Quichua: Chimborazo John APUNCHIJ JESUCRISTOMANTA ALLI HUILLANATA SAN JUAN HUILLAN DIOS RIMASHCA SHIMICA AICHAYUJ TUCUSHCAMANTA /1 Taita Dios imatapish manaraj rurajpimi, Rimashca shutica iia tiyashcallataj. Paica Taita Diosllahuantajmi cashca. Chai Rimashca shutica Diosllatajmi cashca. 2 Imatapish manaraj rurajpimi, paica Taita Diosllahuantaj cashca. 3 Tucui imalla tiyajtami paihuan tucushpa Taita Diosca rurashca. Tucui imalla rurashcatapish Taita Diosca paillahuanmi rurashca. 4 Paimi causaitaca charin. Chai causaimi tucuicunata luz shina achijyachicun. 5 Chai luzmi amsataca achijyachicun. Amsaca chai luztaca mana amsayachi tucurcachu. 6 Taita Diosca shuj runatami huillagrichun agllarca. Paica Juan shutimi carca. 7 Achijyachij luzta tucuicuna crichunmi, paica achijyachij luzta huillaj shamurca. 8 Juanca mana paillatajchu pai huillacushca luzca carca. Paica luzta huillachunllami cachashca carca. 9 Tucuicunata achijyachij luztajca nami cai pachaman chayamucurca. 10 Cai pachataca Taita Diosmi Rimashca shutihuan tucushpa rurashca. Pai cai pachapi cajpica, pai rurashca cashpapish, cai pachapi causajcunaca paitaca pi cashcataca mana rijsircacunachu. 11 Pai rurashcacunapajmanmi shamurca. Pai rurashcacunaca paitaca mana chasquircacunachu. 12 Chashna mana chasquijpipish maijanlla paita crishpa chasquijcunataca tucuicunatami Diospaj huahuacunata rurashca. 13 Taita Diospaj huahua tucungapajca mana huahuacuna huacharij shina, aicha munaimanta, c'ari munaimantachu huacharin. Ashtahuanpish paicunapaj yayaca Taita Diosmari. 14 Chai Rimashca shutica aichayuj tucushpami nucanchijhuan causarca. Taita Diospaj shujila Churitaca pai shinallataj alli sumaj cashcatami ricurcanchij. Paica jatunta c'uyaj, mana llullajmi carca. 15 Bautizaj Juanca Jesucristomanta huillashpaca: "Nucapaj q'uipaca shuj shamungami. Paica nucapaj naupa na tiyashcamanta fiucata yalli jatunmari" nishpa sarun nuca nicushcaca caimari nishpa sinchita nirca. 16 Pai tucuita charishcamantami, nucanchijca tucuicuna Dios jatunta c'uyashpa cushca imatapish allicunataca jahuanpi jahuanpi chasquicunchij. 17 Taita Diosca pai mandashcacunataca Moisestami nucanchijmanca cuchirca. Jatunta c'uyaj cashcata ricuchichun, alli huillanatapish huillachunca, Taita Diosca Jesucristotamari cachashca. 18 Taita Diostaca manataj pipish ricushcachu. Paipaj shujlla c'uyashca Churillami paitaca ricushca. Paillatajmi Taita Dios ima shina cashcataca nucanchijmanca ricuchirca. JESUCRISTOMANTA BAUTIZAJ JUAN HUILLASHCAMANTA 19 Jerusalen pueblopi causaj Israelcunaca curacunatapish curacunata ayudajcunatapish Juantaca: Canca, pitaj cangui? nishpa tapuchun cachajpi paica cashnami nirca: 20 Nucaca mana Quishpichij Cristochu cani nishpa huillashpaca, mana llullarcachu. 21 Chashna nijpi: Shinashpaca, pitaj canguiari? Eliaschu cangui? nijpi: Mana chaichu cani nirca. Shina nijpi: Shinashpaca, chai shamuna cashca huillajchu cangui? nijpi: Chaipish mana canichu nirca. 22 Chashna nijpica: Shinashpaca, pitaj canguiari? Pi cashcatataj yuyangui? Nucanchijta cachajcunaman huillagringapajmari yachashun ninchij nircacuna. 23 Chashna nijpi: "Quishpichij shamuna nanta allichichij" nishpa "Shitashca pambapi caparijmi" nishpa naupa huillaj Isaias nishca shinallami "Nucaca cani" nishpami Juanca huillarca. 24 Juanta tapunaman cachashcacunaca fariseocunapuramantami carca. 25 Paicunami Juantaca: Canca manapish Quishpichij Cristo cashpaca, Eliaspish mana cashpaca, chai shamuna cashca huillajpish mana cashpaca, shinashpaca, ima nishpataj canca bautizacungui? nishpa tapurcacuna. 26 Chashna nijpi Juanca: Ari. Nucaca yacullapimi bautizacuni. Shujmari cancunapurallapitaj tiyan. Paitaca manaraj rijsinguichijchu. 27 Paica nucapaj q'uipa shamucushpapish iiucapaj naupa iia tiyashcamanta nucaca paipaj pargate huatashcallatapish mana pascaipajmi cani nirca. 28 Jordan yacu ch'imbanij Betabara pueblopi Juan bautizacujpimi chashnaca tucurca. JESUSCA TAITA DIOS CACHASHCA OVEJA SHINA CASHCAMANTA 29 Chai cayandij punllami Juanca Jesus paipajman chayamucujta ricushpa nirca: Riquichij, caimari cai pachapi causa jcunapaj juchata anchuchichun Taita Dios cachashca Ovejaca. 30 Paitamari nucaca: "Nucapaj q'uipa shamucujca iiucapaj naupa na tiyashcamanta nucata yalli jatunmari" nicurcani. 31 Nucaca paitaca pi cashcata mana rijsishpapish Israelcunaman* paita rijsichingapajmi yacupi bautizaj shamurcani nirca. 32 Juanca pai ricushcata huillashpa nirca: Nucaca Diospaj Samai Espiritu jahua pachamanta shuj paloma shina uriyamushpa paipi tiyarijtami ricurcani. 33 Chashna tucungacama nucaca paitaca mana rijsircanichu. Yacupi bautizachun nucata cachaj Taita Diosmi: "Pipaj jahuapi nuca Samai Espiritu shamushpa tiyarijta ricungui, chaimi Samai Espirituhuan bautizajca canga" nirca. 34 Chashnallataj tucujta ricushcamantami nucaca: "Caimari Diospaj Churi" nishpa huillacuni nirca. JUANPAJ ISHQUI YACHACUJCUNA JESUSTA CATISHPA RISHCAMANTA 35 Cayandij punllapish cutin Juanca paipaj yachacujcunamantaca ishqui yachacujcunandijmi shayacurca. 36 Chashna shayacushpa Jesus chaita puricujta ricushpa Juanca: Riquichij, chaimi Taita Dios cachashca Ovejaca nirca. 37 Chashna nijta Juanpaj ishqui yachacujcuna uyashpaca Jesusta catishpa rircallacunami. 38 Paicuna caticujpi Jesusca tigrarishpa paita caticujta ricushpaca: Imatataj mashcacunguichij? nijpi: Rabi, maipitaj causangui? nircacuna. Rabi nishcaca yachachij nisha ninmi. 39 Chashna tapujpi Jesusca: Jacuchij, ricunguichij nijpi paicuna rishpaca maipi causacushcata ricurcacunami. Na chishi cajpi, chai chishica paihuanmi saquirircacuna. 40 Juan chashna nijta uyashpa Jesusta chai ishqui catishpa rijcunamanta shujca Andresmi carca. Andresca Simon Pedropaj huauquimi carca. 41 Andresca paipaj huauqui Simonhuanraj tupashpaca: Mesiashuanmari tupashcanchij nirca. Mesias nishcaca Quishpichij Cristo nisha ninmi. 42 Chashna nishpa Andresca paipaj huauqui Simonta Jesuspajman pushamurca. Jesusca Simonta ricushpaca: Canca Jonaspaj churi Simonmi cangui. Cantaca cunanca Cefas shutitami shutichini nirca. Cefas nishcaca Pedro nisha ninmi. FELIPETAPISH NATANAELTAPISH JESUS CAYASHCAMANTA 43 Chai cayandij punllami Jesusca Galilea llajtaman risha nicushpa Felipehuan tupashpaca: Jacu nucahuan nirca. 44 Felipepish Andrespish Pedropish Betsaida pueblomantami carca. 45 Felipeca Natanaelta mashcanaman rishpa paihuan tupashpaca: Nucanchij shuyacushca runahuanmari tupashcanchij. Mandashcata Moises quillcashcapi, naupa huillajcuna quillcashcapipish paimantaca huillanmi. Paica Nazaret pueblomanta Josepaj churi Jesusmi cashca nirca. 46 Chashna nijpi Felipeta Natanaeica: Nazaret pueblomantaca, ima allitaj tiyangari? nijpi Felipeca: Jacuari, ricungui nirca. 47 Chashna ninacushpa Jesuspajman shamucujpi Jesusca Natanaelta ricushpa paihuan cajcunaman: Paitajca Israel runami. Paica mana llullajchu nirca. 48 Jesus chashna nijta uyashpa Natanaeica: Ima shinataj nucataca rijsingui? nijpi Jesusca: Canta manaraj Felipe imata nijpimi cantaca higo yura ucupi cajpiraj ricurcani nirca. 49 Chashna nijpi Natanaeica: Yachachij, canca Diospaj Churimi cangui. Canca Israelcunata jatun Mandajmi cangui nirca. 50 Shina nijpi Jesusca nirca: "Higo yura ucupi canta ricurcani" nishcallamantachu utca nucataca cringui? Caita yalli ashtahuan jatun rurashcacunatapishmari ricungui. 51 Cancunaca cunanmanta pachami jahua pacha pascarishcata, Runa Aichayuj tucushca nucapajman Dios cachashca angelcuna huichiyacujta uriyacujta ricunguichij. Chashnallatajmi canga nirca. CANA SHUTI PUEBLOPI CASAMIENTO BODA TIYASHCAMANTA /2 Chai quimsa punlla q'uipami Galilea llajtapi tiyaj Cana pueblopica casamiento boda tiyarca. Jesuspaj mamapish chai bodapimi carca. 2 Jesustapish paipaj yachacujcunatapish cayajpi rircacunami. 3 Chai bodapi cajpi vino tucurijpi Jesuspaj mamaca Jesustaca: Vinoca fiamari tucurin nirca. 4 Shina nijpi Jesusca: Mama, ima nishpataj nucataca chashna ningui? Nuca ruranata ruranaca manaraj chayamushcachu nirca. 5 Chashna nijpi paipaj mamaca chai bodapi sirvijcunataca: Pai tucui imalla nishcata ruranguichijlla nirca. 6 Chai boda huasipica rumi p'unducunami sujta tiyashca carca. Chai p'unducunaca maijanca quimsa punu, maijanca chuscu punu yacutami apaj cashca carca. Israelcunaca Taita Diospaj naupajpi alii ricuringapaj maillarij cashcamantami chai p'unducunataca charincuna. 7 Jesusca chai sirvijcunataca: Cai p'unducunapi yacuta jundachichij nijpi jundatami jundachircacuna. 8 Na yacuta jundachishca q'uipaca Jesusca sirvijcunata: Cunanca surcuichij. Raquij alhuajanopajman apaichij nijpica aparcacunami. 9 Raquij alhuajanoca yacu vino tucushcata ashata ubyarcami. Chai vinotaca maimanta apamushca cashcataca mana yacharcachu. Yacuta apamushpa p'undupi churaj sirvijcunallami yacharca. Alhuajanoca noviota cayashpa nirca: 10 Canca cunancamamari alii vinota charicushcanguiraj. Manachu tucuicunamari achcata ubyashca q'uipaca, fia chagrushcallata cuncuna nirca. 11 Jesusca Galilea llajtapi tiyaj Cana pueblopimi pi mana rurai tucushcataca punta rurarca. Chashna rurashpami pai jatun sumaj cashcatapish ricuchirca. Chaita ricushpami paipaj; yachacujcunaca paitaca Dios cachashca cashcata crircacuna. 12 Chai q'uipami paindij, paipaj mamandij, paipaj huauquicunandij, yachacujcunandij Capernaum puebloman rircacuna. Chaipica asha punllacunallatami carcacuna. DIOSTA ADORANA HUASIPI C'ATUCUJCUNATA JESUS LLUJSHICHISHCAMANTA 13 Israelcunapaj pascua punlla nalla chayamucujpimi, Jesusca Jerusalen puebloman huichi rirca. 14 Diosta adorana huasiman yaicushpa, chai huasipi huagracunata, ovejacunata, palomacunata c'atucujcunata, cullquita cambiajcunatapish ricurca. 15 Chashna chaicunata ricushpa Jesusca huascata patarishpa, tucui chai ucupi cajcunata ovejacunandij, huagracunandij canllaman Ilujshichishpa cacharca. Cullqui cambiajcunapaj mezacunatapish tigrachishpa, tucui paicunapaj cullquitapish pambaman tsirapashpa shitarca. 16 Jesusca palomacunata c'atujcunatapish: Caicunata caimanta anchuchichij! Nuca Yayapaj huasitaca cashna c'atuna randina huasitaca ama ruraichijchu! nirca.