Dios Rimashca Shimi nishcami, Aichayu tucushca
1 Callaripica, Dios Rimashca Shimi nishcami ña tiarca. Chai Shimi nishcami, Taita Dioshuan causajurca. Chai Rimashca Shimica, Diosllatami carca. 2 Callaripica, paica ñami Taita Dio shuan causajurca. 3 Ima tiachumbash paihuanllatami, Diosca tucuita rurarca. Ima tiachun churashcapash, paihuanllatami rurarca. 4 Paipimi causaica tiarca. Chai causaimi, tucuilla gentecunata punchayachij micha carca. 5 Chai michami, yana yana tutapishna causajcunataca punchayachijun. Chai yana yanataca, chai michata mishashpa yanayachitaca na usharcachu. 6 Taita Dios cachamushca shuj runami tiarca. Paica, Juan shutimi carca. 7 Paimi, chai michamanda villachingapaj shamurca. Chai michata tucuicuna crichunmi villachijurca. 8 Juanga, na chai michachu carca. Ashtahuangarin michamanda villajuchunmi, paita cachamushca carca. 9 Tucuilla gentecunata punchayachij michagupachami, ña cai pachaman chayamujurca. 10 Chai Rimashca Shimica, cai pachapimi carca. Cai pachatapash, paihuanllatami rurashca carca. Ashtahuangarin cai pachapi causajcunaca, paitaca na rijsircachu. 11 Pai rurashca gentecunapajman shamujpipash, pai rurashca gentecunaca na chasquircachu. 12 Ashtahuangarin tucui paita chasquishpa, paita crijcunataca, Taita Diospaj huahuacuna cachunmi ushaita cararca. 13 Paicunaca yahuarmanda, aichamanda, runapaj munaimanda huacharishcacunaca na canllu. Ashtahuangarin paipaj huahuacuna cachun, Taita Dios munashcacunami can. 14 Chai Rimashca Shimi nishcami, aichayu tucushpa ñucanchihuan causajurca. (Taita Diospaj shujlla Churitaca, paishnallata ushaita charijta, punchapambagu cajtapashmi ricurcanchi). Paica, ninanda juyaj, napacha llullajmi carca. 15 Juanga, paimandami caparishpa cashna nishpa villachijurca: “Paimandami cashna nijurcani: ‘Ñucapaj jipami shamunga. Paica, ñucapaj pundallatami causajurca’ nijurcanimi” nishpami villachijurca. 16 Tucui imatapash pai charishpa ninanda juyajujpimi, ñucanchica ashtahuan ashtahuan japinajurcanchi. 17 Diosca, pai mandashca shimicunataca, Moisesman cushpami ñucanchiman curca. Ashtahuangarin ninan juyaihuan, na llullaj shimihuanga Jesucristomi shamurca. 18 Taita Diostaca, pipash ima horallapash na ricushcachu. Paipaj Taitahuan tiajuj paipaj shujlla Churimi, paitaca rijsichirca.
Bautizaj Juanmi, Jesucristomanda villachijushca
19 Judiocunaca, curacunata, levitacunatami Bautizaj Juanda: —¿Quiquinga pita capangui?— nishpa tapuchun, Jerusalenmanda cachamurca. Shina cachamujpi, villachishca shimicunami caipica tiajun. 20 Paica villachircallami, paica: —Ñucaca, na Quishpichij Cristo canichu— nishpami villachirca. 21 Paicunaca, cutinmi cashna nishpa tapurca: —Shina cashpaca, ¿pita capangui? ¿Quiquinllu Elías cangui?— nijpimi Juanga: —Na chaichu cani— nirca. Shina nijpi, paicuna cutin tapushpaca: —¿Quiquinllu Dios ima nishcata villachij capangui?— ninajurcami. Shina nijpimi: —Na chaichu cani— nishpa tigrachirca. 22 Shina nijpica paicunaca, cashna nishpami tapunajurca: —¿Shinaca maijanda capangui? Maijan cashpapash villachillayari. Imata tigrachishcatapash, ñucanchita cachamushcacunaman villachinapachami canchi— ninajurcami. 23 Shina nijpimi Juanga, cashna nijurca: —Ñucaca, Dios ima nishcata villachij Isaías villachishca shinallata cani: ‘Jatun Diosman ñanda alichipaichi’ nishpa caparishpa, jichushca pambapi villachij runallami cani— nijurcami. 24 Fariseocunami paicunataca cachashca carca. 25 Paicunami Juandaca, cashna nishpa tapunajurca: —Quiquinga, Quishpichij Cristopash, Eliaspash, Dios ima nishcata villachijpash na cashpaca, ¿imashpata cashna bautizajungui?— nishpami tapunajurca. 26 Shina nijpimi Juanga, cashna nishpa tigrachirca: —Ñucami yacupilla bautizajuni. Ashtahuangarin quiquinguna purapimi, quiquingunapash na rijsishca shuj runagu tian. 27 Paimi, ñucapaj jipa shamushpapash, ñaupamandapacha ña tiashca. Shinamandami, paipaj chaquipi churajushpa huatarishcata pascangapajllapash nali cani— nijurcami. 28 Jordán shuti yacu chimbapillami, Betábara shuti uchilla pueblogupi, chashna tapunajurca. Chaipimi Juanga bautizajurca.
Taita Diospaj Llamagumandami villachijun
29 Chai cayandi punllami Juanga, Jesús paipajman shamujujta ricushpa cashna nijurca: —Ricuichi, Taita Diospaj Llamaguca chaipimi capan. Paimi, cai pachapi causajcunapaj juchata anchuchin. 30 Paimanda villachijushpami, cashna nijurcani: ‘Ñucapaj jipaca, shujmi shamunga. Paica, ñucapaj pundami carca. Paica, ñucapaj pundallatami causajurca’ nijurcanimi. 31 Paitaca, ñucapash na rijsircanichu. Ashtahuangarin israelcuna rijsinajuchunmi, yacupi bautizangapaj shamurcani— nircami. 32 Shinallata Juanga, pai ricushcatami cashna nishpa villachijurca: —Jahua pachamanda Diospaj Espiritumi, palomagushna urai shamushpa, paipaj umapi tiarishpa quedajta ricurcani. 33 Ñucapash paitaca na rijsircanichu. Ashtahuangarin yacupi bautizachun ñucata cachamuj Diosmi, cashna nihuarca: ‘Ñucapaj Espíritu urai shamushpami, umapi tiarishpa quedanga. Chaita ricushpami, jucha illaj Espirituhuan pai bautizanata yachangui’ nihuarcami. 34 Chaitaca ricurcanimi. Chaimandami: ‘Caimi, Taita Diospaj Churi capan’ nishpa, quiquingunaman villachijuni— nircami.
Jesuspaj callari yachajujcunamandami villachijun
35 Chai cayandi punllami Juanga, paipaj yachajuj puramanda ishcaihuan chaipillata cutin shayajurca. 36 Jesús chaita yalijujta ricushpami Juanga: —Ricuichi, caimi Taita Dios cachamushca Llamagu capan— nijurca. 37 Shina nijujta uyashpami, chai ishcai yachajujcunaca, Jesusta catishpa rinajurca. 38 Paicuna catishpa rinajujpi, Jesús tigrarishpa ricushpami: —¿Imatata mascanguichi?— nirca. Shina nijpimi paicunaca: —Rabí, ¿maipita causajungui?— ninajurca. (Rabí nishpaca, Yachachij nijunmi). 39 Shina tapujpimi, Jesusca: —Jacuchi, rijsinguichi— nirca. Shina nijpi rishpami, pai maipi causajujtaca rijsinajurca. Ña chishajujpimi, paicunaca chai punllapica, Jesushuan chaipi quedanajurca. 40 Chai ishcandimi, Juan chashna villachijujta uyashpaca, Jesusta catishpa rinajurca. Chai ishcai puramanda shujca, Simón Pedropaj huauqui Andresmi carca. 41 Andresca, paipaj huauqui Simonda punda tuparishpaca: —Mesiashuanga ñami tuparircanchi— nircami. (Mesías nishpaca, Quishpichij Cristo nijunmi). 42 Andresca, paipaj huauquita tuparishpaca, Jesuspajmanmi pushamurca. Jesús paita ricushpami, cashna nirca: —Quiquinga, Jonaspaj churi Simonmi cangui. Cunanmandaca, Cefas shutimi cangui— nircami. (Cefas nishpaca, Pedro nijunmi).
Felipe shuti, Natanael shuti runacunatami Jesusca cayachishca
43 Chai cayandi punllami Jesusca, Galilea llactaman ringapaj munarca. Felipeta tuparishpaca: —Ñucata catihuai— nircami. 44 Felipeca, Betsaida shuti pueblomandami carca. Andrespash, Pedropash chai pueblomandallatami carca. 45 Natanael runata Felipe tuparishpaca, cashnami nirca: —Mandashca shimita Moisés escribishcapipash, shinallata Dios ima nishcata villachijcuna escribishcapipash villachij runatami tuparishcanchi. Paimi, Nazaret pueblomanda Josepaj churi Jesús capan— nircami. 46 Shina nijpimi Natanael runaca, cashna nirca: —Nazaret pueblomandaca, ¿ima alipash llujshingachu?— nijpimi, Felipeca: —Shamui, ricungui— nirca. 47 Jesusca, Natanael runa paipajman shamujujta ricushpami: —Ricuichi cai runaguca, Israel runapacha cashpami, umachinataca na yachan— nijurca. 48 Shina nijujpimi, Natanael runaca: —Ñucataca maipita rijsihuarcangui?— nirca. Shina nijpimi Jesusca, cashna nishpa tigrachirca: —Felipepash quiquinda nara jacu nijpillatami, jigos yura ucupi tiajujta quiquindaca ricujurcani— nircami. 49 Shina nijpimi Natanael runaca, cashna nishpa tigrachirca: —Rabí, quiquinga Taita Diospaj Churimi capangui. Quiquinga israelcunata Jatun Mandajmi capangui— nijurcami. 50 Shina nijujpimi Jesusca, cashna nijurca: —Quiquindaca: ‘Jigos yura ucupi tiajujtami ricurcani’ ¿nijpillachu crihuangui? Na caitalla ricunguichu, ashtahuan caitapash yali imata ruraitapash ricunguirami. 51 Napacha llullashpami, quiquingunataca cashna nini: Cunanmandapachami, jahua pacha pascarishcata ricunguichi. Shinallata Runa Aichayu tucushca ñucapajman, Taita Dios cachamujpi angelcuna jahuaman rinajujta, uraiman shamunajujtami ricunguichi— nijurcami.
Caná shuti pueblopi cazarai boda tiashcatami villachijun
1 Quimsa punlla jipami, Galilea llactapi tiaj Caná shuti pueblopica, cazarai boda tiarca. Jesuspaj mamapashmi chaipi carca. 2 Chai bodaman shamupaichi nijpimi Jesusca, paipaj yachajujcunandi rirca. 3 Chaipi vino tucurijpimi, Jesuspaj mamaca: —Vinoca tucurishcami— nirca. 4 Shina nijpimi Jesusca, cashna nijurca: —¿Mama, imashpata chaitara nihuangui? Ñuca imaguta rurana horaspash nara chayamunllu— nijurcami. 5 Shina nijujpimi paipaj mamaca, chaipi servijcunataca: —Imaguta pai mandashcata ruranguichilla— nirca. 6 Chai boda huasipica, rumita rurashca sucta jatun funducunami yacuta churangapaj tiarca. Judiocuna imashna ruranata yachanshnallata, Diospaj ñaupajpi mapa illaj tucungapajmi, chai funducunapi yacuta charin carca. Uchilla funducunamanda yacuta talijpica, huaquinga ishcaita, huaquinga quimsata apaj funducunami carca. Jesusca chai servijcunataca: 7 —Cai funducunapi yacuta jundachipaichi— nijpimi, fundu shimicaman jundachinajurca. 8 Chaipimi Jesusca, cashna nijurca: —Cunanga, cai funducunamanda ashata vishishpa, jatun serviciopajman apaichi— nijurcami. Shina nijujpimi, vishishpa apanajurca. 9 Yacuta vinoman tigrachishcataca, maimanda apamushcatapash na yachashpatami, jatun serviciora malirca. Yacuta vishimushca servijcunallami chaitaca yacharca. Chai servicioca noviota cayachishpami, 10 cashna nijurca: —Tucuicunami callaripica, ali vinotara ufiachun caran. Ña tucuilla ufiashca jipami, chagrushca vinotaca caran. Ashtahuangarin quiquinga, ¿ali vinotarachu cunangaman alichishpa charijurcangui?— nijurcami. 11 Galilea llactapi tiaj Caná shuti pueblopimi, Jesusca cashna juyaillata rurashpa ricuchishpa callarirca. Chaipimi, pai punchapamba cajtaca ricuchirca. Chaita ricushpami paipaj yachajujcunaca, Jesusta crinajurca. 12 Chai jipami Jesusca, paipaj mamandi, paipaj huauquicunandi, paipaj yachajujcunandi, Capernaum puebloman urai rirca. Paicunaca, huaquin punllatallami chaipi carca.
Jesusca, Diospaj huasitaca mapa illajtami saquishca
13 Judiocuna pascua fiestata rurana punllacuna ña pactajujpimi Jesusca, Jerusalenman vichai rirca. 14 Chaipi cashpami, Diospaj huasi ucupica huagracunata, llamacunata, palomacunata jatunajujta Jesusca ricurca. Shinallata culquicunata cambiashpa tianajujtapashmi ricurca. 15 Jesusca, huascata azialta rurashpami llamacunata, huagracunata, Diospaj huasi ucumanda tucuillata canllaman calpachirca. Shinallata cambiaj runacunapaj culquicunatapash, mezacunatapash shitashpami saquirca. 16 Palomacunata jatujcunatapash Jesusca, cashnami nijurca: —Caicunataca llujchishpa apaichi. Ñuca Taitapaj huasitaca, jatushpa tiana huasitaca na ruranachu canguichi— nijurcami. 17 Shinata ricushpami, paipaj yachajujcuna: “Quiquimbaj huasiguta juyashpami huañujuni” nishpa, escribishca tiajujta yarinajurca. 18 Shinamandami judiocunaca, cashna nishpa tapunajurca: —Chashnata rurashpaca, ¿imatata ñucanchiman juyaillaguta rurashpa ricuchinguiyari?— ninajurcami. 19 Shina ninajujpimi Jesusca, cashna nishpa tigrachirca: —Diospaj cai huasitaca, urmachishpa saquichilla. Ñucami, quimsa punllapica cutin shayachisha— nijurcami. 20 Shina nijujpimi, judiocunaca cashna ninajurca: —Chuscu chunga sucta huatacamanmi, Diospaj cai huasitaca shayachinajurca. ¿Quiquinga, quimsa punllapillami cutin shayachisha ninguichu?— ninajurca. 21 Ashtahuangarin Jesusca, paipaj cuerpotami, Diospaj huasitashna yarishpa chashna nijurca. 22 Huañushcacunapaj chaupimanda Jesús causarijpimi, paipaj yachajujcunaca chashna nishcataca yarinajurca. Chaimandami, Dios escribichishca Shimipi imata nijujtapash, Jesús imata nishcatapash crinajurca.
Gentecunapaj yuyaitaca, Jesusmi yachan
23 Pascua fiesta punllacunapimi Jesusca, Jerusalenbi purijurca. Chaipica, pai imatapash juyaillata rurajujta ricushpami, ashtaca gentecuna paita crinajurca. 24 Ashtahuangarin tucuilla gentecuna imashna cajta yachashpami Jesusca, paicunataca cringapaca na munarca. 25 Runacuna imashna causanajujta maijan villajuchumbash, Jesusca na munarcachu. Runacunapaj shungupi imata yarinajujtapash, paillata ña yacharcami.
Nicodemo shuti runahuan, Jesushuanmi parlashca
1 Fariseo puramanda Nicodemo shuti shuj runami tiarca. Paica, judiocunata mandaj puramandami carca. 2 Chai runami, Jesuspajman tuta shamushpa, cashna nijurca: —Rabí, quiquin yachachijuchunga Taita Dios cachamushcatami yachanchi. Taita Dios quiquinhuan cajpillami, cashna imagutapash juyaillata rurashpa ricuchijungui. Shina ruranataca, pipash na ushanllu— nijurcami. 3 Shina nijpimi Jesusca, cashna nishpa tigrachirca: —Napacha llullashpami, quiquindaca cashna nijuni: Pipash cutin na huacharishpaca, Taita Dios mandajujtaca napacha ricuita ushangachu— nircami. 4 Shina nijpimi Nicodemoca, cashna nirca: —Shuj rucu runaca, ¿imashnata cutin huacharita ushanga? ¿Cutin huacharingapaca, mamapaj vijsamanllu cutin yaicuita ushanga?— nircami. 5 Shina nijpimi Jesusca, cashna nishpa tigrachirca: —Napacha llullashpami, quiquindaca cashna nijuni: Maijambash yacumanda, Diospaj Espiritumanda na cutin huacharishpaca, Taita Dios mandajujman napacha yaicuita ushangachu. 6 Aichamanda huacharishpaca, aichallatami can. Ashtahuangarin Diospaj Espiritumanda huacharishpaca, Diospaj Espiritutami charin. 7 “Cutin huacharinapachami canguichi” nishcamandaca, na manllarinachu cangui. 8 Huaira shamushpaca, maita munashcata huairamunllami. Maimanda shamujujta, maiman yalijujtapash na yachanguichu. Huairataca, huacashpa yalijujtallami uyangui. Diospaj Espiritumanda tucuilla huacharijcunapash, shinallatami— nijurcami. 9 Shina nijpimi, Nicodemoca: —¿Imashnata chashnaca tucungayari?— nishpa tigrachirca. 10 Shina nijpimi Jesusca, cashna nishpa tigrachirca: —Quiquinga, Israel llactapi jatun yachachij cashpapash, ¿caitaca nachu yachangui? 11 Napacha llullashpami, quiquindaca cashna nijuni: Imatapash yachashcatami, ñucanchica villachinajunchi. Imatapash ricushcatami, chashnapachami nishpa villachinajunchi. Ashtahuangarin ñucanchi villachishcataca, na uyangapaj munashpami causanguichi. 12 Cai pachapi imapash tiajmandami quiquingunaman villachijurcani. Chaitapash na cringapaj munashpaca, jahua pachapi imalla tiajcunamanda villachijpicarin, ¿imashnata cringuichiyari? 13 Pipash na jahua pachaman rishcachu. Ashtahuangarin Runa Aichayu tucushca ñucallami, jahua pachamanda shamurcani. Shina cashpami, jahua pachapi causajuni. 14 Moisesca, jirru culebrata rurashpami, jichushca pambapi caspipi huarcurca. Shinallatami, Runa Aichayu tucushca ñucapash, caspipi huarcui tucunapacha cani. 15 Shina huarcui tucujpimi, pipash ñucata crishpaca, na chingaita chingagringa. Ashtahuangarin causaitami causagringa.
Taita Diosmi, cai pachapi causajcunataca ninanda juyajun
16 Taita Diosca, cai pachapi causajcunata ninanda juyashpami, paipaj shujlla Churiguta caramurca. Pipash paita crishpaca, na chingaita chingagringachu, ashtahuangarin causaitami causagringa. 17 Taita Diosca, cai pachapi causajcunata ninan llaquiman cachangapaca, na paipaj Churita cachamurcachu. Ashtahuangarin cai pachapi causajcunaca, paimandalla quishpirichunmi cachamurca. 18 Paipaj Churita crijtaca, na llaquichi tucunapachami nishcachu canga. Ashtahuangarin na crijtaca, Taita Diospaj shujlla Churita na crishcamandami, llaquichi tucunapachami nishcami canga. 19 Michami, cai pachaman shamurca. Gentecunaca, paicunapaj ruraicuna nali cajpimi, michata juyangapaj randica, yana yana tutapishna causanatara ashtahuan juyarca. Chashna causajuimandaca, llaquichi tucunapachami nishcami canga. 20 Nalitalla rurashpa tucuilla causajcunaca, michataca na ricunayachishpami causanajun. Paicuna nalita ruranajujpi ama jarcashpa rimanajuchunmi, michaman na quimirinajun. 21 Ashtahuangarin na llullashpa villachijuj Shimita catishpa causajcunaca, michaman quimirinajunmi. Taita Dios munashcata rurashpa causanajushca ricurichunmi, chashna quimirinajun— nijurcami.
Bautizaj Juanmi, Jesusmanda cutin villachishca
22 Shina nishca jipami Jesusca, paipaj yachajujcunandi, Judea llactaman shamurca. Chai llactapi paicunandi cashpami bautizajurca. 23 Juanga, ashtaca yacu tiajpimi, Salim shuti pueblo ladolla Enón shuti llactapipash bautizajurca. Gentecuna paipajman chayamujpimi, paica bautizajurca. 24 Juanga, nara prezu japi tucushpami, chashna bautizajurca. 25 Shuj punllami, Juanbaj yachajujcunahuan, judiocunahuan, Diospaj ñaupajpi mapa illaj ricurinamanda ninanda rimarinajurca. 26 Chashna rimarinajushpami, Juanbajman shamushpa cashna ninajurca: —Rabí ricui, Jordán yacu chimba ladopi quiquinhuan tiajushca chai runamandami, quiquinga villachijurcangui. Paica bautizajunmi, paipajmanmi tucuicuna shamunajun— ninajurcami. 27 Shina nijpimi Juanga, cashna nishpa tigrachirca: —Taita Dios ushaita carajpillami, maijambash imagutapash ruraita ushan. 28 Quiquingunallatami, ñuca cashna imata nijushcatapash yachanguichi: ‘Na Quishpichij Cristo canichu. Ashtahuangarin Taita Dios ñucata ñaupashpa villajuchun, cachamushcallami cani’ nijurcanimi. 29 Cazarajuj huarmica, cusapajmi capan. Ashtahuangarin cusapaj juyashca cumbaca, paipaj ladopi cashpami, chai cusa rimashca shimita uyashpa ninanda cushijun. Ñucapash, chai cusapaj cumbashna cashpami ninandapacha cushijuni. 30 Quishpichijca, ashtahuan ashtahuan jatunyachi tucunatami charin. Ashtahuangarin ñucami, ashtahuan yangapi churai tucuna cani.
Diospaj Churica, jahua pachamandami shamushca
31 Jahua pachamanda shamujujca, tucuicunata mandajmi. Cai pachamanda runaca, alpapi imapash tiajmandallami parlan. Ashtahuangarin jahua pachamanda shamujujca, tucuicunatami mandajun. 32 Paica, pai ricushcata, pai uyashcatami, chashnapachami nishpa villachijun. Ashtahuangarin pai villachishcataca, pipash na chasquingapaj munanllu. 33 Imashna causanata pai yachachijpi pipash chasquishpaca, Taita Dios na llullashpa villachijujtami ricuchijun. 34 Taita Dios cachamujpi shamushcami, Diospaj Shimigutalla villachijun. Taita Diosca paipaj Espiritutaca, na mitsashpami caramujun. 35 Taita Diosca, paipaj Churita ninanda juyashpami, tucui imatapash mandajuchun, paipaj maquipi churarca. 36 Diospaj Churita maijambash crij cashpaca, causaita causagrinatami charin. Ashtahuangarin Diospaj Churita na cazungapaj munashpaca, causaita causagrinataca napacha charingachu. Ashtahuangarin ninanda fiñashpa Taita Dios llaquichinaca, paipaj jahuapimi shuyajun— nijurcami.
Samaria shuti llactamanda huarmihuanmi, Jesusca parlashca
1 “Jesusca, Juandapash yalimi ashtacacuna paipaj yachajujcuna tucuchun bautizajun” nishpa parlanajujtami, fariseocunaca uyashca carca. Chaitami, Apunchi Jesusca yacharca. 2 (Jesusca, na bautizajurcachu. Ashtahuangarin paipaj yachajujcunallami bautizanajurca). 3 Shinamandami Jesusca, Judea llactamanda llujshishpa, Galilea llactaman cutin tigrarca. 4 Chaiman tigrangapaca, Samaria shuti llactatami Jesusca, yalinapacha carca. 5 Samaria llactapi tiaj Sicar shuti pueblomanmi chayamurca. Chai pueblo ladomanga, ñaupa taita Jacobo, paipaj churi Joseman carashca alpami tiarca. 6 Chaipimi, yacuta llujchingapaj allashca jatun utuju tiarca. Chaica, Jacobopajmi carca. Jesusca, ninanda purijushpa shaijushca cashpami, yacuta llujchingapaj allashca jatun utuju patapi tiarirca. Ña chaupi punllashnami carca. 7 Chaipi tiajujpimi, Samaria llactamanda shuj huarmica, yacuta llujchingapaj shamurca. Chai huarmitami, Jesusca: —Asha yacuguta ufiangapaj carahuai— nirca. 8 Paipaj yachajujcunaca, pueblopi micunata randingapajmi rishca carca. 9 Yacuguta carahuai nijpimi, Samaria llacta huarmica cashna nirca: —Samaria llacta huarmimi capani. Quiquinga, judío runamari cangui. ¿Imashpata ñucataca, yacuta mañahuangui?— nircami. Judiocunaca, Samaria llactapi causajcunahuanga na tandanajuj cashpami, chashna nirca. 10 Shinamandami Jesusca, cashna nishpa tigrachirca: —Taita Dios quiquinman imaguta carasha nijujtapash, na yachanguichu. ‘Yacuguta carahuai’ nishpa maijan mañajujtapash, na rijsinguichu. Ñucata rijsishpaca, quiquinmi yacuguta mañahuanguiman. Quiquin mañajpica, causaita caraj yacugutami caraiman— nircami. 11 Shina nijpimi chai huarmica, cashna nijurca: —Taitalla, quiquinga imahuan yacuta vishingapajpash na charipanguica. Yacuta llujchingapaj allashca cai jatun utujupica, yacupash ucu ucupimari capan. Causaita caraj yacuta carangapaca, ¿maipita charipangui? 12 ¿Quiquinga, ñucanchipaj ñaupa taita Jacobopajpash, ashtahuan yalichu cangui? Paimi, yacuta llujchina cai jatun utujuta allashca. Cai utujumandami paipash, paipaj churicunapash, paipaj animalcunamambash yacuta ufian cashca— nijurcami. 13 Shina nijpimi Jesusca, cashna nishpa tigrachirca: —Maijambash cai yacuta ufiashpaca, cutin yacunayachingami. 14 Ashtahuangarin ñuca carasha nijuni chai yacuguta maijambash ufiashpaca, cutinga na yacunayachingachu. Ñuca carashca yacuguca, paipaj shungupica causaita carangapaj llujshijuj pugyu yacugushnami canga— nijurcami. 15 Shina nijpimi chai huarmica, Jesusta cashna nirca: —Shina cashpaca Taitalla, chai yacuguta carahuailla. Chaita ufiashpaca, cutinga na yacunayachishachu. Shinallata cutinga, na caiman yacuta llujchingapaj shamupashachu— nircami. 16 Shina nijpimi Jesusca: —Quiquimbaj cusatara pushashpa tigramugri— nijurca. 17 Shina nijujpimi, chai huarmica: —Cusataca na charinichu— nishpa tigrachirca. Shina nijpimi Jesusca, cashna nijurca: —Quiquinga: ‘Cusataca na charinichu’ nishpaca, na llullashpami nijungui. 18 Quiquinga, ñami picha cusata charishcangui. Cunan quiquinhuan causajuj runapash, na quiquimbaj cusachu. Chaitaca, na llullashpami nishcangui— nijurcami. 19 Shina nijujpimi chai huarmica, cashna nijurca: —Taitalla, quiquinga Dios ima nishcata villachijmi cangui yarin. 20 Ñucanchipaj ñaupa taitacunaca cai urcupimi, Diostaca ninanda alicachin cashca. Ashtahuangarin quiquingunaca: ‘Jerusalenbillami Diostaca punchapambagumi cangui nina’ ninguichimi— nijurcami. 21 Shina nijpimi Jesusca, cashna nijurca: —Quiquinga, ñuca villachishcata cripangui. Na cai urcupilla, na Jerusalenbilla Taita Diostaca punchapambagumi cangui nina punllacunami chayamugrin. 22 Quiquingunaca, na rijsishca Diosta mañajcunami canguichi. Ashtahuangarin ñucanchica, paita rijsishpapachami mañanajunchi. Quishpichirinaca, judío puramandami shamun. 23 Ashtahuangarin na nij tucushpalla, tucui shunguhuambacha Taita Diosta ninanda alicachijcunaca, Diospaj Espíritu yuyaita cujujpi, ninanda alicachina punllacunami chayamuna carca. Chai punllami, cunanga ña chayamushca. Chashna ninanda alicachijcunatami, Taita Diosca paita ninanda alicachinajuchun mascan. 24 Taita Diosca, Espiritumi capan. Chashna cajpimi, Diospaj Espíritu yuyaita cujujpi ninanda alicachijcunaca, na nij tucushpalla ninanda alicachinata charin— nijurcami. 25 Shina nijpimi chai huarmica, cashna nirca: —Mesías nishca Quishpichij Cristo shamunataca yachapanimi. Pai shamushpami, imatapash ñucanchiman tucuita villachinga— nircami. 26 Shina nijpimi Jesusca, cashna nirca: —Chaica ñucami cani. Paihuanmi quiquinga parlajungui— nircami. 27 Shina parlanajujpimi, paipaj yachajujcunaca chayamurca. Chai huarmihuan Jesús parlajujta ricushpaca, ninandami manllarinajurca. Shina ricushpapash, chai huarmitaca: “¿Imatata tapujungui?” na cashpaca: “¿Imatata chai huarmihuan parlajungui?” nishpaca, maijambash na tapuita usharcachu. 28 Chai huarmica, fundutapash chaipillata saquishpami, puebloman tigrarca. Chaipica, gentecunaman cashna nishpami villachijurca: 29 —Jacuchi, shuj runaguta ricunguichi. Paica, ñuca tucui imata rurashpa causashcataca, tucuillatami yachashpa villahuarca. ¿Nacha paica, Quishpichij Cristo imashi?— nijurcami. 30 Shina nijpimi, chai pueblomandaca llujshinajushpa, Jesuspajman shamunajurca. 31 Chaicamanmi, Jesuspaj yachajujcunaca: —Rabí, micupayari— ninajurca. 32 Shina nijpimi, Jesusca: —Ñuca micungapaca, quiquinguna na rijsishca micunagutami charini— nirca. 33 Shina nijpimi, paipaj yachajujcunaca caishuj chaishuj: —Pai micuchun, ¿pipash micunaguta apamurcachu imashi?— ninajurca. 34 Shina ninajujpimi Jesusca, paicunata cashna nijurca: —Ñucata cachamuj Taita munashcatami, rurashpa tucuchina cani. Chaimi, ñucapaj micunagu capan. 35 ¿Nachu quiquingunaca: ‘Cozechana punlla chayamungapaca, chuscu quilla tianrami’ nishpa parlanguichi? Ashtahuangarin ñucami, quiquingunata cashna nini: Chagra pambacunata vichai ricuichi. Ña fucushca, cozechanallami. 36 Cozechaj runaca, racionda japinmi. Chai fucushca granoca, jahua pachapi causaitami causagringa. Shina cajpimi tarpuj runahuan, cozechaj runahuanga, ishcandillata cushijunajunga. 37 ‘Shujmi tarpun, shujmi cozechan’ nishpaca, na llullashpami shina parlanajun. 38 Quiquinguna na tarpushcatami, cozechachun cacharcani. Shujcunami tarpurca. Ashtahuangarin quiquingunarami, shujcuna tarpushcaman yaicushpa tandachinguichi— nijurcami. 39 Samaria llactapi causanajuj ashtaca gentecunami, chai huarmi villachijujpi crinajurca. Chai huarmica: ‘Ñuca imata rurashpa causajushcatapash, tucuitami villachihuarca’ nishpami villachijurca. 40 Shina crishpami, Samaria llactapi causajcunaca, Jesuspajman shamushpa: —Ashaguta shuyapai— ninajujpi Jesusca, ishcai punllata paicunahuan chaipi quedarca. 41 Chaipi cashpa Jesús villachijujta uyashpami, ashtahuan shujcunapash crinajurca. 42 Paicunaca, chai huarmitaca cashnami ninajurca: —Cunanga, pai villachijujtapacha uyashpami, na quiquin villachijpilla crinajunchi. Paica, cai pachapi causajcunata Quishpichij Cristopacha cajtami yachanchi— ninajurcami.
Mandaj runapaj churitami, Jesusca alichishca
43 Jesusca, ishcai punllata Samaria llactapi cashpami, Galilea llactaman llujshishpa rirca. 44 “Dios ima nishcata villachijtaca, chai llactamandallata cajpipash, alicachishpa chasquinataca na yachanllu” nishpami, Jesusllata ña villachishca carca. 45 Ashtahuangarin Galilea llactaman chayajpica, chai llactapi causajcunaca, cushijushpami Jesustaca chasquirca. Pascua fiesta punllacunapi, Jerusalenbi Jesús imatalla rurajujtami ricushca carca. Paicunapash, chai fiestaman rishca cashpami, chaitaca ricushca carca. 46 Jesusca, Galilea llactapi tiajuj Caná shuti pueblomanmi, cutin tigramurca. Chaipimi, yacuta vinoman tigrachishca carca. Capernaum shuti pueblopimi, jatun mandaj churashca mandaj runapaj churiguca, huañunalla sirijurca. 47 Judea llactamanda, Galilea llactaman Jesús tigramushcata uyashpami, chai mandaj runaguca, ñapash Jesuspajman shamurca. Shina shamushpaca: —Ñuca churigumi huañunalla sirijupan. Paita alichipangui, urai ripashun— nircami. 48 Shina nijpimi Jesusca, chai runagutaca cashna nirca: —Imatapash rurashpa na ricuchijpi, jatun manllarinacunata rurashpa na ricuchijpica, quiquingunaca ñucataca na cringuichimanllu— nircami. 49 Shina nijpimi jatun mandaj churashca mandaj runaca, cashna nirca: —Ñuca churigu nara huañujpillata uchalla urai ripashunyari, Apunchi Jesús— nircami. 50 Shina nijpimi Jesusca, cashna nirca: —Rilla, quiquimbaj churiguca ñamari ali tucushca— nijpimi chai runaca, Jesús nishcata crishpa tigrarca. 51 Pai ña urai rijujpi, paita servijcuna tuparishpami: —Quiquimbaj churiguca, ñami ali tucushca— nishpa villachinajurca. 52 Shina villachijpica: —¿Ima horasmandata ña samachi callariparca?— nishpami tapurca. Shina tapujpimi: —Caina chaupi punlla yalishcallapimi, tabardillo nanaitaca yalichirca— ninajurcami. 53 Shina nijpimi: “Quiquimbaj churiguca, ñami ali tucushca” nishpa, chai horasllata Jesús nishcata taitaca yarirca. Shinamandami paipash, paipaj huasipi tucuilla causajcunandi, Jesusta crirca. 54 Judea llactamanda, Galilea llactaman Jesús tigramushpami, caihuanga ña ishcaicaman juyaillata rurashpa ricuchijurca.
Suchu runatami, Jesusca alichishca
1 Chai jipami Jerusalenbica, judiocuna fiestata ruranajurca. Jesuspash, chaimanmi vichai rirca. 2 Jerusalenbica, llamacunahuan yaicuna pungu patapimi, cuchayashca yacu tian. Chai cuchaca, hebreo rimaipica, Betesda shutimi. Chai cucha manñamanga, picha corredorcunami tian. 3 Chai corredorpica ashtaca huañunajuj, ñausa, janga, suchu gentecunami sirinajurca. Paicunaca, chai yacuta cuyuchinatami shuyanajurca. 4 Jahua pachamanda shuj ángel urai shamushpami, chai yacutaca huaquimbi huaquimbilla cuyuchin carca. Chai yacu cuyurijhuan, punda huashajujllami, ima nanaita charishpapash, ali tucun carca. 5 Chai corredorpica, ña quimsa chunga pusaj huatata huañujuj runami sirijurca. 6 Shina sirijujta Jesús ricushpaca, ña unai huatata huañujujta yachashpami: —¿Nachu ali tucungapaj munanguiman?— nishpa tapurca. 7 Shina tapujpimi, chai huañujuj runaguca, cashna nishpa tigrachirca: —Yacu cuyurijhuan, yacupi ñucata huashajuchijtaca, pitapash na charipanichu, Taitalla. Ñuca rijujpillatami, shujra mishashpa huashajun— nircami. 8 Shina nijpimi, Jesusca: —Jatari, can mandashpa sirijushcata aparishpa rilla— nirca. 9 Shina nijhuan ali tucushpami, chai runaca pai mandashpa sirijushcata aparishpa, ri callarirca. Chai punllapica, samana punllami carca. 10 Judiocuna chaita ricushpami, cashna ninajurca: —Cunanga, samana punllamari. Mandashpa sirijushcata cashna aparishpa rijushpaca, nalitamari rurajungui— ninajurcami. 11 Shina nijpimi, cashna nishpa tigrachirca: —Ñucata alichijmi: ‘Quiquin mandashpa sirijushcata aparishpa rilla’ nihuarca— nircami. 12 Shina nijpimi: —¿Pita candaca: ‘Mandashpa sirijushcata aparishpa rilla’ nirca?— nishpa, chai runataca tapunajurca. 13 Ashtahuangarin chai runaca, maijan paita alichishcatapash na rijsircachu. Chaipi tianajuj gentecunamanda Jesús ña anchurishca cajpimi, na rijsi usharca. 14 Chai jipami Jesusca, pai alichishca runataca, Diospaj huasi ucupi tuparirca. Shina tuparishpami, cashna nijurca: —Ricui, cunanga ña ali tucushcami cangui. Ama ashtahuan juchata rurashpa causanguichu. Juchata rurashpaca, ashtahuanmi llaquichi tucungui— nijurcami. 15 Shina nijujpimi chai runaca, judiocunapajman rishpaca: —Jesusmi, ñucataca alichihuashca— nishpa villachijurca. 16 Shina alicachishcamandami judiocunaca, Jesusta ninanda fiñashpa huañuchingapaj mascai callarirca. Jesusca, samana punllapimi chai runataca alichirca. 17 Shinamandami Jesusca, cashna nishpa tigrachirca: —Ñucapaj Taitaca, cunangaman imagutapash rurajunllami. Chaimandami, ñucapash rurajunilla— nircami. 18 Shina nijpimi judiocunaca, Jesusta huañuchishumbacha nishpa, ashtahuan yarinajurca. Samana punllatami faquinshna, yangapi churashpallapash na fiñachijurcachu. Ashtahuangarin Taita Dioshuan chimbapura tucushpami, Taita Diostaca ñucapaj Taitapachami nijurca.
Diospaj Churica, ninan ushaitami charin
19 Jesusca, paicunataca cashnami nijurca: “Napacha llullashpami, quiquingunataca cashna nini: Diospaj Churi cashpapash, ñucapaj munaica imatapash na rurai ushanichu. Ashtahuangarin ñucapaj Taita imaguta rurajujtapash ricushpami, paipaj Churi cashpa paishnallata imagutapash rurajuni. 20 Ñucapaj Taitaca, paipaj Churi cajpimi, ñucataca ninanda juyahuan. Shinallata imata rurajushpapash, paica tucuitami ñucaman ricuchijun. Cunan ñuca imata rurajujtapash yali ashtahuan rurai ushachunmi ricuchihuanga. Chaita ricushpami, ninanda manllaringuichi. 21 Imashnami ñucapaj Taitaca, huañushcacunata causachishpa causaita caran, chashnallatami ñucapash paipaj Churi caimanda, maijan munajman causaita carani. 22 Ñucapaj Taitaca, pitapash na llaquichinllu. Ashtahuangarin ñucamanmi, chai llaquichinataca paipaj Churi cajpi carahuarca. 23 Imashnami ñucapaj Taitata tucuicuna ninanda alicachin, chashnallata paipaj Churitapash ninanda alicachinajuchunmi, chai ushaitaca carahuarca. Paipaj Churi ñucata na alicachishpaca, ñucata cachamuj Taitatapash na alicachijunllu. 24 Napacha llullashpami, quiquingunataca cashna nini: Ñuca imata villachijujtapash uyashpa, ñucata cachamuj Taitatapash crishpallami, causaita causagrinataca charin. Paica, huañushcamanda causaita causagrinaman ña yalishcami. Shina cashpami, napacha llaquichi tucunga. 25 Napacha llullashpami, quiquingunataca cashna nini: Taita Diospaj Churi imata villachijujta huañushcacuna uyashpa cazuna punllacunaca, cunanmi ña chayamushca. Pipash paita uyajcunaca, causaitami causagringa. 26 Ñucapaj Taitallami, causaita carangapaca ushaita charin. Paipaj Churi cajpimi, causaita carachun ñucamambash ushaita carahuarca. 27 Llaquichi ushachumbash, Runa Aichayu tucushca cajpimi, ñucaman ushaita carahuarca. 28 Ñuca cashna nijujtaca, na manllarinachu canguichi. Huañushpa pambai tucushcacunaca, tucuillami ñuca rimajujta uyanajunga. Chai punllacunaca, ñami chayamujun. 29 Chai punllapica, imatapash aliguta rurashpa causajcunallami causaita causanajunga. Ashtahuangarin imatapash nalitalla rurashpa causashcacunaca, ninanda llaquichi tucungapajmi causaringa.
Chashnapachami nishpa, Jesusmanda villachishcami
30 Ñucapaj munaica, imata ruraitapash na ushanichu. Ñucapaj Taita mandajpi uyashpallami, llaquiman cachajuni. Na ñucapaj munailla chashna rurashpami, imatapash cashcatapacha rurashpa llaquiman cachajuni. Ashtahuangarin ñucata cachamuj Taita munashcatami rurajuni. 31 Ñucapaj munai ñucamanda villachishpa cashna imatapash nijushpaca, llullashpami nijuiman. 32 Ashtahuangarin shujmi, ñucata alicachishpaca villachijun. Pai ñucamanda villachijuj shimicunaca, napacha llulla cajtami yachani. 33 Quiquingunaca Juanda tapuchunmi, runacunata cacharcanguichi. Paica, ñucamandaca na llullashpami villachijurca. 34 Maijan runa ñucamanda villachijuchumbash, na munanichu. Ashtahuangarin cashnataca, quiquinguna quishpirichunmi villachijuni. 35 Micha sindishca punchayachinshnami, Juanga villachijurca. Pai punchayachijunshna villachijujtaca, ashacamanllami cushijushpa uyarcanguichi. 36 Ñucapaj Taita mingashcatami, imata rurashpapash pactachijuni. Imata rurashpapash, ñucapaj Taita ñucata cachamushcatami ricuchijuni. Juan imata nijushcatapash, ñucami yali ashtahuan villachijuni. 37 Shinallata ñucata cachamuj Taitapash, ñucamandami villachijurca. Pai imata rimajujtapash, ima horasllapash na uyashpa, pai imashna cajtapash na ricushpami causanajushcanguichi. 38 Paipaj shimicunatapash, quiquingunapaj shungupi na charishpami causanajunguichi. Shina cashpami, Dios ñucata cachamushcatapash na cringuichi. 39 Causaita causagrinata japishumbacha yashpami, Dios escribichishca Shimicunataca, aligutapacha ricuna canguichi. Ashtahuangarin chai Shimicunapica, ñucamandami villachijun. 40 Shina villachijujpipash causaita causagrinata charingapaj ñucapajman shamungapaca, na munashpami causanguichi. 41 Gentecuna ñucata punchapambagumi cangui ninajuchunga, na munanichu. 42 Quiquingunataca ñucallata rijsinimi. Taita Diosta quiquinguna na juyajtapash yachanimi. 43 Ñucaca, ñucapaj Taitapaj shutipimi shamurcani. Shina cajpipash, ñucataca na chasquishpami causanajunguichi. Maijan cashpapash, quiquin shutipi shamujtaca chasquinguichimanmi. 44 Quiquingunaca, shujmanda shujmanda alicachirishpa causanatallami yarinajunguichi. Chaimandami, shujlla Taita Dios quiquingunata alicachishpa charichumbash na mascanguichi. Chashna cashpami, ñucata cringapaca na munanguichi. 45 Ñucapaj Taitaman quiquingunata juchachishpa ñuca villachigrinataca, na yanachu canguichi. Quiquingunaca, Moisés ayudangallami yashpami shuyanajunguichi. Ashtahuangarin paillatami, quiquingunataca juchachinga. 46 Moisesca, ñuca shamunata villachijushpami escribirca. Pai escribishcata crishpami, ñucataca cringuichiman. 47 Ashtahuangarin Moisés escribishcata na crishpaca, ¿imashnashi ñuca rimajujtaca crinajunguichi?” nijurcami.
Picha huaranga runacuna micuchunmi, Jesusca carashca
1 Chai jipami Jesusca, Galilea shuti cucha manñaman yalirca. Chai cuchaca, Tiberias shutipashmi can. 2 Huañunajuj gentecunata Jesús alichijujta ricunajushpami, ashtaca ashtaca gentecuna catinajurca. 3 Jesusca, urcuman vichai rijushpami, paipaj yachajujcunandi tiarirca. 4 Judiocuna pascua fiestata rurana punllacunapash, ñami pactamujurca. 5 Jesús vichai ricujushpaca, ashtaca gentecuna paipajman shamunajujujtami ricurca. Shina ricujushpami: —Cai tucuilla gentecuna micunajuchunga, ¿maipita tandaguta randigrishun?— nishpa, Felipeta tapurca. 6 Ashtahuangarin Felipe imata nijta yachangapajllami tapurca. Imata ruranatapash, Jesusca ñami yacharca. 7 Felipeca, cashna nishpami tigrachirca: —Tucuicunaman ashagu ashagu carangapaca, ishcai patsaj denario nishca culquihuan randishca tandapash na pactangachu— nijurcami. 8 Jesuspaj yachajuj puracunamandaca, Simón Pedropaj huauqui Andresmi, Jesustaca cashna nijurca: 9 —Caipi shuj huambragumi, picha cebada tandaguta, ishcai pijiguhuan charijun. Cai tucuilla gentecuman carangapaca caigullahuanga, ¿maitata pactangayari?— nijurcami. 10 Shina nijujpimi, Jesusca: —Shina cashpaca, tucuicunata tiachipaichi— nirca. Chai urcupica, jihua juyailla viñashcami carca. Chaipimi jaricunaca, picha huarangashna tiarinajurca. 11 Jesusca, chai tandacunata japishpa, Taita Diosta pagui nishpami, paipaj yachajujcunaman curca. Chai yachajujcunami, chaipi tianajujcunaman caranajurca. Shinallata pijitapashmi, mashnata munashcaguta micunajurca. 12 Na munashpa tianajujta ricushpami, paipaj yachajujcunataca: —Ama yanga shitachun puchucunataca tandachipaichi— nishpa mandarca. 13 Paicunaca, chunga ishcai canasta jundatami tandachirca. Picha cebada tandamandallami na micuita ushashpa, chashna puchuchirca. 14 Jesús chashna juyailla rurajujta ricunajushpami, chai gentecunaca cashna ninajurca: —Dios ima nishcata villachij runaguca, cai pachaman shamungami nishpami, pundata ña villashca. Caica, chai runapachami— ninajurcami. 15 Ashtahuangarin Jesusca, paita japishpa, jatun mandajta rurangapaj munanajujta yachashpami, chai urcumanllata pailla cutin tigrarca.
Jesusca, yacu jahuatami purijushca
16 Ña tutayajujpimi, Jesuspaj yachajujcunaca, mama cuchaman urai llujshinajurca. 17 Paicunaca, shuj canoapi tiarishpami, Capernaum shuti puebloman ringapaj, mama cuchata chimbai callarinajurca. Ña alipacha tutayashcami carca. Jesusca, paicunapajman nara shamushcachu carca. 18 Shina rinajujpimi, ninan huaira jatarishpa, mama cucha yacutaca caiman chaiman shitajurca. 19 Picha kilometrota, na cashpaca sucta kilometrotashnami, paipaj yachajujcunaca ña rinajurca. Shina rinajushpami Jesusca, yacu jahuata purishpa, canoaman shamujujta ricunajurca. Paita ricushpaca, ninandami manllarinajurca. 20 Paicuna manllarijpimi Jesusca: —Ñucami cani, na manllarinachu canguichi— nirca. 21 Shina nijpimi Jesustaca, cushijushpa canoapi tiachirca. Shina tiachishpaca, paicuna rinajuj puebloman ñapashmi chayagrinajurca.
Gentecuna Jesusta mascashcami
22 Chai cayandi tutamandami, mama cucha chimbaman quedashca gentecunaca, cashna ninajurca: “Cainaca, shujlla canoami caipi carca. Chaipica, paipaj yachajujcunallami rirca. Jesusca, na paicunahuan rircachu” ninajurcami. 23 Shina ninajujpimi, Tiberías shuti pueblomanda canoacuna chayamurca. Chai cucha vichaigupillami Apunchi Jesusca, Taita Diosta pashi nishpa, tandata gentecuna micuchun carashca carca. 24 Chaipica Jesuspash, paipaj yachajujcunapash illajtami, chai gentecunaca ricurca. Shinamandami chai canoacunapi tiarishpa, Capernaum shuti pueblopi Jesusta mascangapaj rinajurca.
Jesusca, ñucallami causaita caraj tandagu cani nishcami
25 Chai gentecuna mama cuchata chimbashpa, Jesusta tuparishpaca: —Rabí, ¿ima horasta caiman chayamurcangui?— nishpami tapunajurca. 26 Shina nijpimi Jesusca, cashna nishpa tigrachirca: —Napacha llullashpami, quiquingunataca cashna nini: Quiquingunaca, juyaillata ñuca rurashpa ricuchijuimandaca, na shamushcanguichica. Ashtahuangarin tandata na munajta micunajushcata yarishpallami, ñucataca mascahuanguichi. 27 Ismushpa tucurinalla micunata japingapaca, na ruranachu canguichi. Ashtahuangarin causaita causagrinata caraj micunaguta japingapajmi munana canguichi. Chai micunagutaca, Runa Aichayu tucushca ñucallami, quiquingunaman carasha. Chaita carajuchunmi, Taita Diosca ñucata cachamuhuarca— nijurcami. 28 Shina nijpimi: —Taita Dios munashcata pactachingapaca, ¿imatata rurana capanchi?— nishpa tapunajurca. 29 Shina nijpimi Jesusca, cashna nirca: —Pai cachamushca ñucata crinajuchunmi munan. Chaimi, Taita Dios munashcata pactachina capan— nircami. 30 Shina nijpimi, cashna nishpa tapunajurca: —Quiquinda cringapaca, ¿imagutata juyailla rurashpa ricuchinguiyari? Na cashpaca, ¿imagutata ruranguiyari? 31 ‘Tandaguta micunajuchunga, jahua pachamandami caramujurca’ nishpa escribishcami tiajun. Chaipi nijunshnami, ñucanchipaj ñaupa taitacunaca, jichushca pambacunapi maná shuti micunaguta micushpa purinajushca— ninajurcami. 32 Shina nijpimi Jesusca, cashna nijurca: —Napacha llullashpami, quiquingunataca cashna nijuni: Jahua pachamanda cachamushca tandataca, na Moisés cararcachu. Ashtahuangarin ñucapaj Taitami, jahua pachamandaca paipaj tandatapacha quiquingunaman caramujun. 33 Taita Dios caramushca tandagumi, cai pachapi causajcunaman causaita causagrinataca carangapaj, jahua pachamanda shamushca— nijurcami. 34 Shina nijpimi: —Chai tandagutaca, tucui punlla ñucanchiman carajuilla, Apunchi Jesús— ninajurca. 35 Shina nijpimi Jesusca, paicunata cashna nijurca: —Ñucami, causaita causagrinata caraj tandagu cani. Maijambash ñucapajman shamushpaca, ima horallapash na yarjachingachu. Ñucata crishpaca, ima horallapash na yacunayachingachu. 36 Ashtahuangarin ñami nircani: Quiquingunaca ñucata ricushpapash, na crishpami purinajunguichi. 37 Ñucapaj Taita ñucaman carashca gentecunaca, tucuicunami ñucapajman shamunajunga. Ñucapajman shamujcunataca, na tigrachishpa canllaman cachashachu. 38 Jahua pachamandaca, na ñuca munashcata rurangapaj shamurcanichu. Ashtahuangarin ñucata cachamuj Taita munashcaguta pactachingapajmi shamurcani. 39 Ñucata cachamuj Taitapaj munaica, caimi capan: Ñucapaj Taita ñucaman caramujuj gentecunataca, shujtallapash na chingachishpa, tucurimui punllapica tucuillata causachijuchunmi munan. 40 Ñucata cachamuj Taitami, quiquingunataca cashna causanajuchun munajun: Paipaj Churi ñucata ricushpa maijambash crishpaca, causaita causagrichunmi munan. Ñucata crijcunataca, tucuicunatami tucurimui punllapica causachisha— nijurcami. 41 “Ñucami, jahua pachamanda shamushca tandagu cani” nishpami, Jesusca villajurca. Shinamandami, Judea llactapi causajcunaca fiñashpa, cashna nalicachinajurca: 42 —Cai runaca, Josepaj churi Jesusllamari. Paipaj taitata, mamatapash ñucanchica rijsinchimari. ¿Imashpata paica: ‘Jahua pachamandami shamurcani’ nirijunyari?— ninajurcami. 43 Chashna ninajujpimi Jesusca, cashna nishpa tigrachirca: —Canguna purapica, na chashna fiñashpa nalicachinachu canguichi. 44 Ñucata cachamuj Taita ñucapajman pushamujpillami, pipash shamun. Paitaca, ñucami tucurimui punllapi causachisha. 45 ‘Taita Diosmi, tucuicunata yachachinga’ nishpami, pai ima nishcata villajcunaman ña escribichishca. Shinallata ñuca Taita yachachijujta uyashpa yachajujcunallami ñucapajman shamun. 46 Ñucapaj Taitataca, pipash na ricushcachu. Ñucallami, Taita Diospajmanda shamushca cashpa, ñucapaj Taitataca ricujurcani. 47 Napacha llullashpami, quiquingunataca cashna nini: Ñucata crijllami, causaita causagrinata charin. 48 Ñucami, causaita causagrinata caraj tandagu cani. 49 Quiquingunapaj ñaupa taitacunaca, jichushca pambacunapimi maná shuti micunaguta micushpa purinajurca. Chaita micushpapash, tucuillami huañunajurca. 50 Caimi, jahua pachamanda shamushca tandaguca capan. Chai tandaguta maijambash micushpaca, na huañungachu. 51 Ñucami, jahua pachamanda shamushca causajuj tandagu cani. Chai tandata maijambash micushpaca, causaitami causagringa. Ñuca carana tandaguca, ñuca aichagumi capan. Ñucallatami, cai pachapi causajcuna causaita causagrichun carangapaj huañusha— nijurcami. 52 Shina nijpimi judiocunaca, paicunapura fiñanajushpa cashna ninajurca: —¿Imashnata caica, paipaj aichataca ñucanchi micunajuchun caraita ushangayari?— ninajurcami. 53 Shina nijpimi Jesusca, cashna nijurca: —Napacha llullashpami, quiquingunataca cashna nijuni: Runa Aichayu tucushca ñucapaj aichaguta na micushpa, ñucapaj yahuargutapash na ufiashpaca, causaita causagrinataca na charinguichica. 54 Ñucapaj aichaguta micuj, ñucapaj yahuartapash ufiajllami, causaita causagrinataca charin. Paitaca, tucurimui punllapimi causachisha. 55 Ñucapaj aichaguca, micunapachami capan. Ñucapaj yahuarpash, ufianapachami capan. 56 Ñucapaj aichaguta micuj, ñucapaj yahuarta ufiajllami, ñucahuan shujlla tucushpa causajun. Shinallata ñucapash, paipaj shungupimi causajuni. 57 Ñucata cachamuj Taitaca, causaitami causajun. Ñucapash, ñucapaj Taitamandami causajuni. Shinallatami ñucata micujpash, ñucamandalla causajunga. 58 Cai tandaguca, jahua pachamanda shamushca tandami capan. Maijambash cai tandata micushpallami, causaita causagringa. Cai tandaguca, na quiquingunapaj ñaupa taitacuna micushca tandashnachu capan. Paicunaca, maná shuti micunaguta micushpa purinajushpapash, huañurcallami— nijurcami. 59 Cai shimicunataca, Capernaum shuti pueblopi tandanajuna huasi ucupimi, Jesusca yachachijurca.
Causaita causagrinata caraj shimicunami
60 Jesuspaj ashtaca yachajujcunaca chaita uyashpami, cashna ninajurca: —Pai yachachijuj shimicunataca, napacha cati ushanallachu. ¿Pita cashna nijujtaca, uyaita ushangayari?— ninajurcami. 61 Chashna fiñashpa nalicachinajujta yachashpami, Jesusca paipaj yachajujcunata cashna nijurca: —¿Ñuca yachachijuj shimicunachu, quiquingunata fiñachin? 62 Runa Aichayu tucushca ñuca punda causajushcaman vichai rijujta ricushpacarin, ¿imatashi ninguichi? 63 Diospaj Espiritullami, causaita causagrinataca caramujun. Chaitaca, na gentecunapaj ushaihuanlla japinllu. Ñuca quiquingunaman villajuj shimicunaca, causaita caraj Espiritumi capan. 64 Cashna nijujpipash huaquingunaca, quiquinguna purapi napacha crishcami canguichi— nijurcami. Huaquinguna paita na crinatapash, huañuchijcunaman maijan paita japichinatapash, Jesusca callarimandallatami yacharca. 65 Shinamandami, paicunataca cashna nijurca: —Quiquingunamanmi, cashna nishpa ña villachijurcani: ‘Ñucapaj Taita ñucapajman pushamujpillami, pipash shamui ushan’ nishpami villachijurcani— nijurcami. 66 Shina nijujpimi, Jesusta catijcunaca, ashtacacuna paita saquishpa, na ashtahuan catirca. 67 Shinamandami Jesusca, paipaj chunga ishcai yachajujcunatapash: —¿Quiquingunapash ñucata saquishpa ringapaj munanguichi?— nirca. 68 Shina nijpimi Simón nishca Pedroca, cashna nishpa tigrachirca: —Apunchi Jesús, ¿pipajmanda rishunyari? Quiquinllami, causaita causagrinata caraj shimigucunataca charingui. 69 Ñucanchica quiquinda crij cashpami, causajujlla Taita Diospaj Churi, Quishpichij Cristo cajtapacha yachapanchi— nijurcami. 70 Shina nijujpimi Jesusca, cashna nishpa tigrachirca: —Quiquingunataca, chunga ishcaitami agllarcani. Shina cashpapash quiquinguna puramanda shujca, diablomi can— nircami. 71 Chashna nishpaca, Simonbaj churi Judas Iscariotetami shina nijurca. Paimi, chunga ishcai yachajuj puracuna cashpapash, Jesustaca huañuchijcunaman japichishapacha yajurca.
Jesustaca, paipaj huauquicunapash na crishcachu
1 Chashna nishca jipaca, Galilea llactapimi Jesusca purijurca. Judiocuna paita huañuchishumbacha nishcata yachashpami, Judea llactapica na quedangapaj munarca. 2 Judiocunaca, carpacunapi causanajushcata yarishpami, fiestata ruran carca. Chai fiestata rurana punllacunami, ña chayamujurca. 3 Shinamandami Jesustaca, paipaj huauquicunaca cashna ninajurca: —Can imagutapash rurajujta, canda catijcuna ricunajuchun, caimanda llujshishpa, Judea llactaman rilla. 4 Maijambash alicachishpa ricuchun munashpaca, na pacallapi imatapash ruranllu. Can chashna rurajunata yachashpaca, tucuicuna ricunajujtami rurana cangui— ninajurcami. 5 Jesustaca, paipaj huauquicunapash na crishpami, chashnaca ninajurca. 6 Shina nijpimi Jesusca, cashna nijurca: —Ñuca chaiman rina punllami, nara chayamun. Cangunapaj rinaca, ima punllapash alimi. 7 Cai pachapajtalla rurashpa causajcunaca, cangunataca na millanayachinllu. Imatapash nalitallami rurashpa causanguichi nijujpimi, ñucataca ninanda na ricunayachihuan. 8 Cangunaca, chai fiestaman vichai richilla. Ñuca rina punlla nara chayamujpimi, na vichai rijuni— nijurcami. 9 Shina nishpami, Galilea llactapillata Jesusca quedarca.
Chugllacunata rurana fiestaman Jesús rijushcatami villachijun
10 Paipaj huauquicuna fiestaman ña rishca jipami, Jesusca chaimanllata vichai rijurca. Na paicunahuan rijushpami, jipaman pacalla rijurca. 11 Judiocuna chai fiestapi Jesusta mascanajushpami: —¿Maipishi chai runaca?— ninajurca. 12 Chaiman rishca ashtaca gentecunami, Jesustaca ninanda nalicachishpa parlanajurca. Huaquingunaca: “Chai runaca alipachami” ninajurcami. Ashtahuangarin shujcunaca: “Napacha alichu. Gentecunata umachishpallami purijun” ninajurcami. 13 Ashtahuangarin judiocunata manllashpami, Jesusmandaca pacalla parlanajurca. 14 Chai fiesta punllacuna ña chaupiyajujpimi Jesusca, Diospaj huasiman yaicurca. Chaipimi gentecunaman yachachijurca. 15 Shina yachachijujta uyashpami, judiocunaca ninanda manllarishpa cashna ninajurca: —¿Maipita chai tucuita yachajushcanga? Paica, na yachajushcachu carca— ninajurcami. 16 Shina nijpimi Jesusca, cashna nishpa tigrachirca: —Na ñucapaj munaica, cashna yachachijunichu. Ashtahuangarin ñucata cachamuj Taita yachachishcatami yachachijuni. 17 Na ñucapaj munai cashna yachachijushpami, Taita Dios yachachijujpilla villachijuni. Chaitaca, Taita Dios munashcata pactachingapaj munajllami yachai ushanga. 18 Pipash paipaj munailla villachijushpaca, gentecuna ninanda alicachishpa ricunajuchunllami villachijun. Ashtahuangarin pipash paita mandashpa cachamujta alicachinajuchun villachijushpaca, napacha llullashpami villachijun. Shina cashpami, paipi ima nalipash na tian. 19 Mandashca shimicunataca, Moisesmi quiquingunaman curca. Chaita charishpapash, quiquingunaca maijambash na pactachishpami causanajunguichi. ¿Imamandata ñucataca huañuchingapaj munanguichi?— nijurcami. 20 Shina nijpimi, chai ashtaca gentecunaca cashna nishpa tigrachirca: —Canga, aya jundashca runamari cangui. Candaca, ¿pita huañuchingapaj munanyari?— ninajurcami. 21 Shina nijpimi Jesusca, cashna nishpa tigrachirca: —Shuj aligutami rurarcani. Chaimandallami quiquingunaca, tucuicuna manllaringuichi. 22 Quiquingunapash, samana punllapimi jari huahuacunataca, circuncisión nishcata ruranajunguichi. Shina ruranajuchunga, Moisesmi mandarca. (Na pailla callarircachu. Ashtahuangarin quiquingunapaj ñaupa taitacunami, chashna ruranataca callarishca). 23 Moisés mandashcata ama faquinshna yangapi churashca cachun nishpami, samana punlla cajpipash runagutaca, circuncisionda rurashpa causanajunguichi. Samana punllapimi, shuj huañujuj runaguta aligutapacha alichircani. ¿Chaita ruraimandallachu ninanda fiñahuanguichi? 24 Chashnami canga nishpalla, na pitapash juchachinachu canguichi. Imata rurashcatapash aliguta ricushpami, juchachi ushana canguichi— nijurcami.
¿Caichu Quishpichij Cristo canga? ninajushcami
25 Shinamandami Jerusalenmanda huaquin runacunaca, cashna ninajurca: —¿Nachu cai runata huañuchingapaj mascanajun? 26 Ricuichi, tucuicunapaj ñaupajpi villachijujpipash, paitaca na imatapash nishpami uyanajun. ¿Nachu mandajcunapash paitaca, Quishpichij Cristopachami nishpa rijsinajurca imashi? 27 Cai runataca, maimanda shamushcatapash, ñucanchica alipachami yachanchi. Ashtahuangarin Quishpichij Cristo shamujpica, maimanda shamushcatapash pipash na yachangachu— ninajurcami. 28 Diospaj huasipi yachachijushpami Jesusca, shinllita caparishpa cashna nijurca: —Ari, ñucataca rijsinguichimi, ñuca maimanda cashcatapash yachanguichimi. Ashtahuangarin ñucapaj munaica, na shamurcanichu. Tucuita pactachijjuj ñucapaj Taita cachamujpimi shamurcani. Quiquingunaca, paitaca napacha rijsishpami causanajunguichi. 29 Ashtahuangarin paipajmanda ñuca shamushca cashpami, paitaca rijsini. Paimi ñucataca cachamuhuarca— nijurcami. 30 Shina nijujpimi Jesustaca, prezu japishumbacha ninajurca. Shina ninajushpapash, paita japina punlla nara chayamujpimi, na japi usharca. 31 Chai gente puracunamandaca, ashtacacunami Jesusta crinajurca. Paicunaca cashnami ninajurca: —Quishpichij Cristo shamushpaca, ¿cai runagu rurajujtapash yali imatapash juyaillaguta rurai ushangachu, imashi?— ninajurcami.
Jesusta prezu japichunmi fariseocunaca, soldadocunata cachashca
32 Jesusmanda gentecuna imata parlanajujtapash fariseocunami uyanajurca. Curacunata mandajcunandi, fariseocunandi parlarishpami, Jesusta prezu japichun soldadocunata cacharca. 33 Chaimandami Jesusca, cashna nijurca: —Quiquingunahuanga, asha punllacunata purijusharami. Chai jipami, ñucata Cachamujpajman tigrashalla. 34 Quiquingunaca, ñucata mascashpapash, na tarishpami causanguichi. Shinallata ñuca maipi causajuj llactamambash, napacha chayamuita ushanachu canguichi— nijurcami. 35 Shina nijujpimi judiocunaca, paicunapura cashna nishpa tapurinajurca: —Ñucanchi paita ama tarichunga, ¿paica maimanshi ringa? Grecia shuti llactapi israelcuna chapurishpa causajcunapajman rishpa, ¿griegocunata yachachingapajchu shina nijun, imashi? 36 Paica cashnamari nijun: ‘Quiquingunaca, ñucata mascashpapash, na tarishpallatami causanajunguichi. Shinallata ñuca maipi causajuj llactamambash, napacha chayamui ushanachu canguichi’ nishpaca, ¿imashpashi shina nijun?— ninajurcami.
Causaita caraj yacucunata ufiaj shamuichi nishcatami villachijun
37 Chai jatun fiesta tucurijui punllami, Jesusca shayarishpa shinllita caparishpa, cashna nijurca: —Maijambash yacunayachishpaca, ñucapajman shamushpa ufiaichilla. 38 ‘Ñucata maijan crijpaj shungu ucumandaca, causaita causagrinata caraj yacucunami llujshinajunga’ nishpami, Dios escribichishca Shimipica villachijun— nircami. 39 Chaitaca, paita crijcunalla Diospaj Espirituta chasquina cajpimi, Jesusca chashna nijurca. Taita Dios Jesustaca nara paipaj punchapamba llactaman pushashcachu carca. Chaimandami, Diospaj Espirituca nara shamushca carca.
Jesusmanda parlashpami, maitapash nirinajushca
40 Jesús villachijujta ashtaca gentecuna uyashpami, huaquingunaca cashna ninajurca: —Paica, Dios ima nishcata villachij runapachami— ninajurcami. 41 Shujcunaca: —Paica Quishpichij Cristomari— ninajurcami. Ashtahuangarin huaquingunaca, cashnami ninajurca: —¿Galilea llactamandachu Quishpichij Cristoca shamuna cashca? 42 ¿Nachu Dios escribichishca Shimipica: ‘Quishpichij Cristoca, ñaupa taita Davidpaj miraimanda David causajushca Belén pueblomandami shamunga’ nijun?— ninajurcami. 43 Shina ninajushpami Jesusmanda rimanajushpa, paicunapura fiñanajurca. 44 Paicuna puramanda huaquingunaca, Jesusta prezu japingapajmi munanajurca. Shina munashpapash paitaca, pipash na japita usharcachu.
Cai runashnaca, pipash na rimashcachu nishcami
45 Soldadocunami curacunata mandajcunapajman, fariseocunapajman tigranajurca. Shina tigrajpimi: —¿Imashpata chai runataca, na apamunguichi?— nishpa tapunajurca. 46 Shina tapujpimi soldadocunaca, cashna nishpa tigrachinajurca: —¡Ima horallapash cai runashna juyailla shimigutaca, pipash na parlashcachu!— ninajurcami. 47 Fariseocunaca, cashna nishpami tigrachinajurca: —¿Quiquingunapashchu umachi tucurcanguichi? 48 Ñucanchi mandaj puracunapash, fariseo puracunapash paitaca, pipash na crishcami canchi. 49 Ashtahuangarin Moisés mandashca shimicunata na yachaj cai gentecunataca, ima llaquipash japishpami ali canman— ninajurcami. 50 Shina ninajujpimi shuj tuta, Jesushuan parlangapaj shamushca Nicodemo runaguca, paica fariseo purallatami carca. Paimi, chai runacunataca cashna nijurca: 51 —Ñucanchita mandashca shimita cazuj cashpaca, shuj runa imata rurajushcatapash tapuchishpa, ali uyashparami imata ruranatapash ricuna capanchi— nijurcami. 52 Shina nijujpimi, cashna nishpa tigrachinajurca: —¿Quiquimbash, Galilea llactamanda runa purachu cangui? ¿Galilea llactamandaca, Dios ima nishcata villachij runaca, ima horallapash shamushcachu? Chaitaca, Dios escribichishca Shimita ali ricushpa yachajungui— ninajurcami. 53 Shina nishpaca, paicunapaj huasimanmi tucuilla rinajurca.
Cazarashca jahua shujhuan causajuj huarmimandami villachijun
1 Jesusca, Olivos shuti lomamanmi rijurca. 2 Chai cayandi tutamandami, Diospaj huasiman tigramujurca. Tucuilla gentecuna paipajman shamujpimi Jesusca, tiarishpa yachachijurca. 3 Shina yachachijujpimi, mandashca shimita yachachijcunapash, fariseocunapash, cazarashca jahua shujhuan japi tucushca shuj huarmita apamurca. Chai huarmitaca, tucuicunapaj chaupipi shayachishpami, 4 Jesustaca cashna ninajurca: —Yachachij, cai huarmica cazarashca jahuami shujhuan japi tucushca. 5 Moisés mandashca shimicunapica cashna huarmicunataca, rumicunahuan huañuchinajuchun nishpami, ñucanchitaca mandajun. Quiquinga, ¿ima ninguita?— ninajurcami. 6 Paicuna chashna tapushpaca, Jesús imata tigrachijpipash juchachingapajmi, shina tapunajurca. Ashtahuangarin Jesusca cumurishpami, alpapi maqui dedohuan escribijurca. 7 Paicuna ashtahuan ashtahuan tapunajujpillatami Jesusca, paicunata vichai ricushpa cashna nijurca: —Quiquinguna purapi maijambash jucha illaj tiashpaca, paira cai huarmitaca rumihuan pegai callarichun— nijurcami. 8 Shina nishpaca, cutin cumurishpa, alpapi escribishpa catijurcallami. 9 Jesús chashna nijujta uyashpami, paicunallata nali cajta yarinajushpa, rucumanda callarishpa, chairalla viñaicunacaman cati cati tucuilla llujshinajurca. Shina llujshijpimi Jesusca, chaupipi shayajuj huarmillahuan chaipi quedarca. 10 Jesús cutin vichai ricujushpaca, chai huarmilla chaipi shayajujta ricushpami, chai huarmitaca cashna nijurca: —Quiquinda nalicachijcunaca, ¿maitata rinajurca? ¿Maijambash ninanda llaquichircachu?— nijurcami. 11 Shina nijpimi, chai huarmica: —Pipash na imata nihuarcachu, Taitalla— nirca. Shina nijpimi Jesusca, cashna nijurca: —Ñucapash, quiquindaca na llaquichigrinichu. Cunanga rilla, ama ashtahuan juchata rurashpa causanguichu— nijurcami.
Jesusca, cai pachapi causajcunapaj michami cani nishcami
12 Jesusca, cutinmi cashna nishpa villachijurca: —Ñucami, cai pachapi causajcunapaca, punchayachij micha cani. Ñucata catijcunaca, pipash na yana yana tutapishna causajungachu. Ashtahuangarin causaita causagrinata caraj michatami charinga— nircami. 13 Shina nijpimi fariseocunaca, cashna ninajurca: —Quiquinga, alipi ricurisha yashpallami, chashnaca villachijungui. Quiquinmandallata villachijushca shimicunaca, llullami can— ninajurcami. 14 Shina nijpimi Jesusca, cashna nishpa tigrachirca: —Ñucamandallata cashna villachijushpapash, ñuca villachijushca shimicunaca, napacha llullachu capan. Ñucami, maimanda shamushcatapash, maiman tigranatapash yachani. Ashtahuangarin quiquingunaca, ñuca maimanda shamushcatapash, maiman rijunatapash, na yachashpami chashna nihuanguichi. 15 Quiquingunaca, runacuna llaquichijunshnatallami llaquichinata yachanguichi. Ñucami, pitapash na llaquichijuni. 16 Ñuca llaquichijushpaca, aliguta ricushpami llaquichisha. Ashtahuangarin na ñucalla llaquichinichu, ñucata cachamuj Taitahuanmi ishcandi llaquichinajunchi. 17 Quiquingunata mandashca shimicunapica, cashnami escribishca tiajun: ‘Ishcai runacuna imata cajtapash, chashnatapachami nishpa villachijpica crinallami’ nijunmi. 18 Shina cajpimi ñucapash, ñucamandallata villachijuni. Shinallata ñucata cachamuj Taitapash, ñucamandami villachijun— nijurcami. 19 Shina nijpimi: —Quiquimbaj Taitaca, ¿maipitayari?— nishpa tapunajurca. Shina tapujpimi Jesusca, cashna nishpa tigrachirca: —Quiquingunaca ñucatapash, ñucapaj Taitatapash na rijsishpami, chashna tapunajunguichi. Ñucata rijsishpaca, ñucapaj Taitatapash rijsinguichimanmi— nircami. 20 Jesusca, cai shimicunatami, Diosman imagutapash carashpa churana cajón ladoman, Diospaj huasi ucupi yachachijurca. Paita japina punlla nara chayashca cajpimi, paita prezu japitaca, pipash na usharca.
Ñuca rijuj llactaman quiquingunaca, na shamui ushanguichica nishcami
21 Jesusca, cutinmi paicunata cashna nijurca: —Ñucaca ñami rigrini. Quiquingunaca, ñucata ninanda mascashpapash, ashtahuangarin quiquingunapaj juchapillatami huañunguichi. Shina cashpami quiquingunaca, ñuca rijuj llactaman shamuitaca na ushanguichi— nijurcami. 22 Shina nijujpimi judiocunaca, paicunapura cashna ninajurca: —¿Paillatachu huañuchiringa, imashi? ¿Shinamandachu: ‘Ñuca rijuj llactaman shamuitaca, na ushanachu canguichi’ nijun, imashi?— ninajurcami. 23 Shina nijpimi Jesusca, cashna nijurca: —Quiquingunaca, cai alpa pachamandami canguichi. Ñucaca, jahua pachamandami cani. Quiquingunaca, cai pachamandami canguichi. Ashtahuangarin ñucaca, na cai pachamanda canichu. 24 Chaimandami quiquingunataca: ‘Quiquingunapaj juchapillatami huañunguichi’ nircani. Ñucata quiquinguna na crishpaca, juchahuanllatami huañunguichi— nircami. 25 Shina nijpimi: —Quiquinga, ¿pita canguiyari?— nishpa tapunajurca. Shina tapujpimi Jesusca, cashna nijurca: —Villachita callarishpallatami, quiquingunaman villachijushcani. 26 Ñucaca, ashtaca rimajunata, quiquingunata llaquichinatapash charinirami. Ñucata cachamuj Taitaca, napacha llullashpami imatapash pactachijun. Pai rimajjutapash, ñucami uyajurcani. Chaitami, cai pachapi causajcunaman villachijuni— nijurcami. 27 Taita Diosmanda Jesús chashna villachijujpipash, pipash na yuyaita japircachu. 28 Chashnamandami Jesusca, cashna nijurca: —Quiquingunaca, Runa Aichayu tucushca ñucata jahuapi huarcushpami, ñuca maijan cajtapash rijsinguichi. Ñucapaj munaica, na imatapash rurajunichu. Ashtahuangarin ñucapaj Taita yachachishca shimicunatallami villachijuni. 29 Ñucata cachamushca Taitami, ñucahuanga causajun. Pai cushijunata punllandi rurajujpimi, ñuca Taitaca na ñucatalla saquihuashca— nijurcami. 30 Jesús chashna villachijujpica, ashtacacunami paitaca crinajurca.
Na llullashpa villachijushcami, quiquingunata cacharichinga
31 Jesusca, Judea llactapi paita crijcunatami, cashna nijurca: —Ñuca yachachijushca shimicunata, quiquinguna cazushpa catishpaca, ñucapaj yachajujcunapachami canguichi. 32 Shina cashpami, na llullashpa villachijuj shimitapash rijsinajunguichi. Chai na llullashpa villachijushca shimimi, quiquingunataca cacharichinga— nijurcami. 33 Shina nijpimi Jesustaca, cashna nishpa tigrachirca: —Ñucanchica, ñaupa taita Abrahambaj miraicunamari canchi. Shina cashpami, na pipajpash gañan canchi. ¿Imashpata quiquinga, ñucanchitaca: ‘Cachari tucunguichimi’ ningui?— ninajurcami. 34 Shina nijujpimi Jesusca, cashna nishpa tigrachirca: —Napacha llullashpami, quiquingunataca cashna nijuni: Juchata rurashpa causajcunaca, tucuillami juchapaj gañan causanajun. 35 Gañanga, amopaj huasipica na causajunllachu. Ashtahuangarin amopaj churillami, huasipi causajunlla. 36 Shinami Diospaj Churi cashpa, quiquinguna gañan causanajujuimanda ñuca cacharichijpi, cachari tucushcapacha canguichi. 37 Quiquingunataca, Abrahambaj miraicuna cajtaca yachanimi. Quiquingunaca, ñuca villachijuj shimicunata shungupi na chasquishpami, ñucataca huañuchishumbacha nishpa purinajunguichi. 38 Ñucapaj Taitapaj ladopi cashpa, ñuca ricujushcatami villachijuni. Ashtahuangarin quiquingunaca, quiquingunapaj taitamanda rimashcata uyashcatallami rurashpa causanajunguichi— nijurcami.
Quiquingunapaj taitaca, diablomi nishcatami villachijun
39 Shina nijpimi: —Abrahammi ñucanchipaj taita capan— nishpa tigrachinajurca. Jesusca, paicunataca cashnami nijurca: —Quiquingunaca, Abrahambaj miraicuna cashpaca, pai rurashcatami ruranguichiman. 40 Taita Dios na llullashpa ñucaman yachachijushcatami, quiquingunaman aliguta villachijuni. Shina villachijujpipash, ñucataca huañuchishumbacha nishpami purinajunguichi. Abrahamga, na chashnachu carca. 41 Quiquingunaca, quiquingunapaj taita imata rurajushcatallami rurashpa causanajunguichi— nijurcami. Shina nijpimi, cashna ninajurca: —Ñucanchica, na huainapaj huahuacunachu canchi. Ashtahuangarin Taita Diostallami, shujlla Taitata charinchi— ninajurcami. 42 Shina nijpimi Jesusca, paicunata cashna nijurca: —Taita Dios quiquingunapaj Taita cajpica, ñucataca ninandami juyanguichiman. Ñucallami, ñucapaj Taitapajmandaca cai pachaman shamurcani. Na ñucapaj munaica shamurcanichu. Ashtahuangarin Taita Diosmi cachamuhuarca. 43 Ñuca villachijuj shimicunataca, ¿imashpata na yuyaipi japinguichi? Ñuca villachijujta uyangapaj na munashpami, yuyaipi na japinguichi. 44 Quiquingunaca, quiquingunapaj taita diablopajmi canguichi. Shinamandami, pai munashcata rurangapaj munanguichi. Paica, callarimandapacha huañuchijmi. Llullashpalla causajmi can. Paipica, llullanallami tian. Llullashpa rimajushpaca, paimandallami llullashpa rimajun. Llullapacha cashpami, llullapaj taita can. 45 Na llullashpa villachijujpipash, quiquingunaca ñucataca na crishpami causanajunguichi. 46 ¿Quiquinguna puramanda maijanda ñucataca: ‘Juchata rurashcanguimi’ nishpa rimaita ushanguichi? Shina na llullashpa villachijujpipash, ¿ima nishpata na crihuanguichi? 47 Taita Diospaj huahuacunaca, Diospaj Shimicunata uyanajunmi. Ashtahuangarin quiquingunaca, na Taita Diospaj huahuacuna cashpami, paipaj shimita uyangapaca na munanguichi— nijurcami.
Abrahamga nara tiajpillatami, Cristoca ña tiashca
48 Shina nijpimi judiocunaca, cashna nishpa tigrachinajurca: —‘Canga aya jundashca, Samaria llactamanda shamuj runamari cangui’ nishpaca, alipacha yachashpami ninajunchi— ninajurcami. 49 Shina nijpimi Jesusca, cashna nishpa tigrachirca: —Aya jundashca runaca, na canichu. Ashtahuangarin ñucapaj Taitatami, ninanda alicachijuni. Quiquingunami, ñucata nalicachishpa chashna nihuanguichi. 50 Shina cajpipash ñuca alicachi tucungapaca, na munanichu. Ñucapaj Taitami ñuca alicachi tucuchunga munan. Paimi, ñucata nalicachijcunataca llaquichinga. 51 Napacha llullashpami, quiquingunataca cashna nijuni: Ñuca villachijushca shimicunata maijambash cazushpaca, ima horallapash na huañungachu— nijurcami. 52 Shina nijpimi judiocunaca, cashna ninajurca: —Can aya jundashca cajtaca, cunanmi ali yachanchi. Abrahamga huañushcami, Dios ima nishcata villajcunapash huañushcami. Canga: ‘Ñuca villachijushca shimita cazushpaca, ima horallapash na huañungachu’ ninguimi. 53 ¿Canga, ñucanchipaj ñaupa taita Abrahamdapash ashtahuan yalichu cangui? Paica huañushcami. ¡Dios ima nishcata villajcunapash huañushcami! Canga, ¿maijan cani yanguita?— ninajurcami. 54 Shina nijpimi Jesusca, cashna nishpa tigrachirca: —Ñuca munailla alipachami cani nijushpaca, chashna alicachirishca shimicunaca, yangami canman. Ashtahuangarin ñucapaj Taitami, ñucataca ninanda alicachijun. Paitami, quiquingunaca: ‘Ñucanchipaj Taita Diosmi’ ninajunguichi. 55 Shina nishpapash paitaca, na rijsishpami quiquingunaca causanajunguichi: Ñucallami paitaca rijsini. ‘Ñucapaj Taitata na rijsinichu’ nishpaca, quiquingunashnalla llullami caiman. Ashtahuangarin paitaca rijsinipachami. Chaimandami, pai imatalla mandashcatapash pactachijuni. 56 Quiquingunapaj ñaupa taita Abrahamga, cai pachaman ñuca shamujpi, ricunata yachashpami cushijurca. Ña shamujta ricushpaca, ninandami cushijurca— nijurcami. 57 Shina nijpimi judiocunaca, cashna ninajurca: —Picha chunga huatatapash, canga nara charinguichu. Shina cashpapash: ¿‘Abrahamdaca ricurcanimi’ ninguichu?— ninajurcami. 58 Shina nijpimi Jesusca, paicunata cashna nijurca: —Napacha llullashpami, quiquingunataca cashna nijuni: Abraham nara tiajpillatami, ñucaca ña tiarcani— nircami. 59 Shina nijpimi chai runacunaca, Jesusta huañuchishun nishpa pegangapaj, rumicunata japi callarirca. Ashtahuangarin Jesusca pacajushpami, paicunapaj chaupitallata yalishpa, Diospaj huasimandaca llujshishpa rirca.
Ñausa huacharishca runagutami, Jesusca alichishca
1 Jesús chaimanda rijushpami, ñausa huacharishca shuj runaguta ricurca. 2 Jesuspaj yachajujcunapash, chai runaguta ricushpami, cashna nishpa tapunajurca: —Yachachij, ¿cai runaguca paillata juchayu cashpachu cashna ñausa huacharishca, imashi? Na cashpaca, ¿paipaj taita mamachu juchayu carca, imashi?— ninajurcami. 3 Shina nijpimi Jesusca, cashna nishpa tigrachirca: —Pai juchata rurajuimanda, paipaj taita mama juchata rurajuimandaca, na cashna ñausachu capan. Ashtahuangarin Taita Diosca, pai imata rurai ushajtaca, cai runagupi ricuchingapajmi munan. 4 Punlla cajpillatami, ñucata cachamuj Taita imata rurachun mandashcataca pactachinapacha cani. Tutayajpica, pipash na imatapash rurai ushanllu. 5 Cai pachapi causajushpami, cai pachapi causajcunata punchayachij micha cani— nijurcami. 6 Cashna nishpallami Jesusca, t'ucahuan alpata turuyachirca. Chai turutami, ñausa runapaj ñavipi javirca. 7 Shina rurashpaca: —Siloé nishca uchilla tanquepi maillagri— nishpami cacharca. (Siloé nishpaca, Cachamushca nijunmi). Shina nijpi ñavita maillangapaj chai runagu rishpaca, ñapash ricushpami tigramurca. 8 Pai ñausa causajujtaca, paipaj ladolla causajcunapash, shuj runacunapash ricujmi carca. Paicunaca: —¿Nachu cai runagu, culquita mañashpa tiajun carca?— nishpami parlanajurca. 9 Huaquingunaca: —Paillatamari— ninajurcami. Shujcunaca: —Paishnallamari— ninajurcami. Chashna ninajujpimi, chai runaca: —Ari, ñucamari cani— nirca. 10 Shina nijpimi: —¿Imashnata quiquimbaj ñavica pascarirca?— nishpa tapunajurca. 11 Shina tapujpimi, chai runaca cashna nishpa tigrachirca: —Jesús shuti runagumi, turuta rurashpa, ñuca ñavipi javirca. Shina javishpaca: ‘Siloé nishca tanquepi maillagri’ nishpami cachahuarca. Chaiman rishpa ñavita maillashpaca, ñapash ricurcanillami— nijurcami. 12 Shina nijujpimi: —¿Chai runaca maipita?— nishpa tapunajurca. Shina tapujpica: —Maipichá, na yachanichu— nircami.
Ñavi ali tucushca runatami, fariseocunaca tapuchinajushca
13 Chai ñausa causajushca runagutaca, fariseocunapaj ñaupajmanmi pushashpa rinajurca. 14 Samana punllapimi Jesusca, turuta rurashpa, chai ñausa runata alichirca. 15 Fariseocunapash, cutinmi chai runataca: —¿Imashnata ricui callarircangui?— nishpa tapurca. Shina tapujpimi chai runaca, cashna nirca: —Turutami, ñucapaj ñavipi javirca. Ñavita maillashpaca, ñapash ricurcanillami— nircami. 16 Shina nijpimi huaquin fariseocunaca, cashna ninajurca: —Chai runaca, napacha Taita Diosmanda shamushcachu canga. Paica samana punllapica, imatapash na ruranachu nishcatami na cazushpa, chashna alichishca— ninajurcami. Ashtahuangarin huaquingunaca: —Juchayu runa cashpaca, na cashna imatapash juyaillacunata rurajunmanllu— ninajurcami. Chashna nishpami, paicunapura maitapash nirishpa fiñanajurca. 17 Chai ñausa causajushca runataca, fariseocunaca cutinmi cashna nishpa tapurca: —Quiquinga, quiquinda alichij runataca, ¿ima ninguita?— nijpimi: —Paica profetami capan— nirca. 18 Ashtahuangarin judiocunaca, chai ñausa causajushca runa ña ricujujtaca na crinajurcachu. Shina cashpami, chai ali tucushca runapaj taitata, mamatapash cayachinajuchun cacharca. 19 Paicuna shamujpimi, cashna nishpa tapunajurca: —¿Caichu quiquingunapaj churi capan? ¿Caitachu quiquingunaca, ñausatami tarircanchi ninguichi? ¿Imashpata cunanga ña ricujun?— ninajurcami. 20 Shina nijpimi, paipaj taitandi, mamandi cashna nishpa tigrachirca: —Paica, ñucanchipaj churigumi capan. Paica ñausagumi huachariparca. 21 Imashpa ricujujtapash, paipaj ñavita maijan alichishcatapash na yachapanchica. Ña rucullagumi capan, paitallata tapupaichilla. Paillata imata cashpapash villachipangallami— ninajurcami. 22 Judiocunata manllashpami, paipaj taitapash, mamapash chaitaca ninajurca. Judiocunami: “Jesusca Mesiasmi capan” nishpa maijambash villachijujpica, tandanajuna huasimanda llujchishun nishpami yarinajushca carca. 23 Chaita yachashpami, paipaj taita mamaca: “Ña rucullagumi capan. Paitallata tapupaichilla” ninajurca. 24 Shina nijpimi, chai ñausa causajushca runata cutin cayachishpa, cashna ninajurca: —Taita Diostallami alicachina cangui. Ñucanchica, chai runataca juchayu cajtaca yachanchimi— ninajurcami. 25 Shina nijpimi chai runaca, cashna nishpa tigrachirca: —Chai runataca juchayuchari, nacha juchayu, na yachanichu. Ñausami causajurcani, cunanga ricujunimi. Chaitallami yachani— nircami. 26 Shina nijpimi, paicuna cutin tapushpaca: —¿Imatata rurarcayari? Quiquimbaj ñavi ricuchunga, ¿imashnata alichircayari?— ninajurcami. 27 Shina nijpimi chai runaca, cashna nijurca: —Villachinataca ña villachinimi. Quiquingunami, napacha uyangapaj munanguichi. ¿Imapajta cutin villachijuchun munanguichi? ¿Quiquingunapash, paipaj yachajujcuna cangapajchu munanguichi?— nijurcami. 28 Shina nijujpimi chai runataca, ninanda fiñashpa cashna ninajurca: —Canmari paipaj yachajuj cangui. Ñucanchica, Moisés yachachishcata catijcunamari canchi. 29 Moiseshuan, Taita Dios rimashcataca, alipachami yachanchi. Ashtahuangarin chai runataca, maimanda shamushcatapash na yacharinllu— ninajurcami. 30 Shina nijpimi chai runaca, cashna nishpa tigrachirca: —Caitami juyaillaguta rurarca. Pai maimanda shamushcata quiquinguna na yachajpipash, ñucapaj ñavitaca alichihuarcami. 31 Taita Diosca, juchayu runacuna mañanajujtaca napacha uyanllu. Maijambash Taita Diosta manllashpa, pai munashcata rurashpa causajcunatallami uyajun. Chaitaca ñami yachanchi. 32 ‘Ñausa huacharishcata shuj runa alichishcami’ nijtaca, cai pachata churashca punllamandapacha nara uyashcachu canchi. 33 Chai runagu na Taita Diosmanda shamushca cashpaca, imatapash na rurai ushanmanllu— nijurcami. 34 Shina nijpimi paicunaca, cashna nishpa tigrachirca: —Quiquinga, juchasapamari huacharishcangui. Shina cashpapash, ¿ñucanchitara yachachingapajchu munangui?— ninajurcami. Shina ninajushpami, paitaca llujchishpa cacharca.
Diosta na cazushpami ñausashna causanguichi nishcatami villachijun
35 Chai ñausa causajushca runagutaca, tandanajuna huasimanda llujchishpa cachashcatami Jesusca yacharca. Shina yachashpami, chai runata tuparishpaca: —Quiquinga, ¿Taita Diospaj Churita cringuichu?— nishpa tapurca. 36 Shina nijpimi: —Paita cringapaca, ¿maijanda capanyari, Taitalla?— nishpami tapurca. 37 Shina nijpimi Jesusca, cashna nirca: —Taita Diospaj Churitaca, ñami ricujungui. Paillatami canhuan rimajuni— nircami. 38 Shina nijpimi: —Crinipachami, Apunchi Jesuslla— nishpami, Jesustaca ninanda alicachirca. 39 Shina nijpimi Jesusca, cashna nijurca: —Gentecunata juzgangapajmi, cai pachaman shamurcani. Ñausacunaca ricushpa causanajuchun, ricunajuj gentecunaca ñausa tigrachunmi shamurcani— nijurcami. 40 Shina nijujpimi, Jesushuan chaipi tianajushca huaquin fariseocuna, chaita uyashpa: —Shinaca, ¿ñucanchipash ñausachu canchi?— ninajurca. 41 Shina nijpimi Jesusca, cashna nishpa tigrachirca: —Ñausa cashpacarin, jucha illajmi canguichiman. Ashtahuangarin cunanga, ñucanchica alimi ricushpa causanajunchi ninguichimi. Shinamandami juchaca, quiquingunapillata quedanga.
Llama corralhuan chimbapurashpami, Jesusca parlashca
1 Na panguta na yaicushpa, maitapash vitsiashpa yaicuj runaca shuhuaj, huañuchij runami can. 2 Ashtahuangarin llamacunata michij runaguca, pungutami yaicujun. 3 Michij runagu yaicuchunga, punguta cuidashpa causajmi pascan. Llamacunaca, michij runagu rimajujtaca rijsinllami. Shina cajpimi michij runaguca, paipaj llamacunata shutipi cayachishpa, corralmanda llujchijun. 4 Michij runaguca, pai michishpa purijuj llamacunata tucuillata llujchishpaca, ñaupashpami rijun. Llamacunapash, michij runagu rimajujta rijsishpaca, catishpa rinllami. 5 Na rijsishca runa rimajta uyashpaca, napacha catinllu. Ashtahuangarin chai na rijsishca runa rimajta uyashpaca, llamacunaca maitapash calpanllami— nijurcami. 6 Paicunata yarichingapajmi, Jesusca cashna nijurca. Ashtahuangarin imamanda chashna nijujtapash, paicunaca na yacharcachu.
Jesusca, ñucami ali michij cani nishcami
7 Jesusca, cutinmi paicunataca cashna nijurca: —Napacha llullashpami, quiquingunataca cashna nijuni: Ñucami, llamacuna yaicuna pungu cani. 8 Ñucapaj punda shamujcunaca, tucuicunami shuhuacuna, huañuchijcuna carca. Ashtahuangarin llamacunaca, paicunataca na uyarcachu. 9 Ñucallami pungu cani. Maijambash ñucamanda yaicushpaca quishpiringami. Corralman yaicushpa, llujshishpa purijllami, ali micunaguta taringa. 10 Shuhuaca apangapaj, huañuchingapaj, tucuchingapajllami shamun. Ñucaca, causaita causagrinata juyaillagutapacha charichunmi shamurcani. 11 Ñucallami, aliguta michij cani. Aliguta michij cashpami, ñucapaj llamacunamandaca huañusha. 12 Ashtahuangarin culquimandalla michishpa purij runaca, napacha aliguta michinllu. Na paipaj llamacuna cajpimi, atuj shamujujta ricushpapash, llamacunata saquishpa pacajushpa calpan. Atuj shamushpaca, llamacunata apashpami, tucuillata caita chaita calpachin. 13 Culquimandalla michishpa purij runaca, llamacunaca imapash cachun yashpami pacajushpa calpan. 14 Ñucallami, aliguta michij cani. Shina cashpami, ñucapaj llamagucunataca rijsini. Shinallata paicunapash ñucataca rijsihuanmi. 15 Imashnami ñucapaj Taitapash ñucata rijsihuan, chashnallatami ñucapash ñucapaj Taitataca rijsini. Ñucapaj llamacunamandaca huañushallami. 16 Shinallata na cai corralmanda shuj llamacunatapash charinimi. Paicunatapash pushamunami cani. Paicunami, ñuca villachijushcata uyashpa cazunajunga. Shina cazujpica, shujlla corralmi tucunga. Shina tucujpimi, paicunataca ñucalla michijusha. 17 Chaimandami ñucapaj Taitaca juyahuan. Paicunamanda huañushpapash, cutinmi causarisha. 18 Ñucata huañuchitaca, pipash na ushangachu. Ashtahuangarin ñucallatami huañuchi tucusha. Huañuchi tucungapajpash, cutin causaringapajpash ushaita charinimi. Chashna ruranataca, ñucapaj Taita mandashcatami chasquircani— nijurcami. 19 Jesús chashna nijujpimi judiocunaca, paicunapura maitapash nirishpa cutin fiñanajurca. 20 Paicuna purami, ashtacacuna cashna ninajurca: —Cai runaca aya jundashca, juizu illajmari can. ¿Imapajta paitaca uyanajunguichi?— ninajurcami. 21 Ashtahuangarin huaquingunaca, cashnami ninajurca: —Aya jundashca cashpaca, na cashna juyailla villachinmanllu. Aya cashpaca, ¿imashnata ñausacunapaj ñavitaca pascaita ushanmanyari?— ninajurcami.
Judiocunaca, Jesús villachijushcata na chasquishcachu
22 Jerusalenbica, Diospaj huasita Diosman mingashcata yarishpami, fiestata ruranajurca. Chai punllacunaca, tamia quillacunami carca. 23 Jesusca, Diospaj huasi ucupimi, Salomón rurashca corredorpi purijurca. 24 Chaipi cajpimi judiocunaca, Jesusta chaupipi churashpa cashna ninajurca: —¿Ima punllacamanda ñucanchi ishcai shungu tucushpa purinajuchunga saquigringui? Canllata Quishpichij Cristo cashpaca, na llullashpa ñucanchiman villachiyari— ninajurcami. 25 Shina nijpimi Jesusca, paicunataca cashna nijurca: —Quiquingunaman ña villachijujpipash, napacha cringuichica. Ñucapaj Taitapaj shutipimi, imagutapash rurajuni. Ñuca Quishpichij cajtaca, chai ruraigumi quiquingunaman ricuchijun. 26 Ashtahuangarin quiquingunaca, na ñucapaj llamacuna cashpami na crihuanguichi. Chaitaca, ñami quiquingunaman villachijurcani. 27 Ñucapaj llamacunaca, ñuca rimajujta uyanajunmi. Ñucapash paicunataca rijsinimi. Paicunapash ñucataca catihuanllami. 28 Paicunamanmi, causaita causagrinataca carani. Chaimandami, chingaita chingangapaca na rinajuga. Paicunataca, ñucapaj maquimandaca pipash na quichushpa apangachu. 29 Paicunataca, ñucapaj Taitami ñucaman carahuarca. Paimi, tucuitapash yali ushaita charin. Shinamandami ñucapaj Taitapaj maquimandaca, pipash na quichushpa apanga. 30 Ñucahuan, ñucapaj Taitahuanga shujllami canchi— nijurcami. 31 Shina nijpimi judiocunaca, Jesusta huañuchingapaj cutin rumicunata japinajurca. 32 Shinamandami Jesusca, cashna nishpa tigrachirca: —Ñucapaj Taita ushaita caramujujpimi, ashtaca juyailla ruraicunata rurajushpa, quiquingunaman ricuchijushcani. ¿Chai ruraicunamanda, maijanmandata cashna rumicunahuan huañuchingapaj munahuanguichi?— nijurcami. 33 Shina nijujpimi judiocunaca, cashna nishpa tigrachinajurca: —Quiquin ali ruraiguta rurajuimandaca, na rumicunahuan huañuchingapaj munanchica. Ashtahuangarin quiquinga, runa cashpapash Diosmi cani nishpa, Taita Diosta fiñachijuimandami, rumicunahuan huañuchingapaj munanchi— ninajurcami. 34 Shina nijpimi Jesusca, cashna nishpa tigrachirca: —Quiquingunata mandashca shimipimi: ‘Dioscunami canguichi’ nishpa, Taita Dios escribichishca. 35 Taita Dios villachijushcata crijcunataca: ‘Quiquingunaca, dioscunami canguichi’ nishcami. (Dios escribichishca Shimitaca, na chashnachu nitaca na usharinllu). 36 Ñucapaj Taitami ñucataca, ñucapajllami cangui nishpa, cai pachaman cachamuhuarca. Shina cashpami: ‘Taita Diospaj Churimi cani’ nijurcani. Ashtahuangarin quiquingunaca: ‘Diostami fiñachishpa purijungui’ nihuanguichimi. 37 Ñucapaj Taita rurachun mandashca ruaraicunata ñuca na rurajujpica, na crinachu cahuanguichi. 38 Ashtahuangarin ñucapaj Taita mandashca ruraicunatami rurajuni. Ñucata na crishpapash, ñuca imata rurajujtaca, crinami canguichi. Chaita crishpaca, ñucapaj Taita ñucahuan causajujta, ñucapash ñucapaj Taitahuan causajujtami aliguta yachanguichi— nijurcami. 39 Shina nijpimi paicunaca, Jesusta cutinllata prezu japingapaj munanajurca. Ashtahuangarin Jesusca, paicunapaj chaupimanda rircallami. 40 Jesús chaimanda llujshishpaca, cutinmi Jordán yacu chimba ladoman rishpa quedarca. Chaipimi Juanga, pundaca bautizajushca carca. 41 Ashtaca gentecunami, paipajman shamushpa cashna ninajurca: —Juanga, imatallapash na juyailla rurashpa ricuchircachu. Ashtahuangarin Jesusmanda imaguta villachijushpapash Juanga, na llullashpami villachijurca— ninajurcami. 42 Shina ninajushpami, ashtaca gentecuna Jesusta crinajurca.
Lázaro shuti runagu huañushcatami villachijun
1 Chai punllacunapimi, Lázaro shuti runaguca huañujurca. Paica, María shuti, Marta shuti panicunandimi, Betania pueblopi causajurca. 2 (Chai huañujuj Lázaro runagupaj pani Mariami, Apunchi Jesuspaj chaquipica, mishquillagu ashnajuj jambita javirca. Shina javishpaca, paipaj ajchahuanmi fichachirca). 3 Chai panicunami: —Apunchi Jesús, quiquin ninanda juyashca Lázaro runaguca huañujunmi— nishpa, Jesusman villachigrichun cacharca. 4 Shina nijta Jesús uyashpami, cashna nijurca: —Cai ung:uihuanga, na huañungachu. Ashtahuangarin Taita Diostaca, punchapambagumi cangui ninajuchun, Taita Diospaj Churipash, chai ungushca runamanda punchapambagumi cangui ni tucuchunmi, chashna tucushca— nijurcami. 5 Martatapash, paipaj ñañatapash, Lázaro runatapash, Jesusca ninandami juyarca. 6 “Lázaro runaguca huañujunmi” nishpa villachijpipash Jesusca, ishcai punllatami chaipillata quedarca. 7 Ishcai punlla jipami, Jesusca paipaj yachajujcunataca: —Judea llactaman cutin tigrashunchi— nirca. 8 Shina nijpimi, paipaj yachajujcunaca cashna ninajurca: —Rabí, cunanga quiquinda rumicunahuan huañuchingapajmi judiocunaca munarca. Shina cajpipash, ¿cutinllu chaimanllata ringapaj munajungui?— ninajurcami. 9 Shina nijpimi Jesusca, cashna nishpa tigrachirca: —Punllacunaca, chunga ishcai horastami charin. Punllapi purijujca, indi punchayachijujpi ricushpami, na nitijashpa purijun. 10 Ashtahuangarin tutapi purijujca, paipi micha na tiajpimi nitijanlla— nijurcami. 11 Shina nishpami Jesusca, cashnatapash nijurca: —Ñucanchipaj cumba Lázaro runaguca, ña puñujunmi. Ashtahuangarin paita rijchachingapajmi rigrijuni— nijurcami. 12 Shina nijujpimi, paipaj yachajujcunaca: —Ña ali tucushpamari puñujunga, Apunchi Jesús— ninajurca. 13 Paicunaca, ali tucushpa puñujujpimi, chashna nijunga yanajurcami. Ashtahuangarin Lázaro huañushca cajpimi, Jesusca chashnaca nijurca. 14 Chai jipallami, paicuna aliguta yachachun Jesusca, cashna nishpa villachirca: —Lázaro runaguca huañushcami. 15 Pai tucurijujpica, ñuca na chaipi cashca cashpami cushijuni. Quiquinguna ñucata crinajuchunmi, paica huañushca. Shina cajpipash jacu, ripashunchi— nircami. 16 Tomastaca, “chai punllallatami ishcandimi huacharishca” nishpami, rijsin cashca. Paimi, paihuan cumba tucushpa purinajuj yachajujcunata cashna nirca: —Ñucanchipash paihuan huañungapaj, paita catishunchilla— nircami.
Jesusca causachijpash, causaita causagrinata carajpashmi
17 Lázaro shuti runagutaca, huañushpa ña chuscu punllata pambai tucushcatami Jesusca japigrirca. 18 Betania shuti puebloca, Jerusalenmanda ishcai kilómetro chaupi yalillami carca. 19 Chaipica turi huañushcamandami Martandi, Mariandi llaqui llaqui tianajurca. Paicunata cushichingapajmi judiocunaca, ashtacacuna shamushca carca. 20 “Jesús shamujun” nijta uyashpami, Martaca paita tuparingapaj rirca. Ashtahuangarin Mariaca, huasipimi shuyajurca. 21 Martaca, Jesustaca cashnami nijurca: —Apunchi Jesús, quiquin cai llactapi cajpica, ñucapaj turiguca na huañunmanllu caparca. 22 Ashtahuangarin cunambash yachanimi. Taita Diosta quiquin tucui imaguta mañajpipash, Taita Diosca caramungallami— nijurcami. 23 Shina nijpimi Jesusca: —Quiquimbaj turiguca causaringami— nirca. 24 Shina nijpica Martaca, cashnami nijurca: —Tucurimui punllapi huañushcacuna causarijpimi, ñucapaj turigupash causaringa. Chaitaca yachapanimi— nijurcami. 25 Shina nijpimi Jesusca, cashna nijurca: —Ñucami causachijpash, causaita causagrinata carajpash cani. Ñucata crijcunaca, huañushca cashpapash causaringami. 26 Cunan causajushpallata, ñucata crijcunaca causaita causaicaman na huañungachu. ¿Ñuca nishcata cringuichu?— nijurcami. 27 Shina nijpimi Martaca, cashna nirca: —Ari, Apunchi Jesús. Quiquin Quishpichij Cristo cajtaca crinipachami. Taita Dios cachamujpi, cai pachaman shamushca paipaj Churigumi capangui— nircami.
Lázaro runaguta pambashca ñaupajpimi, Jesusca huacashca
28 Shina nishpallami Martaca, paipaj ñaña Mariapajman rirca. Shina rishpami: —Ñucanchita Yachachijmi shamushca. Paimi, candaca shamui nijun— nishpami, pacalla villachirca. 29 Chashna villachijpimi María huarmiguca, ñapash jatarishpa, Jesusta tuparingapaj shamurca. 30 Jesusca, nara chai puebloman chayarcachu. Paica, Marta tuparishca pushtupillatami shuyajurca. 31 Mariata cushichingapaj shamushca judiocunaca, huasimanda María ucha llujshishpa rijujtami ricunajurca. Shina ricunajushpami: —Paipaj turita pambashca ladoman huacangapajmi rijun— nishpa catinajurca. 32 Jesusta tuparimushpami María huarmiguca, paipaj ñaupajpi cungurishpa, cashna nirca: —Apunchi Jesús, quiquin caipi cajpica, ñuca turiguca na huañupanmanllu carca— nircami. 33 Shina nishpa María huacajujpimi, paita cumbashpa shamushca judiocunapash huacanajurca. Shina huacanajujta Jesús ricujushpami, shungupi ninanda llaquiyashpa, llaqui llaqui tucujurca. 34 Shina llaquiyashpaca: —¿Maipita paitaca pambaparcanguichi?— nishpami tapurca. Shina tapujpimi: —Jacu ricupashun, Apunchi Jesús— ninajurca. 35 Jesuspash huacarcami. 36 Shina huacajujta ricushpami: —Ricuichi, Lazarotaca ninandami juyan cashca— nishpa judiocunaca parlarinajurca. 37 Ashtahuangarin paicuna puramanda huaquingunaca, cashnami ninajurca: —Paica, ñausa runagutapash ñavita alichircami. Lazarotapash ama huañuchunga, ¿nacha imallatapash ruranman carca?— ninajurcami.
Jesusca, Lázaro runaguta causachishcami
38 Jesusca, cutin ninanda llaquiyajushpami, Lázaro runaguta pambashca utujuman chayarca. Chai jatun utujutaca, rumihuan jahualla jarcashcami carca. 39 Chaiman chayashpami Jesusca: —Rumita suchuchipaichi— nirca. Shina nijpimi, huañushcapaj pani Martaca, cashna nirca: —Paita pambashcapash, ñami chuscu punlla capan. Ña ashnayashcami capanga, Apunchi Jesús— nircami. 40 Shina nijpimi Jesusca, cashna nijurca: —¿Nachu quiquindaca: ‘Crishpaca, Taita Diospaj punchapambaguta ricunguimi’ nircani?— nijurcami. 41 Shina nijujpimi, huañushcata pambashca utujumandaca, jarcashca rumita suchuchirca. Chai jipallami Jesusca, jahua pachata vichai ricushpa cashna nijurca: —Ñuca Taitalla, ñuca mañajujta uyashcamandami, quiquindaca pagui nijuni. 42 Ñuca mañajujta quiquin uyajujtaca yachanipachami. Quiquin ñucata cachamushcata, muyundi shayanajun cai tucuilla gentecuna crinajuchunmi, cashna mañajuni— nijurcami. 43 Shina nishpallami: —¡Lázaro, chaimanda llujshimui!— nishpa caparirca. 44 Shina caparijhuanmi, huañushca Lázaro runaguca maquindi, chaquindi pillushca, umatapash telahuan pillushca llujshimurca. Shina llujshimujpimi, Jesusca: —Pillushcacunata pascashpa, richun saquipaichi— nirca.
Jesusta huañuchingapajmi parlarinajushca
45 Jesús chashna causachijta ricushpami, Mariata cumbangapaj shamushca judiocunaca, ashtacacuna Jesusta crinajurca. 46 Ashtahuangarin huaquingunaca, Jesús imata rurashcata villachingapajmi, fariseocunapajman rinajurca. 47 Shinamandami curacunata mandajcunapash, fariseocunapash, mandaj puralla tandanajushcacunahuan cashna ninajurca: —Chai runataca, ¿imatata rurashunchi? Imatapash juyaillacunata ninanda rurashpami ricuchishpa purijun. 48 Paita imatapash na nishpa yangata saquijpica, tucuillami crishpa catigrinajunga. Chashna catijpica, Roma llactamanda soldadocuna shamushpami, Diospaj huasitapash, ñucanchipaj llactatapash tucuchinajunga— ninajurcami. 49 Chai huatapica, Caifás shuti curami, curacunata mandaj carca. Paimi, tucuicunata cashna nijurca: —Quiquingunaca, imatapash na yachajmi canguichi. 50 Cai llactapi causajcuna, tucuilla huañuchi tucungapaj randica, shujlla runa huañushpa ashtahuan ali canataca, yaritapash na yarishpami causanajunguichi— nijurcami. 51 Caifas runaguca, na paipaj munai chashna nijurcachu. Ashtahuangarin paica, chai huatapimi curacunata mandaj cashpami, chai llactapi causajcunamanda Jesús huañunata Dios yarichijpi villachijurca. 52 Jesusca, na chai llactapi causajcunamandalla huañunachu carca. Ashtahuangarin Taita Diospaj huahuacuna tucushpaca, caipi chaipi causajcunapash shujlla tucunajuchunmi, paica huañuna carca. 53 Tandanajushpa parlarishca chai punllamandami, Jesustaca huañuchishumbacha ninajurca. 54 Shinamandami Jesusca, judiocunahuan tandanajushpa puritaca na ashtahuan usharca. Ashtahuangarin chaimanda llujshishpa rishpaca, Judea llacta jichushca pamba manñaman tiajuj Efraín shuti pueblomanmi chayagrirca. Chaipimi, paipaj yachajujcunandi quedarca. 55 Judiocuna pascua fiestata rurana punllacunami ña chayamujurca. Paicunaca, Taita Diospaj ñaupajpi mapa illaj tucungapaj nishpami, ashtacacuna Jerusalenman vichai rinajurca. 56 Chaiman chayashpami, Jesustaca mascanajurca. Diospaj huasi ucupi paicuna tandanajushpaca, caishuj chaishujmi: —Jesusca, ¿cai fiestaman shamungachu, imashi? ¿Ima ninguichita?— nishpa tapurinajurca. 57 Curacunata mandajcunapash, fariseocunapash, Jesustaca prezu japingapaj munashpami: —Jesús maipi purijujta yachashpapash, ucha villachij shamupanguichi— nishpa mandashca carca.
Betania pueblopimi Jesustaca, mishquillagu ashnajuj jambita talishpa javishca
1 Pascua fiesta punlla chayangapaca, sucta punllalla tiajpimi Jesusca, Betania shuti puebloman rirca. Chaipimi, Lázaro shuti runaguca causajurca. Paitami, huañushcata Jesusca causachishca carca. 2 Chaipimi, paiman carangapaj yanurca. Martami, micunagutaca carajurca. Chai mezapica, Lázaro runagupashmi Jesushuan micushpa tiajurca. 3 Shina tianajujpimi María huarmiguca, mishquillagu ashnajuj nardo nishca jambita, chaupi litrotashna apashpa shamurca. Chai jambiguca, ninan valishca, ashtahuan ali jambimi carca. Chaitami, Jesuspaj chaquipi javishpa María huarmiguca, paipaj ajchahuan fichachirca. Shina rurajujpica, chai huasi ucu jundami mishquilla ashnajurca. 4 Jesuspaj yachajuj puramanda, Simonbaj churi Judas Iscariotemi, Jesustaca japichina carca. Paimi cashna nijurca: 5 —Mishquillagu ashnajuj cai jambitaca, ¿imashpata na quimsa patsaj denario culquipaj jatushpa, chai culquitaca imagutapash na charijcunaman cararca?— nircami. 6 Judas runaca, imagutapash na charijcunata llaquimandaca na chashna nircachu. Ashtahuangarin shuhua cashpami, chashna nijurca. Gentecuna carashca culquita muchilapi churashcataca, paimi apashpa purin carca. Chai culquitami, shuhuashpandi purin carca. 7 Judas chashna nijpimi Jesusca, paita cashna nijurca: —Na chashna ninachu cangui. Cai mishquilla ashnajujtaca, ñuca huañushpa pambai tucuna punllapajmi alichishpa charijushca. 8 Imagutapash na charijcunaca tiangallami. Ashtahuangarin ñucami, quiquingunahuanga na unaicaman caipi casha— nijurcami.
Lázaro runaguta huañuchishun ninajushcami
9 Betania shuti pueblopi, Jesús purijujta yachashpami, judiocunaca ashtacacuna shamunajurca. Paicunaca Jesustapash, Lázaro runatapash ricungapajmi shamunajurca. Lazarotaca, huañushcatami Jesusca causachishca carca. 10 Ashtahuangarin curacunata mandajcunaca, Lazarotapash huañuchishumbacha ninajurca. 11 Lazarota causachijta ricushpami judiocunaca, curacunataca na ashtahuan catinajurca. Ashtahuangarin Jesustami crinajurca.
Jerusalenmanmi Jesusca yaicushca
12 Chai cayandi punllami, Jerusalenbica pascua fiestata ruranajujpi, ashtaca gentecuna shamunajurca. Paicunami, Jerusalenman Jesús shamujujta uyashpaca, 13 ramos malquicunata cuchushpa, Jesusta tuparingapaj llujshinajurca. Paicunaca cashna nishpami, ninanda caparinajurca: —¡Diosca, ninanda alicachi tucushca cachun! ¡Jatun Diospaj shutipi shamujujca, aligumari cangui ni tucushca cachun! ¡Paica, israelcunata jatun Mandajmi capan!— ninajurcami. 14 Jesusca, escribishcapi nijunshnami, shuj maltun burrota tarishpaca, chaipi tiarirca. Chai escribishcapica, cashnami nijun: 15 “Sion shuti pueblopi causajcuna, na manllanachu canguichi. Ricuichi, quiquingunata jatun Mandajmi shamujun. Mama burrogupaj maltun burropi tiarishcami shamujun” nijunmi. 16 Jesuspaj yachajujcunaca, imapaj chashna rurajujtapash, chai punllacunapica nara yacharcachu. Ashtahuangarin Jesusta punchapamba llactaguman pushashca jipami paipaj yachajujcunaca, Jesusmanda escribishpa imata nijushcata yarinajurca. Shina yarishpami, chaica ña pactamushcata yachanajurca. 17 Lázaro runagu huañushpa pambai tucushcataca, Jesusmi cayachishpa causachirca. Chaitaca, Jesusta catishpa rijcuna ricushca cashpami, shujcunamambash villachinajurca. 18 Chashna juyailla causachishcata yachashpami, ashtaca gentecuna Jesusta tuparingapaj llujshimurca. 19 Ashtahuangarin fariseocunaca, paicunapura parlarishpami cashna ninajurca: —Ña ricunguichimi. Yanga saquishpaca, na imatapash rurai usharinllu. Ricuichi, gentecunaca tucuillamari paitalla catinajun— ninajurcami.
Griego nishca gentecunapashmi, Jesustaca mascanajushca
20 Pascua fiesta punllacunapi Diosta mañangapajmi, ashtaca gentecuna Jerusalenman vichai rinajushca carca. Chaipimi, griego nishca huaquin gentecunapash tiarca. 21 Paicunaca, Felipe shuti runapajman quimirishpami: —Ñucanchipash, Jesusta ricungapajmi munapanchi, taitalla— ninajurca. Felipeca, Galilea llactapi tiaj Betsaida shuti pueblomandami carca. 22 Shina nijpimi Felipeca, Andresman villachigrirca. Paicunaca ishcandimi, Jesusman villachingapaj rirca. 23 Shina villachijpimi Jesusca, cashna nishpa tigrachirca: —Runa Aichayu tucushcata punchapambagumi cangui ni tucuna punllacunami ña chayamushca. 24 Napacha llullashpami, quiquingunataca cashna nijuni: Trigo muyu alpapi na urmashpa na ismushpaca, pailla tiajunllami. Ashtahuangarin ismunshna viñashpami, ninanda miran. 25 Maijambash paipaj causaitalla juyarishpa causajushpaca, chingaitami chingagringa. Ashtahuangarin maijambash cai pachapi causanata millanayachishpaca, causaitami causagringa. 26 Ñucata servingapaj munashpaca, pipash catihuaichilla. Ñucata servijujca, ñuca causajuj llactagupimi paipash causagringa. Ñucata servijtaca, ñucapaj Taitami ninanda alicachinga— nijurcami.
Jesusca, pai huañuchi tucunatami villachijushca
27 Cunanmi, ñucapaca ninan llaqui chayamushca. Shina cajpica, ¿imata nipasha? Ñuca Taitalla, ama llaquichi tucuchun quishpichihuai, ¿nipashachu imatayari? Ashtahuangarin caitaca, pactachingapajmi shamurcani. 28 Quiquin punchapambagu cajtaca ricuchipayari, ñuca Taitalla— nijurcami. Shina nijhuanmi, jahua pachamandaca cashna rimamurca: —Ñami ñuca punchapambagu cajtaca ricuchircani. Ña punchapamba cajtaca, cutimbash ricuchishami— nijmi uyarimurca. 29 Chashna rimajujtaca, chaipi shayanajuj ashtaca gentecunapashmi uyarca. Paicunaca: —Rayomari culun nijun— ninajurcami. Huaquingunaca: —Angelmari, paitaca rimamun yarin— ninajurcami. 30 Shina ninajujpimi Jesusca, cashna nishpa tigrachirca: —Ñucapaj ali cachunga, na cashna uyarimunllu. Ashtahuangarin quiquingunapaj ali cachunmi, cashna uyarimun. 31 Cai pachapajtalla rurashpa causajcunata juzganami, cunanga chayamushca. Cai pachapajtalla rurachishpa mandajca, cunanmi shitai tucunga. 32 Caspipi jahuaman huarcui tucushpaca, tucuicunatami ñucapajman pushamusha— nijurcami. 33 Chashna nishpaca, paillata imashna huañuchi tucunatami Jesusca villachijurca. 34 Shina nijpimi gentecunaca, cashna nishpa tigrachirca: —Mandashca shimicunapica: ‘Quishpichij Cristoca, causaitami causajunga’ nishpa villachijujtami uyanajunchi. ¿Quiquinga: ‘Runa Aichayu tucushcataca, jahuaman huarcui tucunapachami’ ninguichu? ¿Imashpata chashna ningui? ¿Runa Aichayu tucushca runaca, maijandayari?— ninajurcami. 35 Shina ninajujpimi Jesusca, cashna nijurca: —Punchayachij michaguca, ashacamanllami quiquingunahuanga purijusha. Yana tuta quiquingunata ama ñapash japichunga, micha tiajpillatami purina canguichi. Tutapi purijcunaca, maiman rijurijtapash na yachanllu. 36 Michagu quiuquingunahuan caipi cajpillata, ucha crihuanguichi. Shina crishpami, michapaj huahuacuna tucunguichi— nijurcami. Jesusca, chashna tucuita nishpallami, paicunapaj chaupimanda llujshishpa, paicunamanda pacajushpa rirca.
Judiocunaca Jesusta na crishcachu
37 Tucuicuna ricunajujta imatapash juyaillata rurashpa ashtacata Jesús ricuchijpipash, paitaca na crinajurcachu. 38 Paicuna na crijpimi, profeta Isaías nishca shimicunaca pactarca. Paica cashnami nijurca: “Jatun Dioslla, ñucanchi villachishcataca, pipash na cringapaj munanllu. Jatun Dios ninan ushaita charijtaca, pipash na ricunllu” nishcami. 39 Paicuna imamanda na crinatapash, Isaiasllatami cashna nijurca: 40 “Diosmi, paicunapaj ñavitaca ñausayachirca. Shinallata paicunapaj shungutapashmi shinlliyachirca. Paicunapaj ñavica ama ricuchun, paicunapaj shungupash ama yachai ushachunmi, chashna rurarca. Ñuca paicunata alichijpi ali tucungapajpash, ñucapajman na tigramunllu” nijurcami. 41 Jesustaca, punchapamba cajta ricushca cashpami, Isaiasca chashna nishpa villachijushca. 42 Chashna tucuita nishpa villachijujpimi, Jesustaca ashtacacuna mandaj puracunapash crinajurca. Tandanajuna huasimanda ama llujchishpa cachai tucungapajmi, fariseocunata manllashpa, crijmi canchi nishpaca na villachinajurca. 43 Paicunaca, Taita Dios alicachinataca na yapa munashpami, gentecuna alicachinatara ashtahuan munarca.
Jesús rimashca shimicunami, gentecunata juzganga
44 Jesusca, shinllita rimashpami cashna nijurca: “Maijambash ñucata crijca, na ñucatalla crijunllu. Ashtahuangarin ñucata cachamuj Taitatapashmi crin. 45 Ñucata ricujushpaca, ñucapaj Taitatami ricujun. 46 Ñucami, michagushna punchayachingapaj cai pachaman shamurcani. Ñucata crijcunaca, tucuicuna ama ashtahuan yana yana tutapishna causanajuchunmi shamurcani. 47 Ñuca villachijuj shimicunata uyashpapash, na cazujtaca ñucaca na juzgashachu. Cai pachapi causajcunata juzgangapaca, na shamurcanichu. Ashtahuangarin cai pachapi causajcunataca, quishpichingapajmi shamurcani. 48 Maijambash ñucata na ricunayachishpa, ñuca villachijushca shimicunata na chasquishpaca, pi juzganatapash ñami charin. Paitaca, ñuca villachijushca shimicunallatami, tucurimui punllapica juzganga. 49 Ñucapaj munaica, na cashna villachijunichu. Ashtahuangarin ñucata cachamuj Taitami imata nichumbash, imata villachijuchumbash ñucataca mandahuarca. 50 Pai villachijuchun mandashca shimicunaca, causaita causagrinatami caran. Chaitaca yachanimi. Chaimandami ñuca imata villachijushpapash, ñucapaj Taita mandashcatalla villachijuni” nijurcami.
Jesusca, paipaj yachajujcunatami chaquita maillachishca
1 Pascua fiestata rurana punllacuna ña chayajujpimi Jesusca, cai pachata saquishpa paipaj Taitapajman tigrana punlla chayamujujtaca yacharca. Jesusta catishpa cai pachapi causajcunataca, ninandami paica juyajurca. Paicunataca, huañuna punlla chayangacamanmi ninanda juyajurca. 2 Jesusca, paipaj yachajujcunahuanmi micushpa tiajurca. Simonbaj churi Judas Iscariotepaj shungupimi, Jesusta japichingui nishpa, diabloca ña yarichishcalla carca. 3 Jesusca, ima tiashcatapash tucuita pai mandajuchun, paipaj Taita ushaita carashcataca alipachami yacharca. Taita Dios cachamujpi shamushcatapash, Taita Diospajmanllata cutin tigranatapashmi yacharca. 4 Jesusca, micushpa tiajuimanda jatarishpami, paipaj jahualla churajunaguta llujchirca. Shina llujchishpami, shuj chaquichina finduguta japishpa chumbilishcapi satirirca. 5 Chai jipami, shuj bateapi yacuta churashpa, yachajujcunapaj chaquita maillachi callarirca. Shina maillachishpaca, pai chumbilishcapi satirishca finduhuanmi chaquichirca. 6 Simón Pedropaj chaquita maillachingapaj chayamujpica: —Apunchi Jesuslla, ¿quiquinrachu ñucapaj chaquitaca maillachigrihuangui, imata?— nircami. 7 Chashna nijpimi Jesusca, cashna nishpa tigrachirca: —Imamanda ñuca cashna rurajujtapash, cunanga nara yachanguichu. Ashtahuangarin jipamanmi yachangui— nircami. 8 Shina nijpimi Pedroca: —Ñucapaj chaquitaca, napacha maillachihuanguichu— nirca. Shina nijpimi Jesusca, cashna nishpa tigrachirca: —Quiquimbaj chaquita ñuca na maillachijpica, na ñucapaj purachu cangui— nircami. 9 Shina nijpimi Simón Pedroca, cashna nirca: —Shina cashpaca Apunchi Jesuslla, ama chaquitalla maillachishpa maquindi, umandi armachihuayari— nircami. 10 Shina nijpimi Jesusca, cashna nijurca: —Pipash ña maillarishca cashpaca, na ashtahuan mapa cashpami chaquitalla maillan. Quiquingunapash ña mapa illajmi canguichi. Shina cajpipash na tucuicuna mapa illajchu canguichi— nijurcami. 11 Jesusca, maijan paita huañuchijcunaman japichinatapash yacharcami. Shina yachashpami: “Quiquingunaca, na tucuicuna mapa illajchu canguichi” nirca. 12 Jesusca, paicunapaj chaquita maillachishca jipami, paipaj jahualla churajunaguta churajushpa, cutin mezaman tigrarca. Shina tigrashpami, paicunataca cashna nijurca: —Imapaj ñuca cashna rurajtapash, ¿nachu yachanguichi? 13 Cangunaca: ‘Yachachijmi cangui, Mandajmi cangui’ nishpaca, aligutami nihuanguichi. Chaillatami cani. 14 Quiquingunata Yachachij, quiquingunata Mandaj cashpapash, chaquitaca maillachinimi. Ñuca rurajujshnami quiquingunapash, shujmanda shujmanda chaquitaca maillachirina canguichi. 15 Ñuca rurajujshna, quiquingunapash rurashpa causanajuchunmi chashnaca maillachini. 16 Napacha llullashpami, quiquingunataca cashna nijuni: Gañanga, paipaj amotaca na yalichu can. Shinallata mandajpi rij runapash, paita mandajtaca na yalichu can. 17 Cashna ñuca mandajujtaca, ñami yachanguichi. Chaita pactachishpa causajushpaca, ninandami cushijunguichi. 18 Quiquingunata ñuca cashna nishpaca, na tucuicunata nijunichu. Ñucapajlla causanajuchun agllashcacunataca rijsinimi. Ashtahuangarin Dios escribichishca Shimipica: ‘Ñucahuan tandata micushpa tiajllatami, ñucataca fiñahuarca’ nijunmi. Chashna nijushca shimica pactanapachami. 19 Nara chaica pactajpillatami, quiquingunaman cashna villachijuni. Ña pactajpica, ñuca maijan cajta crinajuchunmi, cashna villachijuni. 20 Napacha llullashpami, quiquingunataca cashna nijuni: Ñuca cachashcata maijan chasquijpash, ñucatami chasquin. Shinallata ñucata maijan chasquijpash, ñucata cachamuj Taitatami chasquin— nijurcami.
Jesusca, Judas runami ñucataca japichihuanga nishcami
21 Shina nijushpallami Jesusca, shungupi ninanda llaquiyashpa, paicuna yachachun cashna nirca: —Napacha llullashpami, quiquingunataca cashna nijuni: Quiquinguna purapi tiajujllatami, ñucataca huañuchijcunaman japichigrihuan— nircami. 22 Shina nijpimi, paipaj yachajujcunaca maijanda chashna nijujtapash na yachashpa, paipura ñavita chimbapura ricurinajurca. 23 Paipaj yachajuj puramanda shujtaca, ninandami Jesusca juyan carca. Paica, Jesuspaj ladopimi marcarishca tiajurca. 24 Jesús maijanda chashna nijujtapash tapuchunmi, Simón Pedroca chai tiajujtaca, umata shitashpa ricurca. 25 Shina rurajpimi paica, Jesuspi ashtahuan marcarishpa: —Quiquindaca, ¿maijanda japichigrijun, Apunchi Jesús?— nishpa tapurca. 26 Shina tapujpimi Jesusca: —Shuj runamanmi, tandata chaupishpaca, mutiyachishpa caragrini. Chaita japij runami, chai canga— nircami. Shina nishpaca, Simón runapaj churi Judas Iscariote runamanmi, tandata mutiyachishpa Jesusca cararca. 27 Chaita micujpimi Satanasca, Judas runapaj shunguman yaicurca. Shina tiajujpimi Jesusca: —Quiquin imata rurasha yajushcatapash ucha pactachilla— nishpa, Judastaca nirca. 28 Ashtahuangarin Jesushuan micushpa tianajujcunaca, imamanda Judasta chashna nijtapash maijambash na yacharcachu. 29 Judasca, culqui muchilata apashpami purin carca. Jesús chashna nijpimi, huaquingunaca cashna yarinajurca: “Cai fiestapajmi, imagutapash randimugri nijun yarin, na cashpaca imagutapash na charijcunaman carachunmi cachajun yarin” yanajurcami. 30 Judas runaca, chai tandata japishpa micushpallami llujshishpa rirca. Ña tutayashcapachami carca.
Juyarishpa causanajuchunmi, Jesusca mandashca
31 Judas runa llujshishpa rijpimi Jesusca, cashna nijurca: —Cunanga, Runa Aichayu tucushca ñucami, punchapambagumi cangui ni tucugrini. Shinallata Taita Diospash, ñucamandami punchapambagumi cangui ni tucugrin. 32 Taita Diosca, ñucamanda punchapambagumi cangui ni tucushpami, Taita Diosca paimandallatapash punchapambagumi cangui ni tucunga. Chaitaca ñallami ricuchigrini. 33 Ñuca huahuacunalla, ashagutallami cangunahuanga tiajugrini. Shina cajpimi, ñucataca mascahuanguichi. Ashtahuangarin: ‘Ñuca rijuj llactaman cangunaca, na shamui ushanachu canguichi’ nishpami, judiocunataca ña nircani. Shinallatami cunanga, quiquingunatapash nini. 34 Nara mandashca mushujtapachami, cashna nishpa quiquingunataca mandani: Caishujhuan, chaishujhuan ninanda juyarishpami causana canguichi. Ñuca imashnami quiquingunata ninanda juyani, chashnallatami quiquingunapash, caishujhuan chaishujhuan ninanda juyarishpa causana canguichi. 35 Shina juyarishpa causanajujta ricushpami, ñucapaj yachajujcuna cajtaca tucuicuna rijsinajunga— nijurcami.
Pedroca, ñucataca na rijsinichu nihuanguimi nishpami Jesusca villachishca
36 —Apunchi Jesús, ¿quiquinga maimanda rigrijungui?— nishpa, Simón Pedro tapujpimi Jesusca, cashna nishpa tigrachirca: —Ñuca maiman rijujman cunanllata catishpa ritaca, na ushanguichu. Ashtahuangarin jipamanmi, ñucataca catimungui— nircami. 37 Shina nijpimi Pedroca, cashna nijurca: —¿Imashpata cunanllata, quiquinda catishpa ritaca na ushana capani? Huañuna cajpipash, quiquimbaj randi huañushallami, Apunchi Jesuslla— nijurcami. 38 Shina nijpimi Jesusca, paitaca cashna nijurca: —¿Quiquinga, ñucapaj randi huañushallami ninguichu? Napacha llullashpami, quiquinda cashna nini: Gallo nara cantajpillatami, quiquinga quimsacaman ñucataca na rijsinichu nigringui— nijurcami.
Jesusmi, Taitapajman pushaj ñanmi
1 Quiquingunapaj shungupica, na musparishpa pandarinachu canguichi. Ashtahuangarin Taita Diosta cringuichi, ñucatapash crihuaichi. 2 Ñuca Taitapaj huasipica, ashtaca ashtaca causana ucucunacami tian. Chaipi causana na tiajpica, ñucallata quiquingunaman villachiimanmi carcani. Quiquinguna chaipi causanajuchun alichingapajmi rigrijuni. 3 Ñuca rishpami, quiquinguna causanata alichisha. Chai jipami, ñuca causajuj llactagupi ñucahuan causanajuchun, quiquingunataca pushangapaj tigramusha. 4 Quiquingunaca, ñuca maiman rigrijujtapash yachanguichi, ñandapash rijsinguichimi— nijurcami. 5 Shina nijpimi Tomasca, cashna nirca: —Apunchi Jesús, quiquin maiman rigrijujtapash na yachapanchica. ¿Imashnata ñandacarin rijsishunyari?— nircami. 6 Shina nijpimi Jesusca, cashna nijurca: —Ñucallami ñan cani. Na llullashpa villachijpash, causaita causagrinata carajpashmi cani. Ñuca Taitapajman ñuca na pushajpica, pipash na paillata chayaita ushanllu. 7 Ñucata rijsishpaca, ñucapaj Taitatapash rijsinguichimanmi. Cunanmandami paitaca ña rijsinguichi, ricuitapash ñami ricushcanguichi— nijurcami. 8 Shina nijujpimi Felipe runaguca, cashna nirca: —Apunchi Jesús, shina cashpaca quiquimbaj Taitata rijsichihuayari. Paita rijsishpaca cushijunchimanmi— nircami. 9 Shina nijpimi Jesusca, cashna nijurca: —Felipe, ¿ñucataca narachu rijsihuangui? Ña unaitami quiquingunahuan causajuni. Maijambash ñucata ricushpaca, ñucapaj Taitatami ricujun. Quiquinga, ¿imashpata Taitata rijsichihuai nihuangui? 10 Ñucapaj Taitaca ñucahuanmi, ñucapash ñuca Taitahuan causajujtaca, ¿nachu cringui? Cai shimicunataca, na ñucapaj munai villachijunichu. Ashtahuangarin ñucahuan causajuj Taitami, ima ruraicunata rurajuchumbash ushaita carahuarca. 11 Ñucapaj Taitapash ñucahuan, ñucapash ñuca Taitahuan causajujtaca crinami canguichi. Chaita na crishpapash, ñucapaj ruraicunatallapash crichiyari. 12 Napacha llullashpami, quiquingunataca nijuni: Pipash ñucata crijca, ñucapaj ruraicunataca paipash rurangallami. Ñuca Taitapajman ñuca rijpimi, paica ñucapaj ruraicunatapash yalita ashtahuan rurajunga. 13 Ñucapaj shutipi ñucapaj Taitata imaguta mañajpipash, carashallami. Paipaj Churimanda Taita punchapambagumi cangui ni tucuchunmi, chashna carasha. 14 Ñucapaj shutipi imata mañajpipash, carashallami.
Jesusca, Diospaj jucha illaj Espirituta cachamushami nishcami
15 Ñucata juyashpaca, ñuca mandashca shimicunatami pactachina canguichi. 16 Shuj ali Cushichijta quiquingunaman carachunmi, ñucapaj Taitataca mañasha. Chaimi quiquingunahuanga, causaita causajunga. 17 Chaica, Diospaj na llullaj Espiritumi capan. Cai pachapajtalla rurashpa causajcunaca, paitaca na ricushca, na rijsishca cashpami, na chasquita ushanga. Ashtahuangarin quiquingunaca, quiquingunahuan causanajujpimi rijsinguichi. Paica, quiquingunapaj shungupimi causaita causajunga. 18 Na quiquingunatalla jichushpa saquishachu. Cutinmi quiquingunapajman shamusha. 19 Cai pachapajtalla rurajcunaca, asha punllacunata ñucata ricushpaca, na ashtahuan ricungachu. Ashtahuangarin quiquingunaca, ñucata ricuhuanguichimi. Ñucaca causaitami causajuni, quiquingunapash causaitami causanajunguichi. 20 Chai punlla chayamujpimi, ñuca Taitahuan ñuca causajujtaca yachanguichi. Quiquingunapash, ñucahuanmi causanajunguichi. Ñucapash quiquingunapaj shungupimi causajusha. 21 Ñuca mandashca shimicunata chasquishpa pactachishpa causajujllami, ñucataca juyahuan. Paitaca, ñucapaj Taitapash juyangami. Ñucapash paitaca juyashami, paimanmi ricurisha— nijurcami. 22 (Judas Iscarioteca, na cashna nircachu). Shuj Judasmi, cashna nirca: —Apunchi Jesuslla, ¿imashpata cai pachapajtalla rurashpa causajcunaman na ricurishpa, ñucanchimanlla ricurisha ningui?— nircami. 23 Shina nijpimi Jesusca, cashna nishpa tigrachirca: —Ñucata juyashpaca, ñuca villachishca shimicunata pactachingami. Paitaca, ñucapaj Taitapash juyangami. Paipajman shamushpami, ñuca Taitandi, ñucandi paihuanga causashun. 24 Ñucata na juyashpaca, ñuca villachishca shimicunata na pactachijunllu. Quiquinguna uyashca shimicunaca, na ñucapajchu can, Ashtahuangarin ñucata cachamuj ñuca Taitapajmi can. 25 Quiquingunahuan cashpallatami, cashna tucuita villachijuni. 26 Ñucapaj Taitaca shuj Cushichij, jucha illaj paipaj Espiritutami, ñucapaj shutipi cachamunga. Paimi, imagutapash tucuita yachachijunga. Shinallata ñuca quiquingunaman imata villachijushcatapash tucuitami yarichijunga. 27 Ñucashnallata causanajuchunmi, casilla ali causaiguta quiquingunaman carashpa saquini. Chaitaca, cai pachapajtalla rurashpa causajcunaca, na caraita ushanllu. Ashtahuangarin quiquingunapaj shungupica, na musparishpa pandarinachu canguichi, na manllanachu canguichi. 28 ‘Cunanga rigrinimi, cutin quiquingunapajman tigramushami’ nishcataca ñami uyarcanguichi. Quiquinguna ñucata juyashpaca: ‘Ñucapaj Taitapajman rigrinimi’ nijpica, cushijunguichimanmi. Ñucapaj Taitaca, ñucata yali ushaitami charin. 29 Cunanga, ñuca nishcacuna nara tucujpillatami, quiquingunaman ña villachijuni. Ña chashna tucujpica, ñuca nishcataca yarishpa crinajuchunmi, cashna villachijuni. 30 Cai pachapajtalla rurachishpa mandajmi ña shamujun. Shina cajpimi quiquingunahuanga, na ashtahuan parlagrini. Chai mandaj shamushpapash, ñucataca na imatapash ruraita ushangachu. 31 Ashtahuangarin cai pachapi causajcuna ñucapaj Taitata juyajujta yachachunmi, ñucapaj Taita mandashcashna imatapash pactachijuni. Cunanga, jatarishpa jacuchi.
Jesusca, uvas yurashnapachami
1 Ñucami, uvas yuragushnapacha cani. Ñucapaj Taitaca, uvas chagrata cuidaj runagushnami capan. 2 Ñucapi malquishna causajcuna na fucujpica, paillatami cuchushpa shitanga. Aliguta fucujujtaca, ashtahuan fucuchunmi ima nali tiajujtapash anchuchinga. 3 Quiquinguna nalita rurashpa causashcataca, ñuca villachijushca shimicunami ña anchuchirca. 4 Quiquingunaca, ñucahuanmi causajunalla canguichi. Shina causajpimi, ñucapash quiquingunapaj shungupi causajushalla. Uvas yuramanda malquita anchuchijpica, na chai malquipilla fucunllu. Quiquinguna na ñucahuan causanajushpaca, quiquingunapash chashnallatami canguichi. 5 Ñucami, uvas yuragu cani. Quiquingunaca, ñucapaj malquicunami canguichi. Ñucahuan causajujpillami, ñucapash paihuan causajushalla. Shina causajujpimi, granota fucunshna causajunga. Quiquinguna ñucahuan na causashpaca, imata ruraitapash na ushashpami causanajunguichi. 6 Ñucahuan na causajujtaca, na fucuj malquitashnami canllaman shitanga. Ña chaquijpica tandachishpa, ninapi shitajpimi rupajunga. 7 Quiquinguna ñucahuan causashpa ñuca villachijushca shimicunatapash yariashpa causashpaca, imaguta cashpapash ñucapaj Taitata mañanguichilla. Paica carangallami. 8 Aliguta fucujunshna causajpimi, ñucapaj yachajujcunapacha cajtaca ricunga. Shina ricushpami, ñucapaj Taitaca punchapambagumi cangui ninajunga. 9 Ñucapaj Taita ñucata juyanshnami, ñucapash quiquingunataca juyajuni. Ñuca quiquingunata juyajunshna, juyarishpa causanajunguichi. 10 Ñucapaj Taita imata mandashcata pactachijushpami, pai juyajpi causajuni. Quiquingunapash ñuca mandashca shimicunata pactachijushpaca, ñuca juyajujpimi causanajunguichi. 11 Cai shimicunataca, quiquinguna ñucahuan cushijunajuchunmi villachijuni. Chashna cashpami, quiquingunaca ninandapacha cushijushpa causanajunguichi. 12 Quiquingunataca, caitami mandani: Imashnami quiquingunata ñuca juyarcani, chashnallata caishujhuan chaishujhuan juyarishpa causanguichi ninimi. 13 Maijambash pai juyashca cumbacunamanda huañushpaca, ninandapacha juyajtami ricuchijun. 14 Ñuca imata mandashcata rurashpaca, ñuca juyashca cumbacunami canguichi. 15 Servij runaca, paipaj amo imata rurajta na yachanllu. Ashtahuangarin ñucapaj Taita ñucaman imata villachijushcatapash, tucuitami quiquingunaman ña villachijurcani. Shina cashpami quiquingunataca, ñuca juyashca cumbacunami canguichi nini. Ñucata servijcunami canguichi nishpaca, na ashtahuan nishachu. 16 Quiquingunataca ñucami agllarcani. Shina cajpimi quiquingunaca, ñucataca na agllahuarcanguichi. Aliguta fucuj yuragushna causangapaj rinajuchunmi, quiquingunataca agllarcani. Chai mirashcacunataca, causaita causagrichunmi munani. Chashna cajpica, quiquinguna ñucapaj shutipi ñucapaj Taitata imaguta mañajpipash, paica carangallami. 17 Quiquingunataca, caishujhuan chaishujhuan juyarishpa causanguichi nishpami mandani.
Cai pachapajtalla rurashpa causajcunaca, quiquingunataca millanayachingami
18 Cai pachapajtalla rurashpa causajcunaca, quiquingunataca millanayachingami. Quiquingunata nara ricunayachishpallatami, ñucata ña millanayachishcata yaringuichi. 19 Cai pachapajtalla rurashpa causajcunashna quiquingunapash causajpica, paicunaca quiquingunata juyanmanmi. Ashtahuangarin quiquingunataca, cai pachapajtalla rurashpa causaj puramandami agllarcani. Na cai pachapajta rurashpa causajpimi, quiquingunatapash millanayachin. 20 Ñuca villachijushca shimicunata yaringuichi: ‘Servij runaca, paipaj amota na yalichu can’ nircanimi. Ñucata catiriashpa llaquichinshnami, quiquingunatapash catiriashpa llaquichinajunga. Ñuca villachijushca shimicunata cazushpaca, quiquinguna villachijushcatapash cazunajungami. 21 Ashtahuangarin ñucapaj shutipi villachijujpimi, quiquingunataca cai tucuita llaquichinajunga. Paicunaca, ñucata cachamuj Taitataca na rijsinllu. 22 Juchata rurajcunami canguichi nishpa villachingapaj ñuca na shamujpica gentecunaca, juchata rurashcataca na yachanmanllu carca. Ashtahuangarin cunanga, juchata na rurashcanichu nitaca na ushanajunllu. 23 Pipash ñucata millanayachishpaca, ñucapaj Taitatapash millanayachinmi. 24 Paicunapaj ñaupajpica, pipash na ruraita ushashcatami, imagutapash rurashpa purijurcani. Na chashna rurashpa purishca cajpica, paicuna juchata rurashcata na yachamanllu carca. Cunanga, chashna rurashcata ricushca cashpapashmi ñucatapash, ñucapaj Taitatapash millanayachinajun. 25 ‘Yanga yangamandami, ñucataca millanayachihuarca’ nishpami, paicunata mandashca shimipica villachijun. Chashna nishca pactachunmi millanayachinajun. 26 Ashtahuangarin ñucami, ñucapaj Taitapajmanda quiquingunata Cushichijta cachamusha. Chaica, Diospaj na llullaj Espiritumi capan. Chai Espíritu Taitapajmanda shamushpami, ñucamandaca villachijunga. 27 Quiquingunaca, ñuca villachi callarishca punllamandapachami, ñucahuan purircanguichi. Shina cashpami quiquingunapash, ñucamandaca chashnapachami nishpa villachinajunguichi.
1 Cai shimicunataca, quiquinguna ama nitijanshna pandashpa purinajuchunmi villachijurcani. 2 Quiquingunataca, tandanajuna huasicunamandapash llujchishpami cachanga. Maijambash quiquingunata huañuchishpaca, Taita Dios munashcatami pactachinchi nina punllacunami chayamujun. 3 Ñucapaj Taitatapash, ñucatapash na rijsishpami, chashna llaquichinajunga. 4 Chai punllacuna chayamujpica, quiquingunaman ñuca villachijushcata yarinajuchunmi, cai villachinacunata quiquingunaman villachijurcani. Cai shimicunataca, quiquingunahuan ñuca purijushpami, quiquingunahuan puri callarishca punllamandapacha nara villachircani.
Diospaj jucha illaj Espiritumi yachachinga nishcami
5 Cunanga, ñucata cachamuj Taitapajmanmi rigrini. Shina nijpipash: ‘¿Quiquinga, maimanda rigrijungui?’ nishpaca, maijambash na tapuhuanguichica. 6 Ashtahuangarin chaita nishcamandami, quiquingunapaj shungupica ninanda llaquiyanguichi. 7 Napacha llullashpami, quiquingunataca cashna nijuni: Ñuca rishpaca, quiquingunapaj ali cachunmi risha. Ñuca na rijpica, quiquingunata ali Cushichijca na shamungachu. Ñuca rishpallami, quiquingunata ali Cushichijtaca cachamusha. 8 Pai shamushpami, cai pachapajtalla rurashpa causajcunataca juchata rurajcuna cajtapash, justiciatapash, jucio shamunatapash ricuchijunga. 9 Ñucata na crishcamanda, juchayu causanajujtami ricuchinga. 10 Justiciata ruranataca, ñucapaj Taitapajman tigrajpi, ñucata na ashtahuan ricunatami ricuchinga. 11 Juciota ruranataca, cai pachapajtalla rurachishpa mandajta juzgashcatami ricuchijunga. 12 Quiquingunaman villachinataca, ashtacatami charini. Shina cajpipash cunanda yachajuitaca, na ushanguichica. 13 Ashtahuangarin Diospaj na llullaj Espíritu shamushpami, na llullashpa imagutapash tucuita quiquingunataca yachachijunga. Paica, na paipaj munaica imatapash villachijungachu. Ashtahuangarin uyashcatallami, tucuita villachijunga. Paimi, jipa punllacuna ima tucunatapash quiquingunaman yachachijunga. 14 Paimi, ñucamanda imata yachachinatapash, quiquingunataca yachachijunga. Shina yachachijushpami, ñucataca punchapambami cangui nihuanga. 15 Ñucapaj Taita imaguta charishcapash ñucapajmi. Shina cajpimi, Diospaj Espirituca ñucamanda yachajushpa, quiquingunaman yachachij shamunga nini.
Llaquilla canaca, cushijuimi tigranga nishcami
16 Ashaguta tiajushca jipami, quiquingunaca na ricuhuanguichi. Ashaguta illashca jipaca, cutin ricuhuanguichimi. Ñucapaj Taitapajmanmi rigrini— nijurcami. 17 Shina nijpimi Jesuspaj yachajuj puramanda huaquingunaca, paipura cashna nishpa tapurirca: —¿Ima nishpata: ‘Ashaguta tiajushca jipami, quiquingunaca na ricuhuanguichi. Ashaguta illashca jipaca, cutinmi ricuhuanguichi. Ñucapaj Taitapajmanmi rigrini’ nijun?— ninajurcami. 18 Paicuna purami: “¿Ima nishpata: ‘Ashaguta tiajusharami’ nijun? Pai chashna nijujtaca na yacharinllu” ninajurca. 19 Jesusca, paita tapungapaj munanajujta yachashpami cashna nijurca: —¿Quiquingunaca: ‘Ashaguta tiajushca jipami, na ricuhuanguichi. Ashaguta illashca jipaca, cutinmi ricuhuanguichi’ nishcatachu quiquingunapura tapuringuichi? 20 Napacha llullashpami, quiquingunataca cashna nijuni: Quiquingunaca huacashpa, llaqui llaquimi purinajunguichi. Ashtahuangarin cai pachapajtalla rurashpa causajcunaca, ninandami cushijunga. Quiquingunaca, llaqui llaqui cashpapash, cutinmi cushijunguichi. 21 Maijan huarmipash, unguna punlla pactajpi nanachijushpaca llaquillami tiajun. Ashtahuangarin huahuaguta ungushca jipaca, nanachishcataca cunganllami. Huahuaguta cai pachapi charishpa cushijuimandami, chashna cungan. 22 Shinallatami cunanga, quiquingunapash llaqui llaqui canguichi. Ashtahuangarin quiquingunata ricungapaj ñuca tigramujpimi, tucui shungu ninandapacha cushijunajunguichi. Chai cushijuitaca, pipash na anchuchi ushangachu. 23 Chai punlla chayamujpimi, na ashtahuan tapuhuanguichi. Napacha llullashpami, quiquingunataca cashna nijuni: Ñucapaj shutipi ñucapaj Taitata imaguta mañajpipash, paica carangallami. 24 Cunangamanmi paitaca, nara imatapash ñuca shutipica mañanguichi. Quiquinguna ninanda cushijushpa causanajungapaca mañanguichilla, japinguichimi.
Cai pachapi ima nali tiajtapash misharcanimi nishcami
25 Cunangamanmi, chimbapurashpa yarichinacunahuan villachijurcani. Shina chimbapurashpa yarichinacunahuan na villachina punllacunami chayamujun. Ashtahuangarin quiquinguna entendinajuchunga, ñucapaj Taitamandami aligutapacha villachijusha. 26 Chai punlla chayamujpimi, quiquingunaca ñucapaj shutipi ñucapaj Taitata mañanguichi. Quiquingunamandaca ñucami, ñucapaj Taitata mañashataca na ninichu. 27 Quiquingunaca ñucata juyahuanguichimi. Taita Diospajmanda ñuca shamushcatapash crihuanguichi. Shina cajpimi, ñucapaj Taitaca quiquingunata juyajun. 28 Ñucapaj Taitamanda llujshishpami, cai pachaman shamurcani. Cunanga cai pachata saquishpami, ñucapaj Taitapajman cutin rigrijuni— nijurcami. 29 Shina nijpimi Jesuspaj yachajujcunaca, cashna ninajurca: —Ricui cunanga, chimbapurashpa yarichinacunahuan na villachishpami, yachajunalla shimicunata villachijungui. 30 Cunanga, quiquinga imagutapash tucuita yachajlla cajtami ricunajunchi. Pipash nara tapujpillata, tucuita yachanguillami. Chaimandami quiquindaca, Taita Diospajmanda shamushcata cripanchi— ninajurcami. 31 Shina nijpimi Jesusca, cashna nishpa tigrachirca: —Cunanga ña crihuanguichimi. 32 Ricuichi, quiquingunataca ñallami calpachigrin. Chaica, ñamari pactamushca. Shina calpachijpimi, ñucatalla saquishpa, quiquinguna maipi causajushcaman, caita chaita ringuichi. Shina rijpipash, na ñucallachu cani. Ñucapaj Taitaca ñucahuanmi. 33 Quiquinguna ñucahuan shujlla tucushpa, casilla ali causaiguta charichunmi, cai tucuita villachijuni. Cai pachapi causashpaca, ninandami llaquichi tucunajunguichi. Ashtahuangarin Diosta yariashpami causana canguichi. Ñucallami, cai pachapi ima nali tiajtapash ña misharcani— nijurcami.
Jesús paipaj yachajujcunamandami, Diosta mañashca
1 Jesusca, cai tucuita villachijushpami, jahua pachata vichai ricushpa cashna nijurca: “Ñuca Taitalla, ñucata japichina horasca ñamari chayamushca. Quiquimbaj Churi ñucataca, punchapambagumi cangui nihuailla. Quiquimbaj Churi ñucapash, punchapambagumi cangui nipashami. 2 Tucuicunata mandachunmi, quiquimbaj ushaitaca ñucaman carahuarcangui. Shinallatami quiquin ñucaman carashca tucuilla gentecunamambash, causaita causagrinata carani. 3 Na llullaj shujlla Taita Dios cashpami, quiquimbaj Churi Jesucristotaca cachamuhuarcangui. Shina cajta rijsishpallami, pipash causaita causagringa. 4 Quiquin ñucaman imata rurachun mingashcataca, ñami pactachircani. Shina cashpami, cai pachapica punchapambami cangui nijuni. 5 Ñuca Taitalla, nara cai pachata churashpallatami, punchapambagumi cangui nijpi canhuanga tiajurcani. Cunambash, chashnallata punchapambagumi cangui nihuayari. 6 Cai pachapajtalla rurashpa causajcunatami, ñucaman carangapaj agllaparcangui. Paicunamanmi, quiquimbaj shutiguta rijsichircani. Paicunataca quiquimbajlla cajpimi, ñucaman carahuarcangui. Shina cashpami, quiquimbaj shimicunata cazunajun. 7 Tucui imatalla ñucaman carashcatapash, quiquimbajlla cajtami paicunaca cunambi yachanajun. 8 Ñuca villachijuchun quiquin mingashca shimicunataca, paicunaman villachijurcanimi. Chaita villachijujpimi, paicunaca chasquirca. Quiquinmanda ñuca shamushcatapash, alipachami yachan. Shinallata quiquin ñucata cachamushcatapash crinmi. 9 Paicunamandami quiquindaca mañajuni. Cai pachapajtalla rurashpa causajcunamandaca, na mañanichu. Ashtahuangarin quiquin ñucaman carashcacunaca, quiquimbajllami causanajun. Paicunamandami quiquindaca mañajuni. 10 Tucui imatalla ñuca charishcapash quiquimbajmi. Shinallata can imaguta charishcapash ñucapajmi. Paicunapimi, ñucapash punchapambagumi cangui ni tucushcani. 11 Cunanga, cai pachapi na quedashpami, quiquimbajman shamugrini. Ashtahuangarin paicunaca, cai pachapillatami quedanajunga. Jucha illaj Taitalla, quiquin ñucaman carashcacunataca, paicunapash ñucanchishnalla shujlla cachun, quiquimbaj ushaihuan aliguta charipangui. 12 Quiquin ñucaman carashcacunahuan cai pachapi cashpaca, quiquimbaj ushaihuanmi paicunataca aliguta charircani. Paicunaca, shujllapash na chingarcachu. Ashtahuangarin quiquin escribichishca Shimipi nijuj pactachunmi, chingangapaj purijushca runalla chingarca. 13 Cunanga, quiquimbajmanmi shamugrini. Paicunapash ñuca ninanda cushijunshna cushijunajuchunmi, cai pachapi cashpallata cashna nijuni. 14 Quiquimbaj Shimitapash, paicunaman villachijurcanimi. Ñucapash, paicunapash na cai pachamanda cajpimi, cai pachapajtalla rurashpa causajcunaca millanayachirca. 15 Paicunataca, cai pachamanda anchuchupai nishpaca, na mañanichu. Ashtahuangarin nalita rurachijujmanda jarcapangui nishpallami, quiquindaca mañajupani. 16 Imashnami ñuca na cai pachamanda cani, shinallata paicunapash na cai pachamandachu capan. 17 Quiquin na llullashpa villajuj Shimita catishpa quiquimbajlla causanajuchun, paicunataca charipayari. Quiquimbaj Shimica, napacha llullajchu. 18 Cai pachapi causajcunaman villachijuchunmi, ñucataca cachamuhuarcangui. Shinallatami ñucapash, paicunataca cai pachapi causajcunaman villachijuchun cachajuni. 19 Na llullashpa villajuj Shimita catishpa quiquimbajlla causanajuchunmi, paicunamandaca ñucallata quiquinman cararigrini. 20 Quiquindaca, na paicunamandalla mañajupanichu. Paicuna villachinajujpica, shujcunapash ñucataca crinajuhuangami. Paicunamandapashmi mañajupani. 21 Paicunapura shujlla tucushpa causanajuchun nishpami, quiquindaca mañajupani. Ñuca Taitalla, quiquinhuan ñucahuanga shujllami canchi. Shinallata paicunapash, ñucanchihuan shujlla tucushpa causanajuchunmi mañajupani. Shina causanajujpimi, cai pachapi causajcunaca quiquin ñucata cachamushcata crinajunga. 22 Quiquinhuan ñucahuanga, shujllami canchi. Quiquin ñucata punchapambami cangui nishpa charishcashnami, paicunapash shujlla tucushpa causanajuchun ña curcani. 23 Quiquinga, ñucahuanmi causajungui. Ñucapash, paicunapaj shungupimi causajuni. Shina cajpimi, paicuna purapash shujlla tucushpa, ima pandatapash na rurashpa causanajunga. Quiquinga, ñucataca ninandami juyahuangui. Shinallatami paicunatapash juyajungui. Shina juyajujtapash, quiquin ñucata cachamushcatapash, cai pachapajtalla rurashpa causajcunaca yachangami. 24 Ñuca Taitalla, cai pachata nara rurashpallatami, ñucataca ninanda juyashpa charihuarcangui. Quiquin ñucata punchapambagumi cangui nijta ricunajuchunmi, can ñucaman carashcacunaca, ñuca maipimi cani chaipillata paicunapash ñucahuan cachun munani. 25 Ñuca Taitalla, quiquinga justomi cangui. Cai pachapajtalla rurashpa causajcunaca, quiquindaca na rijsinajunllu. Ñucallami quiquindaca rijsini. Ashtahuangarin paicunaca, quiquin ñucata cachamushcataca alimi yachan. 26 Paicunamanmi, quiquimbaj shutigutaca ña rijsichircani, ashtahuan rijsichisharami. Shina cashpami, quiquin ñucata juyajunshna, paicunapash juyarishpa causanajunga. Shinallata ñucapash paicunapaj shungupimi causajusha” nijurcami.
Jesustaca prezu apashcami
1 Jesusca, chashna nishca jipami, paipaj yachajujcunata pushashpa, ninanda jatarijuj Cedrón shuti huaicu yacu chimba ladoman rirca. Chaipica, shuj huerta pambami tiarca. Chaimanmi Jesusca, paipaj yachajujcunandi yaicurca. 2 Chaipimi Jesusca, paipaj yachajujcunandi cutin cutin tandanajun carca. Shinamandami, Jesusta japichij Judaspash chai huertataca rijsirca. 3 Shina rijsishpami Judasca, ashtaca soldadocunata, curacunata mandajcunahuan, fariseocunahuan parlarishpa cachamushca cuidajcunatapash pushashpa rirca. Paicunaca michacunata, michungunata, macanajunacunatapash apashcami shamurca. 4 Jesusca, imata paita ruranatapash tucuita yachashpami, ñaupashpa rishpa: —¿Pitata mascaj shamunguichi?— nishpa tapurca. 5 Shina tapujpimi: —Ñucanchica, Nazaret pueblomanda Jesustami mascaj shamunchi— ninajurca. Shina nijpimi, Jesusca: —Ñucamari chai cani— nirca. Chai soldadocunahuanga, Jesusta japichij Judas runapashmi shamujushca carca. 6 Jesús: “Ñucami chai cani” nijpimi chai soldadocunaca, huashaman suchurishpa alpaman shitarirca. 7 Jesusca cutinmi: —Quiquingunaca, ¿pitata mascanguichi?— nishpa tapurca. Shina tapujpimi: —Ñucanchica, Nazaret pueblomanda Jesustami mascanchi— ninajurca. 8 Shina nijpimi Jesusca, cashna nishpa tigrachirca: —Ñucaca ñami: ‘Ñucamari chai cani’ nishpa villachircani. Ñucata mascanajushpaca, ñucapaj cumbacunataca richun saquichi— nircami. 9 “Ñucapaj Taita ñucaman carashcacunataca, shujllatapash na chingachircanichu” nishpa, Jesús nijushca pactachunmi, chashnaca nirca. 10 Simón Pedroca, shuj espadatami charirca. Chaita surcushpami, Malco shuti runapaj ali lado rinrita muchurca. Chai runaca, curacunata mandajpaj servijmi carca. 11 Shina muchujpimi Jesusca, Pedrota cashna nirca: —Quiquimbaj espadataca, maipi tiajushca pillata cutin alichilla. Ñucapaj Taita cushca copamandaca, ¿nachu ufiana cani?— nircami.
Curacunata mandajpaj ñaupajmanmi, Jesustaca apashca
12 Shina nijpimi soldadocunapash, soldadocunata mandajpash, judiocuna cachamushca cuidajcunapash, Jesustaca japishpa huatanajurca. 13 Chashna japishpami, Anás shuti curapaj huasimanra, Jesustaca punda aparca. Chai curami, Caifás shuti curapaj suedro carca. Caifás runaca, chai huatapica curacunata mandajmi carca. 14 Chai Caifás curallatami: “Cai llactapi causajcunamanda shujlla runa huañunaca, alipachamari” nishpa judiocunaman yuyaita cushca carca.
Pedroca, Anás shuti curapaj huasi patiopimi cashca
15 Jesusta apanajujpica, Simón Pedropash shuj yachajujpashmi catishpa rijurca. Pedrohuan rijushca chai yachajujtaca, curacunata mandajpash rijsijmi carca. Paimi, mandaj curapaj huasi patioman, Jesusta catiriaj yaicurca. 16 Ashtahuangarin Pedroca na yaicushpami, pungu huashapi shayajurca. Shina shayajujpimi, chaishuj yachajujca mandaj curapaj rijsij cashpa, punguta cuidajuj cuitsataca: —Pedro yaicumuchun saquipai— nigrirca. Shina nishpami Pedrotaca, ucuman pusharca. 17 Shina yaicujpimi, punguta cuidaj cuitsaca: —¿Nachu chai runapaj yachajujpura cangui?— nishpa, Pedrotaca tapurca. Shina tapujpimi Pedroca: —Na chai purachu cani— nirca. 18 Chiri chiri cajpimi, servijcunapash, huasita cuidajcunapash, yamdata rupachishpa cununajurca. Paicunahuanmi, Pedropash cunushpa shayajurca.
Jesustaca, curacunata mandaj Anasmi tapuchishca
19 Jesustaca, paipaj yachajujcunamandapash, pai imata yachachishpa purishcatapash, curacunata mandajmi tapuchi callarirca. 20 Shina tapujpimi Jesusca, cashna nishpa tigrachirca: —Ñucami tucuilla gentecuna uyanajujta villachishpa purijurcani. Judiocunaca, tandanajuna huasicunapipash, Diospaj huasipipashmi tandanajun. Chaicunapipash, tucuicunamanmi yachachishpa purijurcani. Imagutapash na pacalla villachijurcanichu. 21 ¿Imamandata ñucataca tapuchihuangui? Ñuca imata villachijushcata uyashcacunaca, tucuitami yachan. Paicunata tapuchilla— nijurcami. 22 Jesús chashna nijujpimi, chaipi shayanajuj cuidaj puramanda shuj runaca: —Mandaj curataca, ¿cashna nishpachu tigrachingui?— nishpa ñavipi huactarca. 23 Shinamandami Jesusca, cashna nishpa tigrachirca: —Ima nalita nijushca cajpipash, chashnapachami nalita nijushca nishpa villachilla. Ashtahuangarin aliguta nijushca cajpica, ¿imamandata cashna huactahuangui?— nijurcami. 24 Chai jipami Jesustaca, maquita huatashpa curacunata mandaj Caifás shuti curapajman apanajuchun, Anás shuti cura cacharca.
Cutinmi Pedroca, Jesustaca na rijsinichu nijushca
25 Jesusta tapuchijujpica, Pedroca chaipillatami cunushpa shayajurca. Shina shayajujpimi: —¿Nachu quiquimbash, chai runapaj yachajujpura cangui?— nishpa tapurca. Shina nijpimi Pedroca: —Napacha chai purachu cani— nirca. 26 Chai jipami, curacunata mandajta servijpura shuj runaca, Pedrota cashna nirca: —¿Nachu quiquindapash, huertapi chai runahuan cajta ricurcani?— nircami. Cashna nijuj runaca, rinrita Pedro muchushca runapaj familiami carca. 27 Pedroca cutinmi: —Napacha chaipichu carcani— nirca. Shina nishca jipallami, galloca ñapash cantarca.
Pilatopaj ñaupajmanmi, Jesustaca apashca
28 Narapash ali punllayajpillatami Jesustaca, Caifás shuti curapaj huasimandaca, mandaj Pilatopajman apashpa rinajurca. Ashtahuangarin paicunaca, chai mandajpaj huasiman na yaicurcachu. Paicunaca, pascua fiestata yarishpa micungapaj, ama mapayashun nishpami na yaicurca. 29 Shinamandami Pilatoca, canllaman llujshishpa: —Cai runataca, ¿imata juchachishpata apamunguichi?— nirca. 30 Shina nijpimi, cashna nishpa tigrachirca: —Imatapash nalita na rurashpa purij cajpica, na quiquinman cungapaj apamunchimanllu carca— ninajurcami. 31 Shina nijpimi Pilatoca, cashna nijurca: —Quiquingunata mandashca shimipi nijunshna, imatalla rurashcata ricushpa, quiquingunallata juzgangapaj apaichilla— nijurcami. Shina nijujpimi, judiocunaca: —Ñucanchica, pitapash na huañuchi ushana canchica— ninajurca. 32 Jesús imashna huañuchi tucunata villachijushca shimicuna pactachunmi, paicunaca shina ninajurca. 33 Pilatoca, pai mandashpa tiajuj ucuman tigrashpa yaicushpami, Jesusta cayachishpa: —¿Quiquinllu judiocunata Jatun Mandaj cangui?— nirca. 34 Shina nijpimi Jesusca, cashna nishpa tigrachirca: —¿Quiquimbaj munaichu cashna tapuhuangui, na cashpaca shujcunachu ñucamanda villachij shamurca?— nircami. 35 Shina nijpimi Pilatoca, cashna nishpa tigrachirca: —¿Ñucataca, judío runa yanguichu? Ashtahuangarin quiquimbaj llactapi causajcunallata, mandaj curacunallatami quiquindaca, ñucapajman apamushca. ¿Quiquinga, imatata rurashpa purijurcangui?— nircami. 36 Shina nijpimi Jesusca, cashna nishpa tigrachirca: —Ñuca mandana llactaca, na cai pachapi tiajunllu. Cai pachata ñuca mandana cajpica, ñucata servijcunami judiocuna ñucata ama japichunga, paicunahuan macanajunman carca. Ashtahuangarin ñuca mandana llactaca, na cai pachapi tiajunllu— nircami. 37 Shina nijpimi Pilatoca: —Shinaca, ¿jatun mandajchu cangui?— nishpa, Jesusta tapurca. Shina nijpimi Jesusca, cashna nirca: —Quiquinllatami, jatun Mandajmi cangui nihuangui. Shina cashpami, na llullashpa villachingapaj cai pachapi huacharimurcani. Na llullashpa villachijujta cazujcunaca, tucuillami ñuca imata villachijujtapash aliguta uyanajun— nircami. 38 Shina nijpimi Pilatoca: —¿Imata na llullayari?— nishpa tapurca. Shina tapushpallami Pilatoca, cutin llujshishpa judiocunata cashna nijurca: —Cai runa ima nalita rurashcatapash na tarinichu. Shina cajpimi, na juchachita ushani. 39 Ashtahuangarin pascua fiestapica, quiquingunaca prezu tiaj puramanda shujta cacharipai ninatami yachanguichi. Shina cashcamanda, ¿judiocunata Jatun Mandajtachu cacharichun munanguichi?— nijurcami. 40 Shina nijujpimi, tucuicuna cutin ninanda caparinajushpa: —Chai runata cacharichunga, na munanchica. Ashtahuangarin Barrabás shuti runatami cacharichun munanchi— ninajurca. Barrabás runaca, ninan shuhuami carca.
1 Chashna caparinajujpimi Pilatoca, Jesusta japishpa astichun mandarca. 2 Chai jipaca soldadocunaca, cashata ahuashpa rurashca coronatami, Jesuspaj umapi churachirca. Shinallata morado, jahualla churajunatapashmi churachirca. 3 Chashna churachishpallami: —¡Judiocunata Jatun Mandaj, quiquinga juyaillagumari cangui!— nij tucushpalla ñavipi huactanajurca. 4 Pilatoca, cutinllata canllaman llujchishpami cashna nijurca: —Ricuichi, cai runataca ima nalita rurashcatapash na ricunichu. Chaita quiquinguna yachachunmi, caiman llujchimuni— nijurcami. 5 Jesusca, cashata ahuashpa rurashca coronata umapi churajushca, morado jahualla churajunata churajushcami llujshijurca. Shina llujshijujpimi Pilatoca: —¡Cai runata ricuichi!— nirca. 6 Shina nijpimi curacunata mandajcunapash, Diospaj huasita cuidajcunapash, Jesusta ricushpaca: —¡Chacatailla! ¡Chacatailla!— nishpa ninanda caparinajurca. Shina caparinajujpimi Pilatoca, cashna nijurca: —Cai runataca, quiquingunallata apashpa cruzpi chacataichilla. Ñucaca, ima nalita rurashcatapash na ricunichu— nijurcami. 7 Shina nijujpimi judiocunaca, cashna nishpa tigrachinajurca: —Ñucanchica, shuj mandashcatallami charinchi. Chai mandashcapi nijunshnaca, chai runaca: ‘Taita Diospaj Churimi cani’ nishpa purijuimandaca huañunapachami can— ninajurcami. 8 Chashna ninajujpimi Pilatoca, ashtahuan manllarirca. 9 Pai mandashpa tiajuna ucuman cutin yaicushpaca: —Quiquinga, ¿maimandata cangui?— nishpami tapurca. Ashtahuangarin Jesusca, upalla shayajurcallami. 10 Shina shayajujpimi Pilatoca, Jesusta cashna nijurca: —¿Imashpata na ñucahuan parlangui? Quiquinda cacharingapajpash, ushaita charinimi. Chacatangapajpash ushaita charinimi. Chaitaca, ¿nachu yachangui?— nijurcami. 11 Shina nijujpimi Jesusca, cashna nishpa tigrachirca: —Taita Dios quiquinman ushaita na carashca cajpica, ñucataca imata ruraitapash na ushanguimanllu. Tucuimanda yalica, ñucata quiquinman cushca runami, quiquindapash yali juchata charin— nijurcami. 12 Shina nijujpimi Pilatoca, Jesusta imashnata cacharishayari yajurca. Ashtahuangarin judiocunaca, cashna nishpami ninanda caparinajurca: —Chai runata quiquin cacharishpaca, na Cesarpaj ali cumbachu cangui. Maijambash: ‘Ñucami jatun mandaj cani’ nirijushpaca, Cesartami ninanda fiñan— ninajurcami. 13 Shina ninajujta uyashpami Pilatoca, Jesusta canllaman llujchishpa, pai mandashpa tiajushcapi tiarirca. Chai ucuca, Rumicunahuan rurashca ucumi carca. Chaimandami hebreo rimaipica, Gabata nishpa shutichishca. 14 Pascua fiesta micuipaj alichinajujpi, ña chaupi punlla chayajujpica: —¡Ricuichi, quiquingunata jatun Mandaj runaca caipimi!— nishpami judiocunaman ricuchirca. 15 Shina nijpimi paicunaca, ashtahuan caparinajushpa: —¡Llujchilla, llujchilla! ¡Chacatailla!— nishpa ninanda caparinajurca. Shina caparijpimi Pilatoca: —¿Quiquingunata jatun Mandajtachu chacatachisha?— nirca. Shina nijpimi, curacunata mandajcunaca: —Ñucanchica, Cesartallami jatun mandajta charinchi— nishpa tigrachirca. 16 Shina ninajujpimi, paicunallata Jesusta chacatagrichun, Pilatoca cushpa saquirca. Shina saquijpimi, paicunaca Jesusta apashpa rinajurca.
Jesustaca chacatashpami huañuchishca
17 Jesusca, cruzta aparishpa llujshishpami, Uma Tullu shuti lomaman chayagrirca. Chai lomaca, hebreo rimaipica Gólgota shutimi can. 18 Chai lomapimi, Jesustaca chacatanajurca. Paitaca, ishcai runacunapaj chaupipi churashpami chacatanajurca. 19 Jesús chacatariajuj cruzpi churachunmi, Pilatoca escribishcata cacharca. Chai escribishca tablapica, cashnami nijurca: “CAICA, NAZARET PUEBLOMANDA JESUSMI. PAICA, JUDIOCUNATA JATUN MANDAJMI” nijurcami. 20 Chai shimicunataca hebreo, griego, latín rimaicunapi escribishcami carca. Jesusta chacatashca pushtuca, Jerusalén pueblo ladollapimi carca. Shina cajpimi judiocunaca, ashtacacuna chai escribishcataca leyinajurca. 21 Shinamandami judiocunapaj curacunata mandajcunaca, Pilatotaca cashna nigrirca: —‘Judiocunata jatun Mandajmi’ nishpaca, na escribinachu carcangui. Ashtahuangarin ‘Ñucami, judiocunata jatun Mandaj cani’ nishpa, paillata nijushcata escribipai— ninajurcami. 22 Shina nijpimi Pilatoca: —Ñuca imata escribishcapash, ñami escribishca tiajun— nirca. 23 Soldadocunaca, Jesusta chacatashpami, paipaj churajunataca chuscupi chaupishpa, shuj shuj japinajurca. Shinallata paipaj jahualla churajunatapashmi japinajurca. Chai churajunaca, na sirashcachu carca. Jahuamanda ura pundacaman, jatunda ahuashcami carca. 24 Shina cajpimi, paipura cashna ninajurca: —Ama chaupirishpa, maijambaj urmachumbash suerteta rurashunchi— ninajurcami. Dios escribichishca Shimipi nishcashna pactachunmi, chashna ruranajurca. Chaipica cashnami nijun: “Ñuca churajunataca, paicunapura chaupirircami. Ñuca churajunapaj jahuapillatami, suerteta ruranajurca” nijunmi. 25 Jesús chacatariajuj ladomanga, paipaj mamapash, paipaj ñañandi, Cleofas shuti runapaj huarmi Mariandi, Magdala shuti pueblomanda Mariandimi, chaipi shayanajurca. 26 Jesusca, paipaj mamatapash, pai juyashca yachajujtapash, chaipi shayajujtami ricurca. Shina ricushpami Jesusca, paipaj mamagutaca: —Ricui mama, caipimi cambaj churi— nirca. 27 Chai jipami, paipaj juyashca yachajujtapash cashna nirca: —Ricui, caipimi quiquimbaj mama— nircami. Shina nishcamandapachami, chai yachajuj runaguca paipaj huasipi causajuchun, Jesuspaj mamagutaca pusharca. 28 Chai jipami Jesusca, ña tucuita pactachishcata yacharca. Shina yachashpami, Dios escribichishca Shimipi nijuj pactachun: —Yacunayanmi— nirca. 29 Shina nijpimi soldadocunaca, shuj fundupi junda tiajuj vinagrepi esponjata mutiyachirca. Chaitaca, hisopo nishca caspi pundapi churashpami, Jesús chupachun shimiman chayachinajurca. 30 Chai vinagreta Jesús chupashpaca: —Ñami tucuita pactachircani— nircami. Shina nishpallami, umata urai huarcushpaca, paipaj espirituta Diosman mingashpa huañurca.
Jesustaca, costillaspimi lanzahuan tujsishca
31 Pascua fiestapaca, shuj punllallami tiarca. Cayapaca, samana punllapi ashtahuan jatun fiesta cajpimi, cruzpi chacatai tucushcacunaca, ama chaipillata saquishca cachunmi, judiocunaca Pilatopajman rishpa: —Chaquita faquishpa cruzmanda uriajuchingapaj richun cachapai— ninajurca. 32 Shina mañagrijpi soldadocuna shamushpami, Jesusta chaupipi churashpa, chacatai tucushca runacunapaj chaquitaca ishcandipajta faquirca. 33 Ashtahuangarin Jesuspajman chayashpaca, ña huañushcatami ricunajurca. Shina cajpimi, chaquitaca na faquinajurca. 34 Shina na faquishpapash, shuj soldadoca Jesuspaj costillaspimi, lanzahuan tujsirca. Shina tujsijpimi yahuarpash, yacupash llujshirca. 35 Shinamandami chaita ricuj runaca, chashnapachami nishpa villachijun. Pai villachijushca shimicunaca, na llullachu. Quiquingunapash crinajuchunmi, cashna villachijun. Chaitaca paipash yachambachami. 36 Dios escribichishca Shimipimi: “Paipaj tullutaca, shujllatapash na faquishcachu canga” nijun. Chai nishcami pactarca. 37 Dios escribichishca Shimipillata, shuj pushtupimi: “Paita tujsishca gentecunaca, cutinmi paitaca ricunajunga” nijun.
Jesusta pambashcatami villachijun
38 Tucui chai jipami, Arimatea shuti pueblomanda Joseca, Jesús huañushcata pambangapaj saquichun, Pilatota mañangapaj rirca. Shina mañajpimi Pilatoca, Jesús huañushcata apachun saquirca. Shina saquijpimi, Jesús huañushcata apashpa rirca. Joseca, judiocunata manllashpami, Jesús yachachijujtaca, pacalla uyashpa purin carca. 39 Paitaca, Nicodemo shuti runagupashmi cumbarca. Nicodemoca, pundatami Jesushuan parlangapaj shuj tuta rishca carca. Shina cashpami chai runaguca, mirra nishcahuan, áloe nishcahuan chapushca mishquillagu ashnajuj jambicunataca, shuj quintaltashna apamurca. 40 Jesús huañushcata apashpaca, mishquillagu ashnajuj chai jambita fachacunapi javishpami pilluchinajurca. Judiocunaca, chashna pambanatami yachan carca. 41 Jesusta chacatashca ladomanga, shuj huertami tiarca. Chai huertapica, pitapash nara pambashca mushuj utujuta rurashcami tiarca. 42 Chai utujuca ladolla cajpimi, Jesuspaj cuerpogutaca, chaipi churashpa jarcarca. Judiocuna pascua fiestata rurana ña chayajujpimi, chaillapi churanajurca.
Jesús causarishcatami villachijun
1 Domingo tutamandata nara ali punllayajpillatami, Magdala shuti pueblomanda María huarmiguca, Jesusta pambashcata ricungapaj rirca. Chaiman chayashpaca, chai utujuta quilpashca rumita ladoman churashcatami ricujurca. 2 Chaita ricujushpaca Simón Pedroman, Jesús juyashca caishuj yachajujpajmambash calpamushpami cashna nijurca: —Apunchi Jesustaca utujumanda apashcamari. Maipi churashcatapash, na yacharinllu— nishpami, villaj shamurca. 3 Shina nijpimi, Jesusta pambashca utujuta ricungapaj Pedropash, caishuj yachajujpash llujshishpa rinajurca. 4 Ishcandi calpashpaca, caishuj yachajujrami Pedrotaca mishashpa, chai utujuman punda chayagrirca. 5 Ña chayashpaca, chai utuju ladoman urai rishpami, chaipica fachacunatalla ricurca. Ashtahuangarin na yaicushpami shayajurca. 6 Jipaman Simón Pedro chayamushpaca, utuju ucuman yaicurcallami. Paipash fachacunatallami ricurca. 7 Jesuspaj umata pilluchishca telataca, na caishuj fachacunahuan tandachishpa, shican pillushca shuj pushtupi tiajujtami ricurca. 8 Utujuman punda chayamushca caishuj yachajujpashmi, catishpa yaicurca. Paipash, chaipica fachacunatalla ricushpami crirca. 9 “Huañushcacunapaj chaupimanda causarinapachami” nishpa tiajujtaca, paicunaca nara ali yachaita usharcachu. 10 Chashna illajta ricushpami, chai yachajujcunaca paicunapaj huasiman tigranajurca.
Magdala pueblomanda Mariamanmi, Jesusca ricurishca
11 Ashtahuangarin María huarmiguca, Jesusta pambashca utuju ñaupajpimi huacajurca. Paica huacajushpandimi, utuju ucutaca quinrai chapashpa ricujurca. 12 Shina ricujushpaca, yurajta churajushca ishcai angelcuna tianajujtami ricujurca. Jesús huañushcata churashca pushtupica, shuj angelca uma ladoman, shujca ura chaquiman tianajujtami ricujurca. 13 Chai angelcunami: —Quiquinga, ¿imamandata huacajungui?— nishpa tapurca. Shina tapujpimi María huarmiguca, cashna nirca: —Ñucata Mandaj Jesusta apashcamandami huacajuni. Paitaca, maipi churashcatapash na yachapanichu— nircami. 14 Shina nishpa tigrarishpa ricushpaca, Jesús shayajujtami ricujurca. Ashtahuangarin Jesustaca na rijsircachu. 15 Shina ricujpimi Jesusca: —Quiquinga, ¿imashpata huacajungui? ¿Pitata mascajungui?— nishpa tapurca. Shina tapujpimi María huarmiguca, huertata cuidaj runagumi yashpa cashna nijurca: —Ñucata Mandajlla, Jesús huañushcata maipi churangapaj apashca cashpaca villachihuailla, ñuca apamugripashallami— nijurcami. 16 Shina nijujpimi Jesusca: —¡María!— nirca. Shina nijpimi: —¡Raboni!— nishpa tigrachirca. (Raboni nishpaca, Yachachij nijunmi). 17 Shina nijpimi Jesusca, cashna nijurca: —Ñucataca ama tacarihuaichu. Nara ñuca Taitapajman vichai rinichu. Ashtahuangarin ñucapaj huauquicunapajman rishpa, cashna villachigripai: ‘Ñucapaj Taitaca, quiquingunapajpash Taitami capan. Ñucapaj Taita Diosca, quiquingunapajpash Taita Diosmi capan. Paipajmanmi vichai rina cani’ nigripai— nijurcami. 18 Shina nijujpi, Magdala shuti pueblomanda María huarmiguca, Apunchi Jesusta ricujushcatapash, paiman Jesús imatalla nijushcatapash, Jesuspaj yachajujcunaman villachingapaj rijurca. Shinallata Jesús paicunaman imata villachijuchun mingashcatapashmi villachijurca.
Paipaj yachajujcunamanmi, Jesusca ricurishca
19 Chai domingo chishillatami ña tutayajujpi, Jesuspaj yachajujcunaca tandanajushca tianajurca. Paicunaca judiocunata manllashpami, pungucunata ali vicharishpa tianajurca. Shina tianajujpimi, Jesusca yaicumushpa paicunapaj chaupipi shayarishpa: —Quiquingunapaca, casilla ali causaigu tiachun— nirca. 20 Shina nishpallami, paipaj ishcandi maquitapash, costillastapash paicunaman ricuchirca. Paipaj yachajujcunaca, Apunchi Jesusta ricushpaca ninandami cushijunajurca. 21 Shinamandami Jesusca, cutin cashna nirca: —Quiquingunapaca, casilla ali causaigu tiachun. Imashnami ñucapaj Taita ñucata cachamuhuarca, chashnallatami quiquingunatapash cachani— nircami. 22 Shina nishpallami, paicunapajman fucushpa cashna nijurca: —Diospaj jucha illaj Espirituta chasquichi. 23 Maijambaj juchacunatapash quiquinguna cungajpica, paicunapaj juchacunaca cungai tucushcami canga. Shinallata maijambaj juchacunatapash quiquinguna na cungajpica, na cungai tucushcachu canga— nircami.
Tomasca, Jesús causarishcatami na crishca
24 “Chai punllallata ishcandi huacharishcami” nishpa rijsishca Tomasca, Jesuspaj chunga ishcai yachajuj puracuna cashpapash, paicunapajman Jesús shamushca horasca illashcami carca. 25 Chai jipami, caishuj yachajujcunaca: —Apunchi Jesusta ricurcanchimi— nishpa, Tomasman villachinajurca. Shina nijpimi Tomasca, cashna nijurca: —Paipaj maquipi clavoscunahuan tacai tucushcata ricushpa, chai chugripi ñuca maqui dedota satishpallami crisha. Shinallata paipaj costillas chugripi, ñuca maquita na satishpaca napacha crishachu— nijurcami. 26 Pusaj punlla jipami, chai huasi ucupillata Jesuspaj yachajujcunaca, cutin tandanajushca tianajurca. Tomaspash chaipimi carca. Shina tianajujpimi, pungucunata ali vichashca cajpipash, Jesusca yaicumushpa, paicunapaj chaupipi shayarishpaca: —Quiquingunapaca, casilla ali causaigu tiachun— nirca. 27 Shina nishpallami Jesusca, Tomastaca cashna nijurca: —Quiquimbaj maqui dedota, ñucapaj maqui chugripi churashpa ali ricui. Shinallata quiquimbaj maquita, ñucapaj costillas chugripi satishpa ricui. Ama chashna na crishpa purijuichu. Ashtahuangarin ñucataca crinami cangui— nijurcami. 28 Shina nijujpimi Tomasca: —¡Ñucata Mandaj, ñucapaj Taita Diosmari cangui!— nirca. 29 Shina nijpimi Jesusca, cashna nijurca: —Tomás, quiquinga ñucata ricushpapachami crihuashcangui. Ñucata na ricushpapash crijcunaca, ninandami cushijunajun— nijurcami.
Jesusta crinajuchunmi, cai shimicunataca escribishca
30 Jesusca, imatapash juyaillagutami ashtacata rurashpa purijurca. Chaitaca, paipaj yachajujcunapash ricunajurcami. Imata ricushcatapash, na tucuita cai libropica escribishcachu. 31 Ashtahuangarin Jesusca, Quishpichij Cristo cajtapash, Taita Diospaj Churi cajtapash crinajuchunmi caitaca escribishca. Paita crishpaca, paipaj shutipi causaita causagrinata charichunmi escribishca.
Jesusca, canchispura yachajujcunamanmi ricurishca
1 Chai jipami Jesusca, paipaj yachajujcunaman cutin ricurirca. Paica, Tiberias shuti cucha manñapimi cashnaca ricurirca: 2 Chaipica Simón Pedropash, “chai punllallata ishcandi huacharishcami” nishpa rijsishca Tomaspashmi chaipi carca. Shinallata Galilea llactapi tiaj Caná shuti pueblomanda Natanael shuti runagupash, Zebedeo shuti runapaj ishcandi churicunapash, shuj ishcai yachajujcunapashmi tandanajushca chaipi carca. 3 Chaipi cashpami, Simón Pedroca: —Pijita japingapaj rigrinimi— nirca. Shina nijpimi paicunaca: —Ñucanchipash quiquinhuan rishunllami— ninajurca. Shina nishpaca, canoapi tiarishpami rinajurca. Ashtahuangarin paicunaca, shuj pijillatapash na tarishpami punllayanajurca. 4 Ña punllayajujpimi Jesusca, cucha manñaman ricurirca. Ashtahuangarin paipaj yachajujcunaca, Jesús cajtaca na yacharcachu. 5 Jesusca paicunataca: —Huahuacuna, ¿micungapaca imagupash tianllu?— nircami. Shina nijpimi paicunaca: —Imagupash na tiapanllu— ninajurca. 6 Shina nijpimi Jesusca: —Cai canoa ali ladoman linllita shitaichi, taringuichillami— nirca. Shina nijpi linllita shitashpaca, chai linllipi pijicuna junda cajpimi, aisashpa llujchitapash na ushanajurca. 7 Shina cajpimi, Jesús juyashca yachajujca: —¡Apunchi Jesusmari cashca!— nishpa Pedroman villachirca. Shina nijpimi Simón Pedroca, paipaj churajunata (llujchishca cashpa), cutin huatarishpa yacuman shitarirca. 8 Yacu manñaman llujshingapaca, shuj cuadrashnami tiarca. Shina cajpimi piji jundashca linllitaca, caishuj yachajujcuna canoapi aisashpa llujchirca. 9 Ña manñaman llujshishpaca, carbón ninayashcapi piji cusarijujta, tandagupash tiajujtami ricunajurca. 10 Jesusca cashnami nirca: —Cunan japimushca pijicunamanda, huaquinguta apamuichi— nircami. 11 Shina nijpimi Simón Pedroca, canoaman vitsiashpa linllitaca, manñaman aisashpa llujchimurca. Chai linllipica, patsaj picha chunga quimsa jatun pijicunalla jundashcami cashca carca. Ashtaca pijicuna junda cajpipash, linllica na liquirircachu. 12 Chai jipallami Jesusca: —Shamushpa micuichi— nirca. Paicunaca, Apunchi Jesús cajta rijsishpami: “¿Maijanda cangui?” nishpaca, paipaj yachajuj puracunamanda, shujllapash na tapui usharca. 13 Jesús shamushpami, tandaguta japishpa paicunaman cararca. Shinallata pijigutapashmi cararca. 14 Huañushcacunapaj chaupimanda causarishca jipami Jesusca, caihuanga ña quimsacaman, paipaj yachajujcunaman ricurirca.
Jesusca, Simón Pedrohuanmi parlashca
15 Paicuna micushca jipami Jesusca, Simón Pedrotaca cashna nirca: —Jonaspaj churi Simón, ¿caishujcunatapash yalichu canga juyahuangui?— nircami. Shina nijpimi Pedroca: —Ari, quiquindaca juyanipachami. Chaitaca quiquinllata yachapanguimi, Apunchi Jesús— nishpa tigrachirca. Shina nijpimi Jesusca: —Shina cashpaca, ñucapaj huahua llamagucunata michipangui— nirca. 16 Shina nishpallami: —Jonaspaj churi Simón, ¿ñucataca juyahuanguipachachu?— nishpa cutin tapurca. Shina nijpimi Pedroca: —Ari, quiquindaca juyanipachami. Chaitaca quiquinllata yachapanguimi, Apunchi Jesús— nishpa tigrachirca. Shina nijpimi Jesusca: —Ñucapaj llamagucunata michipangui— nirca. 17 Caihuanga quimsacamanmi: —Jonaspaj churi Simón, ¿ñucataca juyahuanguipachachu?— nirca. “¿Juyahuanguipachachu?” nishpa, quimsacaman tapuimandami Pedroca, ninanda llaquiyarca. Shina llaquiyashpami, cashna nijurca: —Quiquinga tucuitamari yachapangui. Quiquinda ñuca juyajujtapash yachapanguimi, Apunchi Jesús— nijurcami. Shina nijpimi Jesusca, cashna nijurca: —Shina cashpaca, ñucapaj llamagucunata michipangui. 18 Napacha llullashpami, quiquindaca cashna nijuni: Quiquin chairalla viñai cashpaca, ali chumbilirishpami, quiquin maiman munashcaman rijun carcangui. Ashtahuangarin quiquin rucuyashpaca, ishcandi maquitami chutangui. Quiquindaca, shuj chumbita huatachishpami, na ringapaj munashcaman apashpa ringa— nijurcami. 19 Shina nijushpaca, Pedro imashna huañuchi tucushpapash, Taita Diostaca punchapambagumi cangui nijunatami Jesusca villachijurca. Shina nishpallami, Jesusca: —Ñucata catihuailla— nirca.
Jesusca, pai juyashca yachajujmanmi villachijushca
20 Pedro tigrarishpa ricushpaca, Jesús ninanda juyashca yachajuj catishpa rijujtami ricurca. Chai yachajujmi micunajushpaca, Jesuspi marcarishpa tiajushca carca. Paillatami: “¿Quiquindaca pita japichigrin, Apunchi Jesús?” nishpa tapushca carca. 21 Chai yachajujta Pedro ricujushpami: —¿Cutin caica imashi tucunga, Apunchi Jesús?— nishpa tapurca. 22 Shina tapujpimi Jesusca, cashna nijurca: —¿Imapajta quiquinga yachangapaj munangui? Ñuca munajpica, ñuca tigramungacaman paica causajunllami. Quiquinga ñucata catihuailla— nijurcami. 23 Chai yachajujta Jesús chashna nijujpimi: “Chai yachajujca, na huañungachu” nishpa, crij puracunaca parlanajurca. “Na huañungachu” nishpaca na villachircachu. Ashtahuangarin: “¿Imapajta yachangapaj munangui? Ñuca munajpica, ñuca tigramungacaman paica causajungallami” nishpami Jesusca villachirca. 24 Chashna ni tucushca yachajujllatami, imata ricujushcata, imata uyajushcatapash caipica escribishca. Paica, napacha llullashpa villachijushcatami yachanchi. 25 Jesusca, imagutapash ashtahuan ashtaca ashtacatami rurashpa purijurca. Pai imata rurajushcatapash, shuj shujlla escribijpica, chai librocunata churangapaj, cai pachapash na pactanmanllu yanimi. Shina cachun.