỹauáachiỹi jen'me sé'etpi, qaláxasa taqadíta sa ỹaqalan da' jaỹim niquiỹá'a nataq'en ñi' ỹit'a. 25 Qaláxasa jeda'me mai'chi ladíquiaxac qoỹin, qaidi ỹipaquíchiỹi da' n'aqtac 'me nedétañi jen'me naqátaxacpi 'me qoỹanem joca'li jen'me siỹaxadipi, 'me 'eet'oi: “Jaỹim niquiỹá'a jen'me siỹaxadipi, qamaale qaỹa ga' sasouaxat.” 26 Qaláxasa qomle ỹivíta da' janac jega'me 'ami lecochiỹalo qataxa 'ami ỹ'añaqte't, ga'me nepaqal 'me ỹátaqta 'eesa, ga'me 'ami ñamaxalo qomle 'me chiỹoqot'ot ñi' ỹit'a, jega'me qomle jaỹim ỹ'axat. 27 Qataxa 'ami nataq'en jaỹim 'au'axáchii, qá'a na'chi 'eeta't da' jaỹim 'oviit'aguet joca'li ỹímta s'onataxan.

Juan 16

1 Naỹi 'ami s'axatema dójo', qaidi sa 'axañíiñi qomle. 2 'Ami qoỹamaqadáiỹi qomle da' 'ovíiỹaaue jen' lemáxaqui na' judiopi, qataxa ỹivíd'a qomle da' 'uo ga' 'ami ỹalaa't, qana'chi jega'me 'éetapega da' ỹ'étetac ga'me l'onataxanaxac ñi' Dios. 3 Ỹí'et qomle dójo' jen'me siỹaxadipi, qá'a sa ỹaateton jiñi'me ỹit'a nataq'en jaỹim. 4 Naỹi 'ami s'axatema dójo', qaidi qomle ỹivíta ga' lalóqo', qana'chi 'ami 'aueenachíit'a da' ma'le sóxote da' 'ami s'axátetapeema jeda'me dójo'.

Da' l'onataxanaxac so' Espíritu Santo

Sa 'ami s'axatema dójo' ca'li ỹímta da' s'onataxan, qá'a jaỹim maliaxa 'ami souetaavlo. 5 Qaláxasa naỹi sec da' sec'áta jiñi'me jaỹim namaq; qaláxasa qaỹa ga' 'oonolec da' 'oñíita da' jaỹim ỹinatétac jái'chogamaxa hua'ague ga' saiỹi. 6 Na'chidáta da' 'ami 'auaquicóita, ỹasouaxat da' 'ami s'axatema dójo'. 7 Qaláxasa ỹátaqta 'eesa dójo' 'ami s'axatema 'me 'eet'oi: 'Ami 'adiỹamqáichiiñi da' sec. Qá'a da' sa sec, qana'chi sa janac qomle da' 'ami huetaavlo jega'me 'ami lecochiỹalo qataxa 'ami ỹ'añaqte't. Qaláxasa da' jaỹim sec, qana'chi ñamaq qomle jega'me. 8 Qomle ỹivíta da' janac jega'me, qana'chi ỹaỹátenaxanaxanec jen'me siỹaxadipi 'me huetalégue jen' 'aléua da' loicoló'olpi, qataxa da' 'uo ga' naq'aic 'me ỹiỹamqáchiiñi, qataxa da' ñi' Dios ỹa'uo qomle ga' ne'uaxánaguec jen'me. 9 Jen'me siỹaxadipi 'uo da' lasouaxaset, qá'a sa jaỹim ỹ'amaqten; 10 qataxa na' siỹaxadipi qomle ỹaỹáten da' 'uo ga' naq'aic ỹiỹamqáchiiñi, qá'a jaỹim saiỹi da' net'ague ñi'me ỹit'a, qana'chi 'ami qomle sa jaỹim 'aulói'ỹa; 11 qataxa na' siỹaxadipi qomle ỹaỹáten da' ñi' Dios ỹa'uo ga' ne'uaxánaguec, qá'a sóxote da' qoỹa'uo da' ne'uaxánaguec jeso'me damaxasóxonaac 'me qadó'o jen' 'aléua. 12 Jaỹim jalcote na' ỹ'aqtaxanaxac laỹi da' 'ami s'axatema, qaláxasa sa 'auañoxochii da' 'auaỹáchiñii naỹi. 13 Qaláxasa qomle janac jega'me nepaqal 'me ỹátaqta 'eesa, qana'chi jega'me 'ami ỹapaxaguenque ỹima jen'me lasoxocpi 'me 'eesa; qá'a jega'me sa mai'chi nachiỹoxola't ga' l'aqtaxanaxac, na'chidáta da' ỹ'axat ỹima jen'me demachíchiỹi, qataxa 'ami ỹaỹátenaxanaxanque jega'me qomle maliaxa naỹa'quéna. 14 Jega'me qomle ỹátaqta jaỹim ỹi'ỹoxoden, qá'a jega'me ỹaconguet jen'me ỹalémaxasetpi, qana'chi 'ami ỹaỹátenaxanaxanque. 15 Qá'a ỹima jen'me lalémaxasetpi ñi' ỹit'a, nataq'en ỹalémaxasetpi. Tadeno' jaỹim senaac jega'me nepaqal ỹaconguet qomle jen'me ỹalémaxasetpi, qana'chi 'ami ỹaỹátenaxanaxanque.

Da' naquicoxo náỹi qoỹin da' tónaxac

16 Ma'le ỹamtaa'le da' 'ami sa jaỹim 'aulói'ỹa qomle, qaláxasa sa huaỹáloq qomle da' ỹitaxa jaỹim 'aulói'ỹa, qá'a jaỹim saiỹi da' net'ague ñi' ỹit'a. 17 Qana'chi jeso'me lapaxaguenatacpi 'uo na' nenatétapega't, 'eet'oi: —¿Jái'chogamaxa hua'ague ga' 'éeta ga' náỹi da' l'aqtac? Da' 'éetapega sa huaỹáloq qomle da' sa selaqá'a, qaláxasa nataq'en sa huaỹáloq da' ỹitaxa selaqá'a, qá'a ỹasouaxat da' taiỹi da' net'ague ñi' let'a. 18 ¿Jái'chogamaxa hua'ague ga' 'éet'ec dójo', 'eet'oi: “Sa huaỹáloq qomle da' jaỹim sa 'aulói'ỹa?” Qo'mi sa saỹátenaq jái'chogamaxa 'enapéga. 19 Qana'chi so' Jesús nóm'a da' sétaaque da' qoỹinat, qana'chi 'enapéga so' lapaxaguenatacpi, 'enaaco': —Jaỹim senaac da' ma'le sa huaỹáloq da' jaỹim sa 'aulói'ỹa, qaláxasa sa huaỹáloq qomle da' ỹitaxa jaỹim 'aulói'ỹa. ¿Na'chidáta séetapega da' 'anenachíitapiỹi 'ami? 20 Ỹátaqta 'eesa dójo' 'ami s'axatema naỹi, da' 'ami qomle 'anoiñíitac, qataxa 'auaquicóita, qaláxasa jen'me siỹaxadipi 'me huetalégue jen' 'aléua, jen'me qomle mátac qa'en. Qaláxasa temaqaidi qomle da' 'ami ỹátaqta 'auaquicóita, qaláxasa dójo' 'adaquicoqoi, jeda'me náỹi ga' 'antónaxaquii. 21 Jaga' ỹauo da' ỹivíta di' lalóqo' da' decó'o, qaláxasa ỹátaqta dachitata, qá'a ma'le ỹivíta di' lalóqo' da' lichic. Qaláxasa da' ma'le niỹíñi ga' lec'óxot, qana'chi jaga'me petelaxaguet so' lichic, ỹasouaxat da' netónaxac da' niỹíñi so' nootolec jen' 'aléua. 22 Qana'chi naq'áita nataq'en da' 'oñíita naỹi 'uo da' 'adachoxodíquii, qaláxasa jaỹim 'ami ñ'iỹílaxalo qomle, qana'chi jan' 'adiquidiaqchii ỹátaqta saqáchiỹi da' 'antónaxaquii, qaláxasa jega'me 'antónaxaquii qaỹa 'te ỹañoxot da' deuootáxanec qomle. 23 Jega'me nolo' qomle, qana'chi qaỹa 'te 'uo ga' jaỹim ỹinatétac da' 'ami. Ỹátaqta 'eesa dójo' 'ami s'axatema, da' ñi' ỹit'a 'ami ỹanema qomle ỹima ga' 'aviỹáxañiỹaaque da' 'oviilégue da' ỹinaxat. 24 Cha ỹivíde'ta naỹi da' 'ami maliaxa 'uo ga' 'aviỹáxañiỹaaque da' 'oviilégue da' ỹinaxat. 'Auasélaxañii qomle, qana'chi 'auacoñiiỹet ga' 'auasélaxañiỹaaque, qaidi ỹátaqta 'ami saqachiilo da' 'antónaxaquii.

So' Jesucristo nemat jen' n'onataguec jen' 'aléua

25 'Ami s'axatema ỹima jénjo', qaláxasa sauo'oi naua' ỹaloqtenaxanaqa'te. Qaláxasa nata't ga' lalóqo' da' sa sauo'oi qomle naua' ỹaloqtenaxanaqa'te, na'chidáta da' ỹátaqta 'ami s'axatema ñi' ỹit'a. 26 Qana'chi jega'me nolo' qomle ỹátaqta 'oviilégue da' ỹinaxat da' 'aviỹáxañii, qataxa jaỹim sa senaac da' 'ami ñachoxodeetapeelóo'te qomle da' ñachoxodenot ñi' ỹit'a, 27 qá'a jiñi'me mai'chi 'ami lauotaqa'te. 'Ami ỹauoteque, qá'a jaỹim 'adauotaxáchii, qataxa 'au'amaqchíñii da' jaỹim sachiỹoqot'ot jiñi'me. 28 Jaỹim sachiỹoqot'ot joca'li ñi' ỹit'a, ñanaỹa jen' 'aléua, qaláxasa naỹi jaỹim secá'ai jen' 'aléua da' s'iỹílaxa ñi' ỹit'a. 29 Qana'chi so' lapaxaguenatacpi 'enapego': —Naỹi ma'le ỹataqteelo naua' 'ad'aqtaqa; sa 'aua'uo ga' 'adaloqtenaxanaxat. 30 Naỹi ma'le saỹátenaq da' 'am 'auaỹáten ỹima na' lasoxocpi, qana'chi sa 'auen da' 'uo ga' 'am ỹinat. Tadeno' s'amaqténaq 'am 'auachiỹoqo'ot ñi' Dios. 31 Qana'chi so' Jesús 'enaaco': —¿'Eesa séetapega da' 'ami jaỹim 'au'amaqchíñii naỹi? 32 Qaláxasa naỹi ma'le ỹivíta di' lalóqo', na'chína naỹi jen' huétooue, da' 'ami 'anlagaxachíitac qomle, ñi' 'oonolec mai'chi ỹoiquíitac ga' taiỹi, qana'chi jaỹim 'aviimiỹapega't qomle. Qaláxasa jaỹim sa jaỹim 'oonolec, qá'a ñi' ỹit'a jaỹim huet'asop. 33 Jaỹim 'ami s'axatema ỹima dójo', qaidi 'uo da' 'adelagaxadíquii da' jaỹim 'auqochiit'aguet. 'Ami jen' 'aléua 'me 'oviitalégue 'uo qomle da' 'an'queténaxaquii. Qaláxasa 'an'añaxachii qomle, qá'a jaỹim sóxote ỹoxonec jen' n'onataguec 'me huetalégue jen' 'aléua.

Juan 17

So' Jesús netameelégue jeso'me lapaxaguenatacpi

1 Joca'li ỹim da' 'enaac dójo' so' Jesús, qana'chi ỹilosée'ma di' piỹem, qana'chi 'enaaco': —'Am ỹit'a, ma'le ỹivíta di' ỹalóqo'. Naỹi 'avi'ỹoxoden qomle jen' 'ac'óxot, qaidi jen' 'ac'óxot nataq'en 'am ỹi'ỹoxoden. 2 Qá'a 'am 'auanem da' l'añaxac jen'me 'ac'óxot, qaidi ỹilo'ogue ỹima na' siỹaxadipi, qataxa da' qaidi ỹanem da' lec'alaxa 'me qaỹa 'te loiquiaqa' ỹima jen'me 'auanempi jen'me. 3 Dójo' n'óiỹaxac 'me qaỹa 'te loiquiaqa', jeda'me naqaida da' náỹi da' 'am qoỹaateton, 'am ñitamnaxala' 'me na'chi'améta qataxa 'am 'eesa, qataxa jen' 'ac'óxot Jesucristo 'me 'anamaq jocalia'cho'. 4 Jaỹim ỹátaqta 'am si'ỹoxoden naỹi da' souét'a jénjo' 'aléua, qataxa ỹátaqta sematéta da' jaỹim 'auamaxalégue da' sé'et. 5 Naỹi, 'am ỹit'a, sétaaque da' sonet'ague na' 'adai, da' jaỹim 'auanem da' ỹi'ỹoxodic 'me sáatañi joca'li 'am sonet'asop joca'li maliaxa qaỹa jen' 'aléua. 6 Jen'me 'adiquiỹacpi 'me 'auachiỹoxotáaue joca'li jen'me huetalégue jen' 'aléua da' qaidi jaỹim 'auanem, jen'me sóxote da' s'axátet'em da' 'am. Jen'me 'me 'adalémaxasetpi, qaláxasa jaỹim 'auanem, qana'chi ỹátaqta ỹalaxaguet da' 'ad'aqtac. 7 Qataxa ỹaỹáteeta da' ỹima jen'me jaỹim 'auanem 'am chiỹoqo'ot, 8 qá'a ma'le sanem da'me 'ad'aqtac 'me jaỹim 'auanem. Qana'chi jen'me ỹaconguet, qataxa ỹaỹáteeta da' ỹátaqta 'eesa da' 'am sachiỹoqo'ot, qataxa ỹ'amaqten da' jaỹim 'adamaxasec. 9 Jaỹim 'am ñachoxodenot ỹasouaxat jen'me. Sa ñachoxodeetapeelégue jen'me huetalégue jen' 'aléua, na'chínata jen'me jaỹim 'auanem, qá'a 'adalémaxasetpi. 10 Qá'a ỹima jen'me ỹalémaxaset, jen'me 'adalémaxasetpi, qataxa jen'me 'adalémaxasetpi, jen'me nataq'en ỹalémaxasetpi. Qana'chi da' ỹi'ỹoxodic qoỹilá'a da' huétaaue jen'me. 11 Jaỹim ma'le sa souét'a jen' 'aléua, qaláxasa jen'me maliaxa huetalégue jen' 'aléua, qana'chi jaỹim naỹi sec da' 'am sec'áta. 'Am ỹit'a 'me 'am ỹoqovíta, 'au'euóxona qomle da' 'ad'añaxac da' 'antelá'a jen'me jaỹim 'auanempi, qaidi jen'me ỹátaqta naselt'a't, 'ená'am da' 'éeta 'am qataxa jaỹim. 12 Joca'li souétaaue jen'me 'adalémaxasetpi jen' 'aléua, qaláxasa jaỹim s'euóxona da' 'ad'añaxac da' ñitelá'a qataxa ñiquepaxatetalégue na'me jaỹim 'auanem. Qaỹa ga' daqat jen'me, na'chisóta jeso'me chi'ena da' taỹá'a da' daqat, qaidi ỹátaqta ỹipaquíchiỹi da'me 'enapegalo naua' nedétrañi 'ad'aqtaqa. 13 Naỹi ma'le 'am sec'áta, qaláxasa naỹi da' maliaxa souetalégue jen' 'aléua, qaláxasa jaỹim senaac dójo', qaidi na' jaỹim 'auanem ỹátaqta saqáchiỹi da' ñitónaxac. 14 Jaỹim sanem jen'me da' 'ad'aqtac, qaláxasa jen'me huetalégue jen' 'aléua ỹátaqta niquiỹá'a jen'me, qá'a jen'me sa l'acháqa' jen' 'aléua, 'ená'am da' 'éeta da' jaỹim sa ỹ'acháqa' jen' 'aléua. 15 Jaỹim sa 'am siỹaxanot da' qaidi 'anaqtéegue jen'me jen' 'aléua, na'chidáta da' 'am siỹaxaatapecot da' 'anquepaxatelégue jen'me, ỹasouaxat so' paiỹac 'me qadó'o. 16 Jedójo' 'éeta da' sa ỹ'acháqa' jen' 'aléua, na'chidáta da' 'éeta jen'me sa l'acháqa' jen' 'aléua. 17 'Aviỹotái'ỹa qomle jen'me da' qaidi 'adalémaxaset, 'auachiỹoxotaỹi jeda'me 'eesa lasoxoc; jeda'me 'ad'aqtac 'me ỹátaqta 'eesa. 18 Jedójo' 'éeta da' jaỹim 'anamaxa jen' huetalégue jen' 'aléua, na'chidáta da' séet'ec nataq'en da' jaỹim samaxa jen'me jen' huetalégue jen' 'aléua. 19 Qataxa ỹasouaxat jen'me, qana'chi jaỹim ỹátaqta 'am ñañanot, qaidi jen'me nataq'en 'am nañanot, chiỹoqóchiỹi jeda'me 'eesa lasoxoc. 20 Qaláxasa sa na'chínata jen'me da' ñachoxodeetapeelégue, nataq'en jega'me jaỹim ỹ'amaqten qomle, qomle demachíỹa ga' l'aqtaxanaxac jen'me. 21 Qataxa 'am siỹaxanot, 'am ỹit'a, da' qaidi ỹima jen'me ỹátaqta naselt'a't, da' ỹátaqta 'oonolec ga' lasoxoc da' qo'mi ỹoqotéta'ualo, qaidi 'ená'am da' jaỹim 'ouet'aguet qataxa jaỹim 'am souet'aguet. Qataxa sétaaque da' jen'me ỹátaqta naselt'a't, qaidi jen'me huetalégue jen' 'aléua ỹ'amaqten da' jaỹim 'adamaxasec. 22 Qataxa jaỹim sanem jen'me jeda'me ỹi'ỹoxodic 'me jaỹim 'auanem, qaidi jen'me ỹátaqta 'oonolec jega'me lasoxoc, 'ená'am da' 'éeta 'am qataxa jaỹim da' ỹátaqta 'oonolec da' qadasoxoc. 23 Jaỹim souétaaue jen'me, qataxa 'am jaỹim 'ouet'asop, qaidi jen'me ỹátaqta 'oonolec ga' lasoxoc, qaidi jen'me huetalégue jen' 'aléua ỹilá'a da' 'am jaỹim 'adamaxasec, qataxa da' ỹátaqta 'auauotec jen'me, 'ená'am da' 'éet'ec da' ỹátaqta jaỹim 'adauotaxat. 24 'Am ỹit'a, jen'me jaỹim 'auanem joca'li, chan'eesa sétaaque da' jen'me jaỹim huet'asop qomle jega'me souét'a, qaidi ỹauáachiỹi jega'me ỹi'ỹoxodic 'me jaỹim 'auanem. Qá'a 'am chi'ena joca'li da' ỹátaqta jaỹim 'auauotec ca'li maliaxa qaỹa jen' 'aléua. 25 'Am ỹit'a 'me ỹátaqta ỹiỹamadíchidiñi naua' 'ad'onataqa, jen'me huetalégue jen' 'aléua sa 'am ỹaateton. Qaláxasa jaỹim 'am saateton, qataxa jénjo' sóxote da' ỹaỹáten da' jaỹim 'adamaxasec. 26 Jaỹim sóxote saỹátenaxanaxanec jen'me da' 'onéta, qaláxasa taqadíta jaỹim maliaxa sequet'ot da' 'am s'axátetac, qaidi jeda'me 'adauo'chi da' séeta na'chi 'eeta't da' huétaaue jen'me, qataxa qaidi jaỹim na'chi 'eeta't da' souétaaue jen'me.

Juan 18

So' Jesús qoỹaconé'uo da' qoỹicoñi'

1 Joca'li ỹim da' nasaxáiỹi dójo' so' Jesús, qana'chi jec, náicapee'to saua' lapaxaguenataqa da' taiỹi da' lasego so' l'auáxac lenaxat Cedrón. Qana'chi huá'ña jidi'me so' l'acháqa' jana' nañiise 'epaq, qana'chi táaue so' Jesús, liquiáxa'u saua' lapaxaguenataqa. 2 So' Judas, 'me sétaaque da' ỹaneuo so' Jesús, nataq'en ỹauana jeso'me nemáqa'. Qá'a ma'le jalcote naale huét'a so' Jesús jeso'me da' náictapee'to jesaa'me lapaxaguenataqa. 3 Qana'chi so' Judas ỹilóte'uo jeso'me, náictapegue' so' nesoxonaqapi qataxa jeso'me huataxanaq 'me ỹilotalégue jeso' tamnaxaqui 'me lamaxa'spi na' lasoxola' jen' netaxaỹáxanaxanecpi qataxa so' fariseopi. Jeso'me siỹaxadipi ỹátaqta nepataỹi jen' l'euóxonaxat qataxa ỹachítac so' lecoỹadáxanaxat. 4 Qaláxasa so' Jesús, qá'a sóxote ỹaỹáten ỹima jeda'me huápiỹi, qana'chi jeso'me sóxote huaqátet'aguet jeso'me siỹaxadipi, qana'chi ỹinatétac, 'eet'oi: —¿Jái'chogamaxa 'anmichíitaaque? 5 Qana'chi jeso'me siỹaxadipi 'enaaco': —Ñimitaqátaaque ga' Jesús 'me Nazaret lé'ec. Qana'chi so' Jesús 'enaaco': —Na'chaỹim. So' Judas 'me na'chiso so' ỹaneuo, jeso'me nataq'en huétaaue jeso'me siỹaxadipi. 6 Qana'chi so' Jesús joca'li 'enapéga so' siỹaxadipi da' 'eet'oi: “Na'chaỹim,” qana'chi jeso'me qoséegue, qana'chi ỹima chiỹaqséguem. 7 Qana'chi so' Jesús ỹitaxa ỹinat, 'eet'oi: —¿Jái'chogamaxa 'anmichíitaaque? Qana'chi jeso'me 'enaaco': —Ñimitaqátaaque ga' Jesús 'me Nazaret lé'ec. 8 Qana'chi so' Jesús 'enaaco': —Sóxote 'ami séetapegalo da' na'chaỹim. Da' ỹátaqta 'eesa da' jaỹim 'anmichíitaaque, n'óota da' 'amachíit'a jénjo' ỹaỹi da' jec. 9 Dójo' l'aqtac, jeda'me ỹipaquíchiỹi jeda'me mai'chi l'aqtac so' Jesús joca'li 'enaac: “Jen'me jaỹim ỹanem ñi' ỹit'a, jen'me qaỹa ga' daqat.” 10 Qana'chi so' Simón Pedro, 'me 'uo so' legaxanaxat, jeso'me nauégueegue, qana'chi ỹiquesoxóiỹi jaso' lequetéla p'aiỹi na' loic jeso' 'oonolec 'me lenaxat Malco. Jeso'me mai'chi lamaxasec jeso'me lasoxola' so' netaxaỹáxanaxanecpi da' qodetaxaỹapégue' ñi' Dios. 11 Qaláxasa so' Jesús 'enapego' jeso' Pedro, 'enaaco': —'Av'iỹílaxachiñi na' 'adelegaxanaxat, 'anpataỹi. Ñi' ỹit'a, da' jaỹim ỹipagaqtena'aguet da' ñi'queténaxac 'me 'ená'am da' qonỹómỹi ga' chim, qana'chi ¿sétaacoomaxa sa sáaue jeda'me? So' Jesús qoỹasoxona'aguet so' lasoxola' na' netaxaỹáxanaxanecpi 12 Qana'chi jeso'me nesoxonaqapi qataxa jeso'me let'a, qataxa jeso'me neuataxanaq so' judiopi, jeso'me ỹaconé'uo so' Jesús, qana'chi ỹicoñida't naua' loua'. 13 Ỹim, qana'chi qoỹauée'uo so' l'acháqa' so' Anás. Jeso'me Anás mai'chi li'ỹodo so' Caifás, 'me na'chiso so' lasoxola' na' netaxaỹáxanaxanecpi so' huó'e. 14 Jeso'me Caifás na'chiso joca'li so' 'éetapega so' judiopi da' ỹasouaxat jeso'me qana'chi n'óota da' ga' 'oonolec siỹaxaua ỹileualégue na' l'acháqa' lé'ecpi.

So' Pedro noqolguétetac, 'éetapega sa ỹaateton so' Jesús

15 So' Simón Pedro qataxa so' napaxaguenatac laqáỹa, jesaa'me quétrapegue' so' Jesús. Jeso'me laqáỹa so' napaxaguenatac, jeso'me naatetonaxaua jeso'me lasoxola' so' netaxaỹáxanaxanecpi. Tadeeto' jeso'me na'chi liquiáxauauo so' Jesús da' p'áuo so' nasoxoc jeso'me nasoxola'. 16 Jeso'me Pedro, qaa'le p'átai'ỹa so' lai so' som. Tadeeto' ỹañoxot da' p'áiỹi jeso' napaxaguenatac 'me mai'chi naatetonaxaua jeso'me lasoxola' na' netaxaỹáxanaxanecpi. Qana'chi jeso'me detaxaỹapégue' jaso'me ỹilotalégue so' som, qana'chi ỹip'áxaneuo so' Pedro. 17 Qana'chi jaso'me som ló'o ỹinatétaco' so' Pedro, 'enaaco': —¿Séetapega na'chi'am 'me 'aualquétaaue jen' lapaxaguenatacpi dójo' siỹaxaua? Qana'chi so' Pedro 'enaaco': —'Axai', sa naqaỹim. 18 Qá'a ỹátaqta jó'om, qana'chi jeso'me namaxa'spi qataxa jeso'me huataxanaq ỹa'uo so' lóle', qana'chi nichaatétañi da' netóotac. So' Pedro nataq'en huétaaue jeso'me da' netóotapiỹi so' dóle'.

So' lasoxola' na' netaxaỹáxanaxanecpi ỹinatétac so' Jesús

19 Qana'chi jeso'me lasoxola' na' netaxaỹáxanaxanecpi, jeso'me ỹachimaxatétapega so' Jesús, ỹinatétapeeque saua' lapaxaguenataqa, qataxa jái'chogamaxa 'éeta ga' lapaxaguenataxanaxac jeso'me. 20 Qana'chi so' Jesús 'enapego': —Jaỹim ỹátaqta ñaloxóot'a naale ỹima jen'me siỹaxadipi da' setaqátac, qataxa na'chi 'eeta't da' huáaue jen' lemáxaqui na' judiopi da' sapaxaguenataxáatac qataxa jiñi'me tamnaxaqui let'ádaic 'me huá'ña naale da' ỹima'a't na' judiopi. Jaỹim qaỹa ga' ỹ'aqtac da' soxotétapiiñi. 21 ¿Tá'nooqo'chi da' jaỹim 'aunatétac? N'óota toqo' da' 'aunat jen'me siỹaxadipi 'me jaỹim naquiáxatapega naale, qaidi jen'me ỹ'axat jega'me ỹ'aqtaxanaxac 'me sanem jen'me. Qá'a jen'me ỹaỹáten da'me ỹ'aqtaxanaxac. 22 Qana'chi so' Jesús joca'li 'enaac dójo', qana'chi jeso'me 'oonolec na' huataxanaq 'me ỹilotalégue jeso' tamnaxaqui 'me huétaaue, jeso'me ỹi'uaxánooue so' latáxasoxoc so' Jesús. Qana'chi 'enapéga, 'eet'oi: —¿Qa'chi 'auet'eco' dójo' da' 'au'axátem jiñi'me lasoxola' na' netaxaỹáxanaxanecpi da' qodetaxaỹapégue' ñi' Dios? 23 Qana'chi so' Jesús 'enapego': —Da' 'uootaxa sa nó'in ga' ỹ'aqtac, n'óota taa'le 'au'axat jái'chogamaxa hua'ague ga' 'éeta ga' sa nó'in. Qaláxasa da' 'uootaxa ỹiỹamqáchiiñi jeda'me senaac, ¿tóoqo'chi da' jaỹim 'au'axan? 24 Qana'chi so' Anás ỹamaq so' Jesús qoỹicoñida'a't saua' loua', da' ỹamaxa so' Caifás jeso'me 'oonolec lasoxola' so' netaxaỹáxanaxanecpi.

So' Pedro v'iỹílaxalégue da' 'éetapega sa ỹaateton so' Jesús

25 So' Pedro maliaxa quet'ot da' nichaatétañi netóotapiỹi so' dóle'. Qana'chi ỹitaxa qoỹinat, qoỹiit'oi: —¿Séetapega da' na'chi'am 'oonolec jen'me lapaxaguenatacpi dójo' siỹaxaua? Qana'chi so' Pedro ỹitaxa noqolguétetac, 'enaaco': —'Axai', sa naqaỹim. 26 Qana'chi ỹitaxa denataxan jeso'me 'oonolec so' lamaxa'spi jeso'me lasoxola' na' netaxaỹáxanaxanecpi, 'me mai'chi l'acháqa' lé'ec so' siỹaxaua 'me ỹiquesoxóiỹi joca'li jaso' lequetéla so' Pedro, 'eet'oi: —¿Sa na'chi'amo' da' 'am selótapega da' huá'ña di' nanaqa' jan' nañiise 'epaq, da' 'ouet'asop jeda'me? 27 Qana'chi so' Pedro ỹitaxa noqolguétetac. Huá'a, qana'chi noỹen so' 'olégaxa.

So' Jesús qoỹasoxono'ot so' net'a Pilato

28 Qana'chi qoỹauec so' Jesús, qoỹachiỹoxotá'ña so' l'acháqa' so' Caifás da' qoỹauéga so' nasoxoc so' net'a Pilato. Ma'le ỹamtaa'le ỹ'oxoñi, qana'chi jeso'me judiopi sa ỹañoxot joca'li da' p'áuo so' nasoxoc so' net'a, qá'a ỹivitétaaque da' sega'me paxáchiỹi da' l'óiỹaxac. Qá'a da' na'chi 'éeta dójo', qana'chi sa neuána'uo so' nalic jeso'me nolo' 'me huáaue da' qoueenata jeso' nolo' joca'li qocá'ai so' Egipto. 29 Tadeno' so' Pilato p'áiỹi joca'li, qana'chi ỹinatétac jeso'me siỹaxadipi, 'enaaco': —¿Jái'chogamaxa 'auasaqáitapeelégue da' lasouaxaset 'aviñii dójo' siỹaxaua? 30 Qana'chi jeso'me siỹaxadipi 'enapega'to': —Jeda'me da' sa 'te taa'le sa nó'in, qana'chi sa 'te toqo' da' 'am sanaxauó'o. 31 Qana'chi so' Pilato 'enapego' jeso'me siỹaxadipi, 'enaaco': —Jeda'me 'auavíquii, qana'chi 'auedoilégue jen'me naqátaxacpi 'me 'ami qoỹanema joca'li da' mai'chi 'anmichii. Qana'chi so' siỹaxadipi 'enaaco': —Qaláxasa qo'mi judío lase', sa 'te da' 'uo ga' qan'aqtaguec, da' qaidi 'uo ga' salaataq. 32 Huá'a, qana'chi ỹátaqta ỹipaquíchiilo naua' 'enapegalo so' Jesús joca'li ỹ'axát'a da' 'éeta qomle da' nalaataguec. 33 Qana'chi so' Pilato v'iỹílaxa'uo so' l'acháqa', qana'chi ỹiỹáxanee'ga so' Jesús, qana'chi ỹinatétac, 'enaaco': —¿Séetapega na'chi'am let'a na' judiopi? 34 Qana'chi so' Jesús 'enaaco': —¿'Am séetapega mai'chi 'andotelégue dójo' 'adenataxanaxac, 'uootaxa 'uo ga' 'am ỹ'axátem da' jaỹim? 35 Qana'chi so' Pilato 'enaaco': —¿Séetapega jaỹimo' judío lé'ec? Qá'a jen'me mai'chi 'ad'acháqa' lé'ecpi qataxa jen'me lasoxola'pi na' netaxaỹáxanaxanecpi, na'chína jen'me 'am ỹaneuó'o jaỹim. ¿Jái'chogamaxa 'aué'et sa nó'in? 36 Qana'chi so' Jesús 'enaaco': —Jeda'me ỹ'onataxanaxac da' jaỹim net'a, jeda'me sa na'chína jen' 'aléua. Qá'a da' na'chida 'éeta toqo' dójo', qana'chi jen'me jaỹim quétapegue'pi sóxote táxa da' delóquitac, da' qaidi sa jaỹim qoỹaneuó'o na' judiopi. Qaláxasa da' ỹ'onataxanaxac da' jaỹim net'a, jeda'me sa na'chína jen' 'aléua. 37 Qana'chi so' Pilato 'enapego' jeso'me, 'enaaco': —¿Qa'chi ỹátaqta 'eesa da' 'am net'a? Qana'chi so' Jesús 'enaaco': —Já'a, jaỹim net'a, naqaida da'me 'auenaac. Jaỹim ñiỹíñi da' ñanaỹa jen' 'aléua, da' qaidi s'axat jega'me 'eesa. Ỹima jen'me ỹalaxaguet jeda'me 'eesa, qana'chi naquiáxana jeda'me ỹ'aqtaxanaxac. 38 Qana'chi so' Pilato 'enapego' jeso'me, 'enaaco': —¿Jái'chogamaxa 'eesa lasoxoc?

So' Jesús qoỹaneuó'o da' nalaataguec

Joca'li ỹimat dójo' lenataxanaxac so' Pilato, qana'chi ỹitaxa p'áiỹi da' d'aqtaxanem so' judiopi, 'enaaco': —Jaỹim qaỹa ga' sauana lasouaxaset dójo' siỹaxaua. 39 Qaláxasa 'ami 'uo naale da' 'an'onataguiquii da' sétaaque da' sesóiỹi ga' necointáisec ỹasouaxat da' 'oñíita da' ỹivít'a di' nolo' 'me huáaue da' qoueenata joca'li qodíc'ai di' Egipto. ¿Séetapega sétaaque da' sesóiỹi jiñi'me let'a na' judiopi? 40 Qana'chi ỹima so' siỹaxadipi ỹitaxa v'iỹílaxalégue da' ỹ'alaqaỹi, 'enaaco': —¡'Ai', sa na'chida dójo' siỹaxaua! ¡'Auen ga' Barrabás da' 'ausóiỹi! Jeso'me Barrabás ỹátaqta cacháxaic joca'li.

Juan 19

1 Qana'chi so' Pilato damaxasoxolégue da' qoỹaconé'uo so' Jesús, qana'chi qoỹi'uaxan. 2 Qana'chi jeso'me nesoxonaqapi ỹanáỹi na' laqaic so' Jesús jaso' l'onata ỹaxat, qataxa qoỹanaỹilo saua' nouo 'me ỹátaqta ỹimalqalégue da' letóomaqa'. 3 Joca'li ỹim, qana'chi qonchíi'uo jeso'me, qana'chi qoỹíitapega, qoỹiit'oi: —¡Jéga, 'am 'me let'a na' judiopi! Qana'chi qoỹi'uaxáatapegooue jen' latáxasoxoc. 4 Qana'chi so' Pilato ỹitaxa p'áiỹi, qana'chi 'enapego' so' siỹaxadipi, 'enaaco': —Ỹa 'auc'achiñii naỹi jeda'me, ñaqatéegue, qaidi 'auaỹáchiñiita da' jaỹim qaỹa ga' sauana lasouaxaset jeda'me. 5 Qana'chi qonep'áxaneegue so' Jesús, nétaỹi qoỹin na' laqaic jaso' ỹaxat 'me n'onata, qataxa ỹáatrañi saua' nouo 'me ỹimalqalégue da' letóomaqa'. Qana'chi so' Pilato 'enapego' so' siỹaxadipi, 'enaaco': —¡Jedójo' jeda'me siỹaxaua! 6 Joca'li qoỹilá'a jeso'me, qana'chi na' lasoxola'pi na' netaxaỹáxanaxanecpi da' qodetaxaỹapégue' ñi' Dios qataxa jen'me mai'chi neuataxanaq, ỹima jeso'me ỹ'alaqaỹi. Qana'chi 'enaaco': —¡Qoỹip'enaséguem qomle jeda'me! ¡Qoỹip'enaséguem qomle jeda'me! Qana'chi so' Pilato 'enapego' so' siỹaxadipi, 'enaaco': —Já'a, 'auavíquiỹiiỹi jeda'me, qana'chi mai'chi 'ap'iñiỹaséguem, qá'a jaỹim qaỹa ga' sauana huasoilégue jeda'me. 7 Qaláxasa so' judiopi 'enaaco': —Qo'mi 'uo jeda'me naqátaxac 'me qo'mi qoỹanema ca'li, jeda'me 'enaac da' ỹiuen da' qoỹalaat ga' siỹaxaua, qá'a jeda'me 'enapeela't da' lec'óxot ñi' qan'étoqo't. 8 Joca'li demachíỹa dójo' so' Pilato, qana'chi ỹátaqta huosái'isa da' loqolánaxa. 9 Qana'chi ỹitaxa táaue so' l'emec, qana'chi ỹitaxa ỹinatétac so' Jesús, 'enaaco': —¿Jái'chogamaxa hua'ague ga' ỹátaqta 'auachiỹoqot'egue 'am? Qaláxasa so' Jesús qaỹa 'te l'aqtac. 10 Qana'chi so' Pilato 'enapego' jeso'me, 'enaaco': —¿Sa jaỹim 'au'ateguet? ¿Sa 'auaỹateno' da' jaỹim 'uo da' senec da' samaxasoxolégue da' 'am qoỹip'iiséguem 'uootaxa da' 'am sesóiỹi? 11 Qana'chi so' Jesús 'enaaco': —'Am qaỹa ga' 'adesáaque da' 'uootaxa sa 'am ỹanem ñi' Dios ga' 'ad'añaxac, da' qaidi 'uo ga' jaỹim 'auéet'ec. Tadeeto' jega'me jaỹim 'am ỹaneuó'o, jega'me qomle ỹátaqta p'asáiỹi da' lasouaxaset, sa 'ená'am da' 'onéta. 12 Huá'a, qana'chi so' Pilato nimitétaaque ga' lasoxoc, da' qaidi ỹañoxot da' ỹisóiỹi so' Jesús, qaláxasa so' judiopi ỹátaqta ỹ'alqátaỹi, 'eet'oi: —¡Da' 'am 'auaxanéegue jeda'me, qa'chi sa 'anauotaxaua jiñi'me let'a jen' net'alpi 'me net'ague da' Roma! ¡Qá'a gamachaqaiga sétaaque da' mai'chi n'etela't da' net'a, qana'chi jega'me nep'aguénaxaua jen'me let'a jen' net'alpi! 13 Qana'chi so' Pilato joca'li demachíỹa dójo', qana'chi damaxasoxolégue da' qonaqatéegue so' Jesús. Qana'chi jeso'me néta'ña jeso'me huá'ña da' qoỹí'et ga' nasouaxac, 'me qoỹimatá'ac da' lenaxat Gabata jenaa'me hebreo l'aqtaqa. Jeda'me náỹi da' napiáqa' qa'. 14 Jeso'me nolo' na'chiso so' p'aỹa'aguet jeso'me nolo' 'me huétooue da' qoueenata joca'li qodíc'ai so' Egipto. Ma'le nolo' laiñi joca'li so' Pilato 'enapéga so' judiopi, 'enaaco': —¡Jedójo' jeda'me 'adet'ai! 15 Qaláxasa so' judiopi ỹ'alqátaỹi, 'enaaco': —¡Qoỹalaat qomle jeda'me! ¡Qoỹalaat qomle jeda'me! Qataxa ¡qoỹip'enaséguem qomle! Qana'chi so' Pilato 'enaaco': —¿Séetapega sañoxoto' da' sep'enaséguem jeda'me 'adet'ai? Qaláxasa jeso'me lasoxola'pi so' netaxaỹáxanaxanecpi 'enapega'to': —Qo'mi qaỹa ga' laqáỹa qadet'a, na'chiñíta ñi'me let'a jen' net'alpi 'me net'ague da' Roma. 16 Huá'ña, qana'chi so' Pilato ỹanóoue so' siỹaxadipi, da' qaidi ỹip'enaỹi jaso' nesodooso so' Jesús. Qana'chi so' siỹaxadipi ỹauec jeso'me.

Da' 'éeta joca'li qoỹip'enaséguem so' Jesús

17 Joca'li ỹim, qana'chi qodicot so' Jesús, mai'chi ỹáchi jaso' nesodooso, da' ỹic'átee'ga so' 'aléua 'me qoỹimatá'ac da' naqaic lip'inec l'acháqa', jen'me hebreo naua' l'aqtaqa ỹimatá'ac Gólgota. 18 Huá'ña di'me, qana'chi qoỹip'enaỹi jaso' nesodooso jeso'me, nataq'en saua' laqáỹa' dos. Jeso' laqáỹa jesaa'me p'aiỹi da' loic qataxa so' laqáỹa p'aiỹi jen' n'emaq. Qana'chi so' Jesús huánỹi laiñi. 19 Qana'chi so' Pilato damaxasoxolégue da' qoỹanaỹi so' leséenec jaso' nesodooso so' nidíisec 'me 'eet'oi: “Jesús Nazaret lé'ec, 'me let'a na' judiopi.” 20 Ỹátaqta jalcote so' judiopi ỹitaxaỹaxáatac jeso'me nidíisec, qá'a jeso'me 'aléua, 'me huá'ña joca'li qoỹip'enaséguem so' Jesús, jeso'me sa qaỹáaque so' noic Jerusalén. Jeso'me nidíisec qoỹidétrañi naua' l'aqtaqa so' hebreo lé'ecpi, qataxa griego lé'ec, qataxa na' latín lé'ec. 21 Chan'eesa so' lasoxola'pi na' letaxaỹáxanaxanecpi na' judiopi 'eetapego' so' Pilato, 'enaaco': —'Ena't qomle da' 'avidíñi “jiñi'me let'a na' judiopi.” Na'chidáta da' 'avidíñi “Jiñi'me 'enapeela't da' let'a na' judiopi.” 22 Qaláxasa so' Pilato 'enapego' so' nasoxola'pi, 'enaaco': —Jeda'me sidíñi, da'me na'chi 'eeta't qomle da' qodemachíit'a. 23 Joca'li so' nesoxonaqapi ỹimat da' ỹip'iiséguem so' Jesús, qana'chi qoỹaconalo saua' louo, qana'chi jesaa'me cuatro nesoxonaqa 'oonolec qoỹin ñi' qoỹanem. Qataxa qoỹacona so' lapoto, qaláxasa jeso'me qaỹa ga' letaxat, ỹima'a't jeso'me. 24 Qana'chi saua' nesoxonaqa 'enapega'to': —'Ena't qomle da' secolaxataqa'ague jena'me. Na'chidáta da' ñalítaxaỹi, qaidi saỹátenaq jái'chogamaxa ỹaconguet. Huá'a, qana'chi ỹátaqta ỹipaquíchiilo naua' nedétrañi l'aqtaqa ñi' qan'étoqo't 'me 'eet'oi: “Qonalochiilo qomle naua' ỹiuo da' qonalichiilo, qaidi 'uo ga' ỹaconguet.” Naqaida da' 'éeta joca'li so' nesoxonaqapi. 25 Jaso' nesodooso so' Jesús na'chi huéta'uo lai jaso' lat'e, qataxa jaso' laqáỹa jaso' lat'e, qataxa jaso' laqáỹa María 'me loua so' Cleofas, qataxa jaso'me María 'me lase di' Magdala. 26 Qana'chi so' Jesús joca'li ỹilá'a jaso' lat'e da' nichaatétañi huaqat'aguet jeso'me lapaxaguenatac 'me ỹátaqta lauotaxat, qana'chi 'enapego' jaso' lat'e, 'enaaco': —'Am ỹauo, jedójo' qomle da' 'ac'óxot. 27 Ỹim, qataxa 'enapego' so' lapaxaguenatac, 'enaaco': —Jadójo' qomle jada' 'adat'e. Qana'chi chiỹoqóchii'ña so' nolo' da' jeso'me lapaxaguenatac ỹauée'uo so' l'acháqa' jaso'me.

Da' 'éeta joca'li ỹileu so' Jesús

28 Joca'li ỹim dójo', qana'chi so' Jesús ỹaỹáten da' sóxote ỹipaquíchiỹi ỹima jen'me qoỹ'axat jocalia'cho', da' qaidi ỹipaquíchiilo naua' nedétrañi n'aqtaqa. Qana'chi 'enaaco': —Siliinquip. 29 'Uo jaso' ỹómaxaqui saqáchiỹi jen' latáxa chimaxadaic. Qana'chi qoỹipet jaso' 'ená'am jan' huol, qana'chi qoỹanáỹi jaso' lepee jan' nañiise lenaxat hisopo. Qana'chi qoỹaasée'ma, qaidi nec'ouoq. 30 Qana'chi so' Jesús niỹómỹi jeso' latáxa chimaxadaic. Ỹim, qana'chi 'enaaco': —Naỹi ỹim ỹima jen'me qoỹí'etpi. Huá'a, qana'chi naqáchiiñi jen' laqaic, qana'chi ỹileu.

So' huataxanaq lé'ec ỹisói'uo so' lai so' Jesús jaso' nemiỹoxo

31 Jeso' nolo' 'me p'aiỹet so' nolo' 'me huétooue da' qoueenata joca'li qodíc'ai di' Egipto. Qana'chi so' judiopi sa ỹiỹamaxaden da' na'chi nétaỹilo saua' nesodoosol jesaa'me qoỹip'eedéuo jeso'me nolo' mataxaqui. Qá'a so' nolo' ỹátaqta p'asáiỹi da' qoỹoden. Tadeno' qoỹiỹaxanot so' Pilato, qaidi damaxasoxolégue da' qoỹinoxo'n naua' lichil saua' qoỹip'éetrauo, qana'chi qonaqchidíñi da' ló'oquiaxa'j jesaa'me. 32 Qana'chi saua' nesoxonaqa jéque', qana'chi qoỹinoxo'n naua' lichil saua' nep'enaxa'u so' Jesús. 33 Qaláxasa joca'li qoỹic'áta so' Jesús, qana'chi qoỹilá'a da' sóxote ỹileu, qana'chi sa qoỹinoxo'n naua' lichil. 34 Qaláxasa so' 'oonolec saua' nesoxonaqa, jeso'me ỹisói'uo so' lai jeso'me jaso' nemiỹoxo, qana'chi janac jaso' letauo' qataxa so' noxop. 35 Jeso'me ỹ'axat dójo', jeso'me joca'li ỹauáachiỹi qataxa ỹátaqta 'eesa dójo' 'enaac. Qá'a jeso'me ỹaỹáten da' ỹátaqta 'eesa dójo' l'aqtac, qaidi 'ami nataq'en 'au'amaqtenataxañii. 36 Qá'a dójo' qouápiỹi, jeda'me di'ỹoq, qaidi ỹipaquíchiilo naua' nedétrañi n'aqtaqa 'me 'eet'oi: “Naua' lip'ináqa, qaỹa 'te ga' qoỹinoxon.” 37 Qataxa di' laqáỹa nedétañi 'enaaco': “Qoỹauáachiỹi qomle jeso'me qoỹisoc.”

So' Jesús qoỹisiiñi

38 Joca'li ỹim dójo', qana'chi so' José 'me l'acháqa' di' Arimatea, jeso'me ỹiỹaxanot so' Pilato, da' qaidi ỹidóiỹi so' Jesús. Jeso' José, jeso'me quétapegue' so' Jesús, qaláxasa sa ỹátaqta naloxon, ỹasouaxat da' d'óitapega so' judiopi. Qana'chi so' Pilato ỹanem jeso'me da' ỹiỹáxane'uo, qana'chi jec so' José da' ỹidóiỹi so' Jesús. 39 Nataq'en so' Nicodemo, jeso'me nec'áte'uo joca'li so' pí'ỹaq da' detaxaỹapégue' so' Jesús, jeso'me nachítac so' treinta kilos jan' qoỹalectena't 'epaq licha', lenaxat mirra qataxa áloes. 40 Qana'chi so' José qataxa so' Nicodemo, jesaa'me ỹidódeegue so' Jesús. Qana'chi jeso'me qoỹaxatet'ague so' naanaxat 'me qoỹ'amenque saua' qoỹalectena't 'epaq licha' 'me jama jen' laita, qá'a jeda'me na'chi n'onataguec so' judiopi da' ỹivíta da' ỹisiiñi jen' laqatacpi. 41 Jeso' 'aléua 'me huá'ña joca'li qoỹip'enaséguem so' Jesús, jeso'me 'uo so' nanaqa' jaso' nañiise 'epaq, qana'chi huáaue jaso' napa'lai't dálaxai 'me maliaxa qaỹa 'te ga' qoỹachánỹi. 42 Qana'chaso 'me qoỹachánỹi so' Jesús, qá'a jaso' napa'lai't sa qaỹáaque, qataxa ỹasouaxat da' ma'le ỹamtaa'le ỹivíta so' lalóqo' so' nemataxaqui so' judiopi.

Juan 20

Da' 'éeta joca'li nec'aliséguem so' Jesús

1 Jeso'me 'uáuapiiñi nolo' naua' noloqo'te, qana'chi jaso' María 'me lase di' Magdala, jaso'me ỹic'átee'ga jaso' napa'lai't joca'li néte'ta. Joca'li maliaxa n'alalégue jen' 'aléua, qana'chi jaso'me ỹilá'a so' qa' 'me lapadénaxat jaso' napa'lai't da' ma'le qonaqat. 2 Qana'chi jaso'me jec, naqalégoqta'uo ga' huét'a so' Simón Pedro qataxa so' laqáỹa napaxaguenatac 'me ỹátaqta nauotaxaua so' Jesús. Qana'chi 'enapegalo, 'enaaco': —So' qadesaliaxanec qonaqatéegue joca'li jañi' napa'lai't, qaláxasa qo'mi sa saỹátenaq ga' qoỹacha'ague jega'me. 3 Qana'chi so' Pedro qataxa so' lapaxaguenatac laqáỹa, jesaa'me jéque' da' ỹic'átree'ga jaso' napa'lai't. 4 Jesaa'me chiỹoqodáñi, náictapega't, qaláxasa so' 'oonolec vidiáqaic, napacalégue so' Pedro. Qana'chi jeso'me 'uáutee'ga da' ỹivídee'ga jaso' napa'lai't. 5 Qana'chi ñ'ii'ñisop jaso'me da' ỹic'aten. Qana'chi ỹilá'a so' naanaxat da' huetai'ndi, qaláxasa sa ỹátaqta táaue. 6 Joca'li ma'le nóvi' so' Pedro, qana'chi jeso'me ỹátaqta táaue jaso' napa'lai't. Qana'chi jeso'me nataq'en ỹilá'a so' naanaxat 'me huetai'ndi. 7 Qataxa nataq'en ỹilá'a jeso'me 'uáloq 'me qoỹaxatétaỹi na' laqaic so' Jesús. Qaláxasa jeso'me sa hua'asop jeso'me naanaxat, qá'a jeso'me qoỹinana't qataxa ỹaqá'a so' huéta'ña. 8 Qana'chi so' laqáỹa lapaxaguenatac 'me 'uáutee'ga joca'li da' ỹivídai'ỹa jaso' napa'lai't, jeso'me nataq'en táaue, qana'chi ỹauáachiỹi ỹima dójo', qana'chi ỹátaqta ỹ'amaqten. 9 Qá'a jesaa'me maliaxa sa ỹaỹáte'n ga' náỹi naua' nedétrañi n'aqtaqa, da' ỹiuen da' nec'aliséguem qoỹin so' Jesús. 10 Qana'chi jesaa'me napaxaguenataqa v'iỹílaxade'uo ga' l'acháqa't.

So' Jesús naloxóna jaso' María 'me lase di' Magdala

11 Qaláxasa jaso' María qapiỹáñi, huét'a so' lai jaso' napa'lai't. Joca'li maliaxa noỹíitac, qana'chi ñ'íiñi da' ỹic'aten so' lauel jaso' napa'lai't. 12 Qana'chi ỹila'alo saua' dos namaxa's piỹem lase', pagaxaiqa naua' louo, nétra'ña jeso'me qoỹachá'ña joca'li so' Jesús. So' 'oonolec jesaa'me néta'ña so' nasaxánaqa', qaláxasa so' laqáỹa net'ague so' noqosoxonaqa'. 13 Qana'chi jesaua' namaxa's ỹinatétrac jaso'me, 'enapega'to': —'Am ỹauo, ¿tóoqo'chi 'anoỹíitac? Qana'chi jaso'me 'enaaco': —Ỹasouaxat da' qoỹáchi so' ỹasoxola', jaỹim sa saỹáten ga' qoỹacha'ague jega'me. 14 Qana'chi joca'li 'chi 'enaac dójo', qana'chi ỹitaxa naxaséguem. Qana'chi ỹilá'a so' Jesús da' nichaatet'asop, qaláxasa sa ỹaỹáten da' naqaiso so' Jesús. 15 Qana'chi so' Jesús ỹinatétaco' jaso'me, 'enaaco': —'Am ỹauo, ¿tá'nooqo'chi 'anoỹíitac? qataxa ¿jái'chogamaxa 'anmitétaaque? Qana'chi jaso'me 'éetapega da' na'chiso jeso'me ỹilot'ague jaso' nañiise l'acháqa'. Qana'chi 'enapego', 'enaaco': —'Am siỹaxaua, da' 'uootaxa na'chi'am 'me 'auáchi so' ỹasoxola', n'óota da' jaỹim 'au'axátem jega'me 'auacha'ague, qaidi jaỹim s'iiná'a jega'me. 16 Qana'chi so' Jesús 'enapego' jaso'me, 'enaaco': —¡'Am María! Qana'chi jaso'me ỹilapecot, qana'chi huo'oi naua' l'aqtaqa na' hebreo da' 'enapéga, 'eet'oi: —¡Raboni! —jeda'me náỹi da' 'enáacjo': 'Am paxaguenataxanaxaic. 17 Qana'chi so' Jesús 'enapego' jaso'me, 'enaaco': —Jaỹim 'auaxanéegue qomle, qá'a jaỹim maliaxa sa saiỹi da' na'ague ñi' ỹit'a. Qaláxasa 'am qomle 'oc, qana'chi 'au'aqtaxanem ga' ỹapaxaguenatacpi da' jaỹim saiỹi da' net'ague ñi' ỹit'a, 'me nataq'en 'adet'ai, jiñi'me ỹit'a Dios qataxa nataq'en 'adet'ai Dios. 18 Qana'chi jaso' María 'me lase di' Magdala, jaso'me jec da' d'aqtaxanema saua' napaxaguenataqa da' jaso'me nauá'ne' jeso'me qadesaliaxanec, qataxa da' jeso'me ỹ'axátetapeguem dójo' jaso'me.

So' Jesús naloxonalo saua' lapaxaguenataqa

19 Qana'chi so' nolo' 'me 'uáuapiiñi naua' noloqo'te joca'li ma'le pí'ỹaq, qana'chi saua' napaxaguenataqa dasot'a'salo. Ỹátaqta ỹapadíichidiỹi so' som, ỹasouaxat da' d'óitraaque so' judiopi. Qana'chi so' Jesús p'áuo, qana'chi víchiinỹi so' laiñi saua' lapaxaguenataqa. Qana'chi ỹip'iỹe'n, 'enaaco': —'Ami 'uo qomle da' 'ad'emáxaquii. 20 Joca'li ỹim da' 'enaac dójo' jeso'me, qana'chi ỹaloxo'n saua' loua' qataxa so' lai. Qana'chi jesaa'me ỹátaqta 'uo da' netónaxa'j da' ỹilotr'ot so' qadesaliaxanec. 21 Ỹim, qana'chi so' Jesús ỹitaxa 'enapegalo jesaa'me, 'enaaco': —'Ami 'uo qomle da' 'ad'emáxaquii. Dójo' 'éeta joca'li da' jaỹim namaq ñi' ỹit'a, naqaida qomle da' seet'eque da' 'ami sama'. 22 Qana'chi jeso'me ỹipetétoovlo jesaa'me so' laỹat, qana'chi 'enapegalo: —'Auacoñiiỹet qomle na' Espíritu Santo. 23 Jega'me 'auapalaxachii' naua' loico, qana'chi jega'me qoỹapalaxa't naua' loico. Qataxa jega'me sa 'auapalaxachii' naua' loico, qana'chi jega'me sa qoỹapalaxa't naua' loico.

So' Tomás nauá'ne' so' qadesaliaxanec 'me sóxote nec'aliséguem

24 Qaláxasa so' Tomás, jeso'me 'oonolec saua' doce napaxaguenataqa 'me qoỹimatá'ac huadiáxaic, jeso'me joca'li maliaxa sa huetaavlo jesaa'me joca'li qonauá'ne' so' Jesús. 25 Joca'li ỹoxoi'ỹi dójo', qana'chi saua' laqáỹa' napaxaguenataqa d'aqtaxáatrapeguem jeso'me, qoỹinaaco': —Qo'mi ñauanáxai' so' qadesaliaxanec. Qaláxasa so' Tomás 'enapegalo jesaa'me, 'enaaco': —Jaỹim da' sa sec'ate'n saua' loua' ga' liidéuo saua' clavo, 'uootaxa da' sesooguilo ga' liidéuo saua' clavo naua' loua' qataxa so' lai, qana'chi jaỹim sa s'amaqten dójo'. 26 Joca'li ma'le ỹivid'alo saua' ocho noloqo'te, qana'chi saua' napaxaguenataqa ỹitaxa ỹima'a'salo da' huétraaue so' 'emec, qana'chi huétauo so' Tomás da' huetaavlo jesaa'me. Temaqaidi da' ỹátaqta qoỹapadíichiỹi so' som, qaláxasa so' Jesús p'áuo, qana'chi víchiinỹilo jesaa'me. Qana'chi ỹip'iỹe'n, 'enaaco': —'Uo qomle da' 'ad'emáxaquii. 27 Ỹim, qana'chi 'enapego' so' Tomás, 'enaaco': —Ỹa 'auséteelo naua' 'adiaxata naua' ỹoua', qataxa 'auc'ate'n jenaa'me; nataq'en 'ando'quéna na' 'adouaq, 'apoteuó'o jen' ỹai. Sa 'te qomle da' 'auqolguétaxan, na'chidáta da' 'au'amaqtenataxan. 28 Qana'chi so' Tomás 'enaaco': —¡'Am ỹisaliaxanec qataxa 'am ñitamnaxala'! 29 Qana'chi so' Jesús 'enapego' jeso'me, 'enaaco': —'Am Tomás, naỹi 'au'amaqtenataxan, qá'a jaỹim 'anauá'ne'. Qaláxasa ỹátaqta mátac qomle jega'me d'amaqtenataxan, temaqaidi da' sa jaỹim nauá'ne'.

Da' 'éeta tadeno' qoỹidelégue jan' nede

30 So' Jesús nataq'en jalcote so' ỹí'et n'anecpi 'me sa qoỹauanápiỹi da' ỹauáachiỹi qa'en so' lapaxaguenatacpi da' sa qoỹidelégue jan'me nede. 31 Qaláxasa dójo' qoỹidíñi, jeda'me qoỹidíñi, qaidi 'ami 'au'amaqchíñii so' Jesús da' naqaiso jeso'me qoỹ'axátet'aguet net'a 'me qadec'alaxaqui, jeso'me lec'óxot ñi' qantamnaxala', qataxa qaidi 'ami 'auañoxochii da' 'uo da' 'adec'alaqai da' 'au'amaqchíñii jeso'me.

Juan 21

So' Jesús naloxonalo saua' siete lapaxaguenataqa

1 Joca'li ỹim dójo', qana'chi so' Jesús ỹitaxa naloxonalo saua' lapaxaguenataqa, huá'ña di' loxogue jaso' peróna 'me huá'ña di' Tiberias. Da' 'éeta joca'li naloxonalo, 'eet'oi: 2 Jesaa'me joca'li huet'a'salo Simón Pedro, qataxa Tomás 'me qoỹinapéga da' huadiáxaic, qataxa so' Natanael 'me l'acháqa' di' noic Caná 'me huáaue di' Galilea, qataxa saua' dos lec'óqo'te so' Zebedeo, qataxa saua' laqáỹa' dos lapaxaguenataqa so' Jesús. 3 Qana'chi jeso' Simón Pedro 'enapegalo jesaa'me, 'enaaco': —Jaỹim sec da' si'ỹáco. Qana'chi jesaa'me 'enapega'to': —Qo'mi nataq'en 'am sec'átaqtapegue'. Qana'chi jéque' jesaa'me, qana'chi huenóchidinỹi jaso' nilicota, qaláxasa jeso' pí'ỹaq qaỹa 'te ga' loxone'j. 4 Joca'li ma'le ỹamtaa'le ỹ'oxoñi, qana'chi so' Jesús naloxon, huet'ot so' loxogue, qaláxasa jesaua' lapaxaguenataqa sa ỹaỹáte'n da' naqaiso jeso'me. 5 Qana'chi jeso'me 'enapegalo jesaa'me, 'enaaco': —'Ami soxodipi, ¿séetapega qaỹa ga' 'adoxonquii? Qana'chi jesaa'me 'enapega'to': —Já'a, qaỹa. 6 Qana'chi so' Jesús 'enapegalo jesaa'me, 'enaaco': —'Auasaqáiñi qomle na' 'ade'uáanaxanaxachii, qaláxasa 'auasaqaỹiỹi na' loic jana' 'adilicotai, qaidi 'uo ga' 'adoxonquii. Qana'chi naqaida da' qoỹíit'ec joca'li qoỹasaxáñi so' 'uáanaxanaxat. Joca'li ỹim, qana'chi sa qoỹañoxot da' qonqadiséguem so' 'uáanaxanaxat, ỹasouaxat da' ỹágueegue so' huétaỹi niỹaqpi. 7 Qana'chi jeso'me napaxaguenatac 'me ỹátaqta nauotaxaua so' Jesús, jeso'me 'enapego' so' Pedro, 'enaaco': —¡Na'chida da' qadesaliaxanec! Qana'chi joca'li 'chi demachíchiỹi dójo' so' Simón Pedro da' naqaiso so' qadesaliaxanec, qana'chi ỹaadíñi saua' louo (qá'a jeso'me naqa't joca'li saua' louo), qana'chi huenóchiinỹi so' noxop. 8 Saua' laqáỹa' napaxaguenataqa qaa'le ỹivíded'ata so' loxogue da' nétranỹi jaso' nilicota, qoỹauéqueta'ta so' 'uáanaxanaxat, ỹátaqta saqáchiỹi so' niỹaqpi, qá'a jeso'me loxogue ỹóvi' cien metros di' sequet'eta. 9 Joca'li huenótreegue, qana'chi qoỹilalégue so' dóle' nedot'a't jaso' poqo, huétanỹi so' níỹaq, qataxa 'uo jaso' pan. 10 Qana'chi so' Jesús 'enapegalo jesaa'me, 'enaaco': —Ỹa 'auauóỹi ga' 'andoita jena'me niỹaqpi 'me ỹímta 'andoita. 11 Qana'chi so' Simón Pedro huenóchiinỹi jaso' nilicota, qana'chi ỹauéctata so' loxogue so' 'uáanaxanaxat 'me ỹátaqta saqáchiỹi so' niỹaqpi, nedot'a't na' let'ádaic. So' niỹaqpi táchii'ña di' ciento cincuenta y tres. Te'me da' ỹátaqta jalcote, qaláxasa sa ỹicolaxat so' 'uáanaxanaxat. 12 Qana'chi so' Jesús 'enapegalo jesaa'me, 'enaaco': —'Aỹaláỹi, 'au'quíỹi. Qana'chi jesaa'me napaxaguenataqa sa 'te da' 'uootaxa 'uo ga' ỹañoxot da' ỹinat jeso'me jái'chosomaxa jeso'me, qá'a qoỹaỹáten jeso'me da' naqaiso so' qadesaliaxanec. 13 Qana'chi so' Jesús noqochíiuo, qana'chi ỹacona jaso' pan, qana'chi ỹanoovlo jesaa'me, qataxa na'chi 'ená'am qa'en joca'li so' níỹaq. 14 Naqaida da' 'éet'ec joca'li ma'le ỹivid'alo saua' tres da' v'iỹílaxalégue da' naloxonalo saua' lapaxaguenataqa joca'li ỹim da' ma'le nec'aliséguem.

So' Jesús detaxaỹapégue' so' Simón Pedro

15 Joca'li ỹima't da' liqui'ỹáxa'j jesaa'me, qana'chi so' Jesús ỹinat so' Simón Pedro, 'enaaco': —'Am Simón 'me 'am lec'óxot so' Jonás, ¿séetapega ỹátaqta da' jaỹim 'auauotec, sa 'auená'am jen' 'adaỹi da' jaỹim ỹauotec? Qana'chi so' Pedro 'enaaco': —Já'a, 'am ỹisaliaxanec, 'am 'auaỹáten maiñaxa da' 'am sauotec. Qana'chi so' Jesús 'enapego' jeso'me, 'enaaco': —Qama'chi táxa 'antelo'o' qomle jan' ỹilopi n'aanaxate lec'oqtepi. 16 Qana'chi v'iỹílaxalégue da' ỹinat jeso'me, 'enaaco': —'Am Simón 'me 'am lec'óxot so' Jonás, ¿séetapega jaỹim 'auauotec? Qana'chi so' Pedro 'enaaco': —Já'a, 'am ỹisaliaxanec, 'am 'auaỹáten maiñaxa da' 'am sauotec. Qana'chi so' Jesús 'enapego' jeso'me, 'enaaco': —Qama'chi táxa 'aulo'ogue qomle jan' ỹilopi n'aanaxate. 17 Qana'chi v'iỹílaxalégue da' ỹinat, 'enaaco': —'Am Simón 'me 'am lec'óxot so' Jonás, ¿séetapega jaỹim 'auauotec? Qana'chi so' Pedro ỹátaqta daquicóta, ỹasouaxat da' sóxote tres da' qov'iỹílaxalégue da' qoỹinat da' ỹátaqta 'eesa da' 'uo da' lauo'chi. Qana'chi jeso'me 'enapego': —'Am ỹisaliaxanec, 'am 'auaỹáten maiñaxa ỹima da' ỹasoxoc, qataxa 'auaỹáten da' ỹátaqta 'am ỹauotaxat. Qana'chi so' Jesús 'enapego' jeso'me, 'enaaco': —Qama'chi táxa 'aulo'ogue jan' ỹilopi n'aanaxate. 18 Ỹátaqta 'eesa dójo' 'am s'axátem naỹi, da' joca'li maliaxa 'am nesoqolec, qaa'le 'am mai'chi 'auadíñi naua' 'adouo da' 'ané'et qataxa mai'chi 'auoiquíitac ga' 'aiỹi. Qaláxasa da' ỹivíta da' 'am ỹ'axaic, qana'chi 'am 'auanodétraiỹi naua' 'adoua', qana'chi ỹaqá'a ga' 'am n'étaxanaxan, qataxa 'am qoỹaueegue jega'me sa ỹátaqta 'atapeegue. 19 Jedójo' 'enaac so' Jesús, jeda'me náỹi da' sétaaque da' ỹaỹátenaxanaxanec da' 'éeta qomle da' leleuaxa so' Pedro qataxa da' 'éet'ec da' ỹi'ỹoxoden ñi' Dios. Joca'li ỹim, qana'chi 'enapego' jeso'me, 'enaaco': —¡Jaỹim 'auc'átet'ague qomle!

So' nauotaxat napaxaguenatac

20 Joca'li neselcaac so' Pedro, qana'chi ỹila'aguet so' napaxaguenaxaua 'me ỹátaqta nauotaxaua so' Jesús, jeso'me huéta'uo lai joca'li 'uo so' niqui'ỹáxac, jeso'me ỹinatétaco' jeso'me joca'li 'enaaco': “'Am ỹisaliaxanec, ¿jái'chogamaxa táchiỹi da' 'am ỹaneuo?” 21 Qana'chi so' Pedro joca'li ỹilá'a jeso'me, qana'chi ỹinatétac so' Jesús, 'enaaco': —'Am ỹisaliaxanec, jena' cha'aguet, ¿jái'chogamaxa hua'ague qomle ga' 'éeta ga' taỹá'a? 22 Qana'chi so' Jesús 'enaaco': —Da' jaỹim sétaaque da' jen'me na'chi 'eeta't qomle da' nec'alétaiỹi, cha ỹivíd'a qomle da' ñ'iỹílaq, qaláxasa ¡'amachít'a qomle; sa 'aỹapée'uo jena'me! 'Am, qaa'le jaỹim 'oquegue. 23 Qana'chi jec dójo' n'aqtaxanaxac jeso'me nauégaxau'pi da' sa ỹileu so' lapaxaguenatac. Qaláxasa so' Jesús sa 'enapéga jeso'me da' sa ỹileu. Qá'a jedójo' 'enaac, 'eet'oi: “Da' jaỹim sétaaque jen'me da' na'chi 'eeta't qomle da' nec'alétaiỹi, cha ỹivíde'ta qomle ñ'iỹílaq, ¡'am sa 'te qomle da' 'aỹapée'uo jen'me!” 24 Jesójo' napaxaguenatac, naqaiso so' ỹ'axátetac ỹima dójo', qataxa mai'chi ỹidíñi. Qaláxasa qo'mi saỹátenaq da' ỹátaqta 'eesa dójo' 'enaac. 25 Nataq'en ỹátaqta jalcote joca'li na' laỹi ỹí'etpi so' Jesús, tadeeto' jen'me da' 'uootaxa ỹima da' qoỹidíñi, qana'chi jaỹim séetapega da' ỹátaqta sa nalolégue jen' 'aléua jan' nedepi 'me qoỹidelégue. Já'a, na'chi naq'áita dójo'.