The New Testament of our Lord and Saviour Jesus Christ
1 Jisumkristuqam unay Abrajamba, unay gubyirnu Dabidpa karu willkanmanda nasirqan. Kaypim iskibrini Jisuspa chay unay agwilungunampa chutingunata: 2 Chay agwilun Abrajamba churinmi Isamk chutirqan. Isamkpa churinqam Jamkubu. Jamkubumpa churingunaqam Juda masangunawan karqan. 3 Chay Judaqam ichkay churiyuq karqan. Suqqam chutirqan Faris. Suqqam chutirqan Sari. Chay runamkunampa mamanqam chutirqan Tamar. Chay Farispa churinqam Isrum chutirqan. Isrumba churinqam Aran; 4 Aramba churinqam Aminadab; Aminadabpa churinqam Nasun; Nasumba churinqam Salmun; 5 chay Salmumba churinqam Bus; Buspa mamanmi chutiq Rrab. Chay Buspa churinqam Ubid; Ubidpa mamanmi chutiq Rrut. Chay Ubidpa churinqam Isayi. 6 Isayimpa churinqam karqan chay unay gubyirnu Dabid. Chay Dabidmi alma Uriyaspa warmin biyudampi churiyuq karqan. Chay churinqam karqan chay gubyirnu Salumun. 7 Salumumba churinqam Rrubun; Rrubumba churinqam Abiyas; Abiyaspa churinqam Asa; 8 Asampa churinqam Jusafat; Jusafatpa churinqam Jur; Jurpa churinqam Usiyas; 9 Usiyaspa churinqam Jutan; Jutamba churinqam Amkas; Amkaspa churinqam Isimkiyas; 10 Isimkiyaspa churinqam Manasis; Manasispa churinqam Amun; Amumba churinqam Jusiyas. 11 Chay Jusiyasqam churiyuq karqan isrraylinumkunata prisuchpa, Babiluña nasyunman ampachqanllampa tyimpumpi. Chaqa chay tyimpumpim churin Jimkuniyas yumbay masangunawan nasirqan. 12 Chaymandaqam chay Jimkuniyas Babiluñamanda Isrrayilman kutimuchqan tyimpumpi nasirqan churin Salatyil chutiq. Chay Salatyilpa churinqam Surubabil chutirqan. 13 Surubabilpa churinqam Abiyud; Abiyudpa churinqam Ilyamkin; Ilyamkimba churinqam Asur; 14 Asurpa churinqam Sadumk; Sadumkpa churinqam Amkin; Amkimba churinqam Ilyud; 15 Ilyudpa churinqam Ilyasar; Ilyasarpa churinqam Matan; Matamba churinqam Jamkubu. 16 Jamkubumpa churinqam Jusi chutirqan. Chay Jusim Maryampa qusanqa karqan. Chay Maryam Jisuspa mamanqa karqan. Chay Jisusllam Dyus Amkrachqan Wachadurpis chutin. 17 Chaychinam chay agwilu Abrajanmandampacha agwilu Dabidkaman katursi agwilumkuna karqan. Chay Dabidpa tyimpunmandampacham isrraylinumkunata Babiluñaman ampachqan tyimpumkamambis katursi agwilumkuna karqan. Chay tyimpumandampismi Jisumkristu nasichqan tyimpumkaman katursi agwilumkuna karqan. 18 Kaychinam Jisumkristuqa nasirqan. Suq warmi Marya chutiqmi suq runa Jusi chutiqwan tratumkuchqa karqan kasarananllampa. Piru dunsillaraq kachpa, manaraq puñumptinllampam, chay Maryaqa pach'ayuqna (umkuyuqna) karqan, Dyuspa Santu Ispiritumba pudirninmanda. 19 Kanan Jusiqam ancha allin runa karqan. Chaymi Marya Pach'ayuqmi (Umkuyuqmi) kani, nimptin, mana munarqanchu dimandayta, ni suqkunata parlachiyta: Suqwanmi kachqa, nichpaqa. Achwanmi munarqan uyaramplla (uyaralla) amkramkayta Maryamandaqa. 20 Chaymi amkramkanambaq yuyallkamptinqa, Dyuspa suq anjilnin musquynimbi Jusitaqa nirqan: Dabidpa karu willkan Jusi, ama manchaychu Maryawan kasaranallkiqa. Chaqa payqam mana runayuqchu kachqa. Achwanmi Dyuspa Santu Ispiritumba pudirninmanda pach'ayuqqa (umkuyuqqa). 21 Chay wambrituqam nasyun masin isrraylinumkunata uchangunamanda rin wachaq. Chayri nasimptinqa, Jisusta chutichiy. [Nuta: Chay chutin Jisusqam munan niyta: Tayta Dyusmi wachamkun, nichpa.] 22 Tumkuy challkunam pasarqan, Tayta Dyus nichqan kumplinambaq. Chaqa payqam Santu Librumbi paypaq suq rimaqta kaychina iskibrichichqa karqan: 23 Suq dunsilla china manaraq runawan puñuchpam, pach'ayuq (umkuyuq) rin kaq. Chaymi rin qachyaq suq wambrituta. Chay wambritundam rinllampa chutichiq Imanwilta. Chay chutinmi munan niyta: Dyusmi nuqanchiqkunawan, nichpa. 24 Chaymi Jusiqa puñuymanda rimkch'amkachpa, Dyuspa anjilnin kamachichqanchina rurachpa, Maryawanqa kasararqanna. 25 Piru kasarachpampismi, Jusiqa mana puñurqanchu Maryawanqa, chay kulamka churin nasinangaman. Nasimptinqam Jusiqa chay wambritumbaqqa nirqan: Jisusmi rin chutiq, nichpa.
1 Jisusqam kaychina nasirqan prubinsya Judiyampa Bilin llaqtambi. Waq tyimpumpim gubyirnu Irudis chay Judiyampiqa kamachimkullkarqan. Jisus nasimptinqam, lusirumkunampaq wamkin yach'aqkuna lusirumkunata rimkachpa yach'arqan: Suq kamachimkuq wambrituch nasichqa, nichpa. Chaymi pallkunaqa ancha karu nasyunninmanda maskachpa, ch'ayamurqanllampa Jirusalin llaqtamkaman. Pallkunaqam chamuchqallampa karqan rumpay lluqchinan ladumandampacha. 2 Ch'ayachpaqam, tampumkurqanllampa: ¿Maypitaq nasichqa kay nasyunnimkimpa chay chayraq nasiq gubyirnunqa? Chaqa waq rumpay lluqchinambi kachpam, rimkarqayllampa muchuq lusiruta kay ladumpi. Chay lusiruta rimkachpaqam, yach'arqayllampa: Suq muchuq gubyirnum nasichqa, nichpa. Chaymi chamuchqallampa kani, payta aduraq, nichpa. 3 Chaymi chay yach'ayniyuq runamkuna chaychina tampumkumptinllampaqa, chay gubyirnu Irudis, chay Jirusalimbi achka tiyaqkunampis chayta yach'achpaqa, ancha manchachpa, yuyarqanllampa: ¿Ima, muchuq gubyirnuchuch nasichqa? nichpa. 4 Chaymi chay Irudisqa chay kamachimkuq isrraylinu kuramkunata, Muysispa liyningunata yach'achimkuqkunatampis qayachichpa, tampurqan: Dyuspa Santu Librumbiqa ¿imatam nin? ¿Maypitaq nasinambaq kachqa Dyus Amkrachqan Wachadurqa? nichpa. 5 Chaymi pallkunaqa Irudista nirqanllampa: Kay prubinsya Judiyampa Bilin llaqtambim nasinambaqqa kachqa. Chaqa Dyuspaq rimaq librumbi iskibrichqa karqan: 6 Qamkuna Bilin llaqtampi tiyaqkuna, prubinsya Judiyamanda llaqtallki tamkchita kachpampismi, ancha rin baliq chay Judiyampa mas kamachimkuqnin llaqtangunamandaqa. Chaqa chay llaqtitallkimpim rin nasiq suq ancha pudirniyuq gubyirnu, yumbay isrraylinumkunata chumaqta kamachinambaq, nichpa. 7 Chaychina nimptinllampaqam, chay Irudisqa chay karumanda chamuq yach'ayniyuqkunata uyaramplla (uyaralla) qayachichpa, tampurqan: Ima diyam rimkarichqa chay lusiruqa? nichpa. [Nuta: Chay Irudisqam chaychina tampurqan, munachpa yach'ayta chay wambritumpaq: ¿Ima tyimpum nasichqa? nichpa.] 8 Chaymi Irudisqa (chay runamkunata ingañayta yuyachpa) nirqan: Mayñ, riyllampa Bilinman, tampumkuq chay wambritumpaq. Tarichpaqar abisawayllampa, nuqampis rinaypaq aduraq, nichpa. 9 Chaychina Irudis kunamptinmi, chay yach'ayniyuq runamkunaqa lluqchirqanllampana Jirusalinmanda. Kanan chay rimkachqanllampa lusiruqam pallkunampa ñawpanllampata rirqan Bilin llaqtaman chay wambritu Jisus kachqangaman. Chaymi chay lusiru Jisus kachqanman ch'ayachpaqa, wasimp sawan dirichumbina chayarqan. 10 Chaymi chay runamkuna lusiruta chayaqta rimkachpaqa, anchana kuchimkurqanllampa. 11 Chaymandaqam chay wasiman yallkuchpaqa, rimkarqanllampana chay wambritu Jisusta, maman Maryawan kallkaqta. Chaymi qunqurimkuchpa, Jisusta adurarqanllampa. Chaymandaqam ampamuchqan trastinllampata kich'achpa, surquchpa uruta, ancha ch'aniyuq insinsyuta, ch'aniyuq mirra chutiq ambita, Jisuspaq qurqanllampa. 12 Chaymandaqam nasyunninman kutinambaqllampaqa, Tayta Dyus musquynimbi chay runamkunata kaychina nirqan: Amamkich kutingillampachu chay gubyirnu Irudismanqa, nichpa. Chaymi Dyusta kasuchpa, suq ladu ñandana kutirqanllampa nasyunninmanqa. 13 Chaymandaqam chay yach'ayniyuq runamkuna rimptinllampanaqa, Jusi puñullkamptin, Dyuspa suq anjilnin musquynimbi nirqan: Jusi, atarichpa chay wambrituta mamitandinda mitimkachiy Ijimptu nasyunman. Chay nasyumbi tiyayllampa, nuqa nichunallkaman. Chaqa chay gubyirnu Irudismi rin kamachiq suldadungunata, chay wambrituta wanchinambaqllampa, nichpa. 14 Chaymi Jusiqa puñullkachqanmanda rimkch'amkachpa, chay uras tutamplla Bilinmanda chay wambrituta mamandinda Ijimptu nasyunman amparqan. 15 Chaychina richpam, chay Ijimptu nasyumbina tiyarqanllampa chay gubyirnu Irudis wañunangaman. Chaychina ruramptinllampam, kumplirqan Tayta Dyuspaq suq rimaq Santu Librumbi kaychina nichqan: Churiytam Ijimptu nasyunmanda kay Isrrayil nasyunman kutichimurqay, nichpa. 16 Chay yach'ayniyuq runamkuna Irudista mana abisamptinqam, payqa yach'arqan: Chay runamkunaqam ingañawachqa, nichpa. Chaymi ancha fiyuta piñamkuchpa, suldadungunata kamachirqan: Riyllampa Bilin llaqtaman tumkuy rridurninman. Chaypi wanchiyllampa yumbay ullqu wambritumkunata manaraq ichkay watayuq kamptinllampa, nichpa. Chaychinam chay Irudisqa kamachimkurqan, chay yach'ayniyuq runamkuna chay wambrampaq kaychina nichqa kamptin: Chay lusirum rimkamkuchqa ichkay watana, nichpa. 17 Chaychina chay Irudis kamachimkumptinmi, Dyuspaq rimaq Jirimiyas nichqanqa kumplirqanna. Chaqa chay Jirimiyasmi Dyuspa Santu Librumbi iskibrichqa karqan: 18 Uyachqam kanchiq chay llaqta Rrama chutiqpi ancha kunyachpa yumpamkuqta. Chaqa Rramkilpa karu willkangunam wambritungunampaq llamkichpa yumpamkullkarqanllampa. Mananam ni pimpis atirqanchu kunswilayta, chay wambritunguna wañuchqana kamptinqa, nichpa. 19 Chaymandaqam Irudisqa wañurqanna. Wañumptinqam, Dyuspa anjilnin waq Ijimptumpi Jusita musquynimbi nirqan: 20 Jusi, atarichpa, wambrituta mamitandinda ampachpa, kutiriy Isrrayil nasyunnimkiman. Chaqa chay wambrituta wanchiyta munaqkunaqam wañuchqana, nichpa. 21 Chaymi Jusiqa atarichpa chay wambrituta mamitandinda ampachpana, kutirqan Isrrayil nasyunmanna. 22 Lumkismi alma Irudispa churin Arkilawna taytamba rrimplasun gubyirnu karqan chay Isrrayilpa prubinsyan Judiyampiqa. Chaymi Jusiqa chay gubyirnu Arkilawpaq yach'achpa, mancharqan Judiyaman kutiytaqa. Chaychina Jusi manchamptinmi, bwilta musquyningunampi Tayta Dyus kunarqan, chay prubinsya Galiliyaman rinambaq. 23 Waqman ch'ayachpaqam, Nasarit llaqtamanna rirqan tiyaq. Chaychina ruramptinmi, Dyuspaq rimaqkuna nichqan kumplirqan. Chaqa pallkunaqam nichqallampa karqan: Wachadurninchiqmi nasarinu rin chutiq, nichpa.
1 (Chay Nasaritpi tiyallkamptinllampam) suq runa Jwan Chutichimkuq rirqan prubinsya Judiyampa chuncha lugarninman. Chaypi runamkunata yach'achichpam, 2 kutin kutin nirqan: Dyusmi dasna rin chamuq, chumaqta kamachiwananchiqllampa. Chayri uchallkillampata dijachpa, chumaqtana kawsayllampa, nichpa. 3 Chay Jwambaqmi Dyuspaq rimaq Isayiyasqa librumbi iskibrichqa karqan: Chunchamkunampim suq runa ancha jwirtita rimachpa, kaychina rin yach'achimkuq: Siñurninchiqta chumaqta ch'ayachinallkillampa, bidallkillampata ñandachina allichayllampa. Chayri kananmandaqa, amana uchamkunata rurachpachu, chumaqtana kawsayllampa. Chaqa uchallkillampata dijachpaqam, alabis qamkunaqa allichallkangimanchina Siñurninchiqpa ñanninda, nichpa. 4 Chay Jwanqam chuncha lugarkunampi tiyaq. Mudananqam kamillu animalpa millwanmanda awadu karqan. Wach'umkunqam qaramanda karqan. [Nuta: Chay mudananqam Dyuspaq unay rimaqkunampa mudananchina karqan.] Chay chunchamkunampi tiyachpaqam, chay Jwanqa atun churqampkunata (churqamkunata), myil di abijata mimkuq. 5 Achka lugarkunamandam runamkuna, warmimkuna chay Jwan kachqanman rirqanllampa, payta uyaq. Jirusalin llaqtamanda, prubinsya Judiyampa yumbay llaqtangunamanda, tumkuy chay rriyu Jurdamba ladungunamandampis rirqanllampa Jwanmanqa. 6 Kanan achka uyaqkunaqam, chay Jwanda kriyichpa, Dyusman mañamkurqan, uchangunata pirdunanambaq. Chaymi Jwanqa chay uchata dijaqkunata rriyu Jurdambi chutichiq. 7 Piru achka farisiyu dumktrinayuqkuna, achka sadusiyu dumktrinayuqkuna (uchangunata mana dijachpachu) Jwanman chamurqanllampa, pallkunata chutichinambaq. Chaymi pallkunata rimkachpa, Jwanqa nirqan: A! ¿Qamkuna kulibrampa wambranguna layampischu munangillampa wachamkayta, ama kastigadu kanallkillampa? 8 Chaychina wachamkanallkillampa uchallkimkunata dijachpana, Dyusman tumkuy chunqu mañamkuyllampa, qamkunata pirdunachunambaq. Kananmandaqa allitana rurachpa kawsayllampa. 9 Piru amar ni achlita yuyayllampachu: Abrajamba karu willkanguna kamptinchiqmi, Dyusqa rin wachawaqninchiq, nichpaqa. Achwan allita intyindiwayllampa, Dyusmi kay rumimkunamanda runamkunata atin rurayta, Abrajamba karu willkanguna kanambaqqa. 10 Chaqa qamkunaqam uchata rurachqallkirallku, suq yura birdura mana allita puquqchina kangillampa. Chaymi Dyusqa qamkunaman achanda qamichqana. Listunam suq yuratachina bulachunanllampa. Chaqa Tayta Dyusqam yumbay chay mana baliq birdura yuramkunata das kuchuchpa, rin wichuq lumyallkaq ninaman rumpanambaq. 11 Allimptam nillkillampa, ucha rurachqallkimkunata dijamptimkillampaqam, nuqaqa yamkumpilla chutichillkillampa. Piru rinnam chamuq nuqamanda suq mas pudirniyuq. Chaymi qamkuna paypi kriyimptimkiqa, payqa Dyuspa Santu Ispiritunwan rin chutichichuqllampa, chay Santu Ispiritunwanna purinallkillampa. Piru chay mas pudirniyuqpi mana kriyimptimkillampaqam, ninawan rin kastigachuqllampa. Chaqa pay ancha pudirniyuq kamptinmi, nuqaqa mana nimampaqpis balinichu paypa ñawpambiqa, ni llanqanda ampanaypaq. 12 Chaqa paypi kriyiqkunaqam paypa trigunchina. Payqam palata piskaqchina kachpa, chay trigunda rin abyintaq, trujanman ampanambaq. Piru paypi mana kriyiqkunaqam tamuchina. Chaymi pallkunataqa Siñurninchiqqa rin wichuq chay mana nunka wañuq ninaman, tamuchina rumpanambaq, nichpa. 13 Jisusmi prubinsya Galiliyamanda rirqan rriyu Jurdanman, Jwan chutichinambaq. 14 Piru Jwanqam Jisusta mana munachpa chutichiyta nirqan: Manam balinichu, nuqaman chamunallki chutichichunaqqa. Achwanri qam nuqata chutichiway, nichpa. 15 Chaymi Jisusqa nirqan: Chutichiwaylla. Chaychinam alli rurananchiqpaq, Taytanchiq Dyus yumbay munachqanda kumplinaypaq, nichpa. Chaymi Jwanqa Mayñr, nichpa, chutichirqanna Jisustaqa. 16 Jisus chutimkuchpa, yamkumanda lluqchillkamptinqam, syilu das kich'amkarqan. Chaymi Jisusqa rimkarqan Dyuspa Santu Ispiritunda suq palumachina syilumanda urangumuchpa payman chamuqta. 17 Kanan syilumandampacham Tayta Dyusqa nirqan: Kaymi ancha kuyachqay Churisituyqa! ¡Paywanmi nuqaqa ancha kuchimkuni! nichpa.
1 Jisus chutimkumptinmi, Dyuspa Santu Ispiritun suq chuncha lugarman amparqan, dyablu mallimpanambaq. 2 Chay chuncha lugarpiqam 40 diyasta punchawnindin tutampnindin mana nimata mimkurqanchu. Chaymi ancha mallaqnarqan. 3 Kanan dyablu mallaqtana rimkachpaqa, qamimkarqan tyintanambaq. Chaymi Jisustaqa nirqan: Mayñ, qam Dyuspa Churin allimp kachpaqa, kamachiy kay rumimkunata, tandampaq timkramkanambaq, nichpa. 4 Chaymi Jisusqa nirqan: Manñm! Chaqa Dyuspa Santu Librumbim nin: Runamkuna warmimkunaqam mana mimkunawanllachu kawsanqallampa. Achwanmi kawsanqallampa Dyus tumkuy ima nichqangunawan, nichpa. 5 Chaymandaqam dyabluqa Jisusta amparqan Dyus amkrachqan llaqta Jirusalinman. Waqpim Dyuspa adurana wasimba mas altu sawanman surquchpa, 6 Jisusta nirqan: Mayñ, Dyuspa Churin allimp kachpaqa, kaymanda ura pachamkaman brinkay. Chaqa Dyuspa Santu Librumbim nin: Dyusmi anjilningunata rin kamachiq kwidachunanllampa. Chaymi mamkingunampi rin ch'askichuqllampa, ama ni ch'amkimkimkuna waq ura rumimkunampi tumpamkachpa chuqrimkanambaq, nichpa. 7 Chaychina dyablu nimptinmi, Jisusqa nirqan: Dyuspa Santu Librumbiqam niwanchiqpis: Amar Dyusnimkita mallimpaychu, munachqallkita ruranambaqqa, nichpa. 8 Chaymandaqam chay dyabluqa suq ancha altu qaqampa sawanman Jisusta ampachpa, rimkachirqan kay mundumpa yumbay nasyunningunata, tumkuy chay munaypaq imandinda. 9 Chaymandaqam nirqan: Mayñ, qunqurimkuchpa adurawamptimkiqam, yumbay kay nasyungunata quchqallki, challkunampi qamna kamachimkunallki, nichpa. 10 Piru Jisusqam mana kasuchpachu, nirqan: A dyablu, achuy laduymanda! Chaqa Dyuspa Santu Librumbim nin: Tayta Dyustalla aduray. Pay munachqandalla rurachpa kawsay, nichpa. 11 Chaymi chay dyabluqa, (mana atichpa uchata rurachiyta), Jisuspa ladunmandaqa ladiyarqan. Chaymandaqam Jisus sampalitanna kallkamptinqa, Dyuspa anjilningunana chamuchpa, payta tumkuy imampi yanamparqanllampa. 12 Jisusqam chay chunchamkunamanda kutimuchpa, yach'achpa: Kay prubinsya Judiyampich Jwan Chutichimkuqta karsilachqallampa, nichpaqa, prubinsya Galiliyaman kutirqan. 13 Piru manana kidachpa Nasarit llaqtampim, rirqanna Kampirnawun llaqtaman tiyaq. Chay Kampirnawunqam Galiliya Atun Quch'ampa manyambi kidan. Chay Kampirnawumba ladumbim ichkay lugarkuna karqan. Challkunaqam chutiqllampa Sabulun, Nimptali. 14 Chaychina Jisus chay Kampirnawunman rimptinmi, Dyuspaq rimaq Isayiyas iskibrichqan kumplirqanna: 15 Chay prubinsya Galiliyampa yumbay llaqtangunampi tiyaqkunam rimkachqallampana Dyusmanda chamuq Wachadurta. Chay Sabulun lugarpi tiyaqkuna, chay Nimptali lugarpi tiyaqkuna, chay ancha atun quch'ampa manyambi tiyaqkuna, chay rriyu Jurdamba ladungunampi tiyaqkuna, isrraylinumkuna, mana isrraylinu kaqkunampismi Wachadurtaqa rimkachqallampana. 16 Chay uchayuqkuna tutayaqpichina kawsaqkunaqam suq atun michatachina rimkachqallampa. Chaqa Wachadurninchiqqam pallkunata uchangunamanda wachachqana, nichpa. 17 Chay Kampirnawun llaqtaman richpa tiyaqmi, Jisusqa yach'achimkullkarqan: Dyusqam ch'ayamullkanna qamkunaman, chumaqta kamachimkunambaq. Chayri uchallkillampata dijachpa, paytana chumaqta ch'ayachiyllampa, nichpa. 18 Jisusqam Galiliya Atun Quch'ampa manyanda rillkachpa, ichkay runa masampura kaqta rimkarqan. Suqqam Simun Pidru chutiq. Suqqam Andris chutiq. Pallkunaqam atarrayanllampata yamkuman wichullkarqanllampa, piskaduta piskanambaqllampa. 19 Pallkuna chaychina rurallkamptinqam, Jisusqa nirqan: Chamuyllampa nuqawan purinallki. Qamkunaqam yach'angina piskadumkunata piskayta. Nuqaqam rini yach'achichuqllampa, runamkunatana maskachpa, yach'achinallkillampa, nuqampi kriyinanllampa, nichpa. 20 Chaychina nimptinmi, chay uras pallkunaqa, atarrayanllampata dijachpa, Jisuswanna rirqanllampa. 21 Rillkachpa, achla waqsitumpiqam Sibidiyumpa ichkay churingunatampis rimkarqan. Suqmi chutirqan Jamkubu. Masanqam chutirqan Jwan. Pallkunam taytan Sibidiyuwan chay yamkumpa manyambi yamkumpi puriq barkumbi atarrayangunata rrimindallkarqanllampa. Piru Jisus chaychina qayamptinqam, 22 chay uras das barkunmanda ichkichpa, taytanda chaypi dijachpa, Jisuswanna rirqanllampa. 23 Jisusmi Galiliyampa tumkuy llaqtangunaman, kasiriyungunaman rirqan yach'achimkuq. Kada llaqtaman ch'ayachpaqam, sinaguga wasiman richpa, Dyuspa chumaq nutisyanda yach'achimkuchpa nirqan: Tayta Dyusmi dasna rin chamuq, chumaqta kamachimkunambaq, nichpa. Tumkuy laya nanaywan kaqkunatampismi kach'amkachirqan. 24 Chaymi Jisuspa famandaqa yach'arqanllampa prubinsya Siryampa tumkuy lugarningunampi: Jisusqach qachyaqkunata kach'amkachillkan, nichpa. Chaymi chay siryanumkunaqa Jisusman ampamurqanllampa tumkuy laya nanaywan padisillkaqkunata, dyablumpa ispiritunwan puriqkunata, atamkiwan padisiqkunata, wañuchqachina kwirpuyuqkunata. Chaypim Jisusqa yumbayta kach'amkachirqan. 25 Chaymi ancha achka runamkuna, warmimkuna chamurqanllampa prubinsya Galiliyamanda, prubinsya Dimkampulismanda, Jirusalin llaqtamanda, prubinsya Judiyamanda, rriyu Jurdamba waq ladunmanda, Jisusta uyanambaqllampa. [Nuta: Chay chutin Dimkampulismi munan niyta: Dyis llaqtamkunampa prubinsyan, nichpa.]
1 Chay achka ch'ayamuqkunata rimkachpam, Jisusqa suq lumaman richpa, tiyachpa, pallkunata yach'achirqan. Chaymi payman chamuqkunaqa chay punta yach'amkuqningunawan Jisuspa rridurninman tandamkarqanllampa. 2 Chaypim Jisusqa kaychina yach'achimkurqan: 3 Tayta Dyusta nisitaqkunar kuchimkunqallampa. Chaqa Dyus allita kamachimkuchpa, pallkunata chumaqta rin ch'askiq, paywanna kawsananllampa. 4 Waqaqkunar kuchimkunqallampa. Chaqa Dyusmi pallkunataqa rin kunswilaq. 5 Umildi chunquyuqkunar kuchimkunqallampa. Chaqa Tayta Dyus kay mundumpi chumaqta kamachimkumptinmi, pallkunampis paywan pulla rinllampa kamachimkuq. 6 Dyusta ancha munaq kasuqkunar kuchimkunqallampa. Chaqa Dyusmi pallkunataqa ancha rin yanampaq, pay nichqanda allita kasuchpa kawsananllampa. 7 Runa masinda llamkimpaqkunar kuchimkunqallampa. Chaqa pallkuna llamkimpachqanchinam Taytanchiq Dyuspis pallkunata rin llamkimpaq. 8 Limpyu chunquyuqkunar kuchimkunqallampa. Chaqa Dyuswanmi rinllampa kawsaq. 9 Suqkunata alliyachiqkunar kuchimkunqallampa. Chaqa pallkunampaqmi Dyusqa ninqa: Kallkunam wambrallkunaqa, nichpa. 10 Qasachadumkunampisri kuchimkunqallampa. Chaqa pallkunaqam Dyus munachqanda rurachqanrallku padisillkanllampa. Chaymi Tayta Dyusqa chumaqta kamachimkuchpa, pallkunata rin wachaq, paywan kawsananllampa. 11 Chayri nuqampi yuyamkuchqallkirallku musyachuchpa, qamkunata qasachachumptinqa, kuchimkuyllampa. Yanqamkunata rimachumptinllampaqa, masta kuchimkuyllampa. Chaqa Dyusmi ancha allin primyullkita syilumpi rin quchuqllampa. Chay qasachadu kachqallkichina Dyuspaq chay unay rimaqkunampis qasachadu karqanllampa. 13 Jisumkristuqam nirqambis: Kay mundumpi kawsachpaqam, qamkunaqa kach'ichina kangillampa. Piru kach'i lambaqyamptinqam, manana atinchu kach'impaq timkramkaytaqa. Chaymi chay mana baliq kach'itaqa wichumkunchiqna. Chaypinam runamkuna sarrun, ¿manachu? 14 Qamkunaqam kay mundumpi tiyaqkunampaqqa michachinampis kangillampa, pallkuna Dyusman ch'ayananllampaqa. Chaymi allita kawsamptimkillampa, suq michatachina das rimkachungillampa, suq llaqta qaqamp sawambi kaqta das rimkachqanllampachina. 15 Chaychinallam suq michata syindichpa, mana kajumba waranmanqa ruranchiqchu. Achwanmi altumpi ruranchiqqa, chay wasimpi yumbay kaqta achimkchawananchiq, ¿manachu? 16 Qamkunampisri michachina kachpa, allitalla rurachpa kawsayllampa. Chaychina allita ruramptimkillampam, chay rimkachuqkuna alabanqallampa Taytanchiq Dyusta. 17 Jisusqam kaychinampis yach'achimkurqan: Kinsampch'i wamkinnimki yuyangillampa: Jisumkristum rin chingachiq Muysis kamachimkuchqanda, Dyuspaq chay suq rimaqkuna kamachimkuchqanda, nichpa. Amamkich chaychinaqa yuyangillampachu. Manam chingachiqchu chamuchqaqa kani. Achwanmi chamuchqaqa kani, tumkuy ima nichqanda kumpliq. 18 Allimptam nillkillampa, Dyuspa Santu Librumbi kaq liyningunaqam mana nimampis rinllampachu chingaq, kay pachawan syilu uchyamkanangaman. Chay liyningunamandaqam mana rinchu chingaq ni suq litra ni suq puntitumpis, tumkuy ima nichqan kumplinangaman. 19 Chaqa Dyuspa yumbay liyningunam ancha balin. Chayri yumbay chay liyningunata kasuchunllampa. Chaymi suq runa suq tamkcha liysituta mana kasuchpachu, suqkunatampis animachimptin ama kasunanllampaqa, Dyuspaqqa mana nimampis balinchu. Taytanchiq Dyus chumaqta kamachiwamptinchiqqam, chay laya uchayuqqa mana nimampaqpis rinchu baliq. Piru suq runa ichu suq warmi Dyus nichqanda allita kasuchpa, suqkunata kasunambaq yach'achichpaqam, syilumpiqa ancha rinllampa baliq. 20 Chaymi ancha klaruta nillkillampa, Tayta Dyus munachqandar tumkuy chunqu rurayllampa. Chaqa mayqannimki chay farisiyu dumktrinayuqchina ichu Muysispa liyningunata chay yach'achimkuq runamkunachina Dyus munachqanda achlitatalla rurachpaqam, ringillampa chingaq. Piru pallkunamanda mas allita Dyusta kasumptimkillampaqam, payqa rin wachachuqllampa, chumaqta kamachimkumptin, paywan kawsanallkillampa. 21 Jisusqam nirqambis: Qamkunaqam yach'angillampa chay unay agwilullkimkunata Tayta Dyus kamachichqanda: Ama pitampis wanchiychu. Mayqan wanchimkuqqam dimandadu rin kaq, juyiskuna sintinsyachpa kastigananllampa, nichpa. 22 Piru kananqam nuqaqa nillkillampa, runa masimkimpaq piñamkuchpaqam, uchayuq kangi. Chaymi sintinsyadu ringi kaq. Chaychinallam suq runata musyachpampis, ancha kastigadu ringi kaq chay Mas Kamachimkuq Tandamkaq Juyiskunampa ñawpambi. Runa masimkita: Ancha tuntum kangi nichpaqam, ancha kastigadu ringi kaq infyirnumpa ninambi. 23 Chayri ufrindallkita ampachpa pata altarman Dyusta aduranallkiqa, piru yuyachpa: Suq runa masiytam piñachichqa kani, nichpaqa, 24 amaraq ufrindallkita quychu. Achwanri chay uraslla pata altarpa ñawpambi ufrindallkita dijachpa, kutichpa chay runa masimkiman, paywan allichay. Chaychina allichachparaqmi, atingi ufrindallkita quytaqa. 25 Chaychina suq runata mana allita ruramptimki, juyisman rillkamptin dimandachuqqa, payman das richpa, ñambilla allichay, amana dimandachunambaq. Mana chayta ruramptimkimkich, ampachungiman juyisman. Challkich juyisqa kach'achungiman suldadumkunaman karsilachichunan. 26 ¡Allimptam nillkillampa, karsilmandaqam mana ringichu lluqchiq, tumkuy ima dibirachqallkita payta pagaranallkimkaman! 27 Jisusqam nirqambis: Qamkunaqam uyamkuchqallampa kangi unay tyimpumpi kaychina kamachimkuchqanda: Suq runampa warminwan ama puñuyllampachu, niqta. 28 Piru kananqam nuqaqa kaytampis nillkillampa, mayqan runa champachpa suqpa warminda, paywan puñunambaqqam ancha uchayuqna. Chaqa chaychina chunqumbilla yuyachpaqam, alabis puñullkanmanchinana chay warmiwanqa. 29 Chayri ama nima laya uchata ruraychu. Piru chay allin ladu ñawimki inkitachumptin uchata ruranallkiqa, surquchpa wichumkuy. Mas allim suq parti kwirpullkilla chinganambaq, ama yumbay kwirpullkita infyirnuman wichumkunambaq. 30 Chaychinallar chay allin ladu mamkimki ancha qawch'u kamptin uchata ruranambaqpis, kuchuchpa wichumkuy. Mas allim suq parti kwirpullkilla chinganambaq, ama yumbay kwirpullkita infyirnuman wichumkunambaq. 31 Unayqam nirqanllampampis: Mayqan runa warminmanda amkramkaqqa, suq dumkumintuta qunqa, amana warmin kanambaq, nichpa. 32 Piru kananqam nuqaqa nillkillampa, suq runa warminmanda amkramkachpa, ancha uchayuqna. Piru mayqan warmi runanda traysyunda rurachpa, suq runawan kamptinllam, qusanqa atin amkramkaytaqa. Manaqa manam balinchu warminda qatinanqa. Chaqa chay qatichqa warmiqa suq runawan kachpam, uchatana ruranman. Piru chay punta runan qatichpam, chay uchataqa rurachinman. Kanan chay qatichqa warmita mayqan tandaqpismi uchayuqna. 33 Unay lillkunaqam agwilullkimkunata kaychinampis nirqan: Amamkich yanqata rimachpaqa: purdyusitu ningichu. Imata Tayta Dyuspa ñawpambi ufrisimkuchpa, purdyusitu nichpaqa, allimpta kumpliy. Amamkich llullamkungichu, nichpa, ¿manachu? 34 Piru kananqam nuqaqa nillkillampa, amar nimampaqpis purdyusitu nichpaqa, jurayllampachu. Amamkich Dyuspa tiyanan syiluta myintachpaqa jurangillampachu. 35 Amamkich kay pacha allpata myintachpaqa jurangillampachu. Chaqa kay pacha allpaqam Dyuspa ch'amkin sarrumkuchqan lugar. Amamkich ni Dyus amkrachqan Jirusalin llaqtata myintachpaqa jurangillampachu. 36 Amamkich ni umallkita myintachpa jurangillampachu. Chaqa Dyusllam rurachqa umallkitaqa. Qamqam mana ni suq aqchallkita atingichu yuraqyachiyta ni yanayachiyta. 37 Chayri ama jurayllampachu. Achwan imatampis ufrisimkuchpaqa kumpliy. Chaqa qamkuna jurachpa ufrisimkumptimkiqam, dyablu chaychinaqa rimachichungillampa. 38 Unay nichqanllampatampismi uyachqallampa kangi: Mayqan runa masinda suq ladu ñawinda sarkuyachimptinqa, chaychinalla paytampis dimandachpa, suq ladu ñawindalla sarkuyachinqa. Mayqan runa masinda suq kirunda surqumptinqa, dimandachpa, chaychinalla paytampis suq kirundalla surqunqallampa, nichpa. 39 Piru kananqam nuqaqa nillkillampa, suq malutaqa ama bingayllampachu. Achwan kaychina rurayllampa: Mayqan allin ladu qaqllallkimpi tamkachumptinqa, timkramkay, chay suq ladu qaqllallkimpimpis maqachunambaq. 40 Ichu mayqan dimandachuchpa munamptin kuchmallkita quch'ichuytaqa, punchullkitampis dijay ampanambaq. 41 Mayqan qamkunata kamachichumptin, trastinda suq kilumitru y midyumkaman ampanallkimpaqqa, kimsa kilumitrumkaman ampay. 42 Mayqan imata mañachumptimbis, quy. Mayqan pristanallki munaqtaqa, ama fyirusyachpachu, pristay ima munachqanda, nichpa. 43 Jisusqam kaychinampis nirqan: Unay nichqanllampatam kaychina yach'amkuchqallampa kangi: Kuyachuqkunata kuyay. Kuntrachuqkunataqa ch'iqniy, nichpa, ¿manachu? 44 Piru kananqam chaypaqqa nillkillampa, kuntrachuqkunata kuyayllampa. Maldisyachuqkunampaq Dyusman mañamkuyllampa, pallkunata yanampanambaq. Ch'iqnichuqkunata allita rurayllampa. Musyachuchpa, qasachachuqkunampaq Dyusman mañamkuyllampa, pallkunata tumkuy imampi yanampanambaq. 45 Chaqa chay Taytallkillampa Dyusmi ancha allin yumbaywan. Chaymi rumpayta lluqchichin, tamyachimkun yumbay allingunampaq, malumkunampaqpis. Chayri qamkunampis yumbaywan chumaqta kawsayllampa, chay rimkachuqkuna ninambaq: Waq kriyiqkunaqam allimpta Dyuspa wambranguna, nichpa. 46 Chaqa kuyachuqkunatalla kuyachpaqam, mana ancha allitaqa rurallkangillampachu. Chaymi chay layata ruraqqa ¿ima laya pagutaraq Dyusmandaqa rinllampa ch'askiq? Chaqa chay uchayuq kuntribusyunda kubramkuqkunampismi chaychina kuyaq masingunatalla kuyanllampa, ¿manachu? 47 Chayri qamkunaqa uyawayllampa, kriyiq masimkimkunatalla nampallkuchpaqam, chay uchayuq runamkunamandaqa mana mas allitachu rurallkangillampa. Chaqa chaychina kuyachpaqam, Dyuspi chay mana kriyiqkunachinalla kawsallkangillampa. Chaychinallam chay mana kriyiqkunaqa kuyaqkunatalla chumaqta nampallkunllampa. 48 Chayri allita uyawayllampa: Taytallkillampa Dyusqam ancha allin kachpa, mana nima maluta ruranchu. Chayri qamkunampis Dyuschina kawsayllampa, ama nima maluta rurachpachu.
1 Jisusqam kaychinampis yach'achimkurqan: Ima allimkunata rurachpaqa, ama rurayllampachu, runamkuna rimkachuchpa alabachunambaq. Alabadu kamptimkillampaqam, Tayta Dyusqa mana quchunqallampachu primyullkitaqa. 2 Chayri pubrisitumkunata yanampachpaqa, ama pitampis parlachiychu: Kaychinam nuqaqa yanampamkuni, nichpaqa, Dyusta chay chiminwanlla kasuqkunachinaqa. Chaqa chay chiminwanlla kasumkuqkunaqam pita imanllampata quchpaqa, sinaguga wasimpi, kallimkunampi yanampamkuchqanda rimanllampa, uyaqkuna pallkunata alabananllampa. Piru allimptam nillkillampa, pallkunaqam chaychina alabadumkuna kachpaqa, manana Dyusmandaqa nimatampis rinllampachu ch'askiq. 3 Chayri ufrindallkita qumptimkiqa, ama ni mas kuyachqallki yanasullki (yanasallki) yach'anqachu. 4 Chaychina pamkachpa qumptimkiqam, Taytanchiq Dyus rimkachuqlla ufrindallkimpaqqa yach'anqaqa. Chaymi payqa yumbaypa ñawpambi primyullkitaqa rin quchuq. 5 Jisusqam nirqambis: Amar chay chiminwanlla kasumkuqchinaqa Tayta Dyusmanqa mañamkuyllampachu. Chaqa pallkunaqam ancha gustanllampa chayachpa sinaguga wasimkunampi, kallimkunampa iskinangunampi Dyusman mañamkuyta, suqkuna rimkanambaq. Piru allimptam nillkillampa, pallkunaqam chaychina kay bidampi alabachqamkuna kachpaqa, Dyusmandaqa mana nima primyuta rinllampachu ch'askiq. 6 Chayri qamkunaqa ama pallkunachinaqa kayllampachu. Achwanri Dyusman munachpa mañamkuytaqa, umku wasimkiman yallkuchpa, pungullkita kirpachpa, sampalallkilla Dyusman mañamkuy. Chaychina mañamkumptimkiqam, Tayta Dyuslla uyachuchpa, suq chumaq primyuta ?yumbaypa ñawpambi? rin quchuqllampa. 7 Piru Dyusman mañamkunallkillampaqa, ama kutin kutinqa rimayllampachu Dyuspi mana kriyiqkunachinaqa. Chaqa pallkunaqam kutin kutin ancha mañamkunllampa dyusningunaman, yuyachpa: Achkata rimachpa mañamkumptiymi, dyusnillkuna rinllampa uyawaq, nichpa. 8 Amar pallkunachinaqa kayllampachu. Chaqa Taytanchiq Dyusqam manaraq ni mañamkumptimki, yach'anna imam faltachungi, nichpa. 9 Chayri kaychina Tayta Dyusman mañamkuyllampa: Taytanchiq Dyusitu syilumpi kaq, qamllam ancha santu, mana nima uchayuqchu kangi. Chaymi ancha balin, yumbay runa, warmi qamtalla alabachunanllampa. 10 Chamuyri, qamna yumbayta chumaqta kamachinallki. Qam munachqallkitar yumbay runa warmi kay pachampi ruranqallampa, anaq syilumpi ruraqkunachina. 11 Taytitu, tumkuy diyampaqri mimkunitayta quwayllampa. 12 Mana allita rurachqaytampisri pirdunawayllampa, nuqallkuna waq mana alli rurawaqkunata pirdunachqaychina. 13 Dyablu munamptin tyintawaytampisri, ama dijaychu uchata rurachiwananqa. Achwanri tumkuy chay mana allimkunamanda wachawayllampa. ?Tumkuy imar qamtalla kasuchunqa. Chaqa qamllam ancha pudirniyuqqa kangi. Qamllam ancha chumaqtaqa llimpyangi. Chaychinallar tumkuy tyimpu kanqa,? nichpa. 14 Chayri yumbay dañachichuqkunata pirdunayllampa. Chaqa mayqan runa ichu warmi mana allita rurachumptin, qamkuna pirdunamptimkiqam, syilumpi kaq Tayta Dyuspis uchallkimanda rin pirdunachuq. 15 Piru pallkunata mana pirdunamptimkiqam, Taytanchiq Dyuspis mana rinchu pirdunachuqllampa. 16 Jisusqam kaychinampis yach'achimkurqan: Ayunachpaqa, ama rurayllampachu Dyusta chiminwanlla kasuqkunachinaqa. Chaqa pallkunaqam ayunachpaqa, llamkiqkunachina tumkunllampa, rimkaqkuna ninanllampa: Rimkay, amkamkñw, ayunallkanllampam, nichpa. Piru allita uyawayllampa: chay chiminwanlla kasumkuqkunampaq chaychina nimptinllampaqam, Dyusmandaqa mana nima primyunda rinllampachu ch'askiq. 17 Chayrallkur qamkuna ayunachpaqa, qaqllallkita mayllachpa, chumaqta ñaqchamkuyllampa, 18 rimkachuqkuna ama yach'anambaq: Chay runam ayunallkan, nichpa. Chaychina ruramptimkillampaqam, Tayta Dyuslla yach'anqa. Chaymi payqa primyullkita ?yumbaypa ñawpambi? rin quchuq. 19 Jisusqam nirqambis: Amar llamkiyllampachu, kay mundumpi tumkuy imayuq kanallkiqa. Chaqa kay mundumpiqam pulillamkuna chay kusasnimkimkunata rin kuch'kuq. Wamkin kusasnimkiqam rin muqusuyaq. Wamkindaqam ladrunguna rin ampaq. 20 Chay kusaskunamandaqa achwan muchuq bidampaq syilumpi ancha yuyayllampa. Chaqa waqpiqam mana nima pulillaqa kanchu, imatampis kuch'kunanllampaqa. Manam nimampis rinchu muqusuyaq, ni ladrunguna kanchu ampananllampaqa. 21 Chayri allita yuyayllampa, tumkuy imallkiwan Dyuspaq trabajanallki. Chaychina trabajachpaqam, Dyuspilla ringillampa yuyamkuq; mananam kusasnimkimpiqa. 22 Jisusqam kaychinampis yach'achimkurqan: pawinchiqqam kwirpunchiqpa michanchina. Chaymi ancha yanampawanchiq allita rimkamkuchpa, yach'ananchiq: ¿Maymanmi rini? nichpa. Chaychinallam Dyuspis suq michachina paypi kriyiqkunampaqqa. Chaqa paymi yanampawanchiq, yach'ananchiq: ¿Imam alli? ¿Imam mana allichu? nichpa. 23 Piru Dyusmanda amkramkachpaqam, tutayaqpichina purillkanchiq. Chaymi mana nimatampis rinchiqchu intyindiq Dyuspaqqa. 24 Manam pimpis atinchu ichkay patrunda kasuytaqa. Chaqa ichkay patrunniyuq kachpaqam, suq patrunninda ch'iqnichpa, suqta masta kuyanman. Chaymandaqam suqta manana kasuchpachu, suqtana masta kasurinman. Chaychinallam nuqanchiqkunampis mana atinchiqchu Dyusta qallaytampis pullata kasuytaqa. 25 Jisusqam nirqambis: Nuqaqam nillkillampa, ama llamkiyllampachu: ¿Imataraq mimkuchaq? ¿Imataraq umpyachaq kawsanaypaqqa? ¿Imataraq ruramkuchaq? nichpallampaqa. Ima, ¿manachu yach'angillampa, Taytanchiq Dyusmi bidallkita quchuchqanchina, mimkunallkitampis rin quchuq kawsanallkimpaq, nichpaqa? Ima ¿manachu yach'angillampa, paymi kwirpullkillampata rurachqanchina rin yanampachuqllampa mudanayuqpis kanallkillampa, nichpaqa? 26 Pichqumkunata champachpa, allita yuyayllampa: Pallkunaqam mana tarpumkunllampachu, ni kusichamkunllampachu, ni trujamkunampi granumkunata tandanllampachu. Piru Tayta Dyus pallkunata mantyinin. Dyuspaqqam qamkunaqa masta balingillampa chay pichqumkunamandaqa. 27 Mayñ, ancha munachpa masta wiñaytaqa, ¿atingimanchu midyu mitru masta wiñayta? Manñm. Chaymi nillkillampa, ama chaychinaqa llamkiyllampachu, nichpa. 28 Mudanallkimpaqpis ¿imarallkutaq llamkingillampaqa? Yuyayllampa chay liryu tumktumkunampi. Challkunaqam mana trabajanllampachu, ni puchkamkunllampachu. 29 Piru allimptam nillkillampa, chay ancha kampuq gubyirnu Salumunqam maychimka ancha chumaqta mudamkuchpampis, mana chay tumktumkunachinaqa mudamkurqanchu. 30 Yuyayllampampis qawamkunampaq. Challkunaqam suq tyimpumpaqlla kawsan. Chaymanda limpu chamkimptinqam, rumpachinampaqna balin. Chaychina mana duraqkuna kamptimbismi, Dyusqa ancha chumaq munaypaqta mudachin. Piru qamkunaqam chay qawamkunamandaqa Dyuspaqqa masta balingillampa. ¿Ima manachu yuyamkungillampa Dyuspiqa? Payqam chay tumktumkunamandaqa achwan mas chumaqta qamkunataqa rin kwidachuqllampa. 31 Chaymi nillkillampa, ama llamkiyllampachu: ¿Imataraq mimkuchun? ¿Imataraq umpyachun? ¿Imataraq ruramkuchun? nichpaqa. 32 Dyuspi mana yuyamkuqkunallam chay layampaqqa llamkinllampa. Piru qamkunaqar ama pallkunachinaqa kayllampachu. Chaqa Taytanchiq Dyusmi allita yach'an imam faltachungillampa, nichpaqa. 33 Chayri chay tumkuy imampaq llamkinallkimandaqa, achwan ancha munayllampa Dyus munachqanda rurayta, paylla ancha allin kamachimkuqnimki kanambaq. Chaychina Dyus munachqanda ruramptimkiqam, payqa ima nisitachqallkita rin quchuqllampa. 34 Chayri ama llamkiyllampachu: ¿Qayaqa imaraq pasawanqa? nichpaqa. Kanan kaqtalla allichayllampa. Qaya ima pasachumptin, qayaraq allichayllampa.
1 Jisusqam nirqambis: Runa masimkitaqa ama jusgayllampachu, qamkunatampis Dyus ama jusgachunambaq. 2 Chaqa suqkunata jusgamptimkiqam, qamkunatampis Dyusqa chaychinalla rin jusgachuqllampa. 3 Qamkuna mas uchayuqkunaqa ama jusgayllampachu kriyiq masimkita, achla uchata ruramptinqa. Chaqa jusgachpaqam, paypa ñawimbi uqchitatachina rimkangi. Piru manam rimkangichu qamba ñawimkimpi suq bigatachinaqa. 4 Chaychina qamba kimkin ñawimkimpi suq biga kamptinqa, ¿imachinataq kriyiq masimkita atingi niyta: Dijaway chay ñawimkimanda chay uqchitata surqunaypaq, nichpaqa? 5 ¡A, chimimkiwanlla kasumkuq! ¡Qambaqam kan grasyallki, suqkunata jusganallki! Chaychina kanallkimandaqa puntata qamba ñawimkimandaraq chay bigatachina surquy. Chaymanda allita rimkamkuchparaq, atingiman surquyta chay uqchitatachina kriyiq masimkimpa ñawinmanda. 6 Jisusqam kaychinampis yach'achimkurqan: Ancha santu Tayta Dyusta asimpaqkunataqa ama yach'achiyllampachu. Chaqa pallkunamkich saqra allqu kanimkuqkunachina ancha dañachichungiman. Chay yach'amkuchqallki nutisyaqam ancha baliq ch'aniyuq parlaskunachina. Piru Dyusta asimpaqkunaqam chay chumaq nutisyataqa mana munanllampachu uyayta. Chaqa pallkunaqam kuchimkunachina sarrullkan chay llimpyaq parlaschina nutisyataqa. 7 Jisusqam kaychinampis yach'achimkurqan: Dyusman (mana challkuq) mañamkuyllampa. Chaqa qamkuna chaychina mañamkumptimkiqam, payqa rin quchuqllampa. Nisitachqallkita maskachpaqam, Dyusmanda ringillampa ch'askiq. Chaqa payman mañamkuchpaqam, pungumbi qayamkullkangichina, yanampachunambaq. Chaychina (mana challkuq) qayamkumptimkiqam, Tayta Dyusqa rin yanampachuq. 8 Chaymi mañamkuqqa paymanda ch'askin; ima nisitachqanda maskaqqam paypiqa tarin; chay pungumbichina qayamkuqqam umkuman yallkun. 9 ¿Suq wambrallki tandata mañachumptinchu, suq rumita qungiman? Manñm. 10 ¿Ichu suq piskaduta mañachumptinqa, suq kulibrata qungiman? Manñm. 11 Chaqa qamkuna malumkuna kachpampismi, yach'angillampa wambrallkillampata allin kusaskunata quyta. Piru Taytanchiq Dyusqam qamkunamandaqa mas allin. ¡Chaymi payman yumbay mañamkuqtaqa ancha rin yanampaq! 12 Qamkunaqam munangi, suqkuna allita rurachunambaq. Chaychina munachpaqa, achwan qamkuna allita ruray pallkunata. Chaychina rurachpaqam, ringi kumpliq Muysis kamachimkuchqanda, Dyuspaq rimaqkuna yach'achimkuchqandampis. 13 Jisusqam kaychinampis yach'achimkurqan: Kay bidampiqam kan ichkay pungu, ichkay ñan. Suq pungu, suq ñanqam ancha anchu, mana nima trabajuschu yallkunanchiq. Chaymi ancha achka runamkuna, warmimkuna chay punguta, chay ñanda rillkanllampa. Piru chay anchu ñanmi rin ampachuqllampa infyirnuman, chaypi uchyamkanallkillampa. Kambismi suq pungu, suq ñan ancha kich'ki ancha trabajus yallkunanchiq. Chayri allita yuyachpa, chay kich'ki punguta yallkuchpa, chay kich'ki ñanda riy. Chaqa wamkingunallam chay kich'ki punguta chay kich'ki ñanda maskachpa tarinllampa, muchuq bidaman ch'ayananllampa, tumkuy tyimpu kawsananllampa. 15 Jisusqam kaychinampis yach'achimkurqan: Kwidamkayllampa Dyuspaq rimaq tumkuqkunamanda. Chaqa pallkunaqam rinllampa niq: Nuqallkunam Dyuspaq allimp rimaqkuna kanillampa, nichpa. Piru chunqunllampampiqam chay lubu (ichu chay surru) wichata mimkuqkunachina rinllampa kaq. Chayri allita kwidamkayllampa yumbay chay mana baliq yach'achimkuqmanda, qamkunata ama pandachichunanllampa. 16 Kaychinam pallkunataqa atingillampa riqsiyta: Dyuspaqchu allimpta yach'achimkun ichu mana, nichpaqa. Allita rurachpa kawsamptinllampaqam, ringillampa yach'aq: Allimptam Dyuspaq yach'achimkunllampa, nichpa. Piru chay llullamkuqkunaqam mana baliq yuramkunachina. Chaqa kachamkunamandaqam mana tandanchiqchu ubaskunata ichu iguskunata. 17 Yumbay allin yuraqam allindalla puqun. Piru chay mana baliq yurampa puquyninqam mana balinchu mimkunampaqqa. 18 Chaqa chay allin yuramkunaqam mana atinllampachu mana baliqta puquytaqa. Chaychinallam chay mana allin yuramkunampis maychimkampis mana atinllampachu allinda puquytaqa. 19 Chaymi yumbay chay mana allinda puquq yuramkunataqa kuchuchpa wichumkunllampa ninaman. Chaychinallam Tayta Dyusqa rin ruraq chay llullamkuqkunataqa. 20 Chaymi nillkillampa, chay llullamkuqkunataqam atingillampa riqsiyta, ima laya kachqanllampata, allita ichu mana allita ruramptinllampa, nichpa. 21 Jisusqam kaychinampis yach'achimkurqan: Yumbay niwaqkuna: Kamachimkuq Siñursitu, Kamachimkuq Siñursitu, nichpaqam, mana rinllampachu yallkuq syilumanqa. Chaqa Taytay Dyus nichqandaqam mana kasuchqallampachu. Piru Taytay Dyusta kasuqkunam paywan, nuqawan rinllampa kawsaqqa. 22 Chaymi chay jwisyu diyampiqa achka rinllampa niwaq: ¡Kamachimkuq Siñursitu, Kamachimkuq Siñursitu, qamba chutimkita myintachpam yach'achimkurqayllampa! ¡Chutimkita myintachpam, dyablumkunata qatirqayllampa! ¡Chutimkita myintachpam, achka milagrumkunata rurarqayllampa! nichpa. 23 Chaychina niwamptinllampaqam, nuqaqa rini niq: Manam nunka riqsichuchqallampachu kani. Qamkuna mana alli ruraqkunaqa amkramkayllampa nuqamanda. 24 Kay nichqayta kasuqqam suq ancha yach'ayniyuq runachina. Chay yach'ayniyuqqam wasinda rurarqan kaskajumpa sawambi. 25 Chaymandaqam ancha tamyamptin, rriyumkuna undamptin, ancha jwirti wayramptinqa, chay yach'ayniyuqpa wasinqa mana bulamkarqanchu, ancha allin simyintuyuq kachqanrallku. 26 Piru kay nichqayta mana kasuqqam suq tuntu runa aqumkunamp sawambi wasimkuqchina. 27 Chaymandaqam ancha tamyamptin, rriyumkuna undamptin, ancha jwirtita wayramptin, chay tuntumpa wasinqa limpu bulamkarqan. 28 Challkunata Jisus yach'achimkumptinqam, chay uyaqkunaqa ancha ispantachqata yuyarqanllampa: Jisusqam ancha yach'ayniyuq, nichpa. 29 Chaqa Jisusqam ancha yach'ayniyuq kamachimkuq kachpa, mana yach'achimkuqchu Muysispa liyningunata yach'achimkuqkunachina.
1 Chay lumamanda Jisus uraman rimptinmi, ancha achka runamkuna, warmimkuna imkinda rirqanllampa. 2 Chaypim suq runa ismullkaq kwirpuyuq chamuchpa, ñawpambi qunqurimkuchpa, nirqan: Kamachimkuq taytitu, yanampawayri. Chaqa qamqam munachpa kay qachyayniymandaqa das atingi kach'amkachiwayta, nichpa. 3 Chaymi Jisusqa chay millanaypaq runampa sawanman mamkinda rurachpa nirqan: Munanim kach'amkachichuyta. Kanalitan kach'amkay, nichpa. Chaychina nimptinllam, chay qachyayqa limpu chingarqan. 4 Chaymi Jisusqa nirqan: Amamkich pitampis nimata ningichu Kaychinam kach'amkachiwarqan, nichpaqa. Achwan kuramanlla riy, pay rimkachuchpa nichunambaq: Kach'amkachqanam kangi, nichpa. Chaymandaqa ampay ufrindallkita Muysis kamachimkuchqanchina, yumbay yach'ananllampa: Chay runaqam kach'amkachqana, nichpa. 5 Jisus ch'ayamptin Kampirnawun llaqtamanmi, payman chamurqan suq suldadu rrumanu. Paymi achka suldadumkunampa kamachimkuqnin karqan. Chay kamachimkuq suldadumpa suq ancha kuyachqan kriyadunmi qachyaq karqan. Chaymi chay suldaduqa qamimkachpa, Jisusta kaychina rruqarqan: 6 Kamachimkuq Taytitu, kriyaduymi wasiypi ancha qachyaq kamampi. Mananam atinchu kuyuyta. Kanan nanaywanmi ancha padisin, nichpa. 7 Chaymi Jisusqa nirqan: Richaqri kach'amkachiq, nichpa. 8 Chaymi chay kamachimkuq suldaduqa nirqan: Kamachimkuq Taytitu, qamkuna isrraylinumkuna ningillampa: Manam balinchu suq isrraylinu yallkunambaq suq furastiru runampa wasinman, nichpa. Ancha pudirniyuqmi kangi. Chayri kamachimkuylla, chay kriyaduy kach'amkanambaqqa. Chaychinallam kach'amkanqa. 9 Chaqa nuqampismi kamachiwaqkunata kasuni. Chaychinallam suldadullkunampis ima nichqayta kasuwanllampa. Suqninda riy, nimptiyqam, rin. Suqta chamuy, nimptiyqam, chamun. Kriyadullkunata kayta ruray, nimptiyqam, ruran. Chaymi yach'ani: Rimamptimkillam, kriyaduyqa das rin kach'amkaq, nichpa. 10 Chaychina niqta uyachpaqam, Jisusqa ispantachpa, kuchimkuchpa, chay pullan riqkunata nirqan: Kay furastiru runaqam ancha chumitaqta kuntistawan! ¡Allimptam nillkillampa, kay nasyunninchiq Isrrayilpiqam mana ni suq runata tarichqachu kani kay ancha yuyamkuq furastiru runatachinaqa! 11 Chaymi nillkillampa, yumbay nasyungunamanda achka furastirumkuna Dyuspi kriyichpaqam, chay unay agwilunchiq Abrajanwan, Isamkwan, Jamkubuwan pulla tiyachpa, rinllampa mimkuq Dyuswan syilumpi. 12 Piru achka llaqta masinchiq isrraylinumkunataqam (nuqampi mana kriyichqanrallku), sawa tutayaqman rinllampa wichumkuq. Chaypiqam ancha padisichqanrallku waqachpa kirunllampata rinllampa qach'yachiq. 13 Chaychina nichpaqam, Jisusqa chay kamachimkuq suldadutaqa nirqan: Riyna. Kriyichqallkichinam rin kaq, nichpa. Chay nichqan urasllam kriyadunqa kach'amkarqanna. 14 Suq diyam Jisusqa Pidrumpa wasinman chamuchpa, Pidrumpa swigranda tarirqan jibriwan qachyaq kamampi kaqta. 15 Chaymi Jisus chay warmita mamkinmanda piskamptinlla, chay jibrimandaqa das kach'amkarqan. Chaymandaqam atarichpana, pallkunata qararqan. 16 Amsayallkamptinnam dyablumkuna kamachichqan runamkunata, warmimkunata Jisusman ampamurqanllampa. Chaymi payqa dyablumkunata Lluqchiy nimptinlla, chay runamkunamanda lluqchirqanllampa. Kach'amkachirqanmi yumbay chay ampamuchqan qachyaqkunatampis. 17 Chaychinaqam karqan Dyuspaq rimaq Isayiyas kaychina iskibrichqan kumplinambaq: Paymi tumkuy laya nanayninchiqmanda kach'amkachiwachqa kanchiq, nichpa. 18 Suq diya Jisusman ancha achka runa tandamkamptinmi, ch'awpinllampampina kachpa, yach'amkuqningunata nirqan: Amku pasaq kay ancha atun quch'ampa waq chimba ladunman, qamkunawanlla kanaypaq, nichpa. 19 Chaychina nimptinmi, suq runa Muysispa liyningunata yach'achimkuqqa qamimkachpa, Jisusta nirqan: Yach'achimkuq Taytitu, maytampismi qamwanna munani riyta, nichpa. 20 Chaymi Jisusqa nirqan: Surrumkunam mach'ayniyuqkuna. Pichqumkunam kamachayuqkuna. Piru nuqa Dyusmanda chamuq runa kachpampismi, mana nima wasiyuqchu kani samanaypaqqa. (Chayri yach'amkuqniy kachpaqa, qambis nuqachina ancha ringi padisiq.) 21 Chaymandaqam suq yach'amkuq masiy nirqan: Taytitu, dijawayri puntata rinaypaq taytayta pambaq. Pambachpaqam qamwanna rini puriq, nichpa. 22 Chaychina nimptinmi, Jisusqa nirqan: Mas allim nuqawan purinallki. Chaqa nuqampi mana kriyiqkunaqam wañuchqamkunachina. Chayri chamuyna nuqawan purinallki. Taytallki wañumptinqam, chay wañuchqa laya ayllullkimkunana pambanqa, nichpa. 23 Jisusmi yach'amkuqningunawan yamkumpi puriq barkumpi richpa, chay ancha atun quch'ata pasallkarqanllampa. 24 Piru yamkumpa ch'awpimbi kallkamptinllampam, ancha jwirtitana wayrarqan. Chaymi yamkuqa ancha maqchimkamuchpa undallkarqanna chay barkumanqa. Chaychina kallkamptinqam, Jisusqa puñullkarqan. 25 Chaymi pallkunaqa Jisusta rimkch'achichpa, nirqanllampa: Ay, Taytitu, wachawayllampa! ¡Saqallkanchiqnam yamkuman! nichpa. 26 Chaymi Jisusqa nirqan: Imarallkutaq ancha manchangillampa? Qamkunaqam mana allitachu nuqampi yuyamkungillampa. Chaychina nichpaqam, Jisusqa atarichpa, chay wayrata yamkuta jwirtita rimachpa, kamachichpa, limpu qasillachirqan. 27 Chaymi ancha ispantachqata nirqanllampa: Ima laya runataq kay Siñurninchiq Jisusqa? Rimkay, kamachimptinlla, yamkuqa wayrawan kasuchpa qasillarqan, nichpa. 28 Jisus chay ancha atun quch'ata pasachpam, ch'ayarqan Gadara lugarman. Chaychina ch'ayamptinmi, pantyunmanda ichkay lumkumkuna chamurqanllampa Jisusta tinguq. Chay lumkumkunampa umkumbiqam dyablumkunampa ispiritunguna kachqanrallku, ancha wampumkuna karqan. Kanan chay lumkumkuna ñambi kamptinllampaqam, mana pimpis atirqanllampachu pasayta. 29 Chaymi Jisusman ch'ayachpaqa, chay lumkumkunaqa kaychina qayach'amkurqan: Qam Jisus Dyuspa Churinqa, ¿imampaqtaq mitimkungi nuqallkunamanqa? ¿Ima chamuchqachu kangi kastigawaqllampa, manaraq jwisyu diya ch'ayamumptin? nichpa. 30 Chay kallkachqanllampa sirkambiqam runamkuna achka kuchimkunata michillkarqanllampa. 31 Chaymi chay dyablumkunaqa Jisusta ancha rrugarqanllampa: Nuqallkunata qatiwachpaqar, yuch'allku dijaway, waq kuchimkunaman yallkunayllampa, nichpa. 32 Chaymi Jisusqa pallkunata nirqan: Mayñ, riyllampa waq kuchimkunaman, nichpa. Chaychina nimptinmi, chay dyablumkunaqa chay runamkunamanda lluqchichpa, rirqanllampa chay kuchimkunamanna. Chaymi chay kuchimkunaqa das lumkuyachpa, qaqamanda chay ancha atun quch'aman yumbay saqachpa, yamkumpi ch'uqachpa, limpu wañurqanllampa. 33 Chaymi chay kuchimkunata michiqkunaqa ancha manchachpa, kallpaylla rirqanllampa Gadara llaqtaman abisamkuq. Ch'ayachpaqam nirqanllampa: Jisusqam chay ichkay lumkumkunataqa kaychina kach'amkachirqan, nichpa. 34 Chaymi yumbay chay gadarinumkuna manchachpa, Jisus kallkachqanman chamuchpa nirqanllampa: Jisus, yuch'allku kay llaqtamandaqa riyna suq laduman, nichpallampa.
1 Chaychina nimptinllampaqam, Jisusqa yamkumpi puriq barkuman yallkuchpa, pasarqan suq ladu chimbaman llaqta Kampirnawunman. 2 Chaymi chaypina kallkamptinqa, runamkuna ch'ayarqanllampa suq runa wañuchqachina kwirpuyuqta parampi ampamuchpa. Chaymi Jisusqa yach'achpa: Chay runamkunam nuqampi ancha yuyamkunllampa, nichpaqa, chay runa wañuchqachina kwirpuyuqta nirqan: Ijitu, ama llamkiychu. Nuqam uchallkimkunamanda pirdunallki, nichpa. 3 Chaychina Jisus nimptinqam, Muysispa liyningunata wamkin yach'achimkuqkuna uyachpa, kaychina yuyarqanllampa: Kay runaqam Dyuschina yanqa tumkuchpa, Tayta Dyusta burlallkan, nichpa. 4 Chaymi Jisusqa yuyachqanllampata yach'achpa, pallkunata nirqan: Imarallkutaq chaychina mana baliqkunataqa yuyallkangillampa? 5 Mayñ, ¿imataq mas trabajus ruranaypaq, ichu ninaypaq: Uchallkimkunatam pirdunallki ichu ninaypaq: Kach'amkachillkim; atarichpa, riy nichpa? 6 Mayñ, kayta rimkachichqallki yach'anallkillampa: Tayta Dyus Jisusta pudirniyuqta rurachqa, kay mundumpi runamkunata uchangunamanda pirdunanambaq, nichpa. Chaymandaqam Jisusqa chay runa wañuchqachina kwirpuyuqtaqa nirqan: Atarichpa, parallkita ampachpa, riyna wasimkiman, nichpa. 7 Chaymi chay runaqa das atarichpa, kach'amkachqana rirqan wasinman. 8 Chay milagruta ruramptinqam, chay rimkaqkunaqa ispantachqata Dyusta kaychina ancha alabarqanllampa: Dyusilumpagi, Taytitu, pudirnimkitam quchqa kangi chay runamkunata, nichpa. 9 Jisusqam chay kachqanmanda chamuqchinaqa, nuqa Matiyuta rimkawarqan kuntribusyun kubramkunay dispachuypi tiyallkaqta. Chaymi niwarqan: Chamuy. Amku nuqawan, nichpa. Chaymi nuqaqa chay urasna paywan rirqay. 10 Chaymandaqam Jisus nuqallkuna yach'amkuqningunawan wasiypi mimkullkamptiyllampa, wamkin kuntribusyunda kubramkuq masillkuna, suq laya uchayuq runamkunampis ch'ayamuchpa, pullayllampana tiyarqanllampa. 11 Chaymi wamkin farisiyu dumktrinayuqkunaqa chayta rimkachpa, nuqallkuna Jisuspa yach'amkuqningunata niwarqanllampa: Imarallkutaq Jisusqa chay millanaypaq kuntribusyunda kubramkuqkunawan, chay suq laya mana baliqkunawanqa mimkullkan? nichpa. 12 Chaymi Jisusqa chaychina niqta uyachpaqa, nirqan: Mana qachyaqkunaqam mana munanchu ambimkuqtaqa. Qachyaqkunallam munan ambimkuqtaqa. 13 (Kay uchayuqkunam qachyaqkunachinaqa.) Chaymi pallkunata wachaq chamuchqaqa kani. Manam chamuchqachu kani chay allin tumkuqkunata wachaq. Chayrallku yach'amkuyllampa Dyuspa Santu Librumbi kaychina nichqanda: Nuqaqam munani llamkimpamkuqkuna kanallkillampa. Chaymi qamkuna suqkunata mana llamkimpamptimkiqa, mana munanichu ufrindallkillampata quwachpa adurawanallkiqa, nichpa. 14 Jwan Chutichimkuqpa yach'amkuqningunam Jisusman qamimkarqanllampa, kaychina tampunambaqllampa: Taytitu, nuqallkuna Jwanda kasuqkunaqam ayunanillampa. Yumbay chay farisiyu dumktrinayuqpismi ayunanllampa. ¿Imarallkutaq qamba yach'amkuqnimkimkunaqa mana ayunanllampachu? nichpa. 15 Chaymi Jisusqa pallkunata nirqan: Mayñ, suq runa kasarallkamptinqachuraq, yanasunguna (yanasanguna) chaypi pullan kallkamptin, ¿ayunanmanllampa? Manñm. Chaychinallam kay yach'amkuqnillkunaqa nuqawan kachpaqa, kuchimkullkanllampa. Chaymi manaraq ayunanllampachu. Piru suq diyam (ch'iqniwaqkuna) pallkunamanda rinllampa amkrawaq. Chaychina amkrawamptinraqmi, pallkunampis rinllampa ayunaq. 16 Manam pimpis mawka mudanandaqa muchuq rritasuwanqa rrimindanchu, ¿manachu? Chaychina ruramptinqach'i, chay muchuq rritasuqa qandichpa, achwamba llimkinman chay mawka mudanataqa. 17 Chaychinallam llullu binutampis mana wichunchiqchu mawka qara taligamanqa. Chaqa chay llullu binuqach' qarwachpa, chay mawka qara taligata pach'yachinman. Chaychinam pulla qasachamkanman binuwan qara taligaqa. Chaymi llullu binutaqa muchuq qara taligaman wichunchiq, ama ni binu ni taliga qasachamkanambaq. [Nuta: Jisuspa chay muchuq yach'achimkuchqanqam chay llullu binuchina. Isrraylinumkunampa chay unay kustumbringunaqam chay mawka qara taligachina. Chaymi mana balirqanchu taqllunanllampa Jisuspa muchuq dumktrinangunata chay mawka kustumbrimkunawanqa.] 18 Chaychina Jisus rimallkamptinmi, ch'ayamurqan suq runa. Chay runaqam isrraylinumkunampa suq kamachimkuqnin karqan. Payqam Jisuspa ñawpambi qunqurimkuchpa, kaychina ancha rruqarqan: Taytitu, chinitaymi kanalitan wañurqanna. Yuch'allku amku kawsachinallki. Chaqa kriyinim: Mamkimkita sawambi ruramptimkim kawsarinqa, nichpa. 19 Chaymi Jisusqa Ari, nichpa, chay lugarmanda lluqchichpa, nuqallkuna yach'amkuqningunawan chay runawanna rirqayllampa. 20 Chaymi ñanda rillkamptiyllampaqa, suq warmimpis nuqallkunawan rillkarqan. Chay warmitaqam dusi wata tumkuyta yawar mana dijachqachu karqan. Chaymi yuyarqan: Jisuspa kampamba manyanda llamkachpallam kach'amkachaq, nichpa. Chaychina yuyachpa, manchachpampismi, chay warmiqa imkinda riqchina Jisuspa kampamba manyanda achlita llamkarqan. 22 Chaychina llamkamptinmi, Jisusqa imkinman timkramkachpa, chay warmita champachpa nirqan: Ijita, ama manchachpachu, animamkay. Nuqampi allita yuyamkuchqallkirallkum kach'amkachqana kangi, nichpa. Chaymi chay urasmandampacha chay warmiqa kach'amkarqanna. 23 Chaymandaqam Jisusqa chay kamachimkuq runampa wasinman ch'ayachpaqa, rimkarqan runamkunata, warmimkunata kunyalla waqallkaqta, flawtirumkunatampis. 24 Chaymi Jisusqa pallkunata nirqan: Achuyllampa. Manam wañuchqachu chinitaqa. Puñullkanllñm, nichpa. Chaymi chay uyaqkunaqa Jisusta asimparqanllampa. 25 Chaymandaqam chay asimpaqkunataqa umkumanda sawaman surquchpa, Jisusqa umku wasiman yallkurqan. Chaymandaqam chay almataqa mamkinmanda piskamptin, das kawsamuchpa, chayarqan. 26 Chaymi chay milagruta rurachqambaqqa, Jisuspa famanqa tumkuy mayta chimkwamkarqan. 27 Chay Jayrumpa wasinmanda Jisuswan rillkamptiyllampam, ichkay sarkumkuna imkiyllampata rirqan, ancha jwirtita qayamkuchpa: Unay Dabidpa Karu Willkan, yuch'allku llamkimpawayllampa! nichpa. [Nuta: Dabidpa Karu Willkanmi munan niyta: Dyus Amkrachqan Wachadur, nichpa.] 28 Chaymandaqam Jisusqa suq wasiman ch'ayachpa, umkuman yallkumptinqa, chay ichkay sarkumkunampis imkinda yallkurqan. Chaymi Jisusqa pallkunata tampurqan: Qamkunaqachu kriyingi: Jisusmi atin kach'amkachiwayta? nichpa. Pallkunaqam nirqan: Ari, Taytitu, nichpa. 29 Chaymi Jisusqa ñawinllampata llamkachpa, nirqan: Qamkuna kriyichqallkichina kanqa, nichpa. 30 Chaychina nimptinllam, pallkunampa ñawingunaqa ancha klarutana rimkamkurqanllampa. Chaymandaqam Jisusqa pallkunata nirqan: Amamkich pitampis parlachingillampachu kay rurachqaypaqqa, nichpa. 31 Piru pallkunaqam chay wasimanda lluqchichpa, waqman kaymanna richpa, yumbayta parlachirqan: Jisusmi kach'amkachiwachqa, nichpa. 32 Chaychina rillkamptiyllampam, wamkin runamkunaqa suq muduta ampamurqanllampa Jisusman. Chaqa dyablumpa ispiritunmi chay runampa kwirpunman yallkuchpa, muduyachichqa karqan. 33 Chaymi Jisus chay dyabluta runamanda qatimptinqa, atirqanna rimayta. Chaymi chayta rimkaqkuna ancha ispantachqata nirqanllampa: Manamkich nunka kay Jisus rurachqandachinaqa rimkachqallampachu kanchiq kay Isrrayilpiqa! nichpa. 34 Piru farisiyu dumktrinayuqkunaqam chayta rimkachpaqa, Jisusta kuntrachpa, nirqanllampa: Dyablumkunampa kamachimkuqnin yanampamptinmi, Jisusqa chay dyablumkunata runamkunamanda atin qatiytaqa, nichpa. 35 Chay diyamkunampim Jisusqa ancha achka llaqtamkunaman, kasiriyumkunaman rirqan yach'achimkuq. Chaymi sinaguga wasimkunampi Dyuspa chumaq nutisyangunata yach'achimkuchpa, nirqan: Taytanchiq Dyusmi dasna rin chamuq, chumaqta kamachimkunambaq, nichpa. Chaychina yach'achimkuchpam, tumkuy laya qachyaqkunata kach'amkachirqan. 36 Chaymandaqam Jisusqa ancha achka ch'ayamuqkunata rimkachpa, ancha llamkimparqan. Chaqa chay ch'ayamuqkunaqam ancha challkuchqa, wichumkudu mana michidurniyuq wichamkunachina karqanllampa. 37 Chaymi payqa nuqallkuna yach'amkuqningunata niwarqanllampa: Allimptam nillkillampa, chay achka maskawaqkunaqam ancha achka kusichachina. Piru kusichadurkunaqam achlitalla kanchiqllampa. 38 Tayta Dyusmi chay kusichampa dwiñun. Chayri payman mañamkuyllampa, mas kusichadurkunata numbranambaq, yanampawananchiqllampa, yumbayta yach'achinanchiq, Dyuspi kriyinanllampa, nichpa.
1 Jisusmi yumbay chay yach'amkuqninmanda dusi runamkunata amkrawachpa, pudirniyuqkunata rurawarqanllampa, atinayllampa runamkunamanda dyablumkunata qatiyta, tumkuy laya nanaywan kaqkunata atinayllampa kach'amkachiyta. [Nuta: Chay dusi amkrachqangunaqam ampustulkuna chutirqanllampa.] 2 Chay dusi ampustulkunaqam kallkuna karqayllampa: puntatam Simun; payllam Pidrumpis chutin; chay Pidrumpa masan Andris, Sibidiyumpa churinguna Jamkubuwan Jwan, 3 Filimpi, Bartulu (payllam Natanayilpis chutin), Tumas. Suqqam nuqa Matiyu. Unaymi nuqaqa kuntribusyunda kubramkuq karqay. Suqqam Alfiyumpa churin Jamkubu. Suqqam ?Libiyu; payllam? Tadiyumpis chutin. 4 Suqqam suq Simun. Payqam isrraylinu Kananista partidumanda karqan. Suqqam Judas Iskaryuti. Chay Judas Iskaryutim Jisusta intrigamkurqan chay kuntraqkunamanqa. 5 Jisusmi nuqallkuna dusi yach'amkuqningunata manaraq kach'awachpa, kaychina kunawarqanllampa: Amamkich chay suq nasyungunamanqa ringillampachu. Amamkich chay prubinsya Samaryamambis ringillampachu. 6 Achwan riyllampa llaqta masinchiq isrraylinumkunamanlla. Chaqa pallkunaqam chingachqa wichamkunachina purillkanllampa. 7 Chayri niyllampa: Taytanchiq Dyusmi kay tyimpumpi qallarillkan chumaqta kamachimkuq, nichpa. 8 Chaychina yach'achimkuchpaqar, qachyaqkunata kach'amkachiyllampa. Chay ismullkaq kwirpuyuqkunatampis kach'amkachiyllampa. Wañuchqamkunatampis kawsachiyllampa. Dyablumkunatampis runamkunamanda, warmimkunamanda qatiyllampa. Chaqa qamkunataqam dibaldilla pudirniyuqta rurachuchqallampa kani. Chayri qamkunampis chay pudirniywanqa yumbayta yanampayllampa, ama nimata kubrachpachu. 9 Chaychinalla riyllampa. Amamkich ñannimkimpaqqa ampangillampachu uruta, ni qallayta ni kubrimanda qallallkunatampis bulsimkullkimpiqa. 10 Amar ni alfurjata ni llanqata ni burdunda ampayllampachu. Mudanallkitampis suqsitutalla ampayllampaqa. Chaqa suqkunata yach'achimptimki, kach'amkachimptimkiqam, alli pallkuna qamkunata qarachunambaq. Manchu suq trabajaqqa dirichuyuq, pagunda ch'askinambaq. 11 Chayri suq llaqtaman ichu suq kasiriyuman ch'ayachpaqa, maskayllampa suq allin runata, chaypi paywan kidanallkillampa, chay llaqtamanda rinallkillampa diyamkaman. 12 Suq wasiman ch'ayachpaqar, chumaqta nampallkuchpa, Dyusman mañamkuyllampa, chay wasimpi tiyaqkunata yanampanambaq. 13 Chay wasimpa dwiñun chumaqta qamkunata ch'ayachichumptinqa, masta mañamkuyllampa pallkunampaq. Piru qamkunata fyirusyachumptinqa, pallkunampaqqa amana mañamkuyllampachu. Chaqa Dyusqam mana rinchu yanampaq pallkunataqa. 14 Chaychina mana munamptinllampa chay wasiman ch'ayachichuyta ni uyachuytaqa, chay wasimanda ichu chay llaqtamandaqa das lluqchichpa, riyllampa suq ladumanna. Ch'amkimkillampamanda pulbuta ch'ampsiy, chay llaqtampi tiyaqkuna yach'anambaq: Chay yach'achimkuqkunaqam manana kwintayuqchu nuqanchiqkunawanqa, nichpa. 15 Allimptam nillkillampa, jwisyu diyampiqam chay mana ch'askichuqkunataqa ancha fiyuta rinllampa kastigaq, maski chay ancha uchayuq runamkuna Sudumampi, Gumurrampi tiyaqkunamanda. 16 Jisusqam niwarqanllampampis: Allimptam nillkillampa! Uñitamkunata ancha atun surrumkunampa umkunda kach'allkaymanchinam, qamkunataqa kach'allki, chay malu runamkunampa umkunda rinallkillampa. Chayri ancha sabidu kayllampa kulibrachina, yumbayta allita yanampanallkillampa. Piru ancha allin mana nimata dañachimkuq palumitachinar kayllampa. 17 Allita yuyachpa, kwidamkachpa puriyllampa. Chaqa chay wampu runamkunam prisuchuchpa, awturidarkunampa ñawpambi rinllampa dimandachuq. Rinllampampismi asutichuqllampa sinaguga wasimkunampi. 18 Kanan nuqampi kriyimptimkiqam, prifimktumkunaman, gubyirnumkunaman rin ampachuqllampa. Chaymi qamkunaqa chay awturidarkunampa ñawpambi, chay mana isrraylinu kaqkunampa ñawpambimpis nuqampaq ringillampa yach'achimkuq. 19 Chayri awturidarkunaman qamkunata ampachumptinqa, ama llamkiyllampachu: ¿Imataraq rimachaq? nichpaqa. Chaqa prisuchumptinllampaqam, chay uras Dyus kimkin rin yanampachuqllampa, chumaqta paypaq yach'achimkunallki. 20 Chaqa chay uraspiqam manana qamkunallachu ringillampa yach'achimkuqqa. Achwanmi Dyuspa Santu Ispiritun qamkunampi kachpa, rin yanampachuq, chumaqta rimanallki. 21 Wamkingunaqam chay tyimpumpi masanda rinllampa intrigamkuq wanchinambaqllampa. Wamkin taytaqam wambranda rin intrigamkuq. Wamkin wambrangunaqam taytanda mamanda kuntrachpa, rinllampa intrigamkuq wanchinambaqllampa. 22 Kanan nuqampi kriyichqallkirallkum, achka runamkuna qamkunata rinllampa ch'iqnichuq. Chaychina padisichpa, nuqampi mana challkuq yuyamkumptimkillampa wañunallki diyamkamanqam, rini wachachuq. 23 Chayri suq llaqtampi qamkunata qasachachumptinqa, suq llaqtaman mitimkayllampa. Chaqa allimptam nillkillampa, qamkuna manaraq yach'achimkumptimki kay Isrrayilpa yumbay llaqtangunampim, nuqaqa Dyusmanda Chamuq Runa rini kutimuq. 24 Piru nuqata qasachawachqanchinam, qamkunatampis rinllampa qasachachuq. Chaqa suq yach'achimkuqmi mas rrispitadu rin kaq yumbay yach'amkuqninmandaqa. Chaychinallam suq patrumbis mas pudirniyuq rin kaq yumbay kriyadunmandaqa. Chayri suq yach'amkuqqa yuyanqa: Allita yach'amkuchaq, chay yach'achimkuqniychina kanaypaq, nichpa. Chaychinallar suq kriyadumpis yuyanqa: Allita yach'amkuchaq, patrunniychina kanaypaq, nichpa. Piru nuqampaq nimptinllampa: ¡Jisumkristum chay mas pudirniyuq dyablu Bilsibu! nichpaqam, qamkunataqa achwamba rinllampa musyachuq. 26 Jisusqam kaychinampis yach'achiwarqanllampa: Runa masimkitaqa ama manchayllampachu. Chaqa tumkuy ima pamkadu kaqpaqmi ancha klaruta rinchiqllampa yach'aq. Tumkuy ima pamkaduta maychimka ñigachqampis, yach'achqa rin kaq. 27 Chayri chay pamkadu nichuchqaytaqa, qamkunaqa amana pamkachpachu, yumbayta yach'achiyllampa. Chay uyaritamp nichuchqaytaqa, wasimkimkunampa sawanmanda ancha jwirtita rimayllampa, yumbay uyachunanllampa. 28 Chaychina rimachpaqa, ama manchayllampachu wanchimkuqkunataqa. Chaqa pallkunaqam qamkunampa kwirpullkitalla atinman wanchiyta. Piru almallkitaqam mana nimatampis atinllampachu dañachiytaqa. Chayri Taytay Dyustalla manchayllampa. Chaqa payqam kwirpullkillampata almandinda atin chingachiyta infyirnumpi. 29 (Tayta Dyusmi ancha allita kwidachungillampa. Chayri ama manchayllampachu chay wanchimkuqkunataqa.) ¿Manachu ichkay pichqatuta suq rriyalitumpaqlla randimkunllampa? Piru mana baliqsitumkuna kamptimbismi, ni suq pichqatu atinchu wañuyta Taytanchiq Dyus mana dijamptinqa. 30 Dyusmi ancha allita kwidachuchpa, yumbay aqchallkillampatampis ancha allita yumpachqa. 31 Chayri ama pitampis manchayllampachu. Chaqa qamkunaqam pichqumkunamandaqa masta balingillampa Dyuspaqqa. 32 Qamkuna runamkunampa ñawpambi nuqampaq nimptimkillampa: Nuqam Jisumkristuta sigini nichpaqam, nuqampis qambaqqa syilumpi Dyuspa ñawpambi rini niq: Paymi allimpta nuqata sigiwachqa, nichpa. 33 Piru panqamkuchpa, runamkunampa ñawpambi ñigawamptimki: Manam siginichu Jisusta, nichpaqam, nuqampis Taytay Dyuspa ñawpambiqa rini ñigachuq: Manam riqsinichu paytaqa, nichpa. 34 Jisusqam kaychinampis yach'achiwarqanllampa: Nuqampaqqa ama yuyayllampachu: Jisusmi kay munduman chamuchqa, ama pimpis qasachawananchiq, nichpaqa. Achwanmi nuqampi kriyimptimkillampaqa, ayllullkimkuna, suqkuna rinllampa qasachachuq. 35 Chaqa wamkin runamkuna nuqampi kriyimptinqam, ullqu wambran rin kuntraq. Wamkin warmimkunampis nuqampi kriyimptinqam, warmi wawan rin kuntraq. Chaychinallam wamkin llumchumkunampis swigranllampata rin kuntraq. 36 Chaychinallam kimkin ayllullkimkunampis kuntrallkillampa rin kaq. 37 (Chaymi nillkillampa, yumbay runamkunata kuyachpampis, nuqata masta kuyaway.) Piru mayqannimki nuqata achlatalla kuyawachpa, taytallkita ichu mamallkita masta kuyachpaqam, mana balingichu yach'amkuqniy kanallkiqa. Chaychinallam nuqata achlatalla kuyawachpallampa, wambrallkimkunata masta kuyachpaqa, mana balingichu nuqampa yach'amkuqniy kanallkillampaqa. 38 Chayri nuqampi kriyichqallkirallku padisichpa ichu suq kruspi munamptinllampa wanchichuytampis, allita kasuwachpaqa, nuqampa allimp yach'amkuqniy ringillampa kaq; manaqa manñm. 39 Chaymi mayqannimki nuqata ñigawachpa bidallkita wachanallkiqa, ringillampa chingaq tumkuy tyimpumpaq. Piru nuqampi kriyichqallkirallku wanchichumptinllampaqam, nuqa rini wachachuq, tumkuy tyimpu nuqawan kawsanallkimpaq. 40 Jisusqam niwarqanllampampis: Mayqan runa ichu warmi qamkunata chumaqta ch'ayachichuchpaqam, nuqata ch'ayachiwallkanchina. Chaychina nuqata ch'ayachiwachpaqam, Taytay Dyustampis ch'ayachillkanmanchina. 41 Chaqa Dyuspaq rimaqta, chumaqta ch'ayachimptimkiqam, Dyusqa primyullkita rin quchuq chay rimaqpa primyundachina. Chaychinalla Dyus munachqanda rurallkaq runata yanampamptimkiqam, paypa primyundachina Dyus rin quchuq. 42 Chayraq yach'amkullkaq wambrallkunata yanampachpam, primyullkita ringi ch'askiq. Chaqa allimpta nillkillampa, chiri yamkituta qumptimki umpyananmi, Taytanchiq Dyus ancha chumaq primyullkita rin quchuq, nichpa.
1 Jisusmi nuqallkuna dusi yach'amkuqningunata kunawachpaqa, chay llaqtamanda suq llaqtamkunamanna rirqan, Dyuspa chumaq nutisyanda yach'achimkuq. 2 Chay Jwan Chutichimkuqmi karsilpina kachpa, yach'arqanna Jisumkristu rurallkachqambaq. Chaymi ichkay yach'amkuqninda Jisusman kach'arqan, kaychina tampunanllampa: 3 Taytitu, ¿Dyusmanda chay chamunambaq Amkrachqan Wachadurqachu qam kangi, ichu suqtaraq chuyachaqllampa? nichpa. 4 Chaychina tampumptinllampaqam, Jisusqa nirqan: Riyllampa, Jwanda willay nuqa yach'achimkuchqayta uyachqallkita, kay rurachqayta tumkuy ima rimkachqallkita. 5 Chaqa sarkumkunaqam kach'amkachimptiy rimkamkunna. Kujumkunampismi purinna. Kwirpun ismullkaqkunampismi allinna kidan. Surdumkunampismi uyamkunna. Wañuchqamkunampismi kawsamunna. Pubrimkunatam Taytanchiq Dyuspa chumaq nutisyanda yach'achillkani. 6 (Chayri Jwanda niyllampa, nuqampi mas allita kriyinambaq.) Chaqa nuqampi chay mana challkuq kriyiqqam ancha rin kuchimkuq, nichpa. 7 Chaymandaqam Jwamba chay kach'adunguna rimptinllampaqa, Jisusqa chaypi kaqkunata kaychina yach'achimkurqan Jwan Chutichimkuqpaq: Ima laya runatam rirqallkillampa champaq chay chuncha lugarmanqa? ¿Rirqallkillampachu champaq suq runa mana alli yach'aqta, suq kañata wayra waqman kayman kuyuchiqtachina? Manñm. 8 Ichu ¿rirqallkillampaqa champaq suq runa ancha ch'aniyuq chumaq mudanayuqta? Manñm. Chaqa qamkunaqam allita yach'angillampa, chay ancha chumaq mudanayuqkunaqam gubyirnumkunampa atun wasingunampi tiyanllampa, ¿manachu? 9 Chaymi tampullkillampa: ¿imata rimkaqtaq rirqallkillampaqa? Rirqallkillampa rimkaqqam Dyuspaq suq ancha yach'ayniyuq rimaqta, ¿manachu? Ari, qamkuna chay rimkachqallkiqam Dyuspaq yumbay rimaqkunamandaqa mas klaruta nuqampaqqa yach'achimkuchqa. 10 Chaymi Jwan Chutichimkuqpaq Taytay Dyusqa Santu Librumbi kaychina niwarqan: Qamba mas puntallkitam nuqanchiqpaq suq rimaqta rini kach'aq. Chaqa paymi qambaq rin yach'achimkuq, chay uyaqkuna chumaqta ch'ayachichunanllampa. Chaychina yach'achimkuchpaqam, ñannimkita allichallkanmanchina, nichpa. 11 Chaymi allimpta nillkillampa, runamkuna kawsachqan diyamandampacha kanangamanqam, mana pimpis kachqachu Jwan Chutichimkuqmanda mas baliqqa. Piru nuqampi kriyiqkunamanda chay yaqqa mana baliqqam chay Jwanmanda mas pudirniyuq rin kaq syilumpiqa. 12 Chaymi chay Jwan Chutichimkuq yach'achimkuchqan diyamandampacha achka runamkuna, warmimkuna Tayta Dyusta allitana kasullkanllampa. Piru achka wampu runamkunampismi Dyusta ancha kuntrallkanllampa. 13 Kanan chay Jwan Chutichimkuq manaraq yach'achimkumptinmi, unay tyimpumkunampi Muysis liynimbi, Dyuspaq yumbay rimaqkuna librungunampimpis nirqanllampa: Taytanchiq Dyusmi suq diya tumkuy maypi rin kamachimkuq, nichpa. 14 Chayri kay nichuchqayllampata paqtar qamkuna intyindingiman: Chay Aliyas chamunambaq kaqqam chay Jwan Chutichimkuq kachqa, nichpa. 15 Chayri qamkuna rinriyuqkunaqa, allita uyawachpa intyindiyllampa. 16 Piru kay tyimpumanda mana kriyiqkunaqam chay wambra mana munaq pugllaqkunachina. Manchu wamkin wambramkunaqa plasamkunampi pugllanllampa, fyistatachina rurachpa ichu suq almata pamballkaqchina tumkuchpa. Piru wamkin wambramkuna mana munamptin pugllaytaqam, chay pugllaqkunaqa kaychina anyanllampa: 17 Flawtata waqachimptiyllampam, ay, qamkunaqa mana munangillampachu dansayta. Chaymandaqam nuqallkuna llamkiy llamkiyta yumpamkumptiypis, qamkunaqa mana munangillampachu waqayta nuqallkunawanqa, nichpa. (Chaychinallam wamkinnimkimpis mana munangillampachu uyayta ni Jwan Chutichimkuqta ni nuqata.) 18 Chaqa chay Jwan chamuchpa, allinda mana mimkumptin, binuta mana umpyamptin, chay yumpamkuq wambramkunachina kamptinmi, qamkunaqa nirqallkillampa: Waq Jwamba umku kwirpumbim dyablumpa ispiritun, nichpa. 19 Chaymandaqam nuqa Dyusmanda Chamuq Runa chamuchpa, imata mimkuchpa umpyamptiyqa, ningillampa: Chay Jisusqam mana undaqchu mimkun, binuta umpyan. Kanan kuntribusyunda kubramkuqkunawan suq laya uchayuqkunawanmi tandamkan, nichpa. Piru nuqampi kriyiqkunaqam Dyus munachqanchina kawsamptinllampa, suqkuna rimkachpa rinllampa yach'aq: Taytanchiq Dyusmi ancha yach'ayniyuq kachpa, Churin Jisusta, chay Jwan Chutichimkuqtampis kach'amuchqa, nuqanchiqkunata yach'achiwananchiq, nichpa. 20 Jisumkristu chay llaqtamkunampi achka milagrumkunata ruramptimbismi, chaypi tiyaqkunaqa mana munarqanllampachu uchanllampata dijaytaqa. Chaymi Jisusqa kaychina anyarqan: 21 Ay, imanangiraqri qamkuna Kurasin llaqtampi tiyaqkuna, qamkuna Bitsayda llaqtampi tiyaqkunaqa! Chaqa ñawpallkillampampim achka milagrumkunata ruramptiypismi, mana munangillampachu nuqampiqa kriyiyta. Piru qamkunampi rurachqay milagrumkunata waq uchayuq Tiru llaqtampi, waq Sidun llaqtampi ruramptiyqach'i, pallkunaqa unayna uchangunata dijanandallampa. Chaqa pallkuna mana allimkunata rurachqanrallku syintichpach'i, waqachpa, lutu mudanamkunata ruramkuchpa, uch'pata sawanman basyanandallampa. 22 Kallkich nillkillampa, jwisyu diyampiqam qamkunaqa chay Tirumanda Sidunmanda kaqkunamandaqa mas kastigadu ringillampa kaq. 23 Mayñ, qamkuna Kampirnawumbi tiyaqkunaqa, ¿imatam yuyangillampa? ¿Palanganumkuna kachpachu yuyangillampa: Syilumanmi rini ch'ayaq, nichpa? ¡Manñm! Achwanmi qamkunataqa rinllampa wichuchuqllampa wañuchqamkuna kachqanman. Chaqa kay milagrumkuna qamkunampi rurachqayta waq chingachichqa Suduma llaqtampi ruramptiyqach'i, chaypi tiyaqkunaqa uchanllampataqa dijanandana. Chaychina dijamptinllampaqam, Tayta Dyusqa chay llaqtandaqa mana chingachinandachu. Achwanmi kanangaman kananda. 24 Kallkich nillkillampa, jwisyu diyampiqam qamkunaqa chay Suduma llaqtampi tiyaqkunamandaqa mas kastigadu ringillampa kaq, nichpa. 25 Chay tyimpumpim Jisusqa Tayta Dyusta nirqan: Taytitu, kay pachampa, anaq syilumpa kamachimkuqninmi qamlla kangi. Kanan yuyachqallkitam chay yach'ayniyuqkunamanda pamkachqa kangi. Piru chay mana yach'aqkunatam chay yuyaynimkimkunata yach'achichqa kangi. Chaqa chaychina kanambaqmi munachqa kangi, Taytitu. Chaymi ancha alaballki. 27 Chaymandaqam Jisusqa nirqambis: Taytay Dyusmi nuqatalla amkrawachqa, tumkuy imata paypaq yach'achpa, pudirniyuq yach'achimkuq kanaypaq. Chaqa manam pimpis allimptaqa riqsiwanchu. Taytayllam riqsiwan Churin kachqaytaqa. Chaychinallam paytampis mana pimpis riqsinchu. Nuqa sampalan Churin kaqllam paytaqa riqsini. Kanan nuqampi kriyiqkunata yach'achimptiymi, pallkunampis atinllampa Taytay Dyustaqa riqsiyta yuyayninllampampi. [Nuta: Piru pallkunaqam ancha yuyarqanllampa: ¿Imachinam atini kasuyta Muysispa yumbay liyningunata wachamkanaypaq, Taytanchiq Dyus ama kastigawanambaq? nichpa. Chaychina ancha yuyachpaqam, suq ancha llachaq yugutachina ampallkarqanllampa. Chaymi Jisumkristuqa pallkunata kaychina nirqan:] 28 Qamkuna yugutachina ampaqkuna, challkuchpa, chamuy nuqaman samachichunaqpaqllampa, amana llamkinallkillampa. 29 Chaqa nuqamanda yach'amkuqqam suq yunta wanguduchina nuqawanqa rin kawsaq. Kanan nuqaqam ancha manchu ancha umildi kani. Chaymi mana trabajuschu rin kaq qamkuna nuqawan purinallkiqa. Chaymi nuqampi yuyamkuchpa, mana nimata llamkichpachu, nuqampina atingillampa samayta. 30 Chaqa manam trabajuschu rin kaq qamkuna chay yach'achichuchqayta kasunallkiqa. Suq mana llachaq yugituchinam rin kaq, nichpa.
1 Waq tyimpumpim Jisusqa nuqallkuna yach'amkuqningunawan samana diyampi trigu tarpudumpa umkunda rillkarqayllampa. Chaymi nuqallkuna yach'amkuqningunaqa mallaqnachpa, pasaqchina trigumpa ispiganda pitimkuchpa, qaqumkuchpa mimkurqayllampa. 2 Chaymi wamkin farisiyu dumktrinayuqkunaqa rimkawachpallampa, Jisusta anyarqan: Liyninchiqpim kamachiwanchiq, samana diyampi ama trabajananchiq. Rimkay, yach'amkuqnimkimkunaqa kay samana diyampi qaqumkuchpa trabajallkanllampa, nichpa. 3 Chaymi Jisusqa chay farisiyumkunata nirqan: Ima, manachu liyichqallampa kangi chay unay gubyirnu Dabid kumpañirungunawan mallaqnachpa rurachqandaqa? 4 Chaqa payqam yallkurqan karpamanda adurana wasiman mimkunata maskaq. Chay adurana wasimpi ufrinda tandamkuna kaqmi kuramkunampaqlla karqan. Suqkunaqam mana atiqllampachu mimkuytaqa. Piru chay Dabidqam kumpañirungunawan mana dirichuyuq kachpampis, chay ufrinda tandamkunata mimkurqanllampa. 5 ¿Manachu Muysispa librunda liyichqallampa kangi? Chaypiqam nin: Dyuspa adurana wasimbiqam kuramkunaqa samana diyata mana gwardachpachu trabajanqallampa, nichpa. ¿Chaychina trabajachpachu, pallkunaqa uchata rurallkanllampa? Manñm. 6 Allimptam nillkillampa, Dyuspa chay adurana wasinmandaqam nuqa mas baliqqa kani. 7 Chaqa Dyuspa Santu Librunmanda intyindichpaqach'i, kay nichqandaqa yach'angimanllampa: Manam munanichu animalkunata wanchichpa, chay laya ufrindata quwanallkillampaqa. Achwanmi munani suqkunata llamkimpanallkillampa, nichpa. Chayta intyindichpaqach'i, qamkunaqa kay mana uchayuqkunataqa mana wichumpanallkitachu. 8 Nuqaqam Dyusmanda Chamuq Runa kachpa, samana diyampa dwiñun kani. Chaymi atini kamachimkuyta: Kaymi alli ichu kayqam mana allichu, samana diyampi rurananchiqqa, nichpa. 9 Jisusqam chay kachqayllampamanda richpa, sinaguga wasiman yallkurqan. 10 Chaypim karqan suq qandichqa mamkiyuq runa. Chaymi wamkin isrraylinumkuna Jisusta munachpa dimandayta, yanqa tampurqanllampa: Mayñ, ¿Dyusqachu kamachiwanchiq samana diyampi suq qachyaqta kach'amkachinanchiq ichu mana? nichpa. 11 Chaymi Jisusqa chay tampuqkunata nirqan: Mayqannimkimpa suq wichallki samana diyampi saqamptin suq pusumanqa, ¿manachu das surqungiman? 12 Kanan suq runaqam suq wichamandaqa masta balin. Chaymi liyninchiq dijawanchiqllampa, samana diyampi runa masinchiqkunata allita rurananchiqllampa. 13 Chaymandaqam chay chamki mamkiyuq runata nirqan: Chutay mamkimkita, nichpa. Chaymi runampa mamkinqa chamki kachqanmanda das allinyarqan, chay suq ladu mamkin allin kaqchinana. 14 Piru chay farisiyu dumktrinayuqkunaqam chay uras sawaman lluqchichpa, kunanamkurqan, Jisusta wanchinanllampa. 15 Chay farisiyumkuna kunanamkumptinqam, Jisusqa yach'arqan. Chaymi chay sinaguga wasimanda lluqchichpaqa, pallkunamanda amkramkachpa, suq ladumanna rirqayllampa. Piru ancha achka runamkuna, warmimkunam sigirqanllampa. Kanan Jisusqam yumbay qachyaqkunata kach'amkachichpa, 16 kaychina kamachirqan: Amamkich suqkunataqa parlachingichu: Jisusmi kach'amkachiwachqa, nichpaqa. 17 Chaychina Jisus nimptinmi, Dyuspaq rimaq Isayiyas nichqan kumplirqan. (Chaqa Isayiyaspa librumbim Tayta Dyus Churimbaq kaychina nichqa karqan): 18 Kaymi amkrachqay yanampawaqqa. Paytam ancha kuyani. Paywanmi ancha kuchimkuni. Chaymi Ispirituyta qumptiy, payqa tumkuy kay mundumpi tiyaqkunata nuqampaq rin yach'achiq: Kaychinam Tayta Dyus allin justisyata rin ruraq, nichpa. 19 Chay yanampawaqqam mana ni piwambis anyanamkunqachu. Chaymi mana ni pimpis rinchu uyaq kallimkunampi anyanamkumptinqa. 20 Ancha llamkimpamkuq kachpam, chay manaraq allita kriyiqkunataqa mana rinchu wichumkuq suq llawimkallkaq kañatachinaqa. Chay achlalla kriyiqkunataqam mana rinchu wanchiq salqayallkaq michatachinaqa. Chaychinam rin llamkimpamkuq, malumkunata binsichpa, allin justisyata ruranangaman. 21 Kanan yumbay nasyungunampi achka runa warmim paypi rinllampa yuyamkuq, nichpa. 22 Suq dyablum suq runaman yallkuchpa sarkuyachichpa, muduyachichqa karqan. Chayrallkum chay sarku mudu runata Jisusman ampamumptinllampa, payqa kach'amkachirqan. Chaymi chay runaqa atirqanna champamkuyta, parlayta. 23 Chayrallkum payta rimkaqkunaqa ancha ispantachqata kaychina tampunamkurqanllampa: Kay Jisusqachuraq chay unay gubyirnu Dabidpa Karu Willkan chay chamunambaq Wachadurninchiq? nichpa. 24 Chaychina tampunamkumptinmi, farisiyu dumktrinayuqkunaqa uyachpa nirqan: Kay runaqam mana payllachu dyablumkunataqa qatin. Chay mas pudirniyuq dyablu Bilsibu yanampamptinmi, atin qatiytaqa, nichpa. 25 Jisusqam chay yuyachqanllampata yach'achpa, kaychina nirqan: Mayqan nasyumba awturidarninguna pallkunampura pilyanamkuchpaqach', chingachinamkunman. Suq llaqtampi ichu suq ayllumpi pallkunampura pilyachpaqam, uchyanamkunman. Maychimkampisch'i mana atinmanllampachu duraytaqa. 26 Chaychinallam chay Satanaspis dyablu masingunawan pilyachpaqa, mana atinmanchu suqkunata binsiyta. Chaychinaqach'i limpu chingachinamkunman. 27 Qamkunaqam nuqampaq ningillampa: Dyablu Bilsibu yanampamptinmi, qatin dyablumkunataqa, nichpa. Chaychina kamptinqa ¿chay kimkin Bilsibuchu yanampan wamkin yach'amkuqnimkitampis, dyablumkunata qatinambaqqa? ¡Manñm! Chaymi pallkuna rimkachichungillampa qamkuna pandachqallkitaqa. 28 Chaqa Dyuspa Santu Ispiritunmi nuqataqa yanampawan, dyablumkunata runamkunamanda qatinaypaqqa. Chaymi allita yach'anchiqllampa: Dyuspa pudirninqam ch'ayamullkanna qamkunaman, nichpa. 29 Chaqa suq quch'imkuq runaqam mana atinchu dasqa quch'iyta imangunata suq ancha wampu runataqa. Chay quch'imkuqqam puntata chay wampu runata binsichpa, alli alli ch'aqnachparaq, atin quch'iyta imandaqa. (Chay runachinam nuqampis dyabluta binsichpa, runamkunata, warmimkunata quch'ini wachanaypaq), nichpa. 30 Jisusqam nirqambis: Chay mana yanampawaqqam kuntrawallkan. Chaymi mana yanampawanchu, runamkunata, warmimkunata tandanaypaqqa. Achwanmi tandachqallkunataqa chimkwallkan. 31 Chaychina kamptimbismi, Dyusqa runamkunampa tumkuy laya uchangunata rin pirdunaq. Piru Dyuspa Santu Ispiritunda kuntrachpa rimaqkunataqam mana rinchu pirdunaq. 32 Chaqa mayqan kuntrawaqtam Tayta Dyusqa atin pirdunayta. Piru Santu Ispiritunda kuntrachpa rimaqkunata mana rinchu pirdunaq, ni kay bidampi, ni suq bidampi. 33 Suq allin yuraqam allinda puqun. Piru suq mana baliq yuraqam mana baliqta puqun. Chaqa suq yurataqam riqsinchiq puquyninmanda. 34 ¡A, farisiyu dumktrinayuqkuna, qamkunaqam kulibramkunampa wawanguna kangillampa! ¡Malumkuna kachpam, mana atingillampachu allimkunata rimaytaqa! Chaqa chimimkillampaqam chunqullkillampampi kaqkunata riman. 35 Chaymi allin runaqam chunqumbi allita yuyachpa, allita riman. Piru malu runaqam, chunqumbi mana allita yuyachpa, chaychinalla mana allimkunata riman. 36 Chaymi nillkillampa, jwisyu diyampiqam yumbay ringillampa kwintata quq chay mana baliq rimachqallkimpaq. 37 Chaymi chay rimachqallkimanda Dyusqa jusgachuchpa, rin nichuqllampa: Uchayuqmi kangi, ichu Manam uchayuqchu kangi, nichpa. 38 Jisumkristu chaychina nimptinmi, wamkin farisiyu dumktrinayuqkunaqa Muysispa liyningunata yach'achimkuqkunawan Jisusta nirqanllampa: Yach'achimkuq Taytitu, munanillampam suq milagruta ruranallkimpaq, nichpa. 39 Chaymi Jisusqa pallkunata nirqan: Qamkunaqam ancha uchayuq kachpa, Dyusta mana munangillampachu kasuyta. Kanan munangillampam suq milagruta rimkayta. Piru manam rurachaqchu qamkuna munachqallkitaqa. Achwanmi kaychina kanqa. Manchu unay tyimpumpi Dyus rurarqan suq milagruta paypaq rimaq Junaswan. Chay laya milagrutallam Dyusqa nuqawambis rin ruraq, qamkuna rimkanallkiqa. 40 Chaqa Junasqam suq ancha atun piskadumpa umkumbi kimsa diya, kimsa tutata karqan. Chaychinallam nuqampis kimsa diya, kimsa tutata umku allpampi rini kaq. 41 (Chaymandaqam chay Junasta piskadu wichumkumptinqa, rirqan Ninibi llaqtaman, Dyuspaq yach'achimkuq.) Chaychina Junas yach'achimkumptinmi, chay ninibinumkunaqa uchangunata dijachpa, Dyustana kasurqanllampa. Chaymi jwisyu diyampiqa chay ninibinumkuna qamkuna farisiyumkunata, qamkuna Muysispa liyningunata yach'achimkuqkunata rin chimbichuqllampa: Qamkunaqam ancha uchayuqkuna kangillampa, nichpa. Chaqa chay Junasmanda mas pudirniyuq kamptiypismi, mana kasuwangillampachu. 42 Chay jwisyu diyampim Saba nasyumba gubyirnambis kawsamuchpa, kay tyimpumanda kaqkunataqa rin chimbichuqllampa. Chaqa chay gubyirna warmiqam ancha karu nasyunmandampacha chamurqan, chay yach'ayniyuq gubyirnu Salumun yach'achimkuchqanda uyaq. Piru kaypi Salumunmanda mas yach'ayniyuq kamptiypismi, mana munangillampachu uyawaytaqa. 43 Suq dyablum suq runamanda lluqchichpaqa, rin puriq chuncha lugarkunaman, maskachpa maypi tiyanambaq. Piru mana tarichpa tiyanandaqam, chay runa lluqchichqanmanda kaqpaq yuyachpa nin: 44 ¡A, paymanlla kutirichaq! nichpa. Chaychina yuyachpa, kutirichpaqam, chay runataqa tarin suq illaq wasi pichadutachina. 45 Chaymi rin riq ampamuq mas dyablu masingunata. Chaymi chay punta dyabluqa syiti dyablumkuna mas fiyuta tarichpa, ampamun chay runaman. Chaychinam suq trumpa dyablumkunampa ispiritunguna chay runamanqa yallkunllampa, wasimpichina tiyaq. Chaymi chay runaqa achla malu kachqanmandaqa mas maluna timkramkan. Chaychinallam rin kaq kay malu runamkunawambis, nichpa. 46 Jisus runamkunata parlachillkamptinmi, maman masangunawan ch'ayarqan. Chaymi paywan munachpa parlayta, sawampilla chuyallkarqanllampa. 47 ?Chaypi pallkuna chuyallkamptinqam, suq runa Jisusta nirqan: Kay sawampim mamitallki masallkimkunawan chuyachullkan. Anchach munanllampa parlayta qamwan, nichpa.? 48 Chaymi Jisusqa chay willaqtaqa nirqan: Pitaq mamay? ¿Pitaq masallkunaqa? nichpa. 49 Chaymandaqam mamkinwan nuqallkuna yach'amkuqningunaman rimkachimkuchpa, nirqan: Kallkunam mamitay, masallkunaqa. 50 Chaqa Tayta Dyus munachqanda kasuqkunam mamay, masallkuna, panillkunaqa, nichpa.
1 Jisusqam chay diyalla wasimanda lluqchichpa, rirqan chay ancha atun quch'ampa manyanman yach'achimkuq. Chayman ch'ayachpa tiyallkamptinmi, 2 ancha achka runamkuna, warmimkuna payman chamuchpa, quch'ampa manyambi undarqanllampa. Chaymi payqa yamkumpi puriq barkuman lluqchichpa, chay barkumpi tiyarqan yach'achimkunambaq. 3 Chaymandaqam Jisusqa achka laya kumparasyunda rurachpa, kaychina yach'achimkurqan: Suq runam rirqan tarpumkuq. 4 Chaymi simillanda chimkwamptinqa, wamkinqa ancha angu ñanman ichkirqan. Chaymandaqam pichqumkuna chamuchpa, chay simillamkunata limpu pallarqan. 5 Wamkin simillaqam kaskajuman ichkirqan. Chaymi sawitampilla kachpa, wayralla wiñarqan. 6 Piru kaskaju kachqanrallku mana umkumkaman atichpa ch'umpamkuytam, rumpay lluqchimptinqa, das chamkirqan. 7 Wamkin simillaqam kachamkunampa umkunman ichkirqan. Chaymi chay kachamkunaqa wiñachpa, maqachpa limpu chingachirqan. 8 Piru wamkin simillaqam allin allpaman ichkirqan. Challkunaqam chumaqta wiñachpa, allita puqurqan. Wamkinqam kada simillita syin granusta puqurqan. Wamkinqam 60 granusta; wamkinqam 30 granusta puqurqan. 9 ¡Chayri qamkuna rinriyuqkunaqa allita uyawayllampa kay nichuchqayta! 10 Chaymi nuqallkuna yach'amkuqninguna qamimkachpa, Jisusta tampurqayllampa: Imarallkutaq kumparasyunwanqa yach'achimkungi? nichpa. 11 Chaychina tampumptiyllampaqam, Jisusqa niwarqanllampa: Dyusmi munan yach'anallkillampa imachinam syilumpi paywan ancha chumaqta ringillampa kawsaq, nichpa. Chaymi kay kumparasyungunawan yach'achimkuchpaqa, qamkunatalla intyindichillki. Piru chay mana munaq kriyiqkunataqam mana intyindichinichu. Pallkunampaqqam pamkadu. 12 Chaychina mayqan allita uyawaqtaqam yanampani, mas yach'ayniyuq kanambaq. Piru chay mana kriyiqtaqam achlita yach'amkuchqanda Taytay Dyus limpu rin quch'iq. 13 Chaymi nuqampi chay mana munaq kriyiqkunataqa kumparasyungunawan yach'achini. Chaqa pallkunaqam maychimka rimkachpa uyachpaqa, mana intyindinllampachu chay yach'achimkuchqayta. 14 Chaychina mana intyindimptinllampam, Dyuspaq rimaq Isayiyas kaychina nichqanqa kumplillkanna pallkunampi: Maychimka uyachpampismi, mana ringillampachu intyindiq. Rimkachpampismi, mana ringillampachu yach'aq: imam chayqa, nichpaqa. 15 (Chaymandaqam Taytanchiq Dyusqa Isayiyasta kaychina nirqan:) Chay runamkunampa chunqunqam ancha angu timkramkachqa, ama kasuwananllampa. Chaymi yach'achimptiypis, mana intyindinllampachu. Chaqa ñawinda, rinrindam kirpanllampa, nuqampi ama kriyinanllampa, uchanllampamanda ama pirdunanaypaq, nichpa. 16 Piru Tayta Dyusqam qamkunawanqa ancha alli. Chaymi ñawimkillampawan champachpa, intyindingillampa. Rinrimkillampawan uyamkuchpam kasungillampa. Chayri kuchimkuyllampa. 17 Allimptam nillkillampa, Dyuspaq achka rimaqkuna, suq laya allin runamkunampismi ancha munarqanllampa rimkawayta, uyawayta qamkuna rimkawachqallkichina. Piru pallkunaqam wañurqan manaraq chamumptiy. Chaymi mana atirqanllampachu rimkawayta ni uyawayta. 18 Allimptam nillkillampa, chay tarpumkuq kumparasyunwan yach'achimkuchqayta. 19 Chay angu ñanqam munan niyta runamkuna, warmimkuna angu chunquyuqkunampaq. Chaqa pallkunaqam mana munanllampachu intyindiyta Dyuspa chumaq nutisyandaqa. Chaymi chay pichqumkuna simillata pallaqchinam dyabluqa chay uyamkuchqanda das qunqachin. 20 Chay kaskaju ch'amkraqam yach'achiwanchiq chay das disanimamkaqkunampaq. 21 Chaqa pallkunaqam Dyuspa chumaq nutisyanda uyachpaqa, kuchimkuchpa das kriyinllampa. Piru manam allitachu nuqampiqa yuyamkunllampa. Chaymi nuqampi kriyichqanrallku qasachadu kachpaqa, das disanimamkachpa, manana munanllampachu nuqampi kriyiytaqa. 22 Chay allpa kachayuqqam munan niyta Dyus nichqanda achla uyaqkunampaq. Chaqa pallkunaqam Dyus nichqanda uyachpaqam, kay mundumpa kusasningunampaq llamkichpa, tumkuy imayuq munachpa kayta, manana munanllampachu Dyus nichqanda kasuytaqa. Chaymi manana siginllampachu Dyuspi yuyamkuchpaqa. 23 Piru wamkin uyamkuqkunaqam chay ancha allin allpachina. Pallkunaqam nichqayta uyachpa, allita kriyichpaqa, ancha allita rurachpa kawsanllampa. Wamkinqam chay ancha allin allpa syin granusta puquqchina, ancha allita Dyusta kasunllampa. Wamkinqam chay allin allpa 60 granusta puquqchina. Wamkinqam chay allin allpa 30 granusta puquqchina, nichpa. 24 Jisusmi suq kumparasyundampis rurachpa, kaychina nirqan: Taytanchiq Dyusmi suq runa tarpumkuqchina rin ruraq. Chay runam allin simillanda ch'amkrambi tarpurqan. 25 Piru tarpuchpa puñunangamanmi, chay runampa suq kuntran chamuchpa, trigun tarpuchqamba umkunman ballimkuta chimkwachpa rirqan. 26 Chaymi trigun wiñachpa, ispigallkamptinqa, chay ballimkumkunampis umkumbi wiñarqan. 27 Chaymi dwiñumpa kriyadungunaqa ballimkuta rimkachpaqa, rirqanllampa niq: Patrunsitu, ¿manachu allin simillata tarpurqallkiqa? ¿Maymandaraq chay ballimkumkuna trigumpa umkumbiqa wiñachqa? nichpa. 28 Chaymi dwiñuqa nirqan: Suq kuntrawaqmi chaytaqa rurachqa kanqa. Chaychina nimptinqam, chay kriyadungunaqa nirqan: Patrunsitu, ¿munangichu rinaypaqllampa, chay ballimkuta trigumanda surquq? nichpa. 29 Piru dwiñunqam nirqan: Dijayllampa wiñanan. Ballimkuta pilachpa, imamkich trigundinda pilangimanllampa. 30 Chayri dijayllampa trigumpa pullan wiñanambaq kusichamkaman. Kusicha tyimpumpinam syigaqkunata rini kamachiq, puntata chay ballimkumkunata amkrachpa, qutuchpa, rumpachinambaq, chaymanda trigutalla trujaypi waqaychananllampa, nichpa. 31 Kay kumparasyunda rurachpampismi, Jisusqa pallkunata kaychina nirqan: Dyusta kasuqkunaqam ñampuchpa murunchina. Chaqa suq runa ch'amkrambi tarpumptinqam, 32 chay ñampuchpa murunqa yumbay simillamanda mas tamkchita kachpampis, wiñachpaqa, achka tarpuduta binsin. Chaychina atunna kamptinqam, pichqumkuna rimkrangunampi kamachamkunllampa (mamkachamkunllampa). [Nuta: Chay ñampuchpa muritunchinam Dyusta kuyaqkunampis achlita kachqanllampamanda rinllampa achkayaq.] 33 Kay kumparasyunda rurachpam, Jisusqa nirqan: Dyusta kasuqkunaqam libadura samksachimkuqchina. Manchu suq warmi midyu kustal mach'kata yamkuwan sanguchpa, achla libadurata taqllumptinqa, ancha achkayachpa, yumbay chay mach'kataqa limpu samksachin. [Nuta: Chaychinallam Dyusta kasuqkunampis, achlitalla kachpampis, ancha rinllampa achkayaq.] 34 Jisusqam yumbay chay nichqanda achka kumparasyunwanlla yach'achimkurqan. Mana kumparasyunda rurachpaqam, mana yach'achimkuqchu. 35 Chaychina Jisumkristu yach'achimkumptinmi, Dyuspaq rimaq kaychina iskibrichqan kumplirqan: Tayta Dyus kay munduta rurachqan tyimpumandampacha manaraq yach'achqanllampatam kumparasyungunawan rini yach'achimkuq, nichpa. 36 Runamkunata yach'achichpa uchyachpaqam, Jisusqa wasiman yallkurqan. Chaymandaqam nuqallkuna yach'amkuqninguna qamimkachpa kaychina tampurqayllampa: Taytitu, kay nuqallkunatar intyindichiway ¿imam munan niyta chay nichqallki ch'amkrampi ballimkuqa? nichpa. 37 Chaymi Jisusqa nuqallkunata kaychina niwarqanllampa: Nuqa Dyusmanda Chamuq Runam chay allin simillata tarpuq runachinaqa kani. 38 Kay munduqam chay ch'amkrachina. Dyusta kasuq runamkuna, warmimkunam chay allin simillachinaqa. Dyabluta kasuq runamkuna, warmimkunam chay ballimkuchinaqa. 39 Chaqa dyablum kuntrayqa. Chaymi pay chay ballimkuta tarpuq runachinaqa. Chay dyabluqam wambrangunata taqllun wambrallkunaman. Jwisyu diyaqam chay syigachina rin kaq. Dyuspa anjilningunam chay syigamkuqkunaqa. 40 Chay ballimkumkunata amkrachpa rumpachichqanchinam, jwisyu diyampi chay mana wambray kaqkunataqa rinllampa rumpachiq. 41 Chaqa nuqa Dyusmanda Chamuq Runaqa kachpam, anjilnillkunata rini kamachiq, wambrallkunamanda amkrananllampa uchata rurachimkuqkunata, tumkuy chay uchayuqkunatampis. 42 Chaymandaqam rin wichuqllampa lumyallkaq urrnuman. Chaypim chay uchata ruraqkunaqa ancha waqachpa, kirunllampata rinllampa qach'yachiq. 43 Piru Dyus chamumptin, chumaqta kamachimkunanmi, payta kasuqkunaqa ancha alabachqa rinllampa kaq. Chaymi rumpaychina rinllampa llimpyaq. Chayri qamkuna rinriyuqkunaqa, allita uyayllampa kay nichuchqayta. 44 Dyuswan suq bidampi kawsananchiqqam ancha balin suq kampumpi mina pamkaduchina. Chaymi suq runa chay minata tarichpaqa, manana munanchu dijayta. Chaymi muchuqmanda chay minata pambarichpa, kuchimkuchpa rin tumkuy iman kaqta randimkuq. Chaychina randimkuchpa, kutimuchpaqam, chay ch'amkra minayuqta randin. 45 Dyuswan suq bidampi kawsananchiqqam ancha balin suq ancha ch'aniyuq parla rumichina. Suq nigusyantiqam chay mas chumaq llimpyaq parlas rumimkunata maskan. 46 Chaymi chay mas munaypaq llimpyaq parla rumita tarichpaqa, tumkuy iman kaqkunata randimkun, kutirinan randiq. [Nuta: Chaychinar tumkuy ima atichqanchiqta rurachun, Dyuswan syilumpi kawsananchiqllampa.] 47 Tayta Dyus chamuchpa chumaqta kamachimkunanmi, piskadumkunata piskaqkunachina rin ruraq. Chaqa chay runamkunaqam piskadumkunata piskanambaqqa, atarrayanda yamkuman wichumkunllampa. 48 Chaymandaqam tumkuy laya piskadumkuna bulsachamkamptin, atun quch'ampa manyanman chutachpa tiyanllampa, allin piskadumkunata amkrananllampa kanastanman. Piru mana baliq piskadumkunataqam wichumkunllampa. 49 Chaychinam jwisyu diyampi Dyuspa anjilninguna allin kaqkunamanda uchayuqkunata amkrachpa, 50 lumyallkaq ninaman rin wichumkuqllampa. Chaypim chay uchata ruraqkunaqa ancha waqachpa kirunllampata rinllampa qach'yachiq. 51 Jisusmi nuqallkuna yach'amkuqningunata kaychina tampuwarqanllampa: Qamkunaqachu intyindingillampa yumbay chay kumparasyunda? nichpa. Nuqallkunaqam nirqanillampa: Ari, intyindinillampam, Taytitu, nichpa. 52 Chaymi Jisusqa niwarqanllampa: Wamkin runamkunaqam Dyuspa Santu Librunmanda allita yach'achimkunllampa: Kaychinam Tayta Dyus chumaqta rin kamachimkuq, nichpa. Chay laya yach'achimkuqqam suq wasimpa dwiñunchina. Chaqa chay dwiñuqam yach'an surquyta unay waqaychachqanda, chayraq waqaychachqandampis. [Nuta: Chaychinallam chay yach'achimkuqkunampis Dyuspa unay dumktrinangunata, muchuq dumktrinangunatampis allita yach'an yach'achimkuyta.] 53 Jisusqam chay kumparasyungunawan yach'achimkuchpaqa, chay lugarmandaqa rirqanna. 54 Chaymi uywamkachqan llaqta Nasaritman ch'ayachpaqa, sinaguga wasimpi llaqta masingunata yach'achirqan. Chaymi pallkuna uyachpa ancha chumaqta yach'achimkumptinqa, ancha ispantachqata nirqanllampa: Ima, maymandataq kay runa ancha yach'ayniyuqqa? ¿Imachinataq achka milagrumkunataqa ruran? 55 ¿Manachu kayqa chay karpintirumpa churin? ¿Manachu mamanqa Marya chutin? ¿Manachu masangunaqa Jamkubu, Jusi, Simun, Judas chutin? 56 ¿Manachu kay llaqtanchiqpi paningunaqa tiyanllampa? Chaychinaqa, ¿imachinataq kay karpintirituqa ancha yach'ayniyuq, tumkuy challkunata ruranambaqqa? 57 Chaychina ninamkuchpaqam, mana munarqanllampachu chay yach'achimkuchqanda kasuytaqa. Chaymi Jisusqa pallkunata nirqan: Dyuspaq rimaqkunataqam suq llaqtamkunampiqa chumitaq ch'askichpa kasunllampa. Piru llaqta masinguna, kimkin ayllungunaqam mana kasunllampachu, nichpa. 58 Chaymi pallkuna mana kriyichqanrallku, Jisusqa chay Nasaritpiqa mana achka milagrumkunataqa rurarqanchu.
1 Chay tyimpumpi prubinsya Galiliyampa gubyirnun Irudis Jisuspa famanda yach'achpa, 2 yanampamkuqnin awturidarkunata nirqan: Chay alma Jwan Chutichimkuqmi kawsamuchqana. Chaymi chay milagrumkunata atin rurayta, nichpa. 3 Chaqa chay Irudismi chay Jwan Chutichimkuqta wanchichichqa karqan. Piru manaraq wanchichimptinmi, kaychina karqan. Puntatam chay Irudisqa masan Filimpimpa warmin Irudiyaswan kachqa karqan. Chaymi chay Jwanqa Irudista kaychina anyachqa karqan: Ama masallkimpa warminwanqa kaychu, nichpa. Chaychina anyachqambaqmi chay Irudisqa suldadungunata kamachirqan, Jwandaqa prisuchpa, watachpa, karsilananllampa. 5 Irudisqam Jwanda munarqan wanchichiyta. Piru ancha achka runamkunam Jwambaqqa kriyirqanllampa: Paymi Dyuspaq rimaq, nichpa. Chaymi Irudisqa pallkunata manchachpa, mana daschu Jwandaqa wanchichirqan. 6 Chaymandaqam Irudisqa diyambaq suq fyistata rurarqan. Chaypim yumbaypa ñawpambi chay warmi Irudiyaspa chinan ancha dansamptin, chay gubyirnu Irudistaqa ancha gustarqan. 7 Chaymi payqa intinadanda jurachpa nirqan: Ima mañawachqallkitam quchqallki, nichpa. 8 Chaymi maman kunamptin, chay chinaqa padrastun Irudista nirqan: Jwan Chutichimkuqpa umanda suq platumpi quway, nichpa. 9 Chaychina mañamptinmi, gubyirnu Irudisqa limpu malaganayarqan. Piru yumbaypa ñawpambi jurachqanrallkum, 10 suq suldadunda kamachirqan, karsilman richpa, Jwamba umanda ampamunambaq. 11 Chaychina Jwanda wanchichpam, umanda suq platumpi ampamurqan chinaman. Chinaqam ch'askichpaqa, mamandana qurqan. 12 Chaymi chay Jwamba yach'amkuqningunaqa chay karsilman ch'ayachpaqa, Jwamba kwirpundallana amparqanllampa pambaq. Pambachpaqam, rirqanllampa Jisusta willaq chay pasachqambaq. 13 Jisusqam yach'achpa, Jwan Chutichimkuqta wanchichqallampa, nichpaqa, chay kallkachqanmanda rirqan yamkumpi puriq barkumpi suq chuncha lugarman, sampalan chaypi kanambaq. Piru ancha achka runamkuna, warmimkunam yach'arqan: Chay lugarmanmi rillkan, nichpa. Chaymi llaqtangunamanda ch'amkimp richpa, Jisus rillkachqan lugarman ch'ayarqanllampa. 14 Chaymi Jisusqa chay barkumanda ichkichpaqa, chay ancha achka runamkunata, warmimkunata rimkarqan. Chaymi pallkunata llamkimpachpa, ampachqan qachyaqkunata kach'amkachirqan. 15 Amsayallkamptinqam nuqallkuna yach'amkuqningunaqa qamimkachpa, Jisusta kaychina nirqayllampa: Tardinñm. Kay chunchampiqam mana pimpis tiyanchu. Chayri kay runamkunataqa kach'ayna, sirka kasiriyumkunaman rinambaqllampa, mimkunata randiq, nichpa. 16 Chaymi Jisusqa niwarqanllampa: Imampaqnamir rinqallampaqa? Qamkuna qarayllampa, nichpa. 17 Chaymi nuqallkuna yach'amkuqningunaqa nirqayllampa: Manam nima mimkuna kanchu. Sinku tandita, ichkay piskaditullam kan, nichpa. 18 Chaymi Jisusqa niwarqanllampa: Challkunata kayman ampamuyllampa, nichpa. 19 Chaymandaqam Jisusqa kamachimkurqanna qawamkunampa sawambi chay runamkuna, warmimkuna tiyanambaqllampa. Chaymandaqam chay sinku tanditata, chay ichkay piskadituta piskachpa, syiluman champamkuchpa, Dyusta pagimkurqan. Chaychina pagimkuchpaqam, chay tanditamkunata piti piti rurachpa, nuqallkuna yach'amkuqningunata quwarqanllampa, chay runamkunata qunaypaqllampa. Chaychinam rurarqan chay ichkay piskadituwambis. 20 Mimkuchpallampaqam yumbay undarqanillampa. Chay tandawan piskaduqam subrarqanraq dusi kanasta undamkuna. 21 Kanan chay mimkuqkunaqam ullqumkunalla 5.000ch'i karqan. Warmimkunata, wambramkunataqam mana yumparqayllampachu. 22 Chaymi chay uras Jisusqa nuqallkuna yach'amkuqningunata niwarqanllampa: Lluqchichpa chay barkuman, ñawpayllampa waq chimbaman, nichpa. Chay barkumpi rillkamptiyllampaqam, Jisusqa kidarqan dispidiq chay achka runamkunata, warmimkunata. 23 Chaymandaqam payqa rirqan suq chuncha lumaman, chaypi Tayta Dyusman mañamkuq. Chaymi chaypilla sampalitan tutayarqan. 24 Chay barkumpi nuqallkuna rillkaqqam ancha atun quch'ampa ch'awpimbina karqayllampa. Lumkismi ñawpa ladumanda ancha wayrarqan. Chaymi yamkumkuna waqmanda kaymanda maqchimkachpa chay barkuta arkamptin, manana atirqayllampachu riyta. 25 Piru yaqqana achimkyamptinmi, Jisusqa yamkumpa sawanda ch'amkimp rillkarqan nuqallkunampa imkiyta. 26 Chaymi nuqallkuna rimkachpa, yamkumpa sawanda rillkamptinqa, ancha manchachpa qayach'amkurqayllampa: Ichichin, almam chamullkan! nichpa. 27 Chaymi Jisusqa niwarqanllampa: Ama manchayllampachu. Nuqam kani, nichpa. 28 Pidruqam nirqan: Qam Jisumkristu kachpaqar, kamachimkuy, kay yamkumkunampa sawanda purichpa, ch'amkimp chamunaypaq qaman, nichpa. 29 Chaymi Jisusqa nirqan: Chamuyri, nichpa. Chaymi Pidruqa chay barkumanda ichkichpa, chay yamkumpa sawanda rillkarqan Jisusman. 30 Lumkismi rimkachpa ancha wayrallkan, nichpa, manchachpa, yuyarqan: saqayman imamkich, nichpa. Chaymi saqallkachpana, qayach'amkuchpa, Jisusta kaychina nirqan: Wachawayri, Taytitu! nichpa. 31 Chaymi Jisusqa Pidruta das piskachpa, nirqan: A, runa nuqampi mana allita kriyiq! ¿Imampaqmir mana allitaqa nuqampiqa yuyamkungichu? nichpa. 32 Chaymandaqam Jisuswan Pidru barkumanna lluqchimptinqa, chay wayraqa limpuna qasillarqan. 33 Chaymi chay barkumpi nuqallkuna Jisuspa ñawpambi qunqurimkuchpa, payta adurarqayllampa, Allibraq qamqa Dyuspa Churin kangi! nichpa. 34 Chay ancha atun quch'ata pasachpaqam, ch'ayarqayllampa suq atun pamba Jinisarit chutiqman. 35 Chaymi chay jinisarinumkuna Jisusta riqsichpaqa, chay lugarnimba tumkuy rridurninman abisumkunata kach'arqanllampa. Chaymi yumbay qachyaqninllampata Jisusman ampamurqanllampa. 36 Ch'ayamuchpaqam Jisusta kaychina rrugarqanllampa: Dijawayri kampitallkimpa manyandalla llamkanaypaq, nichpa. Chaymi chay qachyaqkuna kampanda llamkaqkunaqa yumbaynin das kach'amkarqanllampa.
1 Suq diyam Muysispa liyningunata yach'achimkuqkuna, farisiyu dumktrinayuqkuna Jirusalin llaqtamanda Jisusman chamurqanllampa. Payman qamimkachpam, tampurqanllampa: 2 Unay agwilunchiqkunaqam mimkunambaqqa puntata mayllamkuna kustumbrita rurachpa, mamkingunata mayllaqllampa. Yach'achiwarqanchiq, nuqanchiqkunampis chay kustumbrita rurananchiq. Chayri ¿imarallkutaq yach'amkuqnimkimkunaqa mana kasunllampachu chay kustumbritaqa? nichpa. 3 Chaymi Jisusqa pallkunata tampurqan: Imarallkutaq Dyus kamachimkuchqanda dijachqallampa kangi, kustumbrimkitalla ruranallkillampaqa? 4 Chaqa Dyusqam kaychina kamachimkuchqa: Taytallkita, mamallkita rrispitayllampa. Mayqan runa warmi taytanda mamanda maldisyaqqam wañunqa, nichpa. 5 Piru qamkunaqam kustumbrimkimkunata kasuchpa, ningillampa: Taytallki, mamallki mañachumptin yanampanallkiqam, atingi ñigayta: Chay mañawachqallkitaqam rini quq Dyusta. Chaymi mana atinichu qamtaqa yanampachuyta , nichpa. 6 Chaychina yach'achimkuchpaqam, Dyus kamachimkuchqandaqa ñigallkangillampa, chay kustumbrimkimkunata siginallkirallku. 7 ¡A, chimimkiwanlla kasumkuqkuna! Dyuspaq rimaq Isayiyasqam qamkunampaq ancha allita kaychina nirqan: 8 Kay runamkunaqam chiminwanlla adurawanllampa. Piru chunqunllampampiqam mana nimatampis kuyawanllampachu. 9 Chaymi yanqa adurawanllampa. Chaqa runamkuna kamachimkuchqandallam yach'achimkunllampa. Manam yach'achimkunllampachu nuqampa dumktrinaytaqa, nichpa. 10 Chaymi Jisusqa chay uyamkuq runamkunata qayachpa nirqan: Allita uyawachpa, intyindiyllampa: 11 Imata mimkuchpaqam, mana uchayuqchu kanchiq. Achwan chunqunchiqpi mana allimkunata yuyachpa, chiminchiqwan rimachpam, uchayuqqa kanchiq, nichpa. 12 Chaymi nuqallkuna yach'amkuqningunaqa qamimkachpa, Jisusta kaychina nirqayllampa: Taytitu, chaychina nimptimkiqam, farisiyu dumktrinayuqkunaqa mana gustachpachu ancha piñamkurqanllampa. 13 Chaymi Jisusqa nuqallkunata niwarqan: Pallkunataqa ama manchayllampachu. Chaqa runamkunaqam plantamkunachinalla. Suq diyam Tayta Dyus paypi mana kriyiqkunataqa rin wichumkuq mana baliq plantatachina. Chay farisiyu dumktrinayuqkunaqam ancha pandachpa, sarkumkunachina kidachqallampa. Chaymi suqkunata mana baliq dumktrinanda yach'achichpa, sarkumpura rambanamkuqchina. Chaymi chay farisiyumkuna, pallkunata kasuqkunampis uch'kuman saqaqkunachina kachpa, limpu rinllampa chingaq, nichpa. 15 Chaymi Pidruqa nirqan: Intyindichiwayllampñr chay kumparasyunda, nichpa. 16 Chaymi Jisusqa nirqan: Ima manachu qamkunampis intyindingillampa? 17 Allita yuyayllampa. Mayqan runa imatampis mimkumptin umpyamptinqam, pach'anman yallkun, ¿manachu? Chaymandaqam pach'anmandaqa sawaman pasan. (Manam chunqunmanchu yallkun, uchayuq kanambaqqa.) 18 Piru mana baliq palabramkunata rimachpam uchayuqqa. Chaqa chay rimachqandaqam chunqumbi yuyachpa, rimanqa. 19 Kay laya mana baliq yuyallkunaqam chunqunmanda lluqchin: wanchimkunambaq; warmiyuq kachpa, suqwan kanambaq; manaraq willachpa taytanda mamanda, chinawan puñunambaq; suwamkunambaq; yanqa llullamkunata rimanambaq; wacha rimay kanambaq. 20 Chay laya mana baliq yuyayniyuqkunam uchayuqqa. Piru chay mayllamkuna kustumbrita mana ruraqkunaqam mana uchayuqchu, nichpa. 21 Chaymandaqam Jisusqa chay kallkachqanmanda rirqanna (Isrrayilpa ladumbi kaq nasyunman.) Chay nasyumba Tiru llaqtamba, Sidun llaqtamba sirkanman ch'ayarqan. 22 Waqpim prubinsya Kanayanmanda kaq warmi tiyaq. Chay warmim Jisusman chamuchpa ancha jwirtita qayamkurqan: Unay gubyirnu Dabidpa Karu Willkan Taytitu, llamkimpawayri! ¡Wawaymanmi dyablumpa ispiritun yallkuchqa! ¡Chaymi mana dijachpachu, ancha padisichin! nichpa. 23 Piru Jisusqam uyararqanlla. Manam nimatampis nirqanchu. Chaymi nuqallkuna yach'amkuqningunaqa Jisusta nirqayllampa: Chay warmi imkinchiqta chamuq qayamkuchpaqam ancha piñachiwanchiq. Yuch'allku, willay rinambaqna. 24 Chaychina nimptiyllampam, Jisusqa chay warmita nirqan: Taytay Dyusqam mana kach'amuwachqachu furastirumkunamanqa. Achwan kach'amuwachqaqam isrraylinumkunaman, nichpa. 25 Piru chay warmiqam Jisuspa ñawpanman chamuchpa, qunqurimkuchpa urkunda pachaman ch'ayachichpa, kaychina rrugarirqan: Taytitu, yanampawayri! nichpa. 26 Jisusqam nirqan: Manam allichu wambramkunata mimkunanda quch'ichpa, allqatumkunata qunanchiqqa. (Chaychinallam mana allichu, isrraylinumkunata dijachpa, qamkuna furastirumkunata yanampachunayqa), nichpa. 27 Chaychina nimptinqam, chay warmiqa nirqan: Ari. Chaychinam, Taytitu. Piru patrunguna masampi mimkumptinqam, allqumkunampis chay pidasitun ichkiqkunata mimkunllampa. (Chaychinam alli kanman, nuqallkunatampis achlitata yanampawanallki), nichpa. 28 Chaychina nimptinmi, Jisusqa nirqan: Warmisita! ¡Ancha allitaraq nuqampi kriyichqa kangi! Chaymi chay mañawachqallkita rini ruraq, nichpa. Chayta nichqan urasmandampacham chinanqa kach'amkarqanna. 29 Jisusmi chay lugarmanda richpaqa, Galiliya ancha atun quch'ampa manyanda richpa, suq lumaman lluqchichpa, chaypi tiyarqan. 30 Jisus kallkachqanman achka runamkuna, warmimkuna ch'ayarqanllampa ampamuchpa kujumkunata, sarkumkunata, mudumkunata, mankumkunata, suq laya nanaywan kaqkunatampis. Chaychina ch'ayachpaqam, chay qachyaqkunata Jisuspa ñawpambi rurarqanllampa. Chaymi payqa yumbayta kach'amkachirqan. 31 Chaymi mudumkuna rimamptin, mankumkuna allinyamptin, kujumkuna purimptin, mana rimkamkuqkuna champamkumptinqa, chay isrraylinu rimkaqkunaqa ancha ispantachqata Taytanchiq Dyusta ancha alabarqanllampa. 32 Chaychina pallkunata kach'amkachichpam, Jisusqa nuqallkuna yach'amkuqningunata qayawachpa, kaychina niwarqanllampa: Ancharaq kay runamkunampaq llamkini. Chaqa kimsa diyanam kaypi pullay nuqawan; piru manam nima kanchu mimkunanllampaqa. Chaymi mana munanichu mallaqta kach'ayllampataqa. Chaqa ñambi imamkich binsimkanmanllampa, nichpa. 33 Chaymi nuqallkunaqa nirqanillampa: Imatamir qarachun kay chunchampiqa? Chaqa kaypiqam mana pimpis tiyanchu, mimkunata randichiwananchiqqa, pallkunata qarananchiq, nichpa. 34 Chaymi Jisusqa niwarqanllampa: Allka tanditayuqmi kangillampa? nichpa. Nuqallkunaqam nirqayllampa: Syiti tandita, achla piskaditullam kan, nichpa. 35 Chaymi Jisusqa kamachimkurqan, yumbay chay runamkuna pambampi tiyanambaqllampa. 36 Chaymandaqam chay syiti tanditata, chay piskaditumkunata piskachpa, Dyusta pagimkurqan. Chaymandaqam piti piti rurachpa, nuqallkunata quwarqanllampa, chay yumbay runamkunata qaranaypaqllampa. 37 Qaramptiyllampaqam, yumbay mimkurqanllampa undanangaman. Mimkumptinllampaqam, syiti kanasta unda subrarqan. Chaymi chay subraqkunata tandarqayllampa. 38 Chay mimkuqkunaqam ullqumkunalla 4.000ch'i karqan. Warmimkunata wambramkunataqam mana yumparqayllampachu. 39 Chaymandaqam chay runamkunamanda dispidimkachpaqa, Jisusqa yamkumpi puriq barkuman lluqchichpa, rirqanna Magdala chutiq lugarman.
1 Wamkin farisiyu dumktrinayuqkuna sadusiyu dumktrinayuqkunawan chamuchpam Jisusta mallimpanambaq, yanqa kaychina nirqanllampa: Mayñ, suq manchaypaq milagruta ruray yach'anaypaqllampa, allimpchu syilumanda chamuchqa kangi ichu mana, nichpa. 2 Chaymi Jisusqa pallkunata nirqan: Qamkunaqam tardiman rumpay saqamptin, syilumpi chumpimkata rimkachpaqa, ningillampa: Allin diyam qayaqa rin kaq, nichpa. 3 Chaychinallam madrugadumpi syilu tuldadu kamptin, qarwita chumpimkayallkaqta rimkachpaqa, ningillampa: Tamyaqmi rin, nichpa. ¡A chimimkiwanlla Dyusta kasuqkuna! Chaychina syiluta champachpam, yach'angillampa, imachinam rin kaq tyimpu, nichpa. Chaychina yach'achpaqa, ¿imarallkutaq mana yuyangillampachu, Dyus nichqanmi kumplillkanna, nichpaqa? 4 ¡Qamkuna kay tyimpumanda malumkunaqam Dyustaqa mana munangillampachu kasuyta! Chaymi qamkuna chay milagru mañawachqallkitaqa mana rinichu ruraq. Achwanmi kay laya milagrulla rin kaq. Manchu Dyuspaq rimaq Junaswan suq milagru karqan. Chaychinallam nuqawambis kanqa. [Nuta: Chay Junasqam suq ancha atun piskadumpa pach'ambi karqan pambaduchina. Chaymandaqam lluqchirqan. Chaychinallam Jisuspis atun mach'aychina simpulturampi pambadu kachpa, kawsamuchpa, lluqchirqan.] Chaychina nichpaqam, pallkunamandaqa amkramkachpa, rirqanna. 5 Nuqallkuna Jisuspa yach'amkuqningunam chay ancha atun quch'ampa waq chimbanman richpaqa, qunqarqayllampa tandata ampaq. 6 Chaymandaqam chay chimbaman ch'ayamptiyllampaqa, Jisusqa niwarqanllampa: Uyawayllampa, kallkich nillkillampa, farisiyumkunampa libaduranmanda, sadusiyumkunampa libaduranmanda kwidamkanallkillampa, nichpa. 7 Chaychina niwamptinllampaqam, nuqallkunampura kaychina parlarqayllampa: Tandata mana ampamuchqanchiqrallkum chay libadurampaqqa niwanchiqllampa. 8 Piru chaychina parlamptiyllampaqam, Jisusqa yach'achpa, kaychina niwarqanllampa: Tandallkillampata qunqachpaqa ¿imarallkutaq chaychina parlallkangillampa? ¿Ima manachu allita nuqampi yuyamkungillampa: Jisumkristum atin qarawayninchiqta, nichpaqa? 9 ¿Ima manachu intyindingillampa? ¿Manachu yuyangillampa chay sinku tanditamkuna chay 5.000 runampaq aypachqandaqa? ¿Manachu yuyangillampa pallkuna mimkuchpa undamptinllampa, chay achka kanastamkunampi subrachqandaqa? 10 ¿Manachu ni yuyangillampa chay syiti tandamkuna 4.000 runamkunampaq aypachqandaqa? ¿Manachu yuyangillampa chay 4.000 mimkuchpa undamptinllampa, chay achka kanastamkunampi subrachqandaqa? 11 ¿Ima manachu intyindingillampa? Manam nillkillampachu, tandallkillampata qunqachqallkirallkuchu. Achwanmi nillkillampaqa, farisiyumkunampa, sadusiyumkunampa libaduranmanda kwidamkanallkillampa, nichpa. 12 Chaychina nuqallkunata niwamptinraqmi intyindirqayllampa: Manam niwachqachu kanchiq, tandampa libaduranmanda kwidamkananchiqchu. Achwanmi chaychinaqa niwarqanchiq, farisiyumkunampa, sadusiyumkunampa dumktrinanmanda kwidamkananchiq, nichpa. [Nuta: Chaqa achla libadurallam achka masata atin samksachiyta. Chaychinallam farisiyumpa, sadusiyumpa kustumbringunata achlitatalla ruramptinchiq, ancha dañachiwanchiqman.] 13 Jisusqam ch'ayachpa prubinsya Filimpumpa Sasarya llaqtamba lugarningunaman, nuqallkuna yach'amkuqningunata tampuwarqanllampa: Runamkunaqa ¿imatam nin nuqampaqqa? ¿Pich kani nuqaqa pallkunampaqqa? nichpa. 14 Chaymi nuqallkunaqa nirqayllampa: Wamkinqam nin chay alma Jwan Chutichimkuqchi kangi. Wamkinqam nin: Dyuspaq chay unay rimaq Aliyaschi kangi. Wamkinqam nin: Dyuspaq chay unay rimaq Jirimiyaschi kangi ichuch Dyuspaq suq unay rimaq kangi, nichpa. 15 Chaymandaqam tampuwarqanllampa: Mayñ, qamkunaqa ¿imatataq ningi? ¿Pitaq kani qamkunampaqqa? nichpa. 16 Chaymi Simun Pidruqa nirqan: Qamqam Dyus Amkrachqan Wachadurniyllampa kangi. Qamqam Dyus kawsaqpa Churin kangi, nichpa. 17 Chaychina nimptinqam, Jisusqa nirqan: Manam ni mayqan runa nichuchqachu: pim Jisumkristuqa, nichpaqa. Achwanmi Taytanchiq Dyus syilumpi kaq yanampachuchqa intyindinallki. Chayri qam, Junaspa churin Simun Pidruqa kuchimkuy. 18 (Chaqa chutimki Pidrum munan niyta rumi.) Kanan suq simyintu rumichinam ringi kaq. Chaqa runamkuna, warmimkuna qamanda yach'amkuchpa, nuqampi kriyimptinllampaqam, rini wachaq, ama ni mas pudirniyuq dyablu atinambaq ampayta wañuchqamkunampa lugarninman. Chaqa nuqampi chay kriyiqkunaqam ilgisyay. 19 Syilumpa llabingunatam rini quchuq. Chaqa nuqampi chay mana kriyiqkunaqam dyablumpa kadinangunawan wataduchina. Piru kay mundumpi nuqampaq yach'achimkuchpaqam, chay kadinamkunata paskallkangimanchina. Chaymi nuqampaq willamptimki, pallkuna nuqampi kriyimptinllampaqa, syilumpa pungunda kich'allkangimanchina, syiluman yallkunanllampa. Piru nuqampaq willachqallkita mana kriyiqkunaqam wataduchinalla kidan. Manam atinqallampachu yallkuyta syilumanqa. 20 Chaychina nichpaqam, Jisusqa yumbay yach'amkuqningunata niwarqanllampa: Amaraq ni pitampis nuqampaqqa niyllampachu: Jisusqam Dyus Amkrachqan Wachadurninchiq, nichpaqa. 21 Chaymandaqam Jisusqa yach'amkuqningunata kaychina niriwarqanllampa: Riqmi rini Jirusalin llaqtaman. Waqpim chay kamachimkuq ansyanumkuna, chay kamachimkuq isrraylinu kuramkuna, Muysispa liyningunata yach'achimkuqkuna ancha rinllampa padisichiwaq. Kanan rinllampam sintinsyawaq wañunaypaq. Piru chay wanchiwachqan diyamandam qaya suq punchawnin rini kawsamuq, nichpa. 22 Chaymi Pidruqa Jisusta suq laduman sampalanda ampachpa, nirqan: Taytitu, amar Taytanchiq Dyus munanmanchu chaychina padisichpa wañunallkimpaqqa, nichpa. 23 Chaymi Jisusqa timkramkachpa, Pidruta nirqan: Qamqam dyabluchina rimallkangi! ¡Achuy ñawpaymanda! Chaqa qamqam munangi disanimachiwayta, Tayta Dyus munachqanda ama ruranaypaq. Mana intyindiq runachinam yuyallkangi. Manam yuyallkangichu Dyus yuyachqanchinaqa, nichpa. 24 Chaymandaqam Jisusqa nuqallkuna yach'amkuqningunata niwarqanllampa: Mayqan munaq yach'amkuqniy kaytaqa tumkuy ima munachqanda dijachpa, nuqatalla sigiwanqa, suq kruspi munamptinllampa wanchiytampis. 25 (Chaqa nuqampi kriyiqkunataqam chay kuntrawaqkuna munanqallampa wanchiyta.) Piru amar ñigawaychu, chay kuntrawaqkuna ama wanchichunanllampa. Chaychina ñigawachpaqam, jwisyu diyampiqa ringi chingaq. Piru nuqampi kriyichqallkirallku wanchichumptinqam, jwisyu diyampi rini wachachuq, tumkuy tyimpu nuqawan kawsanallki. 26 Chaqa suq runa ichu suq warmi kay mundumpa tumkuy imanda ch'askichpa, piru jwisyu diyampi chingachpaqa, ¿imatam ganachqa? Chaqa manam atinchu pagaramkuyta wachamkanambaqqa. 27 Nuqaqam Dyusmanda Chamuq Runa kachpa, Taytay Dyuspa pudirninwan llimpyachpa, anjilningunawan syilumanda rini kutimuq. Chay diyampim runamkuna tumkuy ima rurachqambaq rini pagaraq, primyunda quchpa, ichu kastigachpa. 28 Allimptam nillkillampa, wamkinnimkiqam manaraq wañuchpa, ringillampa rimkawaq, chaychina Dyuspa pudirninwan llimpyachpa, chamumptiyqa.
1 Chay nichqanguna sayis diyas pasamptinnam, Jisusqa Pidruta, Jamkubuta, masan Jwannindinda ampachpa, rirqan suq altu lumampa sawanman. 2 Chay lumampim Jisusqa suq layayarqan. Chaqa qaqllanqam rumpaychina llimpyachpa, achimkchamkurqan. Ruramkuchqan mudanambismi rumpaychina ancha llimpyarqan. 3 Chaymandaqam Dyuspaq chay unay rimaqkuna Muysiswan Aliyas chay uras ladumbi rimkamkuchpa, Jisuswan parlallkarqanllampa. 4 Chaymi Pidruqa Jisusta nirqan: Taytitu, ancha alliraq kaypi kananchiqllampa. Munamptimkiqa, kimsa chuqllata rurachaqllampa, suqta qambaq, suqta Muysispaq, suqta Aliyaspaq, nichpa. 5 Chaychina Pidru rimallkamptinllam, suq llimpyaq pumkutay chamuchpa, limpu pambarqan. Chaychina pambamptinqam, chay uras pumkutaypa umkunmanda Dyusta uyarqanllampa kaychina niqta: Kaymi kuyachqay Churiy. Paywanmi anchallana kuchimkuni. ¡Paytar uyayllampa! nichpa. 6 Chayta uyachpaqam, chay kimsa yach'amkuq masillkunaqa ancha manchachpa, qunqurimkurqanllampa qaqllanllampa allpaman ch'ayanangaman. 7 Chaymi Jisusqa qamimkachpa, pallkunampa sawanman mamkinda rurachpa, nirqan: Atariyllampa. Ama manchayllampachu, nichpa. 8 Chaymi atarichpaqa, manana ni pitampis ladumbiqa rimkarqanllampachu. Jisustallanam rimkarqanllampaqa. 9 Chaymandaqam Jisus chay lumamanda uraman riqchinaqa, chay kimsa yach'amkuq masillkunata kamachirqan: Kay rimkachqallkitaqa amaraq pitampis niyllampachu, wañuchpa kawsamunallkaman, nichpa. 10 Chaymi chay yach'amkuq masillkunaqa Jisusta tampurqanllampa: Muysispa liyningunata yach'achimkuqkunaqa ¿imarallkutaq ninllampa: Dyus Amkrachqan Wachadur manaraq chamumptinchi, chay alma Aliyas kawsamuchpa, puntata rin chamuq, nichpaqa? 11 Chaymi Jisusqa pallkunata nirqan: Allibmi chaychina. Aliyasmi puntata chamunambaq karqan, runamkunata yach'achinambaq, uchangunata dijanambaqllampa. 12 Piru nuqaqam nillkillampa, Aliyasqam chamurqanna. Piru paytaqam mana riqsirqanllampachu, Dyuspaq rimaq, nichpaqa. Chaymi paytaqa munachqanllampata rurarqanllampa. Paytachinallam nuqa Dyusmanda Chamuq Runatampis ancha rinllampa padisichiwaq, nichpa. 13 Chaychina Jisus Aliyaspaq nimptinqam, pallkunaqa intyindirqanllampa: Jwan Chutichimkuqpaqmi chaychina niwachqaqa kanchiq, nichpa. 14 Jisus chay kimsa yach'amkuq masillkunawan chay lumamanda chamuchpaqam, chay kachqayllampaman ch'ayamurqanllampa. Chaymi suq runa chamuchpa, Jisuspa ñawpambi qunqurimkuchpa, kaychina rrugarqan: 15 Taytitu, llamkimpayri wambrayta. Atamkimkuna piskachpam, ancha padisichin. Chaqa kutin kutin piskachpam, ninamkunaman yamkumkunaman bulachqa. 16 Chaymi kay yach'amkuqnimkimkunaman ampamuchqa kani. Piru pallkunaqam mana atichqallampachu kach'amkachiyta, nichpa. 17 Chaychina nimptinmi, Jisusqa nirqan: A, qamkuna Dyuspi mana yuyamkuqkuna, mana allita ruraqkunaqa! ¿Ima tyimpumkamanraq qamkunawanqa padisichaq? ¿Ima tyimpumkamanraq qamkunataqa agwantachqallkiqa? Mayñ, kayman ampamuyllampa wambrallkita, nichpa. 18 Ampamumptinllampaqam, Jisusqa dyabluta anyachpa, chay chulumanda qatirqan. Chaymi chay urasmandampacha kach'amkachqana kidarqan. 19 Chaymandaqam nuqallkunalla Jisuswan kachpaqa, kaychina tampurqayllampa: Imarallkutaq nuqallkunaqa mana atirqayllampachu chay dyabluta qatiytaqa? nichpa. 20 Chaymi Jisusqa niwarqanllampa: Dyuspi mana allita yuyamkuchpam, mana atirqallkillampachu qatiytaqa. Piru allimptam nillkillampa, achlita Dyuspi yuyamkuchpa, chay ñampuchpa muritun tantitutaqach'i, kay atun urqquta kamachimptimkillampa suq laduman rinambaqqa, kasuchuchpa rinman suq laduman. Chaqa qamkuna Dyuspi allimpta yuyamkumptimkiqam, mana nimampis trabajuschu kanman qamkunampaqqa. 21 ?Piru kay laya dyablutaqam chaychinallaqa mana atingillampachu qatiyta. Achwanmi ayunachpa, Dyuspi allita yuyamkuchpa, payman mañamkuchpa atingillampa qatiytaqa, nichpa.? 22 Prubinsya Galiliyampi kallkamptiyllampam, Jisusqa nuqallkuna yach'amkuqningunata kaychina niriwarqanllampa: Nuqa Dyusmanda Chamuq Runataqam rinllampa intrigamkuwaq runamkunampa mamkinman. 23 Rinllampam wanchiwaq. Piru kimsa diyamanmi rini kawsamuq, nichpa. Chaychina niwamptinllampaqam, ancha llamkirqayllampa. 24 Jisusqam nuqallkuna yach'amkuqningunawan Kampirnawun llaqtaman ch'ayarqayllampa. Chaypi kamptiyllampam, kuntribusyunda kubramkuqkuna Pidruman qamimkachpa, kaychina tampurqanllampa: Qamkunampa yach'achimkuqnimkichu Dyuspa adurana wasimbaq kuntribusyunda pagaramkun ichu mana? nichpa. 25 Chaymi Pidruqa nirqan: Ari, pagaramkunmi, nichpa. Chaymandaqam Simun Pidru wasiman yallkumptinqa, manaraq nimata nimptin, Jisusqa tampurqan: Mayñ, ¿ima ningitaq, Simun? Kay mundumpi gubyirnumkunaqa ¿pitataq kubranllampa kuntribusyundaqa? ¿Llaqta masingunatachu ichu jwiramkunata? nichpa. 26 Chaymi Pidruqa nirqan: (Girrampi binsichqanrallkum), jwiramkunataqa kuntribusyunda kubranllampa, nichpa. Chaymi Jisusqa nirqan: Ari. Chay gubyirnumkunampa llaqta masingunaqam mana pagaramkunchu kuntribusyundaqa. (Chaymi nuqanchiqkuna Dyuspa wambran isrraylinumkuna kachpaqa, mana nisisaryuchu pagaramkunanchiq chay kuntribusyundaqa.) 27 Piru ama ni pitampis piñachinanchiq pagaramkuchun. Chayri riy chay atun quch'aman, answilullkiwan piskaduta piskanallki. Chaqa chay punta piskadu piskachqallkimpa chimimbim ringi tariq suq qallayta. Chayta ampamuchpa, nuqampaq qambaqpis chay kuntribusyunda pagaramkuy, nichpa.
1 Chay tyimpumpim nuqallkuna yach'amkuqninguna Jisusman qamimkachpa, kaychina tampurqayllampa: Taytitu, Tayta Dyus chumaqta kamachimkumptin syilumpiqa, yumbay runamandaqa ¿pitaq masta rin kamachimkuqqa? nichpa. 2 Chaymi Jisusqa suq wambrituta qayachpa, ch'awpiyllampampi rurachpa, 3 kaychina niwarqanllampa: Allimptam nillkillampa, kay umildi wambrituchina mana kachpaqam, mana ringillampachu atiq yallkuyta syiluman, Dyuswan kawsanallkillampa. 4 Chaymi Tayta Dyus chumaqta kamachimkumptinqa, kay wambrituchina umildi kaqkunaqam Dyuspaqqa masta rinllampa baliq. 5 Mayqan runa kasuwachpa kay laya wambrituta ch'ayachiqqam, nuqata ch'ayachiwallkanchina, nichpa. 6 Nuqampi chayraq kriyiqkunata uchata rurachiqqam ancha kastigadu rin kaq. Chaymi chay uchata rurachiqpaqqa mas alli kanman, suq atun mulinu rumita kungambi watachpa, wichumkunanllampa mar yamkumpa ch'awpinman, chaypi ch'uqachpa wañunambaq (manaraq chay uchata rurachimptin, ama mas kastigadu kanambaq). 7 ¡Amkamkñw kay mundumpi kawsaqkunampaqqa! Chaqa achka laya mana baliq yuyallkunam runamkunata, warmimkunata animachin, uchata rurananllampaqa. Chaymi ancha trabajus rin kaq, chumaqta kawsananllampaqa. ¡Piru mas kastigadum rin kaq chay runa uchata rurachimkuqqa! 8 Chayrallku mamkimki ichu ch'amkimki ancha qawch'u kamptin uchata rurachichunanqa, kuchuchpa wichumkuy, uchata ama ruranallkimpaq. Mas allim kanman, kuju ichu manku suq bidaman yallkunallkimpaqqa. Manam allichu ichkay mamkiyuq ichu ichkay ch'amkiyuq kachpa, tumkuy tyimpu lumyallkaq ninaman wichumkudu kanallkimpaqqa. 9 Kanan ñawimkiwan imata rimkachpa, animamkachpa uchata ruranallkiqa, surquchpa, karuman wichumkuy. Chaqa mas allim suq ñawiyuqlla kachpa, suq bidaman yallkunallki. Manam allichu ichkay ñawiyuq kachpa, lumyallkaq infyirnuman wichumkudu kanallkiqa. 10 Kay tamkcha wambritutachinaqa ama disprisyayllampachu. Chaqa pallkunata kwidaq anjilkunam Tayta Dyuspa ñawpanman ima uraspis atin ch'ayayta, chay wambritumkunampaq mañamkunan. 11 ?Nuqaqam chamuchqa kani, chay chingachqamkunata wachanaypaq.? 12 ¿Imatataq yuyangillampa? Suq runa 100 wichayuq kachpa, suq wichitan chingamptinqa, ¿manachuraq chay 99ta lumampi dijachpa, rinman chay suq chingachqa wichitanda maskaq tarinangaman? 13 Chay chingachqa wichanda tarichpaqach', ancha kuchimkunqa maski chay 99 mana chingachqamkunampaq. 14 Chaychinam syilumpi Taytanchiq Dyuspis mana munanchu kay wambrituchina kaqkuna ni suqnin chinganambaq. 15 Kriyiq masimki mana allita rurachumptinqa, richpa, paywanlla parlay: Kaychinam dañachiwachqa kangi, nichpa. Chaymi kasuchuchpa alliyamptinqa, chumaqtana ringi kawsaq chay kriyiq masimkiwanqa. 16 Piru mana kasuchumptinqa, ampay suq ichu ichkay tistigumkunata, ichkay ichu kimsa yach'anallkillampa, ¿Imatam nin? nichpa. 17 Chay ampachqallkimkunata mana kasumptinqa, yumbay chay tandamkaq kriyiq masinchiqkunata willay. Yumbay pallkunata mana kasumptinqa, paytaqa suq mana kriyiqtachina ichu suq uchayuq kuntribusyunda kubramkuqtachinana riqsiyllampa. 18 Allimptam nillkillampa, nuqampi chay mana kriyiqkunataqam dyablu kadinamkunawan watachqachina. Piru kay mundumpi nuqampaq yach'achimkuchpaqam, chay kadinamkunata paskallkangimanchina. Chaychina suqkunata animachichpa nuqampi kriyinanllampaqam, qamkunaqa syilumpa pungunda alabis kich'allkangimanchina, syiluman yallkunanllampa. Piru kay mundumpi yach'achimkuchqallkita mana kriyiqkunaqam wataduchinalla rin kidaq. Manam atinqallampachu yallkuyta syilumanqa. 19 Nillkillampampismi, kay mundumpi ichkay qamkuna suq yuyayniyuqlla kachpa, Tayta Dyusman mañamkumptimkiqam, payqa mañachqallkita syilumanda rin quchuqllampa. 20 Chaqa ichkay ichu kimsa nuqampi yuyamkuchpa tandanamkumptinqam, pallkunampa ch'awpimbi kani, nichpa. 21 Chaymi Pidruqa qamimkachpa, Jisusta kaychina tampurqan: Taytitu, suq kriyiq masiy mana allita rurawamptinqa, ¿allka kutindam pirdunachaq? ¿Syiti bwiltastachu pirdunachaq? nichpa. 22 Chaychina tampumptinmi, Jisusqa nirqan: Manam nillkichu syiti bwiltastalla pirdunay, nichpaqa. Achwan pirdunayqa 70 bwiltasta syitiyuqwan, nichpa. [Nuta: Chayqam munan niyta tumkuy bwiltasta pirdunananchiq.] 23 Jisusqam nirqambis: Taytanchiq Dyus chumaqta kamachimkumptinqam, suq gubyirnu pirdunamkuqchina rin kaq. Chaqa chay gubyirnum munarqan yach'ayta: Kriyadullkunaqa, ¿allkatataq dibirawanllampa? nichpa. 24 Chaymi kwintanda surqullkamptinqa, ampamurqanllampa suq runa 10.000 talintu dibiraqta. [Nuta: 10.000 talintumkunaqam ancha achka qallay karqan. Chaqa suq trabajaq runam masdi 15 watamkunata trabajachpa, suq talintutalla atiq ganayta.] 25 Chaymi chay dibiramkuqqa manana nimatampis atirqanchu pagaramkuytaqa. Chaymi patrunninqa kamachimkurqan: Randimkuyllampana kay runata warmindinda, wambrandingunata, tumkuy imandinda, chay dibirawachqanda kutichiwanambaq, nichpa. 26 Piru chay dibiraqqam qunqurimkuchpa, ancha rrugarqan chay gubyirnuta: Patrunsitu, yuch'allku chuyawayri. Yumbay dibirachuchqaytam pagarachqallki, nichpa. 27 Chaymi chay gubyirnuqa chay dibiraq rrugamptin, llamkimpachpa, yumbay dibirachqambaq nirqan: Pirdunallkinam. Mananam dibirawangichu. Librinam kangi, nichpa. 28 Piru chay pirdunachqa kriyaduqam chay gubyirnumanda lluqchichpalla, suq kriyadu masinda tarirqan. Payqam 100 dinaryu qallaytalla dibirarqan. Piru payqam chay dibiraqtaqa kunganmanda piskachpa, urka urka rurachpa nirqan: Pagaraway dibirawachqallkita, nichpa. 29 Chaymi chay dibiraqpis qunqurimkuchpa ancha rrugarqan: Chuyawayri. Rinim pagarachuq yumbay dibirachuchqayta, nichpa. 30 Piru payqam mana chuyachpachu, ampamurqan karsilman, yumbay dibirachqanda pagaranangaman. 31 Wamkin kriyadu masingunam chaychina chay dibiraqta ruramptin rimkachpaqa, ancha llamkimparqan. Chaymi rirqanllampa chay gubyirnuta parlachiq yumbay rimkachqanda. 32 Chayrallkum chay gubyirnuqa chay pirdunachqa kriyadunda qayachichpa nirqan: ¡A, kriyadu malu! Rrugawamptimkiqam nuqaqa yumbay dibirawachqallkita pirdunachuchqa kani. 33 Chaychina qambis llamkimpachpa, chay dibirachuqta pirdunanallkita, nichpa. 34 Chaymi patrunninqa ancha piñamkuchpa, karsilman ampachpa, kastigamkuqkunata intrigarqan, munachqanda kastigananllampa, yumbay dibirachqanda pagaranangaman. 35 Chaymi Jisusqa nirqambis: Runa masimkimkunata tumkuy chunqu qamkuna mana pirdunamptimkiqam, syilumpi tiyaq Taytanchiq Dyuspis qamkunata mana rinchu pirdunachuq.
1 Jisusqam uchyachpa rimaytaqa, rirqanna chay prubinsya Galiliyamandaqa. Chaychina richpam, ch'ayarqan rriyu Jurdamba waq chimba ladunman, chay prubinsya Judiyampa lugarningunaman. 2 Piru imkindaqam ancha achka runamkuna, warmimkuna rirqanllampa. Chaypim Jisusqa yumbay qachyaqkunata kach'amkachirqan. 3 Chaymi wamkin farisiyu dumktrinayuqkuna ch'ayachpa, pandachiyta munachpa, yanqa kaychina tampurqanllampa: Allichuraq suq runa imampaqpis yuyachpa, warminmanda amkramkanambaq? nichpa. 4 Chaychina tampumptinllampaqam, Jisusqa nirqan: Qallarichqan tyimpuqam Dyusqa ullquta, warmita rurarqan. ¿Manachu librumbiqa chayta liyichqallampa kangi? 5 Chaqa pallkunampaqmi Taytanchiq Dyusqa nirqan: Runaqam taytanda, mamanda dijachpa, warminwanna tandamkachpa rin tiyaq. Chaymi ichkay kachpampis, suqchinallana kanqallampa, nichpa. 6 Chaymi nillkillampa, rrispituyuqkunaqam ichkay kachpampis, suqllana. Chayri Dyus tandachqandaqa, runamkunaqa ama amkranqachu, nichpa. 7 Chaychina Jisus nimptinqam, chay farisiyumkunaqa nirqan: Chaychina kamptinqa, ¿imarallkutaq Muysisqa unay agwilunchiqkunata kamachirqan, suq runa warminmanda amkramkanambaqqa suq dumkumintuta qunqa, nichpaqa? 8 Chaymi Jisusqa pallkunata nirqan: Chaqa angu chunquyuqkuna kamptinllampam, Muysisqa dijarqan pallkunata, dumkumintuta quchpa, warminmanda amkramkananllampaqa. Piru qallarichqan tyimpumpiqam mana chaychinachu karqan. Achwan Tayta Dyusqam runamkunata, warmimkunata rurarqan, tandanamkuchpa, ama amkramkananllampa. 9 Chaymi nillkillampa, suq runa warminmanda amkramkachpa, suq warmiwan kanambaqqam ancha uchayuqna. Chaychinallam chay warmi dijachqawan suq runa kasaraqpis ancha uchayuqna. Piru mayqan warmi runanda traysyunda rurachpa, suq runawan kamptinllam, qusanqa atin amkramkaytaqa. Manaqa manam balinchu amkramkananqa. 10 Chaychina Jisus niwamptinllampaqam, nuqallkuna yach'amkuqningunaqa malaganayachpa, kaychina nirqayllampa: Chaychina warmiyuqkuna manana atichpa amkramkayta, suqwan kanambaqqa, mas allich'i kanman, ama ni mayqan warmiyuq kananchiqllampa, nichpa. 11 Chaymi Jisusqa niwarqanllampa: Yumbay runamkunaqam mana atinchu intyindiyta kay nichuchqaytaqa. Piru Taytanchiq Dyus yanampamptinllam, wamkinqa atinllampa intyindiyta. 12 Wamkin runamkunaqam mana atinllampachu kasaraytaqa. Chaqa wamkinqam nasin, sampalanlla kawsanambaq. Wamkindaqam runamkuna inumkuta ruranllampa, ama kasaranambaq. Piru wamkinqam mana kasaranchu, Dyusta mas allita sirbinanllampa. Chayri mayqannimki kay nichuchqayta atichpa ruraytaqa, rurayllampa, nichpa. 13 Wamkinqam wambritumkunata Jisusman ampamurqanllampa, mamkinda sawambi rurachpa, Dyusman mañamkunambaq pallkunampaq. Piru nuqallkuna yach'amkuqningunaqam chay wambran ampamuqkunata anyarqayllampa (ama Jisusta piñachinanllampa). 14 Chaymi Jisusqa niwarqanllampa: Ama arkayllampachu. Achwan dijayllampa, chay wambritumkuna nuqaman chamunanllampa. Chaqa mayqan kay wambritumkunachina kaqmi Dyuswanqa syilumpi rin kawsaq, nichpa. 15 Chaymandaqam chay wambritumkunampa sawambi mamkinda rurachpa, Dyusman mañamkuchpaqa, rirqanna suq lugarman. 16 Suq wambra runa chamuchpam, Jisusta kaychina tampurqan: Ancha Allin Yach'achimkuq Taytitu, ¿imatam atini rurayta, Taytanchiq Dyuswan tumkuy tyimpu kawsanaypaqqa? nichpa. 17 Chaymi Jisusqa nirqan: Imarallkutaq niwangi: Ancha Allin Yach'achimkuq, nichpaqa? Dyusllam ancha allinqa. Munamptimki suq bidampi tumkuy tyimpu kawsanallkimpaqqa, Dyus kamachimkuchqanda kasuchpa kawsay, nichpa. 18 Chaymi chay runaqa nirqan: Mayqan kamachimkuchqandam kasuchaqqa? nichpa. Chaychina tampumptinqam, Jisusqa nirqan: Ama wanchimkuychu. Qam warmiyuq kachpaqa, ama suq warmiwanqa puñuychu. Ama suwamkuychu. Ama yanqa llullamkunata runa masimkimpaq rimaychu. 19 Taytallkita, mamallkita ancha rrispitachpa kasuy. Qam kwirpullkita kuyachqallkichina, runa masimkitampis kuyay, nichpa. 20 Chaychina Jisus nimptinqam, chay runaqa nirqan: Yumbay challkunatam wambra kachqaymandampacha kasuchqa kani. ¿Imataq mas faltawan ruranaypaqqa? nichpa. 21 Jisusqam nirqan: Dyus nichqanda ancha allita kumplinallkimpaqqa, tumkuy imallki kaqta randimkuchpa, quy chay mana nimayuqkunata. Chaychina quchpam, syilumpiqa tumkuy imayuqqa ringi kaq. Chayta rurachpaqa chamuyna, nuqawan purinanchiq, nichpa. 22 Chaychina nimptinqam, chay runaqa limpu malaganayachpa, tumkuy imambaq llamkichpa, rirqan. 23 Chaymi Jisusqa nuqallkuna yach'amkuqningunata niwarqanllampa: Allimptam nillkillampa, ancha trabajusmi suq kampuq runa Dyusta kasunambaq, paywan kawsanambaq. 24 Suq kutindam nirillkillampa. Mas fasilmi chay atun kamillu animal awjamp rinrinda pasanambaq. Piru suq runa tumkuy imayuqqam Dyusta kasuchpa syiluman yallkunanqa ancha trabajus, nichpa. 25 Chaychina niwamptinllampaqam, nuqallkunaqa ancha ispantachqata kaychina parlarqayllampa: Chaychina kampuqkuna mana wachamkamptinqa, ¿pitaq atinman wachadu kaytaqa? nichpa. 26 Chaymi Jisusqa nuqallkunata champawachpa niwarqanllampa: Runamkunallaqam mana atinchu wachamkaytaqa. Piru Dyuspaqqam mana nima trabajuschu, runamkunata wachanambaqqa, nichpa. 27 Chaymi Pidruqa nirqan: Taytitu, nuqallkunaqam tumkuy imayllampata dijachqallampa kani, qamwanna purinaypaqllampa. Chaychina dijachpaqa, ¿imatam ganachaqllampa? nichpa. 28 Jisusqam niwarqanllampa: Allimptam nillkillampa, muchuq bidampi nuqa Dyusmanda Chamuq Runa llimpyachpa kamachimkumptiyqam, qamkuna sigiwaqkunampis dusi awturidarkuna ringillampa kaq, chay dusi isrraylinu atun ayllumkunata kamachinallkillampa. 29 Chaychinallam rin kaq chay mayqan dijachpa wasingunata, masangunata, paningunata, taytanda, mamanda, warminda, wambrangunata, ichu ch'amkrangunata, nuqata kasuwanambaqqa. Chaqa payqam 100 tantusta rin ch'askiq. Kanan suq bidampim tumkuy tyimpu rin kawsaq. 30 Piru kay pachampi achka kamachimkuqqam suq bidampiqa manana rinllampachu baliq. Piru kay pachampi mana kamachimkuqkunaqam syilumpiqa kamachimkuqkuna rinllampa kaq, nichpa.
1 Jisusqam kay kumparasyunda rurachpa yach'achimkurqan: Tayta Dyus kutimuchpaqam, suq ubasniyuq runachina rin ruraq. Chaqa chay ubasniyuq runaqam madrugadu wasinmanda lluqchichpa, rirqan trabajaqkunata maskaq, rinanllampa ubasninda kusichaq. 2 Chaymi trabajaqkunata tarichpaqa nirqan: Riyllampa trabajaq ch'amkraypi. Chichyachtin qamkuna trabajamptimkiqam, suq dinaryu qallayta pagarachqallkillampa, nichpa. Chaymi chay runamkunaqa Ari, nichpa, rirqanna trabajaq. 3 Chaymandaqam chay ch'amkra dwiñuqa las nwibich'i ririrqan plasaman. Chaypim wamkin runa mana trabajuyuqta rimkachpa, 4 pallkunatampis nirqan: Riyllampa ubasniyta kusichaq. Kabaltam rini pagarachuqllampa, nichpa. Chaymi chay runamkunaqa Ari, nichpa, rirqanllampana trabajaq. 5 Chaymandaqam chay patrunqa larrdusitach'i bwilta ririrqan mas trabajaqkunata maskaq. Chaymandaqam, las tris di la tarditampisch'i bwilta kutirirqan maskariq mas trabajadurkunata. 6 Chaymandaqam las sinku di la tardimpisch'i kutirichpa, suq mana trabajuyuqkunata tarirqan. Pallkunatampismi tampurqan: ¡Qamkunaqa imata rurachpam chichyangillampa kaypiqa? nichpa. 7 Chaymi chay runamkunaqa nirqan: Manam pimpis trabajuta quwanllampachu, nichpa. Chaymi chay ubasniyuqqa nirqan: Qamkunampis riyllampa ubasniyta kusichaq. Kabaltam rini pagarachuq, nichpa. 8 Chaymandaqam amsayallkamptinna, chay patrunqa kampatasninda nirqan: Piyungunata qayachpa, pagarayna. Piru puntata pagaray chay imki yallkuqkunata. Chay punta yallkuqkunataqa ultimutaraq pagarayqa, nichpa. 9 Chaymi chay ultimu yallkuqkunaqa rirqanllampana pagunda ch'askiq. Pallkunaqam pagundaqa ch'askirqan suq dinaryu qallayta kada unu. 10 Chaychina chay imki yallkuqkunata puntata pagarachpam, chay punta yallkuqkunataqa ultimutaraq pagararqan. Chaymi chay punta yallkuqkunaqa yuyarqanllampa: Pallkunamandaqam masta rini ch'askiq, nichpa. Piru pallkunampismi suq dinaryutalla pagundaqa ch'askirqanllampa. 11 Chaymi pagunllampata ch'askichpaqa, piñamkuchpa, anyarqanllampa chay dwiñutaqa: 12 Chay ultimu yallkuqkunaqam suq uritatallana trabajarqanllampa. Piru pallkunatampismi igwalta pagarachqa kangi. Nuqallkunaqam chichyachtin ancha trabajachqallampa kani tumkuy rumpaypi, nichpa. 13 Chaymi dwiñuqa chay anyaqkunata suqninda nirqan: Yanasita (Yanasitu), manam nima agrabyuta rurachuchqachu kani. Chaqa tratumkurqanchiqqam, suq dinaryuta pagarachunaqpaq, ¿manachu? 14 Mayñ, kaypi pagullki. Riyna. Nuqaqam munani kay ultimu yallkuqkunatampis qamtachinalla igwalta pagarayta. 15 Chaqa nuqaqam dirichuyuq kani, munachqayta ruranaypaq qallayniywanqa. ¿Qamqachu imbidyamkungi qallayniywan pallkunata yanampamptiyqa? nichpa. 16 Chay kumparasyunda rurachpam, Jisusqa nirqan: Chaychinam kay pachampi achka kamachimkuqkunaqa suq bidampiqam manana rinllampachu baliq. Piru kay pachampi achka umildi kaqkunaqam suq bidampiqa ancha rinllampa baliq. ?Chaqa Taytanchiq Dyusqam achkata qayan. Piru paypi yuyamkuqkunatallam amkran, paywan kawsananllampaqa?, nichpa. 17 Jisusmi paywan puriqkunawan Jirusalinman rillkachpa, ñanmanda suq laduman nuqallkuna dusi yach'amkuqnindalla ampawachpa, kaychina niwarqanllampa: 18 Rimkayllampa, Jirusalinmannam rillkanchiqllampa. Waqpim nuqa Dyusmanda Chamuq Runataqa rin intrigamkuwaq kamachimkuq isrraylinu kuramkunaman, Muysispa liyningunata yach'achimkuqkunaman. Pallkunaqam rinllampa sintinsyawaq wanchiwananllampa. 19 Chaychina sintinsyawachpaqam, nasyunninchiq Isrrayilpa kuntrangunaman rinllampa intrigamkuwaq. Pallkunana asimpawachpa, suq lastima rurawachpa, asutiwachpallampa, kruspi klabawanqallampa wañunallkaman. Piru kimsa diyamanmi rini kawsamuq, nichpa. 20 Sibidiyumpa warminmi chay ichkay wambran Jamkubuwan, Jwanwan Jisusman chamuchpa, qunqurimkuchpa, suq faburta mañarqan. 21 Chaymi Jisusqa tampurqan: Imampitaq munangi yanampachunaypaq? nichpa. Chaymi chay Sibidiyumpa warminqa nirqan: Taytitu, yumbaypa gubyirnun kachpaqar, yuch'allku kamachimkuy, kay wambrallkuna suqnin allin ladullkimpi, suqnin ichuq ladullkimpi tiyachpa, qamwan kamachimkunanllampa. 22 Chaymi Jisusqa pallkunata nirqan: Qamkunaqam mana yach'angillampachu: Imatam mañallkani, nichpaqa. Chaqa nuqaqam ancha rini ñamkaq. Chay ñamkallkunaqam nuqampaqqa suq basu ancha ayaq yamkuta umpyallkaymanchina rin kaq. ¿Chaychinachu qamkunampis atingimanllampa padisiyta? nichpa. Chaymi pallkunaqa nirqan: Ari. Atinillampam chaychina padisiyta, nichpa. 23 Chaymi Jisusqa pallkunata nirqan: Allimptam qamkunampis ancha padisichpaqam, chay ayaq basumandachina ringillampa umpyaq. Piru nuqaqam mana atinichu kamachimkuyta, allin laduypi ichu ichuq laduypi tiyanallkillampaqa. Achwanmi Taytay Dyuslla sigurachqa, pimkunam rinllampa tiyaq allin laduypi ichu ichuq laduypi, nichpaqa. 24 Chay mañamkuchqambaq yach'achpaqam, nuqallkuna dyis yach'amkuqkunaqa chay ichkay masallkunawanqa piñamkurqayllampa. 25 Chaymi Jisusqa nuqallkunata qayawachpa, niwarqanllampa: Chay suq nasyungunampiqam gubyirnunguna patrungunachina wampuyachpa, manchachimkuchpa, llaqta masingunata kamachin, ¿manachu? 26 Piru qamkunaqa ama chaychinaqa kayllampachu. Achwan mas kamachimkuq munachpa kaytaqa, suqkunata sirbiyllampa. 27 Chayri mayqannimki munachpa kamachimkuq kaytaqa, suq kriyaduchina kanqa. 28 Chaychinalla nuqa Dyusmanda Chamuq Runa kachpampismi, mana chamuchqachu kani suqkuna sirbiwananqa. Achwanmi chamuchqaqa kani, yumbayta sirbinaypaq. Chaymi rini wañuq uchangunampaq pagaramkunay, ama kastigadu kanambaqllampa. Chaychinam nuqampi yumbay yuyamkuqkunata rini wachaq. 29 Nuqallkuna Jirimku llaqtamanda Jisuswan rillkamptiyllampam, ancha achka runamkuna, warmimkuna Jisuspa imkinda rirqanllampa. 30 Chay ñamba ladumbi ichkay sarku runamkuna tiyallkachpam, yach'arqanllampa: Jisumkristum kayta pasallkan, nichpa. Chaymi ancha jwirtita qayamkurqanllampa: Dabidpa Karu Willkan Taytitu, llamkimpawayri! nichpa. 31 Chaypi kaqkunaqam chay sarkumkunata anyarqan, uyaranambaq. Piru pallkunaqam mana uyarachpachu, achwamba masta qayamkurqanllampa: Dabidpa Karu Willkan Taytitu! ¡Llamkimpawayri! nichpa. 32 Chaymi Jisusqa richqanchina chayachpa, chay sarkumkunata qayachpa, tampurqan: Imachinam munangillampa yanampachunayqa? nichpa. 33 Chaymi pallkunaqa nirqan: Taytitu, munanillampam rimkamkuyta, nichpa. 34 Chaymi Jisusqa llamkimpachpa, chay sarkumkunampa ñawingunata llamkarqan. Chay urasllam das rimkamkurqanllampa. Chaymi Jisuspa pullanna rirqanllampa.
1 Jirusalin llaqtaman yaqqana ch'ayachpaqam, puntata ch'ayarqayllampa Bitfaji llaqtitaman. Chay Bitfajiqam Ulibu lumampa sirkambi kidan. Chay lugarpiqam Jisusqa ichkay yach'amkuq masillkunata nirqan: 2 Rimkay, waq ñawpanchiqpim suq kasiriyu. Waqman richpam, ringillampa tariq suq burra watachqata wawandinda. Chay burrata paskachpa, ichkandinda ampamuyllampa. 3 Piru mayqan imata nichumptinllampaqa, niyllampa: Siñurninchiqmi munan. Dasllam rin kutichimuq, nichpa. 4 Chaychina ruramptinllampam, Dyuspaq rimaq kaychina iskibrichqanqa kumplirqanna: 5 Jirusalin llaqtampi tiyaqkunata niyllampa: Rimkay, gubyirnullkiqa suq burrampa wawambi muntamkuchpa, ancha umildi chamun qamkunaman, nichpa. 6 Chaymi chay ichkay yach'amkuqnin masillkunaqa richpa, Jisus nichqanchina ampamurqanllampa suq burrata wawandinda. Chaymandaqam sawanman kampanllampata rurarqanllampa. Chaychina ruramptinllampaqam, Jisusqa muntamkuchpana rirqan. 8 Chaypim ancha achka runamkuna, warmimkuna karqan. Pallkunam Jisus rillkachqan ñawpanda kampangunata mandachpa rirqan. Wamkinqam muntimpa rimkran ramprayuqkunata kuchuchpa, mandarqanllampa. 9 Kanan chay ñawpanda, imkinda riqkunaqam ancha kuchimkuchpa, ancha jwirtita kunyarqanllampa: Biba, biba! ¡Alabachun unay Dabidpa Karu Willkan Jisusta! ¡Taytanchiq Dyus ancha yanampanqa kay rrimplasun chamullkaqta! ¡Tayta Dyustaqa ancha alabachunllampa! nichpa. 10 Jirusalinman yallkumptinqam, chaypi achka tiyaqkuna ancha kunyamptinllampaqa, wamkinqa kaychina tampurqanllampa: Pitaq kay runaqa? nichpa. 11 Chaymi chay runamkuna, warmimkunaqa nirqanllampa: Kayqam Dyuspaq rimaq Jisus. Payqam Galiliyampa Nasarit llaqtanmanda chamuchqa, nichpa. 12 Chaymandaqam Jisus Tayta Dyuspa adurana wasinman yallkuchpaqa, (patyumbi) tarirqan randillkaqkunata randimkullkaqkunata. Chaymi yumbay pallkunata qatirqan, chay adurana wasimanda lluqchinanllampa. Kanan chay qallay kambyaqkunampa masangunata, chay palumitamkunata randimkuqkunampa iskañundindam bularqan. 13 Kanan pallkunataqam nirqan: Dyuspa Santu Librumbiqam nin: Wasiyqam nuqaman mañamkunanllampa, nichpa. Piru qamkunaqam ladrungunampa mach'aynindachina rurachqallampa kangi, nichpa. 14 Chaymandaqam Tayta Dyuspa adurana wasimbi Jisus kallkamptin, payman tandamkarqanllampa sarkumkuna, kujumkuna. Chaymi yumbay pallkunata kach'amkachirqan. 15 Piru isrraylinu kuramkunampa kamachimkuqninguna, Muysispa liyningunata yach'achimkuqkunam Jisusta rimkarqanllampa, chay milagrumkunata rurallkamptin. Chaymandaqam uyarqanllampampis chay wambritumkunata, Tayta Dyuspa adurana wasimbi Jisusta kaychina alabamptinllampa: ¡Biba gubyirnu Dabidpa Karu Willkan! nichpa. Chaymi ancha piñamkuchpa, 16 Jisusta kaychina tampurqanllampa: Uyangichu kay wambramkuna niqta? (Manam balinchu qambaq ninanllampa: Dabidpa Karu Willkanmi, nichpaqa.) Chaymi Jisusqa nirqan: Ari, uyanim. ¿Manachu liyichqallampa kangi Dyuspa Santu Librumbi pallkunampaq kaychina nichqanda? Dyus yanampamptinmi, chay wambritumkuna tumkuy chay iti ñuñullkaqkuna ancha chumaqta rinllampa alabaq, nichpaqa. 17 Chaymandaqam pallkunata dijachpana, Jisusqa nuqallkunawan rirqan Bitanilla (Bitaniya) llaqtamanna, waqpina chay tuta kidanayllampa. 18 Jisusqam qayandin madrugadu Jirusalinman kutirillkachpaqa mallaqnarqan. 19 Chaychina riqchinaqam, ñamba ladumbi suq yura igusta rimkarqan. Rimkachpaqam rirqan puquyninda maskaq. Piru manam nima puquyninda tarirqanchu. Ramprangunatallam tarirqanqa. Chaymi chay yura igustaqa nirqan: Mananam nunka ringichu puquq! nichpa. Chaychina nimptinllam, chay uras igusqa limpu chamkirqan. 20 Chayta rimkachpam, nuqallkuna yach'amkuqningunaqa ispantachqata tampurqayllampa: Imachinataq chayta nimptimkilla, chay igusqa das chamkirqan? nichpa. 21 Chaymi Jisusqa kaychina niwarqanllampa: Allimptam nillkillampa, Dyuspi allita yuyamkuchpa mañamkuchpaqam, kay rurachqaymanda masta atingillampa rurayta. Chaymi Dyuspi allita yuyamkuchpa, kay qaqata nimptimkillampa, Riy mar yamkuman, nichpaqam, chaychina rin kaq. Piru chaychina ruranallkiqam mana balinchu achlitatalla Tayta Dyuspi yuyamkunallkillampa. 22 Chaymi Dyuspi allita yuyamkuchpa, tumkuy ima mañamkuchqallkita paymanda ringillampa ch'askiq. 23 Jisus Tayta Dyuspa adurana wasinman yallkuchpa yach'achimkullkamptinmi, kamachimkuq isrraylinu kuramkuna, chay kamachimkuq ansyanumkunawan payman qamimkachpa, tampurqanllampa: Mayñ, niwayllampa. ¿Ima karguyuqtaq kangi? ¿Pitaq numbrachuchqa, awturidar kanallkiqa? nichpa. 24 Chaymi Jisusqa pallkunata nirqan: Mayñ, nuqampis suq tampunata tampuchqallkillampa. Chayta qamkuna kuntistawamptimkim, nuqampis nichqallkillampa: Pi kamachiwamptinmi, kallkunata rurani, nichpa. 25 Mayñ, Jwan Chutichimkuqtaqa ¿pitaq numbrarqan, chutichimkunanqa? ¿Dyuschu ichu runamkunalla? Chaymi chay isrraylinu kuramkuna, chay ansyanumkunaqa suqnin suqnin parlarqanllampa: Dyusmi kamachichqa, nimptinchiqqach'i, niwachun: Chaychina numbramptinqa, ¿imarallkutaq qamkuna mana kriyirqallkichu paytaqa? nichpa. 26 Piru runamkunallam kamachichqa nimptinchiqqach'i, ¿imanachiwachun yumbay kay runamkunaqa? Chaqa pallkunaqam Jwambaqqa kriyinllampa, Dyuspaq rimaqmi karqan, nichpa. 27 Chaymi Jisusta kaychinana nirqanllampa: Manam yach'anillampachu, nichpa. Chaychina nimptinllampaqam, Jisuspis pallkunata nirqan: Nuqampismi mana nichqallkillampachu pi kamachiwamptinmi, kallkunata rurani, nichpaqa. 28 Jisusqam chay kamachimkuqkunata nirqan: Mayñ, ¿imatam yuyangillampa kaypaqqa? Suq runam ichkay churiyuq karqan. Chaymi suqninda nirqan: Ijitu, riy kananqa ubasninchiqta kusichaq, nichpa. 29 Chay churinqam nirqan: Manam rinichu, nichpa. Piru chaymandaqam taytanda kasuchpa, rirqanna trabajaq. 30 Chaychinallam taytanqa chay suq churindampis nirqan: Riy ubasninchiqta kusichaq, nichpa. Payqam, Richaqri nirqan. Piru yanqam nirqanqa. Manam rirqanchu tandaqqa. 31 Chaychinaqa ¿mayqan churindaq taytan nichqandaqa kasurqan? nichpa. Chaymi pallkunaqa nirqan: Chay punta churinmi kasurqanqa, nichpa. Chaymi Jisusqa pallkunata nirqan: Allimptam nillkillampa, chay uchayuq kuntribusyunda kubramkuqkuna, bandulira warmimkunampismi chay uchangunata dijachpa, Dyustana kasuchpa, qamkunamanda mas puntata syiluman rinllampa yallkuq, Dyuswan kawsananllampa. 32 Chaqa Jwan Chutichimkuq chamuchpaqam, qamkunata yach'achichurqan, allita rurachpana kawsanallkillampa. Piru qamkunaqam paytaqa mana kriyirqallkillampachu. Piru chay kuntribusyunda kubramkuqkuna, chay bandulira warmimkunam Jwandaqa kriyirqanllampa. Piru qamkunaqam chayta rimkachpampis, uchallkimkunataqa mana dijarqallkillampachu, Dyuspi yuyamkunallkiqa. 33 Uyayllampa kay suq kumparasyunda: Suq runa ancha achka ubasta tarpuchpach, rridurninda muralla pirqata rurarqan. Chaymandaqach jwirti rumi kantiriyampi uch'kumkuchpa, suq pusuta rurarqan, ubasningunata kusichachpa, chaypi qampinambaq. Rurarqambischi suq altu turrita, chay altumanda chay tarpudunda kwidanambaq. Chaychina rurachpaqach, partidaryungunawan ch'amkranda dijachpa, payqa karumanna rirqan. 34 Chaymandaqach ubasta kusichanan tyimpu ch'ayamptinqa, chay ch'amkrampa dwiñunqa kriyadungunata kach'arqan, chay partidaryunguna partinda qumptinllampa ampanambaq. 35 Piru chay partidaryungunaqach, chay dwiñumpa kriyadunguna ch'ayamptinqa, piskachpa, suqninda alli alli maqarqanllampa; suqtaqach wanchirqanllampa; suqtaqach rumimkunawan sitarqanllampa. 36 Chaymandaqach chay dwiñuqa mas achka kriyadungunata kach'arirqan. Pallkunatampischi chaychinalla suq lastima rurarqanllampa chay punta chamuqkunatachina. 37 Ultimutaqach chay dwiñuqa churindana kach'arqan: Churiytaqam kasunqallampana, nichpa. 38 Piru chay partidaryungunaqa chay dwiñumpa churin yaqqana ch'ayaqta rimkachpaqach suqnin suqnin parlarqanllampa: Payqam irinsyawan rin kidaq. Chayri amku wanchiq, nuqanchiqkunana kay ch'amkranwan kidananchiq, nichpa. 39 Chaychi chaychina parlachpaqa, chay dwiñumpa churinda piskachpa, ch'amkranmanda sawaman surquchpa, wanchirqanllampa. 40 Chaymi Jisusqa chay runamkunata kaychina tampurqan: Chay ch'amkrampa dwiñun chamuchpaqa, ¿imanachinqaraq chay malu partidaryungunataqa? nichpa. 41 Pallkunaqam nirqanllampa: Chay malumkunataqam mana llamkimpachpachu wanchinqa. Chaymandaqam allin partidaryumkunata maskanqa, kusichan puqumptin, partinda qunanllampa, nichpa. [Nuta: Chay ch'amkrampa dwiñunqam munan niyta Tayta Dyus. Chay kriyadungunaqam munan niyta Dyuspaq rimaqkuna. Chay dwiñumpa churinqam munan niyta Jisumkristu. Chay mana baliq partidaryumkunaqam munan niyta chay mas kamachimkuq isrraylinu kuramkuna chay kamachimkuq ansyanumkunampis, nichpa.] 42 Chaychina nimptinllampaqam, Jisusqa suq kumparasyunda rurachpa, nirqan: Qamkunaqam riqsiwangillampa mana baliq rumitachina. Piru Dyuspa Santu Librumbiqa ¿manachu liyichqallampa kangi kaychina nichqandaqa? Albañilkuna wichumkuchqan rumitaqam kananqa Dyusqa wasimba simyintumbi mas baliqpaqna rurachqa. Dyus chaychina rurachqanrallkum ancha alabanchiqllampa: Ancha chumitaqtam rurachqa, nichpa. 43 Chaymi nillkillampa, qamkuna disprisyawachpam, manana ringillampachu kawsaq Dyuswanqa. Achwanmi payta kasuqkunalla suq bidampiqa paywan rinllampa kawsaq. 44 ?Piru chay ancha baliq rumimpa sawambi bulamkaqkunaqam piti piti rin kidaq. Kanan chay rumi mayqamba sawanman ichkichpaqam, limpu chankachpa, pulbuta rin dijaq, nichpa.? [Nuta: Jisumkristum chay rumichinaqa. Paypi mana munaq yuyamkuqkunam chay albañilkunachina, chay rumimpi bulamkaqkunachina.] 45 Chay ichkay kumparasyunda uyachpaqam, chay kamachimkuq isrraylinu kuramkuna, chay farisiyu dumktrinayuqkunaqa intyindirqanllampa: Nuqanchiqkunatam kumparawallkanchiq chay malu partidaryumkunawan, chay albañilkunawanqa, nichpa. 46 Chaymi Jisustaqa prisuytana munarqanllampa. Lumkismi runamkunata mancharqanllampa. Chaqa achka runam kriyirqanllampa: Jisusmi Dyuspaq rimaq, nichpa.
1 Jisusmi achka kumparasyunda rurachpa, suq kutinda pallkunata kaychina yach'achirqan: 2 Dyuswan suq bidampi kawsananchiqqam suq kasamyintu fyistachina. Suq gubyirnuch fyistata rurarqan, churin kasaranambaq. 3 Chaymandaqach kriyadungunata nirqan: Riyllampa kumbidachqallkunata ampamuq, nichpa. Piru chay kumbidachqangunaqach mana munarqanllampachu chamuytaqa. 4 Chaychi pallkuna mana chamumptinqa, suq kriyadungunata nirqan: Richpa chay kumbidachqallkunata kaychina niyllampa: Patrunniymi yanuchimkuchqa mimkunata. Gurduyachichqan michirungunata wanchichichqa. Suq laya animalkunatam gurduyachichpa wanchichichqana, ancha michkita mimkunanchiq. Tumkuy imatam allichachqana. Amkullampar fyistaman , nichpa. 5 Piru pallkunaqach kriyadungunata fyirusyachpa, suqqa ch'amkranman rirqan trabajaq. Suqqach rirqan nigusyungunata ruraq. 6 Suqkunaqach chay gubyirnumpa kriyadungunata suq lastima maqachpa wanchirqanllampa. 7 Chaychi chay gubyirnu chay rurachqanllampata yach'achpaqa, ancha piñamkuchpa, suldadungunata kamachirqan: Riyllampa wanchiq chay matansyirumkunata. Wanchichpaqa, llaqtanda rumpachiyllampa, nichpa. 8 Chaymandaqach chay gubyirnuqa kriyadungunata nirqan: Allimptam nillkillampa, tumkuy imam allichachqana, kasamyintu fyistata rurananchiqllampa. Lumkismi chay kumbidachqallkunaqa fyirusyawachqa. Chaymi manana munanichu pallkuna chamunanqa. 9 Mayñ, atun ñangunaman richpa, yumbanda kumbiday, chamunanllampa kay kasamyintu fyistaman, nichpa. 10 Chaychi kriyadunguna ñangunaman richpaqa, yumbay tarichqanllampata allinda, maluta kumbidarqan, fyistaman chamunambaq. Chaychinach chay wasimanqa achka runamkuna undarqan. 11 Chaymandaqach gubyirnuqa yallkurqanna chay kumbidachqangunata rimkaq. Piru chaypi karqan suq kumpañaq runa. Payqach (chay kasaraqta mana rrispitachpachu) mana mudamkuchqachu karqan kasamyintu mudanataqa. 12 Chaychi chay gubyirnuqa tampurqan: Yanasita (Yanasitu), ¿imachinataq kaymanqa yallkumurqallki kasamyintumpaq mana mudamkuchpaqa? nichpa. Piru runaqach uyararqanlla. 13 Chaychi chay gubyirnuqa kriyadungunata kamachirqan: Ch'amkingunata, mamkingunata ch'aqnachpa, sawa tutayaqman wichumkuyllampa. Chay tutayaqpim ancha padisichpa, waqachpa, kirungunata rin qach'yachiq, nichpa. 14 Chaqa Taytanchiq Dyusqam achkata kumbidallkan, paywan kawsananllampa. (Piru achlalla paypi yuyamkunllampa.) Chaymi achlatalla amkran, (paywan tumkuy tyimpu kawsananllampaqa.) 15 Chaymandaqam farisiyu dumktrinayuqkunaqa tandanamkuchpa, kaychina parlarqanllampa: Amku tampuq Jisusta, imampi pandamptin, chaypaq tumbanna prisunanchiqllampa, nichpa. 16 Chaymi chay farisiyumkunaqa wamkin yach'amkuqningunata, Irudispa partidunmanda wamkin kaqkunatampis kach'arqanllampa, Jisusta kaychina tampunan: Yach'achimkuq Taytitu, qamqam allimp kaqtalla Dyuspaq yach'achimkungi. Chaqa manam nima pudirniyuq runata manchachpachu ni sawachachpachu, Dyus munachqandalla yach'achimkungi. 17 Chayri niwayllampa, ¿Allichu Rrumampa gubyirnunda kuntribusyunda pagarananchiqllampa, ichu mana? nichpa. 18 Piru Jisusqam yach'arqan: Prisuwananrallkum chay layataqa tampuwanllampa, nichpa. Chaymi pallkunataqa nirqan: A, chimimkiwanlla Dyusta kasuqkuna! ¿Imarallkutaq chaychinaqa munangillampa mallimpawaytaqa? 19 Mayñ, rimkachiwayllampa chay kuntribusyun pagaramkunanchiq qallayta, nichpa. Chaychina nimptinqam, chay runamkunaqa suq dinaryu qallayta rimkachirqanllampa. 20 Chaymi Jisusqa chay qallayta rimkachpaqa, pallkunata tampurqan: Pimpa rritratunmi, pimpa chutinmi kay qallaypiqa? nichpa. 21 Chaymi pallkunaqa nirqan: Rrumampa gubyirnumba chutinwan rritratunmi, nichpa. Chaychina nimptinllampaqam, Jisusqa pallkunata nirqan: Rrumampa gubyirnumba kaqtaqa, payta quyllampa. Dyuspa kaqtaqa Dyusta quyllampa, nichpa. 22 Chaychina Jisusta mana atichpa pandachiytaqam, chay kuntraqkunaqa ancha ispantarqanllampa. Chaymi dijachpana, rirqanllampa. 23 Chay diyataqmi wamkin sadusiyu dumktrinayuqkunaqa chamurqanllampa Jisusta rimkaq. Chay sadusiyumkunaqam kriyinllampa: Wañuchqamkunaqach manana rinchu kawsamuq, nichpa. Chaymi pallkunaqa Jisusta tampurqanllampa: 24 Yach'achimkuq Taytitu, chay unay Muysismi kamachimkuchqa, suq warmiyuq runa manaraq wambrayuq kachpa wañumptinqa, chay almampa masanna biyudawan kasaranqa, chay biyudampi wambrayuq kamptin, chay alma masamba wambranchina kanambaq. 25 Chaymi munanillampa tampuchuyta: Suq ayllumpich syiti ullqu masampura karqan. Chay syitimanda kulamka masanqach warmimkurqanna. Piru manaraq wambrayuq kachpach wañurqan. Chaychina wañumptinqach, chay almampa minur masanna kasararqan biyudawanqa. 26 Chay masambischi chaychina manaraq wambrayuq kachpa wañurqan. Chaymandaqach chay mas minur masanna chay biyudawanqa kasararirqan. Paypischi manaraq wambrayuq kachpa wañurqan. Chaychinach syitindin chay warmiwan kasarachpa, mana ni mayqannin chay warmimpiqa wambrayuq kachpachu wañurqanllampa. 27 Chaymandaqach chay warmimpis wañurqanna. 28 Chaychina wañuchqamkuna allimpta kawsamumptinqach'i, ¿mayqannimba warminraqri kanman? Chaqa syitindimba warminchi kachqa, nichpa. 29 Chaychina nimptinllampam, Jisusqa pallkunata nirqan: Qamkunaqam Dyuspa Santu Librun nichqanda mana intyindichpa ni Dyus pudirniyuq kachqambaq yach'achpa, ancha pandachqa kangi. 30 Chaqa wañuchqamkuna kawsamuchpaqam, manana warmiyuqchu ni runayuqchu rinllampa kaq. Achwanmi Dyuspa anjilningunachina manana kasarachpachu rinllampa kawsaq. 31 Piru wañuchqamkunampaq yach'ananchiqqa, yuyachunllampa chay unay agwilunchiqkunampaq Dyus nichqanda. Chaqa chay unay alma agwilunchiqkuna Abrajan, Isamk, Jamkubum puntata wañurqanllampa. (Chaymandaqam achka watamkunamanda) Tayta Dyus pallkunampaq nirqan: Kanangamanmi pallkunampa Dyusnin kani, nichpa. Chaymi yach'anchiq: Chay almamkunam Dyuspaqqa kawsallkanllamparaq, nichpa. ¿Manachu chaytaqa liyichqallampa kangi? 33 Chaychina Jisus ancha chumaqta yach'achimkumptinqam, chaypi kaq uyaqkuna ancha ispantachqata yuyarqanllampa: Ancha yach'ayniyuqmi kay runaqa, nichpa. 34 Farisiyu dumktrinayuqkuna yach'achpa: Jisusmi sadusiyu dumktrinayuqkunata uyarachichqa nichpa, tandamkarqanllampa, pallkunampis payta tampunambaq. 35 Chaymi Muysispa liyningunata suq yach'achimkuq mallimpananrallku Jisusta kaychina tampurqan: 36 Yach'achimkuq Taytitu, ¿Tayta Dyuspa yumbay liyninmandaqa mayqan liytaq mas allinqa? nichpa. 37 Chaymi Jisusqa nirqan: Dyusnimkita kuyayllampa, tumkuy chunqullkiwan, tumkuy bidallkiwan, tumkuy yuyaynimkiwan. 38 Kay liymi mas alli ruranallkimpaqqa. 39 Kay suq liypismi chay punta liychinalla ancha balin. Kaychinam nin: Qam kwirpullkita kuyachqallkichina, yumbay runa masimkitampis kuyay, nichpa. 40 Kay ichkay lillkunata kasuchpaqam, alabis Muysispa yumbay liyningunata, Dyuspaq suq rimaqkuna yumbay nichqanllampatampis kasullkangillampa. 41 Chaychina farisiyu dumktrinayuqkuna tandanamkuchqa kamptinmi, Jisusqa pallkunata tampurqan: 42 Imatataq yuyangillampa Dyus Amkrachqan Wachadurpaqqa? ¿Pimpa karu willkandaq qamkunampaqqa? nichpa. Farisiyumkunaqam nirqanllampa: Alma gubyirnu Dabidpa karu willkanmi, nichpa. 43 Chaychina nimptinllampam, Jisusqa tampurirqan: Chaychina kamptinqa, ¿imarallkutaq Dyuspa Santu Ispiritum Dabidta rimachirqan: Dyus Amkrachqan Wachadurqam kamachimkuqniy, ninambaqqa? Chaqa Dabidqam nirqan: 44 Tayta Dyusmi Kamachimkuqniyta nirqan: Allin laduypi tiyay, kuntrachuqkunata binsichpa, ch'amkimkimpa waranman ruranallkaman (qamta kasuchunanllampa), nichpa. 45 Chaychina chay ancha baliq gubyirnu Dabid Dyus Amkrachqan Wachadurpaq Siñurniymi nirqan. Piru Dabidpa karu willkan kamptinqam, ¿imachinataq siñurninqa kanman? [Nuta: Jisusqam chaychinaqa nirqan, chay uyaqkuna yach'anambaqllampa: Dyus Amkrachqan Wachadurqam, runa kachpampis, yumbay runamkunamanda mas pudirniyuq, nichpa.] 46 Chaychina tampumptinqam, manana ni pimpis atirqanchu Jisusta kuntistaytaqa. Chaymi chay diyamandampacha manana ni pimpis almitimkarqanchu Jisusta yanqa tampuytaqa.
1 Chaymandaqam Jisusqa chaypi kaqkunata, nuqallkuna yach'amkuqnindampis kaychina niwarqanllampa: 2 Muysispa liyningunata yach'achimkuqkuna, farisiyu dumktrinayuqkunawanmi kaychina yuyanllampa: Nuqanchiqkunallam kamachimkuqqa kanchiq, Muysispa liyningunata suqkunata intyindichinanchiqqa, nichpa. 3 Pallkuna yach'achimkuchqandar kasuyllampa, piru ama rurayllampachu pallkuna rurachqandaqa. Chaqa pallkunaqam chiminwanlla ninllampa: Kay imata rurachunllampa, nichpa. Piru manam chay nichqandaqa ruranllampachu. 4 Pallkunaqam Dyus nichqanda yach'achimkuchpaqa, yuyayningunatampis yampanllampa. Chaychina yach'achimkuchpaqam, llaqta masinchiqkunata ancha llachaqtachina amparichillkan: Yumbay kallkunata rurayllampa, nichpa. Piru kamachichpaqam, pallkunaqa mana ni achlita ni suq didunwan munanllampachu yanampayta, chay kamachimkuchqanda kumplinambaqqa. 5 Tumkuy imataqam ruranllampa, runamkuna rimkanambaqlla. Chaymi Dyuspa Santu Librunmanda wamkin birsimkulumkunata tamkcha pampilkunampi iskibrichpa, mas atun kajitamkunampa umkumbi rurachpa, urkungunampi, rimkrangunampi watachpa purinllampa. Kanan kampangunatampismi ruramkunllampa manyangunampi mas atun flimkuskunata rurachpa, suqkuna alabachpa: Waqkunaqam kamachimkuqkuna, ninanllampa. 6 Ampamptinllampa mimkuqpismi, gustanllampa chay mas kamachimkuqkunampa ladumbi tiyayta, yumbay rimkananllampa. Chaychinallam sinaguga wasimpimpis gustanllampa kamachimkuqkunampa tiyanambi tiyayta. 7 Plasamkunaman richpam, munanllampa suqkuna chumaqta nampallkunanllampa: Yach'achimkuq Taytitu, nichpa. 8 Piru qamkunaqa ama dijamkayllampachu, suqkuna Yach'achimkuq Taytitu nichunanllampaqa. Chaqa yumbay qamkunaqam masampurachinalla kangillampa. Nuqallam qamkunampa yach'achimkuqnimkiqa kani. 9 Chayri kay mundumpi mayqan kamachimkuqtaqa ama Taytitu niyllampachu. Chaqa Dyus syilumpi kaqllam Taytallkillampaqa. 10 Amar ni dijamkayllampachu: Kamachimkuq Taytitu nichunanllampaqa. Chaqa nuqa Dyus Amkrachqan Wachadurllam kamachimkuqnimkiqa kani. 11 Qamkunampa kamachimkuqnimkiqam yumbayta sirbinqa kriyaduchina. 12 Chaqa mayqan palanganutaqam Taytanchiq Dyusqa rin panqachiq. Piru mana kamachimkuq kaqkunataqam kamachimkuqpaq rin numbraq. 13 ¡Imanangiraqri qamkuna Muysispa liyningunata yach'achimkuqkuna, qamkuna farisiyu dumktrinayuqkunaqa! ¡Chaqa chimimkiwanllam Dyustaqa kasungillampa! Dyusta kasuyta munaqkunataqam mana baliq dumktrinallkimkunata yach'achichpa, ancha dañachingillampa. Chaymi pallkunaqa syilumanqa manana rinllampachu yallkuq, Dyuswan kawsananllampa. Chaychina dañachichpaqam, qamkuna syilumpa pungunda kirpallkangichina. Chaymi qamkunaqa syilumanqa mana ringillampachu atiq yallkuyta. 14 ?¡Imanangiraqri qamkuna Muysispa liyningunata yach'achimkuqkuna, farisiyu dumktrinayuqkunaqa! ¡Chaqa qamkunaqam chimimkiwanlla Dyusta kasungillampa! Kanan biyudamkunampa wasingunata quch'ingillampa. Chaymandaqam allin runamkunampaq tumkuchpa, yumbaypa ñawpambi Dyusman mana challkuq mañamkungillampa. Chaymi suqkunamanda mas kastigadu ringillampa kaq.? 15 ¡Imanangiraqri qamkuna Muysispa liyningunata yach'achimkuqkuna, farisiyumkunaqa! ¡Chaqa chimimkiwanllam Dyustaqa kasungillampa! Qamkunaqam ancha qawch'u kangillampa, tumkuy pachata, tumkuy mar yamkutampis rinallkillampa, suq runa masta dumktrinallkimpi kriyichinallkillampa. Piru chay runa kriyichichqallkiqa qamkunachina ruramptinqam, ichkay tantu mas uchayuqta rurallkangillampa, infyirnumpi mas kastigadu kanambaq. 16 ¡Imanangiraqri qamkuna mana allita yach'achimkuqkunaqa! Dyus nichqanda mana intyindimptimkiqam, yuyaynimkimkunaqa suq mana rimkamkuqchina. Chaymi suqkunata mana baliq kustumbrimkimkunata yach'achichpaqa, pallkunatampis pandachingillampa. Chaqa qamkunaqam yach'achimkungi: Mayqan runa ichu warmi Tayta Dyuspa adurana wasimba chutimbi jurachpaqam, mana nisisaryuchu kumplinambaq. Piru mayqan runa Dyuspa adurana wasimba urumba chutimbi jurachpaqam, ancha nisisaryuna kumplinambaq, nichpa. 17 ¡A, tuntu sarkumkunachina! ¿Mayqannindaq masta balin Dyuspaqqa, uru ichu paypa adurana wasin? Paypa adurana wasinmi masta balin urumandaqa. Chay uruqa Dyuspa adurana wasimba kamptinmi santu kidan, Dyuspaqna kachqanrallku. Manaqa manam balinmanchu Dyuspaqqa. 18 Ningillampampismi: Pata altarpa chutimbi jurachpaqam, mana nisisaryuchu kumplinambaqqa. Piru chay pata altarpa sawambi ufrinda kaqpa chutimbi jurachpaqam, ancha nisisaryu kumplinambaq. Chaqa mana kumplichpaqam ancha uchayuq, nichpa. 19 ¡A tuntumkuna! ¡Sarkumkunachinam mana nimatampis rimkangillampachu! ¿Mayqandaq masta balin, ufrindachu ichu pata altar? Chay pata altarmi mastaqa balin. Chaqa pata altarpi chay ufrinda Dyuspaqna kachpaqam, ancha balin. Manaqa manam balinchu. 20 Allimptam nillkillampa, pata altarpa chutimbi juraqqam, tumkuy ufrindandimba chutimbimpis jurallkan. 21 Dyuspa adurana wasimba chutimbi juraqqam, Dyuspa chutimbimpis jurallkan. Chaqa Dyusqam tiyan chay chumaq wasimbi. 22 Syilumpa chutimbi juraqpismi, Dyuspa ancha altu trunumba chutimbimpis jurallkan. Chaqa syiluqam Dyuspa ancha chumaq trunun. Chaychinaqam Dyuspa chutimbimpis jurallkan. 23 ¡Imanangiraqri qamkuna Muysispa liyningunata yach'achimkuqkuna, qamkuna farisiyu dumktrinayuqkunaqa! ¡Chaqa qamkunaqam chimimkiwanlla Dyustaqa kasungillampa! Asta anisnimkimanda, kuminusnimkimanda mintallkimandam dyismuta surqungillampa Dyuspaq. Piru Tayta Dyus mas baliq kamachimkuchqandaqam mana kasungillampachu. Chayri bidallkillampata kambyachpa, chay mas baliq kamachimkuchqanda kasuchpaqa, allitana rurachpa, llamkimpamkuqkuna kachpa, Dyuspi allita kriyingimanllampa. Chaychina rurachpaqa, chay dyismullkitampis quyllampa. 24 ¡A, qamkuna, mana yach'ayniyuq yach'achimkuqkuna! Qamkunaqam ancha allita kwidamkangillampa, ama nima mampa mimkunata mimkunallkillampa. Piru mas fiyu uchamkunata rurachpaqam, mana ni intyindingillampachu: Uchatam rurallkani, nichpaqa. Ancham kwidamkangillampa, ama ni suq chuchpisitu chimimkiman yallkunan. Piru manam intyindingillampachu: Suq atun mampa kamillu animalmi yallkullkan chimiyman, nichpaqa. 25 ¡Imanangiraqri qamkuna Muysispa liyningunata yach'achimkuqkuna, qamkuna farisiyu dumktrinayuqkuna! ¡Chaqa qamkunaqam chimimkiwanlla Dyustaqa kasungillampa! Qamkunaqam basullkimkunampa, platullkimkunampa sawandalla mayllangillampa, piru kwirpullki munachqandalla rurachpaqam, chay umpyachqallkita, chay mimkuchqallkita quch'ichqallampa kangi runa masimkimkunata. Chaymi chunqullkillampaqa ancha mampa Dyuspaqqa. 26 ¡A, mana yach'ayniyuq farisiyumkuna! Puntata Dyusman mañamkuy, yumbay uchallkimanda pirdunachunambaq. Chaymandaqa pay munachqanda rurachpaqam, limpyu chunquyuq kayllampa. Chaychina rurachpaqam, tumkuy kwirpullkimpis Dyuspaqqa limpyuna rin kaq. 27 ¡Imanangiraqri qamkuna Muysispa liyningunata yach'achimkuqkuna, qamkuna farisiyu dumktrinayuqkunaqa! ¡Chaqa qamkunaqam chimimkiwanlla Dyustaqa kasungillampa! Chaymi qamkunaqa chay almamkuna pambamkachqa nichu laya simpulturachina kangillampa. Manchu almata pambamptinchiqqa, nichumpa sawanda ancha chumaqta blankiyanchiq. Piru umkunqam tullu limkidu ancha millanaypaq mampamkuna ach'nallkan. 28 Chay nichuchinallam qamkunampis kangillampa. Chaqa sawa kwirpullkillam allin laya kangillampa, runamkuna rimkachunanllampa. Piru chimimkiwanlla Dyusta kasuchpaqam, chunqullkimpiqa ancha uchayuq kangillampa. 29 ¡Imanangiraqri qamkuna Muysispa liyningunata yach'achimkuqkuna, qamkuna farisiyu dumktrinayuqkunaqa! ¡Chaqa qamkunaqam chimimkiwanlla Dyustaqa kasungillampa! Unay agwilullkillampam wanchirqan Dyuspaq rimaqkunata. Piru kananmi qamkunaqa chay rimaqkunampa nichu laya simpulturangunata kwidallkangillampa. Chay nichungunata kwidachpa, chay unay rimaqkunata alabachpaqam, 30 ningillampa: Chay unay agwilunchiqkunampa tyimpumbi kawsachpaqach'i, Dyuspaq rimaqkunata mana wanchinayllampatachu, nichpa. 31 (Piru kananqam nuqata munangillampa wanchiwayta.) Chaymi chay unay agwilullki wanchimkuqkunachina kangillampa. 32 Chaqa qamkunaqam munangillampa uchyayta chay unay agwilullkimkuna qallarichqanda. 33 ¡Qamkunaqam malumkuna kachpa, kulibrampa ayllunguna kangillampa! Chaychina kachpaqa, ¿imachinaraq atingimanllampa infyirnumandaqa wachamkayta? Manam ringillampachu atiq wachamkaytaqa. 34 Chaychina malumkuna kamptimkillampam, qamkunaman rini kach'amuq nuqampaq rimaqkunata, yach'ayniyuqkunata, yach'achimkuqkunata. Piru pallkunamanda wamkindaqam ringillampa wanchiq. Wamkindaqam kruspi ringillampa klabaq. Wamkindaqam sinaguga wasimkunampi ringillampa asutiq. Llaqtan llaqtanmi imkinllampata ringillampa riq, pallkunata qasachanallki. 35 Chaychina ruramptimkillampam, chay unay agwilullkimkuna allin runamkunata wanchichqangunampaq qamkunampis uchayuqkuna ringillampa kaq. Chay ancha allin Abilta wanchichqan tyimpumandampacha, chay Birimkiyaspa churin Samkariyasta wanchichqan tyimpumkaman, yumbay chay agwilullkimkuna wanchichqan runamkunampaqmi qamkunampis kastigadu ringillampa kaq. Chay unay agwilullkimkunaqam chay Samkariyasta wanchirqanllampa Dyuspa adurana wasimba pungumbi, pata altarpa ñawpambi. 36 Chayri allita uyawayllampa, Taytanchiq Dyusqam yumbay qamkunata rin kastigachuqllampa, chay ancha uchata rurachqallkirallku, chay agwilullkimkuna rurachqanrallkumpis. 37 ¡Ay, Jirusalimbi tiyaqkuna! Qamkunaqam Taytanchiq Dyuspaq rimaqkunata wanchingillampa. Kanan Dyus kach'amuchqan runamkunatam sitangillampa. Manchu suq wallpaqa alitamba warambi pulichitungunata tandan. Chaychinallam nuqampis qamkunata kutin kutin ancha munachqa kani tandachuyllampata, piru mana munarqallkillampachu. 38 Chaymi kay llaqtallkiqa wichumkudu rin kidaq. 39 Kanan mananam ringillampachu rimkawaq, syilumanda kutimunay diyamkaman. Chay diyampiqam nuqampaq ringillampa niq: ¡Alabachqa kanqa Tayta Dyuspa rrimplasun chamuqqa! nichpa.
1 Tayta Dyuspa adurana wasinmanda Jisus lluqchichpa rillkamptinnam, nuqallkuna yach'amkuqningunaqa qamimkachpa, nirqayllampa: Siñursitu, rimkay kay ancha chumaq atun adurana wasita! nichpa. 2 Chaymi Jisusqa niwarqanllampa: Kananqam rimkallkangillampa kay atun wasitaqa. Piru allimptam nillkillampa, suq diyam kay rimkachqallkitaqa limpu rinllampa bulaq. Chaychina bulamptinllampa kay wasitaqam, manana ni suq rumi patachaduqa rinchu kidaq, nichpa. 3 Jisusmi nuqallkuna yach'amkuqningunawan Ulibu lumaman richpa, chaypi tiyarqan. Chaypi tiyallkamptinmi nuqallkunaqa qamimkachpa, uyaramplla (uyaralla) tampurqayllampa: Niwayllampari chay nichqallkimkunaqa ¿ima tyimpum rin kumpliq? ¿Imata rimkachpam yach'achaqllampa: Jisumkristum rinna kutimuq. Kay munduqam rin uchyamkaqna, nichpaqa? 4 Chaymi Jisusqa niwarqanllampa: Kwidamkayllampa ama pimpis ingañachunambaq. 5 Chaqa achka llullamkuqkuna chamuchpam, nuqampa chutiyta myintachpa, rin niq: Nuqam Dyus Amkrachqan Wachadurqa kani, nichpa. Chaychinam achka runata, warmita rinllampa ingañaq. 6 Qamkunaqam ringillampa uyaq: Waqpi, kaypim pilyallkanllampa, nichpa. Piru amar manchayllampachu. Chaychinam rin kaq. Piru chaychina kamptimbismi, manaraq rinchu uchyamkaq kay munduqa. 7 Chaqa puntata suq nasyumbi tiyaqkunam rin pilyaq suq nasyumbi tiyaqkunawan. Achka nasyungunampuram rinllampa pilyaq. Kay mundumpiqam waqpi, kaypi qachyallkuna, ambrunamkuna rin kaq. Pachampismi waqpi kaypi rin kuyuq. 8 Tumkuy kay siñamkunaqam munan niyta, ñamkallkunam qallarillkanna, nichpa. Chaymandaqam mas achka ñamkallkuna rin kaq. 9 Qamkunatampismi qasachachuchpa, rinllampa wanchichuq. Yumbaymi rin ch'iqnichuqllampa, nuqampi kriyichqallkirallku. 10 Chaymi achka runamkuna nuqamandaqa rinllampa amkramkaq. Kanan pallkunampura ch'iqninamkuchpam, kuntrangunaman rinllampa intriganamkuq. 11 Achka llullamkuqkuna chamuchpam, rinllampa niq: Nuqam Dyuspaq rimaq kani. (Paypaqmi yach'achimkuni) nichpa. Chaychinam achka runata warmita rinllampa ingañaq. 12 Chay runamkuna, warmimkuna ancha maluyachpam, manana rinllampachu llamkimpaq runa masingunataqa. 13 Piru nuqampi mana challkuq yuyamkumptimkiqam, suq bidampi rini wachachuq. 14 Kanan nuqampi yuyamkuqkunam chumaq nutisyayta tumkuy mundumpi ringillampa yach'achimkuq: Jisumkristum chumaqta rin kamachiwaqninchiq, nichpa, yumbay nasyungunampi nuqampaq yach'ananllampa. Chaymandaraqmi rin uchyamkaq kay munduqa. 15 Dyuspaq rimaq Dañilmi (unay tyimpumpi) librumbi kaychina iskibrirqan: Suq millanaypaq dañachimkuqmi rin yallkuq Tayta Dyuspa adurana wasinman, nichpa. Chayri qamkuna yach'achpa: Chay millanaypaq dañachimkuqmi chay santu lugarman yallkuchqa, nichpaqa, intyindiyllampa: Chay unay Dañil iskibrichqanqam kumplillkanna, nichpa. 16 Chayta yach'achpaqa, kay prubinsya Judiyampi kaqkunaqa qaqamkunaman mitimkanqallampa. 17 Kanan wasimba sawambi kaqkunampisri ichkichpa, ama yallkunqallampachu wasinman, imangunata surqunambaqqa. Achwanri chaychinalla das mitimkanqallampa. 18 Ch'amkrampi kaqkunampis ama wasinman kutinqallampachu, ni mudananda ampananllampaqa. 19 ¡Imananqallamparaq chay pach'ayuq (umkuyuq) warmimkuna, chay iti wambrituyuqkunaqa! 20 Chayri Dyusman mañamkuyllampa, ama mitimkanallkillampa tamya tyimpumpi, ni samana diyampi. 21 Chay mitimkanallki tyimpumpiqam yumbay runamkuna, warmimkuna ancha rinllampa ñamkaq maski yumbay ñamkallkunamanda. Chaqa kay mundu qallarichqan diyamandampacham mana nunka ñamkachqallampachu chay mitimkanan tyimpumpichinaqa. Chay ñamkana tyimpu uchyamkamptinmi, manana nunka rinllampachu ñamkaq chay tyimpumpichinaqa. 22 Piru Dyusqam amkrachqan wambrangunata llamkimpachpa, chay ñamkana diyamkunata das rin pasachiq, paypi kriyiqkuna ama achka diyamkunata padisinanllampa. Chaqa chaychina mana pasachimptinqach'i, mana pimpis atinmanchu kawsaytaqa. Yumbay runa, warmi wañunmanllampa. 23 Chayri mayqan runa qamkunata nichumptin: ¡Rimkayllampa, kaypim Dyus Amkrachqan Wachadurqa! ichu nichumptin: Kay waqpim payqa, nichpaqa, ama kriyiyllampachu. 24 Chaqa achka llullamkuqkuna chamuchpam rin niq: Nuqam Dyus Amkrachqan Wachadur kani, nichpa, ichu Nuqam Dyuspaq rimaq kani, nichpa. Pallkunam ispantaypaq milagrumkunata, siñamkunata rinllampa ruraq. Chaychina rurachpam, achka runata, warmita rinllampa ingañaq. Atichpaqach'i, asta Dyuspa amkrachqan wambrangunatampis ingañanmanllampa. 25 Kallkich manaraq challkuna pasamptin, nichuchqallampana kani (ama pimpis ingañachunanllampa). 26 Chayri nichumptinllampa: Waq chunchampim Wachadurninchiqqa, nichpaqa, ama riyllampachu; ichu Kay umku wasimpim, nichumptinllampampis, ama kriyiyllampachu. 27 Chaqa nuqa Dyusmanda Chamuq Runam rini kutimuq llimpyaq rrilampaguchina. Manchu rrilampaguqa tumkuy syilumpi lliwyan kay ladumanda suq ladumkaman. Chaychinallam nuqampis yumbay ladumkunampi lliwyachpa, rini kutimuq. 28 Chaqa maypi suq wañuchqa kamptinqam, chingumkuna tandamkanllampa. [Nuta: Chay chingumkunata karumanda rimkachpam yach'anchiq, imam wañuchqa, nichpa. Chaychinallam chay diya Jisumkristu chamurimptinqa, karumanda yumbay rinllampa rimkaq.] 29 Chay ñamkallkuna pasamptinllam, rumpaywan killa wañuchpa, manana rinchu achimkchamkuq. Lusirumkunampismi syilumanda rinllampa ichkimuq. Syilumpi tumkuy ima kaqkunampismi rin kuyuq. 30 Chaymandaqam yumbayna rinllampa rimkaq syilumpi suq siñata. Chaymi rinllampa yach'aq: Dyusmanda Chamuq Runa Jisumkristum kutimullkanna, nichpa. Chay siñata rimkachpaqam, tumkuy mundumpi ancha manchachpa, rinllampa waqaq. Chaypinam rinllampa rimkawaq, syilumanda pumkutaypa sawambi, ancha pudirniyuq llimpyachpa chamullkaqta. 31 Anjilnillkunatam rini kach'aq kay pachampa yumbay kuchungunaman, pallkuna kurnitata waqachichpa, amkrachqallkunata tandananllampa. 32 Kay kumparasyunda allita yach'amkuyllampa: Qamkunaqam suq yura igusta pallpamullkaqta rimkachpaqa, yach'angillampana: Biranunam rin kaq, nichpa. 33 Chaychinallar yumbay kay nichuchqayllampa qallarimptinqa, yach'ayllampa: Chay willawachqanchiqmi rinna kumpliq, nichpa. 34 Allimptam nillkillampa, kay tyimpumpi kawsaqkuna manaraq wañumptinmi, kay nichuchqallkunaqa rin kumpliq. 35 Chaqa syiluwan kay pacham rin uchyamkaq. Piru kay nichuchqallkunaqam mana nunka rinchu uchyamkaq. Achwanmi yumbay rin kumpliq. 36 Piru manam pimpis nuqampaqqa yach'anchu: ¿Ima diyata, ima urastam rin kutimuq? nichpaqa. Manam ni anjilkuna ni nuqa Dyuspa Churimbis yach'anillampachu. Tayta Dyusllam chaytaqa yach'an. 37 Nuwimpa tyimpumbi kachqanchinam, kutimunay tyimpumpis rin kaq. 38 Chaqa chay Nuwimpa tyimpumbiqam runamkunaqa mimkullkarqan, umpyallkarqan, kasarallkarqan, wambrangunata kasarachillkarqan, chay Nuwi wambuq wasiman yallkuchqan diyamkaman. 39 Manam intyindirqanllampachu: Ancha tamyamptinmi, yamkumkunampi yumbay ch'uqachpa rinchiqllampa uchyamkaq, nichpaqa. Chaychinallam nuqa Dyusmanda Chamuq Runa kutimumptiy, mana rinllampachu yach'aq: Kay diyampim Jisumkristu rin kutimuq, nichpaqa. 40 Ichkay runa ch'amkrampi kallkamptinmi, suqta ampachaq, suqta dijachaq. 41 Chaychinallam ichkay warmi kutamkullkamptimbis, suqta ampachaq, suqta dijachaq. 42 Chaqa manam yach'angillampachu: ¿Imurasmi Jisumkristuqa rin kutimuq? nichpaqa. Chayrallku chayta yuyachpa, allita kwidamkachpa, listu kayllampa kutimunaypaqqa. 43 Kaytampis allita yach'ayllampa, suq runa yach'achpa, ima urasmi ladrunqa rin chamuq, nichpaqach'i, wasindaqa ancha allita kwidanman, ama yallkunambaq suwaq. 44 Chaychina qamkunampis tumkuy tyimpu listu kayllampa. Chaqa nuqaqam mana yuyachqallkillampa uraspi rini kutimuq. 45 Nuqata allita chuyawaqkunaqam allin yach'ayniyuq kumplidu kriyaduchina. Chaqa chay allin kriyadumpa patrunninqam paypa mamkimbi dijan wasinda: Kay kriyadu masimkimkunatar allita kwidachpa, urasnimbi qaray, nichpa. 46 Chaymi chay wasi kwidaq kriyaduqa ancha rin kuchimkuq, chay patrunnin kutimuchpa, kamachichqanchina rurallkaqta tarimptin. 47 Allimptam nillkillampa, chay patrunninqam chay allin kriyadunda mas kamachimkuqta numbrachpa, tumkuy imangunata paypa kwintan rin dijaq, payna kwidanambaq. 48 Piru amamkich chay kriyaduqa yuyanqachu: Manaraqmi patrunniyqa rinchu kutimuq, nichpaqa. 49 Chaqa chaychina yuyachpa maluyachpaqam, kriyadu masingunata maqachpa, mach'aqkunawan unda unda mimkuchpa, umpyamptinqam, 50 patrunninqa mana yuyachqan uraspi chamuchpa, 51 ancha fiyuta rin kastigaq. Chaymandaqam paytaqa rin wichumkuq chay chiminwanlla Dyusta kasuqkunampa kachqanman, chaypi pallkunawan pulla padisinambaq. Chaypim waqachpa, kirungunata rin qach'yachiq.
1 Suq bidampi Dyusman ch'ayananchiqqam, kay dyis dunsillamkuna kasamyintu fyistaman riqkunachina rin kaq. Chaqa chay dyis dunsillamkunaqam michangunata piskachpa, rirqanllampa kasamyintu fyistaman, suq dunsilla masimba namuradunda chuyaq. 2 Pallkunamandam sinku chinamkuna ancha yach'ayniyuq, jwisyusamkuna karqan. Sinkuqam dijada mana yach'ayniyuqkuna karqan. 3 Chay dijadamkunaqam michangunatalla amparqan. Manam lamparamba mas asiytindaqa amparqanllampachu. 4 Piru chay yach'ayniyuq dunsillamkunaqam butillangunampi asiytinllampata amparqanllampa. 5 Chaymandaqam chay kasaraq runa unayamptin ch'ayamuqqa, chay dunsillamkunaqa chuyachqanchina, yumbayninna puñurqanllampa. 6 Chaymandaqam ch'awpi tutata uyarqanllampa kaychina qayamkuqta: ¡Kasaraq runaqam chamullkanna! ¡Lluqchiyllampa tinguq! nichpa. 7 Chaymi yumbay chay dunsillamkunaqa utqaymaya atarichpa, michanllampata allicharqanllampa. 8 Piru dijadamkunaqam jwisyusamkunata nirqan: ¡Michayllampam wañullkanna! ¡Achlita asiytimkitar quwayllampa! nichpa. 9 Chaymi chay jwisyusa dunsillamkunaqa chay dijadamkunata kaychina nirqan: Ama pullata faltawananchiq, riyllampa randimuy, nichpa. 10 Piru chay dijadamkuna rinangamanllampa asiytita randimuqqam, ch'ayamurqanna chay kasaraq runaqa. Chaymi chay sinku dunsilla lista kaqkunaqa wasimanna yallkurqanllampa, dunsilla masinda kuchichiq. Chaychina umkumpina kamptinllampaqam, pungutaqa kirparqanna. 11 Chaymandaqam chay dijada dunsillamkunampis ch'ayamuchpaqa, qayamkurqanllampa: Taytitu, Taytitu, pungullkitar kich'ay yallkunayllampa, nichpa. 12 Piru chay kasaraqqam pallkunataqa nirqan: ¡Pich'i kangillampa? Allimptam nillkillampa, manam riqsillkillampachu, nichpa. 13 Chayta nichpaqam, Jisusqa nirqan: Chaychinar qamkunampis allita rurachpa chuyawayllampa. Chaqa manam yach'angillampachu: Ima diya, ima urasmi Jisumkristuqa rin chamuq, nichpaqa. 14 Suq bidampi Dyuswan kawsananchiqqam suq qallayniyuq runachina rin kaq. Chaqa chay runaqam karu nasyunman rinambaq, kriyadungunata qayachpa, qallayninda mingarqan trabajachichpa ganachinanllampa. 15 Suq kriyadundam 5.000 qallayta mingarqan. Suq kriyadundaqam 2.000 qallayta mingarqan. Suq kriyadundaqam 1.000 qallayta mingarqan. [Nuta: Kada qallaymi ancha baliq. Chaqa suq trabajadurmi masdi 15 watamkunata trabajaq, mil qallayta gananambaqqa.] Chaychina mingachpaqam, rirqanna karu llaqtaman. 16 Chaymi chay 5.000 qallayta ch'askiqqa, nigusyumkunata rurachpa, ganachirqan 5.000 masta. 17 Chay 2.000 qallayta ch'askiqpismi, 2.000 masta ganachirqan. 18 Piru chay 1.000 qallayta ch'askiqqam suqkunamanda amkramkachpa, allpampi uch'kumkuchpa, patrunnimba qallaynindaqa pambarqan. 19 Chaymandaqam achka tyimpumanda chay kriyadumkunampa patrunninqa kutimurqanna. Chaymi qallaynimba wach'aynimbaq chay kriyadungunata kwintata mañarqan. 20 Chay 5.000 qallayta ch'askiq kriyadunqam 5.000 masta ampamuchpa patrunnindaqa nirqan: Patrunsitu, 5.000 qallaytam quwarqallki. Piru 5.000 mastam ganachichqa kani, nichpa. 21 Chaymi patrunninqa paytaqa nirqan: Allin kumplidu kriyaditu, allitam nuqampaq trabajachichqa kangi chay achla qallayniy mingachuchqayta. Chaymi ancha achka imallkunata qamta rini mingachuq, qamna rimkanallki. Chayri allin lugarniyman yallkuy, kuchimkunanchiq, nichpa. 22 Chay 2.000 qallayta ch'askiqpismi nirqan: Patrunsitu, 2.000 qallaytam quwarqallki. Piru 2.000 mastam ganachichqa kani, nichpa. 23 Chaymi chay patrunninqa nirqan: Allin kumplidu kriyaditu, qambismi allita nuqampaq trabajachichqa kangi chay achla qallayniy mingachuchqayta. Chaymi achka imallkunata qamta rini mingachuq, qamna rimkanallki. Chayri qambis allin lugarniyman yallkuy kuchimkunanchiq, nichpa. 24 Piru chay 1.000 qallayta ch'askiq kriyadunmi ch'ayachpaqa nirqan: Patrunsitu, nuqaqam riqsichurqaq wampu kachqallkita. Chaqa suqkuna tarpuchqangunatam qamna kusichangi. 25 Chaymi manchachuchpa, chay 1.000 qallay quwachqallkita allpampi uch'kumkuchpa pambachpa, pamkachqa kani. Kaypi qallaynimki, nichpa. 26 Chaymi chay patrunninqa nirqan: ¡A, malu, qalla kriyadu! Qamqam yach'arqallki suqpa tarpudunda kusichachqayta, nichpa. 27 Chaychina waqaychachqallki kwintamandaqa, chay qallayniytaqa bankuman ruranallkita, kutimuchpa ganansyayuqta surqunaypaq. 28 Chaychina nichpaqam, chaypi kaqkunata kaychina kamachirqan: Chay 1.000 qallay quchqayta quch'ichpa, chay 10.000 qallayniyuqta quyllampa. 29 Chaqa chay imayuqtaqam masta rini quq (allita kasuwachqanrallku). Chaymi mas imayuqna rin kaq. Piru chay achlita kaqniyuqtaqam limpu rini quch'iq (mana allita kasuwachqanrallku). 30 Chayri chay malu kriyadutaqa sawa tutayaqman wichumkuyllampa, chaypi padisichpa, waqachpa, kirungunata qach'yachinambaq, nichpa. 31 Jisumkristuqam kaychinampis nirqan: Yumbay anjilnillkunawanmi nuqa Dyusmanda Chamuq Runa ancha kamachimkuq gubyirnu chamuchpa, llimpyaq trunuypi rini tiyaq kamachimkunaypaq. 32 Yumbay nasyungunamandam runamkuna, warmimkuna ñawpayman rinllampa tandamkaq. Manchu michidurqa wichangunata amkran chibumkunamanda. Chaychinallam nuqampis rini amkraq nuqata kuyawaqkunata chay mana kuyawaqkunamanda. 33 Chaqa chay kuyawaqkunaqam wichallkuna. Chaymi pallkunata allin laduypi rini ruraq. Chay mana kuyawaqkunaqam chay chibumkunachina. Chaymi pallkunataqa ichuq laduypi rini ruraq. 34 Chaymandaqam allin laduypi kaqkunataqa rini niq: Tayta Dyusmi qamkunata ancha yanampachuchqa. Chayri nuqaman chamuyllampa. Chaqa kay munduta rurachqan diyamandampacham Tayta Dyusqa anaq syilumpi ancha chumaq lugarta rurachqa, qamkuna waqpi tiyanallkillampa. 35 Chaqa mallaqnamptiymi, qamkuna qarawarqallki. Yamkunamptiymi, yamkuta quwarqallki. Furastiru kamptiymi, pusadata quwarqallki. 36 Mana mudanayuq kamptiymi, qamkuna mudanata quwarqallki. Qachyaq kamptiymi, chamurqallkillampa watumkuwaq. Karsilpi kamptiypismi, rirqallkillampa kunswilawaq. 37 Chaychina nimptiymi, chay kuyawaqkunaqa rin niwaq: Taytitu, ¿ima tyimputaq mallaqta rimkachuchpa, qarachurqaqllampa, yamkunaqta rimkachuchpa, quchurqaqllampaqa? 38 ¿Ima tyimputaq furastiru kamptimki, pusadata quchurqaqllampa, mana mudanayuq kamptimki, mudanata quchurqaqllampa? 39 ¿Ima tyimputaq qachyaq kamptimki, karsilpi kamptimki, rirqayllampa watumkuchuqqa? nichpa. 40 Chaychina tampuwamptinllampam, nuqaqa pallkunata rini niq: Allimptam nillkillampa, chay mana imayuqkunata yanampachpaqam, alabis nuqata yanampawachqa kangi, nichpa. 41 Chaymandaqam ichuq laduypi kaqkunatana rini niq: ¡Achuyllampa laduymanda qamkuna malditu kundinadumkuna! Riyllampa chay tumkuy tyimpu lumyallkaq ninaman. Chay infyirnutaqam Taytanchiq Dyus rurachqa, dyablu tumkuy yanampamkuqnin dyablumkunawan rumpanambaq. 42 Chaqa mallaqnamptiymi, qamkunaqa mana qarawarqallkichu; yamkunamptiypismi, mana quwarqallkichu. 43 Furastiru kamptiypismi, mana pusadata quwarqallkichu. Mudanay faltawamptimbismi, mana nimatampis quwarqallkichu. Qachyaq kamptiy, karsilpi kamptiypismi, mana rirqallkillampachu watumkuwaqqa. 44 Chaychina nimptiyqam, pallkunaqa rin tampuwaqllampa: Taytitu, mallaq kamptimki, yamkunamptimki, furastiru kamptimki, mana mudanayuq kamptimki, qachyaq kamptimki, karsilpi kamptimkiqam, mana rimkachuchqachu kanillampa yanampachunayqa, nichpa. 45 Chaychina niwamptinllampaqam, pallkunata nichaq: Allimptam nillkillampa, chay pubrimkunata mana yanampachpaqam, alabis nuqata disprisyawachqa kangi, nichpa. 46 Chayta nichpaqam, Jisusqa nirqambis: Pallkunaqam rinllampa riq chay mana uchyamkaq kastiguman. Piru allingunaqam rinllampa riq luryaman, tumkuy tyimpu kawsananllampa, nichpa.
1 Jisusmi challkunata yach'achimkuchpaqa, nuqallkuna yach'amkuqningunata niwarqanllampa: 2 Qamkunaqam yach'angillampa: Ichkay diyallanam faltan Paskwa fyista qallarinanqa, nichpa. Chay fyistampim nuqa Dyusmanda Chamuq Runataqa kuntrawaqkunaman rinllampa intrigamkuwaq, kruspi klabawananllampa, nichpa. 3 Allimptam chay diyamkunampi kamachimkuq isrraylinu kuramkuna, Muysispa liyningunata yach'achimkuqkuna, kamachimkuq ansyanumkunawan tandamkarqanllampa chay mas kamachimkuq isrraylinu kurampa atun wasimba patyumbi. Chay kuraqam Kayfas chutirqan. 4 Yumbay chay kamachimkuqkunam kaychina parlarqanllampa: Imachinaraq Jisusta ingañachpa dimandanchiqman, prisuchpa wanchinanchiqllampa? nichpa. 5 Chaymandaqam nirqanllampa: Kay fyistampiqam mana balinchu wanchinanchiqqa. Chaqa kay fyistampi kaqkunamkich kuntranchiq alsamkanmanllampa, nichpa. 6 Jisusmi nuqallkuna yach'amkuqningunawan Bitanilla (Bitaniya) llaqtampi kachpa, rirqayllampa suq runa Simun chutiqpa wasinman. Chay Simunmi unayqa ismullkaq kwirpuyuq kachqa karqan. 7 Paypa wasimbi kallkamptiyllampam, suq warmi ch'ayarqan kirpadu rumi pumumpi ancha ch'aniyuq michki mutkinata ampamuchpa. Masampi kallkamptiyllampam, chay warmiqa chay michki mutkinawan Jisuspa umanda nuyuchirqan. 8 Chayta rimkachpam, nuqallkunaqa piñamkuchpa, nirqayllampa: Imampaqtaq qasachallkan chay ch'aniyuq michki mutkinataqa? 9 Chaytaqach' achka qallaypaq randimkuchpa, chay mana nimayuqkunata yanampananchiqta, nichpa. 10 Chaymi Jisus chayta uyachpaqa, kaychina niwarqanllampa: Imampaqmi kay warmitaqa piñachingillampa? Payqam ancha allita rurawachqa. 11 Chaqa pubrimkunaqam qamkunampa pullallkillampa tumkuy tyimpu rinllampa kaq. Piru nuqaqam manana tumkuy tyimpuchu pullallkillampaqa rini kaq. 12 Kaychina michki mutkinata sawayman basyachpaqam, allichawachqachina, wañumptiy pambawananllampa. 13 Chaymi allimpta nillkillampa, tumkuy kay mundumpi nuqampa chumaq nutisyayta yach'achimkuchpaqam, kay warmi allita rurawachqandampis rinllampa yach'achimkuq, payta ama qunqananllampa, nichpa. 14 Chaymandaqam yach'amkuq masiy Judas Iskaryutiqa kamachimkuq isrraylinu kuramkunaman rirqan kaychina niq: 15 Allkatam qamkunaqa pagarawangiman, Jisusta intriganaqqa? nichpa. Chaymi chay kamachimkuq kuramkunaqa 30 yuraq qallayta pagararqanllampa. 16 Chay urasmandampacham Judasqa yuyarqan: ¿Maypitaq, imachinataq Jisusta intrigamkuni? nichpa. 17 Chay Paskwa fyistampiqam suq laya mimkunamkunata, kachangamkunata nuqallkuna isrraylinumkunaqa mimkunillampa. Chay fyista qallarichqan diyam wamkin yach'amkuq masillkunaqa Jisusta tampurqanllampa: Kay Paskwa fyista mimkunata mimkunanchiqqa, ¿maypitaq munangi allichanayllampa? nichpa. 18 Chaymi Jisusqa pallkunataqa nirqan: Richpa Jirusalinmanqa, riyllampa chay riqsichqanchiq runaman. Payta niyllampa: Yach'achimkuq Taytitum nin: Ch'ayamuchqanam uras. Wasimkimpim munani rurayta Paskwa fyistata yach'amkuqnillkunawan, nichpa. 19 Chay nichqanchina rurachpam, Paskwa mimkunata allicharqanllampa. 20 Tutayamptinnaqam, Jisusqa nuqallkuna dusi yach'amkuqningunawan masampina karqayllampa. 21 Chaypi mimkuqchinam niwarqanllampa: Allimptam nillkillampa, suqnimkim ringi intrigamkuwaq kuntrawaqkunaman, nichpa. 22 Chaymi yumbay nuqallkuna limpu malaganayachpa, suqniy suqniy kaychina tampurqayllampa: Taytitu, ¿nuqachu kani? nichpallampa. 23 Chaymi Jisusqa niwarqanllampa: Nuqawan suq platumpilla pullay mimkuqmi rin intrigamkuwaqqa. 24 Chaqa Dyuspa Santu Librun nichqanchinam nuqa Dyusmanda Chamuq Runaqa rini wañuq. Lumkis ¡imananqaraqri chay intrigamkuwaqqa! Mas allich'i kananda chay runaqa ama nasinambaq, nichpa. 25 Chaymi chay intrigamkuq Judasqa Jisusta nirqan: Yach'achimkuq Taytitu, ¿nuqachu kani? nichpa. Chaymi Jisusqa nirqan: Ari, nichqallkichinam qam kangi, nichpa. 26 Chaypi mimkuqchinam Jisusqa kachangata piskachpa, Dyusman pagimkurqan. Chaymandaqam pitichpa, nuqallkuna yach'amkuqningunata niwarqanllampa: Kay kachangata ch'askiwachpa, mimkuyllampa. Kaymi kwirpuy, nichpa. 27 Chaymandaqam kumpatampis piskachpa, Dyusman pagimkuchpa, nuqallkunata niwarqanllampa: Kay kumpamanda yumbaynimki umpyayllampa. 28 Chaqa kaymi yawarniy, Dyuswan muchuq tratuta ruranaypaqqa. Yawarniyta ich'amptinllampam rini wañuq, achka runata, warmita uchangunamanda wachanaypaq. 29 Piru nillkillampam, kay binutaqam manana mastaqa rinichu umpyaq kay mundumpiqa, Taytay tiyachqambi qamkunawan muchuq binuta umpyanallkaman, nichpa. 30 Suq imnuta kantachpaqam, nuqallkunaqa chay kachqaymanda lluqchichpa, rirqayllampana Ulibu lumaman. 31 Riqchinaqam Jisusqa kaychina niwarqanllampa: Kay tutaqam yumbaynimki nuqampi manana yuyamkuchpa, nuqamanda amkramkachpa, chimkwa chimkwana ringillampa riq. Chaqa Tayta Dyuspa Santu Librumbim nin: Michidurta chuqrimptiyqam, wichangunaqa waqta kayta chimkwamkanqallampa, nichpa. 32 Piru wañuchqaymanda kawsamuchpam, qamkunamanda mas puntata rini riq prubinsya Galiliyaman, nichpa. 33 Chaychina Jisus nimptinqam, Pidruqa nirqan: Qambi manana pimpis yuyamkumptimbismi, nuqaqa qambilla rini yuyamkuq, nichpa. 34 Chaymi Jisusqa nirqan: Allimptam nillki, kay tuta gallu manaraq kantamptinmi, kimsa kutinda ringi ñigawaq: Manam riqsinichu Jisustaqa, nichpa. 35 Chaymi Pidruqa nirirqan: Pullallki imampis wañuchaq. Manamir ñigachqallkichu, nichpa. Chaychinallam nirqayllampa nuqallkuna chay suq yach'amkuqningunampis. 36 Jisusqam nuqallkuna yach'amkuqningunawan Jitsimani chutiq lugarman rirqanillampa. Chayman ch'ayachpaqam, Jisusqa niwarqanllampa: Kaypi tiyayllampa, nuqa kay waqman rinallkaman Dyusman mañamkuq, nichpa. 37 Chaychina nichpaqam, Pidruta, Sibidiyumpa chay ichkay churingunata achla waqkaq ampachpa, Jisusqa suq layayachpa, ancha malaganayarqan. 38 Chaymi pallkunata nirqan: Ancha jwirtitam llamki piskawan. Limpuraq chunquy tutayan. Tumkuy kay llamkimkunam munan wanchiwayta. Kaypi kidachpa, ama puñuchpachu, yampachawayllampa, nichpa. 39 Chaymi achla waqkaq richpa, qunqurimkuchpa, ancha kumurachpa qaqllan allpaman ch'ayachichtin, Dyusman mañamkuchpa, nirqan: Taytitu, kay tumkuy ñamkallkunaqam nuqampaqqa suq kumpa ancha ayaq yamkuchina. Munachpaqar chay ñamkallkunamanda wachaway. Piru amar nuqa munachqayqa kanqachu. Achwanri qam munachqallkichina kanqa, nichpa. 40 Chaychina Dyusman mañamkuchpa, kutimuchpaqam, chay kimsa yach'amkuq masiyllampata puñullkaqta tarichpa, Pidruta nirqan: Ima manachu atichqallampa kangi agwantayta puñuymandaqa ni suq uritata? 41 Rimkch'amkachpa, Dyusman mañamkuyllampa, ama tyintadu kanallkillampa. Chaqa qamkunaqam allimpta munangillampa Dyusta kasuyta. Piru manam atingillampachu kwirpullkita sujitayta, nichpa. 42 Chaymandaqam Jisusqa suq kutinda waqkaq ririchpa, Dyusman kaychina mañamkurirqan: Taytitu, illumki ñamkanaypaq kamptinqa, qam munachqallkichina kanqa, nichpa. 43 Chaymi chamurichpaqa, puñullkaqta taririrqan chay kimsa yach'amkuq masillkunataqa. Chaqa pallkunataqam puñuyqa ancha binsillkarqan. 44 Chaymandaqam chaypilla pallkunata dijachpa, muchuqmanda chay waqkaq ririrqan, Tayta Dyusman mañamkuriq. Chay kimsa kutindam chaychina nichpalla, mañamkurqan. 45 Chaymandaqam chay kimsa kutinda kutimuchpaqa, chay yach'amkuq masillkunataqa nirqan: Sigingillampachu puñuchpa? Kananqam ch'ayamuchqa chay uras nuqa Dyusmanda Chamuq Runata intrigamkuwanan uchayuq runamkunaman. 46 Atariyllampa. Amkuna. Rimkayllampa, chay intrigamkuwaqqam ch'ayamullkanna, nichpa. 47 Chaychina rimallkamptinllam, chay yach'amkuq masiy Judasqa achka runamkunawan ch'ayamurqan. Chay runamkunaqam qaruta, atun kuchilluta piskachpa, chamurqanllampa chay kamachimkuq isrraylinu kuramkuna, chay kamachimkuq ansyanumkuna kach'amumptin. 48 Chay Judas intrigamkuqqam pallkunataqa nichqa karqan: Jisusta riqsinallkillampaqam, muchachpa rini nampallkuq. Chaytam piskangillampaqa, nichpa. 49 Chaymi ch'ayachpaqa, Jisustaqa muchachpa nampallkurqan: Bwinas nuchis, Yach'achimkuq Taytitu, nichpa. 50 Jisusqam nirqan: Yanasita (Yanasitu), ¿imampaqtaq chamuchqa kangi? nichpa. Chay uritaslla chay runamkunaqa Jisusta piskarqanllampa. 51 Piru Jisuspa suq yach'amkuqninmi atun kuchillunda surquchpa, mas kamachimkuq isrraylinu kurampa kriyadumba rinrinda pitirqan. 52 Chaymi Jisusqa nirqan: Atun kuchillullkitaqa waqaychayna. Chaqa kuchilluwan pilyaqkunataqam, kuchilluwan rinllampa wanchiq. 53 ¿Ima manachu yach'angi, nuqa Taytay Dyusman mañamkumptiyqam, kach'amunman mas di 70.000 anjilningunata wachawanambaq, nichpaqa? 54 Lumkis chaychina kach'amunambaq mañamptiyqach'i, Dyuspa Santu Librumbi nuqampaq nichqanqa mana kumplinqachu. Chaqa librumbiqam kaychina pasawanambaq riman, nichpa. 55 Chaymandaqam Jisusqa chay chamuq runamkunata nirqan: Qamkunaqa, ¿imarallkutaq chamuchqallampa kangi atun kuchillumkunawan, qarumkunawan, saltiyadurtachina prisuwaqqa? Manchu tumkuy diya Tayta Dyuspa adurana wasimbi qamkunawan kachpa, yach'achimkuchqa kani. ¿Imarallkutaq qamkunaqa chaypiqa mana prisuwarqallkichu? 56 Piru tumkuy kallkunam kaychina pasallkan, Dyuspaq rimaqkuna iskibrichqanguna kumplinambaq, nichpa. Chay urasmi nuqallkuna yumbay yach'amkuqningunaqa Jisusta sampalitanda dijachpana, mitimkarqayllampa. 57 Chay prisuqkunaqam Jisustaqa chay mas kamachimkuq isrraylinu kura Kayfaspa wasinman amparqanllampa. Chaypim karqanllampa Muysispa liyningunata yach'achimkuqkuna, kamachimkuq ansyanumkunampis. 58 Piru Pidruqam Jisuspa karu imkinda rirqan chay Kayfaspa wasimba patyungaman. Chaypiqam suldadumkunawan tiyarqan, rimkanambaq imanachiqchi rin Jisustaqa, nichpa. 59 Chay kamachimkuq isrraylinu kuramkuna, chay kamachimkuq ansyanumkuna, yumbay chay Mas Kamachimkuq Tandamkaq Juyiskunampismi tistigumkunata maskarqanllampa, llullamkuchpa, Jisuspa kuntran rimananllampa, chaypaq tumbanna wanchinanllampa. 60 Piru maychimka suqnin suqnin yanqamkunata llullamkuchpa, mana igwalta rimamptinllampaqam, mana nimampaq atirqanllampachu tumbayta Jisusta, wanchinanllampaqa. Piru ultimumpim ichkay llullamkuqkuna ñawpanllampaman pasachpa, 61 nirqanllampa: Kay runam nichqa: Dyuspa chay atun adurana wasinda bulachpam, atini kimsa diyampi muchuqmanda rurariyta, nichpa. 62 Chaymi chay mas kamachimkuq isrraylinu kuraqa atarichpa, Jisusta tampurqan: Manachu nimatampis ningi? ¿Manachu uyangi kay runamkuna qambaq rimachqandaqa? nichpa. 63 Piru kuntramptinllampaqam, Jisusqa uyararqanlla. Manam nimatampis nirqanchu. Chaymi chay mas kamachimkuq kuraqa nirqan: Mayñ, kamachillkim juranallki Dyuspa chutimbi, ¿Qamchu Dyuspa Churin kangi? ¿Qamchu Dyus Amkrachqan Wachadurqa kangi ichu mana? nichpa. 64 Chaymi Jisusqa nirqan: Qam nichqallkichinam kani. Nillkillampampismi, kananmandaqam nuqa Dyusmanda Chamuq Runata ringillampa rimkawaq, ancha pudirniyuq Tayta Dyuspa allin ladumbi tiyallkaqta. Ringillampam rimkawaqpis pumkutallkunampi syilumanda chamullkaqta, nichpa. 65 Chaychina Jisus nimptinmi, chay mas kamachimkuq isrraylinu kuraqa ancha piñamkuchpa, kwirpumbi kaq mudananda llimkichpa, chay juyiskunata nirqan: Ichichin, kay runaqam Taytanchiq Dyusta burlallkan! Kananqam manana munanchiqchu tistigumkunataqa, ¿manachu? Waqqar kananqa qamkuna kimkimki uyachqallampa kangi, kaychina rimachpa Dyusta burlamptinqa. 66 Chaymandaqam chay juyiskunata tampurqan: Imatataq yuyangillampa? nichpa. Chaymi pallkunaqa nirqanllampa: Ari, uchayuqmi. Allim wañunambaq, nichpa. 67 Chay urasmi qaqllambi tuqampachpa, wamkinqa puñitiyarqanllampa, wamkinqam qaqllambi paqyachichpa, nirqanllampa: 68 Mayñ, qam Dyus Amkrachqan Wachadur kachpaqa, niwayllampa: ¿Pitaq maqachuchqa? nichpa. 69 Pidru chay wasimpa patyumbi tiyallkamptinmi, suq kriyada qamimkachpa nirqan: Qambismi Jisus Galiliyamanda kaqwan purirqallki, nichpa. 70 Piru Pidruqam yumbay chaypi kaqkunampa ñawpambi ñigachpa nirqan: Manam yach'anichu imatach'i niwallkangi, nichpa. 71 Chaymandaqam chay patyumanda sawa punguman lluqchimptin, suq kriyadampis Pidruta rimkachpa, chaypi kaqkunata nirqan: Kay runampismi Jisus Nasaritmanda kaqwan puriq, nichpa. 72 Piru payqam kaychina jurachpa, ñigarirqan: Pur Dyusitu, manam riqsinichu chay runataqa, nichpa. 73 Chaymandaqam suq rratitumandalla, chaypi kaqkuna qamimkachpa, Pidruta nirqan: Allibraq qambis pallkunamanda suqnin kangi. Chaqa qamqam chay Galiliyamanda kaqkunachina rimangi, nichpa. 74 Chaychina nimptinllampam, Pidruqa masta jurachpa, nirqan: Pur Dyusitu, allimpta nillkillampa, manamir chay runataqa riqsinichu! nichpa. Chay urasmi suq gallu kantarqan. 75 Chaymi Pidruqa yuyarqan Jisus kaychina nichqanda: Manaraq gallu kantamptinmi, kimsa kutinda ringi ñigawaq, nichpa. Chaymi payqa ancha syintichpa, sawaman lluqchichpa, ancha waqarqan.
1 [Nuta: Chay tyimpumkunampim Rruma llaqtamanda kaqkuna achka nasyungunampi kamachimkuqllampa. Chaymi isrraylinumkunatampis suq rrumanu gubyirnu kamachiq. Chay gubyirnuqam chutiq Pilatu.] Achimkyamptinnam isrraylinumkunampa yumbay kamachimkuq kuranguna, kamachimkuq ansyanumkunawan tandamkarqanllampa parlanambaq, Jisusta wanchinanllampa. 2 Chaymandaqam Jisusta grillitachpa, amparqanllampa gubyirnu Punsyu Pilatuta intrigaq. 3 Chay intrigamkuq Judasqam rimkachpa Jisusta sintinsyadu wanchinanllampa kamptinqa, ancha syintirqan intrigamkuchqambaq. Chaymi rirqan kamachimkuq isrraylinu kuramkunata, kamachimkuq ansyanumkunata chay 30 yuraq qallay ch'askichqanda kutichiq. Chaymi nirqan: 4 Uchatam rurachqa kani, suq mana nima uchayuq runata intrigamkuchpa wanchinallkillampa, nichpa. Piru chay isrraylinu kuramkunaqam Judastaqa nirqanllampa: Ima kwintayuqtaq nuqallkunaqa kani? Chayqam qamba kwintallki, nichpa. 5 Chaychina nimptinqam, Judasqa umku Dyuspa adurana wasimbi chay qallayta wichumkurqan. Chaymandaqam suq lugarman richpa, urkamkachpa wañurqan. 6 Chay kamachimkuq isrraylinu kuramkunaqam chay qallayta tandachpa, kaychina parlarqanllampa: Kay qallaypaqmi suq runata intrigamkurqan, payta wanchinanchiqllampa. Chaymi liyninchiq mana dijawanchiqchu wichunanchiq ufrindanchiqpa kajunninmanqa, nichpa. 7 Chaychina parlachpallampaqam, kaychina yuyarqanllampa: Chay qallaywanqa randichunllampa chay manga ruraqpa ch'amkranda, pantyun kanambaq, furastirumkuna wañumptin, chaypi pambananchiqllampa, nichpa. 8 Chaymi chay ch'amkraqa kanan diyamkaman chutin Yawar Pamba. Chaqa chay ch'amkrataqam Jisuspa prisyunwan randirqanllampa. 9 Chaychinam kumplirqan Dyuspaq rimaq Jirimiyas kaychina nichqan: Chay isrraylinumkunam suq runampaq pagarachqanllampa prisyunda pallkunalla tandarqanllampa. Chay 30 qallallkunawanmi randirqanllampa mangata ruraq runampa ch'amkranda, Kamachimkuqniy niwachqanchina, nichpa. 11 Gubyirnu Pilatuman Jisusta ampamptinllampa, paypa ñawpambi chayallkamptinmi, chay Pilatuqa kaychina tampurqan: Qamchu isrraylinumkunampa gubyirnunqa kangi? nichpa. Chaymi Jisusqa nirqan: Ari, chay nichqallkichinam kani, nichpa. 12 Kanan chay kamachimkuq kuramkuna, chay kamachimkuq ansyanumkuna kuntrachpa kusasta nimptimbismi, Jisusqa mana nimatampis nirqanchu. 13 Chaymi Pilatuqa Jisusta nirqan: Manachu uyangi kuntrachuchpa, malutach rurachqa kangi, nimptinllampaqa? 14 Chaychina nimptimbismi, Jisusqa mana ni suq palabrata rimarqanchu. Chaymi uyaraqtalla rimkachpaqa, chay gubyirnuqa ancha ispantarqan. 15 Chay Paskwa fyistampim gubyirnuqa watan watan suq prisuta kach'aq, runamkuna rrugamkumptin. 16 Chay tyimpumpim suq runa Barrabas chutiq karsilpi karqan. Paypaqqam yumbay isrraylinumkuna ancha allita yach'arqanllampa. 17 Kanan chay achka runamkuna tandamkachqandam Pilatuqa kaychina tampurqan: Pitam munangillampa kach'anaypaq? ¿Barrabasta ichu kay Jisus Dyus Amkrachqan Wachadur chutiqta? nichpa. 18 Chaqa Pilatuqam intyindichqa karqan: Pallkuna imbidyachpam, kay Jisustaqa intrigawachqallampa, nichpa. 19 Chaychina Pilatu trunumbi tiyallkamptinmi, paypa warminqa suq rrimkaduta kaychina kach'amkurqan: Chay allin runamanqa ama mitimkuychu. Chaqa tutam ancha llamkita paypaq musquchqa kani, nichpa. 20 Piru chay kamachimkuq isrraylinu kuramkuna, chay ansyanumkunawanqam chay achka runata kunachpa, animachichpa, kaychina kunarqanllampa: Pilatutaqa mañayllampa Barrabasta kach'achpa, Jisusta wanchinan, nichpa. 21 Chaymi chaychina nimptinllampaqa, chay gubyirnu Pilatuqa pallkunata tampurirqan: Kay ichkay prisumkunamanda, ¿mayqannindataq munangillampa kach'anaypaqqa? nichpa. Pallkunaqam nirqanllampa: Barrabasta kach'ay! nichpa. 22 Chaymi Pilatuqa tampurirqan: Chaychinaqa, ¿imanachichaqtaq kay Jisus Dyus Amkrachqan Wachadur chutiqtaqa? nichpa. Chaymi yumbaynin nirqanllampa: Kruspi klabay! nichpa. 23 Chaychina nimptinllampaqam, Pilatuqa nirqan: Piru ¿ima malutamir rurachqa? nichpa. Chaychina tampumptinmi, pallkunaqa achwamba ch'uqyarqanllampa: Kruspi klabay! ¡Kruspi klabay! nichpallampa. 24 Chaychina nimptinllampaqam, Pilatuqa yach'arqanna: Maychimka imata nimptiypismi, mana rinllampachu kasuwaq. Piñamkuchpam mastana rinllampa ch'uqyaq. Nuqamannam rinllampa alsamkaq, nichpa. Chaymi yamkuta mañachpa, yumbaypa ñawpambi mamkingunata mayllachpa, nirqan: Kay allin runata qamkuna wanchimptimkiqam, mana uchayuqchu kani nuqaqa. Qamkuna munachqallkita rurayllampa. Qamkunam uchayuqqa ringillampa kidaq, nichpa. 25 Chaychina nimptinmi, yumbay chay runamkunaqa nirqan: Ari! Wanchichpaqam, nuqallkuna wambrallkunawan uchayuqkuna kachaqllampa, nichpa. 26 Chaymi Pilatuqa, Barrabastana kach'achpa, Jisustaqa asutichichpa, pallkunatana intrigarqan, kruspina klabanambaqllampa. 27 Chaymandaqam chay gubyirnumpa suldadungunaqa umku kwartilninman Jisusta amparqanllampa. Chay umkumpiqam yumbay suldadu masingunata Jisuspa rridurninman tandarqanllampa. 28 Chaymandaqam chay suldadumkunaqa Jisuspa kampanda surquchpa, granati kampata rurachirqan, gubyirnuchina kanambaq. 29 Umanmanmi rurarqanllampa suq kuruna kacha limkiduta. Allin ladu mamkimbimpismi suq gubyirnumpa burdunnin layata piskachirqanllampa. Chaychina rurachpaqam, ñawpambina qunqurimkuchpa, ancha burlarqanllampa: Biba isrraylinumkunampa gubyirnun! nichpa. 30 Kanan tuqampachpam, chay piskachichqanllampa burdunwan umambi waqtarqanllampa. 31 Chaychina burlachpaqam, chay kampa rurachichqanllampata surquchpa, mudananda rurachirqanllampa. Chaymandaqam amparqanllampa, kruspina klabanambaq. 32 Kwartilmanda lluqchichpaqam, tingunamkurqanllampa suq runa Simun chutiqwan. Payqam Sirini llaqtamanda karqan. Chay Simundam Jisuspa krusninda amalas umbruchachirqanllampa ampanambaq. 33 Chaychinam ch'ayarqanllampa chay lugar Gulguta chutiqman. Chay Gulgutaqam pallkunampa rimaynimbiqa munan niyta Kalabira Lugar, nichpa. 34 Chaypina kachpaqam, binuta ayaqwan taqlluchpa, Jisusta qurqanllampa umpyanambaq. Piru Jisusqam mallichpa chay binutaqa, mana umpyarqanchu. 35 Chaymandaqam kruspina klabarqanllampa. Kruspi klabachpaqam, chay suldadumkunaqa swirtita rurarqanllampa, Jisuspa mudananda partinamkunanllampa. ?Chaychina ruramptinllampam, kumplirqanna Dyuspaq rimaq kaychina iskibrichqan: Pallkunampuram swirtita rurachpa, mudananda partinamkurqan, nichpa. ? 36 Partinamkuchpaqam, chaypina tiyarqanllampa kwidaq. 37 Chay kruspiqam Jisuspa umamba sawambi suq tablitata rurarqanllampa, imarallkum wañun, nichpa. Chay litramkunaqam niq: Kay Jisusmi isrraylinumkunampa gubyirnun, nichpa. 38 Jisuspa ladumbiqam ichkay ladrungunatampis kruskunampi klabarqanllampa, suqninda allin ladumbi, suqninda ichuq ladumbi. 39 Kanan ladunllampata pasaqkunaqam umanllampata kuyuchichpa, musyachpa niqllampa: 40 Qam Dyuspa adurana wasinda bulachpa kimsa diyampi ruraqqar, qam kimkimki wachamkay. Mayñ, Dyuspa Churin kachpaqa, chay krusmanda ichkimuy, nichpa. 41 Chaychinallam kamachimkuq isrraylinu kuramkuna, Muysispa liyningunata yach'achimkuqkuna, farisiyu dumktrinayuqkuna, kamachimkuq ansyanumkunampis ancha burlachpa, Jisuspaq nirqanllampa: 42 Suqkunataqam wacharqan. Piru pay kimkinllaqam mana atinchu wachamkayta. Mayñ, Isrrayilpa gubyirnun kachpaqa, kanalitan chay krusmanda ichkimunqa, paypi kriyinanchiqllampa. 43 Payqam niwarqanchiqllampa: Dyuspa Churinmi kani. Paypillam yuyamkuni, nichpa. Mayñ, Tayta Dyus payta allimpta kuyachpaqa wachanqa, nichpa. 44 Chay ladrunguna ladumbi kaqkunampismi musyarqanllampa. 45 Chay diyaqam tumkuy pachampi limpu tutayarqan larrdusi urasmanda asta las tras di la tardimkaman. 46 Yaqqana las tris kamptinmi, Jisusqa ancha jwirtita qayamkuchpa, nirqan: Ali, Ali, ¿lama sabamktani? nichpa. Chay nichqanqam isrraylinumkunampa rimaynimbiqa munan niyta: Dyusitu, Dyusitu, ¿imampaqmir sampalaytaqa dijawachqa kangi? nichpa. 47 Chaychina niqta uyachpaqam, chaypi kaqkunamanda wamkinninqa pandachpa, yuyarqan: Dyuspaq chay unay rimaq Aliyastam qayallkan, nichpa. 48 Chay urasmi suqnin kallparqan ich'umputa ampamuq. Ampamuchpaqam puchqu binumpi nuyuchichpa, suq kañampa puntambi rurachpa, Jisuspa chiminman qamirqan chumpanambaq. 49 Piru chay wamkingunaqam nirqan: Chuyay rimkananchiq, mayñ, ¿Aliyaschuch rin chamuq wachaq ichu mana? nichpa. 50 Chaymandaqam Jisusqa suq kutinda jwirtita rimachpa, ispiritunda Dyusman mingachpa, wañurqanna. 51 Chay urasmi Dyuspa adurana wasimba kurtinanqa anaqmanda uramkaman ch'awpi ch'awpi llimkimkarqan. [Nuta: Chay ancha atun rramkta kurtinaqam chay Ancha Santisimu Kwartuta amkraq chay Santu Kwartumanda.] Chay urasmi timblurpis karqan. Chaymi atun rumimkuna limpu partimkarqan. 52 Chaymandaqam Jisus wañuchqanmanda kawsamumptinqa, chay mach'aychina simpultura alma pambamkachqanguna kich'amkarqan. Chaymi Dyuspi kriyiq wañuchqamkunampis achka kawsamuchpa, rirqanllampa Dyus amkrachqan llaqta Jirusalinman. Chay Jirusalimbiqam achka runamkuna, warmimkuna chay kawsamuqkunataqa rimkarqanllampa. 54 Kanan Jisus wañuchqan urasqam kay pachampi timblur karqan. Chaymi chay kwidallkaq kamachimkuq suldaduqa yumbay suldadungunawan chayta rimkachpa, tumkuy chay mas kusaskuna pasamptinqa, ancha manchachpa nirqanllampa: Allibraq kay runaqa Dyuspa Churin kachqa, nichpa. 55 Chaypim achka warmimkunampis karumanda Jisusta champallkarqanllampa. Pallkunaqam Galiliya kachqanmandampacha payta yanampachpa, pullan chamuchqallampa karqan. 56 Chay warmimkunamanda wamkinninqam karqan: Marya Magdalamanda kaq, Jamkubumpa Jusimpa maman Marya, chay Sibidiyumpa churingunampa mamambis. 57 Chay diya byirnis amsayallkamptinnam, suq kampuq runa Jusi chutiq chamurqan Pilatuman. Payqam Arimatiya llaqtamanda karqan. Paypismi Jisuspa yach'amkuqnin karqan. 58 Chaymi payqa Pilatuman richpa, Jisuspa kwirpunda mañarqan. Chaymi Pilatuqa kamachimkurqan, kwirpunda intrigananllampa Jusita. 59 Chaychina Jisuspa kwirpunda intrigamptinqam, suq limpyu trampuwan liyachpa, amparqanna pambaq. 60 Chay Jusiqam suq luma qaqitampa pach'ambi muchuq mach'aychina simpulturata rurachichqa karqan. Chaymi payqa chay simpulturampina kwirpunda kamamkachichpa, suq atun rumiwan kirpachpa, rirqanna. 61 Chay mach'aychinampa ñawpambim tiyallkarqanllampa chay Marya Magdalamanda kaq, tumkayan Maryawan. 62 Qayandin sabaduqam isrraylinu kuramkunampa kamachimkuqninguna farisiyu dumktrinayuqkunawan rirqanllampa gubyirnu Pilatuta niq: 63 Taytitu, yuyanillampam chay alma llullamkuq kawsallkachpa kaychina nichqanda: Wañuchpaqam kimsa diyaman rini kawsamuq, nichpa. 64 Chayri wamkin suldadullkita kamachiy, rinanllampa allita kwidaq chay pambamkachqanman, kimsa diya kumplinangaman. Yach'amkuqninguna imamkich tutamp chamuchpa, chay kwirpunda surquchpa, isrraylinu masiyllampata ingañanmanllampa: Chay wañuchqaqach kawsamuchqana, nichpa. Chaychinaqach'i mas piyur llulla kanman chay punta llulla rimachqanmandaqa, nichpa. 65 Chaychina nimptinllampaqam, Pilatuqa nirqan: Mayñ, chaypim suldadumkuna. Pallkunata ampachpa, may atichqallkimkaman ancha allita kwidachiyllampa, nichpa. 66 Chaychina nimptinmi, pallkunaqa richpa, chay mach'aychina simpulturampa kirpanan rumita ancha allita siñalarqanllampa suq silluwan, yach'ananllampa kunfurmi kachqanda. Chaymi chaypina suldadungunata dijarqan kwidananllampa.
1 Chay samana diya pasamptin, dumingu yaqqana achimkyamptinmi, chay Marya Magdalamanda kaq tumkayan Maryawan rirqanllampa Jisus pambamkachqanman rimkaq. 2 Chay madrugadum ancha jwirti timblur karqan. Chay urasmi Tayta Dyuspa anjilnin syilumanda chamuchpa, chay mach'aychina simpulturampa kirpachqan rumita achuchichpa, sawambi tiyarqan. 3 Chay anjilmi rrilampaguchina achimkchamkurqan. Mudanangunaqam ancha yuraq qasachina llimpyarqan. 4 Kanan chay kwidamkuq suldadumkunaqam chay anjilta rimkachpaqa, ancha manchachpa ch'ampsimkachpa, bulamkachpa, wañuchqachinana kidarqanllampa. 5 Chay anjilqam chay warmimkunata nirqan: Ama manchayllampachu. Nuqaqam yach'ani: Qamkunaqam chay kruspi wañuchqa Jisusta maskallkangillampa, nichpa. 6 Mananam kaypichu. Pay nichqanchinam kawsamuchqana. Chamuyllampa kay umku kamamkachichqanman champamkuq. 7 Utqana richpa, yach'amkuqningunata niyllampa: Jisusqam wañuchqanmanda kawsamuchqana. pawpallkillampatam prubinsya Galiliyaman rillkan. Waqpinam ringillampa rimkaq, nichpa. Chay allimp kaqtallam nichuchqallampa kani, nichpa. 8 Chaymi chay warmimkunaqa chay pambamkachqanmanda dasna lluqchirqanllampa. Chay anjilta rimkachqanrallku manchachpampismi, ancha kuchimkuchpa, kallpaylla rirqanllampa chay anjil nichqanda Jisuspa yach'amkuqningunata willaq. 9 Chaychina rillkamptinllampaqam, Jisusqa chay rillkachqanllampampi das rimkamkuchpa nampallkurqan: Bwinus diyas warmisitamkuna, nichpa. Chaymi pallkunaqa qamimkachpa, ch'amkingunata abrasachpa, Jisusta adurarqanllampa. 10 Kanan Jisusqa pallkunataqa nirqan: Ama manchayllampachu. Achwanri masaychina kaqkunaman riyllampa abisaq, pallkuna rinanllampa prubinsya Galiliyaman. Waqpinam rinllampa rimkawaq, nichpa. [Nuta: Jisus Riyllampa masaychina kaqkunata abisaq nichqanqam munan niyta paypa ampustulningunata rinanllampa abisaq.] 11 Chay warmimkuna nuqallkunaman chamullkamptinqam, wamkin kwidamkuq suldadumkunaqa Jirusalinman richpa, chay kamachimkuq isrraylinu kuramkunata willarqanllampa chay tumkuy ima pasachqambaq. 12 Chaymi chay kuramkuna, kamachimkuq ansyanumkunawan tandamkachpa, kaychina parlarqanllampa: ¡Kananqa imatanam rurachunllampa? nichpa. Chaychina parlachpaqam, suldadumkunata achka qallayta pagarachpa nirqan: 13 Amar rimayllampachu chay pasachqandaqa. Achwan kaychina rimayllampaqa: Nuqallkuna puñunallkamanmi Jisuspa yach'amkuqninguna tutamp chamuchpa, suwawachqallampa paypa kwirpunda, nichpa. 14 Kay nichuchqaychina rimamptimkillampa, gubyirnu yach'amptinqam, nuqallkuna paytaqa kriyichichaqllampa: Chay suldadumkunaqam mana uchayuqchu, nichpa. Chaychinam wachachqallkillampa, qamkunata ama kastigachunan, nichpa. 15 Chaymi chay suldadumkuna qallayta ch'askichpaqa, chay kunachqanchinana rimarqanllampa. Chay nichqandam achka isrraylinumkuna kanangaman parlanllampa. 16 Nuqallkuna chay unsi yach'amkuqninguna Galiliyaman richpaqam, Jisus nichqan lumaman rirqayllampa. 17 Chay lumampi Jisusta rimkachpaqam, adurarqayllampa. Piru wamkin yach'amkuqniy masillkunaqam mana allita kriyichpa yuyarqanllampa: ¿Allimpchuraq pay? nichpa. 18 Chaymi Jisusqa nuqallkunaman qamimkachpa, kaychina niwarqanllampa: Tayta Dyusqam ancha pudirniyuq kamachimkuqta numbrawachqa, syilumpi, kay pachampi kamachimkunaypaq. 19 Chaymi kamachillkillampa, riyllampa yumbay nasyungunaman, runamkunata, warmimkunata yach'achiq, nuqampi kriyichpa, yach'amkuqnillkuna kanambaq. Chay kriyiqkunataqa chutichiyllampa Taytay Dyuspa chutimbi, nuqampa chutiypi, Santu Ispiritumpa chutimbi. 20 Chaychina chutichichpaqar, yach'achiyllampa tumkuy kamachimkuchqayta kasunanllampa. Kay mundu uchyamkamptimbismi, nuqaqa tumkuy tyimpu pullallkillampa rini kaq, nichpa. Kaytallam iskibrillkillampa.
1 Kaychinam qallarin Dyuspa Churin Jisumkristumpa ancha chumaq nutisyanqa. 2 (Jisumkristu manaraq chamumptin kay pachamanmi, Tayta Dyuspaq suq rimaq karqanna. Paymi Isayiyas chutirqan.) Chay Isayiyasmi librumbi iskibrichqa karqan Taytanchiq Dyus Churinda kaychina nichqanda: Qamba puntallkitam rini kach'aq suq runata, qambaq yach'achimkunambaq, runamkuna, warmimkuna chumaqta ch'ayachichunanllampa. 3 Chaymi chunchamkunampi ancha jwirtita rimachpa, kaychina rin yach'achimkuq: Uyamkuyllampa, Siñurninchiqmi rinna chamuq. Chayri chumaqtana kawsayllampa, pay chamumptin, allita ch'ayachinallkillampa. Chaqa uchallkillampata dijachpaqam, alabis allichallkangimanchina paypa ñanninda, nichpa. 4 Chay nichqanchinam allimp karqan. Chaqa Taytanchiq Dyusmi Jisusmanda mas puntata Jwan Chutichimkuqta kach'amurqan, Jisuspaq yach'achimkunambaq. Chay Jwanmi chunchamkunampi runamkunata, warmimkunata niq: Uyawayllampa, uchallkimkunata dijachpa, Tayta Dyusta kasuchpana, chutimkuyllampa, chay uchallkimkunamanda pirdunachunambaq! nichpa. 5 Chaymi Jirusalin llaqtamanda, tumkuy chay prubinsyan Judiyamanda ancha achka runamkuna, warmimkuna chay chunchaman riqllampa, chay Jwanda uyaq. Kanan Jwanqam chay uchanda dijaqkunataqa rriyu Jurdambi chutichiq. 6 Chay Jwanqam chunchamkunampim tiyaq. Kampanqam kamillumpa millwanmanda kaq. Wach'umkunqam qaramanda kaq. Kanan payqam atun churqampkunata (churqamkunata), myil di abijata mimkuchpa kawsaq. [Nuta: Jwamba chay mudananqam Dyuspaq unay rimaqkunampa mudananchina karqan.] 7 Payqam runamkunata yach'achichpa niq: Dyusmandam rinna chamuq suq ancha pudirniyuq maski nuqamanda. Chay ancha kamachimkuqpa ñawpambiqam nuqaqa mana nimachu kachaq. Chaymi nini, manam balinichu ni kriyadunchina llanqamba watunda paskanaypaq. 8 Chaqa nuqaqam qamkunataqa yamkuwan chutichillkillampa. Piru chay ancha baliq chamuchpaqam, chutichichunqallampa Dyuspa Santu Ispiritumba pudirninwan, chay Santu Ispiritunwanna purinallkillampa. 9 Jisusmi prubinsya Galiliyampa Nasarit llaqtanmanda rirqan Rriyu Jurdanman, Jwan chutichinambaq. 10 Chaychina Jwan chutichimptinqam, Jisusqa yamkumanda lluqchillkachpa, anaqman champamkuchpa, syiluta kich'amkallkaqta rimkarqan. Chaymandaqam rimkarqan Dyuspa Santu Ispiritunda suq palumitachina syilumanda urangumuchpa payman chamuqta. 11 Chay urasmi syilumandampacha Tayta Dyus Jisusta nirqan: Ijitu! ¡Qam ancha kuyachqay Churiyqa kangi! ¡Qamwanmi ancha kuchimkuni! nichpa. 12 Chaymandaqam Dyuspa Santu Ispiritun suq chunchaman Jisusta amparqan. 13 Chay chunchampim Jisusqa 40 diyas tumkuyta tiyarqan, chumkaru kita animalkunampa umkumbi. Chaypi kamptinmi, dyabluqa rimkamkurqan tyintanambaq. Chaymandaqam mana nimampi atichpa tyintaytaqa, Jisuspa ñawpanmanda achuchpa rirqan. Chaymandaqam Dyuspa anjilninguna chamuchpa, tumkuy imampi Jisusta yanamparqan. 14 Chay Jwan Chutichimkuqta karsilamptinmi, Jisusqa rirqan prubinsya Galiliyaman, Tayta Dyuspa chumaq nutisyanda yach'achimkuq. 15 Chaymi yumbayta nirqan: Tayta Dyusmi qamkunampa ladullkimanna ch'ayamuchqa, chumaqta kamachichunanllampa. Chayri qamkunaqa mana allimkunata rurachqallkirallku syintichpa, Dyusta rrugayllampa pirdunachunambaq. Kanan paypi kriyichpa, allimpta yuyamkuyllampa: Taytanchiq Dyusmi munan wachawayninchiqta, nichpa. 16 Jisusmi chay prubinsya Galiliyampi ancha atun quch'ampa manyanda rillkachpa, rimkarqan ichkay masampura runamkunata. Suqmi chutirqan Simun. Suqqam chutirqan Andris. Chaypim pallkunaqa atarrayanwan piskallkarqan piskadumkunata. 17 Pallkunatam Jisusqa kaychina qayarqan: Chamuyllampa nuqawan purinallki. Qamkunaqam yach'angina piskadumkunata piskayta. Nuqaqam rini yach'achichuqllampa, runamkunata maskachpa, yach'achinallkillampa, nuqampi kriyinanllampa, nichpa. 18 Chaymi pallkunaqa chay uras atarrayangunata dijachpa, Jisuswanna rirqan. 19 Rillkachpallampa, achla waqman ch'ayallkachpaqam, Jisusqa ichkay runa masta rimkarqan. Pallkunaqam Sibidiyumpa churinguna karqan. Suqnin chutirqan Jwan; suqqam Jamkubu. Pallkunaqam yamkumpi puriq barkumba umkumbi atarrayangunata allichallkarqan. 20 Pallkunatampismi Jisus qayarqan, paywan pulla purinambaqllampa. Chaymi chay uras das pallkunaqa taytanda dijachpa, rirqanllampa Jisuswan. Taytanqam chay barkumpiqa kidarqan wamkin yanampamkuqninwan. 21 Jisusqam chay runamkunawan Kampirnawun llaqtaman ch'ayarqan. Chay llaqtampiqam samana diyampi sinaguga wasiman yallkuchpa, chaypi yach'achimkurqan. 22 Chaymi Jisus yach'achimkumptinqa, chay uyaqkunaqa ancha ispantachqata uyarqanllampa. Chaqa Jisusqam ancha yach'ayniyuq kamachimkuq kachpa, mana yach'achimkuqchu Muysispa liyningunata yach'achimkuqchina. 23 Chay sinaguga wasimpiqam suq runampis karqan. Paypiqam suq millanaypaq dyablumpa ispiritun tiyaq. Chaymi qayach'amkurqan: 24 A! Qam Jisus Nasaritmanda kaq, ¿ima kwintayuqtaq kangi piñachiwanallkiqa? ¿Ima, kayman chamuchpachu, ringi chingachiwaqllampa? ¡Nuqaqam riqsillki! ¡Qamqam Dyuspa chay santu Churin kangi! nichpa. 25 Chaymi Jisusqa chay dyabluta anyachpa nirqan: Uyaray! ¡Lluqchiy kay runamanda! nichpa. 26 Chaychina qatimptinqam, chay dyabluqa chay runata atamkimkunata quchpa, ancha qayach'amkuchpa, umkunmanda lluqchirqan. 27 Kanan chayta rimkachpaqam, chay runamkunaqa ancha ispantachqata champarqanllampa Jisustaqa. Chaymandaqam pallkunampura kaychina parlarqanllampa: Imataq kayqa? ¿Ima laya muchuq yach'achimkuqtaq, ima laya kamachimkuqtaq? ¡Rimkay, paypaqqam mana nimachu waq saqra dyablumkunaqa! ¡Chaymi kamachimptinqa, das kasunllampa! nichpa. 28 Jisus rurachqambaqmi das parlarqanllampa chay prubinsya Galiliyampa tumkuy lugarningunampi. 29 Lluqchichpa chay sinaguga wasimandaqam, Jisusqa chay Jamkubuwan, Jwanwan rirqan Simumba, Andrispa wasinman. 30 Chaypim Simumba swigranqa jibriwan kamampi karqan. Chaymi Jisusta nirqanllampa: Simumba swigranmi qachyaq, nichpa. 31 Chaymi Jisusqa chay warmiman qamimkachpa, mamkinmanda rambachpa, chayachirqan. Chaychina chayachimptinmi, das kach'amkarqan. Chaymi chay warmiqa chay uras pallkunataqa qararqan. 32 Chay diya rumpay saqallkamptinmi, ancha achka runamkuna, warmimkuna tandamkarqan Jisusman. Pallkunaqam ampamurqan yumbay qachyaqningunata, Jisus kach'amkachinan. Dyablumkuna kamachichqan runamkunatampis ampamurqanllampa, dyablumkunata pallkunamanda wichumkunambaq. 33 Chay llaqtampi yumbay tiyaqkunam tandamkachpa, Jisus kallkachqan pungumpi undamkarqanllampa. 34 Jisusqam chaypiqa kach'amkachirqan tumkuy laya nanaywan kaqkunata. Suqkunamandampismi dyablumkunata qatirqan. Chay dyablumkunaqam yach'arqanllampa: Jisumkristum Dyuspa Churin, nichpa. Piru Jisusqam mana nimatampis dijarqanchu, paypaq rimananllampaqa. 35 Qayandin yaqqana achimkyallkamptinmi, Jisusqa atarichpa, rirqan suq chunchaman, Tayta Dyusman mañamkuq. 36 Chay chunchampi kallkamptinmi, Simun Pidruqa chay suqkunawan richpa payta maskaq, chaypi tarirqanllampa. 37 Tarichpaqam, Jisusta nirqanllampa: Yumbaymi maskachullkangi, nichpa. 38 Piru Jisusqam nirqan: Achwan amku waq sirka llaqtamkunaman, waqpimpis yach'achimkunaypaq. Chaqa chaypaqmi chamuchqaqa kani, nichpa. 39 Chaymi chay prubinsya Galiliyampa tumkuy llaqtangunaman ch'ayachpaqa, sinaguga wasimkunaman yallkuchpa, yach'achimkurqan. Dyablumkunatampismi runamkunamanda qatirqan. 40 Suq diyam suq ismullkaq kwirpuyuq runa Jisusman chamuchpa, ñawpambi qunqurimkuchpa rrugarqan: Taytitu! Qamqam ancha pudirniyuq kangi. Chayri qam munachpaqa, atingi kach'amkachiwayta, nichpa. 41 Chaymi Jisusqa chay millanaypaq runata ancha llamkimpachpa, paypa sawanman mamkinda rurachpa nirqan: Nuqam munani kach'amkachichuyta. Kanalitan kach'amkay, nichpa. 42 Chayta nimptinllam, chay ancha fiyu qachyayqa kwirpunmanda das chingarqan. 43 Chaymandaqam Jisusqa chay runata ancha kunarqan: Amamkich pitampis ni maypimpis parlachimkungichu. Riy kuramanlla, allita rimkachunan. Ufrindallkita ampay Dyuspa adurana wasinman, Muysis kamachimkuchqanda ruranallki, yumban yach'anambaq: Waq runaqam kach'amkachqana, nichpa. 45 Piru waq runaqam mana rurarqanchu Jisus kunachqandaqa. Achwanmi payqa richpa, yumbayta parlachirqan: Jisusmi kaychina allita yanampawachqa, nichpa. Chaymi Jisusqa manana atirqanchu llaqtamkunampi yach'achimkuyta, ancha achka qachyaqkuna maskamptinllampa. Chaymi sawa chunchamkunampina puriq. Chay chunchamkunampi kallkamptimbismi, achka runamkuna, warmimkunaqa yach'arqanllampa. Chaymi Jisuspa imkinda ancha achkamkuna tumkuy maymanda chay chunchaman rirqanllampa.
1 Suq diyam Jisusqa kutirirqan chay Kampirnawun llaqtaman. Chaymi runamkunaqa yach'achpa: Chaypinam, nichpaqa, ancha achka tandamkarqan, Jisusta rimkananllampa. Chayrallkum Jisus kachqanman undamptinllampa, manana ayparqanchu chay wasiqa. Chaymi manana karqanchu lugar ni sawa pungumpi. Umkumpiqam Jisusqa Tayta Dyus kunachqanda yach'achimkullkarqan. 3 Chay kachqanmanmi ch'usku runamkuna suq runa wañuchqachina kwirpuyuqta parampi ampamurqanllampa. 4 Piru chay wasiman ch'ayachichpaqam, mana atirqanllampachu irpuyta umku Jisus kachqanman, ancha unda runamkuna kamptin. Chaymi wasimpa sawanman lluqchichpa, tichunda uch'kuchpa, chay uch'kutana chay qachyaqtaqa waskamkunawan parambi ichkichirqanllampa Jisuspa umku ñawpanman. 5 Jisusqam chayta rimkachpaqa, yuyarqan: Ancharaq nuqampi yuyamkunllampa, nichpa. Chaymi chay qachyaqtaqa nirqan: Ijitu, pirdunallkim uchallkimkunamanda, nichpa. 6 Piru chay umku wasimpiqam Muysispa liyningunata yach'achimkuqkuna tiyachpa, uyamkullkarqanllampa. Pallkunaqam yuyarqan: 7 Kay Jisusqam yanqa runalla. ¿Imarallkutaq kaychinaqa nin? ¡Chaqa rimkay! Dyuschina tumkuchpam, Tayta Dyusta burlallkan. Manam ni pimpis atinchu uchamkunata pirdunamkuytaqa. Tayta Dyusllam chaytaqa atin rurayta, nichpa. 8 Jisusqam yach'arqanna chay runamkuna yuyachqandaqa. Chaymi pallkunata tampurqan: Imarallkutaq qamkunaqa chay mana baliqkunata yuyallkangillampa? 9 Mayñ, ¿imataq mas trabajus ruranaypaq, ninaypaq: Uchallkimkunatam pirdunallki ichu ninaypaq: Nuqam kach'amkachillki; atarichpa, parallkita tandachpa, riy, nichpa? 10 Kananqam rini rimkachichuq yach'anallkillampa: Tayta Dyus Jisusta pudirniyuqta numbrachqa, runamkunata uchangunamanda pirdunanambaq, nichpa. Chaymandaqam, chay runa wañuchqachina kwirpuyuqta nirqan: 11 Atarichpa, parallkita tandachpa, ampachpa, riyna wasimkiman, nichpa. 12 Chaychina kamachimptinllam, chay runaqa dasna atarirqan. Chaymi paranda tandachpa, yumbay champallkamptin, ñawpanllampata rirqan. Chay champaqkunaqam chayta rimkachpaqa, ancha ispantarqanllampa. Chaymi Dyusta ancha alabachpa nirqanllampa: Manam nunka kay layataqa rimkachqachu kanchiqllampa! nichpa. 13 Chaymandaqam Jisusqa ririrqan chay ancha atun quch'ampa manyanman. Chaymambismi ancha achka runamkuna, warmimkuna tandamkarqan. Chaymi chaypimpis payqa pallkunata yach'achirqan. 14 Chaymanda riqchina suq lugarta pasaqchinam rimkarqan suq runa Libi chutiqta. [Nuta: Chay Libillam Matiyumpis chutiq.] Payqam Alfiyumpa churin karqan. Chay Libiqam tiyallkarqan kuntribusyun kubramkunan dispachumbi. Payta rimkachpaqam, Jisusqa kaychina qayarqan: Chamuy, amku nuqawan, nichpa. Chaymi Libiqa chay uras atarichpa, Jisuswanna rirqan. 15 Chaymandaqam Jisusqa yach'amkuqningunawan rirqan Libimpa wasinman mimkuq. Chaypim karqanllampa wamkin kuntribusyunda kubramkuqkuna, suq laya uchayuq runamkunampis. Chay uchayuqkunaqam chay masampilla tiyachpa, Jisuswan pulla mimkullkarqanllampa. Jisuspa imkinda achka riqkunampismi chaypiqa karqan. 16 Chaymi Muysispa liyningunata wamkin yach'achimkuqkuna, wamkin farisiyu dumktrinayuqkunaqa chayta rimkachpa, Jisuspa yach'amkuqningunata tampurqanllampa: Imarallkum Jisusqa mimkun waq kuntribusyunda kubramkuqkunawan, waq uchayuq runamkunawanqa? nichpa. 17 Piru Jisusqam uyarqan chay runamkuna nichqandaqa. Chaymi pallkunataqa nirqan: Mana qachyaqkunaqam mana munanchu ambimkuqtaqa. Qachyaqkunallam munan ambimkuqtaqa. Chaymi nuqaqa chamuchqa kani kay uchayuqkunata wachanaypaq. (Chayrallkum pallkunawan kani.) Piru manam chamuchqachu kani wachaq allita ruraq tumkuqkunataqa, nichpa. 18 Suq diyam Jwan Chutichimkuqpa yach'amkuqninguna, ayunallkarqanllampa. Chay farisiyu dumktrinayuqkunampismi ayunallkarqanllampa. Chaymi chayta rimkaqkunaqa Jisusman richpa, payta tampurqanllampa: Jwan Chutichimkuqpa yach'amkuqninguna, chay farisiyumkunampis ayunanllampa. ¿Imarallkutaq qamba yach'amkuqnimkimkuna mana ayunanllampachu? nichpa. 19 Chaymi Jisusqa pallkunata nirqan: Manchu suq runa kasarachpaqa, kumpañirungunata kumbidan chamunambaq fyistanman. Chay kasaraq runa kumpañirungunawan fyistampi kuchimkuqkunaqam mana ayunanchu, ¿manachu? Chaychina yumpaymi nuqampa kumpañirullkunampis pullay kachpaqa, manaraq ayunanllampachu. 20 Piru suq diyam (ch'iqniwaqkunaqa) pallkunamanda rinllampa amkrawaq. Chaypinam pallkunampis rinllampa ayunaqqa. 21 Manam pimpis mawka trampunda muchuq trampuwanqa rrimindanchu. Chaqa muchuq trampuwan rrimindamptinqam, chay muchuq rritasuqa qandichpa, achwamba llimkin mawka tramputaqa. 22 Chaychinallam llullu binutampis rurachpa, mana wichunchiqchu mawka qara taligaman. Chaqa chay llullu binuqam qarwachpa, pach'yachin mawka qara taligataqa. Chaychinam pulla qasachamkan binuwan qara taligaqa. Qara taligampismi llimkimkan. Chayri llullu binutaqa muchuq qara taligamkunaman wichuchun, chay qara chutamkachpa, ama pach'yanambaq. [Nuta: Jisus chay muchuq yach'achimkuchqanqam chay llullu binuchina. Isrraylinumkunampa chay unay kustumbringunaqam chay mawka qara taligachina.] 23 Suq samana diyampim Jisusqa yach'amkuqningunawan tarpudumkunampa umkunda rillkarqan. Chaymi chay yach'amkuqninguna mallaqnachpa, pasaqchina trigumkunampa ispigangunata pitimkuchpa, qaqumkuchpa, mimkurqanllampa. 24 Chaypaqmi farisiyu dumktrinayuqkunaqa Jisusta nirqanllampa: Muysismi kamachimkuchqa, samana diyampi ama trabajananchiq. ¡Rimkay! Chay yach'amkuqnimkimkunaqa trabajallkanllampa. Manam kasunllampachu Muysis nichqandaqa, nichpa. 25 Chaymi Jisusqa chay farisiyumkunata nirqan: Ima, manachu liyichqallampa kangi chay unay gubyirnu Dabid kumpañirungunawan mallaqnachpa rurachqandaqa? 26 Chaqa payqam yallkurqan chay unay karpamanda adurana wasiman mimkunata maskaq. Chay tyimpumpim chay kura Abyatarqa mas kamachimkuq isrraylinu kura kachpa, chay adurana wasita kwidaq. Chay adurana wasimpi ufrinda tandamkuna kaqmi kuramkunampaqlla karqan. Piru chay Dabidqam mana dirichuyuq kachpampis, chay ufrinda tandamkunata mimkuchpa, chay kumpañirungunatampis qurqan mimkunambaqllampa. 27 Jisusqam nirqambis: Dyusqam samana diyataqa runamkunampaq rurarqan, pallkunata yanampanambaq. Manam rurarqanchu samana diyataqa, runamkunampa patrunninchina kanambaqqa. 28 Nuqaqam Dyusmanda Chamuq Runa kachpa, samana diyampa dwiñun kani. Chaymi atini kamachimkuyta: Kaymi alli ichu kayqam mana allichu, samana diyampi rurananchiqqa, nichpa.
1 Suq samana diyampim Jisusqa ririrqan sinaguga wasiman. Chaypim karqan suq qandichqa mamkiyuq runa. 2 Kanan wamkinqam Jisustaqa mana challkuq champarqanllampa: ¿Ima, kay samana diyampinachu rin kach'amkachiq kay qandichqa mamkiyuqtaqa? Chayta ruramptinqa dimandachun, nichpa. 3 Jisusmi chay qandichqa mamkiyuqtaqa nirqan: Atarichpa, chamuy kay ch'awpiyllampaman, nichpa. 4 Chaymi chay runa ch'awpiman rimptinqa, Jisusqa yumbay chay runamkunata tampurqan: Tayta Dyusqa, ¿imatam kamachiwanchiq, samana diyampi rurananchiqqa? ¿Allita rurananchiq ichu maluta? ¿Munanchu runampa bidanda wachananchiq ichu wanchinanchiq? nichpa. Chaychina Jisus tampumptinqam, chay runamkunaqa uyaramplla (uyaralla) kidarqanllampa. 5 Piru Jisus nichqandaqam mana nimatampis munarqanllampachu intyindiytaqa. Chaymi Jisusqa ancha champachqanchina malaganayachpa, chay qandichqa mamkiyuq runataqa nirqan: Chutay mamkimkita, nichpa. Chaymi chay runa mamkinda chutamptinqa, dasna allinyarqan. 6 Chayta rimkachpam, chay farisiyu dumktrinayuqkunaqa lluqchichpa, gubyirnu Irudispa partidungunawan parlarqanllampa, Jisusta wanchinanllampa. 7 Jisusmi yach'amkuqningunawan ririrqan chay ancha atun quch'ampa manyanman. Chaypi ancha chumaq milagrumkunata rurarimptinmi, achka runa, warmi yach'achpa, chay prubinsya Galiliyampa llaqtangunamanda tandamkarqanllampa Jisusman. Chamurqambismi prubinsya Judiyamanda, Jirusalin llaqtamanda, Idumiyamanda, Tirumanda, Sidunmanda, rriyu Jurdamba waq ladun chimbanmandampis Jisusta rimkaq. 9 Chay runamkuna, warmimkunam ancha undarqan Jisus kachqanman. Chaymi yumbay qachyaqkuna kach'amkanambaq kumsanamkuypa, waqmanda kaymanda chutamkachpa, Jisuspa kampanda munachpa llamkayta, ancha kich'kiyachirqanllampa paytaqa. Chaymi Jisusqa yach'amkuqningunata kamachirqan, yamkumpi puriq barkuta ampamunanllampa, chay barkumpi tiyachpa yach'achimkunambaq. 11 Kanan dyablumpa ispiritunwan puriqkunam Jisusman chamuchpa, ñawpambi qunqurimkurqanllampa. Pallkunampim dyablumkunampa ispiritunguna tiyarqanllampa. Chay dyablumkunaqam Jisusta rimkachpaqa qayach'amkuqllampa: Qamqam Dyuspa Churin kangi! nichpa. 12 Piru Jisusqam chay dyablumkunataqa anyarqan uyarananllampa, ama chaychina rimananllampa. 13 Jisusqam suq lumampa sawanman lluqchichpa, yach'amkuqningunata qayarqan, payman chamunanllampa. 14 Rimptinllampaqam, pallkunamanda amkrarqan dusi yach'amkuqningunata, paywan pulla purinanllampa, suq lugarkunaman kach'amptin, pay nichqanda suqkunata yach'achinanllampa. [Nuta: Chay dusi amkrachqangunaqam ampustulninguna chutiqllampa.] 15 Pallkunataqam ancha pudirniyuqta rurarqan, atinambaqllampa qachyaqkunata kach'amkachiyta, atinambaq dyablumkunata runamkunamanda qatiyta. 16 Chay dusi amkrachqan runamkunaqam kallkuna karqan: Suqmi chutiq Simun. Paypaqllam Jisumkristuqa nirqan: Paylla Pidrumpis chutinqa, nichpa. 17 Ichkayqam karqan Sibidiyumpa churinguna Jamkubuwan masan Jwan. Pallkunampaqmi Jisumkristu nirqan: Buwanirjismi chutinqallampa, nichpa. Chay chutinqam rimaynimbiqa munan niyta: Lanyachina rimayniyuqkuna, nichpa. 18 Chay suqkunaqam chutiqllampa: Andris, Filimpi, Bartulu, Matiyu, Tumas. Suqqam karqan Alfiyumpa churin Jamkubu. Suqqam karqan Tadiyu. Suqqam karqan suq Simun. Payqam isrraylinu Kananista partidumanda karqan. 19 Suqqam karqan Judas Iskaryuti. Chay Judasmi suq tyimpumanda Jisusta randimkurqan. 20 Jisusmi chay yach'amkuqningunawan yallkurqan suq wasiman. Chaymambismi, ancha achka runa, warmi tandamkarqan. Chaymi Jisusqa yach'amkuqningunawan chay chamuqkunata yach'achichpa, yanampachpa, mana ni atirqanllampachu mimkuyta. 21 Chaychina kallkamptinllampam, suqkuna rimarqanllampa: Jisusqach lumkuyachqa, nichpa. Chaymi Jisuspa ayllunguna chayta uyachpaqa, rirqanllampa Jisusta ampamuq wasinman. 22 Kanan Muysispa liyningunata yach'achimkuqkunam Jirusalin llaqtamanda Jisusman chamuchpa, kaychina rimarqanllampa: Chay mas kamachimkuq dyablu Bilsibumpa ispiritunqam Jisuspi tiyan. Chaymi chay Bilsibu yanampamptin, payqa atin dyablumkunata runamkunamanda qatiyta. Manaqa manam atinmanchu qatiyta, nichpa. 23 Chaymi Jisus chayta yach'achpaqa, chay wachan rimaqkunata qayachpa, kay kumparasyunda rurachpa nirqan: Chay dyabluqam mana nunka atinmanchu pay mismuqa qatimkayta suq runamandaqa. 24 Chaychinallam suq nasyumbi tiyaqkunampis pallkunampura pilyachpa, wanchinamkuchpaqa, ¿imachinam atinmanllampa kawsaytaqa? 25 Chaychinallam suq ayllumpi pallkunampura wanchinamkuchpaqa limpuna chinganmanllampa. 26 Chaychinallam dyablumpis mana munanchu pay mismu wanchimkaytaqa. Chaychina wanchimkachpaqach'i, chinganmanna. 27 Kaytampis uyayllampa: Suq ladrunqam mana dasqa atinchu quch'iyta imangunata suq ancha wampu runataqa. Achwanmi puntata chay wampu runawan pilyan binsinangaman. Chaychina binsichparaqmi, alli alli ch'aqnachpa, atin imangunata quch'iytaqa. (Chay runachinam nuqampis dyabluta binsichpa, runamkunata, warmimkunata quch'ini wachanaypaq, nichpa.) 28 (Dyuspa Santu Ispiritunmi Jisumkristuta ancha yanamparqan achka milagrumkunata ruranambaqqa.) Piru wamkin runamkunaqam Jisuspaq rimallkarqanllampa: Jisustaqam dyablu yanampallkan, nichpa. Chaymi Jisumkristuqam chay rimaqkunataqa nirqan: (Chaychina kuntrayta rimachpaqam, Dyuspa Santu Ispiritumbaq dyablum nillkangillampa.) Allimptam nillkillampa, runamkuna allimpta mañamkumptinmi, Taytanchiq Dyus tumkuy laya uchangunata, mana baliq rimachqangunata rin pirdunaq. Piru mayqan runa Santu Ispiritumbaq nimptin: Chayqam dyablu nichpaqam, chay runataqa Taytanchiq Dyusqa mana nunka rinchu pirdunaq, nichpa. 31 Jisus chay wasimpi kallkamptinmi, maman masanguna chayman ch'ayachpa, sawamandalla Jisusta qayachirqan. 32 Chaymi Jisuspa ladumbi tiyallkaqkunaqa paytaqa nirqanllampa: Mamallkiwan masallkimkunach sawampi chuyachullkangillampa, nichpa. 33 Chaymi Jisusqa nirqan: Pitaq mamay? ¿Pitaq masallkunaqa? 34 Chaymandaqam rridurnimbi kaqkunata champachpa nirqan: Qamkunam mamay, masallkunaqa kangillampa. 35 Chaqa Tayta Dyus munachqanda kasuqkunam mamay, masallkuna, panillkunaqa, nichpa.
1 Suq diyam Jisus ririchpa chay atun quch'ampa manyanman, yach'achimkurirqan. Chaymambismi ancha achka runa, warmi tandamkarqan, payta uyanambaq. Chaymi kich'kichamptinllampa, Jisusqa yamkumpi puriq barkuman lluqchichpa, barkumandana pallkunata yach'achirqan. Pallkunaqam manyampilla kidachpa uyarqanllampa. 2 Chaymi Jisusqa achka laya kumparasyunda rurachpa, kaychina yach'achimkurqan: 3 Mayñ, kayta uyawayllampa: Suq runam rirqan tarpumkuq. 4 Chaymi tarpumkuchpa, simillanda chimkwamptinqa, wamkin simillaqa ñanman ichkirqan. Chay simillitatam pichqumkuna chamuchpa limpu pallarqan. 5 Wamkin simillaqam kaskajuman ichkirqan. Chaymi chay simillaqa sawampilla kachpa, wayralla wiñarqan. Piru kaskaju kachqanrallkum, mana ch'umpamkurqanchu umkumkamanqa. 6 Chaymi rumpayamptinqa, das chamkirqan, mana umkumkaman ch'umpamkuchqanrallku. 7 Wamkin simillaqam kachamkunampa umkunman ichkirqan. Chaymi wiñallkamptinqa, kachamkuna maqamptin, limpu chingarqan. Manam nimatampis puqurqanchu. 8 Piru wamkin simillamkunaqam allin allpaman ichkirqan. Challkunaqam chumaqta wiñachpa, allita puqurqan. Wamkinqam kada simillita 30 granusta puqurqan. Wamkinqam 60 granusta puqurqan. Piru wamkinqam syin granusta puqurqan. 9 ¡Chayri qamkuna rinriyuqkuna, allita uyawayllampa kay nichuchqayta! 10 Chay achka runamkuna rimptinqam, Jisusqa chay dusi amkrachqangunawan, wamkin yach'amkuqningunawan kidarqan. Chaymi pallkunaqa Jisusta tampurqanllampa: Imarallkutaq kumparasyunwan yach'achimkungi? Chay nichqallkiqa ¿imam munan niyta? nichpa. 11 Chaymi Jisusqa nirqan: Taytay Dyuslla yuyachqandam qamkunataqa yach'achillki: Kaychinam ancha chumaqta rini kamachimkuq, nichpa. Piru manam balinchu chay mana munaq kriyiqkuna chaypaq yach'ananllampaqa. 12 Chaymi achka kumparasyunwanlla yach'achimkuni, pallkunaqa champachpa, uyachpampis, ama allita intyindinanllampa. Chaqa manam balinchu, pallkuna amalas nuqampi kriyichpa, uchangunamanda pirdunadu kanambaqqa, nichpa. 13 Jisumkristum chay yach'amkuqningunata nirqambis: Ima qamkunampischu mana intyindichqa kangi chay kumparasyundaqa? Chaychina mana intyindichpaqa, ¿imachinataq ringillampa intyindiq suq kumparasyungunawan yach'achimkumptiyqa? 14 Suq runa Dyus nichqanda yach'achimkuqqam chay tarpumkuq runachina. Chaymi yach'achimkuchqanqa chay similla chimkwachqanchina. 15 Wamkin runamkunaqam ancha angu chunquyuqkuna chay angu ñanchina. Chaymi dyabluqa pallkunaman richpa, uyamkuchqanda limpu qunqachin. Chaqa dyabluqam chay pichqumkuna simillata ñanmanda pallaqkunachina. 16 Chay kaskaju ch'amkraqam yach'achiwanchiq chay das disanimamkaqkunampaq. Chaqa pallkunaqam Dyuspa chumaq nutisyanda uyachpaqa, kuchimkuchpa das kriyinllampa. Piru manam allitachu nuqampiqa yuyamkunllampa. Chaymi nuqampi kriyichqanrallku qasachadu kachpaqa, das disanimamkachpa, manana munanllampachu nuqampi kriyiytaqa. 18 Wamkin runamkunaqam chay kachampa umkumbi tarpudu wiñaqkunachina. Chaqa pallkunaqam Dyus nichqanda uyachpa, das ch'askinllampa. 19 Chaymandaqam kay mundumpa imangunampaq llamkichpa, tumkuy imayuq munachpa kayta, Dyusta das qunqanllampa. 20 Piru wamkinqam Dyus nichqanda uyachpa, ch'askichpaqa, allimpta paypi yuyamkunllampa. Chaymi pallkunaqa chay similla allin allpampi wiñaqkunachina. Chaqa Dyusta kuyachpa, kasuchpam, chumaqta kawsanllampa. Chaymi pallkunaqa chay similla 30 puquqkunachina. Wamkinninqam Dyusta masta kuyachpa, chay similla 60 puquqkunachina. Llalli wamkinqam Dyusta masta kuyachpa, chay similla syin puquqkunachina. 21 Kay kumparasyunda rurachpampismi, Jisusqa yach'achimkurqan: Mayñ, ¿suq michataqachu ruranchiqman suq kajumba waranman ichu suq kamampa waranman? Manñm. Achwanmi altumpi ruranchiqqa, allita achimkchamkunanqa. 22 Chaychinallam yumbay pamkadu kaqqam suq diyaqa manana pamkaduchu rin kaq. Achwanmi achka runamkuna chay mana yach'achqangunata rinllampa yach'aq. 23 Chayri qamkuna rinriyuqkunaqa, allita uyawayllampa kay nichuchqayta, nichpa. 24 Chaymandaqam kaychinampis yach'achimkurqan: Allita kasuyllampa kay uyamkuchqallkita. Qamkuna allita kasuwamptimkiqam, Taytanchiq Dyusqa masta rin yach'achichuqllampa. 25 Allita uyawayllampa, chay allita yach'amkuqtam Dyusqa masta rin yach'achiq. Piru chay mana allita uyamkuqtaqam chay achla yach'amkuchqandaqa limpu rin qunqachiq. 26 Kaychinampismi Jisusqa yach'achimkurqan: Taytanchiq Dyusta ancha achka runamkuna, warmimkuna chumaqta kasuchpaqam, suq tarpuduchina rin kaq. Chaqa suq tarpumkuqqam simillanda ch'amkrambi tarpuchpaqa, chaypina dijan wiñanambaq, ¿manachu? 27 Chaymandaqam chay dwiñuqa ch'amkranmanda richpaqa, puñun, rimkch'amkan. Manam yach'anchu, imachinam wiñan chay simillaqa, nichpaqa. 28 Piru chay simillaqam gustunlla wiñachpa, allpamanda lluqchin. Chaychina wiñachpa atunyachpaqam ispiganna. Chaymandaqam chay muritungunaqa qarwanna. 29 Chaychinam kusicha tyimpuqa ch'ayamunna. Chaymi runamkuna rinna syigaq. [Nuta: Chaychina yumpaymi Dyuspaq yach'achimkumptinchiq, mas achka runamkuna, warmimkuna payta kasullkan.] 30 Jisusqam nirqambis: Ima mas kumparasyunda rurachpam, atini qamkunata yach'achichuyta: Taytanchiq Dyustam ancha achka runamkuna, warmimkuna chumaqta rin kasuq, nichpa? 31 Chayqam ñampuchpa murunchina rin kaq. Chaqa chay ñampuchpa murunqam yumbay simillamanda mas uchulita, ¿manachu? 32 Piru allpampi pambamkachpaqam, uchulita kachpampis, atunda wiñan yumbay yuramkunata binsichpa. Kanan ancha achkatam rimkramkun. Chay rimkrangunampim pichqatumkunampis tiyachpa llandumkun. [Nuta: Chay ñampuchchinam Dyusta kasuqkunaqa achlita kachpampis, ancha rinllampa achkayaq.] 33 Jisusmi chaychina achka kumparasyunwanlla yach'achimkurqan, chay uyaqkuna may intyindinangaman. 34 Piru yach'amkuqningunatallam intyindichiq chay kumparasyungunampaq. 35 Chay diyallam yaqqana tutayallkamptin, Jisusqa yach'amkuqningunata nirqan: Amku kay atun quch'ampa waq ladu chimbanman, nichpa. 36 Chaymi pallkunaqa, runamkunata dijachpa, yamkumpi puriq barkumpi Jisusta amparqanllampa. Wamkin barkumkunampimpismi runamkunaqa pullan rirqan yampachachpa. 37 Piru rillkamptinllampam, ancha jwirtita wayrarqan. Chaymi yamkuqa ancha maqchimkamuchpa chay barkuman undallkarqanna. 38 Chay barkumpiqam Jisusqa imki ladumpi suq sawanampa sawambi umanda rurachpa puñullkarqan. Chaymi chay yach'amkuqningunaqa utqaymaya rimkch'achichpa, Jisusta nirqanllampa: Ay, Taytitu! ¡Yamkumanmi saqallkanchiqna! ¿Ima, manachu nuqallkunata llamkimpawangi? nichpa. 39 Chaymi Jisusqa atarichpa, wayrata, yamkuta jwirtita rimachpa kamachirqan: Qasillay! nichpa. Chaychina kamachimptinqam, chay wayra, tumkuy chay yamku maqchimkamullkaq limpu qasillarqan. 40 Chaymandaqam chay yach'amkuqningunata nirqan: Imarallkutaq qamkunaqa mancharqallkillampa? ¿Ima manachu allita nuqampi yuyamkungillampa? nichpa. 41 Chaymi chay yach'amkuqningunaqa ancha manchachqata paypura kaychina parlarqanllampa: Ima laya runataq kay Siñurninchiqqa? ¡Rimkay, wayrawan yamkuta kamachimptinqa, das kasun! nichpa.
1 Chaychina richpaqam ch'ayarqanllampana waq chimba Gadara lugar chutiqmanna. 2 Chay yamkumpi puriq barkumanda lluqchimptinllampaqam, Jisuspa ñawpanman kallpaylla ch'ayarqan suq lumku runa dyabluwan puriq. 3 Chay runaqam pantyungunampi tiyaq. Kanan ancha jwirsayuqmi kaq. Chaymi kadinamkunawan watachpampis, mana pimpis atiqchu sujitaytaqa. 4 Sujitananllampa yuyachpam, kutin kutin mamkingunamanda ch'amkingunamanda kadinamkunawan ch'aqnaqllampa. Chaychina ruramptinllampampismi, chay runaqa kadinamkunata limpu pitichpa, maytampis riq. 5 Chay runaqam punchawnindin, tutampnindin qaqamkunampi, pantyungunampi qayach'amkuchpa puriq. Kanan rumimkunawanmi paylla chankamkachpa limpu chuqrimkaq. 6 Chay runaqam karumanda Jisusta rimkachpa, kallpaylla richpa, ñawpambi qunqurimkurqan. 7 Chaymi Jisusqa nirqan: Qam, dyablu mana baliq, lluqchiy kay runamanda, nichpa. Chaychina nimptinqam, chay dyabluqa kaychina qayach'amkurqan: Imampaqmi nuqamanqa mitimkungi qam anaq altu Dyuspa Churinqa? ¡Yuch'allku, amar qasachawaychu! nichpa. 9 Chaychina qayach'amkuchpa nimptinqam, Jisusqa tampurqan: Imataq chutingi? nichpa. Chaymi dyabluqa nirqan: Nuqallkunaqam chutini Manada, ancha achka kachqayllamparallku, nichpa. 10 Chay dyablumkunaqam kutin kutin Jisusta rrugarqan: Yuch'allku, kay lugarmandaqa ama qatiwayllampachu, nichpa. 11 Chay qaqampa ladumbim ancha achka kuchimkuna mimkullkarqan. 12 Chaymi dyablumkunaqa Jisusta rrugarqan: Kach'awayllampa, waq kuchimkunaman yallkunayllampa, nichpa. 13 Chaymi Jisusqa nirqan: Mayñ, riyllampa, nichpa. Chaymi dyablumkunaqa runamanda lluqchichpa, kuchimkunamanna yallkurqan. Yallkumptinllampaqam, kuchimkunaqa chay qaqamanda kallpachpa, limpu qaqayachpa, yumbaynin yamkuman saqachpa, ch'uqachpa wañurqanllampa. Chay qaqayaq kuchimkunaqam ichkay milch'i karqan. 14 Chaymi chay kuchimkunata michiqkunaqa ancha manchachpa kallparqanllampa abisamkuq: Jisumkristum kay kusaskunata rurachqa, nichpa. Pallkunaqam abisarqan ch'amkrampi kaqkunata, llaqtampi kaqkunata. Chaymi ancha achka runamkuna, warmimkuna chamurqanllampa rimkaq, mayñ, ¿imach kachqa? nichpa. 15 Chaychina ch'ayamuchpaqam, chay runataqa rimkarqanllampa manana lumkutachu. Achwanmi kampanda ruramkuchpana, Jisuspa ladumbi chumaqta tiyallkarqan. Chaymi chay runamkuna, warmimkuna chaychina rimkachpaqa, anchana mancharqanllampa. 16 Chay michidurkunaqam chay lumkumpaq, chay kuchimkunampaq manyaqlla pallkunata parlachirqanllampa. 17 Chaymi chay chamuqkunaqa Jisusta ancha rrugarqanllampa, lluqchinan pallkunampa lugarninmanda. 18 Kanan Jisus yallkumptin barkumanqam, chay kach'amkachqa runaqa ancha rrugarqan, pullan rinambaq. 19 Chaymi Jisusqa nirqan: Nuqawan rinallkimandaqam mas allin ayllullkimkunawan wasimkiman rinallki. Richpaqa, pallkunata parlachiy Dyus llamkimpachuchpa yanampachuchqambaq. 20 Chaymi chay runaqa richpa, dyis llaqtamkunampa prubinsyambi kaychina parlachimkurqan: Jisusmi ancha yanampawachqa nichpa. Kanan yumbay uyaqkunaqam ancha ispantachqata kuchimkurqanllampa. 21 Jisusmi kutirirqan yamkumpi puriq barkumpi atun quch'ampa suq ladun chimbanman. Chaypimpismi ancha achka runamkuna, warmimkuna tandamkarqan, payta uyanambaq. 22 Pallkunawan kallkamptinmi, sinaguga wasimpa suq kamachimkuqnin chayman ch'ayamurqan. Chay runaqam Jayru chutiq. Paymi Jisuspa ñawpambi qunqurimkuchpa, 23 kaychina rrugarqan: Taytitu, suq faburta ruraway. Chinaymi wañullkanna. Amkur mamkimkita sawambi rurachpa, kach'amkachinallki, ama wañunambaq, nichpa. 24 Chaymi Jisusqa paywanna rirqan. Chaychina rillkamptinqam, ancha achka runamkuna, warmimkuna imkinda richpa, ñambiqa Jisusta kich'kicharqanllampa. 25 Chay imkinda riqkunampim suq qachyaq warmi karqan. Chay warmitaqam dusi watamkuna tumkuyta yawar mana dijarqanchu. 26 Chaymi ambimkuqkunaman richpa ancha ñamkarqan. Kanan qallaynindampismi limpuna uchyachqa karqan. Piru manam nimatampis kach'amkarqanchu. Achwanmi mastana achwambayarqan. 27 Chaymi payqa Jisuspaq uyamkuchpa, yuyarqan: ¿Imanayraq Jisuspa kampitanda llamkayman kach'amkanaypaq? nichpa. Chaymi runamkunampa umkundalla richpa, imkimanda aypamkuchpa, kampanda llamkarqan. 29 Chay llamkachqan urasllam yawarqa das dijarqan. Chaymi kwirpundaqa kach'amkachqatana tantiyarqan. 30 Piru Jisusqam pudirnin lluqchimptinqa, yach'arqanna. Chaymi imkiman timkramkachpa tampumkurqan: Pitaq kampayta llamkachqa? nichpa. 31 Chaychina tampumkumptinmi, chay yach'amkuqningunaqa nirqan: Rimkay, achka runamkunam kich'kichachullkangi. ¿Chaychu ningi: ¡Pitaq kampayta llamkachqa? nichpaqa? 32 Piru Jisusqam yumbayta ancha champarqan, yach'anambaq, ¿Pim kampayta llamkachqa? nichpa. 33 Chaymi chay warmiqa yuyarqan: Nuqampaqmi champamkullkan, nichpa. Chaymi manchaywan ch'ampsimkachpa rirqan, ñawpambi qunqurimkuchpa, tumkuy ima pasachqanda Jisusta niq. 34 Jisusqam chay warmita nirqan: Ijita, nuqampi yuyamkuchqallkirallkum kach'amkachqana kangi. Kuchimkuchpana riy. Chaqa chay qachyaynimkimandam ringi kach'amkachqana kidaq, nichpa. 35 Chaychina Jisus chay warmiwan parlanangamanmi, chay Jayrumpa wasinmanda abisuwan ch'ayamuchpallampa, Jayruta nirqan: Chinallkiqam wañuchqana. Amkuna. Amana piñachiychu kay yach'achimkuq siñurtaqa, nichpa. 36 Piru chay nichqanllampata mana kasuchpam, Jisusqa Jayruta nirqan: Ama manchaychu. Yuyamkuylla nuqampi, nichpa. 37 Chaychina nichpaqam, Jisusqa chay imkin riqkunataqa manana amparqanchu yumbaytaqa. Amparqanqam Jayruta, Pidruta, Jamkubuta, masan Jwandalla. 38 Chaychina Jayrumpa wasinman ch'ayachpaqam, uyarqan ancha waqachpa yumpamkullkamptinllampa. 39 Chaymi Jisusqa yallkuchpa umku wasinman nirqan: Imampaqmi kunyallaqa waqallkangillampa? Chinaqam mana wañuchqachu. Puñullkanllñm, nichpa. 40 Chaychina nimptinqam, chaypi kaqkunaqa Jisusta asimparqanllampa. Piru Jisusqam yumbay umkumpi kaqkunata sawaman surquchpa, chay chinampa taytanda, mamanda ampachpa, chay kimsa pullan riqkunawanlla yallkurqan chay alma kachqanmanqa. 41 Chaymandaqam chinata mamkinmanda piskachpa nirqan: Talita kumi. Chay nichqanqam rimaynimbiqa munan niyta: Chinita, qamtam nillki, ¡atarimuy! nichpa. 42 Chaymi chinaqa chay uras wañuchqanmanda atarichpa purirqanna. Payqam dusi watayuq karqan. Chay rimkaqkunaqam ancha ispantarqanllampa. 43 Piru Jisusmi pallkunataqa ancha jwirtita kamachirqan, ama pitampis chaytaqa parlachinanllampa. Nirqambismi chay chinata qarananllampa.
1 Chay llaqtamandaqam Jisusqa uywamkachqan llaqta Nasaritmanna kutirqan. Yach'amkuqningunampismi pullan rirqanllampa. 2 Chaypiqam samana diya ch'ayamumptinqa, Jisusqa yach'achimkullkarqan sinaguga wasimpi. Chaymi achka llaqta masinguna uyachpaqa, ancha champachqanchina rimarqanllampa: Maypitaq waq imaqa challkunataqa yach'amkuchqa? ¿Ima yach'achqandataq yach'achiwanchiq? ¿Imachinataq waq runaqa milagrumkunataqa ruran? 3 Chaqa waqqam chay karpintiru. Maryampa ullqu wawan. Jamkubumpa, Jusimpa, Judaspa, Simumba masanmi kay runaqa. Paningunampismi nuqanchiqkunawan kay llaqtampi tiyanllampa. Chaychina nichpam, ancha rimarqanllampa. Kanan pallkunaqam mana munarqanllampachu Jisusta uyaytaqa. 4 Chaymi Jisusqa nirqan: Yumbay llaqtamkunampi Dyuspaq rimaqkunataqam chumaqta ch'askinllampa. Chay rimaqkunampa llaqta masingunalla, ayllunguna, wasimbi tiyaqkunallam mana chumaqtachu ch'askinllampaqa. 5 Chaymi payqa chay Nasarit llaqtambiqa manana atirqanchu achka milagrumkunata ruraytaqa. Wamkin qachyaqkunampa sawambi mamkinda rurachpam kach'amkachirqan. 6 Chaypaqmi Jisusqa ancha yuyarqan: ¿imarallkutaq kay llaqta masillkunaqa mana munanchu nuqampi yuyamkuytaqa? nichpa. ?Chaymandaqam Jisusqa chay sirka llaqtitamkunamanna rirqan yach'achimkuq.? 7 Jisusqam chay dusi ampustulningunata qayachpa kamachirqan, ichkay ichkay rinanllampa yach'achimkuq. Pudirninda pallkunataqa qurqan, dyablumkunata runamkunamanda qatinanllampa. 8 Pallkunatam kamachirqan: panda rinallkillampaqa, ama nimatampis ampayllampachu. Kadunu suq qaru burdundalla ampayllampa. Alfurjata, fiyambrita, qallayta ama ampayllampachu. 9 Llanqamkuchpalla sampalan kampallkiwanlla riyllampa. Ama ampayllampachu ichkay kampallkitaqa. 10 Pusadata tarichpaqa, chaypilla kidayllampa, chay llaqtamanda rinallkimkaman. Ama tiyayllampachu suq wasimpi suq wasimpiqa. 11 Piru mayqan llaqtampi mana munamptinllampa ch'ayachichuyta, ama kidayllampachu chaypiqa. Piru chay llaqtamanda rinallkillampaqa llanqamkimanda allpata ch'ampsichpa riyllampa, ama ni allpanda ampanallkillampa, yach'ananllampa: Pallkunaqam manana kwintayuqchu nuqanchiqkunawanqa, nichpa. Allimptam nillkillampa, chay fyirusyachuqkunaqam jwisyu diya ch'ayamumptinqa, chay Sudumawan Gumurra llaqtamkunamanda mas kastigadu rinllampa kaq, nichpa. 12 Chaychina kamachimptinmi, pallkunaqa richpa, runamkunata, warmimkunata yach'achirqan, uchanllampata dijachpa, Dyustana kasunambaqllampa. 13 Pallkunaqam qatirqan achka dyablumkunatampis. Qachyaqkunampa sawanman asiytita rurachpam, pallkunatampis kach'amkachirqan. 14 Chay llaqtamkunampa gubyirnun Irudismi Jisuspa famanda yach'arqan, yumbay parlamptinllampa. Chay famata yach'achpaqam nirqan: Alma Jwan Chutichimkuqmi wañuchqanmanda kawsamuchqana. Chaymi chay milagrumkunata atin rurayta, nichpa. 15 Suqkunaqam niqllampa: Dyuspaq rimaq chay alma Aliyasmi kawsamuchpa, Jisusna chutin, nichpa. Wamkinqam niqllampa: Payqam Dyuspaq suq muchuq rimaq kanman, chay unay rimaqkunachina, nichpa. 16 Gubyirnu Irudisqam challkunata yach'achpaqa nirirqan: Chay Jisusqam alma Jwan Chutichimkuq. Manchu nuqaqa umanda pitichirqay. Chay almam kananqa kawsamuchqa, nichpa. 17 Chaqa chay alma Jwan Chutichimkuq kawsallkamptinraqmi, chay gubyirnu Irudisqa masan Filimpimpa warmin Irudiyasta purichillkarqan. Chaymi Jwan Chutichimkuqqa mana manchachpachu, anyachqa karqan: Manam balinchu masallkimpa warminwan kanallkiqa, nichpa. Chaymi Irudisqa Jwandaqa karsilachichpa, kamachirqan kadinamkunawan watananllampa. 19 Kanan chay warmi Irudiyasmi Jwan Chutichimkuqtaqa ancha ch'iqnichpa, munarqanna wanchiyta, piru manam atirqanchu wanchiytaqa. 20 Chaqa Irudisqam Jwanda wachachpa, chay warmin Irudiyasta nirqan: Ama wanchichunchu, nichpa. Chaqa payqam Jwanda ancha rrispitachpa yuyarqan: Jwanqam ancha allin runa. Dyustam ancha allita kasun, nichpa. Chaymi Jwan yach'achimkumptin, chay gubyirnu Irudisqa uyachpa yuyarqan: ¿Kasuchaqchu ichu mana? nichpa. Chaychina yuyachpampismi, ancha gustarqan uyaytaqa. 21 Piru suq diyam chay warmi Irudiyasqa illumki kaychina rurarqan. Gubyirnu Irudisqam chay prubinsya Galiliyampa yanampamkuq awturidarningunata, mas kamachimkuq suldadungunata, suq laya ancha baliq runamkunata kumbidarqan, diyambaq chamumptin, fyistata rurananllampa. 22 Chaymi chay diyambaq kumbidachqangunawan masampi mimkullkamptinqa, chay Irudiyaspa chinan ñawpanllampampi ancha dansarqan. Chaychina dansamptinqam, ancha gustarqan chay Irudistaqa. Chaymi chay Irudisqa intinadanda nirqan: Imatampis mañaway. Ima mañawachqallkitam quchqallki, nichpa. 23 Chaychinam ancha jurachpa nirirqan: Mañawaylla. ¿Imatam munangi? Nuqaqam tumkuy ima munachqallkita quchqallki. Tumkuy imay kaqmandam midya partita atini quchuyta, nichpa. 24 Chaymi chinaqa lluqchichpa, maman Irudiyasta tampurqan: Imataraq mañayman? nichpa. Chaymi mamanqa nirqan: Mañay, Jwan Chutichimkuqpa umanda suq platumpi quchunambaq, nichpa. 25 Chaymi chinaqa utqaymaya kallpachpa, yallkurichpa, gubyirnutaqa nirqan: Jwan Chutichimkuqpa umanda suq platumpi kanalitan quway, nichpa. 26 Chayta mañachqanrallkum, gubyirnu Irudisqa limpu malaganayarqan. Piru yanampamkuq awturidarkunampa ñawpambi jurachqanrallkum, mana munarqanchu chinata ñigaytaqa. 27 Chaymi suq suldadunda kamachirqan, richpa karsilman, Jwamba umanda ampamunambaq. 28 Chaymi chay suldaduqa richpa, Jwamba umanda kuchuchpa, suq platumpi ampamuchpa, chinatana qurqan. China ch'askichpaqam mamandana qurqan. 29 Chay alma Jwamba yach'amkuqningunam chayta yach'achpaqa, karsilman richpa, kwirpundallana amparqanllampa pambaq. 30 Jisuspa chay dusi ampustulninguna yach'achimkuchpa, qachyaqkunata kach'amkachichpaqam kutimurqanna. Kutimuchpaqam Jisusta nirqanllampa tumkuy ima rurachqambaqllampa. 31 Chay diyamkunampiqam ancha achka runa, warmi Jisusman tandamkaqllampa. Chaymi payqa yach'amkuqningunawan tandamkaqkunata yanampachqanrallku, mana atiqllampachu ni mimkuyta ni samayta. Chaymi Jisusqa yach'amkuqningunata nirqan: Amkullampa achlita samaq suq chuncha lugarman, nichpa. 32 Chaymi Jisusqa yach'amkuqningunawan rirqanllampa yamkumpi puriq barkumpi chay atun quch'ampa suq chuncha manyanman. 33 Piru achka runamkunam Jisusta rimkarqanllampa barkumpi rillkaqta. Chaymi pallkunaqa chay uras chay atun quch'ampa manyanda kallpaylla rirqanllampa. Yumbay chay llaqtamkunamanda richpam, chay barkuta binsichpa, puntata chay chunchamanna ch'ayarqanllampa. 34 Chaymi Jisus barkumanda ichkichpaqa, chay ancha achka runata, warmita rimkachpa, llamkimpachpa, yuyarqan: Manam ni pimpis kanchu pallkunata Dyus nichqanda yach'achinambaqqa. Mana dwiñuyuq wichamkunachinam purinllampa, nichpa. Chaymi Jisusqa pallkunataqa ancha yach'achirqan Dyuspaqqa. 35 Piru tardina kamptinqam, chay yach'amkuqningunaqa nirqan: Tardinñm. Manam pimpis kay chunchampiqa tiyanchu. 36 Chayri kay runamkunata, warmimkunataqa dispidiyna, sirka kasiriyumkunaman rinanllampa, mimkunanda randiq, nichpa. 37 Piru Jisusqam nirqan: Qamkuna qarayllampa, nichpa. Chaymi pallkunaqa nirqan: Maymandataq dusyintus dinaryu qallaytaqa tarichaqllampa, yumbaypaq tandata randinayllampaqa? nichpa. 38 Chaymi Jisusqa tampurqan: Allka tandayuqtaq kangillampa? Mayñ, riyllampa rimkay, nichpa. Chaymi pallkunaqa richpa rimkaqqa nirqanllampa: Sinku tandita ichkay piskaditullam kan, nichpa. 39 Chaymi Jisusqa yumbay chay runamkunata, warmimkunata kamachirqan, pachan pachan chay qawamkunampa sawambi tiyanambaqllampa. 40 Chaychina kamachimptinqam, wamkinqa 50, 50 tiyarqanllampa; wamkinqam 100, 100 tiyarqanllampa. 41 Chaymandaqam Jisusqa chay sinku tanditata, ichkay piskadituta piskachpa, syiluman champamkuchpa, Dyusta pagimkurqan. Chaymandaqam chay tanditamkunata piti piti rurachpa, yach'amkuqningunata qurqan, chay yumbay runata, warmita qunanllampa. Chay ichkay piskaditutampismi chaychinalla piti piti rurachpa, yumbayta qurqanllampa. 42 Chaychina qumptinqam, yumbay undanangaman mimkurqanllampa. 43 Chaychina mimkumptinllampaqam, achka pidasu tanda piskaduwan subrarqan. Chaymi dusi kanasta undamkunata tandarqanllampa. 44 Chay mimkuqkunaqam ullqumkunalla 5.000 karqan. (Warmimkunawan, wambramkunawanqam mas achka karqan.) 45 Chay ancha achka runamkuna, warmimkuna mimkumptinqam, Jisusqa yach'amkuqningunata nirqan: Yamkumpi puriq barkuman lluqchichpa, ñawpayllampa waq chimba Bitsayda llaqtaman, nichpa. Chaychina nichpam, payqa kidarqan, yumbaymanda dispidimkanambaq. 46 Chaymandaqam, sampalanllana rirqan suq lumaman, Tayta Dyusman mañamkuq. 47 Chay diya amsayamptinqam, chay barkuqa chay atun quch'ampa ch'awpimbina karqan. Kanan Jisusqam sampalanlla kidarqan chay lumampi. 48 Piru ñawpa ladunmanda ancha wayramptinmi, chay yach'amkuqningunaqa mana atirqanllampachu ñawpaman riyta. Chaychina kallkamptinmi, Jisusqa pallkunataqa rimkarqan barkumpa kumsanan palangunawan ancha chinchimkuchpa ampallkaqta. Chaychina ñamkallkamptinllampam, manaraq achimkyamptin, Jisusqa yamkumpa sawanda imkinllampata rirqan. Chaychina richpaqam, pallkunataqa pasallkarqanna. 49 Chaychina yamkumpa sawanda rillkaqta rimkachpaqam, pallkunaqa yuyarqan: ¡Waqqam alma! nichpa. Chaymi ancha manchachpa yumbaynin qayach'amkurqan. Chaymi Jisusqa nirqan: Ama manchayllampachu. Nuqam kani, nichpa. 51 Chaymandaqam Jisusqa chay barkuman lluqchimptinqa, wayraqa limpu qasillarqan. Chayta rimkachpaqam, chay yach'amkuqningunaqa ancha ispantarqanllampa. 52 Pallkunaqam chayraq rimkachqallampa karqan, Jisus tanditata achkayachimptin. Piru chay milagruta rimkachpampismi, manaraq paypiqa allitaqa kriyirqanllampachu, angu chunquyuq kachqanllamparallku. 53 Chaymandaqam barkumpi chay atun quch'ata pasachpaqa, Jinisarit pambaman ch'ayarqanllampa. Chayman ch'ayachpaqam, barkuta watarqanllampa atun quch'ampa manyambi. 54 Chay barkumanda dimki ichkimptinllampaqam, chaypi tiyaqkunaqa Jisustaqa das riqsirqanllampa. 55 Chaymi chay rimkaqkunaqa kallparqanllampa yumbay chay lugarkunaman abisamkuq: Jisusqam chay lugarman chamuchqa, nichpa. Chaymi achka qachyaqkunata paramkunampi ampamurqanllampa Jisusman. 56 Kanan yach'achpa: Jisusqam chaymanna rillkan, nichpa, qachyaqkunata ampaqllampa chuyachiq. Chaymi llaqtamkunampi, kasiriyumkunampi, chunchamkunampi, ñangunampi, tumkuy maypi qachyaqkunata chuyachichpa, Jisusta ancha rrugarqanllampa: Yuch'allku kay qachyaqnillkunatar dijay, kampitallkimpa manyanda llamkananllampa, nichpa. Chaymi chay qachyaqkunaqa Jisuspa kampanda llamkachpa, yumbay kach'amkarqanllampa.
1 Suq diyam wamkin farisiyu dumktrinayuqkuna, Muysispa liyningunata wamkin yach'achimkuqkunampis Jirusalin llaqtamanda chamurqanllampa Jisusman. 2 Pallkuna rimkallkamptinmi, Jisuspa wamkin yach'amkuqninguna mamkingunata mana mayllachpachu mimkurqanllampa. Chaymi chay chamuqkunaqa Jisuspa yach'amkuqningunata anyarqanllampa. Chaqa isrraylinu llaqta masingunampa mayllamkuna kustumbrindam mana rurarqanllampachu. 3 Piru chay farisiyumkunaqam, isrraylinu masingunawan kanangaman unay agwilungunampa chay mayllamkuna kustumbrinda, suq laya kustumbringunatampis ruranllampa. Chaymi kutin kutin mayllanllampa mamkingunata, basungunata, jarrangunata, jirru mangangunata, kamangunata. Llalli plasaman richpa kutimuchpaqam, kutin kutin mamkingunata mayllachparaq mimkunllampaqa. Mana mayllachpaqam, mana mimkunllampachu. 5 Chaymi chay farisiyumkuna, Muysispa liyningunata chay yach'achimkuqkunampis piñamkuchpa, Jisusta nirqanllampa: Rimkay, qamwan puriqkunaqam mana mayllamkuchpachu, mampa mamkingunawan mimkunllampa. Mayñ, ¿imarallkutaq mana ruranllampachu agwilunchiqkuna rurachqanchinaqa? nichpa. 6 Chaymi Jisusqa chay rimaqkunata nirqan: A, qamkuna chimimkiwanlla Dyusta kasuqkunaqa! Qamkunampaqmi Dyuspaq rimaq Isayiyasqa librumbi kaychina Dyus nichqanda iskibrirqan: Kay runamkunaqam chiminwanlla kasuwanllampa. Manam allimptaqa kasuwanllampachu tumkuy chunqunwanqa. Chaymi nuqamandaqa amkramkachqallampana. 7 Chayrallkum mana nimampis balinchu pallkuna nuqata alabawananqa. Chaqa runamkuna nichqandallam yach'achimkunllampa, nichpa. 8 Kaychinallam qamkunampis Dyus kamachimkuchqanda dijachpaqa, runamkuna kamachimkuchqandalla rurallkangillampa. Chaymi chay mayllamkuna kustumbri layata rurachpaqa, jarrallkimkunata, basullkimkunata mayllangillampa. 9 Chaymandaqam Jisusqa nirqambis: Qamkunaqam chay kustumbrimkimkunata ruranallkirallku, Dyus kamachimkuchqandaqa mana kasungillampachu. 10 Chaqa Muysismi kamachimkurqan: Taytallkita, mamallkita rrispitachpa kasuy. Taytanda mamanda mayqan maldisyaqta wanchiyllampa, nichpa. 11 Piru qamkunaqam ningi: Suq runaqam taytanda mamanda atin niyta: Manam atinichu yanampachuyta. Yumbay kusasnillkunatam Dyusta rini quq nichpa. 12 Chaychina nichpaqam, qamkunaqa suqkunata yach'achillkangi: Mana munachpa yanampayta taytallkita mamallkitaqa, ama yanampaychu, nichpa. 13 Chaychina yach'achimkuchpaqam, qamkunaqa Dyus nichqandaqa mana baliqpaqna riqsillkangillampa, runamkunampa kustumbrindalla ruranallkirallku. Kanan suqmanda yach'amkuchpam, suqkunatana yach'achingillampa. Achka laya mana baliq kustumbrimkunatam rurangillampa chay kustumbritachina. 14 Chaymandaqam yumbay chaypi kaqkunata qayachpa nirqan: Yumbaynimki uyawachpa, allita intyindiwayllampa: 15 Tumkuy ima sawamanda yallkuqqam mana uchayuqtachu dijachungi. Achwanmi mana allimkunata chunqullkimpi yuyachpa, uchayuqqa kangillampa. 16 ?Chayri qamkuna rinriyuqkunaqa allita uyawayllampa,? nichpa. 17 Chaymandaqam Jisusqa chay achka runamkunamanda amkramkachpa, suq wasimanna yallkurqan. Chay wasimpina kachpaqam, chay yach'amkuqningunaqa tampurqanllampa: Chay nichqallkitaqar allita intyindichiwayllampa, nichpa. 18 Chaymi Jisusqa nirqan: Ima qamkunampischu mana intyindingillampa? Nuqaqam nichuchqallampa kani: Mimkuna sawamanda pach'anchiqman yallkuchpaqam, mana uchayuqtaqa rurachiwanchiqchu. 19 Chaqa manam ni pimpis chunqunmanqa mimkunchu. Achwan mimkunchiqqam pach'anchiqman. Chaymandaqam kwirpunchiqmandaqa lluqchinna litrinaman. Chaychina nichpaqam yach'achimkurqan: Yumbay laya mimkunaqam limpyu, nichpa. 20 Kaychinampismi nirqan: Runamkunampa mana allin yuyayningunam umku chunqunmanda lluqchin, uchayuq kanambaqqa. 21 Chaqa chunqunllampampi mana allin yuyayninguna kamptinmi, kay laya mana allimkunata ruranllampa: Wamkinqam warmiyuq kachpa, ichu warmimpis runayuq kachpaqa, suqwan puñunllampa. Wamkin sampalan kaqkunaqam piwambis puñunllampa. Wamkinqam wanchimkun, 22 suwamkun, suqpa imangunata ancha munanllampa. Wamkinqam malnaturalkuna. Wamkinqam michki michkita parlachichpa, ingañamkunllampa. Wamkinqam kwirpunda mana sujitachpachu, munachqandalla ruranllampa. Wamkinqam imampaqpis imbidyamkunllampa. Wamkinqam wacha rimallkuna. Wamkinqam palanganumkuna. Wamkinqam mana jwisyuyuqkuna. 23 Yumbay chay mana baliq yuyallkunaqam runampa chunqumbi tarimkan. Chay laya mana baliqkunata yuyachpam, uchayuqna kidanllampa. 24 Jisusqam chay kachqanmandaqa rirqanna (Isrrayilpa ladumbi kaq nasyunman. Chay nasyumba) Tiru llaqtamba, Sidun llaqtamba sirkanman ch'ayachpaqam, suq wasimpina kidarqan. Jisusqam mana munarqanchu ni pimpis yach'anambaq chaypi kachqanda. Piru dasmi yach'arqanllampa. 25 Chaymi suq warmi Jisus chaypi kachqanda yach'achpaqa, das chamuchpa, ñawpambi qunqurimkuchpa, rrugarqan: Taytitu, chinitaymanmi dyablumpa ispiritun yallkuchqa. Yuch'allku paymanda qatiy chay dyablutaqa, nichpa. Chay warmiqam chay suq nasyun Sirufinisya chutiqmanda kachpa, grigu rimaypi rimarqan. Manam isrraylinachu karqan. Chaymi chay warmitaqa Jisusqa nirqan: 27 Manam allichu isrraylinu masillkunata dijachpa, jwiramkunata yanampanaypaqqa. Isrraylinu masillkunaqam wambrallkunachina. Puntataqam wambranchiqkunata qaranchiq, ¿manachu? Manam allichu wambranchiqkunampa tandanda quch'ichpa, allqatumkunata puntata qarananchiqqa. 28 Chaymi chay warmiqa nirqan: Ari. Chaychinam, Taytitu. Piru wambramkuna masampi mimkumptinqam, allqumkunampis masampa warambi tiyachpa, chay pidasitun ichkiqkunata mimkunllampa. (Chaychinam alli kanman, nuqallkunatampis achlitata yanampawanallki,) nichpa. 29 Chaymi Jisusqa chay warmita nirqan: Allitam kuntistawachqa kangi. Chaymi rini yanampachuq. Atinginam riyta. Dyabluqam wawallkimandaqa lluqchichqana, nichpa. 30 Chaymi chay warmiqa wasinman kutirichpaqa, chay wawandaqa kamambi tarirqan kach'amkachqatana. Chaqa paymandaqam dyabluqa lluqchichqana karqan. 31 Jisusqam chay Tiru llaqta ladumanda richpaqa, chay prubinsya Sidunda, chay prubinsya Dimkampulista pasachpa, ch'ayarirqan chay Galiliya Atun Quch'aman. [Nuta: Chay chutin Dimkampulismi munan niyta: Dyis llaqtamkunampa prubinsyan, nichpa.] 32 Chayman ch'ayamptinqam, Jisusman ampamurqanllampa suq surdu mudu runata. Ch'ayachimuchpaqam Jisusta rrugarqanllampa, chay runampa sawambi mamkinda rurachpa, kach'amkachinambaq. 33 Chaymandaqam Jisusqa chay runata suq laduman ampachpa, rinringunaman didungunata rurarqan. Tuqayninwan didunda nuyuchichpa, qallunman rurarqan. 34 Chaymandaqam anaq syiluman champamkuchpa, llamkichpa, samayninda kach'achpa nirqan: Ifata! Chayqam munan niyta: ¡Kich'amkay! nichpa. 35 Chaychina nimptinqam, chay runaqa surdu kachqanmanda chay uras uyamkurqanqa. Kanan mudu kachqanmandampismi, chay uras dasna atirqan rimayta. 36 Kanan Jisusqam yumbay chaypi kaqkunata nirqan: Kay runata kach'amkachichqaypaqqa amamkich ni pitampis willangillampachu, nichpa. Chaychina kutin kutin nimptimbismi, pallkunaqa mana kasuchpachu, achwamba chay famata parlachimkurqanllampa. 37 Chaymi runamkunaqa: ¿Ima laya runataq chayqa? nichpa, ancha ispantachqata Jisusta kaychina alabaqllampa: Rimkay kay runaqa! Tumkuy imata allita yach'an rurayta. Surdumkunatam uyachin. Mudumkunatam rimachin, nichpa.
1 Chay tyimpumpim ancha achka runa, warmi Jisusman chamurqanllampa. Kanan manam nimampis waqpiqa karqanchu mimkunanllampa. Chaymi Jisusqa yach'amkuqningunata qayachpa nirqan: 2 Ancham llamkini kay uyawaqkunampaq. Chaqa kaypiqam kimsa diyana nuqawan kachqallampa uyawanambaq. Kanan pallkunaqam mana nimayuqchu mimkunanllampaqa. 3 Piru mallaqtalla wasinman kach'amptiyqach'i, challkuchpa ñambi binsimkanmanllampa. Llalli wamkinqam ancha karumanda chamuchqallampa. 4 Chaychina nimptinqam, yach'amkuqningunaqa nirqan: Imatamir qarachun kay chunchampiqa? Chaqa kaypiqam mana pimpis tiyanchu, mimkunata randichiwananchiqqa, pallkunata qarananchiq. 5 Chaychina nimptinmi, Jisusqa tampurqan: Allka tanditayuqmi kangillampa? nichpa. Chaymi pallkunaqa nirqan: Syiti tanditayuqllam kanillampa, nichpa. 6 Chaychina nimptinqam, Jisusqa yumbay chay runata, warmita kamachirqan, waqpi kaypi pambampi tiyananllampa. Chaymandaqam chay syiti tanditata piskachpa, Tayta Dyusta pagimkurqan. Chaychina pagimkuchpaqam, tanditamkunata piti piti rurachpa, yach'amkuqningunata qurqan, pallkunana yumbay runata, warmita qarananllampa. 7 Karqambismi piskaditumkuna. Challkunampaqpismi pagimkuchpa, yumbayta qarachirqan. 8 Chaychina qarachimptinqam, yumbay runa, warmi undanangaman mimkurqanllampa. Chaymandaqam chay subrataqa syiti kanastamkuna undata tandarqanllampa. 9 Chay mimkuqkunaqam ullqumkunalla 4.000ch'i karqan. Chaymandaqam yumbayta dispidichpa, dijarqanna rinanllampa. 10 Chaychina yumbay rimptinqam, Jisusqa yach'amkuqningunawan yamkumpi puriq barkumpi rirqanllampa Dalmanu lugarmanna. 11 Chay Dalmanu lugarpina kamptinqam, farisiyu dumktrinayuqkunaqa Jisusman chamurqanllampa. Chaymi Jisusta uyachpaqa, payta mallimpachpa nirqanllampa: Manam chaychinachu. Kaychinñm. Mayñ, qam Dyusmanda chamuq kachpaqa, suq milagru syilumanda kaqta ruray rimkanayllampa, nichpa. 12 Chaymandaqam Jisusqa chunqumbi ancha llamkichpa nirqan: Kay runamkunaqa ¿imarallkutaq munanllampa milagrumkunata ruranayqa? Allimptam nillkillampa, manam rinichu ruraq nima laya milagrumkunata, nichpa. 13 Chaymandaqam chay farisiyumkunamanda amkramkachpa, Jisusqa yamkumpi puriq barkumpina rirqan chay atun quch'ampa suq manyanman. 14 Richpaqam, Jisuspa yach'amkuqningunaqa tandata mana randichqallampachu karqan. Kanan fyambrinda qunqachpam, suq tanditayuqlla rillkarqanllampa yamkumpi puriq barkumpiqa. 15 Chaypim Jisusqa pallkunata nirqan: Farisiyumkunampa libaduranmanda, gubyirnu Irudispa libaduranmandaqa kwidamkayllampa, nichpa. 16 Chaychina kunamptinqam, Jisuspa yach'amkuqningunaqa pallkunampura kaychina parlarqanllampa: Imampaqraq chaychinaqa niwanchiq? Mana tandayuq kamptinchiqch'i, chaytaqa niwanchiq, nichpa. 17 Chaychina parlamptinqam, Jisusqa tampurqan: Imarallkutaq nillkangillampa: Manam tandayuqchu kanchiq nichpaqa? ¿Ima, manachu intyindingillampa? ¿Ima manachu jwisyuyuq kangillampa? 18 ¿Ima manachu ñawimkillampawan rimkachqallampa kangi chay rurachqaytaqa? ¿Ima manachu rinrimkiwan uyawangillampa? ¿Ima manachu nimatampis yuyangillampa? 19 Mayñ, chay sinku tanditata piti piti ruramptiy 5.000 runamkuna mimkumptinqa, ¿allka kanastamkuna undataq subrarqanqa? nichpa. Chaychina tampumptinqam, pallkunaqa nirqan: Dusi kanastamkuna undam subrarqanqa, nichpa. 20 Chaymandaqam Jisusqa tampurqan: Mayñ, chay syiti tanditata piti piti ruramptiy 4.000 runamkuna mimkumptinqa, ¿allka kanasta undataq subrarqanqa? nichpa. Chaychina tampumptinqam, pallkunaqa nirqan: Syiti kanastamkuna undam subrarqanqa, nichpa. 21 Chaymi Jisusqa nirqan: Ima manaraqchu intyindingillampa? nichpa. [Nuta: Jisumkristuqam mana tandampaqchu rimarqanqa. Achwanmi nirqanqa: Achla libadurallam samksachin achka masata. Chaychinallam chay farisiyumkunampa mana baliq kustumbringunata achlitatalla ruramptinchiqqa, ancha dañachiwanchiqman, nichpa.] 22 Chaymandaqam Bitsayda llaqtamanna ch'ayarqanllampa. Chay llaqtampi Jisus kallkamptinqam, suq sarku runata ampamurqanllampa, ñawingunata kach'amkachinan. 23 Chaymi Jisusqa chay sarkuta rambachpa, chay llaqtamanda sawa chunchaman amparqan. Chay chunchampiqam chay runampa ñawingunata tuqayninwan nuyuchichpa, mamkingunata sawambi rurachpa, tampurqan: Mayñ, ¿atinginachu imatampis rimkayta? nichpa. 24 Chaychina tampumptinqam, chay runaqa achla rimkamkuchpaqa, nirqan: Salqatatam runamkunata rimkani muntimkuna purillkaqtachina, nichpa. 25 Chaymi Jisusqa chay runampa ñawinda suq kutinda llamkarirqan. Chay urasllam ñawingunaqa allitana champamkurqan. Chaymi tumkuy imata atirqanna rimkayta. 26 Chaychina rimkamkumptinqam, Jisusqa chay runataqa kamachirqan: Riyna wasimkiman. Piru amamkich chay llaqtamanqa ringichu. ?Amamkich ni pitampis nimatampis ningichu, nichpa.? 27 Chaymandaqam Jisusqa yach'amkuqningunawan rirqan prubinsya Sasarya Filimpumpa kasiriyungunaman. Riqchinam ñambi yach'amkuqningunata tampurqan: Runamkunaqa, ¿imatam nin nuqampaqqa? ¿Pich kani pallkunampaqqa? nichpa. 28 Chaymi pallkunaqa nirqan: Wamkinqam nin, Jwan Chutichimkuqchi kangi. Wamkinqam nin, Dyuspaq unay rimaq Aliyaschi kangi. Wamkinqam nin, Dyuspaq suq rimaqchi kangi, nichpa. 29 Chaychina nimptinllampaqam, pallkunata tampurqan: Mayñ, qamkunaqa ¿imatataq ningi? ¿Pitaq kani qamkunampaqqa? nichpa. Chaymi Pidruqa nirqan: Qamqam Dyus Amkrachqan Wachadurniyllampa kangi, nichpa. 30 Chaychina nimptinqam, Jisusqa kamachirqan: Amamkich ni pitampis chaytaqa ningillampachu, nichpa. 31 Chaymandaqam Jisusqa yach'amkuqningunata nirqan: Nuqaqam Dyusmanda Chamuq Runa kachpa, ancha rini padisiq. Kanan kamachimkuq ansyanumkuna, kamachimkuq isrraylinu kuramkuna, Muysispa liyningunata yach'achimkuqkunam mana baliqpaq riqsiwachpa, rinllampa wanchiwaq. Piru wanchiwamptinllampam, kimsa diyamanda rini kawsamuq, nichpa. 32 Chaychina pallkunata ancha klaruta nimptinqam, Simun Pidruqa suq laduman sampalanda ampachpa, Jisusta nirqan: Ama chaychinaqa rimaychu, nichpa. 33 Chaychina nimptinmi, Jisusqa das timkramkachpa, yach'amkuqningunata champachpa, Pidruta kaychina anyarqan: A dyablu! ¡Ladiyay ñawpaymanda! Chaqa qamqam dyabluchina mana munangichu ruranaypaq Taytay Dyus munachqanda. Kanan Dyuspi mana kriyiqkunachinam qamqa yuyallkangi, nichpa. 34 Chaymandaqam yach'amkuqningunata qayachpa nirqan: Mayqan runa yach'amkuqniy munachpa kaytaqa, nuqa munachqayta ruranqa. Amana ruranqachu pay munachqandaqa. Nuqampi kriyichqanrallku suq kruspi munamptinllampa wanchiytampisri, nuqatalla sigiwanqa. 35 Chaymi mayqannimki nuqata ñigawachpa bidallkita wachanallkiqa, ringi chingaq tumkuy tyimpumpaq. Piru nuqampi ichu Dyus nichqambi kriyimptimki wanchichumptinllampaqam, nuqa rini wachachuq, tumkuy tyimpu nuqawan kawsanallki. 36 Piru suq runa ichu suq warmi kay mundumpa tumkuy imanda ch'askichpa, piru jwisyu diyampi chingachpaqa, ¿imampaqtaq balinman? 37 Mayñ, chay wañuchqaqa, ¿allkatam pagaramkunman wachamkananqa? 38 Chaymi qamkuna Dyusta kuntraq uchayuq runamkunampa ñawpambi nuqampaq ichu nuqa nichqaypaq panqamkuchpaqa, kayta yach'ayllampa: Dyusmanda Chamuq Runa Jisumkristum syilumanda rin kutimuq suq ancha kamachimkuq gubyirnuchina, Tayta Dyuspa llimpyayninwan llimpyachpa, paypa santu anjilningunawan. Chay diyaqam paypis nuqampaqqa rin panqamkuq, nichpa.
1 Kaychinampismi Jisusqa nirqan: Allimptam nillkillampa, kaypi wamkin kaqkunam manaraq wañuchpa, Taytaypa pudirninda rinllampa rimkaq, pay ancha jwirsayuq kamachimkumptin, nichpa. 2 Sayis diyas pasamptinmi, Jisusqa rirqan suq atun lumampa sawanman. Chaymanqam pullan amparqan Pidruta, Jamkubuta, Jwanda. Chay lumampina kachpaqam, Jisusqa pallkunampa ñawpambi suq layayarqan. 3 Kampanqam ancha yuraq llimpyallkaq ?qasachina? timkramkarqan. Kay mundumpi mudananda mayqan taqchachpampismi, mana pimpis atinmanchu chay layata yuraqyachiytaqa. 4 Chaymandaqam chay kimsa yach'amkuqninqam champallkachpa rimkarqan Aliyasta, Muysista Jisuswan parlallkaqta. 5 Chaymi pallkunaqa ancha mancharqanllampa. Chaychina manchachpam, Pidruqa Jisusta nirqan: Yach'achimkuq Taytitu. Ancha alliraq kaypi kananchiqqa. Rurachaqllampa qamkunampaq kimsa chugllata: suqta qambaq, suqta Muysispaq, suqta Aliyaspaq, nichpa. Piru Pidruqam manchachpa, chay rimachqambaqqa mana yach'arqanchu: ¿Imatam rimallkani? nichpaqa. 7 Challkamanqam pallkunampa sawambi pumkutay rimkamkuchpa, limpu pambarqan. Chay pumkutaypa umkunmandam Tayta Dyus Churin Jisuspaq nirqan: Kaymi kuyachqay Churiy. Payta uyayllampa, nichpa. 8 Chaymandaqam chay uras rridurninllampaman champamkuchpaqa, Jisuswan chay ichkay parlallkaqtaqa manana rimkarqanllampachu. Jisustallanam rimkarqanllampaqa. 9 Chaymandaqam chay lumamanda chamuqchina, Jisusqa chay kimsa yach'amkuqninda nirqan: Qamkuna rimkachqallkitaqa amaraq ni pitampis parlachiyllampachu wañuchqaymanda kawsamunallkaman, nichpa. 10 Chaymi pallkunaqa mana ni pitampis parlachirqanchu. Piru pallkunampuram tampunamkurqan: Imaraq munan niyta: Wañuchqaymanda kawsamunallkaman, nichpa? 11 Chaychina parlachpaqam, Jisusta tampurqanllampa: Muysispa liyningunata yach'achimkuqkunaqa ¿imarallkum nin: Aliyasmi puntata rin chamuq. (Chaymandaraqmi Dyus Amkrachqan Wachadurqa rin chamuq, nichpaqa?) 12 Chaymi Jisusqa nirqan: Allibmi Aliyas puntata chamun tumkuy imata allichaq. Piru Dyuspa Santu Librumbiqa ¿imatataq nin Dyusmanda Chamuq Runampaq? Chaypiqam nin: Chamumptinqam, runamkunaqa mana baliqpaq rinllampa riqsiq. Kanan ancham rin padisiq, nichpa. 13 Piru nuqaqam nillkillampa, Aliyasqam chamuchqana. Chamumptinqam, runamkunaqa mana llamkimpachpachu, pallkuna munachqanda rurarqanllampa. Chaqa Dyuspa Santu Librumbim paypaqqa nichqa karqan: Rinmi padisiq, nichpa. [Nuta: Jisumkristuqam chaychina Jwan Chutichimkuqpaq parlachimkurqan Aliyaspa chutinwan. Payqam Aliyaschina karqan. Rimkay Matiyu 17.13pi.] 14 Jisusqam chay kimsa yach'amkuqninwan kutimuchpaqa, chay wamkin yach'amkuqningunata ancha achka runamkunawan kallkaqta tarirqan. Chaypim Muysispa liyningunata wamkin yach'achimkuqwan anyanamkullkarqanllampa. 15 Chay runamkunaqam Jisusta ch'ayallkaqta rimkachpaqa, ispantachqata kallparqanllampa nampallkuq. 16 Chaymi Jisusqa pallkunata tampurqan: Imampaqmi pallkunawanqa qamkunaqa anyanamkullkangillampa? nichpa. 17 Chaychina tampumptinqam, chaypi kaq suq runa nirqan: Yach'achimkuq taytitu, dyablum churiyta muduyachichpa, atamkimkunata qun. Chaymi qaman ampamurqay kach'amkachinallki. Chaqa chay dyablu chay atamkimkunata qumptinmi, maypimpis churiyqa bulamkan. Kanan babach'kunatam sitamkuchin. ¡Kirungunatam qach'yachin! Kanan limpunam ichkin. Chaymi yach'amkuqnimkimkunata rrugarqani, kay churiymanda chay dyabluta qatinambaq. Piru pallkunaqam mana atichqallampachu qatiyta, nichpa. 19 Chaymi Jisusqa nirqan: A, qamkuna Dyuspi mana yuyamkuqkuna! ¿Ima tyimpumkamanraq qamkunataqa agwantachqallki? Mayñ, chay wambrallkita kayman ampamuyllampa, nichpa. 20 Chaychina pallkuna ampamumptinqam, chay dyablu Jisusta rimkachpa, atamkimkunata qurqan chay wambrataqa. Chaymi chay wambraqa pambaman bulamkachpa, bulatimkachpa, babach'kunata sitamkurqan. 21 Chaymi Jisusqa paypa taytanda tampurqan: Kay churimkiqa, ¿ima tyimpumandampacham kaychinaqa? nichpa. Chaymi chay runaqa nirqan: Tamkchitanmandam kaychinalla. 22 Kanan kutin kutinmi chay dyabluqa kay wambrituytaqa ninaman yamkuman bulan wanchinambaq. ¡Chayri llamkimpawachpa yuch'allku, atichpaqa kach'amkachiy kay wambraytaqa! nichpa. 23 Chaychina nimptinqam, Jisusqa nirqan: Nuqampi yuyamkumptimkiqam, tumkuy imata atini rurayta. Piru ¿atingichuraq nuqampi yuyamkuytaqa? nichpa. 24 Chaymi chay runaqa qayach'amkuchpa nirqan: Qambim yuyamkuni! ¡Piru yanampawayri, masta yuyamkunaypaq! nichpa. 25 Chaychina nimptinqam, Jisusqa achka runa chamuqta rimkachpa, utqaymaya chay dyabluta kaychina anyarqan: Qam surdu mudu dyabluqa, nuqa kimkiymi kamachillki, lluqchiy kay wambramanda! ¡Amamkich yallkuringichu! nichpa. 26 Chaychina nichpa qatimptinqam, chay dyabluqa qayach'amkuchpa, atamkimkunata quchpa, chay wambramanda lluqchirqan. Lluqchichpaqam wañuchqatachina dijarqan. Chaymi rimkaqkunaqa nirqan: Jwira, wañurqannam wambraqa! nichpa. 27 Piru Jisusqam wambrataqa mamkinmanda piskachpa chayachirqan. 28 Chaymandaqam Jisusqa yach'amkuqningunawan yallkurqanna suq wasiman. Chaypi mana pimpis kamptinqam, pallkunalla Jisusta tampurqanllampa: Nuqallkunaqa, ¿imarallkutaq mana atirqayllampachu qatiyta chay dyablutaqa? nichpa. 29 Chaymi Jisusqa nirqan: Chay laya ancha wampu dyablumkunataqam mana chaychinallaqa atinchiqchu qatiytaqa. Dyuspi ancha yuyamkuqkunallam payman ancha mañamkuchpa, ?ayunachpa? atin qatiytaqa. 30 Jisusqam chay kallkachqanmanda richpaqa, pasarqan prubinsya Galiliyampa lugarningunata. Piru payqam mana munarqanchu ni pimpis yach'anambaq chayman rillkachqandaqa. 31 Chayman riqchinaqam chay yach'amkuqningunata nirqan: Nuqa Dyusmanda Chamuq Runatam kuntrawaqkunampa mamkinman rinllampa intrigamkuwaq. Chaymi wanchiwanqallampa. Chaychina pallkuna wanchiwamptimbismi, kimsa diyamanda rini kawsamuq, nichpa. 32 Piru Jisus chaychina nimptinqam, chay yach'amkuqningunaqa mana nimatampis intyindirqanchu: ¿Imampaqmi chaytaqa nillkan? nichpaqa. Kanan tampuq purichpampismi, manchachpa, mana ni tampurqanllampachu. 33 Chaychina richpaqam, Kampirnawun llaqtamanna ch'ayarqanllampa. Chayman ch'ayachpaqam, suq wasimanna yallkurqanllampa. Chaypi kachpaqam, Jisusqa yach'amkuqningunata kaychina tampurqan: Qamkunaqa imampaqmi ñambiqa anyanamkurqallki? nichpa. 34 Chaqa pallkunaqam ñambiqa anyanamkuchqaqa karqan: Mayqanninchiqmi mas baliqqa kanchiq, nichpa. Chaymi tampumptinqa, pallkunaqa panqamkuchpa, uyararqanllana. 35 Chaymandaqam Jisusqa chay dusi yach'amkuqninda qayachpa, tiyachpa, nirqan: Chay mas baliq munaq kaytaqa, umildiyachpa, yumbayta sirbinqa kriyaduchina, nichpa. 36 Chaymandaqam suq wambrituta ampachpa, pallkunampa ch'awpimbi marqachpa nirqan: 37 Mayqan runa kasuwachpa kay laya wambrituta ch'ayachiqqam, alabis nuqata ch'ayachiwallkanmanchina. Piru manam nuqatallachu ch'ayachiwallkanqa. Achwanmi Taytay Dyustampis ch'ayachillkanqa. Chaqa paymi kach'amuwachqa, nichpa. 38 Chaymandaqam yach'amkuqnin Jwanqa nirqan: Yach'achimkuq Taytitu, rimkachqallampam kani suq runata qamba chutimkita myintachpa, dyablumkunata runamkunamanda qatillkaqta. Piru chay runaqam mana nuqanchiqwanqa purichqachu. Chaymi nirqayllampa, ama chaychina ruranambaq, nichpa. 39 Chaychina nimptinqam, Jisusqa nirqan: Dijayllampa chaychina ruranambaq. Chaqa mayqan ruraq suq milagruta chutiyta myintachpaqam, mana kuntrawanchu. 40 Mana kuntranchiq kaqkunaqam, faburninchiq. 41 Chaymi allimpta nillkillampa, mayqan runa ichu warmi chutiyta myintachpa, achla yamkituta quchumptin nuqampa kachqallkirallkum, Dyus kimkin rin pagaraq, nichpa. 42 Nuqampi chayraq kriyiqkunata uchata rurachiqqam ancha kastigadu rin kaq. Chaymi chay uchata rurachiqpaqqa mas alli kanman suq atun mulinu rumita kungambi watachpa, mar yamkuman wichumkunanllampa (manaraq chay uchata rurachimptin, ama mas kastigadu kanambaq). 43 Chayri mamkimki ancha qawch'u kamptin uchata ruranambaqqa, kuchuchpa wichumkuy. Chaqa mas allim kanman, syiluman manku ch'ayanallki. Manam allichu ichkay mamkiyuq kachpa, uchallkirallku infyirnu mana nunka wañuq ninaman rinallkimpaq. 44 Chaychinalla ch'amkimki munamptin ampachuyta uchata ruranallkiqa, kuchuchpa wichumkuy. Mas allim kanman, kuju ch'ayanallki syiluman. Manam allichu ichkay ch'amkiyuq kachpa, uchallkirallku chay mana nunka wañuq infyirnu ninaman rinallkiqa. ?Chaqa infyirnumpiqam mana nunka wañunqachu chay kuru mimkuchuqkunaqa. Chaypi chay nina lumyaqpismi mana nunka wañunqachu.? 47 pawimkiwan imata rimkachpa, uchata munamptimki ruraytampis, mas allim surquchpa wichumkunallki. Chaqa mas allim chulla ñawiyuqlla kachpa, syiluman ch'ayanallki. Manam allichu ichkay ñawiyuq kachpa, uchallkirallku infyirnuman rinallkiqa. 48 Chaqa infyirnumpiqa kuru mimkuchuqkunaqam mana nunka rinchu wañuq. Chay nina lumyallkaqpismi mana nunka rinchu wañuq. 49 (Manchu aychamanqa kach'ita wichunchiq, ufrinda kanambaq.) Chaychinallam runamkunampa sawanman kach'itachina ninataqa rinllampa ruraq, (uchanmanda amkramkanambaq). Chaqa yumbay ufrindamkunam kach'iwan allichadu rin kaq. 50 Piru kach'iqam allin kachpampis dañamkachpaqa, manana nimampaq balinchu, ¿manachu? Chaqa ¿imachinanam atinchiqman allichaytaqa? Piru qamkuna kuyanamkuchpaqam, allin kach'ichina kangillampa. Chayri chumaqta kuyanamkuchpa kawsayllampa.
1 Chay Kampirnawun llaqtamandaqam Jisus rirqanna prubinsya Judiyaman, rriyu Jurdamba waq ladu chimbanman. Chaypim ancha achka runamkuna, warmimkuna Jisusman tandamkarqan. Chaypimpismi pallkunata Taytanchiq Dyuspaq yach'achirqan. 2 Wamkin farisiyu dumktrinayuqpismi tandamkarqanllampa Jisusman, mana atiypaq tampunamkunata tampunanllampa, mana allita kuntistamptin, tumbananllampa. Chaymi kaychina tampurqanllampa: Mayñ, ¿suq runachu atin warminmanda amkramkayta ichu mana? nichpa. 3 Chaymi Jisusqa pallkunata nirqan: Mayñ, ¿imatam Dyuspaq unay rimaq Muysisqa chaypaqqa kamachimkurqan? nichpa. 4 Chaymi pallkunaqa nirqan: Muysismi nirqan, suq runa warminmanda munachpa amkramkaytaqach, suq kartata quchpa, atin amkramkayta, nichpa. 5 Chaychina nimptinllampaqam, Jisusqa nirqan: Unay agwilunchiqkunaqam qamkunachina Dyustaqa mana munarqanchu kasuyta. Chaymi Muysisqa ancha angu chunquyuq kamptinllampa, pallkunata kamachirqan, chay kartata qunanllampa. 6 Piru Dyusqam mana munanchu chaychina rurananchiqqa. Chaqa kay pachata tumkuy imata rurachpaqam, suq ullquta, suq warmita rurarqan. 7 Chaymi chay tyimpumandampacha suq ullquqa taytanmanda, mamanmanda amkramkachpa, warminwanna tandamkachpa tiyan. 8 Kanan ichkay kachpampismi suqchinallana tiyanllampa. Mananam ichkaychinachu. 9 Chayri runamkunaqa Dyus tandachqandaqa ama amkranqallampachu, nichpa. 10 Chaymandaqam Jisuswan wasimpina kachpallampaqa, chay yach'amkuqningunampis chay nichqambaq tampurqan. 11 Chaymi Jisusqa nirqan: Mayqan runa warminmanda amkramkachpa, suq warmitana tandaqqam, punta warminda traysyunda rurallkan. Chaymi ancha uchayuqna chay runaqa. 12 Warmimpismi runanmanda amkramkachpa, suq runawan kachpaqa, chay punta runanda traysyunda rurallkan. Chaymi chay warmimpis ancha uchayuqna. 13 Achka runa, warmim wambritungunata ampamurqanllampa Jisusman, sawambi mamkinda rurachpa, Dyusman mañamkunambaq. Piru yach'amkuqningunaqa wambran ampamuqkunata anyarqanllampa. 14 Chayta uyachpaqam Jisusqa piñamkuchpa, yach'amkuqningunata nirqan: Dijayllampa chay wambritumkuna nuqaman chamunambaq. Ama arkayllampachu. Chaqa Tayta Dyus chumaqta kamachimkumptinqam, kay wambrituchina kaqkuna paywan rinllampa kawsaq. 15 Allimptam nillkillampa, kay umildi wambrituchina kaqkunallam tumkuy tyimpu rin kawsaq Dyuswanqa; manaqa manñm. 16 Chaychina nichpaqam, wambritumkunata marqachpa, mamkinda sawanman rurachpa, Dyusman mañamkurqan, chay wambritumkunata yanampanambaq. 17 Jisumkristu rillkamptinnam, suq runa kallpaylla ñawpanman ch'ayamuchpa, qunqurimkuchpa, tampurqan: Ancha allin Yach'achimkuq Taytitu, ¿imatam atini rurayta, Taytanchiq Dyuswan tumkuy tyimpu kawsanaypaqqa? nichpa. 18 Chaymi Jisusqa tampurqan: Imarallkutaq niwangi: Ancha allin Yach'achimkuq, nichpaqa? Dyusllam ancha allinqa. 19 Qamqam Dyus kamachimkuchqandaqa allita yach'angi. Paymi nin: Qam warmiyuq kachpaqa, ama suq warmiwanqa puñuychu; ama wanchimkuychu; ama suwamkuychu; ama llullamkuychu suqkunampaq; ama pitampis ingañaychu, imanda quch'inallki; taytallkita, mamallkita ancha rrispitay, nichpa. 20 Chaychina nimptinqam, chay runaqa nirqan: Yach'achimkuq Taytitu, yumbay chay niwachqallkitaqam wambraymandampacha kumplichqa kani, nichpa. 21 Chaymi Jisusqa champachpa, chay runata ancha kuyachpa, nirqan: Kaysitullam faltachungi. Tumkuy imallkita randimkuchpa, mana nimayuqkunata quy. Chaychina quchpaqam, syilumpiqa tumkuy imayuqna ringi kaq. Chayta rurachpaqar chamuy, nuqawan purinanchiq. ?Awnki kruspi munamptinllampa wanchichuytampis, nuqatalla kasuway,? nichpa. 22 Chaychina Jisus nimptinqam, chay runaqa limpu malaganayarqan. Chaqa tumkuy imayuq kachpam, chay imangunampaq llamkichpa, kutirqan. 23 Chaymandaqam Jisusqa rridurninman champamkuchpa, yach'amkuqningunata nirqan: Ancha trabajusraq, kampuqkuna Dyusta kasunanllampa, paywan tumkuy tyimpu kawsananllampaqa! nichpa. 24 Chaychina nimptinqam, yach'amkuqningunaqa ancha ispantarqanllampa. Chaymi Jisusqa pallkunataqa nirirqan: Ijitumkuna, ¡ancha trabajusraq waq kampuq runamkuna, tumkuy imangunampilla yuyamkuchpa, Dyusta kasunanllampa, paywan tumkuy tyimpu kawsananqa! 25 Chaqa suq kampuq runa Dyusta kasunambaqmi ancha trabajus. Mas fasilmi kanman chay atun kamillu animal awjampa rinrinda pasanambaq, nichpa. 26 Chayta uyachpaqam, pallkunaqa achwamba ispantarqanllampa. Chaymi pallkunampura ancha tampunamkurqanllampa: Chaychina kamptinqa, ¿pitaq atinman wachamkaytaqa? nichpa. 27 Chaymi Jisusqa pallkunata champachpa nirqan: Runamkunallaqam mana nimatampis atinchu wachamkaytaqa. Piru Dyusqam tumkuy ima munachqanda atin rurayta. Paypaqqam mana nimampis trabajuschu, nichpa. 28 Chaymi Pidruqa Jisusta nirqan: Yach'achimkuq Taytitu, nuqallkunaqam tumkuy imayllampata dijachqallampa kani, qamwan purinaypaqllampa, nichpa. 29 Chaychina nimptinmi, Jisusqa nirqan: Allimptam nillkillampa, mayqan runa dijaq wasinda, masangunata, paningunata, taytanda, mamanda, warminda, wambrangunata, ch'amkrangunata, nuqa nichqayta kasuwachpa, nichqayta yach'achimkuchqanrallkum, 30 syin tantus masta rin ch'askiq kay mundumpilla. Qasachadu kachpampismi, mas achka wasingunata, masangunata, paningunata, mamangunata, wambrangunata, ch'amkrangunata kay mundumpiqa rin ch'askiq. Chay ch'askichqanmandam syilumpiqa Dyuswan tumkuy tyimpu rin kawsaq. 31 Piru kay pachampi achka kamachimkuqqam suq bidampiqa manana rinllampachu baliq. Piru kay pachampi achka mana kamachimkuqkunam syilumpiqa ancha kamachimkuqkuna rinllampa kaq. 32 Chaychina yach'achimkuchpaqam, Jisusqa yach'amkuqningunampa ñawpanda Jirusalin llaqtamanna rillkarqan. Chaymi pallkunaqa ancha manchachqata imkinda rillkarqanllampa. Chaymi Jisusqa riqchina, chay dusi yach'amkuqningunatalla suq laduman qayachpa, kaychina nirqan: 33 Rimkay, kananqa rillkanchiqna Jirusalinman. Waqpiqam nuqa Dyusmanda Chamuq Runataqa rinllampa intrigamkuwaq isrraylinu kuramkunampa kamachimkuqninman, Muysispa liyningunata yach'achimkuqkunaman. Pallkunam jwira runamkunaman rinllampa intrigamkuwaq wanchiwananllampa. 34 Chaypi pallkuna asimpawananrallkum, kusas layata rinllampa rurawaq. Kanan tuqampawachpam, suq lastima chuqri chuqri maqawachpa, rinllampa wanchiwaq. Piru kimsa diya wañuchqaymandam rini kawsamuq, nichpa. 35 Sibidiyumpa chay churinguna Jamkubuwan Jwanmi qamimkachpa, Jisusta rrugarqanllampa: Yach'achimkuq Taytitu, suq faburta rurawayllampa, nichpa. 36 Chaymi Jisusqa nirqan: Mayñ, ¿imatam munangillampa, qamkunampaq ruranaypaq? nichpa. 37 Chaymi pallkunaqa nirqan: Chumaqta llimpyachpa, yumbaypa gubyirnun kachpaqar, yuch'allku kamachimkuy, suqniy allin ladullkimpi, suqniy ichuq ladullkimpi tiyanayllampa, nichpa. 38 Chaychina pallkuna mañamkumptinqam, Jisusqa nirqan: Qamkunaqam mana yach'angillampachu: Imatam mañallkanchiq, nichpaqa. Chaymi chaytaqa mañawangillampa. Chaqa nuqaqam ancha rini ñamkaq. Chay ñamkallkunaqam nuqampaqqa suq basu ancha ayaq yamkuta umpyallkaymanchina rin kaq. ¿Atingimanllampachu qamkunampis nuqachina ñamkayta? Chaqa kuntrawaqkunaqam ancha padisichiwachpa, rinllampa wanchiwaq. ¿Chaychinachu qamkunampis atingimanllampa padisiyta? nichpa. 39 Chaymi pallkunaqa nirqan: Ariri. Atinillampam chaychina padisiyta, nichpa. Chaymi Jisusqa pallkunata nirqan: Allimptam qamkunampis chay ayaq yamkuta umpyaqchina ancha ringillampa padisiq. 40 Piru chaychina qamkuna padisimptimkimpismi, nuqaqa mana atinichu kamachimkuyta, allin laduypi ichu ichuq laduypi tiyanallkillampaqa. Taytay Dyusllam munachqanchina runamkunata amkrachqa, laduypi tiyananllampa, nichpa. 41 Chay Jamkubuwan Jwan Jisusta mañachqanda chay dyis yach'amkuq masinguna yach'achpaqam, ancha piñamkurqanllampa. 42 Chaychina chay suqkuna piñamkumptinqam, Jisusqa qayachpa, nirqan: Chay suq nasyungunampa gubyirnungunam wampuyachpalla, manchachimkuchpa llaqta masingunata kamachinllampa, ¿manachu? 43 Piru qamkunaqa ama chaychinaqa kayllampachu. Achwanri mayqannimki munachpa kamachimkuytaqa, suq kriyaduchina sirbiy chay suqnimkimkunata. 44 Chaqa nuqa Dyusmanda Chamuq Runa kachpampismi, mana chamuchqachu kani runamkuna sirbiwananqa. Achwanmi chamuchqaqa kani, suq kriyaduchina runamkunata sirbinaypaq, wañuchpa, uchangunampaq pagaramkuchpa, pallkunata wachanaypaq. Chaymi nillkillampa, mayqannimki mas baliq munachpa kaytaqa, chay suqnimkimkunata kriyaduchina sirbiyllampa, nichpa. 46 Jisusqam Jirusalinman riqchina, ch'ayarqan Jirimku llaqtaman. Chaymandaqam chay Jirimkumanda yach'amkuqningunawan ancha achka runamkunawan rillkamptinqa, suq sarku runa Bartimiyu chutiq ñamba ladumbi tiyallkarqan, limuch'nata mañamkuchpa. Payqam Timiyumpa churin karqan. 47 Chay Bartimiyuqam yach'achpa: Jisus Nasaritmanda kaqchi kayta chamullkan, nichpaqa, ancha jwirtita qayamkurqan: Unay Dabidpa Karu Willkan Jisus, llamkimpawayri, yanampawayri! nichpa. [Nuta: Dabidpa Karu Willkanmi munan niyta: Dyus Amkrachqan Wachadur, nichpa.] 48 Chaychina qayamkumptinqam, achka runa anyarqan: Uyaray! ¡Uyaray! nichpa. Anyallkamptimbismi, achwamba qayamkurqan: Unay Dabidpa Karu Willkan, llamkimpawayri, yanampawayri! nichpa. 49 Chaymi Jisusqa richqanchina chayachpa nirqan: Qayamuyllampa chay runata, nichpa. Qayamuqkunaqam Bartimiyuta nirqan: Kuchimkuchpa atariy. Jisusmi qayachungi, nichpa. 50 Chaymi payqa, kampanda utqaymaya wichumkuchpa, brinkachpa chamurqan Jisusman. 51 pawpambina kamptinqam, Jisusqa tampurqan: Imachinam munangi yanampachunayqa? nichpa. Chaymi chay sarku Bartimiyuqa nirqan: Yach'achimkuq Taytitu, yanampawayri rimkamkunaypaq, nichpa. 52 Chaymi Jisusqa nirqan: Atinginam riyta. Nuqampi kriyichqallkirallkum allitana ringi rimkamkuq. Chaychina nimptinllam, chay Bartimiyuqa atirqanna rimkamkuyta. Chaymi kuchimkuchpana, Jisuswan rirqan.
1 Jirusalinman riqchinam, ch'ayarqanllampa chay llaqtamkuna Bitanillampa (Bitaniyampa), Bitfajimpa ladunman. Chay llaqtamkunampa ñawpambim karqan Ulibu luma. Chay lugarpina kachpaqam, Jisusqa ichkay yach'amkuqninda nirqan: 2 Rimkay, waq ñawpanchiqpim suq kasiriyu. Waqman ch'ayachpaqam, ringillampa tariq suq burritu watachqata. Chay burrumpiqam manaraq ni pimpis purichqachu. Chay burrituta paskachpa, ampamuyllampa. 3 Piru mayqan tampuchumptinllampa: ¡Imampaqmi ampangillampa? nichpaqa, niyllampa: Siñurninchiqmi nisitan. Dasllam rin kutichimuq, nichpa. 4 Pallkuna richpaqam, allimpta burrutaqa ñamba ladumbi suq wasimpa pungumbi watachqata tarirqanllampa. Chaymi waskanda paskallkamptinllampa, 5 chaypi kaqkunaqa tampurqanllampa: Imatam rurallkangillampa? ¿Imampaqtaq paskangillampa burrutaqa? nichpa. 6 Chaymi pallkuna Jisus nichqanda nimptinqa, dijarqanllampana ampanambaq. 7 Chaychina ch'ayachichpa Jisus kachqanmanqam, pallkunaqa kampangunata burritumpa sawambi rurarqanllampa. Chaychina ruramptinqam, Jisusqa muntamkuchpana rirqan. 8 pandaqam achka runamkuna Jisuspa ñawpanda riqllampa, kampangunata mandachpa. Wamkinqam muntimkunampa ramprangunata kuchuchpa, ñambi mandaqllampa. 9 Kanan ñawpanda riqkuna, imkinda riqkunaqam yumbaynin ancha kuchimkuchpa, Jisuspaq kaychina kunyaqllampa: Biba, biba! ¡Kuchimkuchun, Wachadurninchiq chamullkachqanrallku! ¡Taytanchiq Dyus ancha yanampanqa kay rrimplasun chamullkaqta! 10 ¡Biba Wachadurninchiq! ¡Chaqa chamuchqam, nuqanchiqkunata chumaqta kamachiwananchiq, chay unay gubyirnu Dabidchina! ¡Biba syilumpi Taytanchiq Dyus! ¡Paytalla alabachun! nichpa. 11 Chaychinam Jisusqa Jirusalinman ch'ayarqan. Chaypiqam yallkurqan Tayta Dyuspa adurana wasinman. Chay wasimpi kachpaqam, tumkuy imata ancha allita champarqan. Chaymandaqam tardina kamptinqa, chay dusi yach'amkuqninwan kutirqanna Bitanilla (Bitaniya) llaqtaman. 12 Qayandin, Bitanillamanda (Bitaniyamanda) kutiriqchina Jirusalinmanqam, Jisusqa mallaqnarqan. 13 Chaymandaqam suq yura igusta rimkarqan. Manaraq puqunan tyimpun kamptimbismi, chay igusqa ramprayuqna karqan. Chaymi Jisusqa rirqan rimkaq: Paqta puquyniyuq, nichpa. Piru ch'ayachpaqam, ramprangunatalla rimkarqan. Manam nima puquyniyuqchu karqan. 14 Chaymi Jisusqa chay igusta nirqan: Mananam nunka ringichu puquq, runamkuna mimkunambaq puquynimkitaqa, nichpa. Chay nichqandaqam uyarqan chay yach'amkuqninguna. 15 Chaymandaqam Jisusqa Jirusalinman ch'ayachpaqa, Tayta Dyuspa adurana wasinman yallkurqan. Umkumpiqam tarirqan achka randimkullkaqta, randillkaqkunata. Achka nasyungunampa qallaynindampismi kambyallkarqanllampa. Chaymi Jisusqa yumbay pallkunata animalnindinda sawaman qatirqan. Chay qallayta kambyamkuqkunampa masangunatam ch'ilya ch'ilya bularqan. Palumamkunata randimkuqkunampa iskañungunatampismi bularqan. 16 Wamkingunaqam suq ñandachina dirichaqllana Dyuspa adurana wasimba patyumbiqa. Chaqa kusasningunata ampachpam, suq punguta yallkuchpa, suq pungutana lluqchiqllampa. Pallkunatampismi Jisusqa anyarqan: Kaytaqa ama puriyllampachu, nichpa. 17 Yumbay chaypi kaqkunatam nirqan: Dyuspa Santu Librumbiqam nin: Kay wasiyqam kanqa yumbay nasyunmanda kaqkuna nuqaman mañamkunanllampa, nichpa. Piru qamkunaqam kay wasitaqa rurachqallampa kangi ladrungunampa mach'aynindachina, nichpa. 18 Chaychina nimptinqam, chay kamachimkuq isrraylinu kuramkuna, Muysispa liyningunata yach'achimkuqkunaqa uyachpa, Jisustaqa mancharqanllampa. Chaymi anchana yuyarqanllampa: ¿Imachinaraq paytaqa atinchiqman wanchiyta? nichpa. Chaqa chaypi kaqkunaqam Jisusta ancha allita uyaqllampa. 19 Piru tutayamptinqam, Jisusqa Jirusalin llaqtamandaqa Bitanilla (Bitaniya) llaqtamanna rirqan. 20 Qayandin madrugadu kutirillkachpa Jirusalinmanqam, chay yura igustaqa ch'umpandinna chamkichqata rimkarqanllampa. 21 Chaymi Pidruqa yuyachpa Jisus chay igusta anyachqanda nirqan: Yach'achimkuq Taytitu, rimkay chay igus qayna anyachqallkiqa chamkichqana. 22 Chaychina nimptinqam, Jisusqa nirqan: Taytanchiq Dyuspi allita yuyamkuyllampa. 23 Chaqa allimptam nillkillampa, mayqan runa Dyuspi allita yuyamkuchpa kay urqquta nimptin: Achuy kaymanda. Riy mar yamkuman, kamachimptinqa, chay nichqanchina rin kaq. Piru chay kamachimkuqqar chunqumbiqa ama nimata yuyanqachu: Mana imach'i chaychinaqa kanqachu, nichpaqa. 24 Chaymi nillkillampa, allita kriyichpa mañamkuyllampa, yuyachpa: Dyusmi rin quwaq mañachqayta, nichpa. Chaychina mañamkuchpaqam, allimpta ringillampa ch'askiq. 25 Piru Dyusman mañamkunallkiqa, chay mana alli rurachuqta pirdunayllampa. Chaychina pirdunamptimkiqam, syilumanda Tayta Dyus qamkunatampis uchallkimkunamanda rin pirdunachuq. 26 ?Chay imanachichuqta mana pirdunamptimkiqam, syilumanda Taytanchiq Dyuspis mana rinchu pirdunachuq yumbay uchallkimandaqa.? 27 Jirusalinman ch'ayachpaqam, Jisusqa Dyuspa adurana wasimbina purillkarqan. Chaypi purillkamptinqam, kamachimkuq isrraylinu kuramkuna, Muysispa liyningunata yach'achimkuqkuna, wamkin kamachimkuq ansyanumkunampis Jisusman tandamkarqanllampa. 28 Kanan pallkunaqam Jisusta kaychina tampurqanllampa: Ima karguyuqtaq kangi? ¿Mayqan awturidartaq numbrachuchqa, kallkunata ruranallkimpaq kay adurana wasimpiqa? nichpa. 29 Chaymi Jisusqa nirqan: Mayñ, nuqampis suq tampunata tampuchqallkillampa. Chayta niwamptimkiqam, nuqampis nichqallki chay tampuwachqallkimpaq. 30 Mayñ, ¿pitaq Jwan Chutichimkuqtaqa numbrarqan chutichimkunanqa? ¿Dyuschu numbrarqan ichu runamkunalla? Mayñ, niwayllampa, nichpa. 31 Chaymi pallkunampura suqnin suqnin kaychina parlarqanllampa: Imatam ninchiqman? Chaqa nimptinchiq: Dyusmi Jwanda numbrarqan, nichpaqach'i, Jisusqa niwachun: Chaychina numbramptinqa, ¿imarallkutaq qamkunaqa mana kriyirqallkichu paytaqa? nichpa. 32 Piru: Runamkunallam numbrarqan, nimptinchiqqach'i, kay yumbay uyamkuqkunaqa ¿imanachiwachun? nichpa. Chaqa chaypiqam ancha achka runamkuna uyamkullkarqan. Yaqqa yumbay pallkunaqam kriyirqan: Dyusmi Jwanda allimpta numbrarqan, nichpa. Chaymi chay awturidarkunaqa ancha mancharqanllampa chay uyamkuqkunata. 33 Mana imanayta atichpaqam, Jisusta nirqanllampa: Manam yach'anillampachu, nichpa. Chaymi Jisuspis nirqan: Tampuchqaqta qamkuna mana niwachqallkirallkum, nuqampis mana rinichu nichuq: Kay laya karguyuqmi kani, nichpaqa.
1 Chaymandaqam Jisusqa kay kumparasyunda rurachpa nirqan: Suq runach ancha achka ubasta tarpuchpa, rridurninda muralla pirqata rurarqan. Chaymandaqach rumi kantiriyampi uch'kumkuchpa, suq pusuta rurarqan, ubasningunata kusichachpa, chaypi qampinambaq. Rurarqambischi suq altu turrita, chay altumanda chay tarpudunda kwidanambaq. Chaychina rurachpaqach, partidaryungunawan tratumkurqan, pallkunana tarpudunda kwidanambaq. Chaymandaqach karumanna rirqan. 2 Chaymandaqach kusicha tyimpu ch'ayamumptinqa, chay ch'amkrampa dwiñunqa suq kriyadunda kach'arqan, paypa partinda ampamunambaq. 3 Piru chay kwidamkuqkunaqach chay kriyadutaqa mana nimata quchpachu, suq lastima maqamptinllampa, illaqllana kutirqan. 4 Chaymandaqach chay dwiñuqa suq kriyadunda kach'arirqan, partinda ampamunambaq. Chay kriyadu ch'ayamptimbischi, chay kwidamkuqkunaqa rumimkunawan sitarqanllampa, umanda pamkichtin. Kanan ima layach musyarqanllampa chay kriyadutaqa. 5 Chaychina pallkuna ruramptimbischi, chay dwiñuqa suq kriyaduta kach'arirqan. Chaytaqach wanchirqanllampa. Chaychina pallkuna ruramptimbischi, chay dwiñuqa suqta suqta achka kriyadungunata kach'arqan. Piru chay kwidamkuqkunaqach chay kriyadumkunata mana ch'ayachichpachu, wamkinda ancha maqarqanllampa, wamkinda wanchirqanllampa. 6 Chay dwiñumpaqach suq churinlla karqan. Paytaqach ancha kuyaq. Chaymandaqach chay kuyachqan churindana kach'arqan, yuyachpa: Kay churiytaqam kasunqallampa, nichpa. 7 Piru chay runamkunaqach yaqqana ch'ayallkaqta rimkachpaqa, kaychina parlarqanllampa: Chay churinqam irinsyiru rin kaq. Chayri amkullampa wanchiq, nuqanchiqkunana piskananchiq kay ch'amkrandaqa, nichpa. 8 Chaychina parlachpach, chay churindaqa wanchirqanllampana. Chaymandaqach chay ch'amkranmanda sawa ladumanna wichumkurqanllampa. 9 Chaychina nichpaqam, Jisusqa chay uyamkuqkunata tampurqan: Mayñ, chay ch'amkra dwiñuqa ¿imanachinqaraq chay ch'amkrambi tiyaqkunataqa? Payqam chamuchpa, yumbayta wanchichpa, suqkunatana ch'amkrandaqa minganqa. 10 Dyuspa Santu Librumbim kan suq kumparasyun kay kumparasyunchina. ¿Manachu liyichqallampa kangi? Chaypiqam nin: Albañilkuna wichumkuchqan rumiqam mas allin rumi simyintumpaq rin kaq. 11 Chaqa Tayta Dyusmi chay rumitaqa amkrachqa, mas baliq kanambaq. Chaychina amkrachqanrallkum ancha ispantachqata kuchimkunchiqllampa, nichpa. [Nuta: Chay ichkay kumparasyunda rurachpaqam, kaychina yach'achiwanchiq: Ch'amkra dwiñuqam Taytanchiq Dyus. Chay ch'amkra dwiñumpa churinqam Jisumkristu. Chay wanchimkuq partidaryumkunaqam chay mas kamachimkuq isrraylinu kuramkuna. Ch'amkra dwiñumpa kriyadungunaqam Dyuspaq rimaqkuna. Chay albañilkunampismi chay kamachimkuq isrraylinu kuramkuna. Chay wichumkudu rumimpismi Jisumkristu, nichpa.] 12 Chay awturidarkuna Jisusta uyachpaqam, intyindirqanllampa: Jisusqam nuqanchiqkunampaq chaytaqa nillkan, nichpa. Chaymi piñamkuchpa, ancha yuyarqanllampa Jisusta prisunanllampa. Piru chaypi kaqkunata manchachpam, mana prisurqanllampachu. Chaymi Jisuspa ñawpanmandaqa ladiyarqanllampa. 13 Chaymandaqam chay kuntraqkunaqa kach'amurqan wamkin farisiyu dumktrinayuqkunata, gubyirnu Irudispa wamkin partidungunata, imampaq Jisusta tumbachpa prisunanllampa. 14 Chaymi chay kach'adumkuna ch'ayamuchpaqa, michki michkita kaychina Jisusta parlachirqanllampa: Taytitu, nuqallkunaqam yach'ani: Qamqam allimp kaqtalla rimangi. Chaqa qamqam mana nima pudirniyuq runata manchachpachu ni sawachachpachu, Dyus munachqandalla yach'achimkungi. Mayñ, niwayllampa: ¿Allichu gubyirnu Sasarta kuntribusyunda pagarananchiq, ichu mana? nichpa. 15 Piru Jisusqam yach'arqan: Yanqam kallkunaqa tampuwallkan, nichpa. Chaymi pallkunata tampurqan: Imampaqmi tampuwangillampa, chaypaq tumbawachpa, prisuwanallkillampaqa? Mayñ, suq qallayta ampamuyllampa rimkanaypaq, nichpa. 16 Chaychina nimptinqam, pallkunaqa suq qallayta qurqan. Chaymi Jisusqa chay qallayta champachpaqa nirqan: Pimpa rritratunmi kay qallaypiqa? ¿Pimpa chutindam iskibrichqa kay qallaypiqa? nichpa. Chaymi pallkunaqa nirqan: Chay mas kamachimkuq gubyirnu Sasarpa rritratunda, chutindam rurachqa kay qallaypiqa, nichpa. 17 Chaymi Jisusqa pallkunataqa nirqan: Sasarpa kaqtaqa, Sasarta quyllampa. Dyuspa kaqtaqa, Dyustalla quyllampa. Chaychina nimptinqam, ancha ispantarqanllampa, ancha yach'ayniyuq kachqanrallku. 18 Chaymandaqam sadusiyu dumktrinayuqkuna Jisusman chamurqanllampa. Pallkunaqam kriyinllampa: Wañuchqamkunaqach manana rinchu kawsamuq, nichpa. Chaymi Jisusta tampurqanllampa: 19 Yach'achimkuq Taytitu, chay unay Muysismi librumbi iskibrichpa kamachimkuchqa, suq warmiyuq runa manaraq wambrayuq kachpa wañumptinqa, chay almampa masanna biyudawan kasaranqa, chay biyudampi wambrayuq kamptin, chay alma masamba wambranchina kanambaq, nichpa. 20 Chaymi munanillampa tampuchuyta: Suq ayllumpich syiti ullqu masampura karqan. Chay syitimanda kulamka masanqach warmimkurqanna. Piru manaraq wambrayuq kachpach wañurqan. 21 Chaychi wañumptinqa, chay almampa minur masanna biyudawanqa kasararqan. Chay masambischi manaraq wambrayuq kachpa, wañurqan. Chaymandaqa mas minur masanna biyudawanqa kasararqan. Paypischi manaraq wambrayuq kachpa, wañurqan. 22 Chaychinach syitindin chay warmiwan kasararqanllampa. Piru manach ni mayqannin chay warmimpiqa wambrayuq kachpachu wañurqanllampa. Chaymandaqach chay warmimpis wañurqanna. 23 Chaychina wañuqkuna allimpta kawsamumptinqach'i, ¿mayqannimba warminraq kanman? Chaqa syitindimba warminchi kachqa, nichpa. 24 Chaychina tampumptinllampaqam, Jisusqa nirqan: Qamkunaqam Dyuspa Santu Librun nichqanda mana intyindichpa, ni Dyus pudirniyuq kachqambaq yach'achpa, ancha pandachqa kangi: (Wañuchqamkunaqam mana kawsamunqachu, nichpa). 25 Chaqa wañuchqamkuna kawsamuchpaqam, manana warmiyuqchu ni runayuqchu rinllampa kaq. Chinangunatampismi manana rinllampachu kasarachiq. Achwanmi Dyuspa anjilningunachina manana kasarachpachu kawsanqallampa. 26 Piru wañuchqamkunampaq yach'anallkiqa, yuyayllampa Tayta Dyus nichqanda chay unay agwilunchiqkunampaq Muysispa librumbiqa. Chaqa chay unay almamkuna Abrajan, Isamk, Jamkubum puntata wañurqanllampa. Chaymandaqam achka watamkunamanda Tayta Dyus chay lumyallkaq sarsa sach'amanda Muysista parlachichpa, pallkunampaq kaychina nirqan: Nuqam kanangaman Abrajamba, Isamkpa, Jamkubumpa Dyusnin kani, nichpa. 27 Chaychina nimptinmi yach'anchiq: Chay almamkunaqam Dyuspaqqa kawsallkanllamparaq, nichpa. Piru qamkuna chayta mana intyindichpaqam, ancha pandachqallampa kangi: Wañuchqamkunaqam mana rinllampachu kawsamuq, nichpa. 28 Jisumkristu chay sadusiyumkunata chumaqta kuntistamptinmi, Muysispa liyningunata suq yach'achimkuq chaypi uyallkarqan. Chaymi qamimkachpa tampurqan: Taytitu, Tayta Dyuspa yumbay liyninmandaqa, ¿mayqan liytaq mas allinqa? nichpa. 29 Chaymi Jisusqa nirqan: Yumbay liyninmandam kay mas allinqa: Uyamkuy isrraylinumkuna, Tayta Dyusllam Dyusqa. 30 Payta kuyayllampa tumkuy chunqullkiwan, tumkuy bidallkiwan, tumkuy yuyaynimkiwan, tumkuy jwirsallkiwan, nichpa. Chay liyninmi mas allinqa. 31 Chaymandaqam kay suq liypis yaqqalla chay punta liychina. Kaychinam nin: Qam kwirpullkita kuyachqallkichina runa masimkitampis kuyay, nichpa. Manam ni suq liy mastaqa balinchu kay ichkay liymandaqa. 32 Chaychina Jisus nimptinqam, chay runaqa nirqan: Yach'achimkuq Taytitu, allimptam nichqa kangi. Allibmi Taytanchiq Dyusqa payllam Dyusqa. Manam suqqa kanchu. 33 Chaymi ancha alli, payta kuyananchiq tumkuy chunqunchiqwan, tumkuy yuyayninchiqwan, tumkuy bidanchiqwan, tumkuy jwirsanchiqwan. Runa masinchiqtampismi ancha alli kuyananchiq kwirpunchiqtachina. Chaychina kuyanamkuchpa kawsamptinchiqmi, mastaqa balin yumbay chay rumpachichqan animalkunamanda ichu chay suq laya ufrindamkunata qunanchiqmanda. 34 Chaychina jwisyunwan allita nichqa kamptinmi, Jisusqa nirqan: Achlitallanam faltachungi, Dyusta chumaqta kasunallkiqa, nichpa. Chaymi chay urasmandampacha manana ni pimpis almitimkarqanchu Jisusta tampuytaqa. 35 Dyuspa adurana wasimbi Jisus yach'achimkuchpam, kaychina tampurqan: Imarallkum Muysispa liyningunata yach'achimkuqkunaqa nin: Dyus Amkrachqan Wachadurmi unay gubyirnu Dabidpa karu willkan rin kaq nichpaqa? 36 (Chaychina kamptinqa, ¿imarallkutaq chay kimkin Dabidqa nirqan: Dyus Amkrachqan Wachadurqam kamachimkuqniy, nichpa?) Chaqa Dyuspa Santu Ispiritun rimachimptinmi, chay gubyirnu Dabidqa nirqan: Tayta Dyusmi Kamachimkuqniyta nirqan: Allin laduypi tiyay, kuntrachuqkunata binsichpa, ch'amkimkimpa waranman ruranallkaman (qamta kasuchunanllampa), nichpa. 37 Mayñ, chay Wachadurqa Dabidpa karu willkan kamptinqa, ¿imarallkutaq paypaqqa chay Dabidqa nirqan: Kamachimkuqniy nichpaqa? Chaychina Jisus yach'achimkumptinqam, chay achka runamkunaqa ancha gustarqanllampa uyayta. 38 Chaymandaqam Jisusqa kaychina yach'achimkurqan: Kwidawkich. Chaqa Muysispa liyningunata yach'achimkuqkunaqam ancha gustanllampa chumaq mudananda ruramkuchpa puriyta. Kanan ñangunampimpismi ancha munanllampa chumaqta nampallkunanllampa. 39 Sinaguga wasimkunaman richpampismi, ancha gustanllampa tiyayta chay mas pwidiqkunampa tiyanambi. Mimkunambaqpismi masampiqa mas baliq lugarkunampi tiyanllampa. 40 Chaychinam allingunachina tumkuchpa, biyudamkunampa wasingunata quch'inllampa. Chaymandaqam allin runamkunampaq tumkuchpa, yumbaypa ñawpambi Dyusman mana challkuq mañamkunllampa. Chaymi suqkunamanda mas kastigadu rinllampa kaq. 41 Dyuspa adurana wasimbim karqan kajunguna, ufrindamkunata tandanambaqllampa. Chay kajungunampa ñawpambi Jisus tiyallkamptinmi, achka runamkuna, warmimkuna ufrindangunata wichuqllampa. Achka kampuq runamkunampismi chaypi achka qallayta wichuqllampa chay kajungunaman. 42 Piru suq pubri biyuda ch'ayachpam, ichkay qallitaynin kubrimanda kaqta chay kajunman wichurqan. Chay qallitallkunaqam ancha achlitalla balirqan. 43 Chaymi Jisusqa yach'amkuqningunata qayachpa nirqan: Allimptam nillkillampa, kay pubri biyudita quchqanqam Dyuspaqqa ancha balin maski yumbay chay suqkuna quchqanmanda. 44 Chaqa chay suqkunaqam qallaynin subrandalla qunllampa. Piru chay biyuditaqam ancha pubri kachpampis, mantyinimkanan kaqta limpulla quchqa, nichpa.
1 Dyuspa adurana wasinmanda lluqchimptinllampam, Jisuspa suq yach'amkuqnin nirqan: Yach'achimkuq Taytitu, rimkay Dyuspa adurana wasinqam ancha chumaq. Chaqa ancha atun rumimkunawanmi murallanda rurachqallampa, nichpa. 2 Chaymi Jisusqa payta nirqan: Kananqam rimkallkangi kay atun wasita. Piru suq diyam limpu rinllampa bulaq. Chaychina bulamptinllampam, manana ni suq rumi patachaduqa kidanqachu, nichpa. 3 Chaymandaqam Ulibu lumamanna rirqanllampa. Chay lumaqam Dyuspa adurana wasimba chimba ladu frintimbi karqan. Chay lumampinam Jisusqa samallkarqan. Chaymi Pidru, Jamkubu, Jwan, Andrisqa uyaritamplla Jisusta kaychina tampurqanllampa: 4 Chay nichqallkiqa, ¿ima wataraq kanqa? ¿Imataraq rimkachpa yach'achaqllampa: Kay munduqam rinna uchyamkaq, nichpaqa? 5 Chaymi Jisusqa nirqan: Kwidamkayllampa ama pimpis ingañachunambaq. 6 Chaqa achka llullamkuqkuna chamuchpam, nuqampa chutiyta myintachpa, rin niq: Nuqam Dyus Amkrachqan Wachadurqa kani, nichpa. Chaychinam achka runata, warmita rinllampa ingañaq. 7 Chayri qamkuna uyachpa: Waqpi, kaypim pilyallkanllampa, nichpampis, ama manchayllampachu. Chaqa chaychinam rin kaq. Chaychina kamptimbismi, manaraq rinchu uchyamkaq kay munduqa. 8 Achwanmi puntata suq nasyumbi tiyaqkuna rinllampa pilyaq suq nasyumbi tiyaqkunawan. Achka nasyungunampuram rinllampa pilyaq. Kay pachampismi waqpi kaypi rin kuyuq. Ambrunampismi waqpi, kaypi rin kaq. Tumkuy kay siñamkunaqam munan niyta: pamkallkunam qallarillkanna, nichpa. Chaymandaqam mas achka ñamkallkuna rin kaq. 9 Chayri qamkunaqa allita yach'ayllampa: Rinim padisiq, nichpa. Chaqa rinllampam ampachuq awturidarkunaman. Kanan sinaguga wasimkunampim rinllampa maqachuq. Rinllampam ampachuq gubyirnumkunampa ñawpanman, nuqampi kriyichqallkirallku. Chaymi qamkunaqa pallkunampa ñawpambiqa nuqampa faburniyta ringillampa rimaq. 10 Chaqa kay pacha manaraq uchyamkamptinmi, puntata yumbay nasyungunampi nuqampa chumaq nutisyayta ringillampa yach'achimkuq. 11 Kanan qamkunata ampachumptinllampa intrigamkuchuq awturidarkunamanqa, ama llamkiyllampachu ni yuyayllampachu: ¿Imachinaraq kuntistachaq? nichpaqa. Chaqa chay urasmi Tayta Dyus rin yanampachuqllampa, pay munachqanda ninallkillampa. Manam qamkunallachu ringillampa rimaqqa. Achwanmi Dyuspa Santu Ispiritun rin yanampachuqllampa, allita rimanallkillampa. 12 Kanan runamkunaqam masanllampata rin intrigamkuq wanchinanllampa. Taytamkunampismi rinllampa intrigamkuq wambrangunata wanchinambaq. Churingunampismi taytangunata kuntrachpa, rinllampa wanchichiq. 13 Kanan yumbay runamkunam rinllampa ch'iqnichuq, nuqampi kriyichqallkirallku. Piru nuqampi mana challkuq yuyamkumptimkiqam, suq bidampi rini wachachuq. 14 Dyuspaq rimaq Dañilmi unay tyimpumpi librumbi kaychina iskibrichqa: Suq millanaypaq dañachimkuqmi rin yallkuq santu lugarman mampachamkuq, nichpa. Chayri chaypaq yach'achpaqa, yuyayllampa chay liyichqallkita. Chaqa chay tyimpu ch'ayamumptinqar, kay prubinsya Judiyampi kaqkunaqa mitimkanqallampa chuncha lugarkunaman. 15 Kanan wasimba sawambi kaqkunampisri ichkichpa das mitimkanqallampa, ama ni wasinman yallkuchpa imanda surqunambaq. Achwanri chaychinalla das mitimkanqallampa. 16 Ch'amkrampi kaqkunampisri amana kutinqallampachu wasinman, imanda surquqqa. 17 ¡Kanan imananqaraqri chay pach'ayuq (umkuyuq) warmimkunaqa, chay iti wambrituyuqkunaqa! 18 Chayri Dyusman mañamkuyllampa, ama mitimkanallkillampa tamya tyimpumpi. 19 Chay mitimkanallki diyamkunampiqam runamkuna, warmimkuna ancha rinllampa padisiq. Chaqa Dyus kay pachata rurachqan diyamandampacham mana nunka chaychinaqa padisichqallampachu. Chay ñamkay diyamkuna pasamptinmi, manana nunka chaychinaqa rinllampachu padisiq. 20 Piru Dyusqam amkrachqan wambrangunata llamkimpachpa, chay ñamkana diyamkunata das rin pasachiq, paypi kriyiqkuna ama achka diyamkunata padisinanllampa. Chaqa Taytanchiq Dyusmi chaychina mana pasachimptinqach'i, mana pimpis atinmanchu kawsayta. 21 Chayri mayqan qamkunata nichumptinllampa: ¡Rimkay, kaypim Dyus Amkrachqan Wachadur! ichu: ¡Rimkay, waqpim payqa! nichumptinqa, ama kriyiyllampachu. 22 Chaqa rinllampam chamuq achka llullamkuqkuna: Nuqam Dyus Amkrachqan Wachadur kani, nichpa, ichu: Nuqam Dyuspaq rimaq kani, nichpa. Kanan rinllampam ruraq ispantaypaq milagrumkunata, suqkuna pallkunampi kriyinambaqllampa. (Chaychina rurachpam, achka runata, warmita rinllampa ingañaq.) Atichpaqach'i, asta Dyuspa amkrachqan wambrangunatampis ingañanmanllampa. 23 ¡Chayri allita kwidamkayllampa! Yumbay kallkunatam nichuchqallampana kani manaraq nima pasamptin (ama pimpis ingañachunanllampa). 24 Chay laya ñamkallkuna pasamptinqam, rumpaywan killa wañuchpa, manana rinchu achimkchamkuq. 25 Lusirumkunampismi syilumanda rin ichkimuq. Syilumpi tumkuy ima kaqkunampismi rinllampa kuyuq. 26 Chaymandaqam nuqa Dyusmanda Chamuq Runataqa rinllampa rimkawaq syilumanda chamullkaqta. Chaqa nuqaqam rini chamuq pumkutallkunampa umkumbi, ancha pudirniyuq, ancha chumaqta llimpyachpa. 27 Chaychina chamuchpaqam, anjilnillkunata rini kamachiq, amkrachqay wambrallkunata tumkuy kay mundumanda tandananllampa. 28 Kay kumparasyunda allita yach'amkuyllampa: Qamkunaqam suq yura igusta pallpamullkaqta rimkachpaqa, yach'angillampana: Tamya tyimpumanmi ch'ayallkanchiqna, nichpa. 29 Chaychinallam kay nichuchqayllampata rimkachpa, yach'ayllampa: Allibmi Jisumkristu nichqanchina utqana rin kumpliq, nichpa. 30 Chaymi allimpta nillkillampa, kay tyimpumpi kawsaqkuna manaraq wañumptinmi, chay nichuchqallkunaqa rin kumpliq. 31 Chaqa syiluwan kay pacham rin chingaq. Piru kay nichqallkunaqam mana nunka rinchu uchyamkaq. Achwanmi chaychinalla rin kumpliq. 32 Piru kay nichqaytaqam mana pimpis yach'anchu: ¿Ima diya, ima urasmi rin kaq? nichpaqa. Ni syilumpi kaq anjilkuna ni nuqa Dyuspa Churimbis mana yach'anillampachu. Taytay Dyusllam chaytaqa yach'an. 33 Llalli qamkunaqam mana yach'angichu, ¿Ima tyimpum chay diyaqa rin ch'ayamuq? nichpaqa. Chayrallkur qamkunaqa Dyusman mañamkuchpa, ama challkuchpachu chuyawayllampa. 34 Chaqa nuqam qunqaylla rini kutimuq suq runa wasiyuq kutimuqchina. Chay runa karuta rinambaqqam wasindaqa kriyadungunata mingachpa rin. Piru manaraq richpaqam, chay kriyadungunata kamachin, tumkuy imangunata allita kwidanambaq, trabajungunata ruranambaq. Wasimkamandampismi kamachin, allita rimkanambaq, kutimuchpa, tumkuy imanda allita tarinambaq. Qamkunaqam chay kriyadumkunachina kangillampa. 35 Chayri bidallkita allita allichachpa chuyawayllampa. Chaqa manam yach'angillampachu: ¿Ima diyam Siñurninchiq rin kutimuq? nichpaqa. Kinsampch'i kutimuchaqqa chichimpacha ichu ch'awpi tuta, ichu gallu kantallkachqan uras ichu achimkyaq purillkamptin. 36 Chayri kwidawkich; mana yuyachqallki uras kutimuchpa, puñullkaqllampata tarichuyman. 37 Kay nichuchqaytaqam yumbay runata, warmita nini: Allita allichachpa bidallkita chuyawayllampa, nichpa.
1 [Nuta: Tayta Dyusqam unay isrraylinumkunata nasyun Ijimptumanda surquchqa karqan. Chaymi chaytaqa ama qunqananllampa, watan watan suq fyistata ruraqllampa. Chay fyistaqam chutiq Paskwa.] Chay Paskwa fyistampiqam kachangamkunata mimkuqllampa. Ichkay diya faltamptin chay paskwa fyistampaqqam, kamachimkuq isrraylinu kuramkuna, Muysispa liyningunata wamkin yach'achimkuqkunawan kunanamkuchpa yuyarqanllampa: ¿Imanayraq ingañachpa, Jisusta piskanchiqman wanchinanchiq? nichpa. 2 Wamkinqam nirqanllampa: Ama wanchichunchu fyistampiqa. Chaqa fyistaman tandamkaqkunamkich, chayta ruramptinchiqqa, kuntranchiq alsamkanmanllampa, nichpa. 3 Suq runa Simun chutiqmi Bitanilla (Bitaniya) llaqtampi tiyaq. Unaymi payqa ismullkaq kwirpuyuq kachqa karqan. Jisusmi chay Simumba wasinman ch'ayachpa, masaman tiyarqan mimkunambaq. Chaypi tiyallkamptinmi, suq warmi ch'ayarqan kirpadu rumi pumumpi ancha ch'aniyuq nardu puru plantamanda michki mutkinata ampamuchpa. Chaymandaqam chay warmiqa chay pumumpa kunganda pamkichpa, chay michki mutkinawan Jisuspa umanda nuyuchirqan. 4 Chaymi wamkin chaypi kaqkuna chaychina ruraqta rimkachpaqa, ancha piñamkuchpa, pallkunampura kaychina parlarqanllampa: Kay warmiqa, ¿imampaqraq kay ancha ch'aniyuq michki mutkinataqa qasachan? 5 Chaqa kayta randimkuchpaqach'i masdi 300 dinaryu qallayta ch'askinanchiqta, chay qallaywan pubrimkunata yanampananchiq, nichpa. Chaychina parlachpaqam, anyarqanllampa chay warmitaqa. 6 Chaymi Jisusqa nirqan: Chay warmitaqa ama anyayllampachu. ¿Imampaqmi piñachingillampa? Kaychina rurawachpaqam, ancha allita rurachqa. 7 Chaqa pubrimkunaqam qamkunawanraq rinllampa kaq, munachqallki uraspi yanampanallkillampa. Piru nuqaqam manana qamkunawanqa rinichu kaq. 8 Kay warmiqam atichqanda rurachqa. Chaqa manaraq wañumptiymi, kay michki mutkinawan kwirpuyta allichallkan, wañumptiy pambawananllampa. 9 Chaymi allimpta nillkillampa, tumkuy kay mundumpi chumaq nutisyayta yach'achimkuchpaqam, kay warmi allita rurawachqandampis rinllampa yach'achimkuq, paytaqa ama nunka qunqananllampa, nichpa. 10 Chay runa Judas Iskaryuti chutiqmi Jisuspa chay dusi amkrachqan yach'amkuqninmanda suqnin karqan. Piru chay Judasmi kamachimkuq isrraylinu kuramkunaman richpa, tratumkurqan, pallkunaman Jisusta intrigamkunan. 11 Chaymi chay kamachimkuq kuramkuna ancha kuchimkuchpa, ufrisirqanllampa qallayta qunambaq. Chaymi Judasqa ancha yuyarqan: ¿Imachinataq Jisusta intrigamkuchaq chay kuntraqkunaman? nichpa. 12 Paskwa fyistampiqam uñitamkunata wanchichpa, aychanda, kachangamkunata, suq laya mimkunamkunatampis mimkuqllampa. Chay punta diya fyistampim Jisuspa yach'amkuqninguna payta tampurqanllampa: Kay Paskwa fyista mimkunata mimkunanchiqqa, ¿maypitaq munangi allichanayllampa? nichpa. 13 Chaymi Jisusqa ichkay yach'amkuqninda kamachirqan: Riyllampa Jirusalin llaqtaman. Waqpim ringillampa tinguq suq runa puyñumbi yamkuta ampallkaqta. Chay runampa imkinda riyllampa. 14 Chay may yallkuchqambi chay wasimpa dwiñunda tarichpa, tampuyllampa: Yach'achimkuqniymi nin: ¿Mayqan kwartullkimpich yach'amkuqnillkunawan Paskwa mimkunata mimkuchaq? nichpa. 15 Chaychina nimptimkillampam, payqa rin rimkachichuq wasimba altumbi suq atun kwartuta tumkuy imawan allichachqata. Chaypi allichayllampa Paskwa mimkunataqa, nichpa. 16 Chaymi chay ichkay yach'amkuqninguna Jirusalinman richpaqa, Jisus nichqanchina runata tarirqanllampa. Chaymandaqam chay wasimpina Paskwa mimkunata allicharqanllampa. 17 Tutayamptinnaqam Jisusqa chay dusi yach'amkuqningunawan chay wasimanna rirqan. Chaypinam pallkunawan Paskwa mimkunata mimkullkarqan. Mimkuqchinaqam Jisusqa nirqan: Allimptam nillkillampa, qamkunamanda suqnimki nuqawan pulla mimkuqmi, ringi intrigamkuwaq kuntrawaqkunaman, nichpa. 19 Chaymi pallkunaqa limpu malaganayachpa, suqnin suqnin Jisusta tampurqanllampa: Nuqachu kani? nichpallampa. 20 Chaymi Jisusqa chay dusi ampustulninda nirqan: Suqnimki nuqawan suq platumpilla mimkuqmi rin intrigamkuwaqqa. 21 Chaqa Dyuspa Santu Librumbi nuqa Dyusmanda Chamuq Runampaq nichqanqam allimpta rin kumpliq. Piru chay runa intrigamkuwaqqam chay uchanrallku ancha kastigadu rin kaq. ¡Chaymi mas allich'i kananda, chay runa ama nasinambaq! 22 Paskwa mimkunata mimkuqchinam Jisusqa kachangata piskachpa, Dyusman mañamkuchpa, bindisirqan. Chaymandaqam pitichpa, pallkunata nirqan: Ch'askiway kay kachangata. Kaymi kwirpuy, nichpa. 23 Chaymandaqam suq kumpata piskachpa, Dyusta pagimkuchpa pallkunata qurqan. Chaymi pallkunaqa chay kumpamanda binuta yumbay umpyarqanllampa. 24 Pallkuna umpyallkamptinqam Jisusqa nirqan: Kay kumpa binuqam yawarniy. Kay yawarniywanmi runamkunawan, warmimkunawan suq muchuq tratuta rini ruraq. Chaqa kay yawarniyta ich'achpam, achka runamkunata, warmimkunata rini wachaq. 25 Allimptam nillkillampa, mananam rinichu umpyaq ubaspa yamkundaqa, syilumpi muchuq binuta umpyanallkaman, Taytanchiq Dyus chumaqta kamachimkumptin, nichpa. 26 Chaymandaqam imnuta kantachpa, Ulibu lumamanna rirqanllampa. 27 Chaypina kachpaqam, Jisusqa nirqan: Kay tutam yumbay qamkunaqa manchachpa, nuqamanda ringillampa amkramkaq. Chaqa Tayta Dyuspa Santu Librumbim nin: Michidurta suq lastima ruramptiymi, wichangunaqa waqta kayta rinllampa chimkwamkaq, nichpa. 28 Piru wañuchqaymanda kawsamuchpaqam, qamkunampa ñawpallkita rini riq waq prubinsya Galiliyaman, nichpa. 29 Chaymi Pidruqa nirqan: Yumbay manchachpa amkramkamptimbismi, nuqaqa mana amkramkachaqchu qamandaqa. 30 Chaychina nimptinmi, Jisusqa Pidruta nirqan: Allimptam nillki, kay tuta gallu manaraq ichkay bwiltata kantamptinmi, qamqa kimsa kutinda ringi ñigawaq: Manam riqsinichu Jisustaqa, nichpa. 31 Chaymi Pidruqa kutin kutin nirqan: Pullallki wañuchpampismi, mana ñigachqallkichu, nichpa. Yumbay chay suq yach'amkuqningunampismi chaychinalla nirqanllampa. 32 Chaymandaqam Jisusqa chay yach'amkuqningunawan rirqanna suq lugar Jitsimani chutiqman. Chaypim wamkin pallkunataqa nirqan: Kaypi tiyayllampa, rinallkaman kay waqman, Tayta Dyusman mañamkuq, nichpa. 33 Chaychina nichpaqam, Jisusqa Pidruwan, Jamkubuwan, Jwanwan riqchinaqa, ancha llamkirqan. Chunqun munamptin tutayaytam, 34 pallkunata nirqan: Ancharaq llamkini. Chaymi chunquy tutayachpa munan wanchiwayta. Mayñ, kaypilla chuyawayllampa. Piru amamkich puñungillampachu, nichpa. 35 Chaychina nichpaqam, Jisusqa mas waqkaq richpa, qunqurimkuchpa, kumurachpa pambamkaman, Dyusta ancha rrugarqan, ama chay kruspi padisinambaq. 36 Mañamkuchpaqam, kaychina nirqan: Taytitu, qamqam tumkuy imata atingi rurayta. Munachpaqa wachaway, ama chaychina wañunaypaq. Chaqa yumbay kay ñamkallkunaqam suq basumpi ancha ayaq yamkumkunachina. Yuch'allku amar dijawaychu, chaychina ñamkanaypaqqa. Piru mastam munani qam munachqallkita ruranallkimpaq. Amar nuqa munachqaytaqa ruraychu, nichpa. 37 Chaychina mañamkuchpa, pallkunaman kutimuchpaqam, puñullkaqta tarirqan. Chaymi Pidruta nirqan: Simun, ¿ima puñullkangichu? ¿Ima manachu atichqa kangi suq uritata agwantayta puñuymandaqa? 38 Allita rimkch'amkachpa, Dyusta rrugay, ama tyintadu kanallkillampa. Qamqam allimpta munangi Dyusta kasuyta. Piru manam atingichu kwirpullkita sujitayta, nichpa. 39 Chaymandaqam Jisusqa kutirirqan, chaychinalla Dyusman mañamkuriq. 40 Chaymandaqam kutirimuchpaqa, yach'amkuqningunata taririrqan puñullkaqta. Chaqa puñuywanqam ñawingunaqa kirpamkallkarqan. Chaymi pallkunaqa panqamkuchpa, Jisustaqa mana nimatampis atirqanllampachu niyta. 41 Chaymandaqam Jisusqa suq kutinda richpa mañamkuq, kutirimuchpaqa, puñullkaqta taririrqan. Chaymi nirqan: Puñuyllampana, samayllampana, nichpa. (Chaymandaqam suq rratitumanda nirqan:) Rimkch'amkayllampana. Ch'ayamuchqanam uras, uchayuq runamkunaman nuqa Dyusmanda Chamuq Runata intrigamkuwanan. 42 Atariyllampa. Amkuna. Chamunnam chay intrigamkuwaq, nichpa. 43 Jisumkristu chay wamkin yach'amkuqninwan parlallkamptinmi, chay yach'amkuqnin Judasqa ch'ayamurqanna achka runamkunawan. Pallkunaqam atun kuchillumkunawan, qarumkunawan chamurqanllampa. Chaqa pallkunataqam chay kamachimkuq isrraylinu kuramkuna, Muysispa liyningunata chay yach'achimkuqkuna, chay kamachimkuq ansyanumkunawan kach'amuchqallampa karqan, Jisusta prisunanllampa. 44 Judasqam chay runamkunata nichqa karqan: Qamkuna Jisusta riqsinallkiqam, muchachpa rini nampallkuq. Chaymi chay nampallkuchqayta piskachpa, ampayllampa, nichpa. 45 Chaymi chay Judasqa ch'ayachpa, Jisusmanqa qamimkachpa, nampallkurqan: Yach'achimkuq Taytitu, nichpam, mucharqan. 46 Chaymi chay runamkunaqa Jisusta piskachpa amparqanllampana. 47 Piru Jisuspa suq yach'amkuqninmi das surquchpa atun kuchillunda, mas kamachimkuq isrraylinu kurampa kriyadumba rinrinda pitirqan. 48 Chaymi Jisusqa chay runamkunataqa nirqan: Ima qamkunachu chamuchqa kangi atun kuchillumkunawan, qarumkunawan, suq ladrundachina prisuwaq? 49 Nuqaqam tumkuy diya qamkunampa pullallkillampa kachpa, Dyuspa adurana wasimbi yach'achimkuchqa kani, ¿manachu? Piru chaypiqam qamkunaqa mana prisuwarqallkichu. Kaychinaqam rurawangillampa, Dyuspa Santu Librumbi nichqanchina kumplinambaq, nichpa. 50 Chaychina Jisusta piskamptinllampaqam, yach'amkuqningunaqa payta sampalandallana dijachpa, mitimkarqanllampa. 51 Suq wambra runa utkumanda kampayuqmi Jisuspa imkinda rillkarqan. Chaymi chay prisuq runamkunaqa paytampisna piskarqanllampa. 52 Piru chay runaqam, kampanda dijachpa, simprallana mitimkarqan. 53 Jisustaqam chay tutatalla amparqanllampa mas kamachimkuq isrraylinu kuraman. Chaymanmi tandamkarqan kamachimkuq isrraylinu kuramkuna, kamachimkuq ansyanumkuna, Muysispa liyningunata yach'achimkuqkuna. [Nuta: Yumbay chay awturidarkunaqa tandadu kachpam, chutiq Mas Kamachimkuq Tandamkaq Juyiskuna, nichpa.] 54 Kanan Pidruqam Jisuspa karu imkinda rirqan chay mas kamachimkuq isrraylinu kurampa umku patyungaman. Chay patyumpiqam nina mirallkarqan. Chaypim Pidruqa suldadumkunawan ninampi machamkullkarqan. 55 Kanan chay kamachimkuq isrraylinu kuramkuna yumbay chay Mas Kamachimkuq Tandamkaq Juyiskunawanqam maskarqanllampa allin tistigumkunata, Jisusta wanchinanllampa; piru manam tarirqanllampachu. 56 Chaqa chay tarichqan tistigumkunaqam wamkingunaqa suq layata llullamkurqan. Wamkinnataqmi suq layata llullamkuchpa rimarqanllampa. Chaymi mana balirqanchu chay rimachqanllampaqa. 57 Wamkimbismi Jisusta yanqamkunata llullamkuchpa nirqanllampa: 58 Nuqallkunaqam uyachqallampa kani kaychina nimptin: Nuqaqam Dyuspa adurana wasinda runamkuna rurachqandaqa pamba pamba rini bulaq. Chaymandaqam kimsa diyampilla rini rurariq suq laya wasita. Chay wasiqam mana kanqachu runamkuna rurachqanchinaqa, nichpa. 59 Chay tistigumkunampismi suq layata suq layata rimarqanllampa. Manam chay layatallachu rimarqanllampaqa. 60 Chaymi chay mas kamachimkuq isrraylinu kura atarichpa, Jisusta tampurqan: Imarallkum uyarangi? ¿Manachu uyangi kay runamkuna qambaq rimachqandaqa? nichpa. 61 Piru Jisusqam uyararqanlla. Manam nimatampis nirqanchu. Chaymi chay kamachimkuqqa Jisusta tampurirqan: Qamqachu Tayta Dyus Amkrachqan Wachadur kangi? ¿Binditu Tayta Dyuspa Churinchu kangi? nichpa. 62 Chaychina tampumptinmi, Jisusqa nirqan: Ari, nuqam kani. Kanan qamkunaqam nuqa Dyusmanda Chamuq Runata ringillampa rimkawaq ancha pudirniyuq Tayta Dyuspa allin ladumbi tiyallkaqta. Ringillampam rimkawaq syilumanda pumkutallkunampa umkumbi chamullkaqta, nichpa. 63 Chaychina Jisus nimptinmi, chay mas kamachimkuq isrraylinu kuraqa ancha piñamkuchpa pay kimkin kampanda llimkichpa, nirqan: Mayñ, kananqa mananam munanchiqchu mas tistigumkunataqa! 64 Yumbay qamkuna uyarqallkillampa kay runata: Dyuspa Churinmi kani, nichqanda. Chaychina rimachpaqam, Dyusta burlallkan. Mayñ, qamkunaqa ¿imatam ningillampa? nichpa. Chaymi yumbay nirqan: Chaychina rimachqanrallku wañunqa, nichpa. 65 Chaymi wamkinqa chay uras Jisusta qaqllambi tuqamparqanllampa. Kanan ñawinda pambachpam, suq lastima maqachpa nirqanllampa: Mayñ, niwayllampa: ¿Pim maqachurqan? nichpa. Kanan wamkin suldadumkunaqam suq lastima qaqllitambi maqarqanllampa. 66 Chay mas kamachimkuq isrraylinu kurampam suq kriyadan karqan. Kanan Pidru chay kurampa wasimba patyumbi kallkamptinmi, chay kriyadaqa chamurqan. 67 Chamuchpaqam, Pidruta ninampi machamkullkaqta rimkachpa, ancha champachqanchina nirqan: Qambismi Jisus Nasaritmanda kaqwan puriq kangi, nichpa. 68 Piru Pidruqam nirqan: Manam paytaqa riqsinichu. Manam ni yach'anichu imatach'i niwallkangi, nichpa. Chaychina nichpa, Pidruqa sawa punguman lluqchillkamptinmi, suq gallu kantarqan. 69 Kanan chay kriyadaqam Pidruta ancha champachpa, chaypi kaqkunata nirirqan: Kay runaqam Jisuswan puriq, nichpa. Chaymi Pidruqa chaychina niqta uyachpaqa nirirqan: 70 Manam riqsinichu Jisustaqa, nichpa. Chaymandaqam suq rratitumanda chaypi kaqkunaqa Pidruta nirirqan: Allibmi qamqa pallkunampa suqnin kangi. Chaqa chay Galiliyamanda kaqkunachinam rimangi. Chaymi riqsillkillampa, prubinsya Galiliyamandam kangi, nichpa. 71 Chaychina nimptinllampaqam, Pidruqa ancha jurachpa llullamkuchpa nirqan: Pur dyusitu, allimptam nillkillampa, manam riqsinichu chay runataqa! Pimpaqch'i niwallkangillampa, nichpa. 72 Chaychina nimptinllam, galluqa kantarirqan. Chaymi Pidruqa galluta uyachpa kantariqtaqa, das yuyarqan Jisus nichqanda: Gallu manaraq ichkay kutinda kantamptinmi, qamqa kimsa kutinda ringi ñigawaq: Manam riqsinichu Jisusta , nichpa. Chay nichqanda yuyachpam, Pidruqa ancha waqarqan.
1 [Nuta: Chay tyimpumkunampim Rruma llaqtamanda kaqkuna achka nasyungunampi kamachiqllampa. Chaymi isrraylinumkunatampis suq rrumanu gubyirnu kamachiq. Chay gubyirnuqam chutiq Pilatu.] Achimkyallkamptinnam kamachimkuq isrraylinu kuramkuna, kamachimkuq ansyanumkuna, Muysispa liyningunata yach'achimkuqkunawan tandanamkuchpa parlarqanllampa. Pallkunaqam Jisuspa mamkingunata grillitachpa amparqanllampa gubyirnu Pilatuman intrigamkuq. 2 Pilatuqam Jisustaqa tampurqan: Qamchu isrraylinumkunampa gubyirnun kangi? Chaymi Jisusqa nirqan: Ari, chay nichqallkichinam kani, nichpa. 3 Kanan chay kamachimkuq isrraylinu kuramkunaqam Jisusta kriminachpa, ancha rimarqanllampa. 4 Chaymi gubyirnu Pilatuqa Jisusta tampurqan: Kaychina kuntrachuchpa ancha rimamptinllampaqa ¿ima manachu qamqa nimata ningi? nichpa. 5 Piru Jisusqam mana nimata nirqanchu. Chaymi Pilatuqa ancha ispantarqan. 6 Piru chay Paskwa fyistampi isrraylinumkuna rrugamkumptinqam, gubyirnu Pilatuqa kada wata suq prisuta karsilmanda surquq. 7 Chay tyimpumpi wamkin isrraylinumkunam rrumanumkunawan pilyachpa, wamkingunata wanchichqallampa karqan. Chaymi chay wanchimkuqkunaqa karsilpi karqan. Suqqam Barrabas chutiq. 8 Chaymandaqam Pilatumpa ñawpambi Jisus kallkamptinqa, suq isrraylinumkuna chamurqanllampa rrugamkuq, suq prisuta karsilmanda surqunambaq. 9 Chaymi Pilatuqa nirqan: Munangillampachu kay gubyirnullki Jisusta kach'anaypaq? nichpa. 10 Chaqa chay Pilatuqam yach'arqan: Chay kamachimkuq isrraylinu kuramkunaqam Jisusta imbidyachpalla, nuqamanqa ampamuchqallampa, nichpa. 11 Piru chay kamachimkuq isrraylinu kuramkunaqam chay mañamkuq isrraylinumkunata ancha kunarqan, Pilatuta ninambaqllampa: Jisustaqa ama kach'aychu. Barrabasta kach'ayqa, nichpa. 12 Chaymi chaychina nimptinllampa, Pilatuqa tampurqan: Munachpa Barrabasta kach'anaypaqqa, ¿imatam munangillampa kay gubyirnullki Jisusta ruranaypaq? nichpa. 13 Chaymi pallkunaqa ancha ch'uqyarqanllampa: Jisusta suq kruspi klabayllampa! nichpa. 14 Chaymi Pilatuqa nirqan: Imampaqmi kamachichaq wanchinanllampaqa? ¿Ima uchatam rurachqa? Chaychina nimptinqam, pallkunaqa masta ch'uqyarqanllampa: Kruspi klabay! ¡Kruspi klabay! nichpa. 15 Chaymi Pilatuqa ama malpi kidanambaq chay rrugamkuqkunawan, Barrabastana karsilmandaqa kach'arqan. Chaymandaqam kamachirqan, ancha asutinanllampa Jisusta. Asutichichpaqam, suldadumkunata intrigarqan, pallkunana kruspi klabananllampa. 16 Chaymi suldadumkunaqa Jisustaqa amparqanna gubyirnu Pilatumpa dispachumba patyunman. Kanan pallkunaqam yumbay suldadu masingunata chayman tandarqanllampa. 17 Chaymandaqam chay suldadumkunaqa suq granati kampata kampachirqanllampa Jisustaqa. Kanan suq kuruna kachamanda chimbadutam umachachirqanllampa. 18 Chaychina rurachpaqam, ancha asimpachpa, kaychina ch'uqyarqanllampa: Biba, biba isrraylinumkunampa gubyirnun! nichpa. 19 Chaychina nichpaqam, suq qaruwan umitambi waqtachpa, payta tuqampaqllampa. Kanan ñawpambi qunqurimkuchpam, aduraq tumkuqllampa. 20 Chaychina burlachpaqam ancha asimpachpa, chay kampata surquchpa, paypa kampandana rurachirqanllampa. Chaymandaqam amparqanllampana, kruspi klabananllampa. 21 Jisusta ampallkamptinllampa kruspi klabaqmi, suq runa Sirini llaqtamanda kaq chayta pasallkarqan. Payqam Simun chutiq. Suq churinmi Alijandru chutiq. Suqqam Rrufu chutiq. Chay Simundam suldadumkunaqa amalas umbruchachirqan Jisus ampallkachqan krusta. 22 Kanan Jisustaqam ampallkarqanllampa suq lugar Gulguta chutiqman. Chay Gulgutaqam pallkunampa rimaynimbiqa munan niyta Kalabira Lugar, nichpa. 23 Chay lugarman ch'ayachpaqam, binuta ayaq qawawan taqlluchpa, Jisusta qurqanllampa umpyanambaq. Chay ayaq qawaqam chutin mirra. Piru Jisusqam mana umpyarqanchu. 24 Kanan Jisustaqam kruspina klabarqanllampa. Chaymandaqam chay suldadumkunaqa swirtita rurarqanllampa, Jisuspa mudananda partinamkunanllampa. 25 Jisustaqam kruspi klabarqanllampa rumpay altuna kamptin. Chay urasqam las nwibina karqan. 26 Chaychina kruspi klabachpaqam, chay kruspa puntambi suq tablitata rurarqan. Chay tablitampiqam iskibrichqa karqan: Kay runaqam isrraylinumkunampa gubyirnun nichpa. Chaychinaqam rurarqan, liyiqkuna yach'anambaq: Jisusqam chayrallku wañurqan, nichpa. 27 Kanan ichkay ladrungunatampis Jisuspa ladumbi kruskunampi klabarqanllampa, suqninda allin ladumbi, suqninda ichuq ladumbi. ? 28 Chaychina ruranambaqmi Dyuspa Santu Librumbi kaychina nichqa karqan: Dyus Amkrachqan Wachadurpaqmi ninqallampa: Uchayuqkunawanmi purin , nichpa. Chaychinam Dyus nichqanchina kumplirqan.? 29 Kanan kruspa ladunda pasaqkunampismi umanllampata kuyuchichpa, Jisusta musyachpa, asimparqanllampa: Jajñy! Qamqam nirqallki: Dyuspa adurana wasinda pamba pamba bulachpam, kimsa diyampi muchuqmanda rini alsariq, nichpa. 30 Chaychina atichpa ruraytaqa, kananqa qam kimkimki wachamkachpa, chay krusmanda ichkimuy, nichpa. 31 Kanan kamachimkuq isrraylinu kuramkuna, Muysispa liyningunata yach'achimkuqkunawan asimkuchpa, pallkunampura kaychina parlarqanllampa: Suqkunataqam atirqan wachayta. Piru pay kimkinllaqam manana atinchu wachamkayta. 32 Mayñ, Dyus Amkrachqan Wachadur kachpa, Isrrayilpa gubyirnun kachpaqa, krusmanda ichkimunqa, chayta rimkachpa, paypi kriyinanchiqllampa, nichpa. Chay ichkay kruspi kaq ladrungunampismi Jisustaqa musyarqanllampa. 33 Chay diya larrdusimandampacham las tras di la tardimkaman limpu tutayarqan tumkuy pachampi. 34 Las trasna kamptinmi, Jisusqa ancha jwirtita kaychina qayamkurqan Tayta Dyusman: Alui, Alui, ¿lama sabamktani? Chayqam pallkunampa rimaynimbiqa munan niyta: Dyusituy, Dyusituy, ¿imampaqmi sampalitaytaqa dijawachqa kangi? nichpa. 35 Chaymi wamkin chaypi kaqkuna uyachpaqa nirqan: Uyayllampa, Dyuspaq chay unay rimaq Aliyastam qayallkan, nichpa. 36 Chay urasmi suq runa kallpachpa, suq ich'umputa puchqu binumpi nuyuchichpa, suq chumkchampa puntambi rurachpa, Jisuspa chiminman qamirqan chumpanambaq. Chaymandaqam nirqan: Chuyachun rimkananchiq, mayñ, ¿Aliyaschu rin chamuq krusmanda ichkichimuq ichu mana? nichpa. 37 Chaymandaqam Jisusqa jwirtita rimachpa wañurqanna. 38 Jisus wañumptinqam, Dyuspa adurana wasimba kurtinanqa anaqmanda uramkaman punta punta limpu llimkimkarqan. [Nuta: Chay ancha atun rramkta kurtinaqam chay Ancha Santisimu Kwartuta amkraq chay Santu Kwartumanda.] 39 Kanan chay rrumanu suldadumkunampa kamachimkuqninmi Jisuspa ñawpambi chayallkarqan. Paymi allita rimkachqa karqan Jisus ?Tayta Dyusman qayamkuchpa? wañumptin. Chaymi payqa nirqan: Allibmi kay runaqa Dyuspa Churin kachqa, nichpa. 40 Chaypim wamkin warmimkunampis karqan. Pallkunaqam karumandalla champallkarqanllampa. Pallkunamanda suq warmiqam chay Marya Magdalamanda kaq karqan. Suqqam suq Marya karqan. Payqam minur Jamkubumpa, Jusimpa maman karqan. Suqqam Salumi karqan. 41 Chay warmimkunaqam Jisuspa pullan purichpa, ancha yanampachqa karqan waq prubinsya Galiliyampa llaqtangunampi. Pallkunawanmi mas warmimkunampis chaypiqa karqan. Pallkunaqam Galiliyamanda Jirusalinman Jisuspa pullan chamuchqa karqan. 42 Chay diyaqam tardina karqan. Chay urasqam karqan allichamkananllampa samana diyampaqna. 43 Chay urasmi suq ancha allin runa Jusi chutiq gubyirnu Pilatuman rirqan. Chay Jusiqam Arimatiya llaqtamanda karqan. Paymi chay Mas Kamachimkuq Tandamkaq Juyiskunampa suq ancha baliq myimbrun karqan. Chay Jusiqam ancha munarqan rimkayta, Tayta Dyus chamumptin yumbayta chumaqta kamachinan. Chaymi payqa manchayta dijachpa, Pilatuman rirqan, Jisuspa kwirpunda mañaq. 44 Chaymi Jusi ch'ayamptinqa, Pilatuqa yuyarqan: ¿Ima dasnachu Jisusqa wañuchqa? nichpa. Chayrallkum ancha kunsidirachpa, suldadumkunampa kamachimkuqninda qayachichpa tampurqan: Allimptachu Jisusqa wañuchqana ichu manaraq? nichpa. 45 Chaymi suldadumkunampa kamachimkuqnin Pilatuta nirqan: Ari, wañuchqanam, nichpa. Chaymi Pilatuqa Jusita pirmisuta qurqan, Jisuspa kwirpunda ampanambaq. 46 Chaymi Jusiqa suq atun chumaq tramputa randichpa rirqan, Jisuspa kwirpunda krusmanda ichkichimuq. Ichkichimuchpaqam, chay trampuwan liyachpa, amparqanna pambaq. Suq luma qaqitampa pach'ambi muchuq mach'aychina simpulturata rurachichqa karqan. Chaymi chaypi Jisuspa kwirpunda kamamkachichpa, suq atun rumiwan kirparqan. 47 Pambamptinqam Marya Magdalamanda kaq, Jusimpa maman Maryawan allita rimkarqanllampa.
1 Samana diya pasamptinmi, Marya Magdalamanda kaq, Jamkubumpa maman Maryawan, Salumiwan michki mutkinata randichpa rirqanllampa, Jisuspa kwirpunda chay michki mutkinawan liyaq, ama ach'nanambaq. 2 Chaymandaqam chay diya dumingu madrugadu rirqanllampa Jisus pambamkachqanman. 3 Pallkunaqam rirqanllampa parlaqchina: Chay ancha atun rumiwan chay mach'aychina simpultura kirpachqandaqa ¿piraq achuchinman yallkunanchiq? nichpa. 4 Piru chay pambachqanman yaqqana ch'ayachpa, champamkuchpaqam, chay atun rumitaqa rimkarqanllampa chay mach'aychina simpulturampa yallkunanmanda suq ladumanna isqandallkaqta. 5 Chaymi pallkunaqa chay simpulturaman yallkuchpaqa, suq wambra runa atun yuraq kampayuqta chaypi rimkarqanllampa. Umku pantyumbiqam allin ladumpi tiyallkarqan. Chaymi chay warmimkuna rimkachpaqa, ancha mancharqanllampa. 6 Chayrallkum chay runaqa nirqan: Ama manchayllampachu. Qamkunaqam maskallkangillampa Jisus Nasaritmanda kaq kruspi wañuchqata. Kananqam kawsamuchqana. Mananam kaypichu. Champamkuyllampa kay kachqanman. 7 Riyllampa yach'amkuqningunata, Pidruta abisaq: Jisusqam qamkunampa ñawpallkita rillkan prubinsya Galiliyaman. Waqpinam ringillampa rimkaq, pay kawsallkachparaq nichuchqanchina, nichpa. 8 Chaymi chay warmimkunaqa ancha manchachpa, ch'ampsimkachpa, chay pambamkachqanmandaqa lluqchichpa, kallpaylla rirqanllampa. Pallkunaqam manchaywan rillkachpa, ñambiqa mana pitampis parlachirqanchu. 9 ?Chay diya dumingu achimkyallkamptinnam, Jisusqa wañuchqanmanda kawsamurqan. Chaymandaqam puntata rimkamkurqan Marya Magdalamanda kaqman. Chay Maryamandam syiti dyablumkunata qatichqa karqan. 10 Chaychina chay Maryaqa Jisusta rimkachpaqam, rirqanna abisaq yach'amkuqningunata. Piru pallkunaqam ancha llamkiwan Jisuspaq waqallkarqanllampa. 11 Chay Maryaqam nirqan: Jisusqam kawsamuchqana! Nuqam payta rimkachqa kani, nichpa. Piru chaychina nimptinqam, pallkunaqa mana kriyirqanllampachu. 12 Chaymandaqam ichkay yach'amkuqninguna chuncha ñanda rillkamptinllampa, Jisusqa pallkunaman rimkamkurqan suq runa mana yaqqa riqsichqachina. 13 Piru payta riqsichpa, kutimuchpa, kriyiq masingunata willamptinllampaqam, pallkunatampis mana kriyirqanllampachu. 14 Chaymandaqam chay unsi yach'amkuqninguna masampi tiyachpa mimkullkamptinllampa, Jisusqa pallkunaman rimkamkurqan. Kawsamuchqa kamptin, chay rimkaqkuna nimptinqa, chay unsimkunaqa mana kriyichqallampachu karqan. Chaymi pallkunataqa kaychina anyarqan: Qamkunaqam rumi chunquyuqkuna kachpa, kawsamuchqayta mana kriyichqallampachu kangi, nichpa. 15 Nirqambismi: Riyllampa yumbay nasyungunaman, chumaq nutisyayta yumbay runata, warmita yach'achiq. 16 Chaymi nuqampi kriyichpa chutimkuqkunataqa rini wachaq. Piru nuqampi mana kriyiqkunaqam rinllampa chingaq. 17 Kanan nuqampi kriyiqkunaqam pudirniywan runamkunamanda dyablumkunata ringillampa qatiq. Kanan mana yach'achqallki rimallkunampim ringillampa rimaq. 18 Kulibramkunata piskachpampismi, mana ringillampachu wañuq. Bininuta mimkuchpampismi, mana ringillampachu wañuq. Kanan mamkimkimkunata qachyaqkunampa sawanman rurachpam, ringillampa kach'amkachiq. 19 Jisus chaychina pallkunata willachpaqam, syiluman richpa, Tayta Dyuspa allin ladumbina tiyarqan. 20 Chay yach'amkuqningunaqam tumkuy mayta rirqanllampa, Jisus nichqangunata yach'achimkuq. Kanan Taytanchiq Dyus yanampamptinmi, pallkunaqa milagrumkunata rurarqanllampa. Chaymi chay milagrumkunata rimkaqkunaqa yach'arqanllampa: Allimp kaqkunatam yach'achimkunllampa, nichpa. Kaytallam iskibrini qamkunampaq. Chaychina kanqa.?
1 Achka runamkunam Jisuspa bidambaq manyaqlla iskibrichqallampa. 2 Pallkunaqam Jisuspa pullan puriqkuna nichqanda iskibrichqallampa. Chaqa chay pullan puriqkunaqam kimkin ñawinllampawan Jisustaqa rimkachqallampa. Chaymi pallkunaqa tistigunguna kachpa, chay rimkachqanchinalla chumaq famanda yach'achiwachqallampa kanchiq. 3 Dun Tiyufilitu, nuqampismi chay tistigumkuna Jisuspaq nichqanda allita yach'amkuchqa kani tumkuy bidambaq, nasichqan diyamandampacha. Chaymi yuyarqani tumkuy ima rurachqambaq manyaqlla iskibriyta, puntata imachina kachqa, chaymandaqa imatam rurachqa, nichpa. 4 Kallkunatam iskibrillki, chay yach'achqallkimanda mas allimp kaqta Jisuspaq yach'anallki. 5 Irudis Judiya prubinsyampa gubyirnun kamptinmi, suq isrraylinu kura karqan. Paymi chutirqan Samkariyas. Payqam kuramkunampa suq trumpanmanda karqan. Chay trumpam chutiq Abiyas. Samkariyaspa warmin Ilisabitpismi paychina chay unay kura Arumba karu willkan karqan. 6 Pallkunaqam ichkandin chumaqta kawsaqllampa. Chaymi Dyusqa ancha kuchimkurqan pallkunawanqa. Chaqa pay nichqanda, tumkuy liyningunatampis allita kasuchpam kawsarqanllampa. Chaymi mana pimpis atirqanchu pallkunata anyaytaqa. 7 Piru manam wambrayuqchu karqanllampa. Chaqa chay Ilisabitqam mana nunka wambrayuqchu karqan. Kanan ichkandinmi ancha byijitumkunana karqanllampa. 8 Suq diyam chay Abiyas trumpa kuramkunata tumkarqan, Dyuspa adurana wasimbi ruranangunata rurananllampa. Chaymi chay kuramkunaqa swirtita rurachpa, Samkariyasta amkrarqanllampa, yallkunambaq Dyuspa adurana wasimba Santu Kwartunman, insinsyuwan qundachimkunan. 10 Chaymi umku Santu Kwartumpi Samkariyas insinsyuta rumpachichpa qundachillkamptinqa, sawampi ancha achka isrraylinumkuna Dyusman mañamkullkarqanllampa. 11 Chaychina Samkariyas umkumpi kallkamptinmi, Dyuspa suq anjilnin payman rimkamkurqan. Chay anjilqam insinsyuta qundachimkunan pata altarpa allin ladumbi chayallkarqan. 12 Chaymi Samkariyasqa anjilta rimkachpaqa, ancha manchachpa, mana nimanayta atirqanchu. 13 Piru anjilqam nirqan: Samkariyas, ama manchaychu. Mañamkuchqallkitam Dyusqa uyachuchqa. Chaymi warmimki Ilisabitqa wambrayuq rin kaq. Chay wambrallkitaqam Jwanda ringi chutichiq. 14 Pay nasimptinqam, ancha ringi kuchimkuq. Chaychinam achka llaqta masimkimkunampis ancha rinllampa kuchimkuq. 15 Chaqa Dyusqam chay churimkitaqa ancha kamachimkuqta rin ruraq, Dyusta sirbinambaq. Manam rinchu umpyaq binuta ni suq laya tragumkunatampis. Mamamba pach'ambilla kallkamptinmi, Dyuspa Santu Ispiritunqa paypina rin kaq. 16 Achka isrraylinumkunata yach'achimptinmi, uchangunata dijachpa, Dyustana rinllampa kasuq. 17 Dyusmi Jwannimkita Santu Ispiritunda rin quq, chay unay pudirniyuq Aliyaschina kanambaq. Kanan Dyus Amkrachqan Wachadurmandaqam Jwannimkiqa mas puntata rin yach'achimkuq, piñamkuchqa taytamkuna alliyanambaq wambrangunawan, Dyusta mana kasuqkuna yach'amkunambaq payta kasuyta. Chaychinam runamkunata, warmimkunata rin yach'achiq, chay Amkrachqan Wachadurta chumaqta ch'ayachinanllampa, nichpa. 18 Chaychina nimptinmi, Samkariyasqa anjilta tampurqan: Imata rimkachpam atini kriyiyta kay niwachqallkitaqa? Chaqa nuqaqam ancha byijuna kani. Warmiypismi byijana, nichpa. 19 Chaychina tampumptinmi, chay anjilqa nirqan: Nuqaqam Grabyil kani. Dyuspa ñawpambim kani, kamachiwachqanda ruranaypaq. Tayta Dyus kimkinmi kach'amuwachqa, chay kuchimkunallki nutisyata nichunaypaq. 20 Piru chay nichuchqaytaqam mana kriyiwangichu. Chaymi muduna ringi kidaq. Mananam ringichu atiq rimayta, kay nichuchqay kumplinangaman, nichpa. 21 Chaychina umkumpi anjilwan unayamptinmi, sawampi kaq runamkunaqa Samkariyasta ancha chuyallkarqanllampa: ¿Imanachqataq Samkariyasqa? ¿Imamkuchparaq ancha unayan lluqchimunambaq Santu Kwartumandaqa? nichpa. 22 Chaymanda lluqchimuchpaqam, Samkariyasqa manana atirqanchu parlachiyta pallkunataqa. Chaymi intyindirqanllampa: Santu Kwartumpi kachpa, musquypichinach'i karqan, nichpa. Chaqa Samkariyasqam siñamkunata rurachpana intyindichirqan. Chaychinam mudullana kidarqan. 23 Chaychina Samkariyas Dyuspa adurana wasimbi yumbay ruranangunata kumplichpaqam, rirqanna wasinman. 24 Chaymandaqam warmin Ilisabitqa pach'ayuqna (umkuyuqna) karqan. Chaymi wasinmandaqa sinku killata manana maytampis rirqanchu. 25 Payqam nirqan: Dyusmi munachqana, wawayuq kanaypaq, suqkuna ama rimawanambaq, nichpa. 26 Sayis killamandam Tayta Dyusqa kach'arqan chay anjilnin Grabyilta waq prubinsya Galiliyampa Nasarit llaqtanman, 27 parlachinambaq suq china Marya chutiqta. Chay Maryaqam dunsillaraq karqan. Piru tratumkuchqanam karqan, suq runa Jusi chutiqwan kasaranambaq. Chay Jusiqam alma gubyirnu Dabidpa karu willkan karqan. 28 Chaymandaqam Dyuspa anjilnin chay Maryaman chamuchpa, nampallkuchpa, nirqan: Maryita, Dyusri yanampachunqa! ¡Kuchimkuy! Chaqa Tayta Dyusmi qamwan. Paymi qamtaqa rin yanampachuq maski yumbay warmimkunamanda, nichpa. 29 Chaychina chay anjil nampallkumptinmi, Maryaqa ispantachqata champachpa, ancha yuyarqan: ¿Imampaqraq kaychina nichpaqa nampallkuwan? nichpa. 30 Chaymi anjilqa nirqan: Ama manchaychu, Maryita. Chaqa Dyusqam qamwan ancha kuchimkun. 31 Pach'ayuqmi (Umkuyuqmi) ringi kidaq. Chaymandaqam ringi qachyaq suq wambrituta. Chay wambritullkiqam rin chutiq Jisus. 32 Paymi ancha kamachimkuq rin kaq. Chaymi paypaqqa rinllampa niq: Ancha pudirniyuq Dyuspa Churinmi, nichpa. Kanan Taytanchiq Dyusmi rin ruraq ancha pudirniyuq gubyirnuta, chay karu agwilun Dabidtachina. 33 Wambrallkim yumbay isrraylinumkunata tumkuy tyimpu rin kamachiq. Chaqa kargunqam mana nunka uchyamkanqachu, nichpa. 34 Chaychina chay anjil nimptinqam, Maryaqa tampurqan: Mayñ, ¿imachinam chay niwachqallkiqa rin kaq? Chaqa dunsillaraqmi kani. Manaraqmi runawanqa puñuchqachu kani, nichpa. 35 Chaymi chay anjilqa nirqan: Dyuspa Santu Ispiritunmi qaman rin chamuq. Paymi Tayta Dyuspa pudirninwan pumkutaychina rin pambachuq. Chaymi chay urasmandampacha pach'ayuqna (umkuyuqna) ringi kidaq. Chaymi chay nasiq wawallkiqa Dyuspaqlla kachpa, mana nima uchayuqchu rin kaq. Paypaqmi ninqallampa: Dyuspa Churinmi, nichpa. 36 Ayllullki Ilisabitpismi ancha byijana kachpampis, pach'ayuqna (umkuyuqna). Paypaqmi niqllampa: Payqam mana atinchu wambrayuq kaytaqa nichpa. Piru kananqam sayis killamkunana pach'ayuq (umkuyuq). 37 Chaqa Dyuspaqqam mana nima trabajuschu, nichpa. 38 Chaychina anjil nimptinqam, Maryaqa nirqan: Dyuspa kriyadanmi kani, payta kasunaypaq. Chay niwachqallkichina kanqa, nichpa. Chaychina nimptinqam, chay anjilqa rirqanna. 39 Chay diyamkunam Maryaqa utqaymaya rirqan prubinsya Judiyampa jalkanman. Chay jalkampa suq llaqtambim Ilisabitqa tiyaq. 40 Maryaqam Samkariyaspa wasinman ch'ayarqan. Chaymandaqam yallkuchpa, Ilisabitta nampallkurqan. 41 Chaychina nampallkumptinmi, Ilisabitpa pach'ambi wambritunqa kuyurqan. Kanan chay urasmi Dyuspa Santu Ispiritunwan Ilisabitqa unda karqan chunqumbi. 42 Chaymi payqa ancha jwirtita nirqan: Maryita, Dyusmi ancha yanampachullkangi maski yumbay warmimkunamanda. Pach'allkimpi wambritullkitampis ancha yanampallkan. 43 ¿Pitaq kani nuqaqa? Manam nimampaq balinichu chamunambaq watumkuwaq Siñurniypa mamanqa. 44 Chaqa dimki nampallkuwamptimkim, umku pach'aypi wambrayqa kuchimkuchpa kuyurqan. 45 Kriyichqallkirallku kuchimkuy. Chaqa Tayta Dyus tumkuy ima nichuchqandam allimpta rin kumpliq, nichpa. 46 Chaychina Ilisabit nimptinmi, Maryaqa nirqan: Taytanchiq Dyustam tumkuy chunquywan ancha alabani. 47 Chaychinam ancha kuchimkuni Dyus Wachadurniypaq. 48 Chaqa mana baliq kriyadanchina kamptiypismi, Tayta Dyusqa amkrawachqa. Chaymi kananmandampacha tumkuy runamkuna nuqampaq kaychina ninqallampa: Dyus yanampamptinmi, payqa ancha kuchimkuq warmi, nichpa. 49 Chaqa Dyusqam ancha pudirniyuq kachpa, ancha yanampawachqa. Manam nima maluta ruranchu. Chaymi Santu chutin. 50 Kanan Tayta Dyusqam yumbay kasuqkunata tumkuy tyimpu rin yanampaq. 51 Kanan mana ni pi atichqanda ruraytam payqa rurachqa. Yumbay afanirutam binsichqana. 52 Pwidiqkunatam kargungunamanda kambyarqanna. Mana karguyuq kaqkunataqam numbrarqan, ancha kamachimkuqkuna kanambaq. 53 Chay mallaqkunatam tumkuy imata qurqan. Piru kampuqkunataqam nirqan illaqllana rinanllampa. 54 Tayta Dyusmi sirbimkuqnin isrraylinumkunata llamkimpawaqninchiq, ancha yanampawachqallampa kanchiq. 55 Chaqa chay unay agwilunchiq Abrajanda yumbay ayllundinda chaychina ufrichqa karqan yanampayta tumkuy tyimpumpaq. Chay ufrisichqandam kumplichqana, nichpa. 56 Kanan kimsa killatach'i Maryaqa Ilisabitpa pullan tiyarqan. Chaymandaqam kutirqanna wasinman. 57 Chaymandaqam Ilisabitpa qachyanan tyimpun kumplimptinqa, qachyarqanna wambritundaqa. 58 Bisinungunawan ayllungunaqam yach'arqanllampa: Tayta Dyuschi Ilisabitta ancha yanampachqa, nichpa. Chaymi pallkunaqa Ilisabitpa wasinman tandamkachpa, paywan ancha kuchimkurqanllampa. 59 Chaymandaqam 8 diyasmanda chay wambritumpa kwirpumbi siñalta rurarqanllampa. Chay diyampiqam chaypi kaqkuna wambritumpaq nirqanllampa: Samkariyas chutinqa, taytanchina chutiyuq kanambaq, nichpa. 60 Piru mamanqam nirqan: Manñm! Jwanmi rin chutiq, nichpa. 61 Chaymi mamandaqa nirqanllampa: Imarallkutaq munangi chaychina chutinanqa? Chaqa manam pimpis ayllullkimpiqa Jwanqa chutinchu, nichpa. 62 Chaymi siñiyachpa, taytanda tampurqanllampa: Wambritullkitaqa imatam munangi chutichiyta? nichpa. 63 Chayrallkum taytanqa suq tablitata mañachpa, chaypi kaychina iskibrirqan: Wambrayqam chutin Jwan, nichpa. Chaymi chay iskibrichqanda rimkachpaqa, yumbaynin ancha ispantarqanllampa. 64 Chay urasmi Samkariyasqa mudu kachqanmanda, atirqanna rimayta. Kanan Dyustam ancha alabarqan. 65 Challkunata rimkachpaqam, chay bisinungunaqa masta ispantarqanllampa. Chaymandaqam chay famaqa chay prubinsya Judiyampa tumkuy jalkangunaman chimkwamkarqan. 66 Yumbay chayta yach'achpaqam, ancha yuyachpa, pallkunampura tampunamkurqan: Chay wambra wiñachpaqa ¿ima karguyuqraq kanqa? nichpa. Chaqa paytaqam Tayta Dyusqa ancha yanampaq. 67 Tayta Dyuspa Santu Ispiritunmi yallkurqan Jwamba taytan Samkariyasman. Chaymi chay Santu Ispiritu rimachimptin, Samkariyasqa kaychina nirqan: 68 ¡Alabachqa kanqa nuqanchiq isrraylinumkunampa Taytanchiq Dyus! Chaqa kayman chamuchpam, nuqanchiq wambrangunata wachawachqa kanchiq. 69 Chay unay Dabidqam Tayta Dyusta ancha kasuq. Kananqam chay Dabidpa karu willkanda quwachqa kanchiq, ancha pudirniyuq Wachadurninchiq kanambaq. 70 Chaychinam Dyusqa unaymandampacha paypaq ancha santu rimaqkunata amkrachpa, kaychina rimachirqan: 71 Yumbay kuntrachuqmanda, ch'iqnichuqmandam rini wachachuqllampa, nichpa. 72 Chaymi Tayta Dyus chay unay agwilunchiqkunata llamkimpachpa, pallkunawan suq santu tratuta rurarqan. Chay tratutaqam mana qunqachqachu. 73 Achwanmi unay agwilunchiq Abrajanda jurachpa, nuqanchiqkunampaq kaychina ufrisirqan: 74 Karu willkallkimkunatam kuntraqkunamanda rini wachaq, ama ni pita manchachpa nuqatalla kasuwananllampa, 75 allitalla rurachpa, mana uchayuq kachpa, tumkuy tyimpu nuqawan kawsananllampa, nichpa. 76 Chaychina nichpaqam, Samkariyasqa chay wambritunda nirqan: Ijitu, qambaqmi rinllampa niq: Ancha pudirniyuq Dyuspaq rimaqmi kangi nichpa. Chaqa qam Dyus Amkrachqan Wachadurmanda puntata yach'achimkuchpaqam, ñanninda allichaqchina ringi kaq, payta chumaqta ch'ayachinanllampa. 77 Ringim kaychina yach'achimkuq: Tayta Dyus pirdunachuchpam, uchallkimkunamanda rin wachachuqllampa, nichpa. 78 Chaqa Taytanchiq Dyusmi kuyawaqninchiq, llamkimpawaqninchiq, Wachadurninchiqta syilumanda rin kach'amuq runamkunata, warmimkunata wachawananchiq. Paymi rumpaychina llimpyachpa, suq muchuq diyachina rin achimkchamkuq. 79 Uchayuq kachpaqam chingallkarqanchiqllampa. Piru payqam suq muchuq bidata rin quwaqninchiq. Chaqa rinmi yanampawaqninchiq, kuchimkuchpa, chumaqta kawsananchiqllampa, nichpa. 80 Chaymandaqam chay Jwan wiñallkamptinqa, Dyuspa Santu Ispiritun yanamparqan, tumkuy chunqu Dyusta kuyanambaq. Kanan Jwanqam chuncha lugarkunampi tiyaq, ch'ayanangaman tyimpu isrraylinumkunata yach'achinambaq.
1 Waq tyimpumkunampim Rrumampa gubyirnun Sasar Agustu kamachimkurqan, suq sinsuta rurananllampa tumkuy mundumpi. 2 Chay punta sinsutaqam rurarqanllampa, chay prubinsya Siryampa prifimktun Siriniyu kamptin. 3 Chaychina chay gubyirnu kamachimkumptinmi, yumbay runamkuna riqllampa kimkin llaqtanman, chay sinsumpi ampuntamkananllampa. 4 Chaymi Jusiqa prubinsya Galiliyampa Nasarit llaqtanmanda lluqchichpa, rirqanna prubinsya Judiyampa Bilin llaqtanman. Chaqa chay Bilimbim chay unay alma gubyirnu Dabidqa nasichqa karqan. Chaymi Jusiqa Dabidpa karu willkan kachqanrallku, rirqan Maryawan Bilinman, chay sinsumpi ampuntamkanambaq. Chaqa Jusiqam Maryawanqa tratumkuchqana karqan kasarananllampa. (Piru mana puñumptinllampam,) Maryaqa pach'ayuqna (umkuyuqna) karqan. 6 Chaymi Bilimbilla kallkamptinllampa, Maryampa qachyanan diya ch'ayamurqanna. 7 Chaymi chaypi qachyachpa kulamka wambritunda, llambu trampumkunawan wanguchpa, usurachirqan suq istablu kurralpi suq pisibrimpi. Chaqa pusadampiqam mana karqanchu lugar, pallkuna kidanambaqqa. 8 Chay Bilimba sawa chunchambim michidurkuna yuraqachtin wichanllampata kwidallkarqanllampa. 9 Pallkunamanmi das rimkamkurqan Dyuspa suq anjilnin. Kanan Tayta Dyuspa llimpyayninmi rridurninllampata limpu achimkcharqan. Chaymi chay michidurkunaqa ancha mancharqanllampa. 10 Piru anjilqam pallkunata nirqan: Ama manchayllampachu. Qamkunamanmi ancha chumaq nutisyata ampamuni. Kay nutisyata yach'achpaqam, yumbay runamkuna ancha rinllampa kuchimkuq. 11 Kananmi chay unay Dabidpa llaqtambi nasichqa suq Wachadur. Paymi Dyus Amkrachqan Wachadur. 12 Kriyiwanallkim, chay wambritutaqa ringillampa tariq llambu trampumkunawan wanguchqata, suq pisibrimpi usurallkaqta, nichpa. 13 Chaymandaqam chay anjilpa ladumbi das rimkamkurqan ancha achka anjilkuna. Pallkunaqam kunyarqanllampa, Dyusta kaychina alabachpa: 14 Biba, biba altu syilumpi Tayta Dyus! ¡Alabachqa kanqa! ¡Chaqa payqam achka runata, warmita munan yanampayta! ¡Chaymi pallkunaqa kay mundumpi ancha kuchimkunqallampa! nichpa. 15 Chaychina chay anjilkuna Dyusta alabachpaqam, kutirqanna syiluman. Chaychina kutimptinllampaqam, michidurkunaqa pallkunampura kaychina parlarqanllampa: Mayñ, amkullampa Bilinman, Taytanchiq Dyus niwachqanchiqta rimkananchiq, imach' kachqa, nichpa. 16 Chaymandaqam utqaymaya richpa, Maryata, Jusitaqa, iti wambrituyuqtana tarirqanllampa. Chay wambritunqam usurallkarqan chay pisibrimpi. 17 Chaymi chay michidurkuna wambrituta rimkachpaqa, chaypi kaqkunata parlachirqan chay anjil nichqanda. 18 Chaychina parlachimptinqam, yumbay chay uyaqkunaqa ancha ispantarqanllampa. 19 Piru Maryaqam tumkuy challkunata uyachpa, ancha yuyachpa, chunqumbilla waqaycharqan. 20 Chaymandaqam chay michidurkunaqa kutiriqchina Tayta Dyusta ancha alabarqanllampa yumbay uyachqambaq, rimkachqambaqllampa. Chaqa chay anjil tumkuy ima nichqanqam allimp kachqa karqan. 21 Chay wambritu 8 diyasniyuq kamptinmi, kwirpumbi siñalta rurachpa, nirqanllampa: Jisus chutinqa, nichpa. Chaqa Marya manaraq pach'ayuq (umkuyuq) kamptinmi, Dyuspa anjilnin chaychina nichqa karqan chutinambaq. 22 Chaymi Muysis kamachimkuchqanda kumplichpaqa, 40 diyasmandaqa rirqanllampana Jirusalinman. Kanan Dyuspa adurana wasinman richpaqam, Dyusta nirqanllampa: Kay wambrituytam ampamunillampa prisintaq qamba ñawpallkiman, qamta sirbichunan, nichpa. 23 Chaqa Tayta Dyusqam liynimbi kamachimkuchqa karqan: Yumbay ullqu kulamka nasiqtam nuqampa ñawpayman ampamuyllampa, wiñachpa nuqata sirbiwananllampa, nichpa. Chaymi Dyus nichqanda rurarqanllampa. 24 Dyusqam liynimbi kamachimkuchqampis karqan, ufrindananllampa ichkay turtula pichqumkunata ichu ichkay palumata. Chaymi Maryawan Jusiqa chaychina rurarqanllampa. 25 Chay tyimpumpim Jirusalimbi suq ancha allin runa tiyarqan. Paymi Simiyun chutirqan. Payqam Dyusta ancha aduraq. Chaymi ancha chuyamkullkarqan, Dyus Amkrachqan Wachadur payta, isrraylinu llaqta masingunata wachanambaq. Chaqa Dyuspa Santu Ispiritunmi Simiyunwan kachpa, 26 kaychina yach'achichqa karqan: Manaraq wañuchpam, ringi rimkaq Tayta Dyus Amkrachqan Wachadurta, nichpa. 27 Kanan Dyuspa Santu Ispiritun chay Simiyunda ampamptinmi, payqa richqa karqan Dyuspa adurana wasinman. Chaymi Maryawan Jusiqa chay adurana wasiman Jisusta ampamptinllampa, Muysis kamachimkuchqanda kumplinan, 28 chay Simiyunqa Jisusta marqachpa, Dyusta kaychina ancha alabarqan: 29 Dyusilumpagi Taytitu; ufrisiwachqallkitam kumplichqana kangi. Chayrallkum ancha kuchimkuni. Kananqam atingina dijawayta wañunaypaq. 30 Chaqa kimkiy ñawillkunawanmi rimkachqana kani kay Wachadurta. 31 Qam paytaqa kach'amuchqana kangi, yumbay runa, warmi riqsinanllampa. 32 Kay wambritum suq micha achimkchamkuqchina rin yanampaq yumbay nasyungunampi tiyaqkunata, qamta chunqunllampampi riqsichuchpa, allita kasuchunanllampa. Kay wambritu achka furastirumkunata wachamptinmi, pallkuna rinllampa alabaq llaqta masin isrraylinumkunatampis, nichpa. 33 Chaychina Simiyun Jisusta alabamptinmi, Maryawan Jusiqa ancha ispantarqanllampa. 34 Simiyunqam Dyusman mañamkurqambis, pallkunata chumaqta yanampanambaq. Chaymandaqam Maryata nirqan: Kay wambrallkim achka isrraylinu masinchiqkunata rin wachaq, paypi kriyimptinllampa. Piru achka llaqta masinchiqkunaqam rinllampa chingaq, paypi mana kriyichpallampa. Chaqa achka runamkunam paytaqa rinllampa disprisyaq. 35 Chaychina disprisyamptinllampam, wamkinqa chayta rimkachpa, yach'anqallampa: Chay runamkunaqam mampa chunquyuqkuna, nichpa. Lumkismi Maryita, tumkuy challkunata rimkachpaqa, ancha ringi llamkiq. Chaqa qambaqqam chay llamkimkunaqa suq atun kuchilluwan chunqullkimpi puntiyachuqchina rin kaq, nichpa. 36 Chaypim karqambis Dyuspaq suq rimaq warmi Ana chutiq. Paypa taytanmi Fanwil chutichqa karqan. Chay Fanwilmi atun ayllu Asirmanda kachqa karqan. Chay Anaqam chinalla kachpa, kasarachqa karqan. Kanan qusanwanqam syiti watastalla purirqan. Chaymandaqam qusan wañumptinqa, 84 watas biyudalla kachpa, ancha byijana karqan. Payqam Dyuspa adurana wasinmandaqa mana lluqchiqchu. Chaypim punchawnindin tutampnindin Dyus munachqanda rurachpa, ayunachpa, Dyusman mañamkuchpa kawsaq. 38 Chay Simiyun wambritu Jisuswan kallkamptinmi, Anaqa pallkunaman qamimkachpa, Dyusta pagimkuchpa, chaypi kaqkunata parlachirqan. Pallkunaqam unaymandampacha ancha munarqanllampa rimkayta, Jirusalin llaqtampa Wachadurnin ch'ayamumptin. 39 Jusiwan Maryaqam, Dyus tumkuy ima kamachimkuchqanda rurachpaqa, wambritundinna prubinsya Galiliyaman kutirqanllampa chay kimkin Nasarit llaqtanman. 40 Wambritun Jisusqam diyampi diyampi wiñachpaqa, mas jwirsayuq, mas yach'ayniyuqna karqan. Kanan Tayta Dyusqam tumkuy imampi payta ancha yanamparqan. 41 Jisuspa taytan mamanmi watan watan riqllampa Jirusalinman chay Paskwa fyistaman. Chaymi Jisusqa dusi watayuqna kamptin, pallkunawan rirqan Jirusalinman chay Paskwa fyistamanqa. 43 Chay fyista uchyamkamptinqam, taytanwan mamanqa kutirillkarqanna Nasarit llaqtaman. Piru Jisusqam Jirusalimbilla kidachqa karqan. Kanan Maryawan Jusiqam mana watumkuchqachu karqan Jisus kidamptinqa. 44 Pallkunaqam yuyarqan: Kay achka runampa umkumbich'i rillkan, nichpa. Chaychina yuyachpaqam, suq diya ñandana rirqanllampa. Chaymandaqam watumkuchpaqa, manana tarirqanllampachu. Chaymi ayllungunampi, tumkuy chay riqsichqangunampi maskachpa, 45 mana tarichpaqa, pallkunaqa kutirirqanna Jirusalinman maskaq. 46 Chaymi ancha maskachpa, kimsa diyamanda Dyuspa adurana wasimbi tarirqanllampa. Jisusqam Muysispa liyningunata yach'achimkuqkunampa ch'awpimbi tiyachpa, pallkunata uyallkarqan, tampullkarqan. 47 Kanan payta tampumptinllampaqam, ancha allita kuntistarqan. Chaymi yumbay chay uyaqkunaqa ispantachqata kidarqanllampa: ¡Rimkay, tampumptinllampaqam, kay wambraqa ancha yach'ayniyuq kachpa, ancha allita kuntistan! nichpa. 48 Kanan taytanwan mamanqam chay yach'ayniyuqkunampa ch'awpimbi tarichpaqa, ancha ispantarqanllampa. Chaymi mamanqa nirqan: Ay, ijitu, ¿imampaqmir kaychina rurawangillampa? Taytallkiwanmi nuqaqa ancha manchachpa, llamkichpa, maskallkallkillampa. 49 Chaychina nimptinmi, Jisusqa nirqan: Imampaqmir maskawallkangiqa? ¿Manachu yach'angillampa: Taytaymi munan, paypa wasimbi ruranangunata ruranaypaq, nichpaqa? 50 Piru pallkunaqam mana intyindirqanchu Jisus nichqandaqa. 51 Chaymandaqam Jisusqa pallkunawan kutirirqan Nasaritman. Chaypim payqa pallkunata tumkuy imampi kasuchpa kawsarqan. Kanan mamanqam yumbay chay pasachqambaq mana pitampis parlachirqanchu. Achwanmi chunqumbilla waqaychaq. 52 Kanan Jisusqam diyampi, diyampi wiñachpa, mas jwirsayuq, mas yach'ayniyuq karqan. Tayta Dyusqa, runamkunampismi paywanqa ancha kuchimkuqllampa.
1 Tibiryu Sasar Rrumampa gubyirnun kinsi watasna kamachimkullkamptinmi, prubinsya Judiyampa prifimktun Punsyu Pilatu karqan. Prubinsya Galiliyampa prifimktunmi suq Irudis karqan. [Nuta: Chay suq Irudismi chay punta gubyirnu Irudispa churin karqan.] Prubinsya Ituriyampa tumkuy Tramkunitimpa prifimktunmi chay Irudispa masan Filimpi karqan. Prubinsya Abiliñampa prifimktunqam Lisaniyas karqan. 2 Kanan Anaswan Kayfasmi mas kamachimkuq isrraylinu kuramkuna karqanllampa. Chay tyimpumpim suq chuncha lugarpi Samkariyaspa churin Jwanda Dyusqa nirqan, paypaq rimanambaq. 3 Chaymi Jwanqa yach'achimkuchpa, yach'achimkuchpa, rillkarqan chay rriyu Jurdamba tumkuy chuncha lugarningunata. (Chay chunchamkunamanmi achka runamkuna, warmimkuna chamurqanllampa, Jwanda uyaq.) Chaymi pallkunata nirqan: Uchallkimkunata dijachpa, Dyustana kasuchpa, chutimkuyllampa, Dyus pirdunachunan uchallkimkunamanda, nichpa. 4 Chay Jwambaqmi Dyuspaq rimaq Isayiyasqa unay tyimpumpi librumbi kaychina iskibrichqa karqan: Chunchamkunampim suq runa ancha jwirtita rimachpa, kaychina rin yach'achimkuq: Dyus Amkrachqan Wachadurta chumaqta ch'ayachinallki, bidallkita allichayllampa suq ñandachina. 5 Chaqa mana allin yuyaynimkimkunam suq waqru ñanchina. Chayri chay mana baliq ñandachina bidallkita allichayllampa, Wachadurninchiq mas allita qamkunaman ch'ayamunambaq. 6 Chaychina bidallkillampata allichamptimkiqam, yumbay runamkuna rinllampa yach'aq: Kaychinam Dyus wachawachun, nichpa. 7 Kanan achka runamkuna, warmimkuna tandamkamptin chutichinanqam, Jwanqa wamkinda nirqan: A, qamkuna kulibrampa wambrangunata! ¿Pinamir nichurqan, Dyuspa ancha manchaypaq kastigunmanda wachadu kanallkillampaqa? 8 Mana allita rurachqallkirallku malayamkuchpa, chay uchamkunata dijachpana, kananmandaqa allita rurachpa, kawsayllampa. Piru ama ni achlita yuyayllampachu: Abrajamba karu willkanguna kamptinchiqmi, Dyus wachawachun, nichpaqa. Achwan allita intyindiwayllampa: Dyusmi kay rumimkunamanda runamkunata atin rurayta, Abrajamba karu willkanguna kanambaqqa. 9 Chaqa qamkunaqam uchata rurachpaqa, chay mana allin puquq yuramkunachina kangillampa. Chaymi Dyusqa qamkunaman achanda qamichqana. Listunam kuchuchunanllampa. Chaqa Tayta Dyusqam yumbay chay mana baliq yuramkunata kuchuchpa, rin wichuq lumyallkaq ninaman rumpanambaq. 10 Chaychina Jwan nimptinmi, chay runamkunaqa tampurqan: Imatamiri atinillampa rurayta wachamkanayqa? nichpa. 11 Chaymi Jwanqa nirqan: Mayqannimki ichkay mudanayuq kachpaqa, suq mudanallkita quyllampa chay mana mudanayuqta. Mayqannimki mimkunayuq kachpaqa, chay mana mimkunayuqta quyllampa, nichpa. 12 Chay Jwanmanqam wamkin kuntribusyunda kubramkuqkunampis ch'ayarqanllampa chutichinambaq. Pallkunaqam Jwanda kaychina tampurqan: Yach'achimkuq Taytitu, ¿imatamiri nuqallkunaqa atinillampa rurayta? nichpa. 13 Chaymi Jwanqa nirqan: Liy nichuchqanchinalla kubramkuyllampa; ama mastaqa, nichpa. 14 Chaymandaqam wamkin suldadumkunampis Jwandaqa tampurqan: Nuqallkunaqa ¿imatataq atinillampa rurayta? nichpa. Chaymi pallkunata nirqan: Ama ni pitampis jurampachpa, ni yanqamkunata tumbachpaqa, imanda quch'iyllampachu. Achwan pagullkita ch'askichpa, kuntintamkayllampa, nichpa. 15 Chaymi Jwambaqqa chay llaqta masin isrraylinumkunaqa yuyarqanllampa: Paqtaraq payna Wachadurninchiqqa, nichpa. (Chaqa unaymandampacham pallkunaqa ancha chuyallkarqan, Dyus Amkrachqan Wachadur chamunambaq.) 16 Piru Jwanqam pallkunataqa nirqan: Allimptam nillkillampa. (Manam paychu kani.) Piru chamuqnam rin. Nuqaqam qamkunataqa yamkumpilla chutichillkillampa. Piru payqam ancha kamachimkuq maski nuqamanda. Chaymi Dyuspa Santu Ispiritumba pudirninwan ninawambis rin chutichichuqllampa, chay Santu Ispiritunwanna purinallkillampa. Pay chamumptinqam, nuqaqa mana nimachu kachaq paypa ñawpambiqa. Manam ni llanqamba watunda paskanaypaq balichaqchu. 17 Dyusta kasuqkunaqam allin triguchina. Chaymi chay Wachadurninchiqqa palan piskachqana, trigunda wayrachachpa, trujambi waqaychanambaq. Piru mayqan paypi mana kriyiqkunaqam tamuchina. Chay tamutaqam rin wichuq chay mana nunka wañuq ninaman rumpananllampa, nichpa. 18 Kanan Jwanqam runamkunata ancha allita chay Wachadurpa chumaq nutisyanda yach'achirqan: Dyus Amkrachqan Wachadurmi rinna chamuq wachawananchiq, nichpa. 19 Chay Jwanqam anyachqa karqan gubyirnu Irudista, masanda traysyunda rurachqambaq, suq laya mana allimkunata rurachqambaqpis. Chaqa chay Irudisqam masan Filimpimpa warmin Irudiyasta quch'ichpa, payna purichillkarqan. 20 Chaymi chay Irudisqa malpaq piskachpa, achwamba maluta rurachpa, Jwandaqa karsilarqan. 21 Piru Jwan manaraq karsilpi kachpam, ancha achka runamkunata chutichirqan. Jisuspismi chay diyamkunampi Jwanman rirqan chutichinambaq. Chaymandaqam Jisusqa chutimkuchpa, Dyusman mañamkullkamptinqa, syiluqa kich'amkarqan. 22 Chaymandaqam Dyuspa Santu Ispiritun suq palumitachina chamurqan Jisuspa sawanman. Chay urasmi Tayta Dyusqa syilumandampacha payta kaychina nirqan: Qami ancha kuyachqay Churiyqa kangi! ¡Qamwanmi ancha kuchimkuni! nichpa. 23 Jisumkristu 30 watayuq kachpach'i, qallarirqan Tayta Dyuspaq yach'achimkuq. 24 Alimpa taytanqam Matat chutiq. Matatpaqam Libi; Libimpaqam Milki; Milkimpaqam Jana; Janampaqam Jusi; 25 Jusimpaqam Matatiyas; Matatiyaspaqam Amus; Amuspaqam Nawun; Nawumbaqam Isli; Islimpaqam Nagayi; 26 Nagayimpaqam Mat; Matpaqam Matatiyas; Matatiyaspaqam Simiyi; Simiyimpaqam Jusi; Jusimpaqam Juda; 27 Judampaqam Juwana; Juwanampaqam Rrisa; Rrisampaqam Surubabil; Surubabilpaqam Salatyil; Salatyilpaqam Niri; 28 Nirimpaqam Milki; Milkimpaqam Adi; Adimpaqam Kusam; Kusambaqam Ilmudam; Ilmudambaqam Ir; 29 Irpaqam Juswi; Juswimpaqam Ilyisir; Ilyisirpaqam Jurin; Jurimbaqam Matat; 30 Matatpaqam Libi; chay Libimpaqam Simiyun; Simiyumbaqam Juda; Judampaqam Jusi; Jusimpaqam Junan; Junambaqam Ilyamkin; 31 Ilyamkimbaqam Miliya; Miliyampaqam Maynan; Maynambaqam Matata; Matatampaqam Natan; 32 Natambaqam Dabid; Dabidpaqam Isayi; Isayimpaqam Ubid; Ubidpaqam Bus; Buspaqam Salmun; Salmumbaqam Nasun; 33 Nasumbaqam Aminadab; Aminadabpaqam Aram; Arambaqam Isrum; Isrumbaqam Faris; Farispaqam Juda; 34 Judampaqam Jamkubu; Jamkubumpaqam Isamk; Isamkpaqam Abrajan; Abrajambaqam Tari; Tarimpaqam Namkur; 35 Namkurpaqam Siruq; Siruqpaqam Rragaw; Rragawpaqam Pilimki; Pilimkimpaqam Ibir; Ibirpaqam Sala; 36 Salampaqam Kaynan; Kaynambaqam Arfasad; Arfasadpaqam Sim; Simbaqam Nuwi; Nuwimpaqam Lamimk; 37 Lamimkpaqam Matusalin; Matusalimbaqam Inumk; Inumkpaqam Jarid; Jaridpaqam Malalil; Malalilpaqam Kaynan; 38 Kaynambaqam Inus; Inuspaqam Sat. Satpa taytanqam kachqa chay punta runa Adan. Adandaqam Dyus rurarqan.
1 Jisusmi chay rriyu Jurdambi chutimkuchpaqa, kutillkarqanna. Chaychina kutillkamptinqam, Dyuspa Santu Ispiritun chunqumbi kaqqa suq chuncha lugarman amparqan. 2 Chaypiqam 40 diyas tumkuyta karqan, mana nimata mimkuchpachu. Chaymi Jisus ancha mallaqnamptin, dyabluqa chaypi rimkamkurqan tyintanambaq. 3 Chaymi Jisustaqa nirqan: Mayñ, qam Dyuspa Churin allimp kachpaqa, kay rumita kamachiy, tandampaq timkramkanambaq, nichpa. 4 Chaychina dyablu nimptinmi, Jisusqa nirqan: Dyuspa Santu Librumbim nin: Runamkuna, warmimkunaqam mana mimkunawanllachu kawsanqa. Achwanmi Dyus tumkuy ima nichqangunawan kawsanqa, nichpa. 5 Chaymandaqam chay dyabluqa suq ancha altu qaqampa sawanman Jisusta ampachpa, kay mundumpa yumban nasyunningunata rimkachichpa, 6 nirqan: Rimkay kay ancha chumaq nasyungunata. Tumkuy munaypaq imandindam nuqa ch'askichqa kani. Chaymi pitampis atini quyta. Mayñ, qamta quchqallki, qamna tumkuy imampa dwiñun kanallkimpaq. 7 Piru qam qunqurimkuchpa adurawamptimkiqam, yumbay kallkunata quchqallki, nichpa. 8 Piru Jisusqam nirqan: A, dyablu, achuy ñawpaymanda! Chaqa Dyuspa Santu Librumbim nin: Tayta Dyustalla aduray. Pay munachqandalla rurachpa kawsay, nichpa. 9 Chaymandaqam dyabluqa Jisusta amparqan Jirusalin llaqtaman. Waqpim Dyuspa adurana wasimba mas altu sawanman surquchpa, Jisusta nirqan: Mayñ, Dyuspa Churin allimp kachpaqa, kaymanda ura pachamkaman brinkay. 10 Chaqa Dyuspa Santu Librumbim nin: Dyusmi anjilningunata rin kamachiq kwidachunambaq. 11 Chaymi mamkingunampi rinllampa ch'askichuq, ama ni ch'amkimkimkuna waq ura rumimkunampi tumpamkachpa chuqrimkanambaq, nichpa. 12 Chaychina dyablu nimptinmi, Jisusqa nirqan: Dyuspa Santu Librumbiqam niwanchiqpis: Dyusnimkitaqar ama mallimpaychu, munachqallkita ruranambaq, nichpa. 13 Chaychina dyablu tumkuy layata rurachpa, mana atichpa tyintaytaqam, Jisuspa ñawpanmanda suq tyimpumpaq achurqan. 14 Jisusmi Santu Ispiritumpa pudirninwan kutirqan prubinsya Galiliyaman. Kanan chay Galiliyampa yumbay llaqtangunampim waqpi kaypi famanqa chimkwamkarqan. 15 Chaqa Jisusqam kada llaqtaman ch'ayachpaqa, sinaguga wasimkunaman yallkuchpa, chumaqta yach'achimkurqan. Chaymi yumbay ancha alabaqllampa. 16 Jisusmi uywamkachqan llaqta Nasaritman kutirqan. Waqpim samana diyampi sinaguga wasiman rirqan, chaychina kustumbrin kamptin. Chaymi atarichpa, ñawpanllampaman rimptin liyiq Dyuspa Santu Librunmandaqa, 17 qurqanllampa Dyuspaq rimaq Isayiyaspa librunda. Chaymi chay libruta ch'askichpa, kich'achpa, kaychina liyirqan: 18 Taytanchiq Dyusmi Ispiritunda quwachqa. Chaqa amkrawachqam, paypa chumaq nutisyanda pubrimkunata yach'achinaypaq. ?Kach'amuwachqam llamkichqa kaqkunata kunswilanaypaq? prisumkunata ninaypaq: Ringillampanam lluqchiq, nichpa, sarkumkunata champachinaypaq; chay qasachadu kaqkunata wachanaypaq; 19 yumbayta ninaypaq: Rinnam ch'ayamuq Siñurnimkimpa allin tyimpun. Chay tyimpumpim payqa ancha rin yanampachuqllampa, nichpa. 20 Jisusmi chayta liyichpaqa, chay librundaqa kutichirqanna chay sinaguga wasimpi yanampamkuqta. Chaymandaqam tiyarqanna. Chaymi yumbay chaypi kaqkunaqa ancha unayta champarqanllampa Jisustaqa. 21 Chaymi Jisusqa nirqan: Dyuspa Santu Librunmanda kay liyichqayqam kanan diya ñawpallkillampampi kumplichqana, nichpa. 22 Chaymi yumbay chay uyaqkunaqa ispantachqata, Jisusta ancha alabachpa, kaychina parlaqllampa: Ancha chumaqtaraq riman! nichpa. Piru chaychina nichpaqam, suqnin suqnin paypura nirqanllampa: Piru kay runaqam Jusimpa churin, ¿manachu? nichpa. 23 Chaymi Jisusqa pallkunata nirqan: Qamkunaqach'i chay rimachqaypaqqa niwangimanllampa: Qam ambimkuqqar, qamlla ambimkachpa, kach'amkay. Mayñ, waq Kampirnawun llaqtampi yumbay chay rurachqallki milagrumkunata, kay llaqtallkimpimpis ruray rimkanaypaqllampa, nichpa. 24 Chayta nichpaqam, Jisusqa nirqambis: Allimptam nillkillampa, Dyuspaq rimaqkunataqam mana allitaqa ch'askinllampachu kimkin llaqtambiqa. 25 Manchu Dyuspaq rimaq Aliyaspa tyimpumbim kimsa wata y midyuta mana tamyarqanchu. Chaymi tumkuy Isrrayilpi ambrunawan ancha padisirqanllampa. Chay tyimpumpim Isrrayilpiqa achka biyudamkuna karqan. 26 Piru Dyusqam chay rimaq Aliyastaqa mana ni suq isrraylina biyudaman kach'arqanchu yanampanambaq. Achwanmi kamachirqan suq nasyunman rinambaq, chay prubinsya Sidumba Sarimpta llaqtanman, suq biyudata yanampanambaq. 27 Chaychinallam Dyuspaq rimaq Alisiyumpa tyimpumbimpis Isrrayilpiqa achka ismullkaq kwirpuyuq runamkuna karqan. Piru Alisiyumpismi mana ni mayqanninda kach'amkachirqanchu. Achwanmi chay nasyun Siryamanda kaq runa Naman chutiqta kach'amkachirqanqa. 28 Chaychina Jisus furastirumkunata sawachachpa nimptinmi, chayta uyachpa, chay sinaguga wasimpi yumbay kaqkunaqa ancha piñamkurqanllampa. 29 Chaymi Jisusta piskachpa, chay Nasarit llaqtamanda amparqanllampa, suq filamanda wichumkuq. Chaqa chay llaqtaqam ancha altu qaqampa sawambi karqan. 30 Piru Jisusqam pallkunampa ch'awpinda rirqan. 31 Jisusqam rirqan prubinsya Galiliyampa Kampirnawun llaqtanman. Chay llaqtampiqam samana diyampi sinaguga wasiman richpa, chaypi 32 ancha yach'ayniyuq kamachimkuq kachpa, yach'achimkurqan. Chaymi uyaqkunaqa ancha ispantarqanllampa. 33 Chay sinaguga wasimpiqam karqan suq runa. Paypiqam dyablumpa ispiritun tiyaq. Chaymi chay runaqa kaychina qayach'amkurqan: 34 A, qam, Jisus Nasaritmanda kaq! ¡Dijawayllampa! ¡Ama mitimkuychu nuqallkunamanqa! ¿Ima, kayman chamuchpachu, ringi chingachiwaqllampa? ¡Nuqaqam riqsillki! ¡Qamqam Dyuspa santu Churin kangi! nichpa. 35 Chaymi Jisusqa chay dyabluta anyachpa, nirqan. Uyaray! ¡Lluqchiy kay runamanda! nichpa. Chaychina Jisus kamachimptinqam, chay dyabluqa yumbaypa ñawpanman runata waqtamkuchpa, mana chuqrichpachu, paymanda lluqchirqanna. 36 Chayta rimkachpam, runamkunaqa ancha ispantachqata suqnin suqnin Jisuspaq parlarqanllampa: Ima laya pudirniyuq awturidar kachpam, dyablumkunata atin qatiyta? ¡Rimkay, Lluqchiy nimptinlla, chay dyablumkunaqa das lluqchin! nichpa. 37 Chay famanqam chay llaqtamandaqa chay prubinsyampa yumbay lugarningunaman chimkwamkarqan. 38 Chaymandaqam Jisusqa chay sinaguga wasimanda lluqchichpa, Simun Pidrumpa wasinman rirqan. Chay Simumba swigranmi ancha jwirti jibriwan qachyaq kamampi karqan. Chaymi Jisusta rrugarqanllampa kach'amkachinambaq. 39 Chayrallkum Jisusqa qachyaqman richpa, kumurachpa, jibritaqa anyarqan. Chaychina anyamptinllam, chay warmiqa jibrimanda das kach'amkarqan. Kanan chay urasmi atarichpa, pallkunata qararqan. 40 Rumpay saqallkamptinnam, tumkuy laya nanayniyuqkunata ampamurqanllampa Jisusman. Chaymi payqa mamkinda suqpa suqpa sawanman rurachpa, yumbayta kach'amkachirqan. 41 Achka runamkunamandam dyablumkunata qatirqan. Chaymi dyablumkunaqa lluqchichpa, qayach'amkurqan: A, qamqam Dyuspa Churin kangi! nichpa. Piru Jisusqam pallkunata anyachpa, mana dijarqanchu masta rimananllampa. Chaqa chay dyablumkunaqam yach'arqanllampa: Jisusqam Dyus Amkrachqan Wachadur, nichpa. 42 Achimkyallkamptinnam, Jisusqa chay llaqtamanda lluqchichpa, suq chunchamanna rirqan. Chay chunchampi kallkamptimbismi, ancha achka runamkuna, warmimkuna maskarqan tarinangaman. Chaymi tarichpaqa, ancha rrugarqanllampa, pallkunamanda amana rinambaq. 43 Piru Jisusqam pallkunata nirqan: Rinim suq llaqtamkunamambis, Taytay Dyuspa chumaq nutisyanda yach'achimkuq, payta allita kasunanllampa. Chaqa chaypaqmi nuqataqa kach'amuwachqa, nichpa. 44 Chaychina nichpam, Jisusqa chay prubinsya Galiliyampi llaqtan llaqtan purichpa, sinaguga wasimkunampi yach'achimkurqan.
1 Suq diyam Jisusqa Jinisarit atun quch'ampa manyambi kallkarqan. [Nuta: Chay Jinisarit quch'allam Galiliya quch'ampis chutiq.] Chaypim Jisusqa Tayta Dyus nichqanda yach'achimkullkarqan. Chaymi ancha achka chamuqkuna ancha kumsanamkuchpa Jisusta kich'kichachpa yaqqa bularqan. 2 Chaychina yaqqa bulamptinllampaqam, Jisusqa rimkarqan ichkay yamkumpi puriq barkuta chay quch'ampa manyambi chayallkaqta. Chaqa piskaduta piskaqkunaqam chay barkumkunamanda ichkichpa, atarrayangunata mayllallkarqanllampa. 3 Suq barkum Simun Pidrumpa karqan. Chay barkunman Jisus lluqchichpam, chay Simunda nirqan: Kay barkullkita kay manyamanda achlita waqkaq ampay, nichpa. Chaychina ampamptinmi, Jisusqa chay barkumpina tiyachpa, chay atun quch'amanda chay manyambi kaqkunata yach'achirqan. 4 Uchyachpa yach'achimkuytaqam, Simun Pidruta nirqan: Barkullkita kay atun quch'ampa mas ch'awpinman ampachpa, atarrayallkita wichuyllampa, piskadumkunata piskanallki, nichpa. 5 Chaymi Simun Pidruqa nirqan: Yach'achimkuq Taytitu, kay tutam yuraqachtin yanqa trabajachpa, mana nimatampis piskachqallampachu kani. Piru qam niwamptimkiqa, atarrayayta wichurichaq, nichpa. 6 Chaymandaqam atarrayanda wichumptinqa, allimpta ancha achka piskadumkuna atarrayambiqa bulsachamkarqan. Chaymi llachaqwanqa atarrayanqa llimkimkallkarqanna. 7 Chaychina kamptinqam, pallkunaqa mamkingunawan siñiyamkuchpa, qayarqanllampa chay suq barkumpi kaq kumpañirungunata, chamunambaqllampa yanampaq. Chamumptinllampaqam, yumbayninmanda ichkandin barkuta ancha undachirqanllampa piskadumkunawan. Chaymi chay barkumkuna ancha llachaqwanqa yaqqa saqarqanllampa chay atun quch'aman. 8 Chaymi Simun Pidruqa Jisuspa ñawpambi qunqurimkuchpa, nirqan: Kamachimkuq Taytitu, nuqaqam ancha uchayuq runa kani. Chaymi rrugallki nuqamandaqa achunallkimpaq, nichpa. 9 Chaqa Simun Pidruqam chay pullan kaqkunawan ancha achka piskaduta surquchqanrallku, Jisuspaq ancha ispantarqanllampa. 10 Simun Pidrumpa kumpañirungunam Jamkubuwan Jwan karqan. Pallkunaqam Sibidiyumpa churinguna karqan. Jisusmi Simun Pidrutaqa nirqan: Ama manchaychu. Chaqa piskadumkunata maskachqallkichinam, kananmandaqa runamkunatana maskachpa, ringi yach'achiq, nuqampi kriyinanllampa, nichpa. 11 Chaymi pallkunaqa barkunllampata atun quch'amanda manyanman surquchpaqa, chaypina tumkuy imandinda dijachpa, Jisuswanna rirqanllampa. 12 Suq llaqtampi Jisus kallkamptinmi, payman ch'ayarqan suq runa ismullkaq kwirpuyuq. Chaymi Jisusta rimkachpaqa, ñawpanman richpa, qunqurimkuchpa, qaqllanda pachaman ch'ayachichpa, ancha rrugarqan: Kamachimkuq Taytitu, munachpaqam kay nanayniymanda atingi kach'amkachiwayta, nichpa. 13 Chaymi Jisusqa chay millanaypaq runampa sawanman mamkinda rurachpa, nirqan: Munanim kach'amkachichuyta. Chayri kanalitan kach'amkay, nichpa. Chayta nimptinllam, chay qachyayqa limpu chingarqan. 14 Chaymandaqam Jisusqa chay runata kamachirqan: Amamkich pitampis parlachingichu kay kach'amkachichuchqaypaq. Achwan kuramanlla richpa, Muysis kamachimkuchqanchina ufrindallkita Dyuspaq quy, yumbay yach'anambaq: Waq runaqam kach'amkachqana, nichpa. 15 Piru Jisuspaqqam chay parlaqa diyampi diyampi achwamba chimkwamkarqan. Chaymi ancha achka runa ch'ayamurqanllampa, payta uyanambaq, nanayninmanda kach'amkachinambaq. 16 Piru Jisusqam pallkunamanda ladiyachpa, kutin kutin rirqan chuncha lugarkunaman, Tayta Dyusman mañamkuq. 17 Suq diyam Jisus yach'achimkullkamptin, chaypi tiyallkarqan wamkin farisiyu dumktrinayuqkuna, Muysispa liyningunata wamkin yach'achimkuqkuna. Pallkunaqam chamuchqallampa karqan prubinsya Galiliyampa, prubinsya Judiyampa llaqtangunamanda, Jirusalinmandampis. Kanan Jisusqam Dyuspa pudirninwan qachyaqkunata kach'amkachillkarqan. 18 Chaymi wamkin runamkunaqa suq runa wañuchqachina kwirpuyuqta parampi ampamuchpa, ch'ayamurqanllampa. Pallkunaqam ancha munarqanllampa umkuman yallkuyta Jisuspa ñawpanman, chaypi chay qachyaqta kach'amkachinan. 19 Piru ancha unda runa kamptinmi, mana mayta atirqanllampachu yallkuytaqa. Chaymi wasimpa sawanman qachyaqta surqurqanllampa. Chaymandaqam tijamkunata achuchichpa, waskamkunawan parambi watachpa, qachyaqtaqa umku runamkunampa ch'awpinman, Jisuspa ñawpanman ichkichirqanllampa. 20 Chaymi Jisusqa ancha kriyiqkunata rimkachpa, nirqan: Runita, uchallkimkunamandam pirdunallki, nichpa. 21 Chay nichqambaqmi Muysispa liyningunata chay yach'achimkuqkuna, chay farisiyu dumktrinayuqkuna yuyarqanllampa: ¡Ima pitaq kay runaqa chaychina nichpa Dyuschina tumkuchpa, Tayta Dyusta burlallkan? ¡Paqta imanan ima! Chaqa manam pimpis atinchu runamkunampa uchangunata pirdunayta. Tayta Dyusllam atin pirdunaytaqa, nichpa. 22 Chaymi Jisusqa yuyachqanllampata yach'achpa, pallkunata nirqan: Imarallkutaq chay mana baliqkunata yuyallkangillampa? 23 Mayñ, ¿imataq mas trabajus ruranaypaq, ichu ninaypaq: Uchallkimkunamandam pirdunallki ichu ninaypaq: Kach'amkachillkim; atarichpana, riy nichpa? 24 Chaymi rini rimkachichuq yach'anallkillampa: Tayta Dyusmi Jisumkristuta pudirniyuqta numbrachqa, runamkunata uchangunamanda pirdunanambaq, nichpa. Chaymandaqam Jisusqa chay runa wañuchqachina kwirpuyuqta nirqan: Qamtam nillki, atarichpa, parallkita ampachpa, riyna wasimkiman, nichpa. 25 Chaychina kamachimptinllam, yumbay champallkamptin, das atarirqan. Chaymi chay uras paranda tandachpa, Dyusta ancha alabaqchina rirqanna wasinman. 26 Chayta rimkachpam, yumbay chaypi kaqkunaqa ancha ispantachqata Dyusta ancha alabarqanllampa. Kanan manchachqatam kaychina parlarqanllampa: Mana nunka rimkachqanchiqtam kananqa rimkanchiq, nichpa. 27 Chaymandaqam Jisusqa chay kachqanmandaqa rirqanna. Chaymi riqchinaqa rimkarqan suq runa Libi chutiqta. [Nuta: Chay Libillam Matiyumpis chutiq.] Chay Libiqam tiyallkarqan kuntribusyun kubramkunan dispachumbi. Kanan Jisusqam Libitaqa nirqan: Chamuy, amku nuqawan, nichpa. 28 Chaymi Libiqa das atarichpa, tumkuy imata dijachpa, Jisuswanna rirqan. 29 Chaymandaqam chay Libiqa Jisusta wasinman ampachpa, suq atun fyistata paypaq rurarqan. Kanan wamkin kuntribusyunda kubramkuqkuna, suq runamkunampismi chay masampilla pulla tiyallkarqanllampa. 30 Chaymi chayta rimkachpaqa, farisiyu dumktrinayuqkuna, Muysispa liyningunata yach'achimkuqkunaqa ancha piñamkuchpa, Jisuspa yach'amkuqningunata kaychina anyarqanllampa: Imarallkutaq qamkunaqa kuntribusyunda kubramkuqkunawan, suq laya uchayuq runamkunawan tandamkachpa mimkullkangillampa, umpyallkangillampaqa? nichpa. 31 Chaymi Jisusqa chay piñamkuqkunata nirqan: Qachyaqkunallam munan ambimkuqtaqa. Chay mana qachyaqkunaqam ambimkuqtaqa mana munanchu. (Kay uchayuqkunaqam chay qachyaqkunachinaqa.) 32 Chaychinallam nuqaqa chamuchqa kani uchayuqkunata qayanaypaq, uchangunata dijachpa, Dyuspi kriyinanllampa. Piru manam chamuchqachu kani chay mana uchayuq tumkuqkunata qayaq, nichpa. 33 Wamkin runamkunam Jisusta tampurqan: Jwan Chutichimkuqpa yach'amkuqninguna, yumbay farisiyu dumktrinayuqkunaqa ancha ayunanllampa; kutin kutin Dyusman mañamkunllampa. ¿Imarallkutaq qamba yach'amkuqnimkimkuna mana ayunachpachu mimkunllampa, umpyanllampa? nichpa. 34 Chaymi Jisusqa pallkunata nirqan: Mayñ, suq kasaraq runa kumpañirungunata kumbidachpa, fyistampi kamptinqachuraq, ¿atingimanllampa chay kumpañirungunata ayunachiyta? Manñm. Chaychinallam kay yach'amkuqnillkunampis pullay kuchimkullkachpaqam, mana ayunanllampachu. 35 Piru suq diyam kuntrawaqkuna pallkunamanda rinllampa amkrawaq. Chaychina amkrawamptinraqmi, kay yach'amkuqnillkunampis rinllampana ayunaq, nichpa. 36 Jisusqam kaychinampis suq kumparasyunda rurarqan: Manam pimpis muchuq mudananmanda suq pidasuta kuchunchu, mawka mudananda rrimindananqa. Chaqa muchuq mudananda kuchumptinqam qasachamkan. Kanan muchuq rritasuqam mana pullachu mawkawanqa. Siramptinqam mana chumaqchu kanqa. 37 Chaychinallam llullu binutampis mana wichunchiqchu mawka qara taligamanqa. Chaqa llullu binuqam qarwachpa, mawka qara taligataqa pach'yachin. Chaychinam binu, qara taligaqa qasachamkan. 38 Chayri muchuq binutaqa wichuchun muchuq qara taligaman (chay qara chutamkachpa, ama pach'yanambaq). [Nuta: Chay llullu binuqam Jisuspa muchuq nutisyanchina. Chay mawka qara taligaqam isrraylinumkunampa chay unay kustumbringunachina.] 39 Piru chay qarwachqa binutalla umpyaqqam, llullu binutaqa mana munanllampachu: Qarwachqa binum nuqampaqqa mas allinqa, nichpa.
1 Suq samana diyampim Jisusqa yach'amkuqningunawan tarpudumkunampa umkunda pasallkarqan. Chaymi yach'amkuqningunaqa mallaqnachpa, triguta pitichpa, qaquchpa, mimkullkarqanllampa. 2 Chaypaqmi wamkin farisiyu dumktrinayuqkuna Jisusta anyarqanllampa: Samana diyampiqam mana balinchu trabajananchiqqa. ¿Imarallkutaq kay samana diyampi wamkin yach'amkuqnimkiqa trigumpa ispigangunata pitimkuchpa, qaqumkuchpa trabajallkanllampa? nichpa. 3 Chaymi Jisusqa pallkunata nirqan: Ima, ¿manachu liyichqallampa kangi chay unay gubyirnu Dabid kumpañirungunawan mallaqnachpa rurachqandaqa? 4 Karpamanda adurana wasimpi ufrinda tandamkuna kaqmi kuramkunampaqlla karqan. Piru Dabid mana dirichuyuq kachpampismi, chay adurana wasiman yallkuchpa, chay ufrinda tandamkunata mimkuchpa, chay kumpañirungunatampis qurqan mimkunambaq. 5 Chaymandaqam Jisusqa nirqan: Nuqaqam Dyusmanda Chamuq Runa kachpa, samana diyampa dwiñun kani. Chaymi atini kamachimkuyta: Kaymi alli ichu kayqam mana allichu, samana diyampi rurananchiqqa, nichpa. 6 Suq samana diyampim Jisusqa sinaguga wasiman richpa, chaypi yach'achimkullkarqan. Chay umkumpiqam suq runa allin ladu qandichqa mamkiyuq karqan. 7 Chaymi Muysispa liyningunata yach'achimkuqkuna, farisiyu dumktrinayuqkunaqa Jisusta ancha champarqanllampa: ¿Payqachu rin kach'amkachiq chay runata kay samana diyampi ichu mana? nichpa. Chaqa pallkunaqam yuyarqanllampa, chaypaq tumbachpa dimandananllampa. 8 Piru Jisusqam yuyayninllampata yach'achpa, chay qandichqa mamkiyuq runata nirqan: Atarichpa, chamuy kay ch'awpiyllampaman, nichpa. Chaymi runaqa atarichpa ch'awpinllampampina chayarqan. 9 Chaymandaqam Jisusqa chay jusgaqkunata nirqan: Mayñ, niwayllampa: ¿Imatam Tayta Dyus kamachiwanchiq, samana diyampi rurananchiqqa? ¿Allita rurananchiq ichu maluta? ¿Suq runata wachananchiq, ichu wanchinanchiq? nichpa. 10 Chaychina Jisus nichpaqam, yumbay chay rridurnimbi kaqkunata champachpa, chay qandichqa mamkiyuq runata nirqan: Chutay mamkimkita, nichpa. Chaymi chay runa mamkinda dimki chutamptinlla, qandichqa kachqanmandaqa dasna allinyarqan. 11 Chayta rimkachpaqam, chay kuntraqkunaqa ancha fiyuta piñamkurqanllampa. Chaymi pallkunampura parlarqanllampa: ¿Imanachichundaq Jisusta? nichpa. 12 Chay diyamkunampim Jisusqa rirqan suq lumaman Dyusman mañamkuq. Chay lumampiqam chay tutaqa yuraqarqan Dyusman mañamkuchpa. 13 Chaymandaqam achimkyamptinqa, yach'amkuqningunata qayachpa, yumbay pallkunamanda dusita amkrachpa numbrarqan, ampustulninguna kanambaq. 14 Chay dusi ampustulningunaqam kallkuna karqan: Simun; payllam Pidrumpis chutirqan; paypa masan Andris; wamkinqam Jamkubu, Jwan, Filimpi, Bartulu, 15 Matiyu, Tumas, Alfiyumpa churin Jamkubu. Suq Simun chutiqtampismi amkrarqan, ampustulnin kanambaq. Paymi isrraylinu Kananista partidumanda karqan. 16 Ichkay ampustulkunaqam Judas chutirqan. Suqqam Jamkubumpa masan karqan. Suqqam Judas Iskaryuti chutirqan. Chay Judas Iskaryutim suq tyimpumpi Jisusta kuntraqkunaman intrigamkurqan. 17 Jisusmi chay lumamanda yach'amkuqningunawan chamuchpa, suq pambaman ch'ayarqanllampa. Chaypim achla unayarqan. Ancha achka runa, warmim chay pambaman ch'ayamuchqallampa karqan prubinsya Judiyampa kampitalnin Jirusalinmanda, yumbay llaqtangunamanda, Tiru llaqtampa, tumkuy Sidun llaqtampa kustangunamanda. Pallkunaqam chamuchqallampa karqan Jisusta uyanambaq, qachyayningunamanda kach'amkanambaq. 18 Chaymi Jisusqa pallkunata kach'amkachichpa, runamkunamanda dyablumkunatampis qatirqan. 19 Kanan payqam ancha pudirniyuq kachpa, qachyaqkunampa sawanman mamkinda rurachpa, yumbayta kach'amkachirqan. Chaymi yumbay qachyaqkunaqa imachinampis munarqanllampa Jisusman mamkinda rurayta kach'amkanambaqllampa. 20 Jisusmi yach'amkuqningunata champachpa nirqan: Qamkuna pubrimkunaqar kuchimkuyllampa. Chaqa Tayta Dyus allita kamachimkuchpaqam, chumaqta rin ch'askichuqllampa, paywan kawsanallkillampa. 21 Kanan qamkuna mallaqnaqkunampisri kuchimkuyllampa. Chaqa suq diyaqam ringillampa undaq. Qamkuna waqaqkunampisri kuchimkuyllampa. Chaqa suq diyaqam ringillampa kuchimkuq. 22 Nuqampi kriyichqallkirallku ch'iqnichumptinllampa ichu qatichumptinllampa ama tandamkanallki pallkunaman, ichu mana allimkunata rimachumptinllampa, ichu malumkunatachina musyachumptinllampaqa, kuchimkuyllampa. 23 Chaqa ancha chumaq primyutam syilumpiqa ringillampa ch'askiq. Unay tyimpumpimpismi chay ch'iqnichuqkunampa agwilungunaqa chaychinalla Dyuspaq rimaqkunata ancha qasacharqanllampa. 24 Piru ¡imanangillamparaqri qamkuna kampuqkunaqa! Dyuswanqam mana ringillampachu kuchimkuq. Chaqa kay pachampi bwina bidata pasachpaqam kuchimkullkangillampa. 25 ¡Ay, imanangiraqri qamkuna unda unda mimkuqkunaqa! Chaqa ringillampam mallaqnaq. ¡Imanangiraqri qamkuna asimkuqkunaqa! Chaqa ancha llamkichpam, ringillampa waqaq. 26 ¡Ay, imanangiraqri qamkuna, runa masimkimanda alabachqamkunaqa! Chaqa chay alabachuqkunampa unay agwilungunampismi Dyuspaq rimaq tumkuqkunataqa chaychinalla alabarqanllampa. 27 Piru qamkuna uyawaqkunatam nillkillampa, kuntrallkimkunata kuyayllampa. Ch'iqnichuqkunata allita rurayllampa. 28 Maldisyachuqkunata niyllampa: Dyus yanampachunqa, nichpa. Musyachuqkunampaq Dyusman mañamkuyllampa, pallkunata yanampanambaq. 29 Mayqan runa suq ladu qaqllallkimpi tamkachumptinqa, suq ladutampis quy, chaypimpis tamkachunambaq. Kampallkita quch'ichumptimbis, kuchmallkitampis dijay ampanambaq. 30 Mayqan imata mañachumptimbis, quy. Pi imallkita quch'ichumptimbis, amana mañaychu kutichichunanqa. 31 Qamkuna munachpa runa masimkimkuna allita rurachunambaqqa, pallkunatampis chaychina allitalla ruray. 32 Kuyachuqkunatalla kuyamptimkiqam, Dyuspaqqa mana balingillampachu. Chaqa chay ancha uchayuqkunampismi kuyaqkunatalla kuyan. 33 Chaymi qamkuna faburta rurachuqtalla faburta ruramptimkiqa, Dyuspaqqa mana balingillampachu. Chaqa asta chay ancha uchayuq kaqkunampismi chaychinalla ruranllampa. 34 (Chayri qamkunampa imallki kamptinqa, runa masimki ima nisitachqanda pristayllampa.) Piru imata quchunanrallku pristamptimkiqam, Dyuspaqqa mana balingillampachu. Chaqa chay uchayuqkunampismi pristan chay iman quqkunatalla. 35 Piru qamkunaqar achwan kuntrallkimkunata kuyachpa, allita rurayllampa. Qamkunampa imallki kamptinqar, ima nisitachqanda pristayllampa. Piru ama imata quchunanrallkuchu pristayllampaqa. Chaychina allita ruramptimkiqam, Dyusqa ancha chumaq primyullkita rin quchuqllampa. Chayta rurachpallampaqam, Dyuspa wambranguna ringillampa kaq. Chaqa Dyusqam ancha allin kachpa, chay mana ni agradisiqkunata, chay malumkunatampis yanampan. 36 Chayri ancha allin Taytanchiq Dyus llamkimpachumptinqa, qamkunampis llamkimpamkuqkuna kayllampa. 37 Ama jusgamkuychu, qamkunampis ama jusgadu kanallkillampa. Suqkunata ama wichumpayllampachu, qamkunampis ama wichumpadu kanallkillampa. Achwan suqkunata pirdunayllampa, qamkunampis pirdunadu kanallkillampa. 38 Imallki kamptimbis, suqkunata quyllampa. Chaychina qumptimkiqam, Tayta Dyus rin quchuq. Chaqa Dyusqa ancha achkata quchuchpa, kuyuchichpa, ch'ampsichpa, llampchachpa, ich'amkallkaqta rin millqachichuq. Chay ima tantuta yanampamptimkim, Dyuspis chay tantuta rin yanampachuqllampa, nichpa. 39 Chaymandaqam Jisusqa kay kumparasyundampis yach'amkuqningunata nirqan: Suq sarku runaqa ¿imachinaraq ampanman suq sarkutaqa? Manam atinchu. ¿Imanaymi ampanqaqa? Achwambam suq uch'kuman ichkandin saqanmanllampa, ¿manachu? 40 Chaychinallam suq yach'amkuqqa mana rinchu binsiq yach'achimkuqnindaqa. Piru tumkuy imata allita yach'amkuchpaqam, chay yach'achimkuqninchina atin kayta. 41 Qamkuna mas uchayuqkunaqa ama jusgayllampachu, kriyiq masimki achla uchata ruramptinqa. Chaqa jusgachpaqam, paypa ñawimbi suq pidasu uqchitachina kaqta champallkangichina, mana intyindichpa qamba ñawimkimpi suq bigachina kachqanda. 42 Chaychina chay kimkin ñawimkimpi suq ancha atun biga kachqanda mana rimkachpaqa, ¿manachu panqamkungi masallkita ninallki: Masita, dijaway ñawimkimanda chay uqchitata surqunaypaq nichpaqa? ¡A, qamkuna chimimkiwanlla kasumkuqkuna! ¡Suqta jusganallkiqam kan grasyallki! ¡Chaqa suqta jusganallkimandaqa puntata qamba ñawimkimandaraq chay ancha atun bigata surquy! Chaychina allita champamkuchparaqmi, kriyiq masimkimpa ñawinmanda uqchitataqa atingi surquyta. Manaqa manam atingichu, nichpa. 43 Suq yura mana baliqqam mana allitaqa puqunchu. Piru suq allin yuraqam allinda puqun. 44 Chaychinam yumbay plantamkunataqa puquyninmanda riqsinchiq, ¿manachu? Kachamandaqam mana iguskunataqa pallanchiqchu. Chaychinallam chay sarsamandampis mana ubaskunataqa pallanchiqchu. 45 Chaychinallam allin runaqa allimkunata riman, allin yuyallkuna chunqumbi kachqanrallku. Piru chay mana allin runamkunaqam mana baliqkunata riman, malu yuyallkuna chunqunllampampi kachqanrallku. Chaqa chunqumbi ima laya yuyallkuna kachqandam chiminwanqa rimanllampa; manam maymandachu. 46 ¿Imarallkutaq qamkunaqa Siñursitu, Siñursitu niwangillampaqa, nichuchqayta mana kasuchpaqa? 47 Suq kumparasyunda nichqallkillampa. Nuqata allita kasuwaqkunaqam suq yach'ayniyuq runa wasita ruraqchina. 48 Chay yach'ayniyuq runaqam wasinda ruranambaqqa allamkurqan umku angu rumiman ch'ayachtin. Chaymandaqam chay jwirti rumimpa sawambina simyintunda rurachpa, wasinda alsarqan. Chaymanda uchyamptinqam, rriyu undachpa, ancha jwirtita ch'ayamurqan bulaq chay wasitaqa. Piru manam ni kuyuchirqanchu, rumimpa sawambi allin simyintuyuq kachqanrallku. Chay rumimpa sawambi wasimkuqchinam nuqata kasuwaqkunaqa. 49 Piru mana kasuwaqkunaqam suq runa pamba allpampi mana simyintuyuq wasinda ruraqchina. Chaqa wasinda uchyamptinqam, chay rriyu undachpa, ancha jwirtita ch'ayamuchpa, chay wasi mana simyintuyuqta bulachpa, limpu chingachirqan, nichpa.
1 Jisusqam pallkunata yach'achichpaqa, rirqanna Kampirnawun llaqtaman. 2 Chaypim suq rrumanu suldadu tiyaq. Chay suldaduqam achka suldadumkunampa kamachimkuqnin karqan. Paypam suq ancha kuyachqan kriyadun qachyaq wañullkarqanna. 3 Chay rrumanu suldaduqam Jisuspa famanda yach'arqan. Chaymi kach'arqan kamachimkuq ansyanu isrraylinumkunata, rinambaqllampa Jisusta rrugachpa ampamuq, kriyadunda kach'amkachinambaq. 4 Chaymi kach'adungunaqa richpa, Jisusta ancha rrugarqanllampa: Ancha allinmi chay rrumanu suldaduqa. Yanampayri yuch'allku. 5 Chaqa nuqanchiq isrraylinumkunatam ancha kuyawanchiq. Chaymi sinaguga wasita rurachqa nuqallkunampaq, nichpa. 6 Chaychina nimptinqam, Jisusqa chay rrugaqkunawanna rirqan. Chaymi suldadumpa wasinman yaqqana ch'ayamptinqa, chay rrumanuqa wamkin kumpañirunda kach'arqan, ñanmanlla tinguchpa, ninanllampa: Taytitu, amar piñamkuychu. Amanar kallkamanqa chamuychu. Chaqa manamir baliq runachu kani, kay wasiyman yallkunallkiqa. 7 Chaymi mana rirqaychu nuqa kimkiy maskachuqqa. Kamachimkuyri. Chay nichqallkiwanllam kriyaduyqa rin kach'amkaq. 8 Chaqa nuqampismi kamachiwaqta kasuni. Chaychinallam kamachichqay suldadullkunampis kasuwan. Suqninda Riy, nimptiymi, rin. Suqta Chamuy, nimptiymi, chamun. Kriyaduyta kamachimptiy, imata ruranambismi ruran. 9 Chaychina nimptinmi, Jisusqa ancha ispantachpa, kuchimkurqan. Chaymi timkramkachpa chay pullan riqkunata nirqan: Allimptam nillkillampa, kay ancha kriyiq runatachinaqam mana ni suqta tarichqachu kani, ni kay llaqta masinchiq isrraylinumkunampi, nichpa. 10 Chaymandaqam chay kach'adungunaqa wasiman kutirichpaqa, chay kriyadun qachyaqtaqa kach'amkachqatana tarirqanllampa. 11 Chaymandaqam Jisusqa Nayin chutiq llaqtamanna rirqan. Paypa pullanmi rirqanllampa yach'amkuqninguna, ancha achka runamkuna, warmimkuna. 12 Chay Nayin llaqtaman yaqqana ch'ayachpaqam, rimkarqan suq almata ampallkamptinllampa pambaq. Chay wañuchqaqam suq biyudampa sampalan ullqu wawan kachqa karqan. Chay llaqtamandaqam achka runamkuna, warmimkuna rillkarqan pambamkuq, chay biyudata kumpañachpa. 13 Chaymi Jisusqa chay biyudata champachpa, llamkimpachpa nirqan: Amar waqaychu, nichpa. 14 Chaymandaqam almaman qamimkachpa, paranman mamkinda rurarqan. Chaymi chay ampaqkunaqa rillkachqanmanda chayamptin, Jisusqa chay almata nirqan: Wambra, qamtam nillki, ¡atariy! nichpa. 15 Chaychina nimptinllam, chay wañuchqa wambraqa alsamkamuchpa, parlarqanna. Chaymandaqam Jisusqa chay wambrataqa kawsaqtana mamanda intrigarqan. 16 Chaymi rimkaqkunaqa manchachqata champachpa, Dyusta kaychina alabarqanllampa: Dyuspaq suq ancha kamachimkuq rimaqmi kay nuqanchiqkunaman chamuchqa! nichpa. Nirqanllampampismi: Tayta Dyusmi chamuchqa yanampawananchiq, nichpa. 17 Kanan Jisuspa famanqam chay prubinsya Judiyampa tumkuy rridurnin llaqtamkunaman chimkwamkarqan, Jisuschi kawsachimkuchqa, nichpa. 18 Challkunata Jisumkristu ruramptinmi, Jwan Chutichimkuqpa yach'amkuqninguna yach'arqan. Chaymi pallkunamanda yach'achpa, Jwanqa ichkay yach'amkuqninda qayachpa, 19 Jisusman kach'arqan, kaychina tampunambaq: Mayñ, ¿qamchu Dyusmanda chay chamunambaq Wachadur kangi, ichu suqtaraq chuyachaqllampa? nichpa. 20 Chaymi chay kach'adungunaqa richpa, Jisusta nirqan: Jwan Chutichimkuqmi kach'amuwachqa tampuchunayllampa: ¡Qamchuch Dyusmanda chay chamunambaq Wachadur kangi, ichu suqtaraq chuyachaqllampa? nichpa. 21 Chay urasmi Jisusqa achka qachyaqkunata kach'amkachillkarqan. Wamkinmandaqam dyablumkunata qatillkarqan. Achka sarkumkunatampismi champachillkarqan. 22 Chaymi Jisusqa chay tampuqkunata nirqan: Kutirichpa, Jwanda niyllampa kay rimkachqallkillampata, uyachqallkillampata, sarkumkuna rimkamkuchqanda, kujumkuna purichqanda, ismullkaq kwirpuyuqkuna kach'amkachqanda, surdumkuna uyamkuchqanda, wañuchqamkuna kawsamuchqanda, pubrimkuna Dyuspa chumaq nutisyanda uyachqanda. 23 Kanan nuqampi mana challkuq kriyiqkuna kuchimkunqallampa. Chayta Jwanda niyllampa, nichpa. 24 Chaychina nimptinmi, chay kach'adungunaqa Jwanmanna kutirirqan. Rimptinllampaqam, Jisusqa chaypi kaqkunata kaychina yach'achimkurqan Jwan Chutichimkuqpaq: Ima laya runatam rirqallkillampa champaq chay chuncha lugarmanqa? ¿Rirqallkillampachu champaq suq runa mana alli yach'aqta, suq kañata wayra waqman kayman kuyuchiqtachina? Manñm. 25 ¿Ichu rirqallkillampaqa champaq suq ancha ch'aniyuq mudanayuq runata? Manñm. Chaqa chay ancha chumaqta mudamkuqkuna, chay bwina bida kawsaqkunaqam tiyanllampa gubyirnumkunampa atun wasingunampi, ¿manachu? 26 Chaychinaqa ¿imata rimkaqtaq rirqallkillampaqa? ¿Dyuspaq suq allimp rimaqta? Ari, allimptam nillkillampa, Dyuspaq ancha baliq rimaqtam rirqallkillampa rimkaqqa. Kanan chay Jwanqam yumbay chay suq rimaqkunamanda mas baliq kachqa. 27 Chaqa chay Jwambaqmi Taytanchiq Dyusqa Santu Librumbi Amkrachqan Wachadurta kaychina niwarqan: Qamba ñawpallkitam nuqampaq suq rimaqta rini kach'aq. Paymi ñanda allichanmanchina runamkunata rin yach'achiq, chumaqta qamta ch'ayachichunanllampa, nichpa. 28 Chaymi allimpta nillkillampa, Dyuspaq yumbay rimaqkunamandam mana ni suq Jwanmandaqa mas baliqqa kachqachu. Piru nuqa Taytaywan kamachimkumptiy, nuqampi yuyamkuqmanda mas umildi kaqqam mas baliq rin kaq chay Jwanmandaqa, nichpa. 29 Chaychina Jisus Jwanda alabamptinqam, yumbay chay uyaqkuna asta chay kuntribusyun kubramkuqkunampis nirqanllampa: Dyusqam ancha allin kachqa nuqanchiqkunawanqa, nichpa. Chaqa yumbay pallkunatam Jwanqa chutichichqa karqan. 30 Piru farisiyu dumktrinayuqkuna, Muysispa liyningunata yach'achimkuqkunaqam mana dijamkachqachu karqan Jwan chutichinambaq. Achwanmi Tayta Dyus pallkunata munamptin wachaytaqa, fyirusyachpa mana munarqanllampachu. 31 Chaymi Jisusqa nirqan: Imawandaq kay tyimpumanda runamkunataqa atini kumparayta? ¿Ima laya kustumbriyuqmi pallkunaqa? 32 Kay mana kriyiqkunataqam kumparani chay wambra mana nimatampis munaq pugllaqkunawan. Manchu wambramkunaqa plasampi pugllanllampa, fyistatachina rurachpa ichu suq almata pambaqchina tumkuchpa. Piru wamkin wambramkuna mana munamptin pugllaytaqam, chay pugllaqkunaqa ninllampa: ¡Fyistampichina flawtata waqachimptiymi, mana dansangillampachu! ¡Pambamkuqchina llamkiy llamkiyta kantamptiypismi, mana waqangillampachu! nichpa. (Chaychinallam wamkinnimkimkuna mana munangillampachu uyayta ni Jwan Chutichimkuqta ni nuqata). 33 Chaqa chay Jwan chamuchpa, mana ni tandata ni allin mimkunata mimkumptin, mana ni binuta umpyamptinqam, nirqallkillampa: Waq Jwanqam dyabluwan kachpa, lumkuchina purin, nichpa. 34 Chaymandaqam Dyusmanda Chamuq Runa kachpa mimkumptiy, imitata umpyamptiyqam, nuqampaq ningillampa: ¡Jwi, mana undaqmi mimkun, umpyan! Chay uchayuqkunawan, kuntribusyunda kubramkuqkunawanmi tandamkan, nichpa. 35 Piru Dyus nichqanda kasuqkunaqam ancha yach'ayniyuqkuna. Chaymi chumaqta kawsamptinllampa, rimkaqkunaqa intyindinllampa: Ancha yach'ayniyuqmi Dyusqa, nichpa. 36 Suq farisiyu dumktrinayuq runam Jisusta nirqan: Amku wasiyman mimkuq, nichpa. Chaymi Jisusqa wasinman richpaqa, masaman tiyarqan mimkunambaq. 37 Chay llaqtampim suq warmi ancha uchayuq karqan. Chay warmim yach'arqan chay farisiyumpa wasimbi Jisus kachqanda. Chaymi imkinda ch'ayarqan michki mutkinata suq rumi pumumpi ampachpa. 38 Jisuspa ch'amkinman qamimkachpam, ancha waqarqan. Waqaqchinam ch'amkingunata nuyuchirqan waqayninwan. Nuyuchichpaqam aqchanwan chamkichichpa, muchachpa, chay michki mutkinawan pasarqan. 39 Chay farisiyu Jisusta ampaqqam chay warmi chayta rurallkaqta rimkachpaqa, yuyarqan: Atatayraq kay warmiqa. Mana allimkunata rurachpam purirqan. Kay runa Dyuspaq allimp rimaq kachpaqach'i, atinanda yach'ayta: Uchayuq warmim ch'amkiymanda piskawallkan, nichpa. 40 Chaychina yuyamptinmi, Jisusqa nirqan: Simun, munanim suq kusitata nichuyta. Chaymi farisiyuqa nirqan: Niwayri, Yach'achimkuq Taytitu, nichpa. 41 Chaymi Jisusqa nirqan: Ichkay runam suq qallayniyuqta dibiraq. Suqmi 500 dinaryu qallayta dibirarqan; suqqam 50 dinaryu qallayta dibirarqan. 42 Mana atimptinllampa pagaraytam, chay qallay dwiñuqa chay ichkandin dibiraqta pirdunarqan. Mayñ, niway, chay dibiraqkunaqa, ¿mayqanninraq masta rin kuyaq chay qallay dwiñutaqa? nichpa. 43 Chaychina nimptinqam, Simunqa nirqan: Nuqam yuyani, chay runa mas achka dibirachqan pirdunachqanmi mastaqa rin kuyaq, nichpa. Chaymi Jisusqa nirqan: Ari, chaychinam. Allitam yuyachqa kangi, nichpa. 44 Chaymandaqam chay warmita champachpa, Simunda nirqan: Intyindichqachu kangi kay warmi rurachqandaqa? Rimkay, kay wasimkiman yallkumptiyqam, mana quwarqallkichu yamkuta, ch'amkillkunata mayllanayqa. Piru kay warmiqam waqayninda ich'achpa, ch'amkillkunata aysachpa, aqchanwan chamkichichqa. 45 Qamqam mana nampallkuwachqachu kangi muchawachpa. Piru payqam ch'ayamuchqay urasmandampacha mana challkuq ch'amkillkunata muchachqa. 46 Qamqam mana umaytaqa asiytiwanqa pasarqallkichu, chumaqta ch'ayachiwanallkiqa. Piru payqam ancha ch'aniyuq michki mutkinawan ch'amkillkunata liyachqa. 47 Chaymi allimpta nillki, Taytanchiq Dyus kay warmita yumbay uchangunata pirdunamptinqam, kaychina ancha kuyawan. Piru Tayta Dyus suq runa achla uchayuqta pirdunamptinqam, chay runaqa achlitatalla kuyan, nichpa. 48 Chaymandaqam chay warmitaqa nirqan: Uchallkimandam pirdunallki, nichpa. 49 Chaychina nimptinqam, Jisuswan masampi kaqkunaqa, suqnin suqnin parlarqanllampa: Imataq kachpa, kay yanqa runaqa uchangunata pirdunallkan? nichpa. 50 Piru Jisusqam chay warmita nirqan: Nuqampi kriyichqallkirallkum, yumbay uchallkimanda pirdunaduna kangi. Kuchimkuchpana riy, nichpa.
1 Chaymandaqam Jisusqa dusi ampustulningunawan rirqan achka llaqtamkunata, achka kasiriyumkunata, Dyuspa chumaq nutisyanda yach'achimkuq, chay uyaqkuna Dyusta kasunambaqllampa. 2 Wamkin warmimkunampismi Jisuspa pullan rirqan. Pallkunataqam nanayningunamanda kach'amkachichqa karqan. Wamkinmandaqam dyablumkunata qatichqa karqan. Chay warmimkunamandaqam suqninqa Marya karqan. Payllam Madalinampis chutiq (Magdalamanda kachqanrallku). Paymandam Jisumkristu syiti dyablumkunata wichumkuchqa karqan. 3 Suq warmiqam Jwana chutiq. Payqam Chusampa warmin karqan. Chay Chusaqam prifimktu Irudispa wasimba kamachimkuqnin karqan. Suq warmiqam Susana karqan. Wamkin warmimkunampismi Jisuspa pullan puriqllampa tumkuy iman kaqwan yanampachpa. 4 Achka llaqtamkunamanda achka runa, warmi chamumptin Jisusta rimkaqmi, payqa kay kumparasyunwan pallkunata yach'achirqan: 5 Suq tarpumkuq runa simillanda chimkwamptinmi, wamkin simillaqa ñanman ichkirqan. Chay ñambi ichkiq simillatam pasaqkuna sarrurqanllampa; wamkindaqam pichqumkuna pallarqan. 6 Wamkin simillaqam kaskajuman ichkirqan. Chay simillaqam sawampilla kachpa, wayralla wiñarqan. Lumkismi kaskaju kachqanrallku, mana atichpa ch'umpamkuyta, chamkirqan. 7 Wamkin simillaqam kachamkunampa umkunman ichkirqan. Chaymi chay similla wiñamptinqa, kachamkunampis pullan wiñachpa maqarqan. Chaymi limpu chingachirqan. 8 Piru wamkin simillaqam ancha allin allpaman ichkirqan. Chay simillaqam chumaqta wiñachpa, allita puqurqan. Chaqa kada simillitam syin granusta puqurqan. Chaychina nichpaqam, Jisusqa ancha jwirtita nirqan: Qamkuna rinriyuqkunaqar allita uyawayllampa kay nichuchqayta! nichpa. 9 Chay kumparasyunda nichqambaqmi yach'amkuqninguna Jisusta tampurqan: Niwayllampar, ¿imam munan niyta chay nichqallkiqa? nichpa. 10 Chaymi Jisusqa nirqan: Dyusmi munan nuqampi kriyiqkuna allita intyindinallkillampa: Kaychinam ancha chumaqta rin kamachimkuq, nichpa. Piru nuqampi mana munaq kriyiqkunataqam achka kumparasyunwanlla yach'achini, maychimka champachpampis, ama rimkananllampa, maychimka uyachpampis, ama intyindinanllampa. 11 Chay kumparasyunqam kaychina munan niyta: Dyuspa chumaq nutisyanqam chay simillachina. 12 Wamkin uyawaqkunam chay similla ñanman ichkiqchina. Ancha angu chunquyuq kachpa, Dyuspa chumaq nutisyanda uyachpaqa, mana kriyinllampachu. Chaymi dyabluqa chamuchpa, uyachqanda das qunqachin, ama kriyichpa wachadu kananllampa. 13 Wamkin uyawaqkunaqam chay achla allpayuq kaskajuchina. Chaymi Dyuspa chumaq nutisyanda uyamptinllampaqa, chunqumbi mana allitaqa yuramkanchu. Chaymi das kriyichpa, achla tyimputalla ancha kuchimkuchpa kawsanllampa. Chaymandaqam achla padisichpaqa, das syintichpa, Dyusmanda amkramkanllampa. 14 Wamkin uyawaqkunaqam chay kachampa umkumbi tarpudu wiñaqkunachina. Pallkunaqam Dyuspa chumaq nutisyanda uyachpa kriyin. Piru chaymandaqam tumkuy imayuq munachpa kayta, kwirpun munachqambilla yuyachpaqa, Dyusta qunqanllampa, chay similla kachamkunampa umkumbi chingaqchina. 15 Piru wamkingunaqam chay allin allpachina. Chaqa ancha allin chunquyuqkuna Dyus nichqanda uyamptinllampam, allita yuramkan. Chaymi Dyustana mana challkuq kuyachpa, kasuchpa, chumaqtana kawsanllampa. 16 Suq michata syindichpaqam, mana pimpis suq almunwanqa pambanchu ni kamamba waranman pamkanchu. Achwanmi altumpi ruran, yallkuqkunata achimkchanambaq. 17 Chaychinallam yumbay pamkadu kaqqam suq diyaqa manana pamkaduchu rin kaq. Achwanmi achka runamkuna chay mana yach'achqangunata rinllampa yach'aq. 18 Allita uyawayllampa, chay allita yach'amkuqtam Dyusqa masta rin yach'achiq. Piru chay mana allita uyamkuqtaqam chay achla yach'amkuchqandaqa limpu rin qunqachiq. 19 Jisuspa masanguna mamambismi ch'ayamurqan chay kachqanman. Piru ancha unda runa kamptinmi, mana atirqanllampachu ch'ayayta Jisuspa ladunmanqa. 20 Chaymi Jisustaqa suq runa abisarqan: Siñursitu, mamallki masallkimkunam kay sawampi. Anchach munanllampa qamwan parlayta, nichpa. 21 Chaymi Jisusqa nirqan: Taytay Dyus nichqanda uyaqkuna kasuqkunam nuqampa mamay, masallkunaqa, nichpa. 22 Suq diyam Jisusqa yach'amkuqningunawan yamkumpi puriq barkuman yallkuchpa, pallkunata nirqan: Amku kay atun quch'ampa waq chimbanman, nichpa. Chaychina nimptinqam, rirqanllampana. 23 Chaymi rillkamptinllampaqa, Jisusqa puñurqanna. Kanan qunqaylla ancha jwirtita wayramptinmi, chay yamkuqa ancha maqchimkamuchpa, undallkarqanna chay barkuman. Chaymi chay barkuqa yaqqana saqarqan. 24 Saqallkamptinnaqam utqaymaya Jisusta rimkch'achichpa nirqanllampa: Ay, Taytitu, Taytitu! ¡Saqallkanchiqnam yamkuman! nichpa. Chaymi Jisusqa atarichpa, chay wayrata, chay maqchimkallkaq yamkumkunata jwirtita rimachpa, kamachichpa, limpu qasillachirqan. 25 Chaymandaqam chay yach'amkuqningunata tampurqan: Imampaqmi qamkunaqa mancharqallkillampa? ¿Ima manachu nuqampi allita yuyamkungillampa? nichpa. Chaymi pallkunaqa ancha ispantachqata, suqnin suqnin parlarqanllampa: Ima layaraq kay runaqa? ¡Rimkay, kamachimptin kay wayrawan yamkuqa das kasuchpa, qasillarqan! nichpa. 26 Chay quch'ampa waq chimbanman richpaqam, Gadarampa manyanman ch'ayarqanllampa. Gadaraqam Galiliyampa chimba chutimbi kidan. 27 Chay yamkumpi puriq barkumanda quch'ampa manyambi ichkimptinllampaqam, suq lumku gadarinu runa Jisusman ch'ayarqan. Chay runampa kwirpumbim achka tyimpuna dyablumkunampa ispiritunguna tiyachqa karqan. Chaymi lumku kachpa, simpralla puriq. Kanan pantyungunampim tiyaq. Wasimbiqam manana tiyarqanchu. 28 Chay runaqam Jisusta champachpa, qayach'amkuchpa, ñawpambi qunqurimkuchpa nirqan: Imampaqmi mitimkungi nuqamanqa, qam ancha pudirniyuq Dyuspa Churinqa? Rrugallkim, yuch'allku, amar qasachawaychu, nichpa. 29 Chaqa Jisusqam chay runamanda qatillkarqan chay dyabluta. Chaymi chaychina chay dyabluqa rrugarqan. Chay dyabluqam achka tyimpuna chay runataqa dwiñumkuchqa karqan. Chaymi runamkunaqa chay runata sujitananllampa yuyachpa, mamkingunamanda, ch'amkingunamanda kadinamkunawan alli alli watachqallampa karqan. Piru chay lumkuqam chay kadinataqa mana kwintachpachu, pitichpa, chuncha lugarkunaman rirqan, dyablu ampamptin. 30 Jisusmi tampurqan: Imam chutingi? nichpa. Payqam nirqan: Manadam chutinillampa, nichpa. Chaychinaqam nirqan, ancha achka dyablumkunampa ispiritunguna chay runampa kwirpunman yallkuchqa kamptin. 31 Chay dyablumkunaqam Jisusta ancha rrugarqanllampa, ama chay manchaypaq talalanman kach'anambaq. 32 Anaq ladun qaqampim ancha achka kuchimkuna mimkullkarqan. Chaymi chay dyablumkunaqa Jisusta rrugarqanllampa, chay kuchimkunaman yallkunambaq. Chaymi Jisusqa nirqan: Mayñ, riyllampa, nichpa. 33 Chaychina nimptinqam, chay dyablumkunaqa runamanda lluqchichpa, chay kuchimkunamanna yallkurqanllampa. Chaymi yumbay chay kuchimkunaqa, lumkuyachpa, qayach'amkuchpa, qaqamanda kallpachpa, quch'aman saqarqan. Chaymi ch'uqachpa yumbayna wañurqanllampa. 34 Kanan chay michiqkunaqam chayta rimkachpaqa, ancha manchachpa, kallpaylla rirqanllampa abisaq ch'amkrangunampi kaqkunata, llaqtambi kaqkunata: Kay kusasmi pasawachqa, nichpa. 35 Chaymi ancha achka runamkuna rirqanllampa, chay pasachqanda rimkaq. Kanan Jisus kachqanman ch'ayachpaqam, chay lumkutaqa kach'amkachqatana tarirqanllampa, Jisuspa ch'amkin kaqpi tiyallkamptin. Chay runaqam jwisyumbina kachpa, mudanandampis allitana ruramkuchqa karqan. Chayta rimkachpaqam, ancha mancharqanllampa. 36 Kanan chay rimkaqkunaqam chay chamuq runamkunata manyaqlla parlachirqanllampa: Rimkachqallampam kani chay lumkuta Jisus kaychina kach'amkachimptin, nichpa. 37 Chaymi chay gadarinumkunaqa achwamba mancharqanllampa. Chayrallkum yumbaynin Jisusta rrugarqanllampa, chay Gadaramanda lluqchinan. Chaymi Jisusqa barkuman yallkuchpa, chay Gadaramandaqa rirqanna. 38 Kanan chay runa kach'amkaqqam Jisusta ancha rrugarqan pullan ampanambaq. Piru Jisusqam kamachichpa kidanambaq, dispidimkachpa nirqan: 39 Wasimkiman kutirichpa, Tayta Dyus tumkuy ima ancha yanampachuchqanda ayllullkimkunata willay, nichpa. Chaymi chay runaqa llaqtanman kutirichpa, yumbayta parlachirqan: Jisusmi kaychina ancha yanampawachqa, nichpa. 40 Jisus kutimumptin chay quch'ampa suq ladu chimbanmanqam, ancha achka runa, warmi chaypi payta chuyallkarqanllampa. Chaymi chamumptinqa, ancha kuchimkuchpa, chumaqta ch'ayachirqanllampa. 41 Chaymambismi suq runa Jayru chutiq ch'ayarqan. Payqam suq sinaguga wasimpa kamachimkuqnin karqan. Chay Jayrum Jisuspa ñawpambi qunqurimkuchpa, kaychina ancha rrugarqan: Taytitu, yuch'allkur amku wasiyman, nichpa. 42 Chaqa payqam suq chinayuqlla karqan. Piru chay chinanqam dusi watayuq kachpach'i, wañullkarqanna. Chaymi Jisusqa Jayruwanna rimptinqa, ancha achka runa, warmi imkinda kich'kichaypa rirqanllampa. 43 Chay runamkunampa umkumbiqam suq qachyaq warmi rillkarqan. Chay warmitaqam yawarqa dusi wata tumkuyta mana dijarqanchu. Chaymi ancha qachyaqlla puriq. Kanan ambimkuqkunata pagarachpam, tumkuy ima kaqninda limpuna uchyachqa karqan. Piru manam ni mayqan ambimkuq atirqanchu kach'amkachiytaqa. 44 Chaymi chay warmiqa imkin laduta qamimkachpa, Jisuspa kampamba manyanda mamkinda ruramptinlla, yawarqa das dijarqan. 45 Chaymi Jisusqa tampurqan: Pitaq kampayta llamkachqa? nichpa. Yumbay imkinda riqkunaqam nirqanllampa: Manam, manam, nichpa. Chaychina nimptinllampaqam, Pidruqa ?wamkin yach'amkuq masingunawan? nirqan: Yach'achimkuq Taytitu, kay tumkuy runam kich'kichachullkangi. Tumkuy ladumandam kumsachungi. Chaypaqqa ¿imarallkutaq tampumkungi: ¡Pitaq kampayta llamkachqa? nichpaqa? 46 Piru Jisusqam nirirqan: Suqnimkim kampayta llamkarqallki. Chaqa pudirniy kach'amkachichqandam syintichqa kani, nichpa. 47 Chaymi warmiqa yuyachpa: Mananam atinichu pamkamkuyta, nichpa, ancha manchaywan ch'ampsimkachpa, Jisuspa ñawpanman richpa, qunqurimkuchpa, yumbaypa ñawpambi Jisusta nirqan: Taytitu, nuqam qachyaq kachpa, kampitallkimpa manyanda llamkachqa kani. Chaymi dimki llamkachpalla kach'amkarqay, nichpa. 48 Chaymi Jisusqa nirqan: Ijita, nuqampi yuyamkuchqallkirallkum kach'amkachqana kangi. Chayri kananqa kuchimkuchpana riy, nichpa. 49 Chaychina Jisus rimallkamptinmi, chay sinaguga wasimpa kamachimkuqnin Jayrumpa wasinmanda suq runa ch'ayamuchpa nirqan: Chinallkiqam wañuchqana. Amana Yach'achimkuqtaqa piñachiychu, nichpa. 50 Chaychina chay runa nimptimbismi, Jisusqa Jayruta nirqan: Ama manchaychu. Allita nuqampi yuyamkuy. Chinallkiqam rin kawsamuq, nichpa. 51 Chaymandaqam wasinman ch'ayachpaqa, Jisusqa yumbayta nirqan: Ama yallkuyllampachu, nichpa. Chaymandaqam Pidruwan, Jamkubuwan, Jwanwan, almampa taytanwan mamanwanlla Jisusqa yallkurqan. 52 Umku wasimpiqam dwilumpi kaqkunaqa almitampaq yumpamkullkarqanllampa. Piru Jisusqam chay yumpamkuqkunata nirqan: Ama waqayllampachu. Chinaqam mana wañuchqachu. Puñullkanllñm, nichpa. 53 Chaymi yumbay pallkuna yach'achpa: Chinaqam allimpta wañuchqana, nichpa, Jisustaqa asimparqanllampa. 54 Piru Jisusqam almitata mamkinmanda piskachpa, jwirtita nirqan: Chinita, atariy! nichpa. 55 Chaychina qayamptinllam, chay chinaqa das kawsamuchpa, atarimurqanna. Chaymi Jisusqa kamachirqan, qaranambaqllampa chay chinata. 56 Kanan chay taytanwan mamanqam ispantachqata ancha kuchimkurqanllampa. Piru Jisusqam pallkunata kamachirqan, chay rurachqambaq ama pitampis parlachinanllampa.
1 Jisusmi tandachpa chay dusi amkrachqan yach'amkuqninda, pudirninda qurqan, runamkunamanda atinanllampa dyablumkunata qatiyta, qachyaqkunata atinanllampa kach'amkachiyta. 2 Kanan pallkunatam kach'arqan, rinanllampa Dyuspaq yach'achiq runamkunata, warmimkunata: Dyusmi munan chumaqta payta kasunanchiqllampa, nichpa. Kach'arqambismi, kach'amkachinanllampa qachyaqkunata. 3 Chaymandaqam nirqan: Chaychinallar riyllampa. Amar ampayllampachu burdunda, alfurjata, fiyambrita, ni qallayta. Mudanallkitaqa suqtalla kadunu ampayllampa. 4 Mayqan wasiman ch'ayachpaqa, chaypilla kidayllampa, chay lugarmanda rinallkimkaman. 5 Mayqan llaqtampi mana munamptinllampa ch'ayachichuytaqa, lluqchichpa, ch'amkimkimkunata ch'ampsiy pulbu ichkinan, yach'ananllampa: Chay ampustulkunaqam manana kwintayuqchu nuqanchiqkunawanqa, nichpa. 6 Chaymi ampustulningunaqa kasiriyumkunaman richpa, tumkuy maypi Dyuspa chumaq nutisyanda yach'achimkuchpa, qachyaqkunata kach'amkachirqanllampa. 7 Gubyirnu Irudismi tumkuy ima Jisus rurachqambaq yach'arqan. Lumkismi runamkuna suqpaq suqpaq rimamptinllampa, Irudisqa ancha yuyachpa tampurqan: ¡Chaychinaqa pitaq chay runaqa? nichpa. Chaqa Jisuspaqqam wamkinqa niq: Alma Jwan Chutichimkuqmi wañuchqanmanda kawsamuchpa, Jisusna chutin, nichpa. 8 Wamkinqam nirqan: Dyuspaq rimaq Aliyasmi rimkamkumuchqa, nichpa. Wamkinqam nirqan: Dyuspaq unay rimaqkunamandam suqnin kawsamuchqa, nichpa. 9 Chaymi chay Irudisqa ancha yuyachpa nirqan: Piru Jwan Chutichimkuqpa umandaqam nuqa kimkiy pitichirqay. ¿Chaychinaqa pimpa famandaraqri ancha parlanllampa: Kallkunatam rurachqa, nichpaqa? Chaymi Irudisqa Jisusta ancha munarqan riqsiyta. 10 Chaymandaqam chay dusi ampustulninguna kutimuchpaqa, yumbay rurachqanllampata Jisusta parlachirqanllampa. Chaymi Jisusqa suqkunamanda amkramkachpa, pallkunata ampachpa, rirqan Bitsayda llaqtampa sawa chuncha lugarmanna. 11 Piru runamkunaqam yach'achpa: Jisusqach waq llaqta Bitsaydampa sawa chunchambi, nichpaqa, imkinda rirqanllampa. Chaymi chay runamkuna ch'ayamptin, Jisusqa pallkunata chumaqta ch'ayachichpa, yach'achirqan imachinam Tayta Dyus chumaqta rin kamachiq yumbay payta kasuqkunata. Kanan qachyaqkunatampismi chaypiqa kach'amkachirqan. 12 Chaymandaqam tardiyamptinqa, chay dusi ampustulkunaqa Jisusta nirqanllampa: Dispidiyna kay achka runata, warmita, kay sirka lugarkunaman rinanllampa, pusadanda, mimkunanda maskaq. Chaqa kay chunchampiqam mana pimpis tiyanchu, nichpa. 13 Chaymi Jisusqa pallkunata nirqan: Qamkuna qarayllampa, nichpa. Chaymi pallkunaqa nirqan: Imatanamir qarachaqllampaqa? Sinku tandita, ichkay piskaditullam kan. Yumbay kay uyachuqkunata qaranayllampaqam munan rinayllampa karuman, ancha achka mimkunata randimuq, nichpa. 14 Chaqa ullqumkunallach'i karqan 5.000qa. Piru Jisusqam yach'amkuqningunata kamachirqan: Yumbayta tiyachiyllampa 50, 50 waqpi kaypi, nichpa. 15 Chay nichqanchinam yumbayta tiyachirqanllampa pachan pachan. 16 Chaymi Jisusqa chay sinku tanditata chay ichkay piskadituta piskachpa, syiluman champamkuchpa, Dyusta pagimkurqan. Chaymandaqam pitichpa, yach'amkuqningunata qurqan, pallkunana aypachinambaq yumbay runamkunata, warmimkunata, wambramkunata. 17 Chaychinam yumbay mimkurqanllampa undanangaman. Undamptinllampaqam chay tandawan pijisituqa dusi kanastas unda subrarqan. 18 Suq diyam Jisus suq chuncha lugarpi Dyusman mañamkullkarqan. Chaypi yach'amkuqninguna paypa pullan kallkamptinmi, Jisusqa kaychina tampurqan: Mayñ, runamkunaqa ¿imatam nin nuqampaqqa? ¿Pich kani pallkunampaqqa? nichpa. 19 Chaymi pallkunaqa nirqan: Wamkinmi nin, Jwan Chutichimkuqchi kangi. Wamkinqam nin, Dyuspaq unay rimaq Aliyaschi kangi. Wamkingunaqam nin, Dyuspaq unay rimaqkunamanda suqnin kawsamuqchi kangi, nichpa. 20 Chaychina nimptinllampaqam, pallkunata tampurqan: Mayñ, qamkunaqa ¿imatataq ningi? ¿Pitaq kani qamkunampaqqa? nichpa. Chaymi Pidruqa nirqan: Qamqam Dyus Amkrachqan Wachadurniyllampa kangi! nichpa. 21 Piru Jisusqam chay yach'amkuqningunata ancha kunarqan, chay nichqanllampata ama pitampis ninambaqllampa. 22 Kaychinampismi nirqan: Dyus nichqanda kumplinaypaqmi nuqa Dyusmanda Chamuq Runaqa ancha rini ñamkaq. Chaqa chay kamachimkuq ansyanumkuna, chay kamachimkuq isrraylinu kuramkuna, Muysispa liyningunata chay yach'achimkuqkunam mana baliqpaq riqsiwachpa, rinllampa wanchiwaq. Piru chaychina wanchiwamptimbismi, kimsa diyamanda rini kawsamuq, nichpa. 23 Chaychina nichpaqam, yumbayta nirqan: Mayqan runa nuqampa yach'amkuqniy munachpa kaytaqa, tumkuy ima pay munachqanda dijanqa. Chaymandaqa tumkuy diya nuqatalla kasuwachpa kawsanqa, awnki suq kruspi munamptinllampa wanchiytampis. 24 Chaqa mayqannimki nuqata ñigawachpa, bidallkita wachanallkiqam, ringi chingaq tumkuy tyimpumpaq. Piru nuqampi kriyichqallkirallku mayqan wanchichumptinqam, nuqa rini wachachuq, tumkuy tyimpu nuqawan kawsanallki. 25 Mayñ, suq runa ichu suq warmi tumkuy kay munduta ganachpa, piru jwisyu diyampi chingachpaqa, ¿imatam ganachqa? Manam nimatampis ganachqachu. 26 Chaymi mayqan runa nuqampaq ichu yach'achimkuchqaypaq panqamkuchpaqa, kayta yach'anqa: Dyusmanda Chamuq Runa Jisumkristum syilumanda rin kutimuq suq ancha kamachimkuq gubyirnuchina, Tayta Dyuspa llimpyayninwan llimpyachpa, paypa santu anjilningunawan. Chay diyaqam paypis nuqampaqqa rin panqamkuq, nichpa. 27 Piru allimptam nillkillampa, wamkin kaypi kaqkunaqam mana rinllampachu wañuq, Dyus kamachimkuqta rimkanangaman, nichpa. 28 Uchu diyas pasamptinch'i, Jisusqa Pidruta, Jamkubuta, Jwanda ampachpa, rirqan suq atun lumampa sawanman, Dyusman mañamkuq. 29 Chaypi Jisus Tayta Dyusman mañamkullkamptinmi, qaqllanqa limpu suq layayarqan. Mudanambismi ancha yuraqpaq timkramkachpa, ancha llimpyarqan. 30 Chaymandaqam ichkay runa chaypi rimkamkuchpa, paywan parlarqanllampa. Suqmi Muysis, suqqam Aliyas karqan. 31 Yumbay rridurninllampampi ancha llimpyarqan. Kanan pallkunaqam Jisuswan parlaqllampa: Jirusalimbi wañumptimkim, Dyus nichqanchina rin kumpliq, nichpa. 32 Kanan Pidruqam ichkay kumpañirunwan ancha puñunallkarqan. Piru puñuymanda agwantachpa, champamkullkachpam, rimkarqanllampa Jisusta chay ichkay runawan rumpaychina achimkchamkuqta. 33 Chaymanda Muysis, Aliyas Jisusmanda achullkamptinqam, Pidruqa Jisusta nirqan: Yach'achimkuq Taytitu, ancha chumaqraq kaypi kachqanchiqqa! Rurachaqllampa kimsa chugllamkunata, suqta qambaq, suqta Muysispaq, suqta Aliyaspaq, nichpa. Piru Pidruqam ancha ispantachpa, mana yach'arqanchu: Imatam rimallkani, nichpaqa. 34 Chaychina Pidru rimallkamptinllam, pumkutay chamuchpa, pallkunataqa limpu pambarqan. Chaymi ancha mancharqanllampa. 35 Kanan chay urasmi anaq pumkutaymanda Taytanchiq Dyusqa Jisumkristumpaq nirqan: Kaymi kuyachqay Churiyqa. Payta uyayllampa, nichpa. 36 Chaymandaqam pallkuna champamkuchpaqa, sampalandallana Jisustaqa rimkarqanllampa. Kanan pallkunaqam chay diyamkunaqa mana ni pitampis chay rimkachqambaqqa parlachirqanchu. 37 Qayandin chay lumamanda chamumptinllampam, achka runamkuna rirqanllampa Jisusta tinguq. 38 Kanan chay runamkunampa ch'awpinmanda suqninqam ancha jwirtita Jisusta nirqan: Yach'achimkuq Taytitu, yuch'allkur kay sampalan churiyta yanampay! 39 Chaqa dyablum atamkimkunata quchpa, qayach'achin. Kanan ancha qasachachpam, babach'kunata sitamkuchichpa, mana munanchu dijayta. 40 Chaymi yach'amkuqnimkimkunata rrugarqani, kay wambraymanda dyabluta qatinanllampa. Piru manam atirqanllampachu qatiytaqa, nichpa. 41 Chaymi Jisusqa nirqan: Ayayay, qamkuna mana yuyamkuqkuna, mana allita ruraqkunaqa! ¿Ima tyimpumkamanraq qamkunataqa agwantachqallki? Chaymandaqam chay chulumpa taytanda nirqan: Mayñ, chay wambrallkita kayman ampamuy, nichpa. 42 Chaymi chay chuluqa Jisusman qamimkamptin, chay dyabluqa ancha fiyu atamkimkunata quchpa, ch'ampsi ch'ampsi pambaman bularqan. Piru Jisusqam chay dyabluta anyachpa, qatirqan chay chulumanda. Chaymandaqam chay chulutaqa intrigarqanna taytanda. 43 Chay runamkunaqam ancha ispantachqata champachpa, yuyarqanllampa: Ancha pudirniyuqmi Tayta Dyusqa, nichpa. Chay rurachqambaq yumbay ispantamptinmi, Jisusqa yach'amkuqningunata nirqan: 44 Kay nichuchqayta allita uyawachpa, ama qunqayllampachu. Nuqa Dyusmanda Chamuq Runatam rinllampa intrigamkuwaq ch'iqniwaq runamkunampa mamkinman, nichpa. 45 Piru yach'amkuqningunaqam chay nichqandaqa mana atirqanllampachu intyindiyta, yuyayninllampa pambaduchina kamptin. Kanan intyindinanllampa munachpa tampuytampismi, manchachpa, mana tampurqanllampachu. 46 Chaymandaqam chay yach'amkuqningunaqa pallkunampura suqnin suqnin anyanamkurqan: Nuqam mas kamachimkuqqa kani, nichpa. Suqqam niriq: Manam qamchu; nuqam mas kamachimkuqqa kani, nichpa. 47 Chaychina anyanamkumptinmi, Jisusqa pallkuna yuyachqanda yach'arqan. Chaymi suq wambrituta ampamuchpa ladunman, 48 pallkunata nirqan: Mayqan runa kasuwachpa, kay wambrituta ch'ayachiqqam alabis nuqata ch'ayachiwallkanmanchina. Chay ch'ayachiwaqqam kach'amuwaqtampis ch'ayachillkan. Chaqa mayqannimki kay tamkchitachina umildi kaqmi mas kamachimkuqqa ringi kaq, nichpa. 49 Chaymandaqam yach'amkuqnin Jwanqa Jisusta nirqan: Yach'achimkuq Taytitu, rimkachqallampam kani suq runata qamba chutimkita myintachpa, dyablumkunata runamkunamanda qatillkaqta. Piru chay runaqam mana nuqanchiqwanqa purichqachu. Chaymi nirqayllampa, ama chaychina ruranambaq, nichpa. 50 Chaymi Jisusqa payta nirqan: Ama chaychinaqa niyllampachu. Chay mana kuntranchiqmi nuqanchiqpa faburninchiqqa, nichpa. 51 Syiluman kutinambaq tyimpu ch'ayallkamptinqam, Jisusqa suq balurta piskarqan, Jirusalinman rinambaq. 52 Kanan ñanda rillkachpam, wamkin yach'amkuqninda ñawpanda kach'arqan, pusadata maskanambaq. Chaymi pallkuna ñawpachpaqa, prubinsya Samaryampa suq kasiriyunman ch'ayarqanllampa. 53 Piru chay Samaryamanda kaqkunaqam yach'arqanllampa: Jisusmi Jirusalinman rillkan, nichpa. Chaymi mana munarqanllampachu pusadata quytaqa. [Nuta: Chay prubinsya Samaryamanda kaqkunam munarqanllampa yumbay runamkuna Samaryampilla Dyusta adurananllampa; ama Jirusalimbiqa.] 54 Chayta rimkachpaqam, chay ampustulnin Jamkubuwan Jwanqa nirqanllampa: Kamachimkuq Taytitu, ¿munangichu ?Dyuspaq rimaq Aliyaschina? kamachimkunayllampa, syilumanda ninamkuna ichkichpa uchyanambaq chay kasiriyumpi tiyaqkunata? nichpa. 55 Chaymi Jisusqa timkramkachpa, pallkunata anyarqan: ?Qamkunaqam mana yach'angichu ima laya malu ispiritum chay layataqa yuyachichungi, nichpa. 56 Chaqa nuqaqam mana chamuchqachu kani, runamkunata wanchinaypaq. Achwanmi chamuchqaqa kani, pallkunata wachanaypaq, nichpa.? Chaymandaqam suq kasiriyumanna rirqanllampa. 57 Rillkamptinllampaqam ñambi suq runa Jisusta nirqan: Taytitu, munanim riyta may richqallkita, nichpa. 58 Chaymi Jisusqa nirqan: Surrumkunaqam mach'ayniyuq. Pichqumkunampismi kamachayuqkuna. Piru nuqa Dyusmanda Chamuq Runa kachpampismi, mana atinichu maypi umayta isqandachpa samachiyta, nichpa. 59 Chaymandaqam Jisusqa suq runata nirqan: Chamuy, amku nuqawan, nichpa. Piru chay runaqam nirqan: Taytitu, dijawayraqri rinaypaq taytayta pambaq, nichpa. 60 Chaychina nimptinqam, Jisusqa nirqan: (Nuqampi mana kriyiqkunaqam wañuchqamkunachina.) Chay mana kriyiqkunata dijay, chay mana kriyiq wañuchqamkunata pambananllampa. Piru qamqa chamuy nuqawan, runamkunata yach'achinanchiq: Dyusmi yumbay runata, warmita chumaqta rin kamachiq, nichpa. 61 Chaymandaqam suq runampis Jisusta nirqan: Taytitu, nuqampismi munani riyta qamwan. Piru dijawayri puntata ayllullkunamanda dispidimkanaypaq, nichpa. 62 Piru Jisusqam chay runataqa nirqan: Suq runa yampumkuq aradunda piskachpaqam, mana imkimanqa champamkunchu. Chaychinallam nuqata munaq kasuwaqqa imkiman kutichpaqa, mana balinmanchu, Dyusta sirbinanqa, nichpa.
1 Jisusqam munarqan riyta achka lugarkunaman. Chaymi yach'amkuqningunamanda 70ta amkrachpa, puntata kach'arqan, ichkay ichkayta, chay yumbay llaqtamkunaman, kasiriyumkunaman rinanllampa. [Nuta: Wamkin unay biblyamkunampim nin: 72 yach'amkuqningunatam kach'arqan, nichpa.] 2 Chaymi pallkunata nirqan: Allimptam nillkillampa, kusichaqam ancha achka kan. Piru kusichamkuqkunaqam achlitalla. Chayrallku qamkunaqa kusichampa dwiñunman mañamkuyllampa, mas trabajadurkunata kach'anambaq, kusichata tandananllampa. 3 Chaymi qamkunata uñamkunatachina kach'allkillampa, rinallkillampa ancha atun surru layamkunampa umkunda. 4 (Piru Dyusmi rin kwidachuqllampa.) Chayri ama ampayllampachu alfurjallkita ni qallaynimkita ni llanqamkita. panda riqchinampis ama arkamkayllampachu mayqanda parlachichpaqa. 5 Kanan ch'ayachpa suq wasimanqa, puntata nampallkuchpa kaychina niyllampa: Tayta Dyusri kay wasimpi tiyaqkunata yanampachunqa, chumaqta kawsanallkillampa, nichpa. 6 Chaychina nimptimkillampam, Dyusqa rin yanampaq chay chumaq uyachuqkunata. Piru mana munamptinllampa uyachuytaqam, Dyusqa mana rinchu yanampaq pallkunataqa. 7 Mayqan wasiman ch'ayachichumptinqa, chaypilla kidachpa, pallkuna ima quchuchqanda mimkuyllampa, umpyayllampa. Amar wasin wasinqa puriyllampachu. Chaqa trabajaqqam dirichuyuq mantinsyunninda ch'askinambaq. 8 Chayri suq llaqtaman ch'ayachpa, chay may ch'ayachichuchqambi ima quchuchqanda mimkuyllampa. 9 Chay llaqtampi qachyaqkunata kach'amkachichpa, niyllampa: Dyusqam ch'ayamullkanna qamkunaman, chumaqta kamachimkunambaq, nichpa. 10 Piru chay mayqan llaqtampi mana pimpis ch'ayachichumptinqa, sawa kallingunaman lluqchichpa, pallkunata niyllampa: 11 Kay llaqtallkimpa allpan ch'amkiyllampampi pigamkachqandam ch'ampsinillampa, amana nima kwintayuqchu kanayllampa qamkunawanqa, nichpa. Chaqa yach'ayllampa, Dyusmi munachqa qamkunaman ch'ayayta, payta kasuchpa, chumaqta kawsanallkillampa. (Piru qamkunaqam mana munarqallkillampachu) nichpa. 12 Chaymandaqam Jisusqa nirqan: Allita uyawayllampa, chay mana ch'ayachichuqkunaqam jwisyu diyampiqa mas kastigadu rinllampa kaq chay rumpachqa Sudumampi tiyaqkunamandaqa. 13 ¡Ay, imanangillamparaqri qamkuna Kurasin llaqtampi tiyaqkuna, qamkuna Bitsayda llaqtampi tiyaqkunaqa! Chaqa ñawpallkillampampi achka milagrumkunata ruramptiypismi, mana munangillampachu nuqampi kriyiytaqa. Qamkunaqam uchallkimkunata mana munangillampachu dijayta. Piru qamkunampi rurachqay milagrumkunata waq Tiru llaqtampi, waq Sidun llaqtampi ruramptiyqach'i, pallkunaqa unayna uchangunata dijanandallampa. Chaqa pallkuna mana allimkunata rurachqanrallku syintichpach'i, waqachpa, lutu mudanamkunata ruramkuchpa, uch'pata sawanman basyanandallampa. 14 Kaytampis yach'ayllampa, qamkuna Kurasin llaqtampi tiyaqkuna, Bitsayda llaqtampi tiyaqkunaqam, jwisyu diyampiqa mas kastigadu ringillampa kaq chay Tirumpi, Sidumbi tiyaqkunamandaqa. 15 Mayñ, ¿qamkuna Kampirnawun llaqtampi tiyaqkunaqachu yuyangillampa: Anaq syilumanmi rini riq, nichpa? ¡Manñm! Achwanmi Tayta Dyus rin wichumkuchuqllampa wañuchqamkunampa lugarninman. 16 Chaymandaqam Jisusqa yach'amkuqningunata nirqan: Qamkunata uyachuqkunaqam nuqatampis uyawallkanllampa. Ch'iqnichuqkunaqam nuqatampis ch'iqniwallkanllampa. Chay mayqan ch'iqniwaqqam Taytay Dyustampis ch'iqnillkan. Chaqa paymi kach'amuwachqa, nichpa. 17 Jisuspa chay 70 kach'adungunam ancha kuchimkuchpa kutimurqanllampa. Chaymandaqam Jisusta nirqanllampa: Taytitu, qamba chutimkita myintachpa dyablumkunata qatimptiyllampam, kasuwachpa runamkunamanda lluqchirqanllampa, nichpa. 18 Chaychina nimptinllampam, Jisusqa pallkunata nirqan: Ari, rimkachqam kani chay dyabluta anaq syilumanda rrilampaguchina ichkimuqta. 19 Chaymi nuqaqa kamachimkuqkunata rurachuchqallampa kani, kulibramkunampa, atallkimkunampa (alamkran kurumkunampa) sawambi sarrumkunallkillampa, dyablutampis binsinallkillampa, ama nimampi dañachichunanllampa. 20 Piru ama kuchimkuyllampachu dyablumkunata qatimptimkillampa. Achwan kuchimkuyllampaqa chutimkillampata anaq syilumpi iskibrichqambaq. 21 Chaychina Jisus nillkamptinqam, Dyuspa Santu Ispiritun paytaqa ancha kuchichirqan. Chaymi Tayta Dyusta nirqan: Taytitu, anaq syilumpa, kay pachampa kamachimkuqnin kachpam, waq yach'ayniyuq runamkunamanda, waq intyindiqkunamanda pamkachqallkita chumaqta yach'achichqa kangi umildimkunata. Chaymi ancha alaballki, Taytitu. Chaqa chaychina kanambaqmi qam munachqa kangi. 22 Taytay Dyusmi yanampawachqa, tumkuy imampaq yach'anaypaq. Piru manam pimpis yach'anchu Dyuspa Churin kachqaytaqa. Taytay Dyusllam yach'an paypa Churin kachqaytaqa. Chaychinallam mana pimpis yach'anchu: Pim Tayta Dyusqa, nichpaqa. Nuqa kimkiy Churinllam paytaqa riqsini. Kanan yach'achichqay runamkunallam Taytay Dyustaqa rinllampa riqsiq chunqumbi. 23 Chaychina nichpaqam, Jisusqa yach'amkuqningunaman timkramkachpa, pallkunatalla nirqan: Kuchimkunqallampa qamkunachina rimkawaqkunaqa. 24 Ancha klarutam nillkillampa, Dyuspaq achka rimaqkuna, achka gubyirnumkunam ancha munarqanllampa rimkawayta, uyawayta, qamkuna kanan kay rimkawachqallkichina, uyawachqallkichina. Lumkismi (wañuchqana kachpa) mana atirqanllampachu rimkawayta ni uyawayta, nichpa. 25 Muysispa liyningunata suq yach'achimkuqmi Jisusta mallimpananrallku atarichpa, kaychina tampurqan: Yach'achimkuq Taytitu, ¿imatam atini rurayta, Dyuswan tumkuy tyimpu kawsanaypaqqa? nichpa. 26 Chaymi Jisusqa nirqan: Muysispa liyningunaqa ¿imatam nin? Liyichpaqa, ¿imatam intyindingi? nichpa. 27 Chaymi chay yach'achimkuqqa nirqan: Chay lillkunaqam nin: Tayta Dyusta kuyayllampa tumkuy chunqullkiwan, tumkuy bidallkiwan, tumkuy jwirsallkiwan, tumkuy yuyaynimkiwan. Runa masimkitampis kuyay, kwirpullkita kuyachqallkichina, nichpa. 28 Chaymi Jisusqa nirqan: Allitam nichqa kangi. Chay rimachqallkita rurachpaqam, Dyuswanna tumkuy tyimpu ringi kawsaq, nichpa. 29 Piru chay yach'achimkuqqam ama atimpadu kanambaq, yanqana tampurqan: Piru pitaq runa masiyqa? nichpa. 30 Chaymi Jisusqa nirqan: Suq isrraylinu runam Jirusalinmanda ura Jirimku llaqtaman rillkarqan. Chaychina rillkamptinmi, ladrunguna ñambi tinguchpa, ancha maqachpa, yaqqa wanchichpa, tumkuy imanda limpu quch'irqanllampa. Kanan mudanandampismi lluchtichichpa, amparqanllampa. Kanan chay runataqam wañuchqatachina ñambi dijachpana, rirqanllampa. 31 Chaymandaqam suq isrraylinu kura chay ñanda pasallkarqan. Payqam chay runata rimkachpaqa, ladiyachpa, karu kaqta pasarqan. 32 Chaymandaqam isrraylinu kuramkunampa suq yanampamkuqnin libita runa chay chuqridu runa kachqanman saqamurqan. Chay libita runampismi rimkachpaqa, ladiyachpa, karu kaqtalla pasarqan. 33 Piru suq runa Samaryamanda kaqmi chay ñanda riqchina chay runata rimkachpaqa, ancha llamkimparqan. 34 Chaymi paypa ladunman qamimkachpa, asiytiwan, binuwan ambichpa, trampitumkunawan chuqringunata pambarqan. Chaymandaqam burrumbina amparqan suq pusadaman. Chaypiqam chay diyaqa payna kwidarqan. 35 Qayandinqam rinambaqna kachpaqa, chay pusada dwiñuta ichkay dinaryu qallayta quchpa nirqan: Yuch'allku kay runitata kwiday. Payta yanampachpa masta gastamptimkiqam, kutimuchpa pagarachqallki, nichpa. 36 Chaychina nichpaqam, Jisusqa tampurqan: Mayñ, niway, chay chuqridu runampaq, chay kimsa runamandaqa ¿mayqanninmi mas allin runa masinqa kachqa, (chay furastiru samaryanu ichu chay isrraylinu kura ichu kuramkunampa chay yanampamkuqnin libita)? nichpa. 37 Muysispa liyningunata chay yach'achimkuqqam nirqan: Chay llamkimpaqmi mas allin runa masinqa karqan, nichpa. Chaymi Jisusqa kamachirqan: Qambis richpa, chaychinalla yanampamkuy, nichpa. 38 Jisusmi chay kallkachqanmanda richpaqa, suq kasiriyuman ch'ayarqan. Chaypim suq warmi Marta chutiq tiyarqan. Paymi Jisusta wasinman ch'ayachirqan. 39 Martampaqam suq masan (panin) Marya chutiq. Chay Maryaqam Jisuspa ñawpambi tiyarqan, payta uyanambaq. 40 Piru Martaqam tumkuy ima ruranayuq karqan. Chaymi payqa qamimkachpa, Jisusta nirqan: Taytitu, ¿manachu llamkimpawangi? Maryam dijawachqa yumbay trabajumkunawan, sampalaylla ruranaypaq. Kamachiyri yuch'allku, yanampawanambaq, nichpa. 41 Piru Jisusqam nirqan: Marta, Marta, qamqam chay ruranallkimpaqlla ancha llamkiwan kangi ruranallkimpaq. 42 Suq ruranallam tumkuy imamanda mas allinqa. Chay ruranataqam Maryaqa ancha allita amkrachqa. Chaymi mana ni pimpis atinqachu laduymanda achuchiytaqa, nichpa.
1 Suq diyam suq lugarpi Jisusqa Tayta Dyusman mañamkurqan. Chaymandaqam suq yach'amkuqninqa nirqan: Jwan Chutichimkuqmi yach'amkuqningunata yach'achirqan, Dyusman mañamkunanllampa. Chayri qambis yach'achiwayllampa, Dyusman mañamkunayllampa, nichpa. 2 Chaymi Jisusqa nirqan: Kaychina Dyusman mañamkuyllampa: Taytanchiq Dyusitu ?syilumpi kaq?, qamllam ancha santu, mana nima uchayuqchu kangi. Chaymi ancha balin, yumbay runa warmi qamtalla adurachunanllampa. Chamuyri, qamna yumbayta chumaqta kamachinallki. Qam munachqallkitar yumbay runa, warmi kay pachampi ruranqallampa, anaq syilumpi ruraqkunachina. 3 Taytitu, tumkuy diyampaqri mimkunitayta quwayllampa. 4 Mana allita rurachqaytampisri pirdunawayllampa, nuqallkuna waq mana alli rurawaqkunata pirdunachqaychina. Dyablu munamptin tyintawaytampisri, ama dijaychu uchata rurachiwananqa. Achwanri tumkuy chay mana allimkunamanda wachawayllampa, nichpa. 5 Jisusqam pallkunataqa nirqambis: Mayñ, mayqannimki suq kumpañiruyuq kachpa, ch'awpi tutata ringiman pungunmanda qayaq: Kuyachqay kumpañiritu, pristawayri kimsa tanditata. 6 Suq bisitaymi karumanda kanalitan wasiyman ch'ayamuchqa. Chaymi mana nimay kanchu qaranaypaq, nichpa. 7 Chaychina nimptimkiqam, chay kumpañirullki umkumanda nichungiman: ¡Ama piñachiwaychu! Punguyqam alli kirpachqana. Puñullkaninam. Wambrallkunampismi pullay puñullkanna. Manam nimatampis atinichu quchuyta, nichpa. 8 Chaymi nillkillampa, awnki kumpañirullki mana munamptin nimata quchuyta, piru mana challkuq mañamptimkiqam, atarichpa yumbay munachqallkita quchungiman, ama masta piñachinallki. 9 Chaymi nillkillampa, Dyusman (mana challkuq) mañamkuy. Chaychina mañamkumptimkiqam, Dyusqa rin quchuqllampa. Allita imatampis maskachpaqam, ringillampa tariq. Dyuspa pungumbichina qayamkumptimkiqam, rin kich'aq yallkunallkillampa. 10 Chaqa chaychina (mana challkuq) mañamkuchpaqam, ringillampa ch'askiq. Maskachpaqam, ringillampa tariq. Chaychinallam pungumpi qayamkumptimkiqa, rin kich'amkaq yallkunallkillampa. 11 ¿Mayñ, wambrallkiqa suq tanditata mañachumptinqachu, qungimanllampa suq rumita? ¿Ichu suq piskaduta mañachumptinqachu, qungimanllampa suq kulibrata? 12 ¿Ichu, Wallpamp wawanda quway, nichumptinqa, suq atallki kuruta (alamkran kuruta) qungimanllampa? Manñm. 13 Chaychinar intyindiyllampa, qamkunaqam malu kachpampis, allin kusasta wambrallkitaqa qungillampa, ¿manachu? Piru Taytanchiq Dyus syilumpi kaqqam qamkunamandaqa mas allin. Chaymi payqa Santu Ispiritunda rin quq mayqan mañaqtaqa. 14 Suq runatam dyablu muduyachichqa karqan. Chaymi Jisusqa chay mudumanda dyabluta qatirqan. Chay dyablu lluqchimptinqam, chay runaqa atirqanna rimayta. Chaymi chayta rimkachpa, runamkunaqa ancha ispantarqanllampa. [Nuta: Manam yumbay mudumkunaqa dyabluwanchu. Wamkingunallam dyabluwanqa.] 15 Piru wamkinqam niqllampa: Chay mas kamachimkuq dyablu Bilsibum Jisustaqa yanampan. Chaymi atin dyablumkunata qatiyta, nichpa. 16 Wamkinqam Jisusta munachpa mallimpayta, kaychina nirqanllampa: Mayñ, suq milagruta ruray syilumpi, rimkachpa yach'anayllampa: Dyuspaqmi rimangi, nichpa. 17 Piru Jisusqam yach'arqan chay runamkuna yuyachqandaqa. Chaymi yumbayta nirqan: Mayñ, suq nasyumbi pallkunampura pilyachpaqa, ¿imanaytaq atinmanllampa kawsaytaqa? Chaqa wanchinamkuchpach', limpuna uchyamkanmanllampa. Chaychinallam suq ayllu, pallkunampura pilyachpaqach'i, limpuna uchyamkanmanllampa. 18 Chaychinallam dyablumpis pay kimkin ch'iqnimkachpa maqamkachpa wanchimkachpaqa, uchyamkanmanna, ¿manachu? Piru qamkunaqam nuqampaq ningillampa: Dyablu Bilsibu yanampamptinmi, atichqa dyabluta runamkunamanda qatiytaqa, nichpa. 19 Chaychina nuqampaq nimptimkillampaqa, ¿pim yanampan qamkunampa yach'amkuqnimkimkunata, dyablumkunata runamkunamanda qatinanllampaqa? ¿Dyabluchu yanampan pallkunata qatinanllampaqa? Chay yach'amkuqnimki kaqkunampaq yuyachpa, intyindiyllampa: Ancham pandachqallampa kanchiq, nichpa. 20 Piru nuqaqam dyablumkunataqa runamkunamandaqa qatini, Taytay Dyus kimkin yanampawamptin. Chayri rurachqayta rimkachpa, yach'ayllampa: Dyuspa pudirninqam chamuchqana nuqanchiqkunaman, nichpa. 21 Suq runa ancha jwirsayuq, armayuq wasinda kwidamptinqam, tumkuy iman kaqkuna chay wasimbi allita tiyan. Chaqa manam pimpis chutanchu. 22 Piru suq mas wampu runa chamuchpam, chay jwirsayuq runata maqachpa binsichpana, paypa armangunata, kusasningunata limpu atin quch'iyta. Chaychina wichumkuchpa chay jwirsayuq dwiñutaqam, chay binsimkuqna kamachimkun chay quch'ichqambiqa. (Chay runachinam nuqampis dyabluta binsichpa, runamkunata, warmimkunata quch'ini wachanaypaq.) 23 Mana nuqampa faburniy kaqqam kuntrawachpa purin. Chaqa mayqan wachanaypaq kaqmanqam mana tandamkanchu. Achwanmi chimkwan, ama pullay kanambaq. 24 Suq dyablum suq runamanda lluqchichpa, rin puriq chuncha lugarkunaman, maskachpa maypi tiyanambaq. Piru chay dyablu mana atichpa maypi tiyaytaqam, chay runa lluqchichqanmanda kaqta yuyachpa, nin: ¡A, paymanlla kutirichaq! nichpa. 25 Chaychina yuyachpa kutirichpaqam, chay runataqa tarin suq pichadu allichadu wasitachina. 26 Chaymi dyablu masingunaman richpa, syiti mas fiyu dyablumkunata ampamun chay runamanqa. Chaychinam suq trumpa dyablumkunampa ispiritungunana runamanqa yallkunllampa, wasimpichina tiyananllampa. Chaymi chay runaqa unay achla malu kachqanmandaqa mas maluna timkramkan. 27 Jisus challkunata rimallkamptinqam, chay ancha achka runamkunampa umkunmanda suq warmi ancha jwirtita rimachpa nirqan: Ancha kuchimkunqa chay warmi qachyachuq, ñuñuchichuchpa uywachuqqa! nichpa. 28 Chaychina paypaq nimptinmi, Jisusqa nirqan: Achwan masta kuchimkunqa Dyus nichqanda uyachpa kasuqkunaqa, nichpa. 29 Ancha achka runamkunam Jisusman tandamkarqanllampa. Chaymi payqa kaychina yach'achimkurqan: Kay tyimpumanda runamkunaqam ancha uchayuqkuna. Suq milagrutaraqmi munanllampa rimkayta. Piru manam pallkuna munachqanqa kanqachu. Achwanmi Dyusqa suq milagrutalla rin ruraq, pallkuna rimkanambaq. Manchu unay tyimpumkunampi Dyusqa rurarqan suq milagruta paypaq rimaq Junaswan. Chay laya milagrutallam Dyusqa rin ruraq nuqawambis. 30 Chaqa Ninibi llaqtampi tiyaqkuna kriyinambaqmi, chay Junaswan Dyus suq milagruta rurarqan. Chaychinallam nuqa Dyusmanda Chamuq Runawambis rin ruraq, kay tyimpumanda runamkuna nuqampi kriyinanllampa. 31 Kanan jwisyu diyampim Dyusqa rin jusgaq kay tyimpumanda kaqkunata. Chay diyampim Saba nasyumba warmi gubyirnan kawsamuchpa, chayachpa, Dyuspa ñawpambi rin chimbiq kay mana kasuwaqkunata. Chaqa chay warmi gubyirnaqam ancha karu nasyunmandampacha chamurqan, yach'ayniyuq gubyirnu Salumun nichqanda uyaq. Piru Salumunmanda kaypi mas yach'ayniyuq kamptiypismi, mana munangillampachu uyawaytaqa. 32 Chay Ninibimpi tiyaqkunampismi Junas yach'achimptin, mana alli rurachqangunata dijachpa, Dyustana kasurqanllampa. Piru chay Junasmanda kaypi mas kamachimkuq kamptiypismi, mana munangillampachu kasuwaytaqa. Chaymi jwisyu diyampiqa chay ninibinumkunampis Dyuspa ñawpambi rin jusgachuqllampa. 33 Suq michata syindichpaqam, mana pimpis suq pamkaqman ichu suq kajumba waranman ruranchu, ¿manachu? Achwanmi michataqa altumpi ruran, yallkuqkunata achimkchanambaq. 34 pawinchiqpismi suq michachina kwirpunchiqpaqqa. Chaymi allita champamkumptinchiqqa, tumkuy kwirpunchiqpis achimkpichina purin. Piru mana balimptin ñawinchiqkunaqam, tumkuy kwirpunchiqpis tutayaqpichina purin. 35 Chaymi kunallkillampa, chay michallkillampamkich tutayaqpaq timkramkanman. 36 Piru Dyusta kasumptimkiqam, yumbay kwirpullki michayuqchina rin kaq. Manam nima tutayaqpichinachu ringi puriq. (Chaqa allita rurachpaqam, suq atun micha achimkchamkuqchina ringillampa kaq.) 37 Jisus yach'achimkumptinqam, suq farisiyu dumktrinayuq runa payta kumbidarqan, wasinman richpa, paywan mimkunambaq. Chaymi umkuman yallkuchpa, Jisusqa masaman tiyarqan. 38 Chaypim Jisusqa mamkinda mana mayllachpachu, tiyarqan mimkunambaq. Chaymi isrraylinumkunampa mayllamkunan kustumbrinda mana ruramptin, chay farisiyuqa ancha champarqan. 39 Chaymi Jisusqa chay farisiyuta nirqan: Qamkunaqam suq platumpa suq basumpa sawandalla maylladumkunachina kangillampa. Chaqa sawa kwirpullkitallam mayllangillampa. Piru chunqullkimpiqam ancha nisyu ancha uchayuq kangillampa. 40 ¡Ay, tuntumkuna! ¿Manachu yach'angillampa, runamkunampa sawanda Dyus rurachpaqam, chunqundampis rurarqan, nichpaqa? 41 Chayri qamkunaqa limuch'nallkita tumkuy chunqu quchpaqam, mana nima uchayuqchu ringillampa kaq. 42 ¡Ay qamkuna farisiyumkunaqa! Chaqa Dyustaqa qungillampa irba bwinamanda, rrudamanda dyis rampranmanda suqta. Chaychinallam yumbay plantamanda dyismullkita qungillampa. Piru runa masimkimkunata malta rurachpam kawsangillampa. Tayta Dyustampismi mana kuyangillampachu. Chayri chay dyismullkita quchpa, chumaqta kuyayllampa Dyusta, runa masimkimkunatampis. 43 ¡Ay qamkuna farisiyumkunaqa! Sinaguga wasimkunampi kachpaqam, ancha munangillampa tiyayta chay kamachimkuqkunampa tiyanangunampi. Kanan munangillampam, chumaqta nampallkuchunanllampa kallimkunampi. 44 ¡Ay, qamkuna Muysispa liyningunata yach'achimkuqkuna, farisiyumkuna! Chimimkiwanllam Dyusta kasungillampa. Chaymi qamkunaqa chay pamkachqa simpulturachina kangillampa. Chaqa runamkunaqam chay pamkachqa simpulturampa sawanda pasachpaqa, mana yach'anllampachu: (Umkumpim ancha mampa ach'nallkan, nichpaqa. Chaychinallam qamkunata tinguchuchpampis, mana yach'anllampachu: Pallkunam umku chunqumbi ancha uchayuq, nichpaqa.) 45 Chaymi suq runa Muysispa liyningunata yach'achimkuqqa Jisusta nirqan: Yach'achimkuq Taytitu, chaychina nichpaqam, nuqallkunatampis ancha piñachiwallkangi, nichpa. 46 Chaymi Jisusqa nirqan: Ay qamkuna Muysispa liyningunata yach'achimkuqkuna! Chaqa qamkunaqam suqkunata mana atiypaqta amparichingillampa. Piru qamkunaqam mana nimatampis ni suq didullkiwan munangillampachu yanampayta pallkunataqa. 47 ¡Ay qamkunaqa! Chay unay agwilullkillampam wanchirqan Dyuspaq rimaqkunata. Kanan qamkunaqam chay rimaqkunampa nichu laya simpulturangunata allichangillampa. 48 Piru chaychina allichachpampismi, chay unay kastallkichinalla yuyallkangillampa. Chaqa pallkunaqam Dyuspaq rimaqkunata wanchirqan. Chaymandaqam qamkunaqa simpulturangunata allichangillampa. (Piru kananqam nuqata munangillampa wanchiwayta. Chaymi chay unay agwilullki wanchimkuqkunachina kangillampa). 49 Chaymi Tayta Dyusqa chayta yach'achpa nirqan: Kach'amuqmi rini qamkunaman nuqampaq rimaqkunata, ampustulnillkunatampis. Piru wamkindaqam ringillampa wanchiq; wamkindaqam ringillampa qasachaq, nichpa. 50 Chaymi nillkillampa, Tayta Dyusqam rin kastigachuqllampa yumbay chay wanchichqa rimaqkunampa yawarnimbaq, chay punta runa Adamba churin Abilta wanchichqan tyimpumandampacha chay Samkariyasta wanchichqan tyimpumkaman. Chay Samkariyastaqam wanchirqanllampa Dyuspa adurana wasimba pata altarpa ladumbilla. 52 ¡Ay qamkuna Muysispa liyningunata yach'achimkuqkunaqa! Chaqa qamkunaqam mana munangillampachu Dyusta kasuyta, syiluman ch'ayanallkiqa. Kanan suqkuna munamptin Dyusta kasuytaqam, qamkunaqa mana allin dumktrinallkita yach'achingillampa. Chaymi pallkunaqa ancha pandachpa, mana atinllampachu Dyusta allita kasuytaqa. 53 Jisus chaychina nimptinqam, Muysispa liyningunata chay yach'achimkuqkuna, chay farisiyumkunampis ancha piñamkurqanllampa. Chaymi tumkuy laya tampunata tampurqanllampa, pandamptin, chaypaq tumbananllampa.
1 Chaychina farisiyumkuna tampunangamanmi, ancha achka mil runamkuna ch'ayarqan Jisusman sarrunamkuypa. Chaymandaqam Jisusqa puntata yach'amkuqningunata nirqan: Kwidamkayllampa chay farisiyumkunampa libaduranmanda. Chaqa pallkunaqam chiminwanlla Dyusta kasunllampa. [Nuta: Achla libadurallam achka masata atin samksachiyta. Chaychinallam farisiyumpa kustumbringunata achlitatalla ruramptinchiq, ancha dañachiwanchiqman.] 2 Piru tumkuy chay pamkadu mana allita rurachqanda ancha klaruta yumbay rinllampa yach'aq. 3 Chay tyimpumpiqam tumkuy maypi manyaqlla rinllampa yach'aq tutamp pamkamkuchpa ichu umku wasimkimpi uyaritamp (uyarita) parlachqallkitampis. Chay tyimpumpiqam wasimkunampa sawangunamanda ancha jwirtita rinllampa rimaq tumkuy ima parlachqallkimpaq, nichpa. 4 Yanasitamkuna (Yanasitumkuna), qamkunatam nillkillampa, ama manchayllampachu wanchimkuqkunataqa. Chaqa kwirpullkitallam atinllampa wanchiytaqa. Manam mastaqa atinllampachu imanachichuyta. 5 Chayri Dyustalla manchayllampa. Chaqa payqam bidallkita quch'ichuchpa, atin infyirnuman wichuchuyta. 6 Piru Dyusqam ancha kuyachuchpa, ancha allita riqsichungillampa. Chaymi yumbay aqchallkillampata manyaqlla yumpachqa. Asta achla baliq pichqatumkunatampismi kwidan. Manchu runamkunaqa ichkay qallitaywanlla atin randiyta sinku indyu pichqu layamkunata. Chaychina runamkunampaq mana balimptimbismi, Dyusqa mana ni suq pichqatuta qunqanchu. Chayri ama llamkiyllampachu. Chaqa qamkunaqam ancha achka pichqatumkunamanda masta balingillampa Dyuspaqqa. 8 Yumbaytam nillkillampa, mayqan runa ichu warmi mana panqamkuchpachu, runamkunampa ñawpambi nuqampaq rimamptinqam, nuqa Dyusmanda Chamuq Runampis jwisyu diyampi Dyuspa chay anjilningunampa ñawpambi paypa faburninda rini rimaq. 9 Piru runamkunampa ñawpambi ñigawaqtaqam, jwisyu diyampiqa nuqampis Dyuspa anjilningunampa ñawpambi kaychina rini ñigaq: Manam paytaqa riqsinichu, nichpa. 10 Mayqan runa nuqa Dyusmanda Chamuq Runata kuntrawachpa mana allimkunata rimawamptinqam, Dyusqa pirdunanman. Piru Dyuspa Santu Ispiritunda mayqan kuntranda rimaqtaqam mana rinchu pirdunaq. 11 Nuqampaq yach'achimkumptimkim, kuntrachuqkunaqa rinllampa ampachuq sinaguga wasimkunaman, juyiskunaman, suq awturidarkunaman. Chaychina rurachumptinllampaqa, ama llamkiyllampachu: Tampuwamptinqa, ¿imataraq nichaq? nichpaqa. 12 Chaqa Dyuspa Santu Ispiritunmi chay uraspi rin yanampachuq, allita rimanallkillampa. 13 Chay ancha achka runamkunamanda suqninmi Jisusta nirqan: Yach'achimkuq Taytitu, masaytar niy, irinsyayta partiwanambaq, nichpa. 14 Chaymi Jisusqa nirqan: Pitaq numbrawachqa, juyisnimki kachpa, irinsyallkita partichichunayqa? nichpa. 15 Nirqambismi: Kwidamkayllampa, ama tumkuy imata munamkunallkillampa. Chaqa runamkuna chumaqta kawsanambaqqam mana munanchu tumkuy imayuq kanambaqqa. 16 Chaychina nichpaqam, suq kumparasyunda rurachpa nirqan: Suq kampuq runach ch'amkrangunamanda ancha allita kusichamkuq. 17 Chaychi chay runaqa yuyarqan: ¡Imanachaqtaq? Chaqa kusichaytaqam mana maypi atinichu waqaychayta, nichpa. 18 Chaychina yuyachpaqach nirqan: ¡A, ya! Yach'aninam imatam rini ruraq. Yumbay waqaychana wasillkunata bulachpam, mas atungunata rini ruraq, chaypi kusichayta tumkuy imayta tandanaypaq. 19 Chaymandaqam nichaq: Kananqam waqaycharqayna tumkuy kusichayta achka watamkunampaq. Chayri kananqa samachpa, mimkuchaq, umpyachaq, kuchimkuchaq, nichpa. 20 Piru Tayta Dyusqach chay runataqa nirqan: A, runa tuntu, kay tutatam ringi wañuq. Kanan chay imallkimkunaqa, ¿pimpaqraq kidanqa? nichpa. 21 Chaychinam rin kaq chay nisyumkunawanqa. Chaqa achka qallayniyuq kachpampismi, Dyuspaqqa mana nima allita rurachqachu. 22 Chaymandaqam Jisusqa yach'amkuqningunata nirqan: Nuqaqam nillkillampa, ama llamkiyllampachu, ¿imataraq mimkuchaq? ¿Imataraq ruramkuchaq? nichpaqa. 23 Chaqa bidallkiqam ancha balin maski mimkunamanda. Kwirpullkimpismi balin maski mudanallkimanda. 24 Pichqumkunampaq yuyayllampa: Pallkunaqam mana tarpumkunchu, ni kusichamkunchu. Manam ni trujayuqchu ni wasiyuqchu, granumkunata tandanambaqqa. Piru Tayta Dyusmi pallkunata mantyinin. Qamkunaqam chay pichqumkunamandaqa masta balingillampa Dyuspaqqa. 25 Mayñ, qamkunamanda suqnimki ancha munachpa masta wiñaytaqa, ¿ima ancha llamkichpachu atingiman midyu mitru masta wiñayta? ¡Manñm! 26 Chaychina mana ni chayta atichpa ruraytaqa, ¿imampaqnam llamkingillampa, imaraq pasawanqa, nichpaqa? 27 Allita yuyayllampa chay ancha chumaq liryu tumktumkunampi. Manam trabajanllampachu ni puchkamkunllampachu. Piru allimptam nillkillampa, chay ancha kampuq gubyirnu Salumunqam ancha chumaqta mudamkuchpampis, mana atirqanchu chay tumktumkunachina mudamkuytaqa. 28 Chay ch'amkrallkimpi qawamkunam suq tyimpitulla kawsan. Qayandimbaqqam rumpachinampaqna balin. Piru chay tumktu mana duraqkunatam Dyusqa ancha chumaqta ruran. Chaychinam qamkunatampis ancha chumaqta rin rurachichuqllampa maski chay chumaq tumktumkunamanda. Chaychina kamptinqa, ¿imarallkutaq Dyuspiqa mana allitaqa yuyamkungillampachu? 29 Chayri ama llamkiyllampachu, ¿imataraq mimkuchaq? ¿Imataraq umpyachaq? nichpaqa. 30 Chaqa Dyusta mana kasuqkunaqam tumkuy imata munachpa, ancha llamkinllampa: ¿Imachinataq chaytaqa atini kunsigiyta? nichpa. Chayri qamkunaqa ama pallkunachinaqa kayllampachu. Chaqa Taytanchiq Dyusmi yach'an imam faltachungillampa, nichpa. 31 Chayri Dyus munachqanda puntata rurayllampa, pay kamachimkuqnimki kanambaq. Chaychina ruramptimkillampaqam, tumkuy ima faltachuchqandampis rin quchuqllampa. 32 Kuyachqay wichitallkuna, ama nimata manchayllampachu. Chaqa achlita kamptimkimpismi, Taytanchiq Dyusqa ancha kuchimkuchpa, suq muchuq bidata munan quchuyllampata, paywan tumkuy tyimpu kawsanallkillampa. 33 Chayri imallkita randimkuchpa, chay mana nimayuqkunata quyllampa. Chaychina Dyus munachqanda ruramptimkiqam, payqa chumaq primyullkita syilumpi rin quchuqllampa. Anaqpiqam chay primyullki mana nunka rinchu uchyamkaq. Manam ni ladrunguna rinchu yallkuq ampaqqa, ni pulillamkuna rinchu kuch'kuq. 34 Kanan chay primyullki syilumpi kamptinqam, qamqa chunqullkimpi ancha ringi yuyamkuq Tayta Dyuspilla. 35 Listu kayllampa, nuqa chamumptiy, chumaqta ch'ayachiwanallki. Manchu suq patrumba kriyadungunaqa, allita siguramkachpa, michata syindichpa, patrunninda chuyanllampa. Chaqa chay kriyadumkunaqam patrunnin kasamyintu fyistampi kamptinqa, rimkch'allkachpalla chuyan, ch'ayamumptin, das kich'anambaq punguta. 37 Chaymi chay chuyamkuq kriyadumkunaqa ancha kuchimkunqallampa, chay patrunnin kutimuchpa, mana puñullkaqta tarimptinqa. Allimptam nillkillampa, chay patrunmi, mandilninda ruramkuchpa, chay kriyadungunata masaman tiyachichpa, rin qaraq. 38 Chaymi ch'awpi tutata ichu madrugadumpi chamuchpa, pallkunata mana puñullkaqta tarimptinqa, kuchimkunqallampa. 39 Kaytampis yach'ayllampa, suq wasi dwiñu yach'achpa: Kay tutam ladrunqa rin chamuq suwawaq, nichpaqach'i, mana puñunmanchu. Achwanmi allita rimkch'achpa, kwidamkunman yuraqachtin, ama wasinman yallkunambaq. 40 Chaychinar qamkunampis allita kawsachpa, listu kayllampa, chumaqta ch'ayachiwanallki. Chaqa nuqa Dyusmanda Chamuq Runaqam mana yuyachqallkillampa uraspi rini kutimuq, nichpa. 41 Pidruqam Jisusta tampurqan: Taytitu, ¿chay kumparasyundaqachu nuqallkunampaqlla rurarqallki ichu yumbay runamkunampaq? nichpa. 42 Chaymi Jisusqa nirqan: Mayñ, yuyayllampa, ¿pim chay allin kumplidu yach'ayniyuq kamachimkuq impliyaduqa? ¿Ima laya runatam patrunninqa numbran, paypa mamkimbi dijanan wasinda kwidanan, kriyadungunata urasnimbi qaranambaqqa? 43 Chay wasi kwidaqqam ancha rin kuchimkuq, chay patrunnin kutimuchpa, kamachichqanchina rurallkaqta tarimptinqa. Chaymi chay wasi kwidaq kriyaduqa ancha rin kuchimkuq, chay patrunnin kutimuchpa, kamachichqanchina rurallkaqta tarimptin. 44 Allimptam nillkillampa, chay kriyadun allita kasuchqanrallku, chay patrunninqa mas kamachimkuqta numbrachpa, tumkuy imandana paypa kwintan rin dijaq, payna rimkanambaq. 45 Piru amamkich chay kriyaduqa yuyanqachu: Manaraqmi patrunniyqa rinchu kutimuq, nichpa, maluyachpa, kriyadu masingunata maqachpa, payllana unda unda mimkunman, umpyanman, mach'anman. 46 Chaychina rurallkamptingich, patrunninqa mana yuyachqan diyampi, qunqaylla chamuchpa, ancha fiyuta rin kastigaq. Chaymandaqam paytaqa rin wichumkuq mana kriyiqkuna kachqanman. 47 Mayqan kriyadu yach'achpa: Patrunniymi kaychina munan ruranaypaq, nichpaqa, piru mana nima rurananda rurachpaqa, ancha kastigadu rin kaq, patrunninda mana kasuchqanrallku. 48 Piru suq kriyadu mana yach'achpa, patrunnin munachqanda mana rurachpaqam, achla kastigadulla rin kaq. Chaychinallam suq kriyaduta achkata intrigachpa, suq tyimpumanda ancha rin mañaq kwintata qunambaq: ¿Maypim ganansyay? nichpa. 49 Nuqam kay mundumanqa chamuchqa kani, ninata ampamuchpa. ¡Chaymi ancha munani miranambaq! 50 Piru puntatam ancha padisichpa, mallimpadu rini kaq. Chaymi ancha padisini Dyus munachqanchina kumplinangaman. 51 ¿Ima qamkunaqachu yuyangi: Siñurninchiq Jisuspi kriyimptinchiqmi, yumbay runamkuna chumaqta rin kawsaq nuqanchiqkunawan, nichpa? Manam chaychinachu. Achwanmi nuqampi kriyimptimkillampa, suqkunaqa qamkunamanda rinllampa amkramkaq. 52 Chaqa suq ayllumpi nuqampi mana kriyiqkunaqam rin amkramkaq nuqampi kriyiq ayllungunamanda. Sinku kamptinqam, kimsa rin kuntraq ichkayta. 53 Kanan taytanmi ullqu wambranda rin kuntraq. Churimbismi taytanda rin kuntraq. Mamambismi warmi wawanda rin kuntraq. Warmi wawambismi mamanda rin kuntraq. Swigrambismi llumchunda rin kuntraq. Llumchumbismi swigranda rin kuntraq, nichpa. 54 Chay achka runamkunataqam Jisusqa kaychinampis yach'achirqan: Qamkunaqam waq rumpay saqanamba ladumbi pumkutayta rimkachpaqa ningillampa: Rinnam tamyaq, nichpa. Allibri chay nichqallkichina rin tamyaq. 55 Kay lugarpi sur ladumanda wayramptinqam, ningillampa: Biranum rinna chamuq, nichpa. Kanan allibri chay nichqallkichina chamun. 56 Piru Dyus munachqandaqam mana munangillampachu yach'ayta. ¡A, qamkuna chimimkiwanlla Dyusta kasuqkunaqa! Qamkunaqam syilumpi ichu kay pachampi ima kaqta rimkachpa yach'angillampana: Imam rin kaq, nichpa. Chaychina yach'achpaqa, ¿imarallkutaq mana yach'angillampachu: Dyus nichqanqam kumplillkanna, nichpaqa? 57 ¿Imarallkutaq qamkuna kimkimki mana yach'angillampachu: Imam alli, imam mana allichu, nichpaqa? 58 Chayri mayqan imampaq dimandachuchpa, juyisman ampachullkamptinqa, ñambilla alliyay chay mana allita rurachqallkimpaq. Mana chayta ruramptimkimkich, ampachungiman juyisman. Challkich juyisqa kach'achungiman suldadumkunaman, karsilman ampachunambaqllampa. 59 Chaymi allimpta nillkillampa, karsilmandaqam mana ringichu lluqchiq yumbay kubrachuchqanda pagaranallkimkaman. Chaqa manach' ni suq sintimuta rinchu pirdunachuq.
1 Chay tyimpumpillam suq runamkuna chamuchpa, Jisusta nirqan: Suq disgrasyam kachqa. Chaqa wamkin llaqta masimki galiliyanumkunam Dyuspa adurana wasimbi animalningunata wanchillkarqanllampa, Dyusta aduranambaq. Chaychina rurallkamptinllampam, gubyirnu Pilatumpa suldadunguna qunqaylla pallkunataqa wanchirqan. Chaymi chay runamkunampa yawarnin chay animalningunampa yawarninwan taqllumkarqan, nichpa. 2 Chaymi Jisusqa nirqan: (Kwidawkich qamkunampis pallkunachina wañungimanllampa.) Amar yuyayllampachu: Chay runamkunaqam yumbay llaqta masin galiliyanumkunamanda mas uchayuq kachqanrallku, wañurqanllampa, nichpaqa. 3 Achwanri allita yach'ayllampa, uchallkita mana dijamptimkillampa Dyusta kasunallkimpaqqam, qamkunampis ringillampa chingaq. 4 Manchu Jirusalimbiqa chay Siluwi chutiq altu turri bulamkachpa, 18 jirusaliniruta pambachpa wanchirqan. Piru amar yuyayllampachu: Chay wañuqkunam yumbay llaqta masingunamanda mas uchayuq kachqanrallku, chaychina wañurqanllampa, nichpaqa. 5 Achwan allimptam nillkillampa, uchallkita mana dijachpaqam, qamkunampis ringillampa chingaq, nichpa. 6 Suq kumparasyunda ruranambaqmi, Jisusqa kaychina nirqan: Suq runampa wirtambim suq yura igus karqan. Chaymi chay dwiñunqa suq diya rirqan chay igusnimba puquyninda maskaq. Piru manam nima puquyninda tarirqanchu. 7 Chaymi piyunninda qayachpa nirqan: Rimkay, kimsa watanam achka bwiltasta yanqa chamuchqa kani igusta pallaq. Piru rimkay, kanangamanmi mana nima puquyninda tarichqachu kani. Chayri kuchuyna. Yanqam arkamkullkan wirtaypiqa, nichpa. 8 Piru chay piyunninqam nirqan: Taytitu, dijayraq kay watitata. Mayñ, tumkuy rridurninda allachpa wanuta wichuchaq. 9 Talbisri chaychina ruramptiy, puqunman. Piru mana puqumptinqam, chaypina kuchuchpa wichumkungi, nichpa. [Nuta: Chay yura igus mana puquyniyuqqam chay runa Dyusta mana kasuqchina.] 10 Suq kutinmi Jisusqa samana diyampi sinaguga wasimpi yach'achimkullkarqan. 11 Chaypim karqan suq qachyaq warmi. Payqam 18 watas tumkuyta kumurachpalla puriq. Chaqa suq dyablum rurachqa karqan, ama nimatampis atinambaq dirichu chayayta. 12 Chaymi Jisusqa chay qachyaq warmita rimkachpa, qayachpaqa nirqan: Warmisita, nanaynimkimandam kach'amkachillkina. 13 Chaychina nichpaqam, Jisusqa mamkingunata sawanman rurachpa, chay uras das kach'amkachirqan. Chaymi chay warmiqa, dirichuna chayachpa, Taytanchiq Dyusta ancha alabarqan. 14 Chayta rimkachpam, chay sinaguga wasimpa kamachimkuqninqa Jisuspaq ancha piñamkurqan. Chaqa Jisusqam chay warmitaqa kach'amkachichqa karqan samana diyampi. Chaymi chay kamachimkuqqa yumbay chaypi kaqkunata nirqan: Sayis diyastallam atinchiqllampa trabajaytaqa. Chayri chay diyamkunampilla chamuyllampa, kach'amkachichunan nanaynimkimanda. ¡Ama samana diyampiqa! nichpa. 15 Chaychina nimptinqam, Jisusqa nirqan: A, chimimkiwanlla Dyusta kasuqkuna! ¿Ima qamkunaqachu mana trabajangillampa samana diyampiqa? Chaqa chay samana diyampiqam buyisnimkita, burrullkita tamkalninmanda paskachpa, ampangillampa yamkuta umpyachiq, ¿manachu? 16 Chaychinallam kay warmi Abrajamba karu willkan kaqta dyabluqa 18 watasta kay qachyaywan watachqachina. Chaychina kamptinqa, ¿amkasuchu mana balin samana diyampi kach'amkachinayqa? Chaqa ancham balin kach'amkachinaypaq, nichpa. 17 Chaychina Jisus nimptinqam, yumbay chay kuntraqkunaqa ancha panqamkurqanllampa. Piru chay ancha achka rimkaqkunaqam, Jisus yumbay chay chumaq rurachqangunata rimkachpaqa, ancha kuchimkurqanllampa. 18 Chaymandaqam Jisusqa kaychinampis nirqan: Dyustana kasuqkunataqa ¿imawandaq atini kumparayta? 19 Pallkunaqam ñampuchpa murunchina. Chaqa suq runa ch'amkrambi tarpumptinqam, chay ñampuchpa murunqa uchulitamanda wiñachpa, atunda wiñan. Chaymi asta bwilaq pichqumkuna rimkrangunampi kamachamkunllampa (mamkachamkunllampa). [Nuta: Chay ñampuchpa murunchinam Dyusta kasuqkunaqa. Chaqa achlita kachpallampampismi, ancha rinllampa achkayaq.] 20 Jisusqam nirqambis: Dyustana kasuchpa kawsaqkunataqa ¿ima maswandaq atini kumparayta? 21 Pallkunaqam libadurachina. Suq warmiqam midyu kustal mach'kata yamkuwan sanguchpa, achla libadurata taqllumptinqa, ancha achkayan. Chay achla libaduraqam chay achka mach'kataqa limpu samksachin, ¿manachu? [Nuta: Chaychinallam Dyusta kasuqkunampis achlitalla kachpampis, ancha rinllampa achkayaq.] 22 Jisusqam Jirusalinman riqchinaqa, llaqtamkunaman, kasiriyumkunaman ch'ayarqan. Ch'ayachpaqam, chay llaqtamkunampi tiyaqkunata yach'achichpa, yach'achichpa, pasarqan. 23 Chaypim Jisusta suq runa kaychina tampurqan: Taytitu, ¿achlitallachu rinllampa wachadu kaqqa? nichpa. Chaymi Jisusqa nirqan: 24 Chay kich'ki punguta imachinampis utqa yallkuyllampa. Kallkich nillkillampa, ancha achka runa warmim rinllampa munaq yallkuyta. Piru tardina kamptinqam, manana rinllampachu atiq yallkuytaqa. 25 Chaqa wasi dwiñu atarichpa, pungunda kirpamptinqam, mayqannimki sawampi kidaqqa pungunda tamkachpa, ringillampa qayamkuq: Kamachimkuq Siñursitu, kich'ayri pungullkita, nichpa. Piru payqam rin nichuqllampa: Manam riqsillkillampachu. ¿Maymandach'i kangillampa? nichpa. 26 Chaymandaqam qamkunaqa ringillampa niq: Qamwanmi mimkurqanchiq, umpyarqanchiq. Manchur qamqa chay kallillkunampi yach'achimkurqallki nichpa. 27 Chaychina qamkuna nimptimkimpismi, payqa rin nichuqllampa: ¡Nichuchqallampanam kani: Manam riqsillkillampachu! ¿Maymandach'i kangillampa? ¡Achuyllampa kaymanda, qamkuna mana allimkunata ruraqkunaqa! nichpa. 28 Chaymi sawa pungumpi kidachpa, ringillampa rimkaq chay alma Abrajanda, Isamkta, Jamkubuta, Dyuspaq rimaqkunatampis syilumpi Dyuspa ñawpambina kaqta. Chaymi qamkunaqa ancha ringillampa malayamkuq. ¡Llalli qamkunata Dyuspa ñawpanmanda qatichumptinqam, ancha waqachpa, ancha llamkichpa, kirullkillampata ringillampa qach'yachiq! 29 Chaqa chay diyampiqam kay pachampa yumbay kuchungunamanda rin tandamkaqllampa Dyusman, paywan syilumpi tiyachpa, pulla mimkunambaqllampa. 30 Chay diyampim wamkin mana kamachimkuq kaqkunaqa ancha kamachimkuqna puntampi rinllampa kaq. Piru wamkin kamachimkuq kaqkunaqam chay diyampiqa mana nimampaq balichpa, ancha imkimpi rinllampa kaq. 31 Chay diyallam wamkin farisiyu dumktrinayuqkuna ch'ayamuchpa, Jisusta nirqanllampa: Riy kaymanda. Chaqa chay gubyirnu Irudismi munan wanchichuyta, nichpa. 32 Chaychina willamptinllampam, Jisusqa nirqan: Riyllampa willay chay surruchina ingañamkuq Irudista: Kay diyamkunam Jisusqa rin qatiq dyablumkunata. Rimbismi kach'amkachiq qachyaqkunata. Chaymandaqam yumbay trabajunda rinna uchyaq, nichpa. 33 Piru kanan, qaya, qaya suq punchawpismi alli, kay ñanda rinaypaq. Chaqa Dyuspaq yumbay rimaqkunataqam masta wanchinllampa Jirusalin llaqtampi. 34 ¡Ay, Jirusalimbi tiyaqkuna! ¡Qamkunaqam Dyuspaq rimaqkunata wanchingillampa! ¡Kanan Dyus kach'amuchqan runamkuna ch'ayachumptinmi, sitachpa wanchingillampa! Manchu suq wallpaqa alitamba warambi pulichitungunata tandan. Chaychinallam nuqampis kutin kutin ancha munachqa kani qamkunata tandachuyllampata. Piru manam munachqallampachu kangi. 35 Chaymi kay llaqtallkiqa wichumkudu rin kaq. Kanan mananam ringillampachu rimkawaq, suq diya kutimunallkaman. Chaymi chay diyampi nuqampaqqa ringillampa niq: ¡Alabachqa kanqa, Tayta Dyuspa rrimplasun chamuqqa! nichpa.
1 Suq samana diyampim Jisusqa rirqan mimkuq suq kamachimkuq farisiyu dumktrinayuqpa wasinman. Chaypim wamkin farisiyumkunaqa Jisusta champallkarqan. 2 Chaypim karqambis suq runa ancha padisillkaq samksaywan. 3 Chaymi Jisusqa Muysispa liyningunata chay yach'achimkuqkunata, chay farisiyumkunatampis tampurqan: Mayñ, ¿qamkunaqa imatam ningillampa? ¿Dyusqachu dijawanchiq, runa masinchiqta kach'amkachinanchiq samana diyampi ichu mana? nichpa. 4 Chaychina tampumptinqam, chay farisiyumkunaqa uyararqanlla. Chaymi Jisusqa chay uras chay qachyaqpa sawanman mamkinda rurachpa, kach'amkachichpa: Riyna, nirqan. 5 Chaymandaqam chay farisiyumkunata nirqan: Mayqannimkimpa suq burrullki ichu suq turullki suq quch'aman bulamkamptin samana diyampiqa, ¿manachu chay uraslla qamkunampis trabajachpa, surqungimanllampa? nichpa. 6 Chaymi chay farisiyumkunaqa manana nimatampis atirqanllampachu kuntistayta. 7 Chaymandaqam Jisusqa chay kumbidadu runamkunata rimkarqan, mas allin iskañumkunata amkramptin, puntampi tiyanambaqllampa. Chaymi suq kumparasyunda rurachpa, nirqan: 8 Mayqan kumbidachumptin suq kasamyintu fyistamanqa, ama tiyaychu punta tiyanampiqa. Chaqa puntampi tiyamptimkiqamkich, ch'ayamunman suq kumbidachqan mas kamachimkuq qamanda. 9 Challkich chay mayqan kumbidachuqqa nichungiman: Quyri kay tiyanata kay suqta, nichpa. Chaych'i ancha panqamkuchpa, ringiman tiyaq imki tiyanaman. 10 Chayri mayqan kumbidachumptinqa, imki tiyanampi tiyay. Chaymi chay mayqan kumbidachuq chamuchpa nichungiman: Yanasita (Yanasitu), chamuy kay mas allin punta tiyanaman, nichpa. Chaymi chay masampi wamkin kaqkunaqa qambaq ninqallampa: Paymi ancha baliq runa, nichpa. 11 Chaymi mayqan runa munachpa kamachimkuq kaytaqa, suq diyaqa rin panqamkuq. Piru chay umildi kaqqam suq diyaqa ancha rin kamachimkuq, nichpa. 12 Chaymandaqam chay kumbidamkuq runata Jisusqa nirqan: Rurachpa fyistataqa, ama yuyaychu: Yanasallkunata (Yanasullkunata), masallkunata, ayllullkunata ichu imayuq bisinullkunatallam rini kumbidaq, nichpaqa. Chaqa pallkunaqam qam kumbidachqallkichina kumbidachuchpa, rinllampa kutichichuq. Chaychinaqam mana pitampis yanampallkangichu. 13 Achwanri suq fyistata rurachpaqa, kumbiday chay mana imayuqkunata, mankumkunata, kujumkunata, sarkumkunata. 14 Chaymi chaychina chay mana imayuqkunata yanampachpaqa, ancha kuchimkuchpa ringillampa tiyaq. Chaqa chay pubrimkunaqam mana atinqachu pagarachuytaqa. Piru allin runamkuna kawsamumptinmi, Dyusqa rin pagarachuq, nichpa. 15 Chaymi Jisus nichqanda uyachpaqa, chay masampi tiyaqkunamanda suqninqa Jisusta nirqan: Ancha kuchimkunqa chay runa Dyuswan syilumpi tandata mimkuqqa! nichpa. 16 Chaymi Jisusqa nirqan: Suq runach ancha allin fyistata rurachpa, kumbidarqan ancha achka runamkunata. 17 Chaychi mimkunan uras ch'ayamptinqa, kriyadunda kach'arqan qayamunambaq chay kumbidachqangunata. Chaychi kriyadunqa richpa nirqan: Chamuyllampana mimkunanchiq. Listunam mimkunaqa, nichpa. 18 Chaychina qayamptinqach, yumbay kumbidachqangunaqa nirqan: Pirdunawayllampa. Manam atinillampachu riyta, nichpa. Chay punta runa kumbidachqaqach nirqan: Randichqam kani ch'amkrata. Riqmi rini rimkaq. Chaymi rrugallki pirdunawanallki, nichpa. 19 Suqpischi nirqan: Randichqam kani sinku yuntas buyiskunata. Chaymi rini riq mallimpaq. Chaymi rrugallki pirdunawanallki, nichpa. 20 Suqpischi nirqan: Chayraqmi kasarachqa kani. Chayrallkum mana atinichu riyta, nichpa. 21 Chaychi kriyadu kutimuchpa, chaychina patrunninda nimptinqa, chay patrunninqa piñamkuchpa, nirqan: Riy kallimkunamanda das ampamuq waq mana nimayuq runamkunata, mankumkunata, kujumkunata, sarkumkunata, nichpa. 22 Chaychi kriyaduqa richpa, challkunata ampamuchpaqa, nirqan: Patrunsitu, ampamuchqanam kani chay niwachqallkichina. Piru kanraqmi tiyanamkunaqa, nichpa. 23 Chaychi patrunqa kriyadundaqa nirqan: Riy kallimkunaman, ñangunaman. Ancha animachichpa, ampamuy suq runamkunatampis, kay wasiy undanan. 24 Piru manam ni mayqan waq punta kumbidachqayqa mimkunqachu mimkunaytaqa, nichpa. 25 Chay tyimpumpim ancha achka runamkuna, warmimkuna Jisuspa imkinda rirqanllampa. Chaymi payqa richqanchina timkramkamuchpa, yumbayta nirqan: 26 Mayqan nuqaman chamuqqa ancha kuyawanqa maski yumbay kuyachqanmanda. Chayri mayqannimki nuqata kuyawanallkimanda taytallkita, mamallkita, warmimkita, wambrallkimkunata, masallkimkunata, panimkimkunata ichu kimkin kwirpullkita masta kuyachpaqam, mana balingichu yach'amkuqniy kanallkimpaqqa. 27 Chayri nuqampi kriyichqallkirallku padisichpa, ichu suq kruspi munamptinllampa wanchichuytampis, allita kasuwachpaqa, nuqampa allimp yach'amkuqniy ringi kaq; manaqa manam. 28 (Mayñ, nichqallkillampa suq kumparasyunda:) Mayqannimki suq altu turrita munachpa ruraytaqa, puntata allita yuyangiman: ¿Allkataraq gastayman uchyanayqa? ¿Aypanmanchuraq qallayniy ichu mana? nichpa. 29 Chaqa mana allita yuyachpa, simyintuta qallarichpaqam, mana atingimanchu uchyayta, faltamptin qallaynimki. Chaymi yumbay rimkachuqkuna asimpachuchpa ninmanllampa: 30 Kay runam qallarichqa suq turrita ruraq; piru manam atichqachu uchyayta, nichpa. 31 Ichu mayqan gubyirnu munachpa pilyayta suq gubyirnuwanqa, manachu puntata allita yuyanman: ¿Kay 10.000 suldadullkunawanqa atiymanchu binsiyta paypa 20.000 suldadungunataqa? nichpa. 32 Chaymi mana atichpa pilyaytaqa, karumpillaraq kachpa, chay gubyirnuqa kach'anman rrimplasunda parlanambaq, ama pilyananllampa. 33 (Chaychinar mayqannimki nuqata munachpa kasuwaytaqa, puntata ancha allita yuyay: ¿Allimptachu munani kasuyta ichu mana? nichpa.) Chaqa mana dijachpa tumkuy imallkitam, mana atingichu yach'amkuqniy kaytaqa. 34 Chaymandaqam Jisusqa suq kumparasyunda rurachpa, kaychinampis nirqan: Kach'iqam ancha allin. Piru lambaqyamptinqam, mana atinchiqchu allichayta kach'iyanambaqqa. 35 Mananam balinchu nimampaq, ni wanumpaq. Achwanmi wichumkunanchiqna balinqa. Chayri qamkuna rinriyuqkunaqa, allita uyawayllampa, nichpa. [Nuta: Jisusta mana munaq kasuqqam chay mana baliq kach'ichina.]
1 Achka kuntribusyunda kubramkuqkuna, suq laya uchayuqkunampismi qamimkarqanllampa, Jisusta uyanambaq. 2 Chayrallkum farisiyu dumktrinayuqkuna, Muysispa liyningunata yach'achimkuqkunampis Jisusta panqachpa nirqanllampa: Rimkay, Jisusqam uchayuq runamkunata ch'ayachichpa, pallkunawan mimkun, nichpa. 3 Chaymi Jisusqa kay kumparasyunda rurarqan: 4 Mayñ, qamkunamanda suqnimki 100 wichayuq kachpa, suq wichallki chingamptinqa, ¿manachuraq chay 99 wichallkita pastumpi dijachpa, ringiman maskaq chay suq wichallkita tarinallkimkaman? 5 Chaymi chay wichallkita tarichpaqa, ancha kuchimkuchpa umbrumkuchpana ampamungiman. 6 Kanan wasimkiman ch'ayachpaqam, kumpañirullkimkunata, bisinullkimkunata tandachpa, ningiman: ¡Kay chingachqa wichaytam tarichqana kani! ¡Chayri kuchimkuchunllampa! nichpa. 7 Chaymi allimpta nillkillampa, chaychinallam syilumpimpis. Dyuspi chay 99 kriyiqkunampaq syilumpiqa ancha kuchimkunllampa. Piru suq mana allin runa ichu warmi uchangunata dijachpa, Dyuspina allimpta kriyimptinqam, achwan masta kuchimkunllampa syilumpiqa. 8 Mayñ, suq warmi dyis ancha baliq yuraq qallayniyuq kachpa, suq qallayninda wichuchpaqa, ¿manachuraq michanda syindichpa, chay wasinda pichachpa, kuchun kuchun allita maskanman tarinangaman? 9 Chaymandaqam chaychina tarichpaqa, tandachpa yanasangunata, bisinangunata ninman: Yanasitamkuna, kuchimkuchunllampa, kay wichuchqay qallayniyta tarichqayrallku, nichpa. 10 Chaychinallam syilumpi Dyuspa anjilningunampis ancha kuchimkunllampa suq mana allin runa uchangunata dijachpa, Dyustana kasumptinqa. (Chayrallkum chay uchayuqkunawanqa tandamkani, Dyuspaq yach'achinaypaq), nichpa. 11 Jisusqam nirqambis: Suq runam ichkay churiyuq karqan. 12 Chay chullka churinmi taytanda nirqan: Taytitu, quwaynari nuqampaq kaq irinsyayta, nichpa. Chaymi taytanqa chay ichkay churingunata ch'amkrangunata animalningunata partirqanna. 13 Chaymandaqam wamkin diyamandaqa, chay chullka churinqa irinsyanda limpu randimkuchpa, suq karu nasyunmanna rirqan. Waqpiqam tumkuy laya mana allimkunata rurachpa, chay qallayninda malgastachpa, limpuna uchyarqan. 14 Chaymandaqam yumbay qallayninda uchyamptinqa, chay nasyumbiqa tumkuy maypi ambrunana karqan. Chaymi payqa mallaqna purirqan. 15 Chayrallkum manana nimanayta atichpaqa, suq patrunmanna rirqan, trabajuta maskaq. Chaymi chay patrunqa trabajuta quchpa, kach'arqan asyindanman, kuchingunata qaranambaq. 16 Chaypi qaraqchinaqam anchana mallaqnarqan. Chaymi kuchimkunampa mimkunan algarrubuta anchana munarqan mimkuyta. Piru manam dijarqanllampachu mimkunambaqqa. [Nuta: Chay algarrubuqam suq plantampa puquynin. Piru manam runamkuna mimkunanchu.] 17 Chaymi ancha yuyachpa nirqan: Taytaypa wasimbiqam achka trabajadurkuna kan. Pallkunaqam ancha allita mimkunllampa. ¡Piru nuqaqam kaypi mallaqnachpa wañuqna rini! 18 Kutirichaq taytayman. Ch'ayachpaqam nichaq: Taytitu, Dyusta, qamta mana kasuchuchpam, ancha uchata rurachqa kani. 19 Chaymi manana balinichu, churimki kanaypaqqa. Suq piyunnimkitachinar ch'ayachiway, nichpa. 20 Chaychina yuyachpaqam, chay karu nasyunmandaqa kutimurqanna taytanman. Chaymandaqam ch'ayallkamptinqa, taytanqa karumpilla rimkachpa, ancha llamkimpachpa, kallparqan tinguq. Tinguchpaqam abrasachpa, mucharqan qaqllambi churindaqa. 21 Churinqam nirqan: Taytitu, Dyusta, qamta mana kasuchuchpam, uchata rurachqa kani. Chaymi manana balinichu, churimki kanaypaqqa, nichpa. 22 Piru taytanqam qayachpa kriyadungunata kamachirqan: Chay mas allin mudanata ampamuchpa, kay churiyta mudachiyllampa, surtijachiyllampa, sampatuchiyllampa. 23 Chay mas gurdu michiruta ampamuchpa, wanchiyllampa, fyistata rurachpa mimkunanchiqllampa. 24 Chaqa kay churiyqam chingachpa, wañuchqachina karqan. Piru kanan kutimuchpaqam, kawsamuchqachina, nichpa. Chaymi fyistata rurachpa kuchimkurqanllampa. 25 Piru chay kulamka churinqam ch'amkrambi kachqa karqan. Chaymandaqam wasinman ch'ayallkachpaqa, uyarqan kunyalla fyistata rurachpa dansallkamptinllampa. 26 Chaymi payqa suq kriyadunda qayachpa tampurqan: ¡Imam kan? nichpa. 27 Chay kriyadunqam nirqan: Masallkim ch'ayamuchqana. Chaymi taytallkiqa allilla ch'ayamuchqanrallku, chay mas gurdu michiruta wanchichichqa, fyistata ruranambaq, nichpa. 28 Chayta yach'achpaqam, chay kulamka churinqa ancha piñamkuchpa, manana munarqanchu yallkuyta. Chaymi taytanqa lluqchichpa, ancha rrugarqan yallkunambaq. 29 Piru payqam piñamkuchpa, taytanda kaychina nirqan: Nuqaqam ancha achka watamkunata kaypi sirbillki, tumkuy imampi kasuchuchpa. Piru chaychina allita sirbichumptiypismi, mana nunka ni suq chibituta quwachqachu kangi, kumpañirullkunawan fyistata rurachpa kuchimkunaypaqqa. 30 Piru rimkay, chay churimki partin quchqallkita bandulira warmimkunawan limpu uchyachpa kutimumptinqam, paypaqqa chay mas gurdu michiruta wanchichichqa kangi, nichpa. 31 Chaymi taytanqa nirqan: Ijitu, qamqam tumkuy tyimpu pullay kangi. Chaymi tumkuy imallkunaqa qamba. 32 Piru kananqam ancha alli, kay fyistata rurachpa kuchimkunanchiq. Chaqa kay masallkiqam wañuchqachina kachqanmanda, kananqa kutimuchqana. Chingachqa kachqanmandam, tarichqana kanchiq, nichpa. [Nuta: Chaychinam Dyus ancha kuchimkun, suq uchayuq runa uchangunata dijamptin. Piru chay farisiyumkunam chay kulamka churichina mana munarqanllampachu ch'ayachiyta chay uchamkunata dijaqkunataqa.]
1 Jisusqam yach'amkuqningunata kay kumparasyunda rurachpa nirqan: Suq kampuq runam suq impliyadumbi ancha yuyamkuchpa numbrarqan, payna tumkuy imanda randinambaq randimkunambaq. Piru suq diyam wamkin runamkuna yach'arqan chay impliyadumpaq: Patrunnimba kusasningunata, qallaynindam yanqamkunampi gastallkan, nichpa. Chaymi chay patrunnindaqa chaychina rurachqambaq willarqanllampa. 2 Chaymi chay patrunqa chay impliyadundaqa qayachpa, nirqan: Qambaqmi yach'ani. ¿Imatam rurachqa kangi? Mayñ, chay kusasnillkunampaq, qallayniypaq kwintata quway. Mananam ringichu trabajaq, nichpa. 3 Chaymi chay impliyaduqa yuyarqan: Patrunniy trabajuymanda qatiwamptinqa, ¿imanachaqraq? Chaqa ch'amkrampi trabajanaypaqqam mana balinichu. Limuch'nata mañamkunaypaqqam panqamkuni, nichpa. 4 Chaymandaqam yuyarqan: ¡A, ya yach'aninam! Kaypiraq kachpa, suqkunata yanampachaq, mana trabajuyuq kamptiy, pallkunana wasinman tandawanambaq, nichpa. 5 Chaymi chaychina yuyachpaqa, patrunninda dibiraqkunata, suqninda suqninda qayachichpa, tampurqan: ¡Allkatataq dibirangi patrunniytaqa? nichpa. 6 Chaymi suq dibiramkuqqa nirqan: 100 barril asiytitam dibirani, nichpa. Chaymi chay impliyaduqa chay runata nirqan: Kaypim kay tratumkuchqallki dumkumintu. Tiyachpa, das suq muchuq dumkumintuta ruray, 50 barriltallana dibiranallki, nichpa. 7 Chaymandaqam suq dibiramkuqtampis tampurqan: ¡Qamqa, allkatataq dibirangi? nichpa. Chaymi chay dibiramkuqqa nirqan: 100 midida trigutam dibirani, nichpa. [Nuta: Kada mididach'i ch'usku kintal triguta piskaq.] Chaymi chay kriyaduqa paytampis nirqan: Kaypi kay tratumkuchqallki dumkumintu. Suq dumkumintuta das allichay, 80 mididatallana dibiranallki, nichpa. 8 Chaymi patrunninqa chayta yach'achpa, chay malu impliyadumbaqqa nirqan: Ay, chay impliyaduyqam ancha yach'ayniyuq kachqa, chayta ruranambaqqa, nichpa. Chaymandaqam Jisusqa nirqan: Kay mundumpa kusasningunampi yuyamkuqkunaqam Dyuspi yuyamkuqkunamanda mas yach'ayniyuqkuna. Chaqa pallkunampuram masta yanampanamkunllampa qallayninwan. 9 Chaymi nuqaqa kaychina nillkillampa, kay mundumpi imallki kaqwan suqkunata yanampay, yanasuyuq (yanasayuq) kanallkillampa. Chaymandaqam chay imallkillampaqa rin uchyamkaq. Piru syilumpiqam chay achka yanampachqallkimkuna kuchimkuchpa, chumaqta rinllampa ch'ayachichuq. 10 Chaqa mayqan achlitata allita kwidaqqam, achkatampis allita rin kwidaq. Piru mayqan achlitata mana allita kwidaqqam mas achkatampis mana allitachu rin kwidaq. 11 Chaychinam kay mundumpa kusasningunata mana allimkunampi qamkuna gastamptimkiqa, Dyusqa mana rinchu quchuqllampa chay mana uchyamkaq imangunataqa. 12 Kanan kay pachampi suqpa imangunata mana allita kwidamptimkillampaqam, Taytanchiq Dyusqa mana quchunqallampachu partimkitaqa. 13 Manam pimpis atinchu ichkay patrundaqa kasuyta. Chaqa suq patrunnindam masta rin ch'iqniq; suqtaqam masta rin kuyaq. Ichu suqtalla ancha rin kasuq, suqtaqa mana. Chaychinallam mana atingillampachu Dyusta, qallayta pullata kuyaytaqa. 14 Chay farisiyu dumktrinayuqkunaqam qallayta ancha munarqanllampa. Chaymi Jisus nichqanda uyachpaqa, ancha asimparqanllampa. Chaymi Jisusqa pallkunata nirqan: 15 Qamkunaqam runamkuna alabachunambaq, allin runa layampaq tumkungillampa. Piru Tayta Dyusqam qamkunampa chunqullkitaqa allita riqsin: Qallaytallam munanllampa, nichpa. Chaymi Dyusqa qamkuna rurachqallkita millanachpa ch'iqnin. 16 Jisusmi kaychinampis nirqan: Muysispa liyningunata, Dyuspaq rimaqkuna iskibrichqandampismi yach'amkurqallkillampa Jwan Chutichimkuq chamuchqan tyimpumkaman. Chay chamuchqan tyimpumandampacham Dyuspa chumaq nutisyanda yach'achimkullkani. Chaymi ancha achka munanllampa imachinampis syiluman yallkuyta. 17 Piru Muysispa liyningunaqam kanangaman ancha balin. Chaymi syiluwan kay pacha chingamptimbis, chay lillkunaqa mana ni achlita rinchu chingaq. 18 Dyuspaqqam mana balinchu suq runa amkramkanambaq warminmandaqa. Chaymi suq runa warminmanda amkramkachpa, suqta tandachpaqam, uchayuqna kidan. Chaychinallam chay warmi dijachqata mayqan tandaqpis uchayuqna. 19 Suq runam ancha kampuq karqan. Chaymi ancha chumaq ch'aniyuq mudanayuq puriq. Kanan tumkuy diyam ancha allingunatalla mimkuq. 20 Karqambismi suq pubri limuch'niritu. Paymi Lasaru chutiq. Kanan ichquyallkaq kwirpuyuqmi karqan. Chaymi usurallkarqan chay kampuqpa pungumbi. 21 Kanan chay Lasaruqam ancha munarqan chay kampuqpa masanmanda ichkiq mimkunata mimkuyta undanambaq. Kanan allqumkuna chamuchpam, chay ichquyninda lambillkarqan. 22 Chaymandaqam chay pubri limuch'nirituqa wañurqanna. Chaymi Dyuspa anjilninguna ispiritunda amparqan syiluman, Abrajamba ispiritunwan tiyanambaq. Chaymandaqam chay kampuqpis wañurqanna. Wañumptinqam paytampis pambarqanllampa. 23 Piru chay kampuqqam wañuchqamkunampa lugarninman richpa, ancha padisirqan. Chaymi chaychina padisillkachpaqa, karumanda rimkarqan Lasaruta, Abrajamba ladumbi tiyallkaqta. 24 Chaymi payqa jwirtita qayamkuchpa, nirqan: Taytitu Abrajan, llamkimpawachpa, kamachiy chay Lasaruta, chamunambaq didumba puntanda yamkitumpi nuyuchichpa, qallituyta chirichinambaq. ¡Chaqa kay ninampim ancha padisillkani! nichpa. 25 Abrajanqam nirqan: Ijitu, yuyayri chay unay bidallkimpi tumkuy imayuq kachqallkita. Piru Lasaruqam tumkuy imampi padisirqan. Kananqam payqa kaypi ancha kuchimkuchpana tiyallkan. Piru qamqam padisillkangina. 26 Suq ancha jundu kibradam qamkunata nuqallkunamanda amkrawanchiq. Chaymi mana pimpis atinchu kay chimbamanda chay chimbamanqa pasayta. Chay chimbamandampismi mana pimpis atinchu kaymanqa pasamuyta, nichpa. 27 Chaymi chay kampuq runaqa ancha rrugachpa nirqan: Taytitu Abrajan, yuch'allku Lasaruta kach'ay ayllullkunaman, 28 chay sinku masallkunata willanambaq, ama kay kastiguman chamunanllampa, nichpa. 29 Chaymi Abrajanqa nirqan: Masallkimkunam atin liyiyta Muysis iskibrichqanda, Dyuspaq rimaqkuna iskibrichqandampis. Challkunata liyichpa, kasunqallampa, wachadu kananllampa, nichpa. 30 Chaymandaqam chay kampuqqa nirqan: ¡Taytitu, challkunataqam mana rinllampachu kasuq! Piru suq alma kawsamuchpa, pallkunaman rimkamkumptinqam, kriyichpa, uchanllampata rinllampa dijaq, nichpa. 31 Piru Abrajanqam nirqan: Pallkuna mana kasuchpa Muysis nichqanda, Dyuspaq rimaqkuna nichqandaqam, mana rinllampachu kasuq wañuchqanmanda kawsamuqtampis, nichpa.
1 Jisusmi kaychinampis yach'amkuqningunata nirqan: Ancha trabajusmi rin kaq, chumaqta kawsanallkillampa. Chaqa suqkunam rinllampa animachichuq, uchata ruranallkillampa. Piru pallkunaqam ancha kastigadu rin kaq. 2 Chayri chay uchata rurachiqpaqqa mas alli kanman kungambi suq atun mulinu rumita watachpa, mar yamkuman wichumkunanllampa, ch'uqachpa wañunambaq, amaraq kay wambritullkunata uchata rurachimptin. 3 Chayri qamkuna kimkimki kwidamkayllampa, ama ni pitampis animachinallki uchata ruranambaq. Achwanri kriyiq masimki mana allita rurachumptinqa, anyay, amana mas uchata ruranambaq. Piru uchangunata dijachpa, pirdunda mañachumptinqa, pirdunay. 4 Suq diyampi syiti bwiltasta mana allita rurachuchpa, chaymanda chay syiti bwiltasta syintichpa, pirdunda mañachumptinqa, pirdunay, nichpa. 5 Yumbay chayta uyachpaqam, Jisuspa ampustulningunaqa nirqan: Yanampawayllampa, qambi mas allita yuyamkunaypaq, nichpa. 6 Chaymi Jisusqa pallkunata nirqan: Achlitata nuqampi kriyichpaqach'i, tumkuy imata atingimanllampa rurayta. Chaqa kay ancha atun yura simkamuruta qamkuna kamachimptimki: Pilamkachpa, riy mar yamkuman plantamkaq, nimptimkiqa, kasuchuchpa, allimpta chaychina rin ruraq. 7 Amar palanganuqa kayllampachu. Achwanri yuyayllampa: Dyuspaqqam mana baliq randichqa kriyaduchinalla kani, nichpa. Mayñ, yuyachunllampa: Suqnimki kriyaduyuq kachpa, chay kriyadullki yampumkuchpa, michimkuchpa, wasimkiman ch'ayamptinqachuraq, ¿ningiman: Pasachpa masaman tiyay mimkunallki, nichpa? 8 Manam chaychinaqa ningimanchu. Achwanmi kamachingiman: Utqa yanumkuchpa, mandilnimkita ruramkuchpa, mirindachiway. Chaymandaqa nuqa mimkumptiy umpyamptiyraqmi, qambis atingi mimkuyta, umpyaytaqa, nichpa. 9 ¿Amkasuchu qamkunaqa chay randichqa kriyadullkita chay ima kamachichqallkita ruramptinqa, Dyusilumpagi ningimanllampa? Manñm. 10 Chaychinallar qamkunampis Dyus kamachichuchqanda rurachpa, yuyayllampa: Mana baliq randichqa kriyaduchinam kanchiqllampa. Chaqa Dyus niwachqanchiqtallam rurachqa kanchiq. Manam yuyachqachu kanchiq, masta rurananchiqpaqqa, nichpa. 11 Jisusmi Jirusalinman riqchinaqa, prubinsya Galiliyampa, prubinsya Samaryampa lindirunda pasallkarqan. 12 Suq kasiriyuman ch'ayallkamptinqam, dyis ismullkaq kwirpuyuq runamkuna chamurqan tinguq. Yaqqana tinguchpaqam, karumpilla chayachpa, 13 ancha jwirtita nirqanllampa: Yach'achimkuq Jisus, yuch'allku nuqallkunatar llamkimpaway! nichpa. 14 Chaymi Jisusqa pallkunata rimkachpa, nirqan: Mayñ, riyllampa kuramkunaman, pallkuna rimkachuchpa: Kach'amkachqanam kangi, ninambaq. Chaymi chay runamkunaqa kuramkunaman riqchinaqa, limpu kach'amkarqanllampa. 15 Chaymi suqninqa rimkachpa: Kach'amkachqanam kani, nichpaqa, Taytanchiq Dyusta ancha alabachpa, Jisusmanna kutirqan. 16 Chaymi Jisusman ch'ayachpaqa, ñawpambi qunqurimkuchpa, pachamkaman qaqllanda ch'ayachichpa, ancha pagimkurqan. Chay runaqam prubinsya Samaryamanda karqan. (Chay samaryanumkunam isrraylinumkunawan ancha ch'iqninamkuqllampa.) 17 Chaymi Jisusqa nirqan: Chay fiyu qachyaymanda kach'amkaqkunaqa ¿manachu dyis runamkuna karqan? ¿Maypinataq chay nwibiqa? 18 ¿Ima, kay furastirullachu kutimuchqa, Dyusta alabanambaqqa? nichpa. 19 Chaymandaqam Jisusqa chay runata nirqan: Atarichpana riy. Nuqampi yuyamkuchpam, kach'amkachqana kangi, nichpa. 20 Farisiyumkunaqam Jisusta tampurqan: Ima tyimputaq Dyusqa rin chamuq kamachimkuqqa? nichpa. Chaymi Jisusqa pallkunata nirqan: Dyus runamkunampa chunqumbi kamachimkumptinqam, mana ringillampachu atiq rimkayta. 21 Manam pimpis rinchu niq: Kaypim, waq maypim Dyusqa kamachimkullkan, nichpaqa. Chaqa Dyusqam paypi yuyamkuqkunampa chunqumbi kamachimkullkan, nichpa. 22 Chaymandaqam Jisusqa yach'amkuqningunata nirqan: Suq diyamkunam ancha ringillampa munaq rimkawayta. Piru manaraqmi ringillampachu rimkawaq. 23 Chay diyamkunampiqam wamkingunaqa rinllampa nichuq: ¡Kaypinam Jisumkristuqa! ichu rin nichuqllampa: ¡Waqpim payqa! nichpa. Piru chaychina nichumptinllampampis, ama kriyiyllampachu ni pallkunawan riyllampachu. 24 Chaqa nuqa Dyusmanda Chamuq Runam llimpyaq rrilampaguchina rini kutimuq. Manchu rrilampaguqa tumkuy syilumpi lliwyan kay ladumanda suq ladumkaman. Chaychinallam nuqa Dyusmanda Chamuq Runampis yumbay ladumkunampi lliwyachpa, rini kutimuq. 25 Piru puntatam ancha rini padisiq. Chaqa kay tyimpumpi runamkunaqam mana baliqpaq rinllampa riqsiwaq. 26 Nuwimpa tyimpumbi kawsaqkunachinam, nuqa kutimunay tyimpumpimpis rinllampa kawsaq. 27 Chaqa chay Nuwimpa tyimpumbiqam mimkullkarqanllampa, umpyallkarqanllampa. Wamkinqam kasarallkarqan. ?Wamkinqam chinangunata kasarachillkarqan? chay Nuwi wambuq wasinman yallkunan diyamkaman. Chaymandaqam ancha jwirtita tamyarqan. Chaymi runamkuna warmimkunaqa ch'uqachpa, limpu wañurqanllampa. 28 Chay Lutpa tyimpumbi pasachqanchinam rin kaq. Chaqa chay tyimpumpiqam runamkunaqa mimkullkarqan, umpyallkarqan, tumkuy imata randillkarqan, randimkullkarqan, tarpumkullkarqan, wasimkullkarqanllampa. 29 Piru chay Sudumamanda Lut lluqchichqan diyaqam syilumanda ninamkuna asufriwan ichkimuchpa, chay runamkunata, warmimkunata limpu wanchirqan. 30 Chaychinallam rin kaq, nuqa Dyusmanda Chamuq Runa syilumanda kutimumptiypis. 31 Chayri chay diyampiqa mayqan wasimba sawambi kaqqa amana yallkunqachu, imangunata surqunambaqqa. Chaychinallar ch'amkrambi kaqkunampis amana wasinmanqa kutinqachu. 32 Lutpa warminda pasachqandar yuyayllampa. [Nuta: Chaqa payqam Sudumamanda kallpallkachpa, imkiman timkramkachpa, champamkurqan. Chaymi chaypilla das wañurqan. Liyiy Ganasis 19.26ta] 33 Chaychinam mayqannimki nuqata ñigawachpa bidallkita wachanallkimpaqqa, ringi chingaq tumkuy tyimpumpaq. Piru nuqampi kriyichqallkirallku wanchichumptinllampam, nuqa rini wachachuq, tumkuy tyimpu nuqawan kawsanallkimpaq. 34 Allimptam nillkillampa, chay tyimpumpi suq kamampilla ichkay puñullkamptinqam, Tayta Dyusqa suqta rin ampaq, suqta rin dijaq. 35 Chaychinam ichkay warmimkuna pulla kutamkullkamptinqa, suqta rin ampaq, suqta rin dijaq. 36 ?Ichkay runa ch'amkrambi kallkamptimbismi, suqta rin ampaq, suqta rin dijaq.? 37 Chaychina nimptinqam, chay yach'amkuqningunaqa tampurqanllampa: Taytitu, ¿maypitaq kay nichqallkiqa rin kaq? nichpa. Chaymi Jisusqa nirqan: Suq wañuchqa kamptinqam, chaypi chingumkuna chutilla tandamkachpa muyullkan, ¿manachu? (Chaychinallam chay tyimpumpimpis tumkuy ima pasachqanda rimkachpalla, das ringillampa yach'aq: Waqpim, nichpa.)
1 Jisusmi suq kumparasyunda rurarqan, ama disanimamkachpachu, Dyusman mañamkunanllampa. Chaymi nirqan: 2 Suq llaqtampim karqan suq juyis. Chay juyismi mana rrispitaqchu ni Dyusta ni runa masingunata. 3 Chay llaqtampiqam suq biyudampis karqan. Payqam chay juyisman richpa, suq dimandata rurarqan kuntrambaq. Chaymi kutin kutin juyisman richpa nirqan: Siñur juyis, kuntrawaqwan allin justisyata ruraway, nichpa. 4 Piru chay juyisqam achka tyimputa chay biyudataqa mana kasurqanchu. Chaymandaqam kaychina yuyarqan: Manam rrispitanichu ni Dyusta ni runa masillkunatampis. 5 Piru kay biyudaqam kutin kutin chamun piñachiwaq, dimandanda allichanaypaq. Chaymi yanampachpa allichachaq. Chaqa achka bwiltasta chamuchpaqach'i, mana dijawanqachu samanaypaq, nichpa. 6 Chaychina nichpaqam, Jisusqa pallkunata nirqan: Allita yuyayllampa chay malu juyis nichqambaq. 7 Piru Taytanchiq Dyusqam ancha allin. Chaymi mana unayachpachu, amkrachqangunata dasna rin wachaq, payman punchawnindin, tutampnindin mañamkumptinllampa. 8 Chaqa Dyusqam chay amkrachqangunata das rin wachaq. Piru nuqa Dyusmanda Chamuq Runa kay pachaman kutimumptiyqam, ¿kanqachuraq nuqampi yuyamkuqkuna ichu mana? nichpa. 9 Wamkingunaqam yuyarqan: Nuqam chay suqkunamanda Dyusta mas allita kasuni. Chaymi pallkunaqa mana balinllampachu, nichpa. Chayrallkum Jisusqa kay kumparasyunda rurarqan: 10 Ichkay runamkunam rirqanllampa Dyuspa adurana wasinman, chaypi Dyusman mañamkunanllampa. Suqqam farisiyu dumktrinayuq karqan. Suqqam kuntribusyunda kubramkuq karqan. 11 Chay farisiyuqam chayachpa, nirqan: Dyusitu, dyusilumpagiri; manam chay uchayuq runamkunachinachu kani. Chaqa wamkingunaqam suwamkunllampa, ichu rrispituyuq kachpampis, suqwan puñunllampa, ichu suq laya mana allimkunata ruranllampa. Piru nuqaqam mana pallkunachinachu kani, ni kay runa kuntribusyunda kubramkuqchinachu kani. 12 Kanan kada simanam ichkay diyata ayunani. Tumkuy ima ganachqaymandam dyismuyta qullki, nichpa. 13 Piru chay kuntribusyunda kubramkuqqam mana ni alli qamimkachpachu, ni syiluman champamkuchpachu, achwan pichunda tamkachpa nirqan: Dyusitu, llamkimpawayri. Chaqa nuqaqam ancha uchayuq kani, nichpa. 14 Chaymi nuqaqa nillkillampa, chay kuntribusyunda kubramkuqqam uchangunamanda pirdunaduna, kutirqan wasinmanqa. Piru Tayta Dyusmi chay farisiyutaqa mana pirdunarqanchu. Chaqa Dyusqam chay palanganutaqa ultimumpi rin ruraq panqamkunambaq. Piru chay umildi kaqkunataqam ancha kamachimkuqpaq rin ruraq. 15 Wambritumkunatam ampamurqanllampa Jisusman, sawanllampampi mamkinda rurachpa, Dyusman mañamkunambaq. Piru yach'amkuqninguna chayta rimkachpa, anyarqanllampa chay wambritumkuna ampamuqkunata (Jisusta ama piñachinanllampa). 16 Piru Jisusqa chay wambritumkunata qayachpa, yach'amkuqningunata nirqan: Ama arkayllampachu. Dijayllampa chay wambritumkunata, nuqaman chamunambaq. Chaqa Tayta Dyus chumaqta kamachimkumptinqam, kay wambrituchina kaqkuna paywan rinllampa kawsaq. 17 Allimptam nillkillampa, kay umildi wambrituchina kaqkunallam Dyusta kasuchpa, rin kawsaq paywanqa. Piru palanganumkunaqam mana Dyuswan rinllampachu kawsaq. 18 Suq kamachimkuq runam Jisusta kaychina tampurqan: Allin yach'achimkuq Taytitu, ¿imatam atini rurayta, Dyuswan tumkuy tyimpu kawsanaypaqqa? nichpa. 19 Chaymi Jisusqa nirqan: Imarallkutaq niwangi: Allin nichpaqa? Tayta Dyusllam allinqa. Manam masqa kanchu. 20 Qamqam yach'angi Dyuspa Santu Librumbi kamachimkuchqambaq: Warmiyuq kachpaqa, ama suq warmiwanqa puñuychu. Ama wanchimkuychu. Ama suwamkuychu. Ama yanqaqa pimpaqpis llullamkuychu. Taytallkita, mamallkita rrispitay, nichpa. 21 Chaychina Jisus nimptinqam, chay runaqa nirqan: Tumkuy kallkunatam wambraymandampacha kasuchqa kani, nichpa. 22 Chayta uyachpaqam, Jisusqa nirqan: Kaysitullam faltachungi ruranallkimpaqqa. Tumkuy ima kaqnimkita randimkuchpa, chay mana nimayuqkunata quy. Chaychina quchpaqam, syilumpi tumkuy imayuq ringi kaq. Chaymandaqam chamuy, nuqawan purinallki, nichpa. 23 Chayta nimptinqam, chay runaqa limpu malaganayarqan, ancha kampuq kachqanrallku. 24 Chaymi Jisusqa, ancha malaganayaqta rimkachpaqa nirqan: Ancha trabajusraq, kampuq runamkuna Dyusta kasunanllampa, paywan kawsananllampa. 25 Ancha trabajusraq kanman, chay atun animal kamillu awjamp rinrinda pasanambaq. Piru mas trabajusmi kanman, suq kampuq runa Dyuswan kawsanambaqqa, nichpa. 26 Chaymi chayta nimptinqa, chay uyaqkunaqa tampurqan: Chaychina kamptinqa, ¿pitaq atinman wachamkayta? nichpa. 27 Chaymi pallkunataqa nirqan: Runamkunallaqam mana nimatampis atinmanllampachu wachamkayta. Piru Taytanchiq Dyusmi atin wachaytaqa, nichpa. 28 Chaymandaqam Pidruqa nirqan: Taytitu, nuqallkunaqam tumkuy imayllampata dijachqallampana kani, qamwanna purinaypaqllampa, nichpa. 29 Chaymi Jisusqa nirqan: Allimptam nillkillampa, mayqan runa dijaq wasinda, taytanda, mamanda, masangunata, warminda, wambrangunata, Dyusta kasunambaq, 30 chay dijachqambaq mas achkata rin ch'askiq kay mundumpiqa. Piru manam chaytallachu rin ch'askiqqa. Achwanmi syilumpi tumkuy tyimpu rin kawsaq Dyuswan, nichpa. 31 Jisusmi yach'amkuqningunatalla suq laduman ampachpa, nirqan: Kananqam anaq Jirusalinmanna rinchiq riq. Chaqa Dyuspaq rimaqkuna nuqampaq yumbay nichqangunaqam Jirusalimbi rin kumpliq. 32 Chaypiqam furastiru runamkunamanna rinllampa intrigamkuwaq. Kanan mana baliqkunata niwachpam, rinllampa asimpawaq. Suq lastima rurawachpam, rinllampa tuqampawaq. 33 Asutiwachpam, rinllampa wanchiwaq. Piru kimsa diyamandam rini kawsamuq, nichpa. 34 Piru chaychina Jisus nimptinqam, chay yach'amkuqningunaqa mana intyindirqanchu: ¿Imampaqraq chaychinaqa nirqan? nichpa. Chaqa yuyayninllampa tutayaqpichina karqan. Chaymi mana atirqanllampachu intyindiyta. 35 Jisus ch'ayallkamptinna Jirimku llaqtamanmi, suq sarku runa ñambi tiyachpa, limuch'nata mañamkullkarqan. 36 Chaymi ancha achka runamkuna chayta pasallkaqta uyachpaqa, tampurqan: Imataq kachqa? nichpa. 37 Chaymi paytaqa nirqanllampa: Jisus Nasaritmanda kaqmi kayta pasallkan, nichpa. 38 Chaymi payqa ancha jwirtita qayamkurqan: Unay Dabidpa Karu Willkan Jisus, llamkimpawayri! nichpa. 39 Chaymi Jisuspa ñawpanda riqkunaqa chay sarkutaqa anyarqanllampa uyaranambaq. Piru payqam achwamba mas jwirtita qayamkurqan: Unay Dabidpa Karu Willkan, llamkimpawayri! nichpa. [Nuta: Unay Dabidpa Karu Willkanmi munan niyta: Dyus Amkrachqan Wachadur, nichpa.] 40 Chaymi Jisusqa rillkachqanmanda chayachpa, kamachirqan: Riyllampa ampamuy waq runata, nichpa. Ch'ayachimptinqam, Jisusqa tampurqan: 41 Imatam munangi ruranaypaq qambaqqa? nichpa. Chaymi chay runaqa nirqan: Taytitu, munanim ñawillkunata kach'amkachinallki champamkunaypaq, nichpa. 42 Chaymi Jisusqa nirqan: Nuqampi allita kriyichqallkirallkum nillki, champamkuy, nichpa. 43 Chayta nimptinllam, chay runaqa chay uras atirqanna rimkamkuyta. Chaymi Tayta Dyusta ancha alabachpa, Jisuspa imkindana rirqan. Kanan yumbay rimkaqkunampismi Taytanchiq Dyusta ancha alabarqanllampa.
1 Jisusmi Jirimku llaqtampa ch'awpinda pasallkarqan. 2 Chay llaqtampim karqan suq ancha kampuq runa Samkiyu chutiq. Payqam kuntribusyunda kubramkuqkunampa kamachimkuqnin karqan. 3 Chay Samkiyum ancha munarqan Jisusta rimkayta. Lumkismi ancha achka runa kamptin, tamkchita kachqanrallku, mana atirqanchu rimkaytaqa. 4 Chaymi payqa Jisuspa ñawpanda kallpachpa, suq yura simkamuru chutiqman lluqchirqan, chayta pasallkamptin, rimkanambaq. 5 Chaychina chay muntimpi kallkamptinqam, Jisusqa chayta pasaqchina anaqman champamkuchpa, paytaqa rimkarqan. Chaymi Jisusqa nirqan: Samkiyu, utqa ichkimuy, wasimkimpi pusadata quwanallki. Chaqa Taytay Dyusmi munan, qamwan kidanaypaq, nichpa. 6 Chaymi Samkiyuqa utqaymaya ichkimuchpa, kuchimkuchpa amparqan wasinman. 7 Chaychina ampamptinqam, yumbay chay rimkaqkunaqa kaychina ancha rimatimkurqanllampa: Suq uchayuq runampa wasinmanmi Jisusqa rin kidaq, nichpa. 8 Kanan Samkiyuqam chayachpa, Jisusta nirqan: Taytitu, tumkuy imay kaqkunatam midya partita rini quq chay mana nimayuqkunata. Mayqanda ingañachpa, imanda quch'ichqa kachpampismi, ch'usku tantuta rini kutichiq, nichpa. 9 Chaychina nimptinqam, Jisusqa nirqan: Kananqam Tayta Dyusqa kay Samkiyuta wasimbi tiyaqkunata wachachqana, chay unay Abrajanchina kriyichqanllamparallku. 10 Chaqa nuqa Dyusmanda Chamuq Runaqam chamuchqa kani chay chingachqa kaqkunata maskachpa, wachanaypaq, nichpa. 11 Jisusta chay uyallkaqkunaqam yuyarqanllampa: Jisusqam Jirusalinman ch'ayallkanna. Chaymi dasna rinchiq rimkaq paytaqa, chumaqta kamachiwamptinchiq, nichpa. Chaymi Jisusqa kay kumparasyunda rurachpa nirqan: 12 Suq kamachimkuq runam suq karu kamachimkuq nasyunman rirqan gubyirnumpaq numbrananllampa, kutimuchpa nasyunninman, chaypi gubyirnun kanambaq. 13 Piru manaraq richpaqam, dyis kriyadungunata qayachpa, kadunuta qurqan suq qallay ancha baliqta. Chaymandaqam pallkunata nirqan: Kutimunallkaman kay qallayniyta trabajachiyllampa, nichpa. 14 Piru llaqta masingunam ch'iqnirqan paytaqa. Chaymi wamkin runamkunata imkinda kach'arqanllampa chay karu nasyunman, paypa kuntran kaychina rimanambaq: Nuqallkunaqam mana munanillampachu chay runa gubyirnuy kanambaqqa, nichpa. 15 Piru chay kamachimkuq runaqam kargunda ch'askirqan. Chaymanda kutimuchpaqam, chay dyis kriyadun qallaynin quchqandaqa qayachirqan tampunambaq: ¡Allkatam qallayniyta ganachichqallampa kangi? nichpa. 16 Chaymi chay punta kriyadunqa chamuchpa nirqan: Taytitu, kay qallaynimkitaqam dyis tantus masta ganachichqa kani, nichpa. 17 Chaymi chay kamachimkuqninqa kriyadunda nirqan: Ancha allin kriyaduymi kangi. Kay achla qallayniyta allita trabajachimptimkim, rini numbrachuq, dyis llaqtamkunampa kamachimkuqnin kanallkimpaq, nichpa. 18 Chaymandaqam suqpis chamuchpa nirqan: Taytitu, qallaynimkitaqam ganachichqa kani sinku tantus masta, nichpa. 19 Chaymi chay patrunninqa paytampis nirqan: Qamqam sinku llaqtamkunampa kamachimkuqnin ringi kaq, nichpa. 20 Chaymandaqam suqpis chamuchpa nirqan: Taytitu, kaypim qallaynimki. Suq pañuypi qampichpam waqaychachqa kani. 21 Chaqa ancha wampu kachpam, suqkuna waqaychachqanda qamna tandangi. Suqkuna tarpumkuchqandam qamna kusichangi. Chaymi ancha manchachurqaq, nichpa. 22 Chaychina chay kriyadun nimptinmi, chay patrunninqa kaychina nirqan: Qamqam ancha malu kangi. Chay kimkin chimimkillam kundinachungi: Uchayuqmi kangi nichpa. Qami niwallkangi wampu kachpa, suqkuna waqaychachqanda tandachqayta, suqkuna tarpumkuchqanda kusichachqayta. 23 Chaychina nuqampaq yach'achpaqa, ¿imarallkutaq chay qallayniytaqa mana rurarqallkichu bankuman, kutimuchpaqa wach'ayniyuqta surqunayta? nichpa. 24 Chaychina nichpaqam, chaypi kaqkunata kamachirqan: Chay malu kriyaduyta qallayta quch'ichpa, chay dyis qallayniyuqta quyllampa, nichpa. 25 Chaymi pallkunaqa nirqanllampa: Taytitu, piru chay suq kriyadullkiqam dyis qallayniyuqna. ¿Imampaqnamiri qallayniyuq kaqtaqa masta quchaqllampa? nichpa. 26 Piru patrunninqam nirqan: Uyawayllampa, yumbay chay imayuqkunam masta rinllampa ch'askiq. Chay mana nimayuqqam chay achlita kaqninda rin pyirdiq (mana allita trabajachichqanrallku). 27 Waq kuntrallkunampismi mana munanllampachu kamachimkuqnin kanaypaqqa. Chayri pallkunata kay ñawpayman ampamuchpa, wanchiyllampa, nichpa. 28 Challkunata yach'achimkuchpaqam, Jisusqa ñawpanllampata anaq Jirusalinmanna rirqan. 29 Chaymi riqchinaqa, yaqqana ch'ayachpa Bitfaji llaqtaman, Bitanilla (Bitaniya) llaqtaman, chay Ulibu lumampa sirkambi kachpaqa, ichkay yach'amkuqninda nirqan: 30 Riyllampa waq chimba kasiriyuman. Waqman ch'ayachpaqam, ringillampa tariq suq burritu watachqata. Chay burritumpiqam manaraq ni pimpis purichqachu. Chayta paskachpa, ampamuyllampa. 31 Piru mayqan nichumptinllampa: ¡Imampaqmi paskangillampa? nichpaqa, niyllampa: Siñurninchiqmi nisitan kay burrituta, nichpa. 32 Chaychina kamachimptinqam, chay yach'amkuqninguna richpa, Jisus nichqanchina burritutaqa tarirqanllampa. 33 Chaymi ampamunanllampa paskallkamptinqa, dwiñungunaqa tarichpa tampurqan: Imampaqmi burrituyta paskallkangillampa? nichpa. 34 Chaymi pallkunaqa nirqan: Siñurninchiqmi nisitan. Chaymi ampanillampa, nichpa. 35 Chaychina dwiñunda nichpam, burritutaqa ampamurqanllampa Jisusman. Chaymandaqam chay burritumpa sawanman kampangunata rurachpa, Jisusta muntachirqanllampa. 36 Chaymandaqam yumbay pallkunaqa Jisuspa ñawpanda rirqanllampa, kampangunata ñambi mandachpa, chay burritu sawanda rinambaq. 37 Kanan Jisuspi kriyiqkunam ancha achka paypa pullan rillkarqanllampa. Chaymi pallkunaqa chay Ulibu lumampa bajadanman ch'ayallkachpaqa, ancha kuchimkuchpa, ancha jwirtita kunyarqanllampa. Kanan pallkunaqa yumbay chay milagrumkunata rimkachqanrallkum, Dyusta ancha alabarqanllampa: 38 Biba biba! ¡Tayta Dyus ancha yanampanqa kay gubyirnunchiqta, paypa rrimplasun chamullkaqta! ¡Anaq syilumpimpisri ancha kuchimkuchpa, Taytanchiq Dyusta alabanqallampa! nichpa. 39 Chaychina Jisusta ancha alabamptinllampam, wamkin farisiyu dumktrinayuqkunaqa nirqan: Yach'achimkuq Taytitu, kay yach'amkuqnimkimkunataqa anyachpa uyarachiy, nichpa. 40 Chaymi Jisusqa nirqan: Kay runamkuna uyaramptinqach'i, rumimkunana rinllampa alabawaq, nichpa. 41 Chaychina Jirusalinman yaqqana ch'ayallkachpaqam, Jisusqa chay atun llaqtata champachpa, waqachpa, nirqan: 42 Ay Jirusalimbi tiyaqkuna! Ancha allich'i kanman kay diyampi nuqampaq intyindinallkillampa, ¿pim Jisumkristu? nichpa. Chaqa nuqam chamuchqa kani yanampachuq, chumaqta kawsanallkillampa. Piru chaytaqam mana atingillampachu intyindiytaqa. 43 Suq diyam ancha ringillampa padisiq. Chay diyaqam kuntrallkimkunaqa rin kurralachuqllampa, murallata rurachpa. Chaychina kurralachuchpam, ancha rin maqachuqllampa. 44 Kanan wasimkillampatam pamba pamba bulachpa, rinllampa wanchichuqllampa. Chaymi llaqtallkimpiqa mana nima rumi pirqachqataqa rinllampachu dijaq. Chaqa chamumptiy wachachuqmi, qamkunaqa disprisyawachqa kangillampa. 45 Jisumkristu Tayta Dyuspa adurana wasinman yallkuchpaqam, tarirqan tumkuy imata randimkullkaqkunata, randillkaqkunata. Chaymi pallkunataqa qatiqchina nirqan: 46 Taytanchiq Dyusmi Santu Librumbi nin: Adurana wasiyqam nuqaman mañamkunanllampa, nichpa. Piru qamkunaqam ladrungunampa mach'aynindachina rurachqallampa kangi, nichpa. 47 Chaymandaqam Jisusqa tumkuy diyamkuna Dyuspa adurana wasimbi yach'achimkuq. Piru kamachimkuq isrraylinu kuramkuna, Muysispa liyningunata yach'achimkuqkunaqam, chay llaqtampa awturidarningunawan kunanamkurqanllampa, Jisusta wanchinanllampa. 48 Piru achka runamkunam Jisustaqa ancha allita uyallkarqan. Chaymi chay kuntraqkunaqa chay uyaqkunata manchachpa, mana nimatampis atirqanllampachu rurayta Jisustaqa.
1 Jisusmi suq diyam Dyuspa adurana wasimbi chumaq nutisyanda yach'achimkullkarqan. Chaychina rurallkamptinmi, ch'ayamurqanllampa kamachimkuq isrraylinu kuramkuna, Muysispa liyningunata yach'achimkuqkuna, kamachimkuq ansyanumkunampis. 2 Pallkunaqam Jisusta tampurqanllampa: Mayñ, niwayllampa. ¿Ima karguyuqtaq kangi? ¿Pitaq numbrachuchqa, awturidar kachpa, kallkunata ruranallki? 3 Chaychina tampumptinllampaqam, Jisusqa pallkunata nirqan: Puntata nuqampis suq tampunata tampuchqallkillampa. Mayñ, niwayllampa: 4 Jwan Chutichimkuqtaqa ¿pitaq numbrarqan, runamkunata chutichinanqa? ¿Dyuschu kamachirqan, ichu runamkunalla? nichpa. 5 Chaymi suqnin suqnin pallkunampura parlarqanllampa: Nimptinchiq: Dyusmi numbrarqan Jwandaqa, nichpaqach'i, niwachun: Chaychina kamptinqa, qamkunaqa ¿imarallkutaq mana kriyirqallkichu paytaqa? nichpa. 6 Piru nimptinchiq: Runamkunallam paytaqa kamachirqan, nichpaqach'i, yumbay kay runamkuna rumimkunawan sitawaqninchiq wanchiwanchiqman. Chaqa pallkunaqam ancha kriyinllampa: Jwanqam Dyuspaq rimaq karqan, nichpa. 7 Chaymi chaychina yuyachpaqa, Jisusta nirqanllampa: Manam yach'anillampachu: Pim Jwandaqa kamachirqan chutichimkunanqa, nichpa. 8 Chaychina Jisusta nimptinllampaqam, paypis nirqan: Nuqampismi mana nichqallkillampachu pi kamachiwamptinmi, kallkunata rurani, nichpa. 9 Chaymi Jisusqa suq kumparasyunda rurachpa, chay runamkunata nirqan: Suq runach ch'amkrambi ubasta tarpuchpa, partidaryumkunata maskachpa, dijarqan chay tarpudunda rimkanambaqllampa. Chaymandaqach payqa karuman richpa, ancha unayarqan. 10 Chaychi kusicha tyimpu ch'ayamptinqa, suq kriyadunda kach'arqan, chay partidaryunguna partinda qunambaq. Piru chay partidaryungunaqach chay kriyadundaqa mana nima ubasta quchpachu, achwan maqachpa, illaqtalla kach'arqanllampa. 11 Chaymandaqach chay dwiñuqa suq kriyadunda kach'arirqan. Piru chay partidaryungunaqach chay kriyadutampis musyachpa, maqachpa, mana nimatampis quchpachu, illaqtalla kach'arqanllampa. 12 Chaychina ruramptinllampaqach, chay dwiñuqa suq kriyadundana kach'arirqan. Piru chay partidaryungunaqach chaytampis suq lastima chuqri chuqri maqachpa, qatirqan chay ch'amkramanda. 13 Chaymandaqach chay wirta dwiñuqa nirqan: ¡Imatataq kananqa atini rurayta? Mayñ, kay ancha kuyachqay churiyta kach'achaq, partiyta ampamunambaq. Paqta paytaqa chumaqta ch'ayachinqallampa, nichpa. Chaychi chaychina nichpaqa, churindana kach'arqan. 14 Piru chay partidaryungunaqach saqamuqta rimkachpaqa, kaychina parlarqanllampa: Kay churinqam irinsyiru rin kaq. Chayri amkullampa wanchiq, nuqanchiqpaqna kay ch'amkra kidanambaq, nichpa. 15 Chaychina parlachpaqach, chay ch'amkramanda sawaman surquchpa, chay dwiñumpa churinda wanchirqanllampa. Chaychina nichpaqam, Jisusqa tampurqan: Chay ch'amkrampa dwiñun kutimuchpaqa, ¿imataraq ruranqa chay partidaryungunataqa? nichpa. 16 Chaymandaqam pay kimkin nirqan: Chay ch'amkrampa dwiñun chamuchpaqam, chay partidaryungunata rin wanchiq. Wanchichpaqam, suqkunatana ch'amkrandaqa rin quq trabajanambaq, nichpa. [Nuta: Chay ch'amkra dwiñuqam munan niyta Tayta Dyus. Chay malu partidaryumkunaqam munan niyta isrraylinumkunampa kamachimkuqninguna.] Chaychina Jisus nimptinqam, chay uyaqkunaqa nirqanllampa: Amar chaychinaqa kanqachu! nichpa. 17 Piru Jisusqam chay runamkunata champachpa nirqan: Chaychina kanqa. Chaymi Dyuspa Santu Librumbi suq ancha baliq rumimpaq kaychina nin: Albañilkuna wichumkuchqanllampa rumiqam kananqa simyintumpa mas baliq rumin timkramkachqa, nichpa. 18 Chaymi mayqan chay ancha baliq rumimpa sawambi bulamkaqqam piti piti rin kidaq; ichu chay rumi mayqamba sawan bulamkachpaqa, limpu chankachpa, piti piti rin ruraq, nichpa. [Nuta: Chay wichumkuchqa rumiqam Jisumkristu. Chay piti piti uchyamkaqqam paypi mana kriyiqkuna.] 19 Chay kamachimkuq isrraylinu kuramkuna, Muysispa liyningunata chay yach'achimkuqkunawanmi intyindirqanllampa: Jisusqam chay kumparasyundaqa rurachqa, nuqanchiqkunata kuntrawaqninchiq, nichpa. Chaymi chay uras munarqanllampa prisuyta Jisustaqa. Piru yumbay chay uyamkuq runamkunata manchachpam, mana pimpis almitimkarqanchu prisuytaqa. 20 Chaymi Jisusta kuntraqkunaqa ancha champarqanllampa, paqta imampi imachina pandanman, nichpa. Chaychina yuyachpaqam, wamkin runamkunata pagarachpa nirqanllampa: Jisusman richpa, ancha allin kasuqkunachina tumkuchpa, allita uyay, imampi pandamptin, chaypaq tumbachpa, gubyirnumpi dimandananchiq, nichpa. 21 Chaymi chay uyamkuqkunaqa yanqa Jisusta nirqanllampa: Yach'achimkuq Taytitu, qamqam allimp kaqtalla Dyuspaq yach'achimkungi. Kanan qamqam mana ni pitampis sawachachpachu, allitalla rurangi. 22 Mayñ, niwayllampa, ¿allichu Rrumampa gubyirnunda kuntribusyunda pagarananchiqllampa ichu mana? nichpa. 23 Piru Jisusqam yach'arqan: Yanqam chaychinaqa tampuwallkanllampa prisuwananrallku, nichpa. Chaymi pallkunataqa nirqan: Imarallkutaq chaychinaqa tampuwangi? 24 Mayñ, rimkachiwayllampa suq qallayta. ¿Pimpa rritratunda, chutindam rurachqallampa chay qallaypiqa? nichpa. Chaymi pallkunaqa nirqanllampa: Chay qallayqam mas kamachimkuq gubyirnu Sasarpa rritratunwan, chutinwan, nichpa. 25 Chaymi Jisusqa pallkunata nirqan: Chaychina kamptinqa, chay mas kamachimkuq gubyirnu Sasarpa kaqtaqa, payta quyllampa. Dyuspa kaqtaqa, Dyusta quyllampa, nichpa. 26 Chaymi chay uyamkuqkunaqa, chay tampunamkunawan tumkuy runamkunampa ñawpambi pandachiyta munachpaqa, mana nimatampis atirqanllampachu. Achwanmi allita kuntistamptinqa, pallkunaqa ancha ispantachqata, uyarampllana (uyarallana) kidarqanllampa. 27 Chaymandaqam wamkin sadusiyu dumktrinayuqkuna Jisus kallkachqanman ch'ayarqanllampa. Chay sadusiyumkunaqam kriyinllampa: Wañuchqamkunaqam mana rinllampachu kawsamuq, nichpa. Chaymi Jisusta tampurqanllampa: 28 Yach'achimkuq Taytitu, (unay tyimpumpim) Muysisqa librumbi iskibrichpa, kamachimkurqan, suq warmiyuq runa manaraq wambrayuq kachpa wañumptinqa, chay almampa masanna biyudawan kasaranqa, chay biyudampi wambrayuq kamptin, chay alma masamba wambran kanambaq. 29 Chaymi munanillampa tampuchuyta: Suq ayllumpich syiti ullqu masampura karqan. Chay syitimanda kulamka masanqach warmimkurqanna. Piru manaraq wambrayuq kachpach wañurqan. 30 Chaychina wañumptinqach, chay almampa minur masanna biyudawanqa kasararqan. Paypischi manaraq wambrayuq kachpa wañurqanna. 31 Chaymandaqach chay mas minur masanna biyudawanqa kasararqan. Paypischi manaraq wambrayuq kachpa wañurqan. Chaychinach syitindin chay warmiwan kasararqanllampa. Piru manach ni mayqannimbis chay warmimpiqa wambramkurqanchu. 32 Chaymandaqach warmimpis wañurqanna. 33 Chaychina wañuchqamkuna allimpta muchuqmanda kawsamumptinqach'i, ¿mayqannimba warminnaraqri kanman? Chaqa syitindimba warminchi kachqa, nichpa. 34 Chaychina tampumptinllampaqam, Jisusqa nirqan: Manam ni mayqannimba warmin kanqachu. Chaqa syilumpiqam manana ni warmiyuq ni runayuq rinchu kaq. Kay mundumpillam runamkunaqa churingunata kasarachin. Pallkunampismi kasaranllampa. Piru Dyusta kasuqkuna muchuqmanda kawsamuchpaqam, syilumpiqa manana ni runayuqchu ni warmiyuqchu rinllampa kaq; ni chinangunata rinllampachu kasarachiq. 36 Chaqa kawsamuchpaqam, syilumpiqa Dyuspa wambrangunana kachpa, chay anjilningunachina manana nunka rinllampachu wañuq. 37 Ari, rinllampam kawsamuq. Chaqa kimkin Muysismi yach'achimkurqan: Wañuqkunam rin kawsamuq, nichpa. Payqam chay lumyallkaq sach'ata rimkachpa, Dyus nichqanda kaychina uyarqan: Kanangamanmi nuqa Abrajamba, Isamkpa, Jamkubumpa Dyusnin kani, nichpa. 38 Chaychina Taytanchiq Dyus chay almamkunampaq nimptinmi, yach'anchiq: Chay almamkunam Dyuspaq kawsallkanraq, nichpa. 39 Chaychina Jisus nimptinqam, Muysispa liyningunata wamkin yach'achimkuqkunaqa nirqan: Yach'achimkuq Taytitu, ancha allitam nichqa kangi, nichpa. 40 Chaymi chay urasmandampacha manana pimpis almitimkarqanchu Jisusta tampuyta. 41 Chaymandaqam Jisusqa pallkunatampis tampurqan: Mayñ, ¿pitaq Dyus Amkrachqan Wachadurqa? ¿Imarallkutaq chay Wachadurpaqqa ningillampa: Dabidpa karu willkanmi, nichpaqa? 42 Chaqa kimkin Dabidmi Salmus librumbi nin: Tayta Dyusmi Kamachimkuqniyta nirqan: Allin laduypi tiyay, 43 kuntrachuqkunata binsichpa, ch'amkimkimpa waranman ruranallkaman (qamta kasuchunanllampa), nichpa. 44 Chaychina chay Amkrachqan Wachadur chay Dabidpa karu willkan kamptinqa, ¿imarallkutaq kimkin Dabid chay Wachadurpaqqa nin: Kamachimkuqniy, nichpaqa? Chaychinaqa ¿imachinataq Dabidpa karu willkanqa atin kayta, Kamachimkuqnin nimptinqa? 45 Yumbay uyamkuqkunampa ñawpambim Jisusqa yach'amkuqningunata nirqan: 46 Allita uyawayllampa, ama Muysispa liyningunata yach'achimkuqkunachinaqa kayllampachu. Chaqa pallkunaqam ancha palanganu kachpa, gustanllampa rrastramkallkaq mudanangunata ruramkuyta. Chaymandaqam plasamkunaman rin, yumbay chumaqta nampallkunanllampa. Kanan sinaguga wasimkunaman richpampismi, ancha gustanllampa ñawpaman pasachpa, kamachimkuqkunampa tiyanangunampi tiyayta. Ampamptinllampa mimkuqpismi, ancha gustanllampa kamachimkuqkunampa tiyanangunampi tiyayta. 47 Chaychina allingunampaq tumkuchpam, biyudamkunampa wasingunata quch'inllampa. Chaymandaqam ancha unayta Dyusman mañamkunllampa, rimkaqkuna ninambaq: Pallkunaqam Dyusta ancha aduranllampa, nichpa. Chaymi mas kastigadu rinllampa kaq.
1 Dyuspa adurana wasimbim Jisus kampuqkunata rimkarqan, ufrindanda kajungunaman wichumptinllampa. 2 Chaypim rimkarqambis suq ancha pubri biyudata, ichkay qallitay mana balurniyuqta wichumptin. 3 Chaymi Jisusqa nirqan: Allimptam nillkillampa, kay pubri biyudita quchqanqam Dyuspaqqa ancha balin maski yumbay chay suqkuna quchqanmanda. 4 Chaqa yumbaymi ufrindataqa qunllampa subraq qallayninda. Piru chay pubri biyuditaqam mimkunanda randinambaq kaqta limpulla qurqan, nichpa. 5 Wamkingunaqam Dyuspa adurana wasimbaq parlallkarqanllampa: Rimkay, ancha chumaqmi kay rumingunaqa. Kanan ancha chumaq rrigalumkunatam quchqallampa, chumaqyachinanllampa kay atun wasita, nichpa. Chaymi Jisusqa pallkunata nirqan: 6 Suq diyam kay rimkachqallkitaqa limpu rinllampa bulaq. Chay diyampiqam manana ni suq rumi patachaduqa rinchu kidaq, nichpa. 7 Chaymi Jisusta kaychina tampurqanllampa: Yach'achimkuq Taytitu, ¿ima tyimpum kay nichqallkiqa rin kaq? ¿Imata rimkachpam yach'achaqllampa: Kay munduqam rin uchyamkaqna, nichpaqa? 8 Chaymi Jisusqa nirqan: Kwidamkayllampa. Amar dijamkayllampachu pimpis ingañachunambaq. Chaqa achka llullamkuqkunam chutiywan chamuchpa, rinllampa nichuq: Nuqaqam Dyus Amkrachqan Wachadur kani. Kananqam chay diyaqa ch'ayamuchqana wachachunayllampa, nichpa. Piru qamkunaqa amamkich pallkunataqa kasungillampachu. 9 Kanan parlata uyachpa, chay maypich nasyungunampura pilyallkanllampa, chay maypich suq nasyumba umkumbi llaqta masimpura pilyallkanllampa, nichpaqa, amamkich manchangillampachu. Puntatam chaychina rin kaq, piru manaraqmi kay munduqa rinchu uchyamkaq. 10 Chaychina nichpaqam, Jisusqa nirqambis: Suq nasyumbi tiyaqkunaqam suq nasyumbi tiyaqkunawan rinllampa pilyaq. 11 Chay tyimpumpiqam kay pachaqa ancha jwirtita rin kuyuq. Kanan ambruna, qachyallkunam waqpi kaypi rin kaq. Syilumpimpismi manchaypaq siñamkuna rin kaq. 12 Piru kay nichuchqallkuna manaraq pasamptinmi, qamkunataqa ancha rinllampa qasachachuq. Sinaguga wasimkunaman ampachuchpam, rinllampa dimandachuq, nuqampi kriyichqallkirallku. Kanan rinmi karsilachuqllampa. Dimandachuchpam, rinllampa ampachuq gubyirnumkunampa, prifimktumkunampa ñawpanman. 13 Piru chaychina ampachumptinllampaqam, ringillampa atiq nuqampaq yach'achimkuyta. 14 Chaymi pallkuna tampuchumptinqa, ama llamkiyllampachu: ¿Ima nichparaq kuntistachaq? nichpaqa. 15 Chaqa nuqam rini yanampachuqllampa, allita kuntistanallki, chay kuntrachuqkuna ama atinanllampa ni binsichuyllampata ni kuntistachuyllampata. 16 Piru qamkunataqam taytallki, mamallki, masallkimkuna, ayllullkimkuna, yanasullkimkunampis (yanasallkimkunampis) rinllampa intrigamkuchuq kuntrallkimkunaman. Chaymi kuntrallkimkuna wamkinnimkitaqa rinllampa wanchichuq. 17 Kanan achka runa, warmim rinllampa ch'iqnichuq, nuqampi kriyichqallkirallku. 18 Piru kayta yach'ayllampa: Dyuspaqqam aqchallkimkunaqa mana ni suqsitu rinchu chingaq. 19 Chaymi maychimka imanachichumptimbis, nuqampi mana challkuq yuyamkumptimkiqa, suq bidampi rini wachachuq, tumkuy tyimpu kawsanallkillampa. 20 Piru rimkamptimkillampa furastiru suldadumkuna kay Jirusalimbi tiyaqkunata kurralamptinllampam, yach'ayllampa: Ch'ayamuchqanam tyimpu kay Jirusalinda chingachinanllampa, nichpa. 21 Chayri chaychina pasamptinqa, prubinsya Judiyampi kaqkunaqa qaqamkunaman mitimkanqallampa. Kay Jirusalin llaqtampi kaqkunampisri mitimkanqallampa. Chay chunchampi kaqkunampisri kay Jirusalinmanqa amana chamunqallampachu. 22 Chaqa chay diyamkunampiqam ancha padisiqllampa rin, Dyuspa Santu Librumbi nichqanchina. 23 ¡Chay diyampiqa amkamkawraq chay (umkuyuq) pach'ayuq warmisitamkuna, chay iti wambrituyuqkunaqa! Chaqa achka kastigumkunam kay mundumpiqa rin kaq. Chaychinallam kay Jirusalimbimpis achka llamkimkuna rin kaq. 24 Wamkingunatam atun kuchillumkunawan rinllampa wanchiq. Wamkingunataqam prisuchpa, waqta, kayta karu nasyungunaman rinllampa ampaq. Chay jwira runamkuna binsichpam, kay Jirusalimbiqa ancha wampuyachpa rinllampa kamachimkuq, Tayta Dyus quchqan tyimpu uchyamkanangaman. 25 Rumpaypi, killampi, lusirumkunampim siñamkuna rin kaq. Kanan kay mundumpa tumkuy nasyunningunampi tiyaqkunaqam ancha llamkichpa rinllampa niq: ¡Imananchiqtaq? nichpa. Kanan mar yamku ancha fiyuta kunyachpa maqchimkamptinmi, ancha manchachpa rinllampa niq: ¡Imaraq pasanqa? nichpa. 26 Chaychina tumkuy ima kamptinmi, wamkin runaqa: ¿Imataq kay mundumpi rin pasaq? nichpa, ancha manchaywan rinllampa dismayaq. Chaqa syilumpi Tayta Dyus tumkuy ima rurachqambismi rin kuyuq. 27 Chaymandaqam nuqa Dyusmanda Chamuq Runata ringillampa rimkawaq, syilumanda pumkutaypa umkumbi ancha pudirniyuq, ancha llimpyachpa chamullkaqta. 28 Chayri yumbay kay nichuchqayllampa qallarimptinqa, kuchimkuchpa, chayachpa, syiluman champamkuyllampa. Chaqa wachachunay diyaqam ancha utqana rin ch'ayamuq. 29 Kay kumparasyunda rurachpam, Jisusqa kaychinampis nirqan: Yura igusta ichu suq laya muntimkunata champayllampa. 30 Chay muntimkunampa rampranguna pallpamuqta rimkachpaqam, yach'angillampana: Tamya tyimpumanmi yallkunchiqna, nichpa. 31 Chaychina yumbay kay nichuchqallkunata rimkachpaqa, yuyayllampa: Tayta Dyusqam utqana rin chamuq, nuqanchiqkunata chumaqta kamachiwananchiq, nichpa. 32 Allimptam nillkillampa, yumbay kay nichuchqallkunaqam rin kumpliq kay tyimpumpi kawsaqkuna manaraq wañumptin. 33 Chaqa syiluwan kay pachaqam rin chingaq. Piru kay nichuchqayqam mana nunka rinchu uchyamkaq. Achwanmi yumbay rin kumpliq. 34 Chunqullkimpi allita yuyachpa kwidamkayllampa, ama kwirpullki munachqandalla ruranallkillampa. Ama mach'ayllampachu. Amamkich kay pachampa imangunampiqa yuyangillampachu. Challkich nuqa qunqaylla chamuchpa, tarichuyman mana allimkunata rurallkamptimkillampa. 35 Chaqa chay diyaqam kay mundumpi yumbay tiyaqkunampaqqa suq trampa qunqaylla piskamkuqchina rin kaq. 36 Chayri qamkunaqa listu kachpa, tumkuy tyimpu Dyusman mañamkuyllampa, chay diyampi yumbay kay nichuchqaymanda wachachunayllampa. Chaqa chaychina qamkuna kwidamkamptimkiqam, Tayta Dyus rin yanampachuq, chay diyampi mana nimampaq panqamkuchpa, ñawpayman prisintamkanallkillampa, nichpa. 37 Jisusqam chay diyamkunampiqa punchawqa Dyuspa adurana wasimbi yach'achimkuq. Tutampqam Ulibu lumaman riq puñuq. 38 Kada madrugadum achka runamkuna Dyuspa adurana wasinman riqllampa, Jisusta uyaq.
1 Chay diyamkunampim karqan chay Paskwa fyista. Chay fyistataqam pasaqllampa kachangamkunata, suq laya mimkunata mimkuchpa. Chay fyista yaqqana ch'ayamptinmi, 2 chay kamachimkuq isrraylinu kuramkuna Muysispa liyningunata yach'achimkuqkunawan tandanamkuchpa, uyaramplla (uyaralla) parlarqanllampa: Imachinaraq Jisustaqa wanchinchiqmanllampa? nichpa. Lumkismi chay fyistampi kaqkunata mancharqanllampa. (Jisusta wanchimptinchiqqach'i, achka runamkuna kuntranchiq alsamkanmanllampa, nichpa.) 3 Piru chay urasmi dyabluqa yallkurqan Judas Iskaryutiman. Chay Judasqam Jisuspa dusi ampustulninmanda suqnin karqan. 4 Paymi rirqan parlaq kamachimkuq isrraylinu kuramkunawan, adurana wasimba kamachimkuq suldadungunawambis: Imachinataq atini intrigachuyta Jisustaqa? nichpa. 5 Chaymi pallkunata chaychina ufrisimptinqa, ancha kuchimkuchpa, Judasta nirqanllampa: Qallaytam quchqallkillampa, nichpa. 6 Chaymi Judasqa ari, nichpa, yuyarqan: ¿Ima urasraq alli Jisusta intrigamkunayqa, mana kamptin achka runamkuna? nichpa. 7 Chay Paskwa fyistampa diyanqam ch'ayamurqanna. Chay qallarichqan diyampim suq uñitata wanchichpa, kachangamkunawan mimkurqanllampa, chay fyistata pasanambaqllampa. 8 Chaymi Jisusqa Pidruta Jwanda nirqan: Riyllampa allichaq mimkunata, Paskwa fyistampi mimkunanchiqllampa, nichpa. 9 Chaymi pallkunaqa tampurqan: Maypitaq munangi allichanayllampaqa? nichpa. 10 Chaymi Jisusqa nirqan: Waq Jirusalinman ch'ayallkachpam, ringillampa rimkaq suq runa puyñumbi yamkuta ampallkaqta. Chayri chay runampa imkinda riyllampa wasi yallkuchqangaman. 11 Chaymandaqa chay wasimpa dwiñunda tampuyllampa: Yach'achimkuqmi nin: ¿Mayqan kwartullkimpich yach'amkuqnillkunawan mimkuchaqllampa Paskwa mimkunata? nichpa. 12 Chaychina nimptimkillampaqam, payqa wasimba altumbi suq atun kwartunda rin rimkachichuqllampa tumkuy imawan allichachqata. Chaypi allichayllampa Paskwa mimkunanchiqtaqa, nichpa. 13 Chaymi Pidruwan Jwan richpaqa, Jisus nichqanchina tarirqanllampa. Chaymi chay wasimpina Paskwa mimkunataqa allicharqanllampa. 14 Chaymi chay uras ch'ayamptinqa, Jisusqa ampustulningunawan masampi tiyarqan. 15 Chaymandaqam pallkunata nirqan: Manaraq padisichpam, ancha munachqa kani mimkuyta kay Paskwa fyista mimkunata qamkunawan! 16 Chaqa allimptam nillkillampa, kay Paskwa mimkunataqam kananllana qamkunawanqa rini mimkuq. Mananam mastaqa rinichu mimkuq syilumpi kananchiqkaman. Waqpiqam Taytay Dyuspa pullan kachpana, mimkurichunllampa, nichpa. 17 Chaymandaqam kumpata piskachpa, Dyusman pagimkuchpa, nirqan: Kay kumpamanda yumbaynimki umpyayllampa. 18 Chaqa allimptam nillkillampa, mananam mastaqa rinichu umpyaq ubaskunampa yamkundaqa, Taytay Dyuswan chamuchpa, chumaqta kamachimkunallkaman, nichpa. 19 Chaymandaqam kachangata piskachpa, Dyusman pagimkuchpa, pitichpa, pallkunata quchpa, nirqan: Kaymi kwirpuy. Chaqa intrigamkanim wañunaypaq, qamkunata wachachunaypaq. Chayri kaychina rurayllampa, nuqata yuyawanallkillampa, nichpa. 20 Chay Paskwa mimkunata mimkumptinllampaqam, kumpatampis piskachpa nirqan: Kay kumpa binuqam yawarniy. Chaqa ich'achpa yawarniytam, suq muchuq tratuta rini ruraq, qamkunata wachachunaypaq. 21 Piru rimkayllampa, chay runa intrigamkuwaqqam pullay kay masampi. 22 Chaqa Dyuspa Santu Librumbi nichqanchinam, nuqa Dyusmanda Chamuq Runaqa rini wañuq. ¡Piru imananqaraqri chay intrigamkuwaqqa! Ancha kastigadum rin kaq, nichpa. 23 Chaychina Jisus nimptinmi, ampustulningunaqa suqnin, suqnin tampunamkurqan: Mayqanninchiqraq kanchiq chay intrigamkuqqa? nichpa. 24 Chaymandaqam chay dusi yach'amkuqninguna anyanamkurqanllampa: Nuqam mas kamachimkuqqa kani. Suqqam bwilta nirqan: Nuqam mas kamachimkuqqa kani, nichpa. 25 Chaypaqmi Jisusqa pallkunata nirqan: Chay suq nasyungunampa gubyirnungunam patrungunachina wampuyachpa, llaqta masingunata kamachinllampa. Chaymandaqam chay kamachimkuqkunaqa alabamkanllampa: Llaqta masillkunatam ancha yanampani, nichpa. 26 Piru qamkunaqa ama chaychinaqa kayllampachu. Achwanri qamkunamanda chay mas kamachimkuqqa suq umildi wambrachina ancha sirbimkuq kanqa. Chayri chay kamachimkuqqa suq kriyaduchina qamkunata sirbichunqa. 27 Mayñ, yuyayllampa: ¿Pitaq mas kamachimkuqqa, masampi tiyaq ichu kriyadun? ¿Manachu mas kamachimkuqqa masampi tiyaq? Piru nuqaqam qamkunampa kamachimkuqnimki kachpampis, suq kriyaduchina tumkuy imampi yanampallkillampa. 28 Qamkunaqam chay ñamkachqallkunampi pullay kachqallampa kangi. 29 Chaymi Taytay Dyus awturidarta numbrawachqanchina, nuqampis qamkunata numbrallki, kamachimkuqkuna kanallkillampa. 30 Chaychinam numbrallkillampa, kamachimkunay tyimpumpi nuqawan pulla masaypi mimkunallkillampa, umpyanallkillampa. Kanan kamachimkunan trunumkunampi ringillampa tiyaq, isrraylinumkunampa dusi atun ayllungunata allita kamachinallkillampa, nichpa. 31 Jisusqam Pidrutampis nirqan: Simun, Simun, dyablum qamkunata ancha munan mallimpachuyta, triguta ichanaqchina. Chaymi Taytanchiq Dyusta nichqa: Chay ampustulkunata quway mallimpanaypaq, ¿qambichu allita kriyinllampa ichu mana? nichpa. 32 Chaychina kamptimbismi, Tayta Dyusta qambaq rrugachqa kani, ama tumkuy tyimpu qunqawanallki. Chaymandaqar qamqa tumkuy chunqullkiwan nuqampi yuyamkurichpa, yanampay kriyiq masimkimkunata, nuqampi mas allita yuyamkunanllampa. 33 Chaychina nimptinqam, Simun Pidruqa nirqan: Taytitu, nuqam kaypi kani pullallki rinaypaq karsilman, ichu wanchichumptimbis, pullallki wañuchaq, nichpa. 34 Piru Jisusqam nirqan: Uyaway Pidru, kallkich nillki, kay tutatam manaraq gallu kantamptin, qamqa kimsa kutinda ringi ñigawaq: ¡Pich'i Jisusqa? Nuqaqam mana paytaqa riqsinichu, nichpa. 35 Chaymi Jisusqa pallkunata tampurqan: Chay suq bwilta kach'achumptiy rinallkillampa, alfurjallkita, qallaynimkita, llanqamkita dijachpaqa, ¿imallkichu faltachurqan? nichpa. Chaymi pallkunaqa nirqan: Manam nimampis faltawarqanllampachu, nichpa. 36 Kanan pallkunatam nirqan: Piru kananqam nillkillampa, alfurjayuqqa alfurjanda ampanqa. Qallayniyuqpis qallayninda ampanqa. Chay mana atun kuchilluyuqqa kampanda randimkuchpa, suq atun kuchillunda randinqa. 37 Chaqa kananqam rinllampana qasachawaq, suq runa ancha malu ruraqtachina. Chaymi Dyuspa Santu Librumbi nichqanqa kumplinna. Chay librumbim nuqampaq nin: Mana allin runampaqchi rinllampa riqsiq, nichpa. 38 Chaymi chay ampustulningunaqa nirqan: Taytitu, kaypim kan ichkay atun kuchillumkuna, nichpa. Chaymi Jisusqa nirqan: Chaychinalla kanqa, nichpa. 39 Chay tutaqam Jisusqa chay wasimanda lluqchichpa, yach'amkuqningunata ampachpa, rirqan Ulibu lumaman. Chaqa chay laya kustumbriyuqmi karqan. [Nuta: Jitsimani wirtam chay Ulibu lumampi kidaq.] 40 Chayman ch'ayachpaqam, pallkunata nirqan: Dyusman mañamkuyllampa, ama tyintadu kanallkillampa, nichpa. 41 Chaychina nichpaqam, Jisusqa mas waqman rirqan 30 mitrustach'i. Chaypim payqa qunqurimkuchpa, Tayta Dyusman 42 mañamkuchpa nirqan: Taytitu, kay tumkuy ñamkallkunaqam nuqampaqqa suq kumpa ayaq yamkuchina. Munachpaqar kay ñamkallkunamanda wachaway. Piru amar nuqa munachqayqa kanqachu. Achwanri qam munachqallkichina kanqa, nichpa. 43 Chay urasmi syilumanda suq anjil chamurqan Jisusta yanampanan, ama dismayanambaq. 44 Kanan tumkuy chay llamkimkunawan masta mañamkumptinmi, Jisustaqa limpu umbi pambarqan. Chaqa chay umbichqangunaqam yawarchina chuturqan allpaman. 45 Chaymandaqam chay mañamkuchqanmanda atarichpa, rirqan yach'amkuqningunata rimkaq. Chaymi ch'ayachpaqa, pallkunata tarirqan puñullkaqta. Chaqa llamkichpa, ancha challkuchqa kachpam, puñullkarqanllampa. 46 Chaymi pallkunataqa nirqan: Imarallkutaq puñullkangillampa? Atarichpana, Dyusman mañamkuyllampa, ama tyintadu kanallkillampa, nichpa. 47 Chaychina rimallkamptinmi, achka runamkuna Jisus kallkachqanman ch'ayarqanllampa. pawpanllampataqam ch'ayarqan Judas. Chay Judasqam Jisuspa dusi yach'amkuqningunamanda suqnin karqan. Paymi qamimkachpa, Jisusta nampallkurqan muchachpa. 48 Chaymi Jisusqa nirqan: Judas, ¿ima chaychina muchawachpachu, nuqa Dyusmanda Chamuq Runataqa intrigamkuwangi kuntrawaqkunaman? nichpa. 49 Chaymi Jisuspa ampustulninguna challkunata rimkachpaqa, tampurqanllampa: Taytitu, ¿atun kuchilluwanchu puntiyachaqllampa kay runamkunata? nichpa. 50 Kanan suq ampustulninqam atun kuchillunda surquchpa, mas kamachimkuq isrraylinu kurampa kriyadumba allin ladu rinrinda pitirqan. 51 Chaymi Jisusqa chayta rimkachpaqa, nirqan: Chaytallana. Amana maqayllampachu. Chaychina nichpaqam, chay kriyadumpa rinrinman mamkinda rurachpa, das achyachirqan (allinyachirqan). 52 Chaymandaqam Jisusqa chay kamachimkuq kuramkunata, Dyuspa adurana wasimba chay chamuq prisuq suldadungunata, tumkuy chay kamachimkuq ansyanumkunatampis nirqan: Ima qamkunaqachu atun kuchillumkunawan, qarumkunawan chamuchqallampa kangi suq ladrundachina prisuwaq? 53 Nuqaqam pullallkillampa kachqa kani tumkuy diyamkuna Dyuspa adurana wasimbi, ¿manachu? Chaypiqam qamkunaqa mana prisuwarqallkichu. Piru dyabluqam tutayaqpi mana allimkunataqa ruran. Chaymi kay tuta chamuchqallampa kangi, mana allimkunata rurawaqqa, nichpa. 54 Chaymandaqam Jisusta piskachpa, amparqanllampa chay mas kamachimkuq isrraylinu kurampa wasinman. Kanan Pidruqam Jisuspa karu imkinda rirqan. 55 Chay tutaqam chay wasimpa umku patyumbi ninata lumyachichpa, rridurnimbi tiyachpa machamkullkarqanllampa. Pidrumpismi pallkunampa pullan tiyachpa machamkullkarqan. 56 Suq kriyadam Pidruta chaypi rimkachpa, ancha champachpa nirqan: Kay runaqam Jisuswan puriq, nichpa. 57 Chaychina nimptinqam, Pidruqam nirqan: Warmisita, nuqaqam mana Jisustaqa riqsinichu, nichpa. 58 Suq rratitumandaqam suqpis champachpa, Pidrutaqa nirqan: Qambismi pallkunamanda suqnin kangi, nichpa. Chaymi Pidruqa paytampis nirqan: Ay runa, nuqaqam mana pallkunamandachu kani, nichpa. 59 Chaymandaqam suq uramandach'i suq runa Pidrumpaq nirqan: Allimptam kay runaqa Jisuswan puriq. Chaqa paypismi prubinsya Galiliyamanda, nichpa. 60 Chaymi Pidruqa chay runatampis nirqan: Ay runa, ¿imatataq rimallkangi? Chay runampaqqam mana nimatampis yach'anichu, nichpa. Chaychina Pidru rimallkamptinmi, suq gallu kantarqan. 61 Chay urasmi Jisusqa timkramkamuchpa, Pidruta champarqan. Chaychina champamptinqam, Pidruqa das yuyarqan Jisumkristu nichqanda: Gallu manaraq kantamptinmi, qamqa kimsa kutinda ringi ñigawaq, nichpa. 62 Chay nichqanda yuyachpam, Pidruqa ancha syintichpa, sawaman lluqchichpa, ancha waqarqan. 63 Kanan chay kwidamkuqkunaqam ancha asimpachpa, Jisusta maqarqanllampa. 64 Kanan ñawinda pambachpam, qaqllambi ancha maqachpa, nirqanllampa: Mayñ, yach'aq kachpaqa, rimay pitaq maqachungi! nichpa. 65 Kanan suqnin suqnin tumkuy ima mana allimkunata rimachpa, paytaqa ancha musyarqanllampa. 66 Achimkyamptinqam, isrraylinumkunampa kamachimkuq ansyanunguna, kamachimkuq isrraylinu kuramkuna, Muysispa liyningunata yach'achimkuqkunampis suq lugarpi tandamkarqanllampa. Chaymi chay Mas Kamachimkuq Tandamkaq Juyiskunampa ñawpanman Jisusta ampamuchpa, kaychina tampurqanllampa: 67 Mayñ, niwayllampa, ¿Qamchu kangi Dyus Amkrachqan Wachadurqa? Chaychina tampumptinllampam, Jisusqa pallkunata nirqan: Ari nimptiyqam, mana ringillampachu kriyiwaq. 68 Imata tampuchumptiypismi, mana ringillampachu kuntistawaq, ni ringillampachu kach'awaq. 69 Piru nuqa Dyusmanda Chamuq Runa kachpaqam, kananmandampacha Tayta Dyuspa allin ladumbi rini tiyaq. 70 Chaychina nimptinmi, yumbay tampurqanllampa: Chaychinaqachu qamqa Dyuspa Churin kangi? nichpa. Chaymi Jisusqa nirqan: Ari, qamkuna nichqallkichinam kani, nichpa. 71 Chaychina nimptinmi, pallkunaqa nirqan: Ima mastam munanchiq? Kananqam manana munanchiqchu mas tistigumkunataqa. Chaqa uyanchiqna, pay kimkin chiminwan chayta niwamptinchiq, nichpa.
1 [Chay tyimpumkunampim Rruma llaqtamanda kaqkuna achka nasyungunampi kamachimkuqllampa. Chaymi isrraylinumkunatampis suq rrumanu gubyirnu kamachiq. Chay gubyirnuqam chutiq Pilatu.] Chaymandaqam yumbay juyiskuna Jisustaqa amparqanllampa gubyirnu Pilatuman. 2 Chay Pilatumpa ñawpambim juyiskunaqa llullamkuchpa, Jisusta kuntrachpa, kaychina rimarqanllampa: Kay runataqam tarichqallampa kani llaqta masiy isrraylinumkunata animachichpa, gubyirnunchiq Sasarta kuntribusyunda ama pagarananllampa. Paychi Dyus Amkrachqan Wachadur. Paychi suq gubyirnu, nichpa. 3 Chaymi Pilatuqa Jisusta tampurqan: Qamchu isrraylinumkunampa gubyirnunqa kangi? nichpa. Chaymi Jisusqa nirqan: Ari, chay nichqallkichinam kani, nichpa. 4 Chaychina nimptinqam, Pilatuqa chay kamachimkuq isrraylinu kuramkunata, yumbay chaypi kaqkunatampis nirqan: Kay runampiqam nuqaqa mana nima uchata tarinichu, nichpa. 5 Piru Pilatu chaychina nimptinqam, pallkunaqa mana munachpachu, achwamba ch'uqyachpa nirqanllampa: Tumkuy kay prubinsya Judiyampim kay runaqa ingañallkan yumbay llaqta masiy isrraylinumkunata, kuntranchiq alsamkananllampa. Waq prubinsya Galiliyampim qallarichqa karqan. Kananqa rimkay, kaypimpis ingañamkurillkan, nichpa. 6 Chay runamkuna chaychina Galiliyata myintamptinllampaqam, Pilatuqa pallkunata tampurqan: Allimpchu kay runaqa prubinsya Galiliyamanda? nichpa. 7 Chaymi chay runamkunaqa nimptin: Ari, payqam Galiliyamanda, nichpa, Pilatuqa kamachimkurqan, Jisusta ampanambaqllampa Galiliyampa gubyirnun Irudisman. Chaqa chay diyamkunampiqam Irudisqa Jirusalimbi kallkarqan. 8 Chaymi Jisusta, ch'ayachimptinllampa, Irudisqa ancha kuchimkurqan. Chaqa payqam unaymandampacha Jisuspa famanda yach'achpa, ancha yuyarqan: Ay, rimkaymanri Jisusta suq milagruta ruramptin, nichpa. 9 Chaymi Jisusta payman ampamptinllampaqa, tumkuy ima munachqanda tampurqan. Lumkismi tampumptinqa, Jisusqa uyararqanlla. Manam nimatampis nirqanchu. 10 Kanan chay Irudispa ñawpambiqam tandamkachpa, chay kamachimkuq isrraylinu kuramkuna, Muysispa liyningunata yach'achimkuqkunampis ancha kuntrarqanllampa Jisustaqa. 11 Chaymi Irudisqa suldadungunawan Jisustaqa disprisyachpa, burrlarqanllampa. Kanan asimpananrallkum ancha chumaqta mudachirqanllampa suq gubyirnutachina. Chaychina mudachichpaqam, kach'arirqanna Pilatuman. 12 Chay diyampim Pilatuwan Irudisqa alliyarqanna. Chaqa kuntram kachqallampa karqan. 13 Chaymandaqam Pilatuqa kamachimkuq isrraylinu kuramkunata, suq awturidarkunata, achka runamkunatampis tandachpa, 14 nirqan: Qamkunam kay runataqa nuqaman ampamuchpa, niwachqallampa kangi: Ingañallkanmi isrraylinumkunata, kuntranchiq alsamkananllampa, nichpa. Chaymi nuqa kimkiy, kay ñawpallkillampampi tampuchqa kani yach'anaypaq: ¿Allimpchu chaychina ichu mana? nichpa. Piru manam nima dilituta paypiqa tarinichu. 15 Irudisman kach'amptiypismi, paypis mana nima dilituta tarichqachu. Chaymi kach'arimurqan nuqaman. Rimkayllampa, manam nima maluta rurachqachu wañunambaqqa. 16 Chayrallkum asutichichpalla, rini kach'aq, nichpa. 17 ?Kanan Pilatuqam chay Paskwa fyistampiqa kada wata suq prisuta kach'aq, isrraylinumkuna rrugamkumptinllampa.? 18 Piru chay runamkunaqam mana munarqanllampachu, Jisusta kach'anambaqqa. Chaymi yumbaynin ancha jwirtita nirqanllampa: Chay Jisusta wanchiy! ¡Barrabasta kach'ayqa! nichpa. 19 Chay Barrabasqam Jirusalimbi tiyaqkunata animachichqa karqan, awturidarkunampa kuntran alsamkananllampa. Kanan wanchimkuchqampismi karqan. Challkunampaqmi paytaqa karsilachqallampa karqan. 20 Chaymi Pilatuqa suq kutinda nirirqan, Jisusta kach'anambaq. 21 Piru pallkuna mana munachpa Jisusta kach'anambaqmi, masta ch'uqyarqanllampa: Kruspi klabay! ¡Kruspi klabay! nichpa. 22 Chaychina nimptinllampampismi, Pilatuqa suq kutindampis pallkunata nirirqan: Piru ¿ima malutamiri rurachqa? Nuqaqam mana nima dilituta paypiqa tarinichu wañunambaqqa. Chaymi kastigachichpa rini kach'aq, nichpa. 23 Piru pallkunaqam mana munarqanllampachu, Jisusta kach'anambaqqa. Chaymi mas jwirtita qayach'amkuchpa nirqanllampa: Kruspi klabay, kruspi klabay! nichpa. Chaychinam rimarqanllampa, gustunllampata ruranangaman. 24 Chaymi Pilatuqa nich'karqanna: Qamkuna munachqallkichina, Jisusqa wañunqa, nichpa. 25 Chaymi Pilatuqa chay ancha wampu wanchimkuq Barrabasta kach'achpa, Jisusta intrigamkurqan wanchinanllampa. 26 Jisusta ampallkachpa kruspi klabaqmi, tingunamkurqanllampa suq runa Simun chutiqwan. Chay Simunqam Sirini llaqtamanda karqan. Payqam chuncha lugarkunamanda chamullkarqan. Chay Simundaqam Jisus ampallkachqan krusta umbruchachirqanllampa, Jisuspa imkinda ampanambaq. 27 Jisuspa imkindam ancha achka runamkuna, warmimkunampis rirqanllampa. Kanan chay warmimkunam paypaq ancha llamkichpa, waqachpa rirqanllampa. 28 Chaymi Jisusqa pallkunata champachpa, nirqan: Jirusalinira warmisitamkuna, nuqampaqqa ama waqayllampachu. Achwanri qamkunampaq, wawallkimkunampaq waqayllampaqa. 29 Chaqa rinmi ch'ayamuq waqana diyamkuna. Chay diyamkunampim wamkinqa ancha padisichpa, rinllampa niq: Ancha alliraq kachqa chay mana wach'aq warmimkuna, chay mana nunka wawamkuchpa ñuñuchimkuqkunampis. (Chaqa wambritunguna kachpach'i ancha padisillkanmanllampa) nichpa. 30 Chay diyampiqam runamkunaqa qaqamkunata rinllampa niq: Sawayllampaman ichkiyllampa. Lumamkunatam rinllampa niq: Pambawayllampa, ama tariwananllampa, nichpa. 31 Chaqa nuqa mana nima uchayuq kamptiypismi, ancha padisichiwanllampa. Chaychina nuqata rurawachpaqa, ¿imataraq qamkunataqa rurachunqallampa? nichpa. 32 Amparqanllampampismi ichkay ancha uchayuq prisumkunata, kruspi klabachpa, Jisuspa pullan wanchinanllampa. 33 Chaymandaqam Kalabira chutiq lugarman ch'ayachpa, chaypina Jisusta kruspi klabarqanllampa. Chay ichkay prisutampismi pullan kruskunampi klabarqanllampa, suqta Jisuspa allin ladumbi, suqta ichuq ladumbi. 34 Kanan kruspina klaballkamptinllampam, Jisusqa mañamkuchpa, nirqan: Taytitu, pirdunayri kay runamkunata. Chaqa pallkunaqa mana yach'achpa: (Dyuspa Churindam wanchillkanchiq, nichpam,) kallkunata rurawallkanllampa, nichpa. Kanan chay suldadumkunaqam swirtita rurarqan, Jisuspa mudananda partinamkunanllampa. 35 Kanan chaypiqa achka runamkuna Jisusta champallkamptinmi, chay awturidarkuna ancha asimpachpa nirqanllampa: Suqkunatam wacharqan. Mayñ, Dyus Amkrachqan Wachadur kachpaqa, kananqa pay kimkin wachamkanqa, nichpa. 36 Chay suldadumkunampismi Jisusta ancha asimpachpa, qamimkachpa, puchqu binuta ampachpa, nirqanllampa: Kayta umpyay. 37 Mayñ, isrraylinumkunampa gubyirnun kachpaqa, qam kimkimki wachamkay, nichpa. 38 Chay kruspiqam Jisuspa umamba sawambi rurachqallampa karqan suq tablitata, grigu rimaypi, latin rimaypi, ibriyu rimaypi kaychina iskibrichqata: Kay runaqam isrraylinumkunampa gubyirnun, nichpa. 39 Chaymandaqam chay ichkay kruspi kaqkunamanda suqninqa Jisusta musyachpa, nirqan: Mayñ, Dyus Amkrachqan Wachadur kachpaqa, qam kimkimki wachamkachpa, nuqallkunatampis wachawayllampa, nichpa. 40 Piru chay suq uchayuqqam payta anyachpa, nirqan: Uyaray! Kaychina padisillkachpa wañunanchiqqa, ¿ima, manachu Dyusta manchangi? 41 Allita yuyay, nuqanchiqqam uchanchiqkunarallku ñamkallkanchiq. Piru kay runaqam mana nima uchayuqchu ñamkanambaqqa, nichpa. 42 Chaymandaqam Jisusta nirqan: Chamuchpa kamachimkuqqar, yuyawachpa, wachaway, nichpa. 43 Chaymi Jisusqa nirqan: Allimptam nillki, kay diyamandampacham qamqa Taytay Dyuspa ancha chumaq lugarnimbi nuqawan pulla ringi kaq, nichpa. 44 Chay diya larrdusina kamptinmi, limpu tutayarqan las tras di la tardimkaman. 45 Chaqa rumpaymi wañurqan. Kanan Dyuspa adurana wasimba kurtinanqam anaqmanda ura manyamkaman ch'awpi ch'awpi llimkimkarqan. 46 Chay urasmi Jisusqa jwirtita rimachpa nirqan: Taytitu, ispirituytar tandayna. Qamba mamkimkimpim mingallki, nichpa. Chayta nichpaqam wañurqanna. 47 Chaymi suldadumkunampa kamachimkuqnin yumbay challkunata rimkachpaqa, Dyusta kaychina alabarqan: Allibraq kay runaqa mana nima uchayuqchu kachqa, nichpa. 48 Chaypi kaqkunampismi chay pasachqanda rimkachpa, yumbaynin ancha syintichpa, pichunda tamkachpa, wasinman kutirqanllampa. 49 Piru Jisuspa yumbay riqsichqanguna, chay warmimkuna Galiliyamanda pullan chamuqkunampismi, karumanda rimkarqanllampa tumkuy ima chaypi pasachqanda. 50 Karqanmi suq ancha allin runa Jusi chutiq. Payqam prubinsya Judiyampa Arimatiya llaqtanmanda karqan. Chay Jusim chay Mas Kamachimkuq Tandamkaq Juyiskunamanda suqnin karqan. 51 Piru paypaqqam mana allichu karqan Jisusta wanchinanllampaqa. Chay Jusiqam unaymandampacha ancha munarqan Tayta Dyusta rimkayta, yumbayta chumaqta kamachimptin. 52 Chaymi Jusiqa Pilatuman richpa nirqan: Yuch'allku, quway Jisuspa kwirpunda, ampanaypaq pambaq, nichpa. Chaychina mañamptinqam, Pilatuqa ari nirqan. 53 Chaymi Jusiqa krusmanda ichkichimuchpa, suq ancha chumaq trampuwan Jisuspa kwirpunda liyachpa, ampachpa, suq mach'aychina simpulturampi pambarqan. Chay simpulturataqam suq luma qaqitampa pach'ambi kinraypa rurachqallampa karqan. Piru manaraqmi nima almata chaypiqa pambachqallampachu karqan. 54 Chaychinam Jisustaqa pambarqanllampa byirnis tardita, rumpay yaqqana saqamptin, samana diya qallarinambaq urasna kamptin. 55 Pambamptinllampaqam, chay Galiliyamanda Jisuspa pullan chamuq warmimkunaqa rirqanllampa chay pambamkachqanman. Kanan allita rimkarqanllampa Jisuspa kwirpunda kamamkachichqanda. 56 Chaymi wasinman kutirichpaqa, michki mutkinamkunata allicharqanllampa, Jisuspa kwirpunda liyananllampa, ama ach'nanambaq. Chay samana diyampiqam samarqanllampa, Dyus kamachimkuchqanda kasuchpa.
1 Simanampa qallarinan diya dumingum chay warmimkunaqa Jisusta pambachqanman madrugadu rirqanllampa, chay allichachqan michki mutkinata ampachpa. Wamkin warmimkunampismi pallkunawanqa rirqan. 2 Chay pambachqan lugarman ch'ayachpam, chay mach'aychina simpulturataqa tarirqanllampa kich'achqatana. Chay kirpachqan rumiqam suq ladumanna isqandallkarqan. 3 Kanan kich'araqna kamptinqam, pallkunaqa chay pambamkachqanman yallkuchpa, Jisuspa kwirpundaqa manana tarirqanllampachu. 4 Chaymi ancha manchachqata yuyallkamptinllampa, ladunllampampi diskwidu rimkamkurqan ichkay anjil ancha llimpyallkaq mudanayuqkuna. 5 Chaymi chay warmimkunaqa ancha manchachpa, pambaman kumurarqanllampa. Kanan chay anjilkunaqam nirqan: Imarallkum maskallkangillampa chay kawsaqtaqa wañuchqamkunampa kay lugarnimbiqa? 6 Mananam kaypichu. Kawsachqanñm. Yuyayllampa waq Galiliyampi kachpa, qamkunata nichuchqanda. 7 Manchu nichurqanllampa: Nuqa Dyusmanda Chamuq Runatam rinllampa intrigamkuwaq uchayuq runamkunampa mamkinman, kruspi klabawachpa wanchiwananllampa. Chaychina rurawamptimbismi, kimsa diyamanqa rini kawsamuq, nichpa. 8 Chaychina nimptinqam, chay warmimkunaqa yuyarqanllampa Jisus nichqangunata. 9 Chaymandaqam pallkunaqa chay pambamkachqanmanda kutimuchpa, yumbay rimkachqanda parlachirqanllampa chay unsi ampustulkunata, tumkuy chay wamkin kriyiq masingunatampis. 10 Chay famata ampustulkunaman ampaqkunaqam karqan: Marya Magdalamanda kaq, Jwana, Jamkubumpa maman Marya, suq warmimkunampis. 11 Lumkismi ampustulkunaqa chay warmimkuna nichqandaqa mana kriyichpachu yuyarqanllampa: Lumka imach'i kay warmimkunaqa kaychina niwananchiqqa, nichpa. 12 Piru Pidruqam chay kachqanmanda lluqchichpa, kallpaylla rirqan chay pambachqanman. Chaymi ch'ayachpa, umku mach'aychina simpulturaman champamkuchpa, chay trampumkunataqa suq ladumpina kaqta rimkarqan. Chayrallkum ancha ispantachqata kutirqan chay wasi kachqanmanqa. 13 Chay dumingutallam Jisuspi ichkay kriyiqkuna Imawus llaqtaman rillkarqan. Chay Jirusalinmandaqam unsi kilumitrusch'i karqan Imawuskamanqa. 14 Chay kriyiqkunaqam rillkarqanllampa Jisus padisichqambaq parlachpa. 15 Chaychina ancha parlachpa, tampunamkuchpa rillkamptinllampam, Jisusqa pallkunaman qamimkachpa, pullanllampa chay ñanda rirqan. 16 Piru pallkunaqam pullan riqta rimkachpampis, mana atirqanllampachu riqsiyta, pim pullanchiq rillkan, nichpaqa. 17 Chaymi Jisusqa pallkunata tampurqan: Imata parlaqchinam qamkunaqa rillkangillampa? ¿Imampaqmi ancha llamkingillampa? nichpa. 18 Chaymi suqnin Kliyufas chutiqqa Jisusta nirqan: Yumbay runamkunam yach'anllampa kay Jirusalimbi pasachqanda. ¿Ima qamqachu furastiru kangi, challkunata mana yach'anallkiqa? nichpa. 19 Chaymi Jisusqa tampurqan: Imamir kachqa? nichpa. Pallkunaqam nirqan: Jisus Nasaritmanda kaqpaqmi parlaqchina rillkanillampa. Paymi Dyuspa ñawpambi, runamkunampa ñawpambimpis ancha pudirniyuq rimaq karqan. Chaqa ancha ispantaypaq milagrumkunatam rurarqan. Yach'achimkurqambismi ancha chumaqkunata. 20 Paytamiri kamachimkuq kuramkuna, wamkin awturidarninchiq kaqkunawan chay rrumanumkunaman intrigamkumptin, kruspi klabachpa wanchirqanllampa. 21 Piru nuqallkunaqam yuyarqay: Paynam nuqanchiq isrraylinumkunataqa rin wachawaqninchiq, nichpa. Manam yuyachqayllampachu kachqa. Chaqa kananwanqam kimsa diyana wañuchqanqa. 22 Piru kanan madrugadum nuqallkuna partiymanda wamkin warmimkuna rirqanllampa chay pambachqanman champamkuq. Chaymandaqam kutimuchpaqa, ispantachqata dijawachqallampa. Chaqa niwarqanllampam, mananach kanchu kwirpunqa. Anjilkunatach rimkarqanllampa. Chay anjilkunach nichqallampa: Jisusqam kawsamuchqana, nichpa. 24 Chaymi wamkin kriyiq masillkuna rirqan chay pambachqanman champamkuq, yach'ananllampa: Allimpchu kawsamuchqa ichu mana, nichpa. Pallkunampismi kutimuchpaqa niwarqanllampa: Mananach kanchu kwirpunqa, nichpa. Chaqa allimptam chay warmimkunaqa rimarqanllampa. Piru Jisustaqam mana rimkarqanllampachu. 25 Chaychina nimptinllampam, Jisusqa pallkunata nirqan: A, mana jwisyuyuqkuna! ¿Ima manallachur qamkunaqa kriyingillampa Dyuspaq rimaqkuna nichqandaqa? 26 Chaqa Dyus Amkrachqan Wachadur syiluman rinambaqqam, puntata ñamkanambaqraq karqan. ¿Manachu chaychina nirqan? nichpa. 27 Chaychina nichpaqam, pallkunata intyindichirqan Dyuspa Santu Librumbi paypaq yumbay nichqanda. Puntatam Muysis iskibrichqanda intyindichirqan. Chaymandaqam Dyuspaq chay suq rimaqkunampis iskibrichqanda intyindichirqan. 28 Chay Imawus llaqtaman ch'ayachpaqam, Jisusqa pasaqlla tumkurqan. 29 Chaymi pallkunaqa ancha rrugachpa, kaychina arkarqan: Kidachunna nuqallkunawan. Tardinam. Tutayaqnam rin, nichpa. Chaychina arkamptinllampaqam, Maya nichpa, pallkunawanna kidarqan. Chaymi Jisusqa pallkunampa pullanna wasinman yallkurqan. 30 Chaymandaqam pallkunawan masampi tiyachpa, tandata piskachpa, Dyusta pagimkurqan. Chaymandaqam chay tandata pitichpa, pallkunata qurqan. 31 Chay urasmi pallkunaqa atirqanllampana Jisusta riqsiyta. Piru Jisusqam pallkunampa pullan kachqanmanda das chingarqan. 32 Chaymi pallkunampura kaychina parlarqanllampa: Manchu ñanda chamuqchina Dyuspa Santu Librunmanda parlachiwamptinchiqqa, chunqunchiqpi ancha kuchimkurqanchiq, nichpa. 33 Chaychina parlachpaqam, chay uraslla kutirqanllampa Jirusalinman. Chaymi ch'ayachpaqa, chay unsi ampustulkunata wamkin kriyiq masingunata tarirqanllampa tandanamkuchqata. 34 Chay wasimpi kaqkunaqam puntata chay chamuqkunata nirqan: Allimptam Siñurninchiq Jisusqa kawsamuchqana. Chaqa Simun Pidrumanmi rimkamkuchqa, nichpa. 35 Chaychina nimptinllampam, chay ichkay chamuqkunampis kaychina parlachirqan: pandam pullayllampa riqchina nuqallkunata parlachiwachqa. Tandata pitichqan urasmi paytaqa riqsichqallampa kani, nichpa. 36 Chaychina parlallkamptinllampam, Jisusqa qunqaylla ch'awpinllampampi rimkamkuchpa, nirqan: Bwinas nuchis, Dyusri qamkunata yanampachunqa, nichpa. 37 Piru pallkunaqam Jisusta rimkachpaqa, ancha manchachpa, yuyarqanllampa: Almatach'i rimkallkanchiqllampa, nichpa. 38 Piru Jisusqam pallkunata nirqan: Imarallkum manchangillampa? ¿Imarallkutaq nuqampaqqa yuyangillampa, almach'i, nichpaqa? 39 Champayllampa mamkillkunata, ch'amkillkunata. Nuqa kimkiymi kani. Kwirpuyta malliyllampa. Rimkay, aychayuq, tulluyuqmi kani. Suq almaqam mana chaychinachu, nichpa. 40 Chaychina nichpaqam, mamkingunata, ch'amkingunata rimkachirqan champanambaqllampa. 41 Piru pallkunaqam achla manchachpa, achla kuchimkuchpa, ispantachqata champachpa, yaqqa mana atirqanllampachu kriyiyta. Chaymi Jisusqa nirqan: Kanchu imitallkillampa mimkunaypaq? nichpa. 42 Chaymi pallkunaqa suq pidasu piskadu kangachqata, abijampa suq panalnindampis qurqanllampa. 43 Chaymi Jisusqa ch'askichpa, ñawpanllampampi mimkurqan. 44 Chaymandaqam pallkunata nirqan: Manchu pullallkillampa kachpa, nichurqaqllampa: Rinmi kumpliq nuqampaq Muysispa librumbi yumbay nichqanguna, Dyuspaq chay suq rimaqkunampa librungunampi nichqanguna, Salmus librumpi nichqangunampis, nichpa. Chay nichuchqayllampam kumplichqana. 45 Chaymandaqam Jisumkristu pallkunataqa ancha allita intyindichirqan Dyuspa Santu Librumbi nichqanda. 46 Kanan pallkunata nirqan: Dyuspa Santu Librumbiqam nuqampaqqa nin: Dyus Amkrachqan Wachadurqach wañuchpa, kimsa diyamanda rin kawsamuq. 47 Chaymandaqam yach'amkuqninguna Jirusalimbi qallarichpa, yumbay nasyungunaman rinllampa ch'ayaq, paypa chutimbi kaychina yach'achimkuchpa: Chay mana allimkunata rurachqallkimpaq ancha syintichpa, Dyusmanna mañamkuyllampa, pirdunachuchpa, wachachunanllampa, nichpa. 48 Kananqam qamkuna tistigullkuna kangillampa, nuqa rurachqaypaq parlanallkillampa. 49 Uyawayllampa, Taytay Dyus ufrisichuchqandam rini kach'amuq qamkunamanqa. Piru chuyayllamparaqri kay Jirusalimbi, syilumanda chay pudirninda kach'amunallkaman, nichpa. 50 Chaymandaqam Jisusqa chay ampustulningunata Jirusalinmanda amparqan Bitanillaman (Bitaniyaman). Chaypim payqa mamkingunata alsachpa, Tayta Dyusman mañamkurqan, pallkunata yanampanambaq. 51 Chaychina mañamkullkachpaqam, chay ampustulningunampa ch'awpinmanda rirqanna syiluman. 52 Pallkunaqam Jisusta adurachpa, ancha kuchimkuchpa, chay kachqanllampamanda Jirusalinman kutirqanllampa. 53 Kanan pallkunaqam Dyuspa adurana wasinman richpa, tumkuy diya Dyusta alabaqllampa. Chaychina kanqa.
1 Manaraq kay pacha kamptinmi, suq Rimaqqa karqanna. Chay Rimaqqam Dyuspa pullan kachpa, paypis Dyus karqan. 2 Qallariypiqam payqa Tayta Dyuswan karqan. 3 Chaymandaqam Tayta Dyusqa chay Rimaqwan syiluta, kay pachata, tumkuy imandinda rurarqan. Chaqa Tayta Dyusqam mana nimatampis sampalanqa rurarqanchu. Achwanmi chay Rimaqwan tumkuy imataqa rurarqan. 4 Kanan chay Rimaqqam tumkuy imata kawsachin. Payqam bidanchiqpaqqa suq Michachina. Chaqa paymi yach'achiwanchiq, allita rurachpa kawsananchiqllampa. 5 Kay pachampi uchata ruraqkunaqam tutayaqpichina. Piru chay Michachina kaqmi chay tutayaqpichina achimkchamkun, yumbayta yach'achichpa, chay uchamkunata ama rurananllampa. Kanan chay uchata ruraqkunaqam chay Michachina kaqta kuntrachpampis, mana atichqallampachu binsiytaqa. 6 Suq runam Jwan Chutichimkuq chutirqan. Paytam Dyus amkrachqa karqan, chay Michachina kaqpaq yach'achimkunambaq. 7 Chaymi chay Jwanqa chay Michachina kaqpaq yach'achimkurqan, yumbay uyaqkuna chay Michampi yuyamkunanllampa. 8 Chaqa chay allimp Michaqam chamurqan kay munduman, yumbay runamkunata yach'achinambaq. Piru Jwanqam mana chay Michachu karqan. Payqam chay Michampaq yach'achimkuqlla karqan. 10 Chay Rimaq Michaqam kay munduta rurachqa karqan. Chaymandaqam kay munduman chamumptin, runamkunaqa mana yach'arqanllampachu: Paymi kay munduta rurachqa, nichpaqa. 11 Chaymi amkrachqan nasyunman chamumptinqa, pallkunaqa disprisyachpa, mana chumaqtachu ch'ayachirqanllampa. 12 Piru wamkinnataqmi payta chumaqta ch'ayachichpa, paypi kriyirqanllampa. Chaymi pallkunataqa amkrarqan, Tayta Dyuspa wambranguna kanambaq. 13 Chaymi pallkunaqa chay Rimaqpi kriyichpaqa, muchuqmanda nasichqachina kachqallampa. Chaqa pallkunaqam mana mamanmandallachu nasirqan, ni nasirqanllampachu suq runa wambrayuq kanambaqqa. Achwanmi Tayta Dyus kimkin munachqa, paypi kriyichpa, muchuqmanda nasirinambaq, wambrangunana kanambaqllampa. 14 Kanan chay Rimaqqam runampaq timkramkachpa, pullayllampa puriq. Chaymi Taytanchiq Dyuspa chay sampalan Churinda rimkarqanillampa ancha allin kaqta, ancha pudirniyuqta. Chaqa payqam ancha kuyawaqninchiq, allimp kaqtalla yach'achimkurqan. 15 Paypaqmi chay Jwan Chutichimkuqqa ancha jwirtita rimachpa, kaychina nirqan: Chay kamachimkuqpaqmi qamkunata nichurqaqllampa: Puntatam nuqa nasichqa kani. Chaymandaraqmi chay Rimaqqa rin chamuq. Paymi nuqamanda mas baliqqa. Chaqa nuqa manaraq nasimptiymi, payqa unaymandampacha kawsachqa, nichpa. 16 Chay ancha kuyawaqninchiq Rimaqmi tumkuy imampi kutin kutin yumbayninchiqta ancha yanampawachqa kanchiq. 17 Chaqa Tayta Dyusmi Muysista amkrarqan, liyningunata yach'achiwananchiq. Piru Jisumkristutaqam kach'amurqan kuyawaqninchiq, allimp kaqtalla Dyuspaq yach'achiwananchiq. 18 Taytanchiq Dyustaqam mana pimpis nima tyimpu rimkachqachu. Piru chay ancha kuyachqan sampalan Churinllam, Tayta Dyuspa pullan kawsachpa, kay pachaman chamuchpa, niwachqa kanchiq, Taytambaq allimpta yach'ananchiq. 19 Isrraylinumkunampa awturidarningunam Jirusalinmanda wamkin kuramkunata, wamkin yanampamkuqnin libitamkunatampis kach'arqanllampa, Jwan Chutichimkuqta kaychina tampunanllampa: Qamqa, ¿ima karguyuqmi kangi, yumbayta kaychina yach'achinallkiqa? nichpa. 20 Chaymi Jwanqa mana nimata pamkachpachu, nirqan: Manam nuqaqa Dyus Amkrachqan Wachadurchu kani, nichpa. 21 Chaymi chay chamuqkunaqa tampurqanllampa: Chaychinaqa ¿ima karguyuqmi kangi? ¿Chay unay alma Aliyaschu kangi? nichpa. Piru Jwanqam nirqan: Manam, nichpa. Chaymi tampurirqanllampa: Dyuspaq chay chamunambaq rimaqchu kangi? nichpa. Jwanqam nirqan: Manam paychu kani, nichpa. 22 Chaymi pallkunaqa tampurirqanllampa: Chaychinaqa ¿ima karguyuqmi kangi? Niwayllampar, chay kach'amuwaqta ninaypaq, nichpa. 23 Chaymi Jwanqa Dyuspaq rimaq Isayiyas iskibrichqanda nirqan: Nuqam kani chay chuncha lugarkunampi kaychina qayamkuq: Bidallkillampata ñandachina chumaqta dirichuta allichayllampa, Siñurninchiqta chumaqta ch'ayachinallkillampa, nichpa. 24 Chay tampuqkunaqam farisiyu dumktrinayuq kaqkunamanda chamuchqallampa karqan. 25 Chaymi nirqanllampa: Chaychina Dyus Amkrachqan Wachadur mana kachpaqa, ni Aliyas kachpaqa, ni Dyuspaq chay suq rimaq kachpaqa, ¿imarallkutaq qamqa chutichimkungiqa? nichpa. 26 Chaymi Jwanqa pallkunata nirqan: Nuqaqam yamkuwanlla chutichimkuni. Piru suq ancha kamachimkuqmi chamuchqa. Payqam qamkunampa ch'awpimkimpi purillkan. Piru paypaqqam mana yach'angillampachu: Dyus Amkrachqan Wachadurmi, nichpaqa. 27 Nuqaqam puntata chamuchqa kani. Chaymandaraqmi payqa chamuchqa. Piru nuqamandaqam mas pudirniyuq. Chaymi nuqaqa mana nimachu kani paypa ñawpambiqa. Chaqa manam balinichu, ni llanqamba watunda paskanaypaq, nichpa. 28 Chaychinam Jwandaqa tampurqanllampa, rriyu Jurdamba waq ladu chimban Bitabara lugar chutiqpi. Chaqa chay chimbampim Jwanqa chutichimkullkarqan. 29 Chaymandaqam qayandinqa, Jwan Chutichimkuqqa Jisusta rimkarqan, payman chamullkaqta. Chaymi kaychina nirqan: Rimkayllampa. Chaypinam Dyuspa Uñanqa. Paymi kay munduman chamuchqa, wañuchpa, runamkunampa uchangunata pirdunanambaq. 30 Paypaqmi nuqaqa nillkarqay: Rinmi chamuq suq runa. Paymi mas pudirniyuq nuqamandaqa. Chaqa unay tyimpumandampacham nuqa manaraq nasimptiy, payqa kachqana, nichpa. 31 Manam nuqaqa riqsirqaychu. Piru chaychina payta manaraq riqsichpampismi, nuqaqa chamurqay, yamkuwan chutichimkuq, qamkuna isrraylinu masillkuna paypaq yach'anallkillampa: Rinnam chamuq, nichpa. 32 Chay Jwan Chutichimkuqqam nirqambis: Dyusmi kach'amuwachpa, yamkuwan chutichimkunaypaq, kaychina niwarqan: Santu Ispirituyta syilumanda chamullkaqta rimkachpa, suq runampa sawambi tiyamptinmi, ringi yach'aq: Chay runam Santu Ispirituwan chutichimkun, nichpa. Piru manaraqmi yach'arqaychu: ¿Pim payqa? nichpa. Piru suq diya Jisusta chutichillkamptiymi, Dyuspa Santu Ispiritun suq palumitachina syilumanda urangumuchpa, paypa sawambi tiyarqan. 34 Nuqa kimkiymi chaytaqa rimkachqa kani. Chaymi tistigu kani. Chaqa allitam yach'ani: Jisumkristum Dyuspa Churin, nichpa. 35 Qayandinqam chay Jwan Chutichimkuqpa ichkay yach'amkuqnin paywan chaypi karirqanllampa. 36 Chaymi Jwanqa, Jisusta rimkachpa pasallkaqta, chay ichkay yach'amkuqninda nirqan: Rimkay, waq runaqam Dyuspa Uñan, nichpa. 37 Chaychina nimptinqam, chay ichkay yach'amkuqninguna uyarqan. Chaymi pallkunaqa Jisuspa imkinda rirqanllampa. 38 Chaymandaqam Jisusqa imkiman champamkuchpa, rimkarqan chay ichkay sigiqkunata. Chaymi payqa tampurqan: Imatam maskallkangillampa? nichpa. Pallkunaqam nirqan: Yach'achimkuq Taytitu, ¿maypitaq tiyangi? nichpa. 39 Chaymi pallkunataqa Jisusqa nirqan: Amku nuqawan, tiyachqayta riqsinallkillampa, nichpa. Chaymi pallkunaqa richpa, rimkarqanllampa chay maypi tiyachqanda. Las kwatru di la tardinach'i chay tiyachqanmanqa ch'ayarqanllampa. Chaymandaqam chaypina paywan tardiyarqanllampa. 40 Chay ichkay runamandaqam suqninqa karqan Andris. Payqam Simun Pidrumpa masan karqan. 41 Chay Andrisqam das rirqan maskaq chay masan Simunda. Chaymi masanda tarichpaqa, nirqan: Misiyastam tarichqallampa kani, nichpa. (Pallkunampa rimaynimbiqam Misiyasqa ichu Kristuqa munan niyta Dyus Amkrachqan Wachadur, nichpa.) 42 Chaymi Andrisqa chay uras masan Simunda ampamurqan Jisusman. Chaymi Jisusqa champachpa, nirqan: Qamqam Junaspa churin Simun kangi. Piru kananqam ringi chutiq Sifas, nichpa. Chay Sifas chutiqqam rimaynimbiqa munan niyta Pidru. (Pidruqam munan niyta rumi.) 43 Qayandinqam Jisusqa munarqan riyta prubinsya Galiliyaman. Chaymandaqam tingunamkurqan suq runa Filimpi chutiqwan. Chaymi pay kachqanman ch'ayachpa nirqan: Amku nuqawan, nichpa. 44 Chay Filimpiqam Bitsayda llaqtamanda karqan. Chaymi chay Andrispa, Pidrumpa llaqta masin karqan. 45 Kanan Filimpiqam suq runa Natanayil chutiqman richpa nirqan: Tarichqallampanam kani Dyus Amkrachqan Wachadurta. Manchu chay unay Muysis librungunampi, Dyuspaq suq rimaqkunampis librungunampi kaychina iskibrirqan: Dyus Amkrachqan Wachadurmi rin ch'ayamuq, nichpa. Chay Wachadurqam Nasarit llaqtamanda. Jusimpa churinmi. Jisusmi chutin, nichpa. 46 Piru Natanayilmi Filimpitaqa nirqan: Chay llaqta Nasaritmandaqa ima allindaq atinman ch'ayamuyta? Manam nimampis, nichpa. Chaychina Natanayil nimptinmi, Filimpiqa nirqan: Amku rimkaq, nichpa. 47 Chaymi chay Natanayilqa Filimpiwan Jisusmanna ch'ayamullkamptin, Jisusqa rimkachpa, Natanayilpaq nirqan: Kaypinñm suq lijitimu isrraylinu. Payqam ancha kabalta riman. Manam llullamkunchu, nichpa. 48 Chaymi Natanayilqa Jisusta nirqan: Imachinataq riqsiwangi, chaychina niwanallkiqa? nichpa. Chaymi Jisusqa nirqan: Manaraq Filimpi qayachumptinmi, yura iguspa warambi kallkamptimki, rimkachurqay, nichpa. 49 Chaychina nimptinqam, Natanayilqa nirqan: Yach'achimkuq Taytitu, qamqam Dyuspa Churin kangi. Qamqam nasyunninchiq Isrrayilpa gubyirnun kangi, nichpa. 50 Chaychina nimptinqam, Jisusqa nirqan: Chay yura iguspa warambi rimkachuchpa nichumptiychu, nuqampiqa yuyamkungi? Ringinam rimkaq mas ispantaypaq milagrumkunata ruramptiy, nichpa. 51 Chaymandaqam pallkunata nirqan: Allimptam nillkillampa, nuqam Dyusmanda Chamuq Runa kani. Chaymi qamkunaqa ringillampa rimkaq syiluta kich'arallkaqta. Chaymandaqam ringillampa rimkaq Dyuspa anjilningunata, nuqamanda syiluman rillkaqta, syilumanda nuqaman chamullkaqta, nichpa.
1 Kimsa diya pasamptinnam, chay prubinsya Galiliyampa Kanñ llaqtambi rurarqanllampa suq kasamyintu fyistata. Chaypim karqan Jisuspa maman. 2 Chay fyistamanmi Jisusta, nuqallkuna yach'amkuqninda kumbidawarqanllampa. 3 Chay fyistampi binu uchyamkamptinmi, mamanqa Jisusta nirqan: Ijitu, uchyamkachqanam binunqa. Yanampayri, nichpa. 4 Chaymi Jisusqa mamanda nirqan: Mamita, ¿imarallkutaq chaychinaqa niwangi? Manaraqmi ch'ayamunchu uras, milagrumkunata ruranaypaqqa, nichpa. 5 Chaymi mamanqa kasaraqkunampa kriyadungunata kaychina nirqan: Waway yumbay nichuchqanda rurayllampa, nichpa. 6 Chaypim karqan sayis payaskamkuna rumimanda kaq. Chaqa chay isrraylinumkunam yamkuta tandaqllampa chay payaskamkunampi, mayllamkuna kustumbrinda rurananllampa. Kada payaskam 80 litrus a 100 litruskaman umkumkuq. 7 Chaymi Jisusqa chay kriyadumkunata nirqan: Chay payaskamkunaman undachiyllampa yamkuta, nichpa. Chaymi pallkunaqa kasuchpa, ancha undachirqanllampa yamkuta. 8 Chaymandaqam chaychina ruramptinllampaqa, Jisusqa pallkunata kaychina nirqan: Kananqa chay payaskamkunamanda achla surquchpa, ampachpa, sirbisyumkunampa kamachimkuqninda quy, nichpa. Chaymi chay kriyadumkunaqa Jisus nichqanchina rurarqan. 9 Piru chay sirbisyumkunampa kamachimkuqninqam mana yach'arqanchu: Maymandam ampamunllampa kay binutaqa, nichpa. Kriyadumkunallam yach'arqanllampa, pallkuna kimkin chay payaskamanda surquchqanllamparallku. Chaqa chay yamkuqam binumpaqna timkramkachqa karqan. Chaymi chay kamachimkuq sirbisyuqa mallichpa, ancha gustachpa, chay kasarallkaqta qayachpa, 10 nirqan: Kay binuqam ancha michki! Yumbay runam kumbidachqangunataqa chay mas ch'aniyuq binuta puntata qunllampa. Chay allin binuta achkata umpyamptinraqmi, chay mana ch'aniyuq binutaqa qunllampa. Piru qamqam ultimumpaqraq kay mas allin binullkitaqa waqaychachqa kangi, nichpa. 11 Chaychina prubinsya Galiliyampa Kanñ llaqtambim Jisusqa punta milagruta rurarqan, chay binuta rurachpa. Chayta rurachpam, payqa pudirniyuq kachqanda rimkachimkurqan. Chaymi nuqallkuna yach'amkuqningunaqa paypi kriyirqayllampa. 12 Chaymandaqam Jisusqa mamanwan, masangunawan, nuqallkuna yach'amkuqninwan chay Kanñ llaqtamandaqa ura Kampirnawun llaqtaman rirqayllampa. Waq Kampirnawumbim wamkin diyamkunata tiyarqayllampa. 13 Paskwa fyista ch'ayallkamptinnam, Jisusqa rirqan Jirusalin llaqtaman. 14 Chaypim runamkunata tarirqan Dyuspa adurana wasimba patyumbi buyiskunata, wichamkunata, palumamkunata randimkullkaqta. Qallayta kambyamkuqkunampismi chaypi kambyallkarqanllampa. 15 Chaymi Jisusqa chayta rimkachpa, suq chimkutita rurachpa, yumbay chay wichamkunata, buyiskunata qatirqan Dyuspa adurana wasimba patyunmandaqa. Kanan chay qallayta kambyamkuqkunampa qallayningunatam ch'ilya ch'ilya pambaman wichumkurqan. Masangunatampismi bularqan. 16 Chay palumata randimkuqkunataqam nirqan: Chay tumkuy imallkimkunata kaymanda surquyllampa. Taytaypa wasindaqa ama plasatachinaqa rurayllampachu, nichpa. 17 Chayta rimkachpaqam, nuqallkuna yach'amkuqninqa yuyarqayllampa Dyuspa Santu Librumbi Tayta Dyusta kaychina nichqanda: Chumaq wasimkita nuqa ancha kuyachpam, suqkuna disprisyamptin, ancha piñamkuni, nichpa. 18 Chaymi chay mas kamachimkuq isrraylinumkuna Jisusta kaychina nirqanllampa: Ima milagrutam atingi rurayta, rimkachpa, yach'anayllampaqa: Taytanchiq Dyusmi qamta numbrachuchqa, paypa kay adurana wasimbi kamachimkunallki, nichpaqa? 19 Chaymi Jisusqa pallkunata nirqan: Kay wasita limpu bulamptimkillampam, nuqaqa kimsa diyampilla rurarichaq, nichpa. 20 Chaychina Jisus nimptinmi, chay kamachimkuqkunaqa nirqanllampa: Kwarinta y sayis watamkunampim Dyuspa kay adurana wasindaqa rurarqanllampa. ¿Chaychu qamqa kimsa diyampilla ringi rurariq? nichpa. 21 Piru Jisusqam chaychina rimachpaqa, kwirpumbaq rimarqanqa; manam Dyuspa adurana wasimbaqchu. 22 Chaymi wanchimptinllampa, muchuqmanda kawsamumptinqa, nuqallkuna yach'amkuqninqa chay nichqanda yuyarqayllampa. Chaymi nuqallkunaqa Dyuspa Santu Librumbi nichqanda, Jisus nichqandampis kriyirqayllampa. 23 Jisusmi Jirusalin Paskwa fyistampi kachpa, milagrumkunata rurarqan. Chaymi achka runamkuna paypi kriyirqanllampa. 24 Piru Jisusqam pallkunampiqa mana yuyamkurqanchu. Chaqa pay kimkinmi riqsirqan yumbaypa chunqunda, ima layamkunata yuyallkanllampa, nichpa. Chaymi mana nisisaryuchu karqan ni pimpis ninambaq: Kay runamkunaqam kaychina yuyallkanllampa, nichpa.
1 Karqanmi suq farisiyu dumktrinayuq runa Nimkudimu chutiq. Payqam isrraylinumkunampa kamachimkuqnin karqan. 2 Chay Nimkudimuqam suq tuta Jisusta richpa watumkuq, kaychina nirqan: Yach'achimkuq Taytitu, yach'anillampam qambaq: Tayta Dyusmi kach'amuchuchqa, nuqallkunata yach'achiwanallki, nichpa. Chaqa Taytanchiq Dyus kach'amuchuchqa kamptinqam, atingi chay achka milagrumkunata rurayta. Manaqa manam atingimanchu, nichpa. 3 Chaychina Nimkudimu nimptinmi, Jisusqa nirqan: Allimptam nillki, suq runa muchuqmanda nasichpam, atin Tayta Dyuswan syilumpi kawsaytaqa. Manaqa manam atinchu, nichpa. 4 Chaymi Nimkudimuqa Jisusta kaychina tampurqan: Imachinataq suq runaqa atinman muchuqmanda nasiriytaqa? Manam ni pimpis atinmanchu mamamba pach'anman yallkuriyta, muchuqmanda nasinambaqqa, nichpa. 5 Nimkudimu chaychina nimptinmi, Jisusqa nirqan: Allimptam nillki, Tayta Dyuswan tumkuy tyimpu pullan kawsanallki, puntata munan yamkumanda, ispiritumanda nasinallki. 6 Chaqa yumbay runamkuna mamanmanda nasichpaqam, kwirpunda ch'askinllampa. Piru Dyuspa Santu Ispiritunmi wamkingunata yanampan, muchuqmanda nasirinambaq, chay Santu Ispirituta kasuchpa kawsananllampa. 7 Chayri ama ispantaychu: Muchuqmanda nasiriy, nichumptiyqa. 8 Chaqa wayraqam tumkuy ladumanda wayran. Piru qamkuna uyachpaqam, mana yach'angillampachu: ¿Maymandam chamun? ni ¿maymanmi rin? nichpaqa. Chaychinallam Dyuspa Santu Ispiritunmanda nasiqkunampis. (Chay Santu Ispirituta mana rimkachpampis, yach'anllampa: Paymi yanampawallkan, nichpa.) 9 Chaychina Jisus nimptinmi, Nimkudimuqa muchuqmanda tampurirqan: Imachinaraq kanqa chay layamkunaqa? nichpa. 10 Chaymi Jisusqa nirqan: Isrraylinumkunampa yach'achimkuqnin kachpampischu, ¿mana yach'angi challkunata? 11 Allimptam nillki, nuqaqam yach'achqayta, rimkachqayta yach'achillkillampa. Piru qamkunaqam mana kriyiwangichu. 12 Chaychina kay pachampi rimkachqaypaq parlachichumptiy, mana kriyiwachpaqa, ¿imachinataq kriyiwangiman, syilumpi rimkachqaypaq parlachichumptiyqa? 13 Manam ni pimpis syiluman richpaqa, kutimuchqachu. Nuqallam Dyusmanda Chamuq Runa kachpa, syilumandaqa chamuchqa kani. 14 Unay tyimpumpim chuncha lugarpi Muysisqa suq kulibrata jirrumanda rurachpa, suq qarumpi alsarqan. Chaychinallam nuqatampis suq kruspi rinllampa alsawaq, 15 nuqampi yumbay yuyamkuqkuna ama chinganambaq, achwan syiluman richpa, tumkuy tyimpu kawsanambaqllampa, nichpa. 16 Chaqa Tayta Dyusqam kay mundumpi yumbay tiyaqkunata ancha kuyachpa, sampalan Churinda kach'amurqan wañunambaq, paypi yumbay kriyiqkuna ama chingananllampa; achwan tumkuy tyimpu kawsananllampa. 17 Chaymi Tayta Dyus kay munduman Churinda kach'amurqan, yumbayta chay kastigumanda wachanambaq. Manam kach'amurqanchu, kay mundumpi tiyaqkunata jusgachpa kastigananqa. 18 Chaymi Dyuspa Churimbi yuyamkuqkunataqa Taytanchiq Dyusqa mana rinchu chingachiq. Piru paypi mana yuyamkuqkunataqam rin chingachiq, sampalan Churimbi mana kriyichqanllamparallku. 19 Chaqa payqam kay mundumanqa chamuchqa, Tayta Dyuspaq yach'achimkunambaq. Chaymi suq michachina kachqa. Piru paypi mana kriyiqkunaqam mana munanllampachu michampichina kawsaytaqa. Chaqa uchangunata mana munachpa dijaytaqa, tutayaqpichina munanllampa kawsayta. Chaymi Taytanchiq Dyusqa pallkunata rin kastigaq. 20 Chay mana allita ruraqkunaqam mana munanllampachu ni pimpis yach'anambaq chay mana alli rurachqambaqqa. Chaymi chay michachina kaqta ch'iqnichpaqa, mana qamimkanchu, ama ni pimpis rimkachpa yach'anambaq: Ancha malutam rurallkan, nichpa. 21 Piru suqkunaqam allimp kaqta kasuchpa, michampichina purinllampa. Chaymi tumkuy runamkuna rimkachpa yach'anllampa: Taytanchiq Dyus munachqandam rurallkanllampa, nichpa. 22 Chaymandaqam Jisusqa nuqallkuna yach'amkuqninwan pullan prubinsya Judiyaman rirqayllampa. Chaypim suq tyimpumpaq kidachpa, runamkunata, warmimkunata chutichirqayllampa. 23 Jwan Chutichimkuqpismi Inun llaqtampi chutichillkarqan runamkunata, warmimkunata, chaypi achka yamku kachqanrallku. Chay Inun llaqtaqam Salim llaqtampa ladumbi kidan. 24 Chaychinaqam karqan, Jwanda manaraq karsilamptinllampa. 25 Chay tyimpumpim Jwamba yach'amkuqningunaqa suq isrraylinu masingunawan suq layata suq layata anyanamkurqanllampa: Tayta Dyusqam munan kaychina mayllamkunanchiq, ama uchayuqkuna kananchiqllampa, nichpa. 26 Chaymandaqam Jwamba wamkin yach'amkuqningunaqa rirqanllampa payta niq: Yach'achimkuq Taytitu, rriyu Jurdamba chimbambim suq runa qamwan pulla karqan. Chay runampaqmi niwarqallkillampa: Paytaqam Taytanchiq Dyus kach'amuchqa, nichpa. Kananqam chay runaqa achkatana chutichillkan. Achka runamkuna, warmimkunampismi paytana sigillkanllampa, nichpa. 27 Chaychina yach'amkuqninguna nimptinllampaqam, Jwanqa nirqan: Tayta Dyus suq runata yanampamptinqam, imatampis atin rurayta. Manaqa manñm. 28 Qamkuna kimkimkim uyawachqallampa kangi, nuqa nichumptiy: Manam nuqaqa Dyus Amkrachqan Wachadurchu kani. Achwanmi Taytanchiq Dyus kach'amuwachqa, chay Wachadurninchiqmanda mas puntata chamunaypaq, nichpa. 29 Kay kumparasyumbaq yuyayllampa: Suq runa kasarachpaqam, ancha kuchimkuchpa riman. Chaymi chay runampa mas kuyachqan kumpañirumbis uyachpa, ancha kuchimkun. Jisusqam chay kasaraq runachina. Nuqa chay runa kasaraqpa mas kuyachqan kumpañirun kani. Chaymi achka runa Jisusta sigimptinqa, ancha kuchimkuni. 30 Chaymi mas alli kanman, nuqata dijawachpa, paytana masta siginambaqllampa. 31 Chay runa syilumanda chamuqqam tumkuy runamkunamanda mas baliq. Piru suq runa kay pachamandalla chamuqqam kay pachampalla. Chaymi kay pachampa kusasningunampaq yach'achimkun. Piru chay syilumanda kaqqam yumbay runamkunamanda mas pudirniyuq. 32 Chaymi payqa syilumpi rimkachqanda, uyachqanda yach'achimkun. Piru tumkuy challkunata yach'achimptimbismi, ancha achka runamkuna mana kriyinllampachu paytaqa. 33 Piru paypi kriyiqkunaqam allita yach'anllampa: Tayta Dyusqam mana llullamkunchu. Chaqa pay nichqanqam tumkuy ima allimp, nichpa. 34 Taytanchiq Dyusqam Churinda syilumanda kach'amuchpa, Santu Ispiritunda qun, tumkuy imampi ancha allita yanampanan. Chaymi payqa Tayta Dyus rimachqandalla yach'achimkun. 35 Tayta Dyusqam Churinda ancha kuyan. Chaymi paypa mamkimbi rurachqa tumkuy runamkunata, warmimkunata, tumkuy ima kaqta, yumbayta kamachinambaq. 36 Chayrallkum Taytanchiq Dyuspa Churimbi yuyamkuqkunaqa tumkuy tyimpu rinllampa kawsaq. Piru paypi mana yuyamkuyta munaqkunaqam mana rinllampachu tiyaq syilumpiqa. Achwanmi Tayta Dyusqa ancha rin kastigaq pallkunataqa, nichpa.
1 Farisiyu dumktrinayuqkunam yach'arqanllampa: Chay Jisusqach Jwan Chutichimkuqmanda mas achka runamkunata chutichillkan, yach'achillkan, nichpa. 2 Piru manam Jisus kimkinchu chutichimkurqanqa. Achwan nuqallkuna yach'amkuqningunam chutichimkurqayqa. 3 Chaymi Jisusqa chay farisiyumkuna parlachqanda yach'achpa, (nuqallkuna yach'amkuqningunata ampawachpa), prubinsya Judiyamanda lluqchirqanna, prubinsya Galiliyamanna rinambaq. 4 Chay Galiliyaman ch'ayanayllampaqam, prubinsya Samaryata pasallkarqayllampa. 5 Chaymi riqchinaqa chay prubinsya Samaryampa Simkar llaqtanman ch'ayarqayllampa. Chay llaqtaqam kidan chay unay Jusimpa ch'amkramba ladumbi. Chay ch'amkrandaqam ch'askichqa karqan taytan Jamkubumanda. 6 Chay Simkar llaqtampim ancha unay tyimpumkunampi chay alma Jamkubu suq pusuta rurachqa karqan. Chaymi Jisusqa riqchina challkuchpa, chay pusumpa ladumbi samarqan. Chay urasqam larrdusinach'i karqan. 7 Chaymi nuqallkuna yach'amkuqninqa chay pusumpa ladumbi Jisusta dijachpa, chay Simkar llaqtaman rirqayllampa, mimkunata randiq. Challkamanqam suq samaryana warmi Simkarmanda lluqchichpa, chay pusuman rirqan yamkumpaq. Chaymi Jisusqa chay warmitaqa nirqan: Warmisita, quwayri yamkituta, nichpa. 9 Chaymi chay warmiqa nirqan: Qam isrraylinu kachpaqa, ¿imachinataq nuqa samaryana warmitaqa niwangi: Yamkuta quway, nichpaqa? Chaqa isrraylinumkunaqam samaryanu kaqkunawanqa mana tandamkaqllampachu. 10 Chaychina nimptinqam, Jisusqa nirqan: Taytanchiq Dyusmi suq ancha chumaq rrigaluta munan quchuyta. Chaymi qam nuqata riqsiwachpa: Kay runam Dyusmanda chamuchqa, nichpaqach'i, kawsachimkuq yamkuta mañawanallkita quchunaypaq, nichpa. 11 Chaychina Jisus nimptinqam, chay warmiqa nirqan: Taytitu, kay pusuqam ancha jundu. Manam nimayuqchu kangi, surqunallki chay kawsachimkuq yamkutaqa. 12 Qamqam mana mas baliqchu kangi chay punta agwilunchiq Jamkubumandaqa, ¿manachu? Chaqa paymi quwachqallampa kay pusutaqa. Pay kimkinmi wambrangunawan, animalningunampis kay pusumanda yamkutaqa umpyaqllampa, nichpa. 13 Chaymi Jisusqa nirqan: Kay pusumanda mayqan umpyaqqam rin yamkunariq. 14 Piru nuqa quchqayta mayqan ch'askiwaqqam, alabis manana rinchu yamkunaq. Chaqa chay quchqayqam chunqumbiqa suq pumkyuchina rin kaq. Chay pumkyu layamandam ancha achka yamkuchina rin lluqchiq, tumkuy tyimpu kawsanambaq, nichpa. 15 Chaymi warmiqa nirqan: Taytitu, quwayri chay laya yamkuta, amana yamkunanaypaq, ni kayman chamunaypaq yamkumpaq, nichpa. 16 Chaymi Jisusqa nirqan: Riy ampamuy qusallkita, nichpa. 17 Chaymi warmiqa nirqan: Manam qusayuqchu kani, nichpa. Chaymi Jisusqa nirqan: Allimptam niwachqa kangi: Manam qusayuqchu kani, nichpaqa. 18 Chaqa sinku kutindam kasarachqa kangi. Piru kananqam chay muchuq runallkiqa mana ni lijitimu qusallkichu. Chaymi allimp kaqta niwachqaqa kangi, nichpa. 19 Chaychina nimptinqam, chay warmiqa nirqan: Taytitu, qamqachumach' Dyuspaq rimaq kangi. Chaymi kayta munani tampuchuyta: 20 Unay agwiluy samaryanumkunam kay altu lumaman chamuchpa, Dyusta aduraqllampa. Piru qamkuna isrraylinumkunaqam ningillampa: Jirusalimbilla Dyustaqa adurachunllampa, nichpa. (Chaymi tampullki: ¿Mayqan lugarpim mas allin adurananchiq? nichpa.) 21 Chaymi Jisusqa chay warmita nirqan: Warmisita, kay nichuchqayta kriyiway; Rinmi ch'ayamuq tyimpu, mana ni kay lumaman chamuchpa, ni Jirusalinman richpa, qamkuna Dyusta aduranallkiqa. 22 Qamkuna Samaryamanda kaqkunaqam mana yach'angillampachu: Pitam aduranillampa, nichpaqa. Piru nuqallkuna isrraylinumkunaqam yach'anillampa: Pitam aduranillampa, nichpa. Chaqa Dyus Amkrachqan Wachadurqam Isrrayilmanda chamun. 23 Piru kananqam Dyuspi yuyamkuqkunaqa tumkuy chunqu payta allimpta aduranqallampa, paypa Santu Ispiritun yanampamptin. Chaqa Tayta Dyusqam munan, yumbaynimki chaychina paytalla aduranallkillampa. 24 Taytanchiq Dyusqam mana kwirpuyuqchu. Achwanmi suq ispiritu. Chayri payta aduraqkunaqa mana rimkachpampis, tumkuy chunqu, tumkuy ispiritunwan allimpta aduranqallampa, Dyuspa Santu Ispiritun yanampamptin. 25 Chaymi chay warmiqa Jisusta nirqan: Nuqaqam yach'ani: Dyus Amkrachqan Wachadurmi rin chamuq. Payllam Misiyaspis chutin. Chamuchpam, tumkuy imata ancha klaruta rin yach'achiwaqninchiq, nichpa. 26 Chaymi Jisusqa payta nirqan: Nuqa qamwan parlaqmi chay Wachadurqa kani, nichpa. 27 Chaymandaqam nuqallkuna yach'amkuqninqa Jisus kallkachqanman ch'ayachpaqa, tarirqayllampa suq warmiwan parlallkaqta. Chaymi ancha ispantachpa yuyarqayllampa: ¿Imata munachpam, chay samaryana warmiwanqa parlallkan? ¿Imampaqraq parlallkan? nichpa. Piru manam ni mayqanniypis almitimkarqaychu tampuqqa. 28 Chaymandaqam chay warmiqa puyñunda dijachpa, llaqtanman yallkurqan, llaqta masingunata kaychina abisaq: 29 Amkullampa rimkaq suq runata. Chaqa payqam tumkuy ima rurachqayta niwachqa. ¿Manachuraq pay Dyus Amkrachqan Wachadurqa? nichpa. 30 Chaymi llaqta masingunaqa lluqchichpa, chamurqanllampa Jisusman. 31 Pallkuna chamunangamanqam, nuqallkunaqa Jisusta kaychina rrugarqayllampa: Yach'achimkuq Taytitu, kayta mimkuy, nichpa. 32 Piru Jisusqam niwarqanllampa: Nuqampaqam kan suq laya mimkunay. Chaypaqqam mana yach'angillampachu, nichpa. 33 Chaymi nuqallkuna suqniy suqniy kaychina parlarqayllampa: Piraq ampamuchqa mimkunandaqa? nichpa. 34 Chaymi Jisusqa nuqallkunata niwarqan: Taytay Dyusmi tariyayta quwachqa, pay munachqanda ruranaypaq uchyanallkaman. Chay tariyaymi nuqampa mimkunaychinaqa. 35 Qamkunaqam ningillampa: Ch'usku killaraqmi faltan, syiga tyimpu ch'ayamunambaqqa, nichpa, ¿manachu? Piru nuqaqam nillkillampa, tumkuy laduman champamkuchpa, intyindiyllampa: Achka runamkuna, warmimkunam listuna, nuqampi yuyamkunanllampa. Chaymi suq tarpuduchina qarwamuchqana kusichananchiqllampa. 36 Kusichampi trabajaqqam pagunda ch'askin, ¿manachu? Chaychinallam Dyuspaq yach'achimkuqkunampis Dyusmanda pagunda rin ch'askiq. Dyuspi kriyiqkunam chay tandachqan granumkunachinaqa. Chay kriyiqkunaqam tumkuy tyimpu rinllampa kawsaq. Chaymi chay puntata yach'achiqkunaqa, chay imkita yach'achiqkunawan pulla rinllampa kuchimkuq. 37 Chaymi chay unay nichqanchina allimpta kaychina nillkillampa: Suqmi tarpumkun, suqmi kusichamkun, nichpa. 38 Chaychinallam suq runamkuna nuqampaq puntata yach'achimkuchpam, tarpumkuqchina kachqallampa. Piru kanan qamkuna nuqampaq masta yach'achimkumptimkim, nuqampi kriyimptinllampaqam, alabis suq tarpumkuchqanda qamkunaqa kusichallkangi, nichpa. 39 Chay warmiqam llaqta masin samaryanumkunawan parlallkarqan, Chay runaqam tumkuy ima rurachqayta niwachqa, nichpa. Chaymi achka llaqta masinguna Jisuspi kriyirqanllampa. 40 Chay samaryanumkunam chamuchpa, Jisusta rrugarqanllampa, chay llaqtambi kidanambaq. Chaymi ichkay diyata chaypi kidarqayllampa. 41 Kanan Jisusta uyachpaqam, mas samaryanumkuna paypi kriyirqanllampa. 42 Chaymandaqam chay warmitaqa kaychina nirqanllampa: Puntatam Jisuspi kriyirqayllampa, qam paypaq niwachqallkirallku. Piru kananqam nuqallkuna kimkiyna paytaqa uyachqallampa kani. Chaymi mas allitana yach'anillampa: Allibraq payqa yumbaypa Wachadurninchiq, nichpa. 43 Ichkay diyamandam Jisusqa nuqallkunawan chay prubinsya Samaryamanda richpa, prubinsya Galiliyamanna ch'ayamurqayllampa. 44 Paymi kaychina niwachqallampa karqan: Dyuspaq rimaqtaqam kimkin llaqta masingunaqa mana rrispitanllampachu, nichpa. 45 Piru chay llaqta masin galiliyanumkunaqam Jirusalimbi Paskwa fyistampi kachqallampa karqan. Chaymi Jisus chay fyistampi achka milagrumkunata ruramptin, rimkachqallampa karqan. Chaymi Galiliyaman ch'ayamptiyllampa, pallkunaqa allita ch'ayachiwarqanllampa. 46 Chaymandaqam Jisusqa nuqallkunawan chay prubinsya Galiliyampa Kanñ llaqtanmanna kutimurqayllampa. Chay Kanampim Jisusqa yamkuta binumpaq timkrachqa karqan. Piru chaypi kallkamptiyllampam, gubyirnumpa suq yanampamkuqnimba churin ancha qachyaq karqan Kampirnawun llaqtampi. 47 Chaychina qachyaq kamptinqam, chay kamachimkuq runaqa Jisuspaq yach'arqan: Judiyamandach kay prubinsya Galiliyaman ch'ayamuchqa, nichpa. Chaymi payqa chamuchpa, Jisusta chaypi tarichpa, ancha rrugarqan, Kampirnawunman rinambaq, churinda kach'amkachiq. Chaqa churinqam anchayachpa, wañullkarqanna. 48 Chaymi Jisusqa payta nirqan: Mana rimkachpa siñamkunata, milagrumkunataqam, mana kriyiqllampachu ringi, nichpa. 49 Chaymi chay kamachimkuq runaqa Jisusta nirqan: Taytitu, amkur das, wambray ama wañunambaq, nichpa. 50 Chaymi Jisusqa nirqan: Riyna wambrallkita rimkaq. Payqam kach'amkachqana. Mananñm rinchu wañuq, nichpa. Chayrallkum chay runaqa Jisus nichqanda kriyichpa, llaqtanmanna rirqan. 51 Yaqqana ch'ayallkamptinqam, kriyadunguna chamurqan chay runata tinguq. Chaymi tinguchpaqa, nirqanllampa: Churimkiqam kach'amkachqana. Mananñm rinchu wañuq, nichpa. 52 Chaymi kriyadungunataqa tampurqan: Ima urasmi kach'amkarqanqa? nichpa. Chaymi kriyadungunaqa nirqan: Qayna a la una di la tardim jibriqa dijarqan, nichpa. 53 Chaymi chay kamachimkuq runaqa intyindirqan: Chay urasmi Jisusqa niwarqan: Churimkiqam kach'amkachqana. Mananñm rinchu wañuq, nichpa. Chaymi payqa yumbay ayllundin Jisuspina kriyirqanllampa. 54 Chaychina prubinsya Judiyamanda kutimuchpam, chay milagru rurachqanwanqa, Jisusqa ichkay milagrutana rurachqa karqan prubinsya Galiliyampiqa.
1 Chaymandaqam Jisusqa Jirusalinmanna rirqan, llaqta masin isrraylinumkunampa suq fyistanman. 2 Chay Jirusalin llaqtampa suq yallkunanmi Wicha pungu chutin. Chay pungumpa ladumbim kan suq pusu. Chay pusuqam ibriyu rimaypiqa Bitisda chutin. Chay pusuqam sinku kurridurniyuq. 3 Chay pusumpa ladumbim qachyaqkuna, mana rimkamkuqkuna, kujumkuna, wañuchqachina kwirpuyuqkuna, usurachpa ?chuyamkullkarqanllampa, chay pusumpi yamku kuyunangaman. 4 Chaqa Dyuspa suq anjilninmi tyimpun tyimpun chamuchpa, chay pusumpi kaq yamkuta kuyuchiq. Chaymi mayqan qachyaq chay pusuman puntata yallkuqqa chay qachyayninmanda kach'amkarqan, ima laya nanayniyuq kachpampis.? 5 Suq runa chay pusumpa manyambi kaqmi 38 watas tumkuyta qachyaqlla karqan. 6 Jisusqam chay runata usurallkaqta rimkachpaqa, yach'arqan achka watamkunata qachyaqlla kachqanda. Chaymi tampurqan: Munangichu kach'amkayta? nichpa. 7 Chaymi chay qachyaqqa nirqan: Taytitu, manam pimpis kanchu kay yamkuman yallkuchiwanambaq kuyuchqan urasqa. Chaymi kada kuyumptin, ñamkanallkaman, suqkuna binsiwachpa, das yallkun yamkumanqa, nichpa. 8 Chaychina nimptinqam, Jisusqa nirqan: Atarichpa, parallkita tandachpa, ampachpa, puriyna, nichpa. 9 Chaymi chayta nimptinlla, chay runaqa qachyayninmanda kach'amkachpa, paranda tandachpa, ampachpa, rirqanna. Piru chay kach'amkachichqan diyaqam samana diya karqan. 10 Chaymi isrraylinumkunampa wamkin kamachimkuqninqa chay runa kach'amkachqata anyarqanllampa: Kananqam samana diya. Manam allichu parallkita ampanallkiqa, nichpa. 11 Chaymi chay runaqa nirqan: Kach'amkachiwaq kimkinmi kamachiwachqa: Parallkita tandachpa puriyna, nichpa. 12 Chaymi chay anyaqkunaqa tampurqanllampa: Pitaq kamachichuchqa, parallkita tandachpa rinallkiqa? nichpa. 13 Piru chay runaqam mana yach'arqanchu: Pim kach'amkachiwachqa, nichpaqa. Chaqa Jisusqam chay achka runamkunamanda das amkramkachpa, suq lugarmanna richqa karqan. 14 Chaymandaqam Jisusqa chay kach'amkachichqan runata Dyuspa adurana wasimbi tarichpa, nirqan: Allita uyaway, kallkich kach'amkachqana kangi. Piru uchamkunataqa amana rurariychu, ama masta ñamkanallkimpaq, nichpa. 15 Chaychina Jisusta riqsichpaqam, chay runaqa chay kamachimkuqkunaman richpa, nirqan: Jisusmi chay kach'amkachiwaqqa kachqa, nichpa. 16 Chaymi Jisus chaychina samana diyampi rurachqanrallku, chay kamachimkuqkunaqa ancha kuntrachpa, yuyarqanllampana wanchiyta. 17 Piru Jisusqam pallkunataqa nirqan: Taytay Dyusmi kanangaman tumkuy imata kwidallkan. Chaychinam trabajallkan. Chayrallkum nuqampis runamkunata kwidachpa, kach'amkachichpa trabajallkani, nichpa. 18 Chayta nimptinqam, chay kamachimkuq isrraylinumkunaqa achwamba munarqanllampa wanchiyta. Chaqa Jisusqa pallkunampa liyninda mana kasuchpam, samana diyampi trabajarqan. Kaychinampismi nirqan: Dyusmi Taytay, nichpa. Chaymi pallkunaqa yuyarqan: Yanqam Dyus tumkullkan, nichpa. 19 Chaymandaqam Jisusqa chay kuntraqkunata nirqan: Allimptam nillkillampa, nuqa Dyuspa Churin kachpam, mana nimatampis nuqa munachqaytaqa ruranichu. Achwanmi Taytay rurachqanda rimkachpa, chay layatalla nuqampis rurani. 20 Taytayqam kuyawan. Chaymi tumkuy ima rurachqangunata rimkachiwan. Piru mas ispantaypaq kusaskunatam rin rimkachiwaq. Chay rimkachiwachqanda ruramptiyqam, qamkunaqa ancha ringillampa ispantaq. 21 Chaqa Taytayqam wañuqkunata kawsachin. Chaychinallam nuqampis munachpa, mayqandampis atini kawsachiyta. 22 Taytay Dyusqam mana pitampis jusganchu. Payqam nuqata numbrawachqa juyis kanaypaq, yumbayta jusganaypaq. 23 Chaychinam numbrawachqa, runamkuna alabawanambaq, payta alabachqanchina. Piru mayqan runa mana baliqpaq riqsiwachpaqam, chay kach'amuwaq Tayta Dyustampis mana baliqpaq riqsillkan. 24 Allimptam nillkillampa, mayqan runa nichqayta kasuwachpa, kach'amuwaq Taytaypi yuyamkuchpaqam, tumkuy tyimpu rin kawsaq. Payqam manana sintinsyaduchu rin kaq, kastigadu kanambaqqa. Achwanmi payqa wañunambaq kachqanmanda pasachqana suq laya bidaman, tumkuy tyimpu kawsanambaq. 25 Allimptam nillkillampa, Dyusta mana kasuqkunaqam wañuchqa layachina. Piru kay tyimpumandampacham chay wañuchqa layamkunaqa nuqa Dyuspa Churinda rinllampa uyawaq. Uyawachpa kasuwaqkunallam tumkuy tyimpu rinllampa kawsaq. 26 Chaqa Tayta Dyus kimkinmi yumbay kawsaqkunata kawsachin. Chaychinallam nuqa Churindampis pudirninda quwachqa, kawsachimkunaypaq. 27 Dyusmanda Chamuq Runam kani. Chaymi payqa juyispaq numbrawachqa, runamkunata jusganaypaq. 28 Piru kayta uyachpaqa, ama yuyayllampachu: ¿Imachinaraq kanqa? nichpaqa. Chaqa suq diyam rin ch'ayamuq, wañuqkuna busniyta uyachpa 29 kawsamunanllampa. Kanan allita ruraqkunaqam rin kawsamuq, tumkuy tyimpu kawsanambaqllampa. Piru chay mana allita ruraqkunaqam rinllampa kawsamuq, kastigadu kanambaqllampa. 30 Nuqaqam sampalitayqa mana nimatampis atinichu rurayta. Achwan Taytay Dyus niwachqanchinallam jusgamkuni. Chaqa chay Taytay kach'amuwaq munachqanchinallam tumkuy imata rurani; manam nuqa munachqaytaqa. Chaymi ancha kabalta justisyata rurani. 31 Manam nuqampa faburniytachu rimani. Nuqalla faburniyta rimamptiyqach'i, mana balinmanchu. 32 Piru suq tistigumpismi faburniytaqa riman. Kanan allitam yach'ani chay tistugumpaqqa. Payqam nuqampaqqa allimp kaqtalla riman, nichpa. (Chaqa chay tistiguqam Taytay Dyus.) 33 Kanan qamkunaqam suqkunata kach'arqallkillampa, Jwan Chutichimkuqta tampuq. Chaymi paypis allimp kaqta nuqampaq rimarqan. Manam llullamkurqanchu. 34 Piru nuqaqam mana nisitanichu, runamkuna faburniyta rimanambaqqa. Qamkunallam chaychinaqa yuyangillampa. Chaymi chay Jwan Chutichimkuq nichqanda nillkillampa, nuqampi kriyimptimki, wachachunayllampa. 35 Chay Jwan Chutichimkuqqam Dyuspaq allimp kaqta yach'achichuchpa, qamkunampaqqa suq michachina karqan. Chaymi paymanda yach'amkuchpaqa, qamkunaqa suq tyimpitumpaq kuchimkuchpa kawsarqallkillampa. 36 Chaychina Jwan nuqampaq yach'achimkumptinmi, atingillampa yach'ayta: Pim Jisumkristu, nichpa. Piru Taytay Dyus yanampawamptin tumkuy ima munachqanda ruranaypaqqam, mas allita atingillampa yach'ayta: Tayta Dyusmi Jisusta kach'amuchqa, nichpa. 37 Chaqa Taytanchiq Dyuspismi kach'amuwachpa, nuqampaq rimachqa. Piru qamkunaqam chay rimachqandaqa mana uyachqallampachu kangi, ni payta rimkachqallampachu kangi. 38 Kanan pay kach'amuwamptinmi, qamkunaqa nuqampiqa mana kriyirqallkillampachu. Chaymi Dyus nichqandaqa mana kasuchqallampachu kangi. 39 Qamkunaqam Dyuspa Santu Librunmandaqa ancha allita yach'amkungillampa, yuyachpa: Chayta yach'amkuchpam, tumkuy tyimpu rinchiq kawsaq, nichpa. Kanan chay Santu Libruta liyichpam, ringillampa yach'amkuq nuqampaqqa. 40 Piru qamkunaqam mana munangillampachu nuqaman chamuyta, tumkuy tyimpu kawsanallkillampaqa. 41 Manam munanichu, qamkuna alabawanallki. 42 Chaqa nuqaqam qamkunataqa riqsillkillampa: Dyustaqam mana kuyangillampachu, nichpa. 43 Nuqaqam, Taytay kach'amuwamptin, paypa rrimplasun chamuchqa kani. Piru qamkunaqam mana kasuwangillampachu. Piru suq runa chamuchpa, pay munachqandalla yach'achichumptinqam, das kasungillampa. 44 Kanan qamkunampura ancha alabanamkungi. Piru manam munangillampachu sampalan Tayta Dyus alabachunanqa. Chaychina kachpaqa, ¿imachinataq ringillampa kriyiwaqqa? 45 Kayta yach'ayllampa: Awnki qamkuna fyirusyawamptimkiqam, mana rinichu chimbichuq Taytaypiqa. Achwanmi Muysis rin chimbichuqllampa: Ancha malutam rurachqa kangi, nichpa. Piru qamkunaqam Muysispi ancha yuyamkungillampa: Paymi rin yanampawaq, nichpa. 46 Chaymi Muysis iskibrichqanda allimpta kriyichpaqa, nuqatampis kriyiwangimanllampa. Chaqa paymi nuqampaqqa kaychina iskibrirqan: Dyusmi Wachadurninchiqta rin kach'amuq, nichpa. 47 Piru Muysis librungunampi iskibrichqanda mana kriyichpaqam, ¿imachinataq nichuchqaytaqa ringillampa kriyiwaq? nichpa.
1 Jisusqam chaychina yach'achimkuchpa, uchyachpaqa, nuqallkunawan rirqan chay ancha atun quch'a Galiliyampa suq ladu chimbanman. Chay atun quch'a Galiliyallam Tibiryaspis chutiq. 2 Chay richqanmanmi ancha achka runamkuna, warmimkuna imkinda rirqanllampa. Chaqa Jisumkristu qachyaqkunata kach'amkachimptinmi, pallkunaqa rimkachqallampa karqan. 3 Chaychina Jisusta sigimptinllampam, payqa nuqallkuna yach'amkuqninwan rirqayllampa suq filaman. Chay filampim tiyarqayllampa samaq. 4 Chay diyamkunampiqam nuqallkuna isrraylinumkunampa Paskwa fyistayllampa ch'ayamullkarqanna. 5 Kanan Jisusqam rridurninman champamkuchpa, rimkarqan chay achka runamkuna, warmimkuna payman chamuchqanda. Chaymi Filimpita tampurqan: Maymandam atinchiq tandata randiyta, yumbay kaypi kaqkunata qarananchiqqa? nichpa. 6 Chaychinaqam nirqan, Filimpita mallimpananrallku. Piru Jisusqam yach'arqanna: Nuqam rini qaraq, nichpa. 7 Chaychina tampumptinmi, Filimpiqa Jisusta nirqan: Ni 200 dinaryumkunawan ancha achka tandata randimptinchiqpis, mana aypanmanchu ni achlita achlita qarananchiq yumbay kaypi kaqkunata, nichpa. 8 Chay Simun Pidrumpa masan Andrispismi Jisuspa suq ampustulnin karqan. Paymi kaychina nirqan: 9 Kaypim suq wambra sibadamanda sinku tanditayuq, ichkay piskadituyuq. Piru ¿chaysitullaqa allkamir aypanqa kaypi yumbay kaqkunampaqqa? nichpa. 10 Chaymi Jisusqa nuqallkuna yach'amkuqninda kaychina niwarqanllampa: Yumbay kallkunata tiyachiyllampa, nichpa. Chay lugarpiqam ancha qawa karqan. Chaymi yumbay chay runamkuna, warmimkuna, wambramkunaqa chay qawamkunampi tiyarqanllampa. Pallkunaqam 5.000ch'i ullqumkunalla karqan. 11 Chaymandaqam Jisusqa chay wambrampa tanditangunata piskachpa, Dyusman pagimkuchpa, nuqallkuna yach'amkuqninda quwarqanllampa, nuqallkunana chaypi yumbay kaqkunata qunaypaqllampa. Chaychina rurachpam, chay ichkay piskaditutampis quwarqanllampa, chaypi yumbay kaqkunata qurinayllampa. 12 Chaymi yumbay mimkuchpa undamptinllampaqa, nuqallkunata niwarqanllampa: Subrachqan pidasumkunata tandayllampa, ama nimampis qasachamkanambaq, nichpa. 13 Chaymi nuqallkunaqa chay sinku tanditamkunamanda subrachqan pidasumkunata tandachpaqa, dusi kanastas tumkuyta undachirqayllampa. 14 Chayrallkum chaypi kaqkunaqa Jisumkristu chay milagru rurachqanda rimkachpaqa, nirqanllampa: Manchu unay tyimpumkunampi Tayta Dyus ufrisirqan kach'amuyta suq ancha pudirniyuq rimaqta kay munduman. Allibraq kay Jisusqa chay ancha pudirniyuq rimaq, nichpa. 15 Piru Jisusqam kwintata qumkarqan: Kay runamkunam piskawachpa, amalas rinllampa numbrawaq gubyirnumbaq, nichpa. Chaymi pallkunamanda amkramkachpa, suq lumampa sawanman rirqan, chaypi sampalan kanambaq. 16 Amsayallkamptinnam nuqallkuna yach'amkuqninqa chay Galiliya Atun Quch'aman urangumurqayllampa. 17 Chaymi chay atun quch'aman ch'ayachpaqa, yamkumpi puriq barkumpi rillkarqayllampa Kampirnawun llaqtaman. [Nuta: Chay Kampirnawunqam chay atun quch'ampa suq ladu chimbambi karqan.] Chay rillkachqayllampa urasqam tutana karqan. Piru Jisusqam manaraq nuqallkunamanqa chamuchqachu karqan. 18 Chaychina rillkamptiyllampam, ancha jwirtita wayrarqan. Chaymi chay atun quch'ampi yamkuqa waqman, kayman maqchimkarqan. 19 Chaymi chay barkumpa kumsanan palangunawan sinku ichu sayis kilumitrustana richqallampa karqay. Chaychina chay atun quch'ampa ch'awpimbi kachpaqam, Jisusta rimkarqayllampa, chay yamkumpa sawanda purichpa, nuqallkunaman ch'ayallkaqtana. Chaymi nuqallkunaqa ancha mancharqayllampa. 20 Piru Jisusqam niwarqanllampa: Amar manchayllampachu; nuqam kani! nichpa. 21 Chaymi nuqallkunaqa kuchimkuchpa, Jisusta nirqayllampa: Kay barkuman chamuy, nichpa. Chaymandaqam dasituna ch'ayarqayllampa chay chimba Kampirnawunmanqa. 22 Chaymi qayandinqa chay ancha achka runamkuna, warmimkuna chay suq chimbampi kidarqanllampa. Jisusta maskachpam, yuyarqanllampa: Chichiqam suq barkulla kaypiqa karqan. Chay barkumpiqam Jisuspa yach'amkuqningunalla rirqan. Piru Jisusqam mana rirqanchu, nichpa. 23 Chay tutamandam Tibiryas llaqtamanda wamkin barkumkuna ch'ayarqan chay 5.000 runamkuna mimkuchqan lugarpa ladunman. Chaypiqam Jisumkristu Dyusta pagimkuchpa, pallkunata qarachqa karqan. 24 Chaymi chay chimbampi mana tariwachpa ni Jisusta ni nuqallkunata, achka runa, warmimkunaqa Jisusta maskachpa, chay barkumkunampina chamurqanllampa Kampirnawun llaqtamanna. 25 Chay maskawaqkunaqam chay chimba Kampirnawunman ch'ayamuchpaqa, chaypi Jisusta tarirqanllampa. Chaymi kaychina tampurqanllampa: Yach'achimkuq Taytitu, ¿ima urastaq kaymanqa ch'ayamurqallki? nichpa. 26 Chaymi Jisusqa pallkunata nirqan: Allimptam nillkillampa, qamkunaqam sigiwangillampa; piru manam intyindingichu chay milagrumkuna rurachqaytaqa. Achwanmi tandata unda mimkuchpa sigiwangillampa. 27 Amar trabajayllampachu uchyamkaq mimkunampaqllaqa. Achwan trabajayllampaqa tumkuy tyimpu kawsachimkuq mimkunampaq. Chay kawsachimkuq mimkunatam nuqa Dyusmanda Chamuq Runaqa rini quchuqllampa. Chaqa Taytanchiq Dyusqam yanampawan, milagrumkunata ruranay, yumbaynimki yach'anallkillampa: Jisusmi Tayta Dyusmanda chamuchqa, nichpa. 28 Chaychina nimptinmi, pallkunaqa tampurqanllampa: Imatam atinillampa rurayta, Dyus munachqanda ruranayllampaqa? nichpa. 29 Chaychina tampumptinllampaqam, Jisusqa nirqan: Tayta Dyusmi kach'amuwachqa, qamkunaman chamunaypaq. Chaymi munan nuqampi kriyinallkillampa, nichpa. 30 Chaychina nimptinmi, pallkunaqa tampurqanllampa: Ima laya milagrutam atingi rurayta, chayta rimkachpa, qambi kriyinayllampaqa? ¿Mayñ, imatam ringi ruraq? 31 Chaqa unay agwilunchiqkunam chuncha lugarkunampi Dyus kach'amuchqan manaya mimkunata mimkurqanllampa. Chay mimkunampaqmi Dyuspa Santu Librumbiqa kaychina nin: Taytanchiq Dyusmi syilumanda tandata pallkunata qararqan, nichpa. 32 Chaymi Jisusqa nirqan: Allimptam nillkillampa, Muysisqam mana qurqanchu agwilunchiqkunata syilumanda chamuq tandataqa. Achwanmi Taytay Dyusqa pallkunata qararqan. Kananmi payqa munan quchuyta syilumanda chamuq allimp kaq tandata. 33 Syilumanda chay kawsachimkuq tandaqam suq runa. Chaqa payqam syilumanda chamuchpa, yumbay runamkunata tumkuy tyimpumpaq atin kawsachiyta, nichpa. 34 Chaychina nimptinqam, pallkunaqa nirqanllampa: Chay laya tandataqar tumkuy diya quwayllampa, nichpa. 35 Chaymi Jisusqa pallkunata nirqan: Nuqam kani chay kawsachimkuq tandaqa. Chaymi nuqampi kriyiqqa mana nunka rinchu mallaqnaq chunqumbiqa. Kanan nuqampi yuyamkuqqam manana nima tyimpu rinchu yamkunaqpis chunqumbiqa. 36 Piru nichuchqaychina, qamkunaqam rimkawachpampis, mana kriyingillampachu nuqampiqa. 37 Piru Taytay quwachqan runamkuna, warmimkunaqam nuqampi yuyamkunllampa. Chaymi mana pitampis disprisyachpachu, nuqampi yumbay yuyamkuqkunata chumaqta rini ch'ayachiq. 38 Chaqa nuqaqam syilumanda chamuchqa kani, Taytay munachqanda ruranaypaq; manam nuqa munachqaytachu. 39 Tayta Dyus kach'amuwaqmi munan chay quwachqan runamkunata allita kwidanaypaq, ama ni suqnin chinganambaq. Achwanmi munan jwisyu diyampi kawsachinaypaq, tumkuy tyimpu kawsananllampa. 40 Chaqa Taytay kach'amuwaqmi munan mayqambis nuqampi yuyamkuqtaqa wachachpa, tumkuy tyimpu kawsachinaypaq. Chaymi nuqaqa pallkunata rini kawsachimuq jwisyu diyampi, nichpa. 41 Jisumkristu yach'achimkumptin: Nuqam syilumanda chamuq tandaqa kani nimptinqam, achka isrraylinumkuna piñamkuchpa, kaychina rimatimkurqanllampa: 42 Kay Jisusqam Jusimpa churin. Taytanda mamandaqam riqsinchiq, ¿manachu? Chaychinaqa ¿imarallkum nin: Syilumandam chamuchqa kani, nichpaqa? 43 Chaymi Jisusqa pallkunata nirqan: Ama chaychinaqa rimatimkuyllampachu. 44 Manam pimpis atinchu pay kimkinlla nuqampi yuyamkuytaqa. Achwan Taytay kach'amuwaqmi yanampan runamkunata, nuqampi kriyinanllampa. Kanan nuqampi kriyiqtaqam chay jwisyu diyampiqa rini kawsachiq. 45 Dyuspaq rimaqkunampa librungunampiqam kaychina nin: Dyusqam yumbayta rin yach'achiq, nichpa. Chaymi Taytanchiq Dyusta yumbay uyaqkuna, paymanda yumbay yach'amkuqkunaqa nuqampi yuyamkunllampa. 46 Manam pimpis Tayta Dyustaqa rimkachqachu. Nuqa paymanda chamuqllam paytaqa rimkachqa kani. 47 Chaymi allimpta nillkillampa, nuqampi yuyamkuqqam muchuq bidayuqna, tumkuy tyimpumpaq kawsanambaq. 48 Chaqa nuqam kawsachimkuq tandaqa kani. 49 Chay unay agwilunchiqkunaqam chuncha lugarkunampi mimkurqanllampa Dyus kach'amuchqan manaya mimkunata. Chaychina mimkuchpampismi, tumkuy tyimpuqa mana kawsarqanllampachu. Achwanmi wañurqanllampa. 50 Piru syilumanda chamuq tandaqam suq laya. Chaymi kay laya tandata mimkuqkunaqa mana wañunqallampachu. 51 Kanan nuqam kani chay syilumanda chamuchqa kawsachimkuq tandaqa. Chaymi mayqan kay tandata mimkuqqa tumkuy tyimpu rin kawsaq. Kay kwirpuymi chay kawsachimkuq tandaqa. Chaymi nuqa rini wañuq, runamkunata, warmimkunata wachanaypaq, tumkuy tyimpu kawsananllampaqa, nichpa. 52 Chay isrraylinumkunaqam chayta uyachpaqa, piñamkuchpa, suqnin suqnin kaychina parlarqanllampa: Kay runaqa ¿imachinam kwirpundaqa qarawachunllampa? nichpa. 53 Chaymi Jisusqa pallkunata nirqan: Allimptam nillkillampa, kay kwirpuyta mana mimkumptimkillampa, yawarniyta mana umpyamptimkillampaqam, maychimkampis mana ringillampachu kawsaq tumkuy tyimpumpaqqa. 54 Piru kwirpuyta mimkuq, yawarniyta umpyaqqam muchuq bidata ch'askin, tumkuy tyimpumpaq kawsanambaq. Chay mimkuqtaqam nuqaqa jwisyu diyampi rini kawsachiq. 55 Chaqa kwirpuyqam allimp mimkuna; yawarniyqam allimp umpyana. 56 Chaymi kwirpuyta mimkuchpa, yawarniyta umpyachpa nuqampi yuyamkuqqa nuqawan kawsan. Nuqampismi paywan kawsani. 57 Chaqa Taytanchiq Dyusmi kawsan. Paymi kach'amuwachpa, nuqatampis kawsachiwan. Chaychinallam kwirpuyta mimkuqtampis nuqa rini kawsachiq. 58 Kay kwirpuymi chay tanda syilumanda chamuqqa. Allita yach'ayllampa: Chay unay agwilunchiqkuna Dyus kach'amuchqan manaya mimkunata mimkuchpampismi, mana kawsarqanllampachu tumkuy tyimpumpaqqa. Achwanmi yumbay wañurqanllampa. Piru kanan kay quchuchqay tandata mimkuqkunaqam tumkuy tyimpumpaqna rinllampa kawsaq, nichpa. 59 Jisusqam chaychina yach'achimkurqan Kampirnawun llaqtampa sinaguga wasimbi. 60 Chaychina Jisus yach'achimkumptinmi, payta achka sigiqkunaqa suqnin suqnin kaychina parlarqanllampa: Manam ni achlita gustawanchu kay yach'achimkuchqanqa. Mayñ, ¿piraq chay layamkunataqa atinman kasuytaqa? nichpa. 61 Piru chaychina uyaritamp parlamptinllampampismi, Jisusqa allita yach'arqan. Chaymi chay rimaqkunataqa kaychina tampurqan: Chay nichuchqaypaqchu piñamkungillampa? 62 Nuqaqam Dyusmanda Chamuq Runa kani. Chaymi syiluman kutirimptiy, rimkawachpaqa, ¿imataraq yuyangimanllampa? 63 Dyuspa Santu Ispiritunllam yumbanda kawsachin. Piru runamkunallaqam mana nimatampis atinchu kawsachimkuytaqa. Chaymi Dyuspaq yach'achillkillampa, chay nichuchqayta kriyimptimkillampa, Dyuspa Santu Ispiritun qamkunaman chamuchpa, tumkuy tyimpumpaq kawsachichunanllampa. 64 Piru wamkinnimkiqam nuqampiqa manaraq kriyingillampachu, nichpa. Chaqa qallarichqan diyamandampacham Jisusqa yach'arqanna: Mayqan runamkunam nuqampiqa mana rinllampachu kriyiq. Pallkunamanda suqninmi nuqataqa rin intrigamkuwaq, nichpa. 65 Chaymandaqam nirqambis: Chayrallkum nichuchqallampa kani: Manam pimpis pay kimkinllaqa atinchu nuqampiqa kriyiyta. Achwanmi Taytay Dyus animachimptin, nuqampi atin kriyiytaqa, nichpa. 66 Chaymi chay diyamandampacha paywan achka puriqkunaqa, yach'achimkuchqanda mana gustachpachu, paymanda amkramkachpa, manana purirqanllampachu paywanqa. 67 Chaymi nuqallkunata dusi yach'amkuqninda tampuwarqanllampa: Qamkunampischu nuqamanda munangillampa amkramkayta? nichpa. 68 Chaymi Simun Pidruqa nirqan: Taytitu, qamanda amkramkachpaqa, ¿pimannamiri richaqllampa? Chaqa qamllam yach'achiwangi, suq bidampi tumkuy tyimpu kawsanayllampa. 69 Kay nuqallkunaqam qambi yuyamkuchqallampa kani. Chaqa yach'anillampam: Qam Dyus Amkrachqan Wachadurqa kangi. Tayta Dyuspa Churinmi kangi, nichpa. 70 Chaymi Jisusqa niwarqanllampa: Qamkuna dusitam amkrachuchqallampa kani. Piru suqnimkiqam dyablumpaq timkramkachqa kangi, nichpa. 71 Chaychinaqam Jisusqa nirqan Judas Iskaryutimpaq. Chay Judaspa taytanqam Simun chutirqan. [Nuta: Piru manam Simun Pidruchu karqanqa.] Chay Judasmi nuqallkunamanda suqniy kachpampis, Jisusta intrigamkunambaq karqan.
1 Chaymandaqam Jisusqa prubinsya Galiliyampa llaqtangunampilla purillkarqan. Mananam munarqanchu prubinsya Judiyampi puriytaqa. Chaqa Judiyampiqam isrraylinumkunampa kamachimkuqninguna ancha munarqanllampa Jisusta wanchiyta. 2 Piru chay diyamkunaqam arkacha wasimkuna fyista sirkana karqan. Chaymi chay fyista ch'ayamullkamptinqa, 3 Jisuspa masangunaqa payta yanqa nirqanllampa: Kay prubinsya Galiliyamandaqa prubinsya Judiyaman riy, milagrumkunata ruramptimki, waqpi qambi kriyiqkunampis chayta rimkananllampa. 4 Chaqa mas famayuq munachpa kaytaqam, mana balinchu kay kasiriyumkunampi pamkamkuchpa, milagrumkunata ruranallkiqa. Achwanri Jirusalinman riy, yumbay runamkunampa ñawpambi chay milagrumkunata ruranallki, nichpa. 5 Chaychinaqam burlachpa nirqanllampa. Chaqa manam ni masangunampis Jisuspiqa kriyirqanllampachu. 6 Chaymi Jisusqa masangunata nirqan: Tayta Dyus siñalachqan tyimpuyqam manaraq ch'ayamuchqachu. Piru qamkunaqam ima diyampis atingillampa riyta. 7 Chaqa Dyusta mana kasuqkunaqam qamkunataqa mana ch'iqnichungillampachu. Piru nuqataqam ch'iqniwanllampa, mana alli rurachqangunampaq nimptiy. 8 Chayri qamkunalla riyllampa waq fyistamanqa. Manaraqmi Dyus siñalachqan tyimpuyqa ch'ayamuchqachu. Chaymi manaraq rinichu riq chay fyistamanqa. 9 Chaychina masangunata nichpaqam, payqa chay prubinsya Galiliyampilla kidarqan. 10 Chay masanguna chay fyistaman rimptinqam, Jisuspis uyarampllana (uyarallana) Jirusalinmanqa rirqan. 11 Chaymi chay kuntraq isrraylinumkunaqa Jisusta mana tarichpachu, chay fyistampiqa ancha maskarqanllampa: Maypiraq chay runaqa? nichpa. 12 Kanan achka runamkunaqam Jisuspaqqa uyaramplla (uyaralla) parlaqllampa. Wamkinqam niqllampa: Jisusqam ancha allin runa, nichpa. Piru wamkinqam niqllampa: Chay runaqam mana allinchu. Chaqa llaqta masinchiqkunatam ingañallkan, nichpa. 13 Piru Jisuspaq parlaqkunaqam, chay kamachimkuqkunata manchachpa, mana nimatampis parlarqanllampachu suqkunampa ñawpambiqa. 14 Kanan ch'awpi fyistampina kamptinllampaqam, Jisusqa Dyuspa adurana wasinman richpa, chaypi yach'achimkurqan. 15 Chaymi chay kamachimkuqkunaqa Jisusta uyachpaqa, ispantachqata kaychina nirqanllampa: Kay runaqam mana ni suq yach'achimkuqwan istudyachqachu. ¿Imachinataq ancha yach'ayniyuqqa? nichpa. 16 Jisusqam pallkunata nirqan: Kach'amuwaq niwachqandallam yach'achimkuni; manam nuqa yuyachqaytachu. 17 Chaymi mayqan runa Dyus munachqanda ruraqqa kay nichqaypaqqa atin yach'ayta: ¿Jisusqam Tayta Dyus munachqanda yach'achimkullkan ichu pay munachqandalla yach'achimkullkan? nichpa. 18 Chaqa mayqan runa munachqandalla rimaqqam runa masin alabananrallkulla yach'achimkun. Piru Taytaymi nuqataqa kach'amuwachqa, allimp kaqtalla yach'achimkunay. Chaymi ancha munani Taytay Dyusta yumban alabananllampa. 19 ¿Manachu Muysisqa Dyuspa liyningunata chay unay agwilunchiqkunata qurqan? Piru qamkunaqam mana munangillampachu kasuyta. ¿Imarallkutaq munangillampa wanchiwaytaqa? nichpa. 20 Chaymi chay achka uyaqkunaqa tampurqanllampa: Pim munan wanchichuytaqa? Dyablum lumkuyachichuchqa, chaychina rimanallkiqa, nichpa. 21 Chaymi Jisusqa pallkunata nirqan: Samana diyampi suq byinda ruramptiyqam, qamkunaqa ispantachpa, piñamkungillampa. 22 Piru kay kumparasyumbi yuyachunllampa: Chay punta agwilunchiqkunam kwirpumbi chay siñalta rurarqanllampa. Chaymandaqam Muysispis liynimbi nirqan, kwirpunchiqpi chay siñalta rurananchiqllampa. Chaymi chay kustumbrita kumplinallkillampa, samana diyampi ullqu wambrallkita aychanda kuchuchpa, siñalachpaqa, qamkunampis trabajallkangillampa. Chaychina qamkuna trabajachpaqa, ¿imampaqmi piñamkungillampa, suq runata nanayninmanda kach'amkachimptiy samana diyampiqa? 24 Manaraq allita yach'achpaqa, ama dasqa jusgayllampachu. Achwan allita yach'achpa, jusgayllampa: ¿Allichu chay rurachqanqa ichu mana? nichpa. 25 Chaychina Jisus nimptinmi, wamkin jirusalinirumkunaqa kaychina parlarqanllampa: Manachuraq maskallkanllampa kay runata wanchinanllampa? 26 Rimkayllampa, yumbaypa ñawpambim rimallkan. Manam pimpis nimata ninchu. ¿Awturidarkunachuraq yach'anllampa: Allibmi kay Jisusqa Dyus Amkrachqan Wachadur, nichpa? 27 Piru Jisuspaqqam yach'anchiq: Nasaritmandam chamuchqa, nichpa. Piru chay Wachadur chamumptinqam, mana pimpis yach'anqachu: Maymandam payqa chamun, nichpaqa. 28 Jisusqam chayta yach'achpa, Dyuspa adurana wasimba patyumbi yach'achimkullkachpa, kaychina jwirtita nirqan: Qamkunaqam yuyangillampa: Jisustaqam riqsinchiq. Yach'anchiqmi maymanda chamuchqa, nichpa. Piru manam allimptaqa yach'angillampachu. Manam ni riqsingillampachu chay kach'amuwaqtaqa. Chaqa gustuymandaqam mana chamuchqachu kani. Achwanmi suq allimp kaqta rimaq kach'amuwachqa. 29 Chay kach'amuwaqtaqam nuqaqa allita riqsini. Chaqa paymandam chamuchqa kani, nichpa. 30 Chaychina nimptinmi, Jisustaqa munarqanllampa prisuyta. Piru manaraqmi wanchinanllampa urasqa ch'ayamuchqachu karqan. Chaymi mana pimpis almitimkarqanchu prisuytaqa. 31 Kanan achka runamkunam paypi yuyamkuchpa, kaychina nirqanllampa: Manam pimpis atinmanchu rurayta kay Jisus rurachqan milagrumkunataqa. Chaymi yach'anchiq: Jisumkristum Dyus Amkrachqan Wachadurqa, nichpa. 32 Chay runamkuna uyaramplla (uyaralla) Jisuspaq chaychina parlamptinmi, farisiyu dumktrinayuqkunaqa uyarqan. Chaymi kamachimkuq isrraylinu kuramkuna chay farisiyumkunawan Dyuspa adurana wasimba suldadungunata kach'arqanllampa, Jisusta prisuchpa ampamunanllampa. 33 Chaymi Jisusqa payta uyaqkunata nirqan: Achla tyimpullanam qamkunawanqa rini kaq. Chaymandaqam chay kach'amuwaqmanna rini kutiriq. 34 Chaymi qamkunaqa ringillampa maskawaq. Lumkismi manana ringillampachu tariwaq. Chaqa waqman rimptiyqam, mana ringillampachu atiq imkiyta riytaqa, nichpa. 35 Chaymi isrraylinumkunampa kamachimkuqninguna pallkunampura kaychina parlarqanllampa: Maytanach kay runaqa rinqa, ama tarinanchiqllampaqa? ¿Amkasuchu rin riq chay chimkwa chimkwa tiyachqan isrraylinumkunaman? Chaqa pallkunaqam suq nasyungunampi mana isrraylinu kaqkunawan tiyanllampa. ¿Chaychinaqachu rinqa, chay furastirumkunata yach'achiq? 36 ¿Imam munan niyta kay niwachqanchiqqa: Maskawachpampismi, mana ringillampachu tariwaq. May kachqaymanqam mana ringillampachu atiq chamuytaqa, nichpa? 37 Chay fyista uchyamkanan diyaqam mas baliq diya karqan. Chay diyaqam Jisusqa chayachpa, ancha jwirtita nirqan: Mayqan yamkunaqqa nuqaman chamunqa umpyachinaypaq. 38 Chaqa Dyuspa Santu Librumbim kaychina nin: Nuqampi kriyiqkunampa chunqunmandaqam kawsachimkuq yamku rin lluqchiq, nichpa. 39 Jisusqam chaychina yach'achimkurqan, intyindinanllampa: Jisuspi kriyiqkunam Dyuspa Santu Ispiritunda rinllampa ch'askiq, nichpa. Chaqa chay diyamkunampiqam Jisus manaraq syiluman richqachu karqan, waqpi llimpyanambaq. Chaymi Dyuspa Santu Ispiritunqa pallkunamanqa manaraq chamuchqachu karqan. 40 Chay achka runamkunamanda wamkinqam Jisusta chaychina niqta uyachpa, nirqanllampa: Allibraq kay runaqa Dyuspaq chay chamunambaq rimaq, nichpa. 41 Wamkinqam nirqanllampa: Kayqam Dyus Amkrachqan Wachadur, nichpa. Piru wamkinnataqmi nirqanllampa: Dyus Amkrachqan Wachadurqam mana atinchu kayta chay prubinsya Galiliyamandaqa. 42 Chaqa Dyuspa Santu Librumbiqam nin: Chay Wachadurqam chay unay gubyirnu Dabidpa karu willkan rin kaq. Chaymi chay Dabidpa kimkin Bilin llaqtambi rin nasiq, nichpa. [Nuta: Pallkunaqam mana yach'arqanllampachu: Jisusmi Bilin llaqtambim nasirqan, nichpa.] 43 Chaymi chay wamkin runamkunaqa Jisuspaqqa suq layata yuyarqanllampa. Suqkunanataqmi suq layata yuyarqanllampa. 44 Wamkinqam munarqanllampa prisuyta. Piru manam ni pimpis prisurqanchu. 45 Chay suldadu riqkunaqam mana prisuchpachu, kutirqanllampa isrraylinu kuramkunampa chay kamachimkuqningunaman, chay farisiyumkunaman. Chaymi pallkunaqa chay suldadumkunata tampurqanllampa: Imarallkutaq qamkunaqa mana ampamurqallkichu Jisustaqa? nichpa. 46 Chaymi chay suldadumkunaqa nirqan: Manam ni mayqan runampis chay runachinaqa rimachqachu! nichpa. 47 Chaymi farisiyumkunaqa chay suldadungunata nirqanllampa: Ima, qamkunampischu dijamkarqallkillampa ingañachunambaq? 48 Allita yuyayllampa, nuqallkunamandaqam mana ni suq kamachimkuq, ni suq farisiyu chay runampiqa kriyichqallampachu kani, ¿manachu? 49 Achwanmi Muysispa liyningunata chay mana yach'aqkunalla Jisuspiqa kriyinllampa. Chaymi pallkunaqa kundinadu rinllampa kaq, nichpa. 50 Piru chay farisiyumkunamanda suqninmi chay Nimkudimu karqan. Payqam suq tuta Jisusman richqa karqan tampuq. Chaymi payqa chay farisiyu masingunata nirqan: 51 Liyninchiqmi kamachiwanchiq, amach dasqa pimpaq nichunchu: Uchayuqmi, nichpaqa. Achwanmi kamachiwanchiq, puntata allita uyananchiq, chaychina yach'ananchiq: ¿Allitachu rurachqa ichu mana? nichpa. 52 Chaymi chay suq farisiyumkunaqa nirqanllampa: Ima qambischu galiliyanu kangi? Dyuspa Santu Librunda allita liyiy, yach'anallki: Dyuspaq rimaqkunaqam mana ni pimpis Galiliyamandaqa chamuchqachu, nichpa. [Nuta: Piru liyiy Isaias 9.1ta.] 53 ?Chaychina nichpaqam, rirqanllampana wasingunaman.
1 Piru Jisusqam Ulibu lumamanna rirqan. 2 Qayandin tutamandam Dyuspa adurana wasinmanna kutirirqan. Chay diyam ancha achka runamkuna Jisusman tandamkarqanllampa. Chaymi payqa tiyachpa, pallkunata yach'achirqan. 3 Chaypi yach'achimkullkamptinmi, wamkin farisiyu dumktrinayuqkuna, Muysispa liyningunata wamkin yach'achimkuqkunampis suq warmita ampamurqanllampa Jisusman. Chay warmitaqam tarichqallampa karqan suq runa mana rrispitun kaqwan puñullkaqta. Chaymi yumbaypa ñawpambi rurachpa, 4 Jisusta nirqanllampa: Yach'achimkuq Taytitu, kay warmitam tarichqallampa kani suq runa mana rrispitun kaqwan puñullkamptin. 5 Muysispa liynimbiqam nin, kay laya warmimkunata rumimkunawan sitachpa, wanchinanchiq. Mayñ, qamqa ¿imatam ningi? nichpa. 6 Chaychinaqam yanqa tampurqanllampa, imampi pandamptin, chaypaq tumbachpa dimandananllampa. Chaymi Jisusqa pambaman kumurachpa, allpampi didunwan iskibrirqan. 7 Piru pallkuna kutin kutin tampumptinllampaqam, kumurallkachqanmanda alsamkachpa, nirqan: Mayqannimki mana nima uchayuq kaqri puntata sitay kay warmitaqa, nichpa. 8 Chaychina nichpaqam kumurarirqan, allpampi iskibrinambaq. 9 Chaychina Jisus nimptinqam, chay runamkunaqa, uchayuq kachpa, panqamkuchpa, suqnin suqnin rirqanllampa. Puntataqam chay mayurkuna rirqanllampa. Chaymandaqam chay mas wambra runamkunampis rirqanllampa. Chaymi chay warmillana kidarqan Jisuspa ñawpambi. 10 Chaymandaqam Jisusqa alsamkarichpa, chay warmitallana rimkarqan. Chaymi tampurqan: Maypinataq chay dimandachuqkunaqa? ¿Mananachu pimpis kan, chimbichunanqa? nichpa. 11 Chaymi warmiqa nirqan: Taytitu, mananam ni pimpis kanchu, nichpa. Chaymi Jisusqa chay warmitaqa nirqan: Nuqampismi mana sintinsyallkichu wanchichunanllampaqa. Mayñ, riyna. Kananmandaqa amanamkich uchamkunataqa rurangichu, nichpa.? 12 Chaymandaqam Jisusqa chaypi kaqkunata suq kutinda kaychina yach'achirirqan: (Kay mundumpi tiyaqkunaqam Dyuspi mana yuyamkuchpaqa, tutayaqpichina kawsallkanllampa.) Nuqaqam Taytanchiq Dyuspaq yach'achimkuchpa, suq michachina kani pallkunampaqqa. Chaymi mayqan runa nuqampi yuyamkuchpaqa, achimkpichinana rin kawsaq, nichpa. 13 Chaymi wamkin farisiyu dumktrinayuqkunaqa Jisusta kaychina nirqan: Qamllam faburnimkita rimallkangi. Chayrallkum chay nichqallkiqa mana nimampaq balinchu, nichpa. 14 Chaymi Jisusqa pallkunata nirqan: Nuqalla faburniyta rimamptiypismi, chay nichqallkunaqa mana llullachu. Chaqa nuqaqam yach'ani: Maymandam chamuchqa kani, maymanmi kutirichaq, nichpa. Piru qamkunaqam mana yach'angillampachu: Maymandam chamuchqa Jisus, ni maymanmi kutirinqa, nichpaqa. 15 Qamkunaqam suqkunata champachpa, yuyaynimkimandalla jusgachpa, ningillampa: Kay laya runam payqa, nichpa. Piru nuqaqam mana pitampis chaychinaqa jusganichu. 16 Jusgamkuchpaqam, kabalta jusgamkuni. Chaqa manam sampalayqa jusgamkunichu. Achwanmi kach'amuwaq Taytaywan jusgamkuniqa. 17 Qamkunampa liynimkimpiqam kaychina nin: Ichkay tistigu chay layatalla rimamptinqam, balinna chay rimachqanqa, nichpa. 18 Chaychinam nuqampis nuqa kimkiypaq suq tistigu kani. Kach'amuwaq Taytaypismi nuqampaq suq tistigu, nichpa. 19 Chaymi pallkunaqa tampurqanllampa: Maypitaq taytallkiqa? nichpa. Chaymi Jisusqa pallkunata nirqan: Nuqata mana allita riqsiwachpa: Pim Jisumkristu nichpaqam, Taytaytampis mana riqsingillampachu. Piru nuqata allita riqsiwachpaqam, Taytaytampis riqsingimanllampa, nichpa. 20 Chaychinam Jisusqa rimarqan Dyuspa adurana wasimbi chay ufrindampaq kaq kajungunampa ladumbi. Piru manam pimpis prisurqanchu. Chaqa manaraqmi prisunanllampa urasqa ch'ayamuchqachu karqan. 21 Jisusmi kaychina nirirqan: Nuqaqam rinina riq. Rimptiyqam qamkunaqa ringillampa maskawaq. (Piru mananam ringillampachu tariwaq.) May richqaymanqam qamkunaqa mana atingillampachu riyta. Chaqa Tayta Dyusqam mana rinchu pirdunachuq uchallkimkunataqa. Chaymi wañuchpaqa, ringillampa chingaq, nichpa. 22 Chaychina Jisus nimptinqam, chay mas kamachimkuq isrraylinumkunaqa suqnin suqnin kaychina tampunamkurqan: Ima pay kimkinllachu munachpa wanchimkayta, niwanchiqllampa: May richqaymanqam mana atingillampachu riyta nichpaqa? 23 Chaymi Jisusqa pallkunata nirqan: Qamkunaqam kay mundumanda kangi. Piru nuqaqam mana kay mundumandachu kani. Achwanmi anaq syilumanda kaniqa. 24 Chaymi nuqampaq mana kriyichpa: Jisusqam Dyuspa Churin, nichpaqa, wañuchpa ringillampa chingaq. Chaqa Taytanchiq Dyusqam mana rinchu pirdunachuqllampa uchallkimkunamandaqa, nichpa. 25 Chaymi chaychina nimptinqa, Jisusta tampurqanllampa: Pitaq qamqa kangi? nichpa. Chaymi Jisusqa pallkunata nirqan: Qallarichqay diyamandampacham chaytaqa nichuchqallampa kani. 26 Nuqaqam qamkunata jusgachuchpa, chay ima laya kachqallkillampata rini nichuq. Piru nuqaqam chay kach'amuwaqta uyani. Chaymi pay nichqanchina allimp kaqtalla yumbay runamkunata, warmimkunataqa nini. 27 Chaychina Jisus nimptinqam, pallkunaqa mana intyindirqanchu: Tayta Dyuspaqmi rimallkan, nichpaqa. 28 Chaymi Jisusqa yumbay chaypi kaqkunata nirqan: Nuqa Dyusmanda Chamuq Runata (klabawachpa, suq krusman) alsawachparaqmi, ringillampa yach'aq: Allibmi Jisusqa Dyusmanda chamuchqa, nichpaqa. Chaypim ringillampa yach'aqpis: Manam pay munachqandaqa rurachqachu. Achwan Taytan nichqandallam rimachqa, nichpa. 29 Taytay kach'amuwaqqam pullay. Manam sampalaytaqa dijawachqachu. Chaqa tumkuy bidaypim pay munachqandalla rurani. 30 Chaychina Jisus nimptinqam, achka runamkuna, warmimkuna paypina kriyirqanllampa. 31 Jisusqam paypi kriyiq isrraylinumkunataqa kaychina nirqan: Nichuchqallkunata mana challkuq kasuwachpaqach'i, allimp yach'amkuqnillkuna kangimanllampa. 32 Chaychina kasuwachpaqach'i, tumkuy nichuchqaypaq yach'angimanllampa: Allibmi kachqa, nichpa. Chay allimp nichuchqayta kasuchpaqach'i, manana randichqa kriyaduchinaqa kangimanllampachu. Achwanch'i librina kangimanllampa, nichpa. 33 Chaymi pallkunaqa nirqanllampa: Abrajamba kastanguna kachpam, tumkuy tyimpu libri kanillampa. Manam ni mayqamba randichqa kriyadunchu kachqallampa kani. Chaychinaqa ¿imarallkum niwangillampa: Librinam kangimanllampa, nichpaqa? 34 Chaymi Jisusqa pallkunata nirqan: Allimptam nillkillampa, yumbay runa uchata ruraqkunaqam dyablumpa kriyadunchina. 35 Kay kumparasyumbaq yuyachunllampa: Suq kriyaduqam mana tumkuy tyimpumpaqchu patrunnimba kriyadunqa rin kaq. Piru chay patrumba churinqam tumkuy tyimpumpaq taytamba churin rin kaq. 36 Chaymi nuqa Dyuspa Churin wachachumptiyqa, allimpta uchallkimanda librina ringillampa kaq. 37 Allitam yach'ani: Abrajamba kastanguna kangillampa, nichpa. Piru wamkinnimkiqam yach'achichuchqayta mana kriyiwachpa, munangillampa wanchiwayta. 38 Nuqaqam rimani Taytay rimkachiwachqanda. Piru qamkunaqam suq taytallki nichuchqanda rurangillampa. 39 Chaychina Jisus nimptinmi, wamkin isrraylinumkunaqa nirqanllampa: Nuqallkunampa taytayqam chay unay Abrajan, nichpa. Chaymi Jisusqa nirqan: Chay Abrajanqam allita rurachpa kawsarqan. Chaymi qamkunaqa paypa kastan kachpaqa, paychina allita rurachpa kawsangimanllampa. 40 Piru qamkunaqam mana Abrajanchinachu kawsangillampa. Chaqa Tayta Dyus allimp kaqta niwachqanda qamkunata nichumptiymi, munangillampa wanchiwayta. Piru Abrajanqam mana nunka chaychinaqa rurarqanchu. 41 Qamkunaqam suq laya taytayuq kangillampa. Chaymi chay mana alli taytallkimpa rurananda qamkuna rurallkangillampa. Chaychina Jisus nimptinmi, chay runamkunaqa kaychina nirqanllampa: Nuqallkunaqam mana tarimkuchu kanillampa. Achwanmi Taytanchiq Dyuslla taytayllampaqa, nichpa. 42 Chaymi Jisusqa pallkunata nirqan: Qamkuna Tayta Dyuspa wambranguna allimpta kachpaqach'i, nuqataqa kuyawangimanllampa. Chaqa Tayta Dyus kach'amuwamptinmi, kay pachamanqa chamuchqa kani. Manam nuqampa yuyayniymandachu chamuchqaqa kani. 43 Piru yach'achimkumptiyqam, qamkunaqa mana munangillampachu uyawayta. Chaymi chay nichuchqaytaqa mana atingillampachu intyindiwayta. 44 Chaqa qamkunampa taytallkiqam dyablu. Chaymi dyablu munachqanda munangillampa rurayta. Chaqa dyabluqam qallarichqan tyimpumandampacha matansyiru, ancha llulla limkidu kachqa. Chaymi llullamkuchpalla purin. Manam nunka allimp kaqtaqa rimanchu. Chaymi llullamkuqkunaqa paypa wambranguna. 45 Chaymi nuqa allimp kaqta nichumptiyqa, qamkunaqa mana kriyiwangichu. 46 Nuqa allitalla ruramptiyqa, ¿mayqannimkim atingi niwayta: Uchayuqmi kangi, nichpaqa? Nuqa mana llullamkuchpa, allimp kaqtalla nichumptiyqa ¿imarallkutaq qamkunaqa mana kriyiwangichu? 47 Chaqa Tayta Dyuspa wambrangunaqam pay nichqanda kasunllampa. Piru qamkuna Tayta Dyuspa mana wambranguna kachpaqam, pay nichqandaqa mana munangillampachu kasuyta. 48 Chaychina Jisus nimptinmi, chay isrraylinumkunaqa nirqanllampa: Nuqallkunaqam allimp kaqta kaychina rimanillampa: Qamqam dyabluta kasuq samaryanu kangi, nichpa. 49 Chaymi Jisusqa nirqan: Nuqaqam mana dyablutaqa kasunichu. Achwanmi Taytay munachqanda rurachpa, payta alabani. Piru qamkunaqam mana nimatampis alabawangichu. Achwanmi qamkunaqa disprisyawangi. 50 Nuqaqam mana munanichu, qamkuna amalas alabawanallkiqa. Achwanmi Taytay Dyus ancha munan, qamkuna alabawanallki. Chaqa paymi nuqampa faburniy. Kanan paymi yumbayta rin jusgaq. 51 Allimp kaqtallam nillkillampa, yumbay rimachqayta kasuqkunaqam mana nunka rinllampachu wañuq, nichpa. 52 Chaychina Jisus nimptinmi, chay ch'iqniq runamkunaqa kaychina nirqanllampa: Imampaqmi ningi qamta kasuchuqkunach mana nunka rinllampachu wañuq, nichpaqa? Kananqam allitana yach'anillampa: Qamba kwirpullkimpim dyablumpa ispiritun tiyan, nichpa. Chaqa unay agwilunchiq Abrajanqam wañuchqa. Dyuspaq yumbay rimaqkunampismi unay tyimpuna wañuchqa. ¿Ima qamqachu yuyangi: Mas balidum kani chay unay agwilunchiq Abrajanmanda, nichpa? Chaychinaqachu ¿yuyangi: Yumbaymandam mas balidu kani, nichpa? 54 Chaychina nimptinllampam, Jisusqa nirqan: Manam nuqa kimkiyllaqa alabamkanichu. Nuqa kimkiylla alabamkachpaqam, mana nimampaq baliymanchu. Taytaymi nuqataqa alabawan. Kanan qamkunampismi Taytaypaq ningillampa: Paymi Dyusniy, nichpa. 55 Chaychina nichpampismi, paytaqa mana riqsingillampachu. Piru nuqaqam paytaqa riqsini. Chaymi Manam Dyustaqa riqsinichu, nichpaqa, qamkunachina llullamkuq kayman. Piru nuqaqam Taytay Dyusta allimpta riqsichpa, pay nichqanda kasuni. 56 Chay unay agwilunchiq Abrajanqam ancha kuchimkurqan, yach'achpa: Dyus Amkrachqan Wachadurmi rin chamuq, nichpa. Chaymandaqam chay Abrajanqa (wañuchpa, syilumpina kachpa) nuqata rimkawarqan syilumanda chamuqta. Chaymi ancha kuchimkurqan. 57 Chaychina Jisus nimptinmi, chay ch'iqniq runamkunaqa kaychina nirqanllampa: Agwilunchiq Abrajanqam achka watamkunana wañuchqa. Piru qamqam manaraq ni 50 watayuqchu kangi. ¿Imampaqtaq ningi: Abrajandam rimkachqa kani, nichpaqa? 58 Chaymi Jisusqa nirqan: Allita uyawayllampa. Manaraq Abrajan kamptinmi, nuqaqa tumkuy tyimpu kachqa kani, nichpa. [Nuta: Chaychinallam Tayta Dyuspis Muysista nichqa karqan. Axudu 3.14.] 59 Chaychina Jisus nimptinmi, chay runamkunaqa ancha piñamkuchpa, rumimkunata piskarqanllampa, sitachpa wanchinanllampa. Chaymi Jisusqa chay achka runamkunampa umkumbi pamkamkuchpa, Dyuspa adurana wasinmanda lluqchichpa, suq lugarmanna rirqan.
1 Suq lugarta pasallkachpam, Jisusqa suq sarku runata rimkarqan. Chay runaqam sarkulla nasichqa karqan. 2 Chaymi nuqallkuna yach'amkuqningunaqa chay runampaq kaychina tampurqayllampa: Yach'achimkuq Taytitu, kay runa sarkulla nasinambaqqa, ¿pitaq uchata rurarqan? ¿Paychu ichu taytanguna? nichpa. [Nuta: Chay isrraylinumkunam mana intyindichpa yuyarqanllampa: Yumbay qachyaqkuna ichu pubrimkuna uchata rurachqanrallku padisinllampa, nichpa.] 3 Chaymi Jisusqa nuqallkunata niwarqan: Manam ni chay runa ni taytanguna uchata rurachqanrallkuchu sarkuqa kachqa. Achwanmi sarkuqa nasichqa, Dyus yanampanambaq, rimkaqkuna yach'ananllampa: Dyusmi ancha pudirniyuq, nichpa. 4 Chaqa Dyusmi kach'amuwachqa, pay munachqanda ruranaypaq. Chaymi manaraq uchyamkamptin tyimpuy, chayta rurallkani. Chaqa kay tyimpuqam punchawchinaraq. Piru rinmi ch'ayamuq suq tyimpu, manana pimpis nimata atinan rurayta. Chay tyimpuqam tutampchina rin kaq. 5 Piru kay mundumpi kachpaqam, runamkunampa, warmimkunampa michanchina kani, nichpa. 6 Chaymandaqam Jisusqa tuqayninwan allpata nuyuchichpa, chay sarku runampa ñawingunata implastarqan. 7 Chaychina rurachpaqam, Jisusqa nirqan: Riy chay Siluwi pusuman mayllamkuq, nichpa. Chay Siluwiqam ibriyu rimaypiqa munan niyta: Kach'amuchqa, nichpa. Chaymi chay sarku runaqa richpa, chay pusumpi mayllamkuchpa, rimkamkurqanna. 8 Chay sarku runampa bisinunguna, suq runamkunampismi payta rimkachqallampa karqan limuch'nata mañamkullkaqta. Chaymi rimkamkuqtana rimkachpaqa, nirqanllampa: Manachuraq chay runa tiyachpa limuch'nata mañamkuq? nichpa. 9 Suqkunampismi nirqanllampa: Waqqar pay, nichpa. Wamkinnataqmi nirqanllampa: Waqqar chay runa limuch'nata mañamkuq laya. Piru manam paychu, nichpa. Piru chay runa sarku kachqanqam nirqan: Nuqam kani, nichpa. 10 Chaymi tampurqanllampa: Imachinataq atingina rimkamkuytaqa? nichpa. 11 Chaymi payqa nirqan: Chay runa Jisus chutiqmi lluchkitamkuchpa, ñawillkunata implastachpa, kamachiwarqan: Riy Siluwi pusuman mayllamkuq, nichpa. Chaymi nuqaqa richpa, chay pusumpi mayllamkuchpa, rimkamkurqayna, nichpa. 12 Chaymi chay runamkunaqa chay sarkutaqa tampurqanllampa: Maypinam chay Jisusqa? nichpa. Payqam nirqan: Manam yach'anichu. Maypinach'iri, nichpa. 13 Samana diyampim chay sarku runataqa Jisusqa lluchkitata rurachpa, implastachpa kach'amkachichqa karqan. Chaymi chay runata amparqanllampa farisiyumkunaman. 15 Pallkunaman ch'ayamptinqam, tampurqanllampa: Imachinataq sarku kachqallkimandaqa kananqa atingina rimkamkuyta? nichpa. Chaymi chay runaqa nirqan: Suq runam ñawillkunampa sawanda lluchkitawan implastarqan. Chaymandaqam nuqa ñawillkunata mayllachpaqa, atirqayna rimkamkuyta, nichpa. 16 Chaychina nimptinqam, wamkin farisiyumkunaqa nirqan: Chay runa kach'amkachichuqqam samana diyata mana rrispitanchu. Chaymi payqa mana Dyusmandachu chamuchqa, nichpa. Piru wamkinnataqmi nirqan: Suq uchayuq runa kachpaqach'i, kay milagrumkunataqa mana atinmanchu rurayta, nichpa. Chaychinam pallkunampura suq laya, suq layata parlarqanllampa. 17 Chaymi chay runa sarku kachqandaqa tampurirqanllampa: Mayñ, ima ningitaq qamqa chay kach'amkachichuq runampaqqa? nichpa. Chaymi chay runaqa nirqan: Nuqaqam nini: Payqam Dyuspaq suq rimaq, nichpa. 18 Piru chay kamachimkuq isrraylinumkunaqam mana kriyirqanllampachu: Chay runam sarku kachqanmanda rimkamkuchqa, nichpaqa. Chaymi taytanda mamanda qayachpa, 19 tampurqanllampa: Kaychu wambrallki? ¿Allimptachu sarku nasirqan? Kananqa ¿imachinataq atinna rimkamkuyta? nichpa. 20 Chaymi taytan mamanqa pallkunata nirqan: Ari, wambraymi. Allimptam sarku nasirqan. 21 Piru manam yach'anillampachu imachinam ichu pim kach'amkachichqa, nichpaqa. Waqqar mayur runana. Paytar tampuyllampa, pay kimkin nichunanllampa, imachinam rimkamkuchqa, nichpa. 22 Taytanwan mamanqam chaychinaqa nirqanllampa, chay kamachimkuqkunata manchachpa. Chaqa chay kamachimkuqkunaqam tandamkachpa parlachqallampa karqan: Mayqan runa ichu warmi: Jisusmi Dyus Amkrachqan Wachadur nimptinqa, sinaguga wasimanda qatichun, nichpa. 23 Chaymi taytanwan mamanqa manchachpa: Qatiwachunch'i, nichpa, nirqanllampa: Mayur runanam. Payta tampuyllampa, nichpa. 24 Chaymi chay runataqa qayarichpa, nirqanllampa: Dyuspa ñawpambi juray: ¿Imachinam rimkamkuchqa kangi? nichpa. Nuqallkunaqam yach'anillampa: Chay Jisusqam uchayuq runa, nichpa. 25 Chaymi chay runaqa nirqan: Manam nuqaqa yach'anichu: Uchayuqchu Jisusqa ichu mana, nichpa. Piru kaytallam yach'ani: Sarku kachqaymandam rimkamkunina, nichpa. 26 Chaymandaqam muchuqmanda tampurirqanllampa: Imatam rurachurqan rimkamkunallkiqa? nichpa. 27 Chaymi pallkunataqa nirqan: Nichurqaqllampanam, piru qamkunaqam mana munangillampachu uyawayta. Chaychinaqa ¿imampaqnamir munangillampa muchuqmanda nirichunayqa? ¿Qamkunampischu munangillampa yach'amkuqninguna kayta? nichpa. 28 Chaychina nimptinqam, chay kamachimkuqkunaqa chay runataqa ancha musyachpa nirqanllampa: Qamqam kangi chay Jisuspa yach'amkuqnin. Piru nuqallkunaqam chay unay Muysispa librungunamanda yach'amkunillampa. 29 Chaymi yach'anillampa: Dyusmi parlachirqan Muysista, nichpa. Piru chay mana baliq Jisuspaqqam mana yach'anillampachu ni maymandach'i chamuchqa, nichpa. 30 Chaymi chay runaqa pallkunata nirqan: Chaychinaqam mana nunka uyachqachu kani! Qamkunaqam mana yach'angillampachu: ¿Maymandam chamuchqa chay runa? nichpa. Piru nuqataqam yanampawachqa rimkamkunaypaq. 31 Kanan nuqanchiqkunam yach'anchiq: Dyusqam ucha ruraqkunataqa mana yanampanchu. Piru payta aduraqkunata, munachqanda ruraqkunataqam Dyusqa yanampan. 32 Manamkich nunka uyachqachu kanchiq: Suq sarku nasiqtam suq runa kach'amkachichqa, nichpaqa. 33 Chaymi nillkillampa, chay yanampawaq runa, Dyusmanda mana chamuchpaqach'i, mana nima milagruta atinandachu rurayta, nichpa. 34 Chaychina nimptinqam, chay kamachimkuq runamkunaqa nirqanllampa: Ima qam ucha limkidu nasiqchu nuqallkunata munangi yach'achiwayta? nichpa. Chaychina nichpam, chay runataqa sinaguga wasimanda qatirqanllampa. 35 Jisusmi yach'arqan chay runata sinaguga wasimanda qatichqanllampata. Chaymi chay runata tinguchpaqa, kaychina tampurqan: Qamqachu Dyuspa Churimbi kriyingi? nichpa. 36 Chaymi payqa nirqan: Taytitu, ¿pimir payqa? Mayñ niwayri, paypi kriyinaypaq, nichpa. 37 Chaymi Jisusqa nirqan: Rimkawachqam kangi. Nuqam kani. Kayqar parlachillkallki, nichpa. 38 Chaymi chay runaqa nirqan: Ari, Taytitu. Qambim kriyini, nichpa. Chaychina nichpaqam, Jisuspa ñawpambi qunqurimkurqan. 39 Chaymandaqam Jisusqa nirqan: Nuqaqam kay mundumanqa chamuchqa kani, Dyuspaq mana intyindiqta yach'achinaypaq, paypaq allita yach'ananllampa. Piru chay yach'aq tumkuqkunata jusgachpam, rini amkraq chay yach'aqkunamanda, sarkumkunachina kachpa, mana nimatampis intyindinambaq, nichpa. 40 Wamkin farisiyumkunaqam chaypi karqan. Chaymi chaychina Jisus nimptin uyachpaqa, kaychina tampurqanllampa: Qamchu niwangillampa: Sarkumkunachinam kangillampa, nichpa? Manam sarkumkunachinachu kanillampaqa, nichpa. 41 Chaymi Jisusqa chay farisiyumkunata nirqan: Yuyaynimkimpi sarkumkunachina kachpaqach'i, mana yaqqa uchayuqchu kangimanllampa. Piru qamkuna kimkimkim ningillampa: Allitam Dyuspaq yach'anillampa, nichpa. Chaymi mas uchayuqna kangillampa.
1 Allimptam nillkillampa, suq runa wichamkunampa kurralninman chay pungunda mana yallkuchpa, achwan sawanda yallkuqqam suq ladrun ichu suq saltiyadur. 2 Piru kurralpa pungunda yallkuqqam wichamkunampa michidurnin. 3 Chaymi kurralpa pungunda kwidaqqa kich'an, chay michidur yallkunambaq. Yallkumptinqam, chay wichangunaqa michidurnimba busninda riqsin. Kanan paypismi wichangunata riqsichpa, kadunuta chutimbi qayachpa, surqun. 4 Chaymandaqam chay wichangunampa ñawpanda rin. Wichangunampismi chay michidurnimba busninda riqsichpa, imkinda rinllampa. 5 Piru mana michidurnin kaqtaqam mana siginllampachu. Achwanmi busninda mana riqsichpachu, manchachpa mitimkanllampa. 6 Jisus chay kumparasyunda ruramptinqam, chay isrraylinumkunaqa mana intyindirqanllampachu: imam munan niyta, nichpa. 7 Jisusmi pallkunata nirirqan: Allimptam nillkillampa, nuqaqam wichamkunampa yallkunan punguchina kani. 8 Piru yumbay chay puntata chamuq pandachimkuq yach'achimkuqqam ladrunchina, saltiyadurchina kachqallampa. Chaymi wichaychina kaqkunaqa pallkunataqa mana kasurqanchu. 9 Nuqam syilumpa yallkuna pungunchina kani. Chaymi mayqan nuqampi yuyamkuqqa wachadu kachpa, syiluman rin yallkuq. Payqam suq wicha qawata tariqchina rin kaq. 10 Suq ladrunqam chamun suwamkuq, wanchimkuq, chingachimkuq. Piru nuqaqam chamuchqa kani, runamkunata, warmimkunata tumkuy tyimpu ancha chumaqta kawsachinaypaq, tumkuy bidambi ancha kuchimkunanllampa. 11 Nuqaqam ancha allin michidurchina kani. Chaymi rini wañuq, runamkunata, warmimkunata wachanaypaq. Chaqa pallkunaqam wichallkuna. 12 Piru paguta ch'askiq michimkuqqam mana lijitimu dwiñuchu. Chaymi chay atun kita animal lubu chamuqta rimkachpaqa, wichamkunata dijachpa, das mitimkan. Chaymi chay lubuqa wichamkunata richpa piskaq mimkunambaqqa, waqta kayta chimkwan. 13 Chaqa chay michimkuq pagu ch'askiqqam pagurallkulla wichamkunataqa michin. Chaymi mitimkan, mana nimatampis llamkichpachu, ¿chay wichamkunachu chingan ichu mana? nichpa. 14 Piru nuqaqam ancha allin michidurchina kani. Taytay nuqata riqsiwachqanchinam nuqampis paytaqa riqsini. Chaychinallam runamkunata, warmimkunata ancha allita riqsini, wichallkuna kamptin. Achka runa, warmimpismi nuqata riqsiwan. Chaymi rini wañuq, pallkunata wachanaypaq. 16 Kanan suq nasyungunampimpismi wambrallkuna kan. Pallkunampismi rinllampa kasuwaq. Chaymi pallkunatampis rini ampamuq, yumbay wichallkuna suq trumpa tandadulla kananllampa, nuqalla michidurnin kanaypaq. 17 Wichallkunampaqmi rini wañuq. Chaymi Taytayqa ancha kuyawan. Kanan wañuchpaqam, muchuqmanda rini kawsamuq. 18 Piru manam pimpis amalasqa rinchu wanchiwaq. Achwan nuqa kimkiy munachpam, rini dijamkaq wanchiwananllampa. Chaqa dirichuyuqmi kani wañuchpa, kawsamunaypaq. Taytanchiq Dyusqam kach'amuwachqa, chaychina ruranaypaq. 19 Chaychina Jisus nimptinmi, wamkin isrraylinumkunaqa pallkunampura suq layata, suq layata rimarqanllampa. 20 Chaymi pallkunamanda achka runamkuna Jisuspaqqa nirqanllampa: Payqam lumku. Umku chunqumbim dyablumpa ispiritun. Chayri ama uyayllampachu paytaqa, nichpa. 21 Piru wamkinnataqmi nirqanllampa: Kay runampa chunqumbi dyablumpa ispiritun kamptinqach'i, kay ancha chumaqkunataqa mana rimanmanchu. Kanan chay dyabluqam sarkumkunata mana atinmanchu champachiyta, nichpa. 22 Jirusalin llaqtampim unay tyimpumkunampi Dyuspa adurana wasinda allichachqallampa karqan. Chaymandaqam Tayta Dyustana intrigachqallampa karqan. Chaymi watan watan, chayta yuyachpa, chiri tyimpumpi suq fyistata rurarqanllampa. 23 Dyuspa adurana wasinmi achka kurridurniyuq karqan. Suq kurridurninmi Salumun kurridur chutiq. Chay fyistampi Jisumkristu chay Salumun kurridurpi purillkamptinmi, 24 wamkin isrraylinumkuna paypa rridurnimbi chayachpa, kaychina tampurqanllampa: Ima tyimpumkamanmi mana ringichu niwaqllampa: Dyus Amkrachqan Wachadurmi kani ichu mana, nichpaqa? Chayri Dyuspa chay Amkrachqan Wachadur kachpaqa, klaruta niwayllampa, nichpa. 25 Chaymi Jisusqa pallkunata nirqan: Nichuchqallampanam kani. Piru manam munangillampachu kriyiwaytaqa. Nuqaqam Taytay niwachqanda rurani. Chayta rimkachpam, atingillampa yach'ayta: Jisusmi Dyusmanda chamuchqa, nichpa. 26 Piru qamkunaqam mana wichallkunachu kangillampa. Chaymi nuqataqa mana kriyiwangillampachu. 27 Piru wichallkunaqam busniyta riqsichpa, sigiwanllampa. Nuqampismi chay wichallkunataqa riqsini. 28 Chaymi nuqaqa pallkunata kawsachini, suq bidampi tumkuy tyimpu kawsachpa, ama nunka chingananllampa. Chaychina pallkunata wachamptiyqam, mana pimpis nuqataqa rinchu quch'iwaq. 29 Chaqa Taytayqam yumbaymanda mas pudirniyuq. Paymi wichallkunataqa quwachqa. Chaymi mana pimpis atinchu quch'iyta chay wichallkunataqa Taytaypa mamkinmandaqa. 30 Nuqaqam Taytaywanqa suqlla kanillampa, nichpa. 31 Chaychina nichqambaqmi, chay isrraylinumkunaqa rumimkunata piskarqanllampa, Jisusta sitachpa, wanchinambaqllampa. 32 Chaymi Jisusqa pallkunata nirqan: Taytay yanampawamptinmi, qamkunampa ñawpallkimpi ancha achka runata, warmita yanampachqa kani. ¿Mayqan chay yanampachqaypaqmi ringillampa wanchiwaqqa? nichpa. 33 Chaymi chay isrraylinumkunaqa Jisusta nirqanllampa: Manam rinillampachu wanchichuq chay allimkunata rurachqallkirallkuqa. Achwanmi rinillampa wanchichuqqa Taytanchiq Dyusta burlachqallkirallku. Chaqa qamqam suq runalla kachpa, Dyusmi kani ningi, nichpa. 34 Chaymi Jisusqa pallkunata nirqan: Tayta Dyus kimkinmi Santu Librumbi payta uyaqkunata nirqan: Dyuskunam kangillampa, nichpa, ¿manachu? Chaymi chaychina Dyuspa Santu Librun nichqandaqa mana atingillampachu ñigayta. 36 Kanan Tayta Dyusmi nuqata amkrawachpa, kay munduman kach'amuwachqa. Chaymi nini: Dyuspa Churinmi kani, nichpa. Chaychina nimptiyqa, ¿imarallkutaq niwangillampa: Dyustam burlallkangi, nichpaqa? 37 Taytay munachqanda mana ruramptiyqa, ama kriyiwayllampachu. 38 Piru nuqaqam pay munachqanda rurani. Chayri mana nimata nuqata kriyiwachpampis, chay milagrumkunata rurachqayrallku kriyiwayllampa: Dyusmi Jisuswan; Jisuspismi paywan, nichpa. 39 Chaychina Jisus nimptinmi, muchuqmanda munarqanllampa prisuchpa ampayta. Piru manam atirqanllampachu piskaytaqa. 40 Chaymandaqam Jisusqa kutirqanna rriyu Jurdamba chay suq chimbanman. Chayman ch'ayachpaqam, chaypina kidarqan. Chay lugarqam karqan chay Jwan chutichimkuchqan lugar. 41 Kanan achka runamkuna, warmimkuna payman richpam, kaychina nirqanllampa: Allibraq chay Jwan Chutichimkuqqa mana nima milagruta rurarqanchu. Piru kay runampaq tumkuy ima nichqanqam allimp kachqa, nichpa. 42 Chaymi chay lugarpiqa achka runamkuna, warmimkuna Jisuspi kriyirqanllampa.
1 Suq runa Lasaru chutiqmi ancha qachyaq karqan. Paymi panin Maryawan, panin Martawan Bitanilla (Bitaniya) kasiriyumpi tiyarqan. 2 Chay Lasarumpa panin Maryam Jisuspa ch'amkingunata michki mutkinawan pasachqa karqan. Chaymandaqam aqchanwan chamkichichqa karqan. 3 Chay warmimkunam suq kach'amkuta kach'arqanllampa, Jisusta kaychina ninambaq: Taytitu, kuyachqallki Lasarum qachyaq, nichpa. 4 Chaymi chaychina nimptinllampaqa, Jisusqa nirqan: Chay nanaywanqam mana rinchu wañuq tumkuy tyimpumpaqqa. Achwanmi chay nanayqa piskachqa, yumbay runa, warmi yach'anambaq: Jisuspa Taytanmi ancha pudirniyuq. Churin Jisuspismi ancha pudirniyuq, nichpa. 5 Kanan Jisusqam ancha kuyarqan Martata, masan Maryata, turin Lasarutampis. 6 Piru chaychina kuyachpa, yach'achpa: Lasarum ancha qachyaq, nichpampismi, Jisusqa mana daschu rirqan paymanqa. Achwanmi kidarqan ichkay diya masta chay kallkachqan lugarpilla. 7 Chaymandaqam nuqallkuna yach'amkuqninda niwarqanllampa: Amkullampa kutiriq prubinsya Judiyaman, nichpa. 8 Chaymi nuqallkunaqa Jisusta nirqayllampa: Yach'achimkuq Taytitu, amar richunllampachu. Chaqa chayraqmi waq prubinsya Judiyamandaqa chamuchqallampa kanchiq. Manchu waqpiqa chay isrraylinu masinchiqkunaqa munachqallampa sitachuchpa wanchichuyta. ¿Chaychu munangi waqman kutiriyta? nichpa. 9 Chaymi Jisusqa niwarqanllampa: Punchawqam dusi urasniyuq, achimkpi imatampis rurananchiqqa, ¿manachu? Chaymi punchawpi purichpaqa, mana rinchiqchu trumpisaq. Chaqa achimkyamptinmi, atinchiq rimkamkuyta. 10 Piru tutayaqpi puriqqam trumpisan, bidambi mana micha kachqanrallku. 11 Chaymandaqam Jisusqa niwarqanllampa: Kuyachqanchiq Lasaruqam puñullkanna. Piru nuqam rini rimkch'achiq, nichpa. 12 Chaymi Jisustaqa nirqayllampa: Taytitu, chaychina puñuchpaqam, pay kimkinlla atinqa kach'amkayta, nichpa. 13 Piru Jisusqam chaychinaqa nirqan, Lasaru wañuchqana kamptin. Piru nuqallkunaqam yuyarqayllampa: Payqam puñuypaq rimallkan, nichpa. 14 Chaymi Jisusqa ancha klaruta niwarqanllampa: Lasaruqam wañuchqana. 15 Piru ancham kuchimkuni waqpi mana kachqayrallku. Chaqa kananqam qamkunaqa mastana nuqampi ringillampa yuyamkuq. Mayñ, amkullampana rimkaq, nichpa. 16 Chaychina Jisus nimptinmi, Tumas Millisu chutiq, yach'amkuq masingunata niwarqanllampa: Amku nuqanchiqkunampis, Jisuspa pullan wanchiwananchiqllampa, nichpa. 17 Jisus Lasaruman richpaqam, ch'usku diya pambamkachqambina ch'ayarqan. 18 Kanan chay Lasarumpa kasiriyun Bitanillaqam (Bitaniyaqam) Jirusalimba ladumbi ichkay kilumitrus y midyumpi kidan. 19 Chaymanmi achka isrraylinumkuna richqallampa karqan, Martata, Maryata kunswilaq turin Lasaru wañuqpaq. 20 Chaymandaqam Marta yach'achpa: Jisus chamullkan, nichpaqa, wasinmanda lluqchichpa, rirqan tinguq. Piru Maryaqam wasimbilla kidarqan. 21 Chaymi Marta Jisusta tinguchpaqa, nirqan: Taytitu, kaypi kamptimkiqach'i, turisituy Lasaruqa mana wañunandachu. 22 Piru nuqaqam yach'ani: Tayta Dyusqam tumkuy ima mañachqallkita rin quchuq, nichpa. 23 Chaychina nimptinqam, Jisusqa nirqan: Turimki Lasaruqam rin kawsamuq, nichpa. 24 Chaymi Martaqa nirqan: Ari, chaytaqam yach'ani: Wañuqkuna chay ultimu diyampi kawsamumptinmi, turisituyqa rin kawsamuq, nichpa. 25 Chaymi Jisusqa Martataqa kaychina nirqan: Nuqam wañuqkunataqa kawsachimuni, tumkuy tyimpu kawsanambaq. Chaymi nuqampi kriyichpa wañumptinqa, rini kawsachimuq. 26 Kanan nuqampi allimpta kriyichpa kawsaqqam manana tumkuy tyimpumpaqchu rin wañuq. ¿Kriyingichu kay nichuchqaytaqa? nichpa. 27 Chaymi Martaqa nirqan: Ari, Taytitu, nuqam kriyini: Qami Dyuspa Churin, Dyus Amkrachqan Wachadurqa kangi, nichpa. Chaqa unay tyimpumpim Dyusqa qambaq nirqan: Churiymi rin chamuq kay munduman, nichpa. 28 Chaychina nichpaqam, Martaqa rirqan masan Maryata ampamuq. Chaymi uyaramplla (uyaralla) nirqan: Siñurninchiq Jisusmi nin: Amkuch, nichpa. 29 Chaymi Maryaqa das atarichpa, utqaymaya Jisusman rirqan. 30 Jisusqam chay Bitanilla (Bitaniya) yallkunampilla kidachqa karqan. Chay lugarpim Martaqa payta tinguchqa karqan. 31 Chaymi chay kunswilaq isrraylinumkunaqa Maryata das lluqchiqta rimkachpaqa, yuyarqanllampa: Turin Lasaru pambamkachqanmanmi rin waqaq, nichpa. Chaymi imkinllampata rirqanllampa kunswilaq. 32 Piru Maryaqam Jisus kallkachqanman ch'ayachpa, paypa ñawpambi qunqurimkuchpa, nirqan: Taytitu, kaypi kamptimkiqach'i, turiy Lasaruqa mana wañunandachu, nichpa. 33 Chaymi Jisus, rimkachpa Maryata yumbay chay isrraylinu waqallkaqkunataqa, ancha llamkichpa, malaganayarqan. 34 Chaymi kaychina tampurqan: Maypitaq Lasarutaqa pambachqallampa kangi? nichpa. Chaychina tampumptinqam, pallkunaqa nirqan: Taytitu, amku rimkaq, nichpa. 35 Jisusqam waqarqan. 36 Chaychina waqamptinmi, chay isrraylinumkunaqa parlarqanllampa: Rimkay, Jisusqam Lasarutaqa ancha kuyachqa, nichpa. 37 Piru wamkinqam nirqanllampa: Kay runaqam chay sarku runamkunata atichqa champachiyta. ¿Ima manachu atichqa Lasarutampis kach'amkachiyta, ama wañunambaqqa? nichpa. 38 Jisusmi suq kutinda ancha llamkirichpa, qamimkarqan chay pambamkachqan mach'aychina simpulturaman. Yallkunandam suq atun rumiwan kirpachqallampa karqan. 39 Chaymi Jisusqa nirqan: Chay rumita achuchiyllampa, nichpa. Chaymi chay almampa panin Martaqa kaychina nirqan: Taytitu, millanaypaqnach'i ach'nallkan. Chaqa kanan diyawanqam ch'usku diyana wañuchqanqa, nichpa. 40 Piru Jisusqam Martataqa nirqan: Manchu nichurqay, Kriyichpaqam ringi yach'aq: Dyusmi ancha pudirniyuq, nichpa. 41 Chaymi chaypi kaqkunaqa chay atun rumitaqa achuchirqan. Chaymandaqam Jisusqa syiluman champamkuchpa, nirqan: Taytitu, kay mañachuchqayta uyawachpam ringi ruraq. Chaymi pagimkullki. 42 Nuqaqam yach'ani: Qamqam yumbay mañachuchqayta rurangi, nichpa. Piru kaychinaqam pagimkullki, kay uyawaqkuna yach'ananllampa: Tayta Dyusmi Jisusta kach'amuchqa, nichpa. 43 Chayta nichpaqam, ancha jwirtita alma Lasaruta kaychina qayarqan: Lasaru, chay umkumanda lluqchimuy! nichpa. 44 Chaymi chay alma Lasaruqa tumkuy kwirpun wanguchqa trampuwan, qaqllan suq tumkawan tumkumkuchqa chay simpulturamanda lluqchimurqan. Chaymandaqam Jisusqa nirqan: Chay wanguchqanda paskayllampa purinambaq, nichpa. 45 Jisumkristu Lasaruta chaychina kawsachimumptinmi, chay isrraylinumkuna Maryampa imkinda chamuqkunamanda achka chay milagruta rimkachpa, Jisuspina kriyirqanllampa. 46 Piru wamkingunaqam richpa, farisiyu dumktrinayuqkunata manyaqlla parlachirqan: Kay milagrutam Jisusqa rurachqa, nichpa. 47 Chaymi chay kamachimkuq isrraylinu kuramkuna chay farisiyumkunawan, chay Mas Kamachimkuq Juyiskunawan tandanamkuchpa, kaychina parlarqanllampa: Mayñ, ¿imatam atinchiqllampa rurayta? Chaqa chay runaqam ancha achka milagrumkunata rurallkan. 48 Dijamptinchiqllampa chaychina ruranambaq, yumbay llaqta masinchiq isrraylinumkuna paypi kriyichpaqam, manana rinllampachu kasuq rrumanumkunataqa. Chaymi ancha achka rrumanumkuna kay nasyunninchiqman chamuchpa, nuqanchiq isrraylinumkunata wanchiwaqninchiq, Dyuspa kay santu adurana wasinda limpu rinllampa chingachiq, nichpa. 49 Chay watam chay isrraylinu kuramkunamanda suqnin mas kamachimkuq kura karqan. Payqam Kayfas chutirqan. Chaymi chay Kayfasqa chay farisiyumkunata, chay suq kamachimkuqkunata nirqan: Qamkunaqam mana nimatampis yach'angillampachu. 50 Chaqa nuqanchiqpaqqam mas alli suq runalla wañunambaq, yumbayninchiqta wachawananchiq, ama nasyunninchiq chinganambaq. ¿Chaytaqachu mana intyindingillampa? nichpa. 51 Piru chay Kayfas chaychina rimachpaqam, mana kimkin yuyaynindallachu rimallkarqanqa. Achwanmi chay watampi mas kamachimkuq kura kachpa, Dyus munachqanda rimallkarqanqa. Chaymi nirqan: Jisumkristum rin wañuq nasyunninchiqpi tiyaqkunata wachawananchiq, nichpa. 52 Piru manam chay Isrrayil nasyunda wachanambaqllachu wañurqanqa. Achwanmi wañurqanqa, yumbay nasyunmanda Dyuspa wambrangunata tandanambaq, suq ayllulla kananchiqllampa. 53 Chay diyamandampacham chay isrraylinu awturidarkunaqa kunanamkurqan, Jisusta wanchinambaqllampa. 54 Chaymi Jisusqa chay ch'iqniq awturidarkunampa ñawpambiqa manana puriqchu. Achwanmi chay prubinsya Judiyamandaqa rirqanna Ifrayin chutiq llaqtamanna. Waq Ifrayinqam suq chuncha lugarpa ladumbi kidan. Waqpim nuqallkuna yach'amkuqningunawan kidarqan. 55 Chaypi kallkamptiyllampam, ch'ayamullkarqanna isrraylinumkunampa Paskwa fyistan. Chaymi achka runamkuna, warmimkuna tumkuy ladumanda rirqanllampa Jirusalin llaqtaman. Waqpi mayllamkunan kustumbringunata rurarqanllampa, amana uchayuq kachpa, Dyusta adurananllampa. 56 Waq Jirusalimbiqam chay isrraylinumkunaqa Jisusta maskachpa, purillkarqanllampa. Chaymi Dyuspa adurana wasimbi kachpaqa, suqnin suqnin tampunamkurqan: Imatam yuyangillampa? ¿Chamunqachuraq fyistaman Jisusqa, ichuraq mana? nichpa. 57 Chay kamachimkuq isrraylinu kuramkuna, chay farisiyumkunawanqam yumbay llaqta masin isrraylinumkunata kamachirqanllampa, maypimpis Jisusta rimkachpa, abisananllampa, chay uras rinanllampa prisuq.
1 Sayis diyas Paskwa fyista faltamptinraqmi, Jisusqa chamurqan chay Bitanilla (Bitaniya) llaqtaman. Chaypim tiyarqan chay kawsachichqan Lasaru. 2 Chaypim Jisuspaq mimkunata rurarqanllampa. Kanan Lasaruqam Jisuswan masampi kaqkunawan tiyallkarqanllampa. Panin Martaqam sirbillkarqan. 3 Chaychina sirbillkamptinmi, Maryaqa chamurqan ancha ch'aniyuq michki mutkinata midyu litrutach'i ampamuchpa. Chay michki mutkinaqam nardu puru plantamanda karqan. Chaywanmi Maryaqa Jisuspa ch'amkingunata pasarqan. Chaymandaqam aqchangunawan chamkichirqan. Kanan chay wasimpiqam chay michki mutkinata ancha michkita mutkirqayllampa. 4 Chaypim karqan Simumba churin Judas Iskaryutimpis. Paymi Jisuspa ampustulnin kachpampis, Jisusta kuntraqkunaman intrigamkunanna karqan. Chay Judasmi nirqan: 5 Imarallkutaq chay michki mutkinata mana randimkuchqachu kanchiq, chay qallaywan pubrimkunata yanampananchiq? Chaqa chayqam ancha ch'aniyuq. 300 dinaryu qallaymi balin, nichpa. 6 Piru Judasqam mana allimptaqa pubrimkunampiqa yuyarqanchu. Achwanmi ladrun kachpa, chaychinaqa nirqan. Chaqa paymi ufrindamkunataqa tandaq. Paypa mamkimbim ufrindata tandanan taligaqa karqan. Chaymi payqa ufrindamkunamanda qallayta piskaq. 7 Chaymi Jisusqa Judasta nirqan: Ama Maryataqa piñachiychu. Payqam chay michki mutkinata waqaychachqa nuqampaq. Kananqam ancha balin allichawanambaq, wañumptiy, pambawananllampa. 8 Pubrimkunaqam qamkunawan tumkuy tyimpu rinllampa kaq, pallkunata yanampanallkillampa. Piru nuqaqam manana tumkuy tyimpumpaqchu qamkunawanqa rini kaq, nichpa. 9 Achka isrraylinumkunam yach'arqanllampa: Jisusmi chay Bitanillampi (Bitaniyampi), nichpa. Chaymi paymanna chamurqanllampa, payta chay kawsamuq Lasarutampis rimkananllampa. 10 Chaymi Lasaruta kawsaqtana rimkachpaqa, ancha achka isrraylinumkuna Jisuspi kriyichpa, chay kamachimkuq isrraylinu kuramkunamanda amkramkarqanllampa. Chaymi chay kamachimkuq kuramkunaqa kunanamkurqan, Lasarutampis wanchinanllampa. 12 Ancha achka isrraylinumkunam Jirusalin llaqtaman rirqanllampa chay Paskwa fyistaman. Pallkunam yach'arqanllampa: Jisusqach qayandin rin ch'ayamuq kay Jirusalinman, nichpa. 13 Chaymi palmiramkunampa ramprangunata kuchuchpa, challkunata ampachpa, rirqanllampa Jisusta tinguq. Chaychina tinguchpaqam, ancha jwirtita alabarqanllampa: Biba Tayta Dyus! ¡Alabachunllampa Dyuspa rrimplasun chamuqta! ¡Alabachunllampa kay Isrrayilpa gubyirnunchiqta! nichpa. 14 Jisusqam suq burrituta ampachimuchpa, chay burrituta muntamkuchpa, Jirusalinman ch'ayarqan. Chaychina rurachpam, kumplirqan Dyuspa Santu Librumbi kaychina nichqanda: 15 Siyun llaqtampi tiyaqkuna, ama manchayllampachu. Kaypim wachachuq gubyirnullkiqa suq burrituta muntamkuchpa, chamullkan, nichpa. 16 Piru nuqallkuna yach'amkuqningunaqam chay tyimpumpiqa manaraq intyindirqayllampachu chay pasachqambaqqa. Piru Jisus kawsamuchpa, syiluman rimptinraqmi, yuyarqayllampa: Dyuspaq rimaqkunam Santu Librumbi iskibrichqana karqan yumbay chay pasachqambaq, nichpa. 17 Achka runam Jisusta rimkachqallampa karqan, Lasaruta mach'aychina simpulturamanda qayachpa kawsachimumptin. Chay rimkaqkunaqam suqkunata kaychina ancha parlachichqa karqan: Kaytam Jisusqa rurachqa, nichpa. 18 Chaymi ancha achka runamkuna, warmimkuna lluqchirqanllampa tinguq. Chaqa yach'arqanllampanam chay milagruta rurachqambaq. 19 Chaymi farisiyu dumktrinayuqkunaqa suqnin suqnin kaychina parlarqanllampa: Qamkuna rimkachqallkichinam, kananqa manana nimatampis atinchiqchu rurayta. Chaqa rimkay, yumbaymi payta sigichpa, rinllampa, nichpa. 20 Jirusalin fyistaman riqkunawanmi wamkin grisyanumkunampis chay fyistaman richqallampa karqan. 21 Chay grisyanumkunaqam Filimpiman qamimkarqanllampa. Chay Filimpiqam prubinsya Galiliyampa Bitsayda llaqtanmanda karqan. Chay grisyanumkunam Filimpita rrugachpa, nirqanllampa: Taytitu, munanillampam Jisuswan parlayta, nichpa. 22 Chaymi Filimpiqa richpa, chay grisyanumkuna nichqambaq Andrista willarqan. Chaymi ichkandin richpa, Jisusta chaypaq parlachirqanllampa. 23 Chaychina nimptinmi, Jisusqa pallkunata nirqan: Rinnam ch'ayamuq uras wañunaypaq. Chaymandaqam Taytay Dyusqa ancha rin yanampawaq, yumbay yach'anambaq: Jisumkristu Dyusmanda Chamuq Runa kachpam, ancha pudirniyuq, nichpa. 24 Chaqa allimptam nillkillampa, nuqaqam suq triguchina kani. Chay trigu allpaman mana ichkichpa, mana pambamkachpaqam, sampalan trigulla kidan. Piru pambamkachpaqam wiñan. Chaychina wiñachpa, yuramkuchpa, puquchpaqam, achkayan. 25 Chaychinallam suq runa nuqata kuyawananmanda paypa bidanda masta kuyaqqa rin chingaq. Piru mayqan runa nuqampi kriyichqanrallku kay mundumpi bidanda pyirdimptinmi, paytaqa rini wachaq, suq bidampi tumkuy tyimpu kawsanambaq. 26 Chayri mayqan kasuwaqqa allita sigiwanqa. Chaqa chay kasuwaqqam chay may kachqaypi pullay rin kaq. Paytaqam Taytay Dyus rin alabaq, allita kasuwachqanrallku, nichpa. 27 (Jisusqam wañunan diya ch'ayamullkamptin, nirqambis:) Kananqam ancha llamkiwan kani. Piru manam atinichu Taytanchiq Dyusta niyta: Taytitu wachaway, ama ñamkachpa wañunaypaq, nichpaqa. Chaqa chaychina wañunaypaqmi chamuchqaqa kani. 28 Achwanri nichaq: Taytitu, qam munachqallkita ruray, qamtalla alabachunanllampa, nichpa. Chaymi chay uras Tayta Dyus syilumanda qayamkuchpa, nirqan: Munachqayta rurallkani alabawananllampa. Mastampis rini ruraq, masta alabawananllampa, nichpa. 29 Chaypi kaqkunaqam chay qayamkuta uyachpaqa, nirqanllampa: Syilumpim lanyamkullkan, nichpa. Wamkinnataqmi nirqanllampa: Dyuspa suq anjilninmi Jisusta parlachichqa, nichpa. 30 Chaymi Jisusqa pallkunata nirqan: Chay qayamkuqam mana nuqampaqllachu. Achwanmi uyachqallampaqa kanchiq, qamkuna yach'anallki: Tayta Dyusmi Jisusta parlachillkan, nichpa. 31 Ch'ayamuchqanam diya, Tayta Dyus paypi mana kriyiqkunata uchangunarallku kastiganambaq. Kananqam Dyusqa chay dyablutaqa binsichpa, rin qatiq, amana kay mundumpi kamachimkunambaq. 32 Nuqata kay allpamanda alsawamptinllampaqam, yumbay runamkunata rini kumbidaq, nuqampi yuyamkunanllampa. 33 Challkunata nichpaqam, Jisumkristuqa pallkunata kaychina intyindichirqan: Suq kruspim rinllampa alsawaq, nichpa. 34 Chaychina nimptinqam, chay runamkunaqa Jisusta nirqanllampa: Dyuspa Santu Librumbim niwanchiqllampa: Dyus Amkrachqan Wachadurqach tumkuy tyimpu rin kawsaq, nichpa. Chaychina Santu Libru nimptinqa, ¿imarallkutaq qamqa niwangillampa: Dyusmanda Chamuq Runatam rinllampa wanchiq, nichpaqa? ¿Pitaq chay chamuq runaqa? nichpa. 35 Chaymi Jisusqa pallkunata nirqan: Nuqa Dyuspa michanqam suq tyimpumpaqllana pullallkillampaqa rini kaq. Chayri achimkchachumptiy, allita rurachpa kawsayllampa, ama tutayaqpichina purinallkillampa. Chaqa tutayaqpichina puriqqam mana yach'anchu: Maytam rillkani, nichpaqa. 36 Chayri nuqa pullallkillamparaq kamptiy, nuqampi yuyamkuyllampa, qamkunampis michampichina kawsanallkillampa, nichpa. Jisusqam chaychina nichpaqa, suq ladumanna rirqan, amana chay runamkunawan kanambaq. 37 Chaqa pallkunampa ñawpambi achka milagrumkunata ruramptimbismi, mana munarqanllampachu paypiqa yuyamkuyta. 38 Chaychina mana kriyimptinllampaqam, kumplirqanna Dyuspaq chay rimaq Isayiyas Jisuspaq kaychina iskibrichqan: Taytitu, qambaq yach'achimkumptiymi, mana pimpis kriyiwachqachu. Manam ni pimpis intyindichqachu: Qam ancha pudirniyuq kangi, nichpaqa. 39 Chaymi chay isrraylinumkunaqa mana atirqanllampachu Jisuspi yuyamkuytaqa. Chaqa Isayiyasqam chay mana munaq kriyiqkunampaq kaychinampis iskibrichqa karqan: 40 Dyusqam pallkunataqa qunqachichqa, angu chunquyuq kanambaqllampa. Chaymi ima milagruta rimkachpampis, nuqampiqa mana yuyamkunllampachu, pallkunata wachanaypaq, nichpaqa. 41 Chaqa Dyuspa chay rimaq Isayiyasmi Jisusta ancha kamachimkuqta, llimpyallkaqta rimkachqa karqan. Chaymi chaychina paypaq iskibrichqa karqan. 42 Achka isrraylinumkuna mana kriyimptimbismi, wamkin isrraylinumkuna awturidarnindin Jisuspi kriyirqanllampa. Piru mancharqanllampam: Chay farisiyumkunach'i sinaguga wasimanda qatiwachunllampa, nichpa. Chaymi mana rimarqanllampachu: Jisuspim kriyini, nichpaqa. 43 Chaqa mastam munarqanllampa, runamkuna pallkunata alabanambaq maski Dyusmanda. 44 Jisusmi jwirtita rimachpa, nirqan: Nuqampi kriyiqqam mana nuqampillachu kriyillkanqa. Achwanmi Taytay Dyuspimpis kriyillkanqa. Chaqa paymi kach'amuwachqa. 45 Chaymi mayqan nuqata rimkawaqqa chay kach'amuwaqtampis rimkallkan. 46 Chaqa nuqaqam kay mundumpaqqa achimkchamkuq michanchina kani. Chaymi kay mundumanqa chamuchqa kani, nuqampi yuyamkuqkuna tutayaqpichina ama chinganambaq. 47 Piru nichqayta mana kasuwaqtaqam nuqaqa mana sintinsyanichu, kastigadu kanambaqqa. Chaqa manam chamuchqachu kani, kay mundumpi tiyaqkunata kastiganayqa. Achwanmi chamuchqaqa kani, pallkunata wachanaypaq. 48 Piru chay jwisyu diya ch'ayamumptinmi, nichqayta yach'achpa mana kasuqtaqa Taytay Dyus rin kastigaq, chay nichqayta mana kasuwachqanrallku. 49 Chaqa nuqaqam mana yuyachqaytachu yach'achimkuniqa. Achwanmi Tayta Dyus kach'amuwachqa, pay nichqandalla yach'achimkunayqa. 50 Allitam kaychina yach'ani: Taytay Dyus kamachimkuchqanda kasuqkunam suq bidampi tumkuy tyimpu rinllampa kawsaq, nichpa. Chaymi Taytay Dyus niwachqandalla yach'achimkuniqa.
1 Paskwa fyista ch'ayamullkamptinnam, Jisusqa yach'arqan: Ch'ayamunnam wañunay diya, kay mundumanda Tayta Dyusman kutirinaypaq, nichpa. Kay mundumpi Jisuspi kriyiqkunataqam payqa tumkuy tyimpu ancha kuyarqan. 2 Piru dyabluqam Simumba churin Judas Iskaryutita yuyachichqa karqan, Jisusta intrigamkunambaq kuntraqkunaman. 3 Jisusqam yach'arqan: Taytay Dyusmi nuqata ancha pudirniyuqta rurawachqa. Paymanda chamuchpam, paymanna rini kutiriq, nichpa. 4 Chaymi nuqallkunawan mimkullkachpa, masampi tiyallkachqanmanda atarichpa, kampanda lluchtimkuchpa, suq chamkichimkuq tramputa sinturamkurqan. 5 Chaymandaqam suq tamkcha pilankuman yamkuta basyachpa, ch'amkiyllampata mayllarqan. Mayllachpaqam, chay sinturamkuchqan trampuwan ch'amkiyllampata chamkichirqan. 6 Chaymandaqam Simun Pidrumpa ch'amkindana rirqan mayllaq. Chaymi Simun Pidruqa nirqan: Taytitu, ¿qamchu ch'amkillkunata ringi mayllaq? nichpa. 7 Chaymi Jisusqa nirqan: Nuqa rurachqaytaqam manaraq atingichu intyindiyta. Chaymandaraqmi ringi intyindiqqa, nichpa. 8 Chaymi Pidruqa Jisusta nirqan: Taytitu, maychimkampismi mana nunka balinmanchu, qam ch'amkillkunata mayllanallkiqa, nichpa. Chaymi Jisusqa nirqan: Nuqa mana ch'amkimkita mayllamptiyqam, mana yach'amkuqniychu ringi kaq, nichpa. 9 Chaychina nimptinraqmi, Simun Pidruqa nirqan: Taytitu, amar ch'amkiytallachu mayllayqa. Achwanri mamkillkunata, umaytampis mayllayqa, nichpa. 10 Chaymi Jisusqa kaychina nirqan: Chayraq mayllamkuqmi mana nisitanchu, tumkuy kwirpunda mayllananqa. Chaqa tumkuy kwirpunmi limpyu. Ch'amkingunatallam balin mayllanambaqqa. Qamkunaqam yaqqa yumbaynimki limpyu kangillampa; piru manam yumbaynimkichu, nichpa. 11 Chaychinaqam Jisusqa nirqan, yach'achpa: Pim rin intrigamkuwaq kuntrawaqkunaman, nichpa. Chaymi nirqan Manam yumbaynimkichu limpyuqa kangillampa, nichpa. 12 Chaychina ch'amkiyllampata mayllachpaqam, chay kampanda ruramkurichpa, tiyarichpa masaman, kaychina tampuwarqanllampa: Intyindingillampachu: Imampaqraq Jisumkristu ch'amkiyllampata mayllachqa, nichpaqa? 13 Qamkunaqam niwangillampa: Yach'achimkuqniy ichu Kamachimkuqniy, nichpa. Chaytaqam allimpta niwangillampa. Chaqa allibmi qamkunampa yach'achimkuqnimki, kamachimkuqnimki kani. 14 Piru chaychina kachpampismi, ch'amkimkillampata mayllachqa kani. Chaychinar qamkunampis suqnimki suqnimki ch'amkimkillampata mayllachinamkuy. 15 Chaqa nuqaqam allita rurachpa, kawsachqa kani. Chayri chay kawsachqaychina, qamkunampis chumaqta kawsayllampa. 16 Allimptam nillkillampa, suq kriyaduqam mana atinchu kayta mas kamachimkuq patrunninmandaqa. Suq kach'adumpismi mana mas kamachimkuqchu patrunninmandaqa. 17 Kay nichuchqayllampata intyindiwachpa, chaychina rurachpaqam, kuchimkuchpa ringillampa kawsaq. 18 Chaytaqam mana yumbaynimkimpaqchu nillkillampaqa. Chaqa qamkunata amkrachuchpaqam, allita riqsillkillampa. Piru rinmi kumpliq Dyuspa Santu Librumbi kaychina nichqan: Nuqawan pulla mimkuqmi kuntraypaq timkramkachqa, nichpa. 19 Chay nichuchqayllampaqam manaraq kachqachu. Piru nuqa kimkiymi challkunampaq nillkillampa, chay nichuchqayta rimkachpa, kriyinallkillampa: Jisusmi Dyus Amkrachqan Wachadur, nichpa. 20 Allimptam nillkillampa, kach'achqayta mayqan ch'ayachiqqam nuqatachina ch'ayachillkan. Nuqata ch'ayachiwaqqam kach'amuwaqtampis ch'ayachillkan, nichpa. 21 Chaychina nichpaqam Jisusqa ancha llamkichpa, kaychina niwarqanllampa: Allimptam nillkillampa, qamkunamanda suqnimkim ringi intrigamkuwaq kuntrawaqkunaman, nichpa. 22 Chaymi nuqallkuna yach'amkuqningunaqa champanamkurqayllampa. Chaqa manam yach'arqayllampachu: ¿Mayqanniypaqmi chaychinaqa nillkan? nichpaqa. 23 Kanan Jisusqam nuqata ancha kuyawarqan. Chaymi laditumbi isqandachpa, mimkullkarqay. 24 Chaypi kallkamptiymi, Simun Pidruqa siñiyawarqan, Jisusta tampunaypaq: ¿Pich chay intrigamkuqqa? nichpa. 25 Chaymi nuqaqa Jisusman isqandachpa, uyaritamplla tampurqay: Taytitu, ¿pitaq chay intrigamkuchuqqa? nichpa. 26 Chaymi Jisusqa niwarqan: Nuqam suq pidasu kachangata nuyuchichpa, chay intrigamkuwaqtaqa rini quq, nichpa. Chaychina niwachpaqam, suq pidasu kachangata mimkunampi nuyuchichpa, Simumba churin Judas Iskaryutita qurqan. 27 Chay pidasu kachangata Jisus qumptinqam, Judasqa ch'askirqan. Piru chay urasmi dyabluqa Judaspa chunqunman yallkurqan. Chaymi Jisusqa paytaqa kaychina nirqan: Chay ruranallki kaqtaqar utqana ruray, nichpa. 28 Piru masampi kaqkunaqam mana ni mayqanniypis intyindirqayllampachu: ¿Imampaqraq kaychinaqa nin? nichpaqa. 29 Wamkinniyqam yuyarqayllampa: Judaspa mamkimbim chay taliga qallayqa. Chaych'i Jisusqa kach'allkan, kay fyistampaq imata randinambaq, ichuraq pubrimkunata imata qunambaq, nichpa. 30 Chaymandaqam chay Judasqa chay pidasu kachangata mimkuchpaqa, chay kallkachqanmanda atarichpa, lluqchirqanna sawaman. Chay urasqam tutana karqan. 31 Chaychina Judas sawaman lluqchimptinqam, Jisusqa nirqan: Kay diyamkunam Tayta Dyus nuqampaq yumbayta rin yach'achiq: Nuqamanda Chamuq Runam ancha allin, ancha pudirniyuq, nichpa. 32 Chaqa nuqa ancha allita rurachqayrallkum, Taytay Dyusqa ancha alabadu rin kaq. Kanan Dyus kimkinmi das yumbayta rin intyindichiq: Nuqamanda Chamuq Runam ancha allin, ancha pudirniyuq, nichpa. 33 Kuyachqay wambrallkuna, mananam qamkunawanqa unaytachu rini kaq. Chayrallkum ringillampa maskawaq. Piru isrraylinumkunata nichqaychinam, qamkunatampis nillkillampa, may richqaymanqam mana atingillampachu riyta, nichpa. 34 Chaymi kay muchuq kamachimkuchqayta nillkillampa: Nuqaqam ancha kuyallkillampa. Chaychinallar qamkunampis suqnimki suqnimkiwan kuyanamkuyllampa, nichpa. 35 Chaychina qamkuna chumaqta kuyanamkumptimkiqam, chay rimkachuqkunaqa rinllampa yach'aq: Allimptam pallkunaqa Jisuspa yach'amkuqninguna, nichpa. 36 Simun Pidrum Jisusta tampurqan: Taytitu, ¿maymanmi ringi riq? nichpa. Chaymi Jisusqa nirqan: May richqaymanqam mana ringichu atiq imkiyta riytaqa. Chaymandaraqmi ringi sigiwaqqa, nichpa. 37 Chaychina Jisus nimptinqam, Pidruqa nirqan: Taytitu, ¿imarallkutaq kananqa mana atinichu sigichuytaqa? Chaqa listum kani, qambi kriyichqayrallku wañunaypaq, nichpa. 38 Chaymi Jisusqa nirqan: Allimptachu qamqa listu kangi nuqampi kriyichqallkirallku wañunallkiqa? Piru allimptam nillki, gallu manaraq kantamptinmi, kimsa kutinda ringi ñigawaq: Manam riqsinichu Jisustaqa, nichpa.
1 Amar llamkiyllampachu ni manchayllampachu. Achwanri Tayta Dyuspi yuyamkuchpaqa, nuqampimpis yuyamkuyllampa. 2 Taytay tiyachqambiqam kan ancha achka wasimkuna. Mana kamptinqach'i, nichunayllampata. Nuqam richpa, mas wasimkunata rurachaq qamkunampaq. 3 Chaymandaqam syilumpi qamkunampaq chay lugarta allichachpa, rini kutimuq ampachunayllampa, chay kachqaypi qamkunampis pullay kanallkillampa. 4 Qamkunaqam nuqampaq yach'angillampana: Jisumkristum waqmanmi rin, nichpa. Chaqa ñandampismi riqsingillampana. 5 Chaychina Jisus nimptinqam, Tumasqa nirqan: Taytitu, manam yach'anillampachu: Maymanmi ringi, nichpaqa. Chaychinaqa ¿imachinataq atinillampa yach'ayta: Mayqan ñandam richaqllampa chay richqallkimanqa? nichpa. 6 Chaymi Jisusqa kaychina nirqan: Dyusman riq ñanmi kani. Allimp kaqmi kani. Kawsachimkuqpismi nuqa kani. Chaqa manam pimpis pay kimkinllaqa atinchu ch'ayayta Tayta Dyusmanqa. Nuqarallkullam atingillampa ch'ayaytaqa. 7 Chaymi nuqata riqsiwachpaqa, Taytaytampis riqsingillampa. Chaqa nuqata rimkawachpaqam, alabis paytampis rimkallkangillampana, nichpa. 8 Chaymi Filimpiqa nirqan: Taytitu, rimkachiwayllampar Taytallkita, payta rimkachpa, nuqallkuna kuchimkunaypaq, nichpa. 9 Chaychina tampumptinmi, Jisusqa Filimpita nirqan: Filimpi, unaynam qamkunawanqa kani! ¿Ima, kanangamanchu manaraq riqsiwachqa kangi? Nuqata rimkawaqqam Taytaytampis rimkachqana. Chaychinaqa ¿imarallkutaq niwangi: Rimkachiwayri Taytallkita, nichpaqa? 10 ¿Ima, manachu kriyingi: Jisusmi Taytanwan suqlla; Tayta Dyusmi Jisuswan suqlla, nichpaqa? Chaqa tumkuy ima nichuchqayqam mana nuqampa yuyayniyllachu. Achwanmi Taytay nuqawan kachpa, yumbay chay rurachqallkunata pay kimkin rurachqa. 11 Chayri kriyiwayllampa, Taytaywanmi suqlla kani. Paypismi nuqawan suqlla. Piru mana munachpa kriyiwaytaqa, chay rurachqallkunata rimkachpa, kriyiwayllampa. 12 Chaqa allimptam nillkillampa, nuqampi kriyiqkunaqam rurachqay layamkunata rinllampa ruraq. Nuqa Taytayman rimptiymi, mas ispantaypaq milagrumkunata rinllampa ruraq. 13 Chaymi chutiypi tumkuy ima mañawachqallkita rini ruraq. Chaychina ruramptiyqam, ancha achka runa, warmi Tayta Dyusta rinllampa alabaq. 14 Muchuqmanda nirillkillampa: Nuqampa chutiypi tumkuy ima mañawachqallkitam rini ruraq, nichpa. 15 Qamkuna nuqata allimpta kuyawachpaqar, kamachimkuchqayta rurayllampa. 16 Kanan nuqaqam Taytayta rini mañaq, suq kunswilachuqta kach'amunambaq, qamkunampa pullallki tumkuy tyimpu kanambaq. 17 Payqam Dyuspa Santu Ispiritun. Payqam allimp kaqtalla qamkunata rin yach'achichuq. Piru nuqampi mana kriyiqkunaqam paytaqa mana atinllampachu ch'askiyta chunqumbiqa. Chaqa paytaqam mana rimkanllampachu, ni riqsinllampachu. Piru qamkunaqam Santu Ispiritutaqa riqsingillampa, qamkunawan kachqanrallku. Kanan payqam qamkunampi tumkuy tyimpu rin kawsaq. 18 Manam rinichu dijachuqllampa wamkchatachinaqa. Achwan qamkunamanmi rini kutimuq. 19 Achla tyimpumandaqam runamkunaqa manana rinllampachu rimkawaq. Piru qamkunaqam ringillampa rimkariwaq. Chaqa nuqa kawsamuchqayrallkum qamkunampis tumkuy tyimpu ringillampa kawsaq. 20 Chay kawsamuchqay diyampim qamkunaqa ringillampa yach'aq Taytaywan kachqayta, nuqawan kachqallkillampata, nuqampa ispirituy qamkunampa chunqullkimpi kachqanda. 21 Kamachimkuchqayta kasuqqam allimpta kuyawan. Chay kuyawaqtaqam Taytayqa kuyan. Nuqampismi paytaqa kuyachpa, payman rini chamuq riqsiwanambaq. 22 Chaymi suq Judas (mana chay Judas Iskaryutichu), nirqan: Taytitu, ¿imachinam nuqallkunallaqa rinillampa rimkachuqqa? ¿Imarallkutaq chay mana kriyiqkunampis mana rinllampachu rimkachuqqa? nichpa. 23 Chaychina tampumptinmi, Jisusqa chay allin Judasta nirqan: Qamkuna kuyawachpaqam, nichqayta ringillampa kasuwaq. Kanan Taytayqam qamkunata rin kuyachuq. Chaymi nuqaqa Taytaywan rini chamuq, qamkunawan pulla kawsanaypaq. 24 Kay nichuchqayqam mana nuqampa yuyayniyllachu. Achwan chay kach'amuwaq Taytay niwachqandallam nuqaqa nillkillampa. Piru mana kuyawaqqam chay nichqaytaqa mana kasunchu. 25 Yumbay kallkunatam pullallkillampa kachparaq, nuqa kimkiy nillkillampa. 26 Piru Taytaymi rinna kach'amuq Santu Ispiritunda nuqampa rrimplasuy, qamkunata yanampachuchpa kunswilachunan. Chay Santu Ispiritunmi tumkuy imata rin yach'achichuqllampa. Tumkuy ima nichuchqaytampismi rin yuyachichuqllampa. 27 Dyuspi mana kriyiqkunaqam mana nuqachinaqa atinllampachu yanampachuyta, kuchimkuchpa chumaqta kawsanallkillampa. Piru nuqaqam rini yanampachuqllampa, kuchimkuchpa kawsanallkillampa. Chaymi dispidimkachpa nillkillampa, ama nimata manchayllampachu ni llamkiyllampachu. 28 Chaqa uyawachqam kangillampa, kaychina nichuchqayta: Richpaqam rini kutimuq qamkunaman, nichpa. Nuqamandaqam Taytay mas kamachimkuqqa. Chaymi qamkuna allimpta kuyawachpaqa, Tayta Dyusman rimptiyqa, dijuru kuchimkungimanllampa. 29 Kallkunataqam nichuchqallampa kani, manaraq nimampis pasamptin, kay nichuchqayta rimkachpa, nuqampi yuyamkunallkillampa. 30 Qamkunawanqam manana achkataqa rinichu parlaq. Chaqa kay mundumpa kamachimkuqnin dyabluqam chamullkanna. Piru payqam mana nima pudirniyuqchu, nuqata kamachiwananqa. 31 Achwanmi Tayta Dyusta kasuchpa, nuqaqa rini wañuq, yumbay runamkuna, warmimkuna yach'ananllampa: Jisumkristum Tayta Dyusta kuyachpa, kamachichqanda ruran, nichpa. Chaymandaqam nirqambis: Atariyllampa. Amkullampana, nichpa.
1 Jisusqam kaychinampis yach'achimkurqan: Nuqaqam suq yura ubaschina kani. Taytayqam chay yura ubasta kwidaqchina. 2 Nuqampi yuyamkuqkunaqam chay yurampa allin rimkrangunachina. Piru Taytayqam chay yurampa mana puquq rimkrangunataqa kuchun. Piru chay puquq rimkrangunataqam tirampachpa qurallkanchina. Chaqa pallkunampa bidanmanda tumkuy ima mana baliqkunata wichumkullkan, mas chumaqta payta kasunanllampa. 3 Chaymi Dyus nichqanda yach'achichumptiyqa, qamkunaqa quraduchina kangillampa. 4 Nuqaqam qamkunata tumkuy imampi rini yanampachuq. Chayri nuqampi tumkuy chunqu yuyamkuchpa, kawsayllampa. Chaqa suq yura ubaspa rimkran pitimkachpaqam, manana atinchu puquyta. Chaychinallam qamkunampis nuqampi mana yuyamkuchpaqa, mana atingillampachu Dyus munachqanda rurachpa kawsaytaqa. 5 Nuqaqam chay yurachina kani. Qamkunaqam chay yurampa rimkrangunachina kangillampa. Chaymi nuqampi yuyamkumptimkiqa, rini yanampachuq, allita rurachpa kawsanallkillampa, ancha puquq yurachina kanallkillampa. Piru nuqampi mana yuyamkuchpaqam, mana atingillampachu chumaqta kawsaytaqa. 6 Chaqa nuqampi mana yuyamkuqqam wichumkuchqa rin kaq. Tumkuy jwirsandam limpu rin pyirdiq, suq yurampa rimkran pitimkachpa chamkiqchina. Chay rimkrandaqam ninampi rumpachinllampa. 7 Piru qamkuna nuqampi yuyamkuchpa, nichuchqayta kasuwamptimkiqam, tumkuy ima mañachqallkita Taytayqa rin quchuqllampa. 8 Kanan qamkuna allita rurachpa kawsamptimkiqam, chay rimkachuqkunaqa Dyusta rinllampa alabaq. Chaqa chaychina kawsachpa, ancha puquq yurachina kachpaqam, allimp yach'amkuqnillkuna ringillampa kaq. 9 Taytaymi nuqata ancha kuyawan. Chaychinallam nuqampis qamkunataqa ancha kuyallki. Chaychina kuyachumptiyqar, nuqamandaqa ama amkramkayllampachu. 10 Chaqa nuqaqam Taytay Dyus niwachqanda kasuni. Chaymi paymandaqa mana amkramkanichu. Chaychinallam qamkunampis kasuwachpaqa, mana nunka nuqamandaqa ringillampachu amkramkaq. 11 Challkunataqam nillkillampa, nuqawan tumkuy chunqu kuchimkunallkillampa. 12 Chaymi kaychina kamachillkillampa: Nuqa kuyachuchqaychinar, suqnimki suqnimkiwan kuyanamkuyllampa. 13 Suq runa yanasungunata (yanasangunata) ancha kuyachpaqam, wañunman wachanambaq. Chay laya wañuqmi yumbay runamanda mas kuyamkuqqa. 14 Nichuchqayta kasuchpaqam, yanasullkuna (yanasallkuna) kangillampa. 15 Mananam kriyaduchinachu kangillampa. Chaqa suq kriyaduqam mana yach'anchu: Patrunniymi kay imata rin ruraq, nichpaqa. Piru nuqaqam Taytay tumkuy ima niwachqanda qamkunata nichuchqa kani. Chaymi yanasullkunana (yanasallkunana) kangillampa. 16 Piru manam qamkunachu nuqataqa amkrawachqa kangi. Achwanmi nuqa qamkunata amkrachuchpa, numbrachuchqa kani, rinallkillampa nuqampa chumaq nutisyayta yach'achimkuq, achka runa, warmi tumkuy tyimpu nuqampi yuyamkunanllampa. Chaychina ancha puquq yurachina kamptimkillampaqam, nuqampa chutiypi tumkuy ima mañamkuchqallkita Tayta Dyusqa rin quchuqllampa. 17 Chaymi nirillkillampa, suqwan suqwan kuyanamkunallki. 18 Nuqampi mana kriyiqkunam ancha ch'iqniwanllampa. Chaymi qamkunatampis ch'iqnichungillampa. 19 Chaqa unaynam nuqampi mana kriyiqkunamanda amkrachuchqallampa kani. Chaymi pallkunachina manana ruramptimkillampaqa, ch'iqnichungillampa. Piru qamkuna mana allita ruramptimkiqach'i, pallkunaqa kuyachungimanllampa uchayuq masingunatachina. 20 Chaqa qamkunata nichuchqaychinam: Suq kriyadutaqa mana rrispitanllampachu maski patrunninmandaqa. Chaychinallam qamkunatampis mana rinllampachu rrispitachuq maski nuqamandaqa. Chaymi chay mana kriyiqkunaqa nuqata qasachawachpa, qamkunatampis rinllampa qasachachuq. Chaqa nuqampi mana kriyiqkunaqam kach'amuwaq Dyustampis mana riqsinllampachu yuyaynimbiqa. Chaymi qamkuna nuqampi yuyamkumptimkiqa, qamkunatampis rinllampa qasachachuq. Piru kasuwaqkunaqam qamkunatampis rinllampa kasuchuq. 22 Nuqa mana chamumptiy yach'achimkuqqach'i, chay qasachamkuqkunaqa mana uchayuqchu kananda. Piru kananqam uchangunampaq yach'achimptiyqa, manana atinllampachu niyta: Manam yach'arqaychu: Uchayuqmi kani, nichpaqa. 23 Chaymi nuqata ch'iqniwaqkunaqa Taytaytampis ch'iqnillkanllampa. 24 Kanan ispantaypaq milagrumkunata pallkunampa ñawpambi mana ruramptiyqach'i, mana uchayuqchu kanandallampa. Piru pallkunaqam chay milagrumkunata rimkachpampis, nuqata, Taytayta ch'iqniwanllampa. 25 Piru chaychinaqam pasachqa, kumplinambaq Dyuspa Santu Librumbi kaychina nichqan: Mana nima uchayuq kamptiypismi, ch'iqniwarqanllampa, nichpa. 26 Piru nuqaqam Tayta Dyusman richpaqa, rini kach'amuq chay kunswilamkuq Santu Ispiritunda. Paymi Dyusmanda chamuchpa, allimp kaqtalla rimachpa, nuqampaq rin yach'achichuqllampa. 27 Qamkunampismi nuqampaq ringillampa yach'achimkuq. Chaqa qallarichqay diyamandampacham qamkunaqa pullay kachqallampa kangi.
1 Jisusqam nirqambis: Challkunataqam nirqaqllampa, qamkuna padisichpampis, ama disanimamkanallki. 2 Chaqa rinllampam qatichuq sinaguga wasimkunamanda. Rinmi ch'ayamuq tyimpu, wanchichuqkuna kaychina yuyanan: Chay mana baliq Jisuspi kriyiqkunata wanchichpaqam, Taytanchiq Dyusta kasullkanchiq, nichpa. 3 Chaqa pallkunaqam nuqampi Taytaypi mana nunka yuyamkuchpa, chaychinaqa rinllampa wanchichuq. 4 Kaychinaqam nillkillampa, chay qasachachunan uras ch'ayamumptin, yuyanallkillampa kay nichuchqayta, nichpa. Jisusqam kaychinampis nuqallkunataqa yach'achiwarqan: Qamkunawan kallkachpam, manaraq yumbaytachu nichurqaqllampa. 5 Kanan rininam kutiriq Taytay kach'amuwaqman. Piru qamkunaqam mana tampuwangichu: ¡Maymanmi ringi? nichpaqa. 6 Achwanmi kallkunata nichumptiyllampaqa, ancha llamkingillampa. 7 Piru ama llamkiyllampachu. Allimp kaqtam nillkillampa. Qamkunampaqqam mas alli, kay mundumanda rinaypaq. Mana rimptiyqam, chay kunswilachuq Santu Ispirituqa mana rinchu chamuq qamkunamanqa. Piru nuqa richpam, rini kach'amuq, qamkunaman chamunambaq. 8 Chaymi chay Santu Ispiritu chamuchpaqa, kay mundumpi uchayuqkunata rin yuyachiq: Ay, uchayuqmi kani, ninambaqllampa. Rinmi yuyachiqpis: Dyusmi ancha allin. Paymi rin jusgawaqninchiq, ninambaqllampa, 9 yach'anambaqllampa: Jisuspi mana kriyichqayrallkum, uchayuqna kani, nichpa. 10 Chaychina Taytay kachqanman kutimptiyqam, manana ringillampachu rimkawaq. Piru ringillampam yach'aq: Jisumkristum ñanninchiqchina, Dyusman rinanchiqllampaqa, nichpa. 11 Ringillampampismi yach'aq: Tayta Dyusmi, ancha allita jusgachpa, kay mundumpa kamachimkuqnin dyabluta sintinsyachqana, kastigadu kanambaq, nichpa. 12 Jisusqam kaychinampis nirqan: Kanmi masta qamkunata nichunaypaq. Piru kananqam mana ringillampachu atiq intyindiyta. 13 Piru Dyuspa Santu Ispiritun chamuchpam, tumkuy ima allimp kaqta rin yach'achichuqllampa. Manam rinchu yach'achichuq pay yuyachqandaqa. Achwanmi yumbay uyachqanda qamkunataqa rin intyindichichuq: Kallkunam rin pasaq, nichpa. 14 Chay Santu Ispiritum nuqataqa rin alabawaq. Kanan nuqamanda uyachqandam rin yach'achichuqllampa. 15 Taytay Dyus tumkuy ima yuyachqandam nuqampis yach'ani. Chaymi chay yach'achqayta Santu Ispiritumpis rin yach'achichuqllampa, nichpa. 16 Jisusqam kaychinampis nirqan: Achla diyamandaqam manana ringillampachu rimkawaq. ?Chaqa Taytaymannam rini kutiriq.? Piru achla diyamandaqam muchuqmanda ringillampa rimkariwaq, nichpa. 17 Chaymi wamkin nuqallkuna yach'amkuqningunaqa suqniy suqniy kaychina parlarqayllampa: Imampaqmi kay layataqa niwanchiq? ¿Imam munan niyta: Achla diyamandaqam manana ringillampachu rimkawaq. Chaqa Taytaymanmi rini kutiriq. Piru achla diyamandaqam muchuqmanda ringillampa rimkariwaq, nichpa? 18 ¿Imam munan niyta, Achla diyamanda, nichpaqa? Manam intyindinichu chay nichqandaqa, nichpa. 19 Piru Jisusqam yach'arqanna nuqallkuna parlachqaypaq. Chaymi niwarqanllampa: Nuqam nichuchqallampa kani: Achla diyamandaqam manana ringillampachu rimkawaq. Piru achla diyamandaqam muchuqmanda ringillampa rimkariwaq nichpa. ¿Ima, kaypaqchu qamkunaqa tampunamkullkangi? 20 Allimptam nillkillampa, qamkunaqa ancha llamkichpa, ringillampa waqaq. Piru nuqata kuntrawaqkunaqam rinllampa kuchimkuq. Piru chaychina qamkuna ancha llamkichpampismi, ringillampa kuchimkuq. 21 Suq warmi qachyanan uras ch'ayamumptinqam, nanaywan ancha padisin. Piru wawitanda qachyachpaqam, qunqanna nanachqandaqa. Chaqa kay mundumpi wawitan nasimptinqam, anchana kuchimkun. 22 Chaychinam qamkunampis kananqa ancha llamkingillampa. Piru kutimuchpam, rini watumkuchuqllampa. Chay diyampiqam tumkuy chunqu ancha ringillampa kuchimkuq. Mananam ni pimpis atinqachu llamkichichuytaqa. 23 Kanan chay diyampiqam manana nimatampis ringillampachu tampuwaq. Achwanmi allimpta nillkillampa, chutiywan Taytay Dyusman ringillampa mañamkuq. Chaymi payqa rin quchuqllampa. 24 Kanangamanmi mana nimatampis chutiywanqa Taytaymanqa mañamkuchqallampachu kangi. Paymanri mañamkuyllampa, ch'askichpa, ancha kuchimkunallkillampa. 25 Kanangamanmi achka kumparasyunwan qamkunata yach'achichuchqa kani. Piru suq tyimpumpiqam manana chay kumparasyungunawanqa rinichu yach'achichuqllampa. Achwanmi ancha klaruta rini yach'achichuqllampa Taytaypaqqa. 26 Chay tyimpumpiqam Taytaymanqa ringillampa mañamkuq nuqampa chutiypi. Mananam nisisaryuchu rin kaq, nuqalla qamkunampaq mañamkunaypaqqa. 27 Chaqa qamkunaqam nuqata kuyawachpa, yuyamkungillampa: Jisumkristum Tayta Dyusmanda chamuchqa, nichpa. Chaymi Taytay Dyus ancha kuyachungillampa. 28 Tayta Dyusmandam kay munduman chamurqay. Piru kananqam kay munduta dijachpa, paymanna rini kutiriq, nichpa. 29 Chaymi nuqallkuna yach'amkuqningunaqa nirqayllampa: Kananqam manana kumparasyunwanchu nuqallkunataqa yach'achiwallkangi. Achwanmi ancha klarutana niwallkangillampa. 30 Kananqam nuqallkunaqa intyindinina: Qami tumkuy imata yach'angi, nichpa. (Chaqa manaraq tampuchumptiyllampam, qamqa yach'angina: Kaychinam rinllampa tampuwaq, nichpa.) Chaymi mana ni nisisaryuchu nuqallkuna tampuchunayqa. Chayrallkum yach'anillampa: Dyusmi qamtaqa kach'amuchuchqa, nichpa. 31 Chaymi Jisusqa kaychina niwarqanllampa: Kananqachu allimpta nuqampi yuyamkungillampa? 32 Kanalitanmi chay urasqa rinna ch'ayamuq. Chay uraspillam qamkunaqa waqta kayta ringillampa chimkwamkaq. Nuqataqam sampalitayta ringillampa dijawaq. Piru manam sampalitayllachu rini kaq. Chaqa Taytaymi nuqampa pullay. 33 Chaymi kallkunata nichuchqallampa kani, nuqampi allita yuyamkuchpa, ama nimata manchanallkillampa. Kay mundumpi ringillampa padisiq. Piru nuqampi yuyamkuchpa, animamkayllampa. Chaqa nuqaqam kay mundumpi yumbay kuntrawaqkunata binsichqa kani.
1 Challkunata nichpaqam, Jisusqa syiluman champamkuchpa, kaychina mañamkurqan: Taytitu, chay wañunay urasqam ch'ayamullkanna. Chayri runamkunata nuqa Churimkimpaq intyindichiy: Jisumkristum ancha allin ancha kamachimkuq, nichpa. Chaychina willamptimkiqam, nuqampis pallkunata atichaq yach'achiyta: Tayta Dyusmi ancha allin kamachimkuq, nichpa. 2 Qami numbrawachqa kangi, yumbayta kamachinaypaq, nuqampi yumbay yuyamkuqkunata tumkuy tyimpumpaq kawsachinaypaq. Chaqa pallkunatam animachichqa kangi, nuqampi yuyamkunanllampa. 3 Kanan qamllam allimp Dyusqa kangi. Qam kimkimkim kach'amuwachqa kangi kay munduman. Chaymi qambi, nuqampi yuyamkuqkunaqa suq bidampi tumkuy tyimpumpaq rinllampa kawsaq. 4 Yumbay niwachqallkitam rurachqana kani, kay mundumpi yumbay tiyaqkuna yach'ananllampa: Tayta Dyusmi ancha allin kamachimkuq, nichpa. 5 Taytitu, unayqam manaraq kay mundu kamptin, ancha baliq llimpyaq kamachimkuq kachpa, qamwan kawsarqay. Kanambisri ruray, chay unaychina karinaypaq. 6 Kay mundumpi kawsaqkunamandam qam wamkingunata amkrachqa kangi, yach'amkuqnillkuna kanambaq. Chaymi pallkunata qambaq yach'achichqa kani. Kanan pallkunaqam qam nichqallkita kasuchqallampa. 7 Chaymi kananqa pallkunaqa yach'anllampa: Jisumkristum tumkuy imata ruran, yach'achimkun, Tayta Dyus yanampamptin, nichpa. 8 Chaqa qam niwachqallkitallam pallkunataqa yach'achichqa kani. Chaymi nuqampi allita yuyamkuchpa, kananqa yach'anllampana: Allibmi Tayta Dyus Churin Jisumkristuta kach'amuchqa, nichpa. 9 Chaymi qamba kaqkunampaq ancha rrugallki. Chaqa pallkunataqam nuqata quwachqa kangi. Piru chay kuntrachuqkunampaqqam mana rrugallkichu. 10 Chaqa nuqampa yumbay yach'amkuqnillkunaqam qambampis. Chaychinallam qamanda yumbay yach'amkuqkunampis nuqampa. Chaychina nuqampa kachpam, pallkunampis suqkunata intyindichinllampa: Jisumkristum ancha allin kamachimkuq, nichpa. 11 Nuqaqam kay mundumandaqa qamanna rini chamuq. Piru yumbay yach'amkuqniyqam kay mundumpilla rinllampa kidaq. Chaymi ancha allin Taytitu, qamta rrugallki nuqampi yuyamkuqkunata allita kwidanallki, suq aylluchina kuyanamkuchpa kawsananllampa, qam nuqawan kawsachqanchiqchina. 12 Chaqa kay mundumpi pallkunampa pullanllampa kachpaqam, nuqaqa chay quwachqallki yach'amkuqnillkunata kwidachqa kani, qam yanampawamptimki. Chaymi yumbay pallkunamanda chay chinganambaq kaqlla rin chingaq, dyabluta kasuchqanrallku. Chaychina chingamptinmi, qamba Santu Librullkimpi nichqanqa rin kumpliq. 13 Kananqam qam kachqallkimanna rini kutimuq. Piru kay mundumpiraq kachpaqam, kay yach'amkuqnillkunata yach'achini, nuqa kuchimkuchqaychina, pallkunampis ancha kuchimkunambaq. 14 Chaymi nuqaqa yach'achiwachqallkita pallkunataqa yach'achichqana kani. Chayrallkum chay mana munaq kriyiqkunaqa pallkunataqa ancha ch'iqninllampa. Chaqa nuqampi kriyiqkunampismi nuqachinana yuyanllampa. Mananam yuyanllampachu chay mana kriyiqkunachinaqa. 15 Piru manam rrugallkichu, pallkunata kay mundumanda surqunallkimpaqqa. Achwanmi rrugallkiqa dyablumanda wachanallkimpaq. 16 Nuqaqam mana kay mundumanda kaqkunachinachu yuyani. Chaychinallam nuqampi kriyiqkunampis manana kay mundumanda kaqkunachinachu rinllampa yuyaq. 17 Yuch'allku pallkunata amkrachpa yach'achiy, qamtalla kasuchunanllampa. Chaqa chay yach'achimkuchqallkiqam mana llullachu. Achwanmi allimp kaqlla. 18 Taytitu, qamqam kay munduman kach'amuwachqa kangi. Chaychinallam nuqampis kay yach'amkuqnillkunata kay mundumpi tiyaqkunaman kach'achqa kani, nuqampaq yach'achimkunanllampa. 19 Chaqa pallkunata wachanaypaqmi nuqa kimkiy intrigamkani wañunaypaq, pallkunampis allimp kaqpi kriyichpa, tumkuy chunqu qaman intrigamkananllampa. 20 Pallkuna nuqampaq yach'achimkumptinmi, suqkunampis nuqampi rinllampa yuyamkuq. Chaymi mana kay kriyiqkunampaqllachu rrugallkiqa. Achwanmi rruqallkiqa nuqampi manaraq kriyiqkunampaqpis, 21 yumbaynin qambi, nuqampi kriyichpa, suq aylluchina kanambaqllampa, qam nuqawan suq aylluchina kachqanchiqchina. Chaychina kuyanamkuchpa kawsamptinllampam, suqkuna pallkunata rimkachpa, rinllampa kriyiq: Taytanchiq Dyusmi Jisusta kach'amuchqa, nichpa. 22 Chaqa qam numbrawachqa kangi, ancha yach'ayniyuq kamachimkuq kanaypaq. Chaychinallam nuqampis kay yach'amkuqnillkunata numbrachqa kani, ancha yach'ayniyuq kamachimkuqkuna kachpa, kuyanamkuchpa, suq kwirpuchinalla kananllampa, qam nuqawan kachqanchiqchina. 23 Kanan qamqam nuqawan kachpa, ancha yanampawangi. Chaychinallam nuqampis pallkunawan kachpa, ancha yanampani, suqwan suqwan kuyanamkuchpa kawsananllampa. Chaychina chumaqta kawsamptinllampam, chay mana kriyiqkunampis yach'anqallampa: Allimptam Tayta Dyusqa Jisusta kay munduman kach'amuchqa, nichpa. Yach'anqallampampismi: Tayta Dyusmi paypi kriyiqkunata ancha kuyan, Churin Jisusta kuyachqanchina, nichpa. 24 Taytitu, ancham rruqallkimpis, kay quwachqallki yach'amkuqnillkuna may kachqaypi, pullay kanambaqllampa. Rrugallkimpismi yach'anambaqllampa: Tayta Dyusmi Churin Jisusta ancha kuyachpa, ancha alaban, nichpa. Chaqa kay munduta manaraq rurachpam, nuqata ancha kuyawachqa kangi. 25 Ancha allin Taytitu, qamta kuntrachuqkunaqam mana riqsichungichu. Piru nuqaqam riqsillki. Kanan yumbay kay yach'amkuqniypismi yach'an: Taytanchiq Dyusmi Churin Jisusta kay munduman kach'amuchqa, nichpa. 26 Taytitu, nuqam pallkunataqa yanampachqa kani, qamta riqsichunambaq chunqunllampampi. Chaychinallam pallkunata masta rini intyindichiq, suqkunata kuyanambaqllampa, nuqata kuyawachqallkichina. Chaqa chayta pallkuna intyindimptinqam, nuqampa ispirituyqa pallkunampa chunqumbi rin kaq, nichpa.
1 Chaychina Tayta Dyusman mañamkuchpaqam, Jisusqa nuqallkuna yach'amkuqningunawan rirqayllampa chay kibrada Sidrumba chimba ladunman. Chaypim karqan suq wirta. Chay wirtamanmi yallkurqayllampa. 2 Chay Judas Jisusta intrigamkuqpismi riqsirqan chay wirtataqa. Chaqa Jisusqam achka bwiltasta nuqallkunawan chaypiqa tandamkachqa karqan. 3 Chaypi kallkamptiyllampam, kamachimkuq isrraylinu kuramkuna, farisiyumkunampis Dyuspa adurana wasinmanda suldadumkunata kach'amurqan. Achka rrumanu suldadumkunampismi pallkunawanqa chamurqan. Yumbaymi chamurqanllampa lamparamkunawan michamkunawan, qarumkunata, atun kuchillumkunata piskamkuchpa. Chay runamkunampa ñawpandaqam Judas Iskaryuti chamurqan. 4 Piru Jisusqam yach'arqanna: Kaychinam rin pasawaq, nichpa. Chaymi das ñawpaman richpa, yumbayta tampurqan: Pitam maskallkangillampa? nichpa. 5 Pallkunaqam nirqan: Jisus Nasaritmanda kaqtam maskallkanillampa, nichpa. Chaymi Jisusqa nirqan: Nuqam kani Jisus Nasaritmanda kaqqa, nichpa. Kanan chay suldadumkunampa pullanmi chay intrigamkuq Judasqa karqan. 6 Chay uras Jisus Nuqam kani nimptinmi, chay runamkunaqa imkimp imkimp richpa, pachaman waqtamkarqanllampa. 7 Chaymandaqam Jisusqa tampurirqan: Pitam maskallkangillampa? nichpa. Chaymi pallkunaqa nirirqanllampa: Jisus Nasaritmanda kaqtam maskallkanillampa, nichpa. 8 Chaymi Jisusqa pallkunata nirirqan: Nichuchqallampanam kani: Nuqam kani, nichpa. Nuqata maskawachpaqa, kay suq runamkunataqa dijayllampa rinambaq, nichpa. 9 Chaychina nimptinmi, kumplirqan pay kimkin kaychina nichqan: Taytitu, chay quwachqallki sigiwaqkunamandaqam mana ni suqta dijachqachu kani chinganambaq, nichpa. 10 Simun Pidruqam atun kuchilluyuq karqan. Chaymi payqa chay sinturamkuchqan kuchillunda baynanmanda surquchpa, chay mas kamachimkuq isrraylinu kurampa kriyadun Malku chutiqta machitiyachpa, allin ladu rinrinda pitirqan. 11 Chayta rimkachpaqam, Jisusqa Pidruta nirqan: Chay atun kuchillullkitaqa chay baynambina waqaychay. Taytaymi niwachqa, ancha ñamkanaypaq. Chay ñamkallkunaqam nuqampaqqa umpyanaypaq ancha ayaq yamkuchina. ¿Amkasuchu mana rini ñamkaq? nichpa. 12 Chay rrumanu suldadumkunam kamachimkuqninwan tumkuy isrraylinumkunampa suldadungunawan Jisusta piskachpa, mamkingunata ch'aqnarqanllampa. 13 Chaymandaqam amparqanllampa Anaspa wasinman. Chaqa Anasqam Kayfaspa swigrun karqan. Kayfasqam chay tyimpumpiqa mas kamachimkuq isrraylinu kura karqan. 14 Chay Kayfasmi chay mas kamachimkuq isrraylinumkunata nichqa karqan: Nuqanchiqkunampaqqam mas alli, suq runa wañunambaq, yumbay llaqta masinchiqkuna ama wañunanllampa, nichpa. 15 Simun Pidrum suq yach'amkuq masinwan Jisuspa imkinda rirqanllampa. Chay suq yach'amkuqqam chay mas kamachimkuq isrraylinu kurampa riqsichqan karqan. Chaymi payqa chay kurampa wasimba patyunman Jisuswan yallkurqan. 16 Pidruqam sawa pungumpilla kidarqan. Chaymi chay suq yach'amkuq masinqa punguman chamuchpa, purtira chinata rrugachpa, umkumkaman Pidrutaqa amparqan. 17 Chaymi chay purtira chinaqa Pidrutaqa kaychina tampurqan: Manachu qambis Jisuspa suq yach'amkuqnin kangi? nichpa. Chaymi Pidruqa nirqan: Manñm, nichpa. 18 Kanan ancha chiri kamptinmi, chay kamachimkuq kurampa kriyadunguna, wamkin suldadumkunawan chayachpa, ninampi machamkullkarqanllampa. Chaymi Pidrumpis pallkunampa pullan chayachpa, machamkullkarqan. 19 Chay mas kamachimkuq isrraylinu kuraqam Jisusta tampurqan: Pimkunam yach'amkuqnimkiqa? ¿Imatam yach'achimkuchqa kangi? 20 Chaymi Jisusqa nirqan: Nuqaqam yumbaypa ñawpambi rimachqa kani. Kutin kutinmi sinaguga wasimkunampi, Dyuspa adurana wasimbimpis yach'achimkuchqa kani. Chaqa yumbay llaqta masinchiq isrraylinumkunam challkunampi tandamkanllampa. Manam nimatampis pamkamkuchpaqa, yach'achimkuchqachu kani. 21 Chaychinaqa ¿imarallkutaq tampuwangi nuqataqa? Chay uyawaqkunata tampuyqa. Pallkunam nichunqallampa chay yach'achimkuchqaytaqa, nichpa. 22 Chaychina Jisus nimptinmi, suq suldadu chaypi kaqqa suq lamputa Jisusta quchpa, tampurqan: Ima, chaychinachu mas kamachimkuq kuranchiqta kuntistangi? nichpa. 23 Chaychina nimptinmi, Jisusqa nirqan: Mana allita rimachqa kamptiyqa, niway ima malutam rimachqa kani, nichpa. Piru allimp kaqta rimachqa kamptiyqa, ¿imampaqtaq maqawangiqa? nichpa. 24 Chaymandaqam Anasqa Jisusta ch'aqnachqatalla kach'arqan chay mas kamachimkuq kura Kayfasman. 25 Pidru chaypilla chayachpa machamkullkamptinmi, kaychina tampurqanllampa: Manachu qamqa chay runampa suq yach'amkuqnin kangi? nichpa. Chaymi Pidruqa nirqan: Manam nuqaqa yach'amkuqninchu kani, nichpa. 26 Chay kamachimkuq kurampa suq kriyadunmi, chay kriyadumpa rinrinda pitichqamba ayllun karqan. Payqam Pidruta tampurqan: Amkasuchu mana rimkachuchqa kani chay Jisuswan pulla kamptimki chay wirtampi? nichpa. 27 Piru Pidruqam chaychina tampumptinqa, suq kutinda ñigarirqan. Chay urasllam suq gallu kantarqan. 28 [Nuta: Chay tyimpumkunampim Rruma llaqtamanda kaqkuna achka nasyungunampi, Isrrayilpimpis kamachimkurqanllampa. Isrrayilpa rrumanu gubyirnunqam Pilatu chutirqan.] Achimkyallkamptinnam Kayfaspa wasinmanda Jisusta amparqanllampa rrumanu gubyirnu Pilatumpa dispachunman. Piru manam yallkurqanllampachu chay dispachunmanqa. Chaqa kriyirqanllampa: Chay furastiru rrumanumkunawan kachpa, mampa chunquyuq rinchiq kidaq. Chaychina kidachpaqam, manana atinchiqmanchu mimkuyta chay Paskwa fyistampi mimkunataqa, nichpa. 29 Chaymi chay gubyirnu Pilatuqa dispachunmanda lluqchichpa, pallkunata tampurqan: Ima malutam rurachqa kay runaqa, qamkuna payta kuntranallkiqa? nichpa. 30 Chaymi pallkunaqa nirqanllampa: Kay runa mana maluta rurachqa kamptinqach'i, nuqallkunaqa mana ampamunaytachu, nichpa. 31 Chaymi Pilatuqa pallkunataqa nirqan: Qamkuna chay runata ampachpa, liynimki nichqanchina justisyata rurayllampa, nichpa. Chaychina nimptinqam, chay isrraylinumkunaqa nirqan: Qamkuna rrumanumkunam mana dijawangillampachu wanchinayllampa, nichpa. 32 Chaychinam kumplirqan Jisus nichqanqa: Kruspim rini wañuq, nichpa. (Chaqa rrumanumkunallam kruspi klabachpa wanchirqanllampa.) 33 Chaymi Pilatuqa yallkuchpa dispachunman, Jisusta qayachpa, tampurqan: Qamchu isrraylinumkunampa gubyirnunqa kangi? nichpa. 34 Chaymi Jisusqa tampurqan: Kimkin yuyaynimkimandachu kaychinaqa tampuwangi, ichu suqkuna parlachichuchqa kamptin? nichpa. 35 Chaymi Pilatuqa nirqan: Manam nuqaqa isrraylinuchu kani, qambaq yach'anaypaqqa. Achwan llaqta masimki isrraylinumkuna, chay kamachimkuq kuramkunampismi qamtaqa intrigawachqallampa, kaychina tampuchunaypaq: ¿Ima malutam rurachqa kangi? nichpa. 36 Chaymi Jisusqa Pilatuta nirqan: Suq lugarpim gubyirnuqa kani. Manam kay mundumpichu. Kay mundumpa gubyirnun kamptiyqach'i, kasuwaqkunaqa pilyanandallampa, ama intrigamkuwanan chay llaqta masiy isrraylinumkunaman. Lumkismi mana kay mundumpa kamachimkuqninchu kani, nichpa. 37 Chaychina nimptinqam, Pilatuqa tampurqan: Chaychinaqachu gubyirnu kangi qamqa? nichpa. Chaymi Jisusqa nirqan: Ari, qam nichqallkichinam gubyirnu kani. Nuqaqam kay munduman chamuchpa, nasichqa kani, allimp kaqta yach'achimkunaypaq. Chaymi chay allimp kaqta kasuqkunaqa nuqa nichqayta kasunllampa, nichpa. 38 Chaychina nimptinmi, Pilatuqa tampurqan: Imam chay allimp kaqqa? nichpa. Chaychina tampuchpaqam, chay Pilatuqa lluqchichpa sawaman, chay isrraylinumkunata kaychina nirqan: Manam nima dilituta paypiqa tarinichu. 39 Piru qamkunaqam kustumbriyuq kangillampa, Paskwa fyistampi suq prisuta kach'anaypaq. ¿Munangillampachu kay gubyirnullkita kach'anaypaq? nichpa. 40 Chaychina nimptinqam, yumbay ch'uqyarqanllampa: Kay runataqa ama kach'aychu! ¡Achwan Barrabasta kach'ayqa! nichpa. Chay Barrabasqam suq ladrun saltiyadur karqan.
1 Chaymandaqam chay gubyirnu Pilatuqa kamachimkurqan, Jisusta ancha fiyuta asutinanllampa. 2 Kanan chay rrumanu suldadumkunaqam suq kuruna kacha limkiduta rurachpa, Jisusta umachachirqanllampa. Kanan kampachirqanllampam suq granati kampata. 3 Chaymandaqam ñawpanman qamimkachpa, yanqa burlachpa, niqllampa: Biba, isrraylinumkunampa gubyirnun! nichpa. Chaychina nichpaqam, qaqllambi maqaqllampa. 4 Chaymandaqam Pilatuqa dispachunmanda lluqchirichpa, isrraylinumkunata nirqan: Rimkayllampa, kay sawamanmi ampamuni, qamkuna yach'anallkillampa: Gubyirnu Pilatuqam mana nima dilituta tarinchu paypiqa, nichpa. 5 Chaymi Jisusqa sawaman lluqchirqan, chay kacha limkidu kurunayuq, chay granati kampayuqna. Chaymandaqam Pilatuqa pallkunata nirqan: Mayñ, kaypinam kay runaqa! nichpa. 6 Chaymandaqam chay kamachimkuq isrraylinu kuramkunaqa Dyuspa adurana wasinda kwidaq suldadumkunawan Jisusta rimkachpaqa, ancha jwirtita kaychina ch'uqyarqanllampa. Kruspi klabay, kruspi klabay! nichpa. Chaymi Pilatuqa nirqan: Qamkuna ampachpa, kruspi klabayllampa. Piru nuqaqam paypiqa mana nima dilituta tarinichu, nichpa. 7 Chaymi chay kamachimkuq isrraylinumkunaqa Pilatutaqa nirqanllampa: Nuqallkunampaqam kan suq liy, Dyustaqa ama burlananchiqllampa. Piru kay runaqam Dyuspa Churinmi kani, nichqa. Chayri chay liy nichqanchina wañunqa, nichpa. 8 Chaychina Dyuspa Churinmi kani, nichqanda uyachpaqam, Pilatuqa mastana mancharqan. 9 Chaymi payqa umku dispachunman Jisusta amparichpa, tampurirqan: Maymandataq qamqa kangi? nichpa. Chaychina tampumptinqam, Jisusqa mana nimatampis nichpachu, uyararqanlla. 10 Chaymi Pilatuqa tampurqan: Ima manachu nimatampis niwangi? ¿Manachu yach'angi, nuqa Pilatum ancha kamachimkuq kachpa, atini kruspi klabachuyta, ichu kach'achuyta, nichpaqa? 11 Chaymi Jisusqa nirqan: Tayta Dyus mana dijachumptinmi, mana nimatampis nuqataqa atingimanchu rurawayta. Kaytampis yach'ay: Chay qaman intrigamkuwaqmi mas uchayuqqa kidan qamandaqa, nichpa. 12 Chaychina nimptinqam, Pilatuqa ancha munarqan kach'ayta, librina kanambaq. Piru chay isrraylinumkunaqam nirqanllampa: Kay runata kach'achpaqam, mana gubyirnunchiq Sasarpa yanasunchu (yanasanchu) kangi! ¡Chaqa mayqan runa gubyirnu kani niqqam chay mas kamachimkuq gubyirnu Sasarta kuntrallkan! nichpa. 13 Chaymi Pilatuqa chay runamkuna nichqanda uyachpaqa kamachimkurqan, Jisusta sawaman surqunambaq. Chaymandaqam Pilatuqa trunumbi tiyarqan, justisyata ruranambaq. Pilatumpa chay trununqam karqan suq pamba Gabata chutiqpi. Chay Gabataqam ibriyu rimaypiqa munan niyta: Rumimkunawan allichadu pamba, nichpa. 14 Yaqqana qallarimptin chay Paskwa fyista diya, larrdusinach'i karqan. Chay urasmi Pilatuqa chay isrraylinumkunata (piñachinambaq) nirqan: Rimkayllampa, kaypim gubyirnullkiqa! nichpa. 15 Piru pallkunaqam ancha jwirtita kaychina ch'uqyarqanllampa: Wañunqa, wañunqa! ¡Kruspi klabay! nichpa. Chaychina nimptinllampaqam, Pilatuqa yumbayta tampurqan: Qamkunampa gubyirnullkitachu kruspi klabachichaq? nichpa. Chaymi chay kamachimkuq kuramkunaqa nirqanllampa: Sasarllam gubyirnuyllampaqa! ¡Manam masqa kanchu! nichpa. 16 Chaymi Pilatuqa pallkunatana intrigarqan, kruspi klabananllampa. Chayrallkum pallkunaqa amparqanllampana Jisustaqa. 17 Jisusqam krusta umbrumkuchpa, Jirusalinmanda rirqan Kalabira chutiq lugarman. Chay lugarqam ibriyu rimaypiqa chutirqan Gulguta. 18 Chay lugarpinam Jisustaqa kruspi klabarqanllampa. Kanan ichkay runamkunatampismi pullan klabarqanllampa, suqta ichuq ladumbi, suqta allin ladumbi. 19 Kanan Pilatuqam suq litriruta rurachpa, kach'arqan kruspa puntambi ruranambaq. Chay litrirumpiqam kaychina nirqan: Jisus Nasaritmanda kaqmi isrraylinumkunampa Gubyirnun, nichpa. 20 Chay Kalabira lugarqam Jirusalin llaqtampa ladumbilla kidan. Chaymi achka isrraylinumkuna chay litrirutaqa liyirqanllampa. Chaqa chay litrirutaqam rurachqallampa karqan ibriyu rimaypi, grigu rimaypi, latin rimaypimpis. 21 Chaypaqmi chay isrraylinumkunampa kamachimkuq kurangunaqa Pilatuta nirqanllampa: Ama iskibriychu: Isrraylinumkunampa Gubyirnunmi, nichpaqa. Achwan iskibriyqa: Payqam nirqan: Nuqam kani isrraylinumkunampa Gubyirnun , nichpa. 22 Chaymi Pilatuqa nirqan: Iskibrichqayqam chaychinana kidanqa, nichpa. 23 Chaymandaqam chay suldadumkunaqa Jisuspa trampunda ch'uskundin partinamkurqanllampa. Kuchmambaqqam suqnin, suqnin kaychina ninamkurqan: Kaytaqam nuqa piskani, kaytaqam nuqa piskani, nichpa. Chaqa chayqam mana nima kusturayuqchu karqan. Suq awayllam karqan, anaq kunganmanda ura puntangaman. 24 Chaymi chay kuchmampaqqa chay suldadumkunaqa kaychinana parlarqanllampa: Ama llimkichpachu, swirtita rurachun, mayqanninchiqchi ampanchiq, nichpa. Chaychina ruramptinllampaqam, kumplirqanna Dyuspa Santu Librumbi kaychina nichqan: Pallkunampuram mudanallkunata partinamkurqanllampa. Kuchmaypaqqam swirtiyarqanllampa, nichpa. 25 Chay kruspa ladumbim Jisuspa mamitanqa karqan. Chay mamitamba masambismi chaypi karqan. Kliyufaspa warmin Maryampis, chay suq Marya Magdalamanda kaqpismi chaypi karqan. 26 Chaymi Jisusqa mamitamba ladumbi kuyachqan yach'amkuqninda rimkawachpa, kaychina nirqan: Mamita, chay ladullkimpi chayallkaqmi wawallkiqa kanqa, nichpa. 27 Chaymandaqam nuqa yach'amkuqnindampis kaychina niwarqan: Chay mamaymi mamallkiqa kanqa, nichpa. Chaymi chay urasmandampacha mamitaypaqna riqsichpa, wasiymanna amparqay. 28 Chaymandaqam Jisusqa yach'achpa: Tumkuy imatanam kumplillkani, nichpaqa, Dyuspa Santu Librumbi nichqanda kumplinambaq kaychina nirqan: Yamkunanim, nichpa. 29 Chaypim puchqu binu suq puyñu unda karqan chay suldadumkuna umpyanambaq. Chaymi pallkunaqa suq ich'umputa chay puchqu binumpi nuyuchichpa, suq barillampa puntambi rurachpa, chiminman qamirqanllampa. 30 Chay puchqu binuta chumpachpaqam, Jisusqa nirqan: Tumkuy imatam kumplichqana kani, nichpa. Chaymandaqam kumurachpa, ispiritunda Dyusman mingachpa, wañurqanna. 31 Chay diyaqam karqan allichamkananllampa Paskwa fyistampaqna. Chaymi isrraylinumkunaqa mana munarqanchu samana diyampi kruskunampi wañuchqamkuna kidanambaqqa. Chaqa chay Paskwa fyistampi kaq samana diyaqam ancha santu diya karqan. Chaymi pallkunaqa Pilatuta rrugarqanllampa, kamachimkunan, chay kruspi kaqkunampa ch'angangunata pamkinambaq, mas das wañumptinllampa, achuchinanllampa. 32 Chaymi chay rrumanu suldadumkuna chamuchpa, Jisuspa ladumbi chay kruspi kaq runamkunampa ch'angangunata pamkirqanllampa. 33 Chaymandaqam Jisuspa kwirpunman richpa, wañuchqatana rimkachpa, ch'angandaqa manana pamkirqanllampachu. 34 Piru suq suldaduqam suq garruchawanchina Jisusta kustillambi tumkchirqan. Chaychina tumkchimptinqam, chay kustillanmanda yawar, yamku lluqchirqan. 35 Chaychinam pasarqan, kumplinambaq Dyuspa Santu Librumbi kaychina nichqan: Paypa tullundaqam mana rinllampachu pamkiq, nichpa. Chay Santu Librumpim suq partimpimpis nin: Chay tumkchichqandam rinllampa rimkaq, nichpa. Jisusta chaychina ruramptinllampam, nuqa kimkiy rimkarqay. Chaymi tistigu kachpa, allita yach'achpa, allimp kaqtalla iskibrini, qamkunampis Jisumkristumpi kriyinallkillampa. 38 Chaymandaqam suq runa Jusi chutiq rirqan gubyirnu Pilatuman. Chay Jusiqam Arimatiya llaqtamanda karqan. Jisuspa yach'amkuqnin karqan. Piru chay kamachimkuq isrraylinumkunata manchachpam, uyaritamplla Jisuspi kriyichqa karqan. Paymi Jisuspa kwirpunda mañarqan, ampanambaq pambaq. Pilatuqam nirqan: Mayñ, ampay, nichpa. Chaymi chay Jusiqa Jisuspa kwirpundaqa amparqanna pambaq. 39 Nimkudimumpismi Jusiwan rirqan. Chay Nimkudimuqam Jisusman tutamp richqa karqan parlaq. Payqam amparqan 30 kilustach'i michki mutkina pulbuta mirramanda, aluwismanda kaqta. 40 Chaychina Jisuspa kwirpunda ampachpaqam, chay mirrawan chay aluwiswan muchuq tramputa pasachpa, Jisuspa kwirpunda wangurqanllampa. Chaqa nuqallkuna isrraylinumkunam wañuqkunataqa chaychina pambanillampa. 41 Jisusta chay wanchichqan lugarpa ladumbillam suq wirta karqan. Chay wirtampiqam suq muchuq mach'aychina simpultura karqan. Chaypiqam manaraq pitampis pambachqallampachu karqan. 42 Kanan nuqallkuna isrraylinumkunampa samana diyayllampaqam yaqqana qallarillkarqan. Chaymi mana munachpa samana diyampi trabajaytaqa, chay sirkampillana das pambarqanllampa Jisuspa kwirpundaqa.
1 Simanampa qallarinan diya dumingum Marya Magdalamanda kaq ancha madrugadu salqa salqalla rirqan Jisus pambamkachqanman. Ch'ayachpaqam, chay mach'aychina simpulturataqa manana kirpadutachu tarirqan. Achwanmi tarirqanqa chay rumitaqa isqandallkaqtana. 2 Chaymi chaychina chay simpultura kich'aduna kamptinqa, chay Maryaqa kallpamurqan abisawaqllampa. Chaymi ch'ayamuchpaqa, Pidruta, nuqata niwarqanllampa: Jisuspa kwirpundaqam chay simpulturamandaqa surquchqallampana! Manam yach'anillampachu maypinam rurachqallampa, nichpa. 3 Chaychina niwamptinllampaqam, Simun Pidruwan nuqa kallpaylla, rirqayllampa chay simpulturaman champamkuq. 4 Kallpachpaqam, Pidruta binsichpa, nuqa mas puntata ch'ayarqay chay simpulturamanqa. 5 Ch'ayachpaqam, nuqaqa yallkunanman kumurachpa, umkuman champamkuchpa, rimkarqay chay trampu Jisuspa kwirpunda liyachqandallana. Piru nuqaqam umkumanqa mana yallkurqaychu. 6 Chaychina champallkamptiyqam, Simun Pidruqa ch'ayamurqanna imkiyta. Paymi umkuman das yallkurqan rimkaq. Chaymi paypis rimkarqan chay trampu Jisuspa kwirpunda liyachqandallana. 7 Chaymandaqam rimkarqambis Jisuspa umanda wanguchqan tramputampis, suq ladumpina rurachqata. Chaqa mananam pullachu karqan chay trampu kwirpunda liyachqanwanqa. 8 Chaychina Pidru yallkumptinqam, nuqampis chay simpulturamanqa yallkurqanina. Yallkuchpaqam, nuqampis chay trampumkunata rimkarqay, suq ladumpi suq ladumpina kaqta. Chayta rimkachparaqmi, nuqaqa kriyirqay. 9 Piru nuqallkunaqam manaraq intyindirqaychu Dyuspa Santu Librumbi kay nichqandaqa: Dyus Amkrachqan Wachadurmi wañuchqanmanda rin kawsamuq, nichpa. 10 Challkunata rimkachpaqam, kutirqayllampana pusadayllampaman. 11 Nuqallkuna pusadayllampaman kutimptiyllampaqam, Magdalamanda kaq Maryaqa waqachpa, chay mach'aychina simpulturampa sawa yallkunambi kidarqan. Chaypich kumurachpa, umkuman champamkurqan. 12 Chaychina champamkuchpaqach, rimkarqan ichkay ancha yuraq mudanayuq anjilkunata. Suqqach tiyallkarqan Jisuspa uman rurachqan ladumpi; suqqach ch'amkin kachqan ladumpi. 13 Chaychi chay anjilkunaqa Maryata tampurqan: Warmisita, ¿imampaqmi anchaqa waqallkangi? nichpa. Chaychi Maryaqa nirqan: Siñurniypa kwirpundam ampachqallampana. Manam yach'anichu, maypinam rurachqallampa, nichpa. 14 Chaychina nichpaqach, Maryaqa imkiman champamkuchpa, Jisusta rimkarqan. Piru manach riqsirqanchu: Paymi Jisumkristu, nichpaqa. 15 Chaymandaqach Jisumkristu tampurqan: Warmisita, ¿imampaqmi anchaqa waqallkangi? ¿Pitam maskallkangi? nichpa. Chaychina tampumptinchi, Maryaqa nirqan: Taytitu, Kamachimkuqniypa kwirpunda qam ampachqa kachpaqa, ¿maypitaq rurachqa kangi? Yuch'allku niway, rinaypaq ampamuq. Chaqa Maryaqach yuyarqan: Kay runaqam kay wirtata kwidaq, nichpa. 16 Chaychi Jisusqa nirqan: Marya! nichpa. Chaychina chutimbi nimptinraqchi, Maryaqa Jisusta riqsichpa, payman timkramkachpa, nirqan: Rrabuni! nichpa. Chay palabra Rrabuniqam ibriyu rimaypiqa munan niyta: Yach'achimkuq Taytitu, nichpa. 17 (Chaychina nichpaqach, Maryaqa Jisuspa ñawpambi qunqurimkuchpa, ch'amkingunampi piskamkurqan.) Chaychi Jisusqa nirqan: Ama piskawaychu. Chaqa manaraqmi Taytay Dyusmanqa richqachu kani. Achwan riy yach'amkuqnillkunata abisaq: Jisumkristum rillkan Taytanman. Paypa Taytanqam nuqanchiqkunampa Taytanchiqpis. Paypa Dyusninqam nuqanchiqkunampa Tayta Dyusninchiqpis, nichpa. 18 Chaymi Marya Magdalamanda kaqqa chamuchpa, niwarqanllampa: Siñurninchiq Jisustam rimkachqa kani. Pay kimkinmi niwachqa, chamunaypaq abisachuqllampa, nichpa. 19 Chay dumingullam nuqallkunaqa tutamp suq wasimpi tandamkarqayllampa. Chaymi kamachimkuq isrraylinumkunata manchachpa, chay wasimpa pungunda alli kirpachpa, trankachqallampa karqay. Piru Jisusqam chamuchpa, qunqaylla rimkamkurqan nuqallkunampa ch'awpiyllampampi. Chaychina rimkamkuchpaqam, nuqallkunata nampallkuwarqan: Bwinas nuchis. Dyus yanampachunqallampa, nichpa. 20 Chaymandaqam rimkachiwarqanllampa mamkinda, kustillanda chay chuqrichqangunata. Chaychina Jisusta rimkachpaqam, ancha kuchimkurqayllampa. 21 Chaymandaqam Jisusqa nuqallkunata kaychina niriwarqan: Dyus qamkunata yanampachunqa. Chaqa payqam kay pachaman kach'amuwachqanchina, nuqampis kach'allkillampa, chumaq nutisyayta qamkunampis yach'achimkunallki. 22 Chaychina niwachpallampaqam, Jisusqa yumbay nuqallkunata pumkawachpa, niwarqanllampa: Dyuspa Santu Ispiritunda ch'askiyllampa. 23 Chay Santu Ispiritu qamkunata yanampachumptinmi, wamkin uchayuqkunata ringillampa niq: Taytanchiq Dyusmi uchallkimkunata pirdunachuchqa, nichpa. Chaychina nimptimkillampaqam, pallkunaqa uchangunamanda pirdunadu rin kaq. Piru suq uchayuqkunata nimptimkillampa: Tayta Dyusqam mana pirdunachuchqachu, nichpaqa, mana pirdunaduchu rin kidaq. 24 Jisus nuqallkunaman rimkamkuchqan urasqam chay yach'amkuq masiyllampa Tumas Millisuqa mana nuqallkunawanchu karqan. 25 Chaymi pay ch'ayamumptinqa, nirqayllampa: Siñurninchiq Jisustam rimkachqallampa kani, nichpa. Piru Tumasqam niwarqanllampa: Manam kriyillkillampachu. Nuqaqam mamkinda klabu uch'kuchqanda rimkachpa, diduywan llamkachpa, kustillambi mamkiywan llamkachparaq, chay niwachqallkitaqa kriyichaq. Manaqa manñm, nichpa. 26 Chaymandaqam 8 diyasmanda tutampina nuqallkuna chay wasimpina tandamkachqa karirqayllampa. Chay bwiltaqam Tumaspis pullayllampa karqan. Punguta alli kirpachpam, trankachqa karqayllampa. Piru Jisusqam ch'awpiyllampaman yallkuchpa, kaychina nuqallkunata nampallkuriwarqan: Bwinas nuchis. Dyus yanampachunqallampa, nichpa. 27 Chaymandaqam Tumasta nirqan: Tumas, didullkita kay mamkiy klabu uch'kuchqanman ruray. Kay uch'kuchqa kustillaymambis mamkimkita ruray kriyinallki: Allimptam kawsamuchqana, nichpa. Ama mana kriyiq runaqa kaychu. Achwan nuqampi allimpta kriyiy, nichpa. 28 Chaychina Jisus nimptinmi, Tumasqa paytaqa nirqan: Qamir Kamachimkuqniy, Dyusniy kangi! nichpa. 29 Chaymi Jisusqa Tumasta nirqan: Qamqam rimkawachparaq kriyingi. Piru chay mana rimkawachpa kriyiqkunataqam Dyusqa masta rin yanampaq, kuchimkunanllampa, nichpa. 30 Jisusmi nuqallkunampa ñawpaypi suq laya ancha achka milagrumkunatampis rurarqan. Piru yumbay chay milagru rurachqambaqqam mana iskibrichqachu kani kay librumpiqa. 31 Piru wamkin milagrumkunampaqmi iskibrichqa kani, kriyinallkillampa: Jisusqam Dyus Amkrachqan Wachadurninchiq. Payllam Dyuspa Churimbis, nichpa, chaychina kriyichpa, tumkuy tyimpu Dyuswan kawsanallkillampa.
1 Chaymandaqam nuqallkuna Jisuspa yach'amkuqningunaqa tandamkarqayllampa chay Tibiryas atun quch'ampa manyambi. [Nuta: Chay quch'allam Galiliya quch'a, Jinisarit quch'ampis chutin.] Chaypim karqayllampa: Simun; payllam Pidrumpis chutiq; Tumas Millisu, Natanayil. Payqam prubinsya Galiliyampa Kanñ llaqtanmanda karqan. Nuqallkuna Sibidiyumpa ichkay churingunampismi chaypi karqayllampa. Ichkay mas ampustul masillkunampismi chaypi karqan. Chaychina chay quch'ampa manyambi kallkamptiyllampam, Jisumkristu nuqallkunaman rimkamkumurirqan. 3 Piru manaraq rimkamkumumptinmi, Simun Pidruqa niwachqallampa karqan: Nuqam richaq piskadumkunata piskaq, nichpa. Chaymi nirqayllampa: Nuqallkunampisri qamwan amkullampa, nichpa. Chaychina nichpaqam, lluqchichqallampa karqay yamkumpi puriq suq barkuman. Chaychinam chay tuta rirqayllampa piskaduta piskaq. Piru chay tutaqam yuraqachtin mana ni suq piskaduta piskarqayllampachu. 4 Chaymandaqam qayandin achimkyallkamptinqa, Jisusta chay quch'ampa manyambi rimkarqayllampa. Piru manam paytaqa riqsirqayllampachu. 5 Chaymandaqam Jisusqa kaychina tampuwarqanllampa: Ijitumkuna, ¿manachu nimata piskachqallampa kangi? nichpa. Chaymi nuqallkunaqa nirqayllampa: Manam ni suqsituta piskachqallampachu kani, nichpa. 6 Chaymandaqam Jisusqa niwarqanllampa: Atarrayallkita barkumpa allin ladunman wichumkuyllampa, piskadumkunata tarinallkillampa, nichpa. Chay niwachqanchinam rurarqayllampa. Chaymi allimpta manana atirqayllampachu atarrayataqa chutayta, ancha achka piskadumkuna bulsachamkamptin. 7 Chaymi nuqa Jisuspa ancha kuyachqan yach'amkuqninqa Simun Pidruta nirqay: Waq runaqam Siñurninchiq Jisus! nichpa. Chaychina nimptiyqam, Simun Pidruqa chay uraslla das mudananda ruramkurqan. Chaqa payqam piskaduta piskananqa trusanwanlla kallkarqan. Chaymandaqam Pidruqa barkumanda brinkachpa yamkuman, nadachpa Jisusman rirqan. 8 Chaymandaqam nuqallkunampis barkumpiqa chay quch'ampa manyanman ch'ayarqayllampa, atarrayata rrastramkuchpa, unda piskadu kamptin. Chaqa chay barku kachqanmandaqam manyamanqa 100 mitrusch'i karqan. 9 Chay barkumanda ichkichpaqam, chay manyampiqa tarirqayllampa puchu ninata. Chay ninampa sawambiqam suq piskadu karqan. Chaypa ladumbiqam tandampis karqan. 10 Chaymandaqam Jisusqa niwarqanllampa: Chay piskadu piskachqallkita wamkinda ampamuyllampa, (kangachpa, mimkunanchiq) nichpa. 11 Chaymi Jisusta uyachpaqam, Simun Pidruqa barkuman lluqchichpa, chay atarrayata rrastramurqan yamkumpa manyangaman. Chay atarrayampiqam karqan 153 atun piskadumkuna. Piru achka piskaduyuq kachpampismi, chay atarrayaqa mana ni llimkimkarqanchu. 12 Chaymandaqam Jisusqa qayawarqanllampa: Chamuyllampana mimkunanchiq, nichpa. Chaychina niwamptinllampaqam, mana ni mayqanniyllampa tampurqayllampachu: ¡Pim kangi? nichpaqa. Chaqa riqsirqayllampam: Payqam Siñurninchiq Jisumkristu, nichpa. 13 Chaymandaqam nuqallkunaman qamimkachpa, tandata piskachpa, quwarqanllampa. Chaychinam piskadutampis quwarqanllampa mimkunayllampa. 14 Kay bwiltawanqam nuqallkunaqa kimsa kutindana Jisustaqa rimkachqallampa karqay, chay kawsamuchqan diyamanda. 15 Uchyachpa mimkuytaqam, Jisusqa Simun Pidruta kaychina tampurqan: Junaspa churin Simun, ¿kay wamkinmandaqachu qamqa masta kuyawangi? nichpa. Chaymi Pidruqa nirqan: Taytitu, qam yach'angi kuyachuchqayta, nichpa. Chaymi Jisusqa nirqan: Nuqampi chayraq kriyiqkunatar kwiday, suq michidur uñitangunata allita michiqchina, nichpa. 16 Jisusqam Pidruta suq kutinda tampurirqan: Junaspa churin Simun, ¿allimptachu kuyawangi? nichpa. Chaychina tampurimptinqam, Pidruqa nirirqan: Ari, Taytitu, qam yach'angi kuyachuchqaytaqa, nichpa. Jisusqam nirirqan: Nuqampi kriyiqkunatar kwiday, suq michidur wichangunata allita michiqchina, nichpa. 17 Jisusqam suq kutindampis kaychina tampuririrqan: Junaspa churin Simun, ¿allimptachu kuyawangi? nichpa. Chaymi kimsa kutinda chaychinalla tampurimptinqa, Pidruqa malaganayachpa, nirqan: Taytitu, qam ancha allita yach'angi nuqa kuyachuchqaytaqa, nichpa. Chaymi Jisusqa nirirqan: Nuqampi kriyiqkunatar kwiday, suq michidur wichangunata ancha allita michiqchina. 18 Allimptam nillki, chuluraq kachpaqam, qamqa mudamkuchpa, may munachqallkita riq kangi. Piru byijuyamptimkiqam, rimkrallkimkunata chutamptimki, suqna mudachichuchpa, rin ampachuq mana munachqallki lugarman, nichpa. 19 Jisusqam chaychinaqa nirqan, yach'anayllampa: Kaychinam Pidruqa rin wañuq. Chaychina Dyusta ancha allita kasuchpa wañumptinqam, suqkunampis Dyusta rin alabaq, nichpa. Chaymandaqam Pidrutaqa kaychina nirqan: Chamuy, amku nuqawan, nichpa. 20 Chaychina Jisus nimptinmi, Pidruqa imkiman champamkuchpa, nuqa Jwanda rimkawarqan. Nuqam Jisuspa ancha kuyachqan yach'amkuqninqa karqani. Chaymi Jisus chay Santa Mimkunata nuqallkunawan mimkumptinqa, nuqa ladumbi karqay. Chaypi kachpam, kaychina tampurqay: Taytitu, ¿mayqan yach'amkuqnimkim rin intrigamkuchuq kuntrachuqkunamanqa? nichpa. 21 Chaymi Pidru rimkawachpaqa, Jisusta nuqampaq tampurqan: Taytitu, ¿Jwandaqa imataq rin pasaq? nichpa. 22 Chaymi Jisusqa nirqan: Nuqa munamptiyqach'i Jwan kawsanambaq kutimunay diyamkamanqa, ¿ima kwintayuqtaq qamqa kangiman? Qamqa sigiwaylla, nichpa. 23 Pidruta nuqampaq chaychina nimptinqam, chay parlataqa kriyiq masinchiqkunaqa das yach'arqan. Lumkismi pandachpa yuyarqanllampa: Manach Jwanqa rinchu wañuq, nichpa. Piru Jisusqam mana nuqampaqqa nirqanchu: Manam rinchu wañuq, nichpaqa. Achwan payqam nirqanqa: Kutimunay diyamkaman nuqa munamptiyqach'i Jwan kawsanambaqqa, ¿ima kwintayuqtaq qamqa kangiman? nichpa. 24 Chaymi Jisuspa yach'amkuqnin kachpa, allimp kachqandalla iskibrichqa kani kay librumpiqa. 25 Piru Jisusqam ancha achka layamkunatampis rurarqan. Chaymi tumkuy chay rurachqangunampaq manyaqlla iskibrimptiyqach'i, tumkuy kay mundumpiqa mana aypanmanchu yumbay librumkunaqa. Chaytallam iskibrillkillampa. Chaychina kanqa.
1 Kuyachqay Tiyufilu, punta libruypim iskibrichurqaq Jisus rurachqanda, yach'achimkuchqanda, qallarichqan diyamandampacha, 2 syiluman richqan diyamkaman. Paymi manaraq syiluman richpa, amkrarqan wamkin runamkunata, ampustulninguna kanambaq. Pallkunatam Santu Ispiritunwan yach'achirqan, pay munachqanda ruranambaqllampa. 3 Kuntraq runamkunam Siñurninchiq Jisusta wanchirqanllampa; piru kawsamuchpaqam, pay kimkin rimkarimurqan chay ampustulningunaman. Chaymandaqam 40 diyasta kutin kutin pallkunaman chamurqan, pay kimkinda rimkachpa, ancha allita yach'ananllampa: Kawsamuchqanam, nichpa. Kaytampismi ampustulningunata yach'achirqan: Ancha achka runa, warmim Taytanchiq Dyusta chumaqta rinllampa kasuq, nichpa. 4 Paymi chay ampustulningunawan pulla kallkachparaq, yumbayta kamachirqan: Amaraq lluqchiyllampachu Jirusalin llaqtamandaqa. Achwanri chuyayllampa, Dyus ufrisichuchqanda kumplinangaman. Jwan Chutichimkuqqam yamkuwanlla chutichimkurqan. Piru qamkunata nichuchqaychinam, achla diyamkunamanda Tayta Dyusqa Santu Ispiritunwan rin chutichichuqllampa, nichpa. 6 Jisus manaraq rimptin syilumanmi, chay ampustulningunaqa kaychina tampurqanllampa: Kananmandanachu ringi yanampawaqllampa, chay rrumanu runamkunata binsinanchiq, nuqanchiqkunata amana kamachiwananchiq? nichpa. 7 Chaymi Jisusqa pallkunata nirqan: Chaytaqam Taytay Dyuslla yach'an, ima diya, ima urasmi chaytaqa rin ruraq, nichpa. Chaytaqam qamkunaqa mana atingillampachu yach'ayta. 8 Piru Dyuspa Santu Ispiritun qamkunaman chamuchpam, pudirninda rin quchuqllampa. Kanan pay qamkunata yanampachumptinmi, ringillampa nuqampaq yach'achimkuq kay Jirusalimbi, tumkuy kay prubinsya Judiyampi, chay prubinsya Samaryampi, kay mundumpa mas karu kuchungunampi, nichpa. 9 Chaymandaqam yumbay champallkamptinllampa, Jisusqa kay pachamanda alsamkarqan, syiluman rinambaq. Chaymi rillkamptinqa, pumkutayna pambarqan. Mananam paytaqa rimkarqanllampachu. 10 Chaymi anaq syiluman yumbay champamkullkamptinqa, ichkay yuraq bistiduyuq pallkunaman rimkarichpa, 11 nirqanllampa: Uyayllampa, galiliyanumkuna, ¿imarallkutaq qamkunaqa champamkullkangi anaq syilumanqa? Waq Jisus syiluman riqqam rin kutirimuq. Chay rimkachqallkichina riqtam, chaychinalla pay kimkin syilumanda rin kutirimuq, nichpa. 12 Chaymandaqam Ulibu lumamandaqa Jirusalinmanna kutirqanllampa. Chay Ulibu lumamandaqam Jirusalinmanqa 800 mitrusllach'i karqan. Chay isrraylinumkunampa liyninqam kamachimkurqan chaychina 800 mitruskamanlla samana diyampiqa purinanllampa. 13 Pallkunaqam chay Jirusalinman ch'ayachpaqa, pusada wasimpa altunman lluqchirqanllampa. Pallkunaqam karqan: Simun Pidru, Jamkubu, Jwan, Andris, Filimpi, Tumas, Bartulu, Matiyu, suq Jamkubumpis. Chay suq Jamkubuqam Alfiyumpa churin karqan. Chaypiqam karqan suq Simun. Payqam karqan chay isrraylinu Kananista partidumanda. Chaypiqam karqambis suq Jamkubumpa masan Judas. (Payqam manam chay Judas Iskaryutichu karqan.) 14 Yumbay pallkunam Tayta Dyuspi yuyamkuchpa, suq chunqulla kachpa, tandamkaqllampa Jisuspa masangunawan, maman Maryawan, wamkin warmimkunawan, Dyusman mañamkunanllampa. 15 Chay tyimpumpim tandamkarqanllampa 120 kriyiq masimkuna. Chaymi pallkunampa ch'awpimbi chayachpa, Pidruqa nirqan: 16 Kriyiq masitamkuna, uyawayllampa. Dyuspa Santu Librumbi nichqanqam kumplichqana. Chaqa Dyuspa Santu Ispiritunmi chay unay gubyirnu Dabidta yanamparqan, chay Santu Librumpi iskibrinambaq Jisusta intrigamkuqpaq. Kay diyamkunampim chay Judasqa chay suldadumkunata amparqan rimkachiq, Jisusta prisunanllampa. 17 Chay Judasqam nuqanchiqkunampa suqninchiq kachpa, pullanchiq puriq. Chay imamkunata ruramptinchiqmi, chaypi karqan. 18 Piru chay Judasmi mana allita rurachpa, Wachadurninchiqta randimkurqan. Chay qallay ch'askichqanwanqam randirqan suq ch'amkrata. Chaymandaqam anaq altumanda umamba sawan ichkimptin, pach'an pach'yarqan, chunchulinguna chimkwamkachtin. 19 Chaymi Jirusalimbi tiyaqkuna chayta yach'achpaqa, chay ch'amkrataqa Asildamata chutichirqanllampa. Chayqam rimaynimbiqa munan niyta: Yawar Pamba. 20 Chay Santu Libru Salmuspim chay Judaspaq kaychina nin: Wasinqam wichumkuchqa, chunchana kidanqa. Mananam pimpis wasimbiqa tiyanqachu, nichpa. Nimbismi: Suqnam ch'askinqa paypa kargundaqa, nichpa. 21 Kaypim nuqanchiqkunawan tarimkan allin runamkuna. Jisumkristu pullanchiq kallkamptinmi, kay runamkunampis paywan purichqa, 22 chay Jwan chutichichqan diyamandampacha syiluman rinan diyamkaman. Allich'i kanman pallkunamanda suqninda numbrananchiq, dusi ampustulkuna karinanchiqllampa, paypis ninambaq: Nuqam Jisusta rimkachqa kani wañuchqanmanda kawsamuchqata, nichpa. 23 Chaychina yuyachpaqam, pallkunamanda ichkay runamkunata amkrarqanllampa. Suqtam amkrarqanllampa Jusita. Payllam Barsabas, Justumpis chutiq. Suqtaqam amkrarqan Matiyasta. 24 Chaymandaqam Dyusman kaychina mañamkurqanllampa: Taytitu, qamqam yumbay runamkunampa chunqunda riqsingi. Chayri yach'achiwayllampa kay ichkaymanda mayqannindam amkrachqa kangi, 25 Judaspa kargunda ch'askichpa, suq ampustulna kachpa, nuqallkunata yanampawanambaq. Chaqa chay Judasqam, uchanrallku kargunda dijachpa, rirqanna suq lugar paypaq kaqman. 26 Chaychina mañamkuchpaqam, pallkunaqa surtiyarqanllampa. Swirtiqam Matiyaspi ichkirqan. Chaymi chay diyamandampacha Matiyasqa ampustul karguyuqna kachpa, chay unsi ampustulkunawan pullana purirqanllampa.
1 Jisuspi yumbay kriyiqkunam Pintimkustis fyista ch'ayamptin, tandamkarqan suq wasiman. 2 Chaypi kallkamptinllampam, qunqaylla uyarqanllampa ancha jwirti wayrachina kunyaqta anaq syilumpi. Chay kunyaqqam chamuchpa, chay wasiman undarqan. 3 Kanan umangunampa sawambim qallu laya ninamkunachina rimkamkurqan kadunumpi. 4 Dyuspa Santu Ispiritunqam yumbay pallkunampa chunqunman yallkuchpa, undarqan. Chaymandaqam chay Santu Ispiritu rimachimptin, achka laya rimallkunampina rimarqanllampa. 5 Chay diyamkunampim Jirusalinmanqa chamuchqallampa karqan achka isrraylinumkuna tumkuy karu nasyungunamanda. Pallkunaqam dumktrinanda ancha allita kasuqllampa. 6 Kanan chay kunyaqta uyachpaqam, chay wasiman qamimkarqanllampa. Chaypi uyachpa achka laya rimallkunampi rimamptinllampaqam, pallkunaqa ispantachqata ancha yuyarqanllampa: ¿Imachinataq kay runamkunaqa atinllampa rimayta kadunumpa kimkin rimayninchiqpiqa? nichpa. 7 Kanan pallkunaqam ancha ispantachqata suqnin suqnin nirqanllampa: Ima kay rimaqkunaqam prubinsya Galiliyamanda ¿manachu? 8 Mana yach'amkuchpa nasyunninchiqkunampa rimayningunata, ¿imachinataq atinllampa rimayta kay achka rimayninchiqkunampiqa? 9 Chaqa kaypim kanchiq achka nasyungunamanda: Partiyamanda, Midyamanda, Ilanmanda, Misumputamyamanda, Judiyamanda, Kampadusyamanda, Puntumanda, Asyamanda, 10 Frijyamanda, Panfilyamanda, Ijimptumanda, Afrimkampa lugarningunamanda. Chay lugarkunaqam Sirini llaqtamanda mas waq ladumbi kidan. Rrumanumkunampismi kay Isrrayilpi tiyanllampa. Chay rrumanumkunampa wamkin wambrangunaqam kay Isrrayilpi nasiqkuna. Wamkin rrumanumkunaqam nuqallkuna isrraylinumkunampaq timkramkachqa, dumktrinayllampampi kriyichqanllamparallku. 11 Kambismi Krita nasyunmanda, Arabya nasyunmanda runamkuna. Achka nasyungunamanda kachpampismi, ancha allita intyindinchiq kimkin rimayninchiqkunampi Dyuspaq niwamptinchiqllampa: Tayta Dyusmi ancha chumaq milagrumkunata rurachqa, nichpa. 12 Yumbay pallkunam ancha ispantachqata ampustulkunata champarqanllampa. Manam atirqanllampachu intyindiyta: Imachinam atinllampa kaytaqa rurayta? nichpa. 13 Piru wamkinnataqmi burlachpa, yanqamkunata kaychina rimarqanllampa: Chay runamkunaqam mach'achqa, nichpa. 14 Pidruqam chay unsi ampustulkunawan chayachpa ancha jwirtita rimarqan: Isrraylinu masimkuna, tumkuy kay Jirusalimbi tiyaqkuna, allita uyawayllampa, kayta yach'anallkillampa. 15 Manam chay yuyachqallkichu kanillampa. Manam mach'achqallampachu kani. Chaqa chayraqmi las nwibi. Manaraqmi punchawchu. ¿Chaychu mach'achqa kaymanllampa? 16 Achwan kaychinaraqmi. Dyuspaq chay unay rimaq Juwilmi nirqan: 17 Taytanchiq Dyusmi nin: Uchyamkanan tyimpu ch'ayamumptinmi, Santu Ispirituyta rini quq yumbay laya runamkunata. Chaymi wambrallkimkunaqa, ullqumpis, warmimpis nuqa munachqayta rinllampa rimaq. Chulumkunatam musquypichina achka layamkunata rini rimkachiq. Byijumkunatampismi rini rimkachiq musquynimbi. 18 Chay diyamkunampim Santu Ispirituyta rini quq chay kasuwaqkunata, ullqumkuna warmimkuna nuqa nichqayta suqkunata ninambaqllampa. 19 Anaq syilumpimpismi rurachaq mana rimkachqanllampata, challkunata rimkachpa, ispantananllampa. Kay pachampimpismi yawarta, ninata, qundayta rurachaq, runamkuna rimkachpa ispantananllampa. 20 Rumpayqam rin wañuq. Killaqam yawarchina kulurniyuq rin timkramkaq. Chaychinam rin kaq yaqqana chamumptin runamkunampa Wachadurnin. Chaymandaqam pay chamumptinqa, suq ancha chumaq diya rin kaq. 21 Chay diyampim nuqampi yumbay kriyiqkunata rini wachaq, pallkuna chutiyta myintachpa nuqaman mañamkuchqanrallku, nichpa. 22 Chaychina Dyus nichqanda nichpaqam, Pidruqa nirqan: Isrraylinu masillkuna, kayta uyawayllampa: Taytanchiq Dyusmi chay Jisus Nasaritmanda kaqta amkrarqan, manaraq wañuchpa, ancha chumaq milagrumkunata ruranambaq. Chay milagrumkunatam ñawpallkillampampi rurarqan, rimkachpa yach'anallkillampa: Allibmi Dyusqa paywan, nichpa. 23 Piru challkunata rimkachpampismi, qamkunaqa mana allimkunata rurarqallkillampa. Jisusta intrigachumptinllampam, prisuchpa amparqallkillampa chay mana allin runamkunaman, pallkuna kruspi klabachpa wanchinanllampa. Dyusmi unaymandampacha yach'arqan: Churiy Jisustam chaychina rinllampa wanchiq, nichpa. 24 Chaychina qamkuna wanchimptimkimpismi, Taytanchiq Dyusqa wañuyta binsichpa, Jisusta kawsachimurqan. Manam dijarqanchu wañuchqalla kidanambaq. 25 Chaymi chay unay gubyirnu Dabidqa Jisus ninambaq kaqta kaychina iskibrirqan: Tumkuy tyimpum Taytay Dyus pullay kachqa. Chaychina nuqampa allin laduypi kamptinqam, mana pimpis atinqachu manchachiwaytaqa. 26 Paypi yuyamkuchpa, tumkuy chunqu ancha kuchimkuchpam, payta alabachqa kani. Chaymi wañunaypaq kachpampis, mana nimata manchachpachu rini kawsaq. 27 Chaqa qamqam nuqa kasuchuqtaqa mana ringichu dijawaq, wañuqkunampa lugarnimbi ismunaypaqqa. 28 Yach'achiwachqam kangi, qamwan tumkuy tyimpu kawsanaypaq. Kanan qam pullay kachpam, ancha ringi kuchichiwaq. 29 Challkunata yach'achichpaqam, Pidruqa nirqan: Masitamkuna, chayqam ancha klaru, nuqanchiqkuna yach'ananchiq. Chay unay agwilunchiq Dabid wañumptinmi, pambarqanllampa. Chaqa paypa pantyunninqam kanangaman kay sirkanchiqpi. Chaypillam kwirpunqa. 30 Piru chay Dabidmi Dyuspaq rimaq kachpa, yach'arqan Dyus ufrisichqanda. Chaqa Dyusqam paytaqa kaychina ufrisichqa karqan: Nuqa kimkiymi allimpta nillki: Qamba karu willkallkimandam rin nasiq isrraylinumkunampa Wachadurninqa. Paymi rin kamachimkuq qamchina, nichpa. 31 Chaymi chay Dabidqa ancha unay tyimpumpi Dyus Amkrachqan Wachadurpaq kaychina iskibrichqa karqan, payta rimkachqa kanmanchina: Jisusqam mana rinchu kidaq wañuqkunampa lugarnimbiqa. Achwanmi rin kawsamuq. Chaymi kwirpunqa mana rinchu ismuq, nichpa. 32 Chay Dabid nichqanchinallam Tayta Dyusqa allimpta Jisusta wañuchqanmanda kawsachimuchqa. Paytaqam nuqallkuna kimkiy ñawiyllampawan rimkachqallampa kani. Chaymi tistigumkuna kanillampa. 33 Chaymandaqam Tayta Dyusqa Jisusta amparqan anaq syiluman, paypa allin ladumbi tiyanambaq. Kanan Jisus Tayta Dyusmanda Santu Ispiritunda ch'askichpam, quwachqallampa ufrisiwachqanchina. Chaymi kay achka rimallkunata atinillampa rimayta. 34 Chay unay gubyirnu Dabid wañuchpaqam, manaraq kawsamuchqachu, syiluman rinambaqqa. Achwan Dyus Amkrachqan Wachadurpaqmi kaychina iskibrirqan: Tayta Dyusmi Kamachimkuqniyta nirqan: Allin laduypi tiyay, kuntrachuqkunata binsichpa, ch'amkimkimpa waranman ruranallkaman (qamta kasuchunanllampa), nichpa. [Nuta: Chay Dabidpa Kamachimkuqninmi Jisusqa.] 36 Llaqta masi isrraylinumkuna, allita uyawayllampa. Manchu qamkuna chay Jisusta kruspi klabachirqallkillampa. Piru Taytanchiq Dyusqam payta numbrachqa, Wachadurninchiq, Siñurninchiq, kanambaq. 37 Chaychina Pidru nimptinmi, yumbay chay uyaqkunaqa ancha malayamkuchpa syintirqanllampa. Chaymi Pidruta tumkuy chay wamkin ampustulkunata tampurqanllampa: Masitamkuna! ¿Imatam kananqa atinillampa rurayta, wachadu kanayllampaqa? nichpa. 38 Chaymi Pidruqa pallkunata nirqan: Tumkuy ima mana allimkunata rurachqallkirallku syintichpa, chay uchallkimkunata dijachpa, Jisumkristumpa chutimbi chutimkuyllampa, Tayta Dyus uchallkillampata pirdunachunambaq. Chaychina ruramptimkillampaqam, payqa Santu Ispiritunda rin quchuqllampa. 39 Payqam chayta ufrisiwachqa kanchiq nuqanchiqkunampaq, wambranchiqkunampaq, yumbay karumpi kaqkunampaq, yumbay pay amkrachqangunampaq. 40 Chaychina nichpam, Pidruqa masta yach'achichpa, pallkunata kaychina ancha kunarqan: Amar kayllampachu chay malu llaqta masinchiqkunachinaqa. Achwanri wachadu kayllampa, ama pallkunawan kastigadu kanallkillampa. 41 Chaychina Pidru yach'achimkumptinmi, chay kunachqanda kasuqkunaqa chutimkurqanllampa. Chay diyaqam Jisuspi kriyiqkunamanqa kimsa mil muchuq kriyiqkuna tandamkarqanllampa. 42 Kanan yumbay pallkunam ancha allita kasuqllampa chay dusi ampustulkuna yach'achichqanda. Pallkunampuram ancha chumaqta kawsachpa tandamkaqllampa, Dyusman mañamkunambaq, tandata pitichpa, pulla mimkuchpa, Santa Mimkunata mimkunambaqllampa. 43 Chay dusi ampustulkunam ancha achka milagrumkunata ruraqllampa. Chayta rimkaqkunaqam ancha ispantachqata champarqanllampa. 44 Jisuspi yumbay kriyiqkunaqam ancha chumaqta kawsaqllampa. Tumkuy ima kusasnimbismi yumbaypaq kaq. 45 Randimkuchpa wamkin ch'amkranda, wamkin kusasnindampismi, chay qallaywanqa chay mas pubrimkunata yanampaqllampa. 46 Tumkuy diyam Dyuspa adurana wasinman chumaqta tandanamkuqllampa. Ancha umildi kachpam, kuchimkuchpa, wasingunampimpis tandanamkuchpa, tandata pitichpa, Santa Mimkunata pulla mimkuqllampa. 47 Kanan Taytanchiq Dyustam ancha alabaqllampa. Chaychina chumaqta kawsamptinllampam, yumbay rimkaqkuna yuyaqllampa: Pallkunaqam ancha allin runamkuna, warmimkuna, nichpa. Siñurninchiq Jisusmi diyampi diyampi muchuq kriyiqkunata wachachpa, masta achkayachiq chay kriyiqkunataqa.
1 Suq diyam las tris di la tardi Pidruqa Jwanwan rirqanllampa Dyuspa adurana wasinman. Chay urasqam isrraylinumkuna Dyusman mañamkunan urasna karqan. 2 Dyuspa adurana wasimba suq yallkunanmi Chumaq Pungu chutiq. Chay pungumpim suq kuju tiyallkarqan. Payqam nasichqan diyamandampacha mana ni atirqanchu chayayta. Chaymi ayllunguna tumkuy diya chay kujuta ampachpa, chay Chumaq Pungumpi dijaqllampa, adurana wasiman yallkuqkunata limuch'nata mañanambaq. 3 Chay kujuqam Pidruta Jwanda rimkachpa Dyuspa adurana wasinman yallkullkamptinqa, rrugarqan: Quwayllampñr limuch'nitata, nichpa. 4 Chaymi pallkunaqa kujuta champachpa, Pidruqa nirqan: Mayñ, champawayllampa, nichpa. 5 Chaymi kujuqa das champarqan: Rinnam quwaq limuch'nata, nichpa. 6 Piru Pidruqam nirqan: Manam nima qallayniyuqchu ni uruyuqchu kani. Piru kaychinam atini yanampachuyta: Jisumkristu nasarinumpa chutimbim nillki, atarichpa puriy, nichpa. 7 Pidruqa chaychina nichpa, allin ladu mamkinmanda rambachpa chayachimptinmi, chay kujumpa ch'amkinguna, ñudunguna jwirtina timkramkarqan. 8 Chaymi chay kujuqa chayachpa, brinkarqan. Chay urasmandampacham atirqanna puriyta. Kanan Dyusta ancha alabachpam, chay ampustulkunampa pullan Dyuspa adurana wasinman yallkurqan. 9 Chaychina chay kuju purichpa, Dyusta alaballkamptinqam, yumbay chaypi kaqkuna 10 ancha ispantachqata champarqan: ¿Imachinaraq kach'amkachqaqa? nichpallampa. Chaqa chay kujutaqam unaymandampacha rimkachqallampa karqan, chay Chumaq Pungumpi limuch'nata mañamkullkamptin. 11 Chay kujum kach'amkachpa, Pidruta, Jwandaqa manana dijarqanchu. Chaymi suq atun kurridurpi kallkamptinllampa, ancha achka runamkuna ispantachqata pallkunaman kallparqanllampa, chay kujuta rimkanambaq. Chay kurridurmi chutiq Gubyirnu Salumumba kurridurnin, nichpa. 12 Chay runamkunata rimkachpam, Pidruqa nirqan: Isrraylinu masimkuna, ¿imarallkutaq ancha ispantachqata champawangillampa? ¿Ima qamkunachu nuqallkunampaq yuyangi: Ancha pudirniyuq kachpa, Dyusta kasuqkuna kachpam, pallkuna kach'amkachichqa chay kujutaqa, nichpa? 13 Manam chaychinachu. Achwanmi unay agwilunchiq Abrajamba, Isamkpa, Jamkubumpa Dyusnin kay kujutaqa kach'amkachichqa. Chaqa Dyusqam Churin Jisusta numbrachqa karqan, ancha pudirniyuq kanambaq, paytalla kasunanchiqllampa. Piru qamkunaqam paytaqa amparqallkillampa awturidarkunaman. Chaymandaqam Gubyirnu Pilatu munamptin kach'aytampis, qamkunaqa mana munarqallkillampachu. 14 Achwanmi chay ancha allin mana nima uchayuq Jisusta disprisyachpa, qamkunaqa mañamkurqallki, suq matansyiru runata kach'anambaq. 15 Chaymandaqam qamkunaqa wanchichirqallkillampa chay Jisus kawsachimkuqtaqa. Piru Dyusqam paytaqa wañuchqanmanda kawsachimurqan. Chaychina kawsachimumptinmi, nuqallkunaqa rimkachqallampa kani. Chaymi tistigunguna kanillampa. 16 Chayrallku Jisuspi kriyichpa Kach'amkay nimptiyllam, kay riqsichqallki kujuqa kach'amkachpa, jwirsayuqna. 17 Masitamkuna, yach'anim: Qamkuna mas kamachimkuq runamkunawan Jisusta wanchichirqallkillampa, mana yach'achpa: Paymi Wachadurninchiq, nichpa. 18 Chayta ruramptimkillampam, Dyus nichqanqa kumplichqana. Chaqa unay tyimpumpim Dyuspaq rimaqkuna Jisuspaq kaychina iskibrirqan: Dyus Amkrachqan Wachadurmi ancha rin ñamkaq, nichpa. 19 Chayri qamkunaqa mana allimkunata dijachpana, Tayta Dyuspi yuyamkuyllampa, chay uchallkimkunamanda pirdunachunambaq. Chaychina Dyuspi kriyimptinchiqmi, payqa rin animachiwaqninchiq kuchimkunanchiq. 20 Rinmi kach'amuq Churin Jisumkristuta. Chaqa manaraq kay mundu kamptinmi, Jisusta numbrachqa karqan, Wachadurninchiq kanambaq. 21 Lumkismi Jisusqa manaraq rinchu kutimuq. Achwanmi syilumpilla rin kaq, Tayta Dyus kay mundumpi tumkuy ima nichqanda kumplinangaman. Chaqa Dyusqam paypaq ancha allin rimaqkunawan unay tyimpumkunampi chaychina nichqa karqan. 22 Chaymi Dyuspaq chay rimaq Muysisqa agwilunchiqkunata Jisuspaq kaychina nirqan: Tayta Dyusmi nasyunninchiqpi rin nasichiq paypaq suq pudirniyuq rimaqta, nuqata numbrawachqanchina. Chayri tumkuy ima pay nichqanda kasuyllampa. 23 Chay rimaqta mana kasuqkunataqam Dyusqa wambrangunamanda amkrachpa, rin chingachiq, nichpa. 24 Chaymi chay unay rimaq Samwilpa tyimpunmandampacha, Dyuspaq yumbay rimaqkuna Jisus kay tyimpumpi rurachqambaq rimachpa, iskibrirqanllampa. 25 Chaqa Tayta Dyus chay rimaqkunawan ufrisimkuchqanmi nuqanchiqkunampaq kachqa. Nuqanchiqkunata yanampawananchiq yuyachpam, Dyusqa suq tratuta rurarqan unay agwilunchiqkunawan. Chaymi Abrajanda nirqan: Karu willkallkiwanmi kay mundumpi yumbay runamkunata rini yanampaq, nichpa. 26 Chaymi Tayta Dyus Churinda wañuchqanmanda kawsachimuchpa, puntata nuqanchiqkunaman kach'amurqan yanampawananchiq, chay mana alli rurachqanchiqta dijachpa, paypi yuyamkunanchiqllampa, nichpa.
1 Pidru Jwanwan chay runamkunata yach'achillkamptinmi, ch'ayarqanllampa isrraylinu kuramkuna, sadusiyu dumktrinayuqkuna, Dyuspa adurana wasimba suldadungunampa kamachimkuqnimbis. 2 Pidruqam Jwanwan kaychina yach'achimkullkarqan: Jisusqam wañuchqanmanda, kawsamuchqa. Chaymi yach'anchiq: Wañuqkunaqam rin kawsamuq, nichpa. Chaypaqmi chay ch'ayamuqkunaqa ancha piñamkurqanllampa. (Chaqa chay sadusiyumkunaqam kriyirqanllampa: Wañuqkunaqam mana rinllampachu kawsamuq, nichpa.) 3 Chaymi Pidruta Jwanda prisuchpa, amparqanllampa karsilman. Chay diya tardina kamptinmi, karsilpi dijarqanllampa qayandin diyamkaman. 4 Piru Pidru Jwanwan yach'achimkumptinmi, ancha achka runamkuna Jisuspi kriyichqallampa karqan. Chaymi Jisuspi kriyiqkunaqa ullqumkunallach'i 5.000na karqan. 5 Chaymandaqam qayandin diyaqa tandamkarqanllampa chay Jirusalinman Isrrayilpa kamachimkuqninguna, kamachimkuq ansyanumkuna, Muysispa liyningunata yach'achimkuqkunampis. 6 Chaypiqam karqambis mas kamachimkuq isrraylinu kura Anas chutiq. Chay Anasqam ayllun Kayfaswan, Jwanwan, Alijandruwan, yumbay ullqu ayllungunawambis chamuchqallampa karqan. 7 Yumbay chay awturidarkunaqam Pidruta, Jwanda karsilmanda ampachimuchpa, yumbaypa ch'awpinman pasachichpa, kaychina tampurqanllampa: Pitaq qamkunataqa kamachichuchqa, chay kujuta kach'amkachinallkiqa? ¿Pimpa chutinwanmi myintachpa, chaytaqa rurachqallampa kangi? nichpa. 8 Chaymi Pidruqa, Dyuspa Santu Ispiritun ancha yanampamptin, nirqan: Llaqta masiy isrraylinumkunampa kamachimkuqninguna, kamachimkuq ansyanumkunampis, 9 qamkunaqam tampuwangillampa yach'anallki: Kay runa kujuqa ¿imachinam kach'amkachqa? ¿Pim paytaqa yanampachqa? nichpa. 10 Mayñ, nichqallkillampa, yumbay llaqta masinchiq isrraylinumkuna yach'ananllampa. Kay runa kujuqam kach'amkachqa Jisumkristu nasarinumpa pudirninwan. Qamkunam nirqallkillampa, Jisusta kruspi wanchinanllampa. Piru Tayta Dyusqam wañuchqanmanda paytaqa kawsachimurqan. 11 Albañilkunam mana baliq rumimkunata wichumkunllampa. Chaychinallam qamkunampis Jisustaqa wichumkurqallkillampa. Piru Jisusqam kananqa wasimpa iskinambi mas baliq rumichina. 12 Chaqa Dyusqam mana quwachqachu kanchiq suq laya wachadurtaqa. Jisusllam atin wachawayninchiqtaqa, nichpa. 13 Chaychina mana nimata manchachpachu allita rimamptinllampaqa, chay awturidarkunaqa ancha ispantachqata pallkunata champarqanllampa. Chaqa Pidruwan Jwanqam mana istudyachqachu karqan. Chaymi chay awturidarkunaqa kwintata qumkarqanllampa: Kay mana baliq runamkunaqam Jisuswan purichpa, ancha yach'amkuchqallampa, nichpa. 14 Kanan chay runa kujumpismi pallkunampa ñawpambi kach'amkachqana chayallkarqan. Chaymi mana nimampaq atirqanllampachu kuntraytaqa. 15 Chaymi pallkunaqa Pidruta, Jwanda sawaman surqurqan, chay awturidarkunalla tumkuy imata parlananllampa. 16 Chaymandaqam pallkunampura kaychina parlarqanllampa: Imatam atinchiq rurayta kay runamkunataqa? Chaqa kay Jirusalimbiqam yumbayna yach'anllampa: Chay kujutaqam pallkuna kach'amkachichqa, nichpa. Chaymi nuqanchiqkunaqa mana atinchiqchu niyta Yanqam, nichpaqa. 17 Achwan manchachichpalla, nutifimkachunllampa, kananmandaqa amana pitampis willananllampa Jisuspa chutimbiqa, amana chay faman masta chimkwamkanambaq, nichpa. 18 Chaychina kunanamkuchpaqam, Pidruta Jwanda qayachirqanllampa. Chaymandaqam jurampachpa, kamachirqanllampa, amana pitampis parlachinambaq, ni yach'achinambaq, Jisuspa chutinda myintachpaqa. 19 Piru chaychina kamachimptimbismi, Pidruwan Jwanqa kaychina nirqan: Mayñ, allita yuyayllampa. ¿Imataq mas alli Tayta Dyuspaqqa? ¿Allichu qamkunata kasuchunaypaq, ichu mas alli Dyusta kasunayllampa? 20 Chaqa nuqallkunaqam mana nimatampis atinillampachu uyaraytaqa. Achwanmi rimkachqayllampata, uyachqayllampata rinillampa yach'achimkuq, nichpa. 21 Chaychina nimptimbismi, chay awturidarkunaqa ancha jurampachpa, dijarqanllampana rinambaq. Chaqa chay kujuta kach'amkachichqanrallkum, yumbay runamkuna Dyusta ancha alabarqanllampa. Chaymi chay awturidarkunaqa mana nimampaq atirqanllampachu kastigayta. 22 Chay kach'amkachqa kujuqam masdi 40 watayuqna karqan. 23 Pidruwan Jwanqam chay kamachimkuq kuramkunampa, chay kamachimkuq ansyanumkunampa dispachunmanda lluqchichpaqa, kriyiq masingunamanna rirqanllampa. Pallkunataqam manyaqlla tumkuy ima pasachqanllampata willarqan. 24 Chaymi yumbay chay kriyiq masinguna chayta yach'achpaqa, tandanamkuchpa, kaychina Dyusman mañamkurqanllampa: Taytitu Dyus, qam rurachqa kangi anaq syiluta, kay pachata, mar yamkuta, tumkuy ima kaqkunata. 25 Qamqam Santu Ispiritullkiwan rimachirqallki chay unay sirbichuq agwilunchiq Dabidta. Chaymi payqa qambaq rimaq kachpa, Santu Librullkimpi kaychina iskibrirqan: ¿Imarallkutaq achka nasyungunampi tiyaqkunaqa ancha piñamkuchpa alsamkanllampa Dyuspa kuntranqa? ¿Imarallkutaq chay runamkuna, warmimkunaqa yanqamkunata yuyanllampa, Dyusta binsinanllampaqa? 26 Chaqa kay mundumpa gubyirnungunam Dyuspa kuntran alsamkarqanllampa. Kanan llaqtamkunampa kamachimkuqningunam tandamkachpa, Tayta Dyuspa, Amkrachqan Wachadurpa kuntran alsamkarqanllampa, nichpa. 27 Taytitu Dyus, allibraq chay Dabid iskibrichqanchina kachqa. Chaqa kay Jirusalin llaqtampi chay amkrachqallki santu Churimki Jisustam kuntrarqanllampa. Chaymi chay gubyirnu Irudis, chay gubyirnu Punsyu Pilatuwan, furastirumkunawan, isrraylinumkunawan tandamkarqanllampa. 28 Pallkunam tandamkachpa, rurarqan chay unay tyimpumpi qam yach'achqallkichina: Churiytam rinllampa wanchiq, nichpa. 29 Dyusitu, rimkay, kananqam nuqallkunatampis jurampawanllampa, qamta ama myintachuchpa, yach'achimkunayllampa. Chayri animuta quwayllampa, ama nimata manchachpa, qambaq yach'achimkunayllampa. 30 Pudirnimkiwanri yanampawayllampa, qachyaqkunata kach'amkachinayllampa, santu Churimki Jisuspa chutimbi milagrumkunata ruranayllampa, yumbay rimkaqkuna yach'anambaq: Dyusmi ancha pudirniyuq, nichpa. 31 Uchyamptinllampa mañamkuyta Dyusmanqam, chay tandamkachqanllampa lugarqa ch'ampsimkarqan. Chay urasmi Dyuspa Santu Ispiritun pallkunampa chunqunda undachpa, masta animachirqan, ama nimata manchachpachu, Dyus nichqanda rimananllampa. 32 Jisuspi yumbay kriyiqkunam suq yuyayniyuqlla kaqllampa. Tumkuy chunqu allimpta kuyanamkuqllampa. Chaymi mana niqllampachu: Kay imayqam nuqampalla nichpaqa. Achwanmi tumkuy ima kaqninwan yumbaynin yanampanamkuqllampa. 33 Kanan Jisuspa chay dusi ampustulningunam ancha pudirniyuq kachpa, kaychina yach'achimkuqllampa: Siñurninchiq Jisusmi wañuchqanmanda allimpta kawsamuchqa, nichpa. Kanan Dyusqam ancha yanampaq paypi yumbay kriyiqkunata, chumaqta kawsananllampa. 34 Pallkunaqam mayqanninda iman faltamptinqa, wamkin ch'amkrayuq ichu mayqan wasiyuqqa randimkuchpa, qallayninda ampaq chay dusi ampustulkunaman. Pallkunaqam chay mana nimayuqkunata quqllampa. Chaymi pallkunampiqa mana ni mayqan pubriqa karqanchu. 36 Chaypim karqan suq libita runa Jusi chutiq. Ampustulkunaqam paypaq nichqa karqan: Birnabi chutinqa, nichpa. Rimaynimbiqam Birnabiqa munan niyta Kunswilamkuq. Payqam yamkumpa ch'awpimbi isla allpa Chimprimpi nasichqa karqan. 37 Chay Birnabim suq ch'amkranda randimkuchpa, qallayninda ampamuchpa, ampustulkunata qurqan, pallkunana kriyiq masingunata yanampanambaq.
1 Karqanmi suq runa Ananiyas chutiq. Warminqam Safira chutiq. Chay Ananiyasmi warminwan, suq ch'amkranda randimkuchpa, 2 wamkin qallayta piskarqanllampa. Chaymandaqam Ananiyasqa wamkindalla ampachpa, ampustulkunata qurqan, Yumbaymi nichpa. 3 Chaychina llullamkumptinmi, Pidruqa nirqan: Uyay, Ananiyas. ¿Imarallkum dijarqallki dyabluta yallkunambaq chunqullkimanqa? Qamqam chay ch'amkrallkimpa ch'aninda wamkinda piskachpaqa, Dyuspa Santu Ispiritunda munarqallki ingañayta. 4 ¿Ima manachu qamba kimkimkimpa ch'amkrallkiqa kachqa? Randimkumptimkiqam, qallayqa qambana kachqa. ¿Imarallkum llullamkuchqaqa kangi? Chay layata llullamkuchpaqach'i, qamqa yuyarqallki: Runamkunatallam rini ingañaq, nichpa. Manam chaychinachu kachqa. Achwanmi Taytanchiq Dyusta munarqallki ingañayta. 5 Chaychina Pidru nimptinmi, Ananiyasqa chayta uyachpa, chay uras pachaman bulamkachpa wañurqanna. Chaymi chayta yach'achpaqa, yumbay ancha mancharqanllampa. 6 Chaymandaqam wamkin wambra runamkuna chamuchpa, almataqa suq trampuwan liyachpana, amparqanllampa pambaq. 7 Chaychina kimsa uras pasachqambinam, chay almampa warminqa ampustulkuna kachqanman yallkurqan. Piru payqam mana nimatampis yach'arqanchu: Qusaymi wañuchqa, nichpaqa. 8 Chaymi Pidruqa paytampis tampurqan: Safira, ¿allimpchu chay prisyumpaqlla ch'amkrallkitaqa randimkurqallki? nichpa. Chaymi Safiraqa nirqan: Ari. Chaysitumpaqllam randimkurqayllampa, nichpa. 9 Chaychina nimptinmi, Pidruqa chay warmita nirqan: Imampaqmi qusallkiwanqa kunanamkuchpa llullamkuchqallampa kangi, Dyuspa Santu Ispiritunqam mana yach'anqachu, nichpach'i? Uyay, chay qusallkita pambaqkunaqam chamullkanllampana. Nam kay pungumanna ch'ayamullkanllampa ampachunambaq, qamtampis pambachuq, nichpa. 10 Chaychina nimptinllam, chay warmimpis chay uras Pidrumpa ñawpanman bulamkachpa wañurqanna. Chaymi chay pambamkuqkunaqa ch'ayamuchpa, umkuman yallkuchpa, chay warmitampis wañuchqatana tarirqanllampa. Chaymi paytampis amparqanllampana pambaq runamba ladunman. 11 Chaymi Jisuspi kriyiqkunaqa, tumkuy chay wamkin runamkunawan chayta yach'achpaqa, achwamba mancharqanllampa. 12 Ampustulkunaqam runamkunampa ñawpambi achka milagrumkunata ruraqllampa. Kanan Jisuspi yumbay kriyiqkunam Dyuspa adurana wasinman tandamkaqllampa chay unay gubyirnu Salumumba kurridurnimbi. 13 Piru mana kriyiqkunaqam manchachpa, pallkunawanqa mana tandamkaqllampachu. Piru mana tandamkachpampismi, ancha alabaqllampa Jisuspi kriyiqkunataqa. 14 Chaychinam ancha achka ullqumkuna, warmimkuna kriyirqanllampana Jisuspi. 15 Kanan achka runamkunam qachyaqningunata wasinmanda surquchpa, paramkunampi kamamkunampi ampamuchpa, ñangunampi chuyachiqllampa, Pidru chay ñanda pasamptin, ankisiya llandunllampis qachyaqningunampa sawanda pasamptin, kach'amkanambaq. 16 Asta chay sirka llaqtamkunamandam achka runamkunaqa Jirusalinman ampamurqan qachyaqningunata, dyablumpa ispiritungunawan lumkuyachqamkunata, ampustulkuna kach'amkachinambaq. Kanan yumbay pallkunataqam kach'amkachirqanllampa. 17 Chaymi mas kamachimkuq isrraylinu kura, sadusiyu dumktrinayuq runamkuna ampustulkunata ancha imbidyarqanllampa. 18 Chaymi pallkunataqa prisuchpa, karsilman wichurqanllampa. 19 Piru chay tutaqam Tayta Dyuspa suq anjilnin, karsilpa pungunda kich'achpa, pallkunata surquchpa, nirqan: 20 Riyllampa Dyuspa adurana wasinman, chaypi chayachpa, yumbay runamkunata yach'achiq, Jisuspi kriyichpa, kawsanambaqllampa. 21 Chaychina nimptinqam, ampustulkunaqa kasuchpa, madrugadu Dyuspa adurana wasinman richpa, waqpi yach'achimkurqanllampa. Chaypina kallkamptinllampaqam, chay mas kamachimkuq isrraylinu kura, yumbay paywan kaqkunampis mas pudirniyuq isrraylinumkunata qayarqan, tandamkachpa, Mas Kamachimkuq Tandamkaq Juyiskunana kachpa, Pidruta, Jwanda jusgananllampa. Yumbay chay kamachimkuqkunaqam parlachpa, suldadumkunata kach'arqanllampa, karsilmanda ampamunanllampa chay ampustulkunata. 22 Piru suldadumkuna karsilman richpaqam, manana tarirqanllampachu. Chaymi das kutimurqanllampa kaychina abisamkuq: 23 Karsiltaqam tarichqallampa kani alli kirpachqata. Chay kwidamkuq suldadumkunaqam karsilpa pungundaqa ancha allita kwidallkarqanllampa. Piru punguta kich'achpaqam, manana ni pitampis umkumpiqa tarirqayllampachu, nichpa. 24 Chaychina nimptinllampaqam, chay isrraylinu kuramkunampa kamachimkuqninqa, Dyuspa adurana wasimba suldadungunampa kamachimkuqninwan, yumbay chay ancha kamachimkuq kuramkunawambis ancha yuyachpa, tampunamkurqanllampa: Chaychinaqa ¿imaraq pasanqa? nichpa. 25 Chaychina parlallkamptinqam, suq runa ch'ayamuchpa, nirqan: Chay karsilachqallkillampa runamkunaqam Dyuspa adurana wasimbi runamkunata yach'achillkan, nichpa. 26 Chaymi suldadumkunampa kamachimkuqninqa suldadungunawan chay uras chay adurana wasiman rirqanllampa piskaq. Ampustulkunata chaypi tarichpaqam, chumaqlla ampamurqanllampa, mana maqachpallampachu. Chaqa chay suldadumkunaqam mancharqanllampa: Kay ampustulkunata maqamptinchiqqach'i, runamkunaqa sitawanchiqman, nichpa. 27 Chaymandaqam ampustulkunata ch'ayachimuchpaqa, chayachirqanllampa chay Mas Kamachimkuq Tandamkaq Juyiskunampa ñawpanman. Chaypi kamptinqam, chay kamachimkuq kuraqa nirqan: 28 Manchu nuqallkunaqa qamkunata ancha kamachichurqaq, amamkich Jisuspa chutinda myintachpaqa yach'achimkungichu, nichpa. Piru qamkunaqam mana kasuwachpachu, tumkuy Jirusalin llaqtampi dumktrinallkita yach'achimkungillampa. Kanan achwambam munangillampa wichumpawayta chay Jisus wañuchqambaq, nichpa. 29 Chaymi Pidruqa chay wamkin ampustulkunawan nirqan: Nuqallkunampaqqam masta balin Dyusta kasunayllampa, runamkunata kasunaymandaqa. 30 Manchu qamkunaqa Jisusta kruspi klabachichpa, wanchichirqallkillampa. Piru paytaqam Taytanchiq Dyus kawsachimuchpa, 31 anaq syilumpi allin ladumbi tiyachichpa, ancha Kamachimkuq Wachadurninchiqta rurachqa. Chaymi uchanchiqkunata dijamptinchiqqa, payqa pirdunawaqninchiq wachawanchiqllampa. 32 Chay Jisus rurachqambaqmi Dyuspa Santu Ispiritun, nuqallkunampis tistigumkuna kanillampa. Chaqa Tayta Dyusmi chay Santu Ispiritunda payta kasuqkunata quwachqallampa, nichpa. 33 Chay awturidarkunaqam chayta uyachpaqa, ancha piñamkuchpa, chay ampustulkunataqa munarqanllampa wanchiyta. 34 Piru chay awturidarkunamanda suq farisiyu Gamayil chutiqmi ancha allin yach'achimkuq karqan. Chaymi paytaqa yumbay runamkuna ancha allita uyaqllampa. Chay Gamayilmi chayachpa kamachimkurqan, suq rratitu ampustulkunata sawaman surqunanllampa. 35 Chaymandaqam chay karguyuq masingunata nirqan: Uyawayllampa, isrraylinu masillkuna. Allita yuyayllampa. Kwidawkich mana allitachu rurangimanllampa chay runamkunata. 36 Yuyayllampa, manchu suq tyimpuqa chay runa Tiwdas nirqan, paychi ancha kamachimkuq. Kanan paytaqam 400 runamkuna kasurqanllampa. Chaymandaqam suq runamkuna Tiwdasta wanchimptinllampa, chay 400 sigiqkuna waqta kayta chimkwamkarqanllampa. 37 Chaymandaqam suq tyimpu sinsuta ruramptin, alsamkarqan suq kamachimkuq Judas prubinsya Galiliyamanda. Paytampismi achka runamkuna kasurqanllampa. Chaymandaqam chay Judasta wanchimptinllampaqa, payta sigiqkunampis waqta kayta chimkwamkarqanllampa. Mananam mastaqa tandamkarqanllampachu. 38 Chaymi kaychina kunallkillampa: Dijayllampa chay runamkunata. Ama mitimkuyllampachu pallkunamanqa. Chaqa chay dumktrinan pallkunampalla kamptinqam, das rin uchyamkaq. 39 Piru pallkuna Dyuspa dumktrinanda yach'achimkullkamptinqam, qamkunaqa mana atingillampachu chingachiyta. Allita yuyayllampa. Paqtamkich Dyusta kuntrallkangillampa, nichpa. 40 Chay Gamayil nichqanda kasuchpam, manana wanchirqanllampachu. Chaymi chay ampustulkunata qayachichpa, suq lastima asutichichpa, kamachirqanllampa, amana masta Jisuspaq yach'achimkunanllampa. Chaymandaqam pallkunataqa kach'arqanllampana. 41 Chaychina asutimptimbismi, chay ampustulkunaqa ancha kuchimkuchpa, chay awturidarkunampa ñawpanmanda lluqchirqanllampa, yuyachpa: Tayta Dyusmi amkrawachqa kanchiq, kaychina Jisuspaq yach'achimkuchpa, ñamkananchiqpaq, nichpa. 42 Kanan pallkunaqam tumkuy diyamkuna Jisumkristumpaq masta yach'achimkurqanllampa Dyuspa adurana wasimbi, achka wasimkunampimpis.
1 Chay tyimpuqam Jisuspi kriyiqkunaqa masta achkayaqllampa. Piru chay grigu rimaypi rimaqkuna piñamkuchpam, kaychina rimarqanllampa ibriyu rimaypi rimaq kriyiq masingunampaq: Grigumpi rimaq biyudamkunatach tumkuy diya mana allitachu mimkunata partinllampa, nichpa. 2 Chaymi chay dusi ampustulkunaqa yumbay kriyiqkunata tandachpa nirqanllampa: Nuqallkunaqam Dyus nichqanda yach'achimkullkani. Chaymi mana allichu, chay yach'achimkullkachqayta dijachpa, mimkunata partinayllampaqa. 3 Chayri masitamkuna, qamkunamanda amkrayllampa syiti allin yach'ayniyuq runamkunata, Dyuspa Santu Ispiritunwan puriqkunata. Pallkunata numbrayllampa, chay mimkunata partinanllampa. 4 Nuqallkunaqam tumkuy diya Dyusman rinillampa mañamkuq. Pay nichqanda rinillampa yach'achimkuq, nichpa. 5 Chaypaqmi Jisuspi yumban kriyiqkunaqa nirqan: Allibmi chay nichqallkillampaqa, nichpa. Chaymandaqam amkrarqanllampa suq runa Istiban chutiqta. Payqam Tayta Dyuspi ancha yuyamkuq. Paypa chunqumbim Dyuspa Santu Ispiritun kawsaq. Pallkunaqam amkrarqambis Filimpita, Prumkuruta, Nimkanurta, Timunda, Parminastampis. Amkrarqambismi Nimkulasta Antyumkiya llaqtamanda kaqta. Paymi yach'amkuchqa karqan isrraylinumkunampa dumktrinanda. 6 Chaymandaqam chay syiti runamkunata ampamurqanllampa ampustulkunaman. Pallkunaqam sawambi mamkinda rurachpa, Dyusman mañamkurqanllampa, tumkuy imampi yanampanambaq. 7 Chaychinam Jisuspi kriyiqkunaqa Dyuspaq tumkuy maypi masta masta yach'achimkuqllampa. Chaymi Jirusalin llaqtampiqa pallkunaqa masta achkayaqllampa. Chaqa asta isrraylinumkunampa achka kurangunampismi Jisuspi kriyirqanllampa. 8 Dyus yanampamptinmi, Istibanqa ancha pudirniyuq kachpa, achka milagrumkunata rurarqan yumbaypa ñawpambi. 9 Piru wamkin isrraylinumkuna Istibanwan tandamkachpam, tarimpanamkurqan. Pallkunaqam suq sinaguga wasimanda karqanllampa. Chay wasiqam chutiq Libri Randichqa Kriyadumkunampa sinagugan, nichpa. Chay kuntraqkunaqam Sirini llaqtamanda, Alijandriya llaqtamanda, prubinsya Silisyamanda, chay prubinsya Asyamandampis karqanllampa. 10 Piru Istibanqam Dyuspa Santu Ispiritunwan kachpa, ancha yach'ayniyuq karqan. Chaymi chay kuntraqkunaqa mana atirqanllampachu binsiyta paytaqa. 11 Chaymi pagararqanllampa wamkin runamkunata, llullamkuchpa ninambaqllampa: Istibandam uyachqa kani, ancha fiyuta Muysispaq, Dyuspaq rimamptin, nichpa. 12 Chaychina llullamkumptinllampa uyachpam, achka runa, kamachimkuq ansyanumkuna, Muysispa liyningunata yach'achimkuqkuna chay nichqanda kriyichpa, ancha piñamkurqanllampa. Chaymi Istibanda piskachpa, rrastramkuchpa, amparqanllampa Mas Kamachimkuq Tandamkaq Juyiskunampa ñawpanman. 13 Kanan amparqanllampampismi chay llullamkuq tistigumkunata, Istibambaq kaychina rimanambaqllampa: Kay runaqam kutin kutin mana challkuq ancha fiyumkunata riman Dyuspa adurana wasimbaq, Muysispa liyningunampaqpis. 14 Chaqa nuqallkunaqam kay Istibanda uyachqallampa kani kaychina nimptin: Chay Jisus Nasaritmanda kaqchi Dyuspa adurana wasindaqa rin bulaq. Muysismanda yach'amkuchqanchiq kustumbrinchiqkunatach rin chingachiq, nichpa. 15 Chaymi chay Mas Kamachimkuq Tandamkaq Juyiskuna, yumbay chaypi tiyaqkunawan champachpa, rimkarqanllampa Istibamba qaqllanda anjilchina llimpyallkaqta.
1 Chay mas kamachimkuq isrraylinu kuram Istibanda tampurqan: Allimpchur chaychina nichqa kangi? nichpa. 2 Chaymi Istibanqa nirqan: Taytamkuna, masitamkuna, allita uyawayllampa. Ancha pudirniyuq llimpyallkaq Tayta Dyusmi rimkamkurqan chay punta agwilunchiq Abrajanman, chay nasyun Misumputamyampi tiyallkamptin, manaraq Aran llaqtaman rimptin tiyaq. 3 Kaychinam kamachirqan: Llaqtallkita, yumbay ayllullkimkunata dijachpa, riy suq lugarman. Nuqam rini rimkachichuq maypim kidan chay lugarqa, nichpa. 4 Chaychina Dyus nimptinmi, Abrajanqa chay Kaldiya nasyunmanda lluqchichpa, rirqan Aran llaqtaman tiyaq. Chaymandaqam Abrajamba taytan wañumptinqa, Dyusqa chay Abrajandaqa kay Isrrayil nasyunninchiqman ampamurqan. 5 Piru Dyusqam mana nima irinsyata ni suq pidasu ch'amkritata qurqanchu Abrajandaqa. Payqam alayri kaypiqa tiyarqan. Mana quchpampismi, Abrajandaqa kaychina ufrisirqan: Wañumptimkiqam, karu willkallkimkunampaq kay pachaqa rin kaq, nichpa. Chaychinam chay Abrajandaqa ufrisirqan, manaraq ni churiyuq kamptin. 6 Tayta Dyusqam chay unay agwilunchiq Abrajandaqa nirqambis: Karu willkallkimkunam kay llaqtamanda richpa, suq nasyumbi suq furastiruchina rinllampa tiyaq. pamkaq randichqa kriyadumkunam rinllampa kaq. Pallkunatam ancha rinllampa qasachaq 400 wata tumkuyta. 7 Tayta Dyusqam Abrajandaqa nirqambis: Piru kastigaqmi rini chay nasyumbi qasachamkuqkunataqa. Chaymandaqam chay karu willkallkimkunaqa, chay nasyunmanda lluqchichpa, rinllampa kasuwaq kay Isrrayilpi, nichpa. 8 Chaymandaqam Dyusqa Abrajanwan suq tratuta rurarqan. Paytam kamachirqan, kwirpumbi siñalta ruranambaq, ama qunqanambaq chay tratu rurachqanda. Chaymi Abrajanqa churin Isamk nasimptinqa, uchu diyasniyuq kamptinlla, kwirpumbi chay siñalta rurarqan. Chaychinallam Isamkpis churin Jamkubuta rurarqan. Chay Jamkubumpismi chaychinalla rurarqan dusi churingunata. Chay dusi churingunaqam nasyunninchiq Isrrayilpa chay dusi atun ayllungunampa taytanguna karqanllampa. 9 Chay Jamkubumpa dusi churingunaqam punta agwilunchiqkuna karqan. Pallkunaqam masan Jusita imbidyachpa randimkurqanllampa, chay randiqkuna Ijimptu nasyunman ampanambaqllampa. Piru Dyusqam Jusimpa pullan karqan. 10 Chaymi Jusi ñamkamptinqa, Tayta Dyus yumbay chay ñamkachqanmanda wachachpa, yanamparqan, yach'ayniyuq kachpa, allita kawsanambaq. Chaychina Dyus Jusita yanampamptinmi, chay Ijimptumpa gubyirnun Farunqa ancha gustarqan. Chaymi Jusita numbrarqan, Ijimptumpa gubyirnun kanambaq. Paytaqam nirqambis: Tumkuy ima kaqniyta, wasillkunampi yumbay tiyaqkunatampis qam kwiday, nichpa. 11 Chaymandaqam Ijimptu nasyumbi Kanayan nasyumbimpis ancha jwirti ambruna karqan. Chaymi mimkunan mana aypamptin, chay punta agwilunchiqkunaqa ancha ñamkarqanllampa. 12 Chaychina ñamkachpaqam, Jamkubuqa yach'arqan: Ijimptumpich kan trigu, nichpa. Chaymi chay punta bwiltata dyis churingunata Ijimptuman kach'arqan, triguta randinanllampa. Chay churingunaqam unay agwilunchiqkuna karqan. 13 Chaymandaqam suq kutinda kutirimptinllampa Ijimptuman, triguta randirinambaqqa, Jusiqa masangunata nirqan: Nuqam masallki Jusi kani, nichpa. Chaychina masanguna Jusita riqsimptinqam, Ijimptumpa gubyirnun Farunqa yach'arqan: Jusiqach isrraylinumkunampa kastan, nichpa. 14 Chaymandaqam Jusiqa chay masangunata nirqan: Riyllampa ampamuy taytanchiqta, yumbay ayllunchiqkunata, nichpa. Chay tyimpumpim 75 karqanllampa. 15 Chaychinam karqan, Jamkubu yumbay ayllundin rimptin Ijimptuman tiyaq. Waqpinam achka watamkunamanda payqa wañurqanna. Chaymandaqam tumkuy chay punta agwilunchiqkunampis achka wambrangunata dijachpa, wañurqanllampa. 16 Jamkubu wañumptinqam, kwirpunda amparqanllampa Sichin llaqtaman pambaq paypa pantyunnimbi. Chaqa Abrajanmi chay pantyundaqa randichqa karqan chay runa Jamurpa churingunamanda. 17 Tayta Dyusmi jurachpa, Abrajanda kaychina ufrisichqa karqan: Suq nasyundam rini quq karu willkallkimkunata, nichpa. Chay ufrisichqan tyimpu kumplinan kallkamptinmi, chay Ijimptu llaqtampiqa isrraylinumkuna anchana achkayachqa karqan. 18 Chay tyimpumpim Ijimptumpiqa suq muchuq gubyirnu kamachimkurqan. Payqam mana nimatampis yach'achqachu karqan chay Jusimpa allin famambaqqa, ancha unayna wañuchqa kamptin. 19 Chay muchuq gubyirnuqam chay agwilunchiqkunataqa tumkuy imampi ingañachpa, ancha qasachaq. Chaymi pallkunataqa kamachirqan, ullqu wambritunguna nasimptin, wichumkunanllampa wañunambaq. 20 Chaychina kamachimkumptinmi, chay tyimpumpi Muysis nasirqan. Paytaqam Dyusqa ancha kuyaq. Kanan taytanwan mamanqam kimsa killata wasimbi pamkachpa, kriyarqan. 21 Chaymandaqam (chay gubyirnuta kasuchpa) wichumkumptinqa, chay gubyirnumpa chinan chay wambrituta tarimkuchpa, tandachpa, wawandachina kriyarqan. 22 Chaymi Muysis wiñachpaqa, tumkuy imata ijimptinu runamkunachina yach'amkurqan. Chaymi tumkuy imata rimanambaq, ruranambaqqa ancha pudirniyuq karqan. 23 Chaymandaqam 40 watayuqna kachpaqa, Muysisqa munarqanna riyta isrraylinu kastanda watumkuq. 24 Chaymi richpaqa, rimkarqan suq ijimptinu ancha maqallkaqta suq isrraylinuta. Chaymi Muysisqa chay isrraylinuta wachachpa, wanchirqan chay ijimptinuta. 25 Chaqa Muysisqam yuyarqan: Isrraylinu masillkunach'i allita intyindinqallampa: Muysiswanmi Dyusqa rin yanampawaqninchiq, ama randichqa kriyadumkuna kananchiqllampa, nichpa. Piru chay isrraylinu masingunaqam mana intyindirqanllampachu. 26 Qayandin diyaqam Muysisqa isrraylinumkunaman kutirichpa, ichkayta tarirqan pallkunampura pilyallkaqta. Chaymi munachpa alliyachiyta, pallkunataqa nirqan: Qamkunaqam llaqta masimpura kangillampa. ¿Imampaqmi pilyallkangillampa? Ama pilyayllampachu, nichpa. 27 Piru chay yanqa maqaqmi Muysista kumsachpa, nirqan: ¡Ima pitaq qamtaqa numbrachuchqa, nuqallkunampa kamachimkuqniy, juyisniyllampa kanallkiqa? 28 ¿Ima munangichu nuqatampis wanchiwayta qayna chay ijimptinuta wanchichqallkichina? nichpa. 29 Chaychina nimptinmi, Muysisqa manchachpa, mitimkarqan nasyun Madyan chutiqman. Chaypiqam kasarachpa, ichkay wambrayuqna karqan. Piru chaypiqam furastiruchina tiyarqan. 30 Chaymandaqam 40 watas pasamptinna, Muysisqa chuncha lugar Sinayi urqqumpa ladumbi kallkarqan. Chay chunchampim Dyuspa anjilninqa suq yura sach'ampi nina lumyallkaqpi Muysisman rimkamkurqan. 31 Chaymi Muysis ancha ispantachqata champachpa, qamimkachpa mas allita rimkanambaq, uyarqan Taytanchiq Dyusta kaychina nimptin: 32 Nuqam chay punta agwilullkimkuna Abrajamba, Isamkpa, Jamkubumpa Dyusnin kani, nichpa. Chaychina niqta uyachpaqam, Muysisqa manchachpa, ch'ampsimkarqan. Chaymi manana munarqanchu masta champaytaqa. 33 Kanan Tayta Dyusqam paytaqa nirqan: Ch'amkimkimkunamanda surquy llanqallkita. Chaqa nuqam kaypi kani. Chaymi ancha santu lugarpi chayallkangi. 34 Nuqam rimkachqa kani wambrallkunata Ijimptumpi ancha ñamkallkamptinllampa. Uyachqam kani pallkunata ancha waqamptin. Chaymi syilumanda chamuchqa kani, chay wambrallkunata ñamkachqanmanda wachanaypaq. Kayman chamuy. Rinim qamtaqa kach'achuq Ijimptuman, nichpa. 35 Piru chay unay agwilunchiqkunaqam Muysista disprisyachpa, nirqanllampa: ¡Pim qamtaqa numbrachuchqa, nuqallkunampa kamachimkuqniy, juyisniy kanallkiqa? nichpa. Piru Tayta Dyusqam chay sach'ampi rimkamkuq anjilninwan Muysista numbrachqa karqan, chay unay agwilunchiqkunampa kamachimkuqnin, wachadurnin kanambaq. 36 Muysismi achka milagrumkunata, siñalkunata rurachpa, chay unay agwilunchiqkunata Ijimptumanda surqurqan. Chaymandaqam Chumpimka Mar Yamkumpi, chunchamkunampimpis 40 watas tumkuyta mas milagrumkunata rurarqan. 37 Chay kimkin Muysismi unay isrraylinumkunataqa nirqan: Dyus nuqata numbrawachqanchinam, qamkunamanda suq runata rin numbraq, paypaq rimanambaq. Chayri payta kasuyllampa, nichpa. 38 Chay Muysismi isrraylinumkunawan chuncha lugarkunampi karqan. Chaypi kallkamptinmi, Dyuspa anjilnin Sinayi urqqumpa sawambi Muysista Dyus munachqanda nirqan, payna chay unay agwilunchiqkunata ninambaq. Chaymandaqam Muysisqa chay uyachqanda Dyuspa Santu Librumbi iskibrirqan, nuqanchiqkunampis chayta kasuchpa, tumkuy tyimpu kawsananchiqllampa. 39 Piru chay agwilunchiqkunaqam mana munarqanchu Muysista kasuytaqa. Achwanmi payta disprisyachpa, munarqanllampa kutiyta Ijimptuman. 40 Chaymi Arunda nirqanllampa: Masallki Muysisqam nuqallkunata Ijimptu nasyunmanda surquwachpaqa, manana rimkch'anchu. Chaymi munanillampa amitumkunata ruranallki, ñawpanchiqta rinambaqllampa, nichpa. 41 Chaymi suq michiru amitunda rurarqanllampa. Chaymandaqam animalkunata wanchichpa, rumpachichpa, ancha kuchimkuchpa, adurarqanllampa chay rurachqanllampa amitunda. 42 Chaymi Dyusqa pallkunamanda amkramkachpa, dijarqan, rumpayta, killata, lusirumkunata adurananllampa. Chaymi Dyuspaq rimaqkuna Dyus nichqanda Santu Librumbi kaychina iskibrirqanllampa: ¿Ima qamkuna isrraylinumkuna chay 40 watasta chunchamkunampi tiyachpachu, nuqampaq wanchirqallkillampa chay animalkunata? 43 Manam nuqampaqchu chaytaqa rurarqallkillampa. Achwanmi qamkunaqa chay amitu laya Muluqpa andasninda purichichqallampa kangi. Chay amitu laya lusiru Rrifan chutiqtampismi purichichqallampa kangi. Kanan qamkuna kimkimkim chay amitu layamkunata rurachpa, adurachqallampa kangi. Chaymi nuqaqa Isrrayilmanda surquchuchpa, rini kach'achuqllampa chay nasyun Babiluñampa mas waq ladunman, nichpa. 44 Chuncha lugarkunampiqam agwilunchiqkunaqa chay karpamanda adurana wasita pullan purichiqllampa, chaypi Dyusta adurananllampa. Chay wasimpim waqaychaqllampa Dyuspa liyninda chay ichkay rumi tablampichina iskibrichqata. Chaqa chay karpamanda adurana wasimpaqmi Tayta Dyusqa Muysista rimkachichpa nichqa karqan: Kaychina ruray, nichpa. Chaymi chay kamachichqanchina rurarqanllampa. 45 Kanan agwilunchiqkunaqam chay karpamanda adurana wasitaqa irinsyatachina ch'askirqanllampa. Chaymandaqam chay Juswiwan chamuqkuna pullan ampamurqanllampa chay karpamanda adurana wasita kay (Kanayan) nasyunman. Kaypiqam kuntraqkunata binsirqanllampa. Chay kuntraqkunataqam Dyus qatirqan, chay agwilunchiqkuna kaypi tiyanambaqllampa. Chay karpamanda adurana wasiqam kay Isrrayilpi karqan Dabid kamachimkuchqan tyimpumkaman. 46 Dyusmi chay unay gubyirnu Dabidpaqqa ancha kuchimkurqan. Chaymi Dabidqa munarqan Dyuspa adurana wasinda rurayta, chaypi Tayta Dyus tiyanambaq. 47 (Piru Dyusninchiqmi mana dijarqanchu, chay gubyirnu Dabid wasinda ruranambaqqa.) Achwanmi Dabidpa churin Salumun Dyuspa adurana wasindaqa rurarqan. 48 Piru ancha pudirniyuq Tayta Dyusqam mana tiyanchu runamkuna rurachqan wasimkunampiqa. Chaymi Dyuspaq rimaq Isayiyasqa Dyus nichqanda kaychina iskibrirqan: 49 Syiluqam nuqampa atun trunuy. Kay pachampiqam ch'amkillkunata samachini. Chaychina kamptinqa, ¿ima laya wasiytaraq atinmanllampa rurayta nuqampaqqa, chaypi samanaypaq? (Manam nisitanichu nima laya adurana wasita rurananllampa, chaypi samanaypaqqa.) 50 Chaqa nuqam mamkiywan tumkuy imata rurachqa kani, nichpa. 51 Chaychina Dyus nichqanda nichpam, Istibanqa juyiskunata nirqan: Qamkunaqam unaymandampacha angu chunquyuqlla kachqallampa kangi. Mana baliq rinriyuq, chunquyuqmi kangillampa, Dyuspi mana kriyiq runamkunachina. Chay unay agwilunchiqkunachinam Dyuspa Santu Ispiritunda kuntrangillampa. 52 Mayñ, ¿Dyuspaq mayqan rimaqtam mana qasacharqanchu chay unay agwilunchiqkunaqa? Yumbandam qasacharqanllampa, ¿manachu? Chaqa chay rimaqkuna Dyus Amkrachqan Wachadurpaq yach'achimkumptinmi, chay unay agwilunchiqkuna pallkunataqa wanchirqanllampa. Chaymandaqam chay ancha allin Wachadurninchiq chamumptinqa, qamkunaqa paytampis wanchirqallkillampa. 53 Chaqa qamkunaqam Dyuspa liyninda kimkin anjilninguna yach'achichumptinqa, mana kasungillampachu. 54 Chaychina Istiban nimptinmi, chay juyiskunaqa ancha piñamkurqanllampa. Chaymi qach'yachirqanllampa kirungunata. 55 Piru Istibanqam Dyuspa Santu Ispiritunwan kachpa, syiluman champamkuchpa, rimkarqan Dyuspa pudirninda llimpyallkaqta. Rimkarqambismi Jisusta, Dyuspa allin ladumbi chayallkaqta. 56 Chaymi nirqan: Champayllampa! Rimkanim syiluta kich'amkachqata. Rimkanimpismi Dyusmanda Chamuq Runata, Dyuspa allin ladumbi chayallkaqta, nichpa. 57 Chaychina Istiban nimptinmi, ama uyananllamparallku, chay runamkunaqa rinrinllampata pambachpa, ¡A! qayach'amkuchpa, kallparqanllampa Istibanda piskaq. 58 Piskachpaqam, chay llaqtamanda sawaman surqurqanllampa, rumimkunawan sitachpa, wanchinambaqllampa. Kanan chay llullamkuq tistigumkunaqam sawanmanda bistidungunata surquchpa, suq chulu Sawlu chutiqta mingarqanllampa. [Nuta: Chay Sawlullam Pablumpis chutirqan.] 59 Chaychina pallkuna sitallkamptinmi, Istibanqa mañamkuchpa nirqan: Siñursitu Jisus, tandayri ispirituyta, nichpa. 60 Chaymandaqam qunqurimkuchpa, ancha jwirtita rimachpa, nirqan: Siñursitu Jisus, yuch'allku ama kastigaychu kay kuntrawaqkunataqa, kaychina rurawamptinllampa, nichpa. Chaychina nichpaqam, Istibanqa wañurqanna.
1 Chay Sawlum rimkachpa Istibanda wanchimptinllampaqa, yuyarqan: Allitam rurallkanllampa, nichpa. Chay diyamandampacham Jisuspi kriyiqkunata ancha qasacharqanllampa Jirusalimbiqa. Chaymi yaqqa yumbay chay kriyiqkunaqa waqta, kayta chimkwamkachpa, rirqanllampa prubinsya Judiyampa, prubinsya Samaryampa lugarningunaman. Piru chay dusi ampustulkunam kidarqan chay Jirusalimbiqa. 2 Jisuspi wamkin kriyiqkunaqam ancha waqachpa, alma Istibanda pambarqanllampa. 3 Piru chay Sawluqam ancha qasachaq Jisuspi kriyiqkunataqa. Wasin wasin yallkuchpam, rrastrachpa, runamkunata, warmimkunata surquq karsilanambaq. 4 Chay Jirusalinmanda mitimkaqkunaqam may richqangunampi masta Jisuspaqqa yach'achimkurqanllampa: Jisusqam chamuchqa wachawananchiqllampa, nichpa. 5 Chay riqkunamandam suqnin Filimpi chutiq. Paymi prubinsya Samaryampa suq llaqtanman richpa, Jisumkristumpaq yach'achimkurqan. 6 Chaychina yach'achimkumptinmi, ancha achka runamkuna tandamkachpa, ancha allita uyaqllampa. Kanan milagrumkunata Filimpi ruramptinmi rimkaqllampa. 7 Chaqa payqam Dyuspa pudirninwan ancha achka runamkunamanda dyablumkunata qatirqan. Chay dyablumkunaqam Filimpi kamachimptinlla, qayach'amkuchpa runamkunamanda lluqchirqanllampa. Kanan achka wañuchqachina kwirpuyuqkunata, kujumkunatam kach'amkachirqan. 8 Chaychina kamptinmi, chay llaqtampiqa yumbay runamkuna ancha kuchimkurqanllampa. 9 Piru karqambismi suq runa Simun chutiq. Unayqam chay Samaryampi tiyaqkunata brujiyachpa, kriyichichqa karqan: Chay Simunqach ancha pudirniyuq runa, nichpa. 10 Chaymi wambramkuna, byijumkuna paytaqa ancha allita kasuqllampa. Paypaqmi niqllampa: Dyusmi kay brujumpiqa. Chaymi ancha pudirniyuq kachpa, achka laya milagrumkunata atin rurayta, nichpa. 11 Chaqa ancha unaymandampacham pallkunataqa brujiyachqa karqan. Chaymi payta kriyichpa, ancha kasuqllampa. 12 Piru Filimpiqam yach'achimkurqan: Tayta Dyusmi chamuchqa, payta kasuchpa kawsananchiqllampa. Jisumkristum Wachadurninchiqqa, nichpa. Chaychina yach'achimkumptinmi, achka runamkuna, warmimkuna Jisumkristumpi kriyichpa chutimkurqanllampa. 13 Asta chay bruju Simumbismi kriyichpa chutimkurqanna. Chaymandaqam Filimpimpa pullanna puriq. Chaymi achka milagrumkunata Filimpi ruramptinqa, challkunata rimkachpa, chay Simunqa ancha ispantarqan. 14 Jirusalimbim ampustulkunaqa yach'arqanllampa: Samaryanumkunaqach kriyichqallampana Jisuspi, nichpa. Chaymi chay prubinsya Samaryaman Pidruta, Jwanda kach'arqanllampa. 15 Pallkunaqam Samaryaman ch'ayachpaqa, Dyusman mañamkurqanllampa, Santu Ispiritunda qunambaq chay muchuq kriyiqkunata. 16 Chaqa Dyuspa Santu Ispiritunqam manaraq pallkunamanqa chamuchqachu karqan. Achwan pallkunaqam Jisuspa chutimbi yamkuwanlla chutimkuchqallampa karqan. 17 Chaymi Pidruwan Jwanqa pallkunampa sawambi mamkingunata rurachpa, Dyusman mañamkumptinllampa, Santu Ispiritundaqa ch'askirqanllampa. 18 Chayta rimkachpaqam, chay bruju Simunqa chay ampustulkunataqa nirqan: Pagarachqallki qallayta. 19 Yanampawayllampar qamkunachina runamkunampa sawambi mamkiyta ruramptiy, Dyuspa Santu Ispiritunda ch'askinambaq, nichpa. 20 Chaymi Pidruqa, Simunda nirqan: Ima qamqachu yuyangi: Atinim randiyta Dyuspa Santu Ispiritunda, nichpa? Chaychina yuyachpaqam, ringi chingaq qallaynindimki. 21 Qamba chunqullkiqam mana balinchu Dyuspaqqa. Chaymi qamqa mana nima dirichuyuqchu kangi ruranallki nuqallkuna rurachqaytaqa. 22 Riqsillkim ancha malu kachqallkita. Chaqa mana allin yuyaynimkimkunam karsilachuchqachina, Dyuspi ama yuyamkunallki. Chayri mana alli yuyachqallkita dijachpa, Dyusman mañamkuy pirdunachunambaq. Paqta payqa pirdunachungiman, nichpa. 24 Chaychina Pidru nimptinmi, Simunqa nirqan: Siñurninchiq Jisusmanri mañamkuyllampa, ama chay niwachqallkichina chinganaypaq, nichpa. 25 Chaymandaqam Pidruwan Jwanqa Tayta Dyus nichqanda yach'achimkuchpa, Jisuspa chumaq nutisyandampis yach'achimkurqanllampa. Chaymandaqam chay prubinsya Samaryampa suq llaqtangunampi chay chumaq nutisyata yach'achimkuchpa, kutirqanllampa Jirusalin llaqtaman. 26 Chaymandaqam Dyuspa suq anjilnin Filimpita nirqan: Atarichpa, sur laduman riy suq ñanda. Chay ñanqam Jirusalinmanda uran rin chuncha lugarkunata pasachpa, chay Gasa llaqtaman ch'ayachtin, nichpa. 27 Chaymi Filimpiqa chay kach'achqan ñanda riqchina, tingunamkurqan suq runa Ityumpiya nasyunmanda kaqwan. Chay runaqam suq inumku ancha kamachimkuq karqan. Chaqa Ityumpiyampa gubyirnan Kandasimpa tisurirunmi payqa karqan. Payqam richqa karqan Jirusalinman Dyusta aduraq. 28 Chaymandaqam chutana karrumbi llaqtanmanna kutirillkarqan. Payqam Dyuspaq unay rimaq Isayiyaspa librunda liyiqchina rillkarqan. 29 Chaymi Dyuspa Santu Ispiritun Filimpitaqa nirqan: Qamimkay chay runampa chutana karrunman, nichpa. 30 Chaymi Filimpiqa chay karruman qamimkachpa, chay runata rimkarqan Isayiyaspa librunda liyillkaqta. Chaymi tampurqan: Chay liyichqallkitachu intyindingi? nichpa. 31 Chaymi chay runaqa nirqan: Imachinam atichaq intyindiyta, mana pimpis intyindichiwamptinqa? nichpa. Chaychina nichpaqam, Filimpita kumbidarqan, karrunman lluqchichpa, ladumbi tiyachpa, chay liyichqanda intyindichinambaq. (Chaymi Filimpiqa chay karrumanna lluqchirqan.) 32 Chay runaqam Dyuspa Santu Librumbiqa kaychina nichqanda liyillkarqan: Wichatachinam paytaqa amparqanllampa wanchiq. Rutuqkunampa ñawpambiqam uñitaqa uyaritamp kallkarqan. Chaychinallam paypis mana nimata rimarqanchu. 33 Paytaqam ancha panqachirqanllampa. Chaqa allin dimandataqa manam rurarqanllampachu. Kay pachampiqam paytaqa wanchirqanllampa, mana ni warmiyuq ni wambrayuqchu kamptin, nichpa. 34 Chay kamachimkuq runaqam Filimpita tampurqan: Dyuspaq chay rimaqqa ¿pimpaqmi chaychinaqa nin? ¿Paypaqllachu ichu suq runampaq chaychinaqa nin? Mayñ, niwayri yuch'allku, nichpa. 35 Chaymi Filimpiqa chay liyichqanda intyindichichpa, Jisuspa chumaq nutisyanda yach'achirqan: (Chay wichachinam wañuchqa, nuqanchiqkunata wachawananchiq, nichpa). 36 Chaymandaqam pasaqchina suq lugarpi yamkuta tarirqan. Chaymi chay ityumpiyanuqa Filimpita nirqan: Kaypiqam kan yamku. ¿Manachu kaypi atingiman chutichiwayta? nichpa. 37 ?Chaymi Filimpiqa nirqan: Tumkuy chunqullkiwan Jisuspi kriyimptimkiqam, atini chutichichuyta, nichpa. Chaychina nimptinqam, chay runaqa nirqan: Kriyinim: Jisumkristuqam Dyuspa Churin, nichpa.? 38 Chaymandaqam chay chutana karruta chayachichpa, ichkandinna ichkirqanllampa. Ichkichpaqam yamkuman yallkuchpallampa Filimpiqa chaypina chutichirqan. 39 Yamkumanda lluqchimptinllampaqam, Dyuspa Santu Ispiritunqa Filimpitaqa dasna amparqan. Chaymi chay ityumpiyanuqa Filimpitaqa manana rimkarqanchu. Piru ñannindaqam kuchimkuchpana rirqan. 40 Kanan Filimpiqam das rimkamkurqan Asutu llaqtampina. Chay Asutumandaqam llaqtan llaqtanna rirqan yach'achimkuq Jisuspa chumaq nutisyanda. Chaychinam rirqan Sasarya llaqtaman ch'ayachtin.
1 Challkamanqam chay Sawluqa mana challkuq juramparqan, Jisuspi kriyiqkunata wanchinambaq. Chaymi rirqan mas kamachimkuq isrraylinu kuraman, 2 urdingunata surquchpa, Damasku llaqtaman rinambaq. Chaqa chay urdingunawanqam yuyarqan yallkuyta sinaguga wasimkunaman, Jisuspi kriyiq ullqumkunata, warmimkunata prisuchpa, Jirusalinman ampamuchpa, chaypi dimandanambaq. 3 Piru urdingunata ch'askichpa, rillkamptin Damaskumanqam, yaqqana ch'ayamptin, chay ñambiqa qunqaylla syilumanda suq ancha jwirti micha lliwyachpa, paypa rridurninda limpu achimkcharqan. 4 Chaymi payqa pambaman bulamkachpa, uyarqan syilumanda kaychina qayaqta: Sawlu, Sawlu! ¿Imampaqmi qasachawallkangi? nichpa. 5 Chaymi payqa tampurqan: Pimir kangi, Taytitu? nichpa. Chay qayamkuqqam nirqan: Nuqam kani Jisus. Nuqatam qasachawallkangi. ?Manchu buyis yampumkuchpaqa, imkiman garruchata matqachpaqa, paylla chuqrimkan. Chaychinallam qambis dañamkallkangi, kaychina qasachawachpaqa, nichpa. 6 Chaymi Sawluqa ancha manchaywan ch'ampsimkachpa, tampurqan: Taytitu, ¿imatamir munangi ruranaypaq? nichpa. Chaymi Siñurninchiq Jisusqa nirqan:? Atarichpa riy chay Damasku llaqtaman. Waqpim rinllampa nichuq, imata ruranallki, nichpa. 7 Sawluwan riqkunampismi uyarqanllampa chay qayamkuqtaqa. Piru manam pitampis rimkarqanllampachu. Chaymi ancha mancharqanllampa. 8 Sawluqam pambamanda atarichpa, manana atirqanchu nimatampis rimkamkuyta. Chaymi chay pullan riqkunaqa, rambachpana, amparqanllampa chay Damasku llaqtaman. 9 Chaypim kimsa diyata karqan. Chay kimsa diya tumkuytam mana nimatampis rimkamkurqanchu, ni mimkurqanchu, ni imatampis umpyarqanchu. 10 Chay Damaskumpiqam suq runa Ananiyas chutiq tiyarqan. Paymi Jisuspi ancha yuyamkuq. Chaymi Siñurninchiqqa payman rimkamkuchpa suq musquypichina nirqan: Ananiyas! nichpa. Chaymi Ananiyasqa nirqan: Imamiri, Taytitu? Kaypim kani, nichpa. 11 Chaymi Siñurninchiqqa Ananiyasta nirqan: Atarichpa, riy chay kalli Dirichu chutiqman. Chay Judaspa wasinman ch'ayachpa, tampumkuy suq runa Sawlu chutiqpaq. Payqam Tarsu llaqtamanda. Nuqamannam mañamkullkan. 12 Paymi suq musquypichina rimkachuchqa, pusadanman ch'ayallkaqta, mamkimkita sawambi rurallkaqta, muchuqmanda rimkamkunambaq, nichpa. 13 Siñurninchiq nichqanda uyachpaqam, Ananiyasqa nirqan: Taytitu, achka runamkunam parlachiwachqa chay runampaqqa: Chayqam ancha malu, nichpa. Jirusalimbiqach qambi kriyiqkunata ancha qasachachqa. 14 Kananqach chay runaqa kamachimkuq isrraylinu kuramkunamanda urdingunata surquchpa, kay Damaskumanna chamuchqa, nuqallkuna qambi kriyiqkunata prisuwananllampa, nichpa. 15 Chaychina nimptimbismi, Siñurninchiqqa nirirqan: Riylla. Nuqam chay runataqa amkrachqa kani, chay furastiru runamkunata gubyirnundinda, Isrrayilmanda kaqkunatampis nuqampaq yach'achimkunambaq. 16 Nuqam paytaqa rini yach'achiq: Kaychinam ringi ñamkaq nuqampi kriyichqallkirallku, nichpa. 17 Chaychina Siñurninchiq nimptinqam, Ananiyasqa rirqanna Sawluman. Ch'ayachpaqam, chay wasiman yallkuchpa, Sawlumpa sawambi mamkinda rurachpa, nirqan: Masita Sawlu, ñanda chamullkamptimkim, Siñurninchiq Jisus qaman rimkamkurqan, ¿manachu? Paymi kach'amuwachqa, muchuqmanda rimkamkurinallki, Dyuspa Santu Ispiritunda ch'askinallki, nichpa. 18 Chaychina nimptinqam, Sawlumpa ñawinmanda ichkirqan piskadumpa qarachangunachina. Chaychina ichkimptinqam, rimkamkurqanna. Chaymi Sawluqa chay uras atarichpa, chutimkurqanna. 19 Chaymandaqam mimkuchpaqa, jwirsayuqna karqan. Kanan wamkin diyamkunam Jisuspi kriyiqkunawanna kidarqan chay Damasku llaqtampi. 20 Chaymandaqam Sawluqa chay Damaskumpiqa sinaguga wasimkunampina kaychina yach'achimkurqan: Taytanchiq Dyuspa Churinmi Jisusqa, nichpa. 21 Chaychina yach'achimkumptinmi, yumbay chay uyaqkunaqa ancha ispantachqata ninamkuqllampa: Manachu kay runaqa Jirusalimbi Jisuspi kriyiqkunata qasachachpa puriq? ¿Manachu kay Damaskuman chamurqan, Jisuspi kriyiqkunata prisuchpa, chay kamachimkuq isrraylinu kuramkunaman ampanambaq? nichpa. 22 Piru Sawluqam ancha animamkachpa, chay Damaskumpi yach'achimkurqan, chay isrraylinumkunata binsinangaman: Tayta Dyusmi Amkrachqan Wachadurta kach'amuchqana. Paymi Jisus, nichpa. Ancha chumaqta yach'achimkumptinmi, mana pimpis atirqanchu nimata niyta Sawlutaqa. 23 Chaymanda achka diyamkuna pasamptinnam, wamkin isrraylinumkunaqa Damaskumpi tandamkachpa, parlarqanllampa Sawluta wanchinanllampa. 24 Chaymi chay ch'iqniqkunaqa chay llaqtampa murallamba pungungunampi chichyachtin yuraqachtin chuyaqllampa, Sawlu lluqchimptin, chaypi wanchinanllampa. Piru chaychina pallkuna chuyallkamptinqam, Sawluqa yach'arqanna. 25 Chaymi Jisuspi kriyiqkunaqa Sawlutaqa tutamp amparqanllampa, murallampa sawanda surquq. Chaymi chay altu murallampa sawanmanda waskamkunawan suq atun kanastampi ichkichirqanllampa sawa laduman. Chaychinam wachamkarqan Sawluqa. 26 Sawluqam Jirusalin llaqtaman ch'ayachpaqa, munarqan Jisuspi kriyiqkunaman tandamkayta. Piru chay kriyiqkunaqam Sawlutaqa ancha mancharqanllampa. Chaqa manam kriyirqanllampachu: Sawlum allimpta Jisuspi kriyichqa, nichpaqa. 27 Piru chay runa Birnabim Sawluta ampustulkunaman ampachpa, nirqan: Kay Sawluqam ñambi rimkachqa Siñurninchiq Jisusta. Chay Siñurninchiqmi payta parlachichqa. Kanan Damaskumpim mana pitampis manchachpachu, payqa Jisuspaq yach'achimkurqan, nichpa. 28 Chaymi Sawluqa chay ampustulkunawanna puriq Jirusalimbiqa. 29 Kanan manam nimata manchachpachu, Sawluqa rirqan Siñurninchiq Jisuspaq yach'achiq grigumpi rimaq isrraylinumkunata. Piru pallkunaqam Sawluwan tarimpanamkuchpa, paytaqa munarqanllampana wanchiyta. 30 Chayta yach'achpaqam, Jisuspi kriyiqkunaqa Sawluta Sasarya llaqtaman amparqanllampa. Waqmandaqam kach'arqanllampa, Tarsu llaqtanman kutinambaq. 31 Chaymi chay prubinsya Judiyampi, Galiliyampi, Samaryampi Jisuspi kriyiqkunaqa manana qasachaduchu kawsaqllampa. Pallkunaqam Dyuspi ancha yuyamkuchpa, payta ancha rrispitachpa ancha animamkarqanllampa. Kanan Dyuspa Santu Ispiritunmi pallkunataqa ancha yanamparqan, masta achkayananllampa. 32 Pidruqam puriq Jisuspi kriyiqkunata watumkuchpa. Chaymi rirqan watumkuq Lida llaqtampi tiyaq kriyiq masingunata. 33 Waqpim tingunamkurqan suq runa Iniyas chutiqwan. Chay Iniyasqam wañuchqachina kwirpuyuq karqan. Chaymi mana atichpa kuyuyta, uchu watas tumkuyta kamampilla kachqa karqan. 34 Pidruqam payta nirqan: Iniyas, Jisumkristum kach'amkachichungi. Mayñ, atarichpa, kamallkita allichay, nichpa. Chaychina nimptinqam, Iniyasqa kach'amkachpa, dasna atarirqan. 35 Chaymi Lida llaqtampi, Charun llaqtampi tiyaqkuna chayta rimkachpaqa, unay dumktrinanda dijachpa, Jisuspina kriyirqanllampa. 36 Chay tyimpumpiqam Jumpi llaqtampi tiyarqan suq warmi Tabita chutiq. Grigu rimaypiqam chay chutinqa munan niyta Durkas. Chay warmiqam Jisuspi ancha kriyiq. Chaymi payqa tumkuy laya allimkunata rurachpa, pubrimkunata yanampaq. 37 Piru chay tyimpumpiqam chay Durkasta nanay piskamptin, wañurqanna. Chaymi kwirpunda mayllachichpa, amparqanllampa suq wasimpa altunman kamamkachichpa bilanambaqllampa. 38 Lida llaqtaqam Jumpi llaqtampa sirkambi karqan. Chaymi chay alma Durkaspa kriyiq masinguna yach'achpa: Pidruqach Lidampi, nichpaqa, ichkay runata kach'arqanllampa, Pidruta ampamunanllampa. Chay riqkunaqam paytaqa nirqan: Yuch'allku kanalitan amku Jumpiman, nichpa. 39 Chaychina nimptinmi, Pidruqa pallkunawanna chamurqan. Ch'ayamumptinqam, amparqanllampa chay alma Durkasta bilallkachqanman. Chaypina kamptinqam, achka biyudamkuna Pidrumpa rridurninman tandamkachpa, ancha waqachpa, payta rimkachichpa, nirqanllampa: Kay mudanaytam quwarqan almita Durkas, nichpa. 40 Chaymandaqam Pidruqa umkumanda surqurqan yumbay chay almampi kaqkunata. Kanan payqam qunqurimkuchpa, Dyusman mañamkurqan. Chaymandaqam chay almitataqa champachpa, nirqan: Tabita, atariy, nichpa. Chaymi Durkasqa suq puñuymandachina rimkch'amkamuchpa, wañuchqanmanda kawsamurqan. Pidruta rimkachpaqam, tiyamurqanna. 41 Chaymandaqam Pidruqa, mamkinmanda piskachpa, Durkastaqa chayachirqanna. Chay biyudamkunata, suq kriyiq masingunatampis qayachpam, Durkastaqa kawsaqtana rimkachirqan. 42 Chaymi rimkaqkuna chay famata suqkunata parlachimptin, tumkuy Jumpimpi tiyaqkuna yach'arqanllampa. Chayrallkum achka runamkuna, warmimkuna Jisuspi kriyirqanllampa. 43 Kanan Pidruqam achka diyata Jumpi llaqtampi tiyarqan Simumba wasimbi. Chay Simunqam kuch'tyimbrimpi trabajaq qaramkunata allichachpa, ama anguta chamkinambaq.
1 Sasarya llaqtampim tiyaq suq runa Kurnilyu chutiq. Paymi achka rrumanu suldadumkunampa kamachimkuqnin karqan. Paypa trumpanmi Italyanu Trumpa chutiq. 2 Chay Kurnilyuqam warminwan, wambrangunawan Dyusta ancha allita kasuchpa, aduraqllampa. Payqam Dyusta ancha rrispitachpa, mana nima maluta munarqanchu rurayta. Chaymi tumkuy diya Dyusman mañamkuq. Kanan ancham yanampaq mana nimayuq isrraylinumkunata, qallayta quchpa. 3 Suq diyam las tris di la tarditach'i, Kurnilyuqa suq musquypichina rimkarqan Dyuspa anjilninda. Pay kachqanman yallkuchpam, chay anjilqa nirqan: Kurnilyu! nichpa. 4 Chaymi Kurnilyuqa ancha manchachqata champachpa, anjiltaqa nirqan: Imamir Taytitu? nichpa. Chaymi anjilqa nirqan: Tayta Dyusmi uyachuchqa, payman mañamkumptimki. Pubrimkunata yanampamptimkim, ancha gustachqa. 5 Kach'ay runamkunata Jumpi llaqtaman, ampamunambaq suq runa Simun chutiqta. Payllam Pidrumpis chutin. 6 Tumkayun Simumba wasimbim tiyallkan. Chay tumkayunqam trabajan qaramkunata allichachpa, ama anguta chamkinambaq. Wasinqam mar yamkumpa manyambi. Chay Pidruqam chamuchpa, rin yach'achichuq: Kallkunata ruray, nichpa. 7 Chaymi chay anjil chaychina nichpa rimptinqa, Kurnilyuqa suq yanampaq suldadunda, ichkay kriyadunda qayarqan. Chay suldadunmi Dyuspi kriyichpa, Kurnilyuta ancha allita yanampaq. 8 Chaymi chay anjil nichqanda manyaqlla parlachichpa, pallkunataqa kach'arqan rinanllampa Jumpiman, Simun Pidruta ampamunanllampa. 9 Qayandinqam yaqqana Jumpiman ch'ayallkamptinqa, larrdusinach'i karqan. Chay urasmi Pidruqa lluqchirqan wasimpa sawanman, Dyusman mañamkuq. 10 Payqam ancha mallaqnachpa, munarqanna mimkuyta. Yanuchpa allichanangaman mimkunataqa, Pidruqa musquypichina 11 rimkarqan syiluta kich'amkallkaqta. Kanan anaqmandam kay pachaman ichkimurqan atun jirgachina, watadu ch'usku manyangunamanda. 12 Umkumbiqam karqan tumkuy laya mana mimkuypaq animalkuna: wamkinqam ch'usku ch'amkiyuqkuna karqan; wamkinqam kulibramkuna; wamkinnataqmi pichqumkuna karqan. 13 Challkunata champallkamptinmi, uyarqan suq rimaq kaychina niqta: Pidru, atarichpa, wanchichpa, challkunata mimkuy, nichpa. 14 Chaymi Pidruqa nirqan: Taytitu, manam nunka chay laya mampa animalkunataqa mimkuchqachu kani, nichpa. 15 Chaymi chay niqqa nirqan: Taytanchiq Dyus pichachqandaqa, ama mampam niychu, nichpa. 16 Chaychinam pasarqan kimsa kutinda. Chaymandaqam syilumanna kutirirqan chay jirgachina umkumbi kaq animalkunawan. 17 Piru Pidruqam ancha munarqan yach'ayta chay musquypichina rimkachqambaq: ¿Imampaqraq chaychinaqa kachqa? nichpa. Chaychina ancha yuyallkamptinmi, Kurnilyu kach'achqan runamkunaqa Simumba wasimbaq tampumkullkarqan. Simumba pungunman ch'ayachpam, 18 pallkunaqa kaychina qayamkurqanllampa: Kay wasimpichu tiyan Simun Pidruqa? nichpa. 19 Kanan Pidru chay rimkachqambaq yuyallkamptinmi, Dyuspa Santu Ispiritunqa nirqan: Champamkuy. Kimsa runamkunam maskachullkangi. 20 Atarichpa, ichkichpa, (chay mana isrraylinu kaqkunawan) riy, ama nimatampis yuyachpachu. Chaqa nuqam pallkunataqa kach'amuchqa kani, qaman chamunanllampa, nichpa. 21 Chaymi Pidruqa wasimpa sawanmanda ichkimuchpa, Kurnilyu kach'achqan runamkunata nirqan: Nuqam kani Simun Pidru. ¿Imampaqmi chamuchqallampa kangi? nichpa. 22 Chaymi pallkunaqa nirqan: Nuqallkunaqam chamuni, Kurnilyu kach'amuwamptin. Paymi suldadumkunampa kamachimkuqnin. Pay Dyusta ancha kasumptinmi, yumbay isrraylinumkuna paytaqa allin runampaq riqsinllampa. Chaymi Dyuspa suq anjilnin Kurnilyuta kaychina nichqa karqan: Kurnilyu, Simun Pidruta qayachiy, kay wasimkiman chamuchpa, Dyuspaq yach'achichunambaq, nichpa. 23 Chaychina nimptinllampam, Pidruqa pallkunata pusadanman ch'ayachirqan. Chaymi chay tutaqa chay pusadampina kidarqanllampa. Qayandinqam pallkunawanna Pidruqa rirqan. Wamkin jumpinu kriyiq masingunam yampachachpa, pullan rirqanllampa. 24 Jumpi llaqtamanda lluqchichpaqam, qayandinraq Sasarya llaqtamanqa ch'ayarqanllampa. Kurnilyuqam ayllungunata, yanasungunata (yanasangunata) tandachpa, Pidruta chuyallkarqanllampa. 25 Pidru ch'ayallkamptinqam, Kurnilyuqa wasinmanda lluqchirqan ch'ayachinambaq. Chaymi ñawpambi qunqurimkurqan, Pidruta aduranambaq. 26 Piru Pidruqam Kurnilyutaqa atarichichpa nirqan: Chayay. Ama adurawaychu. Chaqa nuqampismi qamchina runalla kani, nichpa. 27 Chaymandaqam Pidruqa Kurnilyuwan parlaqchina, wasinman yallkuchpa, achka runamkunata tarirqan. 28 Chaymi Pidruqa yumbayta nirqan: Qamkunaqam yach'angillampa, nuqallkuna isrraylinumpa dumktrinayllampam kamachiwan, nuqallkunampuralla tandamkanayllampa. Manam dijawanchu, qamkunawan tandamkanayqa. Chaqa kamachiwanllampam, ama ni wasimkimpa pungunman ch'ayanaypaq. Piru Tayta Dyusmi kaychina yach'achiwachqa: Pidru, ama pimpaqpis mampa, niychu, nichpa. 29 Chaymi qayachiwamptimki, utqay maya chamuchqa kani, mana nimatampis nichpachu. Mayñ, ¿imampaqmir qayachiwachqa kangi? nichpa. 30 Chaymi Kurnilyuqa nirqan: Kananwanqam ch'usku diyana kay urasch'i nuqaqa kay wasiypi ayunachpa, Dyusman mañamkullkarqay. Las tris di la tardich'i ñawpaypi rimkamkurqan suq runa llimpyallkaq bistiduyuq. 31 Chay runam niwarqan: Kurnilyu, Dyusman mañamkumptimkim, payqa uyachuchqa. Pubrimkunata yanampamptimkim, ancha gustachqa. 32 Kach'ay runamkunata Jumpi llaqtaman, ampamunambaq Simunda. Payllam chutin Pidrumpis. Payqam ch'ayamuchpa, rin kunachuq. Mar yamkumpa manyambim tumkayun Simumba wasimbi tiyallkan. Chay tumkayunqam trabajan qaramkunata allichachpa, ama anguta chamkinambaq, nichpa. 33 Chaychina niwamptinmi, utqay maya kach'arqay pallkunata maskachunambaq. Chamuchpaqam ancha allita rurachqa kangi. Kananqam yumbay kaypi kanillampa Dyuspa ñawpambi. Ancham munanillampa qamta uyachuyta, nuqallkunata yach'achiwamptimki Tayta Dyus nichuchqanda, nichpa. 34 Chaymi Pidruqa pallkunata nirqan: Kananqam ancha allita yach'ani: Tayta Dyusqam mana ni pitampis sawachanchu. 35 Achwanmi yumbay laya runamkuna payta rrispitachpa kasumptinllampaqa, wambrambaq riqsin, mayqan nasyunmanda kamptimbis. 36 Jisumkristuqam yumbaypa Kamachimkuqninchiq. Dyusmi puntata paytaqa kach'amurqan isrraylinumkunaman, chumaq nutisyanda pallkunata yach'achichpa, Dyuswan alliyananllampa. 37 Qamkunaqam ancha allita yach'angi nuqallkuna isrraylinumkunampa nasyunniypi pasachqanda. Puntatam Jwan Chutichimkuq Dyus Amkrachqan Wachadurpaq yach'achimkuchpa, achka kriyiqkunata chutichirqan. Chaymandaqam Jisumkristuqa prubinsya Galiliyampi puntata yach'achimkurqan, nichpa. 38 Qamkunaqam yach'angillampampis: Taytanchiq Dyusmi Churin Jisus Nasaritmanda kaqta Santu Ispiritunda quchpa, ancha pudirniyuqta rurarqan. Chay Jisusqam allimkunatalla rurachpa kawsarqan. Kanan Tayta Dyus yanampamptinmi, achka padisiq runamkunata dyablumanda wacharqan, nichpa. 39 Jisus rurachqandaqam Jirusalimbi, tumkuy prubinsyan Judiyampi rimkachqallampa kani. Chaymi nuqallkunaqa tistigun kanillampa. Paytam kruspi klabachpa, wanchirqanllampa. 40 Piru Tayta Dyusqam kimsa diyamanda kawsachimuchpa, dijarqan nuqallkunaman rimkamkunambaq. 41 Manam yumbay runamkunamanqa rimkamkurqanchu. Achwanmi Dyusqa nuqallkunata amkrawarqan, tistigunguna kanayllampa. Chaymi nuqallkunamanlla rimkamkurqanqa. Chaqa allimpta kawsamuchqa kamptinmi, pay kimkinwan mimkuchqallampa kani, (ubaspa yamkunda) umpyachqallampa kani. 42 Paymi nuqallkunata kamachiwachqa, runamkunata kaychina yach'achinaypaq: Dyusmi Jisusta kach'amuchqa, wañuqkunampa, kawsaqkunampa juyisnin kanambaq, nichpa. 43 Kanan ancha unay tyimpumpim Dyuspaq rimaqkuna Jisuspaq kaychina nichqallampa karqan: Mayqan paypi kriyiqqam, uchangunamanda pirdunadu rin kaq, nichpa. 44 Pidru pallkunata yach'achillkamptinmi, Dyuspa Santu Ispiritunqa chamurqan chay yumbay uyaqkunaman. 45 Chaymi chay isrraylinu kriyiq masinguna chayta rimkachpaqa, ancha ispantarqanllampa. Chaqa chay runamkunatam uyarqanllampa dasitu muchuq laya rimallkunampi parlamptinllampa, Dyusta ancha alabamptinllampa. Chaymi pallkunaqa yach'arqan: Tayta Dyusqam jwiramkunatampis Santu Ispiritunda quchqa, nichpa. 47 Chaymi Pidruqa chay kriyiq isrraylinumkunata nirqan: Kay runamkunataqam mana atinchiqllampachu niyta: Ama chutimkuyllampachu, nichpaqa. Rimkay, pallkunampismi nuqanchiq isrraylinumkunachina Santu Ispirituta ch'askichqallampa, ¿manachu? nichpa. 48 Chaychina nichpaqam, Pidruqa kamachimkurqan, chutimkunanllampa Jisumkristumpa chutimbi. Chaymandaqam Pidruta ancha rrugarqanllampa, pallkunawan mas diyamkunata kidanambaq. Chaychinam karqan.
1 Ampustulkunaqam Judiyampi tiyaq isrraylinu kriyiq masingunawan yach'arqanllampa: Chay mana isrraylinu kaqkunampischi Tayta Dyus nichqambi kriyichqallampa, nichpa. 2 Wamkin isrraylinu kriyiq masingunaqam ancha munarqanllampa, yumbay kriyiqkunampa kwirpumbi siñalta rurananllampa, isrraylinumkunachina kanambaq. Chaymi Jirusalinman kutirimptinqa, Pidruta kaychina anyarqanllampa: 3 Imampaqmi richqa kangi chay mana isrraylinu kaqkunamanqa? ¡Atatay! ¿Ima pallkunawanchu mimkuchqa kangi? nichpa. 4 Chaychina anyamptinllampam, Pidruqa chay pasachqanda manyaqlla nirqan: 5 Jumpi llaqtampim kachqa kani. Chaypi Dyusman mañamkullkachpam, suq musquypichina rimkarqay syilumanda ichkimuqta suq atun jirgatachina, ch'usku puntanmanda watachqata. Ichkimurqanqam nuqa kachqayman. 6 Umkunman allita champamkuchpam, rimkarqay achka laya mana mimkuypaq animalkunata: ch'usku ch'amkiyuq animalkunata, kita animalkunata, kulibramkunata, pichqumkunata. 7 Chaymandaqam uyarqay suq rimaq kaychina niwaqta: Pidru, atarichpa, wanchichpa, mimkuy, nichpa. 8 Chaymi nuqaqa nirqay: Taytitu, manam atinichu kay laya animalkunataqa mimkuyta. Chaqa manam nunka kay mampa animalkunataqa mimkuchqachu kani, nichpa. 9 Chaymi chay syilumanda qayawaqqa niwarqan: Dyus pichachqandaqa ama mampa niychu, nichpa. 10 Chayqam chaychinalla kimsa kutinda karqan. Chaymandaqam chay jirgachinaqa kutirirqanna syiluman. 11 Chay urasmi kimsa runamkuna ch'ayamurqan chay wasi kachqayman. Pallkunatam suq furastiru runa Sasarya llaqtamanda kach'achqa karqan ampawanambaq. 12 Awnki pallkuna furastirumkuna kamptimbismi, Dyuspa Santu Ispiritun niwarqan pallkunawan rinaypaq, ama nimatampis yuyachpachu. Chaymi nuqampa pullay richqallampa kay sayis kriyiq masimkuna. Yumbay pallkunawanmi ch'ayachpa, yallkuchqallampa kani suq runampa wasinman. 13 Chay runaqam nuqallkunata kaychina parlachiwarqan: Wasiypim rimkachqa kani Dyuspa anjilninda, ñawpambi chayallkaqta. Chay anjilmi nuqata niwarqan: Kach'ay runamkunata, rinambaq Jumpi llaqtaman, ampamuq suq runa Simun chutiqta. Payllam Pidrumpis chutin. 14 Paymi chamuchpa yach'achichunqa, imatam alli ruranallki, tumkuy ayllundimki wachadu kanallkillampa , nichpa. 15 Chaymandaqam nuqa ch'ayachpa, pallkunata yach'achillkamptiy, Dyuspa Santu Ispiritun pallkunaman chamurqan, nuqanchiqkunaman chamuchqanchina. 16 Chaymi yuyachqa kani Siñurninchiq kaychina nichqanda: Allimptam Jwan Chutichimkuqqa yamkuwanlla chutichimkuchqa. Piru Dyusmi qamkunataqa rin chutichichuqllampa Santu Ispiritumba pudirninwan, chay Santu Ispiritunwanna purinallkillampa. Manam yamkuwanllachu, nichpa. 17 Chaqa nuqanchiqkunam Siñurninchiq Jisumkristumpi kriyimptinchiq, Santu Ispiritunda quwachqa kanchiq, ¿manachu? Chaychinam chay jwira runamkunatampis kimkin Tayta Dyus Ispiritunda qumptinqa, ¿pitaq nuqaqa kani ninaypaq Tayta Dyusta Ama quychu, nichpaqa? 18 Chaychina Pidru nimptinmi, chay jirusaliniru kriyiq masingunaqa uyachpa, uyararqanllampana. Chaymandaqam Dyusta ancha alabarqanllampa: Tayta Dyusqam chay mana isrraylinu kaqkunatampis yanampachqana, uchangunata dijachpa, tumkuy tyimpumpaq paywanna kawsananllampa! nichpa. 19 Kuntraqkuna Istibanda wanchichpaqam, Jisuspi achka kriyiqkunatampis qasachaqllampa. Chaymi wamkin kriyiqkunaqa Jirusalinmanda mitimkachpa, rirqanllampa prubinsya Finisyaman, prubinsya Chimpriman, Antyumkiya llaqtamambis. Waq prubinsyamkunampim pallkunaqa yach'achiqllampa Dyuspa chumaq nutisyanda isrraylinu masingunatalla. Manaraqmi yach'achiqllampachu chay mana isrraylinu kaqkunataqa. 20 Jisuspi wamkin kriyiqkunaqam chay prubinsya Chimprimanda, chay suq prubinsya Sirinimpa kampitalninmanda Antyumkiya llaqtaman rirqanllampa. Chaypiqam pallkunaqa Jisuspa chumaq nutisyanda yach'achirqan isrraylinumkunata, tumkuy chay mana isrraylinu kaqkunatampis. 21 Siñurninchiq chay yach'achimkuqkunata yanampamptinmi, achka runamkuna unay dumktrinangunata dijachpa, Jisuspina kriyirqanllampa. 22 Kriyiq masinchiq Jirusalimbi tandamkaqkunam chay famata yach'achpaqa, Birnabita kach'arqan, rinambaq Antyumkiyaman, chay muchuq kriyiqkunata rimkaq. 23 Birnabiqam waqman ch'ayachpaqa, rimkachpa Dyus pallkunata yanampachqanda, ancha kuchimkurqan. Chaymi pallkunataqa chumaqta kunarqan, tumkuy chunqu Jisusta kasuchpa kawsanambaqllampa. 24 Chay Birnabiqam ancha allin runa karqan. Chaqa Jisuspim ancha allita yuyamkurqan. Chaymi Dyuspa Santu Ispiritun chay Birnabitaqa ancha yanamparqan, allita yach'achimkumptin, achka runamkuna, warmimkuna Jisuspi kriyinanllampa. 25 Chaymandaqam Birnabiqa rirqanna Tarsu llaqtaman, Sawluta maskaq. [Nuta: Chay Sawlullam Pablumpis chutiq.] Tarichpaqam amparqan Antyumkiya llaqtaman. 26 Waqpiqam suq watata Jisuspi kriyiqkunawan tiyachpa, achka runamkunata, warmimkunata yach'achirqanllampa. Waq Antyumkiya llaqtampim Jisumkristumpi kriyiqkunampaqqa puntata Kristyanumkuna, nirqanllampa, Kristumpi kriyichqanllamparallku. 27 Chay tyimpumpim Dyuspaq wamkin rimaqkuna, Jirusalinmanda rirqan Antyumkiyaman. 28 Suqninmi chutirqan Agabu. Paymi richpa, kriyiq masingunampa ch'awpimbi chayachpa, Dyuspa Santu Ispiritun yanampamptin, nirqan: Tumkuy maypim ambruna rin kaq, nichpa. Chaqa allibmi ambrunaqa karqan Rrumampa gubyirnun Klawdyu kamachimkuchqan tyimpumpi. 29 Chaymi Jisuspi kriyiqkunaqa chay Antyumkiya llaqtampi parlachpa, tandarqanllampa qallayta, kach'anambaqllampa prubinsya Judiyampi tiyaq kriyiq masinchiqkunaman. Yumbaymi atichqangaman qallayta qurqanllampa. 30 Chaychina ufrinda qallayta tandachpam, Birnabita, Sawluta quchpa, kach'arqanllampa, prubinsya Judiyampi tiyaq kriyiqkunampa yach'achimkuq ansyanungunata qunambaq.
1 Chay tyimpumpim gubyirnu Irudisqa ancha qasacharqan Jisuspi wamkin kriyiqkunata. 2 Jwamba masan Jamkubutam atun kuchilluwan wanchichirqan. 3 Chay mana kriyiq isrraylinumkunaqam ancha gustarqan chay wanchichqanqa. Chaymi chay Irudisqa kamachimkurqan Pidrutampis prisuchpa, karsilman ampananllampa. Chaychinam Irudisqa rurarqan Paskwa fyistampa tyimpumbi. Chay fyistampiqam mana libadurayuq tandata mimkuqllampa. 4 Chay Irudismi Pidruta prisuchichpa, karsilman wichuchpa, 16 suldadumkunata kamachirqan, ch'usku ch'usku kambyanamkuchpa, punchawnindin, tutampnindin allita kwidanambaqllampa. Chaqa Irudisqam yuyarqan Paskwa fyista pasamptin, yumbaypa ñawpanman Pidruta ampanambaq, chaypi dimklarachichpa, wanchinambaq. 5 Chaychina karsilpi suldadumkuna allita kwidallkamptinmi, Jisuspi kriyiqkunaqa Dyusman mana challkuq tumkuy chunqu mañamkullkarqanllampa Pidrumpaqqa. 6 Chaymandaqam Pidruta dimklarachinan diya ch'ayamullkamptinqa, chay ultimu tuta Pidruqa karsilpi puñullkarqan ichkay suldadumkunampa ch'awpimbi. Alli alli ichkay kadinawan chay suldadumkunampi watadu karqan. Wamkin suldadumkunaqam karsilpa pungunda kwidallkarqanllampa. 7 Piru Dyuspa suq anjilninmi rimkamkurqan chay karsilpi. Chaymi limpu achimkchamkurqan umkumpiqa. Chay anjilqam Pidruta kustillanmanda kuyuchichpa, rimkch'achichpa, nirqan: Kanalitan atariy, nichpa. Chaychina nimptinllam, Pidrumpa mamkingunamanda kadinamkunaqa das ichkirqan. 8 Chaymandaqam anjilqa nirqan: Wach'umkullkita allichay; llanqamkita ruramkuy, nichpa Chaychina Pidru allichamkamptinqam, anjilqa nirqan: Kampallkita ruramkuchpa, chamuy imkiyta, nichpa. 9 Chaymi Pidruqa anjilpa imkindana lluqchirqan. Piru payqam mana yach'arqanchu: ¿Allimptachu lluqchillkani ichu musquypichina rimkallkani? nichpa. 10 Piru Pidruqam chay anjilwanqa suldadumkunampa ch'awpinda pasarqan. Chaymandaqam mas ñawpaman richpaqa, suq suldadumkunampa ch'awpindampis pasarqan. Chaychinam ch'ayarqanllampa karsilpa sawa pungunman. Chay jirrumanda atun punguqam gustunlla kich'amkarqan. Chaymi lluqchichpaqa, chay anjilqa Pidruwan sawa ñandana rirqan. Achla karumkaq ampachpaqam, sampalandana Pidrutaqa dijarqan. 11 Chaymi Pidruqa yuyarqan: Kananqam yach'ani: Allimptam Dyusqa anjilninda kach'amuchqa, Irudismanda, yumbay chay isrraylinu masillkunamanda wachawanambaq, nichpa. 12 Chaychina ancha yuyachpaqam, Pidruqa rirqan Jwamba maman Maryampa wasinman. Chay Jwanllam Markuspis chutiq. Chay wasimpim ancha achka kriyiq masimkuna tandamkachpa, Pidrumpaq Dyusman mañamkullkarqan. 13 Pidruqam chay wasiman ch'ayachpaqa, punguta tamkarqan. Chayta uyachpaqam, suq china Rrudi chutiq kallparqan champamkuq: ¿Piraq punguta tamkallkan? nichpa. 14 Chay chinaqam rimayninmandalla Pidruta riqsichpa, ancha kuchimkurqan. Chaymi manaraq ni punguta kich'achpachu, kallparqan Jisuspi kriyiqkunata abisaq: Kaypinam Pidruqa! nichpa. 15 Chaymi chinataqa mana kriyichpachu nirqanllampa: Lumka imach' kangi, nichpa. Piru chinaqam nirirqan: Allibmiri kaypina Pidruqa, nichpa. Pallkunaqa nirqanllampa: Manam paychu. Chayqach'i anjilnin ima, nichpa. [Nuta: Pallkunaqam yuyarqanllampa: Pidruta kwidaq anjil ichu Pidrumpa almanch'i chamuchqa, nichpa.] 16 Chaychina pallkuna ninangamanqam, Pidruqa pungutaqa tamkallkarqanlla. Chaymi pallkuna punguta kich'achpa, payta rimkachpaqa, ancha ispantarqanllampa. 17 Chaymi Pidruqa mamkinwan siñiyarqan uyarananllampa. Chaymandaqam pallkunataqa nirqan: Kaychinam Tayta Dyusqa karsilmanda surquwachqa. Kay nichuchqayllampata niyllampa Jamkubuta, yumbay kriyiq masinchiqkunata, nichpa. Chaychina nichpaqam, Pidruqa suq lugarmanna rirqan. 18 Chaymandaqam achimkyallkamptinna, chay suldadumkunaqa Pidru chunchana kamptinqa, mana imanayta atichpallampaqa, pallkunampura anyanamkurqan. Chaqa manam atirqanllampachu yach'ayta: Maypinam Pidruqa, nichpa. 19 Chaymi chay Irudisqa kamachimkurqan, Pidruta maskanambaqllampa. Manana atimptinllampa tariytaqam, Irudisqa kamachimkurqan, wanchinanllampa chay kwidamkuq suldadumkunata, Pidru chingachqanrallku. Chaymandaqam chay gubyirnu Irudisqa chay prubinsya Judiyamanda lluqchichpa, ura Sasarya llaqtaman rirqan tiyaq. 20 Chay gubyirnu Irudispa nasyunnimba ladumbim ichkay llaqtamkuna karqan. Suqmi chutirqan Tiru. Suqqam chutirqan Sidun. Chay llaqtamkunampi tiyaqkunawanmi Irudisqa piñamkuchqa karqan. Piru chay ichkay llaqtampi tiyaqkunaqam ancha munarqanllampa paymanda mimkunata randiyta. Chaymi Irudispa suq yanampamkuqnin Blastu chutiqwan yanasamkarqanllampa, pay yanampamptin, atinanllampa Irudiswan alliyayta. 21 Chaymi Irudisqa chay kuntrangunata ari nirqan, suq diya paywan parlanambaqllampa. Chay diya ch'ayamptinqam, payqa ancha chumaqta mudamkuchpa, dispachumbi kamachimkunan trunumbi tiyallkarqan. Chaymandaqam ancha unayta rimarqan, yumbay pallkuna uyanambaq. 22 Chaymi chay uyaqkunaqa ancha jwirtita nirqanllampa: Kay Irudisqam mana yanqa runallachu! ¡Achwanmi payqa suq dyus! nichpa. 23 Chaychina nimptinllampaqam, Irudisqa Dyusta mana alabachpachu, payna ancha pudirniyuqpaq tumkurqan. Chaymi Dyuspa anjilninqa suq nanayta Irudista qumptin, kuruchpana, wañurqan. 24 Piru chay tyimpumpim Dyuspa chumaq nutisyanqa ancha chimkwamkarqan, tumkuy maypi Jisuspaq yach'achimkumptinllampa. 25 Chaymandaqam Birnabi Sawluwan chay ufrindata intrigachpa, Jirusalin llaqtamanda lluqchichpa, Antyumkiya llaqtamanna kutirirqanllampa, pullan ampachpa Jwanda. Payllam Markuspis chutiq.
1 Antyumkiya llaqtampi tandamkaq kriyintimkunamandaqam karqan Dyuspaq rimaqkuna, yach'achimkuqkunampis. Pallkunaqam chutiqllampa: Birnabi, Simun. Chay Simunllam Yanitampis chutiq. Karqambismi suq runa Sirini llaqtamanda Lusyu chutiq. Suqqam chutiq Manayin. Payqam Galiliyampa gubyirnun Irudispa pullan uywamkachqa karqan. Suqqam karqan Sawlu (Pablu). 2 Suq diyam pallkunaqa ayunachpa, Tayta Dyusta adurallkarqanllampa. Chaypim Dyuspa Santu Ispiritunqa pallkunata nirqan: Amkrayllampa Birnabita, Sawlutampis, nuqampaq yach'achimkunan. Chaqa nuqam pallkunata amkrachqa kani, nichpa. 3 Chaymi chay karguyuqkuna masta ayunachpa, Dyusman mañamkuchpa, Birnabimpa, Sawlumpa sawambi mamkinllampata rurachpa, pallkunampaq Dyusman mañamkurqanllampa. Chaymandaqam pallkunata dispidirqanllampa, rinanllampana yach'achimkuq. 4 Chaymandaqam Dyuspa Santu Ispiritun pallkunata kamachimptin, Birnabiqa Sawluwan rirqanna Silusya llaqtaman. Waqmandaqam yamkumpi puriq barkumpi mar yamkumpa ch'awpinda pasarqanllampa yamkumpa ch'awpimbi isla allpa Chimpri chutiqman. 5 Chay prubinsya Chimprimpa Salamina llaqtanman ch'ayachpaqam, sinaguga wasimkunaman richpa, chaypi Dyuspa chumaq nutisyanda yach'achimkurqanllampa. Jwan Markusmi pullanllampa rirqan pallkunata yanampachpa. 6 Chay Chimprimpa yumbay llaqtangunaman richpam, yach'achimkuchpa, ch'ayarqanllampa Pafus llaqtaman. Chaypiqam pallkunaqa tingunamkurqan suq isrraylinu Barjisus chutiqwan. Payqam bruju karqan. Dyuspaq rimaq tumkuchpam, llullamkuchpa rimaq. 7 Chay brujuqam kallkarqan gubirnadur Sirjyu Pawluwan. Chay gubirnadurqam ancha yach'ayniyuq runa karqan. Paymi Birnabita, Sawluta munarqan uyayta, Dyuspaq yach'achimkumptin. Chaymi pallkunataqa qayachirqan. 8 Chay bruju Barjisusmi grigu rimaypi Ilimas chutiq. Paymi Birnabita Sawluta kuntrarqan, chay gubirnadur ama kriyinambaq Jisuspi. 9 Chaymi Sawlu (payllam Pablumpis chutiq), Dyuspa Santu Ispiritunwan kachpa, chay brujuta ancha champachpa, nirqan: 10 Qam mana allin runa llullamkuqqam dyablumpa churin kangi! ¡Allin kaqkunatam kuntrangi! ¿Imampaqmi qamqa Dyus nichqandaqa munangi dañachiyta? 11 Chayta rurachqallkirallkum, kananqa Dyus rin kastigachuq. Suq tyimpumpaqmi manana ringichu rimkaq ni rumpayta, nichpa. Chaychina nimptinllam, chay brujuqa sarkuna kidarqan. Chaymi maskarqan suq runata, rambachpa ampanambaq. 12 Pablu rurachqanda rimkachpaqam, chay gubirnadurqa Jisuspina kriyirqan. Kanan Dyuspaq yach'achimkumptinqam, ancha ispantachqata uyarqan. 13 Pafus llaqtamandam Pabluqa paywan kaqkunawan yamkumpi puriq barkuman lluqchichpa, rirqan prubinsya Panfilyampa Pirji llaqtanman. Piru Jwan Markusqam pallkunamanda amkramkachpa, kutirqanna Jirusalinman. 14 Chaymandaqam pallkunaqa chay Pirji llaqtamanda rirqanllampa prubinsya Pisidyampa Antyumkiya llaqtanman. Chaypim samana diyampi sinaguga wasiman yallkuchpa tiyarqanllampa. 15 Chaypi kaqkunaqam Muysispa librungunata Dyuspaq suq rimaqkunampa librungunata liyillkarqanllampa. Chaymandaqam chay sinaguga wasimpa kamachimkuqninguna Pabluta, Birnabita nirqanllampa: Masitamkuna, munachpa imata kunawaytaqar kanalitanna niwayllampa, nichpa. 16 Chaychina nimptinllampam, Pabluqa atarichpa mamkinwan siñiyachpa uyanambaqllampa, nirqan: Uyawayllampa, llaqta masiy isrraylinumkuna, Dyusta aduraq furastirumkunampis. 17 Taytanchiq Dyusmi unay isrraylinumkunata amkrarqan, suq atun nasyun kanambaqllampa. Pallkuna Ijimptu nasyumbi furastiruchina tiyamptinllampam, ancha achkayachirqan. Chaymandaqam chay Ijimptumanda pallkunata pudirninwan surqurqan. 18 Chuncha lugarkunampim chay agwilunchiqkunata 40 watamkunata agwantarqan, mana allimkunata ruramptinllampampis. 19 Kanayambim syiti nasyunguna karqan. Chay nasyungunatam Tayta Dyusqa chingachirqan, unay agwilunchiq isrraylinumkunata partinda qunambaq, chaypi tiyanambaqllampa. 20 Chaymandaqam juyiskunata numbrarqan, 450 watamkunata chay unay isrraylinumkunata rimkanambaq, Dyuspaq rimaq Samwil kamachimkunangaman. 21 Chaymandaqam Dyusman mañamkurqanllampa, amkranambaq suq gubyirnuta, pallkunata kamachinambaq. Chaymi Dyusqa gustunllampata rurachpa, numbrarqan Sawul chutiqta, 40 watampaq gubyirnun kanambaq. Chay Sawulqam Binjamin atun ayllumanda karqan. Payqam Sispa churin karqan. 22 Chaymandaqam Tayta Dyusqa Sawulta kargunmanda surquchpa, Dabidta numbrarqan, gubyirnu kanambaq. Dyusqam chay Dabidpaq nirqan: Tarichqam kani Isayimpa churin Dabidta. Payqam nuqawan suq yuyayniyuq. Chaymi paywan ancha kuchimkuni. Tumkuy ima munachqaytam rin ruraq, nichpa. 23 Chay kimkin Dabidpa karu willkangunamandam Jisusqa nasirqan, nuqanchiqkunata wachawananchiq. Chaychinam Tayta Dyusqa chay unaymandampacha ufrisimkuchqanda kumplichqana. 24 Manaraq Jisus yach'achimkumptinmi, Jwan Chutichimkuq isrraylinumkunata puntata yach'achirqan, tumkuy ima uchangunata dijachpa, chutimkunanllampa. 25 Yaqqana wañunan tyimpu ch'ayamumptinmi, Jwanqa kaychina yach'achimkurqan: Manam qamkuna yuyachqallkichina Wachadurchu kani. Kanangunaraqmi chay ancha pudirniyuq Wachadurqa rin chamuq. Paypa ñawpambiqam mana nimachu kani. Chaymi nillkillampa: Manam balinichu ni kriyadunchina llanqamba watunda paskanaypaq nichpa. 26 Pabluqam nirqambis: Abrajamba karu willkan masitallkuna, yumbay qamkuna Taytanchiq Dyusta aduraqkunatam kaychina nillkillampa, wachadu kanallkillampa: 27 Jirusalin llaqtampa kamachimkuqninguna achka llaqta masingunawambismi mana yach'arqanllampachu: Jisusmi Wachadurninchiq, nichpaqa. Chaqa tumkuy samana diyampim sinaguga wasimkunampi Dyuspaq rimaqkuna iskibrichqanda liyichpampis, pallkunaqa mana intyindirqanchu. Chaymi Jisusta sintinsyarqanllampa wanchinanllampa. Piru chaychina ruramptinllampaqam, kumplirqan Dyuspaq rimaqkuna iskibrichqanqa. 28 Chaqa chay kuntraqkunam mana nima uchata tarichpampis, Pilatuta mañarqanllampa, Jisusta wanchinambaq. 29 Chaychinam Dyuspa Santu Librumbi Jisuspaq nichqa karqan: Dyus Amkrachqan Wachadurtam rinllampa wanchiq, nichpa. Allibmi chay nichqan kumplimptin, Jisuspa kwirpunda krusmanda ichkichichpa pambarqanllampa. 30 Chaychina pallkuna wanchimptimbismi, Tayta Dyusqa Jisusta wañuchqanmanda kawsachimurqan. 31 Chaymandaqam Jisusqa kutin kutin yach'amkuqningunaman rimkamkurqan. Pallkunaqam Galiliyamanda Jirusalinman Jisuswan chamuchqallampa karqan. Kananqam runamkunata, warmimkunata Jisuspaq yach'achinllampa. 32 Chaymi nuqallkuna chamuchqallampa kani yach'achichuqllampa kay chumaq nutisyata, Tayta Dyus unay agwilunchiqkunata ufrisichqanda. 33 Pallkunampa karu willkangunam kanchiqllampa. Chaymi Tayta Dyusqa pallkunata ufrisichqanda nuqanchiqkunata kumpliwanchiq, Jisusta wañuchqanmanda kawsachimuchpa. Chayrallkum Salmu ichkaypi Taytanchiq Dyusqa Jisusta kaychina nin: Qamqam Churiy kangi. Nuqaqam kananqa kamachuchqa kani, kwirpuyuq nasinallki, nichpa. 34 Dyusmi Churin Jisusta wañuchqanmanda kawsachimurqan, kwirpun ama ismunambaq. Chaymi Dyuspa Santu Librumbi kaychina nin: Qamkunatam rini quchuq chay Dabidta ufrisichqaytaqa, nichpa. 35 Chayrallkum suq salmumpimpis Dabidqa Dyusta nirqan: Manam ringichu dijaq chay ancha kuyachqallki sirbichuqpa kwirpun ismunambaqqa, nichpa. 36 Dabidmi chay tyimpumbi Dyus nichqanda kasuchpa, achka runamkunata yanamparqan. Chaymandaqam wañumptinqa, kwirpunda pambarqanllampa agwilungunampa ladumbi. Chaypinam Dabidpa kwirpunqa ismurqan. 37 Piru Jisusqam mana chaychinachu karqan. Achwanmi Taytanchiq Dyus payta kawsachimumptin, paypa kwirpunqa mana ismurqanchu. (Chaymi yach'anchiq: Dabidmi iskibrirqan Jisuspaq, nichpa.) 38 Masitamkuna, kay chumaq nutisyata nillkillampa: Jisusmi wañuchqa, uchallkimkunamanda pirdunachunan, nichpa. 39 Piru Muysispa liyningunataqam mana atichqallampachu kanchiq kumpliyta, uchanchiqkunamanda wachamkananchiqqa. Piru kananqam Jisuspi kriyimptinchiqllampa, payqa pirdunawanchiqllampa. 40 Kwidawkich Tayta Dyusqa qamkunata kastigachungiman chay unay malu runamkunatachina. Chaqa Dyuspaq rimaqkunam chay uchayuqkunampaq kaychina iskibrichqa Dyus nichqanda: 41 Uyamkuyllampa qamkuna mana kriyiqkuna, grasyampi pasaqkuna. Nuqam milagrumkunata rurachaq qamkuna mana nunka rimkachqallkita, rimkachpa ispantanallkillampa. Piru mayqan runa chay rurachqaypaq yach'achichumptimbismi, mana ringillampachu kriyiq. Chaymi ringillampa chingaq, nichpa. 42 Chaymandaqam Pabluqa yanasungunawan (yanasangunawan) sinaguga wasimanda lluqchimptinqa, chay mana isrraylinu kaqkunaqa pallkunata rrugarqanllampa: Qaya samana diyampis nuqallkunata yach'achiriway, nichpa. 43 Uchyamkamptin chay rriyuñun, achka isrraylinumkuna, furastirumkunampis tandamkarqanllampa Pabluman Birnabiman. Chay furastirumkunaqam isrraylinumkunampa dumktrinambi ancha allita kriyichqallampa karqan. Yumbay chay tandamkaqkunatam Pabluwan Birnabiqa ancha kunarqan, Dyuspi mana challkuq yuyamkunanllampa: Ancha allin kachqanrallkum kuyawanchiqllampa nichpa. 44 Qayandin samana diyampiqam chay llaqtampi yaqqa yumbay tiyaqkunaqa tandamkarqanllampa, Dyus nichqanda uyanambaq, Pabluwan Birnabi yach'achimkumptin. 45 Chay yach'achimkuq isrraylinumkunaqam, achka runamkuna tandamkaqta rimkachpaqa, Pabluwan Birnabita ancha imbidyarqanllampa. Chaymi ancha kuntrachpa, Pabluta musyarqanllampa: Manam chaychinachu. Kaychinaraqmi. Qamqam mana nimatampis yach'angichu, nichpa. 46 Chaymi Pabluqa Birnabiwan mana nimata manchachpachu, pallkunata nirqan: Allim kachqa, Dyus nichqanda puntata qamkuna isrraylinu llaqta masillkunata yach'achichunaypaq. Lumkismi qamkunaqa Dyuspa chumaq nutisyambaq yach'achichumptiyqa, malpaq piskangillampa. Chaychina rurachpaqam, qamkunaqa alabis nillkangillampa: Manam munanichu muchuq bidampi Dyuswan tumkuy tyimpu kawsayta nichpa. Chaymi kananqa chay mana isrraylinu kaqkunata rini yach'achiq. 47 Taytanchiq Dyusmi nuqallkunata kaychina kamachiwachqa: Nuqam qamta suq michatachina rurachuchqa kani. Chayri riy yumbay nasyungunaman, chumaq nutisyayta yach'achimkuq, nuqampi kriyimptinllampa, uchangunamanda wachanaypaq, nichpa. 48 Chayta uyachpaqam, chay mana isrraylinu kaqkunaqa ancha kuchimkuchpa nirqanllampa: Tayta Dyus nichqanqam ancha allin, nichpa. Chaymi pallkunaqa ancha kriyirqanllampa Dyus nichqanda. Chaqa Dyusmi pallkunata amkrachqa karqan, muchuq bidampi paywan tumkuy tyimpu kawsananllampa. 49 Chaychinam Dyuspa chumaq nutisyanda pallkuna yach'achimkurqan tumkuy chay llaqtamkunampi. 50 Piru chay isrraylinumkunaqam wamkin warmi Dyuspi kriyiqkunata, wamkin karguyuq runamkunatampis llullamkuchpa willarqanllampa, piñamkunambaq Pabluwan Birnabiwan. Chaymi pallkunataqa ancha qasacharqanllampa, chay llaqtamanda qatinangaman. 51 Qatimptinllampaqam, Pabluwan Birnabiqa chay llaqtamanda lluqchichpa, llanqanllampamanda chay llaqtampa allpanda ch'ampsirqanllampa. (Chaytam rurarqanllampa, yumbay yach'anambaq: Mananam nima kwintayuqchu kanillampa qamkunawanqa, nichpa.) Chaymandaqam rirqanllampa Imkuñu llaqtamanna. 52 Piru Jisuspi chay muchuq kriyiqkunaqam Dyuspa Santu Ispiritunwan chunqunllampampi unda kachpa, ancha kuchimkurqanllampa.
1 Imkuñu llaqtampiqam Pabluqa Birnabiwan yallkurqan sinaguga wasiman. Chaypi pallkuna yach'achimkumptinmi, achka isrraylinumkuna, furastirumkunampis Jisuspi kriyirqanllampa. 2 Piru wamkin mana kriyiq isrraylinumkunaqam yanqamkunata rimachpa, ingañarqanllampa chay furastirumkunata, Jisuspi kriyiqkunata kuntranambaqllampa. 3 Piru Pabluwan Birnabiqam mana pitampis manchachpachu, achwan Tayta Dyuspi allita yuyamkuchpa, achka diyamkunata kidarqanllampa yach'achimkuchpa. Kanan Tayta Dyusqam pallkunata ancha yanamparqan, milagrumkunata ruranambaq, yumbay runamkuna yach'anambaq: Allibmi Taytanchiq Dyusqa kuyawanchiq. Allibmi Dyusqa pallkunata yanampan, paypaq yach'achimkunanllampa, nichpa. 4 Lumkismi chay Imkuñumpi tiyaqkunaqa wamkinqa isrraylinumkunawan piskamkarqanllampa. Wamkinnataqmi ampustulkunata sawacharqanllampa. 5 Chaymandaqam chay isrraylinumkuna wamkin furastirumkunawan tandamkarqanllampa awturidarkunawan, Pabluta, Birnabita anyachpa, rumimkunawan sitachpa wanchinanllampa. 6 Piru chayta yach'achpaqam, chay ampustulkunaqa mitimkachpa, rirqanllampa prubinsya Limkuñampa kay llaqtangunaman: Listraman, Dirbiman, tumkuy rridurnin kasiriyungunaman. 7 Yumbay chay llaqtamkunampim pallkunaqa yach'achimkurqanllampa Dyuspa chumaq nutisyanda. 8 Listra llaqtampim tiyarqan suq kuju runa. Nasichqan diyamandampacham mana nimatampis atirqanchu puriyta. Chaymi Pablu yach'achimkumptinqa, tiyachpalla payqa uyamkullkarqan. Kanan Pabluqam chay kujuta champachpa yuyarqan: Kay runaqam Dyuspi ancha kriyin. Chaymi atin kach'amkayta, nichpa. 10 Chaychina yuyachpaqam, jwirtita rimachpa nirqan: Mayñ, dirichu chayay! nichpa. Chaymi chay kujuqa das brinkachpa, chayachpa, purirqanna. 11 Chaymi chaypi kaqkunaqa Pablu rurachqanda rimkachpa, ancha jwirtita rimaynimbi nirqanllampa: Dyuskunam runamkunampaq timkramkachpa, syilumanda chamuchqallampa nuqanchiqkunaman, nichpa. 12 Chaymi Birnabimpaq nirqanllampa: Payqam mas pwidiq dyusninchiq Jumpitir. Pablumpaqqam, ancha rimachqanrallku, nirqanllampa: Payqam dyusninchiqkunampaq rimaq dyus Mirkuryu, nichpa. 13 Chay Listra llaqtampa yallkunambim karqan chay dyusnin Jumpitirpa adurana wasin. Chaymi chay dyus Jumpitirpa kuranqa turumkunata, tumktumkunata amparqan chay adurana wasiman, chay turumkunata wanchichpa, Pabluta, Birnabita adurananllampa. 14 Chaymi Birnabiwan Pabluqa chayta yach'achpa, ancha malaganayachpa, mudanan ruramkullkachqanda llimkirqanllampa. Chaymandaqam chay runamkunampa umkunman kallpachpa, ancha jwirtita kaychina nirqanllampa: 15 Taytitumkuna, imampaqmi kaytaqa munangillampa rurawayta! Nuqallkunaqam qamkunachina runamkunalla kanillampa. Chamuchqallampam kani qamkunata willachuq chay amitu layamkunampaq. Pallkunaqam mana nimampaq balinllampachu. Chay mana baliq dyuskunata dijachpana, Tayta Dyus kawsaqtalla kasuyllampa. Chaqa payqam syiluta, kay pachata, yamkumkunata, tumkuy ima kaqkunata rurachqa. Chayri paytalla adurayllampa. 16 Unay tyimpumkunampim Tayta Dyusqa runamkunata dijarqan, pallkuna munachqanda rurachpa purinanllampa. 17 Chaychina dijachpampismi, pallkunataqa allimkunata rurachpa, yach'achirqan: Kaychinam ancha allin kani, nichpa. Chaymi tamyata kach'amun; mimkunanchiqta puquchin, ama mallaq kawsananchiqllampa, achwan kuchimkuchpa, kawsananchiqllampa, nichpa. 18 Chaychina nichpampismi, ancha trabajus karqan, pallkunata dijachinambaq, ama chay turumkunata wanchichpa adurananllampaqa. 19 Chaymandaqam wamkin isrraylinumkuna Antyumkiyamanda, Imkuñumanda ch'ayachpa chay Listra llaqtaman, inkitarqanllampa chay listranumkunata, Pabluta ch'iqninanllampa. Chaymi chay runamkunaqa kuntranna alsamkachpa, rumimkunawan ancha sitarqanllampa, Pabluta wanchinanllampa. Chaymandaqam Pabluqam wañuchqana nichpa, rrastramkuchpa, amparqanllampa chay llaqtampa sawa chunchanman wichumkuq. 20 Wichumkuchpa rimptinllampaqam, Jisuspi kriyiqkunaqa tandamkarqan chay Pablu kachqanman. Rridurnimbi kallkamptinllampam, Pabluqa atarirqan. Chaymandaqam kutirqanna chay llaqtaman. Qayandinqam Birnabiwan Dirbi llaqtaman rirqan. 21 Waq Dirbimpiqam Pablu Birnabiwan Dyuspa chumaq nutisyanda yach'achimkumptinqa, achka runamkuna, warmimkuna Jisumkristumpi kriyirqanllampa. Chaymandaqam chay ampustulkunaqa kutirqanllampa Listraman, Imkuñuman, Antyumkiyaman. 22 Chay llaqtamkunampiqam kriyiq masingunata kunachpa animachirqan, Dyusta allita kasunanllampa, paypi allita yuyamkuchpa kawsananllampa. Pallkunatam nirqambis: Syiluman rinanchiq Dyuswan tiyaqqam, kay bidampiqa ancha rinchiqllampa padisiq, nichpa. 23 Chay purichqanllampa llaqtamkunampim allin runamkunata numbrarqanllampa, Jisuspi kriyiqkunampa yach'achimkuq ansyanunguna kanambaqllampa. Chaymandaqam ayunachpa, Jisumkristuman mañamkurqanllampa, chay ansyanumkunata yanampanambaq, chumaqta kawsananllampa. Chaqa paypi kriyichqallampa karqan. 24 Chaymandaqam prubinsya Pisidyata pasachpa, ch'ayarqanllampa prubinsya Panfilyaman. 25 Pirji llaqtampimpismi yach'achimkurqan Dyuspa chumaq nutisyanda. Chaymandaqam Atalyamanna rirqanllampa. 26 Waqmandaqam yamkumpi puriq barkumpi mar yamkuta pasachpa, prubinsya Siryampa Antyumkiya llaqtanman ch'ayarqanllampa. Chay llaqtampi tiyaq kriyiq masingunam Pabluta, Birnabita numbrachqallampa karqan, chay karu nasyungunaman rinanllampa, Dyus nichqanda yach'achimkuq. Chaychina numbrachpaqam, Dyusman mañamkuchqallampa karqan, tumkuy imampi pallkunata yanampanambaq. Chaymi chay tariyata uchyachpaqa kutirqanllampana. 27 Chaymandaqam chay Antyumkiyaman ch'ayachpaqa, Jisuspi kriyiqkunata tandachpa, manyaqlla parlachirqan pallkunawan tumkuy ima Dyus rurachqanda. Parlachirqambismi Dyus chay mana isrraylinu kaqkunata yanampachqanda, paypi kriyinanllampa. 28 Chaymandaqam Pabluqa Birnabiwan chay Antyumkiyampina Jisuspi kriyiqkunawan tiyarqan achka tyimputa.
1 Chay tyimpuqam wamkin runamkuna richqa karqan prubinsya Judiyamanda Antyumkiya llaqtaman. Waqpiqam Jisuspi kriyiqkunata kaychina yach'achirqanllampa: Muysis kamachimkuchqanda kasuchpa, kwirpullkimpi chay siñalta rurayllampa, atinallkillampa wachamkayta, nichpa. 2 Chaymi chaychina pallkuna yach'achimkumptinqa, Pabluwan Birnabiqa chay siñalta ruraqkunawan anyanamkurqanllampa. Chaypaqmi chay Antyumkiyanu kriyiq masimkunaqa tandanamkuchpa, Pabluta, Birnabita, wamkin kriyiqkunatampis kach'arqanllampa, rinambaq Jirusalinman, ampustulkunata, yach'achimkuq ansyanumkunata tampuq chay siñalpaq. 3 Kach'amptinllampaqam, Jirusalinman riqchinaqa, prubinsya Finisyampi, prubinsya Samaryampi kriyiq masingunata watumkuchpa, nirqanllampa: Chay mana isrraylinu kaqkunampismi unay kriyichqanllampata dijachpana, kananqa Siñurninchiq Jisuspina kriyichqallampa, nichpa. Chayta yach'achpaqam, chay Finisyampi, Samaryampi tiyaq kriyiqkunaqa ancha kuchimkurqanllampa. 4 Chaymandaqam Pabluwan Birnabi Jirusalinman ch'ayamptinllampaqa, chaypi tandamkaq kriyiq masinguna, chay ampustul masinguna, chay yach'achimkuq ansyanumkunampis ancha allita ch'ayachirqanllampa. Chaymandaqam Pabluqa Birnabiwan manyaqlla pallkunata parlachirqan: Kaychinam Tayta Dyus tumkuy imampi ancha yanampawachqallampa, nichpa. 5 Piru wamkin farisiyu dumktrinayuqkunaqam Jisuspina kriyichqallampa karqan. Pallkunaqam das chayachpa, nirqanllampa: Chay mana isrraylinu kriyiq masinchiqkunaqam kwirpunllampampi chay siñalta ruranqallampa. Kanan kamachichun, Muysispa yumbay liyningunata kasunanllampa, nichpa. 6 Chaychina nimptinllampaqam, ampustulkunaqa yach'achimkuq ansyanumkunawan tandamkachpa, parlarqanllampa chay farisiyumkuna nichqambaq. 7 Chaymi suqnin suq layata, suqnin suq layata ancha ninamkumptinllampa, Pidruqa atarichpa nirqan: Masitamkuna, qamkunaqam nuqampaqqa ancha allita yach'angillampa: Tayta Dyusmi amkrawarqan, chay mana isrraylinu kaqkunaman richpa, yach'achinaypaq paypa chumaq nutisyanda, pallkunampis Jisuspi kriyichpa wachadu kananllampa. 8 Tayta Dyusqam yumbaypa chunqunda riqsin. Payqam ch'askichqana chay mana isrraylinu kaqkunatampis. Chayta yach'ananchiqllampam, pallkunatampis Santu Ispiritunda quchqa nuqanchiqkunatachina. 9 Dyusqam mana nuqanchiqkunampaqllachu. Payqam nuqanchiqkunata kuyawachqanchiqchina, chay suq nasyungunamanda kaqkunatampis kuyan. Chaymi chay furastirumkuna paypi kriyimptinllampa, pallkunampa chunqundampis uchangunamanda pichachqana. 10 Chaychina kimkin Taytanchiq Dyus chay furastirumkunata ch'askimptinqa, ¿imarallkum qamkunaqa pallkunata mana munangillampachu ch'askiytaqa? ¿Chaychinaqachu qamkunaqa Dyusta munangillampa kuntrayta? Chaqa Muysispa liyningunaqam suq ancha llachaq trastichina kachqa nuqanchiqkunampaq chay unay agwilunchiqkunampaqpis. Chaymi mana atichqallampachu kanchiq kumpliyta. Chaychina kamptinqa, ¿imarallkum chay ancha llachaqta munangillampa quyta Jisuspi chay muchuq kriyiqkunataqa? 11 Achwanmi nuqanchiqkuna Jisuspi kriyimptinchiqqa, payqa ancha allin kachpa, dibaldilla wachawanchiq, ¿manachu? Chaychinallam chay mana isrraylinu kaqkunatampis dibaldilla wachan. 12 Chaychina Pidru nimptinmi, pallkunaqa yumbay uyararqanllampa. Kanan allita uyarqanllampa Birnabi Pabluwan kaychina parlachqanda: Tayta Dyusmi nuqallkunawan kay milagrumkunata rurachqa chay mana isrraylinu kaqkunampi, nichpa. 13 Chaychina parlayta uchyamptinllampaqam, Jamkubuqa nirqan: Masitamkuna, uyawayllampa. 14 Simun Pidruqam parlachiwachqana kanchiq imachinam Tayta Dyus puntata chay mana isrraylinu kaqkunata amkrachqa, wambranguna kanambaq, nichpa. 15 Dyuspaq rimaqkuna nichqanchinam allimp kachqa. Chaqa Santu Librumbiqam Dyusqa kaychina nin: 16 Tumkuy ima pasamptinmi, kutirichpa allicharichaq unay gubyirnu Dabidpa bulamkachqan wasinda, paypa karu willkan kamachimkunan Isrrayilpi. Achla kidachqanmandam muchuqmanda alsarichaq. 17 Chay mana isrraylinu kaqkunatampismi animachichqa kani, nuqata maskawananllampa. Chaqa pallkunampismi nuqampi rinllampa kriyiq, nichpa. 18 Chaychinam Tayta Dyusqa challkunata yach'achiwachqa kanchiq unay tyimpumandampacha, nichpa. 19 Chaymi nuqaqa nini, chay mana isrraylinu kaqkuna, unay mana baliq kriyichqangunata dijachpa, Tayta Dyusta kasumptinllampaqa, amana piñachichunllampachu. Amana kamachichunchu, yumbay liyninchiqkunata kasunanllampaqa. 20 Achwan suq kartata iskibrichpa, pallkunaman kach'achun, kamachichpa, ama mimkunambaq amitu layamkunampaq mimkuna rurachqanda; warmimkuna runanwanlla puñunanllampa, ullqumkunampis warminwanlla puñunanllampa, ama ni mimkunanllampa chay urkamkachpa ichu ch'uqachpa wañuchqa animalkunampa aychanda; animalkunata wanchichpa, ama yawarninda mimkunanllampa. 21 Chaqa Muysis chaychina kamachimkuchqanda sinaguga wasimkunampiqam unaymandampacha yumbay samana diyampi yach'achimkuchqallampa. 22 Chaymi Jamkubu chaychina nimptinqa, chay ampustulkunaqa, chay yach'achimkuq ansyanumkunawan, yumbay chaypi tandamkaq kriyiq masingunawan amkrarqanllampa wamkin kriyiq masingunata, rinambaqllampa Pabluwan, Birnabiwan Antyumkiya llaqtaman. Suqtam amkrarqanllampa Judasta. Payllam Barsabaspis chutiq. [Nuta: Payqam mana Judas Iskaryutichu karqan.] Suqtaqam amkrarqanllampa Silasta. Chay ichkay runamkunaqam kriyiq masingunampaq ancha baliqkuna karqan. 23 Kanan pallkunawanqam kay kartata iskibrichpa kach'arqanllampa: Kuyachqay kriyiq masitamkuna Antyumkiyampi, Siryampi, Silisyampi tiyaqkuna, qamkuna mana isrraylinu kaqkunata nampallkullkillampa kay Jirusalin llaqtamanda nuqallkuna ampustulkuna, yach'achimkuq ansyanumkuna, Jisuspi yumbay kriyiqkunawan. 24 Yach'achqallampam kani kay Jirusalinmandach wamkin kriyiq masinchiqkuna gustunlla chamuchqa qamkunaman, mana kach'amumptiyllampachu. ?Pallkunach qamkunata kamachichuchqa, nuqallkuna isrraylinumkunampa siñalniyllampata kwirpullkillampampi ruranallkillampa, Muysis kamachimkuchqanda kasunallkillampa.? Chaychina rurachpaqam, pallkuna qamkunataqa ancha piñachichuchqallampa, nichpa. 25 Chaymi nuqallkunaqa yumbayniy, allita yuyachpa, amkrachqallampa kani wamkin allin kriyiq masinchiqkunata, kay ancha kuyachqanchiq masitanchiq Birnabiwan, Pabluwan chamunanllampa qamkunata watumkuchuq. 26 Kay masitanchiqkunaqam wañun kawsan Siñurninchiq Jisumkristumpaq yach'achimkuchpa. 27 Chamuchpa Judas Silaswanmi qamkunata masta rinllampa nichuq kay kartayllampampi kunachuchqaypaq. 28 Dyuspa Santu Ispiritunqam mana munanchu qamkuna ñamkanallkillampa. Chaychinallam nuqallkunampis mana munanillampachu ñamkanallkillampa. Chaymi mana kamachillkillampachu, Muysispa yumbay liyningunata kasunallkillampaqa. Achwanri kallkunatalla kasuyllampa: 29 Amar mimkuyllampachu yanqa amitu layamkunampaq ufrisichqan mimkunataqa. Animalkunata wanchichpa, yawarnindaqa ama mimkuyllampachu. Urkamkachqa animalkunampa aychandampis ama mimkuyllampachu. Qamkuna runamkuna, warmimkiwanlla puñuyllampa. Qamkuna warmimkunampis runallkiwanlla puñuyllampa. Kay iskibrichuchqayta kasuchpaqam, allita ringillampa ruraq. Mayñ masitamkuna, rimkanamkuchun. Dyus qamkunata yanampachunqa. Chaytallam nillkillampa, nichpa. 30 Chaychina pallkuna iskibrimptinqam, chay kach'adungunaqa Antyumkiya llaqtaman rirqanllampa. Waqman ch'ayachpaqam, kriyiq masingunata tandachichpa, chay kartata qurqanllampa. 31 Chaymi chay kartata liyichpa, chay antyumkiyanu kriyiq masingunaqa ancha kuchimkurqanllampa. 32 Chaymandaqam Judasqa Silaswan Dyuspaq rimaqkuna kachpa, pallkunata kunswilachpa, ancha animachirqanllampa. 33 Kanan Judas Silaswanqam achka diyamkunata chay Antyumkiyampi kriyiq masingunawan tiyarqanllampa. Chaymandaqam kutirinanllampa diyampiqa chay kriyiq masingunaqa pallkunata ancha chumaqta abyarqanllampa, kutirinanllampa Jirusalinman chay kach'achqangunaman. 34 ?Piru Silasqam munachpa kidayta, chay Antyumkiyampi kidarqan.? 35 Pablumpismi Birnabiwan chay Antyumkiyampi kidarqanllampa. Chaypiqam achka kriyiq masingunawan yach'achimkurqanllampa Jisuspa chumaq nutisyanda. 36 Chaymandaqam suq diyamkuna pasamptinqa, Pabluqa Birnabita nirqan: Masita Birnabi, amku watumkuriq kriyiq masinchiqkunata yumbay chay yach'achimkuchqanchiq llaqtamkunaman. Mayñ, amku rimkaq imachinaraq purillkanllampa, nichpa. 37 Birnabiqam munarqan pullanllampa Jwan Markusta ampayta. 38 Piru Pabluqam yuyarqan: Mananam allichu kay Jwan Markusta ampananchiqqa, nichpa. Chaqa suq kutinmi pallkunawan rillkachpa, Panfilyaman ch'ayamptinllampaqa, pallkunamanda amkramkachpa, kutichqa karqan. Mananam rirqanchu pallkunata yanampaqqa. Chaymi Pabluqa manana munarqanchu pullanllampa rinambaqqa. 39 Chaypaqmi Pabluqa Birnabiwan anyanamkurqan amkramkanangaman. Chaymandaqam Birnabiqa Jwan Markusta ampachpa, yamkump sawanda puriq barkumpi richpa, ch'ayarqanllampa yamkumpa ch'awpimbi isla allpa Chimpriman. 40 Pablunataqmi Silasta amkrarqan, pullan rinambaq. Chaymi chay antyumkiyanu kriyiq masinchiqkunaqa Dyusta ancha rrugarqan, Pabluta, Silasta yanampanambaq tumkuy may richqangunampi. 41 Chaychina ichkandin prubinsya Siryata, prubinsya Silisyata pasaqchinam, achka lugarkunaman rirqan, kriyiq masingunata animachinanllampa.
1 Pabluwan Silas richpaqam, ch'ayarqanllampa Dirbi llaqtaman, Listra llaqtaman. Listrampiqam pallkunaqa tingunamkurqan kriyiq masin Timutiyu chutiqwan. Chay Timutiyumpa mamanmi unaymandampacha Jisuspi kriyichqa karqan. Chay mamanmi nasyun Isrrayilmanda karqan. Taytanqam nasyun Grisyamanda karqan. 2 Chay Listrampi, Imkuñumpi tiyaqkunaqam Timutiyumpaqqa nirqanllampa: Payqam ancha allin, nichpa. 3 Piru chay llaqtamkunampi tiyaq isrraylinumkunaqam yach'arqanllampa: Taytanqach nasyun Grisyamanda. (Manam nasyunninchiq isrrayilmandachu), nichpa. Piru Pabluqam Timutiyuta munarqan ampayta yampachanambaq. Chaymi isrraylinumkuna ama piñamkunanllampa, pallkunampa kustumbrinda rurachpa, Pabluqa Timutiyumpa kwirpumbi isrraylinumkunampa siñalninda rurachirqan. 4 Chaymi Timutiyumpis Pabluwanna rirqan. Kanan yumbay llaqtamkunaman ch'ayachpaqam, Jisuspi kriyiqkunata chumaqta kaychina yach'achirqanllampa: Jirusalinmanda ampustulkuna, yach'achimkuq ansyanumkuna kay kartampi kaychina kunawachqa kanchiq, nichpa. 5 Chay llaqtamkunampi pallkuna yach'achimkumptinqam, Jisuspi kriyiq masingunaqa mas allita kriyirqanllampa. Achka mana kriyiqkunampismi, tandamkachpa uyamkuq, Jisuspi kriyirqanllampa. Chaychinam Jisuspi kriyiqkunaqa yumbay diya masta achkayarqanllampa. 6 Dyuspa Santu Ispiritunmi mana munarqanchu Pablu Silaswan Timutiyuwan prubinsya Asyaman rinanllampa yach'achimkuqqa. Chaymi Asyaman manana richpa, pasarqanllampa prubinsya Frijyata, prubinsya Galasyata, 7 prubinsya Misyampa manyanman ch'ayachtin. Chay prubinsyamanda munamptinllampa riyta prubinsya Bitiñamanmi, Jisuspa Santu Ispiritunqa nirqan: Ama riyllampachu chay prubinsyamanqa, nichpa. 8 Chaymi pallkunaqa chay prubinsya Misyata pasachpa, ura Truwas llaqtaman rirqanllampa. Chay Truwasqam barkumkunampa chayanan lugar karqan. 9 Chay llaqtampiqam chay tutaqa suq musquypichina Pabluqa suq runa prubinsya Masiduñamanda kaqta rimkarqan. Chay runaqam ñawpambi chayachpa, ancha rrugachpa nirqan: Yuch'allku, chamuyri kay chimba Masiduñaman, nuqallkunata yanampawanallki, nichpa. [Nuta: Chay Truwas llaqtampim kay libruta iskibriq Lumkas tandamkarqan Pabluwan, Silaswan Timutiyuwan.] 10 Chaychina Pablu chay musquypichina rimkamptinmi, nuqallkunaqa utqay maya rirqayllampa Masiduñaman. Chaychinam yach'arqayllampa: Dyusmi qayawanchiq, waqpimpis yach'achimkunanchiq chumaq nutisyanda, nichpa. 11 Truwas llaqtamandaqam yamkumpi puriq barkumpi mar yamkuta pasarqayllampa yamkumpa ch'awpimbi isla allpa Samutrasya chutiqman. Qayandinqam chay barkumpi ch'ayarqayllampa Nampulis llaqtaman. 12 Chay llaqtamandaqam ch'amkimpna rirqayllampa Filimpus llaqtaman. Chay Filimpusqam prubinsya Masiduñampi kachpampis, Rrumamanda kaq runamkunampa llaqtan karqan. Chaymi chay Filimpus prubinsya Masiduñampa mas kamachimkuq llaqtan karqan. Chay llaqtampim wamkin diyamkunata tiyarqanillampa. 13 Yach'arqayllampa: Isrraylinumkunam suq rriyumpa ladunman rinllampa, Dyusman mañamkuq, nichpa. Chaymi suq samana diyampi chay llaqtamanda lluqchichpa, chay lugarman rirqayllampa, pallkunawan Dyusman mañamkuq. Ch'ayachpaqam, tarirqayllampa wamkin warmimkuna tandamkachqata. Chaymi nuqallkunaqa tiyachpa, pallkunata Jisuspaq yach'achirqayllampa. 14 Chay warmimkunamanda suqninmi chutirqan Lidya. Payqam Tiyatira llaqtamanda karqan. Randimkuqmi granati sida trampumkunata. Chay Lidyaqam Taytanchiq Dyustalla aduraq. Pablu yach'achimkuchqanda uyallkamptinmi, Dyusqa Lidyampa chunqunda kambyarqan, chumaqta ch'askinambaq Pablu nichqanda. 15 Chaymi chay Lidyaqa tumkuy ayllundin munamptin chutimkuyta, nuqallkunaqa chutichirqayllampa. Chaymandaqam chay Lidyaqa kaychina rrugawarqanllampa: Qamkuna riqsiwachpa: Kay Lidyam allimpta Siñurninchiqpi kriyin, nichpaqa, amku wasiyman, pusadata quchunayllampa, nichpa. Chaychina kutin kutin niwamptinllampaqam, nuqallkunaqa wasinman richpa, paywan kidarqayllampa. 16 Suq diyam rillkachpallampa Dyusman mañamkunan lugarman, suq chinawan tingunamkurqayllampa. Chay chinampa chunqumbim dyablumpa ispiritun tiyaq. Chaymi dyablu rimachimptin, payqa brujachina swirtimpaq rimaq. Kanan chay chinaqam randichqa kriyada karqan. Chaymi swirtimpaq rimamptin, patrunningunaqa qallayta ancha ganaqllampa. 17 Chaymandaqam chay chinaqa Pablumpa, nuqallkunampa imkiyta purirqan, qayach'amkuchpa: Kay runamkunaqam syilumpi tiyaq Dyusta kasunllampa! ¡Chaymi chamuchqallampa, qamkunata yach'achichuq, uchallkimkunamanda wachamkanallkillampa! nichpa. 18 Chaychinam qayach'amkuchpa, tumkuy diya imkiyllampata puriq. Chaymi Pabluqa chay dyabluwan piñamkuchpa, timkramkachpa nirqan: Jisumkristumpa chutinwanmi kamachillki, lluqchiy kay chinamanda, nichpa. Chaymi chayta nimptinlla, chinamandaqa das lluqchirqan dyabluqa. 19 Kanan chay chinampa patrunningunaqam manana atirqanllampachu chay kriyadanmanda qallayta ganaytaqa. Chaymi Pabluta, Silasta piskachpa, amparqanllampa llaqtampa plasanman, awturidarkunampi dimandanambaq. 20 Chay juyiskunampa ñawpambim kaychina nirqan: Kay isrraylinu runamkunaqam kayman chamuchpa, llaqta masinchiqkunata piñachichpa, ancha ch'uqyachillkan. 21 Chaqa mana baliq kustumbringunatam kaypiqa yach'achiwallkanchiq. Piru rrumanumkuna kachpam, mana atinchiqchu chay yach'achimkuchqanda ruraytaqa, nichpa. 22 Chaymi yumbay chay runamkuna Pablumpa Silaspa kuntran alsamkamptinllampa, chay juyiskunaqa kamachirqan, Pabluta, Silasta lluchtichichpa, maqananllampa qarumkunawan. 23 Suq lastima maqachpaqam, amparqanllampa karsilaq. Chaymandaqam chay karsiliruta jurampachpa, kamachirqanllampa: Amamkich dijangichu lluqchinanllampa, nichpa. 24 Chaychina kamachimptinllampam, chay karsiliruqa Pabluta, Silasta karsilpa umku kuchunman ampachpa, uch'kuyuq qarumkunampa ch'awpimbi ch'amkingunata ampritarqan, ama mitimkananllampa. 25 Piru ch'awpi tutatach'i Pablu Silaswan Dyusman mañamkuchpa, imnumkunata kantaqllampa. Chay wamkin prisumkuna uyallkamptin, 26 qunqaylla ancha jwirti timblur karqan. Chaymi timblurwanqa chay karsilpa pirqangunaqa pachan pachan partimkarqan. Pungungunampismi kich'amkarqan. Kanan chay prisumkunamandam kadinamkuna pitimkachpa, ichkirqan. 27 Chaymi chay karsiliru rimkch'amkachpa, pungumkunata kich'arallkaqta rimkachpaqa, yuyarqan: Prisumkunaqach'i mitimkachqana. ¿Imanachaqnar kananqa? nichpa. Chaymi atun kuchillunda surqurqan wanchimkanambaq. 28 Piru Pabluqam das qayarqan: Ama wanchimkaychu. Kaypim yumbayniy kanillampa, nichpa. 29 Chaymi chay karsiliru, Pabluta uyachpaqa yanampamkuqninda nirqan: Michata ampamuy, nichpa. Chaymandaqam ancha manchaywan ch'ampsimkachpa, michawan umku karsilman kallpachpa, Pablumpa, Silaspa ñawpanman piratarqan. 30 Chaymi pallkunata umku karsilmanda surquchpa, tampurqan: Taytitumkuna, ¿imatam rurachaq, uchallkunamanda wachadu kanayqa? nichpa. 31 Chaymi pallkunaqa nirqan: Qam yumbay ayllullkimkunawan wachamkanallkillampaqa Jisumkristumpi kriyiyllampa, nichpa. 32 Chaymandaqam paytaqa, yumbay ayllundinda yach'achirqanllampa Siñurninchiq Jisus rimachqanda. 33 Kanan chay tutam chay karsiliruqa Pablumpa, Silaspa yawarlla chuqringunata mayllarqan. Kanan chay tutallam yumbay ayllungunawan chutimkurqanllampa. 34 Chaymandaqam Silaswan Pabluta wasinman ampachpa, qararqan. Kanan chay karsiliruqam yumbay ayllundin ancha kuchimkurqanllampa, Jisuspi kriyichqanllamparallku. 35 Achimkyamptinqam, chay juyiskunaqa kach'arqan suldadumkunata, karsiliruta ninambaq: Chay ichkay prisumkunataqa surquyna rinambaqllampa, nichpa. 36 Chaymi karsiliruqa Pabluta nirqan: Juyiskunam kamachiwachqa, qamkunata kach'achunaq. Chayri riyllampana ama nimata manchachpachu, nichpa. 37 Piru Pabluqam chay kach'adu suldadumkunata nirqan: Yach'ayllampa, nuqallkunampismi lijitimu rrumanumkuna kanillampa. Piru qamkunaqa mana ni dimandata rurachpachu, yumbaypa ñawpambi suq lastima maqawachpa, karsilman wichuwarqallkillampa. ¿Ima kananqachu uyarampllana (uyarallana) munangillampa surquwayta karsilmanda? ¡Manam uyarampllaqa lluqchichaqllampachu! Achwan chay kimkin juyiskuna chamuchpa, pirdunda mañawachpa surquwanqallampa, nichpa. 38 Chaymi suldadumkuna richpa, juyiskunata chaychina nimptinqa, pallkunaqa ancha mancharqanllampa, yach'achpa: Pabluqam Silaswan rrumanumkuna kachqa, nichpa. 39 Chaymi chay juyiskunaqa karsilman chamuchpa, Pabluta, Silasta ancha rrugarqanllampa pirdunananllampa. Chaymandaqam karsilmanda surquchpa, chumaqta parlachichpa, rrugarqanllampa, chay llaqtamanda rinanllampa. 40 Piru Pabluqam Silaswan karsilmanda lluqchichpaqa, chay llaqtamanda manaraq richpachu, Lidyampa wasinman rirqanllampa, Jisuspi kriyiq masingunata watumkuq. Pallkunata animachichparaqmi, chay llaqtamandaqa rirqanllampa.
1 Pabluqam Silaswan Anfimpulis llaqtata, Ampuluña llaqtata pasachpa, ch'ayarqanllampa Tisalunimka llaqtaman. Chay llaqtampim sinaguga wasi karqan. 2 Pabluqam kustumbriyuq karqan, samana diyamkunampi yallkunan chay sinaguga wasimkunaman yach'achimkuq. Chaymi kimsa simanata chay Tisalunimkampi kachpa, rirqan sinaguga wasiman, isrraylinumkunata yach'achinambaq. 3 Chaymi payqa pallkunata kaychina yach'achirqan: Dyuspa Santu Librumbim nin: Dyus Amkrachqan Wachadurmi rin ñamkaq. Wañuchpaqam rin kawsamuq, nichpa. Chaymandaqam Pabluqa nirqan: Dyus chay Amkrachqan Wachadurmi chutin Jisus. Paypaqmi yach'achillkillampa, nichpa. 4 Chaychina yach'achimkumptinmi, wamkin isrraylinumkunaqa kriyichpa, Pabluman, Silasman tandamkarqanllampa. Tayta Dyuspi achka grisyanu kriyiqkunam achka pwidiq warmimkunampis Jisuspina kriyirqanllampa. 5 Chaymandaqam chay isrraylinu mana kriyiqkuna chayta rimkachpaqa, Pabluta Silasta imbidyarqanllampa. Chaymi chay imbidyamkuqkuna achka pirbirsu qalla kallijiru runamkunata tandachpa, ancha ch'uqyarqanllampa. Chaymandaqam kurralarqanllampa Jasumba wasinda, Pabluta, Silasta maskachpa, surquchpa yumbaypa ñawpambi dimandananllampa. 6 Piru pallkunata mana tarichpaqam, Jasunda, wamkin kriyiq masingunata rrastrachpa, awturidarkunampa ñawpanman ampachpa, kaychina qayach'amkurqan: Kay runamkunaqam tumkuy llaqtamkunaman richpa, runamkunata suq laya dumktrinata yach'achichqa. Rimkayllampa, kaymambis chamuchqallampana, dañachiwananchiq. 7 Jasunqam chay runamkunata pusadata quchqa. Yumbay pallkunam gubyirnunchiq Sasar kamachimkuchqanda kuntranllampa. Kananqam ninllampa: Kanchi suq gubyirnu. Jisuschi chutin, nichpa. 8 Chayta uyachpaqam, yumbay chay runamkuna, chay awturidarnindin achwamba ch'uqyarqanllampa. 9 Piru chay Jasunmi kriyiq masingunawan garantita pagaramkurqan. Chaymi pallkunataqa kach'arqanllampa. [Nuta: Suq runata munamptinllampa karsilaytam, payqa qallayninda atirqan dijayta, suq garanti kanambaq, amaraq karsilman kach'anambaq. Piru manam prisintamkamptin dimandanda allichaq, chay qallaynin kidarqan istadumpaq. Dimandanman prisintamkamptinqam, chay qallayninda payta kutichirqanllampa. Kastillanumpiqam chutin fianza ichu garantia.] 10 Kach'amptinllampaqam, chay kriyiqkunaqa das Pabluta, Silasta Tisalunimka llaqtamanda surquchpa, tutamp kach'arqanllampa Biriya llaqtaman. Pallkunaqam waqman ch'ayachpaqa, yallkurqan sinaguga wasiman. 11 Chay Biriyampim tiyaq isrraylinumkuna ancha allin karqanllampa. Manam chay Tisalunimkampi tiyaqkunachinachu karqanllampa. Chaymi Pablu yach'achimkumptinqa, allita uyarqanllampa. Chaymandaqam pallkunaqa tumkuy diya Dyuspa Santu Librunda ancha allita liyiqllampa yach'ananllampa: ¿Dyus nichqanchinachu Pabluqa yach'achimkun ichu mana? nichpa. 12 Chaymi Dyus nichqanchina yach'achimkumptin, chay Biriyampi achka isrraylinumkuna, achka kamachimkuq grisyanu warmimkuna, achka grisyanu ullqumkunampis Jisuspi kriyirqanllampa. 13 Piru chay Tisalunimkampi tiyaq isrraylinumkuna yach'achpa: Biriyampinach Pabluqa Jisuspaq yach'achimkullkan, nichpaqam, chay uras imkinda rirqanllampa. Ch'ayachpaqam chay biriyanumkunata kunsijarqanllampa, Pablumpa kuntran timkramkananllampa. 14 Chaymi wamkin kriyiq masimkunaqa utqay maya Pabluta kach'arqanllampa kustaman. Silasqam Timutiyuwanlla chay Biriya llaqtampiqa kidarqanllampa. 15 Chay ampaqkunaqam Pablutaqa Atinas llaqtamkaman ch'ayachirqanllampa. Waqmandaqam pallkunaqa Biriya llaqtaman kutirichpa, Silasta Timutiyuta nirqan: Pabluqam nuqallkunata kach'amkumuwachqa, utqana rinallkillampa waq Atinas llaqtaman. Waqpinach chuyachungillampa, nichpa. 16 Chay Atinas llaqtampiqam Pabluqa Silasta, Timutiyuta chuyaqchina, ancha achka amitu layamkunata rimkachpa, ancha malaganayarqan. 17 Chaymi Pabluqa rirqan sinaguga wasiman Jisuspaq yach'achiq isrraylinumkunata, Dyusta aduraq furastirumkunatampis. Plasamambis tumkuy diya richpam, tinguqkunata parlachirqan Jisuspaq. 18 Chay Atinas llaqtampiqam Pabluqa tingunamkurqan wamkin yach'aq runamkunawan. Pallkunaqam dumktrinangunarallku chutirqan Impimkuryanumkuna, Istullkumkuna. Pabluqam pallkunata parlachirqan Jisuspa bidambaq, wañuchqambaq, kawsamuchqambaq. Chaymi pallkunaqa chayta uyachpa, ninamkurqanllampa: Imataraq kay luruchina rimaqqa niwanchiq? nichpa. Wamkinnataqmi nirqanllampa: Kay runaqach'i suq dyuskunampa muchuq dumktrinanda yach'achiwallkanchiq, nichpa. 19 Chaymandaqam Pablutaqa amparqanllampa suq lugar Ariyumpagu chutiqman. Chaypim yach'ayniyuq runamkuna tandamkaqllampa kunanamkunambaq. Chaymi pallkunaqa Pabluta nirqan: Muchuq dumktrinatam yach'achimkungi, ¿manachu? Chaypaqmi munanillampa yach'ayta. 20 Chaqa chay laya dumktrinampaqmi manaraq uyachqallampachu kani. Chaymi chaypaq munanillampa yach'ayta, nichpa. 21 Chay Atinaspi yumbay tiyaqkunam, chaypi tiyaq furastirundin ancha gustaqllampa tiyayta uyamkuchpa, parlachpa muchuq yuyallkunampaq. 22 Chaymi Pabluqa chay Aryumpagu lugarpi pallkunampa ch'awpimbi chayachpa, nirqan: Taytitumkuna, kay Atinas llaqtampi qamkunata rimkachuchqa kani, achka dyuskunata ancha aduramptimkillampa. 23 Kay llaqtallkillampampi purichpam, rimkachqa kani achka dyusnimkimkunampa pata altarningunata. Kanan suq dyusnimkimpa altarnimbim tarichqa kani litramkunata kaychina iskibrichqata: Kay altarmi mana riqsichqa Dyuspa altarninqa, nichpa. Chaqa qamkunam adurangillampa suq Dyus mana riqsichqallkita. Chay Dyuspaqmi rini yach'achichuqllampa. 24 Chay Dyusmi anaq syilumpa, kay pachampa dwiñun. Paymi kay munduta tumkuy imandinda rurachqa. Payqam mana tiyanchu runamkuna rurachqan adurana wasimkunampiqa. 25 Paymi samayninchiqta quwanchiq. Tumkuy imata quwanchiq. Chaychina pay ancha pudirniyuq kachpam, mana nisitanchu nimata qunanchiqqa. 26 Chaymi pay suq runamandalla achkayachichqa yumbay laya kastamkunata, tumkuy maypi kay mundumpi undananchiqllampa. Chaqa pay munachqanchinam rurawachqa kanchiq, nuqanchiqkuna ima tyimpumpi, mayqan lugarpi tiyananchiqllampa. 27 Piru rurawachqam kanchiq, maypi kachpampis, payta maskananchiqllampa tarinanchiqkaman. Piru allimpta maskamptinchiqqam, payqa mana karumpichu nuqanchiqmandaqa. 28 Chaqa paymi kawsachiwanchiq, kay mundumpi purinanchiqqa. Unay yach'ayniyuq llaqta masimkimkunam kaychina iskibrichqallampa: Dyuspa wambrangunam kanchiq, nichpa. 29 Chaychina Dyuspa wambranguna kachpaqa, ama yuyachunchu: Nuqanchiqkuna allita yuyachpa, Tayta Dyusta atinchiq rurayta urumanda, qallaymanda, rumimanda, nichpaqa. 30 Unay tyimpumkunampiqam runamkunaqa manaraq yach'arqanllampachu: ¿Imam alli? ¿Imam mana allichu? nichpa. Chaymi mana allita ruramptinllampampis, Tayta Dyusqa pallkunataqa mana kastigarqanchu. Piru kananqam tumkuy maypi yumbay runamkunata, warmimkunata kamachiwanchiq, chay uchanchiqkunata dijachpa, paytana kasunanchiqllampa. 31 Tayta Dyusmi amkrachqana suq diyata. Chay diya ch'ayamumptinmi, pay numbrachqan juyiswan yumbay runamkunata, warmimkunata ancha allita rin jusgaq. Chay juyistaqam unaymandampacha Taytanchiq Dyusqa amkrachqa karqan. Chaymandaqam ñawpayllampampi chay juyistaqa wañuchqanmanda kawsachimurqan, nichpa. 32 Chaychina kawsamuchqa runampaq Pablu nimptinmi, wamkin chay uyaqkunaqa grasyampi pasarqanllampa. Piru wamkinqam nirqan: Suq diyanam chaytaqa uyachqallkillampa, nichpa. 33 Chaymandaqam Pabluqa pallkunamandaqa rirqanna. 34 Piru wamkingunaqam Pabluwan tandamkachpa, Jisuspi kriyirqanllampa. Chay kriyiqkunamanda suqninmi chutiq Dunisyu. Paymi chay Ariyumpagu kunsijumpiqa kachqa karqan. Kriyirqambismi suq warmi Damaris chutiq. Wamkin chaypi kaqkunampismi Jisuspi kriyirqanllampa.
1 Chaymandaqam Pabluqa chay Atinas llaqtamanda lluqchichpa, Kurintu llaqtamanna rirqan. 2 Waqpim tingunamkurqan suq isrraylinu runa Amkilas chutiqwan. Paymi Puntu llaqtampi nasichqa karqan. Chaymandaqam Italya nasyunman richpa, Rruma llaqtampi tiyarqan. Piru Rrumampa gubyirnun Klawdyum kamachimkurqan: Yumbay isrraylinumkunaqa Rruma llaqtaymanda lluqchinqallampa, nichpa. Chaymi Amkilasqa warmin Prisilawan, waq Italyamanda chamuchpa, chayraq ch'ayachqa karqan chay Kurintu llaqtaman tiyaq. 3 Pallkunaqam trabajaqllampa karpamkunata rurachpa. Chaymandaqam Pabluqa rirqan pallkunata watumkuq. Chaymi paypis chay laya trabajuta yach'achqanrallku, pallkunampa pullanna tiyachpa trabajaq. 4 Piru tumkuy samana diyampim Pabluqa riq sinaguga wasiman, chay isrraylinumkunata, chay mana isrraylinu kaqkunatampis yach'achiq, Jisuspi kriyinambaqllampa. 5 Chay tyimpumpim prubinsya Masiduñamanda Silas Timutiyuwan chamurqanllampa chay Kurintu llaqtaman. Pabluqam manana karpamkunata rurachpachu, ancha yach'achiq isrraylinumkunata: Jisusmi Dyus Amkrachqan Wachadurqa, nichpa. 6 Piru chay isrraylinumkunaqam kuntran alsamkachpa, mana allimkunata Pabluta willarqanllampa. Chaymi Pabluqa mudanan ruramkuchqanda ch'ampsirqan, yach'ananllampa: Qamkunampaqqam manana kwintayuqchu kani, nichpa. Kanan pallkunataqam nirqan: Mana munachpa uyawaytaqam, qamkunana uchayuqqa kangillampa. Chingamptimkillampaqam manana uchayuqchu kani. Nuqaqam kananqa chay mana isrraylinu kaqkunata rini yach'achiq Jisuspaq. 7 Chaychina nichpaqam, sinaguga wasimanda lluqchichpa, Pabluqa suq runa Justu chutiqpa wasinman rirqan kidaq. Chay Justuqam Dyusta aduraq. Wasinqam sinaguga wasimba ladumbilla karqan. 8 Chay sinagugampa kamachimkuqninmi Krispu chutiq. Paymi wasimbi yumbay kaqkunawan Jisuspi kriyirqan. Pablu yach'achimkumptinqam, achka kurintinumkunampis kriyichpa, chutimkurqanllampa. 9 Suq tutaqam suq musquypichina Jisumkristuqa Pabluta nirqan: Ama manchachpachu yach'achimkuylla. Ama uyaraychu. 10 Chaqa nuqam qamwan kachaq. Manam pimpis nimata rurachunqachu. Chaqa kay llaqtampiqam achka runamkuna, warmimkuna nuqampi rinllampa kriyiq, nichpa. 11 Chaymi Pabluqa suq wata y midyuta chay Kurintumpi tiyarqan, yach'achimkuchpa Dyus nichqanda. 12 Chay tyimpumpiqa chay prubinsya Amkayampa prifimktun Galyun kamptinmi, Jisuspi mana kriyiq isrraylinumkunaqa tandamkachpa, Pablumpa kuntran alsamkarqanllampa. Chaymi payta dimandarqanllampa chay prifimktumpi. 13 Prifimktutaqam kaychina nirqanllampa: Kay runaqam Muysispa liyninda kuntrachpa, runamkunata yach'achin, suq laya dumktrinanwan Dyusta adurananllampa, nichpa. 14 Chaymi Pablu rimaqna purillkamptin, chay prifimktu Galyunqa isrraylinumkunata nirqan: Kay runa mana allita rurachqa kamptinqam, nuqaqa qamkuna isrraylinumkunata agwantachuchpa, uyachuyman. 15 Piru kay niwachqallkiqam mana nima liypa kuntranchu. Yanqa dumktrinallkimpaqlla, kustumbrimkimpaqllam niwallkangillampa. Chaypaqqa qamkunampuralla parlayllampa. Manam nuqaqa chaypaqqa munanichu juyis kayta. 16 Chaychina nichpaqam, chay dimandamkuqkunataqa dispachunmanda sawaman qatirqan. 17 Chay dimandamkuqkunampa sinaguga wasimba kamachimkuqninmi Sustinis chutiq. Chay mana isrraylinu kaqkunaqam chay Sustinistaqa piskachpa, chay prifimktumpa ñawpambi maqarqanllampa. Piru chay Galyunqa mana ni achlita llamkimparqanchu. 18 Pabluqam Kurintumpiqa achka diyamkunata tiyarqan. Chaymandaqam kriyiq masingunata: Richaqna, nichpa, Prisilawan, Amkilaswan rirqan Sinkriya llaqtamanna. Chaypiqam Dyusman jurachpa, Pabluqa aqchanda ruturqan, yumbay rimkaqkuna yach'anambaq: Rinmi kumpliq Dyusta ufrisichqanda, nichpa. Chaymandaqam yamkumpi puriq barkumpi mar yamkumpa sawanda rirqanllampa prubinsya Siryamanna. 19 Ifisu llaqtaman ch'ayachpaqam, Pabluqa Prisilata Amkilasta dijachpa, rirqan sinaguga wasiman. Chaymi isrraylinumkuna tandamkamptinllampa, Jisuspaq yach'achirqan. 20 Pablu yach'achimptinmi, chay isrraylinumkunaqa rrugarqanllampa, tiyanambaq chay Ifisumpi. Piru Pabluqam mana munarqanchu kidayta. 21 Chaymi pallkunataqa nirqan: ?Manam atinichu kidayta. Chaqa Jirusalimbim kay chamuq fyistampi rini kaq.? Piru Tayta Dyus munamptinmi, kutimuchpa, qamkunata watumkurichqallki. Chaychina nichpaqam, chay Ifisumandaqa barkumpi rirqan mar yamkumpa sawandana. 22 Sasarya llaqtaman ch'ayachpaqam, Pabluqa anaq Jirusalinman rirqan, chaypi tiyaq kriyiq masingunata nampallkuq. Chaymandaqam urangumurqan Antyumkiya llaqtaman. 23 Chay Antyumkiyampi suq tyimputa kidachpam, rirqanna prubinsya Galasyampa prubinsya Frijyampa llaqtan, llaqtanna, Jisuspi kriyiqkunata animachichpa. 24 Chay diyamkunam suq isrraylinu Ampulus chutiq ch'ayarqan Ifisu llaqtaman. Payqam Alijandriya llaqtamanda karqan. Payqam Dyuspa Santu Librunda allita intyindichpa, ancha yach'ayniyuq karqan. Chaymi ancha chumaqta rimachpa, yach'achimkurqan. 25 Chaqa Jisuspaq yach'amkuchpam, ancha animadu, kuchimkuchpa, chumaqta yach'achimkurqan. Lumkismi payqa Jwan Chutichimkuqmandalla Jisuspaqqa yach'amkuchqa karqan. 26 Chay runa Ampulusqam mana nimata manchachpachu, sinaguga wasimpi yach'achimkuq. Payta uyachpam, Prisilaqa Amkilaswan chay Ampulustaqa amparqanllampa wasinman, payta mas allita yach'achinanllampa: Kaychinam Tayta Dyus munan Churin Jisumkristuwan wachawayninchiqta, nichpa. 27 Chaymandaqam Ampulusqa munarqan riyta prubinsya Amkayaman, Jisuspaq yach'achimkuq. Chaymi kriyiq masingunaqa paytaqa ancha animachichpa, yanamparqan. Suq kartatam kriyiq masingunampaq iskibrirqanllampa, Ampulusta chumaqta ch'ayachinanllampa. Chaymandaqam Ampulusqa prubinsya Amkayaman ch'ayachpaqa, ancha yanamparqan Dyuspi kriyiqkunata. Pallkunaqam Jisumkristumpi kriyichqallampa karqan, Tayta Dyus yanampamptin. 28 Ampulusqam ancha yach'ayniyuq kachpa, yumbaypa ñawpambi isrraylinumkunataqa nirqan: Qamkunaqam Dyuspa Santu Librundaqa mana allitachu intyindichqallampa kangi. Rimkayllampa, Jisusmi Tayta Dyus Amkrachqan Wachadur. Paytam chuyallkachqallampa kangi, nichpa. Chaychinam binsirqan yumbay chay isrraylinumkunataqa.
1 Ampulus Kurintu llaqtampi kallkamptinqam, Pabluqa jalkamkunata richpa, Ifisu llaqtaman kutirichpa, Jisuspi wamkin kriyiqkunawan tingunamkurqan. 2 Kanan pallkunataqam kaychina tampurqan: Jisuspi kriyichpaqachu, ch'askirqallkillampa Dyuspa Santu Ispiritunda ichu mana? nichpa. Pallkunaqam nirqan: Manam nimatampis yach'achqallampachu kani: Santu Ispiritu kan, nichpaqa. 3 Chaymi Pabluqa pallkunata tampurqan: Imampi kriyichpam, qamkunaqa chutimkuchqallampa kangi? nichpa. Pallkunaqam nirqan: Jwan Chutichimkuq yach'achimkuchqanda kriyichpam, chutimkuchqallampaqa kani, nichpa. 4 Chaymi Pabluqa pallkunata nirqan: Jwanqam chutichirqan uchangunata dijaqkunata. Qamkunataqam nichurqan: Chamuqnam rin suq ancha pudirniyuq. Paypi kriyiyllampa, nichpa. Chay ancha pudirniyuqmi Dyus Amkrachqan Wachadur Jisusqa. 5 Chaychina Pablu nimptinmi, chay uyaqkunaqa Jisuspa chutimbi chutimkurqanllampa. 6 Pablu mamkingunata chay chutimkuqkunampa sawanman ruramptinmi, Dyuspa Santu Ispiritun pallkunaman chamurqan. Chaychina chamuchpaqam, pallkunataqa muchuq rimallkunampi rimachirqan. Rimachirqambismi Dyus nichqanda. 7 Pallkunaqam dusi runamkuna karqan. 8 Kimsa killa tumkuytanam Pabluqa riq sinaguga wasiman. Chaypim Dyuspaq yach'achimkuq, mana ni pitampis manchachpachu. Chaqa chay isrraylinumkunataqam ancha munarqan kriyichiyta: Tayta Dyusmi chumaqta rin kamachiwaqninchiq. Payta kasuchunllampa, nichpa. 9 Piru wamkinqam angu chunquyuq kachpa, mana munarqanllampachu Jisuspi kriyiytaqa. Pallkunaqam runamkunampa ñawpambi Pablu yach'achimkuchqanda kuntrarqanllampa. Chaymi pallkunamanda amkramkachpa, Pabluqa kriyiq masingunata ampachpa, rirqan suq iskwilaman. Chay iskwilaqam suq runa Tiranu chutiqpa karqan. Chaypim Pabluqa tumkuy diyamkuna yach'achimkurqan. 10 Chaychinam ichkay watata chay prubinsya Asyampi tiyaq isrraylinumkuna, mana isrraylinumkunampis uyarqanllampa Siñurninchiq Jisuspaq. 11 Taytanchiq Dyus yanampamptinmi, Pabluqa ancha ispantaypaq milagrumkunata rurarqan. 12 Kanan Pablumpa pañundalla ichu trampun ruramkuchqandalla ampamptinllampa qachyaqkunamanmi, chay qachyaqkunaqa kach'amkarqanllampa. Dyablumkuna kamachichqan runamkunampismi chay trampunda piskamptinllampalla, chay dyablumkuna runamkunamandaqa lluqchirqanllampa. 13 Piru wamkin isrraylinumkunam qallayta ganananrallku puriqllampa, dyablumkunata qatichpa runamkunamanda. Pallkunampismi mas pudirniyuq kanambaq, munarqanllampa Siñur Jisuspa chutinwanna dyablumkunata runamkunamanda qatiyta. Chaymi dyablumkunata kaychina nirqanllampa: Chay Pablu yach'achimkuchqan Jisuspa chutinwanmi kamachillkillampa, lluqchinallki kay runamanda, nichpa. 14 Chaytaqam rurarqanllampa suq runa Isiba chutiqpa syiti churinguna. Chay Isibaqam isrraylinumkunampa suq kamachimkuq kuran karqan. 15 Chaymi chay churinguna Jisuspa chutinwan chaychina qatimptinqa, dyabluqa nirqan: Jisustaqam riqsini. Yach'anim pim Pabluqa, nichpa. Piru ¿pitaq qamkunaqa kangillampa nuqata kamachiwanallkiqa? nichpa. 16 Chaymi chay lumku runa dyablumpa ispiritunwan puriqqa pallkunampa kuntran alsamkarqan. Kanan ancha jwirsayuq kachpam, chay syiti runamkunata binsichpa, ¡ay! suq lastima rurachpa, chuqri chuqri rurachpa, mudanangunata llimkichpa, simpratalla chay wasimanda kallpachirqan. 17 Chay Ifisu llaqtampi tiyaq isrraylinumkuna, mana isrraylinumkunampis chaypaq yach'arqanllampa. Chaymi ancha manchachpa, Siñurninchiq Jisusta ancha alabarqanllampa: Pudirniyuqmi, nichpa. 18 Jisuspi wamkin kriyiqkunampismi chayta yach'achpa, chamuchpa, nirqanllampa: Nuqallkunampismi uchayuq kanillampa. Manam allimkunatachu rurachqallampa kani, nichpa. 19 Wamkingunaqam brujiyayta yach'amkuchqa karqan librumkunamanda. Chay brujiyanan librungunata ampamuchpam, yumbaypa ñawpambi rumpachirqanllampa. Chay librungunaqam ancha ch'aniyuq karqan. 50.000 ch'aniyuq blanku qallallkunam balirqan. 20 Chaychina Jisuspa chumaq nutisyanda tumkuy maypi yach'achimkumptinllampam, Tayta Dyusqa achka milagrumkunata rurarqan. Chaymi mas runamkuna, warmimkuna Jisuspi kriyirqanllampa. 21 Chaymandaqam Pabluqa yuyarqan pasayta prubinsya Masiduñata, prubinsya Amkayata, Jirusalinman rinambaq. Nirqanmi: Dyusmi munan Jirusalinmanda Rrumaman rinaypaq yach'achimkuq, nichpa. 22 Chaymi payqa kach'arqan yanampamkuqnin Timutiyuta, Irastuta, rinambaqllampa chay prubinsya Masiduñaman. Piru payqam chay prubinsya Asyampilla wamkin diyamkunata kidarqan. 23 Chay tyimpuqam suq runa Damatru chutiq achka runamkunata willarqan, Pabluta kuntrananllampa. Chaymi Pablu Jisuspa chumaq nutisyanda yach'achimkumptin, chay runamkunaqa piñamkuchpa ch'uqyarqanllampa. Chay Damatruqam qallaymanda ruraq chumaq adurana wasisitumkunata, chay yanqa dyusnin Diyanampa atun adurana wasindachina. Chaymi paywan trabajaqkunata allita pagaraq. [Nuta: Chay dyusnin Diyanallam Artimisampis chutiq.] 25 Chayrallkum chay trabajaqningunata tandachpa, tumkuy chay suq platiru masingunatampis nirqan: Taytitumkuna, yach'angillampam kay trabajunchiqwanmi allita ganachpa kawsanchiq. 26 Piru qamkuna rimkachqallkichina, uyachqallkichinam, chay Pabluqa purin yach'achimkuchpa kay rurachqanchiq amitunchiqkunach mana dyuskunachu, nichpa. Kanan chaychina rimachpam, achka runamkunata kriyichichqana. Chaychinam rurachqa yaqqa tumkuy kay prubinsya Asyampimpis. Manam kay Ifisu llaqtanchiqpillachu. 27 Pablumpa dumktrinambi kriyiqkunaqam dyusninchiq Diyanampiqa manana rinllampachu kriyiq. Chaychina kamptinqach'i, chinganman trabajunchiqqa. Chaqa dyusninchiq Diyanampa adurana wasimba famanch'i chinganman. Kanangaman kay Asyampi tiyaqkunamanda, tumkuy mundumpi tiyaqkunamandampis ancha achka aduranllampa dyusninchiq Diyanata, ¿manachu? ¡Ima qunqanmanllampach'i dyusninchiq Diyanataqa! ¡Amar chayqa kanqachu! nichpa. 28 Chayta uyachpaqam, ancha piñamkuchpa, pallkunaqa mana challkuq kunyarqanllampa: Biba ifisyanumkunampa dyusninchiq Diyana! nichpa. 29 Chay llaqtampi tiyaqkunaqam ancha piñamkuchpa kunyarqanllampa. Chaymi Jisuspi ichkay kriyiqkunata piskachpa, amparqanllampa suq pamba istadyu layaman, yumbaypa ñawpambi dimandananllampa. Chaqa chay ichkay runaqam Pablumpa pullan puriqllampa. Suqmi chutiq Gayu. Suqqam chutiq Aristarku. Pallkunaqam Masiduñamanda karqan. 30 Chaymi Pablu munarqan yallkuyta, chay piñamkuchqa runamkunawan parlaq. Piru kriyiq masingunaqam mana dijarqanllampachu. 31 Chay prubinsya Asyampa wamkin awturidarningunam Pablumpa yanasunguna (yanasanguna) kachpa, abisuta kach'arqan, ama rinambaq chay kuntraqkunaman. 32 Achka runamkunam mana yach'arqanllampachu: Imampaqmi tandamkachqa kanchiq, nichpaqa. Piru pallkunaqam ancha kunyarqanllampa. Wamkinmi suq layata niq. Wamkinqam suq layata niriq. 33 Chaymi wamkin isrraylinumkunaqa suq runa Alijandru chutiqta ñawpanllampaman kumsarqanllampa, isrraylinumkunata sawachanambaq. Chaypaqmi chay Alijandruta wamkinqa parlachirqan tumkuy ima pasachqambaq. Chaymi chay Alijandruqa munachpa rimayta, mamkinwan siñiyarqan, yumbay payta uyanambaq. 34 Piru pallkunaqam Alijandruta riqsichpa: Waqqam dyusninchiq Diyanampi mana kriyiq isrraylinu, nichpa, mana kasurqanllampachu. Achwambam mana challkuq kunyarqanllampa ichkay urastach'i: Biba ifisyanumkunampa dyusninchiq Diyana! nichpa. 35 Chaynam chay llaqtampa simkritaryun, uyarachichpa, nirqan: Ifisyanumkuna, tumkuy mundumpim yach'anllampa: Ifisyanumkunatam mingachqallampa, kwidananllampa chay pudirniyuq dyusnin Diyanampa adurana wasinda, syilumanda ichkimuchqan Diyanampa chay rritratundampis, nichpa. 36 Manam pimpis chaytaqa atinchu ñigayta. ¿Imampaqnamiri piñamkungillampa? Manaraq nimata allita yach'achpaqa, amaraq kunyayllampachu. 37 Kay ampamuchqallkillampa runamkunaqam mana nima maluta rurachqachu. Manam ni dyusninchiq Diyanampa kuntranda rimachqallampachu. 38 Chay Damatruqa paywan trabajaqkunampis dimandata munachpa rurayta, atinllampa riyta juyiskunaman, justisyata rurananllampa. 39 Suq laya dimandata munachpa rurayta, suq lijitimu rriyuñunda rurachpa, chumaqta alliyayllampa. 40 Chay altu karguyuq rrumanumkunamkich kuntranchiqta rimanmanllampa. Ninmanllampamkich Manam yach'anllampachu kamachimkuyta. Yanqa mana uyamkuqkunachinam ruranllampa, nichpa. Kay tumkuy imampaq nuqanchiqkunata tampuwamptinchiqqa, ¿imatam rinchiq niq? nichpa. 41 Chaychina nichpaqam, pallkunataqa dispidirqanna, rinanllampa chay rriyuñunmanda.
1 Chay alburutu uchyamkamptinqam, Pabluqa Jisuspi kriyiq ifisyanumkunata qayachimuchpa kunarqan, Dyusta mana challkuq kasunanllampa. Chaymandaqam Richaqnari, nichpa, rirqanna prubinsya Masiduñaman. 2 Waqpimpismi kriyiq masingunata watumkuchpa, yach'achichpa, ancha animachirqan. Chaymandaqam rirqanna nasyun Grisyaman. 3 Waqpim kimsa killata kidachpa, munarqanna riyta prubinsya Siryaman. Chaymi yaqqana yamkumpi puriq barkumpi richpa, yach'arqan: Isrraylinumkunaqach jurampawallkan wanchiwanambaqllampa, nichpa. Chaymi payqa allita yuyachpa, ch'amkimpna kutirirqan prubinsya Masiduñaman. 4 Yampachachpam pullan rirqanllampa kay kumpañirumkuna: Sumpatir; payqam Biriya llaqtamanda karqan; Aristarku, Sigundu. Pallkunaqam Tisalunimka llaqtamanda karqan. Suqnataqmi Gayu karqan. Payqam Dirbi llaqtamanda karqan. Suqqam Timutiyu. Suqkunaqam Timkimku, Trufimuwan. Pallkunaqam prubinsya Asyamanda karqanllampa. 5 Pallkunaqam ñawpachpa, nuqallkunata chuyawarqanllampa Truwas llaqtampi. 6 Chay mana libadurayuq kachangata mimkunan fyistatam chay Filimpus llaqtampi pasarqayllampa. Chaymandaqam nuqallkunaqa rirqayllampa yamkumpi puriq barkumpi chay Truwas llaqtamanna. Sinku diyasmanda chayman ch'ayachpam, tandanamkurqayllampa chay ch'amkimp riqkunawan. Waqpiqam syiti diyasta karqayllampa. 7 Chaymi dumingutaqa tandamkarqayllampa, tandata pitichpa, Santa Mimkunata mimkunayllampa. Tandamkamptiyllampaqam, Pabluqa nuqallkunata chaypi yach'achiwallkarqan. Kanan payqam qayandin yuyachpa riyta, mana challkuq ch'awpi tutamkaman yach'achimkurqan. 8 Tandamkachqallampa karqay suq wasimpa mas altu pisumbi. Chaypiqam achka michamkuna achimkchamkuq. 9 Suq chulu Iwtimku chutiqmi chaypiqa karqan. Payqam bintanampi tiyallkarqan. Ancha unayta Pablu yach'achimkumptinmi, uyamkullkamptin, chay chulutaqa puñuy binsirqan. Chaymi chay kimsa pisumanda bulamkarqan ura pachamkaman. Chaymi wañuchqatana tandarqanllampa. 10 Piru Pabluqam ichkimuchpa, kumurachpa, chay almata abrasarqan. Chaymandaqam nirqan: Amar manchayllampachu. Kawsallkanmi kay chuluqa, nichpa. 11 Chaychina nichpaqam, Pabluqa kutirirqanna chay mas altu pisuman. Chaymandaqam tandata pitichpa, mimkuchpaqa, yach'achimkurirqan achimkyanangaman. Chaymandaqam rirqanna. 12 Chay Iwtimkutaqam kawsaqtana wasinman amparqanllampa. Chaymi chay llamkiqkunaqa anchana kuchimkurqanllampa. 13 Pabluqam munarqan riyta ch'amkimp Asun llaqtaman. Chaymi niwarqanllampa: Qamkunaqa yamkumpi puriq barkumpi riyllampa. Nuqaqam ch'amkimp rini riq, nichpa. Chaymi nuqallkunaqa puntata ch'ayachpa, Pablutaqa chuyarqayllampa waq Asun llaqtampina. 14 Chaymandaqam waqpi paywan tingunamkuchpaqa, barkumpina rirqayllampa Mitilini llaqtaman. 15 Waqmanda lluqchichpaqam, qayandinqa pasarqayllampa yamkumpa ch'awpimbi isla allpampa ñawpanda. Chay isla allpaqam chutiq Kiyu. Qayandin suq punchawraqmi ch'ayarqayllampa Samus llaqtaman. Waqmanda richpaqam, Trujiliyu llaqtampi samarqayllampa. Qayandin chay llaqtamanda lluqchichpam, ch'ayarqayllampa Militu llaqtaman. 16 Pabluqam ancha utqana munarqan ch'ayayta Jirusalinman, waqpi kanambaq Pintimkustis fyistampaq. Chaymi payqa mana munamptin Asyaman riyta, chay prubinsya Asyata pasarqayllampa. Mananam chay Asyampa Ifisu llaqtanmanqa ch'ayarqayllampachu. 17 Militu llaqtaman ch'ayachpaqam, Pabluqa kach'amkurqan Ifisu llaqtaman: Yach'achimkuq ansyanumkuna chamunqallampa kayman, nichpa. 18 Chaymi chamumptinllampa, pallkunataqa nirqan: Qamkunaqam yach'angillampa imachina kachqayta chay punta bwilta Asyaman ch'ayachqay diyamandampacha. 19 Tumkuy tyimpum qamkunawan kachpa, ancha umildi kachpa, waqachpa, Siñurninchiqta kasuchqa kani. Ancham ñamkachqampis kani, chay mana kriyiq isrraylinumkuna munamptinllampa imanachiwayta. 20 Chaychina ñamkachpampismi, mana uyarachpachu, achwan tumkuy imata qamkunata yach'achichuchqa kani byinnimkimpaq. Chaychinam rurarqay yumbaypa ñawpambi, qamkunampa wasimkimkunampi. 21 Chaqa isrraylinumkunata, mana isrraylinu kaqkunatampismi nichqana kani, chay mana alli rurachqanda dijachpa, kriyinanllampa Taytanchiq Dyuspi, Siñurninchiq Jisumkristumpimpis. 22 Kananqam Jirusalin llaqtamanna rillkani, Dyuspa Santu Ispiritun ampawamptin. Piru manam yach'anichu: ¿Imam rin pasawaq? nichpaqa. 23 Kaytallam yach'ani: Yumbay chay llaqtamkunaman rimptiymi, Dyuspa Santu Ispiritun niwachqa: Rinllampam karsilachuq, ñamkachichuq, nichpa. 24 Challkunata yach'achpampismi, mana llamkinichu. Chaqa kay bidayqam mana nimachu nuqampaqqa. Achwanmi munani, ?kuchimkuchpa? allita Siñurninchiq Jisuspaq yach'achimkuyta wañunallkaman. Paymi kamachiwachqa, paypaq kaychina yach'achimkunay: Dyusmi ancha allin. Paymi kuyawaqninchiq munan wachawayninchiqta, nichpa. 25 Purichqam kani, qamkunata yach'achichuchpa: Kaychinam Tayta Dyus chumaqta rin kamachiwaqninchiq, nichpa. Piru allitam yach'ani: Kananmandaqam manana ringillampachu rimkawaq. 26 Qamkunatam yach'achichuchqa kani Tayta Dyus tumkuy ima munachqanda. Manam nimata pamkachqachu kani. Chaymi qamkuna chingamptimkiqa, nuqaqa mana uchayuqchu rini kaq ni mayqannimkimpaq. 28 Allitar kwidamkayllampa. Jisuspi kriyiq masinchiqkunatampis allita kwidayllampa allin michidurkunachina. Chaqa pallkunataqam Siñurninchiq Jisumkristu randichqa, yawarninda ich'achpa. Dyuspa Santu Ispiritunmi Dyuspa chay wambrangunata mingachuchqa, ubispunguna kachpa, kwidanallkillampa. 29 Chaqa nuqaqam yach'ani: Rimptiyqam, qamkunaman rinllampa chamuq llullamkuq yach'achimkuqkuna, nichpa. Pallkunaqam chay saqra lubumkunachina ancha rinllampa munaq dañachichuyta. 30 Kanan qamkunamandam wamkinnimkiqa mana allin runamkunampaq ringillampa timkramkaq. Wamkinnimkiqam ringillampa yach'achimkuq mana baliq dumktrinamkunata, kriyiq masinchiqkuna kriyinambaq. 31 Uyamkuyllampar, kallkich kimsa wata tumkuyta punchawnindin tutampnindin ancha kuyachuchpa, waqachpa, qamkunata yach'achichuchqa kani. ¡Amar qunqayllampachu chay yach'achichuchqaytaqa! 32 Kananqa masitamkuna, Tayta Dyusman mingamkullkillampa, payna qamkunata kwidachunambaq. Paymi ancha kuyachuchpa, chumaq kunayningunata rin yach'achichuqllampa, ancha pudirniyuq wambranguna kanallkillampa. Chaychina paypaqlla kachpam, paymanda atingillampa ch'askiyta suq chumaq irinsyata. 33 Manam nuqaqa munachqachu kani suqkunampa qallayninda ni urunda ni mudananda. 34 Qamkunaqam ancha allita yach'angillampa: Pabluqam kimkin mamkingunawan trabajachqa mantyinimkanambaq, yumbay pullan puriqkunatampis mantyininambaq, nichpa. 35 Chaychina rurachpam, qamkunata yach'achichuchqa kani, qamkunampis trabajachpa, yanampanallkillampa chay mana nimayuqkunata. Chaychina yanampachpam, kasullkangillampa Siñurninchiq Jisus kay nichqanda: Nuqanchiq ch'askinanchiqmandaqam mas alli, suqkunata qunanchiq. Chaqa chaychina quchpaqam, masta rinchiqllampa kuchimkuq, nichpa. 36 Challkunata nichpaqam, Pabluqa qunqurimkuchpa, yumbaywan Dyusman mañamkurqan. 37 Chaymandaqam yumbay pallkunaqa ancha waqachpa, Pablutaqa abrasachpa, muchachpa, dispidirqanllampa. 38 Chaqa ancham llamkirqanllampa Pablu kaychina nichqanrallku: Mananam mastaqa ringillampachu rimkawaq, nichpa. Chaymandaqam yampachachpa, rirqanllampa yamkumpi puriq barkumkaman.
1 Jisuspi kriyiq masinchiqkunata dijachpam, rirqayllampa yamkumpi puriq barkumpi Kus llaqtaman. Chaymandaqam qayandinqa rirqayllampa Rrudas llaqtaman. Waqmandaqam rirqayllampa Patara llaqtamanna. 2 Patarampiqam tarirqayllampa suq barkuta prubinsya Finisyaman rillkaqta. Chay barkumpinam waqmandaqa rirqayllampa. 3 Riqchinaqam rimkarqayllampa yamkumpa ch'awpimbi isla allpa Chimpri chutiqta, barkumpa ichuq ladumbi kaqta. Chayta pasachpaqam rirqayllampa prubinsya Siryaman, ch'ayachtiyllampa Tiru llaqtamkaman. Chaqa chay barkuqam Tiru llaqtampi trastingunata dijarqan. Chaymi nuqallkunaqa chay barkumandaqa ichkichpa, yallkurqayllampa Tiru llaqtaman. 4 Chay Tiruman yallkuchpaqam, tarirqayllampa Jisuspi kriyiq masinchiqkunata. Chaymi syiti diyasta pallkunawan tiyarqayllampa. Pallkunataqam Dyuspa Santu Ispiritun nichqa karqan: Pablutaqam rinllampa imanachiq, nichpa. Chaymi pallkunaqa Pabluta nirqanllampa: Amar riychu Jirusalin llaqtamanqa, nichpa. 5 Chaychina nimptinllampampismi, chay syiti diyasmandaqa, chay Tiru llaqtamanda lluqchirqayllampa, Jirusalin llaqtamanna rinayllampa. Chaymi yumbay chay kriyiq masinchiqkunaqa warmindin, wambrandin yampachawachpa ampawarqanllampa mar yamkumpa manyangaman. Chayman ch'ayachpaqam, qunqurimkuchpa, Dyusman mañamkurqayllampa. 6 Chaymandaqam abrasanamkuchpa, dispidinamkuchpa, barkuman yallkurqayllampa. Pallkunaqam wasinmanna kutirqanllampa. 7 Chaychina Tiru llaqtamanda lluqchichpam, barkumpina mar yamkumpa sawanda rirqayllampa Tulimayda llaqtaman. Chaypim kriyiq masinchiqkunata nampallkuchpa, pallkunampa pullanna suq diyata kidarqayllampa. 8 Chaymandaqam qayandinqa Pabluqa nuqallkunawan barkumpi rirqayllampa Sasarya llaqtamanna. Waqman ch'ayachpaqam, rirqayllampa Dyuspaq yach'achimkuq Filimpimpa wasinman. Payqam ampustulkunampa chay syiti yanampamkuqninmanda suqnin karqan. Chaymi paywanna wasimbi kidarqayllampa. 9 Chay Filimpiqam ch'usku chinayuq karqan. Pallkunaqam mana runayuqchu karqanllampa. Chay chinamkunaqam Dyuspaq rimaqllampa, Dyuspa Santu Ispiritun yanampamptin. 10 Waqpi pallkunawan achka diyata tiyallkamptiyllampam, prubinsya Judiyamanda Dyuspaq suq rimaq ch'ayamurqan. Paymi Agabu chutiq. 11 Paymi nuqallkunaman chamuchpa watumkuwaq, Pablumpa wach'umkunda surquchpa, chaywan ch'amkingunata, mamkingunata ch'aqnamkachpa, nirqan: Dyuspa Santu Ispiritunmi nin: Jirusalimbiqach isrraylinumkunaqa kay wach'umkumpa dwiñundaqa kaychina ch'aqnachpa, furastiru runamkunaman rinllampa intrigamkuq, nichpa. 12 Chaychina nimptinmi, nuqallkunaqa tumkuy chay sasaryanu kriyiq masinchiqkunawan Pablutaqa ancha rrugarqayllampa, ama rinambaq Jirusalinmanqa. 13 Piru Pabluqam niwarqanllampa: Imampaqmir ancha waqachpa llamkichiwangillampa? Siñurninchiq Jisusta kasunayrallkum nuqaqa listu kani ch'aqnawachpa, wanchiwananllampa waq Jirusalimbiqa, nichpa. 14 Chaychina nuqallkunata niwamptinmi, manana atichpa arkayta, dijarqayllampana rinambaq: Dyus munachqanchina kanqa, nichpa. 15 Chaymandaqam nuqallkunaqa kamamkachpa, anaq Jirusalinmanna rirqayllampa. 16 Wamkin sasaryanu kriyiq masimkunam yampachawachpa, pullayllampa rirqanllampa. Rirqambismi suq chimprinu kriyiq masinchiq Minasun chutiq. Payqam unaymandampacha Jisuspi kriyichqa karqan. Kanan ch'ayachpa Jirusalin llaqtamanqam, paypa wasimbi kidarqayllampa. 17 Jirusalinman ch'ayamptiyllampaqam, kriyiq masinchiqkunaqa kuchimkuchpa, chumaqta ch'ayachiwarqanllampa. 18 Chaymandaqam qayandinna Pabluqa nuqallkunata ampawachpa, rirqan parlaq Jamkubuwan. [Nuta: Chay Jamkubullam Santyagumpis chutiq.] Waqpim karqan yumbay yach'achimkuq ansyanumkuna. 19 Ch'ayachpaqam Pabluqa pallkunata nampallkuchpa, manyaqlla parlachirqan Dyus paywan rurachqambaq waq mana isrraylinu kaqkunawan kallkamptin. 20 Chayta uyachpaqam, Tayta Dyusta ancha alabachpa, Pablutaqa nirqanllampa: Masita, rimkachqallkichinam, achka mil isrraylinu masinchiqkunampis Siñurninchiq Jisuspi kriyichqallampa. Paypi kriyichpallampam, ancha kamachiwanchiq, kasunanchiq Muysispa liyningunata. 21 Piru pallkunaqam qambaq mana allimp kaqkunata uyachqallampa: Pabluch chay karumpi tiyaq isrraylinumkunata yach'achichqa, amana kasunanllampa Muysis kamachimkuchqanda. Yach'achimkumbischi amana wambrangunampa kwirpumbi siñalta ruranambaqllampa, amana chay suq kustumbrinchiqkunata siginanllampa, nichpa. 22 Chaychina uyachqallampa kamptinqa, ¿imatam atinchiq rurayta, pallkuna yach'ananllampa: Mana chaychinachu kachqa, nichpaqa? Ch'ayamuchqallkita yach'achpaqach'i, chay kuntrachuqkuna kayman tandamkamunman. 23 Chayri kay kustumbrinchiqta ruray. Kaypim nuqallkunawan kan ch'usku runamkuna. Pallkunaqam tratumkuchqa Dyuswan, suq dibusyunda rurananllampa. 24 Pallkunata pullallki ampay Dyuspa adurana wasinman. Chaypi pallkunawan dibusyunda ruray. Mayllamkuna kustumbritampis ruray, limpyamkanallkimpaq. Pagaramkuy kay ch'usku runamkunampaq, atinanllampa simpralla umanda rutuyta, yumbay yach'ananllampa: Chay runamkunam Taytanchiq Dyusta ufrisichqanda kumplichqana, nichpa. Chaychina ruramptimkiqam, yumbayna qambaqqa yach'anqallampa: Yanqamkunatam Pablumpaqqa rimachqallampa. Rimkay, payqa Muysispa liyningunata allita kasun, nichpa. 25 Kaytampis yach'ay: Chay furastiru kriyiq masinchiqkunatam nuqallkunaqa mana kamachichqachu kani, chay kustumbrinchiqkunata rurananllampaqa. Pallkunamanqam kallkunatalla iskibrichqallampa kani: Ama mimkuyllampachu amitu layamkunaman ufrisichqan aychataqa, ni yawarta, ni chay urkamkachpa wañuq animalkunampa aychandaqa, nichpa. Nichqallampampismi kani, warminwanlla ichu runanwanlla kananllampa, ama suqkunawanqa, nichpa. 26 Chaymi Pabluqa chay ch'usku runamkunata ampachpa, qayandinqa pullanllampa mayllamkuna kustumbrita rurarqanllampa. Chaymandaqam Pabluqa Dyuspa adurana wasinman yallkuchpa, chaypi kaqkunata nirqan: Tal diyam rinillampa mayllamkuriq. Tal diyam rinillampa ufrindayllampata ruraq, nichpa. 27 Chay syiti diyas uchyamkallkamptinmi, Pabluqa kutirqan Dyuspa adurana wasinman. Piru wamkin isrraylinumkuna prubinsya Asyamanda kaqkunam paytaqa Dyuspa adurana wasimbi rimkarqanllampa. Chaymi chaypi kaqkunata tumkuy imata nirqanllampa, Pablumpa kuntran timkramkananllampa. 28 Chaqa chay rimaqkunaqam unayqa Pabluta rimkachqallampa karqan, suq ifisyanu runa Trufimu chutiqwan purillkaqta. Chaymi yanqa yuyarqanllampa: Chay furastiru runataqam Pabluqa Dyuspa santu adurana wasinman ampamuchpa, mampachachqa, nichpa. Chaymi Pabluta piskachpa, ancha qayach'amkurqanllampa: Llaqta masi isrraylinumkuna! ¡Yanampawayllampa kay runata piskananchiqllampa! ¡Payqam tumkuy mayta purichpa, runamkunata yach'achin, nuqanchiqkunata kuntrawananchiq, Muysispa liyningunata kuntranan, kay adurana wasinchiqtampis kuntrananllampa! ¡Imanandaq kay runaqa Grisyamanda jwira runamkunatampismi irpuchqa kay santu adurana wasinchiqman! ¡Santu lugartam mampachachqa! nichpa. 30 Chaychina chay llaqtampi kunyallkamptinllampam, yumbay runamkuna waqmanda kaymanda kallpachpa, tandamkarqanllampa. Kanan Pablutaqam piskachpa, rrastramkuchpa, Dyuspa adurana wasinmanda surquchpa, das pungumkunata kirparqanllampa. 31 Chaymandaqam suq lastima maqachpa, wanchillkamptinllampana, suldadumkunampa kamachimkuqnin yach'arqan: Tumkuy Jirusalimbich ancha ch'uqyallkanllampa, nichpa. 32 Chaymi payqa suldadungunata tandachpa, kallparqan Pablu kachqanman. Chaymi chay maqamkuqkunaqa chay kamachimkuqta, suldadungunatampis rimkachpa, achla qasillarqanllampa. 33 Chaymi ch'ayachpa, chay mas kamachimkuq suldadu Pabluta prisuchpa, kamachimkurqan: Ichkay kadinawan payta piskayllampa, nichpa. Chaymandaqam yumbayta tampurqan: Pitaq kay runaqa? ¿Imatam rurachqa? nichpa. 34 Kanan chay runamkunaqa qayach'amkuchpa ch'uqyarqanllampa. Piru wamkinmi suq layata niq. Wamkinnataqmi suq layata niriq. Chaymi chay kamachimkuq suldaduqa mana atirqanchu yach'ayta: ¿Imam kachqa? nichpaqa. Chaymi suldadungunata kamachirqan, Pabluta ampanambaq kwartilninman. 35 Chay kwartilnimba gradangunaman ch'ayachichpaqam, utqaymaya Pabluta alayrilla alsachpa, irpurqanllampa umku kwartilman, ama chay kuntraqkuna quch'ichpa wanchinanllampa. 36 Chaqa pallkunaqam imkinllampata rirqan qayach'amkuchpa: Wanchiyllampa chay Pabluta! ¡Wanchiyllampa chay Pabluta! nichpa. 37 Suldadumkunaqa kwartilninman irpuqna purillkamptinllampam, Pabluqa chay kamachimkuqninda grigu rimaypi tampurqan: Atinichu imatampis rimayta? nichpa. Chaymi chay kamachimkuqqa nirqan: Qamqachu yach'angi grigumpi rimayta? 38 ¡A! Nuqaqam yuyarqay: Chay wampu ijimptinuch'i kangi, nichpa. Chaqa payqam 4.000 matansyirumkunata chunchaman surquchpa, munarqan binsiyta gubyirnunchiqta. ¿Manachu chay wampu runa kangi? nichpa. 39 Chaychina tampumptinmi, Pabluqa nirqan: Nuqaqam isrraylinu runa kani. Piru manam kay Isrrayilpichu nasichqa kani. Waq prubinsya Silisyampa chay ancha kamachimkuq Tarsu llaqtambim nasichqa kani. Dijawayri yuch'allku willanay kay runamkunata, nichpa. 40 Chaymi chay kamachimkuq Maya nimptinqa, Pabluqa chay pungumpa gradangunampi chayachpa, mamkingunawan siñiyarqan, chay runamkuna uyaranambaq. Uyaramptinllampaqam, ibriyu rimaypi nirqan:
1 Masitamkuna, taytitumkuna, uyawayllampa. Kaytam rini nichuqllampa yach'anallkillampa nuqa kachqayta, nichpa. 2 Pabluta uyachpa ibriyu rimaypi rimamptinqam, masta uyararqanllampa. Chaymi Pabluqa pallkunataqa nirqan: 3 Nuqaqam isrraylinu llaqta masimkillampa kani. Prubinsya Silisyampa chay Tarsu llaqtambim nasichqa kani. Chaymandaqam kay Jirusalinman chamuchpa, kaypi wiñachqa kani. Chay ancha yach'ayniyuq Gamayilwanmi istudyachqa kani. Payqam yach'achiwarqan, ancha allita kasunaypaq unay agwilunchiqkunampa liyningunata. Nuqaqam qamkunachina Tayta Dyustalla munachqa kani kasuyta. Chaymi tumkuy chunqu Taytanchiq Dyuspi kriyichpa, 4 (mana kriyirqaychu: Jisusmi Dyus Amkrachqan Wachadur, nichpaqa.) Chaymi unayqa Jisuspi kriyiqkunata qasachachqa kani wanchinallkaman. Ullqumkunata, warmimkunata prisuchpam, ampamuchqa kani karsilman. 5 Chay mas kamachimkuq isrraylinu kuram tumkuy chay kamachimkuq ansyanumkunawan tistigullkuna. Chaqa pallkuna kimkinmi urdingunata quwarqanllampa, ampanaypaq Damasku llaqtaman, pwidiq isrraylinumkunata rimkachichpa, Jisuspi kriyiqkunata prisuchpa, ampamunaypaq kay Jirusalinman kastiganayllampa, nichpa. 6 Damaskuman rillkamptiy, yaqqana ch'ayamptiymi, larrdusinach'i karqan. Chay ñanda rillkamptiymi, qunqaylla syilumanda suq ancha jwirti micha llimpyachpa, tumkuy rridurniyman achimkchamkurqan limpu pambawachtin. 7 Chaymi nuqaqa bulamkarqay pambamkaman. Chay urasmi uyarqay kaychina qayawaqta: ¡Sawlu! ¡Sawlu! ¿Imampaqmi qasachawallkangi? niwaqta. 8 Chaymandaqam tampurqay: ¡Taytitu, pimir kangi? nichpa. Chaymi niwarqan: Nuqam Jisus Nasaritmanda kani. ¡Nuqa kimkiytam qasachawallkangi! nichpa. 9 Chay pullay kaqkunaqam chay michata rimkachpaqa, ancha mancharqanllampa. Piru manam allitachu uyarqanllampa chay qayawaqtaqa. 10 Nuqaqam chay qayawaqta kaychina tampurqay: Taytitullay, ¿imatam munangi ruranaypaq? nichpa. Chaymi chay Siñur Jisusqa niwarqan: Atarichpa, riy Damasku llaqtaman. Waqpim nichunqallampa: Kaychina ruray , nichpa. 11 Rumpaymanda chay mas jwirti llimpyaq micha sarkuyachiwamptinmi, manana atirqaychu rimkamkuyta. Chaymi chay pullay riqkunaqa, rambawachpana, ampawarqanllampa Damaskuman. 12 Waqpim karqan suq runa Ananiyas chutiq. Paymi ancha allita kasuq Muysispa liyningunata. Chaymi chay damaskinu isrraylinumkunaqa paypaqqa ancha chumaqta parlaqllampa. 13 Chay Ananiyasqam chamurqan rimkawaq. Ch'ayachpaqam niwarqan: Masita Sawlu, muchuqmanda rimkamkuy, nichpa. Chaychina dimki niwamptinllam, dasna rimkamkurqay. Chaymi paytampis rimkarqayna. 14 Kanan chay Ananiyasqam niwarqan: Sawlu, punta agwilunchiqkunampa Dyusninmi qamtaqa unaymandampacha amkrachuchqa, pay munachqanda ruranallkimpaq, ancha allin Wachadurninchiqta rimkachpa, pay rimachqanda kimkin chiminmanda uyanallkimpaq. 15 Qamqam paypaq ringi rimaq yumbay runamkunampa ñawpambi kay mundumpiqa. Ringim parlaq chay rimkachqallkita, uyachqallkita. 16 Chaychina munamptinqa ¿imarallkutaq unayallkangiqa? Siñurninchiq Jisuspi tumkuy chunqu yuyamkuy, uchallkimkunamanda pirdunachunambaq. Atarichpa, chutimkuy, niwarqanmi Ananiyasqa. 17 Kay Jirusalinman kutimuchpam, Dyuspa adurana wasinman rirqay, payman mañamkuq. Chaypim suq musquypichina 18 rimkarqay Siñur Jisusta. Payqam niwarqan: Utqa lluqchiy kanalitan kay Jirusalinmanda. Chaqa nuqampaq imata rimamptimkiqam, mana rinllampachu kasuchuq, nichpa. 19 Chaymi nuqaqa nirqay: Taytitu, pallkunaqam yach'anllampa saqra kachqayta. Chaqa yumbay sinaguga wasimkunaman richpam, qambi kriyiqkunata prisuchpa, maqachpa, karsilachqa kani. 20 Qambaq rimaq Istibanda wanchimptinllampam, nuqa kimkiy chaypi chayachpa, champachpa, Allitam rurallkanllampa nirqay. (Chaymi chay wanchimkuqkunampa kampangunata nuqa kwidarqay. Yumbay isrraylinumkunam challkunata yach'an. Chaymi qambaq yach'achimkumptiy, rinllampa kriyiwaq), nichpa. 21 Piru Siñur Jisusqam niwarqan: Riylla Jirusalinmanda. Chaqa nuqam karuman rini kach'achuq chay mana isrraylinu kaqkunata nuqampaq yach'achinallki, nichpa. 22 Challkamanllam Pablutaqa allita uyarqanllampa. Piru payqam chay furastirumkunampaq rimamptin, das ch'uqyarirqanllampa. (Chaqa pallkunaqam ancha disprisyarqanllampa yumban furastirumkunata.) Chaymi ancha jwirtita nirqanllampa: Chay Pabluqa wañunqa! ¡Manam allichu kawsanambaqqa! nichpa. 23 Chaychinam, ay, mana challkuq ancha ch'uqyarqanllampa. Kanan ancha piñamkuchpam, kampangunata surqurqanllampa. Allpatampismi altumkunaman sitamkurqanllampa pulbu alsamkachtin. 24 Chaychina ruramptinllampam, chay mas kamachimkuq suldaduqa nirqan: Pablutaqa umku kwartilman wichuyllampa. Alli alli asutiyllampa dimklaranambaq, nichpa. Chaqa chay kamachimkuq suldaduqam munarqan yach'ayta: ¿Imarallkuch chay runamkunaqa ancha ch'uqyachpa, payta kuntranllampa? nichpa. 25 Chaymi ch'aqnamptinllampa asutinanqa, Pabluqa chay kamachimkuq suldaduta nirqan: Ima kanchur dirichullki suq rrumanu runata asutinallkillampa, manaraq ni sintinsyadu kamptin? 26 Chaychina nimptinmi, chay kamachimkuq suldaduqa, mana asutichpachu, rirqan chay mas kamachimkuqninda willaq: Mana imamkich allitachu rurangiman. ¡Rrumanu kastanchiqchi chay runaqa! nichpa. 27 Chaymi chay mas kamachimkuqqa chamuchpa, Pablutaqa kaychina tampurqan: Allimpchur qamqa rrumanu kangi? nichpa. Chaymi Pabluqa Ari nirqan. 28 Chaymi chay kamachimkuqqa nirqan: Nuqaqam ancha achka qallayta pagaramkuchqa kani, rrumanu kasta kanaypaq. Chaychina nimptinmi, Pabluqa nirqan: Piru nuqaqam rrumanumkunampa ayllumbi nasichqayrallku, mas lijitimu rrumanu kani. 29 Chaychina nimptinmi, chay asutinambaq kaqkunaqa Pablumandaqa achurqanllampana. Asta chay mas kamachimkuq suldaduqam yach'achpa: Kay runaqam rrumanu kasta kachqa nichpaqam, ancha mancharqan, prisuchqanrallku. 30 Qayandinqam chay mas kamachimkuq suldaduqa munarqan yach'ayta: Mayñ, imampaqchi chay isrraylinumkunaqa Pabluta kuntranllampa, nichpa. Chaymi Pablutaqa ch'aqnadu kachqanmanda paskachichpa, kwartilmanda surqurqan. Chaymandaqam tandachichpa chay kamachimkuq isrraylinu kuramkunata tumkuy chay mas kamachimkuq juyiskunata, pallkunampa ñawpanman Pabluta rurarqan.
1 Pabluqam chay Mas Kamachimkuq Tandamkaq Juyiskunata champachpa nirqan: Masitamkuna, uyawayllampa. Tayta Dyusmi rimkawallkan. Nuqaqam paypa ñawpambi kanangaman allin chunquyuq kawsachqa kani. 2 Chaychina nimptinmi, mas kamachimkuq isrraylinu kura Ananiyasqa ñawpambi kaqkunata kamachirqan, chimimbi Pabluta maqananllampa. 3 Chaychina nichqambaqmi, Pabluqa chay Ananiyasta nirqan: Dyusmi qamtaqa rin maqachuq, chimimkiwanlla payta kasumptimki! Chaypim tiyallkangi suq juyischina, justisyata ruranallki. Liyninchiq nichqanchina ruray, allita yach'anallki, dilituyuqchu kani ichu mana, nichpa. ¿Imarallkum qamqa liyninchiqta mana kasuchpa, munangi maqachiwaytaqa? 4 Uyachpa, chaypi kaqkunaqam Pabluta nirqan: Ima wampuyallkangichu Dyuspa mas kamachimkuq kuranda? nichpa. 5 Pabluqam nirqan: Masitamkuna, manamir yach'achqachu kani: Payqam mas kamachimkuq kura, nichpaqa. Chayta yach'achpaqam, mana chaychinachu rimanayta. Chaqa Dyuspa Santu Librumbiqam nin: Amamkich llaqtallkimpa awturidarnimba kuntrandaqa rimangichu, nichpa. 6 Pabluqam chay tandamkaq kamachimkuq juyiskunata champachqanchina, kwintata qumkarqan: Wamkin juyiskunaqam sadusiyu dumktrinayuq kachqa, wamkin juyiskunaqam farisiyu dumktrinayuq kachqa. Chaymi jwirtita rimachpa, nirqan: Masitamkuna, farisiyumkunampa dumktrinandam kriyini. Farisiyumpa churinmi kani. Chaymi kriyini: Wañuqkunam muchuqmanda rin kawsamuq, nichpa. Chayrallkum munanllampa kastigawayta. Manam imampaqchu, nichpa. 7 Chaychina Pablu nimptinmi, farisiyumkunaqa sadusiyumkunawan anyanamkurqan pallkunampura. Chay pudirniyuq juyiskunaqam amkramkarqanllampa, mana chay layalla dumktrinayuq kachqanllamparallku. 8 Chaqa sadusiyumkunaqam ninllampa: Wañuqkunaqam mana rinchu kawsamuq. Manam ni anjilkuna, ni almamkuna kanchu, nichpa. Piru farisiyumkunaqam ninllampa: Kanmi anjilkuna, kanmi almamkuna. Wañuqkunampismi rin kawsamuq, nichpa. 9 Chaymi yumbay ancha kunyarqanllampa. Wamkin farisiyumkunaqam Muysispa liyningunata yach'achimkuqkuna karqan. Pallkunaqam das atarichpa, nirqanllampa: Kay runaqam mana nima maluta rurachqachu. Kinsampch'i suq alma ichu suq anjil paytaqa parlachichqa. Chaymi mana balinchu payta kastigananchiqqa. Dyuspa kuntrangich timkramkanchiqman. 10 Chaychina Pablumpaq nimptinllampam, yumbay chay sadusiyumkunaqa farisiyumkunawan ancha kunyarqanllampa, suqta suqta ninamkuchpa. Pilyaq layana kamptinllampam, chay mas kamachimkuq suldaduqa ancha mancharqan: Pablutamkich chillpinmanllampa quch'inamkuchpa, nichpa. Chaymi payqa kamachirqan suldadungunata, chay ch'uqyaqkunampa ch'awpinmanda Pabluta surquchpa, ampananllampa umku kwartilman. Chaymi chaychina rurarqanllampa. 11 Qayandin tutaqam Siñurninchiq Jisusqa Pabluman rimkamkuchpa, nirqan: Pablitu, ama manchachpachu, animamkay. Chaqa kay Jirusalimbi nuqampaq rimachqallkichina, waq Rruma llaqtampimpis nuqampaqqa ringi rimaq, nichpa. 12 Qayandinqam mas di 40 isrraylinumkuna tandanamkuchpa, Pabluta wanchinambaq parlarqanllampa kaychina jurachpa: Ama nimatampis mimkuchunchu ni umpyachunchu, Pabluta wanchinanchiqkaman. Mana wanchimptinchiqqam, Tayta Dyus kastigawachun, nichpa. 14 Pallkunaqam kamachimkuq isrraylinu kuramkunaman, kamachimkuq ansyanumkunaman richpa, nirqanllampa: Nuqallkunaqam jurachqa kani Pabluta wanchinayllampa, manaraq nimata mimkuchpa. Mana nuqallkuna wanchimptiyqach'i, Taytanchiq Dyus yumbayniyta kastigawanqa. 15 Chayri qamkunaqa tumkuy chay Mas Kamachimkuq Tandamkaq Juyiskunawan mañayllampa chay mas kamachimkuq suldaduta, qaya ampamunambaq Pabluta kay ñawpallkillampaman: Paypaqmi munanillampa mas allita yach'ayta, nichpa. Nuqallkunaqam ñambi pamkamkuchpa, rinillampa chuyaq wanchinayllampa, manaraq kayman ch'ayamumptin, nichpa. 16 Piru Pablumpa panimba wambranmi chay jurampachqanda yach'arqan. Chaymi chay subrinunqa das rirqan kwartilman tiyunda abisaq. 17 Chayrallkum Pabluqa suq kamachimkuq suldaduta qayachpa, nirqan: Ampay kay chulituta kamachimkuqnimkiman. Munanchi payta parlachiyta, nichpa. 18 Chaymi chay uraslla chay suldaduqa chulituta ampachpa, chay mas kamachimkuq suldadutaqa nirqan: Jifisitu, chay prisu Pablum qayawachpa, rrugawarqan, kay chulituta ampamunaypaq qaman. Anchach munan qamta parlachichuyta, nichpa. 19 Chay kamachimkuqqam ama pimpis uyanambaq, chay chulituta mamkinmanda rambachpa, ampachpa suq ladituman, tampurqan: Imatamir munangi willawayta? nichpa. 20 Chaymi chulituqa nirqan: Achka isrraylinumkunach kunanamkuchqa, qamta ingañachuchpa, nichunanllampa: Nuqallkunampa mas kamachimkuq juyisnillkunach munanllampa Pabluta tampuyta, allita yach'ananllampa dimklarachqanda, nichpa. Chaypaq tumbanllach rinllampa mañachuq, qaya ampanallkimpaq tiyuyta chay Mas Kamachimkuq Juyiskunaman. 21 Amamkich qamqa pallkunataqa kriyingichu. Chaqa mas di 40 runamkunach ñambi pamkamkuchpa chuyallkanllampa, tiyuy Pabluta wanchinanllampa. Pallkunach jurachqallampa, manaraq nimata mimkuchpachu ni umpyachpachu, tiyuyta wanchinanllampa. Isi mana wanchichpaqach, Dyusmanda kastiguta rinllampa ch'askiq, nichpam, jurachqallampa. Chaymi chuyamkullkanllampa: Imatach ringi niq, nichpa. 22 Chaychina nimptinmi, chay kamachimkuqqa chulitutaqa kach'arqanna kunachpa: Mayñ, riynari. Amamkich pitampis chay niwachqallkitaqa ningichu, nichpa. 23 Chay chulitu rimptinqam, chay kamachimkuqqa ichkay yanampamkuq suldadunda qayachpa, nirqan: Sigurayllampa 200 ch'amkimp puriq suldadumkunata, 70 suldadu bistyayuqkunata, 200 garruchiru suldadumkunata, rinallkillampa kay tuta las nwibi Sasarya llaqtaman. 24 Pablumpaqpis bistyamkunata sigurayllampa, muntamkuchpa rinambaq, allita ch'ayanambaq waq prifimktu Filisman, nichpa. 25 Chay kamachimkuqqam pallkunawan kach'arqan suq kartata, kaychina nichpa: 26 Kuyachqay kamachimkuq prifimktu Filis, nuqa Klawdyu Lisyasmi qamta nampallkullki. 27 Yach'anallkimpaqmi kallkunata iskibrillki: Kay runatam isrraylinumkuna prisurqanllampa. Wanchinanllampa kamptinmi, nuqaqa yach'achpa: Rrumanuch payqa nimptinllampa, suldadullkunawan richpa, wachachqa kani. 28 Yach'anayrallku imampaqchi kuntranllampa, nichpa, amparqani Mas Kamachimkuq Tandamkaq Isrraylinu Juyiskunaman. 29 Chaypim yach'arqay: Pallkunampa dumktrinanmi mana igwalchu, nichpa. Chaysitumpaqmi kuntranllampa. Piru chaysitumpaqllam mana dirichuyuqchu wanchinanllampa ni karsilananllampa. 30 Nuqaqam yach'arqayna: Chay isrraylinumkunaqam rinllampa chuyaq ñambi, Pabluta wanchinanllampa, nichpa. Chaymi paytaqa qaman kach'amuni. Payta kuntraqkunatampismi nichqa kani, qaman chamunanllampa, justisyata ruranallki. Chaytallam iskibrillki. Mayñ, rimkanamkuchun, nichpa. 31 Chay kartata suldadungunata quchpam, nirqan rinanllampa. Chaymi nichqanda kasuchpa, Pabluta ampachpa, tutamp rirqanllampa Antimpatris llaqtamkaman. 32 Qayandinqam chay ch'amkimp riq suldadumkunaqa Antimpatrismanda kutimurqan kwartilninman. Chay bistyayuq suldadumkunallam Pabluwanqa mas waqman rirqanllampa. 33 Chaymi Sasarya llaqtaman ch'ayachpaqa, chay kartata qurqanllampa prifimktu Filista. Pablutampismi intrigamkurqanllampa. 34 Chaymandaqam chay kartata liyichpaqa, chay prifimktuqa Pabluta tampurqan, yach'anambaq: Maymandach, nichpa. Chaymi Pablu willamptinqa, yach'arqanna prubinsya Silisyamanda kachqanda. 35 Chaymi Pablutaqa nirqan: Kuntrachuqkuna chamumptinnam, uyachaq niwachqallkita, nichpa. Chaymandaqam chay suldadumkunata kamachirqan, Pabluta kwidananllampa gubyirnu Irudis atun wasi rurachqambi.
1 Sinku diyas pasamptinnam, chay mas kamachimkuq isrraylinu kura Ananiyasqa Jirusalinmanda ch'ayarqan chay Sasarya llaqtaman. Wamkin kamachimkuq ansyanumkuna suq abugadumpismi paywan chamurqanllampa. Chay abugaduqam Tirtulu chutiq. Pallkunaqam chay prifimktu Filisman ch'ayarqan, Pablumpa kuntran dimandata rurananllampa. 2 Pabluta ampamumptinllampaqam, chay abugadu Tirtuluqa payta kuntrachpa, chay prifimktu Filista kaychina willarqan: Qam ancha allin Taytitu Prifimktu Filis, dyusilumpagi. Chaqa qam ancha yach'ayniyuq kachpam, yumbay llaqtayllampampi allita kamachimkumptimki, ancha chumaqta kawsanillampa, mana nimatampis pilyachpachu. 3 Chaychina ancha allita kamachimkumptimkim, tumkuy maypi kuchimkuchpa, qamta ancha agradisillkillampa. 4 Piru ama masta unayachichunay, ancha rrugallki suq faburta nuqallkunata rurawanallki. Uyawayri das suq palabritata willachunay kay Pablumpaq. 5 Riqsinillampam: Kay runaqam suq plaga, nichpa. Chaqa kay mundumpi tumkuy mayman richpa, suq laya dumktrinata yach'achimkumptinmi, isrraylinumkunaqa piñachinamkuchpa, pallkunampura amkramkachpa, gubyirnunchiq Sasarta kuntranllampa. Payqam nasarinu dumktrinayuqkunampa suq kamachimkuqnin. 6 ¡Ima! Dyuspa santu adurana wasindam disprisyachpa, munachqa mampachayta. ?Chaymi nuqallkunaqa prisuchpa, munachqallampa kani liy kamachichqanchina justisyata rurayta. 7 Piru chay kamachimkuq suldadu Lisyasmi mitimkuchpa, wampuyachpa, suldadungunawan quch'iwachqallampa. 8 Chaymandaqam niwachqallampa, qaman chamunaypaq.? Chaymi kananqa qam kimkimki atingi kay nichuchqaypaq tampuyta kay Pabluta, allita yach'anallki yumbay rurachqambaq, nichpa. 9 Chaychina chay abugadu nimptinmi, chay kamachimkuq isrraylinumkunampis Pablumpaqqa nirqan: Ari, chaychinam kachqa, nichpa. 10 Chaymandaqam chay prifimktuqa mamkinwan Pabluta siñiyarqan rimanambaq. Chaymi Pabluqa nirqan: Siñur Prifimktu, nuqaqam yach'ani: Unaymandampacham kay nasyunniypa juyisnin qam kachqa kangi. Chaymi mana manchachpachu, rimani kay ñawpallkimpi. 11 Qam kimkimkim suqkunata tampuchpa, atingi yach'ayta. Chayraqmi dusi diyas kananwan chay Jirusalinman ch'ayarqay, Dyusta aduranaypaq. 12 Manam pimpis tariwachqachu, suqkunawan anyanamkullkamptiy. Manam ni Dyuspa adurana wasimbi ni sinaguga wasimkunampi, ni Jirusalimbi pitampis anyachqachu kani. 13 Chaymi kay runamkunaqa tumkuy laya llullangunawan kuntrayta rimachpampis, mana atinllampachu ichkichiwayta. 14 Piru allita yach'anallkimpaqmi, klaruta nillki, unay agwilullkunampa Dyusnindam kasuni. Lumkismi muchuq dumktrinata sigini. Chay dumktrinaypaqmi yuyanllampa: Manach balinchu, nichpa. Piru kriyinim yumbay liyninllampampi. Kriyinim Dyuspaq rimaqkuna iskibrichqambi. 15 Pallkunachinallam nuqampis Dyuspi allita yuyamkuni: Wañuqkunatam rin kawsachiq, chay alli ruraqkunata tumkuy chay uchayuqkunatampis, nichpa. 16 Chayrallkum nuqaqa sujitamkani, allita rurachpa, allin chunquyuq kanaypaq Dyuspa ñawpambi, runamkunampa ñawpambimpis. 17 Suq nasyungunaman richpam, achka watamkunamanda kutimuchqa kani nasyunniymanqa, limuch'nata, ufrindamkunata kay Jirusalinman ampamuchpa. 18 Chaymi Dyuspa adurana wasimbi mayllamkuna kustumbrita rurachpa, chay ufrindamkunata rurallkamptiy, wamkin isrraylinu prubinsya Asyamanda kaqkuna tariwarqan. Piru manam achka runamkuna pullayqa karqanchu. Manam ni pitampis anyarqaychu. 19 Mana allimkunata rurachqa kamptiyqa, chay Asyamanda kaqkuna munachpa kuntrawaytaqa, chamunqallampa kay ñawpallkimpi chimbiwaq. 20 Piru kaypi kaqkunaqam Dyuspa adurana wasimbiqa mana karqanllampachu. Pallkunaqam rimkawachqallampa chay Mas Kamachimkuq Tandamkaq Juyiskunampa ñawpambi kallkamptiy. Chaypi faltachqa kamptiyqar, kariyawanqallampa. 21 Chay mas kamachimkuq juyiskunampa ñawpambim jwirtita rimachpa, nirqay: Kananqam kaychina dimandadu kani, kriyichqayrallku: Wañuqkunam muchuqmanda rin kawsamuq, nichpa. Kinsampch'i pallkunataqa chaychina nichpa faltachqa kani, nichpa. 22 Chay prifimktu Filisqam allita yach'arqan Jisuspi kriyiqkunampaq. Chaymi chay dimandataqa suq diyampaqna dijarqan. Pallkunataqam nirqan: Suldadumkunampa kamachimkuqnin Lisyas chamumptinmi, paytaqa tampuchaq, mas allita yach'anay kay dimandampaq, nichpa. 23 Chaymandaqam chay prifimktu Filisqa kampitanda kamachirqan: Pabluta allita kwiday. Piru dijay, yanasunguna (yanasanguna) chamuchpa watumkunan, payta imampimpis yanampananllampa, nichpa. 24 Chaymandaqam wamkin diyamkunamanda Filisqa chamurqan warmin Drusilawan. Chay warminqam Isrrayilmanda karqan. Pablutaqam qayachirqan, Jisumkristumpa dumktrinambaq parlachinan. 25 Chaymi Pabluqa kaychina parlachirqan: Jisuspi kriyichpar, kwirpunchiqtaqa allita sujitachun. Justisyatampis ancha allita rurachun. Chaqa kaychinam jwisyu diya rin kaq, nimptinmi, Filisqa ancha mancharqan. Chaymi Pablutaqa nirqan: Riyna kananqa. Suq diyanam lugarniyuq kachpa, qayachichqallki uyachunaqpaq, nichpa. 26 Chaqa chay Filisqam munarqan Pablu pagaranambaq qallayta, karsilmanda surqunambaq. Chaymi kutin kutin Pablutaqa qayachiq parlanambaq. 27 Chaychinaqam ichkay watana karqan. Chaymandaqam Filisqa dijarqanna prifimktu kargundaqa. Pursyu Fistunam chay prifimktu kargunmanqa yallkurqan. Piru Filisqam isrraylinumkunawan allita munachpa kidayta, mana kach'arqanchu Pablutaqa. Prisulla dijachpam, kargunmandaqa lluqchirqan.
1 Fistu ch'ayarqan chay Sasarya llaqtaman, prifimktu karguta ch'askinambaq. Kimsa diyamandaqam anaq Jirusalinmanna rirqan. 2 Waqpiqam chay kamachimkuq isrraylinu kuramkuna mas kamachimkuq ansyanumkunawan das rirqanllampa, Fistumpina Pabluta dimandaq. 3 Pallkunaqam ch'ayachpa kaychina rrugarqanllampa: Suq faburta rurawayllampa. Ampachimuyri Pabluta waq Sasaryamanda kay Jirusalinman, nichpa. Piru pallkunaqam yuyarqanllampa Pablutaqa ñambi wanchiyta. 4 Piru Fistuqam pallkunata nirqan: Pabluqam Sasarya llaqtampi prisu. Nuqa kimkiymi yuyani waqman riyta kay diyamkunalla. 5 Qamkunamandam suqnimkimkuna atingillampa pullay riyta waqman. Chaychina richpaqam, atingillampa chay runataqa chimbiyta, ima maluta rurachqa kamptinqa, nichpa. 6 Chaymandaqam chay Fistuqa uchu diyas ichu dyis diyastalla Jirusalimbiqa karqan. Chaymandaqam chay isrraylinumkunawan kutirqan Sasaryamanna. Qayandin diyaqam dispachumbina kallkachpa, ampachimurqan Pabluta, chay Fistumpi dimklaranambaq. Chaymi chay isrraylinumkunaqa Pablumpa ladunman qamimkachpa, yanqamkunata llullamkuchpa, chimbirqanllampa: Chayta manchu rurachqa kangi, nichpa. Piru maychimka ima layata kuntrachpampis, mana nimampi atirqanllampachu ichkichiyta. 8 Chaymi Pabluqa wachamkanambaq nirqan: Manam nuqaqa isrraylinumkunampa liynindaqa kuntrachqachu kani. Manamkich ni Dyuspa adurana wasinda burlachqachu kani. Manam ni gubyirnu Sasarta kuntrachqachu kani, nichpa. 9 Piru chay Fistuqam munachpa allita kidayta isrraylinumkunawan, Pablutaqa tampurqan: Munangichu riyta Jirusalinman, waqpina kay justisyata ruranaypaq? nichpa. 10 Chaymi Pabluqa prifimktu Fistutaqa nirqan: Manñm. Kay dispachum gubyirnu Sasar Agustumpa. Chaymi kaypilla atingi dimandaytaqa uchyayta. Qamqam allita yach'angi: Manam nimampi isrraylinumkunataqa faltachqachu kani. 11 Piru imampi faltachqa kamptiyqa, wanchiwanqallampa. Piru mana nima uchayuq kamptiyqam, mana pimpis dirichuyuqchu, llaqta masillkunaman intrigamkuwananqa. Nuqa rrumanu kachpam, dirichuyuq kani mañanaypaq mas kamachimkuq gubyirnunchiq Sasarta, dimandayta uchyanambaq. Chaymi kananqa chaychina mañani, nichpa. 12 Chay Fistuqam yanampamkuqningunawan Pablumpa dimandambaq parlarqan. Chaymandaqam Pablutaqa nirqan: Qam nichqa kangi: Rrumampa gubyirnun Sasarmi kay dimandayta uchyanqa, nichpa. Chaymi paymanna ringi riq, nichpa. 13 Suq diyam gubyirnu Agrimpa rirqan Sasarya llaqtaman panin Birinisiwan, chay muchuq prifimktu Fistuta nampallkuq. 14 Waqpilla pallkuna kamptinmi, chay prifimktu Fistuqa chay Agrimpata Pablumpaq nirqan: Chay prifimktu Filismi kaypi suq prisuta dijachqa. 15 Jirusalimbi kallkamptiymi, kamachimkuq isrraylinu kuramkuna kamachimkuq ansyanumkunawan suq dimandata nuqampi rurarqanllampa, sintinsyanaypaq chay prisuta. 16 Chaymi nuqaqa pallkunataqa nirqay: Nuqallkuna rrumanu awturidarkunam mana kustumbriyuqchu kanillampa ni pitampis sintinsyanayllampa wañunanqa, manaraq chimbinamkumptinqa, nichpa. 17 Chaymi pallkuna nuqawan kayman chamumptiyllampa, mana unayachpachu, qayandin diyalla, dispachuypi tiyachpa, Pabluta ampachimurqay, chimbinanllampa. 18 Chaqa nuqaqam yuyarqay: Imamkunatach'i Pablumpaq ninqallampa, nichpa. Piru chay chimbiqkuna kariyamptimbismi, mana nima dilituta paypiqa tarirqaychu. Manam yuyachqaychinachu kachqa. 19 Chaqa Pablumpa dumktrinambaqllam kaychina rimarqanllampa: Pabluch yach'achimkun suq runa Jisus chutiqpaq. Chay Jisusqach wañuchqana. Piru Pabluqach chay Jisuspaqqa nin: Wanchimptimbischi kawsamuchqana, nichpa. 20 Chaychina nimptinllampam, nuqaqa mana imata atirqaychu rurayta. Chaymi Pabluta tampurqay, Mayñ, ¿munangichu Jirusalinman riyta, waqpi kay dimandata rurananchiqllampa? 21 Chaychina nimptiymi, Pabluqa niwarqan: Mas kamachimkuq gubyirnunchiq Sasar Agustunam kay dimandayta uchyanqa, nichpa. Chayrallkum nuqaqa kamachimkuchqa kani prisulla gwardananllampa, chay gubyirnunchiqman kach'anallkaman, nichpa. 22 Chaychina chay Fistu nimptinmi, chay Agrimpaqa nirqan: Nuqampismi chay runataqa munani uyayta, nichpa. Chaymi Fistuqa Agrimpata nirqan: Qayam ringi uyaq, nichpa. 23 Chay qayandinqam chay gubyirnu Agrimpampa mas kamachimkuq suldadunguna, chay llaqtampi suq kamachimkuq runamkunawan, Agrimpampa chay panin Birinisiwan ch'ayachpa, Agrimpata bibachichpa, yallkurqanllampa Fistumpa dispachunman, Pabluta uyanambaqllampa. 24 Kanan chay Fistuqam Pabluta ampachimuchpa, nirqan: Gubyirnu Agrimpa, yumbay qamkuna kamachimkuq runamkuna, uyawayllampa. Kaypim kay runaqa. Jirusalimbi, kay Sasarya llaqtampimpis achka isrraylinumkuna paypa kuntranda rimachqallampa. Mana challkuqmi niwanllampa: Kay Pablu wañunqa, nichpa. 25 Piru nuqampa yuyayniymandaqam mana nima dilituta rurachqachu wañunambaqqa. Piru pay kimkinllam nichqa: Mas kamachimkuq gubyirnunchiq Sasar Agustunam dimandaytaqa uchyanqa, nichpa. Chaymi yuyachqana kani Sasar Agustuman kach'anaypaq. 26 Lumkismi chay gubyirnunchiq Sasar Agustuman ufisyuta kach'anaypaq, mana yach'anichu kay Pablumpaq iskibriyta: Payqam kay laya dilituyuq kachqa nichpa. Chaymi gubyirnu Agrimpa, qamba ñawpallkiman, kay suqkunampa ñawpanman paytaqa ampamuchqa kani. Piru masmi qaman ampamuchqa kani. Chayri tampuy, imata nimptin, chaytana iskibrichpa, ufisyuta kach'anaypaq. 27 Allkabraq alli kanqa kay Pabluta gubyirnunchiqman kach'anaypaq, mana nimata iskibrichpa paypaqqa: Kay laya uchayuqmi payqa, nichpa.
1 Chaymi gubyirnu Agrimpaqa Pabluta nirqan: Atingim rimayta wachamkanallkimpaq, nichpa. Chaymi Pabluqa mamkinda alsachpa, nirqan: 2 Gubyirnu Agrimpa, qamba ñawpallkimpi kachpam, ancha kuchimkuni rimanaypaq, yach'anallki isrraylinu llaqta masinchiqkuna nuqampaq yumbay nichqanda. 3 Kanan mastam kuchimkuni ancha allita riqsichqallkirallku nuqanchiq isrraylinumkunampa kustumbrinchiqkunata, tumkuy ima layata anyanamkumptiypis. Chaymi mañallki, ama piñamkuchpa, allita uyawanallki kay nichuchqayta. 4 Yumbay isrraylinu llaqta masinchiqkunam yach'anllampa llaqtaypi, Jirusalimbimpis imachina pallkunawan wambraymandampacha tiyachqayta. 5 Pallkunampismi munachpaqa, atinllampa willachuyta nuqa kachqaypaq. Chaqa nuqaqam wambraymandampacha farisiyu dumktrinayuq kachqa kani. Farisiyumkunam ancha munanillampa dumktrinayllampata manyaqlla kasuyta maski yumbay isrraylinumkunamanda. 6 Chaychina kamptiypismi, rimkay, ampamuwachqallampa dimandawaq, ancha kriyimptiy: Tayta Dyusmi wañuqkunata rin kawsachimuq, nichpa. Chaqa wañuqkunata kawsachinanmi payqa ufrisichqa karqan unay agwilunchiqkunata. 7 Isrraylinumkunampa chay dusi atun ayllunchiqkunam ancha munanllampa ch'askiyta Tayta Dyus ufrisimkuchqanda. Chaymi pallkunaqa Tayta Dyusta aduranllampa punchawnindin tutampnindin. Uyaway, Gubyirnu Agrimpa. Nuqampismi pallkunachina Tayta Dyus ufrisimkuchqambi ancha yuyamkuni. Chayrallkum kay isrraylinumkunaqa kuntrawanllampa. 8 Isrraylinumkuna, ¿imarallkutaq mana kriyingillampachu: Tayta Dyusmi rin kawsachimuq wañuqkunata, nichpaqa? 9 Nuqa kimkiymi unayqa yuyarqay: Taytanchiq Dyusmi munan qasachanaypaq Jisus Nasarinumpi kriyiqkunata, nichpa. 10 Chaymi nuqaqa Jirusalimbi kamachimkuq isrraylinu kuramkunamanda urdingunata surquchpa, rirqani prisuq Jisuspi achka kriyiqkunata, karsilanaypaq. Kanan pallkunata wanchimptinllampam: Ancha allitam rurallkangillampa, nirqani. 11 Waqta kaytam purirqay Jisuspi kriyiqkunata ancha qasachachpa, Jisusta ñiganambaqllampa. Chaychinam rurarqani isrraylinumkunampa yumbay sinaguga wasiyllampampi. Kanan ancha piñamkuchpam, pallkunata ch'iqnirqay. Chaymi karu llaqtamkunaman rirqani, pallkunata qasachaq. 12 Kamachimkuq isrraylinu kuramkuna kamachiwamptinmi, Jisuspi kriyiqkunata qasachayta yuyachpa, rillkarqay Damasku llaqtaman. 13 Uyawayri Gubyirnu Agrimpa, ñanda nuqa rillkamptiy, larrdusi urastach'i suq ancha jwirti micha syilumanda achimkchawarqan. Chay michaqam rumpaymandaqa mas jwirtita llimpyarqan. Chaymi nuqataqa, yumbay pullay riqkunatampis limpu achimkchawarqanllampa. 14 Chayrallkum yumbayniy bulamkarqayllampa pambaman. Chay urasmi uyarqay suq qayawaqta ibriyu rimaypi: Sawlu, Sawlu, ¿imampaqmi qasachawangi? Manchu buyisqa yampumkuchpa, imkiman garruchata matqachpa, paylla chuqrimkan. Chaychinallam qambis rurallkangi, nichpa. 15 Chaychina qayawamptinmi, nuqaqa tampurqay: ¡Pimir kangi, Taytitu? nichpa. Chaymi payqa niwarqan: Nuqam Jisus kani. Nuqa kimkiytam qasachawallkangi. 16 Mayñ, atarichpa chayay. Qamanmi rimkamkuchqa kani sirbiwanallki, yumbay kay rimkachqallkimpaq tistiguy kanallki. Chaymandaqam masta rini rimkachichuq, chaypaqpis rimanallkimpaq. 17 Wachachuqmi rini isrraylinumkunamanda tumkuy furastiru kaqkunamandampis. Kananqam kach'allki, pallkunaman richpa, 18 yach'achimptimki, intyindinanllampa, amana masta tutayaq ñambichina purinanllampa. Achwanmi munani, allita rurachpa, achimk ñambichinana purinanllampa. Chaychina kawsachpaqam, manana rinllampachu puriq dyablu munachqanda rurachpaqa. Chaymi Tayta Dyusta uyachpa, pay kamachimkuchqanda kasuchpana, rinllampa kawsaq. Chaychina nuqampi kriyimptinllampam, uchangunata pirdunachaq, amkrachqallkuna kachpa, suq irinsyata ch'askinanllampa, nichpa. 19 Uyayri, Gubyirnu Agrimpa. Chay syilumanda qayawaqta kasuchpam, mana fyirusyachqachu kani. 20 Chaymi puntata Damaskumpi tiyaqkunata yach'achirqay Jisus niwachqanda. Chaymandaqam das richpa, yach'achirqay Jirusalimbi tiyaqkunata tumkuy chay prubinsya Judiyampi tiyaqkunatampis. Chay mana isrraylinu kaqkunatampismi yach'achichqa kani, mana allimkunata rurachqanrallku syintichpa, chay uchamkunata dijachpana, Dyuspi tumkuy chunqu yuyamkunanllampa. Pallkunataqam animachichqa kani, chumaqtana kawsananllampa, pallkunata rimkaqkuna ninanllampa: Dyuspim allimpta kriyinllampa, nichpa. 21 Kaychina yach'achimkumptiymi, Dyuspa adurana wasimbiqa llaqta masinchiq isrraylinumkunaqa prisuwachpa, munachqallampa wanchiwayta. 22 Piru Taytanchiq Dyus yanampawamptinmi, kanangaman paypi allita kriyichpa kawsallkani, paypaq yach'achichpa byijumkunata wambramkunata. Manam nunka suq layataqa yach'achimkuchqachu kani. Achwanmi Dyuspaq rimaqkuna nichqanda, Muysis nichqandalla yach'achimkuchqa kani. 23 Chaqa pallkunaqam nirqan: Dyus Amkrachqan Wachadurqach padisichpa rin wañuq. Wañuchpaqach payqa yumbay wañuqkunamanda puntata rin kawsamuq, yach'achinambaq isrraylinumkunata, tumkuy furastirumkunatampis, nichpa. 24 Chaychina Pablu rimamptinmi, prifimktu Fistuqa jwirtita rimachpa nirqan: A, lumkuch'i kangi, Pablu! ¡Ancha liyichpach'i, lumkuyachqa kangi! nichpa. 25 Chaymi Pabluqa nirqan: Uyaway ancha kamachimkuq Taytitu Fistu. Manam lumkuchu kani. Achwanmi tumkuy jwisyuywan allimp kaqtalla rimallkani. 26 Kayqa kaypi Gubyirnu Agrimpa; payqam ancha allita yach'an kay nichqaypaqqa. Chaymi mana pitampis manchachpachu, klaruta paypa ñawpambiqa rimani. Chaqa manam suq kuchumpi ima pamkaduchinachu kachqa. 27 Qamqam Gubyirnu Agrimpa kriyingi Dyuspaq rimaqkuna nichqanda, ¿manachu? Nuqam yach'ani kriyingim, nichpa. 28 Chaymi Gubyirnu Agrimpaqa Pablutaqa nirqan: Kanan qamqam das munangi Jisuspi kriyichiwayta, nichpa. 29 Chaymi Pabluqa nirqan: Nuqaqam Dyusman mañamkuni, daslla ichu qachuqa qam yumbay kay uyawaqkunawan nuqachina Jisuspi kriyinallkillampa; piru amar kay kadinamkunawan watachqa kanallkillampa. 30 Chaychina Pablu nimptinmi, chay gubyirnu, panin Birinisindin, chay prifimktuwan, yumbay chay pullanllampa tiyallkaqkunampis atarirqanllampa. 31 Chaymandaqam achurqanllampa suq laduman parlaq. Chaypiqam pallkunampura ninamkurqanllampa: Kay runaqam mana nima maluta rurachqachu wañunambaq, ni karsilpi kanambaq. 32 Chaymi Agrimpaqa Fistuta nirqan: Kach'anchiqmannam kay runata, mana pay kimkin nichqa kamptin: Gubyirnunchiq Sasar Agustu dimandayta uchyanqa, nichpa.
1 Chay kamachimkuqkunaqam yuyarqan prisumkunata intrigamkuyta, suldadunguna Italya nasyunman ampananllampa. Chaymi Pabluta yumbay chay wamkin prisumkunatampis intrigarqanllampa suq kamachimkuq suldadu Julyu chutiqta. Chay Julyuqam gubyirnu Sasar Agustumpa achka suldadungunampa kamachimkuqnin karqan. [Nuta: Lumkasmi mana prisuchu kachpa, Pablumpa pullan rirqan.] 2 Rirqayllampa yamkumpi puriq barku Adramitiyu llaqtamanda kaqpi prubinsya Asyampa llaqtangunaman. Chay barkumpiqam pullayllampa rirqan kriyiq masinchiq Aristarku. Paymi prubinsya Masiduñampa Tisalunimka llaqtanmanda karqan. 3 Chaymandaqam qayandinqa ch'ayarqayllampa Sidun llaqtaman, barkumkunampa chayanan lugarman. Chay kamachimkuq Julyuqam ancha alli karqan Pabluwan. Chaymi dijarqan rinambaq yanasungunata (yanasangunata) watumkuq. Kanan pallkunaqam Pablutaqa tumkuy imampi yanamparqanllampa. 4 Chaymandaqam Sidunmanda chay barkumpina lluqchirqayllampa. Riypiqam yamkumpa ch'awpimbi isla allpa Chimprimpa ladunda pasarqayllampa, wayramanda wachamkanayllampa. 5 Chay mar yamkumpa sawandaqam rirqayllampa prubinsya Silisyampa, prubinsya Panfilyampa manyanda. Chaymandaqam ch'ayarqayllampa prubinsya Lisyampa Mira llaqtanman. 6 Chay Mira llaqtampi suldadumkunampa kamachimkuqninqa tarirqan suq barkutana, Alijandriya llaqtamanda Italya nasyunman rillkamptin. Chaymi chay barkumanna nuqallkunata yallkuchiwarqan, waq Italyamanna rinayllampa. 7 Chaymandaqam achka diyamkunata chay mar yamkutaqa qachuqa rirqayllampa. Kanan ancha ñamkachpam ch'ayarqayllampa Kinidu llaqtampa ñawpanman. Kanan chay wayra arkawamptinllampam, pasarqayllampa Salmun llaqtampa ñawpanda. Wayramanda wachamkanayllampa, nichpa, muyurqayllampa chay isla allpa Kritampa imki ladunda. 8 Chaychina ancha ñamkachpam, tumkuy chay kustata richpa, ch'ayarqayllampa suq llaqtaman Barkumkunampa chumaq chayanan lugarninguna chutiqman. Chay llaqtaqam Lasiya llaqtampa sirkambi. 9 pawpa ladumanda ancha wayrachqanrallkum, qachuqa richpa, achka diyamkunata unayarqayllampa. Kanan chay diyamkunaqam tamyanan tyimpu ch'ayamullkarqanna. Chaymi mancharqayllampa mar yamkumpa sawanda rinayllampa. Chaymi Pabluqa pallkunata kunarqan: 10 Taytitumkuna, mananam allichu rinanchiqpaq. Disgrasyamkich pasawanchiqman. Kay barkuqam dañamkachpa trastindin saqanman. Nuqanchiqkunampiskich yamkumpi ch'uqachpa, wañunchiqman, nichpa. 11 Piru chay kampitan Julyuqam Pablutaqa mana kasurqanchu. Mastam kasurqan barkumpa dwiñunda chufirnindampis, Richunlla, nimptinllampa. 12 Chay llaqtampiqam mana allichu karqan, tamya tyimpu chaypi tiyanambaq. (Chaqa chaymanqam dirichu wayraq.) Chaymi yaqqa yumbay yuyarqan: Mas alli kanman, kay llaqtamanda lluqchichpa, rinanchiq Finisi llaqtaman, nichpa. Chay Finisiqam chay yamkumpa ch'awpimbi isla allpa Kritampa suq llaqtan karqan. Wayrampa arkaqnimbim kidarqan. Chutim karqan champamkunampaq rumpay saqanamba yaqqa ichuq ladunman. Chaypim munarqanllampa tiyayta, tamya tyimpu pasanangaman. 13 Qallarimptin achla wayra ichuq ladumandam, pallkunaqa yuyarqan: Atinchiqnam allita riyta, nichpa. Chaymi chay kachqayllampamanda rirqayllampa isla allpa Kritampa manyanda. 14 Chaypi kallkamptiynam, qunqaylla das ancha jwirtita wayrarqan chay Kritampa ladunmanda. Chay jwirti wayraqam chutiq Nurdisti. 15 Chay wayraqam chay yamkumpi puriq barkuta ichuq ladumanna amparqan. Chaymi manana atichpa ñawpaman riytaqa, nuqallkunaqa ¿imanachaqnataqri? nichpa, dijamkarqayllampana, chay wayra ampawananllampa. 16 Chaymi chay wayraqa ampawarqanllampa tamkcha isla allpa Klawda chutiqpa waqta ladunman. Chay waqta ladumbiqam manana jwirtitaqa wayrarqanchu. Chaymi chaypiqa ancha ñamkachpa, tandarqayllampa atun barkumpa tamkcha barkitunda. Chaqa chay atun barkuqam chay tamkcha barkitunda aysachpa ampamuchqa karqan. 17 Chaymandaqam chay tamkcha barkituta wichurqayllampa chay atun barkumpa umkunman. Chaynam chay atun barkuta waskamkunawan watarqayllampa, mas jwirti kachpa, ama pamkimkanambaq. Chay barkuta manijaqkunaqam mana munarqanllampachu Sirti chutiq aqu rumimkunaman tumpamkayta. Chaymi barkuta purichiq tramputa ichkichirqanllampa. Chaymandaqam dijarqanllampana, wayra barkuta ampanambaq. 18 Qayandin diya chay wayra chaychina jwirtilla kamptinmi, mana imanayta yach'achpa, barkumpi kaq trastimkunata yamkumanna wichumkurqanllampa. 19 Kimsa diyamanqam nuqallkunaqa kimkiy mamkiyllampawan, barkumpa kusasningunatampis yamkuman wichumkurqayllampa. 20 Chaymandaqam achka diyamkunata mana atirqayllampachu rimkayta ni rumpayta ni lusirumkunata, yach'anayllampa: Maymanmi rillkanchiqllampa, nichpa. Chay tumkuy wayramkuna mallkunata ampawamptinllampaqam, manana ni achlita yuyarqayllampachu kawsaytaqa. 21 Chaychina achka diyamkunata ancha ñamkachpam, mana ni mimkurqayllampachu. Chaymandaqam Pabluqa ch'awpiyllampampi chayachpa, niwarqanllampa: Taytitumkuna, mas allich'i kananda chay nichuchqayta kasuwanallkillampa. Ama lluqchinanchiqtachu chay Kritamanda, kay tumkuy laya atrasumkunata ñamkananchiqqa. 22 Piru kananqa ama llamkiyllampachu. Kay barku yamkuman saqamptimbismi, mana ni mayqanninchiq rinchiqchu chingaq. 23 Chaqa Dyuspam kani. Paytam sirbini. Pay anjilninda kach'amumptinmi, tutaqa nuqaman rimkamkuchqa. 24 Chay anjilninmi niwachqa: Pablu, ama manchaychu. Chaqa Rrumampa ancha kamachimkuq gubyirnumba ñawpambi ringi prisintamkaq. Dyusqam qamrallku chay barkumpi pullallki kaqkunatampis yumbayta rin wachaq, nichpa. 25 Chayri kananqa ama manchachpachu animamkayllampa. Nuqaqam ancha allita Dyuspi yuyamkuni. Yach'anim: Chay anjil niwachqanchinam rin kumpliq, nichpa. 26 Lumkismi kay yamkumkunaqa rinllampa wichumkuwaqninchiq yamkumpa ch'awpimbi isla allpaman. 27 Chaymandaqam ichkay simanata ancha wayramptin, mar yamku Adriya chutiqpi kallkarqayllampa. Ch'awpi tutata chay barkuta manijaqkunaqa kwintata qumkarqanllampa: Allpamannam ch'ayallkanchiq, nichpa. 28 Chaymi waskampa puntambi suq llachaqta watachpa, kach'arqanllampa yamkumpa umkunman midinambaq: ¿Junduraqchu ichu manana? nichpa. 36 mitrus junduraqmi karqan. Chaymandaqam chay yamkumpa mas manyaman midirirqanllampa. Chaypiqam 27 mitrusllana karqan. 29 Chayta yach'achpaqam, ancha mancharqanllampa rumimkunampi tumpamkayta. Chaymi ch'usku llachaq sujitanan rumimkunata kadunu waskampi watachpa, imki ladumanda kach'arqanllampa yamkuman, chay barkuta sujitanambaq, ama tumpamkanambaq rumimkunampi. Chaychina rurachpam, ancha manchachpa, chuyamkurqanllampa achimkyanambaq. 30 Piru manaraq achimkyamptinmi, chay barkuta manijaqkunaqa yuyarqanllampa atun barkumanda lluqchichpa, mitimkachpa, chay tamkcha barkitumpina rinanllampa, pallkunalla wachamkanambaq. Chaymi pallkunaqa ñawpa ladumanda waskamkunampi llachaq rumimkunata yamkuman kach'aq tumkurqanllampa, ama yach'anayllampa: Mitimkaqllampanam rin, nichpa. Chaychina ruraq tumbam manachinalla chay tamkcha barkituta winduchpa, yamkuman ichkichillkarqanllampa, chaypi mitimkananllampa. 31 Chaymi Pabluqa chayta rimkachpa, chay suldadumkunata, jifindampis nirqan: Kay manijaqkuna barkuta dijachpa mitimkamptinllampaqam, manana ringillampachu wachamkaq, nichpa. 32 Chaychina nimptinqam, suldadumkunaqa kallpachpa, das kuchurqanllampa waskamkunata, chay tamkcha barkitu yamkuman ichkinambaq. 33 Achimkyallkamptinnam Pabluqa yumbayta kaychina nirqan, imatampis mimkunanllampa: Ichkay simana tumkuynam qamkunaqa llamkiwan champamkuchpa, mana ni mimkuchqallampachu kangi ?ni puñuchqallampachu kangi?. 34 Chaymi rrugallkillampa, imatampis mimkunallkillampa, jwirsayuq kanallkillampa. Chaqa manam ni mayqanninchiqpa ni suq aqchitanchiq umanchiqmanda rinchu chingaq. 35 Chaychina nichpaqam, Pabluqa yumbaypa ñawpambi suq tandata piskachpa, Dyusta pagimkurqan. Chaymandaqam pitichpa, mimkurqan. 36 Chaychina mimkuqta rimkachpaqam, yumbayna animamkachpa, mimkurqayllampa. 37 Chay barkumpi kaqkunaqam 276 karqayllampa. 38 Munachqanda mimkuchpaqam, chay trigu trastimkunata mar yamkuman wichumkurqanllampa, amana chay barku llachaqniyuq kanambaq. 39 Achimkyamptinmi, chay barkuta purichiqkunaqa allpampa manyanda rimkachpampis, mana yach'arqanllampachu: Maypinam kanchiq, nichpa. Piru chaypim rimkarqanllampa suq kuchu aqulla kaqta. Chaymi yuyarqanllampa: Mayñ, amku qamiq barkuta waq kuchuman. Paqtar atinchiqman ch'ayayta, nichpa. 40 Chaymi pallkunaqa chay llachaq sujitanan rumiyuq waskamkunata kuchuchpa, mar yamkumpi dijarqanllampa. Chaymandaqam barkumpa muyuchinan pala plujarqanllampa. Chayna ñawpa ladu purichiq tramputa chayachirqanllampa, wayrawan rinambaq. Chaymi barkuqa rillkarqanna chay kuchu manyanman. 41 Lumkismi chay barkuqa richpa, yallkurqan suq mana riypaq lugarman. Chaqa chaypiqam yamkumkuna ichkay ladumanda tingunamkuchpa, aqumkunata qutuchqa karqan. Chaymi chay barkuqa ñawpa ladunman rillkachpa, chay aqumkunaman plantamkarqan. Chaypiqam manana ni achlita kuyurqanchu. Kanan imki ladumanda yamkumkuna ancha jwirtita waqtamptinmi, chay barkuqa piti pitina pamkimkallkarqan. 42 Chaychina barku pamkimkallkamptinqam, suldadumkunaqa munarqanna prisumkunata wanchiyta, ama mitimkananllampa. 43 Piru chay mas kamachimkuq suldaduqam munarqan Pabluta wachayta. Chaymi chay suldadungunata kamachirqan: Ama prisumkunataqa wanchiyllampachu. Achwan mayqannimki yach'aq nadayta, puntata yamkuman wimkampamkayllampa, nadachpa waq manyanman lluqchinallkillampa. 44 Wamkinnimkiqa barkumpa pamkichqa tablangunampi piskamkuchpa, wambuchpa, riyllampa manyaman, nichpa. Chaymi chaychina yumbay yamkumandaqa lluqchirqayllampa, mana ni suqniyllampa wañuchpachu.
1 Yumbayna mar yamkumanda wachamkachpam, yach'arqayllampa: Chay yamkumpa ch'awpimbi isla allpa Malta chutichqa, nichpa. 2 Chay Maltampi tiyaqkunaqam ancha llamkimpawachpa, yanampawarqanllampa. Ancha tamyamptinmi, nuqallkuna chirimptiy, ninata lumyachirqanllampa, yumbayniy machamkuchpa quñumkanayllampa. 3 Chaymi Pabluqa achla chamki yamtata tandachpa, ninaman wichurqan. Nina qarwachimptinqam, lluqchirqan suq kulibra. Lluqchichpaqam, Pabluta kanichpa mamkimbi warkuramkarqan. 4 Chaymi chay maltinumkunaqa kulibrata rimkachpa Pablumpa mamkimbi warkumkaqtaqa, pallkunampura ninamkurqan: Allibmi kay runaqa wanchimkuq kachqa. Chaymi Tayta Dyusqa paytaqa kulibrawan kastigallkan. Mar yamkumanda wachamkamptimbismi, Dyusqa manana dijanchu kawsananqa, nichpa. 5 Pabluqam mamkinda ch'ampsichpa, kulibrata ichkichirqan ninaman. Piru Pabluqam mana nimanarqanchu. 6 Yumbaymi Pablumpaq yuyarqanllampa: Limpu samksachpanam, bulamkachpa, rin wañuq, nichpa. Chaymi ancha unaytana champachpa, mana nima laya nanay piskamptinqa, suq layatana yuyarqanllampa: Kay runaqam suq dyus, nichpa. 7 Chay Maltampa kamachimkuqninmi Publiyu chutiq. Paypa ch'amkrangunam chay sirkayllampampi karqan. Paymi nuqallkunata ampawachpa, chumaqta wasinman ch'ayachiwarqanllampa. Kimsa diyata pusadata quwachpam, allita nuqallkunata qarawarqan. 8 Chay Publiyumpa taytanmi jibriwan, arriyawan, qachyaq kamampi karqan. Chaymi Pabluqa richpa rimkaq, Dyusman mañamkuchpa, sawambi mamkinda rurachpa, kach'amkachirqan. 9 Chayta rimkachpam, maltinumkunaqa qachyaqningunata Pabluman ampamurqanllampa. Chaymi pallkunatampis kach'amkachirqan. 10 Chaymi Dyusilumpagi niwachpa, rrigalitumkunata quwarqanllampa. Kimsa killatam chay Maltampi tiyarqayllampa. Chaymandaqam rinaypaqllampana, yamkumpi puriq suq barkuman lluqchimptiyllampa, chay maltinumkunaqa tumkuy imata quwarqanllampa ñanniypaqllampa. Chay barkuqam Alijandriya llaqtamanda karqan. Pallkunampa amitungunam Gasturwan Pulus chutiqllampa. Chay ichkay amitungunatam barkumba ñawpa qarumbi rurachqallampa karqan. Chay barkuqam Maltampi chayachqa karqan, tamya tyimpu pasanangaman. Chaymi chay barkumpina rirqayllampa. 12 Richpaqam ch'ayarqayllampa barkumkunampa chayanan lugar Siramkusa chutiqman. Chaypim kimsa diyata karqayllampa. 13 Waqmandaqam mar yamkumpa manyan manyan rirqayllampa Rrijiyu llaqtaman ch'ayachtiyllampa. Chaymandaqam sur ladumanda chumaqta wayramptin, ichkay diyampilla ch'ayarqayllampa Putyuli llaqtaman. 14 Waqpim tingunamkurqay wamkin kriyiq masinchiqkunawan. Pallkunaqam rrugawarqanllampa, suq simanata pullan kidanayllampa. Chay simanata kidachpaqam, ch'amkimpna rirqayllampa Rruma llaqtaman. 15 Rrumampi tiyaq kriyiq masinchiqkunam nuqallkunampaq yach'arqanllampa: Chamullkanllampach kayman, nichpa. Chaymi pallkunaqa lluqchirqan ñanman tinguwaqllampa; wamkinguna Ampyu chutiqpa plasangaman rirqanllampa tinguwaq. Wamkinnataqmi Kimsa Kantina lugarkaman rirqanllampa, nuqallkunata tinguwaq. Chaymi Pabluqa chay kriyiq masinchiqkunata rimkachpa, animamkachpa, Dyusta pagimkurqan. 16 Rruma llaqtaman ch'ayamptiyllampaqam, suldadumkunampa kamachimkuqnin Julyuqa prisumkunata intrigamkurqan kamachimkuqninman. Piru Pablutaqam sampalandalla dijarqanllampa, suq wasimpi tiyanambaq. Suq suldadutallam kamachirqanllampa, Pabluta kwidanambaq. 17 Kimsa diyamandam Pabluqa qayachirqan chay Rrumampi tiyaq pudirniyuq isrraylinumkunata. Chaymi tandamkamptinqa, pallkunataqa nirqan: Masitamkuna, isrraylinu masinchiqkunawan tiyachpam, mana nimatampis pallkunataqa kuntrachqachu kani. Manam ni agwilunchiqkunampa kustumbringunata kuntrachqachu kani. Mana nimata ruramptiypismi, waq Jirusalimbi prisuwachpa, pallkuna rrumanumkunaman intrigamkuwachqa. 18 Chaymi waqpiqa rrumanumkuna tampuwarqan: ¡Imatam rurachqa kangi? nichpa. Dimklaramptiyqam pallkunaqa nirqanllampa: Kay runaqam mana nima uchayuqchu wañunanqa, nichpa. Chaymi munarqanllampa kach'awayta. 19 Piru chay isrraylinu masinchiqkunaqam ancha wampuyarqanllampa. Chaymi nirqay: Mas pudirniyuq gubyirnunchiq Sasarna kay dimandaytaqa uchyanqa, nichpa. Chaytaqam nirqay wachamkanayrallku; manam llaqta masinchiqkunata dimandanaychu. 20 Chaymi qamkunataqa qayachichuchqa kani parlananchiqllampa. Nuqanchiq isrraylinumkunaqam kriyinchiq Dyus Amkrachqan Wachadurninchiqpi, ¿manachu? Chay Wachadurninchiqpi kriyichqayrallkum, kay kadinawanqa watawachqallampa. 21 Chaychina nichpa parlachimptinmi, isrraylinumkunaqa Pablutaqa nirqan: Nuqallkunaqam mana nima ufisyuta ch'askichqallampachu kani prubinsya Judiyamanda. Waqmanda isrraylinu masinchiqkuna chamuchpa kay Rrumamanqam, mana nima wachallkita niwachqallampachu. 22 Piru nuqallkunaqam yach'anillampa: Tumkuy maypim chay muchuq dumktrinallkita kuntrachpa, rimanllampa. Chaymi munanillampa uyayta ima ningim chay dumktrinallkimpaqqa, nichpa. 23 Chaymi suq diyampaqna kidarqanllampa, Pabluta uyananllampa. Chay diya ch'ayamptinqam, ancha achka runamkuna tandamkarqan Pablumpa pusadanman. Chaymi Pabluqa achimkyachqanmanda tardi amsayanangaman parlachirqan Dyuspaq, imachinam paywan ancha chumaqta kawsachun, nichpa. Muysispa librungunamanda, Dyuspaq suq rimaqkunampa librungunamandampis yach'achimkuchpam, pallkunataqa ancha munarqan Jisumkristumpi kriyichiyta. 24 Wamkinmi Pablu nichqandaqa ch'askirqan. Piru wamkinqam mana munarqanllampachu kriyiyta. 25 Kanan wamkingunaqam suq layata, suq layata yuyachpa, rirqanllampa. Chaymi Pabluqa chay riqkunata nirqan: (Qamkunaqam wamkin unay agwilunchiqchina kangillampa.) Allitam Santu Ispirituqa Dyuspaq rimaq Isayiyasta rimachirqan, kaychina ninambaq chay agwilunchiqkunata: 26 Riy chay runamkunata kaychina willay: Ancha uyachpampis, ancha rimkachpampismi, mana ringillampachu intyindiq. 27 Chaqa qamkunampa chunqullkiqam anguna timkramkachqa. Chaymi mana munangillampachu ni uyawayta ni rimkawayta. Chunqullkimpiqam mana munangillampachu nuqampaq yach'ayta, nuqaman chamunallkillampa, uchallkimkunamanda wachachunayllampaqa, nichpa. 28 Kaytampis yach'ayllampa: Kananmandampacham rinillampa yach'achiq chay mana isrraylinu kaqkunatampis Taytanchiq Dyuspaq. Pallkunampismi paytaqa rinllampa kasuq. 29 ?Chaychina Pablu nimptinmi, chay isrraylinumkunaqa rirqanllampa. Riqchinaqam pallkunampura ancha parlarqanllampa: Manam chaychinachu. Kaychinaraqmi, nichpa.? 30 Pabluqam ichkay watata tiyarqan chay arrindachqan wasimpi. Chaypim ch'askiq yumbay payman chamuqkunata, 31 kaychina yach'achimkuchpa: Chumaqtam rinchiq tiyaq Taytanchiq Dyuswanqa, nichpa. Siñurninchiq Jisumkristumpaqpismi ancha yach'achimkurqan. Chaychina mana nimata manchachpachu yach'achimkumptinmi, mana ni pimpis paytaqa piñachiqchu. (Chaytallam iskibrirqan San Lumkas.)
1 Kuyachqay kriyiq masitamkuna, suq kriyadu patrunninda kasuqchinam nuqa Pablu Jisumkristuta kasuchpa, paypa chumaq nutisyanda yach'achimkuni. Chaqa Tayta Dyusmi amkrawachqa, ampustulnin kanaypaq. 2 Taytanchiq Dyusqam unay tyimpumpi paypaq rimaqkunata chumaq nutisyanda kaychina iskibrichirqan Santu Librumbi: 3 Dyus Amkrachqan Wachadurmi kay pachaman rin chamuq, nichpa. Chaymandaqam Dyus nichqanchina, Churin Jisumkristuqa kay pachampi suq warmimanda nasirqan. Payqam chay unay gubyirnu Dabidpa karu willkan karqan. 4 Chaymandaqam Jisumkristuqa wañurqan. Piru Dyuspa Santu Ispiritun ancha pudirniyuq kachpa, kawsachimuchpam, intyindichiwarqanchiq: Jisumkristuqam Tayta Dyuspa ancha santu Churin, nichpa. 5 Chaymandaqam Taytanchiq Dyusqa nuqallkunawan ancha allin kachpa, amkrawarqanllampa, ampustulninguna kanaypaqllampa. Chaymi ancha kuchimkunillampa. Chaqa Tayta Dyusqam yumbay nasyungunaman kach'awarqanllampa, runamkunata, warmimkunata yach'achinaypaq, Jisumkristumpi kriyichpa, Dyusta kasunanllampa. 6 Chaychinam qamkunatampis Taytanchiq Dyusqa qayachuchqa, Jisumkristumpi kriyichpa, paypa wambranguna kanallkillampa. 7 Chaymi kay kartata kach'amuni qamkuna Rruma llaqtampi tiyaqkunaman. Chaqa Tayta Dyusmi qamkunata ancha kuyachuchpa, qayachuchqallampa, paypaqlla kawsanallkillampa. Chaymi nuqaqa Taytanchiq Dyusman mañamkuni, pay, Siñurninchiq Jisumkristuwan, tumkuy imampi qamkunata yanampachunambaq, ama nimata manchachpachu, achwan chumaqta kawsanallkillampa. 8 Puntatam kallkunata munani nichuyllampata: Ancha achka llaqtamkunampim qamkunampaq chumaqta rimanllampa: Chay rrumanumkunaqach Jisumkristumpi ancha allita kriyinllampa, nichpa. Chaymi nuqaqa Jisumkristu yanampawamptin, Tayta Dyusta ancha pagimkuni qamkunampaq. 9 Chaqa nuqaqam kawsani Taytanchiq Dyuspaq tumkuy chunqu yach'achimkuchpa. Chaychinam yach'achimkuni Churin Jisuspa chumaq nutisyanda. Tayta Dyusqam nuqampaqqa allita yach'an: Pabluqam rrumanu kriyiq masingunampaq mana challkuq nuqaman mañamkun, nichpa. 10 Tumkuy tyimpum mañamkullkanimpis, Taytanchiq Dyus yanampawanambaq, qamkunaman chamunaypaq. Piru mastam munani pay munachqan kanambaq. 11 Ancham munani rimkachuyllampata, qamkunata animachichunay, Dyuspi mas allita yuyamkunallkillampa. 12 Chaqa qamkunaman chamumptiymi, yumbayninchiq suqwan, suqwan atinchiq animachinamkuyta, Jisuspi mas allita yuyamkunanchiqllampa. 13 Kriyiq masitamkuna, munanim yach'anallkillampa: Pabluqam achka bwiltata munachqa chamuyta nuqanchiqkunaman, nichpa. Piru manaraqmi atichqachu kani chamuytaqa. Chaqa Jisuspaq achka nasyungunampi yach'achimkumptiymi, pallkunampis Jisuspi kriyichqallampa. Chaymi kananqa qamkunamambis munani chamuyta, achka rrumanu masimkimkunata animachinaypaq, Jisuspi allita yuyamkunanllampa. 14 Chaqa Tayta Dyusmi nuqataqa kach'amuwachqa, yumbay laya runamkunata, warmimkunata yach'achinaypaq. Chaymi yach'achillkani chay yach'ayniyuq grisyanumkunata, chay mana yach'ayniyuq kaqkunatampis. 15 Chaymi ancha munani chamuyta qamkuna Rrumampi tiyaqkunamambis, Jisumkristumpa chumaq nutisyanda yach'achichunayllampa. 16 Nuqaqam mana nimatampis panqamkunichu yach'achimkunaypaq Jisuspa chumaq nutisyandaqa. Chaqa chay chumaq nutisyanda yach'achimkumptinchiqmi, pudirniyuq Tayta Dyusqa atin wachayta paypi yumbay kriyiqkunata, isrraylinumkunata, mana isrraylinu kaqkunatampis. 17 Chaqa chay chumaq nutisyanda intyindichpaqam, yach'anchiqllampa: Tayta Dyusmi pirdunan Churin Jisuspi kriyiqkunatalla, nichpa. Chaymi Dyuspa Santu Librumbi kaychina nin: Nuqampi yumbay kriyiqkunata pirdunachpam, manana uchayuqpaqchu riqsini. Chaymi pallkunaqa, nuqampi kriyichpa, chumaqta rinllampa kawsaq, nichpa. 18 Piru Taytanchiq Dyusmi syilumandampacha piñamkuchpa, chay mana alli ruraqkunata rin kastigaq. Chaqa chay uchayuqkunaqam mana baliqta rurachpa, suqkunata pandachinllampa, allimp kaqkunata ama yach'ananllampa. 19 Tayta Dyus kimkinmi pallkunataqa allita yach'achichqa: Nuqam tumkuy tyimpu ancha allin, ancha pudirniyuq Dyusnimki kani, nichpa. Chaytaqam yach'achimkuchqa, kay munduta tumkuy imandinda rurachpa, yumbay runamkuna chay rurachqanda rimkanambaqllampa. Chaymi pay kimkinda mana rimkachpampis, yumbay runamkuna paypaqqa yach'anchiqllampa: Kanmi Dyus, nichpa. Chaymi Dyuspi mana munaq kriyiqkunaqa mana atinqallampachu wachamkayta: Manam yach'achqachu kani Dyuspaq, nichpaqa. 21 Chaqa chay runamkuna Taytanchiq Dyuspaq yach'achpampismi, mana munachqallampachu alabayta ni pagimkuyta. Achwanmi mana allimkunata yuyachpa kawsachqallampa. Chaymi chunqumbi mana baliqkunata yuyachpa, tutayaqpichina kawsanllampa. 22 Chaymi: Ancha yach'ayniyuqmi kanchiqllampa, nichpampis, ancha tuntumkunampaq timkramkachqallampa. 23 Chaqa Tayta Dyus ancha pudirniyuq, mana nunka uchyamkaq kamptimbismi, chay uchayuqkunaqa mana munachqallampachu paytaqa adurayta. Achwanmi munachqallampa aduraytaqa kay mundumpi kaq amitu layamkunata. Chay amitungunataqam rurachqallampa mana duraq runamkunatachina, pichqumkunatachina, ch'usku ch'amkiyuq animalkunatachina, kulibramkunatachina. 24 Chayrallkum Taytanchiq Dyusqa chay runamkunamanda amkramkachqana. Chaymi pallkunaqa kwirpun munachqandalla ruranllampa. Suqwan suqwan ancha panqamkuypaq kusaskunata rurachpa kawsanllampa. 25 Chaqa chay runamkunaqam Dyus allimp nichqanda mana munachpa kriyiyta, llullamkuqkunata kriyichqallampa. Chaymi Tayta Dyusta disprisyachpa, mana adurachpaqa, pay rurachqangunata adurallkanllampa. Piru Taytanchiq Dyusmi tumkuy imata rurachqa. Chayri paytalla tumkuy tyimpu alabachunllampa. ¡Chaychina kanqa! 26 Piru wamkin runamkuna mana munamptinllampa Tayta Dyusta aduraytaqa, payqa chay runamkunamanda amkramkachqana, ancha millanaypaq kusaskunata rurachpa kawsananllampa. Warmimkunampismi runanwan mana puñuchpachu, warmimpura puñunllampa. 27 Chaychinallam wamkin ullqumkunampis warminwan mana munachpa puñuyta, ancha munanllampa ullqumpura puñuyta. Chaymi chaychina puñuchpa, panqamkuypaq kusaskunata rurachpa, ancha padisinllampa. Chaychinam kastigunda ch'askinllampa. 28 Chay uchayuqkunaqam mana nimatampis munanllampachu yach'ayta Dyuspaqqa. Chaymi Taytanchiq Dyusqa pallkunamanda amkramkachpa, dijachqana yuyayninguna ancha dañamkananllampa. Chayrallkum ancha fiyumkunata yuyachpa, kay laya uchamkunata ruranllampa: 29 Manam kasunllampachu lillkunata; mayqanwambismi puñunllampa; runa masingunatam dañachinllampa; ch'iqninamkunllampam. Iman kamptimbismi, nisyuyachpa, masta munanllampa; runa masingunata imbidyachpam, kusasningunata ancha munanllampa; wanchimkunllampam. Ancha piñamkuchpam, anyanamkunllampa; ingañanamkunllampam. Chaqa pallkunaqam ancha pirbirsumkuna, kwintirumkuna. 30 Runa masimba wachandam rimanllampa. Dyustam ch'iqninllampa. Ancha afaniruyachpam, suqkunata disprisyanllampa. Kanan ancha alabamkachpam, ancha yuyanllampa suqkunata dañachiyta. Taytanda mamandam mana kasunllampachu. 31 Pallkunaqam ancha tuntumkuna. Chaqa manam nimatampis munanllampachu intyindiyta. Imata ufrisichpampismi, mana kumplinllampachu. Kanan manam ni pitampis kuyanllampachu ni pirdunanllampachu ni llamkimpanllampachu. 32 Pallkunaqam allita yach'anllampa Tayta Dyus kamachimkuchqanda. Yach'anllampampismi: Chay laya uchayuqkunataqam, alli wanchinanllampa, nichpa. Piru chayta yach'achpampismi, chay laya uchamkunata rurachpa kawsanllampa. Kanan runa masinguna pallkunachina uchata ruramptinllampam, ancha kuchimkunllampa.
1 Chayri mayqannimkimpis, runa masimkitaqa ama jusgayllampachu. Chaqa qamkunampismi pallkunachina uchata rurallkangillampa. Chaymi chay runa masimkita chimbichpaqa, qamkuna kimkimki chimbimkallkangi. 2 (Piru Tayta Dyusmi dirichuyuq jusgawananchiqqa.) Chaqa allitam yach'anchiqllampa: Taytanchiq Dyusmi tumkuy uchayuqkunata allita jusgachpa, rin kastigaq, nichpa. 3 Chaymi suqkunata jusgachpaqa, qam kimkimki maluta rurachpa, mana nimatampis ringillampachu wachamkaq Dyuspa kastigunmandaqa. 4 Piru kinsampch'i qamkunaqa Dyusta mana manchachpachu yuyangillampa: Tayta Dyusqam ancha allin. Chaymi mana rinchu kastigawaq, nichpa. Manam chaychinachu. Achwanmi payqa ancha allin kachpa, agwantachuchpa, mana daschu qamkunataqa kastigachungi. Chaymi payqa qamkunata chuyachullkangi, uchallkimkunata dijachpa, payta rruganallkillampa pirdunachunambaq. 5 Piru qamkunaqam rumi chunquyuqkuna kachpa, mana nimatampis munangillampachu uchallkimkunata dijachpa, bidallkita kambyaytaqa. Chaymi mas uchayuqna kangillampa. Chayrallkum Tayta Dyusqa jwisyu diyampi yumbaynimkita allita jusgachuchpa, ancha rin kastigachuqllampa. 6 Chaqa yumbayninchiqtam allita rin jusgawaqninchiq, allita rurachqa kamptinchiq, ichu mana allita rurachqa kamptinchiqpis. 7 Wamkin runamkunaqam mana challkuq allita rurachpa, Dyusta kasunllampa, paywan llimpyachpa, tumkuy tyimpu kawsananllampa. Chaymi Taytanchiq Dyusqa pallkunata alabachpa, tumkuy tyimpu rin kawsachiq. 8 Piru Dyusqam piñamkuchpa, rin kastigaq payta mana kasuq malu ruraqkunata. 9 Chaymi pallkunaqa ancha padisichpa, rinllampa ñamkaq; puntata chay isrraylinumkuna; chaymandaqam chay mana isrraylinu kaqkunampis. 10 Piru Tayta Dyusqam chay alli ruraqkunataqa ancha alabachpa, ancha rin kuchichiq, puntata chay Isrrayilmanda kaqkunata; chaymandaqam chay mana isrrayilmanda kaqkunatampis. 11 Chaqa Taytanchiq Dyusqam yumbayta igwalta rin jusgaq. Manam rinchu sawachaq ni mayqan mana alli ruraqta. 12 Chaymi chay mana isrraylinu kaqkunata rin jusgaq pallkunampa liyningunawanlla. Chaqa yach'achpa imam alli, imam mana allichu nichpampismi, pallkunaqa mana allimkunata ruranllampa. Piru isrraylinu kaqkunataqam Muysispa liyningunawan rin jusgaq. Chaqa pallkunaqam chay liyningunata yach'achpampis, mana kasunllampachu. 13 Manam balinchu Muysispa liyningunata yach'ananchiqllaqa. Achwanmi Dyusqa munan, yumbay chay liyningunata allita kasunanchiq, paypa wambranguna kananchiqllampa. 14 Piru chay suq nasyungunamanda wamkin kaqkunaqam Muysispa liyningunata mana yach'achpampis, allita rurachpa kawsanllampa. Chaqa pallkunaqam kimkin chunqunmandalla yach'anllampa: Imam alli; imam mana allichu, nichpa. 15 Chaymi chaychina allita rurachpa kawsamptinllampaqa, yach'anchiqllampa: Pallkunampismi chunqunllampampi Dyus munachqanda intyindinllampa, nichpa. Chaqa yuyayningunampim yach'anllampa: Allitachu rurallkani ichu mana, nichpa. 16 Chaymi jwisyu diyampimpis chaychinalla rin kaq. Chaqa Dyusqam Jisumkristuwan tumkuy ima chunqunchiqpi yuyachqanchiqta rin jusgaq. Chaychinallam qamkunataqa nichuchqa kani Jisuspa chumaq nutisyanda yach'achichuchpa. 17 Isrraylinu masillkuna, wamkinnimkimkunaqa alabamkachpa, suqkunata ningillampa: Nuqallkunaqam Isrrayilmanda kanillampa. Chaymi Tayta Dyusqa masta kuyawanllampa yumbay runamkunamanda, nichpa. Chaychinam ancha kriyingillampa Muysispa liyningunampi wachamkanallkillampa. 18 Chaymi Muysispa liyningunata yach'amkuchpaqa, Dyus munachqanda yach'angillampa, allita rurachpa kawsanallkillampa. 19 Kaychinampismi yuyangillampa: Muysispa liyningunata mana yach'aqkunaqam sarkumkunachina. Chaymi pallkunata atini yach'achiyta, amana tutayaqpichina purinanllampa, nichpa. 20 Ningillampampismi: Muysispa liyningunatam ancha allita yach'ani. Chaymi chay mana yach'aqkunampa yach'achimkuqnin kachpa, allimp kaqta atini yach'achiyta: Imam alli; imam mana allichu, nichpa. 21 Piru ancha allita yach'achimkuchpaqa, ¿imarallkutaq qamkunampis chay nichqallkitaqa mana kasungillampachu? Chaqa qamkunaqam yach'achimkungi: Ama suwamkuyllampachu, nichpa. Chaychina nichpaqa, ¿imarallkutaq qamkunaqa suwamkungillampa? 22 Ningillampampismi: Suqpa warminwanqa ama puñuyllampachu, nichpa. Chaychina yach'achimkuchpaqa, ¿imarallkutaq suqpa warminwanqa puñungillampa? Amitu layamkunata ch'iqnichpaqa, ¿imarallkutaq adurana wasingunaman yallkungillampa, kusasningunata suwaqqa? 23 Kanan qamkunaqam Muysispa liyningunata allita yach'achpaqa, ancha alabamkangillampa. Piru chay lillkunata mana kasuchpaqam, Dyuspa famandaqa dañachillkangillampa. 24 Chayrallkum Taytanchiq Dyuspa Santu Librumbi nin: Qamkuna isrraylinumkuna mana allita rurachqallkillamparallkum, chay mana isrraylinu kaqkunaqa Dyuspaq mana allimkunata rimanllampa, nichpa. 25 Isrraylinu llaqta masillkuna, qamkuna kwirpullkimpi siñalta rurachpa, Muysispa liyningunata kasumptimkiqam, chay siñalqa qamkunampaqqa allimpta balin. Piru mana kasuchpa Muysispa liyningunataqam, kwirpullkimpiqa yanqa rurachqallampa kangi chay siñaltaqa. 26 Chay mana isrraylinu kaqkunaqam kwirpumbiqa mana ruranllampachu chay siñaltaqa. Piru pallkuna Muysis nichqanda kasumptinllampaqam, pallkunampis chay siñalniyuqchinana Tayta Dyuspaqqa. 27 Piru wamkinnimkiqam siñalniyuq kachpa, Muysispa liyningunata yach'achpampis, mana kasungillampachu. Rimkay chay mana siñalniyuq kaqkunata. Pallkunaqam Muysispa liyningunata mana yach'achpampis, wamkinqa Dyus munachqanchina kawsanllampa. Chaychina kawsamptinllampaqam, qamkuna yach'aqkuna mana kasuchpaqa, mas uchayuq ringillampa kaq. 28 Mayñ, chaychina kamptinqa, ¿pimkunam Dyuspa lijitimu wambrangunaqa? Manam sawa kwirpunchiqpi siñalta rurachpallachu, lijitimu wambrangunaqa kanchiqllampa. 29 Achwanmi Dyuspi kriyimptinchiq, paypa Santu Ispiritun umku chunqunchiqpi siñalawanchiq, Dyuspa wambranguna kananchiqllampa. Chay lillkunaqam mana atinllampachu wachawayninchiqta. Piru Taytanchiq Dyusmi wachawaqninchiq, nuqanchiqkunata alabawanchiq, awnki runa masinchiqkuna disprisyawamptinchiqpis.
1 Chaychina nimptiych'i, qamkunaqa yuyangimanllampa: ¿Imampaqtaq balin isrraylinu kananchiqllampaqa? Ichu ¿imampaqtaq balin kwirpunchiqpi siñalniyuq kananchiqllampaqa? nichpa. 2 Piru ancham balin Isrrayil nasyunmanda kananchiqllampaqa. Chaqa Tayta Dyusqam Santu Librunda qurqan nuqanchiqkunampa karu agwilunchiqkunata. 3 Piru chaychina Santu Librunda qumptimbismi, wamkin isrraylinu masinchiqkunaqa Dyus nichqanda mana kumplinllampachu. Chaychina pallkuna mana kumplimptimbismi, Tayta Dyusqa tumkuy ima nichqanda rin kumpliq. 4 Chaqa yumbay runamkuna llullamkumptimbismi, Taytanchiq Dyusqa allimp kaqtalla rin rimaq. Chaymi Dyuspa Santu Librumbi nin: Tayta Dyus, qam rimamptimkim, yumbay uyachuqkuna rinllampa yach'aq: Taytanchiq Dyusmi allimp kaqtalla riman, nichpa. Chaymi yumbay jusgachuqta binsichpa, ringi uyarachiq, nichpa. 5 Piru suq uchayuq runa ninman: Uchata ruramptiymi, chay rimkawaqkunaqa Dyuspaq rinllampa yuyaq: Dyusqam ancha allin. Manam kay uchayuq runachinachu. Chaymi paypi rini kriyiq, nichpa. Chaychina chay rimkawaqkuna Dyusta alabamptinqam, mana balinmanchu Dyusqa kastigawananqa, ¿manachu? nichpa. (Chaychinaqam yuyanman suq ancha tuntu uchayuq runa.) 6 Piru manam chaychinachu. Achwanmi Tayta Dyusqa ancha rin kastigaq chay uchayuqkunataqa. Chaqa payqam ancha allin juyis kachpa, justisyata allita rurachpa, atin jusgayta yumbay runata, warmita. 7 Piru suq uchayuq runa munachpa wachamkayta ninman: Llullamkuchqayrallkum Dyusta masta rinllampa alabaq: Dyusmi mana kay llullamkuq runachinachu nichpa. Chaymi llullamkumptiyqa, mana balinchu Dyus kastigawananqa, ¿manachu? nichpa. 8 Piru chaychina rimachpaqam, pay kimkinlla ingañamkallkan. Chaqa chaychina kamptinqa, ¿ima, masta balinman ancha malumkunata rurananchiq, suqkuna Taytanchiq Dyusta masta alabananllampa? ¡Manñm! Piru chay rimaqkunaqam achwamba ingañachpa ninllampa: Pablumpismi nuqallkunachinalla yach'achimkun, nichpa. Chaymi pallkunata Tayta Dyusqa allita jusgachpa, ancha rin kastigaq. 9 Mayñ, ¿imatam atinchiq niyta? ¿Isrraylinumkuna kachpaqachu, chay mana isrraylinu kaqkunamanda mas allin kanchiqllampa? ¡Manñm! Chaqa nichuchqallampanam kani: Isrraylinumkuna, chay mana isrraylinu kaqkunampismi uchayuqkuna kanchiqllampa, nichpa. 10 Chaymi Dyuspa Santu Librumbi kaychina niwanchiqllampa: Dyuspaqqam mana kanchu ni suq runa ni suq warmi ancha allinqa. Achwanmi yumbayninchiq uchayuqkuna kanchiqllampa. 11 Manam pimpis munanchu intyindiyta Dyuspaqqa. Manam pimpis munanchu Dyustaqa riqsiyta. 12 Chaqa yumbay runamkuna, warmimkuna uchata rurachpaqam, Tayta Dyusmanda amkramkachpa, dañamkachqallampa. Chaymi Dyuspaqqa mana kanchu ni suqsitu allita ruraqqa. 13 Chay uchayuqkunampa mana baliq rimachqangunam Dyuspaqqa ancha ach'nan suq pambachqa wañuchqampa kwirpunchina. Chaqa pallkuna runa masingunata ingañachpaqam, ancha dañachin kulibrampa bininunchina. 14 Kanan mana challkuq piñamkuchpam, runa masinda maldisyanllampa. 15 Kanan dasmi kallpanllampa wanchimkuq. 16 Chaychina rurachpaqam, achka runamkunata dañachichpa, ancha llamkichinllampa. 17 Chaqa manam munanllampachu suqkunawan chumaqta kawsaytaqa. 18 Kanan Taytanchiq Dyustampismi mana nimatampis rrispitanllampachu, nichpa. 19 Muysispa liyningunam isrraylinumkunata kamachiwanchiq, yumbay chay lillkunata kasunanchiqllampa. Piru manam pimpis atinchu kumpliyta yumbay chay lillkunataqa. Chaymi chay lillkunawanqa mana pimpis atinchu wachamkayta: Manam nima uchayuqchu kani, nichpaqa. Achwanmi jwisyu diyampi uyaritamp Dyusmanda kastigunda rinllampa ch'askiq. 20 Chaqa manam pimpis atinchu wachamkayta Muysispa liyningunata kasuchpaqa. Achwanmi Tayta Dyusqa chay lillkunataqa quwachqallampa kanchiq, yach'ananchiq: Uchayuqmi kani, nichpa. 21 Piru kananqam Tayta Dyus yach'achiwachqa kanchiq: Jisumkristumpi kriyimptillkillam, payqa rin wachachuqllampa, nichpa. Chaqa Isrrayilmanda kaqkuna, mana isrraylinu kaqkunampismi mana atinchiqllampachu kasuyta yumbay lillkunata wachamkananchiqqa. Chaymi Dyuspaq rimaq Muysis, chay suq rimaqkunampis Dyuspa Santu Librumbi niwanchiqllampa: Suq Wachadurmi chamuchpa, rin wachawaqninchiq, nichpa. 23 Chaqa yumbay runamkuna, warmimkunam uchayuq kanchiqllampa. Chaymi mana atinchiqllampachu wachamkayta, ancha allin Dyuswan kawsananchiqqa. 24 Chayrallkum Jisumkristu wañurqan, nuqanchiqkunata wachawananchiq. Chaychina wañumptinmi, Tayta Dyusqa ancha allin kachpa, dibaldilla pirdunawaqninchiq, wachawanchiqllampa. 25 Chaqa Tayta Dyus munamptinmi, Jisumkristu wañurqan, paypi kriyimptinchiqllampa, Tayta Dyus yumbay uchanchiqmanda pirdunawananchiq. Chaychinaqam wañurqan, yach'ananchiqllampa: Tayta Dyusqam ancha allin kachpa, wachawanchiqllampa, nichpa. Chaymi Jisumkristu wañuchqan diyamkaman, runamkuna uchata ruramptinllampaqa, Taytanchiq Dyusqa agwantachpa, pallkunataqa manaraq jusgarqanchu. 26 Piru kay tyimpumpiqam Tayta Dyusqa ancha allin juyis kachpa, atinna Jisuspi kriyiqkunata pirdunawayninchiqta, (Churin Jisumkristu nuqanchiqkunampaq wañuchqanrallku). 27 Chaychina Taytanchiq Dyus wachawamptinchiqqa, ¿imampaqtaq balinman alabamkananchiqqa? ¿Atinchiqchu alabamkayta, Muysispa yumbay liyningunata kasuchqanchiqrallku? Manñm. Achwanmi Jisuspi kriyimptinchiqlla, Tayta Dyusqa uchanchiqkunamanda pirdunawanchiq. 28 Chaymi yach'anchiqllampa: Jisuspi kriyimptinchiqllam, Tayta Dyusqa yumbay uchanchiqmanda pirdunawanchiq; manam Muysispa liyningunata kasuchqanchiqrallkuchu, nichpa. 29 Chaqa Tayta Dyusqam mana isrraylinu kaqkunatallachu wachan. Achwanmi chay mana isrraylinu kaqkunatampis wachan, Churin Jisuspi kriyimptinllampa. 30 Chaqa suq Dyusllam kan. Payqam Jisuspi yumbay kriyiqkunata pirdunawanchiq, kwirpunchiqpi siñalniyuq ichu mana siñalniyuq kamptinchiqpis. 31 Piru amar yuyachunllampachu: Taytanchiq Dyuspa liyningunaqam manana balinchu, nichpaqa. Achwanmi Jisuspi kriyichpa, mas allitana atinchiqllampa Dyuspa liyningunata kasuyta.
1 Mayñ, yuyachunllampa chay unay agwilunchiq Abrajambaq. ¿Imatam rurarqan chay Abrajanqa, Taytanchiq Dyus uchangunamanda pirdunanambaqqa? 2 Payqam mana allitachu tumkuy imata rurarqan. Chaqa allitalla rurachpaqam, pay kimkin atinanda alabamkayta Dyuspa ñawpambi. Piru manam atirqanchu alabamkaytaqa. 3 (Achwanmi Tayta Dyuspi ancha kriyimptin, uchangunamanda wacharqan.) Chaymi Dyuspa Santu Librumbi nin: Abrajanqam Taytanchiq Dyuspi allita kriyirqan. Chaymi Tayta Dyusqa uchangunata pirdunachpa, mana nima uchayuqpaqna riqsichqa, nichpa. 4 Mayñ, allita yuyachunllampa: Suq runa trabajaqqam pagunda ch'askin. Chaymi chay pagunqa mana rrigaluchu, ¿manachu? Achwanmi trabajachpaqa, dirichuyuq chay pagunda ch'askinambaq. 5 (Piru nuqanchiqkunaqam mana atinchiqchu allitalla rurayta wachamkananchiqqa.) Achwanmi Taytanchiq Dyuspi kriyimptinchiqqa, payqa pirdunawaqninchiq, manana nima uchayuqpaqna riqsiwaqninchiq, dibaldilla wachawanchiqllampa. 6 Chaychinallam chay unay gubyirnu Dabidpis Dyuspa Santu Librumbi chaypaq kaychina iskibrirqan: Runamkuna kuchimkunqa, tumkuy uchangunata Tayta Dyus dibaldilla pirdunachqambaq. 8 Taytanchiq Dyus chaychina pirdunachpaqam, manana rinchu niq: Uchayuqmi kangi, nichpaqa. Chayri ancha kuchimkunqallampa, nichpa. 9 ¿Chaychinaqachu kuchimkunqa kwirpunllampampi siñalniyuqkunalla? ¡Manñm! Achwan Tayta Dyuspi kriyichpam, rinllampa kuchimkuq chay mana siñalniyuq kaqkunampis. Mayñ, allita yuyachunllampa. Dyuspa Santu Librumbiqam nin: Abrajanqam Taytanchiq Dyuspi allita kriyirqan. Chaymi Tayta Dyusqa uchangunata pirdunachpa, mana nima uchayuqpaqna riqsichqa, nichpa. 10 Chaychinaqa ¿ima tyimpumpim Dyusqa pirdunarqan Abrajandaqa? ¿Kwirpumbi siñalta ruramptinna, ichu manaraq siñalamkamptin? Taytanchiq Dyusqam pirdunarqanqa, kwirpumbi manaraq chay siñalta ruramptin. 11 Chaychina Dyus pirdunamptinraqmi, Abrajanqa chay siñalta kwirpumbiqa rurarqan, ama qunqanambaq: Dyusmi pirdunawachqa, paypi kriyichqayrallku, nichpa. Chaymi chay Abrajanqa Dyuspi yumbay kriyiqkunampa taytanchiqchina. Kanan payrallkum yach'anchiqllampa: Tayta Dyusmi chay mana siñalniyuq kaqkunatampis pirdunan, paypi kriyimptinllampaqa, nichpa. 12 Chay Abrajanmi nuqallkuna siñalniyuq isrraylinumkunampa taytaychinampis. Piru manam wambrangunachinachu kanillampa, kwirpuyllampampi chay siñalta rurachqayrallkuqa. Achwanmi Abrajanchina kriyichqayllamparallku, paypa wambrangunachina kanillampa. 13 Tayta Dyusqam chay Abrajanda karu willkandinda ufrisirqan, yumbay kay mundumpi tiyaqkunata kamachinanllampa. Piru manam Muysispa liyningunata kasuchqanrallkuchu, chaychinaqa ufrisirqanqa. (Chaqa Abrajamba tyimpumbiqam manaraq karqanchu chay lillkunaqa.) Achwanmi chaychina ufrisirqanqa, allita Dyuspi kriyichqanrallku. Chaychina kriyimptinmi, Taytanchiq Dyusqa uchangunamanda pirdunachpa, manana nima uchayuqpaq riqsirqan. 14 Chaychina Dyuspi kriyimptinchiqllampam, nuqanchiqkunatampis wachawanchiqllampa, paywan kawsananchiqllampa. Manam wachawanchiqchu Muysispa liyningunata kasuchqanchiqrallkuqa. Chaqa atimptinchiq wachamkayta, lillkunata kasuchpaqam, mana nimampaq balinmanchu Jisuspi kriyinanchiqqa. Tayta Dyus Abrajanda chay ufrisichqambismi mana nimampaq balinmanchu. 15 Mana kamptin Muysispa liyningunaqam, runamkunaqa mana may uchayuqchu kanmanllampa. Piru Muysispa liyninguna kachqanrallkum, achka uchayuqkuna mas kastigadu rinllampa kaq, chay lillkunata mana kasuchqanllamparallku. 16 Chaymi Taytanchiq Dyusqa Abrajanda ufrisirqan dibaldilla yanampanan, paypi kriyichqanrallku. Chaychinallam nuqanchiqkunatampis dibaldilla yanampawanchiq, suq rrigaluta quwanchiqmanchina. Chaymi Dyuspi kriyiqkunaqa Abrajamba wambranchinana kanchiqllampa. Chaqa Tayta Dyusqam mana yanampanchu Muysispa liyningunata kasuqkunatallaqa. Achwanmi yanampan Abrajanchina paypi yumbay kriyiqkunatampis. 17 Chaqa Abrajanqam allita Dyuspi kriyirqan. Yach'arqanmi: Tayta Dyusmi kamachimkuchpalla, tumkuy imata ruran. Wañuqkunatampismi kawsachin, nichpa. Chaymi Dyusqa Santu Librumbi kaychina nin: Abrajan, qamtam amkrachuchqa kani, achka nasyumbi tiyaqkunampa agwilunchina kanallki, nichpa. Chaychina nimptinmi, Abrajanqa allimpta kriyirqan. 18 Chaqa Taytanchiq Dyusqam Abrajanda nichqa karqan: Warmimki Sarampim suq churiyuq kachpa, achka nasyungunampi tiyaqkunampa karu agwilunllampa ringi kaq, nichpa. Piru Saraqam mana nunka wambrayuqchu kachqa karqan. Chaychina Abrajan mana churiyuq kachpampismi, Tayta Dyus nichqanda kriyirqan. Piru ancha achka watamkunatam chuyarqanllampa, Taytanchiq Dyus nichqanda kumplinambaqqa. Chaymandaqam Abrajanqa warmin Sarawan yaqqana syin watayuq kachpa, wañunan sirkana kamptin, Tayta Dyus nichqanchina, suq wambrayuqna karqan. Chaychinam achka nasyungunampi tiyaqkunampa karu agwilun karqan. 20 Chaqa Abrajanqam ancha allita kriyichqa karqan: Taytanchiq Dyusmi chay ufrisiwachqanda allimpta rin quwaq, nichpa. Chaymi Dyus nichqanda mana challkuq kriyichpa, ancha alabarqan. 21 Chaqa ancham yuyamkuchqa karqan: Tayta Dyusmi ancha pudirniyuq kachpa, yumbay chay ufrisiwachqanda atin rurayta, nichpa. 22 Chaymi Taytanchiq Dyuspi allita kriyimptinqa, Dyusqa Abrajanda uchangunamanda pirdunachpa, ancha allin runampaqna riqsirqan. 23 Piru Dyusqam mana nirqanchu: Nuqampi kriyimptinmi, Abrajandalla allin runampaq riqsini, nichpaqa. 24 Achwanmi chaychinaqa nin paypi yumbay kriyiqkunampaqpis. Chaqa nuqanchiqkunampismi Tayta Dyuspi kriyinchiq: Paymi Siñurninchiq Jisusta wañuchqanmanda kawsachimuchqa, nichpa. 25 Chaqa payqam Churin Jisusta kuntraqkunaman intrigamkurqan, uchanchiqkunarallku wañunambaq. Chaymandaqam chay wañuchqanmanda kawsachimurqan, nuqanchiqkunata uchanchiqkunamanda wachawananchiq.
1 Siñurninchiq Jisumkristumpi allimpta kriyimptinchiqmi, Taytanchiq Dyusqa yumbay uchanchiqmanda pirdunawachqa kanchiq. Chaymi manana manchanchiqllampachu: Tayta Dyusmi rin kastigawaqninchiq, nichpaqa. Achwanmi Jisumkristu pirdunawamptinchiq, Tayta Dyus ancha kuchimkun nuqanchiqkunawan. 2 Chaychina kriyimptinchiqllampam, Tayta Dyusqa ancha allin kachpa, dibaldilla pirdunawanchiq. Chaymi paypi yuyamkuchpa, ancha kuchimkunchiqllampa: Llimpyallkaq Tayta Dyuswanmi pulla rinchiqllampa kawsaq, nichpa. 3 Yach'anchiqpismi: Padisichpaqam, mas allita yach'amkunchiqllampa Jisuspi mana challkuq yuyamkuyta, nichpa. Chaymi padisichpampis, kuchimkunchiqllampa. 4 Chaychina mallimpadu kachpa, Jisuspi mana challkuq kriyimptinchiqqam, Taytanchiq Dyusqa ancha kuchimkun. Chaychina kuchimkuchpam, ancha yanampawanchiq, paypi mas allita yuyamkunanchiqllampa. 5 Chaymi Tayta Dyusqa Santu Ispiritunda quwanchiq, yach'achiwananchiq: Tayta Dyusmi ancha kuyachungillampa, nichpa. Chaychina niwamptinchiqmi, ancha allita yach'anchiqllampa: Tayta Dyusqam yumbay niwachqanchiqta rin kumpliq. Manam rinchiqchu panqamkuq: Yanqam paypi yuyamkuchqa kani, nichpaqa. 6 Chaqa yumbay nuqanchiqkunaqam (uchayuq kachpa) mana atirqanchiqchu wachamkaytaqa. Chaymi Tayta Dyusqa munachqan tyimpumpi Churin Jisumkristuta kach'amurqan, wañuchpa yumbay uchanchiqmanda wachawananchiq. 7 Manam ni pimpis munanmanchu wañuyta, ni suq allin kaqta wachanambaqqa. Piru kinsampch'i mayqan runa wañunman, suq ancha allin kaqta wachanambaq. 8 Piru nuqanchiqkuna uchayuqraq kamptinchiqmi, Jisumkristuqa wañurqan, uchanchiqkunamanda wachawananchiq. Chaychina wañumptinmi, Tayta Dyusqa nuqanchiqkunata allita yach'achiwanchiq: Ancham kuyallkillampa, nichpa. 9 Chaqa Jisumkristu wañumptinmi, Tayta Dyusqa yumbay uchanchiqmanda pirdunawachqa kanchiq. Chaymi kananqa paywan allina kachpa, mas allita yach'anchiqllampa: Jisumkristum rin wachawaqninchiq, Tayta Dyus jwisyu diyampi ama kastigawananchiq, nichpa. 10 Chaqa nuqanchiqkunam Tayta Dyusta kuntramptinchiqpis, payqa Churin Jisusta kach'amurqan, wañuchpa, yumbay uchanchiqmanda wachawananchiq. Chaymi kananqa chumaqta atinchiq kawsayta Dyuswanqa tumkuy tyimpumpaq. 11 Manam chaychinallachu yanampawanchiqqa. Achwanmi Churin Jisuswan nuqanchiqkunata ancha kuchichiwanchiq. Chaqa Siñurninchiq Jisumkristum wachawachqa kanchiq, chumaqtana Taytanchiq Dyuswan kawsananchiq. 12 Ancha unay tyimpumpim chay punta agwilunchiq Adan Dyusta mana kasuchpa, uchata rurarqan. Chaymi wañurqan. Chaychinallam chay Adamba tyimpunmandampacha kanangaman yumbay karu willkanguna wañunchiqllampa. Chaqa yumbayninchiqmi uchata ruranchiqllampa. 13 Chay punta runa Adanqam Dyus kamachichqandaqa mana kasurqanchu. Chay karu willkangunampismi manaraq Muysispa liyninguna kamptin, uchata rurachpa, Adanchina wañurqanllampa. Piru Dyuspa liyningunata manaraq yach'achpam, pallkunaqa mana disprisyarqanchu Dyustaqa chay Adanchinaqa. Chaymi Dyusqa pallkunataqa mana rinchu anyaq: Chay kamachimkuchqaytam mana kasuchqachu kangi, nichpaqa. Piru chay punta runa Adanrallkum yumbayninchiq rinchiqllampa wañuq. Piru Jisumkristurallkum tumkuy tyimpumpaq rinchiqllampa kawsaq. 15 Chaqa chay Adan uchata ruramptinmi, yumbay runamkuna, warmimkuna wañunchiqllampa. Piru Jisumkristu wañumptinmi, Tayta Dyusqa achka runata, warmita dibaldilla wachawachqa kanchiqllampa, tumkuy tyimpu kawsananchiqllampa. 16 Chaymi Dyus rurachqanqa mana nimampis igwalchu chay Adan rurachqanwanqa. Chaqa Adanmi suq uchatalla rurachpa, yumbay runata, warmita ancha dañachiwachqa kanchiq, uchayuq kananchiqllampa. Chaymi Tayta Dyusqa listuna karqan, nuqanchiqkunata kastigawananchiq. Piru kananqam Jisumkristu wañuchqanrallku, Taytanchiq Dyusqa yumbay chay uchanchiqmanda dibaldilla pirdunawanchiq. 17 Manchu chay runa Adanlla uchata rurachpa, ancha dañachiwachqa kanchiq, yumbayninchiq wañunanchiqpaq. Piru Jisumkristullam wañuchpa, achka nuqanchiqkunata wachawachqa kanchiq. Chaymi Tayta Dyusqa dibaldilla yumbay uchanchiqmanda pirdunawachqa kanchiq, suq bidampi pudirniyuq kananchiq. 18 Chay agwilunchiq Adan Taytanchiq Dyusta mana kasuchpa, uchata ruramptinmi, yumbay nuqanchiqpis uchata rurachpa, uchayuq kanchiqllampa. Chaymi Tayta Dyusqa yumbay runata kastigawananchiq karqan. Piru Jisumkristu ancha allin kachpa wañuchqanrallkum, Taytanchiq Dyusqa yumbay uchanchiqmanda pirdunawanchiq, amana kastigadu kananchiq. Chaqa Churin Jisumkristu Tayta Dyusta allita kasuchqanrallkum, paypi yumbay kriyiqkunataqa mana nima uchayuqpaqna riqsiwanchiq. 20 Tayta Dyusqam liyningunata Muysista qurqan, yumbayninchiq yach'ananchiq: Uchayuqkunam kanchiqllampa, nichpa. Piru chaychina yach'achpampismi, mas uchata rurarqanchiqllampa. Piru chaychina ancha uchayuqkuna kamptinchiqpismi, Taytanchiq Dyusqa ancha allin kachpa, yumbay uchanchiqmanda pirdunawarqanchiq. 21 Chaqa yumbay runamkuna, warmimkuna uchata rurachpaqam, wañunanchiqna karqanchiqllampa. Piru Jisumkristum wañurqan, yumbay uchanchiqmanda pirdunawananchiq. Chaymi paypi kriyimptinchiqllampa, Tayta Dyusqa ancha allin, ancha pudirniyuq kachpa, pirdunawachqa kanchiq, paywan syilumpi tumkuy tyimpu kawsananchiqllampa.
1 Mayñ, kananqa ¿imatam yuyanchiqllampa? Taytanchiq Dyus kuyawaqninchiq, tumkuy uchanchiqmanda pirdunawamptinchiq, ¿mas uchatachu rurachun, chay uchamandampis pirdunawananchiq? 2 ¡Manñm! ¡Amar nimatampis uchataqa rurachunchu! Chaqa Jisuspi kriyichpaqam, chay unay bidanchiqtaqa pambachqachinana kanchiq, amana nima uchata rurachpachu kawsananchiqllampa. 3 Qamkunaqam allita yach'angillampa: Nuqanchiqkuna Jisumkristumpi kriyichpa, chutimkuchpaqam, paywanna pulla pambaduchina karqanchiq, nichpa. Chayri Jisumkristu pambadu kachqanchina, nuqanchiqkunampis chay unay bidanchiqta pambachun, amana maluta rurananchiqllampa. 4 Chaqa Jisumkristumpi kriyichpaqam, pay pambamkachqanchina nuqanchiqkunampis yamkumpi chutimkuchpa pambamkarqanchiq. Chaymandaqam yamkumanda lluqchichpaqa, muchuq bidayuqna kanchiqllampa. Chaqa Tayta Dyusqam ancha pudirniyuq kachpa, Churin Jisusta wañuchqanmanda kawsachimurqan. Chaychinallam nuqanchiqtampis yanampawanchiq, muchuq bidampina kawsananchiqllampa. 5 Jisumkristu wañuchqanchinam nuqanchiqkunampis wañuchqachinana kanchiqllampa, amana uchata rurananchiqllampa. Chaychinalla Jisumkristu kawsamuchqanchinam, nuqanchiqkunampis rinchiqllampa kawsamuq. 6 Kanan allitam yach'anchiqllampa: Jisumkristum wañurqan suq kruspi klabamptinllampa, nichpa. Chaymi pay wañuchqanchina, nuqanchiqkunampis wañuchqachinana kanchiq, amana uchata rurananchiqllampa. Piru Jisuspi manaraq kriyichpaqam, chay mana baliq yuyayninchiqkunata kasurqanchiqllampa suq patrundachina. Piru kananqam chay yuyallkunaqa manana atinchu kamachiwayninchiqta, uchata rurananchiqqa. 7 Chaqa suq runa wañuchqaqam manana pitampis kasunchu, uchata ruranambaqqa. (Chaychinallar nuqanchiqkunampis kachunllampa). 8 Chaymi nuqanchiqkuna wañuchqachina kachpaqa, allita yuyamkunchiqllampa: Jisumkristuwanmi pulla rinchiqllampa kawsaq, nichpa. 9 Chaqa yach'anchiqpismi: Jisumkristum wañuchqanmanda kawsamuchpa, wañuyta binsirqan. Chaymi manana nunka rinchu wañuriq, nichpa. 10 Chaqa payqam suq kutindalla wañurqan, dyabluta binsichpa, uchanchiqkunamanda wachawananchiq. Chaymandaqam wañuchqanmanda kawsamuchpaqa, Taytanda sirbichpa kawsallkan. 11 Chaychinar qamkunampis wañuchqachina kayllampa, amana uchamkunata ruranallkillampa. Kananmandaqar Siñurninchiq Jisumkristu yanampachumptin, Taytanchiq Dyusta sirbichpa kawsayllampa. 12 Chaychina kriyimptimkillampam, Dyusqa muchuq bidatana quchuchqallampa. Chayri chay mana baliq yuyaynimkimkunata dijachpa, kwirpullkillampata sujitachpa, amana nima maluta rurayllampachu. Achwanri tumkuy kwirpullkita, yuyaynimkimkunatampis Dyusta intrigayllampa, pay munachqanda rurachpa kawsanallkillampa. 14 Manam rinchiqllampachu wachamkaq Muysispa liyningunata kasuchpaqa. Achwanmi Tayta Dyuspi yuyamkumptinchiq, payqa dibaldilla wachawanchiqllampa. Chaymi chay mana baliq yuyayninchiqkunaqa manana atinllampachu amalasqa kamachiwayninchiqta, uchamkunata rurananchiqqa. 15 Piru Tayta Dyus chaychina dibaldilla wachawamptinchiqqa, ¿atinchiqllampachu kawsayta uchata rurachpa? ¡Manñm! ¡Amar nima uchataqa rurachunchu! 16 Chaqa qamkunaqam allita yach'angillampa: Suq runa patrumbi trabajaqqam chay patrunnindalla kasun, ¿manachu? Chaychinallam Taytanchiq Dyusta kasumptimkillampaqa, payqa rin uchallkimanda pirdunachuq, amana uchayuqkuna kanallkillampa. Piru dyabluta kasuchpa, uchata rurachpaqam, ringillampa chingaq. 17 Manchu unayqa amalas uchata rurachpaqa, dyablumpa randichqa kriyadunchina kawsarqallkillampa. Piru kananqam Tayta Dyuspaq yach'amkuchpaqa, paytana tumkuy chunqu allita kasullkangillampa. Chaymi nuqaqa Dyusta ancha pagimkuni. 18 Chaqa Taytanchiq Dyusqam qamkunata ancha yanampachuchqa, amana uchata rurachpa, librina kawsanallkillampa. Chaymi kananqa Tayta Dyus munachqanda rurachpa kawsallkangillampa. 19 Chaymi kay kumparasyunwan bidallkimpaq rini yach'achichuqllampa, allita intyindinallki. Chaqa kaychina mana yach'achichumptiyqam, mana atingillampachu allita intyindiytaqa. Unayqam dyabluman intrigamkachpa, paytalla kasuchpa, kawsarqallkillampa, randichqa kriyadu patrunninda kasuqkunachina. Chaymi ancha qawch'u karqallkillampa, uchata ruranallkillampa. Piru kananqar intrigamkayllampa Dyusman, ancha qawch'u kanallki, alli kaqkunatalla ruranallkillampa. 20 Unayqam uchata rurachpaqa, mana baliq patrumba kriyadunguna karqallkillampa. Chaymi mana munarqallkillampachu allita kawsayta. 21 Piru chaychina uchata rurachpaqam, ¿imatam ganarqallkillampa? ¡Manam nimatampis ganarqallkichu! Achwanmi chinganallki karqallkillampa. Chaymi kananqa chay rurachqallkita yuyachpa, ancha panqamkungillampa. 22 Piru Taytanchiq Dyusmi chay uchallkimkunamanda wachachuchqallampa, amana dyablumpa kriyadunguna kanallkillampa. Chaymi kananqa Dyusta sirbimptimkillampa, payqa ancha yanampachungi, paytana allita kasuchpa kawsanallkillampa. Chaymandaqam syiluman rin ampachuqllampa, paywan tumkuy tyimpu kawsanallkillampa. 23 Piru uchata rurachpaqam, pagunchiqta rinchiq ch'askiq. Chay paguqam rin kaq infyirnu. Piru Jisumkristumpi kriyimptinchiqqam, Tayta Dyusqa dibaldilla syiluman rin ampawaqninchiq, tumkuy tyimpu kawsananchiqllampa.
1 Kriyiq masitamkuna, qamkunaqam allita yach'angillampa lillkunampaq. Chay lillkunataqam kasunchiqllampa wañunanchiq diyamkamanlla, ¿manachu? 2 Mayñ, kay kumparasyumbaq yuyachunllampa: Chay lillkunaqam suq warmi kasarachqata kamachin, qusanwanlla kanambaq wañunan diyamkaman. Chaymi suqwan kachpaqa, ancha uchayuqna kidan. Piru qusan wañumptinqam, chay warmiqa sultirachinana kidan. Chaymi munachpa kasaraytaqa, suqwan atin kasarariyta. Chaychina kasarachpa, chay runanwan puñuchpaqa, mana uchayuqchu kidan. 4 Kuyachqay kriyiq masitamkuna, chay unay lillkunaqam nuqanchiqkunampaqqa chay warmimpa qusan wañuchqanchina. Chaqa kanan nuqanchiqkuna Jisumkristumpi kriyichpaqam, suq warmi suq runawan kasaraqchina kanchiqllampa. Chaymi Jisustana kasuchpaqa, manana chay unay lillkunataqa kasunchiqllampachu. Chaqa kananqam chay kawsamuq Jisuspa warminchinana kanchiqllampa, Taytanchiq Dyus munachqanda rurachpa kawsananchiqllampa. 5 Piru manaraq kriyichpa Jisuspiqam, Muysispa liyningunata yach'achpampis, mana munachpa kasuyta, masta animamkarqanchiq uchata rurananchiqllampa. Chaymi kwirpunchiqta kasuchpa, chingananchiqpaqna karqanchiqllampa. 6 Piru Jisuspi kriyichpaqam, manana chay unay iskibrichqan lillkunampa kriyadunchinachu kanchiqllampa. Achwanmi kananqa Dyuspa Santu Ispiritun yanampawanchiq, muchuq bidampi librina kawsananchiq, Dyusta kasuchpa. 7 Chaychina kamptinqa, ¿imatam nichun? ¿Muysispa liyningunaqachu malu, nichpa? ¡Manñm! Achwanmi chay lillkuna niwanchiq: Kaymi alli, kaymi mana allichu, nichpa. Chaqa chay lillkunaqam yach'achiwanchiq: Runa masimkimpa kusasningunata ama anchaqa munamkuychu, nichpa. Chayta mana niwamptinchiqqam, chay kusasningunata munamkuchpaqa, mana yach'ananchiqtachu: Uchatam rurallkani, nichpaqa. 8 Piru Muysispa liyninguna kamachiwamptin, uchata ama ruranaypaqqam, nuqaqa masta munarqay chay uchata rurayta. Piru chay lillkuna mana kamptinqam, mana yuyanaytachu chay uchamkunata ruranaypaqqa. 9 Chaqa unay tyimpumpi manaraq chay lillkunata yach'achpaqam, uchata rurachpampis, yuyarqay: Allin runam kani, nichpa. Piru chay lillkunata yach'amkuchpaqam, masta munarqay uchata rurayta. Chaymi intyindirqay: Rinim chingaq. Manam atinichu chay lillkunata kumpliytaqa wachamkanaypaq, nichpa. 10 Piru Tayta Dyusqam chay liyningunata quwarqanchiq, allita kasuchpa, wachamkachpa, paywan tumkuy tyimpu kawsananchiqllampa. Lumkismi chay liyningunataqa mana atirqaychu kasuyta. Chaymi chay lillkunaqa chingachiwanambaq karqan. 11 Piru nuqaqam puntata yuyarqay: Yumbay lillkunatam atini kasuyta, nuqa kimkiylla wachamkanaypaq, nichpa. Chaychina yuyachpaqam, nuqa kimkiylla ingañamkallkarqay. Chaqa mana atichpa tumkuy lillkunata kasuytaqam, chinganaypaq karqay. 12 Chaymi nillkillampa: Dyuspa liyningunaqam ancha allin, ancha santu, mana nima maluchu, nichpa. 13 Piru ¿chaychina allin kachpampischu, dañachiwarqan chinganaypaq? ¡Manñm! Achwanmi uchata rurachpa, nuqa kimkiylla dañamkarqay chinganaypaqqa. Piru chay allin lillkunaqam yach'achiwarqan: Ancha fiyutam rurallkangi, nichpa. Piru chaychina yach'achiwamptinmi, nuqaqa intyindichpa: Uchallkunaqam dañachiwallkan chinganaypaq, nichpaqam, masta animamkarqay, chay uchamkunata ruranaypaq. 14 Allitam yach'anchiqllampa: Chay allin lillkunatam Dyuspa Santu Ispiritun quwachqallampa kanchiq, nichpa. Piru nuqaqam mana allitaqa ruranichu. Chaqa kwirpuy munachqandalla rurachpam, dyabluta kasullkani suq randichqa kriyadu patrunninda kasuqchina. 15 Piru nuqaqam mana intyindinichu: ¿Imarallkum uchata rurani? nichpaqa. Chaqa munachpa allita ruraytampismi, mana atinichu. Chaychina mana munachpa uchata ruraytampismi, chay uchamkunata rurani. 16 Chaymi uchata mana munachpa ruraytaqa, intyindini: Dyuspa liyningunaqam ancha allin, nichpa. Piru chaychina intyindichpampismi, chay uchamkunata rurani. 17 Chaqa chunquypi kaq mana baliq yuyaynillkunam animachiwan, chay uchamkunata amalas ruranaypaq. 18 Chaymi munachpa allitalla ruraytampis, mana atinichu. Chayrallkum yach'ani: Ancha uchayuq runam kani, nichpa. 19 Chaqa munachpa allitalla ruraytampismi, mana atinichu. Achwanmi mana munachpampis, chay uchamkunata rurani. 20 Chaychina mana munachpampismi, jiñuyrallku uchamkunata rurani. Chaqa chunquypi uchamkuna kamptinmi, chay mana baliqkunata rurani. 21 Chaymi allitalla munachpa ruraytampis, achwamba uchamkunata rurani. 22 Piru Dyuspa liyningunaqam ancha gustawan chunquypi. 23 Piru chaychina gustawamptimbismi, nuqaqa uchayuq kachpa, ichkay yuyayniyuq kani. Suq yuyayniymi Dyusta ancha munan kasuyta. Piru suq yuyayniyqam kwirpuy munachqandalla ancha munan rurayta. Chaymi chay yuyaynillkunaqa suq girrampichina pilyamptin, mana atinichu allita rurachpa kawsaytaqa. Chaqa suq prisuchinam chay mana baliq yuyayniyta kasuni. 24 Chaymi ancha llamkichpa yuyani: ¿Piraq yanampawanman, chay mana baliq yuyaynillkunata dijanaypaq, ama chinganaypaq? nichpa. 25 ¡Taytanchiq Dyusllam Siñurninchiq Jisumkristuwan atin yanampawaytaqa! ¡Chaymi pallkunata ancha pagimkuni! Piru nichuchqaychinam, ichkay yuyayniyuq kachqa kani. Suq yuyayniymi Dyuspa liyningunata ancha munan kasuyta. Piru suq yuyayniyqam uchamkunata ancha munan rurayta. Chaymi nuqa sampalayllaqa mana atinichu allitalla rurachpa kawsaytaqa.
1 Kananqam Jisumkristumpi yuyamkuqkunataqa Tayta Dyusqa tumkuy uchanchiqmanda pirdunawaqninchiq, manana rinchu kastigawaqninchiq. Chaqa mananam kwirpunchiq munachqan uchamkunata rurachpachu kawsanchiqllampa. Achwanmi Dyuspa Santu Ispiritunda kasuchpana kawsanchiqllampa. 2 Chaymi nuqaqa Jisumkristumpi yuyamkuchpa, Santu Ispiritunda kasumptiyqa, muchuq bidata quwachqa. Chaqa payqam yanampawan, amana uchata rurachpa kawsanaypaq. Chaymi manana rinichu chingaq. 3 Piru nuqanchiqkunalla ancha munachpa Muysispa liyningunata kasuytaqam, uchayuqkuna kachpa, mana atirqanchiqllampachu kumpliytaqa. Chaymi chay lillkunaqa mana atirqanchu wachawayninchiqta. Piru Taytanchiq Dyusmi chay lillkunamanda mas pudirniyuq. Chaymi Churin Jisusta kay pachaman kach'amurqan, kwirpuyuq runa kanambaq. Chaychina kwirpuyuq kachpampismi, mana nima uchata rurarqanchu. Piru suq kruspim wañurqan, uchanchiqkunampaq pagaramkunambaq, amana kastigadu kananchiqllampa. 4 Chaychinam wañurqan, Dyustana kasuchpa kawsananchiqllampa. Chaqa Dyuspa Santu Ispiritunqam yanampawanchiq, Dyus kamachimkuchqanda kasuchpa, amana kasunanchiq mana baliq yuyayninchiqkunataqa. 5 Chaqa wamkin runamkunaqam mana baliq yuyayningunata rurachpaqa, kwirpun munachqandalla yuyanllampa. Piru Dyuspa Santu Ispiritunda kasuqkunaqam Dyus munachqandalla yuyanllampa. 6 Chaqa nuqanchiqkuna kwirpunchiq mana alli munachqanda yuyachpaqam, tumkuy tyimpumpaq rinchiqllampa chingaq. Piru Tayta Dyus munachqanda yuyachpaqam, paywan pulla kuchimkuchpa, tumkuy tyimpu chumaqta rinchiqllampa kawsaq. 7 Piru wamkin runa, warmi kwirpun munachqandalla rurachpaqam, Tayta Dyusta kuntrallkanllampa. Chaqa manam munanllampachu ni atinllampachu Dyuspa liyningunata kasuytaqa. 8 Chaymi pallkunaqa munachqandalla rurachpa, mana atinllampachu Tayta Dyusta kuchichiytaqa. 9 Piru qamkunaqam mana pallkunachinachu kawsangillampa. Achwanmi Dyuspa Santu Ispiritun chunqullkimpi tiyan. Chaymi payta kasuchpa kawsangillampa. Piru mayqannimkimpi Jisuspa Santu Ispiritun mana tiyamptinqam, mana Jisumkristuwanchu kangillampa. 10 Piru kananqam Jisumkristumpa Ispiritun nuqanchiqkunampi tiyamptin, Tayta Dyusqa manana uchayuqpaq riqsiwanchiqllampa. Chaymi ispiritunchiqqa manana rinchu wañuq. Piru kwirpunchiqmi wañun, chay unay uchamkunata rurachqanchiqrallku. 11 Kanan Dyuspa chay Santu Ispiritunmi Jisumkristuta wañuchqanmanda kawsachimurqan. Chaychinallam Ispiritunqa nuqanchiqkunampi tiyachpa, rin kawsachimuq kwirpunchiqta wañuchqanmanda. 12 Chaymi masitamkuna, Tayta Dyusta ancha dibiranchiq, chaychina wañuchpa, wachawachqanchiqrallku. Chayri amana kawsachunchu chay mana baliq yuyayninchiqkunata kasuchpaqa. 13 Chaqa chay mana baliq munachqallkita rurachpaqam, wañuchpa ringillampa chingaq. Piru Dyuspa Santu Ispiritun yanampachumptinmi, chay mana baliq kusaskunataqa amana ruranallkillampa, Dyuswan pulla ringillampa kawsaq. 14 Chaymi Dyuspa Santu Ispiritunda kasuchpaqa, Dyuspa wambrangunana kanchiqllampa. 15 Chaqa chay Santu Ispiritundaqam mana ch'askirqanchiqchu suq randichqa kriyaduchina, Taytanchiq Dyusta manchananchiqqa. Achwanmi paytaqa ch'askirqanchiq, Tayta Dyuspa wambranguna kananchiq. Chaymi kananqa dirichuyuq kanchiq Dyusta ninanchiq: Taytaymi kangi, nichpa. 16 Chaqa chay Ispiritunqam nuqanchiqkunampi tiyachpa niwanchiqllampa: Dyuspa wambrangunanam kangillampa, nichpa. 17 Chaymi Churin Jisumkristuwan pulla rinchiqllampa ch'askiq suq chumaq irinsyata. Chaqa kay mundumpi Jisuspi kriyimptinchiq, suqkuna padisichiwanchiq. Piru chaychina padisichpaqam, syilumpi Jisuswan pulla llimpyachpa, rinchiqllampa kamachimkuq. 18 Kay pachampiqam ancha ñamkanchiqllampa. Piru allitam yach'ani: Suq diyam syilumpi ancha llimpyaq Siñurninchiqwan kuchimkuchpa, rinchiqllampa yach'aq: Kay kuchimkuchqanchiqpaqqam chay ñamkachqanchiqqa mana nimachu kachqa, nichpa. 19 Tayta Dyus tumkuy ima rurachqanmi ancha chuyamkullkan, Dyusqa nuqanchiqkunampaq ninambaq: Kallkunam wambrallkuna, nichpa. 20 Chaqa runamkuna uchamkunata ruramptinllampam, Tayta Dyusqa dijarqan, pay tumkuy ima rurachqanguna dañamkanambaq. Piru chaychina dijachpampismi, ufrisimkurqan: Suq diyam yumbay wambrallkuna nuqawan pulla llimpyachpa, rinllampa kamachimkuq. Mananam rinllampachu wañuq. Chay diyampiqam tumkuy ima rurachqayqa manana rinchu dañamkaq. Achwanmi allichamptiy, chay rurachqallkunaqa rinllampa kuchimkuq chay wambrallkunawan, nichpa. 22 Chaqa yach'anchiqllampam: Tayta Dyus tumkuy ima rurachqangunam ancha padisichpa kanangaman kijamkun, suq warmi qachyanambaq padisiqchina. 23 Chaymi nuqanchiqkuna Santu Ispirituwan kachpampis, Dyus chay rurachqangunawan pulla padisinchiqllampa. Piru Taytanchiq Dyusqam chay Santu Ispiritunda quwachqa kanchiq, yach'ananchiq: Suq diyam masta rin yanampawaqninchiq, nichpa. Chaymi kay mundumpi padisichpampis, ancha chuyamkullkanchiq, Tayta Dyus amkrachqan wambrangunata yumbay irinsyanchiqta quwananchiqkaman. Chay diyampim payqa suq muchuq kwirputana rin quwaqninchiq. 24 Chaqa Taytanchiq Dyuspi kriyimptinchiqmi, payqa wachawachqa kanchiq, suq diya paypa pullan syilumpi kawsananchiq. Lumkismi manaraq rimkanchiqchu chay ufrisiwachqanchiqtaqa. Piru Dyuswan syilumpi kachpaqam, manana nisisaryuchu rin kaq pay niwachqanchiqpi yuyamkunanchiqqa. Piru kananqam chuyamkullkanchiq, chay manaraq rimkachqanchiq kumplinambaq. 25 Chaymi manaraq richpa syilumanqa, mana challkuq chuyamkullkanchiq, chayman rinanchiqllampa. 26 Mana yach'amptinchiq Dyusman allita mañamkuytam, paypa Santu Ispiritun ancha yanampawanchiq mas allita mañamkunanchiq. Chaqa ancha syintichpam llamkiypaqta, rrugamkun nuqanchiqkunampaq mana ni palabramkunata rimachpa. 27 Kanan Tayta Dyusqam tumkuy ima yuyachqanchiqta allita yach'an. Chaymi chay Santu Ispiritun nuqanchiqpaq mañamkuchqanda ancha allita intyindin. Chaqa chay Santu Ispirituqam Taytanchiq Dyus munachqanchinalla mañamkun. 28 Yach'anchiqllampam: Tayta Dyusmi qayawachqa kanchiq, pay munachqanchina kawsananchiq. Chaymi payta kuyaqkunataqa tumkuy imampi byinninchiqpaq yanampawanchiq, nichpa. 29 Chaqa unaymandampacha manaraq nasimptinchiqmi, Tayta Dyusqa riqsiwaqninchiq amkrawarqanchiq, Churin Jisuschina kananchiqllampa, Jisusqa yumbay nuqanchiqkunampa kulamka masanchiqchina kanambaq. 30 Chaychina amkrawaqninchiqmi, Dyusqa qayawarqanchiq, paypa wambranguna kananchiqllampa. Chaychina qayawaqninchiqmi, uchanchiqkunamanda pirdunawaqninchiq, mana uchayuqpaqna riqsiwanchiqllampa. Chaymi Jisumkristuqa rin yanampawaqninchiq pudirninwan, paychina llimpyachpa, paywan kamachimkunanchiq. 31 Tumkuy chayta yach'achpaqam, allita kaychina yuyamkunchiqllampa: Tayta Dyus yanampawamptinmi, mana ni pimpis atinqachu binsiwayta, nichpa. 32 Chaqa Tayta Dyusqam mana nimata mich'awaqninchiqchu, sampalan Churin Jisusta kay pachaman kach'amurqan, nuqanchiqkunampaq wañunambaq. Chaychina kimkin Churin Jisusta intrigamkuchpam, Tayta Dyusqa tumkuy imampi nuqanchiqkunata rin yanampawaqninchiq, ¿manachu? 33 Chaychina Tayta Dyus amkrachqangunata mana uchayuqkunampaq riqsiwamptinchiqqam, mana pimpis atinqachu chimbiwayninchiqta: Uchayuqkunam kangillampa, nichpaqa. 34 Chaqa Jisumkristum wañurqan, uchanchiqkunamanda wachawananchiqllampa. Chaymandaqam kawsamuchpa, Tayta Dyuspa allin ladumbi tiyachpa, rrugamkullkan, nuqanchiqkunata yanampawananchiq. Chaymi mana pimpis atinqachu chimbiwayninchiqta: Uchayuqmi kangi, nichpaqa, kastigadu kananchiqllampa. 35 Chaqa mana ni pimpis ni mayqambis atinmanchu Jisumkristuta disanimachiyta, ama kuyawananchiqqa: ni ñamkallkuna, ni llamkimkuna, ni qasachawaqninchiqkuna, ni ambruna, ni mana kamptin mudananchiq, ni uchayuqkuna jurampawamptinchiq, ni atun kuchilluwan wanchiwamptinchiq. 36 Chaymi Dyuspa Santu Librumbi paypaq rimaqkuna payta nin: Tayta Dyus, qamta sirbichumptiyllampam, chay kuntrachuqkuna tumkuy uras munanllampa wanchiwayllampata. Manchu wichamkunata kamalman ampanllampa wanchiq (wanchinanllampa). Chaychinallam nuqallkunatampis munanllampa wanchiwayta, nichpa. 37 Piru chaychina munachpa wanchiwayninchiqtam, mana nimatampis atinllampachu binsiwayninchiqta. Achwanmi Jisumkristu ancha kuyawaqninchiq yanampawanchiq, Dyuspi allita yuyamkuchpa, dyabluta, tumkuy ima maluta binsinanchiqllampa. 38 Chaymi kawsallkamptinchiq ichu wañumptinchiqpis, mana nimampis atinqachu amkrawayninchiqta Tayta Dyusmanda, nuqanchiqkunata ama kuyawananchiqqa. Manam atinchu ni mas kamachimkuq anjilkuna, ni mas kamachimkuq dyablumkuna, ni suq laya kamachimkuqkuna, ni kay tyimpumpi kawsaqkuna, ni chamuq tyimpumpi kawsaqkunampis. 39 Manamir rinllampachu amkrawaqninchiq ni altumpi puriqkuna ni kay allpampa warambi kaqkuna ni suq laya kaqkunampis. Chaqa Taytanchiq Dyusmi Siñurninchiq Jisumkristuta kach'amuchpa, ancha allita yach'achiwachqa kanchiq: Ancham kuyallkillampa, nichpa.
1 Kriyiq masitamkuna, Jisumkristumpi tumkuy chunqu kriyimptiymi, Dyuspa Santu Ispiritun chunquypi tiyachpa yanampawan, allimp kaqtalla qamkunata nichunaypaq. Chaymi kayta nillkillampa, mana nimata llullamkuchpachu: 2 Ancham llamkini (llaqta masiy isrraylinumkunampaq, Jisuspi mana kriyimptinllampa. Chaqa chay llaqta masillkunatam ancha kuyani.) 3 Chaymi atichpaqa, intrigamkayman pallkunampa rrimplasun chinganaypaq, pallkunata wachanaypaq. 4 Chaqa nuqaqam pallkunawanqa Isrrayilpa karu willkanguna kanillampa. Tayta Dyusmi amkrawarqanllampa, paypa wambranguna kanayllampa. Unay agwilullkunam Tayta Dyuspa llimpyayninda rimkarqanllampa. Chaymandaqam pallkunawan suq tratuta rurachpa, Muysispa liyningunata qurqan. Pallkunataqam yach'achirqan, paytalla adurananllampa. Pallkunataqam ufrisirqan, Amkrachqan Wachadurta kach'amunambaq. 5 Chaqa chay unay isrraylinu agwilullkunampa karu willkangunam kanillampa. Nuqallkunamandam Dyus Amkrachqan Wachadur Jisuspis nasirqan. Payqam Dyus. Chaymi tumkuy imata, tumkuy maypi kamachin. Chayri payqa tumkuy tyimpu alabachqa kanqa. ¡Chaychina kanqa! 6 Dyusqam isrraylinumkunata ufrisichqanda mana qunqarqanchu. (Achwanmi kumplirqan.) Piru chay unay agwiluyllampa Isrrayilpa karu willkanguna kachpampismi, mana yumbayniychu Dyuspa wambranguna kanillampa. 7 Chaqa Abrajamba mirayningunamanda kachpampismi, mana yumbayniyllampachu Dyuspa lijitimu wambrangunaqa kanillampa. Chaymi Tayta Dyusqa Abrajanda kaychina nirqan: Churimki Isamkmandallam lijitimu willkallkimkunaqa kanqa, nichpa. 8 Chaymi yach'anchiqllampa: Abrajamba mirayninguna kachpampismi, mana yumbaychu kachqa Dyuspa wambrangunaqa, nichpa. Achwanmi Dyuspi kriyiqkunatalla amkrarqan, wambranguna kanambaqqa. Chaychina Abrajan Dyuspi kriyimptinmi, chaychinalla paytampis ufrisichqa karqan: Churiyuqmi ringi kaq, nichpa. 9 Chaqa Taytanchiq Dyusqam Abrajanda kaychina ufrisichqa karqan: Suq watamanda kutimumptiymi, warmimki Sara qachyanqa churimkita, nichpa. 10 Manam Abrajanwanllachu chaychinaqa karqan. Achwanmi churin Isamkpis warmin Rribimkampi ichkay churiyuq karqan. 11 Piru manaraq nasimptin chay churingunam, manaraq ni uchata ni allita ruramptinllampa, Tayta Dyusqa Rribimkata nirqan: Punta nasiq wawallkim chay imki nasiq wawallkita rin kasuq, nichpa. Chaychinallam Taytanchiq Dyuspis Santu Librumbi nirqan: Jamkubum gustawan. (Chaymi payta amkrachqa kani, nasyunniypa agwilun kanambaq.) Piru masan Isawmi mana gustawanchu. (Chaymi paytaqa mana amkrachqachu kani chay nasyunniypa agwilun kanambaqqa), nichpa. Chaychina manaraq ni allita ni maluta ruramptinllampam, Tayta Dyusqa chay ichkay masampuramanda suqta amkrarqan, nasyunnimba agwilun kanambaq. Pay munachqandallam chaychinaqa amkrarqan. 14 Chaychina Taytanchiq Dyus gustachqan runata amkramptinqam, ¿atinchiqchu niyta: Tayta Dyusqam mana allitachu rurachqa, nichpa? ¡Manñm! Chaychinaqa ama rimachunllampachu. 15 Chaqa Tayta Dyusqam Muysista nirqan: Mayqanda munachpa yanampaytaqam, yanampachaq. Mayqanda munachpa llamkimpaytaqam, llamkimpachaq, nichpa. 16 Chaymi Dyusqa mana yanampanchu suq runata, chay runaqa ancha munachqanrallku yanampanambaqqa ichu ancha trabajachqanrallku. Achwanmi Tayta Dyusqa llamkimpachpa pay kimkin munachqanda yanampan. 17 Chaymi Tayta Dyusqa librumbi chay unay gubyirnu Farunda nirqan: Farun, qamtam ancha pudirniyuqta rurachuchqa kani. Chaymi kuntrawamptimkiqa, nuqa rini binsichuq, yumbay kay mundumpi tiyaqkuna yach'anambaq: Dyusmi ancha pudirniyuq, ancha chumaq famayuq, nichpa. 18 Chaqa Dyus kimkin munachpam, wamkin runamkunata llamkimpan, wamkin angu chunquyuq runamkunataqam jwirtiyachin, chaychinalla kidananllampa, nichpa. 19 Piru kinsampch'i suqnimki Dyusta munachpa wichumpayta nuqata kaychina niwangiman: Dyusmi yumbayninchiqta rurawachqa kanchiq, paypi kriyiqkunata, mana kriyiqkunatampis. Chayri angu chunquyuqta rurawachpaqa, ¿Imarallkum rin kastigawaq, uchata ruramptiyqa? nichpa. 20 (Piru chaychina nichpaqam, mana allimp kaqtachu rimallkangi.) Chaychinaqa ¿pitaq kangi Tayta Dyusta rrispundinallkiqa? Tayta Dyusqam suq runa mangata ruraqchina. Qamqam chay mangachina kangi. Chaymi mana dirichuyuqchu kangi Dyusta rrispundinallkiqa: ¡Imarallkum kaychinaqa rurawachqa kangi? nichpa. 21 Chaqa Tayta Dyus mangata ruraqchina kachpaqam, pay munachqanda atin rurayta. Chaymi mitumanda wamkin mangamkunataqa ancha baliqta atin rurayta, fyistamkunampilla yanumkunanllampa. Chay mitumandallam atin rurayta mana yaqqa baliq mangamkunatampis, challkunampi tumkuy diyamkuna yanumkunanllampa. 22 Chaychinallam Tayta Dyusqa runamkunawambis ruran, yach'achiwananchiq: Ancha pudirniyuq kachpam, atini kastigayta chay uchayuqkunata, nichpa. Piru ancha allin kachpam, mana daschu kastigan chay chinganambaq kaq uchayuqkunataqa. Achwanmi pallkunataqa ancha achka tyimpumpaq agwantan. 23 Chaychina pallkunata agwantachpam, nuqanchiqkunata llamkimpawaqninchiq, ancha yanampawachqa kanchiq, intyindinanchiq: Tayta Dyusmi ancha pudirniyuq, ancha allin, nichpa. Chaymi unaymandampacha tumkuy imata allicharqan, nuqanchiqkunata wachawaqninchiq, paypa llimpyallkaq lugarninman ampawananchiq. 24 Chaqa Dyusqam amkrawachqallampa kanchiq isrraylinumkunata, mana isrraylinu kaqkunatampis, paypa wambranguna kananchiqllampa. 25 Chaymi Dyuspaq rimaq Usiyaspa librumbi Tayta Dyus kaychina nin: Chay mana wambray kaqkunatam nichaq: Wambrallkunanam kangillampa, nichpa. Chay mana kuyachqamkunatam nichaq: Ancham kuyallkillampa, nichpa. 26 Chay librumbillam Tayta Dyusqa nimbis: Suq lugarpim qamkunata nichurqaqllampa: Manam nuqampa wambrallkunachu kangillampa, nichpa. Piru kananqam chay kimkin lugarpilla rini nichuqllampa: Nuqa kawsaq Dyuspa wambrallkunanam kangillampa, nichpa. 27 Piru Dyuspaq rimaq Isayiyasmi isrraylinumkunampaq nirqan: Tayta Dyusqam chay rimachqanda kumplichpa, yumbay kay mundumpi tiyaqkunata ancha allita das rin jusgaq. Chaymi chay Isrrayilmanda kaqkuna, ancha achka aquchina kachpampis, wamkingunalla wachadu rinllampa kaq jwisyu diyampi, nichpa. 29 Chaymi chay kimkin Isayiyas ancha unayna nirqambis: Ancha pudirniyuq Tayta Dyus mana llamkimpawamptinchiqqam, yumbay nuqanchiqkuna uchyamkachqana kananchiqta. Chay Suduma llaqtachina, Gumurra llaqtachinam yumbayninchiqna chingananchiqllampata, nichpa. 30 Chayta yach'achpaqa, ¿imatam nichun? Chay mana isrraylinu kaqkunaqam mana nimatampis rurarqanllampachu, Tayta Dyus pallkunata pirdunanambaqqa. Piru pallkunaqam Tayta Dyuspi allimpta kriyimptinllampa, payqa pirdunachpa, mana nima uchayuqkunampaqna riqsin. 31 Piru isrraylinumkunaqam Muysispa liyningunata ancha munachpa kasuytampis, mana atirqanllampachu kumpliyta. Chaymi Tayta Dyusqa mana pirdunarqanchu pallkunataqa. 32 Chaqa pallkunaqam yuyarqanllampa: Lillkunata kumplichpam, nuqa kimkiylla atini wachamkayta, nichpa. Piru manam munarqanllampachu Jisuspi kriyiyta, pallkunata pirdunanambaqqa. Chaymi pallkuna suq rumimpi trumpisachpa bulamkaqchina karqanllampa. 33 Chaymi Dyuspa Santu Librumbi Jisuspaq kaychina nin: Siyun llaqtampim suq allin rumitachina rurachaq. Chay rumimpim achka runamkuna trumpisachpa, bulamkanqallampa. Piru chay rumimpi kriyiqkunaqam mana nimatampis rinllampachu panqamkuq: Yanqam kriyichqa kani, nichpaqa. Chaqa pallkunataqam ancha rini yanampaq, nichpa.
1 Kuyachqay masitamkuna, tumkuy chunquywanmi ancha munani, isrraylinu masillkuna wachadu kananllampa. Chaymi Tayta Dyusman ancha mañamkuni, pallkunata wachanambaq. 2 Chaqa allimp kaqtam nillkillampa: Pallkunaqam ancha munanllampa Tayta Dyusta kasuyta. Piru manam intyindinllampachu pay nichqandaqa. 3 Chaqa manam intyindinllampachu: Tayta Dyusqa imachinam uchanchiqmanda pirdunawanchiq, nichpaqa. Achwanmi munanllampa pallkuna kimkinlla allita rurayta wachamkanambaq. Chaymi mana munanllampachu Dyus nichqanchina Churin Jisumkristumpi kriyiytaqa. 4 Piru Jisumkristuqam yumbay lillkunata kumplichpa, wañurqan, uchanchiqkunampaq pagaramkunan. Chaymi manana balinchu chay lillkunata kumplinanchiq wachamkananchiqqa. Achwanmi Jisuspi kriyimptinchiqllampa, payqa wachawanchiq. 5 Piru wamkin runamkunaqam munanllampa lillkunata kasuyta, pallkuna kimkinlla wachamkananllampa. Chaymi pallkunampaq Muysisqa kaychina iskibrirqan: Suq runa wachamkanambaqqa, Tayta Dyuspa yumbay liyningunata allita kasuchpa kawsanqa, nichpa. [Nuta: Piru manam ni pimpis atinchu kumpliyta yumbay chay lillkunataqa.] 6 Chaymi Tayta Dyusqa nin: Churiypi kriyimptimkillampaqam, rini wachachuqllampa, nichpa. Chayri ama yuyayllampachu: ¿Mayqan runatam kach'achun syiluman, Dyus Amkrachqan Wachadurta kay pachaman ampamunambaq? nichpaqa. (Chaqa chay Wachadurqam chamuchqana.) 7 Ama ni yuyayllampachu: ¿Pitam kach'achun wañuqkunampa lugarninman, Dyus Amkrachqan Wachadurta wañuchqanmanda kawsachimuchpa, kay pachaman ampamunan? nichpa. (Chaqa Wachadurninchiqmi wañuchqanmanda kawsamuchqana.) 8 Chaymi Muysispa librumbiqa nimbis: Manam trabajuschu Tayta Dyuspa chumaq nutisyanda intyindinallkiqa. Chaqa dasmi atingi chunqullkimpi kriyiyta, chimimkiwan suqkunatampis willanallki, nichpa. Chay kimkin nutisyatallam nuqallkunampis yach'achimkunillampa, chay uyawaqkuna Jisuspi kriyinanllampa. 9 Tumkuy chunqullkiwan allita kriyiy: Tayta Dyusmi Jisusta wañuchqanmanda kawsachimuchqa, nichpa. Chaychina kriyichpa, chimimkiwan suqkunata allimp kaqta willay: Jisusmi nuqampa kamachimkuqniyqa, nichpa. Chaychina ruramptimkiqam, Tayta Dyusqa rin wachachuq. 10 Chaqa chunqunchiqwan allimpta kriyimptinchiqqam, Tayta Dyusqa uchanchiqkunamanda pirdunawanchiq. Chaymandaqam chiminchiqwan suqkunata nimptinchiq: Jisumkristum kamachimkuqniy, nichpaqa, Dyusqa wachawanchiqllampa. 11 Chaymi Dyuspa Santu Librumbi nin: Tayta Dyusqam paypi kriyiqkunata imatampis ufrisichpaqa, tumkuy imata rin kumpliq, nichpa. 12 Chaychinam nin yumbay laya runamkunampaq. Chaqa Tayta Dyusqam isrraylinumkunampa, mana isrraylinu kaqkunampa kamachimkuqninchiq. Paypaqqam yumbayninchiq igwallla kanchiqllampa. Chaymi payman mañamkumptinchiqqa, ancha allita yanampawanchiq. 13 Chaqa Dyuspa Santu Librumbiqam kaychinampis nin: Mayqan runa ichu warmi Siñurninchiqta rrugamptin wachanambaqqam, payqa rin wachaq, nichpa. 14 Piru manaraq ni pimpis kach'amptin yach'achimkuqtaqa, ¿imachinam atinman riyta yach'achimkuq Jisuspaqqa? Chay kach'adumkuna manaraq ch'ayamptin yach'achimkuqqa, ¿imachinam suqkunaqa atinmanllampa yach'ayta Jisuspaqqa? Chaychina manaraq yach'achpa Jisuspaqqa, ¿imachinam atinmanllampa paypi kriyiytaqa? Manaraq paypi kriyichpaqa, ¿imachinam atinmanllampa rrugayta wachanambaqqa? Chaymi Dyuspa Santu Librumbi nin: Yach'achimkuqkuna ch'ayamumptinqam, ancha chumaq rin kaq. Chaqa pallkunaqa Dyuspa chumaq nutisyanda yach'achimkumptinqam, achka runamkuna, warmimkuna rinllampa kuchimkuq, nichpa. 16 Piru chay yach'achimkuq runamkuna Tayta Dyus nichqanda yach'achimkumptimbismi, mana yumbaychu kriyichqallampa. Chaymi Dyuspaq chay rimaq Isayiyasqa librumbi nin: Tayta Dyus, qambaq yach'achimkumptiyqa, ¿pimkunataq kriyiwachqallampa? (Wamkingunallñm), nichpa. 17 Chaychinallam Jisumkristumpa chumaq nutisyanda yach'achimkumptinchiqqa, wamkingunaqa uyanllampa. Chay uyaqkunamandam, wamkinningunaqa Jisuspi kriyinllampa. 18 Mayñ, tampuchqallkillampa: ¿Manachu tumkuy maypi chay chumaq nutisyandaqa uyachqallampa? Ari. Tumkuy maypim uyachqallampaqa. Chaymi Dyuspa Santu Librumbi nin: Chay yach'achimkuqkunam yumbay nasyungunampi yach'achimkuchqa, kay pachampa tumkuy kuchungunamkaman ch'ayachtin, nichpa. 19 Mayñ, muchuqmanda qamkunata tampurichqallki: ¿Isrraylinu masillkunaqa manachuraq yach'achqa Dyuspa chumaq nutisyanda? nichpa. Ari, pallkunaqam yach'achqallampa. Chaqa Muysispismi Tayta Dyus nichqanda kaychina iskibrirqan: Isrraylinumkunatam piñachichaq, mana isrraylinu kaqkunata wachachpa. Chaqa chay mana intyindiq runamkunata kuyamptiymi, rimkawachpallampa, chay isrraylinumkuna rinllampa pallkunataqa imbidyaq, nichpa. 20 Chaychinallam Isayiyaspis mana nimata manchachpachu, Tayta Dyus nichqanda kaychina iskibrirqan: Mana maskawaq runamkunam tariwachqallampa; mana tampumkuqkunatam dijachqa kani riqsiwananllampa, nichpa. 21 Piru chay Isayiyasllam isrraylinumkunampaq Dyus nichqanda kaychinampis iskibrirqan: Isrraylinumkunata mana challkuq qayamptiypismi, pallkunaqa mana uyamkuqkuna kachpa, mana munarqanllampachu uyawayta, nichpa.
1 Mayñ, tampuchqallkillampa: ¿Tayta Dyuschu nasyunnin Isrrayilmanda amkramkachqana? ¡Manñm! Chaqa nuqampi yuyayllampa. Nuqampismi isrraylinu kachpa, chay unay agwiluy Abrajamba karu willkan Binjamimba atun ayllunmanda kani. Piru Tayta Dyusqam mana amkramkachqachu nuqamandaqa. 2 Tayta Dyusqam ancha unaymandampacha yach'arqan: Isrraylinumkunatam rini amkraq, nasyunniy kananllampa, nichpa. Chaychina amkrawachpaqam, mana yumbay nuqallkuna isrraylinumkunataqa wichumkuwachqachu. ¿Manachu yuyangillampa Dyuspaq rimaq Aliyas Tayta Dyusta nichqandaqa? Chaqa payqam llaqta masingunata Tayta Dyuspi kaychina kulpacharqan: 3 Tayta Dyusitu, kay llaqta masillkunam qambaq rimaqkunata wanchichqallampa. Pata altarnimkimkunatam bulachqallampa. Nuqatallam manaraq tariwachqachu wanchiwananllampa. Piru nuqatampismi ancha munanllampa wanchiwayta, nichpa. 4 Chaychina Aliyas kulpachamptinmi, Tayta Dyusqa kaychina nirqan: Manam qamllachu nuqampi kriyingiqa. Achwanmi nuqaqa 7.000 isrraylinu runamkunata kwidachqa kani, nuqatalla kasuwananllampa. Pallkunaqam mana qunqurimkuchqachu chay yanqa amitu laya Bal chutiqpa ñawpambi adurananllampaqa, nichpa. 5 Chaychinallam kay tyimpumpimpis Tayta Dyusqa ancha allin kachpa, wamkin isrraylinu masillkunatampis amkrachqa, paypa wambranguna kananllampa. 6 Chaychina Tayta Dyus ancha allin kachqanrallkullam pallkunata wacharqan. Manam wacharqanchu, pallkuna ancha allita rurachqanrallkuchu. Chaqa pallkuna ancha allin kachpa wachamkamptinqam, manana balinmanchu Taytanchiq Dyus pallkunata wachanambaqqa. 7 Yumbay challkunata yach'achpaqa, ¿imatam intyindinchiqllampa? Chaqa achka llaqta masiy isrraylinumkunam allita rurachpa, munachqa pallkuna kimkin wachamkayta. Piru manam atichqallampachu wachamkaytaqa. Piru Tayta Dyusmi nuqanchiqkunata amkrawachqa kanchiq, wachawananchiq, Jisuspi kriyimptinchiq. Piru chay mana munaq kriyiqkunataqam Tayta Dyusqa masta jwirtiyachichqa, mas rumi chunquyuq kanambaqllampa. 8 Chaymi Dyuspa Santu Librumbi chay mana munaq kriyiqkunampaqqa kaychina nin: Tayta Dyusmi pallkunata dijarqan, pay nichqanda ama intyindinanllampa. Chaychina dijamptinmi, allin ñawiyuqkuna kachpampis, sarkumkunachina kidarqanllampa. Rinriyuqkuna kachpampismi, surdumkunachina kidarqanllampa, Chaymi pallkunaqa kanangaman mana intyindinllampachu, nichpa. 9 Chay karu agwilunchiq Dabidpismi librumbi kaychina iskibrirqan: Dyusman mañamkuni, chay mana kriyiqkunata patañampichina piskanambaq, fyistangunampi mimkullkamptin, umpyallkamptinllampa. Suq runa atarrayawan piskaduta piskaqchina Tayta Dyusqa piskachpa kastiganqa. 10 Chaymi Dyuspi mana kriyichpaqa, ancha rinllampa pandaq, Dyus nichqanda ama intyindinanllampa. Mana intyindichpaqam, sarkumkunachina kanqallampa. Chaymi tumkuy tyimpu ñamkanqallampa suq runa ancha llachaqta ampaqchina, nichpa. 11 Muchuqmandam tampurillkillampa: ¿Chay isrraylinumkuna pandachpaqachu, yumbayna rinllampa chingaq? ¡Manñm! Piru pallkuna Jisuspi mana munamptinllampa kriyiytam, Dyusqa kumbidachqa chay mana isrraylinu kaqkunata, paypi kriyichpa wachadu kananllampa. Chaymi chay isrraylinumkunaqa rin imbidyaq chay mana isrraylinu kaqkunata. Chaychina imbidyachpaqa, paqta pallkunampis animamkanqa, Jisuspi kriyichpa wachadu kananllampa. 12 Piru kay tyimpumpim achka isrraylinu llaqta masillkunaqa mana Jisuspiqa kriyichqallampachu. Chaymi Dyusqa chay mana isrraylinu kaqkunata ancha yanampachqa, paypi kriyinanllampa. Piru chay isrraylinumkunampis Jisuspi kriyimptinllampaqam, Dyusqa yumbayninchiqta masta rin yanampawaqninchiq. 13 Piru wamkinnimkiqam mana Isrrayilmandachu kangillampa. Qamkunatam kaychina nillkillampa: Tayta Dyusqam kach'amuwachqa, qamkunampa yach'achimkuqnimki kanaypaq. Chaymi atichqallkaman munani allita qamkunata yach'achichuyta. 14 Paqtar isrraylinu masillkuna, qamkunata rimkachuchpa, qamkunachina munanqallampa Jisuspi kriyiyta, wachadu kananllampa. 15 Chaqa Tayta Dyusqam chay mana kriyiq isrraylinu kaqkunamanda amkramkachpa, qamkuna furastiru kaqkunata yanampachuchqa, paywan alliyachpa, wambranguna kanallkillampa. Chaychina achka llaqta masiy isrraylinumkunampis Jisuspi kriyimptinllampaqam, mas chumaq rin kaq. Chaqa pallkunaqam wañuchqanmanda kawsamuchqanchina rinllampa kaq. 16 Kay ichkay kumparasyundam nillkillampa: Suq masamanda punta tanda Dyuspa kamptinmi, yumbay chay masampis Dyuspalla. Chaychinallam suq plantampa ch'umpan Dyuspa kamptinqam, yumbay chay plantampis paypalla. [Nuta: Chay isrraylinumkunampa unay agwilunguna Dyuspi puntata kriyichpaqam, chay masamanda punta rurachqan tandachina, chay plantampa ch'umpanchina karqanllampa. Chaychinallam Pablu, chay suq isrraylinu kriyiq masingunampis chay mas imkita rurachqan tandamkunachina ichu chay plantampa rimkrangunachina karqanllampa.] 17 Piru wamkin isrraylinu masillkunaqam Tayta Dyusmanda amkramkarqanllampa. Pallkunaqam allin ulibu plantampa pitichqa rimkrangunachina karqanllampa. Qamkuna furastiru kaqkunaqam muntimpi yanqa wiñachqa ulibu mana puquqchina karqallkillampa. Piru Tayta Dyusqam kuyachuchpa, chay mana baliq plantampa rimkranda kuchuchpa, chay allin ulibu plantaman pyisachqachina rurachuchqallampa. Chaymi chay allin plantampa ch'umpambichinana tiyangillampa. (Chaqa chay unay isrraylinumkunam Tayta Dyuspi allita kriyichpa, pay nichqanda iskibrichqanrallku, qamkunampis atichqallampa kangi Dyuspi kriyiyta.) 18 Piru nuqallkuna isrraylinumkunaqam chay allin ulibumpa lijitimu rimkrangunachina kachqallampa kani. Qamkuna furastiru kaqkunaqam chay gustunlla wiñaq ulibumpa rimkrangunachina kachqallampa kangi. Chayri ama yuyayllampachu: Chay isrraylinu kaqkunamandaqam masta balinillampa, nichpaqa. Chaqa qamkuna isrraylinumkunarallkum Dyuspi kriyichqallampa kangi. Manam qamkunarallkuchu nuqallkuna isrraylinumkunaqa Dyuspi kriyichqallampa kani. [Nuta: Chay unay isrraylinumkunaqam Dyuspa Santu Librunda iskibrichqallampa karqan. Chaymandaqam chay furastiru kaqkunampis chay Santu Libruta uyachpa, Dyuspi kriyichpa, wachadu karqanllampa.] 19 Kinsampch'i qamkuna niwangiman: Ariri. Qamkuna isrraylinumkunamandam Dyuspaq yach'amkuchqallampa kani. Piru kananqam Tayta Dyusqa chay mana kriyiq isrraylinumkunata wichumkuchqana suq ulibu plantampa mana baliq rimkrandachina, nuqallkunata chay plantanman tandawanambaq, nichpa. 20 Piru manam yanqachu wichumkurqanqa. Achwanmi pallkuna paypi mana kriyichqanrallku, wichumkuchqa. Chaymandaqam qamkunataqa wachachuchqa, paypi kriyimptimkillampa. Chayri ama yuyayllampachu: Pallkunamandaqam masta balinillampa, nichpaqa. Achwan umildi kachpa, Tayta Dyusta manchachpa, allita kwidamkayllampa, Dyusmanda ama amkramkanallkillampa pallkunachina. 21 Chaqa chay mana kriyiq isrraylinu kaqkunatam wichumkurqan, chay allin ulibumpa rimkrangunata kuchuchpa wichumkuchqanchina. Chaychinallam qamkunatampis rin wichumkuchuqllampa, paypi mana kriyimptimkillampaqa. 22 Mayñ, ¡allita yuyayllampa! Tayta Dyusqam ancha allin yumbaywan. Piru uchata ruraqkunataqam kastigan. Chaymi paymanda amkramkaqkunataqa kastigachqa. Piru qamkunataqam ancha yanampachuchqa. Chayri Tayta Dyuspi mana challkuq kriyiyllampa: Paymi ancha allin, nichpa. Piru chaychina qamkunampis mana kriyimptimkiqam, rin wichumkuchuqllampa. 23 Piru chay mana kriyiq isrraylinu masillkuna Tayta Dyuspi kriyimptinllampaqam, Dyusqa pallkunatampis rin yanampaq. Chaqa payqam muchuqmanda das atin pyisariyta pallkunata chay allin plantamanchina, wambranguna kanambaqllampa. 24 Qamkuna mana baliq ulibu plantachina kamptimkimpismi, Jisuspi kriyimptimkillampa, Tayta Dyus wachachuchqa. Piru dasmi atin wachayta chay isrraylinu masillkunata, paypi kriyimptinllampa. Chaqa pallkunaqam ulibumpa lijitimu rimkrangunachina. 25 Kriyiq masitamkuna, Tayta Dyus yuyachqandallam munani yach'anallkillampa, amana yuyanallkillampa: Nuqam yumbaymanda mas yach'ayniyuq kani, nichpaqa. Dyus chunqumbilla yuyachqanqam kaychina: Chay isrraylinumkunaqam mana tumkuy tyimpumpaqchu angu chunquyuqkuna rinllampa kaq. Achwan Dyus munachqanchinam achka furastirumkuna Jisuspi puntata rinllampa kriyiq. Chaymandaqam ancha achka isrraylinumkunampis paypi rinllampa kriyiq. 26 Chaqa Tayta Dyusqam yumbay isrraylinumkunata rin wachaq, paypi kriyimptinllampa. Chaymi Tayta Dyusqa Santu Librumbi nin: Siyun llaqtamandam suq Wachadur rin chamuq, Jamkubumpa karu willkangunata uchangunamanda wachanambaq. 27 Chaymi pallkunawan suq tratuta rini ruraq tumkuy uchangunamanda pirdunanaypaq, nichpa. 28 Piru kananqam chay isrraylinu masillkunaqa Dyuspa chumaq nutisyandaqa mana munanllampachu kriyiyta. Chaymi Dyusta kuntrallkanllampa. Chayrallkum Tayta Dyusqa qamkuna furastiru kaqkunata masta yanampachullkangi. Piru Tayta Dyusqam isrraylinu kaqkunataqa kuyawanllamparaq, chay karu agwilullkunata amkrachqanrallku. 29 Chaqa chay karu agwilullkunata amkrachpam, suq tratuta rurarqan, karu willkangunata yanampanambaq. Chaymi mana ñigachpachu, yumbayta rin kumpliq. 30 Piru chay isrraylinumkuna Tayta Dyusta mana kasumptinllampaqam, payqa qamkuna furastirumkunata llamkimpachuchpa, yanampachungillampa. Piru unay tyimpumpiqam qamkunampis mana kasurqallkichu Dyustaqa. 31 Chaychinallam kanan chay isrraylinumkunampis Dyustaqa mana kasuchqallampachu. Piru Tayta Dyusqam llamkimpachpa pallkunatampis rin yanampaq, qamkunata yanampachuchqanchina. 32 Piru yumbay runamkuna warmimkunam Tayta Dyustaqa mana kasurqanchiqchu. Chaymi karsilpichina karqanchiqllampa. Chaqa Tayta Dyusqam suq tyimpumpaq chaychina dijawarqanchiq, suq tyimpumanda llamkimpawaqninchiq wachawananchiqllampa. 33 ¡Tayta Dyusqam ancha yach'ayniyuq kachpa, tumkuy imata intyindin! Chaymi mana pimpis atinchiqllampachu intyindiyta yuyachqangunata, ni rurachqangunata: ¿imampaqmi challkunata rurachqa? nichpaqa. 34 Chaymi Dyuspa Santu Librumbi nin: ¡Pitaq atinman yach'ayta Tayta Dyus yuyachqandaqa? ¿Ichu pitaq atinman payta yach'achiytaqa? (Manam pimpis atinmanchu.) 35 ¡Pitaq Dyustaqa imata atichqa quyta, chaymanda kutichirinambaqqa? (Manam pimpis atichqachu.) 36 Chaqa Tayta Dyusqam tumkuy imata rurachpa, kawsachillkan. Chaymi tumkuy ima kaqqa Dyuspaqlla. Chayri ¡paytalla alabachunllampa tumkuy tyimpumpaq! ¡Chaychina kanqa!
1 Kuyachqay masitamkuna, Taytanchiq Dyus chaychina kuyawaqninchiq wachawamptinchiqmi, ancha rrugallkillampa, tumkuy chunqullkiwan, tumkuy kwirpullkiwan payman intrigamkachpa, paytalla kasunallkillampa. Chaychina intrigamkachpaqam, Dyuspaqqa qam kimkimki suq chumaq kawsaq ufrinda kangi, paytalla adurachpa, kawsanallkillampa. 2 Chayri amana kawsayllampachu kay mundumpa mana baliq kustumbringunata rurachpaqa. Achwanri Taytanchiq Dyusman intrigamkayllampa, muchuq yuyayniyuqkuna kanallkillampa. Chaychina intrigamkachpaqam, Tayta Dyus munachqanda allita ringillampa yach'aq. Chaqa payqam munan, payta kuchichichpa, allitalla rurachpa, ancha chumaqta kawsananchiqllampa. 3 Tayta Dyusmi, ancha allin kachpa, nuqata numbrawachqa, qamkunata paypaq yach'achichunay. Chaymi yumbay qamkunata nillkillampa: Ama yuyayllampachu palanganuchinaqa. Achwanri allita yuyayllampa: ¿Taytanchiq Dyuschu yanampawallkan, allita paypi kriyinaypaq ichu mana? nichpa. 4 Chaqa nuqanchiqkunampa kwirpunchiqpiqam kan tumkuy ima atinanchiq yuyayta, rimkayta, puriyta. Chay kusaskunaqam kwirpunchiqtaqa yanampan suq layawan, suq layawan. 5 Chaychinallam Jisumkristumpi allita kriyichpaqa, achka kachpampis, suq kwirpuchinallana kanchiqllampa. Chaymi suqwan suqwan yanampanamkuchpa, chumaqta kawsanchiqllampa. 6 Tayta Dyusqam pay munachqanchina yumbayninchiqta yanampawanchiq, kadunu suq layampi suq layampi qawch'u kachpa, atinanchiq yanampanamkuyta. Chayri Tayta Dyus wamkinninchiqta suq kach'amkuta niwamptinchiqqa, paypi ancha yuyamkuchpa, chay niwachqanchiqta yach'achimkuchun. 7 Ichu Tayta Dyus wamkinninchiqta yanampawamptinchiq, suqkunata yanampananchiqqa, ancha allin chunqunchiqwan allita yanampachun. Ichu yanampawamptinchiq allin dumktrinanda yach'achimkunanchiqqa, allita yach'achimkuchun. 8 Ichu yanampawamptinchiq, suqkunata animachinanchiqqa, allita animachichun. Ichu yanampawamptinchiq ima kaqninchiqwan yanampamkunanchiqqa, kuchimkuchpa quchun, ama ni achlitata mich'achpachu. Mayqanninchiq karguyuq kachpaqa, ancha allita yuyachpa, chumaqta kamachimkuchun. Mayqanninchiq nisitaqkunata yanampachpa, kuchimkuchpa yanampachun. 9 Allimpta kuyanamkuchunllampa, ama chiminchiqwanllachu. Uchamkunata ancha ch'iqnichpa, allitalla rurachpa, kawsachunllampa. 10 Jisuspi kriyiq masinchiqkunawan allin masampurachina ancha kuyanamkuchun. Amar palanganumkuna kachunchu. Achwanri suqwan suqwan rrispitanamkuchpa, ancha qawch'u kachun, suqkunata alabananchiq. 11 Amar qallamkunaqa kachunllampachu. Achwan tumkuy chunqu Siñurninchiq Jisusta kuyachpa, ancha allita paypaq trabajachunllampa. 12 Paypi allita yuyamkuchpa, kuchimkuchunllampa. Padisichpampis, chay ñamkallkunata mana challkuq agwantachunllampa. Tayta Dyusman tumkuy tyimpu mañamkuchunllampa. 13 Jisuspi kriyiq masinchiqkunampa iman faltamptin, yanampachunllampa. Nuqanchiqkunaman chamumptinllampa, chumaqta ch'ayachichunllampa. 14 Mayqan runamkuna padisichiwamptinchiq, Tayta Dyusman mañamkuchunllampa, pallkunata yanampanambaq. Piru amar mañamkuchunchu, pallkunata kastiganambaqqa. 15 Suqkuna kuchimkumptinqa, pullan kuchimkuchunllampa. Suqkuna waqamptinqa, pullan waqachunllampa. 16 Chaychinar suqwan suqwan suq yuyaylla kachpa, chumaqta kawsachunllampa. Amar palanganuchu kachunllampa: Ancha yach'ayniyuq kani, nichpaqa. Achwan mana nimayuq kaqkunawan kachunllampa. 17 Mayqan ima maluta rurawamptinchiqqa, ama kutichichunchu, maluta rurachpaqa. Achwan yumbaypa ñawpambi allitalla rurachpa, kawsachunllampa. 18 Chayri atichqanchiqkaman imachinampis yumbaywan chumaqta kawsachunllampa. 19 Kuyachqay kriyiq masitamkuna, mayqan runa ima maluta rurawamptinchiqqa, ama paytaqa bingachunllampachu. Achwanri dijachunllampa, Tayta Dyuslla kastiganambaq. Chaymi Dyuspa Santu Librumbi nin: Nuqallam rini kastigaq chay maluta rurachuqkunataqa. Chaqa nuqallam yumbayta rini pagaraqqa, nichpa. 20 Dyuspa chay librumbillam nimbis: Ch'iqnichuqkuna mallaqnamptinqa, qarayllampa. Yamkunamptimbis, quyllampa yamkituta. Chaychina pallkunata yanampamptimkiqam, panqamkuchpa, ancha rinllampa chumpimkayaq nichpa. 21 Chaychinar ama dijamkayllampachu, uchamkuna binsichunambaqqa; achwan allitalla rurayllampa, tumkuy laya uchata binsinallkillampa.
1 Yumbay awturidarkunata allita kasuchunllampa. Chaqa Tayta Dyusmi yumbay chay awturidarkunata dijachqa, kay pachampi kamachimkunanllampa. Mana dijachqa kamptinqam, mana ni suq awturidar kanmanchu. 2 Chaymi chay awturidarkunata kuntraqkunaqa Tayta Dyus rurachqanda kuntrallkanllampa. Chayrallkum chay kuntraqkunaqa kastigadu rinllampa kaq. 3 Chaqa Tayta Dyusmi yumbay awturidarta dijachqa, mana alli ruraqkunata kastigachpa, manchachinanllampa, ama maluta rurananllampa. Manam rurachqachu, alli ruraqkunata kastigananllampaqa. Chayri qamkunaqa allitalla rurayllampa, chay awturidarkunata ama manchanallkillampa. Chaychina qamkuna chumaqta kawsamptimkiqam, chay awturidarkunaqa rin alabachuqllampa. 4 Chaqa pallkunaqam qamkuna alli ruraqkunata kwidachuchpa, Tayta Dyus munachqanda rurallkanllampa. Chaymi ancha pudirniyuq kachpa, pallkunaqa chay mana alli ruraqkunata atinllampa kastigayta. Chayri mayqannimki mana allita rurachpaqa, ancha manchay chay kastigamkuqkunata. 5 Piru amar kastiguta manchachpallachu kasuchunllampa chay awturidarkunataqa. Achwan kasuchunqa, yuyachpa: Allitam munani rurayta, nichpa. 6 Chaychina allita kwidawamptinchiqqar, impwistumkunata pagarachun, pallkunata mantyininanchiqllampa. Chaqa pallkunaqam yumbayta kwidawaqninchiq, Dyus munachqanda rurallkanllampa. 7 Chayri yumbay dibiramkuchqanchiqta pagaramkuchun. Kuntribusyunda manaraq pagaramkuchpampis, pagaramkuchun. Suq laya impwistumkunata manaraq pagaramkuchpa, challkunatampis pagaramkuchun. Yumbay allin awturidarta rrispitachpa, alabachunllampa. 8 Amar ni pitampis dibirachunchu. Piru listu kachunllampa, yumbayta kuyananchiqllampa. Chaqa runa masinchiqkunata kuyachpaqam, Tayta Dyuspa yumbay liyningunata kasullkanchiqllampa. 9 Chaqa Muysispa liyningunam kaychina niwanchiq: Warmiyuq ichu runayuq kaqkunaqa suqkunawanqa ama puñuyllampachu; ama pitampis wanchiyllampachu; ama suwamkuyllampachu; ama tistimuñiruqa kayllampachu; suqkunampa imandampis ama munamkuyllampachu, nichpa. Chaymandaqam Tayta Dyusqa nirimbis: Qamkuna kwirpullkita kuyachqallkichina, runa masimkitampis kuyay, nichpa. Chay ultimu kamachimkuchqanda kasuchpaqam, yumbay chay punta kamachimkuchqangunatampis, kasullkanchiqllampa. 10 Chaqa allimpta kuyanamkuchpaqam, runa masinchiqkunataqa manana nima maluta rinchiqllampachu ruraq. Chaymi suqwan suqwan kuyanamkuchpaqa, Tayta Dyus yumbay kamachimkuchqanda allita kasullkanchiqllampa. 11 Chaychina Dyusta kasuchpaqa, allita yach'ayllampa: Jisumkristu chamunan diyaqam sirkamullkanna, nichpa. Chaqa paypi chayraq kriyimptinchiqqam, mas achka tyimpuraq kidarqan chamunambaqqa. Piru kananqam mas achla tyimpullana kidan ñamkachqanchiqmanda wachawananchiqqa. Chayri rimkch'amkachpa, Dyusta allita kasuchunllampa. (Piru payta mana allita kasuchpaqam puñullkanchiqchina.) 12 Chaqa uchayuqkunampa tyimpunqam rin uchyamkaq Jisumkristu chamumptin. Piru paypi kriyiqkunampaqqam suq tuta das achimkyaqchina rin kaq. Chayri amana rurachunchu chay uchata ruraqchinaqa. Achwanri Dyus munachqanda rurachpa kawsachunllampa. Chaychina kawsachpaqam, armayuqchina kanchiqllampa dyabluta, uchata binsinanchiq. 13 Chayri allitalla rurachpa kawsachunllampa, punchawpichina purinanchiq. Amar chay kunyallkaq fyistamkunaman richunllampachu. Amar ni mach'achunllampachu. Amar ni warmimkunata maskachunchu, pallkunawan puñunanchiqqa. Warmimkunampisri ama suqkunawanqa puñunqachu. Amar ni anyanamkuchunchu ni imbidyanamkuchunchu. 14 Achwanri Siñurninchiq Jisumkristumpi ancha allita kriyichunllampa, ama rurananchiq kwirpunchiq munachqandalla. Manchu suldadumkunaqa armanwan kuntrangunamanda wachamkan. Chay suldadumpa armanchinam Jisusqa atin wachawayninchiqta. Chayri paypi yuyamkuchpa, amana yuyachunchu kwirpunchiq munachqandallaqa.
1 Wamkin kriyiq masinchiqkunaqam Jisumkristu nichqandaqa manaraq allitaqa intyindinllampachu. Piru pallkunataqa ama kuntradisichunchu. Achwanri chumaqta ch'ayachichun, nuqanchiqkunawan pulla kanambaq. 2 Chaqa wamkingunaqam kriyin: Tumkuy laya mimkunatam atinchiqllampa mimkuyta, nichpa. Piru chay manaraq allita intyindiqkunaqam kriyinllampa: Ch'amkramanda kaqtallam atinchiqllampa mimkuyta, nichpa. Manam munanllampachu aychata mimkuytaqa. 3 Chayri qamkuna tumkuy laya mimkunata mimkuqkunaqa ama disprisyayllampachu chay mana yumbayta mimkuqkunataqa. Chaychinalla qamkuna mana yumbayta mimkuqkunampis ama jusgayllampachu chay tumkuy laya mimkunata mimkuqkunataqa. Chaqa Taytanchiq Dyusqam pallkunataqa chumaqta ch'askichqa, wambranguna kanambaq. 4 Chaychina Tayta Dyus chumaqta ch'askimptinqa, ¿pitaq qamqa kangi jusganallki Dyusta sirbiqtaqa? Chaqa Dyusllam dirichuyuq, jusganambaq payta sirbiqkunataqa. Taytanchiq Dyus ancha pudirniyuq kachpam, chay sirbiqningunata atin yanampayta, allita kawsananllampa, ama kastigadu kananllampa. 5 Chaychinallam wamkin kriyiq masinchiqkuna kriyinllampa: Yumbay diyamkunamandam suq diyalla masta balin, Dyuspaq gwardananchiqllampa, nichpa. Piru suqkunaqam kriyinllampa: Yumbay diyamkunam igwallla balin, Dyuspaq gwardananchiqqa, nichpa. Piru chay diyamkunampaqqa ancha allita yuyanqallampa, kriyichqanda kumplinanllampa. 6 Chaqa chaychina allita yuyachpa, suq diyatalla gwardachpaqam, Siñurninchiqpaq gwardallkanllampa. Chaychinallam suq diyatalla mana gwardaqkunampis yuyanllampa: Tumkuy diyam balin Siñurninchiqpaq gwardananchiqqa, nichpa. Chaychinallam chay tumkuy imata mimkuqkunaqa Tayta Dyusta pagimkuchpa, mimkunllampa. Chay tumkuy imata mana mimkuqkunampismi Tayta Dyusta pagimkuchpa, chay wamkin mimkunatalla mimkunllampa. Chaymi chay ichkay laya kriyiqkunaqa Dyusta allita alaballkanllampa. 7 Chaymi kawsachpa ichu wañuchpaqa, mana nuqanchiqpaqllachu kawsanchiqllampa ichu wañunchiqllampa. 8 Achwanmi kawsachpaqa, Siñurninchiq Jisuspaqlla kawsanchiqllampa. Wañuchpampismi, paypaqlla wañunchiqllampa. Chaymi kawsachpa ichu wañuchpampis, Jisuspaqlla tumkuy imata ruranchiqllampa. 9 Chaqa Jisumkristuqam wañuchpa kawsamurqan, kawsaqkunampa, wañuqkunampa kamachimkuqnin kanambaq. 10 Chaychina Jisumkristu juyisninchiq kamptinqa, ¿imampaqtaq jusgangillampa kriyiq masinchiqkunataqa? Ichu ¿imarallkum disprisyangillampa kriyiq masinchiqkunataqa? Chaqa suq diyam yumbayninchiq Jisumkristumpa ñawpanman rinchiqllampa ch'ayaq, pay jusgawananchiqllampa. 11 Chaymi Dyuspa Santu Librumbi nin: Allimptam nillkillampa, yumbay runamkunam ñawpaypi qunqurimkuchpa, rinllampa niq: Qamllam Dyusniyllampa kangi, nichpa. 12 Chaymi allita yach'anchiqllampa: Suq diyam yumbayninchiq Tayta Dyusta kwintata rinchiq quq, kay mundumpi tumkuy ima rurachqanchiqpaq. 13 Yach'achpa: Tayta Dyusllam juyisninchiq, nichpa, ama jusganamkuchunchu. Achwan allita yuyachpa, ama nimatampis dañachichunchu kriyiq masinchiqkunata, uchata rurananllampaqa. 14 Nuqaqam Siñurninchiq Jisuspi yuyamkuchpa, allita yach'ani: Tumkuy laya mimkunam alli mimkunanchiqpaq. Manam nimampis mampachu, nichpa. Piru wamkin kriyiq masinchiqkunaqam yuyanllampa: Chay wamkin laya mimkunata mimkuchpaqam, uchayuqna kani, nichpa. Chaychina yuyamptinllampaqam, mana balinchu, chay laya mimkunata mimkunanllampaqa. 15 Chaymi nuqanchiqkuna chay mana mimkuqkunampa ñawpambi tumkuy laya mimkunata mimkumptinchiqqa, kinsampch'i yuyanmanllampa: Chay kriyiq masillkunam uchata ruramptinllampa, nuqampis pallkunachina rurachaq, nichpa. Chaychina yuyachpamkich, tumkuy imata mimkumptinchiq, pallkunampis mimkuchpa, uchayuq kidanmanllampa. Chaymi chaychina pallkunata dañachichpaqa, Jisuspa wambrangunataqa manana kuyallkanchiqchu. Piru Jisumkristuqam wañuchqa, pallkunatampis wachanambaq. Chayri pallkunata ama chingachichunchu, tumkuy laya mimkunata mimkuchpaqa. 16 Chayri alli kamptin imata mimkunallki ichu ruranallkiqa, piru suqkunampaq mana balimptinqa, ama ruraychu pallkunampa ñawpambiqa, ama rimachunanllampa: Uchatam rurallkan, nichpaqa. 17 Chaqa Tayta Dyusqam mana kamachiwanchiqchu: Challkunata mimkuyllampa, chayta umpyayllampa, ichu ama chayta mimkuyllampachu ni chayta umpyayllampachu, nichpaqa. Achwanmi Tayta Dyusqa kaychina kamachiwanchiq: Nuqa nichuchqayta rurachpa kawsayllampa. Santu Ispirituy yanampachumptin, kuchimkuchpa, yumbaywan chumaqta kawsayllampa, nichpa. 18 Chaychina chumaqta kawsachpaqam, Jisumkristuta kasullkanchiq. Taytanchiq Dyustampismi kuchichillkanchiq. Chaychina kawsamptinchiqmi, runa masinchiqkunaqa ancha rinllampa alabawaqninchiq. 19 Chayri imachinampis ancha chumaqta suqwan suqwan kawsachunllampa, tumkuy imampi animachinamkuchpa, Jisuspi mas allita kriyinanchiqllampa. 20 Chaqa Tayta Dyusqam chay kriyiq masinchiqkunata yanampallkan, paypi masta yuyamkunanllampa. Chayri ama nimatampis dañachichunchu pallkunataqa, ñawpambi ima mimkunata mimkuchpaqa. Chaqa allibmi tumkuy laya mimkuna limpyu. Piru manam balinchu chay mimkunamkunata mimkuchqanchiqrallku, wamkin kriyiq masinchiqkunata uchata rurachinanchiq. 21 Chayri yach'achpa: Chay kriyiq masiytam dañachillkani, nichpaqa, mas alli kanman ama aychata mimkunanchiq, ama ni binuta umpyanchiq, ama ni suq laya kusaskunata rurananchiq, ama pitampis dañachinanchiq, Dyusmanda amkramkanambaq. 22 Chayri chay mimkunamkunampaq imata yuyamptinchiqqa, Tayta Dyuslla yach'anqa. Chaychina yach'achpaqa, pay niwamptinchiq: Allitam rurallkangi, nichpaqa, ancha kuchimkuchunllampa. 23 Piru suq kriyiq masinchiq manaraq allita yach'achpa: Dyusmi munan kay mimkunata mimkunaypaq, nichpaqa, ama mimkunqachu. Chaqa manaraq allita yach'achpa mimkuchpaqam, uchata rurallkan. Chaychina imampi kriyichpa, chay kriyichqanchiqta mana kasuchpaqam, uchata rurallkanchiqllampa.
1 Jisuspi allita kriyichpaqa, nuqanchiq munachqanchiqtallaqa amana rurachunllampachu. Achwanri chay mana allita intyindiqkunata agwantachpa, mana challkuq llamkimpachpa, chumaqta yanampachunllampa, Jisuspi mas allita yuyamkunanllampa. 2 Chayri kriyiq masinchiqkunata kuchichichpa, yanampachun, mas allita Jisuspi kriyinanllampa. 3 Chaqa Jisumkristumpismi pay munachqandallaqa mana rurarqanchu. Achwanmi Tayta Dyus munachqandalla rurarqanqa. Chaymi achka runamkuna Jisusta musyarqanllampa. Chayrallkum Dyuspa Santu Librumbi Jisusqa Taytanda nin: Qamta musyachuqkunaqam nuqatampis musyawanllampa, nichpa. 4 Chaymi Tayta Dyusqa Santu Librumbi tumkuy imata iskibrichirqan, nuqanchiqkunata yach'achiwananchiq, chaychina mana challkuq paypi yuyamkuchpa, kuchimkuchpa kawsananchiqllampa. 5 Kanan Dyusmanmi mañamkuni, qamkunata kunswilachuchpa, ancha yanampachunanllampa, mana challkuq paypi yuyamkunallkillampa. Mañamkunimpismi suq yuyayniyuqlla kachpa, suqwan suqwan chumaqta kawsanallkillampa, Jisumkristu kawsachqanchina, 6 qamkunampis pulla alabanallkillampa Siñurninchiq Jisumkristumpa Tayta Dyusta. 7 Jisumkristum nuqanchiqkunata ancha chumaqta ch'askiwachqa kanchiq. Chayri nuqanchiqkunampis yumbay kriyiq masinchiqkunata ancha chumaqta ch'askichunllampa, yumbay rimkawaqninchiq Tayta Dyusta alabananllampa. 8 Chaqa allimptam nillkillampa: Jisumkristuqam chamuchqa, nuqallkuna isrraylinumkunata yanampawanambaq, Tayta Dyus agwilullkunata ufrisichqanda kumplinambaq, kaychina allita yach'anaypaqllampa: Tayta Dyusqam tumkuy ima ufrisimkuchqanda kumplin, nichpa. 9 Jisusqam kay mundumanqa chamurqan, qamkuna mana isrraylinu kaqkunampis Tayta Dyusta alabanallkillampa, qamkunatampis llamkimpachuchpa, wachachuchqanllamparallku. Chaymi Dyuspa Santu Librumbi chay unay Dabidqa nin: Nuqam suq nasyungunamanda kaqkunawan adurachqallki. Kantachpam, alabachqallki, nichpa. 10 Dyuspa Santu Librumbiqam nimbis: Qamkuna mana isrraylinu kaqkunampisri isrraylinumkunawan pulla kuchimkuyllampa, nichpa. 11 Dyuspa Santu Librumbiqam nirimbis: Qamkuna yumbay nasyungunamanda kaqkunampisri Tayta Dyusta alabayllampa. Qamkuna yumbay kastamkunamanda kaqkunampisri paytalla alabayllampa, nichpa. 12 Dyuspaq chay rimaq Isayiyaspismi kaychina iskibrirqan: Chay unay isrraylinu Isayimpa karu willkangunamandam rin nasiq suq kamachimkuq runa. Paymi yumbay chay mana isrraylinu kaqkunatampis chumaqta rin kamachiq. Chaymi pallkunaqa paypi ancha rinllampa yuyamkuq, nichpa. 13 Tayta Dyusmi ancha yanampawanchiq, paypi mana challkuq yuyamkunanchiqllampa. Chaymi payman mañamkuni, paypi kriyimptimkillampa, pudirniyuq Santu Ispiritunwan yanampachunanllampa, kuchimkuchpa, ama nimata manchachpa, paypi mas allita yuyamkunallkillampa. 14 Kriyiq masitamkuna, qamkunaqam Dyus nichqanda allita intyindingillampa. Chaymi ancha allinguna kachpa, atingillampa qamkunampura allita kunanamkuyta. 15 Piru kay kartatam kach'amuni, Dyuspaq yach'amkuchqallkita ama qunqanallkillampa. Chaymi mana nimata pamkachpachu, tumkuy ima yuyachqayta nillkillampa. Chaqa Tayta Dyusqam ancha allin kachpa, numbrawachqa, 16 qamkuna mana isrraylinu kaqkunata Jisumkristumpaq yach'achichunaypaq, paypi kriyinallkillampa. Chaymi Dyuspa Santu Ispiritunqa qamkunata rin amkrachuqllampa, Dyus munachqanchina kawsanallkillampa. Chaychina amkrachumptinllampam, nuqaqa kurachina kachpa, qamkunata rini intrigamkuchuq Tayta Dyusman, suq allin ufrindatachina ch'askichunanllampa, wambranguna kanallkillampa. 17 Jisumkristumpi yuyamkumptiymi, payqa ancha yanampawan, Tayta Dyuspaq allita yach'achimkunaypaq. Chaymi nuqaqa ancha kuchimkuni. 18 Piru manam munanichu nichuyllampata nuqa rurachqaypaqqa. Achwanmi munani kaychina nichuyllampata: Jisumkristum ancha yanampawachqa, mana isrraylinu kaqkunata allita yach'achichpa, milagrumkunata ruranaypaq, pallkuna Dyusta kasuchpa kawsananllampa. 19 Chaqa Dyuspa Santu Ispiritunmi yanampawachqa, milagrumkunata ruramptiy, chay rimkawaqkuna intyindinambaq: Tayta Dyusmi Pabluta kach'amuchqa, nichpa. Chaymi Jirusalin llaqtamandampacha chay ancha karu Ilirimku lugarkaman allita yach'achimkuchqa kani Jisumkristumpa chumaq nutisyanda, paypi kriyichpa, wachadu kananllampa. 20 Ancham munachqa kani yach'achimkuyta chay karu lugarkunampi, manaraq ni pimpis Jisumkristumpaq yach'achimkumptin. Chaychina puntata yach'achimkuchpaqam, suq wasimpa simyintundachina rurachqa kani. 21 Chaqa chaychina yach'achimkuchpaqa, Dyuspa Santu Librun kaychina nichqanda rurachqa kani: Chay runa, warmi mana ni suq kutinda paypaq uyaqkunaqam uyanqallampa. Chay manaraq uyaqkunaqam uyachpa, paypaqqa allita rinllampa intyindiq, nichpa. 22 Ancham munachqa kani watumkuchuyllampata. Piru achka llaqtamkunaman richpa yach'achimkuqmi, kanangaman manaraq atichqachu kani chamuyta qamkunamanqa. 23 Piru kananqam kay llaqtamkunampiqa uchyachqana kani yach'achimkuyta. Chaymi achka watamkunana ancha munachpa rimkachuyllampata, 24 nasyun Ispañaman riqchina, munani qamkunaman chamuyta watumkuchuq. Chaychina watumkuchuchpaqam, ancha kuchimkuchaq. Yuyamkunimpismi: Ringillampam yanampawaq, Ispañaman rinaypaq, nichpa. 25 Piru manaraq qamkunaman chamuchpaqam, Jirusalinmanraq rini riq, isrraylinu kriyiq masinchiqkunampaq suq ufrindata ampachpa. 26 Chaqa kay prubinsya Masiduñampi, kay prubinsya Amkayampi tiyaq kriyiq masinchiqkunam yuyachqallampa suq ufrindata tandayta chay Jirusalin llaqtampi pubri kriyiq masinchiqkunampaq. 27 Chaychina pallkuna kimkin yuyachpaqam, ancha allita rurachqallampa. Chaqa chay isrraylinu kriyiq masinchiqkunaqam qamkuna mana isrraylinu kaqkunata Dyuspaq yach'achichuchqallampa. Chaymi ancha balin, chay pubri kriyiq masinchiq isrraylinumkunata yanampanallkillampa. 28 Chaymi chay ufrindataqa nuqa kimkiy ampachaq chay pubrimkunamanqa. Chaymandaraqmi rini riq chay Ispañamanqa. Chayman riqchinam watumkuchuqchina pasachaq. 29 Chaymi allita yach'ani: Qamkunaman chamumptiy yach'achichuqmi, Jisumkristuqa ancha rin yanampachuqllampa, nichpa. 30 Kuyachqay masitamkuna, Dyuspa Santu Ispiritunmi animachiwanchiq, ancha kuyanamkunanchiq. Chaymi Siñurninchiq Jisumkristumpa chutimbi rrugallkillampa, Dyusman ancha mañamkunallkillampa, nuqata yanampawanambaq. 31 Mañamkuyllampampisri, prubinsya Judiyampi Jisusta kuntraqkunamanda kwidawanambaq, kay ufrindata Jirusalinman ampamptiy, chay kriyiq masinchiqkuna kuchimkuchpa, chumaqta ch'askiwananllampa. 32 Mañamkuyllampampisri, Dyus munamptin, qamkunaman ch'ayanaypaq, parlachpa, animachinamkuchpa, kuchimkunanchiqllampa. 33 Nuqaqam Tayta Dyusman mañamkuni, qamkunawan kanambaq. Chaqa payqam chumaqta kawsachiwanchiq, ama nimatampis manchananchiqllampa. Chaychina kanqa.
1 Munanim nichuyllampata kriyiq paninchiq Fibimpa faburninda. Chaqa payqam Sinkriya llaqtampi dyamkunisa kachpa, kriyiq masinchiqkunata ancha yanampachqa. 2 Chaqa chay Fibiqam Siñurninchiqpi allita kriyichpa, achka kriyiq masinchiqkunata, nuqatampis ancha yanampawachqa. Chayri ch'ayamptin qamkunamanqa, chumaqta ch'ayachichpa, payta ima nisitachqanda quyllampa. 3 Yuch'allku nuqampa chutiypi nampallkuyllampa kriyiq masinchiqkuna Prisilata, qusan Amkilastampis. Chaqa pallkunaqam nuqampa pullay Jisumkristumpaq yach'achimkuchqallampa. 4 Kanan pallkunaqam wachawananrallku, listu karqan, wañunambaqllampa. Chaymi nuqaqa Prisilata Amkilastampis ancha pagimkuni. Piru manam nuqallachu pallkunataqa pagimkuni. Achwanmi yumbay chay furastiru kriyiq masinchiqkunampis pallkunata ancha pagimkunllampa. 5 Nampallkuyllampar nuqampa chutiypi chay Prisilampa Amkilaspa wasimbi tandamkaq kriyiq masinchiqkunatampis. Kuyachqay kriyiq masitay Impinitutampis nampallkuyllampa. Chaqa chay prubinsya Amkayampi manaraq pimpis kriyimptinmi, payqa puntata Jisumkristumpi kriyirqan. 6 Nampallkuyllampar kriyiq paninchiq Maryatampis. Chaqa payqam ancha trabajachqa, qamkunata yanampachunan. 7 Nampallkuyllampar chay isrraylinu masiy Andrunimkuta, Juniyastampis. Pallkunaqam nuqamanda mas puntata Jisumkristumpi kriyichpa, nuqampa pullay karsilpi karqanllampa. Chaychina ancha allita kriyimptinllampam, chay suq ampustulkunaqa ancha rrispitanllampa pallkunataqa. 8 Nampallkuyllampar kuyachqay kriyiq masiy Ampliyustampis. 9 Nampallkuyllampar Jisumkristumpaq yach'achimkuq masiy Urbanuta, kuyachqay masanchiq Istamkista, 10 masanchiq Ampilistampis. Chaqa payqam padisichpampis, mana challkuq Jisumkristumpi allita yuyamkun. Nampallkuyllampampisri masanchiq Aristubulusta tumkuy ayllundinda, 11 isrraylinu masillkuna Irudyunda, Narsisuta Jisuspi kriyiq ayllundinda. 12 Nampallkuyllampar paninchiq Trifinata, paninchiq Trifusata. Chaqa pallkunaqam Jisumkristuta ancha allita sirbinllampa. Nampallkuyllampar kuyachqay paninchiq Pirsidatampis. Paypismi Siñurninchiqpaq ancha trabajachqa. 13 Nampallkuyllampar chay ancha allin kriyiq masinchiq Rrufutampis, mamandinda. Chaqa mamanqam mamaychina kuyawachpa, ancha yanampawachqa. 14 Nampallkuyllampar kay kriyiq masinchiqkunata: Asinkrituta, Fliguntita, Irmasta, Patrubusta, Irmista, yumbay kriyiq masinchiq pallkunawan tandamkaqkunata. 15 Nampallkuyllampampisri masanchiq Filuguta, paninchiq Julyata, masanchiq Niryuta, panindinda, chay masanchiq Ulimpasta, pallkunawan tandamkaq kriyiq masinchiqkunatampis. 16 Chaychinar suqwan suqwan tingunamkuchpa, (ancha rrispitanamkuchpa) muchanamkuchpa, chumaqta nampallkunamkuyllampa. Kay llaqtamkunampi yumbay tandamkaq kriyiq masinchiqkunam qamkunata nampallkuchungi. 17 Kriyiq masitamkuna, yuch'allku allita kwidamkayllampa suq laya dumktrinata yach'achimkuqkunamanda. Kwidawkich, chay dumktrinanchiqta kuntraqkunata kriyichpa, Dyusmanda amkramkangimanllampa. Chayri chay laya yach'achimkuqwanqa ama ni tandamkayllampachu. 18 Chaqa pallkunaqam Jisumkristuta mana kasuchpachu, pallkuna munachqandalla rurachpa kawsanllampa. Kanan michki michkita rimachpam, mana yach'aqkunata ingañanllampa. 19 Kriyiq masitamkuna, qamkunampaqmi yumbay runamkuna yach'anllampa: Yach'amkuchqallkitam allita kasungillampa, nichpa. Chaymi ancha kuchimkuni. Piru munanim alli kaqtalla ruranallkillampa. Manam munanichu ni yuyanallki, uchata ruranallkillampaqa. 20 Kanan Tayta Dyusqam chumaqta kawsachiwaqninchiq, dyabluta das rin binsiq. Binsichpaqam, rin yanampawaqninchiq, chay dyabluta sarrunanchiqllampa. Siñurninchiq Jisumkristur yanampachunqallampa. 21 Yach'achimkuq masiy Timutiyumpismi kay kartampi qamkunata nampallkuchungi. Isrraylinu masillkuna Lusyanu, Jasun, Susimpatirwanmi qamkunata nampallkuchungi. 22 Nuqa Tirsyu, masanchiq Pablumpa kay kartanda iskibriqpismi nampallkullkillampa Siñurninchiqpa chutimbi. 23 Masanchiq Gayumpismi qamkunata nampallkuchungi. Paymi nuqa Pabluta pusadata quwallkan. Achka kriyiq masinchiqtampismi wasinda pristan, kaypi Dyusta alabananllampa. Kay llaqtampa tisurirun Irastu, masanchiq Kwartu chutiqpismi nampallkuchungillampa. 24 ?Siñurninchiq Jisumkristur yumbay qamkunata yanampachunqa. Chaychina kanqa.? 25 Jisumkristumpa chumaq nutisyanda qamkunata yach'achichumptiymi, Tayta Dyusqa atin yanampachuyta, mana challkuq Jisuspi kriyinallkillampa. Chayri payta ancha alabachunllampa. Chaqa payqam manaraq kay munduta rurachpa, yuyarqan: Suq diyam nuqampi kriyiqkunata rini intyindichiq nuqalla yuyachqayta, nichpa. Achka tyimputam mana pitampis chay yuyachqandaqa yach'achirqanchu. 26 Piru kananqam Tayta Dyus tumkuy tyimpu kawsaq yach'achiwachqa kanchiq paylla yuyachqanda. Chaqa paypaq chay unay rimaqkunatam kamachichqa karqan, Dyuslla yuyachqanda Santu Librungunampi iskibrinanllampa. Chaychina paylla yuyachqandam yumbay nasyumbi tiyaqkunata intyindichiwachqana kanchiq, Jisuspi kriyichpa, paytana kasunanchiqllampa. 27 Tayta Dyusllam tumkuy imata yach'an. Chaqa payllam Dyusqa. Chayri Jisumkristu yanampawamptinchiq, Tayta Dyusta tumkuy tyimpu alabachunllampa. ¡Chaychina kanqa!
1 (Kuyachqay kriyiq masitamkuna,) Tayta Dyus munamptinmi, Jisumkristu nuqata numbrawachqa, ampustulnin kanaypaq. Chaymi nuqa Pablu kriyiq masinchiq Sustiniswan 2 kay kartata kach'amuni qamkuna kriyiq masiy Kurintu llaqtampi tandamkaqkunaman. Chaqa qamkunaqam Jisuspi allita yuyamkuchpa, payta kasuchpa kawsangillampa. Chaymi Tayta Dyusqa qamkunata, tumkuy lugarkunampi tiyaq kriyiq masinchiqkunatampis amkrawachqallampa kanchiq, paypa wambranguna kachpa, allitalla rurachpa, kawsananchiqllampa. Chaymi qamkunampis nuqallkunachina Jisumkristutana adurangillampa. Chaqa payqam yumbayninchiqpa Siñurninchiq. 3 Chaymi Tayta Dyusman, Siñurninchiq Jisumkristuman mañamkuni, qamkunata tumkuy imampi yanampachunambaq, ama nimata manchachpa, kawsanallkillampa. 4 Jisumkristumpi allita kriyimptimkillampam, payqa Tayta Dyuswan qamkunata ancha yanampachuchqa, chumaq nutisyanda allita intyindichpa, paypaq yach'achimkunallkillampa. Chaymi qamkunampaq Tayta Dyusman tumkuy tyimpu ancha pagimkuni. 6 Chaqa qamkuna Jisumkristumpaq yach'amkuchpaqam, paypi allita kriyichqallampa kangi. 7 Chaymi Tayta Dyusqa tumkuy imampi qamkunata yanampachullkangi, suq layampi, suq layampi paypaq trabajanallkillampa. Chaychina paypaq allita trabajachpam, chuyallkangillampa, Siñurninchiq Jisumkristu syilumanda kutimunangaman. 8 Chaqa Dyusqam qamkunata yanampachullkangi, paypi mana challkuq kriyinallkillampa Siñurninchiq Jisumkristu chamunan diyamkaman, ama ni pimpis atinambaq chimbichuyta paypa ñawpambi. 9 Tayta Dyusqam tumkuy ima ufrisimkuchqanda kumplin. Kanan pay kimkinmi amkrawachqa kanchiq, Churin Jisumkristumpi allita yuyamkuchpa, paywan pulla kawsananchiqllampa. 10 Kuyachqay masitamkuna, paninchiq Kluwimpa wasimbi wamkin tiyaqkunam niwachqallampa: Wamkin kurintinu kriyiq masinchiqkunach anyanamkuchpa kawsanllampa, nichpa. Chaymi Siñurninchiq Jisumkristumpa chutimbi ancha rrugallkillampa, yumbaynimki kuyanamkuchpa, suq yuyayniyuqlla kachpa, pulla imata rurachpa kawsanallkillampa. 12 Chaqa wamkinnimkiqach ningillampa: Nuqaqam Pablu yach'achimkuchqanda kriyini, nichpa. Wamkinnimkiqach ningillampa: Nuqaqam Ampulus yach'achimkuchqanda kriyini, nichpa. Wamkinnimkiqach ningillampa: Nuqaqam Sifas (Pidru) yach'achimkuchqanda kriyini, nichpa. Wamkinnimkiqach bwilta ningillampa: Nuqaqam masta kriyini Jisumkristu yach'achimkuchqanda, nichpa. 13 Chaychina amkramkanallkiqa, ¿Jisumkristuqa amkasuchu pidasu pidasu, waqpi kaypi? ¿Nuqatachu kruspi klabawachqallampa, qamkunata wachachunaypaqqa? ¿Nuqampa chutiyta myintachpachu chutichichuchqallampa? ¡Manñm! (Chaymi mana balinchu qamkunampura amkramkachpa, nuqata sigiwanallkiqa.) 14 Chaqa nuqaqam mana qamkunataqa chutichichuchqachu kani. Piru masanchiq Krisputa, Gayutallam chutichichqaqa kani. Chaychina qamkunata mana chutichichuchpam, Dyusta ancha pagimkuni. 15 Chaymi mana atingillampachu niyta: Pablumpa chutimbim chutimkuchqallampa kani, nichpaqa. 16 Piru kanalitanmi yuyani, Istifanaspa wasimbi kaqkunatampismi chutichichqa kani. Piru manam yuyanichu masta chutichichqaytaqa. 17 Chaqa Jisumkristuqam mana kach'amuwachqachu chutichimkunayqa. Achwanmi kach'amuwarqanqa, paypa chumaq nutisyanda yach'achimkunay. Piru chay chumaq nutisyandaqam mana yach'achimkunichu ancha yach'ayniyuqchina tumkuchpa. Chaqa chaychina yach'achimkumptiyqam, qamkunaqa mana atinallkitachu intyindiyta: Jisumkristulla kruspi wañuchpam, atin wachawayninchiqta, nichpaqa. 18 Nuqanchiqkuna yach'achimkumptinchiq: Jisumkristum kruspi wañurqan, wachawananchiq, nichpaqa, kastiguman riqkuna mana kriyiwanchiqchu. Achwanmi yuyanllampa: Tuntumkunallam Jisuspa chay famandaqa kriyinllampa, nichpa. Piru nuqanchiqkunaqam yach'anchiqllampa: Jisumkristum ancha pudirniyuq kachpa, uchanchiqmanda atin wachawayninchiqta, nichpa. 19 Chaqa Tayta Dyusmi Santu Librumbi nin: Nuqaqam kay mundumpi yach'ayniyuqkunata rini binsiq, chay yach'aynin ama nimampaq balinambaq, nichpa. 20 Chaymi tumkuy chay ancha yach'ayniyuq runamkuna, chay yach'achimkuq runamkuna, kay mundumpa kusasningunampaqlla yach'aq rimaqkunaqam Dyuspaqqa ancha tuntumkuna. Yuyayningunaqam mana nimampaq balinchu paypaqqa. 21 Chaymi runamkuna yuyayninwanlla mana atinllampachu Dyustaqa riqsiyta. Achwanmi Tayta Dyusqa ancha yach'ayniyuq kachpa, atin wachawayninchiqta, paypa chumaq nutisyanda kriyimptinchiq. Piru mana kriyiqkunaqam chay chumaq nutisyambaq: Manam balinchu ninllampa. 22 Llaqta masiy isrraylinumkuna, Jisuspi kriyinanllampaqam munanllamparaq milagrumkunata rimkayta. Kanan grisyanumkunaqam, yuyanllampa ancha yach'ayniyuqlla kayllampata. 23 Piru nuqallkunaqam Jisumkristumpaq kaychina rimanillampa: Kruspim wañurqan, uchanchiqmanda wachawananchiq, nichpa. Chaychina nimptiyllampam, achka isrraylinumkuna mana munanllampachu kriyiyta: Dyus Amkrachqan Wachadurmi wañurqan, nichpaqa. Mana isrraylinu kaqkunampismi chay yach'achimkuchqaypaq ninllampa: Manam nimampaqpis balinchu, nichpa. 24 Piru Dyuspi kriyiqkunaqa isrraylinumkuna, grisyanumkuna kachpampismi, allita yach'anchiqllampa: Jisumkristum Tayta Dyuspa pudirninwan yach'ayninwan, nichpa. 25 Piru achka runamkunam mana atinchu intyindiyta Dyus rurachqandaqa. Chaymi chay chumaq nutisyampaq: Manam nimampaq balinchu, ninllampa. Piru chaychina nimptinllampampismi, Tayta Dyusqa yumbay chay runamkunamanda mas pudirniyuq mas yach'ayniyuq. 26 Kuyachqay kriyiq masitamkuna, allita yach'ayllampa: Qamkunaqam runamkunampaqqa mana yach'ayniyuqchu kangillampa. Manam ni achka kamachimkuqkuna, ni achka qallayniyuqkuna kangillampachu. 27 Piru pallkunampaq tuntumkuna kamptimkillampampismi, Tayta Dyusqa amkrachuchqa, wambranguna kanallkillampa. Chaymi chay palanganu yach'ayniyuqkuna rinllampa panqamkuq. Mana kamachimkuqkuna kamptinchiqpismi, Tayta Dyusqa amkrawachqa kanchiq, chay kamachimkuq runamkuna panqamkunanllampa. 28 Chaychina runamkunampaq mana nimampaq balimptinchiqpismi, Tayta Dyusqa amkrawachqa kanchiq, yumbay kamachimkuqmanda mas baliqkuna kananchiqllampa, pallkuna amana nimampaq balinanllampa. 29 Chaychinam Tayta Dyusqa ruran, ama ni pimpis paypa ñawpambi alabamkanambaq. 30 Piru Tayta Dyus kimkinmi nuqanchiqkunata yanampawachqa kanchiq, Jisumkristumpi kriyichpa kawsananchiqllampa. Chaychina kriyimptinchiqmi, Jisumkristuqa ancha allita yach'achiwanchiq Tayta Dyuspaq. Kanan tumkuy uchanchiqmanda pirdunawaqninchiqmi, Tayta Dyuswan alliyachiwanchiq, paytalla kasuchpa kawsananchiqllampa. 31 Chaychina Tayta Dyus wachawamptinchiqqa, paytalla alabachunllampa. Chaymi Dyuspa Santu Librumbi niwanchiqllampa: Qamkuna munachpa alabamkaytaqa, achwan Dyusta alabayllampa, nichpa.
1 Kriyiq masitamkuna, nuqa qamkunaman chamuchpaqam, mana yach'achichurqaqchu trabajus palabramkunawanqa. 2 Achwanmi nichurqaqllampa: Jisumkristum kruspi wañuchqa, uchanchiqmanda wachawananchiq, nichpalla. Chaqa manam munarqaychu qamkunata suq layata yach'achichuytaqa. 3 Chaymi qamkunaman ch'ayachpaqa, manchachpa ch'ampsimkarqay: Manach' allitachu Dyuspaqqa yach'achimkuchaq, nichpa. 4 Kanan qamkunatam mana yach'achichurqaychu ancha yach'ayniyuq runachinaqa. Achwanmi Dyuspa Santu Ispiritumba pudirninwan milagrumkunata rurachpa, qamkunataqa yach'achichurqaq, 5 chaychina Dyuspilla yuyamkunallkillampa. Chaqa manam munanichu, yach'ayniyuq runamkunampi yuyamkunallkillampaqa. 6 Piru Tayta Dyuspi allita kriyiqkunatam masta rinillampa yach'achiq Dyuspaq, ancha yach'ayniyuq kanambaqllampa. Piru manam nuqallkunaqa yach'achimkunichu kay mundumpi yach'ayniyuq runamkunachina, ni kamachimkuq runamkunachinaqa. Chaqa chay laya runamkunaqam sintinsyaduna chingananllampa. 7 Achwanmi Tayta Dyus yuyachqandalla yach'achimkuniqa. Chaqa payqam kay munduta manaraq rurachpa yuyarqanna, paywan pulla syilumpi kawsananchiq. 8 Piru kay mundumpi kamachimkuq runamkunaqam Tayta Dyus yuyachqandaqa mana intyindirqanchu. Chaqa pallkuna intyindichpaqam, kruspiqa mana wanchinandachu ancha pwidiq llimpyaq Siñurninchiq Jisustaqa. 9 Chaymi Dyuspa Santu Librumbi nin: Manam pimpis rimkachqachu, ni uyachqachu, ni yuyachqachu Tayta Dyus rurachqan ancha chumaq kusaskunata. Piru tumkuy chay chumaqkunatam Tayta Dyusqa rurachqa payta kuyaqkunampaq, nichpa. 10 Piru kananqam Tayta Dyusqa chay pamkadu kusaskunataqa Santu Ispiritunwan intyindichiwachqa kanchiq. Chaqa chay Santu Ispiritunqam, Tayta Dyuspa tumkuy iman mas pamkadu kaqta rimkan, riqsin. 11 Manchu suq runa chunqumbi yuyachqandaqa paylla yach'an. Chaychinallam Dyuspa Santu Ispiritunlla Dyus yuyachqandaqa yach'an. 12 Chaymi Tayta Dyusqa ancha allin kachpa, chay Santu Ispiritundaqa quwachqa kanchiq. Paymi intyindichiwanchiq Tayta Dyus rurachqanda nuqanchiqpaq. Chaymi manana yuyanchiqllampachu Dyuspi mana kriyiqkunachinaqa. 13 Kanan nuqallkunaqam mana yuyayniymandaqa yach'achimkunichu. Achwanmi Dyuspa Santu Ispiritun yanampawanllampa, paypa yuyayningunata payta ch'askiqkunata yach'achinayllampa 14 Piru Dyuspi mana kriyiqkunaqam Santu Ispiritu nichqandaqa mana atinllampachu intyindiyta. Pallkunampaqqam tumkuy chay chumaq nichqangunaqa mana nimampaq balinchu. Chaqa challkunataqam Dyuspi kriyiqkunalla atinchiqllampa intyindiytaqa, Santu Ispiritun yanampawamptinchiq. 15 Chaymi Santu Ispirituwan kaqkunalla tumkuy imampaq atinchiqllampa yach'ayta: ¿Allichu ichu mana? nichpa. Chay mana kriyiqkunaqam mana yach'anllampachu. Chaymi pallkunaqa mana atinllampachu nuqanchiqpaq yach'ayta: Paymi uchayuq ichu mana, nichpaqa. 16 Chayrallkum Dyuspa Santu Librumbi nin: Manam pimpis atinchu intyindiyta Tayta Dyus yuyachqanda, ni atinchu nimatampis yach'achiyta Tayta Dyustaqa, nichpa. Piru Santu Ispiritun yanampawamptinchiqmi, Jisumkristuchina atinchiqllampa yuyayta.
1 Kriyiq masitamkuna, Dyuspa Santu Ispiritundaqam manaraq allita kasuchpachu kawsallkangillampa. Achwanmi chay mana kriyiqkunachina kawsallkangillampa. Chaymi tamkcha wambramkunachina kamptimkillampa, manaraq atichqachu kani allita yach'achichuyta Jisumkristumpaq. 2 Tayta Dyus yach'achiwachqanchiqqam ancha michki mimkunachina. Piru qamkunaqam manaraq atichqallampachu kangi intyindiyta paypa chay mas trabajus rimayninda. Chaymi nuqaqa Dyus nichqandaqa mas fasiltalla qamkunataqa yach'achichuchqa kani ñuñullkaq wambritumkunatachina. 3 Chaqa Jisuspi mana kriyiqkunachinam kawsallkangillampa, munachqallkitalla rurachpa, imbidyanamkuchpa, anyanamkuchpa. (Chaymi kanangaman manaraq atingillampachu Dyus nichqanda intyindiytaqa.) 4 Chaqa wamkinnimkimkunam nillkangillampa: Nuqaqam Pablu yach'achimkuchqanda kriyini, nichpa. Suqnimkimkunaqam ningillampa: Ampulus yach'achimkuchqandam kriyini, nichpa. Chaychina rimachpaqam, chay mana kriyiqkunachinalla kawsallkangillampa. 5 Chaqa nuqa Pablu yach'achimkuq masiy Ampuluswanqam mana nimachu kanillampa. Tayta Dyusmi nuqallkunata kach'amuwachqa, pay nichqanda qamkunata yach'achichunaypaq. Chaymi Jisuspi kriyichqallampa kangi. Chaqa nuqa Pablu Ampuluswanqam Tayta Dyus munachqanda yach'achimkuchqallampa kani. 6 Chaymi qamkunata puntata yach'achichuchpaqa, nuqaqa tarpumkuqchina trabajachqa kani. Chaymandaqam masanchiq Ampulus, masta yach'achichuchpaqa, suq parqumkuqchina trabajachqa. Piru Tayta Dyusllam chay tarpudutaqa wiñachichqa. 7 Chaymi nuqa tarpumkuqchina kachpaqa, mana nimachu kani. Chaychinallam Ampulus tarpuduta parquqchina kachpa, mana nimachu. Piru Tayta Dyusmi ancha balin. Chaqa payllam chay tarpudutaqa wiñachin. 8 Chayri mayqan tarpumkuqchina ichu parqumkuqchina kachpaqa, Dyuspaqlla yach'achimkullkan. Chaymi Dyusqa kadunuta rin pagarawaqninchiq ima tantu trabajachqanchiqpaq. 9 Chaqa nuqaqam Ampuluswan yach'achimkuq masimkuna kanillampa. Chaychina Tayta Dyuspaq yach'achimkuchpaqam, ch'amkrampichina trabajallkanillampa. Kanan qamkunaqam Tayta Dyuspa ch'amkranchina kangillampa. Dyuspa adurana wasinchinampismi kangillampa. Chaqa qamkunamandam payqa suq atun chumaq adurana wasitachina rurallkan. 10 Chaymi Tayta Dyus yanampawamptin, puntata qamkunata allita yach'achichurqaq, suq allin albañil wasimpa simyintunda ruraqchina. Chaymandaqam suqkuna masta yach'achichuchpaqa, chay wasita uchyaqchina kachqallampa. Piru yumbay chay uchyaqkunaqa allita yuyanqallampa: ¿Allitachu yach'achimkullkani ichu mana? nichpa. 11 Chaqa Dyuspa wasimba simyintunqam Jisumkristu. Chaymi mana ni pimpis atinchu rurayta suq laya simyintuta, Dyuspa adurana wasinchina kaqta ruranambaqqa. 12 Piru suq albañilqam chay simyintumpa sawambiqa achka laya kusaskunawan atin rurayta allin wasita ichu mana baliq wasita. Allita yach'achimkuchpaqam, ancha baliq urumanda, qallaymanda, ancha ch'aniyuq rumimkunamanda Dyuspa wasinda rurallkanmanchina. Piru mana allita yach'achimkuqqam mana baliq qarumanda ichu uqchamanda ichu chumkchamanda Dyuspa adurana wasinda rurallkanmanchina. 13 Chaymi Jisumkristu kutimuchpaqa, ninawan rin mallimpaq chay rurachqanchiqta: ¿Balinchu ichu mana? nichpa. Chaymi chay mana baliq rurachqanchiqta rin rumpachiq, chay mana baliq qarumanda ichu uqchamanda ichu chumkchamanda rurachqa wasita rumpachillkanmanchina. Piru chay allita ruraqkunaqam chay urumanda, qallaymanda ichu ch'aniyuq rumimkunamanda wasitachina rurachqallampa. Chaymi wasin ninampichina kamptimbis, mana rinchu rumpachpa chingaq. 14 Chaymi Tayta Dyusta allita sirbimptinchiq, payqa primyunchiqta rin quwaqninchiq. 15 Piru mana allita sirbimptinchiqqam, Dyusqa mana nima primyuta rinchu quwaqninchiq. Piru manam rinchiqllampachu chingaq. Achwanmi ampinitas rin wachawaqninchiq, suq runa nina piskallkamptin wachamkaqchina. 16 ¿Manachu yach'angillampa: Nuqanchiqkunaqam Tayta Dyuspa adurana wasin kanchiqllampa; Dyuspa Santu Ispiritunmi nuqanchiqkunampi tiyan, nichpaqa? 17 Chaymi suq runa inkitachumptinllampa, qamkunampura amkramkanallkiqa, Tayta Dyus rin chingachiq chay inkitachuqtaqa. Chaqa payqam dañachichqa Dyuspa santu adurana wasinchina kaqkunata. 18 Chayri ama ni mayqannimkimpis ingañamkaychu, yuyachpa: Kay mundumpi tiyaqkunampaqmi ancha yach'ayniyuq kani, nichpaqa. Achwanri yuyayllampa: Manam achkataqa yach'anichu, nichpa. Kanan chaychina umildi kachpaqam, allimp yach'ayniyuqkuna ringillampa kaq. 19 Chaqa Tayta Dyusqam kay mundumpi yach'ayniyuqkunataqa tuntumkunampaq riqsin. Chaymi Dyuspa Santu Librumbi nin: Tayta Dyusmi binsin chay Yach'ayniyuqmi kani niqkunataqa. Chayrallkum ancha yuyamptinllampampis tumkuy imampi binsinanllampa, Dyuspa ñawpambi tuntumkunachina kidanllampa, nichpa. 20 Chay Santu Librumbim nimbis: Tayta Dyusmi yach'ayniyuq runamkunampa yumbay yuyachqangunata mana baliqpaq riqsin, nichpa. 21 Piru Tayta Dyusllam nuqa Pabluta, Ampulusta, Pidrutampis kach'amuwachqa, qamkunata yach'achichunay. Chaqa Dyusllam kay mundumpa tumkuy iman kaqkunata quchuchqallampa qamkunampa byinnimkimpaq. Chayri ama alabamkayllampachu: Chay yach'ayniyuq runatam kasuni, nichpaqa. Achwanri allita yach'ayllampa: Kawsamptinchiqllampa ichu wañumptinchiqpismi, tumkuy imampi Tayta Dyuslla nuqanchiqkunata yanampawanchiq, nichpa. 23 Chaqa nuqanchiqkunaqam Jisumkristumpa masangunachina, paningunachina kanchiqllampa. Kanan Jisumkristuqam Dyuspa Churin.
1 Allita intyindiyllampa nuqallkuna Jisumkristumpa yanampamkuqnin kachqayllampata. Chaqa paymi nuqallkuna ampustulningunata numbrawachqa, Tayta Dyus pamkadu yuyachqanda yach'achimkunayllampa. 2 Mayñ, suq kach'aduqa allita kumplinqa patrunnin kamachichqanda. (Chaqa patrunninmi payta rin jusgaq.) 3 Chaymi nuqaqa mana nimatampis manchanichu, qamkuna ichu suqkuna jusgawamptimkillampa. Manam ni nuqa kimkiy jusgamkanichu. 4 Chaqa nuqa kimkiy uchayuq kachpam, atini ingañamkayta: Manam uchayuqchu kani, nichpa. Piru Tayta Dyusmi ancha allita yach'an: Pablum uchayuq ichu mana uchayuqchu, nichpaqa. Chaymi paylla balin jusgawanambaq. 5 Chayrallkum nillkillampa, ama dasqa jusganamkuychu. Achwanri chuyayllampa, Siñurninchiq Jisus kay pachaman chamunangaman. Chaqa pay chamuchpam, tumkuy ima pamkadu yuyachqanchiqta, rurachqanchiqta allita yach'achpa, rin jusgawaqninchiq. Chaymi allita rurachqa kamptinchiqqa, rin alabawaqninchiq. 6 Masitamkuna, byinnimkimpaqmi nillkillampa, nuqa Pablu masanchiq Ampuluswan kawsachqaychina, qamkunampis kawsayllampa, Dyuspa Santu Librunda allita kasuchpa. Chayri ama ni mayqannimki afaniruyachpaqa, suq yach'achimkuqta ancha alabaychu, suq yach'achimkuqta disprisyachpa. 7 Chaqa qamkunaqam mana suqkunamandaqa mas baliqchu kangillampa. Achwan Tayta Dyusllam chay tumkuy ima kusasnimkimkunata quchuchqa. Chaychina kamptinqa, ¿imarallkutaq qamkunaqa afaniruyangillampa: Nuqa kimkiyllam tumkuy imayta kunsigichqa kani, tumkuy imayuq kanaypaq, nichpaqa? 8 Chaqa qamkunallam kaychina alabamkangillampa: Tumkuy imayuqmi kanillampa. Gubyirnuchinam kanillampa, nichpa. Piru nuqallkunataqam manana kasuwangillampachu. Paqtar pudirniyuq gubyirnu kangimanllampa, nuqallkunampis pullallkillampa kamachimkunayllampa. 9 Piru nuqallkuna Dyuspa ampustulninguna kachpampismi, mana chaychinachu yuyanillampa. Achwanmi yuyanillampa: Manam nimampaq balinichu, nichpa. Kanan Jisuspaq yach'achimkuchpa, ima diyach'i wañuchaqllampa. Chaqa suq atun pamba pugllanampichinam kanillampa, Dyusta kuntraqkuna wanchiwamptinllampa, yumbay runamkuna, anjilkuna rimkawananllampa. 10 Nuqallkuna Jisumkristumpaq yach'achimkuchqayrallkum, achka runamkuna ninllampa: Pallkunaqam ancha tuntumkuna, nichpa. Piru qamkunampaqqam ninllampa: Pallkunaqam ancha yach'ayniyuqkuna, nichpa. Kanan nuqallkunaqam mana chay kamachimkuqchinachu purinillampa. Piru qamkunaqam kamachimkuqchina puringillampa. Chaymi achka runamkuna qamkunataqa rrispitachungi. Piru nuqallkunataqam disprisyawanllampa. 11 Chaqa nuqallkunaqam kanangaman achka diyamkuna mimkunaypaq, yamkumpaq, sawaypaqllampa padisinillampa. Kanan runamkunaqam ancha maqawanllampa. Manam ni wasiyuqchu kanillampa. 12 Nuqallkuna kimkiymi challku challku trabajanillampa mantyinimkanaypaq. Mana kriyiqkuna musyawamptimbismi, Dyusman ancha mañamkunillampa, pallkunata yanampanambaq. Kanan Dyusta kuntraqkuna nuqallkunata qasachawamptinmi, mana challkuq agwantanillampa. 13 Nuqallkunampaq mana allita rimamptinllampampismi, pallkunata chumaqta kunanillampa. Piru kanangamanmi kay mundumpiqa rimkawanllampa wanutachina. Chaymi wichumkuwanambaqna kallkanllampa. 14 Kuyachqay kriyiq masitamkuna, qamkunaqam wambraychina kangillampa. Chaymi ancha kuyachuchpa, mana munanichu panqachichuyta. Achwanmi kay kartata kach'amuni, chumaqta kunachunaypaq. 15 Qamkuna 10.000 yach'achimkuqmanda Jisumkristumpaq yach'amkuchpaqam, suq taytayuqchinalla kangillampa. Chaqa nuqalla puntata Jisuspa chumaq nutisyanda yach'achichumptiymi, paypi kriyirqallkillampa. 16 Chayri ancha rrugallkillampa, nuqachina kawsanallki. 17 Chayrallkum kay masanchiq Timutiyuta qamkunaman kach'amuni. (Chaqa payqam, nuqamanda yach'amkuchpa, Jisumkristumpi ancha allita kriyichqa.) Chaymi payqa wambraychina. Pay nichunqallampa: Pablum kaychina kawsallkan, kaychina yach'achillkan yumbay llaqtamkunampi tiyaq kriyiq masinchiqkunata, nichpa. 18 Wamkinnimkiqam ancha palanganuyachpa, alabamkangillampa, yuyachpa: Pabluqam mana rinchu chamuq anyawaqninchiq, nichpa. 19 Piru Siñurninchiq Jisus munamptinqam, utqa rini chamuq watumkuchuqllampa. Rimkachuchpallampam, allita yach'achaq: Chay palanganu kaqkunachu Dyuspa pudirninwan milagrumkunata atinllampa rurayta, ichu chiminwanlla rimallkanllampa, nichpa. 20 Chaqa Tayta Dyusta allimpta kasuchpaqam, mana rinchiqllampachu rimaqllaqa. Achwanmi paypa pudirninwan tumkuy ima munachqanda rinchiqllampa ruraq. 21 Mayñ, nuqa chamuchpaqa, ¿imatam munangillampa ruranaypaq? ¿Munangillampachu kastigachunaq, ichu ancha kuyachuchpa, kuchimkuchpa, chumaqta yach'achichunaqllampa?
1 Yach'achqam kani: Suqnimkich madrastanda warmimkuchqa, nichpa. Piru Dyuspi mana kriyiqkunampismi mana dijanllampachu, chay laya ancha fiyu uchata ruranambaqqa. 2 Piru chay runa chay ancha fiyu uchata ruramptimbismi, qamkunaqa palanganumkuna kangillampa. Mas allich'i kanman, qamkuna malaganayachpa panqamkunallki. Chayri chay mana alli ruraqtaqa wichumkuyllampa, amana tandamkanambaq qamkunawan. 3 Chaqa nuqa qamkunamanda karumpi kachpampismi, mana nimatampis qamkunata qunqachuchqachu kani. Chaymi yuyachuchpa, pullallkichina kachpa, chay ancha uchayuq runata jusgachqana kani, kastigadu kanambaq. 4 Chaqa Siñurninchiq Jisuspa chutimbi qamkuna tandanamkumptimkiqam, nuqampis yuyayniypiqa qamkunawan kachaq. Siñurninchiq Jisuspismi qamkunawan kachpa, pudirninwan ancha rin yanampachuqllampa. 5 Chayri chay uchayuq runata dyabluman intrigamkuyllampa. Chaychina ruramptimkillampam, Tayta Dyusqa manana rinchu kwidaq paytaqa. Achwanmi dyabluna rin padisichiq. Chaychina kwirpunda ancha padisichimptinri, paqta chay runaqa ucha rurachqanda dijachpa, Dyusman mañamkunqa pirdunanambaq. Chaychina pirdunamptinmi, Siñurninchiq Jisus chamuchpa rin wachaq. 6 Piru qamkunaqa ama alabamkaychu. ¿Manachu intyindingillampa kay kumparasyun nichqanda: Achla libadurallam achka mach'kata atin samksachiyta nichpa? (Chaychinallam qamkunampi suq kriyiq masinchiqlla uchata rurachpaqa, atin dañachiyta achka kriyiq masinchiqkunata, pallkunampis uchata rurananllampa.) 7 Chayri chay uchallkimkunataqa dijayllampana, suqkunata ama qach'anallkillampa, pallkunampis uchata ama rurananllampa. Chaychina uchallkimkunata dijachpaqam, ancha limpyu masa mana nima libadurayuqchina ringillampa kaq, chay Paskwa fyistampi rurachqan masachina. Chaqa chaypaqmi Jisumkristuqa chay Paskwa fyistampi wañurqan suq uñitachina, tumkuy uchanchiqmanda pirdunawananchiq. 8 Kanan chay libadurayuq tandaqam yuyachiwanchiq uchanchiqkunampaq. Chaymi Paskwa fyistampiqa kachangamkunatalla mimkunchiqllampa. Chayri chay uchanchiqkunata dijachpa, tumkuy diyamkunata allitalla rurachpa, allimp kaqtalla rimachunllampa, chay tanda mana nima libadurayuqchina kananchiqllampa. 9 Nuqaqam chay suq kartaypi nichurqaqllampa: Ama tandamkayllampachu chay mana rrispitunwan puñuqkunawanqa, nichpa. 10 Piru chaychinaqam nillkillampa uchayuq kriyiq masinchiqkunampaqlla. Manam nillkillampachu: Chay mana kriyiqkunamanda amkramkayllampa, nichpaqa. Awnki suqwan, suqwan puñumptinllampa ichu qallayta ancha munamptinllampa, ichu suwamkumptinllampa ichu amitu layata aduramptinllampampis, pallkunata parlachichunllampa. Chaqa kay mundumanda manaraq lluqchichpaqam, pallkunamandaqa mana atinchiqllampachu amkramkaytaqa. 11 Achwanmi nichurqaqllampa amkramkanallkiqa chay runa ichu warmi chiminwanlla Jisuspi kriyiqkunamanda. Chaqa chay kriyiq tumkuqkunaqam mañusumkuna, nisyumkuna, amitu layata aduraqkuna, llullamkuqkuna, suwamkuqkuna, mach'aqkuna. Chay laya kriyiq tumkuqkunamandam munani qamkuna amkramkanallkiqa. Chay layamkunawanqa ama ni mimkuyllampachu. 12 Piru chay mana kriyiqkuna uchata ruramptinllampaqam, nuqanchiqkunaqa mana nimatampis atinchiqchu jusgayta, kastigadu kananllampa. Chaqa Tayta Dyusllam chay mana kriyiqkunataqa rin jusgaq. Piru chay kriyiq masinchiqkuna uchata ruramptinqa, nuqanchiqkuna pallkunataqa jusgachunllampa. Chayri chay ancha uchayuq runataqa ama dijayllampachu, qamkunawan tandamkanambaqqa.
1 Qamkuna suq kriyiq masinchiqwan imampaq piñamkuchpaqa, ama nimatampis riyllampachu dimandaq juyiskunampiqa. Chaqa chay juyiskuna Jisuspi mana kriyiqkuna kachpaqam, ¿imachinam atinman allita justisyata ruraytaqa? Chayri kriyiq masinchiqkunaman riyllampa, pallkuna allita justisyata rurananllampa. 2 ¿Manachu yach'angillampa: Jwisyu diyampim nuqanchiqkuna rinchiqllampa jusgaq yumbay mana kriyiqkunata, nichpaqa? Chaychina atichpa jusgaytaqa, ¿ima manachu atingillampa qamkunampuralla allichayta chay tamkcha prublimamkunataqa? 3 ¿Manachu yach'angillampa: Anjilkunatampis rinchiqllampa jusgaq, nichpaqa? Chayri kay mundumpi kawsachpaqa, kriyiq masinchiqkunata nuqanchiqkuna allita jusgachunllampa. 4 Chayrallku kay mundumpa kusasningunampaq pilyachpaqa, mana nimampaq balinchu rinallkillampa mana kriyiq juyiskunamanqa. Chaqa pallkunaqam Dyuspaqqa mana nimatampis yach'anllampachu, Dyuspi kriyiqkunata jusgananllampa. 5 Challkunataqam nillkillampa, qamkuna panqamkunallki. ¿Amkasuchu qamkunampi mana kan ni suq yach'ayniyuq kriyiq masinchiq, allichanambaq qamkunampura anyanamkuchqallkita? 6 ¡Piru qamkunaqam suq kriyiq masinchiqwan anyanamkuchpaqa, ringillampa dimandanamkuq mana kriyiq juyiskunaman! 7 Chaychina kriyiq masinchiqwan anyanamkuchpaqam, ancha panqamkuypaqta kawsallkangillampa. Chayri kriyiq masinchiq mana allita rurachumptinqa, dijayllampa imatampis quch'ichunambaq. 8 Piru challkunata yach'achpampismi, mana kasungillampachu. Kanan achwambam qamkuna kimkimki asta kriyiq masinchiqkunata dañachichpa, imangunata quch'ingillampa. 9 Chayri allita intyindiyllampa. Ama dijamkayllampachu ingañachunanllampa. Chaqa uchayuqkunaqam mana rinchu riq syiluman, Dyuswan kawsananllampa. Chaymi runa, warmi manaraq rrispituyuq kachpa, amaraq piwambis puñunqachu. Chaqa mana rrispitunwan puñuqkuna, amitu layamkunata aduraqkuna, ullqumpura warmiwanchina puñuqkuna, ladrunguna, nisyumkuna, mach'aqkuna, kwintirumkuna, llullamkuchpa quch'imkuqkunaqam mana rinllampachu kawsaq Dyuswanqa. 11 Kanan manaraq Jisuspi kriyichpaqam, wamkinnimkiqa chay laya mana alli ruraqkuna karqallkillampa. Piru kananqam tumkuy uchallkimanda pirdunaduna kangillampa. Chaymi kananqa Siñurninchiq Jisus wachachuchqanrallku, Dyuspa Santu Ispiritun qamkunata yanampachuchqa, Tayta Dyuswan chumaqta alliyanallkillampa. 12 Wamkinnimkimkunach ningillampa: Tumkuy ima munachqanchiqtam atinchiqllampa rurayta, nichpa. Ari, piru yumbay rurachqanchiqqam mana yanampawanchiqchu. Chayri kwirpunchiq mana allita munamptin ruraytaqa, sujitachpa, ama uchataqa rurachunchu. 13 Chaqa wamkin runamkunaqam allimp kaqta kaychina rimachqallampa: Tayta Dyusqam mimkunataqa rurachqa mimkunanchiq. Chaychinallam pach'anchiqtampis rurachqa, chayman mimkunanchiq. (Piru pallkunaqam ninllampampis: Chaymi kwirpunchiq munachqandalla rurachpa, atinchiq kawsayta, nichpa.) Piru manam balinchu chaychina yuyananchiq. Chaqa Siñurninchiqqam suq diya rin uchyaq pach'anchiqta, mimkunanchiqtampis. Payqam kwirpunchiqtaqa rurachqa, paytalla kasuchpa kawsananchiqllampa. Manam rurachqachu, piwambis puñuchpa, uchata rurananchiqqa. Achwanmi Siñurninchiqqa kwirpunchiqtaqa allita kwidan. 14 Chaymi payqa ancha pudirniyuq kachpa, Siñurninchiq Jisusta wañuchqanmanda kawsachimurqan. Chaychinallam suq diya nuqanchiqkunata wañuchqanchiqmanda rin kawsachiwaqninchiq. 15 ¿Manachu yach'angillampa: Kwirpunchiqqam Jisumkristumpalla, nichpaqa? Payllam Siñurninchiqqa. Chaychina kamptinqa, ¿balinchu suq bandulira warmiwan puñunanchiq? ¡Manam nimampaqpis balinchu! ¡Chayri chay layataqa ama nunka rurachunchu! 16 Chaqa Dyuspa Santu Librumbiqam niwanchiqllampa: Suq runa warmiwan tandanamkuchpaqam, suq kwirpuchinalla kidanllampa, nichpa. Chaymi suq bandulira warmiwan puñuchpaqa, suq kwirpuchinalla chay warmiwanqa kanchiqllampa. 17 Piru nuqanchiqkunaqam Siñurninchiq Jisuspi yuyamkuchpaqa, suq yuyaylla paywanqa kanchiqllampa. 18 Chayri chay laya uchamkunamandaqa mitimkayllampa. Chaqa suq laya uchamkunaqam kwirpunchiqtaqa mana dañachinchu. Piru suqwan suqwan puñuchpaqam, kimkin kwirpunchiqta ancha dañachillkanchiq. 19 ¿Manachu yach'angillampa: Kwirpunchiqqam Dyuspa Santu Ispiritumba adurana wasinchina, nichpaqa? Chaqa Dyusqam Santu Ispiritunda quwachqa kanchiq, nuqanchiqkunampa kwirpunchiqpi tiyanambaq. Chaymi kwirpunchiqkunaqa manana nuqanchiqpachu; achwanmi Tayta Dyuspana. 20 Chaqa paymi ancha ch'aniyuqta pagaramkuchpa, randiwachqana kanchiqllampa. [Nuta: Chay ancha ch'aniyuqqam Jisuspa bidan karqan.] Chayrallku Dyuspa wambranguna kachpaqa, paytalla kasuchunllampa tumkuy yuyayninchiqwan, tumkuy kwirpunchiqwan, yumbay rimkawaqninchiq Dyusta alabananllampa.
1 Qamkunaqam suq kartampi tampuwachqa kangi: ¡Allichu suq runa warmiyuq kanambaq ichu mana? nichpa. Chay tampuwachqallkita munani nichuyllampata. Allim kanman ama warmiyuqchu kananchiq. 2 Piru mana warmiyuq kachpaqam, wamkingunaqa suqwan suqwan puñun. Chaymi chay uchata ama rurananllampa, alli kanman, yumbay runa, warmi kasarananllampa, kadunu warmiyuq ichu qusayuq kanambaq. 3 Chaychina runa warmi kasarachpaqa, ama disprisyanamkunqachu puñunambaqqa. 4 Chaqa chay warmimpa kwirpunqam qusambana. Mananam warmin kimkimbachu. Chaychinallam chay qusamba kwirpumbis warmimbana. Mananam pay kimkimbachu. 5 Chayri warmiqa qusanwan ichu runa warminwanqa ama ñiganamkunqachu puñunambaqqa. Piru maynimbis Tayta Dyusman masta munachpa mañamkuytaqa, atingimanllampa ichkandimki parlayta: Chay diyamkunaqa ama pulla puñuchunchu, Dyusman masta mañamkunanchiq, nichpa. Piru chaychina Dyusman mañamkuchpaqa, pullana puñuriyllampa, dyablu ama tyintachunanllampa. 6 Tumkuy kallkunatam kunallkillampa, qamkunata yanampachunaypaq. Piru manam qamkunataqa kamachillkichu, chaychina ruranallkiqa. 7 Chaqa nuqampaqqam mas alli kanman, yumbay runa, warmi nuqachina sampalanlla kanambaqllampa. Piru Tayta Dyus allita riqsiwaqninchiqmi, wamkinda yanampan, kasarachpa, chumaqta kawsananllampa. Suqkunataqam yanampan, sampalanlla kachpa, chumaqta kawsananllampa. 8 Chaymi chulumkunata, chinamkunata, biyudamkunata kaychina kunallkillampa: Allim kanman nuqachina sampalallkilla kawsanallkillampa. 9 Piru kwirpullkita mana atichpa sujitaytaqa, kasarayllampa, ama uchata ruranallkillampa, nichpa. 10 Kriyiq masitamkuna, yumbay rrispituyuq kaqkunatam kaychina kamachillkillampa: Warmimkuna runayuq kachpaqa, ama amkramkayllampachu runallkimandaqa, nichpa. Kay kamachichuchqayqam mana nuqampa yuyayniychu. Chaqa kaytaqam Siñurninchiq Jisumkristu kamachiwachqa kanchiqllampa. 11 Piru suq warmi runanmanda amkramkachpaqa, amana kanqachu suq runawanqa. Achwan munachpa runayuq kariytaqa, muchuqmanda chay runanwanlla tandanamkurinqa. Piru runanwan mana tandanamkuchpaqa, sampalanllana kawsanqa. Chaychinalla runampis warminmandaqa ama amkramkanqachu. 12 Piru wamkin laya rrispituyuq kaqkunampaqqam Siñurninchiq Jisumkristu mana yach'achimkurqanchu. Chaymi nuqalla kaychina kunallkillampa: Suq runa warmiyuq kachpa, Jisuspi kriyimptin, chay mana kriyiq warmin paymanda mana munamptin amkramkaytaqa, ama amkramkanqachu. 13 Chaychinalla suq warmi Jisuspi kriyimptin, mana kriyiq runan mana munamptin amkramkaytaqa, chay runanmandaqa ama amkramkanqachu. 14 Chaqa chay warmi Jisuspi kriyichqanrallkum, Tayta Dyusqa runandampis rin yanampaq. Chaychinallam suq kriyiq masinchiqpa warmin mana kriyiq kamptimbis, Tayta Dyusqa chay warmita rin yanampaq, runan Dyuspa wambran kachqanrallku. Pallkunampa wambrangunampismi Dyuspaq yach'amkuchpa rinllampa wiñaq. Piru taytan mamanmanda amkramkamptinqam, wamkin wambrangunaqa Dyuspi mana kriyiqkunawan rinllampa wiñaq. Chaymi pallkunaqa Dyuspaqqa mana yach'amkunmanllampachu. 15 Piru chay mana kriyiq warmi ichu runa munamptin amkramkaytaqa, dijayllampa amkramkanambaq. Chaychina amkramkamptinqam, chay kriyiq masinchiqqa Dyuspaqqa mana uchayuqchu. Librinam kidan. Chaqa Tayta Dyusqam munan, chumaqta kawsananchiqllampa. 16 Manam yach'anchiqchu: Qam panisita, ¿chay runallkitachu atingiman animachiyta, Dyuspi kriyinambaq ichu mana? Qambis, kriyiq masita, ¿warmimkitachu atingiman animachiyta, Dyuspi kriyinambaq ichu mana? nichpa. 17 Jisuspi kriyichpaqa, allin kustumbrimkimkunata ama dijayllampachu. Achwanri yuyayllampa: Dyusmi kaychina rurawachqa, nichpa. Chaychinam yumbay llaqtamkunampi tandamkaq kriyiq masinchiqkunata yach'achini. 18 Chayri qamkuna kwirpullkimpi siñalniyuq kachpa, Jisuspi kriyichpaqa, siñalniyuqlla kidayllampa. Piru mana siñalniyuq kachpa, Jisuspi kriyichpaqa, chaychinalla kidayllampa. Chay siñaltaqa ama rurayllampachu kwirpullkimpiqa. 19 Chaqa manam nimampaq balinchu, siñalniyuq ichu mana siñalniyuq kananchiqllampaqa. Achwanmi ancha balin Dyus kamachimkuchqanda kasunanchiqllampa. 20 Chayri Jisuspi kriyichpaqa, yumbay chay allin kustumbrimkiwanlla kidayllampa. 21 Chayri ama llamkiychu: Randichqa kriyadulla kani, nichpaqa. Piru chay patrunnimkimanda pirmisuta atichpa surquyta lluqchinallkiqa, lluqchiy, amana randichqa kriyadu kanallki. 22 Wamkinnimkimkunam runamkunampa randichqa kriyadunguna kangillampa. Piru chaychina kachpampismi, Jisuspi kriyichpaqa, librina kangillampa dyablumanda, amana paypa kriyadunguna kanallkillampa. Wamkinnimkimkunaqam runamkunampa mana randichqa kriyadunguna kangillampa. Piru Jisumkristumpi kriyichpaqam, paypa randichqa kriyadunna kangillampa, paytalla kasuchpa kawsanallkillampa. 23 Chaqa Jisumkristum kruspi wañuchpa, randiwarqanchiq, amana dyablumpa kriyadunchina kawsananchiq. Chayrallkur runamkuna animachiwamptinchiq, uchata rurananchiqqa, amana kasuchunchu. 24 Chayri kriyiq masitamkuna, ama kambyayllampachu chay allin kustumbrimkimkunata. Achwanri Dyuspi yuyamkuchpa kawsayllampa. 25 Kananqam qamkuna sultirumkunata, sultiramkunata kaychina kunallkillampa: Siñurninchiq Jisusqam qamkunampaqqa mana kamachiwarqanchu: Kaychina ruranqallampa, nichpaqa. Piru nuqa yuyachqaytallam yach'achillkillampa. Kay nichuchqayqam ancha balin. Chaqa Siñurninchiq Jisumkristum llamkimpawachpa yanampawan, allita qamkunata yach'achichunay. 26 Kay tyimpumpiqam Jisuspi kriyichqanchiqrallku, ancha padisichpa kawsallkanchiqllampa. Chaymi nuqampaqqa mas alli kanman, runamkuna, warmimkunampis chay kachqanchinalla kidanambaq. 27 Chayri qamkuna rrispituyuqkunaqa ama amkramkayllampachu. Sultirumkunampis ama warmimkuychu ni runamkuychu. 28 Piru munachpa warmimkuytaqa, warmimkuyllampa. Chaychina warmimkuchpaqam, mana uchataqa rurallkangillampachu. Chaychinallam suq china runamkuchpa, mana uchataqa rurallkanchu. Piru warmiyuqkuna, runayuqkunaqam masta rinllampa padisiq, kay mundumpi kuntrawamptinchiqllampa. Chaymi mas alli kanman, sultirumkuna kanallkillampa. 29 Kriyiq masitamkuna, ancham munani, kayta intyindinallkillampa: Kananmandaqam achla tyimpullana kidan. Chayri ama ancha yuyachunchu kay mundumpa kusasningunampaq. Qamkuna kasaradumkunar ama yuyayllampachu: Warmiyuq ichu runayuq kachpaqam, manana atinichu ñamkayta Dyuspaqqa, nichpaqa. Achwanri chay sampalanlla kaqkunachina tumkuy imampi Dyuspaqlla kawsayllampa. 30 Chayri mayqannimki lutumpi kachpampis, ama anchaqa llamkiychu. (Achwanri Dyuspaqlla kawsayllampa.) Chaychinallar mayqannimki imampaq kuchimkuchpampis, ama anchaqa kuchimkuychu. (Achwanri Dyuspi kriyichqallkirallku mastaqa kuchimkuy.) Chaychinalla qamkuna imata randiqkunampis ama chay kusasnimkimkunampiqa yuyayllampachu. (Achwanri mana nimayuqkunachina Dyuspilla yuyamkuchpa, kawsayllampa.) 31 Kay bidampim wamkinninchiqqa achka kusasniyuq kanchiqllampa. Piru chay kusasninchiqpiqa ama yuyamkuchpachu, mana nimayuqchina kawsachunllampa. Chaqa kay munduqam tumkuy kusasnindin rin uchyamkaq. 32 Chaymi kunallkillampa, ama ancha kunsidirachpachu kawsanallkillampa. Chay sultiru kriyiq masinchiqkunaqam ancha yuyanllampa: ¿Imachinam atini kuchichiyta Siñurninchiq Jisusta? nichpa. 33 Piru warmiyuq kriyiq masinchiqkunaqam masta yuyanllampa kay mundumpi kaq kusaskunampaq: ¿Imachinam kuchichichaq warmiyta? nichpa. 34 Chaychinallam chay runayuq warmimkunampis chay china sultiramkunawanqa mana igwalchu. Chaqa sultiramkunaqam ancha tyimpuyuq, Dyusta sirbinanllampa tumkuy ispiritunwan tumkuy kwirpunwan. Piru runayuqkunaqam masta yuyanllampa kay mundumpi tumkuy ima kaqkunampaq, qusanda kuchichinanllampa. 35 Chaymi kaychina kunallkillampa, qamkunata yanampachunay, Tayta Dyuspaqlla tumkuy chunqu kawsanallkillampa, ama suqta suqta yuyachpa, kunsidiranallki. Piru manam kamachillkillampachu kasaranallki ni ama kasaranallkiqa. 36 Chayri mayqan runampa suq chinan idarniyuqna kamptinqa, allita yuyanqa: Allinachu kasaranambaq ichu mana, nichpa. Allina kasaranan kamptinqa, dijanqa kasaranambaq. Chaqa kasarachpaqam, mana nima uchayuqchu rin kaq. 37 Piru suq tayta chinambaq ancha allita yuyachpa, nimptin: Chinayqa ama kasaranmanchu, nichpaqa, paypis allita rurallkan. 38 Chaychinallam wamkinnimki kasarachpampis, allita rurallkangillampa. Wamkinnimkimkuna mana kasaraqkunampismi mas allita rurallkangillampa. [Nuta: Grigu rimaypim chay kasaranan warmimpaq nin: suq runampa dunsillan, nichpa. Piru manam ancha allitaqa yach'anchiqchu: Chay warmichu taytamba dunsillan ichu nubyumba dunsillan, nichpaqa.] 39 Kanan suq warmi runayuqpis chay runanwanlla kawsanqa. Piru runan wañumptinqa, munachpa kasarayta, atin kasarariyta gustachqan runawan; piru Jisuspi kriyiq masinwanlla. 40 Piru nuqaqam yuyani: Chay biyuda sampalanllana kidachpaqam, masta kuchimkuchpa rin kawsaq. Nuqaqam kriyinimpis: Dyuspa Santu Ispiritunmi yanampawallkan, kaychina kunachunaypaq, nichpa.
1 Mayñ, kananmi munani yach'anallkillampa chay amitu layamkunampaq ufrindachqan aychampaq. Chaypaqqam achka nuqanchiqkuna yach'anchiqllampa: ¿Balinchu chay laya aychata mimkunanchiq ichu mana, nichpa? Piru chayta yach'achpampismi, mana balinchu alabamkananchiq. Achwanri chay manaraq allita yach'aq kriyiq masinchiqkunata kuyachpa yanampachunllampa, mas allita Jisuspi kriyinanllampa. 2 Chayri mayqan runa alabamkachpa nimptin: Ancha yach'ayniyuqmi kani, nichpaqam, manaraq allitaqa yach'anchu Dyus nichqandaqa. 3 Piru Tayta Dyusta allita kuyamptinchiqqam, payqa nuqanchiqkunata wambrangunampaq riqsiwanchiq. 4 Chaymi nuqanchiqkunaqa allita yach'anchiqllampa: Tayta Dyusllam Dyusqa, nichpa. Chaqa manam kanchu suq dyuskunaqa. Piru achka runamkunam mana allita yach'achpachu, kriyinllampa: Kay pachampi anaq syilumpim achka dyuskuna kan, nichpa. Piru chay dyuskunaqam mana kawsaqkunachu. (Chaymi chay aychata ufrisichqangunaqa aychalla.) 6 Chaqa nuqanchiqkunaqam allita yach'anchiqllampa: Taytanchiq Dyusllam allimp Dyusqa. Paymi Taytanchiqllampa. Payllam tumkuy imata rurachqa, nichpa. Chaymi nuqanchiqkunaqa pay munachqanchina kawsanchiqllampa. Siñurninchiqpismi suqlla. Paymi Jisumkristu. Paywanmi Taytanchiq Dyus tumkuy imata rurachqa. Kanan Jisumkristum nuqanchiqkunata kawsachiwanchiq. 7 Piru wamkin kriyiq masinchiqkunaqam challkunataqa manaraq allitachu intyindinllampa. Chaqa unaymandampacham pallkunaqa ancha kriyichqallampa: Chay dyuskunam kawsanllampa, nichpa. Chaymi chay dyuskunampaq ufrindachqan aychataqa mana munanllampachu mimkuyta. Chaqa pallkunaqam yuyanllampa: Chay aychata mimkuchpaqam, chay yanqa dyusta adurallkani. Chaymi uchata rurallkani, nichpa. 8 Piru nuqanchiqkunaqam yach'anchiqllampa: Tayta Dyusqam kuyawanchiqllampa, imata mimkumptinchiq ichu mana mimkumptinchiqpis, nichpa. 9 Piru alli kamptimbis chay aychata mimkunallkiqa, kwidamkayllampa, chay mana alli yach'aq kriyiq masinchiqkunata uchata ama rurachinallkillampa. 10 Kay ijimplumpi yuyachun: Qam Jisuspi yuyamkuchpam, yach'angi: Chay yanqa dyuskunaqam mana kawsaqchu, nichpa. Chaymi chay yanqa dyuspa adurana wasimbi kachpa, mana manchachpachu, chay aychata mimkungi. Piru chaypi mimkullkamptimki, suq kriyiq masinchiq mana alli yach'aq, rimkachuchpa yuyanman: Chay yach'ayniyuq kriyiq masiymi chay dyusta adurallkan, nichpa. Chaychina rimkachuchpamkich, paypis animamkanman chay aychata mimkuchpa, chay yanqa dyusta aduranambaq. 11 Chaychina mas yach'ayniyuq kachpa, chay mimkunata mimkuchpamkich, chay manaraq allita kriyiq masinchiqta dañachingiman chinganambaq. ¡Amar paytaqa dañachiychu! Chaqa Jisumkristuqam wañurqan, paytampis wachanambaq. 12 Chaychina chay kriyiq masinchiqkunata pandachichpaqam, pallkunataqa ancha dañachingiman, ama yach'ananllampa: ¿Imam alli, imam mana allichu? nichpa. Chaychina rurachpaqam, Jisumkristuta kuntrangimanllampa. 13 Chaymi chay mimkuchqayrallku suq kriyiq masiy dañamkamptinqa, mana nunka munanichu chay aychata mimkuyta, chay masiyqa uchata ama ruranambaq.
1 Nuqa kimkiymi Siñurninchiq Jisusta rimkachqa kani. Paymi nuqata amkrawachqa, ampustulnin kanaypaq. Chaymi dirichuyuq kani, Dyustalla kasuchpa, Churin Jisuspaq yach'achimkunaypaq. Chaychina qamkunata yach'achichumptiymi, Siñurninchiq Jisuspi kriyichqallampa kangi. 2 Kinsampch'i wamkin runamkunaqa mana munanllampachu kriyiyta: Pablum Jisuspa ampustulnin, nichpaqa. Piru qamkunaqam allita riqsiwangillampa. Chaqa qamkunata yach'achichumptiyqa, Jisuspi kriyimptimkim, payqa wachachuchqallampa. Chaychina qamkunata yanampachumptiymi Jisuspi kriyinallkillampa, chay rimkachuqkunampis atinllampa yach'ayta: Pabluqam Jisuspa lijitimu ampustulnin, nichpa. 3 Chaymi chay rimaqkunata kaychina nini: 4 Qamkunata yach'achichuchpaqam, dirichuyuq kani, qamkunamanda mantinsyunniyta ch'askinaypaq. 5 Munachpa kasaraytampismi, dirichuyuq kani kasaranaypaq suq kriyiq masinchiq warmiwan, nuqawan pulla purinambaq. Chaqa yach'achimkuq masiy Pidru, Siñurninchiq Jisuspa masanguna, chay suq ampustulkunampismi kadunu warminwan pulla purinllampa, Tayta Dyuspaq yach'achimkuchpa. 6 ¿Ichu yuyangillampa: Pabluwan Birnabillam mana dirichuyuqchu mantinsyunninda ch'askinambaq, nichpa? (Manam chaychinachu.) 7 Suq suldadu sirbisyumpi kachpaqam, mana pay kimkinchu mimkunanda randin mantyinimkananqa, ¿manachu? Suq runa ch'amkrambi ubasta tarpuchpampismi, chay tarpumkuchqanmanda mimkun. Chaychinallam animalkunata michiqkunampis, chay animalkunata qampichpa, lichinda umpyanllampa, ¿manachu? (Chaychinallam nuqallkunampis dirichuyuq kanillampa, kriyiq masinchiqkunamanda mantinsyunniyta ch'askinayllampa.) 8 Chaychina nichuchpaqam, mana runamkuna yuyachqandallachu yach'achillkillampa. Chaqa Muysispa liynimbismi chaychina yach'achimkurqan. 9 Chaymi Dyuspa Santu Librumbi Muysis kaychina yach'achiwanchiq: Animalkunawan trillamkuchpaqa, chimindaqa ama watayllampachu. Mimkunqam, nichpaqa. Piru Tayta Dyus chaychina nichpaqam, mana animalpaqllachu yach'achimkurqanqa. 10 Achwanmi chaychinaqa yach'achiwanchiq yumbay trabajaqkunampaq. Chayri Dyuspaq mayqan yach'achimkuqtampis allita yanampachunllampa. Chaqa suq yampumkuq, suq trillamkuqqam yuyan: Yanampamptiymi, rin quwaq kusichanmanda, nichpa. 11 Chaychinallam nuqallkuna Tayta Dyuspaq yach'achichuchpaqa, suq tarpumkuqchina kanillampa. Chaymi dirichuyuq kanillampa, qamkuna nuqallkunata yanampawanallki mimkunaywan. 12 Chaqa chay suq yach'achimkuqkunaqam dirichuyuq, qamkunamanda mantinsyunninda ch'askinanllampa. Piru pallkunamandaqam nuqawan Birnabi mas dirichuyuq kanillampa, nuqallkunata qamkuna yanampawanallki. (Chaqa nuqallkunam Jisumkristumpaq mas puntata qamkunata yach'achichurqaq.) Chaychina dirichuyuq kachpampismi, nuqallkunaqa mana nimatampis qamkunataqa mañachuchqachu kani yanampawanallkiqa. Achwanmi ancha padisichpa trabajachqallampa kani, mimkunayta randinayllampa, ama ni pimpis yuyanambaq: Imata ganananrallkum Jisuspa chumaq nutisyanda yach'achimkullkan, nichpa. 13 Qamkunaqam allita yach'angillampa: Jirusalimbi Dyuspa adurana wasimbi chay trabajaqkunaqam chay wasimpi ufrindachqan mimkunamanda suq partita ch'askinllampa, nichpa. Chay animal quchqanllampata pata altarpi wanchiqkunampismi chay aychamanda suq partita ch'askinllampa mantyinimkanambaq. 14 Chaychinam Siñurninchiq Jisuspis nichqa, chumaq nutisyanda yach'achimkuqkuna mantinsyunninda ch'askinanllampa chay kriyiq masingunamanda. 15 Piru nuqa chaychina dirichuyuq kachpampismi, mana nunka qamkunataqa mañachuchqachu kani, imatampis quwanallkillampa. Chaymi kay kartata iskibrichpampis, mana nimatampis mañallkillampachu. Achwanmi Jisuspaq yach'achimkuchpaqa, listu kani wañunaypaq imampis mallaqmanda. Chaqa manam munanichu, suqkuna ninambaq: Pabluqam Dyuspaqqa yach'achimkun ganananrallkulla, nichpa. 16 Piru Jisuspaq dibaldilla yach'achimkuchpaqam, mana nimatampis atinichu alabamkayta. Chaqa Siñurninchiqmi kamachiwachqa, chumaq nutisyanda imachinampis yach'achimkunaypaq. Chaymi chaychina mana yach'achimkuchpaqa, ¡amkamkawraq nuqa! 17 Piru nuqa kuchimkuchpa, chumaq nutisyanda yach'achimkumptiyqam, Tayta Dyusqa primyuyta rin quwaq. Piru mana munamptiypismi, Tayta Dyusqa kach'amuwachqa, paypaq yach'achimkunaypaq. 18 Chaymi nuqa Jisumkristumpa chumaq nutisyanda yach'achimkumptiyqa, Tayta Dyusqa ancha yanampawan, dibaldilla yach'achichuchpa, ancha kuchimkunaypaq. Kay kuchimkuchqaymi primyuyqa. Chaymi dirichuyuq kachpa kubrachunaypaqpis, mana nimatampis mañachuchpachu, dibaldilla chay chumaq nutisyanda yach'achillkillampa. 19 Chaychina nuqa mana ni pimpa randichqa kriyadun kachpampismi, yumbaypa randichqa kriyadunchina timkramkachqa kani, mas achka runamkunata, warmimkunata animachinaypaq, Jisuspi kriyinanllampa. 20 Chaymi llaqta masiy isrraylinumkunawan kachpaqa, pallkunachina Muysispa liyningunata allita kasuni. Awnki mana nisisaryu kamptimbis yumbay chay lillkunata kasunaypaq, allita kasuni, mas achka isrraylinumkunata animachinaypaq, Jisuspi kriyinanllampa. 21 Chaychinallam chay mana isrraylinu kaqkunawan kachpampis, pallkunachina kawsani. Chaqa pallkuna, Muysispa liyningunata mana yach'achpaqam, suq laya kustumbrimkunawan kawsanllampa. Chaymi nuqampis pallkunachina kawsachpa, pallkunata yach'achini, Jisumkristumpi kriyinanllampa. Chaychina pallkunata kuyachpaqam, Jisuspa liyninda kasullkani. Chaychinaqam alabis Tayta Dyuspa liyningunatampis kumplillkani. 22 Chaychinallam Dyuspaq chay manaraq allita intyindiqkunawan kachpaqa, nuqampis pallkunachina yuyani, pallkunatampis mas allita Jisuspaq yach'achinaypaq. Achka laya runamkunachinam kachqa kani, imachinampis wamkingunata animachinaypaq, Jisuspi kriyinanllampa. 23 Nuqaqam chaychina rurani, ancha achka runamkuna, warmimkuna Jisuspa chumaq nutisyanda uyachpa, paypi kriyinanllampa, nuqanchiqkunawan wachadu kachpa, pulla kuchimkunanchiqllampa. 24 Qamkunaqam yach'angillampa: Achka runamkunam ancha kallpanllampa, binsimkuchpa, primyunda ch'askinambaq. Piru suqllam binsimkuchpa, chay primyutaqa ch'askin. Chaychinar qamkunampis chay kallpaqkunachina, atichqallkita ruray, tumkuy imampi Dyusta kasunallkillampa. Chaychina kasuchpaqam, Dyusmanda suq ancha chumaq primyullkita ringillampa ch'askiq. 25 Manchu suq runa pugllaqqa allichamkachpa, ancha kwidamkan, tumkuy imampi allita pugllanan. Chaychinam kwidamkan, binsimkuchpa, suq uchyamkaq primyu kurunata ch'askinan. Chay kurunaqam rampramandalla kachpa, achla tyimpumpaqlla duran. Piru nuqanchiqkunaqam suq kuruna mana nunka uchyamkaqta rinchiqllampa ch'askiq primyunchiqtaqa. 26 Chaymi nuqaqa chay kallpaq runamkunachina ichu suq pilyaq runachina, tumkuy ima atichqayta rurani, uchata binsichpa, Dyusta allita sirbinaypaq. Manam yanqallachu pilyaniqa wayrata maqallkaymanchina. 27 Achwanmi kwirpuy munachqandalla mana rurachpachu, ancha allita sujitamkani, primyuyta ch'askinaypaq. Chaqa mana munanichu suqkunata yach'achichpa, chaymanda nuqa dañamkachpa, manana balinaypaq Dyuspaqqa.
1 Kriyiq masitamkuna, allita yuyayllampa Tayta Dyus chay unay agwiluyllampata yanampachqanda. Chaqa payqam pallkunata chay Chumpimka Mar Yamkumpa ch'awpinda pasachirqan pumkutaypa waranda. 2 Chaychina chay mar yamkuta, chay pumkutaypa waranda pasachpaqam, yamkumpi chutimkullkanmanchina karqanllampa, Muysista kasuchpa kawsananllampa. 3 Chaymandaqam Tayta Dyusqa yumbay chay unay agwilullkunata qararqan syilumanda kaq mimkunata. 4 Chaymandaqam Tayta Dyusqa chay atun rumimanda yamkuta surquchpa, yumbayta qurqan umpyananllampa. Chay rumiqam Jisumkristuchina karqan. Chaqa paymi pallkunampa pullan rirqan. 5 Piru chaychina ancha yanampamptimbismi, yaqqa yumbay chay agwilullkunaqa Tayta Dyusta mana munarqanllampachu kasuyta. Chaymi Tayta Dyusqa dijarqan, chay chuncha chamki lugarkunampi waqpi kaypi wañunanllampa. 6 Tayta Dyusqam chay unay agwilullkuna rurachqambaq iskibrichirqan, nuqanchiqkuna pallkunampaq yach'achpa, ama munananchiq mana baliq kusaskunata pallkunachina. 7 Chayri amitu layamkunata ama adurachunllampachu. Chaqa Dyuspa Santu Librumbi niwanchiq: Isrraylinumkunaqam suq fyistata rurachpa, mimkuqllampa, umpyaqllampa, dansaqllampa, (amitu layata adurananllampa), nichpa. 8 Chaymi achka pallkunaqa suqwan suqwan puñuchpa, ancha uchata rurarqanllampa. Chayrallkum suq diyampilla 23.000 isrraylinumkuna wañurqanllampa. Chayri nuqanchiqkunaqa ama pallkunachina suqwan suqwanqa puñuchunchu. 9 Amar mallimpachunchu Tayta Dyusta chay unay agwilullkuna rurachqanchinaqa. Chaqa pallkunaqam yuyarqan: Manam rinchu kastigawaqninchiq, nichpa. Piru Tayta Dyusqam dijarqan, achka kulibramkuna pallkunata kanichpa, wanchinanllampa. 10 Kanan Dyuspaqqa ama kijamkuyllampachu. Chaqa chaychina unay agwilullkuna kijamkumptinllampam, Tayta Dyuspa wanchimkuq anjilnin pallkunata ancha achkata wanchirqan. 11 Tayta Dyusqam chay unay agwilullkunata kastigachpaqa, chay tumkuy ima pasachqambaq Santu Librumbi iskibrichirqan, challkunata liyichpa, kay ultimu tyimpumkunampi, amana pallkunachina kawsananchiqllampa. 12 Chayri yuyachpa: Nuqaqam Jisuspi allita yuyamkuni, nichpampis, allita kwidamkachunllampa, paymanda ama amkramkananchiq. 13 Chaqa kay mundumpi kawsachpaqam, yumbayninchiq ancha mallimpadu rinchiqllampa kaq. Dyablum yumbayninchiqta ancha rin animachiwaqninchiq, uchata rurananchiqllampa. Piru Tayta Dyusqam ancha allin. Ufrisiwachqanchiqtam rin kumpliq. Chaymi tumkuy imampi rin yanampawaqninchiq, ancha padisichpampis, tumkuy ima disgrasyamkunata agwantachpa, dyabluta binsinanchiqllampa. 14 Chayri kuyachqay kriyiq masitamkuna, amitu layamkunataqa ama nimatampis adurayllampachu. 15 Nuqaqam chaychina yach'achillkillampa yuyachpa: Yach'ayniyuq kachpam, ringillampa intyindiq: ¿Pabluchu allimp kaqta yach'achiwanchiq ichu mana? nichpa. 16 (Mayñ, kananqa allita yuyachunllampa chay Santa Mimkunampaq.) Manchu tandanamkuchpa chay santu binuta umpyananchiqqa, Dyusman mañamkuchpa, chay binuta umpyanchiq. Chaychina umpyachpaqam, Jisumkristu nuqanchiqpaq yawarninda ich'achqanrallku, paywanqa suqllana kanchiqllampa. Chaychinallam chay santa tandata mimkuchpampis, Jisuswanqa suq kwirpullana kanchiqllampa. 17 Chaqa achka kachpampismi, suq tandatalla yumbayninchiq mimkunchiqllampa. Chayrallkum yumbayninchiq suq kwirpuchinalla kanchiqllampa. 18 Allita yuyayllampa chay isrraylinu llaqta masillkunampaq. Pallkunaqam Dyusman ufrindachqan animalkunata wanchichpa, Dyuspa pata altarnimbi suq partita rumpachinllampa, suq partita mimkunllampa. Chaqa Dyusta adurachpam, suq partita pulla yumbay mimkunllampa. 19 Amitu layata aduraqkunampismi aychata rumpachichpa, mimkunllampa. Piru chay amitu layaqam mana kawsaqchu. Chaymi chay aychaqa aychalla kidan. Chaqa chay amitu layamkunaqam mana atinchu dañachiyta, ama mimkunanchiqqa. 20 Piru amitu layamkunata aduraqkunaqam animalningunata wanchichpaqa, aychanda dyablumkunata ufrisillkanllampa. Manam Tayta Dyustaqa qunllampachu. Chaymi nuqaqa mana munanichu nima tratuta ruranallkillampa dyablumkunawanqa, chay aychata mimkuchpaqa. 21 Chaqa Jisuspa Santa Mimkunanda mimkuchpa, paypa kumpanmanda umpyachpaqa, mana balinchu dyablumkunampa mimkunanda mimkunallkillampa, ni pallkunampa kumpanmanda umpyanallkillampa. 22 Chaqa chaychina rurachpaqam, Siñurninchiqtaqa ancha piñachinchiqman. Piru ama yuyachunllampachu: Tayta Dyustaqam atinchiq binsiyta, nichpaqa. 23 Wamkingunam ninllampa: Tumkuy ima munachqanchiqtam atinchiq rurayta, nichpa. Ari, chaychinñm. Piru wamkin kusaskunaqam mana yanampawanchiqchu, Dyuspi mas allita yuyamkuchpa, suqkunata animachinanchiqqa. 24 Chayri suqkunata yanampachpa, animachichpa, kawsachunllampa. Amar nuqanchiqpaqllaqa imata maskachpa kawsachunchu. 25 Chay plasampi tumkuy ima kaqta randichpaqam, atingi mimkuyta. Chaqa mimkuchpaqam, mana nima uchayuqchu kangi. Chayri aychata randichpaqa, ama tampumkuyllampachu: ¡Kay aychaqachu amitu layamkunata quchqan ichu mana? nichpaqa. 26 Chaqa Dyuspa Santu Librumbim nin: Tayta Dyusllam kay munduta, tumkuy imandinda rurachqa, nichpa. Chaymi tumkuy ima kaqqa Tayta Dyuspa. 27 Chayri mayqan runa Jisuspi manaraq kriyiq kumbidachumptin paywan mimkunallkiqa, munachpa riytaqa, riy. Piru richpaqa, ama nimata tampuchpachu, ni llamkichpachu, mimkuylla. 28 Piru mayqan runa nichumptin: Kay aychataqam chay amitu layamkunata ufrindachqanllampa nichpaqa, ama mimkuychu, chay nichuq ama yuyanambaq: Jisuspi kriyiqpismi chay amitu layamkunata adurallkan, nichpa. 29 Manam nillkillampachu: Chay aychata mimkuchpam, chay amitu layamkunata adurallkangi, nichpaqa. Achwanmi chaytaqa nillkillampa, chay rimkachuqkuna ama yuyanambaq: Chay amitu layamkunatam adurallkan, nichpa. Piru kinsampch'i tampuwangiman: ¡Pablu, imarallkutaq chay suqkuna yuyachqanrallkulla mana balinchu chay aychata mimkunayqa? 30 Chaqa nuqaqam Tayta Dyusta pagimkuchpa mimkullkani. Chaychina mimkumptiyqa, ¿imarallkum suq runaqa atinman niwayta: Chayta mimkuchpaqam, mana allitachu rurallkangi, nichpaqa? 31 (Piru nuqa Pablum kaychina nillkillampa:) Amaraq mimkuchpa ichu umpyachpa ichu imata rurachpa, puntata allita yuyay: Kaychina rurachpaqam, suqkunata ancha munani animachiyta, Tayta Dyusta alabananllampa, nichpa. 32 Kwidawkich qamkuna imata mimkumptimkillampa ichu ruramptimkillampa, chay isrraylinumkuna ichu mana isrraylinu kaqkuna ichu chay kriyiq masinchiqkuna disanimamkanman, Dyuspi ama yuyamkunanllampa. 33 Nuqaqam tumkuy imata allita rurani, yumbay rimkawaqkunata animachinaypaq, Dyuspi mas allita kriyinanllampa. Chaqa manam nuqampaqllachu imata rurachpa kawsani. Achwanmi yumbayta yanampani, pallkunampis Jisuspi kriyichpa, wachadu kananllampa.
1 Nuqa Pablum atichqallkaman rurani, Jisumkristuchina kawsanaypaq. Chaychinallar qamkunampis nuqa kawsachqaychina kawsayllampa. 2 Kriyiq masitamkuna, qamkunaqam nuqata yuyawachpa, yach'achichuchqayta kasullkangillampa. Chaymi alaballkillampa. 3 Piru munanimpismi kay kunachuchqayta allita intyindinallkillampa: Jisumkristum Tayta Dyusta allita kasuchpa kawsan. Chaychinallar yumbay runamkuna Siñurninchiq Jisusta allita kasuchpa kawsachunllampa. Chaychinallar warmimkunampis runanda allita kasuchpa kawsanqallampa. 4 Qamkuna ullqumkunatam kaychina nillkillampa: Umallkitaqa ama pambaychu, Tayta Dyusman mañamkunallkiqa ichu Dyus nichqanda uyachpa, suqkunata ninallkillampa. Chaqa umallkita pambachpaqam, Jisustaqa mana rrispitallkangichu. 5 Piru warmimkuna Dyusman mañamkunambaq ichu Dyus nichqanda uyachpa, suqkunata willanambaqqa, umanda pambanqa. Piru umanda mana pambachpaqam, ancha panqamkuypaq, aqchanda simpralla rutuchqachina kanman. [Nuta: Chay unay tyimpumkunampim suq warmi umanda mana pambamptinqa, nirqanllampa: Chay warmiqam suqwan suqwan puñun, nichpa.] 6 Chayri suq warmi umanda mana munachpa pambaytaqa, mas alli kanman yumbay aqchanda rutunambaq. Piru chay paninchiq yuyachpa nimptin: ¡Ichichin! Manam munanichu rutumkayta, nichpaqa, umanda pambanqa. 7 Piru manam nisisaryuchu ullqumkuna umanllampata pambananqa. Chaqa Tayta Dyusqam ullquta puntata rurarqan, Dyuschina yuyanambaq, chay runawan Dyus kuchimkunambaq. Piru warmitaqam rurarqanqa, ullqumkuna warminwan kuchimkunambaq. 8 Chaqa Tayta Dyusqam warmitaqa ullqumanda rurarqan. Manam warmimandachu ullqutaqa rurarqan. 9 Tayta Dyusqam warmitaqa rurarqan, ullqu sampalan kachqanrallku. Manam warmi sampalan kachqanrallkuchu, ullqutaqa rurarqan. 10 Chayri warmiqa umanda pambanqa, anjilkuna chayta rimkachpa, yach'ananllampa: Chay warmiqam runanda kasun, nichpa. 11 Chaychina kamptimbismi, Jisuspi kriyimptinchiqqa, warmimkunampis ullqumkunampis ancha yanampanamkunchiq. Chaymi warmimkunalla ichu ullqumkunalla kamptinqam, mana atinchiqmanchu kawsayta. 12 Chaqa Tayta Dyus suq ullquta rurarqan. Chaymandaqam chay ullqumanda suq warmita rurarqan. Piru Dyusmi kamachqa karqan, yumbayninchiq warmimkunamanda nasinanchiq. Chaqa Tayta Dyusllam tumkuy imata ruran. 13 Mayñ, qamkuna kimkimki allita yuyayllampa: Chay warmimkuna kultumpi tandamkachpa Dyusman mañamkunanqam, ancha alli umanllampata pambananllampa. 14 Chaqa yumbayninchiqmi allita yach'anchiqllampa: Suq ullqu warmichina ancha largu aqchayuq kachpam, ancha panqamkuypaq, nichpa. 15 Piru suq warmi ancha largu aqchayuq kachpaqa, kuchimkunqa. Chaqa Tayta Dyusqam chay largu aqchandaqa qurqan, umanda chumaqta pambanambaq. 16 Piru yumbay kay nichqayta wamkinnimki mana munachpa kasuwaytaqa, allita yach'ayllampa: Jisuspi yumbay kriyiqkunaqam chaychinalla yuyanchiqllampa. Chaqa manam suq laya kustumbriyuqqa kanchiqllampachu, nichpa. 17 Tandanamkuchpa Tayta Dyusta alabanallkiqa, allita ruranallkimanda qamkunampura dañachinamkungi. Chaymi kay kartata kach'amuchpaqa, mana atinichu alabachuyta. 18 Puntatam kayta munani nichuyllampata: Qamkuna tandanamkuchpa Tayta Dyusta alabanallkiqach, qamkunampura kuntranamkungi. Chayta uyachpaqam, allimpta suq partita kriyini. 19 Chaychina kuntranamkuchpa kawsamptimkiqam, rimkachuqkuna rinllampa yach'aq: Mayqannimkimkunam Jisuspi allimpta kriyillkangillampa, mayqannimkimkunam mana allimptachu kriyingillampa, nichpa. 20 Chaychina anyanamkuchpaqam, mana balinchu tandanamkuchpa Santa Mimkunata mimkunallkiqa. Chaqa mana allimptaqa Jisustaqa adurallkangichu. 21 Chaqa qamkunaqam mimkunallkillampa urasqa mana chuyanamkuchpachu, wamkinnimkiqa achkata mimkungillampa, umpyangillampa. Chaymi wamkinnimkiqa mallaqna kidangillampa. Piru chay wamkinnimkiqam ancha mimkuchpa, umpyachpa mach'angillampa. 22 Chaychina chay pubri kriyiq masinchiqkunata mana qaramptimkillampaqam, ancha panqamkunllampa. Chaychina rurachpaqam, Dyuspa wambrangunata disprisyallkangillampa. ¡Chaychina ruramptimkiqam, qamkunataqa mana atinichu alabachuyta! Chaychina ruranallkimandaqa ¿manachu kan imampis wasimkimpi, mimkunallki umpyanallkiqa? 23 Nuqaqam Siñurninchiq Jisus yach'achiwachqanda qamkunata kaychina yach'achichurqaqllampa: Chay tuta Judas intrigamkunan kamptinmi, Jisusqa ampustulningunawan kachpa, suq kachangata piskachpa, 24 Tayta Dyusman pagimkurqan. Chaymandaqam, chay kachangata pitichpa, pallkunata quchpa, nirqan: Kay kachangata mimkuyllampa. Kayqam kwirpuy. Ancha padisichpam rini wañuq, qamkunata wachachunaypaq. Chayri qamkunaqa kananmandampacha kaychina kachangata mimkuyllampa, ama qunqawanallkillampa, nichpa. 25 Chaychina mimkuchpaqam, Jisusqa suq kumpa binuta piskachpa nirqan: Kay binuqam yawarniy. Nuqam yawarniyta ich'achpa, muchuq tratuta qamkunawan rini ruraq. Chayri qamkunaqa kanamandampacha kaychina binuta umpyayllampa, ama qunqawanallkillampa, nichpa. 26 Chaychina chay kachangata mimkuchpa, chay binuta umpyachpaqam, yach'achimkullkanchiq: Jisumkristum wañurqan wachawananchiq, nichpa. Chaychinaqam yach'achimkunchiq syilumanda chamunangaman. 27 Chaqa suq runa ichu suq warmi Dyusta mana kasuchpa, chay kachangata mimkuchpa, chay binuta umpyachpaqam, Jisumkristu wañuchqambaqqa asimpallkanchina. Chay asimpaqchinaqam ancha uchayuqna kidan. 28 Chayri amaraq chay kachangata mimkuchpa, chay binuta umpyachpaqa, puntata chunqunchiqpaq allita yuyachun: ¿Uchayuqchu kani ichu mana? nichpa. 29 Chaymanda chay kachangata mimkuchpa, chay binuta umpyachpaqa, allita yuyachunllampa: Siñurninchiq Jisuspa kwirpunmi ancha santu, nichpa. Piru mana allitachu yuyachpa mimkumptinchiqqam, Tayta Dyusqa ancha rin kastigawaqninchiq. 30 Chaymi achka qamkunaqa qachyaq kangillampa, mana nima jwirsayuqchu kangillampa. Kanan wamkinnimkiqam wañuchqana kangillampa. 31 Piru kimkin nuqanchiqkuna puntata Dyuswan, runa masinchiqkunawan alliyachpa, chay Santa Mimkunata mimkumptinchiqqam, Tayta Dyusqa mana rinchu kastigawaqninchiq. 32 Piru mana allita rurachpa mimkumptinchiqqam, Tayta Dyusqa kastigawanchiq, allita rurachpa, amana chingananchiq chay mana kriyiqkunawan. 33 Chayrallkur kuyachqay masitamkuna, tandanamkuchpa chay Santa Mimkunata mimkunallkillampaqa, suqwan suqwan chumaqta chuyanamkuchpa mimkuyllampa. 34 Piru mayqannimki mallaqnachpaqa, wasimkimpilla mimkuyllampa. Chaymandaqa tandanamkuchpa, chay Santa Mimkunata chumaqta mimkuyllampa, Tayta Dyus ama kastigachunambaq. Qamkunaman chamuchparaqmi, wamkin kusaskunataqa rini yach'achichuqllampa.
1 Kuyachqay kriyiq masitamkuna, munanim allita yach'anallkillampa: Dyuspa Santu Ispiritunmi yanampawanchiq, suqninchiq suq layata, suqninchiq suq layata rurachpa, Dyuspaq trabajananchiq. 2 Qamkuna Jisuspi manaraq kriyichpaqam, dijamkarqallki, suqkuna pandachichunan, ancha yuyamkunallki mana kawsaq mana rimaq amitu layamkunampi. Chaypaqmi ancha allita yach'angi. 3 Chaymi kananqa munani yach'anallkillampa: Dyuspa Santu Ispiritun suq runata rimachimptinqam, mana atinchu niyta: Jisusri infyirnuman rinqa, nichpaqa. Chaqa Dyuspa Santu Ispiritun rimachiwamptinchiqqam atinchiq niyta: Jisusmi kamachimkuqniy, nichpa. 4 Dyuspa Santu Ispiritunqam nuqanchiqkunata yanampawanchiq, suqkuna suq layata, suqkuna suq layata rurachpa, Dyusta sirbinanchiqllampa. Chaychina achka laya trabajadurchina kamptinchiqpismi, suq Santu Ispiritulla yumbayninchiqta yanampawanchiq. 5 Chaychina suqkuna suq layata, suqkuna suq layata rurachpampismi, Siñurninchiq Jisustalla sirbinchiqllampa. 6 Chaychinallam wamkinninchiq Dyuspaq suq laya trabajuta, wamkinninchiq suq laya trabajuta ruramptinchiqpis, Tayta Dyuslla pudirninwan yumbayninchiqta yanampawanchiq, tumkuy challkunata rurananchiqqa. 7 Chaychinam Dyuspa Santu Ispiritunqa yumbayninchiqta yanampawanchiq, yach'ananchiq: Santu Ispiritum nuqawan, nichpa. Chaychinam yanampawanchiq, kriyiq masimpura yanampanamkunanchiq. 8 Chaqa Tayta Dyusqam Santu Ispiritunwan wamkinninchiqta yanampawanchiq, paypaq allita yach'achpa, suqkunata yach'achinanchiq. Wamkinninchiqtam chay Ispiritunwanlla yanampawanchiq, ancha yach'ayniyuq kachpa, suqkunata kunananchiqllampa. 9 Chay Ispiritunllam wamkinninchiqta yanampawanchiq, Tayta Dyuspilla tumkuy chunqu yuyamkunanchiq. Wamkinninchiqtam chay Ispiritunlla yanampawanchiq, qachyaqkunata kach'amkachinanchiq. 10 Wamkinninchiqtaqam yanampawanchiq, milagrumkunata rurananchiqllampa. Wamkinninchiqtaqam yanampawanchiq, pay niwachqanchiqta uyachpa, suqkunata ninanchiqllampa. Wamkinninchiqtaqam yanampawanchiq, atinanchiq yach'ayta: ¿Pitam Dyuspa Santu Ispiritun yanampallkan? ¿Pitam dyablu yanampallkan? nichpa. Wamkinninchiqtaqam yanampawanchiq, mana yach'achqanchiq rimallkunampi rimananchiqllampa. Wamkinninchiqtaqam yanampawanchiq, suq laya rimaypi rimachqanda, suqkunata intyindichinanchiq. 11 Chaychinam chay Santu Ispiritulla pay munachqanchina yumbayninchiqta yanampawanchiq, suqkuna suq layata, suqkuna suq layata rurananchiqllampa. 12 Kwirpunchiqpi achka laya partimkuna kamptimbismi, suq kwirpuyuqlla kanchiqllampa. Chaychinallam yumbayninchiq, achka laya runa, warmi kachpampis, Jisumkristumpi kriyichpaqa, suq kwirpuchinalla paywanqa kanchiqllampa. 13 Chaymi Isrrayilmanda kachpa ichu Grisyamanda kachpa, randichqa kriyadu kachpa, ichu mana randichqa kriyadu kachpampis, piru Jisuspi kriyichpa, chutimkuchpaqa, suq kwirpuchinalla kanchiqllampa. Chaqa Dyuspa Santu Ispiritun nuqanchiqman chamuchpaqam, chunqunchiqpi chutichiwaqninchiq, nuqanchiqkunampi tiyan, Jisuswan suq kwirpuchinalla kananchiqllampa. 14 Piru kwirpunchiqqam suqlla kachpampis, achka laya partiyuqkuna. 15 Mayñ, ch'amkinchiq niwamptinchiq: Nuqaqam mana mamkimkichu kani. Chaymi mana qamba kwirpullkichu kani, nichpampismi, chay ch'amkinchiqqa kwirpunchiqlla. 16 Ichu rinrinchiq niwamptinchiq: Nuqaqam mana ñawimkichu kani. Chaymi mana qamba kwirpullkichu kani nichpampismi, chay rinrinchiqqa kwirpunchiqlla. 17 Chaqa yumbay kwirpunchiq suq atun ñawilla kamptin, mana rinriyuq kachpaqam, mana nimatampis uyamkunchiqmanchu, ¿manachu? Ichu yumbay kwirpunchiq rinrilla kamptinqam, mana nimatampis mutkimkunchiqmanchu, ¿manachu? 18 Piru Tayta Dyusqam pay munachqanchina yumbay partimkunata rurachqa kwirpunchiqpiqa. 19 Piru rinrinchiqlla ichu ñawinchiqlla kamptinqam, mana kwirpuyuqchu kanchiqmanllampa. 20 Chaymi kwirpunchiqpi achka laya partimkuna kamptimbis, suq kwirpuyuqlla kanchiqllampa. 21 Chaqa ñawinchiqqam mana ninmanchu mamkinchiqtaqa: Achuy kwirpuymanda. Manam nisitallkichu, nichpaqa. Umanchiqqam ch'amkinchiqkunata mana ninmanchu: Manam munanichu kwirpuypi kanallkiqa, nichpaqa. 22 Achwanmi chay mas dibil partisitu ancha yanampan kwirpunchiqtaqa. 23 Ichu kwirpunchiqpa suq partimbaq yuyachpa: Kay partita suqkuna rimkamptinqam, ancha panqamkuyman, nichpa, chay partitaqam mas chumaqta pambanchiq mudananchiqwan, ama rimkanambaqllampa. 24 Piru chay mas chumaq partinchiqkunaqam mana munanchu ancha kwidananchiqqa. Chaychinam Tayta Dyusqa rurawachqa kanchiq, chay panqamkuypaq partita masta kwidananchiqllampa. 25 Chaqa Tayta Dyusqam munan, kwirpunchiqpa yumbay partinguna pulla yanampanamkunan. 26 Chaymi suq parti nanamptinqa, tumkuy kwirpunchiq padisin. Ichu runamkuna kwirpunchiqpa suq partinda alabamptinqa, tumkuy kwirpunchiq kuchimkun. 27 Chaychinallam nuqanchiqkunampis Jisumkristumpi kriyichpaqa, yumbayninchiq paypa kwirpumba partinguna kanchiqllampa. 28 Chaymi Jisuspi kriyiqkuna tandanamkumptinchiq, Tayta Dyus yanampawanchiq, achka laya karguyuqkuna kananchiqllampa. Puntatam yanampan, ampustulninguna kananllampa. Chaymandaqam yanampan, kay laya sirbimkuqningunampis kananllampa: paypaq rimaqkuna, Santu Librunmanda yach'achimkuqkuna, milagrumkunata ruraqkuna, qachyaqkunata kach'amkachiqkuna, suqkunata yanampaqkuna, kriyiq masingunata chumaqta kamachiqkuna, mana intyindiq rimallkunata rimaqkunampis kananllampa. 29 Piru Tayta Dyusqam mana yumbayninchiqtachu yanampawanchiq, ampustulnin ichu paypaq rimaq kananchiqllampaqa. Manam ni yumbayninchiqtachu yanampawanchiq, yach'achimkuqkuna kananchiq ichu milagrumkunata rurananchiq, 30 ichu qachyaqkunata kach'amkachinanchiq, ichu mana yach'achqanchiq rimallkunata rimananchiq. Manam yumbayninchiqtachu yanampawanchiqqa, chay suq rimallkunampi nichqanda intyindichinanchiq. 31 Chayri Tayta Dyusman mañamkuchunllampa, chay mas allin karguyuqkuna kananchiq. Piru kananqam rini yach'achichuqllampa, yumbay chay kargumkunamanda mas alli kaychina rurananchiqllampa.
1 Nuqa runamkunampa, anjilkunampa rimayningunampi atichpa rimayta, piru suqkunata mana kuyachpaqam, mana nimampaqpis balinichu. Achwan suq pandirita ch'ilyallkaqchina ichu suq tambur kunyallkaqchinallam kani. 2 Chaychinallam Dyuspaq rimaq kachpa, ancha yach'ayniyuq kachpa, Dyuspa mas trabajus yuyayningunampaq allita intyindichpampis, piru suqkunata mana kuyachpaqam, mana nimampaqpis balinichu. Kanan Tayta Dyuspi ancha yuyamkuchpa, payman mañamkuchpa, suq atun qaqa suq laduman rinambaqqa, piru suqkunata mana kuyachpaqam, mana nimampaqpis baliymanchu. 3 Chaychinallam tumkuy imallkunata pubrimkunata quchpa ichu Dyusta kuntraqkunaman intrigamkachpa, pallkuna rumpachiwachpa wanchiwananllampa, piru suqkunata mana kuyachpaqam, yanqa padisillkani. Chaqa chay rurachqayqam mana balinmanchu Dyuspaqqa. 4 Piru suqkunata allimpta kuyachpaqam, pallkunawanqa mana piñamkunchiqchu. Achwanmi kuchimkuchpa, pallkunata yanampanchiqllampa. Manam imbidyamkunchiqchu ni alabamkanchiqchu ni afaniruyanchiqchu. 5 Manam malkriyaduchu kanchiq, ni nuqanchiqpaqllachu tumkuy imata munanchiq, ni piñamkunchiqchu, ni binganamkunchiqchu. 6 Runa masinchiq maluta ruramptinqam, mana kuchimpanchiqchu. Piru allita rurachpa, allimp kaqta rimamptinqam, ancha kuchimkunchiq. 7 Suqkunata kuyachpaqam, ima maluta rurawamptinchiqpis, pallkunataqa agwantanchiq. Chay kuyachqanchiqpa wachanda rimamptinllampaqam, mana daschu kriyinchiq. Achwanmi paypiqa mana challkuq yuyamkunchiq. 8 Achka laya baliq kusaskunam rinllampa uchyamkaq. Chaqa Jisumkristu chamumptinqam, manana nisisaryuchu rin kaq, Dyuspaq rimaqkuna kanambaq, ni suq laya rimallkunampi rimaqkuna kanambaqqa. Tumkuy yach'achqanchiqpismi manana rinchu baliq. Piru tumkuy tyimpumi ancha rin baliq kuyanamkunanchiq. 9 Kananqam manaraq ancha allitaqa Dyuspaqqa yach'anchiqllampachu. Manaraqmi ni pay nichqanda ancha allitaqa yach'achimkunchiqchu. 10 Piru Jisumkristu chamumptinqam, yumbayninchiq ancha allita rinchiqllampa yach'aq Dyuspaqqa. Chaymi manana nisisaryuchu rin kaq, ni pitampis paypaq yach'achinanchiqqa. 11 Wambrallaraq kachpaqam, suq wambrachina rimachpa, yuyachpa, yach'achpa, kawsarqay. Piru atunna kachpaqam, manana chay wambra kachqaychinachu kawsani. 12 Chaychinallam kanangaman chay wambramkunachina kachpaqa, Tayta Dyuspaqqa manaraq allitachu yach'anchiqllampa. Manchu suq salqa ispijumpi qaqllanchiqta champachpaqa, salqatatalla rimkanchiq. Chaychinallam kananqa achlitatalla yach'anchiq Jisuspaqqa. Piru pay chamumptinqam, ancha allita rimkanamkuchpa, pay riqsiwachqanchiqchina, paytampis ancha allita rinchiqllampa riqsiq. 13 Kanan tumkuy tyimpum Jisuspi rinchiq kriyiq. Tumkuy tyimpum paypi rinchiq yuyamkuq: Paywanmi rini kawsaq nichpa. Tumkuy tyimpum payta, kriyiq masinchiqkunata rinchiqllampa kuyaq. Piru chay kimsamandam suqnin masta balin rurananchiq. Chaqa masta balin kuyanamkunanchiq.
1 Chayri atichqanchiqkaman allita kuyanamkuchpa, kawsachunllampa. Dyusman mañamkuchumbis, yanampawananchiq, suqninchiq suq karguyuq, suqninchiq suq karguyuq kachpa, paypaq trabajananchiq. Piru chay suq kargumkunamandar masta mañamkuchunllampa, Dyuspaq rimaqkuna kananchiqllampa. 2 Chaqa chay mana intyindichqanchiq rimallkunampi rimachpaqam, Tayta Dyuswanlla parlallkanchiq. Piru chay uyawaqninchiqkunam mana nimatampis intyindiwanchiqchu. Achwanmi Dyuspa Santu Ispiritumba pudirninwan chay mana intyindiypaq kusaskunata Dyustalla nillkanchiq. 3 Piru Dyuspaq rimaqkuna pay parlachichqanda willachpaqam, suqkunata kunswilachpa, animachinllampa, Dyuspi mas allita yuyamkuchpa kawsananllampa. (Chaqa willanllampa nuqanchiqkunampa rimayninchiqpi.) 4 Chay mana intyindiypaq rimayta rimaqqam pay kimkinlla animamkan: Mana intyindichpampismi, Tayta Dyus munachqanda rimallkani, nichpa. Piru Dyuspaq rimaq Dyus parlachichqanda rimayninchiqpi willachpaqam, yumbayninchiqta animachiwanchiq, Dyuspi mas allita yuyamkunanchiq. 5 Nuqampaqqam alli kanman, yumbaynimki mana intyindiypaq rimallkunampi rimanallkillampa. Piru mas allim kanman, yumbaynimki Tayta Dyus parlachichuchqanda rimayninchiqpi rimanallkillampa. Chaqa Dyuspaq rimaqkunaqam masta balin chay suq laya rimayta rimaqkunamandaqa. Chayri suq kriyiq masinchiq mana intyindichpa, suq rimaypi rimamptinqa, suq kriyiq masinchiqqa allita intyindichimkunqa chay rimachqanda, Santu Ispiritu yanampamptin. Chaychina yumbay kriyiq masinchiqkunata intyindichimptinqa, Dyuspi mas allita rinllampa yuyamkuq. 6 Chayri kriyiq masitamkuna, nuqa chamuchpa qamkunata watumkuchuq, mana intyindiypaq rimaypi imata nichuchpaqam, mana nimatampis yach'achichuymanchu. Piru Dyus parlachiwachqanda rimayninchiqpi nichuchpa, ichu suq yach'allkunata intyindichichuchpa, ichu Dyuspa Santu Librunmanda yach'achichuchpaqa, mas allita yach'achichuyman qamkunataqa. 7 Chaychinallam suq runa kinata ichu gitarra layata mana allita waqachimptinqa, mana yach'anchiqchu: ¿Mayqan tunadatam waqachillkan? nichpaqa. 8 Ijirsitumpi kurnitata mana allita waqachimptinqam, suldadumkunaqa mana yach'anqallampachu rinambaq pilyaqqa. 9 Chaychinallam nuqanchiqkunampis tandanamkuchpa, mana intyindiypaq rimayta rimamptinchiqqa, mana ni pimpis yach'anmanchu: ¿Imatam niwallkanchiq? nichpaqa. Chaychina mana intyindiwamptinchiqqam, yanqa rimallkanchiq. Chaqa wayrawanchinam parlallkanchiq. 10 Kay mundumpiqam ancha achka rimallkuna kan. Chay rimallkunaqam ancha balin runamkuna kada nasyumbi intyindichinamkunan. 11 Piru suq runa mana yach'achqanchiq rimaypi imata niwamptinchiqqam, furastiru runampaq riqsinchiq, ¿manachu? Chaychinallam paypis nuqanchiqkunata furastirumpaq riqsiwanchiq. 12 Qamkunaqam ancha munangillampa Dyuspa Santu Ispiritun yanampachunambaq, ancha allita trabajanallkillampa Dyuspaq ¿manachu? Piru mayqannimki Dyuspaq trabajachpaqa, ancha munayllampa kriyiq masinchiqkunata animachiyta, Dyuspi mas allita yuyamkunanllampa. 13 Chayri mana intyindiypaq rimaypi rimachpaqa, Dyusman mañamkuchun, chay rimachqanchiqta chay uyaqkunampa rimaynimbi ninanchiq, pallkunampis intyindinambaq. 14 Chaqa mana intyindiypaq rimaypi Dyusman mañamkuchpaqam, ispiritunchiqwanlla payman mañamkullkanchiq. Piru yuyayninchiqwanqam mana nimatampis intyindillkanchiqchu: ¿Imatam nillkani? nichpa. 15 ¿Imachinam Tayta Dyusman mañamkuchun? Ispiritunchiqwan mañamkuchpa, mana intyindichpa, tumkuy yuyayninchiqwambis mañamkuchun, allita intyindinanchiq. Chaychina ispiritunchiqwan kantachpa, yuyayninchiqwambis kantachun, allita intyindinanchiq. 16 Chaqa Tayta Dyusta ispiritunchiqwanlla alabamptinchiqqam, yumbay uyawaqninchiqqa mana nimatampis intyindinmanllampachu. Chaymi mana atinqallampachu pullanchiq Tayta Dyusta alabayta: ¡Chaychina kanqa! nichpaqa. 17 Chaychina mana intyindiypaq rimaypi Tayta Dyusta pagimkuchpaqam, kinsampch'i ancha chumitaqta pagimkullkanchiqman. Piru yumbay chay uyawaqninchiqtaqam mana nimatampis animachillkanchiqchu, Jisuspi mas allita kriyinanllampa. 18 Tayta Dyus yanampawamptinmi, nuqaqa yumbay qamkunamanda masta rimani chay mana intyindiypaq rimallkunampi. Chaymi Tayta Dyusta ancha pagimkuni. 19 Piru kriyiq masinchiqkunawan tandamkachpaqam, mana balinchu chay mana intyindiypaq rimallkunampi rimanaypaqqa. Chaqa 10.000 palabramkunata chay rimallkunampi rimanaymandaqam, masta balin sinku palabritastalla yach'achimkunaypaq chay uyamkuqkunampa rimaynimbi, pallkuna allita yach'amkunanllampa. 20 Masitamkuna, amar qawch'u kayllampachu, maluta ruranallkillampa. Achwanri wambramkunachina kayllampa, ama maluta ruranallkimpaq. Piru Tayta Dyuspaqqar yach'ayniyuq mayurkunachina kayllampa. 21 Chaymi Tayta Dyus Santu Librumbi nin: Kay nasyunmanmi suq nasyungunamanda rini kach'amuq suq laya rimallkunampi rimaqkunata, nuqampaq yach'achimkunambaq. Piru pallkuna nuqampaq yach'achimkumptimbismi, kay nasyumbi tiyaqkunaqa mana rinllampachu kasuwaq nichpa. 22 Chaychina Tayta Dyus yanampawamptinchiq, mana intyindiypaq rimallkunata rimananchiqqam, Jisuspi mana kriyiqkuna chay rimallkunata uyachpaqa, rinllampa qamimkaq uyamkuq: ¡Imachinataq waq rimallkunampiqa rimallkanllampa? nichpa. Piru Tayta Dyus niwachqanchiqta, rimayninchiqpi klarituta nimptinchiqqam, kriyiq masinchiqkuna qamimkachpa, rinllampa allita uyawaqninchiq. 23 Piru kriyiq masinchiqkunawan tandanamkuchpa, yumbay qamkuna mana intyindiypaq rimallkunata rimamptimkiqam, suq runa mana kriyiq ichu suq runa Dyuspaq mana allita intyindiq uyachuchpa, yuyanman: Waqkunaqam lumkumkuna, nichpa. 24 Piru kimkin rimaynimkimpi Dyus parlachichuchqanda willamptimkiqam, suq runa mana kriyiq ichu suq runa Dyuspaq mana allita intyindiq willachqallkita uyachpaqa, rinna intyindiq: Ancha uchayuqmi kani, nichpa. 25 Chaqa Dyuspa Santu Ispiritunqam rin parlachichuq chay mana kriyiq runa chunqumbilla yuyachqanda. Chay yuyachqambaq willamptimkiqam, chay mana kriyiqqa qunqurimkuchpa, Tayta Dyusta adurachpa, rin niq: Allibmi Dyusqa paypi kriyiqkunawan kachpa, yanampallkan, yuyachqayta yach'ananllampa, nichpa. 26 Kriyiq masitamkuna, challkunata yach'achpaqa, ¿imam alli rurananchiqllampa? Qamkuna tandanamkumptimki, wamkinnimkiqa kantanqa. Chaymandaqa wamkinnimkiqa Dyuspa Santu Librunmanda yach'achimkunqa. Chaymandaqa wamkinnimkiqa Tayta Dyus parlachichuchqanda suqkunata willanqa. Chaymandaqa wamkinnimkiqa suq mana intyindiypaq rimaypi rimanqa. Chaymandaqa wamkinnimkiqa chay mana intyindiypaq rimaypi nichqanda intyindichinqa. Tumkuy challkunataqar rurayllampa, Jisuspi kriyiq masinchiqkuna Dyuspi masta yuyamkuchpa kawsananllampa. 27 Piru tandanamkuchpaqa, ama rimayllampachu mana intyindiypaq rimallkunampillaqa. Achwan munachpa chaychina rimaytaqa, ichkay ichu kimsalla suqpa suqpa rimanqallampa. Piru suq kriyiq masinchiq chay rimachqanda yumbay qamkunata intyindichichunqa. 28 Piru mana pimpis kamptin intyindichichunambaq, mana balinchu qamkunampa ñawpallkimpi rimanambaq chay mana intyindiypaq rimallkunampiqa. Achwanri chunqumba umkumbilla Tayta Dyuswanlla chaychina parlanqa. 29 Chaychinallar Dyuspa Santu Ispiritun qamkunata yanampachumptin Dyus parlachichuchqanda suqkunata willanallkiqa, ichkay ichu kimsalla chaychina willayllampa. Suqnimkimkunaqar ancha allita uyayllampa yach'anallkillampa: ¿Allimptachu Dyus parlachichqanda willallkan ichu mana? nichpa. 30 Piru Dyuspa Santu Ispiritun suq tiyallkaq kriyiq masinchiqta yanampamptin, Dyus parlachichqanda willanambaqqa, chay punta rimallkaqqa nillkachqanda das uchyanqa, chay tiyallkaqtampis partinda qunambaq. 31 Chaychina Dyuspa Santu Ispiritun qamkunata yanampachumptin, Dyus parlachichuchqanda willanallkiqa, suqpa suqpa chumaqta willayllampa. Chaqa chaychina willamptimkillampam, yumbay kriyiq masinchiqkuna Tayta Dyusmanda allita yach'amkuchpaqa, ancha animamkanqallampa. 32 Tandanamkumptinchiqqam, Dyuspa Santu Ispiritunqa munan, nuqanchiqkuna allita sujitamkachpa, suqpa suqpa pay parlachiwachqanchiqta willananchiq. 33 Chaqa Tayta Dyusqam mana ch'uqyachiwanchiqchu. Achwanmi munan, Jisuspi kriyiqkuna suqwan suqwan chumaqta yach'achinamkunanchiq. Yumbay tandamkaq kriyiq masinchiqkuna rurachqanchina, 34 warmimkunaqa yach'achimkuq runamkunata rrispitachpa, uyaramp (uyara) uyamkunqallampa. Manam balinchu warmimkuna kultumpi kachpa tampumkunanqa. Chaqa Tayta Dyuspa liynimbim nin: Warmimkunaqa ullqumkunataqa ama kamachinqachu. Achwan kasunqallampa, nichpa. 35 Chayri imatampis mana allita intyindichpaqa, wasimbi qusanda tampunqa. Chaqa manam balinchu warmimkuna kultumpi tampumkunanqa. 36 Kurintinu kriyiq masitamkuna, Jisuspa chumaq nutisyanqam mana puntataqa chamurqanchu qamkunaman. Manam qamkunallachu Jisuspiqa kriyichqallampa kangi. 37 Chayri mayqannimki yuyachpa: Nuqaqam Dyuspaq rimaq kani. Chaymi paypa Santu Ispiritun ancha yanampawan, nichpaqa, allita yach'ayllampa: Jisumkristum Pabluta kamachichqa, kallkunata nuqanchiqkunampaq iskibrinambaq, nichpa. 38 Piru mayqan runa kay iskibrichuchqayta mana munamptin kasuytaqa, paytaqa ama kasuyllampachu. 39 Chayri kuyachqay masitamkuna, Dyusman mañamkuyllampa parlachichunambaq, chay nichuchqanda suqkunata willanallkillampa. Chaychinalla chay mana intyindiypaq rimallkunampi rimaqkunatampis dijayllampa chay rimallkunampi rimanambaq. Ama arkayllampachu. 40 Piru qamkuna tandanamkuchpa Dyusta aduranallkiqa, ama ch'uqyachpachu, achwan tumkuy imata chumaqta rurayllampa.
1 Kriyiq masitamkuna, munanim chay yach'achichuchqay chumaq nutisyata allita yuyanallkillampa. Chaqa chay chumaq nutisyata kanangaman mana challkuq kriyichpa kawsallkangillampa. 2 Chaymi kay yach'achichuchqayta mana challkuq kriyimptimkillampaqa, Tayta Dyusqa wachachuchqallampa. Piru mana allimpta kriyimptimkiqam, mana rinchu wachachuq. 3 Nuqaqam chay ch'askichqay chumaq nutisyata qamkunata yach'achichurqaq, Dyuspa Santu Librumbi nichqanchina: Jisumkristum wañurqan, uchanchiqmanda pirdunawananchiq. 4 Kanan Jisusta wanchichpa pambamptinllampam, Tayta Dyusqa kimsa diyaman kawsachimurqan. Chaqa Dyuspa Santu Librumbiqam chaychina nin. 5 Chaymandaqam Jisumkristuqa puntata rimkamkurqan ampustul Pidruman. (Pidrullam Sifaspis chutin.) Chaymandaraqmi yumbay ampustulninmanqa rimkamkurqan. 6 Chaymandaqam rimkamkurqan mas di 500 kriyiq masinchiqkuna tandamkachqanman. Chay kriyiq masinchiq rimkaqkunaqam wamkinqa kay kartata iskibrichqay diyamkaman kawsallkanraq; wamkinqam wañuchqallampana. 7 Chaymandaqam Jisumkristuqa Jamkubuman rimkamkurqan. (Jamkubullam Santyagumpis chutin.) Chaymandaqam yumbay ampustulningunaman rimkamkurqan. 8 Ultimumpiqam achka tyimpumanda Jisusqa nuqa Pabluman rimkamkurqan. Piru paypi kriyimptiyqam, yumbaypaq suq wambra mana diyambi nasichqachina karqay. 9 Chaymi nuqaqa yumbay ampustulmandaqa mana nimampaq balinichu. Chaqa Jisuspi manaraq kriyichpaqam, chay kriyiq masinchiqkunata ch'iqnichpa wanchirqay. Chaymi mana ni balinichu Ampustul Pablu niwananllampa. 10 Piru chay laya kamptiypismi, Tayta Dyusqa ancha kuyawachpa amkrawachqa, ampustulnin kanaypaq, pay nichqanda yach'achimkunaypaq. Chaymi yumbay chay ampustul masillkunamanda masta yach'achimkuchqa kani. Piru Tayta Dyus mana yanampawamptinqam, mana atinaytachu nimatampis yach'achimkuytaqa. 11 Chaymi igwallla kachqa ichu nuqa ichu chay suq ampustul masillkuna Jisuspa chumaq nutisyanda yach'achimkuchqayqa. Chay chumaq nutisyata uyachpam, kriyichqallampa kangi. 12 Nuqallkunaqam yach'achichuchqa kani: Jisumkristum wañuchqanmanda kawsamuchqana, nichpa. Chaychina yach'achichumptiyqa, ¿imarallkutaq wamkinnimkiqa rimangillampa: Wañuqkunaqam mana rinchu kawsamuq, nichpaqa? 13 Chaqa wañuchqamkuna mana kawsamumptinqam, Jisumkristumpis wañuchqanmandaqa mana kawsamunandachu. 14 Piru Jisumkristu wañuchqanmanda mana kawsamuchqa kamptinqam, nuqallkuna paypaq yach'achimkuchqayqa mana nimampaq balinmanchu. Chaychinallam qamkuna Jisuspi kriyichqallkillampa mana nimampaq balinmanchu. 15 Chaychina wañuqkuna mana kawsamumptinqam, nuqallkunaqa ancha ingañamkuqkuna kaymanllampa. Chaqa nuqallkunaqam yach'achimkuchqa kani: Tayta Dyusmi Jisumkristuta wañuchqanmanda kawsachimuchqa, nichpa. 16 Piru wañuchqamkuna mana kawsamumptinqam, Jisumkristumpis mana kawsamunandachu. 17 Chaychina Jisumkristu mana kawsamuchqa kamptinqam, nuqanchiqkunaqa uchayuqlla kanchiqmanllampa. Chaqa yanqam paypi kriyichqallampa kanchiqman. Chaychina kamptinqam, Tayta Dyusqa uchanchiqmandaqa mana pirdunawanchiqmanchu. 18 Chay wañuchqa kriyiq masinchiqkunampismi Tayta Dyuswanqa syilumpiqa mana tiyallkanmanchu. Chaqa pallkunampismi chingachqana kanmanllampa. 19 Chaymi wañuchpa, manana kawsamunanchiq kamptinqa, ¿imampaqtaq balinman Jisumkristumpi kay bidampilla kriyinanchiqqa? Chaychina kamptinqam, yumbay runamkunamanda mas llamkimpaypaq kanchiqmanllampa. 20 Piru Jisumkristuqam wañuchqanmandaqa allimpta kawsamurqan. Chaqa yumbay runa Tayta Dyuspi kriyichpa wañuqkunamandam, Jisusqa puntata kawsamurqan. Chaymi payqa achka kusichampa punta partinchina. 21 Chaqa chay punta runa Adanmi Tayta Dyusta mana kasuchqanrallku wañurqan. Chaymi yumbay nuqanchiqkunampis rinchiq wañuq. Piru Jisumkristu Tayta Dyusta kasuchqanrallkum, wañuchqanmanda kawsamuchqa. Chaymi nuqanchiqkunampis rinchiqllampa kawsamuq. 22 Chaychina Adamba karu willkanguna kachpam, yumbayninchiq wañunchiq. Piru Jisumkristumpi kriyichpaqam, paypa wambranchina kachpa, wañuchqanchiqmanda rinchiqllampa kawsamuq. 23 Piru Tayta Dyusmi munan kada wañuqkuna urdinnimbi kawsamunambaq. Chaymi Jisusta puntata kawsachimurqan, yumbay wañuqkunamanda payqa achka kusichampa punta partinchina kanambaq. Chaymandaqam Jisumkristu syilumanda chamumptin, paypi kriyiqkunampis wañuchqanchiqmanda kawsamuchpa, chay achka kusichachina rinchiqllampa kaq. 24 Chaymi kay pacha uchyamkanambaq kamptinqa, Jisumkristu chamuchpa, tumkuy laya kamachimkuq dyablumkunata, awturidarkunata rin binsiq. Chaychina binsichpaqam, Tayta Dyusta tumkuy imata rin intrigaq, payna kamachinambaq. 25 Piru Taytanman intrigamkunangamanmi, Jisumkristuqa tumkuy imata rin kamachiq, chay ch'iqniqkunata sarru sarru rurachpachina binsinangaman. 26 Chaychina binsichpaqam, wañuchqanchiqmanda rin kawsachiwaqninchiq, amana nunka wañunanchiqllampa. 27 Chaqa Tayta Dyusqam Jisusta ancha pudirniyuqta rurachqa, tumkuy imata kamachinambaq. Chaymi Tayta Dyusqa tumkuy ima kaqkunata rin kamachiq, Churin Jisusta kasunanllampa. Piru Dyuspa Santu Librumbi chaychina nichqanqam mana munanchu niyta: Tayta Dyuspismi Churin Jisusta rin kasuq, nichpaqa. 28 Achwanmi Tayta Dyusqa rin kamachimkuq, tumkuy ima Jisumkristuta kasunambaq. Chaymandaqam Jisusqa, Tayta Dyuspa Churin kachpa, Taytanda tumkuy imampi rin kasuq. Chaychinam tumkuy imampi Tayta Dyuslla rin kamachimkuqqa. 29 Chayrallkum yach'anchiqllampa: Yumbay wañuqkunam rin kawsamuq, nichpa. Chaqa wañuqkuna mana kawsamumptinqa, ¿imampaqmi balinman wamkinguna chutimkunanllampa chay wañuchqamkunampaq? [Nuta: Kinsampch'i Dyuspi wamkin kriyiqkuna manaraq chutimkuchpachu wañurqan. Chaymi suq kriyiq masinguna pallkunampa rrimplasun chutimkurqanllampa.] 30 Chayri wañuchqanchiqmanda mana kawsamunanchiq kamptinqa, ¿imampaqmi balin ancha padisichpa Dyuspaq yach'achimkunanchiq? 31 Chaqa tumkuy diya ch'iqniwaqkunam munanllampa wanchiwayta. Piru ancham kuchimkuni, yach'achpa: Qamkunach Siñurninchiq Jisumkristumpi allita yuyamkuchpa kawsallkangillampa, nichpa. 32 Chaymi Ifisu llaqtampi chay ch'iqniwaqkunaqa saqra kita animalkunachina ancha padisichiwarqan. Piru wañuqkuna mana kawsamunan kamptinqach'i, yanqa padisichqa kayman, ¿manachu? Mas allich'i kanman kawsachpa, tumkuy layata mimkunanchiq, umpyananchiq, bwina bidata pasananchiq: Qayam rinchiq wañuq, nichpa. (Piru wañuqkunaqam allimpta rinllampa kawsamuq.) 33 Chayri ama dijamkayllampachu, chay ingañamkuqkuna ingañachunanqa. Chaqa runamkuna nichqanchina: Mana allin runamkunawan purichpaqam, pallkunachina rinchiqllampa kawsaq. 34 Chayri ¡allitana yuyachpa, allita rurayllampa! ¡Amar uchata rurachpaqa kawsayllampachu! Chaqa wamkinnimkiqam Tayta Dyuspiqa mana allimptachu yuyamkungillampa. Chaymi chaychinaqa nillkillampa, qamkuna Dyuspi mana yuyamkuqkuna panqamkuchpa, ancha uchayuqmi kani, ninallkillampa. 35 Kinsampch'i qamkuna kaychina tampuwangiman: Wañuchqamkunaqa, ¿imachinaraq kawsamunqa? Kawsamuchpaqa, ¿ima laya kwirpuyuqraq kanqallampa? nichpa. 36 Chaychina tampuwachpaqam, ancha tuntumkuna kangimanllampa. Manchu suq simillata tarpumptimkiqa, manana simillallachu kidan. Achwanmi chay simillamandaqa wiñanna suq atun planta. Piru chaychina wiñamptinmi, chay simillaqa ismuchpa chinganna. 37 Chaychinam chay triguta ichu suq laya simillata tarpumptinchiqqa, chay plantataqa mana tarpunchiqchu; achwanmi simillatalla tarpunchiqqa. 38 Chaqa chay simillata tarpumptinchiqqam, Tayta Dyuslla wiñachin pay munachqanchina. Mayqan laya simillata tarpumptinchiqpismi, chay similla wiñachqan plantandalla wiñachin. 39 Piru kay pachampi tumkuy ima kawsaqqam mana igwalchu. Chaqa runamkunaqam suq laya kwirpuyuq kanchiqllampa; animalkunaqam suq laya kwirpuyuqkuna, pichqumkunampismi suq laya kwirpuyuqkuna, piskadumpismi suq laya kwirpuyuq. 40 Chaychinallam syilumpi tiyaqkuna kay pachampi tiyaqkunawanqa mana igwalchu kwirpungunaqa. Chaqa syilumpi tiyaqkunaqam suq laya chumaq kwirpuyuqkuna. Kay pachampi tiyaqkunaqam suq laya chumaq kwirpuyuqkuna kanchiqllampa. 41 Rumpayqam mana llimpyanchu killachinaqa. Killampismi mana llimpyanchu lusiruchinaqa. Yumbay lusirumpismi mana llimpyanchu suq layatallaqa. 42 Chaychinallam nuqanchiqkunampis rinchiqllampa kaq. Wañumptinchiqqam kay kwirpunchiqta allpampi pambawamptinchiqqa, chay simillachina ismuchpa, allpampaqna rin timkramkaq. Piru wañuchqanchiqmanda kawsamuchpaqam, suq laya kwirpuyuqna kachpa, manana nunka rinchiqllampachu wañuq. 43 Chaqa wañumptinchiqqam, kay qachyaylintu kwirpunchiqta pambanllampa. Piru kawsamuchpaqam, suq muchuq chumaq kwirpuyuqna kachpa, ancha kuchimkuchunllampa. Wañumptinchiqqam kay mana jwirsayuq kwirpunchiqta pambanllampa. Piru kawsamuchpaqam, ancha jwirsayuq kwirpuyuqna rinchiqllampa kaq. 44 Kay aychamanda kaq kwirpunchiqtam rinllampa pambaq. Chaymandaqam Dyuspa Santu Ispiritun suq laya kwirputa rin quwaqninchiq, anaq syilumpina kawsananchiqllampa. Chaqa kay pachampi kawsananchiqqam aychamanda kwirpuyuq kanchiqllampa. Piru syilumpi kawsananchiqqam suq laya kwirpuyuq rinchiqllampa kaq. 45 Dyuspa Santu Librumbim nin: Tayta Dyusmi chay punta runa Adanda allpamanda rurachpa, kawsachirqan, nichpa. Piru Jisumkristum muchuq Adanchina kachpa, Santu Ispiritunwan kawsachiwanchiq. 46 Puntatam aychamanda kwirpuyuq nasinchiqllampa. Chaymandaqam muchuq laya kwirpuyuq, muchuq ispirituyuq rinchiqllampa nasiriq, syilumpi kawsananchiqqa. 47 Tayta Dyusmi chay punta runa Adanda allpamanda rurarqan, kay allpampi kawsanambaq. Chaymandaqam Siñurninchiq Jisumkristu syilumanda chamurqan kay pachaman, muchuq Adanchina kanambaq. 48 Tumkuy runamkunaqam Adamba karu willkanguna kachpa, Adanchina kay allpamanda kanchiqllampa. Piru Jisuspi kriyichpaqam, paychina syilumanda rinchiqllampa kaq. 49 Kay pachampi nasichpaqam, Adanchina allpamanda kwirpuyuq kanchiqllampa. Piru suq diya kawsamuchpam, Jisumkristuchina syilumanda kwirpuyuq rinchiqllampa kaq. 50 Chaymi kriyiq masitamkuna, munani kayta nichuyllampata: Kay wañuq kwirpunchiqwanqam mana atinchiqllampachu Dyuswan kawsaytaqa. Chaqa kay kwirpunchiqqam das uchyamkan. Piru Dyusqam mana nunka uchyamkanqachu. 51 Manaraq pimpis yach'achqandam munani nichuyllampata: Manam yumbayninchiqqa rinchiqllampachu wañuq. Piru Jisumkristum yumbay paypi kriyiqkunata muchuq kwirputa rin quwaqninchiq, 52 ultimu kurnitata waqachimptin. Chaqa chay kurnitata waqachimptinqam, Jisuspi kriyiq wañuqkunaqa das rinllampa kawsamuq, amana nunka wañurinanllampa. Chay urasllam paypi yumbay kriyiq kawsaqtampis das rin quq muchuq kwirputa. 53 Chaqa wañuq kwirpuyuq kamptinchiqmi, payqa rin kambyawaqninchiq, mana nunka wañuq kwirpuyuq kananchiqllampa. 54 Kay wañuq kwirpunchiqta dijachpam, muchuq laya kwirpu mana nunka wañuqta rinchiqllampa ch'askiq. Chay tyimpumpim, rinna kumpliq Dyuspa Santu Librumbi kaychina nichqan: Tayta Dyus wañuyta chingachimptinmi, manana nunka rinchiqllampachu wañuq, nichpa. 55 Dyuspa Santu Librumbiqam nimbis: Wañuytaqa ama manchachunchu. Ama nimampaqpis llamkichunchu: Rini wañuq, nichpaqa. 56 Muysispa liyningunata mana kasuchqanchiqrallkum ancha uchayuq kanchiqllampa. Chaymi wañunchiqllampa. 57 Piru Siñurninchiq Jisumkristu wañuchqanrallkum, Tayta Dyusqa dyabluta binsichpa, uchanchiqmanda pirdunawachqa kanchiq. Chayri paytaqa ancha pagimkuchunllampa. 58 Chayrallkur kuyachqay masitamkuna, Siñurninchiq Jisuspi yuyamkuchpa, mana challkuq tumkuy diya paypaq masta trabajachunllampa. Chaqa allitam yach'anchiqllampa: Siñurninchiq Jisusmi rin yanampawaqninchiq, ama yanqa imatampis paypaq rurananchiqllampa, nichpa.
1 Mayñ, kananqa yuyachunllampa chay mana nimayuq kriyiq masinchiqkunampaq, ufrindata surqunanchiqllampa. Nuqaqam chay prubinsya Galasyampa llaqtangunampi tandamkaq kriyiq masinchiqkunata nichqa kani: Kaychinar chay ufrindata surquyllampa, nichpa. Chaychinar qamkunampis chay ufrindata surquyllampa. 2 Chayri kada simana ganachqallkimanda suq partita amkrayllampa, tumkuy dumingu ufrindanallkillampa. Chaymandaqam nuqa qamkunaman ch'ayamumptiyqa, manana nisisaryuchu kanqa chay ufrindata tandanallkillampa. 3 Allin kriyiq masinchiqkunata amkrayllampa, chay ufrindamkunata Jirusalinman ampananllampa. Nuqaqam qamkunaman ch'ayachpaqa, chay amkrachqallkimkunata rini quq kartamkunata, Jirusalimbi tiyaq kriyiq masinchiqkunaman ampananllampa chay tandachqallki ufrindamkunata. 4 Ichu mas alli kamptin, nuqampis rinaypaq Jirusalinmanqam, pallkunaqa nuqawan pulla rinqallampa. 5 Qamkunaman chamuqchinaqam puntata rini watumkuq chay prubinsya Masiduñampi tiyaqkunata. Chaychina watumkuchpaqam, chay Kurintu llaqtallkiman ch'ayamuchaq. 6 Kinsampch'i chay llaqtallkillampampi qamkunawan suq tyimpumpaq kidachaq. Paqtar tumkuy chay tamya tyimputa chay llaqtallkimpi qamkunawan pasachaq. Chaychina qamkunawan kidamptiymi, atingimanllampa imitawan yanampawayta, suq llaqtamkunaman rinaypaq. 7 Piru Tayta Dyus munamptinqam, ancha munani qamkunawan kidayta suq tyimpumpaq. Chaqa manam munanichu pasaqchinalla yumbaynimkita rimkachuytaqa. 8 Piru kay diyamkunaqam kay Ifisu llaqtampilla rini kidaq chay Pintimkustis fyista diyamkaman. 9 Chaqa kay llaqtampi achka runamkuna kuntrawamptimbismi, Tayta Dyusqa ancha yanampawallkan, achka runamkunata yach'achinaypaq, Jisuspi kriyinambaqllampa. 10 Masanchiq Timutiyu qamkunaman chamumptinqa, chumaqta ch'ayachiyllampa, ama nimampaq llamkichpa qamkunawan kuchimkunambaq. Chaqa paypismi nuqachina Siñurninchiqpa chumaq nutisyanda yach'achimkun. 11 Chayri ama ni mayqannimkimpis disprisyayllampachu. Achwan yanampayllampa, kuchimkuchpa nuqaman kutimunambaq. Chaqa nuqaqam wamkin kriyiq masinchiqkunawan kaypi pulla Timutiyuta chuyallkanillampa. 12 Nuqaqam masanchiq Ampulusta ancha rrugachqa kani, chay kriyiq masinchiqkunawan qamkunaman chamunan watumkuchuq. Piru kay diyamkunaqam manaraq munanchu chamuyta. Paqtar lugarnin kamptin, suq tyimpumanda rin chamuq. 13 Allita kwidamkachpa, ama disanimamkachpachu, Jisuspi allita yuyamkuyllampa. Ama nimatampis manchachpachu, achwan ancha jwirti runamkuna kayllampa, Dyusta kasunallkillampa. 14 Allita kuyanamkuchpar, tumkuy imata rurayllampa. 15 Masitamkuna, qamkunaqam yach'angillampa: Kay Amkaya prubinsyampi manaraq ni pi Jisuspi kriyimptinllampam, masanchiq Istifanaslla tumkuy ayllunwan Jisuspi puntata kriyichqallampa. Chaychina kriyichpaqam, kriyiq masinchiqkunata ancha yanampachpa kawsanllampa. 16 Chaymi munani, qamkunampis chay laya yanampachuqkunata allita kasunallkillampa, Tayta Dyuspaq trabajachqanrallku. 17 Ancham kuchimkunimpis chay masanchiq Istifanas, masanchiq Furtunatu, masanchiq Amkallkuwan watumkuwachqanrallku. Chaqa yumbay qamkuna mana atimptimkillampa chamuytampismi, chay kimsa masanchiqkuna rrimplasullkillampa chamuchqallampa watumkuwaq. 18 Pallkunaqam qamkunata animachichuchpa, nuqatampis ancha animachiwachqa, Tayta Dyuspi ancha allita yuyamkunaypaq. Chayri chay laya masanchiqkunata ancha alabachunllampa. 19 Kay prubinsya Asyampa llaqtangunampi tandamkaq kriyiq masinchiqkunam qamkunata nampallkuchungi. Masanchiq Amkilaspismi warmin Prisilawan nampallkuchungi. Pallkunampa wasimbi tandamkaq kriyiq masinchiqkunampismi Jisuspa chutimbi nampallkuchungi. 20 Tumkuy kaypi kaq kriyiq masinchiqpis qamkunata nampallkuchungi. Chaychina qamkunampis tandanamkuchpaqa, suqwan suqwan ancha rrispitanamkuchpa, muchanamkuchpa nampallkunamkuy. 21 Kay partitallam nuqa Pablu kimkiy mamkiywan iskibrichpa nampallkullkillampa. 22 Piru mayqan runa Siñurninchiq Jisumkristuta mana nimatampis kuyamptinqar, chay runataqa dyabluta intrigachun, kastigadu kachpa, chinganambaq. ¡Siñurninchiq Jisumkristu chamunqa! 23 Ancham mañamkuni, Siñurninchiq Jisumkristu qamkunata yanampachunan. 24 Kriyiq masitamkuna, Jisumkristumpi kriyichqanchiqrallkum ancha kuyachuchpa, kay kartata kach'amuni. (Kaytallam iskibrillkillampa.) Chaychina kanqa.
1 Kuyachqay kriyiq masitamkuna, nuqa Pablum masanchiq Timutiyuwan kay kartata kach'amunillampa qamkuna Kurintu llaqtampi tandamkaq kriyiq masillkunaman, chay prubinsyallki Amkayampi tiyaq yumbay kriyiq masinchiqkunamambis. Chaqa Tayta Dyus munamptin ampustulnin kanaypaqmi, Jisumkristu amkrawachqa, paypaq yach'achimkunaypaq. 2 Chaymi Tayta Dyusman, Siñurninchiq Jisumkristuman mañamkuni, tumkuy imampi qamkunata yanampachunan, ama nimata manchachpa, achwan kuchimkuchpa kawsanallkillampa. 3 Siñurninchiq Jisumkristumpa Taytan Dyusta alabachunllampa. Chaqa payqam ancha llamkimpawaqninchiq, tumkuy imampi kunswilawanchiq. 4 Chaychinam tumkuy ima ñamkachqanchiqpi ancha kunswilawanchiq, nuqanchiqkunampis suqkunata atinanchiq kunswilayta, Tayta Dyus kunswilawachqanchiqchina. 5 Chaqa Jisumkristuchina ancha padisimptinchiqmi, payqa ancha animachiwanchiq, ama llamkinanchiqllampa. 6 Chaymi nuqallkunaqa ancha ñamkanillampa, qamkunata animachichunay, Jisuspi yuyamkuchpa wachadu kanallkillampa. Chaqa Tayta Dyus nuqallkunata kunswilawamptinmi, atinillampa qamkunatampis kunswilachuyta. Chaymi qamkunampis nuqallkunachina ñamkachpampis, atingillampa agwantayta. 7 Chaqa allita yach'anillampa: Qamkunampis nuqallkunachina ñamkamptimkillampam, Tayta Dyusqa nuqallkunatachina rin kunswilachuqllampa. 8 Kuyachqay masitamkuna, munanillampam allita yach'anallkillampa prubinsya Asyampi ancha ñamkachqaypaq. Chaqa chay ñamkallkunataqam mana atirqayllampachu agwantayta. Chaymi manana yuyarqayllampachu kawsaytaqa. 9 Achwanmi yuyarqayllampa: Kananqam rinchiq wañuq, nichpa. Piru chaychinaqam ñamkarqayllampa yach'amkunaypaq, Tayta Dyuspi mas allita yuyamkunaypaq: Paymi wañuchqamkunata kawsachimun, nichpa, ama nuqallkuna kimkiypi yuyamkunayllampa. 10 Wañunaypaqna kamptiyllampampismi, Tayta Dyusqa wachawarqan, ama wañunayllampa. Kanangaman wachawallkanllampa. Chaymi paypi ancha yuyamkunillampa: Qamkuna achka kriyiq masinchiqkunawan payman nuqallkunampaq mañamkumptimkim, rin wachawaqllampa, ama wanchiwananllampa, nichpa. Chaychina nuqallkunata yanampawamptinmi, ancha achka qamkuna ringillampa pagimkuq Tayta Dyusta. 12 Ancha kuchimkuchpam nillkillampa: Dyus yanampawamptinmi, kay mundumpi allitalla rurachpa, mana nimata pamkachpachu, kawsachqallampa kani. Piru qamkunawanqam mas chumaqta kawsachqallampa kani. Chaymi mana nimata panqamkuchpachu, ancha kuchimkuni. Piru manam nuqallkunampa yuyayniywanllachu chaychinaqa kawsachqallampa kani. Achwanmi Tayta Dyus yanampawamptin, chaychinaqa kawsachqallampa kani. 13 Yumbay kartallkunampim atichqallkaman klarituta iskibrichqa kani, mana nimatampis pamkachpachu. Piru chay imki kartaymandaqam mana yumbaytachu intyindichqallampa kangi. Paqtar kay kartampi yumbay kaqta qamkuna allita intyindingiman, Siñurninchiq Jisus chamumptin, nuqampaq kuchimkunallkillampa. Chaychinam nuqampis qamkunampaq ancha rini kuchimkuq. 15 Chaymi nuqaqa yuyarqay Masiduña prubinsyaman riqchina puntata qamkunaman chamuyta watumkuchuq. Yuyarqaypismi kutimuqchina watumkurichuq, ichkay bwiltasta pulla kuchimkunanchiq, qamkuna yanampawanallki, prubinsya Judiyaman rinaypaq, nichpa. 17 Piru chaymandaqam mas allita yuyachpa, manana chamurqaychu qamkunamanqa. Kinsampch'i chaypaq yuyangillampa: Pablum ufrisimkuchqanda mana kumplinchu. Jisuspi mana kriyiqkunachinam ari, nichpaqa, mana ruranchu, nichpa. Manam chaychinachu. 18 Tayta Dyusmi allita yach'an: Pablum Ari nichpa, mana yach'arqanchu: Manam rinichu riq, nichpaqa. Chaymi Dyusqa nuqampa tistiguy. 19 Chaqa Tayta Dyuspa Churin Jisumkristum mana ichkay yuyayniyuq kachpa, tumkuy ima nichqanda allimpta kumplin. Chay Jisuspaqllam nuqa, Timutiyu, Silbanuwan yach'achillkillampa. 20 Kanan Tayta Dyusqam ufrisiwachqa kanchiqllampa, tumkuy imampi yanampawananchiq. Chaymandaqam Churin Jisumkristu chay ufrisiwachqanchiqta kumplillkan. Chaymi Jisumkristu yanampawamptinchiq, Tayta Dyusta ancha alabanchiqllampa: Chaychina kanqa, nichpa. 21 Chay kimkin Tayta Dyusmi nuqallkunata, qamkunatampis yanampawachqa kanchiqllampa, Jisumkristumpa kananchiq, paypi mas allita yuyamkunanchiq. 22 Chaymi Santu Ispiritunda quwachqa kanchiq suq siñaltachina, chunqunchiqpi tiyanambaq. Chaymi yach'anchiqllampa: Tayta Dyusmi tumkuy ima ufrisiwachqanchiqta rin quwaqninchiq, nichpa. 23 Tayta Dyusqam allita yach'an: Imarallkum Pabluqa manaraq chamuchqachu Kurintu llaqtamanqa, nichpa. Chaqa manam munarqaychu anyachuyllampata ni llamkichichuyta chay mana allimkunata rurachqallkirallku. Kanan Tayta Dyusmi yach'an allimp kaqtalla nichuchqayta. Chaymi nillkillampa: Mana allimp kaqta nichumptiyqa, Tayta Dyus kastigawanqa, nichpa. 24 Piru qamkunaqam Jisuspi allita kriyillkangillampa. Chaymi mana munanichu kamachichuyta: Kaychina kriyiyllampa, nichpaqa. Achwanmi chay Kurintu llaqtallkiman munani riyta, qamkunata animachichuq, masta kuchimkuchpa kawsanallkillampa.
1 Chayrallkum manaraq munarqaychu kutimuyta qamkunaman, ama llamkichichunaypaq. 2 Chaqa chaychina nuqa qamkunata llamkichichumptiyqa, ¿pitaq nuqataqa kuchichiwanman? Qamkunallam chaypi kangi, kuchichiwanallkiqa. 3 Chaymi manaraq chamuchpa, chay punta kartaypi anyachurqaqllampa, allita kawsachpa kuchichiwanallki. Chaqa manam munarqaychu chamuyta, qamkunarallku llamkinaypaq. Achwanmi yuyamkurqay: Dyusta kasumptinllampam, rini kuchimkuq. Chaychina kuchimkumptiymi, pallkunampis rinllampa kuchimkuq, nichpa. 4 Chaymi ancha llamkiwan malaganayachpa, waqachpa, chay punta kartata qamkunata iskibrichurqaq. Manam munarqaychu qamkuna llamkinallkimpaq. Achwanmi iskibrichurqaqqa, qamkuna yach'anallki: Pablum ancha kuyawanchiqllampa, nichpa. 5 Chay uchayuq runaqam malaganayachiwachqa. Piru yumbay qamkunata masta malaganayachichuchqaqa. Piru manam ninichu: Ancham dañachiwachqa kanchiq, nichpaqa. Chaqa manam munanichu ancha achkata anyaytaqa. 6 Chay uchayuqtaqam ancha anyachpa, manana dijangillampachu qamkunawan tandamkananqa. Piru uchangunata dijamptinqam, amana mastaqa kastigayllampachu. 7 Achwan kananqa pirdunachpa, kuchichiyllampa, ama ancha llamkichpa disanimamkanan. 8 Chayrallkum rrugallkillampa, chay masallkillampata yanampanallki, allita yach'anan: Allimptam kuyawanllampa, nichpa. 9 Chay punta kartatam qamkunata iskibrichurqaq kunachuchpa, chay runata kastiganallkillampa, chaychina yach'anaypaq: ¿Chay nichqaytachu allita rinllampa kasuwaq ichu mana? nichpa. 10 Chaqa qamkuna mayqan uchayuqta pirdunamptimkiqam, nuqampis ancha rrispitachuchpa, payta pirdunani Jisumkristumpa chutimbi. 11 Chaychinam pirdunani, dyablu munachqanda ama rurananchiqllampa. Chaqa ancha allitam yach'anchiqllampa: Chay dyablum achka laya trampamkunata ruran ingañawananchiq, nichpa. 12 Nuqaqam rirqay Truwas llaqtaman, Jisumkristumpa chumaq nutisyanda yach'achimkuq. Chaymi chay llaqtaman ch'ayamptiyqa, Tayta Dyus ancha yanampawarqan, ancha achka truwasinumkunata yach'achinaypaq. 13 Chaychina achka runata, warmita yach'achichpampismi, mana atirqaychu kuchimkuyta, kriyiq masinchiq Tituta mana tarichqayrallku. Chaymi chay Truwaspi tiyaqkunamanda dispidimkachpa, prubinsya Masiduñaman rirqay, Tituta maskaq. 14 Piru Tayta Dyusmi nuqallkunata ancha yanampawanllampa, dyabluta binsichpa, Wachadurninchiq Jisumkristumpaq yach'achimkunaypaq. Chaqa Jisuspa chay chumaq nutisyandaqam suq ancha michki mutkinatachina ampallkanillampa tumkuy nasyungunaman. Chaymi Tayta Dyusta ancha pagimkunillampa. 15 Kanan Jisumkristumpi kriyimptiyllampam yanampawanllampa, Tayta Dyuspaq michki mutkinachina kanayllampa. Chaychina yanampawachpam, kach'awanllampa chay wachamkanan kaqkunaman, chay chinganan kaqkunamambis, Jisuspaq yach'achimkunay. 16 Chay chinganan kaqkunampaqqam wañuchqa kwirpu ach'naqchina kanillampa. Piru wachamkanan kaqkunampaqqam ancha michki kawsachimkuq mutkinachina kanillampa. Piru Tayta Dyus mana yanampamptinqam, mana ni pimpis atinmanchu chay chumaq nutisyanda allita yach'achimkuytaqa. 17 (Piru paymi ancha yanampawanllampa.) Chaymi nuqallkunaqa mana chay wamkin yach'achimkuqkunachinaqa kanillampachu. Achwanmi mana nima qallayta munachpachu, chay chumaq nutisyata dibaldilla yach'achimkunillampa. Chaymi Tayta Dyus nuqallkunata kach'amuwamptin, paypa ñawpambi kawsachpa, Jisumkristumpaq allimp kaqtalla yach'achimkunillampa.
1 Kinsampch'i qamkunaqa chay nichuchqaypaq yuyangillampa: Pallkuna kimkinllam suq kutinda alabamkanllampa, nichpa. Manam chaychinachu. Chaqa wamkin yach'achimkuqkunam ancha munanllampa kriyiq masinchiqkunamanda kartamkunata surquyta: Kay kartata ampamuqmi Dyuspaq allita yach'achimkun, ninanllampa. Piru nuqallkunampaqqam mana nisisaryuchu runamkuna kartamkunata quwananllampaqa. 2 Chaqa nuqallkuna qamkunata puntata Jisuspaq yach'achichumptiymi, paypi allimpta kriyirqallkillampa, ¿manachu? Chaymi qamkuna kimkimki nuqallkunampa kartallkunachina kangillampa, yumbay runamkuna yach'anambaq: Pablu paywan yach'achimkuqkunam Dyuspaq lijitimu yach'achimkuqkuna, nichpa. 3 Chaqa Jisumkristum yanampawachqa, chunqullkillampampi paypa nutisyanda iskibrinaychina. Chaymi yumbay runamkuna rimkachuchpa yach'anllampa: Pallkunaqam kimkin Jisuspa kartanchina, nichpa. Piru Jisusqam mana tintawanchu qamkunampiqa iskibrichqa, rumimkunampi iskibrichqanchinaqa. Achwanmi Dyuspa Santu Ispiritunwan chunqullkillampampi iskibrichqaqa. 4 Tayta Dyuspim ancha yuyamkunillampa: Paymi Jisumkristuwan ancha rin yanampawaqllampa, nichpa. 5 Chaqa nuqallkunallaqam mana nimatampis atiymanllampachu rurayta. Achwanmi Tayta Dyus yanampawanllampa, pay munachqanda allita ruranayllampa. 6 Chaychinam Tayta Dyus yanampawanllampa, paypa muchuq tratunda atinayllampa yach'achimkuyta. Piru manam chay punta iskibrichqa lillkunatachinachu rurachqaqa. Chaqa chay punta iskibrichqa lillkunata mana kasumptinchiqqam, chingananchiqna karqanchiqllampa. Piru kananqam Dyuspa Santu Ispiritun yanampawanchiq, tumkuy tyimpu kawsananchiq. 7 Chay punta lillkunataqam rumi tablamkunampichina iskibrichqa karqan. Muysis chay lillkunata ch'askimptinqam, qaqllanqa suq tyimpumpaq ancha llimpyarqan. Chaymi chay llaqta masin isrraylinumkunaqa mana atirqanllampachu qaqllandaqa champayta. Chaymandaqam chay qaqllanqa allimanda allimanda manana llimpyarqanchu. Chaychinam Muysis chay mana wachawaqninchiq lillkunata ch'askichpa, ancha llimpyarqan. 8 Piru Dyuspa Santu Ispiritun masta llimpyachpa, chay muchuq tratuta ampamuchpa, yach'achiwanchiq. 9 Chay punta lillkunam ancha chumitaq kachpampis, mana atirqanllampachu wachawayninchiqta. Achwanmi chay lillkunawan kundinadu kidarqanchiq chingananchiqllampa, mana kumplichqanchiqrallku. Piru Jisumkristu wachawachqanchiqqam chay lillkunamandaqa mas chumitaq. 10 Kanan chay punta lillkuna chumitaq kamptimbismi, Jisus rurachqanqa masta balin. 11 Chaqa chay punta lillkuna ancha chumaq kachpampismi, achla tyimpumpaqlla karqan. Manam tumkuy tyimpumpaqchu. Piru Jisumkristu rurachqanqam tumkuy tyimpumpaq kachpa, mas chumitaq. 12 Chaymi Jisumkristu rurachqambi yuyamkuchpa, mana nimatampis manchachpachu, chay muchuq tratumpaq yach'achimkuni. 13 Piru nuqallkunaqam mana chay Muysischinachu yach'achimkuniqa. Manchu Muysisqa qaqllanda suq trampuwan pambarqan, llaqta masin isrraylinumkuna chay qaqllan llimpyaq chingallkamptin, ama rimkananllampa. 14 Piru chay unay isrraylinumkunaqam mana atirqanllampachu intyindiyta chay punta lillkunataqa, yuyayninguna suq trampuwan pambaduchina kamptin. Kanangamanmi pallkunaqa chay lillkunata liyichpampis, manaraq atinllampachu intyindiyta. Piru Jisumkristullam chay tramputachina yuyayninmanda atin achuchiyta, atinanllampa intyindiytaqa. 15 Chaymi Muysispa liyningunata kanangaman liyichpaqa, yuyayningunaqa suq trampuwan pambaduchina. 16 Piru suq runa Siñurninchiqpi kriyimptinqam, chay yuyayningunaqa manana pambaduchinachu. Achwanmi atinna intyindiyta Tayta Dyus nichqandaqa. 17 Chay palabra Siñurninchiqmi chay birsimkulumpi munan niyta Dyuspa Santu Ispiritun, nichpa. Kanan Dyuspa Santu Ispiritun mayqan runampi, warmimpi kachpaqam, uchamkunamanda wachawanchiq, libri kananchiqllampa. 18 Chaymi Dyuspa Santu Ispiritun yanampawamptinchiq, atinchiqllampana allita intyindiyta Dyus nichqanda. Chaqa yuyayninchiqqam manana pambaduchinachu. Achwanmi ancha llimpyaq Siñurninchiqta rimkachpa, suq ispijuchina nuqanchiqkunampis llimpyanchiq. Chaqa chaychina payta rimkamptinchiqqam, Dyuspa Santu Ispiritun yanampawanchiq, diyampi diyampi mas chumaqta rurachpa Jisumkristuchina kawsananchiqllampa.
1 Tayta Dyusmi ancha llamkimpawachpa, amkrawachqallampa, pay nichqanda yach'achimkunayllampa. Chayrallkum mana nunka disanimamkachpachu 2 ni ingañamkuchpachu ni Tayta Dyus nichqanda kambyachpachu, allimp kaqtalla yach'achimkunillampa. Chaymi yumbay riqsiwaqkunaqa allita yach'anllampa: Pallkunaqam Dyuspaq allimpta yach'achimkunllampa, nichpa. Chaymi mana nimatampis munanillampachu rurayta chay pamkadu panqamkuypaq mana baliq kusaskunataqa. Chaqa yach'anchiqmi: Tayta Dyusmi rimkawallkanchiq, nichpa. 3 Piru infyirnuman rillkaqkunam mana intyindinllampachu Jisumkristumpa chumaq nutisyanda yach'achimkumptiyllampa. 4 Chaqa pallkunam Jisumkristumpi mana munamptinllampa kriyiyta, kay mundumpi kamachimkuq dyablu ingañachpa, yuyayningunata suq trampuwan pambachqachina, suq sarkuchina yuyayningunampi kanambaq. Chayrallkum mana atinllampachu intyindiyta Jisuspa ancha chumaq nutisyandaqa. Chay chumaq nutisyanqam yach'achiwanchiq: Llimpyallkaq Jisumkristum kimkin Tayta Dyuschinalla, nichpa. 5 Chaymi nuqallkuna yuyachqaytaqa mana yach'achimkunichu, (nuqallkunata sigiwanallkillampa.) Achwanmi nuqallkunaqa yach'achimkuni, Siñurninchiq Jisumkristuta kasunallkillampa. Chaqa nuqallkuna Jisusta ancha kuyachpam, qamkunampa kriyadullkichina kanillampa yanampachunaypaq. 6 Chaqa Tayta Dyusmi kay pachata rurachpa, kamachirqan achimkchamkunambaq. Chaychinallam pay kimkinqa chunqunchiqkunata achimkcharqan intyindinanchiq: Paypa llimpyayninda Churin Jisumkristumpa qaqllambi llimpyachichqa, nichpa. 7 Jisuspa chumaq nutisyanqam ancha balin achka qallaychina. Piru chay chumaq nutisyanda yach'achimkuqqam allpamanda das pamkimkaq mangachinalla kanillampa. Chayrallkum nuqallkunallaqa mana atinillampachu runamkunata Dyuspi kriyichiyta. Piru Tayta Dyus pudirninwan yanampawamptinmi, achka runamkuna, warmimkuna paypi kriyichqallampa. 8 Chaymi ancha padisichpampis, Dyusta sirbinillampa. Mana yach'achpa: ¿Imatam rini ruraq? nichpampismi, mana disanimamkanichu. 9 Runamkuna nuqallkunata ancha padisichiwamptinmi, Tayta Dyusqa mana dijawanllampachu. Runamkuna pachaman bulawamptinllampam, mana wañunillampachu. 10 Maymambis rimptiyllampa Jisuspaq yach'achimkuqmi, kutin kutin munachqallampa wanchiwayllampata, Jisusta wanchichqanllampachina. Piru Tayta Dyus wachawamptinmi, achka rimkawaqkuna intyindichqallampa: Jisumkristum pallkunampi kawsachpa, ancha yanampan, nichpa. 11 Nuqallkunaqam listu kanillampa ima diyampis wañunayllampa Jisuspaq yach'achimkuchqayrallku. Chaqa ancham munanillampa chay rimkawaqkuna intyindinanllampa: Jisuspa Santu Ispiritun pallkunampi kawsachpam, tumkuy imampi yanampallkan, Dyuspaqlla kawsananllampa, nichpa. 12 Chaychina munamptinllampa wanchiwaytampismi, qamkunata yach'achillkillampa, wachadu kachpa, tumkuy tyimpu Dyuswan kawsanallkillampa. 13 Dyuspa Santu Librumbim suq runa kaychina iskibrichqa: Nuqaqam Tayta Dyuspi kriyirqay. Chaymi payman mañamkurqay, nichpa. Chay iskibrichqan runa kriyichqanchinam nuqallkunampis kriyichpa, Dyusman mañamkunillampa. 14 Kanan yach'anchiqpismi: Tayta Dyusmi Jisusta wañuchqanmanda kawsachimuchqa. Chaychinallam Jisuspi kriyiqkunatampis rin kawsachiwaqninchiq, paywan pulla syilumpi kawsananchiqllampa, nichpa. 15 Chaychinam padisichqallampa kani, wachadu kanallkillampa. Chaqa Tayta Dyus ancha achka runata, warmita wachamptinmi, pallkunampis Dyustaqa pagimkuchpa, rinllampa aduraq, ancha allin kachqanrallku. 16 Awnki kay bidampi kwirpuyllampa byijuyamptimbismi, ispirituyllampampi diyampi diyampi Jisuspi mas allita yuyamkullkanillampa, mana nimatampis disanimamkachpachu. 17 Chaqa kay bidampi padisimptinchiqqam, challkunaqa das pasan. Piru Jisuspaq padisimptinchiqqam, payqa rin ampawaqninchiq syiluman, chaypi kuchimkuchpa, llimpyachpa, tumkuy tyimpu kawsananchiqllampa. 18 (Chayri ancha padisichpampis, ama llamkichunllampachu.) Achwanri Dyuspa syilunda manaraq rimkachpampis, chaypaq yuyachpa kawsachunllampa. Amar kawsachunchu kay mundumpa imangunampaq yuyachpaqa. Chaqa tumkuy kay rimkachqanchiqkunaqam mana duranqachu. Piru syilumpi manaraq rimkachqanchiqqam tumkuy tyimpumpaq rin duraq.
1 Allitam yach'anchiqllampa: Kay kwirpunchiqqam suq mana duraq chugllachina kachpa, das rin uchyamkaq, nichpa. Piru Tayta Dyusqam wañuchqanchiqmanda rin kawsachiwaqninchiq, suq mana uchyamkaq muchuq kwirpuyuq kananchiqllampa. Chay muchuq wasinchiq layaqam mana runamkuna rurachqanchu. Achwanmi Tayta Dyus kimkin rurachqa, anaq syilumpi tumkuy tyimpu kawsananchiqllampa. 2 Piru kay pachampiqam wañunanchiqkaman ancha llamkinchiq, munachpa syiluman riyta, chay muchuq kwirpunchiqta ch'askinanchiqllampa. 3 Chaqa chay muchuq kwirpunchiqqam suq muchuq mudanachina rin kaq. Chaymi chay muchuq kwirpuyuqna kachpaqa, manana suq kwirpumanda lluqchichqa almachinachu rinchiqllampa kaq. 4 Piru kay kwirpunchiqpi padisichpaqam, ancha munanchiq muchuq kwirpuyuq kayta. Piru manam munanchiqchu wañuyta. Achwanmi munanchiq chamunan Jisumkristu, manaraq wañumptinchiqllampa, chaychina muchuq laya kwirpunchiqta quwananchiq, tumkuy tyimpu kawsananchiqllampa. 5 Chaqa Tayta Dyus kimkinmi rurawachqa kanchiq, suq bidampi tumkuy tyimpu kawsananchiqllampa. Chaymi Santu Ispiritunda quwachqa kanchiq, allita yach'ananchiq: Muchuq kwirputam rin quwaqninchiq, nichpa. 6 Chaymi mana nimatampis manchachpachu, Tayta Dyuspi ancha yuyamkunchiqllampa. Chaqa yach'anchiqllampa: Kay kwirpunchiqwanlla kawsachpaqam, manaraq atinchiqchu syilumpi kawsayta Siñurninchiq Jisuswanqa, nichpa. 7 Kanan Dyuspa wasindaqam manaraq rimkanchiqchu. Piru paypi yuyamkuchpam, allita yach'anillampa: Ancha chumaqmi rin kaq, paywan kawsananchiq, nichpa. 8 Chaymi paypi allita yuyamkunillampa: Mas allim kanman kay kwirpuyta dijanaypaq, Siñurninchiqman richpa, paywan kawsanaypaq, nichpa. 9 Chaymi kay pachampi kawsachpa ichu syiluman richpaqa, ancha munanillampa Siñurninchiq Jisumkristuta kuchichiyta. 10 Chaqa suq diyam payqa yumbay runamkunata rin qayawaqninchiq, paypa ñawpanman rinanchiqllampa, jusgawananchiq. Kay bidampi allita kawsachqa kamptinchiqqam, rin alabawaqninchiq. Piru mana allita kawsachqa kamptinchiqqam, rin kastigawaqninchiq. 11 Chaymi yach'achpa: Siñurninchiqmi tumkuy ima rurachqaypaq rin jusgawaq, nichpa, payta ancha rrispitachpa, kasunillampa. Chayrallkum yumbay runata, warmita animachinillampa, Jisuspi yuyamkuchpa kawsananllampa. Chaqa Tayta Dyusmi tumkuy ima yuyachqayta yach'an. Paqtar qamkunampis allita yach'angillampa: Pablum Dyusta sirbin, nichpa. 12 Piru mana munachpa alabamkaytam, challkunataqa nillkillampa. Achwanmi munani nuqarallku kuchimkuchpa, chay rimawaq runamkunata ninallkillampa: Pablum allimp kaqtalla yach'achiwachqa kanchiq, nichpa. Chaqa chay laya runamkunaqam ancha alabamkachpa ninllampa: Pablumandam mas kamachimkuq kanillampa, nichpa. Piru manam intyindinllampachu: Mastam balin tumkuy chunqu Jisusta kuyananchiq, nichpaqa. 13 Chaqa chay runamkuna nuqampaq nimptinllampa: Pabluqam lumku, nimptimbismi, nuqaqa lumkuyani Tayta Dyusta kuchichinaypaq. Piru suqkunampaq allin yuyayniyuq kamptiyqam, chaychina allin yuyayniyuq kani, qamkunata allita yach'achichunaypaq. 14 Chaqa nuqallkunaqam allita yach'anillampa: Jisumkristum ancha kuyawaqninchiq, yumbay nuqanchiqkunampaq wañurqan, wachawananchiq, nichpa. Chaymi Jisumkristu wañuchpa kawsamuchqanchina, nuqanchiqkunampis paypi kriyichpa, uchanchiqkunata dijachpa, kawsamuchqachina kanchiq. Chaymi manana munachqayllampata rurachpachu, achwanmi Dyus munachqanda rurachpa kawsanillampa. 16 Piru manaraq Jisumkristumpi kriyichpaqam, runa masinchiqkunampaq, Jisumkristumpaqpis chay mana kriyiqkunachina yuyarqayllampa. Piru Jisuspi kriyichpaqam, manana paypaqqa chay mana kriyiqkunachinaqa yuyanillampachu. 17 Chaymi Jisumkristumpi kriyichpaqa, muchuq runa, muchuq warmina kanchiqllampa. Chaqa chay unay mana baliq kusaskunata dijachpaqam, kananqa muchuq bidayuqna kanchiqllampa. 18 Jisumkristu wañuchqanrallkum, Taytan Dyusqa yanampawarqanchiq, paywan alliyananchiq. Kanan mingawarqanchiqmi, yumbay runa masinchiqkunata yanampananchiq, pallkunampis Tayta Dyuswan alliyanambaq. 19 Chaychina Jisumkristu wañumptinmi, Taytan Dyusqa uchanchiqmanda pirdunawaqninchiq, yanampawarqanchiq, paywan alliyananchiqllampa. Chaymandaqam mingawarqanchiq, yumbay runata warmita Dyus rurachqanda yach'achinanchiq, pallkunampis kriyichpa, Tayta Dyuswan alliyananllampa. 20 Chaychinam nuqallkunata kach'amuwachqa, Jisumkristumpa rrimplasun yach'achimkunaypaq. Chaymi nuqallkuna qamkunata rrugachumptiyqa, Jisumkristu kimkin alabis qamkunata rrugachullkangi, Tayta Dyuswan alliyanallkillampa. 21 Chaqa Jisumkristuqam mana nima uchayuqchu karqan. Piru nuqanchiqkuna uchayuq kachqanchiqrallkum, Tayta Dyusqa Jisusta kastigarqan suq runa uchayuqtachina, amana nuqanchiqkunata kastigawananchiq. Achwanmi Jisumkristumpi kriyimptinchiqqa, Tayta Dyus riqsiwanchiq mana nima uchayuqkunampaq.
1 Nuqallkunaqam Tayta Dyuspaq yach'achimkuqkuna kachpa rrugallkillampa, ama paypi yanqa chimimkiwanlla kriyinallkillampa. Achwan dijayllampa, ancha allin Tayta Dyus yanampachunambaq, paypi allimpta kriyinallkillampa. 2 Chaqa Dyuspa Santu Librumbim nin: Yanampamkunay tyimpumpi mañawamptimkim, uyachuchqa kani. Wachamkunay tyimpumpim yanampachuchqa kani, nichpa. Chayri allita uyawayllampa: ¡Kananqam Tayta Dyus yanampawananchiq tyimpu, wachawananchiq tyimpu! nichpa. 3 Chaymi nuqallkunaqa mana ni pitampis dañachichpachu yach'achimkuni, ama ni pimpis chay yach'achimkuchqayta disprisyanambaq. 4 Chaymi padisichpa, ichu mana nimay kamptin, ichu ancha trabajus kamptimbis, tumkuy imata munanillampa agwantayta, yumbay rimkawaqkuna yach'ananllampa: Tayta Dyustam allimpta kasullkanllampa, nichpa. 5 Chaqa kuntrawaqkunam maqawachpa, asutiwachpa, karsilawachqallampa. Kanan mayninqam challku challku Dyuspaq trabajachpa, mana puñuchpachu ni mimkuchpachu, mallaqlla padisichqallampa kani. 6 Chaychina padisichpampismi, allita rurachpa, Dyus nichqanda yach'amkuchpa, piñachiwaq runamkunata agwantachpa, yumbaywan chumaqta kawsachqallampa kani. Kanan Dyuspa Santu Ispiritun yanampawamptinmi, yumbay runata, warmita allimpta kuyachpa, 7 allimp kaqtalla yach'achimkunillampa. Chaqa Tayta Dyus pudirninwan ancha yanampawamptinmi, allita atinillampa rurayta. Chaychina chumaqta kawsachpaqam, kuntrawaqkunata, dyablutampis atinillampa binsiyta. Pallkunamandaqam atinillampa wachamkayta. 8 Wamkin runamkunaqam alabawanllampa. Wamkingunaqam anyawanllampa. Wamkin runamkunampaqmi chumaq nutisyayuq kanillampa. Wamkingunampaqqam mana allin famayuqchu kanillampa. Kanan nuqallkuna mana nima llullata nimptiypismi, wamkingunaqa rimanllampa: Llullamkuchpam yach'achimkunllampa, nichpa. 9 Wamkingunaqam mana munanllampachu riqsiwayta. Piru Tayta Dyusqam nuqallkunata allita riqsiwan. Kanan yaqqa wañuchpampismi kawsallkanillamparaq. Chaqa kuntrawaqkunaqam ancha kastigawachpampis, mana wanchiwachqallampachu. 10 Llamkichpampismi, kuchimkuchpa kawsanillampa. Ancha pubri kachpampismi, suqkunata yach'achinillampa, pallkunampis Jisuspi kriyichpa, tumkuy imayuqchina kanambaqllampa. Chaqa mana nimayuq kachpampismi, Jisuspi kriyichpaqa, tumkuy imayuqchina kanillampa. 11 Kurintinu kriyiq masitamkuna, tumkuy chunquywanmi ancha kuyallkillampa. Chaymi mana nimata pamkachpachu, tumkuy ima yuyachqayta kay kartaypi iskibrillkillampa. 12 Chaqa nichuchqaychinñm tumkuy chunquywan ancha kuyallkillampa. Piru qamkunaqam mana nuqallkunataqa chaychinachu kuyawangillampa. 13 Chaymi nuqaqa qamkunampa taytallkichina kachpa, ancha rrugallkillampa, nuqa kuyachuchqaychina tumkuy chunqu kuyawanallkillampa. 14 Kuyachqay masitamkuna, Jisuspi mana kriyiqkunawanqa ama kasarayllampachu ni tratuta rurayllampachu. (Chaychina rurachpaqam, suq turuwan suq burruta wangullkaqchina kangiman.) Chaqa manam balinchu suq allin runaqa yanampanan suq uchayuq runata, maluta ruranambaq. Chaychinallam punchawpis tutampwanqa mana atinmanchu tandamkayta. 15 Chaychinallam Jisumkristumpis mana atinchu suq yuyaylla kayta dyabluwanqa. Chaychinallam Jisuspi kriyiqkunampis chay mana kriyiqkunawanqa mana atinchu suq yuyaylla kayta. 16 Nuqanchiqkunaqam Tayta Dyuspa adurana wasin kanchiqllampa. Chaymi mana balinchu amitu layamkunata adurananchiqqa. Chayrallkum Tayta Dyusqa Santu Librumbi nin: Nuqaqam pallkunawan kawsachpa, pulla purichaq. Nuqaqam Tayta Dyusnin kachaq. Pallkunaqam nuqampa wambrallkuna rinllampa kaq, nichpa. 17 Chaymandaqam Tayta Dyusqa kaychinampis nirqan: Chay uchayuqkunampa ch'awpinmanda achuchpa, amkramkayllampa. Amar nimatampis chay mana baliq kaqkunataqa rurayllampachu. Chaychina allita ruramptimkillampam, nuqaqa chumaqta ch'askichqallkillampa. 18 Chaychinam nuqaqa Taytallkillampa kachaq. Qamkunaqam wambrallkuna ringillampa kaq. Chaychinam nin ancha pudirniyuq Tayta Dyus.
1 Kuyachqay kriyiq masitamkuna, Tayta Dyusmi chaychina nuqanchiqkunata ufrisiwachqa kanchiq ancha yanampawananchiq. Chayri kwirpunchiqta allita sujitachpa, ama nima uchata rurachunchu, limpyu chunquyuq kananchiqllampa. Chayri Tayta Dyusta ancha rrispitachpa, payman allita intrigamkachun, pay munachqanda rurachpa kawsananchiq. 2 Yumbay qamkunatam rrugallkillampa, tumkuy chunqu kuyawanallkimpaq. Chaqa manam ni pitampis dañachichqachu kani, ni pitampis uchata rurachichqachu kani. Manam ni qamkunata ingañachuchqachu kani. 3 Mana munachpachu kundinachuytam, tumkuy kallkunata iskibrillkillampa. Chay punta bwilta iskibrichpa nichuchqaychinallam, tumkuy chunqu ancha kuyallkillampa. Chaychinallam kawsachpa wañuchpampis, rinchiqllampa kuyanamkuq. 4 Chaychina qamkunampi yuyamkuchpam, ancha kuchimkuni. Chaymi padisichpampis, nuqaqa ancha animamkachpa, kuchimkuni. 5 Prubinsya Masiduñaman ch'ayachqay diyamandampacham, achka prublimamkuna kachqanrallku, mana atirqayllampachu samayta. Chaqa achka runamkunam kuntrawarqanllampa. Chaymi chunquyllampampiqa mancharqayllampa. 6 Piru Tayta Dyus disanimadumkunata animachiqmi masanchiq Tituta qamkunamanda nuqallkunaman ampamuchpa, ancha animachiwarqan. 7 Piru manam payrallkullachu kuchimkuni. Achwanmi kuchimkuniqa Titu parlachiwamptin: Kurintinumkunam ancha animachiwachqa, nichpa. Chaqa payqam niwarqan: Kurintinumkunam ancha munanllampa rimkachuyta. Ancham llamkinllampa chay anyachqallkimpaq. Chaymi ancha munanllampa alliyayta qamwan, niwachpa. Chaychina parlachiwamptinmi, achwan masta kuchimkuchqa kani. 8 Chaymi kananqa manana llamkinichu chay punta kartata iskibrichuchqaypaqqa. (Chaqa llamkichichuchpampismi, chay kartaywan yanampachurqaqllampa, mas chumaqta kawsanallkillampa.) Piru qamkunata llamkichichuchpaqam, nuqampis ancha llamkirqay. 9 Piru chay llamkichqaymandaqam kananqa kuchimkunina. Manam kuchimkunichu qamkuna malagana kachqallkirallkuqa. Achwanmi kuchimkuniqa chay uchallkimkunata dijachpa, Tayta Dyustana kasumptimkillampa. Chaymi nuqaqa mana dañachichurqaqchu. (Achwanmi yanampachurqaqllampa, Tayta Dyuswan alliyanallkillampa.) 10 Chaqa mana allimkunata ruramptinchiqqam, Tayta Dyusqa yanampawanchiq, syintichpa ninanchiq: Ancha uchayuqmi kani, nichpa. Chaychina syintichpa Dyusman mañamkumptinchiqqam, payqa yumban uchanchiqmanda pirdunawaqninchiq, wachawanchiqllampa. Piru Jisuspi mana kriyiqkuna kay mundumpa kusasningunampaq llamkichpaqam, rinllampa chingaq. 11 Piru qamkunaqa chay uchayuq runampaq yach'achpaqam, ancha llamkichpa, Dyus munachqanchina rurarqallkillampa. Chaqa chay uchayuqrallkum qamkunaqa piñamkuchpa, mancharqallkillampa: Payrallkum Tayta Dyus rin kastigawaqninchiq, nichpa. Chaymi chay runataqa kastigachpa, nuqata munachpa rimkawayta, tumkuy ima rurachqallkimpaq qamkunaqa abisawarqallki. Chaymi mana uchayuqchu kangillampa chay runa rurachqambaq. 12 Piru kay kartataqam mana iskibrichurqaqchu chay dañachimkuq runarallkuchu, ni chay dañachichqanrallkuchu. Achwanmi iskibrichurqaq, qamkuna Dyuspa ñawpambi intyindinallkillampa: Pablutam ancha kuyanchiqllampa, nichpa. 13 Chaymi chaychina qamkuna kuyawamptimki, ancha kuchimkuchqa kani. Piru mastam kuchimkuchqa kani, rimkachpa masanchiq Tituta ancha kuchimkullkamptin. Chaqa yumbay qamkunam paytaqa ancha animachirqallki, chaychina kuchimkunanqa. 14 Chay masanchiq Titu manaraq qamkunaman chamumptinmi, paytaqa willachqa karqay: Chay Kurintumpi tiyaqkunaqam ancha allita rurallkanllampa, nichpa. Chaymandaqam qamkunamanda kutimuchpaqa, niwarqan: Allimptam niwachqa kangi chay kurintinumkunampaq, nichpa. Chaymi ancha kuchimkuchqa kani. Chaqa qamkunata allimp kaqtalla nichuchqaychinam, paytampis allimp kaqtalla nichqa kani. 15 Kananqam Tituqa ancha kasuchqallkita yuyachpa, masta kuyachungillampa. Chaqa qamkunaqam ancha umildina kachpa, payta ancha rrispitachpa, chumaqta ch'ayachirqallkillampa. 16 Chaychina kamptimkillampam, nuqa kuchimkuchpa, qamkunampi ancha yuyamkuni.
1 Kuyachqay kriyiq masitamkuna, kananqam munani nichuyllampata prubinsya Masiduñampi Tayta Dyus kriyiq masinchiqkunata ancha yanampachqambaq. 2 Pallkunaqam ancha padisichpampis, kuchimkuchpa kawsallkanllampa. Ancha pubri kachpampismi, kampuqkunachina ufrindanda achkata quchqallampa. 3 Nuqa kimkiymi rimkachqa kani, kuchimkuchpa ufrindanda Tayta Dyusta qumptinllampa. Chaqa tumkuy ima kaqninmandam atichqanda mas achkata quchqallampa. 4 Chay Masiduñamanda kaqkunam ancha rrugawarqanllampa, dijanayllampa, pallkuna ufrindanda qunanllampa chay mana nimayuq kriyiq masinchiqkunampaq. 5 Piru manaraq ufrindanda quchpam, puntata pallkuna kimkin intrigamkarqan Siñurninchiq Jisusman, nuqallkunamambis: Qamkunata kasuchuchpam, Dyus munachqanchina kawsachaqllampa, nichpa. 6 Chaymi Tituta rrugachqallampa kani, qamkunaman chamuchpa, yanampachuchpa, chay ufrindallkillampata tandanambaq. Chaqa payqam unaymandampacha chaychina tandallkan. 7 Kanan qamkunaqam tumkuy imata ancha allita rurallkangillampa. Jisuspim ancha allita yuyamkullkangillampa. Tayta Dyus nichqanda allita yach'achpam, chumaqta yach'achimkungillampa. Ancha animamkachpam, Tayta Dyusta tumkuy imampi sirbillkangillampa. Nuqallkunatam allita kuyawangillampa. Chaychinallar suqkunatampis kuyachpa, chay ufrindallkita ancha allita quyllampa. 8 Piru manam kamachillkichu, ufrindallkillampata qunallkiqa. Achwanmi munani yach'anallkillampa chay wamkin kriyiq masinchiqkuna ancha animamkachpa ufrindachqambaq, yach'anayllampa: ¿Qamkunampischu pallkunachina suqkunata allimpta kuyangillampa ichu mana? nichpa. 9 Chaqa qamkunam yach'angillampa: Ancha allin Siñurninchiq Jisumkristum tumkuy imayuq kachpampis, kuyawaqninchiq, suq runa ancha pubrichina kay pachaman chamurqan wachawananchiq. Chaychinam pubrimpaq timkramkarqan, qamkuna tumkuy imayuqchina kanallkillampa. 10 Chaymi byinnimkimpaq munani kunachuyllampata chay ufrindallkimpaq. Allim kanman uchyanallkillampa qayna wata qallarichqallkita. Manchu qamkunaqa qayna wata ancha animamkachpa, yumbay kriyiq masinchiqmanda puntata munarqallkillampa ufrindallkita quyta. 11 Chayri chaychina animamkachpa, chay qallarichqallki ufrindallkita mana challkuq quyllampa lumki kaqta. 12 Chaqa suq runa, warmi kuchimkuchpa lumki kaqta qumptinqam, Tayta Dyusqa kuchimkuchpa ch'askin. Payqam mana kamachiwanchiqchu ufrindananchiq, mana kamptinqa. 13 Nuqaqam mana munanichu suqkunata yanampachpa, pallkunamanda mas pubri kanallkillampa. 14 Achwanmi munani yumbay yanampanamkuchpa, ama pimpis ancha pubri kananchiqllampa. Chayri chay mana nimayuq kriyiq masinchiqkunata kay tyimpumpi qamkuna yanampayllampa. Paqtar suq tyimpumpi imallkillampa faltachumptin, pallkunanataq qamkunata yanampachunqallampa. Chaychina suqninchiq suqninchiq yanampanamkuchpam, mana ni pimpis padisinchiqmanchu. 15 Chaymi Tayta Dyusqa Santu Librumbi nin: Suq runa achka mimkunata tandamptimbismi, mana subrarqanchu. Suq runa achla mimkunata tandamptimbismi, mana faltarqanchu, nichpa. 16 Tayta Dyusmi Tituta animachichqa, nuqa qamkunata kuyachuchqaychina, paypis kuyachunanllampa. Chaymi Tayta Dyusta ancha pagimkuni. 17 Chaqa Tituqam nichqayta kasuwachpa, ancha munachqa qamkunata yanampachuyta. Chaymi payqa manaraq pimpis animachimptin, gustunmandalla rin chamuq watumkuchuqllampa. 18 Titumpa pullanmi suq ancha allin kriyiq masinchiqta kach'amunillampa qamkunaman. Payqam Jisuspa chumaq nutisyanda allita yach'achimkun, uyaqkuna wachadu kanambaq. Chaymi yumbay kriyiq masinchiqkuna paypaq ancha chumaqta parlanllampa. 19 Chayrallkum achka kriyiq masinchiqkuna payta numbrachqa, nuqallkunawan ampanambaq chay ufrindanllampata, chay pubri kriyiq masinchiqkunata yanampananchiq. Chayta rimkachpam, ancha achka runamkuna Siñurninchiqta rin alabaq. Chaychinam qamkunampaq rinllampa yach'aq: Allibmi ancha munanllampa suqkunata yanampayta, nichpa. 20 Chaymi kay achka ufrindata ampachpaqa, ancha allita kwidallkanillampa, ama ni pimpis yuyanambaq: Pablum chay ufrindata paypaqlla ampallkan, nichpa. (Chayrallkum chay ancha allin kriyiq masinchiqkuna pullay rinqallampa.) 21 Chaqa Dyuspa ñawpambi, yumbay runamkunampa ñawpambimpismi tumkuy imata allitalla munanillampa rurayta. 22 Chaymi chay kriyiq masinchiqkunampa pullan suq kriyiq masinchiqtampis kach'amunillampa. Paytam achka kutinda rimkachqallampa kani, kriyiq masinchiqkunata ancha kuyachpa yanampamptin. Payqam ancha yuyamkun qamkunampi. 23 Piru mayqan tampuchumptin: ¡Pim Tituqa? nichpa, kaychina niyllampa: Tituqam masanchiq Pablumpa yach'achimkuq masin. Pabluwanmi trabajan yanampawachpallampa, nichpa. Ichu tampuchumptin: Titumpa pullan puriqkunaqa ¿pimkunam? nichpa, niyllampa: Pallkunaqam kriyiq masinchiqkunamanda kach'amuchqanguna. Chaqa pallkuna ancha chumaqta purimptinmi, suqkuna rimkachpa, Jisumkristumpi munanllampa kriyiyta, nichpa. 24 Chayri pallkunata allimpta kuyachpa, chumaqta yanampayllampa, yumbay kriyiq masinchiqkuna yach'ananllampa: Pabluqam mana yanqachu alabachqa chay Kurintumpi tiyaqkunataqa, nichpa.
1 Qamkunaqam yach'angillampa allita ufrindayta, kriyiq masinchiqkunata yanampanallkillampa. Chaymi manana nisisaryuchu muchuqmanda kay kartaypi qamkunata kunarichunaypaq ufrindanallkiqa. 2 Chaqa allitam yach'ani: Qamkunaqam tumkuy chunqu munangillampa ufrindallkita quyta, nichpa. Chaymi prubinsya Masiduñamanda kaq kriyiq masinchiqkunata parlachichqa kani: Prubinsya Amkayampa Kurintu llaqtambi tiyaqkunam suq watana ancha animadu kachqallampa, ufrindanda qunanllampa, nichpa. Chaymi kay prubinsya Masiduñampi achka tiyaqkunampis ancha animamkachqallampa, ufrindanda qunanllampa. 3 Piru chaychina parlachichpampismi, achlita manchani: Kinsampch'i manaraq ufrindallkita qullkangillampachu, nichpa. Chayrallkum kay kimsa kriyiq masinchiqkunata kach'amunillampa, qamkunata yanampachunan, yumbay ufrindallkita tandanallkillampa. Chaychina tandamptimkillampam, mana pimpis atinmanchu niwayta: Yanqam alabachqa kangi chay kurintinumkunata, nichpaqa. 4 Chaqa ancham yuyamkuchqallampa kani qamkunampi. Chayri kwidawkich kay prubinsya Masiduñamanda kaqkuna nuqampa pullay chamumptin watumkuchuqllampa, tarichungiman manaraq ufrindallkita tandamptimkillampa. Chaychina manaraq tandamptimkiqam, ancha panqamkuymanllampa. Piru qamkunaqam masta panqamkungiman. 5 Chaymi nuqallkuna manaraq chamuchpa, kay kimsa kriyiq masinchiqkunata kach'amuni, chay ufrisichqallki ufrindallkita yanampachunambaq tandaq. Chaymi pallkuna qamkunata yanampachumptin tandaytaqa, nuqallkuna chamuchpaqa, tandadu ufrindatana tarichaqllampa. Chaypinam yumbay rimkachuqkuna yach'anqallampa: Chay Kurintumpi tiyaqkunaqam tumkuy chunqu ufrindanda quchqallampa, Pablu mana ampuramptinllampa, nichpa. 6 Yumbay qamkunaqar kayta yuyayllampa: Suq runa achlatalla tarpumkuchpaqam, achlatalla kusichamkumbis. Chaychinallam suq runa achkata tarpumkuchpaqa, achkata kusichamkumbis. 7 Chayri allita yuyachpa, kuchimkuchpa ufrindanchiqta quchun. Amar quchunchu llamkiqchinaqa ichu mayqan ampurawamptinchiq. Chaqa Tayta Dyusqam ancha kuyan chay kuchimkuchpa quqkunata. 8 Payqam ancha pudirniyuq kachpa, achka laya kusaskunata atin quchuyta, ama nima faltachunambaq, achwan kuchimkuchpa, suqkunatana atinallkillampa yanampayta. 9 Chaymi Dyuspa Santu Librumbi kaychina nin: Chay yanampamkuq runa mana nimayuqkunata achkata qumptinmi, Tayta Dyusqa mana nunka rinchu qunqaq paytaqa, nichpa. 10 Chay tarpumkuq runamkunatam Tayta Dyusqa simillanda qun. Mimkunanchiqtampismi paylla quwanchiqllampa. Chaychinallam payqa qamkunata rin yanampachuq, tumkuy imallki achkayanambaq, chay pubrimkunata masta yanampanallki. 11 Chaychinam Tayta Dyusqa ancha rin yanampachuqllampa, qamkunampis achka imayuq kachpa, atinallkillampa suqkunata yanampayta. Chay tandachqallki ufrindata ampamptiyllampaqam, chay pubrimkunaqa ch'askichpa, Tayta Dyusta ancha rinllampa pagimkuq. 12 Chaqa chaychina chay pubri kriyiq masinchiqkunata quchpaqam, ancha yanampangillampa ama padisinambaqllampa. Chaychinam pallkunata animachillkangi, Tayta Dyusta ancha pagimkunanllampa. 13 Chaymi pallkunaqa ufrindallkillampata ch'askichpa, yach'anqallampa: Chay kurintinu kriyiq masinchiqkunaqam Jisumkristumpa chumaq nutisyanda allimpta kriyichpa kasullkanllampa, nichpa. Pallkunatachina achka kriyiq masinchiqkunata qamkuna yanampamptimkim, Tayta Dyusta ancha rinllampa alabaq. 14 Chaychinam Tayta Dyus ancha rin yanampachuqllampa, ufrindallkita qunallkillampa. Chaychina ufrindamptimkillampam, chay ch'askiqkunaqa ancha kuyachuchpa, Tayta Dyusman rinllampa mañamkuq, tumkuy imampi qamkunata yanampachunambaq. 15 ¡Pagimkuchun Tayta Dyusta! (Chaqa dijarqanmi sampalan Churin nuqanchiqkunampaq wañunambaq.) Piru manam atinchiqchu intyindiyta: ¿Imarallkum chaychina ancha yanampawarqanchiq? nichpa. ¡Chayri payta ancha alabachunllampa!
1 Kuyachqay kriyiq masitamkuna, Siñurninchiq Jisumkristum mana nimatampis wampuyachpachu, ancha chumaqta kuyawachqa kanchiq. (Chaychinallam nuqampis kuyachuchpa, munani qamkunata yanampachuyta.) Piru wamkinnimkiqam disprisyawachpa, rimawangillampa: Chay Pabluqam nuqanchiqkunawan kachpaqa, ancha umildichina chumaqta parlachiwanchiq. Piru richpaqam, ancha wampumpaq timkramkachpa, ancha anyawanchiqllampa kartangunampi, nichpa. 2 Chaymi nuqa Pablu ancha rrugallkillampa, allita kasuwanallki, qamkunaman chamuchpa, ama nimatampis anyachunayllampa. Piru wamkinnimkiqam ningillampa: Chay Pablum Jisuspi mana kriyiqkunachina pay munachqandalla rurallkan, nichpa. Chaymi qamkunaman chamuchpaqa, listu kani chay rimawaqkunata ancha jwirtita anyanaypaq. 3 Nuqallkunaqam runamkunalla kanillampa. Piru mayqan kuntrawaqwanqam mana pilyanillampachu chay mana kriyiqkunachinaqa. 4 Chaqa manam binsinillampachu runamkunampa armangunawanqa. Achwanmi Tayta Dyus ancha yanampawanllampa, paypa armangunawan pilyachpa, binsinayllampa asta chay ancha pudirniyuq kuntrawaqkunata. 5 Chaqa chay palanganu kuntrawaqkunam mana munanllampachu ni pimpis Tayta Dyuspi kriyinambaq. Piru chay rimawaqkunatam uyarachichpa, runa masinchiqkunata yach'achinillampa, Jisumkristuta kasuchpa, pay munachqanchina yuyananllampa. 6 Chayrallkum qamkunaman chamuchpa, rinillampa yanampachuq, Jisusta mas allita kasunallkillampa. Piru yumbay mana kasumkuqtaqam (Dyuspa pudirninwan) rinillampa kastigaq. 7 Qamkunaqam champangillampa sawa kwirpu ima laya kachqandalla. Kanan suq runa yuyamptin: Jisumkristumpam kani, nichpaqa, allita intyindinqa: Pablumpismi Jisumkristumpa, nichpa. 8 Chaqa wamkinnimkiqam nuqampaq ningillampa: Pabluqam suq alabamkaq runa, nichpa. Piru manam nimatampis panqamkunichu. Achwanmi allita yach'ani: Jisumkristum nuqata numbrawachqa, kamachimkuq ampustulnin kachpa, qamkunata rimkachunaypaq, paypi mas allita yuyamkunallkillampa. Manam numbrawachqachu, qamkunata dañachichunayqa. 9 Chayri kartallkunata liyichpaqa, ama yuyayllampachu: Pablum munan manchachiwayta, nichpaqa. 10 Piru wamkinnimkiqam ningillampa: Pabluqam kartangunampilla ancha jwirtita anyawanchiqllampa. Piru nuqanchiqkunawan kachpaqam, ancha kubardi karqan. Manam yaqqa atirqanchu rimayta yach'achiwananchiqqa, nichpa. 11 Chayri chay laya rimaqqa kaychina allita yach'ayllampa: Pablu karu llaqtampi kachpam, kallkunata iskibrichpa kach'amun. Chaymanda kutimuchpaqam, kay kartambi nichqanchinalla rin ruraq, nichpa. 12 Nuqallkunaqam mana alabamkanichu yumbay chay alabamkaq yach'achimkuqchinaqa. Chaqa pallkunaqam pallkunampuralla alabanamkuchpa ninllampa: Chay suq yach'achimkuqmandam mas allita rurallkani, nichpa. Chaychina yuyachpaqam, mana nimatampis yach'anllampachu. 13 Piru nuqallkunaqam mana chaychinachu rinillampa alabamkaq suq yach'achimkuqkuna rurachqambaqqa. Chaqa Tayta Dyusmi nuqallkunata kamachiwachqa, achka nasyungunaman rinayllampa yach'achimkuq. Chaychinam ch'ayamurqayllampa Kurintuman, qamkunata yach'achichunayllampa. 14 Chaqa manaraq ni pimpis yach'achichumptinmi, puntata nuqallkuna Jisumkristumpa chumaq nutisyanda yach'achichurqaqllampa, paypi kriyinallkillampa. Chaymi maski yumbay runamkunamanda mas dirichuyuq kanillampa kunachunayllampa. 15 Nichuchqaychinam mana rinillampachu alabamkaq suqkuna rurachqambaqqa. Achwanmi Tayta Dyus niwachqanchinalla rurallkanillampa, Jisumkristumpi mas allita kriyinallkillampa. Chaqa chaychina kriyimptimkillampam, mas allita qamkunata atinillampa yach'achichuyta. 16 Chaychina allita yach'achichuchpaqam, munanillampa riyta mas karu llaqtamkunaman, Jisuspa chumaq nutisyanda yach'achimkuq. Piru manam munanillampachu riyta chay suqkuna yach'achimkuchqan llaqtamkunamanqa. Chaqa manam munanillampachu alabamkayta suq yach'achimkuqkuna rurachqambaqqa. 17 Achwanmi Dyuspa Santu Librun nichqanchina nuqampis nini: Mayqan runa, warmi ama alabamkachpachu, Siñurninchiqta alabanqallampa, nichpa. 18 Chaqa Tayta Dyusqam mana kuchimkunchu, suq runa ichu suq warmi alabamkamptinqa. Achwanmi payqa kuchimkun payta alabaqkunampaq.
1 [Nuta: Pablu Dyuspa ampustulnin kachpampismi, mana munarqanchu alabamkayta. Lumkismi chay ampustul tumkuqkunaqa alabamkachpa, nirqanllampa: Pabluqam mana Dyuspa lijitimu ampustulninchu, nichpa. Chaymi kay partita iskibrirqan.] Kananqam ancha rrugallkillampa, chay tuntu ampustul tumkuqkunachina alabamkamptiy, qamkuna agwantawanallki. 2 Chaqa Tayta Dyuschina kuyachuchpam, nuqaqa mana munanichu, chay ampustul tumkuqkunata kriyichpa, Jisumkristumanda amkramkanallkiqa. Achwanmi ancha munani qamkunata ampachuyta Jisumkristuman suq mana uchayuq dunsilla chinatachina. Chaymi allita kwidallkillampa, ama nima uchayuq kachpa, Jisuswanlla kasaranallkichina. 3 Piru ancham manchani, dyablu qamkunata ingañachunan, chay punta warmi Ibata chay kulibrawan ingañachqanchina, Jisumkristuta amana tumkuy chunqu kuyanallkillampa. 4 Chaqa chay ampustul tumkuqkuna Jisuspaq suq laya dumktrinata yach'achichumptinmi, qamkunaqa das kriyingillampa. Piru Dyuspa Santu Ispiritunda ch'askichpaqa, ¿imampaqtaq chay suq laya ispiritutana munangillampa ch'askiriyta? Jisuspa chumaq nutisyanda yach'amkuchpaqa, ¿imampaqtaq suq laya nutisyata munangillampa yach'amkuriytaqa? 5 Nuqaqam allita yach'ani: Chay ancha kamachimkuq ampustul tumkuqkunaqam nuqamandaqa mana mas yach'ayniyuqchu, nichpa. 6 Chaqa mana allita atichpa rimaytampismi, allita intyindini Jisumkristu yach'achimkuchqanda. Chaymi chumaqta qamkunata yach'achichumptiy, allita yach'angillampa: Pablum ancha yach'ayniyuq, nichpa. 7 Manchu nuqa qamkunawan ancha umildi kachpa, yumbaynimkita dibaldilla Dyuspa chumaq nutisyanda yach'achichurqaq. Chaychinam rurarqay, yach'anallkillampa: Pablum ancha rrispitawanchiq, nichpa. Chaychina rurachpaqachu, ¿maluta rurachqa kani? Manñm. 8 Chaqa suq kriyiq masinchiqkunamanda ufrindangunata ch'askichpaqam, pallkunata quch'illkaymanchina, dibaldilla qamkunata yach'achichunaypaq. 9 Kanan qamkunawan kachpa imay faltawamptinqam, mana nimata qamkunataqa mañachurqaqchu. Achwanmi chay prubinsya Masiduñamanda ch'ayamuq kriyiq masinchiqkuna ima faltawaqta quwachqallampa. Chaychinallam mana nimatampis rinichu mañachuqllampa. 10 Chaqa Jisumkristumpa chutimbim allimpta nillkillampa: Chay prubinsyallki Amkayampi yumbay tiyaqmandaqam mana ni pimpis atinqachu uyarachiwayta, kaychina kuchimkuchpa nimptiy: Dibaldillam qamkunata yach'achichuchqa kani, nichpa. 11 Piru chaychina nichumptiyllampaqa, ama yuyayllampachu: Pabluqam mana kuyawanchiqchu, nichpaqa. Chaqa Tayta Dyusmi yach'an, qamkunata ancha kuyachuchqaytaqa. 12 Piru rinim sigiq dibaldilla yach'achichuchpa, chay ampustul tumkuqkuna ama atinanllampa alabamkayta: Nuqampismi Pabluchina yach'achimkuni, nichpaqa. (Chaqa pallkunaqam kubrachuchpa yach'achimkun.) 13 Chay runamkunaqam mana Jisumkristumpa lijitimu ampustulningunachu. Achwan yach'achimkuqchina tumkuchpam, achka llullamkunata yach'achimkunllampa. 14 Chaychina allin yach'achimkuqchina tumkumptinllampaqa, ama ispantayllampachu. Chaqa kimkin dyablumpismi Dyuspa anjilninchina ruramkuchpa, ancha chumaqta llimpyan ingañawananchiq. 15 Chaymi chay ampustul tumkuqkunampis dyabluta kasuchpa, allin runamkunachina tumkunllampa. Piru chaychina ingañachqanrallkum, Tayta Dyusqa pallkunata ancha rin kastigaq. 16 Muchuqmandam nirillkillampa: Amar ni mayqannimkimpis nuqampaqqa yuyayllampachu: Pabluqam lumku, nichpaqa. Piru chaychina yuyachpaqa, dijawayllampa lumkuchina rimanaypaq. Chaqa chay ancha alabamkaq ampustul tumkuqkunachinam nuqampis achlitata rini alabamkaq. 17 Piru nuqa chaychina alabamkachpaqam, suq lumkuchina rimallkani. Manam Siñurninchiq Jisumkristu munachqanchinachu (ni nuqa munachqaychinachu) rimallkaniqa. 18 Piru chay ampustul tumkuqkunam ancha alabamkanllampa Jisuspi mana kriyiqkunachina. Chaymi nuqampis achlitata rini alabamkaq (ama kriyinallkillampa chay llullamkuqkunampi). 19 Chaqa qamkuna yuyachpa: Yach'ayniyuqmi kani, nichpampismi, das kasungillampa chay tuntu alabamkaq runamkunata. 20 Kanan suq ancha wampu patrunchina qamkunata kamachichumptimbismi, das kasungillampa. Chaymi ingañachuchpa, imallki kaqkunata quch'ichungillampa. Kanan qamkunata disprisyachuchpa, ancha palanganuyachpa, asta qaqllallkimpi maqachumptinqa, ¿imampaqmi pallkunataqa kasungillampa? 21 Piru nuqallkunaqam mana chay ingañamkuq kaqkunachinachu kanillampa. ¡Kinsampch'i balinman panqamkunaypaq, qamkunawan ancha umildi kachqayrallku! Piru chay ingañamkuqkunaqa manam pitampis manchachpachu, ancha alabamkanllampa. Chaymi nuqampis, mana pitampis manchachpachu, suq lumkuchina rimachpa, atini alabamkayta. 22 Pallkunaqam ninllampa: Ibriyu rimaypim rimanillampa, nichpa. Nuqampismi ibriyu rimaypi rimani. Ninllampampismi: Lijitimu isrraylinumkunam kanillampa, nichpa. Nuqampismi lijitimu isrraylinu kani. Ancham rimanllampampis: Nuqallkunaqam chay Abrajamba karu willkanguna kanillampa, nichpa. Nuqampismi Abrajamba karu willkan kani. 23 Ninllampampismi: Nuqallkunaqam Jisumkristumpaq yach'achimkuni, nichpa. Piru nuqaqam Jisuspaq masta yach'achimkuni. Suq lumkuchinam kallkunata parlachillkillampa. Nuqatam mas achka kutinda karsilawarqanllampa. Kanan mas achka kutindam asutiwarqanllampa. Chaychinam mas achka kutinda yaqqa wañurqanimpis, (Jisuspa chumaq nutisyanda yach'achimkuchpa.) 24 Chaqa llaqta masiy isrraylinumkunampa awturidarninguna sinku kutinda chimkutiwan asutiwarqanllampa. Kada bwiltam asutiwarqan 39 chimkutista. 25 (Rrumanu awturidarkunampismi) kimsa kutinda qarumkunawan maqawarqanllampa. Suq kutindam kuntrawaqkuna sitawarqanllampa, wanchiwananllampa. Yamkumpi puriq barkumkunampi rillkachpa, kimsa kutinda yamkuman saqarqayllampa. Chaymi suq kutinda suq diya, suq tuta yamkumpi wambullkarqay. 26 Chaychina Jisumkristumpaq yach'achimkuchpa, tumkuy mayta purichpam, rriyumkunata pasaqchina yaqqa wañurqay. Ladrungunampismi yaqqa wanchiwarqanllampa. Llaqta masiy isrraylinumkuna, mana isrraylinu kaqkunampismi achka kutinda munarqanllampa wanchiwayta. Kanan llaqtamkunampa ch'awpimbi kachpa, chay chuncha lugarkunata pasaqchina, chay mar yamkumpi purichpampismi, yaqqa wañurqay. Jisuspi kriyiq tumkuqkunampismi ancha munachqallampa dañachiwayta. 27 Kanan achka diyamkunam punchawnindin tutampnindin challku challku trabajachpa, mana nimatampis puñuchqachu kani. Kanan wamkin diyamkunam yamkumpaq, mimkunampaq ancha padisichqa kani. Manam ni allin mudanayuqchu kachqa kani. Chaymi chiriwan ch'ampsimkachpa purichqa kani. 28 Chaychina padisichpaqam, achwan masta llamkini yumbay kriyiq masinchiqkunampaq. Chaqa ancham yuyani: ¿Imachinaraq kawsallkanllampa Dyuswan? nichpa. 29 Chaymi Jisuspi kriyiq masinchiqkuna disanimamkamptinqa, nuqampis pallkunampaq ancha llamkichpa, yaqqa disanimamkani. Ichu suq kriyiq masinchiqta uchata rurachimptinqa, ancha panqamkuchpa, piñamkuni. 30 Chaymi alli kamptin alabamkanayqa, kaychinalla nichaq: Ancha dibil kamptiypismi, Jisumkristu ancha yanampawachqa, nichpa. 31 Kanan Siñurninchiq Jisumkristumpa Taytan Dyusmi yach'an allimp kaqtalla rimachqaytaqa. ¡Paytalla tumkuy tyimpu alabachunllampa! 32 Chaymi Damasku llaqtampi kallkamptiy, chay gubyirnu Aritaspa yanampamkuqninmanda wachawarqan. Chay llaqtampa tumkuy rridurninmi muralladu karqan. Chaymi ama lluqchinaypaq, chay kamachimkuqqa chay atun murallampa yumbay pungungunampi suldadungunata rurarqan, piskawananllampa. 33 Chaymi wamkin kriyiq masinchiqkuna suq kanastata waskamkunawan watarqanllampa. Chaymandaqam chay atun murallampa suq bintananman surquwachpa, chay kanastampi sawaman ichkichiwarqanllampa, chay llaqtamanda mitimkanaypaq.
1 Manam nimampaqpis balinchu alabamkanayqa. Piru Siñurninchiqmi musquypichina pamkadu kusaskunata rimkachiwarqan. Chay rimkachqayta nichqallkillampa. 2 Chaqa katursi watanam pasachqa, Tayta Dyus mas altu syiluman ampawachpa, paypa lugarninda rimkachiwachqanqa. Piru manam yach'anichu: Kwirpundiytachu ampawarqan ichu musquypichinalla ampawarqan, nichpaqa. Tayta Dyusllam chaypaqqa yach'an. 3 Muchuqmandam nirillkillampa, Tayta Dyusllam yach'an kwirpundiytachu ampawarqan ichu ispirituytalla, nichpaqa. Chaqa nuqaqam mana yach'anichu. 4 Chaychina Tayta Dyus syiluman ampawamptinmi, ancha chumaq pamkadu palabramkunata uyarqay. Piru Tayta Dyusqam mana dijawanchu rimanaypaq chay uyachqay palabramkunataqa. 5 Chaychina syiluman richpampismi, mana munanichu alabamkayta chay rimkachqaypaqqa. Achwanmi alabamkachaqqa ancha dibil kamptiy, Siñurninchiq yanampawachqambaq. 6 Piru chaychina alabamkachpaqam, mana chay tuntumkunachinachu rimayman. Achwanmi allimp kaqtalla niymanqa. Piru manam munanichu alabamkayta. Achwanmi munani qamkuna allita riqsiwanallki: ¿Pabluchu allita ruran, allita yach'achimkun ichu mana? nichpa. 7 Piru chay ancha chumaq kusaskunata syilumpi rimkachiwachpaqam, Tayta Dyusqa mana munarqanchu palanganu kanaypaqqa. Chaymi dyabluta dijarqan, kwirpuyta padisichinambaq. Chaychinam padisini, ama alabamkanaypaq. [Nuta: Kay birsimkulum grigu rimaypi kaychina nin: Nuqampa kwirpuypim kachata plantarqan, nichpa. Mas achka yach'ayniyuqkunam yuyanllampa: Chay kacha plantachqam munan niyta: Pablum qachyaq ichu lisyadu karqan, nichpa. Piru wamkinqam yuyanllampa: Chay kachaqam munan niyta: Pabluta kuntraqkunam payta ancha padisichichqa, nichpa.] 8 Chaymi kimsa kutinda Siñurninchiqta ancha rrugachqa kani, ama masta chaychina padisinaypaq. 9 Piru payqam niwarqan: Nuqa kuyachuchpam, ancha rini yanampachuq, kuchimkuchpa kawsanallki. Chaqa mana nimatampis atimptimki ruraytaqam, masta rini yanampachuq, nichpa. Chaymi nuqaqa ancha kuchimkuni. Chaqa ancha dibil kamptiypismi, Jisumkristu ancha yanampawan pudirninwan. 10 Chaymi ancha dibil kachpa ichu musyawamptinllampa ichu imay faltawamptin ichu kuntrawaqkuna qasachawamptin ichu ancha padisichpampis, nuqaqa rini kuchimkuq. Chaqa mas dibil kamptiymi, Jisumkristu masta yanampawan, ancha jwirti kanaypaq. 11 Manam munachqachu kani alabamkayta suq tuntuchina. Mas allich'i kananda, qamkuna alabawanallki. Chaqa chay ampustul tumkuqkunaqam mana nimampimpis atinllampachu binsiwayta. Piru wamkinnimkiqam mana munangillampachu ni uyawayta. Achwanmi chay ampustul tumkuqkunatalla kasungillampa. Chaymi awnki mana balimptiypis, ancha nisisaryu kachqa, alabamkanaypaq, chay ampustul tumkuqkunata ama kriyinallkillampa. 12 Chaqa Tayta Dyus yanampawamptinmi, qamkunawan kachpa, mana challkuq yach'achichuchpa, achka ispantaypaq milagrumkunata rurachqa kani. Challkunata ruramptiymi, qamkunaqa allita yach'arqallkillampa: Jisumkristum Pabluta allimpta numbrachqa, ampustulnin kanambaq, nichpa. 13 Chaymi tampullkillampa: ¿Imampitaq mana allitachu yanampachuchqallampa kani chay wamkin kriyiq masinchiqtachinaqa? Piru qamkunawan kachpaqam, mana nimatampis mañachurqaqchu mantyiniwanallkiqa. Kinsampch'i chaychina mana nimatampis mañachuchpa, qamkunata ufyindichuchqa kani. Chaychina rurachqa kamptiyqa, pirdunawayllampa. 14 Siguradunam kani chamunaypaq qamkunata watumkuchuq. Kay chamuchqaywanqam kimsa kutinna rini watumkuchuqllampa. Piru manam munanichu nimatampis mañachuyllampata. Achwanmi munani, qamkuna tumkuy chunqullkiwan kuyawanallki. (Nuqaqam taytallkichina kachpa, munani qamkunata yanampachuyta.) Chaqa wambritumkunam taytangunata mana mantyininllampachu. Achwanmi taytamkuna wambrangunata mantyinin. 15 Chaychina taytallkichina kachpam, tumkuy imayta quchuyman, qamkunata yanampachunaypaq. Asta wañuymambismi qamkunata yanampachunaypaq. Chaychina ancha kuyachumptiyqa, ¿imarallkutaq qamkunaqa mana yaqqa kuyawangichu? 16 Chaqa qamkunaqam allita yach'angi mana nimata mañachuchqayta. Piru chayta yach'achpampismi, wamkinnimkiqa nuqampaq rimangillampa: Pablum, ancha bibasu kachpa, ingañawaqninchiq, qallayninchiqta surquwachqa kanchiq, nichpa. 17 ¿Qamkunaqachu yuyangillampa: Pablum wamkin kriyiq masinchiqkunata kach'amurqan, ufrindanchiqta paypaq ampananllampa, nichpa? (Manam nimatampis chaychinaqa rurachqachu kani.) 18 Achwanmi masanchiq Tituta rruqarqay, rinambaq watumkuchuqllampa. Suq masanchiqtampismi paywan kach'amurqay. Mayñ, ¿chaychinaqachu Titu ingañachuchpa, imallkillampata surqurqan? Manñm. Achwanmi Tituqa nuqachinalla yuyachpa, ancha kuyachuchpa, dibaldilla qamkunata yach'achichurqan. 19 Kuyachqay kriyiq masitamkuna, kinsampch'i yuyangillampa: Pabluqam kay kartata kach'amuchqa, wachamkamptin, paytana kriyinanchiq, nichpa. Manam chaychinachu. Achwanmi Jisumkristu yanampawamptin, Dyuspa ñawpambichina kay kartata iskibrillkillampa, Jisuspi mas allita kriyinallkillampa. 20 Piru nuqaqam manchani: Chamuchpa watumkuchuqch'i, tarichuyman, mana allimkunata rurallkamptimkillampa. Chaychina tarichuchpaqam, mana rinichu ruraq gustullkitaqa. Chaqa kinsampch'i qamkunaqa suqwan suqwan anyanamkullkangi, imbidyanamkullkangi, piñampanamkullkangi, amkranamkullkangi, wacha rimallkuna kangillampa, musyanamkullkangi, palanganuyallkangi ichu ch'uqyachpa, tumkuy mana baliqkunata rurallkangillampa, nichpa. 21 Chaymi manchani: Kinsampch'i achka qamkuna unaymandampacha uchata rurallkangillampa, suqwan suqwan puñuchpa ichu runamkunampa ñawpambi panqamkuypaq kusaskunata rurachpa. Chaymi chay uchallkimkunata mana dijamptimkillampa, qamkunaman chamuchpa, qamkunarallku panqamkuchpa, Dyuspa ñawpambi rini waqaq, nichpa.
1 Nichuchqaychinam, kay chamuchqaywanqa kimsa kutindana rini chamuq, qamkunata rimkachuq. Dyuspa Santu Librumbim nin: Yach'anallki suq runampaq, ¿uchayuqchu ichu mana? nichpaqa, ichkay ichu kimsa tistigumkunata allita uyay, chay runata chimbimptinllampa, nichpa. 2 Yuyayllampa chay ultimu diya watumkuchuchpa kunachuchqayta. Chaqa qamkunawan kachpaqam, chay uchayuqkunata ancha kunarqay, uchamkunata amana rurananllampa. Kanan nuqaqam karumpi kachpampis, yumbaynimkita chaychinalla ancha kunallkillampa. Chaqa qamkunaman chamurichpaqam, yumbay chay uchayuqkunata rini kastigaq. 3 Chaychina kastigachumptiymi, allita ringillampa yach'aq: Pablum Jisumkristumpaq riman, nichpa. Chaqa Jisumkristum ancha pudirniyuq kachpa, chay uchayuqkunata rin kastigaq qamkunampa ñawpallkimpi. 4 Allibmi Jisumkristu kruspi wañurqan suq mana pudirniyuq runachina. Piru Tayta Dyusmi pudirninwan wañuchqanmanda kawsachimurqan. Chaychinallam nuqallkunampis mana pudirniyuq runamkuna kanillampa. Piru Jisuspi allita kriyimptiyllampam, ancha pudirniyuq Tayta Dyus yanampawanllampa, pay munachqanchina atinayllampa rurayta qamkunawan. 5 Chayri yumbay qamkuna allita mallimpamkayllampa: ¿Jisumkristumpichu allimpta kriyillkani ichu mana? nichpa. Chaqa paypi allimpta kriyimptimkiqam, payqa qamkunampi kawsallkan. Piru paypi mana allimpta kriyichpaqam, yanqa kriyiq tumkuqkunalla kangillampa. 6 Piru nuqaqam qamkunampi yuyamkuni: Allitam ringillampa riqsiwaq: Pablum Jisuspa lijitimu ampustulnin, nichpa. 7 Chaymi Dyusman mañamkuni, ama nima maluta rurachpa kawsanallkillampa. Chaqa mas allim kanman, nuqa pandachpa anyachunaypaq, mana nima uchayuq kamptimkillampa. Paqtar anyachuchpa, pandachqa kani. 8 Kanan allimp kaqtaqam mana atinillampachu kuntrayta. Achwanmi allimp kaqtalla rimachpa kawsanillampa. 9 Chaymi qamkuna Jisuspi allita kriyimptimkiqa, ancha kuchimkunillampa. Chaqa qamkuna chaychina kawsamptimkiqam, mana nima pudirniyuqchu kanillampa kastigachunayqa. Chaymi Tayta Dyusman ancha mañamkuni, kada diya mas allita rurachpa, kawsanallkillampa. 10 Chaymi manaraq chamuchpa qamkunata watumkuchuqqa, karumanda kay kartata iskibrillkillampa, allitalla rurachpa kawsanallkillampa, nuqa chamuchpa, ama kastigachunaypaq. Chaqa Siñurninchiq Jisusmi pudirniyuq ampustulnimbaq numbrawachqa, qamkunata yach'achichunay, paypi mas allita kriyinallkillampa. Manam numbrawachqachu, qamkunata dañachichunayqa. 11 Kuyachqay kriyiq masitamkuna, kuchimkuyllampa. Ancham rrugallkillampa, allitalla rurachpa kawsanallki. Chayri kunswilamkachpa, suq yuyayniyuq kachpa, chumaqta kawsayllampa. Chaychina kawsamptimkillampaqam, Tayta Dyusqa kuchichichuchpa, kuyachuchpa, qamkunawan rin kaq. 12 Chayri suqwan suqwan ancha rrispitanamkuchpa, muchanamkuchpa nampallkunamkuyllampa. 13 Kay lugarmandam, Jisuspi yumbay kriyiq masinchiqkunampis nampallkuchungillampa. 14 Siñurninchiq Jisumkristur tumkuy imampi yumbaynimkita yanampachunqa. Tayta Dyuspis kuyachunqallampa. Santu Ispiritumbis qamkunawan kanqa. Chaychina kanqa.
1 Kuyachqay kriyiq masitamkuna, nuqa Pablu, kaypi pullay kaq kriyiq masinchiqkunawanmi kay kartata kach'amunillampa qamkuna prubinsya Galasyampi tandamkaq kriyiq masillkunaman. Chaqa nuqatam kimkin Jisumkristu numbrawachqa, ampustulnin kanaypaq. Manam runamkunachu numbrawachqaqa. Achwanmi Jisumkristu, payta kawsachichqan Taytan Dyuswan numbrawachqaqa. 3 Chaymi mañamkuni Taytanchiq Dyusman, Jisumkristumambis, tumkuy imampi yanampachunanllampa, kuchimkuchpa kawsanallkillampa. 4 Chaqa Tayta Dyus munachqanchinam Jisumkristu wañurqan, uchanchiqkunamanda wachawananchiq, amana chay uchayuqkunachina kawsananchiqllampa. 5 ¡Chayri tumkuy tyimpu Tayta Dyusta alabachunllampa! ¡Biba Tayta Dyus! ¡Chaychina kanqa! 6 Jisumkristu ancha kuyawaqninchiq wañuchqanrallkum, Tayta Dyusqa kumbidawachqa kanchiq, paypi kriyimptinchiq, wachawananchiq. Piru qamkunaqam paymanda das amkramkachpa, suq laya dumktrinampina kriyillkangillampa. Chaymi ancha ispantani: ¿Imampaqraq chaychina kriyillkanllampa? nichpa. 7 Chaqa Jisumkristullam uchanchiqkunamanda pirdunawaqninchiq, atin wachawayninchiqta. Chaymi mana kanchu suq laya dumktrina wachawananchiqqa. Lumkismi wamkin runamkuna pandachichuchpa, suq laya dumktrinatana yach'achichungillampa. 8 Chayri suq laya dumktrinata mayqan qamkunata yach'achichuqtaqa Tayta Dyus kastigachpa chingachinqa. Kanan nuqa kimkiy ichu suq anjil syilumanda chamuqqa chay yach'achichuchqaymanda suq laya dumktrinatana qamkunata yach'achichumptiyqa, nuqallkunatampis kastigawachpa, chingachiwanqa. 9 Chay nichuchqaytam suq kutinda nirillkillampa: Suq laya dumktrinata mayqan yach'achichuqtaqar, Tayta Dyus kastigachpa chingachinqa, nichpa. 10 Chaychinaqam nillkillampa, ancha munachpa Tayta Dyus alabawanambaq: Ancha allita nuqampaq yach'achimkuchpam, kawsallkangi, nichpa. Manam munanichu, runamkuna alabawananqa. Chaqa runamkuna alabawanambaq yach'achimkuchpaqach'i, Jisumkristutaqa manana kasuymanchu. 11 Kuyachqay kriyiq masitamkuna, kayta allita yach'ayllampa: Nuqa Pablum Jisumkristumpa chumaq nutisyanda yach'achimkuni, qamkuna wachadu kanallkimpaq. Manam runamkuna yuyachqandachu yach'achimkuniqa. 12 Chaqa Jisumkristu kimkinmi kay chumaq nutisyandaqa yach'achiwachqa. Manam mayqan runachu yach'achiwachqaqa. 13 Qamkunaqam nuqampaqqa yach'angillampa: Unayqam Pabluqa isrraylinu masingunampa dumktrinanda kasuchpa kawsarqan. Chaymi Jisuspi kriyiqkunataqa ancha qasachachpa, munarqan limpu chingachiyta, nichpa. 14 Chaqa unayqam nuqaqa chay isrraylinu agwilullkunampa kustumbringunata ancha allita kasurqay. Chaymi nuqaqa chay pullay wiñaqkunamandaqa masta yach'amkuchqa karqay chay unay dumktrinangunata. 15 Piru Tayta Dyusqam ancha kuyawachpa, mamitaypa pach'ambi kamptiylla, amkrawachqa karqan, paypaq yach'achimkunaypaq. Chaymi munachqan tyimpumpi, 16 Churin Jisusta riqsichiwarqan, chumaq nutisyanda waq mana isrraylinu kaqkunata yach'achinaypaq. Chaychina Tayta Dyus kimkin yach'achiwamptinmi, mana rirqaychu ni mayqan runaman, Jisuspaq yach'achiwananqa. 17 Manam ni Jirusalin llaqtaman rirqaychu, chay punta ampustulkunamanda yach'amkunaypaqqa. Achwanmi das rirqay chay nasyun Arabyaman. Chaymandaqam kutimurqay chay Damasku llaqtamanna. 18 Chaymandaqam kimsa watamandaraq Jirusalinman rirqay, Pidruta riqsichpa paywan parlaq. Chaypi tarichpaqam, paywan kinsi diyasta karqay. 19 Chaypi kachpaqam, Siñurninchiq Jisuspa masan Jamkubuwambis parlarqay. [Nuta: Chay Jamkubullam Santyagumpis chutirqan.] Piru manam tarinamkurqaychu chay suq ampustulkunawanqa. 20 Allimptam nillkillampa: Allimp kaqtalla iskibrichpam, qamkunaman kach'amuni. Dyuspa ñawpambim nillkillampa: Manam nimatampis llullamkullkanichu, nichpa. 21 Chaymandaqam prubinsya Siryaman, prubinsya Silisyaman rirqay. 22 Piru prubinsya Judiyampiqam Jisumkristumpi kriyiq masinchiqkunaqa manaraq riqsiwarqanchu. 23 Piru yach'arqanllampa: Chay runa unay qasachawaqninchiqmi manana kuntrawanchiqchu. Achwanmi Jisuspa chumaq nutisyandana yach'achimkullkan, nichpa. 24 Chaychina nuqampaq yach'achpaqam, Tayta Dyusta ancha alabarqanllampa.
1 Katursi watas pasamptinqam, kriyiq masinchiq Birnabiwan Tituta ampachpa, muchuqmanda ririrqay Jirusalin llaqtaman, 2 Tayta Dyus kamachiwamptin. Chaymi waqman ch'ayachpaqa, chay kamachimkuq kriyiq masinchiqkunawanlla tandamkachpa, pallkunata intyindichirqay: Nuqaqam chay mana isrraylinu kaqkunata kaychina Jisuspa chumaq nutisyanda yach'achillkani, paypi kriyinanllampa, nichpa. Chaqa manam munarqaychu chay kamachimkuq kriyiq masinchiqkuna kuntrawananllampa, ama balinambaq chay yach'achimkuchqayqa. 3 Chaypim pullay karqan chay kriyiq masinchiq Titumpis. Paymi nasyun Grisyamanda kamptimbis, chay ampustul masillkunaqa mana kamachirqanchu, isrraylinumkunampa siñalninda kwirpumbi ruranambaqqa. 4 Piru chay Jirusalimbiqam karqambis Jisumkristumpi kriyiq tumkuqkuna. Pallkunaqam Tituta ancha munarqanllampa kamachiyta, chay siñalta kwirpumbi ruranambaq. Chaymi pallkunaqa manachinalla nuqallkunaman chamuchqa karqan jusgawananllampa: Jisuspi kriyichpaqachu, Muysispa yumbay liyningunata kasullkanllampa ichu mana, nichpa. Chaqa ancham munarqanllampa, randichqa kriyaduchina kawsachpa, yumbay liyningunata kasunayllampa. 5 Piru nuqallkunaqam mana nimatampis pallkunataqa kasurqayllampachu. Chaqa munarqayllampam, qamkuna mana isrraylinu kaqkuna Jisuspa chumaq nutisyambilla allimpta kriyichpa kawsanallkillampa. 6 Kanan chay mas kamachimkuq kriyiq masinchiqkunaqam mana nimatampis niwarqanllampachu, kambyanaypaq chay yach'achimkuchqayta. Piru chay kamachimkuqkunaqam ancha rrispitadu kachpampis, nuqampaqqa mana balinllampachu maski chay wamkin kriyiq masinchiqmandaqa. Chaqa Dyusqam mana sawa kwirpunchiqtallachu rimkan. (Achwanmi chunqunchiqta rimkachpa, jusgawanchiq.) 7 Chay kimkin Tayta Dyusmi Pidruta ampustulnimbaq numbrachpa, isrraylinumkunaman kach'arqan, pallkunata Jisuspaq yach'achinambaq. Chaychinallam nuqatampis ampustulnimbaq numbrawachpa, qamkuna mana isrraylinu kaqkunaman kach'amuwarqan, qamkunata Jisuspaq yach'achichunaypaq. Chayta nuqampaq intyindichpaqam, chay ampustul masillkunaqa mana nimatampis niwarqanchu, kambyanaypaq chay yach'achimkuchqayta. 9 Achwanmi chay ancha rrispitadu kriyiq masinchiqkuna Jamkubu, Pidru, Jwan nuqampaq allita yach'achpa, suq tratuta rurarqanllampa nuqawan, Birnabiwambis, di palabra kidachpa, yach'achimkuq masimkuna kanayllampa. [Nuta: Pidrullam Sifaspis chutiq.] Chaymandaqam kaychina niwarqanllampa: Qamkuna riyllampa yach'achiq yumbay chay mana isrraylinu kaqkunata. Nuqallkunaqam rinillampa yach'achiq kay llaqta masinchiq isrraylinumkunata, nichpa. 10 Challkunata niwachpaqam rrugawarqanllampa, chay mana nimayuqkunata yanampanayllampa. Nuqampismi chaychinalla yuyachpa, chay pubrimkunata ancha yanampachqa kani. 11 Kanan nuqa Pablum rini nichuqllampa imarallkum anyarqay ampustul masiy Pidruta, chay Antyumkiya llaqtampi mana allita rurachqanrallku. 12 Chaqa chay Pidruqam Antyumkiya llaqtaman ch'ayachpaqa, puntata allita rurachpa, yumbay kriyiq masinchiqkunawan pulla mimkurqan. Piru chaymandaqam Jirusalinmanda ch'ayamurqan wamkin isrraylinu kriyiq masinchiqkuna, Jamkubu kach'amumptin. Chay ch'ayamuqkunam munarqan, Jisuspi yumbay kriyiqkuna chay siñalta kwirpumbi rurananllampa. Chaymi Pidruqa mancharqan, chay ch'ayamuqkuna anyanambaq: ¡Imarallkutaq mimkullkangi chay mana siñalniyuq kaqkunawanqa? nichpa. Chaymi Pidruqa chay mana siñalniyuq kaqkunamanda amkramkachpa, manana mimkurqanchu pallkunawanqa. 13 Chaymi chay suq isrraylinu kriyiq masinchiqkunampis, chiminwanlla Dyusta kasuchpa, manana mimkurqanllampachu chay mana isrraylinu kaqkunawanqa. Asta Birnabitampismi manchachimptinllampa, pallkunawan manana mimkurqanchu. 14 Chaychina rurachpaqam, Jisumkristu niwachqanchiqtaqa manana kasurqanllampachu. Chaymi nuqa Pablu chay Pidruta yumbay kriyiq masinchiqkunampa ñawpambi anyarqay: Qam isrraylinu kachpampismi, chay mana isrraylinu kaqkunawanqa chumaqta kawsachqa kangi. ¿Imampaqnamiri kananqa pallkunataqa yach'achillkangi, kustumbrinchiqkunata kasuchpa, kawsananllampaqa? nichpa. 15 Nuqallkunaqam isrraylinu kastamanda nasichqallampa kani. Chaymi llaqta masiy isrraylinumkunampaqqa mana kanillampachu qamkuna suq nasyungunamanda kaqkunachinaqa. Chaqa qamkunampaqqam ninllampa: Muysispa liyningunataqam mana kasunllampachu. Chaymi uchayuqkuna, nichpa. 16 Piru isrraylinu kachpampismi yach'anillampana: Jisumkristumpi kriyimptinchiqllam, Tayta Dyus uchanchiqmanda pirdunawanchiq. Manam pirdunawanchiqchu, Muysispa liyningunata kasumptinchiqqa. Chaqa manam pimpis wachamkanqachu Muysispa liyningunata kasuchpaqa. 17 Chaychina Jisumkristumpi kriyimptiyllampaqam, achka isrraylinu masillkuna nuqallkunampaq kaychina ninllampa: Pallkunaqam Muysispa liyningunata manana kasuchpaqa, ancha uchayuqkuna, nichpa. ¿Chaychina Jisuspi kriyimptiyqachu, pay uchata rurachiwallkan? ¡Manñm! 18 Piru nuqa yach'achimkuchpa: Muysispa liyningunata kasuchunllampa wachamkananchiqqa, nichpaqam, uchayuqna kayman. 19 Chaqa Muysispa liyningunampi kriyichpaqam intyindirqay: Chay lillkunawanqam mana atinichu wachamkayta. Achwanmi yumbay chay lillkunata mana atichpa kumpliyta, rini chingaq, nichpa. Chaymi chay lillkunata munachpa kumpliyta wachamkanaypaqqa, wañuchqachina kani. Piru Jisuspi kriyichpaqam, kawsamuchqachina kani. 20 Chaqa Jisumkristu kruspi klabadu kamptinmi, nuqampis paywan pulla kruspi klabaduchina karqay. Chaymi kananqa kay kwirpuypiqa manana nuqallachu kawsani. Achwanmi Jisumkristu Santu Ispiritunwan nuqampi kawsachpa yanampawan, allita rurachpa kawsanaypaq. Chaymi kay pachampi kawsachpaqa, Dyuspa Churimbi kriyichpa kawsani. Chaqa payqam ancha kuyawachpa, pay kimkin intrigamkachpa wañurqan, uchallkunamanda wachawanambaq. 21 Chaychina Tayta Dyus ancha kuyawachpa wachawamptinmi, mana rinichu disprisyaq pay rurachqandaqa. Piru Muysispa liyningunawan atimptinchiq wachamkaytaqam, yanqana wañunanda Jisumkristuqa.
1 ¡A, galasyanu tuntumkuna! ¿Pitaq qamkunata brujiyachuchqa, amana Jisuspi allita kriyinallkiqa? Manchu nuqallkunaqa qamkunawan kachpa, ancha klarituta yach'achichurqaq: Jisumkristum kruspi wañurqan wachawananchiq, nichpa. 2 Mayñ, niwayllampa, ¿Muysispa liyningunata kasumptimkichu, Dyuspa Santu Ispiritunqa qamkunaman chamurqan? ¡Manam chaychinachu! Achwanmi chamurqanqa, Jisuspaq uyamkuchpa, paypi kriyimptimkillampa, ¿manachu? 3 ¿Ima, ancha tuntuchu kangillampa? Allita yuyayllampa. ¿Imachinam ch'askirqallkillampa Dyuspa Santu Ispiritundaqa? Jisuspi kriyichpallam ch'askirqallkillampaqa, ¿manachu? Chaymi ¿imachina atingillampa yuyayta: Nuqanchiqlla allita kawsachpam, atinchiqllampa wachamkayta, nichpaqa? 4 Jisuspi kriyichqallkirallku ancha padisichpampis, ¿manachu nimatampis yach'amkuchqallampa kangi? ¡Paqtar achlitata yach'amkuchqallampa kangi! 5 Chaqa Jisuspaq uyamkuchpa, paypi kriyimptimkillampam, Tayta Dyusqa Santu Ispiritunda quchuchpa, qamkunampi achka milagrumkunata rurachqa. Piru manam chaychinaqa rurachqachu, Muysispa liyningunata kasuchqallkirallku. Achwanmi chay milagrumkunata rurachqa, qamkuna Jisuspi kriyichqallkirallku. 6 Dyuspa Santu Librumbim chay unay Abrajambaq nin: Dyuspim allita kriyirqan. Chaymi Dyusqa uchangunata pirdunachpa, mana uchayuqpaqna riqsirqan, nichpa. 7 Chayri allita yach'ayllampa: Pimpis Dyuspi allimpta kriyiqqam Abrajamba karu willkanchina, nichpa. 8 Chaqa unaymandampacham Tayta Dyusqa yach'arqan: Chay mana isrraylinu kaqkuna nuqampi kriyimptinqam, pallkunatampis mana uchayuqpaqna rini riqsiq, nichpa. Chaymi Tayta Dyus Santu Librumbi kay allin nutisyata Abrajanda nirqan: Abrajan, qamrallkum yumbay nasyungunampi tiyaqkunata rini yanampaq, nichpa. 9 Chaychinam Tayta Dyusqa paypi yumbay kriyiqkunata yanampan, Abrajanda yanampachqanchina. 10 Piru Muysispa liyningunampi kriyiqkunaqam maldisidu rinllampa kaq chingananllampa, yumbay chay lillkunata mana kumplichqanrallku. Chaqa Dyuspa Santu Librumbim nin: Mayqan runa ichu warmi Muysispa yumbay liyningunata mana kumplichpaqam, maldisidu rinllampa kaq, nichpa. 11 Allitam yach'anchiqllampa: Manam pimpis atinchu kumpliyta Muysispa yumbay liyningunata wachamkanambaqqa, nichpa. Chaymi Dyuspa Santu Librumbi nin: Tayta Dyuspi kriyiqkunaqam pirdunadu kachpa, tumkuy tyimpu rinllampa kawsaq, nichpa. 12 Piru Muysispa liyningunata munachpa kumpliyta wachamkananchiqqam, Dyuspiqa manana kriyillkanchiqchu. Chaymi Dyuspa Santu Librumbiqa nin: Muysispa yumbay liyningunata kumplichpaqam, qamkunalla atingimanllampa wachamkayta. Manaqa manam, nichpa. [Nuta: Piru manam pimpis atinchu kumpliyta yumbay chay lillkunataqa.] 13 Chaymi maldisidu karqanchiq chingananchiqllampa. Piru nuqanchiqpa rrimplasunchiq Jisumkristuqam maldisidu karqan, amana chingananchiqllampa. Chaymi Dyuspa Santu Librumbi kaychina nin: Qarumpi yumbay warkudumkunam maldisidu, nichpa. 14 Chaychinam Jisumkristuqa kruspi warkudu wañurqan, isrraylinumkunata, mana isrraylinu kaqkunatampis wachawananchiq, chay unay Abrajanda Dyus ufrisichqanchina. Chaymi Jisumkristu wañurqan, paypi yumbay kriyiqkuna Santu Ispiritunda ch'askinanchiqllampa. 15 Kriyiq masitamkuna, suq kumparasyunda rurachpam, kaychina nillkillampa: Mayqan runa suq tratuta rurachpa firmamptinqam, manana ni pimpis atinchu chingachiyta ni yampayta, suq laya tratuna kanambaqqa. (Chaychinallam Tayta Dyus ufrisiwachqanchiqta mana nunka rinchu kambyaq.) 16 Chaymi Tayta Dyusqa suq tratuta rurachpa, chay unay agwilunchiq Abrajanda kaychina ufrisirqan: Qamba suq miraynimkiwanmi yumbay nasyungunampi tiyaqkunata rini yanampaq, nichpa. Manam nirqanchu: Miraynimkimkunawanmi rini yanampamkuq, nichpaqa. Achwanmi suqpaqlla rimarqan. Chaychinam Tayta Dyusqa Churin Jisumkristumpaq rimarqan. 17 Kaytaqam nillkillampa: Tayta Dyusqam Abrajanwan chay punta tratuta rurachpa, ancha allita ufrisirqan kumplinambaq. Chaymandaqam 430 watamkuna pasamptinqa, Muysisqa Dyusmanda ch'askirqan chay lillkunata. Piru Muysispa chay liyningunaqam mana atichqachu kambyayta Tayta Dyus Abrajanwan chay punta tratu rurachqandaqa. 18 Chaqa Tayta Dyusqam Abrajandaqa mana wacharqanchu, chay lillkunata kasuchqanrallku. Achwanmi Abrajanda chay ufrisichqanda kumplichpa, dibaldilla wacharqanqa. 19 Tayta Dyus chaychina Abrajanda dibaldilla ufrisichpaqam, ¿imarallkutaq Muysistaqa qurqan chay lillkunataqa? Chay lillkunataqam qurqan, intyindinanchiq: Uchayuqmi kani nichpa. Piru chay lillkunaqam balirqan Abrajamba chay karu willkan Jisumkristu wañunangamanlla. Chaymi Dyuspa anjilninguna chay lillkunata Muysista qurqan. Chaymandaqam Muysisqa abugaduchina kachpa, isrraylinumkunata qurqan. 20 Piru Tayta Dyus kimkinllam Abrajanda ufrisichqa karqan yanampanambaq. Manam nirqanchu ni anjilningunata ni abugadu layata, Abrajanwan parlanambaqqa. 21 Kinsampch'i qamkunaqa yuyangillampa: Tayta Dyus puntata ufrisichpa Abrajanda dibaldilla wachanambaq, ¿imarallkutaq liyningunata Muysistaqa qurqan? nichpa. ¿Tayta Dyusqachu chay lillkunawan munarqan chingachiyta pay Abrajanda ufrisichqanda? ¡Manñm! Piru yumbay chay lillkunataqam mana atinchiqllampachu kasuyta wachamkananchiqqa. 22 Chaymi Dyuspa Santu Librumbi niwanchiq: Yumbay runamkuna, warmimkunam uchamkunata munanllampa rurayta, nichpa. Chayrallkum uchamkunampa prisungunachina karqanchiqllampa. Piru kanan Jisumkristumpi kriyimptinchiqqam, Tayta Dyus yumbay uchanchiqmanda wachawanchiqllampa, ufrisimkuchqanchina. 23 Piru Jisuspi manaraq kriyimptinchiqqam, Muysispa liyningunaqa suq patrunninchiqchina karqan. Piru kananqam yach'achqallampa kanchiq, Jisumkristumpi yuyamkuchpa wachadu kananchiq. 24 Chaymi Jisumkristu chamuchqangamanlla chay lillkunaqa suq yach'achimkuqchina kamachiwarqanchiq, intyindinanchiq: Uchayuqmi kani, nichpa. Chaychina intyindichpaqam, listuna karqanchiq Jisuspi kriyinanchiqllampa, uchanchiqmanda pirdunawananchiq, amana uchayuqkunampaq riqsiwananchiq. 25 Chaymi kanan Jisuspi kriyimptinchiqqa, chay lillkunaqa manana kamachiwanchiqchu. 26 Chaqa Jisumkristumpi kriyimptinchiqllampam, yumbayninchiq Tayta Dyuspa wambrangunana kanchiqllampa. 27 Kanan Jisumkristumpi kriyichpa, chutimbi chutimkuchpaqam, paychinana munanchiqllampa kawsayta. Chaychinaqam muchuq mudanata ruramkuqchina kanchiqllampa, Jisumkristuchina kawsananchiqllampa. 28 Chaymi Jisumkristumpa ayllun kachpaqa, yumbay kriyiq masinchiqkunawan suq kwirpuchinallana kanchiqllampa. Chayrallkum Dyuspaqqa isrraylinumkuna chay mana isrraylinu kaqkunawan igwallla kanchiqllampa; randichqa kriyadumkuna chay mana randichqa kaqkunawan igwallla kanchiqllampa; ullqumkuna warmimkunawanqam Dyuspaqqa igwallla kanchiqllampa. 29 Chaychina Jisumkristumpa ayllun kachpaqam, Abrajamba karu willkanchinana kanchiqllampa. Chaymi Tayta Dyus Abrajanda ufrisichqandaqa, nuqanchiqtampis rin quwaqninchiqllampa.
1 Suq kumparasyundam rurachpa, rini parlachichuqllampa: Suq runampa churinmi tumkuy iman kaqta rin ch'askiq irinsyanda. Piru chay churin tamkchitaraq kachpaqam, manaraq atinchu wasimbiqa kamachimkuyta. Achwanmi randichqa kriyaduchina 2 kwidaqningunata kasun, taytan nichqan tyimpu kumplinangaman. Chaqa chay tyimpumkamanmi, pallkunaqa paypa kusasningunata kwidan. 3 Chaychinallam yumbay nuqanchiqkunampis manaraq Jisuspi kriyichpaqa, chay irinsyayuq wambrituchina karqanchiqllampa. Chaymi runamkunampa kustumbringunata kasuchpaqa, randichqa kriyadumkunachina kawsarqanchiqllampa. 4 Chaymandaqam Tayta Dyus yuyachqan tyimpu ch'ayamumptinqa, Churin Jisusta kach'amurqan, suq warmimanda nasichpa, lijitimu isrraylinu kachpa, Muysispa liyningunata kasuchpa, kawsanambaq. 5 Chaychinaqam Jisumkristu chamurqan, ama kastigadu kananchiqllampa Muysispa liyningunarallku. Achwanmi chamurqanqa, Tayta Dyus wambrangunampaq riqsiwananchiq. 6 Chaymi Dyuspa wambranguna kamptinchiqllampa, Churin Jisuspa Santu Ispiritunda kach'amurqan, chunqunchiqman yallkunambaq. Chaymi chay Santu Ispiritu yach'achiwanchiq, Dyuspaq ninanchiq: Taytitu, nichpa. 7 Chaymi Dyuspa wambrangunana kachpa, manana kasunchiqllampachu chay unay kustumbrimkunata, randichqa kriyadumkunachinaqa. Achwanmi Dyuspa wambrangunana kachpa, paypa iridirunna kanchiqllampa. 8 Allimptam nillkillampa, qamkunaqam unayqa Tayta Dyuspi manaraq kriyichpa, yanqa dyuskunata adurachpa, randichqa kriyadungunachina kawsarqallkillampa. 9 Piru kananqam Tayta Dyusta riqsingillampa yuyaynimkimpi. Piru mas allim kanman ninanchiq: Dyusmi nuqanchiqkunata wambrangunampaq riqsiwanchiq, nichpa. Chaychina riqsiwamptinchiqqa, ¿imampaqnam runamkunampa mana baliq kustumbringunata munangillampa kasuriytaqa? ¿Imarallkutaq munangillampa kawsariyta chay randichqa kriyaduchinaqa? 10 Chaqa qamkunaqam chay isrraylinumkunachina fyistamkunata rurachpa, gwardallkangillampa wamkin diyamkunata, killamkunata, tyimpumkunata, watamkunata, (Tayta Dyus qamkunata uchallkimkunamanda pirdunachunambaq). 11 Chaymi nuqaqa ancha llamkini yuyachpa: Yanqa imach'i padisichqa kani pallkunata Jisuspaq yach'achichpaqa, nichpa. 12 Kriyiq masitamkuna, nuqa isrraylinu kachpampismi, manana yuyamkunichu llaqta masillkunampa kustumbringunampiqa, wachamkanaypaqqa. Piru kananqam qamkunaqa chay unay kustumbringunampina yuyamkullkangi. Chaymi ancha rrugallkillampa, nuqachina Jisumkristumpilla kriyinallkillampa. Chaqa qamkunawan kamptiymi, mana nima maluta rurawarqallkichu. 13 Achwanmi qachyaq kamptiypis, qamkunaqa chumaqta ch'ayachiwarqallki suq anjiltachina ichu kimkin Jisumkristutachina, mana nimatampis disprisyawachpachu. Allitam yach'angillampa, chay punta bwilta watumkuchuchpa qachyaq kachqayta. Piru yach'achichurqaqmi Jisuspa chumaq nutisyanda. 15 Chay tyimpumpim qamkunaqa kuyawachpa, kuchimkuchpa, ancha yanampawarqallki. Asta ñawimkimkunata surquchpach'i, quwanallkita yanampawanallki. Piru kananqa ¿imarallkutaq manana kuchimkungillampachu nuqawanqa? 16 ¿Allimp kaqta nichumptiychu, qamkunaqa kuntray timkramkachqallampa kangi? 17 Yumbay chay llullata yach'achimkuqqam ancha munanllampa pallkunawan kanallkillampa. Piru manam munanllampachu allimpta qamkunata yanampachuytaqa. Achwanmi munanllampa nuqallkunamanda amkrachuyllampata, pallkunatalla kasunallkillampa. 18 Nuqampaqqam ancha alli, tumkuy tyimpu suqkunamanda allimp kaqta yach'amkunallkillampa. Piru nuqa qamkunawan kamptiy ichu mana kamptiypis, chaychinalla allita yach'amkuyllampa. 19 Kuyachqay wambrallkuna, ancham munani Jisumkristuchina kawsanallkillampa. Chaymi chunquy ancha nanan suq warmi qachyanan uras ñamkachqanchina, Jisumkristuchina kanallkillampa. 20 Chaymi ancha munani qamkunawan kayta, mas allita qamkunampaq yach'achpa yach'achichunay. Chaqa qamkunamanda karumpi kachpam, mana yach'anichu: ¿Imatam atichaq rurayta, pallkunata yanampanaypaq? nichpa. 21 Allita uyawayllampa, qamkuna Muysispa liyningunampi yuyamkuqkuna. ¿Manachu yach'angillampa Muysisqa librumbi iskibrichqanda? 22 Chay librumbim nin: Abrajambam karqan ichkay wambranguna. Suq wambranmi karqan randichqa kriyadan Agarpi. Suqninqam karqan chay lijitima warmin Sarampi. Chay warmin Saraqam mana randichqa kriyadanchu karqan. 23 Chay randichqa warmi Agarpa wambranqam nasirqan wambra warmillaraq kamptin. Piru chay Sarampa wambranqam nasirqan ancha byijitana kamptin, Tayta Dyus suq milagruta ruramptin. Chaqa Dyusqam Abrajanda ufrisichqa karqan, warmin Sara wawamkunambaq. Chaymi chay ufrisichqanda allimpta kumplirqan. 24 Dyusmi chay ichkay warmimkunampi yuyachiwanchiq ichkay laya tratumkunampaq. Suq tratutaqam Tayta Dyus isrraylinumkunawan rurarqan Sinayi urqqumpi, liyningunata kasunanllampa. Chay punta tratuqam yuyachiwanchiq chay randichqa kriyada Agarpaq. (Chaqa chay lillkunawan mana atichpa wachamkaytaqam, randichqa kriyadumkunachina kawsarqayllampa.) 25 Chaymi chay warmi Agarpaq yuyachpaqa, yuyanchiqllampa chay nasyun Arabyampi kaq Sinayi urqqumpaq. Chay Sinayi urqqumpaq yuyachpaqam, yuyanchiqllampa Jirusalin llaqtampaq. Chaqa chay Jirusalimbi tiyaqkunaqam Muysispa liyningunata munachpa kumpliytampis, mana atinllampachu kumpliytaqa. Chaymi randichqa kriyadumkunachina kawsanllampa. 26 Piru nuqanchiqkuna Jisumkristumpi kriyichpaqam, manana randichqa kriyaduchinachu kanchiqllampa. Achwanmi rinchiqllampa riq syiluman, suq muchuq Jirusalin llaqtampi Tayta Dyuswan kawsananchiqllampa. 27 Chaymi Dyuspa Santu Librumbi Abrajamba lijitima warmimbaq, chay muchuq Jirusalimbaqpis nin: Chay warmim achka watamkunata mana nima wawayuqchu karqan. Piru Tayta Dyus nimptin, suq wambrayuq kachpam, ancha achka karu willkayuq karqan. Chaychinallam chay muchuq Jirusalimbi ancha achka rinllampa kawsaq, maski chay punta Jirusalimbi kawsaqkunamanda. Chaymi chaypi kawsaqkunaqa ancha rinllampa kuchimkuq, nichpa. 28 Masitamkuna, chay Isamkpaq nasinambaq ufrisichqanchinam, Tayta Dyus ufrisirqambis, paypi yumbay kriyiqkunata wachawananchiq, wambrangunana kananchiqllampa. 29 Chaqa Dyuspa Santu Ispiritunmi chay mana wawayuq Sarataqa yanamparqan, wambrayuq kanambaq. Chaymi Saraqa wawan Isamkta qachyarqan. Chaymandaqam chay Agarpa wawanqa chay Sarampa wawanda qasacharqan. Chaychinallam kay tyimpumpimpis Muysispa liyningunampi kriyiqkunaqa Jisumkristumpi kriyiqkunata qasachawanchiqllampa. 30 Kanan Dyuspa Santu Librumbim Agarpaqqa kaychina nirqan: Wichumkuy chay randichqa kriyadallkita wambrandinda. Chaqa chay kusasnimkiqam chay lijitima warmimkimpa wambran Isamkpaqlla. Chaymi chay randichqa kriyadallkimpi wambrallkiqa mana atinchu partinamkuyta chay churimki Isamkwanqa, nichpa. 31 Kriyiq masitamkuna, chaychinallam nuqanchiqkuna Jisuspi kriyichpaqa, Abrajamba lijitima warmimba wambranchina kanchiqllampa. Manam chay randichqa kriyadamba wambranchinachu kanchiqllampaqa, nichpa.
1 Nuqanchiqkuna Jisumkristumpi kriyichqanchiqrallkum, payqa wachawachqana kanchiq, amana randichqa kriyaduchina kawsananchiqllampa. Chayri chay lillkunampiqa amana kriyichunchu wachamkananchiqqa. 2 Chayri allita uyawayllampa, nuqa Pablum allimpta nillkillampa: Chay siñalta kwirpullkimpi ama rurayllampachu. Chaqa chaychina rurachpaqam, qamkunaqa manana kriyillkangichu Jisumkristumpi, pay wachachunambaqqa. 3 Muchuqmandam nirillkillampa: Chaychina chay siñalta kwirpullkimpi rurachpaqam, balinna Muysispa yumbay liyningunata kumplinallkillampa. (Manaqa manam ringillampachu wachamkaq.) 4 Piru wamkinnimkiqam Muysispa liyningunata munangillampa kasuyta wachamkanallki. Chaymi Jisumkristumandaqa amkramkachqana kangillampa. Chaqa qamkunaqam manana kriyillkangichu: Tayta Dyusmi kuyawaqninchiq dibaldilla wachawanchiq, Jisuspi kriyimptinchiq, nichpaqa. 5 Piru Dyuspa Santu Ispiritun nuqallkunata yanampawamptinmi, allita yuyamkunillampa: Jisumkristumpi kriyimptinchiqmi, Tayta Dyus uchanchiqmanda pirdunawanchiq, nichpa. 6 Chaymi tumkuy chunqu Jisumkristumpi kriyimptinchiqqa, Dyuspaqqa manana nimampaq balinchu, siñalniyuq kananchiq ichu mana siñalniyuq kananchiqqa. Piru Dyuspaqqam ancha balin, Jisumkristumpi kriyichpa, suqwan suqwan kuyanamkunanchiq. 7 Qamkunaqam unayqa Jisumkristumpi ancha allita kriyichpa kawsarqallkillampa. Kananqa ¿pitaq qamkunata pandachichuchqa, Dyus nichqanda amana kasunallkillampa? 8 Chaqa chay yach'amkuchqallkiqam mana Dyus nichqanchinachu kachqa. 9 Manchu achla libaduraqa ancha achka masata samksachin. (Chaychinallam chay mana baliq dumktrinamkunata achlitata yach'amkuchpaqa, ancha dañamkangillampa.) 10 Piru nuqaqam ancha yuyamkuni: Tayta Dyusmi rin yanampachuqllampa, muchuqmanda Jisumkristumpi kriyinallkillampa, nichpa. Piru Dyusqam ancha rin kastigaq chay mayqan ingañachuqtaqa. 11 Kriyiq masitamkuna, chay ingañachuqkunaqam nuqampaqqa nichungillampa: Pablumpismi yach'achimkun, chay siñalta kwirpunchiqpi rurananchiqllampa, nichpa. Nuqaqam mana chaychinachu yach'achimkuni. Chaychina yach'achimkumptiyqam, chay isrraylinu llaqta masillkunaqa manana qasachawanmanchu. Piru nuqaqam yach'achimkuni: Jisumkristu kruspi wañuchqanrallkulla, Tayta Dyus tumkuy uchanchiqmanda pirdunawanchiq, nichpa. Chaymi ancha qasachawanllampa. 12 Chaymi yumbay chay piñachichuqpaq kaychina nillkillampa: ¡Chay siñalta kwirpullkimpi ruranallkillampa nichunanmandaqa, mas allim kanman pallkunampura dyunabis kastranamkunanllampa! 13 Kriyiq masitamkuna, Tayta Dyusqam wachawachqa kanchiq, librina kananchiqllampa. Piru chaychina libri kachpaqa, ama kawsayllampachu kwirpullki munachqanda rurachpaqa. Achwanri kuyanamkuchpa suqwan suqwan yanampanamkuyllampa. 14 Chaqa Tayta Dyuspa yumbay liyningunam kaychinalla munan niyta: Qamkuna kimkimki kwirpullkita kuyachqallkichina, runa masimkitampis kuyay, nichpa. 15 Piru ch'iqninamkuchpa dañachinamkuchpaqam, chay chumkaru kaninamkuq animalkunachina kangimanllampa. Kwidawkich, qamkunampura chingachinamkungiman. 16 Chaymi kaychina nillkillampa: Dyuspa Santu Ispiritunda allita kasuchpa kawsayllampa, ama kwirpullki mana baliq munachqanda ruranallkillampa. 17 Chaqa kwirpullkim munan uchata ruranallkillampa. Piru Dyuspa Santu Ispiritunmi munan allita ruranallkillampa. Chaymi chunqullkimpi chaychina kuntranamkumptin, mana atingillampachu kawsayta munachqallkita rurachpaqa. 18 Piru Dyuspa Santu Ispiritunda kasuchpaqam, manana nisisaryuchu chay lillkunata kumplinallkillampa, wachadu kanallkiqa. 19 Dasmi atinchiqllampa riqsiyta chay kwirpun munachqandalla ruraqkunataqa. Chaqa pallkunaqam warmiyuq kachpa ichu runayuq kachpa, suqkunawan puñunllampa. Manaraq rrispituyuq kachpa, suqkunawan puñunllampa. Kanan ancha millanaypaq uchamkunatam ruranllampa. 20 Amitu layamkunatam aduranllampa. Brujiyanllampa. Suqkunata ch'iqnichpam anyanllampa. Munanllampam yumbayta binsiyta. Dasmi piñamkunllampa. Pallkunampaqllam tumkuy imata munanllampa. Kanan suqkunatam animachinllampa suqkunamanda amkramkanambaq. 21 Ancham imbidyamkunllampa, wanchimkunllampa; mach'anllampa. Fyistamkunampim ancha ch'uqyachpa, mana undaq mimkuchpa, umpyachpa, uchata ruranllampa. Chaymi ancha kunallkillampa unay kunachuchqaychina, chay laya uchamkunata ama ruranallkillampa. Chaqa chay laya uchayuqkunaqam mana rinchu kawsaq Tayta Dyuswanqa. 22 Piru Dyuspa Santu Ispiritunmi ancha yanampawanchiq, suqwan suqwan kuyanamkuchpa, kuchimkuchpa, chumaqta kawsananchiqllampa. Yanampawanchiqpismi, ama piñamkunanchiq; achwan yumbaywan pasinsyusu kananchiq, ancha allin kachpa, yumbayta yanampananchiq, yumbaywan ancha kumplidu, 23 ancha umildi kananchiq, kwirpunchiqta allita sujitananchiqllampa. Chaychina allita ruramptinchiqqam, mana ni pimpis atinmanchu anyawayninchiqta: Kay lillkunataqam mana kasuchqachu kangi, nichpaqa. 24 Chaychina Jisumkristumpi kriyichpaqam, kwirpunchiq munachqandaqa manana ruranchiqllampachu. Achwanmi chay kwirpunchiq mana baliq munachqandaqa suq kruspi wanchichqa kanchiqmanchina. 25 Chaymi Dyuspa Santu Ispiritun suq muchuq laya bidata quwachqa kanchiq. Chayri payta kasuchpa kawsachunllampa. 26 Ama ni palanganuchu kachunllampa, ni piñamkuchunchu, ni imbidyanamkuchunchu suqwan suqwan.
1 Kriyiq masitamkuna, suq kriyiq masinchiq mana allita ruramptinqa, nuqanchiqkuna Jisuspi mas allita kriyiqkuna chay kriyiq masinchiqta kunachpa yanampachun, chay maluta ama masta ruranambaq. Piru umildi kachpa, chumaqta yanampachun, yuyachpa: Kwidawkich nuqampis suq diya mana allitachu rurayman, nichpa. 2 Chaychinar tumkuy imampi kriyiq masimpura yanampanamkuchun. Chaqa chaychina kuyanamkuchpaqam, Jisumkristumpa liyninda kumplillkanchiqllampa. 3 Piru suq mana baliq runa ichu warmi yuyachpa: Ancha baliqmi kani, nichpaqam, pay kimkin ingañamkallkan. 4 Chayri kadunu allita yuyachunllampa: ¿Allitachu rurachqa kani ichu mana? nichpa. Allita rurachpaqam, atinchiq kuchimkuyta. Piru ama yuyachunchu: Chay kriyiq masinchiqmandaqam nuqa mas allita rurachqa kani, nichpaqa. 5 Chaqa kadunur suq tariyatachina kumplichun atichqanchiqkaman, Tayta Dyuspaq allita trabajananchiq. 6 Kanan Jisumkristumpaq yumbay yach'achiwaqninchiqta tumkuy imawan yanampachunllampa. 7 Amar qamkunallaqa ingañamkaychu. Chaqa manam pimpis atinchu Dyusta ingañaytaqa. Manchu tarpuchpa mayqan laya mimkunataqa, chay layatalla kusichanchiq. (Chaychinallam Tayta Dyuspaq allita yach'achimkuchpaqa, suq ancha chumaq primyuta rinchiq ch'askiq paymanda.) 8 Piru kwirpunchiq munachqandalla rurachpaqam, rinchiqllampa chingaq, chay mana baliq kusicha chingaqchina. Piru Dyuspa Santu Ispiritunda kasuchpaqam, tumkuy tyimpu Dyuswan rinchiqllampa kawsaq. 9 Chayrallku ama challkuchunllampachu allita rurananchiqqa. Chaqa chaychina mana challkuq allita rurachpaqam, ancha allin kusichayuqchina rinchiqllampa kaq suq diyaqa. 10 Chayri Jisuspi kriyiq masinchiqkunata ancha allita yanampachpa, atichqanchiqkaman yumbay runamkunata, warmimkunata yanampachunllampa. 11 Rimkayllampa kay mas atun litramkunata. Kay partitallam nuqa kimkiy mamkiywan iskibrillkani. 12 Chay siñalta kwirpullkimpi rurachichuqkunaqam ancha munan, yumbay runamkuna pallkunata rrispitananllampa. Chaqa manam munanllampachu, pallkunata qasachanambaqqa. Chaymi mana munanllampachu yach'achimkuyta: Jisumkristu kruspi wañuchqanrallkum, Tayta Dyus atin wachawayninchiqta, nichpaqa. 13 Chay siñalniyuq kaqkunamanda wamkinqam ancha munan, qamkunampis chay siñalta kwirpullkimpi ruranallkillampa, pallkuna alabamkachpa ninanllampa: Chay mana isrraylinu kaqkunatampismi yach'achichqallampa kani, Muysispa liyningunata kumplichpa, chay siñalta kwirpumbi rurananllampa, nichpa. Piru chaychina yach'achimkuchpampismi, pallkunaqa mana kumplinchu Muysispa yumbay liyningunataqa. 14 Piru nuqaqam mana pallkunachinaqa alabamkanichu. Achwanmi Siñurninchiq Jisumkristutalla alabani, kruspi wañuchqanrallku wachawananchiq. Chaymi paytalla kasumptiy, kay mundumpa kusasningunaqa manana nimampaq balinchu nuqampaqqa. Chaqa nuqaqam chay kusaskunampaqqa suq wañuchqa runachinana kani. 15 Chaqa Tayta Dyuspaqqam mana balinchu, siñalniyuq ichu mana siñalniyuq kananchiqllampa. Piru paypaqqam ancha balin Jisumkristumpi kriyichpa, muchuq laya runamkuna, warmimkuna kananchiqllampa. 16 Chayri kay yach'achimkuchqayta yumbay kasuqkunata Tayta Dyus llamkimpachpa yanampanqa, kuchimkunanllampa. Chaychinallar kuchimkunqallampa paypi yumbay kriyiqkuna. Chaqa pallkunaqam Dyuspaqqa lijitimu wambrangunana. 17 Siñurninchiq Jisuspaq yach'achimkumptiymi, payta kuntraqkunaqa maqawachpa, ancha chuqriwachqallampa. Chaymi kwirpuypi achka siñamkuna kidachqa. Chay siñamkunaqam suq siñalchina, Jisuspa lijitimu sirbimkuqnin kani, nichpa. Chaymi kananmandaqa mana munanichu ni mayqan runa ni warmi piñachiwananqa. 18 Kriyiq masimkuna, Siñurninchiq Jisumkristu yumbaynimkita yanampachunqa, kuchimkuchpa kawsanallkillampa. Chaychina kanqa.
1 Kuyachqay kriyiq masitamkuna, Tayta Dyus munamptinmi, Jisumkristu nuqa Pabluta numbrawachqa, ampustulnin kanaypaq. Chaymi Jisumkristumpi kriyimptimkillampa, kay kartata kach'amuni qamkuna Ifisu llaqtampi tandamkaqkunaman. 2 Mañamkunim Tayta Dyusman, Siñurninchiq Jisumkristumambis, tumkuy imampi qamkunata yanampachunan, ama llamkichpachu achwan kuchimkuchpa kawsanallkillampa. 3 Jisuspi kriyimptinchiqllampam, Tayta Dyusqa syilumandampacha ancha yanampawachqa kanchiq, paypi mas allita yuyamkuchpa kawsananchiq. ¡Chayrallkur Siñurninchiq Jisumkristumpa Tayta Dyusta ancha alabachunllampa! 4 Chaqa ancha unay tyimpumpim Tayta Dyusqa manaraq kay munduta rurachpa, nuqanchiqkunata amkrawarqanchiq, paypa wambranguna kachpa, paypa ñawpambi ama nima uchayuqkuna kananchiqllampa. 5 Chaychina ancha kuyawaqninchiqmi, unaymandampacha payqa kamawarqanchiq, wambranguna kananchiqllampa. Chaymi Churin Jisumkristuta kach'amurqan wachawananchiq. Chaqa chaychinam munarqan rurayta. 6 Chaymi ancha allin kachpa, kuyachqan Churinwan wachawaqninchiq, tumkuy imampi yanampawachqa kanchiq. ¡Chayri payta ancha alabachunllampa! 7 Chaqa Tayta Dyus ancha kuyawamptinchiqmi, Churin Jisumkristu yawarninda ich'achpa wañurqan wachawananchiq. Chaychinam Tayta Dyusqa yumbay uchanchiqmanda pirdunawachqa kanchiqllampa. 8 Chaychina ancha kuyawaqninchiqmi, ancha allita yach'achiwachqa kanchiq, yach'ayniyuq kananchiqllampa. 9 Chaychinam intyindichiwachqa kanchiq paylla yuyachqanda. Chaqa chay yuyachqan ruranan kaqtaqam mana pimpis yach'achqachu karqan. 10 Piru Dyusqam kaychina yuyarqan: Munachqay tyimpu ch'ayamumptinmi, rini tandaq syilumpi tiyaqkunata, mundumpi tiyaqkunatampis, Churiy Jisusta kasunanllampa, nichpa. 11 Tayta Dyusqam tumkuy imata pay munachqanchina ruran. Chaymi Churin Jisumkristumpi kriyimptinchiqllampa, payqa unaymandampacha amkrawachqa kanchiq, suq chumaq irinsyata ch'askinanchiq. 12 Chaymi payqa munarqan nuqallkuna isrraylinumkuna Jisumkristumpi puntata kriyinayllampa, kay tyimpumpi qamkunawan yumbayninchiq paypi kriyichpa, Tayta Dyusta alabachpa kawsananchiqllampa. 13 Chaychinallam qamkuna mana isrraylinu kaqkunampis allimp kaqta uyachpa, Jisumkristumpa chumaq nutisyanda yach'amkuchpa, paypi kriyirqallkillampa. Chaymi Tayta Dyusqa ufrisimkuchqan Santu Ispiritunda quchuchqallampa, qamkunampi tiyachpa, suq siñalchina kanambaq, yumbay riqsichuqkuna yach'anambaq: Pallkunam allimpta Dyuspa wambranguna, nichpa. 14 Chaqa Tayta Dyusqam manaraq irinsyanchiqta quwaqninchiq, Santu Ispiritunda quwachqa kanchiq, yach'ananchiq: Tayta Dyusmi wachawaqninchiq, yumbay ufrisiwachqanchiqta rin kumpliq, nichpa. Chayri payta alabachunllampa, ancha pudirniyuq kachqanrallku. 15 Nuqam yach'ani: qamkunach Siñurninchiq Jisuspi kriyichpa, yumbay kriyiq masinchiqkunata kuyachpa, kawsangillampa, nichpa. 16 Chaymi Siñurninchiq Jisumkristumpa ancha llimpyaq Taytan Dyusman mañamkuchpa, mana challkuq ancha pagimkuni qamkunampaq. Mañamkunimpismi Santu Ispiritunwan yanampachunan, pay nichqanda intyindichpa, ancha yach'ayniyuq kachpa, payta mas allita riqsinallkillampa yuyaynimkimpi. 18 Mañamkunimpismi, qamkunata yanampachunan, allita intyindinallki: Tayta Dyuswanmi tumkuy tyimpu syilumpi rinchiqllampa kawsaq, nichpa. Chaqa paypa yumbay wambrangunatam ancha chumaq irinsyata rin quwaqninchiq. 19 Mañamkunimpismi intyindinallkillampa: Ancha pudirniyuq Tayta Dyusqam tumkuy imata atin rurayta. Paypaqqam mana nima trabajuschu, nichpa. Chaymi Churin Jisumkristumpi kriyiqkunata yanampawamptinchiq, tumkuy ima munachqanda atinchiqllampa rurayta. Chaqa ancha pudirniyuq kachpam, Tayta Dyus Churin Jisusta wañuchqanmanda kawsachimuchpa, syilumpi allin ladumbi tiyachirqan. Chay kimkin pudirninwanmi nuqanchiqkunatampis yanampawanchiq. 21 Chay pudirninwanmi Jisumkristuta ancha pudirniyuqta numbrachpa, nirqan: Yumbay patrungunata, awturidarkunata, kamachimkuqkunata, anjilkunata kamachiy kay tyimpumpi, suq tyimpumpimpis. 22 Tumkuy ima kaqta kamachiy. Chaqa qamqam nuqampi yumbay kriyiqkunampa umanchina kangi, nichpa. 23 Chaychina Jisumkristu umanchiqchina kamptinqam, paypi yumbay kriyiqkunaqa kwirpunchina kanchiqllampa. Chaqa payqam Santu Ispiritunwan nuqanchiqkunampa chunqunchiqpi tiyachpa, tumkuy imampi kamachiwanchiq. Chaychina tumkuy lugarkunampi kachpam, tumkuy ima kaqta kamachin.
1 Qamkuna Jisumkristumpi kriyimptimkiqam, payqa wachachuchqa, tumkuy tyimpu kawsanallkillampa. Piru unay tyimpumpi uchayuqkuna kamptimkiqam, Dyuspaqqa wañuchqachina karqallkillampa. 2 Chaqa Jisuspi manaraq kriyichpaqam, kay mundumpi tiyaq uchayuqkunachina kawsarqallkillampa. Chay kamachimkuq dyablu wayrampi tiyaqta kasuchpam kawsarqallkillampa. Chay dyabluqam Dyusta mana kasuqkunata animachin, uchamkunata rurananllampa. 3 Kanan unay tyimpumpiqam nuqanchiqkunampis chay uchayuqkunachina kawsarqanchiq, kwirpunchiqta kasuchpa, mana baliq yuyachqanchiqkunata rurachpa. Chaymi Tayta Dyusqa piñamkuchpa, kastigawananchiqna karqan, chay suq uchayuq kaqkunatachina. 4 Chaychina kastigawananchiq kachpampismi, Tayta Dyusqa ancha kuyawaqninchiq, ancha llamkimpawarqanchiq. 5 Uchanchiqkunarallkum wañuchqachina karqanchiq. Piru Tayta Dyusqam, Jisumkristuta kawsachimuchqanchina, nuqanchiqkunatampis ispiritunchiqpi kawsachiwarqanchiq, paywan tumkuy tyimpu kawsananchiqllampa. Chaymi ninchiqllampa: Tayta Dyusmi ancha allin kachpa, dibaldilla wachawachqa kanchiq, nichpa. 6 Chaychina Tayta Dyus Jisumkristuta wañuchqanmanda kawsachimuchpaqam, nuqanchiqkunatampis suq muchuq bidata quwachqa kanchiq, syilumpi Jisumkristuwan kawsananchiqllampa. 7 Chaychina Tayta Dyus ancha yanampawamptinchiqmi, yumbay runamkuna, warmimkuna ch'ayamuq tyimpumkunampi rinchiqllampa yach'aq: ¡Tayta Dyus ancha allin kachpam, Churin Jisumkristuwan yumbay paypi kriyiqkunata ancha kuyawaqninchiq, tumkuy imampi yanampawanchiq! nichpa. 8 Chaqa Tayta Dyusqam ancha kuyawaqninchiq, uchanchiqkunamanda wachawachqa kanchiq, Churin Jisumkristumpi kriyichqanchiqrallku. Piru nuqanchiqkunallaqam mana atinchiqchu ancha allin kayta, wachamkananchiqqa. Achwanmi Tayta Dyus nuqanchiqkunata dibaldilla wachawachqa kanchiq. 9 Chaqa manam pimpis atinchu ancha allita rurayta wachamkananqa. Chaymi mana pimpis atinchu alabamkayta: Nuqallam wachamkachqa kani, nichpaqa. 10 Chaqa Dyusqam Jisumkristumpi kriyiqkunata rurawachqa kanchiq, allita rurachpa kawsananchiq. Payqam unaymandampacha yach'arqanna: Nuqa munachqaychinam allita rurachpa rinllampa kawsaq, nichpa. 11 Qamkuna ifisyanumkuna, allita yuyayllampa unay kawsachqallkimpaq. Manchu llaqta masiy isrraylinumkunaqa qamkunampaq ninllampa: Kwirpumbi siñalta mana rurachpaqam, mana Dyuspa wambrangunachu, nichpa. Chaqa chay isrraylinumkunaqam ninllampa: Nuqallkunallam siñalniyuq kachpa, Dyuspa wambranguna kanillampa, nichpa. 12 Chaymi chay isrraylinumkunaqa mana tandamkarqanchu qamkunawanqa. Chaqa manaraq kriyimptimkillampa Jisumkristumpim, Tayta Dyus rurachqan tratumkunaqa mana qamkunampaqchu karqan. Chaymi mana yach'arqallkillampachu: Tayta Dyusmi Amkrachqan Wachadurta rin kach'amuq, nichpaqa. Chaqa Dyusmanda amkramkadu kachpa, manaraq paypi kriyichpam, kay mundumpi malaganayachpaqa kawsarqallkillampa. 13 Piru kananqam Jisumkristu yawarninda ich'achpa wañuchpa, paypi kriyimptimkillampa, qamkunata wachachuchqa, Tayta Dyuspa wambrangunana kanallkillampa. 14 Jisumkristu wañuchpam, isrraylinu kaqkunata, mana isrraylinu kaqkunata achkata wachawachqa kanchiq, suq ayllullana kananchiqllampa. Piru manaraq wachawamptinchiqqam, nuqanchiqkunaqa ch'iqninamkuchpa, suq altu pirqa layata rurachqallampa karqanchiq, ama tandanamkunanchiq. Piru kananqam Jisumkristu bulachpa chay altu pirqa layata, yanampawanchiq, suq ayllullana kananchiqllampa. 15 Chaqa Jisumkristu wañuchpam, chingachirqan Muysispa yumbay liyningunata, amana chay kamachimkuchqan kustumbrimkunata rurananchiqllampa. Kanan isrraylinumkunata, mana isrraylinu kaqkunatampismi yanampawachqa kanchiqllampa, paypi kriyichpa, suq ayllullana kananchiqllampa. 16 Chaychina kruspi wañuchpam, isrraylinu kaqkunampaq, mana isrraylinu kaqkunampaqpis bidanwan pagaramkurqan, Tayta Dyus nuqanchiqkunata pirdunawananchiq. Chaymi kananqa suq ayllullana kachpa, manana ni piwambis ch'iqninamkuchpachu chumaqta kawsanchiqllampa. 17 Chaqa Jisumkristu kay munduman chamuchpam, Dyuspaq yach'aq isrraylinumkunata, Dyuspaq mana yach'aq suq nasyungunamanda kaqkunatampis yach'achirqan paypa chumaq nutisyanda, suqwan suqwan kuyanamkuchpa kawsananchiqllampa. 18 Chaychina Jisumkristu wañumptinmi, Dyuspa Santu Ispiritun nuqallkuna isrraylinu kaqkunata, qamkuna mana isrraylinu kaqkunata yanampawanchiqllampa, Dyusman qamimkachpa, payman mañamkunanchiq. 19 Chayrallkum qamkunaqa manana furastiruchinachu kangillampa. Chaqa nuqallkuna isrraylinu kaqkunachinam qamkunampis Tayta Dyuspa wambranguna kangillampa. Chaymi kananqa suq nasyunchinallana kanchiqllampa. 20 Chayrallkum nuqallkunawan qamkunampis Dyuspaqqa rumimanda suq wasichina kanchiqllampa. Chaqa Jisumkristuqam chay wasimpa simyintumba mas allin ruminchina. Kanan Dyuspaq rimaqkuna, Jisumkristumpa ampustulningunampismi chay simyintumpa suq rumingunachina kanillampa. 21 Chaqa Tayta Dyusmi Churin Jisuspi yumbay kriyiqkunata yanampawanchiq, paypa chumaq adurana wasinchina kananchiqllampa. Chaymi yumbayninchiq achkayachpa tandanamkunchiq, Dyusta adurachpa, paypa ancha santu adurana wasinchina kananchiqllampa. 22 Chaychina qamkunampis Jisumkristumpi kriyichpam, yumbay nuqallkunawan kuyanamkuchpa kawsangillampa. Chaymi Dyuspa Santu Ispiritunqa qamkunampimpis tiyan. Chayrallkum nuqallkunawan qamkunampis Tayta Dyuspa ilgisyanna kanchiqllampa.
1 Nuqa Pablum kay karsilpi kani, tumkuy maypi qamkuna mana isrraylinu kaqkunata Jisumkristumpaq yach'achichuchqayrallku. Chaymi Dyusman ancha mañamkuni qamkunampaq. 2 Chaqa allitam yach'angillampa: Tayta Dyusmi ancha allin kachpa, kuyawaqninchiq, Pabluta numbrachqa, nuqanchiqkunata Jisuspaq yach'achiwananchiq, nichpa. 3 Chaymi Tayta Dyuslla yuyachqanda nuqata yach'achiwamptin, achlitata chay pamkadumpaq qamkunaman iskibrichuchqa kani. 4 Chayri chay iskibrichuchqayta liyichpaqa, intyindiyllampa: Pabluqam allimpta yach'an Jisumkristulla yuyachqanda, nichpa. 5 Piru unay tyimpumkunampi kawsaqkunaqam mana yach'arqanllampachu Jisumkristu chay yuyachqambaqqa. Piru kay tyimpumpiqam Dyuspa Santu Ispiritun amkrachqan ampustulningunata, paypaq rimaqkunatampis yach'achiwachqallampa chay yuyachqanda. 6 Chay pamkadu yuyachqanqam kaychina nin: Qamkuna mana isrraylinu kaqkunampischi Jisumkristumpa chumaq nutisyanda kriyichpaqa, nuqallkuna isrraylinu kriyiq masimkimkunawanqa suq aylluchina suq kwirpuchinalla kanchiqllampa. Chaymi Tayta Dyus nuqallkunata ufrisiwachqanda qamkunatampis rin quchuqllampa. 7 Nuqa mana nima balimptiypismi, ancha allin pudirniyuq Tayta Dyus numbrawachqa, chay chumaq nutisyanda yach'achimkunaypaq. 8 Jisumkristumpi yumbay kriyiqkunamandam nuqaqa minusta balini. Piru Tayta Dyusqam ancha allin kachpa numbrawachqa, qamkuna suq nasyungunamanda kaqkunata yach'achichunay Jisumkristumpa chumaq nutisyanda. Piru Jisumkristu ancha allin kachqandaqam mana pimpis atinchu yumbayta intyindiytaqa. Wamkindallam intyindinchiqllampaqa. Chaqa Jisumkristuqam tumkuy ima kaqmanda mas allinqa. 9 Kanan payqam numbrawarqan, Tayta Dyuslla yuyachqanda yumbay runata, warmita intyindichinaypaq. Chaqa Tayta Dyus tumkuy ima kaqta ruraqqam unaymandampacha mana pitampis nichqachu karqan: Kaychinam rini wachaq chay suq nasyungunamanda kaqkunata, nichpa. 10 Chaychina Tayta Dyus nuqallkunata, qamkunatampis wachawanchiqllampa, syilumpi ancha pudirniyuq anjilkuna kaychina intyindinanllampa: Tayta Dyusqam tumkuy imampi ancha yach'ayniyuq, nichpa. 11 Chaqa Tayta Dyusqam, manaraq nima kamptin, yumbay challkunampaq yuyachqana karqan. Chaymandaqam chay yuyachqandaqa Siñurninchiq Jisumkristuwan rurarqan. 12 Chayrallkum kananqa Jisumkristumpi kriyichpaqa, mana nimata manchachpachu, atinchiqllampa Dyusman mañamkuyta, yach'achpa: Dyusmi ancha kuyawachpa, rin yanampawaq, nichpa. 13 Chaymi kaychina rrugallkillampa: Qamkunata yach'achichuchqayrallku padisimptiyqa, ama disanimamkaychu. Achwanri kuchimkuyllampa, yach'achpa: Pabluqam ancha kuyawaqninchiq Jisuspaq yach'achiwarqanchiq. Chayrallkum kananqa karsilpi padisillkan, nichpa. 14 Nuqa chaychina ancha kuyachuchpam, Jisumkristumpa Tayta Dyuspa ñawpambi qunqurimkuchpa, ancha mañamkuni qamkunampaq. 15 Chaqa Tayta Dyusqam yumbayninchiqpa Taytanchiq. Payqam anaq syilumpi, kay pachampi yumbay kawsaqkunata rurawachqallampa kanchiq. 16 Chaymi ancha llimpyaq tumkuy imayuq Tayta Dyusman mañamkuni, Santu Ispiritunwan qamkunata yanampachunan, ispiritullkimpi ancha jwirsayuq kanallkillampa. 17 Mañamkunimpismi Jisumkristumpi allimpta kriyimptimkillampa, payqa chunqullkillampampi kawsanambaq, payta kuyachpa, suqwan suqwan kuyanamkuchpa, suq munti allin ch'umpayuqchina chunqullkimpi ancha jwirsayuq kanallkillampa. 18 Mañamkunimpismi chaychina kuyanamkuchpa, atinallkillampa masta intyindiyta: Jisumkristum tumkuy maypi, tumkuy tyimpumpi ancha kuyawanchiqllampa, nichpa. 19 Piru manam pimpis atinchu intyindiyta imachinam ancha allita kuyawanchiq, nichpaqa. Piru yumbayta mana intyindimptinchiqpismi, ancha mañamkuni, mas allita intyindinallkillampa, Dyuspa Santu Ispiritunwan ancha unda kanallkillampa chunqullkimpi. 20 Chaqa Tayta Dyusqam ancha pudirniyuq kachpa, atin yanampawayninchiqta maski mañamkuchqanchiqmanda, maski yuyachqanchiqmanda, paypa pudirniyuq Santu Ispiritun chunqunchiqpi tiyamptin. 21 Chayri Jisumkristumpi yumbay kriyiqkunaqa tumkuy tyimpu paytalla alabachunllampa. ¡Chaychina kanqa!
1 Chaychina Tayta Dyus qamkunata qayachumptin wambranguna kanallkillampa, nuqa Pablu ancha rrugallkillampa, pay munachqanchina kawsanallkillampa. Chaychinam rrugallkillampa, kay karsilpi kachpa Jisuspaq yach'achimkuchqayrallku. 2 Ancha umildi pasinsyayuqkuna kachpa, agwantanamkuchpa, suqwan, suqwan kuyanamkuyllampa. 3 Dyuspa Santu Ispiritun qamkunata yanampachumptinqar, tumkuy diya suq yuyayniyuqlla kayllampa. Atichqallkimkaman yumbaywan chumaqta kawsayllampa. 4 Chaqa Jisumkristumpi yumbay kriyiqkunaqam suq kwirpuchinalla kanchiqllampa. Dyuspa Santu Ispiritumbismi suqlla. Tayta Dyusmi yumbayninchiqta yanampawachqa kanchiq, suq Wachadurpilla kriyinanchiqllampa. 5 Chaqa suq Siñurninchiq Jisumkristullam kan. Suq dumktrinayuqllam kanchiq. Chutimkunanchiqpismi suqlla kan. 6 Tayta Dyuspismi suqlla. Payllam yumbaypa Taytanchiq. Tumkuy imatam paylla kamachin. Payllam tumkuy lugarkunampi kachpa, yumbay nuqanchiqkunampi tiyan. 7 Piru Jisumkristum yumbayninchiqta yanampawanchiq, suq laya trabajuta, suq laya trabajuta paypaq atinanchiqllampa rurayta. 8 Chaymi Jisumkristumpaq Dyuspa Santu Librumbi nin: Achka kuntraqkunata binsichpa, syiluman richpam, Santu Ispiritunda kach'amurqan, runamkunata warmimkunata yanampawananchiq, suq laya suq laya trabajuta paypaq atinanchiqllampa rurayta, nichpa. 9 Chaychina Jisumkristumpaq nimptin: Syilumanmi rirqan, nichpaqa, ¿imataq munan niyta? Chayqam munan niyta: Kay pachaman chamuchpam, puntata kay allpampa mas waranman ch'ayarqan, nichpa. 10 Chaymandaqam syiluman kutirirqan, Santu Ispiritunwan tumkuy maypi kachpa, tumkuy imata kamachinambaq. 11 Kanan pay syiluman richpaqam, achka runata, warmita yanampawarqanchiq. Chaqa wamkinninchiqkunatam numbrawarqanchiq, ampustulninguna kananchiqllampa. Wamkinninchiqtaqam numbrawarqanchiq paypaq rimaqkuna kananchiqllampa. Wamkinninchiqtaqam numbrawarqanchiqllampa, chumaq nutisyanda yach'achimkunanchiqllampa. Wamkinninchiqtaqam numbrawarqanchiqllampa, suq michidurchina kriyiq masinchiqkunata kwidachpa yach'achinanchiqllampa. 12 Chaychinaqam rurarqan, kriyiq masinchiqkunata yach'achichpa, animachinanchiq, Jisumkristumpa kwirpunchina kachpa, paypi mas allita mas allita yuyamkunanllampa. 13 Chaychinar suq yuyayniyuqlla kachpa, Dyuspa Churin Jisumkristumpi yuyamkuchpa, chunqunchiqpi kada diya mas allita payta riqsichun. Chaqa chaychina rurachpaqam, tumkuy imampi mas allita mas allita paychina rinchiqllampa kawsaq. 14 Chayri amana wambramkunachinaqa kachunllampachu. Manchu suq wambraqa tumkuy imata das kriyin. Chaychinallam wamkin kriyiq masinchiqkunampis mayqan qawch'u ingañamkuqpa dumktrinanda das kriyinllampa. Piru Jisumkristuchina kawsachpaqam, manana rinchiqllampachu kriyiq mayqan ingañamkuqtaqa. Chay ingañamkuqqam manana rinchu atiq pandachiwayninchiqta. 15 Achwanri kuyanamkuchpa, allimp kaqtalla rimachpa, Jisumkristumpi masta masta yuyamkuchpa, yach'ayniyuq mayurchina kachunllampa. Chaqa Jisumkristuqam paypi yumbay kriyiqkunampa umanchiqchina. 16 Chaymi yumbayninchiqta yanampawanchiq, suq kwirpuchina, suq yuyayniyuqlla kananchiqllampa. Chaqa kwirpunchiqpa yumbay partingunaqam, yanampanamkuchpa, tumkuy imata ruranllampa, ¿manachu? Chaychinalla yumbayninchiq kriyiq masimpura kuyanamkuchpaqam, mas allita mas allita Dyuspi rinchiqllampa yuyamkuq. 17 Jisumkristu numbrawamptinmi, kaychina ancha kunallkillampa: Amana kawsayllampachu Dyuspi chay mana kriyiqkunachinaqa. Chaqa pallkunaqam mana baliq yuyachqangunata rurachpa kawsanllampa. 18 Ancha angu chunquyuq kachpam, mana munanllampachu Jisumkristumpi kriyiytaqa. Chaymi Tayta Dyusmanda mana nimatampis yach'amkuchpaqa, tutampichina kawsanllampa. Chayrallkum chingachpa, Tayta Dyuswanqa manana rinllampachu kawsaq. 19 Chaymi mana nimatampis panqamkuchpachu, ni sujitamkachpachu, tumkuy laya munachqan uchamkunata rurachpa kawsanllampa. 20 Piru qamkunaqam Jisumkristumpaq yach'amkuchpaqa, mana yach'amkurqallkichu chay uchayuqkunachina kawsanallkillampa. 21 Achwanmi Jisuspaq allimp kaqta uyachpa, yach'amkurqallkillampa pay munachqanchina kawsanallkillampa. 22 Piru qamkuna manaraq Jisuspi kriyichpaqam, kwirpullki munachqandalla rurachpa, dañamkarqallkillampa. Chayri kananqa chay unay jiñullkitaqa dijayna, suq mana baliq mawka lach'ampatachina, amana chaychina kawsanallkillampa. 23 Achwanri muchuq yuyayniyuq, muchuq chunquyuqna kayllampa. 24 Chayri Tayta Dyusmanda muchuq bidata ch'askichpa, ancha allin, ancha santu kayllampa. 25 Chayri yumbayninchiq suq kwirpuchinalla kachpa, amana ni pitampis ingañachpachu, achwan allimp kaqtalla suqwan suqwan parlachunllampa. 26 Piru mayqanwan piñamkuchpaqa, das alliyayllampa, ama uchayuq kanallkillampa. Amar chuyaychu ni amsayanangaman alliyanallki chay piñachichuqwanqa. 27 Chaychina ama dijamkayllampachu, dyablu uchata rurachichunanqa. 28 Mayqan suwamkuqpisri amana mastaqa suwamkunqachu. Achwanri allita trabajanqa, pubrimkunata atinambaq yanampayta. 29 Amar malas palabraskunataqa rimayllampachu. Achwanri allitalla rimachpa, suqkunata animachiyllampa, Jisuspi mas allita yuyamkuchpa, kuchimkuchpa kawsananllampa. 30 Kanan amar llamkichiyllampachu Dyuspa Santu Ispiritunda. Chaqa Tayta Dyusqam chay Santu Ispiritunda quwachqallampa kanchiq, allita yach'ananchiq: Dyuspa wambranmi kani. Jisumkristu wachawachpa, syiluman rin ampawaq, nichpa. 31 Chayri ama syintichpachu, ni piñamkuchpachu, ni piwan anyanamkuchpa, ni musyanamkuchpa, ni pitampis ch'iqnichpachu, ni suq laya malumkunata rurachpachu, kawsachunllampa. 32 Achwanri ancha allita suqwan suqwan yanampanamkuchpa, llamkimpanamkuchpa, pirdunanamkuyllampa. Chaqa Jisumkristu wañuchqanrallkum, Tayta Dyus uchanchiqkunamanda pirdunawachqa kanchiqllampa. Chayrallkur nuqanchiqkunampis suqwan suqwan pirdunanamkuchpa kawsachunllampa.
1 Qamkuna Tayta Dyuspa kuyachqan wambranguna kachpaqar, paychina kawsayllampa. 2 Chaqa Jisumkristuqam ancha kuyawaqninchiq, intrigamkarqan wañunambaq, Tayta Dyus uchanchiqkunamanda pirdunawananchiq. Chaychina wañuchpaqam Tayta Dyusta ancha kuchichirqan. Chaqa Jisusqam wañurqan suq ancha chumaq uñitata ufrindampaq wanchichqachina. Chayri nuqanchiqpis Jisuschina suqkunata kuyachpa kawsachunllampa, Tayta Dyusta kuchichinanchiq. [Nuta: Unay tyimpumpim isrraylinumkuna chumaq uñitamkunata wanchichpa, ufrindatachina qurqan Dyusta, uchangunata pirdunanambaq.] 3 Chayri Tayta Dyuspa wambranguna kachpaqa, manaraq rrispituyuq kachpa ichu rrispituyuq kachpa, ama puñuyllampachu mana rrispitullki kaqwanqa, ni suq laya uchamkunata rurayllampachu. Suqkunampa imangunata ama munamkuyllampachu. 4 Amar malas palabrasta rimayllampachu ni tuntumkunachina panqamkuypaq grasyamkunata rurachpa asimkuyllampachu. Chaqa manam nimampis balinchu chay layamkunata rimanallkillampaqa. Achwanri Tayta Dyusta pagimkuchpa, kawsayllampa. 5 Chaqa allitam yach'angillampa: Manaraq rrispituyuq kachpa ichu rrispituyuq kachpa, suqwan puñuchpa ichu suq laya uchamkunata rurachpa ichu nisyumkuna kachpa, mana ringillampachu kawsaq Tayta Dyuswan Churin Jisumkristuwanqa. Chaqa chay nisyumkunam tumkuy imata ancha munachpa, chay kusaskunata adurallkanllampa, amitu layamkunata aduraqkunachina. 6 Amar pimpis ingañachunqachu, yanqamkunata nichuchpa, uchata ruranallkiqa. Chaqa Tayta Dyusqam chay uchata ruraqkunawan piñamkuchpa, ancha rin kastigaq, payta mana kasumptinllampa. 7 Chayri chay laya runamkunamandaqa kwidamkayllampa, ama qamkunata dañachichunan. 8 Qamkunaqam unay tyimpumkunampi mana allimkunata rurachpa, tutayaqpichina kawsarqallkillampa. Piru kananqam Jisumkristumpi kriyichpa, allita rurachpa, achimkpichinana kawsangillampa. Chaychinalla mana challkuq kawsayllampa, suqkunampaq suq micha achimkchamkuqchina kanallkillampa. 9 Chaqa Dyuspa Santu Ispiritunmi rin yanampachuqllampa, ancha allin kachpa, allitalla rurachpa, allimp kaqtalla rimachpa kawsanallkillampa. 10 Chayri allita yach'amkuyllampa Dyus munachqanda, pay munachqanchina kawsanallkillampa. 11 Amar kawsayllampachu chay uchayuq runamkunachinaqa. Achwan pallkuna uchata rurachpa pamkamptinqa, anyachpa kunayllampa: Chaychina rurachpaqam, ringillampa chingaq, nichpa. 12 Chaqa chay pamkachqan uchangunaqam ancha fiyu panqamkuypaq. Chaymi mana munanchiqchu ni rimayta chay ucha rurachqambaqqa. 13 (Piru Dyuspa Santu Ispiritunmi atun michachina.) Chaymi chay pamkachqa uchamkunata das rimkachiwanchiq, achimkpichinana kidananllampa. Chaymi das intyindinchiq: Chay uchamkunaqam ancha fiyu, nichpa. 14 Chayrallkum suq yach'ayniyuqqa nin: Qamkuna mana alli ruraqkunaqam puñuqkunachina, wañuqkunachina kangillampa. Chayri rimkch'amkamuchpa, atarimuyllampa, Jisumkristu achimkpichinana kawsachichunan, allitana rurachpa kawsanallkillampa, nichpa. 15 Chayri ancha allita kwidamkachunllampa, allita rurachpa kawsananchiq. Amar tuntuchinaqa kachunllampachu. Achwanri jwisyuyuqchina kawsachunllampa. 16 Chaqa kay tyimpumpiqam uchayuq runamkunaqa achwamba achwamba mana allimkunata rurallkanllampa. Chayri tumkuy diya allita yuyachpa, Dyus munachqanchina kawsachunllampa. 17 Chayrallkur ama tuntuchinaqa kachunllampachu. Achwanri yach'amkuchunllampa Dyus munachqanda rurananchiq. 18 Amar mach'achunllampachu. Chaqa mach'achqamkunaqam mana sujitamkachpachu, tumkuy imampi rinllampa dañamkaq. Achwanri Dyuspa Santu Ispiritunda kasuchpa, kawsachunllampa. 19 Chaychina kawsachpa, salmumkunata, imnumkunata, suq laya alabansamkunata kantachpa, Siñurninchiq Jisusta tumkuy chunqu alabachpa, suqwan suqwan animachinamkuchun. 20 Siñurninchiq Jisumkristumpa chutimbi tumkuy tyimpu, tumkuy imampaq Tayta Dyusta pagimkuchunllampa. 21 Yumbay qamkuna Dyusta ancha rrispitachpaqa, suqwan suqwan kasunamkuyllampa. 22 Qamkuna qusayuq warmimkuna, Jisumkristuta kasuchqallkichina, qusallkitampis kasuy. 23 Jisumkristuqam paypi yumbay kriyiqkunampa Wachadurninchiq, umanchiqchina kachpa, kamachiwanchiq. Chaqa paypi kriyiqkunaqam Jisuspa kwirpunchina kanchiqllampa. Chaychinallam suq warmimpa qusanqa umanchina kachpa paytaqa kamachin. 24 Chayri Jisumkristumpi kriyiqkuna payta kasuchqanchiqchina, warmimpis qusanda tumkuy imampi kasunqa. 25 Runamkunampis ancha kuyanqa warminda, awnki wañunqampis. Manchu Jisumkristuqa paypi kriyiqkunata ancha kuyawaqninchiq, wañurqan wachawananchiq. Chaychinalla suq runa warminda kuyanqa. 26 Chaqa Jisumkristum wañurqan, paypi kriyiqkunata uchanchiqmanda pirdunawananchiq, Tayta Dyustana kasuchpa kawsananchiqllampa. Kanan chumaq nutisyanda yach'achiwaqninchiqmi, uchanchiqkunata yamkuwanchina mayllawachqa kanchiq. 27 Chaychinam rurarqan, paypa ñawpambi mana nima uchayuq chumaq nubyachina kananchiqllampa. Chaychina ancha llimpyaq yuraq mudanayuqchina kamptinchiqllampam, chumaqta rin ch'ayachiwaqninchiq. 28 Chayri qamkunampis warmimkita ancha kuyay, kimkin kwirpullkita kuyachqallkichina. Chaqa suq runa warminda ancha chumaqta kwidachpaqam, pay kimkin kwidamkallkan. 29 Chaqa manam pimpis kwirpunchiqtaqa ch'iqninchiqchu. Achwanmi chumaqta kwidachpa, imatampis mimkuchpa kawsanchiqllampa. Chaychinallam Siñurninchiq Jisumkristumpis paypi kriyiqkunata chumaqta kwidawanchiqllampa. 30 Chaqa paypi kriyichpaqam, paypa kimkin kwirpunchinana kachpa, paypa aychanchina, tullunchina kanchiqllampa. 31 Chaymi Dyuspa Santu Librumbi nin: Suq runa warmimkuchpaqa, taytanda, mamanda dijachpa, warminwanna kawsanqa. Kanan ichkay kachpampis, suq kwirpuchinallana kanqa, nichpa. 32 Chay nichqandaqam mana pimpis atichqachu ancha allita intyindiyta. Chaqa manam rimanchu runa warmi kasarananllachu. Achwanmi rimambis, Jisumkristu paypi kriyiqkunawan tandamkamptinchiq, paywan suq kwirpuchinallana kananchiqllampa, nichpa. 33 Chaymi nillkillampa: Yumbay runamkuna ancha kuyanqa warminda kimkin kwirpunda kuyachqanchina. Warmimkunampisri qusanda rrispitanqa.
1 Wambramkuna, Jisumkristumpi kriyichpaqa, taytallkita, mamallkita allita kasuyllampa. Chaychina kasuchpaqam, allita rurallkangillampa. 2 Chaqa Tayta Dyuspa punta liyninmi kaychina nin: Taytallkita, mamallkita rrispitayllampa, nichpa. Chay liyta niwaqninchiqmi, suq chumaq primyuta kaychina ufrisiwachqa kanchiq: 3 Taytallkita, mamallkita kasumptimkiqam, ancha rini yanampachuq, kuchimkuchpa, achka watamkunata kay mundumpi kawsanallkimpaq, nichpa. 4 Qamkuna taytamkunampis, wambrallkimkunata ama piñachiyllampachu. Achwanri chumaqta yach'achichpa kunachpa, kriyayllampa, Jisumkristumpi kriyinanllampa. 5 Qamkuna randichqa kriyadumkuna, patrunnimkita manchachpa, allita rrispitachpa kasuyllampa, Jisumkristuta kasullkangimanchina. 6 Chayri chay patrunnimki rimkachumptin ichu mana rimkachumptimbis, allita trabajayllampa. Piru amar trabajaychu chay patrunnimkiwan allita kidanallkillaqa. Achwanri Dyus munachqanda rurachpa, tumkuy chunqu allita trabajay, Jisumkristumpaq trabajallkangimanchina. 7 Chaychina kuchimkuchpa, patrunnimkita allita yanampachpaqar, Jisuspaqchina trabajay, ama runamkunampaqllachu. 8 Chaqa randichqa kriyadu ichu libri runa kachpampismi, allita yach'anchiqllampa: Tayta Dyusmi rin pagarawaqninchiq alli rurachqanchiqpaq, nichpa. 9 Qamkuna patrungunampis, randichqa kriyadullkimkunata ama nimatampis manchachichpachu, chumaqta kamachiy. Chaqa syilumpim kan yumbayninchiqpa patrunninchiq. Payqam mana ni pitampis sawachachpachu, yumbayninchiqta ancha allita rin jusgawaqninchiq. 10 Kananri kriyiq masitamkuna, Jisumkristuman mañamkuchunllampa, pudirninwan yanampawamptinchiq, uchamkunata binsinanchiq. 11 Manchu suldadumkuna kuntrangunata binsinanllampaqa, jirrumanda kaskuta ruramkuchpa, jirrumanda chilimkinda ruramkuchpa, armangunawan pilyanllampa. Chaychinallar nuqanchiqkunampis Tayta Dyusmanda armangunatachina ch'askichunllampa, dyablu ama ingañawananchiq. 12 Chaqa nuqanchiqkunaqam mana pilyallkanchiqchu runa masinchiqkunawan. Achwanmi pilyallkanchiqqa chay jwirsayuq, pudirniyuq, kamachimkuq dyablumkunawan, tutayaqpi puriq kamachimkuqkunawan. Pallkuna ingañamptinmi, kay pachampi achka runa warmi tutayaqpichina purillkanllampa. Chay kamachimkuq dyablumkunam altumpi bwilaq dyablumkunatampis kamachinllampa. 13 Chayri Tayta Dyusmanda yumbay chay armangunatachina ch'askichunllampa, chay dyablumkunamanda atinanchiq wachamkayta. Chaychina ruramptinchiqqam, chay dyablumkunaqa suq diya munachpa binsiwayninchiqta, mana rinllampachu atiq. 14 Chayri allimp kaqtalla kriyichpa, rimachpaqa, suldadumkuna wach'umkunda ruramkuqchina kachunllampa. Chaychinar allitalla rurachpa, jirrumanda chilimkiyuqchina kachunllampa. 15 Listur kachunllampa, Jisuspa chumaq nutisyanda yach'achimkunanchiq, suqkunampis Dyuswan alliyananllampa. Chaqa chay chumaq nutisyanqam nuqanchiqpaqqa suldadumpa sampatungunachina. 16 Yumbay kusasmandam masta balin Jisumkristumpi allita kriyinanchiqllampa. Chaychina kriyichpaqam, suq iskudu tabla layata piskallkanchiqmanchina wachamkananchiq. Chaqa dyabluqam ancha munan dañachiwayninchiqta, rumimkunawan sitawanchiqmanchina. Piru Jisumkristumpi allita yuyamkuchpaqam, chay iskudu tabla layawan atinchiq arkayta, ama ch'ayachiwananchiq. 17 Tayta Dyusmi wachawanchiqllampa, suq suldadu jirrumanda kaskunwan wachamkaqchina. Tayta Dyus nichqanqam atun kuchilluchina. Chayri Dyuspa Santu Ispiritunmanda yach'amkuchun Dyus nichqanda, dyabluta maqachpa, binsinanchiq. 18 Piru Dyuspa Santu Ispiritun qamkunata yanampachumptin, allita yuyachpa, mana challkuq mañamkuyllampa yumbay kriyiq masinchiqkunampaq. 19 Nuqampaqpis mañamkuyllampa, Tayta Dyus yanampawanambaq, ama manchachpachu, achwan ancha allita Jisumkristumpa pamkadu nutisyanda yach'achimkunay. Chaqa unaymandampacham mana pimpis intyindichqachu: (Tayta Dyusmi qamkuna mana isrraylinu kaqkunatampis munan wachachuyllampata, nichpa.) 20 Kanan Tayta Dyusmi numbrawachqa, rrimplasun rimanaypaq chay chumaq nutisyanda. Chayrallkum kay karsilpi kadinamkunawan watadu kani. Chayri Tayta Dyusta nuqampaq rrugayllampa, ama nimata manchachpachu, paypaq yach'achimkunay. 21 Kuyachqanchiq kriyiq masinchiq Timkimkum ancha allita yanampawachqa, Jisumkristumpaq yach'achimkunay. Chaymi payta rini kach'amuq, qamkunata animachichunan: Masanchiq Pablum karsilpiqa kaychina kawsallkan, nichpa. 23 Kriyiq masitamkuna, ancham mañamkuni, Taytanchiq Dyus, Siñurninchiq Jisumkristumpis tumkuy imampi qamkunata yanampachunan, kuchimkuchpa, kuyanamkuchpa, Dyuspi allita yuyamkunallkillampa. 24 Chaychinam mañamkuni, Tayta Dyus yumbay allin kriyiq masinchiqkunata ancha yanampanambaq. Chaqa pallkunaqam mana challkuq Siñurninchiq Jisumkristuta kuyallkan. Chaychina kanqa.
1 Kuyachqay kriyiq masitamkuna, nuqa Pablum masanchiq Timutiyuwan Jisumkristumpa sirbimkuqnin kanillampa. Chaymi kay kartata kach'amuni qamkuna Filimpus llaqtampi tiyaq kriyiq masillkunaman. Chaqa qamkunaqam Jisumkristumpi allimpta kriyichpa, Dyuspa wambrangunana kangillampa. Chaymi ubispullkimkunata, dyamkunullkimkunata, yumbay qamkunata nampallkullkillampa. 2 Mañamkunim Tayta Dyusman, Siñurninchiq Jisumkristumambis, tumkuy imampi qamkunata yanampachunan, ama nimata manchachpachu, achwan kuchimkuchpa kawsanallkillampa. 3 Kriyiq masitamkuna, kada bwilta qamkunata yuyachuchpam, Dyusman ancha pagimkuni qamkunampaq. 4 Kanan qamkunampaq Dyusman mañamkuchpaqam, ancha kuchimkuni. Chaqa Jisumkristumpi kriyichqallki diyamandampacham kanangaman qamkunaqa ancha yanampawachqa kangi, Jisuspa chumaq nutisyanda yach'achimkunaypaq. 6 Kanan allitam yach'ani: Tayta Dyusmi qamkunata yanampachuchqa, paypi kriyichpa, pay munachqanda ruranallkillampa. Chaychinallam mana challkuq rin yanampachuqllampa, mas allita mas allita pay munachqanda rurachpa, kawsanallkillampa, Jisumkristu chamunan diyamkaman. 7 Chaymi ancha balin, tumkuy chunqu qamkunata kuyachunaypaq. Chaqa kay karsilpi kamptiy ichu libri kamptiypis, qamkuna ancha yanampawangi, kuyawaqninchiq Tayta Dyuspa chumaq nutisyanda awturidarkunampa ñawpambi yach'achimkunay: Kay nichuchqayqam allimp, nichpa. 8 Kanan Tayta Dyusmi yach'an: Churiy Jisumkristu yanampamptinmi, Pabluqa tumkuy chunqu filimpusinumkunata ancha kuyan, nichpa. 9 Chaymi Dyusman mañamkuni, chay ancha kuyamkuchqallkimanda masta kuyamkunallki, allita Dyusmanda yach'amkuchpa, ancha yach'ayniyuq kanallkillampa. 10 Mañamkunimpismi, ancha allita yach'anallkillampa, imam alli, imam mana allichu, nichpa, Jisumkristu chamumptin, ama nima uchayuq kanallkillampa, 11 achwan Jisumkristu yanampachunan, yumbayta allita rurachpa kawsanallkillampa, yumbay rimkachuqkuna Tayta Dyusta alabananllampa. 12 Kriyiq masitamkuna, nuqa Pabluta karsilawamptinllampam, mas achka runamkuna, warmimkuna Jisuspa chumaq nutisyanda uyachqallampa. 13 Chaqa gubyirnu Sasarpa yumbay kwidamkuq suldadunguna, kay atun llaqtampi yumbay tiyaqkunampismi yach'anllampana: Pablutaqam karsilachqallampa, Jisumkristumpaq yach'achimkumptin, nichpa. 14 Kanan kay karsilpi kachpa, mana nimata manchachpachu, Jisumkristumpaq yach'achimkumptiymi, ancha achka kriyiq masinchiqkunampis, manana manchachpachu, Jisumkristumpaq masta yach'achimkullkan. 15 Allibmi wamkingunaqa imbidyawachpa, munachpa binsiwayta, Jisumkristumpaq yach'achimkullkan. Piru suqkunaqam, allin chunquyuq kachpa, munachpa yanampawayta, Jisumkristumpaqqa yach'achimkullkan. 16 Pallkunaqam kuyawachpa, yach'anllampa: Tayta Dyusmi Pabluta numbrachqa, chumaq nutisyanda yach'achimkunan. Chaymi karsilpina kidachqa, nichpa. Chay imbidyawaqkunaqam Jisumkristumpaq yach'achimkuchpaqa yuyanllampa: Pablu karsilpi kamptinqar piñachichun, paypa rrimplasun yach'achimkuchpa, nichpa. 18 Piru manam piñamkunichu. Chaqa allin chunquyuq kachpa, ichu mana allin chunquyuq kachpampismi, Jisumkristumpaq yach'achimkullkanllampa. Chaymi ancha kuchimkuni. Kanan mastam rini kuchimkuq, 19 qamkuna Dyusman nuqampaq mañamkumptimki, Jisumkristumpa Santu Ispiritun yanampawamptin wachamkanaypaq. 20 Piru wañuchpa ichu kawsachpampis, ancha munani Jisumkristumpaq yach'achimkuyta, mana nimatampis panqamkuchpachu ni manchachpachu, achka runa, warmi payta alabananllampa. 21 Chaqa kawsachpaqam, kay bidampi Jisumkristuta rini alabaq. Piru wañuchpaqam, suq bidampiqa paywan kawsachpa, rini alabaq. Chaymi nuqampaqqa alli kanman wañunaypaq. 22 Piru manaraq wañuchpaqam, mastaraq atiyman Jisumkristumpaq yach'achimkuyta. Chaymi mana yach'anichu: Mayqanmi mas allin, kawsanaypaqraq ichu wañunaypaqna, nichpaqa. 23 Chaqa nuqampaqqam allina kanman wañunaypaq, Jisumkristuwanna kanaypaq. Piru nuqaqam mana yach'anichu: Mayqanmi mas alli, nichpa. 24 Chaqa qamkunampaqqa mas alli kanman kawsanaypaqraq, Jisumkristumpaq mas allita qamkunata yach'achichunay. 25 Chaymi yuyamkuni: Rinim kawsaqraq, qamkunata animachichunay, kuchimkuchpa, mas allita Siñurninchiqpi kriyinallkillampa, nichpa. 26 Chaymi Jisumkristu kay karsilmanda surquwamptin, muchuqmanda qamkunawan karinaypaqqa, ancha kuchimkuchpa, payta ringillampa alabaq. 27 Piru mastam rrugallkillampa, Jisumkristu nichqanchina kawsanallkillampa. Chaychina kawsamptimkillampaqam, qamkunaman chamuchpa ichu mana chamuchpampis, rini yach'aq: Suq yuyayllam mana challkuq yanampanamkullkan, Jisuspa chumaq nutisyanda yach'achimkuchpa, nichpa. 28 Chaqa Tayta Dyusmi rin yanampachuqllampa, chay kuntrachuqkunata ama nimatampis manchanallkillampa. Chaymi chay kuntrachuqkunaqa rinllampa yach'aq: Jisuspi mana kriyichpaqam, rinchiqllampa chingaq, nichpa. Piru qamkunaqam ringillampa yach'aq: Dyusmi rin wachawaqninchiq, nichpa. 29 Chaqa ancham balin qamkuna Jisumkristumpi kriyinallkillampa. Piru ancham balimbis chaychina kriyichqallkirallku, qasachadu kachpa, ñamkanallkillampa. 30 Chaymi kananqa qamkunampis nuqachina Jisumkristumpaq yach'achimkumptimki, payta kuntraqkuna qamkunatampis qasachachungi. Manchu qamkunampa pullallki kachpa, qasachadu kamptiy rimkawarqallkillampa. Kanan qamkunaqam yach'angillampa: Pabluqam karsilpi ancha ñamkachpampis, Jisumkristumpaq mana challkuq yach'achimkullkan, nichpa.
1 Manchu Jisumkristumpi kriyimptimkiqa, payqa qamkunata ancha animachichungi. Ancha kuyachuchpam, tumkuy imampi qamkunataqa kunswilachungi. Paypa Santu Ispiritumbismi qamkunata tumkuy imampi yampachachungi. Tayta Dyuspismi ancha kuyachuchpa, llamkimpachungi. 2 Chayri qamkunampis kuyanamkuchpa, suq yuyaylla kachpa, suqwan suqwan ancha chumaqta kawsayllampa, masta kuchichiwanallki. 3 Amar palanganuqa kayllampachu. Amar rurayllampachu qamlla munachqallkitaqa. Achwan umilidi kachpa yuyayllampa: Suqkunaqam ancha balin maski nuqamanda, nichpa. 4 Amar yuyayllampachu qamkunampaqllaqa. Achwan suqkunampaqpis yuyayllampa: ¿Imam mas alli pallkunampaq? nichpa. 5 Chayri qamkunampis Jisumkristu yuyachqanchinalla yuyayllampa. 6 Manchu payqa syilumpi Tayta Dyuswan kachpaqa, Taytanchina ancha baliq kamachimkuq Dyus karqan. Piru manam nirqanchu: Taytaychinallam kachaq, nichpaqa. 7 Achwanmi tumkuy imata dijachpa, kay mundumpi nasirqan, umildi yanampamkuq runa kanambaq. 8 Chaychina umildi runa kachpam, Tayta Dyusta tumkuy imampi kasuchpa, suq kruspi panqamkuypaqta wañurqan. 9 Chaychina wañumptinmi, Tayta Dyusqa kawsachimuchpa, ancha pudirniyuq kamachimkuqta rurarqan, yumbay awturidarmanda mas kamachimkuq kanambaq. 10 Chaymi syilumpi yumbay kaqkuna, kay pachampi yumbay tiyaqkuna, kay pachampa warambi yumbay kaqkunampis Jisuspa ñawpambi rinllampa qunqurimkuq, payta rrispitachpa. 11 Chaychina qunqurimkuchpaqam, yumbaypa ñawpambi ninqallampa: Jisumkristum tumkuy ima kaqpa kamachimkuqnin, nichpa, Tayta Dyustampis alabananllampa. 12 Ancha kuyachqay kriyiq masitamkuna, nuqa qamkunawan kachpa kunachumptiymi, tumkuy tyimpu allita kasuwarqallkillampa. Kanan qamkunamanda karumpi kamptiypisri, allita kasuwayllampa. Umildi kachpa, imachinampis kamamkayllampa wachamkanallki. Chayri manchayllampa: Uchata rurachpamkich, Dyusmanda amkramkayman, nichpa. 13 Piru Dyus kimkinmi qamkunata animachichungi, pay munachqanda qamkunampis munanallkillampa. Chaymandaqam yanampachungillampa, chay munachqanda ruranallkillampa. 14 Chayri ama kijamkuchpachu ni anyanamkuchpachu, tumkuy imata chumaqta rurayllampa, 15 Dyuspa mana uchayuq wambranguna kanallkillampa. Chaqa chaychina kay mundumpi ancha uchayuqkunampa umkumbi kawsamptimkillampaqam, pallkunampis animamkanmanllampa, Dyusta kasunanllampa. Chaqa pallkunaqam uchangunarallku tutayaqpichina kawsallkanllampa. Piru qamkuna Dyuspa kawsachimkuq nutisyanda pallkunata yach'achichpaqam, lusirumkunachina llimpyallkangillampa pallkunampaqqa. Chaymi Jisumkristu chamumptinqa, nuqaqa ancha rini kuchimkuq qamkunampaq: Manam yanqachu chay Filimpusmanda kaqkunata yach'achichqa kani, nichpa. 17 Kanan qamkuna Jisuspi allita kriyichpam, Dyusta allita kasuchpa, kawsallkangillampa. Chaymi nuqaqa ancha kuchimkuni, yawarniyta ich'achpa, wanchiwanan kamptinllampampis. Chaqa suq animal ufrindampaq wanchichqandachina munamptinllampa wanchiwaytampismi, kuchimkuchpa qamkunata animachillkillampa. 18 Chaychinallar qamkunampis kuchimkuchpa, nuqata animachiwayllampa kuchimkunaypaq. 19 Siñurninchiq Jisus munamptinmi, utqa kach'amuchaq qamkunaman kriyiq masinchiq Timutiyuta. Chaychina qamkunamanda kutimuchpa willawamptin: Kaychinam chay Filimpus llaqtampi kawsallkan, nichpaqam, nuqaqa ancha rini kuchimkuq. 20 Manam kanchu suq yach'achimkuq masiy kay Timutiyuchinaqa. Chaqa payqam nuqachinalla yuyachpa, ancha munan qamkunata yanampachuyta, allita rurachpa, kawsanallkillampa. 21 Piru achka yach'achimkuqqam pallkuna munachqandalla ruranllampa. Manam ruranllampachu Jisumkristu munachqandaqa. 22 Piru qamkunaqam allita yach'angillampa: Masanchiq Timutiyum ancha allita Pabluta yanampachqa, nichpa. Chaqa payqam churiychina nuqawan pulla Jisuspa chumaq nutisyanda ancha yach'achimkuchqa. 23 Chaymi munani qamkunaman kach'amuyta. Piru puntatam munani yach'ayta: ¿Imam rin pasawaq? nichpa. Chay yach'achqay urasmi Timutiyutaqa rini kach'amuq. 24 Piru yuyamkunim: Jisumkristum yanampawanqa, kay karsilmanda lluqchichpa, utqa chamunaypaq watumkuchuqllampa. 25 Munanim kach'amuyta kuyachqay kriyiq masinchiq Impafruditutampis. Chaqa qamkuna kimkimkim payta kach'amurqallki, nuqata yanampawanambaq. Payqam ancha allita yanampawallkan, dyabluta binsichpa, Jisuspaq yach'achimkunaypaq. 26 Piru payqam ancha qachyaq kachpa, wañullkarqanna. Chaymi chaypaq yach'amptimkillampa, payqa ancha llamkichpa nirqan: Chay kriyiq masillkunach'i nuqampaq anchana llamkillkanllampa, nichpa. Chayrallkum ancha munachqa chamuyta qamkunaman. Allibmi payqa ancha qachyaq karqan. Piru Tayta Dyusmi payta, nuqata llamkimpawachpa, yanamparqan kach'amkanambaq, ama achwamba llamkinaypaq. 28 Chaymi Impafruditu ancha munamptin rimkachuyllampata, kach'amullkani, payta rimkachpa kuchimkunallkillampa, nuqampis amana paypaq llamkinaypaq. 29 Chayri pay qamkunaman ch'ayamumptinqa, ancha kuchimkuchpa, payta ancha rrispitachpa, Jisuspa chutimbi chumaqta ch'ayachiyllampa. Chaqa payqam yach'achpa: Chay karsilpiqam atini wañuyta, nichpampis, kayman chamurqan yanampawanambaq. Chaymi yaqqa wañurqan. Chaqa qamkunaqar karu llaqtampi kachpa, mana atirqallkillampachu yanampawayta.
1 Kriyiq masitamkuna, Siñurninchiqpi allita yuyamkuchpa, kuchimkuchpa kawsayllampa. Manam challkunichu kaychina achka kutinda qamkunata kunachunaypaqqa. Chaqa chaychina Jisumkristumpaq allita yach'amptimkiqam, mana pimpis ingañachunqachu. 2 Chayri kwidamkayllampa yumbay mana baliq yach'achimkuqmanda. Pallkunaqam dañachimkuq allqumkunachina. Chaqa yach'achimkunllampam: Kwirpumbi siñalniyuq kaqkunallach Dyuspa wambrangunaqa, nichpa. Manam chaychinachu. 3 Achwanmi Dyuspa Santu Ispiritun yanampawamptinchiq, nuqanchiqkunaqa Dyusta adurachpa, Jisumkristumpi kriyichpa, Dyuspa wambrangunaqa kanchiqllampa. Chaymi kuchimkunchiqllampa. Mananam kriyinchiqllampachu: Kwirpumbi siñalta rurachpa ichu suq kustumbrimkunata rurachpam, Dyuspa wambranguna kanchiqllampa, nichpa. 4 Piru Jisuspi manaraq kriyichpam, nuqampis ancha pandarqay. Chaqa yuyarqaymi: Kwirpuypi siñalniyuq kachpa, isrraylinumkunampa dumktrinanda kasuchpam, nuqa kimkiylla atini wachamkayta, nichpa. Kanan yumbay isrraylinumandam nuqa masta yuyamkurqay chay kustumbrimkunampiqa. Manam pimpis binsiwaqchu. 5 Chaqa 8 diyasniyuq kamptiymi, kwirpuypi siñalta rurarqanllampa. Chaymi ancha lijitimu isrraylinu kani. Taytay, mamay, agwilullkunampismi Isrrayilmandalla karqanllampa. Chaqa chay alma Binjamimba atun ayllunmandam kani. Farisiyumkunampa dumktrinandam ancha allita sigirqay. Chaymi Muysispa liyningunata ancha allita kasurqay. 6 Chaychina ancha allita kasuchpa kawsamptiymi, mana pimpis atiqchu anyawaytaqa. Kanan chay lillkunampi yuyamkuchpam, Jisuspi kriyiqkunata ch'iqnichpa, ancha qasacharqani. 7 Piru kananqam Jisumkristumpi kriyichqayrallku, tumkuy chay rurachqallkuna nuqampaqqa manana balinchu. 8 Chaymi bidaypi Jisumkristu tumkuy imamanda nuqampaqqa masta balin. Chayrallkum nuqaqa tumkuy chay munachqallkunata dijachqana kani, Siñurniy Jisumkristuta yuyayniypi mas allita riqsinaypaq. Chaymi chay munachqallkunaqa nuqampaqqa ancha millanaypaq mampachinana kidachqa, 9 Jisumkristuta masta kuyanaypaq. Chayrallkum manana kriyinichu: Muysispa liyningunata kasuchpam, atini wachamkayta, nichpaqa. Achwanmi yach'ani: Jisumkristumpi allimpta kriyimptiymi, Tayta Dyus yumbay uchallkunamanda pirdunawan, nichpa. 10 Chaymi Jisumkristuta yuyayniypi riqsichpa, paypa pudirninwan Dyusta kasuchpa, munani kawsayta, Jisumkristuchina padisinaypaq. Chaqa Tayta Dyusmi paytaqa wañuchqanmanda kawsachimurqan. Chaychinam nuqampis munani yanampawanambaq, payta allita kasunaypaq, awnki Jisustachina nuqata wanchiwamptinllampampis. 11 Chaychina munamptinllampa wanchiwaytampismi, Dyuspi yuyamkuni: Suq diyam nuqatampis rin kawsachiwaq, nichpa. 12 Manam ninichu: Jisumkristuchinam kani, nichpaqa. Chaqa nuqaqam yach'ani: Manaraqmi paychinachu kawsani, nichpa. Piru payqam wachawachqa, paychina kawsanaypaq. Chaymi tumkuy ima atichqayta rurani, pay munachqanchina kawsanaypaq. 13 Kriyiq masitamkuna, nuqaqam mana ninichu: Jisumkristu munachqanchinallam kawsallkani, nichpaqa. Piru tumkuy ima chay unay rurachqallkunataqam dijachqana kani. Kananqam tumkuy ima atichqayta rurallkani Jisumkristu munachqanchina kawsanaypaq. 14 Chaqa Tayta Dyusmi kumbidawanchiq, syiluman ampawaqninchiq, primyunchiqta quwananchiqllampa, Jisumkristuta mana challkuq sirbimptinchiq. Chaymi nuqaqa tumkuy ima atichqayta rurallkani, chay primyuta ch'askinaypaq. 15 Chayrallku Jisuspi yumbay ancha allita yuyamkuqkuna chay nichuchqaychina yuyachunllampa. Wamkinnimkimkuna suq layata yuyamptimkiqam, Tayta Dyus rin intyindichichuq. 16 Piru yumbay yach'amkuchqanchiqta mana challkuq kasuchunllampa, suq dumktrinayuqlla suq yuyayniyuqlla kachpa. 17 Kriyiq masitamkuna, qamkunawan kachpa chumaqta kawsamptiymi, allita rimkawarqallkillampa. Chayri kananqa nuqachina, chay suq kriyiq masinchiqkunachina qamkunampis Dyusta allita kasuchpa, kawsayllampa. 18 Piru achka runamkunam Jisumkristuta kuntrachpa, mana kriyinllampachu: Paymi kruspi wañuchpa, atin wachawayninchiqta, nichpa. Chaymi nuqa waqachpa, achka kutinda qamkunata kunachuchqaychina, suq kutinda nirillkillampa: Chay kuntraqkunataqar ama kasuyllampachu, nichpa. 19 Chay laya runamkunataqam Tayta Dyusqa rin chingachiq. Chaqa allimp Dyusta mana munachpa kasuytam, pallkunampa kwirpun munachqandalla rurachpa kawsanllampa. Panqamkuypaq kusaskunata rurachpampismi, mana panqamkuchpachu, achwan alabamkanllampa. Kay mundumpa yumbay kusasnimbillam yuyanllampa. 20 Piru yumbay nuqanchiqpaqqam kan suq llaqtanchiq anaq syilumpi. Chaymi chuyallkanchiqllampa, Siñurninchiq Jisumkristu waqmanda chamunangaman wachawananchiq. 21 Chaychina chamuchpam, tumkuy laya pudirniyuq kamachimkuqta binsichpa, tumkuy ima kaqta rin kamachiq. Kay kwirpunchiq wañunambaq kaqtampismi chay pudirninwan rin kambyaq, paypa chumaq kwirpunchina kachpa, amana wañunanchiqllampa.
1 Ancha kuyachqay kriyiq masitamkuna, qamkuna ancha kuchichiwachpaqam, chumaq primyuychina kangillampa. Chaymi ancha munani rimkachuyllampata. Kanan ancha kuyachuchpam kunallkillampa, Jisuspi mana challkuq yuyamkunallkillampa. 2 Kaychinam nini chay kriyiq panisitanchiq Ibudyata, Sintimkatampis: Jisuspi allimpta kriyichpaqam, alliyayllampa, suq yuyayniyuqlla kanallkillampa. 3 Ancha allin yach'achimkuq masisitu, qamtampismi rrugallki, chay ichkay paninchiqkunata yanampanallki alliyananllampa. Chaqa pallkunaqam nuqawan pulla padisichpa, ancha yanampawarqan, Jisuspa chumaq nutisyanda yach'achimkunay. Masanchiq Klimintimpismi suq masanchiqkunawan nuqawan pulla chaychina yach'achimkurqanllampa. Pallkunampa chutingunatam Tayta Dyusqa iskibrichqana librumbi, tumkuy tyimpu paywan kawsananllampa. 4 Qamkuna Jisumkristumpi kriyichqallkirallku, tumkuy tyimpu kuchimkuyllampa. Muchuqmandam nirillkillampa: ¡Kuchimkuyllampa! nichpa. 5 Qamkunampura tumkuy chunqu kuyanamkuyllampa, yumbay runamkuna warmimkuna intyindinambaq: Jisuspi kriyiqkunaqam ancha chumaqta kawsanllampa, nichpa. Chaqa Siñurninchiq Jisumkristum sirkana. [Nuta: sirkana munan niyta ichu: sirkana tyimpun chamunambaq ichu sirkanchiqpi payqa, nichpa.] 6 Chayri ama nimampaq llamkichpachu, achwan Tayta Dyusman tumkuy imampaq mañamkuyllampa. Chaychina mañamkuchpaqar, payta pagimkuyllampa. 7 Chaychina Jisumkristumpi allita kriyimptinchiqmi, Tayta Dyusqa ancha kunswilawanchiq, ama ancha llamkinanchiqllampa. Piru pay ancha pudirniyuq ancha yach'ayniyuq kamptinmi, nuqanchiqkunaqa mana atinchiqchu allita intyindiyta: ¿Imachinam ancha kunswilawanchiq? nichpa. 8 Kriyiq masitamkuna, kay nichuchqayta uchyanaypaqmi kunallkillampa, allin kusaskunampilla yuyanallkillampa. Chayri yuyayllampa tumkuy ima allimp kaqpilla, allita ruraqpilla, suqkunata rrispitaqpilla, mana nima uchayuq kaqpilla, allin famayuq kaqpilla. Chaqa ima kamptin kuchimkunanchiq, ichu allin runamkuna kamptin, pallkunata alabananchiq, chay chumaq kaqkunampilla yuyayllampa. 9 Yumbay yach'achichuchqayta allita rurayllampa. Chaqa Dyuspaq yach'achimkumptiymi, qamkuna allita uyawarqallki; allita ruramptiymi, qamkuna allita rimkawarqallki. Chayri qamkunampis chaychinalla allita rurachpa kawsayllampa. Chaychina kawsamptimkillampam, Tayta Dyus kunswilawaqninchiq qamkunampa pullallki rin kaq. 10 Suq tyimpumpi qamkuna ancha yanampawayta munachpampismi, mana atirqallkillampachu ufrindallkita kach'amuwayta. Piru kananqam nuqata yuyawachpa, ufrindallkita kach'amuwachqa kangillampa. Chaymi nuqa ancha kuchimkuchpa, Siñurninchiq Jisumkristuta ancha pagimkuni. 11 Piru chayta nichuchpaqam, mana nimatampis mañallkillampachu. Chaqa mana nimayuq kachpa ichu achka imayuq kachpampis, yach'amkuchqana kani kuchimkuyta. 12 Chaymi achkata mimkuchpa ichu achlitata mimkuchpampis kuchimkuni. Achka imayuq kachpa ichu mana nimayuq kachpampismi, yach'amkuchqana kani kuchimkuchpalla kawsayta. 13 Chaqa Jisumkristu yanampawamptinmi, tumkuy imata atini rurayta. 14 Piru padisimptiyqam, qamkuna yanampawachpa, ancha allita rurachqallampa kangi. 15 Filimpusinu kriyiq masitamkuna, qamkunaqam allita yach'angillampa: Pabluqam prubinsyanchiq Masiduñamanda suq llaqtamkunaman rirqan, Jisuspa chumaq nutisyanda yach'achimkuq, nichpa. Chay llaqtamkunaman rimptiymi, qamkunalla yach'achichuchqaypaq agradisiwachpa, ufrindamkunata kach'amuwarqallki. 16 Chaymandaqam Tisalunimka llaqtampi kallkamptiy, kutin kutin ufrindamkunata nuqaman kach'amurqallki mantyinimkanaypaq. 17 (Tumkuy challkunampaqmi ancha pagimkullkillampa.) Piru manam mañallkillampachu, mas ufrindamkunata nuqaman kach'amunallkiqa. Achwanmi chay ufrindallkita quwachqallkirallku, munani Tayta Dyus suq chumaq primyuta qamkunata quchunambaq. 18 Chaqa chay ufrinda Impafrudituwan qamkuna kach'amuchqallkitam ch'askichqa kani. Chaymi ufrindallkillampa ancha yanampawamptin, mana nimampis faltawanchu. Chay ufrindallkita kach'amumptimkim, Tayta Dyusqa ancha kuchimkuchqa. Chaqa paypaqqam suq michki mutkina insinsyuchina kachqa. 19 Kanan payqam Churin Jisumkristuwan tumkuy imayuq kachpa, syilumanda ancha achkata rin quchuqllampa, ama nimampis faltachunanllampa. 20 ¡Taytanchiq Dyusqam tumkuy tyimpumpaq alabachqa kanqa! ¡Chaychina kanqa! 21 Yumbay kriyiq masinchiqkunata niyllampa: Pablum Jisumkristumpa chutimbi qamkunata nampallkuchungi, nichpa. Nuqawan kaypi kaq kriyiq masinchiqkunampismi qamkunata nampallkuchungi. 22 Yumbay kriyiq masinchiqpismi qamkunata nampallkuchungi. Piru yumbaymandam masta nampallkuchungi gubyirnu Sasarpa wasinmanda kaqkuna. 23 Siñurninchiq Jisumkristu tumkuy imampi qamkunata yanampachunqa. Chaychina kanqa.
1 Kuyachqay kriyiq masitamkuna Kulusas llaqtampi tiyaqkuna, nuqa Pablum masanchiq Timutiyuwan kay kartata kach'amuni qamkuna Jisumkristumpi allita kriyiqkunaman. Chaqa Tayta Dyus munamptinmi, Jisuspa ampustulnin kani, qamkunata yach'achichunaypaq. Chaymi Dyusman mañamkuni, tumkuy imampi qamkunata yanampachunan, ama nimata manchachpachu, achwan kuchimkuchpa kawsanallkillampa. 3 Yach'achqallampam kani: Qamkunach Siñurninchiq Jisumkristumpi ancha allita kriyichpa, yumbay kriyiq masinchiqkunata ancha kuyallkangillampa, nichpa. Chaymi ancha kuchimkuchpa, Siñurninchiq Jisumkristumpa Taytan Dyusta mana challkuq pagimkunillampa. 5 Chaychinam qamkunaqa Jisumkristumpa allimp chumaq nutisyanda yach'amkuchpa, ancha kuyanamkungillampa. Chaymi tumkuy chunqu kuchimkungillampa: Anaq syilumpim paywan rinchiqllampa kawsaq, nichpa. 6 Chay chumaq nutisyata uyachpaqam, yach'amkuchqallampa kangi: Tayta Dyusmi allimpta kuyawaqninchiq, ancha munan wachawayninchiqta, nichpa. Chay yach'amkuchqallki diyamandampacham Dyusqa qamkunata yanampachuchqa, mas allita paypi kriyinallkillampa. Chay chumaq nutisyataqam tumkuy kay mundumpi yach'achimkullkanchiq. Chaymi qamkuna Jisumkristumpi kriyichqallkichina, achka uyamkuqkunampis paypi kriyillkanllampa. Pallkunaqam Dyuspaq ancha atun kusichachina. 7 Chay kuyachqay yach'achimkuq masiy Impafrasmandam qamkunaqa Jisuspaq allita yach'amkuchqallampa kangi. Chaqa payqa Jisumkristumpa ancha allin sirbimkuqnin kachpam, mana challkuq yach'achichungillampa. 8 Payqam nuqallkunataqa niwachqa: Santu Ispiritu Kulusasmanda kaqkunata yanampamptinmi, pallkuna yumbay kriyiq masinchiqkunata allita kuyanllampa, nichpa. 9 Chaymi chaychina qamkunampaq yach'achqayllampa diyamandampacha, mana challkuq Dyusman mañamkunillampa, Santu Ispiritunwan qamkunata ancha yanampachunan, pay munachqanda allita yach'anallkillampa, allin jwisyuyuq, ancha yach'ayniyuq kanallkillampa. 10 Chaychinaqam mañamkunillampa, Siñurninchiq Jisumkristu munachqanchina kawsanallkillampa, tumkuy tyimpu payta kuchichinallkillampa. Chaychina allitalla rurachpaqam, Tayta Dyusta chunqullkillampampi mas allita ringillampa riqsiq. 11 Chaymi payman mañamkunillampa, pudirninwan qamkunata yanampachunan, paypi ancha allita kriyichpa, payman pagimkunallkillampa. Chaychina kriyichpaqam qasachachumptimbis, kuchimkuchpa ringillampa agwantaq. Chaqa Dyuspa wambranguna kamptinchiqmi, payqa kamachqa, llimpyallkaq luryampi irinsyayuq kananchiqllampa. 13 Dyablum uchata rurachiwachqa karqanchiq. Piru Tayta Dyusmi chay dyablumanda, uchanchiqmanda wachawachqana kanchiq, kuyachqan Churin Jisumkristutana kasunanchiqllampa. 14 Chaqa Jisumkristu ?yawarninda ich'achpa wañumptinmi,? Tayta Dyusqa yumbay uchanchiqmanda pirdunawaqninchiq, wachawachqa kanchiq. 15 Jisuspa Taytan Dyustaqam mana atinchiqchu rimkayta, mana kwirpuyuq kachqanrallku. Piru chaychina ispiritu kachpampismi, Churin Jisumkristutaqa kwirpuyuqta nasichirqan kay mundumpi. Chaymi Jisusta rimkachpaqa, Tayta Dyustachina rimkallkanchiq. Chayrallkum Jisumkristuqa tumkuy ima rurachqanmanda masta balin. 16 Chaqa Tayta Dyusqam Churin Jisumkristuta kwirpuyuqta manaraq nasichichpa, kamachirqan: Ruray syiluta, pachata, tumkuy imandinda, rimkaypaqta, mana rimkaypaqtampis. Ruraypis tumkuy laya kamachimkuq anjilkunata, chay tumkuy ima rurachqallki qamta kasuchunanllampa, nichpa. 17 Chaqa, manaraq nima kamptinmi, Jisumkristuqa karqanna. Kanan kay pachata, syiluta, tumkuy imandinda pay kwidallkamptinmi, mana chinganchu; manaqach' tumkuy ima chinganmanna. 18 Chaychinallam Jisumkristu paypi yumbay kriyiqkunata kawsachichpa, chumaqta kamachiwanchiq. Manchu umanchiqqa yumbay kwirpunchiqta kamachin. Chaychinallam Jisumkristu paypi yumbay kriyiqkunata chumaqta kamachiwanchiq. Chaqa payqam yumbay wañuqmanda puntata tumkuy tyimpumpaq kawsamuchqa, tumkuy ima rurachqanmanda mas allin kamachimkuq kanambaq. 19 Jisumkristuqam tumkuy imampi Tayta Dyuschinalla. Chaqa Tayta Dyusqam chaychina munarqan kanambaq. 20 Kanan Tayta Dyusmi munachqa uchanchiqmanda wachawayninchiqta. Chaymi Churin Jisusta kay pachaman kach'amurqan, yawarninda ich'achpa kruspi wañuchqanrallku, pirdunawananchiq. Chaymi kay pachampi, anaq syilumpi yumbay tiyaqkuna Tayta Dyuswan atinchiqllampa alliyayta. 21 Unayqam qamkunaqa uchamkunata rurachpaqa, Dyusta kuntrarqallkillampa. Chaymi Dyuspaqqa furastirumkunachina karqallkillampa. Piru kananqam Jisumkristu kruspi wañuchqanrallku, paywan yumbay alliyaqtaqa tumkuy uchanchiqkunamanda pirdunawachqa kanchiq. Chaychinam rurachqa, paypa ñawpambi manana nima uchayuqchu kananchiqllampa. 23 Piru chaychina mana uchayuq kanallkimpaqqa, Jisumkristumpa chumaq nutisyanda uyachpa, mana challkuq paypi yuyamkuyllampa: Paymi rin wachawaq, nichpa. Amar amkramkaychu chay kriyichqallkimandaqa. Chaqa chay chumaq nutisyandam tumkuy kay mundumpi yach'achimkullkanllampa. Chaytallam nuqa Pablumpis yach'achimkullkani. 24 Kananqam nuqaqa qamkunata yach'achichuchqayrallku kay karsilpi padisichpampis, kuchimkuni. Chaqa Jisumkristumpi yumbay kriyiqkunaqam paypa kwirpunchina. Chaymi ancha balin Jisumkristuchina chay kriyiq masinchiqkunampaq padisinaypaq. Chaqa Tayta Dyusmi numbrawachqa, paypi kriyiqkunata tumkuy ima pay nichqanda yach'achinaypaq. 26 Tayta Dyusmi unaymandampacha paylla yuyachqandaqa mana pitampis nirqanchu. Piru kananqam paypi kriyiqkunataqa yach'achiwachqana kanchiq chay pamkadu mana nichqandaqa. 27 Chay pamkaduqam munan niyta: Dyusqach yumbayta munan wachayta. Manach nuqallkuna isrraylinu kaqkunatallachu munan wachawayllampataqa, nichpa. Chaqa Churin Jisumkristumpa Ispiritunmi paypi yumbay kriyiqkunampi tiyan. Chaymi qamkuna mana isrraylinu kaqkunampis Jisuspi kriyichpaqa, luryampi paywan ringillampa kawsaq. 28 Chaymi Dyus yanampawamptin, may atichqallkaman yumbayta kunachpa, yach'achinillampa Jisumkristumpaq, paypi tumkuy chunqu kriyinanllampa, Dyuspa ñawpambi ancha allin, ancha yach'ayniyuq wambranguna kanambaqllampa. 29 Chayrallkum Jisumkristu ancha yanampawamptin, paypa pudirninwan achka runata, warmita challku challku may atichqallkaman Jisumkristumpaq yach'achini.
1 Munanim yach'anallkillampa: Nuqam tumkuy chunqu Dyusman qamkunampaq ancha mañamkuni, nichpa. Chay Lawdisya llaqtampi tiyaqkunampaqpis, yumbay chay suq mana riqsiwaq kriyiq masinchiqpaqpismi ancha mañamkuni. 2 Mañamkuniqam yumbay qamkuna, pallkunampis suq yuyayniyuqlla kachpa, kuyanamkuchpa, ancha animadu kanallkillampa. Chaychina kachpaqam, ancha allita ringillampa riqsiq Tayta Dyuspa pamkadu Churin Jisumkristuta. 3 Chaqa Jisumkristuqam nuqanchiqkunampaqqa ancha balin maski ch'aniyuq urumanda. Payllam atin yach'achiwayninchiqta Tayta Dyuslla yach'achqandaqa. 4 Kallkunataqam nillkillampa, ama pimpis, michki michki parlachichuchpa, ingañachunanllampa. 5 Chaqa qamkunawan mana kachpampismi, kuyachuchpa, ancha yuyallkillampa. Chaymi ancha kuchimkuni yach'achpa: Qamkunach suq yuyayniyuqlla kachpa, mana challkuq kriyingillampa Jisumkristumpi, nichpa. 6 Chayri chay punta diyamkunampi Siñurninchiq Jisumkristumpi kriyichqallkichina, paypi allita kriyichpa, kawsayllampa. 7 Suq planta allpampi allita ch'umpamkuqchinar qamkunampis Jisuspi ancha allita kriyiyllampa, paymanda ama amkramkachpachu. Chaqa chaychina kriyinallkillampam allita yach'amkurqallki achka kriyiq masinchiqmanda. Chayri tumkuy diya Dyusman ancha pagimkuchpa kawsayllampa. 8 Kwidawkich kasungimanllampa mayqan mana baliq dumktrinayuq yach'achimkuqta. Chay laya yach'achimkuqqam runamkunampa mana baliq kustumbringunata, yuyayningunata munanllampa yach'achichuyta. Jisumkristumpa lijitimu nutisyandaqam mana yach'achimkunllampachu. 9 Chaqa Siñurninchiq Jisumkristu kwirpuyuq kachpampismi, tumkuy imampi Tayta Dyuschinalla. 10 Kanan Jisumkristuqam yumbay kamachimkuq anjilkunamanda, dyablumkunamanda mas pudirniyuq kamachimkuq. Chaymi paypi allita kriyimptimkillampa, ancha rin yanampachuq, chumaqta kawsanallkillampa. 11 Manchu runamkuna kwirpumbi chay siñalta rurachpaqa, wichumkunllampa chay piti aychata. Chaychinallam qamkuna Jisumkristumpi kriyimptimkiqa, pay kimkin uchallkimkunata surquchpa, wichumkun bidallkimanda. Piru manam chay siñaltaqa rurachuchqachu. Achwanmi uchallkimkunamanda pirdunachuchqa. 12 Nuqanchiqkunaqam yamkumpi chutimkuchpaqa, Jisumkristu pambamkachqanchina karqanchiqllampa. Chaymandaqam yamkumanda lluqchichpaqa, Jisumkristu muchuqmanda kawsamuchqanchina kanchiqllampa. Chaqa kriyirqanchiqmi: Dyusmi pudirninwan Jisusta wañuchqanmanda kawsachimurqan, nichpa. 13 Qamkuna mana siñalniyuq kwirpullkimpi kaqkunaqam unayqa uchata rurachpa, Dyuspa liyninda mana kasuchpaqa, wañuchqachina karqallkillampa. Piru kananqam Tayta Dyusqa muchuq bidatana quchuchqa. Chaqa Jisumkristumpi qamkuna kriyimptimkiqam, yumbay uchallkimanda pirdunachuchqa. 14 Suq runa sintinsyadu kamptinqam, juyisqa suq urdinda ruran, kastigadu kanambaq. (Chaychinallam nuqanchiqkunampis uchayuq kachqanchiqrallku sintinsyaduna karqanchiq, jwisyu diyampi kastigadu kananchiqllampa.) Piru Tayta Dyusqam chay urdinda kruspi klabachpachina chingachirqan. Chaymi Jisumkristumpi kriyiqkunaqa manana sintinsyaduchu rinchiqllampa kaq, jwisyu diyampi kastigadu kananchiqqa. 15 Chaychina kruspi wañuchpa, kawsamuchpaqam, Jisumkristu yumbay chay kamachimkuq dyablumkunata binsichpa, panqamkuchqata dijarqan. Chaqa pallkunataqam prisumkunatachina purichirqan yumbaypa ñawpambi. 16 Chayrallkur ama ni pimpis qamkunataqa jusgachunqachu, imatampis mimkumptimkillampa, ichu umpyamptimkillampaqa; ni rimachunqallampachu llullu killa fyistata ichu suq fyistamkunata ichu samana diyamkunata mana gwardamptimkillampaqa. 17 Chaqa chay unay kustumbringunaqam ancha salqatata Jisumkristumpaq yach'achiwarqanchiq. Chaymi paypa llandunchinalla karqanllampa. Piru kananqam nuqanchiqkunaqa allitana yach'anchiqllampa Jisumkristu kimkimbaq. 18 Chayri chay umildi tumkuqkunata, anjilkuna aduraqkunataqa ama kasuyllampachu. Chaqa pallkunaqam yuyachqangunampi kriyichpa, ancha palanganuyachpa, ninllampa: Tayta Dyusmi musquypichina kallkunata yach'achiwachqa, nichpa. Pallkunata uyachpamkich, pyirdingimanllampa primyullkita. 19 Chaqa pallkunaqam Jisumkristumanda amkramkachpa, suq mana umayuq kwirpuchinana kidanllampa. Piru Jisumkristuqam umanchiqchina. Chaymi kwirpunchina kamptinchiq, pay animachiwanchiq, suqwan suqwan kuyanamkuchpa, Dyuspi mas allita kriyinanchiqllampa. Chaqa Tayta Dyusmi nichqa karqan, chaychina paypi masta masta kriyinanchiqllampa. 20 Jisumkristumpim kriyichqallampa kangi. Chaymi pay wañuchqanchina, qamkunampis wañuchqachinana kangillampa, kay mundumpa kustumbringunata amana ruranallkillampa. Chaychina kamptinqa, ¿imarallkutaq runamkunampa kustumbringunata kasuchpa kawsangillampaqa? 21 Chaqa runamkunam qamkunata kamachichungillampa: ¡Ama chay imata rurayllampachu! ¡Ama chay imata mimkuyllampachu! ¡Ama chay imata llamkayllampachu! nichpa. 22 Yumbay chay kamachichuchqanqam kamachiwanchiq mimkuna umpyana kusaspaqlla. Chay layamkunaqam das uchyamkan. Manam duranchu. Chaqa runamkunampa dumktrinanmandallam chay layamkunataqa kamachiwanchiq. 23 Pallkuna kamachimkuchqanqam ancha balinmanchina. Piru pallkuna kimkin munachqanchinallam Dyusta adurallkanllampa. Chaymi kamachimkunllampa, ancha rrisamkuq, ancha umildi tumkuchpa, kwirpunchiqta kastigananchiq. Piru yumbay chay rurachqanllampaqam mana yanampawanchiqchu, kwirpunchiqta sujitananchiqqa.
1 Tayta Dyusqam Churin Jisumkristuta kawsachimuchpa, nuqanchiqkunatampis suq muchuq bidampaqna kawsachiwachqa kanchiq. Kanan Siñurninchiq Jisumkristuqam luryampina Tayta Dyuspa allin ladumbi tiyallkan. Chayri luryampi kaqpaqlla yuyachpa kawsachunllampa. Amanar kay mundumpa kusasningunampaqqa yuyachpa kawsachunllampachu. 3 Chaqa nuqanchiqkunaqam chay uchamkunampaqqa wañuchqachinana kanchiqllampa. Chaymi kananqa Jisumkristumpi allita kriyichpa, Tayta Dyuswanna kanchiqllampa. Piru mana kriyiqkunampaqqam kay muchuq bidanchiqqa pamkadu. (Chaqa manam intyindinllampachu kay muchuq bidanchiqpaqqa.) 4 Piru Jisumkristum nuqanchiqkunata kawsachiwanchiq. Chaymi pay llimpyachpa chamumptinqa, nuqanchiqkunampis paywan pulla rinchiqllampa llimpyaq. 5 Chayri kay mundumpi uchamkuna kaqpaqqa wañuchqachina kachunllampa. Sultiru kachpaqar, amaraq puñuychu warmiwanqa. Rrispituyuq kachpaqar, rrispitullkiwanlla puñuy. Amar suqwanqa. Amar ni suq laya uchamkunata rurayllampachu, kwirpullki munachqandalla rurachpaqa. Imallkillampa kamptimbisri, ama mastaqa ancha munayllampachu. Chaqa chaychina munachpaqam, chay kusaskunata adurallkangi dyuskunatachina. 6 Yumbay chay laya uchayuqtaqam Dyusqa ancha rin kastigaq, payta mana kasuchqanrallku. 7 Kanan Dyuspi manaraq kriyichpaqam, qamkunampis chay laya uchamkunata rurachpa kawsarqallkillampa. 8 Piru kananqa dijayllampana yumbay laya uchamkunata. Amana piñamkuyllampachu ni anyanamkuyllampachu ni suqkunata dañachiyllampachu ni musyamkuyllampachu ni mala palabramkunata rimayllampachu. 9 Amar pitampis ingañaychu. Chaqa chay laya uchallkillampaqam ancha mampa trampuchina karqan. Piru kananqam chay unay millanaypaq uchallkillampataqa dijachqallampana kangi. 10 Chaymi Jisumkristumpi kriyichpaqa, chumaqtana kawsallkangillampa, suq ancha chumaq mudanata mudamkuchqachina. Chaqa kananqam Dyusqa qamkunata yanampachuchqa, yuyaynimkimpi payta mas allita riqsinallkillampa. 11 Chaymi mana yaqqa balinchu isrraylinu kananchiq ichu mana isrraylinu kananchiq, ni kwirpunchiqpi siñalniyuq kananchiq ni mana siñalniyuq kananchiq, ni furastiru kananchiq ni llaqta masimkuna kananchiq, ni yach'ayniyuq kananchiq ni mana yach'ayniyuq kananchiq, ni randichqa kriyadu kananchiq ni mana kriyadu kananchiqllampa. Achwanmi ancha balin Jisumkristumpi kriyinanchiqllampa. Chaqa Jisumkristum yumbaymanda masta balin. Kanan Santu Ispiritunqam Jisuspi yumbay kriyiqkunampi tiyan. 12 Tayta Dyusmi ancha kuyawaqninchiq, amkrawachqallampa kanchiq, paypa wambranguna kananchiqllampa. Chayri chumaqta kawsachun, suq ancha chumaq mudanayuqchina kananchiqllampa. Chayri chay iman faltaqkunata llamkimpachpa, imawambis yanampachunllampa. Umildi kachpa, ama piñamkuchpachu, achwan suqkunata agwantachunllampa. 13 Chaychina agwantanamkuchpa, pirdunanamkuchun. Chaqa Jisumkristum nuqanchiqkunataqa pirdunawachqa kanchiq, ¿manachu? Chayri chaychinalla nuqanchiqkunampis pirdunanamkuchun. 14 Piru tumkuy imamandam mas alli kuyanamkunanchiq. Chaqa chaychina kuyanamkuchpaqam, suq yuyayniyuqlla rinchiqllampa kawsaq. 15 Chayri Tayta Dyus qamkunata yanampachunqa, chunqullkillampampi kuchimkuchpa, yumbaywan chumaqta kawsachpa, suq kwirpuchinalla kanallkillampa. Kanan Dyusta pagimkuchpa kawsayllampa. 16 Chaychinar Jisumkristumpa chumaq nutisyanda ancha allita yach'amkuchpa, tumkuy chunqu mana challkuq kasuyllampa. Chayri ancha allita yach'achinamkuchpa suqnimki suqnimkiwan animachinamkuy. Salmumkunata, imnumkunata, tumkuy laya alabansamkunata kantachpa, tumkuy chunqu Dyusta pagimkuyllampa. 17 Imatampis nichpa, ichu imatampis ruranallki kachpaqa, Jisumkristu munachqanchinalla ruray, Tayta Dyusta pagimkuchpa, Churin Jisumkristu yanampachumptin. 18 Qusayuq warmimkuna, qusallkita allita kasuy. Chaqa Siñurninchiqpi kriyichpaqam, ancha alli chaychina kasunallkillampa. 19 Qamkuna warmiyuq runamkunampis warmimkita kuyay. Amar piñamkuchqa layaqa kamachiychu. 20 Qamkuna wambramkunampis, taytallkita, mamallkita tumkuy imampi chumaqta kasuyllampa, Tayta Dyusninchiq kuchimkunambaq. 21 Qamkuna taytamkunampis, wambrallkillampata chumaqta kamachiyllampa. Amar dasqa anyayllampachu, ama syintichpa disanimamkanan. 22 Qamkuna randichqa kriyadumkuna, kay bidampiqa patrunnimkillampata tumkuy imampi allita kasuyllampa. Amar champachuchqan uraslla kasuqkuna tumkuyllampachu. Achwan Dyusta rrispitachpa, tumkuy chunqu allimpta kasuyllampa yuyachpa: Dyusmi tumkuy uras rimkawallkan, nichpa. 23 Chayri imata rurachpaqa kuchimkuchpa, allin chunqullkiwan tumkuy imata rurayllampa: Siñurniy Jisumkristumpaqmi rurallkani, nichpa. Piru amar runamkunampaqllaqa rurayllampachu. 24 Chaqa qamkunaqam yach'angillampa: Siñurninchiq Jisumkristuta allita kasumptinchiqqam, suq bidampi Tayta Dyus rin quwaqninchiq ancha chumaq irinsyata, nichpa. 25 Piru mayqanninchiq mana allimkunata ruramptinchiqqam, rin kastigawaqninchiq. Chaqa Dyusqam mana ni mayqanda sawachachpachu, achwan yumbayta allita rin jusgaq.
1 Qamkuna, patrungunampis yuyayllampa: Nuqampismi patrunniyuq kani anaq syilumpi. Payqam allita rimkawallkan, nichpa. Chayri allita rimkachpa, chumaqta kamachiyllampa chay randichqa kriyadullkimkunata. 2 Yumbaynimkir rimkch'amkachpa, allita yuyachpa, Dyusman mana challkuq mañamkuchpa, payta pagimkuyllampa. 3 Nuqampaqpisri Dyusman mañamkuyllampa. Chaqa Jisumkristumpa pamkadu nutisyanda yach'achimkuchqayrallkum kay karsilpiqa kani. Chayri mañamkuyllampa, chay pamkadu yuyachqambaq achka runata warmita atinaypaq yach'achiyta. 4 Mañamkuyllampampisri Dyus munachqanchina ancha klarituta Jisumkristumpaq yach'achimkunaypaq. 5 Chay mana kriyiqkunawanri chumaqta kawsayllampa. Allitar tyimpullkita kwidayllampa, lugarniyuq kanallki, suqkunata yanampanallki, Jisumkristumpi kriyinanllampa. 6 Ancha animadu chumaqta pallkunawan parlachpaqam, Dyuspaq imata tampuchumptinllampa, allita yach'ayllampa, pallkunata kuntistanallki. 7 Kuyachqanchiq yach'achimkuq masinchiq Timkimkutam qamkunaman kach'amullkani, nuqampaq tumkuy imata parlachichunan. Chaqa paymi nuqallkunawan ancha allita Dyusninchiqta sirbichqa. 8 Chaymi payta kach'amullkani, imachina kaypi kachqayllampata nichuchpa, qamkunata animachichunan. 9 Pullanmi chamumbis kuyachqanchiq masanchiq Unisimu. Paypismi ancha allita Siñurninchiq Jisumkristuta kasun. Payqam qamkunampa llaqta masimki. Chay ichkay masanchiqkunam yumbayta rin parlachichuqllampa, imam kaypi pasawallkanllampa, nichpa. 10 Prisu masiy Aristarkumpismi qamkunata nampallkuchungi. Birnabimpa ayllun Markuspismi nampallkuchungillampa. Paypaqqam nichuchqana kani: Qamkunaman chamumptinqar, chumaqta ch'ayachiyllampa, nichpa. 11 Kriyiq masinchiq Jisuspismi qamkunata nampallkuchungi. Payllam Justumpis chutin. [Nuta: Chay Justu Jisusmi mana Jisumkristuchu karqan.] Yumbay isrraylinu kriyiq masillkunamandam pallkunalla kaypi yanampawallkanllampa, chay mana kriyiqkunata animachichpa, Tayta Dyuspi kriyinanllampa. Pallkunam ancha animachiwachqa, ama llamkinaypaq. 12 Jisumkristuta sirbiq masiy Impafraspismi, llaqta masimkillampa kachpa, qamkunata nampallkuchungi. Paymi mana qunqachuchpachu, Dyusman tumkuy diya mana challkuq ancha mañamkun qamkunampaq. Chaqa ancham munan Jisumkristumpi allita kriyichpa, payman intrigamkachpa, Dyus munachqanda allita ruranallkillampa. 13 Nuqaqam tistigu kani; Impafrasqam qamkuna Kulusaspi tiyaqkunampaq, Lawdisya llaqtampi tiyaqkunampaq, Yirampulis llaqtampi tiyaqkunampaqpis ancha llamkin. Chaymi ancha munan, chumaqta kuchimkuchpa kawsanallkillampa. 14 Kay kuyachqanchiq dumktur Lumkasmi kriyiq masinchiq Dimaswan yumbaynimkita nampallkuchungi. 15 Kriyiq masitamkuna, waq Lawdisya llaqtampi kriyiq masinchiqkunata, waq kriyiq masinchiq Ninfasta, paypa wasimbi yumbay tandamkaq kriyiq masinchiqkunatampis niyllampa: Pablum nampallkuchungillampa, nichpa. 16 Kay kartaytaqar yumbaynimkimpaq liyichpa, Lawdisya llaqtaman kach'ayllampa, waqpimpis yumbay tandamkaq kriyiq masinchiqkunampa ñawpambi liyinanllampa. Pallkunamambismi suq kartata kach'achqana kani. Chayri pallkunaman chay kach'achqay kartata mañachimuchpa, yumbaynimkimpaq liyiyllampa. 17 Kriyiq masinchiq Arkimputa niyllampa: Jisumkristum numbrachuchqa, paypaq yach'achimkunallki. Chayri allita kumpliy chay trabaju quchuchqanda, nichpa. 18 Nuqa Pablum kay partitalla kimkiy mamkiywan iskibrichpa, nampallkullkillampa. Amar qunqawachpachu yuyayllampa: Pablum karsilpi, nichpa. ¡Ancha allin Tayta Dyusri tumkuy imampi qamkunata yanampachunqa! ¡Chaychina kanqa!
1 Kuyachqay kriyiq masitamkuna Tisalunimka llaqtampi tandamkaqkuna, nuqa Pablum, masanchiq Silbanuwan, masanchiq Timutiyuwan kay kartata iskibrillkillampa. Qamkunaqam Taytanchiq Dyusman, Siñurninchiq Jisumkristumambis intrigamkachpa kawsallkangillampa. Pallkunar qamkunata tumkuy imampi yanampachunqa, ama nimata manchachpa, achwan ancha kuchimkuchpa kawsanallkillampa. 2 Kriyiq masitamkuna, tumkuy tyimpum yumbay qamkunampaq Dyusman pagimkuchpa, mañamkunillampa, qamkunata yanampachunan. 3 Tumkuy urasmi yuyallkillampa: Qamkunam Dyuspi allita kriyichpa, payta ancha kuyachpa, paypaq yach'achimkuchpa kawsallkangillampa, nichpa. Yuyanillampampismi: Siñurninchiq Jisumkristumpi ancha allita mana challkuq yuyamkullkangillampa, nichpa. 4 Masitamkuna, Dyusqam qamkunata ancha kuyachuchpa, amkrachuchqa, wambranguna kanallkillampa. 5 Chaqa manam rimachpallachu, qamkunataqa yach'achichuchqa kani Jisumkristumpa chumaq nutisyanda. Achwanmi Dyuspa Santu Ispiritumba pudirninwan milagrumkunata rurachpa, allimp kaqtalla qamkunata yach'achichuchqa kani. Chaymi qamkunaqa allita yach'angillampa: Pablum kumpañirungunawan pullanchiq kachpa, kuyawaqninchiq, allitalla rurachpa, ancha yanampawachqa kanchiq, nichpa. 6 Qamkunampismi Siñurninchiqchina, nuqallkunachina allita rurachpa, kawsachqallampa kangi. Chaqa qamkuna Jisumkristumpi kriyichqallkirallku qasachachumptimbismi, Dyuspa Santu Ispiritun yanampachuchqa, kuchimkuchpa Dyus nichqanda ch'askinallkillampa. 7 Qamkuna chaychina Jisumkristumpi allita kriyimptimkiqam, chay kriyiq masinchiqkuna prubinsya Masiduñampi, prubinsya Amkayampi tiyaqkunampis, qamkunachina munanllampa kawsayta. 8 Chaqa qamkuna Jisumkristumpa chumaq nutisyanda yach'achimkumptimkim, pallkunampis yach'amkuchqallampa. Piru manam chay ichkay prubinsyampillachu yach'amkuchqallampaqa. Achwanmi tumkuy maypi yach'amkuchqallampa. Chaymi yumbayna yach'anllampa: Chay tisalunimkanu kriyiq masinchiqkunach ancha allita Dyuspi kriyinllampa, nichpa. Chayrallkum manana nisisaryuchu nuqallkuna chay allin famallkita parlachimkunayqa. 9 Achwanmi pallkuna kimkinna suqkunata parlachin: Pablu chay Tisalunimkaman ch'ayamumptinmi, chumaqta ch'ayachirqanllampa. Kanan amitu layamkunatam dijachqallampana, allimp Dyusta kasunanllampa. 10 Chaymi chuyallkanllampa Dyuspa Churin Jisusta syilumanda chamurinangaman, nichpa. Chaqa Dyusmi chay Churin Jisustaqa wañuchqanmanda kawsachimuchqa. Chaymi payqa rin wachawaqninchiq chay ancha manchaypaq chamuq kastigumanda.
1 Masitamkuna, allitam yach'angillampa: Manam yanqaqa chamurqanichu qamkunamanqa, nichpa. 2 Piru manaraq qamkunaman chamuchpaqam, ancha ñamkarqayllampa Filimpus llaqtampi. Chaqa chay Filimpuspi achka tiyaqkunam mana baliqpaq riqsiwachpa, suq lastima maqawarqanllampa. Piru qamkuna yach'achqallkichina, Dyusqa ancha animachiwarqan, chamunaypaq yach'achichuqllampa paypa chumaq nutisyanda. Chaymi chay ancha kuntrawaqkunata mana manchachpachu, qamkunata yach'achichuchqa kani. 3 Chaqa manam pandachpachu, ni ima maluta rurachpachu, ni imarallkuchu, ni imampaq ingañachuyta munachpachu, qamkunata yach'achichurqaq. 4 Achwanmi Tayta Dyus chunquyta allita riqsichpa, numbrawachqa, chumaq nutisyanda yach'achimkunaypaq. Chaymi allimp kaqtalla yach'achimkuniqa, Tayta Dyusta kuchichinaypaq. Manam munanichu, runamkuna alabawananqa. 5 Chaqa yumbaynimki yach'achqallkichinam, manam nunka michki michkitaqa parlachichuchqachu kani, qallaynimkita ch'askichunaqqa. Kanan Dyusmi chaypaqqa allita yach'an. Paymi tistiguy. 6 Manamkich nima tyimpu pudirniyuqpaq tumkuchqachu kani, qamkuna alabawanallki, ni suqkuna alabawanambaq. Piru Jisumkristu kach'amuwamptin qamkunata yach'achichunayqam, dirichuyuq karqay kamachichunaqpaq. 7 Manchu suq warmiqa wambritungunata ancha kuyachpa rimkan. Chaychinallam nuqallkunampis ancha kuyachuchpa, chumaqta rimkallkillampa. 8 ¡Ancharaq kuyallkillampa! Chaymi Dyuspa chumaq nutisyanda yach'achichuchpa, bidaytampis quyman qamkunampaq. Chaqa ancham kuyallkillampa. 9 Masitamkuna, yuyayllampa nuqallkuna punchawnindin tutampnindin trabajachqayta. Chaqa challku challkum trabajachqallampa kani mantyinimkanaypaq. Dyuspa chumaq nutisyanda yach'achichuchpam, chay suq laya trabajumkunata rurachqallampa kani, ama ni mayqannimkita mimkunampi gastachichunaqpaq. 10 Chaqa qamkuna kimkimkim rimkawangillampa. Taytanchiq Dyuspismi rimkawanllampa. Chaymi tistigullkuna kangillampa. Manchu pullallkillampa kachpaqa, Dyus munachqandalla rurachqallampa kani. Manamkich nima maluta rurachqallampachu kani. Chaychina allimkunatalla rurachpa kawsamptiyllampaqam, mana pimpis atinchu nimampaq anyawayllampata. 11 Yuyayllampampis, manchu suq taytaqa wambranda ancha kuyan. Chaychinallam nuqallkunampis ancha kuyachuchpa, suqnimkita suqnimkita kunachuchpa, kunswilachuchqa kani. 12 Kunallkillampam ama nima maluta rurachpa kawsanallkillampa. Chaqa Dyus kimkinmi qamkunata amkrachuchqa, paypi kriyichpa, payta kasuchpa, waq ancha chumaq llimpyallkaq luryampi paywan kawsanallkillampa. 13 Qamkunata Dyus nichqanda yach'achichumptiyqam, mana fyirusyawarqallkichu: Kayqam runamkunampa yuyayninlla, nichpaqa. Achwanmi nirqallkillampa: Tayta Dyus nichqanda yach'achimkullkan, nichpa. Chaqa allibmi Tayta Dyus chaychina nichqanqa. Chaymi tumkuy chunqu kriyimptimkillampa, bidallkillampata kambyallkan. Chayrallkum nuqallkunaqa qamkunata mana qunqachuchpachu, tumkuy tyimpu Dyusta ancha pagimkunillampa qamkunampaq. 14 Masitamkuna, chay llaqta masimkimkuna qasachachumptinmi, ancha ñamkachqallampa kangi, waq isrraylinu kriyiq masinchiqkunachina. Chaqa Isrrayilpa waq prubinsyan Judiyampiqam Jisumkristumpi kriyiq masinchiqkunaqa ancha padisichqallampa, chay mana kriyiq isrraylinu masillkuna qasachamptinllampa. 15 Chay prubinsya Judiyampi tiyaqkunam Siñurninchiq Jisustaqa wanchirqanllampa. Pallkunampa unay agwilungunampismi Dyuspaq rimaqkunata wanchirqanllampa. Kanan nuqallkunatampis qasachawachpam, llaqtaymanda wichumkuwarqanllampa. Chaychinallam yumbay runamkunatampis kuntranllampa. Chaymi Tayta Dyusqa ancha piñamkuchqa pallkunawanqa. 16 Chaqa chay mana isrraylinu kaqkunata munamptiyllampa yach'achiyta wachamkananqam, chay isrraylinumkunaqa ancha munanllampa arkawayta. Chaymi achwamba mas achka uchayuq kidanllampa. Chayrallkum Tayta Dyusqa piñamkuchpa, ancha kastigachqa pallkunataqa. 17 Masitamkuna, achla tyimpu qamkunamanda karumpi kachpam, ancha llamkimpachuchqa kani. Chaqa tumkuy urasmi yuyachuchqa kani. Chaymi ancha munachqa kani chamuyta utqa rimkachunaqllampa. 18 Chaychina ancha munachpa watumkuchuytaqam, nuqa Pablu kutin kutin munachqa kani chamuyta. Lumkismi dyablu arkawarqan. 19 Mayñ, ¿imarallkum ancha yuyamkunillampa, ancha kunswilamkanillampa, ancha kuchimkunillampa? Chaqa qamkunaqam nuqallkunampaqqa suq ancha chumaq rrigaluchina kangillampa. Chaymi Siñurninchiq Jisumkristu chamumptinqa, ancha rinillampa kuchimkuq, kunswilamkaq, qamkuna paypi allita kriyichqallkirallku. 20 Chaqa qamkunarallkum ancha alabawanllampa. Chaymi ancha kuchimkunillampa.
1 Mana atichpa chamuyta watumkuchuqllampam, ancha llamkirqanillampa. Chaymi nuqaqa yuyarqay Atinas llaqtampi kidayta, 2 masanchiq Timutiyuta atinaypaq qamkunaman kach'amuyta. Payqam ancha allita Dyusta sirbin. Paymi pullayllampa trabajan, Jisumkristumpa chumaq nutisyanda yach'achimkuchpa. Chaymi kach'amurqayllampa, qamkunata animachichunan, mas allita Siñurninchiqpi kriyinallkillampa, 3 ancha padisichpampis, ama disanimamkanallki. Chaqa qamkuna kimkimkim allita yach'angillampa: Jisumkristumpi kriyiqkunaqam rinchiqllampa padisiq, nichpa. 4 Chaymi pullallkillampa kachpa, kutin kutin nichurqaqllampa: Rinchiqllampam padisiq, nichpa. Chay nichuchqaychinallam allimp kachqa, ¿manachu? 5 Chaymi mana das atichpa chamuyta, ancha llamkichpa, kach'amurqay masanchiq Timutiyuta qamkunaman, yach'anaypaq: ¿Siñurninchiqpichu sigillkangillampa kriyichpa ichu manana? nichpa. Chaqa ancham yuyarqay: Paqtamkich dyabluqa tyintachuchqallampa uchata ruranallkillampa. Kinsampch'i yanqa qamkunata yach'achichuchqa kani, nichpa. 6 Piru chay masanchiq Timutiyu llaqtallkimanda kutimuchpaqam, ancha kuchichiwachqa: Qamkunaqach Siñurninchiqpi allita kriyillkangillampa. Chumaqtach runa masinchiqtampis kuyangillampa, nichpa. Niwachqampismi: Anchach yuyawangillampa. Chaychi kuyawachpa, munangillampa rimkawayta, nichpa. Chaychinallam nuqallkunampis ancha munani rimkachuyllampata. 7 Masitamkuna, nuqallkunata qasachawamptinllampam, ancha padisillkani. Piru qamkunampaq yach'achpa: Allitam Siñurninchiqpi kriyillkanllampa, nichpaqam, ancha kuchimkuni. 8 Qamkuna Siñurninchiqpi mana challkuq kriyimptimkillampaqam, ancha kunswilawachqa, kuchimkuchpa kawsanaypaq. 9 Kanan ¿imachinaraq ancha pagimkuymanllampa Tayta Dyusman qamkunampaq? ¡Chaqa nuqallkunatam ancha kuchichiwachqa kangillampa! 10 Punchawnindin, tutampnindinmi nuqallkunaqa Dyusman mañamkuni yanampawanambaq, chamunayllampa qamkunata rimkachuq. Chaqa mastam munanillampa yach'achichuyta, mas allita Jisumkristumpi kriyinallkillampa. 11 Ancham mañamkunillampa, Tayta Dyus Churin Jisumkristuwan yanampawananllampa, chamunayllampa qamkunata watumkuchuq. 12 Siñurninchiqri yanampachunqallampa, qamkunampura ancha kuyanamkuchpa, suqkunatampis masta masta kuyanallkillampa, nuqallkuna qamkunata kuyachuchqaychina. 13 Siñurninchiqri qamkunata yanampachunqa, paypi tumkuy chunqu yuramkachpa, pay munachqanchina kawsanallkillampa. Chaymi Siñurninchiq Jisumkristu yumbay wambrangunawan chamumptinqa, chay diyampiqa Tayta Dyuspa ñawpambi manana nima uchayuqchu ringillampa kaq.
1 Masitamkuna, kananqam Jisuspa chutimbi ancha rrugachuchpa, kunallkillampa, yach'achichuchqaychina, Dyusta masta masta kuchichichpa kawsanallkillampa. 2 Allitam yach'angillampa: Jisumkristu nuqallkunata numbrawamptinmi, pay munachqandalla qamkunata yach'achichuchqa kani. 3 Chaqa Dyusmi munan paypaqlla kawsachpa, warmimkiwanlla ichu runallkiwanlla puñunallkillampa; ama suqwanqa. 4 Mayqan kriyiq masinchiq runa munachpa warmiyuq kaytaqar, ama nima uchata ruranqachu. Achwanri Dyus munachqanchinalla warminwan chumaqta kawsanqa. 5 Ama ruranqachu mana baliq kusaskunata, Dyuspi chay mana kriyiqkunachinaqa. 6 Ama ni masanda traysyunda ruranqachu. Chay laya ruraqkunataqam Tayta Dyusqa ancha fiyuta rin kastigaq, chay kutin kutin nichuchqaychina. 7 Chaqa Tayta Dyusqam qayawachqa kanchiq, pay munachqanchinalla kawsananchiqllampa. Manam qayawachqachu kanchiq, uchata rurananchiqqa. 8 Chaymi kay yach'achichuchqayta disprisyaqqa mana nuqallkunatallachu disprisyawallkan. Achwanmi Dyusta disprisyallkanqa. Chaqa Tayta Dyusmi Santu Ispiritundaqa quwachqa kanchiq, paypaqlla kawsananchiqllampa. 9 Dyus kimkinmi qamkunata yach'achichuchqa kuyanamkunallki. Chaymi chaypaqqa manana iskibrillkillampachu. 10 Chaqa qamkunaqam yumbay kriyiq masinchiq chay prubinsyallki Masiduñampi tiyaqkunata chumaqta kuyangillampa. Piru rrugallkillampam, masta kuyanamkunallkillampa. 11 Atichqallkimkaman yumbaywan chumaqta kawsayllampa, qamkunampa kusasnimkimanlla mitimkuchpa. Chay nichuchqaychina, ama qallamkuchpachu, kimkin mamkimkiwan trabajayllampa, 12 ama nimallki faltachunanllampa, Jisuspi chay mana kriyiqkuna chumaq famallkita rimanambaq. 13 Masitamkuna, munanim ancha allita yach'anallkillampa chay wañuchqa kriyiq masinchiqkunampaq. Chaqa manam munanichu llamkinallkillampa chay mana kriyiqkunachinaqa. Pallkunaqam almanllampampaq yuyan: Chingachqanam. Mananam rinchiqchu tarinamkuq, nichpa. 14 Piru nuqanchiqkunaqam allimpta kriyinchiqllampa: Jisusmi wañuchpa, kawsamuchqa, ¿manachu? Chaychinallam Tayta Dyus rin kawsachimuq Jisuspi kriyichpa wañuqkunatampis, Jisuswan rinambaqllampa. 15 Chaymi Siñurninchiq yach'achiwachqanda kaychina nillkillampa: Jisumkristu chamurimptinqam, kay pachampi kawsallkaqkunaqa mana puntataqa rinllampachu riq paymanqa. 16 Achwanmi kimkin Siñurninchiqqa syilumanda chamuchpa, ancha jwirtita kamachimkumptin, mas kamachimkuq anjilnin jwirtita rimachpa, Dyuspa kurnitanda rin waqachiq. Chay urasmi Jisumkristumpi kriyiq masinchiq wañuchqamkunaqa puntata rinllampa kawsamuq. 17 Chaymandaqam Tayta Dyus rin ampawaqninchiq yumbay paypi kriyiq kawsaqkunatampis chay kawsamuqkunawan anaq pumkutayman, Siñurninchiqwan tingunamkunanchiq. Chay diyamandampacham paypa pullanna rinchiqllampa kaq. 18 Chayrallkur kay nichuchqayta yuyachinamkuchpa, suqnimki suqnimkiwan kuchichinamkuyllampa.
1 Kuyachqay masitamkuna, manam nisisaryuchu yach'ananchiqllampa: ¿Ima tyimpum Jisusqa rin chamuq? nichpa. 2 Chaqa allitam yach'angillampa: Manam pimpis chay tyimpumpaqqa yach'anchu, nichpa. Manchu suq ladrunqa qunqaylla chamun tutampi. Chaychinallam Jisusqa mana yuyachqa uraspi qunqaylla rin chamuq. 3 Suq umkuyuq (pach'ayuq) warmimpa qachyanan urasninqam qunqaylla ch'ayamun, ¿manachu? Chaychinallam mana kriyiqkunampa kastigunqa qunqaylla rin ch'ayamuq kaychina nillkamptinllampa: Manam nimampis rinchu pasawaqninchiq. Allimpim kallkanchiq, nichpa. ¡Maychimkampis pallkunaqam mana rinllampachu wachamkaq! 4 Piru qamkuna masitamkuna, Jisuspi allimpta kriyichpaqam, manana tutayaqpichinachu kawsangillampa. Chaymi Jisumkristu qunqaylla chamumptinqa, mana ringillampachu manchaq. 5 Chaqa kananqam yumbay nuqanchiqkunaqa Dyuspa wambranguna kachpa, achimkpichinana kawsanchiqllampa. Mananam dyablumpa tutayaqnimbichu kawsanchiqllampa. 6 Chayrallkur Siñurninchiqta ama qunqachunchu chay mana intyindiq kaqkunachinaqa. Achwanri allita rimkch'amkachpa, tumkuy yuyayninchiqwan, tumkuy jwisyunchiqwan allita kriyichpa, Jisusta chuyachunllampa. 7 Tutayaqpi kaqkunaqam (Jisumkristuta qunqachpa) puñunllampa, mach'anllampa. 8 Piru nuqanchiqkunaqa achimkpichina kachpaqar, allin jwisyunchiqwan kawsachun. Suq suldaduqam kuntranmanda wachamkananqa jirrumanda chilimkinda ruramkun, ¿manachu? Chaychinar nuqanchiqkunaqa wachamkachun Jisuspi allita kriyichpa, kuyanamkuchpa. Chay alli kriyichqanchiqri jirru chilimkinchiqchinaqa kanqa. Piru suldaduqam mas allita wachamkananqa jirru kaskundampis ruramkun. Chaychinallar nuqanchiqpis tumkuy chunqu yuyamkuchunllampa: Allimptam Dyusqa rin wachawaq, nichpa. Chay yuyamkuchqanchiqri kaskunchiqchinaqa kanqa. 9 Chaqa Dyusqam mana rurawachqachu kanchiq, kastigadu kananchiqllampa. Achwanmi rurawachqa kanchiqqa, Siñurninchiq Jisumkristumpi kriyimptinchiq wachawananchiq. 10 Chaqa Jisumkristum wañurqan paypi yumbay kriyiqkunampaq, kawsaqkunata, wañuqkunatampis wachawaqninchiq, paypa pullan kawsananchiqllampa. 11 Yumbay nichuchqayta yach'achpaqar, chay rurachqallkichina sigiyllampa animachinamkuchpa yanampanamkuchpa, Siñurninchiqpi mas allita kriyinallkillampa. 12 Masitamkuna, ancham rrugallkillampa, chay yach'achichuqkunata chumaqta uyanallkillampa. Chaqa pallkunaqam allita kunachuchpa, kamachichungi, Siñurninchiqta kasunallkillampa. Chayri pallkunataqa ancha rrispitachpa, kuyayllampa. Chumaqtar kawsayllampa, suqnimki suqnimkiwan ancha kuyanamkuchpa. 14 Masitamkuna, chay qalla kaqkunata anyayllampa trabajananllampa. Chay disanimadu kaqkunata animachiyllampa, Siñurninchiqmanda ama amkramkananllampa. Chay manaraq allita intyindiqkunata yach'achiyllampa, mas allita Dyuspaq intyindinanllampa. Kanan suqkuna piñachichumptinqa agwantayllampa, ama piñamkuchpachu. 15 Pi mana allita rurachumptinqa, amamkich kutichingichu. Achwanri suqnimki suqnimkiwan chumaqta rurayllampa. Chay mana kriyiqkunatampis allita rurachpa, kawsayllampa. 16 Tumkuy tyimpur kuchimkuchpalla kawsayllampa. 17 Tumkuy tyimpur mana challkuq chunqullkimpi Dyuswan parlayllampa. 18 Allilla kachpa ichu mana allilla kachpampis, kuchimkuchpa Dyusta pagimkuyllampa. Chaqa chaychinam Dyus munan ruranallkillampa, Churin Jisumkristumpi kriyichqallkirallku. 19 Dyuspa Santu Ispiritun kamachichumptinqa, ama fyirusyayllampachu. 20 Dyuspaq rimaqkuna yach'achichumptinqa, ama disprisyayllampachu. 21 Piru allita mallimpayllampa yumbay chay uyachqallkita: ¿Allimpchu ichu mana? nichpa. Chayna allimp kaqtalla ch'askiyllampa. 22 Ama nima laya uchata rurayllampachu. 23 Dyus kunswilawaqninchiq kimkinri yanampachunqallampa, pay munachqanchina kawsanallkillampa. Payna ancha allita kwidanqa ispiritullkita, bidallkita, kwirpullkita, limpyu chunquyuq kanallkillampa, Siñurninchiq Jisumkristu chamunangaman. 24 Chaqa Tayta Dyus qayawaqninchiqqam ancha allin, ancha kumplidu. Chaymi payqa yumbay ufrisiwachqanchiqta rin ruraq. 25 Masitamkuna, nuqallkunampaqri Dyusman mañamkuyllampa. 26 Yumbay kriyiq masinchiqwan ancha rrispitanamkuchpa muchanamkuchpa, qamkunampura chumaqta nampallkunamkuy. 27 Siñurninchiqpa chutimbi kamachillkillampa, kay kartata liyinallkillampa yumbay chaypi kaq kriyiq masinchiqkunawan. 28 Siñurninchiq Jisumkristu kuyachuchpa, tumkuy imampi yanampachunqallampa. (Chaytallam iskibrillkillampa.) Chaychina kanqa.
1 Kuyachqay tisalunimkanu kriyiq masitamkuna, nuqa Pablum, masanchiq Silbanuwan, masanchiq Timutiyuwan nampallkullkillampa. Qamkunaqam Tayta Dyusman, Siñurninchiq Jisumkristuman bidallkillampata intrigachpa puringillampa. Chaymi kay kartata iskibrillkillampa. 2 Chayri Tayta Dyus, Siñurninchiq Jisumkristuwan ancha allin kachpa, qamkunata yanampachunqa, ama nimata manchachpachu, achwan kuchimkuchpa kawsanallkillampa. 3 Masitamkuna, qamkunaqam diyampi diyampi mas allita Jisumkristumpi kriyillkangillampa. Kanan yumbaynimkim ancha allita kuyanamkullkangi. Chaymi ancha alli, tumkuy diya qamkunampaq Dyusman pagimkunayllampa. 4 Nuqallkuna mayqan llaqtaman richpaqam, tandamkaq kriyiq masinchiqkunawan parlanillampa, qamkunata ancha alabachuchpa: Chay tisalunimkanu kriyiq masinchiqkunatam ancha qasachamptimbis, mana disanimamkanllampachu. Achwanmi mas allita Jisumkristumpi yuyamkullkanllampa, nichpa. 5 Chaychina Dyusta kasuchqallkirallkum padisillkangillampa. Piru Jisumkristumpim mana challkuq kriyillkangillampa. Chaymi achka runa, warmi qamkunata rimkachuchpa, intyindillkan: Dyuschi ancha allin, ancha yach'ayniyuq kachpa, pallkunata amkrachqa, muchuq bidampina paywan kawsananllampa, nichpa. 6 Piru Dyusqam allin justisyata rurachpa, rin qasachaq yumbay chay qasachachuqtaqa. 7 Kanan nuqanchiq qasachadumkunatam rin samachiwaqninchiq, Siñurninchiq Jisumkristu pudirniyuq anjilningunawan syilumanda chamumptin. Paymi ninata ampamuchpa, rin kastigaq paypa chumaq nutisyanda mana kasuqkunata, Tayta Dyuspi mana kriyiqkunata. 9 Chaqa ancha llimpyachpa, pudirniyuq kamachimkuqmi rin kutimuq kay pachaman. Chaychina chamumptinmi, yumbay chay mana kriyiqkunaqa paypa ñawpanmanda wichumkudu rinllampa kaq, tumkuy tyimpu chingananllampa. Piru yumbay nuqanchiqkunaqam ancha kuchimkuchpa, kunyalla payta rinchiqllampa alabaq. Chaqa yach'achichumptiymi, qamkunampis Siñurninchiqpi kriyichqallampa kangi. Chaymi qamkunampis pullayllampa paytaqa ringillampa alabaq. 11 Chayrallkum nuqallkunaqa kutin kutin Tayta Dyusman mañamkunillampa, ancha allita kawsanallkillampa, payqa qamkunampaq ninambaq: Kuchimkunim chay amkrachqay wambrallkuna chumaqta kawsamptinllampa, nichpa. Mañamkunimpis, pudirninwan qamkunata yanampachunan, paypi allita yuyamkuchpa, paypaq chumaqta yach'achimkunallki. 12 Chaychina qamkuna kawsamptimkim, rimkachuqkunaqa Siñurninchiq Jisumkristuta rinllampa alabaq. Chaymi chay Siñurninchiqqa qamkunatampis rin alabachuq. Chaqa Tayta Dyusmi, Churin Jisumkristumpis ancha allin kachpa, rin yanampachuqllampa, chaychina chumaqta kawsanallkillampa.
1 Kuyachqay masitamkuna, Siñurninchiq Jisumkristu kutimumptinqam, paywan rinchiq tandamkaq. Chayri yuch'allku 2 yumbay jwisyullkiwan allita yuyayllampa. Amar kriyiyllampachu nichumptinllampa: Dyuspaq rimaqmi niwachqallampa: Kay pachampinach Siñurninchiqqa, nichpaqa, ni nichumptinllampa: Kaypinach Jisumkristuqa, nichpa, ni mayqan nichumptinllampa: Pablum suq kartambi niwachqa: Kaypinach Jisumkristuqa , nichpampis. Chaychina nichumptinllampampis, ama kriyiyllampachu ni manchayllampachu. 3 Chay llullamkuqkuna ingañachuyta munamptinllampampis, ama ch'askiyllampachu. Chaqa Jisumkristu manaraq kutimumptinmi, puntata achka runamkuna Dyuspa dumktrinanmanda amkramkachpa, Siñurninchiqta rinllampa kuntraq. Chay diyamkunampim rin rimkarimuq suq ancha uchayuq runa. Piru paytaqam Tayta Dyusqa sintinsyachqana chinganambaq. 4 Chay uchayuq runaqam ancha palanganuyachpa rin ch'iqniq Tayta Dyusta, tumkuy laya amitumkunatampis, yumbay runamkuna paytalla adurananllampa. Chaymandaqam Jirusalimbi Dyuspa adurana wasinman yallkuchpa, Dyuschina rin kamachimkuq. Achwambam rin niq: Nuqam kani Dyusqa, nichpa. 5 Ima, ¿manachu yuyangillampa pullallki kachpa chay nichuchqaytaqa? 6 Kanan qamkunaqam yach'angillampana: Pim arkallkan chay uchayuq runata, amaraq rimkarimunan, nichpa. 7 Kanangunaqam chay ancha uchayuqqa pamkamkuchpalla, runamkunataqa dañachillkan. Chaqa chay arkamkuqqam manaraq dijanchu rimkarimunanqa. Piru suq diyam chay arkamkuqqa runamkunampa ch'awpinmanda rin achuq. 8 Chaymandaraqmi chay uchayuqqa rin rimkarimuq. Chaymandaqam Siñurninchiq Jisus chamuchpa, samayninwanlla rin wanchiq. Llimpyayninwanmi rin chingachiq chay uchayuqtaqa. 9 Piru manaraq wanchimptinqam, chay uchayuq runa chamuchpaqa, dyablu yanampamptin, achka siñamkunata, milagrumkunata rin ruraq ingañamkunambaq. 10 Chaymi ancha malu kachpa, tumkuy laya llullangunawan rin ingañaq Jisumkristumpi mana munaq kriyiqkunata. Chaqa pallkunaqam mana munanllampachu allimp kaqta kriyiyta wachamkananqa. Chaymi rinllampa chingaq. 11 Chayrallkum Tayta Dyusqa pallkunataqa rin dijaq, chay uchayuq llullamkuqta kriyinanllampa, 12 chaychina chingananllampa. Chaqa mana allimp kaqkunata kriyichpa, achka laya uchamkunata rurachpam, rinllampa kawsaq. 13 Kuyachqay masitamkuna, Siñurninchiq ancha kuyachungillampa. Kanan nuqallkunaqam Dyusta ancha pagimkunillampa qamkunampaq. Chaqa Dyusmi qamkunataqa unaymandampacha amkrachuchpa, Santu Ispiritunda quchuchqa, bidallkillampata kambyanambaq. Chaychina paypaqlla kachpa, allimp kaqpi kriyimptimkillampam, rin wachachuq. 14 Nuqallkuna Jisumkristumpa chumaq nutisyanda yach'achichumptiymi, Dyusqa qamkunata qayachurqan, paypi kriyinallkillampa. Chaymi Siñurninchiq Jisumkristu llimpyachpa syilumanda chamumptinqa, qamkunampis pullanna kachpa, ringillampa llimpyaq. 15 Masitamkuna, nuqallkuna parlachichuchpa, kartamkunata kach'amuchpam, yach'achichuchqa kani Jisumkristumpaq. Chay nichuchqallkunatar mana challkuq tumkuy chunqu sigiyllampa. 16 Mañamkunillampam, Siñurninchiq Jisumkristu, Tayta Dyuswan ancha allin kachpa, ancha kuyachuchpa, tumkuy tyimpumpaq kunswilachuchpa, 17 chunqullkimpi animachichunan, Dyuspi allita kriyichpa, allitalla rurachpa, allitalla rimachpa kawsanallkillampa.
1 Masitamkuna, kay kartata manaraq uchyachpam, rrugallkillampa Dyusman mañamkunallkillampa, nuqallkunampaq, Siñurninchiq nichqanda tumkuy maypi utqa atinayllampa yach'achimkuyta, chay yach'achimkuchqayta kriyiqkuna qamkunachina Dyusta alabananllampa. 2 Mañamkuyllampar, malu, saqra runamkunamanda Siñurninchiq wachawananllampa. Chaqa manam yumbay runamkunaqa Dyuspi kriyinllampachu. 3 Piru Siñurninchiqmi ancha allin, ancha kumplidu. Chaymi qamkunata rin yanampachuq, mas allita paypi kriyinallki, ama dyablu binsichunanllampa. 4 Chaymi Siñurninchiq yanampawamptin, qamkunampi yuyamkunillampa: Kay kartaypi nichuchqaytam kasullkangi. Chaychinallam ringillampa kasuq, nichpa. 5 Kanan Siñurninchiq qamkunata yanampachunqa intyindinallkillampa: Dyusmi ancha kuyawanchiq, nichpa. Yanampachunqampis Jisumkristuchina mana challkuq Dyuspaqlla kawsanallkillampa. 6 Masitamkuna, wamkin kriyiq masinchiqkunaqam mana munanllampachu trabajayta. Manam munanllampachu kasuyta chay nichuchqaytaqa. Chaymi Siñurninchiq Jisumkristumpa chutimbi kamachillkillampa, chay mana kasumkuq qalla runamkunamanda amkramkanallkillampa. 7 Chaqa qamkuna kimkimkim nuqallkunataqa riqsiwangillampa. Manchu pullallki kachpaqa, mana qalla kachpachu trabajarqayllampa. Chayri nuqallkunachina qamkunampis trabajayllampa mantyinimkanallki. 8 Chaqa manam ni pimpa mimkunanda dibaldillaqa mimkurqayllampachu. Achwanmi punchawnindin, tutampnindin ancha trabajarqayllampa umbi umbi, ama ni mayqannimkita mimkunampaq piñachichunaypaq. 9 Awnki dirichuyuq kachpampis mimkunata mañachunaypaq, mana nimatampis qamkunata mañachurqaychu. Achwanmi trabajarqayllampa, rimkawachpa, qamkunampis chaychina trabajanallkillampa. 10 Pullallkillampa kachpam, kay liyta quchurqaqllampa: Suq mana munaq trabajaq ama mimkunqachu, nichpa. 11 Chaqa niwachqallampam: Wamkinnimkiqach mana munachpachu trabajayta, mitimkungillampa suqkunampa kusasninman, nichpa. 12 Chay qallamkunatam Siñurninchiq Jisumkristumpa chutimbi kunachpa kamachinillampa, amana qallamkuna kanambaq; achwan trabajachpa mantyinimkanambaq. 13 Masitamkuna, ama challkuyllampachu Dyus munachqanda rurachpa. 14 Mayqan runa ichu warmi kay kartaypi nichuchqayllampata mana kasumptinqa, ampuntayllampa: Pim chay mana kasumkuq, nichpa. Chaychina rurachpaqar, amana paywanqa tandamkayllampachu, panqamkunambaq. 15 Piru amar paytaqa ch'iqniyllampachu. Achwanri masallkitachina kuyachpa kunayllampa. 16 Kunswilawaqninchiq Siñurninchiq kimkinri tumkuy tyimpumpi yanampachunqallampa, ama nimatampis manchachpachu kawsanallkillampa. Chay Siñurninchiqqa yumbaynimkiwan kanqa. 17 Nuqa Pablum kimkiy mamkiywan iskibrillkillampa kay nampallkuta. Kaychinam iskibrichpa, firmani yumbay kartallkunata. 18 Siñurninchiq Jisumkristu qamkunata ancha kuyachuchpa tumkuy imampi yanampachunqallampa. Chaychina kanqa.
1 Kuyachqay Timutiyitu, nuqa Pablum kay kartata iskibrichpa kach'allki. Chaqa Wachadurninchiq Dyus, Churin Jisumkristuwanmi amkrawachpa, kamachiwarqan, paypa ampustulnin kanaypaq. Chay Siñurninchiqpi yuyamkuchun: Paymi wachawanchiq, nichpa. Chaymi qamqa Timutiyitu, Siñurninchiq Jisumkristumpi allimpta kriyichqallkirallku, nuqampa lijitimu wambraychina kangi. Chaymi kananqa iskibrillki kay kartata. Taytanchiq Dyusman Churin Jisumkristumambis mañamkuni, llamkimpachuchpa, tumkuy imampi yanampachunan, ama nimata manchachpachu, achwan kuchimkuchpa kawsanallkimpaq. 3 Manchu Timutiyu, Masiduña llaqtaman rinay diyaqa rrugachurqaq, chay Ifisu llaqtampi kidanallkimpaq, kriyiq masinchiqkunata kwidachpa. Chaqa chaypim nichurqaq chay wamkin runamkunata kamachinallki, ama suq laya dumktrinamkunata yach'achimkunan. 4 Kaychinampis kunay pallkunata, ama ancha yuyananllampa yanqa mana uchyamkaq isturyamkunampi, ni unay agwilungunampa chutingunampi. Chaqa yumbay challkunaqam yanqa anyanamkunanchiqlla balin. Manam ni achlita yanampawanchiqchu, allita kriyichpa, Dyus munachqanda rurananchiqllampaqa. 5 Chaychinam kamachillkillampa, ama nima maluta rurachpa, achwan limpyu chunquyuq kachpa, Dyuspi allimpta kriyichpa, suqwan suqwan kuyanamkunallki. 6 Piru wamkingunaqam kay allin yuyallkunata dijachpa, pallkunampura yanqa anyanamkunllampa. 7 Chaqa munanllampam ancha yach'ayniyuq kayta, Dyus nichqanda yach'achimkunan. Piru manam intyindinllampachu ni pallkuna kimkin yach'achimkuchqanda. 8 Piru nuqanchiqqam yach'anchiq: Dyuspa liyningunam ancha allin, pay munachqanchina chay liyningunata intyindimptinchiq, nichpa. 9 Chayri allita intyindichun: Dyusqam mana rurarqanchu chay liyningunataqa, allin runamkunata kastigananqa. Achwanmi liyningunata rurachpaqa, kamachimkurqan kastigananllampa wampu rrispundungunata, mana uyamkuqkunata, Dyusta mana aduraqkunata, uchayuqkunata, Dyusta burlaqkunata, allin dumktrinata kuntraqkunata, taytanda mamanda wanchiqkunata, yumbay matansyirumkunata, 10 chay mana rrispitunwan puñuqkunata, ullqumpura warminwanchina puñuqkunata, runa masinda suwamkuchpa randimkuqkunata, llullamkuqkunata, tumkuy chay purdyusitu nichpa llullamkuchpa juraqkunata. Kanan wamkingunaqam Dyuspa dumktrinanda kuntranllampa. Chaymi tumkuy chay kuntraqkunampaqpis Dyusqa rurarqan liyningunataqa. 11 Chaymi chay ancha allin Tayta Dyus mingawachqa, yach'achimkunay paypa chay ancha llimpyaq chumaq nutisyanda. 12 Chaypaqmi ancha pagimkuni Siñurninchiq Jisumkristuta. Chaqa payqam ancha yanampawachqa, allita paypi kriyichpa, paypaq trabajanaypaq. Chaymi tariyayta quwachqa, paypaq yach'achimkunay. 13 Ancha malu kamptiypismi, Dyusqa ancha llamkimpawarqan. Chaqa unayqam Jisumkristumpi manaraq kriyichpaqa, paypa kuntranda rimachpa, paypi kriyiqkunata qasachachpa, ancha wampuyachpa kawsarqay. Piru Dyusqam ancha allin kachpa, ancha wampu kamptiypis, llamkimpawarqan. Chaqa nuqaqam mana yach'arqaychu: Pim Jisumkristu, nichpa. 14 Piru Siñurninchiq Jisumkristuqam ancha allin kachqa. Chaymi ancha yanampawachqa, tumkuy chunqu paypi kriyichpa, Tayta Dyusta, runa masillkunatampis kuyachpa kawsanaypaq. 15 Chaqa kayqam ancha allimp. Manam nima llullachu. Chaymi ancha balin yumbay kriyinanllampa: Jisumkristum syilumanda chamurqan kay pachaman, uchayuqkunata wachawananchiqllampa. Kanan yumbay chay uchayuqmandaqam nuqa mas uchayuqqa karqay. 16 Piru Dyusmi llamkimpawachpa wachawarqan, chay manaraq kriyiqkuna ninanllampa: Rimkay, Jisumkristuqa ancha allin kachpa, chay uchayuq Pabluta pirdunachqa, nichpa. Chaymi pallkunampis kananqa rinllampa animamkaq, Jisumkristumpi kriyinanllampa, wachamkachpa, tumkuy tyimpu Dyuswan kawsananllampa. 17 Chayrallku Tayta Dyusta tumkuy tyimpu alabachun. Chaqa payqam mana nunka wañuchpachu, tumkuy tyimpu kamachimkun. Ancha yach'ayniyuqmi. Paytaqam mana pimpis atinchu rimkayta. Chaqa payllam Dyusqa. Chaychina kanqa. 18 Ijitu Timutiyu, rrugallkim kay kamachichuchqayta kasunallki. Chaqa Tayta Dyusmi paypaq rimaqkunata qambaq rimachirqan: Timutiyuch Dyusta ancha allita kasuchpa rin kawsaq, nichpa. Chay nichqanda yuyachpa, allin suldadunchina kachpa, dyabluta binsiy. Allin yuyayniyuq kachpa, Jisumkristumpi mana challkuq kriyiy, paymanda ama amkramkanallki. Piru wamkingunam mana allin yuyayniyuq kachpa, Jisusmanda amkramkachpa, manana paypiqa kriyinllampachu. 20 Chaychinam Iminiyu Alijandruwan Siñurninchiqmanda amkramkarqanllampa. Chaymi pallkunataqa dyabluta intrigachqa kani, yach'amkunanllampa, amana Dyusta kuntrachpa rimananllampa.
1 Puntatam kunallkillampa, Tayta Dyuswan parlachpa pagimkuchpa, mañamkunanchiq, yumbay runata warmita yanampanambaq. 2 Mañamkuchumbis Dyusman gubyirnumkunampaq, tumkuy awturidarkunampaq, pallkuna chumaqta kamachimkunambaq. Chaychinam nuqanchiqkuna chumaqta rinchiqllampa kawsaq, Dyusta ancha allita kasuchpa, tumkuy imampi ancha allita rurachpa. 3 Wachadurninchiq Dyustam ancha gustan chaychina kawsananchiq. 4 Chaqa payqam munan, yumbay runamkuna, warmimkuna paypi kriyichpa, wachamkachpa, allimp kaqta intyindinanllampa. 5 Suq Dyusllam kan. Chaychinallam suq abugadulla kambis, runamkunata Dyuswan alliyachinambaq. Chay abugadunchiqqam allimp runa Jisumkristu. 6 Chay Jisumkristum intrigamkarqan wanchinanllampa, paypi yumbay kriyiqkunampaq yawarninda pagaramkuchpa, wachawananchiq. Chaymandaqam munachqan tyimpumpi Dyusqa intyindichiwarqanchiq: Qamkunatam munani wachachuyllampata, nichpa. 7 Chaymi Tayta Dyusqa numbrawachqa, Jisumkristumpa ampustulnin kanaypaq, chay mana isrraylinu kaqkunata allimp kaqta yach'achinaypaq, Jisumkristumpi kriyinanllampa. Nuqampismi paypi allimpta kriyichpaqa, allimp kaqtalla nillkillampa, manam nimata llullamkuchpachu. 8 Chaymi munani tumkuy lugarpi tiyaq runamkuna limpyu chunquyuq kachpa, ama nimampaq piñamkuchpachu ni anyanamkuchpachu, mamkingunata anaqman alsachpa, Dyusman mañamkunanllampa. 9 Warmimkunanataq mudamkuchpaqa, sujitamkachpa, umildi purinqallampa. Amar palanganaqa kanqallampachu. Amar ni aqchanllampata kusasnachichpa ñaqchanqallampachu. Amar ni llimpyaq ch'aniyuq uruta, ni parlaskunata ruramkunqallampachu. Ni chay ch'aniyuq mudanamkunata ruramkunqallampachu. 10 Achwanri pallkunaqa allita rurachpa, bidanllampata chumaqyachinqa. Chaychina ruranqallampa yumbay warmi Dyustam adurani niqkunaqa. 11 Runamkuna yach'achimkumptinqa, warmimkunaqa rrispitamkuchpa, uyaramp (uyara) chumaqta uyanqallampa. 12 Yumbaynimki tandamkamptimki Dyusta aduranallkiqa, warmimkunaqa ama runamkunata yach'achinqachu ni kamachinqachu. Achwanri pallkunaqa chumaqta uyamkunqallampa. 13 Chaqa Dyusqam puntata chay punta runa Adanda rurarqan. Chaymandaqam chay punta warmi Ibata rurarqan. 14 Yach'anchiqpismi: Manam Adandachu chay dyabluqa ingañarqan. Ingañarqanqam warmin Ibata. Chaymi chay warmiqa dyabluta kasuchqanrallku uchayuqna kidarqan. 15 Piru warmiqam Jisumkristumpi allimpta kriyichpaqa, suqkunata kuyachpa, allitalla rurachpa, allin jwisyunwan kawsachpa, wambrangunata qachyachpa, rin wachamkaqqa.
1 Allimptam nillki, suq kriyiq masinchiq ubispu karguyuq munachpa kaytaqa, ancha allin karguyuq munan kayta. 2 Piru chay ubispuqa ancha chumaqta kawsanqa, ama pimpis nimampaq atinambaq anyayta. Suq warmiyuqlla kanqa. Ama kusas mañaqa kanqachu; achwan sujitamkanqa. Allin jwisyuyuq, ancha rrispitadu kanqa. Wasinman ch'ayaqkunata chumaqta ch'ayachichpa, pusadata qunqa. Ancha allin yach'achimkuqpis kanqa. 3 Ama ni mach'anqachu, ni suqkunata bullata maskanqachu. Ama qallayrallkuqa ingañamkunqachu. Achwan ancha allin, ancha umildi kanqa yumbaywan. Ama qallaypaqllachu kanqa. 4 Wasimbi yumbay tiyaqkunata yach'anqa chumaqta kamachiyta. Churingunata yach'achinqa, kasumkuchpa, rrispitamkuchpa kawsananllampa. 5 Chaqa suq runa kimkin wasimbi kaqkunata mana atichpa chumaqta kamachiytaqam, mana atinmanchu allita kwidayta Dyuspi achka kriyiqkunataqa. 6 Chayri chay ubispuqa ama suq chayraq kriyiqqa kanqachu. Chaqa muchuq kachpamkich, palanganuyachpa, dyablumpa trampambi ichkinman, paypis dyabluchina kastigadu kanambaq. 7 Kanan chay mana kriyiqkunampa umkumbimpis ancha allin kanqa, chay ubisputa rrispitachpa, chumaqta paypaq rimananllampa. Chaychina yumbaywan chumaqta kawsachpaqam, mana rinchu ichkiq dyablumpa trampambi, ama panqamkunambaq. 8 Chaychinalla dyamkunumkunampis allin famayuq runamkuna kanqallampa. Nichqanda kumplinqallampa. Ama mach'anqallampachu. Ama runa masinda ingañanqallampachu, qallayta ganananllampaqa. 9 Achwanri Jisumkristu yach'achimkuchqanda allita kriyinqallampa. Chaychina allitalla rurachpa kawsanqallampa, limpyu chunquyuq kachpa, ama nimampaqpis panqamkunanllampa. 10 Piru manaraq pallkunata numbrachpa, puntata ancha allita riqsiyllampa: Allin runa ichu mana, nichpa. Mana nima mala famayuq kachpaqa, atinllampa dyamkunumkuna kayta. 11 Chaychinalla kanqa dyamkunisa warmimkunampis. Allin famayuq kanqallampa. Ama wacha rimallkunachu kanqallampa. Ama kusas mañata rurachpachu kawsanqallampa; achwanri sujitamkanqallampa. Allin yuyayniyuq kachpa, tumkuy imampi kumplinqallampa. 12 Chay dyamkunumkunaqa suq warmiyuqlla kanqallampa. Yach'anqallampa allita kamachiyta wambrangunata, wasimbi yumbay kaqkunatampis. 13 Chaqa chay dyamkunumkuna allita trabajamptinmi, suqkuna ancha rinllampa rrispitaq. Allin famayuq kachpaqam, mana nimatampis manchachpachu, achwan Jisumkristumpi yuyamkuchpa, allita rinllampa yach'achimkuq paypaq. 14 Ancha utqanam munani chamuyta watumkuchuq. Piru kay kartatam kananqa iskibrillki, 15 mana utqa chamumptiy, allita yach'anallki imachinam chumaqta kawsachun Dyuspi kriyiq masinchiqkunawan, nichpa. Chaqa Tayta Dyuspi yumbay kriyiqkunaqam paypa ilgisyan. Chay ilgisyanqam allimp kaqtalla Dyuspaq yach'achimkunchiq, chay ingañamkuqkunata binsinanchiq. 16 Chaqa allibri trabajus kachqa, runamkuna intyindinan imachina Tayta Dyus munachqa wachawayninchiqta. Piru chay pamkadu kachqanqam kaychina: Dyusmi kwirpuyuq runampaq timkramkachpa, kay munduman chamurqan. Chaymi Santu Ispiritun nirqan: Allimpchi Jisumkristuqa Dyuspa Churin mana nima uchayuqchu, nichpa. Anjilkunampismi paytaqa rimkarqan. Paypi kriyiqkunam suq nasyungunampi yach'achimkuchqa. Chaymi tumkuy maypi paypi kriyichqallampa. Pay kawsamumptinmi, luryampi ch'askirqanllampa.
1 Dyuspa Santu Ispiritunmi ancha klaruta nin: Ultimu tyimpumpiqach dyablumkunaqa wamkin runata warmita ingañachpa, suq laya dumktrinamkunata rin yach'achimkuq. Chaychi wamkin runa, warmi Jisumkristumpi kriyichqanmanda rin amkramkaq. 2 Chay llullamkuq yach'achimkuqkunaqam chiminllampawanlla Dyusta kasunllampa. Pallkunaqam ancha uchayuq kachqanrallku, jwisyunda pyirdichqa. Chaymi manana yach'anllampachu: Imam alli, imam mana allichu, nichpa. 3 Chay llullamkuqkunaqam suqkunata kamachin, ama kasarananllampa, ama wamkin mimkunamkunata mimkunanllampa. Piru Tayta Dyusmi chay mimkunamkunataqa rurachqa, paypi kriyiqkuna, allimp rimayninda yach'achpa, payta pagimkuchpa, mimkunanchiqllampa. 4 Chaqa Tayta Dyus yumbay rurachqanqam ancha allin. Challkunata ch'askichpa, Dyusta pagimkuchpam, mana nima mimkunata atinchiqchu disprisyayta. 5 Chaqa Dyuspa Santu Librunda liyichpa, Dyusman mañamkumptinchiqmi, payqa chay mimkunataqa limpyutana dijan mimkunanchiqllampa. 6 Kay nichuchqayta kriyiq masinchiqkunata qam yach'achichpaqam, Jisumkristumpa allin yach'achimkuqnin kangi. Chaychina paypa chumaq dumktrinanda allita kasumptimkiqam, chay dumktrinanqa allin mimkunachina rin yanampachuq, Dyuspi mas allita kriyinallki. 7 Piru mana kriyiq runamkuna pandachqan kwintitungunata yach'achichumptinqa, amamkich kriyingichu. Achwanri tumkuy jwisyullkiwan masta masta Dyusta kuyay. 8 Kwirpunchiq mas jwirsayuq kanambaqmi, ancha balin challku challku ijirsisyuta rurananchiq, ¿manachu? Piru mastam balin challku challku yach'amkunanchiq, Dyusta mas allita kuyachpa, sirbinanchiq. Chaqa ancham balin kay bidampaq suq bidampaqpis. 9 Chay nichuchqayqam allimp. Chayri yumbay kriyinqallampa. 10 Chayrallkur Tayta Dyuspi yuyamkuchpa, nuqanchiqkunaqa paypaq ancha trabajanchiq, suqkuna musyawamptinchiqpis. Chaqa Dyusninchiqqam wañuchqa, yumbayta wachawananchiqllampa. Piru mastam rin wachawaqninchiq paypi kriyiqkunata. 11 Yumbay chay nichuchqallkunatar yach'achimkuy y kamachimkuy. 12 Amar dijamkaychu ni pimpis disprisyachunambaq, wambra runaraq kachqallkirallkuqa. Achwanri chumaqta rimachpa, allitalla rurachpa kawsay. Runa masinchiqkunata kuyachpa, tumkuy ispiritullkiwan Dyuspi yuyamkuy. Allita Jisumkristumpi kriyichpa, ama nima maluta ruraychu, kriyiq masinchiqkuna rimkachuchpa, qamchina kawsananllampa. 13 Piru chamunallkaman, qamqa Dyuspa Santu Librunda yumbaypa ñawpambi liyichpa, kriyiq masinchiqkunata animachiy. Kanan pallkunata chumaqta yach'achiy Jisumkristumpaq. 14 Yach'achimkuq ansyanumkuna mamkingunata sawallkiman ruramptinllampam, Dyusqa pudirninda quchuchqa, paypaq allita trabajanallki. Chayri ama qunqaychu chay ch'askichqallkita ni chay uyachqallkita, Dyuspaq rimaqkuna qambaq rimamptinllampa. 15 Yumbay nichuchqaytar ruray, ama nimata qunqachpachu, rimkachuqkuna yach'anambaq: Chay Timutiyum Tayta Dyusta allita kasuchpa, kawsan, nichpa. 16 Piru allita kwidamkay, ama pandachpachu, allin jwisyullkiwan yach'achimkunallki. Ama disanimamkachpachu, achwan tumkuy chay yach'amkuchqallkita kasuchpaqam, ringi wachamkaq. Chaychina chumaqta kawsamptimkim, chay rimkachuqkunampis yach'achichqallkita kasuchpa rinllampa wachamkaq.
1 Amar anyaychu mayur runamkunataqa; achwan taytallkitachina chumaqta kunay. Wambra runamkunatampis masallkitachina chumaqta kunay. 2 Mayur warmimkunatampis mamallkitachina kunay. Chinamkunatampis panimkitachina kunay, ama nima maluta yuyachpachu. 3 Chay mana nimayuq mana aylluyuq biyudamkunata yanampay. 4 Piru suq biyuda wawayuq, willkayuq kamptinqa, pallkuna yach'amkunqallampa mamanda taytanda kwidayta, ama padisinambaq. Chaqa pallkunataqam maman taytan tamkchanmandampacha kriyarqan. Chaymi pallkuna taytanda, mamanda yanampamptinqa, ancha alli Dyuspaqqa. Chaqa paytaqam ancha gustan. 5 Piru suq allimp biyuda mana nima aylluyuqqam tumkuy chunqu Dyuspilla yuyamkun mantyinimkanambaq. Punchawnindin, tutampnindinmi Dyusman mañamkuchpa kawsan. 6 Piru suq biyuda banduliraqam wañuchqachinana. Chaqa kwirpunllanam kawsallkan. 7 Chayri yumbay kallkunata kamachimkuy, allita rurachpa kawsamptinllampa, ama pimpis nimampaq anyanambaq. 8 Piru ayllungunata mayqan mana yanampaqqa ichu kimkin familyangunata mana mantyiniqqam Jisumkristumpi kriyichqandaqa ñigallkanmanchina. Chaqa chaychina mana yanampachpaqam, mas fiyuta rurallkanllampa chay mana kriyiqkunamandaqa. 9 Biyudamkunampa listambi suq biyudata ampuntanallki, kriyiq masingunamanda mantinsyunninda ch'askinanqa, payqa 60 watayuqmanda anaqman kanqa. Suq qusayuqlla kachqa kanqampis. 10 Wawangunata uywachqa kamptin, allin chunqunwan kriyiq masingunampa ch'amkinda mayllachpa yanampamkuchqa kamptin, bisitangunata kuyachqa kamptin, ñamkaqkunata yanampachqa kamptin, tumkuy ima allimkunata rurachqa kamptin, ampuntay chay biyudamkunampa listambiqa. 11 Piru chay wambra biyudamkunata ama chay mayur biyudamkunampa listambiqa ampuntaychu. Chaqa pallkunamkich ufrisichpa Jisuspaqllana trabajayta, kwirpumba gustundalla munachpa rurayta, Jisumkristumanda amkramkachpa, munanmanllampa runayuq kariyta. 12 Chaychinaqam uchayuqna rinllampa kidaq. Chaqa ufrisichpa Dyuspaqlla trabajaytaqam, mana rinllampachu kumpliq. 13 Achwan wasin wasin purichpach'i, qallamkunampaqna timkramkanman. Kanan wacha rimallkunampaq, mitimkucharampaq timkramkanmanllampa. Yanqa mana kaqkunata rimachpa purinmanllampa. 14 Chaymi munani chay wambra biyudamkuna muchuqmanda kasararichpa, wambrayuq kanambaq, wasinllampampi wawangunata chumaqta kamachinambaq. Chaychina ruramptinllampam, kuntrawaqninchiqkuna mana imampaqpis atinqallampachu anyawayninchiqta. 15 Piru wamkin biyudamkunaqam Jisumkristumanda amkramkachpa, dyablu munachqandana rurallkanllampa. 16 Kriyiq masinchiqkunampa ayllumbi biyudamkuna kamptinqa, pallkunalla mantyininqa. Ama dijanqallampachu kriyiq masinchiqkunampa kwintanqa. Chaychinam chay suq kriyiq masinchiqkuna atinqallampa yanampayta chay mana aylluyuq biyuditamkunata. 17 Yach'achimkuq ansyanumkuna allita kwidamptin kriyiq masinchiqkunata, Dyuspaq chumaqta yach'achimkumptinqa, pallkunataqa ancha rrispitachpa, mas ufrindata quyllampa. 18 Chaqa Dyuspa Santu Librumbiqam nin: Animalkunawan trillamkuchpaqar ama chiminda wataychu, ama mimkunanqa. Nimbismi: Suq trabajaqqam dirichuyuq, pagunda ch'askinambaq, nichpa. (Chaychinallam Dyuspaq trabajaqpis dirichuyuq, ufrindata ch'askinan mantyinimkanambaq.) 19 Mayqan runa suq yach'achimkuq ansyanuta tumbachpa rimamptinqa, ama kasuychu, mana kamptin ichkay ichu kimsa tistigumkuna. 20 Piru uchanda mana dijaqkunata yumbaypa ñawpambi anyay, suqkunampis manchachpa, ama uchata ruranambaq. 21 Yumbay challkunata ruranallkimpaqmi kamachillki Taytanchiq Dyuspa, Siñurninchiq Jisumkristumpa, tumkuy amkrachqan anjilningunampa ñawpambi. Piru chay nichuchqallkunatar yumbaywan igwaltalla ruray, ama pitampis sawachachpachu. 22 Kanan mayqanda munachpa numbrayta yach'achimkuq ansyanu kanambaqqa, allitaraq rimkay: Tumkuy imampichu Dyusta allita kasullkan ichu mana, nichpa. Chaqa mayqandampis utqa numbrachpamkich, mana allita ruramptin, qambis uchayuq kangiman. Chayri tumkuy imampi allitalla ruray, ama nima laya uchayuq kanallki. 23 Pach'allki kutin kutin nanamptinqar, achla binuta umpyay. Ama yamkutallaqa umpyaychu. 24 Wamkimba uchangunampaqqam ancha klaruta atinchiq yach'ayta kay mundumpilla. Piru wamkingunaqam manachinalla uchamkunata ruranllampa. Chay pamkadu uchangunampaqqam jwisyu diyampiraq rinchiq yach'aq. 25 Chaychinallam achka allin runamkunampaqpis atinchiq yach'ayta: Allitam rurallkan, nichpa. Piru wamkin allita ruraqkunampaqqam manaraq yach'anchiqchu. Piru suq diyaqam rinchiqna yach'aq. Chaqa manam tumkuy tyimpuqa pamkaduchu rin kaq.
1 Mayqan kriyiq masinchiqkuna, randichqa kriyadumkuna kachpaqa, patrunninda allita kasunqa, ama suqkuna rimanambaq: Chay kriyadumkunaqam mana baliq Dyusnimbi, mana baliq dumktrinambi kriyinllampa. Chaymi patrunninda mana kasunllampachu, nichpa. 2 Ichu patrunninllampa Jisumkristumpi kriyiqkuna kamptinqa, mas allita kasuchpa yanampanqallampa, kriyiq masinguna kachqanrallku. Chaychinar, Timutiyitu, kriyiq masinchiqkunata yach'achiy. 3 Suq runa Siñurninchiq Jisumkristumpa dumktrinanda mana yach'achimkuchpachu, achwan pay yanqa yuyachqanda yach'achimkuchpaqam, mana nimata yach'anchu. Suq palanganullam chay laya yach'achimkuqqa. Ancha malu kustumbriyuq kachpam, suqkunawan yanqamkunata ancha riman: Kaychinam. Manam chaychinachu, nichpa. Kanan pallkunampuram imbidyanamkun, piñampanamkun musyanamkun. Manam ni pimpaqpis yuyamkunchu: Allin runam nichpaqa. 5 Chay laya runaqam ancha malkriyadu, mana jwisyuyuq, pirbirsu yach'achimkuqkuna. Chaymi mana yach'anchu: Imam allimp, imam mana allimpchu, nichpa. Chaqa tumkuy diyam anyanamkuchpa kawsanllampa. Yuyanllampam: Suqkunata Jisuspaq yach'achichpaqach'i, achka qallayta atini ganayta, nichpa. Chayri yumbay chay laya runamandaqa amkramkay. 6 Piru Jisumkristumpi kriyichpa kawsamptinchiqmi, Dyusqa ancha rin kuchichiwaqninchiq, allin furtunayuq kaqchina kuchimkunanchiq; piru kuntintamkamptinchiq imitanchiq kaqwan; manaqa manam. 7 Chaqa nasichqanchiq diyampim mana nimata kay mundumanqa ampamurqanchiqchu. Chaychinallam wañuchpampis, mana nimatampis rinchiqchu ampaq. 8 Chayri mimkunitayuq, mudanitayuq kachpaqa, chay kaqsituwanlla kuntintamkachunllampa. 9 Piru chay tumkuy imata munaqkunaqam das ichkin dyablumpa trampangunaman. Chaymi das ichkichpa, mana baliq yuyayningunata kasuchpa, ancha dañamkanllampa, chinganambaq. 10 Chaqa ancha munachpa qallaytaqam, tumkuy ima mana allimkunata ruranllampa. Chaymi wamkin kriyiq masinchiqkunaqa qallayta ancha munachpa, Jisumkristumanda amkramkachpa, ancha padisichqallampa. 11 Piru qam Dyuspaq yach'achimkuq kachpaqa, tumkuy ima mana allimkunamanda achuy. Tumkuy bidallkimpi allitalla rurachpa, Dyusta kuyachpa, paypi yuyamkuchpa, suqkunata kuyay. Yumbayta agwantachpar, tumkuy chunqullkiwan umildi kay. 12 Chaqa qamqam Timutiyitu, achka runampa warmimpa ñawpambi Jisumkristumpi kriyichqallkita rimachqa kangi. Chaymi chay uyachuqkuna tistigullkimkuna. Chaychina Jisuspi allita kriyichpar, pilyampichina binsiy dyabluta. Chaqa Dyusmi qayachuchpa, ufrisichuchqa, tumkuy tyimpu pullan kawsachichunambaq. 13 Chaymi kananqa Dyus tumkuy imata kawsachimkuqpa ñawpambi, Jisumkristumpa ñawpambi kamachillki chay nichuchqayta kasunallki. Chaqa Jisumkristuqam Pilatumpa ñawpambi kachpa, ancha klaruta allimp kaqtalla rimarqan. 14 Timutiyitu, yumbay kamachichuchqayta kasuway, ama nimata kambyachpachu Siñurninchiq Jisumkristu chamunangaman, ama pimpis anyachunambaq. 15 Chaqa Tayta Dyus siñalachqan tyimpumpim Churin Jisumkristuqa rin chamuriq. Kanan Tayta Dyusmi ancha alabachqa rin kaq. Chaqa payqam ancha pudirniyuq kachpa, yumbay gubyirnumkunampa gubyirnun. Paymi yumbay kamachimkuqkunampa kamachimkuqninqa. 16 Payllam mana nunka wañunchu. Achwanmi ancha chumaq llimpyallkaqpi kawsan. Chaymanqam mana pimpis atinchu qamimkayta. Chaymi mana ni mayqan runa paytaqa rimkachqachu, ni atinchu rimkayta. ¡Chayri payqa ancha alabachqa kanqa! ¡Tumkuy tyimpumpaq pudirniyuq kanqa! Chaychina kanqa. 17 Kay mundumpi kampuqkunata kamachiy, ama palanganu kananllampa, ama kusasningunampi yuyamkunanllampa. Chaqa kay mundumpi kusaskunaqam uchyamkan. Achwanri Tayta Dyuspi tumkuy chunqu yuyamkunqallampa. Chaqa Tayta Dyusqam tumkuy ima kaqta ancha achkata quwachqa kanchiq, kuchimkunanchiq. 18 Chayri pallkunata kamachiy, Dyusta kasuchpa, allitalla rurachpa, ama mich'ayachpachu kawsananllampa. 19 Chaychina kawsachpaqam, suq bidampi kampuqkunachina, allin simyintuyuq wasiyuqchina rinllampa kaq. Chaychinam siguradu kanqa, syilumpi tumkuy tyimpu kawsananllampa. 20 Timutiyitu, Tayta Dyus numbrachuchqanda ama qunqachpachu, allita kumpliy, paypaq yach'achimkuchpa. Chaqa chay mana kriyiq runamkunaqam ancha palanganuyachpa, yanqa mana baliqkunata parlachpa, kuntrawanchiqllampa. Pallkunaqam yuyan: Yach'ayniyuqmi kanillampa, nichpa. Piru qamqa amamkich challkunataqa uyangichu. 21 Chaqa wamkingunaqam pallkunata kasuchpa, Jisumkristumanda amkramkachqana. Piru qamtaqar Tayta Dyus yanampachunqa. Chaychina kanqa.
1 Kuyachqay wambra Timutiyitu, nuqa Pablum Tayta Dyus munachqanrallku, Jisumkristumpa ampustulnin kani. Chaymi yach'achimkuni Dyus ufrisiwachqanchiq muchuq bidampaq. Chaqa Jisumkristumpi kriyimptinchiqmi, paywan rinchiq kawsaq suq bidampi. Chaymi Timutiyitu, Taytanchiq Dyusman, Siñurninchiq Jisumkristumambis mañamkuni, ancha kuyachuchpa, tumkuy imampi yanampachunan, ama nimata manchachpachu, achwan kuchimkuchpa kawsanallki. 3 Unay agwilullkunachinam nuqampis limpyu chunquyuq kachpa, Tayta Dyusta sirbini. Chaymi punchawnindin tutampnindin kutin kutin qambaq payman mañamkuchpa, pagimkuni. 4 Chaqa Timutiyitu, ancharaq yuyani, qamta dijachumptiy, llamkichpa waqachpa kidachqallkita. Chaymi ancha munani rimkachuyta kuchimkunaypaq. 5 Ancham yuyanimpis tumkuy chunqu Siñurninchiqpi kriyichqallkita. Chaqa puntatam agwilitallki Luyda, mamallki Iwnisiwan ancha allita kriyirqanllampa Siñurninchiqpi. Chaymandaqam qambis ancha allita kriyirqallki. 6 Chaymi yuyachillki, Dyuspaq yach'achimkunallki chay numbrachuchqayta. Manchu sawallkiman mamkiyta ruramptiy, Tayta Dyusqa yanampachuchqa, tumkuy imampi paypaq yach'achimkunallki. Chayri yumbay challkunata rurachpa, ama dijamkachpachu, Dyuspaq allita trabajay. 7 Chaqa Tayta Dyusqam ancha pudirniyuq Santu Ispiritunda quwachqa kanchiq, ama nimatampis manchachpachu, achwan allita kuyanamkuchpa, allin yuyayniyuq kananchiq. 8 Chayrallkur ama panqamkuychu Siñurninchiqpaq yach'achimkunallkiqa ni nuqampaq panqamkuychu karsilawamptinllampa, Jisumkristumpaq yach'achimkuchqayrallku. Achwanri listu kay, Jisumkristumpaq yach'achimkuchpa, padisinallki. Chaqa Dyusmi rin yanampachuq, ama kubardamkanallki. 9 Kanan Jisumkristu nuqanchiqpaq wañuchqanrallkum, Tayta Dyus wachawaqninchiq, qayawachqa kanchiq, paypaqna kawsananchiq. Manam qayawachqachu kanchiq, ima allita rurachqanchiqrallku. Achwanmi ancha allin kachpa, kuyawachqa kanchiq, manaraq kay mundu kachqanmandampacha. 10 Chaymi Tayta Dyus Wachadurninchiq Jisumkristuta kay pachaman kach'amuchpaqa, masta yach'achiwachqa kanchiq: Ancham kuyallkillampa, nichpa. Chayrallkum Jisumkristu wañuyta binsichpa, kawsamuchpa, wachawachqana kanchiq, amana chingananchiqllampa. Kanan chumaq nutisyandam yach'achiwachqa kanchiq, paypi kriyichpa, yach'ananchiq: Tumkuy tyimpunam rinchiq kawsaq, nichpa. 11 Chaqa Tayta Dyusmi numbrawachqa, Jisumkristumpa ampustulnin kachpa, kay chumaq nutisyanda yach'achimkunaypaq chay mana isrraylinu kaqkunata. 12 Chayri pay kamachiwachqanda kumplichqayrallkum, kaychina ancha ñamkallkani kay karsilpi. Piru maychimka kaychina ñamkachpampismi, mana nuqaqa panqamkunichu. Chaqa yach'anim: Jisumkristumpim ancha kriyini. Paymi ancha pudirniyuq kachpa, rin kwidawaq, paytalla kasunaypaq jwisyu diya ch'ayamunangaman, nichpa. 13 Chayri chay allimp kaqta yach'achichuchqayta uyawachpa, allita Jisumkristumpi kriyiy. Kanan kriyiq masinchiqkunawambis kuyanamkuchpa, chumaqta kawsay. 14 Dyuspa Santu Ispiritun nuqanchiqpi tiyaq yanampachumptinri, yach'achimkuy Dyus nichqanda, pay kamachichuchqanchina. 15 Qamqam allita yach'angi: Kriyiq masinchiq Fijilu Irmujiniswan prubinsya Asyamanda yumbay kriyiq masingunampismi nuqata sampalayta dijawarqanllampa, nichpa. 16 Chay masitanchiq Unisifurullam nuqarallku mana panqamkuchpachu, kutin kutin kay karsilman chamuchqa animachiwaq. Chaymi Tayta Dyusman ancha mañamkuni, chay masitanchiqpa warminda wambrangunata ancha yanampanambaq. 17 Chay masitanchiq Unisifuruqam kay Rruma llaqtampi kachpaqa, mana yach'achpachu maypi kachqaytampis, maskawarqan tariwanangaman. 18 Jwisyu diya ch'ayamumptinqar, Siñurninchiqqa chumaqta ch'askinqa chay masitanchiqtaqa. Chaqa qamqam Timutiyitu allita yach'angi chay masitanchiq Ifisu llaqtampimpis yanampawachqanchiqta.
1 Ijitu Timutiyu, Jisumkristu ancha allin kachpam, munan tumkuy imampi yanampachuyta. Chayri ama nimata manchachpachu, achwan paypi allita yuyamkuchpa, ancha kurajiyuq kay, paypaq rimanallki. 2 Qamqam rimkawachqa kangi, suqkunata Jisumkristumpaq yach'achimptiy. Chay achka uyawaqkunam tistigullkuna yach'achimkuchqaypaq. Chayri qambis chay yach'achichuchqayta suqkunata yach'achichpa, numbray, Jisumkristumpaq yach'achimkunan. Piru allin kumplidu runamkunatar numbrayqa, pallkunampis suqkunata yach'achirinambaq. 3 Chayri qambis Jisumkristumpa allin suldadunchina kachpa, padisichpampis, agwantay. 4 Chaqa suq suldaduqam sirbisyumbi kachpaqa, kamachimkuqninda allita kasun, paywan kuchimkunambaq. Mananam suq laya trabajumanqa mitimkunnachu. 5 Chaychinallam suq pugllaqpis rriglamkunata allita kasuchpa, pugllachpa, challku challku binsichparaqmi, primyundaqa ch'askin. Chay rriglamkunata mana allita kasuchpaqam, chay primyundaqa pyirdin. 6 Chaychinallam suq tarpumkuqpis. Puntataqam ancharaq trabajan. Chaymandaraqmi atin kusichamkuyta. 7 Kay kimsa kumparasyumbi yuyamptimkiqam, Tayta Dyusqa rin yanampachuq, yumbay chay nichuchqayta allita intyindinallki. 8 Piru amar qunqaychu Siñurninchiq Jisumkristutaqa. Paymi chay unay gubyirnu Dabidpa karu willkan kachqa. Paymi wañuchqanmanda kawsamurqan wachawananchiq chay yach'achichuchqaychina. 9 Paypaq yach'achimkuchqayrallkum, kaychina ancha padisillkani kay karsilpiqa. Suq ancha uchayuq runatachinam asta kadinamkunawan watawanllampa. Piru Dyus nichqandam mana atinllampachu wataytaqa. Achwanmi achka runaman warmiman ch'ayallkan, Jisumkristumpi kriyinanllampa. 10 Chaymi kaychina ancha ñamkachpampis, tumkuy imata agwantani, Dyus amkrachqan kriyiq masitanchiqkunata animachinaypaq, Jisumkristumpi kriyichpa, wachamkachpa, rinanllampa ancha chumaq llimpyallkaq syiluman, waqpi tumkuy tyimpu kawsananllampa. 11 Chaqa kay nichuchqayqam ancha allimp kachqa: Siñurninchiqpi kriyichpa wañuchpaqam, rinchiq kawsamuq, paypa pullan kananchiq. 12 Jisumkristumpi kriyichqanchiqrallku padisichpaqam, paypa pullan rinchiq kamachimkuq. Piru ñigamptinchiq: Manam Jisusta riqsinichu, nichpaqam, paypis rin ñigawaqninchiq: Manam riqsillkichu, nichpa. 13 Nuqanchiq ufrisichpa, mana kumplimptinchiqpismi, payqa wachamkunambaq ichu kastigamkunambaq, yumbay nichqanda kabalta rin kumpliq. Chaqa payqam mana nimatampis ingañamkunchu. 14 Kriyiq masinchiqkunata kayta yuyachichpa, Siñurninchiqpa chutinwan kutin kutin kunay, ama yanqa nichqangunampaq anyanamkunanllampa. Chaqa chaychina anyanamkuchpaqam, mana pitampis yanampanchu. Achwanmi uyaqkunata dañachin. 15 Chayri imachinampis Dyus munachqanda rurachpa, allita yach'achimkuy, suq allin trabajadurchina paypa ñawpanman prisintamkachpa, ama nimampaq panqamkunallki, achwan qamta nichunambaq: Allimp kaqtam nuqampaq yach'achimkuchqa kangi, nichpa. 16 Amar mitimkuychu chay mana baliq yanqa palabramkunata rimamptinllampaqa. Chay laya yanqa rimaqkunaqam Dyusmandaqa kada bwilta masta amkramkachpa, mas uchayuqna kidanllampa. 17 Chay yanqa rimachqanllampaqam bidanchiqtaqa ancha dañachin, chay nanay achkayaq ismuchimkuqchina. Chaqa chaychina yumpaymi chay Iminiyu Filituwanqa mana allimkunata rimachpa suqkunata dañachinllampa. 18 Pallkunaqam Tayta Dyuspa allimp dumktrinanmanda amkramkachpa, wamkin kriyiq masinchiqkunata ingañallkan: Wañuqkunach kawsamuchqana, nichpa. 19 Suq allin albañilqam allita ruran wasimpa simyintunda, ama bulamkachpa chinganambaq, ¿manachu? Chaychinallam Tayta Dyuspis allita yach'achiwanchiq, ama pandananchiq ni chingananchiq. Chaymi nuqanchiqpaq kaychina nichqa: Dyusmi riqsin wambrangunata. Chayri Jisumkristumpi kriyiqkunaqa uchamkunamanda amkramkanqallampa, nichpa. 20 Suq atun wasimpiqam kan platumkuna, basumkuna, achka laya kusaskuna. Wamkinqam urumanda, qallaymanda. Wamkinnataqmi qarumanda ichu allpamanda. Chay mas chumaq kaqkunaqam ancha balin. Chaymi chay mas pudirniyuq runamkuna wasinman ch'ayamptin, ichu ima fyista kamptin, challkunampi qaramkunllampa. Piru chay qarumanda, allpamanda kaqkunampiqam yanqa diyamkunampi mimkunllampa. 21 Runamkuna warmimkunampismi chay ichkay laya platumkunachina basumkunachina. Chaymi suq runa tumkuy ima maluta dijachpaqa, Dyuspaqqa suq limpyu platuchina ancha rin baliq, tumkuy ima allita ruranambaq. 22 Chayri ama kaychu suq mana sujitamkaq chuluchinaqa. Achwanri limpyu chunquyuq kachpa, Jisumkristuta aduraqkunawan qambis allita aduray. Paypi kriyichpa, allita rurachpa, suqkunata kuyay. Amar ni piwan pilyachpachu, chumaqta kawsay. 23 Chayri chay tuntumkuna liriyamptinqa, ama mitimkuychu. Chaqa qamqam allita yach'angi: Kada bwilta anyanamkuchpaqam, masta rinllampa anyanamkuq, nichpa. 24 Piru Siñurninchiqpaq yach'achimkuq kachpaqar, ama anyanamkuchpachu purichun. Achwanri yumbaywan chumaqta kawsachpa, allin yach'achimkuqkuna kachun. Mayqan mana allita rurawamptinchiqqa, ama piñamkuchpachu, achwan agwantachun. 25 Tayta Dyusta kuntraqkunatampis chumaqta willachun, yuyachpa: Kinsampch'i Dyus chunqunllampata rin kambyaq, uchangunata dijachpa, pirdunda mañachpa, allimp kaqpi kriyinanllampa, nichpa. 26 Chaychinam dyablumpa trampanmanda atinqallampa lluqchiyta, amana pay munachqanda rurananllampa. Chaqa kananqam pallkunaqa dyabluta kasullkanllampa.
1 Kaytampis allita yach'ay: Jwisyu diya sirkana kamptinmi, achka runa warmi rinllampa ñamkaq. 2 Chaqa kay mundumpi achka tiyaqkunam tumkuy ima kusaskunata pallkunampaqlla rinllampa munaq. Wamkinmi qallaypaqlla rinllampa lumkuyaq. Wamkinmi ancha palanganu rinllampa kaq. Wamkinqam Dyusta rinllampa maldisyaq. Wamkinqam taytanda, mamanda mana rinchu kasuq. Wamkinnataqmi mana pitampis rinllampachu agradisiq. Wamkinnataqmi Dyuspaq, dumktrinanchiqpaq rinllampa asimkuq. 3 Manam ni yanasunda (yanasanda) ni ayllunda rinllampachu kuyaq. Runa masin imanachimptinqam, mana nunka rinchu pirdunaq. Rinllampam kriminamkuq, yanqamkunata rimachpa. Munachqandallam rinllampa ruraq. Manam nimatampis rinllampachu sujitamkaq. Ancha malu kachpam, mana llamkimpachpachu, runa masinda rinllampa kusasnachiq. Kanan tumkuy ima allingunatam rinllampa ch'iqniq. 4 Traysyundam rinllampa ruraq. Manam pitampis manchachpachu, ancha atribidumkuna rinllampa kaq. Ancha ingriyidum rinllampa kaq. Tayta Dyusta mana kuyachpam, gustunllampatalla rinllampa ruraq. 5 Kustumbrinrallkullam kriyiq masinchiqkunawan rinllampa tandanamkuq. Piru manam allimptachu Siñurninchiqpi rinllampa kriyiq. Chaymi mana atinqallampachu bidanllampata kambyaytaqa. Amar chay laya kaqkunawanqa tandamkaychu. 6 Chaqa pallkunamanda wamkinninqam wasin wasin purichpa, rinllampa yallkuq mana yach'ayniyuq uchayuq warmimkunaman. Chaychina suq laya dumktrinata yach'achichpa, chay uchayuq warmimkunataqa rinllampa ingañaq. 7 Chaqa chay laya warmimkunaqam kada bwilta munanllampa yach'amkuyta. Piru allimp kachqandaqam mana yach'amkunllampachu. 8 Unay tyimpumkunampim chay ichkay brujumkuna Janis, Jambris chutiqkunaqa Muysista kuntrarqanllampa. Pallkunachinam chay ingañamkuqkuna Dyuspa dumktrinanda kuntrallkanllampa. Chaqa pallkunaqam mana baliq yuyayniyuqkuna. Manam allimptaqa Jisumkristumpi kriyinllampachu. 9 Piru manam rinllampachu atiq achka runata ingañaytaqa. Chaqa tumkuy maypim rinllampa yach'aq ancha tuntumkuna kachqanda. Chaychinallam Muysispa tyimpumbimpis chay ichkay brujumkunampaq tuntumkuna niqllampa. 10 Piru qamqam Timutiyitu, manyaqlla ancha allita rimkawachqa kangi imachina yach'achimkuchqayta, imachina kawsachqayta, imampaq yach'achimkuchqayta, Siñurninchiqpi allita kriyichqayta. Rimkawachqampismi kangi kuntrawamptinllampa mana piñamkuchqayta, achwan yumbayta kuyachpa agwantachqayta. 11 Antyumkiya llaqtampi, Imkuñumpi, Listrampi ancha qasachawamptinllampa, padisichqaytampis allita yach'angi. Yach'angimpismi wanchiwananllampa kamptin, Siñurninchiq wachawachqanda. 12 Chaqa Jisumkristuta yumbay munaq kasuqtaqam rinllampa qasachaq. 13 Kanan chay ingañamkuqkunam mas malumpaq rinllampa timkramkaq. Chaymi pallkunampura ingañanamkuchpa, suqkunatampis rinllampa ingañaq. 14 Piru qamqam Jisumkristumpaq yach'amkuchpaqa, paypi allita kriyichqa kangi. Chay yach'amkuchqallkitaqa ama qunqaychu. Chaqa allitam yach'angi: Dyusta sirbiqkunamandam yach'amkuchqa kani, nichpa. 15 Timutiyitu, tamkcha kachqallkimandampacham Dyuspa Santu Librunmanda yach'amkuchqa kangi, yach'ayniyuq kachpa, Jisumkristumpi kriyichpa wachamkanallki. 16 Chaqa Dyus kimkinmi paypaq rimaqkunata yanamparqan, pay nichqanda chay Santu Librumbi iskibrinanllampa. Chaymi chay Santu Librunqa ancha balin yach'achiwananchiq, byinninchiqpaq anyawananchiq, kunawananchiq, yanampawananchiq, mas allita kawsananchiqllampa. 17 Chaqa Tayta Dyusqam Santu Librundaqa paypi allimpta yuyamkuqkunata quwachqallampa kanchiq, allita paypaq yach'amkuchpa, yach'ayniyuq kachpa, tumkuy ima allimkunata rurananchiqllampa.
1 Siñurninchiq Jisumkristu chamuchpa kamachimkuqqam, yumbay kawsaqkunata rin jusgaq. Wañuchqamkunata kawsachimuchpam, pallkunatampis rin jusgaq. Chayri Tayta Dyuspa chutimbi, Churin Jisumkristumpa chutimbi kamachillki, 2 yumbay kay nichuchqayta ruranallki. Dyus nichqandar allita yach'achimkuy. Uyachumptinllampa, mana uyachumptinllampampis, mana challkuq yach'achimkuy, Siñurninchiqpi kriyinanllampa. Mana alli ruraqkunataqa kuyachpa anyay. Amar piñamkuchpachu, achwan chumaqta kunachpa yach'achiy. 3 Chaqa rinmi ch'ayamuq suq tyimpu. Chay tyimpumpim runamkuna warmimkunaqa gustundalla munachpa rurayta, manana rinllampachu uyaq Siñurninchiqpa chumaq dumktrinandaqa. Achwanmi rinllampa maskaq suq laya yach'achimkuqkunata, munachqandalla uyananllampa. 4 Allimp kaqtaqam mana rinllampachu munaq yach'ayta. Achwanmi tumkuy laya mana baliq kwintumkunatalla rinllampa kriyiq. 5 Piru qamqar tumkuy imampi allin jwisyuyuq kay. Padisichpampisri ancha animamkay, Jisumkristumpaq yach'achimkunallki, uyachuqkuna wachamkanambaq. Chayri Dyus nichuchqanda ruray uchyanallkimkaman. 6 Chaqa nuqatam suq wichatachina rinllampana wanchiwaq. Dasnam rin ch'ayamuq wanchiwananllampa diyaqa. 7 Piru dyabluta kuntrachpam, Jisumkristuta kasuchqa kani. Suq runa mana challkuq kallpaqchinam Tayta Dyuspi allita yuyamkuchpa, pay quwachqan tariyayta uchyallkanina. 8 Kananqam Tayta Dyus chuyachiwallkan ancha allin primyuta, jwisyu diyampi quwanambaq, payta kasuchqayrallku. Piru manam nuqatallachu rin quwaqqa. Achwanmi payqa ancha allin juyis kachpa, primyumkunata rin quq yumbay payta chuyaqkunatampis. Chaqa pallkunampismi payta kuyachpa, tumkuy chunqu munanllampa kutimunambaq. 9 Masita Timutiyu, mudusta tumkuchpar, das chamuy watumkuwaq. 10 Masanchiq Dimasqam kay mundumpa kusasningunata ancha munachpa, nuqamanda amkramkachpa, richqana Tisalunimka llaqtaman. Masanchiq Krisintiqam richqa prubinsya Galasyaman. Masanchiq Tituqam richqa prubinsya Dalmasyaman. 11 Masanchiq Lumkasllam kaypi pullayqa kidachqa. Masanchiq Markustar maskay, pullallki ampamunallki, allin yanampamkuqniy kanambaq. 12 Chaqa masanchiq Timkimkutam kach'achqa kani Ifisu llaqtaman. 13 Truwaspim masanchiq Karpumpa wasimbi kampayta dijachqa kani. Chamuchpaqar ampamuy chay kampayta. Rrulluchqa librullkunatampisri ampamuy. Piru mastam munani ampamunallki chay qaramanda kaq rrulluchqa librullkunata. 14 Chay jirriru Alijandrum ancha dañachiwachqa. Piru Siñurninchiqmi yumbay rurawachqambaq payta rin kastigaq. 15 Chay Alijandruqam dumktrinanchiqta ancha kuntran. Chaymi kunallki, paymanda kwidamkanallki. 16 Kay Rrumampa juyisningunampa ñawpambi punta bwiltata ampawamptinllampa dimklaranayqam, mana ni suq (kriyiq masinchiq) kumpañawarqanchu, faburniyta rimanambaq. Yumbayninmi dijawachpa mitimkarqanllampa. Chaychina rurawamptimbismi, Dyusman mañamkuni, pallkunata ama kastiganambaq. 17 Piru chaychina kamptimbismi, Siñurninchiqqa pullay kachpa, ancha animachiwarqan. Chaymi paypaq yach'achimkumptiyqa, yumbay chaypi kaq mana isrraylinumkuna uyawarqanllampa. Chaychinam Siñurninchiqqa wachawarqan, chay rrumanumkuna ama wanchiwananllampa, achka liyungunampa chiminmanda wachawachqanchina. 18 Paymi rin wachawaq yumbay malu kaqkunamanda, (chay rrumanumkuna wanchiwamptimbis) syiluman ampawanambaq, Jisumkristu chumaqta kamachimkumptin, pullan kanaypaq. ¡Biba Siñurninchiq! ¡Tumkuy tyimpu alabachqa kanqa! Chaychina kanqa. 19 Nuqampa chutiypir nampallkuy paninchiq Priskata, qusan Amkilasta, masanchiq Unisifurumpa ayllundampis. [Nuta: Chay warmi Priskallam Prisilampis chutiq.] 20 Masanchiq Irastum Kurintu llaqtampi kidachqa. Masanchiq Trufimutam Militu llaqtampi qachyaqta dijachqa kani. 21 Utqanar chamuy, amaraq tamya tyimpu qallarimptin. Qamkunatam nampallkuchungi masanchiq Iyubulu, Pudinti, Linu, paninchiq Klawdya, yumbay kaypi kaq kriyiq masinchiqkunawan. 22 Mañamkunim, Siñurninchiq Jisumkristu pullallki kanambaq, Taytanchiq Dyus yumbay qamkunata yanampachunambaq. Chaychina kanqa. (Chaytallam iskibrillki.)
1 Kuyachqay Tititu, nuqa Pablum Tayta Dyuspa randichqa kriyadun kani. Jisumkristumpa ampustulnimbismi kani. Chaymi kach'amuwachqa, qamkuna amkrachqan wambrangunata allimp kaqta yach'achichunaypaq, paypi allita kriyinallkillampa, 2 allita yach'anallkillampa: Suq bidampim tumkuy tyimpumpaq Dyuswan rinchiqllampa kawsaq, nichpa. Chaqa Tayta Dyusqam mana llullamkunchu. Manaraq kay mundu kamptinmi, payqa ufrisimkuchqa karqan, tumkuy tyimpumpaq kawsachiwananchiq. 3 Chaymi pay munachqan tyimpu ch'ayamumptin, nuqa yach'achimkumptiy, runamkunata intyindichichqa pay nichqanda. Chaqa Dyus Wachawaqninchiqmi nuqata kamachiwachqa, chay chumaq nutisyanda yach'achimkunay. 4 Chaymi qam kuyachqay Tituman kay kartata kach'amuni. Chaqa nuqachina Jisumkristumpi allita kriyichqallkirallkum, lijitimu wambraychina kangi. Chaymi mañamkuni, Tayta Dyus, Wachadurninchiq Jisumkristuwan ancha allin kachpa, tumkuy imampi yanampachunambaq, ama nimata manchachpachu, achwan kuchimkuchpa kawsanallki. 5 Tititu, chay yamkumpa ch'awpimbi isla allpa Kritamanda lluqchichpam, chay Kritampi dijachurqaq, chay yach'achimkuchqanchiqta qamna uchyanallki. Manchu kamachichurqaq chay Kritampa llaqtangunampi yach'achimkuq ansyanumkunata numbranallki, kriyiq masinchiqkunata rimkananllampa. 6 Chayri chay ansyanumkuna kaychina kanqa: Ancha allin runa kanqa, ama nimampaqpis anyachqa kanambaq. Suq warmiyuqlla kanqa. Churingunampisri payta kasuchpa, Jisumkristumpi kriyiqkuna kanqallampa, ama pimpis panqanambaq: Chay churingunach malkriyadumkuna, mana uyamkuqkuna, nichpa. 7 Chaqa suq ubispum Dyuspa wambrangunampa kamachimkuqnin. Chayri allitalla rurachpa kawsanqa, ama nimampaq anyachqa kanambaq. Amar pay munachqandalla rurachpachu kawsanqa. Amar dasqa piñamkunqachu. Amar mach'anqachu. Amar ni piwambis pilyanqachu. Amar suqkunata ingañanqachu qallayta ganananrallku. 8 Achwanri yach'anqa kuchimkuchpa pusadata quyta. Tumkuy imatar allitalla ruranqa. Allin jwisyuyuqri kanqa. Ancha allin runar kanqa. Dyuspaqllar kawsanqa. Yach'anqar pay kimkin sujitamkayta. 9 Jisumkristumpa lijitimu dumktrinanda yach'amkuchpaqa, allita kasunqa, suqkunatampis chumaqta yach'achichpa, animachinambaq, Dyusta kuntraqkunatampis yach'achichpa, kriyichinambaq. 10 Chaqa kanmi achka runa mana munaq nimata kasumkuyta. Yanqamkunata rimachpam, suqkunata ingañan. Chay ingañaqkunamandam kan achka llaqta masiy isrraylinumkuna. 11 Pallkunaqam achka kriyiq masinchiqkunata yumbay ayllundinda pandachinllampa. Chaychinam yanqalla yach'achimkunllampa, qallayta gananambaqlla. Chayri ama dijaychu pallkunata, chay mana baliqkunata yach'achimkunanqa. 12 Chay Kritampiqam suq ancha yach'ayniyuq runa karqan. Payqam kritanu masingunampaqqa nirqan: Pallkunam tumkuy tyimpu llullamkunllampa, ancha manchaypaq animalkunachina, mana undaq mimkuqkuna, qalla limkidumkuna, nichpa. 13 Chay yach'ayniyuqqam allimp kaqta pallkunampaq rimarqan. Chayrallkur qamqa Tititu, anyay pallkunata, allita Siñurninchiqpi kriyichpa, 14 ama kasunanllampa chay isrraylinumkunampa yanqa dumktrinangunata, ni chay mana allimp kaq yach'achimkuqkunata. 15 Yumbay allin yuyayniyuqpaqqam Dyus tumkuy ima rurachqanqa allin; manam mampachu. Piru uchayuq mana kriyiqkunampaqqam tumkuy ima mampa. Chaqa uchanrallkum pallkunaqa ancha mampa yuyayniyuq. Chaymi mana atinllampachu yach'ayta: ¿Imam alli, imam mana allichu? nichpa. 16 Pallkunaqam: Yuyayniypim Dyusta riqsini, ninllampa. Piru millanaypaq uchamkunata ruramptinllampam, yach'anchiq: Manam allimptaqa Dyuspiqa kriyinllampachu, nichpa. Chaqa pallkunaqam mana uyamkuq ch'iqnimkuqkuna kachpa, mana balinllampachu, nima laya allita rurananllampaqa.
1 Piru qamqa Tititu, allimp dumktrinanchiqtalla yach'achimkuy; amar suq layataqa. 2 Chay byijitu kriyiq masinchiqkunata kunay, allita sujitamkachpa kawsananllampa, suqkuna pallkunata rrispitananllampa, allin jwisyuyuq kananllampa, tumkuy chunqu Siñurninchiqpi yuyamkunanllampa, Dyusta, runa masingunata kuyananllampa, padisichpampis Siñurninchiqta mana challkuq kasunanllampa. 3 Chaychinallar warmi byijitamkunatampis kunay, ancha allin warmimkuna kananllampa, ama suqkunampa wachanda rimananllampa, ama mach'ananllampa, allimp kaqtalla yach'achimkunanllampa. Chaychina chumaqta kawsachpaqam, 4 warmi minurkunatampis yach'achinqallampa, qusanda, wambrangunata kuyanambaqllampa, 5 tumkuy imampi sujitamkachpa allin jwisyuyuq kanambaqllampa, kimkin runambaqlla kanambaq, wasinda allita rimkanambaq, allin warmimkuna kachpa, qusanda kasunambaq, ama pimpis Dyus nichqanda kuntrananllampa. 6 Chaychinalla chulumkunatampis kunachpa animachiy, allin jwisyuyuq kanambaqllampa. 7 Qambisri, Tititu, tumkuy imata allita rurachpa kawsay, rimkachuqkuna, qamchina chumaqta kawsananllampa. Allita sujitamkachpar, allin chunqullkiwan, yumbayta chumaqta yach'achiy. 8 Chaychina allimp kachqandalla yach'achimkumptimkim, mana pimpis atinqachu anyachuyta. Achwanmi kuntranchiq kaqkunaqa, panqamkuchpa, rinllampa uyaraq. 9 Randichqa kriyadumkunatar kunachpa animachiy, tumkuy imampi patrunningunata kasuchpa, ama nimata rrispundichpachu, achwan chumaqta kuchichichpa sirbinanllampa. 10 Amar patrunninllampata nimanda suwachpachu, achwan ancha allin kumplidur kachpa, tumkuy imampi allita trabajanqallampa. Chaychina chumaqta kawsamptinllampaqam, suqkuna rinllampa alabaq Wachadurninchiq Dyusta. 11 Tayta Dyusmi ancha allin kachpa, munan yumbay runamkunata, warmimkunata wachayta. Chaymi Jisumkristutaqa kach'amurqan wachawananchiq. 12 Payqam ancha allin kachpa, yach'achiwanchiq, kwirpunchiq munachqandalla amana rurananchiq chay mana kriyiqkunachina. Achwanmi munan, chay mana baliq munachqanchiqta dijachpa, allin jwisyuyuqna kachpa, payta kuyachpa, allitalla rurachpa, kawsananchiqllampa kay mundumpi. 13 Dyuspi ancha yuyamkuchpar, kuchimkuchpa, chuyachun: Pudirniyuq Wachadurninchiq Dyus Jisumkristum llimpyachpa rin chamuriq ufrisiwachqanchiqchina, nichpa. 14 Paymi intrigamkarqan wanchinambaqllampa, wañuyninwan yumbay uchanchiqmanda wachawananchiq, ancha limpyu chunquyuq wambrangunana kananchiq, ancha animadu kananchiq, allitalla rurachpa kawsananchiq. 15 Chayri yumbay nichuchqallkunata kriyiq masinchiqkunata yach'achichpa, chumaqta animachiy. Piru wamkinguna mana kasuchumptinqar, ama nimata manchachpachu, Dyuspa pudirninwan jwirtita willay, chumaqta rrispitachuchpa kasuchunanllampa.
1 Chay kriyiq masinchiqkunata yuyachiy, gubyirnunda, yumbay awturidarningunata kasuchpa, qawch'u kananllampa, tumkuy ima allimkunata rurachpa kawsananllampa. 2 Kanan amar pimpaqpis yanqamkunataqa rimanqallampachu. Amar pindinsyiruqa kanqallampachu. Achwanri umildi kachpa, allin palabrayuq yumbaywan kanqallampa. 3 Chaqa nuqanchiqpismi unayqa ancha malu, tuntu karqanchiq. Dyusta mana kasuqkunam karqanchiq. Chaymi kwirpunchiq ima munachqandalla rurarqanchiq. Kanan listum karqanchiq, mana allimkunata rurananchiq. Chaymi imbidyanamkuchpa, suqwan, suqwan kuntranamkuchpa, ch'iqninamkurqanchiq. 4 Piru chaychina mana allin kamptinchiqpismi, Tayta Dyus ancha allin kachpa, kuyawaqninchiq, llamkimpawaqninchiq wachawarqanchiq. Chaymi Santu Ispiritunda quwarqanchiq, uchanchiqmanda mayllawananchiq, muchuqmanda nasirichpa, muchuq bidayuq kananchiq. 6 Chaychinam Tayta Dyus ancha allin kachpa, Wachadurninchiq Jisumkristu wañuchqanrallku, chay Santu Ispiritunda quwachqa kanchiq, tumkuy imampi ancha yanampawananchiq, 7 amana uchayuqpaq riqsiwananchiq, achwan yach'ananchiq: Tumkuy tyimpum paywan rinchiq kawsaq, nichpa. 8 Chaqa yumbay kay nichuchqayqam allimp. Chaymi munani kriyiq masinchiqkunata ancha allita yach'achichpa, mana challkuq ninallki: Allitalla rurachpar kawsachunllampa, nichpa. Chaqa chaychina rurachpaqam, yumbayta ancha rinllampa yanampaq. 9 Piru amar anyanamkuychu mana baliq dumktrinamkunampaq, ni unay agwilunchiqkunampa chutingunata myintachpa, ni Muysispa liyningunampaq. Chaqa challkunampaq anyanamkunanchiqqam mana nimampaq balinchu, ni yanampawanchiqchu. 10 Chayri mayqan runa kriyiq masinchiqkunata inkitamptin amkramkanambaq, chay runata suq ichu ichkay kutinda anyachpa willay, ama chaychina ruranambaq. Piru mana kasuchumptinqar, amana paywanqa tandamkayllampachu. 11 Chaqa pay rurachqanda rimkachpam, das yach'anchiq pay ancha pirbirsu kachqanda. 12 Rinim kach'amuq masanchiq Artimasta ichu Timkimkuta, qaman chamunambaq. Chamumptinqar, utqa riy waq Nimkumpulis llaqtaman, chaypi tingunamkunanchiq. Chaqa waqpim yuyani tamya tyimputa pasayta. 13 Masanchiq abugadu Sinasta, Ampulustampis atichqallkimkaman yanampay, ama padisinanllampa ñambi. 14 Kriyiq masinchiqkunampisri yach'amkunqallampa yanampamkuyta. Chayri mayqanda ima faltamptin, yanampanqallampa, suq planta puquqchina kanambaqllampa. 15 Yumbay pullay kaqkunampismi nampallkumkunata kach'amuchungi. Chay kuyawaqninchiq kriyiq masinchiqkunatampisri nampallkuy nuqampa chutiypi. Tayta Dyus ancha allin kachpam, yumbay qamkunata yanampachunqa. (Chaytallam iskibrillki.) Chaychina kanqa.
1 Kuyachqay Filimunsitu, nuqa Pablum Jisumkristumpaq yach'achimkuchqayrallku prisu kani. Yach'achimkuq masisitu, kay karsilmandampacham masitanchiq Timutiyuwan kay kartata iskibrimuni qaman, 2 kuyachqa paninchiq Ampyaman, masanchiq Arkimpuman. Chaqa payqam nuqanchiqwan dyabluta binsichpa, Jisumkristumpaq yach'achimkullkan. Tumkuy chay wasimkimpi tandamkaq kriyiq masinchiqkunamambis kay kartataqa iskibrimuni. 3 Taytanchiq Dyus, Siñurninchiq Jisumkristumpis tumkuy imampi qamkunata yanampachunqa, kuchimkuchpa chumaqta kawsanallkillampa. 4 Tumkuy tyimpu yuyachuchpa, Tayta Dyusman mañamkuchpam, ancha pagimkuni qambaq. 5 Chaqa yach'achqam kani: Ancha allitach Siñurninchiq Jisuspi kriyingi. Tumkuy chunqullkiwanchi payta kuyangi. Paypi yumbay kriyiqtampischi ancha kuyangi, nichpa. 6 Tayta Dyusmanmi mañamkuni, allita kriyichqallkirallku, suqkunampis Siñurninchiqpi allita kriyinanllampa. Chaymi chay kriyiqkunampaq, qambaqpis Dyusman mañamkuni, ancha allita intyindinallkillampa: Jisumkristum tumkuy imampi ancha yanampawanchiq, nichpa. 7 Chaychina ancha allita ruramptimkim, yumbay kriyiq masinchiqkuna ancha kuchimkunllampa. Pallkunata allita kuyachpaqam, nuqatampis ancha kuchichiwangi. 8 Chaychina Dyusninchiqta allita kasumptimkiqam, nuqa Jisumkristumpa ampustulnin kachpa, paypa chutinwan atini kamachichuyta: Kay ima allita ruray, nichpa. 9 Piru qamta kuyachuchpam, mana munanichu kamachichuyta. Achwanmi rini rrugachuqlla. Nuqa Pablum ancha mayurna kani. Kanan Jisumkristumpaq yach'achimkuchqayrallkum kay karsilpi kani. 10 Kay karsilpi yach'achimkumptiymi, randichqa kriyadullki Unisimuqa kriyichqana Siñurninchiqpi. Chaychina kriyichpaqam, payqa wambraychinana. Chaymi paypaq ancha rrugachuchpa, suq faburta mañallki. 11 Unayqam kay randichqa kriyadullki Unisimuqa mana nimampaq qambaqqa balirqanchu. Piru kananqam qambaqpis, nuqampaqpis anchana balin. 12 Paytam rini kach'amuq kay kartawan, qaman chamunambaq. Payta ancha kuyachqayrallku, chumaqta ch'ayachiy nuqatachina. 13 Jisumkristumpa chumaq nutisyanda yach'achimkuchqayrallku kay karsilpi kachpam, ancha munarqani Unisimu pullay kidanambaq, qamba rrimplasullki kachpa yanampawanambaq. 14 Piru mana munamptimkiqach'i, mana munanichu kidanambaqqa. Achwanmi munani qam gustullkiwan ari niwanallki, Unisimu yanampawanambaq. 15 Kinsampch'i payqa suq tyimpumpaqlla qamandaqa amkramkarqan, kananmandampacha tumkuy tyimpuna pullallki kanambaq. 16 Piru mananam allichu, randichqa kriyadutachina ch'askinallki. Achwanri ancha kuyachqa kriyiq masinchiq kamptin, chumaqta ch'ayachiy. Chaqa paytam ancha kuyani. Piru qamqar nuqamandaqa masta kuyay, kriyadullki kachqanrallku, Jisumkristumpi kriyichqanrallku. Chaymi manana yanqa runatachinaqa kuyangichu. 17 Chaychinaqar, Filimunsitu, Siñurninchiqpi kriyiq masimkimpaq riqsiwachpaqa, chumaqta ch'ayachiy Unisimuta, nuqata ch'ayachiwangimanchina. 18 Imampi dañachichuchqa kamptinqa, ichu dibirachuchqa kamptinqa, nuqata kubraway. 19 Nuqam kay partisituta iskibrini kimkiy mamkiywan: Nuqa Pablum pagarachqallki Unisimu dibirachuchqanda, nichpa. Piru chaychina iskibrichuchpaqam, mana yuyachillkichu chay bidallkimpaq dibirawachqallkimpaq. (Chaqa nuqarallkum qamqa Jisumkristumpi kriyichpa, wachamkachqa kangi.) 20 Mayñ, kriyiq masita, Jisumkristumpi kriyichpaqar, kay faburta rurawachpa, kunswilaway. 21 Kay kartatam iskibrillki yuyamkuchpa: Ringim kasuwaq, nichpa. Chaqa yuyamkunim: Chay mañachuchqaymandaqam achwan masta ringi yanampawaq, nichpa. 22 Pusadaytampis siguray. Chaqa ancham yuyamkunimpis: Nuqampaq qamkuna mañamkumptimkim, Tayta Dyusqa rin yanampawaq, kay karsilmanda lluqchichpa, chamunaypaq rimkachuq, nichpa. 23 Masitanchiq Impafraspismi nampallkuchungi. Paypismi Siñurninchiq Jisumkristuta kasuchqanrallku prisu masiy kidachqa. 24 Markus, Aristarku, Dimas, Lumkasmi tumkuy imampi yanampawanllampa. Pallkunampismi qamta nampallkuchungillampa. 25 Siñurninchiq Jisumkristu qamkunata yanampachunqa. (Chaytallam iskibrillki.) Chaychina kanqa.
1 Tayta Dyusqam unay tyimpumkunampiqa paypaq rimaqkunawan chay unay agwilunchiqkunata kutin kutin yach?achirqan suq partita, suq partita. 2 Piru kay ultimu tyimpumkunampiqam Churin Jisumkristuwanna ancha allita yach?achiwachqa kanchiq. Chaqa chay Churinwanmi kay pachampi syilumpi tumkuy ima kaqta rurarqan. Chaymi Tayta Dyusqa Churin Jisumkristuta numbrarqan, tumkuy imampa dwiñun kanambaq. 3 Chaychinam Jisumkristuqa Tayta Dyuschinalla kachpa, nuqanchiqkunata rimkachiwanchiq Tayta Dyus ancha allin, ancha pudirniyuq kachqanda. Kanan Jisumkristu ancha pudirniyuq kachpam, rimachpalla, tumkuy ima kaqta kwidan, ama chinganambaq. Payqam kay pachaman chamuchpa, wañurqan, yumbay uchanchiqmanda pirdunawananchiq. Chaymandaqam kawsamuchpa, syiluman kutichpa, Tayta Dyuspa allin ladumbi tiyarqan, tumkuy imata kamachinambaq. 4 Jisumkristu Tayta Dyuspa Churin kachpam, yumbay anjilkunamanda masta balin. Chaymi Tayta Dyusqa payta numbrachqa, yumbaymanda mas kamachimkuq kanambaq. 5 Chaqa Tayta Dyusqam mana nima tyimpu ni suq anjilta Santu Librumbi nirqanchu: Qamqam Churiy kangi; nuqam mirachuchqa kani, nichpaqa. Manam ni suq anjilpaq nirqambischu: Nuqaqam paypa taytan rini kaq. Payqam nuqampa churiy rin kaq, nichpaqa. 6 Piru Tayta Dyusqa sampalan Churinda kay munduman kach?amuchpaqam, yumbay anjilningunata kamachirqan: Kay Churiyta adurayllampa, nichpa. 7 Chay anjilningunampaqmi kaychina nirqan: Anjilnillkunaqam wayrachina, lumyallkaq ninachina nuqata kasuwanllampa, nichpa. 8 Piru Tayta Dyusqam sampalan Churindaqa nirqan: Dyus, chay kamachimkunallki tyimpuqam mana nunka rinchu uchyamkaq. Achwanmi tumkuy tyimpu kamachimkuchpa, ancha allita ringi jusgaq. 9 Chaqa qamqam ancha kuchimkungi, suqkuna allita ruramptinllampa. Piru manam nimatampis munangichu, maluta rurananllampa. Chaymi nuqa Tayta Dyusnimki qamta kuchichichuchqa kani maski yumbay yanasullkimanda (yanasallkimanda), nichpa. 10 Dyuspa Santu Librumbiqam Churimbaqqa nirqambis: Siñursitu, qallariypi manaraq nimampis kamptinmi, qam mamkimkiwan kay munduta, syiluta rurarqallki. 11 Piru chay syilu, kay pacham, tumkuy imandin suq trampuchina rinllampa mawkayaq. Kanan suq diyam limpu rinllampa uchyamkaq. Piru qamqam mana nunka ringichu uchyamkaq. 12 Chaychina challkuna mawkayamptinqam, qamqa suq mawka mudanatachina dublachpa, ringi kambyaq, muchuq syilu, muchuq pacha kanambaq. Piru qamqam mana nunka ringichu kambyamkaq, ni nunka ringichu wañuq, nichpa. 13 Kanan Tayta Dyusqam Churindalla nirqan: Chamuy; allin laduypi tiyay, ch?iqnichuqkunata binsichpa, qamba ch?amkimkimpa waranman runallkaman, allita kasuchunanllampa, nichpa. Chaqa manam ni suq anjilta chaychinaqa nirqanchu. 14 ¿Imachinataq chay anjilkunaqa? Pallkunaqam ispiritumkuna kachpa wayrachina. Tayta Dyusta adurachpam, payta kasunllampa. Kanan Tayta Dyusqam chay anjilningunata kach?amun, pay wachanambaq kaqkunata yanampananllampa.
1 Yumbay challkunata Jisumkristumpaq yach?amkuchpaqar, ancha allita kasuchunllampa. Kwidawkich achlamp achlamp Siñurninchiqmanda amkramkanchiqmanllampa. 2 Unay tyimpumkunampim Tayta Dyusqa anjilningunata kach?amurqan, pay nichqangunata agwilunchiqkunata yach?achinanllampa. Chaymandaqam suq runa ichu suq warmi Dyus chay nichqanda mana kasumptinqa, allita jusgachpa, kastigarqanllampa. 3 Chayri Dyus munamptin wachawayninchiqtaqa, ama disprisyachunchu. Piru ancha allin Wachadurninchiqta disprisyachpaqam, mana atinchiqllampachu wachamkayta kastigumandaqa. Chaqa puntatam kimkin Jisumkristu chumaq nutisyanda yach?achimkurqan. Chaymandaqam chay yach?amkuqningunaqa nuqanchiqkunata chay chumaq nutisyanda yach?achiwarqanchiq, Jisumkristu uchanchiqmanda wachawananchiq. 4 Tayta Dyusmi pay munachqanchina yumbay yach?achimkuqninda ancha yanamparqan, achka laya manchaypaq siñamkunata, milagrumkunata ruranambaqllampa. Paypi yuyamkuqkunatam Santu Ispiritunda quwachqa kanchiq, chay yach?achimkuqkunata uyachpa, yach?ananchiq: Dyus nichqandam allimpta yach?achiwallkanchiq, nichpa. 5 Tayta Dyusqam anjilningunataqa mana nirqanchu: Muchuq mundumpim ringillampa kamachimkuq, nichpaqa. 6 Achwanmi Dyuspa Santu Librumbi suq runa payta nin: Tayta Dyusitu, nuqallkuna runamkunaqam mana nimampaq balinillampachu. ¿Imampaqtaq nuqallkunata yuyawachpa llamkimpawangi? ¿Imampaqtaq balin kuyawachpa, nuqallkunata yanampawanallki? 7 Chaqa achla tyimpumpaqmi anjilkunamanda minus pudirniyuqta runamkunataqa rurawarqallki. Piru pudirniyuq gubyirnutachinam nuqallkunataqa rurawarqallki, tumkuy ima rurachqallkita kamachinayllampa. 8 Chaqa tumkuy imatam rurachqa kangi, runamkunata, warmimkunata kasunanllampa, nichpa. Chaychinam Tayta Dyusqa runamkunata rurawarqanchiq, tumkuy ima rurachqanda kamachinanchiqpaq. Piru kay tyimpumpiqam chay tumkuy ima rurachqanqa manaraq allitaqa kasunchu runamkunataqa. 9 Piru Jisumkristutam rimkachqallampa kanchiq. Chaqa Tayta Dyusqam ancha kuyawaqninchiq, munarqan Jisumkristu wañunambaq, yumbay uchanchiqmanda wachawananchiq. Chaymi Jisumkristuta kay pachaman kach?amuchpa, achla tyimpumpaq anjilkunamanda minus pudirniyuqta rurarqan. Chaymandaqam ancha padisichpa wañuchqanrallku, kananqa Tayta Dyusqa ancha llimpyaq pudirniyuqta rurachqa, tumkuy imampa kamachimkuqnin kanambaq. 10 Chaqa Tayta Dyusmi tumkuy imamkunata rurachpa kwidallkan, paytalla kasuchpa, kuchichinanllampa. Kanan payqam munan, yumbay wambranguna paywan luryampi chumaqta kamachimkunanchiq. Chaymi dijarqan Churin Jisumkristuta, ancha padisichpa, tumkuy imata kumplichpa, wachawananchiq. Chaychina padisichpam, Tayta Dyusmanda yach?amkurqan, ancha allin Siñurninchiq kanambaq. 11 Chaqa Jisumkristu yumbay uchanchiqmanda pirdunawamptinchiqmi, manana uchayuqchu kachpa, nuqanchiqpis Dyuspa wambrangunana kanchiqllampa. Chaymi Jisumkristuqa mana panqamkunchu niwananchiq masitamkuna, panisitamkuna, nichpaqa. 12 Chaymi Dyuspa Santu Librumbi Jisumkristu Tayta Dyusta nin: Taytitu, nuqampi yumbay yuyamkuqkunatam yach?achichaq ancha allin kachqallkita. Pallkunawan tandanamkuchpam, kantachpa alabachqallki, nichpa. 13 Chaymandaqam nimbis: Nuqaqam Tayta Dyuspi ancha rini yuyamkuq, nichpa. Chaymandaqam nimbis: Kaypim kani Tayta Dyuspa yumbay wambrangunawan. Chaqa pallkunataqam quwachqa, wambrallkuna kanambaq, nichpa. 14 Jisumkristuqam Dyus kachpampis, nuqanchiq laya kwirpuyuq, yawarniyuq runa karqan. Chaychina nuqanchiqchina kachpam, atirqan wañuyta, chay kamachimkuq wanchimkuq dyabluta chingachinambaq, nuqanchiqkunampis Dyuspa wambranguna kananchiq. 15 Chaychinam payqa dyabluta binsichpa wachawarqanchiq, amana tumkuy bidanchiqpi wañuyta manchananchiq. Chaqa wañuyta manchachpaqam, randichqa kriyadumkunachina kawsarqanchiq. 16 Allibmi Jisumkristuqa mana chamurqanchu kay munduman, anjilkunata yanampaqqa. Achwanmi chamurqanqa nuqallkuna Abrajamba karu willkangunata yanampawaq. 17 Chaymi ancha nisisaryu karqan, Jisumkristu tumkuy imampi runa masingunachina kanambaq, Dyuspa ñawpambi faburninchiqta rimanambaq. Chaymi nuqanchiqchina kachpa, ancha allin llamkimpawaqninchiq mas kamachimkuq kurachina kachpa, suq ufrindachqa animalchina wañurqan, yumbay uchanchiqmanda pirdunawananchiq. 18 Chaychina Jisumkristu kwirpuyuq runa kamptinmi, dyablu ancha munachpa uchata rurachiytampis, mana atirqanchu. Piru Jisumkristutam ancha padisichirqan. Chaymi Jisumkristuqa ancha allita yach?an: Dyablum ancha munan runamkunata tyintayta, nichpa. Chaymi Jisumkristuqa ancha allita atin yanampawayninchiqta, uchata ama rurananchiq.
1 Kristumpi kriyiq masitamkuna, Tayta Dyusmi qamkunatampis amkrachuchqa, paypa wambranguna kanallkillampa. Chayri allita yuyayllampa Siñurninchiq Jisumkristumpaq. Chaqa Taytan Dyusmi paytaqa kach?amurqan, rrimplasun rimanambaq, mas kamachimkuq kuranchiq kanambaq. 2 Jisumkristuqam chay unay Muysischina Tayta Dyusta ancha allita kasurqan. Manchu Dyuspa amkrachqan nasyunnin isrraylinumkunata Muysisqa allita yanamparqan. Chaychinallam Jisumkristumpis Dyuspi yumbay kriyiqkunata allita yanampawanchiq. 3 Piru Muysismandaqam Jisumkristu masta balin. Chaqa suq wasita ruraqmi chay wasimandaqa masta balin, ¿manachu? Kanan Dyuspi yumbay kriyiqkunaqam suq atun wasichina kanchiqllampa. Piru chay wasita ruraqqam yumbayninchiqmanda masta balin. Chaychinallam Tayta Dyuspis yumbay kusaskunata rurachqanrallku, yumbaymanda masta balin. 5 Kanan Muysisqam Tayta Dyuspa allin yanampamkuqnin kachpa, yumbay llaqta masin isrraylinumkunata ancha allita yach?achirqan: Achka watamkuna pasamptinmi, Tayta Dyusqa kaychina rin niwaqninchiq, nichpa. Chaqa chay isrraylinumkunam Dyuspa wasinchina karqanllampa. 6 Piru Jisumkristuqam, Tayta Dyuspa ancha allin Churin kachpa, yumbay nuqanchiqta allita kwidawanchiqllampa. Chaymi kuchimkuchpa, mana challkuq paypi yuyamkuchpaqa, paypa wasinchinana kanchiqllampa. 7 Chayri Tayta Dyuspa wasinchina kachpaqa, payta kasuchunllampa. Chaqa Dyuspa Santu Librumbim Santu Ispiritun kaychina niwanchiqllampa: Tayta Dyus nichqanda kanan uyachpaqar, 8 ama rumi chunquyuq kachpa, ama disprisyayllampachu. Amar chay unay runamkunachinaqa kayllampachu. Chaqa pallkunaqam chuncha lugarkunampi kachpa, mana munachpa kasuyta, Dyusta mallimparqanllampa, yach?ananllampa: ¿Imatam rin ruraq? nichpa. Chaymi Tayta Dyusqa nirqan: 40 watamkunampi rurachqayta rimkachpampismi, mana munarqanllampachu kasuwayta. 10 Chaymi pallkunawan piñamkuchpa, nirqay: Pallkunaqam chunqumbi disprisyawachpa, mana munanllampachu kasuwayta, nichpa. 11 Chaymi pallkunawan piñamkuchpa, jurachpa, nirqay: Pallkunaqam mana nunka rinllampachu yallkuq samana lugarniymanqa , nichpa. 12 Chayri kriyiq masitamkuna, ama mana kriyiq rumi chunquyuqqa kayllampachu. Achwanri kwidamkayllampa, Tayta Dyus kawsaqmanda ama amkramkanallkillampa. 13 Chayri tumkuy diyamkuna suqwan suqwan animachinamkuy, Dyusta allita kasunallkillampa wañunallkimkaman, ichu Jisumkristu chamunan diyamkaman. Kwidawkich, dyabluqa ingañachungiman, uchamkunata rurachpa, Dyusta kuntranallkillampa. 14 Piru Jisumkristumpi kriyichqanchiq diyamandampacha mana challkuq paypi yuyamkuchpa wañunanchiq diyamkaman, paypa kumpañirunguna kanchiqllampa. 15 Chaymi Dyuspa Santu Librumbi niwanchiqllampa: Dyus nichqanda kananqa uyachpar, allita kasuyllampa. Amar rumi chunquyuqkunaqa kayllampachu, Dyusta chay mana kasuq runamkunachinaqa, nichpa. 16 Mayñ, ¿pimkunam Dyus nichqanda yach?achpa, mana munarqanllampachu kasuytaqa? Ijimptu nasyunmanda Muysis surquchqan runamkuna, warmimkunam mana munarqanchu kasuyta. 17 ¿Pimkunawanmi Tayta Dyusqa 40 watas tumkuyta ancha piñamkurqanqa? Piñamkurqanqam chay Ijimptu nasyunmanda Muysis surquchqan uchata ruraqkunawan. Chaymi pallkunaqa chay chuncha lugarkunampi wañurqanllampa. 18 ¿Pimkunatam Tayta Dyusqa jurachpa, nirqan: Manam ringillampachu yallkuq samana lugarniymanqa, nichpaqa? Chaychinaqam nirqan chay mana munaq kasuqkunata. 19 Chaqa pallkunaqam Dyuspi mana kriyichpa, mana atirqanllampachu samana lugarninman yallkuytaqa.
1 Kanan Tayta Dyusmi nuqanchiqkunata ufrisiwachqa kanchiq, chay samana lugarninman yallkunanchiqpaq, paywan kuchimkuchpa kawsananchiq. Chaychina ufrisiwamptinchiqqar, allita kwidamkachunllampa, paymanda ama amkramkananchiq. 2 Chaqa chay unay runamkunatachinam Tayta Dyusqa yumbay nuqanchiqtampis ufrisiwanchiq, uchanchiqmanda wachawananchiq. Piru chay unay runamkunaqam Dyus nichqanda yach'achpampis, paypiqa mana yuyamkurqanllampachu. Chaymi mana atirqanllampachu yallkuyta Dyuspa samana lugarninmanqa. 3 Chaqa Tayta Dyusmi Santu Librumbi nirqan: Ancha piñamkuchpa, jurachpam, chay mana munaq kasuwaqkunataqa nirqay: Manam ringillampachu yallkuq samana lugarniyman, nichpa. Piru nuqanchiqkuna Jisumkristumpi allimpta kriyichpaqam, Tayta Dyuspa samana lugarninman rinchiqllampa yallkuq. Chaqa Tayta Dyus yumbay rurachqangunaqam allichaduna kachqa, kay munduta rurachqan diyamandampacha. 4 Chaymi Dyuspa Santu Librumbi samana diyampaq nin: Tayta Dyusmi sayis diyaspi tumkuy imata rurachpa, simptimu diyampiqa samarqanna. (Mananam sigirqanchu muchuq kusaskunata rurachpaqa), nichpa. 5 Suq partimpimpismi Dyuspa Santu Librumbiqa nin: Chay mana kriyiqkunaqam mana yallkunqachu samana lugarniymanqa, nichpa. 6 Tayta Dyusmi munan, samana lugarninman suqkuna yallkunanllampa. Piru chay unay runamkunaqam Tayta Dyus ufrisichqanda yach'achpampis, mana kasurqanllampachu paytaqa. Chaymi mana atirqanllampachu chay samana lugarninman yallkuytaqa. 7 Chaymi pallkuna mana yallkumptinllampaqa, Tayta Dyusqa suq bwiltata ufrisirichqa runamkunata samachiyta: Kananri uyawayllampa, nichpa. Chaymi achka watamkuna pasamptin, unay gubyirnu Dabidtampis kaychina iskibrichirqan: Kananqar Tayta Dyus nichqanda uyachpa, ama rumi chunquyuqqa kayllampachu, nichpa. 8 Chaymi yach'anchiq: Chay unay kamachimkuq Juswita sigiqkunam Dyuspa samana lugarninman mana yallkurqanllampachu, nichpa. Chaqa yallkumptinllampaqam, Tayta Dyusqa suq tyimpumanda Dabidtaqa mana iskibrichinandachu, Dyuspa samana lugarninman yallkunanllampaqa. 9 Chaychina suq bwiltata ufrisimptinmi, yach'anchiqllampa: Dyuspi kriyichpam, atinchiqllampa yallkuyta samana lugarninman, nichpa. 10 Chaqa Tayta Dyusqam tumkuy imata rurachpaqa, kuchimkuchpa samarqan. Chaychinallam runa, warmi, Tayta Dyuspi allita yuyamkuchpaqa, atinna samayta. 11 Chayri atichqanchiqta rurachun, Dyuspi allita yuyamkuchpa, samananchiqllampa, ama kusasnachpachu chay unay mana kriyiqkunachinaqa. 12 Chaqa Tayta Dyus nichqanqam kawsaq. Chaymi ancha pudirniyuq kachpa, ancha allita intyindichiwanchiq: Chunqullkimpim kaychina yuyallkangi; kallkunatam munallkangi, nichpa. Manchu suq atun kuchillu ichkandin filun ancha allita filudu kamptinqa, das kuchuwanchiq. Chaqa yallkunmi ñudunchiqkunaman, ñutqunchiqkunaman ch'ayachtin. Piru Dyus nichqanqam mas das yallkun chunqunchiqman, almanchiqman, ispiritunchiqman ch'ayachtin. 13 Chaqa Tayta Dyusqam tumkuy imata rurachqa. Yumbaytam allita riqsin. Chaymi paymandaqa mana nimatampis atinchiqchu pamkamkuyta. Kanan paytam manyaqlla rinchiqllampa dimklaraq alli, mana alli rurachqanchiqpaq. 14 Tayta Dyuspa Churin Jisumkristu wañuchqanmanda kawsamuchpam, mas kamachimkuq kuranchiq kachpa, syiluman yallkurqan, Tayta Dyuswan tiyanambaq. Chayri pay niwachqanchiqpi kriyichpa, pay munachqanda mana challkuq rurachpa, kawsachunllampa. 15 Dyabluqam ancha munarqan uchata rurachiyta Jisumkristuta nuqanchiqtachina. Piru payqam mana nima uchata rurarqanchu. Chaychina mallimpadu kachpam, ancha allita yach'an: Chay runamkuna, warmimkunam ancha dibilkuna, nichpa. Chaymi payqa, mas kamachimkuq kuranchiq kachpa, ancha llamkimpawaqninchiq yanampawanchiq. 16 Chayri ama nimatampis manchachpachu, Dyuspi masta yuyamkuchpa, payman mañamkuchunllampa. Chaqa payqam ancha allin. Ancha kuyawanchiq. Chaymi ima faltawamptinchiq, llamkimpawaqninchiq rin yanampawaqninchiq.
1 Tayta Dyusqam isrraylinu kuramkunamanda suqtalla amkran, mas kamachimkuq kura kanambaq. Chay kuram Dyusman mañamkun runa masingunampaq. Ampanmi Dyuspa pata altarninman chay runamkunampa achka laya ufrindangunata, rrigalungunata wamkin animalningunatampis. Chay animalkunata wanchichpam, Dyuspa pata altarnimbi rumpachin, Tayta Dyus chay kurampa runa masingunata uchangunamanda pirdunanambaq. 2 Chay kuraqam suq runalla kachpa, Dyus tumkuy ima nichqandaqa mana kasunchu. Chaymi chay mana yach'aq runa masinguna mana allita ruramptinllampa, payqa atin llamkimpayta. 3 Chaqa paypismi suq uchayuq. Chaymi Tayta Dyuspa pata altarninman suq animalta ampachpa wanchin, Tayta Dyus chay kurampa uchangunata puntata pirdunanambaq. Chaymandaqam suq animalkunata wanchin, runa masingunatampis Tayta Dyus pirdunanambaq. 4 Tayta Dyusllam suq runata atin numbrayta, mas kamachimkuq kura kanambaq. Suq runa kimkinllaqam mana atinchu numbramkayta. Puntatam Dyusqa chay unay Arunda amkrarqan. Chaychinallam yumbay kamachimkuq kuramkunata amkrachqa. 5 Chaychinam Jisumkristu kimkimbis mana numbramkarqanchu, mas kamachimkuq kura kanambaqqa. Achwanmi Tayta Dyus paytaqa numbrarqan, kamachimkuq kura kanambaqqa. Chaymi Dyusqa Santu Librumbi Churinda kaychina nin: Qamqam Churiy kangi. Chaqa nuqam mirachuchqa kani, nichpa. 6 Suq partimpimpismi kaychina Churinda nin: Qamqam tumkuy tyimpumpaq kura kangi, chay unay kura Milkisidimkchina, nichpa. 7 Manchu Jisumkristu kay pachampi kawsachpaqa, ancha jwirtita mañamkuchpa, waqachpa, Tayta Dyusta rrugarqan, ama wañunambaq. Chaqa Tayta Dyusqam ancha pudirniyuq kachpa, atinanda wachayta. Kanan Jisumkristu ancha kasumkuq kamptinmi, Tayta Dyusqa payta uyachpa, ancha yanamparqan, tumkuy imata ñamkachpampis, agwantanambaq. 8 Chaychina Jisumkristu, Dyuspa Churin kachpampismi, kay pachaman chamuchpa padisichpa, masta yach'amkurqan Taytanda kasuyta. 9 Chaychina allita kasuchpaqam, payta yumbay kasuqkunata atinna uchanchiqkunamanda pirdunawayninchiqta, tumkuy tyimpu paywan kawsananchiqllampa. 10 Chaymi Tayta Dyusqa payta numbrarqan, mana wañuq mas kamachimkuq kuranchiq kanambaq, chay unay kura Milkisidimk kachqanchina. 11 Ancharaq munani masta nichuyllampata Jisumkristumpaq. Piru mana munamptimkillampa yach'amkuytam, mana atinichu qamkunata allita intyindichichuyta. 12 Chaqa qamkuna unaymandampacha Jisumkristumpi kriyichpam, ancha balinallkita, suqkunatana yach'achinallki. Piru mastaraq munangillampa, suq kutinda qamkunata yach'achichurinay Dyuspa Santu Librunmanda chay mana trabajus partimkunatalla. Chaymi chay iti ñuñullkaq manaraq mimkuqchina kangillampa. 13 Kanan chay itisituchina kachpaqam, manaraq allitachu intyindingillampa: Dyusmi munan kaychina kawsananchiq, nichpaqa. 14 Piru yach'ayniyuqkuna kachpaqam, Dyuspa Santu Librunda ancha allita atingimanllampa intyindiyta, yach'anallkillampa: Imam alli, imam mana allichu, nichpa.
1 Jisumkristumpa mana trabajus palabrangunata yach'amkuchpaqar, chay mas trabajus palabrangunatampis yach'amkuchunllampa, yach'ayniyuq mayurkunachina kananchiqllampa. Amanar chay punta yach'amkuchqanchiqtallaqa kutin kutin yach'amkurichunchu: Kaychinar uchanchiqkunata dijachpa, Dyuspi kriyichun, wachadu kananchiq, ama chingananchiq, nichpa. (Chaqa wachadunam kanchiqllampa. Mananam nisisaryuchu yach'amkurinanchiq wachamkaytaqa.) 2 Yach'amkuchqampismi kanchiqllampa: Kaychinam kriyiq masinchiqkunata chutichinchiq ichu pallkunampa umanman mamkinchiqkunata kaychina ruranchiq, pallkunampaq Dyusman mañamkunanchiq nichpa. Yach'amkuchqanam kanchiqpis: Wañuqkunam rin kawsamuq. Tayta Dyusmi rin jusgaq yumbay runamkunata, warmimkunata, tumkuy tyimpu kawsananllampa ichu chingananllampa, nichpa. 3 Chayri Dyuspa Santu Librunmanda muchuq kusaskunatana yach'amkuchunllampa, Tayta Dyus yanampawamptinchiq. 4 Piru wamkinguna Jisumkristumanda amkramkamptinqam, ancha trabajus wachadu kanambaqllampa. Chaqa puntatam Dyusmanda tumkuy imata ch'askirqanllampa. Paymanda chumaq dumktrinanda yach'amkuchpam, michawanchina purirqanllampa. Chaymi Dyusmanda suq chumaq rrigalutachina ch'askirqanllampa. Kriyiq masinchiqkunawanmi Dyuspa Santu Ispiritunda ch'askirqanllampa. 5 Dyus nichqanda allita uyachpam, intyindirqanllampa: Ancha michki mimkunachinam, nichpa. Pallkunaqam yach'amkurqambis: Siñurninchiqmi ancha pudirniyuq kachpa, suq bidampi chumaqta rin kamachiwaqninchiq, nichpa. 6 Chaychina yumbay chay chumaq kaqkunata yach'achpampismi, Jisumkristumanda amkramkachqallampa. Mananam munanllampachu paypi kriyiytaqa. Chaychina Dyuspa Churinda disprisyachpaqam, pallkunaqa muchuqmanda kruspi klaballkanmanchina. Yumbaypa ñawpambim payta asimpallkanmanchina. Chaymi manana pimpis pallkunataqa atinchu yach'achiriyta, Jisumkristumpi kriyirinanllampaqa. 7 Chay layamkunaqam mana baliq allpachina. Tayta Dyus chumaqta tamyachimptimbismi, chay mana baliq allpampiqa kachamkuna, mana baliq qawamkunalla wiñan, ¿manachu? Chaychinallam Dyusta chay disprisyaqkunaqa. Chaymi Tayta Dyusqa pallkunataqa kundinachpa, rin rumpachiq. Piru suqkunaqam ancha allin allpachina. Chaqa tamya nuyuchimptinmi, chay allpampiqa ancha allin tarpudumkuna wiñan. Chaymi Tayta Dyusqa chay laya kriyiqkunataqa ancha rin yanampaq. 9 Kuyachqay kriyiq masitamkuna, chaychina disprisyaqkunampaq nichuchpampismi, qamkunampaq yach'anillampa: Jisumkristumpim allita kriyingillampa. Chaymi Tayta Dyusqa wachachuchpa, ancha rin yanampachuqllampa, nichpa. 10 Qamkunaqam Dyusta kuyachpa, kriyiq masinchiqkunata yanampachqa kangi. Kanangamanmi pallkunataqa yanampallkangillampa. Chaymi Tayta Dyusqa ancha allin kachpa, mana nunka rinchu qunqachuqllampa. 11 Piru ancham munani, yumbay qamkuna Dyuspaq trabajanallki wañunallki diyamkaman. Chaychina kawsachpaqam, atingillampa yach'ayta: Tayta Dyusmi rin kumpliq tumkuy ima ufrisiwachqanda, nichpa. 12 Piru manam munanichu qallamkunampaq timkramkanallkiqa. Achwanri allin kriyiq masinchiqkunachina Dyusta mana challkuq kasuyllampa, pallkunachina ch'askinallkillampa Dyus tumkuy ima ufrisichuchqanda. 13 Chaqa Tayta Dyusmi punta agwilunchiq Abrajanda jurachpa, ufrisirqan yanampanambaq. Kanan mana ni pimpis mas baliq kamptinmi, Dyusqa kimkin chutinwan chaychina jurarqan. 14 Chaymi Abrajandaqa kaychina ufrisirqan: Qamtam allimpta rini yanampachuq, ancha achka karu willkayuq kanallkimpaq, nichpa. 15 Chaychina Tayta Dyus nimptinmi, Abrajanqa mana challkuq chuyarqan chay ufrisichqanda. Chaymi Tayta Dyusqa yumbay nichqanda kumplichpa, ancha allita yanamparqan. 16 Chaqa runamkuna imampaq jurachpaqam, suq mas baliqpa chutimbi jurachpa nin: Tayta Dyuspa ñawpambim jurallki yach'anallki: Manam llullamkullkanichu, nichpa. Chaychina nimptinraqmi, uyaqkunaqa kriyinqa, ama masta anyanamkunambaq. 17 Chaychinallam Tayta Dyuspis Abrajamba karu willkangunata ancha munarqan allita intyindichiyta: Yumbay chay ufrisichuchqaytam rini kumpliq, nichpa. Chaymi jurarqan kimkin chutinwan, yumbay chay ufrisichqanda kumplinambaq. 18 Chaychinam nuqanchiqkunampis allita yach'anchiq: Tayta Dyusmi mana nimata llullamkunchu, nichpa. Chaymi jurachpa imampaqpis, chay ufrisiwamptinchiq ancha allita rin kumpliq. Chaymi kuchimkuchpa, mana nimatampis manchachpachu, kawsanchiqllampa. 19 Manchu yamkumpi puriq barkumkunataqa llachaq rumimkunata waskamkunawan watanllampa sujitanambaq, wayra ama suq laduman ampanambaq. Chaychinallam Jisumkristumpi allimpta kriyimptinchiqqa, payqa ancha yanampawanchiq, ama pimpis paymanda atinambaq amkrawayninchiqta. Chaqa Dyuspa kamachimkunan trunumbiqam wataduchina kanchiqllampa. 20 Jisumkristuqam chay santu trunumpa kwartunman yallkurqan, faburninchiqta rimanambaq. Chaychinam payqa nuqanchiqkunampa mas kamachimkuq kuranchiq tumkuy tyimpumpaq rin kaq. Paypa kargunqam mana nunka rinchu uchyamkaq. Milkisidimkpa kargunchinam rin kaq.
1 Unay tyimpumpi chay Milkisidimkmi Salim llaqtampa gubyirnun karqan. Paymi Tayta Dyuspa kurambis karqan. (Chay tyimpumpim wamkin llaqtamkunampa gubyirnunguna suldadundin chamuchpa, Abrajamba subrinun Lutta ayllundinda piskachpa, amparqanllampa.) Chaymandaqam Abrajanqa kriyadungunawan sigichpa, chay gubyirnumkunata binsichpa, achka kusasningunata quch'irqan. Chaymandaqam chay Salim llaqtata pasallkamptinna, chay kura Milkisidimkqa lluqchichpa, Abrajanda tinguchpa, Tayta Dyusman mañamkurqan, Abrajanda yanampanambaq. 2 Chaymi Abrajanqa chay quch'ichqan kusaskunamanda kada dyis partimanda, suq partita amkrachpa, dyismunda qurqan chay kura Milkisidimkta. Chay chuti Milkisidimkmi rimaynimbiqa munan niyta Allin kamachimkuq, nichpa. Chay Salimqam rimaynimbiqa munan niyta: Chumaqta kawsaq, nichpa. Chaymi Salim llaqtampa kamachimkuqnin Milkisidimkqa munan niyta: Chumaq kawsaqkunampa allin kamachimkuqnin, nichpa. 3 Manam ni pimpis yach'anchiqchu: Pimkunam karqan chay Milkisidimkpa taytan, maman, agwilunguna, nichpaqa. Chaqa Dyuspa Santu Librumbiqam mana ni suq partimpi Milkisidimk nasichqambaq ni wañuchqambaq niwanchiqchu. Chaymi yuyachiwanchiq Tayta Dyuspa Churin Jisumkristumpaq. Chaqa Jisumkristumpa kura kargumbismi mana nunka rinchu uchyamkaq. 4 Ancha yuyachunllampa: Chay Milkisidimkmi ancha baliq kamachimkuq karqan maski Abrajanmanda, nichpa. Chaqa chay ancha baliq agwilunchiq Abrajanmi chay quch'ichqanmanda dyismunda qurqan chay Milkisidimkta. 5 (Achka watamkunamandam chay Abrajamba willkamba churin Libi nasirqan. Chaymandaqam mas achka watamkunamanda) Muysisqa liyningunata quchpa, kamachirqan: Chay Libimpa churingunamanda, willkangunamanda, karu willkangunamanda kuramkunata numbrayllampa, nichpa. Nirqambismi: Chay kuramkunaqam dirichuyuq kanqa, yumbay llaqta masingunamanda, dyismungunata ch'askinanllampa, nichpa. Chaymi chay llaqta masinguna Abrajamba karu willkanguna kachpampis, chay kuramkunata dyismunda qunllampa. 6 Piru chay kura Milkisidimkmi mana Libimpa miraynin kachpampis, yumbay kuramkunamanda mas baliq karqan. Chaqa kimkin kamachimkuq Abrajanmandam dyismunda ch'askirqan. Kanan Tayta Dyus Abrajanda ufrisichqa kamptimbis ancha yanampanambaqmi, chay Milkisidimkqa Dyusman mañamkurqan, Abrajanda bindisinambaq. 7 Chaymi allita yach'anchiqllampa: Milkisidimkmi Abrajanmandaqa mas baliq karqan, nichpa. Chaqa mayqan mas baliq runaqam Dyusman mañamkun, suqkunata bindisinambaq. 8 Libimpa karu willkanguna, wañuq kuramkunalla kachpampismi, nuqanchiqkunamanda dyis kusasninchiqmanda suqta ch'askinllampa. Piru Dyuspa Santu Librumbim chay kura Milkisidimkpaq niwanchiqllampa: Chay dyismuta ch'askiq Milkisidimkqam mana uchyamkachpachu, kawsanraq, nichpa. 9 Chaymi yach'anchiqllampa: Chay Milkisidimkmi chay Abrajanmanda yumbay mirayninmanda mas baliq. Chay punta isrraylinu kura Libimandampis mas baliqqa, nichpa. Chaqa chay Libiqam Abrajamba churimba willkan kachpa, chay Abrajanmanda minus baliq karqan. [Nuta: Chaymi yach'anchiq: Jisumkristu Milkisidimkchina kachpam, yumbay chay suq kuramkunamanda masta balin, nichpa.] 11 Manchu chay punta kura Arunqa Libimpa karu willkan karqan. Chaymandaqam yumbay kuramkunampa kamachimkuqninguna chay Arumba churinguna, willkanguna, karu willkanguna kachqallampa. Pallkunaqam Dyuspa liyningunata yach'achirqanllampa agwilunchiq isrraylinumkunata. Piru manam atirqanllampachu runamkunampa uchangunata pirdunaytaqa. Chaymi Tayta Dyusqa kach'amurqan suq laya mas baliq kurata. Payqam mana nunka wañunchu. Achwan chay kuraqam Milkisidimk kura laya. 12 Chaychina suq laya kuranchiq chamumptinmi, Taytanchiq Dyusqa suq laya liyta rurarqan. 13 Chay punta lillkunaqam kamachimkurqan, yumbay kuramkuna Libimpa karu willkanmandalla kanambaq. Piru muchuq liywanqam, Tayta Dyusqa Churin Jisumkristuta numbrachqa, mana Libimpa karu willkan kamptimbis, ancha baliq kuranchiq kanambaq. 14 Chaqa allitam yach'anchiqllampa: Siñurninchiq Jisumkristum Judampa karu willkan, nichpa. Piru Muysispa liyningunaqam mana nirqanchu: Kuramkunam Judampa karu willkanmanda rin kaq, nichpaqa. 15 Chayrallkum allita yach'anchiqllampa: Jisumkristum chay Milkisidimkchina suq laya kura, nichpa. 16 Chay suq kuramkunataqam numbrarqanllampa, Libimpa karu willkan kachqanllamparallku. Piru Jisumkristum numbradu karqan, kuranchiq kanambaq, ancha pudirniyuq mana nunka wañuq kachqanrallku. 17 Chaymi Tayta Dyusqa Santu Librumbi Churin Jisumkristuta kaychina nin: Tumkuy tyimpumpaqmi ancha baliq kamachimkuq kura kangi, chay kamachimkuq kura Milkisidimkchina, nichpa. 18 Chay punta lillkunaqam mana atirqanchu wachawayninchiqta, mana pudirniyuq kachqanrallku. Chaymi Dyusqa chingachirqan chay punta lillkunataqa. 19 Chaqa Muysispa liyningunaqam mana ni pitampis yanamparqanchu, allita kumplinambaq Dyus munachqandaqa. Piru kananqam Jisumkristu atin wachawayninchiqta, Tayta Dyuswan kawsananchiqllampa. 20 Tayta Dyusmi jurachpa niwachqa kanchiqllampa: Churiy Jisumkristum kamachimkuq kurallkillampa, nichpa. 21 Manam jurarqanchu: Libimpa karu willkangunallam kuramkuna rin kaq, nichpaqa. Piru Tayta Dyusqam jurachpa, kuranchiq Jisumkristuta librumbi kaychina nirqan: Nuqaqam jurachpa mana nunka kambyamkachpachu, nillki: Qamqam tumkuy tyimpu kura ringi kaq, chay unay kura Milkisidimkchina, nichpa. 22 Chaymi Jisumkristu nuqanchiqkunata sigurawaqninchiq niwanchiq: Tayta Dyusmi chay punta tratunmanda suq mas allin tratuta qamkunawan rurachqa, nichpa. 23 Chaqa chay unay kuramkunaqam wañurqanllampa. Chaymi suqta suqta numbrarqanllampa, chay wañuchqa kurampa rrimplasun kanambaq. Chaychina wañuq kuramkuna kachpam, mana atirqanllampachu sigiyta kamachimkuchpaqa. 24 Piru Jisumkristu manana nunka wañuq kachpam, kura kargundaqa mana qunchu suqtaqa. 25 Chaymi nuqanchiqkuna paypi kriyimptinchiqqa, wachawaqninchiq, alliyachiwanchiq Taytan Dyuswan, tumkuy tyimpu paywan kawsananchiqllampa. Chaqa mana nunka wañuq kachpam, tumkuy tyimpu Tayta Dyusta mana challkuq rrugallkan, nuqanchiqkunata yanampawananchiq. 26 Chaychina kachpam, Jisumkristuqa ancha allin mas kamachimkuq kuranchiq. Chaqa payqam ancha allin, ancha santu. Manam nima uchayuqchu. Chaymi Tayta Dyusqa syiluman amparqan, paywan kawsanambaq. Mananam kawsanchu uchayuq runamkunawanqa. 27 Chaymi Jisumkristuqa mana chay unay kamachimkuq kuramkunachinachu. Chaqa pallkunaqam tumkuy diya achka animalkunata wanchichpa, qurqanllampa Tayta Dyusta, pallkuna kimkinda uchangunamanda pirdunanambaq. Chaymandaqam chay wamkin animalkunataqa wanchichpa, Dyusta qurqanllampa, llaqta masingunatampis pirdunanambaq. Piru Jisumkristuqam suq kutindalla kruspi wañurqan, pay kimkin ufrindanchiq kanambaq, Tayta Dyus tumkuy tyimpumpaq pirdunawananchiq. 28 Muysispa liyningunaqam kamachimkurqan, Libimpa karu willkanguna mas kamachimkuq kuramkuna kanambaq, mana justu kamptinllampampis. Piru chaymandaqam Tayta Dyusqa jurachpa, Churinda nirqan: Qamqam mas kamachimkuq kura kangi, mana nunka nima uchayuq kachqallkirallku. Chaychinallam tumkuy tyimpumpaq mana nima uchayuqchu ringi kaq, nichpa.
1 Allita uyawayllampa. Yumbay chay nichuchqaymandaqam kay partisitu mas alli yach'anallkillampa: Chay mas kamachimkuq kuranchiq Jisumkristum syilumpi Tayta Dyuspa allin ladumbi tiyachpa, rrugamkullkan nuqanchiqkunampaq. 2 Chaychinam Dyuspa Ancha Santisimu Kwartumbi Jisumkristuqa kamachimkuq isrraylinu kurachina trabajallkan. Chay lijitimu Ancha Santisimu Kwartutaqam Tayta Dyus kimkin syilumpi rurachqa. Manam runamkunachu rurachqaqa. 3 Yumbay mas kamachimkuq kuramkunatam numbranllampa, wanchichqa animalkunata, suq laya ufrindamkunata Dyusta qunanllampa. Chaychinam Tayta Dyusqa mas kamachimkuq kuranchiq Jisumkristutampis ubligarqan, suq ufrindata qunambaq. [Nuta: Chayrallkum Jisumkristu intrigamkarqan wañunambaq.] 4 Kanan Jisumkristuqam mana chay Libimpa karu willkanchu karqan. Chaymi kay mundumpi kachparaq, mana balinmanchu Dyuspa adurana wasimbi kuranchiq kanambaqqa. Chaqa chay Libimpa karu willkan kuramkunaqam kanraq kanangaman, Muysispa liyningunata kasuchpa, ufrindamkunata qunanllampa. [Nuta: Dyuspa Santu Librunda iskibrichqan tyimpumpiqam karqanraq Libimpa karu willkanmanda kuramkuna. Chaymi kay birsimkulumpi nin kanangaman kan kuramkuna, nichpa. Piru masdi 1900 watamkuna tumkuynam chay laya kuramkunaqam manana kachqachu.] 5 Piru syilumpim kan Dyuspa mas lijitimu adurana wasin, mas lijitimu kurambis. Chaqa kay pachampi chay atun karpamanda adurana wasiqam suq dibujuchinalla kachpa, rimkachiwanchiqllampa: Syilumpim kay laya wasi kan, nichpa. Chaymi Tayta Dyusqa chay Sinayi urqqumpi Muysista rimkachirqan suq mwistrata, chay rimkachichqandachina ruranambaq. 6 Piru muchuq kuranchiq Jisumkristum mas allita yanampawanchiq chay punta kuramkunamanda. Chaqa abugadunchiq kachpam, mas chumaqta ufrisiwaqninchiq, mas allin tratuta Dyuswan, nuqanchiqkunawan rurachqa. 7 Chay punta tratu tumkuy imampi ancha allin kamptinqam, mana suq muchuq tratutaqa ruranandachu. 8 Piru chay unay agwilunchiqkunaqam mana kasurqanllampachu Dyus nichqandaqa. Chaymi pallkunata uchayuqkunampaq riqsirqan. Chayrallkum Santu Librumbi nirqan: Suq tyimpumpim nuqaqa Isrrayilpa karu willkangunawan, Judampa karu willkangunawan suq muchuq tratuta rini ruraq. 9 Chay muchuq tratuta pallkunawan rurachpaqam, manana rinichu ruraq chay punta tratutachinaqa. Chaqa unay tyimpumpi agwilungunata Ijimptu nasyunmanda surquchpam, chay punta tratutaqa rurarqay. Piru chay tratutaqam mana kumplirqanllampachu. Chayrallkum pallkunataqa manana yanampachpachu wichumkurqani. 10 Chaymi suq muchuq tratuta rini ruraq chay Isrrayilmanda kaqkunawan. Suq diyam yuyaynimbi liynillkunata rini ruraq. Chunqunllampampi rini yanampaq, kamachimkuchqayta kasuchpa kawsananllampa. Chaymi pallkunampa Dyusnin rini kaq. Pallkunaqam wambrallkuna rinllampa kaq. 11 Chay tyimpumpim tamkchamkuna, atungunampis chunqunllampampi rinllampa riqsiwaq. Chaymi mana nisisaryuchu kanqa, ni llaqta masingunata ni ayllungunata yach'achinanllampa: Tayta Dyustar riqsiy, nichpaqa. Chaqa yumbaymi allita rinllampa riqsiwaq. 12 Kanan uchangunata pirdunachpam, chay mana alli rurachqangunata manana nimatampis rinichu yuyaq, nichpa. 13 Tayta Dyusmi nirqan: Suq muchuq tratutam rini ruraq nichpa, chay punta tratuta mana baliqpaqna riqsichqanrallku. Chaymi chay punta tratuqa dasna rin uchyamkaq.
1 Tayta Dyusmi unay tyimpumpi chay punta tratuta rurachpa kamachirqan, pay munachqanchina chay karpamanda adurana wasimpi adurananllampa. 2 Kanan chay adurana wasinqam ichkay kwartuyuq karqan. Chay ichkay kwartumkunaqam suq kurtinawan amkradu karqan. Chay punta kwartumpiqam suq kandiliru syiti rimkrayuq karqan. Chay kwartumpiqam suq masampis karqan. Chay masampa sawambiqam Dyusta quchqan ufrinda tandamkuna karqan. Chay punta kwartuqam Santu Kwartu chutiq. 3 Chay kwartumpa kurtinamba umku ladumbim suq kwartu karqan. Chay kwartuqam chutiq: Ancha Santisimu Kwartu, nichpa. 4 Chay kwartumpa kurtinamba ladumbim suq tamkcha pata altar uruwan llutadu karqan. Chaypim rumpachiqllampa insinsyuta. Chay kwartumpim Dyuspa Santu Kajunnin karqan. Chay kajumba sawan umkunmi uruwan llutadu karqan. Chay kajumba umkumbim suq jarra urumanda karqan. Chay jarrampa umkumbiqam waqaycharqanllampa Dyus kach'amuchqan manaya mimkunata. Chay kajumbiqam karqambis chay punta kura Arumba pallpamuchqa burdunnin. Chay kajumbillam karqambis chay ichkay rumi tablachina. Challkunampim Dyuspa Punta Tratun iskibridu karqan. 5 Chay kajumba kirpanamba sawambim karqan urumanda ichkay anjil alayuqkuna, yach'ananchiqllampa: Chay Ancha Santisimu Kwartumpim llimpyallkaq Tayta Dyus isrraylinumkunata uchangunamanda pirdunan, nichpa. Kanalitanqam manana kanchu lugar tumkuy imampaq nichunayllampa. Chaymi challkunampaqlla nillkillampa. 6 Chaychinam chay karpamanda adurana wasimpi tumkuy imata allicharqanllampa, Dyusta adurananllampa. Chay Santu Kwartumanmi tumkuy diya achka kuramkuna yallkuqllampa, ufrindamkunata ampamuchpa, Dyusta adurananllampa. 7 Piru Dyuspa chay Ancha Santisimu Kwartunmanqam suq kutindalla kada wata chay mas kamachimkuq isrraylinu kuralla yallkuq. Chaychina yallkunambaqqam amparqan suq animalpa yawarninda. Chay yawar ufrindatam Santisimu Kwartuman ampaq, Tayta Dyus chay kurata, llaqta masingunatampis wamkin laya uchangunamanda pirdunanambaq. Chay laya uchamkunataqam rurachqallampa karqan, mana yach'achpa: ¿Uchatachu rurallkani ichu mana? nichpa. 8 Chay ichkay kwartumkunampaqmi Dyuspa Santu Ispiritun kaychina yach'achiwanchiq: Kuramkunaqam chay Santu Kwartumanlla atirqanllampa yallkuyta, nichpa. Piru manaraqmi atirqanllampachu yallkuyta chay Ancha Santisimu Kwartumanqa, suq kurtinawan arkadu kachqanrallku. 9 Tumkuy challkunaqam suq kumparasyunchina kay tyimpumpaqqa. Chaqa allitam yach'achiwanchiq: Chay animalkunata wanchichpa, yawarninda Tayta Dyusta quchpampismi, mana atinchiqchu chunqunchiqta kambyayta, ama uchayuq kananchiqllampaqa. 10 Chay unay lillkunaqam yach'achiwanchiq sawa kwirpunchiqpaqlla. Chaqa yach'achiwanchiqmi: Imam alli mimkunanchiq, umpyananchiq, imachina mayllamkunanchiq, nichpa. Challkunaqam balirqan Tayta Dyus muchuq tratunda ruranangamanlla. 11 Piru Jisumkristum chamuchqana, ancha baliq mas kamachimkuq kuranchiq kanambaq. Chaymandaqam syiluman kutirichpa, Dyuspa adurana wasinman yallkuchpa, tumkuy imampi yanampawanchiq. Dyuspa chay wasin syilumpi kaqqam masta balin kay pachampi runamkuna rurachqan adurana wasimandaqa. 12 Chaychinam Jisumkristuqa kimkin yawarninda ich'achpa, anaq syilumpi Dyuspa Ancha Santisimu Kwartunman yallkuchpa, chay yawarninwan uchanchiqkunampaq pagaramkurqan, tumkuy tyimpu paywan kawsananchiqllampa. Manam yallkurqanchu achka bwiltasta, chibumkunampa, michirumkunampa yawarninda ampachpaqa. 13 Kanan chay kuramkunaqam turumkunampa, chibumkunampa yawarninwan runamkunata chaqchunllampa ichu rumpachichqa michirumkunampa uch'panda yamkuwan taqlluchpa, chaqchunllampa, sawa kwirpunlla limpyu kanambaq. 14 Piru chay achka laya ufrindamandaqam Jisumkristu rurachqan ufrinda masta balin. Chaqa wañuchpam, yawarninwan nuqanchiqkunampaq pagaramkurqan, amana uchayuq kananchiqllampa. Chaymi mana nunka uchyamkaq Santu Ispiritu yanampamptin, Jisumkristu Tayta Dyusman intrigamkarqan, kruspi wañuchpa, mana nima uchayuq ufrinda kanambaq. Chaychina yawarninda ich'achpam, yumbay uchanchiqmanda pirdunawachqa kanchiq, kawsaq Dyusninchiqta allita sirbichpa kawsananchiq. 15 Chaychina Jisumkristu abugadunchiq kachpam, wañuchpa, muchuq tratuta rurachqa ufrisimkuchqanchina, Tayta Dyus yumbay amkrachqangunata pirdunawananchiq, tumkuy tyimpu paywan kawsananchiqllampa. Chaychina wañuchpaqam, chay punta tratuta kasuqkunatampis uchangunamanda wacharqan. 16 Manchu runamkuna manaraq wañuchpaqa, suq pampilpi suq tratuta ruran: Kay kusasnillkunam kay iskibrichqallkunampaq kidanqa, nichpa. Piru manaraq wañumptinqam, manaraq balinchu chay tratuqa. Wañumptinraqmi balin, kusasninguna suqkunampaqna kidanambaqqa. 18 Chaychinallam chay punta tratumpis balirqan, chay animalkunampa yawarninda ich'achqanrallku. 19 Chaymi chay punta tratuta ruranambaqqa, Muysisqa puntata Dyuspa liyningunata liyirqan yumbay llaqta masin isrraylinumkuna uyanambaq. Chaymandaqam michirumkunata chibumkunata wanchichpa, yawarninda yamkuwan taqllurqan. Chaymandaqam suq qaritumpi chumpimka millwata wanguchpa, chay yawarwan nuyuchichpa, Dyuspa Santu Librunda, yumbay runata warmita chaqchurqan. 20 Chaymandaqam Muysisqa pallkunata nirqan: Kay yawarwanmi qamkunata chaqchullki, intyindinallkillampa: Tayta Dyuswan kay tratuta rurachpa, pay nichqanda allita kumplichunllampa, nichpa. 21 Chaychinallam chay unay karpamanda adurana wasimpi manaraq aduramptinllampa, Muysisqa chay wasita, tumkuy imandinda yawarwan chaqchurqan. 22 Chaqa Tayta Dyusqam liynimbi kamachichqa karqan, pallkunata yaqqa yumbay kusasningunatampis yawarwan pichananllampa. Chaychina yawarta ich'achqanrallkum, Dyusqa uchangunamanda pirdunan; manaqa manam pirdunanchu. 23 Muysispa liyningunampim nirqan, chay karpamanda adurana wasita tumkuy imandinda animalkunampa yawarninwan pichananllampa. Piru chay karpamanda wasi kusasninwanqam syilumpi kaq kusaskunampa rritratunchinalla karqan. Chaymi syilumpi kaq kusaskunaqa munan, mas allin ufrinda yawarwan pichadu kanambaq. 24 Kanan Jisumkristuqam mana yallkurqanchu kay pachampi kaq adurana wasimanqa. Chaqa chay wasitaqam runamkunalla rurarqan Dyuspa allimp wasin syilumpi kaqtachina. Achwanmi Jisusqa rirqan syilumpi kaq allimp adurana wasiman, waqman yallkuchpa, Tayta Dyuspa ñawpambi ancha rrugamkunan nuqanchiqkunampaq. 25 Chay isrraylinumkunampa mas kamachimkuq kuranqam tumkuy wata chay Ancha Santisimu Kwartuman yallkun, animalpa yawarninda ampachpa. Piru manam nisisaryuchu karqan Jisumkristu kutin kutin wañunanqa, yumbay uchanchiqmanda pirdunawananchiqqa. 26 Chaqa Jisumkristu tumkuy wata kurachina Dyuspa wasinman yallkullkamptinqach'i, achka kutinda wañunanda kay munduta rurachqanmandampacha. Piru payqam mana achka kutindaqa wañurqanchu. Achwanmi kay ultimu tyimpumkunampi kay pachaman chamuchpa, suq kutindalla kruspi wañuchpa, pay kimkin intrigamkarqan, ancha baliq ufrinda kachpa, yumbay uchanchiqmanda pirdunawananchiq. 27 Yumbay runamkuna, warmimkunaqam suq kutindalla rinchiqllampa wañuq. Chaychina wañuchpaqam, Tayta Dyuspa ñawpanman rinchiqllampa riq, pay jusgawananchiq. 28 Chaychinallam Jisumkristumpis suq kutindalla wañurqan, achka runata, warmita yumbay uchanchiqmanda pirdunawananchiq. Chaymandaqam muchuqmanda rin kutimuq. Piru mananam rinchu kutimuq uchanchiqmanda wachawananchiqqa. Achwanmi kutimunqaqa, payta yumbay chuyaqkunata syiluman ampawananchiq.
1 Muysispa liyningunampismi Jisumkristumpa llandunchinalla kachpa, suq partitalla Dyuspaqqa yach'achiwanchiq. Manam yumbaytachu. Chayrallkum isrraylinumkuna llaqta masinchiq kutin kutin Dyuspa adurana wasinman richpa aduraq, tumkuy wata chay animalkunata wanchimptinllampampis, mana atinllampachu yach'ayta: Dyuspaqqam manana uchayuqchu kani, nichpaqa. 2 Chaqa Muysispa liyninguna allimpta yanampawamptinchiq amana uchayuq kananchiqqam, llaqta masinchiq isrraylinumkunaqa manana kutin kutinqa chay animalkunata wanchinmanllampachu, ufrindanda qunambaqqa. Chaqa suq bwiltatalla chay animalkunata wanchichpam, manana yuyanmanllampachu: Uchayuqraqmi kani, nichpaqa. Achwanmi manana uchayuqchu kanmanllampa. 3 Piru chay ufrindangunawanqam mana atichqallampachu wachamkayta. Achwanmi chay animalkunata watan watan wanchichpaqa, uchangunata yuyachpa, yach'anllampa: Uchayuqmi kani, nichpa. 4 Chaqa chibumkunampa turumkunampa yawarninwanqam mana nunka atinchiqchu wachamkayta yumbay uchanchiqmandaqa. 5 Chaymi Jisumkristu kay munduman chamuchpa, Tayta Dyusta kaychina nirqan: Qamqam mana munangichu, runamkuna animalkunata wanchichpa, ufrindata quchunanllampaqa. Chaymi kwirpuyuqta rurawachpa, kay pachaman kach'amuwachqa kangi. 6 Chaqa runamkuna animalkunata wanchichpa, rumpachichpa, quchumptinllampa, uchangunata pirdunanallkiqam, mana kuchimkungichu. 7 Chaymi nillki: Taytitu Dyus, Santu Librullki nuqampaq nichqanchinam kayman chamuchqa kani, munachqallkita ruranaypaq, nichpa. 8 Chayri allita yuyachunllampa: Puntatam Jisumkristu Tayta Dyusta kaychina nirqan: Chay runamkuna animalkunata wanchichpa, rumpachimptinllampa, uchangunata pirdunanallkiqam, mana kuchimkungichu, nichpa. Muysispa liyninguna chaychina rurananllampa kamachimptimbismi, Dyustaqa mana kuchichinchu. 9 Chaymandaqam Jisumkristu Tayta Dyusta nirqan: Kaymanmi chamuchqa kani, qam munachqallkichina ruranaypaq, nichpa. Chaymi yach'anchiq: Tayta Dyusqam manana munanchu animalkunata wanchinanchiqqa. Achwanmi Jisumkristuta kach'amurqan, wañunambaq, uchanchiqkunamanda wachawananchiq. 10 Chaymi Jisumkristu, Tayta Dyus munachqanda rurachpa, suq kutindalla kruspi wañurqan, tumkuy tyimpumpaq wachawananchiq, amana uchayuq kananchiqllampa. 11 Yumbay chay isrraylinu kuramkunaqam tumkuy diya animalkunata wanchichpa, kutin kutin ufrindanllampa. Chaychina ufrindachpampismi, mana nunka pirdunaduchu kidanllampa uchangunamandaqa. 12 Piru Jisumkristuqam suq kutindalla wañurqan, runamkunata, warmimkunata yumbay uchanchiqmanda pirdunawananchiq. Chaymandaqam wañuchqanmanda kawsamuchpa, Tayta Dyuspa allin ladumbi tiyarqan. 13 Chaymi kananqa chaypi chuyamkullkan, Tayta Dyus payta yumbay kuntraqkunata binsichpa, ch'amkingunampa waranman rurachpa sarrunangaman. 14 Chaqa Jisumkristum suq kutindalla wañuchpa, tumkuy tyimpumpaq pirdunawarqanchiq, amana uchata rurachpa kawsananchiqllampa. 15 Chaychinallam Dyuspa Santu Ispiritumbis Santu Librumbi kaychina yach'achiwanchiq: 16 Tayta Dyusmi chay unay agwilunchiqkunata nirqan: Suq tyimpumandam nuqaqa karu willkallkimkunawan suq muchuq tratuta rurachpa, kamachimkuchqayta rini yuyachiq chunqunllampampi. Chaychina yuyachimptiymi, pallkunampa yuyaynimbiqa chay liynillkuna iskibrichqachina rin kidaq, nichpa. 17 Chaymandaqam nirqambis: Uchangunata pirdunachpam, manana nunka rinichu yuyaq, nichpa. 18 Chaychina Tayta Dyus uchanchiqmanda pirdunawachqa kamptinchiqmi, manana nisisaryuchu animalkunata wanchinanchiqqa. 19 Chayrallku kriyiq masitamkuna, nuqanchiqkunaqa amana manchachunchu. Achwanmi kuchimkuchpa, chay Ancha Santisimu Kwartuman atinchiqna yallkuyta, Dyusta adurananchiqllampa. Chaqa Jisumkristu kimkinmi yawarninda ich'achpa, wañuchpa, 20 chay Ancha Santisimu Kwartumba kurtinanda llimkichpa, kich'arqan, Tayta Dyuspa ñawpanman yallkunanchiqllampa. Chaychina wañuchpam, suq muchuq ñandachina rurarqan, Tayta Dyusman ch'ayananchiqllampa. 21 Kananqam Jisumkristuqa mas kamachimkuq kuranchiq kachpa, Dyuspi yumbay kriyiqkunata kamachiwallkanchiq. 22 Chayri uchanchiqkunata dijachpa, limpyu chunquyuq kachpa, Tayta Dyuspi allita kriyichunllampa. Chaqa payqam chunqunchiqkunata mayllachqa, amana uchayuq kananchiqllampa, achwan limpyu yamkuwan mayllamkuchqachina kachpa, payta adurananchiq. 23 Chaqa allitam yuyamkunchiqllampa: Tayta Dyusmi tumkuy ufrisiwachqanchiqta rin kumpliq, nichpa. Chayrallkur Jisumkristumpi mana challkuq kriyichpa, 24 allita yuyachunllampa, yanampanamkuchpa, kuyanamkuchpa, allita rurachpa, kawsananchiqllampa. 25 Chayri mana challkuq tandamkachunllampa, Dyusta pulla adurananchiq. Amar kachunllampachu chay mana tandamkaqkunachinaqa. Chaqa yach'anchiqllampam: Siñurninchiq Jisumkristum utqana rin kutimuq, nichpa. 26 Chaqa allimp kaqta yach'amkuchpa, chaymanda Jisumkristumanda amkramkachpa, yach'allkachpa uchata ruramptinchiqqam, manana kanchu pimpis wachawananchiqqa. 27 Chaymi chay amkramkaqkunaqa chuyallkanllampa jwisyu diyampi chay manchaypaq ninampi chingadu kanambaq Dyusta suq kuntraqkunawan. 28 Mayqan runa ichu warmi Muysispa liyningunata mana kasumptinllampa, ichkay ichu kimsa tistigumkuna payta chimbimptinllampaqam, juyiskunaqa mana llamkimpachpachu, kamachimkunllampa wanchinanllampa. 29 Piru Tayta Dyusqam mas jwirtita rin kastigaq Churin Jisumkristuta disprisyaqkunata. Chaqa pallkunaqam Jisumkristumpa ich'achqan yawarninda disprisyachpa, Dyuspa Santu Ispiritun kuyawaqninchiqta musyallkanllampa. Manam munanllampachu ch'askiyta Dyuspa muchuq tratunda. Chaymi pallkunaqa mana atinqallampachu wachamkayta. 30 Chaqa allitam yach'anchiqllampa Tayta Dyus kaychina nichqanda: Chay mana alli ruraqkunatam rini kastigaq, nichpa. Chaymandaqam nirqambis: Chay wambrallkunatam nuqalla rini jusgaq, allitachu rurachqa ichu mana, nichpa. 31 ¡Ancha manchaypaqmi, pudirniyuq Dyusninchiqpa mamkinman ichkinanchiqqa! 32 Allitar yuyayllampa imachinam karqan chay unay tyimpumkunampi, Jisumkristumpi chayraq kriyimptimkillampaqa. Chaqa ancha padisichpampismi, qamkunaqa mana challkuq paypi yuyamkurqallki. 33 Wamkinnimkitam musyachuchpa maqachurqanllampa yumbaypa ñawpambi. Chaychina ruramptinllampam, wamkinnimkiqa chay padisiqkunawan tandamkarqallkillampa, pulla padisinallkillampa. 34 Karsilpi kaqkunatampismi llamkimpachpa, yanamparqallkillampa. Jisumkristumpi mana kriyiqkuna tumkuy imallkimkunata quch'ichumptimbismi, mana piñamkuchpachu, achwan kuchimkuchpa, kawsarqallkillampa. Chaqa yach'arqallkillampa: Anaq syilumpim Tayta Dyus yumbay kusasninchiqmanda mas allin mana uchyamkaq kusaskunata rin quwaqninchiq, nichpa. 35 Chayri qamkunaqa ama disanimamkaychu. Chaqa Dyuspi mana challkuq yuyamkuchpaqam, suq ancha chumaq primyuta ringillampa ch'askiq. 36 Chayri ama challkuchpachu, Dyus munachqanda rurachpa, kawsayllampa. Chaychina kawsamptimkillampam, Tayta Dyusqa tumkuy ima ufrisiwachqanchiqta rin quchuqllampa. 37 Chaqa Dyuspa Santu Librumbim kaychina nin: Wachadurnimkiqam mana unayachpachu, ancha utqana rin chamuq. 38 Chayri allita ruraqkunaqa nuqampi kriyichpa, kawsanqallampa. Piru suq runa nuqamanda amkramkamptinqam, paywanqa mana kuntintuchu rini kaq, nichpa. 39 Piru nuqanchiqkunaqam mana chay amkramkaqchinachu kanchiq. Chaymi mana rinchiqchu chingaq pallkunachina. Achwanmi Jisumkristumpi kriyichpa, tumkuy tyimpu rinchiqllampa kawsaq.
1 Tayta Dyuspi allimpta kriyichpam, ancha allita yuyamkunchiqllampa: Yumbay niwachqanchiqtam rin kumpliq, nichpa. Chaqa chay niwachqanchiqta manaraq rimkachpampismi, allita yach'anchiqllampa: Yumbaytam rin ruraq, nichpa. 2 Chaychina unay agwilunchiqkuna Tayta Dyuspi allita yuyamkumptinllampam, Dyusqa pallkunampaq ancha kuchimkurqan. 3 Nuqanchiqpismi Tayta Dyuspi kriyichpa, allita yach'anchiqllampa: Payqam rimachpalla, kay pachata, syilutampis, tumkuy imandinda rurarqan, nichpa. Chaychinallam Tayta Dyusqa mana kachqanmanda tumkuy ima rimkachqanchiqta rurarqan. 4 Yuyachumbis chay (punta runa Adamba churin) Abilpi. Payqam Tayta Dyuspi allita yuyamkuchpa, animalninda wanchichpa, Dyusta qurqan. Chaychina ufrindamptinmi, Tayta Dyustaqa ancha kuchichirqan maski chay masan Kayinmanda. Chaymi Tayta Dyusqa ufrindanda chumaqta ch'askichpa, nirqan: Qamqam munachqayta allita rurangi, nichpa. Chaychina chay Abil wañuchqa kamptimbismi, suq chumaq ijimplu kidachqa nuqanchiqkunampaq, paychina Dyuspi yuyamkuchpa, kawsananchiqllampa. 5 Chay unay Inumkpismi Tayta Dyuspi ancha allita yuyamkurqan. Chaymi mana wañurqanchu. Achwanmi Tayta Dyus syiluman amparqan, paywan kawsanambaq. Chaymi manana pimpis kay allpampiqa tarirqanchu. Chaqa Dyuspa Santu Librumbim niwanchiqllampa: Tayta Dyus manaraq ampamptinmi, chay Inumkqa payta ancha kuchichichpa kawsarqan, nichpa. 6 Piru Tayta Dyuspi mana yuyamkuchpaqam, mana pimpis atinchiqchu paytaqa kuchichiyta. Chaqa Tayta Dyusta adurananchiqqam, puntata munan allita kriyinanchiq: Kanmi Dyus. Payman qamimkamptiyqam, ancha rin yanampawaq, nichpa. 7 Chay unay Nuwimpismi Tayta Dyuspi allita yuyamkuchpa kawsarqan. Chaymi Dyus payta nimptin, suq atun wambuq wasita ruranambaqqa, manaraq nima tamyata rimkachpampis, chay nichqanchina rurarqan. Chaychina rurachpaqam, warminda wambrangunata yamkumanda wacharqan. Piru chay runa masingunaqam ancha uchayuq kidarqanllampa, Dyusta, Nuwita mana kriyichqanllamparallku. Chaymi yamkuman saqachpa, ch'uqachpa, limpu wañurqanllampa. Piru Tayta Dyusmi Nuwita allin runampaq riqsirqan, paypi allita kriyichqanrallku 8 Chaymandaqam chay unay Abrajambis Tayta Dyuspi allita yuyamkurqan. Chaymi Tayta Dyus payta nimptin: Suq chumaq nasyundam rini quchuq, nichpaqa, chay Abrajanqa llaqtanmanda lluqchirqan, chay ufrisichqan nasyunman rinambaq. Mana yach'achpa: ¿Maymanmi rini riq? nichpampismi, Dyuspi yuyamkuchpa rirqan. 9 Chaymandaqam Tayta Dyus nichqan nasyunman ch'ayachpaqa, Abrajanqa chay nasyumbiqa furastiruchina tiyarqan. Mana ch'amkrayuq kachpam, karpamanda wasimkunampi tiyarqan. Tayta Dyusqam wambran Isamkta, willkan Jamkubutampis ufrisichqa karqan, chay nasyunda qunambaq. Piru pallkunampismi Dyuspi yuyamkuchpa, chay karpa wasimkunampilla tiyarqanllampa. 10 Chaqa chay Abrajanqam ancha yuyamkurqan: Dyusmi suq allin simyintuyuq llaqtata rin ruraq nuqallkunampaq. Chay llaqtaqam mana nunka rinchu uchyamkaq, nichpa. 11 Chay Abrajamba warmin Sarampismi Dyuspi ancha yuyamkurqan. Chaymi Tayta Dyus paytaqa nimptin: Ringim qachyaq wambritullkita, nichpaqa, kriyirqan. Mana ni suq wambrayuq kachpa, ancha byijitana kachpampismi, Dyusta allita kriyirqan: Rinmi kumpliq chay ufrisiwachqanda, nichpa. Chaymi Tayta Dyus chay Sarata yanamparqan, wambrituyuq kanambaq. 12 Chaychina chay Abrajan ancha byijitu kamptimbismi, warmin Saraqa wambran Isamkta qachyarqan. Chaymandaqam chay wambran Isamkpa karu willkanguna ancha achkayarqanllampa, lusirumkunachina ichu mar yamkumpa manyambi aqumkunachina. Chaymi kananqa manana atinchiqchu yumpayta yumbay pallkunataqa. 13 Yumbay chay punta agwilunchiqkunaqam chay ufrisichqan nasyundaqa manaraq ch'askichpachu wañurqanllampa. Piru wañunan diyamkamanmi allita yuyamkurqanllampa: Tayta Dyusmi suq diya karu willkanchiqkunata rin quq chay ufrisiwachqanchiq nasyunda, nichpa. Chaymi chay nasyundaqa karumanda rimkallkaqchina kachpa, nirqanllampa: Manaraq llaqtayuqchinam kanchiq. Kay pachampiqam furastirumkunachina kawsanchiqllampa, nichpa. 14 Chaychina nichpam, yumbayta intyindichiwanchiq: Manaraq nasyunniyuq kachpampismi, Dyuspi yuyamkuchpa, nuqallkuna chuyamkullkani, suq nasyunniyuq kanaypaqllampa, nichpa. 15 Manam munarqanllampachu kutiriyta chay punta nasyunninmanqa. Piru munachpaqam, atinanllampata kutiriyta. 16 Piru pallkunaqam chuyamkullkarqan, Tayta Dyus mas allin nasyunda pallkunampaq syilumpi ruranangaman. Chaymi Tayta Dyusqa pallkunampaqqa mana nimatampis panqamkurqanchu. Achwanmi nirqan: Pallkunampa Dyusninmi kani, nichpa. Chaymi pallkunampaqqa syilumpi suq llaqtata rurachqa. 17 Tayta Dyusmi Abrajanda ufrisichqa karqan, wambran Isamkmanda ancha achka karu willkayuq kanambaq. Chaymandaqam Tayta Dyus Abrajanda mallimpachpa, nirqan: Kuyachqallki churimki Isamkta wanchichpa, ufrindatachina quway, nichpa. Chaymi Abrajanqa Tayta Dyuspi allita yuyamkuchpa, churinda mana mich'achpachu, amparqan wanchiq. 19 Chaqa Abrajanqam ancha yuyamkurqan: Isamksituyta wanchimptiymi, Tayta Dyusqa atin kawsachimuyta, nichpa. Chaymi Tayta Dyusqa Abrajanda chaychina mallimpachpa, nirqan: Amana wanchiychu churimkitaqa, nichpa. Chaymi Abrajanqa churin Isamkta wanchillkachqanmanda Tayta Dyus wacharqan. 20 Chaymandaqam Isamkpis Tayta Dyuspi allita yuyamkuchpa, payman mañamkurqan, wambran Jamkubuta, Isawta yanampanambaq. 21 Chaychinallam chay churin Jamkubumpis wañunambaqna kachpa, Tayta Dyuspi ancha yuyamkuchpa, mañamkurqan, churin Jusimpa wambrangunata yanampanambaq. Chaychina wañunambaq kachpampismi, burdunninwan tanqamkachpa, Tayta Dyusta adurarqan. 22 Chay churin Jusimpismi, wañunambaq kachpaqa, Tayta Dyuspi allita yuyamkuchpa, ayllungunata nirqan: Suq diyam karu willkanchiqkuna kay nasyun Ijimptumanda rinllampa lluqchiq. Chaychina lluqchichpaqa, tullullkunata ampanqallampa, Dyus ufrisichqan nasyumbi pambarinanllampa, nichpa. 23 Chaymandaqam chay Ijimptumpi tiyaqkunampa gubyirnun Farun kamachimkurqan, isrraylinumkunampa yumbay ullqu wambritu nasiqkunata wanchinanllampa. Chay tyimpumpim Muysis nasirqan. Piru taytanwan mamanmi Muysistaqa rimkarqan ancha chumitaqta. Chaymi Tayta Dyuspi allita yuyamkuchpa, chay kamachimkuq Farunda mana kasuchpachu, kimsa killata pamkarqanllampa, ama pimpis wanchinambaq. [Nuta: Pamkadu kamptinqam, chay Farumba chinan tarichpa, amparqan wasinman kriyaq. Chaymi Farumba willkanchinana karqan. Liyiy Axudu 1.22–-2.10.] 24 Chaymandaqam chay Muysisqa wiñachpa, atun runa kachpanaqa, Tayta Dyuspi allita yuyamkuchpa, manana munarqanchu chay kamachimkuq Farumba willkanchina kawsaytaqa. 25 Achwanmi tumkuy iman kaqta dijachpa, isrraylinu masingunawan padisirqan. Chaqa manam munarqanchu uchata rurayta, suq tyimpumpaqlla kuchimkunambaqqa. 26 Chay Muysisqam ijimptinumkunawan kidachpa, ancha qallayniyuq, tumkuy imayuq kananda. Piru payqam ancha yuyamkurqan: Tayta Dyusmi suq Wachadurta rin kach'amuq, Isrrayilmanda kaqkunata yanampawananchiq, nichpa. Chaymi Tayta Dyuspa wambrangunawan pulla padisirqan, suq tyimpumpi Dyusmanda primyunda ch'askinambaq. 27 Chayrallkum Muysisqa Tayta Dyuspi allita yuyamkuchpa, chay piñamkuq gubyirnuta mana manchachpachu, Ijimptumanda lluqchirqan. Chaqa Tayta Dyusta rimkachpachinam animamkarqan, Dyus munachqanda ruranambaq. 28 Chaymandaqam Muysisqa Dyuspi ancha yuyamkuchpa, Ijimptuman kutirichpa, chay punta Paskwa fyistata rurachpa, yumbay isrraylinu masingunata kamachirqan, (uñitamkunata ichu chibitumkunata wanchichpa), yawarninwan wasimba pungungunampa numbralninda, markungunata pasanambaq, Dyuspa wanchimkuq anjilnin chay yawarta rimkachpa, chay isrraylinumkunampa kulamka wambrangunata ama wanchinambaq. 29 Chaymandaqam chay suq isrraylinumkunampis Dyuspi allita yuyamkuchpa, chay Chumpimka Mar Yamkuta suq chamki ñandachina pasarqanllampa. Piru ijimptinu suldadumkuna imkinllampata rillkamptin piskaqmi, Tayta Dyusqa waqmanda, kaymanda yamkuta tandarqan. Chaymi yumbay chay suldadumkunaqa ch'uqachpa wañurqanllampa. 30 Chaymandaqam chay warmi Rrab chutiqpis Dyuspi allita yuyamkurqan. Payqam qallayrallku suqwan suqwan puñuchqa karqan. Piru isrraylinumkuna manaraq chay Jirimkuman ch'ayamptinmi, chay warmiqa chay ichkay champamkuq isrraylinumkunata pamkachpa wacharqan. Chaymandaqam isrraylinumkuna Tayta Dyuspi allita yuyamkuchpa, syiti diyas tumkuyta achka bwiltasta chay Jirimku llaqtampa rridurninda purirqanllampa. Chaychina purillkamptinllampam, chay llaqtampa atun murallanguna bulamkarqan. Chaymi chay isrraylinu suldadumkuna yallkuchpa, chay Jirimkumpi yumbay tiyaqkunata wanchirqanllampa, Dyusta mana kasuchqanrallku. Piru chay warmi Rrabtaqam mana wanchirqanllampachu. 32 Piru kambismi Dyuspi achka kriyiqkuna, pallkunampaq iskibrichunaypaq. Piru manam kanchu tyimpu chay Jidiyumbaq, Baramkpaq, Sansumbaq, Jimptimpaq, Dabidpaq, Samwilpaq, Dyuspaq rimaqkunampaq, qamkunata iskibrichuchpa yach'achichunayqa. 33 Dyuspi chay kriyiqkunaqam pilyachpa, nasyungunata binsirqan. Suqkunaqam nasyungunampi allita kamachimkurqan. Wamkingunaqam Tayta Dyus ufrisichqanda ch'askirqan. Suqkunaqam liyungunampa chimingunata kirparqan, ama wanchinanllampa. 34 Suqkunaqam manchaypaq lumyallkaq ninata wanchirqanllampa. Suqkunaqam wachamkarqanllampa, ch'iqniq runamkuna atun kuchilluwan munamptinllampa wanchiyta. Suqkunaqam mana jwirsayuq kachpampis, ancha jwirsayuqpaq timkramkarqanllampa. Chaymi ancha achka kuntraq suldadumkunata binsirqanllampa. 35 Tayta Dyuspi wamkin kriyiq warmimkunam rimkarqanllampa wañuchqa ayllunguna kawsamumptin. Piru Dyuspi wamkin kriyiqkunaqam payta mana ñigachqanrallku wañurqanllampa. Chaqa suq ch'iqniqkunaqam ancha padisichichpa wanchirqanllampa. Piru Dyuspi chay kriyiqkunaqam yach'arqanllampa: Wañuchpaqam, syiluman rinchiqllampa riq, mas allita kawsananchiq, nichpa. 36 Suqkunataqam ancha asimpachpa, asutichpa, kadinamkunawan watachpa, karsilarqanllampa, Tayta Dyuspi kriyichqanrallku. 37 Suqkunataqam sitachpa, wanchirqanllampa. Suqkunataqam sirruchuwan kuchuchpa, wanchirqanllampa. Chaychinam ancha mallimpadu karqanllampa. Wamkingunataqam atun kuchilluwan puntiyachpa wanchirqanllampa. Suqkunataqam wasingunamanda wichumkumptinllampa, wichamkunampa, chibumkunampa qarangunatalla kampamkuchpa, ancha pubrimkunana kachpa, waqta, kayta rirqanllampa. Chaychinam chay kuntraqkunaqa ancha padisichichpa qasacharqanllampa. 38 Chaymi chay kriyiq masinchiqkunaqa rirqanllampa tiyaq chay chamkichqa chuncha lugarkunampi, qaqamkunampi, mach'allkunampi, uch'kumkunampi. Piru pallkunaqam ancha balirqan maski yumbay chay qasachaqmandaqa. 39 Yumbay chay allita kriyiqkunawanmi Tayta Dyusqa ancha kuchimkurqan. Piru kay pachampi kawsachpam, manaraq ch'askirqanllampachu Dyus ufrisichqandaqa. 40 Piru Tayta Dyusqam nuqanchiqkunata kuyawaqninchiq, chuyachichqa chay punta kriyiq masinchiqkunata, Jisumkristu chamumptin, pullanchiq syiluman rinambaqllampa.
1 Dyuspi kriyichpa wañuqkunaqam yumbay rurachqanchiqta rimkawallkanchiq. Chayri tumkuy uchamkunata dijachpa, Dyus munachqanchina kawsachunllampa. Manchu kallpaq runamkunaqa binsimkunambaqqa llachaq mudananda dijachpa, kallpanllampa. Chaychinallar nuqanchiqkunampis tumkuy ima arkawaqninchiqta, tumkuy laya uchata dijachpa, Tayta Dyuspi mana challkuq yuyamkuchpa kawsachunllampa. 2 Chaychina Dyuspaq kawsananchiqri, ancha allita yuyamkuchunllampa Jisumkristumpi. Chaqa paypi kriyichqanchiq diyamandampacha wañunanchiq diyamkamanmi ancha yanampawanchiq, Tayta Dyuspi mas allita yuyamkunanchiqllampa. Payqam kruspi ancha padisichpa wañurqan yach'achpa: Wanchiwaqkuna ancha panqachiwamptimbismi, kawsamuchpa, syiluman richpa, Taytay Dyuswan rini kuchimkuq, nichpa. Kananqam Taytamba allin ladumbina tiyallkan, paywan kamachimkunambaq. 3 Chayri allita yuyayllampa Wachadurninchiq Jisumkristu padisichqambaq, chay uchayuq runamkuna qasachamptin. Qamkunampisri paychina padisichpaqa, ama challkuchpachu ni disanimamkachpachu, Dyuspi allita yuyamkuchpa kawsayllampa. 4 Chaqa qamkuna dyabluta binsinallkiqam, manaraq padisichqachu kangi, Dyusta kuntraqkuna wanchichunangaman. 5 ¿Qunqachqallampachu kangi Dyuspa Santu Librun wambrangunata kaychina kunachqanda? Ijitu, Tayta Dyus qamta kuyachuchpam kastigachungi, yach'amkunallki chumaqta kawsayta. Chayri ama disprisyaychu ni disanimamkaychu. (Achwanri paytaqa allita kasuy.) 6 Chaqa payqam kastigan yumbay kuyachqan wambrangunata. Chaymi qamta wambrambaq riqsichuchpa, ancha kuyachuchpa, kastigachuchpa, yach'achichungi, nichpa. 7 Manchu runamkuna wambrangunata kuyachpa kastigan, yach'amkunambaq. Chaychinallam Tayta Dyuspis nuqanchiqkunata wambrambaq riqsiwaqninchiq, kastigawanchiq. Chayri qamkunata kastigachumptinqa, agwantayllampa. 8 Chaqa Tayta Dyusqam yumbay wambrangunata kastigawaqninchiq yach'achiwanchiq. Chaymi qamkunata mana kastigachumptinqa, mana paypa lijitimu wambrangunachu kangillampa. Achwanmi tarichu wambramkunachina kangimanllampa. 9 Manchu nuqanchiqkuna wambra kamptinchiqqa, kay pachampi taytanchiqkuna kastigawamptinchiq, masta rrispitanchiq. Chaychinallar masta rrispitachun Taytanchiq Dyusta, paywan tumkuy tyimpu kawsananchiqllampa. 10 Chaqa kay pachampi taytanchiqqam suq tyimpumpaqlla kastigawanchiq, pallkuna munachqanda yach'achiwananchiq allinninchiqpaq. Piru Taytanchiq Dyusqam kastigawaqninchiq, yach'achiwanchiq, paychina allitalla rurachpa kawsananchiqllampa. 11 Piru Tayta Dyus kastigawamptinchiqqam, ancha syintichpa, malaganayanchiq. Piru chay kastigumanda yach'amkuchpam, allitana rurachpa, ancha kuchimkuchpa rinchiqllampa kawsaq. 12 Chayri ama challkuchunllampachu suq runa mamkimbi mana jwirsayuqchina ichu suq runa qunqurimbi mana jwirsayuqchina. Achwanri animamkachpa, tumkuy chunqu Jisumkristumpi yuyamkuchpa kawsachunllampa. 13 Chaychina paypi allita yuyamkuchpaqam, suq dirichu ñambichina purillkanchiqllampa, chay manaraq allita kriyiqkunata animachinanchiq. Chaqa pallkunaqam mana jwirsayuq kujumkunachina purillkanllampa. 14 Chayri yumbaywan chumaqta kawsachunllampa, Tayta Dyus munachqandalla rurachpa. Chaqa Siñurninchiqpaqlla kawsachpaqam, paywan rinchiqllampa tiyaq; manaqa manñm. 15 Chayrallkur allita kwidamkayllampa, ama ni suqnimki Tayta Dyusmanda amkramkanallki. Chaqa chay laya amkramkaqtaqam Tayta Dyusqa mana rinchu yanampaq. Kwidawkich chay amkramkaqqa suq ayaq wanchimkuq plantachina timkramkachpa, qamkunatampis atinman dañachichuyta, paychina Tayta Dyusmanda amkramkanallkillampa. 16 Kanan amar warmimkunata maskayllampachu, pallkunawan puñunallkiqa. Amar disprisyaychu Dyus munachqanda chay mana yuyaq unay Isawchinaqa. Chaqa payqam taytamba kulamka churin kachpa, ancha allin irinsyata ch'askinanda. Piru payqam suq diya ancha mallaqnachpa, chay irinsyan ch'askinan kaqta randimkurqan suq platu mimkunampaqlla. 17 Chaymandaqam chay Isawqa anchana munarqan kambyayta chay rurachqandaqa. Chaymi taytan wañunambaqna kamptinqa, Isawqa ancha waqachpa, taytanda rrugarqan, paypaq Tayta Dyusman masta mañamkunambaq. Piru chaychina rrugamptimbismi, taytanqa Isawpa masan Jamkubumpaq Dyusman masta mañamkuchqa karqan. Chaymi manana atirqanchu kambyayta chay mañamkuchqandaqa. 18 Nuqanchiqkunaqam mana qamimkachqachu kanchiq Tayta Dyusman chay achka isrraylinu agwilunchiqchinaqa. Chaqa pallkunaqam chay Sinayi urqqumpa waranman qamimkarqanllampa, Tayta Dyusta uyanambaqllampa. Chay urqqumpiqam manchaypaq nina lumyallkarqan. Ancham tutayarqan, wayrarqan. 19 Chaychina qamimkachpaqam, chay urqqumpiqa uyarqanllampa suq kurnita ancha jwirtita kunyaqta. Tayta Dyuspa busnindampismi chaypiqa uyarqanllampa. Chaymi manchaywan nirqanllampa: ¡Yuch'allku, amana mastaqa rimaychu! nichpa. Piru nuqanchiqkunaqam mana uyanchiqchu Dyuspa busninda pallkunachinaqa. 20 Chaqa chay runamkunaqam ancha mancharqanllampa, Tayta Dyus kamachimkumptinqa: Amar ni pimpis llamkanqachu kay ancha santu urqqutaqa. Suq runa ichu suq animal kay urqquta llamkamptinqa, rumimkunawan sitachpa, ?ichu garruchawanchina puntiyachpa,? wanchiyllampa, nichpa. 21 Chaqa ancha manchaypaqmi chaypiqa karqan. Chaymi Muysis kimkimbis nirqan: Nuqaqam ancha manchachpa, ch'ampsimkallkani, nichpa. 22 Piru nuqanchiqkunaqam suq laya Siyun lumaman qamimkallkanchiq. Tayta Dyusqam syilumpi chay Siyun lumampiqa muchuq Jirusalin llaqtanda rurachqa. Waqpiqam achka mil anjilkuna tandamkachqallampa, 23 Tayta Dyusta alabananllampa. Waqmanmi ch'ayallkanchiqllampa yumbay punta kriyiq masinchiqkuna kachqanman. Pallkunaqam Dyuspa kulamka wambrangunachina. Chaymi chutingunata anaq syilumpi iskibrichqa, waqpi tumkuy tyimpu kawsananllampa. Rillkanchiqllampam yumbaypa allin juyisninchiq Dyusman, chay wañuchqa kriyiq masinchiqkunaman. Pallkunataqam Tayta Dyusqa rurachqa, manana nima uchayuq kanambaqllampa. 24 Rillkanchiqpismi abugadunchiq Jisumkristuman. Payqam yawarninda ich'achpa, wañuchpa, suq muchuq tratuta rurarqan nuqanchiqkunampaq. Chay yawarninqam ancha yanampawanchiq maski Abilpa yawarninmanda. [Nuta: Chay Kayin masan Abilta wanchichpa, yawarninda ich'achqanrallkum, Tayta Dyusqa kastigarqan. Piru Jisumkristu wañuchpa, yawarninda ich'achqanrallkum, Tayta Dyusqa nuqanchiqkunata pirdunawarqanchiq.] 25 Chayrallkur Tayta Dyus imatampis yach'achiwamptinchiqqa, ama disprisyachunchu. Amar chay achka agwilunchiqchinaqa kachunchu. Chaqa pallkunaqam kay mundumpi Dyus nichqanda mana kasuchpaqa, mana atirqanllampachu kastigumanda wachamkaytaqa. Chaychinallam Tayta Dyus syilumanda imatampis niwamptinchiq, mana kasuchpaqam, mana rinchiqchu atiq kastigumanda wachamkaytaqa. 26 Chay Sinayi urqqumpi Tayta Dyus rimachqanqam pachata kuyuchirqan. Piru kananqam niwanchiqllampa: Muchuqmanda rimarichpaqam, yumbay kay pachata, syilutampis rini kuyuchiq. Manam kay pachatallachu kuyuchichaqqa, nichpa. 27 Chaychina Muchuqmanda rini kuyuchiriq, nichpaqam, Tayta Dyusqa yach'achiwanchiq: Yumbay chay kuyuqkunatam rini uchyaq. Nuqampa chay mana kuyuq kusasnillkunallam rinllampa kidaq, nichpa. 28 Piru Tayta Dyuspa chumaq lugarninqam mana nimatampis rinchu kuyuq ni chingaq. Chayri payta ancha pagimkuchpa, tumkuy chunqu adurachpa, manchachpa, ancha allita kasuchpa, kawsachunllampa. 29 Chaqa Tayta Dyusqam lumyallkaq nina chingachimkuqchina.
1 Masitamkuna, Jisumkristumpi yumbay kriyiq masinchiqwanri mana challkuq kuyanamkuchpa masampurachina kawsachunllampa. 2 Amar qunqachunchu wasinchiqman ch'ayamuqkunata chumaqta ch'ayachinanchiqqa. Chaqa pallkunamanda wamkinqam Dyuspa anjilninguna kanman. Chaymi wamkin ch'ayachiqkunaqa mana yach'achpa, anjilkuna nichpampis, pusadata quchqallampa. 3 Karsilpi kaqkunatampisri llamkimpachpa yanampachunllampa, yuyachpa: Pallkunawan pulla karsilpi atinchiqman kayta, nichpa. Mayqan qasachadu kaqtampisri yanampachun, yuyachpa: Nuqanchiqpisch'i pallkunachina qasachadumkuna kanchiqman, nichpa. 4 Yumbayninchiqri kasamyintunchiqta rrispitachun. Chayri rrispituyuqkunaqa warminwanlla ichu qusanwanlla puñunqallampa. Amar suqwanqa puñunqachu. Chaqa Tayta Dyusqam chay laya uchayuqkunataqa rin kastigaq. Chaychinallam rin kastigaq manaraq rrispituyuq kaqkunatampis, suqwan puñumptinqa. 5 Tayta Dyusqam niwachqa kanchiq: Nuqaqam mana nunka qunqachqallkichu ni dijachqallkichu, nichpa. Chayri qallaytaqa ama anchaqa munachunllampachu. Achwanri kusasninchiq kaqwanlla kuchimkuchpa kawsachun. 6 Chaychina Tayta Dyus nuqanchiqwan kamptinqa, mana nimatampis manchachpachu, atinchiqllampa kaychina niyta: Tayta Dyusmi yanampawan. Chaymi mana ni pitampis manchanichu, nichpa. 7 Allita yuyayllampa chay yach'achimkuq ansyanullkimkunata, Dyus nichqanda yach'achichuchqanrallku. Chaqa pallkunaqam Jisumkristumpi allita yuyamkuchpa, chumaqta kawsarqanllampa. Chayri pallkunachina kawsayllampa. 8 Siñurninchiq Jisumkristuqam mana nunka kambyamkanchu. Payqam qayna, kanan, qaya, tumkuy tyimpu chaychinalla. 9 Chayri suqkuna suq laya dumktrinamkunata yach'achichumptinqa, ama kriyiyllampachu. Kanan nichumptinllampa: Kay mimkunamkunatallam atinchiqllampa mimkuyta, nichpaqa, ama kasuyllampachu. Chaqa chay laya lillkunaqam mana ni pitampis yanampachqachu. Achwanri chunqunchiqpi yuyachunllampa: Tayta Dyusmi ancha kuyawaqninchiq, ancha yanampawanchiq, nichpa. 10 Chaqa Jisumkristu kruspi wañuchpam, uchanchiqkunamanda wachawachqa kanchiq. (Chaymi manana nisisaryuchu animalkunata wanchichpa, Dyusta qunanchiq pirdunawananchiqqa.) Chayrallkum chay karpa adurana wasimpi trabajaq kuramkuna mana atinllampachu kuchimkuyta nuqanchiqchinaqa. 11 Manchu chay mas kamachimkuq isrraylinu kuraqa kada wata animalkunata wanchichpa, yawarninda ampan Dyuspa Ancha Santisimu Kwartunman. Chaychina ufrindanda qumptinmi, Tayta Dyusqa uchangunamanda pirdunan. Chaymandaqam chay wanchichqan animalkunampa kwirpundaqa llaqtamanda suq laduman ampachpa, rumpachinllampa. 12 Chaychinallam Jisumkristumpis Jirusalin llaqtamanda sawaman lluqchichpa, ancha padisichpa, kimkin yawarninda ich'achpa, wañurqan, yumbay uchanchiqmanda pirdunawananchiq. 13 Chayri kay mundumpa kusasningunata dijachpa, Jisumkristumpi tumkuy chunqu yuyamkuchpa, payman qamimkachun, awnki paytachina panqachiwamptinchiqpis. 14 Chaqa kay pachampiqam mana kanchu ni suq llaqta tumkuy tyimpu duraqqa. Achwanmi ancha chuyallkanchiq, Tayta Dyus nuqanchiqkunata ampawananchiq suq mana uchyamkaq llaqtaman, chaypi tumkuy tyimpu kawsananchiq. 15 Chayri Jisumkristumpi yuyamkuchpaqa, tumkuy diya Tayta Dyusta alabachpa, kawsachunllampa. Chaychina alabachpaqam, suq allin ufrindatachina Dyustaqa qullkanchiqllampa. Chayri alabachunllampa: Jisumkristum ancha allin kamachimkuqniy, nichpa. 16 Kanan amar qunqachunchu, suqkunata yanampananchiqqa. Achwanri ima kaqninchiqwan suqkunata yanampachunllampa. Chaychina rurachpaqam, Tayta Dyustaqa suq ufrindatachina qullkanchiq. Chaypaqmi payqa ancha kuchimkun. 17 Tayta Dyuspaq yach'achichuqkunata chumaqta kasuyllampa. Chaqa pallkunaqam qamkunata ancha kwidachungi, ama chinganallki. Kanan Tayta Dyustam rinllampa kwintata quq: ¿Allitachu kwidachqa kangi ichu mana? nichpa. Chayri pallkunata allita yanampayllampa, ama nimampaq malaganayachpa, achwan kuchimkuchpa yach'achichunambaq. Piru qamkuna mana kasumptimkiqam, trabajus rin kaq yanampachunanqa. 18 Allimptam yuyanillampa: Limpyu chunquyuqkunam kanillampa, nichpa. Kanan tumkuy imampim allitalla munanillampa rurayta. Chayri nuqallkunampaq Dyusman mañamkuyllampa. 19 Ancham rrugallkimpis, Tayta Dyusman mañamkunallkillampa, qamkunaman utqa chamunaypaq. 20 Kuchichiwaqninchiq Tayta Dyusmanmi ancha mañamkuni, tumkuy imampi yanampachumptin, pay munachqanda rurachpa kawsanallkillampa. Chaqa Jisumkristum yawarninda ich'achpa, chay muchuq tratu mana nunka uchyamkaqta rurarqan. Chaymi Tayta Dyusqa Jisumkristuta wañuchqanmanda kawsachimurqan, ancha allin Pasturninchiq kachpa, chumaqta kwidawananchiq. ¡Chayri chay Siñurninchiq Jisumkristuta tumkuy tyimpu alabachunllampa! ¡Chaychina kanqa! 22 Kriyiq masitamkuna, rrugallkillampam, chumaqta ch'askinallki kay kunachuchqayta. Chaqa manam ancha achkatachu qamkunata iskibrichuchqa kani. 23 Munanim yach'anallkillampa: Masanchiq Timutiyum karsilmanda lluqchichqana, nichpa. Chaymi nuqaman utqa chamumptinqa, paytaqa qamkunaman rini ampamuq. 24 Jisumkristumpi yumbay kriyiq masinchiqkunata, Dyuspaq yumbay yach'achimkuqkunata nuqampa chutiypi nampallkuyllampa. Kay Italya nasyumbi yumbay kriyiq masinchiqpismi qamkunata nampallkuchungillampa. 25 Tayta Dyusri yumbay qamkunata yanampachunqa. Chaychina kanqa.
1 Kuyachqay isrraylinu masimkuna, nuqa Santyagum iskibrillkillampa kay kartata qamkuna chimkwa chimkwa karu nasyungunampi tiyaqkunaman. Tayta Dyuspa, Churin Jisumkristumpa sirbimkuqnin kachpa, qamkuna chay dusi atun ayllumkunamanda kaqkunata nampallkullkillampa. 2 Kuyachqay masitamkuna, Jisumkristumpi kriyichpaqa, tumkuy imampi padisichpampis, ancha kuchimkuyllampa. 3 Chaqa allitam yach'angillampa: Padisichpaqam, masta rinchiq yach'amkuq Dyuspi yuyamkuyta, mana challkuq chay ñamkachqanchiqta agwantananchiq, nichpa. 4 Piru ñamkachpaqar, ama disanimamkachpachu, achwan ancha allita yuyamkuyllampa Tayta Dyuspi, ancha kabal, ancha yach'ayniyuq wambranguna kanallkillampa. 5 Mayqannimki mana allita yach'achpa Dyus munachqanda ruranallkiqa, payman mañamkuy. Chaqa payqam mana panqachuchpachu ni anyachuchpachu, achwan kuchimkuchpa rin yach'achichuqllampa yumbay pay munachqanda. 6 Piru mañamkuchpaqar, tumkuy chunqu Dyuspi kriyiy. Amar yuyaychu: Kinsampch'i mana paypiqa kriyinichu, nichpaqa. Chay mana allita kriyiqqam mar yamku maqchimkaqchina. Chaqa wayrawanqam mar yamkuqa waqman kayman maqchimkan, ¿manachu? (Chaychinallam Dyuspi chay mana allita kriyiqqa. Suq tyimpu Jisumkristumpi allita yuyamkun, suq tyimpumandaqa manana allitachu yuyamkun.) 7 Payqam yuyan: Kananmandam rinina Dyusta kasuq, nichpa. Chaymandaqam qayandimbaqqa Dyusta qunqachpa, chay imangunampillana yuyallkan. Chay laya runamkunaqa amana yuyanqachu: Dyusmi rin yanampawaq, nichpaqa. 9 Piru Tayta Dyusqam mana nimayuq kriyiq masinchiqkunata ancha yanampan, kuyachqan baliq wambranguna kanambaq. Chayri pallkunaqa kuchimkunqa. 10 Kanan suq kampuqqar imangunata pyirdichpaqa, ama llamkichpachu, achwan kuchimkunqa. Chaqa kampuqkunaqam qawamkunampa tumktunchinalla das rinllampa chingaq. 11 Chaqa rumpay lluqchimuchpa ancha rumpayamptin, qawa chamkimptinqa, chumaq tumktungunampis wañuchpaqa, manam chumaqchu kidan, ¿manachu? Chay tumktumkunachinam kampuqkunampis imata rurallkachpa qallayta ganananqa, qunqaylla das rinllampa wañuq. 12 Mayqan runa mallimpadu kachpa, mana nima uchata rurachpaqa kuchimkunqa. Chaqa paytaqam Tayta Dyusqa suq ancha chumaq primyuta quchpa, rin kawsachiq tumkuy tyimpumpaq. Chaychinam ufrisichqa yumbay payta kuyaqkunata. 13 Piru suq runa munachpa uchata rurayta, Dyusta ama tumbanqachu: Paymi mallimpawachpa, animachiwachqa, kay uchata ruranaypaq, nichpaqa. Chaqa Tayta Dyusqam mana nima uchata munanchu rurayta, ni pitampis animachinchu, uchata ruranambaqqa. 14 Achwanmi runalla yuyan, mana allimkunata ruranambaqqa. Chaqa paypa yuyayninmi animachin, chay uchata rurananqa. 15 Chaymi chay runaqa kwirpun munachqandalla kasuchpa, uchata ruran. Chaychina uchampi sigichpa, wañuchpaqam, rin chingaq. 16 Kuyachqay masitamkuna, amar ingañaduqa kayllampachu. 17 Tayta Dyusmi anaq syilumanda tumkuy ima allin kaqtalla quwanchiq. Paymi rurachqa rumpayta, killata, yumbay lusirumkunata. Payqam ancha allin kachqanchinalla rin kaq. Manam rinchu kambyamkaq, llandu kambyamkaqchinaqa. 18 Pay munachqanda rurachpam, amkrawachqa kanchiq, yumbay rurachqanmanda mas baliq kananchiqllampa, allimp kaqta kriyichqanchiqrallku. 19 Chayri kuyachqay masitamkuna, suqkuna rimamptinqa, ancha allita uyachunllampa. Piru amar dasqa rimachunchu ni dasqa piñamkuchunchu. 20 Chaqa suq runa piñamkuchpaqam, mana ruranchu Dyus munachqandaqa. 21 Chayri ama rurayllampachu nima laya mana baliq kusaskunata ni kwirpullki munachqan uchamkunata. Achwanri umildi kachpa, Dyus nichqanda chumaqta kasuyllampa. Chaqa pay nichqanqam tarpuchqachina kachqa chunqullkillampampi, tumkuy chunqu paypi kriyinallkillampa. Chay nichqanqam ancha pudirniyuq wachachunanllampa. 22 Chayri Dyus nichqanda allimpta rurayllampa. Amar uyayllampallachu. Chaqa mayqan mana kasuqqa: Nuqam allin runa kani, nichpaqam, paylla ingañamkallkan. 23 Chaqa Dyus nichqanqam suq ispijuchina nuqanchiqpaqqa. Chaymi chay yanqa uyaqlla runaqa suq ispijumpi qaqllanda champallkaqchina tumkullkan. 24 Chaqa chay ispijumpi kaqmi chay uraslla qaqllandaqa rimkan. Chaymanda achuchpa ispijumandaqa, dasna qunqan ima laya kachqandaqa. (Chaychinallam chay mana kasumkuqkunampis Dyus nichqanda suq rratumpaqlla uyanllampa. Chaymandaqam uyachqandaqa manana kasunllampachu.) 25 Piru chay kasuqtaqam Dyusqa rin yanampaq tumkuy ima rurachqambi. Chaqa mana challkuqmi kasun Jisumkristumpa ancha allin wachawaqninchiq liynindaqa. 26 Piru suq runa yuyachpa: Nuqam allin dumktrinayuq kani, nichpa, piru mana qallunda sujitachpaqam, ingañamkallkan. Chaqa chay dumktrinanqam mana nimampaq balinchu. 27 Piru Taytanchiq Dyuspa ancha allin mana taqlludu dumktrinanqam yach'achiwanchiq, yanampananchiq chay ñamkallkaq wamkchamkunata, biyudamkunata. Kamachiwanchiqpismi, ama rurananchiq kay mundumpa mana baliq kustumbringunata, ama uchayuq kananchiq.
1 Masitamkuna, ancha allin llimpyallkaq Siñurninchiq Jisumkristumpi kriyichpaqar, yumbay runamkunata kuyayllampa, ama wamkindallaqa. Amar pimpaqpis yuyayllampachu: Manam balinchu, nichpaqa. 2 Mayñ, kaypaq yuyachunllampa: Kriyiq masinchiqkunawan tandadu kamptimkillampa, ch'ayachungiman ichkay runamkuna. Suqnin urumanda achka surtijayuq, ancha ch'aniyuq mudanayuq. Suqninqam pubrisitu, ichkillkaq mawka mudanayuq. 3 Chaychina kamptinqa, ¿imataraq rurangimanllampa? Qamkuna chay chumaq mudamkuchqata kaychina nichpa: Samamuy kay chumaq tiyanaman, piru chay mana nimayuqta nimptimkillampa: Chaypilla chayay ichu chay pachampi tiyay, nichpaqa, 4 chaychina wamkinda kuyachpa, wamkinda disprisyachpaqam, mana baliq yuyayniyuq juyischina kangillampa. 5 Kuyachqay masitamkuna, allitar uyawayllampa. Dyusmi kay mundumpi yumbay tiyaqkunamanda pubrimkunata amkrachpa, yanampachqa, paypi allita kriyinanllampa. Chaymi Jisumkristu chumaqta kamachimkumptin, chay pubrimkunaqa paypa pullanna rin tiyaq. Chaychinam Dyus ufrisichqa payta kuyaqkunataqa. 6 Piru qamkunaqam pubrimkunata panqachichqallampa kangi. ¿Manachu yach'angillampa: Kampuqkunaqam ancha trabajachichuchpa, achlitatalla pagarachuchpa, qamkunamanda ancha gananllampa, nichpa? Dimandachuchpampis, amalas ampachungillampa awturidarkunaman. 7 Pallkunaqam musyachpa, ancha allin Wachadurninchiqpa wachanda rimanllampa, ¿manachu? Piru qamkunaqam paypa chumaq chutinwan chutimkurqallkillampa. 8 Dyuspa Santu Librumbim kay ancha baliq liypaq kaychina nin: Runa masimkita kuyay, qamba kwirpullkita kuyachqallkichina, nichpa. Chayta kumplichpaqam, allita rurallkangillampa. 9 Piru mana nimayuqkunata panqachichpa, kampuqkunatalla kuyachpaqam, Dyuspa chay liynindaqa mana kumplillkangillampachu. Chaymi Dyuspa ñawpambiqa uchayuq kangillampa. 10 Chaqa Dyus kamachimkuchqanda yaqqa yumbayta kasuchpa, piru suqsituta mana kasuchpaqam, uchayuqna kanchiq Dyuspa ñawpambiqa, yumbay liyninda mana kasuchqanchiqrallku. 11 Dyusqam nirqan, warmiyuq ichu runayuq kachpa, ama suqwan puñunanchiq. Niwachqampismi kanchiq, ama wanchimkunanchiq. Chaymi suq runa Dyusta kasunanrallku warminwanlla kachpampis, piru wanchimkuchpaqa, uchayuqna. Chaqa Dyus nichqandaqam mana kasuchqachu. 12 Dyusmi yumbay nuqanchiqta rin jusgawaqninchiq: ¡Allitachu Churiy Jisumkristu kamachimkuchqanda kasuchqa ichu mana? nichpa. (Chayri Jisumkristumpi allimpta kriyichpa, Dyusta, runa masinchiqkunata kuyachunllampa, uchanchiqmanda pirdunadu kananchiq.) 13 Chaqa Tayta Dyusmi mana llamkimpachpachu rin jusgaq yumbay chay mana llamkimpamkuqtaqa. Piru jwisyu diyampim rin llamkimpaq yumbay chay llamkimpamkuqtaqa. 14 Masitamkuna, ¿imampaqtaq balin suq runa chiminwanlla ninambaq: Nuqam kriyini Jisumkristumpi, nichpaqa? Chaqa allimpta kriyichpaqa, Jisumkristu nichqanda ruranman. Piru chiminwanlla kriyichpaqa, ¿atinmanchu wachamkayta? Manñm. 15 Mayñ, yuyachunllampa suq pubri kriyiq masinchiqpi. Mana mudanayuq, mana mimkunayuq kamptin, 16 mayqanninchiq mana nimata quchpaqa, ninchiqman: Dyus yanampachunqa. Kuchimkuchpa riy. Imawambis quñumkay. Michkita mimkuy, nichpaqa, ¿ima laya kriyiqkunaraq kanchiqmanllampa? 17 Chaychina mana yanampachpaqa, yanqa chiminchiqwanlla kriyillkanchiqllampa. Manam allimptaqa kriyillkanchiqchu. 18 Suq runam ninman: Qamqam kriyingilla Jisumkristumpi; piru nuqaqam suqkunata yanampani, nichpa. Piru suq runa Jisumkristumpi kriyichpalla, mana yanampamkumptinqa, ¿imachinam atinchiqman yach'ayta: Allimptam kriyin, nichpa? Manam atinchiqmanchu yach'aytaqa. Piru nuqaqa Jisumkristumpi kriyichpa, runa masiyta yanampamptiymi, atingillampa yach'ayta: Allimptam Jisumkristumpi kriyin, nichpa. 19 Mayqannimki kriyichpa: Dyusninchiqllam allimp Dyus, nichpaqam, allimp kaqta kriyillkangi. Piru Dyusta mana kasuchpaqam, dyablumkunachina kangi. Chaqa chay dyablumkunampismi qamchina Dyuspi kriyinllampa. Payta manchachpam ch'ampsimkanllampa. Piru manam munanllampachu payta kasuytaqa. 20 ¡A, runa tuntu! ¿Imachinam atini intyindichichuyta? Kriyichpalla, mana nima allita rurachpaqam, mana ringichu wachamkaq. Yanqam kriyillkangi. 21 Manchu unay agwilunchiq Abrajanqam Dyusta kasuchpa, churin Isamkta amparqan suq pata altarman, chaypi wanchinambaq. Chayta ruramptinmi, Tayta Dyusqa uchangunata pirdunachpa, mana uchayuq runampaqna riqsirqan. 22 Chaqa chay Abrajanmi, Dyuspi yuyamkuchpa, payta allita kasurqan. Chaymi Tayta Dyusqa yanamparqan, mas allita paypi yuyamkunambaq, allita kasuchqanrallku. 23 Chaychina kasumptinmi, Dyuspa Santu Librumbi kay nichqanqa kumplichqa: Abrajanmi Tayta Dyuspi allimpta yuyamkurqan. Chaymi Dyusqa mana uchayuq runampaqna riqsirqan, nichpa. Chayrallkum Abrajambaqqa niqllampa: Dyuspa yanasun (yanasan), nichpa. 24 Chaychina allimpta kriyichpa kasumptinchiqmi, Tayta Dyusninchiqqa manana uchayuqpaq riqsiwanchiq. Piru yanqa kriyimptinchiqllaqam, mana riqsiwanchiqchu wambrangunampaqqa. 25 Chay unay uchayuq warmi Rrabqam ancha bandulira karqan. Piru Dyuspi kriyichpam, paytana kasurqan. Chaymi isrraylinumkunampa champamkuq kach'adungunata wasimbi pamkachpa, suq ladu ñandana kach'arqan, kuntrangunamanda wachamkananllampa. Chaymi Tayta Dyusqa yumbay uchangunamanda pirdunachpa, mana uchayuq warmimpaqna riqsirqan. 26 Chaymi ancha balin, Dyusta kasunanchiq. Chaqa samayninchiq uchyamkamptinqam, wañunchiqna, ¿manachu? Chaychinallam yanqalla kriyichpa, Dyusta mana kasuchpaqa, wañuchqachina kanchiq.
1 Kuyachqay masitamkuna, qamkunampiqa ama achka yach'achimkuqkuna kanqachu. Chaqa allitam yach'anchiq: Nuqallkuna yach'achimkuqkunatam Dyusqa masta rin jusgawaqllampa, mana allita kawsamptiyllampa, nichpa. 2 Chaqa yumbayninchiqmi uchata ruranchiq. Piru suq runa chiminwan mana nima uchata ruraqmi ancha allin runa. Chaqa yach'anmi yumbay kwirpunda allita sujitayta. 3 Bistyampa chiminmanmi frinuta ruranchiq kasuwananchiq. Chay tamkcha frinuwanllam atinchiq chay atun animalta purichiyta may munachqanchiqta. 4 Chaychinalla yuyachun chay yamkumpi puriq barkumkunampaqpis. Ancha atun kamptin, jwirti wayra suq laduman ampallkamptimbismi, runamkunaqa suq muyuchinan palawanlla atinllampa ampayta may munachqanda. 5 Chaychinallam qallunchiqpis kwirpunchiqmanda ancha uchulita kachpampis, ancha alabamkan: Tumkuy imatam atini rurayta, nichpa. ¡Qallunchiqqam suq chispa ninitachina! Manchu suq ancha uchulita chispa ninita mirachpaqa, rumpachin ancha achka muntita. Chaychinallam qallunchiqpis ancha uchulita kachpampis, ancha achkata dañachin. Chaqa infyirnumanda dyablumpa yuyayningunam qallunchiqta mana allimkunata rimachin. Chaychinam bidanchiqta dañachin, ancha uchayuq kananchiqllampa. 7 Runamkunaqam atin dumayta tumkuy laya chumkaru animalkunata, pichqumkunata, yamkumpi tiyaq animalkunata, kulibramkunatampis. 8 Piru qallunchiqtaqam mana pimpis atinchu duminayta. Chaqa qalluqam suq bininuchina ancha qawch'u dañachimkunanqa. Chaymi das mana allimkunata riman. 9 Chaqa chay qallunchiqwanllam Tayta Dyusta chumaqta alabanchiq. Chaymandaqam runa masinchiqkunata dasna maldisyanchiq. Piru Tayta Dyusqam yumbay runamkunata rurawachqa kanchiq, paychina kananchiqllampa. 10 Chayri kuyachqay masitamkuna, manam ni achlita balinchu, chiminchiqwan Dyusta alabachpa, runa masinchiqta maldisyananchiqqa. 11 Mayñ, kaypaqpis yuyachunllampa: ¿Suq pumkyumandallachu pulla lluqchinman michki yamku, ayaq yamku? Manñm. 12 Kuyachqay masitamkuna, ¿yura igusqachuraq puqunman asiytunasta ichu ubasqachuraq puqunman iguskunata? ¡Manñm! Chaychinallam kach'i yamkumandampis mana atinchu lluqchiyta michki yamkuqa. (Chaychinaqam mana balinchu chiminchiqwan Dyusta alabachpa, runa masinchiqta maldisyananchiqqa.) 13 Qamkunamanda suqnimki ancha yach'ayniyuq kachpaqar, ancha umildi chumaqta kawsanqa. 14 Piru mayqannimki imbidyusu kachpa, tumkuy imayuq munachpa kaytaqa, ama afaniru kanqachu ni llullamkunqachu: Ancha yach'ayniyuqmi kani, nichpaqa. 15 Chaqa chaychina yuyachpaqam, mana nimatampis Dyusmandaqa yach'amkuchqachu kangi. Chay laya mana baliq yuyallkunatam yach'amkuchqa kangi kay pachampi uchayuq runamkunamanda ichu kwirpullki munachqanmanda ichu kimkin dyablumanda. 16 Chaqa chay imbidyamkuqkuna, chay kuntramkuqkunaqam maypi kachpampis, yumbay laya uchamkunata rurachpa, mana atinllampachu chumaqta kawsaytaqa. 17 Piru Dyusmanda yach'amkuqkunaqam ancha chumaqta tiyanllampa, mana nima uchata rurachpachu, ni piñamkuchpachu. Achwanmi ancha allin kachpa, tumkuy imampi allita uyanllampa runa masingunata. Llamkimpachpam, suqkunata yanampanllampa. Kanan manam nimata pamkachpachu, allimp kaqtalla rimachpa kawsanllampa. 18 Pallkunaqam anyanamkuqkunata kunachpa alliyachinllampa, kuchimkuchpa, Dyus munachqanchina kawsananllampa.
1 ¿Imarallkutaq qamkunampura pilyachpa, anyanamkungillampaqa? Chaqa kwirpullkillampa tumkuy ima munachqanrallkum chaychinaqa kawsangillampa. 2 Qamkunaqam imata ancha munachpa, mana atichpa kunsigiytaqa wanchimkungillampa. Chaychina ancha munachpam, imbidyanamkuchpa pilyangillampa. Chaqa Dyusman mana mañamkuchpaqam, mana atingillampachu kunsigiyta chay munachqallkitaqa. 3 Kanan kwirpullki munachqandallam Dyusman mañamkungillampa. Chaymi Dyusqa mana quchungillampachu. 4 ¡A, runamkuna, warmimkuna Dyusta traysyunaqkuna! ¿Ima, manachu yach'angillampa: Dyusmi tumkuy laya uchamkunata ch'iqnin, nichpaqa? Qamkunaqam chay mana kriyiqkunachina munachpa kawsaytaqa, Dyuspa kuntran kangillampa. 5 Chaymi Dyuspa Santu Librumbiqam mana yanqachu yach'achiwanchiq: Dyuspa Santu Ispiritunqam nuqanchiqkunampi tiyan. Payqam ancha kuyawanchiqllampa. Chaymi silusu, ama uchata rurananchiq, nichpa. 6 Piru ancha allin kachpam, yanampawanchiq. Chaymi Santu Librumbi nin: Dyusmi yumbay palanganuta kuntran. Piru umildimkunataqam ancha yanampan, nichpa. 7 Chayri Dyusta tumkuy chunqu kasuchpa, dyabluta kuntrachunllampa. Chaychina kuntramptinchiqmi, payqa nuqanchiqmanda rin mitimkaq. 8 Chaymi Dyusman tumkuy chunqu mañamkumptimkim, paypa Santu Ispiritun rin chamuq chunqullkiman yanampachunan. Chayri qamkuna uchayuqkuna amana maluta rurayllampachu mamkimkiwanqa. Chaychinalla qamkuna ichkay yuyayniyuqkunampis uchallkimkunata dijachpa, Tayta Dyustana kasuyllampa, limpyu chunquyuq kanallkillampa. 9 Chayri amana asimkuchpachu, achwan mana allita rurachqallkirallku syintichpa, waqayllampa. 10 Umildiyachpana, Siñurninchiqta tumkuy chunqu kasuyllampa. Chaychina ruramptimkiqam, payqa ancha baliqpaq rin riqsichuqllampa. 11 Masitamkuna, ama ni mayqannimkimpa wachanda rimayllampachu. Chaqa kriyiq masinchiqta jusgachpa rimachpaqam, Jisumkristumpa liynindampis jusgallkangi. Qam juyischina munachpa kaytaqam, Dyuspa liynindaqa manana kasullkangichu. 12 Chaqa Jisumkristullam quwachqa kanchiq chay liynindaqa. Payllam juyisninchiq. Chaymi paylla atin runamkunata jusgayta, wachanambaq ichu chingachinambaq. Piru qamqa, ¿pitaq kangi runa masimkita jusganallkiqa? 13 Uyawayllampa qamkuna palanganumkuna. Qamkunaqam ningillampa: Kanan ichu qayam rinillampa riq chay mayqan llaqtaman. Chaymi suq watata nigusyuta rurachpa, qallayta rinillampa ganaq, nichpa. 14 Piru manam yach'angillampachu: ¿Imam rin pasawaqllampa qaya? nichpaqa. ¿Ima randichqachu bidallkillampaqa? Manchu pumkutallkunaqa suq pachampi rimkamkuchpa, das chingan. Chaychinallam bidanchiqpis mana durachpachu, das chingan. 15 Chayri ningimanllampa: Siñurninchiq munamptinmi, kawsachpa kay imata rurachaq; manaqa manam, nichpa. 16 Piru qamkunaqam ancha palanganuyangi. Chay layaqam ancha malu. Manam nimampaq balinchu. 17 Chaymi suq runa yach'achpa: Dyusmi munan kay byinda ruranaypaq, nichpa, piru mana rurachpaqam, uchayuqna kidan.
1 ¡Uyamkuyllampar kampuqkuna! Rinmi ch'ayamuq tyimpu ancha ñamkanallkillampa. Chaypaq waqachpa, qayach'amkuyllampa. 2 Chaqa yumbay chay ch'aniyuq kusasnimkimkunam rin ismuq. Chay ancha chumaq mudanallkimkunam kuruchpa rin uchyamkaq. 3 Chay urullki, qallaynimkim rin muqusuyaq. Chay dañamkaq qallaynimkiqam suq tistiguchina rin chimbichuq. Chaychina achka qallayta munachqallkirallkum, chay mana baliq yuyaynimkimkuna ninachina rinllampa chingachichuq. Chaqa kay ultimu diyamkunampim (pubrimkunata mich'achpa,) tumkuy kusasnimkita qutullkangillampa. 4 Chay kusichallkita tandaq runamkunatam mana pagarachqachu kangi. Chaymi pagungunampaq Dyusman rrimklamachqallampa. Kanan ancha pudirniyuq Tayta Dyusmi uyachqa chay rrimklamaq trabajaqkunata. 5 Kay mundumpim qamkunaqa ancha bwina bida pasachpa, kwirpullkimpa gustundalla rurachpa, animalkunachina gurduyachqallampa kangi. Chaymi listuna kangillampa, jwisyu diyampi wanchichunanllampa. 6 Chaqa qamkunaqam allin runamkunata dimandachpa, wanchichichqallampa kangi, qamkunamanda mana atimptinllampa wachamkayta. 7 Chayri masitamkuna, ñamkachpampis, ama disanimamkaychu. Achwanri chumaqta chuyamkuyllampa, Siñurninchiq Jisumkristu chamunangaman. Manchu suq tarpumkuqqa, simillanda tarpuchpaqa, chuyamkun tamyamptin wiñanambaq, allin kusichayuq kanambaq. 8 Chay tarpumkuqchinallar qamkunampis ama disanimamkachpachu, chuyamkuyllampa, Siñurninchiq chamunangaman. Chaqa payqam dasna rin chamuq. 9 Chayri masitamkuna, uyayllampa: Dyusmi juyisninchiq. Payqam pungunchiqman ch'ayamullkaqchina. Chaqa listunam chamunambaq jusgawananchiq. Chaymi kunallkillampa, ama ni mayqannimkimpa kuntranda rimanallkillampa, Tayta Dyus chaypaq ama jusgachunanllampa. 10 Kuyachqay masitamkuna, Tayta Dyuspaq rimaqkunam ancha ñamkachpampis, paypaq mana challkuq rimarqanllampa. Chaychinalla nuqanchiqkunampis pallkunachina ñamkachpampis, Dyuspaq mana challkuq rimachunllampa. 11 Chaqa suq kriyiq masinchiq ancha ñamkachpa, allita kriyichpa Tayta Dyuspiqam, nuqanchiqpaqqa ancha chumaq. Chayri payqa kuchimkunqa. Qamkunaqam uyachqallampa kangi chay Jubpaq, ¿manachu? Payqam ancha ñamkachpampis, mana challkuq Dyuspi yuyamkuchpa, mana ñigarqanchu paytaqa. Chaymandaqam Tayta Dyus ancha allin, ancha llamkimpamkuq kachpa, chay Jubtaqa ancha yanamparqan. 12 Piru kuyachqay masitamkuna, yumbay chay nichuchqaymandam masta kunallkillampa, ama juranallkillampa, ama ni syiluta, ni kay pachata nimata myintachpa, ni pur dyusitu ninallkillampa. Achwanri imampaq ari nichpaqa, chayta kumpliyllampa. Manñm nichpaqa, ama rurayllampachu. Ufrisichqallkita kumpliyllampa, Tayta Dyus ama kastigachunanllampa. 13 Mayqannimki padisillkachpaqa, Dyusman mañamkuyllampa. Mayqannimki kuchimkullkachpaqa, Dyusta alabay kantachpa. 14 Mayqannimki qachyaq kachpaqa, qayay yach'achimkuq ansyanullkimkunata. Chaymi chamuchpa chay qachyaqpa umanman asiytita rurachpa, Siñurninchiq Jisumkristumpa chutimbi Dyusman paypaq mañamkunqallampa. 15 Tumkuy chunqunwan yuyamkuchpa mañamkumptinllampam, Siñurninchiqqa chay qachyaqta rin kach'amkachiq. Uchayuq kamptimbismi, chay qachyaqtaqa rin pirdunaq. 16 Chayri mana allita rurachpaqa, kriyiq masinchiqkunata kunfisayllampa: Kay mana allimkunatam rurachqa kani, nichpa. Kanan suqnimkimpaq suqnimkimpaq Dyusman mañamkuyllampa, chay uchallkimkunamanda pirdunachuchpa, qachyaynimkimanda kach'amkachichunan. Chaqa suq ancha allin runa tumkuy chunqu mañamkumptinqam, Dyusqa uyachpa, ancha pudirniyuq kachpa, ancha allita rin yanampaq. 17 Yuyachumbis Dyuspaq rimaq Aliyaspaq. Payqam nuqanchiqchina runalla karqan. Piru tumkuy chunqu Dyusman mañamkumptin ama tamyanambaqmi, kimsa wata y midyuta mana tamyarqanchu kay pachampiqa. 18 Chaymandaqam tamyanambaq mañamkumptinqa, tamyarirqanna. Chaymi tarpudumkuna allita wiñamptin, allin kusichamkuna karqan kay pachampi. 19 Chayri masitamkuna, suq kriyiq masinchiq allimp kaqmanda pandachpa, mana baliq dumktrinampi kriyimptin, qamkuna chumaqta kunachpa Dyusman kutimunambaqqa, 20 ancha allita rurallkangillampa. Chaqa chaychina kutichimuchpaqam, chay uchayuqta wachallkangillampa, ama chinganambaq. Chaychina kutichimumptimkim, Tayta Dyusqa rin pirdunaq chay achka uchangunata.
1 Kuyachqay masitamkuna, nuqam Pidru kani. Jisumkristum amkrawachqa, paypa ampustulnin kanaypaq. Chaymi kay kartata iskibrillkillampa. Chaqa qamkunaqam kay mundumpiqa chimkwa chimkwa furastiruchina kawsangillampa prubinsya Puntumpi, prubinsya Galasyampi, Kampadusyampi, Asyampi, prubinsya Bitiñampimpis. 2 Taytanchiq Dyusmi unaymandampacha qamkunampaq yach'achqa. Chaymi amkrachuchqallampa, paypa wambranguna kanallkillampa. Qamkunatam Santu Ispiritunda quchuchqa, allita kasunallkillampa Churin Jisumkristuta. Chaqa chay Churinqam yawarninda ich'arqan, uchallkimkunamanda wachachunambaq. Chaymi Tayta Dyusman mañamkuni, tumkuy imampi yanampachunan, ama nimata manchachpachu, achwan kuchimkuchpa kawsanallkillampa. 3 ¡Alabachunllampa Siñurninchiq Jisumkristumpa Taytan Dyusta! Chaqa payqam ancha allin, ancha llamkimpamkuq. Chaymi Churin Jisumkristuta wañuchqanmanda kawsachimurqan, nuqanchiqkunata wachawananchiq, muchuqmanda nasirichqachina kananchiqllampa. Chaymi yuyamkunchiqllampa: Dyuswan rinchiq kawsaq, nichpa. 4 Chaqa anaq syilumpiqam rin quwaqninchiq ancha chumaq irinsyanchiqta. Chay irinsyanchiqqam mana nunka uchyamkanqachu ni dañamkanqachu ni chinganqachu chamkillkaq tumktuchina. 5 Chaqa Tayta Dyusqami ancha pudirniyuq kachpa, paypi kriyimptinchiq kwidawanchiq, jwisyu diya ch'ayamumptin, wachawananchiqllampa. Chay diyampiqam rin rimkachiwaqninchiq: Wachachuchpam, ancha chumaqta rini kawsachichuq, nichpa. 6 Chaymi qamkuna kay tyimpumpi suq rratumpaq qasachadu kachpampis, kuchimkuchpa kawsangillampa. 7 Chaqa qamkunaqam ancha balingillampa Dyuspaqqa. Manchu runamkunaqa uruta chulluchichpa mallimpanllampa, yach'anambaq: ¿Allimpchu urulla ichu taqlludu? nichpa. Chaychinallam Dyusqa qamkunatampis dijachungillampa, mallimpadu kanallkillampa, yumbay yach'anambaq: ¿Allimptachu Dyuspi kriyinllampa ichu mana? nichpa. Allita kriyichpaqam, ancha balingillampa maski chay uchyamkaq urumanda. Chaychina allita kriyimptimkiqam, Jisumkristu chamuchpa, kuchimkuchpa, ancha rin alabachuqllampa. 8 Chaqa qamkunaqam payta mana rimkachpampis, ancha kuyangillampa. Ancham yuyamkungillampa paypiqa, wachadu kanallkillampa. Chaymi kananqa ancha kuchimkuchpa, mana ni atingillampachu niyta yumbay chay ancha chumitaq kaqpaq, ancha chumaq kachqanrallku. 10 Waq unay tyimpumkunampim Dyuspaq rimaqkunaqa ancha istudyarqanllampa intyindinambaq: ¿Imachinam Tayta Dyus rin wachaq runamkunata, warmimkunata? nichpa. Chaymandaqam Dyuspaq rimarqanllampa: Ancha allin kachpam, rin wachawaqninchiq, nichpa. 11 Jisumkristumpa Santu Ispiritunmi Dyuspaq chay rimaqkunataqa kaychina yach'achirqan: Dyus Amkrachqan Wachadurmi ancha ñamkachpa rin wañuq. Piru wañuchqanmanda kawsamuchpa, llimpyachpam, rin riq syiluman, nichpa. Chaymi chay rimaqkunaqa ancha munarqanllampa yach'ayta Santu Ispiritu chay nichqambaq: ¿Piraq chay ñamkaq Wachadurqa? ¿Ima tyimpuraq chayqa kanqa? nichpa. 12 Chaymi Dyusqa chay rimaqkunata yach'achirqan: Chay ufrisimkuchqayqam manaraq qamkunampa tyimpullkimpichu rin kumpliq. Achwanmi rin kumpliqqa suq tyimpumpiraq, nichpa. Chaymi kananqa Dyusqa Santu Ispiritunda syilumanda kach'amuchqa, yanampanambaq chay yach'achichuq kriyiq masinchiqkunata. Challkunampaqmi Dyuspa kimkin anjilningunampis ancha munanllampa intyindiyta: ¿Imampaqmi Dyusqa runamkunata warmimkunata ancha kuyachpa, munachqa wachayta? nichpa. 13 Chayri tumkuy jwisyullkiwan allita yuyayllampa: ¿Imatam rini ruraq? nichpaqa. Kaychinampisri allita yuyamkuyllampa: Tayta Dyusmi ancha allin kachpa, Jisumkristu chamurimptin, tumkuy imata rin quwaqninchiq, nichpa. 14 Dyustana allita kasuyllampa. Chaqa manaraq paypi kriyichpaqam, kwirpullki yumbay munachqanda rurarqallkillampa. Piru kananqa amana kawsayllampachu chay unay kawsachqallkichinaqa. 15 Tayta Dyusmi Santu Librumbi nin: Nuqam ancha santu kani. Chayri qamkunampis nuqachina ancha santu kayllampa, nichpa. Tayta Dyusmi amkrawachqa kanchiq, wambranguna kananchiqllampa. Chayri pay nichqanchina, ancha chumaqta kawsachunllampa. 17 Nuqanchiqkunaqam Dyusta Taytanchiqpaq riqsinchiqllampa, ¿manachu? Chaqa payqam yumbayta ancha allita rin jusgaq tumkuy ima rurachqambaq, mana ni pita kuntrachpachu ni pita sawachachpachu. Chayri payta manchachpa, kay mundumpiqa tumkuy tyimpu allita rurachpa kawsachunllampa. 18 Chaymi Tayta Dyusqa qamkunata wachachuchqa tumkuy ima malu rurachqallkimanda. Chaqa yumbay chay mana baliq kustumbrimkitam yach'amkuchqallampa karqallki chay agwilullkimkunamanda. Chaymi Tayta Dyusqa ancha ch'aniyuqta pagaramkuchqa, qamkunata wachachunambaq. Manam uchyamkaq urutachu ni qallaytachu pagaramkuchqaqa. 19 Achwanmi Churin Jisumkristumpa yawarninda ich'achpa pagaramkuchqaqa. Payqam wañurqan suq ancha chumaq uñitachina, nuqanchiqkunata wachawananchiq. 20 Chaqa Tayta Dyusqam manaraq rurachpa kay munduta, nichqana karqan: Churiymi rin wañuq, runamkunata, warmimkunata wachanambaq, nichpa. Piru chayraqmi Jisumkristuta kay munduman kach'amurqan, nuqanchiqkunata wachawananchiq. 21 Chaymi Tayta Dyusqa Jisumkristuta wañuchqanmanda kawsachimurqan. Chaymandaqam syiluman amparqan, ancha pudirniyuq kanambaq. Chaymi nuqanchiqkunaqa Jisumkristurallku Tayta Dyuspi kriyichpa, yuyamkunchiqllampa: Rinchiqllampam riq syiluman, nichpa. 22 Chayrallkum kananqa Dyuspa Santu Ispiritun yanampachumptin, qamkunaqa Dyus allimp nichqanda kasuchpa, uchallkimkunata dijachqallampa kangi, limpyu chunquyuq kachpa, kriyiq masinchiqkunata allimpta kuyanallkillampa. Chaychinar suqnimki suqnimkiwan tumkuy chunqu tumkuy jwirsallkiwan allimpta kuyanamkuyllampa. 23 Chaqa mananam wañuq taytallkimkunampa wambranllachu kangillampa. Achwanmi kananqa Dyus nichqambi kriyichpa, muchuqmanda nasirichqallampa kangi, paypa wambrangunana kanallkillampa. Chay nichqanqam mana nunka chinganchu. Achwanmi tumkuy tyimpu rin duraq. 24 Chaymi Dyuspa Santu Librumbi nin: Yumbay runamkunam qawachina das wañun. Chaqa qawa chamkimptinmi, tumktunqa ichkin. Chaychinallam runamkunampis, pudirniyuq kachpa ichu yach'ayniyuq kachpampis, das wañun. 25 Piru Dyus nichqanqam tumkuy tyimpumpaq duran. Manam nunka uchyamkanqachu, nichpa. Kanan chay chumaq nichqandaqam qamkunata yach'achichuchqallampa kani.
1 Chayrallku ama nima maluta rurayllampachu. Amar ingañamkuyllampachu. Amar chimimkiwanllaqa Dyusta kasuychu. Amar imbidyanamkuychu. Amar runa masimkimpa wachanda rimayllampachu. 2 Allitam yach'angillampa: Tayta Dyusmi ancha allin, nichpa. Dyus nichqambismi nuqanchiqpaqqa ancha michki lichi puruchina. Iti wambritumkunaqam ancha munan ñuñuyta lichinda, ¿manachu? Chaychinallar nuqanchiqkunampis ancha munachun yach'amkuyta Tayta Dyus nichqanda, paypi mas allita kriyichpa, uchanchiqmanda wachadu kananchiqllampa. 4 Runamkunaqam Jisumkristuta riqsirqanllampa mana baliq rumitachina. Chaymi paytaqa wichumkurqanllampa. Piru Tayta Dyuspaqqam Jisumkristuqa ancha chumaq ancha baliq kawsaq rumichina. Chayri payman qamimkayllampa. 5 Chaqa qamkunampismi Jisumkristuchina Dyuspaqqa chumaq kawsaq rumimkunachina kangillampa. Chayri Dyusta bidallkita quyllampa, qamkunamanda ilgisyanda ruranambaq, numbrachunanllampa, kuranguna kanallkillampa. Chaychina Jisumkristumpi kriyichpa, kuranguna kamptimkillampam, Tayta Dyusqa kuchimkuchpa rin ch'askiq ufrindallkimkunata. 6 Chaymi Dyusqa Santu Librumbi Jisumkristumpaqqa kaychina nin: Siyun llaqtampim rini ruraq simyintumpa iskinambi suq mas baliq rumita. Chaymi paypi kriyiqkunaqa mana rinllampachu panqamkuq, nichpa. 7 Chaymi nuqanchiq kriyiqkunampaqqa chay rumiqa ancha balin. Piru Dyuspa Santu Librumbim chay mana kriyiqkunampaqqa kaychina nin: Chay albañilkuna wichumkuchqan rumiqam mas baliqpaq timkramkachqa, nichpa. 8 Piru mana kriyiqkunampaqqach Jisumkristuqa: Suq rumi ñambi trumpichichpa bulaqchina. Chaymi paypi mana kriyiqkunaqa Dyus nichqanda mana kasuchpaqa chingan. Chaqa unaymandampacham pallkunampaqqa kamachqa chingananllampa. 9 Piru qamkunaqam Dyuspa ayllunna kangillampa. Amkrachuchqallampam, payta sirbiq kuramkuna kanallkillampa, paypa nasyunnimbi tiyaq santu wambranguna kachpa, paypa familyan kanallkillampa. Chaychinam amkrachuchqallampa, paypa ancha chumaq nutisyanda yach'achimkunallki, uchallkimkunamanda amkramkachpa, chumaqtana payta kasunallkillampa. Piru manaraq Dyuspi kriyichpaqam, uchayuq kachpa, tutayaqpichina kawsarqallkillampa. Piru kananqam Tayta Dyusqa qamkunata wachachuchqa, ancha chumaq achimkpina kawsanallkillampa. 10 Unayqam qamkunaqa wichumkuchqa karqallkillampa. Piru kananqam Dyuspa ayllunna kangillampa. Unayqam mana pimpis llamkimpachurqanchu. Piru kananqam Dyusqa ancha llamkimpachungillampa. 11 Kuyachqay masitamkuna, kay mundumpiqam furastirumkunachina kawsanchiqllampa. Chaqa mas lijitimu llaqtanchiqqam syilumpiraq. Chaymi rrugallkillampa, ama kwirpullki munachqandalla ruranallkillampa. Chay mana allin yuyayninchiqkunam munan ichkichiwayninchiqta, Dyusmanda amkramkananchiq. 12 Chayri allimkunata rurachpa kawsayllampa chay mana kriyiqkunampa umkumbi. Chaychina kawsamptimkillampam, pallkunaqa intyindinqallampa: Allimptam waq runamkunaqa Dyus nichqanda kasun, nichpa. Chaymi kuntrallki rimaqkuna kachpampis, Dyuspi kriyichpa, jwisyu diya ch'ayamumptin, Dyusta rinllampa alabaq. 13 Chayri Jisumkristumpi kriyichpa, kay mundumpa mas pudirniyuq gubyirnunda, yumbay numbrachqan gubyirnungunatampis kasuyllampa. 14 Chaqa chay mas pwidiq gubyirnum kamachin chay awturidarkunata, mana alli ruraqkunata kastigananllampa, alli ruraqkunataqa alabananllampa. 15 Chaymi Dyusqa munan chumaqta kawsanallkillampa, chaychina uyarachinallki chay tuntu mana kriyiqkunata. 16 Atingillampam tumkuy ima munachqallkita rurayta, piru alli kaqtalla. Amar yuyayllampachu: Munachqayta atichpa ruraytaqam, malutampis atini rurayta, nichpaqa. Achwanri Dyuspa allin kriyadunchina kawsayllampa. 17 Chaychinar runa masimkimkunawan chumaqta kawsayllampa. Kriyiq masinchiqkunatar allita kuyayllampa. Dyusta ancha rrispitachpar, ama nima maluta rurayllampachu. Kay mundumpa mas pudirniyuq gubyirnundampis ancha rrispitayllampa. 18 Randichqa kriyadumkuna, patrunnimkita ancha rrispitachpa, chumaqta kasuyllampa, allin ichu malu kamptimbis. 19 Suqkuna yanqa qasachawamptinchiqpis, agwantachunllampa Dyus munachqanchina. Chaqa ancha allim, chaychina rurananchiq. 20 Piru mana allita ruramptimkillampa, chaypaq suqkuna maqachumptinqam, awnki agwantamptimkimpis, Dyuspaqqa mana balinchu. Piru qamkuna allita rurachqallkirallku ñamkachpa, agwantamptimkiqam, Dyuspaqqa ancha balin. 21 Dyusqam qayachuchqallampa, Jisumkristuchina ancha ñamkachpampis, Tayta Dyusta kasunallkillampa. Chaqa Jisumkristuqam ancha ñamkachpa, wañurqan wachawananchiqllampa. 22 Payqam mana nima uchata rurarqanchu, ni pitampis ingañarqanchu. 23 Payta kuntraqkuna maldisyamptimbismi, mana wampuyarqanchu. Suq lastima maqamptimbismi, mana juramparqanchu. Achwanmi Dyusman mañamkurqan, payna allita jusganambaq chay kuntraqkunata. 24 Kanan Jisumkristuqam chuqri chuqri ñamkarqan nuqanchiqkunarallku, amana uchayuq kachpa, achwan limpyu chunquna, kach'amkaduna kananchiqllampa. Pay kimkinmi kruspi kachpa, kwirpumbi amparqan uchanchiqkunata, amana uchamkunata rurananchiq, achwan allitalla rurachpa, kawsananchiqllampa. 25 Unayqam qamkunaqa Dyusta mana kasurqallkillampachu. Chaymi chingachqa wichamkunachina purirqallkillampa. Piru kananqam Jisumkristumpi kriyichqallampa kangi. Chaymi payna suq allin michidurchina allita kwidachungillampa, ispiritullki ama chinganambaq.
1 Qamkuna warmisitamkuna, qusallkita chumaqta kasuy. Chaqa chaychina kasuchpa ancha allita kawsamptimkillampam, pallkunaqa Dyuspi mana kriyichpampis, qamkunata rimkachuchpa, Jisumkristumpi kriyinqallampa, mana ni yach'achimptimkimpis. 3 Piru amar sawallkitallaqa allichayllampachu, urumanda sarsillumkunata, ancha ch'aniyuq mudanamkunata ruramkuchpaqa. Kanan purinallkiqa, amar palanganayaychu kutin kutin ñaqchamkuchpaqa. 4 Chayta ruranallkimandaqa achwan chunqullkita allichayllampa, ancha limpyu dulsichina chunquyuq kanallkillampa tumkuy tyimpumpaq. Chaqa chaychina chumaqta kawsamptimkim, ancha balin Dyuspaqqa. 5 Unay tyimpumpim wamkin allin warmimkuna chaychina karqan. Pallkunaqam Dyuspi ancha yuyamkuchpa, chumaqta kasuqllampa qusanllampata. 6 Chay unay warmi Sara chutiqmi chaychina karqan. Qusan Abrajandam chumaqta kasuq. Chaymi paytaqa Kamachimkuqniy niq. Chaychina qamkunampis allita rurachpaqam, mana nimata manchachpachu, chay Sarachina ringillampa kaq. 7 Ullqumkunampis allita yuyachpa, warmimkita rrispitachpa, chumaqta paywan kawsayllampa. Chaqa warmiqam mana jwirsayuqchu qamkunachinaqa. Piru pallkunampismi Dyuspa wambranguna. Chayri warmimkiwan chumaqta kawsayllampa, Dyusman mañamkumptimki, allita uyachunambaq. Manaqa manam rinchu uyachuqllampa. 8 Kay kartaytam uchyanaypaq nillkillampa, yumbaynimki llamkimpanamkuchpa, kuyanamkuchpa masampurachina kawsanallkillampa. Umildi llamkimpamkuqkunar kayllampa. 9 Suq runa mana allita rurachumptinqa, ama kutichiyllampachu. Musyachumptinqa, ama wampuyayllampachu. Achwanri Dyusman mañamkuyllampa, payta yanampanambaq. Chaqa Dyusqam qamkunata amkrachuchqa, tumkuy imampi yanampachunambaq. 10 Chaymi Dyuspa Santu Librumbi nin: Mayqan munaq kuchimkuchpa kawsaytaqa ama nima maluta rimanqachu, ni llullamkunqachu. 11 Chayri qamkunaqa ama nima maluta rurachpachu, achwan allitalla rurachpa, yumbaywan chumaqta kawsayllampa. 12 Chaqa Tayta Dyusqam allin runamkunata kwidan. Mañamkuchqandam uyan. Piru mana alli ruraqkunataqam anyan, nichpa. 13 Tumkuy diya qamkuna allita rurachpa kawsamptimkiqa, ¿pitaq qasachachungiman? 14 Piru allita ruramptimkillampa qasachachumptinqa, kuchimkuyllampa. Ama pitampis manchayllampachu ni llamkiyllampachu. 15 Achwanri tumkuy chunqu adurayllampa Siñurninchiqta. Kanan listu kayllampa yach'achinallki mayqan tampuchuqta: ¡Imarallkum Jisumkristumpi yuyamkuchpa, ancha kuchimkungi? nichpa. Piru umildi kachpa, chay tampuchuqta rrispitachpa, chumaqta yach'achiyllampa. 16 Chaychinar kawsayllampa ancha allita Dyusta kasuchpa, ama nimampaq panqamkuchpa, limpyu chunquyuq kanallki. Chaqa Jisumkristumpi kriyichpa, allita kawsamptimkiqam, chay rimachuqkunaqa rin panqamkuq yanqa rimachqambaq. 17 Piru kwidawkich ñamkanchiqmanllampa uchamkunata rurachqanchiqrallku. Achwanmi Dyus munamptin, mas alli padisinanchiq payta kasuchqanchiqrallku. 18 Chaqa Jisumkristu kimkimbismi mana nima uchayuq kachpampis, ancha ñamkachpa, wañurqan, uchayuqkunata wachawananchiq. Suq kutindallam wañurqan, ampawananchiq Tayta Dyusman. Kwirpun wañumptimbismi, ispiritunqa mana wañurqanchu. 19 Achwanmi Jisumkristu wañumptin, chay ispiritunqa wañuqkuna kachqanman richpa chay prisuchqa almamkunata Dyuspaq yach'achirqan. 20 Chay prisuchqa almamkunaqam Nuwimpa tyimpumbi kawsachpa, Dyustaqa mana kasuchqallampachu karqan. Piru pallkunata manaraq chingachichpam, Dyusqa ancha chuyarqan, Nuwi chay atun wambuq wasita uchyanangaman. Chay yamku chay wambuq wasita ampamptinqam, uchu runamkuna warmimkunalla wachamkarqan, Dyuspi kriyichqanrallku. 21 Chaychinallam nuqanchiqkunampis Jisumkristumpi kriyichpa, yamkuwan chutimkuchpa, wachamkanchiq. Chayta rurachpaqam, mana sawa kwirpunchiqtallachu mayllanchiq. Achwanmi Dyusman mañamkunchiq, uchanchiqkunata pirdunawananchiq, limpyu chunquyuqna kananchiqllampa. Chaymi Jisumkristu wañuchqanmanda kawsamuchqanrallku, atinchiqna wachamkayta. 22 Chaqa payqam syiluman richpa, Tayta Dyuspa allin ladumbi tiyallkan. Kanan Dyuspa anjilninguna, suq pudirniyuq ispiritumkuna, suq laya kamachimkuqkunam Jisumkristuta kasunllampa.
1 Jisumkristu nuqanchiqpaq ñamkachqanchina, qamkunampis listu kayllampa ñamkanallkimpaq. Chaqa mayqan runa Dyuspi kriyichqanrallku ñamkaqqam manana kawsanchu uchamkunata rurachpa. 2 Achwanmi Dyus munachqanda rurachpa, chumaqta kawsan. Mananam kwirpun munachqandalla rurachpachu kawsan wañunangaman. 3 Bastanar waq unay tyimpumkunampi chay mana kriyiqkunachina uchamkunata rurarqallkillampa. Chaqa kwirpullkillampa munachqandalla rurachpam kawsarqallkillampa, warmimkunata maskachpa, mach'achpa, ch'uqyana fyistamkunaman richpa, ancha umpyachpa, amitu layamkunata adurachpa. 4 Piru kananqam chay mana kriyiqkunaqa yuyanllampa: ¿Imarallkutaq manana nuqanchiqkunawan purinllampachu? nichpa. Chaymi mana allimkunata rimachungillampa. 5 Piru Jisumkristu kutimuchpaqam, yumbay chay rimachuqta rin jusgaq, kawsaqkunata, wañuchqamkunata. 6 Chaymi chumaq nutisyanda yach'achirqan wañuchqamkunata, kwirpunguna wañuchqa kamptimbis, ispiritungunaqa Dyuschina tumkuy tyimpu kawsananllampa. 7 Jwisyu diyam rinna ch'ayamuq, tumkuy ima uchyamkanambaq. Chaymi kunallkillampa, allin jwisyullkiwan kawsachpa, yumbay diya Dyusman mañamkunallkillampa. 8 Chayri tumkuy imamanda mas alli, ancha kuyanamkunallki qamkunampura. Chaychina kuyanamkuchpaqam, das ringillampa pirdunaq yumbay mana alli rurachuqkunata. 9 Wasimkiman ch'ayaqkunatar pusadata, mimkunata quyllampa, ama rimatimkuchpachu. 10 Tayta Dyusmi yumbaynimkita yanampachuchqa, suq layampi, suq layampi payta, runa masinchiqkunatampis allita yanampanallkillampa. Chayri Dyus yanampachumptin, may atichqallkimkaman chumaqta suqnimki suqnimki yanampanamkuyllampa, Dyuspa allin trabajadurninguna kanallkillampa. 11 Tayta Dyus mayqanninchiqta yanampawamptinchiq, paypaq yach'achimkunanchiqqa, pay munachqanchinalla chumaqta yach'achimkuchunllampa. Tayta Dyus yanampawamptinchiq, suqkunata yanampananchiqqa, paypa pudirninwan ancha allita pallkunata yanampachun. Tumkuy imatar allita rurachunllampa, yumbay rimkawaqninchiq Tayta Dyusta, Jisumkristutampis alabananllampa. Chayri payqa tumkuy tyimpu ancha alabachqa, ancha pudirniyuq kanqa. Chaychina kanqa. 12 Kuyachqay masitamkuna, ancha padisichpaqa, ama yuyayllampachu: ¡Rimkay! Mana nima maluta rurachpampis, ¿imampaqraq ancha padisillkani? nichpa. 13 Achwanri kuchimkuyllampa Jisumkristuchina padisichpampis. Chaqa chaychina padisichpaqam, ancha ringillampa kuchimkuq, rimkachpa ancha pudirniyuq Jisumkristuta syilumanda llimpyachpa chamullkamptin. 14 Jisumkristumpi kriyichqallkirallku suqkuna musyachumptimbis, kuchimkuyllampa. Chaqa Dyuspa llimpyallkaq Santu Ispiritun ancha pudirniyuq kachpam, rin yanampachuqllampa. ?Chay ch'iqnichuqkunaqam chay Santu Ispiritunda kuntranllampa. Piru qamkunaqam paytaqa ancha alabangillampa.? 15 Piru ama padisiyllampachu matansyiru kachqallkirallku ichu suwamkuq kachqallkirallku ichu mana allimkunata rurachqallkirallku ichu mitimkuchara kachqallkirallku. 16 Piru Jisumkristumpi kriyichqallkirallku padisichpaqar, ama panqamkuchpachu, achwan Dyusta alabayllampa. 17 Kananqam Dyusqa qallarillkanna wambrangunata jusgaq. Chaychina kimkin wambrangunata jusgachpaqam, chay chumaq nutisyanda mana kriyiqkunataqa mas jwirtita rin kastigaq. 18 Chaychina allin kaqkuna wachamkanambaq trabajus kamptinqa, ¿imananqaraqri Dyusta chay mana kasuq uchayuqkunaqa? (Maychimkampismi mana atinqallampachu wachamkaytaqa.) 19 Chaymi Tayta Dyus dijawamptinchiq padisinanchiqqa, payta mingachun bidanchiqta yuyachpa: Paymi rurawarqanchiq. Chaymi ancha allin kachpa, rin kumpliq yumbay ufrisiwachqanda, nichpa. Chaychina mingachpaqa, allita rurachpa kawsachunllampa.
1 Kananmi kaychina kunallkillampa qamkuna yach'achimkuq ansyanumkunata. Nuqampismi yach'achimkuq ansyanu masimkillampa kani. Rimkachqam kani Jisumkristuta ancha ñamkamptin. Chaymi tistigu kani. Chayrallku pay llimpyachpa syilumanda kutirimumptinqa, nuqampis qamkunachina ladumbi rini kaq. 2 Tayta Dyusqam munan, nuqanchiqkuna kriyiq masinchiqkunata chumaqta yach'achichpa kwidananchiq. Chaqa pallkunaqam Dyuspaqqa suq trumpa ancha kuyachqa wichamkunachina. Chayri kuchimkuchpa, pallkunata kwidachunllampa; ama amalasqa qallayta ganananchiqrallkuqa. 3 Amar ni mandunguna kachunllampachu. Achwanri Dyusta allita kasuchunllampa, kriyiq masinchiqkuna rimkawaqninchiq, nuqanchiqkunachina chumaqta kawsananllampa. 4 Chaychina kriyiq masinchiqkunata allita kwidamptinchiqmi, mas kamachimkuq Michidur Jisumkristu kutimuchpa, rin quwaqninchiq suq ancha chumaq primyuta. Chay primyuqam mana nunka uchyamkanqachu chay ramprayuq kurunamkunachinaqa. 5 Chaychinallar qamkuna chulumkuna chumaqta kasuyllampa chay yach'achichuq ansyanumkunata. Qamkunampurampis kasunamkuyllampa. Chaqa Dyusqam anyan palanganumkunata. Piru umildimkunataqam ancha yanampan. 6 Chayri yumbay qamkuna umildi kachpa, ancha pudirniyuq Tayta Dyuspa ñawpambi qunqurimkuyllampa, munachqan tyimpumpi yumbaypa ñawpambi alabachunanllampa. 7 Dyusmi ancha llamkimpawanchiq. Chayri ima pasawamptinchiq, ama llamkichpachu, payman mañamkuchunllampa. 8 Manchu liyunqa mallaqnachpa, qayach'amkuchpa purin aychanachpa. Chaychinallam dyablumpis kuntranchiq kachpa, imkinchiqta purillkan chingachiwananchiq. Chayri allita yuyachpa, ancha kwidamkachpa, ama dijachunllampachu, chay dyablu ingañawananchiq. 9 Achwanri Jisumkristumpi allita kriyichpa, dyablumpa kuntran chayachun yach'achpa: Tumkuy mundumpim kriyiq masinchiqkunampis nuqanchiqchina padisillkanllampa, nichpa. 10 Piru achla tyimputa qamkuna padisimptimkiqam, Dyus rin yanampachuqllampa, ancha chumaqta kawsanallki, allita paypi yuyamkunallki, jwirti kanallki, pay nichqambi allita yuramkanallki. Chaqa Tayta Dyus kimkinmi tumkuy imampi yanampawanchiq. Payqam qayawachqa kanchiq, Churin Jisumkristumpi kriyichpa, paywan luryampi tumkuy tyimpu kawsananchiq. 11 ¡Chayri paytalla alabachunllampa! ¡Payllar tumkuy tyimpu kamachimkunqa! ¡Biba Tayta Dyus! Chaychina kanqa. 12 Masitamkuna, kay kartitatam iskibrichqa kani qamkunampaq allin kumplidu masitanchiq Silbanuwan. Chaqa ancha munani yach'anallkillampa: Tayta Dyusmi ancha kuyachuchpa, tumkuy imampi yanampachuchqa, nichpa. Chayri Dyuspilla yuyamkuyllampa. 13 Kay Babiluñampi tiyaq kriyiq masinchiqkunampismi nampallkuchungillampa. [Nuta: Babiluñach'i munanman niyta Rruma.] Dyusmi qamkunatachina pallkunatampis amkrachqa, wambranguna kanambaq. Kriyiq masitanchiq Markuspismi qamkunata nampallkuchungi. Payqam kimkiy churiychina. 14 Kanan kuyanamkuchpa rrispitanamkuchpa, muchanamkuchpa, nampallkunamkuyllampa. Mayñ, Tayta Dyus yumbay qamkuna Jisuspi kriyiqkunata yanampachunqa, chumaqta kawsanallkillampa. Chaychina kanqa. (Chaytallam iskibrillkillampa.)
1 Kuyachqay masitamkuna, panisitamkuna, nuqam Jisumkristumpa ampustulnin Simun Pidru kani. Paypa sirbimkuqninmi kani. Wachadurninchiq Dyus Jisumkristum ancha allin kachpa, qamkunata yanampachuchqa, paypi kriyinallkillampa nuqallkunachina. Chaychina kriyimptinchiqmi, Dyuspaqqa ancha balin. Chaymi kay kartata iskibrichpa qamkunaman kach'allki. 2 Chaqa Tayta Dyusmanmi mañamkuni, qamkunata yanampachunambaq, paypaq, Siñurninchiq Jisuspaqpis allita yach'amkuchpa, chumaqta kawsanallkillampa. 3 Tayta Dyusmi pudirninwan ancha yanampawachqa kanchiq, payta kuyachpa, chumaqta kawsananchiqllampa. Chaqa yach'achiwachqam kanchiq ancha pudirniyuq Churin Jisumkristumpaq. Payqam ancha chumaq milagrumkunata rurachpa, qayawarqanchiq, paypi kriyinanchiq. 4 Tayta Dyusmi chaychina ufrisiwachqa kanchiq ancha yanampawananchiq. Chaymi chay ufrisiwachqanchiqqa ancha balin. Chaqa yanampawanchiqmi, Dyuschina kawsachpa, kay mundumpi tiyaqkunampa mana baliq yuyayningunamanda amkramkananchiq. 5 Chayri Jisumkristumpi allita kriyichpa, atichqanchiqkaman allita rurachpa, Dyusmanda allita yach'amkuchun, yach'ayniyuq kananchiqllampa. 6 Chaychina yach'ayniyuq kachpaqar, sujitamkachun, ama nima maluta rurananchiq. Chaychina sujitamkachpaqar, Dyuspi mana challkuq yuyamkuchun. pamkachpampis agwantachpa, tumkuy chunqu adurachunllampa Tayta Dyusta. 7 Chaychina adurachpaqa, llamkimpanamkuchpa yanampanamkuchun kriyiq masinchiqkunawan. Chaychina llamkimpanamkuchpar, tumkuy chunqunchiqwan kuyanamkuchun. 8 Chaymi kay yumbay nichuchqallkunata ancha allita kasuchpa, masta masta yach'amkuchpaqa, Siñurninchiq Jisumkristumpi allita kriyillkangillampa. Manam yanqaqa paypiqa kriyichqallampachu kangi. 9 Piru Dyus nichqanda mana kasuqkunaqam suq mana allita rimkamkuqchina ichu suq sarkuchina. Chaqa qunqachqallampanam: Jisumkristum uchallkunamanda pirdunawachqa, nichpaqa. 10 Chaymi masitamkuna, Dyusqa qayachuchqa, wambranguna kanallkillampa. Chayrallku yumbay kay kunachuchqayta kasuyllampa, ancha allita yach'amkunallki Siñurninchiq Jisumkristumpaq, chaychina ama nunka paymanda amkramkanallkillampa. 11 Kallkunata qamkuna ruramptimkiqam, Siñurninchiq Jisumkristuqa ancha kuchimkuchpa, rin ampachuqllampa luryaman, paywan tumkuy tyimpu kawsanallkillampa. Chaqa payllam Wachadurninchiqqa. 12 Yumbay kay allimp kaqta nichuchqaytam allitana yach'achpa kasullkangillampa. Piru muchuqmandam qamkunata yuyachirillki, ama qunqanallkillampa. 13 Chaqa Siñurninchiq Jisumkristum yach'achiwachqana: Pidru, ancha utqanam rinllampa wanchichuq, nichpa. Chaymi yuyachqa kani, kawsallkachparaq qamkunata kunachunaypaq, 15 wanchiwamptinllampa kay nichuchqayta ama qunqanallkillampa. 16 Manam yanqa kwintumkunatachu qamkunataqa yach'achichuchqa kani. Achwanmi nichuchqallampa kani: Siñurninchiq Jisumkristum ancha pudirniyuq. Rinmi kutimuq, nichpa. Chaqa kimkiy ñawiyllampawanmi allimpta rimkachqallampa kani Jisumkristu ancha pudirniyuq llimpyallkaqta. 17 Nuqallkunaqam paypa pullan karqayllampa chay santu urqqumpa sawambi. Waqpim Tayta Dyusqa Jisumkristuta llimpyachichpa, kaychina ancha alabarqan: Kaymi kuyachqay Churiy. Paywanmi nuqaqa ancha kuchimkuni, nichpa. Nuqallkuna chaypi kachpam, rimkarqayllampa Jisumkristu ancha llimpyallkamptin. Uyachqallampa kani Dyusta, syilumanda chaychina Jisumkristumpaq nimptin. 19 Nuqallkunamandaqam achwan Dyuspaq chay unay rimaqkuna mas allin tistigumkuna. Chaymi pallkuna iskibrichqanda kasuchpaqa, ancha allita rurallkangillampa. Chaqa kay mundumpiqam runamkuna warmimkuna uchamkunata rurachpaqa, tutayaqpichina purillkanllampa. Piru Dyuspaq rimaqkuna iskibrichqanqam suq micha achimkchamkuqchina. Chaqa Dyus munachqandam yach'achiwachqam kanchiq, Jisumkristu chamunangaman. Paymi chay lusiru yulaqachichina (yuraqachichina) ichu rumpaychina chumaqta achimkchamkuchpa, yumbayninchiqta chunqunchiqpi rin achimkchawaqninchiq. 20 Chayri allita intyindiyllampa: Dyuspaq rimaqkunaqam mana rimarqanllampachu pallkuna munachqanda. Achwanmi chay santu rimaqkunaqa Dyus munachqandalla rimachpa iskibrirqanllampa, Dyuspa Santu Ispiritun yanampamptin. Chayrallkum mana pimpis atinchu yach'achimkuyta pay munachqanda, (Dyus nichqanda dañachpaqa).
1 Unaymi Isrrayil nasyumbi karqan Dyuspaq rimaq tumkuqkuna. Pallkunaqam llullamkunata yach'achimkuqllampa. Chaychinallam kay tyimpunchiqpimpis wamkin runamkuna, Siñurninchiq Wachadur Jisumkristuta ñigachpa, ancha llullamkuchpa manachinalla rinllampa yach'achimkuq mana baliq dumktrinamkunata. Chaymi pallkunaqa das rinllampa chingaq. 2 Chaqa chay llullamkuqkuna yach'achimkumptinqam, achka runamkuna, warmimkuna mana baliq kustumbringunata rinllampa sigiq. Chaymi pallkunampa uchangunarallku, achka rimkaqkuna rinllampa yuyaq: Jisumkristumpa dumktrinanqam mana nimampaq balinchu, nichpa. 3 Chaqa chay llullamkuqkunaqam qallaypaqlla nisyuyachpa, mana baliq dumktrinanda rin yach'achichuqllampa, qallaynimkita surquchunanrallku. Piru Dyusqam achka tyimpuna kastigunda sigurachqa. Chaymi ancha utqana pallkunataqa illumki rin chingachiq. 4 Chaqa unay tyimpumpim Dyuspa wamkin anjilninguna paypa kuntran timkramkarqanllampa. Chaymi Dyusqa pallkunataqa mana pirdunachpachu, wichurqan infyirnuman. Chaypim pallkunataqa kadinamkunawan watachpa karsilarqan, tutayaqpi kanambaqllampa jwisyu diya ch'ayamunangaman. 5 Chaychinallam Nuwimpa unay tyimpumbimpis Tayta Dyusqa mana pirdunarqanchu uchayuq runamkunata, warmimkunataqa. Chaqa Nuwilla allin runa kachpa, Dyus nichqanda chay malumkunata yach'achichqa karqan. Chaymi mana kasumptinllampa, Tayta Dyusqa tamyata kach'amuchpa, chay malumkunataqa limpu chingachirqan. Piru wacharqanmi Nuwita, syiti ayllundinda. 6 Chaymandaqam suq tyimpumpimpis ninawan chingachirqan chay Suduma llaqtata, Gumurra llaqtata uch'payanangaman, challkunampaq yach'achpa, uchayuq runamkuna intyindinambaq: Dyusmi kastigan malumkunata, nichpa. 7 Piru Luttaqam wacharqan, allin runa kamptin. Chaqa chay Lutmi llaqta masingunata rimkachpa, uyachpa, mana allimkunata rurallkaqtaqa, tumkuy diya ancha llamkirqan chunqumbi. 9 Chaychinam Tayta Dyusqa allita yach'an wachayta paypi kriyiqkunata. Yach'ambismi uchayuqkunata waqaychayta, kastigadu kanambaq jwisyu diya ch'ayamumptin. 10 Piru Dyusqam masta rin kastigaq chay mas uchayuqkunata. Chaqa pallkunaqam kwirpumba gustundalla rurachpa, Dyusta mana munanllampachu kasuyta. Mana uyamkuq atribidu kachpam, ancha pudirniyuq kamachimkuqkunampa kuntranda rimanllampa. 11 Piru Dyuspa anjilningunaqam mas pudirniyuq chay llullamkuq runamkunamanda kachpampis, Dyuspa ñawpambiqa mana chimbinllampachu ni musyanllampachu chay ancha pudirniyuq kamachimkuqkunataqa. 12 Piru chay llullamkuqkunaqam mana intyindiq animalkunachina kachpa, maluta rimanllampa mana intyindichqangunampaq. Chaqa animalkunaqam nasichpa wiñanllampa, runamkuna piskachpa wanchinanllampa, ¿manachu? Chaychinallam chay llullamkuqkunampis rinllampa wañuq, 13 suqkunata ñamkachichqanrallku. Chaqa pallkunaqam suqkunampa ñawpambi kwirpun munachqandalla ruranllampa. Chaymi qamkuna kriyiq masinchiqkunawan suq fyistata ruramptimkillampa, chay uchayuqkuna tandamkachpa, pallkuna munachqandalla ruranllampa. Chayrallkum rimkachuqkuna panqachungillampa. 14 Chaqa pallkunaqam yumbay warmi rimkachqanda munanllampa. Kanan mana challkuqmi uchamkunata ruranllampa. Chaymi Jisumkristumpi mana allita kriyiqkunataqa inkitanllampa, pallkunawan uchata rurananllampa. Chaychinam tumkuy imata ancha munanllampa pallkunampaqlla. Chaymi yumbay pallkunataqa Tayta Dyus kundinachpa, ancha rin kastigaq. 15 Chaqa pallkunaqam Dyusmanda amkramkachpa, allin ñanninmanda lluqchichpa, chingachqallampana. Chay unay Biyurpa churin Balanchinam kawsallkanllampa. Chay Balanqam Dyusmanda amkramkarqan. Chaymi qallayta ganananrallku, mana allimkunata munarqan rurayta. 16 Chayrallkum Tayta Dyusqa burrunda rimachirqan, runachina anyanambaq. Chay burrunqam mana dijarqanchu chay munachqanda ruranambaqqa. 17 Chay llullamkuq yach'achimkuqkunam chamki pusuchina ichu pumkutay mana tamyayuqchina. Chaqa yach'achimkuchqanqam mana nimampaq balinchu. Chaymi Dyusqa pallkunata rin wichuq infyirnumpa mas tutayaqninman, tumkuy tyimpu chaypi kanambaqllampa. 18 Chaqa pallkunaqam ancha alabamkachpa, yanqamkunata rimachpa, inkitanllampa Jisumkristumpi chayraq kriyiqkunata. Chaymi animachinllampa muchuqmanda kriyirinanllampa mana baliq kusaskunampi, chay pallkunachina kwirpun munachqandalla rurarinanllampa. 19 Kanan ninllampam: Nuqallkunachina atingillampa munachqallkita rurayta. Manam pimpis rinchu kamachichuqllampa, nichpa. Piru manam intyindinllampachu: Uchata rurachpam, dyabluta kasullkanchiq, nichpaqa. Chaqa chay mayqan uchata ruraqmi dyablumpa kriyadun. 20 Kaychinampis yuyachunllampa: Suq runa kay mundumpa uchangunata dijachpa, Kamachimkuq Wachadurninchiq Jisumkristumpina kriyichpaqa, ama paymandaqa amkramkanqachu. Chaqa Dyuspa santu liyningunata dijachpa, uchangunatana rurarichpaqam, achwamba mas uchayuqna rin kaq. Chaymi mas alli kananda pallkunaqa Jisumkristumpi ama kriyinambaq. 22 Piru kananqam pallkunaqa allquchina ichu kuchichina. Chaymi Dyuspa Santu Librumbiqa allimpta nin chay uchata rurariqkunampaqqa: Allquqam manchu sitamkuchqanda mimkurin. Kuchiqam limpyu maylladu kachpa, lluchkaman richpa armamkuq, limpu mampayarin, nichpa. Chaychinallam chay uchata rurariqkunampis.
1 Kuyachqay masitamkuna, chay punta kartayta, kay imki kartaytampismi qamkunaman kach'amuni kunachuchpa, allita yuyanallki yumbay chay yach'achichuchqaypaq. 2 Chayri allita yuyayllampa Dyuspaq unay santu rimaqkuna nichqanda, Kamachimkuq Wachadurninchiq Jisumkristu kamachimkuchqanda, ampustulninguna yach'achichuchqanda. 3 Piru puntata kallkuna ancha allita intyindiyllampa: Yaqqana jwisyu diya ch'ayamumptinmi, kaychina rin kaq. Wamkin runamkunam Dyus nichqanda burlachpa, kwirpumba gustundalla rurachpa, rinllampa kawsaq. 4 Pallkunaqam asimkuchpa rinllampa tampuchuq: Mayñ, ¿maytaq Jisumkristu chamunchu? Dyusqam ufrisimkuchqa, Jisumkristu chamurinambaq, ¿manachu? ¿Maytaq rimkch'anchu? Unay agwilunchiqkunampa tyimpunmandampacha, kay pacha kachqanmandampismi chaychinalla. Manam nimampis kambyamkanchu, nichpa. 5 Chaqa chay asimkuqkunaqam yach'achpampis, mana munanllampachu kriyiyta: Tayta Dyusmi rimachpalla, syiluta, kay allpata rurarqan, yamkumanda amkrachpa. 6 Dyusmi unay tyimpumpi kay mundumpi tumkuy ima kaqta yamkuwan chingachirqan, nichpa. 7 Piru Dyusmi kamachqa, kay pacha, syilumpis, jwisyu diyampi rumpachpa chinganambaq. Chay ninamkunawan rumpachichpam, chay asimkuq uchayuqkunatampis rin chingachiq. 8 Piru kuyachqay masitamkuna, kaytar yach'ayllampa: Siñurninchiqpaqqam suq diyalla mil watamkunachina. Mil watamkunampismi paypaqqa suq diyachinalla. 9 Piru wamkin runamkunaqam yuyanllampa: Dyusmi ancha unayan chay ufrisimkuchqanda kumplinambaq, nichpa. Piru manam pallkuna yuyachqanchinachu. Chaqa Dyusqam mana yanqachu unayallkanqa. Achwanmi payqa ancha allin kachpa chuyamkullkan, ancha munachpa yumbay runamkuna, warmimkuna uchangunata dijachpa, paypi kriyinambaqllampa. Chaqa manam munanchu, ni suq runa, ni suq warmi chinganambaqqa. 10 Manchu ladrunqa tutamp qunqaylla chamun suwawananchiq. Chaychinam qunqaylla Siñurninchiq Jisumkristumpis mana yuyachqanchiq diyampi rin chamuq. Chay diyaqam syiluqa tumkuy imandin ancha kunyachpa chulluchpa rin uchyamkaq. Kay mundumpismi tumkuy imandin ninawan lumyachpa, limpu rin uchyamkaq. 11 Yach'achpa: Tumkuy imam rin uchyamkaq, nichpaqa, Dyusta kasuchpa, adurachpa kawsachunllampa, ama nima uchata rurachpachu. 12 Chaychina kawsachpaqa, imachinampis Dyuspaq allita yach'achimkuchun, pay mas utqa chamunambaq. Chay diyaqam syiluqa tumkuy imandin chulluchpa lumyallkaq ninamkunawan rin uchyamkaq. 13 Piru nuqanchiqkunaqam chuyallkanchiq muchuq syiluta, muchuq pachata Dyus ufrisiwachqanchiqta. Chaypiqam ancha chumaqta rinchiqllampa kawsaq, Jisumkristu ancha allin justisyata ruramptin. 14 Chayri kuyachqay masitamkuna, challkunata chuyachpaqa, imachinampis allimkunatalla rurachpa, chumaqta kawsachunllampa, Tayta Dyus chamuchpa, ama nima laya uchayuqta tariwananchiq. 15 Allitar intyindiyllampa, Siñurninchiq Jisumkristuqam chuyallkan, mas achka runata warmita wachanambaq. Chaymi manaraq chamunchu. Chaychinallam chay kuyachqanchiq masitanchiq Pablumpis, Dyus yanampamptin, yach'ayniyuq kachpa, qamkunata iskibrichuchqa. 16 Chaychinallam paypis yumbay kartangunampi qamkunata yach'achichuchqa. Lumkismi chay kartangunaqa trabajus intyindinampaq. Chaymi chay runa mana intyindiqkunaqa, Dyuspi mana allita kriyichpa, Pablu nichqanda kambyachpa, suq layatana yach'achimkunllampa. Chaychinallam Dyuspa Santu Librumba wamkin partingunatampis dañachpa, yanqamkunata yach'achimkunllampa. Chaymi pallkunaqa rinllampa chingaq. 17 Chayri kuyachqay masitamkuna, allitana yach'achpa tumkuy challkunata, sigiyllampa Tayta Dyuspi allita yuyamkuchpa. Kwidamkayllampar, chay llullamkuqkuna ama ingañachuchpa, Dyusmanda amkrachunanllampa. 18 Achwanri Siñurninchiq Wachadur Jisumkristuta chunqunchiqpi mas allita riqsichunllampa, chaychina masta masta yach'ananchiq: Paymi ancha kuyawanchiq, nichpa. ¡Biba Siñurninchiq Jisumkristu! ¡Payri kanan tumkuy tyimpumpis alabachqa kanqa! Chaychina kanqa.
1 Kay kartatam iskibrillkillampa, yach'anallki suq ancha allin Rimaqpaq. Manaraq kay mundu kamptinmi, chay Rimaqqa karqanna. Chaymandaqam payqa nuqallkunawan purirqan. Chaymi paytaqa uyachqallampa kani kimkiy rinriyllampawan. Rimkachqallampa kani kimkiy ñawiyllampawan. Kimkiy mamkiyllampawanmi paytaqa llamkarqayllampa. Chay Rimaqqam yanampawanchiq, tumkuy tyimpu kawsananchiq. (Paymi Jisumkristu.) 2 Payqam Tayta Dyuspa pullan karqan. Chaymandaqam Dyusmanda chamuchpaqa, nuqallkunawan purirqan. Payta riqsichpam, tistigunguna kanillampa. Paymi wachawanchiq, tumkuy tyimpu kawsananchiq. Chaymi pay rurachqanda parlachillkillampa. 3 Chayrallkum rimkachqayllampata, uyachqayllampata nillkillampa, qamkunampis nuqallkunawan suq yuyayniyuqlla kanallkillampa. Chaqa Jisumkristumpi kriyichpam, nuqallkunaqa Tayta Dyuswan, Churin Jisumkristuwambis allimpta suq yuyayniyuqlla kanillampa. 4 Chaymi kay kartata iskibrillkillampa, tumkuy chunqullkiwan kuchimkunallkillampa. 5 Jisumkristu kay niwachqandam qamkunataqa yach'achillki. Paymi niwachqallampa: Tayta Dyusqam mana nima uchayuqchu. Chaymi paypiqa mana kanchu tutayaqqa. Achwan ancha allin kachpam, rumpaychina ancha achimkchamkun, nichpa. 6 Chayri uchamkunata rurachpaqa, ama nichunllampachu: Dyustam riqsini. Paywanmi purini, nichpaqa. Chaychina nichpaqam, llullamkullkanchiq. Chaqa Dyus niwachqanchiqtaqam mana kasullkanchiqchu. 7 Piru Dyuschina allitalla rurachpa, achimkpichina kawsamptinchiqqam, suq yuyayniyuqlla kanchiqllampa. Chaymi Tayta Dyusqa yumbay uchanchiqmanda pirdunawanchiq, Churin Jisumkristu yawarninda nuqanchiqkunampaq ich'achqanrallku. 8 Piru Manam nuqaqa uchayuqchu kani nichpaqam, nuqanchiqlla ingañamkallkanchiq. Chaqa chaychina nichpaqam, ancha llullamkullkanchiq. 9 Piru mana nimata pamkachpachu, Dyusman mañamkumptinchiqqam, uchanchiqkunata pirdunawananchiq, payqam mañachqanchiqta rin ruraq. Chaqa ancha allin, ancha kumplidu kachpam, yumbay uchanchiqmanda rin pirdunawaqninchiq, ama nima uchayuqna kananchiqllampa. 10 Piru Manam nima uchayuqchu kani nichpaqam, Dyustaqa riqsillkanchiqllampa llullamkuqtachina. Chaqa payqam niwachqa kanchiq: Uchayuqmi kangillampa, nichpa. Piru manam kriyinchiqllampachu.
1 Qamkunam kuyachqay wambrallkunachina kangillampa. Chaymi kay kartata iskibrillkillampa kunachuchpa, ama nima uchata ruranallkillampa. Piru mayqanninchiq uchata ruramptinchiqqam, Tayta Dyuspa ñawpambi kan suq ancha allin abugadunchiq, faburninchiqta rimanambaq. Paymi ancha allin Jisumkristu. 2 Chaqa Jisumkristuqam wañurqan uchanchiqmanda pirdunawananchiq. Piru manam nuqanchiqpaqllachu wañurqanqa. Achwanmi wañurqanqa munachpa wachayta yumbay runamkunata, warmimkunata. 3 Tayta Dyus kamachimkuchqanda kasuchpaqam yach'anchiqna: Allimptam chunquypi payta riqsini, nichpa. 4 Piru chay mayqan niq: Nuqam chunquypi Dyusta riqsini, nichpa, piru Dyus kamachimkuchqanda mana kasuchpaqam llullamkullkan. Manam allimptachu rimallkan. 5 Piru Dyusta kasuqkunaqam allimpta tumkuy chunqunwan payta kuyanllampa. Chaychinam yach'anchiq: Dyuspa wambrannam kanchiq, nichpa. 6 Piru mayqan niqqam: Nuqam Tayta Dyuspa wambran kani nichpaqa, Jisumkristuchinalla kawsanqallampa. 7 Masitamkuna, manam iskibrillkichu muchuq kamachimkuchqayta. Chaqa Jisumkristumpi kriyichqallki diyamandampacham Dyus kamachimkuchqanda yach'amkuchqallampa kangi. Chay kamachimkuchqandam iskibrillkillampa. 8 Piru kananqam kay allimp kaqtampis iskibrillkillampa, mas allita intyindinallkillampa chay yach'amkuchqallkita. Chaqa Jisumkristum Dyus kamachimkuchqanda rurachqa. Chaymi qamkunampis allitana rurachpaqa, manana tutayaqpichinachu purillkangillampa. Achwanmi kananqa qamkunampa bidallkimpiqa Tayta Dyusna achimkchamkullkan. 9 Piru chay mayqan niq: Dyuswannam achimkpichina kawsallkani nichpa, piru runa masinda ch'iqnichpaqam, uchangunampilla kawsallkan. Chaymi tutayaqpichina purillkan. 10 Piru mayqan runa masinda kuyaqqam Dyuswanna achimkpichina purillkan. Chaymi dyabluqa manana atinchu ichkichiyta, uchata ruranambaqqa. 11 Piru chay runa masinda ch'iqniqqam uchanrallku tutayaqpichina kawsallkan. Manchu suq sarkuqa mana yach'anchu: Maytam rillkani, nichpaqa. Chaychinallam chay uchayuqkunampis tutayaqpichina purillkanllampa suq sarkuchina. 12 Kriyiq masitamkuna, qamkunam wambrallkunachina kangillampa. Chaqa Tayta Dyusmi uchallkimkunamanda pirdunachuchqa, Jisumkristu wañuchqanrallku. Chaymi kay kartata iskibrillkillampa. 13 Wamkinnimkiqam taytamkuna kangillampa. Qamkunaqam Jisumkristumpi kriyichqallampa kangi. Payqam manaraq nimampis kamptin, kachqana. Chaymi paypi kriyichqallkirallku, iskibrillkillampa kay kartata. Qamkuna wambra runamkunamambis iskibrillki. Chaqa qamkunaqam jwirti kachpa, Tayta Dyus nichqanda tumkuy chunqu kriyichpa, dyabluta binsichqallampa kangi. Chaymi qamkunatampis iskibrillki kay kartata. Qamkuna wambramkunamambis iskibrillki, Tayta Dyuspi kriyichqallkirallku. [Nuta: Achka yach'ayniyuqkunam yuyanllampa: Chay taytamkunam munan niyta, Dyuspaq yach'achimkuqkuna; chay wambra runamkunam munan niyta, chay yach'achimkuqkunampa yanampamkuqninguna; chay wambramkunam munan niyta, Jisuspi yumbay kriyiqkuna, nichpa.] 15 Amar munayllampachu kay munduta ni kusasningunata. Chaqa mayqan ancha munaq kay mundumpi kaq kusaskunataqam mana kuyanchu Tayta Dyustaqa. 16 Kay mundumpi achka tiyaqkunam kwirpun munachqandalla ruranllampa. Wamkinqam imamkunata rimkachpaqa, ancha munanllampa. Wamkinqam achla imayuq kachpa ichu achla imata yach'achpaqa, ancha alabamkanllampa. Chay laya yuyallkunaqam mana chamunchu Dyusmandaqa. Achwanmi chamun uchayuq runamkunamanda. 17 Kay munduqam tumkuy imandin, runamkuna munachqambis uchyamkallkanna. Limpunam rin chingaq. Piru nuqanchiqkuna Dyus munachqanda rurachpaqam, tumkuy tyimpu rinchiqllampa kawsaq. 18 Ijitumkuna, kay pachaqam rin uchyamkaq. Chay diyaqam ch'ayamullkanna. Manchu qamkunaqa uyachqa kangi: Rinmi kaq Jisumkristuta kuntraq, nichpa. Allibmi chayqa. Kananqam achka kuntraqkunana kan. Ch'iqninllampam Jisumkristuta. Chaymi yach'anchiq: Kay munduqam rinna uchyamkaq, nichpa. 19 Chay kuntraqkunaqam yumbay nuqanchiqmanda amkramkachqa. Chaqa pallkunaqam yanqa kriyiq tumkuchpa, pullanchiq kachqallampa karqan. Piru Jisumkristumpi allimpta kriyichpaqach'i, kanangaman pullanchiq kanandallampa. Piru pallkuna nuqanchiqmanda amkramkamptinnam, yach'anchiqllampa: Jisumkristumpiqam mana allimptachu kriyichqallampa, nichpa. 20 Piru Jisumkristum qamkunata quchuchqa Santu Ispiritunda. Chaymi yumbaynimki yach'angillampa allimp kachqanda. 21 Kinsampch'i yuyangillampa: Jwanqam iskibriwallkan yuyachpa: Manam yach'anllampachu Dyuspaq, nichpa. Manam chaychinachu. Chaqa qamkunaqam yach'angina Dyus nichqanda. Chaymi iskibrillkillampa, qamkunata masta yanampachunay. Chaqa yach'angillampanam: Tayta Dyus nichqanqam allimp. Manam nima llullachu, nichpa. 22 Mayñ, ¿pitaq chay llullamkuqqa? Payqam nin: Jisumkristuqam mana Dyus Amkrachqan Wachadurchu, nichpa. Chay laya rimaqkunaqam Jisumkristuta kuntranllampa. Chaqa payta ñigachpaqam, Tayta Dyustampis ñigallkanllampa. 23 Chaymi Jisumkristuta ñigaqkunaqa mana Tayta Dyuswanchu. Piru Jisumkristumpi kriyiqkunaqam Taytanchiq Dyuswambis. 24 Chaymi nillkillampa: Allitar yuyayllampa Dyus nichqanda. Chaqa Jisumkristumpi kriyichqallki diyamandampacham allita yach'amkuchqallampa kangi pay nichqanda. Chayta allita yuyachpaqam, ringillampa kawsaq Jisumkristuwan, Tayta Dyuswambis. 25 Chaqa Jisumkristuqam ufrisiwachqa kanchiq, tumkuy tyimpu paywan kawsananchiqllampa. 26 Chaymi kay kartata qamkunaman iskibrillki, allita yach'anallkillampa, chay llullamkuqkuna ama ingañachunanllampa. 27 Piru Jisumkristum Santu Ispiritunda quchuchqallampa, qamkunampi tiyanambaq. Chaymi manana nisisaryuchu, ni pimpis suq laya dumktrinata qamkunata yach'achichunan. Chaqa chay Santu Ispiritunmi tumkuy ima allimp kaqta qamkunata yach'achichungi; manam llullamkunatachu. Chayri chay Santu Ispiritu nichuchqanda kasuchpa, Jisumkristumpi allita kriyichpa kawsayllampa. 28 Chayri kananqa ijitumkuna, Jisumkristumanda amana amkramkachunllampachu. Achwanri paypina yuyamkuchpa kawsachun, pay chamumptin, kuchimkuchpa chuyananchiq, ama nimata manchachpachu. 29 Chaqa qamkunaqam yach'angillampa: Dyusmi ancha allin, nichpa. Chaymi chay mayqan allita rurachpa kawsaqqa Dyuspa wambranguna.
1 ¡Yuyayllampa, Tayta Dyusqa anchallana kuyawanchiqllampa! Chaqa kimkin wambrangunampaqmi riqsiwanchiqllampa. Allibmi paypa wambranguna kanchiqllampa. Chaymi Dyuspi mana kriyiqkuna mana yach'anllampachu: ¿Ima laya runamkunataq Jisumkristumpi chay kriyiqkunaqa? nichpa. Chaqa Dyusta mana riqsinllampachu yuyayningunampi. 2 Kuyachqay masitamkuna, kananqam Dyuspa wambrangunana kanchiqllampa. Piru manaraqmi yach'anchiqchu: ¿Imachinaraq rinchiqllampa kaq? nichpaqa. Piru kaytaqam yach'anchiqna: Jisumkristu chamumptinmi, payta rimkamptinchiq, Tayta Dyus rin kambyawaqninchiq, Jisumkristuchina kananchiqllampa, nichpa. 3 Chaymi yumbayninchiq Jisumkristuta munachpa rimkayta, uchanchiqkunata dijallkanchiqllampa, Jisumkristuchina limpyu chunquyuq kananchiqllampa. 4 Piru uchata ruraqkunam mana kasullkanchu Dyus kamachimkuchqandaqa. 5 Kanan qamkunaqam yach'angina: Jisumkristu mana nima uchayuq kachpam, kay pachaman chamurqan, uchanchiqkunamanda wachawananchiq, nichpa. 6 Chaymi Jisumkristumpi kriyiqkunaqa manana kawsanchiqllampachu uchamkunata rurachpaqa. Piru chay uchata ruraqkunaqam Jisumkristumpi mana allimptaqa kriyinllampachu, ni riqsinllampachu paytaqa chunqunllampampi. 7 Chayri ijitumkuna, amamkich dijamkangillampachu, ni pimpis ingañachunanqa. Chaqa allita rurachpa kawsaqqam allin runana. Paymi Jisumkristuchina chumaqtana kawsallkan. 8 Piru uchata rurachpa kawsaqkunaqam dyablumpa wambranguna. Chaqa Tayta Dyus wichumkuchqan diyamandampacham dyabluqa uchata rurachpalla kawsan. Chaymi Dyuspa Churin Jisumkristu chamurqan chingachiq dyablu chay mana alli rurachqanda. 9 Dyusqam wachawachqa kanchiq, wambranguna kananchiqllampa. Chaymi Santu Ispiritun chunqunchiqpi tiyamptin, manana atinchiqchu kawsayta uchamkunata rurachpa. 10 Ancha riqsiypaqllam Dyuspa wambranguna, dyablumpa wambrangunaqa. Chaqa chay dyablumpa wambrangunaqam mana allimkunata rurachpa kawsanllampa. Kanan runa masindampismi mana kuyanllampachu. 11 Chaqa Dyusmi kamachiwanchiq, kuyanamkunanchiq suqwan suqwan. Chaytaqam unaymandampacha uyachqallampa kangi. 12 Chayri ama chay unay Kayinchinaqa kachunllampachu. Paymi dyablumpa karqan. Chaymi masanda wanchirqan. Mayñ, ¿imampaqtaq masandaqa wanchirqanqa? Chaqa chay Kayinmi mana allimkunata rurachpa kawsaq. Chay masan Abilqam allimkunata rurachpa kawsaq. Chaymi chay Kayinqa imbidyachpa, masan Abilta wanchirqan. 13 Kuyachqay masitamkuna, Jisumkristumpi mana kriyiqkuna ch'iqnichumptinllampaqa, ama yuyayllampachu: ¿Imampaqraq ch'iqniwan? nichpaqa. 14 Chaqa nuqanchiqpismi Dyuspi manaraq kriyichpa, chingananchiq karqanchiqllampa. Piru kananqam suqwan suqwan kuyanamkunchiq. Chaymi yach'anchiqllampa: Muchuq bidamannam yallkuchqa kani, nichpa. Piru suqkunata mana kuyaqkunaqam wañuchqachinaraq. 15 Chaymi suqkunata ch'iqniqkunaqa rinllampa chingaq. Chaqa Dyuspaqqam pallkunaqa suq matansyiruchina. Kanan qamkunaqam yach'angi: Mayqan matansyiru kachpaqam, mana rinchu wachamkaq, tumkuy tyimpu Dyuswan kawsanambaq, nichpa. 16 Piru Jisumkristum yach'achiwanchiq imachina kuyanamkunanchiq. Chaqa paymi kuyawaqninchiq wañurqan wachawananchiq. Chaymi nuqanchiqkunampis kriyiq masinchiqkunata kuyachpa, listu kachunllampa wañunanchiq, pallkunata wachananchiq. 17 Piru mayqanninchiq kriyiq masinchiqta mana nimayuqta rimkachpa, mana yanampachpa imanchiqwanqam, mana nimatampis Tayta Dyustaqa kuyallkanchiqchu. 18 Kuyachqay wambramkuna, amar chiminchiqwanllaqa kuyachunchu runa masinchiqkunataqa. Achwanri allimpta kuyachpa, pallkunata yanampachunllampa. 19 Chaychina kuyanamkuchpaqam yach'anchiqna: Dyuspa allimp wambranmi kani, nichpa. Chaymi paypa ñawpanman ch'ayachpaqa, manana rinchiqllampachu panqamkuq. 20 Chaqa mana allita rurachpaqam, das syintinchiq chunqunchiqpi: Ama chaytaqa ruranaytachu, nichpa. Piru Tayta Dyusqam nuqanchiqmanda mas pwidiq kachpa, masta yach'an. Chaymi payqa tumkuy ima rurachqanchiqta yach'achpampis, atin pirdunawayninchiqta. 21 Chaymi kuyachqay masitamkuna, allita kawsachpaqa, chunqunchiqpi manana nimata syintichpachu, atinchiqna kuchimkuyta Dyuspa ñawpambi. 22 Chaqa Dyus kamachimkuchqanda kasuchpa, pay munachqanda ruramptinchiqmi, mañamkuchqanchiqta rin quwaqninchiq. 23 Paymi kamachiwachqa kanchiq, Churin Jisumkristumpi kriyinanchiqllampa, suqwan suqwan kuyanamkunanchiq, pay niwachqanchiqchina. 24 Chaymi Dyus kamachimkuchqanda kasuqkunaqa paywanna kawsanchiqllampa. Kanan Dyuspismi chunqunchiqpi kawsan. Mayñ, ¿imachinam yach'anchiq: Tayta Dyusmi nuqanchiqpi kawsan, nichpaqa? Chaytaqam yach'anchiq, Santu Ispiritunda quwamptinchiq.
1 Kuyachqay masitamkuna, kay mundumpiqam Dyuspaq achka rimaq tumkuqkuna purillkanllampa: Dyus niwachqandam rimani nichpa. Amamkich dijamkangillampachu ingañachunambaq. Achwanri pallkunataqa allita mallimpayllampa yach'anallki: ¿Allimpchu Dyuspa Santu Ispiritunwan ichu mana? nichpa. 2 Kaychinam atingillampa riqsiyta: Kay runam Dyuspa Santu Ispiritunwan, nichpa. Dyuspa Ispiritunwan puriqkunaqam ninqallampa: Siñurninchiq Jisumkristum Dyusmanda chamuchpa, kay mundumpi nasirqan nuqanchiqchina kwirpuyuq, nichpa. 3 Piru mayqan rimaq: Jisumkristuqam mana kwirpuyuqchu chamuchqa, nichpaqam, mana Dyuspa Santu Ispiritunwanchu. Challkunaqam dyablumpa ispiritunwan. Chaqa chay dyabluqam Jisumkristuta kuntran. Qamkunaqam uyachqa kangi: Chay dyablumpa ispiritunmi rin chamuq nichpa. Chayqam allimp kachqa. Kananqam allimpta kay mundumpina purillkan. 4 Ijitumkuna, qamkunaqam Dyuspa wambranguna kangillampa. Chaymi Dyuspa Santu Ispiritunqa qamkunampi tiyan. Payqam mas pudirniyuq chay llullamkuqkunampa ispiritunmandaqa. Chaymi qamkunaqa binsichqallampa kangi kay mundumpi llullamkuqkunata. 5 Chay llullamkuqkunaqam kay mundumpa imangunampi yuyamkuchpalla rimanllampa. Chaymi Dyuspi mana kriyiqkunaqa pallkunata ancha allita uyanllampa. 6 Piru nuqanchiqkunaqam Dyuspa wambranguna kanchiqllampa. Chaymi yach'achimkumptinchiq, Dyusta kasuqkunaqa ancha allita kasuwanchiq. Piru dyablumpa kaqkunaqam mana munanllampachu kasuwayninchiqta. Chaychinam atinchiq riqsiyta: Mayqanmi Dyuspa wambran kachpa, allimp kaqta riman; mayqanmi dyablumpa wambran kachpa, llullamkun, nichpa. 7 Kuyachqay masitamkuna, Dyusmi ancha kuyawanchiq. Chayri nuqanchiqkunampis suqwan suqwan allita kuyanamkuchun. Chaychina yumbaywan kuyanamkuchpaqam, Dyuspa wambranguna kanchiqllampa. Paytaqam chunqunchiqpi allita riqsinchiq. 8 Tayta Dyusqam ancha kuyamkun. Chaymi mana kuyamkuqkunaqa mana paypa wambrangunachu. Chaqa chunqumbiqam mana paytaqa riqsinllampachu. 9 Tayta Dyusmi suq Churiyuqlla kachpampis, chay Churinda kach'amurqan kay munduman, uchanchiqrallku wañunambaq, Dyuswan tumkuy tyimpu kawsananchiqllampa. Chaymi yach'anchiq: Dyusmi ancha kuyawanchiq, nichpa. 10 Chaqa manam nuqanchiqkunachu Dyusta puntata kuyachqachu kanchiq. Achwanmi Dyusqa nuqanchiqkunata puntata kuyawachqa kanchiq. Chaymi kach'amurqan Churin Jisumkristuta kay pachaman, wañuchpa, uchanchiqkunamanda pirdunawananchiq. 11 Chayri kuyachqay masitamkuna, chaychina Tayta Dyus ancha kuyawamptinchiqqa, nuqanchiqkunampis suqwan suqwan kuyanamkuchun. 12 Manam pimpis Tayta Dyustaqa rimkachqachu. Piru kuyanamkumptinchiq suqwan, suqwanqam, Dyuspa Santu Ispiritun chunqunchiqpi tiyachpa yanampawanchiq, mas allita kuyanamkunanchiq. 13 Chaqa Santu Ispiritunda quwamptinchiqmi, yach'anchiqllampa: Dyuswannam allimpta kallkanchiq. Paypismi allimpta nuqanchiqwan, nichpa. 14 Nuqallkuna kimkiymi rimkachqallampa kani Dyuspa Churindaqa. Chaymi tistigunguna kachpa, allimpta nillkillampa: Dyusmi Churinda kay munduman kach'amurqan, yumbayta wachawananchiq. 15 Kanan mayqan yuyamkuqmi: Jisumkristuqam Dyuspa Churin nichpa, payqam Tayta Dyuswan. Dyuspismi paywan. 16 Kanan yach'anchiqmi: Dyusmi ancha kuyawanchiq. Chaqa paymir ancha kuyamkuqqa. Chaymi yumbay allita kuyamkuqqa Dyuswanna. Dyuspismi pallkunawanna. 17 Chaychinam nuqanchiqkunaqa kay mundumpi kawsachpaqa, yach'amkullkanchiq Jisumkristuchina kuyanamkuchpa kawsayta. Chaymi jwisyu diya ch'ayamumptinqa, mana manchachpachu rinchiqllampa kuchimkuq. 18 Chaqa nuqanchiqkuna Tayta Dyuswan kuyanamkuchpaqam, manana manchanchiqchu: Paych'i rin kastigawaq, nichpaqa. Piru chay kastiguta chuyaqkunaqam ancha manchachpa, llamkichpa kawsallkanllampa. Chaymi chay manchaqkunaqa manaraq allitaqa yach'amkuchqachu kuyanamkuyta. 19 Tayta Dyusmi puntata nuqanchiqkunata kuyawachqa kanchiq. Chaymi nuqanchiqkunampis paytaqa kuyanchiqllampa. 20 Piru chay mayqan rimaq: Nuqaqam Dyusta kuyani nichpa, piru runa masinda ch'iqnichpaqam, llullamkullkan. Chaqa runa masinda rimkachpa mana kuyaqqam mana Dyustaqa atinmanchu kuyayta mana rimkachpaqa. 21 Chaymi Jisumkristuqa kaychina kamachiwachqa kanchiq: Dyusta kuyaqkunaqar runa masingunatampis kuyanqallampa, nichpa.
1 Dyuspa yumbay lijitimu wambrangunaqam kriyinchiqllampa: Jisumkristum Dyus Amkrachqan Wachadur, nichpa. Chayri Tayta Dyusta allimpta kuyachpaqa, wambrangunatampis kuyachun. 2 Chaychina Dyusta kuyachpa, kamachimkuchqanda kasuchpaqam, yach'anchiqna: Dyuspa wambrangunatampismi kuyallkanchiq, nichpa. 3 Chaymi Dyusta kuyachpaqa, kamachimkuchqanda kasunchiqllampa. Kanan chay kamachimkuchqanqam mana trabajuschu kasunanchiqqa. 4 Chaqa Dyuspa wambranguna kachpa, paypi kriyichpaqam, binsinchiq kay mundumpi tiyaqkunampa mana baliq yuyayningunata. 5 Atinanchiq binsiytaqam ancha allita kriyichunllampa: Siñurninchiq Jisumkristum Dyuspa Churin, nichpa. 6 Kimsa tistigu layamkunam yach'achiwachqa kanchiq: Jisumkristum syilumanda chamurqan, nichpa. Puntata Jisumkristu yamkumpi chutimkumptinmi, suq tistiguchina karqan. Chaymandaqam kruspi wañuchpa, yawarninda ich'amptin, suq tistiguchina karqan. Dyuspa Santu Ispiritumbismi Jisumkristumpa faburninda rimarqan. Chay Santu Ispiritumbismi mana llullamkuq tistigu karqan. 7 Jisumkristumpaqqam ?syilumpimpis? kimsa tistigumkuna kan. ?Suqmi Tayta Dyus. Suqqam Jisumkristu kimkin. Suqqam Dyuspa Santu Ispiritun. Chay tistigumkunaqam kimsa kachpampis suqlla. 8 Chay nichuchqaychinam kay pachampimpis kimsa tistigu layamkuna yach'achiwanchiq Jisumkristumpaq.? Suqmi Dyuspa Santu Ispiritun, suqqam chay chutimkuchqan yamku, suqqam kruspi ich'achqan yawarnin. Chay kimsandinmi suq yuyaytalla Jisumkristumpaq yach'achiwanchiq. 9 Chaqa allin runamkuna niwachqanchiqtam kriyinchiqllampa, ¿manachu? Piru Dyus niwamptinchiq Churin Jisumkristumpaqqa, masta kriyichunllampa. Chaqa Dyusqam mas allin tistigu chay allin runamkunamandaqa. 10 Jisumkristumpi kriyiqkunaqam tumkuy chunqu yuyamkunchiq: Allibmi Jisumkristuqa Dyuspa Churin, nichpa. Piru suq runa Jisumkristumpi mana kriyichpaqam, Tayta Dyuspimpis mana kriyinchu. Chaqa Tayta Dyus Churin Jisumkristumpaq nichqandaqam mana kriyinchu. Chaymi Tayta Dyuspaq alabis nillkan: Yanqam llullamkun nichpa. 11 Chaqa Dyusqam niwachqa kanchiq Churimbaq: Churiy wañuchqanrallkum rini wachachuqllampa, tumkuy tyimpu nuqawan kawsanallkillampa, nichpa. 12 Chaymi Dyuspa Churimbi kriyichpaqam, tumkuy tyimpu rinchiqllampa kawsaq. Piru Dyuspa Churimbi mana kriyichpaqam, mana tumkuy tyimpu rinchiqllampachu kawsaq Dyuswanqa. 13 Kay kartatam iskibrillki qamkuna Dyuspa Churimbi kriyiqkunaman, yach'anallkillampa: Dyuspa Churimba chutimbi kriyichpam, tumkuy tyimpu Dyuswan rinchiqllampa kawsaq, nichpa. 14 Kananqam ancha yuyamkunchiqllampa Dyuspi. Chaqa yach'anchiqmi: Dyus munachqanda mañamkumptinchiqqam, payqa uyawaqninchiq, rin quwaqninchiq, nichpa. 16 Masitamkuna, kanmi ichkay laya uchamkuna. Suq layaqam runamkunata dañachin wañunambaq. Suq layaqam dañachin, piru mana wañunambaqchu. Yumbay laya mana alli rurachqanmi uchamkuna. Piru suq laya uchaqam runamkunataqa ancha dañachin wañunanllampa. Chay wanchimkuq uchampaqqam mana nimata nillkillampachu. Piru chay suq laya uchata ruraqkunampaqmi nillki: Dyusmanri mañamkuyllampa chay masallkimkunata pirdunanambaq, nichpa. Qamkuna mañamkumptimkiqam, Dyusqa pallkunata uchangunamanda rin pirdunaq. 18 Dyuspa wambrangunaqam manana kawsanchiqllampachu uchamkunata rurachpaqa. Chaqa Jisumkristuqam ancha allita nuqanchiqtaqa kwidawanchiq, dyablu ama uchata rurachiwananchiq. 19 Chaymi yach'anchiqllampa: Dyuspam kanchiqllampa, nichpa. Piru Dyuspi yumbay mana kriyiqkunaqam dyablu kamachichqanda ruranllampa. 20 Nuqanchiqkunaqam yach'anchiq: Dyuspa Churinmi chamuchqa, nichpa. Chaqa payqam yach'achiwachqa kanchiq, riqsinanchiq Tayta Dyusta chunqunchiqpi. Paymi allimp Dyusqa. Kananmi Jisumkristumpi yuyamkuchpa kawsanchiqllampa. Chaqa paypismi allimp Dyus kachpa yanampawanchiq, tumkuy tyimpu kawsananchiqllampa. 21 Chayri ijitumkuna, kwidamkayllampa, ama yuyamkunallki yanqa amitu layamkunampi. Chaychina kanqa. (Chaytallam iskibrillkillampa.)
1 Ancha rrispitachqa panisita, Tayta Dyusmi qamta, wambrallkimkunata amkrachuchqallampa, paypa wambranguna kanallkillampa. Chaymi qamkunaqa nuqampa masallkunachina kangillampa. Chayrallkum nuqa yach'achimkuq ansyanu kachpa, kay kartata iskibrillkillampa chaypi yumbay tandamkaq kriyiq masinchiqkunaman. Chaqa qamkunampismi nuqallkunachina allimp kaqta kriyichqallampa kangi. Chaymi nuqaqa kriyiq masinchiqkunawan allimpta kuyallkillampa. Chaqa yumbayninchiqmi allimp kaqta tumkuy tyimpu rinchiqllampa kriyiq. 3 Chaymi mañamkuni Tayta Dyusman, Churin Jisumkristuwan tumkuy imampi yanampachunan, ama manchachpa, achwan kuchimkuchpa, kuyanamkuchpa, allimp kaqta kriyichpa, chumaqta kawsanallkillampa. 4 Wamkin wambrallkimkunatam tarichqa kani allimp kaqpi kriyichpa, kawsallkaqta. Pallkunaqam Dyus kamachimkuchqanda kasuchpa, chumaqta kawsallkanllampa. Chaymi ancha kuchimkuni. 5 Chayrallkum kuyachqa panisita, kananqa qamkunata rrugallkillampa, nuqallkunawan chumaqta kuyanamkunanchiq. Manam muchuq yuyachqaytachu kamachillkillampa. Chaytaqam unaymandampacha uyachqallampa kanchiq. 6 Chaqa Tayta Dyusmi kamachiwachqa kanchiq kuyanamkunanchiq. Chaymi Dyusta allimpta kuyachpa, mana challkuq rinchiqllampa kasuq chay niwachqanchiqta. 7 Chaqa kay mundumpiqam achka llullamkuqkuna purillkanllampa. Kwidawkich qamkunata ingañachungiman. Chay llullamkuqkunaqam mana munanllampachu kriyiyta: Jisumkristuqam allimp kwirpuyuq runa kachpa, chamuchqa kay munduman, nichpaqa. Chay layata yuyaqkunaqam ingañamkuq runamkuna. Jisumkristutam kuntranllampa. 8 ¡Kwidamkayllampa! Qamkunaqam Dyuspaq allita yach'achimkullkangi. Chay llullamkuqkunata kasuchpamkich, mana ch'askingimanchu Dyusmanda yumban irinsyallkita. Amamkich chaychinaqa kanqachu. Munanim Dyusmanda yumbay irinsyallkita ch'askinallkillampa. 9 Mayqan runa ichu warmi Jisumkristu nichqanda dijaqqam manana Dyuswanchu. Piru Jisumkristu nichqanda yach'achimkuqqam Tayta Dyuswan, Jisumkristuwambis. 10 Chay llullamkuqkuna munamptin ch'ayachuyta, chay mana baliq dumktrinanda yach'achimkunanqa, ama ch'ayachiyllampachu wasimkimanqa ni Dyus yanampachunqa niyllampachu. 11 Chaqa mayqan chaychina ch'ayachiqqam yanampallkan, masta ingañamkunanllampa. 12 Mastam munani willachuyta. Piru munanim chamuyta qamkunaman, chaypi parlachpa, masta kuchimkunanchiq. Chaymi mana munanichu kay kartampilla masta parlachichuyta. 13 Kaypi tiyaq kriyiq masinchiqkuna qamkunampa masallkimkuna. Chaqa Tayta Dyusmi pallkunatampis amkrachqa, paypa wambranguna kanambaq. Chaymi kaypi tandamkaqkunampis nampallkuchungillampa. Chaychinalla kanqa. (Chaytallam iskibrillkillampa.)
1 Kuyachqay kriyiq masita Gayu, nuqa yach'achimkuq ansyanu kachpam, kay kartitata iskibrillki. Chaqa allimptam kuyallki. 2 Kuyachqay masita, yach'anim, ancha allitach kawsallkangi Tayta Dyuswan, nichpa. Chaymi ancha mañamkuni, allilla kachpa, ancha kuchimkuchpa kawsanallki. 3 Wamkin kriyiq masinchiqkunam ch'ayamuchpa, niwarqan: Chay Gayum Siñurninchiqta ancha allita kuyachpa, kasun. Allimp kaqpi kriyichpam, chumaqta kawsan, nichpa. Chaychina niwamptinmi, ancha kuchimkuchqa kani. 4 Qamkunaqa nuqa yach'achichumptiy Dyuspi kriyichpaqam, wambrallkunachina kangillampa. Kanan tumkuy imamandam masta kuchimkuni yach'achpa: Yumbay wambraychina kaqkunam Dyusta kasuchpa, allimp kaqpi kriyichpa, kawsallkanllampa, nichpa. 5 Kuyachqay kriyiq masita, imampimpis yanampachpa kriyiq masinchiqkunataqam, ancha allita rurallkangi. Chay karumanda chamuq kriyiq masinchiqkunata yanampachpaqam, mas allita rurallkangi. 6 Chay yanampachqallkimkunaqam tandamkaq kriyiq masinchiqkunampa ñawpambi parlachqallampa: Chay masanchiq Gayum nuqallkunata kaychina ancha kuyawachqa, nichpa. Ancha allitach'i rurangiman masita, chay chamuqkunata imawambis yanampachpa, ñanda rinambaqqa. Chaychina yanampamptimkim, Dyusninchiqqa ancha kuchimkun. 7 Chaqa chay kriyiq masinchiqkunam Jisumkristu nichqanda yach'achimkuchpa purillkanllampa. Chaymi pallkunampa iman faltamptinqa, kriyiq masinchiqkunamandalla imatampis ch'askinllampa. Manam ch'askinllampachu chay mana kriyiqkunamandaqa. 8 Chayrallkur nuqanchiqpis pallkunata yanampachun, pallkunawan pulla Dyusta sirbinanchiq, allimp kaqta yach'achimkuchpa. 9 Kach'amuchqam kani suq kartata qamkunaman. Piru chay runa Diyutrifismi munachpa kamachiyta kriyiq masinchiqkunata, mana munanchu kasuwayta. 10 Chaymi payqa llullamkuchpa, yanqamkunata nuqampaqqa riman. Manam kuntintamkanchu yanqamkunata rimachpampis. Achwambam mana ch'ayachinchu qamkunaman chamuqkunata. Achwambam chay suq kriyiq masinchiqkunatampis kamachin, ama ch'ayachinanllampa. Mayqan ch'ayachiqtaqam qatin tandamkachqan kriyiq masinchiqkunamanda. Chaymi chamuchpa, chay Diyutrifistaqa qaqllambi rini anyaq. 11 Kuyachqay masita, ama kawsaychu chay mana allin runamkunachinaqa. Achwanri kawsay chay allin runamkunachina. Chaqa allin runamkunaqam Dyuspa wambranguna. Piru chay mana allita ruraqkunaqam Dyustaqa mana riqsinllampachu chunqumbiqa. 12 Masanchiq Damatruqam mana chay malumkunachinachu. Payqam ancha allita kawsan. Yumbaymi paypaqqa ninllampa: Ancha allinmi nichpa. Chay nichqangunaqam allimp. Nuqallkunampismi tistigu kachpa nillkillampa: Payqam ancha allin masanchiq, nichpa. Chaqa qamqam yach'angi: Manam nunka llullataqa rimanillampachu, nichpa. 13 Mastam munani willachuyta. Lumkismi yuyani chamuyta watumkuchuq. Chaymi chaypina parlachun. Chayrallkum kay kartampi mana munanichu masta willachuyta. 15 Mayñ, Dyus yanampachunqa, chumaqta kawsanallkillampa. Kaymanda yumbay kriyiq masinchiqkunampis qamkunata nampallkuchungi. Nuqampa chutiypir nampallkuy yumbay yanasullkunata (yanasallkunata). Chaychina kanqa. (Chaytallam iskibrillkillampa.)
1 Kuyachqay masitamkuna, nuqam Jamkubumpa masan Judas kani. Jisumkristumpa kriyadunmi kani. Chaymi kay kartata iskibrillkillampa qamkuna Dyuspi kriyiqkunaman. Chaqa qamkunatam Taytanchiq Dyusqa amkrachuchqa, paypa wambranguna kanallkillampa. Chaymi Jisumkristumpi yuyamkumptimkillampa, payqa allita kwidachungillampa. 2 Tayta Dyusmanmi mañamkuni, ancha llamkimpachuchpa, kuyachuchpa, qamkunata yanampachunambaq, chumaqta kawsanallkillampa. 3 Kuyachqay masitamkuna, ancham munarqani qamkunata yuyachichuyta Tayta Dyus wachawachqanchiqpaq. Lumkismi yach'achqa kani: Llullamkuqkunach chamuchqa qamkunaman ingañachuq, nichpa. Chaymi iskibrillkillampa rrugachuchpa Dyus nichqandalla qamkuna yach'achimkunallki tumkuy animullkiwan, binsinallkillampa chay llullamkuqkunata. Chaqa Jisumkristumpa dumktrinanqam mana nunka kambyamkanchu. Piru chay malumkunaqam Dyuspa dumktrinanda dañachichpa, ninllampa: Dyusmi ancha allin. Chaymi mana allita ruramptinchiqpis, mana rinchu kastigawaqninchiq. Chaymi atinchiq rurayta tumkuy ima kwirpunchiq munachqanda, nichpa. Chaychina rimaqkunaqam Taytanchiq Dyusta, Siñurninchiq Jisumkristuta ñiganllampa. Chaymi Tayta Dyusqa pallkunampaqqa unaymandampacha siñalachqa chingananllampa. 5 Chayrallkum qamkuna yach'amptimkimpis, munani yuyachichuyta imachinam Dyusninchiq kastigan chay mana kasuqkunata, nichpa. Rimkayllampa, Tayta Dyusmi isrraylinumkunata Ijimptu nasyunmanda surquchpa, paypi mana kriyiqkunata chingachirqan. 6 Malu anjilkunatampismi kastigarqan. Pallkunaqam karguyuq kachpampis, mana kuntintamkachpachu, munarqanllampa Dyuspa kargunda quch'iyta. Chaypaqmi Dyusqa pallkunata prisuchpa, kadinamkunawan watachpa, tutayaqman wichumkurqan, chaypi kanambaqllampa jwisyu diya ch'ayamunangaman. 7 Chaymandaqam chay malu anjilkunachina chay Sudumampi, Gumurrampi tiyaqkuna, chay sirkambi tiyaqkunampis malumkunampaq timkramkarqanllampa. Chay runamkunaqam ullqumpura warmiwanchina puñurqanllampa. Tumkuy laya mana allimkunata rurachpam, animalkunachina kawsarqanllampa. Chaymi Tayta Dyusqa pallkunata kastigarqan mana nunka wañuq ninawan. Chayri chay kastigumpaq yach'achpaqa, amana pallkunachinaqa kawsachunllampachu. Achwanri intyindichun: Tayta Dyusqam kastigan uchayuqkunata, nichpa. 8 Chay llullamkuq runamkunaqam musquyningunampi imata rimkachpa, mana nimatampis intyindichpachu, kwirpun munachqandalla ruranllampa. Mana munachpa kasuyta Siñurninchiqtam, asta musyanllampa ancha pudirniyuqkunata. 9 Piru ni Dyuspa ancha pudirniyuq anjil Migilqam chaychina maldisyan. Chaymi payqa Muysispa kwirpunda dyabluwan quch'inamkuchpa, dyablutaqa mana musyarqanchu. Achwanmi kaytalla nirqan: ¡Tayta Dyusri anyachunqa! nichpa. 10 Piru chay llullamkuq runamkunaqam mana intyindichpachu, musyanllampa asta chay mas pudirniyuq ispiritumkunata. Chaqa mana intyindiq animalkunachinam kwirpun munachqandalla rurachpa kawsanllampa. Chaymi chay uchangunarallku rinllampa chingaq. 11 ¡Ay, chay llullamkuqkunaqa, imananqaraqri! Chaqa pallkunaqam Kayinchina uchata rurachqallampa. Balanchinam Dyusmanda amkramkachqallampa, qallayta ganananllamparallku. Chay mana kasumkuq runa Kurichinam mana munanllampachu Dyus nichqanda ruraytaqa. Chaymi rinllampa wañuq. 12 Kriyiq masimpura kuchimkuchpa tandanamkumptimki mimkuqmi, chay ingañamkuqkunaqa mana undaq mimkunllampa, umpyanllampa. Manam pitampis panqamkunllampachu. Chaymi pallkunarallku panqamkungillampa. Malu michidurchinam pallkunalla kwidamkanllampa. Mana tamyayuq wayra ampaq pumkutaychinam mana nimatampis yanampawanchiqchu. Pallkunaqam chay mana puquq plantachina. Chaqa tyimpun ch'ayamumptinqa, yanqa rinchiq maskaq, ¿manachu? Chaychinallam chay llullamkuqkunampis wañuchqa, chamkichqa, ch'umpanmanda pilachqa plantachina. 13 Manchu mar yamkuqa waqmanda kaymanda maqchimkamuchpa, babach'kunata wichumkun manyaman. Chaychinallam chay llullamkuqkunampis kallpatimkunllampa, mana allimkunata rurachpa. Pallkunaqam chay lusiru ichkichpa chingaqkunachina. Chaymi sintinsyadu, tumkuy tyimpu mas tutayaqpi kawsananllampa. 14 Chay punta runa Adamba tatara willkamba tatara willkanmi Inumk chutirqan. Tayta Dyusmi chay Inumktaqa chay llullamkuqkunampaq kaychina rimachirqan: Rimkay! Siñurninchiqmi ancha achka mil anjilningunawan chamullkan, 15 yumbayninchiqta jusgawananchiq, allinda, malutampis. Chaqa malumkunataqam rin kastigaq, yumbay mana allimkunata rurachqanrallku, payta kuntrachpa, maldisyachqanrallku, nichpa. 16 Kanan chay mana alli ruraqkunaqam ancha kijamkuchpa, tumkuy imampaq rimatimkunllampa. Kawsanllampam kwirpun munachqandalla rurachpa. Ancha alabamkachpam, michki michkita yamp parlachinllampa runa masinda, iman kaqta munachpa surquyta. 17 Kuyachqay kriyiq masitamkuna, ama qunqayllampachu Siñurninchiq Jisumkristumpa ampustulninguna chay tyimpu nichuchqanllampata. 18 Pallkunaqam willachurqanllampa: Jwisyu diya sirkana kamptinmi, burlamkuq runamkuna rin kaq. Pallkunaqam rinllampa kawsaq mana baliq munachqandalla rurachpa, nichpa. 19 Rinllampam animachiq kriyiq masinchiqkunata, pallkunampura amkramkananllampa. Santu Ispiritum pallkunampi mana kamptin, rinllampa puriq kwirpun munachqandalla rurachpa. 20 Piru qamkuna, kuyachqay masitamkuna, mana challkuq animachimkuy, mas allita Tayta Dyuspi kriyinallki. Santu Ispiritun qamkunata yanampachumptinri, Tayta Dyusman mañamkuyllampa. 21 Tayta Dyusqam ancha kuyawanchiqllampa. Chayri paymanda ama amkramkachpachu, achwan kuchimkuchpa Siñurninchiq Jisumkristuta chuyachunllampa. Chaqa paymi ancha llamkimpawaqninchiq, chamuchpa rin ampawaqninchiq, paywan tumkuy tyimpu kawsananchiqllampa. 22 Chayri Jisumkristumpi mana allita kriyiqkunata animachiyllampa, paypi tumkuy chunqu kriyinanllampa. 23 Chaychina Dyuspaq suqkunata yach'achichpa, wachachpam, alabis rrastrallkangimanchina, ama ninaman yallkunanllampa. Kanan suq uchayuqkunatampis llamkimpayllampa. Piru chay laya uchamkunatamkich rurachichungiman. Ay, uchanllampaqar suq millanaypaq kanqa qamkunampaqqa, suq ancha mampa millanaypaq lach'ampachina. 24 Kananqa ?Siñurninchiq Jisumkristu yanampawamptinchiq? tumkuy tyimpu alabachunllampa ancha yach'ayniyuq Taytanchiq Dyusta. Chaqa payllam Dyus. Pudirninwanmi wachawanchiq, ama paymanda amkramkananchiq. Achwanmi ancha kuchimkuchpa, mana nima uchayuqta rurawaqninchiq, ch'ayachiwanchiq paypa llimpyallkaq ñawpanman. Chayri payqa tumkuy tyimpu ancha pudirniyuq kanqa. Ancha llimpyanqa. Yumbayta kamachinqa. ¡Chaychinam unaymandampacha ancha pudirniyuq kachqa! ¡Chaychinallam kanambis! ¡Chaychinalla kanqa tumkuy tyimpu! (Chaytallam iskibrillkillampa.)
1 Tayta Dyusmi Jisumkristuta puntata nirqan: Kaychinam das rin kumpliq, nichpa. Chaymandaqam Jisumkristu anjilninda challkunata yach'achichpa kach'amurqan, nuqa Jwanda yach'achiwanambaq. Chaymi nuqampis chay yach'achiwachqanda Jisusta sirbiq masillkunata kay librumpi yach'achillkani. 2 Chaqa nuqaqam tistigu kachpa, Tayta Dyus nichqanda, Jisumkristu nichqanda, chay anjil rimkachiwachqanda tumkuy imata kay librumpi iskibrillkani. 3 Chay rimkachqayqam utqana rin kumpliq. Chayri kay iskibrichqayta liyiqkunaqa, chay liyichqanda uyachpa kasuqkunampis ancha kuchimkunqallampa. 4 Nuqa Jwanmi chay prubinsya Asyampi syiti llaqtampi tandamkaq kriyiq masillkunaman iskibrillkillampa. Nuqam Dyusman mañamkuni, ancha kuyachuchpa, tumkuy imampi qamkunata yanampachunambaq, ancha kuchimkuchpa, chumaqta kawsanallkillampa. Payqam tumkuy tyimpu kawsan. Manam nunka nasirqanchu. Suq diyam kay pachaman rin kutimuq. Mañamkunimpismi, paypa trunumba ñawpambi syiti ispiritu kaqkuna tumkuy imampi yanampachunambaq. 5 Mañamkunimpismi Siñurninchiq Jisumkristuman, qamkunata ancha yanampachunambaq. Chaqa payqam ancha allin tistigu kachpa, allimp kaqtalla riman. Ancha kuyawaqninchiqmi, yawarninda ich'achpa, yumbay uchanchiqpaq pagaramkurqan, Tayta Dyus pirdunawananchiq. Chaychina wañuchpaqam, yumbay wañuqkunamanda puntata kawsamurqan. Chaymi payqa kay mundumpi yumbay gubyirnumkunata atin kamachiyta. 6 Jisumkristuqam numbrawachqa kanchiq, paychina gubyirnumkuna, kuramkuna kachpa, Tayta Dyusninda sirbinanchiqllampa. ¡Chayri payqa tumkuy tyimpu ancha alabachqa, ancha pudirniyuq kanqa! Chaychina kanqa. 7 ¡Uyawayllampa! ¡Jisumkristum pumkutallkunampi rin chamuq! Yumbay runamkuna warmimkunam paytaqa rinllampa rimkaq. Asta chay wanchiqkunampismi paytaqa rinllampa rimkaq. Chaychina chamumptinqam, tumkuy llaqtamkunampi tiyaq mana kriyiqkunaqa ancha manchachpa, rinllampa waqaq. Ari, chaychinam allimpta rin kaq. 8 Ancha pudirniyuq Dyusmi yumbaymanda mas pudirniyuq. Tumkuy tyimpum kawsachqa. Kanambismi kawsallkan. Suq diyam rin chamuq. Chaymi payqa kaychina nin: Chay punta litra Achina kachpam, yumbaypa ñawpambi kani. Chay ultimu litra Ychina kachpam, nuqaqa tumkuy imamanda masta rini duraq, nichpa. 9 Nuqa Jwanmi Jisumkristumpi kriyiq masimkillampa kani. Chaqa Tayta Dyuspaq, Churin Jisumkristumpaq yach'achimkumptiymi, qamkunachina nuqampis ancha padisichqa kani. Piru qamkunachinam Tayta Dyusta mana challkuq kasullkani. Chayrallkum prisuwachpa, ampawarqanllampa karsilman chay mar yamkumpa ch'awpimbi isla allpa Patmus chutiqman. 10 Chaychina chay karsilpi kallkamptiymi, suq diya dumingu rimkch'allkamptiylla, Dyuspa Santu Ispiritun nuqaman chamuchpa, achka layata rimkachiwarqan. Puntatam imki laduypi uyarqay suq rimaqta. Chay rimaqqam suq kurnitachina ancha jwirtita 11 kaychina niwarqan: ?Nuqaqam chay punta litra Achina kachpa, yumbaypa ñawpambi kani. Chay litra Y ultimumpi kaqchina kachpam, nuqaqa tumkuy imata atini uchyayta.? Chayri kay tumkuy ima rimkachqallkita suq librumpi iskibrichpa, kach'ay chay prubinsya Asyampa kay syiti llaqtangunampi tandamkaq kriyiq masimkimkunaman: Puntata chay Ifisu llaqtaman, chaymandaqa chay Ismirna llaqtaman, chay Pirgamuman, chay Tiyatiraman, Sardisman, Filadilfyaman, Lawdisya llaqtamambis, nichpa. 12 Chayta uyachpaqam, imkiyman timkramkachpa champamkurqani yach'anaypaq: ¿Pim chaychina parlachiwallkan? nichpa. Chaychina champamkuchpaqam, rimkarqay suq runatachina. Chay runachinaqam syiti lampara tiyanamba ch'awpimbi chayallkarqan. Chay tiyanangunaqam urumanda karqan. Chay runachinaqam ch'amkingaman kampayuq karqan. Pichunqam urumanda rurachqan wach'umkuwan watadu karqan. 14 Aqchangunaqam yuraq millwachina ichu qasachina ancha yuraq karqan. pawingunampismi lumyallkaq ninachina karqan. 15 Ch'amkingunaqam brunsi jirru urrnumpi chulluchidu ch'uch'iduchina llimpyarqan. Kanan rimamptinqam, busninqa achka yamkuchina ancha kunyarqan. 16 Allin ladu mamkimbiqam syiti lusirumkuna karqan. Chiminmandam lluqchirqan suq atun kuchillu ichkandin ladu filuyuqchina. Qaqllambismi ancha llimpyarqan, larrdusi uras rumpay ancha jwirtita llimpyaqchina. 17 Chaychina payta rimkachpaqam, nuqaqa ancha manchachpa wañuchqachina ch'amkingunampa ñawpambi das piratarqay. Chaymi payqa allin ladu mamkinda sawayman rurachpa, niwarqan: Amar manchaychu. Nuqaqam yumbaymanda mas puntampi kachpa, tumkuy imata rurachqa kani. Ultimu kachpampismi, mana nunka rinichu uchyamkaq. 18 Tumkuy imatam kawsachini. Wañurqaymi piru kananqam kawsamuchqa kani, tumkuy tyimpu kawsanaypaq. Chaymi wañuchqamkunampa lugarninda atini kirpayta ichu kich'ayta, chay wañuqkuna kawsamunambaq. 19 Kay rimkachqallkita, kanan pasallkamptin, manaraq pasamptimbis, iskibriy. 20 Kananqam munani intyindichichuyta kay allin ladu mamkiypi kaq syiti lusirumkunampaq, chay syiti lamparamkunampa tiyananguna urumanda kaqpaqpis. Chaqa kanangamanmi pamkadu kachqa. Chay syiti lusirumkunaqam munan niyta chay syiti llaqtampi tandamkaq kriyiq masinchiqkunampa yach'achimkuqninguna, nichpa. Chay syiti lamparamkunampa tiyanangunaqam munan niyta chay syiti llaqtampi tandamkaq kriyiq masinchiqkuna, nichpa.
1 Siñurninchiq Jisumkristum nuqa Jwanda niwarqan, Ifisu llaqtampi tandamkaq kriyiq masinchiqkunampa yach'achimkuqninman kaychina iskibrinaypaq: Chay allin ladu mamkimbi syiti lusiruyuq syiti urumanda rurachqan tiyanamkunampa ch'awpimbi puriqqam kaychina nichungillampa: 2 Nuqaqam qamkuna tumkuy ima rurachqallkimpaq allita yach'ani. Chaqa challku challkum nuqampaq yach'achimkuchqallampa kangi. Manam nimatampis yach'amkungillampachu chay mana alli ruraqkunamandaqa. Achwanmi allita mallimpachqallampa kangi chay ampustul tumkuqkunataqa. Chaymi das intyindichqallampa kangi: Pallkunaqam llullamkuchpalla rimanllampa, nichpa. 3 Nuqampaq yach'achimkuchpa ancha padisichpampismi, mana challkuq kuyawachpa, kasuwachqallampa kangi. 4 Piru nuqaqam rini anyachuqllampampis. Chaqa nuqampi chayraq kriyichpaqam, ancha kuyawachpa, qamkunampura allita kuyanamkurqallki. Piru kananqam qamkuna manana yaqqa kuyanamkungichu ni nuqata ancha kuyawangichu. 5 Chayri chay punta kuyanamkuchqallkimpaq allita yuyachpa, ancha llamkichpa, muchuqmanda kuyanamkuriyllampa. Manaqam nuqaqa qamkunamanda rini amkramkaq, chay lamparallkitachina wanchichpa, chay tiyananda lugarninmanda achuchpa (amana nuqampaq yach'achimkunallki). 6 Piru chay Nimkulaspa dumktrinanda kasumkuqkuna rurachqangunatam qamkuna ch'iqningillampa. Nuqampismi chay rurachqangunata ch'iqnini. Chaymi chay mana baliq kusaskunata mana ruramptimkillampa, atini achlitatalla alabachuyta. 7 Chayri qamkuna rinriyuqkunaqa allita uyayllampa Santu Ispirituy nuqampi kriyiqkunata kay nichqanda. Chaqa dyabluta binsiqkunataqam nuqaqa rini qaraq chay kawsachimkuq plantampa puquyninda, tumkuy tyimpu kawsananllampa. Chay plantaqam Taytay Dyuspa ancha chumaq wirtambi anaq syilumpi tarimkan, nichpa. 8 Siñurninchiq Jisumkristum niwarqambis, Ismirna llaqtampi tandamkaq kriyiq masinchiqkunampa yach'achimkuqninman kaychina iskibrinaypaq: Nuqa Jisumkristuqam yumbaymanda mas puntata kachpa, tumkuy imata rurachqa kani. Ultimu kachpampismi, mana nunka rinichu uchyamkaq. Chaqa wañuchqaymanda kawsamuchpam, tumkuy tyimpumpaq rini kawsaq. Nuqaqam kaychina nillkillampa: 9 Tumkuy ima rurachqallkitam allita yach'ani. Chaymi yach'ani: Nuqampi kriyimptimkillampam, qamkunata ancha qasachachuchqallampa, nichpa. Yach'animpismi mana nimayuq kachqallkita. Piru nuqampi kriyichpa, kuchimkuchpaqam, tumkuy imayuqchina kangillampa. Yach'animpismi wamkin isrraylinumkuna qamkunampa kuntrallkita ancha rimamptinllampa. (Pallkunaqam yuyanllampa: Nuqallkunallam Dyuspa nasyunninqa kanillampa, nichpa.) Piru pallkunaqam dyablu munachqanda rurallkanllampa. 10 Chayri qamkuna yach'achpa: Ancham rinchiqllampa padisiq, nichpampis, ama nimata manchayllampachu. Kanan dyablum wamkin qamkunata rin karsilachichuq, yumbaynimkillampa mallimpadu kanallkillampa. Chaychina dyis diyaskunatallam ringillampa padisiq. Piru wañunallki diyamkaman nuqampi allita kriyimptimkillampaqam, nuqaqa rini kawsachichuq tumkuy tyimpumpaq. Chay muchuq bidallkim suq chumaq primyuchinaqa rin kaq. 11 Chayri qamkuna rinriyuqkunaqa allita uyayllampa Santu Ispirituy nuqampi kriyiqkunata nichqanda. Chaqa dyabluta binsiqkunataqam rini yanampaq, suq kutinda amana wañurinanllampa, nichpa. 12 Siñurninchiq Jisumkristum niwarqambis, Pirgamu llaqtampi tandamkaq kriyiq masinchiqkunampa yach'achimkuqninman kaychina iskibrinaypaq: Nuqa Jisumkristum chay ichkay asyintadu filuyuq atun kuchilluyuq kani. 13 Chaymi tumkuy ima rurachqallkita allita yach'ani: Dyablu llaqtallkimpi tiyachpa ancha kamachimkumptimbismi, qamkunaqa nuqampi mana challkuq kriyichpa kawsallkangillampa. Chaqa chay llaqtallkimpi dyablu tiyamptimbis, chay allin tistiguy Antimpas wanchidu kamptimbismi, qamkunaqa mana challkuq nuqampilla yuyamkuchqallampa kangi. 14 Piru chaychina alabachuchpampismi, rini anyachuqllampa. Chaqa chay Pirgamumpim wamkinnimkimkunaqa chay unay Balamba mana baliq dumktrinambi kriyillkangillampa. Chay Balanqam nasyun Muwabpa unay gubyirnun Balamkta kunarqan, Dyuspi kriyiq isrraylinumkunata dañachinambaq: Pallkunatar inkitay, amitu layamkunampa ufrindan mimkunata mimkunanllampa. Inkitaypisri runa, warmi suqwan suqwan puñunanllampa, nichpa. (Chaychina inkitamptinmi, chay isrraylinumkunaqa chay uchamkunata rurarqanllampa.) 15 Kanan wamkinnimkimpismi chay yach'achimkuq Nimkulaspa ch'iqnichqay dumktrinanda ancha munangillampa kasuyta. 16 Chayri chay uchallkimkunata dijachpa, muchuqmanda nuqampi allimpta kriyiriyllampa. Piru mana munamptimkillampa kasuwaytaqam, nuqaqa utqa chamuchpa, chay mana baliq dumktrinayuqkunata rini maqaq chimiymanda lluqchiq atun kuchilluywan. 17 Chayri qamkuna rinriyuqkunaqa allita uyayllampa Santu Ispirituy nuqampi kriyiqkunata nichqanda. Chaqa dyabluta binsiqkunataqam rini qaraq Dyus kach'amuchqan pamkadu manaya mimkunata. Kanan pallkunataqam rini quq kadunuta suq yuraq rumisituta. Chay rumisitumpiqam rini iskibriq suq muchuq chutita. Chay chutitaqam mana pimpis rinchu yach'aq. Chay ch'askiqllam rin yach'aqqa, nichpa. 18 Siñurninchiq Jisumkristum niwarqambis, Tiyatira llaqtampi tandamkaq kriyiq masinchiqkunampa yach'achimkuqninman kaychina iskibrinaypaq: Nuqaqam Dyuspa Churin lumyallkaq ninachina ñawiyuq kachpa, brunsi jirru ch'uch'idu llimpyaqchina ch'amkiyuq kachpa, kaychina nillkillampa: 19 Nuqaqam tumkuy ima rurachqallkillampata allita yach'ani: Qamkunaqam ancha kuyanamkuchpa, yanampanamkuchpa kawsallkangillampa, nichpa. Chaychina nuqampi allita yuyamkuchpam, nuqampaq yach'achimkuchqa kangillampa. Padisichpampismi agwantachpa, mana challkuq kada diya masta nuqampaq yach'achimkungillampa. 20 Piru chaychina alabachuchpam, nuqaqa rini anyachuqllampa. Chaqa dijallkangillampa, suq warmi dañachimkuq qamkunata yach'achichunan. Chay warmiqam nin: Dyuspaq rimaqmi kani, nichpa. Piru manam Dyuspaqqa rimanchu. Achwanmi nuqampi kriyiqkunata inkitan, chay yanqa amitu layamkunampa ufrindan mimkunata mimkunanllampa, runa, warmi suqwan suqwan puñunanllampa. Chay unay gubyirna Jisabil dañachimkuqchina kachqa. 21 Chaymi nuqaqa chay bandulira warmita ancha chuyachqa kani, arrimpintimkachpa, amana chaychina ruranambaq. Piru payqam mana kasuwachpachu, chay uchamkunata rurachpa kawsan. 22 Chaymi chay warmitaqa ancha rini kastigaq, nanallkunata quchpa, kamambilla kanambaq. Paywan yumbay puñuqkunatampismi mana arrimpintimkamptinqa, ancha rini padisichiq. 23 Chay warmita kasuqkunatampismi rini wanchiq. Chaychina ruramptiymi, nuqampi yumbay kriyiqkunaqa rinllampa yach'aq: Siñurninchiqmi yumbay runamkuna, warmimkuna chunqumbilla yuyachqanda allita yach'an, nichpa. Chaychina tumkuy imata yach'achpam, qamkunatampis rini jusgachuq, uchayuqkunata kastigachunaypaq, allin ruraqkunata kuchichichunaypaq. 24 Piru wamkinnimki Tiyatirampi tiyaqkunaqam mana kasungillampachu chay uchayuq warmi yach'achichuqtaqa ni yach'amkuchqachu kangillampa dyablu pamkadu yach'achimkuchqandaqa. Chaymi mana nillkillampachu, achka lillkunata kasunallkillampa, llachaqta ampallkangimanchina. Achwanmi kaytalla kamachillkillampa: 25 Nuqampi kriyichqallkichina, mana challkuq allita kriyiyllampa chamunay diyamkaman. 26 Chaqa dyabluta chaychina binsiqkunaqam nuqa munachqayta mana challkuq ruranqallampa chamunay diyamkaman. Chaymi Taytay Dyus numbrawachqanchina, nuqampis pallkunata rini numbraq, ancha pudirniyuq awturidarkuna kachpa, achka nasyungunampi kamachimkunanllampa. Suq bara jirrumanda kaqtam pallkunataqa rini quq, yumbay kuntraqkunata binsinanllampa. Chaymi chay kuntraqkunata rinllampa maqaq, piti piti ruranangaman, pamkichqa allpamanda mangatachina. 28 Kanan yumbay chay binsimkuqtaqam rini yanampaq, chay llimpyaq yulaqachi (yuraqachi) lusiruchina llimpyananllampa. 29 Chayri qamkuna rinriyuqkunaqa, allita uyayllampa Santu Ispirituy nuqampi kriyiqkunata nichqanda, nichpa.
1 Siñurninchiq Jisumkristum niwarqambis, Sardis llaqtampi tandamkaq kriyiq masinchiqkunampa yach'achimkuqninman kaychina iskibrinaypaq: Nuqa Jisumkristum Taytay Dyuspa chay syiti ispiritungunampa kamachimkuqnin kani. Chay syiti llimpyaq lusirumkunatam mamkiypi ampani. Nuqaqam tumkuy ima rurachqallkita yach'ani: Chaqa achka runamkuna alabachungillampa: Jisumkristumpim allita kriyinllampa, nichpa. Piru nuqampaqqam wañuchqachinana kangillampa. 2 Chaqa puntata allita kasuwachpaqam kawsarqallkillampa. Piru mananam kawsangillampachu unay kawsachqallkichinaqa. Chayri rimkch'amkachpachina, muchuqmanda allita nuqampi kriyirichpa, allita kasuwayllampa. 3 Nuqampaq yach'amkuchqallkita allita yuyachpa, uchallkimkunata muchuqmanda dijayllampa. Tayta Dyuspir muchuqmanda kriyirichpa, payta kasurichpa, rimkch'amkachqachina chuyawayllampa. Manaqam mana yuyachqallkillampa uras suq ladrunchina qunqaylla chamuchpa, rini kastigachuqllampa. 4 Piru chay Sardis llaqtallkimpiqam wamkinnimkiqa allita kasuwallkangillampa. Chaymi qamkunaqa manana uchamkunata rurachpaqa, limpyu mudanayuqchinana kachpa, ancha balingillampa nuqampaqqa. Chaymi suq diya qamkunaqa yuraq mudanamkunata ch'askichpa, nuqawan pulla ringillampa kawsaq. 5 Chaychina dyabluta yumbay binsiqkunaqam chumaq yuraq bistiduyuqkuna rinllampa kaq. Libruymandaqam mana rinichu burraq chutingunataqa. Chaqa chay libruypiqam wambrallkunampa chutingunata iskibrichqa kani, tumkuy tyimpu nuqawan kawsananllampa. Chaymi Taytaypa ñawpambi, anjilningunampa ñawpambi kaychina rini niq: Kay runamkunaqam nuqampa wambrallkuna, nichpa. 6 Chayri qamkuna rinriyuqkunaqa allita uyayllampa Santu Ispirituy nuqampi kriyiqkunata nichqanda, nichpa. 7 Siñurninchiq Jisumkristum niwarqambis, Filadilfya llaqtampi tandamkaq kriyiq masinchiqkunampa yach'achimkuqninman kaychina iskibrinaypaq: Nuqa Jisumkristum ancha santu mana nima uchayuq kachpa, allimptalla rimani. Chay unay gubyirnu Dabidchina ancha kamachimkuq kachpam, dyabluta atini binsiyta, achka runata warmita nuqampaq yach'achinallkillampa. Chaqa nuqam llabi dwiñu kachpa, mayqan punguta atini kich'ayta, yallkunallkillampa. Chay pungutaqam mana pimpis atinqachu kirpayta. Chaychinallam suq punguta kirpamptiyqa, mana pimpis atinqachu kich'ayta. 8 Tumkuy ima rurachqallkillampatam allita yach'ani. Chaymi yach'ani: Mana kamachimkuqkuna kachpampismi, nuqa nichqayta allita kasuchqallampa kangi. Manam ñigawachqallampachu kangi. Chaymi suq pungutachina kich'achqa kani yallkunallkillampa. Kanan manam pimpis atinqachu kirpayta chay pungutaqa. 9 Chay llaqtallkillampampim wamkin isrraylinumkuna dyablu munachqanda ruranllampa. Ninllampam: Nuqallkunaqam Dyuspa amkrachqa nasyunnin kanillampa, nichpa. Piru manam chaychinachu. Chaymi nuqaqa chay llullamkuq runamkunata ñawpallkillampampi rini qunqurichiq, allita yach'ananllampa: Jisumkristum paypi kriyiqkunata ancha kuyan, nichpa. 10 Chaqa nuqaqam qamkunata kamachichurqaq, mana challkuq nuqampi kriyinallkillampa. Chay kamachichuchqaytam allita kasuwachqallampa kangi. Chaymi qamkunata rini yanampachuq, chay ñamkana tyimpumpi ama padisinallkillampa. Piru chay tyimpu ch'ayamumptinqam, kay mundumpi yumbay mana kriyiqkunata padisichichpa, rini mallimpaq: ¿Rinllampachu kriyiq nuqampi ichu mana? nichpa. 11 Chaqa nuqaqam utqana rini chamuq. Chayri ama nimatampis challkuchpachu, allita kasuwachpa kawsayllampa, ama ni pimpis primyullkita pyirdichichunambaq. 12 Chaqa dyabluta binsiqkunataqam nuqaqa Taytay Dyuspa ladumbi tumkuy tyimpumpaq rini kawsachiq. Dyusniypa adurana wasimba ancha baliq pilarningunachinam rinllampa kaq. Chaymi Dyuspa ladunmandaqa mana pimpis pallkunataqa atinqachu achuchiyta. Taytay Dyuspa chutinda, nuqampa muchuq chutiytampis, Taytaypa llaqtamba chutindampismi pallkunampi iskibrichaq. Chay llaqtanqam syilumanda kay pachaman rin chamuq. Chutinmi Muchuq Jirusalin. 13 Chayri qamkuna rinriyuqkunaqa allita uyayllampa Santu Ispirituy nuqampi kriyiqkunata nichqanda, nichpa. 14 Siñurninchiq Jisumkristum niwarqambis, Lawdisya llaqtampi tandamkaq kriyiq masinchiqkunampa yach'achimkuqninman kaychina iskibrinaypaq: Nuqa Jisumkristum allin tistigu kachpa, allimp kaqtalla rimani. Chaymi chutinimpis: Allimp kaqlla. Taytay Dyusqam nuqawanlla tumkuy imata rurarqan. 15 Nuqaqam qamkuna tumkuy ima rurachqallkita allita yach'ani. Chaymi yach'ani: Manam tumkuy chunqu kuyawachpachu kawsallkangillampa, nichpa. Chayrallkum suq tibyu yamkuchinalla kangillampa. ¡Manam nimatampis munanichu, chaychina tibyulla kanallkillampaqa! Mas allim kanman, chiri yamkuchina kachpa, ama nimatampis kuyawanallkillampa, ichu timbullkaq yamkuchina tumkuy chunqu ancha kuyawanallkillampa. 16 Piru qamkunaqam mana munangillampachu tumkuy chunqu nuqata kuyawaytaqa. Chaymi tibyu yamkuchinalla kamptimkillampaqa, mana rinichu ch'askichuqllampa. Achwanmi millanachuchpa, ansyastachina rini sitamkuchuq. 17 Chaqa qamkunaqam kaychina ningillampa: Nuqaqam tumkuy imayuq kani. Manam nima faltawanchu. Chaymi bwina bida pasani, nichpa. Piru qamkunaqam mana intyindingichu: Dyuspaqqam nuqa suq ancha padisiqchina, ancha panqamkuqchina, mana nimayuqchina, sarkuchina, mana mudanayuqchinam kani, nichpa. 18 Chayrallkum ancha kunallkillampa, nuqamanda ch'askinallkillampa chay lijitimu urutachina. (Chaqa chay yach'achimkuchqayqam chay uruchina.) Chayri nuqamanda ch'askiyllampa chay yuraq mudanatachina, ama simprallachina panqamkuchpa kawsanallkillampa. Ch'askiyllampampisri nuqamanda chay ñawi ambitachina yach'achichuchqayta, allita intyindinallkillampa, amana sarkuchina purinallkillampa. 19 Chaqa nuqaqam yumbay kuyachqayta anyachpa kastigani, mas allita kasuwachpa kawsananllampa. Chayri uchallkimkunata dijachpa, tumkuy chunqu Tayta Dyusta kuyachpa kawsayllampa. 20 Nuqaqam chunqullkiman munani yallkuyta. Chaymi wasimkimpa pungunmandachina qayallkallki. Chayri uyawachpa dijawamptimki, chunqullkiman yallkunaypaq, rini yallkuq, pulla mimkuqkunachina kuchimkuchpa kawsananchiq. 21 Chaymi qamkuna dyabluta binsichpa kawsamptimkiqa, nuqaqa rini tiyachichuqllampa nuqawan chay kamachimkunay trunuypi. Chaqa nuqampismi dyabluta binsichpa, Taytay Dyuspa kamachimkunan trunumbi paywan pulla tiyallkani. 22 Chayri qamkuna rinriyuqkunaqa allita uyayllampa Santu Ispirituy nuqampi kriyiqkunata nichqanda, nichpa.
1 Chaymandaqam nuqa Jwan anaq syilumpi rimkarqay suq kich'amkachqa punguta. Chaychina rimkachpaqam, uyarirqay chay jwirti klarin laya busta kaychina niwaqta: Lluqchimuy kayman rimkachichunaypaq imam rin pasaq suq tyimpumanda, nichpa. 2 Chaychina chay rimaq niwamptinmi, das Dyuspa Santu Ispiritunwan chunquypi unda kidarqay. Kanan anaq syilumpim rimkarqay suq kamachimkunan trunuta. Chay trunumpiqam suq ancha pudirniyuq tiyallkarqan. 3 Paytam rimkarqay ancha chumaq rumimkunachina achka kulurwan llimpyallkaqta. Suq laya kulurqam llimpyarqan chay rumi jaspi chutiqchina. Suq layaqam llimpyarqan chay rumi kurnalina chutiqchina. Kanan chay kamachimkunan trunumbi tiyallkachqamba rridurnimbim ancha llimpyaq inamp laya (chirampa laya) kulurniyuq karqan. Chay rumi ismiraldachina ancha llimpyarqan. 4 Chay mas kamachimkunan trunumpa tumkuy rridurnimbiqam karqambis 24 kamachimkunan trunumkuna. Chay trunumkunampiqam tiyallkarqan 24 ansyanumkuna. Pallkunaqam ancha yuraq mudanayuqkuna karqanllampa. Umambiqam karqan urumanda kurunamkuna. 5 Kanan Dyuspa trununmandaqam rrilampagumkuna chamuchpa, ancha kunyachpa, ancha jwirtita lanyamkurqan. Rimkarqaypismi chay trunumba ñawpambi syiti michamkuna mirallkaqta. Chay syiti michamkunaqam munan niyta: Tayta Dyuspa syiti ispiritunguna, nichpa. 6 Chay trunumba ñawpambiqam rimkarqaypis suq mar yamku ispijutachina. Chay mar yamkuqam kristalchina ancha chuyita karqan. Chaymandaqam rimkarqaypis chay mas kamachimkunan trunumpa ch'usku ladungunampi ch'usku kamachimkuq kawsaqkunata. Pallkunaqam ancha achka ñawiyuqkuna ñawpambi imkimbi karqan. 7 Chay ch'usku kamachimkuq kawsaqmandaqam suqninqa liyunchina karqan. Suqninqam suq turuchina karqan. Suqninqam runa laya qaqllayuq karqan. Suqninqam suq kuchaq syilumpi bwilallkaqchina karqan. 8 Kanan ch'uskundinmi kadunu sayis alayuq karqan. Chay ancha achka ñawinllampaqam alangunampa sawambi, warambi karqan. Kanan tutampnindin punchawnindinmi mana challkuq Tayta Dyusta kaychina alabaqllampa: ¡Yumbaymanda mas pudirniyuq Tayta Dyus, qamqam ancha santu kangi! Manaraq nimampis kamptinmi, qamqa kachqana kangi. Chaychinallam kanangaman kawsallkangi. Muchuqmandam ringi chamuriq, nichpa. 9 Chaqa chay trunumpi tiyaqqam tumkuy tyimpu kawsan. Chaymi chay ch'usku kamachimkuq kawsaqkunaqa kutin kutin rimachpa, payta adurachpa, alabachpa, pagimkunllampa. Chaychina pallkuna adurallkamptinqam, chay 24 ansyanumkunampis qunqurimkuchpa urkunda pambaman ch'ayachinllampa. Chaychina qunqurimkuchpam, chay mas kamachimkunan trunumpi tiyaqpa ñawpanman kurunangunata rurachpa, kaychina ancha aduranllampa: 11 Tayta Dyusitu, tumkuy imatam qam rurachqa kangi. Chaqa qamllam munachqa kangi, tumkuy ima kanambaqqa. Ancha kamachimkuq, ancha pudirniyuq kamptimkim, ancha balin alabachqa, rrispitachqa kanallki, nichpa.
1 Nuqa Jwanmi rimkarqay chay mas kamachimkunan trunumpi tiyallkaqpa allin ladu mamkimbi suq rrulluchqa libruta. Chay rrulluchqa librumpa sawambi umkumbiqam iskibrichqa karqan. Syiti siramanda sillumkunawanmi alli kirpadu karqan. 2 Kanan chay rrulluchqa libruta rimkachpaqam, uyarqay suq kamachimkuq anjil, ancha jwirtita kaychina nimptin: Pim dirichuyuq, kay syiti sillumkunata llimkichpa, kay libruta kich'anambaqqa? nichpa. 3 Piru manam pimpis dirichuyuqchu karqan, chay rrulluchqa librumpa sillungunata llimkichpa, kich'achpa, umkumbi liyinambaqqa. Chaqa anaq syilumpi kaqkunamanda, kay pachampi kaqkunamanda, allpampa warambi kaqkunamandampis mana ni pimpis dirichuyuqchu karqan, chay rrulluchqa libruta kich'anambaq ni rimkanambaqqa. Chaymi nuqaqa ancha waqarqani. 5 Chaychina waqallkamptiymi, chay ansyanumkunamanda suqnin kaychina niwarqan: Amar waqaychu. Chaqa chay atun ayllu Judamandam chamullkan suq kamachimkuq ancha jwirsayuq liyunchina. Payqam chay unay gubyirnu Dabidpa karu willkan. Yumbay kuntrangunatam binsichqa. Chaymi ancha dirichuyuq chay syiti sillunda llimkichpa, chay rrulluchqa libruta kich'anambaq, nichpa. 6 Chaychina niwamptinqam, rimkarqani suq Uñatachina. Chay mas kamachimkunan trunumpa, chay 24 ansyanumkunampa, chay ch'usku kamachimkuq kawsaqkunampa ch'awpimbim karqan. Chay Uña wanchiduchina kachpampismi, chayarqan. Kanan payqam syiti waqrayuq, syiti ñawiyuq karqan. Chay syiti ñawingunaqam Tayta Dyuspa syiti ispiritungunampaq yach'achiwanchiq. Chaqa Tayta Dyusmi chay syiti ispiritungunata kach'amun, kay mundumpa tumkuy lugarningunaman rinanllampa. 7 Chay Uñaqam chay mas kamachimkunan trunumpi tiyaqman richpa, chay tiyaqpa allin ladu mamkinmanda chay rrulluchqa libruta ch'askirqan. 8 Chaymi chay libruta ch'askimptinqa, chay ch'usku kamachimkuq kawsaqkuna, chay 24 ansyanumkunampis chay Uñampa ñawpambi qunqurimkuchpa, urkungunata pambamkaman ch'ayachirqan, payta adurananllampa. Kanan pallkunaqam kadunu arpayuqkuna urumanda kumpayuqkuna karqanllampa. Chay kumpangunampim insinsyuta ampachpa, rumpachirqanllampa, michki qunday lluqchinan. Chay michki qundayqam karqan Dyuspi kriyiqkunampa urasyunninguna. 9 Chaymi chay aduraqkuna chay Uñata alabachpa, kay muchuq imnuta kaychina kantarqanllampa: Qamqam yawarnimkita ich'achpa, wañurqallki, uchayllampamanda pirdunawachpa, wachawanallki. Chaychina wañuchpam, yumbay kastamkunamanda, yumbay rimallkunata rimaqkunamanda, yumbay atun ayllumkunamanda, yumbay nasyungunamanda achka runata, warmita wachawachqa kangi, Taytallki Dyuspa wambranguna kanaypaqllampa. Chaymi dirichuyuq kangi, chay sillumkunata llimkichpa, chay rrulluchqa libruta kich'anallkimpaq. 10 Chaqa qamllam nuqallkunata numbrawachqa kangi, kamachimkuqkuna kanaypaqllampa, kuramkunachina Taytallki Dyuspaq trabajanayllampa. Chaymi kay mundumpi yumbay tiyaqkunata rinillampa kamachiq, nichpa. 11 Chaymandaqam rimkachpa, uyarqani ancha achka anjilkuna alaballkaqta. Chay anjilkunaqam Tayta Dyuspa trunumba, chay ch'usku kamachimkuq kawsaqkunampa, chay 24 ansyanumkunampa rridurnimbi karqan. Chay anjilkunaqam ancha achka millunguna karqan. 12 Pallkunaqam ancha jwirtita nirqanllampa: ¡Chay wanchichqa Uñataqa ancha alabachunllampa! Chaqa payqam ancha pudirniyuq kamachimkuq, tumkuy imayuq, ancha yach'ayniyuq, ancha jwirsayuq. Chaymi ancha balin, payta tumkuy chunqu alabananchiqllampa, nichpa. 13 Kanan Tayta Dyus tumkuy ima rurachqandampismi uyarqay alaballkamptinllampa. Chaqa syilumpi kaqkuna, kay pachampi kaqkuna, chay mar yamkumpi kaqkuna, tumkuy wañuchqamkunampismi ancha alabachpa, kaychina nirqanllampa: ¡Trunumbi tiyaq Tayta Dyusta, chay Uñatampis ancha rrispitachpa, tumkuy tyimpu adurachunllampa! Chaqa pallkunaqam ancha llimpyaqkuna, ancha kamachimkuqkuna, nichpa. 14 Chay ch'usku kamachimkuq kawsaqkunampismi nirqanllampa: Chaychina kanqa! nichpa. Chaychina alabamptinllampaqam, chay 24 ansyanumkunampis qunqurimkuchpa, urkunda pambamkaman ch'ayachichpa, ?tumkuy tyimpu kawsaq? Dyusta ancha adurarqanllampa.
1 Chaymandaqam chay musquypichina rimkarqay chay Uñata chay rrulluchqa librumpa chay syiti sillungunamanda punta sillunda llimkimptin. Chaychina llimkichpa kich'amptinmi, chay ch'usku kamachimkuq kawsaqkunamanda suqnin suq lanyaqchina ancha jwirtita rimachpa nirqan: Chamuy ?rimkay?! nichpa. 2 Chaychina nimptinmi, rimkarqani suq yuraq bistyata. Chay bistyampim suq muntamkuq rirqan suq armata piskachpa. Chay armanqam arku karqan. Kanan payqam suq kurunata ch'askichpa, kuntrangunata maqachpa, binsirqan. Chaychinam rirqan, yumbay kuntrangunata binsinambaq. 3 Chaymandaqam chay Uñaqa chay rrulluchqa librumpa suq sillundampis llimkichpa, masta kich'arqan. Chaychina kich'amptinmi, uyarirqay chay ch'usku kamachimkuq kawsaqkunamanda suqnin ancha jwirtita rimamptin: Chamuy ?rimkay?! nichpa. 4 Chaychina nimptinmi, rimkarqani suq chumpimka bistya syilumanda lluqchillkaqta. Chay bistyampimpismi suq muntamkuq rirqan. Chaytaqam Tayta Dyusqa dijarqan, kay munduman chamunambaq, yumbay nasyumbi tiyaqkunata inkitanambaq, suqwan suqwan pilyachpa wanchinamkunanllampa. Chaypaqmi chay chumpimka bistyampi riqqa ch'askirqan suq ancha atun kuchilluta. 5 Chaymandaqam chay Uñaqa chay rrulluchqa librumpa suq sillunda llimkichpa, masta kich'arqan. Chaychina kich'amptinqam, uyarirqay chay ch'usku kamachimkuq kawsaqkunamanda suqnin kaychina rimamptin: Chamuy ?rimkay?! nichpa. Chaychina nimptinmi, rimkarqani suq yana bistyata. Chay bistyampimpismi suq muntamkuq rirqan. Payqam suq balansata mamkimbi amparqan. 6 Chaymandaqam uyarirqay chay ch'usku kamachimkuq kawsaqkunampa ch'awpinmanda suq rimaq kaychina nimptin: Dijayna ancha ambruna kanambaq. Chaymi runamkunaqa suq diya trabajachqan pagunwan suq kilu trigutalla randinqa. Sibadatampismi kimsa kilustalla suq diya trabajachqan pagunwan randinqa. Piru ama dañachiychu asiytinllampata, binunllampataqa, nichpa. 7 Chaymandaqam chay Uñaqa chay rrulluchqa librumpa suq sillunda llimkichpa, masta kich'arqan. Chaychina kich'amptinmi, uyarirqani chay ch'usku kamachimkuq kawsaqkunamanda suqnin nimptin: Chamuy ?rimkay?! nichpa. 8 Chaychina nimptinmi, rimkarqay suq qarwa bistyata. Chay bistyampimpismi suq muntamkuq rirqan. Chay muntamkuqqam chutirqan Wañuy. Paypa imkindaqam chamurqan wañuchqamkunampa lugarnimba kamachimkuqnin. Chaqa Tayta Dyusmi pallkunata dijarqan, kay mundumpi kada 4.000 kawsaqkunamanda 1.000ta wanchinanllampa. Chaymi chaychina wañurqanllampa pilyachpa, wanchinamkuchpa, qachyachpa, mallaqnachpa, ichu kita animalkuna wanchimptinllampa. 9 Chaymandaqam chay Uñaqa chay rrulluchqa librumpa suq sillunda llimkichpa, masta kich'amptinqa, rimkarqay suq atun pata altarpa warambi achka wañuchqa kriyiq masinchiqkunampa almangunata. Pallkunataqam Dyusta kuntraqkuna wanchichqallampa karqan, Dyus nichqanda yach'achimkumptinllampa. 10 Chay wañuchqamkunaqam Tayta Dyusta ancha jwirtita nirqanllampa: Ancha allin Tayta Dyus, qamqam ancha pudirniyuq kamachimkuq kangi. Tumkuy nichqallkitam kumplingi. Chaymi tampullkillampa: ¿Ima tyimpumkamanmi ringi unayaq, mundumpi tiyaq wanchiwachqan runamkunata jusgachpa, kastiganallkiqa? nichpa. 11 Chayrallkum Tayta Dyusqa pallkunata suqta suqta yuraq mudanamkunata quchpa, nirqan: Ama llamkichpachu, achlita masta samachpa chuyayllampa, wamkin kasuwaq masimkimkunatampis qamkunatachina wanchinangamanllampa, nichpa. 12 Chaymandaqam chay Uñaqa suq sillu masta llimkimptin, kay pacha ancha kuyuqta rimkarqay. Rumpaytampismi rimkarqay ancha yanayachqata mudana lututachina. Killatampismi rimkarqani yawarchina chumpimkampaq timkramkachqata. 13 Rimkarqaypismi lusirumkunata syilumanda kay pachaman ichkimullkaqta, chay yura iguspa puquynin ancha jwirti wayrawan ichkiqtachina. 14 Syilumpismi chingarqan suq pampil rrullumkallkaqchina. Chaymandaqam tumkuy urqqumkuna, tumkuy yamkumpa ch'awpimbi isla allpamkunampis kuyuchpa lugarninmanda achurqanllampa. 15 Challkunata rimkachpam, tumkuy laya runamkuna ancha manchachpa, mitimkachpa, pamkamkurqanllampa. Chaqa kay mundumpa gubyirnunguna, suq kamachimkuq runamkuna, suldadumkunampa kamachimkuqninguna, rrimkumkuna, randichqa kriyadumkuna, mana nima patrunniyuqkunampismi mitimkachpa, mach'allkunampi ichu atun rumimkunampa ch'awpimbi pamkamkurqanllampa. 16 Pallkunaqam qayach'amkuchpa, chay urqqumkunata, chay atun rumimkunata rrugarqanllampa: Nuqallkunampa sawayman bulamkamuchpa pamkawayllampa, chay trunumpi tiyaq ama rimkawananllampa! Chaychinar pamkawayllampa, chay Uña nuqallkunata ama kastigawanan. 17 Chaqa chay manchaypaq Jwisyu Diyam ch'ayamuchqana. Kanan Dyuspa Uñamba kastigunmandaqam manana ni pimpis atichunllampachu wachamkayta, nichpa.
1 Chaymandaqam chay musquypichina rimkarqani ch'usku anjilkuna kay mundumpa ch'usku kuchumbi chayallkaqta. Pallkunaqam ch'usku ladumanda chamuq wayramkunata arkallkarqanllampa, kay pachata, yamkumkunata, muntimkunata ama dañachinambaq. 2 Chaymandaqam rimkarqaypis rumpay lluqchinan ladumanda suq anjil chamullkaqta. Chay anjilqam Tayta Dyus kawsachimkuqpa sillunda ampamullkarqan. Chay anjilqam chay ch'usku anjilkunata wayrata arkallkaqta ancha jwirtita nirqan: Amaraq dañachiychu kay pachata ni mar yamkuta ni muntimkunata. Chaqa Tayta Dyusta kasuqkunataqam manaraq siñalachqachu kanchiq urkungunampi, wachadu kananllampa, nichpa. Chaqa chay ch'usku anjilkunataqam Tayta Dyus pirmisuta quchqa karqan, kay pachata, mar yamkuta dañachinanllampa. 4 Chaymandaqam uyarqay allkam kan Dyuspa siñalninwan kaqkunaqa. Chay isrraylinumkunampa dusi atun ayllungunamandam 144.000 siñalniyuqkuna karqan. 5 Judampa atun ayllunmandam 12.000 siñalniyuqkuna karqanllampa. Rrubimba atun ayllunmandam 12.000 siñalniyuqkuna karqan. Gadpa atun ayllunmandampismi 12.000 karqan. 6 Asirpa atun ayllunmandam 12.000 karqan. Nimptalimpa atun ayllunmandam 12.000 karqan; Manasispa atun ayllunmandam 12.000 karqan; 7 Simiyumba atun ayllunmandam 12.000 karqan; Libimpa atun ayllunmandam 12.000 karqan; Isamkarpa atun ayllunmandam 12.000 karqan; 8 Sabulumba atun ayllunmandam 12.000 karqan; Jusimpa atun ayllunmandam 12.000 karqan; Binjamimba atun ayllunmandampismi 12.000 karqanllampa. 9 Chaymandaqam ancha achka yuraq mudanayuqtampis rimkarqay. Pallkunataqam mana pimpis atirqanchu yumpayta. Chaqa yumbay nasyungunamanda, yumbay kastamkunamanda, yumbay atun ayllumkunamanda, tumkuy laya rimallkunampi rimaqkunamandam karqanllampa. Pallkunaqam Tayta Dyuspa trunumba ñawpambi, chay Uñamba ñawpambi chayachpa, palmampa ramprangunata mamkingunampi ampachpa, 10 ancha jwirtita kaychina kunyarqanllampa: ¡Tayta Dyus trunumbi tiyaqmi chay Uñawan wachawachqa kanchiqllampa! nichpa. 11 Chaychina nillkamptinllampam, yumbay chay anjilkuna chayallkarqanllampa Dyuspa trunumba rridurnimbi, chay ansyanumkunampa, chay ch'usku kamachimkuq kawsaqkunampa rridurnimbi. Kanan chay chayallkaq anjilkunaqam Dyuspa trunumba ñawpambi piratachpa, urkunllampata pachaman ch'ayachichpa, Tayta Dyusta adurachpa, 12 kaychina nirqanllampa: ¡Chaychina kanqa! Chaqa Tayta Dyusqam ancha llimpyaq, ancha yach'ayniyuq, ancha pudirniyuq, ancha jwirsayuq. Chayri ancha rrispitachpa, ancha pagimkuchpa, paytaqa alabachunllampa. Chayrallkum ancha balin, payta tumkuy tyimpu nuqanchiqkuna alabananchiq. Chaychina kanqa, nichpa. 13 Chaychina aduramptinllampam, chay ansyanumkunamanda suqninqa nuqata tampuwarqan: Riqsingichu chay yuraq mudanayuqkunata? ¿Yach'angichu maymandaraq chamuchqallampa? nichpa. 14 Chaymi nirqay: Siñursitu, qam yach'angi: ¿Pimkunam pallkunaqa? ¿Maymandam chamuchqallampa? nichpa. Kanan chay ansyanuqam niwarqan: Pallkunaqam suq ancha manchaypaq tyimpumpi padisichpa, kaymanna chamuchqallampa. Chay Uñam yawarninda ich'achpa wañurqan, pallkunata uchangunamanda pirdunanambaq, limpyu chunquyuq kanambaqllampa. 15 Chaymi pallkunaqa Tayta Dyuspa adurana wasimbi trunumba ñawpambi punchawnindin tutampnindin payta aduranllampa. Kanan payqam pallkunawan kachpa, ancha allita rin kwidaq. 16 Chaymi pallkunaqa manana nimatampis rinllampachu mallaqnaq ni yamkunaq. Manam ni rumpay pallkunataqa rumpachinqachu. 17 Chaqa Dyuspa ladumbi tiyaq Uñaqam Jisumkristu. Paymi pallkunampa Michidurninqa rin kaq. Chaymi ancha allita kwidachpa, pallkunata rin ampaq kawsachimkuq yamkumpa ñawinman, chay michki yamkuta umpyachpa, tumkuy tyimpu kawsananllampa. Kanan imampaq pallkuna waqamptimbismi, Tayta Dyus kimkin, ñawingunata rin chamkichiq, nichpa.
1 Chaymandaqam Dyuspa Uñanqa chay rrulluchqa librumpa syiti sillungunamanda ultimu sillunda llimkichpa kich'arqanna. Chaychina kich'amptinmi, anaq syilumpi suq midya uratach'i ancha uyaritamp karqanllampa. 2 Chaychina uyaritamp kamptinmi, nuqa Jwan rimkarqay syiti anjilkunata Dyuspa ñawpambi chayallkaqta. Kanan chay anjilkunaqam kadunu suq kurnitata ch'askirqan. 3 Chaymandaqam suq anjilta rimkarqay urumanda kumpata ampamuqta. Chay anjilqam pata altar urumanda kaqman chamuchpa, chayachpa, achka insinsyuta ch'askirqan, chay altarpi, chay kumpampi rumpachinambaq. Chay pata altarqam Dyuspa trunumba ñawpambi kidan. Chaymi chay michki qundaynin chay mamkimbi kaq kumpamanda lluqchichpa, Dyuspi kriyiqkunampa mañamkuchqanwan taqllumkachpa Tayta Dyusman ch'ayarqan. 5 Chaymandaqam chay anjilqa chay pata altarmanda puchumkunata tandachpa, chay kumpanda undachichpa, syilumanda kay pachaman wichumkumurqan. Chaychina wichumkumumptinmi, ancha lanyamkurqan. Suq laya kunyaqkunampismi karqan. Achka rrilampagumpismi ancha lliwyarqan. Kay pachampismi ancha kuyurqan. 6 Chaymandaqam chay syiti kurnitanda ampaq anjilkunaqa kamamkarqan, suqpa suqpa waqachinambaq. 7 Chay punta anjilqam waqachirqanna kurnitanda. Chaychina waqachimptinmi, kay pachaman granisu ninawan yawarwan taqlludu ichkimurqan. Chaychina ichkimumptinmi, kay pachampa kada kimsa lugarkunamanda suq lugarninda rumpachirqan. Chay rumpachichqa lugarkunampim yumbay muntimkuna, yumbay qawamkuna rumparqan. 8 Chaymandaqam sigundu anjilpis kurnitanda waqachimptin, suq atun qaqa mirallkaqchina mar yamkuman ichkimurqan. Chaychina ichkimumptinmi, chay mar yamkumpa kimsa partinmanda suq partin yawarpaq timkramkarqan. 9 Chaymi mar yamkumpa chay dañachichqa partimbi kawsaq animalkuna yumbay wañurqanllampa. Chay mar yamkumpa partinda pasallkaq barkumkunampismi yumbay chingarqanllampa. Chaychinam chay mar yamkumpi kallkaqkunamanda kada kimsamanda suqnin wañurqan. 10 Chaymandaqam tirsir anjilpis kurnitanda waqachimptin, suq lusiru ancha atun michachina mirachpa syilumanda ichkimurqan kay pachaman, rriyumkunaman, yamkumpa ñawingunaman. Chaymi kada kimsa rriyumkunamanda suq rriyuta dañachirqan. Kada kimsa yamkumpa ñawingunamandampis suq ñawinda dañachirqan. 11 Chay lusiruqam chutiq Ayaq. Chaychina ayaq kachpam, chay rriyumkunata, yamkumpa ñawingunata dañachimptin, ayaq limkiduna timkramkarqanllampa. Chaymi achka runamkuna warmimkuna yamkunachpa, chay ayaq yamkuta umpyachpa, wañurqanllampa. 12 Chaymandaqam kwartu anjilpis kurnitanda waqachimptin, rumpay, killa, lusirumkuna kimsa partinmanda suq partin dañamkarqan, amana allita achimkchamkunambaq. Chaymi kada punchawpa kimsa partinmanda suq partin tutallana kidarqan. Chaychinallam kada tutampa kimsa partinmanda suq partimbis tutayaqllana kidarqan. 13 Chaymandaqam anaqman champamkuchpa, rimkarqay suq anjilta syilumpa ch'awpimbi bwilallkaqta. Chaytam uyarqay ancha jwirtita kaychina niqta: Ay, amkamkawraq! Faltanraqmi kimsa anjilkuna kurnitangunata waqachinanllampa. ¡Pallkuna waqachimptinqam, ura pachampi tiyaqkunaqa ancha rinllampa padisiq! nichpa.
1 Chaymandaqam kintu anjilpis kurnitanda waqachimptin, rimkarqay suq lusiru layata. Paymi syilumanda kay pachaman ichkimuchqa karqan. Chay lusiru layataqam manchaypaq talalamba pungumba llabinda qurqanllampa. 2 Chaymandaqam chay llabi quchqanwanqa chay talalamba pungunda kich'arqan. Chaychina kich'amptinmi, chay talalanmandaqa suq urrnumandachina ancha achka qunday lluqchichpa, syiluta, rumpayta arkamptin, limpu tutayarqan. 3 Chaymandaqam chay qundaymanda ancha achka atun churqamp (churqa) layamkuna lluqchichpa, kay pachaman chamurqanllampa. Chay atun churqa layamkunaqam atallki kurumkunachina kanichpa, bininunwan runamkunata ancha padisichirqan. 4 Chay churqamp layamkunatam kaychina kamachirqan: Ama dañachiyllampachu chay pachampa qawangunata ni muntingunata ni nima laya plantangunatampis. Achwan richpa, kaniyllampa Dyuspa siñalninda urkungunampi mana ch'askiqkunata, nichpa. 5 Piru chay churqa layamkunataqam mana dijarqanchu, runamkunata warmimkunata wanchinanllampaqa. Achwanmi dijarqan, sinku killata chay churqamp layamkuna ancha jwirtita kaninanllampa, chay runamkuna, warmimkuna nanaywan ancha padisinanllampa. 6 Chaychina chay atun churqa layamkuna ancha kanimptinllampam, ancha padisichpa, munanqallampa wañuyta. Piru ancha munachpa wañuytampismi, mana atinqallampachu wañuytaqa. 7 Chay churqamp layamkunaqam suldadumkunampa bistyangunachina kamamkarqanllampa, suqkunawan pilyananllampa. Kanan umamba sawambim urumanda kuruna layamkunata ruramkuqllampa. Qaqllangunaqam runamkunampa qaqllanchina karqan. 8 Aqchanllampaqam warmimkunampa aqchanchina karqan. Kirungunaqam liyumba kirungunachina karqan. 9 Kanan yumbay pallkunaqam chilimkiyuq layamkuna karqanllampa, kwirpunda wachananllampa. Chay chilimkingunaqam jirrumandachina karqan. Kanan bwilamptinllampaqam, alangunaqa ancha kunyarqan, ancha achka kallpallkaq chutana karrumkuna bistyandinguna pilyanan lugarman kallpallkaqchina. 10 Chay churqa layamkunampa ch'umpangunaqam chay atallkimkunampa (alamkran kurumkunampa) ch'umpangunachina karqan. Chay ch'umpamba puntangunawanmi atirqanllampa runamkunata ancha jwirtita kaniyta bininunwan. Chaychina sinku killa tumkuyta kanichpaqam, runamkunataqa atiqllampa ancha nanachiyta. 11 Chay churqamp layamkunampa kamachimkuqninmi chay manchaypaq talalamba kamachimkuqnin karqan. Payqam ibriyu rimaypi chutin Abadun. Grigu rimaypim chutin Ampulyun. Chay ichkay chutingunam munan niyta Chingachimkuq, nichpa. 12 Chaychinam chay punta kastigu uchyamkarqan. Piru faltanraqmi ichkay kastigumkuna kanambaq. 13 Chaymandaqam chay sistu anjilpis kurnitanda waqachirqan. Chaychina waqachimptinmi, uyarqani suq runa rimaqtachina chay urumanda kaq pata altarpa ch'usku waqrachina adurnungunampa ch'awpinmanda rimamptin. Chay pata altarqam Tayta Dyuspa ñawpambi karqan. 14 Chay rimaqqam chay sistu anjil kurnitanda waqachiqta nirqan: Chay atun Iwfratis rriyumpa manyambi ch'usku watachqa anjilkunata kach'ay, nichpa. 15 Chaychina nimptinqam, chay anjilqa chay ch'usku watachqa anjilkunata kach'arqanna. Chaymi rirqanllampana ancha achka runata, warmita wanchiq. Kada kimsamandam suqta wanchirqanllampa. Chaqa Tayta Dyusmi chay anjilkunata unaymandampacha kamamkachqa karqan, chay uras, chay diya, chay killa, chay wata chaychina wanchinanllampa. 16 Pallkunawanmi rirqan ancha achka suldadu bistyampi puriqkuna. Pallkunaqam niwarqanllampa: Dusyintus millun suldadu layamkunam kan, nichpa. 17 Chay musquypichinam rimkarqay chay suldadumkuna layata chay bistyamkunata muntamkuchpa puriqtachina. Pallkunampa pichumbiqam karqan jirrumanda chilimkimkuna ninachina chumpimka kulurniyuq, safiru llimpyallkaq rumichina asul kulurniyuq, asufrichina qarwa kulurniyuq. Kanan chay bistyamkunampa umangunaqam liyumba umanchina karqanllampa. Chimingunamandaqam lluqchirqan nina, qunday, asufriwan. 18 Chaychina chay bistyamkunampa chimingunamanda chay nina, chay qunday, chay asufri lluqchichpaqam, kimsa plagachina ancha achka runamkunata, warmimkunata wanchirqanllampa. Chaqa kada kimsamandam suqta wanchirqanllampa. 19 Chay bistyamkunaqam chimingunawan, ch'umpangunawan atirqanllampa wanchimkuyta. Chaqa ch'umpangunaqam kulibra laya umayuq karqanllampa. Chaymi chay ch'umpangunampa uman layamkunawan achka runata, warmita dañachirqanllampa. 20 Piru chay mana wañuqkunaqam chaychina padisichpampis, mana dijarqanllampachu uchangunata. Achwanmi chaychinalla chay mana baliq kusaskunata rurachpa kawsarqanllampa. Kanan dyablumkunata adurachpa, chay urumanda, qallaymanda, brunsimanda, rumimanda ichu qarumanda rurachqa dyuskunata amitu layamkunata adurachpam kawsarqanllampa. Piru chay rurachqa dyuskunaqam mana atinllampachu rimkamkuyta ni uyamkuyta ni puriyta. 21 Chaychina kamptimbismi, chay uchayuqkunaqa sigirqanllampa wanchimkuchpa, brujiyamkuchpa, suqkunawan puñuchpa, suwamkuchpa.
1 Nuqa Jwanmi rimkarqay suq ancha pudirniyuq anjilta syilumanda pumkutaypa umkumbi urangumullkaqta. Chay anjilpa umamba sawambim suq inamp (chirampa) karqan. Qaqllanqam rumpaychina ancha llimpyarqan. Ch'angangunaqam mirallkaq qarumkunachina karqan. 2 Chay anjilqam suq tamkcha rrulluchqa librituta kich'achqata mamkimbi ampamurqan. Chaychina chamuchpaqam, allin ladu ch'amkinwan mar yamkumpa sawambi sarrumkurqan, ichuq ladu ch'amkinwanqam allpampi sarrumkurqan. 3 Chaychina sarrumkuchpaqam, payqa atun liyunchina ancha jwirtita qayach'amkuchpa rimarqan. Chaychina rimamptinqam, syiti lanyamkuna ancha kunyachpa, rimarqanllampa. 4 Chaychina chay syiti lanyamkuna rimamptinqam, nuqa Jwanqa chay rimachqanda yuyarqay iskibriyta. Piru chaychina yuyamptiymi, syilumanda suq rimaq niwarqan: Chay syiti lanyamkuna rimachqandaqa ama pitampis niychu ni iskibriychu, nichpa. 5 Chaymandaqam chay anjil mar yamkumpi, allpampi chayaqqa allin ladu mamkinda syiluman alsachpa, 6 kaychina nirqan: Tayta Dyusqam tumkuy tyimpu kawsan. Payqam tumkuy imata rurachqa: anaq syiluta tumkuy imandinda, kay pachata tumkuy imandinda, mar yamkuta tumkuy imandinda. Paypa chutinwan jurachpam, kay allimp kaqtalla rimani: Tayta Dyusmi manana mastachu rin chuyaq, tumkuy ima nichqanda kumplinambaqqa. 7 Achwanmi kay syiti anjilkunamanda ultimu anjil kurnitanda waqachimptinqa, Tayta Dyusqa rin kumpliq paypaq rimaqkunata ufrisichqanda. Chaqa Tayta Dyusmi paylla yuyachqanda paypaq rimaqkunata abisachqa karqan, nichpa. 8 Chaychina chay kamachimkuq anjil nimptinmi, chay suq rimaqqa syilumanda nuqa Jwanda kaychina niwarqan: Chay mar yamkumpa sawambi, kay allpampi chayaq anjilman richpa, mamkinmanda ch'askiy chay tamkcha rrulluchqa libritu kich'achqata, nichpa. 9 Chaychina niwamptinmi, chay kamachimkuq anjilman rirqay mañaq chay rrulluchqa librituta. Chaymi chay anjilqa quwachpa, kaychina niwarqan: Kay librituta mimkuy. Mimkumptimkiqam chay myil di abijachina ancha michki rin kaq. Piru pach'allkimpiqam ancha ayaqpaq rin timkramkaq, nichpa. 10 Chaymi chaychina chay anjil niwamptinqa, nuqaqa chay librituta ch'askichpa mimkurqay. Mimkumptiyqam chimiypiqa chay myil di abijachina ancha michki karqan. Piru pach'aypiqam ancha ayaqpaqna timkramkarqan. 11 Chaymandaqam chay anjilqa niwarqan: Yach'achimkuyri: Kaychinam Tayta Dyus rin ruraq chay achka llaqtampi tiyaqkunawan, chay achka nasyumbi tiyaqkunawan, chay achka laya rimallkunata rimaqkunawan, chay achka gubyirnumkunawan, nichpa.
1 Chaymandaqam suq chumkcha midiq baratachina quwachpa, chay rimaqqa niwarqan: Chay chumkcha barata ampachpar, riy, midiy Tayta Dyuspa adurana wasinda, pata altarnindampis. Challkunata midichpaqar, Dyuspa chay adurana wasimbi payta aduraqkunata yumpay. 2 Piru amar midiychu chay adurana wasimpa sawa patyundaqa. Chaqa Dyuspi mana kriyiq furastirumkunam chay pambaman yallkuchpa, rinllampa sarruq. Chaymi pallkunaqa 42 killata Dyus amkrachqan Jirusalin llaqtata dwiñumkuchpa, chaypi wampuyachpa, munachqanda rurachpa, rinllampa kamachimkuq. 3 Kanan nuqaqam ichkay tistigumkunata rini kach'aq, nuqampaq yach'achimkunambaq. Chaychina kach'amptiymi, chay ichkay tistigumkunaqa lutu mudanata ruramkuchpa, 1260 diyamkunata nuqampaq rinllampa yach'achimkuq, nichpa. 4 Tayta Dyusmi yumbay kay mundumpi tiyaqkunampa kamachimkuqninqa. Chay ichkay yach'achimkuq tistigumkunaqam paypa ñawpambi chayanllampa. Pallkunaqam chay ichkay ulibu plantamkunachina, chay ichkay lamparamkunampa tiyanangunachina. 5 Chaymi Dyusta kuntraqkuna chay ichkay tistigumkunata munamptinllampa maqayta, pallkunampa chiminmanda ninachina lluqchichpa, chay kuntraqkunata rumpachichpa, limpu rinllampa chingachiq. 6 Chaqa chay ichkay tistigumkunaqam Dyuspaq rimallkamptin, ancha pudirniyuq kamachimkuqkuna rin kaq. Chaymi pallkuna kamachimkumptin ama tamyanambaqqa, manana atinqachu tamyayta. Yamkuta kamachimptin yawarpaq timkramkananmi, yawarpaq rin timkramkaq. Chaychinam pallkunaqa tumkuy laya disgrasyawan atinqallampa kastigayta kay mundumpi tiyaqkunata. Munachpaqam, chay disgrasyamkunawan kutin kutin atinqallampa kastigayta. 7 Piru chay ichkay tistigumkuna yach'achimkuchqan tyimpu uchyamkamptinqam, suq manchaypaq animal laya chay ancha jundu talalanmanda lluqchimuchpa, chay ichkay tistigumkunata rin maqaq wanchinangaman. 8 Chaychina wanchichpaqam, chay Jirusalin llaqtampa kallingunampi kwirpungunata rinllampa wichumkuq. Chay llaqtampillam chay tistigumkunampa Kamachimkuqnin Jisumkristutampis kruspi wanchichqallampa karqan. Chaymi suq kumparasyunda rurachpa, chay Jirusalimbaqlla ninllampa: Suduma llaqtachina ichu Ijimptu llaqtachina, nichpa. 9 Chaymandaqam kimsa diya y midyampaq achka llaqtamanda kaqkuna, achka kastamanda kaqkuna, achka laya rimaypi rimaqkunamanda kaqkuna, achka nasyunmanda kaqkunampis rinllampa rimkaq chay ichkay tistigumkunampa wichumkuchqa kwirpungunata. Chaqa manam rinllampachu dijaq pambananllampaqa. 10 Kanan kay mundumpi tiyaqkunaqam ancha kuchimkuchpa, fyistamkunata rurachpa, pallkunampura imangunata rinllampa rrigalanamkuq, chay ichkay tistigumkunata wanchichqanrallku. Chaqa chay tistigumkunaqam chay disgrasyamkunawan ancha padisichichqa karqan kay mundumpi tiyaqkunata. 11 Piru chay kimsa diya y midyamandaqam Tayta Dyusqa chay ichkay wañuchqamkunata kawsachimurqan. Chaymi chay wañuchqamkunata kawsaqtana rimkachpaqa, yumbay chay rimkaqkunaqa ancha mancharqanllampa. 12 Chaymandaqam chay ichkay tistigumkunaqa uyarqan syilumanda suq rimaq ancha jwirtita kaychina nimptin: Kayman chamuyllampa, nichpa. Chaychina uyachpaqam, chay ichkay tistigumkunaqa pumkutallkunampa umkumbina anaq syiluman rirqanllampa, chay kuntraqkuna rimkallkamptinllampa. 13 Chay urasllam kay pachaqa ancha jwirtita kuyurqan. Chaychina ancha kuyumptinmi, chay Jirusalimbi achka wasimkuna bulamkarqanllampa. Kada dyis wasimkunamandam suq wasi bulamkarqan. Chaychina achka wasimkuna bulamkamptinmi, chay Jirusalimbi tiyaqkunamanda 7000 runa, warmi wañurqanllampa. Chaymi chay mana wañuqkunaqa ancha manchachpa, Tayta Dyus syilumpi kaqta alabarqanllampa. 14 Chaychinam rin uchyamkaq chay ancha jwirti sigundu kastigu. Piru, ¡ay! Dasmi rin ch'ayamuq suq manchaypaq tirsir kastigu. 15 Chay syiti anjilkunamanda ultimu anjil kurnitanda waqachimptinmi, achka rimaqkuna syilumanda ancha jwirtita rimarqanllampa: Pachampi gubyirnumkunaqam manana rinllampachu kamachimkuq. Achwan kay diyamandampacham Tayta Dyusqa Amkrachqan Wachadur Jisumkristuwan tumkuy tyimpuna rin kamachimkuq, nichpa. 16 Chaymandaqam chay 24 ansyanumkunaqa Tayta Dyuspa ñawpambi, trununllampamanda atarichpa, qunqurimkuchpa, kumurachpa, qaqllanllampata pambamkaman ch'ayachichpa, Tayta Dyusta adurachpa, 17 nirqanllampa: Tayta Dyus, yumbaymanda ancha pudirniyuq kangi. Manaraq nimampis kamptinmi, qamqa kachqana kangi. Chaychinallam kanangaman kawsallkangi. Suq diyam ringi chamuriq. Chaymi kay pachampi tumkuy jwirsallkiwan kamachimkumptimki, ancha pagimkullkillampa, 18 Achka nasyungunampim chay mana isrraylinu kaqkunaqa qambaq ancha piñamkurqanllampa. Chaymi kananqa ch'ayamuchqana tyimpu, qam piñamkuchpa yumbay chay uchayuq wañuchqamkunata kastiganallki. Piru qambaq rimaqkunata, chay adurachuq wambrallkimkunatam qamqa ringi quq primyumkunata, kamachimkuqkuna kamptin, ichu mana kamachimkuqkuna kamptimbis. Piru kay mundumpi wanchimkuqkunataqam qamqa ringi wanchiq, nichpa. 19 Chaymandaqam syilumpi Dyuspa adurana wasimba pungun kich'amkarqan. Chaymi musquypichina rimkarqani umku adurana wasimbi chay unay tratumpa Santu Kajunninda. Kanan rrilampagumkunam ancha lliwyarqan. Lanyamkunam ancha kunyarqan. Kay pachampismi ancha kuyurqan. Kanan ancha jwirtitam granisarqambis.
1 Nuqaqam chay musquypichina suq manchaypaq siñata syilumpi rimkarqay. Chay siñaqam suq warmi karqan. Payqam rumpayta ruramkuchqachina karqan. Kanan payqam killampa sawambi chayallkarqan. Umambiqam suq kuruna dusi lusiruyuq karqan. 2 Chay warmiqam qachyanan uras kamptin, nanaywan ancha qayach'amkurqan. 3 Chaymandaqam syilumpi suq laya manchaypaq siñata rimkarqani. Chay siñaqam suq ancha atun chumpimka animal qutur laya karqan. Chay animalqam syiti umayuq, dyis waqrayuq karqan. Chay syiti umangunaqam kurunayuqkuna karqan. 4 Chay ancha atun animalqam ch'umpanwan syilumanda ancha achka lusirumkunata rrastramuchpa, kay pachaman wichumkumurqan. Kada kimsa lusirumkunamandam suq lusiruta rrastramurqan. Chaymandaqam chay atun qutur layaqa chay qachyanaq warmimpa ñawpambi chayachpa chuyarqan, qachyamptin wambranda das mimkunambaq. 5 Chaymandaqam chay warmiqa suq ullqu wambritunda qachyarqan. Kanan chay wambranqam yumbay nasyungunata ancha allita rin kamachiq jirrumanda baranwan. Chaymandaqam Tayta Dyusqa chay nasiq wambrituta ladunman kamachimkunan trununman amparqan. 6 Chaychina ampamptinmi, chay warmiqa suq chuncha lugarman mitimkarqan. Chaqa Tayta Dyusqam chaypi suq allin lugarta allichachqa karqan, 1.260 diyamkunata chay warmita kwidachpa, qaranambaq. 7 Chaymandaqam Dyuspa kamachimkuq anjilnin Migil yanampamkuq anjil masingunawan tandamkachpa, syilumpi ancha pilyarqanllampa chay manchaypaq atun qutur layawan, yanampamkuq dyablungunawambis. 8 Chaychina pilyachpam, Dyuspa chay anjilningunaqa chay qutur layampa anjilningunata maqachpa, anaq syilumanda wichumkurqanllampa, amana chaypi kawsananllampa. 9 Chaychinam chay qutur layata, anjilningunatampis syilumanda kay pachaman wichumkumurqan. ¿Pitaq karqan chay qutur layaqa? Payqam karqan chay unay kulibra. Payllam dyablu, Satanaspis chutin. Chay dyabluqam yumbay runata, warmita ingañachpa inkitan, uchata rurananllampa. 10 Chaymandaqam uyarqay syilumpi suq rimaqta, ancha jwirtita kaychina niqta: Kananqam Tayta Dyus paypi kriyiqkunata wachachqa. Chaqa dyablutaqam syilumandaqa wichumkuchqana. Unaymi chay dyabluqa punchawnindin, tutampnindin Dyuspa ñawpambi chayachpa, kriyiq masinchiqkunata amkusarqan. Piru kananqam manana atinchu. Chaqa Tayta Dyusqam ancha pudirniyuq kachpa, pay Amkrachqan Wachadur Jisumkristuwan chumaqta rin kamachiwaqninchiq. 11 Chay kriyiq masinchiqkunampismi chay dyablutaqa binsichqallampana. Chaqa Dyuspa Uñan Jisumkristu wañuchpa, yawarninda ich'achpam, pallkunata uchangunamanda pirdunachqa. Chaymi pallkunaqa yach'achpa: Rinllampam wanchiwaqninchiq, nichpampis, Jisumkristumpaq yach'achimkurqanllampa. 12 Chaychina Tayta Dyus chay dyabluta syilumanda wichumkuchqana kamptinqam, kay syilumpi tiyaqkunaqa ancha kuchimkuchunllampa. Piru qamkuna chay allpampi, chay mar yamkumpi kawsaqkunaqa ancha llamkiyllampa. Chaqa chay dyabluqam chay ura allpaman wichumkuchqana. Kanan payqam yach'an: Dyusmi utqana rin karsilawaq infyirnumpi, amana masta munachqayta ruranaypaq, nichpa. Chaymi chay dyabluqa ancha piñamkuchpa, utqachpa, ancha rin padisichichuqllampa. 13 Chaychina chay manchaypaq qutur laya dyablu yach'achpa: Kay pachaman wichumkuwachqana, nichpaqam, chay qachyachqa warmita ancha maskarqan wanchinambaq. 14 Chaychina maskallkamptinmi, Tayta Dyusqa chay warmita qurqan suq atun kuchaqpa ichkay alangunata. Chaymi chay warmiqa chay alangunawan bwilachpa, chay dyablumanda mitimkachpa, suq chuncha lugarman rirqan. Chay lugarpiqam Tayta Dyus chay warmita kimsa wata y midyuta rin qaraq. [Nuta: Chay dyablullam atun quturchina kachpa, maynimbis manchaypaq kulibrachinampis karqan.] 15 Kanan chayta rimkachpam, chay manchaypaq kulibra qutur laya dyabluqa chiminmanda ancha achka yamkuta sitamkurqan, suq rriyuchina chay warmita ampamptin, ch'uqachpa wañunambaq. 16 Piru chaychina sitamkumptinmi, chay warmimpa imkimbi kaq allpa kich'amkarqan chay achka yamkuta chumpachpa chamkichinambaq. Chaychinam chay warmitaqa wacharqan. 17 Chayta rimkachpaqam, chay manchaypaq kulibra qutur laya dyabluqa ancha piñamkurqan. Chaymi rirqan chay warmimpa mirayningunawan pilyaq. Chaqa chay mirayningunaqam Tayta Dyus kamachimkuchqanda, Churin Jisumkristu yach'achimkuchqanda ancha allita kasuchpa kawsanllampa. 18 ?Kanan chay atun qutur layam ch'ayarqan mar yamkumpa manyambi. ?
1 Nuqa Jwanmi musquypichina chay mar yamkumpa manyambi chayachpa, suq laya manchaypaq animalta rimkarqani, chay yamkumpa umkunmanda lluqchimptin. Chay manchaypaq animal layampismi syiti umayuq dyis waqrayuq karqan. Chay waqrangunaqam kurunayuqkuna karqanllampa. Chay umangunampiqam mana baliq chutimkunata iskibrichqa karqan, Dyusta burlachpa. 2 Chay rimkachqay animalqam suq tigri laya karqan. Ch'amkingunaqam usumpa ch'amkingunachina karqan. Chiminqam liyumba chiminchina karqan. Chaychina chay animal mar yamkumanda lluqchimptinmi, chay atun qutur laya dyablu payta numbrarqan, ancha pudirniyuq awturidar kanambaq, trunumbi tiyachpa, rrimplasun kamachimkunambaq. 3 Chay tigri laya animalpa syiti umangunamanda suqninmi ancha chuqridu wañunambaqna karqan. Piru chay chuqriqam allinyachqana. Chaymi chay tigri laya animal kawsamuchqata rimkachpa, kay mundumpi yumbay tiyaqkuna ancha ispantachpa, paytana kasuchpa kawsarqanllampa. 4 Kanan chay kasuqkunaqam chay atun qutur layata ancha adurarqanllampa, chay tigri laya animalta numbrachqanrallku. Chay animaltampismi ancha adurachpa, kaychina nirqanllampa: Manam pimpis paychinaqa jwirsayuqchu. Manam pimpis paytaqa atinchu binsiyta, nichpa. 5 Kanan Tayta Dyusqam dijarqan, chay tigri laya animal ancha alabamkachpa, Dyusta ancha kuntrachpa rimanambaq. Dijarqambismi, 42 killamkunampaq yumbay runata, warmita kamachinambaq. 6 Chaychina dijamptinmi, chay tigri layaqa Tayta Dyusta ancha kuntrachpa, musyarqan. Chaychina musyachpaqam, Tayta Dyuspa chutinda, Dyuspa adurana wasinda, syilumpi yumbay tiyaqkunatampis ancha maldisyarqan. 7 Chaychina maldisyamptimbismi, Tayta Dyusqa dijarqan, kriyiq masinchiqkunata maqanambaq binsinangaman. Dijarqambismi yumbay kastamkunata, yumbay atun ayllumkunata, yumbay laya rimallkunampi rimaqkunata, yumbay nasyungunampi tiyaqkunata kamachinambaq. 8 Kanan kay mundumpi yaqqa yumbay tiyaqkunam chay tigri laya animalta rinllampa aduraq. Piru wamkin runamkuna, warmimkunaqam paytaqa mana rinllampachu aduraq. Chaqa Tayta Dyusqam manaraq kay pachata rurachpa, pallkunampa chutingunata Churimba librumbi iskibrichqa karqan, tumkuy tyimpu paywan kawsananllampa. Chay Churinllam Dyuspa Uñambis chutin. Paytaqam runamkuna wanchichqallampa karqan. 9 Chayri qamkuna yumbay rinriyuqkunaqa kay nichuchqayllampata allita uyawayllampa. 10 Chay karsilamkuq runamkunatam rinllampa karsilaq. Chay atun kuchilluwan wanchimkuqkunatam atun kuchilluwan rinllampa wanchiq. Chayri Dyuspi kriyiqkuna ancha padisichpampis, paypilla mana challkuq yuyamkuchpa kawsachunllampa. 11 Chaymandaqam musquypichina rimkarqay suq laya manchaypaq animalta umku allpamanda lluqchiqta. Chay animal layaqam ichkay tamkcha waqrayuq karqan. Chay waqrangunaqam suq tamkcha karnirumpa waqranchina karqan. Piru chay waqrayuq animalqam rimarqan suq atun qutur laya animalchina. 12 Chay allpamanda lluqchiq animalpismi ancha kamachimkuq karqan. Chaqa chay tigri layampa rrimplasun kachpam, kay mundumpi yumbay tiyaqkunata kamachirqan. Chaymi yumbayta adurachirqan chay allinyachqa chuqriyuq tigri layata. 13 Kanan chay suq animalmi manchaypaq milagrumkunata rurarqan. Runamkunampa ñawpambim ninata ichkichimurqan anaq altumanda kay allpaman. 14 Kanan Tayta Dyusqam dijarqan, chay milagrumkunata chay tigri laya animalpa ñawpambi rurachpa, kay mundumpi tiyaqkunata ingañanambaq. Chaychina ingañachpaqam kamachirqan, suq amitu layata rurananllampa chay tigri layampa rritratunwan, chaychina chay allinyachqa chuqriyuq animalta adurananllampa. 15 Chay amitu layata ruramptinllampaqam, Dyus dijarqan, chay animal ichkay tamkcha waqrayuqta, chay amitu layata kawsachichpa, rimachinambaq. Kanan chay amitu laya yumbay payta mana aduraqkunatam atirqan wanchichiyta. 16 Chaymandaqam chay animal ichkay tamkcha waqrayuqqa kamachirqan, yumbay runata warmita allin ladu mamkimbi ichu urkumbi siñalananllampa: kamachimkuqkunata, mana kamachimkuqkunata, qallayniyuqkunata, mana nimayuqkunata, randichqa kriyadumkunata, mana kriyadu kaqkunatampis. 17 Chay mana siñalniyuq kaqkunaqam mana atirqanllampachu ni randiyta ni randimkuyta. Chay siñalqam karqan chay tigri laya animalpa chutinwan ichu chutimba numirunwan. 18 Qamkuna kayta intyindinallkiqa yach'ayniyuqkuna kayllampa. Chay chutimba numirungunampi allita yuyachpam, atingillampa yach'ayta chay chutimba litrangunatampis. Chaqa chay animal layampa chay numirunqam suq runampa chutimbaq niwanchiqllampa. Chay numirunqam 666. [Nuta: Grigu rimaypim litramkuna balirqan numirumkunachina. Chaymi litramkunawan yumparqanllampa.]
1 Chaymandaqam nuqa Jwanqa musquypichina rimkarqay Dyuspa Uñanda Siyun lumampa sawambi chayallkaqta. Paywanmi pulla karqan 144.000 paypi kriyiqkuna. Pallkunampa urkungunampim chay Uñampa chutinda, Tayta Dyuspa chutinda iskibrichqallampa karqan. 2 Chaymandaqam kay pachampi kachpa, syilumpi ancha jwirtita kunyaqta uyarqay. Chay kunyaqqam achka rriyu kunyallkaqchina ichu ancha jwirti truwinuchina ichu ancha achka runamkuna arpangunata waqachillkaqchina ancha jwirtita kunyarqan. 3 Jisumkristumpi chay 144.000 kriyiqkunaqam chay ch'usku kamachimkuq kawsaqkunampa, chay 24 ansyanumkunampa ñawpambi chayachpa, suq muchuq imnuta kantarqanllampa. Chay kantachqandaqam mana pimpis atirqanchu kantayta. Chaqa kay mundumpi yumbay tiyaqkunamanda, chay 144.000 wachadumkunallam chay muchuq imnutaqa yach'arqanllampa kantayta. 4 Yumbay chay kantaqkunaqam warmimkunawanqa mana uchataqa rurachqallampachu karqan. Achwanmi Dyuspa Uñan mayman rimptimbis, payta siginllampa. Chaymi kay mundumpi tiyaqkunamanda pallkuna wachadu kachpa, puntata Dyuspa ñawpanman ch'ayarqanllampa. Chaymi pallkunaqa tarpumkuchqanchiqmanda punta ufrinda quchqanchiqchina karqanllampa Tayta Dyuspaq, Uñambaqpis. 5 Chaqa pallkunaqam mana yach'anllampachu llullamkunata rimaytaqa. Chaymi pallkunataqa mana ni pimpis atinchu chimbiyta Tayta Dyuspa ñawpambiqa. 6 Chaymandaqam nuqa Jwanqa musquypichina rimkarqay suq anjilta anaq syilumpa ch'awpimbi bwilallkaqta. Chay anjilqam listu karqan, Tayta Dyuspa mana nunka uchyamkaq nutisyanda yumbay nasyungunampi tiyaqkunata, yumbay kastamkunata, tumkuy laya rimaypi rimaqkunata, yumbay llaqtampi tiyaqkunata yach'achinambaq. 7 Chay anjilqam ancha jwirtita kaychina nirqan: Ch'ayamuchqanam uras Tayta Dyus yumbayta jusganambaq. Payqam syiluta, kay pachata, mar yamkuta, pumkyumkunata rurachqa. Chayri payta ancha rrispitachpa, alabayllampa, nichpa. 8 Chaychina chay anjil rimamptinmi, suq anjil chamuchpa ancha jwirtita kaychina nirqan: Chay ancha atun Babiluña llaqtaqam chingachqana, kay mundumpi yumbay tiyaqkunata inkitachqanrallku, uchamkunata ruranambaqllampa! Chaqa pallkunatam uchangunawan binuwanchina inkitarqan, mach'achqachina, paywan tumkuy laya uchata ruranambaqllampa. 9 Chaychina chay anjil rimamptinmi, suq tirsir anjil chamuchpa, ancha jwirtita nirqan: Tayta Dyusqam ancha rin piñamkuq chay tigri laya animalta aduraqkunawan, chay animalpa rritratunda aduraqkunawan, chay animalpa siñalninda urkumbi ichu mamkimbi ch'askiqkunawan. 10 Chaymi yumbay pallkunataqa ancha jwirtita rin kastigaq ninampi chay asufrimpi rumpachichpa anjilningunampa ñawpambi, chay Uñamba ñawpambimpis. 11 Chaychinam chay ninampi tumkuy tyimpu rinllampa padisiq. Qundaynimbismi mana nunka rinchu uchyamkaq. Chaqa chay animal layata, chay rritratunda aduraqkunaqam punchawnindin, tutampnindin mana samachpachu, rinllampa padisiq, chay animal layampa siñalninda ch'askichqanllamparallku. 12 Chayri challkunata yach'achpa, Dyuspa wambranguna kachpa, pay kamachimkuchqanda allita kasuchpa, Jisumkristumpi mana challkuq yuyamkuchpa, kawsayllampa, nichpa. 13 Chaymandaqam nuqa Jwanqa uyarqay suq rimaqta syilumanda kaychina niwamptin: Kay nichuchqallkunata iskibriy: Tayta Dyusmi ancha rin yanampaq Jisumkristumpi kriyichpa wañuqkunata. Chaymi kananmandampacha anchana rinllampa kuchimkuq, nichpa. Dyuspa Santu Ispiritumbismi niwarqan: Allibmi chay nichuchqanqa rin kaq. Chaqa Dyusta kasuchpa wañuqkunaqam yumbay chay ñamkachqanmandaqa rinna samaq. Kanan Tayta Dyusqam mana nunka rinchu qunqaq chay tumkuy ima rurachqandaqa. 14 Chaymandaqam suq yuraq pumkutaypa sawambi rimkarqay suq runachina tiyallkaqta. Paypa umambim urumanda kuruna karqan. Mamkimbiqam suq ancha allin ichuna karqan. 15 Chaymandaqam suq anjil Dyuspa adurana wasinmanda lluqchichpa, chay pumkutaypa sawambi tiyallkaqta ancha jwirtita kaychina nirqan: Ura pachampi tiyaqkunaqam listuna syiganallkimpaq. Chayri ichunallkiwan riyna pallkunata kuchuq, nichpa. 16 Chaychina chay anjil nimptinmi, chay pumkutaypa sawambi tiyaqqa chay atun ichunanwan kay pachampi tiyaqkunata syigarqan. 17 Chaymandaqam Dyuspa adurana wasin anaq syilumpi kaqmanda suq anjil lluqchirqan. Chay anjilpismi ancha allin ichunata ampamurqan. 18 Chaymandaqam chay pata altarmanda suq anjil chamurqan. Chay anjilqam ninata kwidaq karqan. Payqam chay ichunayuq anjilta ancha jwirtita nirqan: Qambisri chay allin ichunallkiwan ura pachampi tiyaqkunata syigay. Chaqa ubaspa puquyninchinam listuna kuchunallki. 19 Chaychina chay anjil nimptinmi, chay suq anjilpis atun ichunanwan kay pachampi tiyaqkunata ubaspa puquynindachina kuchurqan. Chaychina pallkunata kuchuchpaqam, wichurqan suq atun pusuman, chaypi ubaspa yamkundachina yawarninda qampinambaq. Chay kumparasyunmi munan niyta: Tayta Dyusmi chay uchayuqkunawan piñamkuchpa, ancha jwirtita rin kastigaq, nichpa. 20 Chay atun pusuqam chay llaqtampa sawambi karqan. Kanan chay uchayuqkunata chay pusumpi qampichpachina kastigamptinllampaqam, yawarninllampaqa 300 kilumitrusta kurrirqan. Chaqa bistyampa chiminmi altumkaman ch'ayarqan.
1 Nuqa Jwanmi chay musquypichina anaq syilumpi suq ancha manchaypaq siñata rimkarqay. Chaqa syiti anjilkuna syilumpi kaqkunam yumbay uchayuqkunata syiti disgrasyamkunawan listu karqanllampa kastiganambaq. Chaychina kastigachpaqam, Tayta Dyusqa manana mastaqa rinchu piñamkuq chay uchayuqkunawanqa. 2 Chaymandaqam suq pambampi rimkarqay suq yamkuyuq ispijutachina ninawan taqlluduta llimpyallkaqtachina. Chay llimpyallkaq pambampa manyambiqam achka runamkuna, warmimkuna chayallkarqanllampa. Tayta Dyusmi pallkunata arpamkunata quchqa karqan. Chaqa pallkunaqam mana adurachqallampachu karqan chay tigri laya animalta ni chay animalpa rritratunda. Manam ni ch'askichqallampachu karqan chay animalpa siñalninda ni numirunda. 3 Chay arpayuqkunaqam Dyusta sirbiq Muysispa imnunda, Dyuspa Uñamba imnunda kantachpa, kaychina alabarqanllampa: ¡Ancha pudirniyuq Taytitu Dyus, tumkuy ima rurachqallkim ancha manchaypaq, ancha chumaqkuna! Qamqam ancha allin kachpa, allimp kaqtalla rimangi. Kanan yumbay nasyumbi tiyaqkunampa ancha allin kamachimkuqninmi kangi. 4 Chaymi yumbay runamkuna, warmimkuna ancha rrispitachuchpa, rinllampa alabachuq. Chaqa qamllam ancha allin mana nima uchayuqchu kangi. Chaymi ancha allita rurachqallkita rimkachpa, yumbay nasyumbi tiyaqkuna chamuchpa, rinllampa adurachuq, nichpa. 5 Chaymandaqam rimkarqay anaq syilumpi Tayta Dyuspa karpamanda adurana wasimba Ancha Santisimu Kwartun kich'amkachqata. 6 Chay kwartumandaqam chay syiti kastigamkuq anjilkuna lluqchirqanllampa. Pallkunaqam ancha llimpyallkaq yuraq mudanayuq karqanllampa. Kanan pichunllampampiqam urumanda kaq wach'umkuta ruramkuchqallampa karqan. 7 Chaymandaqam chay ch'usku kamachimkuq kawsaqkunamanda suqnin chay syiti anjilkunata suqta suqta qurqan urumanda kaq kumpamkunata. Chaqa Tayta Dyus tumkuy tyimpu kawsaqmi uchayuqkunawan piñamkuchpa, chay kumpamkunata syiti ancha jwirti kastigumkunawan undachichqa karqan. 8 Chaymandaqam Tayta Dyus ancha llimpyamptin, ancha pudirniyuq kamptin, chay adurana wasin qundaywan undarqan. Chaymi mana pimpis atirqanchu yallkuyta chay Ancha Santisimu Kwartumanqa, chay syiti anjilkuna chay syiti kastigumkunata uchyanangaman.
1 Chaymandaqam chay musquypichina suq rimaqta uyarqay, Dyuspa adurana wasinmanda chay syiti kastigamkuq anjilkunata jwirtita nimptin: Riyllampa, chay kumpamkunampi kaqta ura pachaman ich'aq. Chaqa challkunawanmi Tayta Dyus chay uchayuqkunata ancha rin kastigaq, nichpa. 2 Chaychina nimptinmi, chay syiti anjilkunamanda punta anjilqa kumpanmanda Tayta Dyuspa kastigunda ich'arqan kay pachaman. Chaychina ich'amptinmi, chay tigri laya animalpa siñalninda ch'askiqkunampa kwirpumbi chuqrimkuna rimkamkurqan. Chaqa pallkunaqam chay animal layampa rritratunda adurachqallampa karqan. Chaymi ancha padisirqanllampa. 3 Chaymandaqam chay syiti anjilkunamanda sigundu anjil kumpanmanda suq kastiguta ich'arqan mar yamkumpa sawanman. Chaychina ich'amptinmi, chay mar yamkuqa wañuchqampa yawarninchina timkramkarqan. Chaymi yumbay animal chay yamkumpi kawsaqkunaqa limpu wañurqanllampa. 4 Chaymandaqam chay syiti anjilkunamanda tirsir anjilqa kumpanmanda suq kastiguta ich'arqan rriyumkunaman, pumkyumkunaman. Chaychina ich'amptinmi, yumbay michki yamkumkuna yawar layampaq timkramkarqan. 5 Chaychina kastigamptinmi, uyarqay suq anjil yamkumkunata kwidaqta kaychina Tayta Dyusta nimptin: Tayta Dyusitu, qamllam ancha allin, mana nima uchayuqchu kangi. Manam nunka nasichpachu, tumkuy tyimpumpaq kawsangi. Chay uchayuqkunata kastigachpam, ancha allin justisyata rurachqa kangi. 6 Chaqa chay uchayuqkunaqam qamba wambrallkimkunampa yawarninda ich'achpa, qambaq rimaqkunampa yawarninda ich'achpa, wanchirqanllampa. Chaymi kananqa chay wanchimkuqkunata chay yamku yawarpaq timkrachqallkita umpyachichqa kangi. Chaychina kastigachpaqam, ancha allin justisyata rurachqa kangi, nichpa. 7 Chaychina chay anjil nimptinmi, uyarqay chay pata altarmanda suq rimaq kaychina niqta: Ariri, ancha pudirniyuq Taytitu Dyusitu! Chay ancha uchayuqkunata chaychina kastigachpaqam, ancha allin justisyata rurachqa kangi, nichpa. 8 Chaymandaqam chay syiti anjilkunamanda kwartu anjilqa kumpanmanda suq kastiguta ich'arqan rumpaypa sawanman. Chaychina ich'amptinmi, rumpayqa ancha jwirtita rumpayachpa, chay uchayuqkunata ancha rumpachirqan. 9 Chaychina ancha rumpachimptimbismi, pallkunaqa mana munarqanllampachu uchangunata dijayta. Tayta Dyustaqam mana nimatampis munarqanllampachu alabayta. Achwanmi chay disgrasyamkunawan kastigachqanrallku, Dyusta masta maldisyarqanllampa. 10 Chaymandaqam chay syiti anjilkunamanda kintu anjilqa kumpanmanda kastiguta ich'arqan chay tigri laya animal tiyallkachqanman. Chaychina ich'amptinmi, chay animalta aduraqkunampa nasyunningunampi limpu tutayarqan. Chaymi chay animalta aduraqkunaqa chay nanallkunawan ancha padisichpa, qallungunata kanirqanllampa. 11 Chaychina ancha padisichpampismi, uchangunata mana nimatampis dijarqanllampachu. Achwanmi mana allimkunata rurachpa, Tayta Dyusta ancha maldisyarqanllampa, chay nanallkunawan, puqrumkunawambis kastigachqanrallku. 12 Chaymandaqam chay syiti anjilkunamanda sistu anjilqa kumpanmanda kastiguta ich'arqan chay ancha atun rriyu Iwfratispa sawanman. Chaychina ich'amptinmi, chay atun rriyuqa limpu chamkirqan, chay achka gubyirnumkuna suldadungunawan rumpay lluqchimunan ladumanda chamuchpa, chay rriyuta das pasananllampa. 13 Chaymandaqam rimkarqay chay atun chumpimka qutur layampa chiminmanda suq sampu laya dyablu lluqchimptin. Chay tigri laya animalpa chiminmandampismi suq sampu laya dyablu lluqchirqan. Chay ichkay waqrayuq animalpa chiminmandampismi suq sampu laya dyablu lluqchirqan. Chay waqrayuq animalmi Dyuspaq rimaq tumkuqpis karqan. 14 Chay kimsa sampu laya dyablumkunaqam manchaypaq milagrumkunata rurarqanllampa. Kanan rirqanllampam yumbay nasyungunaman, gubyirnungunata tumkuy suldadundinda tandaq, jwisyu diyampi Tayta Dyus ancha pudirniyuqwan pilyananllampa. 15 Chaychina rimkachpaqam, uyarqay Jisumkristuta, kaychina niqta: Allita uyawayllampa. Mana pimpis yuyachqan uraspim suq ladrunchina qunqaylla rini chamuriq. Chaymi kwidamkachpa, allita rurachpa chuyawachpaqa, ringillampa kuchimkuq. Piru chay mana kasuwaqkunaqam mana mudanayuqchina rinllampa panqamkuq. Chaqa yumbaypa ñawpambim simprallachina kachpa, ancha rinllampa panqamkuq, nichpa. 16 Chaymandaqam chay kimsa dyablumkuna kay pachampa yumbay gubyirnungunata tumkuy suldadundinda suq lugarpi tandarqanllampa. Chay lugarqam ibriyu rimaypi Armajidun chutin. 17 Chaymandaqam chay syiti anjilkunamanda chay ultimu anjilqa anaq altumandampacha kumpanmanda ultimu kastiguta wayraman ich'arqan. Chaychina ich'amptinmi, uyarqay suq rimaqta Dyuspa adurana wasimba trununmanda ancha jwirtita kaychina nimptin: Kaywanmi yumbay kastigumkunata rinina uchyaq, nichpa. 18 Chaychina nimptinmi, ancha achka rrilampagumkuna llimpyarqan. Lanyamkunampismi ancha kunyarqan. Kanan kay pachampismi ancha kuyurqan. Runamkuna kay pachampi kachqanmandampacham mana nunka chaychinaqa kuyuchqachu karqan. 19 Chaychina kay pacha ancha jwirtita kuyumptinqam, chay atun llaqta Babiluña kimsa lugarpaq partimkachpa, ancha dañamkarqan. Kay pachampa yumbay atun llaqtangunampi wasimkunam bulamkarqanllampa. Chaqa Tayta Dyusqam chay Babiluña llaqtampi tiyaqkunampa uchangunataqa mana qunqarqanchu. Chaymi ancha piñamkuchpa, pallkunataqa ancha kastigarqan. 20 Chaychina kay pacha ancha kuyumptinmi, mar yamkumpa ch'awpimbi isla allpamkuna kaq limpu chingarqan. Qaqamkunampismi bulamkachpa, limpu chingarqanllampa. 21 Kanan syilumandam runamkunampa, warmimkunampa sawanman ancha atun manchaypaq granisumkuna ichkimurqan. Chay granisumkunaqam asta 40 kilus llacharqan. Chaychina Tayta Dyus ancha jwirtita kastigachqanrallkum, chay uchayuqkunaqa payta ancha maldisyarqanllampa.
1 Chay syiti anjilkunaqa kumpangunamanda kastigumkunata ich'achpa uchyachpaqam, suqnin chamuchpa, nuqa Jwanda kaychina niwarqan: Chamuy kayman rimkachichunaqpaq suq ancha bandulira warmita. Chay warmiqam munan niyta suq atun llaqtampaq. Chay llaqtaqam achka rriyumkunampa manyangunampi kidan. Piru Tayta Dyusqam chay llaqtampi tiyaqkunata ancha rin kastigaq. 2 Chaqa chay llaqtampi tiyaqkunaqam suq bandulira warmichina inkitachpa, animachichqallampa kay mundumpa gubyirnungunata, pallkunawan tumkuy laya uchamkunata rurananllampa mach'achqa runamkunachina, nichpa. 3 Chaymandaqam Dyuspa Santu Ispiritun masta rimkachiwarqan. Chaymi chay musquypichina chay anjil suq chuncha lugarman ampawamptin, rimkarqay suq warmita suq chumpimka animal layampi muntamkuchqata. Chay animal layaqam syiti umayuq, dyis waqrayuq karqan. Kanan tumkuy kwirpumbim Tayta Dyusta musyanan chutimkuna iskibridu karqan. 4 Chay bandulira warmim mudamkuchqa karqan suq mudana muraduwan chumpimkata. Allichamkachqam karqambis uruwan, ch'aniyuq llimpyallkaq rumimkunawan, ch'aniyuq parlaskunawan. Mamkimbiqam karqan suq kumpa urumanda kaq. Chay kumpandaqam millanaypaq kusaskunawan undachichqa karqan. Chay millanaypaq kusaskunaqam munan niyta, chay warmim achka runayuq kachqa. Ancha fiyu uchamkunatam rurachqa, nichpa. 5 Chay warmimpa urkumbiqam suq chuti mana intyindiypaq karqan. Chay chutinqam kaychina munan niyta: Nuqaqam chay ancha kamachimkuq Babiluña llaqta kani. Chaqa yumbay banduliramkunampa, yumbay ucha ruraqkunampa mamanchinam kani, nichpa. 6 Chaymandaqam nuqaqa allita rimkachpa yach'arqay: Chay warmiqam Dyuspi kriyiqkunata ch'iqnichpa wanchichqa karqan, pallkuna Jisumkristumpaq yach'achimkuchqanrallku, nichpa. Chaqa chaychina yawarninda ich'achpa wanchichpaqam, ancha kuchimkurqan suq mach'achqa warmichina. Chaymi nuqaqa ancha ispantachqata kidarqay. 7 Chaymi chay anjilqa tampuwarqan: Imarallkutaq ancha ispantachqa kangi? Nuqam rini nichuq, pim chay warmiqa, imam munan niyta chay warmita ampaq syiti umayuq dyis waqrayuq animalqa, nichpa. 8 Chay tigri laya animalqam unay tyimpumpi kawsarqan. Piru chaymandaqam manana kawsarqanchu. Piru suq diya kawsamuchpa, manaraq tumkuy tyimpumpaq chingachpa chay manchaypaq talalanmanda suq tyimpumpaq rin lluqchimuq. Chaymi Dyuspi mana kriyiqkunaqa chay animalta rimkachpa, ancha ispantachpa, payta rinllampa aduraq. Chaqa Dyuspa librumbiqam pallkunampa chutingunaqa mana iskibriduchu karqan kay munduta rurachqan diyamandampacha. 9 Allita yuyayllampa, kallkunatampis intyindinallkimpaq. Chay manchaypaq animalpa syiti umangunaqam munan niyta chay atun llaqtampa syiti lumanguna. Chaqa chay bandulira warmichina llaqtaqam chay syiti lumamkunampi kidan. 10 Kanan chay kimkin syiti umangunallam munan niyta syiti gubyirnumkunampis. Chay syiti gubyirnumandaqam sinkuqa suqnin suqnin kamachimkuchpa, wañuchqana. Kananqam kamachimkullkan yaqqa chay ultimu gubyirnuna. Chaymandaqam chay ultimu gubyirnuqa suq tyimpitumpaqllana rin kamachimkuqqa. 11 Chaymandaqam chay warmita ampaq chumpimka animalqa kawsamuchpa, suq umktabu gubyirnu rin kaq. Piru payqam manaraq chay punta bwilta wañuchpaqa, chay syiti gubyirnumkunamanda suqnin karqan. Chaychina chay chumpimka animal laya ultimu gubyirnu kamachimkullkachpam rin chingaq. 12 Chay chumpimka animalpa dyis waqranguna rimkachqallkiqam munan niyta dyis gubyirnumkuna. Pallkunaqam manaraq kamachimkunllampachu. Piru suq diyam chay dyis gubyirnumkunaqa chay chumpimka animal layawan pulla suq tyimpitumpaqlla rinllampa kamachimkuq. 13 Chay dyis gubyirnumkunaqam suq yuyayniyuqlla kachpa, tumkuy imampi chay chumpimka animal layata kasuchpa, 14 Dyuspa Uñanwan rinllampa pilyaq. Piru chay Uñaqam yumbay kamachimkuqkunampa kamachimkuqnin, yumbay gubyirnumkunampa gubyirnun. Chaymi payqa chay chumpimka animal layata, chay dyis gubyirnumkunata rin binsiq. Kanan chay Uñawan kaqkunataqam Tayta Dyus kimkin amkrachpa qayarqan. Chaymi mana challkuq chay Uñata kasunllampa. 15 Chay anjilqam niwarqambis: Chay bandulira warmi laya llaqtataqam rimkarqallki achka rriyumkunampa manyangunampi kaqta, ¿manachu? Chay achka rriyumkunaqam munan niyta ancha achka llaqtamkuna, achka kastamkuna, achka nasyumbi tiyaqkuna, kadunu rimaynimbi rimaqkuna. 16 Chay chumpimka animal laya chay dyis gubyirnumkunawan chay bandulira warmi laya llaqtata rinllampa ch'iqniq. Chaymi chay llaqtampi tiyaqkunata maqachpa, wanchichpa, tumkuy imangunata quch'ichpa, wasingunata rumpachichpa, aychanda mimkuchpa, tullundallana rinllampa dijaq. 17 Chaqa Tayta Dyusmi pay munachqanda chay dyis gubyirnumkunata rin yuyachiq. Chaymi pallkunaqa suq yuyayniyuqlla kachpa, chay chumpimka animal layatalla kasuchpa, tumkuy imampi rinllampa yanampaq. Chaychinam rinllampa ruraq Tayta Dyus nichqanda kumplinangaman. 18 Kanan chay rimkachqallki bandulira warmiqam munan niyta chay atun llaqta. Chaqa chay llaqtampa gubyirnunmi kay mundumpa yumbay gubyirnungunata kamachin, nichpa.
1 Tumkuy challkunata uyachpaqam, nuqa Jwan suq ancha pudirniyuq anjilta rimkarqani syilumanda chamullkaqta. Payqam ancha llimpyachpa, yumbay kay pachata ancha achimkcharqan. 2 Kanan payqam ancha jwirtita kaychina nirqan: Chay atun llaqta Babiluñaqam chingachqana! ¡Rimkay, bulamkachqanñm! Kanan chay llaqtampiqam tumkuy laya dyablumkuna yallkuchpa tiyallkan. Achka ch'iqnichqa millanaypaq pichqumkunampismi chaypi tiyallkanllampa. 3 Chaqa chay Babiluñampi tiyaqkunaqam kwirpunguna munachqandalla rurachpa kawsarqanllampa. Chaymi limpuna chingachqa. Chaqa pallkunaqam yumbay nasyumbi tiyaqkunata inkitarqanllampa, uchamkunata rurananllampa. Suq bandulira warmichinam chay nasyungunampa yumbay gubyirnunda inkitarqanllampa, mach'achqa runamkunachina tumkuy laya uchata ruranambaqllampa. Kay mundumpi randimkuqkunampismi chay Babiluñampi tiyaqkunata tumkuy ima munachqangunata randichichpa, achka qallayta ganaqllampa. 4 Chaymandaqam uyarqani suq rimaqta, syilumanda kaychina nimptin: Qamkuna wambrallkunaqa, chay Babiluña llaqtamanda lluqchiyllampa, ama uchata ruranallkillampa pallkunachina. Chaqa manam munanichu qamkunatampis kastigachuytaqa. 5 Chaqa chay llaqtampi tiyaqkuna ancha uchata ruramptinllampam, chay uchangunaqa ancha achkayachpa syilumkamanna ch'ayachqachina. Chaymi Tayta Dyusqa manana masta agwantachpachu, pallkunataqa ancha rin kastigaq. 6 Chay llaqtampi tiyaqkunaqam suqkunata ancha padisichichqa. Chayri chay padisichichqan kaqmandaqa achwan ichkay tantu masta pallkunataqa kastigayllampa. 7 Chaqa chay Babiluñampi tiyaqkunaqam tumkuy ima munachqanda rurachpa, randichpa, ancha alabamkachpa, kaychina ninllampa: Kaypim ancha kamachimkuq gubyirnuchina tiyallkanillampa. Chaqa manam nimampimpis suq pubri biyudachinaqa kanillampachu. Chaymi mana nunka rinillampachu llamkiq suq biyudachinaqa, nichpa. Chayri chaychina ancha alabamkamptinllampa, ancha llamkichichpa, padisichiyllampa chay Babiluñampi tiyaqkunataqa. 8 Chaqa Tayta Dyusllam ancha pudirniyuq gubyirnuqa. Chaymi chay Babiluñampi yumbay tiyaqkunata qunqaylla suq diyampilla rin kastigaq plagamkunawan, qachyallkunawan, ambrunamkunawan, wañullkunawan. Chaymandaqam chay atun llaqtata rumpachichpa, limpu rin chingachiq. 9 Chaychina chay rimaq nimptinmi, chay Babiluña llaqtaqa ancha rumpachpa rin qundaq. Chaymi kay mundumpa achka nasyunningunampa gubyirnunguna chayta rimkachpa, ancha llamkichpa, kunyalla rinllampa waqaq. Chaqa chay gubyirnumkunaqam chay llaqtampi tiyaqkunawan ancha uchata rurachpa, bwina bidata pasachqallampa karqan. 10 Chaymi chay Babiluña rumpachpa, qundamptinqa, chay gubyirnumkunaqa chay kastiguta ancha manchachpa, karumpilla chayachpa, rinllampa niq: Ay! ¡Amkamkñw! Chay kamachimkuq babiluñanumkunam ancha padisillkanllampa. Chaqa suq rratumpillam qunqaylla kastigunqa ch'ayamuchqa, nichpa. 11 Kay mundumpi randimkuqkunampismi chayta rimkachpaqa, ancha llamkichpa rinllampa waqaq, manana ni pimpis kamptin chay achka kusasningunata randinanllampa. 12 Chaqa chay atun llaqtampi tiyaqkunaqam randichqallampa karqan uruta, qallayta, ch'aniyuq llimpyallkaq rumimkunata, parlas rumimkunata, allin linu tramputa, sida tramputa, chumpimka trampumkunata, muradu trampumkunata, michki mutkina qarumkunata. Randiqllampampismi ilifantimpa atun kirungunamanda tumkuy ima rurachqangunata, ch'aniyuq qarumkunamanda, brunsimanda, jirrumanda, chay chumaq marmul rumimanda rurachqangunatampis. 13 Randiqllampampismi kanilata, mimkuna michkichaqkunata, insinsyuta, mirrata, ancha michki mutkina asiytimkunata, binuta, asiytita, triguta, trigumanda mas allin ñutu mach'kata, wamkamkunata, wichamkunata, bistyamkunata, chutana karrumkunata. Runamkunata, warmimkunatampismi randiqllampa, pallkunampaq trabajananllampa. 14 Kanan chay randimkuqkunaqam chay rumpallkaq llaqtampaqqa rinllampa niq: Chay llaqtampiqam manana kanchu chay ancha ch'aniyuq kusaskunaqa. Chaqa tumkuy chay llimpyallkaq kusasningunaqam tumkuy tyimpumpaqna chingachqa, nichpa. 15 Chay randimkuqkunaqam chay atun llaqtampi tiyaqkunata randichichpaqa, ancha achka qallayta ganachqallampa karqan. Chaymi rimkachpa chay llaqta rumpallkamptinqa, manchachpa, karumpilla kidachpa, ancha llamkichpa, waqachpa 16 kaychina rinllampa niq: Ay! ¡Amkamkñw! Chay atun llaqtaqam rumpallkanna. Waqpi tiyaqkunaqam ch'aniyuq linu trampumanda mudanayuqkuna karqanllampa. Chay ch'aniyuq chumpimka ichu muradu mudanangunatam ruramkurqanllampa. Pallkunaqam allichamkarqan uruwan, ch'aniyuq llimpyallkaq rumimkunawan, parlas rumimkunawan. 17 ¡Piru kananqam tumkuy chay ch'aniyuq kusasningunaqa suq urampilla uchyamkarqan! nichpa. Chaychina rumpamptinmi, yamkumpi puriq barkumkunampa yumbay kamachimkuqnin, tumkuy yanampamkuqninwan, chay pasajirungunawan, barkumkunampi yumbay trabajaqkunampis chay rumpallkaq llaqtata rimkachpa, karumpillana kidarqanllampa. 18 Chaymandaqam chay atun llaqta rumpachpa qundamptinqa, rimkachpa, qayach'amkuchpa, kaychina nirqanllampa: Manam ni suq llaqta chay ancha baliq ancha atun llaqtachinaqa kachqachu. 19 Chaychina nichpa, ancha llamkichpam, umanllampaman allpata rurarqanllampa. Chaymandaqam ancha waqachpa, qayach'amkuchpa, ancha jwirtita nirqanllampa: Ay! ¡Amkamkñw! Chay ancha baliq atun llaqtaqam rumpachqana. Nuqallkuna yamkumpi puriq barkuyuqkunam tumkuy laya kusaskunata chay llaqtampiqa randimkuchpa, ancha qallayniyuqkuna kidarqayllampa. ¡Piru kananqam chay atun llaqtaqa suq urampilla tumkuy imandin chingachqana! nichpa. 20 Piru qamkuna syilumpi tiyaqkunaqa ancha kuchimkuyllampa chay llaqta rumpachqanrallku. Qamkuna ampustulkuna, Dyuspaq rimaqkuna, Dyuspa yumbay wambranguna kuchimkuyllampa. Chaqa Tayta Dyusqam allin justisyata rurachpa, pallkunataqa kastigachqana, qamkunata ancha qasachachuchqanrallku. 21 Chaymandaqam suq ancha pudirniyuq anjilqa suq mulinu laya atun rumita piskachpa, chay mar yamkuman wichumkuchpa, kaychina nirqan: Chay atun wichumkuchqay rumitachinam Tayta Dyusqa chay atun Babiluña llaqtata das rin chingachiq. Chaychina chingachimptinmi, manana ni pimpis nunka rimkanqanachu. 22 Mananam ni pimpis chay llaqtampa kallingunampiqa ni arpamkunata ni flawtamkunata ni kurnitamkunata waqachinqachu. Kanan mananam nima laya trabajaqkuna kanqanachu. Manana ni pimpis uyanqanachu kutamkuchpa kunyachimptinllampa rumitaqa. 23 Chay llaqtamanda randimkuqkunam yumbay randimkuqkunamanda mas kamachimkuq, mas qallayniyuqkuna karqanllampa. Kay mundumpi yumbay tiyaqkunatam brujiyachpa, ingañarqanllampa. Chaymi chay llaqtampiqam manana ni suq micha achimkchamkunqachu ni suq kasamyintu kanqachu. Mananam nunka rinllampachu uyaq kasamyintumpi kuchimkuqkunataqa. 24 Chaqa chay Babiluñampi tiyaqkunaqam Dyuspaq achka rimaqkunata, paypi suq kriyiqkunatampis wanchirqanllampa. Chaychinam kay mundumpi tumkuy maypi suqkunatampis wanchirqanllampa. (Chaymi Tayta Dyusqa chay llaqtampi tiyaqkunata qunqaylla rin chingachiq.)
1 Chaymandaqam nuqa Jwan uyarqay ancha achka rimaqkunata syilumpi jwirtita Tayta Dyusta kaychina alabamptinllampa: ¡Biba Tayta Dyusninchiq! Payqam allimp kaqta yach'achpa, chay Babiluña llaqtampi tiyaqkunata ancha allita jusgachpa, kastigachqa. Chaqa pallkunaqam bandulira warmichina ancha achka runamkunata, warmimkunata animachichqallampa, uchamkunata rurachpa, kawsananllampa. Tayta Dyusta kasuqkunatampismi wanchichqallampa. Chayrallkum Tayta Dyus chay wanchimkuqkunataqa ancha kastigachqa. ¡Chayri payta ancha alabachunllampa! Chaqa paymi yumbay uchanchiqmanda wachawachqa kanchiq. ¡Paymi ancha llimpyaq, ancha kamachimkuq pudirniyuq kachpa, tumkuy imata atin rurayta! nichpa. 3 Chaymandaqam muchuqmanda nirirqanllampa: Tayta Dyusta alabachunllampa! Chaqa chay llaqtata rumpachimptinqam, tumkuy tyimpu rin miraq. Qundayninqam mana nunka rinchu uchyamkaq, nichpa. 4 Chaychina alabamptinllampam, chay 24 ansyanumkuna chay ch'usku kamachimkuq kawsaqkunawan qunqurimkuchpa, urkunda pambamkaman ch'ayachirqanllampa. Kanan Tayta Dyus trunumbi tiyallkaqtam adurachpa, kaychina alabarqanllampa: Biba! ¡Tayta Dyusta alabachunllampa! ¡Chaychina kanqa! nichpa. 5 Chaychina alabamptinllampam, Dyuspa trununmanda suq rimaqta uyarqay, kaychina nimptin: ¡Ariri! ¡Tayta Dyusta yumbay kasuqkunaqa paytalla alabachunllampa! Kamachimkuqkuna kachpa, mana kamachimkuqkuna kachpampis, payta ancha rrispitachpa, alabachunllampa, nichpa. 6 Chaymandaqam musquypichina uyarqay ancha achka rimaqtachina. Pallkunaqam achka paqchamkunachina ichu ancha jwirti lanyamkunachina kunyachpa nirqanllampa: ¡Biba Tayta Dyus! Payqam ancha pudirniyuq Siñurninchiq kachpa, tumkuy ima kaqta kamachillkanna. 7 Chayri ancha kuchimkuchpa, payta alabachunllampa. Chaqa Dyuspa Uñamba kasaranan diyam ch'ayamuchqana. Paypa nubyanmi ancha chumaqta mudamkuchqana chay kasamyintu diyambaq. 8 Chaqa Tayta Dyusqam chay nubyata pirmisuta qurqan, ancha finu linu trampumanda limpyu llimpyallkaq yuraq mudanata ruramkunambaq. Chay ancha chumaq mudananqam munan niyta: Jisumkristumpi kriyiqkunam ancha chumaqta kawsachqallampa, nichpa. 9 Chaymandaqam chay anjilqa niwarqan: Kallkunata iskibriy: Chay Uñampa kasamyintu fyistanman kumbidachqamkunaqam ancha kuchimkunqallampa, nichpa. Chaymandaqam kaychinampis niwarqan: Kimkin Tayta Dyusmi chay nichuchqayta allimpta willachungi. 10 Chaychina chay anjil niwamptinmi, nuqaqa paypa ñawpambi qunqurimkurqay aduranaypaq. Piru payqam niwarqan: Amar adurawaychu. Chaqa nuqampismi qamchina Dyusta kasuni. Manchu qamqa Dyusta kasuq masimkimkunawan mana challkuq rurangillampa Jisumkristu nichuchqanda. Chaychinallam nuqampis kasuni. Chayri Dyustalla aduray, nichpa. Chaqa Jisumkristu yach'achimkuchqanmi ancha animachiwanchiq, paypaq rimaqkunachina Dyus nichqanda yach'achimkunanchiq. 11 Chaymandaqam rimkarqaypis anaq syiluta kich'amkachqata. Kanan waqpim rimkarqani suq yuraq bistyampi muntamkuchpa chamullkaqta. Payqam chutiq Ancha Kumplidur. Chutiqpismi Allimpta Rimaq. Chaqa payqam ancha justu kachpa, Dyusta kuntraqkunata allita jusgachpa, pallkunawan pilyan. 12 Kanan paypa ñawingunaqam nina mirallkaqchina llimpyarqan. Umambiqam achka kurunamkuna karqan. Chutinmi pay kimkimbi iskibridu karqan. Piru manam pimpis yach'arqanchu: Imam munan niyta chay chutinqa, nichpa. Payllam yach'arqanqa. 13 Kanan mudananqam ancha yawar limkidu karqan, (nuqanchiqkunampaq wañuchqanrallku). Paymi chutirqan: Tayta Dyuspa Rimaynin. 14 Chay Rimaynimba imkindam Dyuspa ancha achka suldadunguna yuraq bistyamkunampi rirqanllampa. Pallkunaqam ancha finu limpyu yuraq linumanda mudanayuqkuna karqanllampa. 15 Chay kamachimkuqpa chiminmandam lluqchirqan suq ancha filudu atun kuchillu, chaywan yumbay nasyungunampi tiyaqkunata chuqrichpa kastiganambaq. Kanan yumbaymanda mas pudirniyuq kachpam, chay nasyungunampi kamachichpa, ancha rin rrispitachiq suq bara jirrumandachina kaqwan. Piñamkuchpa, Tayta Dyusta ch'iqniqkunatam rin sarruq chay ubaspa puquyninda ch'amkinwan sarruchpa qampiqchina. 16 Kanan chay kamachimkuqpa sawa mudanambi ch'angambimpismi kay chutinqa iskibridu karqan: Yumbay gubyirnumkunampa gubyirnunmi. Yumbay kamachimkuqkunampa kamachimkuqninmi, nichpa. 17 Chaymandaqam rimkarqay suq anjil rumpaypa sawambi chayallkaqta. Chay anjilqam anaqpi bwilaq pichqumkunata ancha jwirtita qayarqan: Chamuyllampa suq fyistampichina ancha achka aychata mimkunallkillampa. (Chaqa Tayta Dyusmi yumbay payta kuntraqkunata rinna wanchiq.) 18 Chayri chamuyllampa achka laya runamkunampa aychanda mimkunallkillampa: gubyirnumkunampa, kamachimkuq suldadumkunampa, jwirsayuq pilyaqkunampa, bistyamkunampa, chay bistyamkunata purichiqkunampa aychanda mimkunallkillampa. Chamuyllampar randichqa kriyadumkunampa, mana kriyadu kaqkunampa, kamachimkuqkunampa, mana kamachimkuqkunampa aychanda mimkunallkillampa, nichpa. 19 Chaymandaqam rimkarqay chay manchaypaq tigri laya animal kay mundumpa gubyirnungunata tumkuy suldadundinda tandamptin. Pallkunaqam rirqan pilyaq chay yuraq bistyampi muntamkuchqawan, suldadungunawan. 20 Piru pilyachpaqam, chay yuraq bistyampi muntamkuchqa binsichpa, prisurqan chay manchaypaq tigri layata, Dyuspaq chay rimaq tumkuqtampis. Chaqa chay rimaq tumkuqqam chay tigri layampa ñawpambi milagrumkunata rurachpa, achka runata, warmita ingañachqa karqan, chay tigri layampa siñalninda ch'askinanllampa, rritratunda adurananllampa. Chaymi chay yuraq bistyampi muntamkuchqaqa chay tigri layata, Dyuspaq chay rimaq tumkuqnindinda prisuchpa, kawsallkaqtalla wichumkurqan asufriwan lumyallkaq ninaman. 21 Chaymandaqam chay yuraq bistyampi muntamkuchqaqa chiminmanda chay lluqchiq atun kuchillunwan yumbay chay gubyirnumkunata tumkuy suldadundinda wanchirqan. Chaypinam tumkuy chay aycha mimkuq pichqumkunaqa pallkunampa aychanda mimkuchpa undarqanllampa.
1 Chaymandaqam chay musquypichina suq anjilta rimkarqay, syilumanda chamullkaqta. Payqam atun talalamba llabinda, ancha atun kadinata piskamkuchpa chamurqan. 2 Chaymandaqam chay anjilqa chay atun manchaypaq qutur layata piskarqan. Chay qutur layallam chay unay uchata rurachimkuq kulibrampis karqan. Payllam dyablu, Satanaspis chutin. Kanan chay anjilqam chay dyabluta piskachpa, mil watamkunampaq chay atun kadinawan watarqan. 3 Chaychina watachpaqam, chay manchaypaq talalanman wichumkurqan. Chaychina wichumkuchpaqam, chay talalanda llabichpa, suq atun silluwan sillarqan, chay dyablu ama lluqchinambaq. Chaymi chay dyabluqa mil watamkunata mana atinqachu ingañayta kay pachampi tiyaqkunataqa. Piru chay mil watamkuna pasamptinqam, chay dyabluqa chay manchaypaq talalanmanda lluqchichpa, rin ingañariq runamkunata, warmimkunata suq tyimpitumpaq. 4 Chaymandaqam rimkarqay trunumkunata. Chay trunumkunampiqam kamachimkuqkuna tiyallkarqanllampa. Chaqa Tayta Dyusmi pallkunataqa numbrachqa karqan, suqkunata jusgananllampa. Rimkarqanimpis achka wañuchqamkunampa almangunata. Pallkunaqam manaraq wañuchpaqa, Tayta Dyus nichqanda, Churin Jisumkristumpa chumaq nutisyanda allita yach'achimkurqanllampa. Chaqa pallkunaqam mana ni chay tigri laya animalta ni rritratunda adurarqanllampachu. Munamptinllampa siñalayta urkunllampampi mamkinllampampi chay animal layampa siñalninwambismi, pallkunaqa mana dijamkarqanllampachu siñalanambaqqa. Chaymi chay animal layata aduraqkunaqa chay kriyiq masinchiqkunampa umangunata pitichpa, wanchirqanllampa. Piru Tayta Dyusqam chay wanchichqa kriyiq masinchiqkunata kawsachimurqan, chay mil watamkunampaq Jisumkristuwan pulla kamachimkunanllampa. 5 Chaqa Tayta Dyusqam manaraq ni pita kawsachimuchpa, puntata chay wanchichqa kriyiq masinchiqkunata rin kawsachimuq. Chaymandaqam chay mil watamkuna pasamptinraq, chay suq wañuchqamkunatampis rin kawsachimuq. 6 Chay punta kawsamuqkunaqam ancha kuchimkunqallampa. Chaqa Tayta Dyusmi pallkunataqa amkrachqa, paypaqlla kachpa, amana nunka wañurinanllampa. Achwanmi pallkunataqa rin numbraq, paypa, Churin Jisumkristumpa kuranguna kanambaqllampa. Chaymi pallkunaqa Jisumkristumpa pullan mil watamkunata rinllampa kamachimkuq. 7 Chay mil watamkuna pasamptinqam, Dyuspa suq anjilnin chay manchaypaq llabichqa talalanda rin kich'aq. 8 Kanan chay dyabluqam chay talalanmanda lluqchichpa, kay munduman kutimuchpa, yumbay nasyungunampi achka runata, warmita rin ingañaq. Chaymi pallkunaqa rinllampa tandamkaq chay nasyun Gugpi tiyaqkunawan, Magugpi tiyaqkunawambis. Dyabluqam yumbay pallkunata ingañachpa, rin tandaq ancha achka suldadumkunata, Dyuswan pilyananllampa. Aquchina kamptinmi, mana pimpis atinqachu yumpayta. 9 Chaychina tandamkachpaqam, chay ancha achka suldadumkuna kay mundumpa tumkuy ladungunamanda rinllampa chamuq, Dyusta kasuqkunampa lugarninda, Dyus kuyachqan llaqtanda kurralananllampa. Piru Tayta Dyusqam syilumanda ninata kach'amuchpa, yumbay pallkunata rin rumpachiq. 10 Chaymandaqam chay ingañamkuq dyabluta rin wichumkuq chay asufriwan mirallkaq ninaman. Chay ninampim punchawnindin tutampnindin tumkuy tyimpu rin padisiq chay tigri laya animalwan, Dyuspaq chay rimaq tumkuqwan. 11 Challkunata rimkachpaqam, suq atun yuraq trunuta rimkarqay. Chay trunumpiqam Dyus tiyallkarqan. Kanan kay pacha syiluwanmi paypa ñawpanmanda limpuna uchyamkarqan. Mananam ni achlita kidarqanchu. 12 Chaymandaqam rimkarqay yumbay wañuchqa kamachimkuqkunata, mana kamachimkuqkunata Dyuspa yuraq trunumba ñawpambi chayallkaqta. Chaqa Tayta Dyusqam wamkin pallkunataqa mar yamkumpa umkunmanda tandachqa karqan. Wamkin pallkunataqam wañuchqamkunampa lugarninmanda tandachqa karqan. Chay lugar Dyus kachqambiqam librumkunampis karqan. (Chay librumkunampiqam, Tayta Dyus iskibrichqa karqan runamkuna, warmimkuna tumkuy ima rurachqangunata.) Chay librumkunatam kich'arqan liyinambaq. Chaymandaqam suq laya librutampis kich'arqan liyinambaq. (Chay librumpiqam Tayta Dyus iskibrichqa karqan paypi yumbay kriyiqkunampa chutingunata, paywan pulla tumkuy tyimpumpaq kawsananllampa.) Chay libruqam Kawsaqkunampa Librun chutin. Chaymi chay punta librumkunata liyichpa, Tayta Dyusqa chay runamkunata, warmimkunata jusgarqan tumkuy ima rurachqangunampaq. 14 Chaymandaqam wañuchqamkunampa lugarninda chay mirallkaq ninaman wichumkurqan. Wañuytampismi chayman wichumkurqan chinganambaq. Kanan runamkunampa ichu warmimkunampa chutingunata mana tarimptin chay kawsaqkunampa librumbiqam, pallkunatampis wichumkurqan chay mirallkaq ninaman. Chaychina chay ninaman wichumkumptinqam, ultimu wañuy rin kaq.
1 Chay musquypichinam muchuq syiluta, muchuq pachata rimkarqay. Chaqa kay rimkachqanchiq syiluwan pachaqam chingachqana karqan. Mar yamkumpismi chingachqana karqan. 2 Chaymandaqam nuqa Jwan rimkarqay Tayta Dyuspa ñawpanmanda suq muchuq santu Jirusalin llaqta syilumanda chamullkaqta. Chay muchuq Jirusalinqam ancha chumaq allichadu karqan, suq china nubyunwan kasaranambaq chumaqta mudamkuchqachina. 3 Kanan uyarqanim syilumandampacha ancha jwirtita kaychina rimamptin: Kananmandampacham Tayta Dyusqa kay chumaq llaqtampi runamkunawan, warmimkunawan rin kawsaq, pallkunampa Dyusnin kanambaq. Chaqa pallkunaqam paypa wambranguna. Chaymi Tayta Dyusqa, tumkuy tyimpu pallkunampa pullan rin kawsaq. 4 Chaymi Tayta Dyus kimkin pallkunampa ñawingunata pichachpa, rin chamkichiq, amana masta waqananllampa. Chaqa chay muchuq llaqtampi tiyaqkunaqam manana rinllampachu wañuq. Manam ni rinllampachu malaganayaq. Manam ni rinllampachu padisiq. Chaqa kay pachaqam tumkuy mana baliq imandin limpu rin chingaq, nichpa. 5 Chaymandaqam Tayta Dyus kamachimkunan trunumbi tiyachpa, kaychina nirqan: Nuqaqam tumkuy imata muchuqtana rini ruraq, muchuqkunana kanambaq, nichpa. Chaymandaqam niwarqambis: Allimp kaqkunatallam nillki. Chayri kay nichuchqayta iskibriy, suqkunampis kriyinanllampa. 6 Chaymandaqam Tayta Dyusqa niriwarqan: Tumkuy ima yuyachqaytam rurachqana kani. Chaqa chay punta litra A yumbay litramkunata qallariqchinam nuqa tumkuy imata qallarichqa kani. Chay yumbay litramkuna chay litra Ywan uchyamkaqchinam nuqampis tumkuy imata rini uchyaq. Chaymi nuqaqa yamkunaqkunata kawsachimkuq yamkuyta dibaldilla quchaq, nuqawan tumkuy tyimpu kawsananllampa. 7 Chaychinallam dyabluta yumbay binsiqkunataqa kay chumaq primyuta rini quq. Chaqa nuqaqam pallkunampa Dyusnin rini kaq. Pallkunaqam wambrallkuna rinllampa kaq. 8 Piru rinim wichumkuq chay asufriwan mirallkaq ninaman yumbay kay laya uchayuqkunata: suqkunata manchachpa mana nuqata kasuwaqkunata, nuqampi mana munaq kriyiqkunata, ancha fiyu uchata ruraqkunata, wanchimkuqkunata, mana rrispitun kaqkunawan puñuqkunata, brujumkunata, amitu layamkunata aduraqkunata, llullamkuqkunata. Chaychina chay ninaman wichumkumptiyqam, chay uchayuqkunampaqqa ultimu wañuyna rin kaq, nichpa. 9 Chaymandaqam rimkarqay suq anjilta. Payqam chay syiti kumpayuq anjilkunamanda suqnin karqan. Chaqa pallkunaqam chay syiti kumpangunampi chay syiti ultimu kastigumkunata ampamuchqallampa karqan. Chay anjilmi nuqaman chamuchpa, niwarqan: Chamuy kayman Dyuspa Uñamba nubyanda rimkachichunaqpaq, nichpa. 10 Dyuspa Santu Ispiritun yumbay challkunata musquypichina rimkachiwamptinmi, chay anjilqa suq atun altu qaqaman ampawarqan. Chay qaqamandaqam rimkachiwarqan Tayta Dyuspa santu muchuq Jirusalin llaqtanda, syilumanda Dyuspa ñawpanmanda chamullkaqta. 11 Chay muchuq Jirusalinmi Tayta Dyuspa llimpyayninwan ancha llimpyarqan. Chaymi suq ancha chumaq jaspi llimpyallkaq rumichina ichu ancha chumaq basu kristalchina karqan. 12 Kanan chay llaqtampa rridurnimbim karqan suq ancha atun, ancha altu muralla. Chay murallaqam dusi punguyuq karqan. Suq kwidamkuq anjilmi kada pungumpi chayallkarqan. Kada pungum suq chutiyuq karqan. Chay chutingunaqam isrraylinumkunampa chay dusi atun ayllumpa chutinguna karqan. 13 Chay pungumkunamanda kimsaqam karqan rumpay lluqchinan ladumpi. Kimsaqam karqan rumpay saqanan ladumpi. Kimsaqam karqan ñawpa ladumpi. Kimsaqam karqan imki ladumpi. 14 Chay atun murallamba simyintunqam dusi ancha atun rumimkunawan karqan. Kada rumimpim Dyuspa Uñamba dusi ampustulningunampa suq chutin iskibridu karqan. 15 Chay anjil nuqawan parlaqqam ampallkarqan suq urumanda barata. Chay baraqam suq mitruchina karqan. Chaytaqam amparqan midinambaq chay llaqtata, pungungunata, rridurnimbi kaq murallanda. 16 Chay llaqtaqam largundin, anchundin altundin suq tamañulla karqan. Chaymandaqam chay anjil midichpaqa, kada ladunda tarirqan 2.200 kilumitrusta. 17 Chaymandaqam chay anjilqa runamkunampa mididanwan chay murallata midichpaqa, anchundaqa tarirqan 64 mitrusta. [Nuta: Manam allitachu yach'anchiq: ¿Altundachu ichu anchunda chaychinaqa midirqan? nichpaqa.] 18 Chay llaqtampa murallanqam jaspi llimpyaq rumimanda ruradu karqan. Piru chay kimkin llaqtaqam lijitimu urumanda ruradu karqan. Chaymi ancha llimpyarqan ancha limpyu basuchina. 19 Chay murallamba simyintumba chay dusi ancha atun rumingunatam kada rumita suq laya suq laya llimpyaq rumimkunawan chumaqyachichqa karqanllampa. Chay punta atun rumitaqam chay jaspi chutiq llimpyaq rumimkunawan chumaqyachichqa karqan. Chay sigundu atun rumitaqam chumaqyachidu karqan chay safiru llimpyaq rumiwan. Chay tirsir atun rumitaqam chay agata llimpyaq rumiwan. Chay kwartu atun rumitaqam chay ismiralda llimpyaq rumiwan. 20 Chay kintu atun rumitaqam chay unisi llimpyaq rumiwan. Chay sistu atun rumitaqam chay kurnalina llimpyaq rumiwan. Chay simptimu atun rumitaqam chay krisulitu llimpyaq rumiwan. Chay umktabu atun rumitaqam chay birilu llimpyaq rumiwan. Chay nubinu atun rumitaqam chay tumpasyu llimpyaq rumiwan. Chay disimu atun rumitaqam chay krisumprasa llimpyaq rumiwan. Chay disimu primiru rumimpa ladumbi kaqtaqam chumaqyachidu karqan chay jasintu llimpyaq rumiwan. Chay ultimu atun rumitaqam chumaqyachidu karqan chay amatista llimpyaq rumiwan. 21 Kanan chay llaqtampa dusi pungungunaqam kada pungu suq atun ch'aniyuq parla rumimanda karqan. Kallingunataqam rurachqallampa karqan lijitimu urumanda. Chaymi ancha limpyu basuchina llimpyarqan. 22 Chay muchuq Jirusalin llaqtampiqam Dyuspa adurana wasinqa mana kanqachu. Chaqa chay llaqtampi tiyaqkunaqam Tayta Dyus ancha pudirniyuqta chay Uñandampis tarinqallampa chay llaqtampa tumkuy partingunampi, chaypi pallkunata adurananllampa. 23 Kanan chay muchuq llaqtampiqam rumpaywan killaqa manana rinchu kaq achimkchamkunanqa. Chaqa Tayta Dyus kimkinmi llimpyachpa, maski rumpaymanda rin achimkchamkuq. Chay Uñambismi chay llaqtampiqa rin achimkchamkuq suq ancha allin michachina. 24 Chaymi wachadumkuna yumbay nasyungunamanda chamuchpa, chay muchuq Jirusalimba achimkninwan rinllampa puriq. Kay mundumpa gubyirnungunampismi ancha ch'aniyuq kusasningunata ampamuchpa, Dyusta quchpa, payta rinllampa aduraq. 25 Kanan chay muchuq llaqtampiqam chay pungungunataqa manana nunka rinllampachu kirpaq. Chaqa chay llaqtampiqam manana rinchu kaq tutaqa. 26 Kanan yumbay nasyungunamandam ampamunqallampa ancha ch'aniyuq kusasningunata, Tayta Dyusta quchpa, payta adurananllampa. 27 Piru chay llaqtamanqam mana rinchu yallkuq millanaypaq kusaskunaqa. Chaqa manam yallkunqallampachu ni uchayuqkuna ni llullamkuqkuna. Achwanmi yallkunqallampaqa chay Uñampa librumbi chutinguna iskibrichqamkunalla, paywan tumkuy tyimpu kawsananllampa.
1 Chaymandaqam musquypichina chay anjilqa suq ancha limpyu rriyuta chuya kawsachimkuq yamkuta rimkachiwarqan. Chay yamkuqam basuchina llimpyallkaq, lluqchillkarqan Tayta Dyuspa, Uñamba trununmanda. 2 Chaychina chay yamku lluqchichpaqam, chay llaqtampa ancha anchu kallimba ch'awpinda kurrirqan. Chay rriyumpa kada ladu manyambim suq kawsachimkuq planta wiñarqan. Kada killam puqurqan. Chaymi kada wata dusi bwiltasta puqurqan. Kanan chay kawsachimkuq plantampa ramprangunaqam yumbay nasyungunamanda qachyaqkunata kach'amkachirqan. 3 Chay muchuq Jirusalin llaqtampim Tayta Dyuspa, Uñamba kamachimkunan trunun rin kaq. Chaymi uchayuqkunaqa chay llaqtamanqa mana rinllampachu yallkuq. Achwanmi Tayta Dyusta, Uñanda kasuqkunalla chay llaqtampi rinllampa aduraq. 4 Kanan Tayta Dyuspa qaqllandam rinllampa rimkaq. Paypa chutimbismi urkungunampi iskibrichqa rin kaq. 5 Kanan chay muchuq Jirusalimbiqam manana nunka rinchu tutayaq. Chaymi chay llaqtampi tiyaqkunaqa manana munanqallampachu ni michata ni rumpayta. Chaqa kimkin Tayta Dyusmi ancha llimpyachpa, chay llaqtataqa rin achimkchaq. Kanan chay llaqtampi kawsaqkunaqam Dyuswan gubyirnumkunachina tumkuy tyimpu rinllampa kamachimkuq. 6 Chaymandaqam musquypichina chay anjilqa kaychina niwarqan: Yumbay kay uyachqallkitam atingi kriyiyta, ancha allimp kaqkunalla kachqanrallku. Chaqa pudirniyuq Tayta Dyusmi Santu Ispiritunwan paypaq rimaqkunata yanampachqa, pay nichqanda yach'achimkunanllampa. Kanan pay kimkinllam nuqatampis kach'amuwachqa, payta kasuqkunata yach'achinaypaq: Kay nichuchqallkunam utqana rin pasaq, nichpa. 7 Chaymandaqam Jisumkristuqa musquypichina niwarqan: Nuqaqam utqana rini chamuriq! ¡Chayri kay librumpi nichqayta kasuqkunaqa ancha kuchimkunqallampa! nichpa. 8 Nuqa Jwanmi kallkunata uyarqay, rimkarqay. Chaymi chay rimkachiwaq anjilpa ñawpambi qunqurimkurqay, payta aduranaypaq. 9 Piru chay anjilqam kaychina niwarqan: Nuqataqar ama adurawaychu. Chaqa nuqampismi Tayta Dyusta sirbiq masimki kani. Dyuspaq rimaq masimkimkunachina, kay Santu Libruta kasuqkunachinam nuqampis kani. Chayri Dyustalla adurayqa, nichpa. 10 Chaymandaqam chay anjilqa niriwarqan: Kay librumpi iskibrichqallkitam Tayta Dyusqa utqana rin kumpliq. Chayri chay iskibrichqallkita ama nimatampis pamkachpachu, allita yach'achimkuy. 11 Piru chay malumkuna, chay uchamkunata ruraqkunaqam pallkuna munachqandalla rurachpa kawsanqallampa. Piru Dyusta kasuqkuna, uchata mana ruraqkunaqam allitalla rurachpa, kawsanqallampa. 12 Chaymandaqam Jisumkristu kaychina niwarqan: Nuqaqam utqana rini chamuriq, chumaq primyumkunata ampamuchpa, yumbay runata, warmita jusganaypaq: ¿Allitachu rurachqallampa ichu mana? nichpa. Chaychina jusgachpaqam, pagunllampata rini quq. 13 Chaqa chay punta litra A yumbay litramkunata qallariqchinam nuqampis tumkuy imata qallarichqa kani. Chay ultimu litra Ychinam nuqampis tumkuy imamanda masta rini duraq. 14 Chayri Jisumkristumpi yuyamkuqkuna, uchangunamanda pirdunadu kachpa, mudananllampata taqchachqachina kachpa, ancha kuchimkunqallampa. Chaqa pallkunaqam atinqallampa yallkuyta chay muchuq Jirusalimba pungungunata, chay kawsachimkuq plantampa puquyninda mimkunanllampa. 15 Piru chay uchayuqkuna, chay brujumkuna, chay mana rrispitun kaqkunawan puñuqkuna, chay wanchimkuqkuna, chay amitu layamkunata aduraqkuna, chay llullamkuqkunaqam chay chumaq llaqtamanqa mana atinqallampachu yallkuytaqa. 16 Chaymandaqam Jisusqa nirqan: Nuqa Jisumkristum chay anjilniyta kach'amuchqa kani, tumkuy kay nichqayta qamkuna nuqampi kriyiqkunata yach'achichunan. Chaqa nuqaqam chay unay kamachimkuq gubyirnu Dabidpa karu willkan kani. Chay ancha llimpyaq yulaqachi (yuraqachi) lusiruchinampismi kani, nichpa. 17 Chaychina nimptinmi, Dyuspa Santu Ispiritunqa Jisumkristumpa nubyanwan kaychina Jisumkristutaqa ninllampa: Chamuyna, nichpa. [Nuta: Jisuspa nubyanqam yumbay paypi allimpta yuyamkuqkuna.] Kay libruta uyaqkunampisri Jisumkristutaqa ninqallampa: Chamuyna, nichpa. Chayri qamkuna Tayta Dyuspi yuyamkuyta munaqkunaqa, yamkuta munaqkunachina chamuyllampa, kay kawsachimkuq yamkuta dibaldilla umpyanallkillampa. 18 Chaymi kay librumpi Dyus nichqanda uyaqkuna kay iskibrichqaytalla yach'achimkunqallampa, ama ni masyachichpachu ni minusyachichpachu. Chaqa imatampis yampamptimkiqam, Tayta Dyusqa kay librumpi iskibrichqay kastigumkunata rin yampaq, mas kastigadu kanallkillampa. 19 Chaychinallam kay librumpi Dyus nichqanda iskibrichqayta wamkinda burramptimkiqa, Tayta Dyusqa rin burraq chutimkita chay kawsaqkunampa librunmanda, ama yallkunallki chay muchuq santu Jirusalin llaqtaman. 20 Siñurninchiq Jisumkristum kay librumpi iskibrichqaychina niwachqallampa kanchiq: Utqanam rini chamuq, nichpa. Chaychina nimptinmi, nuqampis nini: ¡Ariri! ¡Chaychinalla kanqa! ¡Utqanar chamuy, Siñur Jisumkristu! nichpa. 21 Siñurninchiq Jisumkristur tumkuy imampi qamkunata yanampachunqa. Chaychina kanqa.