1 Manaraj imapis caycaptillan, Tayta Diosninchipa shiminta Camacächicuj cawaycaran. Shiminta Camacächicuj Tayta Diosninchiwan jucnaylla caran. Camacächicujga Tayta Diosninchim. 2 Manaraj imapis caycaptillan, Camacächicujwan-ima Tayta Diosninchi cawaycaran. 3 Paywanmi llapan imacunatapis Tayta Diosninchi camaran. Payllapita llap-llapanpis caycan. 4 Paylla cawachicuj. Achqui-jina Tayta Diosninchi pï cashantapis runacunata tantiyachin. 5 Achicyapämashpanchi Tayta Diosninchipa shungun munashanta tantiyachimanchi. Jucha aparicujcunam ichanga chacajçhu juyar, quiquinpa shungun munashallanta ruran. Achquita wañuchishan-jina Camacächicujtapis wañurachiyta munaran. Ichanga mana camäpacuranchu. 6 Tayta Diosninchi juc runata caçhamuran. Caçhamushan runa Juanmi caran. Pay willapäcuran: 7 Camacächicujman llapan runa yupachicunanpaj willacamuy. Payga achqui-yupay nir. 8 Juan mana achquichu caran. Manchäga achqui pï cashantapis tantiyachicuj shamuran. 9 Achqui-yupay Camacächicuj cay pachaman shaycamuran llapan runata Tayta Diosninchipa shiminta musyachinanpaj. 10 Tayta Diosninchipa shiminta Camacächicuj cay pachaçhu caycaran. Cay pachatapis quiquin camaran. Runacunam ichanga pï cashantapis mana ricsiranchu. 11 Camacächicujga Israel marcaçhu yuriran. Chaypis marca-masincuna mana çhasquicuranchu. Manchäga wasguiparan. 12 Payta çhasquicujcunatam ichanga Tayta Diosninchi wamrachacun: Wawämi canqui nir. 13 Camacächicujman yupachicuptin, pï-pïtapis Tayta Diosninchi wamrachacun. Ichanga mana runapa shungun munashanpitachu, mana runa churiyäcushanpitachu, mana warmi mirashanpitachu, manchäga quiquinpa shungun munaptin, pitapis wamrachacun. 14 Tayta Diosninchipa shiminta Camacächicuj runa-masinchi yuriran. Cay pachaçhu cawaran. Sumaj munayniyuj cashanta nuwacuna ricashcä. Tayta Diosninchipa japallan Wawan cashantapis tantiyacushcä. Llaquipäcujmi caran. Shiminta çharcujmi caran. 15 Camacächicujpita rimar, Juan niran: Shaycämun nishä runa cayçhüna caycan. Puntata yurish captïsi mana yuriptillä, cawaycaran. Mayurnï cashpan alli ricash canan camacan. 16 Pay-raycur Tayta Diosninchi llaquipämashpanchi sumaj-sumaj yanapaycämanchi. 17 Unayga Tayta Diosninchipa shiminta ima-imata çharcunanchipäpis Moisés tantiyachimaranchi. Cananmi ichanga Jesucristu tantiyachimanchi Tayta Diosninchi llaquipäcuj cashantapis, shungun yarpashantapis. 18 Quiquin Tayta Diosninchita pipis mana imaypis ricashachu. Wawallanta ricasha. Payga Tayta Diosninchi. Jesúsga Tayta Diosninchiwanpis juc shungulla cawan. Chaymi Tayta Diosninchi imanuy-imanuy cashantapis tantiyachimanchi. 19 Chaura Juan willapäcuptin, cüracunawan, Leví runacunawan, Jerusalén marca mayur runacuna tapuchiran: ¿Pitaj caçhamushcashunqui? nir. 20 Tapuptin, Juan mana chapacuranchu. Manchä juclla niran: Mana Tayta Diosninchi caçhamushan Washäcujchu cä. 21 Yapaypis tapuran: ¿Pitaj caçhamushcashunqui? ¿Tayta Diosninchipa unay willacujnin Elías-jinachu canqui? nir. Juanna niran: Mana Elías-jinapishchu cä. Yapaypis tapuran: ¿Tayta Diosninchi çhurashan Willacujchu canqui? nir. Juanna: Mana niran. 22 Chaura yapay tapuran: ¿Pitaj caçhamushcashunqui? Pï cashayquitapis mä, willamay caçhamaj runacunata willanäpaj nir. 23 Juanna niran: Unay willacuj Isaíaspa shimin çharcucänanpaj shamushcä. Paypa shimin nin: Chunyajçhu juc runa jayacuypa willacuycan: Taytanchi shamunanpaj wicsu caminuta allchay nir. 24 Chaypis fariseucunapa caçhancuna Juanta yapay tapuran: 25 Washäcujpis mana carga, Elíaspis mana carga, Tayta Diosninchi çhurashan Willacujpis mana carga, ¿imanirtaj ushyachicuycanqui? nir. 26 Juanna niran: Pipis Tayta Diosninchipa maquinçhu cawayta munar juchapita wanacuptin, yacullawan ushyachicuycä. Chaypis mana ricsishanchi runa marcanchiçhu puriycan. 27 Jipäta shamuptinsi, payga munayniyujmi. Llanguinta llushtipuyllatapis manchapacü. 28 Juanta tapurunaj chimpaçhu-caj Betabará marca çhaquinçhu. Juanga runacunata ushyachirunaj Jordán mayuçhu. 29 Warannin junaj Jordán mayuman Jesús çhayaycaran. Payta ricar, llapan runata wiyächipaypa Ushyachicuj Juan niran: Mä, ricay. Paymi Tayta Diosninchi caçhamushan runa. Payga uysha-yupay wañuyman çhayanga llapan runapa juchanta aparicur. 30 Paypaj willacurä: Jipäta shamuj runa munayniyujmi. Puntata yurish caycaptïsi mana yuriptillä, mayna cawaycaran nir. 31 Quiquïpis mana ricsishcächu. Chaypis Israel-masintinchi ricsicunanchi-raycur yacuwan ushyachicuycashcä. 32 Jananmanpis Juan niran: Janaj pachapita Espíritu Santu paluma-jina Jesúsman çhayamujta ricashcä. 33 Washäcuj pï cashantapis mana musyashcärächu. Yacuwan ushyachij caçhamaj Tayta Diosninchim ichanga nimaran: Espíritu Santupa maquinçhu Washäcujta purichishaj. Paypis Espíritu Santuwan pitapis ushyachinga maquïçhu purinanpaj. 34 Nuwaga ñawïwanraj llapanta ricashcä. Tayta Diosninchipa Wawan cashanta musyä. 35 Warannin junajpis Juan ishcaj purïshijnincunawan-ima jinallançhu caycaran. 36 Jesús aywaycajta ricar, Juan niran: Tagaymi Tayta Diosninchi caçhamushan runa. Payga uysha-yupay. 37 Chaynuy niptin, Juanpa purïshijnincuna Jesústa jaticurcuran. 38 Jaticurcuptin ticrarcur, Jesús niran: ¿Imatataj ashinqui? Paycuna niran: Yaçhaj tayta, ¿mayçhütaj tiyanqui? Rimayninçhu: Yaçhaj tayta ninanta: Rabbí nin. 39 Jesúsna niran: Shamuy. Ricsichishayqui, ari. Aywar, Jesús tiyashanman çhayaran. Tacsha mallwayna caycaptin, jinallançhu pachacäriran. 40 Jesústa aywäshijcuna jucnin caran Simón nishan Pedrupa wauguin Andrés. Paymi Ushyachicuj Juan willapäcushanta wiyacuran. 41 Andrésna wauguin Simónta tarir, willaran: Tayta Diosninchi acracushan Washäcujwan tincushcä nir. Washäcuj ninanta hebreo rimayçhu: Mesías nin; Griego rimayçhüna: Cristo nin. 42 Nircur Jesúsman pusharan. Çhayachiptin, Simónta sumaj ricapärir, Jesús niran: Juanpa wamran Simón canqui, ¿au? Cananpita jutiqui canga: Pedro. Pedro ninanpaj: Kefas nir jutichaparan. Kefas ninanga: rumi ninanmi. 43 Warannin junaj Galilea quinranman aywayta Jesús yarparan. Felipiwan tincur, niran: Purïshimay. 44 Felipiga Betsaida marcapita caran. Andréswan Pedrupis chay marcallapita caran. 45 Felipina Natanaelta tarir, willaran: Washäcujwan tincushcä. Paypaj Moiséspa shiminpis, unay willacujcunapa shiminpis riman. Washäcuj Jesúsga Nazaret marca Josépa wawan nir. 46 Natanaelna niran: ¿Nazaret marcaçhu alli runa yurinmançhi? Felipina niran: Ricanayquipaj mä, aywashun, ari. 47 Natanael çhayaycaptin, Jesús niran: Paymi rasunpa unay auquillunchi Israelpa willcan. Payga llullacuytapis mana yaçhanchu. 48 Natanaelna tapuran: ¿Imanuypataj pï cashätapis musyanqui? nir. Chaura Jesús niran: Manaräpis Felipiwan tincuptillayqui, ricashcaj. Jïgus yüra çhaquinçhu jamaraycarayqui. 49 Natanaelna wiyächipaypa niran: Taytallau tayta, rasunpa Tayta Diosninchipa Wawan canqui. Israelcunapa mandajnin canqui. 50 Jesúsna niran: ¿Jïgus yüra çhaquinçhu ricashcaj nishalläpitachu yupachicamanqui? Wara-warantinraj sumaj-sumaj tantiyacunquipaj. 51 Jinarcur niran: Sumaj tantiyacunquiman. Caçhan captï, Tayta Diosninchi sumaj ricaman. Jamcuna janaj pachata quiçharaycajta ricanquipaj. Anjilcunapis waquinga nuwapita jigarcaycanga. Waquinna janaj pachapita nuwaman yarpurcaycämunga.
1 Chaypita quimsa junajta Galilea quinran Caná marcaçhu juc runa warmita ashiran. Jesúspa mamanpis warmi ashiyçhu caycaran. 2 Jayachish captin, purïshijnintin Jesúspis warmi ashiyçhu caycaran. 3 Warmi ashiyçhu bïnu ushyacäcuran. Ushyacäcuptin, maman Jesústa niran: Bïnu ushyacäcushana. 4 Jesúsna niran: Mamallau mama, ¿imanirtaj jaticanqui? Pï cashätapis ricsichicunä junaj mana çhayamunrächu. 5 Chaypis Jesúspa maman sirbinticunata niran: Wawä Jesús nishanta llapanta ruranqui. 6 Chay wasiçhu rumipita sujta urpu caycaran. Cada urpuman yaycuj paçhac (100) litru-yupay yacu. Israelcuna Tayta Diosninchipa ricay ñawinchu alli cayta munar, urpucunaçhu yacuta wiñarächij. Chay yacullawan mayllacuj. 7 Jesúsna sirbinticunata niran: Urpucunaman yacuta juntachiy. Chaura änir yacuta juntachiran. 8 Juntarcachiptin, Jesús niran: Wallcallata çhagarcur, mayur sirbintiman apay. Nishanta änir ruraran. 9 Mayur sirbintina mallircuran. Ichanga maypita jurgamushantapis mana musyaranchu. Waquin sirbintilla yacupita bïnuman ticrachishanta musyaraycaran. Chaura mayur sirbinti warmi ashij müsuta jayarcur niran: 10 Llapanpis puntata alli bïnuta runata upuchin. Sumaj upucurcuptinraj, shigui bïnuta upuchin. Jammi ichanga ushyacänancaman pugush bïnuta çhurarächicushcanqui, ¿au? 11 Chayraj Jesús munayniyuj cashanta musyachicuran. Galilea quinran Caná marcaçhu yacuta bïnuman ticrachishanta ricar, Tayta Diosninchipa maquinçhu Jesús purishanta purïshijnincuna tantiyacuran. Llapan shungunwanna Jesúsman yupachicuran. 12 Chaypita Cafarnaún marcaman mamanwan, wauguincunawan, purïshijnincunawan-ima Jesús aywacuran. Chayçhüna ishcay-quimsa junaj juyapäriran. 13 Israel runacunapa Pascua fiestan yaycaycämuptin, Jesúspis Jerusalén marcaman aywaran. 14 Çhayaptin, Tayta Diosninchipa wasinpa sawanninçhu runacuna türucunata, uyshacunata, palumacunata ranticurcaycaran. Jillaytapis rucanacurcaycaran. 15 Jesúsna wascata aptacurcur, Tayta Diosninchipa wasinpa sawanninpita uyshantinta, türuntinta jarguran. Jillaynincunatapis mashtariran. Mïsancunatapis sajtar ushyariran. 16 Paluma ranticujcunatapis niran: Imayquicunatapis jurguy. Papänïpa wasinçhu mana ranticunayquipächu. 17 Chaynuy ruraptin, purïshijnincuna Tayta Diosninchipa shiminta yarpäriran. Shiminçhu nin: Tayta, wasiqui-raycur imamanpis çhayäman. 18 Mayur Israel runacunam ichanga niran: ¿Pitaj çhurashcashunqui jargumänayquipaj? Tayta Diosninchi caçhamushayquita musyanäpaj mä, imatapis ruray. 19 Jesúsna niran: Mä, Tayta Diosninchipa wasinta juçhurachiy. Nuwam ichanga quimsa junajllaçhu cashganman jatarachishaj. 20 Mayur runacunana niran: Tayta Diosninchipa wasinta çhuscu çhunca sujtawan (46) watataraj rurayta ushyash caran. ¿Imanaypash quimsa junajllata yapay jatarachinquiman? 21 Tayta Diosninchipa wasinpaj rimarpis, wañushanpita cawarimunanpaj Jesús rimaycaran. 22 Wañushanpita Jesús cawarimuptinraj, purïshijnincunapis chaynuy nishanta yarpäriran. Chayrämi Jesúspa shiminpis, Tayta Diosninchipa shiminpis shungunman çhayaran. 23 Jerusalén marcaçhu Pascua fiesta wichan Tayta Diosninchipita shamushanta Jesús musyachicuran. Ima-imatapis rurashanta ricar, achcaj runa Jesúsman yupachicuran. Jesúsmi ichanga shungunta musyar, paycunaman mana yupachicuranchu. 24 - 25 Payga runapa shungunta musyaparan pipis mana willaycaptillan, rurashantapis mana ricaycällar.
1 Chay marcaçhu Nicodemo jutiyuj runa tiyaran. Mayur fariseu runa caycaptin, Israel-masincuna alli ñawinpa ricaran. 2 Juc chacay Jesúsman aywaran. Çhayar, niran: Yaçhaj tayta, Tayta Diosninchipa caçhan car, shiminta willapäcuycanqui. Camacächiyninpa tucuy-jinanpa runacunatapis yanapaycanqui. Rurashayquicunata runa mana ruranmanchu. Chaymi caçhamushushayquita nuwacuna musyä. 3 Jesúsna niran: Sumaj tantiyacunquiman. Tayta Diosninchipa maquinçhu imaypis cawanayquipaj yapayraj yurinayqui. 4 Nicodemuna tapuran: Auquis runa caycar, ¿imanaypataj yapay yurïman? ¿Yapay yurinäpaj mamäpa paçhanman cutïmanchuraj? nir. 5 Chaura Jesús niran: Sumaj tantiyacunquiman. Pipis Tayta Diosninchipa maquinçhu cawayta munar, yacupitapis, Espíritu Santupitapis yurinman. 6 Maman-taytanpita yurijcuna wañucujlla. Espíritu Santupita yurijcunam ichanga Tayta Diosninchipa maquinçhu cawan. 7 Ama yarpaçhacuychu: Yapayraj yuriy niptï. 8 Wayrata mayarsi, maypita shamushantapis, maypa aywashantapis runacuna mana musyanchu. Chay-jina Espíritu Santu pï-pïta cawachishantapis runacuna mana musyanchu. 9 Chaura Nicodemo niran: Tayta, shimiqui umäman mana yaycunchu. 10 Jesúsna niran: Moiséspa shiminta Israel-masiquicunata willapaycarsi, ¿manaçhi tantiyacunquichu? 11 Sumaj tantiyacunquiman. Musyashäta, ricashäta nuwacuna willacü. ¿Imanirtaj jamcuna shimïta mana çhasquicunquichu? 12 Ricashallayquita willapaycaptïsi mana çhasquicur, ¿imanuyparaj çhasquicunquiman janaj pachapita willapaptï? 13 Janaj pachaman jigarcur, pipis mana willacuj cutimunmanchu. Nuwam ichanga Tayta Diosninchipa caçhan car, janaj pachapita yarpamushcä. 14 Unayga chaqui pachaçhu brunsipita curuta rurarcur, Moisés jugarächiran. Chay-jina nuwatapis Tayta Diosninchipa caçhan caycaptïsi, jugarachimanga. 15 Pipis nuwaman yupachicamaptin, mana ushyacaj cawayta taringa. 16 Tayta Diosninchi llapan runata llaquipashpan cay pachaman japallan Wawanta caçhamuran. Pipis Wawanman yupachicur, ushyacayman mana çhayangapächu. Manchäga imaycamanpis cawanga. 17 Tayta Diosninchi Wawanta caçhamuran mana ñacayman runacunata çhayachinanpächu; manchäga llapanta jishpichinanpaj. Paylla jishpichimäshun. 18 Chaymi Wawan Jesúsman yupachicuptinchi, Tayta Diosninchipis alli ñawinwan ricamanchi. Mana yupachicuptinmi ichanga, pitapis juyu ñawinwan rican. Ñacaymanpis mayna çhayachisha japallan Wawanman mana yupachicushanpita. 19 Runacunapa shungunta musyapänanpaj Tayta Diosninchi Jesústa caçhamuran. Paymi achqui-jina Tayta Diosninchipa shungunta musyachicuran. Juchaçhu arujcunam ichanga chacajçhu-jina cawayllata munaran. Achquiçhu cawayta mana munashan-jina, Tayta Diosninchitapis mana wiyacuranchu. Chaymi Jesústapis wasguiparan. 20 Llapan juchallaçhu arujcuna achquita chiquin. Ricaytapis mana munanchu jucha aparicushanta mana taripunanpaj. 21 Tayta Diosninchipa shungun munashannuy cawajcunam ichanga achquiman witipushan-jina Jesúsman witipun. Paycuna allita rurar cawaptin, Tayta Diosninchipa maquinçhu cawaycashantapis runacuna musyanga. 22 Chaypita Judea quinranman purïshijnincunawan-ima Jesús aywaran. Chay quinrançhu runacunata ushyachishpan juyaran. 23 Ainón marca rajraçhu achca yacu captin, Juanpis runacunata ushyachiycaran. Ainón marcaga Salín marcapa washlällançhu caran. Ushyachicuycashanta mayar, waquin runa ushyacuj aywaran. 24 (Juan ushyachicuycaran carsilman manaraj wiçhgaptillan.) 25 Chaura Ushyachicuj Juanpa purïshijnincuna juc Israel runawan tincupänacuran: ¿Imanayparaj juchanchita ushyacächishuwan Tayta Diosninchi alli ricamänanchipaj? nir. 26 Chaymi Juanta willaran: Tayta, Jordán mayu chimpançhu tincushayqui runa ushyachicuycan. Chay-chicaj runa aywarcaycan. Paypaj: Washäcuj nir willacurayqui, ¿au? nir. 27 Ushyachicuj Juanna niran: Runa imatapis ruran. Chaypis Tayta Diosninchi camacächiptinraj, allimanpis çhayan. 28 Jamcunata mayna willashcaj: Mana Tayta Diosninchi caçhamushan Washäcujchu cä. Manchäga Washäcuj Jesús shamunanta willacujlla caçhamasha. 29 Jipash müsu majachacaptinshi majachacächij runa yanagar, munashanta camacächin. Yanagashpanshi sumaj cushicun. Chay-jina Jesúspa ñaupançhu aywar, sumaj cushicü. 30 Jesúsllata llapanpis taytachacunan. Nuwam ichanga jungacaypa aywanä. 31 Janaj pachapita shamujman pipis mana tincunchichu. Nuwanchim ichanga cay pachaçhu yurish car, pishi-yarpaylla caycanchi. Rimanchipis cay pachaçhu cawanallanchipaj. Janaj pachapita shamujmi ichanga munayniyuj. 32 Chaymi janaj pachaçhu ricashancunata, wiyashancunata willacuycan. Willacuptinpis, waquin runa shiminta mana çhasquinchu. 33 Washäcuj Jesúspa shiminta çhasquicurmi ichanga, Tayta Diosninchipa shimintapis aunin: Tayta Diosninchiga shiminta çharcun nir. 34 Tayta Diosninchipa caçhan car, shimintapis Jesús willapäcun. Sumaj yanapashpan maquinçhüpis Espíritu Santu purichin. 35 Wawan Jesústa llaquishpan alli ñawinwan Tayta Diosninchi rican. Chaymi llap-llapanta paypa maquinman çhurasha. 36 Pipis Wawanman yupachicur, mana ushyacaj cawayta tarishana. Wawanpa shiminta mana wiyacuptinmi ichanga, maquinçhu Tayta Diosninchi mana cawachingachu. Manchäga juyu ñawinwan ricar, imaycamanpis ñacachinga.
1 Chaura fariseucuna imata rimaycashantapis Jesús mayaran. Paycuna rimaycaran: Jesúspa purïshijnincuna achcayaycan. Ushyachicuj Juan ichicllata ushyachiran; Jesúsmi ichanga sumaj achcajta nir. 2 Chaypis mana quiquin Jesúschu runacunata ushyachiran; manchä purïshijnincunalla. 3 Chaura fariseucuna rimaptin, Judea quinranpita Galilea quinranman purïshijnincunawan-ima Jesús cuticuran. 4 Galilea marcacunaman çhayananpaj Samaria quinranparaj aywanan caran. 5 Chaymi Samaria quinrançhu Sicar marca ñaupanman çhayaran. Chay quinran caran Jacobpa wamran Josépa çhacran. 6 Jacob uçhcuchishan püsuman lasdüsi çhayar, uticash cashpan Jesús jamacuycuran. 7 -8 Chaycaman purïshijnincuna rantipacuj aywaran. Marcaman rantipacuj aywacushallanta Samaria warmi yacu jurguj püsuman çhayaran. Jesúsna warmita niran: Yacullayqui. 9 Israel runacunawan Samaria runacuna juyupa chiquinacuptin, ricanacuytapis mana munaranchu. Chaymi Samaria warmi Jesústa niran: Israel runa caycar, ¿imanirtaj yacuta mañacamanqui? ¿Samaria warmi cashäta manachu musyanqui? 10 Jesúsna niran: ¿Manachu musyanqui Tayta Diosninchi llaquipäcuj cashanta? ¿Pï cashätapis manachu musyanqui? Yacuta mañacamaptiqui, cawachicuj yacuta tarichijman. 11 Warmina niran: Yacu ruriçhüraj caycan. Jurgamunayquipäpis mana imayquisi canchu. ¿Maypitaraj cawachicuj yacuta jurgapamanquiman? 12 Unay auquillunchi Jacobshi cay püsuta uçhcuchiran. Nuwacunata jaguipamaran. Quiquinpis, wamrancunapis, uywancunapis cay püsullapitash yacuta upuran. ¿Jamrächuraj payman tincunquiman? 13 Chaura Jesús niran: Tincuchiypa tantiyachishayqui. Cay püsupita yacuta upujcuna imaypis yacunaycangapaj. 14 Nuwa jushä yacuta upurmi ichanga, imaypis mana yacunanganachu. Manchä yacupa ñawin pashtamushan-jina quiquinçhu cawachicuj yacu pashtamunga. Cawachicuj Tayta Diosninchi maquinçhu imaycamanpis cawachimäshun. 15 Chaura warmi niran: Imaypis mana yacunänäpaj, cay püsumanpis yacucuj mana cutimunäpaj mä, yacuyquita jumay ari, tayta. 16 Jesúsna niran: Majayquita pushamuy. 17 Chaura warmi niran: Majä mana canchu. Jesúsna niran: Rasullanta rimashcanqui. 18 Runa rucachijmi canqui. Pichgajwan juyashcanqui. Canan-cajwanmi ichanga puripänacuycanqui. Chaymi: Majä mana canchu nir mana llullacushcanquichu. 19 Chaura Samaria warmi niran: Tayta Diosninchipa shiminta willacuj canqui, ¿au? 20 Unay auquillücuna tagay puntaçhüraj Tayta Diosninchita alliman çhuraj. Jamcunam ichanga Israel runa car, ninqui: Jerusalén marcallaçhu llapan runapis Tayta Diosninchita alliman çhuranman. 21 Chaura Jesús niran: Mamallau, sumaj tantiyacunquiman. Juc junaj çhayamuptin, Tayta Diosninchita manchapacunanpaj runa tagay puntamansi, Jerusalén marcamansi mana aywangachu. 22 Samaria marca-masintiqui manchapacursi, Tayta Diosninchi pï cashantapis mana musyanquichu. Nuwacunam ichanga musyä. Washämajninchi Israel runacunapita llucshimungapaj. 23 Tayta Diosninchita alliman çhurananchi junajcuna çhayamushana. Chaymi Tayta Diosninchita llapan shungunwan manchapacujcunata Espíritu Santu yanapaycan. Cawachicuj Tayta Diosninchi shungun yarpashanta musyachicujmi. 24 Espíritu Santu yanapaptin, Tayta Diosninchipa shungun munashannuy pipis manchapacunman. Tayta Diosninchi cawachicuj caycaptin, shungun munashanta musyachicuj caycaptin, llapan shungunwan pipis manchapacunman. 25 Chaura warmi niran: Washäcuj shamunanta musyä. Shamur, Tayta Diosninchipa shungun yarpashanta tantiyachimäshunpaj. (Washäcujta ricsij: Cristu nir.) 26 Niptin, Jesús niran: Nuwa Washäcujmi cä. Quiquïwan parlaycanqui. 27 Samaria warmiwan Jesús parlaycaptin, micuyta rantij aywamushanpita purïshijnincuna çhayaran. Samaria warmiwan parlaycajta tariycur, mancharicäcuran. Ichanga imata parlashantapis mana tapuparanchu. Chaypis shimin rurillançhu parlaran: Tagay warmi, ¿imatataj ashiycan? ¿Imanirtaj paywanraj Jesúspis parlaycan? nir. 28 Warmina yacu puyñunta jaguiycur, wasinman cuticullaran. Marca-masincunata niran: 29 Yacu püsuçhu juc runa caycan. Imanuy-imanuy cawashallätapis llapanta willaramasha. Aywashun-llapa ricanayquipaj. ¿Manachuraj Tayta Diosninchi caçhamushan Washäcuj? nir. 30 Chaymi llapan runa Jesúsman aywaran. 31 Manaraj çhayaptillan, purïshijnincuna Jesústa niran: Tayta, micucurcuy, ari. 32 Jesúsna niran: Micuynï caycan. Jamcunam ichanga mana tantiyanquichu. 33 Purïshijnincunana quiquin-pura tapunacuran: ¿Piraj micuyta apapämusha? nir. 34 Jesúsna niran: Tayta Diosninchi caçhamasha. Chaymi shungun munashanta ruraptï, paçhäpis mana yarganchu. Paypa shiminta çharcur, sumaj cushicü. 35 Rimaypis purin: Murushanchipita çhuscu quillataräshi micuy pugun nir. Chaypis micuy jarwaraycan. Mä, sumaj ricaçhacuriy. May-may runacuna caycan. 36 Micuy shuntajcuna pägunta çhasquin. Shuntarcuptin, murujpis, shuntajpis sumaj cushicun. Chay-jina Tayta Diosninchipa shiminta willacujpis, runacunata tantiyachijpis sumaj cushicun: Shiminta çhasquicujcuna Tayta Diosninchi maquinçhu imaycamanpis cawanga nir. 37 Juc rimaypis purin: Jucshi murun. Jucshi shuntan nir. 38 Juc runacuna murupacur ñacasha. Jamcunata juc murushanman shuntaj caçhashcaj. Juc arucushallanman aywaj-aywanqui. 39 Chaura Samaria runacuna warmipa shiminta wiyar, Jesúsman yupachicuran. Warmi mayna nish caran: Imanuy-imanuy cawashallätapis llapanta willaramasha nir. 40 Chaynuypa Samaria runacuna çhayar, Jesústa niran: Tayta, juyapärishun, ari Chaymi ishcay junaj Jesús juyaran. 41 Chayçhu juyaptin quiquinpa shiminta wiyar, achcaj runa Jesúsman yupachicuran. 42 Chaymi Samaria warmita llapan runa niran: Canan mana shimillayquipitachu payman yupachicü. Manchäga rinrïwan quiquinpa shiminta wiyashcä. Chaymi Washäcuj cashanta musyä. Payga llapan runata washanga. 43 Samaria marcaçhu ishcay junaj juyapärir, Galilea quinranman Jesús cuticuran. 44 Pay nirunaj: Yurishan marcaçhu marca-masincuna Tayta Diosninchipa willacujnincunata pampaman çhuran. Ricaytapis mana munanchu. 45 Chaypis Galilea quinranman çhayaptin, runacuna cushish çhasquicäriran. Paycuna Pascua fiestaman aywar, Jerusalén marcaçhu Jesús ima-imata rurashantapis ricarunaj. 46 Yacuta bïnuman ticrachishan Caná marcaman Jesús çhayaran. Chayçhu juc Roma marcapita mandaj runa caycaran. Cafarnaún marcaçhu chay mandajpa wamran juyupa jishyaycaran. 47 Chaymi: Judea quinranpita Galilea quinranman Jesús çhayamusha niptin, taripaj aywaran. Çhayar, mañacuran: Tayta Jesús, wawäta allchacaycachipallämay, ari. Wasïman aywashun. Wawä wañuycan nir. 48 Jesúsna niran: ¿Yupachicamänayquipaj allchacächinätarächu munarcaycanqui? ¿Tayta Diosninchi camacächishanta camacächinätarächu shuyarcaycanqui? 49 Mandaj runam ichanga niran: Tayta, manaraj wamrä wañushancaman juclla aywashun. 50 Jesúsna niran: Cuticuyna. Wamrayqui allchacashana. Mandaj runana änir Jesúspa shiminman yupachicur, wasinpa cuticuran. 51 Çhayaycaptin, mincaynincuna tariparan: Wamrayqui allchacashana nir. 52 Mandaj runana tapuran: ¿Imay ürataj allchacasha? nir. Paycunana willaran: Janyan inti tumariycaptin, allchacasha nir. 53 Mandaj runana niran: Janyan caynuy üra: Wamrayqui allchacashana Jesús nimaran. Chaymi quiquin mandaj runapis, wasinpa Jesúsman yupachicuran. 54 Judea quinranpita cutircur, ishcay cutipa Galilea quinrançhu Jesús musyachicuran Tayta Diosninchipa maquinçhu cawashanta.
1 Chaypita unayllata Jerusalén marcaçhu fiesta caycaptin, Jesúspis aywaran. 2 Jerusalén marcapa puncunta jucta ricsiran: Uysha llucshinan puncu nir. Puncupa ñaupançhu armacuna püsu caycaran. Hebreo rimayçhu: Betesda nij. Püsuta çhuscu curidur tumaraycaran. Juc curidurna pullanta raquiran. 3 - 4 Curidurcunaçhu jishyaçhucunapis, japracunapis, wijrucunapis, cumllucashcunapis juturpaycaran. 5 Chayçhu juc runapis jitaraycaran. Payga quimsa çhunca pusajwan (38) watana jishyaycaran. 6 Unayna jishyashanta musyar, Jesús tapuran: ¿Allchacayta munanquimanchu? nir. 7 Jishyaçhu runana niran: Au, tayta, allchacayta munä. Ichanga anjil yacuta cuyuchiptin, mana pipis canchu yacuman yaycachimänanpaj. Imaypis yaycuyta munaptï, jucmi llalliraman. 8 Chaura Jesús niran: Jatariy. Mashtacuyquita shuntacurcur, aywacuyna. 9 Chaynuy niptin, allchacäcuran. Änir, mashacunta shuntacurcur, aywacuran. Allchacashan junaj diyawarda caran. Diyawardaçhu Israel runacuna mana ima aruytapis rurajchu. 10 Chaymi mayur Israel runacuna allchacaj runata piñacuran: Diyawarda caycaptin, mashtacuyqui aysash ama purinquimanchu nir. 11 Allchacaj runana niran: Allchacächimaj runa nimasha: Mashtacuyquita shuntacurcur, aywacuy. 12 Chaura mayur Israel runacuna tapuran: ¿Pitaj nishcashunqui: Mashtacuyquita shuntacurcur, aywacuy? 13 Allchacaraycachir juturaj runacunaman yaycurir, Jesús illaricäcuran. Chaymi allchacaj runa pï allchacächishantapis mana musyaranchu. 14 Mayllanta Tayta Diosninchipa wasinçhu allchacaj runawan Jesús tincuran. Tincur, niran: Allchacash caycar, juchata ama aparicuynachu. Yapay juchata rurar, imamanräshi çhayanquipäsi. 15 Allchacaj runa aywarcur, mayur Israel runacunata willaycuran: Jesús allchacächimasha nir. 16 Chaymi mayur Israel runacuna Jesústa chiquir jatiparan: Diyawardaçhu allchacächir arushanpita imamanpis çhayanman nir. 17 Jesúsmi ichanga chapacuran: Nuwapis, Papänïpis mana jamaräcushächu. Chaymi diyawarda captinpis, Tayta Diosninchi-ima runacunata yanapaycäshaj nir. 18 Chaura mayur Israel runacuna Jesústa wañurachiyta munaran: Diyawarda junajçhu cumllu runata allchacächisha. Jananmanpis: Tayta Diosninchipa Wawan caycä nir quiquin Tayta Diosninchiwan tincuchicuycan. 19 Chaura Jesús niran: Sumaj tantiyacunquiman. Tayta Diosninchipa Wawan car, Papänïpa shungun munashallanta rurä. Papänï shacyächimashallanta, ricacushalläta imatapis rurä. 20 Tayta Diosninchi shungunman tincuptï, llaquipäman. Shungun munashanta musyachiman. Mana cumllu runallatachu allchacächishaj. Manchäga mana ricashayquicunata ruraptï, tantiyacuyta mana atipanquipächu. 21 Tayta Diosninchi munayniyujmi wañushcunata cawarachinanpaj. Nuwapis, Wawan cashpä munayniyuj cä shungüman tincujcunata cawachinäpaj. 22 Llapan runa Tayta Diosninchipa maquinçhu cawan. Cananga wañuyman çhayachinäpäpis, cawachinäpäpis maquïman llapanta çhurasha. 23 Tayta Diosninchi munan quiquinta manchapacushan-jina nuwatapis manchapacamänanta. Quiquinmi caçhamasha. Chaymi pipis nuwata mana manchapacamar, Tayta Diosninchitapis mana manchapacunchu. 24 Sumaj tantiyacunquiman. Shimïta wiyajcuna Tayta Diosninchi caçhamashanta çhasquicur, mana ushyacaj cawayta tarishana. Tayta Diosninchi imaycamanpis cawachinga. Juchantapis mana jurgapanganachu wañuyman çhayachinanpaj. 25 Canan tantiyacunquiman. Tayta Diosninchita mana wiyacujcuna wañush-yupay caycan. Shimïta wiyar çhasquicamajcunatam ichanga Tayta Diosninchipa Wawan car, imaycamanpis cawachishaj. Cawachinä wichan çhayamushana. 26 Tayta Diosninchi cawachicujmi. Nuwapis Wawan car, cawachicuj cä. 27 Caçhan captï, llapan runata maquïman çhurasha cawachinäpäpis, wañuyman jitarpunäpäpis. 28 Ama mancharinquichu. Imay junajlla wañushcunapis shimïta wiyanga. 29 Pamparashanpita cawarimunga. Tayta Diosninchipa shungun munashanta rurajcuna maquinçhu imaycamanpis cawanga. Juchallaçhu arujcunam ichanga cawarimurpis, imay-imaypis ñacayllaman çhayanga. 30 Nuwa mana shungü munashallantachu rurä; manchäga Tayta Diosninchipa shungun munashanta. Quiquinmi caçhamasha. Paypa shiminta çharcur, waquin runata mana ushyacaj cawayta tarichishaj. Waquintana ñacayman jitarpushaj. 31 Tayta Diosninchi caçhamashanta mana shimilläpitachu rimä. Ishcay tistïgu caycaptinraj, çhasquicamanquiman. 32 Caçhan cashäta quiquin Tayta Diosninchipis musyachicuycan. Payga llullacuyta mana yaçhanchu. 33 Pï cashätapis musyanayquipaj Ushyachicuj Juanmanraj caçhacamushcanqui, ¿au? Payga rasullanta nuwapita willashcashunqui. 34 Rasunpa Tayta Diosninchipa caçhan caycä. Rasunpa cashäta musyachicunäpaj tistïguta mana ashïchu. Ima captinpis, Tayta Diosninchi washäshunayquipäpis, maquinçhu cawanayquipäpis Juan willapäcushanta yarpaycächij. 35 Ushyachicuj Juan achqui achicyashan-jina Tayta Diosninchipa shiminta willacur, shamunäta musyachicuran. Paywan tincur, jatunpa cushicupärishcanqui. 36 Tayta Diosninchi caçhamashanta mana Ushyachicuj Juanllachu musyachicun; manchä quiquin Tayta Diosninchipis musyachicuycan. Chaymi camacächiyninpa jishyaçhucunata allchacaycächï. Supaycunatapis jarguycä. Chayta ruranäpaj caçhamasha. 37 Caçhan cashäta quiquin Tayta Diosninchi musyachicusha. Jamcunam ichanga shiminta mana wiyashcanquichu. Quiquinwan mana ricanacushcanquichu. 38 Caçhamashanta mana çhasquicuptiqui, shiminpis shunguyquiman mana çhayanchu. 39 Jamcuna mana ushyacaj cawayta yarpar, Tayta Diosninchipa shiminta sumaj liguinqui. Paypa shimin sumaj nuwapita willacun. 40 Chaypis mana ushyacaj cawayta tarinayquipaj mana wiyacamanquichu. Manchä wasguircaycämanqui. 41 Runacunapa ricay ñawinçhu mana alli caytachu ashiycä. 42 Jamcunata musyapä. Mana llapan shunguyquiwanchu Tayta Diosninchita wiyacuycanqui. 43 Papänïpa Wawanmi caycä. Paypita shamushcä. Jamcunam ichanga mana çhasquicamanquichu. Juc runa shungun yarpashanta rimaptinmi ichanga, juclla çhasquicärinqui. 44 Quiquiqui-puralla alli ricanacuyta ashinqui. Tayta Diosninchiwan alli ricanacuytam ichanga imasi mana jucunquichu. Imasi mana jucurga, paypa shungun munashannuychu mana cawaycanqui. 45 Chaypis mana nuwachu Tayta Diosninchipa ñaupançhu juchayquita jurgapushayqui; manchä quiquin Moisésmi. Jamcuna: Moiséspa shiminta llapanta çharcushcä. Chaymi Tayta Diosninchi alli ñawinwan ricamanga nirpis, mana llap-llapantachu çharcushcanqui. Chaymi payga juchayquita jurgapushunquipaj. 46 Moiséspa shimin sumaj nuwapita riman. Chaymi Moiséspa shiminta çhasquiycar, nuwamanpis yupachicamanquiman. 47 Moiséspa shiminta mana çhasquicur, ¿imanuyparaj shimïman yupachicunquiman?
1 Chaypita Galilea püsuta Jesús chimparan. Galilea püsuta ricsij: Tiberíades püsu nir. 2 Tayta Diosninchi camacächiyninpa jishyaçhucunata allchacächiptin, achcaj runa Jesústa jatirpararan. 3 Paymi ichanga purïshijnincunallawan pataman jamaj aywacäriran. 4 Chay wichan Israel runacunapa Pascua fiestan çhayaycämuran. 5 Chaymi achcaj runa çhayajta ricar, Jesús niran: Felipe, ¿maypitaraj tantata rantimushun achcaj runapaj? 6 Shungunta musyapayta munar, yarparan: ¿Mä, imaningash Felipe? nir. Quiquinmi ichanga imata ruranantapis musyaranna. 7 Chaura tapuptin, Felipe niran: Ichic-ichicllatapis jarananchipaj ishcay paçhac (200) jurnalpa çhaninwanräçhi tantata rantish aypanga. 8 Simón Pedrupa wauguin Andrésna niran: 9 Juc wamra pichga sibäda tantatawan ishcay piscädullata charaycan. Chayllaga llapan runapaj mana aypangachu. Andréspis Jesústa purïshiran. 10 Jesúsna niran: Llapan runata jamachiy. Chaura runacuna pashpallaman jamacuran. Yupaptin, ullgulla pichga waranga-ima (5,000) caycaran. 11 Chaura Jesús tantata aptacurcur, niran: Taytallau Tayta, ima allish tarichillämashcanqui nir. Jinarcur tantatapis, piscädutatapis llapan runata aypuran. Runacunana puchupacushancaman micuran. 12 Runacuna puchupacushancaman micucurcuptin, purïshijnincunata Jesús niran: Puchupacushanta shuntay. Ama usuchishunchu. 13 Pichga sibäda tanta puchupacushanta shuntaptin, çhunca ishcaywan (12) canista juntataraj shuntaran. 14 Pichga tantata chay-chicajpaj aypächishanta ricacuycur, runacuna cushicuran: Payga Tayta Diosninchipa willacujnin canga. Ricarimunanta Moisés musyachicuran nir. 15 Chaynuy nir mayur mandaj cananpaj shuyninpa çhurayta munaran. Chayta musyar, Jesús quiquillan wichaypa witicuran. 16 Chacas-chacasna Jesúspa purïshijnincuna püsuman cutiran. 17 Jesúsmi ichanga mana çhayaranrächu. Chaypis purïshijnincuna bütiman jigarcur, chacashana Cafarnaún marcapa llucshicuran. 18 Yacu püsu wayra pücaptin, büchiypa-büchiycaran. 19 Juc lïwata aywarcaycashançhüna Jesús yacu jananpa taripaycajta ricaran. Chaymi llapan manchariran. 20 Jesúsmi ichanga niran: Ama manchacamaychu. Quiquïmi caycä. 21 Chaura bütiman jigachiyta munaran. Niycaptillan, büti Cafarnaún marcaman çhayaran. 22 Warannin tuta püsu cantullançhu pachacujcuna parlanacuran: Jucnayllataj büti caran, ¿au? Chay bütiwan Jesús mana aywashachu. Purïshijnincunalla chimparan nir. 23 Chaypita ishcay-quimsa büticuna Tiberíades marcapita çhayaran. Jesús tantata achcajpaj aypächishan quinrançhu içhicaycäriran. 24 Chaura Jesúspis, purïshijnincunapis mana çhayaptin, Cafarnaún marcaman ashij aywacäriran. 25 Tarir, Jesústa tapuran: Yaçhaj Tayta, ¿imaytaj shamushcanqui? nir. 26 Jesúsna niran: Sumaj tantiyacunquiman. Mana Tayta Diosninchipa maquinçhu cawashäta tantiyashpayquichu ashircaycämanqui; manchäga tanta-raycullarmi. 27 Paçhallayquita ama ashinquimanchu. Manchäga mana ushyacaj cawayta tarinayquipaj shimïta wiyacunquiman. Tayta Diosninchi alli ñawinpa ricamar, caçhamasha. Mana ushyacaypa cawachinäpaj pitapis maquïman çhurasha. 28 Chaura runacuna tapuran: Tayta, ¿imatataj ruräman Tayta Diosninchipa shungun munashanta ruranäpaj? nir. 29 Jesúsna niran: Tayta Diosninchi caçhamashanta çhasquicunayquita munan. 30 Chaura tapuran: Tayta Diosninchi caçhamushushayquita auninäpaj, munayniyuj cayniquitaraj mä, musyachicuy. Tayta Diosninchi camacächiyninpa mä, imatapis ruray. 31 Unay auquillunchicuna chaqui pacha quinrançhu manäta micuran. Moisés isquirbirashançhüpis nin: Tayta Diosninchi ricarachishan tantata micuran. 32 Chaura Jesús niran: Sumaj tantiyacunquiman. Mana Moiséschu janaj pacha tantata shicwachimusha; manchäga quiquin Papänï. Paymi cawachicuj tantata tarichishunqui. 33 Chay tantata janaj pachapita caçhamusha llapan runata cawachinanpaj. 34 Chaura runacuna niran: Chay tantata waran-waran jaraycallämay, ari. 35 Jesúsna niran: Cawachicuj tanta caycä. Tayta Diosninchipa caçhan cashäta çhasquicur, mana imaypis yarganquipächu. Yupachicamar, mana imaypis yacunanquipächu. 36 Jamcuna ricsimanqui. Tayta Diosninchi caçhamashantam ichanga mana auninquichu. 37 Alli ricashancunatam Tayta Diosninchi maquïçhu cawachinga. Pipis çhasquicamaptin, maquïçhu charäshaj. Mana wasguipäshächu. 38 Tayta Diosninchi caçhamasha mana quiquï yarpashäta ruranäpächu; manchäga quiquinpa shungun munashanta ruranäpaj. Chaypämi janaj pachapita shamushcä. 39 Tayta Diosninchi munashanta çharcunä camacan. Chaymi pipis maquïçhu cawar, mana jishpipämanmanchu. Manchäga ushyacay junajçhu llapanta cawarachimushaj. 40 Llapan runa mana ushyacaj cawayta tarinanta Papänï munan. Chaymi pipis musyapämar yupachicamarga, mana ushyacaj cawayta tarin. Ushyacay junajçhüpis Tayta Diosninchipa Wawan cashpä yupachicamajcunata cawarachimushaj. 41 Tincuchiypa rimar: Tayta Diosninchi caçhamashan tanta caycä niptin, Israel runacuna ullgucuycuran. Chaymi niran: 42 Payga Josépa wamran Jesúslla. Maman-taytan pï cashantapis ricsinchi. ¿Imanirtaj: Janaj pachapita shamushcä niycämanchi? 43 Chaura Jesús niran: Ama jamurpämaychu. 44 Tayta Diosninchi caçhamasha. Mana camacächiptin, pipis mana nuwaman yupachicungachu. Yupachicamajcunatam ichanga ushyacay junaj cawarachishaj. 45 Unay willacujcunapa shiminpis nin: Tayta Diosninchi llapan runata tantiyachinga. Chaymi Tayta Diosninchipa shiminta wiyar shungunman çhayaptin, nuwatapis çhasquicaman. 46 Mana pipis Tayta Diosninchita ricashachu. Paypita shamush carmi ichanga Tayta Diosninchiwan ricsinacü. 47 Sumaj tantiyacunquiman. Pipis nuwaman yupachicur, mana ushyacaj cawayta tarishana. 48 Chaypitam nishcä: Nuwa cawachicuj tanta caycä. 49 Unay auquilluyquicuna chaqui pacha quinrançhu manäta micurpis, wañuyta tariran. 50 Janaj pachapita shamuj tantata micujcunam ichanga mana ushyacaj cawayta tarin. 51 Nuwa cawachicuj tanta caycä. Janaj pachapita Tayta Diosninchi caçhamasha. Cay tantata micujcuna mana ushyacaj cawayta taringa. Tantapita rimarga, quiquïpaj rimaycä. Llapan runata cawachinä-raycur wañuyman çhayashaj. 52 Chaura Israel runacuna tincupänacuran: ¿Tantata micushanchi-jina quiquintaräçhi micushun? nir. 53 Jesúsna niran: Sumaj tantiyacunquiman. Tayta Diosninchi caçhamasha. Quiquïta mana micur, yawarnïta mana upur, wañush-yupay carcaycanqui. 54 Quiquïta micur, yawarnïta upur, Tayta Diosninchipa maquinçhu imaycamanpis cawarcaycanqui. Ushyacay junajçhüpis cawarachimushayqui. 55 Quiquïmi cawachicuj micuy caycä. Yawarnïpis cawachicuj yacu caycan. 56 Quiquïta micujcuna, yawarnïta upujcuna shungüwan tincun. Paycunawan alli ricanacü. 57 Tayta Diosninchi cawachicujmi. Payga caçhamasha. Paypita cawaycä. Chaymi çhasquicamajcunata quiquïta micuptin, cawachishaj. 58 Mä, sumaj tantiyacuy. Janaj pachapita Tayta Diosninchi caçhamasha. Chaymi: Cawachicuj tanta caycä nï. Unay auquilluyquicuna manäta micursi, wañuyman çhayaran. Çhasquicamajcunam ichanga mana ushyacaj cawayta taringa. 59 Cafarnaún marcapi shuntacäna wasiçhu Jesús llapantapis willapäcuran. 60 Chaura Jesúspa shiminta wiyar, waquin jatirajnincuna parlanacuran: Jesús imatash rimacullanpis. Mana tantiyanchichu nir. 61 Jamurpashanta musyar, Jesús niran: ¿Rimashä nanäshunquichu? 62 Tayta Diosninchi caçhamasha. Janaj pachaman cuticuptï, ¿imaninquimanraj? 63 Tayta Diosninchi Espíritu Santuwan cawachimanchi; mana runa-masinchichu. Cawachicuj Tayta Diosninchipa shiminta willapaycaj. 64 Chaypis waquinniqui mana aunimanquichu. Pï-pï çhasquicunantapis, pï wañuyman jitarpunantapis Jesús mayna musyaran. 65 Chaymi niran: Tayta Diosninchi camacächiptinraj, pipis yupachicamanga. 66 Chaura achcaj runa wasinman-caman cuticäriran. Jesústa mana purïshirannachu. 67 Achcaj runa aywacuptin, çhunca ishcaywan (12) purïshijnincunatapis niran: Munar, jamcunapis cuticunquiman. 68 Simón Pedruna niran: Tayta, nuwacuna jamllata wiyacushayqui. Imaycamanpis cawanäpaj willapämashcanqui. 69 Jamllaman yupachicü. Tayta Diosninchi caçhamushcashunqui. Acracushan Washäcujninmi canqui. 70 Chaura Jesús niran: Purïshimänayquipaj çhunca ishcaywanta acracushcaj. Chaypis jucniqui supaymi canqui. 71 Supaymi canqui nirga, Judaspaj rimaycaran. Paymi Simón Iscariotipa wamran caran. Judasga Jesústa wañuyman jitarpuran purïshinanpaj acracush caycaptinsi.
1 Chaypita-pacha Galilea quinrallançhu marcan-marcan Jesús puriran. Mayur Israel runacuna wañuchinanpaj ashiycaptin, Judea quinranman mana aywaranchu. 2 - 3 Tacma ruray fiesta çhayaycämuptin, wauguincuna Jesústa niran: Judea quinran Jerusalén marcaman fiestata ruraj aywanquiman. Tayta Diosninchipa maquinçhu purir, ima-imata rurashayquitapis llapan jatiräshujniquicuna ricanman. 4 Llapan runa ricsimänanchita munar, llapan ricay imatapis ruranchi. Runa captiqui, jamtapis llapan runa ricashunquiman. 5 Wauguincuna chaynuy niran Jesústa Tayta Diosninchi caçhamushanta mana çhasquicur. 6 Jesúsna niran: Mana aywashärächu. Tayta Diosninchi caçhamashanta mana musyachicümanrächu. Jamcunam ichanga juclla aywanquiman. 7 Pipis mana chiquishunquichu. Jucha aparicushanta jurgapaptïmi ichanga, chiquiman. 8 Jamcunalla fiestaman ayway. Aywanä mana camacanrächu. 9 Chaynuy nir Galilea quinranpita Jesús mana llucshiranrächu. 10 Wauguincuna fiestaman aywacuriptin, Jesúspis pacayllapa aywaran. Pitapis mana willaparanchu. 11 Fiestaçhu mayur Israel runacuna Jesústa ashiycaran: ¿Mayçhüraj chay runa jatiraycan? nir. 12 Pampa runacunapis Jesús-janan tincupänacurcaycaran. Waquin runa Jesúspaj niran: Pay alli runa. Waquinna niran: Mana. Runacunata pantaycächin. 13 Ichanga mayur Israel runacunata manchacushpan pacayllapa parlanacurcaycaran. 14 Pullan fiestaçhu caycaptinna, Tayta Diosninchipa wasinman Jesús aywaran. Willapäcuyta jallaycuran. 15 Yarpay-sapa cashanta tantiyar, mayur runacuna manchariran: Cay runa mana istudiash caycarçhi, llapanta musyan nir. 16 Jesúsna niran: Tayta Diosninchi caçhamasha. Paypa shiminta willapäcuycä; mana shungü munashallantachu. 17 Wiyacujcuna Tayta Diosninchipa shiminta willacushäta tantiyacunga. Mana umä yarpashallantachu rimaycä. 18 Shungun munashallanta willapäcujcuna quiquillan alli-tucun. Nuwam ichanga mana llullacüchu. Manchä Tayta Diosninchi yarpashallanta willapäcuycä. Payllata alliman çhurashun. 19 Taytacuna, Moiséspa shiminta çhasquicushcanqui, ¿au? Çhasquicush carga, ¿imanirtaj mana çharcunquichu? ¿Imapitataj wañuchimayta ashiycanqui? 20 Chaura runacuna japariran: ¿Piraj wañuchiyta munaycäshunqui? Supay pucllacushcashunqui nir. 21 Jesúsna niran: ¿Diyawardaçhu jishyaçhuta allchacächishalläpitachu wichaypa-uraypa rimarcaycanqui? 22 Mä, tantiyacushun. Moiséspa shiminçhu nin: Ullgu wamra yuriptin, pusaj junajyujllata jïrunqui. Chaymi jïrucuy junaj çhayamuptin diyawarda captinsi, jïruyçhu aruycanqui. Ullgu wamrata jïrunanpaj Tayta Diosninchi auquillunchi Abrahamta, Isaacta, Jacobta willaparan. Jipataraj Moisés yuriran. 23 Moiséspa shiminta çharcunayqui-cashan diyawardaçhüpis jïruyçhu aruycar, ¿imanirtaj diyawardaçhu jishyaçhu runata allchacächishäpita chiquircaycämanqui? 24 Imatapis sumaj mana tantiyar, ama rimacunquimanchu. Sumajraj tantiyacunquiman. 25 Waquin Jerusalén runacuna Jesúspaj parlaran: Mayur runacuna tagay runata wañuchiyta munarcaycan, ¿au? 26 Canan llapanpa ñaupançhu willapäcuptinsi, mana rimapanchu, ¿au? ¿Mayur runacunapis çhasquicushachuraj: Tayta Diosninchi caçhamushan Washäcuj nir? 27 Payga mana Washäcuj canmanchu; manchäga marca-masillanchi. Washäcuj shamuptinmi ichanga, maypita ricarimunantapis mana musyashunchu nir. 28 Chay wichan Tayta Diosninchipa wasinçhu Jesús willapäcuycaran. Chaymi runacuna wasguipashanta wiyar, wiyächipaypa niran: May marcaçhu yurishätapis, pï cashätapis musyanqui. Ichanga mana shungü munashanta rurarchu puriycä. Shiminta çharcushpan Tayta Diosninchi caçhamasha. Jamcuna Tayta Diosninchi pï cashantapis mana musyanquichu. 29 Nuwam ichanga ricsinacü. Paypita cawä. Quiquin caçhamasha. 30 Chaynuy niptin, runacuna ullgucäcuran. Rïsu charicurcuyta munaran. Tayta Diosninchim ichanga mana camacächiranchu. 31 Waquin runacuna Jesúspa shiminta çhasquicur, niran: ¿Jesús rurashanta lluta runa rurangachuraj? Mana. Payga Washäcujçhi canga. Tucuyta rurar, Tayta Diosninchipa maquinçhu purishanta musyachicun. 32 Runacuna parlanacushanta mayar, fariseucunapis, mayur cüracunapis ullgucurcuran. Tayta Diosninchipa wasinta täpajcunata niran: Jesústa rïsu chariy. 33 Jesúsna niran: Unayllaraj juyapärishun. Jinarcur caçhacamashanman cuticushaj. 34 Ashimashpayquipis mana tarimanquipächu. Mayman aywashämanpis mana çhayamunquipächu. 35 Chaura mayur runacuna tapunacuran: Mana tarinanchipaj, ¿mayparaj aywacunga? ¿Jucläçhu tiyaj marca-masinchicunamanchuraj willapaj aywanga? ¿Jäpa runacunatachuraj willapämunga? 36 ¿Imanirtaj nimanchi: Ashimashpayquipis mana tarimanquipächu. Mayman aywashämanpis mana çhayamunquipächu nir? 37 Tacma ruray fiestaçhu ushyanan junajraj jatun diya caran. Chay junaj llapan wiyananpaj tincuchiypa Jesús niran: Pipis yacunar, mañacamächun mishquilla upunanpaj. 38 Tayta Diosninchipa shiminpis nin: Nuwaman yupachicamajcuna mana yacunangachu. Nuwapita upuptin, quiquincunapita cawachicuj yacu pashtamunga. 39 Chaynuy tantiyachicur, tincuchiyllapa Espíritu Santupita rimaycaran. Ichanga Espíritu Santuta mana caçhamuranrächu. Jesús wañushanpita cawarcamur janaj pachaman cuticurraj, Espíritu Santuta caçhamunan caran. Caçhamuptinraj, Jesúsman yupachicujcunata Espíritu Santu maquinçhu purichinga. 40 Jesúspa shiminta wiyar, waquin runa niran: Jesús Tayta Diosninchipa willacujnin canga. 41 Waquinna niran: Payga Washäcuj canga. Waquinnam ichanga niran: Galilea marcapita Washäcujga mana yurimunmanchu, ¿au? 42 Tayta Diosninchipa shiminpis nin: Washäcujga unay mandaj Davidpa yawar-masillanpita yuringa. Paypa marcan Belén marca. 43 Runacuna Jesús-janan wichaypa-uraypa rimaran. Mayganinpis mana tantiyanacuranchu. 44 Chaymi waquin runa Jesústa chariyta munaran. Ichanga pipis mana yataparanchu. 45 Tayta Diosninchipa wasinta täpajcuna cutiptin, fariseucunawan mayur cüracuna tapuran: ¿Imanirtaj Jesústa mana charishcanquichu? nir. 46 Chaura täpajcuna niran: Payga rasunpa Tayta Diosninchipa shiminta willapäcun. Payman pipis mana tincunchu. 47 Fariseucunana niran: ¿Jamcunapis Jesúspa shiminta çhasquicurcushcanquiçhi? 48 Nuwacunam ichanga mayur cüra cashpä, fariseu cashpä imanillarpis mana çhasquicushächu. 49 Upa runacunalla paypa shiminta çhasquicun. Moiséspa shiminta pampaman çhurashanpita paycunata Tayta Diosninchi ñacayman çhayachinga. 50 Chaura chacaypa Jesúsman aywaj Nicodemo mayur Israel runa carpis, niran: 51 Moiséspa shimin nin: Pitapis ñacachinayquipaj juchantaraj sumaj ashinqui. Chaymi sumajraj tapupäshun. 52 Waquin fariseucunana niran: ¿Jampis Galilea marcapita Washäcuj ricarimunantachu riguinqui? Tayta Diosninchipa shiminta mä, sumaj liguiy. Willacujcunapis Galilea marcapita mana ricarimunmanchu. 53 Chaypita llapan runa wasinman-caman cuticäriran.
1 Jesúsmi ichanga Ulïbus puntaman aywacuran. 2 Warannin tuta-tutalla Jerusalén marcaman cutiran. Tayta Diosninchipa wasinçhu achcaj runawan tincur, sumaj willapäcuycaran. 3 Willapaycaptin, Moiséspa shiminta yaçhajcunawan fariseu runacuna juc warmita Jesúsman çhayachiran. Chay warmita runanta jananpachir, juc runawan cacuycajta tarirunaj. Çhayarcachir, llapanpa ricay ñawinçhu Jesústa niran: 4 Cay warmita jucwan cacuycajta tarishcä. 5 Moiséspa shimin nin: Majayuj caycar jucwan cacuptin, sajmaycällar wañuchinqui. ¿Imaninquitaj jam? 6 Paycuna achäquita ashillar tapuran. Chaymi Jesús pachaman uysucuycur, dïdunwan isquirbiran. 7 Yaparir-yaparir tapuptin, içhircur niran: Mayganiquipis juchaynaj cashpayqui mä, sajmay. 8 Chaynuy nir, yapay uysucuycuran. Pachaman isquirbiran. 9 Chaura Jesúspa shiminta wiyar, mayur runacuna aywacuran. Jipanta müsucunapis llucshicuran. Quiquillantana warmita jaguiycuran. 10 Içhircur, warmitana Jesús niran: Juchayquita ashijcuna aywacushana. 11 Warmina niran: Au. Aywacusha. Jesúsna niran: Nuwapis juchayquita mana ashipäshayquinachu. Canan wasiquiman cuticuy. Ichanga juchata ama aparicunquichu. 12 Juc cuti llapan runata Jesús niran: Cay pachapa achquinmi cä. Chaymi Tayta Diosninchipa shungun yarpashanta llapan runata musyachicuycä. Shimïta wiyacur, mana chacajçhu-jinachu juchaçhu cawanquipaj; manchäga achquiçhu-jina alli cawayta tarinquipaj. 13 Fariseucunana niran: Alli-tucuycanqui. Yangalla rimaycanqui. 14 Chaura Jesús niran: Rimashäta mana çhasquicuptiquisi, rasullanta rimaycä. Pipa maquinçhu cawashätapis, pï caçhamashätapis musyä; jamcunam ichanga mana. Maypita shamushätapis, mayman cuticushätapis mana musyanquichu. 15 Jamcuna ñawiqui ricashallanta: Alli, Mana alli ninqui. Pitapis ricapanqui; nuwam ichanga mana. 16 Pitapis: Alli, Mana alli niyta munar-imarga, rasun-cajta nishaj. Mana quiquilläpitachu imatapis rurä. Manchäga caçhamaj Papänï yanapäman llapantapis rasun-cajta ricanäpaj. 17 Jamcunapaj Moisés isquirbishanpis nin: Ishcaj tistïgu ricaptinraj, rasunpa cashan musyacan. 18 Pï cashätapis rasunpa cashan musyacänanpaj quiquïmi niycä. Caçhamaj Papänïpis musyacächin. 19 Chaura tapuran: Papäniqui, ¿mayçhütaj caycan? nir. Jesúsna niran: Jamcuna Papänïwanpis, nuwawanpis mana yaçhänacunquichu. Sumaj ricsinacuycaptinchi, Papänï pï cashantapis musyanquiman. 20 Jesús llapantapis willapäcuycaran Tayta Diosninchipa wasinçhu, cuyachicuycunata jutunan ñaupallanpi. Llapanpa ricay ñawinçhu willapäcuptinsi Tayta Diosninchi mana camacächiptinraj, Jesústa mana chariranrächu. 21 Jananmanpis Jesús niran: Tayta Diosninchi shuntacamanga; jamcunatam ichanga mana. Ashimarsi, mana tarimanquipächu. Juchata aparicushayquipita wañuyta tarinquipaj. 22 Chaura mayur Israel runacuna niran: Wañucuriyta yarparçhi: Mana tarimanquipächu niycan, ¿au? 23 Jesúsna niran: Jamcuna cay pachaçhu yurish car, shunguyqui munashallanta ruranqui. Janaj pachapita shamush carmi ichanga, Tayta Diosninchipa shungun munashallanta rurä. Jamcuna wañucujlla canqui; nuwam ichanga mana. 24 Chaymi nishcaj: Juchayqui aparicushalla wañunqui. Cawachicuj cashäta mana aunirga, wañuyllaman çhayanquipaj. 25 Chaura tapuran: ¿Pitaj canqui? nir. Jesúsna niran: Pï cashätapis mayna willashcaj. 26 Jucha-sapa cashayquipita sumajraj jurgapäman. Jamcunapita rimäman. Shimïta mana çhasquicuptiquisi, caçhamajpa shiminta wiyashpä llapantapis rasullanta rimä. Payga imatapis rasullanta rimaptin, llapan runata willapä. 27 Tayta Diosninchipa maquinçhu cawashanta Jesús tantiyachiptinsi, mayur runacuna mana tantiyacuranchu. 28 Chaura Jesús niran: Jugarachimaptinraj, Papänï caçhamashanta tantiyacunquipaj. Chayraj Washäcuj cashäta musyanquipaj. Papänï tantiyachimashallanta rimashäta, shungü munashallanta imatapis mana rimashäta tantiyacunquipaj. 29 Paypa maquinçhu cawä. Sumaj ricamar, mana caçharimanchu. Nuwapis shungun munashallanta imatapis rurä. 30 Chaynuy niptin, achcaj runa Jesústa çhasquicuran: Taytallau tayta, Washäcujmi canqui nir. 31 Shiminta çhasquicuj Israelcunata Jesús niran: Shimïta wiyacur, shungüman tincunqui. Maquïçhümi purinquipaj. 32 Çhasquicamaptiqui, jucpa maquinpita jurgushayqui Tayta Diosninchipa maquillançhu purinayquipaj. 33 Chaura Jesústa ticrapuran: Auquillunchi Abrahamta quiquin Tayta Diosninchi wamrachacuran. Abrahampa willcan carcaycä; mana jucpa uywayninchu. ¿Imanirtaj: Jucpa maquinpita jurgushayqui nimanqui? nir. 34 Jesúsna niran: Sumaj tantiyacunquiman. Pipis juchallaçhu arur, uyway jucpa maquinçhu cawashan-jina juchacachicuj supaypa maquinçhu cawan. 35 Uywayga mana wasiyujpa wamranchu. Wamranmi ichanga taytanpa wasinpita imaypis mana llucshinchu. 36 Chaymi Tayta Diosninchipa Wawan cashpä washaptij, supaypa maquinçhu mana cawanquipänachu. 37 Abrahampa willcan cashayquita musyä. Chaypis shimïta mana çhasquicunquichu. Manchäga wañuchimayta munarcaycanqui. 38 Papänï yaçhachimashallanta willapaycaj. Jamcunapis taytayqui yaçhachishushayquillata rurarcaycanqui. 39 Chaura niran: Abrahampa willcan carcaycä. Payga taytämi. Jesúsna niran: Rasuypa Abrahampa willcan cashpayqui Abraham-jina cawanquiman. 40 Jamcunam ichanga Tayta Diosninchipa shiminta willapaptijsi, wañuchimayta ashircaycanqui. Abraham mana imaypis wañuchicuranchu. 41 Taytayquiga jucmi. Taytayqui rurashan-jina rurarcaycanqui. Chaura paycuna niran: Mana jucpa churinchu cä. Tayta Diosninchipa wawanmi carcaycä. 42 Jesúsna niran: Tayta Diosninchipa wawan caycar, nuwatapis alli ñawiquipa ricamanquiman. Paymi caçhamasha. Mana shungü munashanta rurarchu puriycä. 43 Chaypis upa-tucur, shimïta mana çhasquicunquichu. Tantiyacuyta mana munar, willapashäta mana wiyacunquichu. 44 Llapantapis ruranqui supaypa maquinçhu cawar. Paymi taytayqui. Paypa shungun munashallanta imatapis rurarcaycanqui. Taytayqui supayga unaypita-pacha wañuchicuj. Llullacuj. Rasun-caj rimaytapis mana junchu. Llullacuyllata shungun yarpan. Llulla cashpan runacunatapis llullacachin. 45 Chaymi shimïta mana çhasquicunquichu. Rasunpa Tayta Diosninchipa shiminta willapaycaj. Paypa shimin rasullanta riman. 46 Ima juchatapis mana aparicushcächu. Munar, mä, mayganiquipis ashipämanquiman. Tayta Diosninchipa shiminta willacuptïsi, mana yupachicamanquichu. 47 Tayta Diosninchipa wawancuna shiminta cushish wiyacun. Jamcunam ichanga jucpa churin cashpayqui imasi mana jucunquichu. 48 Chaura chaynuy niptin, Israel runacuna Jesústa ashllir ushyaran: Samaria runapa churin canqui. Supay pucllacushcashunqui nir. 49 Jesúsna niran: Mana pucllacamashachu. Manchäga Papänïta alliman çhuraycä. Jamcunam ichanga pampaman çhuraycämanqui. 50 Pitapis mana mañacüchu: Alliman çhuramay nir. Tayta Diosninchim ichanga alliman çhuramänayquita munan. Paymi ima-imata rurashanchitapis jurgapämäshun. 51 Sumaj tantiyacunquiman. Shimïta wiyacujcuna wañuyman mana imaypis çhayangachu. 52 Chaura runacuna niran: Supay pucllacushcashunqui, ¿au? Auquillunchi Abrahampis, unay willacujcunapis llapanmi wañucuran. Chaypis niycanqui: Shimïta wiyacujcuna wañuyman mana imaypis çhayangachu. 53 Auquillunchi Abrahampis, unay willacujcunapis Tayta Diosninchipa shiminta sumaj-sumaj wiyacuran. Chaypis wañuyta tariran. Paycunata apärinayquipaj, ¿pitaj canqui? 54 -55 Jesúsna niran: Quiquillä alli-tucuptï, pipis mana alli ricamanmanchu. Papänïmi ichanga alliman çhuraycäman. Paypa maquinçhu cawä. Jamcunam ichanga: Tayta Diosninchita manchapacü nirpis, mana wiyacunquichu. Nuwam ichanga wiyacü. Wiyacü nir rasun-cajta rimaycä. Mana jamcuna-jinachu llullacuycä. 56 Auquilluyqui Abraham shamunäta musyar, jatunpa cushicuran. Ricamar, sumaj-sumaj cushicuran. 57 Chaura runacuna niran: Pichga çhunca (50) watatapis mana ushyanquirächu. ¿Imanuypataj auquillunchi Abrahamta ricsinquiman caran? 58 Jesúsna niran: Sumaj tantiyacunquiman. Abraham manaraj yuriptin, cawaycarä. Cawajmi cä. 59 Cawajmi cä niptin, runacuna sajmariyta munaran. Chaypis achcaj runapa çhaupinman yaycur, Jesús illaricäcuran. Tayta Diosninchipa wasinpita aywacuran.
1 Aywacuycashançhu yuriyninpita-pacha japra runata Jesús tariran. 2 Chaymi purïshijnincuna tapuran: Tayta Jesús, ¿imanirtaj cay runa japra yurisha? ¿Maman-taytan jucha-sapa cashanpitachu, quiquinpa juchanpitachu? nir. 3 Jesúsna niran: Mana quiquinpa juchanpitachu, mana maman-taytanpa juchanpitachu; manchäga Tayta Diosninchi munayniyuj cashanta runacuna musyananpämi. 4 Cay pachaçhu cashäcaman caçhamaj Tayta Diosninchipa shungun munashanta rurashun. Aywacuptï, ima ruraytapis mana camäpacunquipächu. 5 Cay pachaçhu cashäcaman achqui achicyashan-jina Tayta Diosninchipa shiminta willacuycäshaj. Shungun munashantapis ruraycäshaj. 6 Chaynuy nir Jesús tuwayllanwan mituta ruraran. Nircur japrapa ñawinta piçhuparan. 7 Piçhuparcur, niran: Siloé püsuman aywaycur, mayllacuy. Rimayninçhu: Siloé ninan: Caçhamusha ninanmi. Japra runana änir mayllacuran. Ñawinta mayllacurir, ricaycarna cuticuran. 8 Chaura bisïnuncuna, ricsinacushancuna niran: Tagay runa mañapacuj japra, ¿au? 9 Waquin niran: Au, paymi. Waquinna niran: Mana paychu. Ichanga pay-nirajmi. Quiquinna niran: Chay japra carä. 10 Chaura tapuran: ¿Imanuypataj ñawiqui quiçhacasha? nir. 11 Allchacaj runana niran: Mituwan ñawïta Jesús piçhupamasha. Jinarcur Siloé püsuçhu ñawïta mayllacunäpaj caçhamasha. Mayllacushallä ñawï quiçhacäcusha. 12 Chaura tapuran: ¿Mayçhütaj chay runa caycan? nir. Tapuptin, niran: Mana musyächu. 13 - 14 Mituta rurarcur japra runata Jesús allchacächishan junajga diyawarda caran. Chaymi chay runata fariseucunaman aparan. 15 Fariseucunana allchacaj runata tapuran imanuypa ñawin quiçhacashantapis. Tapuptin, niran: Ñawïta mituwan piçhupamasha. Mayllacuriptï, ricarä. 16 Fariseucunana niran: Chay allchacächij runa Tayta Diosninchita mana manchapacunchu. Diyawardaçhu allchacächir, juchaçhu aruycan. Waquincunana niran: Jucha-sapa caycar, ¿imanaypataj jishyaçhuta allchacächinman? Tayta Diosninchi jucha-sapata mana yanapanmanchu. Chaynuy nir quiquin-pura apaycaçhänacuran. 17 Chaura yapay tapuran: Ñawiquita quiçhaj runapaj, ¿imatataj yarpanqui? Tapuptin, niran: Tayta Diosninchipa willacujninmi canga. 18 Mayur Israel runacunam ichanga mana riguiranchu: Llullacuycanqui. Mana japrachu cashcanqui nir. Chaymi allchacaj runapa maman-taytanta jayarcachir, tapuran: 19 ¿Cay runa rasunpachu wamrayqui? ¿Rasunpachu japra yuriran? ¿Imanuypataj allchacasha? nir. 20 Chaura maman-taytan niran: Au, wamrämi. Rasunpa yurishanpita-pacha japra caran. 21 Ichanga imanuypa allchacashantapis, pï allchacächishantapis mana musyächu. Payga auquisna. Sumaj musyayta munar, quiquinta tapunquiman. 22 -23 Payga auquisna. Sumaj musyayta munar, quiquinta tapunquiman niran mayur runacunata manchacushpan. Mayur runacuna mayna parlanacuran: Pipis Jesústa: Washäcujninchi nir çhasquicuptin, shuntacäna wasipita jargushun. Ama ricalläshunpishchu nir. 24 Chaypis mayur runacuna ñawin quiçhacaj runata yapay tapuran: Tayta Diosninchi ricaycämanchim. Canan rasullanta willamay. Chay Jesús jucha-sapa cashanta musyä. 25 Chaura allchacaj runa niran: Jucha-sapa cashantapis, mana cashantapis mana musyächu. Japra captïpis, ñawï quiçhacashallanta musyä. Ricaycäna. 26 Chaypis yapayraj tapuran: ¿Imatataj rurasha ñawiqui quiçhacänanpaj? nir. 27 Chaura niran: Mayna willashcaj. Willaptijpis, mana riguinquichu. ¿Imanirtaj yaparir-yaparir tapupaycämanqui? ¿Jamcunapis Jesústachu jaticurcuyta munarcaycanqui? 28 Chaura ashllir mayur runacuna niran: Jucha-sapa runaman yupachicunqui. Jatiraycanquipis. Nuwacunam ichanga Moiséspa shimillanman yupachicü. 29 Payga Tayta Diosninchipa shiminta willacuran. Jesústam ichanga mana ricsillächu. Pipa wawanraj cacullanpis. 30 Allchacaj runana niran: ¿Imataraj rimacunquipis? Pipa wawan cashanta mana musyaptiquisi, paymi ñawïta quiçhasha. 31 Juchaçhu arujcunata Tayta Diosninchi mana yanapashanta musyanchi. Wiyacujcunallatam, manchapacujcunallatam yanapan. 32 Yuriyninpita-pacha japrata allchacächishanta imaypis mana wiyashcanchichu. 33 Chaymi Tayta Diosninchipa Wawan cashanta musyä. Manchäga imatapis mana ruranmanchu. 34 Chaura mayur runacuna niran: Yurishayquipita-pacha marca-pingay caycar, ¿piraj canqui piñapämänayquipaj? Shuntacäna wasipitapis jarguran: Ricaytapis mana munallajchu nir. 35 Allchacächishan runata jargushanta Jesúspis mayaran. Chaymi allchacaj runawan tincur, niran: ¿Tayta Diosninchi caçhamushan Washäcujman yupachicunquichu? nir. 36 Allchacaj runana niran: Au, tayta. Ichanga, ¿pitaj Washäcuj canga? 37 Jesúsna niran: Washäcujmi cä. Mayna ñawiquitapis quiçhashcä. 38 Chaura Jesúspa ñaupanman jungurpacuycur, alliman çhuraran: Jammanmi yupachicü, Tayta nir. 39 Jesúsna niran: Cay pachaman shamushcä llapan runapa shungunta musyapänäpaj. Tayta Diosninchipa maquinçhu cawananpaj japracunapa ñawinta quiçhashaj. Ricajcunapa ñawintam ichanga chapashaj. 40 Jesúspa shiminta wiyar, waquin fariseucuna niran: ¿Japraçhi carcaycä? 41 Jesúsna niran: Rasunpa japra caycar, mana juchayujchu canquiman. Ricaycämar mana aunimashayquipitam ichanga, juchayuj carcaycanqui.
1 - 2 Chaura Jesús niran: Sumaj tantiyacunquiman. Suwacunash, asaltanticunash chicuta wacman-cayman jiwirir, uyshaman yaycun. Uysha michijshi ichanga puncunpa yaycun. 3 Michijpa shiminta chicu täpajpis, uyshacunapis wiyanshi. Llapan uyshantapis jutinpa-caman jayan. 4 Chicupita jurgurir, uyshancunata jaticun. Uyshancunapis michijta ricsir, ñaupallantash aywan. 5 Mana ricsishcunatash ichanga manchacun. Jayaptinpis, jishpirshi aywacärin. 6 Tincuchiypa Jesús willapaptinsi, fariseucuna mana tantiyacuranchu. 7 Chaymi runata uyshawan tincuchir, Jesús niran: Sumaj tantiyacunquiman. Uyshapa chicunpa puncun-yupay caycä. Uyshacuna maquïçhu purin. 8 Ñaupata purijcuna michij-tucursi, suwa casha. Asaltanti casha. Chaymi uyshacuna mana wiyashachu. 9 Nuwaga puncu-yupay caycä. Uyshacuna maquïçhu puriptin, sumaj ricä. Pipis nuwaman yupachicur, Tayta Diosninchipa maquinçhu cawanga. Imapitapis washäshaj. Cawananpaj imatapis mana pishïchishächu. 10 Suwacuna suwacullar, uyshacunata wañuchillar purin. Nuwam ichanga llapaniquita alli cawayta tarichinajpaj shamushcä. Cushi-cushilla cawayta tarichishayqui. 11 Alli michij caycä. Llaquipäcuj cä. Llaquipäcuj michijga uyshancuna-raycur wañuytapis tarin. 12 Paytacushan uyshata michijcunam ichanga liyunta ricar, jishpir aywacärin. Quiquinpa uywan mana captin, caçhariycur aywacun. Chaura liyun uyshata apacun. Waquin uyshacuna wacpa-caypa jishpicärin. 13 Paytacushan michipacujpis jishpir aywacun. Uyshata liyun micuptinsi, mana imasi jucunchu. 14 Nuwam ichanga alli michij caycä. Uyshäcuna shimïta ricsin. Nuwapis llapanta ricsï. 15 Chay-jinapis Tayta Diosninchiwan sumaj ricsinacü. Chaymi uyshäcuna-raycur imamanpis çhayäman. 16 Uyshäcuna mana juc pachallaçhüchu caycan. Jucläçhüpis caycan. Paycunapis shimïta ricsinga. Imayllaga juc pachallaman llapanta shuntashaj. Nuwalla llapanta michishaj. 17 Uyshäcunata wañuy-caway llaquipaptï, Tayta Diosninchi sumaj llaquipäman. Wañuyta tarirsi, cawarishaj. 18 Mana pipis wañuchimangachu. Manchäga quiquïmi wañuymanpis aywapushaj. Wañuypis, cawaypis maquïçhu caycan. Papänï llapantapis maquïman çhurasha. 19 Chaura chaynuy niptin, Israelcuna yapay quiquin-pura apaycaçhänacuran. 20 Waquin niran: ¿Imapätaj Jesúspa shiminta wiyashunpis? Supay pucllacusha. Jishyayächisha. 21 Waquinna niran: Mana supaychu rimaycächin. ¿Yuriyninpita-pacha japrata supay allchacächinmanchuraj? 22 Jerusalén marcaçhu Tayta Diosninchipa wasinpa diyanta fiestata rurashan wichan sumaj jasay caran. 23 Paypa wasinçhu Salomónpa curidurnin nishan curidurçhu Jesús puriycaran. 24 Shuntacarcur, Israelcuna tapupäcuran: ¿Imaycamantaj yarpaçhacuyman çhuramanqui? Tayta Diosninchi caçhamushan Washäcuj caycar, juclla willamay nir. 25 Jesúsna niran: Mayna willashcaj. Willaptijpis, mana çhasquicunquichu. Papänï camacächiptin, jishyaçhucunata allchacächishäpis, runacunata jarashäpis Washäcuj cashäta musyacaycächin. 26 Jamcunam ichanga Tayta Diosninchita wasguipar, shimïta mana wiyacunquichu. Mana uyshächu canqui. 27 Uyshäcunam ichanga shimïta wiyacun. Paycunata ricsïmi. Jatishäpa aywan. 28 Mana ushyacaj cawaytapis tarichï. Ushyacayman imaypis mana çhayangachu. Maquïpita pipis mana jiçhumangachu. 29 -30 Papänïwan juc shungulla cawä. Payga llap-llapanpita mas munayniyujmi. Shimïta wiyacujcunata maquïman çhurasha ricanäpaj. Maquïçhu cawar, Papänïpa maquinçhüpis cawaycan. Chaymi Papänïpa maquinpita pipis mana jiçhungachu. 31 Chaynuy niptin, mayur Israel runacuna rumita chariran Jesústa sajmananpaj. 32 Jesúsna niran: Papänï camacächiptin, jishyaçhucunata allchacächishäta, supaycunata jargushäta, chay-chicaj runata jarashäta ricashcanqui, ¿au? Cananga, ¿allita rurashäpitachu wañuchimayta munarcaycanqui? 33 Mayur runacunana niran: Mana allita rurashayquipitachu wañuchishayqui; manchäga Tayta Diosninchita apärishayquipita. Runalla caycar, Tayta Diosninchi-tucuycanqui. 34 Jesúsna niran: ¿Shiminçhu Tayta Diosninchi manachu nin: Nuwa-jina carcaycanqui? 35 Unay wichan shiminta çhasquicuptin, Tayta Diosninchi niran: Nuwa-jina carcaycanqui. Paypa shiminta pipis juc-nirajman mana rucanmanchu. 36 Quiquinmi acracamasha. Cay pachaman caçhacamasha. Chaymi: Tayta Diosninchipa Wawan caycä niptï, ama ullgunquimanchu: Tayta Diosninchita apäriycan nir. 37 Imata rurashäpis Papänïpa shungunwan mana tincuptinmi ichanga, shimïtapis ama çhasquicunquimanchu. 38 Shimïta mana aunirpis Papänï camacächiptin, ima-imatapis rurashäta auninquiman. Camacächiyninpa jishyaçhucunatapis allchacächishcä. Supaycunatapis jargushcä. Runacunatapis jarashcä. Chaymi Papänïwan juc shungulla cawashäta tantiyacunquiman. 39 Chaura yapay Jesústa chariyta munaran. Chariyta munaptinsi, llucshir aywacuran. 40 Chaypita Juan ushyachicushan quinranman Jesús cuticuran. Ishcay-quimsa simäna Jordán mayu chimpançhu juyaran. 41 Chay-chicaj runa Jesústa çhayapuran. Paycuna quiquin-puralla ninacuran: Tayta Diosnillanchi camacächishancunata Ushyachicuj Juan mana ruraranchu. Jesúspaj rimashanmi ichanga llapanpis çharcucaycan. 42 Chaymi achcaj runa Jesústa çhasquicuran: Payga Tayta Diosninchi caçhamushan Washäcuj nir.
1 Betania marcaçhu Lázaro jutiyuj runa tiyaran. Juyupa jishyaycaran. Panin caran Maríawan Marta. 2 Maríaga Tayta Jesúspa çhaquinman pirjümita jaycapurir, ajchanwan chaquipush carunaj. 3 Chaura turin Lázaro juyupa jishyaptin, Maríawan Marta Jesúsman caçhacuran: Tayta, yaçhänacushayqui Lázaro juyupa jishyaycan nir. 4 Caçha willaptin, Jesús niran: Chay jishya Lázaruta mana wañuchingachu. Manchäga achäquilla canga Tayta Diosninchi munayniyuj cashantapis, nuwa munayniyuj cashätapis runacuna tantiyacunanpaj. 5 Jesúsga Lázaruwan, Martawan, Maríawan sumaj yaçhänacuran. 6 Chaypis: Lázaro jishyaycan nir willaptin, mana aywaranchu. Ishcay junajraj jinallançhu juyapäriran. 7 Ishcay junajpitaraj purïshijnincunata niran: Yapay Judea quinranman cutishun. 8 Paycunana niran: Tayta, janyancunarätaj sajmaypa wañuchiyta munashurayqui. ¿Imamantaj cutishun? 9 Jesúsna niran: Intipis juyayta achicyan. Achicyaptin junajpa purir, mana tacacunchichu. Chay-jina Tayta Diosninchipa maquinçhu purir, imamanpis mana çhayashunchu. 10 Chacaptinmi ichanga pipis purir, tacacun. Chay-jina shungun munashanta rurar, juchaçhu arujcuna ñacayta taringa. 11 Canan Judea quinranman aywananchi camacan. Yaçhänacushanchi Lázaro puñucäcusha. Ricchachij aywashun. 12 Purïshijnincunana niran: Tayta, puñucash caycar, allina riccharamunga, ¿au? 13 Lázaro puñucäcusha nir tincuycächiran: Wañush ninanta. Purïshijnincunam ichanga rasunpa puñucashallanta tantiyaran. 14 Chaymi Jesús niran: Lázaro wañusha. 15 Jishya wañuycachiptin, ima allish mana ricashcächu. Ima captinpis, aywashun ricaj. Canan munayniyuj cashäta ricar, llapan shunguyquiwan yupachicamanquiman. 16 Chaura Tomás niran: Nuwanchipis aywashun Jesúswan iwal wañunanchipaj. Tomásta: Milli nir ricsiran. 17 Betania marcaman çhayaycar, Lázaro çhuscu junaj pamparaycashanta mayaran. 18 Jerusalén marcapita Betania marcacaman pullan lïwalla caran. 19 Chaymi wañupacush captin, achcaj runa Martatawan Maríata yanagaj aywaran. 20 Jesús çhayaycashanta musyar, María mana llucshiranchu. Martam ichanga tariparan. 21 Jesústa niran: Juclla shamunquiman caran, Tayta. Turï mana wañunmanchu caran. 22 Ima captinpis, jamman yupachicü. Ima-imata mañacuptiquisi, Tayta Diosninchi wiyashushayquita musyä. 23 Jesúsna niran: Turiqui cawarimunga. 24 Martana niran: Cawarinanta musyä. Ichanga llapan wañushcuna cawarimunan junajçhüraj cawarimunga. 25 Jesúsna niran: Nuwaga cawarachicujmi cä. Wañushcunatapis cawarachïmi. Shimïta çhasquicujcuna wañurpis, cawarimunga. 26 Maquïçhu cawajcunata, çhasquicamajcunata imaysi mana caçharishächu. ¿Rasunpa yupachicamanquichu? 27 Chaura Marta niran: Aumi, Tayta. Tayta Diosninchipa Wawan canqui. Paymi cay pachaman caçhamushcashunqui. Washäcujmi canqui. 28 Jinarcur ñañan Maríaman cuticur, rinrillançhu willaran: Tayta Jesús çhayamushana. Jayaycäshunqui nir. 29 Chaura juclla María aywaran. 30 Jesúsmi ichanga marcaman manaraj çhayasharächu. Martawan tincushan pachallaçhüraj caycaran. 31 Wasinpita juclla María llucshiptin, yanagajcunapis jipanta aywaran: Wagajçhi pantyunman aywaycan nir. 32 Maríana Jesústa tariparcur ñaupanman jungurpacuycur, niran: Juclla shamunquiman caran, Tayta. Cayçhu caycaptiqui, turï mana wañunmanchu caran. 33 Maríapis, yanagajcunapis ataptin, Jesúspa shungunpis llaquicuywan ishquicäcuran. 34 Chaymi tapuran: ¿Mayninmantaj Lázaruta pampashcanqui? nir. Paycunana niran: Ricanayquipaj shamuy, Tayta. 35 Willaptin, Jesúspis wagaran. 36 Wagaptin, runacuna niran: Sumajçhari Lázaruwan yaçhänacuran. 37 Waquinna niran: Japra runatapis allchacaycachir, ¿manachuraj Lázarutapis allchacächinman caran? Wañuypita jishpichinman caran, ¿au? 38 Chaura pushaptin, Lázaro pamparashan chaga uçhcuman Jesús juyupa llaquish çhayaran. Uçhcuta jatun rumi chaparaycaran. 39 Jesúsna niran: Rumita witichiy. Martana niran: Tayta, turï çhuscu junajna pamparaycan. Asyariycannaçhi. 40 Jesúsna niran: Mayna willashcaj. Yupachicamar, Tayta Diosninchi munayniyuj cashanta ricanquipaj. 41 Chaura runacuna rumita witirachiran. Jesúsna janaj pachapa ricärir, wiyächipaypa niran: Papällau Papä, ima allish mañacushäta wiyamanqui. 42 Imaypis wiyamashayquita musyä. Caçhacamashayquitapis cay runacuna tantiyacunanta munä. 43 Nircur jayacuriran: Lázaro, llucshimuy nir. 44 Lázaruna uçhcupita llucshiramuran. Umanpis, maquinwan çhaquinpis pitush caran. Llucshiramuptin, Jesús niran: Pascapuy. Purichunna. 45 Lázaruta cawarachiptin, Maríata yanagaj Israel runacunapis achcajmi Jesúsman yupachicuran. 46 Waquin runam ichanga fariseucunaman aywaycur, Jesús imata rurashantapis willaran. 47 Chaura mayur Israel runacunapa sisyunninpaj llapan mayur cüracunapis, fariseucunapis shuntacaran: ¿Imatataj rurashun? Chay runa Tayta Diosnillanchi camacächishancunata ruraycan. Japracunatapis allchacächin. Jishyaçhucunatapis allchacächin. Wañushcunatapis cawarachin. 48 Chapata mana ruraptinchi, llapan runa Jesúsman yupachicunga. Yupachicuptin, Roma mandaj runa ullgucäcunga. Murucuncunata caçhamunga. Murucucunaga Tayta Diosninchipa wasinta juçhurachinga. Marca-masinchita-ima wañurachimäshun nir. 49 - 50 Mayur cüra Caifásna llapan mayur Israel runacunata piñaparan: Upam carcaycanqui. Imatapis mana tantiyacunquichu. Marca-masinchita-ima ama wañuchimäshuwanchu. Llapanchi-raycur juc runalla wañunman. Mayur cüra cashpan chay wata llapan cüra-masinta maquinçhu Caifás purichiran. 51 - 52 Payga mana yarpaypachu rimaran. Manchäga chay wata mayur cüra cashpan Tayta Diosninchi yarpächiptin, cüra-masinta shimiyaran. Llapan Israel runacunata washänan-raycur Jesús wañuyman çhayananta quiquin Tayta Diosninchi camacächiran. Ichanga mana Israel runacuna-raycurllachu wañuyman çhayanga; manchäga llapan runata washänan-raycur. Paycuna may-chayçhu juyarpis, Tayta Diosninchipa wawan cashpan maquinçhu cawanga. 53 Chay junajpita-pacha mayur Israel runacuna parlanacuran Jesústa wañuchinanpaj. 54 Chaymi marca-masincuna ricay Jesús mana puriranchu. Manchäga mana musyachicullar Efraím marcaman aywacuran. Efraím marcaga chunyaj pacha wajtallançhu caycaran. Chay quinrallançhu purïshijnincunawan juyaran. 55 Chay wichan Pascua fiesta çhayaycämuran. Chaymi wacpita-caypita Israel runacuna Jerusalén marcaman aywarcaycaran fiestapaj camaricuj. Camaricuran Tayta Diosninchi alli ricananta munar. 56 Jesústapis ashircaycaran. Chaymi Tayta Diosninchipa wasinçhüpis tapunacurcaycaran: ¿Fiestaman shamungachuraj, manachuraj? nir. 57 Fariseu runacunawan mayur cüracuna mayna runacunata nish caran: Mayçhüpis Jesústa ricar-imarga, juclla willaycamanqui charichinäpaj.
1 Pascua fiestapaj sujta junaj pishiycaptin, Betania marcaman purïshijnincunawan-ima Jesús aywaran. Chay marcaçhu Lázarupis tiyaran. Paytaga wañushanpita Jesús cawarachimush caran. 2 Jesús çhayaptin, micupacunanpaj yanucuran. Marta jaracuptin, Lázarupis Jesúswan-ima micurcaycaran. 3 Micurcaycaptin, María alli pirjümita çhayachiran. Tacshalla butïllan captinsi, sumaj çhaninyuj caran. Pirjümita Jesúspa çhaquinman jaycapurir, ajchanwan chaquichipuran. Wasi junta pirjümi asyacurcuran. 4 Chaura Jesústa wañuyman jitarpuj Judas Iscariote niran: 5 ¿Imapätaj alli cuyayllapaj pirjümita jiçhaycächinqui? Juc wata aruypa çhaninçhu ranticunman caran. Chay jillaywan wacchacunata, pishipacujcunata aypunman caran. Judas Iscariote Jesúspa purïshijnin caycarpis, 6 mana pishipacujcunata llaquiparchu rimaran; manchäga suwa carmi. Paymi Jesúspa tisurïrun caran. Ichanga wallca-wallcalla jillayta raquicurij. 7 Chaura Jesús niran: Pirjümita jiçhapämänanta ama miçhanquichu. Cawaycaptillä, pampacunäpaj armaycächiman. 8 Pishipacujcunatawan wacchacunata imaypis ricanquipaj. Nuwatam ichanga waran-waran mana ricamanquipächu. 9 Betania marcaçhu Jesús caycashanta mayar, chay-chicaj Israel runacuna aywaran. Mana Jesúsllamanchu aywaran; manchäga Lázarutapis ricäcuj. Payta Jesús cawarachish caran. 10 - 11 Lázaruta cawarachishanpita runacuna cüracunapa shiminta mana çhasquirannachu; manchäga Jesúspa shimillanta. Payllaman yupachicuran. Chaymi mayur cüracuna Lázarutapis, Jesústapis wañurachiyta munaran. 12 Warannin Jerusalén marcaçhu chay-chicaj runa fiestata rurananpaj caycashançhu Jesús çhayaycashantapis mayaran. 13 Mayar, runacuna palmapa üjanta cuchuran. Jesústa çhasquicuj llucshir, cushicushpan japarpararan: Taytallau Tayta, washaycallämay, ari. Tayta Diosninchi caçhamushan runa alli ricash caycullächun. Israel runacunapa mandajnin alli ricash caycullächun nir. 14 Jesúsna Tayta Diosninchipa shimin çharcucänanpaj mañacushan manta bürun muntash çhayaran. Tayta Diosninchipa shiminçhu isquirbiraycan: 15 Jerusalén marca runacuna, Ama manchariychu. Mandajniqui shaycämun. Manta bürullan muntash yaycaycämun nir. 16 Chay wichan purïshijnincunapis Jesús mandaj cashanta mana tantiyaranchu. Cawarircamur janaj pachaman aywacuptinraj, Jesús rurashancuna Tayta Diosninchipa shiminçhu isquirbishanwan tincushanta yarpäriran. 17 Lázaruta Jesús cawarachishanta ricajcunam ichanga willacur cushish purircaycaran: Wañush Lázaruta Jesús jayaptin, pamparaycashan uçhcupita cawaycaj llucshimuran nir. 18 Chaymi: Tayta Diosninchi sumaj Jesústa yanapan nir waquin runacunapis Jerusalén marcapita Jesústa çhasquij llucshiran. 19 Fariseucunam ichanga ninacuran: Llapan runa payman yupachicun. ¿Canan imatataj rurashun? ¿Pïnaraj nuwanchita alli ricamäshun? n ir. 20 Pascua fiesta caycaptin, jäpa runacunapis Jerusalén marcaman aywaran Tayta Diosninchita alliman çhuraj. 21 Jäpa runacuna Felipita niran: Jesústa ricsichimay, ari. Felipiga Galilea quinran Betsaida marcapita caran. 22 Felipina Andrésta willaran. Ishcaninna Jesústa willaran. 23 Willaptin, Jesús niran: Cananga Tayta Diosninchipa caçhan cashäta llapan runa musyanga. Llapanmi alliman çhuramanga. 24 Sumaj tantiyacunquiman. Rïgu murutash mana pampaptinchi, mana wiñamunchu. Murullash jitaräcun. Pampaptinchishi ichanga wañush-yupay captin, mamayrunta mana ricanchinachu. Wiñamurshi ichanga, atayar sumaj wayun. 25 Jamcunapis shunguyqui munashallanta rurar mana wiyacamar, ushyacayman çhayanquipaj. Shunguyqui munashanta jungaycur shimïta wiyacurmi ichanga, cay pachaçhüpis, janaj pachaçhüpis mana ushyacaypa cawanquipaj. 26 Maquïçhu cawayta munar, wiyacamar nuwa-jina cawanquiman. Wiyacamar, çhayashäman çhayanquipaj. Wiyacamaptiqui, Papänïpis alliçhu jurgushunquipaj. 27 Cananga juyupa llutäpacuycä. ¿Imataraj rurashaj? Papä, wañuypita washaycallämay niyta munarsi, mana nishächu. Papänïpa shungun munashallanta ruranäpaj cay pachaman shamushcä. 28 Chaymi Papänïta imaypis alliman çhurashaj. Chaura janaj pachapita nimuran: Munayniyuj cashäta mayna musyachicushcä. Yapaypis musyachicushämi. 29 Chayta wiyar, waquin juturajcuna niran: Räyu-imaçhi pashtamusha. Waquinna niran: Anjil-imaçhi rimamusha. 30 Jesúsna niran: Mana nuwatachu jayacamasha. Manchäga jamcunata jayacamusha sumaj tantiyacunayquipaj. 31 Canan llapan runapa shungunta Tayta Diosninchi musyapanga. Supayta jargunga. Cay pachaçhu mandaj cayninta jiçhunga. 32 Jugarachimaptin, janaj pachaman Tayta Diosninchi shuntacamaptin, camacächishaj llapan runa yupachicamänanpaj. 33 Jugarachimaptin nir imanuypapis rusçhu wañuyman çhayananta musyachicuycaran. 34 Runacunana niran: Tayta Diosninchipa shiminta isquirbir, Moisés niran: Washäcujga imaycamanpis cawanga. Jammi ichanga niycanqui: Tayta Diosninchipa caçhan captïsi, rusçhu jugarachimanga. ¿Pitaj canqui? Mä, Tayta Diosninchipa caçhamushan Washäcujpita tantiyachimay. 35 Jesúsna niran: Ishcay-quimsa junajlla ricanacushun. Achqui achicyashan-jina Tayta Diosninchipa shungun munashanta tantiyachishayqui. Chaymi shimïta sumaj wiyacunquiman. Manchä chacay çhayapushunquipaj. Chacaypa purijcuna imamanpis çhayashanta mana musyanchu. 36 Chaymi ricay ñawiquiçhu purishäcaman çhasquicamanquiman. Tayta Diosninchipis: Wawämi canqui nir alli ñawinwan ricashunquipaj. Willapäcuyta ushyariycur, Jesús aywacuran. Runacuna ricay mana puriranchu. 37 Chaura ricay ñawinçhu Tayta Diosninchi camacächiyninpa jishyaçhucunata allchacaycächiptinsi, wañushcunata cawariycachiptinsi, runacuna Jesúsman mana yupachicuranchu. Shiminta mana çhasquicuranchu. 38 Mana çhasquicuranchu unay willacuj Isaíaspa shimin çharcucänanpaj. Payga unay niran: Taytallau Tayta, shimiquita willaptïsi, ¿pillapis çhasquicushachuraj? Munayniyuj cashayquita musyachicuptiquisi, ¿yupachicushachuraj? 39 Chay-jina Jesúsmanpis mana yupachicuranchu. Isaíaspa shimin niycaran: 40 Runacunapa ñawinta Tayta Diosninchi japrayächisha. Shunguntapis chucruyächisha. Japrayächisha mana imatapis ricananpaj. Shunguntapis chucruyächisha mana imatapis tantiyacunanpaj. Jucha aparicushanpitapis mana wanacunanpaj camacächisha. Wanacuptinmi ichanga, Tayta Diosnin cashpan allchacächïman caran. 41 Unayga Jesús munayniyuj cashanta Isaíasta ricachiptin, rimash caran. 42 Achcaj runa Jesústa wasguipaptinsi, waquin Israel runacuna Jesúsman yupachicuran. Waquin mayur runacunapis Jesúspa shiminta wiyacuran. Ichanga shuntacäna wasipita jargunanta manchacur, runa wiyay mana rimacuranchu. 43 Paycuna Tayta Diosninchi alli ricananta munarsi, runa-masin alli ricanantaraj sumaj munaran. 44 Chaura wiyächipaypa Jesús niran: Pipis yupachicamar, Tayta Diosninchimanpis yupachicun. Paymi caçhamasha. 45 Ricamarpis, caçhamaj Tayta Diosninchitapis rican. 46 Achqui achicyashan-jina Tayta Diosninchipa shungun yarpashanta tantiyachicunäpaj shamushcä. Yupachicamajcuna Tayta Diosninchipa maquinçhu cawanga. Mana chacajçhu-jina supaypa maquinçhu cawanganachu. 47 Runacuna shimïta mana wiyacuptinsi, mana ñacayman çhayachinäpächu shamushcä; manchäga llap-llapanta washänäpämi. 48 Wasguimajcunam ichanga, shimïta mana çhasquicujcunam ichanga, quiquillanpita imamanpis çhayangapaj. Shimïta wiyacushanman-tupu ushyacay junajçhu juchanta jurgapash canga. 49 Mana umäpita jurgurcullarchu rimä; manchäga quiquin Tayta Diosninchipa shiminta. Paymi caçhamasha: Shimïta llap-llapanta willay nir. 50 Paypa shiminta wiyacuptinchi, mana ushyacaj cawayta tarichimanchi. Chaymi rimashäga Tayta Diosninchipa shimillan. Nimashannuylla willacuycä.
1 Pascua fiesta manaraj jallariptillan, wañuy janançhu caycashantapis, cay pachapita janaj pachaman Tayta Diosninchiwan tincuj aywanantapis Jesús mayna musyaycaran. Chaynuy captinpis purïshijnincunata sumaj llaquipar, mana caçhariranchu. 2 Chacanaycaptin, llapanwan jutucasha micupacunanpaj. Jesústa wañuyman jitarpunanpämi ichanga Simónpa wamran Judas Iscariotita supay yarpächiran. 3 Chaypis Jesús Papänin llap-llapanta maquinman çhurashanta musyaran. Chaynuypis janaj pachapita shamushanta, janaj pachaman Tayta Diosninchi shuntacunantapis musyaran. 4 Chaymi micupacuycashançhu Jesús jataricurcuran. Punchunta jurgurir, chijllanman jacuta watacurcuran. 5 Angarawan yacuta çhagarcur, purïshijnincunapa çhaquinta mayllapuran. Jinarcur watacushan jacuwan chaquichipuran. 6 Çhaquinta mayllapunanpaj çhayaptin, Simón Pedro niran: Tayta, çhaquïta ama mayllapamanquimanchu. Jucpa çhaquinta manacaj uyway runalla mayllapun. 7 Jesúsna niran: Imapaj rurashätapis mana tantiyanquirächu. Ichanga imayllapis tantiyacunquipaj. 8 Pedruna niran: Çhaquïta imaypis ama yatanquimanchu. Jesúsna niran: Sumaj tantiyacunquiman. Çhaquiquita mana mayllapuptï, mana purïshimanquinapishchu. 9 Chaura Simón Pedro niran: Tayta, çhaquilläta ama mayllapamaychu. Manchäga maquïtapis, umätapis mayllapamay. 10 Jesúsna niran: Chayraj armacushcuna mana janrachu. Chaymi çhaquillanta mayllacurin. Jamcunapis mana janrachu canqui. Chaypis jucniqui janraraj caycanqui. 11 Judas wañuyman jitarpunanta Jesús musyaran. Chaymi niran: Jucniqui janraraj caycanqui. 12 Purïshijnincunapa çhaquinta mayllapurir punchunta jaticurcur, Jesús jamacuycuran. Jinarcur tapuran: ¿Imanir çhaquiquita mayllapushätapis tantiyanquichu? 13 Yaçhaj tayta nimar: Taytallau Tayta nimar, allita rimaycanqui. Rasunpa Taytayqui cä. Yaçhajmi cä. 14 Taytayqui caycarsi, mayurniqui carsi, çhaquiquita mayllapuycaptij, nuwa-jina jamcunapis mayllapanacunquiman. 15 Ricacunayquipaj mayllapushcaj. Ricacamar, nuwa-jina cawanquiman. 16 Sumaj tantiyacunquiman. Uyway runa patrunninta manash apärinmanchu. Caçhapis caçhacujninta mana apärinmanchu. 17 Shimïta wiyashcanqui. Wiyashayquita çharcuptiqui, Tayta Diosninchipis sumaj yanapäshunquipaj. Sumaj cushicärinquipaj. 18 Chaypis llapaniquita ricsipaycaj. Shuyninpa acracushcaj. Jucniquipämi ichanga Tayta Diosninchipa shimin çharcucänanpaj nin: Jarashäta micujmi ticrapacarcamasha. 19 Canan llapanta willapaycaj. Cananllapita imamanpis çhayaptï, Cawachicuj cashäta ama junganquichu. 20 Sumaj tantiyacunquiman. Caçhäcunata çhasquicur, quiquïtapis çhasquicaman. Çhasquicamarga, Tayta Diosninchitapis çhasquicuycan. Paymi caçhamasha. 21 Chaynuy nir shungun ishquicäcuptin, purïshijnincunata Jesús niran: Sumaj tantiyacunquiman. Mayganiquipis ticrapamar, wañuyman jitarpamanquipaj. 22 Chaura mayganin cashantapis mana musyashpan jucnin-jucnin ricapänacuran. 23 Juc purïshijninga yaçhänacushan cashpan Jesúswan jaganacushalla jamaraycaran. 24 Chaymi payta Simón Pedro tapuran: ¿Piraj jitarpuj runa, au? Mä, Jesústa tapushun nir. 25 Yaçhänacushan purïshijninna jagaycur, Jesústa tapuran: Tayta, ¿mayganïtaj wañuyman jitarpushayqui? nir. 26 Jesúsna niran: Tantata paquircur ushmarcachir mallichishä runa canga. Chaynuy nir tantata paquircur ushmarcachir, Simónpa wamran Judas Iscariotita mallichiran. 27 Tantata çhasquircuptillan, Supay charicurcuran. Jesúsna niran: Judas, yarpaycashayquita juclla ruranquiman. 28 Jesús rimashanta maygan purïshijninpis mana tantiyaranchu. 29 Waquin yarparan: Judas tisurïru captinçhi, Pascua fiestapaj rantipacuj caçhaycan. Manchäga pishipacujcunata jillayta aypunanpäçhi caçhaycan nir. 30 Judasna Jesús macyashan tantata micucurcur, juclla llucshicuran. Pachapis chacashana caycaran. 31 - 32 Judas aywacuptin, waquin purïshijnincunata Jesús niran: Cananga Tayta Diosninchi alliman çhuramanga. Runacunata washänä-raycur wañuptïsi, Tayta Diosninchi cawarachimanga. Chaynuypa Tayta Diosninchi caçhamashantapis, munayniyuj cashantapis runacuna tantiyacunga. Allimanpis çhuranga. Manasi aycällatana Tayta Diosninchi llapantapis camacächinga. 33 Wawacuna, mana ricamanquipänachu. Mayur Israel runacunata willashä-jina ashimarsi, mana tarimanquipänachu. Aywashäman mana çhayamunquipächu. 34 Chaymi shimïta ama junganquichu. Llaquipäshaj-jina, jamcunapis llaquipänacärinqui, ari. 35 Llaquipänacuptiqui, maquïçhu cawashayquita llapan runa tantiyacunga. 36 Chaura Simón Pedro tapuran: Tayta, ¿maymantaj aywacunqui? nir. Jesúsna niran: Aywashäman mana aywanquipärächu. Juc junajmi ichanga çhayamunquipaj. 37 Pedruna niran: Tayta, ¿imanirtaj mana aywäshijmanchu? Purïshinaj-raycur jina wañuymanpis çhayäman. 38 Jesúsna niran: ¿Rasunpachuraj nuwa-janan wañuymanpis çhayanquiman? Sumaj tantiyacunquiman. Mana ricsij tucumanquipächu. Gällu mana cantaptillan, quimsa cutiparaj wasguimanquipaj.
1 Chaypita purïshijnincunata Jesús niran: Alläpa ama llaquicunquichu-llapa. Manchäga Tayta Diosninchimanpis, nuwamanpis yupachicunquiman. 2 Papänïpa wasin jatun-caray. Juyänanchipaj aypan. Chaymi camarij aywashaj. Wasin mana aypaptin: Camarij aywashaj mana nijmanchu. 3 Camaricuriycur, pushanajpaj cutimushaj. Papänïpa wasinçhu llapanchi cawashunpaj. 4 Maypa aywanätapis mayna musyanqui. 5 Chaynuy niptin, Tomás niran: Maypa aywanayquitapis mana musyar, ¿imanuypataj shamüman? 6 Jesúsna niran: Nuwalla Tayta Diosninchipa shungun yarpashanta willapashcaj. Imaycamanpis cawachishayqui. Tayta Diosninchimanpis çhayachishayqui. Mana yupachicamarmi ichanga, Tayta Diosninchipa ñaupanmanpis mana çhayanquipächu. 7 Shungüwan tincur, Tayta Diosninchipa shungunwanpis tincunqui. Cananpita-pacha quiquin Tayta Diosninchiwan yaçhänacuycanqui. Mayna ricashcanquipis. 8 Felipina niran: Tayta Diosninchita ricachimay, ari. Ricsiyta munarcaycä. 9 Jesúsna niran: Unay juyaycaptinchichu, ¿shungüta mana musyapanquichu? Shungüta musyapar, Tayta Diosninchipa shunguntapis musyapanqui. Chaymi ama nimanquimanchu: Tayta Diosninchita ricsichimay. 10 Tayta Diosninchiwan juc shungulla cawashäta çhasquicushcanqui, ¿au? Chaypis mana yarpashallätachu rimä; manchäga Tayta Diosninchipa shungun yarpashallanta. Chayraj Tayta Diosninchi camacächishancunatapis tantiyacunquipaj. 11 Chaymi Tayta Diosninchiwan juc shungulla cawashäta çhasquicunquiman. Shimïta mana çhasquicursi ima-imata rurashäcunata ricar, çhasquicamanquiman. Tayta Diosninchi camacächiptin, jishyaçhucunata allchacächishcä. Supaycunata jargushcä. Chay-chicaj runata jarashcä. Wañushcunata cawarachishcä. Chaymi ima-imata rurashäcunata ricaycar, shimïtapis çhasquicunquiman. 12 Sumaj tantiyacunquiman. Tayta Diosninchiwan iwal juyäshaj. Yupachicamaptiqui, shungun munashanta ruranäpaj camacächishan-jina jamcunapis ruranayquipaj camacächinga. Nuwa-jina jishyaçhucunata allchacächinquipaj. Supaycunata jargunquipaj. Chay-chicaj runata jaranquipaj. Wañushcunata cawarachinquipaj. Runacuna Tayta Diosninchipa maquinçhu cawananpaj may-chayçhüpis nuwapita willapanquipaj. Tayta Diosninchi camacächiptin, tucuyta ruranquipaj. 13 Yupachicamashayqui-janan imatapis mañacamaptiqui, Wawan cashpä camacächishaj. Chayta rurar, Tayta Diosninchitapis alliçhu jurgü. 14 Shungü munashanta ruraptiqui ima-imata mañacamaptiquipis, wiyashayqui. 15 Llapan shunguyquiwan manchapacamar, shimïtapis sumaj wiyacunquiman. 16 Espíritu Santu yanagäshunayquipaj Tayta Diosninchita mañacushaj. Payga Espíritu Santuta caçhamunga imaypis yanagäshunayquipaj. 17 Espíritu Santuga Tayta Diosninchipa shungun yarpashanta tantiyachishunquipaj. Tayta Diosninchipa maquinçhu mana cawajcunam ichanga Espíritu Santu pï cashantapis mana musyanchu. Mana çhasquicunpishchu. Espíritu Santupis paycunata mana yanaganchu. Jamcunam ichanga Espíritu Santuta çhasquicushcanqui. Maquinçhüpis cawanqui. Paypis imaycamansi yanagäshunqui. 18 Mana wacchata-jina jaguishayquichu. Yanagänajpaj cutimushaj. 19 Tayta Diosninchipa maquinçhu mana cawajcuna imaypis mana ricamangapächu. Jamcunawanmi ichanga ricanacuycäshunpaj. Wañurpis, cawarimushaj. Wañuptiquipis, cawarachishayqui. 20 Papänï cawarachimaptin, paywan juc shungulla cawashäta, jamcunawanpis juc shungulla cawashäta tantiyacunquipaj. 21 Çhasquicamajcuna manchapacamashpan shimïta wiyacunga. Shimïta wiyacujcunata Papänïpis sumaj llaquipanga. Llaquipashpä nuwapis yanagäshaj. 22 Chaura allicaj Judas tapuran: Tayta, ¿imanirtaj nuwacunallata yanagämanquipaj; waquinta mana? nir. 23 Jesúsna niran: Çhasquicamajcuna manchapacamar, shimïtapis wiyacun. Chaymi Papänï-ima maquïçhu purichishaj. Llaquipashpä iwal cawäshishaj. 24 Wasguimajcunam ichanga mana manchapacamar shimïtapis mana wiyacunchu. Willapäcushäga mana umällapitachu. Manchäga: Shimïta llapanta willanqui nir quiquin Tayta Diosninchi caçhamasha. 25 Ricay ñawiquiçhu puriycällar, llapantapis willapashcaj. 26 Aywacuptï, Tayta Diosninchi Espíritu Santuta caçhamunga. Paymi yanagäshunquipaj. Shimïtapis llapanta yarpächishunquipaj. Pishïshushayquitapis tantiyachishunquipaj. 27 Runacuna alli cawayta ashirpis, quiquinpita mana tarinchu. Nuwam ichanga alli cawayman çhayachishayqui. Allilla juyaycullay, ari. Ima captinpis, ama llaquicunquichu. Ama manchacunquichu. 28 Aywacunäta mayna willashcaj. Chaypis jamcuna-raycur cutimushaj. Rasunpa manchapacamarga, shacya-shacyalla shuyämanquiman. Tayta Diosninchiman cuticushaj. Paypa maquinçhu cawä. 29 Llapantapis willapaycaj aywacuptï, sumaj yupachicamänayquipaj. 30 Alläpa ama rimashunnachu. Supay jananchiçhüna. Cay pachaçhu paymi munayniyuj. Ichanga mana içhipamangachu. 31 Imaman çhayarpis, Papänïpa shiminta çharcüman. Chayräçhi llapan runa Papänïta llaquishäta, shiminta wiyacushäta musyanga. Cananga aywacushun. Jatariy-llapa.
1 Chaypita tincuchiypa willapar Jesús niran: Übas yüra cä. Papänï sumaj ricaman. 2 Callapäcuna mana wayuptin, llaumarin. Wayuptinmi ichanga pichan sumaj wayunanpaj. 3 Jamcuna shimïta wiyacur, pichash wayuj übas-jina cawarcaycanqui. 4 Maquïçhu cawaptiqui, mana caçharishayquichu. Juc callapa yüraman mana tanarar, mana wayunmanchu. Chay-jina jamcunapis nuwaman mana tanarämar, Tayta Diosninchipa shungun munashannuy cawayta mana camäpacunquipächu. 5 Übas yüra cä. Jamcunana callapä canqui. Nuwaman tanarämar, callapäcunapis sumaj alli. Yata cawarmi ichanga, ima ruraytapis mana camäpacunquipächu. 6 Shimïta mana wiyacuptiqui, mana wayuj callapata-jina Tayta Diosninchi llaumashunquipaj. Mana wayuj callapata llaumarin. Chaquiptin shuntarcur, ninaçhu ruparachin. 7 Maquïçhu cawaptiqui, shimïta wiyacuptiqui, Tayta Diosninchipis llapan mañacushayquita tarichishunquipaj. 8 Shimïta wiyacur, manchapacur cawar, Papänïta alliçhu jurgunqui. Chaynuypa maquïçhu cawashayquita musyacanga. 9 Papänï alli ricamashan-jina jamcunatapis alli ricashayqui. Maquïçhu cawaptiqui, alli ñawïwan ricashayqui. Yaçhänacushunpaj. 10 Shimïta wiyacuptiqui llaquipar, mana caçharishayquichu. Papänïpis shiminta wiyacuptï, llaquimar mana caçharimanchu. 11 Llapantapis willapaycaj nuwa-jina shacya-shacyalla cawanayquipaj. Shunguyquipis achicyacäcungapaj. 12 Ichanga ama junganquimanchu. Llaquipäshaj-jina jucniqui-jucniquipis llaquipänacärinquiman. 13 Tantiyacunquiman. Pipis rasunpa llaquipäcuyta yaçhar, yaçhänacushanta yanapänan-cashan wañuymanpis çhayan. 14 Shimïta wiyacuptiqui, yaçhänacunchi. 15 Mana uyway runachu carcaycanqui. Manchäga sumaj yaçhänacunchi. Uyway runata imata yarpashanchitapis mana willanchichu. Jamcunatam ichanga imallata Papänï nimashantapis willashcaj. 16 Mana quiquillayquipitachu çhasquicamashcanqui. Manchäga quiquïmi camacächishcä. Canan übas alli wayushan-jina allita rurar cawanqui, ari. Alli cawashayquita ricacur waquincunapis çhasquicamar, mana yamacällar alli cawanga. Chaymi yupachicamashayqui-janan ima-imata mañacuptiquisi, Papänï wiyashunquipaj. 17 Shimïta ama jungaychu. Jucniqui-jucniquipis sumaj llaquipänacäriy. 18 Runacuna chiquimashan-jina jamcunatapis chiquishunquipaj. 19 Juchata aparicushan-jina cawaptiquim ichanga, alli ñawinpa ricashunquipaj. Jamcunatam ichanga wamrachacushcaj. Chaypita juchaçhu arujcuna chiquishunqui. 20 Nishajta ama junganquichu. Uyway runa patrunninta manash apärinmanchu. Chaymi maquïçhu purishayquipita waquin runa chiquir jaticaçhäshunquipaj. Nuwatapis jaticaçhaycäman. Waquin runam ichanga shimïta wiyacushan-jina shimiquitapis wiyacunga. 21 Purïshimashayquipita chiquijcuna chiquishunquipaj. Paycunaga caçhamajnïpa shungunta mana musyanchu. 22 Cay pachaman shamur, Tayta Diosninchipa shungun munashanta willapashcä. Shimïta wasguirmi ichanga, runacuna juchata aparicun. Paycuna mana chapacunmanchu: Tayta Diosninchipa shiminta mana imaysi wiyashcächu nir. 23 Pipis chiquimar, Papänïtapis chiquin. 24 Cay pachaman shamuptï, jishyaçhucunata allchacächishäta, supaycunata jargushäta, chay-chicajta jarashäta, wañushcunata cawarachishäta ricasha. Ricaycarpis, mana çhasquicamashachu. Chaymi juchayuj ricarisha. Jananmanpis chiquiman. Papänïtapis chiquin. 25 Llapanpis camacaycan Moiséspa shimin çharcucänanpaj. Paypa shimin nin: Juchaynaj caycaptïsi, chiquimasha. 26 Ima captinpis, Tayta Diosninchipita Espíritu Santuta caçhamushaj yanagäshunayquipaj. Payga Tayta Diosninchipita caycar, shungun yarpashantapis musyachishunquipaj. Nuwapitapis tantiyachishunquipaj. 27 Chay-jina jamcunapis waquin runacunata nuwapita willapäcunqui. Unaypita-pacha purïshimashcanqui.
1 Wawacuna, runacuna chiquishuptiquisi, mana yamacällar yupachicamanquiman. Llapanta sumaj willapaycaj mana wasguimänayquipaj. 2 Chiqui runacuna shuntacäna wasicunapitapis jargushunquipaj. Wañuchishushpayquipis ninga: Tayta Diosninchipa ricay ñawinçhu allita ruraycä. 3 Ichanga Tayta Diosninchi pï cashantapis, pï cashätapis mana musyashpan llapanta ruranga. 4 Rimashäman çhayar, yarpänayquipaj llapanta willapaycaj. Ñaupata iwal purishpanchi mana willaparajchu. 5 Cananga caçhamajnïman cuticushaj. Chaypis mayganiquipis mana tapumanquirächu: ¿Maymantaj aywanqui? nir. 6 Shimïta wiyar, ¿imanirtaj llaquish mayarpaycanqui? 7 Sumaj tantiyacunquiman. Allipaj aywacushaj. Aywacur, Espíritu Santuta caçhamushaj yanagäshunayquipaj. Manchäga mana shamungapächu. 8 Paymi llapan ricay tantiyachinga ima jucha cashantapis, pï juchaynaj cashantapis, pï imaman çhayanantapis. 9 ¿Imataj jucha? Juchaga nuwaman mana yupachicuy. 10 ¿Pitaj juchaynaj? Juchaynajga quiquillä cä. Cananga Papänïman aywacushaj. Mana ricamanquipänachu. 11 ¿Pitataj imamanpis çhayachisha? Cay pachaçhu mayur supay ñacananpäga mayna Tayta Diosninchi camacächisha. 12 Achcaraj caycan willapänajpaj. Ichanga tantiyacuyta mana atipanquirächu. 13 Espíritu Santu shamurmi ichanga, Tayta Diosninchi ima-imata yarpashantapis, camacächinantapis tantiyachishunquipaj. Mana quiquinpa yarpayllanpitachu tantiyachishunquipaj; manchäga Tayta Diosninchipita wiyashallanta. 14 Espíritu Santu alliçhu jurgamanga. Shimïta wiyar, musyachishunquipaj. 15 Tayta Diosninchiwan juc shungulla cawä. Chaymi nishcä: Shimïta wiyar, musyachishunquipaj. 16 Manasi aycällata aywacushaj. Mana ricamanquipänachu. Ichanga manasi aycällata cutimuptï, yapay ricamanquipaj. 17 Chaura purïshijnincuna tapunacuran: ¿Imatataj rimaycan: Manasi aycällata mana ricamanquipächu. Ichanga manasi aycällata yapay ricamanquipaj nir? ¿Imanirtaj: Papänïman aywacushaj niycan? 18 ¿Imanirtaj: Manasi aycällata cutimushaj nimanchi? Imata rimashantapis mana tantiyanchichu nir. 19 Yarpaçhacurir tapucuyta munashanta musyar, Jesús niran: ¿Cananpita manasi aycällata mana ricamanquipächu. Chaypita manasi aycällata yapay tincushunpaj nishäpitachu tapunacurcaycanqui? 20 Sumaj tantiyacunquiman. Llaquimashpayqui wagaptiquisi, ataptiquisi, mana çhasquicamajcuna jatunpa cushicunga. Yapay tincuptinchim ichanga, atash caycarpis, jatunpa cushicunquipaj. 21 Warmipis nanay chariptin, llaquicuywan atan. Jishyacurirmi ichanga, jatunpa cushicun: Ima allish wawäta tarishcä nir. Nanashantapis mana yarparannachu. 22 Chay-jina aywacuptï, jamcunapa shunguyquipis sumaj nananga. Yapay tincuptinchim ichanga, shunguyquipis jatunpa cushicunga. Pipis mana llaquicuyman çhurashunquipänachu. 23 Tincuptinchi, imatapis mana tapumanquipänachu. Sumaj tantiyacunquiman. Yupachicamashayqui-janan mañacuptiqui, Tayta Diosninchi imatapis tarichishunquipaj. 24 Yupachicamashayqui-janan mana imatapis mañacushcanquirächu. Mä, mañacuy. Mañacur, çhasquinqui. Chayraj jatunpa cushicunquipaj. 25 Tincuchiyllapa willapashcaj. Cananmi ichanga Tayta Diosninchipita llap-llapanta tantiyachishayqui. 26 Tincushanchi junaj mana jayarämanquipänachu. Yupachicamashayqui-janan quiquiquicunana Tayta Diosninchita mañacunquipaj. 27 Payga llaquipäshunqui çhasquicamashayquipita, paypita shamushäta yupachicushayquipita. 28 Paypita shamushcä. Paymi cay pachaman shamunäpaj camacächisha. Cananga janaj pachaman cuticushaj. Tayta Diosninchiwan cawashaj. 29 Chaura purïshijnincuna niran: Cananmi ichanga mana chapacullar willacuycanqui. Tincuchipayllapa mana rimanquinachu. 30 Runacuna yarpashantapis musyanqui. Llapanta tantiyanqui. Chaymi mana tapupajmanchu. Manchäga Tayta Diosninchipita shamushayquita çhasquicüna. 31 Jesúsna niran: ¿Rasunpachu çhasquicamanqui? 32 Manasi aycällata llapaniqui wasiquiman-caman jishpicärinquipaj. Japalläta jaguiycamanquipaj. Tayta Diosninchim ichanga mana imaypis jaguimanchu. 33 Llapallanta willapashcaj sumaj yupachicamänayquipaj. Maquïçhu juyar ñacayman çhayaptiquisi, yanapäshayqui allilla cawanayquipaj. Mana çhasquicamajcunatapis mandaj supaynintinta mayna içhipushcä. Chaymi cushish cawanquiman.
1 Llapanta willapariycur janaj pachaman ricärir, wiyächipaypa Jesús niran: Papä, cananllapaj cashcä. Wawayquim caycä. Alliçhu jurgaycamay, ari. Nuwapis alliçhu jurgushayqui. 2 Llapan runata maquïman çhurashcanqui. Çhasquicamajcunata imaycamanpis cawachinäpaj camacächishcanqui. 3 Çhasquicamaptinchi, imaycamanpis cawanga. Jamlla Tayta Diosninchi canqui. Nuwana Washäcuj Jesús caycä. Washäcuj canäpaj cay pachaman caçhamashcanqui. Chaymi maquinchiçhu purir, pipis imaycamanpis cawanga. 4 Papä, cay pachaçhu alliçhu jurgur, shimiquita llap-llapanta çharcushcä. 5 Ñaupayquimanna shuntacamay, ari. Alliçhu jurgaycallämay. Cay pacha manaraj captillan, alli ricanacushanchi-jina yapay alli ricanacushun. 6 Cay pachaçhu waquin runacuna purïshimänanta camacächishcanqui. Wawayqui captinpis, maquïman çhurashcanqui purichinäpaj. Pï cashayquitapis paycunata sumaj tantiyachishcä. Shimiquita willapashäta llapanta wiyacusha. 7 - 8 Jamllapita cawashäta musyanna. Shimiquita willacuptï, çhasquicushana. Cay pachaman caçhacamashayquitapis aunisha. 9 Purïshimajcunapaj mañacamuj. Paycuna wawayquim. Maquïman çhurashcanqui. Chaypita mañacamuj. Shimïta mana wiyacujcunam ichanga imanuypis cawacullächun. 10 Papä, shiminchita wiyacujcuna nuwanchipa caycan. Purïshimajcuna alliçhu jurgamaptin, munayniyuj cashä musyacanga. 11 Papällau papä, cay pachata jaguishäna. Cuticamushäna. Chaymi purïshimajcunapaj mañacuj. Paycuna cay pachaçhüraj juyanga. Papä, sumaj alli canqui. Juc shungulla cawananchipaj camacächishayqui-jina paycunapis juc shungulla cawananpaj ricaycullay. 12 Camacächishayqui-jina iwal purishäcaman sumaj ricashcä. Maquïçhu purichishäcaman mayganpis ushyacayman mana çhayashachu. Judas Iscariotilla ushyacayman çhayasha shimiqui çharcucänanpaj. 13 Papä, janaj pachaman cuticamushpä jatunpa cushicü. Chaypis cay pachaçhu cashpä mañacushayqui. Nuwa-jina cushish cawananpaj purïshimajcunata ricaycullay. 14 Shimiquita mayna willapashcä. Nuwa-jina maquiquiçhu cawan. Juchata mana aparicushä-jina wawayquicunapis mana juchaçhu arunchu. Chaymi shungun munashanta mana ruräshiptin, shimiquita mana wiyacujcuna chiquin. 15 Purïshimajcunata cay pachapita ama jurgunquichu. Manchäga cay pachaçhu cawashancaman supaypita washaycunqui, ari. 16 Maquiquiçhu cawä. Purïshimajcunapis maquiquiçhu cawan; mana supaypa maquinçhüchu. 17 Shimiquiga shunguyqui yarpashanwan tincun. Shimiqui imata rimashantapis llap-llapanta purïshimajcunata willapashcä. Chaymi sumaj tantiyaycächï shunguyqui munashannuy cawananpaj. 18 Cananga cay pachaman caçhamashayqui-jina nuwapis caçhacushaj shimiquita llapan runata willapäcunanpaj. 19 Llapan shungüwan shimiquita wiyacushä-jina paycunapis shimiquita wiyacunman. 20 Papä, purïshimajcunallapächu mana mañacuj. Manchäga paycunapa shiminta wiyar waquin çhasquicamajcunapäpis mañacuj. 21 Nuwanchi juc shungulla cawashanchi-jina çhasquicamajcunapis juc shungulla cawanman. Llapanï juc shungulla cawananchita munä. Chayräçhi waquin runapis caçhamashayquita çhasquicunga. 22 Alli ricamashayqui-jina çhasquicamajcunatapis alli ñawïwan ricä. Alli ricanacushanchi-jina paycunapis alli ricanacunman juc shungulla cawananpaj. 23 Papä, juc shungulla cawashanchi-jina çhasquicamajcunawan juc shungulla cawä. Chaynuypa paycunapis juc shungulla cawanga. Juc shungulla cawaptin, llaquipäcuj cashayquita waquin runacunapis tantiyacunga. Llaquipäcuj cashpayqui cay pachaman caçhamashcanqui. Llaquipämashpayqui alli ricamashayqui-jina çhasquicamajcunatapis llaquipar alli ricanqui. Chaytaga llapan runa tantiyacunman. 24 Papä, acrapamashayqui runacunawan juturpayta munä. Achic-achicyaycajta ricamangapaj. Cay pachapis manaraj caycaptin, llaquipämashpayqui alliman çhuramarayqui. 25 Papä, jamlla allillata ruranqui. Runacunam ichanga alli shungu cashayquita mana musyaranchu. Nuwam ichanga alli shungu cashayquita musyä. Caçhamashayquita çhasquicamajcunapis musyan. 26 Pï cashayquitapis tantiyachishcä. Sumajraj tantiyaycächï. Chayrämi alli ricamashayquita tantiyacunga. Nuwapis mana caçharishächu. Quiquin-pura alli ricanacunanpäpis yanapäshaj.
1 Tayta Diosninchita mañacurir, purïshijnincunawan-ima Jesús aywacuran Cedrón nishan rajra chimpanman. Juc çhacraman çhayar, yaycuran. 2 Shuntacänan pacha captin, chay çhacrata Jesústa wañuyman jitarpuj Judas Iscariotipis ricsiraran. 3 Chaymi Jesústa charinanpaj murucucunata Judas çhayachiran. Mayur cüracunawan fariseucuna caçhaptin, Roma marcapa mandaj murucuncunapis, Tayta Diosninchipa wasinta täpajcunapis achquincunawan-caman, cuchilluncunawan-caman çhayaran. 4 Charij çhayananta Jesús mayna musyaran. Chaymi tariparcur çhayajcunata tapuriran: ¿Pitataj ashircaycanqui? nir. 5 Murucucunana niran: Nazaret runa Jesústa. Jesúsna niran: Nuwa cä. Jesústa wañuyman jitarpuj Judaspis caycaran. 6 Nuwa cä niptin, llapan runa jipapa tunicuran. 7 Jesús yapay tapuran: ¿Pitataj ashircaycanqui? nir. Murucucunana niran: Nazaret runa Jesústa. 8 Jesúsna niran: Mayna willashcaj. Nuwata ashimar, quiquilläta apamanquiman. Purïshimajnïcunata ama yatapanquimanchu. 9 Jesús rimashan çharcucänanpaj nish caran: Jammi llapan runata maquïman çhurashcanqui. Jucpis mana ushyacayman çhayashachu. 10 Simón Pedruna cuchilluwan juc runapa dirïcha-caj rinrinta rugupariran. Ruguparishan runapa jutin caran Malco. Payga mayur cürapa uywaynin caran. 11 Jesúsna niran: Cuchilluta ama jugariychu. Cashgallaman çhuraycuy. Papänï camacächiptin, ¿ñacaypita jishpishächuraj? 12 Chaura murucucuna mandajnintin Tayta Diosninchipa wasinta täpaj Israel runacuna-ima Jesústa charircur, watarcäriran. 13 Nircur Anáspa wasinman aparan. Anásga mayur cüra Caifáspa suydun caran. 14 Caifásmi waquin mayur runacunata willapash caran: Alli canman juc runalla llapanchipa rucanchi wañuptin nir. 15 Chaura Jesústa apaycaptin, caru jipallanta aywaran juc purïshij-masinwan Simón Pedro. Chay purïshijga mayur cürawan ricsinacuran. Ricsinacur, Jesúspa jipanta sawan ruricaman yaycuran. 16 Pedrum ichanga puncu wajtapita mana yaycuranchu. Chaymi ruriman yaycuj purïshijga puncu quiçhaj warmita ruwacuran Pedrutapis ruriman yaycuchinanpaj. 17 Puncu quiçhaj warmi Pedruta tapuran: ¿Manachu chay Jesúspa purïshijnin canqui? nir. Pedruna niran: Mana. 18 Juyupa jasaptin, ninata ratarcachir uywaycunapis, Tayta Diosninchipa wasinta täpajcunapis mashacurcaycaran. Pedrupis mashacuycaran. 19 Mayur cürana Jesústa tapuycaran imata yaçhachishantapis, purïshijnincuna pï cashantapis. 20 Jesúsna niran: Llapan wiyay Tayta Diosninchipa shiminta willapäcushcä. Shuntacäna wasicunaçhüpis, Tayta Diosninchipa wasinçhüpis tantiyachicushcä. Israel-masinchicuna llapanmi chay wasicunaçhu jutucan. Mana pacayllapachu willapäcushcä. 21 ¿Imanirtaj tapumanqui? Shimïta wiyajcunata mä, tapuy. Paycuna imata rimashätapis musyan. 22 Chaynuy niptin, Tayta Diosninchipa wasinta täpaj runa Jesústa cutariran: ¿Imanirtaj mayur cürapaj shimiquita jugarishcanqui? nir. 23 Jesúsna niran: ¿Imatataj llutanta rimashcä? Mä, nimay. Llutanta mana rimaycaptï, ama magamanquimanchu. 24 Chaypita mayur cüra Caifásmanna watashta Jesústa Anás apachiran. 25 Jinallaraj Simón Pedro mashacuycaran. Mashacuycaptin, waquin runa tapuran: Jesúspa purïshijnin canqui, ¿au? nir. Pedruna chapacuran: Mana. 26 Mayllanta mayur cürapa uywayninpis niran: Çhacraçhu Jesústawan ishcaniquita ricashcaj. Tapuj runapa yawar-masinpa rinrinta Pedro rugush caran. 27 Chaynuy niptin, yapay Pedro Jesústa wasguiran. Niycaptillan, gällu cantariycuran. 28 Manaräpis pacha waraptillan, mandaj cüra Caifáspa wasinpita mandaj Pilatupa dispächunman Jesústa aparan. Mandaj Pilatuta Roma marca mandaj çhuraran Jerusalén marcaçhu mayur auturdä cananpaj. Israel runacunam ichanga dispächunman mana yaycuranchu: Roma runapa wasinman yaycur, juchata aparicushun. Tayta Diosninchipis juyu ñawinwan ricamäshun. Pascua fiesta micuyta mana micushunpächu nir. 29 Chaymi dispächunpita llucshirir, mandaj Pilato tapuran: ¿Imaçhütaj juchata aparicush dispächüman apamunayquipaj? nir. 30 Runacunana niran: Jatunpa juchata aparicusha captin, apamushcä. Juchaynaj captinga, mana apamümanchu caran. 31 Mandaj Pilatuna niran: Jucha aparicush caycaptin, quiquiquicuna yarpashayquita ruray. Chaura Israel runacuna niran: Israel runacuna pitapis mana wañuchinmanchu. 32 Llapanpis camacaran Jesúspa shimin çharcuptin, imanaypapis wañuyman çhayananpaj. 33 Dispächunman cutircur, mandaj Pilato Jesústa tapuran: ¿Rasunpachu Israel runacunapa mandajnin canqui? nir. 34 Jesúsna niran: ¿Yarpayllayquipitachu rimaycanqui? ¿Jucchu willashcashunqui? 35 Mandaj Pilatuna niran: Mana Israel runachu cä. Marca-masiquicunawan cüracunapa mandajnincuna apamushcashunqui. ¿Imataj juchayqui? 36 Jesúsna niran: Mana cay pachaçhüchu mandaj cayta ashiycä. Mandaj cayta ashiptï, mayur Israel runacunapita alli ricamajcuna tucuy-jinanpa washämanman caran. Washämänan-janan maganacuyta jallaycärinman caran. Ichanga mana cay pachaçhüchu runacunata maquïçhu purichï. 37 Mandaj Pilatuna tapuran: ¿Chaura rasunpachu mandaj canqui? nir. Jesúsna niran: Rasunpa cä. Quiquiqui rimashcanqui. Tayta Diosninchipa shiminta willacunäpaj cay pachaçhu yurishcä. Paypa shungun munashanta rurajcuna shimïta çhasquicun. 38 Mandaj Pilatuna niran: ¿Piraj Tayta Diosninchipa shungunta musyan? Jesústa tapupärir, mayur Israel runacunatana mandaj Pilato niran: Cay runapa juchanta mana tarïchu. 39 Ichanga imaypis Pascua fiestaçhu juc runata caçharishäta musyanqui. ¿Jesústa caçharinäta munanquichu? Paypa maquinçhüshi cawanqui. 40 Chaura llapan runa japararan: Mana. Jesústa ama caçhariychu. Barrabásta caçhariy nir. Barrabásga asaltanti caran.
1 Chaura mandaj Pilato Jesústa sumaj wascachiran. 2 Wascariycur murucucuna cashapita curünata pilltarcur, Jesúspa umanman jatiparan. Mandajpa punchunta-jina puca punchutapis ushtuparan. 3 Asipänan cashpan niran: Israel runacunapa mandajnin alli ricash caycullächun nir. Lajyar ushyaran. 4 Runacunaman llucshircur, yapay mandaj Pilato niran: Ima juchatapis Jesús mana aparicushachu. Caçhariycushun. 5 Jinarcur casha curünan jatishta, puca punchushta Jesústa jurgamuran: Cay runata mä, ricay nir. 6 Jesústa ricar, mayur cüracunawan Tayta Diosninchipa wasinta täpajcuna ullgucurcuran: Rusçhu wañuchicächun. Rusçhu wañuchicächun nir. Japarpaptin, mandaj Pilato niran: Ricaptï, cay runa juchata mana aparicushachu. Wañuchiyta munar, quiquiquicuna imatapis ruracullay. 7 Israel runacunana niran: Tayta Diosninchipa Wawan cä nishanpita wañunman. Moiséspa shiminta çharcunan. 8 Tayta Diosninchipa Wawan cä nishanpita llapan runa ullguptin, mandaj Pilatupis mancharicäcuran. 9 Chaymi dispächunman yaycurir, Jesústa tapuran: ¿Maypitataj caycanqui? nir. Paymi ichanga upällalla cacuran. 10 Chaura mandaj Pilato niran: Tapuycaptij, ¿manachu imatapis rimacunqui? Caçharinäpäpis, rusçhu wañuchishunayquipaj auninäpäpis maquïçhümi caycanqui. 11 Jesúsna niran: Llapantapis Tayta Diosninchi camacächin. Manchäga imata ruramänayquipäpis munayniqui mana canmanchu. Chaypis wañuyman jitarpamaj runa jatunpa juchata aparicusha. 12 Mandaj Pilato imanayllapapis Jesústa caçhariyta munaran. Israel runacunam ichanga chigaypa japarparan: Mandaj-tucur mandamajninchi Césarta pampaman çhurasha. Chaymi Jesústa caçharir, jampis mandamajninchi Césarta pampaman çhuranquipaj nir. 13 Chaura dispächunpita mandaj Pilato Jesústa jurgamuran. Pusharan Gábbata läsaman. Mandajpa jamananman jamachiran. Hebreo rimayçhu: Gábbata läsa ninanga: Läja rumicunawan pirgasha ninanmi. 14 Chay junaj Pascua fiestapa wispiran caran. Lasdüsi caran. Mandaj Pilatuna Israel runacunata niran: Catay mandajniqui. 15 Runacunana ullguran: Wañuchun. Wañuchun. Rusçhu wañuchicächun nir. Mandaj Pilatuna niran: ¿Rasunpachu mandajniquita wañuchinäta munarcaycanqui? Chaura mayur cüracuna niran: Mandamajninchiga Césarllam. Juc mana canchu. 16 Chaura chaynuy niptin, Jesústa inçhigaran rusçhu wañuchinanpaj. 17 Chaura rusnin matancashta Calabïra nishan pataman Jesústa aparan. Calabïra ninanta hebreo rimayçhu: Gólgota nin. 18 Pataman çhayaycachir, rusçhu wañuchiran. Ishcaj runatapis rusçhu wañuchiran: jucninta juc-caj lädunman, jucnintana juc-caj lädunman, Jesústana çhaupinçhu. 19 Mandaj Pilato ruspa puntanman litrïruta çhurachiran: Cay runa Nazaret marca Jesús, Israel runacunapa mandajnin nir. 20 Marca washlällançhu captin, çhurachishan litrïruta achcaj runa ricäcuran. Hebreo rimayçhüpis, latín rimayçhüpis, griego rimayçhüpis isquirbiraycaran. 21 Israel mayur cüracunam ichanga mandaj Pilatuta niran: Israel runacunapa mandajnin nir ama isquirbirächunchu. Manchäga: Israel runacunapa mandajnin-tucun nir isquirbirächun. 22 Mandaj Pilatuna niran: Isquirbishäta mana rucashächu. 23 Rusman läbaycur, murucucuna Jesúspa jacunta çhuscuman raçhiran. Jucta-caman apacäriran. Müdanantam ichanga pampan mana captin, raçhiyta mana camäpacuranchu. 24 Chaymi ninacuran: Ama raçhishunchu. Manchäga surtita jitashun mayganinchisi apacunanchipaj. Chaynuypa Tayta Diosninchipa shimin çharcucächiran. Shiminçhu nin: Müdanäta jiçhunacusha. Mayganpis müdanäta apacunanpäpis surtita jitasha. Nishannuylla murucucuna rasunpa ruraran. 25 Rusçhu läbarashan lädullançhu Jesúspa mamanpis ñañantin ricaparcaycaran. Cleofáspa warmin Maríapis, Magdalena marcapita Maríapis ricaparcaycaran. 26 Chaymi yaçhänacushan purïshijtawan mamanta ricärir, Jesús niran: Mamallau mama, paymi wawayqui. 27 Purïshijnintana niran: Paymi mamayqui. Chaypita-pacha chay purïshijninga Jesúspa mamanta wasinman pushacuran ricananpaj. 28 Chaypita Jesús yarparan: Llapantana çharcushcä nir. Chaymi Tayta Diosninchipa shiminta çharcucächinanpaj niran: Yacunaycä. 29 Juc puyñuçhu shigui bïnu wiñaraycaran. Chaymi jirupa puntanman shaputa watarcur bïnuman ushmarcachir, Jesústa shuguchiran. 30 Shugurcur, Jesús niran: Llapanta çharcushcä. Chaynuy nir uysucäcur wañucäcuran. 31 Waranin junaj diyawarda captin, Israel runacuna rusçhu wañushcuna läbaränanta mana munaranchu. Chay junajga Pascua fiestapis jallariycaran. Chaymi mandaj Pilatuta niran: Juclla wañucunanpaj rusçhu läbarajcunapa çhancanta paquirachinquiman. Ruspita jurgachinquiman. 32 Auniptin, murucucuna Jesúspa lädunçhu ishcaj läbaraj runapa çhancancunata paquipariran. 33 Jesústam ichanga wañushta ricar, mana yataparanchu. Çhancantapis mana paquiparanchu. 34 Juc murucum ichanga llicllacchun çhaquinpa tucsiriran. Tucsiriptin, yawarwan yaculla llucshimuran. 35 Chaymi ñawïwan ricashäta willacü. Ricashäta rasunpa rimä Tayta Diosninchiman llapanchi sumaj yupachicunanchipaj. 36 Llapanpis camacaran Tayta Diosninchipa shimin çharcucänanpaj. Shiminçhu nin: Juc tullullantapis mana paquingachu. 37 Jananmanpis nin: Tucsishantapis runacuna ricanga. 38 Chaypita Arimatea marca José mandaj Pilatuta mañacuran: Jesústa pampachicushaj nir. Josépis Jesúspa purïshijnin caran. Ichanga mayur Israel-masincunata manchacushpan mana musyachicuranchu. Mañacuptin, mandaj Pilato auniran. Chaura Jesúspa ayanta pampananpaj José apacuran. 39 Nicodemupis quimsa arüba aya chaquichicuna pirjümita apacurcur, aywäshiran. Nicodemuga ñaupata Jesúswan parlaj chacaypa aywarunaj. Apashan pirjümi caran mïrapita, áloipita. 40 Israel runacuna pamparashan-jina Joséwan Nicodemo pirjümita murtäjiman piçhuriycur, ayata pituran. 41 Jesústa rusçhu wañuchishan ñaupallançhu murupacuna çhacra caran. Chayllaçhu runa pampacunanpaj mushuj uçhcu caran. Pitapis manaraj pamparanrächu. 42 Diyawarda junaj jallarinanpaj captin, chay uçhcullaman Jesústa pamparan.
1 Dumingu tuta chaca-chacalla Jesús pamparashanman Magdalena marcapita María aywaran. Pamparashanman çhayar, chaparaj rumi witiraycajta tariran. 2 Chaymi juclla cutircur Simón Pedrutawan Jesúspa yaçhänacushan purïshijninta willaran: Ayata apacusha. Mayman apacushantapis mana musyanchichu. 3 Chaynuy niptin, purïshij-masinwan Pedrupis Jesús pamparashanman aywaran. 4 Ishcan juclla aywarpis, juc-cajga Pedruta llallishpan ñaupata çhayaran. 5 Uçhcuman watgaycuptin, pitushan bayïta juturaycajllata ricaran. 6 Jipanta Simón Pedro çhayaran. Ruricaman yaycur, paypis pitushan bayïta juturaycajllata ricaran. 7 Jesúspa uman watashanpis jucläçhu lluylluraycaran. 8 Pedro uçhcu rurinman yaycushanpitaraj ñaupa çhayajpis rurincaman yaycuran. Llapanta ricar, Jesúsman yupachicuran. 9 Chay wichan Jesúspa purïshijnincuna Tayta Diosninchipa shiminta mana tantiyacuranrächu. Shiminçhu nin: Wañushcunapita cawarimunan camacan. Chaymi pitushan bayïta juturaycajllata tarir, Jesús cawarishanta tantiyacuran. 10 Chaymi wasiman cuticäriran. 11 Maríam ichanga pamparashan puncullançhu wagaycaran. Wagaräcur, uçhcuman watgaycuran. 12 Ricäriptin, ishcay anjil yuraj müdanash caycaran. Juc-caj anjil aya çhurarashanpa jawanançhu jamaraycaran; juc-cajna jaytacunçhu. Ayam ichanga mana carannachu. 13 Anjilcunaga Maríata tapuran: Mamallau mama, ¿imanirtaj wagaycanqui? nir. Tapuptin, niran: Taytä Jesús mana canchu. Ayanta mayman apacushantapis mana musyächu. 14 Rimayta ushyarcur ticräriptin, Jesús içhiraycaran. Maríam ichanga Jesústa ricaycashanta mana tantiyacuranchu. 15 Jesúsna tapuran: Mamallau mama, ¿imanirtaj wagaycanqui? ¿Pitataj ashiycanqui? nir. Çhacra aruj runa cashanta yarpar, María niran: Tayta, ayata maymanpis apash carga, willaycamay, ari. Shuntacushaj. 16 Jesúsna niran: Maríallau María. Chaura Jesús caycashanta ricsircurna, niran: Taytallau tayta. Taytallau tayta ninanta hebreo rimayçhu: Rabboní nin. 17 Jesúsna niran: Papänïwan tincuj aywanäta ama miçhämaychu. Paywan manaraj tincushcächu. Cananga purïshimajnïcunata Papäninchiwan tincuj aywaycashäta willamuy. Papäninchiga Tayta Diosninchi. Paypa maquinçhu cawanchi. 18 Chaynuy niptin, Jesúspa purïshijnincunata Magdalena María willaj aywariycuran. Tayta Jesústa ricashantapis, imata nishantapis llapanta willaran. 19 Chay junajlla caycaptin, dumingu chacay Jesúspa purïshijnincuna juc wasiman jutucaran. Mayur Israel runacunata manchacur, puncutapis sumaj wiçhgaran. Jesúsna ñaupallançhu ricaripuran: Allilla juyaycullay, ari nir. 20 Nircur maquintawan llicllacchun çhaquinta ricachiran. Purïshijnincunana Tayta Jesústa ricaycur, jatunpa cushicuran. 21 Jesúsna yapay niran: Allilla juyaycäriy. Tayta Diosninchi caçhamashan-jina jamcunatapis caçhacushayqui shimïta willapäcunayquipaj. 22 Jinarcur llapanman pücarir, niran: Espíritu Santupa maquinçhüna cawarcaycanqui. 23 Jamcunapitana shimïta wiyanga. Pipis jucha aparicushanpita wanacuptin, shacyächinqui: Juchayquita Tayta Diosninchipis mayna jungasha nir. Mana wanacuptinmi ichanga piñapanqui: Juchayquita Tayta Diosninchipis yarparaycanraj nir. 24 Jesús ricaripuptin purïshijnin carsi, millish Tomás mana caranchu. 25 Chaymi purïshij-masincuna willaran: Tayta Jesús ricaripamasha nir. Tomásna niran: Rasunpa cawarishanta yupachicunäpaj maquinman läbus yaycushanta ricanä. Yatashäraj. Maquïwanraj llicllacchun çhaquintapis yatanä. 26 Chaypita pusaj junajta wasiçhu Jesúspa purïshijnincuna yapay jutucaran. Tomáspis chayçhu caycaran. Puncu sumaj wiçhgarash caycaptinsi, Jesús yaycuriran. Llapanpa çhaupinçhu ricaripuran: Allilla juyaycäriy nir. 27 Tomástana niran: Tomás, maquïta mä, yatay. Mä, ricay. Llicllacchü çhaquinpa tucsimashantapis yatay. Ama llutäpacunquinachu. Manchäga cawarimushäta yupachicunquiman. 28 Chayraj jatunpa cushicur, Tomás niran: Taytallau, Tayta. Cananga Tayta Diosninchi cashayquita yupachicü. Maquiquiçhüna caycä. 29 Jesúsna niran: ¿Cawarimushäta ricarrächu yupachicunqui? Mana ricaycämar yupachicujcunam ichanga cushicärinman. 30 Chaura purïshijnincunapa ricay ñawinçhu Tayta Diosninchi camacächiyninpa Jesús achcaj jishyaçhucunata allchacächiran. Supaycunatapis jarguran. Cay libruçhu mana llapanchu isquirbiraycan. 31 Manchäga Tayta Diosninchipa Wawan Jesús cashanta sumaj tantiyacunanchipaj isquirbishcä. Washäcuj Jesúsman yupachicuptinchi, maquinçhu imaycamanpis cawachimanchi.
1 Chaypita Tiberíades püsu cantunçhu Jesús purïshijnincunata ricaripuran. Ricaripushanpita tantiyachishayqui. 2 Simón Pedrupis, millish Tomáspis, Natanaelpis juturaycaran. Natanaelga Galilea quinran Caná marcapita caran. Zebedeupa ishcan wamrancunapis, ishcaj purïshijnincunapis caycaran. 3 Purïshij-masincunata Simón Pedro niran: Canan chacay piscädu charij aywä. Waquinpis niran: Nuwacunatapis pushamay. Chaynuy nir bütiman jigarcur llapan aywacäriran. Chay chacayga warayllata piscäduta ashirsi, jucnayllatapis mana chariranchu. 4 Pacha wararcuptinna, püsu cantunçhu Jesús içhiraycaran. Purïshijnincunam ichanga mana ricsiranchu. 5 Jesúsna jayacuran: Wawacuna, ¿piscäduta charishcanquichu? nir. Paycuna niran: Mana. 6 Jesúsna niran: Bütiquipa dirïcha-caj lädunman ridiquita jitay. Charinquipaj. Niptin, shiminta wiyacuran. Chay-chica piscäduta chariran. Chutaytapis mana jushnachu. 7 Jesúswan yaçhänacuj purïshijna Simón Pedruta niran: Payga Tayta Jesús. 8 Wiyar, jala paçha-niraj mana cananpaj camsanta ushtucurcur, Pedro yacullanpa Jesústa tariparan. Waquillan piscädun jançhash püsu cantunman çhayaran. Büti wampuycashanpita püsupa cantuncaman sujta çhunca sujtawan (66) ricralla caran. 9 Bütipita llucshirir, püsu cantunçhu tullpata tariran. Piscädutawan tantata cancaycaran. 10 Jesúsna niran: Charimushayqui piscäduta juc-ishcayllata apamuy. 11 Chaura Simón Pedro bütiman jigarcur, llapan piscäduta püsu cantunman jançhamuran. Jatusajlla paçhac pichga çhunca quimsawan (153) caran. Chay-chica carsi, ridita mana raçhiranchu. 12 Jesúsna niran: Miculläshun. Purïshijnincuna Jesústa ricarsi, tantiyacuyta mana atiparanchu. Chaypis manchacur mana tapuparanchu. 13 Jesúsna tantata aptacurcur, llapanta aypuran. Piscädutapis aypuran. 14 Wañushanpita cawarircamur, quimsa cutipana Jesús purïshijnincunata ricaripuran. 15 Micuyta ushyarcur, Juanpa wamran Simón Pedruta Jesús tapuran: Tayta Simón, ¿waquin purïshimajnïcunapita maschu llaquipämanqui? nir. Pedruna niran: Au, Tayta. Llaquipäshajta musyanqui. Jesúsna niran: Uysha mallwata michishan-jina wawäcunata sumaj ricay. 16 Yapay Jesús tapuran: Juanpa wamran Simón, ¿llaquipämanquichu? nir. Pedruna niran: Au, Tayta. Llaquipäshajta musyanqui. Jesúsna niran: Uyshata ricashan-jina wamräcunata sumaj ricay. 17 Quimsa cutipana Jesús tapuran: Juanpa wamran Simón, ¿rasunpachu llaquipämanqui? nir. Chaynuy quimsa cuti tapuptin, Pedro llaquicäcuran. Chaymi niran: Llapanta musyanqui, Tayta. Llaquipäshajtapis musyanqui. Jesúsna niran: Uyshata michishan-jina wamräcunata sumaj ricay. 18 Sumaj tantiyacunquiman. Müsu caycar quiquillayqui müdanayquita ushtucur, quiquillayqui watacurayqui. Munashayquimanpis aywacurayqui. Auquisyar, ricrayquita quiquiqui mashtaptiquipis, jucmi watashunquipaj. Mana munaycaptiquipis, jucläman apashunquipaj. 19 Pedro imanuypa wañuyman çhayanantapis, Tayta Diosninchita alliman çhuranantapis tincuchiyllapa Jesús willaparan. Tayta Diosninchita mana wasguir wañuyman çhayarsi, Tayta Diosninchita alliman çhuraran. Jinarcur Pedruta niran: Llupilläpa jatinquiman. Pedruna Jesúspa yaçhänacushan purïshijta ricapaycaran. Paymi Pascua micuyçhu Jesústa jagacushalla tapurunaj: Tayta, ¿pitaj wañuyman jitarpushunquipaj? nir. 21 Pedruna Jesústa tapuran: Tayta, yaçhänacushayqui purïshijniqui, ¿imamantaj çhayanga? nir. 22 Jesúsna niran: Munaptïga, cutimunäcamanpis cawaycangaçhari. Chaypis, ¿imata jucushunqui? Llupilläpa aywanquiman. 23 Jesúspa shiminta wiyar, irmänucuna yarparan Jesúspa yaçhänacushan runa imaypis mana wañunanta. Jesúsmi ichanga nish caran: Munaptïga, cutimunäcamanpis cawaycangaçhari. Chaypis, ¿imata jucushunqui? 24 Jesúspa yaçhänacushan runa cashpä cay libruta isquirbishcä. Ricashätapis, wiyashätapis willacur puriycä. Llapantapis rasun-cajta rimä. 25 Jesúspa willapan achca caycan. Llap-llapanta isquirbiptin, cay pachaçhu papilpis pishinman.