Juan 1

Rimashca Shimica runa tucushcamanta

1 Callarillapitacmi, Rimashca Shimica ña tiyarca. Rimashca Shimica Dios-huanmi carca. Shinallatac Rimashca Shimica Diosllatacmi carca. 2 Paica callarimanta pachami Dios-huan carca. 3 Paillahuantacmi Diosca tucuita ruhuarca. Mana paihuan ruhuashcaca imatapish mana tiyanchu. 4 Paimantami causaica tiyarca. Chai causaimi gentecunapac Achicyachic carca. 5 Chai Achicyachicmi amsapi achicyachicun. Amsaca chai achictaca mana amsayachinchu. 6 Diosca Juan shuti runatami cacharca. 7 Paimi tucui gentecuna crichun, Achicyachicmanta huillangapac shamurca. 8 Mana Juanchu achicyachicca carca, ashtahuanpish Achicyachicmanta huillangapacmi shamurca. 9 Chai Achicyachicmi tucui gentecunata achicyachingapac cai pachaman shamurca. 10 Chai Rimashca Shimica cai pachapimi carca. Diosca chai Rimashca Shimihuanmi cai pachataca ruhuarca. Chashna cacpipish, cai pachapi causaccunaca paitaca mana ricsircachu. 11 Paipac gentecunapacmanmi shamurca. Ashtahuanpish paipac gentecunaca mana chasquircachu. 12 Paita chasquishpa, paita criccunataca, Diospac huahuacuna tucuchunmi chasquin. 13 Mana runacunapac munaimanta, mana cai pachapi huacharishcamantachu Diospac huahuacuna tucun, ashtahuanpish Diospac munaimantami paipac huahuacuna tucun. 14 Chai Rimashca Shimillatacmi runa tucushpa, ñucanchic-huan causarca. Paica yallita cuyac, cashcata nicmi. Paica Diospac shuclla Churi cashpami, yalli poderyuc carca. Chashna cactami ricurcanchic. 15 Juan paimanta huillashpaca: «Ñucaca: “Ñucapac quipa shamucca ñuca manarac tiyacpimi tiyarca. Chaimantami ñucata atishpa ashtahuan poderyuc” nishpa huillarcani. Chai huillashca runami caica» nishpa sinchita rimarca. 16 Pai Taitapac Churi cashcacunamantami ñucanchicca catinta catinta allicunata chasquicunchic. 17 Diosca, pai mandashcacunata ricuchichunca, Moisestami cacharca. Ashtahuanpish Dios cuyac, cashcata nic cashcataca, Jesucristo cachashpami ricuchirca. 18 Diostaca jaicapi pi mana ricushcachu. Ashtahuanpish Dios-huan causac, paipac shuclla Churimi Dios ima shina cashcataca ricsichirca. Paica Diosllatacmi.

Juan pi cashcata huillashcamanta

19 Juan pi cashcata yachangapacmi Jerusalén pueblomanta curacunatapish, curacunata ayudac levitacunatapish tapuchun cacharca. 20 Shina tapucpi, Juanca mana pacashpa huillashpaca: —Ñucaca mana Cristochu cani— nirca. 21 Cutinllatac tapushpaca: —Shinashpaca, ¿pitac cangui? ¿Huillac Eliaschu cangui?— nirca. Shina nicpimi Juanca: —Mana paichu cani— nirca. Shina nicpica, paicunaca: —Shinashpaca, ¿shamuna cashca Dios ima nishcata huillacchu cangui?— nirca. Shina nicpimi Juanca: —Mana— nirca. 22 Shina nicpimi paicunaca: —Shinashpaca, ¿pitac cangui? Ñucanchicca tapuchun cachaccunaman huillanami canchic. Canllamantaca, ¿imatatac ningui?— nirca. 23 Shina nicpimi Juanca: —Dios ima nishca huillac Isaiasca: “Quishpichic shamuna ñanta derechaichic” nishpa, shitashca pambapi caparicuc shinami cani— nirca. 24 Tapuchun cashcacunaca Fariseocunami carca. 25 Paicuna tapushpaca: —Cristopish, Eliaspish, Dios ima nishcata huillacpish, mana cashpaca, ¿ima nishpatac bautizacungui?— nirca. 26 Shina nicpimi Juanca: —Ñucaca yacullahuanmi bautizacuni, ashtahuanpish cancunapac chaupipimi cancunapish mana ricsishca shuc runa tiyan. 27 Paica quipatami shamunga. Ñucaca paipac ushuta huatashcallatapish mana pascaipacmi cani— nirca. 28 Tucui caicunaca, Jordán yacumanta inti llucshina lado Betania llactapi Juan bautizacucpimi tucurca.

Jesusca Dios cachashca Pactalla Oveja cashcamanta

29 Cayandi punzhami Juanca Jesús paipacman chayamucucta ricurca. Chaimantami Juanca: «Paimi gentecunapac juchacunata anchuchichun, Dios cachashca Pactalla Ovejaca. 30 Paimantami ñucaca: “Ñucapac quipa shamucca ñuca manarac tiyacpimi ña tiyarca. Pai ñucata atishpa poderyucmi” nircani. 31 Ñucapish chai shamuc pai cashcataca mana yacharcanichu. Chaimantami israelcuna utca pai cashcata yachachun, yacuhuan bautizarcani» nirca. 32 Cutinllatac Juanca: «Diospac Espíritu jahuamanta paloma shina shamushpa, paipi tiyarictami ricurcani. 33 Chashna ricushpapish, shamuc pai cashcataca mana yacharcanichu. Ashtahuanpish yacuhuan bautizachun cachac Diosca: “Maijanpi ñuca Espíritu shamushpa tiyaricta ricungui, chaimi ñuca Espirituhuanca bautizanga” nirca. 34 Chaitaca ñucami ricurcani. Chaimantami: “Paica Diospac Churimi” nishpa, huillacuni» nirca.

Jesuspac punta yachacuccunamanta

35 Cayandi punzhaca cutinmi Juanca paipac yachacuccunahuan carca. 36 Jesús chaita pasacucta ricushpami Juanca: «Paimi Dios cachashca Pactalla Ovejaca» nirca. 37 Juanpac ishcai yachacuccuna chaita uyashpaca, Jesusta catishpa rircami. 38 Jesús chashna caticta tigrarishpa ricushpaca: —¿Imatatac mashcacunguichic?— nirca. Shina nicpimi paicunaca: —Rabí, ¿maipitac causangui?— nirca. («Rabí» nishpaca, «Yachachic» nisha ninmi). 39 Shina nicpimi Jesusca: —Ricungapac shamuichic— nirca. Chashna rishpami, pai maipi causacta ricurcacuna. Ña chuscu horas chishi shinamantaca tutacamanmi chaipi paihuan carcacuna. 40 Juan rimashcata uyashpa, Jesusta catishpa ric chai ishcai yachacuccunaca, shucca Simón Pedropac huauqui Andresmi carca. 41 Andresca paipac huauqui Simonhuanracmi tupangapac rirca. Shina rishpaca: —Ñami Mesias-huan tuparcanchic— nirca. (“Mesías” nishpaca, “Quishpichic Cristo” nisha ninmi). 42 Andresmi Simontaca Jesuspacman pusharca. Chashna pushacpi, Jesús Simonta ricushpaca: —Juanpac churi Simonmi cangui. Cunanmantaca Cefas shutimi cangui— nirca. (“Cefas” nishpaca, “Pedro” nisha ninmi).

Jesús Felipetapish, Natanaeltapish cayashcamanta

43 Jesusca cayandi punzhaca Galilea llactaman rinatami yuyarirca. Pai ricushpa, Felipehuan tupashpaca: —Ñucata cati— nirca. 44 Felipeca Betsaida pueblomantami carca. Chai pueblollamantatacmi Andrespish, Pedropish carca. 45 Felipe Natanaelta mashcangapac rishpa, paihuan tupashpaca: —Moisés mandashcacunapi quillcashpa huillashca, Dios ima nishcata huillaccuna quillcashca ñucanchic shuyacushca runahuanmi tuparcanchic. Paica Nazaret pueblomanta Josepac churi Jesusmi— nirca. 46 Shina nicpimi Natanaelca: —Nazaret pueblomantaca, ¿ima allitac llucshingachu?— nirca. Shina nicpimi Felipeca: —Canllatac shamui, ricungui— nirca. 47 Jesús, Natanael cuchuyacta ricushpaca: —Israel runatacmi shamushpa caipi can. Paica jaicapi mana llullanchu— nirca. 48 Shina nicpimi Natanaelca: —¿Ima shinatac ñucata ricsingui?— nirca. Shina nicpimi Jesusca: —Can higo yura ucupi cacpi, Felipe manarac cayacpimi, cantaca ña ricurcani— nirca. 49 Shina nicpimi Natanaelca: —¡Yachachic, canca Diospac Churimi cangui, israelcunata Jatun Mandacpishmi cangui!— nirca. 50 Shina nicpimi Jesusca: —¿Ñuca: “Higo yura ucupi cacllapitacmi ña ricurcani” nicllapichu cringui? Ashtahuanpish chaimanta yallitami ricungui— nirca. 51 Shinallatac Jesusca: —Jahua pacha pascarictapish, Diospac angelcuna Runa Tucungapac shamushca ñucapac jahuata huichicucta, uricuctami ricunguichic. Chaica chashnatacmi canga— nirca.

Juan 2

Jesús yacumanta vinota ruhuashcamanta

1 Quimsa punzha quipaca, Galilea llacta Caná pueblopimi shuc boda tiyarca. Chaipimi Jesuspac mamapish carca. 2 Chai bodamanmi Jesustapish, paipac yachacuccunatapish cayarca. 3 Chai bodapi vino tucuricpimi, Jesuspac mamaca: —Vino tucurishcami— nirca. 4 Shina nicpimi Jesusca: —Mamita, ¿ima nishpatac chashna ningui? Ñuca pi cashcata ricsichina horasca manarac chayamunchu— nirca. 5 Shina nicpimi, mamaca serviccunataca: —Tucui pai nishcata ruhuanguichic— nirca. 6 Tinajapi yacuta jundachicun Chaipica, israelcuna yacuta jundachishpa chuyayana sucta rumi tinajacunami tiyarca. Chai tinajacunaca ishcai puñu yalli yacutami apac carca. 7 Jesusca chai tinajacunapi, yacuta jundachichunmi serviccunata mandarca. Paicunaca tinaja shimicamanmi jundachirca. 8 Chaimantami Jesusca: —Cunanca, ashata llucchishpa, mizapi serviccunaman cuichic— nirca. Paicunaca serviccunaman aparcami. 9 Shina apacpi, yacumanta ruhuashca vinota mizapi servic mallishpaca, maimanta llucchishcata mana yacharcachu, ashtahuanpish yacuta tinajapi jundachic serviccunallami yacharca. Mizapi servic noviota cayashpaca: 10 —Pipish alli vinotaracmi ubiachin. Ña yallita ubiashca quipami, yangalla vinotaca ubian. Chashna cashpapish, canca alli vinotami cunancaman huacaichishpa charicushcangui— nirca. 11 Galilea llacta Caná pueblopimi Jesusca milagrota ruhuai callarirca. Chaipimi paica poderyuc cashcata ricuchirca. Chashna ruhuacpimi, paipac yachacuccunaca Diosmanta shamushca cashcata crircacuna. 12 Chai quipami, Jesusca paipac mamahuan, huauquicunahuan, yachacuccunahuan Capernaúm puebloman rirca. Chaipica, tauca punzhatami carca.

Jesús Diosta mañana huasimanta catuccunata llucchishpa cachashcamanta

13 Israelcunapac Pascua fiesta ña chayamucucpimi, Jesusca Jerusalén puebloman rirca. 14 Chaiman chayashpaca, Diosta mañana huasipi huagrata, ovejata, palomata catucucta, shinallatac cullquita cambiacuctami ricurca. 15 Chaita ricushpaca, anguta patarishpami chaipi catuccunataca ovejandi, huagrandi tucui llucchishpa cacharca. Cullquita cambiaccunatapish, mizacunata tigrachishpami shic-huarca. 16 Shinallatac palomata catuccunataca: —¡Caicunata caimanta llucchichic! ¡Ñuca Taitapac huasitaca ama randina, catuna huasita ruhuaichicchu!— nirca. 17 Chaimantami Jesuspac yachacuccunaca: “Diosta mañana huasitaca yallitami cuyani” nishpa, Dios quillcachishcapi David nishcata yuyarirca. 18 Jesús chashna ruhuacpica, maijan mandac israelcunaca: —Canta cai tucuita ruhuachun Dios cachashcata ricungapacca, ¿ima milagrotatac ruhuashpa ricuchingui?— nirca. 19 Chashna nicpimi Jesusca: —Diosta mañana huasita urmachishpa saquichic. Quimsa punzhapica cutin shayachishallami— nirca. 20 Shina nicpimi mandac israelcunaca: —Cai huasitaca chuscu chunga sucta huatapimi shayachirca. ¿Maitatac quimsa punzhallapi shayachinguiyari?— nirca. 21 Diosta mañana huasimanta Jesús nishpaca, paillamantatacmi nicurca. 22 Chaimantami paipac yachacuccunaca Jesús causaricpica, pai chashna nishcata yuyarishpa Dios quillcachishcatapish, Jesús ima nishcatapish crircacuna.

Jesús tucuipac shunguta yachashcamanta

23 Pascua fiesta punzhacunapimi, Jesusca Jerusalén pueblopi milagrocunata ruhuarca. Chashna ruhuacta ricushpami, achcacuna paita crirca. 24 Chashna cacpipish, paicunapac shungu imata yuyacushcata yachashpami, Jesusca paicunataca mana crirca. 25 Jesusca gentecuna imata yuyacushcataca pi mana huillacpipish ña yacharcami. Gentecunapac shungu imata yuyacushcataca tucuitami yacharca.

Juan 3

Nicodemo Jesus-huan parlashcamanta

1 Fariseocunapuramanta Nicodemo shuti runami tiyarca. Paica israelcunapurapica mandacmi carca. 2 Pai Jesuspacman tuta rishpaca: —Yachachic, canca Dios cachashca yachanchicmi. Pipish can ruhuacuc shina, milagrocunataca mana Dios-huan cashpaca, mana ruhuanmanchu— nirca. 3 Shina nicpimi Jesusca: —Maijanpish mana cutin huacharicca, Dios mandacuctaca mana ricungachu. Chaica chashnatacmi canga— nirca. 4 Shina nicpimi Nicodemoca: —¿Ima shinatac runaca cutin huacharingayari? ¿Maitatac cutin mamapac huicsapi yaicushpa huacharingayari?— nirca. 5 Shina nicpimi Jesusca: —Maijanpish yacumanta, Diospac Espiritumanta mana huacharicca, Dios mandacucmanca manatac yaicungachu. Chaica chashnatacmi canga. 6 Aichamanta huacharicca, aichami can. Ashtahuanpish Espiritumanta huacharicca, Espiritumi can. 7 Ama ñuca: “Cutin huacharinami can” nishcamanta mancharichu. 8 Huairaca maimanta cashpapish pucunllami. Shina pucucpi uyashpapish, maimanta shamuctapish, maiman rictapish mana yachanguichu. Shinallatacmi Diospac Espiritumanta huachariccunaca— nirca. 9 Shina nicpimi Nicodemoca: —¿Ima shinatac chashnaca tucunyari?— nirca. 10 Shina nicpimi Jesusca: —Canca israelcunata yachachicmi cangui. ¿Chashna cashca jahuachu caita mana yachangui? 11 Ñucanchicca imatapish yachashcatami ninchic, imata ricushcatami huillanchic. Ñucanchic huillashcataca mana cringuichicchu. Chaica chashnatacmi can. 12 Cai pachapi ima tiyashcamanta huillacpi mana crishpaca, ¿ima shinatac jahua pachamanta huillacpica cringuichicyari? 13 Jahua pachamanca pi mana rishcachu, ashtahuanpish Runa Tucungapac shamushca ñucallami jahua pachamanta shamurcani. Ñucami jahua pachapi causacca cani. 14 Ima shinami Moisés shitashca pambapi broncemanta ruhuashca culebrata caspipi huarcushpa ricuchirca, shinallatacmi Runa Tucungapac shamushca ñucapish, caspipi huarcushca cana cani. 15 Chaica, maijanpish ñucata cricca huiñai causaita charichunmi, chashnaca cana cani.

Dios cai pachapi causaccunata cuyashcamanta

16 Diosca cai pachapi causaccunata yallita cuyashpami, paipac shuclla Churita cai pachaman cacharca. Pipish paita cricca ama chingarichun, ashtahuanpish huiñai causaita charichunmi, chashnaca cacharca. 17 Diosca mana cai pachapi causaccunata llaquiman cachachunchu paipac churitaca cacharcachu, ashtahuanpish cai pachapi causaccunata quishpichichunmi cacharca. 18 Maijanpish Diospac Churita cricca mana llaqui pachaman ringachu, ashtahuanpish paipac shuclla Churita mana cricmi, pai mana crishcamanta llaqui pachaman ringa. 19 Paicunapac mana alli ruhuacushcacuna ama ricurichunmi Achicyachic shamucpica, mana munashpa amsapi causanallata ashtahuan munarca. Chaimantami juchanchishca canga. 20 Tucui mana allita ruhuaccunaca, paicunapac mana allita ruhuashcacuna ama achicman ricurichunmi, Achicyachictaca piñancuna. 21 Cashcata ruhuashpa causaccunaca, Diosllatac ruhuachicushcata yachachunmi, achicman cuchuyancunalla— nirca.

Bautizac Juan huillashcamanta

22 Chai quipami, Jesusca paipac yachacuccunahuan Judea llactaman rirca. Tauca punzhacunata paicunahuan cashpami, gentecunata bautizarca. 23 Juanpish chai punzhacunallapitacmi, Salim llacta cuchulla Enón llactapi, chaipi achca yacu tiyashcamanta bautizacurca. Chaipimi paipacman shamuc gentecunata bautizacurca. 24 Juantaca manarac carcelpi churarcachu. 25 Chaipimi Juanpac maijan caticcunahuan, maijancunaca, Israel shuc runahuan chuyayanamanta rimanacurca. 26 Chaimanta Juanpacman rishpaca: —Yachachic, Jordán yacu chimbapi canhuan tupanacuc, chai can parlacuc runami bautizacun. Achca gentecunami paipacmanca shamucun— nirca. 27 Chaimantami Juanca: —Dios mana cucpica, pipish imata mana chasqui pudinchu. 28 Ñuca: “Ñucaca mana Cristochu cani, ashtahuanpish paipac ñaupata cachashcallami cani” nishpa huillashcata, cancunallatacmi uyarcanguichic. 29 Shuc bodapica, noviaca noviopacmi. Noviopac ricsishcaca, novio rimashcata uyashpaca cushicunmi. Shinallatacmi ñucapish Novio rimashcata uyashpaca, yallita cushicuni. 30 Paica punzhantami ashtahuan alli nishca cana can. Ashtahuanpish ñucaca punzhantami yangalla nishca cana cani— nirca. Jahua pachamanta shamucca ima shina cashcamanta 31 Jahua pachamanta shamucmi tucuita yallica. Cai pachamanta cacca cai pachapi causaccuna shinallami. Chaimantami cai pachallamanta riman. Ashtahuanpish jahua pachamanta shamucmi tucuita yallica. 32 Paica imatapish ricushcacunallata, imatapish uyashcacunallatami huillan. Shina cacpipish, pai huillashcataca pi mana crinchu. 33 Maijanllapish pai huillashcata chasquicca, Diosca cashcata nic cashcatami ricuchin. 34 Dios cachashcami, Dios rimashcata riman. Diosca yallitami paipac Espirituta cushca. 35 Diosca paipac Churita yallitami cuyan. Chaimantami tucuita pai mandachun cushca. 36 Maijanpish paita cricca huiñai causaitami charin. Maijanpish paita mana cricca mana huiñai causaita charinchu, ashtahuanpish paitaca Diosca piñacungallami.

Juan 4

Jesús Samaria llacta huarmihuan parlashcamanta

1 Fariseocunaca: «Jesusca Juanta atishpami tauca caticcunata charin, shinallatac bautizacun» nishpami puricurca. 2 (Jesusca mana bautizacchu carca, ashtahuanpish paipac yachacuccunami bautizac carca). 3 Fariseocuna chashna nicucta yachashpami, Jesusca Judea llactamantaca Galilea llactaman cutishpa rirca. 4 Chaiman rishpaca, Samaria llactatami pasana carca. 5 Chashna ricushpami, Samaria llacta Sicar puebloman chayarca. Chai puebloca Jacobo paipac churi Joseman cushca allpa ladopimi carca. 6 Chaipimi Jacobopac yacu junduca tiyarca. Chaupi punzha shina cacpimi, Jesusca shaicushpa, yacu jundu cuchupi tiyarirca. 7 Chaimanmi Samaria llactamanta huarmi yacuta apangapac chayarca. Chaipimi Jesusca: —Ashalla yacuta carai— nirca. 8 Chai horasca paipac yachacuccunaca micunata randingapacmi puebloman rishca carca. 9 Samaria huarmica Jesustaca: —¿Ima shinatac canca israelcunapura cashca jahua ñucaman yacuta mañangui? Ñucaca Samaria huarmimi cani— nirca. (Israelcunaca Samaria llactapi causaccunahuanca mana apanacucchu carca). 10 Shina nicpimi Jesusca: —Canca Dios imata cusha nicushcatapish, pi yacuta mañacuctapish mana yachanguichu. Yachashpaca, canracmi: “Yacuta carai” ninguiman. Chashna mañacpica, causaita cuc yacutami cuiman— nirca. 11 Shina nicpimi, chai huarmica: —Amito, yacu jundupish ucumi. Imahuan llucchinatapish mana charinguichu. ¿Ima shinatac causaita cuc yacutaca cunguiyari? 12 Cai yacu jundutaca ñucanchic taita Jacobomi saquirca. Caimantami paipish, paipac huahuacunapish, paipac animalcunapish ubiac carca. ¿Canca taita Jacobota yallichu cangui?— nirca. 13 Shina nicpimi Jesusca: —Maijanpish cai jundumanta yacuta ubiacca, cutin yacunayachingami. 14 Ashtahuanpish maijanpish ñuca cushca yacuta ubiacca, jaicapi mana yacunayachingachu. Ñuca cushca yacuca paipica huiñai causaita cuc, tucyacuc yacu shinami canga— nirca. 15 Shina nicpimi, chai huarmica: —Amito, ama cutin cai jundumanta yacuta apac shamungapac, ama cutin yacunayachingapac chai yacuta cuiyari— nirca. 16 Shina nicpimi Jesusca: —Ri, cambac cusata cayamugri— nirca. 17 Shina nicpimi, chai huarmica: —Ñucaca mana cusayucchu cani— nirca. Shina nicpimi Jesusca: —Can: “Mana cusayucchu cani” nishpaca, allitami nishcangui. 18 Canca pichca cusatami charircangui. Cunan canhuan causacucca mana cambac cusachu. Shina nishpaca, mana llullashcanguichu— nirca. 19 Shina nicpimi, chai huarmica: —Amito, canca Dios ima nishcata huillacmi yuyachingui. 20 Ñucanchic ñaupa taitacunaca cai urcupimi Diosta mañac carca. Cutin cancunaca “Jerusalenpimi Diosta mañana canchic” ninguichicmi— nirca. 21 Jesusca chai huarmitaca: —Mana cai urcullapi, mana Jerusalenllapi Diosta mañana punzhacuna chayamucunmi. Chaitaca crinami cangui. 22 Cancunaca pita mañacushcata mana yachanguichicchu. Ñucanchicca pita mañacushcataca yachanchicmi. Diosca israelcunapuramantami Quishpichicta cachasha nishca. 23 Diosta ima shina mañana cashca shina mañana punzhacuna chayamucunmi, cunanllatacmi chai punzhaca. Diospac Espíritu yuyaita cucpimi, Dios ima shina cashcata yachashpa mañanga. Chashna mañaccunatami Diosca munan. 24 Diosca Espiritumi. Chaimantami paita mañacca Diospac Espíritu yuyaita cucpi, ima shina mañana cashca shina mañancuna— nirca. 25 Shina nicpimi, chai huarmica: —Cristo nishca Mesías shamuna cashcataca yachanimi. Pai shamushpami, tucuita alli huillanga— nirca. 26 Shina nicpimi Jesusca: —Chaica, canhuan parlacucllatacmi cani— nirca. 27 Shina ratomi paipac yachacuccunaca shamurca. Jesús chai huarmihuan parlacucta ricushpami mancharirca. Chashna cacpipish pi: «¿Imatatac tapucungui? ¿Imatatac chai huarmihuanca parlacungui?» nishpaca, mana tapurcachu. 28 Chai huarmi puñuta chaipi saquishpa, puebloman cutishpa, chaipi causaccunataca: 29 —Shamuichic, shuc runata ricunguichic. Paica tucui ñuca imata ruhuashpa causacushcatami huillan. ¿Manachu paica Cristo canga?— nirca. 30 Chaimantami gentecunaca chai pueblomantaca Jesus-huan tupangapac shamurca. 31 Chai gentecuna manarac chayamucpimi, Jesuspac yachacuccunaca: —Yachachic, micuiyari— nirca. 32 Shina nicpimi Jesusca: —Ñucaca cancuna mana ricsishca micunatami charini— nirca. 33 Shina nicpimi yachacuccunaca: —¿Pishi micunata carashca canga?— ninacurca. 34 Shina nicpimi Jesusca: —Ñuca micunaca, ñucata cachac Diospac munaita ruhuanami, pai imata ruhuachun nishcata tucuchinami. 35 ¿Manachu cancunaca: “Chuscu quillami cosechangapacca faltan” nicunguichic? Ashtahuanpish ñucaca: Chagrata alli ricushpaca, cosechanalla cashcata ricuichic, ninimi. 36 Granota tandacca, pagota charinmi. Chai tandashca granoca huiñai causaipacmi. Chaimantami granota tandacca tarpuc-huan cushicunga. 37 Gentecuna nishca shinaca shucca tarpun, shucca cosechanmi. Chaica chashnatacmi. 38 Ñucaca, mana cancuna trabajashca chagrata cosechachunmi cachani. Shuccunami llaquita apashpa trabajarca. Shina cacpipish, cancunami chai trabajashcamantaca japinguichic— nirca. 39 Chai huarmi: «Ñuca imata ruhuashpa causacushcatami huillan» nishcata uyashpami, Samaria llacta pueblopi causaccunaca Jesusta crircacuna. 40 Chaimantami gentecuna Jesuspacman shamushpa chaipi saquirichun mañarca. Shina mañacpimi, Jesusca ishcai punzhata chaipi saquirirca. 41 Jesús ima nishcata uyashpacarin, achca gentecunami crirca. 42 Chaimantami chai huarmitaca: —Cunancarin mana can huillashcallamantachu crinchic, ashtahuanpish ñucanchicllatacmi pai ima nishcataca uyashcanchic. Chaimantami cai pachapi causaccunata quishpichingapac shamushcata yachanchic— nirca.

Jesús mandacpac churita alliyachishcamanta

43 Jesús Samaria llactapi ishcai punzhata cashpaca, Galilea llactamanmi rirca. 44 Chaica, Jesusllatacmi: “Dios ima nishcata huillactaca quiquin llactaca mana alli chasquishcachu canga” nishpa huillarca. 45 Galilea llactapi causaccunapish Pascua fiesta punzhapi Jerusalenman rishpa, tucui imallata ruhuashcata ricurca. Chaimantami, paicunapac llactaman Jesús chayacpica, cushicushpa chasquirca. 46 Jesusca Galilea llacta Caná pueblomanmi cutirca. Chai pueblopimi yacumanta vinota ruhuashca carca. Chaipimi jatun mandac churashca mandacpish causarca. Chai mandacpac churimi Capernaúm pueblopi ungushca carca. 47 Chai mandacca Jesús Judea llactamanta Galilea llactaman shamushcata yachashpami, ungushpa huañugricuc paipac churita alliyachic shamuchun mañarca. 48 Chashna mañacpimi Jesusca: —Milagrocunata ruhuacta manarac ricushpaca, ñucata mana cringuichicchu— nirca. 49 Shina nicpimi, chai mandacca: —Amito, utca jacu. Ñuca churi atishpa huañungami— nirca. 50 Shina nicpimi Jesusca: —Cutilla, cambac churica ñami alli— nirca. Chai mandacca Jesús nishcata crishpami huasiman cutirca. 51 Pai huasiman cuticucpi, paipac serviccuna tupangapac llucshishpaca: —Cambac churica ñami alli tucun— nirca. 52 Chashna huillacpimi, mandacca ima horas alli tucushcata tapurca. Chashna tapucpi paicunaca: —Caina chaupi punzha shinatami fiebreca pitirirca— nirca. 53 Chaimantami ungushca huahuapac taitaca, chai horasllapitac Jesús: «Cambac churica ñami alli» nishcata yuyarirca. Chaimantami paipish, paipac tucui huasi ucupuracunapish Jesusta crirca. 54 Chai ishcai milagrotami Jesusca Judea llactamanta Galilea llactaman shamushca quipa ruhuarca.

Juan 5

Jesús paralisis ungüihuan cac runata alliyachishcamanta

1 Chai quipaca, israelcunapac fiestami carca. Chaimantami Jesusca Jerusalenman rirca. 2 Jerusalenpimi ovejacuna yaicuna pungu ladopimi, shuc cucha tiyarca. Chai cuchaca hebreo rimaipica Betesda shutimi can. Chaimanca pichca pungutami yaicuna carca. 3 Chai yaicunapica tauca ungushcacunami tiyac carca. Paicunaca ñahui mana ricuccuna, suchucuna, paralisis ungushcacunami carca. 4 Chaica, shuc angelmi jahua pachamanta cuchaman shamushpa, maijan cutinlla yacuta cuyuchic carca. Maijanpish utca yacuman yaicushpami ima ungüimantapish alliyac carca. 5 Chaipica, quimsa chunga pusac huatata ungushca shuc runami tiyarca. 6 Jesusca chai runata ricushpaca, unai huatacunata ungushca cashcatami yacharca. Chaimantami chai runataca: —¿Alliyasha ninguichu?— nirca. 7 Chai ungushca runaca: —Amito, yacuta cuyuchicpi, pi ñucata apacmi mana tiyan. Ñuca yacuman yaicungacamanca shuccunaracmi atishpa yaicun— nirca. 8 Shina nicpimi Jesusca: —Jatarishpa, canta huandumushcata apashpa rilla— nirca. 9 Chashna nincami, chai runaca alliyashpa, paita huandumushcata apashpa puri callarirca. Chai punzhaca samana punzhami carca. 10 Chaimantami mandac israelcunaca chai alliyashca runataca: —Cunanca samana punzhami. Canta huandumushcataca mana apanachu cangui— nirca. 11 Shina nicpimi, chai runaca: —Ñucata alliyachicmi: “Canta huandumushcata apashpa rilla” nirca. Chaimantami apashpa ricuni— nirca. 12 Shina nicpimi paicunaca: —¿Pitac: “Huandumushcata apashpa rilla” nircayari?— nirca. 13 Alliyashca runaca pi alliyachishcata mana yacharcachu. Chaica, Jesusca achca gentecunapurapimi carca. 14 Jesús, Diosta mañana huasipi chai runahuan tupashpaca: —Uyai, ña alliyashcanguimi. Ama ashtahuan juchallinguichu. Pacta ashtahuan llaquita apanguiman— nirca. 15 Chai alliyashca runa rishpa, mandac israelcunaman huillashpaca: “Jesusmi alliyachirca” nishpami huillarca. 16 Samana punzhapi alliyachishcamantami mandac israelcunaca Jesusta piñai callarirca. 17 Ashtahuanpish Jesusca: —Ñuca Taitaca cunancamanmi caicunataca ruhuacun. Ñucapish caicunata ruhuacunimi— nirca. 18 Chaimantami mandac israelcunaca Jesusta huañuchinata munarca. Mana samana punzhapi alliyachishcallamantachu piñai callarircacuna, ashtahuanpish “ñuca Taitaca Diosmi” nishpa Dios tucushcamantami ashtahuan piñashpa, huañuchisha nicurca.

Dios Jesusman tucui poderta cushcamanta

19 Chaimantami Jesusca: —Ñucaca Diospac Churi cashpapish, mana quiquin munaimanta ruhuanichu, ashtahuanpish ñuca Taita munashcallatami ruhuani. Imatami ñuca Taita ruhuan, chaitami ñucapish ruhuani. Chaica chashnatacmi can. 20 Ñuca Taitaca ñucata cuyashcamantami, tucui pai ruhuacushcata ricuchin. Ashtahuan caicunamanta yalli ruhuashcacunatami ricuchinga. Chaita ricushpaca, mancharishpami saquiringuichic. 21 Ima shinami ñuca Taitaca huañushcacunata causachishpa, causaita cun, chashnallatacmi paipac Churi ñucapish maijanman causaita cusha nishpaca cuni. 22 Ñuca Taitaca pitapish mana taripangachu, ashtahuanpish ñucatami taripachun churarca. 23 Chaica, maijanpish Taitata alli nic shinallatac Churita alli nichunmi chashnaca churarca. Maijanpish Churita mana alli nicca, ñucata cachac Taitami mana alli nin. 24 Maijanpish ñuca nishcata uyashpa, ñucata cachac Taitata cricca, huiñai causaita charinmi. Paica huañushcamanta causaiman pasashcamantami, llaquimanca mana ringa. Chaica chashnatacmi can. 25 Huañushcacuna Diospac Churi rimashcata uyana pachaca chayamucunmi. Chaita, cunanllatacmi. Chaita uyaccunaca causaita charingami. Chaica chashnatacmi can. 26 Ima shinami ñuca Taitaca quiquinllatac causaita charin, chai shinallatac ñucapish causaita cuchunmi cacharca. 27 Runa Tucungapac shamushca ñuca paipac Churi cashcamantami, taripachun ñucaman poderta curca. 28 Tucui huañushcacuna ñuca rimashcata uyana pachami chayamucunmi. Chaimanta ama cai nishcata uyashcallamanta mancharichicchu. 29 Allita ruhuaccunaca causaita japingapacmi causaringacuna, ashtahuanpish mana allita ruhuaccunaca Dios juchanchishca cangapacmi causaringacuna.

Jesús pi cashcata huillaccunamanta

30 Ñuca munaimantaca imata mana ruhuai pudinichu. Ñucata cachac Taita nishcata uyashpami taripani. Mana ñuca quiquin munaimanta, ashtahuanpish ñuca Taita munaimantami juchanchini. Chaimantami cashcata ruhuashpa juchanchini. 31 Ñuca quiquinllamanta huillacucpica, ñuca huillashcaca yangallami canman. 32 Ashtahuanpish ñucamanta huillacca, shucmi. Chai huillacca ñuca ima shina cashcatami huillan. 33 Cancuna Juanman tapuchun cachacpica, paica mana llullashpami huillarca. 34 Mana gentecuna huillashcatachu huillani, ashtahuanpish cancuna quishpirichunmi, pai huillashcata huillani. 35 Juan huillashcaca luz achicyachicuc shinami carca. Cancunaca ashacamanllami achicpi canata munarcanguichic. 36 Ñuca ruhuashcaca Juan huillashcamanta yallimi ñucamanta huillacun. Ñuca Taita ruhuachun nishcacunallatami ruhuacuni. Chai ruhuashcacunami ñuca Taita pi cashcatapish, ñuca pi cashcatapish ricuchin. 37 Ñucata cachac Taitapish ñucamantami huillan. Shina cacpipish, cancunaca jaicapi paitaca mana ricushcanguichicchu, pai rimashcatapish mana uyashcanguichicchu. 38 Dios ñucata cachashcatapish mana cringuichicchu, pai huillashcatapish cancunapac shungupica mana charinguichicchu. 39 Huiñai causaita japisha nishpami, Dios quillcachishcataca allita ricushpa yachacunguichic. Chai quillcashcacunami ñucamanta huillan. 40 Cancunaca huiñai causaita charingapac mana ñucapacman shamushun ninguichicchu. 41 Gentecunalla ñucata alli nichunca mana munanichu. 42 Ñucaca cancuna Diosta mana cuyac cashcatami yachani. 43 Ñuca Taitapac shutipi shamucpipish chasquinguichicchu, ashtahuanpish maijan pai quiquinllamanta shamucpica chasquinguichicmanmi. 44 Cancunaca, cancunapura alli ninacunallatami munanguichic, ashtahuanpish shuclla Diospac alli nishca canataca mana munanguichicchu. Shina cashpaca, ¿ima shinatac ñucataca cringuichicyari? 45 Ñuca Taitapac ñaupapi, ñuca juchanchina cashcataca ama yuyanguichicchu. Ashtahuanpish cancuna shunguta churashpa, shuyacushca Moisesmi juchanchinga. 46 Moisés nishcata crishpaca, ñucatapish cringuichicmanmi. Moisesca ñucamantami quillcarca. 47 Pai quillcashcata mana crishpaca, ¿ima shinatac ñuca nishcataca cringuichicyari?— nirca.

Juan 6

Jesús pichca huaranga gentecunaman carashcamanta

1 Chai quipaca, Jesusca Galilea cucha chimba ladomanmi rirca. Chai cuchallatacmi Tiberias shutipish carca. 2 Ungushcacunata alliyachishcata ricushpami, achca gentecuna paita catishpa rircacuna. 3 Jesusca paipac yachacuccunahuan urcuman rishpami, chaipi tiyarirca. 4 Israelcunapac Pascua fiestami chayamurca. 5 Jesusca achca gentecuna caticucta ricushpami Felipetaca: —Cai tucui gentecunaman carangapacca, ¿maipitac micunata randishun?— nirca. 6 Felipe ima nicta uyangapacllami chashnaca nirca, ashtahuanpish Jesusca imata ruhuana cashcataca ña yacharcami. 7 Shina nicpimi Felipeca: —Ishcai patsac denario cullquihuan randishca tandapish asha ashallami cai tucui gentecunamanca pactanga— nirca. 8 Simón Pedropac huauqui caishuc yachacuc Andresca: 9 —Caipimi shuc huambra pichca cebada tandata, ishcai challuata charicun. Caillaca cai tucui gentecunamanca, ¿imatac pactangayari?— nirca. 10 Shina nicpimi Jesusca: —Gentecunata tiyarichun nichic— nirca. Chaipi tiyariccunaca caricunallami pichca huaranga shinami carca. Chai pambapica achca quihuami tiyarca. 11 Jesusca chai tandata japishpa, Diosta pagui nishpaca, yachacuccunamanmi raquichun curca. Challuata japishpapish, chashnallatacmi ruhuarca. Chashna ruhuacpica, mana nictami micurcacuna. 12 Gentecuna mana nicta micushca quipami, Jesusca paipac yachacuccunataca: —Ama yangamanta cachun, tucui puchushcacunata tandachichic— nirca. 13 Paicuna tandachishpaca, chunga ishcai taza jundatami chai pichca cebada tandamanta puchushcataca tandachirca. 14 Jesús chai milagrota ruhuacta gentecuna ricushpaca: «Cai runaca cai pachaman shamuna cashca Dios ima nishcata huillacmi» nirca. 15 Jesusca gentecuna jatun mandac cachun pushagricushcata yachashpami, cutinllatac urcupi pailla cangapac rirca.

Jesús yacu jahuata purishcamanta

16 Ña tutayamucucpica, cutinllatacmi Jesuspac yachacuccunaca cuchaman shamurca. 17 Chaipimi canoapi huichicushpa, Capernaúm puebloman cuchata pasacurca. Ñami tuta carca. Jesusca manarac paicunapacman cutimurcachu. 18 Sinchi huaira cacpimi, cucha yacuca yallita cuyuri callarirca. 19 Pichca huaranga metro shinata barcopi ricushpami, yachacuccunaca Jesús yacu jahuata purishpa, paicunapacman shamucucta ricurca. Chaita ricushpami, mancharicurca. 20 Shina mancharicucpimi Jesusca: —Ama mancharichicchu, ñucami cani— nirca. 21 Shina nicpimi, paicunaca cushilla canoapi huichicuchinata munarca. Shina cacpipish, ñami paicuna maiman ricushcamanca chayarca.

Gentecuna Jesusta mashcashcamanta

22 Cayandi punzhaca caishuc ladopi cac gentecunaca chaipi shuclla canoa cashcata, Jesuspish mana paipac yachacuccunahuan rishcatami yachac chayarcacuna. 23 Chaimanmi Tiberias pueblomanta canoacuna shamushpa chai yacu patapi shayarirca. Chaipimi Jesusca Diosta pagui nishpa, tandata carashca carca. 24 Gentecunaca Jesuspish, paipac yachacuccunapish mana chaipi cacta ricushpami, canoacunapi huichicushpa, Capernaúm pueblopi Jesusta mashcangapac rircacuna.

Jesús causaita cuc tanda cashcamanta

25 Gentecuna yacu cuchata pasashpa Jesus-huan tupashpaca: —Yachachic, ¿ima horastac caimanca shamurcangui?— nirca. 26 Shina tapucpimi Jesusca: —Cancunaca mana milagrocunata ruhuashcamantachu mashcacunguichic, ashtahuanpish mana nicta micushcallamantami mashcacunguichic. Chaica chashnatacmi can. 27 Cancunaca ama chingariclla micunata mashcaichicchu, ashtahuanpish huiñai causaita cuc micunata mashcaichic. Chai micunataca Runa Tucungapac shamushca ñucallami cusha. Chaita cuchunmi Diosca ñucataca cacharca— nirca. 28 Shina nicpimi paicunaca: —Dios munashcata ruhuangapacca, ¿imatatac ruhuana canchic?— nirca. 29 Shina nicpimi Jesusca: —Pai munashcata ruhuanaca, pai cachashca churita crinami— nirca. 30 Shina nicpimi paicunaca: —Ñucanchic ricushpa canta crichunca, ¿ima milagrotatac ruhuashpa ricuchinguiyari? 31 Ñucanchic ñaupa taitacunaca maná tandatami shitashca pambapi micurca. Dios quillcachishcapica: “Jahua pacha tandatami cararca” ninmi— nirca. 32 Shina nicpimi Jesusca: —Moisesca mana jahua pacha tandatachu curca, ashtahuanpish ñuca Taitami jahua pachamantatac tandata cun. Chaica chashnatacmi can. 33 Dios cushca tandaca jahua pachamanta shamucmi. Chai tandami cai pachapi causaccunaman huiñai causaita cun— nirca. 34 Chaimantami paicunaca: —Shinashpaca, chai tandata punzhanta caraiyari— nirca. 35 Shina nicpimi Jesusca: —Ñucami huiñai causaita cuc tandaca cani. Maijanpish ñucapacman shamucca manatac yarcachingachu. Maijanpish ñucata cricca manatac yacunayachingachu. 36 Ña nishca shina, ñucata ricushpapish, mana cringuichicchu. 37 Tucui ñuca Taita cushcacunami ñucapacman shamun. Chai shamuccunataca manatac cutichishpa cachashachu. 38 Mana ñuca munashcata ruhuangapacchu jahua pachamanta shamurcani, ashtahuanpish ñucata cachac Taita munashcata ruhuangapacmi shamurcani. 39 Ñucata cachac Taitaca tucui ñucaman cushcacunata shucllatapish mana chingachishpa, tucuri punzhapi causachichunmi munan. 40 Taitaca paipac Churita maijanpish ricushpa crishpaca, huiñai causaita charichunmi munan. Ñucami tucuri punzhapi paicunataca causachisha— nirca. 41 Jesús: «Ñucami jahua pachamanta shamushca tandaca cani» nishcamantami, israelcunaca Jesusta piñai callarircacuna. 42 Shina piñarishpaca: —¿Caica manachu Josepac churi Jesús? Paipac taita mamatapish ricsinchicmi. ¿Imamantatac: “jahua pachamantami shamurcani” ninyari?— ninacurca. 43 Chaimantami Jesusca: —Ama huashalla rimanacuichicchu. 44 Ñucata cachac Taita mana pushamucpica, pi ñucapacman mana shamunchu. Chai shamuccunataca tucuri punzhapi causachishami. 45 Dios ima nishcata huillaccuna quillcashcapica: “Tucuimi Dios yachachishca canga” nin. Chaimantami, maijanpish Dios ima nishcata uyashpa, paimanta yachacucca, ñucapacman shamunga. 46 Pipish Diosta mana ricushcachu, ashtahuanpish paipacmanta shamushca ñucallami ricurcani. 47 Maijanpish ñucata cricca, huiñai causaitami charin. Chaica chashnatacmi can. 48 Ñucami causaita cuc tandaca cani. 49 Cancunapac ñaupa taitacunaca shitashca pambapimi maná tandata micurca. Shina micushpapish huañurcacunami. 50 Caimi jahua pachamanta shamushca tandaca. Maijanpish cai tandamanta micucca mana huañungachu. 51 Ñucami jahua pachamanta shamushca, causaita cuc tandaca cani. Maijanpish cai tandata micucca, huiñaita causangami. Cai tandaca ñuca quiquin aichami. Chaitaca cai pachapi causaccuna huiñai causaita charichunmi cusha— nirca. 52 Chaimanta israelcuna paicunapura rimanacushpaca: —¿Ima shinatac paipac quiquin aichataca carangayari?— ninacurca. 53 Shina nicpimi Jesusca: —Runa Tucungapac shamushca ñuca aichata cancuna mana micushpa, ñuca yahuarta mana ubiashpaca, mana causaita charinguichicchu. Chaica chashnatacmi can. 54 Maijanpish ñuca aichata micucca, ñuca yahuarta ubiacca, huiñai causaita charinmi. Ñucami tucuri punzhapica causachisha. 55 Chaimanta ñuca aichami micunatac can, ñuca yahuarmi ubianatac can. 56 Maijanpish ñuca aichata micucca, ñuca yahuarta ubiacca, ñucahuanmi causan. Ñucapish paihuanmi causani. 57 Ñucata cachac Taitaca causaiyucmi. Chaimantami ñucaca paimanta causani. Ñuca aichata micucca, ñucamantami causanga. 58 Caimi jahua pachamanta shamushca tandaca. Cai tandaca mana cancunapac ñaupa taitacuna micushca maná tanda shinachu. Paicunaca chai tandata micushpapish huañurcami. Maijanpish cai tandata micucca, huiñai causaitami charinga— nirca. 59 Jesusca caicunatami Capernaúm pueblo, israelcuna tandanacuna huasipica yachachirca.

Jesús rimashcaca huiñai causaita cuc cashcamanta

60 Jesús chashna yachachishcata tauca paita caticcuna uyashpaca: —Cai yachachishcacunaca sinchimi. ¿Pitac caitaca entendingayari?— ninacurca. 61 Chashna nishcamanta, huashalla parlanacucucta Jesús yachashpaca: —¿Cai nishcaca llaquichinchu? 62 Runa Tucungapac shamushca ñuca ñaupa maipi cashcaman ricta ricushpaca, ¿imashi tucunguichic? 63 Diospac Espiritumi causaita cun. Gentecunallaca imata ruhuai pudinchu. Tucui ñuca nishcacunaca, causaita cuc Diospac Espiritumantami. 64 Shina cacpipish, cancunapuramanta maijancunaca mana cringuichicchu— nirca. Jesusca utcamanmi maijanlla paita mana crigricushcatapish, maijan japichigricushcatapish yacharca. Chaimantami chashna nirca. 65 Shinallatac Jesusca: —Chaimantami ñucaca: “Taita mana pushamucpica, pi mana ñucapacman shamungachu” nishpa, yachachircani— nirca. 66 Chaimanta pachami Jesusta caticcunaca caruyashpa, mana Jesus-huan purirca. 67 Chaimantami Jesusca chunga ishcai yachacuccunataca: —¿Cancunapish shitashpa rishun ninguichicchu?— nirca. 68 Shina nicpimi, Simón Pedroca: —Apunchic Jesús, ¿pipacmantac rishunyari? Cambac rimashca shimicunaca, huiñai causaita cucmi. 69 Ñucanchicca cantaca crishcanchicmi. Dios cachashca Jucha Illac cashcatapish yachanchicmi— nirca. 70 Shina nicpimi Jesusca: —¿Manachu cancunataca chunga ishcaita acllarcani? Shina cacpipish, cancunapuramanta shucca diablohuanmi— nirca. 71 Chashna nishpaca, Simón Iscariotepac churi Judasmantami Jesusca nicurca. Paica chunga ishcai yachacuccunapuramantami carca. Paimi quipata Jesusta japichirca.

Juan 7

Jesuspac quiquin huauquicuna mana crishcamanta

1 Chai quipaca, Jesusca Galilea llactapimi puricurca. Mandac israelcuna huañuchishun nishcamantami, Judea llactapi canataca mana munarca. 2 Israelcunapac chuclla ruhuana fiesta punzhacunami chayamucurca. 3 Jesuspac huauquicunaca Jesustaca: —Ama caipi caichu, canta caticcuna can imalla ruhuashcata ricuchun, Judea llactaman ri. 4 Maijanpish gentecunaman ricsichisha nishpaca, mana pacallapi imatapish ruhuanchu. Shuctac llacta gentecunamanpish milagrota ruhuashpa ricuchiyari— nirca. 5 Quiquin huauquicunapish Jesusta mana crircacunachu. Chaimantami Jesusca: 6 —Ñucapac horasca manarac chayamunchu. Cancunamanmi ima horaspish alli. 7 Cai pacha gentecunaca cancunataca mana piñanchu, ashtahuanpish paicuna mana allita ruhuashcata ñuca huillashcamantami, ñucataca piñancuna. 8 Chai fiestamanca richiclla. Ñucapac horas manarac chayamushcamantami, ñucaca mana rini— nirca. 9 Chashna nishpami, Galilea llactallapitacmi saquirirca.

Israelcunapac fiesta punzhacunapi Jesús yachachishcamanta

10 Paipac huauquicuna fiestaman rishca quipaca, Jesuspish rircami. Shina rishpapish, mana pi yachacllapimi pacalla rirca. 11 Mandac israelcuna Jesusta mashcashpaca: —Chai runaca, ¿maipishi canga?— nishpami mashcacurca. 12 Gentecunapurapi maijan huashalla parlanacushpaca: “Chai runaca alli runami”, cutin maijancunaca: “Paica mana alli runachu. Gentecunata umashpami purin” ninacurca. 13 Shina ninacushpapish, mandac israelcunata manchashcamantami, pipish Jesusmanta imata mana nishpa, picunapuralla parlanacurca. 14 Chai fiesta punzhacuna ña chaupiyamucucpimi, Jesusca Diosta mañana huasipi yachachi callarirca. 15 Jesús shina yachachicpimi israelcunaca: —¿Ima shinatac cai runaca yachachicllapish mana rishpa, cai tucuita yachanlla?— nishpa mancharirca. 16 Shina nicpimi Jesusca: —Ñuca yachachishcaca mana ñuca munaimantachu, ashtahuanpish ñucata cachac Diosmantami. 17 Maijanpish Dios munashcata ruhuanata munaccunami, ñuca yachachishcaca ñuca munaimanta cashcata, mana cashpaca Diosmanta cashcata yachac chayancuna. 18 Quiquin munaillamanta rimacca, jatun tucunallatami munan. Shina cacpipish, Cachacta jatunyachicmi, cashcata nin. Paica jaicapi mana llullanchu. 19 Moisesmi mandashcacunataca curca. Ashtahuanpish cancunaca shucllapish mana cazunguichicchu. ¿Ima nishpatac ñucataca huañuchishun ninguichic?— nirca. 20 Shina nicpimi gentecunaca: —¡Supai japishcami cangui! ¿Pitac cantaca huañuchisha nicun?— nirca. 21 Shina nicpimi Jesusca: —Shuc milagrota ñuca ruhuashcamantami mancharishpa saquiringuichic. 22 Moisesmi circuncisionta ruhuachun mandarca. Chaitami samana punzha cacpipish, cari huahuacunata circuncisionta ruhuachinguichic. Chai mandashcacunaca mana Moisesmantachu shamurca, ashtahuanpish ñaupa taitacunami chaitaca ruhuachiccuna carca. 23 Moisés mandashcata mana paquingaraicumi, samana punzhapipish circuncisionta ruhuanguichic. Shinashpaca, ¿ima nishpatac samana punzhapi ungushca runata ñuca alliyachishcamantaca piñaringuichic? 24 Ama ñahuita ricushpalla juchanchichicchu. Ashtahuanpish cashcata ruhuashpa juchanchichic— nirca.

Pai maimanta cashcataca Jesusllatac parlashcamanta

25 Jerusalén pueblo maijan israelcuna parlanacushpaca: —¿Manachu cai runaca huañuchingapac mashcacushca? 26 Riquichic, tucuipac ñaupapimi rimaricun. Pipish imata mana ninchu. ¿Mandaccunapish “Cristomi” nishpachu crincuna? 27 Ashtahuanpish pai maimanta cashcataca yachanchicmi. Shamuna cashca Cristo shamucpica, maimanta shamushcataca pi mana yachangachu— ninacurca. 28 Jesús Diosta mañana huasipi yachachishpaca: —¿Ñuca maimanta cashcatapish, pi cashcatapish yachanguichicchu? Mana ñuca quiquinllamantachu shamurcani, ashtahuanpish cashcata ruhuac Dios cachacpimi shamurcani. Paitaca cancunaca mana ricsinguichicchu. 29 Ñucataca Diosmi cacharca. Paimanta shamushca cashpami, paitaca ricsini— nirca. 30 Jesusta prezushun nicushpapish manarac prezuna horas cacpimi, pi mana japirca. 31 Ashtahuanpish achca gentecuna paita crishpaca: —Cristo shamushpaca, ¿cai runa ruhuashcamanta yallichu milagrocunata ruhuanga?— nircacuna.

Fariseocuna Jesusta prezushun nishcamanta

32 Fariseocunaca gentecuna Jesusmanta parlanacuctami uyarca. Chaimantami fariseocunapish, curacunata mandac curacunapish Jesusta japichun soldadocunata cacharca. 33 Chaimantami Jesusca: —Ashacamanllami cancunahuan casha. Quipataca ñucata Cachacpacmanmi risha. 34 Ñucata mashcashpapish mana taringuichicchu. Ñuca maipi cashcamanca mana chayai pudinguichicchu— nirca. 35 Chaimanta israelcunaca caishuc chaishuc tapunacushpaca: —Ñucanchic mana tarichunca, ¿maimanshi ringa? ¿Ñucanchicpuramanta Grecia llactaman rishcacunapacmanchu risha nin? ¿Chaipichu israelcunata yachachisha nin? 36 Pai: “Ñucata mashcashpapish mana taringuichic. Ñuca maipi cashcamanca mana chayai pudinguichicchu” nishpaca, ¿imatatac nisha nin?— ninacurca.

Causaita cuc yacumanta

37 Fiesta tucuri jatun punzhapi Jesús jatarishpa sinchita rimashpaca: —Maijanpish yacunayachicca ñucapacman shamushpa, yacuta ubiaichic. 38 Dios quillcachishcapi nishca shina, maijanpish ñucata cricpac shungumantaca, causaita cuc yacumi llucshinga— nirca. 39 Jesusca, paita criccuna Diospac Espirituta chasquina cashcamantami chashna nirca. Jesusta Dios manarac jahua pachaman pushacpimi, Diospac Espirituca manarac shamushca carca.

Gentecuna caita chaita yuyashcamanta

40 Chaita uyashpami maijan gentecunaca: «Cai runaca ñucanchic shuyacushca Dios ima nishcata huillacmi» ninacurca. 41 Cutin shuccunaca: «Paica Cristomi» ninacurca. Shina cacpipish maijancunaca: «¿Cristoca Galilea llactamantachu shamunga? 42 ¿Manachu Dios quillcachishcapica: “Cristoca mandac Davidpac aillupuramanta, pai huacharishca Belén pueblomanta shamunga” nin?» ninacurca. 43 Paimanta gentecunapura shucca shuctac, shucca shuctac ninacushpa chicanyarinacurca. 44 Maijancuna Jesusta prezushun yuyacushpapish, mana imata ruhuarcachu.

Mandac israelcuna Jesusta mana crishcamanta

45 Japichun cachashca soldadocuna fariseocunapacman, curacunata mandac curacunapacman cutimucpi paicunaca: —¿Ima nishpatac Jesusta mana japimunguichic?— nirca. 46 Shina nicpimi soldadocunaca: —Chai runa shinaca, jaicapi pi mana rimashcachu— nirca. 47 Shina nicpimi fariseocunaca: —¿Cancunatapish crichircachu? 48 ¿Mandac israelcunapish, fariseocunapish paita crishcachu? 49 ¡Chai gentecunaca Moisés mandashcacunata mana yachanchu! Chaimantami paicunaca llaquita apanga— nirca. 50 Shuc tuta Jesuspacman ric, fariseocunapuramanta Nicodemomi chaipi carca. Paica: 51 —Mandashcapi nishca shinaca, ima ruhuashcata manarac alli yachashpaca, pitapish mana juchanchinallachu canchic— nirca. 52 Shina nicpimi paicunaca: —¿Canpish Galilea llactamantachu cangui? Dios quillcachishcata ricui. Chaipica: “Galileamantaca pi huillac mana shamushcachu” ninmi— nirca.

Huainayac huarmimanta

53 Chai quipaca quiquin huasimanmi rircacuna.

Juan 8

1 Jesusca Olivos urcumanmi rirca. 2 Chai cayandi punzha pacarimucucpimi, Diosta mañana huasiman cutirca. Chaiman gentecuna chayacpimi, Jesusca tiyarishpa yachachi callarirca. 3 Chaimanmi mandashcacunata yachachiccunapish, fariseocunapish shuc huarmi huainayacucta japishpa, apamurca. Chai huarmita gentecunapac chaupipi 4 shayachishpaca: —Yachachic, cai huarmitaca huainayacuctami japimunchic. 5 Moisés mandashcapica, cai shina mana allita ruhuac huarmicunataca rumihuan shitashpa huañuchichun ninmi. Canca, ¿imatatac ningui?— nirca. 6 Jesús mana allita nicpica, juchanchingapacmi chashnaca tapurca. Ashtahuanpish Jesusca cumurishpami, maqui dedohuan pambapi quillcacurca. 7 Chashna tapushpa caticpi, Jesús jatarishpaca: —Cancunapuramanta maijan jucha illac cashpaca, pairac rumihuan shitachun— nirca. 8 Shina nishpaca, cutinllatacmi cumurishpa pambapi quillcashpa catirca. 9 Chaita uyashpaca, shungupi nanarishpami shucllancaman shucllancaman rirca. Yuyacmanta callarishpami chai huarmillata Jesus-huanca saquishpa rircacuna. 10 Jesús shayarishpa, pitapish mana ricushpa, huarmilla chaipi shayacucpica: —Uyai, ¿maipitac chai juchanchiccunaca? ¿Manachu maijan juchanchirca?— nirca. 11 Shina nicpimi, chai huarmica: —Amito, mana pi juchanchircachu— nirca. Shina nicpimi Jesusca: —Ñucapish mana juchanchinichu. Rilla, cutinca ama juchallinguichu— nirca.

Jesús achicyachic luz cashcamanta

12 Cutinllatac Jesusca israelcunataca: —Ñucami tucui cai pachapi causaccunapac achicyachic luz cani. Maijanpish ñucata caticca mana amsapi puringachu, ashtahuanpish causaita cuc luztami charinga— nirca. 13 Shina nicpimi fariseocunaca: —Canllamantatacmi huillacungui. Chaimanta can huillashcapish yangallami— nirca. 14 Shina nicpimi Jesusca: —Ñucaca maimanta shamushcatapish, maiman ricushcatapish yachanimi. Chaimantami ñucallamanta huillacushcapish, mana yangalla can. Ashtahuanpish cancunaca ñuca maimanta shamushcatapish, maiman ricushcatapish mana yachanguichicchu. 15 Cancunaca gentecuna yuyashca shinami juchanchinguichic. Ashtahuanpish ñucaca pita mana juchanchinichu. 16 Ñucaca mana ñucallachu juchanchini, ashtahuanpish ñucata cachac Taitahuanmi juchanchini. Chaimantami ñucaca cashcata ruhuashpa juchanchini. 17 Moisés mandashcacunapica: “Ishcai huillaccuna tiyacpimi, cierto cashcata yachana” ninmi. 18 Ñuca quiquinmantami huillacuni. Ñucata cachac Taitapish ñucallamantatacmi huillan— nirca. 19 Shina nicpimi paicunaca: —¿Maipitac cambac taitaca?— nirca. Chaimantami Jesusca: —Cancunaca ñucatapish, ñuca Taitatapish mana ricsinguichicchu. Ñucata ricsishpaca, ñuca Taitatapish ricsinguichicmanmi— nirca. 20 Jesusca caicunataca Diosta mañana huasipi, ofrenda churana ladopimi yachachirca. Paita japina horas manarac chayamucpimi, paitaca pi mana japirca.

Jesús ricushcaman pi mana ri pudic cashcamanta

21 Cutinllatac Jesusca: —Ñucaca rigrinimi. Cancunaca mashcanguichicmi. Ñuca ricushcamanca mana ri pudinguichicchu Cancunapac juchallapitacmi huañunguichic— nirca. 22 Chaita uyashpami mandac israelcunaca: —¿Pai: “Ñuca ricushcamanca mana ri pudinguichicchu” nishpaca, paillatac huañunamantachu nicun?— ninacurca. 23 Shina nicpimi Jesusca: —Cancunaca caimantami canguichic. Ñucaca jahua pachamantami cani. Cancunaca cai pachamantami canguichic. Ñucaca mana cai pachamantachu cani. 24 Chaimantami “cancunapac juchallapitacmi huañunguichic” nircani. Ñucata cancuna mana crishpaca, cancunapac juchallapitacmi huañunguichic— nirca. 25 Chaimantami Jesustaca: —Canca, ¿pitac cangui?— nirca. Shina tapucpimi Jesusca: —Ñuca pi cashcataca callarillapitacmi huillarcani. 26 Cancunata juchanchishpa, tauca ninacunatami charini. Shina cashpapish ñucata Cachacca imatapish cashcatami nin. Ñucaca pai imata nishcallatami nini— nirca. 27 Paicunaca Diosmanta Jesús huillacushcata mana entendircachu. 28 Chaimantami Jesusca: —Runa Tucungapac shamushca ñucata chacatashpami, ñuca pi cashcata, ñuca munaimanta imatapish mana ruhuac cashcata, ashtahuanpish ñuca Taita yachachishcata nic cashcata yachanguichic. 29 Ñucata Cachacca ñucahuanmi. Ñucaca pai munashcallatami ruhuani. Chaimantami paica mana ñucallata saquin— nirca. 30 Chaicunata Jesús nicpica, achcacunami crircacuna. Diospac huahuacunamantapish, juchapi huatashca shina causaccunamantapish 31 Jesusca paita cric israelcunataca: —Cancunaca ñuca rimashcata cazushpaca, ñuca yachacuccunatacmi canguichic. 32 Chashnami cashcata nic cashcata ricsinguichic. Chai cashcata nic rimashcami cacharichinga— nirca. 33 Shina nicpimi paicunaca: —Ñucanchicca Abrahampac huahua huahuacunami canchic. Jaicapi huatashca shina servicca mana canchicchu. ¿Ima nishpatac cacharichingami ninguiyari?— nirca. 34 Shina nicpimi Jesusca: —Maijanpish juchata ruhuacca juchapi huatashca shinami. Chaica chashnatacmi can. 35 Shuc servicca mana amopac huasipi huiñaita causanchu, ashtahuanpish churimi taitahuan causacungalla. 36 Chaimanta Diospac Churi cancunata huatashca shinamanta cacharichicpica, cacharishcatacmi canguichic. 37 Cancuna Abrahampac huahua huahuacuna cashcataca yachanimi. Chashna cacpipish, ñuca yachachishcata mana entendishpami, ñucataca huañuchishun nicunguichic. 38 Ñucaca, ñuca Taitahuan cashpa, ricushcallatami huillani. Cancunaca cancunapac taita nishcallatami ruhuanguichic— nirca.

Cancunapac taitaca diablomi nishcamanta

39 Shina nicpimi paicunaca: —Ñucanchic taitaca Abrahammi— nirca. Shina nicpimi Jesusca: —Cancuna Abrahampac huahuacuna cashpaca, Abraham ruhuashcatachari ruhuanguichicman. 40 Ñuca Diosmanta uyashcata, cashcata nishcata nicucpipish cancunaca huañuchishun ninguichicmi. Abrahamca jaicapi mana chashna ruhuarcachu. 41 Cancunaca cancunapac taita ruhuashcatami ruhuanguichic— nirca. Shina nicpimi paicunaca: —¡Ñucanchicca mana huainapac huahuacunachu canchic, ashtahuanpish shuc taitallatami charinchic! ¡Chaica Diosmi!— nirca. 42 Shina nicpimi, Jesusca: —Dios cancunapac taita cacpica, cuyanguichicmanmi. Ñucaca Diosmantami shamurcani. Mana ñuca munaimantachu shamurcani, ashtahuanpish Diosmi cacharca. 43 ¿Ima nishpatac ñuca rimashcataca mana entendinguichic? Ñuca rimashcata mana uyashun nishpami, mana entendinguichic. 44 Cancunaca diablopac huahuacunami canguichic. Chaimantami pai munashcata ruhuanguichic. Diabloca callarimanta pachami huañuchic, llullac cashca. Paica jaicapi mana cashcata ninchu. Paica llullapac taitami. Pai llullashpaca, pai ima shina cashca shinallatacmi ricuchin. 45 Chaimantami ñuca imapish cashcallata nicpica, mana cringuichic. 46 ¿Cancunapuramanta maijantac ñuca juchayuc cashcataca ricuchinguichic? Diosmanta ñuca huillacpica, ¿ima nishpatac mana cringuichic? 47 Maijanpish Diospac huahua cashpaca, pai rimashcatami uyasha nin, ashtahuanpish cancunaca mana Diospac huahua cashpami, pai rimashcataca mana uyashun ninguichic— nirca.

Abraham manarac tiyacpi, Jesucristo ña tiyashcamanta

48 Chaimantami mandac israelcunaca Jesustaca: —Ñucanchic: “Canca Samaria llactamantami cangui, shinallatac supaihuanmi cangui” nishpaca, allitami nishcanchic— nirca. 49 Shina nicpimi Jesusca: —Ñucaca mana supaihuan canichu. Ñucaca Taitatami jatunyachini, ashtahuanpish cancunaca ñucataca mana jatunyachinguichicchu. 50 Gentecuna ñucata alli nichunca mana munanichu, ashtahuanpish ñuca Taitata alli nichunmi munan. Paillami taripanga. 51 Maijanpish ñuca nishcata cazucca mana huañungachu. Chaica, chashnatacmi canga— nirca. 52 Shina nicpimi, mandac israelcunaca: —Cunancarin supaihuan cashcata yachanchictacmi. Abrahampish, Dios ima nishcata huillaccunapish huañurcami. Shina cacpica, ¿ima nishpatac canca “maijanpish ñuca nishcata cazuccunaca mana huañungachu” ninguiyari? 53 ¿Canca Abrahamta yallichari cangui? Paipish, Dios ima nishcata huillaccunapish huañurcami. Canca, ¿ima nishpatac chashnaca nicunguiyari?— nirca. 54 Shina nicpimi, Jesusca: —Ñucallata “allimi cani” nirishpaca, chaica yangami canman. Ñucata alli nicca, ñuca Taitami. Paillatatacmi cancunaca “ñucanchic Dios” ninguichic. 55 Cancunaca paitaca mana ricsinguichicchu. Ñucaca ricsinimi. Ñuca “mana ricsinichu” nishpaca, cancuna shinallatac llullacmi caiman. Ñucaca ricsinitacmi. Chaimantami pai ima nishcataca cazuni. 56 Taita Abrahamca ñuca cai pachaman shamuna punzhata ricushpami cushicurcami. Ña ricushpaca, ashtahuanmi cushicurca— nirca. 57 Shina nicpimi, mandac israelcuna Jesustaca: —Manarac pichca chunga huatatapish charinguica. ¿Ima shinatac taita Abrahamta ricurcangui?— nirca. 58 Shina nicpimi Jesusca: —Manarac taita Abraham tiyacpimi, ñucaca ña tiyarcani. Chaica chashnatacmi can— nirca. 59 Shina nicpimi, paicunaca rumihuan shitangapac rumicunata japircacuna. Ashtahuanpish Jesusca miticushpami, Diosta mañana huasimanta llucshishpa rirca.

Juan 9

Huacharishcamanta pacha ñahui mana ricuc runata Jesús alliyachishcamanta

1 Chaimanta Jesús rishpaca, huacharishca pachamanta ñahui mana ricuc runatami ricurca. 2 Yachacuccuna Jesustaca: —Yachachic, cai runa ñahui mana ricuc huacharichunca, ¿taita mamachu juchallirca? ¿Mana cashpaca paipac juchallamantachu chashna tucushca canga?— nirca. 3 Chaimantami Jesusca: —Mana paipac juchamantachu, shinallatac mana taita mamapac juchamantachu chashnaca tucushca, ashtahuanpish Dios munashcata cai runapi ricuchingapacmi, chashnaca huacharirca. 4 Punzha tiyacpiracmi, ñucata Cachac Diospacta ruhuana canchic. Ña tutayacpica, pi imata mana ruhuai pudinchu. 5 Cai pachapi cashcacamanca, cai pachapi causaccunata achicyachic luzmi cani— nirca. 6 Chaita nishpami, pambapi tucashpa, turuta ruhuashpa chai runapac ñahuipi llutarca. 7 Shina llutashpaca: —Cunanca, Siloé uchilla cuchapi jahuaringapac ri— nirca. (“Siloé” nishpaca, “cachashca” nisha ninmi). Chai runa jahuaringapac rishpaca, ñahui ricucucmi cutirca. 8 Chaimantami vecinocunapish, mañashpa tiyacta ricuccunapish: —Cai runaca, ¿manachu mañashpa tiyacuc runa?— ninacurca. 9 Maijanca: —Ari, paimi— nirca. Maijanca: —Mana paichu. Shuc pailaya runami— ninacurca. Shina ninacucpimi paica: —Ari, ñucallatacmi cani— nirca. 10 Shina nicpimi paicunaca: —¿Ima shinatac ñahuica pascarirca?— nirca. 11 Shina nicpimi paica: —Jesús shuti runami turuta ruhuashpa, ñahuipi llutashpaca: “Siloé cuchapi jahuarigri” nirca. Siloeman rishpa, ñahuita jahuarishpaca, ña ricurcanillami— nirca. 12 Chashna nicpimi paicunaca: —¿Maipitac chai runaca?— nirca. Shina nicpimi paica: —Mana yachanichu— nirca.

Fariseocuna alli tucushca runaman tapushcamanta

13 Chai alli tucushca runataca fariseocunapacmanmi pusharcacuna. 14 Jesusca samana punzhapimi chai runataca alliyachishca carca. 15 Fariseocunaca ima shina alliyashcatami tapurca. Shina nicpimi paica: —Turutami ñahuipi llutarca. Quipaca jahuarircanimi. Cunanca ñami ricucuni— nirca. 16 Shina nicpi, maijan fariseocunaca: —Samana punzhata mana cazunchu, paica mana Diosmantachu shamushca— nirca. Cutin maijanca: —Shuc juchayuc runaca, ¿ima shinatac milagrocunataca ruhuangayari?— nirca. Chashna ninacushpami, paicunapura chicanyarinacurca. 17 Cutinllatac alliyashca runata fariseocunaca: —Ñahuita alliyachic runataca, ¿canca imatatac ningui?— nirca. Shina nicpimi paica: —Dios ima nishcata huillacmi— nirca. 18 Mandac israelcunaca pai ñahui mana ricuc cashcatapish, alliyashcatapish mana crircacunachu. Chaimantami paipac taita mamata 19 cayachishpa: —¿Paichu ñahui mana ricuc huacharishca cancunapac huahua? ¿Ima shinatac cunanca ricucunyari?— nirca. 20 Chaimantami taita mamaca: —Ari, caica ñucanchic huahuami. Pai ñahui mana ricuc huacharishcataca yachanchicmi. 21 Cunan ima shina alliyashcatapish, pi alliyachishcatapish, mana yachanchicchu. Paillamantac tapuichic. Paica ña juizhu runami. Paimi ima cashcata ninga— nirca. 22 Fariseocuna: “Maijanpish ‘Jesusca Cristomi’ nishpa huillacpica, israelcunapac tandanacuimanta llucchishpa cachashcami canga” nishpami, ñaupaman yuyarinacushca carca. Chaimantami mandac israelcunata manchashpa, taita mamaca chashna nirca. 23 Chaimantami paipac taita mamaca: “Paillamantac tapuichic. Paica juizhu runami” nirca. 24 Shina nicpimi, cutin alliyashca runata mandac israelcuna cayashpaca: —Diospac shutipi huillai. Ñucanchicca chai Jesús runataca juchayuc cashcatami yachanchic— nirca. 25 Shina nicpimi paica: —Chai runa, juchayuc cashcata, mana juchayuc cashcata mana yachanichu, ashtahuanpish ñuca ñahuita alliyachicpi, cunan ricucushcallatami yachani— nirca. 26 Shina nicpimi, cutinllatac tapushpaca: —¿Imatatac ruhuarca? ¿Ima shinatac ñahuita alliyachirca?— nirca. 27 Shina nicpimi paica: —Ña huillanica, ¿manachu uyarcanguichic? ¿Cutinchu huillachun ninguichic? ¿Cancunapish paita caticcunachu tucushun ninguichic?— nirca. 28 Shina nicpi, paicuna piñarishpaca: —Canmi paita catic cangui. Ñucanchicca Moisesta caticcunami canchic. 29 Dios rimashcata Moisés huillashcallatami yachanchic, ashtahuanpish chai runa maimanta cashcataca mana yachanchicchu— nirca. 30 Shina nicpimi, chai runaca: —Cancuna pai maimanta shamushcata mana yachanaca shuc mancharinami. Paimi ñuca ñahuita alliyachirca. 31 Diosta mana cazuccuna mañashcata mana uyac cashcataca allimi yachanchic. Ashtahuanpish paita manchacta, pai munashcata ruhuac mañashcataca uyanmi. 32 Huacharishcamanta pacha ñahui mana ricuc runata alliyachishcataca, jaicapi pi mana uyashcachu. 33 Chai runa mana Diosmanta shamushca cashpaca, imatapish mana ruhuanmanchu— nirca. 34 Shina nicpimi paicunaca: —Canca juchasapami huacharircangui. ¿Chashna cashca jahuachu ñucanchicta yachachisha ningui?— nirca. Chashna nishpami, paitaca tandanacuna huasimanta llucchishpa cacharca.

Diosta mana ricsicca ñahui mana ricuc shina cashcamanta

35 Chai alliyashca runata tandanacuimanta llucchishpa cachashcata Jesús yachashpami, paita mashcarca. Ña tupashpaca: —¿Canca Runa Tucungapac shamushcataca cringuichu?— nirca. 36 Shina nicpimi paica: —Amito, ¿pitac chaica, ñuca paita cringapac?— nirca. 37 Shina nicpimi Jesusca: —Ña ricucunguimi. Canhuan rimacucllatacmi cani— nirca. 38 Shina nicpimi paica: —Apunchic Jesús, crinimi— nishpa, cungurishpa, Jesusta alli nirca. 39 Chashna nicpimi Jesusca: —Ñucaca taripangapacmi cai pachaman shamurcani. Ñahui mana ricuccunata alliyachingapac, cutin ricuccunataca ñahui mana ricucta ruhuangapacmi shamurcani— nirca. 40 Maijan fariseocuna chaita uyashpaca: —¿Shinashpaca ñucanchicpish ñahui mana ricuccunachu canchic?— nircacuna. 41 Shina nicpimi Jesusca: —Ñahui mana ricuccuna cashpaca, manachari juchayuccuna canguichicman. Ashtahuanpish “ricushpami causacunchic” nishcamantacarin, juchayuccunami canguichic— nirca.

Juan 10

Ovejata michiccunahuan chimbapurashcamanta

1 Jesusca: —Maijanpish oveja corralman mana punguta yaicucca shuhuac, huañuchicmi. Chaica chashnatacmi can. 2 Ashtahuanpish pipish punguta yaicucmi oveja michicca can. 3 Chai michic chayacpica, corral punguta cuidacca punguta pascanmi. Ovejacunaca Michic rimashcata uyanmi. Paica ovejacunataca shutipi cayashpami, corralmanta llucchin. 4 Ña tucui llucchishpaca, ovejacunapac ñaupatami paica rin. Ovejacunaca michicpac rimashcata ricsishcamantami catin. 5 Ashtahuanpish mana ricsishca runapac rimashcata uyashpaca, mancharishpami rin, paitaca mana catinchu— nirca. 6 Cai chimbapurashca parlohuan Jesús yachachishpaca, imata nisha nishcataca mana entendircacunachu.

Jesús alli michic cashcamanta

7 Jesús cutinllatac rimashpaca: —Ñucami ovejacuna yaicuna punguca cani. Chaica chashnatacmi can. 8 Manarac ñuca shamucpi, tucui shamuccunaca shuhuaccunami, huañuchiccunami carca, ashtahuanpish ovejacunaca mana catircacunachu. 9 Ñucami punguca cani. Maijanpish ñucamanta yaicucca quishpiringami. Paica llucshic, yaicucmi puricunga. Micunatapish taringami. 10 Shuhuacca shuhuangapac, huañuchingapac, chingachingapacmi yaicun. Ñucaca causaita cungapac, yalli causaita cungapacmi shamurcani. 11 Ñucami alli michicca cani. Alli michicca, ovejacunamanta huañuna cacpipish huañungalla. 12 Ashtahuanpish cullquillamanta michicca mana alli michicchu. Mana paipac ovejacuna cashcamantaca atuc shamucpica, shitashpa rinllami. Atucca ovejacunata manchachishpa, maitapish shic-huashpa cachanllami. 13 Cullquillamanta michicca ovejacunata mana llaquishpa shitashpa rinllami. Paica ovejacunata mana llaquinchu. 14-15 Ñucami alli michicca cani. Ima shinami ñuca Taita ñucata ricsin, shinallatacmi Taitataca ricsini. Chashnallatacmi ñuca ovejacunapish ñucata ricsin. Ñuca ovejacunamantaca huañuna cacpipish huañushallami. 16 Shinallatac mana cai corralpi cac shuctac ovejacunatapish charinimi. Paicunatapish pushamunami cani. Paicunaca ñuca rimashcata uyangacunami. Chashna uyashpa tandarishpaca, shuc shinallami tucunga, shinallatac shuc michicllami tiyanga. 17 Ñucaca huañuna cacpipish, huañushpa causarishami. Chaimantami ñuca Taitaca cuyan. 18 Pipish ñuca causaita mana quichungachu, ashtahuanpish ñucallatacmi cusha. Huañungapacpish, causarinatapish poderta charinimi. Chashna ruhuachunmi, ñuca Taitaca mandarca— nirca. 19 Israelcuna chaita uyashpaca, paicunapurami cutinmi chicanyarinacurca. 20 Paicunapuramanta taucacunami: —¿Ima nishpatac paita uyanguichic? Paica supaihuanmi, shinallatac yuyai illacmi— ninacurca. 21 Ashtahuanpish maijancunaca: —Supaihuan cashpaca, mana chashna rimanmanchu. Maijanpish supaihuan cashpaca, ñahui mana ricuctaca mana alliyachinmanchu— ninacurca.

Israelcuna Jesusta piñashcamanta

22 Chai punzhacunaca Jerusalenpica Diosta mañana huasita mingana fiestami carca. Chai punzhacunaca tamya punzhacunami carca. 23 Jesusca Diosta mañana huasipimi Salomón ruhuashca pungu pambapi puricurca. 24 Chaipi Jesuspac muyundipi israelcuna shayarishpaca: —Can Cristo cashpaca, cunanllatac alli huillai: ¿Ima horascamantac can pi cashcata mana yachashpa puricushunyari?— nirca. 25 Chaimantami Jesusca: —Ña nircanica. Chashna nicpipish, mana crircanguichicchu. Ñuca Taitapac poderhuanmi imatapish ruhuani. Chai ruhuashcacunami ñuca pi cashcataca ricuchicun. 26 Cancunaca mana ñuca ovejacuna cashpami, chaita ricushpapish mana cringuichic. 27 Ovejacunaca ñuca rimashcata uyanmi. Ñucapish paicunataca ricsinimi. 28 Ñucaca huiñai causaitami paicunamanca cuni. Paicunaca mana chingaringachu, pipish ñuca maquimantaca mana quichungachu. 29 Paicunata ñucaman cuc Taitaca tucuimanta yallimi. Paipac maquimantaca pi mana quichungachu. 30 Ñuca Taitahuanca shuc shinallami canchic— nirca. 31 Shina nicpimi, israelcunaca Jesusta shitangapac rumita japircacuna. 32 Chashna cacpipish Jesusca: —Ñuca Taitapac poderhuanmi tauca allicunata ruhuarcani. ¿Maijan ruhuashcacunamantatac rumihuan shitashun ninguichic?— nirca. 33 Shina nicpimi israelcunaca: —Mana allicunata ruhuashcamantachu rumicunahuan shitashun ninchic, ashtahuanpish Dios tucushpa, paita piñachishcamantami shitashun ninchic. Canca ñucanchic shina runallami cangui. Chashna cashpapish Dios shina tucusha nishpami, chashnaca nicungui— nirca. 34 Chashna nicpimi Jesusca: —Dios quillcachishcapica: “Cancunami dioscuna canguichic” nicunmi. 35 Dios quillcachishcataca mana llullanchu. Chaitaca yachanguichicmi. Diosca pai rimashcata uyaccunataca “cancunami dioscuna canguichic” nircami. 36 Diosca chicanyachishpami, ñucataca cai pachaman cacharca. ¿Chashna cashca jahuachu ñucataca: “Diospac Churimi cani” nishpaca, “Diostami piñachicun” ninguichic? 37 Ñuca Taita ruhuachun nishcacunata mana ruhuacpica, ama cringuichicchu. 38 Ñucaca ñuca Taita mandashcallatami ruhuani. Ñucata mana crishpapish, ñuca ruhuashcacunata crichicyari. Chashna crishpami, ñuca Taitaca ñucahuan, ñucaca paihuan cashcata alli yachanguichic— nirca. 39 Chaimantami israelcunaca cutinllatac Jesusta japishun nircacuna. Shina cacpipish, paica paicunapac chaupimanta rircallami. 40 Jesusca Jordán yacu chimba ladoman cutishpami, chaipi saquirirca. Chaipimi Bautizac Juan utcaman bautizac carca. 41 Chaipi achca gentecuna paipacman shamushpaca: —Juanca milagrocunataca mana ruhuarcachu. Shina cacpipish, Juan cai runamanta huillashcaca chashnatacmi cashca— ninacurca. 42 Chaipica achca runacunami Jesusta crircacuna.

Juan 11

Lázaro huañushcamanta

1 Betania pueblomanta Lázaro runami ungushca carca. Paica, paipac panicuna Mariahuan, Martahuanmi chai pueblopi causarca. 2 Chai Mariami quipamanca Jesuspac chaquicunapi mishquilla ashnacucta churashpa, acchahuan chaquichirca. 3 Lazaropac panicuna Jesuspacman cachashpaca: —Apunchic Jesús, canhuan apanacuc Lazaromi ungushca— nichun cacharca. 4 Jesús chaita uyashpaca: —Chai ungüica mana huañuchic ungüichu, ashtahuanpish Diostapish, paipac Churi ñucatapish jatunyachingapacmi— nirca. 5 Jesusca Mariatapish, Martatapish, Lazarotapish mai cuyacmi carca. 6 Jesusca Lázaro ungushcata yachashpapish, ishcai punzhacamanmi chaillapitac saquirirca. 7 Chai quipami, Jesusca paipac yachacuccunataca: —Cutinllatac Judea llactaman jacuchic— nirca. 8 Shina nicpimi yachacuccunaca: —Yachachic, sarunllami israelcunaca rumihuan shitashun nircacuna. ¿Chashna cashca jahuachu cutin chaillamantac risha ningui?— nirca. 9 Shina nicpimi Jesusca: —¿Manachu punzhaca chunga ishcai horasta charin? Maijanpish punzhapi puricca, mana mitcarinchu. 10 Maijanpish tuta purishpaca, luzta mana charishcamantami mitcarin— nirca. 11 Chaita nishca quipaca Jesusca: —Ñucanchic-huan apanacuc Lazaromi sueñushca. Paitami ricchachingapac rigrini— nirca. 12 Yachacuccuna chaita uyashpaca: —Apunchic Jesús, sueñucushpaca alliyangami— nirca. 13 Ashtahuanpish Jesusca, Lázaro huañushcamantami chashna nicurca. Cutin yachacuccunaca sueñunamantami nicurca. 14 Chaimanta Jesús alli entendichishpaca: —Lazaroca huañushcami. 15 Ñucaca chaipi mana cashcamantaca cushicunimi. Paica cancuna ashtahuan ñucata crichunmi huañushca. Chaimi cancunamanca ashtahuan alli. Cunanca jacuchic, ricushun— nirca. 16 Shina nicpimi, ishcaipura huacharishca Tomasca caishuc yachacuccunataca: —Ñucanchicpish Jesus-huan huañungapac jacuchic— nirca.

Jesús causachicpish, causaita cucpish cashcamanta

17 Jesusca Lazarota ña chuscu punzhata enterrashca cacpimi chayarca. 18 Betania puebloca Jerusalenmanta quimsa kilómetro shinallapimi carca. 19 Martapac, Mariapac turi huañushcamantaca, tauca israelcunami llaquinacungapac shamushca carcacuna. 20 Jesús shamucucta Marta uyashpaca, tupangapacmi llucshirca. Ashtahuanpish Mariaca huasipimi saquirirca. 21 Chashna tupangapac llucshishpami Martaca: —Apunchic Jesús, can caipi cashca cacpica, ñuca turica mana huañunmanchu carca. 22 Shina cacpipish, Diosta mañacpica, Diosca uyangami— nirca. 23 Shina nicpimi Jesusca: —Cambac turica causaringami— nirca. 24 Shina nicpimi Martaca: —Ari, tucuri punzhapica causaringami. Chaitaca yachanimi— nirca. 25 Shina nicpimi Jesusca: —Ñucami causaita cucpish, huañushcacunata causachicpish cani. Ñucata cricca huañushpapish causaringami. 26 Maijanpish causacushpa, ñucata cricca, mana huiñaita huañungachu. ¿Chaitaca cringuichu?— nirca. 27 Shina nicpimi Martaca: —Ari, Apunchic Jesús crinimi. Canca Diospac Churimi cangui. Cai pachaman shamuna cashca Cristomi cangui— nirca.

Jesús Lazarota enterrashca ladopi huacashcamanta

28 Chaita nishca quipa, Marta huasiman tuctishpa, paipac ñaña Mariata pacallaman cayashpaca: —Yachachicmi caipi. Cantami cayacun— nirca. 29 María chaita uyashpaca, utcami Jesus-huan tupangapac rirca. 30 Jesusca manarac chai puebloman yaicurcachu. Martahuan tupashca pushtupimi carca. 31 Huasipi cushichishpa, compañashpa tiyacuc israelcuna María jatarishpa, utca ricta ricushpaca: —Enterrashcapimi huacangapac rin— nishpami, catishpa rircacuna. 32 María Jesuspacman chayashpa, paipac ñaupapi cungurishpaca: —Apunchic Jesús, can caipi cashca cacpica, ñuca turica mana huañunmanchu carca— nirca. 33 Mariapish, paita compañac israelcunapish huacacucta Jesús ricushpa, shungupi llaquirishpaca: 34 —¿Maipitac enterrarcanguichic?— nishpa tapurca. Shina nicpimi paicunaca: —Apunchic Jesús, shamui, ricungui— nirca. 35 Jesuspish huacarcami. 36 Chaimantami israelcunaca: —Riquichic, Lazarota yallitami cuyashca— ninacurca. 37 Ashtahuanpish maijancunaca: —Cai runaca ñahui mana ricuc runataca alliyachircami. Shina cashpaca, ¿ima nishpatac Lázaro ama huañuchunca imata mana ruhuarca?— nirca.

Lázaro causarishcamanta

38 Cutinllatacmi Jesusca shungupi llaquirishpa, chai enterrashca cuchuman rirca. Chai jutcuca quingraipimi jatun rumihuan jarcashca carca. 39 Chaipimi Jesusca: —Rumita cutichichic— nirca. Shina nicpimi, chai huañushcapac pani Martaca: —Apunchic Jesús, pai huañushcaca ñami chuscu punzha, ashnacungami— nirca. 40 Shina nicpimi Jesusca: —¿Manachu ñucaca: “Crishpaca, Dios imatapish ruhuaclla cashcata ricunguimi” nircani?— nirca. 41 Jesús shina nicpimi, enterrashcata tapashca rumita cutichirca. Jesús jahua pachata huichailla ricushpaca: —Taitalla, ñuca mañashcata uyashcamanta pagui ninimi. 42 Ñuca mañashcata can uyac cashcataca yachanimi. Caipi ñucahuan cac gentecuna ñucata can cachashcata crichunmi, cashna nini— nirca. 43 Chaita nishca quipaca: —¡Lázaro, chaimanta llucshi!— nishpami, sinchita caparirca. 44 Chashna caparicpimi, chai huañushcaca chaqui, maqui pillushca, umapish lienzohuan pillushca llucshimurca. Shina llucshimucpimi Jesusca: —Pai purichun, pillushcata pascaichic— nirca.

Jesusta huañuchingapac yuyarinacushcamanta

45 Mariata compañac tauca israelcuna Jesús imata ruhuashcata ricushpaca, paita crircacunami. 46 Cutin maijancunaca fariseocunamanmi Jesús imata ruhuashcata huillangapac rircacuna. 47 Shina huillacpi, curacunata mandac curacunapish, fariseocunapish mandaccunapura tandanacushpaca: —Chai runataca, ¿imatatac ruhuanchic? Paica tauca milagrocunatami ruhuacun. 48 Chashnalla saquicpica, tucuimi paita cringacuna. Shina cacpica, Roma llacta gentecuna shamushpami Diosta mañana huasitapish, ñucanchic gentecunatapish tucuchinga— nirca. 49 Shina nicpi, paicunapuramanta chai huatapi curacunata mandac Caifasca: —Cancunaca imatapish mana yachanguichicchu. 50 Ñucanchic llacta tucui gentecuna tucurinapac randica, shuc runalla tucui israelcunamanta huañunami ashtahuan alli. ¿Chaitaca manachu yachanguichic?— nirca. 51 Chaitaca mana paipac yuyaimantachu nirca, ashtahuanpish chai huatapi curacunata jatun mandac cashcamantami, Dios yuyaita cucpi, israelcunamanta Jesús huañuna cashcata huillarca. 52 Mana chai llactallamantachu huañuna carca, ashtahuanpish caita chaita rishpa causacuc Dios acllashcacunata tandarishpa, shucllata ruhuangapacmi huañuna carca. 53 Chai punzhamanta pachami, Jesusta ima shina huañuchinata yuyarinacurca. 54 Chaimantami Jesusca israelcunapurapica ña mana purirca, ashtahuanpish chaimanta llucshishpa, shitashca pamba cuchulla Efraín puebloman rishpa, chaipi paipac yachacuccunahuan carca. 55 Israelcunapac Pascua fiesta punzhacunaca ñami caillapi carca. Chaimantami chai punzhacuna manarac chayamucpi, achca gentecuna chuyayangapac Jerusalenman rircacuna. 56 Chaipi Jesusta mashcashpa, Diosta mañana huasipi yaicushpaca: —¿Imatatac ninguichic? ¿Manachu fiestaman shamunga?— ninacurca. 57 Fariseocunapish, curacunata mandac curacunapish Jesusta japingapacmi, maijan ricushpaca, paicunaman huillachun mandarca.

Juan 12

Betaniapi Jesusta chaquipi mishquilla ashnacuc-huan cahuishcamanta

1 Pascua fiestapac sucta punzha siricpimi, Jesusca Betania puebloman rirca. Jesús causachishca Lazaropish chaipimi causarca. 2 Chaipimi Jesusman shuc cenata ruhuarca. Chaitaca Martami caracurca. Lazaropish Jesus-huanmi mizapi micushpa tiyacurca. 3 Chaipimi Mariaca achca valishca chaupi litro nardo nishca mishquilla ashnacucta apamushpa, Jesuspac chaquita cahuirca. Chaimantaca acchahuanmi chaquichirca. Chashna cahuicpica, tucui huasi ucumi mishquilla ashnacuc saquirirca. 4 Chashna ruhuacpimi, yachacuccunapuramanta quipaman Jesusta japichigricuc Judas Iscarioteca: 5 —Cai mishquilla ashnacuctaca, quimsa patsac denario cullquipi catushpa huacchacunaman cunachari, ashtahuan alli canman carca— nirca. 6 Judasca mana huacchacunata llaquishcamantachu chaitaca nirca, ashtahuanpish shuhuac cashcamantami chashna nirca. Paimi cullquita tandashpa huacaichic carca. Chashnami maijan cutinca shuhuac carca. 7 Shina nicpimi Jesusca: —Paica ñuca enterrana punzhapacmi mishquilla ashnacucta huacaichishpa charicushca, saquilla. 8 Huacchacunaca punzhantami cancunahuan. Ashtahuanpish ñucaca mana cancunahuan causacushallachu— nirca.

Lazarota huañuchingapac yuyarinacushcamanta

9 Tauca israelcunami Jesús Betaniapi cashcata chayac chayashpaca, chaiman rircacuna. Mana Jesusta ricungapacllachu rircacuna, ashtahuanpish Jesús causachishca Lazarota ricuna yuyaihuanpishmi rircacuna. 10 Curacunata mandac curacunaca Lazarota huañuchinatami yuyarinacurca. 11 Chaica, Lázaro causarishcamantami achca israelcuna paicunamanta caruyashpa, Jesusta crircacuna.

Jesús Jerusalenpi yaicushcamanta

12 Quipa punzha, Jerusalén Pascua fiestaman ric achca gentecuna Jesús Jerusalenman shamucucta uyashpami, 13 ramacunata pitishpa tupangapac llucshirca. Chashna llucshishpaca: —¡Quishpichicca alli nishca cachun! ¡Mandac Diospac shutipi shamuc, israelcunata Jatun Mandacca tucuipac alli nishca cachun!— nishpami caparirca. 14 Dios quillcachishcapi nishca shinami, Jesusca pactalla burropi tiyarishpa shamurca. 15 Chai quillcashcapica: «Sión pueblopi causaccunalla, ama mancharichicchu. Jatun Mandacca shuc pactalla burropimi montashpa shamucun» ninmi. 16 Cai nishcataca yachacuccunaca chai horasca mana entendircacunachu. Ashtahuanpish Jesús causarishca quipami, paimanta ñaupaman quillcachishca pactashcataca yuyarircacuna. 17 Jesus-huan cac gentecunaca Lazarota enterrashca jutcumanta cayashpa, causachishcatami tucuiman huillashca huillarca. 18 Chaimantami gentecunaca Jesús milagrota ruhuaclla cashcata yachashpa, paihuan tupangapac llucshirca. 19 Ashtahuanpish fariseocuna parlanacushpaca: —Riquichic, tucuimi paita caticun. Ñucanchicca imata mana ruhuai pudinchicchu— nicurca.

Griego gentecuna Jesusta mashcashcamanta

20 Jerusalén fiestapi Diosta alli ningapac riccunapurapica, maijan griego gentecunapishmi carca. 21 Paicunami Galilea llacta Betsaida pueblomanta Felipepacman chayarca. Chashna chayashpaca: —Amito, Jesus-huanmi tupashun ninchic— nirca. 22 Felipeca Andresmanmi huillarca. Chaimantami ishcai tucushpa Jesusman huillarca. 23 Shina huillacpimi Jesusca: —Runa Tucungapac shamushca ñucata jatunyachina punzhami chayamushca. 24 Trigo muyu allpapi mana urmashpa, mana huañushpaca paillami saquirin. Ashtahuanpish allpapi urmashpa, huañushpaca achcatami pucun. Chaica chashnatacmi can. 25 Maijanpish quiquin causaita cuyacca chingaringami. Ashtahuanpish maijanpish quiquin causaita cai pachapi mana cuyacca huiñaitami causanga. 26 Maijanpish ñucata servisha nicca ñucata catichun. Ñucata servicca maipimi ñuca cani, chaipimi canga. Maijanpish ñucata servictaca ñuca Taitami alli ninga.

Jesús pai huañunata huillashcamanta

27 Cunanca yallita llaquillami cani. ¿Cunanca imatac nisha? ¿Taitalla, cai llaquimanta anchuchiyari nishachu? Mana chashna nishachu, llaquita apangapacmi shamurcani. 28 ¡Taitalla, cambac shutita jatunyachiyari!— nirca. Shina nicpi, jahua pachamantaca: «Ña jatunyachircanimi. Cutinpish ricuchishami» nishcami uyarirca. 29 Chaipi cac maijan caccuna chaita uyashpaca: “Urcumi tulun ninacun” nircami. Cutin shuccunaca: “Angelmi rimacun” ninacurca. 30 Chaimantami Jesusca: —Cai rimashcaca mana ñucamantachu uyarin, ashtahuanpish cancunamantami uyarin. 31 Cunanmi cai pachapi causaccunaca taripashca canga. Cunanmi cai pachata mandactapish llucchishpa shitashca canga. 32 Caspipi jahuaman huarcushca cashpami, tucuita ñucapacman pushamusha— nirca. 33 Chaitaca pai ima shina huañuna cashcata entendichingapacmi nirca. 34 Chaipi caccunaca: —Dios quillcachishcapica “Cristo huiñaitami causanga” ninmi. ¿Ima nishpatac canca: “Runa Tucungapac shamushcaca caspipi huarcushcami canga” nicungui? ¿Pitac chai Runa Tucungapac shamushcaca?— nirca. 35 Chaimantami Jesusca: —Asha punzhacamanllami Achicyachicca cancunahuan canga. Achicyachic cancunahuan cashcacamanca, achicpi purichic. Amsapi puricca maiman ricushcatapish mana yachanchu. 36 Cancunahuan Achicyachic cacpirac Achicyachicta crichic. Chashnami Achicyachicpac huahua canguichic— nirca. Shina nishca quipaca, Jesusca paicunapacmanta rishpa chingarircallami.

Israelcuna Jesusta mana crishcamanta

37 Jesús tauca milagrocunata ruhuacucpipish, israelcunaca mana crircacunachu. 38 Dios ima nishcata huillac Isaías huillashca pactachunmi chashna tucurca. Pai huillashpaca: «Dioslla, ¿pitac huillashcataca crishcayari? Diospac podertaca, ¿pitac ricushcayari?» nishcami. 39 Chaimantami mana crircacuna. Chaica, Isaiasllatacmi: 40 «Paicunapac ñahuita huichcarcami. Paicunapac shungutapish sinchiyachircami. Ñahuicunahuan ama ricuchun, paicunapac shungu ama yuyaita japichunmi cashna ruhuarca. Chaimantami ñucapacman mana cutimunga. Paicunataca mana alliyachishachu» nishcami. 41 Isaiasca Jesuspac sumaimana cashcata ricushpami, paimanta chashna huillarca. 42 Chashna cacpipish, mandac israelcunacamanmi taucacuna crirca. Ashtahuanpish tandanacuna huasimanta fariseocuna llucchishpa cachanata manchashpami, mana piman huillarca. 43 Paicunaca Dios alli nishca canapac randica, gentecunapac alli nishca canatami ashtahuan munarca.

Jesuspac rimashcacuna taripana cashcamanta

44 Jesús sinchita rimashpaca: —Maijanpish ñucata cricca mana ñucallatachu crin, ashtahuanpish ñucata cachac Taitatami crin. 45 Maijanpish ñucata ricucca, ñucata cachac Taitatami ricun. 46 Maijanpish ñucata cricca ama amsapi cachunmi, ñucaca achicyachic luz shina cai pachaman shamurcani. 47 Maijanpish ñuca rimashcata uyashpapish mana cazuctaca, mana ñucachu taripasha. Mana cai pachapi causaccunata juchanchingapacchu shamurcani, ashtahuanpish quishpichingapacmi shamurcani. 48 Maijanpish ñucata piñashpa ñuca rimashcata mana cazucca, taripashcami canga. Ñuca rimashcallatacmi, tucuri punzhapica juchanchinga. 49 Mana ñuca munaimantachu rimacuni, ashtahuanpish ñucata cachac Taita imata mandashcallatami huillashpa rimani. 50 Ñuca Taita mandashcacunaca huiñai causaita cuc cashcatami yachani. Chaimantami ñuca rimashpaca, ñuca Taita mandashcallata huillacuni— nirca.

Juan 13

Jesús yachacuccunapac chaquita jahuashcamanta

1 Pascua fiesta punzhacuna manarac chayacpimi, Jesusca cai pachamanta paipac Taitapacman rina horas chayashcata yacharca. Cai pachapica paita caticcunataca yallitami Jesusca cuyarca. Shinami tucuringacaman cuyarca. 2 Jesús manarac paipac yachacuccunahuan micungapac tiyaricpimi, diabloca Simonpac churi Judas Iscariotepac shungupi Jesusta japichina yuyaita churashca carca. 3 Jesusca paiman Dios poderta cushcatapish, Dios cachashca shamushcatapish, paipacman cutina cashcatapish yacharcami. 4 Chaimanta jatarishpami, Jesusca jahualla churanata anchuchishpa, shuc lienzota cinturapi churarca. 5 Chashnashpaca, yacuta bateapi churashpami, yachacuccunapac chaquita jahuashpa, lienzohuan chaquichi callarirca. 6 Simón Pedropac chaquita jahuagricpimi paica: —Apunchic Jesús, ¿canchu ñuca chaquita jahuagringui?— nirca. 7 Shina nicpimi Jesusca: —Ñuca cashna ruhuacushcataca manarac entendinguichu, quipamanmi entendingui— nirca. 8 Shina nicpimi Pedroca: —¡Jaicapi ñuca chaquita jahuachun, mana saquishachu!— nirca. Shina nicpimi Jesusca: —Cambac chaquita ñuca jahuachun, mana saquishpaca, mana ñuca yachacucchu cangui— nirca. 9 Shina nicpimi, Simón Pedroca: —Shinashpaca Apunchic Jesús, ama chaquillata jahuaichu. Umatapish, maquitapish jahuaiyari— nirca. 10 Shina nicpimi Jesusca: —Maijanpish ña armarishcaca chuyanllami, ashtahuanpish chaquillatami jahuana can. Cancunaca ña chuyanllami canguichic. Shina cashpapish, mana tucuichu chuyanlla canguichic— nirca. 11 Jesusca maijan paita japichigricushcata yachashcamantami: “Mana tucuichu chuyanlla canguichic” nirca. 12 Jesús chaquita ña jahuashpa, churanata churarishpa, cutin mizapi tiyarishpaca: —¿Imamantatac caita ruhuashcataca entendinguichicchu? 13 Cancuna ñucata ‘Yachachic’ shinallatac ‘Apunchic Jesús’ nishpaca, allitami ninguichic. Chaica, chaimi cani. 14 Ñuca Mandac cashpapish, Yachachic cashpapish, cancunapac chaquita jahuashcanimi. Chaimanta cancunapish, caishucpac, chaishucpac chaquita jahuaichic. 15 Cancunapish chashnallatac ruhuachunmi, ñucaca chashna jahuashpa ricuchini. 16 Servicca mana amota yallichu. Cachashcapish mana cachacta yallichu. Chaica chashnatacmi can. 17 Caicunata entendishpa, chaitatac ruhuashpaca, mai cushicuimi canguichic. 18 Mana tucui cancunamantachu nicuni. Maijanlla ñuca acllashca cashcataca yachanimi. Dios quillcachishcapi: “Ñucahuan micucucllatacmi ñucataca piñanga” nishca pactachunmi, chashnaca tucunga. 19 Manarac chaicuna pactacpimi, ñuca pi cashcata cancuna crichun, cunanmanta pacha huillacuni. 20 Maijanpish ñuca cachashcata chasquicca, ñucatami chasquin. Ñucata chasquicca, ñucata Cachactami chasquin. Chaica chashnatacmi can— nirca.

Judas Iscariote Jesusta japichinamanta

21 Pascuata yuyarishpa micucun Chaita nishca quipa, Jesús shungupi yallita llaquirishpaca: —Cancunapuramanta shucmi ñucata japichigrin. Chaica chashnatacmi can— nirca. 22 Chaimantami yachacuccunaca pimanta nicushcata mana yachashpa, caishuc chaishuc ricunacurca. 23 Jesuspac shuc cuyashca yachacucmi paihuan quimirishpa tiyacurca. 24 Paitami Simón Pedroca pimanta chashna nicushcata tapuchun señata ruhuarca. 25 Chai yachacuc Jesuspacman ashtahuan cuchuyashpaca: —Apunchic Jesús, ¿pitac chai japichicca?— nirca. 26 Chashna nicpimi Jesusca: —Maijanmanmi tandata jucuchishpa cuni, chaimi— nirca. Jesusca tandata jucuchishpami, Simón Iscariotepac churi Judasman curca. 27 Judas tandata japincami, Satanasca paipac shungupi yaicurca. Chaimantami Jesusca: —Can imata ruhuagricushcataca utca ruhuailla— nirca. 28 Imamanta Jesús chashna nishcataca, chai mizapi tiyacuccunaca pipish mana entendircachu. 29 Judasca cullquita tandacmi carca. Chaimantami maijan yachacuccunaca: «Judastami fiestapac imallata randichun nicunga, mana cashpaca, huacchacunaman cullquita cuchunmi nicunga» nishpa yuyacurca. 30 Judas tandata japishcahuanmi, llucshishpa rirca. Chashna llucshicpica, ñami tuta carca.

Mushuc mandashcamanta

31 Judas llucshishpa ricpimi Jesusca: —Cunanmi Runa Tucungapac shamushca ñucaca jatunyachishca cagrini. Diospish ñucamantami jatunyachishca canga. 32 Dios ñucamanta jatunyachishca cashpaca, Runa Tucungapac shamushca ñucatapish jatunyachingami. Chaitaca utcami ruhuanga. 33 Cuyashca yachacuccunalla, ashacamanllami cancunahuan cagrini. Cancunaca ñucata mashcanguichicmi. Mandac israelcunata nishca shinami cancunatapish nini: Ñuca maiman ricushcamanca, mana ri pudinguichicchu. 34 Mushuc mandashcatami saquini: Caishuc chaishuc-huan cuyanacuichic. Ñuca ima shinami cuyani, chashnallatac cancunapish cuyanacuichic. 35 Cancuna caishuc chaishuc-huan cuyanacucpimi, tucui cai pachapi causaccunaca ñucapac yachacuccuna cashcata yachangacuna— nirca.

Pedro Jesusta neganamanta

36 Simón Pedro Jesusta tapushpaca: —Apunchic Jesús, ¿maimantac rigringui?— nirca. Chashna nicpimi Jesusca: —Ñuca maiman ricushcamanca mana cati pudinguichu, ashtahuanpish quipatami catingui— nirca. 37 Chashna nicpimi Pedroca: —Apunchic Jesús, ¿ima nishpatac cunanca mana cati pudini? ¡Ñucaca canmanta huañuna cacpipish huañushallami!— nirca. 38 Chashna nicpimi Jesusca: —¿Ñucamantachu huañugringui? Manarac gallo cantacpimi, quimsa cutin ñucata negangui. Chaica chashnatacmi canga— nirca.

Juan 14

Jesusca Diospacman pushac cashcamanta

1 Jesusca: —Ama shungupi llaquiringuichicchu, ashtahuanpish Diostapish, ñucatapish cringuichic. 2 Ñuca Taitapac huasipica achca causanami tiyan. Mana chai shina tiyacpica, huillaimanmi carcani. Cancuna causanata allichingapacmi rigrini. 3 Ñuca rishpaca cancuna causanata allichishpami cancunata apangapac cutimusha. Maipimi ñuca causani, chaipimi cancunapish ñucahuan causanguichic. 4 Ñuca maiman ricushcatapish yachanguichicmi, ñantapish ricsinguichicmi— nirca. 5 Shina nicpimi Tomasca: —Apunchic Jesús, can maiman rictapish mana yachanchicchu. ¿Ima shinatac ñantacarin yachashunyari?— nirca. 6 Shina nicpimi Jesusca: —Ñucami cashcata nicpish, ñanpish, causaita cucpish cani. Maijanpish ñucallamantami Diospacman chayanga. 7 Cancuna ñucata ricsishpaca, ñuca Taitatapish ricsinguichicmanmi. Cunanmanta pachami Taitataca ricsinguichic, ricunguichic— nirca. 8 Chaimantami Felipeca: —Apunchic Jesús, Taitata ricuchiyari. Chaillatami munanchic— nirca. 9 Shina nicpimi Jesusca: —Ña unaitami cancunahuan cani. Felipe, ¿chashna cashca jahuachu ñucata mana ricsingui? Maijanpish ñucata ricucca ñuca Taitatapish ricunmi. ¿Ima nishpatac canca: “Taitata ricuchi” ningui? 10 ¿Manachu ñucaca Taitahuan, Taitaca ñucahuan shuclla cashcataca cringui? Ñucaca, mana ñuca munaimantachu rimani, ashtahuanpish ñuca Taita ñucapi cashpami, pai munashcata ruhuachicun. 11 Ñucaca Taitahuan, Taitaca ñucahuan shuclla cashcata crichicyari. Ñucata mana crishpaca, ñuca ima ruhuashcata ricushpa crichicyari. 12 Ñucaca Taitapacmanmi rini. Chaimantami maijanpish ñucata cricca, ñuca ruhuashca shina ruhuanga. Chaicunapish yallitami ruhuanga. Chaica chashnatacmi canga. 13 Ñucapac shutipi imatapish mañacpica, ñuca Taita jatunyachishca cachunmi cusha. 14 Imatapish ñuca shutipi mañacpica, chaitami cusha.

Diospac Espirituta cachanamanta

15 Ñucata cuyashpaca, ñuca mandashcacunata cazunguichic. 16 Ñuca Taitaman mañacpica, shuctac Cushichictami cachanga. Chai Cushichicca huiñaitami cancunahuan canga. 17 Paica cashcata nic Espiritumi. Paitaca cai pacha runacunaca mana ricunchu, mana ricsinchu. Chaimantami mana chasqui pudin. Shina cacpipish, cancunaca ricsinguichicmi. 18 Mana cancunallata saquishachu, cancunapacman cutimushami. 19 Cai pachapi causaccunaca asha punzhacuna quipaca mana ñucata ricungachu. Shina cacpipish cancunaca ricunguichicmi. Chaica, ñucaca causacunimi, cancunapish causacunguichicmi. Chaimantami ricucunguichic. 20 Chai punzhami ñucaca Taitahuan shuclla cashcata, cancunaca ñucahuan, ñucaca cancunahuan shuclla cashcata yachanguichic. 21 Maijanpish ñuca mandashcacunata chasquishpa cazucmi ñucata cuyan. Ñucata cuyactaca Taitapish cuyanmi. Ñucapish cuyashpami Taitaman ricsichisha— nirca. 22 Shina nicpimi chaishuc Judasca: —Apunchic Jesús, ¿ima nishpatac ñucanchicllaman ricurishpa, mana tucui gentecunaman ninguiyari?— nirca. 23 Shina nicpimi Jesusca: —Maijanpish ñucata cuyacca, ñuca rimashcacunatami cazun. Paitaca ñuca Taitapish cuyanmi. Chaimantami paihuan causangapac shamushun. 24 Maijanpish ñucata mana cuyacca, ñuca rimashcacunataca mana cazunchu. Cancuna uyacuc ñuca rimashcacunaca mana ñuca munaimantachu, ashtahuanpish ñucata cachac Taitamantami. 25 Tucui caicunataca cancunahuan cashpami nicuni. 26 Chaica, Dios ñucapac shutipi cachagricuc Cushichic Espíritu shamushpami, tucuita yachachinga, tucui ñuca nishcacunatapish yuyachinga. 27 Sumac cushicui causaitami cuni, sumac cushicui causaitami saquini. Ñucaca mana gentecuna cushca cushi causaitachu cuni. Chaimanta ama llaquirichicchu, ama manchaichicchu. 28 Cancunaca ñuca: “Ñuca rishpapish cancunapacman cutishami” nishcataca, uyarcanguichicmi. Ñuca Taitaca ñucata yallimi. Ñucaca Taitapacmanmi rigrini nishcamantaca ciertota ñucata cuyashpaca cushicunguichicmanmi. 29 Chaicuna tucucta ricushpa ñucata crichunmi, utcashpa huillacuni. 30 Mana ashtahuan cancunahuan parlacushallachu. Chaica, ñami cai pachata mandac shamucun. Paica ñucata mana ati pudinchu. 31 Ñuca Taitata cuyac cashcata, Taita mandashcata pactachicusha. Cai pachapi causaccuna yachachunca, chashnallatacmi cana can. Jatarichic, caimanta jacuchic— nirca.

Juan 15

Jesusca uvas yura shina cashcamanta

1 Jesusca: —Ñucaca alli pucuc uvas yurami cani. Ñuca Taitaca uvas chagrata tarpucmi. 2 Ñucapi cac, mana pucuc ramacunataca tucuitami pitinga. Cutin alli pucuc ramataca ashtahuan pucuchunmi, sumacta allichinga. 3 Cancunaca ñuca yachachishcata uyashcamantaca, ñami chuyayashca canguichic. 4 Ñucahuan shuc shina caichic, ñucapish cancunahuan shuc shinami casha. Ramaca yurapi mana cashpaca, mana pucui pudinchu. Chashnallatacmi cancunapish ñucahuan mana cashpaca, imata mana ruhuai pudinguichic. 5 Ñucaca uvas yurami cani. Cancunaca ramacunami canguichic. Cancunaca ñucahuan shuc shina cashpaca alli pucuc shinami canguichic. Ñucapish shuc shinami cancunahuan casha. Ñucamanta caruyashpaca imata mana ruhuai pudinguichicchu. 6 Maijanpish ñucahuan mana cactaca, mana pucuc ramata shinami pitinga. Ña chaquicpica, tandashpami ninapi rupachingami. 7 Ñucahuan shuc shina cashpa, yachachishcacunatapish cazushpaca mañaichiclla. Tucui mañashcatami Taitaca cunga. 8 Chashna alli pucuc ramacuna shina cacpimi, ñuca Taitaca jatunyachishca canga. Shinallatac ñuca yachacuccuna cashcatapish ricuchinguichicmi. 9 Ñuca Taita ñucata cuyac shinallatacmi, cancunatapish cuyani. Chashna cuyanacushpa catichiclla. 10 Ima shinami ñuca Taita mandashcacunata pactachishpa, paipac cuyashca cani, chai shinallatacmi cancunatapish ñuca mandashcacunata pactachicpica cuyasha. 11 Ñuca cushicuc shina cancunapish cushicuchun, shinallatac yallita cushicuihuan causachunmi, caicunataca nini. 12 Caitami ñucaca mandani: Ñuca cancunata cuyashca shina, caishuc chaishuc cuyanacuichic. 13 Maijanpish quiquin amigomanta huañucmi, yallita cuyashcataca ricuchin. 14 Cancuna ñuca mandashcacunata pactachishpaca, ñuca amigocunami canguichic. 15 Servicca amo imata ruhuacushcata mana yachanchu. Chaimantami cancunataca mana serviccuna nishpaca, cayani. Tucui ñuca Taita nishcacunatami cancunaman huillashcani, chaimantami cancunataca ñuca amigocuna nishpa cayani. 16 Mana cancunachu ñucataca acllarcanguichic, ashtahuanpish ñucami cancunataca acllarcani. Cancuna rishpaca, allita, huiñaita pucuc yura shina causaichic, Shina causashpa, ñuca shutipi imata mañacpica, ñuca Taitaca cungallami. 17 Caishuc chaishuc cuyanacuichic nishpami, mandani.

Cai pachapi causaccuna Jesusta piñashcamanta

18 Cai pachapi causaccuna piñacpica, ñucatarac piñashcata yuyanguichic. 19 Cancuna cai pachapac causacpica, cai pachapac causaccunaca cuyanmanmi. Ashtahuanpish cancunata paicunapuramanta ñucaca acllashcamantami cai pachapac causaccunaca piñancuna. 20 Ñuca: “Shuc servicca mana amota yallichu” nishcata yuyarichic. Ñucatapish llaquichircacunami. Cancunatapish llaquichingami. Ñuca rimashcata cazushpaca, cancuna rimashcatapish cazungami. 21 Ñucata Cachacta mana ricsincunachu. Chaimantami cancunataca ñucata caticushcamanta llaquichingacuna. 22 Ñuca mana shamushca cacpi, paicunata mana rimashca cacpica, mana juchayucchu canman carca. Ashtahuanpish cunanca paicunapac juchamantaca mana quishpiri pudincunachu. 23 Maijanpish ñucata piñaccunaca, ñuca Taitatapish piñanmi. 24 Pi mana ruhuaipaccunata paicunapac ñaupapi ñuca mana ruhuashca cacpica, paicunaca mana juchayucchu canman carca. Ashtahuanpish cunanca ñuca ruhuashcacunata ricushpapish ñucatapish, ñuca Taitatapish piñancuna. 25 Chaica mandashpa quillcashcapi: “Manapish juchayuc cacpimi, piñarca” nishca pactachunmi, chashnaca tucurca. 26 Ashtahuanpish Taitamanta ñuca cachashca Cushichic Diospac Espíritu shamushpami, ñucataca ricsichinga. Paica cashcata nicmi. 27 Cancunaca callarimanta pacha ñucahuan cashcamantami ñucamanta huillaccuna canguichic.

Juan 16

1 Caicunataca ñucata crinata ama saquichunmi huillacuni. 2 Tandanacuna huasicunamanta llucchishpa cachangami. Shinallatac cancunata huañuchishpa, Diosmanmi alli ruhuanchic nina punzhami chayamunga. 3 Ñuca Taitatapish, Ñucatapish mana ricsishcamantami chashna ruhuanga. 4 Caicunataca chai punzhacuna shamucpi, ñuca utcaman nishcata yuyarichunmi nicuni.

Diospac Espíritu imata ruhuac cashcamanta

Ñuca cancunahuan cashcamantami, caicunataca callaripica mana huillarcani. 5 Cunanca ñucata cachac Taitapacmanmi rigrini. Shina cacpipish pipish: “¿Maimantac ringuichic?” nishpa mana tapunguichicchu. 6 Ashtahuanpish caicunaman chashna huillashcamantami yallita llaquiringuichic. 7 Shina cacpipish, cancunapac allipac rinami cani. Chashna ñuca mana ricpica, cancunata Cushichicca mana cancunapacman shamungachu. Ñuca rishpami, paitaca cachasha. Chaica chashnatacmi canga. 8 Pai shamushpami, cai pachapi imami jucha cashcatapish, mana jucha cashcatapish, Dios taripana cashcatapish ricuchinga. 9 Paimi ñucata mana crishpaca juchayuc cashcata ricuchinga. 10 Ñuca Taitapacman rishpa, mana ricuricpimi, imami cashcata ruhuanata ricuchinga. 11 Cai pachata mandacta Dios ña juchanchishca cashcamantami, imami taripana cashcataca ricuchinga. 12 Cancunaman imata ninata chariniracmi. Shina cacpipish, cunanca mana tucui entendinguichicchu. 13 Cashcata nic Diospac Espíritu shamushpaca, mana paipac munaillamantachu rimanga, ashtahuanpish imata uyashcallatami huillanga. Chaimantami cashcata ruhuanata yachachinga. Shinallatac tucui imalla tucugricushcatapish yachachinga. 14 Paica ñucamanta chasquishpami cancunaman yachachinga. Chaimantami ñucata jatunyachinga. 15 Tucui imapish Taitapac cacca ñucapacmi. Chaimantami “Diospac Espirituca ñucamanta chasquishpa, cancunamanca yachachinga” nircani. 16 Asha pacha quipaca ñucata mana ricunguichicchu. Shina cacpipish, asha quipami cutin ricunguichic— nirca.

Llaquica cushiman tigrana cashcamanta

17 Chaimanta maijan Jesuspac yachacuccuna tapunacushpaca: —Pai: “Ñuca Taitapacmanmi rigrini, asha quipaca mana ricunguichicchu, asha quipami cutin ricunguichic” nishpaca, ¿imatatac nisha nin? 18 Pai: “Asha quipaca” nishpaca, ¿imatatac nisha nin? Chaitaca mana entendinchicchu— ninacurca. 19 Paicuna tapunata munacucta yachashpami, Jesusca: —Ñuca: “¿Asha quipaca ñucata mana ricunguichicchu, cutin asha quipami ricunguichic” nishcamantachu tapunacucunguichic? 20 Cancuna llaquilla cacpipish, huacailla cacpipish, cai pachapac causaccunaca cushicungami. Shina cacpipish, cancunapac llaquica cushicuimi tucunga. 21 Shuc huarmica sajuarina punzha chayacpica, nanaihuanmi llaquirin. Shina cacpipish sajuarishca quipaca, shuc huahua cai pachaman apamushcamantami tucui nanaita cungarishpa cushicun. 22 Shinallatacmi cancunaca llaquiringuichic. Shina cashpapish, ñuca cutimucpica, cancunapac shungupi yallitami cushicunguichic. Chai cushicuitaca pi mana quichungachu. 23 Chai punzhacunapica ña mana ashtahuan imata tapunguichicchu. Ñuca shutipi ñuca Taitaman mañacpica paica cungami. Chaica chashnatacmi canga. 24 Cunancamanca, ñuca shutipi imata mana mañashcanguichicchu. Cancunapac shungupi yallita cushicui tiyachun mañaichic, chasquinguichicmi.

Jesús mana allicunata mishashcamanta

25 Tucui caicunataca chimbapurashpallami parlarcani. Ña mana ashtahuan chimbapurashpa parlana punzha chayamucpica, ñuca Taita ima shina cashcatatacmi huillasha. 26 Chai punzhacunapica cancunallatacmi ñuca shutipi mañanguichic. Ña mana cancunamanta ñuca Taitata mañashachu, 27 ashtahuanpish ñuca Taitallatacmi cancunataca cuyan. Chaica, ñucata cuyashcamanta, ñuca Diosmanta shamushca cashcata crishcamantami chashna cuyan. 28 Ñuca Taitapacmantami cai pachaman shamurcani. Cunanca cai pachata saquishpami, ñuca Taitapacman cutigrini— nirca. 29 Shina nicpimi yachacuccunaca: —Cunanmi entendinallatac parlacungui, ashtahuanpish ña mana chimbapurashpachu parlacungui. 30 Cunanmi can tucuita yachac cashcata yachanchic. Pipish manarac tapucpimi, canca yachangui. Chaimantami cantaca Diosmanta shamushca cashcata crinchic— nirca. 31 Shina nicpimi Jesusca: —¿Cunanca cringuichicchu? 32 Chai punzhaca chayamun, ña caillapimi. Cancunaca ñucallata saquishpa, caita chaita ringuichic. Shina cacpipish, mana ñucallachu cani, ashtahuanpish ñuca Taitaca ñucahuanmi. 33 Tucui caicunataca ñucahuan yallita cushicuita charichunmi nini. Cai pachapica llaquita apanguichicmi. Shina cacpipish, cai pacha mana allicunata ñuca atishcamanta ñucata crichic— nirca.

Juan 17

Jesús yachacuccunamanta Diosta mañashcamanta

1 Chaicunata nishca quipa Jesús jahua pachata huichailla ricushpaca: —Ñuca Taitalla, ñucata japichina pachaca ñami chayamushca. Chaimanta cambac Churi canta jatunyachichun, cambac Churitapish jatunyachiyari. 2 Canca ñucaman cushcacunaman huiñai causaita cuchunmi, tucui gentecunata ñuca maquipi churarcangui. 3 Cai huiñai causaitaca, shuclla Dios cashcata crishpa, Jesucristoca Dios cachashca cashcata crishpami chasquinga. 4 Ñucaca cai pachapica canta jatunyachishcanimi, shinallatac imata ruhuachun nishcatapish tucuchishcanimi. 5 Cunanca ñuca Taitalla, cai pacha manarac tiyacpi, ima shinami cambac ladopi jatunyachishca carcani, Chashnallatac cunanpish jatunyachiyari. 6 Cai pacha gentecunamanta can acllashpa, ñucaman cushcacunamanca, ñami can pi cashcataca huillashcani. Cambacmi carcacuna, canmi ñucaman curcangui. Paicunaca can rimashcacunata cazushcacunami. 7 Cunanca tucui ñucaman cushcacunaca, canmanta shamushca cashcatami yachancuna. 8 Can huillachun nishcata huillarcani. Paicuna chasquishpami, ñucataca Dios cachashcata yachac chayashpa crincuna. 9 Ñucaca paicunamantami mañani. Mana cai pachapac caccunamanta mañanichu, ashtahuanpish ñucaman cushcacunaca cambac cashcamantami paicunamanta mañani. 10 Tucui cambac cashcacunaca ñucapacmi, ñucapac cashcacunaca cambacmi. Paicunamantami jatunyachishca cani. 11 Ñucaca ña mana cai pachapi cagrinichu, cambacmanmi rigrini. Ñucata caticcunaca cai pachapimi saquirin. Jucha illac Taitalla, ima shinami canhuan shuc shinalla canchic, chai shinallatac paicunapish shuc shinalla cachun, cambac poderhuan cuidaiyari. 12 Cai pachapi paicunahuan cashpaca, cambac poderhuanmi cuidarcani. Can cushcacunataca tucuitami cuidarcani. Shucllapish mana chingarircachu, ashtahuanpish chingaringapac cashca runallami can quillcachishcapi nishca shina pactachun chingarirca. 13 Can maipi cashcamanmi rini. Ñuca shinallatac paicunapish yallita cushicuchunmi, cai pachapi cashparac cashna mañani. 14 Can rimashcata paicunaman huillashcanimi. Chaimantami cai pachapac caccunaca paicunata piñancuna. Paicunaca ña mana cai pachamantachu, ñucapish mana cai pachamantachu cani. 15 Mana cai pachamanta paicunata anchuchichunchu mañanichu, ashtahuanpish tucui millaimanta huacaichichunmi mañani. 16 Paicunaca mana cai pachamantachu, ñucapish manallatac cai pachamantachu cani. 17 Paicunata cambaclla cachun cambac rimashca shimihuan millaimanta huacaichingui. Canca cashcata nicmi cangui. 18 Ima shinami cai pacha gentecunapacman cacharcangui, chashnallatacmi paicunatapish cai pacha gentecunapacman cachacuni. 19 Paicunapish cashcata nic rimashcahuan cambaclla tucuchunmi, ñucapish paicunapac allipac cambaclla tucuni. 20 Mana paicunallamantachu mañani, ashtahuanpish paicunapac huillashcata uyashpa, ñucata criccunamantapishmi mañani. 21 Taitalla, ima shinami ñucaca canhuan, canca ñucahuan shuc shinalla canchic, chai shinallatac paicunapish ñucanchic-huan shuc shinalla cachunmi mañani. Cai pachapi causaccuna can ñucata cachashcata crichunmi, chashna mañani. 22 Canca ñucata jatunyachishcanguimi. Ñucanchic ima shinami shuc shinalla canchic, chai shinallatac paicunapish shuc shinalla cachunmi paicunatapish jatunyachini. 23 Ñucaca paicunahuan, canca ñucahuan cacpimi, paicunaca shuc shinalla canga. Shina cacpimi, cai pachapi causaccunaca can cachashcata, shinallatac ñucata ima shinami cuyangui, chashnallatac paicunatapish cuyac cashcata yachangacuna. 24 Taitalla, cai pacha manarac tiyacpimi, ñucataca cuyashcangui. Chaimantami can cushcacunaca ñuca maipimi cani, paicunapish chaipi cachun munani. Chaipi cashpami ñuca jatunyachishca cashcata ricunga. 25 Cashcata ruhuac Taitalla, cai pachapac causaccuna canta mana ricsicpipish, ñucaca ricsinimi. Can ñucaman cushcacunapish, can ñucata cachashcata yachanmi. 26 Can ñucata cuyac shinallatac paicunapish cuyanacuchun, shinallatac ñucahuan shuc shinalla cachunmi, can rimashcacunataca ricsichini, shinallatac ricsichishpa catishami— nirca.

Juan 18

Jesusta prezu japishcamanta

1 Jesusca chashna nishca quipaca, paipac yachacuccunahuanmi Cedrón yacu chimbaman rirca. Chaipimi shuc huerta tiyarca. Chaimanmi Jesusca paipac yachacuccunahuan yaicurca. 2 Jesusca tauca cutinmi paipac yachacuccunahuan chaipi tandanacuc carca. Chaimantami, japichic Judaspish chai huertata ricsirca. 3 Chaimanmi Judasca achca soldadocunahuan, curacunata mandac curacunahuan, fariseocuna cachashca Diosta mañana huasita cuidaccunahuan chayarca. Paicunaca macanacunahuan, lamparacunahuan, linternacunahuanmi chayarca. 4 Jesusca, pai ima tucunata ña yachashpami paicunataca: —¿Pitatac mashcacunguichic?— nirca. 5 Shina nicpimi paicunaca: —Nazaret pueblomanta Jesusta— nirca. Shina nicpimi Jesusca: —Ñucami cani— nirca. Jesusta japichic Judaspish chaipimi paicunahuan carca. 6 Jesús: “Ñucami cani” nicpica, huashaman cutirishpami, azhacman urmarcacuna. 7 Jesús cutinllatac tapushpaca: —¿Pitatac mashcacunguichic?— nirca. Shina nicpimi, paicunaca: —Nazaret pueblomanta Jesusta— nirca. 8 Chaimantami Jesusca: —Ña: “Ñucami cani” nircanica. Ñucata mashcacushpaca, cai ñucata caticcuna richun saquichic— nirca. 9 Jesusca utcaman: “Taitalla, can cushcacunataca shucllapish mana chingarircachu” nishca pactachunmi, chashnaca nirca. 10 Chaimantami Simón Pedroca paipac espadata llucchishpa, jatun mandac curata servic Malco runapac alli lado ringrita huactashpa pitirca. 11 Chaimantami Jesusca Pedrotaca: —Espadata maipi charicushcallapitac huacaichi. Ñuca Taita cushca cai jayac ubiana shina llaquitaca ¿manachu apana cani?— nirca.

Mandac Anaspac ñaupaman Jesusta apashcamanta

12 Shinami soldadocunapish, soldadocunata mandacpish, Diosta mañana huasita cuidaccunapish Jesusta japishpa huatashpa, 13 puntaca Anaspacman aparcacuna. Anasca Caifaspac suegromi carca. Caifasca chai huatapica, curacunata jatun mandac curami carca. 14 Utcamanmi Caifasca mandac israelcunataca: “Tucui israelcuna chingarinapac randica, shuc runallami huañuna alli canga” nishpa, yuyaita cushca carca.

Anaspac huasi canzhapi Pedroca cashcamanta

15 Simón Pedropish, caishuc yachacucpishmi Jesustaca catishpa rirca. Chai yachacucca, curacunata jatun mandac curapac ricsishca cashpami, Jesus-huan jatun mandac curapac huasi ucuman yaicurca. 16 Ashtahuanpish Pedroca canzhallapimi saquirirca. Chaimantami jatun mandac curapac ricsishca yachacucca canzhaman llucshishpa, huasita cuidac huarmihuan parlashpa Pedrotaca ucuman yaicuchirca. 17 Chashna yaicucpimi, chai huasita cuidac huarmica Pedrotaca: —¿Manachu canpish chai runapac yachacuc cangui?— nirca. Shina nicpica Pedroca: —¡Mana chaichu cani!— nirca. 18 Yalli chiri cashcamantami Diosta mañana huasita cuidaccunapish, serviccunapish ninata japichishpa masharicurca. Pedropish chaillapitacmi paicunahuan masharicurca.

Anás Jesusta tapushcamanta

19 Curacunata mandac Anasmi paipac yachacuccunamanta, paipac yachachishcamanta Jesusta tapurca. 20 Chashna tapucpimi Jesusca: —Ñucaca tandanacuna huasicunapipish, Diosta mañana huasipipish tucuipac ñaupapimi yachachircani. Mana pacalla yachachishcanichu. 21 ¿Imamantatac ñucata tapungui? Ñuca nishcata uyaccunaman tapui. Paicunami imata nishcataca yachancuna— nirca. 22 Jesús chashna nicpica, Diosta mañana huasita cuidac shuc runami: —¿Chashnachu mandac curata ningui?— nishpa, ñahuipi huactarca. 23 Chashna huactacpimi Jesusca: —Mana alli rimashca cacpica, ima mana allita rimashcata ni. Ashtahuanpish allita nishca cacpica, ¿imamantatac huactangui?— nirca. 24 Anasca curacunata jatun mandac Caifaspacmanmi Jesusta huatashpa cacharca.

Pedro Jesusta negashcamanta

25 Pedroca ninapi masharishpami shayacurca. Chaipimi paihuan caccunaca: —¿Manachu canpish chai runapac yachacuc cangui?— nirca. Chashna nicpi, Pedro negashpaca: —¡Ñucaca mana chaichu cani!— nirca. 26 Cutinllatacmi curacunata jatun mandacpac servicca: —¿Manachu cantapish Jesus-huan ricurcani?— nirca. Paica Pedro ringrita pitishca runapac aillumi carca. 27 Cutinllatacmi Pedro negarca. Chai ratomi galloca cantarca.

Mandac Pilatopacman Jesusta apashcamanta

28 Curacunata mandac Caifaspac huasimantaca, Roma llactata mandashpa tiyana huasimanmi Jesusta aparcacuna. Ña tutamantami carca. Chaimantami Pascua micuita micungapacca ama mapayashun nishpa, israelcunaca jatun mandacpac ucuman mana yaicurca. 29 Chaimantami mandac Pilato llucshishpaca: —¿Cai runataca imamantatac juchanchishpa apamunguichicyari?— nirca. 30 Shina nicpimi paicunaca: —Cai runa ima millaita mana ruhuashca cacpica, manachari apamunchic carca— nirca. 31 Chaimanta Pilatoca: —Cancunapac mandashcapi nishca shina, taripashpa llaquichingapac apaichic— nirca. Shina nicpimi, mandac israelcunaca: —Ñucanchicca mana pita huañuchinallachu canchic— nirca. 32 Chashnami, Jesús pai ima shina huañunata huillashcaca pactarca. 33 Pilato pai mandashpa tiyana ucuman cutin yaicushpa, Jesusta cayashpaca: —¿Canchu israelcunata Jatun Mandac cangui?— nirca. 34 Chashna nicpimi Jesusca: —¿Cambac yuyaimantachu chashna ningui? Mana cashpaca, ¿maijanchu chashnaca huillarca?— nirca. 35 Shina nicpimi Pilatoca: —¿Ñucaca Israel runachu cani? Cambac llacta gentecunallatacmi curacunata mandac curacunahuan ñucapacman apamurca. ¿Imatatac ruhuarcanguiyari?— nirca. 36 Shina nicpimi Jesusca: —Ñuca mandanaca mana cai pachapichu. Cai pachapi mandana cacpica, ñucata caticcuna macanacushpa, israelcuna japichun mana saquinmanchu. Ñuca mandanaca mana caipichu— nirca. 37 Chaimantami Pilatoca: —Shinashpaca, ¿canca jatun mandacchu cangui?— nirca. Shina nicpimi Jesusca: —Ari, can nishca shinallatacmi cani. Ñucaca cashcata huillangapacmi cai pachapi huacharingapac shamurcani. Cashcata rimashcata cazuccunallami, ñuca rimashcata uyancuna— nirca. 38 Chaimantami Pilatoca: —¿Imatac chai cashcata ninaca?— nirca.

Jesusta “huañunami cangui” nishcamanta

Shina nishpami, Pilatoca cutin llucshishpa israelcunataca: —Ñucaca ima mana allita mana cai runapi tarinichu. 39 Shina cacpipish, cancunaca Pascua fiestapi shuc prezuta cacharichun ninatami yachanguichic. ¿Manachu israelcunata Jatun Mandacta cacharichun ninguichic?— nirca. 40 Shina nicpi, tucui mashna caparishpaca: —¡Paitaca ama cacharichu, Barrabasta cachari!— nircacuna. Barrabasca millai shuhuacmi carca.

Juan 19

1 Chaimantami Pilatoca Jesusta macachirca. 2 Soldadocunaca casha angumanta ahuashca shuc coronata umapi churachishpami, morado churanatapish Jesusman churachirca. 3 Chaimanta paipac cuchuman chayashpaca: —Israelcunata Jatun Mandac alli nishca cachun— nishpa, ñahuipi huactarca. 4 Pilato cutin llucshishpaca: —Riquichic, ima juchata paipica mana tarinichu, chaita yachaichic— nirca. 5 Jesús casha coronata umapi churashca, morado churanatapish churashcami llucshirca. Chashna llucshimucpimi Pilatoca: —Caipimi chai runaca— nirca. 6 Chaita curacunata mandac curacunapish, Diosta mañana huasita cuidaccunapish ricushpaca: —¡Paitaca chacatailla, chacatailla!— nishpami caparircacuna. Shina caparicpimi Pilatoca: —Ñucaca paipica ima juchata mana tarinichu. Cancunallatac apashpa chacatagrichic— nirca. 7 Shina nicpimi israelcunaca: —Pai ‘Diospac Churimi cani’ nishcamantaca, ñucanchicta mandashcapi nishca shinaca, huañunami can— nirca. 8 Pilato chaita uyashpaca ashtahuan mancharishpami, 9 mandashpa tiyana ucuman yaicurca. Chashna yaicushpaca Jesustaca: —¿Maimantatac cangui?— nirca. Shina tapucpipish, Jesusca imata mana nircachu. 10 Shina upalla cacpimi Pilatoca: —¿Manachu imata huillagringui? Ñuca mandacpimi, chacatana cacpipish chacatanga, cacharina cacpipish cacharinga. Chaitaca, ¿manachu yachangui?— nirca. 11 Shina nicpimi Jesusca: —Dios mana canman cushca cacpica, ñucataca imata mana ruhuai pudinguimanchu. Shina cacpipish ñucata japichicmi canta atishpa yalli juchayucca— nirca. 12 Chaimanta pachami Pilatoca, ima shinapish Jesusta cacharinata munarca. Shina cacpipish israelcunaca: —¡Cai runata cacharishpaca, mana jatun mandac Cesarpac partechu cangui! ¡Maijanpish ‘jatun mandacmi cani’ niricca, jatun mandac Cesarta piñacmi!— nishpa caparirca. 13 Pilato chaita uyashpaca, Jesusta canzhaman llucchishpami mandashpa tiyanapi tiyarirca. Chai tiyanaca Gábata nishca pambapimi carca. Hebreo rimaipica, “rumihuan ruhuashca pamba” nisha ninmi. 14 Pascua fiestapac allichirina punzha, chaupi punzhapimi Pilatoca israelcunataca: —Riquichic, caipimi Jatun Mandacca— nirca. 15 Shina nicpipish paicunaca: —¡Chacatailla, chacatailla!— nishpami caparircacuna. Shina caparicpimi Pilatoca: —¿Cancunata Jatun Mandactachu chacatachun ninguichic?— nirca. Shina nicpimi, curacunata mandac curacunaca: —Jatun mandac Cesarllatami charinchic. Shuctac mandactaca mana charinchicchu— nirca. 16 Shina nicpimi, Pilatoca Jesusta chacatachun paicunaman curca. Chaimantami Jesusta apashpa rircacuna.

Jesusta cruzpi chacatashcamanta

17 Jesusca cruzta aparishpami, Gólgota urcuman llucshirca. Gólgota nishpaca, Hebreo rimaipi, “uma tullu” nisha ninmi. 18 Chaipimi Jesustaca chacatarca. Ishcai runacunahuanmi shuctaca shuc ladoman, shuctaca shuc ladoman chacatashpa, Jesustaca chaupipi chacatarca. 19 Pilatoca shuc quillcatami cruz jahuapi churarca. Chaipica: “Israelcunata Jatun Mandac, Nazaret pueblomanta Jesusmi” nishpami quillcashca carca. 20 Jesusta chacatashcaca Jerusalén pueblo cuchullapimi carca. Chaimantami achca israelcuna chai quillcata ricurca. Chai quillcaca hebreo rimaipi, latín rimaipi, griego rimaipimi carca. 21 Chai quillcata curacunata mandac curacuna ricushpa Pilatotaca: —Ama ‘Israelcunata Jatun Mandacmi’ nishpa quillcaichu, ashtahuanpish ‘Israelcunata Jatun Mandacmi cani’ nishpa quillcai— nirca. 22 Chaimantami Pilatoca: —Ña quillcashcaca, chashnatacmi cana can— nirca. 23 Ña chacatashca quipaca, soldadocunaca Jesuspac churanacunata chuscu partepi chaupishpami cada shuc japinacurca. Jesuspac ucu churana mana sirashca, shucllami carca. 24 Chaimantami soldadocunaca: —Ama lliquishun, ashtahuanpish suerteta ruhuashpa, japishun— ninacurca. Chashnami Dios quillcachishcapi: «Ñuca churanacunataca chaupinacurcami. Cutin ucu churanataca suerteta ruhuashpami japirca» nishcaca pactarca. Chashnami soldadocunaca ruhuarca. 25 Jesusta chacatashca cuchupica paipac mamapish, paipac mamapac ñañapish, Cleofaspac huarmi Mariapish, Magdala pueblomanta Mariapishmi carca. 26 Jesús paipac mamata, paipac cuyashca yachacucta ricushpa, paipac mamataca: —Mama, caipimi cambac huahuaca— nirca. 27 Chai quipaca, paipac yachacuctapish: —Caipimi cambac mamaca— nirca. Chaimanta pachami chai yachacucca Jesuspac mamata huasiman pusharca.

Jesús huañushcamanta

28 Chai quipami, Jesusca tucuita pactachishcata ña yachashpa, Dios quillcachishcapi nishca pactachun “yacunayanmi” nirca. 29 Chaipica, vinagre jundachishca shuc mangami tiyacurca. Chaipi shuc hisopo caspipi esponjata huatashpa satishpa, Jesuspac shimiman chayachirca. 30 Chai vinagreta Jesús ubiashpaca: “Ña tucuchishcami” nircami. Chashna nishpaca, umata huarcushpa, paipac espirituta Diosman mingashpa huañurcallami.

Lanzahuan Jesusta shuc soldado chugrichishcamanta

31 Chai punzhaca Pascua fiestapac allichina punzhami carca. Chaimantami israelcunaca samana punzhapi huañushcacuna cruzpi cainachun mana munarcacuna. Chai punzhaca israelcunamanca jatun punzhami carca. Chaimantami chacatashcacunapac changacunata paquishpa, chaimanta anchuchichun Pilatota mañarca. 32 Chaimantami soldadocuna rishpa, chacatashcacunataca caishuctapish chaishuctapish changacunata paquirca. 33 Ashtahuanpish Jesuspacman chayashpaca, ña huañushcata ricushpami, mana changacunata paquirca. 34 Shina cashpapish, shuc soldadoca lanzahuanmi Jesuspac costillasta chugrichirca. Chai chugrimantaca yacupish, yahuarpish llucshircami. 35 Tucui caicunata ricushpami, mana llullashpa huillacuni. Cai huillashcaca mana llullachu. Cancuna crichunmi, imatapish cashcata yachashpa huillacuni. 36 Caicunaca Dios quillcachishcapi: “Shuc tullullatapish mana paquingachu” nishcami pactarca. 37 Shuctac quillcachishcapica: “Lanzahuan chugrichishcatami ricungacuna” ninmi.

Jesusta enterrashcamanta

38 Chai quipami, Arimatea pueblomanta José Pilatopacman rishpa, Jesuspac cuerpota enterrangapac mañagrirca. Chai Joseca mandac israelcunata manchashcamantami, pacalla Jesusta caticurca. Pilato apachun nicpimi, Jesuspac cuerpota aparca. 39 Shinallatac shuc tuta Jesus-huan parlanacuc Nicodemopish mirrahuan, aloehuan chapushca shuc quintal shina mishquilla ashnacuctami apamurca. 40 Chashnami Jesuspac cuerpota apashpa, mishquilla ashnacucta churashpa, lienzohuan pillurca. Chashnami israelcunaca enterrac carca. 41 Jesusta chacatashca cuchupica, shuc huertami tiyarca. Chai huertapica pitapish manarac enterrashca, shuc mushuc sepulturami tiyarca. 42 Israelcuna Pascua fiestapac allichirina punzha chayamucushcamanta, chai sepultura cuchullapi cashcamantami, Jesuspac cuerpotaca utca chaillapi churarca.

Juan 20

Jesús causarishcamanta

1 Semana callari punzha, manarac alli achicyacpimi, Magdala pueblomanta Mariaca Jesusta enterrashcaman rirca. Chayashpaca enterrashca pungupi churashca rumita anchuchishcatami ricurca. 2 Chaimantami Simón Pedropacman, shinallatac Jesús cuyashca caishuc yachacucpacman huillangapac callparca. Paicunapacman chayashpaca: —Apunchic Jesuspac cuerpotaca, maimanchari apashcami. Maipi churashcata mana yachanichu— nirca. 3 Pedropish, caishuc yachacucpish maipi enterrashcapimi ricungapac rirca. 4 Ishcaitami callparca. Shina callpashpapish, caishuc yachacucmi Pedrota atishpa, maipi enterrashcamanca chayarca. 5 Ña chayashpaca, mana yaicushpami canzhallamanta cumurishpa, cuerpota pillushca lienzota ricurca. 6 Chai quipata Pedro chayashpaca, ucuman yaicushpami cuerpota pillushca lienzo siricucta ricurca. 7 Jesuspac umata pillushca lienzopish mana caishuc lienzocunahuan cashcata, ashtahuanpish chican pillushca siricuctami ricurca. 8 Utca ñaupashpa chayac yachacucpish ucuman yaicushpami, tucui ima tucushcata ricushpa crirca. 9 Paicunaca Dios quillcachishcapi: “Paica causaringatacmi” nishpa huillashcataca manarac entendircachu. 10 Chai quipaca, yachacuccunaca huasimanmi rirca.

Magdala pueblomanta Mariaman Jesús ricurishcamanta

11 Mariaca enterrashca pungullapitacmi huacashpa saquirishca carca. Chaipi huacashpa shayacushpami, cumurishpa ucuta ricurca. 12 Chashna ricushpami, ishcai angelcunata shucca Jesuspac cuerpota churashca uma ladoman, shucca chaqui ladoman yuranlla churashca tiyacucta ricurca. 13 Chai angelcuna tapushpaca: —¿Ima nishpatac huacacungui?— nicpimi paica: —Ñucata Mandac Apunchic Jesuspac cuerpotami maimanchari apashcacuna. Maipi churashcata mana yachanichu— nirca. 14 Chashna nishcahuan huashata ricucpica, Jesusmi chaipi shayacushca carca. Shina ricushpapish, Jesús cashcataca mana yacharcachu. 15 Jesusca chai huarmitaca: —¿Ima nishpatac huacacungui? ¿Pitatac mashcacungui?— nirca. Shina nicpi, chai huarmica “huertata cuidacmi canga” yuyashpami: —Amito, can maipi churangapac apashca cashpaca huillai, ñuca mashcangapac ringapac— nirca. 16 Chashna nicpimi Jesusca: —¡María!— nirca. Shina nicpimi pai tigrarishpaca, hebreo rimaipimi: “¡Raboni!” nirca. “Raboni” nishpaca, “yachachic” nisha ninmi. 17 Shina nicpimi Jesusca: —Ñucaca manarac ñuca Taitapacman huichai rinichu. Chaimanta ama ashtahuan tuparichu. Shina cacpipish ri, ñuca yachacuccunamanca: ‘Ñucaca ñucapacpish, cancunapacpish Taitapacman, shinallatac ñucapacpish, cancunapacpish Diospacmanmi huichai rigrini’ ninmi, nishpa huillagri— nirca. 18 Chashna nicpi, Magdala pueblomanta María rishpaca, Apunchic Jesusta ricushcatapish, imata pai nishcatapish tucuimi paipac yachacuccunamanca huillarca.

Yachacuccunaman Jesús ricurishcamanta

19 Semana callari chai domingo punzhapitacmi ña tutayamugricucpi, yachacuccunaca mandac israelcunata manchashcamanta pungucunata huichcarishpa, tucui tandarishpa tiyacurcacuna. Chashna cacpimi, Jesús paicunapacman chayashpa, chaupipi shayarishpaca: —Cushicuichic, ama manchaichicchu— nirca. 20 Chashna nishca quipami, paipac maquicunatapish, costillas quingraitapish ricuchirca. Chashna ricuchicpica, Apunchic Jesusta ricushpami cushicurcacuna. 21 Cutinllatac Jesusca: —Cushicuichic, ama manchaichicchu. Ima shinami ñuca Taita ñucata cacharca, chashnallatacmi cancunataca ñucaca cachani— nirca. 22 Chashna nishpa paicunata pucushpami: —Diospac Espirituta chasquichic. 23 Pipish cancunata mana allita ruhuacpi perdonacpica, paicuna juchata ruhuashcamanta perdonashcami canga. Shinallatac pipish cancunata mana allita ruhuacpi mana perdonacpica, paicuna juchata ruhuashcamantaca mana perdonashcachu canga— nirca.

Jesús causarishcata Tomás ricushcamanta

24 Chashna cacpipish, chunga ishcai yachacuccunapuramanta ishcaipura huacharishca Tomasca, Jesús chayacpica mana paicunahuanchu carca. 25 Tomás chayamucpi, caishuc yachacuccunaca: —Apunchic Jesustami ricurcanchic— nircacuna. Chashna nicpimi Tomasca: —Paipac maquicunapi clavocuna yaicushcata mana ricushpa, chai clavo yaicushcapi ñuca dedota mana satishpa, shinallatac paipac costillas quingraipi chugririshcata ñuca maquihuan mana tuparishpaca, manatac crishachu— nirca. 26 Pusac punzha quipami, cutin yachacuccunaca chai ucullapitac tandanacushca carcacuna. Shinallatac Tomaspish chaipimi carca. Huasi pungucuna huichcashca cacpimi, Jesusca cutin paicunapacman chayashpa chaupipi shayarishpaca: —Cushicuichic, ama manchaichicchu— nirca. 27 Chashna nishca quipami Tomastaca: —Cambac dedota ñuca maqui chugripi satishpa ricui, shinallatac cambac maquita ñuca costillas quingrai chugripi satishpa ricui. Ama mana crishpa puricuichu, ashtahuanpish criyari— nirca. 28 Chashna nicpimi Tomasca: —¡Ñucata Mandac Apunchic Jesuslla, ñuca Dioslla!— nirca. 29 Chashna nicpimi Jesusca: —Tomás, canca ricushpatacmi cringui. Manapish ricushpa criccunaca, yallita cushicuichic— nirca.

Imamanta cai librota quillcashcamanta

30 Jesuspac yachacuccuna ricucucpica, ashtahuan achca milagrocunatami ruhuarca. Chaicunaca mana tucuichu cai libropica quillcashca. 31 Chashna cacpipish cancuna Jesusta Quishpichic Cristo cashcatapish, Diospac Churi cashcatapish crichun, shinallatac paita crishpa huiñai causaita charichunmi, caicunataca quillcani.

Juan 21

Paipac yachacuccunaman Jesús cutin ricurishcamanta

1 Chai quipaca, cutinllatacmi Tiberias jatun cucha patapi paipac yachacuccunaman Jesusca cai shina ricurirca: 2 Chaipica Simón Pedropish, ishcaipura huacharishca Tomaspish, Galileapi tiyac Caná pueblomanta Natanaelpish, Zebedeopac churicunapish, shinallatac Jesuspac yachacuccunapuramanta caishuc ishcai yachacuccunapishmi carca. 3 Chaipi cashpami Pedroca: —Ñucaca challuatami japigrini— nirca. Chashna nicpi, caishuc yachacuccunaca: —Ñucanchicpish canhuan challuata japingapac rishun— nirca. Chashna ninacushpami, canoapi huichicushpa rirca. Shina rishpapish, chai tutaca ima challuata mana japircacunachu. 4 Chai tuta ña achicyamucucpimi, Jesusca yacu patapi ricurirca. Shina ricuricpipish, yachacuccunaca Jesús cashcataca mana yacharcacunachu. 5 Chashna cacpimi Jesusca: —Huahuacuna, ¿manachu ima challuata japishcanguichic?— nishpa tapurca. Chashna tapucpi paicunaca: —Imata mana japinchicchu— nirca. 6 Chashna nicpimi Jesusca: —Canoamanta alli ladoman linchita shitaichic. Chaipica challuacunata japinguichicmi— nirca. Chashna nicpica, pai nishca shinallatacmi linchita yacupi shitarcacuna. Chashna shitashpaca, challuacuna yallimana linchipi junda cacpimi, linchita mana llucchi pudircacuna. 7 Chashna tucucpimi, Jesuspac mai cuyashca yachacucca Pedrotaca: —Paica Apunchic Jesusmi— nirca. Pedroca “Apunchic Jesusmi” nicta uyashcahuanmi, churanata churarishpa yacuman shitarirca. Challuata japicushcamantami Pedroca lluchulla carca. 8 Caishuc yachacuccunaca challua junda linchitaca aisashpallami, canoahuanca yacu pataman cuchuyamurca. Paicunaca yacu patamanta patsac metro shinallapimi carca. 9 Paicuna canoamanta uricushpaca, nina brazas jahuapi challua cusaricuctapish, tanda chaipi tiyacuctapish ricurcacunami. 10 Chaipimi Jesusca: —Ñaca japishca maijan challuacunata apamuichic— nirca. 11 Chashna nicpimi, Simón Pedroca canoaman huichicushpa, jatun challuacuna junda linchita japishpa, aisashpalla yacu pataman cuchuyachirca. Challuacunaca patsac pichca chunga quimsami carca. Chashna cai tucui challuacunahuan cashpapish, linchica mana lliquirircachu. 12 Chaipimi Jesusca: —Shamuichic, micunguichic— nirca. Yachacuccunaca Apunchic Jesús cashcata yachashpami maijanllapish: “¿Canca pitac canguiyari?” nishpaca, mana tapusha nircacuna. 13 Chai quipaca cuchuyashpa tandata japishpami, Jesusca paicunaman curca. Challuacunatapish shinallatacmi curca. 14 Jesús chaipi ricurishcahuanca, quimsa cutinmi yachacuccunamanca huañushcacunapuramanta causarishca quipaca ricurirca.

Simón Pedrohuan Jesús parlashcamanta

15 Micushca quipami, Jesusca Simón Pedroman tapushpaca: —Juanpac churi Simón, ¿caishuccunata atishpachu ñucata cuyangui?— nishpa tapurca. Chashna tapucpi Pedroca: —Ari, Apunchic Jesús, canta cuyac cashcataca canllatac yachanguimi— nirca. Chashna nicpimi Jesusca: —Shinashpaca ñuca pactalla ovejacunata cuidangui— nirca. 16 Chashna nicpipish, cutinllatacmi Jesusca: —Juanpac churi Simón, ¿ñucataca cuyanguitacchu?— nishpa tapurca. Chashna tapucpi Pedroca: —Ari, Apunchic Jesús, canta cuyac cashcataca canllatac yachanguimi— nirca. Shina nicpimi Jesusca: —Shinashpaca, ñuca ovejacunata cuidangui— nirca. 17 Ña quimsa cutinhuan Jesús tapushpaca: —Juanpac churi Simón, ¿ñucataca cuyanguitacchu?— nirca. Ña chaihuanca quimsa cutin tapushcamantami, Pedroca llaquilla tucushpaca: —Apunchic Jesús, canllatacmi tucuita yachangui. Shina cashpaca, canllatac ñuca canta cuyac cashcataca yachanguimi— nirca. Shina nicpimi Jesusca: —Shinashpaca, ñuca ovejacunata cuidangui. 18 Huambrarac cashpaca, canllatacmi chumbillirishpa maiman risha nishpapish ric carcangui. Shina cacpipish yuyac cacpica, rigrata chutacpimi, cantaca shuc chumbillichinga, shinallatac can mana risha nishcamanmi pushanga. Chaica chashnatacmi canga— nirca. 19 Jesús chashna nishpaca, Pedro ima shina huañunamanta, shinallatac huañushpa Dios jatun cashcata ricuchinamantami entendichicurca. Chai quipaca: —Ñucata catilla— nircami.

Jesuspac cuyashca yachacucmanta

20 Pedro huashata tigrarishpa ricushpami, Jesuspac cuyashca yachacuc caticushcata ricurca. Chai yachacucllatacmi Jesús Pascuata yuyarishpa micucucpica, paipac ladopi quimirishpa tiyacushca carca. Shinallatac paillatatacmi: “Apunchic Jesús, ¿pitac chai canta japichicca?” nishpa tapushca carca. 21 Chaita Pedro ricushpami: —Apunchic Jesús, ¿paica imatac tucugrin?— nishpa tapurca. 22 Chashna tapucpi Jesusca: —Ñuca cutimungacaman paita causacuchunlla nicpipish, ¿canmanca imatac curinyari? Ashtahuanpish canca ñucata catilla— nirca. 23 Chaimantami Jesusta caticcunapurapica: “Chai yachacucca jaicapi mana huañungachu” nishpa parlanacui tiyarca. Jesusca mana chai yachacuc huañunamantachu nicurca, ashtahuanpish: “Ñuca cutimungacaman paita causacuchunlla nicpipish, ¿canmanca imatac curinyari?” nishcami carca. 24 Chai yachacucllatacmi caicunamanta huillacpish, caicunata quillcacpish can. Shinallatac pai huillashcaca mana llulla cashcatapish yachanchicmi. 25 Jesusca mana caicunallatachu ruhuarca, ashtahuanpish shuctac taucacunatami ruhuarca. Chashna tucui chaicunata shucllancaman shucllancaman quillcacpica, cai pachapi maipi librota churanallapish mana pactanmanchu.