The New Testament of our Lord and Saviour Jesus Christ
1 Jesucristo ailluuna quillca, Davidmanda mirai, Abrahanmanda mirai. 2 Abrahamba churi Isaac, Isaacpa churi Jacob, Jacobpa churiuna Judá paihua uquiunandi anauca. 3 Judá churiuna Fares Zarandi anauca, Tamarmanda llucshijcuna; Farespa churi Esrom, Esromba churi Aram anauca. 4 Aramba churi Aminadab, Aminadabpa churi Naason, Naasomba churi Salmon, anauca. 5 Salmomba churi Booz, Rahabmanda llucshij, Boozpa churi Obed, Rutmanda llucshij, Obedpa churi Isai anauca. 6 Isaihua churi rey apu David, rey apu Davidpa churi Salomón anauca. Salomón Uríaspa huarmimanda llucshij aca. 7 Salomomba churi Roboam, Roboamba churi Abías, Abíaspa churi Asa anauca. 8 Asajpa churi Josafat, Josafatpa churi Joram, Joramba churi Uzías anauca. 9 Uzíaspa churi Jotam, Jotamba churi Acaz, Acazpa churi Ezequías anauca. 10 Ezequíaspa churi Manasés, Manasespa churi Amón, Amomba churi Josías anauca. 11 Josíaspa churiuna Jeconías aca paihua uquiunandi, Babilonia llactama apashca huras. 12 Babiloniama apashca huasha, Jeconíaspa churi Salatiel, Salatielba churi Zorobabel anauca. 13 Zorobabelba churi Abiud, Abiudpa churi Eliaquim, Eliaquimba churi Azor anauca. 14 Azorba churi Sadoc, Sadocpa churi Aquim, Aquimba churi Eliud anauca. 15 Eliudpa churi Eleazar, Eleazarba churi Matán, Matamba churi Jacob anauca. 16 Jacobpa churi José aca. Josega María cari aca. Maríamanda Cristo nishca Jesus pagarimuca. 17 Shinajpi Abrahanmanda Davidgama chunga chuscu cuti mirashcauna tianauca. Davidmanda Babiloniama apanagama chunga chuscu cuti mirashcauna tianauca. Babiloniama apashcamanda Cristogama chunga chuscu cuti mirashcauna tianauca. 18 Jesucristo pagarina casnami aca, paihua mama María Josehua pactachishca aca; manara llutarijllaira, María huahuara tupaca icsai Santu Ispiritumanda. 19 Paihua cari José, ali shungu runa asha, huarmi ama manali rimashca achu nisha, pacalla pacalla paita saquinara iyarica. 20 Casna iyarisha tiaushcai, shu Diosmanda angel paita ricurimuca pai puñusha nuspashcai. Angel paita nica: “José, Davidpa churi, ama manzhaichu camba huarmi Mariara apingaj. Paihua icsai tupashca huahua Santu Ispiritumandami. 21 Shu churira pagarichinga, paita shutichingui JESÚS, paihua intiunara quishpichinga paiguna uchamanda. ” 22 Cai tucui tucuca Señor rimashca shimiuna pactaringaj, profeta nishca Diosmanda rimaj rimashcasna: 23 “Shu huanra huarmi huahuara tupangami, shu churira pagarichingami. Paita shutichingui Emanuel.” Cai shuti nin: “Dios ñucanchihuami. ” 24 José pai nuspashcamanda lliccharisha, Señorba angel rimashcasna rasha, paihua huarmira apica. 25 Shinasha, huarmihua mana llutaricachu ñaupa punda churi pagaringagama. Paita shutichica JESÚS.
1 Jesús Judea partii tiaj Belén llactai pagarimushca huras, Herodes rey apu ashcai, indi llucshina partimanda yachajcuna Jerusalenma shamunauca. 2 “¿Maibira pagarishca angai judiuguna rey apu?” nisha tapunauca. “Paihua istrillasta ricushcanchi indi llucshina partii. Paita adurangaj shamushcanchi. ” 3 Herodes rey apu caita uyasha turbarica, tucui Jerusalen llactai causajcunandi. 4 Herodes tucui sacerdote apuunara, runaunamanda yachaira yachachijcunaras cayasha paigunara tapuca: “¿Cristoga maibira pagarina acai?” 5 Paiguna cutipanauca: “Judeamanda Belembi. Diosmanda rimaj casna quillcashcasna: 6 ‘Can Belén, Judea partii tiaj Judá apuunamanda mana yali ichillachu angui. Canmanda shu pushaj runa llucshinga ñuca inti Israelda cuirangaj. ’ ” 7 Shinajpi Herodes chi yachajcunara pacalla pacalla cayasha, paigunara alira tapucami istrillas ricurimushca timpura. 8 Paigunara cachaca Belén llactama: “Chima richi,” nisha, “huahuamanda sumajlla tapuichi, Paita tupasha cuintahuaichi, ñuca shinallara shamusha huahuara adurangaj!” 9 Paiguna rey apura uyashca huasha rinaucami. Indi llucshina partii ricushca istrillas paiguna ñaupajpi rica pactangagama, huahua tiaushca huasi ahuai shayarica. 10 Istrillasta ricusha ashcara cushiyanauca. 11 Huasii icusha, huahuara ricunauca, paihua mama Mariandi. Tuama urmasha, huahuara aduranauca. Paiguna valijcunara pascasha, huahuara cunauca curiras, insinsu gustu asnaj ambiras, mirra gustu asnaj iraras, 12 Astaun, nuspaushcaunai yachajcunara rimashca aca ama tigrangaj Herodespajma. Shu ñambira tigranauca. 13 Yachajcuna rishca huasha, shu Señormanda angel ricurimusha Josera paihua nuspaibi, paita nica: “Atari, huahuara paihua mamandi pushasha, Egipto llactama miticuiri. Chihui chapai ñuca canda rimanagama. Herodes huahuara mascangami huañuchingaj.” 14 Pai lliccharisha, tuta huahuara paihua mamandi pushasha, Egipto llactama rinauca. 15 Chihui tianauca Herodes huañunagama, Señor rimashcara pactachingaj, Diosmanda rimaj rimashcasna: “Egiptomanda ñuca Churira cayacani.” 16 Shinajpi Herodes yachajcuna paita umachinaupi ricusha, ashcara piñarisha, huahuaunara huañuchingaj cachaca, tucui ichilla cari huahuaunara ishqui huata tupumanda ichillahuagama, Belembi tiajcunara, chi rayai tiajcunaras, yachajcuna rimashca timpumanda yupasha. 17 Chi hurasllai Jereḿias, Diosmanda rimaj, rimashca shimi pactarica, pai rimashcasna: 18 “Ramá llactai shimi uyarica, atun caparina, atun huacai, atun llaquirina, Raquel paihua churiunamanda huacasha. Cariyanara mana munacachu paiguna huañushcaraigumanda!” 19 Shinajpi, Herodes huañushca huasha, Señorba angel cuti ricurimuca Josera paihua nuspaibi, Egipto llactai. 20 “Atari,” nica, “huahuara paihua mamandi pushasha ri. Israel llactara ri. Huahuara huañuchingaj niucuna ña huañunaushcami.” 21 Shinajpi atarica, huahuara paihua mamandi pushaca. Israel llactama shamuca. 22 Joséga, Arquelao Judea partii rey apu tucushcara uyasha, paihua yaya Herodes randimanda, chima rinara manzhacami. Astaun paihua nuspaibi rimashcara uyasha, Galilea partima rica. 23 Nazaret llactama pactamuca chihui tiangaj, Diosmanda rimajcuna rimashcara pactachingaj, casna nisha: “Pai Nazaret runa nishca anga.”
1 Chi punzhaunai Bautisaj Juan Judea partii tiaj runa illashca partima rimaj shamuca. 2 “Aripintirichi,” nica, “ahua pacha mandana mayanllayamushcami.” 3 Caimi Isaías, Diosmanda rimaj rimaushca: “Caparij shimi, runa illashca partii caparisha: ‘Señor purina ñambira alichichi, paihua ñambiunara dirichuichi. ’ ” 4 Juan camillu illmahua ahuashcara churarishca aca, cara chumbillinahua chumbillishca aca. Atun ijiunaras sacha mishquiras micuj aca. 5 Paihuajma shamunauca Jerusalenmanda, tucui Judeamanda, tucui Jordán rayai tiaj partiunamanda. 6 Juan shamuj runaunara bautisaca Jordán yacui, paiguna ucharashcara cuintanaupi. 7 Ashca fariseo saduceo runaunandi paihuajma shamujta ricusha, Juan paigunara nica: “Machacuimanda mirajcuna, ¿pita cangunara yachachica shamuj piñarinamanda miticungaj? 8 Aripintirina tunu ranaunara raichi. 9 Ama iyaichichu canguna quiquin shungtíi, ‘Abraham ñucanchi yayami,’ ningaj. Cangunara nini, Dios cai quiquin rumiunamanda churiunara Abrahambajta sicachinara ushanmi. 10 Cunallara hachara churashcami yurauna sapii. Chimanda maican yura mana ali muyura aparijta cuchusha, ninai shitashca anga. 11 Ñuca sirtu pacha cangunara bautisauni yacui aripintirishcamanda. Astaun ñuca huashai shamuj Santu Ispirituis ninais bautisangami. Ñuca mana valijchu ani paihua zapatusllas apangaj. Pai ñucamanda yali ushajmi. 12 Paihua maquii huairachinara chariun; llushtina pambara pichangami, trigu muyura apingami huacachina huasii, carara rupachingami mana tucurina ninai.” 13 Shinajpi Jesús Galilea partimanda Jordanma shamuca, Juambajma, bautisai tucungaj. 14 Juanga mana munacachu. “Can ñucara bautisana angui,” nica, “astaun ¿can ñucajma shamungui?” 15 Jesús paita cutipaca: “Saquilla, ministirinm ñucanchi tucui ali ranara pactachingaj.” Shinajpi Juan lugarda cuca, 16 Bautisashca huasha, Jesús yacumanda sicaca, shinajpi ahua pacha pascarica. Diospa Ispiritura urpisna irgumujta ricuca, paihua ahuai shamujta. 17 Shu shimi ahua pachamanda uyarica: “Caimi ñuca llaquishca Churi, paihuajpi cushiyani!”
1 Shinajpi Santu Ispíritu Jesusta pushaca runa illashca partima, supai apu paita tintangaj. 2 Chuscu chunga punzhara, tutandi punzhandi mana micusha, Jesús yarcachica. 3 Tintaj supai shamusha paita nica: “Can Diospa Churi ashaga, cai rumiunara rimai, ‘Tanda tucui,’ nisha!” 4 Jesús cutipasha nica: “Quillcashca tian, ‘Mana tandallahua runa causangachu, astaun Dios tucui rimashca shimiunahua. ’ ” 5 Shinajpi supai apu Jesusta Dios ajllashca llactama pushaca, templo nishca Diospa huasi ahua pundai paita shayachica. 6 Paita nica: “Can Diospa Churi ashaga, allpama saltai; casna quillcashca tian, ‘Paihua angelgunara cambajma cachamungami. Canda apinaungami paiguna maquiunai, Ama camba chaquira chugringaj rumii. ’ ” 7 Jesús paita cutipaca: “Shinallara, quillcashca tian, ‘Señor camba Diosta ama tintanguichu. ’ ” 8 Cutillara supai apu paita shu ahua urcuma pushaca, chimanda tucui mundu llactaunara ricuchica paiguna sumajndi. 9 Supai apu paita nica: “Cai tucuira canda cushami can tuama urmasha ñucara adurajpi!” 10 Shinajpi Jesús paita nica: “Ri, Satanás, quillcashcami tian, Señorda camba Diosta aduranami angui, paillara sirvinami angui,’ ” 11 Shinajpi supai apu paita saquica. Angelguna shamunauca, Jesusta sirvinauca. 12 Jesús, Juanda chunda cularbi ishcashcara uyasha, Galileama tigraca. 13 Nazaret llactara saquisha, Capemaum lamar pata llactama shamuca, chihui causaca. Capernaum llacta Zabulon Neftalí partiunai tian. 14 Jesús caima shamuca Diosmanda rimaj Isaías rimashcara pactachingaj, casna nisha: 15 “Zabulón llactas, Neftalí llactas, lamar ñambii, Jordan huashai, gentilguna Galilea partii; 16 Llandu tutai causaj runauna atun vilara ricunauca. Huañuna llandui causajcunara vila punzhayachishcami. ” 17 Chi hurasmanda yachachingaj callarica. Rimai callarica: “Aripintirichi, ahua mayanllayamushcami.” 18 Jesús, Galilea lamar rayai puriusha, ishquindi uquira ricuca, Pedro nishca Simón, paihua uqui Andresndi. Licarinauca lamarbi, aichahuara apijcuna asha. 19 Paigunara nica: “Ñucara catihuaichi, cangunara runara licajcunara rasha.” 20 Paiguna licaunara dsas saquisha Jesusta catinauca. 21 Chimanda risha shu ishquindi uquira ricuca, Zebedeo churi Jacobo paihua uqui Juandi. Paiguna yaya Zebedeohua canuai tianauca, licaunara sirasha. Jesús paigunara cayaca, “Shamichi,” nisha. 22 Paiguna dsaslla canuaras yayaras saquisha, Jesusta catinauca. 23 Jesús tucui Galilea partima risha, paiguna tandarina huasiunai yachachisha, Dios mandana pacha ali shimira camachisha, tucui ungüigunaras tucui nanaigunaras alichisha purica. 24 Paihua shuti uyarica tucui Syria partiunai. Paihuajma pushamunauca nanachiujcunaras, imahua ungusha turmindariujcunaras, supai icushcaunaras, lucu tucushcaunaras, suchu mana purina ushajcunaras. Paigunara alichica. 25 Ashca runauna paita catimunauca, Galileamandas, Decápolismandas, Jerusalenmandas, Judeamandas, Jordan yacu chimbamandas.
1 Jesús chi ashca runaunara ricusha urcuma sicaca; tiarijpi pai yachachishca runauna paihuajma shamunauca. 2 Jesús rimasha, paigunara yachachica, casna nisha: 3 “Cushiunami ‘Almai pugri anchi,’ nijcuna. Paigunajmi ahua pacha mandana. 4 Cushiunami huacajcuna, paiguna cushi tucunaungami. 5 Cushiunami mansuuna, paiguna cai pachara cui tucunaungami. 6 Cushiunami alira rangaj yarcachijcuna, upinaichijcuna, sacsachishca anaungami. 7 Cushiunami llaquij shunguyujcuna, paiguna llaquishca anaungami. 8 Cushiunami chuya shunguuna, paiguna Diosta ricunaungami. 9 Cushiunami macanaujcunara alichijcuna, Diospa churiuna nishca anaungami. 10 Cushiunami aliranamanda turmindachishcauna, paigunajmi ahua pacha mandana. 11 Cushiunami anguichi imahuras chijnishca turmindachishca asha, ima manaliras cangunamanda llullasha rimaujpis. 12 Cushiyaichi, cariyaichi, cangunara pagana atunmi ahua pachai, Shinallarami turmindachinaushca cangunamanda ñaupa causaj Diosmanda rimajcunara. 13 Canguna cai pacha cachi cuinta anguichi. Cachiga paihua mishqui upa tucujpi, ¿imahuara mishquiyachingairi? Imajpas mana sirvin. Canzhama ichuna anga, runauna aitangaj. 14 Canguna cai pacha vila cuinta anguichi. Shu urcu pundai tiaj llacta mana pacarihuajchu. 15 Shinallara shu vilara mana sindichinaunzhu tasa ucui churangaj, astaun pajllai churangaj, huasii tiajcunara ricuchingaj. 16 Shina sindichu canguna vila cuinta runauna ñaupajpi, paiguna can ali rashcaunara ricungaj, ricusha camba ahua pachai tiaj Yayara ahuayachingaj. 17 Ama iyaichichu ñuca shamucani ley camachishca shimira Diosmanda rimajcuna rimashcaras chingachingaj. Mana chingachingajchu shamucani astaun pactachingaj. 18 Sirtu pacha cangunara nini, ahua pachas cai pachas pasangagama, ley shimimanda mana shu shimihuallas, mana shu pundahuallas pasangachu tucui pactaringagama. 19 Shinajpi pi runas shu ichilla mandashcara mana pactachijpi, shinallara runaunara yachachijpis, ‘Ichillami,’ nishca anga ahua pacha mandanai, astaun mandashcara pactachij shina rasha yachachijpi, ‘Atunmi,’ nishca anga ahua pacha mandanai. 20 Cangunara nini, canguna ali rashcauna yachaira yachachijcuna, fariseoguna ali rashcaunamanda mana yali ajpi, ahua pacha mandanai mana icunguichichu. 21 Uyashcanguichi imasna nishca aca ñaupa timpuunai, ‘Ama huañuchinguichichu, pis huañuchijpi taripashca anga. ’ 22 Astaun cangunara nini pis paihua uquihua piñarijpi taripashca anga. Pis ‘¡Upa!’ nijpi paihua uquira, rucuuna tandarinai cauźayachishca anga. Pis ‘¡Mana valij!’ paita nijpi, ucu pachama urmanalla anga. 23 Shinajpi, can Diosma cuyanara altar nishca sacrificiora rana mesama apamusha, chihuis iyariungui imasna camba uqui canda cauźayachiushcara imamandas, 24 camba cuyanara chihui saqui altar ñaupajpi; ri, camba uquihua ñaupara alichingaj, chihuasha shami camba cuyanara cungaj. 25 Uctalla alichingui canda piñachijhua, chara paihua pariju ñambii tiaushallara. Mana shina rajpi, pai canda taripajpa maquii cunga, taripaj canda suldaru maquii, can chunda cularbi ishcai tucungui. 26 Sirtu pacha canda nini, chimanda mana llucshinguichu puchucai mediora pagangagama. 27 Uyashcanguichi imasna rimashca aca, ‘Ama shujhua tacaringuichu. 28 Astaun ñuca cangunara nini, ‘Pi runas shu huarmira munarisha ricujpi, ña paihua shungüi ucharashcami paihua. ’ 29 Shinajpi, camba ali ñahui canda uchai urmachisha nijpi, ñahuira llucchisha ichui. Astaun alimi camba aichamanda shu partira pirdingaj, camba intiru aicha ucu pachai ama shitai tucungaj. 30 Camba ali maqui canda urmachisha nijpi, pitisha ichui. Astaun alimi camba aichamanda shu partira pirdingaj, intiru aicha ucu pachai ama shitai tucungaj. 31 Shinallara rimashca aca, ‘Pi runas paihua huarmira ichusha nisha, maqui llushpirina quillcara cuchu. ’ 32 Astaun ñuca cangunara nini, pi runas paihua huarmira ichusha, mana shujhua tacarishcaraigumanda ajpi, huarmira shujhua tacarichin. Shinallara pihuas ichushca huarmira casarasha, shujhua tacarij tucun. 33 Shinallara uyashcanguichi imasna ñaupa huras rimashca aca, ‘Diospa shutii rimashcara ama paquinguichu, astaun can Diospa shutii rimasha cushca shimiunara Señorba ñaupajpi pactachina angui. ’ 34 Astaun ñuca cangunara nini, Ama Diospa shutii rimasha shimira cunguichi, ama ahua pacha shutii, caimi Diospa tiarina; 35 shinallara ama cai pacha shutiis, caimi Diospa aitarina; shinallara ama Jerusalén shutiis, caimi atun Rey Apu llacta; 36 shinallara ama camba uma shutii shimira cuichi, camba acchara mana yanaras mana yurajtas turcanara ushanguichu. 37 Canguna rimana casna achu: ‘Ari, ari. ’ ‘Mana, mana. ’ Mas caimanda yali ajpiga, mana alimanda shamun. 38 Uyashcanguichi imasna rimashca aca, ‘Ñahuipura, ñahuipura,’ shinallara, ‘Quirupura, quirupura. ’ 39 Ñucaga cangunara nini, Manali runara ama arcaichichu. Astaun pis camba ñahui ali partima sajmajpi, shu partima ricuchi sajmangaj. 40 Runa camba camisitara mañajpi apu ñaupajpi, shinallara camba camisaras cui. 41 Pi runas paihua cargara canda apangaj mandajpi shu samai tupura, canga ishqui samaira apasha ri. 42 Maicans mañajpi, cui. Maicans cambajta mañachisha nijpi, ama mitsaichu. 43 Uyashcanguichi imasna ñaupa huras rimashca aca, ‘Camba mayambi causajta llaquingui, canda piñajta chijningui. ’ 44 Ñuca cangunara nini: Cangunara piñajcunara llaquichi, maldisiajcunara bindisiaichi, cangunara chijnijcunara yanapaichi, cangunara huajlichijcunamanda turmindachijcunamandas mañaichi. 45 Shina rasha canguna ahua pachai tiaj Yaya churiuna tucunguichimi. Paiga paihua indira aitachin manaliuna ahuais aliuna ahuais. Shinallara tamiachin aliuna ahuais manaliuna ahuais. 46 Cangunara llaquijcunallara llaquijpi, ¿Ima paganarara charinguichiri? ¿Manzhu shinallara ranaun cullquira tandachijcunas? 47 Canguna uquiunallara salurajpi, ¿ima alira raunguichiri? ¿Manzhu shinallara ranaun Gentilguna? 48 Gustu ali sumaj aichi, imasna canguna ahua pachai tiaj Yaya ali gustu sumaj ashcasna.
1 Cuiraichi canguna ali rashcaunara ama runauna ñaupajpi rangaj, paiguna ricunauchu nishalla. Casna rasha pagashcara mana apinguichichu canguna ahua pachai tiaj Yayamanda. 2 Canguna tsuntsuunama cullquira cusha, ama curmitara tucachichu camba ñaupajpi, ishqui shimiyujcuna rashca cuinta tandarina huasiunais, ñambiunais, runauna paigunara alabangaj. Sirtu pacha cangunara nii, paganara ña apinaushcami. 3 Canga tsuntsuunama cusha, camba ali maqui rashcara lluqui maqui ama yachachu. 4 Camba cuyanara pacalla pacalla cushca achu. Camba Yaya Dios pacallai ricuj, canda pagangami tucui runauna ñaupajpi. 5 Can Diosta mañasha, ama ishqui shimiyujcuna cuinta aichichu. Paiguna shayarisha mañanara gustanaun tandarina huaisiunais, ñambi rayais, runauna paigunara ricungaj. Sirtu pacha cangunara nini, ña pagai tucunaushcami. 6 Astaun can Diosta mañausha, camba ucui icungui, pungura ishcasha, camba pacallai tiaj Yayara mañangui. Camba pacallai ricuj Yaya tucui runauna ñaupajpi canda pagangami. 7 Canguna mañausha, ama chillarara chillarara rimasha mañaichichu, gentilguna rashcasna. Paiguna ashca cuti rimashcamanda ‘Uyai tucuni,’ nisha iyanaun. 8 Paiguna rashcasna ama raichichu. Canguna Yaya canguna ministishcara ña yachan, canguna manara mañajllaira. 9 Cangunaga casna mañaichi: ‘Ñucanchi ahua pachai tiaj Yaya, camba shutira ahuayachishca achu, 10 Shamuchu camba mandana. Can munashcara rashca achu, imasna ahua pachais, shinallara cai pachais. 11 Ñucanchi caran punzha micunara cuna punzha cuhuai. 12 Ñucanchi manali rashcaunara perdonahuai, imasna shinallara ñucanchira manalira rajcunara perdonaunchi. 13 Tintarinai urmangaj ama lugarda cuhuaichu ñucanchira, astaun manalimanda quishpichihuai. Cambajmi mandanas, ushanas, sumajpas, huiñai huiñaigama. Amen. ’ 14 Canguna runaunara manali rashcaunara perdonajpi, shinallara canguna ahua pachai tiaj Yaya cangunara perdonangami; 15 astaun canguna runaunara manali rashcaunara mana perdonajpi, shinallara canguna Yaya canguna manali rashcaunara mana perdonangachu. 16 Canguna sasisha, ama llaquiringuichichu ishqui shimiyujcunasna. Paiguna ñahuiunara turcanaun, runaunara paiguna sasishcara ricuchingaj. Sirtu pacha cangunara nini, paiguna ña pagai tucunaushcami. 17 Can sasiusha, asitira talingui umai, ñahuiras maillangui, 18 can sasiushcara runauna ama ricunauchu, astaun camba pacallai tiaj Yayama ricuchingaj. Camba pacallai ricuj Yaya tucui runauna ricuushcai canda pagangami. 19 Cai pachai ama charij tucuichichu, maibi susus huacarinas ismuchinaun, maibi shuhuajcuna uctusha shuhuanaun. 20 Astaun ahua pachai charij tucuichi, maibi ima susus ima huacarinas mana ismuchinaun, maibi ima shuhuajcunas mana uctunaun, mana shuhuanaun. 21 Maibi canguna valijta charijpi, chihuimi camba shungu tiaun. 22 Ñahui muyu aichai vilami. Camba ñahui muyu ali ajpi, intiru aicha punzhayachishcami anga. 23 Camba ñahui muyu manali ricuj ajpi, camba aicha llanduimi tian. Shinajpi can ucui charishca vila llandu cuinta ajpi, camba llandu mas llandunmi. 24 Pi runas ishqui patrunda sirvinara mana ushanzhu; shujta chijninga, chishujta llaquingami: shujta ahuayachinga, chishujta pishiyachingami. Mana ushanguichichu Diostas cullquiras sirvinara. 25 Chiraigumanda cangunara nii: Ama turbarichichu canguna causanamanda, ‘¿imara micushun? ¿imara upishun?’ nisha. Shinallara ama turbarichichu canguna aichamanda, ‘¿imara churarishun?’ nisha. ¿Manzhu causana micunamanda yali, aichas churarinamanda yali valij? 26 Pishcuunara ricuichi, mana tarpunaun, mana pallanaun, mana huacachinaun huasiunai. Canguna ahua pachai tiaj Yaya paigunara carán. ¿Manzhu canguna paigunamanda yali valij anguichi? 27 Cangunamanda maicanda ushan masna munashas shu palmura yapangaj, mas ahua tucungaj? 28 ¿Churarinamanda imarasha turbaringuichi? Ricuichi sacha sisaunara imasnara iñanaun, mana tarabanaun, mana cauchunaun; 29 cangunara nini, ‘Salomón tucui paihua sumajhua mana caigunasna churarijchu aca. ’ 30 Shinallara allpamanda quihua, cuna punzha tian, cayandi punzha rupachishcami, Diosmi casna churachin, ¿manzhu mas alira ranga cangunajhua, ansalla quirij runauna? 31 Ama turbarichichu, ‘¿Imara micushun, imara upishun, imara churarishun?’ nisha. 32 Gentilguna caigunara mascanaun, astaun canguna ahua pachai tiaj Yaya yachan imasna cai tucuira ministinguichi. 33 Astaun, ñaupa punda Dios mandanara pai ali causanaras mascaichi, cai tucuira cangunajta yapangami. 34 Shinajpi ama turbarichichu cayandi punzhamanda. Cayandi punzha paihua quiquin turbarinara apamungami. Ña basta caran punzhai paihua quiquin turbarinallara.
1 Ama taripaichichu ama taripashca tucungaj. 2 Ima taripanahua canguna taripajpi, chi tupullara taripai tucunguichimi. Ima tupuhua canguna tupujpi, chi tupuhuallara tupui tucunguichimi. 3 ¿Imarasha camba uqui ñahuii tiaj pulvuhuara ricungui, camba quiquin ñahuii tiaj caspira mana ricusha? 4 Imarasha uquira ningui: ‘Lugarda cuhuai camba ñahuimanda pulvuhuara ichungaj,’ camba quiquin ñahuii caspi tiaullaira? 5 ¡Ishqui shimiyuj! Ñaupa punda camba quiquin ñahuimanda caspira llucchi, chihuasha alimi ricungui ichilla pulvuhuara llucchingaj camba uqui ñahuimanda. 6 Sumaj ajta ama cuichichu allcuunara, shinallara canguna perlas nishca valij muyuunara cuchiunama ama shitaichu, cuchiuna ama aitangaj, chihuasha cangunara chugrichingaj. 7 Mañaichi, cui tucunguichimi. Mascaichi, tupanguichimi, Cayaichi, pascai tucunguichimi. 8 Tucui mañaj apin, mascaj tupan, cayajta pascanaun. 9 ¿Maican runa cangunamanda paihua churi: ‘Tandara cuhuai,’ nijpi, shu rumira paita cungachu? 10 Churi, ‘Aichahuara cuhuai,’ nijpi, ¿shu machacuira cungachu? 11 Canguna manaliuna ashallara, ali cuyanaunara churiunama cuyanara yachanguichi, ¿manzhu mas canguna ahua pachai tiaj Yaya aliunara cunga paita mañajcunama? 12 Imasna tucui imaras canguna munanguichi runauna cangunahua rangaj, shinallara raichi paigunahua. Caimi ley nishca shimi Diosmanda rimajcuna rimashca shimiunas. 13 Quishqui pungura icuichi. Anzhu punguga atun ñambiga ucu pachama pushan chingachingaj. Ashcaunami chi pungura icunaun. 14 Quishqui pungu, ichilla ñambi causanama pushan, ansallami icunaun cai ñambira. 15 Cuiraichi llullasha shamujcunamanda, cangunama buriguna cuinta churarishcauna shamunaun, churarishca ucui runaunara micuj pumaunami. 16 Paiguna rashcaunai paigunara ricsinguichi. ¿Uvillas muyura cashamandachu pallanaun? ¿Higu muyuras chini yuramandachu pallanaun? 17 Shinajpi tucui ali yura ali muyura aparin, manali yuraga manalira aparin. 18 Ali yura manali muyura mana ushanzhu aparinara, shinallara manali yufa ali muyura aparinara mana ushanzhu. 19 Tucui yura manali muyura aparijta cuchusha, ninai shitashca anga. 20 Shinajpi, paiguna aparishca muyumanda ricsinguichimi. 21 Mana tucui ñucara: ‘Señor, señor,’ nij runa ahua pacha mandanai icungachu, astaun ñuca ahua pachai tiaj Yaya munaira rajcunalla. 22 Ashcauna chi punzhai ñucara ninaunga, ‘Señor, señor, ¿manzhu camba shutii yachachicanchi, camba shutii supaigunara ichucanchi, camba shutii ashca munanaita ranaunara rarcanchi?’ 23 Shinajpi ñuca paigunara nishami, ‘Ima huraspas cangunara mana ricsicanichu, anzhurichi ñuca mayanmanda, manalira rajcuna. ’ 24 Maicambas cai ñuca shimira uyasha, cai shimira pactachisha, shu sabiru runa cuintami tucun: Paihua huasira rumii shayachica. 25 Shinzhira tamiaca, yacuuna undamunauca, shinzhira huairaca, huasira huactanauca. Randi huasi mana urmacachu, shinzhi rumii shayachishcaraigu. 26 Astaun maicambas cai shimiunara uyasha mana caźusha, chi upa runa cuintami tucun: paihua huasira tiyui shayachica. 27 Tamiaca, yacuuna undamunauca, shinzhira huairaca, huasira huactanauca. Huasiga urmaca, illajta tulashca aca. ” 28 Jesús cai shimiunara rimashca huasha, runauna pai yachachishcamanda manzharinauca; 29 mandaj cuinta yachachishcaraigu, mana yachaira yachachijcuna cuinta.
1 Jesús urcumanda irgumujpi, ashca runauna paita catinauca. 2 Shu ungushca llagayuj runa shamusha, Jesuspa ñaupajpi tuama urmasha, nica: “Señor, can munasha, ñucara alichingaj ushangui. ” 3 Jesús, maquira chutasha, paita llangaca: “Munanimi,” nisha, “alichishcangui. ” Chi ratullai llaga chingarica. 4 Shinajpi Jesús paita nica: “Riqui, pitas ama cuintaichu; astaun ri, camba aichara sacerdotera ricuchingaj. Moisés rimashca sacrificiora cui, paiguna can aliyashcara ricungaj. ” 5 Jesús Capernaum llactai icujpi, shu suldaru capitán paihuajma shamuca, paita rugaca: 6 “Señor,” nica, “ñucara sirvij runa caitui sirin ñuca huasii, suchu tucushca, ashcara turmindarisha. ” 7 Jesús nica: “Ñuca risha, paita alichisha. ” 8 Capitán cutipasha nica: “Señor, ñuca mana valijchu ani can ñuca huasii icungaj. Shimira rimailla, ñucara sirvij aliyanga. 9 Ñucas mandashca runa mani, shinallara suldaruuna charini mandangaj. Shujta nini, ‘Ri,’ pai rin. Shujta, ‘Shami,’ nini, pai shamun. Ñucara sirvijta nini, ‘Caita rai,’ pai chita ran. ” 10 Caita uyasha Jesús manzharica. Paita catijcunara nica: “Sirtu pacha cangunara nini, Israelbis casna quirinara mana tupashcanichu. 11 Cangunara nini, Ashcauna shamunaunga indi llucshina partimanda, indi icuna partimandas, Abrahanhuas, Isaachuas, Jacobhuas tiaringaj ahua pachai. 12 Astaun ahua pacha mandanai tiana runauna canzha llandui shitai tucunaunga. Chihui tian huacanas quiru mucurinas. ” 13 Shinajpi Jesús capitanda nica: “Ri, can quirishcasna rashca achu. ” Chi ratullaira sirvij runa aliyashca aca. 14 Jesús Pedro huasima shamuca. Pedro huarmi mama calinturahua caitui sirijta ricuca. 15 Paihua maquira llangaca, calintura chiriyaca. Huarmi atarisha paigunara sirvica. 16 Tutayaupi, paihuajma ashca supai icushcaunara apamunauca. Rimashcallahua supaigunara llucchica, tucui ungushcaunaras alichica. 17 Diosmanda rimaj Isaías rimashca pactarichu, casna nisha: “Paillara ñucanchi ungüigunaras apica, ñucanchi nanaigunaras apaca. ” 18 Jesús paihua muyujta runauna tandarishcara ricusha, chimbama pasangaj mandaca. 19 Shu yachaira yachachij runa paihuajma shamusha, paita nica: “Yachachij, canhua catisha maita can rijpis” 20 Jesús paita nica: “Chajauna paiguna uctuunara charinaun, pishcuunas paiguna taźindas charinaun; astaun ñuca, Runa Churi, maibis umara samachinara mana charinichu. ” 21 Shuj pai yachachishca runaunamanda paita nica: “Señor, lugarda cuhuai ñaupara ñuca yayara pambangaj risha. ” 22 Jesús paita nica: “Catihuai. Huañushcaunara saqui paiguna quiquin huañushcaunapura pambangaj. ” 23 Jesús canuai icujpi, pai yachachishca runauna catinauca. 24 Lamarbi shinzhira huairaca. Tsajlas atarijpi canua ñaca ñaca pambarica, astaun Jesús puñuriaica. 25 Yachachishca runauna paihuajma shamusha llicchachinauca: “Señor,” ninauca, “uctalla quishpichihuapai. Huañuunchimi.” 26 Jesús cutipaca: “¿Imarasha manzharinguichi, ansalla quirij runauna?” Shinajpi Jesús atarisha huairaras lamardas piñaca. Punzha aliaca, tucui chunlla tucuca. 27 Runauna manzharisha ninauca: “¿Ima sami runarai? Huairas lamarbas paita uyanaun.” 28 Jesús chimba partima, Gadara runauna llactama pactajpi, ishqui supai icushca runauna paita tupaj shamunauca. Pambana huasiunamanda llucshinauca; yapa milli anauca. Pihuas chi ñambira pasanara mana ushanaucachu. 29 Caparisha ninauca Jesusta: “¿Imara munangui ñucanchihua, Jesús, Diospa Churi? ¿Caima shamushcangui ñucanchira turmindachingaj timpu manara pactarijllaira?” 30 Carullai shu atun cuchi muntun micusha tianauca. 31 Supaiguna paita ruganauca: “Ñucanchira llucchisha ichuusha, lugarda cuhuapai cuchi muntumbi icungaj.” 32 Jesús paigunara, “Richi,” nica. Llucshisha cuchi muntumbi icunauca. Tucui cuchi muntun piñasmanda saltasha urmanauca lamarbi, yacui chucasha huañunauca. 33 Cuchira carajcuna miticusha rinauca. Llactama shamusha, ima tucushcaunaras cuintanauca, shinallara supaiguna icushca runaunahua ima tucushcaras. 34 Llactamanda tucui runauna Jesusta tupangaj shamunauca. Ricusha, paita rugasha ninauca: “Anzhuripai ñucanchi llactamanda.”
1 Shinajpi Jesús canuai icusha, chimbama pasaca, paihua quiquin llactama shamuca. 2 Paihuajma shu suchu runara pushamunauca, caitui huandushca. Jesús huanduj runauna quirishcara ricusha, suchura nica: “Cariyai, churi, can ucharashcaunara perdonashcangui.” 3 Shinajpi huaquin yachaira yachachijcuna shungu ucui ninauca: “Irusta riman.” 4 Jesús paiguna iyariushcara yachasha, nica: “¿Imarasha manalira iyariunguichiri canguna shungu ucui? 5 ¿Imara mas rimaihuajlla anga: ‘Can ucharashcara perdonashca angui. ’ o manashaga, ‘Atari, puri,’ nisha rimangaj? 6 Canguna yachangaj ñuca, Runa Churi, ushaira charini cai pachai uchara perdonangaj.” Jesús suchura rimaca, “Atari, camba caitura apasha ri camba huasima.” 7 Shinajpi, runa atarisha, paihua huasima rica. 8 Runauna caita ricusha manzharinauca, Diosta alabanauca, casna ushaira runaunama cushcamanda. 9 Jesús chimanda pasasha, Mateora ricuca, gubirnu cullquira tandachina huasii tiajta. Paita nica: “Catihuai.” Mateo atarisha catica. 10 Jesús mesai tiarijpi Mateo huasii, ashca cullquira tandachijcunas, ashca uchayujcunas shamusha, mesai tiarinauca Jesushua, pai yachachishca runaunandi. 11 Fariseoguna caita ricusha, yachachishca runaunara ninauca. “Imarasha canguna Yachachij cullquira tandachijcunahuas uchayujcunahuas micun?” 12 Jesús caita uyasha paigunara nica: “Aliuna doctorda mana ministinaun, astaun ungushcauna ministinaunmi. 13 Richi, yachaichi imara nin cai shimi, ‘Sacrificio nishcamanda yali shu ali llaquij shungura munani. ’ Ali causajcunara cayangaj mana shamucanichu, astaun uchayujcunara, paiguna aripintiringaj.” 14 Shinajpi Juan yachachishca runauna Jesusma shamusha, paita ninauca: “¿Imaraigu ñucanchis fariseogunas sasisha causaunchi, astaun can yachachishca runauna mana sasinaun?” 15 Jesús cutipasha nica: “¿Burara rajcuna llaquirina ushanaunzhu cari paigunahua tiaushca huraspi? Astaun punzhauna shamunaunga ima huras cari quichushca anga. Chi huraspi sasinaungami. 16 ”Manapis rucu churarinara rimindanzhu mushuj llachapa pitihua. Shina rasha churarinara mas lliquin. 17 Shinallara mushuj vinura rucu puruunai mana churanaunzhu. Shina rajpi puru lliquirin, vinu talirin, puru pirdirin. Astaun mushuj vinu mushuj purui churajpi ishquindi duranaun.” 18 Jesús casna rimaushcallai, shu valij runa shamuca, paihua ñaupajpi tuama urmasha, nica: “Ñuca ushushi ñancartalla huañuca. Shamupai, camba maquira paihua ahuai churapai. Causaringami.” 19 Jesús atarisha paihua pariju rica, pai yachachishca runaunandi. 20 Ñambii shu ungushca huarmi, yahuar ricurina mana saquirijpi chunga ishqui huatara, huashamanda shamuca. Jesuspa churarina pundara llangaca. 21 Huarmi paihua shungüi nica: “Paihua churarina pundahuallara llangasha aliyashami.” 22 Jesús vultiarisha, huarmira ricusha, nica: “Cariyai, ushushi, can quirishca canda alichishcami.” Chi ratumanda pacha huarmi aliyashca aca. 23 Jesús valij runa huasii icusha, llautara tucajcunaras huacajcunaras ricuca. 24 Paigunara nica: “Anzhurichi. Huahua mana huañushcachu, puñunllami.” Paita burlasha asinauca. 25 Runaunara huasimanda llucchishca huasha, Jesús icuca. Huahuara maquimanda apica. Huahua atarica. 26 Cai rashca uyarica tucui chi partii. 27 Chimanda pasajpi, ishqui ñausa runa paita catimunauca. Caparisha ninauca: “Llaquihuapai ñucanchira, Davidpa Churi.” 28 Jesús huasima pactamujpi, ñausauna paihuajma shamunauca. Paigunara nica: “Ñuca caita rangaj ushajta quiringuichichu?” “Ari, Señor, quirinchimi,” ninauca. 29 Shinajpi Jesús paiguna ñahuira llangasha, “Canguna quirishcasna rashca achu,” nica. 30 Paiguna ñahuiuna pascarinauca. Jesús paigunara shinzhira rimasha, nica: “Ricuichi ama pihuas caita yachanauchu.” 31 Randi, paiguna llucshisha Jesusmanda cuintanauca tucui chi partii. 32 Paiguna llucshiushcai, runauna shu upa shimi runara apamunauca, supai icushcami aca. 33 Supaira llucchishca huasha, upa shimi runa rimaca. Runauna manzharinauca. “Ima huraspas cai samira mana ricushcanchichu Israelbi,” ninauca. 34 Fariseoguna ninauca: “Supai apumanda supaigunara ichun.” 35 Jesús tucui atun tucui ichilla llactaunara purica, tandarina huasiunai yachachisha. Dios mandana pacha ali shimira rimaca, tucui ungüiras tucui nanairas alichisha. 36 Jesús ashca taucarimuj runaunara ricusha llaquirica. Ichushca cuinta, chausishca cuinta anauca, cuiraj illaj buriguunasna. 37 Shinajpi Jesús pai yachachishca runaunara nica: “Sirtu pacha pallana ashcami, astaun tarabajcuna ansallami. 38 Pallana Señorda rugaichi pallajcunara cachangaj paihua pallanama.”
1 Shinajpi Jesús pai yachachishca runaunara cayasha, ushaira paigunara cuca irus supaigunara ichungaj, tucui ungüiras tucui nanairas alichingaj. 2 Pai chunga ishqui cachashca runauna shutiuna caigunami: Ñaupa punda, Pedro nishca Simón, paihua uqui Andrespas; Zebedeo churi Jacobo, paihua uqui Juambas; 3 Felipe, Bartolomé, Tomás, cullquira tandachij Mateo, Alfeo churi Jacobo, Tadeo nishca Lebeo; 4 Cananita Simón, Judas Iscariote, Jesústa intrigaj runas. 5 Cai chunga ishquira Jesús cachaca, paigunara yachachica: “Gentilguna ñambii ama ringuichichu. Samaria runauna llactai ama icunguichichu. 6 Astaun Israel aillumanda chingarishca buriguunama richi. 7 Risha, yachachichi, ‘Ahua pacha mandana mayanllayamushcami. ’ 8 Ungushcaunara alichichi, ismushca llagayujcunara alichichi, huañushcaunara causachichi, supaigunara ichuichi. Yanga llaquishcamanda apishcanguichi, yanga llaquishcamanda cuichi. 9 Ama apaichichu curira, cullquira, ñutu cullquiras canguna chumbillina carai. 10 Bulsaras, ishqui ucu churarinaras, zapatustas, taunaras ama apaichichu. Tarabaj runa paihua micunara apingaj valin. 11 Maican atun llactais, maican ichilla llactais canguna icusha, mascaichi shu chihui tiaj ali runara, paihuajpi pasiaichi llucshinagama. 12 Huasii icusha saluraichi. 13 Ali huasi ajpi, canguna cushi chihui saquiringa. Astaun huasi mana ali ajpi, canguna cushi cangunajmallara tigramunga. 14 Pi runas mana cangunara chasquijpi, canguna shimiunara mana uyajpi, llucshichi chi huasimanda, chi llactamandas; canguna chaquimanda pulvura chausichi. 15 Sirtu pacha cangunara nini, taripana punzhai Sodoma Gomorra llactauna pishi castigai tucunaungami chi llacta castigai tucunamanda. 16 Uyaichi. Cangunara buriguunasna pumauna chaupi shungüi cachauni. Machacui cuinta sabiruuna aichi, astaun urpiuna cuinta mansu shunguyujcuna aichi. 17 Runaunamanda cuiraichi. Cangunara apuuna tandarinaunama intriganaunga, paiguna tandarina huasiunai cangunara livachinaunga. 18 Atun apuuna ñaupajma, rey apuuna ñaupajma apai tucunguichimi ñucaraigumanda, paigunas gentilgunas ñuca shimira uyangaj. 19 Cangunara intrigashca huras ama turbarichichu imara rimanara. Chi hurasllaira ima rimanaras canguna cui tucunguichimi. 20 Mana cangunachu rimanguichi, astaun canguna Yaya Ispíritu canguna shungu ucui rimanga. 21 Uqui paihua uquira intrigangami huañungaj, yaya churiras. Churiuna yayaunahua cuntra atarinaunga, paigunara huañuchinaunga. 22 Tucui runauna cangunara chijninaunga ñuca shutimanda. Astaun puchucaigama ahuantaj runa quishpichishca anga. 23 Cangunara turmindachinaupi cai llactai, shu llactama miticuichi. Sirtu pacha cangunara nini, tucui Israelbi tiaj llactaunama rinara mana tucuchinguichichu Runa Churi manara shamujllaira. 24 Shu yachachishca runa paita yachachijta mana yalichu, sirvij runas paihua patronda mana yalichu. 25 Yachachishca runama bastami paita yachachijsna tucujpi, shu sirvij runa paihua patrunsna. Runauna huasiyuj duiñurara ‘Beelzebú’ nisha, ¿manzhu mas shinallara ninaunga paihua huasii tiajcunaras? 26 Shinajpi, ama manzhaichichu paigunara. Ima quillpashcaras ricuchishca anga, ima pacashcaras yachashca anga, 27 Ñuca cangunara llandui rimashcara punzhai rimaichi. Rinrii uyashcaras huasi pundamanda caparichi. 28 Ama manzhaichichu aichara huañuchijcunara, randi almara mana ushanaunzhu huañuchinara. Astaun manzhaichi almara aichandi ucu pachai chingachijta. 29 ¿Manzhu ishqui ichilla pishcura ishqui realhua catunaun? Shina ajllaira paigunamanda mana shujpas allpama urman, canguna Yaya mana yachajpi. 30 Canguna umamanda acchauna tucui yupashcami. 31 Shinajpi ama manzhaichichu. Canguna ashca pishcuunamanda yali valijcuna anguichi. 32 Maicambas ñucamanda, ‘Paita ricsinimi,’ nisha rimajpi runauna ñaupajpi, ñucas shinallara, ‘Paita ricsinimi. ’ nisha rimashami, ñuca ahua pachai tiaj Yaya ñaupajpi. 33 Maican runa ñucamanda, ‘Paita mana ricsinichu,’ nijpi runauna ñaupajpi, ñuca paimanda shinallara, ‘Mana ricsinichu,’ nisha ñuca ahua pachai tiaj Yaya ñaupajpi. 34 Ama iyaichichu ñuca ganas causanara cai pachama apamungaj shamucani; mana ganas causanarachu apamungaj shamucani, astaun shu isparara apamungaj. 35 Ñuca shamucani piñanauna tiangaj churi paihua yayahua, ushushi paihua mamahua, cachun paihua cari mamahua. 36 Shu runahua piñanaujcuna paihua quiquin huasimandallara anaunga. 37 Maicans yayara mamara ñucamanda yalijta llaquij, mana ñucara catina tupuchu. Maicans churira ushushira ñucamanda yalijta llaquij, mana ñucara catina tupuchu. 38 Maicans paihua cruzta mana aparij, ñucara mana catij, mana ñucara catina tupuchu. 39 Maicans paihua causaira tupasha, chita pirdingami; maicans paihua causaira pirdisha ñucamanda, causaira tupangami. 40 Maicans cangunara chasquisha, ñucara chasquin; maicans ñucara chasquisha, ñucara cachamujta chasquin. 41 Maicans shu Diosmanda rimajta chasquisha, pai Diosmanda rimaj ashcaraigu, shu Diosmanda rimaj tupu paganara apinga; maicans shu ali runara chasquisha, pai ali runa ashcaraigu, shu ali runa tupu paganara apingami. 42 Maicans shu cai ichilla huahuaunama shu chiri yacu vasullaras cusha, huahua ñuca yachachishca ashcamanda, sirtu pacha paima paganara mana pirdingachu.”
1 Jesús pai chunga ishqui yachachishca runaunara camachishca huasha, chi partimanda rica, paiguna llactaunai yachachingaj, camachingajpas. 2 Juan, chunda cularbi tiausha, Cristo rashcaunara uyaca. Ishqui pai yachachishca runaunara paihuajma cachaca. 3 Shamunauca Jesusta tapungaj: “¿Can shamuna ajchu angui? ¿Shujtachu chapashun?” 4 Jesús paigunara cutipasha, nica: “Richi, Juanda cuintaichi canguna ricushcaunaras, uyashcaunaras. 5 Ñausauna ricunaun, anga changauna purinaun, ismushca aichayujcuna pichashcami anaun, upa rinriuna uyanaun, huañushcauna causachishcami, pugriunama evangelio shimira rimashcami. 6 Cushimi maican runas ñucahua mana nijtarij.” 7 Paiguna riushcai, Jesús runaunama rimai callarica Juanmanda: “¿Imara ricungaj llucshicanguichi runa illashca partima? ¿Shu huairai cuyuchishca pindujta? 8 ¿Imara ricungaj llucshicanguichi? ¿Shu gustu churarinahua churachishca runara? Gustu churarinahua churarishcauna rey apu huasiunai tianaun. 9 Astaun, ¿imara ricungaj llucshicanguichi? ¿Shu Diosmanda rimajta? Ari, nini cangunara, shu Diosmanda rimajta yali. 10 Cai runamandami quillcashca tian: ‘Riqui, ñuca rimajta camba ñaupajpi cachani. Pai camba ñambira puruntungami camba ñaupajpi. ’ 11 Sirtu pacha cangunara nini: Huarmi pagarichishcaunamanda, Bautisaj Juanmanda yali runa mana atarishcachu. Shina ajllaira ahua pacha mandanai ima mas ichilla runas paimanda yalimi. 12 Bautisaj Juamba punzhamanda cuna hurascama, ahua pacha mandanara turmindachishcami, shinzhiunaga vinsisha apinaun. 13 Tucui Diosmanda rimajcunas ley camachishca shimis Juan tiashca hurascama Diosmanda rimanauca. 14 Canguna cai shimira chasquisha nijpi, cangunara nini: Caimi shamuna aj Elías. 15 Uyana rinriyuj uyachu. 16 “¿Imahuara ricuchishairi cuna huras mirajcunara? Pujllaj huahuauna cuintami, pulasai tiarisha, cumpañajcunama caparinaun: 17 ‘Llautara tucacanchi, astaun mana bailacanguichi; cangunama huacasha cantacanchi, cangunaga mana huacacanguichi. ’ 18 Juan shamuca, mana micuj, mana upij, ‘Supaiyujmi,’ ninaun. 19 Ñucaga, Runa Churi, micuj upij shamucani. Shinajpi ninaun, ‘Caibi shu micuisiqui, vinura upisiqui, cullquira tandachijcuna amigu, uchayujcuna amigu. ’ Shina ajllaira, Yachana, ‘Alimi,’ nisha rimashcami paihua churiunamanda.” 20 Shinajpi Jesús chi llactaunara piñangaj callarica, paiguna mana aripintirishcaraigu, ashca munanaita rashcaunara chihui rashca ajllaira, casna nisha: 21 “¡Upamanda, Corazín! ¡Upamanda Betsaida! Cambajpi rashca munanaita rashcauna Tiro llactai Sidón llactais rashca ajpi, ña unaira aripintirinaunmaca, custalda churarisha, ushpais tiarisha. 22 Chiraigumanda cangunara nini: Taripana punzhai Tiro llacta Sidón llactas pishi castigai tucunaungami, randi canguna yali castigai tucunguichimi. 23 Cambas, Capemaum llacta, ahua pachagama ahuayachishca acangui, astaun Hades nishca huañushcauna tiashcagama irguchishca angui. Cambajpi munanaita rashcauna Sodoma llactai rashca ajpi, cuna punzhagama duranmaca. 24 Chiraigumanda cangunara nini: Taripana punzhai Sodoma llacta pishi castigai tucungami, randi canga yali castigai tucunguimi.” 25 Cai huras, Jesús cutipasha nica: “Yaya, ahua pachamanda cai pachamandas Señor, canda alabaum. Can tucui caigunara yachajcunamanda intindijcunamandas pacacangui, astaun llullucuunara ricuchicangui. 26 Ari, Yaya, casnami munacangui. 27 Tucuira ñuca Yaya ñucama intrigahuacami. Pis mana ricsin Churira, Yayalla paita ricsin. Pis yayara mana ricsin, Churilla paita ricsin, shinallara Churi ricuchisha nishca runa Yayara ricsingami. 28 “Ñucama shamichi tucui canguna tarabashcauna aparishcaunas. Ñuca cangunara samachishami. 29 Ñuca huanduna caspira cuinta apaichi. Ñucamanda yachaichi, mansu shunguyuj, ali shunguyuj ani. Alma samanara tupanguichimi. 30 Ñuca huanduna caspi cuinta aparinallami, ñuca carga pangallami.”
1 Chi punzhaunai Jesús chagraunara pasauca, shu samana punzha. Pai yachachishca runauna yarcachisha, papajta aisasha, micungaj callarinauca. 2 Fariseoguna caita ricusha ninauca: “Riqui, can yachachishca runauna mana raihuajta ranaun samana punzhai.” 3 Jesús paigunara nica: “¿Manzhu Quillcai ricushcanguichi David rashcara, pai paihua tiajcunandi yarcachishca huraspi; 4 imasna Diospa huasii icuca, ricuchina tandara micuca. Pai, paihua cumpañajcunandi mana micuna aca, sacerdoteunalla micuna ajpi? 5 Shinallara, ¿manzhu ricushcanguichi ley camachishca shimii, imasna templo huasii tiaj sacerdoteuna quiquin samana punzhai tarabanaun sacrificiora rangaj, shina rashas mana cauźayuj tucunaun? 6 Cangunara nini, shu templomanda yali valij caibimi tiaun. 7 Canguna cai shimira intindishaga, ‘Sacrificiora ranamanda yali shu llaquij shungura munanimi,’ shinajpi cauźa illajcunara mana cauźayachinguichimachu. 8 Ñuca, Runa Churi, samana punzhahua Señormi ani.” 9 Chimanda risha, paiguna tandarina huasima shamuca. 10 Chihui shu chaquirishca maquiyuj runa tiauca. Jesusta tapunauca, paita cauźayachingaj: “¿Raihuajchu manzhu raihuaj paita alichingaj samana punzhai?” 11 Jesús paigunara nica: “Maican runa cangunamanda shu burigura charij, paihua burigu shu uctui urmajpi samana punzhai, ¿manzhu maquira chutasha llucchinga? 12 Shinajpi, runaga ¿manzhu burigumanda yali valij angairi? Chiraigumanda raihuajmi ali ranara rangaj samana punzhai.” 13 Shinajpi runara nica: “Maquira chutai.” Maquira chutaca, aliyashca aca chishu maqui cuinta. 14 Fariseoguna llucshisha, rimananauca Jesusta huañuchingaj. 15 Jesús caita yachasha, chi partimanda llucshica. Ashca runa paita catinauca. Tucui ungushcaunara alichica. 16 Runaunara rimaca: “Ama rimanguichichu ñuca maibi ajtas;” 17 Diosmanda rimaj Isaías rimashcara pactachingaj, pai casna nica: 18 “Caibimi ñucara sirvij, ñuca ajllashca; Ñuca Llaquishca, paihuajpi ñuca alma cushiyan, Paihua ahuai ñuca Ispiritura churashami, Gentilgunama ali taripanara rimangami. 19 Mana macanaugachu, mana caparingachu. Pihuas paihua shimira mana uyangachu ñambiunai. 20 Shu taula taula rishca pindujta mana paquingachu, Shu rupasha cushniu pushcara mana huañuchingachu pai ali taripana vinsichingagama. 21 Paihua shutii gentilguna chapanaungami.” 22 Shinajpi shu supai icushca runara Jesusma pushamunauca, ñausa, mana rimaj aca. Jesús paita alichica. Shinajpi ñausa aj ricuca, upa shimi aj rimaca. 23 Tucui runauna manzharinauca. “¿Manzhu cai runa chi Davidpa Churi angairi?” ninauca. 24 Fariseoguna caita uyasha ninauca: “Cai runa supaigunara ichun Beelzebú supai apu shutii.” Beelzebú supai apumi. 25 Jesús paiguna iyariushcara ricsisha, paigunara nica: “Tucui mandana paillara chaupirisha tularingami; tucui llacta, tucui huasi paillara chaupirisha, mana shayaringachu. 26 Satanás quiquin Satanasta canzhama ichusha, paillara chaupirishca tucun; ¿imarashara durangai paihua mandana? 27 Ñuca supaigunara canzhama ichujpi Beelzebumanda, ¿pimanda canguna churiuna supaigunara ichunaun? Shinajpi paiguna cangunara taripajcuna tucunaungami. 28 Astaumbas ñuca Diospa Ispirituhua supaigunara ichujpi, sirtu pacha Dios mandana pacha cangunajma pactamushcami. 29 ¿Ima rashara shu shinzhi runa huasii shu runa icungairi pai charishcaunara shuhuangaj, mana ñaupara duiñora huatasha? Duiñora huatashaga, huasii tiajta ushangami shuhuanara. 30 Maican runas mana ñuca partimanda asha, ñucahua cuntrami tucun. Maicans mana ñucahua pallaj talinmi. 31 Chiraigumanda cangunara nini: Tucui uchara, tucui camisha rimashcara perdonashca anga runaunara, astaun Ispiritura camisha rimashcara mana perdonashcachu anga. 32 Maicans Runa Churimanda manali shimira rimajpi, perdonashca anga. Astaun maicans Santu Ispiritumanda manalira rimajpi, mana perdonashcachu anga cuna timpui, huasha timpuis. 33 Ali yura ali muyura cun, manali yuraga manali muyura. Muyura ricusha, yurara ricsinaun. 34 ¡Machacuimanda mirajcuna cuinta! ¿Imarashara alira rimana ushanguichima manaliuna ashallara? Shungüi yalijta undashcamanda, shimi riman. 35 Ali runaga paihua shungu ucui ali charishcamanda alira llucchin, manali runaga manali charishcamanda manalira llucchin. 36 Maspas cangunara nini, runauna paiguna yanga rimashca shimiunamanda taripashca anaunga taripana punzhai. 37 Can rimashca shimiunamanda ali nishca tucungui, can rimashca shimiunamanda cauźayachishca tucungui.” 38 Shinajpi huaquin yachaira yachachijcuna fariseogunandi cutipasha ninauca: “Yachachij, shu can rashca munanaita ricurijta ricushun ninchi.” 39 Jesús cutipaca: “Manali shujhua tacarisiqui miraiguna munanaita ricurijta mañanaun. Chita mana ricuchishca anga, astaun Diosmanda rimaj Jonasmanda ricurijta ricuchishca anga. 40 Imasnara Jonás atun aichahua icsai tiauca quinsa punzhara quinsa tutara, shinallarami ñuca, Runa Churi, allpa ucui tiashami quinsa punzhara quinsa tutara. 41 Ninivé llactamanda runauna taripana punzhai atarinaunga cuna huras miraigunahua, paigunara cauźayachinaungami. Paiguna Jonás camachishcamanda aripintirinauca. Shina ajllaira Jonasmanda yali caibimi tiaun. 42 Sur nishca quinri partimanda shamuj reina huarmi apu cuna huras mirajcunahua ataringami, paigunara cauźayachingami. Paiga mundu puchucai partimanda shamuca Salomón yachashca shimiunara uyangaj. Shina ajllaira Salomonmanda yali caibimi tiaun.” 43 “Ima huras irus supai shu runamanda llucshisha, chaquishca partiunai purin, samasha nisha, astaun samanara mana tupanzhu. 44 Shinajpi nin, ‘Ñuca llucshishca huasima tigrasha. ’ Pactamujpi huasira chushajta, pichashcara, sumajyachishcara tupan. 45 Shinajpi rin, shu canzhis supaigunara paimanda yali manaliunara apisha apamun, icusha chihui causanaun. Chi runa huasha causana tunu ñaupa causanamanda yali mana valij tucun. Shinallarami tucunga cuna huras manali mirajcunahua.” 46 Jesús runaunahua chara rimaushcai, paihua mama, paihua uquiuna canzhai shamunauca, paihua rimasha nisha. 47 Shu runa paita nica: “Camba mama, camba uquiuna canzhai shayanaun, canhua rimasha ninaun.” 48 Jesús casna rimaj runara cutipaca: “¿Pitangai ñuca mama, pitangai ñuca uquiuna?” nisha. 49 Pai yachachishca runaunara maquihua ricuchisha: “Caimi ñuca mama, ñuca uquiuna,” nica. 50 “Tucui runa ñuca ahua pachai tiaj Yaya munaira rau, paimi ñuca uqui, ñuca pani, ñuca mama.”
1 Chi punzha, Jesús huasimanda llucshisha, lamar rayai tiarica. 2 Ashca runauna paihuajma tandarimunauca. Jesús, canuai icusha, tiarica. Tucui runauna pulayai tianauca. 3 Ashca shimiunara Jesús paigunara rimaca yachachina cuintanaunahua, casna nisha: “Shu tarpuj runa tarpungaj llucshica. 4 Tarpujpiga, huaquin muyuuna ñambi rayai urmanauca. Pishcuuna shamusha micunauca. 5 Huaquin muyuuna rumi pambai urmanauca, mana yapa allpa tiashcai. Uctalla iñamuca, allpa mana ashca tiajpi. 6 Indi llucshimusha rupachica. Angura mana charishcaraigu chaquirica. 7 Huaquin muyuuna cashai urmanauca; casha itayasha muyura chingachica. 8 Astaumbas, huaquin muyuuna ali allpai urmanauca, aparinauca, patsajcama, sucta chungagama, quinsa chungagama, caran muyumanda mirarisha. 9 Uyaj rinriyuj uyachu.” 10 Shinajpi Jesús yachachishca runauna shamusha, paita ninauca: “¿Imarasha yachachina cuintanaunahua rimaungui paigunahua?” 11 Jesús cutipasha nica: “Cangunama cushcami ahua pacha mandana pacashca shimiunara yachangaj, astaun paigunama mana cushcachu aca. 12 Maican runas imaras charijpi, mas cushca anga, mas charingaj. Randi mana charijtaga pai charishcahuaras quichushca anga. 13 Chiraigumanda yachachina cuintanaunahua rimashcani, ricusha ama ricunauchu, uyasha ama uyanauchu, ama intindinauchu. 14 Chiraigumanda Diosmanda rimaj Isaías rimashca shimi paigunajpi pactarin: ‘Rinrihua uyasha mana intindinguichi, ñahuihua ricusha mana ricsinguichi. ’ 15 Cai llacta runauna shungu llashajyashcami. Rinriuna tun tucushca mana ali uyanaun. Nahuiunara ishcanaushca ama ñahuiunahua ricungaj, ama rinrihua uyangaj, ama shunguhua intindingaj, paiguna ama ñucajma vultiarinauchu, ñuca paigunara alichingaj. 16 Astaun cushiunami canguna ñahuiuna, ricuj ashcamanda. Cushiunami canguna rinriuna, uyaj ashcamanda. 17 Sirtu pacha cangunara nini, ashca Diosmanda rimajcunas, ali runaunas canguna ricushcara ricunara munanaucami, randi mana ricunaucachu; canguna uyashcaras uyanara munanaucami, randi mana uyanaucachu.” 18 ”Uyaichi,” nica Jesús, “imara nin tarpuj runamanda yachachina cuintana shimi. 19 Shu runa ahua pacha mandana shimira uyasha, mana intindijpi, manali supai shamun, shungüi tarpushcara quichun. Caimi ñambi rayai tarpushca cuinta. 20 Rumi pambaunai tarpushca caimi: shimira uyasha uctalla cushihua chasquica; 21 paihuajpi angura mana charin, mana duranzhu; turmindarina, turmindachinas shamujpi Diospa shimimanda, shinajpi uctalla nijtasha urman. 22 Casha ucui tarpushca caimi: shimira uyan, astaun cai mundu munai, charij tucuna umachishcas, shimira chingachinaun. Chiraigu muyura mana cun. 23 Astaumbas, ali allpai tarpushca caimi: shimira uyasha intindin, aparin patsajta, sucta chungara, quinsa chungara, caran muyu aparin.” 24 Cutillara shu yachachina cuintanara rimaca.” Ahua pacha mandana casna ricurijmi: Shu runa ali muyura paihua allpai tarpuca. 25 Astaun runauna puñuriashcai, shu paita chijnij runa shamuca, trigu muyu tarpushcai manali quihua muyura tarpuca; chihuasha rica. 26 Trigu iñasha aparica, shinallara manali quihuas ricurica. 27 Shinajpi duiñura sirvijcuna shamusha, ninauca: ‘Señor, ¿manzhu ali muyuunara camba allpai tarpuchicangui? ¿Maimandara cai manali quihua iñashca?’ 28 Paigunara nica: ‘Shu ñucara chijnij caita rashcami. ’ Sirvijcuna ninauca: ‘¿Munanguichu ñucanchi aisai ringaj?’ 29 Duiñuga: ‘Mana,’ nica, ‘manali quihuara aisasha, paihua pariju trigura aisanguichima. 30 Ishquindira saquichi pariju iñangaj pallanagama. Pallana huras, pallajcunara nisha: ‘Ñaupa punda manali quihuara pallaichi, huangüichi, rupachingaj. Randi trigura pallasha, ñuca huacachina huasii huacachichi. ’ ” 31 Cutillara shu yachachina cuintanara paigunara rimaca: “Ahua pacha mandana shu mustaza muyu cuinta ricurijmi. Shu runa muyura apisha tarpuca paihua allpai. 32 Sirtu pacha cai muyu tucui muyumanda yali ichilla muyumi, randi iñasha yuraunamanda yali atun yura tucun. Shinajpi pishcuuna shamunaun huasichingaj paihua pallcaunai. 33 Cutillara shu yachachina cuintanara paigunara rimaca: “Ahua pacha mandana tandara punguichina pulvu cuinta ricurijmi. Shu huarmi caita apisha, quinsa tacita tupu harina pulvui churaca, tucui punguiringagama.” 34 Cai tucuira Jesús runaunara rimaca yachachina cuintanaunahua; casna yachachina cuintana illaj, mana rimajchu aca. 35 Diosmanda rimashca shimira pactachingaj, casna nisha: “Shimira pascashami yachachina cuintanaunahua; Mundu callarishca hurasmanda pacashcaunara yachachishami.” 36 Shinajpi runaunara cachashca huasha, Jesús huasii icuca. Yachachishca runauna shamusha, paita ninauca: “Manali quihuamanda cuintashcara intindichihuapai.” 37 Jesús cutipasha nica: “Ali muyura tarpuj ñuca mani, Runa Churi nishca. 38 Allpaga cai pachami. Ali muyuuna ahua pacha mandana churiunami. Manali quihua, manali supai churiunami. 39 Chijnisha tarpuj supai apumi. Pallanaga cuna timpuuna tucurinami. Pallajcuna angelgunami. 40 Shinajpi, imasnara manali quihuara aisanaun ninai rupachingaj, shinallara tucungami cai timpuuna tucurinai. 41 Ñuca, Runa Churi, ñuca angelgunara cachamushami ñuca mandana pachamanda tucui nijtachijcunara, manali rajcunaras apingaj. 42 Paigunara atun nina uctui shitanaunga. Chihui atun huacanas quiru mucurinas anga. 43 Chi huraspi aliuna indi cuinta chiujlla ricurinaunga paiguna Yaya mandana pachai. Uyaj rinriyuj uyachu.” 44 “Maspas, ahua pacha mandana shu allpai pacashca yapa valij curi cuintami. Shu runa tupan, tupasha cuti pacan. Caimanda cushiyasha, pai tucui charishcara catun chi allpara randingaj.” 45 ”Shinallara ahua pacha mandana shu catuj runa cuintami, gustu sumaj perla valij muyuunara mascaj. 46 Shu yapa ali valijta tupasha, tucui pai charishcara catun chi valij perla muyura randingaj.” 47 “Shinallara ahua pacha mandana shu lica cuintami. Licara lamarbi shitajpi, tucui tunu aichahuara apin. 48 Lica ña undajpi, pulayama aisanaun. Runauna tiarisha, ali aichahuara ashangai churanaun, manaliunara canzhama shitanaun. 49 Shinallarami tucunga cai timpuuna tucurinai. Angelguna llucshinaunga manaliunara aliunamanda chicanyachinaunga. 50 Manaliunara nina uctui shitanaunga. Chihuimi atun huacanas quiru mucurinas.” 51 Jesús paigunara nica: “¿Intindishcanguichichu tucui cai shimiunara?” Cutipanauca: “Ari, Señor” 52 Paigunara nica: “Chiraigumanda tucui yachaira yachachij ahua pacha shimii yachachishca asha, shu yaya cuintami, paihua charishcamanda rucuunaras, mushujcunaras llucchin.” 53 Jesús cai yachachina cuintanaunara rimashca huasha, chi partimanda rica. 54 Paihua quiquin llactama pactamusha, Jesús runaunara yachachica paiguna tandarina huasii. Shinajpi runauna manzharinauca casna nisha: “¿Maimanda charin cai runa casna yachanara, cai munanaita ranaunandi? 55 ¿Manzhu cai runa carpintiru churi? ¿Manzhu paihua mama María, paihua uquiuna Jacobo, José, Simón, Judas? 56 ¿Manzhu tucui paihua paniuna ñucanchihua tianaun? ¿Maimanda charin tucui caigunara?” 57 Paimanda turbarinauca. Astaun Jesús paigunara nica: “Shu Diosmanda rimaj llaquishcami, astaun paihua quiquin allpais quiquin huasiis mana llaquinaushcachu.” 58 Chi llactai mana ashca munanaita ranaunara rarcachu, runauna mana quirishcaraigu.
1 Chi punzhaunai, Herodes rey apu Jesuspa shutira uyarishcara uyaca. 2 Paita sirvijcunara nica: “Caimi Bautisaj Juan, huañushcaunamanda causarishcami. Caimanda cai ushanauna paihuajpi ricurinaun.” 3 Herodes ñaupa huras Juanda apica, cadenahua huataca, chunda cularbi ishcaca paihua uqui Felipe huarmi Herodíasraigumanda; 4 Juan paita: “Chi huarmira mana charinachu angui,” nishcamanda. 5 Herodes paita huañuchinara munaca, astaun runaunara manzhaca, runauna Juanda Diosmanda rimajmi iyashcaraigumanda. 6 Astaun, Herodes pagarishca punzha pactarijpi, Herodíaspa ushushi tiajcuna chaupi shungüi bailaca, Herodesta cushiyachica. 7 Chiraigu shimira cuca imara mañashcaras paita cungaj. 8 Ushushi, paihua mama ñaupa rimashcasna, “Bautisaj Juamba umara pulatui cuhuai,” nica. 9 Shinajpi rey apu llaquirica. Astaun shimira cushcamanda, mesai tiaj runaunamandas, umara cungaj mandaca. 10 juamba cungara pitingaj mandaca chunda cularbi. 11 Paihua umara pulatui apamusha cunauca, ushushima cushca aca, ushushi mamama cuca. 12 Shinajpi Juan yachachishca runauna shamunauca, huañushcara apasha pambanauca. Rinauca Jesusta cuintangaj. 13 Jesús caita uyasha, chi llactamanda rica canuai, runa illashca caru partima. Runauna pai shamushcara uyasha, llactaunamanda chaquillahua paita catinauca. 14 Jesús llucshisha, ashca runauna taucarimushcara ricuca; paigunamanda llaquirica. Paigunamanda ungushca ajcunara alichica. 15 Tutayaupi, pai yachachishca runauna paima shamunauca: “Cai parti runa illajmi,” nisha. “Huras ña pasashcami. Runaunara dispiri ichilla llactaunama ringaj, micunara randinauchu.” 16 Jesús paigunara nica: “Mana ministirinzhu paiguna ringaj. Cangunallara caraichi.” 17 Paiguna cutipanauca: “Caibi pichca tandallara ishqui aichahuallara charinchi.” 18 Jesús nica: “Ñucajma apamichi.” 19 Shinajpi, runaunara quihuai tiaringaj mandaca. Pichca tandara ishqui aichahuaras apisha, ahuama ricusha, bindisiasha partica. Yachachishca runaunara tandara cuca, paiguna runaunara caranauca. 20 Tucui sajsajta micunauca, puchuunara tandachinauca, chunga ishqui tasa tupura. 21 Micujcuna pichca huaranga tupu cariuna anauca, huarmiunara huahuaunara mana yupajllaira. 22 Chi huasha, Jesús pai yachachishca runaunara canuai icuchica, paimanda ñaupa ringaj chimbama. Paiga saquirica tandarishcaunara dispiringaj. 23 Runaunara dispirishca huasha, Jesús urcuma sicaca sapallai Diosta mañangaj. Tutai chihui sapalla tiauca. 24 Canua chaupi lamarbi tiaushcai, tsajlaspi api tucuca, huaira ñahuipuramanda shamujpi. 25 Punzhayanara Jesús paigunajma shamuca, yacu ahuara purisha. 26 Yachachishca runauna Jesusta yacu ahuara purishcara ricusha manzharinauca. “Ayami,” nisha, manzharisha caparinauca. 27 Chi ratullai Jesús paigunara rimaca: “¡Cariyaichi, ñucami ani. Ama manzhaichichu!” 28 Shinajpi Pedro paita nica: “Señor, can ashaga, cayahuai ñucara cambajma shamungaj, yacu ahuara purisha.” 29 Jesús: “Shami,” nica. Pedro canuamanda irgusha, yacu ahuara purica Jesuspajma ringaj. 30 Astaumbas Pedro shinzhi huairara ricusha manzharica. Yacui pambaringaj callarisha, “¡Señor, quishpichihuapai!” caparica. 31 Chi ratullai Jesús maquira chutachisha, paita apisha, “Ansalla quirij runa,” nica, “¿imarasha mana quiricangui?” 32 Paiguna canuai icushcallahua, huaira saquirica. 33 Shinajpi canuai tiajcuna Jesusma shamusha aduranauca: “Sirtu pacha can Diospa Churimi angui.” 34 Yacura chimbashca huasha, Genesaret llactama pactamunauca. 35 Chihui tiaj runauna Jesusta ricsisha, shimira cachanauca tucui chi mayanllai tiaj partiunama. Paihuajma tucui ungushcaunara pushamunauca. 36 Paita ruganauca paihua churarina pundahuallaras llangangaj. Tucui llangajcuna aliyanauca.
1 Huaquin Jerusalenmanda shamuj yachaira yachachijcuna fariseogunandi Jesusma shamunauca. 2 Paita ninauca: “¿Imarasha can yachachishca runauna rucuuna yachachishcaunara mana caźunaun? Maquira mana maillanaun tandara micungaraushcallara?” 3 Jesús cutipasha paigunara nica: “¿Imarasha canguna Dios mandashcara mana caźunguichi canguna yachachishcaunara rasha? 4 Dios mandasha nica: ‘Yayaras mamaras llaquinami angui. Yayamanda mamamanda manalira rimajpi, runa shu rai huañuchu. ’ 5 Astaun canguna ninguichi: ‘Maican runa yayara mamara nisha: ‘Ñuca canda yanapana cullquira Diosma cushcami,’ 6 ña yayara mamara yanapanara mana ministirinzhu. Shina rasha Dios mandashca shimira mana valijta rashcanguichi canguna yachachishcamanda. 7 Ishqui shimiyujcuna, Diosmanda rimaj Isaías cangunamanda alirami rimaca, casna nisha: 8 ‘Cai runauna shimi caramandalla ñucara ahuayachinaun, astaun paiguna shungu ñucamanda carui tiaun, 9 Yangamanda ñucara ahuayachinaun, ali yachanaunara cuinta runauna mandashcaunara yachachisha. ’ ” 10 Jesús taucariai runaunara cayasha: Uyaichi, intindichi nica. 11 “Mana shimii icuj runara huajlichinzhu, astaun shimi ucumanda llucshij huajlichin.” 12 Shinajpi yachachishca runauna shamusha, Jesústa ninauca: “¿Yachanguichu Fariseoguna piñaushcara cai shimira uyasha?” 13 Jesús cutipaca: “Tucui yura, mana ñuca ahua pacha Yaya tarpushca ajpi, pilashca anga. 14 Saquichilla paigunara, ñausauna asha ñausaunara pushanaun. Ñausa runa shu ñausara pushasha, ishquindi uctui urmanaunga.” 15 Pedro cutipasha paita nica: “Yachachihuai ñucanchira cai yachachina cuintanara.” 16 Jesús nica: “¿Cangunas charajchu mana intindinguichi? 17 ¿Manzhu intindinguichi tucui imas shimii icusha icsama pasan, chimanda ichushca tucun ismana uctui. 18 Astaun shimimanda llucshij, shungu ucumanda shamun. Caiga runara huajlichin. 19 Shungu ucumanda llucshinaun: manali iyaiguna, runara huañuchinauna, shujhua tacarinauna, uchalinauna, shuhuanauna, llulla shimiuna, Diosta camisha rimanauna. 20 Caigunami runara huajlichinaun. Astaun maquira mana maillasha micusha, runara mana huajlichinzhu.” 21 Jesús chi llactamanda llucshisha, Tiro Sidón partiunama rica. 22 Chihui shu Canaán huarmi, chi partimanda llucshij, caparisha Jesusta nica: “Señor, Davidpa Churi, llaquihuapai. Ñuca ushushira supai ashcarami turmindachiun.” 23 Astaun Jesús mana imaras cutipacachu. Shinajpi pai yachachishca runauna llutarisha ruganauca: “Cachai cai huarmira, ñucanchi huashai yapa caparisha catimun.” 24 Pai cutipasha nica: “Israel aillumanda buriguuna cuinta chingarishcaunamalla cachamushca ani.” 25 Shinajpi huarmi Jesuspa ñaupajma shamusha, tuama urmasha, paita nica: “Señor, yanapahuapai ñucara.” 26 Jesús cutipasha nica: “Mana valinzhu churiuna tandara quichungaj, ichilla allcuunama shitangaj.” 27 Randi huarmi nica: “Ari, Señor, shina ajllaira ichilla allcuuna mesamanda urmaj puchuunara micunaun.” 28 Shinajpi Jesús cutipaca: “Huarmi, shinzhirami quiringui. Can munashcasna rashca achu.” Chi hurasmanda pacha ushushi aliyashca aca. 29 Chimanda pasasha, Jesús Galilea rayama shamuca. Urcuma sicasha, chihui tiarica. 30 Ashca runauna paihuajma shamunauca. Ashca anga chaquiunara, ñausaunara, upa shimiunara, pullu maquiunara, ashca shujcunandi pushamusha, paigunara Jesuspa chaquii churanauca. Jesús tucuira alichica. 31 Shinajpi taucariai runauna manzharinauca, shimi upauna rimashcara, pullu maquiuna aliyashcara, anga changauna purishcara, ñausa ñahuiuna ricushcaras ricusha. Israelba Diosta alabanauca. 32 Jesus pai yachachishca runaunara cayasha, nica: “Runaunamanda llaquirini. Ña quinsa punzha ñucahua tianaushca, micuna illaj. Paigunara mana micujta cachanara mana munanichu, ama yarcaihua huañunauchu ñambii.” 33 Shinajpi yachachishca runauna paita ninauca: “¿Maimanda cai tupu tandaunara charishun casna runa illashca partii, cai tucui runaunara sajsajta carangaj?” 34 Jesús paigunara nica: “¿Masna tandara charinguichi?” “Canzhis tandara,” ninauca, “ansalla aichahuaunandi.” 35 Runaunara allpai tiaringaj mandaca. 36 Chi canzhis tandara aichahuaras apisha, Diosta agrasicami, tandara particami. Yachachishca runaunama cuca, paiguna runaunara caranauca. 37 Tucui sajsajta micunauca. Puchuunara canzhis atun tasa undajta tandachinauca. 38 Micujcuna chuscu huaranga cariuna anauca, huarmiras huahuaras mana yupajllaira. 39 Shinajpi runaunara dispirishca huasha, Jesús canuai icusha, Magdala partima shamuca.
1 Fariseoguna saduceogunandi shamunauca Jesusta tintangaj. “Ricuchihuai,” ninauca, “shu ahua pachamanda munanaita ricurinara.” 2 Jesús cutipasha nica: “Tutayaupi ninguichi: ‘Silu pucayaun, ali punzha tucungami. ’ 3 Tutamandaga, ‘Tamiangaraun,’ ninguichi, ‘puyu pucayajpi. ’ ¡Ishqui shimiyujcuna! Silui ricurishcara ricsinguichi, astaun cai timpui tucushcaunara mana ricsinguichichu. 4 Manali shujhua tacarisiqui miraiguna, ‘Munanaita ricurinara ricuchihuai,’ ninaun. Shina ajllaira ricurinara mana ricuchishcachu anga. Diosmanda rimaj Jonasmanda ricurinallara ricuchishca anga.” Paigunara saquisha rica. 5 Lamar chimba partima Jesús yachachishca runauna pactai risha, tandara apamunara cungarimunaushca aca. 6 Jesús paigunara nica: “Cuiraichi fariseoguna saduceoguna tandara rana punguichina pulvumanda.” 7 Yachachishca runauna paigunapura iyarisha ninauca: “Ñucanchi tandara mana apamushcamandami casna riman.” 8 Jesús caita intindisha, paigunara nica: “Ansalla quirij runauna, ¿imarasha canguna shungüi rimanaunguichi tandara mana charishcamanda? 9 ¿Manzhu intindinguichi? ¿Manzhu iyaringuichi pichca tandahuara, pichca huaranga runapura micushcara, imasna suru tasara tandachicanguichi? 10 ¿Manzhu iyaringuichi chi canzhis tandahuara, chuscu huarangapura micushcara? ¿Shinajpi, imasna atun tasara tandachicanguichi? 11 ¿Imarasha mana intindihuacanguichi ñuca rimashcara? Mana tandamandachu aca ñuca cangunara rimashca, fariseo saduceo tandara rana punguichina pulvumanda cuiraichi, nisha.” 12 Shinajpi intindinauca, pai mana rimacachu tandara rana pulvumanda cuiranara, astaun fariseoguna saduceoguna yachachishca shimiunamanda cuiranara. 13 Jesús Filipo Cesarea partima shamusha, pai yachachishca runaunara tapuca: “¿Runauna pimi nishara ninaun Runa Churira?” 14 Paiguna cutipanauca: “Huaquinguna Bautisaj Juanmi, shujcuna Elíasmi, chishujcuna Jeremíasmi, shu Diosmanda rimaj chari,” ninaun. 15 Jesús paigunara nica: “¿Cangunaga, pimi nishara ninguichi ñucara?” 16 Simón Pedro cutipasha nica: “Can Cristomi angui, causaj Diospa Churi.” 17 Shinajpi Jesús paita cutipasha nica: “Cushimi angui can, Jonaspa churi Simón. Mana aichachu, mana yahuarchu caita canda ricuchishca, astaun ñuca ahua pachai tiaj Yaya; paimi canda ricuchishca. 18 Ñucas canda nini: Can Pedro nishca angui. Cai piñas rumi ahuai ñuca iglesiara shayachishami. Ucu pacha ushaiguna paita mana vinsinaungachu, 19 Ahua pacha mandana llaviunara cuinta canda cushami. Tucui imaras cai pachai can huatajpi, ahua pachais huatashca anga, Tucui imaras cai pachai can pascajpi, ahua pachais pascashca anga.” 20 Shinajpi Jesús pai yachachishca runaunara mandaca: “Pitas ama cuintaichichu ñuca Jesús Cristo ashcara.” 21 Chi hurasmanda Jesús pai yachachishca runaunara cuintangaj callarica: “Ministirinmi,” nisha, “ñuca Jerusalenma ringaj; chihui rucuuna, sacerdota atun apuuna, yachaira yachachijcunas ñucara ashcara turmindachihuanaunga, ñucara huañuchihuanaunga; quinsa punzhaiga causarishami.” 22 Shinajpi Pedro paita shujma pushasha, camachingaj callarica: “Señor, canllarara llaquipai, ama canhua casna tucuchu.” 23 Jesusca vultiarisha Pedrora nica: “¡Ñuca ñaupajmanda anzhuri, Satanás! Ñucara nijtachina angui, Diospajcunara mana ricusha, astaumbas runajcunallara ricungui.” 24 Shinajpi Jesús pai yachachishca runaunara nica: “Pihuas ñucara catisha nisha, ‘Mana imaschu ani,’ nichu; paihua cruzta aparisha, ñucara catimuchu. 25 Maicans paihua causaira quishpichisha nisha, causaira pirdingami. Maicans paihua causaira pirdisha ñucaraigumanda, causaira tupangami.” 26 “¿Imajta valingai runaj intiru mundura ganashas, paihua almara pirdijpi? ¿Ima paganarara cungai shu runa paihua almamanda? 27 Ñuca, Runa Churi, ñuca Yaya sumajhua paihua angelgunahua pariju shamushami. Chi hurasllaira caran duiñura pagashami pai rashca tupura. 28 Sirtu pacha cangunara nini, ‘Huaquinguna caibi tiajcuna huañunara mana gustanaungachu Runa Churira paihua mandanahua shamujta ricunagama.”
1 Sucta punzha huasha, Jesús Pedrora, Jacobora, paihua uqui Juandas, pushaca paiguna sapallara shu ahua urcu pundama. 2 Chihui, paiguna ñaupajpi, Jesús shu tunu ricurij tucuca. Paihua ñahui indisna chiujlla ricurica. Paihua churarina rasu cuinta yurajlla tucuca. 3 Paigunajma ricurimunauca Moisespas, Elíaspas, Jesushua rimanausha. 4 Shinajpi Pedro Jesusta nica: “Señor, alimi ñucanchi caibi tiangaj. Can munajpi caibi quinsa huasihuara rashun, shuj cambaj, shuj Moisespaj, shuj Elíaspaj.” 5 Caita rimaushcai, shu chiujlla ricurij puyu paigunara quillpaca. Puyu ucumanda shu shimi uyarica: “Caimi ñuca llaquishca Churi, paihuajpimi cushiyani, paita uyaichi.” 6 Yachachishca runauna caita uyasha tuama urmanauca, ashcara manzharinauca, 7 Shinajpi Jesús llutarimusha, paigunara llangaca, “Atarichi, ama manzhaichichu,” nica. 8 Ñahuira atarichisha ricusha, mana pitas ricunaucachu, Jesusllara ricunauca. 9 Urcumanda irgusha, Jesús paigunara mandaca: “Pitas ama rimaichichu cai ricushcara, ñuca, Runa Churi, huañushcaunamanda causarinagama.” 10 Shinajpi yachachishca runauna paita tapunauca: “¿Imarasha ninaun yachaira yachachijcuna, ‘Elías ñaupa punda shamunami,’ nisha?” 11 Jesús cutipasha, paigunara nica: “Sirtu pacha Elías ñaupa punda shamungami tucuira alichingaj. 12 Astaun cangunara nini, ña shamucami Elías. Paita mana ricsinaucachu, astaumbas runauna paiguna munaira ranaucami paihua. Shinallara ñucara, Runa Churira, turmindachihuanaunga.” 13 Shinajpi yachachishca runauna intindinauca Jesús Bautisaj Juanmanda paigunama rimashca ajta. 14 Jesús runauna muntunma pactamujpi, paihuajma shu runa shamusha, paihua ñaupajpi cungurisha, paita nica: 15 ”Señor, ñuca churihuara llaquipai, ura paita apin, ashcara turmindarin. Ashca cuti ninai urman, ashca cuti yacuis. 16 Paita pushamucani can yachachishca runaunajma, randi alichinara mana ushanaucachu.” 17 Jesús cutipasha nica: “¡Mana quirj istu shungumanda mirajcuna! ¿Ima hurascamara cangunahua tiaushairi? ¿Ima hurascamara ahuantashairi? Huahuara caima pushamichi.” 18 Jesús supaira piñaca. Supai huahuamanda llucshica. Huahua chi hurasmanda pacha aliyacami. 19 Yachachishca runauna Jesusma sapallai shamusha, paita ninauca: “¿Imaraigu mana ushacanchi chi supaira ichungaj?” 20 Jesús paigunara nica: “Canguna ansalla quirishcamanda. Sirtu pacha cangunara nini, canguna quirina shu ichilla tarpuna muyu tupu ajpi, canguna cai urcura: ‘Caimanda chima pasai,’ ninguima, pasanmami aca. Imas cangunaj raihuajllami anga. 21 Cai sami supaiguna Diosta mañajllai sasijllai llucshinaun.” 22 Paiguna Galilea partii tiaushcai, Jesús paigunara nica: “Runa Churi runauna maquii intrigashcami anga. 23 Paita huañuchinaungami, astaumbas quinsa punzha huasha causarimungami.” Yachachishca runauna ashcara llaquirinauca. 24 Paiguna Capernaum llactama pactamujpi, Pedrojma, chi ishqui cullquira mañajcuna shamunauca, paita ninauca: “¿Cangunara Yachachij cai ishqui cullquira manzhu pagangai?” 25 Pedro nica: “Ari.” Huasii icujpi, Jesús ñaupa punda paita nica: “¿Imasnara iyangui, Simón, cai pacha rey apuuna, pimandara impuistu cullquira apinaun, churiunamandachu, carumanda shamujcunamandachu?” 26 Pedro cutipaca: “Carumandaunamandami.” Jesús paita nica: “Shinajpi churiuna mana paganachu. 27 Shina ajllaira, paigunara ama piñachingaj, ri lamarma. Ansiluiri. Ñaupa punda apirij aichahuara api, paihua shimira pascai; shimi ucui ishquimanda pagana cullquira tupanguimi. Cullquira api, cuiri ñucamandas canmandas.”
1 Chi huras, Jesús yachachishca runauna paihuajma shamunauca, “¿Pita mas atun angairi ahua pacha mandanai?” ninauca. 2 Jesús shu ichilla huahuara cayasha, “Shami,” nisha, paita paiguna chaupi shungüi shayachica. 3 Jesús nica: “Sirtu pacha cangunara nini, canguna mana turcarisha, huahuaunasna mana tucusha, ahua pacha mandanai mana icunguichichu. 4 Shinajpi maican runas cai huahuasna mansu tucusha yali atunmi anga ahua pacha mandanai. 5 Maicans shu casna huahuara chasquisha ñuca shutii, ñucarami chasquin.” 6 “Maicans shu cai ñucajpi quirij ichilla huahuaunara uchai urmachijpi, astaun alimi anmaca shu atun cutana rumira paihua cungai huatasha, paita lamarbi chingachingaj. 7 ¡Ayailla mundu urmachinaunamanda! Urmachinauna shamuna ministirin. Randi, ¡ayailla urmachij runa! 8 Chiraigumanda camba maqui, camba chaqui canda urmachijpi, piti; ichui canmanda. Yali valin causaibi pullu maqui, pullu chaqui icungaj, astaun mana valin ishqui maquiyuj, ishqui chaquiyuj huiñaigama sindij ninai shitai tucungaj. 9 Shinallara camba ñahui canda urmachijpi, ichui canmanda; yali valin causaibi icungaj shu ñahuillahua, astaun mana valin ishqui ñahuihua ucu pacha ninai shitai tucungaj.” 10 “Ricuichi ama pishii churaichichu shuj cai ichilla huahuaunamanda. Cangunara nini, paiguna ahua pachai tiaj angelguna tucui huras ñuca ahua pachai tiaj Yaya ñahuira ricunaun. 11 Runa Churi chingarishcara quishpichingaj shamushcami. 12 ¿Imara iyanguichi? Shu runa patsaj burigura charisha, shuj chingarijpi, ¿manzhu chishu iscun chunga iscunda saquisha, urcuma ringa chingarishcara mascangaj? 13 Burigura tupasha, sirtu pacha cangunara nini, mas cushiyanga chi buriguraigumanda, chishu iscun chunga iscun mana chingarijcunamanda yali, 14 Shinallarami camba ahua pachai tiaj Yaya mana munanzhu shujllas cai ichilla huahuaunamanda chingaringaj.” 15 “Shinajpi, camba uqui canhua ucharajpi, ri paita rimangaj sapalla ashcai. Pai canda uyajpi, camba uquira ganashcangui. 16 Astaun pai canda mana uyajpi, canhua pariju shujta ishquira pushai, ishqui quinsa puramanda tucui rimashca shimi uyaringaj. 17 Pai cangunara mana uyasha nijpi, iglesiara cuintai. Pai iglesiara mana uyajpi, paita ña shu yanga mana valij runa cuinta iyashca achu. 18 Sirtu pacha cangunara nini, tucui imaras cai pachai huatajpi, ahua pachais huatashca anga; tucui imaras cai pachai pascajpis, ahua pachais pascashca anga. 19 Cutillara cangunara nini, cangunamanda ishquindi cai pachai chi tunullarara iyarijpi, pariju imaras Diosta mañangaj, ñuca ahua pachai tiaj Yaya chita rangami. 20 Maibis ishquipura quinsapura asha, ñuca shutii tandarijpi, chihui tiashami ñuca paiguna chaupi shungüi.” 21 Shinajpi Pedro llutarimusha, nica: “Señor, imasna cuti ñuca uquira perdonashachu pai ñucahua ucharashcara? ¿Canzhis cutigama?” 22 Jesús paita nica: “Mana ninichu canzhis cutigamalla, astaun canzhis chunga cuti canzhis cutigama.” 23 ”Chiraigumanda, ahua pacha mandana shu rey apu cuinta tucun, paita dibishcaunara alichisha nica paita sirvijcunahua. 24 Dibiunara alichingaj callarijpi, shu runa shamuca chunga huaranga cullquira dibij. 25 Cai runara, paganara mana ushajpi, paihua patrón paita catungaj mandaca, huarmindi churiunandi charishcaunandi, dibishcara pagangaj. 26 Shinajpi chi sirvij runa, patromba ñaupajpi tuama urmasha, paita rugaca: ‘Señor, chapahuapai ansallara, tucuira canda pagashcanguimi. ’ 27 Chi sirvijpa patrón, paita llaquisha cacharicami, tucui dibira pasachisha. 28 Chi sirvij runa llucshishca huasha, shu paihua pariju sirvij runara tupaca, paita shu patsaj sucrellara dibica. Paita shinzhira cungai apica, quihuisha nisha raulla. ‘Pagahuai,’ nica, ‘dibishcara. ’ 29 Shinajpi chi paihua pariju sirvij runa, paihua chaquii tuama urmasha, rugaca: ‘Chapahuapai ansallara, tucuira canda pagashcanguimi. ’ 30 Paiga mana munacachu, astaun runara chunda cularbi shitaca dibishcara pagangagama. 31 Chishu paihua pariju sirvijcuna casna tucushcara ricusha, ashcara llaquirisha, patrumbajma cuintai rinauca tucui imasna tucushcara. 32 Shinajpi patrún chi runara cayasha, nica: ‘Manali sirvij runa, tucui can dibishcara pasachicani, can ñucara rugashcaraigu. 33 ¿Manzhu can shinallara canhua pariju sirvij runara llaquinami acangui imasna ñuca canda llaquicani?’ 34 Shinajpi patrún piñarisha, chi runara intrigaca livachijcunama, tucui pai dibishcara pagangagama. 35 Shinallarami ranga ñuca ahua pachai tiaj Yaya cangunahua, canguna mana tucui shunguhua canguna uquiunara paiguna manali rashcaunara perdonajpi.”
1 Jesús cai shimiunara rimai pasashca huasha anzhuricami Galilea partimanda. Judea partima rica, Jordán yacu chimbama. 2 Ashca runauna paita catimunauca; tucuira alichicami. 3 Shinajpi fariseoguna paihuajma shamunauca, paita tintasha, ninauca: “¿Ranallachu shu cari imaraigumandas paihua huarmira ichungaj?” 4 Jesús cutipasha nica: “¿Manzhu ricushcanguichi imasna runaunara ñaupa punda raj Dios paigunara cariras huarmiras rashcami, 5 paigunara nica, ‘Shu cari paihua yayara mamara saquingami, paihua huarmihua llutaringami, ishquindi shu aichalla tucunaungami’? 6 Shinajpi mana ishquichu anaun astaun shu aichalla. Chimanda Dios llutachishcara runa ama llushpichichu.” 7 Paita ninauca: “Shinajpi, ¿Imaraigu Moisés mandaca maqui llushpichina quillcara cungaj, huarmira ichungaj?” 8 Jesús paigunara nica: “Canguna shungu shinzhi ashcaraigu Moisés lugarda cuca canguna huarmiunara ichungaj, astaun callari huraspi mana shinachu aca. 9 Ñuca cangunara nini, maican runa paihua huarmira ichusha, mana shujhua tacarishcaraigumanda ajpi, shu huarmihua casarasha, shujhua tacarij runa tucun, shinallara ichushca huarmihua casaraj runa shujhua tacarij tucun.” 10 Shinajpiga yachachishca runauna Jesusta ninauca: “Shu cari paihua huarmihua shina ajpi, mana valinzhu casarana.” 11 Shinajpi Jesús paigunara nica: “Mana tucui runa cai shimira chasquinara ushanzhu, astaun cushcaunalla. 12 Eunucos nishca mana casarana ushaj runauna tianaun, huaquinguna casnami pagarinaushca mama icsamanda pacha; shujcuna casnami anaun runa rashcamanda; shujcunaga casnami tucunaun paiguna quiquin munaimandallara, ahua pacha mandanaraigumanda. Caita chasquinara ushaj runa chasquichu.” 13 Shinajpi ichilla huahuaunara Jesuspajma pushamunauca paihua maquira paiguna ahuai churangaj, Diosta mañangajpas. Yachachishca runaunaga paigunara piñanauca. 14 Jesusca: “Huahuaunara lugarda cuichi ñucama shamungaj,” nica, “ama arcaichichu paigunara. Casna huahuaunajmi ahua pacha mandana.” 15 Paihua maquiunara huahuauna ahuai churashca huasha, ricami chi llactamanda. 16 Shinajpi shu runa Jesusma shamusha, paita nica: “Ali yachachij, ¿Ima alirara rashairi huiñai causaira charingaj?” 17 Jesús paita nica: “¿Ima rasha ñucara ‘Ali’ nisha rimahuangui? Pihuas mana alichu, Diosllami ali. Randi, causaima icusha nishaga, mandashca shimiunara huacachi.” 18 Runa paita tapusha: “¿Maicangunáraga?” nica. Jesús cutipaca: “Ama huañuchinguichu, ama shujhua tacaringuichu, ama shuhuanguichu, ama llullanguichu shujcunamanda. 19 Yayaras mamaras llaquinami angui, camba rayai tiaj runara can quiquindasnallara llaquinami angui.” 20 Malta runa paita nica: “Cai tucuira rashcani huahuamanda pacha. ¿Imara chara pishin?” 21 Jesús paita nica: “Can sirtu ali pactajta tucusha nijpi, ri, can charishcara catui, tsuntsuunama cuyai, maspas valijcunara ahua pachai charinguimi. Shami, catihuai ñucara.” 22 Maltaga cai shimira uyasha, llaquirisha rica, ashca charij ashcamanda. 23 Shinajpi Jesús pai yachachishca runaunara nica: “Sirtu pacha cangunara nini, turmindusmi shu charij runa ahua pacha mandanai icungaj. 24 Cutillara cangunara nini, shu camillu nishca turmindariushas shu tupulli uctura pasangallami, randi shu charij astaun yali turmindushua Dios mandana pachama icunga.” 25 Pai yachachishca runauna caita uyasha ashcara manzharinauca: “¿Pita quishpinara ushangairi?” nisha. 26 Jesús paigunara ricusha, nica: “Runaunaj mana raihuajchu, astaun Dioshua tucui raihuajllami.” 27 Shinajpi Pedro paita nica: “Ñucanchiga tucuira saquisha canda catimushcanchi, ¿imara charishun ñucanchi?” 28 Jesús paigunara nica: “Sirtu pacha cangunara nini, tucuira alichina punzhai, ñuca, Runa Churi, ñuca sumaj tiarinai tiarishca huras, canguna, ñucara catimujcuna, shinallara chunga ishqui rey apu tiarinai tiarisha, Israel chunga ishqui aillura taripanguichimi. 29 Maicambas huasiunara, uquiunara, paniunara, yayara, mamara, huarmira, churiunara, allpara saquishca ajpi ñuca shutimanda, patsaj cuti mas apingami, maspas huiñai causaira charingami. 30 Randi, ashca ñaupa punda ajcuna puchucaiguna tucunaunga, ashca puchucaiguna ñaupajcunami tucunaunga.”
1 Ahua pacha mandana shu runa cuintami. Tutamandara llucshica tarabajcunara apingaj, paihua uvillas chagrai tarabangaj. 2 Tarabajcunahua alichishca huasha chunga sucresta pagangaj caran punzha, runaunara uvillas chagrama cachaca. 3 Las nueve tupui llucshisha, shujcuna lugar ajcunara ricuca pulasai. 4 Paigunara nica: “Richi cangunas ñuca uvillas chagrama, ali tupura pagashami. Runauna rinauca. 5 Cuti llucshica doce chaupi punzhai, las tres tupuis shinallara rica. 6 Cutillara las cincu tupui llucshica. Chara huaquinguna lugar ajcunara tupaca. Paigunara nica: “¿Imarasha caibi intiru punzha yanga tiaunguichi?” 7 Paita ninauca: “Pihuas mana tarabachishcaraigu.” Duiñu paigunara nica: “Richi cangunas chagrama. Ali tupura pagashca anguichimi.” 8 Tutayaupi, las seis tucujpi, uvillas chagra duiñu paihua huasicamara nica: “Tarabajcunara cayai, paigunara shu punzha tarabashcara pagai, puchucai shamujcunahua callarisha, ñaupa shamujcunagama.” 9 Shinajpi las cincumanda tarabajcuna pactamusha, caran duiñu paihua chunga sucresta apica. 10 Ñaupamanda tarabajcuna pactamusha, ‘Mas cullquira apishunmi,’ nisha iyanauca, astaun paigunas shinallara caran duiñu chunga sucresta apica. 11 Chillara apisha, duiñora piñanauca. 12 Ñinauca: “Cai puchucai huras shamujcuna shu hurasllara tarabanauca, shina ajllaira ñucanchira pagashcasna pagashcangui. Ñucanchiga intiru punzha rupaibi tarabashcanchi.” 13 Duiñuga paigunamanda shujta cutipasha nica: “Amigu, ñuca canda manalira mana raunichu, ¿manzhu canhua alichicani chunga sucresta pagangaj? 14 Can ganashcara apisha ri. Ñuca cai huasha shamujta canda pagashca tupullarara cusha nini. 15 ¿Manzhu raihuaj ñuca munashcara ñucajhua? ¿Canga chijnihuanguichu ñuca shungu ali ashcaraigumanda? 16 Shinallara ñaupa punda ajcuna puchucaiguna tucunaunga, puchucaiguna ñaupa ajcuna tucunaungami. Ashcauna cayashcaunami, randi ansallaunami ajllashcauna anaunga.” 17 Jesús Jerusalenma sicasha, ñambii pai chunga ishqui yachachishca runaunara sapallama pushasha, paigunara nica: 18 “Ña Jerusalenma sicaunchi. Ñucara, Runa Churira, intrigahuanaungami sacerdote apuunama yachaira yachachijcunama. Huañuchihuanaungami. 19 Ñucara gentilgunama intrigahuanaungami burlangaj, asutingaj, chacatangaj. Astaumbas quinsa punzhai causarishami.” 20 Shinajpi Zebedeo churiuna mama llutarimuca, churiunandi, Jesuspa ñaupajpi tuama urmasha paita shu shimira mañangaj. 21 Jesús paita: “¿Imara ningui?” nisha tapuca. Paiga: “Mandangui,” nica, “can mandana pachai cai ñuca ishqui churiuna canhua tiarinauchu, shuj ali maqui partima shuj lluqui maqui partima.” 22 Shinajpi Jesús cutipasha nica: “Canguna mañashcara mana yachanguichichu. ¿Ushanguichichu ñucara cushca vasura cuinta upingaj? ¿Ushanguichichu ñucara cushca bautisanahua cuinta bautisaringaj?” Paiguna: “Ushanchimi,” ninauca. 23 Jesús paigunara nica: “Sirtu pacha canguna ñuca vasura cuinta upinguichimi, ñuca bautisanahua cuinta bautisaringuichimi, randi ñuca ali partima ñuca lluqui partima tiarinara mana ñucajchu cungaj, astaun ñuca Yaya cunga pai ajllashcaunama.” 24 Chishu chungauna caita uyasha piñarinauca chi ishquiunahua. 25 Shinajpi Jesús paigunara cayasha, nica: “Yachanguichi imasna llacta atun apuuna chi llactaunara mandanaun, atunguna shinallara mandanaun. 26 Cangunahua mana shina tucungachu, astaun maicans atun tucusha nisha cangunara sirvij tucungami. 27 Maicans cangunamanda ñaupa aj tucusha nisha, cangunara sirvij tucungami. 28 Imasna ñuca, Runa Churi, mana shamucanichu sirvi tucungaj, astaumbas sirvingaj shamucani, shinallara ñuca causaira cungaj ashcaunara randingaj.” 29 Paiguna Jericó llactamanda llucshijpi, ashca runauna catinauca. 30 Ishqui ñausa runauna, ñambi rayai tiajcuna, Jesús pasaushcara uyasha, caparinauca: “¡Señor!” nisha, “¡Davidpa Churi, llaquihuapai!” 31 Runauna paigunara piñanauca, “¡Chunllayaichi!” nisha. Astaun paiguna mas caparinauca: “¡Señor!” nisha, “¡Davidpa Churi, llaquihuapai!” 32 Jesús shayarisha, paigunara cayasha, nica: “¿Imara rai ninguichira cangunahua?” 33 Paiguna ninauca: “Señor, ñahuira pascahuapai.” 34 Shinajpi, Jesús llaquirisha, ñahuira llangaca. Chi ratullaira ricunauca, paita catimunauca.
1 Paiguna ña Jerusalenma mayanllayausha, Betfagé nishca ichilla llactama pactamunauca, Olivos urcu rayai, Jesús shu ishqui pai yachachishca runaunara cachaca. 2 Paigunara nica: “Richi chimbai tiaj ichilla llactama. Chihui shu buru huatashcara tupanguichimi paihua huahuandi. Pascaichi burura, ishquindira pushamichi. 3 Pihuas cangunara rimajpi, ‘Señor ministinmi,’ ninguichi; shina nijpi uctalla cachamungami.” 4 Cai tucui tucuca Diosmanda rimaj rimashcara pactachingaj, pai casna nishca: 5 “Siomba ushushira rimaichi: ‘Riqui,’ nisha, ‘camba Rey Apu cambajma shamun, Mansu, burui tiarisha, Malta buru ahuai, shu cargara astaj buru huahuai. ’ ” 6 Yachachishca runauna rinauca, Jesús mandashcasna ranauca. 7 Burura paihua huahuandi pushamunauca. Paiguna llachapaunara buru ahuai churanauca. Jesús chi ahuai tiarica. 8 Ashca taucarimuj runauna paiguna llachapaunara mandanauca ñambira. Shujcuna pangaunara yuraunamanda pitinauca, ñambira mandanauca. 9 Ñaupajma riujcunas huasha shamujcunas caparinauca: “¡Alabashca angui, Davidpa Churi! ¡Bindisiashcami Señorba shutii Shamujta! ¡Alabashca angui ahua pachais!” 10 Jesús Jerusalembi icujpi, intiru llacta turbarica, “Caiga, ¿pitangairi?” nisha. 11 Runauna ninauca: “Caimi Diosmanda rimaj Jesús, Galileai tiaj Nazaretmanda.” 12 Jesús Diospa templo huasii icuca. Tucui temploi catujcunara randijcunaras canzhama ichuca, cullquira turcajcuna mesaunara vultiachica, shinallara urpira catujcuna tiarinara vultiachica. 13 Paigunara nica: “Ñuca huasi Diosta mañana huasi nishcami anga. Astaun canguna shuhuajcuna uctura rashcanguichimi.” 14 Paihuajma, templo huasima, ñausauna, anga changaunas shamunaucami. Jesús paigunara alichica. 15 Astaumbas sacerdote apuuna, yachaira yachachijcunas Jesús munanaita rashcaunara ricusha, huahuauna templo huasii caparishcara uyasha, “¡Alabashca angui, Davidpa Churi!” nisha, piñarinauca. 16 Paiguna Jesusta ninauca: “¿Uyanguichu paiguna rimashcara?” Jesús paigunara: “Ari,” nica, “¿manzhu ima huraspas ricushcanguichi: Huahuauna shimimanda, chuchujcuna shimimandas Alabanara alichishcangui?’ ” 17 Jesús paigunara saquisha, llactamanda llucshica, Betania llactama risha, chihui tiaca. 18 Cayandi tutamanda, Jesús llactama tigrasha, yarcachica. 19 Shu higu yurara ñambi rayai ricusha, yurama shamuca. Randi mana imaras tupacachu yurai, pangallara tupaca. Jesús yurara nica: “Ima huraspas ama aparichu muyura.” Chi ratullai higu yura chaquirica. 20 Yachachishca runauna chita ricusha, manzharisha ninauca: “¿Ima rashara uctalla chaquirica higu yura?” 21 Jesús cutipasha nica: “Sirtu pacha cangunara nini, canguna quirisha, mana manzhasha, mana higu yurahua rashcasnallara ranguichimachu, astaun cai urcura: ‘Anzhuri, lamarbi urmairi,’ nijpi, shina tucunmami. 22 Imaras Diosta rugasha, quirishcahua mañajpi, chasquinguichimi.” 23 Jesús templo huasima shamujpi, sacerdote apuuna rucuunandi paihuajma shamunauca pai yachachiushca ratui. Paita ninauca: “¿Pi mandajpira can rashcaunara rangui? ¿Pita canda casna rangaj mandaca?” 24 Jesús paigunara cutipaca: “Ñuca shinallara shu tapunara charini. Canguna ñucara cutipajpi, ñucas shinallara cangunara rimashami pi mandajpira cai rashcaunara rauni. 25 Juamba bautisana, ¿maimandara acai? ¿Ahua pachamandachu aca, runaunamandachu aca?” Shinajpi paigunapura rimananauca, casna nisha: “Ñucanchi ahua pachamandami nijpi, pai ningami, ‘¿Imarasha mana quiricanguichi?’ 26 Ñucanchi, ‘Runaunamandami,’ nijpiga, runaunara manzhanchi, tucui runauna, ‘Juan Diosmanda rimajmi,’ ninaun.” 27 Jesusta cutipasha ninauca: “Mana yachanchichu.” Shinajpi Jesús paigunara: “Ñucas cangunara mana rimashachu pi mandajpira ñuca cai rashcaunara rauni,” nica. 28 “Shinajpi, ¿imasnara iyanguichi? Shu runa ishqui churiyuj aca. Yaya paihua ñaupa punda churima shamusha, paita nica: ‘Churi, cuna punzha ri ñuca uvillas chagrai tarabangaj. ’ 29 Churiga, ‘Mana munanichu,’ nica. Randi, huasha aripintirisha ricami. 30 Yaya chishu churima shamusha, paita shinallara rimaca. Churi cutipasha paita nica: ‘Ari, Señor, riunimi. ’ Randi mana ricachu. 31 Cai ishqui churimanda, ¿maicanda paihua yaya munashcara pactachica?” Cutipanauca, “Ñaupa aj churi.” Jesús paigunara nica: “Sirtu pacha cangunara nini, cullquira tandachij runauna shujhua tacarij huarmiunas cangunamanda ñaupara rinaungami Dios mandana pachama. 32 Cangunajma shamuca Juan, ali causanara yachachisha, paitaga mana quiricanguichi, astaumbas cullquira tandachij runauna shujhua tacarij huarmiunandi paita quirinaucami. Canguna caita ricusha, mana huasha aripintiricanguichi paita quiringaj.” 33 ”Shu yachachina cuintanara uyaichi. Shu yaya tiauca, uvillas chagrara tarpuca. Quinzhaca. Uvillasta chahuanara allaca. Huasira shayachica. Shu tarabajcunara pagara mañasha, chagrara mañachica. Caru llactama rica, 34 Muyura pallana huras pactarijpi, sirvijcunara cachaca tarabajcunama, muyura apingaj. 35 Tarabajcunaga sirvijcunara apisha, shujta sajmanauca, shujta huañuchinauca, shujta rumihua shitanauca. 36 Cutillara sirvijcunara cachaca, ñaupa cachashcaunamanda yalira. Shinallara ranauca chigunaras. 37 Puchucaibi paihua churira cachaca. ‘Ñuca churira manzhanaunga chari,’ nisha. 38 Tarabajcunaga churira ricusha, paigunapura rimananauca: ‘Caimi chagrara apina churi. Acuichi, paita huañuchishunchi, paihua allpara apishunchi,’ 39 Paita apisha, chagra canzhama ichusha, huañuchinauca. 40 Uvillas chagrayuj duiñu shamusha, ¿imara rangai chi tarabajcunahua?” 41 Paita ninauca: “Manali rajcunara mana ansas llaquishcahua tucuchingami. Paihua uvillas chagrara shu tarabajcunama pagara mañasha mañachingami, pallana huraspi aparishcara cujcunama.” 42 Jesús paigunara nica: “¿Ima huraspas manzhu ricushcanguichi Quillcaunai: ‘Sicachijcuna mana munashca rumi Ña istandi siqui rumi tucushcami. Caitaga Señor rashcami, Manzhanaitami ricurin ñucanchi ñahuii?’ 43 Chiraigumanda cangunara nini, Dios mandana pacha cangunamanda quichushca anga, randi cushcami anga pai aparishcara aparij runaunama. 44 Maicans cai rumi ahuai urmasha paquirishca anga; maican ahuais cai rumi urmasha, cuta cuta urmangami.” 45 Sacerdote apuuna fariseogunandi Jesús yachachina cuintanaunara uyasha, “Ñucanchimandami uyachisha riman,” nisha intindinauca. 46 Randi paita apishun nishallara, runaunara manzhanauca, paiguna Jesusta Diosmanda rimajmi, iyashcamanda.
1 Jesús paigunara cutipasha, cuti yachachina cuintanahua rimaca, casna nisha: 2 “Ahua pacha mandana shu rey apu cuintami ricurin, paihua churira istasha buraca. 3 Paita sirvijcunara cachaca burama convirashcaunara cayangaj. Convirashcaunaga mana munanauca shamunara. 4 Shu sirvijcunara cuti cachaca: ‘Convirashcaunara rimai richi, micuna ña puruntushcami,’ nisha; ‘ñuca irayachishca huagraunara, animalgunaras huañuchishcanchi, tucui ña alichishcami; burama shamichi,’ nisha, 5 Convirashcauna mana uyasha rinauca, shuj paihua hacindama, shuj paihua tindama. 6 Shujcunaga sirvijcunara apisha, piñasha, huañuchinauca. 7 Rey apu uyasha, piñarica, paihua suldaruunara cachaca, huañuchijcunara huañuchinauca, paiguna llactara rupachinauca. 8 Shinajpi sirvijcunara nica: ‘Sirtu pacha bura puruntushcami, astaun convirashcauna mana valijcuna anaushca. 9 Richi ñambiuna llucshinaunama, tucui chihui tuparijcunara cayaichi. 10 Sirvijcuna ñambiunara risha, tucui tuparijcunara tandachinauca, manaliunaras, aliunaras. Bura huasi undajta tucuca, ashca convirashcauna shamushcaraigu. 11 Rey apu icucami canvirashcaunara ricungaj. Chihui shu runara ricuca bura churarinara mana churarishcara. 12 Paita nica: ‘Amigu, ¿imarasha caibi bura churarina illaj icucangui? ‘Runaga mana ansas cutipaca. 13 Shinajpi rey apu sirvijcunara nica: ‘Paita huataichi chaquiras maquiras. Canzhai llandu tutai shitaichi. Chihui huacanas quiru mucurinas tian. ’ 14 Ashcaunami cayashcauna, ansallami ajllashcauna.” 15 Shinajpi fariseoguna rimanaungaj rinauca, Jesusta ima shimiis apingaj nisha. 16 Paiguna yachachishca runaunara Herodianos nishcaunandi Jesuspajma cachanauca, paita ninauca: “Yachachij, can sirtu shimira llaquij ajta ricsinchi, can Diospa ñambira sirtu pacha yachachingui; pi runaras mana manzhangui, runauna ima tunu ricurinaras mana ricungui. 17 Ñucanchira rimahuai, ¿imara ningui? ¿Raihuajchu manzhu raihuaj impuistu cullquira César apuma pagangaj?” 18 Jesús paiguna manali iyariushcara yachasha, nica: “¿Imaraigu tintahuanguichi, ishqui shimiyujcuna? 19 Shu impuesto pagana cullquira ricuchihuai.” Paiguna shu denario nishca cullquira ricuchinauca. 20 Shinajpi Jesús paigunara nica: “¿Pihuajtai cai ñahui, pihuajtai cai quillcashca?” 21 ”Césarbaj,” ninauca. Jesús paigunara nica: “Césarbajta Césarma cuichi, Diospajta Diosma cuichi.” 22 Caita uyasha, manzharinauca; paita saquisha rinaucami. 23 Chi punzha saduceo runauna Jesusma shamunauca, “Causarina illanmi,” nijcuna. Paita tapunauca: 24 ”Yachachij,” ninauca, “Moisés nica, ‘Shu runa churi illaj huañujpi, paihua uqui casarachu huañuj uqui huarmihua, uquiraigumanda mirangaj. ’ 25 Ñucanchijpi canzhis uquipura tianauca. Ñaupa punda aj casararca, chihuasha huahuauna illaj huañuca. Paihua huarmira uquima saquica. 26 Shinallarami tucuca ishqui quinsa uquiunahua canzhis uquigama, huarmira apinauca. 27 Puchucaibi huarmis huañuca. 28 Causarinaiga, ¿chi canzhismanda maicanda apingai cai huarmira, tucui uqiuna paita charishca huasha?” 29 Shinajpi Jesús paigunara cutipasha nica: “Pandaunguichimi, Quillcashcaunara Diospa ushanaras mana yachasha. 30 Causarinai rnana casaranaungachu, shinallara mana casarachinaungachu, astaun Diospa ahua pachai tiaj angelguna cuinta tucunaungami, 31 Randi, huañushcauna causarinamanda, ¿manzhu ricushcanguichi Quillcashcaunai Dios cangunama rimashcara, casna nisha: 32 ’Ñuca Abrahamba Dios, Isaacpa Dios, Jacobpa Dios ani?’ Diosca mana huañushcauna Dioschu, astaumbas causajcunajmi.” 33 Runauna caita uyasha manzharinauca, pai yachachishcamanda. 34 Shinajpi fariseoguna Jesús saduceogunara vinsishcara uyasha, pariju tandarinauca. 35 Paigunamanda shuj, ley shimira yachaj, paita tintasha tapuca: 36 “Yachachij,” nica, “¿Iey shimii, maicanda tucuimanda yali atun mandashca shimi?” 37 Jesús paita nica: “Camba Señor Diosta llaquinami angui, intiru shunguhua, intiru almahua, intiru iyaihua. 38 Caimi ñaupa punda atun mandashca shimi. 39 Chimanda huashalla mandashca shimi ñaupa aj cuintallarami: Camba mayambi causaj runara canda llaquishcasna llaquinami angui. 40 Cai ishqui mandashca shimiunamandami, tucui camachishca shimiuna tucui Diosmanda rimajcuna yachachishcaunas tucunaunï.” 41 Jesús fariseogunahua pariju tiausha, paigunara tapuca: 42 “Cristomanda, ¿imara iyanguichi?” nica, “¿pihua churirai?” Paiguna, “Davidpa churimi,” ninauca. 43 Jesús paigunara nica: “¿Imasnara David Ispiritui rimasha paita: ‘Señor,’ nisha, rimanzhu, casna nisha: 44 ‘Señor ñuca Señorda nica: Ñuca ali maqui partima tiari, canda chijnijcunara camba chaqui ucui churangagama?’ 45 David paita, ‘Señor,’ nisha rimasha, ¿imasnajpira paihua churi tucun?” 46 Pihuas paita imaras cutipanara mana ushacachu. Chi punzhamanda pacha, pihuas paita imaras tapungaj mana iyaricachu.
1 Shinajpi Jesús inti runaunaras, pai yachachishca runaunaras rimaca, casna nisha: 2 “Yachaira yachachijcuna fariseogunandi Moisés camachishcaunara yachachinaun. 3 Shinajpi tucui paiguna pactachingaj rimashcaunara pactachichi, shinallara raichi, astaumbas paiguna rashcaunara ama raichichu. Paiguna rimanaun, astaun mana ranaunzhu. 4 Paiguna llashaj turmindus cargaunara runauna huasha tullui huatanaun, randi paiguna ichilla rirullahuas mana munanaunzhu yanapangaj. 5 Astaun paiguna tucui rashcaunara runauna ricungajlla ranaun. Paiguna quillcashcara churana cajitaunara atunyachinaun, paiguna churarina tsiraspa pundara suniyachinaun. 6 Micunaunai ñaupa pundai tiarinaunara munanaun, tandarina huasiunais ñaupa pundai tiarinaunara munanaun. 7 Shinallara pulasaunai salurai tucunaunara munanaun, runauna paigunara: ‘Yachachij, yachachij,’ rimai tucunara munanaun. 8 Cangunaga ama munaichichu runauna cangunara: ‘Yachachij,’ nii tucungaj. Shujllami cangunara yachachij, pai Cristomi. Cangunaga uquipura anguichi. 9 Ama pihuas, ‘Ñuca yaya,’ nisha rimaichi cai pachai. Shujllami canguna Yaya, paiga ahua pachaimi tiaun. 10 Cangunara runauna ama, ‘Yachachij,’ ninauchu. Shujllami cangunara Yachachij, pai Cristomi. 11 Cangunamanda yali aj runa cangunara sirvij achu. 12 Maican runas paillara ahuayajpi, pishayachishca anga. Maicambas paillara pishiyajpi ahuayachishca anga. 13 “Astaumbas, ¡Ayailla cangunamanda, yachaira yachachijcuna, fariseoguna, ishqui shimiyujcuna! Ahua pacha mandanara runaunajta ishcanguichi. Cangunas mana icunguichi, shinallara mana lugarda cunguichi icuujcunara. 14 ¡Ayailla cangunamanda, yachaira yachachijcuna, fariseoguna, ishqui shimiyujcuna! Huaccha huarmiuna huasiunara tucuchinguichi; runauna uyangajlla unaira mañanguichi. Chiraigumanda mas shinzhi cauźayachishca tucunguichimi. 15 “¡Ayailla cangunamanda, yachaira yachachijcuna, fariseoguna, ishqui shimiyujcuna! Lamardas allparas puringuichi shu runara cangunara catijta rangaj. Ña catijpi, paita huajlichinguichi cangunamanda ishqui cuti yali ucu pachama rijta ranguichi. 16 ”¡Ayailla cangunamanda, ñausa pushajcuna! Shu runa templo huasi shutii shimira cujpi, ‘Yangami,’ ninguichi. Shu runaga templo huasii tiaj curimanda shimira cujpi, ‘Dibijmi tucun,’ ninguichi. 17 ¡Upauna, ñausauna! ¿Imara yali valij, curichu, curira valichij templo huasichu? 18 Shinallara, pis altar shutii shimira cujpi, ‘Yangami,’ ninguichi. Astaun, pis altarbi tiaj sacrificio shutii shimira cujpi, ‘Dibijmi tucun,’ ninguichi. 19 ¡Upauna, ñausauna! ¿Imara yali valin, sacrifïciochu, sacrificiora valichij altarchu? 20 Altar shutii shimira cuj altarmandas tucui chihui ahuai tiajmandas shimira cunmi. 21 Templo huasi shutii shimira cuj, templo shutiis, templo huasii Causajpa Diospa shutiis shimira cunmi. 22 Ahua pacha shutii shimira cuj, Diospa tiarina shutii tiarinai tiarij Diospa shutiis shimira cunmi. 23 “¡Ayailla cangunamanda, yachaira yachachijcuna, fariseoguna, ishqui shimiyujcuna! Shu chunga partira cunguichi micunai churana pangaunamanda, astaun ley shimimanda atun ranaunara saquinguichimi: alirana, llaquina, quirina. Caigunara rana aca, chishujcunara mana saquisha. 24 ¡Ñausa pushajcuna. Challunda shushunguichi, astaumbas camillura nillpunguichi! 25 “¡Ayailla cangunamanda, yachaira yachachijcuna, fariseoguna, ishqui shimiyujcuna! Vasu, pulatu huasha partira maillanguichi, astaumbas ucu shungüi shuhuanahua manali ranahuas undashcami anguichi. 26 ¡Ñausa fariseo runa! Ñaupa punda vasuras pulaturas ucu partira pichai, huasha partis shinallara pichashca achu. 27 “¡Ayailla cangunamanda, yachaira yachachijcuna, fariseoguna, ishqui shimiyujcuna! Yurajlla pintashca pambana uctuna cuinta anguichi. Sirtu pacha canzhamanda sumajlla ricurinaun, astaun ucui huañushca tullunahua ima ismushcahuas undashcami anaun. 28 Shinallarami canguna, ahua carai ricujpi ali runaunasna ricuringuichi, astaun shungu ucui manalihua, manali iyaihuas undashcami anguichi. 29 “¡Ayailla cangunamanda, yachaira yachachijcuna, fariseoguna, ishqui shimiyujcuna! Diosmanda rimajcuna pambana huasiunara shayachinguichi, ali runaunara iyarichina rumiunaras sumajyachinguichi. 30 Shinallara ninguichi: ‘Ñucanchiga ñucanchi yayauna causaushca timpui causashca asha, paiguna raushcaunai mana yanapanchimaca, Diosmanda rimajcuna yahuarda talisha. ’ 31 Shina rimasha ricuchinguichi canguna quiquinmandallara, chi Diosmanda rimajcunara huañuchijcuna quiquin churiuna anguichi. 32 ¡Cangunas canguna yayauna rashca tupura undachichi! 33 ¡Machacuiguna, pitalalamanda miraiguna! ¿Imarasha ucu pachama rinamanda quishpinguichi? 34 Chiraigumanda ñuca cangunama Diosmanda rimajcunara, yachajcunara, yachaira yachachijcunara cachauni. Paigunamanda huaquingunara huañuchinguichimi, huaquingunara chacatanguichimi, shujcunara azutinguichimi canguna tandarina huasiunai, shu llactamanda shu llactagama catinguichimi. 35 Casna ranguichimi canguna ahuai tucui ali runa yahuar intiru mundui talirij urmachu ali causaj Abel yahuarmanda Berequías churi Zacarías yahuargama, paita templo altar chaupi shungüi huañuchishcanguichimi. 36 Sirtu pacha cangunara nini, cai tucui shamungami cuna hurasta mirajcunahua.” 37 ”¡Jerusalén, Jerusalén, Diosmanda rimajcunara huañuchij, canma cachashca runaunara rumihua shitaj! ¡Masna cuti canguna churiunara tandachisha nicani, imasna shu atallba paihua huahuanara rigra panga ucui tandachin, randi mana munacangui! 38 Camba huasi ña chunlla saquishcami. 39 Cuna hurasmanda ñucara mana ricuhuanguichichu canguna casna rimanagama: ‘Bindisiashcami Señorba shutii shamujta. ’ ”
1 Jesús templo huasimanda llucshisha ríupi, pai yachachishca runauna paihuajma shamunauca, templo huasiunara paita ricuchingaj. 2 Jesús cutipasha nica: “¿Cai tucuira ricunguichichu? Sirtu pacha cangunara nini: Caibi mana shu rumis shuj ahuai saquiringachu; tucui tulashcami anga.” 3 Jesús Olivos urcui tiarisha, pai yachachishca runauna paihuajma shamunauca sapallai. Paita tapunauca: “Cuintahuai, ¿ima huras caiguna tucunaungairi? ¿Imara ricuringairi can shamunai, cai timpuuna tucurinais?” 4 Jesús cutipaca: “¿Cuiraichi pihuas cangunara ama umachichu. 5 Ashcauna ñuca shutii shamunaungami, ‘Ñuca Cristo ani,’ nisha. Shina nisha rimasha, ashcaunara umachinaungami. 6 Guiraunara, guira shimiunaras uyanguichimi. Ama turbaringuichichu. Ministirinmi casna tucungaj. Shina ajllaira charajmi tucurina huras. 7 Shu llacta shu llactahua ataringa, shu rey apu shu rey apuhua. Llaqui ungüiguna, yarcaiguna, allpa cuyunauna huaquin partiunai tianaungami. 8 Cai tucui turminduscuna callarinami. 9 “Chi huras cangunara turmindachingaj intriganaungami, huañuchinaungami, tucui runauna cangunara chijninaugami, ñuca shutimanda. 10 Chi timpui ashcauna nijtasha urmanaungami, shujcuna shujcunara intriganaungami, shujcuna shujcunara chijninaungami. 11 Ashca llullasha rimajcuna atarinaungami, ashcaunara urmachinaungami. 12 Manalirana mirarishcamanda, ashca runauna llaquina shungu chiriyangami. 13 Randi, puchucaigama ahuantaj runa quishpingami. 14 Cai Dios mandana pacha evangelio ali shimi intiru mundui camachishca anga, tucui llactaunara ricuchingaj. Chihuasha tucurina huras pactamunga. 15 “Chiraigumanda, ima huras Santu Lugarbi Dios chijnishcara ricunguichimi, Diosmanda rimaj Daniel quillcashcasna (ricuj runa intindichu), 16 shinajpi chi hurasllai, Judeai tiajcuna urcuunama miticunauchu. 17 Huasi ahuai tiaj ama irguchu, huasimanda imaras apingaj. 18 Chagrai tiaj ama tigrachu llachapara apingaj. 19 ¡Ayailla icsayujcuna, chuchuchijcunas, chi punzhaunai! 20 Rugaichi canguna miticuna huras ama tamiai tucungaj, ama samana punzhais. 21 Chi huras atun turmindarina timpu tiangami, callari hurasmanda pacha mana casna tucushcachu, cuna hurascamas, huiñaigamas. 22 Chi punzhauna mana curuyashca ajpiga, pihuas mana quishpinmaca. Astaun ajllashcaunaraigumanda chi punzhauna curuyashca anaunga. 23 Shinajpi maicans canda: ‘Ricuichi, caibimi Cristo; ricuichi chihuimi Cristo,’ nijpi, ama quiringuichichu. 24 Llulla Cristouna, llullasha rimajcunas atarinaungami. Atun ricurinaunara, munanaita ranaunaras ranaungami. Ajllashcaunaras shinallara umachi tucunaungami usharijpi. 25 Ña, ñaupa hurasmanda cangunara rimashcani. 26 ”Shinajpi runauna cangunara: ‘Ricuichi, pai runa illashca partii tiaun,’ nijpi, ama llucshichichu. Runauna: ‘Ricuichi, pacalla ucuunaimi tiaun,’ nijpi, ama quirichichu. 27 Imasna rayu limpiashca indi llucshinamanda llucshisha, indi icunagama ricurin, shinallarami tucunga Runa Churi shamunai. 28 Maibi huañushca aicha sirijpi, chihui illahuangauna tandarinaungami.” 29 “Chi turmindarina punzhauna pasashcallai, indi llanduyangami, quillas mana punzhayachingachu, istrillascuna ahuamanda urmanaungami. Ahua pachai tiaj ushanauna cuyuchishca anaungami. 30 Chi huras, Runa Churi ricurishcara ahua pachai ricunaungami. Tucui cai pacha ailluuna huacanaungami; ñuca, Runa Churi, ahua pacha puyuunai ushanahua gustu sumajhuas shamujta ricunaungami. 31 Paihua angelgunara atun curmita shinzhi uyarishcahua cachamungami. Pai ajllashcaunara tandachinaungami chuscu huaira shamuna partimanda, ahua pacha caru pundamanda chishu caru pundagama. 32 “Higu yuramanda yachachina cuintanara yachaichi: Ima huras paihua pallca ña llullujyaupi, pangaunas llucshinaupi, yachanguichi rupai timpu ña mayanllayaunmi. 33 Shinallara cangunas ima huras cai tucui pactariupi ricusha, ña yachaichi pai mayanllaimi tiaun, pungu rayallai. 34 Sirtu pacha cangunara nini,cuna huras miraiguna manara pasajllaira, cai tucui pactaringami. 35 Ahua pachas cai pachas pasanaungami, astaun ñuca rimashca shimiuna mana pasanaungachu. 36 Randi, chi punzhara, chi hurasta, pi runas pi ahuamanda angelgunas mana yachanaunzhu, ñuca Yayallami yachan. 37 Astaun imasna tucuca Noé causaushca punzhaunai, shinallarami tucunga Runa Churi shamunai. 38 Imasna aca yacu izhu manara shamujllaira, runauna micunauca, upinauca, casaranauca, casarichinauca, Noé barcoi icuna punzhagama, 39 imasna mana intindinauca yacu izhu shamunagama, yacu shamusha tucui chingarinauca; shinallarami anga Runa Churi shamunai. 40 Chi hurasllaira ishqui runa chagrai tianaunga, shujta apashca anga, shujta saquishca anga. 41 Ishqui huarmi cutanaunga cutana rumii, shujta apashca anga, shujta saquisha anga. 42 Ricusha chapaichi, mana yachanguichichu canguna Señor shamuna hurasta. 43 Astaun caita yachaichi, shu huasiyuj duiñu shuhuaj runa shamuna hurasta yachasha, chapanma chi runa ama icungaj huasii. 44 Chiraigumanda cangunas puruntuichi; ñucas, Runa Churi, shinallara canguna mana iyaushca huraspi shamushallami. 45 ¿Pitangai ali llaquij iyaiyuj sirvij runa, paihua patrún huasira cuirangaj churaca, chihui ajcunara ali huraspi carangaj? 46 Cushimi casna sirvij runa, paihua patrún shamusha paita shina rauta tupajpi. 47 Sirtu pacha cangunara nini, pai tucui charishcara cuirangaj paita churangami. 48 Randi, chi manali sirvij runa paihua shungüi: ‘Ñuca patrún unaiyaunmi tigrangaj,’ nisha iyarisha, 49 paihua pariju sirvijcunara sajmangaj callarijpi, machajcunahua micungaj upingajpas callarijpi, 50 chi sirvijpa patrún shamungami pai mana chapaushca punzhai, pai mana yachashca huraspi. 51 Paita shinzhira livachingami, ishqui shimiyujcunama cachangami; chihuimi llaqui huacanas quiru mucurinas tian.
1 Shinajpi ahua pacha mandana chunga huanra huarmiuna cuintami. Huarmiuna paiguna vila puruunara apisha, carira tupangaj llucshinauca. 2 Paigunamanda, pichca iyaiyujcuna anauca, chishu pichcaga upauna. 3 Upauna paiguna vila purura sindina yacu illajta apanauca. 4 Iyaiyujcunaga sindina yacura butii apanauca vilahua pariju. 5 Cari unaiyajpi, tucui puñunaipi puñunauca. 6 Chaupi tutai shu shimi caparishca uyarica: ‘Cari shamun, llucshichi paita tupangaj. ’ 7 Shinajpi tucui chi huanra huarmiuna liccharisha, vila puruunara alichinauca. 8 Upauna iyaiyujcunara ninauca: ‘Sindina yacura cuhuai, ñucanchi vila puruuna huañurinaunmi. ’ 9 Iyaiyujcunaga cutipasha ninauca: ‘Ñucanchi sindina yacu mana pactangachu ñucanchijpas cangunajpas. Richi catujcunara randingaj canguna quiquimbajta. ’ 10 Paiguna randingaj rishcallai, cari shamuca. Puruntushcauna paihua pariju burai icunauca. Pungura ishcanauca. 11 Huasha chishu huanra huarmiunas shamunauca. ‘Señor, señor, pungura pascapai,’ ninauca. 12 Paiga cutipasha nica: ‘Sirtu pacha,’ nini, ‘mana ansas ricsinichu cangunara. ’ 13 Ricusha chapaichi, Runa Churi shamuna punzhara pai shamuna hurastas mana yachanguichichu. 14 “Ahua pacha mandana shu runa cuintami. Pai caruma ringarausha, sirvijcunara cayasha, pai charishcaunara paiguna maquiunai saquica. 15 Shujma pichca cullquira cuca, shujma ishquira, shujmas shujllara, caran duiñu ushana tupura cusha. Chi huasha caru llactama rica. 16 Pichca cullquira apijca, chi cullquihua tarabasha, shu pichca cullquira mas ganaca. 17 Shinallara ishquira apijca ishquira mas ganaca. 18 Shujllara apijca, allpara allasha, paihua patrumba cullquira pambaca allpa ucui. 19 Unai timpo huasha, chi sirvijcuna patrún tigramuca, paigunahua cullquimanda alichica. 20 Pichca cullquira apij runa shamusha, shu pichcara apamuca, casna nisha: ‘Señor, pichca cullquira cuhuacangui, pichcara mas ganashcani. ’ 21 Patrún paita nica: ‘Alimi, ali mana quillasha sirvij runa. Ansallahua alira rashcangui, ashcara cuirangaj canda churasha. Camba señorba cushi causanai icui. ’ 22 Ishqui cullquira apij runa shamusha, ‘Señor,’ nica, ‘ishqui cullquira cuhuacangui, ishquira mas ganashcani. ’ 23 Patrún paita nica: ‘Alimi, ali mana quillasha sirvij runa. Ansallahua alira rashcangui, ashcara cuirangaj canda churasha. Camba señorba cushi causanai icui. ’ 24 Randi shuj cullquira apij runa shamusha, ‘Señor,’ nica, ‘can shinzhi shungu runa ajta ricsicani, can mana tarpushcais pallaj, mana can ichashca muyumanda tandachij; 25 chiraigu manzhasha, camba cullquira pambacani allpa ucui. Caiga, camba quiquin cullqui. ’ 26 Paihua patrún cutipasha nica: ‘Mana valij quilla runa, ñuca mana tarpushcai pallashcara yachacangui, ñuca mana ichashca muyumanda tandachishcaras. 27 Chiraigumanda ñuca cullquira bancui churanami acangui, ñuca tigrajpi ñucajta apingaj pai ganashcandi. 28 Quichuichi paimanda chi cullquira, chungara charijma cuichi. 29 Charij mas charingami, yalira charingaj; mana charijmandaga pai charishcahuaras quichushca anga. 30 Manali sirvij runara canzha llandui shitaichi. Chihuimi llaqui huacanas quiru mucurinas tianga. ’ 31 “Runa Churi paihua sumajhua shamushcai, tucui santu angelgunahua panju, paihua gustu sumaj rey apu tiarinai tiaringami. 32 Paihua ñaupajpi tucui llactauna tandarinaungami. Chicanyachingami shujcunara hishucunamanda, imasna shu cuiraj runa buriguunara chivuunamanda chicanyachin. 33 Buriguunara paihua ali maqui partima churanga, chivuunara paihua lluqui partima. 34 Shinajpi Rey Apu ali maqui partima tiajcunama ninga: ‘Shamichi, ñuca Yaya bindisiashcauna, mundu callarishca pundamanda cangunajta puruntushca mandana pachara apichi. 35 Yarcachicani, carahuacanguichi; upinaichicani, upichihuacanguichi; carumanda purij acani, apihuacanguichi. 36 Llatan acani, churachihuacanguichi. Ungushca acani, ñucajma ricui shamuhuacanguichi. Chunda cularbi tiaucani, ñucajma ricui shamuhuacanguichi. 37 Shinajpi ali runauna cutipasha ninaunga: ‘Señor, ¿ima hurasta canda yarcachijta ricucanchi carangaj, upinaichijta upichingaj? 38 ¿Ima hurasta canda carumanda shamujta ricucanchi canda apingaj? ¿Ima hurasta canda llatanda ricucanchi churachingaj? 39 ¿Ima hurasta canda ungushcara ricucanchi, chunda cularbi tiajtas, cambajma shamucanchi ricungaj?’ 40 Rey Apu cutipasha ninga: ‘Sirtu pacha cangunara nini,imasna casna rarcanguichi shu ñuca ichilla uquiunara, ñucarami rarcanguichi. ’ 41 Shinajpi shinallara lluqui partima tiajcunamas ninga: ‘Anzhurichi ñucajmanda, maldisiashcauna, huiñaigama duraj ninama, supai apujta paihua angelgunajta puruntushcama. 42 Ñuca yarcachicani, mana carahuacanguichi. Upinaichicani, mana upichihuacanguichi. 43 Carumanda shamuj acani, mana apihuacanguichi; llatan acani, mana churachihuacanguichi; ungushca acani, chunda cularbi tiaucani, ñucajma mana shamucanguichi ñucara ricungaj. ’ 44 Shinajpi paiguna shinallara cutipasha ninauga: ‘Señor, ¿ima hurasta canda yarcachijta, upinaichijta, carumanda shamujta, llatanda, ungushcara, chunda cularbi tiauta ricushcanchi, canda mana sirvicanchi?’ 45 Shinajpi cutipasha ninga, ‘Sirtu pacha cangunara nini, imasna caita mana rarcanguichi shu cai ichillaunahua, ñucahua mana rarcanguichi. ’ 46 Caiguna huiñaigama duraj turmindarinama rinaungami, randi aliuna huiñai causanama rinaungami.”
1 Jesús cai tucuira rimai pasashca huasha, pai yachachishca runaunara nica: 2 “Yachanguichi imasna ishqui punzha huasha, Pascua ista shamun. Ñuca, Runa Churi, intrigai tucusha chacatangaj.” 3 Shinajpi sacerdote apuuna, yachaira yachachijcuna, rucuunandi tandarinauca, sacerdote atun apu Caifaspa huasi pungüi. 4 Pariju rimananauca Jesusta umachishcahua apingaj, paita huañuchingaj. 5 Astaun ninauca: “Ama rashun ista punzhaunai, runaunara ama nuspachingaj.” 6 Jesús Betania llactai tiauca, llagayuj Simomba huasii. 7 Paihuajma shu huarmi shamuca, valij rumi puru ashca valij asnaj ambihua undachishcara apamuca. Cai ambira Jesuspa umai talica, pai mesai tiashcai. 8 Yachachishca runauna valij ambira ricusha piñarinauca: “¿Imarasha caita yanga baratun?” ninauca. 9 “Caita catuna usharica ashca cullquihua, chi cullquira tsuntsunama cungaj.” 10 Jesús caita intindisha, paigunara nica: “¿Imaraigu cai huarmira turmindachinguichi? Shu ali ranara rashcami ñucahua. 11 Tsuntsunara tucui huras cangunahua charinguichimi, astaun ñucara mana tucui huras charinguichichu. 12 Huarmi cai mishqui asnaj ambira ñuca aichai talisha, ñucara pambangaj puruntusha rashcami. 13 Sirtu pacha cangunara nini, maibis cai evangelio ali shimi uyarichu intiru mundui, shinallara cai huarmi rashcara cuintashca angami paita iyaringaj.” 14 Shinajpi chi chunga ishquipuramanda shuj, Judas Iscariote, sacerdote apuunajma rica. 15 “¿Imasnara cuhuanguichi,” nica, “ñuca Jesusta cangunama intrigangaj?” Paiguna, “Quinsa chunga cullquira cushun,” ninauca. 16 Chi hurasmanda pacha, Judas ima tunuis mascauca Jesusta intrigangaj. 17 Puscu illaj tanda ista ñaupa punda punzhai, yachachishca runauna Jesusma shamunauca, paita ninauca: “¿Maibira puruntunara munangui Pascua istara micungaj?” 18 Jesús nica: “Llactama richi shu runajma. Paita nichi, ‘Yachachij nin, Ñuca punzha ña pactamunmi. Camba huasii Pascua istara micusha ñuca yachachishca runaunahua. ’ ” 19 Yachachishca runauna Jesús mandashcasna ranauca. Pascua istara puruntunauca. 20 Tutayaushcai, Jesús chunga ishquihua pariju mesai tiarica. 21 Paiguna micuushca ratui, Jesús nica: “Sirtu pacha cangunara nini, cangunamanda shuj ñucara intrigangami.” 22 Ashcara llaquirisha, caran runa Jesusta tapungaj callarica: “¿Ñucachu ani, Señor? ” nisha. 23 Shinajpi Jesús cutipasha nica: “Ñucahua pariju maquira pulatui satij, paimi ñucara intrigahuanga. 24 Sirtu pacha ñuca, Runa Churi, riunimi, ñucamanda quillcashcasna; astaun, ¡Ayailla Runa Churira intrigaj runa! Astaun alimi anmaca pai mana pagarishca ajpi.” 25 Shinajpi Judas, paita intrigana runa, cutipasha nica: “Ñucachu ani, Señor?” Jesús nica: “Canda shina ninguiga.” 26 Paiguna micuushcai, Jesús tandara apica, bindisiaca, paquica, pai yachachishca runaunama cuca: “Apichi, micuichi,” nisha, “caimi ñuca aicha.” 27 Vasuras apisha, agrasishca huasha, paigunara cuca: “Upichi tucui canguna,” nisha rimaca. 28 “Caimi ñuca mushuj pactachina shimira alichina yahuar, Ashcaunamanda talishcami, uchaunara perdonagaj. 29 Cangunara nini, cuna hurasmanda pacha, cai uvillas muyumanda mana cuti upishachu shamuna punzhagama ima huras mushujta upisha cangunahua ñuca Yaya mandana pachai.” 30 Cantashca huasha, llucshisha, Olivos urcuma rinauca. 31 Shinajpi Jesús paigunara nica: “Cuna tuta canguna tucui ñucamanda manzharinguichimi. Quillcashca tian, ‘Cuirajta chugrichisha, burigu muntun chausiringami. ’ 32 Ñuca causarishca huasha, cangunamanda ñaupara Galileama rishami.” 33 Pedro cutipasha paita nica: “Tucuilla canmanda manzharinaupis, ñuca mana ima huraspas manzharishachu.” 34 Jesús paita nica: “Sirtu pacha canda nini, cuna tuta, gallu manara cantajllaira, can ñucamanda quinsa cuti, ‘Paita mana ricsinichu,’ ninguimi.” 35 Pedro paita nica: “Canhua pariju huañuna ashas, canmanda mana nishachu, ‘Mana ricsinichu. ’ ” Shinallara ninauca tucui yachachishca runauna. 36 Shinajpi Jesús paigunandi shu Getsemaní nishca sisa pambama pactamuca. Pai yachachishca runaunama nica: “Tiarichi caibi, ñuca chihuama riuni Diosta mañangaj.” 37 Pedrora Zebedeo ishqui churiras pushasha, Jesús ashcara llaquiringaj turmindaringajpas callarica. 38 Shinajpi Jesús paigunara nica: “Ñuca alma ashcara llaquirin, huañuna tupura. Caillai saquirichi, ñucahua ripararus chapaichi.” 39 Cuti chininijhuama risha, tuama urmasha, Diosta mañaca: “Ñuca Yaya,” nisha, “usharijpi cai turmindarina vasu cuinta ñucamanda pasachu. Shina ajllaira mana ñuca munashcasna, astaun can munashcasna.” 40 Ña pai yachachishca runaunama shamusha, paigunara puñuriaita tupaca; Pedrora nica: “¿Mana ushacangui ñucahua chapanara shu huras tupullas? 41 Chapaichi, mañaichi, ama tintai tucungaj. Ispíritu munanmi, aicha irquimi.” 42 Cuti risha, Diosta mañaca, “Ñuca Yaya,” nisha, “cai vasu cuinta ñucamanda mana pasana usharijpi ñuca mana upijpis, camba munai rashca achu.” 43 Cuti shamusha, paiguna puñuriaita tupaca, puñunaimanda huañuucunara. 44 Paigunara saquisha, cuti rica, ña quinsa cuti Diosta mañaca, ñaupasnallara rimasha. 45 Shinajpi, pai yachachishca runaunajma shamusha, nica: “Ña puñuichi, samaichi. Huras pactamushcami. Ñuca, Runa Churi, uchayujcuna maquii intrigai tucunimi. 46 Atarichi, acuichi,” nica, “Ricuichi, ñucara intrigaj runa ña mayanllayamunmi.” 47 Jesús chara rimaushcallai, Judas shamuca, chunga ishquimanda shuj, paihua pariju ashca runauna shamunauca isparaunahua caspiunahua; sacerdote apunamanda runauna rucuunamandas shamunauca. 48 Intrigaj runa paigunara rimashca aca: “Ñuca muchashca runa chimi. Paita apinguichi.” 49 Chi ratullaira Judas Jesusma shamusha, “¿Alillachu angui, Yachachij?” nisha, paita muchaca. 50 Jesús paita, “Amigu,” nica, “¿imara rangajta shamucangui?” Shinajpi runauna llutarimusha, Jesusta apinauca. 51 Astaun shu Jesushua tiau runa, maquira chutasha paihua isparara llucchisha, shu sacerdote atun apura sirvijta chugrichica, paihua rinrira pitica. 52 Shinajpi Jesús paita nica: “Camba isparara sati cara ucui. Tucui isparara apijcuna isparahua huañunaungami. 53 ¿Manzhu iyangui cunallara ñuca Yayara ushani mañanara, pai ashca huaranga angelgunara cachamunma ñucajta? 54 Shina rajpi, ¿imasna rasha Quillcashcauna pactarinaunma, cai tucui tucuna anga nisha?” 55 Chi ratullai Jesús runaunara nica: “¿Imarasha shu shuhuajma cuinta llucshimucanguichi isparahua caspihua ñucara apingaj? Caran punzha cangunahua tiaricani templo huasii yachachisha, ñucara mana apihuacanguichi. 56 Astaun cai tucui tucun Diosmanda rimajcuna Quillcashcauna pactaringaj.” Shinajpi tucui pai yachachishca runauna Jesusta saquisha miticunauca. 57 Jesusta apijcuna paita pushanauca Caifaspajma, pai sacerdote atun apu ajpi. Chihui yachaira yachachijcuna rucuunandi tandarinaushca aca. 58 Pedro carullai paita catimuca sacerdote atun apu huasi pungugama. Suldaruunahua tiarica Jesushua ima tucushcaras ricungaj. 59 Sacerdote apuuna, rucuunandi, tucui gubirnu runaunandi llulla shimiunara mascanauca Jesusta cauźayachingaj, paita huañuchingaj. 60 Mana tupanaucachu, ashca llullasha rimaj ricujcuna shamunaullaira. Huasha ishqui llullasha rimajcuna shamunauca. 61 Paiguna ninauca: “Cai runa nica, ‘Diospa huasira tulanara ushanimi, quinsa punzhai cuti shayachingaj. ’ ” 62 Sacerdote atun apu atarisha, nica: “¿Manzhu cutipangui imaras? ¿Imara ninaun canmanda caiguna?” 63 Jesús chunlla aca, mana cutipacachu. Shinajpi sacerdote atun apu paita nica: “Causaj Diospa shutii rimahuai, Canga, ¿Cristo nishca Diospa Churichu angui?” 64 Jesús paita nica: “Canda casna ninguiga, maspas canda nini, huasha huras can Runa Churira Diospa ushana ali maqui partima tiarishcara, ahua pacha puyuunai shamushcaras ricunguichimi.” 65 Shinajpi sacerdote atun apu paihua churarinara lliquisha, nica: “¡Diosmanda irusta rimashcami! Shu rimajcunara mana ministinchichu. Cunallara pai manali rimashcara uyashcanguichi. 66 ¿Imara ninguichi?” Cutipasha ninauca: “Huañunami anga.” 67 Shinajpi paihua ñahuii tiucanauca, paita sajmanauca, shujcuna maqui palahua huactanauca. 68 “Rimai, Cristo,” ninauca, “¿pita canda sajmacai?” 69 Pedro canzhai tiauca huasi pungüi. Shu sirvij huarmi llutarisha: “Can shinallara Galileamanda Jesushua tiaucangui,” nica. 70 Astaun pai tucui runauna ñaupajpi nica: “Can rimashcara mana yachanichu,” 71 Pai punguma llucshijpi, shu sirvij huarmi paita ricuca. Chihui ajcunara nica: “Cai runas shinallara Nazaretmanda Jesushua tiauca.” 72 Cutillara Pedro Diospa shutii rimasha: “Cai runara mana ricsinichu,” nica. 73 Unáihuallai, chihui tiajcuna llutarimusha, Pedrora ninauca: “Sirtu pacha chigunamandami angui, can rimana tunu canda ricsichin.” 74 Shinajpi Pedro maldisiangaj Diospa shutii rimangajpas callarica: “Cai runara mana ricsinichu,” nica. Chi ratullai gallu cantaca. 75 Shinajpi Pedro Jesús rimashca shimiunara iyarica: “Gallu manara cantajllaira, can quinsa cuti, ‘Paita mana ricsinichu,’ ninguimi.” Canzhama llucshisha llaquira huacaca.
1 Punzhayajpi tucui sacerdote apuuna, runauna rucuunandi pariju rimanauca Jesusta huañucningaj. 2 Paita huatashcara pushanauca, Poncio Pilato nishca gubirnadurba maquii intriganauca. 3 Shinajpi Judas, paita intrigaj runa, Jesusta cauźayachishcara ricusha, aripintirisha, quinsa chunga cullquira cutichica sacerdote apuunama, rucuunamas. 4 Paigunara nica: “Ucharashcanimi, ucha illaj yahuarda intrigacani cangunama.” Paigunaga; “Cai, ¿imajta valin ñucanchij? Canmi yachangui,” ninauca, 5 Cullquira allpai shitasha templo huasii, llucshisha rica. Paillara cungai sipirisha huañuca. 6 Sacerdote apuuna, cullquira apisha, “Mana usharinzhu,” ninauca, “Diosma cushca cullquira huacachina cajumbi churangaj, yahuarmanda pagashca ajpi.” 7 Parijumanda cuintanaushca huasha, shu allpara randinauca, mangara rajpa allpara, chihui carumanda shamujcunara huañujpi pambangaj. 8 Chiraigumanda cuna hurascama chi allpa, ‘Yahuarmanda allpa,’ nisha shutichishcami. 9 Shina rajpi Diosmanda rimaj Jeremías rimashca shimi pactarica: “Quinsa chunga cullquira apinauca, valichishca runa valij tupura, Israel churiuna valichishcasna, 10 cullquira cuca mangara raj runa allpamanda, imasna Señor ñucara mandashcasna.” 11 Jesús atun apu ñaupajpi shayaca. Pilato Jesusta tapuca: “¿Canzhu Judiuguna Rey Apu angui?” Jesús cutipaca, “Canda shina ninguiga.” 12 Sacerdote apuuna rucuunandi paita cauźayachijpi, Jesús imaras mana cutipacachu. 13 Pilato nica: “¿Manzhu uyangui imasnara canmanda cuntra rimanaun?” 14 Jesús mana imaras cutipacachu Chimanda atun apu paimanda ashcara manzharica. 15 Ista punzhai atun apu yachai shu ishcashca runara cacharina aca, runauna munashcara. 16 Chi huras shu ashca uyarij runa ishcarishcara charica, Barrabás nishcara. 17 Runauna tandarijpi, Pilato paigunara nica: “¿Maicanda munanguichichu ñuca cacharingaj, Barrabasta, Cristo nishca Jesustachu cacharisha?” 18 Pilato yachaca Jesusta chijnishcamanda intrigashcara. 19 Pilato taripana tiarinai tiarishcai, paihua huarmi paita rimangaj cachamuca: “Ama imaras ranguichu cai ali runahua,” nisha, “cuna ashcara turmindarishcani paimanda ñuca puñusha ñuspashcai.” 20 Sacerdote apuuna rucunandi runaunara iyachinauca Barrabasta mañangaj cacharingaj, Jesustaga huañuchingaj. 21 Atun apu paigunara cutipaca: “¿Cai ishquimanda maicandara munanguichi ñuca cacharingaj?” Paiguna, “Barrabasta” ninauca. 22 Pilato paigunara nica: “¿Imara rashairi Cristo nishca Jesushua?” Tucui ninauca: “¡Chacatashca achu!” 23 Atun apu paigunara nica: “¿Imaraigu? ¿Ima manalira rashcairi?” Runaunaga maspas caparisha ninauca: “¡Chacatashca achu!” 24 Pilato ricusha mana imaras ranara ushasha, astaun runauna mas mas nusparinaupi, yacura apisha, paihua maquira maillaca runauna ñaupajpi, nisha: “Ñuca mana cauźayujchu ani cai ali runamanda. Cangunami yachanguichi.” 25 Tucui runauna cutipasha ninauca: “Paihua yahuar ñucanchi ahuai, ñucanchi churiuna ahuais achu.” 26 Shinajpi Barrabasta cacharica. Jesusta asutishca huasha, chacatangaj cuca. 27 Shinajpi atun apu suldaruuna Jesusta taripana ucuma pushanauca, paihua muyujta intiru suldaru muntunda tandachinauca. 28 Paita llatanasha, paihua ahuai shu puca llachapara churachinauca. 29 Paihua uma ahuai shu casha llaitura churachinauca, shu taunara paihua ali maquii cunauca. Paihua ñaupajpi cungurisha paita burlanauca, “¡Ee,” nisha, “Judiuguna Rey Apu!” 30 Paihua ñahuii tiucasha, caspira apisha, umai huactanauca. 31 Burlashca huasha, llachapara quichunauca, paihua churarinara churachinauca, paita chacatangaj pushanauca. 32 Chimanda llucshisha, shu Cirenemanda runara tupanauca, Simón nishcara, paita crusta apangaj mandanauca. 33 Golgota pambama pactamunauca, caiga Uma Tullu Pambami nin. 34 Chihui, ayaj vinura shu ayajhua masashcara paita upingaj cunauca. Camashca huasha, mana munacachu upinara. 35 Jesusta chacatashca huasha, suldaruna paigunapura paihua churanara chaupichinauca, maicanda lichayuj anga nisha surtiasha camanauca, paima cungaj, Diosmanda rimajpa shimi pactaringaj, casna nishca: “Ñuca churanara paigunapura chaupichinauca, ñuca llachapamanda lichayujta anga nisha camanauca.” 36 Suldaruuna chihui tiarisha paita chapasha ricurianauca. 37 Paihua uma ahuai cauźayachishca quillcashcara churanauca: “CAIMI JESÚS, JUDIUGUNA REY APU.” 38 Shinajpi, paihua pariju, ishqui shuhuaj runaunara chacatanauca, shujta ali maquima, shujta lluquima. 39 Chi mayanda pasaujcuna Jesusta camisha rimanauca, umaunara cuyuchisha. 40 Ninauca: “Can, templo huasira tulaj, quinsa punzhai cuti shayachij, canllara quishpi. Can Diospa Churi asha, cruzmanda irgüi.” 41 Shinallarami ninauca sacerdote apuuna, paita burlasha, yachaira yachachijcunahua pariju, fariseogunandi, rucunandi. Casna ninauca: 42 ”Shujcunara quishpichica, paillara mana ushanzhu quishpinara. Israelba Rey Apu asha, cunallara cruzmanda irguchu; shina rajpi paihuajpi quirishun. 43 Pai Diospi quiricami. Dios paita cacharichu paita munajpi: pai ‘Diospa Churimi ani,’ nishcamanda. 44 Shinallara paihua pariju chacatashca shuhuaj runauna paita camisha rimanauca. 45 Chaupi punzhamanda pacha las tres tupugama tun llanduyaca tucui partii. 46 Las tres tupui, Jesús shinzhira caparisha, nica: “Elí, Elí, ¿lama sabactani?” Casna nin: “Ñuca Dios, ñuca Dios, ¿ima rashara ñucara saquihuashcangui?” 47 Huaquin chihui ajcuna caita uyasha ninauca: “Eliastami eayaun.” 48 Chi ratullai shu runa callpamusha, shu tsungarina putuspi ayaj vinuhua tsungachisha, caspi pundai churasha, paita cuca upingaj. 49 Shujcuna ninauca: “Saqui, ricushunchi Elías shamunga chari paita llushpichingaj.” 50 Jesús cuti shinzhi shimihua caparisha, paihua ispiritura intrigaca. 51 Chi ratullai, templo huasii huayurai llachapa ishqui partii lliquirica ahuamanda, allpama pasajta. Allpas cuyuca, piñascunas partirinauca. 52 Pambashca uctuunas pascarinauca, ashca ñaupa puñuj quirijcuna atarinauca. 53 Pambashca uctuunamanda llucshisha, Jesús causarishca huasha, santu llactama shamunauca, ashcaunahua ricurinauca. 54 Capitán, paihua pariju Jesusta ricujcunandi, allpa cuyushcara chishu rashcaunaras ricusha, ashcara manzharinauca, casna nisha: “Sirtu pacha cai Diospa Churimi ashca.” 55 Ashca huarmiuna chihui tianauca, carumandalla ricusha. Caiguna Jesusta catimunauca Galileamanda pacha, paita sirvisha. 56 Paigunahua tianauca María Magdalena, Jacobo José mama Mariandi, Zebedeo churiuna mamandi. 57 Tutayaupi, shu José nishca charij runa, Arimatea llactamanda shamuj, Jesús yachachishca runa asha, 58 Pilatojma risha, Jesuspa aichara mañaca. Shinajpi Pilato shimira cachaca aichara paima cungaj. 59 José Jesuspa aichara apisha, shu ali limpi sábana llachapahua pilluca, 60 paihua quiquin mushuj pambana uctui churaca, paillara piñas ucui allashca aca. Shu atun rumira vultiachisha, uctu pungura ishcashca huasha, rica. 61 Chihui tianauca María Magdalena, chishu Mariandi. Pambashca uctu ñaupajpi tiarinauca. 62 Cayandi punzha, ‘Puruntuna’ nishca punzha huasha, sacerdote apuuna, fariseogunandi tandarinauca Pilato ñaupajpi. 63 Ninauca: “Apu, iyariunchi cai umachij runa nishcara pai chara causaushcai: ‘Quinsa punzha huasha causarishami. ’ 64 Mandai pambashca uctura alira pacha ishcangaj quinsa punzhagama, pai yachachishca runauna tutai shamusha aichara shuhuanaunga imami. Chihuasha ninaunga runaunama: ‘ Huañushcaunamanda causarishcami. ’ Shinajpi huasha pandashca ñaupa ajta yalinga.” 65 Pilato paigunara nica: “Caibi suldaruunara charinguichi. Richi pambashcara ali ishcasha cuirangaj canguna yachashcasna.” 66 Shinajpi rinauca pambashcara ali ishcangaj, rumira selluhua pigasha, suldaruunara churasha ricungaj.
1 Samana punzha pasashca huasha, simana ñaupa punda punzha ña punzhayaupi, María Magdalena chishu Marías pambashcara ricungaj shamunauca. 2 Allpa cuyuca shinzhira. Shu Señorba angel, ahuamanda irgumusha, rumira anzhuchica, rumi ahuai tiarica. 3 Angel rayu chiujlla limpiashca cuinta ricurij aca, paihua churarina rasu cuinta yuraj aca. 4 Suldaruuna angelda manzhashcamanda chucchunauca, huañushcaunasna tucunauca. 5 Randi angel huarmiunara nica: “Cangunaga ama manzhaichichu. Ñuca yachani canguna chacatashca Jesusta mascangaj shamushcanguichi. 6 Mana caibichu tian, causarishcami, pai rimashcasna. Shamichi, ricuichi pai siriushcara. 7 Uctalla richi, pai yachachishca runaunara cuintaichi, ‘Señor huañushcaunamanda causarimushcami,’ nisha. Cangunamanda ñaupara Galileama rin. Chihui paita ricunguichimi. Ñuca cangunara rimashcani.” 8 Shinajpi paiguna manzhaihua pambashca uctumanda llucshisha, ashca cushihua callpasha rinauca pai yachachishca runaunara cuintangaj. Yachachishca runaunara rimangaj riushcai, 9 Jesús paigunara tan tupasha, “Cushiyaichi,” nica. Paiguna llutarisha, paihua chaquira ujllarisha, paita aduranauca. 10 Shinajpi Jesús paigunara nica: “Ama manzharichichu. Richi, ñuca uquiunara cuintaichi, Galileama rinauchu. Chihui ricuhuanaungami.” 11 Paiguna riushcai, huaquin suldaruuna llactama rinauca, sacerdote apunara cuintangaj tucui ima tucushcaunaras. 12 Sacerdote apuuna rucunahua tandarisha, rimanaushca huasha ashca cullquira cunauca suldaruunama. 13 “Rimaichi,” ninauca, “ ‘Pai yachachishca runauna tuta shamusha aichara shuhuasha apanauca ñucanchi puñuriaishcai. ’ 14 Atun apu caita uyajpi, ñucanchi paihua rimashun cangunara quishpichingaj.” 15 Suldaruuna cullquira apisha, paiguna yachachishcasna rimanauca. Cai shimi uyarica judiugunahua cuna punzhagama. 16 Chunga shuj yachachishca runauna Galileama rinauca, Jesús rimashca urcuma. 17 Paita ricusha aduranauca, shina ajllaira huaquinguna mana quirinaucachu. 18 Jesús mayanllayamusha, paigunara nica: “Tucui ushaira ñucama cuhuashcami ahua pachais cai pachais, 19 chiraigumanda richi, runaunara yachachichi tucui llactaunai, paigunara bautisaichi Yaya shutii, Churi shutii, Santu Ispíritu shutiis. 20 Paigunara yachachichi tucui ñuca cangunara mandashcaunara huacachingaj. Ñuca cangunahua pariju tiaushami tucui punzhaunai, mundu tucurinagama.” Amen.
1 Diospa Churi Jesucristo rimashca evangelio ali shimi callarin. 2 Imasnara Diosmanda rimaj Isaías quillcashcai tian: “Camba ñaupajma ñuca rimajta cachauni, camba ñambira camba ñaupajpi alichingaj. 3 Runa illashca partimanda caparij casna nin: ‘Diospa ñambira alichichi. Paihua ñambira dirichuichi. ’ ” 4 Runa illashca partii, Juan yacui bautisauca. Casna nisha camachica: “Aripintirichi, bautisarichi, canguna uchamanda perdonai tucungaj! ” 5 Tucui Judea parti llactaunai causajcuna, tucui Jerusalembi causajcunandi paihuajma shamunauca. Paiguna ucharashcaunara cuintajpi, Juan paigunara bautisaca Jordán yacui. 6 Juan camillu illmahua ahuashcara churarishca aca, cara chumbillinahua chumbillishca. Atun ijira micuj, sacha mishquiras upij aca. 7 Pai camachisha nica: “Ñuca huashai shu ñucamanda yali ushaj shamunmi. Paihua zapatus huascara pascanallas mana pactanichu. 8 Ñuca sirtu pacha yacui cangunara bautisacani, pai randi Santu Ispiritui bautisangami.” 9 Jesús Galilea partii tiaj Nazaret llactamanda shamuca. Juan paita bautisaca Jordán yacui. 10 Chi ratullai, Jesús yacumanda sicasha, ahua pacha pascarishcara ricuca, Santu Ispiritura urpisna paihua ahuai irgumujtas ricuca. 11 Ahua pachamanda shu shimi uyarica: “Can ñuca llaquishca Churimi angui. Canhua cushiyani.” 12 Shinajpi Santu Ispíritu Jesusta runa illashca partima cachaca. 13 Chuscu chunga punzhara runa illashca partii tiauca. Supai apu Satanás paita tintaca. Milli animalgunahua tiauca. Angelguna paita sirvinauca. 14 Juan chunda cularbi ishcarishca huasha, Jesús Galilea partima shamuca. Dios mandana pachamanda evangelio ali shimira camachica. 15 “Huras pactamun,” nica, “Dios mandana pacha mayanllayamushcami. Aripintirichi, evangelio ali shimira quirichi.” 16 Galilea lamar patara purisha, Jesús Simonda ricuca paihua uqui Andresndi. Lamarbi licara shitanauca, aichahuara apijcuna asha. 17 Jesús paigunara nica: “Catihuaichi. Cangunara runaunara licajcunara rasha.” 18 Chi ratullaira, licaunara saquisha paita catinauca. 19 Chimanda pasasha, Jesús ansa ñaupajma riushcai, Zebedeo churi Jacobora ricuca paihua uqui Juandi, canuai licaunara rimindasha tiaucunara. 20 Chi ratullai Jesús paigunara cayaca. Paiguna Zebedeo yayara tarabajcunandi canuai saquisha, Jesusta catinauca. 21 Capernaum llactai icunauca, samana punzha ashcai. Jesús tandarina huasii icusha yachachica. 22 Runauna pai yachachishcara uyasha manzharinauca. Ushaihua, mandaj cuinta yachachica, mana yachaira yachachijcunasna. 23 Paiguna tandarina huasii shu irus supai icushca runa caparisha tiauca. 24 Runa, “¿Imarasha ñucanchira inquitangui, Nazaretmanda Jesús?” nica. “¿Ñucanchira tucuchingajchu shamushcangui? Can pi ashcaras yachanimi. Diospa santu Churimi angui.” 25 Jesús paita piñaca: “Upalla, paimanda llucshi.” 26 Irus supai runara chucchuchisha, shinzhira caparisha paimanda llucshica. 27 Tucui runauna manzharinauca. Paigunapura tapunauca: “¿Imarai? ¿Ima mushuj yachairairi caiga? Ushanahua irus supaigunara cachan. Supaiguna llucshinaun.” 28 Intiru Galilea partiunai Jesús rashcauna uctalla yacharica. 29 Chimanda huasha, tandarina huasimanda llucshisha, Simomba Andrespa huasima shamunauca Jacobohua Juanhua pariju, 30 Simomba huarmi mama calinturahua ungushca siriuca. Jesusta cuintanauca. 31 Shinajpi Jesús paihua mayanma shamusha, paihua maquimanda apisha, paita atarichica. Chi ratullaira calintura chiriyaca; huarmi paigunara sirvica. 32 Tutayaushcai, indi icushca huasha, tucui ungushcaunara tucui supai icushcaunaras Jesusma pushamunauca. 33 Tucui llactai ajcuna huasi pungumalla tandarimunauca. 34 Ima tunu ungushcaunaras Jesús ashcara alichica. Ashca supaigunara pajllama ichuca, rimangaj lugarda mana cuca, supaiguna paita ricsishcamanda. 35 Tuta ucura atarisha, chara llandu ucura, Jesús llucshisha, pi runas illashca partima rica. Chihui Diosta mañaca. 36 Simón, paihua pariju tiajcunandi, Jesusta mascanauca. 37 Jesusta tupasha paita ninauca: “Tucui canda mascanaun.” 38 Jesús paigunara nica: “Acuichi ñucanchi mayanlla partiunama, chihuis camachingaj. Chihuajmi shamushcani.” 39 Tucui Galilea partiunai paiguna tandarina huasiunai camachica, supaigunara ichuca. 40 Shu llagayuj runa Jesúsma shamusha, paihua ñaupajpi cungurisha, rugaca: “Can munasha ñucara alichinara ushangui.” 41 Jesús paimanda llaquirisha, maquira chutachisha, paita llangasha, nica: “Munanimi, alichishcangui.” 42 Casna rimashca huasha, llaga dsas chingarica. Chi ratullaira aliyaca. 43 Shinajpi Jesús alira camachisha, dispirisha cachaca: 44 “Riqui,” nisha, “ama imaras pitas rimanguichu; randi sacerdotema ri, can aliyashcara ricuchingaj. Shinallara can aliyashcamanda Moisés camachishca cuyanara cuyai, can ali tucushcara paigunara ricuchingaj. ” 45 Randi, runa rishca huasha yapa rimangaj callarica; Jesús rashcara pajlla pambai uyachica. Chiraigumanda Jesús llactai cungailla icunara mana ushacachu, randi runa illashca partiunai tiauca. Tucui llactaunamanda paihuajma shamunauca.
1 Ansa punzhauna huasha Jesús Capernaumbi cuti icuca. Pai huasii tiaushca uyarica. 2 Chi huraspi ashca runauna paihuajma tandarimunauca, huasi pungugama undajta shamunauca: Diospa shimira camachica. 3 Shinajpi huaquinguna Jesusma shamunauca, shu suchu runara huandusha. Chuscupura tucusha apamunauca. 4 Ashca runauna tiashcamanda, Jesuspajma pactanara mana ushasha: huasi ahuamanda uctunauca Jesús tiaushcai. Uctura rasha, suchu runara caitundi irguchinauca. 5 Jesús paiguna quirishcara ricusha, suchu runara nica: “Churi, can ucharashcara perdonashcangui.” 6 Huaquin yachaira yachachijcuna chihui tianauca, paiguna shungüi piñarisha iyarinauca: 7 “¿Imarasha casna riman? Diosta camiun. ¿Pita uchara perdonanara ushangairi? Diosllami ushan.” 8 Jesús paihua ispíritui riparasha paiguna shungu ucui casna piñarishcara, paigunara nica: “¿Imarasha casna iyaringuichi canguna shungüi? 9 ¿Imara mas rimaihuajlla anga suchu runara: ‘Camba uchara perdonashcangui,’ nisha, o paita rimangaj: ‘Atari, camba caitura apasha, ri?’ 10 Shinajpi canguna yachangaj imasna ñuca, Runa Churi, ushanara charinimi cai pachai uchara perdonangaj.” Jesús suchu runara rimaca: 11 “Canda nini: Atari, caitura apai, camba huasima ri.” 12 Chi ratullai atarica, paihua caitura apasha paiguna ñaupajmanda llucshica. Caita ricusha, tucui manzharinauca: “Mana ima huraspas casnara ricushcanchichu,” ninauca, Diosta ahuayachisha. 13 Cutillara Jesús lamar patama rica. Tucui runauna paihuajma shamunauca. Paigunara yachachica. 14 Jesús pasausha, Alfeo churi Levira ricuca. Levi gubirnu cullquira tandachina huasii tiauca. Jesús paita: “Catihuai,” nica. Atarisha caticami. 15 Jesús Levi huasii tiaushcai, ashca cullquira tandachijcuna, ashca uchayujcunas mesai tiarinauca Jesushua pariju, pai yachachishca runaunandi. Ashca runauna paita catimunauca. 16 Jesús cullquira tandachijcunandi uchayujcunandi micuca. Yachaira yachachijcuna fariseogunandi Jesús casna micuuta ricusha, pai yachachishca runaunara ninauca: “¿Imarasha cullquira tandachijcunahua uchayujcunahua micunri?” 17 Jesús caita uyasha, paigunara nica: “Ali ajcuna ambijta mana ministinaun, astaun ungushcauna. Alira rajcunara cayangaj mana shamucanichu astaun uchayujcunara.” 18 Juan yachachishca runauna, fariseoguna yachachishca runaunas sasinauca. Jesusma shamusha, ninauca: “¿Imarasha Juan yachachishca runauna, fariseoguna yachachishca runauna sasinaun, randi can yachachishca runauna mana sasinaun?” 19 Jesús paigunara nica: “¿Burai, cari ñaupajpi tiajcuna sasinaungachu? Carihua pariju tiausha, sasinara mana ushanaungachu. 20 Huashaga, carira quichuna punzha pactamunga. Chi punzhaunai sasinaungami. 21 “Mana pihuas rucu churarinara mushuj llachapahua rimindanzhu. Shina rajpi mushuj llachapa rucura cuti lliquinga. Churarina astaun mas lliquirishca anga. 22 Shinallara mana pihuas mushuj vinura churanzhu rucu purui. Shina rajpi, cara puru huajliringa, vinu taliringa. Mushuj vinu mushuj purui churana anga!’ ” 23 Jesús samana punzhai shu tarpushca chagrara pasauca. Pai yachachishca runauna pariju riusha trigu papajta aisangaj callarinauca. 24 Shinajpi Fariseoguna paita ninauca: “Riqui, ¿imarasha samana punzhai mana raihuajta ranaun?” 25 Jesús paigunara nica: “¿Mana ima huras ricushcanguichichu David paita cumpañajcunandi rashcara paiguna ministiushca huraspi, paiguna yarcachiushcai, 26 imasnara David Diospa huasii icusha, Abiatar sacerdote apu ashcai, Diosma ricuchina tandara pai paihua cumpañajcunandi micunauca, cai tanda Diosta sirvijcunalla micuna ajta?” 27 Shinallara Jesús paigunara nica: “Samana punzha runajta rashca aca, randi runauna mana ranaushcachu aca samana punzhajta. 28 Casna ajpi, ñuca, Runa Churi, samana punzhahua Señormi ani.”
1 Cuti Jesús tandarina huasii icuca; chihui shu chaquirishca maquiyuj runa tiauca. 2 Chihui tiajcuna paita chapanauca, samana punzhai shu ungushcara, “¿Alichingachu?” nisha ricungaj, paita cauźayachingaj. 3 Shinajpi Jesús chaquirishca maquiyuj runara nica: “Atari, chaupi shungüi shayari.” 4 Jesús paigunara nica: “¿Samana punzhai raihuajchu manzhu raihuaj alira rana, manalira rana? ¿Imara ali anga, causachingaj, huañuchingaj?” Paiguna chunlla uyanauca. 5 Jesús paihua shungüi piñarisha, muyujta ricuca. Runauna shungu shinzhiyashcara llaquirisha, runara nica: “Maquira chutachi.” Maquira chutachica, aliyashca aca. 6 Shinajpi, fariseoguna llucshisha Herodesta catijcunahua rimananauca Jesusta huañuchingaj. 7 Jesús pai yachachishca runaunandi lamar patama anzhurica. Ashca runauna Galileamanda Judeamanda catimunauca. 8 Shinallara Jerusalenmanda, Idumeamanda, Jordan chimbamanda, Tiro partimandas, Sidon partimandas ashca runauna Jesuspajma shamunauca, pai atun rashcaunara uyasha. 9 Jesús pai yachachishca runaunara rimaca shu canua puruntushcara charinauchu. Ashca runauna tiashcamanda, ama paita nitinauchu. 10 Ashca runaunara alichishcamanda, tucui ungüiyujcuna paihuajma nitimunauca llangangaj. 11 Irus supaiguna paita ricusha, paihua ñaupajpi tuama urmanauca: “Canmi Diospa Churi angui,” nisha. 12 Jesús paigunara mandaca paita ama ricsichinauchu. 13 Huasha Jesús urcuma sicaca. Pai munashca runaunara paihuajma cayaca. Shamunaucami. 14 Chunga ishquira ajllaca paihua pariju tiangaj, paigunara camachingaj cachangaj, 15 ungüigunara alichina ushaira charingaj, supaigunara ichuna ushairas. 16 Simonda cayaca. Mushuj shutira Pedro nishcara churaca. 17 Jacobo paihua uqui Juandi, Zebedeo churiunara, cayaca. Paigunara Boanerges nishcaunara shutichica. Caimi Rayo Churiuna nin. 18 Shujcunara cayaca: Andrés, Felipe, Bartolomé, Mateo, Tomás, Alfeo churi Jacobo, Tadeo, cananita Simón nishcaunaras. 19 Shinallara Judas Iscariotera cayaca, Jesusta apuuna maquima intrigajta. Huasima shamunauca. 20 Ashca runauna cuti tandarimunauca; paiguna taucarimushcamanda Jesús paihua tiajcunandi tandara micungajllas mana ushanaucachu. 21 Jesuspa ailluuna caita uyasha, paita apingaj shamunauca, “Lucu tucushcami anga,” nisha. 22 Jerusalenmanda shamuj yachaira yachachijcuna ninauca: “Beelzebú supai apu paihua shungüi tian. Supai apumanda supaigunara pajllama ichun,” ninauca. 23 Jesús paigunara cayasha, yachachina cuintanaunahua rimaca: “¿Imasna rasha Satanás supai apu Satanasllarara ichunara ushangachu?” nisha. 24 “Ima llactas chaupirisha, paigunapurallara macananausha, cai llacta mana durangachu. 25 Shinallara ima huasii tiaj aillu chaupirisha, paigunapurallara macananausha, cai aillu mana durangachu. 26 Satanaspas paillara macanausha chaupirisha, shayarinara mana ushangachu; randi pai tucurina pactamushcami. 27 Pihuas shu shinzhi runa huasimanda pai charishcara shuhuanara mana ushangachu manara paita huatashallara. Huatai pasasha shuhuanara ushangami huasimanda.” 28 ”Sirtu pacha nini: Runaunara tucui uchara perdonashca anga. Ima sami camisha rimashcaras perdonashca anga. 29 Randi, pihuas Santu Ispiritura camisha, mana ima huraspas perdonashcachu anga, astaun huiñaigama cauźayuj anga.” 30 Jesús cai shimira rimaca, paiguna: “Irus supaiyujmi,” n ishcamanda. 31 Huasha, Jesuspa uquiunandi mamandi shamunauca, canzhai chapausha. Paita cayangaj cachanauca. 32 Paihua muyujta tiau runauna paita ninauca: “Camba mama camba uquiuna canzhai tianaun, canda mascanaun! ” 33 Jesús cutipasha nica: “¿Pitai ñuca mama, ñuca uquiuna?” 34 Muyujta tiajcunara ricusha: “Caimi ñuca mama ñuca uquiuna. 35 Maicans Diospa munaira rau, paimi ñuca uqui, ñuca pani, ñuca mama,” nica.
1 Cutillara Jesús lamar patai yachachingaj callarica. Paihuajma ashca runauna tandarimunauca. Chiraigumanda, canuai icusha lamarbi tiarica. Randi tucui runauna pulayai tianauca lamar rayai. 2 Yachachina cuintanaunahua ashcara yachachica. Jesús pai yachachiushcai nica: 3 “Uyaichi, shu tarpuj runa tarpungaj llucshica. 4 Pai tarpushcai, huaquin muyuuna ñambi rayai urmanauca. Pishcuuna shamusha llambura micunauca. 5 Huaquin muyuuna allpa illaj rumi pambai urmanauca. Allpa pishishcamanda uctalla iñanauca. 6 Indi llucshimusha rupachica. Angu illashcamanda chaquirica. 7 Huaquin muyuuna cashaunai urmanauca. Casha itayasha, muyuuna chingarisha, mana aparinaucachu. 8 Randi shu muyuuna ali allpai urmanauca. Ali ahuara iñasha aparinauca, caran muyu quinsa chunga, sucta chunga, patsaj muyura cusha.” 9 Shinajpi Jesús nica: “Uyana rinriyuj uyachu.” 10 Sapalla tucujpi, mayanllai ajcuna paihua chunga ishqui yachachishca runaunandi, pai rimashca yachachina cuintanamanda tapunauca. 11 Jesús paigunara nica: “Canguna Dios mandana pacha pacashca shimira yachanguichimi. Randi canzhai ajcunara yachachina cuintanaunahua tucuira yachachina anga; 12 ricusha ama ricsinauchu, uyasha ama intindinauchu, ama tigranauchu ucharashcara perdonai tucungaj.” 13 Jesús paigunara nica: “¿Cai yachachina cuintanara manzhu intindinguichi? ¿Imasna rasha tucui yachachina cuintanaunara intindingaraunguichi? 14 Tarpuj runa ñuca shimira tarpun. 15 Ñambi rayai urmajcuna caigunami: Shimira tarpushca huasha, uctalla supai apu shamun uyashcara quichungaj paiguna shungumanda. 16 Shinallara rumi pambai tarpushcauna, shimira uyasha, uctalla cushihua Diospa shimira chasquinaun. 17 Randi, angu illajpi mana duranaun. Shimira apishcamanda llaqui tucusha, turmindachi tucusha, nijtasha urmanaun. 18 Caimi casha ucui urmajcuna. Shimira uyanaun, 19 randi cai pachai turmindusmanda, cullquira munashcamanda umachisha, imaunaras munasha, uyashca shimi huañun, mana aparin. 20 Ali allpai urmajcuna shimira uyanaun, uyashcara chasquinaun, aparinaun, huaquinguna quinsa chungagama, huaquinguna sucta chungagama, huaquinguna patsajcama! ” 21 Shinallara Jesús paigunara rimaca: “¿Tasa ucui vilara churanachu? ¿Caitu ucui churanachu? ¿Manzhu tucui ricurinai churana anga? 22 Tucui pacashca pajllai tucungami; tucui mana ricushca pajllai ricuringami. 23 Maicambas uyana rinrira charisha uyachu! ” 24 Shinallara paigunara nka: “Ricuichi uyashcara. Canguna tupushca tupullara shujcuna cangunara tupunaunga, yapashca anga canguna uyajcunara. 25 Maican charijpi, paima cushca anga; randi mana charijmanda pai ima charishcaras astaun quichushca anga.” 26 Shinallara Jesús nica: “Casnami Dios mandana pacha, imasna shu runa muyura allpai tarpun. 27 Runa tuta puñun, punzha atarin. Muyu llucshin, iñan. Imasna iñashcaras pai mana yachanzhu. 28 Allpa paillara apachin: ñaupa punda quihuara, chi huasha papajta, papajpi muyuhua undarin. 29 Na muyu pucujpi, saulihua pitin, pallana huras pactamushcamanda.” 30 Shinallara Jesús nica: “¿Dios mandana pacha imahua ricuchina angai? ¿Ima yachachina cuintanahua ricuchishun? 31 Dios mandana pacha shu mustaza muyu cuintami. Allpai tarpushcai tucui cai pachai tiaj muyumanda yali ichillami. 32 Tarpushca huasha, tucui yuraunamanda yali iñan; atun pallcayuj tucun. Shinajpi yura llandu ucui pishcuuna causanara ushanaunga.” 33 Casna yachachina cuintanaunahua Diospa shimira ashcara cuintaca, paiguna uyana tupura. 34 Yachachina cuintanaunahua mana rimasha mana cuintacachu. Astaun pai yachachishca runaunara chicambi tucuira pajlla pambai yachachica. 35 Chi punzha tutayaupi, Jesús paigunara nica: “Acuichi chimbama.” 36 Runaunara dispirishca huasha, yachachishca runauna Jesústa pai tiaushcasnalla canuai pushanauca. Paihua pariju shu ichilla canuauna rinauca. 37 Shinzhi huaira atarisha, tsajlas shitashcamanda canua pambaringaj callarica. 38 Jesús canua siquii saunai puñusha sirica. Paita llicchachinauca, “Yachachij,” nisha, “¿ñucanchi huañungaraushcara manzhu ricungui?” 39 Jesús shayarisha huairara piñaca, lamardas rimasha, nica: “Upalla, chunllayai.” Huaira shinalla pasarica, tucui ali chunlla tucuca. 40 Jesús paigunara nica: “¿Imarasha manzharinguichi? ¿Imaraigu mana quiringuichi?” 41 Ashca manzharishcahua rimananauca: “Caiga, ¿pitairi? Huairas lamarbas paita uyanaun.”
1 Lamar chimbama, Gadarenos partima shamunauca Jesús, pai yachachishca runaunandi. 2 Jesús canuamanda llucshishca ratullai, aya huasiunamanda shu irus supai icushca runa paigunara tupangaj llucshimuca. 3 Cai supai icushca runa aya huasiunai causaca. Mana pihuas paita huatanara ushacachu ima cadenahuas. 4 Ashca cuti cadenahua huatashca aca maquiras chaquiras. Maqui huatashcara dsas dsas pitica; chaqui huatashcara piti piti rarca. Mana pihuas paita vinsinara ushacachu. 5 Tucui huras, tutandi punzhandi, aya huasiunais urcuunais caparisha puricachaj aca. Rumiunahua chugrichisha causaca. 6 Jesusta carumanda ricusha, paihuajma callpasha shamuca, paihua ñaupajpi cungurica. 7 Shinzhira caparisha nica: “Jesús, atun Diospa Churi, ¿imarasha ñucahua inquitahuangui? Diosmanda, ama turmindachihuaichu! ” 8 Supai casna caparica Jesús casna rimashcamanda: “Cai runamanda llucshi, irus supai.” 9 Jesús paita tapuca: “¿Ima shutirangui?” “Huaranga ani,” nica, “ñucanchi ashca supaipura ashcamanda.” 10 Jesusta ashcara rugaca: “Ama cai partimanda cachahuaichu.” 11 Chi urcu mayambi, shu atun cuchi muntun micusha tianauca. 12 Tucui supaiguna Jesusta ruganauca: “Cuchiunama cachahuai icungaj.” 13 Jesús lugarda cuca. Irus supaiguna llucshisha, cuchiunai icunauca. Cuchi muntunga piñasmanda lamarbi urmasha, chucasha huañunauca. Ishqui huaranga tupu cuchi anauca. 14 Cuchira cuirajcuna miticunauca. Llacta ucuis pajllaunais cuintanauca. Uyajcuna casna tucushcara ricungaj llucshinauca. 15 Jesuspajma pactamusha, huaranga supaiguna turmindachishca runara ricunauca. Paita tiarishca, churarishca, ali iyaiyuj tiauta ricusha, manzharinauca. 16 Ricujcuna shamujcunara cuintanauca imasna supaiyujta alichishcara. Shinallara cuchiunahua tucushcara rimanauca. 17 Duiñuuna Jesusta paiguna llactamanda: “Llucshipai,” nisha rugangaj callarinauca. 18 Jesús canuai icuupi, pai alichishca runa paita rugaca: “Lugarda cuhuai canhua tiangaj!” 19 Jesús lugarda mana cucachu. Randi nica: “Camba huasima ri, camba ailluunama. Paigunara Dios atun rashcara cuintangui, imasna Dios canda llaquishcami.” 20 Pai ricami, Decápolis partii Jesús atun rashcaunara paita alichishcaras rimai callarica. Tucui manzharinauca. 21 Jesús chimbamanda cutillara canuai tigramuca. Ashca runauna paita muyujta tandarimunauca. Pai lamar patai tiauca. 22 Shu Jairo nishca runa, judiuguna tandarina huasimanda apu, shamuca. Jesusta ricusha, paihua chaquii tuama urmaca. 23 Jesusta ashcara rugaca: “Ñuca ushushihua ali huañuira huañuun. Shamupai camba maquira paihua ahuai churapai paita alichingaj, pai causangaj.” 24 Jesús apuhua rica. Ashca runauna catisha paita nitinauca. 25 Shu huarmi chunga ishqui huata paihua ungüihua ungüilla causaca. 26 Ambijcunamanda ashca turmindachishca aca; pai tucui charishcara gastaca. Paiga mana aliyashcachu aca, astaun mas ungushca tucuca. 27 Cai huarmi Jesús rashcaunara uyasha, runa muntumbi pactamusha, huashamanda Jesuspa churarinara llangaca. 28 Huarmi nica: “Ñuca paihua churarinai llangashalla, aliyashami.” 29 Cungaimanda yahuar saquirica; paihua aichai ali tucushcara riparaca. 30 Shinajpi Jesús, ursa paihuajmanda llucshishcara ricsisha, runaunama tigrarisha nica: “¿Pita ñuca churarinara llangacairi?” 31 Pai yachachishca runauna paita ninauca: “¿Manzhu ricungui imasna runauna nitimurianaun? ¿Imarasha ningui, Pita llangahuacai?” 32 Jesús casna rajta ricsingaj muyujta ricuca. 33 Shinajpi cai huarmi pai aliyashcara yachasha, manzhasha, chucchusha shamuca, Jesuspa ñaupajpi tuama urmasha tucuira paita cuintaca. 34 Jesús nica: “Ushushi, can quirishcamanda aliyashcangui. Cushilla ri, camba ungüimanda llushpirishca angui.” 35 Jesús chara rimaushcai huaqinguna apu huasimanda shamusha, apura ninauca: “Camba ushushi ña huañushcami, ¿imarasha Yachachijta yanga mulistangui?” 36 Jesús paiguna rimashcara uyasha, tandarina huasi apura nica: “Ama manzharichu. Quirilla.” 37 Pitas mana lugarda cucachu paihua catingaj, randi Pedrora, Jacobora, paihua uqui Juandas lugarda cuca catingaj. 38 Apu huasima pactamunauca. Jesús chihui ajcuna nusparishcara ricuca; huacashcara caparishcaras uyaca. 39 Jesús icusha, paigunara nica: “¿Imarasha uyaringuichi, huacaunguichi? Huahua mana huañushcachu, puñunllami.” 40 Jesusta burlasha asinauca. Pai, randi, tucuira canzhama cachaca. Jesusca yayandi mamandi pai pushamushcaunandi huahua siriushcama icunauca. 41 Huahuara maquimanda apisha, Jesús nica: “Talita cumi.” Caita runa shimii nin: “Ushushihua, atari nini.” 42 Chi ratullai huahua atarisha puringaj callarica. Huahua chunga ishqui huatayuj aca. Chihui tiajcuna ashcara manzharinauca. 43 Jesús paigunara nica: “Ama pimas cuintanguichichu. Huahuara caraichi.”
1 Chi partimanda llucshisha, Jesús paihua quiquin llactama shamuca. Pai yachachishca runauna catimunauca. 2 Samana punzhai Jesús judiuguna tandarina huasii yachachingaj callarica. Ashca uyajcuna manzharisha ninauca: “¿Paihua ushaira maimanda charingai? ¿Cai paima cushca yachana imarai? ¿Imarai cai paihua maquihua rashca sumaj rashcauna? 3 Paiga, ¿manzhu carpintiru runa? ¿Manzhu María churi? ¿Manzhu Jacobo, José, Judas, Simón paihua uquiuna? ¿Manzhu paihua paniuna caibi ñucanchihua tianaun?” Paimanda turbarinauca. 4 Jesús paigunara nica: “Maican Diosmanda rimaj llaquishca anga, astaun paihua quiquin llactai, paihua ailluunai, paihua huasii, mana ali ricushcachu anga.” 5 Chi llactai mana ima sumaj ranaunara ushacachu. Huaquin ungushcaunallara maquira churasha alichica. 6 Jesús paiguna mana quirishcara ricusha llaquirica. Mayanlla llactaunara purisha yachachica. 7 Chi huasha pai chunga ishqui yachachishca runaunara cayasha, ishquipura ishquipura caran partira cachaca. Irus supaigunara callpachina ushaira cuca. 8 ”Ñambira ama imaras apanguichichu,” nica, “Taunallara apanguichi. Bulsaras tandaras cullquiras ama apanguichichu. 9 Chaquii zapatusllara churaringuichi. Ishqui churarinara ama apanguichichu.” 10 Jesús paigunara nica: “Ima huras shu huasii icusha, chi llactamanda llucshingagama chi huasillai tianguichi. 11 Ima huras cangunara mana chasquinaupi, mana uyanaupi, chi llactamanda llucshiusha canguna chaquimanda pulvura chausinguichi, paiguna mana chasquishcara ricuchingaj. Sirtu pacha cangunara nini, taripana punzhai Sodoma Gomorra llactauna livachina mas ahuantaihuaj anga chi llacta livachinamanda.” 12 Paiguna llucshisha runaunara camachinauca: “Aripintirichi,” nisha. 13 Shinallara ashca supaigunara ichunauca; ashca ungushcaunara asitira umai talisha alichinauca. 14 Jesuspa shuti yapa uyarishcamanda, Herodes rey apu pai rashcaunara uyasha, nica: “Caimi Bautisaj Juan anga; huañushcamanda causarisha cai sumaj ushanaunara raun.” 15 Shujcuna: “Elíasmi,” ninauca. Shujcuna randi: “Paimi shu Diosmanda rimaj yachin, ñaupa rimajcuna cuinta.” 16 Caita uyasha, Herodes nica: “Caimi ñuca umara pitisha huañuchishca Juan anga, huañushcaunamanda causarishcami.” 17 Herodesllara cachaca Juanda apingaj. Paita chunda cularbi cadenahua huatasha ishcachica, Herodíasmanda rimashcaraigu. Herodías Herodespa uqui Felipe huarmi aca, astaun Herodes paita apishca aca. 18 Juan Herodesta nica: “Mana raihuajchu camba uqui huarmira charingaj.” 19 Herodías Juanda chijnica, paita huañuchinara munaca, randi mana ushacachu. 20 Herodes Juanda manzhaca. Juan ali shungu, ali causaj ashcara ricsisha, paita huacachica. Herodes paita uyasha manzharica, munaihua uyaca. 21 Herodes pagarishca punzha pactarijpi, pai istara rarca apuunandi capitangunandi, Galileamanda valij runaunandi. 22 Istai Herodíaspa ushushi icuca, bailasha Herodesta paihua mesai tiajcunandi cushiyachica. Shinajpi Herodes ushushira nica: “Can munashcara mañahuai. Cushca angui.” 23 Herodes Diospa shutii rimasha: “Tucui can mañashcara cushca angui. Ñuca rey apu chariushca chaupi allpagama cushca angui,” nica. 24 Ushushi llucshisha, paihua mamara tapuca: “¿Imara mañashairi?” Paihua mama cutipaca: “Bautisaj Juamba umara mañangui.” 25 Uctalla ushushi rey apu ñaupajma icusha, “Cunallara Bautisaj Juamba umara pitisha, pulatui churasha cuhuai,” nica. 26 Rey apu caita uyasha yapa llaquirica. Randi pai Diospa shutii rimashcamanda, mesai tiajcunamandas, “Mana,” nisha rimanara mana ushacachu. 27 Chi ratullaira rey apu suldarura Juamba umara apamungaj cachaca. 28 Cai suldaru chunda cularbi icusha, umara pitisha, pulatui churasha, apamuca. Umara ushushima cuca, pai randi mamama cuca. 29 Juan yachachishca runauna paita huañuchishcara uyasha shamunauca. Paihua aichara apasha pambana uctui churanauca. 30 Jesús cachashca runauna paihuajma tandarisha, tucui paiguna rashcaunaras yachachishcaunaras cuintanauca. 31 Jesús paigunara nica: “Runa illashca partima shamichi ansa samangaj.” Ashca runauna pasiamushcaraigumanda micungajllas lugarda mana charinaucachu. 32 Canuai icusha runa illashca partima paigunalla rinauca. 33 Paiguna riushcara ashca runauna ricunauca, Jesustas ricsinauca. Ashcauna chaquillahua rinauca llactaunamanda, Jesuscunamanda ñaupara pactanauca, paihuajma llutarimunauca. 34 Jesús canuamanda llucshisha, ashca runaunara ricusha, paigunamanda llaquirica. Paiguna cuiraj illaj buriguunasna anauca. Paigunara yachachingaj callarica. 35 Ña tutayaupi, Jesús yachachishca runauna paima shamunauca: “Cai partii runauna illanaun,” nisha, “Ña tutayaunmi.” 36 ”Runaunara dispiringui,” ninauca, “mayanlla llactaunama rinauchu, tandara randinauchu. Caibi micuna illan.” 37 Jesús cutipasha paigunara nica: “Canguna cai runaunara caraichi.” Paiguna randi: “¿Ishqui patsaj cullqui tupu tandara randingaj rishun cai runaunara carangaj?” nisha tapunauca. 38 Jesús paigunara nica: “¿Imasna tandara charinguichi? Ricuj richi.” Paiguna yachajpi, “Pichca tandandi, ishqui aichahuandi charinchi,” ninauca. 39 ”Tucui paigunara virdi quihua ahuai muntun muntun tiachichi,” nica. 40 Huachu huachu tiachinauca, patsajpura pichca chungapura. 41 Shinajpi Jesús pichca tandandi ishqui aichahuandi maquii apisha, ahuama ricusha bindisiaca. Tandara paquisha yachachishca runaunama cuca tucuima carangaj. Ishquindi aichahuaras paquisha caranma cunauca. 42 Tucui sajsajta micunauca. 43 Tanda puchuunara chunga ishqui suru tasa tupura pallanauca, aichahuamanda puchuunandi. 44 Micujcuna pichca huaranga tupu cariuna anauca. 45 Chi ratullaira Jesús pai yachachishca runaunara: “Canuai icuichi,” nica, “ñuca runaunara dispiriusha, ñucamanda ñaupa Betsaida llactama chimbaichi.” 46 Runaunara dispirishca huasha, Jesús urcuma rica Diosta mañangaj. 47 Tutayashcai canua chaupi lamarbi huamburiaica. Jesús sapalla allpai shayarica. 48 Huaira shujpurama apaupi, shinzhira cahuirianauca. Jesús paiguna sambayashcara ricuca. Punzhayanara Jesús yacu ahuara purisha paigunama shamuca, ñaupasha pasajsna tucuca. 49 Paiguna Jesusta yacu ahuara puriuta ricusha, “Ayami,” nisha caparinauca. 50 Tucui paita ricusha turbarinauca. Uctalla Jesús paigunara nica: “Cushiyaichi, ñucami ani, ama manzhaichichu.” 51 Shamusha, paigunajma canuai sicaca. Huaira saquirica. Ashca manzhaihua manzharinauca. 52 Tandara mirachishcara chara mana intindinauea, paiguna shungu shinzhiyashcaraigu. 53 Chimbai pasashca huasha, Genesaret partima shamunauca; pulayama llutarinauca. 54 Paiguna canuamanda llucshijpi, chihui tiajcuna dsaslla Jesusta ricsinauca. 55 Runauna caran partira muyujta callpasha, ungushcaunara apamui callarinauca huanduunai, Jesús maibi tiaushcara uyasha. 56 Maitas purishca llactaunai, mai ichilla llactaunais, mai partiunais, ungushcaunara ñambiunai churanauca. Paihua churarina pundahuallais llangangaj ruganauca. Casna rasha tucui llangajcuna aliyanauca.
1 Fariseogunandi, huaquin yachaira yachachijcunandi, Jerusalenmanda shamujcuna, Jesusma llutarimunauca. 2 Paiguna Jesús yachachishca runaunara maquira mana maillasha micuujcunara ricusha, paigunara cauźayachinauca. 3 Fariseoguna, tucui judiugunandi, rucuuna yachaira catisha, maquira mana ashca cuti maillasha, mana micujcunachu aca. 4 Pulasamanda tigramusha, mana maillashca maquihua mana micunachu aca. Ashca shu mandashca shimiunara charinauca huacacachingaj. Shinallara paiguna yachaira tucui upina cuya, tucui quisa, tucui iru manga, tucui caitu, tucuira maillajcuna aca. 5 Fariseoguna yachaira yachachijcunandi Jesusta tapunauca: “¿Imarasha can yachachishca runauna rucuuna camachishcasna mana purinaun, randi maquira mana maillasha micunaun?” 6 Jesús paigunara cutipaca: “Ishqui shimiyujcuna, alimi cangunamanda Isaías ñaupa huras rimaca, pai quillcashcasna, ‘Cai runauna shimillahua llaquihuanaun; Astaumbas paiguna shungu ñucamanda caruimi tiaun. 7 Yangami ñucara ahuayachinaun, runauna mandashcaunara yachachisha Dios camachishcasna. ’ 8 Dios camachishca shimira saquisha, runa rimashca shimiunara huacachinguichi: quisaunara maillasha, upina cuyaunara maillasha, shinallara imaras ranguichi.” 9 Jesús shinallara nicami: “Sirtu pacha Dios camachishca shimira mana valijta ranguichi, canguna yachaira rasha catisha. 10 Moisés rimacami, ‘Camba yayara camba mamara llaquinami angui. Maicans paihua yayara mamara chijnisha rimasha, shu rai huañungami. ’ 11 Randi canguna rimanguichi, ‘Shu runa paihua yayara mamara rimasha, ‘Tucui ñuca charishcara canda valirinaunara Diosta cushcami,’ nisha, 12 yayara mamara yanapangaj ña lugarda mana cunguichichu. 13 Shina rasha Diospa shimira mana valijta ranguichi canguna yachaihua. Ashcaunara shina samira ranguichi.” 14 Jesús tucui tandarijcunara cayasha rimaca: “Uyahuaichi, intindihuaichi: 15 pajllamanda runai icuj mana huajlichin, randi paiguna iyaimanda llucshij, caita runara sirtu pacha huajlichin. 16 Maicambas uyana rinrira charisha uyachu.” 17 Jesús runaunamanda anzhurisha, huasii icusha, chihuimi pai yachachishca runauna pai yachachina cuintanamanda tapunauca. 18 Paigunara nica: “¿Canguna shinallara mana intindinguichichu? ¿Manzhu ricsinguichi? Pajllamanda runai icuj mana huajlichinzhu. 19 Pajllamanda icuj mana shungüi icun, astaumbas icsai icusha, chimanda ichurin.” Jesús shina nisha tucui aichara micunalla rarca. 20 “Astaumbas runamanda llucshijcuna, caiguna runara huajlichin. 21 Runa shungu ucumanda manali iyaiguna, shujhua tacarinauna, uchalinauna, huañuchinauna llucshinaun. 22 Shinallara llucshinaun: Shuhuanauna, cullquira yapa munanauna, manali ranauna, umachina, irus iyai, chijnina, camina, mas tucui siqui iyai, mana ali causai iyaiguna. 23 Shungu ucumanda tucui iruscuna llucshinaun, runara huajlichinaun.” 24 Chimanda atarisha, Tiro Sidón llactaunama rica. Shu huasii icusha, pihuas caita ama yachanauchu munaca. Paillara pacarinara mana ushacachu. 25 Shu huarmi, paihua ushushihua irus supaira charij, Jesús pactamushcara uyasha, shamusha, paihua chaquii tuama urmaca. 26 Griego huarmi aca, Sirofenicia partimanda. Paiga Jesusta rugasha nica: “Ñuca ushushimanda supaira ichupai.” 27 Jesús cutipaca: “Ñaupara sacsanauchu churiuna. Mana valinzhu churiuna tandara apisha ichilla allcuunama shitangaj.” 28 Huarmiga cutipasha nica: “Ari, Señor, randi mesa ucui tiaj allcuhuauna churiuna micushcamanda urmaj puchuhuaunara micunaun.” 29 Shinajpi Jesús paita rimaca: “Caita rimashcamanda, canda nini, Ri, supai ña llucshishcami ushushimanda. ” 30 Huarmi paihua huasima pactajpi, ushushimanda supai llucshishcara tupaca. Ushushi caitui siriuca. 31 Jesús Tiro llactamanda tigramusha, Sidón llactara pasasha, Galilea lamarma pactamuca. Decápolis parti chaupi shungura pasaca. 32 Shu upa rinriyuj upa shimiyuj runara paihuajma pushamunauca. “Camba maquira paihua ahuai churapai,” nisha ruganauca. 33 Jesús paita runaunamanda chicanma pushasha, paihua riruunara rinri uctui satica, tiucasha paihua callura llangaca. 34 Ahua pachama ricusha, Jesús llaquirica: “Efata,” nica. Cai runa shimii, “Pascarichu,” nin. 35 Chi ratullaira paihua rinriuna pascarinauca, paihua callu huatashcara llushpichishca aca, alira rimaca. 36 ”Pitas ama cuintanguichichu,” nisha camachica. Paigunara caita mas mandajpi, astaun mas uyachinauca. 37 Paiguna ashcara manzharinauca, casna nisha: “Pai tucuira alirami rashca. Upa rinriuna uyanaun, upa shimiuna rimanaun.”
1 Chi punzhaunai ashca runauna tianauca. Micunara mana charinaucachu. Jesús pai yachachishca runaunara cayasha, nica: 2 “Cai tucui runaunamanda llaquirini,” nica, “ña quinsa punzha ñucahua tiasha mana micunaun. 3 Yarcaira cachajpi paiguna huasiunama, ñambii desmayarinaungami. Huaquinguna carumanda shamunaushca.” 4 Pai yachachishca runauna cutipanauca: “¿Cai tucuira maimanda tandara carangaj ushashun casna runa illashca partii?” 5 Shinajpi Jesús tapuca: “¿Masna tandara charinguichi?” Paiguna cutipasha: “Canzhista,” ninauca. 6 Chi tucui runaunara allpai tiaringaj mandaca. Chi canzhis tandara apisha, Diosta agrasishca huasha, paquisha, pai yachachishca runaunama cuca, runauna ñaupajpi churangaj. Shina rasha churanaucami runauna ñaupajpi. 7 Shinallara ansa yacu aichahuaunara charinauca. Bindisiashca huasha runauna ñaupajpi churangaj mandaca. 8 Sajsajta micunauca. Puchuunara pallanaucami canzhis tasa tupura. 9 Micujcuna chuscu huaranga tupu anauca. Jesús paigunara dispirica. 10 Chi huasha Jesús pai yachachishca runaunandi canuai icusha, Dalmanuta partima shamunauca. 11 Fariseoguna paihuajma shamunauca. Jesushua rimanauca: “Ahua pachamanda ricurinara ricuchihuai,” nisha, paita tintangaj. 12 Jesús paihua shungüi nanarisha, nica: “¿Imarasha, ‘Ahua pachamanda ricurinara ricuchihuai,’ ninaun cuna huras causajcuna? Sirtu pacha cangunara nini: Mana ima ricurinaras ahua pachamanda ricuchishca anga cuna huras causajcunama.” 13 Paigunara saquisha cutillara canuai icusha chimba partima rica. 14 Tandara apanara cungarisha rinaushca aca. Shu tandahuallara paigunahua canuai charinauca. 15 Jesús paigunara rimaca: “Iyaihua puringuichi fariseoguna tandara punguichina pulvu samimanda, Heródespa tandara punguichina pulvu samimandas.” 16 Paigunapura rimananauca: “Tandara mana apamushcamanda casnami riman.” 17 Jesús paiguna rimaushcara intindisha, nica: “¿Imara rimaunguichi cangunapura tandara mana charishcamanda? ¿Mana riparanguichi, mana intindinguichi? ¿Chara canguna shungura shinzhiyashcara charinguichi? 18 ¿Ñahuira charishallara mana ricunguichi? ¿Rinrira charishallara mana uyanguichi? ¿Manzhu iyaringuichi? 19 Ñuca pichca tandara partiushca huras pichca huaranga runauna chaupii, “¿puchuunara imasna ichilla tasa undajtara pallacanguichi?” Paiguna cutipanauca: “Chunga ishqui tasahuara.” 20 “Chishu huras canzhis tandara chuscu huaranga chaupii particani. ¿Imasna atun tasara undajta puchuunara pallacanguichi?” Paiguna, “Canzhista,” cutipanauca. 21 Jesús paigunara nica: “¿Imarasha charajpas mana intindinguichi?” 22 Chihuasha Betsaida llactama Jesús pactamuca. Paihuajma shu ñausa runara pushamunauca. “Llangapai,” nisha ruganauca. 23 Shinajpi ñausa runara maquimanda apisha, llactamanda huashama pushaca. Jesús ñausa runa ñahui muyui tiucasha, maquira paihua ahuai churasha, tapuca: “¿Imaras ricunguichu?” 24 Ricusha pai nica: “Runaunara yura cuinta shayajta r¿cunimi, shinashallara purinaun.” 25 Chi ratullaira Jesús cutillara maquira paihua ñahuii churajpi, runa ali ricuca. Alichishca aca, Tucuira caruma pajlla pambai ricucami. 26 Jesús paita: “Camba huasima ri,” nisha cachaca. “Llactai ama icunguichu, llactai ama pitas rimanguichu,” nica. 27 Jesús pai yachachishca runaunandi llucshisha, Filipohua Cesarea llacta muyujta ichilla llactaunama rica. Ñambii, pai yachachishca runaunara tapuca: “¿Runauna pimi nishara iyanaun ñucara?” 28 Paiguna cutipanauca: “Huaquinguna Bautisaj Juan, huaquinguna Elías, shujcuna shu Diosmanda rimaj, ninaun.” 29 Shinajpi Jesús tapuca: “¿Cangunaga, pimi nishara iyahuanguichi?” Pedro paita cutipaca: “Canmi Cristo angui.” 30 Jesús paigunara nica: “Pitas caita ñucamanda ama uyachinguichichu.” 31 Jesús paigunara yachachingaj callarica: “Ñuca, Runa Churi, ashca turmindarina ministirinmi,” nisha; “rucuuna, sacerdote apuuna, yachaira yachachijcuna, ñucara ichusha, huañuchihuanaungami; quinsa punzha huasha causarishami.” 32 Jesús caita pajlla pambai rimaca. Shinajpi Pedro paita shu partima pushasha nanajta rimai callarica. 33 Jesús vultiarisha, pai yachachishca runaunara ricusha, Pedrora piñaca: “Ñucamanda anzhuri, Satanás,” nisha, “Diospajcunara mana ricungui, astaumbas runajcunallara ricungui.” 34 Jesús tucui runaunara pai yachachishca runaunandi cayasha, paigunara nica: “Pihuas ñucallara catisha nisha, ‘Mana imaschu ani,’ nichu; paihua cruzta aparisha ñucara catimuchu. 35 Maicans paihua causaira quishpichisha nisha, causaira pirdingami. Randi maicambas paihua causaira pirdisha ñucaraigumanda, evangelio ali shimimandas, paihua causaira quishpichingami. 36 ¿Runaj imajta valingai intiru mundura ganashas astaun paihua almara pirdijpi? 37 ¿Ima paganara cungai shu runa paihua almamanda? 38 Pi runas ñucamanda ñuca shimimandas pingarijpi cai tacarisiqui ucharaisiqui hurascunai, ñuca, Runa Churi, shinallara paimanda pingarishami ñuca shamuna huras, ñuca Yaya sumajhua, santu angelgunahua shamushcai.”
1 Shinallara rimaca: “Sirtu pacha cangunara nini, huaquinguna caibi tiajcuna manara huañujllaira, Dios mandana pachara ushanahua shamushcara ricunaungami.” 2 Sucta punzha huasha, Jesús Pedrora, Jacoboras, Juandas paiguna sapallara ahua urcuma pushaca. Paiguna ñaupajpi Jesús shu tunu ricurij tucuca. 3 Paihua churarina sumaj chiujlla tucuca, rasu cuinta yurajmi ricurica. Mana maicans cai pachai tacsaj chi tupura yurajyachina ushanmachu aca. 4 Elías Moisesndi ricurimunauca, Jesushua cuintanausha. 5 Shinajpi Pedro Jesusta rimasha: “Yachachij,” nica, “alimi ñucanchi caibi saquiringaj. Quinsa huasihuara rashunchi: cambajta shuj, Moisespajta shuj, Eliaspajta shuj.” 6 Pai rimashcara mana yachaca. Manzharisha tianauca. 7 Shu puyu shamusha llanducami. Puyumanda shu shimi rimashca uyarica: “Caimi ñuca llaquishca Churi, paita uyaichi.” 8 Chi ratullaira runauna cuti ricujpi, Jesús sapalla shayauca; pihuas mana ricuricachu Jesúshua. 9 Paiguna urcumanda irgumushcai, Jesús rimaca: “Pitas canguna ricushcara ama rimanguichichu, ñuca, Runa Churi, huañushcaunamanda causarinagama.” 10 Paiguna cai shimira huacachinauca. Paigunapura rimananauca: “¿Imara angairi cai ‘huañushcaunamanda causarinaga’?” 11 Jesusta tapunauca: “¿Imarasha ninaun yachaira yachachijcuna, Elías ñaupara shamuna ministirin?” 12 Jesús cutipaca: “Elías sirtu pacha ñaupara shamungami tucuira alichingaj. ¿Imasnara quillcashca tian ñucamanda, Runa Churimanda, ñuca turmindarinami, mana valijta cuinta iyashca tucunami? nisha. 13 Randi cangunara nini, Elías ña shamushcami. Runauna paiguna munaira imaras ranauca, paimanda quillcashcasna.” 14 Jesús pai yachachishca runaunama pactamusha, ashca runauna paiguna muyujta tandarishcara ricuca. Yachaira yachachijcuna paigunahua rimananauca. 15 Chi ratui tucui runauna Jesusta ricusha, manzharisha callpamusha, paita saluranauca. 16 Jesús tapuca: “¿Imara rimanaunguichi chigunahua?” 17 Runa muntunmanda shuj rimaca: “Yachachij,” nisha, “ñuca churira cambajma pushamucani. Paihuajpi shu upa shimi supaira charin. 18 Chi supai maibis paita apishcai chucchuchin. Quiru mucurisha puscu talirin; ricujpi huahua chaquirisha riunmi. Can yachachishca runaunara rimacani: ‘Ichupai pajllama,’ nisha. Astaun paigunaga mana ushanaucachu.” 19 Jesús cutipasha, paigunara nica: “¡Mana quirij miraiguna! ¿Ima hurascama cangunahua tiana ani? ¿Ima hurascama cangunara ahuantana ani? Ñucama huahuara pushamichi.” 20 Shinajpi pushamunaucami. Supaiga Jesusta ricusha huahuara chucchuchica, allpama urmachica. Puscu talirisha huahua allpai cahuirica. 21 Jesús yayara tapuca: “¿Ima hurasmanda pacha casna tucushcai?” Yaya nica: “Casna tucushca ichilla huahua hurasmanda pacha. 22 Ashca cuti ninais yacuis urmachin huahuara huañuchingaj. Imaras ushasha llaquihuapai, yanapahuapai ñucanchira.” 23 Jesús paita nica: “Can quirinara ushajpi, quirijcunaj imaras usharin.” 24 Chi ratullai huahuayuj yaya caparisha rimaca: “Quirinimi, astaumbas ñuca mana quirishcara yanapahuapai.” 25 Jesús runauna nitirimushcara ricusha supaira piñacami, casna nisha: “Upa shimi, upa rinri supai, llucshi, nini, huahuamanda; paihuajpi cuti ama icunguichu.” 26 Shinajpi supai caparisha, huahuara shinzhira chucchuchisha, paimanda llucshica. Huahua huañushcasna saquirica. Shinajpi huaquiguna, “Huañushcami.” ninauca. 27 Randi, Jesús huahuara maquimanda apisha dirichuyachicami. Shina rajpi, huahua ataricami. 28 Jesús huasi ucuma icushcai, pai yachachishca runauna paita shujma cayasha tapunauca: “¿Imamanda ñucanchi supaira ichunara mana ushacanchi?” 29 Shinajpi Jesús nica: “Cai samiuna sasinallahua, Diosta mañashcallahua, llucshinaun.” 30 Chi partimanda llucshisha, Galilea partira purinauca. Jesusca pihuas ama yachanauchu munaca. 31 Pai yachachishca runaunara camachica: “Ñuca, Runa Churi, intrigai tucusha; ñucara huañuchihuanaungami. Huañushca huasha quinsa punzhai causarisha.” 32 Paigunaga cai shimira mana intindinaucachu. Jesusta tapungaj manzhanaucami. 33 Capernaum llactama pactasha, huasii tiausha, Jesús paigunara tapuca: “Ñambii, imara rimanaucanguichi cangunapura? ” 34 Paigunaga mana ansas cutipanaucachu, ñambii paigunapura pita atun tucungairi nisha rimanaushcamanda. 35 Shinajpi Jesús tiarisha, paihua chunga ishqui runaunara cayasha, paigunara nica: “Maican runa ñaupa tucuna munajpi, tucuimanda huasha angami, tucuira sirvij angami.” 36 Jesús shu ichilla huahuara apisha, paiguna chaupi shungüi churasha, paihua maquii marcasha, paigunara nica: 37 ”Maican ñuca shutii shu casna ichilla huahuara chasquisha, ñucaras chasquin; maican ñucara chasquisha, mana ñucallara chasquin, astaun ñucara cachamuj Diostas chasquin.” 38 Juan rimaca: “Yachachij, shu runara ricucanchi, camba shutii supaigunara callpachijta. Paiga mana ñucanchihua catimucachu. Mana catimushcamanda paita, ‘Ama casna raichu,’ nisha, ‘rimacanchi. ’ ” 39 Jesús cutipaca: “Ama paita mitsaichichu. Maican runas ñuca shutii munanaita rau mana dsas manalira rimahuanga ñucamanda. 40 Maicans mana ñucanchihua cuntra tiausha, ñucanchi partima tian. 41 Maicambas ñuca shutii cangunama shu yacu vasura cujpi, canguna Cristojcuna ashcamanda, sirtu pacha cangunara nini: Pai cushcara mana pirdingachu.” 42 ”Maicans cai ñucajpi quiriu ichilla huahuaunara manalii urmachijpi, astaun ali anmaca paihua cungai shu atun cutana rumira huatasha, lamarbi paita shitanauchu. 43 Camba maqui canda uchai urmachijpi, piti. Ishqui maquihua ucu pachama mana huañuna ninama rinamanda, astaun ali anma pullu maquihua causanama icungaj. 44 Ucu pachai paiguna aichai miraj curu mana huañungachu, ninas mana ima huras huañuringachu. 45 Camba chaqui uchai urmachijpi, piti. Ishqui chaquihua ucu pachama, mana huañuna ninama rinamanda astaun ali anma pullu chaquihua causanama icungaj. Ucu pacha ninara mana huañuchihuajchu. 46 Ucu pachai paiguna aichai miraj curu mana huañungachu, ninas mana ima huras huañuringachu. 47 Camba ñahui canda uchai urmachijpi, llucchi. Ishqui ñahuihua ucu pachama rinamanda astaun ali anmaca chulla ñahuiyuj Dios mandana pachai icungaj. 48 Ucu pachai paiguna aichai miraj curu mana huañungachu, ninas mana ima huras huañuringachu. 49 Tucuira ninahua pichashca anga; shinallara tucui sacrificiora cachihua pichashca anga. 50 Cachi alimi. Cachi upa tucujpiga, ¿imahuara mishquiyachinguichima? Cachira cuinta canguna shungüi charichi. Parijumanda cushiyaichi.”
1 Chimanda risha, Jesús Judea partima, Jordán yacu chimbama shamuca. Runauna cutillara tandarimujpi Jesús ñaupasnallara cuti paigunara camachica. 2 Fariseoguna Jesusma llutarimusha, paita pandachishun nisha tapunauca: “¿Shu runa paihua huarmira ichunallachu?” 3 Jesús cutipasha rimaca: “¿Moisés imara mandaca cangunara?” 4 Paiguna cutipanauca: “Moisés lugarda cuca maqui llushpirina quillcara quillcasha huarmira cachangaj.” 5 Jesús paigunara cutipasha nica: “Canguna shungu shinzhi ashcaraigumanda Moisés cai mandashcara quillcacami. 6 Astaun cai pachara rashca hurasmanda pacha, Dios runaunara cariras huarmiras iñachicami. 7 Chiraigumanda shu cari paihua yayara mamara saquisha, paihua huarmihua llutaringami. 8 Ishquindi shu aichalla tucunaunmi: shinajpi ña mana ishquichu anaun astaun shujllami tucun. 9 Shinajpi Dios llutachishcara runa ama llushpichichu.” 10 Huasii, pai yachachishca runauna cuti chi rimashcara tapunaucami. 11 Jesús nica: “Maicans paihua huarmira ichusha, shujhua casarasha, shujhua tacarij tucun. 12 Shinallara huarmis paihua carira ichusha shujhua casarasha, shujhua tacarij tucun.” 13 Huahuaunara Jesusma pushamunauca, paihua maquira paiguna ahuai churangaj. Pai yachachishca runauna pushamujcunara piñanauca. 14 Jesús caita ricusha piñarica. “Lugarda cuichi,” nica, “huahuauna ñucama shamunauchu. Paigunara ama arcaichichu. Paigunajmi Dios mandana pacha. 15 Sirtu pacha cangunara nini maicambas shu huahuasna Dios mandana pachara mana chasquishaga, mana icungachu.” 16 Jesús huahuaunara paihua maquii marcasha, maquira paiguna ahuai churasha, bindisiacami. 17 Jesús pai riushca ñambira ringaraushcai, shu runa callpasha shamuca. Jesuspa ñaupajpi cungurisha tapuca: “Ali Yachachij, ¿imara rashai huiñai causaira apingaj?” 18 Jesús nica: “¿Imamanda ‘Ali’ nisha rimahuangui? Shujpas mana tianzhu ali. Diosllami ali. 19 Dios camachishca shimiunara yachangui: ‘Ama shujhua tacaringuichu. Ama huañuchinguichu. Ama shuhuanguichu. Shujcunamanda ama yanga llullanguichu. Ama umachinguichu. Camba yayara camba mamara llaquinami angui. ’ ” 20 Runa cutipasha nica: “Yachachij, cai tucuira pactachishcanimi ñuca maltamanda pacha.” 21 Shinajpi Jesús paita ricusha llaquicami. “Chara shuj pishinmi,” nica. “Ri, can tucui charishcara catuiri; tsuntsu runaunama cuyai. Randi ahua pachai ashca charij tucunguimi. Shami, camba cruzta aparisha catihuai.” 22 Cai shimira uyasha, runa llaquiricami. Llaquirisha tigracami. Paiga ashcara charijmi aca. 23 Shinajpi Jesús paihua muyujta ricusha, pai yachachishca runaunara nica: “Charijcuna turmindushua icunaunga Dios mandana pachai.” 24 Pai yachachishca runauna cai shimira uyasha manzharinauca. Jesusca cutillara rimaca: “Churiuna, maicanguna charishcaunallai iyausha turmindusmi icunaunga Dios mandana pachai. 25 Mas raihuajmi camillu tupulli uctura pasangaj, randi pishi raihuajmi shu charij runa Dios mandana pachai icungaj.” 26 Paiguna maspas manzharinauca. Paiguna shungüi ninauca: “¿Pita quishpinara ushangairi?” 27 Shinajpi Jesús paigunara ricusha nica: “Runaunajca mana ushaihuajchu, randi Dioshua imas usharin. Dioshuaga tucui ushanallami.” 28 Shinajpi Pedro rimai callarica: “Ñucanchi tucuira saquisha canda catimushcanchi.” 29 Jesús cutipasha nica: “Sirtu pacha cangunara nini: Maicans ñucara llaquishcamanda, evangelio shimira llaquishcamanda, paihua huasira, uquiunara, paniunara, yayara, mamara, huarmira, churiunara, quiquin allpaunaras saquisha, 30 paiga sirtu pacha shu patsaj cuti yalijta cui tucungami, huasiunara, uquiunara, paniunara, mamaunara, churiunara, allpaunara cai hurascunai llaquiunandi; maspas shamuj hurascunai huiñai causaira charingami. 31 Shinajpi ashcauna ñaupa ajcuna puchucaiguna tucunaungami; randi puchucaiguna ñaupa anaungami.” 32 Jerusalenma rina ñambira sicasha ririanauca. Jesús paigunamanda ñaupa riucami. Paiguna llaquirisha, manzharisha catimunauca. Shinajpi pai chunga ishqui yachachishca runaunara shu partima cayasha, cutillara yachachingaj callarica paihua ima samiuna tucungaraushcaras. 33 “Jerusalenma sicaunchi,” nica. “Ñucara, Runa Churira, sacerdote apuuna maquii yachaira yachachijcuna maquiis cunaungami. ‘Huañuchichu,’ nisha cauźayachinaungami. Gentilgunama cunaungami. 34 Ñucara camisha asihuanaungami, livachihuanaungami, ñuca ñahuii tiucahuanaungami. Shina rasha huañuchihuanaungami. Randi quinsa punzhai causarishami.” 35 Shinajpi Jacobo Juandi, Zebedeo churiuna, Jesusma llutarimunauca. “Yachachij,” ninauca, “ñucanchi mañashcara rapai.” 36 Jesús cutipaca: “¿Imara ranara munanguichiri?” 37 Paiguna ninauca: “Ñucanchima cuhuai, can sumaj tiashcai, shuj camba ali maqui partima shujca camba lluqui maqui partima tiaringaj” 38 Jesús paigunara nica: “Canguna mañashcara mana intindinguichichu. ¿Ñuca upina vasura cuinta ushanguichichu upinara? ¿Ñuca bautisanahua cuinta ushanguichichu bautisaringaj?” 39 Paiguna cutipanauca: “Ushanchimi,” nisha. Shinajpi Jesús paigunara nica: “Sirtu pacha nini, ñuca upina vasura cuinta upinguichimi, ñuca bautisanahua cuinta bautisarishcanguichimi. 40 Astaun canguna mañashcara, ñuca ali maqui partima ñuca lluqui maqui partimas tiarinaraga, caita mana ñuca cunachu. Randi pigunajta ña alichishcami, chigunama cushca anga. ” 41 Chi shuj chunga ajcuna uyasha, Jacobohua Juanhuas piñari callarinauca. 42 Jesús paigunara cayasha nica: “Canguna yachanguichi imasna gentilgunajpi apu ajcuna ahuayanaun paiguna ñaupajpi, atunguna paigunara mandanaun. 43 Cangunapura mana shina angachu. Astaumbas maican cangunapurai atunyasha nisha, cangunara sirvij angami. 44 Cangunapuramanda maican ñaupa tucusha nisha tucuira sirvij angami. 45 Ñuca, Runa Churi, mana sirvishca tucungaj shamucanichu astaun sirvingaj. Ashcauna randimanda ñuca causaira cungaj shamucanimi.” 46 Shinajpi Jérico llactama shamunauca. Jesús chi llactamanda llucshimushcai pai yachachishca runaunandi ashca taucarimujcunandi, ñambi rayai shu ñausa runa, Timeoba churi Bartimeo, tiauca, “Cuyahuaichi,” nisha rugasha. 47 Bartimeo Nazaretmanda Jesús shamuuta uyasha, caparingaj callarica: “Jesús, Davidpa Churi, llaquihuapai.” 48 Ashca runauna piñanauca: “Upalla, ama caparichu,” nisha. Pai randi mas shinzhira caparica, “Davidpa Churi llaquihuapai.” 49 Shinajpi Jesús chapasha, cayangaj cachaca. Ñausa runara cayanauca, paita ninauca: “Cushiyai, atari, Jesús canda, ‘Shami’ nin.” 50 Paiga paihua capara ichusha, atarisha, Jesusma shamuca. 51 Jesús cutipasha rimaca: “¿Imara canhua rangaj munanguiri?” Ñausa runa nica: “Yachachij, ñuca ricuj tucungaj munani.” 52 Jesús paita nica: “Ri, can quirishca canda quishpichishcami.” Chi ratullaira ricuj tucuca. Pai Jesusta catica ñambii.
1 Paiguna Jerusalen llactama mayanllayaushcai, Betfagé Betania llactauna mayambi pactamunauca, Olivos urcu ñaupajpi. Jesús pai yachachishca runaunamanda ishquira cachaca. 2 Paigunara nica: “Richi canguna ñaupajpi ricurij llactama. Chihui pactai rishaga, shu malta buru huatashcara tupanguichi, maican runas paihua ahuai mana muntashcachu. Pascasha apamichi. 3 Maicambas rimajpi: ‘¿Imamanda shina raunguichi?’ nisha, cutipanguichi: ‘Señor ministin,’ nisha, ‘uctalla cuti cachamungami. ’ ” 4 Paiguna risha, buruhuara pungu rayai huatashcara canzhai tupanauca ñambi ishqui tucushcai. Pascanaucami. 5 Huaquin chihui ajcuna: “¿Imara rangaj buruhuara pascaunguichiri?” ninauca. 6 Paiguna cutipasha, Jesús mandashcasna rimanauca. “Apaichi,” nisha, cutipanauca. 7 Buruhuara pushamusha, paiguna churarinara buru ahuai churanauca; Jesús tiarica burui. 8 Shinallara ashca runauna paiguna churarinara ñambii mandanauca. Shujcuna yuramanda pangaunara pitisha ñambii mandanauca. 9 Ñaupa riujcuna huasha shamuujcunandi caparinauca: “¡Alabashcangui!” nisha, “¡Diospa shutii shamuj bindisiashcami! 10 ¡Ñucanchi shamuj yaya David rey apu tucuna huras bindisiashca achu! ¡Ahua pachai alabashca angui!” 11 Jesús Jerusalembi icuca, templo huasii. Muyujta tucuira ricuca. Ña chishi ajpi, Betaniama rica paihua chunga ishqui yachachishca runaunandi. 12 Cayandi punzha, Betaniamanda llucshisha, Jesús yarcachicami. 13 Carumanda shu pangayuj higu yurara ricuca, llutarisha imallas tiangami nisha mascaca. Pactasha ricujpi, pangaunalla tianauca, mana pai muyu aparina huras ajpi. 14 Jesús rimasha, nica: “Ima huraspas maicambas canmanda muyura ama micuchu.” Pai yachachishca runauna casna rimashcara uyanauca. 15 Jerusalenma shamunauca, Jesús templo huasii icusha, chihui tiaj catujcunara randijcunara canzhama callpachingaj callarica, Cullquira turcajcuna mesaunara shinallara tulacami. Urpira catujcuna tiarinaunaras vultiachicami. 16 Maican ima cuyaras ima mangaras apasha, Diospa huasi ucura pasangaj lugarda mana cucachu. 17 Jesús yachachisha nica: “¿Manzhu quillcashca tian: ‘Ñuca huasi Diosta mañana huasi nishca anga tucui llactaunaj?’ Randi canguna shu ‘shuhuajcuna uctura’ rashcanguichimi.” 18 Yachaira yachachijcuna sacerdote apuunandi Jesús rimashca shimiunara uyanauca. Imasna rashas paita huañuchingaj mascanauca. Paita manzhanauca, tucui runauna pai yachachishcaunara cushihua uyashcamanda. 19 Tutayaupi, Jesús llactamanda llucshica. 20 Tutamanda, ñambira pasausha, chi Jesús piñashca yurara anguunandi chaquirishcara ricunauca. 21 Pedro iyarisha rimaca: “Yachachij, ricupai. Can piñasha saquishca yura chaquirishcami.” 22 Jesús cutipasha: “Diospi quiri,” nica, 23 “ñuca sirtu pacha cangunara nini, maicans cai urcura rimasha, ‘Caimanda ri, lamarbi urmai,’ nisha, paihua shungüi mana ansas manzhasha astaun quirisha, pai rimashcasna tucungami. 24 Chiraigumanda nini, imara Diosta mañashas, can mañashcara sirtu pacha ‘Apishami,’ nisha quirichi. Can mañashca pactamungami. 25 Shinallara ima huras Diosta mañausha, perdonanguichi, maicanhuas imaras charisha perdonangaj. Casna rajpiga canguna ahua pachai tiaj Yaya canguna ucharashcaunara perdonangami. 26 Canguna mana perdonajpiga, canguna ahua pachai tiaj Yaya shinallara cangunara mana perdonangachu.” 27 Jesús Jerusalenma tigramusha, Diospa templo huasii puriushcai, sacerdote apuuna yachaira yachachijcuna rucuunandi paihuajma shamunauca. 28 Jesusta rimanauca: “¿Ima ushaihua caigunara raungui? ¿Pi mandashcara casna raungui?” 29 Jesús cutipasha rimaca: “Ñuca shinallara cangunara shu shimira tapusha nini. Canguna cutipahuaichi. Shina rajpi ñucas cangunara pi mandashcara rauni nisha cuintasha. 30 Rimahuaichi, Juan bautisana ¿ahua pachamand achu aca, runaunamandachu?” 31 Shinajpi paigunapura rimananauca: “Ñucanchi ahua pachamandami nijpi, pai ‘¿imaraigumanda mana quiricanguichi?’ ningami. 32 Randi ñucanchi: ‘Runaunamandami,’ nisha, runaunara manzhanchi, tucui runa Juan sirtu pacha Diosmanda rimaj ajta quirishcamanda.” 33 Shinajpi Jesusta cutipasha ninauca: “Mana yachanchichu.” Shinajpi Jesús paigunara cutipaca: “Ñucas cangunara mana rimashachu pi mandashca cai rashcaunara rauni.”
1 Jesús yachachina cuintanaunahua rimai callarica. Casna nica: “Shu runa uvillas chagrara tarpucami. Muyujta largasha arcaca. Allpara allasha, uvillas muyu tacana uctura rarca, huasira shayachica. Huaquin tarabaj runaunama pagara mañasha mañachisha, caru llactama rica. 2 Muyu huraspi, mañachij duiñu shu paita sirvijta cachaca tarabajcunama, paigunamanda muyura apingaj. 3 Paigunaga sirvijta apisha, livachisha maquillahua cachanauca. 4 Cuti shu sirvijta cachaca. Shinallara rumihua shitasha, umai chugrichisha, camishas, paitas cachanauca. 5 Cuti shujta cachaca. Caitas huañuchinauca. Huasha shujcunara cachajpi, huaquingunara chugrichinauca, huaquingunara huañuchinauca. 6 Shinallara shu sapalla churira charica, pai llaquishcara. Paitas puchucaibi cachaca: ‘Ñuca churira caźunaunga chari,’ nisha. 7 Astaumbas chi tarabajcuna paigunapura rimananauca: ‘Caimi apij duiñu tucunga,’ nisha, ‘shamichi, huañuchishunchi, allpa ñucanchij tucungami. ’ 8 Paita apisha huañuchinauca, uvillas chagramanda canzhama ichunauca. 9 Chagramanda duiñu shamusha, ‘¿Imara rangai chi tarabajcunara? Shamusha chi tarabajcunara tucuchingami; chagrara shujcunama cungami. ’ 10 ¿Cai quillcashcara manzhu ricushcanguichi: ‘Huasira shayachijcuna ichushca rumi ña huasira shayachina rumi tucushcami; 11 Caita Señor rashcami. Caiga ñucanchi ricujpi munanaitami?’ ” 12 Paiguna Jesusta huañuchinara munanaucami. Cai yachachina cuintanara paigunamanda rimashcara intindinaucami. Taucariai runaunara manzhasha, paita saquisha rinaucami. 13 Apuuna huaquin fariseogunara Herodesta catijcunandi Jesusma cachanauca, paita ima panda shimiis apingaj. 14 Chiguna Jesusta rimanauca, “Yachachij, can sirtu rimaj ajta yachanchi. Ima sami runaras mana manzhajchu angui. Mana runauna ahua carallara ricunguichu. Can sirtu pacha Diospa ñambira yachachingui. Rimahuai: ¿lmpuistu cullquira atun apu Cesarma paganachu manzhu pagana? Cunachu, manzhu cuna?” 15 Jesús paiguna manali shungura ricsisha, paigunara rimaca: “¿Imamanda tintahuanguichi? Shu cullquira apamichi ñuca ricungaj.” 16 Shinajpi cullquira apamusha ricuchinauca. Jesús nica: “¿Pihuajtai cai ñahui? ¿Pihuajtai cai quillcashca?” Paiguna ninauca: “Cesarbaj.” 17 Jesús cutipasha nica: “Cesarbajta Cesarma cuichi; Diospajta Diosma cuichi.” Cai shimira uyasha manzharinauca. 18 Shinajpi Jesusma shamunauca saduceo runauna, huañushcaunamanda “Causarina illan” nijcuna. Paita rirnasha tapunauca: 19 “Yachachij, Moisés ñucanchira quillcacami: ‘Shu runa huañujpi, paihua huarmi churi illaj saquirijpi, paihua uqui chi huarmira apichu huañuj uqui miraira atarichingaj. 20 Canzhis uquipura anauca. Ñaupa uqui shu huarmira apica. Chiga huañuca huahuara mana saquisha. 21 Chi huasha shu quipa uqui cai huarmira apica. Chihuas shinallara huahua illaj huañuca. Chimanda shujpas shinallara cai huarmira apisha huahua illajllara huañuca. 22 Canzhis uquiuna chi huarmira apinauca. Shinallara chi canzhismanda mana huahuara saquinauca. Puchucaibi huarmis huañuca. 23 ¿Causarinai, chi huarmi maicambajta quiquin huarmi tucunga? Tucui canzhis uquipura paita apinauca.” 24 Shinajpi Jesús cutipasha rimaca: “¿Chimanda manzhu pandaunguichi, Diospa shimiras paihua ushanaras mana yachashcamanda? 25 Causarinai mana casaranaunga, shinallara mana casarachinaunga. Astaumbas, ahua pachai tiaj angelguna cuinta tucunaungami. 26 Huañushcauna causarinara, ¿manzhu ricushcanguichi Moisés quillcashcai imasnara Dios yuramanda Moisésta rimaca: ‘Ñuca Abrahamba Dios, Isaacpa Dios, Jacobpa Dios ani?’ 27 Dios mana huañushcauna Dioschu, astaun causajcuna Diosmi. Shinajpi canguna ashcara pandaunguichimi.” 28 Yachaira yachachijcunamanda shuj Jesusma llutarimusha, paiguna ñaupa rimashcara uyasha, shujcunara ali cutipashcara ricsisha, paita tapuca: “¿Tucui camachishca shimiunamanda maicanda ñaupa angai?” 29 Jesús nica: “Ñaupa punda camachishca shimi casnami riman: ‘Uyaichi, Israel runauna. Ñucanchi Señor Dios shujlla Diosmi. 30 Camba quiquin Señor Diosta llaquinami angui tucui camba shunguhua, tucui camba almahua, tucui camba iyaihua, tucui camba ursahua. Caimi tucuimanda ñaupa punda mandashca shimi. 31 Chimanda huasha mandashca shimi ñaupa aj cuintallarami: ‘Camba rayai tiaj runara can quiquinllarara llaquishcasna llaquinami angui. ’ Cai mandashca shimiunamanda yali mana mas tian.” 32 Shinajpi chi yachaira yachachij runa Jesusta nica: “Yachachij, alirami rimashcangui. Shu sapalla Dios tian, shuj mas mana tianzhu. 33 Diosta llaquinami, tucui shunguhua, tucui iyaihua, tucui almahua, tucui ursahua, shinallara camba rayai tiaj runara canda llaquishcasna llaquingaj; caita tucui aichara rupachinamanda sacrificiomandas mas yalimi.” 34 Shinajpi Jesús chi runa ali iyaihua cutipashcara ricusha, paita nica: “Canga Dios mandana pachamanda mana caruichu angui.” Huasha maicambas tapunara mana iyanauca. 35 Jesús templo huasii yachachisha, casna nica: “¿Imasnara yachaira yachachijcuna rimanaun, ‘Cristo Davidpa churimi’ nisha? 36 Davidllara Santu Ispiritumanda rimasha casna nica: Señor ñuca Señorma rimaca: ‘Ñuca ali maquima tiari Ñuca canda chijnijcunara camba chaqui ucui churanagama. ’ 37 Shinajpi Davidllara, ‘Señor’ nisha, ¿imasnajpira paihua churimi ningai?” Ashca taucariai runauna ali munaihua Jesusta uyanauca. 38 Jesús paigunara yachachisha rimaca: “Yachaira yachachijcunamanda iyanguichi. Paiguna suni churarinahua purinara munanaun; shinallara pulasaunai salurai tucunara munanaun. 39 Shinallara tandarina huasiunai ñaupajpi tiarinaunara munanaun. Istaunais ñaupajpi tiarinaunara munanaun. 40 Paiguna huaccha huarmi huasiunara tucuchinaun. Unaira mañasha, umachisha yangamanda Diosta mañanaun. Caiguna astaumbas yali cauźayuj tucunaunga. ” 41 Jesús Diosma cuyana cullquira tandachina mala ñaupajpi tiarica. Ricucami cullquira malai churajcunara. Yapa charijcuna ashca cullquira churanauca. 42 Shu tsuntsu huaccha huarmi shamuca. Ishqui midiuhuara churaca malai. Ishqui midiu shu real tucun. 43 Shinajpi Jesús pai yachachishca runaunara cayasha, paigunara rimaca: “Sirtu pacha cangunara nini, cai tsuntsu huaccha huarmi tucuimanda yalira churashcami. 44 Shujcuna paiguna yalijta charishcamanda puchura churanauca. Randi cai huaccha huarmi pai charishca tupura llambura churaca, pai micuna randina cullqui ajllaira.”
1 Jesús Diospa huasimanda llucshimushcai, shu pai yachachishca runa rimaca: “Ricupai, Yachachij, cai atun rumiunaras, cai huasiunaras.” 2 Jesús cutipasha paita rimaca: “¿Ricunguichu cai atun huasiunara? Mana ima rumis shu rumi ahuais saquiringachu. Tucui tulashca anga.” 3 Jesús Olivos urcui tiarica, Diospa huasi ñahuipurai. Pedro, Jacobo, Juan Andresndi chicambi paita tapunauca: 4 “Rimahuapai,” ninauca, “¿ima huras tucui caiguna tucunaungai? ¿Ima sami ricuringa caiguna pactarinai?” 5 Jesús cutipasha rimai callarica: “Iyanguichi maicambas cangunara ama umachichu. 6 Ashca runauna ñuca shutii shamunaungami, ‘Ñucami Cristo ani,’ nisha. Ashca runauna umachi tucunaunga. 7 Ima huraspas guiraunara uyasha, guira shimiras, ama nusparinguichi. Casna tucuna ministirinmi. Shinashas cai pacha chara mana tucuringachu. 8 Llactapura macananaungami; rey apuunapura macananaunga. Ashca llactaunai allpa cuyunga. Ashca yarcai shamunga. Turmindarinauna tianaunga. Caiguna llaquiuna callarina anaungami. 9 Canguna cangunallara iyanguichi. Taripaj maquii intrigai tucunguichimi. Tandarina huasiunai cangunara asutinaungami. Gubirnu apuuna ñaupajma, rey apuuna ñaupajmas cayai tucunguichimi ñucara llaquishcamanda, paigunara rimangaj. 10 Ñauparaga ministirinmi tucui llactaunama evangelio shimira rimashca achu. 11 Ima huraspas cangunara intrigangaj pushanaupi, imara rimanara ama ñaupa iyanguichi, ama iyarishas. Chi ratui canguna iyaibi cushca shimira chillara rimanguichi. Mana canguna munaimanda rimangaraunguichi, randi Santu Ispiritumanda rimana shimira cangunara cushca anga. 12 Shu uqui paihua uquira huañuchingaj intrigangami, shinallara yaya churiras. Shinallara churiuna yayaunahua atarinaungami, paigunara huañuchinaungami. 13 Ñuca shutira llaquishcamanda canguna tucuigunamanda chijnishca anguichimi. Randi maicans puchucaigama ahuantaj, paimi quishpichishca anga. 14 Ima huras Dios Chijnishcara ricunguichi, Diosmanda rimaj Daniel rimashcasna, mana tiaihuaj tiaushcai shayarijta — ricuj runa intindichu — chi hurasllaira Judeai tiajcuna urcuma miticunauchu. 15 Maicans huasi ahuai tiaushaga huasi ucuma ama icuchu imaras apangaj. 16 Maicans pajllama tiaushaga paihua churarinara apangaj ama tigrachu. 17 Llaquinaita icsayujcuna. Llaquinaita llullu huahuayujcuna chi punzhaunai. 18 Diosta mañaichi canguna miticuna ama tamia punzhaunai shamuchu. 19 Chi punzhaunaiga atun turmindarina shamunga. Casna sami turmindus mana tiashcachu Dios cai pachara rasha callarishcamanda cuna hurascamas, maspas mana cuti tiangachu. 20 Dios cai punzhaunara mana pishiyachijpiga mana pihuas quishpichishca anma. Astaumbas pai ajllashcaunara llaquishcamanda cai punzhaunara pishiyachicami. 21 Shinajpi maicans rimajpi: ‘Riqui, Cristo caibimi; Cristo chihuimi,’ nisha, ama quiringuichichu. 22 Llulla Cristouna atarinaungami llulla rimajcunandi. Paiguna atun ricurinaunaras, munanaita rashcaunaras, umachisha ricuchinaungami, ushaihuaj ajpi quiquin ajllashcaunaras umachingaj. 23 Astaun canguna ricunguichi. Ña ñaupallara tucuira cangunara rimashcani. 24 “Shinajpi chi punzhaunai turmindarinauna pasashca huasha, indi yanayangami, quillas llanduyangami. 25 Istrillascuna ahua pachamanda urmamunaunga. Ahua pachai tiaj ushanauna cuyuchishca anaunga. 26 Chi ratullaira, ñucara, Runa Churira, ricunaungami puyui shamujta shinzhi ushanahua ali sumajhuas. 27 Shinajpi ñuca angelgunara cachamushami. Ñuca ajllashcaunara tandachishami chuscu huaira shamuna partiunamanda, cai pacha puchucai partimanda ahua pacha puchucai pundagamas. 28 Higu yuramanda yachaichi. Paihua pallcauna llulluyaupi, pangauna ña llucshiupi, ña yachanguichi rupai punzhauna pactamunaun. 29 Shinallara canguna cai tucui tucushcara ricusha, ña yachanguichimi pai mayanllaimi, ña pungüimi tiaun. 30 Sirtu pacha cangunara nini, cai huraspi causaj runauna mana pasanaungachu cai tucui rimashcauna pactarinagama. 31 Ahua pachas cai pachas chingarinaungami; randi ñuca rimashca shimi mana ima huras chingaringachu. 32 Chi punzhara, chi hurasta pihuas mana yachanzhu. Ahua pachai tiaj angelgunas, Diospa Churis mana yachanaunzhu. Yaya Dioslla yachanmi. 33 Ricuichi, chapaichi, mañaichi. Mana yachanguichichu ima hura shamuna ashcaras. 34 Imasna caru partima rij runasna, paihua huasira saquica sirvijcuna maquii, caran runama paihua quiquin tarabanara rimaca, pungüi cuirajta rimaca, ‘Chapangui,’ nisha. 35 Shinajpi chapaichi. Huasiyuj duiñu pactamuna hurasta mana yachanguichi, chishira ashas, chaupi tutai ashas, gallu cantanara, punzhayanaras; 36 manajpi pai cungaimanda shamusha cangunara puñuriaita tupangami. 37 Cangunara rimashcara tucuima rimauni. ‘Chapaichi,’ nini.”
1 Ishqui punzha huashaga, Pascua ista aca. Puscu illaj tandara micuna punzhauna pactamunauca. Sacerdote apuuna yachaira yachachijcunandi imasna rasha Jesusta umachisha apingaj, paita huañuchingaj rimananauca. 2 Paiguna ninauca: “Ista punzhaiga ama apishun, runauna ama nusparinauchu.” 3 Jesús Betania llactai tiarica. Shu Simón nishca llagayuj runa huasii, mesai tiarijpiga, shu huarmi ashca valij gustu asnaj ambira apamuca valij rumi purui. Huarmi purura paquisha Jesuspa umai, ambira talica. 4 Huaquin chihui tiajcuna shungu ucui piñarinauca, casna nisha: “¿Imarasha cai ali asnaj ambira yanga baratun? 5 Caiga catuna usharicami, quinsa patsaj yali cullquihua, tsuntsuunama cungaj.” Huarmira piñanauca. 6 Astaun Jesús rimaca: “Saquichi, ¿imamanda paita piñanguichi? Alirami rashca ñucara. 7 Tsuntsuunara tucui huras cangunahua charinguichimi. Canguna munashcai paigunara yanapanara ushanguichimi. Randi ñucara mana tucui huras charihuanguichichu. 8 Caiga pai ushashca tupura rashcami. Paiga ñuca aichara pambanai armachinara ñaupara rashcami. 9 Sirtu pacha cangunara nini: Maibis cai evangelio shimi rimarijpi, tucui cai pachai, cai huarmi rashcara cuintashca angami paita iyarichingaj.” 10 Shinajpi Judas Iscariote, Jesuspa chunga ishquipuramanda shuj, sacerdote apuunama rica, Jesusta paiguna maquii intrigangaj. 11 Apuuna cushiyanaucami Judas rimashcara uyasha. ”Cullquira cushun,” ninauca. Imasna rasha Jesusta paiguna maquii intrigangaj Judas iyarica. 12 Ñaupa punda punzha puscu illaj tandara micuna istai, Pascua burigura sacrificiora rana huraspi, Jesús yachachishca runauna paita ninauca: “¿Maibi munangui Pascua ista micunara alichingaj?” 13 Pai yachachishca runaunamanda ishquira cachaca. Paigunara nica: “Richi llactama, chihui shu runara yacu quisara apauta tupanguichimi. Paita catichi. 14 Maibi icujpi huasiyuj duiñura tapunguichi: ‘Ñucanchira yachachij nin, ¿Maibira micuna ucu, ñuca yachachishca runaunandi Pascua istara micungaj?’ 15 Pai shu ahua patai atun micuna ucura ricuchinga ña alichishcara. Chihui ñucanchijta puruntuichi.” 16 Jesús yachachishca runauna llactama rinauca. Jesús rimashcasna tupanauca. Chihui Pascua ista micunara alichinauca. 17 Ña tutayaupi Jesús shamuca paihua chunga ishqui runaunandi. 18 Mesai tiarishcai, paiguna micushca ratui, Jesús nica: “Sirtu pacha cangunamanda shuj, ñucahua micuj, ñucara intrigangami.” 19 Shinajpi paiguna llaquiringaj callarinauca. Caran shuj: “¿Ñuca chari ani?” shujpas, “Ñuca chari ani?” ninauca. 20 Jesús cutipasha rimaca: “Canguna chunga ishquipuramanda shuj, ñucahua pacta pulatoi tan rajmi, paimi anga, 21 Sirtu pacha ñuca, Runa Churi, riunimi, ñucamanda quillcashcasna. Astaun, ayailla chi runa Runa Churira intrigaj. Ali anmaca cai runa pai mana pagarishca ajpi.” 22 Paiguna micuushcai Jesús tandara apica, bindisiasha paquicami. Paigunama cuca, “Apichi,” nisha, “caimi ñuca aicha.” 23 Vasura apisha, agrasishca huasha, paigunama cuca. Tucui paiguna vasumanda upinauca. 24 Jesús paigunara nica: “Caiga ñuca mushuj pactachina shimira valichina yahuar. Ashcaunamanda talishcami. 25 Sirtu pacha cangunara nini: Uvillas muyu yacura mana cuti upishachu Dios mandana pachai mushujta upina punzhagama.” 26 Paiguna cantanara cantashca huasha, Olivos urcuma llucshisha rinauca. 27 Jesús nica: “Tucui canguna ñucamanda cuna tutai pingaringuichimi. Quillcashca tian: ‘Burigura cuirajta chugrichishami; buriguuna chausirinaungami. ’ 28 Causarishca huasha, ñuca cangunamanda ñaupa Galilea partima risha.” 29 Shinajpi Pedro cutipaca: “Tucui pingarinaupis, ñucaga mana.” 30 Jesús cutipaca: “Sirtu pacha canda nini, can, cuna, cuna tutai, gallu manara ishqui cuti cantajllaira, ñucamanda quinsa cuti ninguimi: ‘Paita mana ricsinichu. ” 31 Pedroga shinzhi rimasha nica: “Canhua huañuna ministirijpi, canmanda mana nishachu: ‘Paita mana ricsinichu. ” Tucui chishujcunas shinallara ninauca. 32 Getsemaní sisa pambama shamunauca. Chihui Jesús pai yachachishca runaunara rimaca: “Caibi tiarichi, ñucaga Diosta mañai risha.” 33 Jesús paihua pariju pushaca Pedrora, Jacobora, Juandas. Pai ashcara llaquiringaj callarica, turbaringajpas. 34 Paigunara nica: “Ñuca alma ashcara llaquirin, huañuna tupura. Caillai saquirichi, ripararus chapaichi.” 35 Ansa ñaupajma rica, allpai tuama urmasha, Diosta mañaca: “Usharijpiga, cai huras pasachu ñucamanda,” nisha. 36 Casnami nica: “Abba, Yaya, canhua tucui raihuajllami. Cai turmindarina vasura cuinta anzhuchipai ñucamanda. Randi mana ñuca munashcasna, astaumbas can munashcasna.” 37 Jesús tigramusha, paigunara puñuucunara tupaca. Pedrora rimaca: “¿Simón, puñunguichu? ¿Mana ushashcangui shu huras tupura chapanara? 38 Chapaichi, mañaichi, ama tintanai icungaj. Sirtu pacha alma munanmi, astaun aicha sambayashcami.” 39 Cutillara rica, ñaupa cuintallara rimasha. 40 Jesús tigramusha, cutillara paigunara puñuucunara tupaca, paiguna puñunaihua singusha. ïmara cutipanara mana yachanaucachu. 41 Quinsa cuti tucunai shamuca. Paigunara rimaca: “Puñuichi ña, samaichi. Chillami, huras ña pactarishca. Ñuca, Runa Churi, uchayujcuna maquii intrigashcami ani. 42 Atarichi, acuichi. Ñucara intrigaj runa ña mayanllayamunmi.” 43 Jesús chara rimaushcallai Judas shamuca. Pai Jesuspa chunga ishquiunamanda shuj aca. Judashua pariju ashca runauna shamunauca, isparaunahua, caspiunahua. Sacerdote apuuna, yachaira yachachijcunas, rucuunas paigunara cachamunauca. 44 Jesusta intrigaj runa paigunara rimashca aca: “Maicanda ñuca muchajpi, paimi anga. Paita apinguichi, ali cuirasha pushanguichi.” 45 Judas pactamusha Jesusma llutarica. “Yachachij, yachachij,” nisha, paita muchaca. 46 Shinajpi Jesusta apinauca. 47 Chihui ajcunamanda shuj paihua isparara llucchisha, sacerdote atun apura sirvijta rinri carara pitica. 48 Jesús nica: “¿Shuhuajta cuinta ñucara apingaj llucshimucanguichi isparaunahua caspiunahua? 49 Caran punzha cangunahua Diospa huasii yachachisha tiaucani. Mana apihuacanguichi. Shina ajllaira casnami tucun Quillcashcauna pactaringaj.” 50 Shinajpi tucui Jesús yachachishca runauna paita saquisha miticunauca. 51 Shu malta, sabana llachapahua pillurisha, catica. Suldaruuna paita apinauca. 52 Paiga llachapara saquisha llatan miticuca. 53 Jesusta sacerdote atun apujma pushamunauca. Chihui tucui sacerdote apuuna rucuunandi yachaira yachachijcunandi tandarimunauca. 54 Pedro carulla carulla catisha ricami, sacerdote atun apu patiogama; guardaunandi ninai cunusha tiauca. 55 Sacerdote apuuna tucui gubimui mandajcunandi shimiunara mascanauca Jesusta huañuchingaj. Astaumbas mana tupanaucachu. 56 Ashca runauna yanga llullasha paimanda rimanauca. Randi paiguna rimashca shimiuna mana chi tunullachu aca. 57 Shinajpi shujcuna atarimusha Jesusta cauźayachisha yanga llullasha rimanauca. 58 “Pai rimashcara uyashcanchimi ninauca: ‘Cai maquihua rashca templo huasira tulashami; randi quinsa punzhai shujta mana maquihua rashcara sicachishami. ’ ” 59 Shina ajllaira paiguna shimiuna mana chi tunullachu aca. 60 Shinajpi sacerdote atun apu paiguna chaupi shungüi atarisha, Jesusta tapuca: “¿Mana imaras cutipangui? ¿Imara nisha canda cauźayachisha rimanaun?” 61 Jesusca chunlla saquirica, mana imaras cutipaca. Sacerdote atun apu cuti tapuca: “Canga, ¿Cristochu angui? ¿Bindisiashca Diospa Churichu angui?” nisha. 62 Jesús cutipasha nica: “Ñucami ani. Ñuca, Runa Churi, ushaj Diospa ali maqui partima tiarishcara ricunguichimi. Huashaga, ahua pacha puyui shamujta ricunguichimi.” 63 Shinajpi sacerdote atun apu paihua churarinara lliquisha, rimaca: “¿Imara mas ministishun rimajcunara? 64 Pai irus rimashcara uyashcanguichi. ¿Imara ninguichi?” Paiguna tucui “Huañuchinami,” ninauca. 65 Huaquinguna paita tiucangaj callarinauca. Paihua ñahuira quillpasha, sajmanauca, “Rimai,” nisha. Guardauna paita huactanauca maqui palahua. 66 Pedro allpai tiauca, patiui. Paihuajma shu sacerdote atun apura sirvij huarmi shamuca. 67 Pedrora ninai cunusha tiauta ricusha, huarmi paita nica: “Cambas Nazaretmanda Jesushua pariju tiaucangui.” 68 Pedro cutipaca: “Paita mana ricsinichu. Imara chari ningui mana yachanichu.” Pedro punguma llucshica. Chi ratullaira gallu cantaca. 69 Chi sirvij huarmi Pedrora cuti ricusha, chihui tiajcunara rimai callarica: “Cai runa chi muntunmandami,” nisha. 70 Cutillara Pedro: “Mana ricsinichu,” nica. Chihuasha chihui tiajcuna Pedrora rimanauca: “Sirtu pacha can chi muntunmanda angui,” nisha, “Galilea runa angui. Can paigunasna rimaj angui.” 71 Shinajpi Pedro manali shimiunara rimangaj callarica, Diospa shutii rimasha: “Canguna rimaushca runara mana ansas ricsinichu,” nica. 72 Cutillara gallu cantaca. Pedro Jesús rimashca shimiunara iyaricami: “Manara gallu ishqui cuti cantajllaira, can quinsa cuti, ‘Paita mana ricsinichu,’ nisha rimanguimi.” Pedro caita iyarisha huacacami.
1 Tutamandara, sacerdote apuuna rucuunandi yachaira yachachijcunandi gubirnu mandajcunandi cuintananauca. Chihuasha paiguna Jesusta huatasha, paita pushasha, Pilatoma intriganauca. 2 Pilato Jesusta tapuca: “¿Canzhu judiuguna Rey Apu angui?” Jesús cutipasha nica: “Canda shina ningui.” 3 Sacerdote apuuna Jesusta ashcara cauźayachinauca. 4 Pilato cutillara tapuca: “¿Mana imaras cutipangui? Riqui imasnara ashcara cauźayachinaun canda.” 5 Shina nijpis Jesús shu shimillas mana cutipacachu. Chiraigumanda Pilato manzharica. 6 Astaumbas ista punzhai shu cauźayuj runara cacharij aca, maicandas paiguna mañashcara. 7 Shu Barrabás nishca runa tiauca. Paiga, cumpañajcunandi, chunda cularbi ishcarishca aca shu macanaushcai shu runara huañuchishcamanda. 8 Runauna shamusha mañai callarinauca caran huatai rashcasna rashca achu, nisha. 9 Pilato cutipasha nica: “¿Munanguichichu ñuca judiuguna Rey apura cacharingaj?” 10 Pilato ricsicami sacerdote apuuna Jesusta chijnishcamanda intrigashcara. 11 Astaumbas sacerdote apuuna tucui runaunara rimanauca Barrabasta cacharingaj. 12 Pilato cutipasha cutillara nica: “¿Imara ranara munanguichi judiuguna Rey apura?” 13 Paiguna cutillara caparinauca. “Paita chacatai” ninauca. 14 Pilatoga rimaca: “¿Ima manalira rashcairi?” Paigunaga maspas caparinauca: “Chacatai,” nisha. 15 Pilato runaunara cushiyachisha nisha, Barrabasta cacharica. Randi Jesusta asutishca huasha paiguna maquii intrigacami chacatangaj. 16 Shinajpi suldaruuna Jesusta taripana huasi patiuma pushanauca. Tucui suldaruunara cayanauca. 17 Puca llachapara churachinauca. Chihuasha shu cashahua ahuashca llaitura churachinauca. 18 Paita salurangaj callarinauca: “Cushiyai, judiuguna Rey Apu,” asisha ninauca. 19 Umai caspihua chugrichinauca. Paita tiucanauca. Alabajsna rasha paihua ñaupajpi cungurinauca. 20 Paita asishca huasha, churachishca puca llachapara llatananauca. Shina rasha paihua quiquin churarinara churachinauca. Paita chacatangaj llucchimunauca. 21 Shu Cirene llactamanda Simón, shu partimanda shamusha, pasauca. Paita Jesuspa cruzta apachinauca. Cai Simón Alejandro Rufo yaya aca. 22 Gólgota pambama Jesusta pushanauca. Runa shimii caita ‘Uma Tullu Pamba,’ nin, 23 Paiguna mirra ambihua masashca vinura Jesús upingaj ricuchinauca. Jesús mana upicachu. 24 Jesusta chacatashca huasha, paihua churarinara paigunapura chaupinauca, paigunamanda maicans lichayuj asha apanauchu, nisha, 25 Ahualla punzha, las nueve tupui, Jesusta chacatanauca. 26 Paihua cauźa quillcai quillcashca tiaca: JUDIUGUNA REY APU. 27 Paihua pariju ishqui shuhuaunara chacatanauca, shuj ali maqui partima, chishuj lluqui maqui partima. 28 Shina rasha, ñaupa huras Quillcashca Shimi pactaricami. Cai quillcashca nica: “Uchayujcunandi yupashca aca.” 29 Pasajcuna Jesusta camisha, umara cuyuchisha rimanauca: “Aa,” nisha, “canmi Diospa huasira tulaj, quinsa punzhai shayachij, 30 canllara quishpi, cruzmanda irgüi.” 31 Sacerdote apuuna yachaira yachachijcunandi shinallara asisha rimananauca: “Shujcunara quishpichicami, randi pai quiquinllara mana ushanzhu quishpinara. 32 Cristo, Israel runauna Rey Apu, cruzmanda irguchu, ñucanchi ricusha quiringaj” ninauca. Shinallara paihua pariju chacatashca runauna paita caminauca. 33 Ña doce hurasmanda pacha chaupi punzhai tun llanduyamuca las tres tupugama. 34 Chaupi chishira las tres mayanda, Jesús shinzhira caparica: “Eloi, eloi, ¿lama sabactani?” nisha. Caiga runa shimii nin: “Ñuca Dios, ñuca Dios, ¿imamanda saquihuashcangui?” 35 Huaquin chihui ajcuna uyasha, “Ricuichi” ninauca, “Elíasta cayaun.” 36 Shu runa callpasha rica, shu putuspi ayaj vinuhua tsungachisha, caspi pundai churasha, Jesús upingaj ricuchicami. “Saquichi,” nica, “ricushunchi Elías shamunga chari paita irguchingaj.” 37 Jesús, shinzhi shimihua caparisha, pitirica. 38 Chi ratui, Diospa huasii huarcushca llachapa ahuamanda allpama pasajta lliquiricami. 39 Paihua rayai shayau capitán, Jesús huañusha capariuta ricusha: “Caiga sirtu pacha Diospa Churimi,” nica. 40 Carumanda huaquin huarmiuna ricurianauca. Chigunahua tianauca María Magdalena, quipa Jacobohua Josehua mama María, Salomendi. 41 Chiguna Jesús Galilea partii ashcai, paita catisha sirvinaucami. Shinallara paigunandi shujcuna Jesushua Jerusalenma sicamujcuna tianauca. 42 Tutayaupi, ‘Puruntuna’ nishca punzha asha, samana punzha tucunai, alichina huras aca. 43 Arimatea llactamanda José, valij gubirnui mandaj runa, paihuas Diospa gubirnu pachara chapau, mana ansas manzhasha Pilatoma rica, huañushca Jesús aichara mañangaj. 44 Pilato Jesús ña huañushcara mana quiricachu. Capitanda cayachi cachasha tapucami: “¿Ña huañushcachu?” nisha. 45 Capitán rimashcara uyasha, huañushca Jesús aichara Josema cuca. 46 José shu yuraj linsura randica. Jesusta cruzmanda irguchisha, linsuhua pilluca, pambana uctui chingachica. Pambana uctu piñas ucui allashca aca. Shu rumira vultiachisha, uctu pungura ishcaca. 47 María Magdalena, Maria José mamandi, Jesusta chingachishcara ricunauca.
1 Samana punzha pasashca huasha, María Magdalena, Jacobo mama María, Salomendi gustu asnaj ambiunara randinauca Jesusta armachi ringaj. 2 Simana ñaupa punzhai, tutamanda, indi llucshimushcai, Jesusta pambashcama shamunauca. 3 Paigunapura ninauca: “¿Rumira uctu pungumanda pita vultiachisha cuhuangai?” 4 Paiguna ricujpi, rumi ña vultiachishca aca. Rumi yapa atunmi aca. 5 Pambashca uctui icusha, shu malta ali maqui partima tiajta ricunauca. Paiga suni yuraj churarinahua churarishca aca. Huarmiuna paita ricusha manzharinauca. 6 Malta rimacami: “Ama manzhaichichu,” nisha, “chacatashca Nazaretmanda Jesusta mascaunguichi. Causarishcami. Mana caibichu. Pai sirishca pistura ricuichi. 7 Astaumbas richi. Pai yachachishca runaunara Pedroras rimai richi. Jesús cangunamanda ñaupara Galileama riun. Chihui paita ricunguichimi, pai rimashcasna.” 8 Chi huarmiuna miticusha rinauca pambashca uctumanda. Paiguna chucchurisha manzharinauca. Pitas mana imaras rimanaucachu manzharishcamanda. 9 Jesús simana ñaupa punzha tutamandai causaricami. María Magdalenama ñaupa punda ricurica, paimanda canzhis supaira ichushca aca. 10 Pai risha, rimai ricami Jesushua purijcunara. Paiguna llaquirisha huacarianauca. 11 Paiguna Jesús causarishcaras, chi huarmi ricushcaras uyasha, mana quirinaucachu. 12 Chi huasha, ishquiunama Jesús shu tunui ricurica, paiguna shu partima puriushcai. 13 Paiguna tigrasha, chishujcunara cuintanauca. Chishujcuna paigunaras mana quirinaucachu. 14 Puchucaibi Jesús ricurimuca chi chunga shuj runaunama, paiguna mesai tiaushcai. Paiguna mana quirishcara, paiguna shungu shinzhiyashcaras rimacami, pai causarishcara ricujcuna rimashcara mana quirishcamanda. 15 Jesús paigunara nica: “Richi intiru mundura, evangelio ali shimira tucui runaunama camachichi. 16 Maicans quirisha bautisarishas quishpichishca anga, maicans mana quirisha cauźayachishca anga. 17 Quirijcunahua munanaita ricurinauna pactarinaunga. Ñuca shutii supaigunara pajllama ichunaungami, shinallara mushuj shimiunara rimanaungami; 18 machacuigunara maquihua apinaunga; ima huañuna ambira upijpis mana huajlichingachu; ungushca runauna ahuai maquira churajpi aliyanaungami.” 19 Jesús paigunara rimashca huasha ahua pachama apai tucuca. Diospa ali maqui partima tiaricami. 20 Paiguna llucshisha, Diospa shimira tucui partii camachinauca. Dios paigunara yanapacami, shimira sirtu ajta ricuchica munanaita ricurinaunahua. Amen.
1 Ashca runauna ñucanchihua sirtu tucushcaunara ali catimpuralla cuintangaj camanaushca, 2 imasna callari hurasmanda pacha ñahuihua ricujcuna ñucanchira yachachinauca, shimira camachijcuna asha. 3 Ñucamas shinallara alimi yachica, tucuira ali tapushca huasha, callarinamanda catimpuralla canda cuintangaj, yapa ali Teófilo, 4 canda yachachishca shimiuna sirtu ashcara ali yachangaj. 5 Herodes Judea rey apu ashcai, shu Zacarías nishca sacerdote tiauca, Diospa huasii sirvij, Abías muntunmanda. Paihua huarmi Aaromba ushushiunamanda aca, paihua shuti Elisabet. 6 Ishquindi ali causajcuna anauca Diospa ñaupajpi, cauźa illaj, tucui Dios mandashca shimiunai camachishcaunais purinauca. 7 Churi illaj anauca, Elisabet huahuara mana ricuj asha. Ishquindi ña rucu tucunauca. 8 Zacarías pai sacerdote rana tunura rausha Diospa ñaupajpi, paihua muntun rana huras ashcai, 9 sacerdote rana yachaira, insinsu nishca gustu asnaj ambira rupachica, Diospa huasii icusha. 10 Tucui taucarimuj runauna canzhai chapanauca, Diosta mañasha, insinsura rupachina huraspi. 11 Paihuajpi shu Señorba angel ricurimuca, altar nishca insinsu rupana mesa ali maquipurama shayarisha. 12 Zacarías paita ricusha ashcara manzharica. 13 Angel paita nica: “Zacarías, ama manzhaichu. Can Diosta mañashcara uyashcami. Camba huarmi Elisabet shu churira pagarichinga, paita Juan nishca shutira churangui. 14 Can cushi tucunguimi, cushiyanguimi. Ashca runauna pai pagarishcamanda cushiyanaungami. 15 Pai Diospa ñaupajpi valij tucungami. Vinuras urti upinaras mana upingachu. Santu Ispirituhua undashca anga mama icsamanda pacha. 16 Ashca Israelba churiunara tigrachinga paiguna Señor Diosma. 17 Diospa ñaupajpi Elíaspa ispirituhua paihua ushanahuas puringami, yayauna shunguunara churiunama tigrachingaj, mana uyajcunara ali iyaiyujcuna ranamas, shu muntun alichishca runaunara Señorbajta puruntungaj.” 18 Zacarías angelda nica: “¿Imasnara caita yachashairi? Ñuca rucu ani, ñuca huarmis shinallara rucumi.” 19 Angel cutipaca: “Ñuca Gabriel ani, Diospa ñaupajpi shayaj. Cachamushca ani canhua rimangaj, cai ali shimira canda cuintangaj. 20 Can ña upa shimi tucungui, rimanara mana ushanguichu, cai tucui pactarina punzhagama, can ñuca shimira mana quirishcamanda. Cai tucui paihua huraspi pactaringami.” 21 Runauna Zacaríasta chapanauca, “¿Ima tucun,” nisha, “pai Diospa huasii unaiyaupi?” 22 Pai llucshisha, rimanara mana ushacachu. Shinajpi runauna pai ima nuspairas Diospa huasii ricushcami intindinauca. Paiga maquillahua ricuchisha rimaca, upa shimi asha. 23 Pai sirvina punzhauna tucurijpi, huasima rica. 24 Chi punzhauna pasashca huasha, paihua huarmi Elisabet huahuara tupaca, pichca quilla tupura huasillai tiaca. 25 “Casnami Señor ñucahua rashca,” nica, “ñuca pingarishcara cuna anzhuchishcami runauna ñaupajmanda.” 26 Sucta quillai, Dios Gabriel nishca angelda cachaca Galileai tiaj Nazaret llactama. 27 Cachamushca aca shu huanra huarmima, shu José nishca carihua pactachishca. Pai Davidpa aillu aca. Huanra huarmi María aca. 28 Angel paihuajpi icusha: “Cushiyangui,” nica, “yapa llaquishca huarmi. Señor canhuami tiaun. Shu huarmiunamanda yali bindisiashca angui.” 29 Huarmi angelda ricusha, pai rimashca shimiunamanda turbarica. “¿Imarai cai salurashca?” nisha iyarica. 30 Shinajpi angel huarmira nica: “María ama manzharichu, gracia nishca yanapashcara tupashcanguimi Diospa ñaupajpi. 31 Cuna, camba icsai huahuara tupanguimi, churira pagarichingui. Paita shutira churangui JESÚS. 32 Valij tucungami. Ahuai tiaj Diospa Churi nishca anga. Señor Dios paihua yaya Davidpa rey apu tiarinara paita cungami. 33 Jacobpa aillu ahuai rey apu tucunga huiñai huiñaigama, pai mandana ima hurascamas mana tucuringachu.” 34 Shinajpi María angelda nica: “¿Ima rasha shina tucungairi? Carira mana charinichu.” 35 Angel cutipasha nica: “Santu Ispíritu camba ahuai shamunga. Ahuai tiaj Diospa ushana paihua llanduhua canda quillpangami. Chiraigumanda pagarij santu huahua Diospa Churi nishca anga. 36 Cuna camba aillu Elisabet shinallara churira tupashcami pai rucu ashcai, cuna sucta quillara huahuara icsai charin, pai huahuara mana ricuj nishca ashallara, 37 Dioshua mana imas mana raihuajchu, astaun paihua tucui raihuajllami.” 38 Shinajpi María nica: “Caibimi ani, Señorda sirvij huarmi. Can rimashcasna ñucahua rashca tucuchu.” Angel paihua ñaupajmanda llucshisha rica. 39 Chi punzhaunai, María atarisha urcu partima uctalla rica, shu Judá partii tiaj llactama. 40 Zacaríaspa huasima icusha, Elisabetda saluraca. 41 Elisabetca, María salurashcara uyajpi, huahua saltaca paihua icsai. Elisabet Santu Ispirituhua undashca aca. 42 Shinzhira rimasha: “Can tucui huarmiunamanda yali bindisiashca angui,” nica, “shinallara camba icsai tiaj huahuara bindisiashcami. 43 ¿Imarasha ñucama cushca aca, ñuca Señorba mama ñucama shamungaj? 44 Ñuca rinri can salurashca shimira uyasha, huahua cushiyasha ñuca icsai saltaca. 45 Quirij huarmi cushimi. Señor paita rimashca shimi pactaringami paihua.” 46 Shinajpi María nica: “Ñuca alma Señorda ahuayachin. 47 Ñuca ispíritu ñucara Quishpichij Diospi cushiyan. 48 Paita sirvij huarmi pugri ashcara ricushcami; Shinajpi cunamanda pacha tucui miraiguna ñucara cushiyashcami ninaunga. 49 Tucuira ushaj Dios atun ranaunara ñucahua rashcami. Santumi paihua shuti. 50 Pai llaquinaga tucui miraigunagama duranmi, tucui paita manzhajcunama. 51 Atun ranaunara rarca paihua rigrahua, shungüi mas yali tucuisiquiunara chausica paiguna shungüi iyarishcaraigumanda. 52 Ushajcunara quichuca paiguna apu tiarinamanda. Mansuunara ahuayachica. 53 Yarcachiujcunara aliunahua undachica. Charijcunara illajta cachaca. 54 Dios paita sirvij Israelda yanapacami, paihua llaquina shungura iyarisha. 55 Caimanda ñucanchi yayaunahua rimaca, Abrahamhuas paihua miraigunahuas, huiñai huiñaigama.” 56 María paihua tiauca quinsa quilla tupura. Chihuasha paihua huasima tigraca. 57 Elisabet pagarichina huras pactarijpi, shu churira pagarichica. 58 Mayanpura causajcuna ailluunas Dios paita ashcara bindisiashcara uyasha, paihua cushiyanauca. 59 Pusaj punzha huasha, huahuara circuncisión nishcara rangaj shamunauca. Paita shutichinauca Zacarías nisha, paihua yaya cuinta. 60 Astaun paihua mama cutipaca: “Mana,” nisha, “paihua shuti Juanmi.” 61 Mamara ninauca: “¿Imaraigu? Casna shutiyuj illan camba aillui.” 62 Shinajpi yayara maquihua ricuchisha tapunauca: “¿Camba huahua ima shutira churasha ningui?” 63 Zacarías shu quillca palahuara mañasha: “Paihua shuti Juanmi,” nisha quillcaca. Tucui manzharinauca. 64 Chi ratullai paihua shimi pascarica, paihua huatashca callu llushpirica, pai Diosta alabasha rimaca. 65 Mayanllapura causajcuna manzharinauca. Cai tucuira cuintanaucami tucui Judea urcu partiunai. 66 Tucui uyajcuna caigunara huacachinauca paiguna shungüi, “¿Ima sami huahuara angai?” nisha. Diospa maqui paihua tiauca. 67 Paihua yaya Zacarías Santu Ispirituhua undashca asha, Diosmanda rimaj cuinta rimaca, casna nisha: 68 “Bindisiashcami Israelba Señor Dios. Paihua runaunara ricushcami, randishcami. 69 Shu ushaj Quishpichijta sicachishcami ñucanchijta. Paita sirvij Davidpa aillui, 70 imasna rimaca paihua callarimanda aj ali rimajcuna shimimanda. 71 Ñucanchira chijnijcunamanda quishpichina, shinallara tucui ñucanchira chijnijcuna maquimandas; 72 ñucanchi yayaunahua alira rangaj, pai chuyaj pactachina shimira iyaringaj. 73 Ñucanchi yaya Abrahanma paihua shutii cushca shimira iyarisha, ñucanchimas cuna aca, 74 imasna ñucanchi, chijnijcunamanda llushpichishca asha, mana manzhasha, paita sirvinchi maca, 75 chuya shunguhua, ali shunguhuas paita sirvingaj paihua ñaupajpi, tucui ñucanchi causana punzhaunai. 76 Canga, ñuca huahua, ‘Ahuai tiaj Diosmanda rimaj,’ nishca angui, Señorba ñaupajpi purina angui paihua ñambiunara alichingaj, 77 paihua runaunara quishpichina shimira yachachingaj, paiguna ucharashcaunara perdonai tucungaj, 78 ñucanchi Dios shunguhua llaquishcamanda, mushuj punzha ahuamanda ñucanchira punzhayachin. 79 Llandu tutais huañuna llanduis causajcunara punzhayachingaj, ganaslla causana ñambira ñucanchi chaquiunara pushangaj.” 80 Huahua iñasha rica, paihua ispiritui shinzhi tucuca. Runa illashca partiunai tiauca pai Israelma ricuchina punzhagama.
1 Chi punzhaunai, Augusto César nishca atun apu shu mandashca shimira cuca tucui runauna shutiunara gubirnu quillcai churachingaj. 2 Cai ñaupa shutira yupana Cirenio Siria llactai gubirnadur ashcai rashca aca. 3 Tucui runa paihua quiquin llactama rica shutira churachingaj. 4 José Galileamanda, Nazaret llactamanda sicaca, Belen nishca Davidpa llactama, pai Davidpa aillumanda miraj asha. 5 Shutira churachingaj rica, paihua pactachishca huarmi Mariandi. María icsayuj aca. 6 Paiguna chihui tiaushcai, huahua pagarina huras pactarica. 7 María paihua ñaupa punda churira pagarichica. Huahuara llachapahua pillusha, huagra micuna batiai sirichica, Hotel huasii paigunaj lugar mana tiajpi. 8 Chi quiquin partii, burigura cuirajcuna tianauca; paiguna buriguunara cuiranauca tutai. 9 Cungaimanda shu Señorba angel ricurimuca paigunama; Señorba sumaj paiguna muyujta punzhajlla ricurica. Ashcara manzharinauca. 10 Angel paigunara nica: “Ama manzhaichichu, yapa ashca cushiyachina shimiunara cangunama apamuni. Tucui runaunaj anga. 11 Cuna punzha Davidpa llactai cangunaj shu Quishpichij pagarishcami. Pai Cristo nishca Señormi. 12 Caita ricusha ricsinguichi. Llachapahua pillushca llullu huahuara tupanguichimi, huagra micuna batiai sirijta. 13 Cungaimanda angelhua pariju ashca angelguna ricurimunauca; Diosta alabasha, ninauca: 14 “Dios sumajyachishca achu ahua pachai, cai pachai ganaslla causana, runaunaj ali munai achu.” 15 Angelguna paigunajmanda ahuama rijpi, cuirajcuna paigunapura ninauca: “Acuichi Belenma, imasna ashcaras ricungaj, Señor ñucanchira ricuchishcara.” 16 Shinajpi uctalla shamunauca, Mariaras Joseras tupanauca, huahuaras huagra micuna batiai sirijta. 17 Huahuara ricusha, angelguna huahuamanda cuintashcara paigunama rimanauca. 18 Tucui uyajcuna cuirajcuna cuintashcara uyasha manzharinauca. 19 María cai tucuira paihua shungüi iyarisha huacachica. 20 Burigura cuirajcuna tigranauca, Diosta alabasha tucui paiguna uyashcamandas ricushcamandas, paigunara rimashcasna. 21 Pusaj punzha pactarijpi huahuara circunisionda rangaj, paita Jesús shutichinauca. Cai shutira angelmanda cushca aca huahuara manara tupajllaira icsai. 22 Huarmi armana punzhauna pactarijpi Moisespa ley shimii rimashcasna, huahuara pushamunauca Jerusalenma, Señorba maquii mingangaj. 23 Imasna Señorba ley shimii quillcashca tian: “Tucui icsamanda ñaupa punda llucshij huahua, cari asha, Diospa ñaupajpi santu nishca chicanyachishca angami,” nisha. 24 Shinallara Señorba ley shimii quillcashcasna, sacrificiora rangaj rinauca, ishqui urpira cusha, mana ajpi ishqui paluma huahuara. 25 Shu Simeón nishca runa tiauca Jerusalembi, ali runa, Diosta llaquij, Israelba cariyanara chapau. Santu Ispíritu paihua tiauca. 26 Santu Ispíritu paita yachachica: “Can manara huañushallara, Señor Ajllashca Runara ricunguimi.” 27 Pai, Santu Ispíritu pushashca, templo Diospa huasima shamuca. Huahua Jesuspa yayauna paita temploma pushamunauca, ley camachishca shimi mandashcara pactachingaj paihua. 28 Simeón huahuara apica paihua rigrai, Diosta bindisiasha nica: 29 “Cuna Señor canda sirvijta cushi shunguhua dispiringui, camba shimii rimashcasna. 30 Ñuca ñahuihua camba quishpichinara ricushcani. 31 Caita tucui runauna ñaupajpi alichishcangui; 32 vilara gentilgunara punzhayachingaj, camba Israel runauna sumajtas.” 33 José Jesuspa mamandi tucuira huahuamanda rimashcaunara uyasha manzharinauca. 34 Simeón paigunara bindisiaca, paihua mama Mariara nica: “Cai huahua churashcami ashca Israelbi tiaj runauna urmangaj shinallara ataringajpas, shu ricurinas, maspas ashca runauna paimanda manali rimanaunga, 35 ashca shunguunai iyashcauna ricurinauchu, maspas shu ispara camba almara pasajta tucsingami.” 36 Shinallara chihui tiauca Ana, shu Diosmanda rimaj huarmi, Fanuelba ushushi, Aser aillumanda. Yapa ashca rucu aca. Pai huanra ashcamanda canzhis huata tupura paihua carihua causauca. 37 Chi huasha pusaj chunga chuscu huata tupura huaccha huarmi aca. Templo Diospa huasimanda mana llucshijchu aca, tutandi punzhandi Diosta sirvisha, sasisha, mañasha. 38 Cai huarmi chi ratullai shamusha Diosta agrásica. Cai huahuamanda tucui Jerusalembi tiau quishpinara chapajcunama rimaca. 39 Tucui Señorba ley shimii quillcashcara pactachishca huasha, Galileama tigranauca, paiguna quiquin Nazaret llactama. 40 Llullu huahua iñasha rica, shinzhi tucusha, ashca yachanahua iñaca. Diospa gracia ali shungu paihua tiaca. 41 Caran huatai Jesuspa yayauna Jerusalenma pascua istama rijcuna aca. 42 Huahua chunga ishqui huatayuj ashcai, pariju Jerusalenma sicanauca, istai paiguna yachaira rangaj. 43 Ista tucurishca huasha tigranauca, astaun huahua Jesús Jerusalembi saquirica. Yayauna pai saquirishcara mana yachanaucachu. 44 “Huahua amiguunahua shamunmi,” nisha iyasha, yayauna shu punzha tupura purinauca. Paita mascanauca ailluunahua, ricsishcaunahuas. 45 Huahuara mana tupasha, Jerusalenma tigranauca paita mascangaj. 46 Quinsa punzha pasashca huasha, huahuara templo huasii tupanauca, Moisés mandashca shimira yachachijcuna chaupi shungüi tiajta, paiguna rimashcara uyasha tapushas. 47 Tucui paita uyajcuna paihua itindinaras pai cutipashcaras uyasha manzharinauca. 48 Huahuara ricusha, yayauna manzharinauca. Paihua mama nica: “Churihua, ¿imarasha casna rashcangui ñucanchihua? Yayandi ñucandi llaquirisha canda mascashcanchi.” 49 Shinajpi huahua Jesús paigunara nica: “¿Imaraigu mascahuacanguichi? ¿Manzhu yachacanguichi ñuca Yaya ranaunai tianara?” 50 Randi paiguna huahua rimashcara mana intindinaucachu. 51 Huahua paigunahua irguca Nazaretma, Paigunara uyaca. Paihua mama tucui caigunara huacachica paihua shungüi. 52 Jesús iñauca yachanais, paihua aichais ali shunguhuas, Diospa ñaupajpi runauna ñaupajpis.
1 Tiberio César gubirnu chunga pichca huatara tiaushcai, Poncio Pilato gubirnadur aca Judea partii, Herodes atun apu aca Galilea partii, paihua uqui Felipe atun apu aca Iturea Traconite partiunai, Lisanias atun apu aca Abilinia partii. 2 Shinallara Anasndi Caifasndi sacerdote atun apuuna anauca. Chi huraspi, Diospa shimi shamuca Zacaríaspa churi Juanma, runa illaj partii. 3 Juan tucui Jordán muyujta tiaj partiunama shamuca: “Aripintirichi, bautisarichi,” nisha, “canguna uchauna perdonai tucungaj,” 4 imasna quillcashcasna Diosmanda rimaj Isaías quillcashca quillcai: “Runa illaj partii caparij shimi: ‘Señor purina ñambira alichichi,’ nisha, ‘paihua ñambiunara dirichuyachichi, 5 Tucui huaicu undachishca angami, tucui urcus tucui ichilla urcus urayanaungami; istu ñambiuna pambayachishca anaungami. 6 Tucui runa Diospa quishpichinara ricungami. ’ ” 7 Juan bautisaringaj llucshijcunama nica: “¡Machacuimanda mirajcuna! ¿pita cangunara yachachica shamuj piñarinamanda miticungaj? 8 Aripintirina tupu ranaunara raichi; ama callarichichu cangunapura rimangaj: ‘Abrahanmi ñucanchi yaya,’ nisha. Cangunara nini, cai rumiunamanda Dios churiunara atarichinara ushanmi Abrahambajta. 9 Maspas, cunallara yurauna sapii hachara ña churashcami. Tucui yura mana ali aparijta cuchusha, ninai shitashca anga.” 10 Shinajpi runauna: “¿Imara rashun?” ninauca. 11 Cutipasha Juan paigunara nica: “Maican runa ishqui churarinara charisha, illajcunama cuyachu; micunara charij runa shinallara rachu.” 12 Paihuajma shamunauca bautisaringaj gubirnu cullquira tandachijcuna: “Señor, ¿imara rashun?” ninauca. 13 Juan paigunara nica, “Ama yapajta cullquira mañaichichu mandashcara yalichisha.” 14 Shinallara suldaruuna paita tapunauca: “Ñucanchis, ¿imara rashun?” nisha. Juan nica: “Imaras ama dsas quichuichichu runaunamanda, ama llullasha rimaichichu, canguna ganashca cullquihua eushiyaichi.” 15 Tucui runauna chapausha, paiguna shungu ucui tapunauca: “¿Cai runa Cristochu anga, manzhu Cristo anga?” nisha. 16 Juan cutipasha, tucui runaunara nica: “Ñuca sirtu pacha cangunara yacui bautisauni, astaun shuj ñucamanda yali ushaj, ñucamanda yali valij shamun; mana valijchu ani paihua zapatus huascara pascangajllas. Paiga Santu Ispirituis ninais bautisangami. 17 Paihua huairachina maquii tian, paihua cutana pambara pichangami, paihua trigu muyura tandachingami huacachina huasii, cararaga sindichingami huiñaigama mana huañuna ninai.” 18 Cai camachishcaunahua ashca shu shimiunahuas Juan runaunara ali shimira yachachica. 19 Shinajpi Herodes atun apu, Juan paita camachishcaraigu Herodes paihua uqui Felipe huarmira apishcamanda, shinallara pai tucui manali rashcaunamanda, 20 tucui ñaupa manali rashcaunai yapachica, Juanda chunda cularbi ishcaca. 21 Imasna tucui runauna bautisarinauca, Jesuspas bautisashca aca; Diosta mañajpi ahua pacha pascarica. 22 Santu Ispíritu paihua ahuai irgumuca, aichayuj, urpisna. Ahua pachamanda shu shimi uyarica: “Can ñuca llaquishca Churimi angui,” nisha, “cambajpi cushiyani.” 23 Jesús camachingaj callariushcai quinsa chunga huata tupura charica, paita José churimi iyanauca, paiga Eli churi. 24 Pai Matatpa churi, Levi churi, Melqui churi, Jana churi, José churi. 25 Matatíaspa churi, Amospa churi, Nahum churi, Esli churi, Nagai churi, 26 Maatpa churi, Matatíaspa churi, Semei churi, José churi, Judá churi, 27 Joana churi, Resa churi, Zorobabel churi, Salatiel churi, Neri churi, 28 Melqui churi, Adi churi, Cosam churi, Elmodam churi, Er churi, 29 Josué churi, Eliezer churi, Jorim churi, Matat churi, 30 Levi churi, Simeón churi, Judá churi, José churi, Jonan churi, Eliaquim churi, 31 Melea churi, Mainán churi, Matata churi, Natán churi, 32 David churi, Isai churi, Obed churi, Boozpa churi, Salmon churi, Naason churi, 33 Aminadab churi, Aram churi, Esrom churi, Farespa churi, Judá churi, 34 Jacob churi, Isaac churi, Abraham churi, Taré churi, Nacor churi, 35 Serug churi, Ragau churi, Peleg churi, Heber churi, Sala churi, 36 Cainan churi, Arfaxad churi, Sem churi, Noé churi, Lamec churi, 37 Matusalén churi, Enoc churi, Jared churi, Mahalaleel churi, Cainán churi, 38 Enospa churi, Set churi, Adan churi, Diospa churi.
1 Jesús, Santu Ispirituhua undashca, Jordanmanda tigraca. Ispíritu pushashca aca runa illashca partima. 2 Chihui chuscu chunga punzha tupu tiaca. Supai apu paita tintaca. Imaras mana micucachu chi punzhaunai, chihuasha yarcachica. 3 Shinajpi supai apu paita nica: “Can Diospa Churi asha, cai rumira rimai, tanda tucuchu.” 4 Jesús paita cutipasha: “Quillcashca tianmi,” nica, “mana tandallahua runa causangachu, astaun tucui Dios rimashca shimiunahua.” 5 Supai apu paita shu atun urcu pundama pushaca, tucui mundui tiaj llactaunara dsaslla ricuchica. 6 Supai apu Jesusta nica: “Cai tucui ushaira canda cusha, tucui cai llactauna sumajta. Ñucama cushca aca, ñuca munashcama cuni. 7 Can tuama urmasha ñucara alabajpi, adurajpi, cai tucuira cushcangui.” 8 Jesús cutipasha paita nica: “Anzhuri ñucajmanda, Satanás; quillcashca tian: ‘Camba Señor Diosta aduranami angui, paillara sirvinami angui,’ ” 9 Paita pushaca Jerusalenma, templo huasi ahua pundai paita churaca. Paita nica: “Can Diospa Churi asha, allpama saltai. 10 Quillcashca tian: ‘Paihua angelgunara mandangami canda cuirangaj,’ supai apu nica. 11 Shinallara: ‘Paiguna maqui ahuai canda apinaungami camba chaqui rumii ama tacaringaj. ’ ” 12 Jesús cutipasha nica: “Rimashca tian, ‘Camba Señor Diosta ama tintanguichu. ’ ” 13 Tucui tintana tucurijpi, supai apu paimanda rica ansa unaigama. 14 Ispíritu ushanahua Jesús Galileama tigraca, paimanda rimashcauna uyarica tucui chi rayara tiaj partiunai. 15 Jesús yachachica judiuguna tandarina huasiunai. Tucui runa paita alabaca. 16 Jesús Nazaretma shamuca, pai iñashca llactama. Paihua yachaira, shu samana punzhai judiuguna tandarina huasii icuca, shayarica quillcara ricungaj. 17 Shu quillcara paita cunauca, Diosmanda rimaj Isaías quillcashcara; Jesús quillcara pascasha, casna quillcashcara tupaca: 18 “Señorba Ispíritu ñucahuami tian, imasna ñucara talishca ali shimira rimangaj tsuntsuunama; ñucara cachamuca turmindarij shunguyujcunara alichingaj; ishcariajcunara rimangaj liuriyachingaj, ñausaunara rimasha ricuuta rangaj; turmindariujcunara llushpichingaj; 19 Señor munashca huatara camachingaj.” 20 Jesús quillcara ishcasha, sirvijma cusha, tiarica. Tucui tandarina huasii tiajcuna paimalla ricunauca. 21 Paigunara rimangaj callarica: “Cuna punzha cai Quillcashca Shimi pactarishcami canguna ñaupajpi.” 22 Tucui paimanda alira rimanauca, riparanauca imasna Jesús ali shungu shimiunara rimashcara. Paiguna ninauca: “¿Manzhu cai José churi?” 23 Jesús paigunara nica: “Canguna ñucara ninguichi chari: Doctor, canllara aliyari. Ñucanchi uyashcanchi imasna ashca ali ranaunara rashcangui Caperaaumbi. Shinallara rai caibi, camba quiquin llactai.” 24 Maspas Jesús nica: “Mana ima Diosmanda rimaj paihua quiquin llactai chasqui tucunzhu. 25 Sirtu pacha cangunara nini, ashca huaccha huarmiuna tianauca Israelbi Elías causaushca punzhaunai, ima huras ahua pacha ishcarica quinsa huata sucta quilla tupura, chimanda atun yarcai tiaca intiru llactai. 26 Astaun Elías mana pimas chigunama cachashcachu aca, randi Sidon partii tiaj Sarepta llactama, shu chihui causaj huaccha huarmima. 27 Maspas, ashca ismushca llagayujcuna tianauca Israel llactai, Diosmanda rimaj Eliseo causaushca huraspi, randi chigunamanda mana pihuas alichi tucucachu, astaun shu Siriamanda Naaman runalla.” 28 Shinajpi caita uyasha, ashcara piñarinauca tucui tandarina huasii tiajcuna. 29 Atarisha, Jesusta ichunauca llactamanda canzhama; paita pushanauca urcu pundama, huaicuma shitangaj nisha. Chi urcu pundai Nazaret llacta tiaca. 30 Astaumbas Jesús paiguna chaupi shungura pasasha, rica. 31 Jesús irguca Galileai tiaj Capernaum llactama. Paigunara yachachica samana punzhaunai. 32 Runauna pai yachachishcara uyasha manzharinauca, ushaihua yachachishcaraigu. 33 Tandarina huasii shu irus supai icushca runa tiauca. Chi runa shinzhira caparica: 34 “Saquihuai ñucanchira,” nica. “¿Imarara munangui ñucanchihua, Nazaretmanda Jesús? ¿Shamushcanguichu ñucanchira tucuchingaj? Canda ricsini pi ashcaras. Diospa Santu Churimi angui.” 35 Jesús supaira piñaca, “Upalla, llucshi paimanda.” Shinajpi supai runara urmachisha paiguna chaupi shungüi, paimanda llucshica, chi runara mana huajlichisha. 36 Tucui manzharisha tianauca, paigunapura rimanausha: “¿Ima shimirai cai?” nisha ninauca, “Ushaihua irus supaigunara llucchisha cachan.” 37 Jesuspa shuti uyarica tucui chi parti llactaunai. 38 Jesús atarisha llucshica tandarina huasimanda, Simomba huasii icuca. Simomba huarmi mama ashca calinturahua siriuca; paita ruganauca: “Huarmira alichipai,” nisha, 39 Jesús huarmi rayai shayarisha calinturara piñaca. Calintura chiriaca. Huarmi dsaslla atarisha paigunara sirvica. 40 Indi icushcai, tucui ungushcaunara charijcuna, ima tunu ungüihuas ungushcaunara pushamunauca Jesuspajma. Paiga paihua maquira caran duiñu ahuai churasha, paigunara alichica. 41 Shinallara ashcaunamanda supaiguna caparisha llucshinauca, casna nisha: “Can Diospa Churimi angui.” Astaumbas Jesús paigunara piñasha, lugarda mana cucachu rimangaj, paiguna Jesús Cristo ajta ricsishcamanda. 42 Ña punzhayajpi Jesús llucshica, shu runa illashca partima rica. Runauna paita mascanauca, tupai risha paita arcasha ninauca: “Ama richu ñucanchijmanda.” 43 Astaun Jesús paigunara nica: “Ñuca shu llactaunama ringaj ministirin, Dios mandana pacha ali shimira paigunara rimangaj. Chihuaj cachamushca acani.” 44 Jesús Galilea partii tandarina huasiunai yachachicami.
1 Jesús Gensaret yacu cucha rayai tiaushcai, ashca runauna paihuajma taucarimunauca Diospa shimira uyangaj. 2 Ishqui canuara ricuca pulaya mayambi. Aichahuara apijcuna canuamanda llucshisha, licaunara maillarinauca. 3 Jesús shu chiguna canuai icuca, Simomba canua aca. Simonda mañaca: “Ansa caruyachi pulayamanda.” Shina rajpi Jesús tiarisha mnaunara yachachica canuamanda. 4 Rimashca huasha, Jesús Simonda: “Canuara apai,” nica, “chaupi lamarma licaunara shitangaj, aichahuara apingaj.” 5 Simon paita cutipasha, nica: “Yachachij, tuta pagarijta licashcanchi, imaras mana apishcanchichu; shina ajllaira, can rimairaigu, licara shitasha.” 6 Shina rasha, aichahuara apinauca ashcara, lica liquirijta. 7 Chishu canuai tiajcunara cayanauca, “Shamichi,” nisha, “yanapangaj.” Shamunaucami, ishqui canuara undachinaucami ñaca ñaca pambarijta. 8 Simon Pedro caita ricusha, Jesuspa ñaupajpi cungurisha: “Anzhuri,” nica, “ñucamanda, Señor. Uchayuj runami ani.” 9 Pedro manzharica, paihua pariju tiajcunandi, paiguna ashca aichahuara apishcaraigumanda. 10 Shinallara tucuca Jacobohuas Juanhuas, Zebedeo churiuna, Simonda cumpañajcuna. Jesús Simonda nica: “Ama manzharichu, cunamanda ñaupajma runaunara licaj angaraungui. ” 11 Canuauna allpama llutarijpi, cai runauna tucuira saquisha, Jesusta catinauca. 12 Jesús shu llactai tiaushcai, shu ashca llagayuj runa shamuca. Pai Jesusta ricusha, tuama urmaca paihua ñaupajpi. Jesusta rugaca: “Señor, can munasha ñucara alichinara ushangui.” 13 Shinajpi Jesús maquira chutasha paita llangaca: “Munanimi, alichishca angui,” nisha. Dsaslla llaga ungüi paimanda llucshica. 14 Jesús paita mandaca: “Pitas ama rimaichu, astaun sacerdotema ricuchijri. Moisés mandashcara cui canda pichangaj, can aliyashcara ricuchingaj paigunama.” 15 Shina ajllaira Jesusmanda mas mas uyarica. Ashca runauna shamunauca paita uyangaj, alichi tucungaj paiguna ungüigunamanda. 16 Astaun, Jesús anzhurica runa illashca partiunama, chihui Diosta mañaca. 17 Shu punzha Jesús yachachiuca. Fariseoguna Moisés mandashca shimira yachachijcunas chihui tianauca. Paiguna tucui Galilea parti llactaunamanda shamunaushca aca, Judea partimandas, Jerusalenmandas. Diospa ushai paihua tiauca ungushcaunara alichingaj. 18 Runauna shu suchu runara pushamunauca, caitui sirijta. Paita huasii icuchingaj mascanauca, Jesuspa ñaupajpi churangaj. 19 Ashca runauna taucarimushcamanda, maimandas runara icuchingaj mana tupanaucachu. Chiraigumanda huasi ahuara sicanauca, huasi pangara pascasha runara irguchinauca runauna chaupi shungüi, Jesuspa ñaupajpi. 20 Jesús chi runauna quirishcara ricusha, suchu runara nica: “Can ucharashcaunara perdonashcangui.” 21 Shinajpi yachaira yachachijcuna fariseogunandi piñangaj callarinauca: “¿Pitangai cai runa casna irusta rimaj? ¿Pita uchara perdonanara ushangairi mana Dios asha?” 22 Jesús paiguna iyarishcara riparasha cutipaca: “¿Imara iyariunguichiri canguna shungu ucui? 23 ¿Imara mas rimaihuaj: ‘Can ucharashcara perdonashcangui,’ nina, o mana ajpiga, ‘Atari, puri,’ ningaj? 24 Astaun canguna yachangaj imasna ñuca, Runa Churi, ushaira charini cai pachai uchara perdonangaj,” suchu runara nin: “Canda nini, atari, caitura apai, camba huasima ri.” 25 Chi ratullaira runa paiguna ñaupajpi atarisha, pai sirishca caitura apasha, rica paihua huasima, Diosta alabasha. 26 Tucui manzharinauca, Diosta alabasha. Ashcara manzhanauca: “Shu munanaita rashcara ricushcanchi cuna punzha,” ninauca. 27 Caimanda huasha, Jesús llucshisha ricuca shu gubirnu cullquira tandachij runara, paihua shuti Levi. Cullquira tandachina huasii tiaca. Jesús paita nica: “Catihuai.” 28 Levi tucuira saquisha, atarisha, Jesusta catica. 29 Levi atun istara rarca paihua huasii. Ashca cullquira tandachijcunandi shu amiguunandi micuna mesai tianauca. 30 Yachaira yachachijcuna fariseogunandi Jesús yachachishca runaunara piñanauca: “¿Imarasha micunguichi cullquira tandachijcunahua uchayujcunahuas?” ninauca. 31 Jesús cutipasha paigunara nica: “Aliuna doctorda mana ministinaunzhu, astaun ungushcauna ministinaun. 32 Mana shamucanichu ali causajcunara cayangaj, astaumbas uchayujcunara aripintinama cayangaj.” 33 Paiguna Jesústa ninauca: “¿Imarasha Juan yachachishca runauna caran ratu sasinaun, Diosta mañanaun; shinallara ranaun fariseo yachachishca runaunas, astaun can yachachishca runauna micunaun upinaun?” 34 Jesús paigunara nica: “¿Ushanguichu burai tiau amiguunara sasichingaj cari tiaullaira? 35 Randi carira paigunamanda quichuna punzhauna shamunaunga. Chi punzhaunai sasinaungami.” 36 Jesús shinallara paigunara shu yachachina cuintanara cuintaca: “Mana pihuas mushuj churarinamanda shu pitira pitinzhu rucu churarinara rimindangaj; shina rajpiga, mushuj churarina liquiringa, maspas mushuj churarinamanda piti mana ali ricuringachu rucu churarinahua. 37 Pihuas mushuj vinura mana churanzhu rucu puruunai, shina rajpiga mushuj vinu purura lliquin, vinu talirin, puruuna pirdirinaun. 38 Astaumbas, mushuj vinu mushuj puruunai churana anga, shina rajpi vinundi puruunandi duranaunga. 39 Pi runas rucu vinura upishca huasha mushujta mana munanga. ‘Rucu vinu astaun alimi,’ ninga.”
1 Jesús shu tarpushca chagrara pasaushcai, shu samana punzha, pai yachachishca runauna trigu papajta aisasha micunauca, muyura maquii cacusha. 2 Huaquin fariseoguna paigunara ninauca: “¿Imaraigu mana raihuajta raunguichi samana punzhai?” 3 Cutipasha Jesús paigunara nica: “¿Manzhu Quillcashcai ricushcanguichi imara rarca David pai yarcachishca huras paihua cumpañajcunandi? 4 Manzhu ricushcanguichi imasna Diospa huasii icusha, ricuchina tandara apisha micuca, paihuas paita cumpañajcunandi? Chi tandara micunara mana raihuajchu aca pihuas. Sacerdoteunalla micunara ushanauca.” 5 Jesús paigunara nica: “Ñuca, Runa Churi, shinallara samana punzhahua duiñumi ani.” 6 Shinallara shu samana punzhai Jesús tandarina huasii icusha yachachiuca. Chihui shu runa tiauca paihua ali maqui chaquirishca. 7 Yachaira yachachijcuna fariseogunandi Jesusta chapanauca, “¿Chi runara samana punzhai alichingachu imara?” nisha, imaras tupangaj Jesusta cauźayachingaj. 8 Jesús paiguna iyarishcara yachaca, shina ajllaira chaquirishca maquiyujta nica: “Atari, chaupi shungüi shayari.” Runa atarisha shayarica. 9 Shinajpi Jesús paigunara nica: “Cangunara tapuni, ¿Raihuajchu samana punzhai aliranara, manaliranara? ¿Raihuajchu causaira huacachina, causaira quichuna?” 10 Jesús tucui muyujta tiajcunara ricusha, runara nica: “Maquira chutai.” Runa shina rarca. Paihua maqui aliyashca tucuca. 11 Fariseoguna ashcara piñarinauca, paigunapura rimananauca: “¿Imara ranangai Jesushua?” 12 Chi punzhaunai Jesús urcuma rica mañangaj. Tuta pagarijta Diosta mañaca. 13 Punzhayajpi Jesús pai yachachishca runaunara cayasha, paigunamanda chunga ishquira ajllaca; chigunara shinallara apóstol nishca cachashcauna shutichica. 14 Caigunami anauca: Simón, Pedro nishca aca, paihua uqui Andresndi, Jacobo Juandi, Felipe Bartolomendi, 15 Mateo, Tomás, Alfeo churi Jacobo, Zelote nishca Simón, 16 Jacobo uqui Judas, shinallara Judas Iscariote, Jesusta intrigaj. 17 Jesús paigunahua irguca, shu pambai chapasha tiauca pai yachachishca runaunahua. Ashca runauna Judeamanda, Jerusalenmandas, Tiro Sidon lamar pata partiunamandas shamunauca Jesusta uyangaj, paiguna ungüigunamanda alichi tucungaj. 18 Shinallara irus supaiguna turmindachishcauna shamunauca. Alichi tucunauca. 19 Tucui runauna Jesusta llangangaj munanauca. Ushai paimanda llucshica tucui runaunara alichingaj. 20 Jesús paihua ñahuira atarichisha, pai yachachishca runaunara ricusha, paigunara rimaca: “Cushiuna anguichi canguna pugriuna. Cangunajmi Dios mandana pacha. 21 Cushiuna anguichi cuna huras yarcachijcuna, sacsachishca anguichimi. Cushiuna anguichi cuna huras huacajcuna, asinguichimi. 22 Cushiuna anguichi runauna cangunara chijnijpi, cangunara chicanyachijpi paigunamanda, cangunara piñanaupi ñucara, Runa Churira, llaquishcaraigu. 23 Cushiyaichi chi punzhai, cushi tucuichi. Cangunara pagana atunmi ahua pachai. Shina ranauca canguna yayauna Diosmanda rimajcunahua. 24 Maspas, ¡Ayailla, charijcuna! canguna cushira cunallami charinguichi. 25 ¡Ayailla, sacsashcauna! Yarcachinguichimi. ¡Ayailla, cuna huras asijcuna! Llaquiringuichimi, huacanguichimi. 26 ¡Ayailla canguna, runauna cangunamanda alira rimanaupi! Shina ranauca canguna yayauna llulla rimajcunahua” 27 “Cangunara ñucara uyajcunara nini: Llaquichi cangunahua cuntraunara, alira raichi cangunara chijnijcunara. 28 Bindisiaichi cangunara maldisiajcunara, shinallara Diosta mañaichi cangunamanda llullasha manali rimajcunamanda. 29 Pi runas camba mujluspi sajmajpi, chishu mujlusta ricuchi. Pi runas camba sacura quichujpi, ama mitsaichu camba caparas. 30 Maican mañajpi, cui. Maican runa cambajta quichujpi, ama cuti mañaichu, ‘Cutichihuai,’ nisha. 31 Imasnara munanguichi runauna cangunahua ranauchu, shinallara paigunahua raichi canguna. 32 Cangunara llaquijcunara llaquijpi, ¿imajta valin? Shinallara uchayujcuna paigunara llaquijcunara llaquinaun. 33 Canguna alira rajpi alira rajcunallara, ¿imajta valin? Uchayujcuna shinallara ranaun. 34 Canguna imaras mañachijpi, huasha paigunamanda apingaj chapausha, ¿imajta valin? Shinallara uchayujcuna uchayujcunama mañachinaun chi tupura yapashcara cuti apingaj. 35 Shinajpi cangunara chijnijcunara llaquichi, alira raichi, mañachichi, imaras mana cuti chapausha; canguna pagana atunmi anga. Ahuai tiaj Diospa churiuna anguichi. Paiga ali shungumi mana agrasijcunahua, manaliunahuas. 36 Cangunaga ali llaquijcuna aichi, imasna camba Yaya ali llaquijmi. 37 ”Ama taripaichichu, mana taripashca anguichi. Ama cauźayachichu, mana cauźayachishca anguichi. Perdonaichi, perdonashca anguichi. 38 Cuichi, cangunama cui tucunguichimi, ali tupura, nitishcara, undajta, talirijta, canguna maquii. Imasna tupunguichi shinallara tupui tucunguichimi” 39 Jesús paigunara shu yachachina cuintanara cuintaca: “¿Ushangachu shu ñausa runa shu ñausara pushangaj? ¿Manzhu ishquindi uctui urmanaunga? 40 Yachachishca runa mana yalinzhu paita yachachijta, astaun maicans ali yachachishca asha, paita yachachij cuinta tucunga. 41 “¿Imarasha camba uqui ñahuii tiau pulvuhuara ricungui, astaun camba quiquin ñahuii tiau caspira mana ricunguiri? 42 ¿Imasnara ningui camba uquira: ‘Uyai, ñuca camba ñahuimanda pulvuhuara llucchisha,’ can camba ñahuii tiaj caspira mana ricusha? ¡lshqui shimiyuj! Ñaupa punda ichui caspira camba quiquin ñahuimanda, chi huasha alimi ricungui pulvuhuara camba uqui ñahuimanda llucchingaj. 43 “Manali yura manali muyura aparin, ali yura ali muyura aparin. 44 Caran yura pai aparishca muyumanda ricsinallami. Higu muyura mana pallanaunzhu quilambu cashamanda, shinallara uvillasta mana apinaunzhu chispu yuramanda. 45 Ali runa paihua shungüi huacachishca ali iyaimanda alira llucchin, astaun manali runa paihua shungüi manali ajpi manalira llucchin. Shungüi yalijta undashcamanda shimi riman. 46 “¿Imarasha ñucara: Señor, Señor, nisha, rimahuanguichi, ñuca mandashcara mana rashallara? 47 Tucui ñucama shamuj runa, ñuca shimira uyaj, ñuca shimira pactachij, cangunara ricuchisha imasna ricurij ajta. 48 Pai shu huasira raj runasna: uctusha, ucura uctuca, huasi istandira shayachica shinzhi piñaspi. Yacu undasha huasira nitica; randi mana ushacachu urmachingaj, huasira rumii shayachishcaraigu. 49 Astaun, shu runa ñuca shimira uyashallara, mana pactachisha, casnami: Shu runa paihua huasira allpallai shayachica. Yacu tujyajpi huasi urmaca. Chi huasi urmasha llambu tucurica.”
1 Tucuira rimai pasashca huasha paita uyajcunara, Jesús icuca Capernaumbi. 2 Shu capitamba sirvij runa huañunalla ungushca aca, Capitán paita yapa llaquica. 3 Capitán Jesuspa shutira rimashcara uyasha, judiugunamanda rucuunara paihuajma cachaca rugangaj: “Shamupai,” nisha, “ñucara sirvijta alichingaj.” 4 Paiguna Jesuspajma shamusha, paita ashcara ruganauca: “Cai capitán valinmi,” nisha, “caita rangaj. 5 Pai ñucanchi llactara llaquin, shinallara ñucanchijta shu tandarina huasira shayachica.” 6 Jesús paigunahua cumpañasha rica. Jesús paihua huasi mayambi pactaupi, capitán amiguunara cachaca Jesusta rimangaj: “Señor,” nisha, “ama mulistarichu, mana valijchu ani can ñuca huasii icungaj. 7 Chiraigumanda ñucallara mana shamushcanichu canhua rimangaj, mana valijchu ani. Astaun, rimailla, ñucara sirvij aliyangami. 8 Ñuca mandashca runa ani, shinallara ñucahua suldaruunara charini mandangaj. Shujta, ‘Ri,’ nijpi, pai rinmi. Shujta, ‘Shami,’ nijpi, paimi shamun. Ñuca sirvijta: ‘Caita rai,’ nijpi, chita ran.” 9 Jesús caita uyasha: “Yapa alimi,” nica. Vultiarisha, Jesús paita catijcunama nica: “Cangunara nini, Israelbis casna quirinara mana tupashcanichu.” 10 Capitán cachashca runauna huasima tigrasha, chi ñaupa ungushca sirvij runa aliyashcara tupanaucami. 11 Chi huasha, Jesús shu Nain nishca llactama rica, pai yachachishca runaunahua pariju, ashca shu runaunandi. 12 Llacta pungu mayambi pactaushcai, shu huañushca runara canzhama llucchinauca pambangaj. Cai runa shujlla churi aca, mamaga huaccha huarmi aca. Paihua pariju ashca runauna cumpañanauca llactamanda. 13 Señor huarmira ricusha llaquirica, paita rimaca: “Ama huacaichu,” nisha. 14 Jesús llutarisha, aya cajunda llangaca. Huanduujcuna shayarinauca. Jesús ayara nica: “Malta, atari, nini.” 15 Huañushca runa atarisha, rimangaj callarica. Jesús paita paihua mamama cuca. 16 Tucui runauna manzharinauca. Diosta alabanauca, casna nisha: “Shu atun Diosmanda rimaj llucshishcami ñucanchi chaupi shungüi. Dios paihua runaunara ricushcami.” 17 Jesuspa shuti uyarica tucui Judea partii, tucui muyujta tiaj partiunais. 18 Juan yachachishca runauna tucui cai rashcaunara paita cuintanauca. Juan ishqui pai yachachishca runaunara cayaca, 19 paigunara Jesuspajma cachaca tapungaj: “¿Canzhu shamuna aj runa angui, manasha shujtachu chapana anchi?” 20 Runauna Jesusma shamusha paita ninauca: “Bautisaj Juan ñucanchira cachamuca cambajma, canda tapungaj: ‘¿Canzhu shamuna aj runa angui, manasha shujtachu chapana anchi?’ ” 21 Chi ratullaira Jesús ashcaunara paiguna ungüimandas, nanaigunamandas, irus supaigunamandas alichicami, ashca ñausaunara ricujta rarca. 22 Jesús paigunara cutipasha nica: “Richi, canguna ricushcara uyashcaras Juanda cuintaichi: ñausauna ricunaunmi, anga changauna purinaunmi, llagayujcuna alichishcami, upa rinriyujcuna uyanaunmi, huañushcauna causachishcami anaun, maspas pugriunama evangelio ali shimira rimashcami. 23 Cushi shunguyujmi maican runa mana nijtarisha ñucahua.” 24 Juan cachamushca runauna rishca huasha, Jesús runaunara rimangaj callarica Juanmanda: “¿Imara ricungaj llucshicanguichi runa illaj partima? ¿Shu huaira cuyuchishca quihuara ricungajchu ricanguichi? 25 Astaumbas, ¿imara ricungaj llucshicanguichi? ¿Shu gustu churarinara churarishca runara? Gustu valij churarinara churarishcauna, charij cuinta causajcuna, rey apu atun huasiunai tianaun. 26 Cutillara cangunara nini: ¿Imara ricungaj llucshicanguichi? ¿Shu Diosmanda rimajta? Sirtu nini, astaun shu rimajmanda yalira. 27 Cai runamanda quillcashca tian: ‘Ñuca rimaj runa camba ñahui ñaupajpi cachauni. Pai camba ñambira camba ñaupajpi alichingami. ’ 28 Cangunara nini, huarmiuna pagarichishcaunamanda, Bautisaj Juanmanda shu yali rimaj illan. Shina ajllaira Dios mandana pachai yali ichilla runa Juanmanda yalimi.” 29 Tucui runauna, gubirnu cullquira tandachijcunandi Jesús rimashcara uyasha, “Dios alira rashcami,” nisha ninauca, shinallara bautisarinauca Juan rashca bautisanahua. 30 Astaumbas fariseoguna, ley shimira camachijcunas Diospa shimii paigunamanda rimashcara ichunauca, Juanmanda mana bautisashca anauca. 31 Señor nica: “¿Imahuara cuna causaj runaunara ricuchisha? ¿Imasnara anaun? 32 Cai runauna pujllaj huahuauna cuintami. Huahuauna pulasai tiarisha paigunapura caparinanaun: ‘Llautaunara cangunajta tucacanchi, astaun canguna mana bailacanguichichu; cangunajta huacacanchi astaumbas canguna mana huacacanguichichu. 33 Bautisaj Juan shamuca, tandara mana micuj, vinuras mana upij; canguna nicanguichi: ‘Supaira charin,’ 34 Randi Runa Churi micujs upijs shamuca, cangunaga: ‘Caiga micuisiqui, vinuras upisiqui,’ nisha nicanguichi, ‘cullquira tandachijcunahua amigu, uchayujcunahua amigu. ’ 35 Randi, Yachana ‘Ali’ nishcami tucui paihua churiunamanda.” 36 Shu fariseo runa Jesusta cunviraca paihua pariju micungaj. Fariseo huasii icusha, mesai tiarica. 37 Shu uchasapa huarmi tiauca llactai. Chi huarmi, Jesús fariseo huasii micuushcara uyasha, gustu asnaj ambira undachishca alabastro rumi purura apamuca. 38 Jesuspa huashai shayarisha, paihua chaqui rayai huacasha tiauca. Pai huacashca iquihua Jesuspa chaquira ucuchica, paihua acchahua chaquira chaquichica, maspas Jesuspa chaquira muchaca, ambira talica chaquii. 39 Jesusta cunviraj fariseo runa cai tucuira ricusha, paihua shungüi nica: “Cai runa Diosmanda rimaj asha ricsinmami ima sami cai huarmi ajtas, cai paita llangaj huarmi uchasapa ajtas.” 40 Shinajpi Jesús cutipasha: “Simón,” nica, “shu shimira charini canda rimangaj.” Simón, “Rimailla, Señor” cutipaca. 41 Jesús nica: “Shu dibiyachij runa ishqui dibiyujcunara charica, shuj pichca patsaj cullquira dibica, chi shuj pichca chungallara. 42 Chi ishqui imaras mana charinaucachu pagangaj, duiñuga ishquindira perdonaca. Rimahuai, cai ishquimanda, ¿maicanda paita mas llaquingairi?” 43 Simón cutipasha nica: “Ñuca iyarini yali dibiyuj runa mas llaquinga.” Jesús paita: “Sirtu,” nica, “alira iyashcangui.” 44 Shinajpi Jesús huarmima vultiarisha, Simonda rimasha: “¿Cai huarmira ricunguichu?” nica, “Ñuca camba huasii icucani. Can yacura mana cuhuacanguichu chaquira maillangaj, astaun cai huarmi paihua iquihua ñuca chaquira maillahuashcami, paihua acchahua chaquichihuashcami. 45 Can mana ñucara muchacanguichu, astaun cai huarmi pai icushca ratumanda pacha ñuca chaquira muchanara mana saquishcachu. 46 Can ñuca umai asitira mana talicanguichu, astaun cai huarmi gustu asnaj ambira talicami ñuca chaquii. 47 Chiraigumanda canda nini, pai ucharashcauna ashca ajllaira, tucuira perdonashcami, huarmi ashcara llaquihuashcamanda. Astaumbas maicans ansalla perdonashca asha, ansallara llaquin.” 48 Jesús huarmira nica: “Can ucharashcaunara perdonashcami.” 49 Shinajpi mesai tiajcuna paigunapura rimangaj callarinauca: “¿Pitangai caiga uchaunara perdonangaj?” 50 Jesús huarmira nica: “Can quirishca canda quishpichishcami. Cushihua ri.”
1 Chi huasha, Jesús puriuca tucui llactaunama, tucui ichilla llactaunamas, Dios mandana pacha evangelio ali shimira rimasha. Paihua chunga ishqui runauna paihua pariju anauca. 2 Shinallara paihua pariju tianauca huaquin huarmiuna, irus supaigunamanda ungüigunamandas Jesús ñaupa huras alichishcauna. Magdalena nishca Marías, paimanda canzhis supaigunara llucchishcas, chihui tiauca, 3 shinallara Juana, Chuza huarmi, cai Chuza Herodespa huasicama aca, shinallara Susana, ashca shu huarmiunandi. Caiguna Jesusta yanapanauca paiguna cullquihua. 4 Ashca runauna caran llactamanda Jesusma shamunauca, Jesús shu yachachina cuintanara cuintasha, nica: 5 Shu tarpuj runa llucshica paihua muyura tarpungaj. Tarpujllaira, huaquin muyuuna ñambi rayai urmanauca, aitai tucunauca, pishcuuna muyuunara micunauca. 6 Huaquin muyuuna rumi ahuai urmanauca. Iñasha chaquirinauca, yacu illashcamanda. 7 Huaquin muyuuna casha ucui urmanauca; cashauna pariju iñasha, itayasha huañuchinauca. 8 Shu muyuuna ali allpai urmanauca. Iñasha, caran muyu shu patsaj muyura aparica. ” Jesús cai shimira cuintasha, caparisha rimaca: “Uyaj rinriyuj uyachu.” 9 Jesús yachachishca runauna paita tapunauca: “¿Imara nin cai cuintashca shimi?” 10 Jesús paigunara nica: “Cangunama cushcami Dios mandana pacha pacashca shimira intindingaj, astaun shujcunama yachachina cuintanahua rimashca aca, ricusha ama ricsingaj, uyasha ama intindingaj. 11 Caimi chi yachachina cuintana: Tarpushca muyu Diospa shimimi. 12 Ñambi rayai urmajcuna uyanauca, astaumbas supai apu shamusha, shimira quichun paiguna shungumanda, paiguna ama quirinauchu quishpingaj. 13 Rumi ahuai urmajcuna uyashca huasha cushihua shimira chasquinaun, astaumbas sapi illajcuna asha shu ratulla quirinaun, tintashca ratui anzhurinaun. 14 Casha ucui urmajcuna, uyashallara cai causana turmindachishcaunahua, charishcaunahuas, cai causana gustashcaunahuas itayasha mana aparinaun. 15 Astaun, ali allpai urmajcuna ali dirichu shunguhua uyashca shimira huacachinaun, aparisha catinaun.” 16 ”Pi runas vilara apichisha, purui mana tapan, caitu ucui mana churan. Astaun mantacai churan icujcuna vilara ricungaj. 17 Tucui ima pacashcaras ricuchishca anga, tucui ima quillpashcaras ricsichishca anga, punzhama shamungami. 18 Shinasha cuiraichi imasna uyanguichi. Charij runama cushca anga; mana charij runaraga, pai, ‘Charinimi,’ nisha iyaushcara quichushca anga.” 19 Jesuspa mama paihua uquiunandi shamunauca paihuajma. Pactanara mana ushanaucachu, ashca runauna taucariashcamanda. 20 Runauna paita ninauca: “Camba mama, camba uquiuna canzhai tianaun, canda ricunara munanaun.” 21 Shinajpi Jesús cutipasha paigunara nica: “Ñuca mama, ñuca uquiuna Diospa shimira uyasha pactachijcunami anaun.” 22 Shu punzha Jesús canuai icuca pai yachachishca runaunahua. Paigunara nica: “Yacu chimbama rishunchi.” Shina nijpi rinaucami. 23 Paiguna riupi, Jesús puñuriaica. Shu shinzhi huaira atarica yacu cuchai. Canua yacuhua undarisha pambaringarauca, paiguna huañunga rarianauca. 24 Jesusma shamusha, paita llicchachinauca “Señor, Señor,” nisha, “huañuunchimi.” Jesús lliccharisha, huairaras tsajlastas piñaca, tucui chunlla tucunauca. 25 Jesús runaunara nica: “¿Maibirai canguna quirina?” Chucchusha manzharinauca; paigunapura rimananauca: “¿Pitangai cai runa? Huairaunara yacuunaras mandan, paiguna caźunaun.” 26 Paiguna Gadarenos runauna llactama rinauca, Galilea lamar chimbai. 27 Jesús allpai pactajpi, paita tupangaj shu supai icushca runa llactamanda shamuca. Unaimanda supai icushca aca. Llatan aca, mana huasii causaj aca, astaun aya pambashcaunai causaca. 28 Cai runa Jesusta ricusha, shinzhira caparisha paihua ñaupajpi tuama urmaca. Shinzhi shimihua caparisha: “Atun Diospa Churi,” nica, “¿imara munangui ñucahua? Canda rugauni ama turmindachihuaichu.” 29 Jesús irus supaira mandaca runamanda llucshingaj. Unaimanda supai paita icushca aca, runara cadena huascahua huatanauca. Shinajpi supai huascara pitisha paita cachaca runa illashca partiunama. 30 Jesús paita tapuca: “¿Ima shutira angui?” nisha. Supai cutipasha: “Huaranga anchi,” nica, ashca supaiguna paihuajpi icushcamanda. 31 Supaiguna Jesusta ruganauca paigunara ama ucu pachama cachangaj. 32 Chi mayambi ashca cuchi tianauca, urcui micusha. Supaiguna paita ruganauca: “Lugarda cuhuai,” nisha, “cuchiunai icungaj.” Lugarda cuca, 33 Supaiguna runamanda llucshisha cuchiunai icunauca. Cuchiuna piñasmanda saltasha, yacui urmasha huañunauca. 34 Cuirajcuna shina tucushcara ricusha miticunauca. Risha, cuintanauca llactais, llacta mayandas. 35 Runauna llucshinauca chi tucushcaunara yachangaj. Jesusma shamunauca, supai icushca runara alichishcara tupanauca, churarishcara, ali iyaiyujta, Jesuspa chaquii tiajta. Ricusha manzharinauca. 36 Ricujcuna cuintanauca imasna supai icushca runara quishpichishca aca. 37 Shinajpi tucui Gadara runauna, tucui muyujta causajcunandi, Jesusta ruganauca, “Ripai,” nisha, paiguna ashca manzhashcaraigumanda. Jesús canuai icusha tigraca. 38 Supai icushcamanda alichishca runa Jesusta rugaca paihua pariju tiangaj, astaumbas Jesús paita dispirica, casna nisha: 39 “Tigrai,” nica, “camba huasima. Cuintairi imasna Dios canda rashcara.” Runa ricami, tucui llactai Jesús paihua sumaj rashcara cuintasha. 40 Jesús tigrajpi, runauna paita cushihua apinauca. Tucui runauna paita chapanauca. 41 Shinajpi shu Jairo nishca runa, tandarina huasii mandaj apu, shamuca. Jesuspa chaquii tuama urmasha, paita: “Shamupai ñuca huasima,” nisha rugaca. 42 Shu sapalla ushushihuara charica, chunga ishqui huatayujta, huañunalla siriuca. Jesús riushcai ashca runauna paita nitirimunauca. 43 Shu ungushca huarmi tiauca, paita yahuar ricurisha mana saquirica, ña chunga ishqui huatara. Tucui paihua cullquira gastaca doctorgunahua. Pihuas paita alichinara mana ushacachu. 44 Cai huarmi Jesuspa huashamanda shamusha, paihua churarina pundara llangaca. Cungaimanda paihua yahuar saquirica. 45 Shinajpi Jesús nica: “¿Pita ñucara llangahuacai?” Tucui runa, “Mana ñucachu ani,” ninauca. Pedro nica, paihua cumpañajcunandi, “Señor, ashca runauna canda nitimurianaun, canda tangamurianaun, ¿Imarasha ningui: ‘Pita ñucara llangahuacai?’ ” 46 Jesús nica: “Pi chari llangahuaca, ñucamanda ushai llucshishcara riparacani. ” 47 Huarmi, pai mana pacashcara ricusha, chucchusha Jesuspa ñaupajpi tuama urmaj shamuca, tucui runauna ñaupajpi imamanda Jesusta llangashcara cuintaca, shinallara imasna dsas aliyashca aca. 48 Jesús paita nica: “Ushushi, can quirishca canda quishpichishcami. Cushihua ri.” 49 Jesús chara rimaushcallaira, tandarina huasi apujmanda shu sirvij runa shamuca, apura rimaca: “Camba ushushi ali huañuira huañuca, ama mas mulistaichu Yachachijta.” 50 Jesús caita uyasha cutipaca: “Ama manzhaichu, quirilla, huahua aliyangami.” 51 Jesús huasii icusha, mana pitas lugarda cuca paihua pariju icungaj. Pedrora, Jacobora, Juanda, huahuayuj yayara, mamara, chigunallara lugarda cuca icungaj. 52 Tucui chihui tiajcuna huacanauca, caparinauca huahuamanda. Jesús paigunara: “Ama huacaichichu,” nica, “huahua mana huañushcachu, puñunllami.” 53 Tiajcuna Jesusta burlanauca, huahua ali huañushcara yachasha. 54 Astaumbas Jesús huahuara maquimanda apisha, caparisha: “Ushushi, atari,” nica. 55 Shinajpi, paihua ispíritu tigramuca, chi ratullai huahua shayarica. Jesús: “Micunara caraichi,” nica. 56 Yayauna manzharinauca. Jesús paigunara: “Pitas ama rimaichichu,” nica, “cai rashcara.”
1 Jesús pai chunga ishqui yachachishca runaunara tandachisha, paigunara ursaras ushairas cuca tucui supaigunara ichungaj, ungüigunaras alichingaj. 2 Dios mandana pacha shimira rimangaj paigunara cachaca, shinallara ungushcaunara alichingaj. 3 Jesús paigunara nica: “Imaras ama apaichichu puringaj, ima taunaras, ima bulsaras, ima tandaras, ima cullquiras, shinallara ishqui churarinaras ama apaichichu. 4 Maican huasiis icusha, chihui tiaichi, chimanda llucshichi. 5 Maicambas cangunara mana chasquinaupi, canguna chi llactamanda llucshisha, chaquimanda pulvura chausichi, paiguna manali rashcara ricuchingaj.” 6 Yachachishca runauna llucshisha, tucui ichilla llactaunama purinauca, evangelio shimira rimasha, ungushcaunaras alichisha, tucui partiunai. 7 Rey apu Herodes Jesús tucui rashcaunara uyaca. “¿Imarai?” nica. Huaquinguna ninauca: “Juan huañushcaunamanda causarishcami.” 8 Shujcunaga: “Elías ricurimunmi,” ninauca, shujcunas: “Shu callari huras Diosmanda rimaj causarishcami.” 9 Herodes rimaca: “Juamba umara pitichicani, ¿pitangai cai runa casna uyarij?” Pai Jesusta ricunara munaca. 10 Apóstol nishca Jesús cachashca runauna tigramusha, tucui paiguna rashcaunara cuintanauca. Jesús paigunahua shu runa illashca partima anzhurica, Betsaida llacta rayai, 11 Ashca runa paita rishcara yachasha, Jesús catinauca. Jesús paigunara chasquica, Dios mandana pacha shimira paigunara rimaca. Shinallara ungushcaunara alichica. 12 Chishiyaupi, paihua chunga ishqui runauna paihuajma shamunauca, paita ninauca: “Dispiri runaunara, paiguna llactama micungaj puñungaj rinauchu. Caimi runa illashca parti.” 13 Jesús paigunara nica: “Canguna runaunara caraichi.” Cutipanauca: “Pichca tandallara ishqui aichahuandi charinchi, ñucanchi mana rijpi micunara randingaj tucui cai runaunajta.” 14 Chi runauna pichca huaranga tupu anauca. Shinajpi Jesús pai yachachishca runaunara nica: “Tiachichi pichca chunga, pichca chunga caran muntun. ” 15 Shina rasha tucui runaunara tiachinauca. 16 Jesús chi pichca tandara ishqui aichahuandi apisha, ahuama ricusha, bindisiaca. Paquisha, pai yachachishca runaunama cuca, runauna ñaupajpi churangaj. 17 Tucui sajsajta micunauca. Puchujcunara tandachinauca, chunga ishqui suru tasara. 18 Jesús sapalla tiausha, Diosta mañauca. Pai yachachishca runauna paihua pariju tianauca. Paigunara tapuca: “¿Pimi ninaundai ñucara?” 19 Cutipasha ninauca: “Bautisaj Juan angui, ninaun; huaquinguna Elíasmi ninaun: shujcuna shu ñaupa huras Diosmanda rimaj causarimushcami, ninaun.” 20 Jesús nica: “Cangunaga, ¿Pimi nishara nihuanguichi?” Shinajpi Pedro cutipasha nica: “Diospa Cristomi angui.” 21 Jesusca paigunara rugasha mandaca: “Caita ama pitas cuintaichichu,” nisha. 22 Jesús nica: “Ñuca, Runa Churi, ashcara turmindaringaj ministirin; rucuuna, sacerdote apuuna, yachaira yachachijcuna ichuhuanaunga, huañuchihuanaunga; randi quinsa punzha huasha causarishami.” 23 Shinallara nica tucui runaunara: “Shu runa ñucara catisha nijpi, pai quiquinllara, ‘Mana imaschu ani,’ nichu; paihua quiquin cruzta aparisha caran punzha, ñucara catimuchu. 24 Maican runa paihua causaira huacachisha nisha, causaira pirdingami, maicans paihua causaira pirdisha ñucaraigumanda, paihua causaira quishpichingami. 25 ¿Imajta valingai shu runa tucui mundura ganasha, paillara tucurijpi, paillara pirdirijpi? 26 Maican runas ñucamandas ñuca shimimandas pingarijpi, casna runamanda ñuca, Runa Churi, pingarishami ñuca sumajhua, Yaya sumajhua, santu angelguna sumajhua shamuna huraspi. 27 Sirtu pacha cangunara nini, caibi tiajcunamanda huaquinguna mana huañunaungachu Dios mandana pachara ricungagama.” 28 Casna rimashca huasha, shu pusaj punzha tupu pasashca huasha, Jesús Pedrora, Juanda, Jacoboras paihua pariju pushaca. Urcuma sicanauca Diosta mañangaj. 29 Jesús mañaushca ratui, paihua ñahui shu tunu tucuca, paihua churarina chiujlla ricurica. 30 Chi ratui ishqui runauna paihua rimanauca. Caiguna Moises Elías anauca. 31 Caiguna gustu sumajhua ricurinauca. Jesushua rimanauca pai ringaraushcara, Jerusalembi pactachingaraushcaras. 32 Pedro, paita cumpañajcunandi puñuihua sambayashca anauca; randi mana puñusha Jesuspa sumajta ricunauca, shinallara chi ishqui runa Jesushua pariju shayajcunara. 33 Shinajpi cai ishqui anzhurijpi Jesuspajmanda, Pedro Jesusta nica: “Señor, ¿manzhu valinma caibi tiangaj? Quinsa huasihuara rangaichi, cambajta shuj, Moisespajta shuj, Eliaspajta shuj” pai rimaushcara mana yachasha. 34 Pai shina rimaushcai, shu puyu shamuca, paigunara quillpaca. Ashcara manzharinauca puyu ucui tucusha. 35 Puyu ucumanda shimi uyarica: “Caimi ñuca llaquishca Churi, paita uyaichi.” 36 Shimi uyarishca huasha, Jesús sapalla saquirica. Paiguna chunlla tucunauca. Chi punzhaunai pitas imaras mana cuintanaucachu paiguna ricushcara. 37 Cayandi punzha urcumanda irgumushcai, ashca runauna shamunauca paigunara tupangaj. 38 Chi runa muntunmanda shuj caparisha: “Yachachij,” nica, “ricupai ñuca churira, canda rugauni. Ñuca sapalla churimi. 39 Shu supai paita apin, cungaimanda caparin, paita quihuichin, puscura talichin; paita chugrichin, ñaca ñaca paita mana saquin. 40 Can yachachishca runaunara rugacani supaira canzhama ichungaj, astaun mana ushanaucachu.” 41 Jesús cutipasha nica: “¡Ah,” nisha, “mana quirij, mana uyaj miraiguna! ¿Ima hurascamara cangunahua cumpañana ani, cangunara ahuantana ani? Camba churira pushami.” 42 Huahua mayanllayamushcai, supai paita allpama urmachica, paita ashcara quihuichica. Astaun Jesús irus supaira piñaca, huahuara alichisha, yayama intrigaca. 43 Tucui runauna manzharinauca, Diospa atun ushaira ricusha. Tucui runauna Jesús tucui rashcaunara ricusha manzharinauca. Jesús pai yachachishca runaunara nica: 44 “Cai rimashcara ali pacha uyaichi, shina tucungami: ‘Ñuca, Runa Churi, runauna maquii intrigai tucushami. ’ ” 45 Paiguna cai rimashcaunara mana intindinaucachu, maspas paiguna iyaimanda pacashca aca, paiguna ama intindingaj. Manzhanaucami paita tapungaj cai shimiunamanda. 46 Shinajpi yachachishca runauna paigunapura tapunanauca paigunamanda maican mas atun tucunga, nisha, 47 Jesús paiguna shungüi iyarishcara riparasha, shu huahuara apisha shayachica paihua rayai. 48 Jesús paigunara nica: “Maicans cai huahuara chasquisha ñuca shutii, ñucara chasquin. Maicans ñucara chasquisha, ñucara cachamujtas chasquin. Cangunamanda maicans mas ichilla, mas mansu shunguyuj tucusha, paimi mas atun.” 49 Shinajpi Juan cutipasha nica: “Señor, shu runara ricucanchi, camba shutii supaigunara ichuuca. Paita, ‘Ama raichu,’ nicanchi, pai mana ñucanchihua catij ashcaraigu.” 50 Jesús paita nica: “Ama mitsaichichu. Maican runa mana ñucanchihua cuntra asha, pai ñucanchimandami.” 51 Timpu pactarijpi Jesús ahua pachama apishca tucungaj, shinzhi munashcahua Jerusalenma ringaj callarica. 52 Rimajcunara ñaupara cachaca. Icunauca shu Samaria runauna llactai paihuajta ñaupa puruntungaj. 53 Astaun paita mana chasquinaucachu, paihua ñahui Jerusalenma riu cuinta ashcaraigu. 54 Pai yachachishca runauna Jacobo Juandi caita ricusha: “Señor” ninauca, “¿munanguichu ñucanchi ninara ahua pachamanda cachamunara paigunara rupachingaj, Elías rashcasna?” 55 Shinajpi Jesús vultiarisha paigunara piñaca: “Canguna mana yachanguichi ima ispiritumanda ashcara. 56 Ñuca, Runa Churi, mana shamucanichu runauna almaunara pirdichingaj, astaun paigunara quishpichingaj.” Shu llactama rinauca. 57 Paiguna riushca ñambii, shu runa Jesusta nica: “Señor, canda catisha maita can purijpis.” 58 Jesús paita nica: “Chajauna paiguna puñuna uctura charinaun, pishcuunas paiguna taźinda, astaun ñuca, Runa Churi, maibis mana charinichu umara samachingaj.” 59 Jesús shu runara nica: “Catihuai.” Runa cutipaca: “Saquihuai ñaupa punda ñuca yayara pambai ringaj.” 60 Jesús paita nica: “Huañushcaunara saqui paiguna quiquin huañushcapura pambangaj. Canga, ri, Dios mandana pacha shimira rimai ri.” 61 Shinajpi shu runa paita nica: “Canda catisha, Señor, astaun lugarda cuhuai ñaupa punda ñuca huasii tiaj ailluunara dispiringaj.” 62 Jesús paita cutipaca: “Pi runas allpara allana maquinara paihua maquii apisha, chi huasha huashama ricusha, mana valinzhu Dios mandana pachai icungaj.”
1 Cai tucui huasha, Señor shu canzhis chunga runaunara ajllaca. Caigunara ishquipura ishquipura paimanda ñaupara cachaca, tucui pai ringaraushca llactaunama. 2 Paigunara nica: “Pallana sirtu pacha ashcami, astaun tarabajcuna pishinaunmi. Chiraigumanda pallachij Señorda rugaichi tarabajcunara paihua pallanama cachangaj. 3 Richi. Cangunara buriguunara cuinta cachauni, pumauna chaupi shungüi. 4 Ama apaichichu cullqui huacachina cararas, bulsaras, zapatustas. Pitas ama saluraichichu ñambii. 5 Maican huasii icusha, ñaupa punda rimaichi: ‘Cushiyaichi cai huasii. ’ 6 Aii shungu runa chihui ajpi, camba cushi paihuajpi tiangami. Mana shina ajpis, cambajma tigrangami. 7 Chi huasillai tiai, micusha upisha imaras canda cunaupi. Tarabaj runa valin pai pagashcara apingaj. Ama caran huasii pasiaichichu. 8 Maican llactais icusha, runauna cangunara icuchijpi, imaras cangunara carashcara micuichi. 9 Chihui tiaj ungushcaunara alichichi; paigunara nichi, ‘Dios mandana pacha cangunajma mayanllayamushcami. ’ 10 Astaumbas maican llactai icusha, runauna cangunara mana munanaupi, chi llacta ñambiunai llucshisha rimaichi: 11 ‘Camba llactamanda pulvu ñucanchi chaquii llutarishcara chausinchi canguna ñaupajpi. Shinajpis yachaichi—Dios mandana pacha cangunajma mayanllayamushcami. ’ 12 Cangunara nini, Sodoma llacta runauna pishi livachishca anaunga chi punzhai cai llactai tiaj runaunamanda.” 13 “¡Ayailla canmanda, Corazín! ¡Ayailla canmanda, Betsaida! Tiro Sidón llactaunai cambajpi munanaita rashcauna rashca ajpiga, ña unai aripintirinaushca anmaca, custal llachapais ushpais tiarisha. 14 Taripana punzhai Tiro Sidón llactauna runauna pishi livachishca anaunga cangunamanda. 15 Can, Capernaum, ahuagama ahuayachishca ashcangui, astaun ucu pachagama urayachishca anguimi. 16 Maicans cangunara uyasha, ñucara uyanmi. Maicans cangunara mana rqunasha, ñucaras mana munanzhu. Maicans ñucara mana munasha, ñucara cachamujtas mana munanzhu.” 17 Canzhis chunga cachashca runauna cushihua tigramunauca: “Señor,” nisha, “supaigunas ñucanchira uyanaun camba shutimanda.” 18 Jesús nica: “Ñuca Satanasta ricucani ahua pachamanda rayusna urmamujta. 19 Cangunara ushaira cuni machacuigunara, uputindiunaras aitangaj, tucui chijnijcuna ushanaras vinsingaj; imas cangunara mana huajlichingachu. 20 Shinashas, supaiguna cangunara caźushcamanda ama cushiyaichichu, astaun canguna shutira ahua pachai quillcashcamanda cushiyaichi. ” 21 Chi ratuhuallaira, Jesús cushiyaca paihua Ispiritui. “Canda alabauni, Yaya,” nica, “can ahua pachamanda cai pachamanda Señormi angui. Umayujcunamanda intindijcunamandas cai shimiunara pacacangui, astaun llullu huahuaunama ricuchishcangui. Ari, Yaya, shina rasha cushiyacangui. 22 Tucui imaras ñuca maquii cushca aca ñuca Yayamanda. Pi runas Churira mana ricsinzhu, Yayalla paita ricsin. Pi runas Yayara mana ricsinzhu, Churilla paita ricsin, shinallara maicandas Churi ajllashcauna paita ricsichingaj.” 23 Jesús pai yachachishca runaunama vultiarisha, paiguna sapallai tiashcai: “Cushiunami canguna ricushcaunara ricuj ñahuina,” nica. 24 “Cangunara nini, ashca Diosmanda rimajcuna, ashca rey apuuna canguna ricushcara ricungaj munanauca, astaun mana ricunaucachu; shinallara canguna uyashcara uyangaj munanauca, astaumbas mana uyanaucachu.” 25 Shu ley shimira yachaj runa shayarica Jesusta tintangaj. “Yachachij,” nica, “¿imara rashairi ñuca huiñai huiñai causaira apingaj?” 26 Jesús paita nica: “¿Imara quillcashca tian ley shimi quillcai? ¿Imasnara ricungui can?” 27 Ley shimira yachaj cutipasha nica: “Señorda camba Diosta llaquinami angui, tucui shunguhua, tucui a!mahua, tucui ursahua, tucui camba iyaihua. Shinallara camba mayambi causaj runara camba quiquin aicharasna llaquinami angui. ” 28 Jesús paita: “Alimi rimashcangui,” nica, “caita rasha causanguimi.” 29 Ley shimira yachaj paillara ali tucusha nisha, Jesusta nica: “Pitangai ñuca mayambi causaj?” 30 Jesús cutipasha nica: “Shu runa Jerusalenmanda Jericó llactama irguuca. Shuhuauna maquii urmaca. Chiguna pai charishcara quichunauca, paita macasha chugrichinauca. Ñacalla huañushcara saquisha rinauca. 31 Shu sacerdote runa chi ñambira irguca. Chugrishca runara ricusha, muyuchisha pasaca. 32 Shinallara shu Levita nishca sacerdotera sirvij runa mayanlla shamusha, chugrishca runara ricusha, muyuchisha pasaca. 33 Randi, shu Samaria llactamanda runa ñambira pasausha, mayanllayamusha, chugrishca runara ricuca. Paita ricusha llaquirica paihua shungüi. 34 Pactamusha, chugrishcaunara pilluca; asitira vinuras talica chugrishcaunai. Runara paihua burui sicachisha, apashca rica puñushca huasima, chihui paita cuiraca. 35 Cayandi punzha pai ringaraushcai, ishqui cullquira llucchisha, cuiraj runara cuca: ‘Paita ali cuirapangui,’ nica. ‘Imaras pishijpi can gastashcamanda, canda pagasha ñuca tigramushcai. ’ ” 36 Shinajpi Jesús nica: “¿Chi quinsa runaunamanda, maican mayambi causaj cuinta tucucachu shuhuauna maquii urmaj runahua?” 37 Ley shimira yachaj nica: “Paita llaquij runami, yachin.” Shinajpi Jesús paita: “Ri,” nica, “shinallara rangui can.” 38 Jesús risha, shu ichilla llactai icuca. Shu Marta nishca huarmi paita chasquica paihua huasii. 39 Cai Marta shu María nishca ñañara charica. María Jesuspa chaquii tiarisha, pai rimashca shimira uyaca. 40 Astaun Marta yapa turbarica paihua ranaunahua, Jesusma shamusha nica: “Señor, ¿manzhu ricungui imasnara ñuca ñaña ñucara saquin sapalla sirvingaj? Paita rimapai ñucara yanapangaj.” 41 Jesús cutipaca: “Marta, Marta,” nisha, “ashca cuiraisiqui angui can; ashca ranaunahua turbarishca angui. 42 Shujlla ministirin. María mas valij partira ajllashcami; paimanda mana quichushca anga.”
1 Jesús shu llactai Diosta mañauca. Mañai pasashca huasha, shu pai yachachishca runa paita “Señor,” nica, “ñucanchiras yachachihuai mañangaj, imasna Juan shinallara yachachica pai yachachishca runaunara.” 2 Jesús paigunara nica: “Canguna Diosta mañausha casna rimaichi: ‘Ñucanchi ahua pachai tiaj Yaya, camba shuti ali rimashca achu. Shamuchu can mandana pacha. Can munashca tucuchu imasna ahua pachai shinallara cai pachais. 3 Cuna punzha ñucanchi caran punzha micuna tandara cuhuapai. 4 Ñucanchi ucharashcara perdonahuai imasna ñucanchi shinallara perdonanchi ñucanchira manali rajcunara. Ñucanchira ama pushahuaichu tintarinai, astaun manalimanda llushpichihuapai. ’ ” 5 Shinallara Jesús nica: “¿Cangunamanda maican runa shu amigura charisha, paihuajma risha chaupi tuta, paita ninguima, ‘Amigu, quinsa tandara mañachihuai. 6 Shu amigu pactamushcami ñambimanda, ñucaga imaras mana charinichu paita carangaj. ’ 7 Manzhu chi runa, huasi ucumanda cutipanma: ‘Ama turmindachihuaichu. Pungu ña ishcashcami, huahuauna ña ñucahua sirinaun caitui, Mana ushanichu llucshinara canda cungaj?’ 8 Cangunara nini, amigu ashcaraigumandalla mana llucshisha, astaun runa paita mulistashcamanda llucshingami tucui ministishcara cungaj. 9 Cangunara nini: Mañaichi, cushca anguichimi. Mascaichi, taringuichimi. Cayaichi, cangunama pascashca angami. 10 Tucui mañaj apin; mascaj tarin; cayaj runama pascashca anga. 11 ¿Cangunamanda maican yaya, paihua churi tandara mañajpi, yaya shu rumira cungachu? ¿Aichahuara mañajpi yaya machacuira cungachu? 12 Lulunda mañajpi, yaya shu uputindira cungachu? 13 Shinajpi canguna manaliuna ashallara, ali cuyashcaunara canguna churiunama cuyanara yachanguichi, ¿manzhu astaun mas canguna ahua pacha Yaya Santu Ispiritura cunga paita mañajcunara?” 14 Jesús shu supaira ichuca, upa shimi supai aca. Supai llucshijpi, runa ña rimaca. Runauna manzharinauca. 15 Huaquinguna ninauca: “Beelzebú supai atun apu ushaihua cai runa supaigunara ichun.” 16 Shujcuna, Jesusta tintangaj: “Shu ahua pachamanda ricurinara ricuchihuai” ninauca. 17 Jesús paiguna iyaira intindisha, paigunara nica: “Tucui llacta pai quiquinmanda chaupirisha, tucuringami. Shinallara shu huasi pai quiquinmanda chaupirisha tularingami. 18 Shinallarami, Satanás pai quiquinmanda chaupirisha, ¿imasnara pai mandana pacha shayaringa? Canguna ñucara ninguichi, ‘Beelzebú ushaihuami supaigunara ichuun,’ nisha. 19 Ñuca supaigunara ichujpi Beelzebumanda, ¿canguna churiunaga, pimanda supaigunara ichunaun? Chimanda paiguna cangunara taripajcuna anaungami. 20 Astaun ñuca Diospa riruhua supaigunara ichujpi, sirtu pacha Dios mandana cangunajma pactamushcami. 21 Shu shinzhi isparayuj runa paihua huasira cuiraupi, chi huraspi pai charishcauna ali cuirashca tucunaun. 22 Astaumbas shu yali shinzhi runa shamusha, paita vinsisha tucui pai munashca isparaunara quichusha, apashcara chaupin shujcunama. 23 Maicambas mana ñucahua tiausha, ñucahua cuntra tucun. Maicambas mana ñucahua tandachisha, chausinmi. 24 Ima huras irus supai shu runamanda llucshisha, chaquishca partiunai purin, samanara mascan. Mana tarisha, casnami nin: ‘Ñuca tigrasha ñuca llucshishca huasimallara.’ 25 Shamushas huasira ña sumajlla pichashcara alichishcara tupan. 26 Shinajpi rin, chishu canzhis supaigunara, paimanda yali iruscunara, pushamun. Huasii icusha, chihui tiasha causanaun. Chi runa huasha causana ñaupa causanamanda yali mana valij tucun. 27 Jesús chi shimiunara rimaushcai, shu huarmi chi muntunmanda, atarisha caparica: “Cushimi canda aparij icsa, cushimi canda chuchuchij chuchuuna,” nisha. 28 Jesús cutipasha nica: “Astaun, cushiunami Diospa shimira uyajcuna, pactachijcuna.” 29 Runauna paihuajma yalijta taucarimujpi, Jesús rimangaj callarica: “Cuna huras causaj runauna manaliunami. Ricurinara mascanaun. Astaun shu ricurinara mana ricuchishca anga. Jonasmanda ricurinallara ricuchishca anga. 30 Imasna Jonás Ninivé llacta runaunama ricurina aca, shinallarami ñuca, Runa Churi, cuna huras causajcunama shu ricurina cuinta tucushami. 31 Taripana punzhai, Sur partimanda shamuj reina huarmi apu ataringami cuna huras causaj runaunara taripangaj, paigunara cauźayachingami. Pai caru partimanda shamuca Salomomba sabiru shimiunara uyangaj. Astaun shu Salomonmanda yali caibimi tiaun. 32 Ninevemanda runauna atarinaungami taripana punzhai cuna huras causaj runaunahua, paigunara cauźayachinaungami. Jonás rimashcara uyasha aripintirinauca. Astaun shu Jonasmanda yali caibimi tiaun. 33 Mana pihuas shu vilara sindichisha tasa ucui pacasha churan, astaun ahuai huatan, tucui huasii icujcuna vilara ricungaj. 34 Ñahui aichamanda vila cuintami. Camba ñahui ali ajpi, camba aicha punzhayachishca angami, astaun camba ñahui manali ajpi, intiru aicha llandui tianga. 35 Ricui camba shungu ucui tiaj vila cuinta ama tuta llandu cuinta tucuchu. 36 Shinasha, tucui camba aicha punzhahua undarishca asha, mana ima partis llandui asha, tucuira punzhayachishca anga, imasna shu vila canda punzhayachin pai aitashcahua. 37 Jesús rimai pasashca huasha, shu fariseo runa paita rugasha: “Ñucahua pariju micui,” nica. Jesús icusha, mesai tiarica. 38 Fariseo runa paita ricusha manzharica, Jesús mana maillasha micungaraupi. 39 Señor paita nica: “Sirtu pacha, canguna fariseo runauna vasu huasha partira pulatu huasha partiras maillanguichi, astaun canguna shungu ucui ima shuhuanahuas, ima manali iyaigunahuas undarishca anguichi.” 40 “Upauna,” nica, “¿huasha partira raj manzhu shinallara ucu partira rarca? 41 Can charishcaunamanda tsuntsuunama cuichi, casna rasha tucui cangunama chuyaj tucungami. 42 “¡Ayailla fariseoguna! Chunga partiunamanda shu partira Diosta cunguichi canguna mishqui pangamanda, ayaj pangamandas, tucui pangaunamandas; astaumbas ali causanara Diosta llaquinaras cungarishcanguichi. Caigunara rangaj ministirica, chigunaras mana saquisha. 43 “¡Ayailla fariseoguna! ali tiarinaunara mascanguichi tandarina huasiunai, pulasaunais saluranaras mascanguichi. 44 “¡Ayailla yachaira yachachijcuna, fariseogunas, ishqui shimiyujcuna! Mana ricurij pambana uctuuna cuinta anguichi, runauna paiguna ahuai aitasha mana riparanaun.” 45 Shu ley shimira camachij cutipasha: “Yachachij, casna rimasha can ñucanchira piñaungui,” nica. 46 Jesús nica: “¡Ayailla shinallara canguna, ley shimira camachijcuna! Runaunara mana aparihuaj cargaunara apachinguichi, astaumbas canguna ichilla rirullahuas mana llanganguichichu yanapangaj.” 47 “¡Ayailla canguna! Diosmanda rimajcuna pambana huasiunara sicachinguichimi, astaun canguna yayauna paigunara huañuchinauca. 48 Shinajpi, canguna ricujcuna, ‘Ari,’ nijcuna anguichi canguna yayauna rashcaunara. Sirtu pacha canguna yayauna Diosmanda rimajcunara huañuchinauca, cangunas paiguna pambana huasiunara sicachinguichi. 49 Chiraigumanda Diospa sabiru shimi nica: ‘Paigunama Diosmanda rimajcunara, cachashca runaunaras cachashami. Paigunamanda huaquingunara huañuchinaunga, huaquingunara turmindachinaunga. 50 Chiraigumanda cuna huras causau runauna cauźayachishca anaunga tucui Diosmanda rimajcuna talishca yahuarmanda, mundu callarina hurasmanda pacha, 51 Abel yahuarmanda Zacarías yahuargama, cai Zacarías altarhua templo huasihua chaupi shungüi huañuchishca aca. Ari, cangunara nini, tucui cai talirishca yahuarmanda cuna huras causajcuna taripashca anaungami. 52 “¡Ayailla, ley shimira camachijcuna! Yachana pungu llavira quichucanguichi. Canguna mana icucanguichichu, astaun icusha nijcunara arcacanguichimi.” 53 Jesús cai shimiunara rimausha, yachaira yachachijcunas fariseogunas paita ashcara nitiringaj callarinauca, ashca shimiunara tapusha paita turmindachingaj. 54 Ima shimiis paita urmachingaj mascanauca, paita cauźayachingaj.
1 Chi punzhaunai ashca huaranga runa tandarinauca, paigunapura aitarijta. Jesús pai yachachishca runaunara ñaupa punda rimangaj callarica: “Cuiraichi fariseoguna tandara punguichina pulvumanda; paiguna ishqui shimiyujcuna anaun. 2 Ima quillparishca pascashca anga. Ima pacashcas yachashca anga. 3 Chiraigumanda canguna llandui rimashca shimiuna punzhai uyashca anaunga. Canguna rinrii rimashca shimiunara huasi ucui, canzhai caparishca anga huasi pundamanda. 4 “Astaumbas, ñuca amiguuna, cangunara nini: Ama manzhaichichu aichara huañuchijcunara, chi huasha mana imaras mas ushanaunzhu rangaj. 5 Randi cangunara yachachisha pitara manzhana anga. Paita manzhaichi maicanda canguna causaira quichushca huasha ushaira charin ucu pacha ninai shitangaj. Shinajpi cangunara nini: ‘Paita manzhaichi.’ 6 ¿Manzhu pichca ichilla pishcu ishqui reallla valin catungaj? Shina ajllaira chi pishcuunamanda Dios mana shujllas cungarinzhu. 7 Shinallara camba umai caran acchara yupashcami. Ama manzhaichichu, ashca pishcuunamanda yali valij anguichi. 8 “Cangunara nini, tucui runa ñucamanda, ‘Paita ricsinimi,’ nisha rimajpi runauna ñaupajpi, shinallara ñuca, Runa Churi, ‘Paita ricsinimi,’ nisha rimashami Diospa angelguna ñaupajpi. 9 Astaun maican runa ñucamanda, ‘Mana ricsinichu,’ nisha rimajpi runauna ñaupajpi, shinallara ñuca paimanda, ‘Mana ricsinichu,’ nisha rimashami Diospa angelguna ñaupajpi. 10 Maican runa ñucara, Runa Churira, camijpi, paita perdonashca anga, astaun maican runa Santu Ispiritura camijpi, mana perdonashca anga. 11 Canguna tandarina huasiunama apuunamas pushamushca huraspi, ama turbarichichu, ‘¿Imara cutipashun, imara rimashun?’ nisha. 12 Chi hurasllaira Santu Ispíritu cangunara yachachinga imara rimana ashcaras.” 13 Chi taucariai runaunamanda shuj Jesusta nica: “Yachachij, ñuca uquira rimai ñuca yayamanda apinara chaupichingaj.” 14 Jesús paita nica: “Amigu, ¿pi ñucara taripajta chaupichijta churacachu cangunahua?” 15 Jesús paigunara nica: “Ricuichi, cuiraichi tucui cullquira yalijta munanamanda. Runa causaiga, mana ashca charinaunara charinamandallachu.” 16 Shu yachachina cuintanara paigunara cuintaca: “Shu charij runa allpa ashcara cuca pallaushca huraspi. 17 Duiñu paihua shungüi iyarica: ‘¿Imara rashai? Imais ñuca pallashcara huacachingaj mana charinichu. ’ 18 ‘Casna rasha,’ nica, ‘ñuca huacachina huasiunara tulasha, yali atungunara sicachisha, chihui tucui ñuca pallashcaunara ñuca charishcaunaras huacachisha. 19 Ñuca almara rimasha: ‘Alma, ashcara charingui, ashca huatagama durangami. Samai, micui, upi, cushiyai. ’ 20 Dios paita nica: ‘Upa runa, cuna tuta camba almara cayangaj shamunaunga. ¿Can tandachishca pihuajta tucunga?’ 21 Shinallarami shu runa paihuajllara tandachijmi, astaumbas Dioshua ima charinas illajmi.” 22 Jesús pai yachachishca runaunara nica: “Chiraigumanda cangunara nini, ‘Ama turbarichichu canguna causanamanda, ¿imara micuna angai?’ nisha, shinallara canguna aichamanda, ‘¿Imara churarina angai?’ nisha. 23 Canguna causai micunamanda yali valin, canguna aicha churarinamanda yali valin. 24 Iyarichi illahuangaunara, mana tarpunaun, mana pallanaun, huacachina huasiras mantacaras mana charinaun. Shinashas Dios paigunara carán. ¿Manzhu canguna pishcuunamanda mas yali valijcuna anguichi? 25 ¿Pita cangunamanda ashcara turbarisha shu chaupi rigra tupura yaparinara ushangui mas atun tucungaj? 26 Shinajpi, canguna ima ichilla ranaras mana ushasha, ¿imarasha turbaringuichu shu ranaunamanda? 27 Sisaunara iyarisha ricuichi imasna iñanaun. Mana tarabanaun, mana cauchunaun. Cangunara nini, Salomón paihua tucui sumajhua mana churarishcachu aca shu cai sisauna cuinta. 28 Shinajpi Dios yanga quihuara casna churachijpi, cuna punzha shayan, cayandi punzha ninai shitai tucun, ¿imasna astaun mas Dios cangunara churachingami, ansalla quirij runauna? 29 Canguna ama turbarichichu, ‘¿Imara micushun? ¿Imara upishun?’ nisha. Shinallara ama manzharichichu. 30 Cai tucuigunara mundu runauna mascanaun, astaumbas canguna caigunara ministishcara canguna Yaya yachanmi. 31 Astaun, Dios mandana pachara mascaichi, cai tucuira cangunara yapashca anga.” 32 ”Ama manzhaichichu, ichilla muntun runauna. Canguna Yaya paihua mandana pachara cangunama cuyasha nin. 33 Canguna charishcaunara catuichi, tsuntsuunama cuyaichi. Cangunajta mana ismuj bulsaunara raichi. Mana tucurij valijcunara ahua pachai tandachichi. Chihui shuhuaj mana pactan, taula curus mana micun. 34 Maibi can charishcauna tiajpi, chihui canguna shungu tiangami. 35 Chumbillishca tiajuichi, canguna vilaunara sindishcara charichi. 36 Buramanda paihua patrún tigranara chapau runauna cuinta tucuichi; pai buramanda shamusha cayajpi, pungura dsas pascangaj. 37 Cushi shunguyujmi chi sirvijcuna, patrún shamusha puruntu chapaugunara tupangami. Sirtu pacha cangunara nini, paillara chumbillichingami, paigunara mesai tiachingami, paigunara sirvingaj shamungami. 38 Patrún chaupi tuta shamusha, gallu cantashca huasha shamusha, pai chi sirvijcunara chapaugunara tupanma, cushi shunguyujmi casna rasha sirvijcuna. 39 Caita yachaichi, duiñu shuhuaj shamungaraushca hurasta yachasha, chapanmaca, lugarda mana cunmaca paihua huasii icungaj. 40 Canguna shinallara puruntushca tiaichi. Canguna mana iyaushca huraspi ñuca, Runa Churi, shamushami.” 41 Shinajpi Pedro Jesusta: “Señor,” nica, “¿cai yachachina cuintashcara ñucanchimallachu cuintangui, manzhu tucui runaunama cuintangui?” 42 Señor paita nica: “¿Pitangairi shu ali sirtu ali sabiru huasicama, paihua patrún paita churangami paihua huasira mandangaj micuna huraspi chihui tiajcunara carangaj? 43 Cushi shunguyujmi chi sirvij runa, paihua patrún shamusha paita tupanga casna rauta. 44 Sirtu pacha cangunara nini, tucui pai charishcara chi sirvijpa maquii churangami cuirangaj. 45 Astaumbas chi sirvij runa paihua shungüi iyarisha: ‘Ñuca patrún unaiyaun shamungaj,’ shina nisha chishu sirvij cariunaras huarmiunaras callarin livachingaj, maspas pai micungaj machangaj callarijpi, 46 shamungami chi sirvijpa patrún pai mana iyaushca punzhai, pai mana yachashca huraspi, paita shinzhira livachingami, mana quirijcunahua pariju churangami, 47 Chi sirvij runa paihua patrún munashcara intindisha, astaun mana puruntusha, pai munashcara mana pactachisha, ashcara asuti tucungami. 48 Astaumbas shu sirvij runa mana yachasha, asutina tupura rajllaira, ansallami asutishca anga. Maican runama ashcara cushca ajpiga, ashcara mañashca anga paimanda. Maicanma ashcara mingashca ajpi, paimanda mas mañashca anga. 49 “Ninara cai pachai shitangaj shamucani. ¿Imara mas munasha ña sindichishca ajpi? 50 Shu bautisanahua bautisarina ani. Ashcara turmindarini pactaringagama. 51 ¿Iyanguichichu ñuca cai pachama shamushcara ganas causanara cungaj? Mana, nini, astaun piñanaunara cungaj. 52 Cuna hurasmanda, shu huasii pichca runa tiajpi, quinsa shu partima ishqui chishu partima piñanausha tianaunga. 53 Yaya churihua macananaunga, churis yayahua. Mama ushushihua macananaunga, ushushis mamahua. Cari mama cachunhua macananaunga, cachun paihua cari mamahua.” 54 Jesús shinallara runaunara nica: “Canguna shu puyura indi icuna partimanda shamujta ricusha, ‘Tamiangaraun,’ ninguichi. Shina tucun. 55 Huaira sur nishca quinri partimanda huairamujpi, ‘Rupai tucunga,’ ninguichi. Shina tucun. 56 ¡Ishqui shimiyujcuna!” nica, “ahua pacharas, cai pacharas ricurishcara ricsinara yachanguichi, ¿imarasha mana yachanguichi cai hurasta?” 57 “¿Imaraigu cangunallara ali taripanara mana taripanguichi? 58 Shinajpi, can apujma rina huras canhua piñarij runahua, paihua alichinara mascai ñambillaira, mana shina rajpi, pai canda aisasha pushanga apujma, canda suldaru maquii intriganga, suldaru canda chunda cularbi ishcanga. 59 Canda nini, chimanda mana llucshinguichu puchucai midiura pagangagama.”
1 Chi hurasllaira huaquinguna Jesusta cuintanauca imasna Pilato huaquin Galilea runaunara huañuchisha, paiguna yahuarda masaca paiguna rashca sacrificio yahuarhua. 2 Jesús paigunara cutipaca: “¿Iyanguichichu cai Galilea runauna casna turmindachishca ajpi, tucui Galilea runaunamanda yali uchayujcuna anauca? 3 Cangunara nini, Mana. Astaumbas canguna mana anpintirijpi, shinallara tucui huañunguichimi. 4 Shinallara chi chunga pusaj huañuj runauna, Siloe huasi paiguna ahuai urmasha huañuchishcai, ¿iyanguichichu chiguna tucui Jerusalembi tiaj runaunamanda yali uchayujcunami anauca? 5 Cangunara nini, Mana. Astaumbas canguna mana aripintirijpi shinallara tucui huñunguichimi.” 6 Shinallara Jesús cai yachachina cuintanara cuintaca: “Shu runa shu higu yurara paihua uvillas chagrai tarpushcara charica. Duiñu shamuca muyura mascangaj, astaun mana aparishca aca. 7 Cuiraj runara nica: ‘Ña quinsa huata tupura muyura mascashcani cai higu yurai, astaumbas mana tupashcanichu. Cuchui, ¿imarashara yanga shayanga allpara gastachisha?’ 8 Shinajpi cuiraj runa cutipaca: ‘Señor, cai huatallara saqui, yura muyujta allasha ali allpara churasha. 9 Chi huasha, muyura aparijpi alimi, mana aparijpiga cuchungui.’ ” 10 Shu samana punzhai Jesús shu tandarina huasii yachachiuca. 11 Chihui shu huarmi tiauca, chunga pusaj huata tupura shu unguchij supaira charica, cumu purij aca, mana ansas dirichuyanara ushacachu. 12 Jesús paita ricusha cayaca: “Huarmi,” nica, “camba ungüimanda lugaryashcangui.” 13 Jesús paihua maquira paihua ahuai churajpi dsaslla huarmi dirichuyaca. Huarmi Diosta alabacami. 14 Tandarina huasimanda apu, Jesús samana punzhai huarmira alichishcamanda piñarisha, chihuajcunara nica: “Sucta punzha tian tarabangaj. Chi punzhaunai shamichi alichi tucungaj. Ama shamichichu samana punzhai.” 15 Shinajpi Señor paita cutipasha, nica: “Ishqui shimiyuj runa, ¿manzhu caran duiñu cangunamanda paihua huagrara paihua burura llushpichisha huasimanda, yacuma pushan upichingaj samana punzhai? 16 Astaun cai Abrahamba ushushira Satanás huatashca ashca cai chunga pusaj huatara, ¿manzhu paita pascana aca shu samana punzhai?” 17 Jesús casna rimajpi, tucui paihua cuntra rimajcuna pingarinauca, astaun tucui runauna cushiyanauca pai tucui munanaita rashcaunara ricusha. 18 Jesús nica: “¿Imahuara ricuchishai Dios mandana pachara? ¿Imasnara angairi? 19 Shu mustaza nishca muyu cuentami. Runa cai muyura apisha, chagrai tarpusha, muyu iñaca, atun yura tucuca, pishcuuna paiguna huasiunara ranauca paihua pallcaunai. ” 20 Cutillara Jesús nica: “¿Imahuara ricuchishai Dios mandana pachara? 21 Dios mandana pacha tandara punguichina pulvu cuintami, shu huarmi apica, quinsa taza tupu harina pulvui churaca, punguiringagama saquica.” 22 Jesús Jerusalenma riusha, atun llactaunara ichilla llactaunaras pasauca, runaunara yachachisha. 23 Shu runa paita nica: “Señor, ¿ansalla runaunachu quishpinaun?” 24 Jesús paigunara: “Ursariaichi,” nica, “quishqui pungura icungaj. Cangunara nini, ashcauna icungaj munanaun, astaun mana ushanaungachu. 25 Huasiyuj duiñu atarisha, pungura ishcashca huasha, canguna canzhamanda cayangaj callaringuichi, ‘Señor, Señor, pungura pascai,’ nisha. Pai cutipasha cangunara ninga: ‘Mana yachanichu cangunara maimanda chari anguichi. ’ 26 Shinajpi rimangaj callaringuichi: ‘Camba ñaupajpi micushcanchi, upishcanchi; can yachachicangui ñucanchi pulasaunai. ’ 27 Pai rimangami: ‘Cangunara nini, mana yachanichu cangunara maimanda chari anguichi. Richi ñucajmanda tucui manalira rajcuna. ’ 28 Chihui atun huacanas quiru mucurinas tiangami, ima huras canguna Abrahamdas, Isaactas, Jacobdas, tucui Diosmanda rimajcunaras, Dios mandana pachai tiajcunaras ricunguichimi, cangunaga canzhama ichushcauna tucusha. 29 Shamunaungami indi llucshina partimandas, indi icuna partimandas, norte nishca ahua partimandas, sur nishca ura partimandas. Mesai tiarinaunga Dios mandana pachai. 30 Ñaupa punda ajcuna puchucaiguna anaunga, puchucaibi ajcuna ñaupa pundai anaunga.” 31 Chi punzhallaira fariseogunamanda huaquinguna Jesusma shamusha, paita ninauca: “Llucshi, caimanda ri. Herodes canda huañuchisha ninmi.” 32 Jesús paigunara nica: “Richi cai sacha allcura rimai richi, ‘Casna rauni, supaigunara ichuni, ungushcaunara alichini, cunas, cayas, quinsa punzhaiga ñuca ranara tucuchishami. ’ 33 Astaun ministirinmi ñuca ñambira catingaj, cunas, cayas, minzhas. Mana usharinzhu shu Diosmanda rimaj huañungaj Jerusalenmanda canzhai. 34 ¡Jerusalén, Jerusalén, Diosmanda rimajcunara huañuchij, cambajma cachashcaunara rumihua shitaj! ¡Imasna cuti camba churiunara tandachingaj munacani, imasna atallba paihua huahuaunara rigra ucuma ujllarin, astaun mana munacanguichu! 35 Canguna huasira chunlla saquishcami, maspas ñucara mana ricuhuanguichichu shamuna huras pactangagama, ima huras ninguichi: ‘Cushimi Señorba shutii shamuj runa. ’ ”
1 Jesús shu gubirnumanda mandaj fariseo huasii icuca shu samana punzha micungaj, runauna paita chapanauca urmachingaj. 2 Chihui shu icsa yacuhua punguirishca runa tiauca. 3 Jesús ley shimira yachajcunara fariseogunaras: “¿Alichihuajchu,” nica, “samana punzhai?” 4 Paiguna mana ansas cutipanaucachu. Shinajpi Jesús ungushca runara apisha, paita alichisha dispirisha cachaca. 5 Jesús runaunara nica “¿Maican runa cangunamanda paihua buru, paihua huagra uctui urmajpi, manzhu uctalla ringa llucchingaj, samana punzha ajllaira?” 6 Mana pihuas paita cutipanara ushacachu. 7 Jesús riparasha ricuca imasna huaquinguna mesai ñaupa punda tiarinaunara ajllaujcunara, shu yachachina cuintanara cuintaca mesama convirashcaunara, casna nisha: 8 “Can burama convirashca asha, ama tiarichu ñaupa punda tiarinai. Shu canmanda yali valichishca runa istama convirashca ima tiaungami. 9 Casna runa shamujpi, canda paitas conviraj duiñu shamunga, canda rimanga: ‘Llucshipai, amigu,’ ninga, ‘can tiaushcara cui cai runama. ’ Shinajpi can pingarisha puchucai tiarinama rina tucungui. ’ 10 Astaun can, convirashca asha, puchucai tiarinai tiaringui. Casna rajpi, canda conviraj duiñu shamusha, canda ninga: ‘Amigu, mas ñaupajma tiaripai. ’ Casna tajpi, can ahuayachishca angui canhua pariju shamujcuna ñaupajpi. 11 Maicambas paillarara ahuayarisha pishii urmangami, astaun maicans paillara pishiyarisha ahuayachishca angami.” 12 Jesús paita convirajta shinallara nica: “Can shu istara rasha, ama conviraichu camba ailluunallara, uquiunara, yayaunara, mayambi causaj charijcunara. Paiguna canda cutipasha conviranara ushanaunga, pagai tucunguimi. 13 Astaumbas can istara rasha, tsuntsuunara convirangui, pullu maquiunara, anga changaunara, ñausaunara. 14 Can casna rasha, cushi tucungui. Caiguna canda paganara mana ushanaun, astaun can pagai tucungui ali runauna causarimuna punzhai.” 15 Shu paihua pariju mesai tiau runa caita uyasha nica: “Cushimi maican runas tandara micuj, Dios mandana pachai.” 16 Shinajpi Jesús paita nica: “Shu runa chishii atun micuna istara rarca, ashca runaunara conviraca. 17 Micuna huras pactajpi, paita sirvijta cachaca convirashcunara cayangaj, paigunara: ‘Shami,’ ningaj, ‘tucui ña puruntushcami. ’ 18 Tucui convirashcauna: ‘Mana lugarchu ani,’ ningaj callarinauca. Ñaupa aj runa nica: ‘Shu hacindara randishcani, llucshinami ani ricungaj. Canda rugauni, Perdonahuapai. ’ 19 Shuj nica: ‘Na randishcani chunga aisaj huagraunara. Riunimi paigunara camangaj. Perdonahuapai, canda rugauni. ’ 20 Shuj, ‘Ña casarashcani,’ nica, ‘chiraigumanda mana ushanichu ringaj. ’ 21 Sirvij runa tigramusha, tucuira paihua patrunda cuintaca. Shinajpi duiñu piñarisha paihua sirvijta nica: ‘Uctalla ri pulasaunama, llacta ñambiunama. Caima pushami tsuntsuunara, pullu maquiunara, anga chaquiunara, ñausaunaras. ’ 22 Sirvij runa: ‘Patrún,’ nica, ‘can mandashcasna rashcanimi. Shina ajllaira chara lugar tiaun. ’ 23 Patrún sirvij runara nica: ‘Ri, yanga ñambiunama, chagraunamas, chihuajcunara aisasha pushami, ñuca huasi undajta tucungaj. 24 Cangunara nini, mana pihuas ñaupa convirashcunamanda ñuca istara gustangachu. ’ ” 25 Ashca runauna Jesushua catirinauca. Jesús paigunama vultiarisha, nica: 26 “Shu runa ñucama shamusha, mana paihua yayara, mamara, huarmira, churiunara, uquiunara, paniunara, paihua quiquin causanaras chijnisha, pai ñuca yachachishca runa tucunara mana ushanzhu. 27 Shu runa mana paihua quiquin cruzta aparisha, ñucara catimusha, mana ushanzhu ñuca yachachishca runa tucunara. 28 ¿Pita cangunamanda shu huasira rasha nisha, manzhu ñaupa punda tiaringa, cullquira yupangaj, ‘Pactangachu huasira tucuchingaj?’ nisha. 29 Mana shina rajpi, istandira shayachishca huasha, mana ushanma tucuchingaj. Shinajpi tucui ricujcuna burlangaj callarinaunga. 30 Casna nisha: ‘Cai runa huasira shayachingaj callarica, astaun mana ushacachu tucuchinara. ’ 31 Shinallara maican rey apu, shu reyhua guirangaj riusha, manzhu ñaupara tiaringa iyaringaj, ‘¿Ushashachu imara nisha shu chunga huaranga suldaruunahua ishqui chunga huaranga shamuj suldaruunahua guirangaj?’ 32 Mana ushana asha, chi shu rey chara carui ajllaira, runaunara cachangami, ‘Amigu tucushunchi,’ ningaj. 33 Shinajpi cangunamanda maicambas mana tucui charishcara saquisha, mana ushanzhu ñuca yachachishca runa tucungaj.” 34 ”Cachi yapa alimi, astaun cachi paihua mishqui upayajpi, ¿imahuara cuti paita mishquiyachinga? 35 Allpajpas basurajpas mana sirvin. Ichuna anga canzhama. Uyaj rinriyuj uyachu.”
1 Jesusma tucui cullquira tandachijcuna, tucui uchayujcuna shamunauca, paita uyangaj. 2 Fariseoguna yachaira yachachijcunandi piñarinauca: “Cai runa uchayujcunara chasquin, paigunahua micun.” 3 Jesús cai yachachina cuintanara paigunara cuintaca, casna nisha: 4 ”¿Maican runa cangunamanda shu patsaj buriguunara charij, shu burigu chingarijpi, manzhu chi iscun chunga iscun burigura saquisha runa illashca partii, ringami chingarishcara mascangaj tupangagama? 5 Burigura tupajpi, paihua rigrai churangami, cushiyasha. 6 Huasima pactamusha, amiguunaras mayambi causajcunaras tandachingami, paigunara: ‘Cushiyaichi ñucahua, chingarishca burigura tupashcanimi,’ nisha. 7 Shinallara cangunara nini, ahua pachai yalira cushiyanaungami shu uchayuj runa aripintirijpi iscun chunga iscun ali runaunamanda aripintirinara mana ministijcunamanda. 8 “Shinallara, ¿maican huarmi chunga cullquira charisha, shujta chingachisha, manzhu shu vila purura sindichisha, huasira pichanga, ali pacha mascanga paihua cullquira tupangagama? 9 Tupasha, paihua amigaunara mayambi causajcunaras tandachisha, paigunara: ‘Cushiyaichi ñucahua, ñuca chingachishca cullquira tupashcanimi,’ ninga. 10 Shinallara cangunara nini, Diospa angelguna ñaupajpi cushi tianmi shu uchayuj runa aripintirijpi. ” 11 Shinallara Jesús nica: “Shu runa ishqui churira charica. 12 Quipa churi yayara nica: ‘Yaya, ñuca apina partira camba hacindamanda cuhuai. ’ Yaya pai charishcaunara chaupisha churiunama cuca. 13 Ansa punzhauna huasha, quipa churi tucui pai charishcara tandachisha, shu caru partima rica. Chihui manali causasha, pai charishcara tucuchica. 14 Tucuira yanga gastashca huasha, atun yarcai shamuca chi partii. Churi yarcaihua huañungaj callarica. 15 Ricami shu chi partii causaj runajma, paihua llutarica. Runa paita cachaca paihua hacindama cuchiunara cuirangaj. 16 Cuchi micunahua paihua icsara undachinara munaca. Shina ajllaira mana pihuas paita micunara cucachu. 17 Pai iyarisha nica: ‘¡Masna ñuca yaya huasii tiau tarabajcuna ashca micunara charinaun, ñuca caibi yarcaihua huañuuni!’ 18 Atarisha, ñuca yayajma risha, paita nishami: ‘Yayahua, ahua pacha ñaupajpis, camba ñaupajpis, uchara rashcanimi. 19 Ña mana valijchu ani camba churimi nii tucungaj, shu cambajpi tarabaj runara cuintalla apihuapai. ’ 20 Atarisha, paihua yayajma shamuca. Churi chara carui shamujllaira, yaya paita ricuca, llaquirica churimanda. Yaya callpasha risha, paita ujllarisha muchaca. 21 Churi yayara nica: ‘Yayahua ahua pacha ñaupajpi camba ñaupajpis uchara rashcanimi. Ña mana valijchu ani camba churimi nishca tucungaj. ’ 22 Astaun yaya sirvijcunara nica: ‘Ali churarinara llucchichi, churachichi, anillura rirui, zapatusta chaquii. 23 Racu huagra huahuara apamichi, huañuchichi, ñucanchi micungaj. Istara rashunchi. 24 Cai ñuca churi huañushca aca, cuna causarimushca; chingarishca aca, cuna tupashcami. ’ Cushiyangaj callarinauca. 25 Paihua ñaupa punda churi chagrai tiauca. Pai shamusha, huasi mayambi pactamusha, tucaushcaunara bailaushcaunaras uyaca. 26 Shu sirvij runara cayasha, paita nica: ‘¿Imarai cai uyarina?’ 27 Sirvij runa paita nica: ‘Camba uqui tigramushcami. Camba yaya racu huagra huahuara huañuchishcami, churi alilla tigramushcamanda. ’ 28 Shinajpi churi piñarisha, icunara mana munacachu. Yaya llucshisha paita rugaca icungaj. 29 Ñaupa churi yayara cutipasha nica: ‘Riqui, Yaya, ashca huatara canda sirvishcani, tucuibi can mandashcara pactachishcani. Ima huraspas shu chivuhuallaras mana cuhuashcangui ñuca cushiyangaj amiguunahua. 30 Astaumbas cai camba churi shamujpi, camba hacindara manali causaj huarmiunahua gastashca huasha, can paihuajta racu huagra huahuara huañuchishcangui. ’ 31 Shinajpi yaya paita nica: ‘Churi tucui huras ñucahua tiaungui. Tucui ñuca charishcauna cambajmi, 32 Shinajpi ministirica istara rangaj, cushiyangaj, cai camba uqui huañushca aca, ña causarishcami, chingarishca aca, ña cuti tuparishcami. ’ ” *
1 Jesús pai yachachishca runaunara nica: “Shu charij runa tiaca. Huasicamara charica. Cai huasicamamanda rimashca aca: ‘Pai can charishcaunara baratunmi,’ nisha. 2 Patrun paita cayasha, nica: ‘¿Imarai cai ñuca canmanda uyashca? Cuintasta rai can huasicama ashcamanda. Ña mana mas ushanguichu huasicama angaj. ’ 3 Shinajpi huasicama paihua shungüi nica: ‘¿Imara rashai, ñuca patrún ñucara huasicama ashcamanda llucchihuan? Allanara mana ushanichu, mañashalla causanara mana ushanichu, pingarichihuanmi. 4 Ña ñuca yachani imara ranara, ñucara huasicama tiashcamanda llucchijpi, cayai tucungaj amiguuna huasiunai. ’ 5 Caran paihua patrunda dibij runara cayasha, ñaupa shamujta nica: ‘¿imasnara dibingui ñuca patrunda?’ 6 Dibiyuj cutipaca: ‘Shu patsaj asiti lata purura. ’ Huasicama paita nica: ‘Camba dibi quillcara api, uctalla tiari, ‘Pichca chungallara quillcai. ’ 7 Chi huasha shujta tapuca: ‘¿Canga, imasnara dibingui?’ Pai, ‘Shu patsaj quintal trigu muyura,’ nica. Huasicama paita: ‘Camba quillcara api,’ nica, ‘pusaj chunga quintalda quillcai. ’ 8 Patrún mana valij huasicamara alabaca pai sabirusha rashcamanda. Cai mundui causajcuna punzhai causajcunamanda yali sabiru anaun runaunahua. 9 Shinallara cangunara nini: ‘Canguna cai uchayuj mundu cullquihua amiguunara raichi, shina ajllaira cullqui tucurijpi, amiguuna cangunara chasquinaunga huiñaigama duraj tianaunai. ’ 10 Maican runa ali rajpi ansashituhuai, shinallara ali rangami ashcai. Maican runa manali rajpi ansashituhuai, shinallara manali rangami ashcai. 11 Canguna mana ali rajpi yanga charishcaunahua, ¿pita cangunara ali sirtu valijcunara cunga cuirangaj? 12 Canguna shujpa charishcaunahua manalira rajpi, ¿pita canguna quiquimbajta cunga charingaj? 13 ”Mana pis ishqui patrunda sirvina ushanzhu; shujta chijninga, chishujta llaquinga; shujhua ali tucunga, chishujta pishiyachinga. Canguna mana ushanguichichu Diostas cullquiras sirvinara.” 14 Fariseoguna shinallara cai Jesús rimashca shimiunara uyanauca. Paiguna cullquira llaquijcuna asha, paita burlanauca. 15 Jesús paigunara nica: “Canguna, ‘Pactajta runaunami anchi,’ ninguichi runauna ñaupajpi. Shina ajllaira Dios canguna shungura ricsin. Runapura, ‘Valijmi,’ nishcara, Yaya Dios chijnin. 16 ”Ley camachishca shimi Diosmanda rimajcunandi Bautisaj Juangama duranauca; chihuasha Dios mandana pachara rimashcami, tucui runauna aburinaun icungaj. 17 Astaun raihuajmi ahua pachas cai pachas tucuringaj, randi ley shimimanda mana usharinzhu shu pundahuallas apashitangaj. 18 ”Maican runa paihua huarmira ichusha, shujhua casarasha, tacarij runa tucun. Maican runa chi cari ichushca huarmira casarasha, shinallara shujhua tacarij tucun. 19 ”Shu charij runa tiauca gustu inu puca yuraj churarinara churarishca. Caran punzha atun micuna istara rarca, 20 Shinallara shu Lázaro nishca tsuntsu mañaj runa tiauca. Paihua aicha llagahua undashca aca. Charij runa pungüi ichushca sirica. 21 Charij runa mesamanda urmaj puchuunahua paihua icsara undachinara munacami. Alcuuna shamusha paihua llagaunara llacanauca. 22 Tsuntsu runa huañuca, angelguna paita pushanauca Abraham tiashcama. Shinallara charij runas huañuca, pambashca aca. 23 Ucu pachaiga chi charij runa turmindariushcai paihua ñahuira pascasha Abrahanda ricuca carui, Lazaroras ricuca Abrahamba rigrai. 24 Shinajpi caparica: ‘Yaya Abraham, llaquihuapai. Lazarora cachamupai ñucajma, paihua maqui riru pundara yacuhua ucuchichu ñuca callura chiriyachingaj, cai ninai yapa turmindariushcamanda. ’ 25 Abraham paita nica: ‘Churi, iyari imasna can causaushca huraspi camba ali charishcaunara charicangui, astaun Lázaro manaliunara. Pai cuna caibi cushiyashcami, randi can turmindariungui. 26 Maspas shu atun huaicu tian canhua ñucanchihua chaupi chaupii. Pasana munajcuna caimanda cambajma pasanara mana ushanaun, chimandas caima mana ushanaun. ’ 27 Shinajpi runa nica: ‘Yaya canda rugauni Lazarora ñuca yaya huasima cachapangui. 28 Pichca uquiyuj ani. Paigunama cachapangui ama shamunauchu cai turmindarinama. ’ 29 Abraham paita nica: ‘Moisesta charinaun, Diosmanda rimajcunandi, paigunara uyanauchu. ’ 30 Shinajpi runa nica: ‘Mana, Yaya Abraham, shu runa huañushcaunamanda paigunama rimai rijpi, aripintirinaunga. ’ 31 Astaun Abraham paita nica: ‘Moisestas Diosmanda rimajcunaras mana uyashaga, shinallara mana uyanaungachu shuj huañushcaunamanda atarisha rimajpis. ’ “
1 Jesús pai yachachishca runaunara nica: “Ursamanda uchai nijtanauna shamunaungami, astaun ¡lastimalla casnai urmachij runa! 2 Astaun ali anmaca shu runara shu atun cutana rumira paihua cungai huatasha lamarbi shitai tucungaj, manara shuj cai ichilla huahuaunara uchai urmachijpi. 3 Ricuichi cangunajmandallara. Camba uqui uchara rajpi, canda piñachisha, paita rimai. Pai aripintirijpiga, perdonai. 4 Pai canzhis cuti canhua cuntra uchara rajpi shu punzhai, canzhis cuti cai punzhai tigramujpi, canda, ‘Aripintiriuni,’ nisha, paita perdonai.” 5 Señor cachashca runauna paita ninauca: “Ñucanchi quirinara yapahuapai.” 6 Shinajpi Señor nica: “Canguna quirina shu mustaza ichilla tarpuna muyu cuinta ajpi, canguna cai atun sicómoro yurara rimanguichimaca: ‘Pilari caimanda, lamarbi tarpuri,’ nijpi, cangunara uyanmaca.” 7 ”¿Pita cangunamanda shu sirvij runara charisha, allpara huanuyachij, huagrara cuiraj, pai chagramanda tigramujpi, paita ninma: ‘lcui, mesai tiari’? 8 Astaun, ¿manzhu ninga; ‘Micunara puruntui, chumbilli, sirvihuai; ñuca micushca upishca huasha can randi micungui, upingui’? 9 ¿Agrasinga charí paihua sirvijta pai mandashcara rashcamanda? Mana, nisha, iyauni. 10 Shinallara canguna, tucui cangunara mandashcara rashca huasha, nichi: ‘Yanga sirvijcunami anchi ñucanchi ministishcallara rashcanchi. ’ “ 11 Jesús Jerusalenma riusha, Samariahua Galileahua chaupira pasauca. 12 Shu ichilla llactai icuushcai, paita tupangaj llucshimunauca chunga llagayuj runauna. Carullai shayarinauca. 13 Caparisha ninauca: “¡Jesús, Yachachij, llaquihuapai ñucanchira!” 14 Jesús paigunara ricusha: “Richi,” nica, “sacerdoteunama ricuchichi.” Paiguna riushcallai alichi tucunauca. 15 Shinajpi paigunamanda shuj, pai aliyashcara ricusha, tigraca. Shinzhi shimihua caparisha, Diosta alabaca. 16 Tuama urmaca Jesuspa chaquii, paita agrasisha. Pai Samaria runami aca. 17 Jesús cutipasha nica, “¿Manzhu chungapura anauca alichishcauna? ¿chishu iscun, maibirai? 18 ¿Cai carumanda runalla tigramuca Diosta alabangaj?” 19 Jesús paita nica: “Atari, ri. Can quirishca canda quishpichishcami.” 20 Fariseoguna Jesusta tapunauca: “¿Ima hurasta shamunga Dios mandana pacha?” Jesús cutipasha nica: “Dios mandana pacha mana rimashcahua shamunga, 21 Mana rimanaungachu: ‘Caibimi, chihuimi,’ nisha. Dios mandana pacha canguna chaupi shungüi tian.” 22 Jesús pai yachachishca runaunara nica: “Punzhauna shamunaungami ima huras Runa Churi tiashca punzhaunamanda shujta ricusha ninguichimi, astaun mana ricunguichichu. 23 Runauna cangunara ninaunga: ‘Caibimi, chihuimi,’ nisha. Ama ringuichichu, ama catinguichichu paigunara. 24 Imasna rayu shu parti silumanda chishu partigama limpian, shinallarami tucunga ñuca, Runa Churi, shamuna punzhai. 25 Chi punzha manara shamujllaira, ministirin ñuca ashcara turmindachishca tucungaj, shinallara cai huras aj runaunamanda ichushca tucungaj. 26 Imasna tucuca Noé causashca punzhaunai, shinallarami tucunga ñuca, Runa Churi nishca punzhaunai. 27 Runauna micurianauca, upirianauca, casarianauca, casarachirianauca, Noé barcui icuna punzhagama. Pai icushca huasha, yacu izhu shamuca, tucui paigunara tucuchica. 28 Shinallara tucuca Lot nishca runa causashca punzhaunai. Runauna micunauca, upinauca, randinauca, catunauca, tarpunauca, huasiunara shayachinauca. 29 Astaun Lot Sodoma llactamanda llucshishca punzhai silumanda ninas azufres tamiaca, tucuira tucuchica. 30 Shinallarami tucunga ñuca, Runa Churi, ricurimuna punzhai. 31 Chi punzhai shu runa huasi ahua pata pundai tiausha, paihua charishcauna huasi ucui tiajpi, ama irguchu apingaj. Shinallara chagrai tiaj ama huashama tigrachu. 32 Lotpa huarmimanda iyarichi. 33 Tucui runa paihua causaira quishpichingaj mascasha, pirdingami. Tucui runa paihua causaira pirdisha quishpingami. 34 Cangunara nini, chi tutai ishquipura shu caitui sirinaunga, shujta apishca anga, shujta saquishca anga. 35 Ishqui huarmiuna pariju cutarinaunga. Shujta apishca anga, shujta saquishca anga. 36 Ishqui runauna chagrai tianaunga. Shujta apishca anga, shujta saquishca anga. 37 Paiguna Jesusta cutipasha, paita ninauca: “¿Maibira angairi, Señor?” Jesús paigunara nica: “Maibis aicha sirijpi chihuimi angauna tandarimunaunga.”
1 Shu yachachina cuintanara Jesús paigunara cuintaca runauna tucui huras Diosta mañanauchu, ama sambayasha. 2 Casna nica: “Shu llactai shu taripaj runa tiaca. Pai Diosta mana manzhacachu, runaunara mana llaquicachu. 3 Shinallara chi llactai shu huaccha huarmi tiaca. Pai taripajma shamusha, nica “Ñucara yanapahuapai ñucara chijnij runamanda.” 4 Taripaj runa uyanara mana munacachu, astaun, huasha paihua shungüi nica: “Ñuca, Diosta mana manzhashallara, runaunaras mana ricushallara, 5 cai huaccha huarmi ñucara mulistajllaira, paita yanapasha chari. Mana casna rajpi huarmi caran ratu shamusha ñucara aburichinga.” 6 Señor nica: “Uyaichi cai manali taripaj rimashcara. 7 ¿Manzhu Dios pai ajllashcaunara yanapanga, paiguna tutandi punzhandi paita caparijpi? ¿Unaiyangachu paigunara cutipangaj? 8 Cangunara nini: Dios uctalla paigunara uyangami. Ñuca, Runa Churi, shamusha, ¿quirinara tupashachu cai mundui?” 9 Huaquingunara, “Ali runami ani,” nisha iyarijcunara, astaun shujcunara chijnijcuna asha, Jesús shinallara cai yachachina cuintanara cuintaca: 10 ”Ishqui runa templo huasima rinauca Diosta mañangaj. Shuj fariseo runami aca, chishujca gubirnu cullquira tandachij aca. 11 Fariseo runa shayarisha paimallara mañaca, casna nisha: ‘Dios, canda agrasini ñuca mana shu runauna cuintachu ani, shuhuajcuna, manaliuna, shujhua tacarijcuna. Mana cai gubirnu cullquira tandachij runa cuintachu ani. 12 Ishqui cuti caran simanai sasiuni, tucui ñuca ganashcamanda shu chunga partira cuni. ’ 13 Gubirnu cullquira tandachij runa, carui shayarisha, mana munacachu paihua ñahuira siluma atarichisha ricungajllas, astaun paihua pichui huactasha, casna nica: ‘Dios llaquihuapai ñucara, uchayuj runami ani. ’ 14 Cangunara nini, cai runa paihua huasima perdonashca rica; chishujca mana. Maican runa paillarara ahuayachisha pishiyachishca anga, maicans paillarara pishiyachisha ahuayachishca anga.” 15 Llullu huahuaunara Jesusma pushamunauca, pai huahuaunara llangangaj. Yachachishca runauna ricusha, paigunara piñanauca. 16 Jesús paigunara cayasha nica: “Ichilla huahuaunara lugarda cuichi ñucama shamungaj, ama arcaichichu paigunara. Casnaunajmi Dios mandana pacha. 17 Sirtu pacha cangunara nini, maicambas Dios mandana pachara mana ichilla huahuasna chasquijpi, mana chihui icungachu.” 18 Shu valij runa Jesusta tapuca: “Ali Yachachij, ¿imara rashai ñuca huiñai causaira apingaj?” 19 Jesús paita nica: “¿Ima rashara ñucara, ‘Ali’ nisha rimahuangui? Pis mana alichu, Diosllami ali. 20 Dios mandashca shimiunara yachangui: Ama shujhua tacarichu, ama huañuchichu, ama shuhuaichu, ama shujcunamanda llullaichu, yayaras mamaras llaquinami angui.” 21 Paiga nica: “Cai tucuira pactachishcani maltamanda pacha.” 22 Jesús caita uyasha nica: “Chara shuj pishinmi: can tucui charishcara catuiri, tsuntsuunama cui. Valijcunara charingui ahua pachai. Shami, catihuai.” 23 Shinajpi malta caita uyasha llaquirica, ashca charij ashcamanda. 24 Jesús pai ashca llaquirishcara ricusha, nica: “Turmindusmi charijcuna Dios mandana pachai icungaj. 25 Shu camillu turmindariushas pasangallami tupulli uctura, randi shu charij runa astaun yali turmindushua Dios mandana pachai icungami.” 26 Cai shimira uyajcuna ninauca: “¿Pita quishpina ushangairi?” 27 Jesús paigunara nica: “Runaunahua mana raihuaj, Dioshua ali raihuajllami.” 28 Shinajpi Pedro nica: “Ñucanchiga ñucanchi charishcaunara saquisha canda catishcanchi.” 29 Jesús paigunara nica: “Sirtu pacha cangunara nini, mana tianzhu shu runas paihua huasira, yayaunara, uquiunara, huarmira, churiunaras saquisha Dios mandana pachamanda, 30 astaun mas ashcara apingami cai hurascunai, shinallara shamuj timpui huiñai causaira charingami.” 31 Jesús paihua chunga ishqui runaunara pushasha, paigunara nica: “Jerusalenma sicanchi. Tucui Diosmanda rimajcuna quillcashca ñucamanda, Runa Churimanda, pactaringami. 32 Pai gentilguna maquii intrigashca anga, burlashca, piñashca, tiucashca. 33 Paita azutishca huasha huañuchinaunga. Astaun, quinsa punzhai causaringami.” 34 Yachachishca runauna imaras mana intindinaucachu cai rimashcamanda. Cai shimira paigunamanda pacashca aca. Mana intindinaucachu Jesús paigunara rimashcara. 35 Jesús Jericó llacta mayanma shamujpi, shu ñausa runa ñambi rayai tiauca, “Cullquira cuyahuai,” nisha mañasha. 36 Nausa runa ashca runauna uyarishcara uyasha tapuca: “¿Imara tucun?” 37 Paita ninauca: “Nazaretmanda Jesús pasaun.” 38 Shinajpi pai caparica: “Jesús, Davidpa Churi, llaquihuapai.” 39 Ñaupa shamuujcuna paita piñanauca: “Chunlla, ama caparichu.” Paiga mas shinzhira caparisha: “Davidpa Churi, llaquihuapai,” nica. 40 Shinajpi Jesús shayarisha, runara paihuajma pushamungaj cachaca. Ñausa runa shamujpi, Jesús paita tapuca: 41 ”¿Imara rangajta ñucara munangui?” Chi ñausa runa cutipasha nica: “Señor, ñuca ricuj tucunara munani,” nica. 42 Jesús paita: “Ricuj tucui,” nica, “can quirishca canda quishpichishcami.” 43 Chi ratullaira ricucami. Jesushua catimuca, Diosta alabasha. Tucui runauna caita ricusha Diosta alabanauca.
1 Jesús Jericó llactara icusha, pasauca. 2 Shu Zaqueo nishca runa tiauca, gubirnu cullquira tandachijcuna apumi aca, charij runa. 3 Pai Jesusta ricunara munaca, astaun mana ushacachu ashca runauna taucarimushcaraigu, pai ichilla runa asha. 4 Ñaupajma callpasha, shu sicómoro yurara sicaca, chi ahuamanda ricungaj. Jesús chita pasanami aca. 5 Jesús chima pactamusha, ahuama ricusha runara ricuca, paita nica: “Zaqueo, uctalla irgüi. Cuna punzha ministirin ñuca camba huasii pasiangaj.” 6 Shinajpi uctalla irgumuca, cushihua paita chasquicami. 7 Tucui runauna caita ricusha piñanauca, Jesús shu uchayuj runahua tiangaj icushcami, nisha. 8 Shinajpi Zaqueo shayarisha, Señorda nica: “Señor, shu chaupi ñuca charishcara tsuntsuunama cusha, pimandas umachisha ñuca yapajta apishca ajpi, chuscu cuti yapasha cutichisha.” 9 Jesús paita nica: “Cunallara quishpina pactamun cai huasima, pais shu Abrahamba churi ashcamanda. 10 Ñuca, Runa Churi, shamucani chingarishcara mascangaj quishpichingajpas.” 11 Runauna cai shimiunara uyajpi, Jesús paigunara shu yachachina cuintanara cuintaca, pai ña Jerusalen mayambi tiausha, runauna Dios mandana pacha ñalla ricurina ajta iyanaupi. 12 Jesús nica: “Shu valij runa caru llactama rica, chi llacta rey apu tucunara apingaj, chi huasha tigramungaj. 13 Pai shu chunga sirvijcunara cayasha, chunga cullquira cuca: “Tarabaichi,” nisha, “ñuca cuti tigranagama.” 14 Paihua quiquin llactai tiajcuna paita chijninauca. Runaunara cachanauca paihua huashallai paita rimangaj: “Mana munanchichu can ñucanchi rey apu tucungaj.” 15 Pai tigramushcai, rey apu tucushca huasha, cayangaj cachaca chi cullquira cushca sirvijcunara, caran duiñu ganashcara yachangaj. 16 Ñaupa runa shamusha nica: “Señor, camba cullquihua chunga cullquira mas ganashcami.” 17 Señor paita nica: “Ali sirvijmi angui, alimi rashcangui, can ansallai alira rashca ajpi, can chunga llacta ahuai apu tucungui.” 18 Shujpas shamusha, “Señor,” nica, “camba cullquihua pichca cullquira mas ganashcami.” 19 Paita shinallara nica: “Cambas pichca llacta ahuai apu tucungui.” 20 Shujpas shamusha, “Señor,” nica, “caiga camba cullqui, shu llachapai pillusha huacachisha charicani. 21 Canda manzhacani, can shu milli runa ajpi, can mana churashallara apij ajpi, can mana tarpushallara pallaj ajpi.” 22 Shinajpi Señor paita nica: “Mana ali sirvij, camba quiquin shimimandallara taripashca angui. Ñuca milli runa ajta yachacangui, ñuca mana churashallara apij, ñuca mana tarpushallara pallaj ajta. 23 ¿Imarasha ñuca cullquira mana churacangui bancui mirangaj, ñuca tigramushcai ñuca cullquira mirashcandi apingaj?” 24 Chihui ajcunara nica: “Paimanda cullquira quichuichi, chunga cullquira charijma cuichi.” 25 Paiguna: “Señor” ninauca, “chunga cullquira charinmi.” 26 ”Shinajpi cangunara nini, charijcunama cushca anga, mana charijcunamanda paiguna charishcahuaras quichushca anga. 27 Maspas ñucara chijnijcunara pushamichi caima, paigunara huañuchichi ñuca ñaupajpi.” 28 Caita rimashca huasha, Jesús ñaupasha, Jerusalenma sicasha riuca. 29 Jesús Betfagé Betanias llactauna mayanma pactamusha, Olivos urcuma pactasha, ishqui yachachishca runaunara cachaca. 30 Paigunara nica: “Richi chimbai tiaj ichilla llactama, chihui icusha shu malta buru huatashcara tupanguichimi, pi runas mana ima huras muntashcara. Pascaichi, apamichi. 31 Maican runa cangunara tapujpi: ‘¿Imaraigu burura pascaunguichi?’ casna cutipanguichi: ‘Señor caita ministin,’ nisha.” 32 Cachashcauna rinaucami, rimashcasna tupanauca. 33 Malta burura pascajpi, duiñuuna ninauca: “¿Imarasha pascaunguichi malta burura?” 34 Paiguna ninauca: “Señor ministishcaraigumanda.” 35 Jesuspajma apamunauca. Paiguna churarinara malta buru ahuai churasha, Jesusta sicachinauca. 36 Jesús pasaushcai, runauna paiguna churarinara mandanauca ñambira. 37 Olivos urcu irguna mayanma pactajpi, tucui yachachishca runauna cushiyasha, Diosta alabangaj callarinauca, shinzhi caparisha tucui pai munanaita rashcaunara ricushcamanda, 38 casna nisha: “¡Bindisiashcami Señorba shutii shamuj rey apu; ahua pachai cushilla tucuchu, ahua pachai sumaj tiachu!” 39 Shinajpi runa muntunmanda huaquin fariseoguna Jesusta ninauca: “Yachachij, can yachachishca runaunara piñai.” 40 Jesús cutipasha paigunara nica: “Cangunara nini, caiguna upalla ajpi, rumiuna caparinaunmami.” 41 Jesús llacta mayanma pactamusha, llactara ricusha huacaca, 42 nisha: “¡Canga cuna cai punzhallais riparasha, cushiyanguimaca! Astaun cuna camba ñahuimanda pacashcami. 43 Punzhauna shamunaunga ima huras canda chijnijcuna camba muyujta sancaunara churanaunga, canda ishcanaunga, tucui partimanda canda nitimunaunga. 44 Canda tulanaungami allpama, shinallara camba churiunandi camba ucui. Shu rumillas mana saquinaungachu shu rumi ahuai, Dios cambajma pasiashca punzhara mana ricsishcamanda.” 45 Jesús templo huasii icusha, chihui catujcunara randijcunaras canzhama callpachica. 46 Paigunara nica: “Quillcashcami tian, ‘Ñuca huasi shu Diosta mañana huasimi,’ randi canguna shuhuauna uctura rashcanguichi.” 47 Caran punzha templo huasii yachachica, astaun sacerdote apuuna, yachaira yachachijcunandi, runauna apuunandi paita huañuchingaj mascanauca. 48 Mana ushanaucachu chita ranara, tucui runauna ashca munaihua paita uyashcamanda.
1 Shu punzha Jesús templo huasii tiausha, runaunara yachachica, evangelio ali shimiras rimaca. Sacerdote apuuna, yachaira yachachijcunandi, rucuunandi paihuajma shamunauca. 2 Paita rimanauca: “Rimahuai, ¿Ima mandashcahua cai rashcaunara raungui? ¿Pi mandajpira casna raungui?” 3 Jesús cutipasha paigunara nica: “Ñucas shinallara shu tapunara charini cangunara tapungaj. Cutipahuaichi. 4 Juan bautisashca, ¿ahua pachamandachu aca, runaunamandachu aca?” 5 Shinajpi, paigunapura rimananauca: “Ñucanchi, ‘Ahua pachamandami,’ nijpi, pai ninga: ‘¿Imarasha paita mana quiricanguichi?’ 6 Ñucanchi, ‘Runaunamandami,’ nijpi, tucui runauna ñucanchira rumihua shitanaunga. Paiguna sirtumi iyanaun ‘Juan shu Diosmanda rimajmi,’ nisha.” 7 Cutipasha ninauca: “Mana yachanchichu maimanda ashcaras.” 8 Shinajpi Jesús paigunara nica: “Ñucas cangunara mana rimashachu pi mandashcahua ñuca casnaunara rani.” 9 Jesús runaunara cai yachachina cuintanara cuintangaj callarica: “Shu runa uvillas chagrara tarpuca, tarabajcunara pagara mañasha mañachica, casna rasha unaiyangaj rica. 10 Pallana huras pactarijpi, shu sirvij runara cachaca, tarabajcuna uvillas aparishca muyuunara paita cunauchu nisha. Tarabajcuna paita macasha, maquillahua, imas illajta paita cachanauca. 11 Duiñu cuti shu sirvijta cachaca; paita shinallara macasha, camisha, maquillahua cachanauca, 12 Ña quinsa cuti cachasha, duiñu shu sirvijta cachaca. Paitas chugrichisha, canzhama shitanauca. 13 Shinajpi chagrayuj duiñu nica: ‘¿Imara rashairi? Ñuca quiquin llaquishca churira cachasha, paita ricusha caźunaunga chari. ’ 14 Tarabajcuna paita ricusha paigunapura rimananauca: ‘Caimi cai chagrara duiñuyana churi. Acuichi, paita huañuchishunchi, allpa ñucanchij tucungaj. ’ 15 Churira chagramanda shitasha, paita huañuchinauca. ¿Imara rangairi chagrayuj duiñu paigunara? 16 Shamungami, tarabajcunara huañuchisha tucuchingami, chagrara shujcunama cungami.” Fariseoguna caita uyasha ninauca: “¡Dios ama lugarda cuchu ñucanchira shina tucungaj!” 17 Jesús paigunara ricusha, nica: “¿Imara nin cai quillcashca: ‘Huasira shayachijcuna mana munashca rumi istandi siqui tucushcami?’ 18 Tucui runa cai rumii urmaj paquirishca anga, astaun maican runa ahuais cai rumi urmamujpi, pulvurishca tucungami.” 19 Sacerdote apuuna yachaira yachachijcunandi Jesusta apinara munanauca chi ratullaira, Jesús cai rimashca shimiuna paigunamanda rimashca ajta intindinauca; astaun runaunara manzhanauca. 20 Jesusta urmachingaj camanauca, ricujcunara cachanauca, ‘Ali runami ani’ yanga rimasha nijcunara, ima pandashca shimiras apingaj, paita atun apu maquii intrigangaj. 21 Paita tapunauca: “Yachachij,” nisha, “yachanchi imasna can sirtu shimira rimaj angui, yachachij angui; tucui runara chi tupullara rasha parijulla ricungui, maspas Diospa ñambira sirtu pacha yachachingui. 22 ¿Paganachu manzhu pagana impuistu cullquira Cesarma?” 23 Jesús paiguna sabiru iyaira ricsisha, paigunara nica: “¿Imarasha tintahuanguichi?” 24 Cullquira ricuchihuaichi. ¿Pihuajtai cai ñahui, cai quillcashca? Paiguna ninauca: “Cesarbaj.” 25 Shinajpi Jesús paigunara nica: “Césarbajta Césarma cuichi, Diospajta Diosma cuichi.” 26 Shinasha, ima panda shimiras tupanara mana ushanaucachu runauna ñaupajpi, astaun pai sabiru shimihua cutipajpi manzharisha chunllayanauca. 27 Chihuasha, huaquin Saduceos nishcauna Jesuspajma shamunauca, caiguna “Causarina illanmi” nijcuna. Jesusta tapunauca: 28 ”Yachachij,” nisha, “Moisés ñucanchira quillcaca, ‘Shu huarmiyuj runa huañujpi, mana churiyuj saquirijpi, paihua uqui chi huarmira apichu churiunara mirachingaj huañuj uquijta. ’ 29 Shinajpi canzhis uquipura tianauca. Ñaupa uqui shu huarmira apica, shinashas churi illaj huañuca. 30 Shinajpi quipa uqui huarmira apica, paihuas churi illaj huañuca. 31 Chi huasha paimanda quipa uquis chi huarmira apica, shinallara tucui chi canzhis uquiuna chi huarmira apisha, churi illaj huañunauca. 32 Puchucaibi huarmis huañuca. 33 Causarina punzhai, ¿maicambajta angai chi huarmi? Tucui canzhis paita apinauca huarmira rasha.” 34 Shinajpi Jesús paigunara cutipaca: “Cuna timpu churiuna casaranaun, shinallara casarangaj cunaun. 35 Astaun maicanguna chishu timpuma pactangaj, huañushcaunamanda causaringajpas valijcuna nishca asha, mana casaranaun, shinallara mana cunaun casarangaj. 36 Ña mas huañunara mana ushanaun, astaun angelcuna cuinta tucunaun, Diospa churiuna anaun, causarina churiuna ashcamanda. 37 Astaumbas, huañushcauna causarinauna ajpi, quiquin Moisés caita yachachica, sindiu yura cuintashcai, ima huras pai Señormanda rimasha nin: ‘Abrahamba Dios, Isaacpa Dios, Jacobpa Dios,’ 38 Dios mana huañushcauna Dioschu, astaun causajcunajmi. Paihua ñaupajpi tucui causanaun.” 39 Huaquin yachaira yachachijcuna Jesusta cutipasha ninauca: “Yachachij, alira rimashcangui.” 40 Ña Jesusta mas tapungaj manzhanaucami. 41 Shinajpi Jesús paigunara nica: “¿Imasna ajpira ninaun Cristo Davidpa churimi, nisha? 42 Quiquin David, Salmos quillcai nin: ‘Señor ñuca Señorda nica, Tiari ñuca ali maquima, 43 canda chijnijcunara camba chaqui ucui churanagama. ’ 44 David paita ‘Señor’ nisha, imasna ashara paihua churi angai?” 45 Tucui runauna uyaushcai, Jesús pai yachachishca runaunara nica: 46 ”Huacachichi yachaira yachachijcunamanda. Suni churarinahua puringaj munanaun, salurai tucunara gustanaun pulasaunai, ñaupajpi tiarinara gustanaun tandarina huasiunai, shinallara micunaunais. 47 Paiguna huaccha huarmi huasiunara tucuchinaun, yangamanda unaira mañanaun. Caiguna yali cauźayuj anaunga.”
1 Jesús ricusha, charij runaunara ricuca, paiguna Diosma cuyana cullquira cullqui malai churaucunara. 2 Shinallara shu tsuntsu huaccha huarmira ricuca, pai ishqui midiuhuara churaca. 3 Jesús nica: “Sirtu pacha cangunara nini, cai tsuntsu huaccha huarmi tucui chishujcunara yali churacami. 4 Chishujcuna puchuj cullquimanda Diosta cunauca, randi cai huarmi tsuntsu ashallara, pai tucui micuna randina cullquira churacami.” 5 Huaquin runauna templomanda rimanauca, gustu ali ricurij rumiunahua cuyashcaunahuas sumajyachishca ajpi. Jesús paigunara nica: 6 ”Cai canguna ricushcaunamanda, cangunara nini, punzhauna shamunaungami ima huras chi rumiuna mana shu rumillas shu rumi ahuai paltashca saquirinaungachu, tucuira tulashca anga.” 7 Paita tapunauca: “Yachachij,” nisha, “¿ima hurasta casna tucungairi? ¿Ima imara ricuringairi cai tucui pactaringaraupi?” 8 Shinajpi Jesús nica, “Cuiraichi ama umachi tucungaj. Ashcauna ñuca shutii shamunaungami, ‘Ñuca Cristomi ani,’ nisha; shinallara, ‘Timpu ña mayanllayaunmi,’ nishas. Shinajpis, ama catinguichichu paigunara.” 9 Canguna guiraunamanda revoluciongunamandas uyasha, ama turbarichichu. Caiguna ministirinmi ñaupa punda tucungaj; astaun tucurina huras mana uctalla shamungachu.” 10 Shinajpi Jesús paigunara nica: “Shu rey apu shu rey apuhua guiranaungami, shu gubirnu shu gubirnuhuas. 11 Shinzhi allpa cuyunauna tianaungami; yarcai timpuunas, shinzhi ungüigunas shamunaunga, huaquin partiunai. Manzhanaita atun ricurinauna ahua pachai ricurimunaungami. 12 Manara casna tucujllaira, runauna cangunara apinaungami, turmindachinaungami, tandarina huasiunama pushanaungami, chunda culargunai ishcanaungami, rey apuuna ñaupajpi, atun apuuna ñaupajpis pushashca anguichimi ñuca shutimanda. 13 Casna rashcauna cangunaj valinaungami ñucamanda rimangaj. 14 Canguna shungüi iyarichi ama ñaupara iyaringaj imara rimangajpas chi punzhaunai canguna ama cauźayachi tucungaj. ’ 15 Ñucallara shimiras iyairas cangunara cushami. Shinajpi cangunara chijnijcuna imaras cutipanara mana ushanaungachu. 16 Cangunara intriganaungami canguna quiquin yayauna, uquiuna, ailluuna, amiguunas, Cangunamanda huaquingunara huañuchinaungami. 17 Tucui runauna cangunara chijninaungami ñuca shutimanda. 18 Shinajpis mana shu acchahuas canguna umamanda chingaringachu. 19 Canguna ahuantasha chapausha, canguna almaunara gananguichimi. 20 Canguna Jerusalén llactara suldaruunahua muyuchishcara ricusha, yachaichi pai tularina huras ña pactamushcami. 21 Shinajpi Judeai tiajcuna urcuunama miticunauchu, llactai tiajcuna llucshinauchu, canzhai tiajcuna ama llacta ucuma icunauchu. 22 Cai punzhauna pagana punzhaunami, tucui quillcashcauna pactaringaj. 23 ¡Ayailla icsayujcunas, huahuara iñachijcunas, chi punzhaunai! Ashca turmindus tiangami cai pachai, ashca piñarinas cai runauna ahuai. 24 Cuchilluhua chugrichisha huañuchinaungami, paigunara apisha apanaungami tucui llactaunama. Gentilguna Jerusalén llactara aitanaungami paiguna mandana timpuuna pactaringagama. 25 ”Shinajpi indiis, quillais, istrillascunais ricurinauna ricurinaungami. Cai pachai runauna ashcara turmindarinaungami, lamar uyarishcamanda tsajlasmanda manzharisha. 26 Runauna dismayarinaungami mundui shamungaraushcaunara iyarisha chapaushcamandas. Ahua pachai tiaj ushajcuna cuyuchishca anaunga. 27 Chi huraspi, ñucara, Runa Churira, ricuhuanaungami, puyui shamuuta, ushanahuas ali sumajhuas. 28 Cai tucunauna callarijpi, shayarichi, umara atarichichi, cangunara quishpichina ña mayanllami.” 29 Shinallara Jesús paigunara shu yachachina cuintanara cuintaca: “Ricuichi,” nica, “higu yuraras tucui yuraunaras. 30 Ima huras yurauna panga llucshingaj callarinaupi, ña yachanguichimi rupai timpu mayanllayaun. 31 Shinallara canguna cai tucushcaunara ricusha, yachaichi Dios mandana pacha ña mayanllami. 32 Sirtu pacha cangunara nini, cai huras causajcuna mana pasanaungachu cai tucui tucunagama. 33 Ahua pachas, cai pachas pasanaungami, astaun ñuca shimiuna ima hurascamas mana pasanaungachu. 34 Ricuichi cangunallara, canguna shungu ama llashajyangaj yalijta micushcamanda, machashcamandas, cai causana turbarinahua mulistarishcamandas, cai punzha ama cungaimanda shamungaj cangunama. 35 Tujllai urmana cuinta cai punzha cungaimanda shamunga tucui cai pachai causajcunama. 36 Chapaichi, tucui huras mañasha, canguna valijcuna nii tucungaj, cai tucui shamungarauta quishpingaj, ñuca, Runa Churi, ñaupajpi shayangaj.” 37 Punzhaga, Jesús yachachiuca templo huasii, tuta Olivos urcuma rij aca. 38 Tutamanda tucui runauna shamunauca paita uyangaj templo huasii.
1 Pascua nishca punguichina puscu illaj tanda ista mayanllayauca. 2 Sacerdote atun apuuna yachaira yachachijcunandi mascanauca imasna rasha Jesusta huañuchingaj. Astaun runaunara manzhanauca. 3 Iscariote nishca Judaspa shungüi Satanás icuca. Pai Jesuspa chunga ishquimanda shuj aca. 4 Pai sacerdote apuunama rimai rica, suldaruuna capitangunahuas, imasna rasha Jesusta intrigana ashcaras. 5 Paiguna cushiyanauca, “Cullquira cushunmi,” ninauca. 6 Judas, “Pactachishami,” nica, Jesusta intrigangaj mascaca runauna mana riparashcai. 7 Puscu illaj tanda ista punzha pactamuca, Pascua ista buriguhua sacrificiora rana aca. 8 Jesús Pedroras Juandas cachaca, paigunara nica: “Richi, Pascua istara alichichi, ñucanchi micungaj.” 9 Paiguna: “¿Maibira munangui ñucanchi alichingaj?” ninauca. 10 Pai nica: “Llactai icujpi, llucshingami cangunara tupangaj shu yacu quisara astaj runa. Paita catichi pai icuna huasigama, 11 Chi huasiyuj duiñura rimaichi: Yachachij canda nin, ¿Maibira Pascua istara micuna ucu, ñuca chihui istara micungaj ñuca yachachishca runaunahua?’ 12 Shinajpi duiñu cangunara shu atun ahuai tiaj ucura ricuchinga, ña alichishcara. Chihui puruntuichi’ 13 Rinaucami. Jesús rimashcasna tupanauca. Pascua istara puruntunauca. 14 Huras pactamujpi, Jesús mesai tiarica, pai cachashca runaunandi. 15 Jesús paigunara nica: “Ashcara munashcani cai Pascua istara cangunahua micungaj manara turmindarijllaira. 16 Cangunara nini, caita mana mas micushachu Dios mandana pacha pactarinagama.” 17 Vasura apisha, Diosta agrasica: “Apichi, cangunapura chaupichichi,” nica. 18 ”Cangunara nini, uvillas muyumanda mana mas upishachu Dios mandana pacha shamunagama.” 19 Tandara apisha, Diosta agrasica; tandara paquisha, paigunara cuca, casna nisha: “Cai tanda ñuca aichami, canguna randimanda cushca. Caita raichi ñucara iyaringaj.” 20 Shinallara micushca huasha, vasura apica, casna nisha: “Cai vasu ñuca mushuj pactachina shimimi, ñuca yahuarbi, ñuca yahuar cangunamanda talirin. 21 Caibi ñucara intrigaj maqui ñucahua tiaun cai mesai. 22 Sirtu pacha ñuca, Runa Churi, riunimi, Dios rimashcasna. Astaun, ¡ayailla chi ñucara intrigaj runa!” 23 Shinajpi paigunapura rimanaungaj callarinauca, “¿Pita angairi ñucanchimanda casna rangarau?” 24 Yachachishca runaunapura rimananauca paigunamanda maican astaun yali atun tucunara. 25 Jesús paigunara nica: “Llacta rey apuuna runaunara mandanaun; paigunara mandajcuna ali rajcunami nishca anaun. 26 Astaumbas cangunahua mana shinachu anga. Cangunahua ñaupa aj mas malta aj cuinta tucuchu, mandajca sirvij cuinta tucuchu. 27 ¿Maicanda mas atun, mesai tiarijchu, mesai sirvijchu? ¿Manzhu mesai tiarij mas atun anga? Astaumbas ñuca cangunahua shu sirvij cuinta ani. 28 Cangunaga ñucahua tiajcunami ashcanguichi ñuca turmindarishcaunai. 29 Ñuca cangunara shu llactara cuni rey apuuna cuinta mandangaj, imasna ñuca Yaya ñucara cuhuashcami, 30 canguna ñuca mesai, ñuca llactai micungaj upingaj, cangunas tiaringaj rey apu tiarinaunai, Israelba chunga ishqui ailluunara taripangaj.” 31 Señor shinallara nica: “Simón, Simón, Satanás canda mañashcami canda shushungaj, trigu muyura shushushca cuinta. 32 Astaun canmanda rugashcani camba quirina ama pishiyachu. Can tigramushca huasha, camba uquiunara shinzhiyachingui.” 33 Pedro paita nica: “Señor, puruntumi ani canhua ringaj, mana chunda cularmalla, astaun huañunagamas.” 34 Señor paita nica: “Pedro, canda nini, gallu manara cantajllaira can quinsa cuti ñucamanda ninguimi: ‘Paita mana ricsinichu. ’ “ 35 Jesús paigunara nica: “Ñuca cangunara cullqui huacachina cara iilaj, bulsa illaj, zapatus illaj cachashcai, ¿imaras ministicanguichichu?” Paiguna ninauca: “Mana imaras.” 36 Jesús paigunara nica: “Cunaga nini, cullqui huacachina carayuj carara apai, bulsayuj bulsara apai; ispara illaj paihua capara catui isparara randingaj. 37 Cangunara nini, ministirin ñucamanda quillcashca chara ñucahua pactarina, imasna quillcashca tian: ‘Manaliunahua yupashca aca,’ Ima ñucamanda quillcashcas pactaringami.” 38 Shinajpi paiguna ninauca: “Señor, caibi ishqui isparara charinchi.” Paiga, “Bastami,” nica. 39 Jesús llucshisha, paihua yachaira, Olivos urcuma rica; pai yachachishca runaunas catinauca. 40 Chima pactajpi, Jesús paigunara nica: “Mañaichi ama tintai tucungaj.” 41 Jesús paigunamanda ansahualla anzhurisha, shu rumi shitashca tupui, cungurisha, Diosta mañaca. 42 Jesús mañasha nica: “Yaya, can munashaga, ñucamanda cai turmindarina vasura cuinta pasachi. Shinashas, mana ñuca munashcasna astaun can munashcasna rashca achu.” 43 Shu ahua pachamanda angel ricurimuca paita shinzhiyachingaj. 44 Jesús nanajta turmindariusha, mas shinzhira mañaca. Paihua umbi atun yahuar muyuuna shutushca cuinta allpama urmaca. 45 Jesús mañaushcamanda atarisha, pai yachachishca runaunajma shamusha, paigunara llaquirishcamanda puñuucunara tupaca. 46 Paigunara nica: “¿Imarasha puñuunguichiri? Atarichi, mañaichi, ama tintai tucungaj.” 47 Jesús chara rimaushcallaira, ashca runauna shamunauca, paigunamanda ñaupalla Judas, chi chunga ishquimanda shuj, llutarimuca, Jesusta muchangaj. 48 Shinajpi Jesús paita nica: “Judas, ¿Runa Churira muchanahuachu intrigahuangui?” 49 Jesushuajcuna manali tucungaraupi riparasha, ninauca: “Señor, ¿isparahua chugrichishunzhu?” 50 Paigunamanda shuj, shu sacerdote atun apura sirvijta chugrichica, paihua ali rinrira pitisha. 51 Shinajpi Jesús cutipasha nica: “Basta ña. Saqui.” Rinrira llangasha alichicami. 52 Jesús rimaca sacerdote apuunara, templo huasi guarda apuunaras, rucuunaras, paita apingaj shamujcunaras: “¿Imarasha shuhuara cuinta shamushcanguichi isparaunahua, caspiunahua? 53 Ñuca cangunahua tiashcani caran punzha templo huasii, mana apihuacanguichichu. Astaun, cuna canguna hurasmi, llandu tuta ushanauna hurasmi,” nica. 54 Jesusta apisha, paita pushanauca sacerdote atun apu huasima. Pedro carulla paita catica. 55 Huasi chaupi shungu patiubi, suldaruuna ninara apichisha, muyujta tiarinauca. Pedros paigunahua tiarica. 56 Astaun shu sirvij huarmi paita nina rayai tiarijta ricusha, paita ali pacha ricusha, “Caihuas shinallara paihua tiauca,” nica. 57 Pai, “Mana,” nisha cutipaca.”Huarmi, paita mana ricsinichu,” nica. 58 Shu ratu huasha, shujpas shamusha, nica: “Can shinallara paigunamandami angui.” Pedro chi runara nica: “Mana paigunamandachu ani.” 59 Shu hura tupu huasha, shujpas nica: “Sirtu pacha cai runas paihua pariju tiauca, Galileo runami.” 60 Pedro chi runara nica: “Mana yachanichu can rimashcara.” Chi ratullai, Pedro chara rimaullaira, gallu cantaca. 61 Shinajpi Señor vultiarisha Pedrora ricuca. Pedro Señor ñaupa rimashcara iyarica, imasna Jesus rimashca aca: “Manara gallu cantajllaira can quinsa cuti, ‘Mana ricsinichu,’ ninguimi.” 62 Pedro canzhama llucshisha llaquira huacaca. 63 Jesusta cuiraj runauna paita burlanauca, sajmanauca. 64 Paihua ñahuira huatasha, ñahuii sajmasha, paita tapunauca: “Rimai, ¿pita canda sajmacai?” 65 Ashca shu shimiunahua paita caminauca. 66 Na punzhayaupi, rucuuna tandarimunauca, sacerdote apuunahua, yachaira yachachijcunahuas. Jesusta pushamunauca gubirnui mandajcuna tandarinama, paita nisha: 67 ”¿Can Cristochu angui? Rimahuai ñucanchira” ninauca. Jesús cutipaca: “Ñuca rimajpis, mana quirihuanguichichu. 68 Shinallara ñuca cangunara tapujpis, mana cutipahuanguichichu, mana cacharihuanguichichu. 69 Randi, cuna hurasmanda pacha, ñuca, Runa Churi, tiarishami Diospa ushana ali maqui partima.” 70 Tucui paita ninauca: “¿Canga Diospa Churichu angui?” Jesús cutipaca: “Cangunara shina ninguichiga.” 71 Shinajpi ninauca: “¿Ima shimirara mas ministina angairi? Ñucanchillara paihua quiquin shimimanda uyashcanchi.”
1 Shinajpi tucui chi muntunguna atarisha, Jesusta pushanauca Pilatojma. 2 Jesusta cauźayachingaj callarinauca, casna nisha: “Cai runara tupashcanchi runaunara huajlichijta, ‘Impuistu cuílquira César apuma ama pagaichichu,’ nijta, shinallara, ‘Ñucallarami Cristo Rey Apu ani,’ nijta.” 3 Shinajpi Pilato paita tapuca: “¿Canzhu judiuguna rey apu angui? Jesús cutipaca: “Canda shina ninguiga.” 4 Pilato sacerdote apuunama runaunamas nica: “¿Ima cauźaras mana tupanichu cai runai.” 5 Astaun paiguna mas tucunauca, casna nisha: “Runaunara turbachin, tucui Judeai yachachisha, Galileamanda caigama. 6 Shinajpi Pilato Galilea shutira uyasha, tapucami: “¿Cai runa Galileamanda runachu?” 7 Jesús Herodes taripana partimanda shamuj ajta uyasha, Pilato paita Herodespajma cachaca. Herodes chi huras Jerusalembi tiauca. 8 Herodes Jesusta ricusha cushiyaca; unaimanda Jesusta ricunara munaca. Pai Jesusmanda ashcara uyaj aca, ima Jesús munanaita rashcaras ricungaj munaca, 9 Herodes Jesusta ashcara tapuca, astaun Jesús imaras mana cutipacachu. 10 Sacerdote apuunas yachaira yachachijcunas shinzhira rimasha paita cauźayachinauca. 11 Shinajpi Herodes paihua suldaruunandi Jesusta pishii urmachinauca, burlanauca, ali ricurij churarinahua churachisha. Cuti paita Pilatojma cachaca. 12 Chi punzha Pilatohua Herodeshua amigupura tucunauca, ñaupa chijninausha causaujcuna. 13 Shinajpi Pilato sacerdote apuunaras, shuj mandaj apuunaras, runaunaras cayaca. 14 Paigunara nica: “Canguna cai runara ñucajma cachamushcanguichi, ‘Runara turbachij,’ nisha. Astaun paita canguna ñaupajpi tapushca huasha, canguna uchachishcara mana ansas tupashcanichu paihuajpi. 15 Shinallara Herodes mana imaras tupashcachu; ñuca paita Herodesma cachacani. Cai runa mana ima huañuchihuaj tupuras rashcachu. 16 Livachishca huasha, ñuca paita cacharisha.” 17 Shu runara cacharina aca caran istai. 18 Tucui runauna, parijulla caparisha, ninauca: “Cai runara ichui, Barrabasta cachari.” 19 Barrabás chunda cularbi shitashca aca llactai macanaushcamanda, shu runara huañuchishcamandas. 20 Cuti Pilato paigunara rimaca: “Jesusta cacharisha,” nisha. 21 Astaun runauna cutillara caparinauca: “Chacatai, chacatai.” 22 Pilato ña quinsa cuti rimaca: “¿Ima manalira rashcairi cai runa? Mana ima huañuna tupu rashcaras tupashcanichu paihuajpi. Paita livachishca huasha cacharisha. 23 Runauna shinzhi shimihua caparinauca: “Jesusta chacatashca achu.” Paiguna shimiuna, sacerdote apuuna shimiunas vinsinauca. 24 Shinajpi Pilato paiguna munashcasna cauźayachica. 25 Shinajpi paigunama chunda cularbi ishcashca turbachij huañuchij runara cacharica, paiguna mañashcara, Jesusta intrigaca paiguna munashcasna rangaj. 26 Jesusta pushaushcai, shu Cirene llactamanda Simonda apinauca, llacta canzhamanda shamujta. Cruzta paita apachinauca, Jesuspa huashalla apasha ringaj. 27 Ashca runauna paita catimunauca, huacau huarmiunandi, Jesusta nisha ashcara huacanauca. 28 Astaun Jesús paigunama vultiarisha, nica: “Jerusalenmanda ushushiuna, ama ñucamanda huacaichichu, astaun canguna quiquinmanda, canguna churiunamandas huacaichi. 29 Punzhauna shamunaungami ima huras ninaunga: “Cushimi huahua illajcuna, huahuara mana tupaj icsauna, mana iñachij chuchuunas. 30 Chi huras atun urcuunara rimangaj callarinaunga: ‘Urmaichi ñucanchi ahuai,’ ichilla urcuunaras, ‘Quillpahuaichi,’ ninaunga. 31 Yura virdi ajllaira casna rasha, ¿imasnara ranaungai chaquishcai?” 32 Jesushua pariju ishqui manali raj runaunara pushamunauca, paigunaras huañuchingaj. 33 Uma Tullu nishca pambama pactamusha, chihui Jesusta chacatanauca; shinallara chi ishqui manalira raj runaunaras, shujta ali maqui partima, chishujta lluqui maqui partima. 34 Jesús nica: “Yaya, paigunara perdonapai. Paiguna rashcara mana intindinaun.” Paigunapura paihua churarinara chaupichisha, maican lichayuj ajta camasha cunauca. 35 Runauna ricurianauca. Apuunas paita burlanauca: “Shujcunara quishpichica; paillarara quishpichichu, pai Dios ajllashca Cristo asha” ninauca. 36 Suldaruuna shinallara paita burlanauca; llutarisha, ayaj vinura ricuchinauca. 37 ”Can judiu rey apu asha, canllara quishpi” ninauca. 38 Paihua uma ahuai quillcashca tiauca griegu, latin, hebreo shimiunai, casna nisha: “Caimi Judiuguna Rey Apu.” 39 Jesushua pariju huarcushca manali rajcunamanda shuj Jesusta camisha, nica: “Can Cristo asha, canllara quishpi, ñucanchiras quishpichihuai.” 40 Chishuj paita piñaca: “Manzhu can Diosta manzhangui cambas shinallara cauźayachishca asha? 41 Ñucanchi sirtu pacha alira turmindariunchi, ñucanchi quiquin manali rashcaunamanda apiunchi. Cai runaga ima manaliras mana rashcachu.” 42 Pai Jesusta nica: “Iyarihuapangui can camba mandana pachai shamujpi.” 43 Shinajpi Jesús paita cutipaca: “Sirtu pacha canda nini, cuna punzhallara ñucahua pariju Paraíso llactai tiaunguimi.” 44 Doce hurasmanda pacha, llandu tucuca tucui partii, las tres chishi tupugama, 45 Indi llanduyaca. Templo huasii huayushca llachapa lliquirica chaupi chaupii. 46 Shinajpi Jesús shinzhira caparisha, nica: “Yaya, ñuca ispiritura camba maquii intrigauni.” Casna nisha samai pitirica. 47 Suldaru capitán casna tucushcara ricusha, Diosta alabaca: “Sirtu pacha cai runa ali dirichu runami aca.” 48 Tucui chihui taucarai runauna, casna tucushcara ricujcuna, chita ricushca huasha tigranauca, paiguna pichura huactasha. 49 Astaun tucui Jesusta ricsijcuna, paita catimuj huarmiunandi, carumandalla casna tucushcaunara ricunauca. 50 Shu José nishca runa tiaca, Arimateamanda shamuj. Arimatea shu Judea llactami aca. Cai José shu gubirnui mandaj runa aca, ali dirichu runa. 51 Cai runa shinallara Diospa mandana pachara chapauca, mana munacachu chishujcuna rimashcaunara, paiguna rashcaunaras. 52 José Pilatoma risha, Jesuspa aichara mañaca, 53 Jesuspa aichara irguchisha, shu llachapahua pilluca. Shu rumii allashca pambana uctui churaca. Uctu mushuj aca, chara mana pitas chihui churaushca. 54 Cayandi punzha pascua ista tucungarauca, samana punzha ñalla punzhayangarauca. 55 Galileamanda cumpañasha shamuj huarmiuna shinallara catinauca, pambashca uctura ricunauca, imasna paihua aicha sirishcaras. 56 Huarmiuna tigrasha, ali asnaj ambiunaras iraunaras alichinauca. Samana punzhai samanauca, camachishca shimii rimashcasna.
1 Simana ñaupa punda punzhai, tutamandara, huarmiuna pambashca uctuma shamunauca, paiguna alichishca ali gustu asnaj ambiunara apamusha. Paigunahua shu huarmiunas shamunauca. 2 Rumira pambashca uctumanda shujma anzhuchishcara tupanauca. 3 Icusha, Señor Jesuspa aichara mana tupanaucachu. 4 Paiguna manzharisha shayaushcai, cungaimanda paigunahua pariju ishqui runauna chiujlla ricurij churarinayuj shayarinauca. 5 Huarmiuna manzharisha, allpama ñahuirasha cumurinauca. Runauna paigunara ninauca: “¿Imarasha causauta huañushcaunai mascaunguichiri? 6 Illanmi caibi, astaun causarishcami. Iyarichi pai cangunara rimashcara chara Galileai tiaushcai, 7 casna nisha: ‘Ministirin Runa Churi uchayuj runauna maquiunai intrigashca achu, chacatashca achu, quinsa punzhai causarichu. ’ “ 8 Shinajpi Jesús rimashca shimiunara iyarinauca. 9 Pambashca uctumanda tigrasha, cai tucuira cuintanauca chunga shujcunama tucui chishujcunamas. 10 Chi huarmiuna María Magdalena, Juana, Jacobo mama María anauca, shu huarmiunandi. Paiguna cai tucuira Jesús cachashca runaunara cuintanauca. 11 Astaumbas, huarmiuna paigunara rimashca shimiuna lucuuna rimashca cuinta yachica. Mana quirinaucachu paigunara. 12 Pedro atarisha, callpasha rica pambashca uctuma. Ucuma ricusha, llachapaunara sapalla siriuta ricuca. Huasima tigraca, casna tucushcaunamanda manzharisha. 13 Chi punzhallaira, paigunamanda ishqui shu Emaus nishca ichilla llactama ririanauca. Cai Emaus Jerusalenmanda ishqui samai tupu aca. 14 Paiguna riushcai, tucui chi punzhaunai tucushcaunamanda cuintananauca. 15 Paigunapura cuintanausha rimanaushas riushcai, Jesusllara llutarimusha, paigunahua riuca. 16 Astaun paiguna ñahuiuna arcashca anauca, paita ama ricsingaj. 17 Jesús paigunara nica: “¿Imara rimanaunguichi canguna puriushcai? ¿Imarasha llaquiringuichiri?” 18 Paigunamanda shuj, Cleofas nishca, cutipaca: “¿Canllachu carumanda purij angui Jerusalembi, chihui cai punzhaunai tucushcaunara mana yachangaj?” 19 Shinajpi Jesús paigunara nica: “¿Ima tucushcaunara?” Paiguna cutipanauca: “Nazaret Jesusmanda. Pai shu Diosmanda rimaj aca, yapa ushayuj pai rashcaunahuas, pai rimaushca shimiunahuas, Diospa ñaupajpis runauna ñaupajpis; 20 shinallara imasnara sacerdote apuuna, ñucanchira mandaj apuunas paita intriganauca huañungaj, paita chacatanauca. 21 Astaun ñucanchi iyacanchi pai Israelda Quishpichij tucunami aca. Ña quinsa punzhami cai tucui tucushca. 22 Shina ajllaira, ñucanchijmanda huaquin huarmiuna tuta ucura pambashca uctuma rijcuna ñucanchira manzhachinaushca. 23 Jesuspa aichara mana tupasha shamunaucami, ‘Angelgunara ricushcanchi,’ nisha, ‘Angelguna Jesús causaunmi,’ ninauca. 24 Ñucanchimandas huaquinguna pambashca uctuma rinauca. Huarmiuna rimashcasna tupanauca, astaun Jesusta mana ricunaucachu.” 25 Shinajpi paigunara nica: “¡Upauna, mana uctalla quirijcuna, Diosmanda rimajcuna tucui rimashcaunara quiringaj! 26 ¿Manzhu ministirica Cristo turmindaringaj cai tucuira, chi huasha paihua sumaj tianai icungaj?” 27 Moisesmanda pacha callarisha, tucui Diosmanda rimajcuna rimashcara catisha, tucui Quillcaunamanda paigunara ricuchica paimanda rimashca shimiunara. 28 Paiguna riushca ichilla llactama pactamunauca, astaun Jesús mas caruma riu cuinta tucuca. 29 Astaun paita saquichinauca, “Ñucanchihua saquiri,” nisha, “ña chishi tucun, tutayaunmi.” Pai icuca paigunahua saquiringaj. 30 Paiga, paigunahua mesai tiarisha, tandara apisha, bindisiaca, paquica, paigunara cuca. 31 Shinajpi paiguna ñahuiuna pascarinauca, paita ricsinaucami. Astaun, cungaimanda Jesus chingarica paiguna ñaupajmanda. 32 Paigunapura ninauca: “¿Manzhu sindinauca ñucanchi shunguuna pai ñucanchihua rimaushca huraspi, Quillcaunara ñucanchijma pascaushca ratui?” 33 Atarisha chi hurasllaira, Jerusalenma tigranauca. Chunga shuj runaunara tandarishcara tupanauca, paigunahua pariju tiajcunandi. 34 Chihui ajcuna ninauca: “Señor sirtu pacha causarishcami, Simonma ricurishca.” 35 Shinajpi paiguna cuintanauca paigunahua ñambii tucushcaunara, imasnara paita ricsinauca tandara paquiushcai. 36 Paiguna chara chigunamanda rimaushcallaira, Jesús paiguna chaupi shungüi shayarisha, paigunara nica: “Cushiyaichi.” 37 Shinajpi manzharisha, shu ayara ricushcasna iyanauca. 38 Astaun Jesús paigunara nica: “¿Imarasha turbaringuichi, casna iyaiguna canguna shungüi shamujpi? 39 Ñuca maquiunara ricuichi, ñuca chaquiunaras, Ñucallarami ani. Llangaichi ñucara, ricuichi, shu aya, shu ispíritu mana aichayujchu, mana tulluyujchu canguna ñuca charishcara ricushcasna.” 40 Casna rimasha, paihua maquiunaras chaquiunaras ricuchica paigunara. 41 Paiguna chara mana quirisha cushiyashcamanda, manzharishas raushcallai, Jesús paigunara nica: “¿Imaras charinguichichu caibi micungaj?” 42 Shinajpi shu cusashca aichahua partira caranauca, ansa sacha mishquihua. 43 Pai apisha micuca paiguna ñaupajpi. 44 Jesús paigunara nica: “Caigunami ñuca cangunara rimashca shimiuna, ñuca chara cangunahua tiaushcai. Ministirica pactaringaj tucui ñucamanda quillcashcauna Moisespa ley shimiis, Diosmanda rimashcaunais, Salmos cantanaunais.” 45 Shinajpi, Jesús paiguna iyaira pascaca, Quillcashcaunara intindingaj. 46 Paigunara nica: “Casnami quillcashca aca, casnami ministirica Cristo turmindarichu, huañushcaunamanda causarichu quinsa punzhai; 47 ñuca shutii yachachinauchu aripintirinaras, ucharashcara perdonanaras tucui llactaunai, Jerusalenmanda callarisha. 48 Canguna cai tucuira ricujcuna anguichi. 49 Ñuca Yaya cushca shimira canguna ahuai cachamusha. Astaun saquirichi Jerusalén llactallai ahuamanda ushanara cui tucunagama.” 50 Jesús paigunara canzhama pushaca, Betania llactagama. Paihua maquiunara ahuai churasha, paigunara bindisiaca. 51 Paigunara bindisiaushca ratullaira paigunamanda anzhurica, ahua pachama apashca tucuca. 52 Paiguna, Jesusta adurashca huasha, cushihua Jerusalenma tigranauca. 53 Tucui huras Diospa huasii tianauca, Diosta alabashas bindisiashas. Amen.
1 Callari timpui Causaj Shimi tiaj aca. Cai Causaj Shimi Dioshua tiaj aca. Cai Causaj Shimi Dios aca. 2 Callari timpui Dioshua tiaj aca. 3 Tucui rashcauna pai rashcami aca. Pai illaj mana imaras rashcachu aca, 4 Paihuajpi causai tiaca. Cai causai runaunara punzhayachina aca. 5 Cai punzhayachina yana tutara punzhayachin, astaun yana tutaga punzhayachijta mana vinsinara ushacachu. 6 Shu Dios cachamushca runa, Juan nishca, tiaca. 7 Cai Juan shamuca rimangaj, cai punzhayachinara ricsichingaj, pai rimashcamanda tucui runauna quirinauchu. 8 Juan mana cai punzhayachinachu aca, astuan cai punshayachinara ricsichingaj shamucami. 9 Chi sirtu punzhayachina, tucui runaunara punzhayachij, cai pachama shamuca. 10 Paiga cai pachai tiaca. Cai pacha pai rashcami aca. Astaun cai pacha mana paita ricsicachu. 11 Paihuajma shamuca, randi paihuajcuna mana paita chasquinaucachu. 12 Astaumbas tucui paita chasquijcunara ushaira cuca Diospa churiuna tucungaj, maicans paihua shutii quirisha. 13 Caiguna mana yahuarmanda, mana runa aichamandas, mana runa munaimandas iñachishca anaun. Astaun Diospa munaimandalla iñachishca anaunmi. 14 Cai Causaj Shimi runa tucuca, ñucanchihua pariju causaca. Ali llaquina iyaihuas sirtu rimana shimihuas undashca aca. Paihua sumajta ricucanchi, Yaya Diospa sapalla Churi sumaj cuinta. 15 Juan paimanda rimasha, caparisha nica: “Caimi ñuca rimaushca runa, ñuca huashai shamuj ñucamanda yalimi, pai ñucamanda ñaupa ashcaraigu.” 16 Pai ashcara charishcamanda tucui ñucanchi apishcanchi, maspas paihua mana tucurihuaj ali llaquina iyairas. 17 Ley camachishca shimi Moisesmanda cushca aca, randi ali llaquina iyais sirtu shimis Jesucristomanda shamunauca. 18 Pihuas ima huraspas Diosta mana ricushcachu. Paihua sapalla Churi, Yayahua pariju tiaj, pailla Diosta ricsichicami. 19 Caita Juan rimashcami ima huras judiuguna Jerusalenmanda sacerdoteunara levitas nishcaunandi cachanauca paita tapungaj: “Can, ¿pitanguiri?” nisha. 20 Pai sirtura rimaca, mana llullacachu, astaun sirtura rimaca: “Ñuca mana Cristochu ani.” 21 Paita tapunauca: “¿Pitanguiri? ¿Elíaschu angui?” Paiga, “Mana,” nica.”¿Diosmanda rimajchu angui?” Paiga cutipaca: “Mana.” 22 Paita ninauca: “Shinajpi, ¿pitanguiri? Cuintahuai, ñucanchira cachamujcunara cutipangaj. ¿Imara ningui can quiquinmanda?” 23 Juan nica: “Ñuca runa illashca partimanda caparij shimi ani: ‘Señorba ñambira dirichuichi,’ nisha, ‘Diosmanda rimaj Isaías rimashcasna.” 24 Cai cachamushca runauna fariseogunamanda anauca. 25 Shinajpi Juanda tapunauca: “¿Imarasha bautisangui can mana Cristo asha, mana Elías asha, mana Diosmanda rimaj asha?” 26 Juan paigunara cutipasha nica: “Ñuca yacui bautisani; randi canguna chaupi shungüi shuj canguna mana ricsishca runa tiaun. 27 Caimi ñuca huashai shamuj. Paiga ñucamanda yalimi. Paihua zapatus huascaunara pascanallas mana valijchu ani.” 28 Caiguna Betabara llactai tucuca, Jordán yacu chimbama, Juan bautisaushcai. 29 Cayandi punzha Juan Jesusta paihuajma shamuuta ricuca. Pai Jesusta ricusha, nica: “Caimi Diospa Burigu, cai pacha uchara llushpichij. 30 Caimi ñuca rimaushca runa: ‘Ñuca haushai shamuj ñucamanda yalimi, pai ñucamanda ñaupa tiaj ashcaraigumanda. ’ 31 Paita mana ricsicanichu; astaun Israelma paita ricsichingaj, ñuca yacui bautisasha shamucani.” 32 Shinallara Juan nica: “Ispiritura urpisna ahua pachamanda irgumujta ricucani; paihua ahuai tiauta. 33 Ñuca paita mana ricsicanichu; randi ñucara yacui bautisangaj cachamuj ñucara nihuaca: ‘Maicamba ahuai Ispíritu urmashcara ricungui, paihua ahuai tiauta, paimi Santu Ispirituhua bautisanga. ’ 34 Paita ricucani. Sirtura rimashcani: ‘Caimi Diospa Churi,’ “ nisha. 35 Cayandi punzha Juan cutillara chihui tiauca, ishqui pai yachachishca runaunandi. 36 Juan Jesusta chihui puriuta ricuusha: “Caiga Diospa Burigumi,” nica. 37 Chi ishqui yachachishca runauna pai rimashcara uyanauca, Jesusta catinauca. 38 Jesús vultiarisha, paita catijcunara ricuca.”¿Imara mascaunguichi?” nica. Paiguna cutipasha ninauca: “Rabí, ¿maibira causangui?” (‘Rabí’ runa shimii ‘Yachachij’ nin). 39 Jesús nica: “Ricuj shamichi.” Paiguna risha, pai tiaushcara ricunauca. Las cuatro mayan tucujpi paihua pariju saquirinauca chi punzhai. 40 Cai ishqui Juan rimashcara uyajcunamanda, Jesusta catimujcunamanda, shuj Andrés aca, Simón Pedro uqui. 41 Pai paihua uqui Simonda ñaupa punda tupasha, paita nica: “Mesíasta tupashcanchi.” (‘Mesías’ runa shimii nin ‘Cristo. ’) 42 Andrés paihua uqui Simonda Jesusma pushamuca. Jesús paita ricusha: “Can Simón angui, Jonaspa churi,” nica, “canda Cephas shutichishca angui” caita Pedro nin. 43 Cayandi punzha Jesús Galilea partima rinara munaca, Pai Felipera tupasha, paita nica: “Ñucahua catihuai.” 44 Felipe Betsaida llactamanda aca, Andrespas Pedros causaushca llacta. 45 Felipe Natanaelda tupaca. Paita nica: “Moisés pai camachishca shimii quillcaushca runara tupashcanchi. Diosmanda rimajcuna shinallara paimanda quillcanauca. Paimi Nazaretmanda Jesús, José churi.” 46 Natanael nica: “¿Nazaretmanda ima alis shamunara ushangachui?” Felipe cutipaca: “Ricuj shami.” 47 Jesús Natanaelda paihuajma shamushcara ricusha, Natanaelmanda rimasha nica: “Cai runa sirtu Israel runami, paihuajpi mana ima umachinas tianzhu.” 48 Natanael paita nica: “¿Maimandara ricsihuacangui ñucara?” Jesús cutipaca: “Felipe manara canda cayashcaira, can higu yura ucui shayaushcai, canda ricucani.” 49 Natanael cutipasha rimaca: “Rabí, Yachachij,” nisha, “can Diospa Churi angui, Israel Rey Apumi angui.” 50 Cutipasha, Jesús paita nica: “¿Ñuca, ‘Canda higu yura ucui ricucani,’ nishcamanda quiringui? Caigunamanda yaliunara ricunguimi.” 51 Jesús nica: “Sirtu pacha cangunara nini: caimanda huasha ahua pacha pascashcara ricunguichimi; Diospa angelgunara Runa Churi ahuai sicasha irgusha rajcunara ricunguichimi.
1 Quinsa punzha tucunahua, burara ranauca Galilea partii tiaj Caná llactai. Jesuspa mama burai tiauca. 2 Jesús pai yachachishca runaunandi burama convirashca anauca. 3 Burai, vinu pishijpi, Jesuspa mama paita nica: “Vinu illan.” 4 Jesús paita nica: “¿Huarmi, imarasha casna rimahuangui? Ñuca huras chara mana pactamushcachu.” 5 Paihua mama sirvijcunara nica: “Tucui pai imara rimashcaras ranguichi.” 6 Chihui sucta atun rumi quisauna tianauca, judiuguna yachai maillarina tunu, caran quisa quinsa manga tupu aca. 7 Jesús paigunara nica: “Quisaunara undachichi yacuhua.” Shinajpi undajta undachinauca. 8 Shinajpi paigunara nica: “Llucchichi cuna. Burayuj duiñuma apaichi.” Apanaucami. 9 Cai yacumanda rashca vinura camashca huasha, burayuj duiñu maimanda apamushcara mana yachaca, randi yacura llucchij sirvijcuna yachanaucami; pai carira cayaca. 10 Carira nica: “Tucui runa ñaupa punda ali vinura upichin; pactajta upishca huasha yanga vinura cun; randi can ali vinura cunagama huacachishcangui.” 11 Cai ñaupa punda munanaita ricurinara Jesús Galileai tiaj Caná llactai rarcami, paihua sumajta ricuchisha. Pai yachachishca runauna paita quirinauca. 12 Caimanda huasha Capernaum llactama irgunauca, paihua pariju paihua mama, paihua uquiuna, pai yachachishca runaunandi. Mana ashca punzhaunara chihui tianaucachu. 13 Judiuguna Pascua ista mayanllayauca. Jesús Jerusalenma sicaca. 14 Templo huasii huagrara burigura urpira catujcunara tupaca: shinallara cullquira turcajcunara chihui tiajcunara tupaca. 15 Jesús huascaunara ahuasha azutinara rarcami. Tucui chigunara templomanda ichuca, buriguunandi, huagraunandi. Shinallara turcajcuna cullquira allpama talica, paiguna mesaunaras vultiachica, 16 Urpira catujcunara nica: “Llucchichi cai tucuira. Ñuca Yaya huasira ama catuna huasira raichichu.” 17 Shinajpi pai yachachishca runauna ñaupa huras quillcashcara iyarinauca, imasna nin: “Camba huasira llaquina tucuchihuanmi.” 18 Judiuguna paita cutipanauca: “¿Ima munanaita ricurinara ricuchihuanguichu cai tucuira rasha?” 19 Jesús cutipasha, nica: “Cai templora tulaichi, ñuca quinsa punzhai cuti shayachishami.” 20 Judiuguna caita uyasha, ninauca: “Chuscu chunga sucta huatara tarabasha cai templora shayachishca aca, canga ¿quinsa punzhallaichu shayachingui?” 21 Jesús, ‘templo’ nisha, paihua quiquin aichamanda rimauca. 22 Shinajpi, pai huañushcaunamanda causarimushcai, pai yachachishca runauna cai rimashcara iyarinauca. Dios quillcashcara quirinaucami, shinallara Jesús rimashca shimira quirinauca. 23 Jesús Jerusalembi tiaushcai, Pascua ista punzhaunai, ashca runauna Jesuspa shutii quirinauca, pai munanaita ricurina rashcaunara ricusha. 24 Jesús paillara paiguna maquii saquinara mana munacachu, tucui runaunara ricsishcamanda. 25 Runaunamanda pihuas rimanara mana ministicachu. Pai tucui runauna shungüi charishcara yachaca.
1 Shu Nicodemo nishca fariseo runa tiaca; judiuguna atun apu aca. 2 Nicodemo Jesusma tuta shamuca: “Rabí, Yachachij,” nica, “can Diosmanda shamuj yachachij ajta ricsinchi. Manapihuas can rashcasna munanaita ricurinaunara rangaj ushanma Dios mana paihua tiajpi.” 3 Jesús cutipasha paita nica: “Sirtu pacha canda nini: maicambas mana cuti pagarisha, Dios mandana pachara ricunara mana ushangachu.” 4 Nicodemo nica: “Shu runa, ¿imasna rasha cuti pagaringachu rucu ashcai? ¿Paihua mama icsai cuti icunara ushangachu pagaringaj?” 5 Jesús cutipaca: “Sirtu pacha canda nini, maicans yacumandas Ispiritumandas mana pagarisha, Dios mandana pachai icunara mana ushangachu. 6 Aichamanda pagarij aichami; Ispiritumanda pagarij ispiritumi. 7 Ama manzharichu ñuca canda nishcamanda: ‘Cutillara pagarina anguichi. ’ 8 Huaira maimandas huairamun, pai uyarishcara uyangui. Astaun huaira maimanda shamushcaras, maima rishcaras mana yachanguichu. Shinallarami tucui Ispiritumanda pagarishcauna.” 9 Nicodemo paita cutipasha nica: “¿Imasna rasha casna tucungai?” 10 Jesús paita cutipaca: “¿Can Israel Yachachij Apu ashallara, caita mana yachangui?” 11 Sirtu pacha canda nini, ñucanchi yachashcara rimanchi, ñucanchi ricushcara ricuchinchi; canguna ñucanchi rimashcaunara mana chasquinguichi. 12 Canguna ñuca cai pachamanda cuintashcaunara mana quirisha, ¿imasna rashara ñuca ahua pachamanda cuintashcaunara quiringuichi? 13 Pihuas ahua pachama mana sicacachu, astaun ahua pachamanda irgumujlla; pai ahua pachai tiaj Runa Churimi. 14 Imasna Moisés chaquishca allpa partii machacuira atarichica caspi ahuai, shinallarami Runa Churi atarichishca anga, 15 maicambas paihuajpi quirisha ama chingarichu, astaumbas huiñai causaira charichu. 16 ”Casnami Dios cai pachara llaquica, paihua sapalla Churira cuca, maicans paihuajpi quirisha ama chingarichu, astaumbas huiñai causaira charichu. 17 Dios paihua Churira mana cachamucachu cai pachara cauźayachingaj, astaun paimanda cai pachara quishpichingaj. 18 Maicans paihuajpi quirijta mana cauźayachishcachu, astaun maicans mana quirijta ña cauźayachishcami, Diospa sapalla Churi shutii mana quirishcamanda. 19 Caimi cauźayana: punzha cai pachama shamuca, runauna punzhamanda yalira tutara llaquinauca, paiguna rashcauna manali ashcamanda. 20 Tucui manalira rajcuna punzhara chijninaun, punzhama mana shamunaun, paiguna rashcaunamanda ama piñai tucungaj. 21 Alira rajca punzhama shamun pai rashcauna Diosmanda rashcaunami nisha ricuchingaj.” 22 Chi huasha, Jesús pai yachachishca runaunandi Judea partima shamuca. Paigunahua chihui tiaushcai bautisacami. 23 Juan shinallara Enon llactai bautisauca. Salim llacta mayambi, ashca yacu chihui tiashcamanda. Shamujcunara bautisaca. 24 Juan chunda cularbi manara ishcashcachu aca. 25 Juan yachachishca runauna judiugunahua rimananauca paiguna aichara maillarinamanda. 26 Juanma shamunauca: “Rabí, Yachachij,” nisha, “canhua Jordán chimbai tiau runa, can rimaushca, shinallara bautisaunmi; tucui paihuajma shamunaun.” 27 Juan cutipaca: “Runa mana imaras apinara ushanzhu mana paima cushca ajpi ahua pachamanda. 28 Cangunallara ñuca rimashcara uyajcuna anguichi, ñaupa cachamushca ani. ’ 29 Huarmira charijca carimi; randi cari amigu, paihua pariju shayarij, paihua shimira uyasha, ashcara cushiyan cari shimira uyashcamanda. Shinami ñuca cushi pactarin. 30 Pai yaparinara ministirin, ñucaga pishiyanara.” 31 ”Ahuamanda shamuj tucuimanda yalimi. Cai pachamanda ajca cai pachamandallami, cai pachamanda shimiunara riman. Ahua pachamanda shamuj tucuimanda yalimi. 32 Imara ricusha uyasha, caillara riman. Mana pihuas pai rimashcara chasquinzhu. 33 Maicans pai rimashcara chasquisha, Dios sirtu rimaj ashcara ricuchin. 34 Dios cachamushca Runa Dios rimashca shimiunara riman. Dios Ispiritura mana tupusha cunzhu. 35 Yaya Churira llaquin; tucuira paihua maquii intrigashcami. 36 Maicans Churii quirisha huiñai causaira charin. Maicans Churira mana caźusha, causaira mana ricungachu, randi Dios piñarishca paihua ahuaimi.”
1 Señor Jesús Fariseoguna uyaushcara riparasha, casna rimaushcara: “Jesús Juanmanda yali runaunara yachachin, shinallara bautisaun,” nisha, 2 (randi Jesús mana bautisacachu, astaun pai yachachishca runauna bautisarianauca), 3 Jesús Judea partimanda llucshisha, cutillara Galilea partima rica. 4 Ministiricami Samaria partira pasangaj. 5 Shinajpi Jesús shu Samaria partii tiaj Sicar llactama pactamuca. Cai llacta Jacob paihua churi Josema cushca allpa mayambi aca. 6 Jacobpa yacu bujyu chihui tiaca. Shinajpi Jesús ñambira purisha, sambayashca asha, yacu bujyu rayai tiarica, doce huras tupui. 7 Shu Samariamanda huarmi yacura apangaj shamuca. Jesús paita nica: “Yacura upichihuai.” 8 Yachachishca runauna micunara randingaj llactama rinaushca aca. 9 Samariamanda huarmi Jesusta nica: “¿Imarasha can judiu runa asha ñucara upina yacura mañangui, ñuca Samaria huarmi ajllaira?” Judiuguna Samaria runaunahua mana llutarinaun. 10 Jesús cutipaca: “Can Dios cushcara ricsisha, canda ‘Upichihuai,’ nisha rimajtas ricsisha, cai paita mañanguima, pai causana yacura canda cunma.” 11 Huarmiga nica: “Señor, imaras mana charingui yacura llucchingaj; yacu uctu yapa ucumi. ¿Maimanda cai causana yacura charinguichu? 12 Ñucanchi Jacob yaya cai yacu uctura cuyahuaca. Cai yacu uctumanda pai upiuca churiunandi animalgunandi. Canga, ¿paimanda yalichu angui?” 13 Jesús cutipaca: “Maicans cai yacura upisha cutillara upinaichingami. 14 Randi maicans ñuca cushca yacura upisha, huiñaigama mana cuti upinaichingachu. Ñuca cushca yacu paihua shungu ucui yacu bujyu cuinta pahuangami huiñai causaira cungaj.” 15 Huarmiga paita nica: “Señor cai yacura cuhuai, ñuca ama upinaichingaj, ama caima llucchij shamungaj.” 16 Jesús nica: “Carira cayai risha, caima shamichi.” 17 Huarmi cutipaca: “Cari illaj ani.” Jesús nica: “Sirtura ningui. ‘Cari illaj ani,’ nisha. 18 Pichca carira charishcangui; can cuna chariushca mana quiquin carichu. Shina nisha, sirtura rimashcangui.” 19 Huarmi nica: “Señor, can Diosmanda rimaj angui, yachin. 20 Ñucanchi yayauna cai urcui Diosta alabanauca. Randi canguna ninguichi Jerusalenllai Diosta alabanami.” 21 Jesús paita nica: “Huarmi, quirihuai, huras pactaringami mana cai urcuis, mana Jerusalembis Yayara alabanguichi. 22 Canguna mana ricsishcara aduranguichi; randi ñucanchi ricsishcallara aduranchi. Quishpina judiugunamanda shamun. 23 Huras shamun, cunallara pactamun, ima huras sirtu adurajcuna Yayara almai sirtu aduranaungami. Shinallara Yaya casna adurajcunara mascanmi paita adurangaj. 24 Dios Ispiritumi. Paita adurajcuna almai sirtu pacha adurangaj ministirinmi.” 25 Huarmi paita nica: “Ñuca yachanimi Mesías nishca shamunara, paita Cristo nishca shutichishcami. Pai shamusha ñucanchira tucuira yachachinga.” 26 Jesús paita nica: “Ñuca canhua rimau, Cristo ani.” 27 Chi ratullaira pai yachachishca runauna shamunauca. Jesús cai huarmihua rimaushcamanda manzharinauca, astaun mana pihuas paita tapucachu: “¿Imara tapungui? ¿imara paihua rimangui?” nisha, 28 Shinajpi huarmi paihua quisara saquisha, llactama rica, runaunara rimaca: 29 ”Ricuj shamichi,” nica “shu runara, pai ñuca tucui rashcaunara rimahuashcami. ¿Manzhu cai Cristo angai?” 30 Shinajpi llactamanda llucshimusha, runauna Jesusma shamunauca. 31 Yachachishca runauna Jesusta: “Yachachij, micui,” nisha ruganauca. 32 Pai cutipaca: “Ñuca canguna mana yachashca micunara charini micungaj.” 33 Shinajpi yachachishca runauna paigunapura ninauca: “¿Maicans paihuajta micunara apamushca angai?” 34 Jesús paigunara nica: “Ñucara cachamuj Dios munashcara rana, caimi ñuca micuna, paihua ranaunara pactachingaj. 35 ¿Manzhu ninguichi: ‘Chara chuscu quilla pishin pallanagama?’ Cangunara nini: Ñahuira atarichichi, chagraunara ricuichi. Tucui ña chaquirishcami pallangaj.” 36 Pallaj paihua pagara apin, muyuunara huiñai causaihuajta pallan. Shinajpi tarpujpas pallajpas pariju cushiyanaun. 37 Casnamanda sirtu rimashcami: ‘Shuj tarpun, shuj randi pallan. ’ 38 Canguna mana tarpushcara pallangaj cachmucani. Shujcuna tarabanauca, canguna paiguna tarabashcamanda valiricanguichi.” 39 Ashca chi llactamanda Samaria runauna Jesusta quirinauca huarmi rimashcamanda: “Pai tucui ñuca rashcaunara cuintahuaca,” nishcamanda. 40 Samaria runauna Jesusma shamusha paita ruganauca: “Ñucanchihua saquiri,” nisha. Jesús ishqui punzhara paigunahua saquirica. 41 Ashca runauna maspas quirinauca, Jesús rimashcamanda. 42 Paiguna ninauca huarmira: “Ña quirinchimi, mana can rimashcamandalla, astaun ñucanchillara paita uyashcanchi. Sirtu pacha yachanchi pai Cristo nishca cai pachara Quishpichij.” 43 Ishqui punzha huasha, Jesús chi llactamanda llucshisha, Galilea partima rica. 44 Jesusllara nica: “Diosmanda rimaj paihua quiquin llactai mana chasqui tucunzhu.” 45 Jesús Galileama shamujpi, chihui causajcuna paita chasquinauca, tucui pai ista punzha rashcaunara ricushcamanda Jerusalembi. Paigunas istama rinaushca aca. 46 Shinajpi Jesús cuti Galilea Caná llactama shamuca, maibi ñaupa yacura turcasha vinura rarca. Capernaum llactai shu rey apu capitán tiaca, paihua churi ungushca aca. 47 Pai Jesús Judeamanda Galileama shamushcara uyasha, Jesuspajma rica. Pai Jesusta rugaca: “Irgumupai,” nisha, “churira alichingaj, ña huañungaraunmi.” 48 Shinajpi Jesús paita nica: “Canguna atun ricurinaunara munanaita ranaunaras mana ricusha, mana quiringuichichu.” 49 Rey apu capitán Jesusta nica: “Señor, ñuca churi manara huañujllaira, uctalla irgumupai.” 50 Jesús cutipaca: “Ri, camba churi causaun.” Runa Jesús rimashcara quirisha ricami. 51 Irgushca huasha, sirvijcuna paita tupangaj llucshinauca. Paita rimanauca: “Camba churi causaunmi,” nisha. 52 Shinajpi capitán tapuca: “¿Ima hurasta aliyangaj callarica?” “Caina, la una tupura, calintura chiriyaca” ninauca. 53 Yaya shinajpi intindica huahua aliyashca huras Jesús rimashca huras chi tupui aca, pai rimaushcai: “Camba churi causaunmi,” nisha. Pai, tucui huasii tiajcunandi quirinauca. 54 Caita ishqui cuti Jesús ali munanaita ricurinara rarcami, Jesús Judeamanda Galileama rijpi.
1 Chimanda huasha, judiuguna ista punzhauna tiajpi, Jesús Jerusalenma sicaca. 2 Jerusalembi, buriguuna pungu mayambi, shu ichilla yacu cucha tiaca. Hebreo shimii cai yacu Betesda nishcami. Pichca punguyuj aca. 3 Cai punguunai ashca ungushcauna sirinauca, ñausauna, anga chaquiuna, suchuuna. Tucui caiguna yacu cuyurishcara chaparianauca. 4 Huaquin huras shu angel yacuma irgumuj aca, yacura cuyuchingaj. Yacu cuyurishca huasha, ñaupa punda yacui icuj runa ima ugüimandas alichishca aca. 5 Chihui shu runa tiaca, quinsa chunga pusac huatara ungushca. 6 Jesús paita ricusha, unaira tiashcara yachasha, paita nica: “¿Aliyanara munanguichu?” 7 Ungushca runa cutipaca: “Señor, pitas mana charinichu yacu cuyurijpi ñucara yacui satingaj: ñucallara alimanda shamungama, shuj ñucamanda ñaupara icun.” 8 Jesús paita nica: “Atari, camba puñunara api, puri.” 9 Chi hurasllaira cai runa aliyashca aca. Puñunara apisha ricami. Samana punzha aca. 10 Shinajpi judiuguna alichishca runara ninauca: “Samana punzhami; camba puñunara apanara mana ushanguichu.” 11 Runa cutipaca: “Ñucara alichij runa rimahuaca, ‘Puñunara apisha, puri,’ nica.” 12 Shinajpi runara tapunauca: “¿Pita acai canda casna rimaj: ‘Puñunara apisha puri,’ nij?” 13 Aliyashca runa pi ashcaras paita alichijta mana yachacachu, Jesús chimanda rishca ajpi. 14 Huasha, Jesús cai runara templo huasii tupasha paita nica: “Ña alichishca angui; uchara ama cuti ranguichu, huasha ama yalijta ungungaj.” 15 Runa risha, judiugunara cuintaca: “Jesusmi ñucara alichihuaca.” 16 Chimanda judiuguna Jesusta turmindachinauca, paita huañuchingaj mascanauca, caigunara samana punzhai rashcamanda. 17 Jesús paigunara nica: “Ñuca Yaya cunagamas tarabaun, ñucas tarabauni.” 18 Shinajpi chimanda judiuguna Jesusta huañuchingaj astaun más mascanauca samana punzha yachaira mana caźushcamanda, shinallara ‘Dios ñuca Yayami’ nishcamanda, shina nisha paillara Dios tupullara rasha. 19 Shinajpi Jesús cutipasha nica: “Sirtu pacha cangunara nini: Churi pai quinquin munaimanda mana imaras ranara ushan, Yaya rashcara ricusha ran. Imaras Yaya rajpi, shinallara Churi ran. 20 Yaya Churira llaquin, tucui pai rashcaunara Churira ricuchin. Caimanda yali rashcaunara paita ricuchingami canguna manzharingaj. 21 Imasna Yaya huañushcaunara causachin, paigunara causaira cusha, shinallarami Churi pai munashca runaunara causaira cun. 22 Yaya mana pitas taripanzhu, randi tucui taripanara Churima cushcami. 23 Casna tucun tucui runa Churira ahuayachinauchu, paiguna Yayara ahuayachishca cuintallara. Maicans Churira mana ahuayachisha, paita cachamuj Yayaras mana ahuayachinzhu. 24 ”Sirtu pacha cangunara nini maicans ñuca shimira uyasha, ñucara cachamuj Yayara quirishas, huiñai causaira charin: mana cauźayuj tucungachu, astaun huañuimanda causaima pasashcami. 25 Sirtu pacha cangunara nini, huras shamun, cunallaras pactarin, huañushcauna Diospa Churi shimira uyanaungami, uyajcunas causarinaungami. 26 Imasna Yaya paillara causaira charin, shinallara Churira cuca paillara causaira charingaj. 27 Shinallara taripangaj ushaira paita cuca, pai Runa Churi ashcamanda. 28 Caimanda ama manzharinguichi. Huras shamungami tucui pambariajcuna paihua shimira uyanaungami. 29 Alira rajcuna causarinaungami causangaj; randi manalira rajcuna causarinaungami cauźayachi tucungaj. 30 Ñuca munaimandallara mana ima ranara ushanichu. Uyashca tupullara taripani. Ñuca taripashca ali tupumi. Ñuca quiquin munaira mana ranichu, astaun ñucara cachamuj Yaya munashcara rauni. 31 Ñuca ñucamandallara rimasha, casna rimasha mana sirtuchu. 32 Shuj ñucamanda rimanmi, pai ñucamanda rimashcara sirtu ajta yachani. 33 Canguna Juanma uyajcunara cachacanguichi. Pai sirtu shimimanda rimacami. 34 Ñuca pi runamandas pai rimashcara mana apinichu; astaun caita rimani canguna quishpichi tucungaj. 35 Juan sindij vilasna punzhayachij aca. Canguna pai punzhayachishcai shu timpura cushiyasha nicanguichi. 36 Ñuca Juan rimashca shimimanda yali valij shimira charini. Yaya ñucara cuhuashca ranaunara rangaj, shinallara rauni. Caiguna Yaya ñucara cachamushcara rimanaun. 37 Shinallara ñucara cachamuj Yaya ñucamanda riman. Paihua shimira mana ima huras uyashcanguichi. Paihua samira mana ima huras ricushcanguichi. 38 Pai rimashca shimira canguna shungüi causajta mana charinguichi. Pai cachamushca Churiras mana quiringuichi. 39 Quillcashcaunara ricuichi. Canguna iyaringuichi chihui huiñai causaira charishcara. Chi Quillcashcauna ñucamanda rimanaun. 40 Ñucajma shamunara mana munanguichi causaira charingaj. 41 Runauna ahuayachishcara mana chasquinichu. 42 Astaun ñuca cangunara ricsini. Canguna shungu ucui Diosta mana llaquinguichi. 43 Ñuca shamushcani ñuca Yaya shutii. Canguna ñucara mana chasquinguichi. Shuj paihua quinquin shutii shamujpi, canguna paita chasquinguichima. 44 Canguna, ¿imasna quirinara ushanguichi? Canguna shujcuna ahuayachishcara parijumanda chasquinaunguichi. Astaumbas shu sapalla Diosmanda shamuj ahuayachishcara mana mascanguichi. 45 Ama iyaichichu ñuca cangunara cauźayachisha Yaya ñaupajpi. Shuj cangunara cauźayachin, canguna ‘Quishpichihuangami’ niushca Moisé. 46 Canguna Moisesta quirisha, ñucaras quiringuichima. Pai ñucamanda quillcacami. 47 Canguna pai quillcashcara mana quirisha, ¿imasna rashara ñuca rimashca shimira quiringuichima?”
1 Caimanda huasha, Jesús Tiberias nishca Galilea lamar chimbama rica. 2 Ashca runauna paita catimunauca, pai munanaita ricurinaunara ungushcaunahua rashcara ricushcamanda. 3 Jesús urcui sicasha chihui tiarica pai yachachishca runaunandi. 4 Judiuguna Pascua nishca ista mayanllayauca. 5 Jesús muyujta ricusha, ashca runauna paihuajma shamujcunara ricusha, Felipera rimaca: “¿Maimanda tandara randishun tucui caiguna micungaj?” 6 Cai shimira Jesús rimaca paita camangaj. Pai imasna rana ashcaras yachacami. 7 Felipe paita cutipaca: “Ishqui patsaj cullqui tupu tanda mana pactangachu caran duiñu ansa ansa micungaj. 8 Shu pai yachachishca runa, Andrés, Simón Pedro uqui, Jesusta rimaca: 9 ”Caibi shu huahua, pai pichca cebadamanda rashca tandara ishqui ichilla aichahuaras charin. ¿Imarasha pactangairi cai tucuira carangaj?” 10 Shinajpi Jesús nica: “Runaunara tiachichi.” Chi llactai ashca quihua tiaca, Pichca huaranga tupu cariuna tiarinauca. 11 Jesús tandaunara apisha, Diosta agrasishca huasha, yachachishca runaunama cuca. Yachachishca runauna tiajcunara cunauca. Shinallara ichilla aichahuaras caranma cunauca, paiguna munashca tupura. 12 Runauna sacsajta micushca huasha, Jesús pai yachachishca runaunara nica: “Puchuunara pallaichi, imas ama ichuringaj.” 13 Shinajpi chunga ishqui tasauna undajta pallanauca, chi pichca cebada tandaunamanda micujcuna puchuchishcara. 14 Chi runauna, Jesús cai munanaita ricurinara rashcara ricusha, ninauca: “Sirtu pacha caimi Diosmanda rimaj, cai pachama shamuna aj.” 15 Jesús paiguna shamungaraushcara riparasha, paita apingaj rey apura rangaj, cuti pailla urcuma anzhuricami sapalla tiangaj. 16 Tutayaupi, Jesús yachachishca runauna lamarma irgunauca. 17 Canuai icusha lamarda chimbarianauca, Capernaum llactama. Ña tutayashca aca Jesús paigunajma chara mana shamucachu. 18 Lamarbi tsaglas atarica shinzhira huairaushcamanda. 19 Paiguna canuai shu samai tupura rishca huasha, Jesusta yacu ahuara puriuta ricunauca. Canua mayanma shamujpi, paiguna manzharinauca. 20 Jesús paigunara nica: “Ñuca mani. Ama manzharichichu.” 21 Shinajpi paiguna Jesusta munaihua chasquinauca canuai. Uctalla allpama pactanauca, paiguna riushca llactama. 22 Cayandi punzha, chimba partii causajcuna shu canualla tiashcara ricunauca, shinallara Jesús mana rishcara yachachishca runaunahua chi canuai, randi yachachishca runauna paigunalla rinaushca aca. 23 Shinajpi shu ichilla canuauna Tiberias llactamanda shamunaushca aca, runauna micuushca pamba mayanma shamusha, chihui runauna micunauca Jesús Diosta agrasishca huasha. 24 Runauna Jesús illajta ricusha, shinallara pai yachachishca runaunas illajta, paiguna ichilla canoaunai icusha, Capernaum llactama rinauca, Jesusta mascasha. 25 Paiguna Jesusta lamar chimbama tupasha, paita ninauca: “Yachachij, ¿ima huras caima pactamucangui?” 26 Jesús paigunara cutipaca: “Sirtu pacha nini, canguna ñucara mascahuanguichi, mana munanaita ricushcamanda, astaun tandara sacsajta micushcamanda. 27 Tarabaichi, mana yanga pasana micunamanda, astaun huiñai causaigama duraj micunamanda. Cai sami micunara Runa Churi cangunara cunga; casna rangaj Dios Yaya paita ricuchicami.” 28 Jesusta ninauca: “¿Imara rashun Dios rashcaunara rangaj?” 29 Jesús cutipasha nica: “Caiga Dios ranami: canguna pai cachamushca runai quirinauchu.” 30 Shinajpi paiguna ninauca: “¿Ima munanaita ricurinara ranguichu can, ñucanchi ricusha quiringaj? ¿Imara rangui? 31 Ñucanchi yayauna maná nishca micunara micunauca chaquishca allpa partii, Quillcai quillcashcasna: ‘Ahua pachamanda tandara paigunama micungaj cucami. ’ “ 32 Jesús paigunara nica: “Sirtu pacha cangunara nini, chi ahua pachamanda tandara mana Moisés cucachu, astaun ñuca Yaya cangunara ahua pachamada sirtu tandara cunmi. 33 Ahua pachamanda irgumuj runa, caimi Diosmanda tanda. Pai cai pachara causaira cun.” 34 Runauna paita ninauca: “Señor, tucui huras cai tandara ñucanchira cuhuai.” 35 Jesús paigunara nica: “Ñuca causana tanda mani. Maicans ñucama shamuj mana ima huras yarcachingachu. Maicans ñucajpi quirij, huiñaigama mana ima huraspas upinaichingachu. 36 Astaun cangunara rimashcani, ñucara ricushallara mana quiringuichi. 37 Tucui Yaya ñucama cushca ñucajma shamunga. Maicans ñucajma shamujta mana callpachishachu. 38 Ahua pachamanda irgumucami, mana ñuca munaira rangaj. astaun ñucara cachamuj munashcara rangaj. 39 Caimi ñucara cachamuj Yaya munai: Tucui ñucara cuhuashcamanda ama imaras chingachichu, astaun puchucai punzhai paita causachingaj. 40 Caimi ñucara cachamujpa munai: tucui maicambas Churira ricuj, paihuajpi quirij, huiñai causaira charichu; puchucai punzhai ñuca paita causachisha.” 41 Shinajpi judiuguna piñarinauca Jesús rimashcamanda: “Ñuca ahua pachamanda shamuj tanda mani” nishcamanda. 42 Ninauca: “¿Manzhu cai Jesús José churi? Paihua yayaras paihua mamaras ricsinchi. ¿Imarasha nin, ‘Ahua pachamanda shamucani?’ “ 43 Jesús cutipasha paigunara nica: “Ama piñaringuichi cangunapura. 44 Pihuas ñucama mana shamunzhu, ñucara cachamuj Yaya mana paita pushamujpi. Puchucai punzhai ñuca paita causachisha. 45 Diosmanda rimajcuna quillcashcaunai quillcashca tian: ‘Dios tucui runaunara yachachingami. ’ Shinajpi tucui Yayara uyaj, paimanda yachaj, ñucama shamunga. 46 Pihuas Yayara mana ricushcachu; Diosmanda shamuj, pailla Yayara ricushcami. 47 Sirtu pacha cangunara nini: maicans ñucajpi quirisha huiñai causaira charin. 48 Ñuca causana tanda mani. 49 Canguna yayauna chaquishca allpa partii maná nishca micunara micunauca, huañunauca. 50 Randi, caimi ahua pachamanda shamuj tanda, maican cai tandara micuj ama huañuchu. 51 Ñuca causaj tanda mani, ahua pachamanda shamuj, Maicans cai tandara micusha huiñaigama causangami. Ñuca cushca tanda ñuca quiquin aichami. Cai aichara cai pacha causanamanda cushami.” 52 Shinajpi judiuguna paigunapura rimananauca: “¿Imarasha cai runa paihua quiquin aichara micungaj cungairi?” 53 Jesús nica: “Sirtu pacha cangunara nini: Runa Churi aichara mana micusha, paihua yahuarda mana upisha, causaira mana charinguichichu cangunajpi. 54 Maicans ñuca aichara micuj, ñuca yahuarda upij, huiñai causaira charin; puchucai punzhai ñuca paita causachishcami. 55 Ñuca aicha sirtu micunami; ñuca yahuar sirtu upinami. 56 Ñuca aichara micuj, ñuca yahuarda upij, ñucajpi tian, ñucas paihuajpi. 57 Imasna causaj Yaya ñucara cachamuca, ñucas Yayamanda causauni, shinallara maicans ñucara micusha, paihuas ñucamanda causangami. 58 Caimi ahua pachamanda irgumuj tanda. Mana canguna yayauna maná nishcara micusha huañushcasna, astaun cai tandara micuj huiñaigama causangami.” 59 Jesús cai tucuira judioguna tandarina huasii rimaca, pai Capernaum llactai yachachiushcai. 60 Pai yachachishca runaunamanda ashcauna cai rimashcaunara uyasha: “Cai shimi yapa mana chasquihuajchu,” ninauca.”¿Pita uyanara ushangairi?” 61 Jesús paigunapura caimanda piñarishcara paihua shungüi yachasha, nica: “¿Cai shimichu cangunara piñachin? 62 ¿Imara ninguichima canguna Runa Churira pai ñaupa tiashcama sicashcara ricusha? 63 Ispíritu causaira cun. Aichaga mana imajpas sirvin. Ñuca cangunara rimaushca shimiuna ispiritumi, causaimi. 64 Randi cangunamanda huaquinguna mana quiringuichi.” Jesús callarimanda mana quirijcunara ricsicami, shinallara paita huañuchingaj apichingarau runaras ricsicami. 65 Jesús rimaca: “Chiraigumanda cangunara nicani, ‘Pis ñucajma shamunara mana ushanzhu, Yaya mana paita cujpi shamungaj. ’ “ 66 Chimanda pacha, pai yachachishca runaunamanda ashcauna tigranauca, paihua pariju purinara saquinauca. 67 Shinajpi Jesús paihua chunga ishqui runaunara nica: “Cangunas shinallara saquinara munanguichichu?” 68 Simón Pedro cutipasha nica: “Señor, ¿pihuajmara rina angairi? canlla huiñai causai shimiunara rimangui. 69 Can Cristo nishca causaj Diospa Churi ashcara quirishcanchi, ricsinchi.” 70 Jesús cutipaca: “¿Manzhu ñuca cangunara chunga ishquira ajllashcani, shina ajllaira cangunamanda shuj supaimi?” 71 Judas Iscariote, Simomba churimanda rimaca, Jesusta apichingarau runa. Pai chunga ishquimanda shuj aca.
1 Caimanda huasha, Jesús Galilea partii puriuca. Judea partira purinara mana munacachu, judiuguna paita huañuchingaj mascashcamanda. 2 Judiuguna ichilla huasira rana ista mayallayamuca. 3 Jesuspa uquiuna paita ninauca: “Caimanda llucshi. Judea partima ri, can yachachishca runauna can rashcaunara ricunauchu. 4 Maican runas ricsi tucusha nisha mana pacalla raun. Can cai rashcaunara rasha, canllara pajlla pambai ricuchi tucui runaunama.” 5 Paihua uquiunas paihuajpi mana quirinaucachu. 6 Shinajpi Jesús paigunara nica: “Ñuca punzha chara mana pactamushcachu. Canguna punzhaga tucui huras puruntumi. 7 Cai pacha runauna cangunara chijninara mana ushanaunzhu. Randi ñucara chijnihuanaun, ñuca paigunara rimashcamanda, ‘Canguna rashcauna manalichu,’ nisha. 8 Canguna istama sicaichi; ñuca cai istama chara mana rinichu. Ñuca punzha chara mana pactarishcachu.” 9 Caita rimashca huasha, Galileai saquirica. 10 Paihua uquiuna rishca huasha, Jesús shinallara istama sicasha rica, mana pajllai astaun pacallai. 11 Istai judiuguna Jesusta mascanauca: “Paiga, ¿maibirai?” nisha. 12 Jesusmanda rimananauca ashcara. Huaquinguna: “Pai ali runami,” ninauca, shujcunaga: “Mana, pai runaunara umachin.” 13 Pihuas pajllai paimanda mana rimacachu, judiugunara manzhashcamanda. 14 Astaun chaupi istai, Jesús templo huasima sicasha yachachicami. 15 Judiuguna manzharisha ninauca: “Pai, ¿imasnara quillcashcaunara yachan, mana yachachiushca ashallara.” 16 Jesús cutipasha nica: “Ñuca yachachina mana ñucajchu, randi ñucara cachamujmandami. 17 Maicans Diospa munaira pactachinara munasha, yachachishcamanda yachangami, Diosmandachu shamun, ñucamandallarachu rimauni. 18 Maicans pai quiquinmandallara rimausha, pai quiquin ahuayanara mascan. Astaun maicans paita cachamujpa ahuayanara mascau, paiga sirtu rimajmi, paihuajpi ima llullas illan. 19 ¿Manzhu Moisés ley camachishca shimira cangunara cuca, shina ajllaira cangunamanda mana pihuas cai camachishcara pactachin? ¿Imamanda ñucara huañuchingaj mascaunguichi?” 20 Runauna cutipanauca: “Supaira charingui. ¿Pita canda huañuchisha nin?” 21 Jesús paigunara cutipaca: “Shu rashcara rarcani; tucui canguna manzharinguichi. 22 Sirtu pacha Moisés circuncisión nishcara cuca, randi mana paimandallachu aca, astaun yayaunamanda pacha. Shinajpi samana punzhai circuncisionda cariunara ranguichi. 23 Cariuna circuncisionda chasquijpi samana punzhai, Moisés camachishcara ama paquingaj, ¿imarasha ñucara piñahuanguichi, ñuca shu ungushca runara alichishcamanda samana punzhai? 24 Ricushcamandalla ama taripaichichu, astaun ali sirtu taripanara taripaichi.” 25 Shinajpi huaquin Jerusalenmanda ajcuna ninauca: “¿Manzhu cai runara mascanaun huañuchingaj? 26 Ricuichi imasna pai pajlla pambai rimaun; pihuas paita mana imaras ninaun. ¿Cai runa quiquin Cristo ashcara sirtu pacha intindinaushcachu anaunga apuuna? 27 Cai runara, maimanda shamushcaras ricsinchi. Cristo shamujpi, pai shamushcara pihuas mana yachangachu.” 28 Shinajpi Jesús temploi yachachisha, caparisha rimaca: “Ñucara ricsinguichi, ñuca maimanda shamushcaras shinallara yachanguichi. Ñuca quiquinmandallara mana shamushcanichu; astaun ñucara cachamuj sirtumi. Paitaga mana ricsinguichichu canguna. 29 Ñuca paita ricsinimi. Paimanda ani. Pimi ñucara cachamuca. 30 Shinajpi Jesusta apingaj camanauca. Shina ajllaira mana pihuas paita apicachu, paihua huras chara mana pactamushcamanda. 31 Ashca runauna paihuajpi quirinauca: “Cristo pai shamushcai, ¿caimanda yalijta munanaita ricurinaunara rangachu?” nisha. 32 Fariseoguna runauna Jesusmanda casna rimanaushcara uyanauca. Sacerdote apuuna fariseogunandi guardaunara cachanauca Jesusta apingaj. 33 Shinajpi Jesús nica: “Chara ansa timpura cangunahua tiasha, chihuasha ñucara cachamujpajma rishami. 34 Ñucara mascahuanguichimi, randi mana tupahuanguichichu. Maibi ñuca tiashcama shamunara mana ushanguichichu.” 35 Shinajpi judiuguna paigunapura ninauca: “¿Maimara ringai ñucanchi paita mana tupangaj? ¿Grieguuna llactai sayashca runaunamachu ringai griegunara yachachingaj? 36 ¿Imarara nin casna rimashca shimi: “Ñucara mascahuanguichimi, mana tupahuanguichichu. Maibi ñuca tiaushcama shamunara mana ushanguichichu? ¿Imarai cai shimi?” 37 Ista puchucai punzhai, atun ista punzha ashcai, Jesús shayarisha caparica: “Maicans upinaichisha ñucajma shamuchu, upichu.” 38 Maicans ñucajpi quirij, Diospa quillcai quillcashcasna, paihuajmanda causana yacuuna llucshinaungami.” 39 Jesús caita rimaca, paihuajpi quirijcuna apingaraushca Ispiritumanda, Santu Ispíritu chara mana shamushca ajpi, Jesús chara mana sumajyachishca ajpi. 40 Shinajpi taucariaj runaunamanda huaquinguna caita uyasha ninauca: “Sirtu pacha cai runa Diosmanda rimajmi.” 41 Shujcuna: “Caimi Cristo,” ninauca. Huaquingunaga: “¿Cristo Galileamandachu shamunga?” 42 ”¿Manzhu Diospa Quillcai quillcashca tian: ‘Cristo David miraigunamanda, Belen llactamanda, David iñashca llactamanda shamuna aca?’ “ ninauca. 43 Shinajpi, Jesusmanda paigunapura piñanausha rimananauca. 44 Paigunamanda huaquinguna Jesusta apishun ninauca; randi pihuas paita mana apicachu. 45 Guardauna sacerdote apuunama fariseogunamas tigranauca. Apuuna shamujcunara ninauca: “¿Imarasha paita mana apamucanguichi?” 46 Guardauna cutipasha ninauca: “Mana pi runas pai rimashcasna ima huras rimashcachu.” 47 Shinajpi fariseoguna cutipanauca: “¿Cangunas shinallara umachi tucushcanguichichu? 48 ¿Maicanguna apuunamandas fariseogunamandas paihuajpi quirinaushcachu? 49 Cai runauna, ley camachishca shimira mana yachajcuna, maldisiashcaunami.” 50 Nicodemo, pai ñaupa Jesusma tutai shamuj, apuunamanda asha, paigunara nica: 51 ”¿Ñucanchi ley camachishca shimi shu runara taripanzhu paimanda manara uyasha, pai rashcara manara yachasha?” 52 Fariseoguna cutipasha paita ninauca: “¿Can Galilea runachu angui? Ricui, mascai, Galileamanda ima rimajpas mana ima huraspas atarishcachu.” 53 Caran duiñi paihua huasima rica.
1 Jesús Olivos nishca urcuma rica. 2 Cayandi tutamanda templo huasima tigraca. Tucui runauna paihuajma shamunauca. Jesús tiarisha paigunara yachachica. 3 Shinajpi yachaira yachachijcuna fariseogunandi Jesusma shu huarmira shujhua tacarishcai apishcara pushamunauca. 4 Paiguna Jesusta ninauca: “Yachachij, cai huarmira shujhua tacariushca ratui api tucuca. 5 Moisés ley camachishca shimii casnaunara ‘Rumihua shitanami,’ nisha mandaca. Canga, ¿imara ningui?” 6 Cai tucuira Jesusta tintasha ninauca, paita cauźayachingaj. Jesús allpama cumurisha, maqui riruhua allpai quillcaca. 7 Paiguna paita maspas tapujpi, Jesús shayarisha nica: “Cangunamanda maicans ucha illaj asha, ñaupa punda rumihua shitachu paita.” 8 Jesús cuti cumurisha, allpai quillcasha catica. 9 Paiguna caita uyasha, iyaibi pingarisha, shuj shuj llucshisha rinauca, rucuunamanda maltaunagama. Jesús sapalla saquirica, chaupi shungüi shayau huarmindi. 10 Jesús atarisha, huarmi sapalla ajta ricusha, paita nica: “Huarmi, ¿maibirai canda cauźayachiujcuna? ¿Mana pihuas canda cauźayachishcachu?” 11 Huarmi nica: “Mana pihuas, Señor.” Shinajpi Jesús paita nica: “Ñucas canda mana cauźayachinichu. Ri, ama mas ucharaichu.” 12 Cuti Jesús paigunara rimaca: “Ñuca cai pacha punzhami ani. Ñucara catimuj runa llandui mana puringachu; astaun cai causai punzhara charingami.” 13 Shinajpi fariseoguna paita ninauca: “Can quiquinmandallara rimaungui. Mana valinzhu can rimashca.” 14 Jesús cutipaca: “Ñuca quiquinmandallara rimajpis, ñuca rimashca sirtumi. Ñuca maimanda shamushcara maima rinaras yachani. Randi canguna ñuca shamushcara ñuca rinaras mana yachanguichichu. 15 Canguna runa taripanara taripanguichi. Ñuca pitas mana taripanichu. 16 Ñuca taripajpi, ñuca taripashca sirtumi. Ñuca mana sapallachu ani, astaun ñuca ñucara cachamuj Yayandi. 17 Canguna camachishca shimii quillcashca tian: “Ishquipura rimashca sirtumi.” 18 Ñuca quiquinmanda rimauni. Ñucara cachamuj Yayas shinallara ñucamanda riman. 19 Fariseoguna: “Camba Yaya, ¿maibirai?” ninauca. Jesús cutipaca: “Ñucaras, ñuca Yayaras, mana ricsihuanguichichu. Ñucara ricsisha, shinallara ñuca Yayaras ricsinguichimami.” 20 Cai shimiunara Jesús rimaca cullquira tandachina pistui, pai templo huasii yachachiusha. Pihuas paita mana apicachu, paihua huras manara pactarishca ajpi. 21 Cutillara Jesús paigunara nica: “Riunimi. Canguna mascahuanguichimi, astaun canguna uchaunai huañunguichimi. Ñuca riushcama shamunara mana ushanguichichu.” 22 Shinajpi judiuguna ninauca: “¿Pai quiquinllarachu huañuchinga, casna nisha ‘Ñuca riushcama shamunara mana ushanguichichu?’ “ 23 Jesús paigunara nica: “Canguna uramanda anguichi, ñucaga ahuamandami ani. Canguna cai pachamandami anguichi, ñucaga mana cai pachamandachu ani. 24 Chiraigumanda cangunara nicani: ‘Canguna uchaunai huañunguichimi. ’ Canguna ñuca ajta mana quirisha, canguna uchaunai huañunguichimi.” 25 Paita ninauca: “Canga, ¿pitangui?” Shinajpi Jesús paigunara nica: “Ñuca cangunara ñaupa punda rimashcasna ani. 26 Cangunara rimangaj taripangajpas ashcara charini. Ñucara cachamuj sirtu rimajmi. Ñuca paimanda uyashcara cai pachai rimauni.” 27 Runauna mana intindinaucachu paihua Yayamanda rimauta. 28 Shinajpi Jesús paigunara nica: “Canguna Runa Churira atarichishca huasha, ñuca ajta intindinguichimi. Shinallara intindinguichimi ñucamandallara mana imaras ranichu. Astaun Yaya ñucara yachachishcara, chillara rimauni. 29 Ñucara cachamuj Yaya ñucahua tiaun. Yaya ñuca sapallara mana saquihuashcachu. Ñuca tucui huras pai munashcara rani.” 30 Jesús shina rimajpi, ashca runauna paihuajpi quirinauca. 31 Shinajpi Jesús paihuajpi quirij judiugunara nica: “Canguna ñuca shimiunara pactachisha causausha, sirtu pacha ñuca yachachishca runauna tucunguichimi. 32 Sirtu shimira yachanguichimi. Cai sirtu shimi cangunara lugaryachingami.” 33 Paiguna Jesusta cutipanauca: “Abrahanmanda miraiguna anchi, ima huras pitas mana sirvishcanchichu. ¿Imarasha ningui, ‘Lugaryachishcauna anguichi’?” 34 Jesús paigunara cutipaca: “Sirtu pacha cangunara nini, maicans uchara rasha, uchara sirvij tucun, 35 Sirvij mana tucui huras huasii saquirinzhu. Randi, churi huiñaigama huasii tiaun. 36 Shinajpi Churi cangunara lugaryachijpi, sirtu pacha lugaryachishcauna tucunguichimi. 37 Canguna Abrahanmanda miraiguna ajta ricsinimi. Randi ñucara huañuchingaj mascanguichi, ñuca shimiuna canguna shungüi mana icushcamanda. 38 Ñuca Yaya ñaupajpi ricushcara rimauni. Cangunas canguna yaya ñaupajpi uyashcaras raunguichi. 39 Paiguna cutipanauca: “Ñucanchi yaya Abrahanmi.” Jesús nica: “Canguna Abrahamba churiuna asha, Abraham rashcaunara ranguichimami. 40 Cuna ñucara huañuchinara mascanguichi, ñuca Diosmanda uyashca sirtu shimira rimajta. Abraham mana caita rarcachu. 41 Canguna yaya rashcara ranguichi.” Shinajpi judioguna paita ninauca: “Ñucanchi mana shujhua tacarishcamanda pagarishcachu anchi. Shu yayara charinchi, paiga Diosmi.” 42 Shinajpi Jesús paigunara nica: “Dios canguna yaya ajpi, sirtu pacha ñucara llaquinguichimami. Diospajmanda llucshisha shamushcani. Ñucamandallara mana shamucanichu, astaun Dios ñucara cachamuca. 43 ”¿Imarasha ñuca shimira mana intindinguichichu? Ñuca rimashcara mana uyashcamanda mana intindinguichichu. 44 Canguna canguna supai apu yayamanda anguichi. Canguna yaya munashcara pactachinara munanguichi. Pai callarimanda pacha huañuchij aca. Sirtu shimira mana rimacachu, paihuajpi sirtu rimana mana tianzhu. Pai llullara rimasha, pai quiquinmanda riman. Pai llullajmi, shinallara llullanahua yayami. 45 Ñucara sirtu shimira rimashcamanda mana quirihuanguichi. 46 ¿Cangunamanda maican ñucara uchamanda cauźayachinzhu? Ñuca sirtu shimira rimajpi, ¿imaraigu mana quirihuanguichi? 47 Maicans Diosmanda aj Dios rimashcara uyan. Chiraigu mana uyahuanguichi, canguna mana Diosmanda ashcaraigu.” 48 Shinajpi judiuguna Jesusta cutipanauca: “¿Manzhu ali rimashcanchi, ‘Can Samaria runa angui, supaiyuj angui?’ nisha.” 49 Jesús cutipasha rimaca: “Supaira mana charinichu, astaun ñuca Yayara ahuayachiuni. Canguna ñucara mana ahuayachinguichichu. 50 Ñuca quiquin ahuayanara mana mascanichu. Shujmi mascan, taripan. 51 Sirtu pacha cangunara nini: maicans ñuca rimashcara huacachisha, huiñaigama huañuira mana ricungachu.” 52 Shinajpi judiuguna paita ninauca: “Cuna yachanchi can supaira charishcara. Abraham huañuca, Diosmanda rimajcunas huañunauca. Canga ningui: ‘Pihuas ñuca shimira pactachisha, huiñaigama huañuira mana ricungachu. ’ 53 Canga, ¿ñucanchi yaya Abrahanmanda yalichu angui? Pais huañuca, shinallara Diosmanda rimajcunas. Canga, ¿pita tucusha ningui?” 54 Jesús cutipaca: “Ñuca ñucamandallara ahuayasha, chi ahuayana mana imajpas valinzhu. Ñuca Yaya ñucara ahuayachinmi. Paimanda canguna rimasha, ‘Ñucanchi Diosmi,’ ninguichi. 55 Paita mana ricsinguichi, randi ñuca paita ricsini. Ñuca ‘Paita mana ricsinichu’ nisha, cangunasna llullaj tucuima. Randi ñuca paita ricsini, shinallara pai rimashcara pactachini. 56 Canguna Abraham yaya ñuca punzhara ricungarausha cushiyaca. Ricucami, ricusha cushi tucuca.” 57 Shinajpi paiguna ninauca: “Can manara pichca chunga huatara charingui. ¿Abrahanda ricushcanguichu?” 58 Jesús cutipaca: “Sirtu pacha cangunara nini, Abrahan manara tiashcaira, ñuca mani.” 59 Judiuguna caita uyasha rumiunara apinauca paita shitangaj. Randi Jesús pacalla templomanda llucshisha, paiguna chaupi shungura pasasha rica.
1 Jesús chimanda pasaushcai, shu ñausa pagarij runara ricuca. 2 Yachachishca runauna paita tapunauca: “Yachachij, ¿Pi ucharashcamanda cai runa ñausa pagarimuca, paillara, paihua yayauna ucharashcamanda?” 3 Jesús cutipaca: “Mana pai ucharashcamanda, mana paihua yayauna ucharashcamanda ñausa pagarica. Shina tucuca Diospa ranaunara paihuajpi ricuchingaj. 4 Ministirinmi ñucara cachamujpa ranaunara rangaj punzha ajllaira, Tuta shamujpi mana pihuas ushan tarabanara. 5 Ñuca cai pachai tiaushca huraspi, cai pachamanda punzha ani. 6 Casna rimasha, Jesús allpai tiucaca, tiucahua turura apiyachisha, ñausa runa ñahuii llutaca. 7 Shina rasha, Jesús paita nica: “Ri, maillairi, Siloé yacui.” Cai ‘Siloé’ runa shimii ‘Cachashca’ nin. Shinajpi runa maillai rica, ricusha tigramuca. 8 Paihua mayambi causajcuna, pai ñausa ashcara ricsijcunas ninauca: “Caiga, ¿manzhu mañasha tiaj runa?” 9 Huaquinguna: “Paimi,” ninauca. Shujcuna, “Chi cuinta ricurin.” Pai quiquinllara: “Ñuca mani,” nica. 10 Paita ninauca: “Camba ñahuiuna ¿imasna rasha pascarinauca?” 11 Runa cutipasha nica: “Chi Jesús nishca runa turura rasha ñahuii llutaca. ‘SiIoema maillai ri,’ nihuaca. Ñuca ricani, maillacani, ricuj tucucani.” 12 Shinajpi ninauca: “Pai ¿maibirairi?” Runa, “Mana yachanichu,” nisha cutipaca. 13 Fariseogunama ñaupa ñausa aj runara pushanauca. 14 Samana punzhai Jesús turura rasha paihua ñahuiunara pascaca. 15 Fariseoguna cutillara paita tapunauca: “¿Imasna rashara ricuj tucucangui? Runa paigunara nica: “Ñahui ahuai turura llutaca, maillacani, ricuj tucuni.” 16 Shinajpi fariseogunamanda huaquinguna ninauca: “Cai runa mana Diosmandachu, samana punzhara mana huacachin. Shujcuna ninauca: “¿Uchayuj runa imasna rasha cai munanaita ricurinaunara rangachu?” Parijumanda piñanausha rimananauca. 17 Cutillara ñausa aj runara rimanauca: “Can ¿imara ningui paimanda, pai camba ñahuira pascajta? Runa cutipaca: “Pai Diosmanda rimajmi.” 18 Judiuguna pai ñausa ashcara, ricuj tucushcaras mana quirinaucachu. Shinajpi ñahuira pascashca runa yayaunara cayanauca. 19 Paigunara tapunauca: “¿Caichu canguna churi, ñausa pagarij nishca? ¿Imasna rasha cuna ricun?” 20 Yayauna cutipasha ninauca: “Cai ñucanchi churi ashcaras yachanchi, pai ñausa pagarishcaras yachanchi. 21 Imasna rasha cuna ricuj tucushcara mana yachanchichu. Pi paihua ñahuira pascashcaras mana yachanchichu. Pai iyaiyuj, paita tapuichi, paillara rimangami.” 22 Yayauna casna ninauca judiugunara manzhashcamanda. Judiuguna ña rimanauca: “Maicans Jesús Mesíasmi nij, tandarina huasimanda ichui tucungami.” 23 Chiraigumanda yayauna: “Iyaiyujmi,” ninauca, “paita tapuichi. 24 Shinajpi ñausa aj runara cuti cayanauca. Paita ninauca: “Diosta alabairi, chi runa uchayuj ajta yachanchi.” 25 Shinajpi ñausa aj runa cutipaca: “Uchayuj ashcara imaras mana yachanichu; caita yachani: ‘Ñuca ñausa acani, cuna ricuuni. ’ “ 26 Fariseoguna cutillara runara ninauca: “¿Imara rarca canda? ¿Imasna rashara camba ñahuira pascaca?” 27 Runa paigunara cutipasha: “Ña cangunara rimashcani,” nica, “uyanara mana munacanguichi. ¿Imarasha cuti uyanara munanguichi? ¿Cangunas shinallara pai yachachishca runauna tucunara munanguichi? 28 Paita caminauca.”Can pai yachachishca runa angui, astaun ñucanchi Moisés yachachishca runaunami anchi. 29 Dios Moisesta rimashcara yachanchi; randi cai runa maimanda ashcaras mana yachanchichu.” 30 Runa cutipaca: “Sirtu pacha caita manzhanaitami, canguna pai ajta mana yachanguichi, shina ajllaira ñuca ñahuira pascahuashcami. 31 Dios uchayujcunara mana uyanzhu, caita yachanchi; randi maicans Diosta manzhajpi, paihua munaira rajpi, Dios paita uyanmi. 32 Callarimanda pacha mana uyarishcachu aca shu pagarishcamanda ñausa runa ñahuira pascangaj. 33 Cai runa mana Diosmanda asha, mana imaras ranara ushanmachu.” 34 Paita cutipasha ninauca: “Can uchai pagarimushcangui, ¿shinashallara ñucanchira yachachihuangui?” Shinajpi paita canzhama ichunauca. 35 Jesús paita ichushcara uyasha, paita tupasha rimaca: “¿Diospa Churii quiringuichu?” 36 Runa cutipaca: “¿Paiga pitairi, Señor, ñuca paita quiringaj?” 37 Jesús nica: “Paita ricushcangui; canhua rimau paimi an.” 38 Pai nica: “Señor, quirinimi,” Casna nisha Jesusta aduraca. 39 Jesús nica: Ñuca taripangaj cai pachama shamucani, mana ricujcuna ricunauchu, ricujcunas ñausa tucunauchu.” 40 Fariseogunamanda huaquinguna, paihua pariju tiajcuna, cai shimira uyasha, ninauca: “¿Ñucanchis shinallara ñausachu anchi?” 41 Jesús nica: “Canguna ñausa asha, ucha illajcuna anguichima; randi cuna, ‘Ricunchimi,’ nisha, caimanda canguna ucha saquirin.”
1 Jesús nica: “Sirtu pacha cangunara nini, maican runa burigu cularbi icusha, mana pungura pasasha, astaun shu partii quinzhara sicasha, casna runa shuhuajmi. 2 Maican runa pungullara icusha, pai burigura sirtu cuirajmi. 3 Pungura cuiraj runa paihuajta pascan; buriguuna paihua shimira uyanaun. Pai buriguunara shutii cayan, paigunara llucchin. 4 Tucui paihua buriguunara llucchisha, ñaupasha rin. Buriguuna paita catinaun, paihua shimira ricsishcamanda. 5 Randi, buriguuna shu mana ricsishca runara mana catinaungachu, astaun paimanda miticunaunga, paihua shimira mana ricsishcamanda.” 6 Cai yachachina cuintanara Jesús paigunara cuintacami. Astaun pai rimashcara mana intindinaucachu. 7 Shinajpi Jesús cuti rimaca: “Sirtu pacha cangunara nini, ñuca buriguuna pungumi ani. 8 Tucui ñucamanda ñaupa shamujcuna shuhuajcunas, shuhuasha huañuchijcunas anaun. Buriguuna paigunara mana uyanaucachu 9 Ñuca pungumi ani. Maican ñucahua icusha quishpichi tucungami; icunga, llucshinga, micuna quihuara tupangami. 10 Shuhuaj runa apingajlla, huañuchingajlla, huajlichingajlla shamun. Randi ñuca shamucani buriguuna causaira charinauchu, causaira charisha talirijta charinauchu. 11 Ñuca burigura ali cuiraj ani. Ali cuiraj paihua causaira cun buriguuna randimanda. 12 Randi, cuirangaj pagashca runa, mana quiquin cuiraj ajpi, buriguuna mana paihua quiquimbaj ajpi, shu puma shamushcara ricusha miticun, buriguunara saquin. Shinajpi puma buriguunara apijpi, llambura chausin. 13 Cuirangaj pagashca runa miticusha rin, pagashca runa ashcamanda; buriguunara mana llaquin, mana cuiran. 14 Ñuca burigura ali cuiraj ani; buriguunara ricsini; ñuca buriguuna ñucara ricsihuanaun, 15 imasna Yaya ñucara ricsishcasna, shinallara ñucas Yayara ricsini. Buriguuna randimanda ñuca causaira cuni. 16 Shinallara shu buriguunara charini, mana cai cularbi tiajcunara. Chigunaras pushamunara ministini. Paigunas ñuca shimira uyanaungami. Shu muntunlla anaunga, shu cuirajlla tiangami. 17 Chiraigumanda Yaya llaquihuanmi. Ñuca causaira cuni, cuti causaira apingaj. 18 Ñuca causaira pihuas ñucamanda mana quichun, ñucallara cuni. Cungaj ushaira charini, cuti apinaras ushani. Cai mandashca shimira Yayamanda apicani.” 19 Cutillara judiugunapura cai shimiunamanda piñanausha rimananauca. 20 Paigunamanda ashcauna ninauca: “Supaira charin, nuspa tucushca, ¿imaraigu paita uyanguichi?” 21 Shujcuna: “Cai shimiuna mana supayujmandachu,” ninauca. ¿Supai ñausa runa ñahuira pascanara ushanzhu?” 22 Jerusalembi, templo huasira Diosma cushcara iyarina ista pactamuca. Tamia huras aca. 23 Jesús templo huasii puriuca, Salomomba pungüi. 24 Judiuguna paihua muyujta tandarisha, paita rimanauca: “¿ïma hurascama ñucanchi shungura turbachingui? Can Cristo asha pajlla pambai rimahuai.” 25 Jesús cutipaca: “Rimashcani, astaun canguna mana quiricanguichi. Ñuca Yaya shutii rashcauna ñucamanda rimanaun. 26 Cangunaga mana quiringuichi, mana ñuca buriguunamanda asha, ñuca cangunara rimashcasna. 27 Ñuca buriguuna ñuca shimira uyanaun. Paigunara ricsini, shinallara paiguna ñucara catimunaun. 28 Paigunara huiñai causaira cuni; huiñaigama mana huañunaungachu. Ñuca maquimanda pihuas paigunara mana quichungachu. 29 Ñuca Yaya paigunara cuhuaca. Yaya tucuimanda yalimi. Ñuca Yaya maquimanda paigunara pihuas mana quichungachu. 30 Ñucahua Yayahua shujlla manchi.” 31 Shinajpi judiuguna rumiunara cuti apinauca paita shitangaj. 32 Jesús paigunara cutipaca: “Ashca ali rashcaunara cangunara ricuchishcani ñuca Yayamanda. ¿Maicanmanda ñucara rumihua shitasha ninguichi? 33 Judiuguna cutipanauca: “Ali rashcamanda mana shitanchichu rumihua, astaun can, ‘Dios mani,’ nishcamanda, can runa ashallara Dios tucusha nishcamanda.” 34 Jesús cutipaca: “¿Manzhu canguna ley shimii quillcashca tian, ‘Nicani dioscuna anguichi?’ 35 Diospa shimira chasquijcunara ‘dioscuna’ shutichishca ajpi, shina ajllaira Diospa shimi mana paquirinallachu. 36 ¿Yaya Dios chicanyachishca runara, cai pachama cachamushcara: ‘Camishcangui,’ ninguichi, pai ‘Diospa Churi ani,’ nishcamanda? 37 Ñuca Yaya rashcaunara mana rajpi, ama quirihuaichichu. 38 Randi, ñuca casna rashcaunara rajpi, ñucara mana quirishas, rashcaunara quirichi, canguna ricsingaj, quiringajpas Yaya ñucajpi tiashcara ñucas paihuajpi tiashcara.” 39 Cuti paita apingaj iyarinauca. Jesús paiguna maquimanda quishpicami. 40 Jesús Jordán yacu chimbama rica, Juan ñaupa bautisaushcama. Chihui tiauca. 41 Ashca runauna paihuajma shamunauca. Paiguna ninauca: “Sirtu pacha Juan ima munanaita ricurinaras mana rarcachu, astaun tucui pai cai runamanda rimashcauna sirtumi.” 42 Ashca runauna chihui Jesúspi quirinauca.
1 Chi huras shu Betania llactamanda runa, Lázaro nishca, ungushca aca. Chi ichilla llactai María paihua ñaña Martandi causanauca. 2 Cai María, ungushca Lázaro pani, Señorda gustu asnaj ambihua armachij, shinallara Señorba chaquiras paihua acchahua chaquichij aca. 3 Paniuna Jesúsma shimira cachanauca: “Señor, can llaquishca runa ungushcami.” 4 Jesús caita uyasha: “Cai ungüi mana huañuchinachu,” nica, “astaun Diosta ahuayachingaj, Diospa Churi caimanda ahuayachishca tucungaj.” 5 Jesús Martaras, paihua ñañaras, Lazaroras llaquicami. 6 Jesús Lázaro ungushcara uyasha, pai tiashcai ishqui punzha masta saquiricami. 7 Shinajpi, caimanda huasha, Jesús pai yachachishca runaunara: “Acuichi,” nica, “cutillara Judea partima.” 8 Yachachishca runauna ninauca: “Yachachij, chi shu punzhalla judiuguna canda rumihua shitanara munanauca. ¿Cuti riunguichu chima?” 9 Jesús cutipaca: “¿Manzhu caran punzha chunga ishqui hurasta charin? Maicans punzhai purisha mana nijtangachu, cai pacha punzhara ricusha. 10 Randi, maicans tutai purisha nijtangami, punzha paihuajpi illashcamanda.” 11 Caita rimashca huasha, Jesús nica; “Ñucanchi llaquishca amigu Lázaro puñunmi. Puñushcamanda paita llicchachingaj riunimi.” 12 Shinajpi yachachishca runauna: “Señor” ninauca, “pai puñusha aliyangami.” 13 Randi, Jesús casna rimasha, Lázaro huañushcara rimaca. Paiguna samasha puñushcara Jesús riman nisha iyanauca. 14 Shinajpi Jesús pajlla pambai nica: “Lázaro huañushcami. 15 Cangunamanda cushiyauni ñuca chihui illashcamanda, canguna quiringaj. Acuichi paihuajma.” 16 Shinajpi Tomás, ‘Chapa Huahua’ nishca, chishu yachachishca runaunama nica: “Acuichi ñucanchis, paihua pariju huañungaj.” 17 Shinajpi Jesús shamuca. Huañushca Lazarora ña chuscu punzha pambashcara tupaca, 18 Betania Jerusalén mayambi aca, shu samai purina tupui. 19 Ashca judiuguna Martama Mariamas shamunaushca aca paigunara cushiyachingaj, Lázaro huañushcamanda. 20 Shinajpi Marta Jesús shamushcara uyasha, paita tupangaj llucshica. Maríaga huasii saquirica. 21 Marta Jesústa nica: “Señor, can caibi tiaushca ajpi, ñuca turi mana huañunmachu aca. 22 Shinallara cuna ricsinimi imaras can Diosta mañajpi, pai canda cungami.” 23 Jesús nica: “Camba turi causaringami.” 24 Marta nica: “Yachanimi puchucai punzhai causarinai causaringami.” 25 Jesús cutipasha nica: “Ñucaga causarina mani, causais ani. Maicans ñucajpi quirisha, huañushca ashas, causaringami. 26 Tucui causajcuna ñucajpi quirisha huiñaigama mana huañunaungachu. ¿Caita quiringuichu can?” 27 Marta cutipaca: “Ari, Señor,” nisha, “can Cristo nishca Diospa Churi ajta, cai pachama shamujta, quirishcani.” 28 Marta casna rimasha, pacalla rica paihua ñaña Mariara cayangaj. Paita nica: “Yachachij caibimi, canda cayaun.” 29 María caita uyasha, uctalla shayarisha paihuajma shamuca. 30 Jesús chara llactai mana icucachu, astaun Marta paita tupashca pambai chapauca. 31 Shinajpi Mariahua pariju huasii tiaj judiuguna cushiyachingaj shamujcuna, pai dsas atarisha llucshishcara ricusha, paita catinaucami: “Aya pambashcama huacangaj riun,” nisha. 32 María Jesús tiashcama shamusha, paita ricusha, paihua chaquii tuama urmasha, paita nica: “Señor, can caibi tiaushca ajpi, ñuca turi mana huañunmachu aca.” 33 Shinajpi Jesús María huacashcara, shinallara paihua pariju shamuj judiuguna huacashcaras ricusha, paihua shungüi yapa llaquirisha turbarica. 34 Jesús nica: “Paita, ¿maibi pambacanguichi?” “Señor,” ninaun, “ricuj shami.” 35 Jesús huacacami. 36 Shinajpi judiuguna ninauca: “Ricuichi imasna Jesús paita llaquicami.” 37 Paigunamanda huaquinguna ninauca: “Cai ñausa ñahuira pascaj, ¿manzhu ushanmaca cai runara huañunamanda quishpichingaj?” 38 Jesús cuti paihua shungüi llaquirisha, aya churashca uctuma shamuca. Peñas uctu aca. Shu rumi uctu pungu ahuai churashca siriuca. 39 Jesús nica: “Rumira anzhuchichi.” Marta, huañushca Lázaro pani, nica: “Señor, asnaunmi; ña chuscu punzha pambashcami.” 40 Jesús nica: “¿Manzhu canda nicani, can quirishaga, Dios sumaj munanaita rashcara ricunguimi?” 41 Shinajpi huañushca runa siriushcamanda rumira anzhuchinauca. Jesús ahuama ricusha: “Yaya,” nica, “can ñucara uyashcamanda agrasini. 42 Can tucui huras ñucara uyashcara yachacani. Randi cai ashca muyujta shayajcunamanda casna nicani, paiguna can ñucara cachamushcara quirinauchu.” 43 Caita rimashca huasha, Jesús shinzhira caparisha: “Lázaro, pajllama llucshi,” nica. 44 Huañushca runa llucshicami, maquindi chaquindi llachapahua huatashca, ñahuis llachapahua pillushca. Jesús nica: “Huatashcara pascaichi, saquichi richu.” 45 Shinajpi Mariajma shamuj judiugunamanda ashcauna Jesús rashcara ricusha, paihuajpi quirinauca. 46 Randi huaquinguna Fariseogunajma rinauca Jesús rashcara cuintangaj. 47 Shinajpi sacerdote apuuna fariseogunandi pariju tandarisha ninauca: “¿Imara rashun? Cai runa munanaita ricurinaunara ashcara raun. 48 Ñucanchi paita shinalla saquijpi, tucui runauna paita quirinaungami. Romanoscuna shamunaunga ñucanchi santu llactaras ailluunaras tulangaj” 49 Caifás, apuunamanda shuj, chi huatai sacerdoteuna atun apu asha, paigunara nica: “Canguna mana imaras yachanguichichu; 50 shinallara mana iyanguichi imasnara ali tucunga shu runa ñucanchi intiru aillu randimanda huañungaj, tucui runauna ama chingaringaj.” 51 Caitaga mana pai quiquinmandallarachu rimaca, astaun pai chi huatai sacerdote atun apu asha. Diosmanda rimasha, “Jesús intiru aillu randimanda huañunami anga,” nica. 52 ”Shinallara mana chi llacta aillumandalla huañuchu, astaun tucui Diospa chausirishca churiunara shujllai tandachingaj.” 53 Shinajpi chi punzhamanda pacha, paigunapura Jesústa huañuchingaj iyanaucami. 54 Chiraigumanda Jesús judiugunahua ña mana pajllai puricachu. Paiga runa illashca parti rayai shu Efraín shutichishca llactama rica. Chihui pai yachachishca runaunahua saquirica. 55 Judiuguna Pascua ista mayanllayauca, Chi llactamanda ashcauna Jerusalenma sicanauca Pascua ista manara pactamujllaira, maillaringaj. 56 Jesústa mascanauca. Templo huasii huaquinguna shujcunara tapunauca: “¿Jesús istama shamungachu? ¿Imasnara iyanguichi?” 57 Sacerdote apuuna fariseogunandi mandanauca: “Maicans Jesús tiashcara yachasha, rimanauchu,” Jesústa apingaj.
1 Pascua istamanda sucta punzha ñaupa, Jesús Betaniama shamuca, huañuj Lázaro llactama, pai huañushcaunamanda causachishca. 2 Chihui, Jesúspajta shu istara ranauca, tuta. Marta yanapaca. Lázaro Jesúshua pariju mesai tiarica. 3 Shinajpi María shu libra tupu gustu asnaj ambira apamuca; ashca valij aca. Chi ambihua Jesúspa chaquira armachica, shinallara paihua acchahua chaquira chaquichica. Ambi gustu asnaihua intiru huasira undaca. 4 Judas Iscariote, Simonba churi, shu Jesús yachachishca runa, paita intrigangarau, rimaca: 5 ”¿Imarasha cai quinsa patsaj cullqui tupu valina ambi mana catushcachu aca tsuntsuunama cungaj?” 6 Casna rimaca, mana tsuntsuunara llaquishcamanda, astaun yachachishca runauna cullqui bulsara charisha, shuhuaj asha, chimanda cullquira apij aca. 7 Shinajpi Jesús: “Saqui,” nica, “ñuca pambarina punzhagama caita huacachishcami. 8 Tsuntsuuna tucui huras cangunahua tianaunga, randi ñuca mana tucui huras cangunahua tiashachu.” 9 Shinajpi judiugunamanda ashcauna Jesús chihui tiaushcara uyanauca. Jesúsmandalla mana shamunaucachu, astaun Lazarora ricungaj shamunaucami, pai huañushcamanda causarishcara ricungaj. 10 Sacerdote apuuna paigunapura rimananauca Lazaroras huañuchingaj nisha. 11 Pai causarishcaraigumanda ashca judiuguna anzhurinauca, Jesúspi quirinauca. 12 Cayandi punzha, ashca runauna istama shamujcuna, Jesús Jerusalenma shamungaraushcara uyasha, 13 ramos pangaunara apisha, paita tupangaj llucshinauca, caparinauca: “¡Alabashca angui! ¡Señor Diospa shutii shamuj Israel Rey Apu. Bindisiashca angui!” 14 Jesús shu malta burura tupasha, paihua ahuai tiarica. Cai Quillcashcasna: 15 ”Ama manzhaichu Siomba ushushi: Caiga camba Rey Apu shamun. Shu malta buru ahuai tiarisha shamun.” 16 Ñaupa punda cai tucuira mana ali intindinaucachu pai yachachishca runauna. Astaun Jesústa sumajyachishca huasha, cai tucuira paimanda quillcashca ajta iyarinauca, shinallara quillcashcasna runauna paita cai tucuira ranauca. 17 Jesúshua pariju tiajcuna pai Lazarora pambashcamanda cayaushcai, huañushcamanda causachishcais, pai rashcara cuintarianauca. 18 Chimandas runauna paita tupangaj shamunauca, Jesús chi munanaita ricurinara rashcara uyashcamanda. 19 Astaun fariseoguna paigunapura ninauca: “¡Ricuichi imasnara mana imaras ushanguichi. Intiru mundu paita catinaun!” 20 Istama Diosta alabangaj shamujcunahua huaquin griegu runauna tianauca. 21 Caiguna Felípema shamunauca. Felipe Galilea parti Betsaida llactamanda aca. Paiguna Felípera ruganauca: “Señor, Jesústa ricunara munanchi.” 22 Felipe caita Andresta cuintaca. Shinajpi Andresndi Felipendi Jesústa cuintanauca. 23 Jesús cutipaca: “Runa Churira sumajyachina huras pactamunmi. 24 Sirtu pacha cangunara nini: “Trigu muyu allpai urmasha, mana huañusha, sapalla saquirin. Randi, huañusha ashcara aparin. 25 Maicans paihua causaira llaquisha, causaira pirdingami. Randi maicans cai pachai paihua causaira chijnisha, huiñaigama paihua causaira huacachingami. 26 Maicans ñucara sirvisha, catihuachu. Maibi ñuca tiaupi chillaira ñucara sirvij tiangami. Maican runa ñucara sirvisha, ñuca Yaya paita ahuayachingami.” 27 ”Cunaga ñuca alma turbarinmi. ¿Imara nishairi? ‘¿Yaya, cai hurasmanda quishpichihuai,’ nishachu? Astaun, caita pactachingaj cai hurasma shamucani. 28 Yaya, camba shutira ahuayachingui.” Shinajpi ahua pachamanda shu shimi uyarica, shina nisha: “Ahuayachishcani, cutillara ahuayachishami.” 29 Chihui tiaj ashca runauna shimira uyajcuna ninauca: “Rayuca” huaquinguna: “Shu angel paita rimashcami.” 30 Jesús cutipaca: “Cai shimi mana ñucajta, astaun cangunajta uyaricami. 31 Cuna cai pachara taripanami. Cuna cai pacha atun apu ichui tucungami. 32 Ñuca mundumanda atarichishca asha, tucui runaunara ñucajma aisashami.” 33 Jesús casna rimasha, pai imasna huañungaraushcara intindichicami. 34 Runauna paita cutipanauca: “Ley shimimanda uyashcanchi Cristo huiñaigama tianara. ¿Imarasha ningui can, Runa Churi, atarinara ministinmi? ¿Pitai cai Runa Churi?” 35 Shinajpi Jesús paigunara nica: “Unaillara punzha cangunahua tiangami. Purichi punzha tiaullaira, tuta cangunara ama cungaimanda apichu. Tutai purij maima riushcaras mana yachanzhu. 36 Ima huras punzhara charisha, punzhara quirichi, canguna punzhamanda churiuna tucungaj.” Caita rimaca Jesús. Casna rimashca huasha, paigunamanda chingarica. 37 Shinajpis, Jesús runauna ñaupajpi ashca munanaita ricurinaunara rajllaira, paiguna mana paita quirinaucachu; 38 Diosmanda rimaj Isaías rimashca pactaringaj, imasna nin: “Señor, ¿pita ñucanchi rimashcara quirishcachu? ¿Pima Diospa ushanara ricuchishcachu?” 39 Chiraigumanda quirinara mana ushanaucachu, imasna Isaías shu partii nica: 40 ”Paiguna ñahuiunara ñausayachica, shunguras shinzhiyachica, Ñahuihua ama ricunauchu, shunguhuas ama intindinauchu, Ama ñucama vultiarinauchu, ñuca paigunara alichingaj.” 41 Cai shimiunara Isaías rimaca, pai Diospa sumajta ricusha, Diosmanda rimasha. 42 Shinasha, apuunamanda ashcauna Jesúspi quirinauca; astaun fariseogunara manzhashcamanda paiguna quirishcara mana rimanaucachu, tandarina huasimanda ama ichui tucungaj. 43 Paiguna Dios alabashcamanda yalira runauna alabashcara llaquinauca. 44 Jesús caparisha nica: “Maicans ñucajpi quirisha, mana ñucajllaira quirinzhu, astaun ñucara cachamujpis quirinmi. 45 Maicans ñucara ricusha, shinallara ñucara cachamujtas ricun, 46 Ñuca, punzhayachij, cai pachama shamushcani, tucui ñucajpi quirijcuna ama tuta llandui tianauchu. 47 Maicans ñuca shimira uyajpi, mana pactachijpi, mana ñuca paita taripanichu. Cai pachara taripangaj mana shamucanichu, astaun cai pachara quishpichingaj. 48 Maicans ñucara, ñuca shimiras mana chasquisha, pai shu taripajta charin. Ñuca rimashca shimi paita taripangami puchucai punzhai. 49 Ñuca ñucamandallara mana rimacanichu; astaun ñucara cachamuj Yaya, paimi mandahuaca imara rimanaras. 50 Yachanimi Dios camachishca shimi huiñai causaimi. Ñuca imara rimashas, Yaya ñucama rimashcasna rimauni.”
1 Pascua ista manara pactamujllaira, Jesús paihua huras ña pactamushcara yachasha, cai pachamanda Yayajma ringaj, paihua cai pachai causaj runaunara llaquisha, puchucaigama paigunara llaquicami. 2 Tuta micunara micuushcai, supai apu Simomba churi Judas Iscariote shungüi iyachica Jesústa intrigangaj. 3 Jesús yachaca paihua Yaya tucuira paihua maquii churashcara, shinallara pai Diosmanda shamushcara, Diospajma rinaras. 4 Jesús micuna mesamanda atarisha, ahua churarinara anzhuchisha, chaquichina llachapara apisha, chumbillica. 5 Shinajpi, shu batiai yacura talisha, pai yachachishca runauna chaquira maillangaj callarica, pai chumbillishca llachapahua chaquiunara chaquichica. 6 Jesús Simón Pedroma shamujpi, Pedro nica: “Señor, ¿canzhu ñuca chaquira maillangui? 7 Jesús paita cutipasha nica: “Ñuca raushcara mana intindinguichu cuna, astaun huasha intindinguimi.” 8 Pedro nica: “Mana ima huras ñuca chaquira maillahuanguichu.” Jesús cutipaca: “Ñuca canda mana maillajpi, mana imaras charinguichu ñucahua.” 9 Simón Pedro cutipasha: “Señor,” nica, “mana chaquillara, astaun maquindis umandis maillahuai.” 10 Jesús nica: “Armashca runa chaquillara cuti maillangaj ministin, pai tucui pichashca tucungaj. Canguna pichashca anguichi, astaun mana tucui.” 11 Jesús maican runa paita intrigangaraushcara yachaca, chiraigumanda nica: “Mana tucui pichashcachu.” 12 Shinajpi, chaquiunara maillashca huasha, Jesús paihua churarinara churarisha, cuti mesai tiarica. Jesús paigunara tapuca: “¿Yachanguichichu ñuca cangunahua rashcara? 13 Canguna ñucara, ‘Yachachij, Señor,’ nisha nihuanguichi. Shina nisha alimi rimanguichi. Shinami ani. 14 Ñuca, Señor, Yachachij ashallara, canguna chaquira maillashcani; shinallara cangunas shujcuna chaquira maillana anguichi. 15 Ñuca shu ricuchinara cangunara ricuchishcani, ñuca rashcasna cangunas shinallara ranguichi. 16 Sirtu pacha cangunara nini: “Sirvij runa paihua patrunmanda mana yalinzhu; shinallara cachashca runa paita cachajmanda mana yalinzhu. 17 Canguna cai camachishcaunara yachasha, pactachisha, cushi shunguyuj anguichi. 18 Ñuca mana tucuimanda rimanichu. Ñuca ajllashca runaunara ricsinimi. Astaun, Diospa Quillca pactaringaj, ‘Ñucahua pariju tandara micuj paihua chaquira atarichica, ñucahua cuntra rasha. ’ 19 Cunamanda pacha, manara pactarijllaira, cangunara rimashcani. Shinajpi pactarishca huraspi ñuca ajta quiringuichimi. 20 Sirtu pacha cangunara nini: Maicans ñuca cachashca runara chasquisha, ñucaras chasquin. Maicans ñucara chasquisha, ñucara cachamujtas chasquin.” 21 Caita rimashca huasha, Jesús paihua shungüi yapa llaquirica.”Sirtu pacha cangunara nini, cangunamanda shuj ñucara intrigangaraun.” 22 Shinajpi yachachishca runauna parijumanda ricunanausha, paigunapura tapunanauca: “¿Pitangai Jesús casna rimaushca?” 23 Shu Jesús yachachishca runa, pai llaquishca, Jesúspajpi quimirisha siriuca. 24 Simón Pedro, maquihua ricuchisha paita nica: “Tapui, ¿pitairi pai casna rimaushca runa?” 25 Pai, Jesúspa pichui quimirisha sirij, “Señor, ¿pitairi?” nica. 26 Jesús cutipaca: “Ñuca ucuchishca tandara cushca runami.” Jesús tandara ucuchisha, Simomba churi Judas Iscariotema cuca. 27 Judas ucushca tandara apishca huasha, Satanás paihua shungüi icuca. Shinajpi Jesús paita nica: “Can rangaraushcara uctalla rai.” 28 Jesús imamanda caita rimashcara mesai tiajcuna mana intindinaucachu. 29 Huaquinguna iyanauca Judas cullqui bulsara charishcamanda, Jesús paita nica: “Ñucanchi istai ministishcara randingui;” mana shinasha imaras tsuntsuunama cuyangaj rimaca. 30 Ucushca tandara apishca huasha, Judas llucshica. Tuta aca. 31 Judas llucshishca huasha, Jesús nica: “Cuna Runa Churi sumajyachishcami. Shinallara Dios paihua Churii sumajyachishcami. 32 Dios Churimanda sumajyachishca asha, shinallara Dios pai quiquinllai Churira sumajyachingami, cunallara paita sumajyachingami. 33 Churihuauna, chara ansa cangunahua pariju tiausha. Mascahuanguichi, randi imasnara judiugunara nicani: ‘Ñuca riushcama canguna shamunara mana ushanguichichu. ’ Shinallara cangunaras cuna nini. 34 Mushuj mandashca shimira cangunara rimauni: Parijumanda llaquinaunguichi. Ñuca cangunara llaquishcasna, shinallara parijumanda llaquinaunguichi. 35 Caimanda tucui runauna canguna ñuca yachachishca runauna ajcunara ricsinaungami, canguna parijumanda llaquinanaupi.” 36 Simón Pedro Jesústa nica: “Señor, maima riungui?” Jesús cutipaca: “Ñuca riushcama cuna mana ushanguichu catinara, astaun huasha catihuanguimi.” 37 Pedro nica: “¿Imamanda canda cunallara catinara mana ushani? Can randimanda ñuca causaira cushami.” 38 Jesús cutipaca: “¿Camba causaira ñuca randimanda cunguichu? Sirtu pacha canda nini: Gallu manara cantajllaira, can quinsa cuti, ‘Paita mana ricsinichu,’ ninguimi.”
1 ”Canguna shungu ama turbarichu. Diospi quiringuichi, ñucajpis quirichi. 2 Ñuca Yaya llactai ashca huasi tian. Mana shina ajpiga, cangunara rimaimacani. Ñuca cangunajta tianara alichingaj riunimi. 3 Rishaga, tianaunara alichisha, cuti shamushami cangunara ñucajma pushangaj, ñuca tiaushcai cangunas shinallara chihui tianauchu. 4 Ñuca riushcaras yachanguichi, ñambiras yachanguichi.” 5 Tomás paita nica: “Señor, can riushcara mana yachanchi, ¿imasna rasha ñambira yachashun?” 6 Jesús paita nica: “Ñuca ñambi ani, sirtu shimi ani, causais ani. Mana pihuas Yayajma shamunzhu mana ñucahua shamujpi. 7 ”Ñucara ricsisha, Yayaras ricsinguichima. Cunamanda paita ricsinguichi, paita ricushcanguichi.” 8 Felipe paita nica: “Señor, Yayara ricuchihuapai, chilla basta.” 9 Jesús paita nica: “¿Ashca punzhaunara cangunahua pariju tiashcani, can ñucara mana ricsihuashcangui, Felipe? Maicans ñucara ricusha Yayaras ricushcami. ¿Imasnajpira shina ningui: ‘Yayara ricuchihuapai?’ 10 ¿Ñucaga ñuca Yayajpi tiashcara, Yaya ñucajpis tiashcara manzhu quiringui? Ñuca cangunara rimashca shimiunara mana ñucamandallachu rimani, astaun ñucajpi causaj Yaya, paimi tucui ranaunara ran. 11 Ñucara quirihuaichi ñuca Yayajpi tiashcara, Yaya ñucajpi tiashcaras; manasha quiquin rashcaunamanda quirihuaichi. 12 Sirtu pacha cangunara nini, maican ñucara quirisha, ñuca rashca samiunara shinallara rangami; caigunamanda yalijtas rangami, ñuca Yayajma ringaraushcamanda. 13 Canguna tucui imaras Yayara mañajpi ñuca shutii, cai tucuira rashami, Yaya Churimanda sumajyachishca angaj. 14 Canguna imaras ñuca shutii mañajpi, rashami. 15 ”Canguna ñucara llaquisha, ñuca mandashca shimiunara pactachichi. 16 Ñuca Yayara rugasha, pai cangunama shu Yanapajta cungami, huiñaigama cangunahua pariju tiangaj. 17 Cai Yanapaj sirtu shimira rimaj Ispiritumi. Cai pacha runauna paita chasquinara mana ushanaun, paita mana ricusha, mana ricsisha, Cangunaga paita ricsinguichi. Pai cangunahua pariju tiaun, canguna shungu ucui tiangami. 18 Cangunara mana huaccha huahuaunasna saquishachu. Cangunama shamushami. 19 Unaillara cai pacha runauna ñucara mana ricuhuanaungachu, astaun canguna ricuhuanguichimi. Ñuca causaushcaraigu, cangunas causaunguichimi. 20 Chi punzhai, ñuca Yayajpi tiashcara yachanguichi, cangunas ñucajpi, ñucas cangunajpi. 21 Maicans ñuca mandashca shimiunara charisha, pactachisha, paimi ñucara llaquij. Ñucara llaquijta ñuca Yaya llaquingami, ñucas paita llaquisha, ñucallara paima ricuchishami.” 22 Judas, mana Iscariote, Jesústa nica: “Señor, ¿imarasha ñucanchillara ricuchingui, mana tucui cai pacha runaunara?” 23 Jesús paita cutipaca: “Maicans ñucara llaquij ñuca mandashca shimira pactachingami. Yayas paita llaquingami. Paihuajma shamushun, paihua causashun. 24 Maicans ñucara mana llaquij ñuca mandashca shimiunara mana pactachinzhu. Canguna uyashca shimi mana ñucamandallarachu shamun, astaun ñucara cachamuj Yaya rimashcami. 25 Ñucas cangunahua pariju tiaushallara, cai shimiunara rimashcani. 26 Yaya ñuca shutii cachamushca Yanapaj, Santu Ispíritu, cangunara tucui imaras yachachingami; shinallara tucui ñuca rimashcaunara cangunara iyarichingami. 27 Cushi shungura cangunama saquini; ñucamanda cushi shungura cangunama cuni. Mana cai pacha cushcasna cunichu. Canguna shungu ama turbarichu, shinallara ama manzharichu. 28 Uyashcanguichi imasnara cangunara nicani, ‘Riunimi,’ shinallara, ‘tigramunimi. ’ Canguna ñucara llaquisha, sirtu pacha cushiyanguichima, ‘Yayajma riunimi,’ nishcamanda, Yaya ñucamanda yali ashcaraigu. 29 Cuna, manara tucujllaira, cangunara cuintashcani, ima huras casna tucujpi canguna quiringuichima. 30 Cunamanda mana ashcara rimashachu. Cai pacha atun apu shamun; paiga ñucajpi imaras mana charinzhu. 31 Astaun cai pacha runauna ñuca Yayara llaquishcaras, Yaya ñucara mandashcaras ricsinauchu, shinallarami rauni.”Atarichi, caimanda rishunchi.”
1 Jesús nica: “Ñuca sirtu uvillas yura ani. Ñuca Yaya uvillas yurara cuirajmi. 2 Tucui pallca ñucamanda muyura mana aparijta pitinga; muyura aparijcunara pichasha alichinga astaun mas aparingaj. 3 Ñuca rimashca shimimanda canguna ña pichashca anguichi. 4 Ñucajpi tiaichi, ñucas cangunajpi. Imasnara pallca paillara mana ushan aparinara mana yurai pigariaisha, shinallara canguna mana ushanguichichu aparinara mana ñucajpi pigariaisha. 5 Ñuca uvillas yura ani, canguna pallcauna anguichi. Pihuas ñucajpi pigariaisha, ñucas paihuajpi, pai ashca muyura aparingami. Ñucamanda anzhurishca asha, mana ima ranaras ushanguichichu. 6 Maicans mana ñucajpi pigariaisha, mana valij pallca cuinta ichui tucunga, chaquiringaj. Ichushca pallcaunara tandachinaunga, ninai shitasha rupachinaunga. 7 ”Canguna ñucajpi tiausha, ñuca shimiuna cangunajpi tiausha, imaras munasha mañaichi, cangunajta rashca anga. 8 Canguna ashca muyura aparijpi, ñuca Yaya sumaj yachishcami anga. Shinajpi canguna ñuca quiquin yachachishca runauna tucunguichimi. 9 Imasna Yaya ñucara llaquihuashca, shinallara ñuca cangunara llaquishcani. Ñuca llaquiushcai tiaichi. 10 Canguna ñuca mandashca shimiunara pactachisha, ñuca llaquiushcai tiaunguichimi, imasna ñuca Yaya mandashca shimiunara pactachishcani, shinallara pai llaquiushcais tiauni. 11 Cai shimiunara cangunama rimashcani ñuca cushi cangunajpi pactarichu, canguna cushi undajta angaj. 12 Caimi ñuca mandashca shimi, ‘Canguna parijumanda llaquinuichi, ñuca cangunara llaquishcasna. ’ 13 Pi runas cai llaquinamanda yalira mana charinzhu, shu runa paihua causaira paihua amiguuna randimanda cungaj. 14 Canguna ñuca amiguuna anguichi ñuca mandashcara rasha. 15 Cunaga, cangunara sirvijcuna nisha mana rimashachu. Shu sirvij paihua patrún rashcara mana yachanzhu. Astaun cangunara amiguuna nisha rimashcani. Ñuca Yayamanda uyashcara tucuira cangunara cuintashcani. 16 ”Canguna ñucara mana ajllashcanguichichu, astaun ñuca cangunara ajllashcani. Cangunara cachashcani aparij tucungaj, canguna aparishca saquirichu, canguna imaras Yayara mañajpi ñuca shutii, cangunara cungami. 17 Caita cangunara mandani: ‘Llaquinaunguichi parijumanda. ’ 18 ”Cai pacha runauna cangunara chijnijpi, caita yachaichi, paiguna shinallara ñucara chijnihuanauca cangunamanda ñaupara. 19 Canguna cai pachamanda ajpi, cai pacha runauna paiguna quiquimbajta llaquinaunma; astaun canguna mana cai pachamanda ajpi, chijni tucushcanguichi ñuca cangunara cai pachamanda ajllashcaraigu. 20 Ñuca cangunara rimashca shimira iyaringuichi. Shu sirvij paihua patrunmanda mana yalinzhu. Runauna ñucara turmindachihuanauca; shinallara cangunara turmindachinaungami. Paiguna ñuca rimashca shimira pactachisha, shinallara canguna rimashcara pactachinaungami. 21 ”Astaumbas runauna cai tucuira cangunara ranaunga ñuca shutimanda, ñucara cachamujta mana ricsishcamanda. 22 Ñuca mana shamushca ajpiga, paigunara mana rimashca ajpi, uchara mana charinaunmaca. Cuna paiguna rimanara mana ushanaun, ‘Mana yachacanchichu,’ nisha, paiguna ucharashcamanda. 23 Maicans ñucara chijnisha, shinallara ñuca Yayaras chijnin. 24 Ñuca paiguna chaupi shungüi shuj cuna mana rashca tunu ranaunara mana rashca ajpi, paiguna uchara mana charinaunmaca. Cunaga ñucaras, Yayaras ricunaushcami, chijninaushcami. 25 Casna tucushcami paiguna ley shimii quillcashca pactaringaj: ‘Yangamanda chijnihuanauca. ’ 26 ”Astaun Yayajmanda ñuca cachamushca Yanapaj, Yayajmanda llucshimuj, sirtu rimaj Ispíritu shamusha rimangami. 27 Cangunas shinallara ñucamanda rimanguichi, canguna callarishcamanda pacha ñucahua pariju causashcamanda.”
1 ”Cai tucuira cangunara rimashcani, canguna ama nijtaringaj. 2 Tandarina huasiunamanda cangunara ichunaungami. Punzha shamunga imahuras maican runas cangunara huañuchisha, ‘Diosta sirviunimi,’ nisha iyangami. 3 Caita ranaungami Yayaras ñucaras mana ricsishcamanda. 4 Cai shimiunara cangunara rimashcani, huras pactamujpi, ñuca casna rimashcaunara iyarinauchu.”Ñuca callarishcamanda mana casna rimacani, ñuca cangunahua pariju tiashcamanda. 5 Cuna ñucara cachamujma ma riunimi. Cangunamanda mana pihuas tapuhuanguichi: ‘¿Maima riungui?’ nisha, 6 Astaun ñuca casna rimashcamanda, canguna shungüi ashcara llaquiringuichi. 7 Sirtu shimira rimauni: ‘Ñuca ringaj ministirinmi. ’ Ñuca mana rijpi, Yanapaj cangunajma mana shamungachu. Ñuca risha, paita cachamushami. 8 Yanapaj shamusha, tucui runaunara ricsichinga uchaunara, ali causanaras, taripanaras. 9 Uchamanda rimangami, runauna ñucajpi mana quirishcamanda, 10 Ali causanamanda rimangami, ñuca Yayajma riushcamanda. Ñucara mana mas ricunguichichu. 11 Taripanamandas rimangami, cai pacha atun apu ña taripashcamanda. 12 Chara ashcara charini cangunara cuintangaj, astaun cunallara uyanara mana ushanguichichu. 13 Ima huras cai sirtu shimira rimaj Ispíritu shamusha, pai cangunara tucui sirtu rimashcara yachachingami. Pai quiquinmandallara mana rimangachu, astaun pai tucui uyashcara cuintangami; ima huasha huras shamunaras yachachingami. 14 Pai ñucara sumajyachingami; ñucajmanda ajcunara cangunara yachachingami. 15 Ñuca Yaya tucui charishca ñucajmi; chimanda nicani: ‘Ispíritu ñucajmanda apisha cangunara yachachingami. ’ 16 ”Unaillara mana ricuhuanguichichu; cuti unaillai ricuhuanguichimi, ñuca Yayajma rishcamanda.” 17 Shinajpi pai yachachishca runaunamanda huaquinguna ninauca: “¿Imara nin, ‘Unaillara ñucara mana ricuhuanguichichu, cuti unaillai ricuhuanguichimi,’ shinallara, ‘Yayajma riunimi’?” 18 Paiguna ninauca: “¿Imara nin cai ‘Unaillai’ nishca? Pai rimashcara mana intindinchichu.” 19 Jesús paiguna tapusha nishcara ricsisha, paigunara nica: “¿Cangunapura tapunguichi cai ñuca rimashcara, ‘Unaillara mana ricuhuanguichichu, cuti unaillai ricuhuanguichimi. ’? 20 Sirtu pacha cangunara nini: ‘Huacangaraunguichi, llaquiringaraunguichi; astaun cai pacha runauna cushiyanaungami. Shinajpis canguna llaqui tucujpi, canguna llaquirishca cushi tucungami. 21 Huarmi shu huahuara pagarichisha nanachinmi, paihua huras pactamushcamanda. Huahuara pagarichishca huasha, huarmi paihua nanaira ña cungarin, shu runa cai pachai pagarichishcamanda cushiyasha. 22 Shinallara cuna canguna sirtu pacha llaquiringuichimi. Shinajpi ñuca cangunara cuti ricusha, canguna shungu cushiyangami. Canguna cushiyashcara pihuas mana quichungachu. 23 Chi punzhai imaras mana tapuhuanguichichu. Sirtu pacha cangunara nini: ‘Tucui imaras Yayara mañajpi ñuca shutii, pai cungami. ’ 24 Cuna hurascama imaras mana mañashcanguichi ñuca shutii. Mañaichi, cui tucunguichimi, canguna cushi pactaringaj. 25 ”Cai tucuira yachachina cuintanaunahua cangunara rimashcani. Huras shamunga ñuca mana yachachina cuintanaunahua rimashachu, astaun pajlla pambai Yayamanda rimasha. 26 Chi punzhai ñuca shutii mañanguichi. Mana ninichu ñuca Yayara cangunamanda rugasha; 27 Yaya paillara cangunara llaquin, canguna ñucara llaquishcamanda, ñuca Diosmanda llucshishcara quirishcamanda. 28 Yayajmanda llucshicani, cai pachama shamucani. Cutillara cai pachara saquisha, Yayajma riuni.” 29 Pai yachachishca runauna ninauca: “Cuna pajlla pambai rimaungui, mana ima pacashca shimira rimaungui. 30 Cuna intindinchi can tucui imaras yachashcara; pihuas canda imaras tapungaj mana ministingui. Caimanda can Diosmanda llucshishcara quirinchimi.” 31 Jesús cutipaca: “¿Cunarachu quiringuichi? 32 Huras shamun, ña pactamun, canguna chausiringuichimi, caran duiñu paihua partima, ñucara sapalla saquihuanguichi. Astaun ñuca mana sapallachu ani, Yaya ñucahua pariju tiaunmi. 33 Cai tucuira cangunara rimashcani canguna ñucajpi cushira charingaj. Cai pachai turmindusta charinguichimi, astaun quirichi, ñuca cai pachara vinsishcanimi.”
1 Jesús cai tucuira rimaca, ahuama ricusha.”Yaya, huras pactamun. Camba Churira sumajyachingui, camba Churi shinallara canda sumajyachichu. 2 Can paita ushaira cushcangui tucui runauna ahuai, tucui can paita cushca runaunama huiñai causaira cungaj. 3 Caimi huiñai causai, canda sapalla sirtu Dios ajta ricsinauchu, shinallara can cachamushca Jesucristoras. 4 Ñuca cai pachai canda sumajyachishcani. Can ñucama cushcara rangaj pactachishcani. 5 Cuna Yaya, ñucara sumajyachihuangui canhua pariju, ñuca ñaupa huras canhua pariju charishca sumajhua, cai pacha manara tiashcaira. 6 ”Can cai pachamanda ñucara cuhuashca runaunama camba shutira ricuchishcani. Cai runauna cambajcuna anauca, paigunara cuhuashcangui. Paiguna camba shimira huacachinaushca. 7 Cuna paiguna ricsinaushcami imasna tucui can ñucara cushcauna cambajmanda ashcara. 8 Can ñucara rimashca shimiunara paigunara rimashcani. Paiguna cai shimiunara chasquinaushcami. Sirtu pacha ñuca canmanda llucshishcara yachanaun, shinallara can cachamushcara quirinaushcami. 9 Paigunamanda rugauni. Cai pacha runaunamanda mana rugaunichu, astaun can ñucara cushca runaunamanda rugauni. Paiguna cambajcuna anaun. 10 Tucui ñucaj cambajmi, shinallara cambaj ñucajmi. Paigunamanda sumajyachishca ani. 11 ”Cunamanda cai pachai mana tiaunichu; caiguna cai pachai tianaunmi. Ñuca cambajma shamuni. Sumaj Yaya, caigunara, can ñucama cushca runaunara, huacachipai camba shutii, paiguna shujlla anauchu, ñucanchisna. 12 Cai pachai, ñuca paigunahua pariju tiaushcai, camba shutii paigunara huacachicani. Can ñucama cushca runaunara huacachishcani, paigunamanda pihuas mana pirdiricachu; randi pirdirina aj runa, pailla piridirica, Quillcashca pactaringaj. 13 Cunaga cambajma shamuni. Caita cai pachai rimauni, paiguna ñuca cushira pactajta charinauchu paiguna shungüi. 14 Can rimashca shimira paigunara rimashcani. Cai pacha runauna paigunara chijninauca, paiguna mana cai pachamanda ashcaraigu, imasna ñucas shinallara mana cai pachamandachu ani. 15 Can paigunara cai pachamanda llucchingaj mana ruganichu, astaun can paigunara manalimanda huacachichu. 16 ”Paiguna mana cai pachamandachu anaun, imasna ñucas mana cai pachamandachu ani. 17 Paigunara sumajyachi camba sirtu shimii. Can rimashca shimi sirtumi. 18 Imasna can ñucara cai pachama cachamucangui, shinallara ñuca paigunara cai pachama cachamushcani. 19 Paigunara llaquishcamanda ñuca ñucallara sumajyariuni, paiguna shinallara sirtu shimii sumajyachishca anauchu. 20 ”Mana caigunamandallachu mañauni, astaun shinallara paiguna camachishcamanda ñucajpi quiringaraucunamandas, 21 tucuipura shujlla anauchu, imasna can, Yaya, ñucajpi, ñucas cambajpi, shinallara paigunas ñucanchijpi shujlla anauchu, cai pacha runauna can ñucara cachamushcara quirinauchu. 22 Ñuca can cushca sumajta paigunama cushcani, paigunapura shujlla anauchu, ñucanchi imasna shujlla ashcasna; 23 ñuca paigunajpi, can ñucajpi, paiguna ali pacha shujlla anauchu; cai pacha runauna can ñucara cachamushcara yachanauchu, shinallara can paigunara llaquishcara ricsinauchu, imasna can ñucara llaquishcasna. 24 ”Yaya, can ñucama cushca runaunara ñuca munani maibi ñuca tiashcais paigunas ñucahua pariju tianauchu, can ñucara cushca sumajta ricungaj. Can cai pachara manara rajllaira ñucara llaquihuashcangui. 25 Ali Yaya, cai pacha runauna canda mana ricsinaushcachu, astaun ñuca canda ricsishcani. Caigunas can ñucara cachamushcara ricsinaushcami. 26 Shinallara ñuca camba shutira paigunama ricsichishcani, charajpas ricsichisha, can ñucara llaquishca sami llaquina paigunajpi tiachu, ñucas paigunajpi.”
1 Jesús cai tucuira rimashca huasha, pai yachachishca runaunahua pariju llucshica, Cedro nishca yacu chimbama, shu sisa pambama. Chihui icuca pai yachachishca runaunahua. 2 Judaspas, Jesústa intrigaj runa, cai sisa pambara ricsica. Ashca cuti Jesús pai yachachishca runaunandi chihui tandarijcuna aca, 3 Judas, shu muntun suldaruunara apisha, sacerdote apuunamanda fariseogunamandas cachashca guardaunandi, chi pambama rinauca vilaunahua, nina huanguunahua, isparaunahua. 4 Jesús tucui ima tucungaraushcaras yachasha, ñaupasha rica: “¿Pita mascaunguichi?” nica. 5 ”Nazaretmanda Jesústa mascaunchi” ninauca. Jesús, “Ñuca mani,” nica. Judas, Jesústa intrigaj runa, paigunahua tiauca. 6 Jesús paigunara, “Ñuca mani” nijpi, runauna huashama tigrasha allpama urmanauca. 7 Cutillara Jesús: “¿Pita mascaunguichi?” nisha tapuca. Paiguna, “Nazaretmanda Jesústa” ninauca. 8 Jesús cutipasha nica: “Ña nicani, ‘Ñuca mani. ’ Canguna ñucara mascasha, caigunara ringaj saquichi,” nica. 9 Casna tucuca pai rimashca shimi pactaringaj: “Can ñucara cushca runaunamanda, pitas mana pirdishcani.” 10 Shinajpi Simón Pedro isparara charisha llucchica, sacerdote atun apura sirvijta chugrichica, paihua ali rinri carara pitisha. Cai sirvij Malco nishca shutiyuj aca. 11 Shinajpi Jesús Pedrora nica: “Isparara carai sati. ¿Ñuca Yaya cuhuashca turmindarina vasura manzhu upisha?” 12 Shinajpi suldaru muntun paiguna capitandi, judiuguna cachashca guardaunandi Jesústa apinauca, huascahua paita huatanauca. 13 Ñaupa punda Jesústa Anaspajma pushanauca, pai Caifaspa huarmi yaya aca. Caifás chi huatai sacerdote atun apu aca. 14 Chi Caifás judiugunama ñaupa rimaj aca: “Shu runa tucui runauna randimanda huañuna ministirin,” nisha. 15 Simón Pedro, shu yachachishca runandi Jesústa catinauca. Chishu yachachishca runa sacerdote atun apu ricsishca aca. Pai Jesúshua pariju sacerdote atun apu huasi pungüi icuca. 16 Astaun Pedro canzhai tiauca, pungu rayai. Shinajpi chi yachachishca runa, sacerdote atun apu ricsishca asha, pungura cuiraj huarmira rimasha, Pedrora ucuma icuchica. 17 Shinajpi pungura cuiraj huarmi Pedrora nica: “¿Manzhu can cai runa yachachishca runaunamanda angui?” Pedro cutipasha, “Mana,” nica. 18 Sirvijcuna guardaunandi shayarisha ninara tandachinauca. Chiri tucushcamanda cunurianauca. Paigunahua pariju Pedro shayasha cunuca. 19 Sacerdote atun apu Jesústa tapuca pai yachachishca runaunamanda, pai camachishcamandas. 20 Jesús paita nica: “Ñuca pajlla pambai runaunara rimashcani. Tucui huras tandarina huasii yachachishcani, templo huasiis, tucui judiuguna tandarinaunais. Pacalla imaras mana rimashcanichu. 21 ¿Imarasha tapuhuangui ñucara? Uyajcunara tapui imara paigunara rimashcani. Paiguna ñuca rimashcara yachanaun.” 22 Jesús casna rimajpi, shu chihui tiaj guarda Jesústa sajmaca, casna nisha: “¿Shinachu sacerdote atun apura cutipangui?” 23 Jesús cutipaca: “Ima manaliras rimashca ajpi, manalira ricuchihuai. Mana shina ajpi, ¿imamanda sajmahuangui?” 24 Shinajpi Anás Jesústa huatashcara Caifás sacerdote atun apujma cachaca. 25 Shinajpi Pedro shayarisha cunuuca. Paita ninauca: “¿Manzhu can pai yachachishca runaunamanda angui?” Pedro, “Mana,” nica. 26 Sacerdote atun apura sirvijcunamanda shuj, rinri chugrichishca aillu, paita nica: “¿Manzhu canda ricucani sisa pambai Jesúshua pariju?” 27 Cutillara Pedro nica: “Paita mana ricsinichu.” Chi ratullaira gallu cantaca. 28 Tutamanda Jesústa Caifaspa huasimanda taripana huasima pushanauca. Paiguna taripana huasii mana icunaucachu, shujcunahua ama llutarisha huajlingaj, shina rasha Pascua istara micunara ushangaj. 29 Shinajpi Pilato paigunajma canzhama llucshimuca.”¿Imamanda cauźayachinguichi cai runara?” nica. 30 Cutipasha ninauca: “Cai runa mana cauźayuj ajpiga, cambajma mana pushamunchimachu aca.” 31 Shinajpi Pilato paigunara nica: “Cangunallara paita pushaichi, canguna yachaira paita taripaichi. Judiuguna paita ninauca: “Ñucanchi pitas mana huañuchinara ushanchichu.” 32 Caita ninauca Jesús rimashca shimi pactaringaj, ima sami huañuihua huañungaraushcara. 33 Shinajpi Pilato cutillara taripana huasii icuca. Jesústa cayasha tapuca: “¿Can judiuguna rey apuchu angui?” 34 Jesús paita cutipaca: “Caita, ¿camba quiquin iyaimanda rimanguichu, manasha shujcunachu ñucamanda rimanauca?” 35 Pilato cutipaca: “¿Ñuca judiuchu ani? Camba llactai causajcuna sacerdote apuunandi canda ñucama intriganaushca. ¿Imara rashcangui?” 36 Jesús cutipaca: “Ñuca mandana pacha mana cai pachamandachu, Cai pachamanda ajpi, ñucara sirvijcuna macananaunmami, ñuca judiugunama ama intrigai tucungaj, Astaun ñuca mandana pacha mana caimandachu. 37 Shinajpi Pilato paita nica: “¿Can rey apuchu angui?” Jesús cutipaca: “Can rey apu angui nisha nihuangui. Chiraigumanda pagaricani. Chiraigumanda cai pachama shamucani, sirtu shimira rimangaj. Tucui sirtu shimira chasquij ñuca shimira uyanmi.” 38 Pilato paita nica: “¿Sirtu shimi imarai?” Caita rimashca huasha, Pilato cuti judiugunama llucshisha paigunara nica: “Ima cauźaras paigunajpi mana tupanichu. 39 Canguna yachaira charinguichi Pascua istai shu runara cacharingaj. Shinajpi ¿ñuca cai judiuguna rey apura cacharingaj munanguichi?” 40 Shinajpi tucui pariju caparinauca: “Caita, mana, astaun Barrabasta munanchi.” Barrabás shu shuhua runa aca.
1 Shinajpi Pilato Jesústa apisha, paita azutica. 2 Suldamuna casha llaitura ahuasha, Jesúspa umai churachinauca. Shinallara puca llachapahua churachinauca. 3 ”¡Alabashcangui,” ninauca, “judiuguna rey apu!” Shina nisha paita sajmanauca. 4 Shinajpi Pilato cuti canzhama llucshisha, judiugunara nica: “Ricuichi, paita llucchimuni canguna yachangaj, ñuca mana ima cauźaras tupanichu paihuajpi.” 5 Jesús canzhama llucshica, casha llaitu paihua umai, puca llachapahua churarishca. Pilato paigunara nica: “¡Caiga cai runa!” 6 Sacerdote apuuna guardaunandi Jesústa ricusha caparinauca: “Chacatai, chacatai.” Piláto paigunara nica: “Cangunalla paita pushaichi, chacataichi. Ñuca ima cauźaras paihuajpi mana tupanichu.” 7 Judiuguna cutipanauca: “Ley shimira charinchi; ñucanchi ley shimimanda pai huañunami, ‘Diospa Churi ani,’ nishcamanda.” 8 Pilato caita uyasha maspas manzharica. 9 Cuti taripana huasii icusha, Pilato Jesústa: “¿Maimandara angui can?” nisha tapuca, Jesús mana imaras cutipacachu. 10 Shinajpi Pilato paita nica: “¿Manzhu cutipahuangui? ¿Manzhu yachangui canda chacatangaj ushaira charini, shinallara canda cacharinaras ushaira charini?” 11 Jesús cutipaca: “Ñucahua mana ima ushairas charinguima, mana ahua pachamanda cushca ajpi. Chimanda ñucara intrigaj runa yali uchayujmi.” 12 Caita uyashcamanda Pilato Jesústa cacharingaj iyarica. Astaun Judiuguna caparinauca: “Can cai runara cacharisha, mana Cesarba amiguchu angui. Maicans paillara rey apu tucusha Cesarda cuntra ran.” 13 Shinajpi Pilato cai shimira uyasha, Jesústa canzhama pushaca. Taripanai tiarica, ‘Rumi Pata’ nishca pistui; caita hebreo shimii ‘Gabata’ nishcami. 14 Pascua ista alichina punzha aca, doce huras chaupi punzha mayan. Shinajpi Pilato judiugunama nica: “¡Caiga canguna Rey Apu!” 15 Paiguna caparisha ninauca: “¡Llucchi, llucchi, paita chacatai!” Shinajpi Pilato nica: “¿Canguna Rey Apura chacatashachu?” Shinajpi sacerdote apuuna ninauca: “Cesarlla ñucanchi rey apumi, shujpas illanmi.” 16 Shinajpi Pilato Jesústa paigunama intrigaca chacatangaj. Paiguna Jesústa apisha pushanaucami. 17 Jesús paihua cruzta aparisha rica. ‘Uma Tullu’ nishca pambama, caita hebreo shimii ‘Gólgota’ nishcami. 18 Chihui Jesústa chacatanauca, ishquiunaras paihua pariju, caran partima shuj shuj, Jesústa paiguna chaupi shungüi. 19 Pilato shu quillcara quillcasha, cruz ahuai churacami. Shinami quillcashca aca: “NAZARETMANDA JESÚS, JUDIUGUNA REY APU.” 20 Ashca judiuguna cai quillcashcara ricunauca, Jesústa chacatashca pamba llacta mayambi ashcamanda. Chi quillcashca hebreo, griegu, latin shimiunai quillcashca aca. 21 Judiuguna sacerdote apuuna Pilatora ninauca: “‘Judiuguna Rey Apu’ nisha ama quillcaichu, astaun ‘Judiuguna Rey Apumi ani,’ nica, chita quillcai.” 22 Shinajpi Pilato cutipaca: “Ñuca ña quillcashcara quillcashcani.” 23 Suldaruuna Jesústa chacatashca huasha, paihua churarinaunara apisha, chuscu partii chaupinauca, caran suldaru shu partira charingaj. Paihua ucu churarina sirana illaj aca, ahuamanda shujllai ahuashca aca. 24 Paigunapura ninauca: “Ama lliquishunchi caita, astaun ajllashunchi pihuajta anga; maican lichayuj asha apachu.” Shina rasha Quillcashcara pactachinauca, casna nij: “Paigunapura ñuca churarinara chaupinauca, Ñuca llachapamanda maican lichayujta ajllanauca.” Suldaruuna shina ranauca. 25 Jesúspa cruz rayai, paihua mama, paihua mama ñaña, Cleofaspa huarmi Marías, María Magdalenas chihui pariju tianauca. 26 Jesús paihua mamara ricusha, shinallara pai llaquishca yachachishca runaras chihui tiajtas, Jesús paihua mamara nica: “Huarmi, riqui camba churira.” 27 Chi huasha Jesús cai yachachishca runara nica: “Riqui camba mamara.” Chi hurasmanda pacha, cai yachachishca runa Jesúspa mamara paihua quiquin huasima pushaca. 28 Chimanda huasha Jesús tucui ña pactarishcara yachasha, Quillcashcara pactachingaj nica: “Upinai.” 29 Chihui shu ayaj vinuhua undachishca puru tiaca. Shinajpi shu putuspi chupachinauca vinuhua; caspi pundai huatasha, Jesúspa shimii llutanauca. 30 Jesús vinura upishca huasha: “Ña pactarishcami,” nica. Shina nisha uraima umara rasha, ispiritura intrigacami. 31 Shinajpi judiuguna Pascua alichina punzha ajpi, samana punzhai huañushcauna cruzpi ama saquirinauchu, chi samana punzha atun ista punzha ajpi, Pilatora mañanauca paiguna changa tulluunara paquinauchu, paigunara cruzmanda anzhuchinauchu. 32 Suldaruuna shamusha, changaunara paquinauca shu runara chishu runaras, Jesúshua pariju chacatashcaunara. 33 Shinajpi Jesúsma shamusha, pai ña huañushcara ricusha, paihua changaunara mana paquinaucachu. 34 Astaumbas shu suldaru Jesústa custillas quinrii tucsica lanzahua. Chimanda dsas yahuarndi yacundi llucshinauca. 35 Chita ricuj runa riman. Pai rimashca shimi sirtumi. Pai rimashca shimi sirtu ashcara paimi yachan, canguna shinallara quirinauchu. 36 Cai tucuira rashca aca Quillcashca pactaringaj, shina nisha: “Paimanda ima tulluras mana paquishcachu anga.” 37 Shinallara shu Quillcashca nin: “Paiguna tucsishca runara ricunaungami.” 38 Chi tucui huasha, Arimatea llactamanda José, Jesús yachachishca runa asha, astaun pacallai, judiugunara manzhashcaraigu, Pilatora mañaca: “Lugarda cuhuai,” nisha, “Jesúspa aichara cruzmanda llucchingaj.” Pilato lugarda cuca, Shinajpi José shamuca, Jesúspa aichara llucchicami. 39 Shinallara shamuca Nicodemo, ñaupa Jesúsma tutai shamuj. Mirahua aloehua masashca gustu asnaj ambira apamuca, patsaj libra tupura. 40 Jesúspa aichara apinauca, llachapahua pillunauca chi gustu asnajcunahua, judiuguna pambana yachaira. 41 Jesústa chacatashca pamba mayambi shu sisa pamba tiaca. Sisa pambai shu mushuj pambana uctu tiaca. Chihui pitas chara mana pambashcachu aca. 42 Judiuguna pascua alichina punzha ashcamanda, chi pambana uctu mayanllai ajpi, chillai Jesústa chingachinauca.
1 Simana callarina punzhai, tuta ucura, chara llandu ashcai, María Magdalena Jesústa pambashcama shamuca. Rumira anzhuchishcara ricuca. 2 Shinajpi María callpasha rica Simón Pedroma, chishu yachachishca Jesús llaquishca runamas. Paigunara nica: “Pambashcamanda Senorda apanaushca. Maibi churashcaras mana yachanichu.” 3 Pedro llucshisha, chishu yachachishca runandi, pambashcama rinauca. 4 Cai ishqui runa pariju callpanauca. Chishuj Pedromanda yali uctalla callpaca, ñaupalla pambashcama pactaca. 5 Cumurisha llachapaunara sirjta ricuca. Shinashas mana icucachu. 6 Huasha, Simón Pedro paita catisha pactamuca. Pambashca uctui icusha siriu llachapaunara ricuca. 7 Shinallara umai pillushca llachapara ricuca, mana chishu llachapaunahua pariju, astaun shujpi pilluchisha churashcara. 8 Shinajpi chishu yachachishca runa, pambashcama ñaupa pactamuj, shinallara icucami. Ricusha quiricami. 9 Paiguna Quillcashcai quillcashcara Jesús huañushcaunamanda causarina ministishcara chara mana intindinaucachu. 10 Yachachishca runauna paiguna huasima tigranauca. 11 Astaun María pambashca canzhai huacasha tiauca; huacaushallara pambashca uctura ricungaj cumurica. 12 Ishqui angelda ricuca, yuraj churarishcaunara, shuj umama, shuj chaquima, Jesúspa aichara churashcai. 13 Angelguna paita ninauca: “Huarmi, ¿imamanda huacaunguiri? María nica: “Ñuca Señorda apashcamanda. Paita maibi churashcaras mana yachanichu.” 14 Shina rimashca huasha, María huashama vultiarisha, Jesústa chihui shayauta ricuca. Pai Jesús ajta mana ricsicachu. 15 Jesús paita nica: “Huarmi, ¿imarasha huacaunguiri? ¿Pita mascaunguiri?” María, sisa pambara cuirajmi iyasha, nica: “Señor, can paita apashca ajpi, maibi churashcara cuintahuai. Ñuca paita apasha.” 16 Jesús: “¡María!” nica. Pai vultiarisha ricusha: “¡Raboni!” nica. Caimi “Yachachij” nin. 17 Jesús paita nica: “Ama llangahuaichu. Chara Yayajma mana sicashcanichu. Ñuca uquiunama ri; paigunama rimairi: ‘Ñuca Yayajma, canguna Yayajmas, ñuca Diosma canguna Diosmas sicauni. ’ “ 18 María Magdalena rica yachachishca runaunama cuintangaj imasna Señorda ricushcaras, pai rimashcaras. 19 Chi quiquin punzha, ña chishiyaupi, simana callarina punzha ajpi, yachachishca runauna tandarinauca. Paiguna tandariushcai pungu ishcashca aca, judiugunara manzhashcamanda. Jesús shamusha, paiguna chaupi shungüi shayarisha, paigunara nica: “Cushiyaichi.” 20 Caita rimashca huasha, Jesús paihua maquiunara paihua custillas quinriras ricuchica. Yachachishca runauna Señorda ricusha cushiyanaucami. 21 Shinajpi Jesús paigunara nica: “Cushiyaichi. Yaya ñucara cachashcasna, shinallara cangunara cachauni.” 22 Casna rimashca huasha, Jesús paiguna ahuai samaca: “Santu Ispiritura apichi,” nica. 23 ”Maicanma ucharashcaunara llushpichisha, llushpichishca anaunmi. Maicanmas ucharashcaunara saquisha, saquishca anaunmi.” 24 Tomás, chunga ishquimanda shuj, ‘Chapa Huahua’ nishca, illacami Jesús shamushcai. 25 Chishu yachachishca runauna paita ninauca: “Señorda ricushcanchi.” Tomás cutipaca: “Paihua maquii quilavashca uctuunara mana ricusha, ñuca rirura quilavu uctuunai mana satisha, ñuca maquiras custillas quinrii mana satisha, mana quirishachu.” 26 Pusaj punzha huasha, cutillara yachachishca runauna ucui tianauca, Tomás paigunahua pariju tiauca. Jesús icuca, pungu ishcashca ashcai. Paiguna chaupi shungül shayarisha: “Cushiyaichi,” nica. 27 Shinajpi Jesús Tomasta nica: “Rirura apamui, ñuca maquiunara riqui, Caima maquira chutachi, custillas quinrii sati, Ama mana quirij tucuichu, astaun quirij tucui.” 28 Shinajpi Tomás cutipaca: “Ñuca Señor, ñuca Dios.” 29 Jesús paita nica: “Can, Tomás, ricushcamandalla quirishcangui. Astaun mana ricusha quirijcuna bindisiashca anaungami.” 30 Jesús shinallara ashca munanaita ricurinaunara rarcami pai yachachishca runauna ñaupajpi, chigunara cai quillcai mana quillcashcachu. 31 Caigunara quillcashcami canguna Jesús Cristomi ashcara, Diospa Churimi, quiringaj, canguna quirisha causaira charingaj paihua shutii.
1 Chimanda huasha, Jesús cuti pai yachachishca runaunama ricurimuca, Tiberias lamar patai. Cai samii ricurica: 2 Simón Pedro, ‘Chapa Huahua’ nishca Tomás, Galilea Canámanda Natanael, Zebedeo churiuna, shu ishqui Jesús yachachishca runaunandi pariju tianauca. 3 Simón paigunara nica: “Licangaj riuni.” Chishujcunas: “Canhua catimunchi,” ninauca. Risha, canuai icunauca. Tuta pagarijta licasha, mana imaras apinaucachu. 4 Punzhayaushcai, Jesús pulayai shayarica. Yachachishca runauna Jesús ajta mana ricsinaucachu. 5 Jesús: “Churihuauna,” nica, “¿imahuallas micunara charinguichichu?” “Illanmi,” ninauca. 6 Paigunara nica: “Licara ali maqui partima shitaichi, tupanguichimi. Shinajpi licara shitajpi, ashca aichahua apirica. Licara mana imasna rashas llucchihuaj aca, ashca aichahua tiashcamanda. 7 Shinajpi chi Jesús llaquishca yachachishca runa Pedrora nica: “Señormi.” Simón Pedro Señor ajta uyasha, churarinara churarisha chumbillica, llatan ashcamanda; chasna rasha yacuma pahuaca. 8 Chishu yachachishca runauna canuandi shamunauca, licara aisasha, paiguna yacu mayanmanda mana yapa carui anauca, patsaj metro tupullai. 9 Allpama pactamusha, ninara apichishcara ricunauca, nina ahuai aichahuara churashcaras, tandandi, 10 Jesús paigunara nica: “Cuna apishca aichahuamanda apamichi. 11 Simón Pedro sicasha, licara pulayama aisamuca. Atun aichahuaunahua undashca aca, shu patsaj picha chunga quinsa tupu. Shina ashca ajllaira lica mana lliquiricachu. 12 Jesús paigunara nica: “Micuj shamichi” Pihuas paita tapungaj manzhanauca: “Canga, ¿pitangui?” nisha, pai Señor ashcara riparashallara. 13 Shinajpi Jesús shamusha, tandara apisha paigunara cuca, shinallara aichahuaras. 14 Caita ña quinsa cuti Jesús pai yachachishca runaunama ricurimuca pai causarishca huasha. 15 Micushca huasha, Jesús Simón Pedrora nica: “Simón, Jonaspa churi, ¿caigunamanda yali ashcara llaquihuanguichu?” Pedro cutipaca: “Ari, can yachangui, Señor, ñuca canda llaquinimi.” Jesús paita nica: “Ñuca burigu huahuaunara carangui.” 16 Ishqui cuti Jesús paita nica: “Simón, Jonaspa churi, ¿ashcara llaquihuanguichu?” “Ari,” nica, “can yachangui, Señor, ñuca canda llaquinimi.” Jesús paita nica: “Ñuca buriguunara carangui.” 17 Jesús quinsa cuti tapuca: “Simón, Jonaspa churi, ¿llaquihuanguichu can?” Pedro, Jesús quinsa cuti tapushcai, “Llaquihuanguichu,” nishcamanda llaquiricami. Cutipaca: “Señor, tucuira yachangui. Ñuca canda llaquishcara yachangui.” Jesús paita nica: “Ñuca buriguunara carangui. 18 Sirtu pacha canda nini: Can malta ashcai canllara churaricangui, maima munashcamas purij acangui. Randi can rucu tucushcai, maquiunara chutachingui, shuj canda churachingami, can mana munashcama canda pushangami.” 19 Caita nica Jesús, Pedro ima huañunahuara huañungarauca, Diosta sumajyachingaj. Shina rimasha Jesús, “Catihuai,” nica. 20 Pedro vultiarisha, Jesús llaquishca yachachishca runara catimujta ricuca. Pai Jesúspa rayai quimirisha sirij aca tuta micushcai, Jesústa tapuca, “Señor, ¿pita canda intrigangaraun?” 21 Pedro paita ricusha, Jesústa nica: “Señor, ¿cai runa imara?” 22 Jesús nica: “Ñuca cuti tigramungagama pai tiauchu munasha, ¿canda imara? Canga, catihuai.” 23 Shinajpi uquiunapura cai shimi mirarica, cai yachachishca runa mana huañunachu.” Astaun Jesús mana nicachu: “Mana huañunachu,” randi casna nica: “Cai runa ñuca cuti tigramungagama tiauchu ñuca munasha, ¿canda imara?” 24 Caimi cai tucuira rimaj yachachishca runa. Cai tucuira quillcacami. Pai rimashcauna sirtu ajta yachanchi. 25 Shinallara Jesús shu rashcauna ashca tianaun; caranda chican chican quillcajpiga intiru cai pacha mana pactanmachu aca quillcashca libruunara charingaj yachin. Amen.
1 Ñuca ñaupa quillcashcai canda rimashcani, Teófilo, imasnara Jesús tucui imaunaras rangaj camachingaj callarica. 2 Santu Ispíritu camachishca shimiunara pai ajllasha cachashca runaunama rimasha, Jesús ahua pachama cayai tucunagama. 3 Pai huañushca huasha, Jesús causarisha paigunama sirtu ricurimuca chuscu chunga punzha tupura. Shina rasha, Dios mandana pacha shimira paigunama rimaca. 4 Jesús paigunahua pariju tiausha, paigunara mandaca: “Jerusalenmanda ama ringuichi. Yaya cusha nishcara chapaichi, ñucamanda uyashcara. 5 Juan sirtu pacha yacui bautisaca. Astaumbas cai punzhaunamanda huashalla canguna Santu Ispiritui bautisaringuichimi.” 6 Shinajpi tandarimujcuna tapunauca: “Señor, ¿cai hurascunai Israelba gubirnura atarichinguichu?” 7 Jesús paigunara nica: “Timpuuna mana canguna yachanachu, astaun Yaya paihua quiquin ushaibi churaca. 8 Astaumbas ushaira apinguichimi Santu Ispíritu canguna ahuai shamushcai. Ñucamanda rimajcuna anguichi Jerusalembi, tucui Judeai, Samariai, cai pacha puchucai pundagama.” 9 Cai shimiunara rimashca huasha, paiguna ricujllaira, Jesús ahuama rica; shu puyu paita apica, paiguna ñahuimanda paita quillpacami. 10 Paiguna ahuama ricuushcai, Jesús riupi, ishqui runa yuraj churarina churarishca paigunahua pariju shayarinauca. 11 Chi runauna ninauca: “Galilea runauna, ¿ima rasha ahuama ricunguichiri? Cai quiquin cangunajmanda ahua pachama apashca Jesús cuti shamunga, canguna pai riushcai ricushcasna shinallara shamungami.” 12 Shinajpi Olivos urcumanda Jerusalenma tigranauca. Caimi chaupi samai purina tupu. 13 Llactai icusha ahua patama sicanauca. Chihui causanauca Pedro, Jacobo, Juan, Andrés, Felipe, Tomás, Bartolomé, Mateo, Alfeo churi Jacobo, Zelotes nishca Simón, Jacobo uqui Judasndi. 14 Paiguna tucui pariju tianauca, shu iyaillahua Diosta mañasha, rugasha, huarmiunandi, Jesuspa mama Mariandi, paihua uquiunandi. 15 Chi punzhaunai uquiuna chaupi shungüi Pedro atarica. Tandarijcuna patsaj ishqui chunga tupu anauca. 16 Shina nisha rimaca: “Runauna, uquiuna, shina tucuna ministiricami, David shimimanda Santu Ispíritu ñaupa rimashca shimiuna pactaringaj, imasnara Judas Jesusta apijcunara yanapaca. 17 Pai ñucanchihua yupashca aca, ñucanchihuas Diosta sirvij aca. 18 Cai Judas shu pambara randica, pai irus rashcamanda pagashca cullquihua; huarcurisha, icsa tujyasha, chunzhulli talirica. 19 Jerusalembi tiajcunara cai tucui yacharicami. Shinajpi chi pambara shutichinauca paiguna quiquin shimii: ‘Aquéldama. ’ Runa shimii nin: ‘Yahuar pamba. ’ 20 Salmos Quillcai quillcashca tian: ‘Pai causana huasi chunllayachu, pihuas ama chihui causachu. ’ Shinallara: ‘Shuj paihua ranara rachu. ’ 21 Ministirinmi cai ñucanchihua pariju tiaj runaunamanda shujta ajllangaj, Señor Jesús causarishcara ricushcara rimaj tucungaj ñucanchihua pariju, 22 shu ñucanchihua pariju tiaj runa tucui Señor Jesús ñucanchihua purishca punzhaunai, Juan paita bautisashcamanda paita ahuama api tucuna punzhagama.” 23 Ishquira ricuchinauca: José Barsabas, paihua shu shuti Justo, shinallara Matías. 24 Diosta mañasha rimanauca: “Señor, canmi tucui shungura ricsij angui. Cai ishquimanda maicanda ajllashcara ricuchi, 25 pai canda sirvingaj, can cachamushca tucungaj, imasna Judas uchara rashcamanda mana valijpi, ucu pachama ringaj urmaca!’ 26 Cai ishquimanda maicanda Dios ajllanga camanauca. Matías ajllashca aca. Chimanda huasha, pai chunga shuj Jesucristo cachashca runaunahua yupashca aca.
1 Pentecostés punzha pactarijpi, paiguna tucui shu iyaillahua pariju tandarishca anauca. 2 Cungaimanda, ahua pachamanda shu shinzhi huaira cuinta uyarimuca; paiguna tiaushca intiru huasii undarica. 3 Paigunama nina cuinta calluuna ricurimunauca, caran runa ahuai tiarisha. 4 Tucui paiguna Santu Ispirituhua undashca anauca. Shu shimiunai rimai callarinauca, Santu Ispíritu rimachishcasna. 5 Chi hurascunai, cai pacha tucui partimanda Diosta llaquij judiuguna Jerusalembi tianauca. 6 Casna uyarimujpi, tucui runauna tandarimunauca. Manzharinauca, caran duiñu paihua quiquin shimii rimashcara uyasha. 7 Paiguna mana intindisha manzharinauca, shina nisha: “¿Manzhu tucui casna rimajcuna Galilea runauna? 8 ¿Imarasha paiguna rimashcara uyaunchi caran duiñu ñucanchi pagarishca shimii?” 9 Cai tucui llactaunamanda shamujcuna uyanauca: Partia, Media, Elam, Mesopotamia, Judea, Capadocia, Ponto, Asia llactaunamanda. 10 Shinallara Frigiamanda, Panfiliamanda, Egiptomanda, Africamanda Cirene huasha partiunamanda, Romamanda pasiajcunandi, judiuguna ashas, paiguna yachaira catimujcuna ashas. 11 Shinallara Cretamanda, Arabiamanda shamujcunas uyanauca. Tucui ninauca: “Ñucanchi quiquin shimii Dios munanaita rashcaunara uyanchi.” 12 Tucui runauna mana yachai tucusha manzharinauca, paigunapura rimanausha: “Casna, ¿imarai?” nisha. 13 Shujcuna randi, burlasha asinauca: “Caiguna machashcaunami,” nisha. 14 Shinajpi Pedro shayarisha, paihua pariju chunga shuj runaunandi, paigunara rimaca: “Judio runauna, tucui Jerusalembi causajcunas, cai shimira yachaichi, ñuca shimiunara uyaichi. 15 Cai runauna mana machashcachu anaun, canguna iyashcasna; chara las nueve tupullami. 16 Caita Diosmanda rimaj Joel casna nica: 17 ‘Puchucai punzhaunai shina tucungami, Dios nin, Ñuca Santu Ispiritura talishami tucuiguna ahuai. Canguna churiuna, canguna ushushiuna ñucamanda rimanaungami; Canguna maltauna nuspaibi ricunaungami; Canguna rucuuna nuspaigunai nuspanaungami. 18 Sirtu pacha chi punzhaunai Ñucara sirvij cariuna huarmiuna ahuai ñuca Ispiritura talishami. Paiguna ñucamanda rimanaungami. 19 Ahua pachai munanaitaunara ricuchishami; Cai pachais imaras mana ricuihuaj ricuringami, Yahuar, nina, cushni. 20 Indi llanduyangami, quiila yahuar cuinta tucungami, Manara Diospa atun punzha, tucui pajllai ricushca punzha, shamungami. 21 Maicans Diospa shutii mañasha quishpichishca anga. ’ 22 ”lsrael runauna, ñuca rimashcara uyaichi: Dios Nazaretmanda Jesusta ‘Alimi’ nishcara ricuchica ashca munanaita rashcaunahua ricurinaunahuas canguna chaupi shungüi, Jesuspa maquihua rasha, canguna yachashcasna. 23 Canguna cai Jesusta, Dios munashcahua, Dios ñaupamanda yachashcahua cushca, apisha huañuchicanguichi, uchayuj maquiunahua paita chacatasha. 24 Paita Dios atarichicami; huañuna nanaigunamanda cacharicami; huañuna mana ushacachu arcanara. 25 David Jesusmanda rimaca: ‘Señorda tucui huras ñuca ñaupajpi ricucani; Pai ñuca ali maqui partima tiausha, mana turbarishachu. 26 Chiraigumanda ñuca corazón cushiyacami, ñuca callu cushiyaca; Shinallara ñuca aicha chapasha samanga. 27 Ñuca almara ucu pachai mana saquinguichu; Shinallara camba Santu Churi ismungaj mana lugarda cunguichu. 28 Causana ñambiunara ricsichihuacangui. Canhua pariju tiaupi, ñuca shungura cushihua undachinguimi. ’ 29 ”Runauna, uquiuna, sirtu pacha cangunara pajlla pambai rimanara ushanchi Rucu Davidmanda. Pai huañucami, pambashca aca. Paita pambashca caibimi; ñucanchihua tiaun cuna punzhagama. 30 Cai David Diosmanda rimaj aca. Pai yachaca imasna Dios paihua quiquin shutillai rimasha sirtura rimaca: ‘Camba miraigunamanda, aichamanda rimasha, Cristora atarichisha camba rey apu tiarinai tiaringaj. ’ 31 Ñaupa hurasmanda ricusha, Cristo causarinara rimacami, paihua alma ucu pachai mana saquiricachu; paihua aicha mana ismucachu. 32 Cai Jesusta Dios causachicami. Ñucanchi caita ricujcunami anchi. 33 Shinajpi Jesús, Diospa ali maquima ahuayachishca asha, Yayamanda cusha nishca Santu Ispiritura apishca asha, cai canguna ricushcara uyashcaras talishcami. 34 David ahua pachama mana sicacachu. Shinashas pai riman: ‘Señor ñuca Señorda nica: Ñuca ali maquima tiari, 35 ñuca canda chijnijcunara camba chaqui ucui churanagama. ’ 36 Tucui Isracl runauna, sirtu pacha yachaichi, cai chacatashca Jesusta Dios Señorda Cristora rarca!’ 37 Shinajpi caita uyasha, uyajcuna shungüi nanarisha, Pedroras chishu cachashca runaunaras rimanauca: “Runauna, uquiuna, ¿Imara rashun?” 38 Pedro paigunara nica: “Aripintirichi, caran duiñu bautisarichi Jesucristo shutii, canguna ucharashcara perdonaringaj. Santu íspiritura apinguichimi. 39 Cai rimashcara cangunara cushcami, shinallara canguna churiunaras, maibi carui tiajcunaras, maicans ñucanchi Señor Dios cayashcaunara cushcami cai rimashcara.” 40 Ashca shimiunahua rimasha paigunara camachica: “Quishpichishca aichi cai manali miraigunamanda.” 41 Shinajpi pai rimashca shimiunara chasquijcuna bautisarinauca. Chi punzhai paigunahua quinsa huaranga runa tupu yaparinauca. 42 Cachashca runauna yachachishcai catinauca, paigunapura parijumanda llaquinausha, tandara paquinais, Diosta mañanais. 43 Tucui runauna manzhanaucami. Jesús cachashca runauna ashca munanaita ranaunara ranauca. 44 Tucui quirijcuna pariju tianauca; paiguna charishcaunara pariju charinauca. 45 Paiguna allpaunara, paiguna charishcaunaras catusha, caranma cunauca, caran runa ministishca tupura. 46 Shina rasha, tucui parijulla caran punzha templo huasii tianaucami. Paiguna huasiunai tandara paquisha, cushi shunguhua chuya shunguhua pariju micunauca, 47 Diosta alabasha, tucui runaunahua ali shunguhua tianaucami. Señor caran punzha quirijcunama quishpina ajcunara llutachica.
1 Pedrondi Juandi templo huasima sicanauca, Diosta mañana huras, las tres tupu chishira. 2 Chihui shu runa tiaca, mama icsamanda pacha anga chaqui pagarishca. Paita Diospa huasi ‘Sumaj’ nishca pungüi caran punzha aparimusha churanauca. Diospa huasima shamujcunara cullquira mañasha tiaca. 3 Cai runa Pedrora Juandas Diospa huasii icuuta ricusha: “Cullquira cuyahuapai,” nisha rugaca. 4 Pedro Juandi paita ali pacha ricusha, rimaca: “Ñucanchira riqui.” 5 Shinajpi paigunara ricuca: “Imaras cuhuanaungami ranaun” iyasha chapauca, 6 Astaun Pedro rimaca: “Cullquiras curiras mana charinchi, randi ñuca charishcara canda cuni. Nazaretmanda Jesucristo shutii canda nini: “Atari, puri.” 7 Pedro paihua ali maquimanda apisha paita atachicami. Chi ratullaira paihua chaquiuna chaqui tulluunandi shinzhiyanaucami. 8 Chi runa pahuasha shayarica, purica. Paigunandi Diospa huasii icuca, ali purisha, saltasha, Diosta alabasha. 9 Tucui runauna pai purishcara, pai Diosta alabashcaras ricunauca. 10 Tucui runauna paita Diospa huasi ‘Sumaj’ nishca pungüi tiarisha cullquira mañaj ajta ricsinauca. Tucui runauna ashcara manzharinauca cai runara alichishcamanda. 11 Alichishca anga chaqui runa Pedroras Juandas apilla charicami. Tucui runauna manzharisha paigunama tandarinaucami, Salomomba pungüi. 12 Pedro caita ricusha, runaunara cutipaca: “Israel runauna, ¿imamanda cai rashcara manzharinguichi? ¿Imamanda ñucanchira ricunguichi, ñucanchi ushaihuachu caita rashcanchi, ñucanchi shungu ali ashcamandachu cai runara purichishcanchi? 13 Abrahamba, Isaacpa, Jacobpa Dios, ñucanchi yayauna Dios, paihua Churi Jesusta sumajyachicami; randi canguna paita intrigacanguichi. ‘Paita mana ricsinchichu,’ nicanguichi Pilato ñaupajpi, chi Pilato paita cacharisha nijpi. 14 Canguna Santu Ajta, Ali Ajta, ‘Mana ricsinchichu,’ nicanguichi, astaumbas shu runara huañuchijta cacharingaj mañacanguichi. 15 Shinallara canguna Causaira Cujta huañuchicanguichi. Astaumbas Dios paita huañushcaunamanda causachicami. Caita ñucanchi sirtu ricujcuna anchi. 16 Jesuspa shutii quirishcamanda, cai canguna ricushca canguna ricsishca runara cai shuti shinzhiyachicami. Paihua Dios cushca quirina paita sumajta alichicami tucui canguna ñaupajpi. 17 Cunaga, uquiuna, ñuca yachani canguna mana yachashcamanda shina rashcanguichimi, shinallara canguna apuunas. 18 Shinajpi Dios tucui paimanda rimajcuna ñaupa rimashcara pactachishcami, imasna paihua Cristo turmindarina aca. 19 Shinajpi aripintirichi, Diosma tigraichi, canguna uchaunara pichai tucungaj. Shina rajpi, Diospa ñaupajmanda ali ganas causana shamungami; 20 cangunama Jesucristora cachamungami ñaupamanda cangunama rimashcasna. 21 Shina ajllaira sirtu ministirinmi pai ahua pachai tiangaj tucuira alichina punzhagama, imasna Dios paimanda santu rimajcuna shimimanda rimacami callari hurasmanda, 22 imasna Moisés yayaunara rimaca: ‘Canguna Señor Dios canguna uquiunamanda shu ñucasna Diospa shimira rimajta cachamungami. Pai tucui rimashcara uyanguichi. ’ 23 Maican alma chi Rimajta mana uyajpi, runaunamanda ichui tucungami. 24 Shinallara tucui Diosmanda rimajcuna, Samuelmanda, paimanda huasha shamujcunandi, maicanguna rimashas, cai punzhaunara rimanaushcami. 25 Canguna chi ñaupa rimajcunamanda churiuna anguichi. Canguna shinallara Dios ñucanchi yayaunara pactachina shimii rimashca runauna anguichi, Dios Abrahanma nisha: ‘Canmanda miramuj churiunai rimashca runauna anguichi, imasna Dios Abrahanma nica: ‘Canmanda miramuj churiunai tucui cai pacha ailluuna bindisiashca anaungami. ’ 26 Dios paihua Churira atarichisha, paita cangunama ñaupa cachamuca cangunara bindisiangaj, caran duiñu ucharashcaunara saquisha vultiaringaj.”
1 Pedroni Juandi runaunama rimaushcai, sacerdoteuna Diospa huasira cuiraj guardauna capitandi, saduceogunandi paigunama shamunauca. 2 Paiguna runaunara yachachishcamanda, Jesús huañushcaunamanda causarishcara rimashcamandas, caiguna piñarisha shamunauca. 3 Paigunara apisha, chunda cularbi ishcanauca cayandi punzhagama, ña chishi ajpi. 4 Cai shimira uyajcunamanda ashcauna quirinauca, cariuna shu pichca huaranga tupu anauca. 5 Casna tucucami: cayandi punzha judio apuuna rucuunandi yachaira yachachijcunandi Jerusalembi tandarinauca. 6 Shinallara sacerdote atun apu Anás, Caifás, Juan, Alejandro, tucui sacerdote atun apu ailluunandi tandarinauca. 7 Paiguna chaupi shungüi Pedroras Juandas shayachisha tapunaucami: “¿Ima ushaihua, pihua shutii, caita rashcanguichi?” 8 Shinajpi Pedro, Santu Ispirituhua undashca asha paigunara rimacami: “Runaunara mandaj apuuna, Israel rucuuna: 9 Cuna punzha canguna shu runara alichishcara tapunguichi, imasna rasha paita alichishca aca. 10 Yachaichi tucui canguna, tucui Israel runaunandi: Nazaretmanda Jesucristo shutii cai runara canguna ñaupajpi alichishcami. Cai canguna chacatashca Jesús, Dios paita huañushcaunamanda causachica, paihua shutii cai runara canguna ñaupajpi alichishcami. 11 Cai Jesús canguna huasira sicachijcuna mana munasha ichushca rumimi; cai rumi huasi istandi rumi tucushcami. 12 Shujpajpi quishpina illanmi. Cai pachai shu shutiras runaunama mana cushcachu ñucanchi quishpichi tucungaj.” 13 Apuuna, Pedrondi Juandi mana manzhashcara ricusha, paiguna quillcara mana yachajcuna ashcara, yanga runauna cuinta ashcaras ricsinauca. Astaun Jesushua purij runauna ashcara ricsinauca. 14 Chi alichishca runara paigunahua pariju tiauta ricusha, mana imaras cuntra rimanara ushanauca. 15 Paigunara taripaushca ucumanda canzhama llucshingaj mandanauca, apuuna paigunapuralla cuintananauca. 16 Ninauca: “¿Imara rana angairi cai runaunahua? Sirtu pacha paiguna shu munanaita rashcara ranaushca, tucui Jerusalembi tiajcuna yachanaushcami. Mana pacaihuajchu. 17 Shina rasha maican runaunamas ama astaun cuintanauchu, paigunara camachishun: ‘Cunamanda, cai shutii ama mas rimaichichu. ’ “ 18 Paigunara cayasha camachinauca: “Ima samiras Jesuspa shutii ama rimaichichu, ama yachachichichu.” 19 Shinajpi Pedrondi Juandi cutipasha paigunara ninauca: “Canguna iyaichi, ¿Diospa ñaupajpi alichu anga cangunara uyangaj Diosmanda ñaupara? 20 Ñucanchi ricushcara, ñucanchi uyashcara rimanara saquingaj mana ushanchichu.” 21 Apuuna paigunara camachisha cachanauca, imasna rashas mana livachihuaj tucusha, runaunara manzhashcamanda. Tucui runauna paiguna rashcamanda Diosta alabanauca. 22 Munanaita alichishca runa chuscu chunga yali huatayuj aca. 23 Pedrondi Juandi lugaryashca huasha paigunajma shamunauca; sacerdote apuuna rucuunandi paigunara rimashcara cuintanauca. 24 Paiguna cuintashcara uyasha, tucui parijulla Diosta rimanauca, shina nisha: “Tucuira mandaj Señor, ahua pachara, cai pacharas, lamardas, tucui imaras chihui causajcunandi raj Dios mangui; 25 can, canda sirvij Davidpa shimimanda rimacangui: ‘¿Imarasha runauna piñarisha caparinaun, yanga iyaigunara iyarinaun? 26 Cai pacha rey apuuna chishu apuunandi shujllai tandarinauca, Señorhua paihua Cristohua cuntra tucusha. ’ 27 Sirtu pacha cai llactai can ajllashca santu Churi Jesusta chignisha, Herodes, Poncio Pilato, gentilgunandi, Israel runaunandi, tucui tandarinauca, 28 tucui imaras can ñaupa pundamanda camba maquihua camba iyaibis munashcara pactachingaj. 29 Ricupai, Señor, paiguna chijnisha rimashcara. Cuna canda sirvijcunama ama manzhasha camba shimira rimangaj cupangui. 30 Camba maquira cachamui runaunara alichingaj, ima munanaita ricurinaras rangaj, camba santu Churi Jesuspa shutii.” 31 Diosta mañashca huasha, paiguna tiashca huasi chucchurica. Tucui paiguna Santu Ispirituhua undashca anauca. Mana manzhasha Diospa shimira rimanauca. 32 Quirij runauna, ashca ashas, shu shungulla shu almalla tucunauca. Paiguna charishcaunamanda mana pihuas: “Cai ñucajmi,” nisha rimajcuna aca. Astaun tucui parijulla charijcuna aca. 33 Cachashca runauna Señor Jesús causarishcara ashca ushaihua rimanauca. Ashca ali llaquina iyaihua undashca anauca. 34 Paigunapurai mana pihuas ministij tiacachu. Maican allpaunara huasiunara charijcuna catunauca, catushcamanda cullquira apamunauca. 35 Cachashca runaunama cullquira cunauca, caranma paiguna ministishca tupura cushca aca. 36 Shinajpi José, cachashca runaunamanda Bernabé shutichishca (Cai runa shimii ‘Cushiyachij’ nin), Levi aillumanda, shu Chipre islamanda runa, 37 shu pai charishca allpara catusha, cullquira cachashca runaunama cucami.
1 Shu Ananías nishca runa paihua Safira huarmindi shu allpara catunauca. 2 Paiga paihua huarmindi apishca cullquira pishiyachinauca; chaupillara apamusha, cachashca runaunama cunauca. 3 Pedro nica: “Ananías, ¿imamanda Satanás camba corazonda llullahua undachishca, Santu Ispiritura llullangaj, camba allpamanda apishca cullquimanda pishira cungaj? 4 ¿Allpara huacachisha, manzhu cambaj aca? Catushca asha, ¿manzhu can yachacangui? ¿Imamanda caita camba shungüi iyacangui? Mana runaunallara astaun Diosta llullashcangui. 5 Shinajpi Ananías cai shimira uyasha, huañusha urmaca. Shina tucujpi, tucui uyajcuna ashcara manzharinauca. 6 Shinajpi, maltauna atarisha paita pillunauca, llucshisha pambai rinauca. 7 Quinsa huras tupu pasashca huasha, paihua huarmi shamuca, cai tucushcaunara mana yachasha. 8 Shinajpi Pedro rimaca: “Rimahuai, ¿canguna allpara chi tupuichu catucanguichi?” Huarmi cutipaca, “Ari, chi tupui!’ 9 Pedro paita nica: “¿Imamanda cuintanaushcanguichi Diospa Ispiritura umangaj? Camba carira pambajcuna pungüi tianaun. Canda shinallara lluchinaungami.” 10 Chi ratullaira Pedro chaquii huarmi huañusha urmaca. Maltauna icumusha huarmi huañushcara tupanauca. Llucchisha, pambai rinauca paihua carihua pariju. 11 Tucui iglesiai tiajcuna ashcara manzharinauca, tucui cai rashcaunara uyajcunandi. 12 Cachashca runauna paiguna maquimanda ashca munanaita ricurinaunaras rashcaunaras ranauca runauna ñaupajpi. Paiguna tucui shu iyaillahua Salomomba pungüi pariju tianauca. 13 Shujcunamanda mana pihuas llutarinara ushacachu manzhashcamanda. Runauna paigunara ashcara alabanauca. 14 Señorbi quirijcuna ashcara yaparinauca, ashca cariunas ashca huarmiunas. 15 Shina rasha ungushcaunara ñambiunai churanauca. Caituunai huanduunai churanauca, Pedro pasausha paihua llandullas huaquinguna ahuara llandusha pasangaj. 16 Mayan llactaunamanda Jerusalenma ashca runauna shamunauca, ungushcaunara pushamusha, irus supaiguna turmindachishcaunandi. Tucui alichi tucunauca. 17 Sacerdoteuna atun apu atarisha, paihua pariju tiajcunandi, saduceo muntunmanda asha, piñarishca anauca. 18 Cachashca runaunara apisha, chunda cularbi ishcanauca. 19 Astaumbas, Diospa angel chunda cular pungura tuta pascasha, paigunara llucchisha, rimaca: 20 ”Richi,” nisha, “templo huasii icusha, runaunara cai tucui causana shimiunara yachachichi.” 21 Caita uyasha, tutamanda Diospa huasii icunauca, chihui yachachinauca. Astaun sacerdoteuna gubirnui mandaj apuunara tandachinauca, Israel rucuunandi. Chunda cularma cachanauca cachashca runaunara pushangaj. 22 Guardauna chunda cularma pactai risha, runaunara mana tupasha, tigrasha cuintanauca. 23 Shina nisha rimanauca: “Sirtu pacha chunda cular pungu ali ishcariaita tupacanchi. Pungüi suldaruuna shayanaushca aca. Astaumbas, pungura pascasha pitas mana tupacanchichu.” 24 Sacerdote atun apu, templo huasi guardauna capitandi, sacerdote apuunandi caita uyasha, mana yachai tucunaucachu imaira pasanaushca anga, 25 Astaun shu runa shamusha, nica: “Canguna chunda cularbi ishcashca runauna templo huasii tianaun, runaunara yachachirianaun.” 26 Shinajpi capitán risha guardaunandi, paigunara alimandalla pushamunauca, runaunara manzhasha rumihua shitai tucunamanda. 27 Paigunara pushamusha, mandaj apuuna tandarinai icuchinauca. Sacerdoteuna atun apu paigunara tapucami: 28 ¿Manzhu shinzhira rimacanchi cai shutii ama yachachingaj? Cunaga, canguna yachachishcahua tucui Jerusalenda undachishcanguichi. Canguna, cai runa huañushcamanda ñucanchi ahuai cauźara churasha ninguichi.” 29 Pedro, cachashca runaunandi, cutipanauca: “Runaunamanda yali Diosta caźuna ministirin. 30 Ñucanchi yayauna Dios Jesusta atarichicami, canguna paita yurai huarcusha huañuchishcara. 31 Dios pai ali maquihua cai Jesusta ahuayachica Señor Quishpichij tucungaj, Israel runauna paiguna ucha rashcaunara aripintirinauchu, uchaunara perdonai tucungaj. 32 Ñucanchi cai tucuira paihua sirtu ricujcuna anchi, Santu Ispíritu shinallara ricujmi. Cai Santu Ispiritura Dios tucui paita caźujcunama cushcami.” 33 Apuuna caita uyasha ashcara piñarinauca, paigunara huañuchinara munanauca. 34 Shinajpi mandaj apuuna tandarishcai, shu Gamaliel nishca fariseo runa, ley shimira yachachij, ataricami. Paita tucui runauna yapa llaquinauca. Paiga: “Cai runaunara shu ratu canzhama llucchichi” mandaca. 35 Shinajpi Gamaliel apuunara nica: “Israel runauna, canguna ricuichi imara ranara iyanguichi cai runaunara. 36 Cai punzhaunamanda ñaupa, shu Teudas nishca runa ataricami, ‘Atun mani,’ nisha. Paihuajma shu chuscu patsaj tupu runa llutarinauca. Paiga huañuchi tucuca, tucui paita catijcuna sayanauca, paigunamanda imas illaca. 37 Paimanda huasha, Galileamanda Judas shinallara ataricami, runaunara yupana punzhai. Paihua ashca runauna shinallara llutarinauca. Pai shinallara huañuca, paihua pariju tiajcuna shinallara sayanauca. 38 Cuna cangunara nini: Cai runaunara saquichi, paigunamanda anzhurichi. Paiguna camachishca shimiuna, paiguna rashcauna runamandalla asha, chingarinaungami. 39 Diosmanda ajpiga mana ushanguichichu chingachinara, astaun canguna Dioshua cuntrauna tucunguichimi.” 40 Gamaliel rimashcara uyanaucami. Cachashca runaunara cayasha, azutishca huasha, Jesuspa shutii ama rimangaj mandanauca. Chi huasha paigunara lugaryachinauca. 41 Paiguna mandaj apuuna tandarinamanda llucshinauca. Yapa cushiyanauca Dios paigunara lugarda cushcaraigu Jesuspa shutimanda pingarishca tucungaj. 42 Tucui punzhauna templo huasii tucui huasiunais Jesucristo shutira rimanara camachinaras mana saquinaucachu.
1 Chi punzhaunai quirijcuna ashca yaparinauca. Paigunamanda griegu shimira rimajcuna hebreo shimira rimajcunahua piñarinauca: “Ñucanchi huaccha huarmiunara caran punzha micuna caranara cungarinaushcami,” ninauca. 2 Shinajpi chunga ishqui cachashca runauna tucui quirijcunara cayasha tandachinauca: “Ñucanchi Diospa shimira saquina mana valinzhu mesaunara sirvingaj,” ninauca. 3 Shinajpi, uquiuna, cangunamanda canzhis runara, ali rimashcaunara, Santu Ispirituhua, ali iyaihua undashcaunara mascaichi, paigunara cai tarabanai churangaj. 4 Ñucanchiga Diosta mañasha, paihua shimira yachachisha causashun.” 5 Tucui tandarimujcuna ali munaihua uyanauca. Cai runaunara ajllanauca: Esteban, shu ali quirij Santu Ispirituhua undashca runara, Felipe, Prócoro,” nicanor, Timón, Parmenas nishcaunara, Antioquíamanda Nicolasndi, shu grieguunamanda judiu tucushca runa. 6 Cachashca runauna ñaupajpi cai runaunara pushamunauca. Cachashca runauna shamujcuna uma ahuai maquira churasha, Diosta mañanauca. 7 Diospa shimi mirarisha rica. Jerusalembi quirijcuna ashcara yaparinauca. Shinallara sacerdoteunamanda ashcauna quirinauca. 8 Astaumbas Esteban, Diospa ali llaquina iyaihua ushanahuas undashca asha, runauna ñaupajpi ima munanaita ranaras gustu ricurinaras rarcami. 9 Shinajpi, Libertinouna, Cirenemanda, Alejandríamanda judioguna tandarina huasimanda huaquinguna atarinauca, huaquin Ciliciamandaunandi, Asiamandaunandi. Estébanhua cuntra rimanaucami. 10 Astaumbas paihua sabiru iyaira Ispirituhua rimashcaras mana ushanaucachu vinsinara. 11 Shinajpi cai runauna shujcunara paganauca llullasha rimangaj: “Ñucanchi paita irus shimiunara rimashcara uyashcanchi, Moisestas Diostas camisha.” 12 Paiguna tucui runaunara, rucuunara, yachaira yachachijcunaras turbachinauca. Estébanda tupasha apinauca. Mandaj apuuna tandarinama pushanauca. 13 Llullasha rimaj runaunara chima pushamunauca: “Cai runa cai santu llactaras, ley camachishca shimiras irusta rimanara mana saquin,” ninauca. 14 Casna rimashcara uyashcanchi: “Nazaretmanda Jesús cai llactara tulangami, Moisés cushca yachaira turcangami,” nin. 15 Shinajpi mandaj apuuna tandarinai tucui tiajcuna, Estébanda ricuusha, paihua ñahuira angelba ñahuisna ricunaucami.
1 Shinajpi sacerdoteuna atun apu nica: “¿Caiga sirtuchu?” 2 Esteban cutipaca: “Runauna, uquiuna, yayaunas, uyaichi: Sumaj ahua pacha Dios ñucanchi yaya Abrahanma ricurimuca pai Mesopotamia llactai causaushca huraspi, manara Harán llactama rishcai. 3 Dios paita rimaca: ‘Camba llactamanda, camba aillumanda llucshi. Ñuca canda ricuchingaraushca llactama shami. ’ 4 Shinajpi Caldeoscuna llactamanda llucshicami, Harán llactai causaca. Paihua yaya huañujpi, chimanda llucshisha, Dios paita cai llactama pushamuca, canguna cuna huras causaushca llactama. 5 Chihuis ansallas allpara mana cucachu, paihua chaqui aitana tupuhuallas. Astaumbas Dios: ‘Cai allpara cushami,’ nica, ‘canma, camba churiunamas,’ Abraham chara churi illaj ajllaira. 6 Dios casnami rimaca: ‘Camba miraiguna mushuj shamujcuna tucunaungami, shujpa llactai. Chihui sirvijcuna tucunaungami, turmindachi tucunaungami chuscu patsaj huata tupugama. 7 Astaun paiguna sirvishca llactara ñuca taripashami,’ nica Dios. ‘Cai huasha paiguna llucshimusha, ñucara sirvihuanaungami cai quiquin llactai. ’ 8 ”Dios Abrahanda circuncisión nishca pactachina shimira cuca. Shinajpi Abraham paihua churi Isaacta tupasha, pusaj punzhai cai circuncisión mandashcara rarcami, shinallara Isaac Jacobtas, Jacob paihua chunga ishqui churiunaras. 9 Chi churiuna Josera chijnisha, paita Egipto llactama catunauca. Astaumbas Dios paihua tiauca. 10 Dios tucui llaquiunamanda Josera llushpichica. Egipto rey apu Faraomba ñaupajpi paita ali shungura, ali iyairas cuca. Faraón paita Egipto llactai apura churacami, shinallara Faraomba huasii José apu tucuca. 11 Chi hurascunai ashca yarcai tucuca, tucui Egipto llactai, Canaan llactais; ashca llaqui tucuca, Ñucanchi yayauna micunara mana tupanaucachu. 12 Jacob, Egiptoi trigu tiashcara uyasha, ñucanchi yayaunara ñaupa punda cachaca. 13 Huasha, paiguna ishqui cuti rishcai, José paillara paihua uquiunama ricsichica. Faraón José aillura yachacami. 14 José paihua yaya Jacobta tucui aillundi pushangaj cachaca. Canzhis chunga pichca tupu runauna shamunauca. 15 Shina rasha Jacob Egiptoma shamuca. Chihui pai ñucanchi yayaunandi huañunauca. 16 Chigunara Siquem llactama apanauca. Chihui Abraham randishca pamabana uctui pambanauca. Chi pambana uctura Siquem llactai Hamor churiunamanda Abraham cullquihua randica. 17 ”Dios Abrahanma rimashca punzha mayallayaupi, Israel runauna Egiptoi ashcara mirasha yaparinauca. 18 Chi huasha, shu rey apu tiauca Egipto llactai, Josera mana ricsij. 19 Pai ñucanchi yayaunara umachisha turmindachica. Shina rasha cari huahuaunara huañuchinauca, paiguna ama miranauchu. 20 ”Chi punzhaunai Moisés pagarica. Pai Dios munashca aca. Quinsa quilla tupura paihua yaya huasii iñachisha charica. 21 Cai Moisés huañuna tucujpi, Faraomba ushushi apasha, quiquin churi cuinta paita iñachica. 22 Moisés Egipto runauna tucui yachanara yachachishca aca; paiguna rimaihua, paiguna rashcaunahua yapa ushayuj aca. 23 Moisés chuscu chunga huatayuj tucusha, paihua uquiunara, Israel churiunara, ricui rinara munaca. 24 Shu Egipto runa shu Israel runara livachishcara ricusha, Moisés paita yanapaca, Egipto runara chugrichisha paita cutipaca. 25 Moisés paihua uquiuna ‘Intindinaungami’ nisha iyaca, imasnara Dios paihua maquihua quishpichinma. Astaumbas, mana shina intindinaucachu. 26 Cayandi punzhai ishqui Israel runauna piñananauca. Moisés shamusha, arcasha rimaca: ‘Runauna, uquipura anguichi, ¿imamanda parijumanda piñanaunguichi?’ 27 Piñanau runaunamanda manali rajca Moisesta tangasha cutipaca: ‘¿Pita canda ñucanchi ahuai mandajtas taripajtas churaca? 28 ¿Can caina Egipto runara huañuchishcasna ñucaras huañuchinara munanguichu?’ 29 ”Moisés cai shimira uyasha, miticuca. Carumanda shamuj runa cuinta Madián llactai causaca, chihui ishqui churira tupacami. 30 ”Chuscu chunga huata huasha, shu angel Moisespa ñaupajpi ricurimuca, Sinai urcu chaquishca allpa partii, ninahua sindij yurai. 31 Shinajpi Moisés pai ricushcara ricusha manzharica. Astaun ali ricungaj mayanllayaushcai, Diospa shimi paima uyarica. 32 ‘Ñuca camba yayauna Dios ani, Abrahamba Dios, Isaacpa Dios, Jacobpa Diosmi ani. ’ Moisés chucchusha, ricunara mana munacachu, manzhashcamanda. 33 Señor paita nica: ‘Camba zapatusta llucchi; can shayaushca pamba santu allpami. 34 Sirtu pacha ñuca Egipto llactai tiaj runauna llaquirishcara ricushcani, huacashcaras uyashcani. Paigunara liuriyachingaj irgumushcani,’ nica, ‘cuna shami, Egipto llactama canda cachasha. ’ 35 ”Cai ñaupa mana munashca Moisesta, ‘Maican canda taripaj apura churacachu?’ paita rimashca asha, cai Moisesta Dios paita mandaj quishpichijta rasha, sindij yurai ricurij angel rimasha cachacami. 36 Cai Moisés Israel runaunara llucchicami. Munanaita rashcaunaras gustu ricurinaunaras ricuchica Egipto llactai, Puca lamarbi, chaquishca allpa partiis, chuscu chunga huata tupura. 37 Cai Moises Israel churiunara rimaca: ‘Shu ñucasna Diosmanda rimajta canguna Señor Dios atarichingami canguna uquiunamanda. Paita uyanguichi. ’ 38 Cai Moisés chaquishca allpa partii tandarishca Israel runaunahua, Sinai urcui rimaj angelhua, ñucanchi yayaunahua tiaucami. Pai causaira cuj shimiunara ñucanchima rimangaj cui tucuca. 39 ”Ñucanchi yayauna paita uyanara mana munanauca. Mana caźunaucachu, paiguna shungüi Egipto llactama tigranara iyanauca. 40 Paiguna Aaronma rimanauca: ‘Dioscunara rasha cuhuai,’ nisha, ‘ñucanchira pushangaj. Cai ñucanchira Egiptomanda llucchimuj Moisesta, ima tucushcara mana yachanchichu. ’ 41 ”Shinajpi shu malta huagrara ranauca. Cai runa rashca yanga diosma sacrificiora ricuchinauca. Paiguna quiquin maquihua rashcaunai cushiyanauca. 42 Paigunamanda Dios anzhuricami; paigunara saquica istrillascunara adurangaj, imasna Diosmanda rimajcuna quillcashcai tiaun: ‘¿Sacrificiounarachu, huañuchishca animalgunarachu chaquishca allpa partii ricuchihuacanguichi chuscu chunga huata tupura, Israel runauna? 43 Randi Moloc nishca yanga diosta alabana carpa huasira apacanguichi, canguna Renfán nishca yanga diospa istrillastas, canguna maquihua rashcaunara, chigunara adurangaj. Chiraigumanda ñuca cangunara Babilonia llacta huashama cachashami. ’ 44 ”Ñucanchi yayauna tabernáculo carpa huasira charinauca chaquishca allpa partii, Dios paigunahua pariju tiajta ricuchingaj, Dios Moisesta mandashca cuinta, pai ricushca samillarara rangaj. 45 Ñucanchi yayauna chi huasira apasha, Josuehua pariju gentilgunamanda apishca allpai icuchinauca. Dios chi gentilgunara ichuca ñucanchi yayauna ñaupajmanda, David causaushca punzhaunagama. 46 Cai David Diospa ñaupajpi llaquishcara tupaca; Jacobpa Diospajta shu huasira sicachinara munaca. 47 Randi Salomón Diospajta shu huasira sicachica. 48 Astaumbas ahua pachai tiau Dios mana maquihua rashca huasiunai causanzhu, Diosmanda rimaj rimashcasna: 49 ‘Ahua pacha ñuca tiarina, cai pacha ñuca chaqui aitarina. ¿Ima huasira rahuanguichi?’ Señor nin. ‘¿Maibirai ñuca samana? 50 ¿Manzhu ñuca maqui cai tucuiunara rarca?’ 51 ”¡Shinzhi shunguyujcuna, mana caźuj rinriyujcuna! Santu Ispiritura tucui huras mana uyanguichi. Canguna yayaunasna tucushcanguichi. 52 ¿Maican Diosmanda rimajcunaras canguna yayauna manzhu caticachanauca? Ali dirichu aj Señor shamungaraushcara rimajcunara huañuchinauca. Maspas canguna cai quiquin ali dirichu aj Señorda intrigacanguichi, huañuchicanguichi. 53 Canguna Diospa ley shimira angelgunamanda apicanguichi, shina ajllaira mana huacachicanguichi.” 54 Runauna Esteban casna rimashcara uyasha, paiguna shunguunai piñarinauca, paimanda quiru mucurinauca. 55 Esteban Santu Ispirituhua undashca, ahua pachama ricusha Diospa sumajta ricuca, Jesustas Diospa ali maqui partima shayauta ricucami. 56 Esteban rimaca: “Ahua pachara pascariaita ricuni, shinallara Runa Churira Diospa ali maqui partima tiauta ricuni.” 57 Shinajpi paita uyajcuna shinzhira caparisha, rinrira tapanauca; paigunapura pariju callpamusha paita nitinauca. 58 Llactamanda paita llucchisha, rumihua shitanauca. Ricujcuna paiguna churarinara shu Saulo nishca malta runa chaquii churanauca. 59 Estébanda rumihua shitanauca. Paiga cayasha nica: “Señor Jesús, ñuca almara apipangui.” 60 Cungurisha shinzhira caparica: “Señor, caigunara ama cauźayachipanguichu cai uchara.” Shina rimasha huañusha puñucami.
1 Saulo Esteban huañunara munaca. Chi punzhaunai Jerusalembi tiaj quirijcunara ashcara turmindachisha caticachanauca. Tucui Judea partima Galilea partimas sayanauca. Jesucristo cachashca runaunalla saquirinauca. 2 Ali shunguyuj runauna Estébanda pambangaj apanauca. Paimanda ashcara huacanauca. 3 Saulo iglesiara turmindachica. Caran huasiunai icusha, cariunara huarmiunaras aisasha, chunda cularbi ishcachica. 4 Chausirij runauna tucui partira Diospa evangelio shimira rimasha rinauca. 5 Shinajpi Felipe Samaria llactama risha, Cristo shutira camachica. 6 Tucui runauna shu iyaillahua Felipe rimashcaunara uyanauca, pai munanaita rashcaunara uyanauca, ricunauca. 7 Ashca runaunamanda irus supaiguna caparisha llucshinauca. Ashca suchuuna, anga chaquiuna alichishca anauca. 8 Shinajpi, ashca cushihua anauca chi llactai. 9 Shu Simón nishca runa tiauca Samaria llactai. Pai ñaupa huras tsalamanga aca. Pai chi llactai tiaj runaunara umachisha causauca, pailla, “Atun mani,” nisha. 10 Paita tucui runauna munaihua uyanauca; ichillaunamanda atungunagama ninauca: “Cai runa Diospa atun ushaira charinmi.” 11 Paita uyanauca, unaimanda pacha paihua yachaimanda rashcaunahua paigunara umachisha charica. 12 Felipe Dios mandana pacha evangelio ali shimira Jesucristo shutiras rimajpi, runauna quirisha bautisarinauca, cariunandi huarmiunandi. 13 Chi Simombas quirisha bautisarica, Felipehua llutarica. Munanaita rashcaunara ricusha manzharica. 14 Jerusalembi tiau cachashca runauna Samaria llactai tiajcuna Diospa shimira chasquishcara uyasha, Pedroras Juandas cachanauca. 15 Paiguna shamusha, Diosta mañanauca quirijcuna Santu Ispiritura apingaj. 16 Santu íspíritu chara pihuajpis mana irgumushcachu aca; Jesuspa shutii bautisashcaunalla anauca. 17 Shinajpi cachashca runauna maquira paiguna ahuai churajpi, quirijcuna Santu Ispiritura apinauca. 18 Simón imasna cachashca runauna maquira churashcahua Santu Ispiritura cushcara ricusha, paigunama cullquira ricuchica. 19 ”Cai ushaira ñucamas cuhuaichi,” nica, “ñucas maicandas paihua ahuai maquira churajpi shinallara Santu Ispiritura apichu.” 20 Shinajpi Pedro rimaca: “Camba cullqui canhua pariju chingarichu, Diospa ushaira cullquihua randinara iyarishcamanda. 21 Canga cai raushcai mana imaras charinguichu. Camba corazón Diospa ñaupajpi mana alichu. 22 Aripintiri cai can manali rashcara. Diosta rugai, pai perdonanga chari camba shungüi iyarishcara. 23 Camba shungu ayajmi, can manalihua huatashca ajta ricuni.” 24 Shinajpi Simón cutipasha nica: “Canguna ñucamanda Señorma rugapaichi, canguna rimashcasna ñucahua ama tucungaj.” 25 Cachashca runauna Diospa shimira rimashca huasha, Jerusalenma tigranauca. Ashca Samaria runa llactaunai Diospa evangelio ali shimira rimanauca. 26 Shu Diospa ángel Felipera rimaca: “Atari, sur quinri partima ri, Jerusalenmanda Gaza llactama rina ñambira. Chihui runa illaj parti.” 27 Shinajpi Felipe atarisha rica. Chihuimi shu Etiopía llacta eunuco runa, Candace nishca Etiopía reina apu atun mandaj runa. Paihua cullquira huacachij aca. Pai Jerusalenma Diosta adurangaj shamushca aca. 28 Paihua carrui tiarisha tigramuuca. Isaías, Diosmanda rimaj quillcashca quillcai ricuuca. 29 Diospa Ispíritu Felipera nica: “Ri, carruma llutari.” 30 Felipe pactai risha, chi runa Isaías quillcai ricushcara uyasha, tapuca: “¿Can ricushcara intindinguichu?” 31 ”¿Ima rashara ushasha maicambas mana yachachijpi?” nica. Felipera rugaca sicangaj, paihua pariju tiaringaj. 32 Pai ricushca quillca casna nica: “Burigu cuinta huañuchinama pushanauca; Burigura rutujpa ñaupajpi upa cuinta, Paihua shimira mana pascaca. 33 Pai pishi tucushcai mana uyai tucuca, ¿Maican paimanda alira rimanga? Cai pachamanda paihua anzhuchishca aca!’ 34 Etiopíamanda runa Felipera tapuca: “Cuintahuapai, canda rugauni, rimaj pimanda riman? ¿Pai quiquinmandachu, shujmandachu riman?” 35 Shinajpi Felipe cai quillcamanda Jesuspa evangelio ali shimira rimai callarica. 36 Ñambira riushcai shu yacuma pactanauca. Etiopía runa nica: “Caibimi yacu. ¿Imara arcan ñuca bautisaringaj?” 37 Felipe paita nica: “Can tucui shunguhua Jesucristoi quirijpi, ushanguimi.” Etiopía runa cutipasha nica: “Jesucristo Diospa Churi ashcara quirinimi.” 38 Paihua carrura shayachingaj mandaca. Felipe Etiopía runandi yacuma irgunauca, Felipe paita bautisaca. 39 Paiguna yacumanda sicamushcai, Diospa Ispíritu cungaimanda Felipera pushacami. Etiopía runa paita mana mas ricucachu. Paiga paihua ñambira cushiyashca ricami. 40 Randi Felipe Azoto llactai tuparica. Pai riushcai Diospa evangelio ali shimira rimaca tucui llactaunai, Cesarea llactama pactangagama.
1 Paulo chara Señorbi quirijcunara chijnisha, huañuchisha nisha, sacerdote atun apuma rica. 2 Paimanda quillcaunara mañaca Damasco llactai tiaj judioguna tandarina huasiunai icungaj. Chihui icusha cai Ñambi nishcara catijcunara tupasha, cari ashas, huarmi ashas, paigunara apisha Jerusalenma pushangaj. 3 Saulo ñambira riushcai, Damasco llactama pactana mayambi, cungaimanda ahua pachamanda paihua muyujta chiujlla ricurica. 4 Allpai urmasha, shu shimi rimauta uyaca; “Saulo, Saulo,” nisha, “imarasha turmindachihuangui?” 5 Saulo nica: “¿Pitangui, Señor?” Uyashca shimi cutipaca: “Ñuca can turmindachiushca Jesúsmi ani. Can tucsina pundai nijtasha, canllara chugringu.” 6 Manzharisha, chucchusha, Saulo nica: “Señor, ¿imara munangui ñuca rangaj?” Señor nica, “Atari, llactama icui. Chihui imara ranara canda rimanaunga.” 7 Saulohua riu runauna manzharisha pariju shayarinauca. Shimira sirtu uyanauca, astaun pitas mana ricunaucachu. 8 Shinajpi Saulo allpamanda atarisha, ñahuira pascasha mana imaras ricucachu. Shina rasha maquimanda apisha, paita pushanauca; Damasco llactama icuchinauca. 9 Chihui quinsa punzhara mana ricusha tiauca, mana micusha, mana upisha. 10 Shu quirij runa Damascoi tiauca, paihua shuti Ananías nishca. Nuspaibi Señor paita rimaca: “Ananías” Pai cutipaca: “Caibimi ani, Señor.” 11 Señor paita nica: “Atari, ri ‘Dirichu’ nishca ñambima. Chihui, Judaspa huasii, shu Tarso llactamanda runara mascai, paihua shuti Saulo. Pai Diosta mañaun. 12 Cai Saulo shu Ananías nishca runara nuspaibi ricushcami, paihuajpi icusha, maquira paihua ahuai churaca ñahuira pascangaj!’ 13 Shinajpi Ananías cutipaca: “Señor, cai Saulomanda ashca runaunamanda uyashcani pai ashca llaquira rashcara Jerusalembi causau canda quirijcunara. 14 Astaumbas, caibi sacerdote apuunamanda mandashcara charinmi tucui camba shutii mañajcunara apingaj!’ 15 Señor paita nica: “Ri, cai Saulo ñuca ajllashca runami. Pai ñuca shutira gentilgunama, rey apuunama, Israel churiunamas rimangami. 16 Ñuca paita ricuchisha imasna pai turmindarina anga ñuca shutimanda,” 17 Shinajpi Ananías rica, huasima icusha, paihua maquira Saulo ahuai churaca.”Uqui Saulo,” nica, “can shamuushca ñambii ricurij Señor Jesús ñucara cachamushcami camba ñahuira pascangaj, camba shungüi Santu Ispirituhua undashca angaj!’ 18 Chi ratullaira, paihua ñahuimanda aichahua cara cuinta urmajpi alira ricuca. Atarisha bautisaricami. 19 Saulo micushca huasha, ursara apica. Saulo huaquin punzhauna Damascoi tiaj quirijcunahua pariju tiauca. 20 Dsaslla Saulo judiuguna tandarina huasiunai Cristo shutira camachica, pai “Diospa Churimi,” nisha. 21 Tucui paita uyajcuna manzharisha rimanauca: “¿Manzhu cai Saulo jerusalembi Jesuspa shutira rimajcunara tucuchiuca? ¿Manzhu chihuaj caimas shamuca quirijcunara apisha pushangaj sacerdote apuunama?” 22 Astaumbas SauIo, Diospa shimii mas shinzhiyaca. Damascoi causaj judiuguna pandarishcara ricuchica, “Sirtu pacha cai Jesús Cristomi,” nisha. 23 Ashca punzhauna pasashca huasha, judiuguna pariju rimanausha Saulora huañuchingaj iyarinauca. 24 Paiguna iyaushcara Saulo riparacami. Judioguna punzhandi tutandi punguunai chapanauca paita huañuchingaj. 25 Shinajpi quirijcuna Saulora apisha, tuta, tasai irguchinauca llacta quinzha huasha partima. 26 Jerusalenma pactamusha Sauio quirijcunahua llutarinara munaca, randi tucui paita manzhanauca, pai quirij ashcara mana quirisha. 27 Shinajpi Bernabé Saulora apisha, cachashca runaunama pushaca. Paigunara cuintaca imasnara Saulo ñambii Señorda ricujpi, Señor paita rimaca, shinallara cuintaca Damascois mana manzhashcahua Jesuspa shutii rimaca. 28 Saulo Jerusalembi tiaj quirijcunahua icusha llucshisha tiauca. 29 Mana ansas manzhashcahua Saulo Señorba shutii rimaca. Grieguunahua rimananauca; chiguna paita huañuchinara munanauca. 30 Uquiuna caita riparasha, Saulora Cesarea llactagama pushasha, paita Tarso llactama cachanauca. 31 Iglesiauna ganaslla tucunauca, Judea, Galilea, Samaria partiunai. ïñasha rinauca, Señorda manzhashcahua causasha, Santu Ispirituhua shinzhiyachishca mirarinauca. 32 Pedro caran partima purisha, Lida nishca llactai causaj quirijcunama shamuca. 33 Chihui shu Eneas nishca runara tupaca; ña pusac huatara caitui sirica. Suchu, mana purij aca. 34 Pedro paita nica: “Eneas, Jesucristo canda alichinmi. Atari, camba puñunara pillui!’ Chi ratullaira ataricami. 35 Paita tucui Lida Saronas llactaunai causajcuna ricunauca. Paiguna Señorbi quirinauca. 36 Jope llactai shu quirij huarmi tiaca, paihua shuti Tabita, shu shimii Dorcas. Cai huarmi alira raj aca, tsuntsuunama cuyaj. 37 Chi punzhaunai ungusha, Dorcas huañucami. Paita armachishca huasha, shu ucui churanauca. 38 Lida Jope llacta mayambi aca. Quirijcuna Pedro chihui ajta uyasha, ishqui runara cachanauca: “Ñucanchijma uctalla shamupai,” nisha rugasha. 39 Pedro atarisha paigunahua rica. Pai pactai rijpi, chi ucuma pushanauca. Huañushca huarmi muyujta, huaccha huarmiuna pai sirashca bataunaras churarinaunaras huacasha ricuchinauca, Dorcas paigunahua pariju tiaushcai rashcaunara. 40 Shinajpi Pedro tucuira canzhama cachasha, cungurisha Diosta mañaca. Huañushca huarmima tigrarisha paita rimaca: “Tabita, atari!’ Ñahuira pascaca, Pedrora ricusha atarisha tiarica. 41 Pedro paita maquimanda apisha atarichica. Shinajpi quirijcunara cayasha huaccha huarmiunandi paita causarishcara ricuchicami, 42 Cai rashca uyarica tucui Jope llactai. Ashca runauna Señorbi quirinauca. 43 Casna rasha Pedro unaira tiaca Jope llactai, shu Simomba huasii. Simón aicha caraunara chaquichij aca.
1 Cesarea llactai shu runa tiaca, paihua shuti Cornelio nishca. Pai Italiano suldaru muntunmanda capitán aca. 2 Cai runa Diosta llaquij, Diosta manzhaj aca, paindi, tucui paihua huasii tiajcunandi; ashcara cuyaj aca. Tucui huras Diosta mañaca. 3 Cai Cornelio, las tres chishi tupura, nuspaibi shu Diospa angelda pajlla pambai ricuca. Cai angel paihuajma icusha rimaca: “Cornelio,” nisha. 4 Pai angelda ricusha, manzharisha tapuca: “¿Imarai, Señor?” Angel cutipaca: “Can Diosta mañashcauna, can cuyashcauna Diospajma pactanaushcami pai iyaringaj. 5 Cuna, runaunara cachai Jope llactama, shu Simón nishca runara pushamungaj, paihua shu shuti Pedromi. 6 Cai Pedro shu Simomba huasii tiaun. Cai Simón aicha caraunara chaquichij runami, paihua huasi lamar rayai tian. Cai Pedro can ima ministishcaras rangaj canda rimangami.” 7 Paihua rimaj angel rishca huasha, Cornelio ishqui paihua sirvijcunara, shu paita yanapaj Diosta llaquij suldarundi cayaca. 8 Paigunara tucui pai ricushcara cuintashca huasha, Jopema cachaca. 9 Cayandi punzha, paiguna ñambira riushcai, llactama pactana mayambi, Pedro ahua patama Diosta mañangaj sicaca, doce mayan tupura. 10 Pedro ashcara yarcachisha, micunara munaca. Micunara puruntungama chapaushcai, cungaimanda nuspasha ricucami, 11 Ahua pacha pascarishcara ricuca. Chimanda shu atun llachapa cuinta ricurij, chuscundi pundamanda huatashca, allpama irgumujta ricuca. 12 Chihui tucui cai allpai purij chuscu chaquiyuj aichauna, allpara llucajcunas, ahuara huamburij pishcuunas tianauca. 13 Shu shimi uyarica: “Pedro, atari. Huañuchisha micui.” 14 Shinajpi Pedro nica: “Mana, Señor, ñuca mana ima huraspas ima sami yanga aichara, ima irustas micushcanichu.” 15 Chi uyarimuj shimi cutillara rimaca: “Dios pichashcara ama ‘Yangami’ nichu!’ 16 Cai samillara quinsa cuti ricurica. Chi huasha llachapa ahua pachama apai tucuca. 17 Pedro mana yachai tucusha tiaushcai, “¿Ima samira angairi cai ricushcara?” nisha iyariuca. Chi ratullai, Cornelio cachamushca runauna pactamunauca. Paiguna Simomba huasira tapusha, punguma llutarimunauca. 18 Cayasha tapunauca: “¿Shu Simón, paihua shu shuti Pedro, caibichu tiaun?” 19 Pedro pai ricushcara chara iyariushcai, Diospa Ispíritu paita rimaca: “Quinsa runa canda mascanaun. 20 Atari, irgüi, ama ansas manzhasha paigunahua ri. Ñuca paigunara cachamucani.” 21 Shinajpi Pedro irgusha, Cornelio cachamushca runaunara nica: “Ñuca canguna mascaushca runa ani. ¿Imamanda shamushcanguichi?” 22 Shamujcuna cutipanauca: “Cornelio nishca, shu capitán, ali shunguyuj, Diosta manzhaj, tucui judiuguna aillui ali rimashcami. Paita shu santu angel rimaca canda pushamungaj paihua huasima, can rimashca shimiunara uyangaj.” 23 Shinajpi runaunara ucuma icuchisha, Pedro paigunara chihui puñuchica. Cayandi punzha Pedro atarisha paigunahua rica. Huaquin Jopemanda uquiunas pariju catinauca. 24 Cayandi punzha, Cesarea lïactai icunauca. Cornelio paigunara chapauca, paihua ailluunandi, pai llaquishca amiguunandi. 25 Pedro icujpi, Cornelio llucshimusha paita tupaca, tuama urmasha paita aduraca. 26 Pedro paita atarichica, “Atari,” nisha, “ñucas runallarami ani.” 27 Paihua cuintanausha, ucuma icusha, ashca runa tandarishcara tupaca. 28 Pedro paigunara nica: “Canguna yachanguichi imasna judiuguna shu llactamanda runaunahua mana llutarinachu. Astaumbas Dios ricuchihuashcami, ‘Maican runaras ama ‘Yanga, irus’ nisha rimanguichu. ’ 29 Chiraigumanda can cayashcara uyasha, mana manzhasha shamushcani. Shinajpi tapuuni, ¿Imaraigumanda cayahuacangui?” 30 Cornelio cutipaca: “Ña chuscu punzha, cai tupu huraspi, yarcaibi, ñuca huasii mañacani, las tres tupui. Cungaimanda shu chiujlla ricurij churarishca runa ñuca ñaupajpi shayarica. 31 Pai nica: ‘Cornelio, can mañashcara uyashcami. Can cuyashcaunara Dios iyarishcami. 32 Jope llactama cachai. Chimanda shu Simón nishcara pushai rinauchu. Paihua shu shuti Pedro. Pai caraunara chaquichij Simomba huasii tiaun. Chi huasi lamar rayai. Cai Pedro shamusha canda rimangami. ’ 33 Shinajpi chi ratullai canma cachacani. Can alira shamushcangui. Cuna tucui caibi manchi, Diospa ñaupajpi, tucui Dios canma mandashca shimiunara uyangaj.” 34 Pedro rimasha nica: “Sirtu pacha ricsini Diospa ñaupajpi tucui runauna chi tupulla anchi. 35 Dios maican llacta runaras, paita manzhajta, alira rauta, llaquin. 36 Dios Israel churiunama shu shimira cachaca, cushi shungura cuj evangelio ali shimira Jesucristomanda rimasha. Cai Jesús tucuihuaj Señormi. 37 Tucui Judea partii rimashcara yachanguichi, Galileamanda callarisha, Juan camachishca bautisarina huasha, 38 Dios Nazaretmanda Jesúspa ahuai Santu Ispirituras ushairas talicami. Pai alira rasha purica, tucui supai turmindachishcaunara alichica, Dios paihua tiashcamanda. 39 Ñucanchi sirtu ricujcuna anchi cai tucui Jesús rashcaunara Judea partii Jerusalembis. Paita huañuchinauca, caspii clavasha. 40 Paita quinsa punzhai Dios atarichicami. Paillara ricuchica. 41 Mana tucui runaunama ricuricachu. Randi Dios ñaupamanda ajllashca sirtu ricujcunama, ñucanchima, paihua pariju micujcuna upijcuna, pai huañushcaunamanda causarishca huasha. 42 Ñucanchira runaunara camachingaj mandacami, sirtura rimangaj, imasna Dios paita churashcami causajcunaras huañushcaunaras Taripaj tucungaj. 43 Cai Jesusmanda tucui Diosmanda rimajcuna rimanaun, imasna tucui paita quirijcuna uchaunara perdonai tucunaunga paihua shutii.” 44 Pedro chara rimaullaira, Santu Ispíritu tucui uyajcuna ahuai urmacami. 45 Circuncisionda raj quirijcuna, Pedrohua pariju shamujcuna, manzharinauca imasna gentilguna ahuai cuyashca Santu Ispíritu talirica. 46 Paigunara shu tunu shimiunai rimajta uyanauca, shinallara Diosta ahuayachishcara. 47 Shinajpi Pedro cutipasha nica: “¿Maicambas ushanzhu yacura mitsanara cai Santu Ispiritura apijcunara ama bautisaringaj ñucanchisna? 48 Paigunara bautisaringaj mandaca Señor Jesuspa shutii. Shinajpi Pedrora unaira paigunahua tiangaj ruganauca.
1 Cachashca runauna Judea partii tiau uquiunandi gentilguna Diospa shimira chasquishcara uyanauca. 2 Pedro Jerusalenma sicajpi, circuncisionda rajcuna paihua rimananauca. 3 ”¿Imamanda circuncisionda mana rajcuna huasii icucangui, paigunahua micucangui?” ninauca. 4 Shinajpi Pedro cuintangaj callarica tucui paihua pasashcara. 5 ”Ñuca Jope llactai tiaushcai, Diosta mañasha, nuspashcara cuinta ricucani. Shu atun llachapara cuinta ahua pachamanda ñuca tiashcama chuscundi pundamanda irguchishca aca. 6 Llachapara ricuusha, chihui cai pachai purij chuscu chaquiyuj aichaunara, milli aichaunandi, allpara llucajcunandi, ahuara huamburij pishcuunandi ricucani. 7 Shu shimi ñucahua rimashcara uyacani: ‘Atari, Pedro, huañuchisha miqui,’ 8 ‘Señor, mana,’ nicani, ‘ima yanga irus aichara mana ima huras amulishcanichu. ’ 9 Shinajpi chi ahua pachamanda shimi cutipahuacami: ‘Dios pichashcara ama, yangami, nichu. ’ 10 Cai sami quinsa cuti ricurica. Chi huasha tucui ahua pachama apai tucuca. 11 Cungaimanda quinsa runa ñuca tiaushca huasima shamunauca, Cesareamanda ñucama cachamushcauna. 12 Ispíritu rimahuaca: ‘Ama manzhasha paigunahua ri. ’ Cai sucta uquiuna ñucahua catinauca. Shu runa huasii icucanchi. 13 Chi runa ñucanchira cuintaca: ‘Shu angelda ñuca huasii ricucani. Shayarisha nihuaca: ‘Jope llactama cachai. Pushai rinauchu shu Simonda, paihua shu shuti Pedro. 14 Pai canda camba huasii tiajcunandi almara quishpichina shimiunara rimangami. ’ 15 Ñuca rimai callarishcai, Santu Ispíritu paiguna ahuai urmacami, callari huras ñucanchihua tucushcasna. 16 Shinajpi Señor rimashcara iyaricani: ‘Sirtu pacha Juan yacui bautisaca, astaumbas canguna Santu ïspirituhua bautisai tucunguichimi. ’ 17 Shina rasha Dios paigunara Santu Ispiritura cuca ñucanchi, Jesucristoi quirijcunama cushcasna. ¿Pita acani Diosta arcangaj?” 18 Shinajpi cai shimiunara uyasha chunllayanauca, Diosta alabanauca: “Gentilgunamas Dios aripintirinara cushcami causanauchu.” 19 Esteban huañushcamanda turmindachiushca huraspi chausirij runauna Fenicia, Chipre, Antioquía llactaunagama pasanauca. Judiugunamalla Diospa shimira rimanauca. 20 Paigunamanda huaquin Chipremanda, Cirenemanda runauna Antioquía llactama shamusha, griegounama Señor Jesusmanda rimaj evangelio ali shimira rimanauca. 21 Dios paigunara yanapaca. Ashcauna quirinauca, Señorbajma vultiarinauca. 22 Paiguna shina rashca Jerusalembi tiaj iglesiai uyarigrica. Shinajpi Bernabera Antioquiama cachanauca. 23 Bernabé pactai risha, Dios yanapashcara ricusha, cushiyaca. Tucui runaunara camachica paiguna quirishcara ama saquisha Señorda catinauchu. 24 Bernabé ali runami aca, ali quirij, Santu Ispirituhua undashca. Ashca runauna Señorbajma tandarimunauca. 25 Chimanda huasha, Bernabé Tarso llactama rica Saulora mascangaj. Paita tupasha, Antioquiama pushaca. 26 Shu huata tupura iglesiahua tandarisha tianauca. Ashca runaunara yachachinauca. Chihui, Antioquía llactai, quirijcunara ‘Cristiano’ nisha ñaupa punda shutichinauca. 27 Chi punzhaunai, Diosmanda rimajcuna Jerusalenmanda Antioquiama shamunauca. 28 Paigunamanda shuj, Agabo nishca, ataricami. Diospa Ispiritumanda rimasha intindichica imasna ashca yarcai cai pachai shamungarauta. Cai yarcai Claudio mandaushca huraspi shamuca. 29 Shinajpi quirijcuna caran shuj pai ushashca tupura Judeai tiau uquiunama yanapasha cachangaj iyarinauca. 30 Shina ranauca. Paiguna yanapashcara Bernabé Saulo maquiunai cusha, quirij rucuunama cachanauca.
1 Chi hurasllaira, Herodes rey apu quirijcunara turmindachingaj callarica. 2 Juamba uqui Jacobora isparahua huañuchica. 3 Caita judiuguna munanauta ricusha, Herodes Pedroras apica. Puscu illaj tanda ista punzhauna aca. 4 Paita apisha, chunda cularbi ishcaca. Chunga sucta suldaruma cushca aca ricungaj. Pascua ista pasashca huasha runauna ñaupajpi llucchinara munaca. 5 Shina rasha Pedrora chunda cularbi ishcariaica. Randi quirijcuna mana saquisha Diosta mañanauca Pedromanda. 6 Herodes paita llucchisha nisha iyaushcai, chi tutai Pedro puñuriaica ishqui suldaru chaupi shungüi; ishqui cadenahua huatashca aca, Chunda cuiarda cuiraj suldaruuna pungu ñaupajpi cuirarianauca. 7 Cungaimanda shu Señorba angel ricurimuca. Chunda cularbi punzhajlla tucuca. Angel Pedrora custillas quinrii tangasha llicchachica: “Uctalla atari,” nisha. Cadenauna paihua maquimanda urmanauca, 8 Angel rimaca: “Chumbilli, zapatusta huatai. Camba churarinara churarisha catihuai.” Shinami rarca. 9 Pedro llucshisha angelda catica. Caita mana sirtu chari iyaca angel rashcara. Astaumbas, “Nuspaunimi,” nisha iyaca. 10 Ucuma ricuu suldaruunaras canzhama ricuucunaras pasanauca. Llactama llucshina iru pungu paiguna pasangaj paihua munaillara pascarica. Llucshisha shu ñambira pasanauca. Chi huasha angel paimanda anzhurica. 11 Shinajpi Pedro ali iyaihua iyarisha nica: “Cuna intindini, sirtu pacha Dios paihua angelda cachamusha ñucara quishpichihuaca Herodes maquimanda, tucui judiuguna chapashcamandas. 12 Caita riparasha, Pedro Juamba mama María huasima pactamuca. Cai Juan, shu shuti Marcosmi. Chihui ashcauna tandarisha pariju tianauca Diosta mañasha. 13 Pedro canzha pungüi cayajpi, shu Roda nishca sirvij huarmi ricungaj llucshica. 14 Roda Pedro shimira ricsisha, cushiyashcamanda pungura mana pascacachu. Astaun ucuma callpaca rimangaj: “Pedro caibimi,” nisha, “pungüi shayaun.” 15 Paiguna rimanauca: “Can nusparisha rimaungui.” Huarmiga: “Sirtumi nini,” nica, Paiguna randi, “Paihua ayami anga,” ninauca. 16 Astaumbas Pedro maspas cayauca. Paiguna pungura pascasha, paita ricusha manzharinauca. 17 Pedro randi, chunllayangaj maquihua ricuchisha, paigunara rimaca imasnara Dios paita chunda cular ucumanda llucchica.”Cai tucuira Jacobora uquiunaras uyachichi,” nica. Chi huasha llucshisha, shu partima rica. 18 Ña punzhayajpi, suldaruuna ashcara nusparinauca: “Pedro ¿imara tucushcangairi?” nisha. 19 Herodes Pedrora mascasha, mana tupacachu. Cuirajcunara taripasha huañuchingaj cachacami. Chimanda huasha, Judeamanda Cesareama irguca. Chihui tiauca. Chimanda huasha Herodes Judeamanda Cesarea llactama rica, chihui saquirica. 20 Herodes Tiro llactamandaunahua Sidón llactamandaunahuas piñarishca aca. Shina ajllaira pariju paihuajma shamunauca. Paita sirvij Blasto nishcahua valirisha, aliyanara munanauca. Paiguna llacta Herodes allpaunamanda micunara apijcuna aca. 21 Herodes, pai rimashca punzhai, rey apu churarinara churarisha, paihua rey apu tiarinai tiarisha, paigunara camachica. 22 Runauna caparinauca: “¡Dios riman, mana runachu!” 23 Chi ratullaira, Diospa angel paita susirichica, mana Diosta alabashcaraigumanda. Chi ratullaira curuuna paita micujpi, Herodes huañuca. 24 Astaumbas Diospa shimi mirarisha, yaparisha rica. 25 Bernabé Saulondi Jerusalenmanda tigranauca, paiguna mingashcara pactachisha. Paigunahua Juan Marcos nishcara pushanauca.
1 Antioquía llactai tiaj iglesiai Diosmanda rimajcuna, yachachijcunas tianauca: Bernabé, Simón Niger nishca, Cirenemanda Lucio, Herodes apuhua pariju iñaj Manaén, Saulondi. 2 Paiguna Diosta sirvisha, sasisha, Diosta mañanauca. Santu Ispíritu paigunara rimaca: “Bernabera, Sauloras chicanyachichi ñuca munashcara rangaj, chihuaj paigunara cayashcani.” 3 Shinajpi sasisha, Diosta mañashca huasha, maquira paiguna ahuai churasha, cachanauca. 4 Paiguna, Santu Ispíritu cachashcauna, Seleucia llactama irgusha, Chipre islama rinauca, 5 Salamina llactama pactamusha, Diospa shimira rimanauca judiuguna tandarina huasiunai. Juambas yanapasha cumpañauca. 6 Intiru islara pasasha Pafos llactagama, shu sagra runara tupanauca. Pai llulla shimira rimaj judiu aca, paihua shuti Barjesús nishca. 7 Pai Sergio Paulo nishca atun apuhua tiauca, Cai Sergio Paulo ali iyaiyuj aca. Bernabera Sauloras cayaca, Diospa shimira uyanara munaca. 8 Cai Elimas nishca sagra runa, (paihua shuti runa shimii Sagra nin), paigunara arcaca, apura pai quirinamanda anzhuchisha nisha. 9 Shinajpi Saulo, caiga Pablomi, Santu Ispírituhua undashca asha, Elimasta ricusha, rimaca: 10 ”Tucui umanahua manaii ranahua undashca angui, supaihua churi, ali ranara chijnisiqui. ¿Señorba ali ñambira huajlichingaj saquinara mana ushanguichu? 11 Cunami Diospa maqui canda susirichin. Ñausa tucungaraungui, indira unaigama mana ricungui.” Shinajpi paihua ñahui llanduyasha tuta tucucami. Muyujta purisha mascaca pitas paita aisasha pushangaj. 12 Apu casna tucushcara ricusha quiricami, Señormanda yachachishcara manzharisha. 13 Pablo, paihua pariju ajcunandi, Pafosmanda llucshinauca. Panfilia partii tiaj Perga llactama pactanauca. Juanga paigunamanda anzhurisha Jerusalenma tigraca. 14 Paiguna Pergamanda pasasha, Pisidia partii tiaj Antioquíama shamunauca. Samana punzhai judiuguna tandarina huasii icusha tiarinauca. 15 Ley shimiras Diosmanda rimajcuna shimiunaras ricushca huasha, tandarina huasi apuuna paigunara rimanauca: “Runauna, uquiuna, ima camachina shimiunaras charisha runaunara yachachingaj, rimaichi.” 16 Shinajpi Pablo atarisha, maquihua chunlla tucungaj ricuchisha, nica: “Israel runauna, Diosta manzhajcunas, uyaichi: 17 Cai Israel runauna Dios ñucanchi yayaunara ajllaca, paigunara ahuayachica. Paiguna Egipto llactai shu caru partimanda shamujcuna ajpi, shinzhi maquihua paigunara chimanda llucchica. 18 Chuscu chunga huata tupura chaquishca allpa partii paigunara ahuantaca. 19 Canzhis llactaunara tulashca huasha Canaan partii, chi runauna allpara paigunama cuca. 20 Chimanda huasha, chuscu patsaj pichca chunga huata tupura, Diosmanda rimaj Samuel shamunagama, taripajcunara cuca. 21 Shinajpi, ‘Rey apura cuhuai,’ nisha mañanauca. Dios paigunara Cispa churi Saulda cuca. Pai Benjamín aillumanda aca. Chuscu chunga huatagama rey apu aca. 22 Dios paita anzhuchisha, Davidta rey apura churaca. Paimanda alira rimaca: ‘Isai churi Davidta tupashcani, paihua shungu ñuca munashcasna. Pai tucui ñuca munashcara rangami. ’ 23 Cai David miraigunamanda, Dios pai cushca shimira pactachingaj, Jesusta atarichicami, Israelba quishpichij tucungaj. 24 Jesús manara shamujllaira, Juan tucui Israel runaunara: ‘Aripintirisha bautisarichi,’ nisha camachica. 25 Juan pai camachinara pactachisha casna nica: ‘¿Pimi nishara iyahuanguichi? Mana paichu ani. Astaumbas ñuca huashai shuj shamun, paihua zapatusta pascangajllas mana valijchu ani. ’ 26 Runauna, uquiuna, Abrahanmanda miramuj churiuna, cangunahua tiaj Diosta manzhajcunas, cangunama cai quishpina shimira cachamushcami. 27 Jerusalemhi causajcuna, paiguna apuunandi, cai Jesusta mana ricsinaucachu. Shinallara ñaupa huras Diosmanda rimajcuna quillcashca shimiunara caran samana punzhai ricusha, mana ricsinaucachu. Shinajpi Jesusta cauźayachisha, paiguna cai shimiunara pactachinauca. 28 Mana imaras paihuajpi tupashallara huañunara, Pilatora mañanauca paita huañuchingaj. 29 Tucui paimanda quillcashcaunara pactachishca huasha, cruzmanda anzhuchisha, pambana uctui churanauca. 30 Astaumbas Dios paita huañushcaunamanda atarichicami. 31 Cai Jesús Galileamanda Jerusalenma paihua pariju shamujcunama ricurimuca ashca punzhauna. Cuna caiguna sirtu ricujcuna tucunaushcami runauna ñaupajpi. 32 Ñucanchi shinallara evangelio ali shimira cangunama cuintanchi, ñucanchi yayaunama cushca shimi rimashcasna. 33 Cai shimira Dios pactachishcami paiguna churiunama, ñucanchimas, Jesusta causachisha. Shinami Salmos cantana quillcai quillcashca tian: ‘Ñuca churi angui, cuna punzha canda tupashcani. ’ 34 imasna huañushcaunamanda atarichicami, ama ima huras ismungaj, casna nica: ‘Davidma cusha nishca ali bindisiashcaunara cushca anguichi. ’ 35 Chiraigumanda shu Salmoi nin: Tugarda mana cunguichu camba santu Churi ismungaj. ’ 36 Sirtu pacha David, paihua pariju causajcunara Dios munashca tupura sirvishca huasha, huañuca; paihua yayaunandi pambashca aca, ismuca. 37 Randi Dios causachishca Santu Churi mana ismucachu. 38 Runauna, uquiuna, yachaichi: Paimanda uchara perdonanara cangunama rimashcami. 39 Moisespa ley mandashca shimii tucui imaras mana Dioshua alichihuaj ajta, Jesuspi maicans quirijta alichishcami. 40 Ricuichi, Diosmanda rimajcuna rimashca ama shamungaj: 41 ‘Ricuichi, pishiyachijcuna, manzharichi, huañuichi. Canguna causaushca punzhaunai shu ranara rauni, Maican rimajpis mana quiringuichima. ’ 42 Paiguna judiuguna tandarina huasimanda llucshijpi, gentilguna ruganauca: “Shamuj samana punzhai cai shimiunara cuti rimaichi,” nisha. 43 Tandarimuj runaunara dispirishca huasha, ashca judiuguna paiguna yachaira ali catimujcunandi Pablora Bernaberas catinauca. Paigunahua llutarijcunara camachinauca Diospa ali llaquina iyaibi quirisha tianauchu. 44 Cayandi samana punzha pactamujpi, ñacalla intiru llacta Diospa shimira uyangaj tandarimunauca. 45 Judiuguna, ashca runauna tandarishcara ricusha, mana munasha piñarinauca. Pablo rimashcara arcanauca, “Mana sirtuchu,” nisha; shinallara paita caminauca. 46 Shinajpi Pablo Bemabendi mana manzhasha rimanauca: “Sirtu ministiricami Diospa shimira ñaupa punda cangunama rimangaj; astaumbas canguna mana munasha ichucanguichi; canguna huiñai causaira apingaj, ‘Mana valijchu anchi,’ nisha iyacanguichi. Chiraigumanda gentilgunama rinchi. 47 Casnami Señor ñucanchira mandaca, shina nisha: ‘Gentilgunaj canda vila cuinta churashcani, runaunara quishpichingaj cai pacha puchucai pundagama. ’ “ 48 Gentilguna caita uyasha cushiyanauca, Diospa shimira alabanauca. Tucui huiñai causaira charina ajcuna quirinauca. 49 Diospa shimi tucui chi parti llactaunai uyarica. 50 Judiuguna ali huarmiunara charij huarmiunandi llacta apuunandi camachinauca Pablora Bernaberas turmindachingaj. Paigunara chi llactamanda ichunauca. 51 Paiguna chaquii llutarij allpapa chaquimanda paigunama chausisha, Iconio llactama pactamunauca. 52 Quirijcuna cushihua Santu Ispirituhuas undashca anauca.
1 Iconio llactai, Pablo Bernabendi judiuguna tandarina huasii pariju icunauca. Casnami rimanauca ashca judiuguna ashca grieguunas quirinauca. 2 Astaun, mana quirij judiuguna gentilgunara turbachinauca uquiunara turmindachingaj. 3 Shinajpis chi llactai unaira tianauca, mana manzhasha rimasha, Señorbi quirinai samausha, Señor paiguna rimashca ali shimiunara sirtu ajta ricuchisha, paiguna maquihua gustu ricurinaunaras munanaita rashcaunaras rarcami. 4 Chi llactai tiaj runauna ishqui muntumbi chaupirinauca, shu muntun judiugunahua, shu muntun cachashca runaunahua. 5 Judiuguna gentilgunandi paiguna apuunahua pariju paigunara camingaj, rumihua shitangaj, shamunauca. 6 Paiguna riparasha miticunauca Listra Derbe nishca Licaonia llactaunama. Chi mayan llactaunais purinauca. 7 Chihui evangelio ali shimira camachinauca. 8 Shu Listra llactamanda runa, paihua mama icsamanda pacha anga chaqui llucshij, tiauca; ima huraspas mana puricachu. 9 Cai runa Pablo rimashcara uyaca. Pablo paita ricusha, pai aliyangaj quirinara charijta ricuusha, 10 shinzhira rimaca: “Dirichulla atari camba chaquii.” Runa saltasha purica. 11 Shinajpi runauna Pablo rashcara ricusha, Licaonia shimihua caparinauca: “Runasna ricurij dioscuna ñucanchima irgumunaushcami.” 12 Bernabera ‘Jupiter’ nisha shutichinauca. Pablora, shimira yapa rimaj ajpi, ‘Mercurio’ nisha shutichinauca. 13 Jupiterba sacerdote, paihua diosta alabana huasi llacta ñaupajpi tiajpi, punguuna ñaupajma huagraunara sisaunaras apamuca, sacrificiora rangaj, paindi runaunandi. 14 Cachashca runauna Bernabé Pablondi caita uyasha, paiguna churarinara lliquisha, runa muntunma chaupi shunguma caparisha callpanauca: 15 ”Runauna,” nica, “¿imamanda casna ranguichi? Ñucanchis runallara anchi canguna cuintallara. Cangunara rimanchi cai mana valij samiunaras saquingaj, causaj Diosta quirinauchu. Pai ahua pachara, cai pacharas, lamardas rarca, paigunajpi tucui tiajcunandi. 16 Pai ñaupa hurascunai tucui runaunara saquishcami paiguna quiquin ñambiunai puringaj. 17 Shina rasha Dios paillara shimi illajta mana saquicachu, alira rasha, tamiaunara ahuamanda cachamusha, muyuuna aparina hurascunara cusha, ñucanchira carasha, ñucanchi shungura cushiyachisha.” 18 Cai shimiunara rimasha, ashca turmindushua uyachinauca runaunara, paiguna sacrificiora ama rangaj. 19 Shinajpi judiuguna Antioquiamandas Iconiomandas shamunauca, runaunara uyachinauca. Pablora rumihua shitasha, llacta ucumanda pajllama aisasha ichunauca, “Huañushcami,” nisha iyanauca. 20 Astaun quirijcuna paihua muyujta shayanauca. Pai atarisha llactai icuca. Cayandi punzha Bernabehua pariju llucshisha, Derbe llactama rica. 21 Chi llactai evangelio ali shimira rimanauca. Ashca runauna quirijpi, paigunara yachachinauca. Chimanda llucshisha, Listra, lconio, Antioquía llactaunama tigranauca. 22 Quirijcunara cariyachinauca paiguna almai. Camachisha ninauca: “Canguna quirinai ama sambayanguichi. Ashca turmindarinahua ministirin ñucanchi Dios mandana pachai icungaj.” 23 Caran iglesiai cuiraj rucuunara ajllanauca. Sasisha Diosta mañanauca, paigunara paiguna quirishca Señorba maquii saquinauca. 24 Pisidia partira pasasha, Panfilia partima shamunauca. 25 Perga llactai Diospa shimira rimashca huasha, Atalia llactama uraira rinauca. 26 Chimanda lamarda chimbanauca Antioquiama. Chi llactamanda ñaupa punda Diospa ali llaquina iyaibi mingashca anauca. Cuna paiguna mingashcara tucuchishca huasha tigramunauca. 27 Paiguna pactai risha, quirijcunara tandachisha, cuintanauca ima atun ranaunara Dios paigunahua rashcara, imasnara gentilgunama quirina pungura pascashca aca. 28 Chihui unaira saquirinauca quirijcunahua.
1 Shinajpi huaquin Judeamanda shamujcuna uquiunara yachachinauca: “Canguna circuncisionda mana rasha Moisés mandashcasna, quishpinara mana ushanguichichu.” 2 Pablo Bernabendi shamujcunahua piñanausha rimananauca. Shinajpi Pablo Bernabendi huaquin quirijcunandi Jerusalenma rinara iyarinauca, chihui tiaj cachashca runaunahua cuiraj rucuunahuas cai rimashcara cuintangaj. 3 Paiguna, iglesiamanda quirijcuna cumpañasha, Fenecia Samaria llactaunara pasanauca, gentilguna quirishcara cuintasha. Tucui uquiuna cushiyanauca. 4 Jerusalenma pactajpi, quirijcuna, cachashca runaunas, cuiraj rucuunas paigunara apinauca. Dios tucui paigunahua rashcaunara cuintanauca. 5 Huaquin quirij fariseoguna rimasha atarinauca, “Circuncisonda rana anga” ninauca, “shinallara Moisés ley mandashca shimiunara pactachina anga.” Paiguna yanapashcara Bernabé Saulo maquiunai cusha, quirij rucuunama cachanauca. 6 Cachashca runauna cuiraj rucuunandi tandarinauca cai shimira yachangaj. 7 Unaira cuintanaushca huasha, Pedro shayarisha paigunara nica: “Runauna, uquiuna, canguna ali yachanguichi imasnara unai Dios ñucara ajllaca gentilguna ñuca shimimanda Diospa evangelio ali shimira uyanauchu, quirinauchu. 8 Shunguunara cuiraj Dios, paiguna quirishcara ricsisha, Santu Ispiritura paigunama cuca, ñucanchima cushcasna. 9 Ñucanchimanda gentilgunara mana chicanyachicachu, quirishcamanda paiguna shungura pichasha. 10 Cunaga, ¿imamanda Diosta tintanguichi, quirijcunara turmindusta apachisha nisha, ñucanchi yayauna ñucanchindi mana apana ushashcara? 11 Astaumbas Señor Jesuspa ali llaquina iyaimanda, ñucanchis paigunasna quishpishun.” 12 Shinajpi tucui tandarijcuna chunllayasha uyanauca. Bernabé Pablondi cuintanauca imasna gentilguna llactaunai Dios paiguna maquimanda gustu ricurinaras munanaita rashcaunaras rashcara. 13 Paiguna rimai pasajpi, Jacobo cutipaca: “Runauna, uquiuna, uyahuaichi. 14 Simón cuintaca imasna Dios gentilgunara ñaupa bindisiaca, paigunamanda runaunara ajliasha paihua shutira alabangaj. 15 Casnami rimanauca Diosmanda rimajcuna, paiguna quillcashcasna: 16 ”Caigunamanda huasha ñuca tigramusha; Davidpa huasira urmashca ajta cuti shayachisha. Tularishcaunara alichisha; Cutilla sicachishami. 17 Tucui puchuj runauna Diosta mascanauchu; Tucui gentilgunandi, maicambas ñuca shutihua shutichishcauna. 18 Casnami Señor nin; cai tucuira yachachishcami callari hurasmanda pacha.” 19 Chiraigumanda casna iyauni, gentilgunamanda Diosta quirijcunara ama turbachingaj. 20 Astaumbas quillcashunchi: “Idolo nishca runa rashca dioscunamanda anzhurinauchu, shujhua tacarinamandas; shinallara yahuaryuj aicharas, yahuardas ama micunauchu. 21 Ñaupa hurasmanda, Moisés pai camachishca shimira rimajcunara caran llactai charin judiuguna tandarina huasiunai, chihui caran samana punzhai ricusha rimanaun. 22 Shinajpi cachashca runauna, cuiraj rucuuna, tucui tandarishca uquiunandi alimi ninauca paigunamanda huaquin runaunara ajllangaj, Pablohua Bemabehuas Antioquíama cachangaj. Judas Barsabás nishcara Silas nishcandi ajllanauca, uquiuna valichishcaunara. 23 Casna nisha quillcashun, paigunahua cachangaj: “Señor cachashca runauna, cuiraj rucuunandi, uquiunandi, gentilgunamanda uquiunara saluranchi, Antioquía, Siria, Cilicia, partiunai tiajcunara. 24 Uyashcanchi imasna huaquin ñucanchimanda llucshijcuna cangunara turmindachinaushca, canguna almara llaquichisha: ‘Circuncisionda rana anguichi,’ nisha, ‘ley shimira huacachingajpas. ’ Ñucanchi casna rimajcunara mana cachacanchichu. 25 Ñucanchi tucui shu iyarishcallai pactasha, iyarishcanchi runaunara ajllangaj cangunajma cachangaj, ñucanchi llaquishca Bernabehuas Pablohuas cumpañangaj. 26 Cai runauna paiguna causaira churanaushcami Señor Jesucristo shutira llaquishcamanda. 27 Shinajpi Judaspas Silaspas cachanchi, paigunamanda cai shimiunara rimasha cangunara uyachinaungami. 28 Alimi yachin Santu Ispiritumas ñucanchimas cangunara ama mas mandangaj. Cai mandashcaunallara ministirin: 29 Runa rashca dioscunara sacrifcioi ricuchishca aichara ama micuichichu. Yahuardas, yahuaryuj aicharas ama micuichichu. Shujhua tacarinaras saquinguichi. Caigunara pactachisha, alira ranguichi. Ali pasanguichi.” 30 Shinajpi cachashcauna Antioquíama rinauca. Tucui quirijcunara tandachisha, quillcara cunauca. 31 Paiguna caita ricusha cushiyanauca, quillcashcamanda. 32 Judas Silasndi shinallara Diosmanda rimajcuna asha, uquiunara cariyachinauca, shinzhiyachinauca, ashca shimiunara rimasha. 33 Chihui unaillara tiashca huasha, uquiunamanda cushihua dispirisha paigunara cachajcunama tigranauca. 34 Astaun Silas chihui saquirinara, ‘Alimi,’ nisha iyarica. 35 Pablo Bernabehua Antioquía llactai tianauca, Señorba shimira yachachisha. Ashca shujcunandi evangelio ali shimira camachinauca. 36 Ansa punzha pasashca huasha, Pablo Bernabera nica: “Acu, ricui rishun uquiunara tucui ñucanchi Diospa shimira camachisha pasamushca llacatunai imasna ashcaras yachangaj.” 37 Bernabé Marcos nishca Juanda paihua pariju pushanara munaca. 38 Astaun Pablo Marcosta paihua pariju pushanara mana munacachu, Marcos paigunamanda Panfilia llactai anzhurishcamanda, Diosta sirvinama mana catishcamanda. 39 Paigunapura mana ali tucusha, paigunapura anzhurinauca. Bernabé Marcosta pushasha, Chipre islama chimbaca. 40 Pablo Silasta ajllasha llucshisha rica, uquiuna paita Señorba ali llaquina iyaibi minganauca. 41 Siria Cilicia partiunai purinauca, iglesiaunara shinzhiyachisha.
1 Chimanda huasha, Derbe, Listra llactaunama pactamunauca. Chihui shu Timoteo nishca quirij runa tiaca, paihua mama quirij judiu huarmi, paihua yaya griegu runami aca. 2 Cai Timoteomanda Listra Iconio llactaunai tiaj uquiuna alira rimanauca. 3 Paita Pablo munaca paihua pariju pushangaj. Chi partii tiaj judiuguna ama turmindachinauchu nisha, paita circuncisionda rarca. Paihua yaya griegu ajta tucui runauna yachanauca. 4 Llactaunara pasausha, mandashcaunara huacachingaj rimanauca, imasna cachashca runauna rucuunandi Jerusalembi rimashcara. 5 Shinajpi iglesiauna cariyachishca anauca paiguna quiriushcai. Caran punzha yaparinauca. 6 Frigia, Galacia partiunara pasajpi, Santu Ispíritu: “Ama rimaichichu Asia partii,” nisha rimaca. 7 Misia partima pactamujpi, Bitinia partima ringaj iyarinauca, astaumbas Ispíritu mana lugarda cucachu. 8 Misia partira pasasha, Troas llactama irgunauca. 9 Pablo tuta nuspaibi casna ricuca—shu Macedonia partimanda runa paihua ñaupajpi shayarisha, “Macedonia partima ñucanchira yanapangaj shami,” nisha rugaca, 10 Tuta nuspaibi ricushca huasha, chi ratullaira Macedoniama rinara iyaricanchi.”Sirtu pacha Dios cayanmi,” nisha iyacanchi, “chihui evangelio ali shimira yachachingaj.” 11 Troasmanda risha, pitijta shamucanchi Samotracia islama. Cayandi punzha Neápolis llactama pactamucanchi. 12 Chimanda Filipos llactama shamucanchi, Macedonia parti gubirnu llacta, shu colonia nishca. Chi llactai unaillara tiacanchi. 13 Shu samana punzhai, llacta pungumanda llucshisha, yacu mayambi Diosta mañana pambama ricanchi. Tiarisha, chihui tandarij huarmiunara rimacanchi. 14 Shinajpi shu Lidia nishca huarmi, Tiatira llactamanda puca llachapara catuj, Diosta aduraj asha, uyauca. Dios paihua shungura pascaca, Pablo rimashcara ali asirtasha uyangaj. 15 Pai bautisarishca huasha paihua aillundi, ñucanchira rugaca: “Canguna ñucara Señorbi ali quirijmi iyasha, ñuca huasii icuichi, samaichi,” nica. Ñucanchira ashcara rugacami saquiringaj. 16 Ñucanchi Diosta mañangaj riushcai, shu malta huarmi tupaj shamuca, shu supai icushca yachaj huarmi. Paihua patrungunara ashcara ganachica pai rimashcaunamanda. 17 Cai huarmi Pabloras ñucanchiras caticami, shina caparisha: “Cai runauna ahua pacha Diosta sirvijcunami, quishpina ñambira yachachinaun.” 18 Shina rarca ashca punzhaunara. Astaun Pablo, mana munasha, vultiarisha, supaira rimaca: “Jesucristo shutii canda mandani, llucshi cai huarmimanda.” Chi ratullaira supai llucshica. 19 Paihua patruncuna ganachij supai llucshishcara ricusha, Pabloras Silastas apisha, pulasama apuuna ñaupajma pushanauca, 20 Patrunguna cai runaunara apuunama ricuchinauca, nisha: “Cai runauna judiuguna ashallara intiru llactara nuspachinaun. 21 Paiguna yachachishcara mana uyanachu, mana ranachu, ñucanchi Romano runauna ashcaraigu.” 22 Llactai tiaj runauna gun tandarinauca. Apuuna paiguna churarinara lliquinauca. Pablounara caspiunahua livachingaj mandanauca. 23 Paigunara ashcara livachishca huasha chunda cularbi ishcanauca, “Chunda cularda cuiraj ali ricuchu,” nisha. 24 Pai cai mandashcara uyasha, paigunara huasha tapa ucuma ishcaca. Paiguna chaquiunara cepoi apichica. 25 Chaupi tutai Pablo Silasndi Diosta mañanauca, shinallara cantanauca. Paigunahua pariju ishcashca runaunas uyanauca. 26 Shinajpi cungaimanda allpa shinzhira cuyuca; shinarasha chunda cular shayachishca rumiuna cuyunauca. Chi ratullai tucui punguuna pascarinauca, tucui runaunara huatashca cadenauna pitirisha urmanauca. 27 Chunda cularda cuiraj runa lliccharisha, chunda cular punguuna pascarishcara ricuca. Paihua isparara llucchisha paillara huañungarauca, ishcashca runauna miticusha rinaushca angami, iyarisha. 28 Pablo, shinzhira caparisha, nica: “Huañunara ama iyaichu, tucui caillai manchi.” 29 Cuiraj runa vilara mañasha ucuma icuca, manzharisha Pablo Silaspa chaquii tuama urmaca, 30 Paigunara canzhama llucchisha tapuca: “Señores, ¿imara ranara ministini ñuca quishpingaj?” 31 Paiguna ninauca: “Señor Jesucristoi quiri, quirisha quishpi tucungui, shinallara camba aillus.” 32 Diospa shimira rimanauca, paita tucui paihua huasii tiajcunandi. 33 Chi tuta hurasllaira paigunara pushasha, chugrichishcaunara maillaca. Chi ratullaira bautisaricami, pai tucui paihua huasii tiajcunandi. 34 Paigunara paihua huasima pushasha micunara caraca. Shinallara cushiyanauca pais tucui paihua huasii tiajcunandi Diosta quirishcamanda. 35 Punzhayashcai apuuna suldaruunara cachanauca: “Chi runaunara cacharinauchu,” nisha. 36 Chunda cularda cuiraj runa Pablora nica: “Apuuna cangunara cacharingaj cachamunaushca. Shinajpi llucshichi, cushihua richi.” 37 Shinajpi Pablo paigunara nica: “Tucuihua ñaupajpi mana taripasha ñucanchira livachihuanauca, Romanoscuna ashallara, maspas ñucanchira chunda cularbi ishcanauca. Cuna randi, ñucanchira pacalla llucchinara munanaun. Mana. Paigunallara shamunauchu ñucanchira llucchingaj.” 38 Suldaruuna tigrasha, apuunama cai shimiunara rimai rinauca. Paiguna cai runauna Romanoscuna ajcunara uyasha manzharinauca. 39 Shinajpi shamusha ruganauca, Pablounara llactamanda llucshingaj rimanauca. 40 Shina rasha, chunda cularmanda llucshisha, Lidia huasii icunauca. Uquiunara ricusha, paigunara cushiyachinauca. Chi huasha rinauca.
1 Amphipolis Apollonia llactaunara pasasha, Tesalónica Ilactama pactanauca. Chihui shu judiuguna tandarina huasi tiaca. 2 Pablo paihua yachaira rasha paigunajma rica, Quinsa samana punzhara paigunahua rimananauca. 3 Quillcashcaunamanda Pablo ricuchisha yachachica imasnara Cristo turmindarina aca, huañushcaunamanda causarina aca: “Cai ñuca cangunara rimaushca Jesús quiquin Cristomi,” nica. 4 Paigunamanda huaquinguna quirinauca, Pablohua Silashua llutarinauca, ashca Diosta llaquij grieguunandi, valij huarmiunandi mana ansallauna. 5 Shinajpi mana quirij judiuguna piñarisha, paigunahua pariju huaquin quilla runaunara manali runaunaras tandachinauca. Intiru llactara nuspachinauca. Jasomba huasima shamunauca macanaungaj. Pablora Silasta llucchinara munanauca runaunajma. 6 Astaumbas paigunara mana tupasha, Jasonda huaquin quirij uquiunandi apuunajma pushasha caparinauca: “Cai runauna intiru mundura turmindachijcuna caima shamunaushca. 7 Jasón cai runaunara apishcami. Tucui caiguna César mandashcaunara mana pactachinaun, shu rey apu Jesús tianmi,” nisha. 8 Judiuguna runaunara apuunaras nuspachinauca, cai shimiunara uyasha. 9 Jasón shujcunandi cullquira cushca huasha cachari tucunauca. 10 Uquiuna dsaslla, chi tutallaira, Pablora Silastas Berea llactagama cachanauca. Paiguna pactai risha judiuguna tandarina huasima icunauca. 11 Caiguna Tesalonicaunamanda yali valijcuna anauca. Ali shunguhua shimira uyanauca. Caran punzha Quillcashcaunara ricunauca, “¿Cai shimiuna alichu manzhu ali? nisha, 12 Shinajpi paigunamanda ashcauna quirinauca, valij griegu huarmiunas, mana ansalla cariunas. 13 Tesalonicamanda judiuguna uyanauca imasna Berea llactais Pablo Diospa shimira rimashcara. Chimas risha intiru llactara nuspachigrinauca. 14 Chi ratullaira uquiuna Pablora lamar partima cachanauca. Silas Timoteo chillai saquirinauca. 15 Pablora pushajcuna paita pushanauca Atenas llactagama. Pablo shimira cachaca Silasta Timoteora uctalla shamunauchu, nisha. Caita uyasha rinauca. 16 Pablo Atenas llactai paigunara chapausha, paihua shungüi yapa sindirica, runa rashca dioscunara alabashcara tucui partii ricusha. 17 Shinajpi judiuguna tandarina huasii rimananauca, judiugunahua Diosta llaquijcunahuas. Shinallara pulasai caran punzha tuparijcunahua rimananauca. 18 Huaquin epicúreo estoico nishca yachajcuna paihua rimananauca. Huaquinguna ninauca: “¿Imara nin cai shimi sapa?” Shujcuna ninauca: “Pai carumanda supai shutiunara camachisha shamun, yachin,” Pablo Jesuspa evangelio ali shimiras causarinaras rimashcamanda. 19 Runauna Pablora apisha, paita Areópago nishca pulasama pushanauca, casna nisha: “¿Ushanchichu uyangaj can rimaushca mushuj yachachishcara? 20 Ñucanchi mana uyaushca shimira rimaj shamungui. Caita yachashun ninchi.” 21 Tucui Atenas llactai causajcunas carumanda shamusha tiajcunas mushuj shimillara uyanaras rimanaras munanauca. 22 Shinajpi Pablo Areópago pulasa chaupi shungüi shayarisha nica: “Atenas runauna, canguna dioscunara yapa alabaisiqui ajcunara ricuni. 23 Ñambira pasausha shu altar nishca sacrificio rana mesara tupacani casna quillcashcahua: ‘Mana ricsishca Dios. ’ Cai Diosta canguna mana ricsisha alabajpi, paita cangunara rimauni. 24 Cai pachara raj Dios, tucui chihui tiajcunaras iñachij, ahua pacha cai pacha Dios asha, maquihua rashca huasiunai mana causaunzhu. 25 Runa maquimanda mana sirvi tucun, pai imaras ministiujsna. Pai tucuima causairas samairas tucui imaras cun. 26 Shu yahuarmandalla tucui runara iñachicami, intiru cai pachai causanauchu. Paiguna causana punzhaunaras allpaunaras ñaupa hurasmanda pacha cushcami. 27 Shinajpi runauna Diosta mascanauchu imasna tunuis rasha tupanauchu. Sirtu pacha caran ñucanchimanda pai mana caruichu. 28 Paihuajpi causanchi, purinchi, tiaunchi; imasna huaquinguna canguna quiquin rimajcuna rimashcasna: ‘Ñucanchis paimanda mirajcuna anchi. ’ 29 Diospajmanda mirajcuna asha, Diosta curihua cullquihua rumihua rashca samira mana iyashunchi, runa iyaushca samira. 30 Dios cai iyai illaj hurascunara mana riparasha, cuna mandan tucui runaunara tucui partiunai aripintirinauchu. 31 Chimandami shu punzhara cushca, pai ajllashca Runa ali dirichu shunguhua cai pachara taripangaj. Cai tucui sirtu ajta tucui runaunama ricuchingaj cai Runara huañushcaunamanda causachica.” 32 Huañushca runauna causarinara uyasha, huaquinguna burlanauca; shujcuna ninauca: “Caimanda canda uyashun cutillara.” 33 Shinajpi Pablo paiguna chaupi shungumanda llucshica. 34 Huaquinguna quirinauca. Pablohua llutarinauca. Chigunamanda Dionisio nishca Areópago runa aca, shu Dámaris nishca huarmindi, shujcunandi.
1 Caimanda huasha Pablo Atenasmanda llucshisha, Corinto llactama rica, 2 Shu Pontomanda judiu runara tupaca, paihua shuti Aquila, Italiamanda mushuj pactamuj, paihua huarmi Priscilandi. Atun rey apu Claudio tucui judiuguna Roma llactamanda llucshinauchu nisha mandaca. Pablo paigunahua llutarica. 3 Pablo paiguna tarabana samira yachaj asha, paigunahua causaca. Pariju tarabanauca, carpa huasira rajcuna anauca. 4 Tucui samana punzhaunai tandarina huasii judiugunahua grieguunahua rimananauca. 5 Silas Timoteo Macedoniamanda shamushcai, Pablo intiru munaihua Diospa shimira camachiuca, judiugunara yachachisha: “Cai Jesús sirtu Cristomi,” nisha. 6 Judiuguna uyanara mana munanauca, Diosta camisha caparinauca. Chiraigumanda Pablo paihua churarinara chausisha nica: “Canguna yahuar canguna uma ahuai tiachu; ñuca ima cauźaras mana charinichu. Cunamanda gentilgunajma risha.” 7 Chimanda llucshisha Justo nishca runa huasima rica, cai Justo Diosta llaquij aca. Paihua huasi judiuguna tandarina huasi rayai aca. 8 Crispo nishca, judiuguna tandarina huasi apu, paihua ailluunandi, Jesuspi quirinauca. Shinallara Corinto llactamanda ashcauna uyasha quirinauca, bautisarinauca. 9 Shinajpi Dios Pablora rimaca nuspaibi: “Ama manzhaichu. Rimailla, ama chunllayaichu. 10 Ñuca canhua tiauni. Pihuas canda mana huajlichingachu. Cai llactai ñucara quiringaraucunara ashcara charini.” 11 Chihui unaiyaca shu huata sucta quilla tupura, Diospa shimira paigunara yachachisha. 12 Galión nishca Acaya partimanda apu ajpi, judiuguna atarisha gun tandarinauca. Pablora apisha, apu ñaupajma pushanauca. 13 Paiguna ninauca: “Cai runa ñucanchi ley shimi mana rimashcasna runaunara yachachiun Diosta alabangaj.” 14 Pablo rimai callarijpi, Galión judiugunara cutipasha nica: “Ima manali rashca ajpi, ima atun cauźa ajpis, cangunara uyaima, Judiuguna, ley shimii rimashcasna. 15 Randi shimiunamanda, shutiunamanda, canguna ley shimimanda asha, canguna yachanguichi; cai sami taripanara mana munanichu.” 16 Paigunara paihua ñaupajmanda cachaca. 17 Shinajpi tucui grieguuna Sóstenesta, judiuguna tandarina huasimanda apura apisha, paita Galiomba ñaupajpi macanauca. Pai randi mana imais satiricachu. 18 Astaumbas Pablo unai punzhaunara tiashca huasha, uquiunamanda dispirisha, Siria partima chimbacami. Paihua pariju Priscilandi Aquilandi rinauca. Cencreas llactai, Diosma shimira cushcara ricuchingaj paihua umara rutuca. 19 Pablo Efeso llactama pactasha, Aquilaras Priscilaras chihui saquica. Paiga judiuguna tandarina huasii icusha, judiugunahua rimananauca. 20 Efeso runauna paita ruganauca unaira paigunahua tiangaj, randi mana munacachu. 21 Pablo paigunamanda dispirisha, nica: “Ursamanda ministirinmi ñuca Jerusalenma pactangaj shamuj istara huacachingaj. Huasha, Dios munajpi tigramushami.” Casna rimasha Efesomanda barcui ricami, 22 Cesareama pactasha, Jerusalenma sicaca quirijcunara salurangaj. Chimanda huasha Antioquíama rica. 23 Chihui unaira tiashca huasha llucshica. Galacia Frigia partiunara purisha, caran llactai tucui quirijcunara cariyachica. 24 Chi hurascunai shu Apolos nishca judiu runa Efesoma pactamuca. Pai Alejandría llactamanda shamuj, ali cuintayuj runa, Diospa shimira rimanara ushaj aca. 25 Cai runa Señorba ñambii yachachishca aca. Shinzhi ispirituyuj asha, Señorba shimiunara rimasha alira yachachica. Shina ajllaira Juan bautisana samillara yachaca. 26 Pai mana ansas manzhasha, judiuguna tandarina huasii rimangaj callarica. Priscila Aquilandi uyasha, paita sapallai cayasha, Diospa ñambira astaun alira yachachinauca. 27 Pai Acaya partima pasasha nijpi uquiuna paita animachinauca ringaj, quirijcunama quillcanauca paita apingaj. Chihui pactasha, quirijcunara ashcara yanapaca, paiguna Diospa ali llaquina iyaimanda quirijcuna asha. 28 Paiga ashca ushaihua runauna ñaupajpi judiuguna pandarishcara ricuchica. Quillcashcaunamanda ricuchisha: “Cai Jesús quiquin Cristomi,” nica.
1 Apolos chara Corintoi tiaushcai, Pablo urcu partii purishca huasha, Efeso llactama shamuca. Chihui huaquin quirijcunara tupaca. 2 Paigunara tapuca: “¿Canguna quirishcai Santu Ispiritura apishcanguichichu?” Paiguna cutipanauca: “Santu Ispíritu tiashcara mana ansallas uyashcanchichu.” 3 Shinajpi Pablo nica: “¿Imaira bautisashcauna anguichi?” Paiguna cutipanauca: “Juan bautisashcai.” 4 Pablo nica: “Juan aripintirijcunara bautisaca, runaunara yachachisha paimanda huasha shamuj Jesuspi quirinauchu; pai Cristomi.” 5 Caita uyasha, Señor Jesuspa shutii bautisarinauca. 6 Pablo paiguna ahuai paihua maquira churajpi, Santu Ispíritu paigunama shamuca. Paiguna shu shimiunara rimanauca, shinallara Diosmanda rimanauca. 7 Tucui cai runauna chunga ishquipura anauca. 8 Pablo judiuguna tandarina huasii icusha, quinsa quilla tupura mana ansas manzhasha, Dios mandana pacha shimira yachachica, runaunahua rimananausha. 9 Astaun huaquinguna shinzhiyasha, mana quirisha, tandarishca runauna ñaupajpi Jesuspa Ñambi nishcara manali rimanauca. Pablo paigunajmanda anzhurisha, quiricunara chicanyachica. Caran punzha shu Tiranno nishca runa escuela huasii yachachica. 10 Shina rasha, ishqui huata tupura catica. Shinajpi tucui Asia partii causajcuna, judiu ashas, griegu ashas, Señor Jesuspa shimira uyanauca. 11 Dios mana rimaihuaj munanaita rashcaunara rarca Pablo maquihua. 12 Shinajpi Pablo aichai pichashca pañuilounara churarinaunaras ungushcaunama apanauca. Shina rasha ungushcauna aliyanauca, paigunamanda irus supaiguna llucshinauca. 13 Huaquin yanga purij judiuguna, supaigunara ichujcuna tianauca.”Señor Jesuspa shutira rimashun,” ninauca supai icushca runaunara alichingaj. Supaigunama: “Pablo rimaushca Jesuspa shutii llucshi,” ninauca. 14 Shu Sceva nishca runa, judiu runa, sacerdoteuna apu, canzhis churiyuj aca. Caiguna casna ranauca. 15 Manali supai cutipasha nica: “Jesusta ricsini, yachanimi pitairi Pablo, randi canguna, ¿pita anguichiri?” 16 Supai icushca runa paiguna ahuai saltasha, paigunara vinsica. Shinajpi paiguna chi huasimanda llatanguna chugrichishcauna miticunauca. 17 Tucui Eíeso llactai causajcuna uyanauca, judiu ashas, griegu ashas. Tucui manzharinauca, shinarasha Señor Jesuspa shutira ahuayachishca aca. 18 Quirijcunamanda ashcauna shamunauca, paiguna ñaupa rashcaunara cuintasha ricuchinauca. 19 Shinallara ashca sagrana yachajcuna paiguna yachaushca quillcaunara apamusha tucuihua ñaupajpi rupachinauca. Quillcauna valishcara yupasha ricujpi pichca chunga huaranga cullqui aca. 20 Shinajpi Diospa shimi mirarisha rica, ushaihua vinsica. 21 Cai tucui pasashca huasha, Pablo paihua almai iyarica Jerusalenma ringaj, Macedonia Acaya partiunara purishca huasha. Pai nica: “Ñuca Jerusalembi tiashca huasha ministirinmi shinallara Roma llactama ringaj.” 22 Pablo paita yanapajcunamanda ishquira, Timoteora Erasto nishcandi, Macedonia partima cachaca. Pai randi Asia partii unaira saquirica. 23 Chi hurascunai Jesuspa Ñambira rimashcamanda, runauna ashcara nusparisha piñarinauca. 24 Shu Demetrio nishca cullquira tarabaj runa ichilla huasiunara raj aca, Diana nishca huarmi diospa alabana huasi cuinta ricurij. Shina tarabajcunama ashcara ganachij aca. 25 Demetrio caigunama, shina tarabajcunamas, nica: “Runauna, canguna ali yachanguichi imasna cai tarabanamanda charij anchi. 26 Ricunguichi shinallara uyanguichi imasna cai Pablo mana Eíeso llactallai rimaun, astaun ñaca tucui Asia partii. Ashca runaunara rimasha anzhuchishcami, casna nisha: ‘Maquihua rashca dioscuna mana sirtu dioscunachu. ’ 27 Manzhai tianmi ñucanchi ganana pishii urmangami, shinallara atun Diana huarmi diospa templo huasi mana ansas llaquishca tucunga; maspas tucui Asiai, intiru mundui llaquishca huarmi diospa sumajta huajlichingaj callaringa.” 28 Caita uyasha ashcara piñarinauca, casna nisha caparinauca: “Efesioscuna Diana atunmi.” 29 Intiru llacta nusparica. Tucui pariju paiguna tandarina huasima gun callpasha rinauca. Macedoniamanda Gayora Aristarcora, Pablora cumpañajcunara, apinauca. 30 Pablo runaunajma icusha nijpi, quirijcuna mana munanauca. 31 Shinallara huaquin Asiamanda apuuna, paihua amiguuna asha, shimira Pabloma cachanauca: “Tandarina huasima, ama icui richu,” nisha. 32 Shujcuna shu samira caparinauca, chishujcuna shujta, Tandarijcuna nusparishca anauca. Mana yachanaucachu paiguna tandarishcara. 33 Runauna chaupi shungumanda shu Alejandro nishca runara judiuguna llucchisha shayachinauca. Shinajpi Alejandro chunllayachingaj maquihua ricuchica, runaunara rimasha nisha. 34 Paita judiu ajta ricsisha, tucui runauna ishqui huras tupura pariju caparinauca: “Efesioscuna Diana atunmi.” 35 Shinajpi quillcaj apu runaunara chunllayachisha rimaca: “Efeso runauna, tucui runauna yachanaun imasna Efeso llacta Diana atun huarmi diospa huasiras, Jupitermanda urmamujtas cuirajmi. 36 Caita mana cutipaihuaj asha, canguna chunllayana ministirinmi, mana imaras dsas rasha. 37 Cai canguna pushamushca runauna camba huarmi diospa huasimanda mana shuhuanaushcachu, paihua shutiras mana caminaushcachu. 38 Demetrio, paihua pariju tarabajcunandi, ima piñanaunaras charisha, taripana tian, taripajcunas tianaun. Parijumanda taripanuichi. 39 Maspas ima taripanaras charijpi, gubirnu tandarinai aíichina usharin. 40 Manzhaimi ñucanchillara cauźayachi tucungaj, cai tandarinama yangamanda tandarishcaraigu” 41 Caita rimashca huasha tandarijcunara dispirisha cachacami.
1 Llacta nusparishca chunllayajpi, Pablo quiricunara cayasha paigunara cariyachica. Ujllarisha Pablo paigunara dispirica; Macedonia partima ringaj llucshica. 2 Cai partiunai purishca huasha, quirijcunara ashca rimashcahua cariyachishca huasha, Grecia partima pactamuca. 3 Chihui quinsa quilla tiashca huasha, Siria partima chimbasha nica. Pai llucshiushcai judiuguna paita huañuchinara munanauca. Chiraigumanda Macedonia partima tigranara iyarica. 4 Cai runauna Pablora cumpañanauca Asiagama: Bereamanda Sopater, Tesalonicamanda Aristarco Segundondi, Derbemanda Gayo Timoteondi, Asiamanda Tíquico Trófimondi. 5 Caiguna ñaupasha, Troas llactai ñucanchira chapanauca. 6 Pascua ista pasashca huasha, Filiposmanda chimbacanchi, Troas llactama. Pichca punzha huasha paigunahua tandaricanchi Troaspi. Chihui saquiricanchi canzhis punzhara. 7 Simana ñaupa punda punzhai, quirijcuna tandara paquingaj tandarinauca. Pablo paigunara camachica, cayandi punzha ringarausha. Pai rimaushcara chaupi tutagama yalichica. 8 Ahua patai paiguna tandariushcai ashca vilara charinauca. 9 Shu Eutico nishca malta vintana pungüi tiauca. Pablo unaira rimajpi, Eutico huañujta puñusha, ahua patamanda allpama urmaca. Huañushcara atarichinauca. 10 Shinajpi Pablo irgumusha, cumurisha, paita ujllarica, casna nisha: “Ama manzharichichu, causaunmi.” 11 Sicamushca huasha, Pablo tandara paquica, micuca; chimanda huasha ashcara rimaca, punzhayanagama. Shina rasha llucshica. 12 Maltara causajta apanauca; chimanda ashcara cushiyanauca. 13 Ñucanchi ñaupasha barcui ricanchi Ason llactama, chihui Pablora tupangaj. Pablo shina rangaj munaca, paiga chaquihua risha nica. 14 Pai Asón llactai ñucanchihua tandarijpi, paita barcui apisha Mitilene islama shamucanchi. 15 Chimanda barcui purisha, shu punzha huasha Quío rayai shamucanchi. Cayandi punzha Samos isla pungiii llutaricanchi. Trogilio llactai llutarisha, cayandi punzha Mileto llactama pactamucanchi. 16 Pablo Efeso llactara mana icusha, pasasha nica, Asia partii ama unaiyangaj. Pai uctalla risha nica, usharijpi Pentecostés punzhai Jerusalemhi tiangaj. 17 Miletomanda Pablo Efesoma cachaca quirijcunamanda cuiraj rucuuna shamungaj. 18 Paihuajma shamujpi, Pablo paigunara rimaca: “Canguna yachanguichi imasna ñuca Asia partima shamushca punzhamanda pacha, alira causashcani cangunahua. 19 Diosta sirvicani mansu shunguhua, ashca huacashcahua, ashca camashcaunahua, judiuguna ñucara huañuchishun nishcamanda. 20 Mana imaras pishiyashcani cangunama ali valij shimiras rimangaj, pajllais huasiunais. 21 Judiugunama gentilgunamas Diospa ñaupajpi aripintirinara, Señor Jesucristoi quirinaras sirtura rimashcani. 22 Cuna, Jerusalenma riuni, ñuca ispiritui huatashca cuinta ima tucunahuas chihui ñucahua mana yachasha. 23 Astaun tucui llactaunai Santu Ispíritu riman, ishcarinauna turmindarinaunas ñucara chapahuanaun, nisha. 24 Mana imaras caźunichu; ñuca causairas mana llaquinichu, usharijpi ñuca causaira cushihua tucuchisha, shinallara Scñor Jesús ñucara cushca sirvinara, Diosta llaquishcamanda evangelio shimira rimasha. 25 Cunaga, ñuca yachani imasna cangunahua Dios mandana pacha shimira rimasha pasashcani, cangunamanda mana pihuas ñuca ñahuira cuti ricuhuangachu. 26 Chiraigumanda cangunara nini: Cuna punzha mana pimandas cauźayujchu ani. 27 Tucui Dios camachishca shimira mana pishiyasha cangunara rimashcani. 28 Shinajpi cangunapura ricuichi, shinallara tucui quirijpuras, imasna Santu Ispíritu cangunara churashcami cuiraj rucuuna tucungaj, Señorba quiquin yahuarhua randishca iglesiara carangaj. 29 Yachani, ñuca rishca huasha, canguna chaupi shungüi milli puma cuinta huajlichij runauna shamunaunga; quirijcunara mana saquinaungachu. 30 Cangunamandallara irusta rimaj runauna atarinaungami, quirijcunara: “Catihuai,” nisha, aisangaj. 31 Chiraigumanda chapaichi, iyarisha imasna ñuca quinsa huatara tutandi punzhandi caran duiñura camachinara mana saquicanichu, huacashcahua camachisha. 32 Cunaga, uquiuna, cangunara Diospa maquii, paihua ali llaquina iyai shimiis saquiuni. Pai ushajmi cangunara shayachingaj, tucui sumajyachishcaunahua paihua herencia nishca cuyanara cungaj. 33 Cullquiras curiras churarinaras mana pihuajtas munasha ricushcanichu. 34 Astaumbas canguna yachanguichi ñuca ñucahua pariju ajcunandi ñucanchi ministishca tupura cai quiquin maquiunahua tarabashcara. 35 Tucuibi cangunara yachachishcani casna tarabasha ministiujcunara yanapangaj, shinallara Señor Jesús rimashcara iyaringaj, imasna nica: ‘Apinamanda yali, cuyana mas valin cushi tucungaj. ’ “ 36 Caita rimashca huasha, Pablo cungurisha Diosta mañaca tucui paigunandi. 37 Shinajpi paiguna ashcara huacanauca, Pablora cunga tullui ujllarisha muchanauca. 38 Pai rimashcamanda ashcara llaquirinauca, pai: “Ñuca ñahuira mana cutihuaj ricuhuanguichu,” nishcamanda. Shinajpi barcuma paita cumpañanauca.
1 Paigunajmanda anzhurishca huasha, barcui pitijta ricanchi Cos islama. Cayandi punzha Rodas islama pactamucanchi. Chimanda Pátara llactama ricanchi. 2 Shu Fenicia llactama riu barcura tupasha, icusha ricanchi. 3 Chipre isla ricurishcara, lluqui maqui partima saquisha, Siria partima huamburicanchi, Tiro llactama pactacanchi. Barcumanda cargara chihui llucchina aca. 4 Quirijcunara tupasha, chihui canzhis punzhara saquiricanchi. Paiguna Ispiritumanda yachachishca asha, Pablora rimanauca: “Jerusalenma ama richu,” nisha. 5 Chi punzhauna pactarishca huasha llucshicanchi. Tucui quirijcuna cumpañahuanauca, huarmiunandi, churiunandi, llactamanda pajllagama. Yacu patai cungurisha Diosta mañacanchi. 6 Parijumanda ujllarishca huasha, barcui icucanchi. Paigunaga huasiunama tigranauca. 7 Tiromanda barcui purisha, Tolemaida llactama pactamucanchi. Uquiunara salurasha paigunahua shu punzhara saquiricanchi. 8 Cayandi punzha, Pablo, paita cumpañajcunandi, ricanchi, Cesareama shamucanchi. Evangelio shimira rimaj Felipe huasii icucanchi. Pai ñaupa huras canzhis ajllashcaunamanda shuj aca. Paihua huasii tiacanchi. 9 Felipe chuscu huanra ushushiunara charica. Paiguna Diosmanda rimajcuna aca. 10 Ñucanchi chihui unai punzhaunara tiaushcai, shu Agabo nishca Diosmanda rimaj shamuca. 11 Agabo ñucanchima shamusha, Pablo chumbillina carara apisha, chaquindi maquindi paillara huatarica. Casna rimaca: “Santu Ispíritu casna nin: “Cai chumbillinayujta judiuguna casnami huatanaunga Jerusalembi. Paita gentilguna maquii cunaungami.” 12 Caita uyasha ñucanchindi chi llactai tiajcunandi Pablora rugacanchi ama ringaj Jerusalenma. 13 Shinajpi Pablo cutipaca: “¿Imara ranguichi huacasha, ñuca shungura llaquichisha? Ñuca huatai tucungaj puruntu ani, shinallara Jerusalembi huañungaj, Señor Jesuspa shutira llaquishcamanda.” 14 Pai uyanara mana munajpi, rimanara saquicanchi: “Señor munashca tunura rashca achu,” nisha. 15 Cai punzhauna huasha, puruntusha, Jerusalenma sicacanchi. 16 Huaquin Cesareamanda quirijcuna ñucanchihua shamunauca. Shu Mnasón nishca runara paigunahua pariju pushamunauca. Pai Chipremanda shamuj aca, shu rucu quirij runa. Paihua huasii tiana acanchi. 17 Jerusalenma pactai rijpi, uquiuna cushihua ñucanchira apinauca. 18 Cayandi punzha Pablo icuca ñucanchihua pariju, Jacobora ricungaj. Tucui ricuj rucuuna tandarishca anauca. 19 Paigunara saiurashca huasha, Pablo tucui Dios gentilgunahua rashcaunara pai sirvishcamanda shuj shujlla rimasha cuintaca. 20 Paiguna uyasha Diosta alabanauca: “Riqui, uqui, imasnara ashca huaranga judiuguna quirinaushca. Tucui paiguna ley mandashcara munaihua huacachinaun. 21 Astaun canmanda casna rimashcara uyanaushca. ‘Canmi gentilgunahua tiaj judiugunara yachachiungui,’ ninaun, ‘Moisés mandashcaunara saquingaj, churiunara ama circuncisionda rangaj, yachaira ama catingaj. ’ 22 Shinajpi, ¿imara rana angai? Sirtu pacha runauna tandarimunaunga can, ‘Shamushcami,’ nishcara uyasha. 23 Shinajpi casna rai, ñucanchi rimashcasna: Ñucanchipurai chuscu runa tianaun, Diosma shimira cushcauna. 24 Caigunara canhua pariju apisha, Moisés rimashcasna armaichi. Paiguna ministishcara pagai can, paiguna ruturingaj. Can casna rasha, tucui intindinaunga paiguna canmanda uyashca mana sirtuchu. Shinallara yachanaunga cambas ley shimira pactachishcara. 25 Randi, gentilgunamanda quirijcunama ña quillcashcanchi cai samiunara ama uyanauchu, astaun runa rashca dioscunama sacrificioi ricuchishca aichara ama micunauchu, yahuardas, yahuaryuj aicharas ama micunauchu, shinallara shujcunahua ama tacarinauchu.” 26 Shinajpi Pablo chi runaunara apica. Cayandi punzha paigunandi armasha, Diospa templo huasii icuca, paiguna armashca punzhauna pactarinara rimangaj, caran duiñu cuyashcara alichingaj. 27 Chi canzhis punzha ña pactaringaraushcai, huaquin Asiamanda judiuguna Pablora temploi ricusha, tucui runaunara nuspachinauca, Pablora apinauca. 28 Caparisha ninauca: “Israel runauna, yanapaichi. Cai runa tucui partii, judiugunaras, ley shimiras, cai huasiras cuntra riman tucui runaunama. Maspas gentilgunara temploi icuchisha cai santu huasira huajlichica.” 29 Ñaupa huras Efesomanda Trofimora Pablohua pariju puriuta ricunauca. Pablo paita temploi icuchishcami nisha iyanauca. 30 Shinajpi intiru llacta nusparica, tucui runauna gun shamunauca. Pablora apisha templomanda pajllama aisasha llucchinauca. Templo punguunara uctalla tapanauca. 31 Paiguna Pablora huañuchingaj mascanauca. Chi ratullaira runauna atun capitanma rimanauca: “Intiru Jerusalen llacta nusparishcami,” nisha. 32 Atun capitán shu capitangunara suldaruunandi pushasha, paigunajma callpanauca. Runauna atun capitanda suldaruunaras ricusha, Pablora macanara saquinauca. 33 Shinajpi atun capitán pactai risha, Pablora apisha, paita ishqui cadenahua huatangaj mandaca. Shina rasha tapuca: “¿Pitairi? ¿Imara rarca?” 34 Chihui tandarijcunamanda, shujcuna shu tunura, chishujcuna shu tunura rimanauca. Capitán ima sirtura intindinara mana ushacachu paiguna caparishcaraigu. Pablora cuartelma apangaj mandaca. 35 Rumi chacanama pactaushcai suldaruuna Pablora huandusha apanauca, runauna nuspachishcaraigumanda, 36 Paiguna huashai ashca runauna caparimunauca: “Huañuchu,” nisha. 37 Pablora cuartel ucuma icuchingaj callarijpi, pai atun capitanda nica: “¿Imaras canda rimanara ushanichu?” Capitán nica: “¿Griegu shimira yachanguichu? 38 Can, ¿manzhu chi Egipto runa angui, ñaupa huras gubirnura piñasha, chuscu huaranga huañuchijcunara runa illashca partima pushacangui?” 39 Shinajpi Pablo nica: “Ñuca sirtu pacha judiu runami ani, Tarso llactamanda. Tarso Cilicia partii atun llactami. Canda rugauni lugarda cuhuai runaunama rimangaj.” 40 Atun capitán lugarda cujpi, Pablo rumi chacanai shayarisha, runaunara maquihua ricuchica. Tucui chunllayajpi, Pablo hebreo shimii rimaca.
1 Pablo nica: “Runauna, uquiuna, yayaunandi, ñucajmanda cangunama rimangaraushcara cuna uyaichi.” 2 Pablo hebreo shimii rimashcara uyasha, runauna maspas chunllayanauca. Pablo nica: 3 ”Ñuca sirtu pacha judiu runami ani. Cilicia partii Tarso llactai pagaricani. Randi cai llactai iñacani, Gamalielba ñaupajpi yachasha. Ñucanchi yayauna ley shimii yachachishca acani, Diosta llaquij imasna anguichi tucui canguna cuna punzhai. 4 Jesuspa Ñambii causajcunara huañuchingagama caticachacani; cariunandi, huarmiunandi chunda cularbi ishcachij acani. 5 Sacerdote atun apu, shinallara tucui rucuunas, caita ali yachanaun. Paigunamanda quillcaunara uquiunama apasha, Damasco llactama ricani, chi llactamanda ajcunara Jerusalenma cauźayachisha pushamungaj, paigunara livachingaj. 6 ”Ñuca Damascoma riushcai, pactana mayambi, chaupi punzha tupui, cungaimanda ahua pachamanda ashca punzhajlla ricurica ñuca muyujta. 7 Allpama urmacani, shu shimira rimajta uyacani: ‘Saulo, Saulo, ¿imamanda turmindachihuangui?” 8 Shinajpi cutipacani: ‘¿Pitanguiri, Señor?’ Pai ñucara nica: ‘Ñuca Nazaretmanda Jesúsmi ani, can turmindachiushca. ’ 9 Ñucahua tiajcuna punzhajlla ricurishcara sirtu pacha ricunauca, caita ricusha manzharinauca. Randi ñucahua rimaujpa shimira mana intindinaucachu. 10 Ñuca nicani: ‘¿Imara rashai Señor?’ Pai cutipasha nica: ‘Atari, Damascoma ri. Chihui tucui canda rangaj mandashcara rimashca anga. ’ 11 Ñuca ricunara mana ushacanichu, cai sumaj punzhayashcara ricushcamanda. Ñucahua tiajcuna Damascoma, maquimanda apisha pushahuanauca. 12 Shinajpi shu runa, Ananías, ley shimira pactachij, tucui chihui tiaj judiugunamanda ali rimashca, 13 ñucama shamusha, llutarisha rimahuaca: ‘Saulo, uqui, ricuj tucui. ’ Chi ratullaira ñuca ñahuiuna pascarinauca, paita ricucani. 14 Ananías nica: ‘Ñucanchi yayauna Dios canda ajllashcami pai munashca tunura ricsingaj, ali dirichu aj Diosta ricungaj pai rimashca shimiras uyangaj. 15 Can sirtu ricushcara paimanda rimaj tucuna angui, tucui runaunama can ricushcaras uyashcaras cuintangaj. 16 Shinajpi cuna, ¿Imarasha chapaungui? Atari, bautisari, camba uchara maillai, Jesuspa shutii rimasha. ’ 17 ”Ñuca Jerusalenma tigrashcai, temploi Diosta mañaushcai, nuspashca cuinta munanaita ricucani. 18 Ñucara rimajta ricucani: ‘Uctalla ri,’ nica, ‘Jerusalenmanda llucshi; can ñucamanda rimashcara mana uyanaungachu. ’ 19 Ñuca nicani: ‘Señor, paiguna yachanaun ñuca chunda cularbi ishcachij ashcara. Tucui judiuguna tandarina huasiunai canda quirijcunara azutij acani; 20 camba sirtu rimaj Estébanba yahuar talirishca huras, ñucas chihui acani; pai huañunara munacani; paita huañuchijcuna churarinara huacachij acani. 21 Shina ajllaira Señor rimahuaca: “Ri, canda caruma cachasha gentilgunama.” 22 Cai shimigama Pablora uyanauca. Shinajpi caparisha ninauca: “Cai pachamanda casna runara anzhuchi. Pai causangaj mana valinzhu.” 23 Paiguna caparisha, churarinaunara ichusha, allpa pulvura ahuama shitanauca. 24 Atun capitán Pablora cuartel ucui icuchingaj mandaca. Paita livachisha tapungaj mandaca, yachangaj imamanda runauna paimanda casna caparinauca. 25 Pablora cara huascahua huatanauca. Paiga chihui tiaj capitanda nica: “¿Usharinzhu shu romano runara livachingaj manara cauźayachijllaira?” 26 Chi capitán Pablo rimashcara uyasha, rimai rica atun capitanma, casna nisha: “¿Imara rangaraungui? Cai runa romano runami.” 27 Atun capitán Pabloma shamusha, paita tapuca: “Rimahuai, ¿sirtuchu can romano runa angui?” Pablo, “Ari,” nica. 28 Atun capitán nica: “Ñuca romano runa tucungaj ashca cullquira pagacani” Shinajpi Pablo nica: “Ñuca, randi, pagarishcamanda pacha romano runami ani.” 29 Shinajpi, chi ratullaira, paita turmindachijcuna anzhurinauca. Atun capitambas manzhacami Pablo romano runa ajta uyasha, paita huatashcamanda. 30 Cayandi punzha, sirtura yachanara munaca imamanda judiuguna Pablora cauźayachinauca. Sacerdote apuunara cayachi cachaca tucui paiguna gubimui mandaj runaunandi. Pablora llucchisha paiguna ñaupajpi ricuchica.
1 Shinajpi Pablo gubirnui mandaj runaunara ricusha, casna nica: “Runauna, uquiuna, ñuca ali iyaihua Diospa ñaupajpi causashcani cuna punzhagama.” 2 Sacerdote atun apu, Ananías, paihua rayai tiajcunara mandaca Pablora shimii sajmangaj. 3 Shinajpi Pablo nica: “Dios canda sajmanga, ishqui shimiyujta. ¿Ley shimimanda ñucara taripangaj caibi tiaungui, randi ley shimira paquisha sajmachihuangui?” 4 Chihui tiajcuna ninauca: “¿ Shina rimasha sacerdote atun apura camingui?” 5 Pablo nica: “Uquiuna, pai sacerdote atun apu ajta mana yachacanichu. Quillcashca tianmi: ‘Runauna atun apura ama caminguichu. ’ “ 6 Shinajpi Pablo riparasha ricuca shu parti runauna saduceoguna anauca, shu parti fariseoguna anauca. Paiguna ñaupajpi caparica: “Runauna, uquiuna, ñuca fariseomi ani, fariseomanda churi ani. Ñucanchi chapaushcara, huañushcaunamanda causarinaras taripai tucuni.” 7 Pablo caita rimajpi, fariseoguna saduceogunahua piñarinauca. Tandarijcuna chaupirinauca. 8 Saduceoguna huañushcamanda causarinas, angelgunas, supaigunas, imas illan, ninaun. Randi fariseoguna cai tucui tianmi ninaun. 9 Ashcara caparinauca. Fariseoguna partimanda yachaira yachachijcuna atarisha rimanauca.”Cai Pablo ima manali rashcaras mana tupanchichu. Ima ispíritu, ima angel paihua rimashca ajpi, Diosta ama arcashunchi.” 10 Paigunapura ashcara piñarinauca, Atun capitán, “Pablora tsuntsura huactanaungami,” nisha suldaruunara cayachi cachaca Pablora paiguna chaupimanda dsas llucchingaj, cuartelma pushangaj. 11 Cayandi tuta Señor Jesús Pabloma ricurica: “Pablo,” nica, “cariyai, ama manzhaichu. Imasnara Jerusalembi ñuca shutira rimashcangui, shinallara Roma llactais ñuca shutira rimana angui.” 12 Punzhayashcai huaquin judiuguna Pablora huañuchingaj iyarinauca.”Ama micushun, ama upishun Pablora huañuchingagama” Diospa shutii rimasha ninauca. 13 Chuscu chunga yali casna rimajcuna anauca, 14 Chiguna sacerdote apuunama rucuunamas rinauca: “Ñucanchi Diospa shutii rimashcanchi ama micungaj Pablora huañuchinagama,” ninauca. 15 ”Cuna canguna gubirnui mandaj runaunandi atun capitanda rimanguichi, Pablora caya apamunauchu, canguna paimanda imaras yachanara munanchi, nisha. Ñucanchi pai manara pactamujllaira huañuchingaj chapariashun.” 16 Shinajpi shu Pablo panimanda huahua paiguna casna rimashcara uyasha, cuartelbi icuca Pablora cuintangaj. 17 Pablo shu capitanda cayasha rimaca: “Cai maltara atun capitanma pushai. Shu shimira paita rimanara charin.” 18 Shinajpi paita atun capitanma pushasha, nica: “Chunda cularbi ishcariai Pablo ñucara cayasha rugahuaca, ‘Cai maltara canma pushai,’ nisha. Shu shimira canda rimanara charin.” 19 Atun capitán maltara maquimanda apisha, shujma anzhurisha, tapuca: “¿Imara rimasha ningui?” 20 Chi malta nica: “Judiuguna iyarinaushca canda rugangaj Pablora caya gubimu huasima cachangaj, paimanda imaras mas sirtura yachangarau cuinta, 21 Astaumbas, can ama quiringuichu paigunara. Paigunamanda chuscu chunga yali pacalla chapanaun, Diospa shutii rimasha: ‘Ama micushun ama upishun,’ nisha, ‘Pablora huañuchinagama. ’ Cuna can rimasha nishcara puruntu chaparianaun uyangaj.” 22 Shinajpi atun capitán maltara dispirisha paita nica: “Can ñucara cuintashcara ama pimas rimanguichu.” 23 Atun capitán ishqui capitangunara cayasha, nica: “Las nueve tupura tuta, ishqui patsaj suldaruunaras, canzhis chunga caballoi purijcunaras, ishqui patsaj lanzayujcunaras, puruntushcara charinguichi, Cesareama ringaj.” 24 Shinallara caballuunara alichingaj mandaca, Pablo muntangaj, Félix nishca atun gubirnadurhuajma ali pactangaj. 25 Casna nisha shu quillcara quillcacami: 26 ”Ñuca, Claudio Lysias, canda, Félix, atun gubirnadurda, salurauni. 27 Cai runara, judiuguna apishcara, paiguna huañuchingaraushcara ñuca uyasha, suldaruunandi quishpichingaj ricani, pai romano runa ashcara yachasha. 28 Imamandara paita cauźayachinaun nisha yachangaj, paita paiguna gubimu huasima pushacani. 29 Chihui yachacani paiguna ley camachishca shimiunamanda paita cauźayachinauca. Ishcangaj, huañuchingaj, mana ima cauźaras charicachu. 30 Judiuguna cai runara huañuchingaraushcara rimahuanauca. Shinajpi uctalla paita cambajma cachamucani. Cauźayachijcunas camba ñaupajpi rimanauchu nicani, paimanda ima cauźaras charisha. Alilla tiangui.” 31 Suldaruuna capitán mandashcasna Pablora tuta pushanauca Antipatris llactagama, 32 Cayandi punzha caballuyuj suldaruuna saquirinauca Pablohua ringaj. Chishujcuna tigranauca paiguna cuartelma. 33 Cesareama pactashcai quillcara cunauca atun gubirnadurma, shinallara Pablora paihua ñaupjpi ricuchinauca. 34 Atun gubirnadur quillcara ricusha, tapuca: “¿Ima partimandarairi?” Cilicia partimanda ajta yachasha, 35 ”Uyashcanguimi,” nica, “canda cauźayachijcuna shamushcai.” Pablora Herodespa huasima huacachingaj cachaca.
1 Pichca punzha huasha, sacerdote atun apu Ananías, huaquin rucuunandi, shu Tértulo ali cuintayuj runandi, Pablora cauźayachingaj, atun gubirnadurba ñaupajma shamunauca. 2 Pablora cayashca huasha, Tértulo paita cauźayachingaj callarica: “Ali Felix,” nisha, “canmanda imasnara ali ganashua causaunchi, tucui ali tucun cai llactai can alira rashcamanda, 3 ima huraspas, maibis, cai tucuira agrasisha chasquinchi. 4 Shinajpi canda mana yapa mulistangaj, camba ali shunguhua shu ratulla uyahuapai. 5 Cai runa yapa turmindachin, tucui judiugunara macanauchin cai pacha tucui partiunai. Astaumbas pai Nazaretcuna muntunmanda apumi. 6 Shinallara templo huasira huajlichinara munaca. Paita apisha, ñucanchi ley mandashca tunui taripanara munacanchi. 7 Randi cai Lisias nishca atun capitán satirisha, ashca ursahua Pablora ñucanchi maquimanda dsas quichuca. 8 Paita cauźayachijcuna canma shamunauchu, nisha mandaca. Canllara paita taripasha tucui ñucanchi cauźayachishcaunara yachanara ushangui.” 9 Shinallara judiuguna: “Cai tucui sirtumi,” nisha rimanauca. 10 Shinajpi gubirnadur Pablora maquihua ricuchica rimangaj. Pablo cutipaca: “Can cai llactai ashca huataunara taripaj ajpi, ali munaihua ñucamanda rimasha. 11 Can yachanara ushangui chara chunga ishqui punzhallami Jerusalenma shamucani adurangaj. 12 Ñucara mana tupahuanaucachu pihuas rimananauta, pi tandarishca runaunaras nuspachiuta, templo huasii, tandarina huasiunais, llactais. 13 Shinallara paiguna ñucara cuna cauźayachishcaunara mana ushanaunzhu ricuchinara. 14 Caita canda sirtu rimani: Paiguna ‘Llulla Shimi’ nishca Ñambira catisha, ñuca yayauna Diosta sirvini. Tucui ley shimii, tucui Diosmanda rimajcuna camachishcaunai quillcashcara quirisha causashcani. 15 Diospi chapasha tiauni, paiguna chapashcasna, imasna huañushcauna causarinaungami, aliunas manaliunas. 16 Chimanda tucui huras mascauni ali chuya iyaira charingaj, Diospa ñaupajpis runauna ñaupajpis. 17 ”Huaquin huatauna huasha, ñuca llactama cullquira cuyangaj shamucani. 18 Ñuca casna raushcai, huaquin Asiamanda judiuguna ñucara temploi armashcara tupahuanauca, mana ashca runaunahua, mana caparishcahua. 19 Chiguna camba ñaupajma shamunaunmaca ñucara cauźayachingaj, imaras ñucamanda rimanara charisha. 20 Manajpi caigunallara rimanauchu ima manalirara ñucajpi tupahuanauca ñuca gubirnu ñaupajpi ricurishcai. 21 Manasha paiguna ñaupajpi shinzhira caparisha,” nicani: “Huañushcauna causarinamanda cuna canguna ñaupajpi taripai tucuni.” 22 Shinajpi Félix, cai tucuira uyashca huasha, cai Ñambi nishcara alira yachasha, paigunara chapachica: “Lisias nishca atun capitán shamushcai, canguna rimashcara uyasha,” nica. 23 Gubirnadur capitanda rimaca Pablora huacachingaj, shina ajllaira paita ansa lugarda cungaj.”Maicans paihua amiguunamanda shamujpi paita sirvingaj, paita cumpañangaj, ama arcanguichu,” nica. 24 Ansa punzhauna huasha, Félix paihua huarmi Drusilandi shamuca. Chi huarmi judiu huarmi aca. Pablora cayasha, paimanda Jesucristoi quirina shimiunara uyanauca. 25 Pablo ali causanaras, aicha munaira arcarinaras, huasha taripanaras rimaca. Félix manzharisha, nica: “Cuna ri. Huasha lugarda charishcai cayashcangui.” 26 Shina rasha chapacami, “Pablo cullquira cungami” iyasha, paita cacharingaj. Caran cuti paita cayachi cachaj aca paihua rimangaj. 27 Astaun, ishqui huata huasha, Félix randimanda Porcio Festo gubirnadur tucuca. Félix judiuguna llaquihuanauchu nisha, Pablora ishcariaita saquicami.
1 Festo cai partima pactamusha, quinsa punzha huasha Cesareamanda Jerusalenma rica. 2 Paima sacerdote apuuna valij judiugunandi shamunauca, Pablora cauźayachingaj ruganauca. 3 Paiguna mañasha ruganauca: “Pablora Jerusalenma cachamupai,” nisha, Pablora ñambii huañuchingaj. 4 Astaun Festo cutipaca: “Pablo ishcashca tiaun Cesarea llactai. Chimallara ña ringarauni,” nica. 5 ”Cangunamanda ushajcuna acuichi ñucahua pariju, paihuajpi ima cauźa tiajpi cauźayachichi.” 6 Paigunahua pariju Festo Jerusalembi chapauca ansa punzhaunara, pusajchu chungachu, ima chari. Chimanda huasha Cesareama shamusha, cayandi punzha gubirnu huasii tiarica. Pablora pushangaj cachaca. 7 Pablo shamujpi, Jerusalenmanda shamuj judiuguna paihua muyujta tandarinauca. Pablora ashcara cauźayachinauca; randi paiguna cauźayachishca sirtu ajta ricuchinara mana ushanaucachu. 8 Astaumbas Pablo rimaca: “Judiuguna ley shimimandas, templomandas, Cesarba ñaupajpis mana ima ucharas rashcanichu.” 9 Astaun Festo, judiuguna llaquihuanauchu nisha iyasha, Pablora nica: “¿Jerusalenma rinara munanguichu chihui ñuca ñaupajpi taripai tucungaj?” 10 Pablo cutipaca: “César taripana huasii tiauni, caibi taripai tucuna mani. Judiugunara mana ima manaliras rashcanichu, imasna can alira yachangui. 11 Ñuca ima manaliras, ima huañuna tupuras rashca asha, puruntumi ani huañungaj. Astaun paiguna ñucara cauźayachishcauna mana sirtu ajpi, pis mana ushanzhu ñucara paiguna maquii intrigangaj. César taripahuachu, nini.” 12 Festo gubirnui mandajcunahua rimanausha cutipaca: “¿Cesarbajma rinara munangui? Cesarbajma ringui.” 13 Ansa punzha pasashca huasha, rey apu Agripa paihua huarmi Bernicehua Cesareama shamunauca Festora salurangaj. 14 Paiguna ashca punzhaunara chihui tiaushcai, Festo rey apura Pablora cauźayachishcara cuintaca: “Félix shu runara ishcashcara saquica. 15 Ñuca Jerusalenma rishcai, sacerdote apuuna judiuguna apuunandi ñucama shamunauca, ñucara mañasha paita cauźayachingaj. 16 Paigunara cutipacani: Romanouna yachaibi pitas huañuchingaj mana cunachu manara cauźayachishca runa paita cauźayachijcunara rimashcaira paihua cauźamanda llushpiringaj. 17 Shinajpi paiguna shamunaupi, mana unaiyasha, cayandi punzha taripana huasii tiarisha, chi runara apamungaj cachacani. 18 Paiguna ñaupajpi mana ansas ñuca iyashcasna cauźayachinaucachu. 19 Astaun, paiguna quirishcamanda paita cauźayachinauca, shinallara shu huañushca Jesús nishcamanda, astaun Pablo paimanda, ‘Sirtu pacha causaunmi,’ nica. 20 Ñuca cai samiunara mana yachasha, paita nicani: “¿Jerusalenma rinara munanguichu chima taripai tucungaj?” 21 Astaun Pablo Augusto César uyachu, nisha mañaca; paita huacachingaj mandacani Cesarma cachanagama. 22 Shinajpi Agripa Festoma nica: “Ñucas chi runara uyanara munani.” Festo cutipaca: “Caya punzha paita uyangui.” 23 Cayandi punzha Agripa Bernicehua shamunauca, sumaj churarishcauna. Taripana huasii icusha capitangunahua, llactamanda valij runaunahua, Festo mandashca ajpi Pablora pushamunauca. 24 Shinajpi Festo nica: “Rey apu Agripa, tucui ñucanchihua pariju tiaj runaunas, cai runara caibi charinguichi. Tucui judiuguna Jerusalembis cai llactais cai runamanda rugahuanauca, ama mas causachu nisha caparisha. 25 Ñuca mana ima huañunaras tupacanichu paihuajpi. Paillara Augustoma rinara munajpi, paita cachangaj iyaricani. 26 Ñuca mana imaras sirtura charisha ñuca señorma quillcangaj, paita canguna ñaupajpi llucchicani, maspas camba ñaupajpi, Rey Apu Agripa, paita tapushca huasha ñuca imaras charisha quillcangaj. 27 Mana valinzhu, yachin, shu cauźayuj runara cachangaj, paihua cauźara mana rimasha.”
1 Shinajpi Agripa Pabloma rimaca: “Cambajmandallara rimanara ushangui.” Shinajpi Pablo maquira chutachisha, shina rimangaj callarica: 2 ”Cushimi ani, Rey Apu Agripa, cuna punzha camba ñaupajpi ñucajmanda rimangaj, tucui imamandas judiuguna ñucara cauźayachishcara. 3 Can tucui judiuguna yachaira ali yachangui, shinallara paiguna iyarishca tunuras. Chiraigumanda canda rugauni alimanda uyahuapai. 4 ”Ñuca maltamanda pacha ñaupa pundamanda ñuca Jerusalembi causacani. Tucui judiuguna ñuca causashcara yachanaun. 5 Paiguna shinallara yachanaun, rimasha nijpi, imasnara ñaupa pundamanda pacha ñucanchi yachaira mas yali pactachisiqui muntumbi acani, fariseo acani. 6 Cunaga Dios ñucanchi yayaunama cushca shimira chapaushcaraigumanda cauźayachi tucuni. 7 Ñucanchi chunga ishqui aillu cai shimi pactarishcara ricungaj chapanaun, tutandi punzhandi Diosta sirvisha. Cai chapanaraigumanda, Rey Apu Agripa, judiuguna ñucara cauźayachinaun, 8 ¿Imarasha cangunapura mana quirihuajta iyaringuichi Dios huañushcaunara causachingami? 9 Ñuca sirtu pacha iyaricani imara rashas Nazaretmanda Jesuspa shutira huajlichingaj. 10 Jerusalembi shinallara rarcani, chunda cularbi ashca quirijcunara ishcachicani, sacerdote apuuna cushca ushaihua; ima huras huañuch¿naupi, ‘Alimi,’ nij acani. 11 Ashca cuti paigunara livachicani tucui judiuguna tandarina huasiunai. Paigunara Diospa shutira camichicani. Ashca milliyashcahua paigunara caru llactaunagama caticani. 12 ”Shina rasha Damascoma riucani; sacerdote apuuna cachahuanauca paiguna mandashcahua. 13 Chaupi punzha, ñambii riushcai, Rey Apu, indimanda yali punzhara ahua pachamanda ricucani. Ñucandi ñucahua pariju tiajcunandi muyujta ricurica. 14 Tucui ñucanchi allpama urmacanchi. Shu shimira ñucara rimajta uyacani hebreo shimii: ‘Saulo, Saulo,’ nisha, ‘¿imamanda turmindachihuangui? Can tucsina pundai nijtasha canllara chugringui. ’ 15 Shinajpi ñuca nicani: ‘¿Pitanguiri, Señor?’ Señor Jesús cutipahuaca: ‘Ñuca can turmindachiushca Jesusmi ani. 16 Atari, shayari. Chiraigumanda canma ricurimushcani. Canda churashcani ñucara sirvij, ñucamanda rimaj tucungaj, can ricushcaunara rimangaj, shinallara ñuca canda huasha ricuchingaraushcaras cuintangaj. 17 Canda camba ailluunamandas gentilgunamandas quishpichisha, cuna canda paigunama cachauni, 18 paiguna ñahuira pascangaj, llandumanda punzhama turcaringaj, supai apu ushaimanda llushpirisha Diospi quiringaj, paiguna ñucara quirisha uchamanda perdonda apingaj, sumajyachishcaunahua Dios cushcara apingaj. ’ 19 ”Chiraigumanda, Rey Apu Agripa, ahua pachamanda ricuchishcara uyacani. 20 Shinajpi ñaupa punda Damascoi, Jerusalembi, tucui Judea llactaunai, shinallara gentilgunamas rimacani aripintirinauchu, Diospi quirinauchu, ali rashcaunahua paiguna aripintirishcara ricuchisha. 21 Caimanda judiuguna ñucara apihuanauca temploi, huañuchingaj iyarinauca. 22 Dios yanapashcamanda cuna punzhagama rimasha catiuni, ichillaunamas atungunamas. Imara Moisés Diosmanda rimajcunas rimashca tucungaraushcara chillarara yachachishcani: 23 imasna Cristo turmindaringarauca, huañushcaunamanda ñaupa punda causarij tucungaj, causana shimira runaunamas gentilgunamas rimangaj.” 24 Pablo paimanda rimajpi Festo shinzhira caparica: “Lucu tucushcangui, Pablo, Can ashca yachashcamanda lucu tucushcangui.” 25 Pablo nica: “Yapa ali Festo, mana lucuchu ani. Astaumbas sirtu shimiunara ali shimiunaras rimauni. 26 Rey apu caigunara ali yachan, chiraigumanda paihua ñaupajpi mana manzhasha rimauni. Ñuca iyani pai tucuira ali pacha yachan, mana pacallai rashcachu aca. 27 Rey Apu Agripa, ¿Diospa shimira rimajcunara quiringuichu? Yachani can quiringuimi.” 28 Shinajpi Agripa Pabloma rimaca: “Ñacalla iyachihuangui ñucara shu cristianu tucungaj.” 29 Pablo cutipaca: “Dios munanma mana ñacalla astaun intiru iyaihua can ñucasna tucungaj, mana canlla astaun tucui ñucara uyajcuna, randi mana ñucasna cadenayuj.” 30 Pablo cai tucuira rimashca huasha, rey apu, gubirnadur, Bernice, paigunahua pariju tiajcunandi, atarinauca. 31 Paiguna shujma risha, paigunapura rimananauca: “Cai runa mana ima huañunaras, mana ima ishcarinaras charinzhu.” 32 Agripa Festoma nica: “Cai runa ushanmaca cachari tucungaj mana: ‘César taripahuachu,’ nishca ajpi.”
1 Ñucanchi Italia llactama shu barcui ringaj nishcai, Pablora shu cauźayujcunandi shu Julio nishca capitanma cunauca. Pai Augusta nishca suldaru muntun capitanmi aca. 2 Shina rasha, shu Adrumeto llactama rij barcui icucanchi; Asia parti yacu punguunai llutarina aca. Aristarco, shu Tesalónicamanda Macedonia runa, ñucanchihua cumpañasha, llucshicanchi. 3 Cayandi punzha Sidonma pactacanchi. Julio Pablora llaquisha, paita lugarda cuca paihua amiguunajma ringaj, amiguuna Pablora cuiranauchu. 4 Chimanda huamburisha, Chipre islara huaira illashca partira pasacanchi, huaira shujpurama shinzhi aitaupi. 5 Cilicia Panfilia partiunara mayanda pasacanchi. Licia partii tiaj Mira llactama pactamucanchi. 6 Chihui ñucanchi capitán shu Alejandríamanda barcura tupaca, Italiama riuta. Chi barcui ñucanchira icuchica. 7 Ashca punzhauna alimanda huamburishca huasha, turmindushua Cnido llacta ñahuipurai pactacanchi, huaira arcajpi. Shina rasha Creta islara huaira illashca partira pasacanchi Salmon llacta ñahuipurai. 8 Ashca turmindushua isla mayanlla huamburicanchi. Ali Punguuna llactama pactacanchi, Lasea llacta mayanllara. 9 Ashcara unaiyashcamanda, shinallara sasina punzhauna pasashcamanda, lamarbi huamburina ña huañuihuaj tucuca. 10 Pablo paigunara camachisha, nica: “Runauna turmindushua huamburishun, ashca piridirinahua; mana cargalla barculla pirdirinaungachu astaun shinallara ñucanchis. 11 Suldaru capitán Pablo rimashcara mana quiricachu; randi barcu capitanda barcuyuj duiñura uyaca. 12 Cai pungu mana valijpi tamia timpura pasangaj, ashcauna chimanda llucshingaj iyarinauca, usharijpi Fenice punguma pactangaj, chihui tamiara pasangaj. Fenice shu Creta pungu aca, indi llucshimuna rayara ricurij. 13 Huaira alilla sur quinri partimanda aitamujpi, paiguna munashcami shamun, nisha iyanauca. Barcura apichina garautura aisasha llucchisha, Creta isla yacu pata mayanda rinauca. 14 Manas chinijhuara riushcai, Euroclidón nishca shinzhi huaira ali maqui partimanda aitasha, barcura apica. 15 Huaira barcura apajpi, mana ushacanchichu paihua pundara huairapurama muyuchingaj; shinajpi barcura saquicanchi huaira apashcama ringaj. 16 Ñucanchi shu ichilla islara, Clauda nishcara, ali maqui partima pasacanchi, chihui turmindushua ichilla canuara apinara ushacanchi. 17 Ichilla canuara barcui icuchishca huasha, barcura huascaunahua shinzhira huatanauca ama paquiringaj. Sirte nishca partima pactai rinara manzhasha, huaira aitana llachapaunara irguchinauca, barcu huaira apashcama ringaj. 18 Astaumbas, cayandi punzha, huaira mas shinzhiyaca; shina rajpi cargara lamarma ichunauca barcura pangallayachingaj. 19 Quinsa punzhai, ñucanchi quiquin maquiunahua barcu charishcaunara ichungaj callaricanchi. 20 Unaira indis, istrillascunas mana ricurijpi, huaira shinzhi atarijpi, mana chari causashun iyacanchi. 21 Shinajpi ñucanchi unaira mana micujpi, Pablo paiguna chaupi shungüi shayarisha, nica: “Sirtu pacha, runauna, ali anmaca ñuca rimashcara uyangaj, ama llucshingaj Cretamanda, casna turmindustas pirdirishcaras ama apingaj. 22 Astaun, cuna rimauni: Cariyaichi. Shu runas mana chingaringachu,randi barculla chingaringami. 23 Cuna tuta, Diospa angel ñucahua tiauca. Ñucas cai Diospaj ani, paita sirviuni. 24 Angel rimasha nihuaca: ‘Pablo, ama manzhaichu. Can Césarba ñaupajpi pactai rina angui. Dios tucui canhua pariju cumpañajcunaras canda cushcami. ’ 25 Chiraigumanda cushiyaichi, runauna. Ñucaga Diosta quirinimi. Pai rimashcasna pactaringami. 26 Shu islai shitai tucuna anchi.” 27 Chunga chuscu tuta tucushcai, Adriático lamarbi huamburicanchi. Barcura apaicachajcuna chaupi tuta huraspi, “Allpa mayambi chari anchi,” nisha iyanauca. 28 Yacu tupuna huascara cacharisha, yacura tupunauca. Ishqui chunga rigra tupu ucumi aca. Mas ñaupajma risha, cutilla huascara shitanauca. Chihui chunga pichca rigra tupumi aca. 29 Rumii tacarinamanda manzhasha, barcu siquimanda chuscu apichina garautura cachanauca. Uctalla punzhayachu nisha chapanauca. 30 Barcura apaicachajcuna miticungaj, ichilla canuara yacuma irguchinauca, pundamanda garautura cacharingaraujsna rasha. 31 Pablo capitanda suldaruunaras rimaca: “Caiguna mana barcui saquirinaupi, canguna quishpinara mana ushanguichichu.” 32 Shinajpi suldaruuna huascaunara pitisha canuara cacharinauca. 33 Punzhayai callarijpi Pablo tucuira camachica: “Canguna tucui micuichi,” nica.”Cuna ña chunga chuscu punzhara yarcaihua pasashcanguichi, mana ansas micusha. 34 Chiraigumanda cangunara rugauni, micuichi, canguna causaimanda. Canguna umamanda mana shu acchallas urmangachu.” 35 Casna rimashca huasha, Pablo tandara apisha, tucuihua ñaupajpi Diosta agrasica, tandara paquisha micungaj callarica. 36 Shinajpi tucui ña cushiyasha, shinallara micunauca. 37 Tucui ñucanchi barcui tiajcuna ishqui patsaj canzhis chunga suctapura acanchi. 38 Pactajta micushca huasha, barcura pangallayachinauca, apaushca trigura lamarma ichusha. 39 Ña punzhayajpi, ricurij allpara mana ricsinaucachu. Shu pulayayuj lamar muyuira ricunauca. Chihui barcura llutachinara iyanauca, usharijpi. 40 Huascaunara pitisha, garautuunara lamarbi saquinauca. Cahuinara huatana huascaras cacharinauca. Barcu pundai aj huaira aitana llachapara atarichinauca, pulayama llutaringaj. 41 Astaun ishqui yacupura aitashcamanda barcu punda rumii siririca. Barcu siqui pascaringaj callarica, lamar tsajlas shinzhi aitashcamanda. 42 Shinajpi suldaruuna tucui cauźayujcunara huañuchingaj iyarinauca, ama pihuas huaitasha miticungaj. 43 Astaun capitán Pablora quishpichinara munasha, paiguna iyarishcara arcaca, shina nisha: “Huaitanara ushajcuna yacuma ñaupa saltaichi pulayama llucshingaj.” 44 Chishujcunamanda huaquinguna palaunai huaquinguna ima barcu paquiunais llutarisha, tucui pulayama llucshisha quishpinauca.
1 Ña quishpishca huasha yachacanchi cai isla shuti Malta aca. 2 Islai causaj runauna ñucanchira ali munaihua ricunauca. Ninara apichisha tucui ñucanchira cayanauca, shinzhi tamiashcamanda, ñucanchi chirichishcamandas. 3 Shinajpi Pablo ansa chaquishca hualista pallasha, ninai taucaca. Nina rupajmanda shu machacui llucshisha Pablo maquii pillurica. 4 Chi runauna Pablo maquii machacui huamburijta ricusha, islai tiajcuna paigunapura rimananauca: “Sirtumi cai runa shu runara huañuchishca. Pai lamarmanda quishpijta Dios paita mana lugarda cun causangaj.” 5 Astaun Pablo machacuira ninai chausica; imas mana tucucachu. 6 Shinajpi paiguna chapanauca, “Ñalla maqui punguingami,” nisha, “manasha huañusha urmangami.” Unaira chapashca huasha, mana imas tucujpi, shu tunura iyarinauca: “Pai shu diosmi,” nisha. 7 Chi isla partii, islamanda apu allpauna tianauca. Paihua shuti Publio aca. Pai ñucanchira cayaca. Quinsa punzhara ñucanchira gustu cuirasha charica. 8 Publio yaya calinturahua ungushca asha caitui siriuca, yahuardas ismasha huañuuca. Pablo paihuajma icuca, Diosta mañashca huasha ungushca ahuai maquira churasha paita alichica. 9 Caita rashca huasha, shinallara shujcunas islai tiaj ungushcaunas shamunauca, alichi tucunauca. 10 Chiguna shinallara ñucanchira llaquinauca, ashcara ñucanchima cuyanauca. Ñucanchi riupis tucui ministishcaunara cuyanauca. 11 Shina rasha quinsa quilla huasha, Alejandríamanda barcui icucanchi, chi barcu tamia timpura islai pasaca. Barcu shuti Cástor y Pólux nishca aca. 12 Siracusa llactama pactasha, quinsa punzhara chihui tiacanchi. 13 Chimanda isla mayanda risha, Regio llactama pactamucanchi. Shu punzha huasha, huaira huashamanda aitajpi, cayandi punzha Puteoli llactama shamucanchi. 14 Chihui quirij uquiunara tupacanchi. Ñucanchira ruganauca paigunahua canzhis punzha tupura tiangaj. Chimanda huasha Roma llactama ricanchi. 15 Chimanda uquiuna ñucanchi shamushcara uyasha, ñucanchira tupangaj llucshimunauca. Apio catuna pulasagama, Quinsa Samana Huasi llactagamas shamunauca. Pablo paigunara ricusha, Diosta agrasisha cariyaca. 16 Roma llactama pactamushcai, ñucanchi capitán cauźayujcunara atun capitanma intrigaca. Randi Pablora lugarda cushca aca shujpi causangaj, shu suldaru cuirashcai cunauca. 17 Quinsa punzha huasha Pablo judiuguna apuunara cayaca. Paiguna paihua pariju tandarijpi, Pablo paigunara nica: “Runauna, uquiuna, ñuca mana imaras rashcanichu judiugunaras ñucanchi yayauna yachairas huajlichingaj. Jerusalenmanda pacha cauźayachishca shamushcani Romanoscuna maquii intrigashca. 18 Paiguna ñucara taripashca huasha cacharinara munanauca, mana ima huañuna cauźas tiajpi. 19 Astaun judiuguna inquitanauca, chiraigumanda, “César taripahuachu,” nicani. Shina rasha judiugunara cauźayachingaj mana ansas charinichu. 20 Chiraigumanda cangunara cayashcani, cangunara ricusha rimangaj. Israel chapaushcamanda cai cadenahua huatai tucuni.” 21 Shinajpi paiguna Pablora rimanauca: “Ñucanchi Judea llactamanda mana ima quillcaras apishcanchichu canmanda rimajta. Shinallara maican uquiunas mana shamunaushcachu canda cauźayachingaj. Canmanda mana ima manaliras rimanaushcachu. 22 Astaumbas canmanda imaras uyanara munanchi. Cai sami quirijcunamanda tucui partimanda uyanchi manali rimashcaunara.” 23 Shinajpi judiuguna shu punzha tandaringaj rimanauca. Pablo huasima ashca runauna shamunauca. Paigunara Dios mandana pacha shimira rimaca. Moisés camachishca ley shimimanda Diosmanda rimajcunamandas Pablo paigunara Jesusmanda ricuchisha rimaca tutamanda pacha chishigama. 24 Huaquinguna pai rimashcara chasquinauca, huaquinguna mana quirinaucachu. 25 Paigunapura mana pariju iyarinaupi, paiguna ringaj callarinaupi, Pablo cai shimira rimaca: “Santu Ispíritu ñucanchi yayaunama alimi rimaca Diosmanda rimaj Isaías shimimanda: 26 ‘Cai runaunama ri, paigunara rimai: Rinrihua uyashallara mana intindinguichi; Ñahuihua ricushallara, mana ricsinguichi. 27 Cai runauna shungu llashacyashcami; Rinriuna uyashallara upa tucunaushcami, Ñahuiunaras ishcanaushcami; Ama ñahuihua ricusha, Ama rinrihua uyasha, Ama shungüi intindinauchu, Ama ñucama tigranauchu, Ñuca paigunara ama alichingaj. ’ 28 Yachaichi, gentilgunama cai Diosmanda quishpichina shimira cachamushcami. Paiguna uyanaungami.” 29 Pablo caita rimashca huasha, judiuguna paigunapura ashcara rimanausha rinauca. 30 Pablo pai quiquin mañachishca huasii ishqui huata tupura tiaca, tucui paima shamujcunara chasquisha. 31 Pablo Dios mandana pacha ali shimira camachica, Señor Jesucristomanda yachachica pajlla pambai, mana imas arcasha.
1 Pablo, Jesucristora sirvij, cayashca shu apóstol nishca Dios cachashca runa tucungaj, chicanyachishca aca Diospa evangelio ali shimira rimangaj. 2 Dios ñaupa hurasmanda cai evangelio ali shimira cusha nica, paimanda rimajcuna quillcashca santu Quillcaunai. 3 Cai Quillcashcauna paihua Churi ñucanchi Señor Jesucristomanda rimanauca. Pai Davidpa miraigunamanda miraj aca paihua aichai. 4 Diospa Churi nishca aca, ushanahua, Santu Ispiritumanda huañushcaunamanda causarishcaraigu. 5 Paimanda Diospa gracia nishca yangamanda llaquishcara charinchi, apóstol nishca cachashca runauna tucusha, tucui llactauna evangelio ali shimira quirisha caźungaj, paihua shutira llaquishcamanda. 6 Cangunas chigunamanda anguichi, Jesucristojcuna tucungaj cayashcauna. 7 Tucui canguna Roma llactai tiajcunama quillcauni, Dios llaquishcauna, sumajyachishca tucungaj cayashcauna. Gracia nishca ali llaquina iyairas cushi shunguras charichi, ñucanchi Yaya Diosmanda, Señor Jesucristomandas. 8 Ñaupa punda Diosta agrasini Jesucristomanda, tucui cangunamanda. Canguna quirishca intiru mundui uyarishcami. 9 Ñuca ispiritui Diosta sirviuni paihua Churimanda rimaj evangelio ali shimira rimausha. Pai ñucara ricujmi imasna mana saquisha tucui huras cangunara iyariuni ñuca Diosta mañashcaunai. 10 Diosta rugauni imasnais pai munajpi, ñuca alira purisha cangunajma shamusha chari. 11 Cangunara ricusha nini, shu almai cuyashcara saquingaj, cangunara shinzhiyachingaj. 12 Casna nisha nini, ñuca cangunahua parijumanda cushi tucungaj, ñucanchi ishquindi quiriushcai, canguna quirishca ñuca quirishcas. 13 Munani, uquiuna, canguna yachangaj ashca cuti cangunajma shamusha nishcani, astaun cuna hurascama arcarishcani, ñuca cangunajmanda ima aparishcaras tupangaj, imasna shu gentilgunai tupashcani. 14 Ñuca grieguunamas mana grieguunamas, yachajcunamas mana yachajcunamas dibiyuj ani. 15 Shinajpi, ñuca ushashcagama puruntu mani evangelio ali shimira rimangaj, canguna Romai tiajcunamas. 16 Ñuca evangelio ali shimimanda mana pingarinichu. Caimi Diospa ushana tucui quirijcunara quishpichingaj, ñaupa punda judiugunama, shinallara grieguunamas. 17 Cai evangelio ali shimii Diospa ali dirichu causana ricurin, quirinahua callarisha, quirinahua tucuringagama, imasna quillcashca tian: “Ali dirichu runa pai quirishcamanda causangami.” 18 Dios piñarishca ahua pachamanda ricurin tucui paita mana ricsijcunamas, tucui manali rajcunamas, paiguna Diospa sirtu shimira uyanara arcasha paiguna manali rashcaunamanda; 19 ima Diosmanda ricsishcara, Dios chita paigunama ricsichicami. 20 Diosmanda mana ricuihuajcuna, paihua huiñaigama ushanas, pai Dios ashcaras ali ricurinaun, cai pacha rashca hurasmanda. Caiguna intindinaushcami pai rashcaunamanda. Chiraigumanda runauna cutipanara mana ushanaunzhu, “Mana yachacanichu,” nisha. 21 Paiguna Diosta ricsishallara, paita mana ahuayachinaucachu quiquin Diosta cuinta, maspas paita mana agrasinaucachu. Astaumbas paiguna iyaushcai upa tucunauca, paiguna upa shungu llandu tucuca. 22 Paiguna, “Intindijcuna manchi,” nisha, upauna tucunauca. 23 Mana ismuihuaj Diospa sumajta turcanauca, ismuihuaj runa samii, pishcuuna, chuscu chaquiyujcuna, machacuiguna samiunais. 24 Chiraigumanda Dios paigunara cuca irusta rangaj paiguna shunguuna ucha munaibi, parijumanda paiguna quiquin aichara huajlichinauca. 25 Diospa sirtu shimira turcasha, llulla shimira uyanauca; tucuira raj Diosta alabana randimanda pai rashcaunara alabanauca, ahuayachinauca, astaun paita alabashca achu huiñaigama. Amen. 26 Chiraigumanda Dios casna rajcunara pinganaita munaira rangaj cuca, huarmiuna paigunama cushca rana samira saquisha, mana cushca samira ranauca. 27 Shinallara cariuna huarmiunahua puñunara saquisha, salinashca cuinta, irus ucha aicha munaibi caripura pinganaita rasha, paiguna irus rashcamanda paganara apinaun paigunajpi. 28 Maspas paiguna Diosta iyarinara mana munajpi, Dios paigunara saquica nuspasha causangaj, mana valijcunara rasha. 29 Tucui manali ranara yapajta ranauca: shujhua tacarina, irusta rana, cullquira yapajta munana, manalirana, shujpajta ricusha munana, runara huañuchina, macanauna, umachinauna, manalira rimanauna, 30 piñajcuna, shimihua huajlichijcuna, Diosta chijnijcuna, camijcuna, mas tucuisiquiuna, ‘Atun mani,’ nijcuna, manali rangaj iyarijcuna, yayaunara mana uyajcuna, 31 upauna, shimira mana pactachijcuna, shungu illajcuna, shinzhi shunguuna, mana llaquijcuna. 32 Caigunaga Diospa taripanara intindishallara, casna rajcuna huañunauna anaun, shina ajllaira cai samiunara ranaun, maspas casna rajcunara cariyachinaun.
1 Chiraigumanda imaras rimanara mana ushanguichu, pi taripaj runas, imais shujta taripasha canllara cauźayangui, can taripaj ashas cai samillarara raungui. 2 Astaun yachanchi imasna Dios taripashca sirtumi tucui casna rajcunahua. 3 Canga casna rajcunara taripasha, shinallara chi tupullarara rasha, ¿can, “Diospa taripanara quishpishami,” nishachu iyangui? 4 Canga, ¿Diospa atun ali shungura, pai ahuantashcara, paihua chapaisiqui shungu valishcara pishii churanguichu? ¿Manzhu ricsingui imasna paihua ali shungu canda aripintiringaj pushamun? 5 Astaun camba shungu shinzhiyashcamanda, mana aripintirishcamanda, piñarinara tandachingui camba quiquimbajta, piñarina punzhai, Diospa ali dirichu taripana ricurina punzhai. 6 Dios caran duiñura pai rashca tupura pagangami: 7 huiñai causaira cunga alira rajcunama. Caiguna sumaj tucunara, ali shutira, mana huañunaras mascanaun. 8 Astaumbas camijcunama, sirtu shimira mana uyajcunama, piñanaras, piñarinaras pagangami, paiguna manali shimira uyajcuna ajpi. 9 Turmindarinaras, turbarinaras tucui manali raj runama pagangami, ñaupa punda judiugunama, shinallara grieguunamas. 10 Astaumbas, sumaj tucunara, ali shutira, cushi causanara pagashca anga tucui alira rajcunama, ñaupa punda judiugunama, shinallara grieguunamas. 11 Dios tucui runaunara chi tupullara ricun. 12 Tucui ley camachishca shimi illajcuna camachishca shimi illaj huañunaungami. Tucui camachishca shimii causajcuna ucharajpi, camachishca shimimanda taripashca anaunga. 13 Ley camachishca shimira rinrillahua uyajcuna mana ali dirichu tucunaunzhu Diospa ñaupajpi, astaun camachishca shimira rajcuna ali dirichu tucunaungami. 14 Gentilguna ley camachishca shimira mana charishallara, paiguna munaimandalla camachishca shimira pactachisha, caiguna camachishca shimira mana charishas, paiguna quiquinllara camachishca shimiyuj tucunaun. 15 Paiguna shina rasha, camachishca shimi yachachishcaunara paiguna shungüi quillcashca ajta ricuchinaun, paiguna iyaibi shina rimausha, paiguna iyaiguna huaquingunara cauźayachinaun, huaquingunama lugarda cunaun, 16 Señor taripana punzhai, ima huras runauna pacashcara taripangami Jesucristomanda, ñuca evangelio ali shimii rimashcasna. 17 Canga, judiu shutira charingui, ley camachishca shimiis samaungui, Diospi cushiyaungui, 18 can Diospa munaira yachangui, ley camachishca shimii yachachishcamanda ali ranara munangui, 19 can iyaungui, “Ñausaunara ricuchijmi ani, llandui tiajcunaj punzhami ani,” nisha, 20 mana yachajcunara yachachij, huahuaunaras yachachij asha, ley camachishca shimii yachana tunura sirtu shimi tunuras charingui. 21 Canllara shujta yachaehij, ¿manzhu can quiquinllara yachachingui? Can, “Ama shuhuaichu,” nisha rimaushallara, ¿can shuhuangui? 22 Can, “Ama tacarichu,” nishallara, ¿shujhua tacaringui? Can runa rashca dioscunara chijnishallara, ¿paiguna huasiunara huajlichinguichu? 23 Can ley camachishca shimii mas tucusha, ley shimira mana pactachisha, ¿Diospa shutira huajlichingui? 24 Imasna quillcashca tian: “Diospa shutira camishcami gentilgunai cangunaraigumanda!’ 25 Sirtu pacha circuncisión nishcara rana valinmi, can ley camachishca shimira huacachijpi, astaumbas can ley shimira mana huacachijpi, can circuncisionda rashca mana valinzhu, circuncisión illaj cuinta tucungui. 26 Shinajpi, ima huias circuncisión illaj runa ley camachishca ranaunara huacachiusha, ¿manzhu chi circuncisión illaj runa ña circuncisionda rashca cuinta tucunga? 27 Maican runas paihua aichai circuncisión illaj ashas, astaumbas ley camachishca shimira ali pacha huacachisha, canda cauźayachingami, can ley shimiras circuncisiondas charishallara, ley shimira mana huacachijpi. 28 Mana judiuchu canzhama ahua aichallai ricurij, shinallara mana circuncisionzhu canzhama ahua aichallai ricurij. 29 Astaumbas shungu ucumanda judiu aj sirtu judiumi. Sirtu circuncisionga shungu ucuimi, ispiritui, mana quillcamandalla. Paihua alabana mana runamandachu, astaun Diosmandami.
1 Judiu runa, ¿imaira yalin? ¿Imajta valin circuncisión? 2 Ashcami, tucuibi. Ñaupa punda, judiugunama Diospa shimira cushca aca. 3 ¿Paigunamanda huaquinguna mana quirijcuna ashca, imarai? ¿Paiguna mana quirishca Diospa sirtu ajta huajlichingachu? 4 Mana, Astaumbas Dios sirtu achu, maspas tucui runa llullaj achu, imasna quillcashcasna: “Can ali tucuchu can tucui rimaushcaunai, vinsingaj canda taripaushcais.” 5 Shinajpi, ñucanchi ucharashca Dios ali ajta yalichisha, ¿imara nishun? ¿Manzhu Dios manali anga ucharashcara livachisha? Runasna rimauni. 6 Mana. Shina tucujpi, ¿ima rashara Dios mundura taripanma? 7 Astaun, ñuca llullamanda Dios sirtu ajta yalichishca ajpi paita ahuayachingaj, ¿imarashara ñuca chara uchayuj cuinta taripai tucuni? 8 Shinallara ¿imarasha mana nishun: “Uchara rangaichi ali tucungaj?” Huaquinguna ñucanchira caminaun, llullasha casna nisha rimanaun. Paiguna cauźayachina ali anmaca. 9 Shinajpi, ¿imarai? ¿Ñucanchiga, paigunara yalinchichu? Mana. Ña cauźayachishcanchi judiugunaras gentilgunaras imasna tucui ucha ucui tianaun. 10 Imasna quillcashca tian: “Ali runa illanmi, mana shujllas tianzhu; 11 illan intindij runa, Diosta mascajpas illan. 12 Tucui anzhurinaushca, pariju mana valijcuna tucunaushca. Alira raj illanmi, mana shujpas tianzhu. 13 Paiguna tunguri pascarishca pambana uctusna; calluhua umachinaun; machacui ambi paiguna shimii tian. 14 Paiguna shimi manali shimiunahuas ayaj shimiunahuas undajta tian. 15 Paiguna chaquiuna uctalla callpanaun yahuarda talingaj. 16 Tularinas nijtarinas paiguna ñambiunai tianaun. 17 Cushi causana ñambira mana ricsinaushcachu. 18 Paiguna ñahui ñaupajpi Diosta manzhana mana tianzhu.” 19 Shinajpi caita yachanchi: Ley shimi ima rimashcaras ley mandashcai tiajcunama riman; tucui shimi ishcarichu, tucui mundu Diospa taripanai tiachu. 20 Ley shimira pactachina ranaunahua pi aichas mana dirichu alichishcachu Diospa ñaupajpi. Ley shimi uchara ricsichin. 21 Cuna leymanda chican, Dioshua dirichu alichina ricurimunmi, ley shimiis Diosmanda rimajcuna shimiunais rimashcami. 22 Caimi Dios munashca ali dirichu causana, Jesucristoi quirishcamanda tucui paita quirijcunama. Pitas mana chicanyachishcachu. 23 Imasna tucui runauna ucharanaushcami, Diospa sumajmanda anzhurinaushcami. 24 Astaun, mana ima paganahuas Dioshua dirichu alichishca anaun, Diospa gracia yangamanda llaquishcaraigu, Cristo Jesús paigunara randishcamanda. 25 Cristo Jesusta Dios ricuchica shu pagana cuinta, paihua yahuar talirishcamanda, quirishcahua chasqui tucungaj. Caita Dios rarca paihua ali shungura ricuchingaj, ñaupa huras ucha rashcaunara pasachishcamanda, pai chapaisiqui ashcamanda, 26 cai hurasllai, Dios pai ali dirichu ashcara ricuchingaj; pai ali dirichu tucuchu, shinallara Jesuspi quirijcunara dirichu alichingaj. 27 Shinajpi, ¿alabarina tianzhu? Illanmi. ¿Ima sami leymanda? ¿Ali ranauna leymandachu? Mana, astaumbas shu quirina leymandami. 28 Shinajpi ricsinchi shu runa ali dirichu tucun pai quirishcamandalla, ley ranauna illaj. 29 Dios, ¿judiugunajllachu? ¿Manzhu shinallara gentilgunajpas? Sirtu, shinallara gentilgunajpa Diosmi, 30 Dios shujllami. Pai circuncisionda rajcunara shinallara mana rajcunaras dirichu alichingami paiguna quirishcamanda. 31 Shinajpi, ¿ley shimira tulanchichu quirishcamanda? Mana, astaun ley shimira shinzhiyachinchi.
1 Abrahanmanda, ¿imara nishun? ¿imara tupacachu? Paiga aichai ñucanchi yayami. 2 Abraham, pai rashcaunamanda ali dirichu tucushca asha, charinmi alabaringaj, astaumbas mana Diospa ñaupajpi. 3 Quillcashcaiga, ¿imara nin? “Abraham Diospi quirica, chimanda ali dirichumi nisha rimashca aca.” 4 Tarabaj runama, pai ganashca cullquira mana cuyashcasna iyanachu, astaun dibishcamanda. 5 Maicans, mana tarabajpi, astaun manalira rajta alichij Diospi quirijpi, paihua quirina ali dirichu tucunami nishca anga, 6 Imasna David shinallara riman: “Cushimi shu runa ali ranauna illaj ajllaira, Dios paita, ‘Alimi angui,’ nin.” 7 Shina nisha: “Cushiunami maicanguna ucharashcaunara perdonashca asha, maicanguna uchaunara quillpashcami. 8 Cushimi maican runas, Señor paita: ‘Mana uchayujchu angui,’ nijpi.” 9 ¿Cai cushiga circuncisionda rajcunamallachu? ¿Manzhu shinallara mana rajcunamas? Ña nishcanchi Abrahamba quirina ali dirichu tucunami nishca aca. 10 ¿Ima huras pai ali dirichu tucushca iyashcachu aca? ¿Pai circuncisionda rashca huashai, pai circuncisionda manara rashcaira? Mana rashca huashai, astaumbas manara rashcai. 11 Abraham circuncisionda apica shu ricuchina cuinta, pai ñaupa huras quirishcamanda ali dirichu tucushca sirtu ajta ricuchingaj, pai circuncisionda manara rajllaira. Shinami aca Abraham tucui circuncisionda mana apijcunamanda yaya tucungaj, paigunajmas paiguna quirina ali dirichu tucushca nishca achu. 12 Shinallara yaya tucuca circuncisionda rajcunaj, mana circuncisionllara rajcunajpas, astaun shinallara ñucanchi yaya Abraham quirishca aitaushcai catijcunajpas, imasna pai circuncisionda manara rashcaira quirij aca. 13 Dios cushca shimira Abrahanmas paihua miraigunamas mana cushcachu aca pai ley shimira pactachishcamanda, pai mundura apij tucungaj, astaun pai Diospi quirisha ali dirichu tucushcamanda. 14 Shinajpi ley shimira catijcuna herederos nishca apijcuna tucujpi, quirina mana valinzhu, shimira cushcas mana sirvinzhu. 15 Ley shimi piñarinara apamun, astaun ley shimi illajpiga, uchas shinallara illanmami. 16 Chiraigumanda Dios cushca shimira quirijcunama cushca aca yangamanda llaquishcaraigu cui tucungaj, shinallara sirtu tucungaj tucui Abraham miraigunama. Mana ley shimira rajcunamalla cushcachu aca, astaun quirijcunamas, imasna Abraham quirishcasna. Shinajpi Abraham tucui ñucanchi yaya tucun, 17 pai quirishca Diospa ñaupajpi; imasna quillcashca tian, “Canda ashca intiuna yayara churashcani” Dios huañushcaunara causaira cun, shinallara illajcunara cayaun tiajcunara cuinta. 18 Abraham ima chapanaras mana charishallara, chapacami quirishcamanda, ashca intiunahua yaya tucungaj, paita rimashcasna: “Shinallarami camba miraiguna tucunaunga.” 19 Paiga mana sambayacachu pai quirinai, paihua aicha ña huañushcasna ajta riparasha, pai ñaca patsaj huatayuj ashcamanda, shinallara Sara mana huahuara tupanara ushashcamanda. 20 Shinallara pai Dios cushca shimira quiricami, “Pactaringami,” nisha. Maspas quirisha, shinzhi tucuca, Diosta ahuayachisha. 21 Abraham ali pacha yachaca Dios ushayuj ashcara pai cusha nishcara pactachingaj. 22 Chiraigu pai quirishcamanda Dioshua, “Ali dirichumi,” nishca aca. 23 Cai shimira mana pai quiquinmallara quillcashcachu aca, pai ali dirichumi nishca asha, 24 astaun ñucanchimas, cai ali dirichu tucushca ñucanchimandas nishca anga, ñucanchi Señor Jesusta huañushcaunamanda atarichij Diospi quirijcunama. 25 Pai ñucanchi manali rashcaunamanda intrigashca aca, maspas causachishca aca ñucanchi ali dirichu tucungaj.
1 Dioshua alichishcaunami anchi ñucanchi quirishcamanda, cushiras charinchi Dioshua, ñucanchi Señor Jesucristomanda. 2 Paimanda cai gracia nishca Dios yangamanda llaquishcara apishcanchi quirishcamanda, chihui shinzhi shayarinchi, shinallara cushiyanchi Diospa sumajta chapausha. 3 Maspas, turmindarishcaunai cushiyanchi, caita yachasha: turmindarina ahuantaj shungura raun; 4 ahuantaj shungura Dios “Alimi” nin; Dios “Alimi” nishca shunguga chapana iyaira iñachin; 5 shinallara chapana iyai mana pingachinzhu, ñucanchima cushca Santu Ispíritu Dios llaquishcara ñucanchi shungüi talishcamanda. 6 Ñucanchi chara irquiuna ajllaira, paihua huraspi Cristo manaliuna randimanda huañuca. 7 Ali runa randimanda shu runa huañunma chari. Astaun shu ali shungu runamanda, shu runa huañusha ninma. 8 Astaumbas Dios pai quiquin llaquishcara ñucanchima ricuchin, ñucanchi chara uchayujcuna ajllaira, Cristo ñucanchi randimanda huañuca. 9 Maspas ñucanchi cuna Dioshua ali dirichu tucusha Cristo yahuarmanda, paimanda Dios piñarishcara quishpishun. 10 Ñucanchi, chijnijcuna ashallara. Dioshua amigouna tucucanchi paihua Churi huañushcaraigu, astaun mas cuna amigopura asha, quishpichi tucushun pai causashcamanda. 11 Maspas, Diospi cushiyanchi, ñucanchi Señor Jesucristomanda, cuna paimanda amigouna tucushcanchi. 12 Chiraigumanda imasna shu runamandalla ucha mundui icuca, uchamanda huañuis icuca, shinallarami huañui tucui runaunama shamuca, paiguna tucui ucharashcamanda. 13 Ley shimi manara tiashcai, ucha mundui tiaca, astaumbas ley shimi illajpi ucha mana ricuricachu. 14 Shina ajllaira huañui mandaca Adanmanda Moisescama, Adan ucharashca samira mana rajcunamas. Adan huasha shamungarau Runara richuchijmi, 15 Dios yanga cuyashca mana ucha samichu aca. Shu runa manali rashcamandalla ashcauna huañunauca, maspas ashcaunama Diospa gracia yangamanda llaquina yaparica. Shinallara Dios cuyashca shu Runa yangamanda llaquishcamanda yaparica. Cai Runa Jesucristomi. 16 Shinallara Dios yangamanda cuyashca mana shu runa ucharashca cuintallachu aca. Taripana sirtu pacha shu uchamanda shamuca, cauźayachingaj, astaun Dios cuyashca ashca uchaunaraigumanda shamuca runauna Dioshua ali dirichu tucungaj. 17 Shu runa ucharashcamandalla, huañui mandaca. Cunaga shu sapalla Jesucristomanda, gracia yangamanda llaquishcaras, ali dirichu tucuna cuyashcaras apijcuna, causaibi maspas mandanaungami. 18 Shinajpi, imasna shu runa ucharashcamandalla tucui runauna cauźayuj tucunauca, shinallarami shu runa ali rashcamandalla ali dirichu tucuna tucui runaunama shamuca, paiguna causaibi Dioshua ali dirichu tucungaj. 19 Chiraigumanda, imasna shu runa mana caźushcamandalla ashcauna uchayuj tucunauca, shinallara shu Runa caźushcamandalla ashcauna Dioshua ali dirichu tucunaungami. 20 Ley shimi icuca uchara yapachingaj, astaumbas ucha mirarijpi gracia Dios yangamanda llaquishca yalis yaparica. 21 Shinajpi imasna ucha mandaca huañunagama, shinallara gracia yangamanda llaquishca mandachu ali dirichu causaimanda huiñai causaira cungaj ñucanchi Señor Jesucristoi.
1 Shinajpi, ¿imara nishun? ¿uchara rasha catishunzhu, gracia yangamanda llaquina yaparingaj? 2 Mana. Ñucanchi uchara rangaj huañushcauna asha, ¿imarasha cuti ucharanai causashun? 3 ¿Manzhu yachanguichi imasna tucui ñucanchi Cristo Jesuspi bautisashcauna paihua huañuibi bautisashca acanchi? 4 Ñucanchi bautisarishcai Jesushua pariju pambashca acanchi huañuibi. Imasna Cristo huañushcaunamanda causarimuca Yaya sumaj ushaimanda, shinallara ñucanchi mushuj causaibi purishunchi. 5 Ñucanchi Cristohua pariju tarpushca asha pai huañushca tunui, shinallara paihua pariju ricurimushun pai causarishca tunui. 6 Caita yachanchi: ñucanchi rucu runa, ñucanchi rucu causai, Cristohua pariju chacatashca aca, ucha aichara tucuchingaj, ñucanchi ama mas ucharanara sirvingaj. 7 Huañushca runa ucharanamanda ña alichishcami. 8 Ñucanchi Cristohua pariju huañusha, shinallara paihua pariju causashun nisha, quirinchi. 9 Caita yachasha: Cristo huañushcaunamanda causarishca asha, mana cuti huañungachu. Huañuna ña paita mana mandanzhu. 10 Cristo huañushca asha, uchamanda huañuca shu cutilla, astaun pai cuna causaushca causai Diospajta causaun. 11 Shinallara canguna sirtu pacha ucharangaj, “Huañushca mani,” nisha iyaichi, astaun Diospajta causajcuna, ñucanchi Señor Jesucristoi. 12 Ucharana ama mandachu canguna huañunalla aichai, pai manali munashcaunara uyangaj. 13 Shinallara canguna aichara ama cuichichu uchara rangaj; astaun cangunallara Diosma cuichi, huañushcaunamanda causajcuna cuinta, canguna aichara shinallara Diosma cuichi aliranara rangaj. 14 Ucha cangunara mana mandangachu, canguna mana ley shimi mandaushcai tiaunguichichu, astaumbas gracia yangamanda llaquiushcai. 15 Shinajpi, ¿imarai? ¿Uchara rashunzhu ñucanchi mana ley shimi ucui tiausha, astaun gracia yangamanda llaquishcai? Mana. 16 Manzhu yachanguichi pimas canguna aichara cunguichi paita uyangaj, paita sirvijcuna tucunguichi, canguna paita uyasha, uchara sirvijcuna asha huañungaj, caźujcuna asha ali dirichuuna tucungaj? 17 Shinajpi Diosta agrasinchi canguna ñaupa huras uchara sirvijcuna ashallara, cuna shungumanda cai yachana samira uyashcanguichi, cai yachanama intrigashca acanguichi catingaj. 18 Canguna uchamanda llushpichishca asha, ali ranara sirvijcuna tucushcanguichi. 19 Runasna rimauni, canguna aicha irqui ashcamanda. Imasna ñaupa canguna aichara cucanguichi irus ranara manali ranaras sirvisha irus tucungaj, shinallara cuna canguna aichara cuichi ali ranara sirvingaj, canguna chuyaj tucungaj. 20 Shinajpi canguna ucharanara sirviushca huraspi, ali ranamanda lugarguna acanguichi. 21 ¿Imara pallacanguichi chi tunui causashcamanda? Shina rashcaunamanda cuna pingaringuichi. Casna ranauna huañunai tucurinaun. 22 Cuna huras, ucharanamanda llushpichishca asha, Diosta sirvijcuna tucusha, canguna aparishca muyu cuinta sumaj tucunguichi, puchucaibi huiñai causaira charinguichi. 23 Uchamanda pagana huañuimi, randi Dios yangamanda cuyashca huiñai causaimi, nucanchi Señor Jesucristoi.
1 ¿Manzhu yachanguichi, uquinuna, imasna ley camachishca shimi runara mandan pai causaushca punzhaunai? Ley shimira yachjcunama quillcauni. 2 Cariyuj huarmi carira uyana anga cari causaushca huraspi, ley shimi mandashcasna. Astumbas cari huañujpi, huarmi llushpirishcami cari mandanamanda. 3 Shinasha, cari causaullaira, huarmi shu carihua llutarijpi shujhua tacarij nishca anga, astaumbas cari huañujpi, huarmi chi ley shimimanda llushpirishcami, mana shujhua tacarij anga shu carihua llutarijpis. 4 Shinallara canguna, ñuca uquiuna, huañushca anguichi ley shimi ñaupajpi, Cristo aichai huañushcaraigu, canguna shujpaj tucungaj, huañushcaunamanda atarijpaj, ñucanchi Diospajta aparishca muyura cuinta aparingaj. 5 Ñucanchi aichai causaushcai, ley shimimanda ucha munai ñucanchi aichai tarabasha, huañuira apachica. 6 Cunaga, ley shimimanda llushpichishca anchi, ñucanchira mandaj ley shimimanda huañushca asha, mana rucu quillcashcamanda causaira catisha, astaun mushuj causaira Ispiritui catingaj. 7 Shinajpi, ¿imara nishun? ¿ley shimiga uchachu? Mana, Astaumbas ley shimi illajpi, ñuca uchara mana yachaimacani. Shinallara shujpajta munanara mana yachaimacani ley shimi mana nishca ajpi: “Ama shujpajta munanguichu.” 8 Ucha, ley shimimanda valirisha, tucui shujpajta munanaras icuchica ñuca shungüi. Ley shimi illajpi, ucha huañushcami. 9 Shinajpi, ñuca ñaupa huras ley shimi illaj causacani, astaumbas ley camachishca shimi shamujpi, ucha causarica, ñuca huañucani. 10 Shinajpi caita tupacani: Camachishca shimi causaira cungaj iyarishca asha, ñucara huañuchica. 11 Uchaga, camachishcaunamanda valirisha, ñucara umachica, shinallara ñucara huañuchica. 12 Shinajpi ley shimi sirtu pacha chuyajmi, shinaïlara camachishca shimi chuyajmi, alimi, valijmi. 13 ¿Ley shimi ali ashallara huañuna tucucachu ñucahua? Mana. Astaun ucha, pai irus ajta ricuchingaj, ley shimi ali ashallara nucajta huañunara rarca. Shinami aca camachishcaunamanda ucha irus tunu yapajta irus ajta ricuchica. 14 Yachanchi imasna ley shimi ispirituma riman, ñucaga aichalla mani, uchara rangaj catushca. 15 Ñuca rashcara mana intindinichu, ñuca munashcara mana raunichu, astaun ñuca chijnishcara, chita rauni. 16 Ñuca, ñuca mana munashcara rausha, ley shimi ali ashcara ricsini. 17 Shinajpi, mana ñucachu chita rauni, astaun ñuca aichai tiaj ucha chita raun, 18 Ñuca yachani imasna ñucajpi, ñuca aichai, ali rana mana tianzhu. Ñuca ali rana munaira charini, astaumbas alira rangaj mana pactanichu. 19 Ñuca, ñuca munashca alira mana raunichu, astaun ñuca mana munashca manalira, chita rauni. 20 Ñuca mana munashcara rasha, mana ñucachu rauni, astaumbas ñuca aichai tiaj ucha chita raun. 21 Shinajpi, ñuca alira rasha nisha, cai ley shimira tupauni: Manalirana ñucajpi tian. 22 Ñuca shungu ucui, Diospa ley shimii cushiyauni. 23 Shinajpi, shu ley shimira ricuni ñuca aichai, caiga ñuca iyaibi tiaj ley shimihua macanaun, ñucara apisha nin, ñuca aichai tiaj ucha ley shimira rangaj. 24 ¡Pugri runami ani! Pita ñucara cai huañuna aichamanda llushpichihuangairi? 25 Diosta agrasini, ñucanchi Señor Jesucristomanda. Shina tucunmi: ñuca iyaibi Diospa ley shimira sirvini, astaumbas ñuca aichai ucharana ley shimira sirvini.
1 Cunaga, Cristo Jesuspi tiajcuna ima cauźaras mana charinaunzhu, mana aicha munaira catisha astaun Ispiritura. 2 Ispíritu mandashca ley shimi, Cristo Jesupi causaira cusha, ñucara llushpichihuaca ucharana ley shimimanda, huañuna ley shimimandas. 3 Ley shimi mana ushashcara, irqui tucujpi aicha mana valishcamanda, Dios chita rarca, paihua Churira cachasha uchayuj aicha samii, ucharaigumanda. Shina rasha Dios uchara cauźayachica aichai, 4 ley shimi ministishcaunara ñucanchijpi pactarinauchu, mana aicha munaibi causajcunahua astaun Ispíritu munashcai purijcunahua. 5 Aicha munashcara catijcuna aicha munashcara iyanaun, randi Ispíritu munashcara catijcuna Ispíritu munashcara iyanaun. 6 Aicha munashcara rana huañuimi, randi Ispíritu munashcara rana causaimi, cushi shungumi. 7 Uchara rana munai Diosta chijnin, Dios camachishca shimira mana uyan, mana ushan. 8 Aicha munashcai causajcuna Diosta cushiyachinara mana ushanaun. 9 Canguna mana aicha munashcai causaunguichichu, astaumbas Ispíritu munashcai, Diospa Ispíritu canguna ucui causaupi. Maicans Cristo Ispiritura mana charisha, mana paihuajchu. 10 Astaun Cristo cangunajpi tiaupi, aicha sirtu pacha huañushcami ucharaigu, randi ispíritu causaun ali dirichu ashcaraigu. 11 Jesusta huañushcaunamanda causachij Ispíritu canguna ucui causausha, Cristo Jesusta huañushcaunamanda causachij Dios shinallara canguna huañunalla aichara causachingami paihua Ispiritumanda, pai canguna ucui tiausha. 12 Shinajpi, uquiuna, mana dibiyujchu anchi aichama, aicha munashcai causangaj. 13 Canguna aicha munashcai causausha huañunguichimi, astaumbas Ispiritumanda aicha ranaunara huañuchisha, causanguichimi. 14 Tucui Diospa Ispíritu pushashcauna, caigunami Diospa churiuna anaun. 15 Canguna isclavu cuinta sirvina iyaira mana apicanguichichu cuti manzhaihua tiangaj, astaun churi cuinta apina iyaihua, “Abba, Yaya,” nisha caparingaj. 16 Diospa Ispiritullara ñucanchi ispiritui riman imasna ñucanchi Diospa churiuna ashcara. 17 Ñucanchi churiuna asha, shinallara herederos nishca apijcuna anchi, Diosmanda cushcara apijcuna; Cristohua pariju apijcuna anchi ñucanchi paihua pariju turmindarisha, paihua pariju sumajyachishca angaj. 18 Caita sirtu pacha yachani: ñucanchi cuna huras turmindariushca mana imaschu, astaun ñucanchira huasha huras ricuringarau sumajyachina ashcami valin. 19 Munai munaihua tucui Dios rashcauna Diospa churiuna ricurimunara chapanaun. 20 Tucui Dios rashcauna mana valij tucunauca, mana paiguna munaimanda, astaun casna raj Diospa munaimanda; pai chapausha shina rarca. 21 Tucui Dios rashcaunara shinallara ismunamanda llushpichishca anaunga, Diospa churiuna gustu sumaj liuri tucunai icungaj. 22 Yachanchi tucui Dios rashcauna pariju nanachinaun cuna hurascama, imasna shu huarmi huahuara pagarichingaj nanachishcasna. 23 Mana chigunalla, astaun ñucanchis, Ispiritura charijcuna, ñaupa punda aparishca cuintami, shinallara shungu ucui huacanchi; Dios ñucanchira churiunasna apingaraushcara chapaunchi, caimi ñucanchi aichara cuti randina. 24 Chapausha quishpichi tucucanchi, astaun ima ricurijtas mana chapanallachu. ¿Ricurijtaga, imarasha chapana? 25 Randi, ñucanchi mana ricurijta chapausha, ahuantasha chapaunchimi. 26 Shinallara Ispíritu ñucanchi irqui ajta yanapaun, imasna ñucanchi ministishcara mañangaj mana ali yachanchichu, astaun quiquin Ispíritu ñucanchimanda mañaun, mana rimaihuaj shimihua rugasha. 27 Astaumbas shungura ricuj Dios Ispíritu munashcara yachan. Ispíritu quirijcunamanda mañaun, Dios munashcasna. 28 Caita yachanchi: Diosta llaquijcunama tucui imas pariju yanaparin ali tucungaj, pai munashcamanda cayashcaunama. 29 Pai ñaupamanda ricsishca runaunara ajllaca, paihua Churisna ricurijcuna tucungaj, Churi ashca uquiunamanda ñaupa punda pagarij tucungaj. 30 Ajllashcaunara shinallara cayaca, cayashcaunara ali dirichuunara rarca, ali dirichu rashcaunara shinallara sumajyachica. 31 Caimanda, ¿imara nishun? Dios ñucanchihua ajpi, ¿pita ñucanchihua cuntra tucungai? 32 Dios paihua quiquin churira mana mitsacachu, astaun paita cuca tucui ñucanchi randimanda, ¿manzhu paihua pariju tucuira ñucanchira cungai? 33 Pita Dios ajllashcaunara cauźayachinga? Dios ali dirichu alichijmi. 34 ¿Pita ñucanchira cauźayachinga? Cristo huañushca, causarishca, maspas Diospa ali maqui partii tiaun, pai shinallara ñucanchimanda mañaun. 35 ¿Pita ñucanchira Cristo llaquishcamanda anzhuchingai? ¿Turmindarina, huacana, yarcai, llatan tucuna, huañuna, sauli—caiguna anzhuchihuanaungachu? 36 Imasna quillcashca tian: “Canda llaquishcamanda intiru punzhaunai huañuchishcami anchi. Huañuchina buriguunasna iyashcami anchi.” 37 Astaun cai tucuibi yalijta vinsijcunami anchi, ñucanchira llaquij Cristomanda. 38 Chiraigumanda sirtu yachani huañuna, causana, angelguna, atunguna, ushajcuna, cuna huras tiajcuna, huasha huras shamujcunas, 39 ahuai tiaj, ucui tiajpas, ima causajpas, mana ushanzhu ñucanchira anzhuchinara Diospa llaquinamanda, cai llaquina ñucanchi Señor Jesucristoimi.
1 Sirtu shimira rimauni Cristoi, mana llullanichu. Ñuca iyai casnami riman Santu Ispiritui. 2 Ashcara llaquiriuni, nanashalla catihuan ñuca shungüi. 3 Ñuca uquiunara llaquishcamanda, paiguna aichai ñuca aillu asha, ñucallara munaimacani maldiciashca angaj, Cristomanda anzhurishca tucungaj. 4 Israelguna anaun, paigunajmi churisna apina, sumaj tucuna, Dioshua pactachina shimi, camachishca shimira cushcas, alabanas, Dios cushca shimiunas. 5 Paigunajmi yayauna, paigunamandami Cristo shamuca paihua aichai. Cristo quiquin Diosmi, tucui ahuai tiaj, huiñai huíaigama bindisiashcami. Amen. 6 Mana sirtuchu Diospa shimi mana valij tucushca. Mana tucui Israelmanda mirajcuna quiquin ísrael runaunachu. 7 Shinallara Abrahanmanda mirajcuna ashas, mana tucui Abrahamba churiunachu, astaumbas nin: “Isaacmanda pagarijcuna quiquin mirajcunami nishca anga.” 8 Caita nin: “Aichamanda churiuna mana Diospa quiquin churiunachu, astaun cushca shimimanda churiuna, caigunami quiquin miraiguna.” 9 Cushca shimi casna nin: “Paihua timpui shamushami, Sara shu churira charingami.” 10 Maspas, Rebeca shinallara shu carimanda huahuaunara tupaca, ñucanchi yaya Isaacmanda. 11 Shinajpi huahuauna manara pagarijllaira, ima aliras ima manaliras manara rajllaira, Dios munasha ajllashcasna tucuchu, mana rashcaunamanda astaun Dios cayashcamanda, 12 rimashca aca: “Ñaupa punda churi quipara sirvingami.” 13 Imasna quillcashca tian: “Jacobta llaquicani, Esaúra chijnicani.” 14 Shinajpis, ¿imara nishun? ¿Dios mana alichu? Mana. 15 Astaumbas Dios Moisesta nin: “Maicandas llaquisha, llaquishami; maicandas yanapasha, yanapashami.” 16 Chiraigumanda, mana munajmandachu, mana camajmandachu, astaumbas Dios llaquishcamandami. 17 Quillcashcai Faraonma nin: “Caita ricuchingaj canda sicachishcani, canmanda ñuca ushaira ricuchingaj, ñuca shuti rimai tucuchu intiru mundui.” 18 Shinajpi, maicandas Dios llaquisha nisha, llaquin; maicandas shungura shinzhiyachisha nisha, shinzhiyachin. 19 Rimahuanguimi: “¿Imaraigu piñarin? ¿Pi paihua munaira arcan?” 20 Astaumbas can, runa, ¿Pitanguiri can Diosta cutipangaj? ¿Allpa manga paita llutajta ningachu: “¿Imaraigu ñucara casna llutahuashcangui?” 21 Manzhu mangara llutaj ushaira charin mangallpamanda shu inu mangara llutangaj, manasha shu yanga mangara llutangaj? 22 Imarai, Dios pai piñarishcara ricuchisha nijpi, pai ushanara yachachisha nijpis, unaira chapasha piñana ajcunara ahuantaca, tucuchingaj puruntushcaunara, 23 shinallara paihua sumaj valij ashcara yachachisha nisha, pai llaquishcaunama ricuchica, ñaupa hurasmanda puruntushcaunama, paigunara sumajyachingaj? 24 Ñucanchi chiguna manchi, pai cayashcauna, mana judiugunamandallachu, astaun gentilgunamandas. 25 Imasna shinallara Oséaspa Quillcashcai nin: “Mana ñuca runauna ajcunara, ‘Ñuca runaunami,’ nisha; mana llaquishcaunaras, ‘Llaquishcaunami,’ nisha.” 26 Shinallara maibi rimashca aca: “Canguna mana ñuca runauna anguichichu,” nijpi, chihui nishca anga: “Causaj Diospa churiunami.” 27 Shinallara Isaías, Israelgunamanda caparisha nin: “Israel churiuna lamar tiyu cuinta yupashca ashas, shina ajllaira puchujcunalla quishpichi tucunaungami; 28 Señorga pai cauźayachishcara mundui pactachingami alira rasha, uctalla rasha.” 29 Shinallara imasna Isaías ñaupara nica: “Ejercitounamanda Señor ñucanchijta shu miraira mana saquishcajpiga, Sodoma cuinta tucunchimaca, Gomorra cuinta ricurimunchimaca.” 30 Shinajpi, ¿imara nishun? Gentilguna ali dirichu causanara mana catijcuna ashas, ali dirichu tucunama pactamunaushca, caimi quirinamnda ali dirichu tucuna. 31 Astaumbas, Israel ali dirichu tucuna ley shimira catijcuna ashas, mana pactanauca chi ali dirichu tucuna ley shimima. 32 ¿Imaraigumanda? Paiguna quirinahua mana catinauca astaun ley shimimanda ranaunahua. Chiraigumanda, nijtana rumii urmanauca. 33 Imasna quillcashca tian: “Caiga, Sión llactai shu nijtana rumira churauni, shu urmachina rumiras. Maicans paihuajpi quirisha mana pingaringachu.”
1 Uquiuna, sirtu pacha ñuca shungüi munaihua Diosta mañauni Israelmanda, paiguna quishpingaj. 2 Ñuca paigunamanda nini, Diosta ashcara llaquinaunmi, astaun mana yachanahua. 3 Paiguna Dios cushca ali dirichu tucunara mana ricsisha, paiguna quiquin rashca ali tucunara catisha nisha, Diosmanda ali dirichu tucunara mana uyanaucachu. 4 Cristo ley shimira tucuchishcami, tucui paita quirij runauna ali dirichu tucunauchu. 5 Moisés ley shimimanda ali dirichu tucunara cuintan, casna nisha: “Caigunara raj runa paigunamanda causanga.” 6 Astaun quirinamanda ali dirichu tucuna casnami nin: “Ama nichu camba shungüi: ‘¿Pita ahua pachama sicangairi?’ (Caita nin, ‘Cristora irguchingaj); 7 shinallara: “¿Pita ucu pachama irgungairi?” (Caita nin, Cristora huañushcaunamanda sicachingaj). 8 Astaun, ¿imara nin? “Rimashca shimi camba mayanbimi tiaun, camba shimii, camba shungüi.” Cai shimi ñucanchi rimaushca quirina shimimi. 9 Casnami nin: “Camba shimihua rimasha, ‘Jesús Señormi,’ nisha, shinallara camba shungüi Dios Cristora huañushcaunamanda causachishcara quirisha, quishpichishca angui.” 10 Shunguhua runa quirin ali dirichu tucungaj, shinallara shimihua riman, “Quirinimi,” nisha, quishpichi tucungaj. 11 Quillcashcai, casnami nin: “Pi runas paihuajpi quirisha mana pingaringachu.” 12 Mana chican chicanzhu judiugunahua grieguunahua. Tucuihua Señor ali shungumi tucui paita cayajcunahua. 13 Tucui Señorba shutira cayaj quishpichishca anga. 14 ¿Imarasha shu mana quirishca Diosta cay anaunga? ¿Imarasha shu mana uyashca quishpichijta quirinaunga? ¿Imarasha uyanaunga, shu rimaj runa illajpi? 15 ¿Imarasha rimanaunga mana cachashca asha? Imasna quillcashca tian: “¡Ima sumajtairi cushi shimira rimajcuna chaquiuna, shinallara evangelio ali shimira rimajcuna chaquiunas!” 16 Shinashas, mana tucui uyanaucachu evangelio ali shimira. Isaías nin: “¿Pita ñucanchi rimashcara quirishcairi?” 17 Shinajpi, quirina uyanamandami shamun, shinallara uyanas Diospa shimimandami shamun. 18 Maspas nin: ¿Manzhu uyanaushca? Sirtu pacha uyanaucami. Astaun: “Paiguna shimi intiru mundui pasashcami, paiguna rimashcaunas mundu puchucai pundagama pasanaushcami.” 19 Shinallara nini: ¿Israelguna manzhu yachanauca? Ñaupa punda Moisés nin: “Cangunara piñachisha shu yanga runaunahuas; iyai illaj runaunahuas cangunara piñachisha.” 20 Maspas, Isaías, pajlla pambai rimasha, nin: “Mana mascahuajcuna ñucara tupahuanauca. Ñucallara ricuchicani ñucara mana tapujcunama.” 21 Astaumbas Israelmanda riman: “Intiru punzha maquira pascacani mana uyaj mana munaj runaunama.”
1 Shinajpi nini: ¿Dios paihua runaunara ichushcachu? Mana. Ñucas Israel runami ani, Abrahamba miraimanda, Benjaminba aillumanda. 2 Dios pai ñaupa huras ricsishca runaunara mana ichushcachu. ¿Manzhu uyangui imara nin Quillcashcai, Eliasmanda rimasha, imasna Elías Israelmanda piñasha Diosta riman: 3 ”Señor, canmanda rimajcunara huañuchinaushca, camba altar nishca sacrificiora rana mesaunara tulanaushca; ñuca sapalla saquirishcani, maspas ñucara mascahuanaun huañuchingaj?” 4 Astaun Dios cutipasha, ¿imara nin? “Ñucajta canzhis huaranga runaunara huacachishcani,” nica, “cunguri mucuhua mana cungurijcunara Baalba ñaupajpi.” 5 Shinallarami cai punzhaunais, puchujcuna tianaun Diospa gracia yanga llaquisha ajllashcamanda. 6 Cai gracia yangamanda llaquishcamanda asha, mana ranamandachu. Mana shina ajpis, gracia yangamanda llaquina ña mana graciachu. Shinallara ranaunamanda asha, cai mana gracia yangamanda llaquinamandachu. Mana shina ajpis, rana ña mana ranachu. 7 ¿Imara? Isarael paiguna mascashcara mana pactanaucachu, randi ajllashcauna pactanaucami. Shujcuna shinzhiyachishca tucunauca. 8 Imasna quillcashca tian: “Dios paigunara shu upa shungura cuca, mana ricuj ñahuiunara, mana uyaj rinriunaras cuna punzhagama.” 9 Shinallara David nin: “Paiguna micuna mesa tujlla cuinta tucuchu, lica cuinta, shu nijtana, shu cuti pagana. 10 Paiguna ñahuiuna llanduyarichu ama ricungaj; paiguna huasha tullu cumurichu huiñaigama.” 11 Ñuca nini: ¿Urmangajchu nijtanauca Israelguna? Mana. Astaumbas paiguna nijtashcamanda, quishpichina shamuca gentilgunama, Israelguna ricusha tigramunauchu. 12 Israelguna ucharashca mundura charijyachipi, shinallara paiguna anzhurina gentilgunara charijyachijpi, ¿manzhu paiguna tigramuna tucuira mas mas charijyachinga? 13 Cangunara rimauni, gentilguna. Imasna gentilgunama ñuca Dios cachashca runami ani, ñuca tarabanara ahuayachiuni, 14 imara raushas ñuca ailluunara iyarichingaj, paigunamanda huaquinguna quishpichi tucungaj. 15 Paiguna Diosmanda anzhurina mundura mayanllayachijpi Dioshua amigu tucungaj, ¿imara angai paigunara cuti chasquina? ¿Manzhu huañushcaunamanda causarina anga? 16 Ñaupa pucuj muyu santu ajpi, shinallarami tucui muyuunas santu anaunga. Sapi santu ajpi, shinallarami pallcauna santu anaunga. 17 Huaquin pallcauna paquirishca ajpi, can shu sachamanda yanga olivo pallca asha, canda paquirishcauna randimanda yurai satishca ajpi, can olivo yuramanda paihua sapira, paihua causana yacuras apiusha, 18 ama burlaichu pallcaunara. Burlasha ama cungaringui can pallcalla asha mana sapira shayachinguichu, astaun sapi canda shaychiun. 19 Can ningui chari: “Pallcauna paquirinauschca aca ñuca yurai sati tucungaj.” 20 Alimi. Paiguna mana quirishcaraigu paquirinaushca aca, astaun can camba quirinamanda shayaringui. Ama mas tucuichu astaun manzhai. 21 Dios quiquin pallcaunara mana perdonasha, shinallara canda mana perdonangachu. 22 Ricupai Diospa ali shungura, paihua shinzhi shunguras: Dios shinzhi aca urmajcunahua, astaun canhua ali shungu aca, can paihua ali shungüi tiaupi. Manajpi, cambas shinallara piti tucunguimi. 23 Paigunas, paiguna mana quiriushcai mana saquirijpi, shinallarami sati tucunaunga yurai. Dios yapa ushajmi paigunara cutillara satingaj. 24 Can sachamanda yanga olivo yuramanda pitishca ajpi, astaun Dios mana cushca samii ali olivo yurai satishca acangui, ¿manzhu maspas caiguna, quiquin olivomanda pallcauna, cutillara paiguna quiquin olivo yurai sati tucunaunga? 25 Canguna, uquiuna, cai pacashca shimira yachaichi, nisha munani, canguna ama mas tucuisiqui tucungaj; huaquin Israelgunahua shungura shinzhiyachishcami, gentilguna pactajta bindisiai tucunagama. 26 Shinajpi tucui Israel quishpichi tucungami, imasna quillcashcasna: “Sionmanda Llushpichij shamunga; Jacobmanda ucharanara quichungami. 27 Caimi ñuca pactachina shimi paigunahua, ñuca paiguna uchara quichuna punzhai.” 28 Shinajpi, evangelio ali shimimanda rimajpi, judiuguna chijnishcauna tucunaushca cangunaraigumanda, astaun Dios ajllashcamanda rimajpi, llaquishcauna anaun, yayaunara llaquishcaraigumanda. 29 Dios cushca cuyashcaunas pai cayashcas mana turcaihuajchu. 30 Imasna canguna ñaupa huras Diosta mana uyajcuna acanguichi, astaumbas cuna Dios llaquishcara apishcanguichi Israelguna mana uyashcaraigu, 31 shinallara cuna caiguna mana uyajcuna anaushcami, paigunas cangunara llaquishcasna shinallara llaqui tucunauchu. 32 Dios tucui runaunara, “Mana caźujcunami,” nica, tucui paigunara llaquisha bindisiangaj. 33 ¡Ima ashca valij tupurai Diospa iyai, paihua yachanas! ¡Mana tupuihuajchu paihua taripanauna, mana ricuihuajchu paihua ñambiuna! 34 ¿Señorba iyaira pihuas yachacachu? ¿Pihuas paita camachijchu aca? 35 ¿Pita imaras paima ñaupara cuca, huasha cutipai tucungaj? 36 ¿Paihuajmi, paihuajtas, paimandas tucui imas tian. ¡Pai alabashca achu huinai huinaigama! Amen.
1 Shinajpi uquiuna, Dios cangunara llaquishcamanda, cangunara rugauni canguna aichara Diosta cuyaichi, shu causaj sacrificiora cuinta, chuyajlla, Dios chasquihuajllami. Caimi canguna Diosta iyaihua alabana. 2 Cai mundu causana samira ama catirichichu. Randi turcarichi, canguna iyaira mushujyachishcamanda, Diospa ali sumaj chasquinalla munaira yachangaj. 3 Ñuca nini, Dios ñucara cushca gracia ali llaquina iyaimanda, caran cangunajpi tiauta nini, pai quiquinmandallara ama yapajta iyarichu, astaun ali tupulla iyari, Dios caran duiñura cushca quirina tupui. 4 Imasnara shu aichai ashca partiuna tian, shinashas mana tucui partiuna chi tunullarara ranaun, 5 shinallara ñucanchi ashca partiuna ashallara, shu aichallami anchi Cristoi, caran aicha parti shinallara tucui chishuj partiunajmi. 6 Shinajpi caran duiñu shu tunu shu tunu cuyashcara charinchi, ñucanchira cushca gracia ali llaquina iyaimanda; Diosmanda rimana ajpi, quirishca tupui rimachu; 7 sirvina ajpi, sirvichu; yachachij yachachichu; 8 camachij camachichu; cuyaj ali shungumanda cuyachu; mandaj ricushalla mandachu; alira raj cushi shunguhua rachu. 9 Canguna llaquina sirtu llaquina achu; manali ranara chijnichi, ali ranara catichi. 10 Parijumanda llaquinuichi, uquipura cuinta; caran duiñu parijumanda ahuayachisha. 11 Canguna ranaunai ama quillasha raichi; sindij almahua Señorda sirvisha; 12 cushihua chapasha, turmindarinais ahuantasha; mana saquisha mañasha. 13 Quirijcuna ministishcaunai yanapaichi; shamujcunara pasiachichi. 14 Cangunara turmindachijcunara bindisiaichi. Bindisiaichi, ama maldisiaichichu. 15 Cushiunahua cushiyaichi; huacajcunahua huacaichi. 16 Shu iyaillahua cangunapura, ama mas tucujcuna aichi, astaun pugriunahua cumpañasha. Ama yachajcuna tucuichichu canguna quiquin iyaibi. 17 Pitas manalira manalihua ama pagaichichu. Aliranara ricuchichi tucui runauna ñaupajpi. 18 Ranalla ajpi, canguna ushashca tupura, cushihua causaichi tucui runaunahua. 19 Cangunamanda ama cutipaichichu, ñuca llaquishcauna, astaumbas lugarda cuichi Dios piñangaj. Quillcashca tian: “Cutipana ñucajmi, ñuca pagashami,” Señor nin. 20 Shinajpis, canda chijnij yarcachishca ajpi, paita carangui; upinaichishca ajpi, upichingui; shina rasha paita pingachingui. 21 Manalihua ama vinsi tucuichu, randi manalira alihua vinsi.
1 Caran runa gubirnura uyachu; pi gubirnus mana tian Dios mana munajpi; gubirnuunara Dios churashcaunami. 2 Maicambas gubirnura arcasha, Dios mandashcara arcan; arcajcuna cauźayanara apinaun paigunajta. 3 Taripajcuna ali rajcunara mana manzhachingaj tianaunzhu, astaun manali rajcunara. ¿Gubirnura mana manzhasha ningui? Alira rai. Gubirnu canda alabangami. 4 Paiga Diosta sirvijmi, canda yanapangaj. Astaun can manalira rasha, manzhai; mana yangamanda isparara apaunzhu. Gubirnu Diosta sirvijmi, paimanda pagajmi, manali rajta livachingaj. 5 Chiraigumanda gubirnura uyangaj ministirinmi, mana livanamandalla manzhasha, astaun ali rana iyaimanda. 6 Shinallara gubirnuma paganara pagaichi. Paiguna Diosta sirvijcunami casnallara rangaj. 7 Dibishcara pagaichi tucuigunama, gubirnu cullqui ajpi cullquira, pagana ajpi paganara, manzhana ajpi manzhanara, ahuayachina ajpis ahuayachinara. 8 Pitas ama imaras dibiyaichichu, astaun parijumanda llaquinaungaj. Maicans paihua mayambi causajta llaquisha, ley shimira pactachishcami. 9 Shinajpi, ama shujhua tacarichu, ama huañuchinguichu, ama shuhuanguichu, shujmanda ama llullanguichu, ama yapajta munanguichu. Shu camachishca shimi tiashas, cai shimi shinallarami nin: Camba mayambi causajta can cuintallara llaquinami angui. 10 Llaquina paihua mayambi causajta mana huajlichinzhu. Shinajpi ley shimira pactachij llaquinmi. 11 Hurasta ricsinguichi, ña puñunamanda lliccharina hurasmi. Ñucanchi quishpina ña mas mayanllayamushcami ñucanchi ñaupa quirishca hurasmanda, 12 Tuta pasashcami, ña punzhayaun. Llandu tuta ranaunara ichushunchi, punzha iru churarinara churarishunchi. 13 Punzhai cuinta purishunchi, ali shunguhua; mana yapajta micusha, mana machasha, mana shujhua tacarisha, mana nuspasha causasha, mana macananausha, mana chijnishas. 14 Astaun Señor Jesucristora churarichi, shu churarinara cuinta; aichara ama caźuichichu paihua munaira rangaj.
1 Ansalla quirij runara chasquichi, astaun mana pai iyashcaunara taripangaj. 2 Huaquin runa, “Tucuira micunami” nin; shuj, ansalla quirij asha, pangaunallara micun. 3 Micuj runa ama burlachu mana micujta. Shinallara mana micuj runa ama taripachu micujta. Dios paita chasquishcami. 4 ¿Pitangui can shujpa sirvijta taripangaj? Paihua quiquin patrumba ñaupajpi shayarin, urman. Shayaringami, Señorga ushajmi paita shayachingaj. 5 Shu runa punzhaunara chicanyachin, shujca tucui punzha shinallarami nin. Caran duiñu paihua quiquin iyaibi sirtura pacha yachachu. 6 Maican runas punzhara chicanyachisha, shina raun Diospa ñaupajpi; punzhara mana ricuj runas Diospa ñaupajpi punzhara mana ricun. Shinallara aichara micuj runa Diospa ñaupajpi micun, Diosta agrasisha; mana micuj runa Diospa ñaupajpi mana micun, shinallara Diosta agrasin. 7 Pi runas causasha, mana paihuajllara causan; pi runas huañusha, mana paihuajllara huañun. 8 Causaushas, Diospa ñaupajpi causaunchi; huañushas, Diospa ñaupajpi huañunchi. Causaushas, huañushas, Señorbajmi anchi. 9 Chiraigumanda Cristo huañuca, atarica, causarica pai Señor tucungaj huañushcaunamandas, shinallara causajcunamandas. 10 Shinajpi can, ¿imarasha camba uquira taripangui? Can, shinallara ¿imarasha camba uquira pishii urmachingui? Tucui ñucanchi Cristo taripana ñaupajpi shayarinami anchi. 11 Quillcashcami tian: “Causaunimi ñuca” Señor nin, “ñuca ñaupajpi tucui cunguri mucu cunguringami, tucui callu Diosta ricsisha rimangami.” 12 Shinajpi caran duiñu pai quiquinmanda Diosta cuintangami. 13 Shinajpi ama parijumanda taripanaushunchi, astaun ricuichi nijtachinaras urmachinaras ama churangaj camba uqui ñaupajpi. 14 Ñuca yachani, ñuca quirini Señor Jesuspi, imasnara mana imas iruschu pai quiquinmanda, randi pi runas imas irusmi iyajpi, paihuaj irus tucunmi. 15 Astaumbas can camba uquira llaquichisha micunamanda, ña mana llaquishcahua puriunguichu. Ama huajlichichu camba uquira camba micunamanda, imasna Cristo paimandas huañucami. 16 Canguna ali rana ama manali rimai tucuchu. 17 Dios mandana pacha mana micunachu, mana upinachu, astaun ali causana, ganas shungu, cushi shungus, Santu Ispiritui. 18 Maican runa cai samiunai Cristora sirvisha Diosta cushiyachin, runaunahuas “Alimi” nishca anga. 19 Shinajpi imaras ganas shungura cusha, imaras parijumanda shinzhiyarisha, caigunara catishunchi. 20 Diospa tarabanara ama huajlichichu micunamanda. Tucui micuna micunallami, astaumbas mana valinzhu shujcunara nijtachisha urmachingaj micunamanda. 21 Alimi aichara mana micungaj, vinuras mana upingaj, imaras mana rangaj, camba uquira ama urmachingaj, ama piñachingaj, ama irquiyachingaj. 22 Can, ¿quirinara charinguichu? Charilla canllara Diospa ñaupajpi. Cushimi maican runas mana paillara cauźayachij pai, “Alimi” nishcamanda. 23 Maican runas, “Micunallachu manzhu micunalla,” nisha micujpi, cauźayachishcami, mana quirisha micushcamanda. Tucuira mana quirinahua rashca uchami.
1 Shinajpi, ñucanchi shinzhiuna asha, irquiunamanda sambayashcara yanapana anchi, mana ñucanchillarara cushiyachisha. 2 Ñucanchimanda caran duiñu paihua mayambi causajta cushiyachichu ali ranahua, paita shinzhiyachingaj. 3 Quiquin Cristo mana paillara cushiyaricachu; astaun quillcashcasna: “Canda camijcuna camishcauna ñuca ahuai urmanauca.” 4 Ñaupa huras Quillcashcauna ñucanchira yachachingaj quillcanaushca aca, ñucanchi ahuantana shungumanda, Quillcashcauna cariyachishcamandas, ali chapanara charingaj. 5 Ahuantaj, cushiyachij Dios cangunara cuchu cangunapura shu iyaillara charingaj Cristo Jesuspi, 6 canguna shu iyaillahua, shu shimillahua Diosta sumajyachingaj, paimi ñucanchi Señor Jesucristo Yaya. 7 Chiraigumanda parijumanda chasquinuichi, imasna Cristo ñucanchira chasquica, Diosta sumajyachingaj. 8 Cangunara nini, Cristo Jesús judiugunara sirvij tucuca Dios sirtu ashcara ricuchingaj, Dios yayaunama cushca shimi ali ashcara ricuchingaj, 9 shinallara gentilguna Diosta sumajyachinauchu pai llaquishcaraigumanda, imasna quillcashcasna: “Chiraigumanda camba shutira rimasha gentilguna chaupi shungüi. Camba shutira cantashami.” 10 Cutillara nin: “Cushiyaichi, gentilguna, canguna runaunahua.” 11 Cutillara: “Señorda alabaichi, tucui gentilguna. Paita ahuayachichi, tucui runauna.” 12 Cutillara, Isaías nin: “Isaihua sapi tiangami, pai ataringami gentilgunara mandangaj; gentilguna paihuajpi chapanaunga.” 13 Chapanara cuj Dios cangunara undachichu tucui cushihua, tucui ganas shunguhuas canguna quirinai, canguna undanauchu ali chapanahua Santu Ispíritu ushaimanda. 14 Ñuca cangunara ali yachani, ñuca uquiuna, imasna canguna ali shunguhuas, tucui yachanahuas, undashca anguichi. Shina ajllaira parijumanda camachinaunara ushanguichi. 15 Shinajpi, uquiuna, cangunara quillcashcani pajlla pambai rimasha, cangunara iyachingaj Dios ñucama cushca gracia ali llaquina iyaimanda, 16 ñuca Jesucristora sirvij tucungaj gentilgunama, Diospa evangelio ali shimira camachisha, gentilguna shu ali sacrificio cuinta tucungaj, Santu Ispirituhua chuyayachishca, chasquinalla tucungaj, 17 Shinajpi Cristo Jesuspi cushiyani, ñuca Diospajta sirvishcai. 18 Rimanara mana munanichu shujcuna rashcaunara, astaumbas rimasha imaras Cristo ñucahua rashcara gentilguna uyangaj, shimiunahuas, rashcaunahuas, munanaita ranaunahuas, atun ushanahuas, Diospa Ispíritu yanapashcamanda. 19 Shinajpi Jerusalenmanda, muyujta tiaj llactaunais Ilírico partigama, tucui partiunara undachishcani Cristo evangelio ali shimihua. 20 Shina rasha tarabacani evangelio ali shimira yachachingaj, mana Cristo shutira ñaupa huras uyashca llactaunai, shu runa rashca ahuai ama shayachingaj. 21 Astaun, imasna quillcashca tian: “Paimanda mana rimashcauna ricunaungami, paimanda mana ima huraspas uyajcuna intindinaungami.” 22 Chiraigumanda ashca cuti arcashca acani cangunajma shamungaj. 23 Randi, cuna mana mas lugar tiajpi cai partiunai, shinallara ña ashca huataunai cangunajma shamusha nisha iyarishcani, 24 ñuca España llactama riushcai cangunajma shamusha. Ñuca pasaushcai cangunara ricusha nini, shinallara munani canguna ñucara ñambira cachangaj, cangunahua pasiashca huasha, 25 Cuna llucshiuni Jerusalenma ringaj, chihui aj quirijcunara sirvingaj. 26 Macedonia Acaya partiunai tiajcuna munanauca shu cuyanara cachangaj Jerusalembi tiau ministiu quirijcunama. 27 Casna munanauca, maspas dibiyujcuna anaun. Imasna gentilguna chigunamanda alma yanapanaunara apinaushca, ministirinmi paigunama aichara yanapanaunara cachangaj. 28 Shinajpi, caita rai pasashca huasha, cai cuyashcara intrigashca huasha, cangunajpi pasiashca huasha Españama risha. 29 Yachanimi, ñuca cangunajma shamuna huraspi, ashca Cristomanda evangelio ali shimii bindisiashcahua pactamusha. 30 Cangunara rugauni, uquiuna, Señor Jesucristomanda, Santu Ispíritu llaquishcamandas, ñucara yanapahuaichi, ñucamanda Diosta mañasha, 31 ñuca llushpirichu Judeai tiaj mana caźujcunamanda, shinallara mañasha Jerusalembi tiaj quirijcuna ñuca sirvishcamanda cuyashcara chasquinauchu; 32 ñuca cushihua cangunajma pactamuchu nisha, Dios munashcasna, ñuca cangunahua pariju samangaj. 33 Cushi shungura cuj Dios tucui cangunahua tiachu. Amen.
1 Ricuichi, nini, ñucanchi pani Fébera, pai Cencreaspi tiaj iglesiara sirvijmi. 2 Paita chasquichi Señorba shutii, quirijpurasna; paita imara cangunamanda ministijpi yanapaichi. Pai ashcaunara yanapajmi, shinallara ñucaras. 3 Priscilandi Aquilandi saluraichi, ñucahua pariju tarabajcuna Cristo Jesusta sirvinai. 4 Paiguna causaira churanauca ñucara quishpichingaj. Paigunara agrasinchi, mana ñucalla astaun tucui gentilguna iglesiaunandi. 5 Shinallara paiguna huasii tiaj iglesiara saluraichi. Ñuca llaquishca Epenetora saluraichi, pai Acayamanda ñaupa punda Cristoi quirijmi. 6 Saluraichi Mariara, pai ashcara tarabashcami cangunahua. 7 Andronicora Juniasta saluraichi, ñuca quiquin ailluuna, ñucahua pariju chunda cularbi cumpañajcuna, cachashca runauna llaquishcauna, shinallara ñucamanda ñaupara Cristoi quirijcuna. 8 Ampliasta saluraichi, ñuca Señorbi llaquishca amigu. 9 Urbanora saluraichi, ñucanchira yanapaj Cristo Jesusta sirvinai, shinallara ñuca llaquishca Estáquista. 10 Apélesta saluraichi, Cristora sirvinai, “Alimi,” nisha rimashca runa. Saluraichi Aristóbulo huasii tiajcunara. 11 Ñuca aillu Herodionda saluraichi, Narciso huasii tiajcunaras, Señorbi ajcunara. 12 Trifenara Trifosara saluraichi, Señorda sirvisha tarabajcunara. Saluraichi llaquishca Pérsidara, Señorbi ashcara tarabaj huarmimi. 13 Saluraichi Rufora, Señor ajllashca runara, shinallara paihua mamara, paiga ñuca mama cuintami. 14 Asíncritora, Flegóntera, Hermasta, Patrobasta, Hermestas saluraichi, paigunahua pariju tiaj uquiunandi. 15 Saluraichi Filólogora, Juliara, Nereora, paihua panindi, shinallara Olímpasta, tucui paigunahua pariju tiaj quirijcunandi. 16 Parijumanda saluranuichi shu sumaj muchanahua. Tucui Cristo iglesiauna cangunara saluranaun. 17 Cangunara rugauni, uquiuna, tucui quirijcunara chaupichijcunara ricsichi, tucui urmachijcunaras, canguna uyashca ali yachanara huajlichijcunaras. Paigunamanda anzhurichi. 18 Casnauna mana ñucanchi Señor Jesucristora sirvinaunzhu, astaun paiguna quiquin icsara, ali uyarij shimiunahua, yanga alabarina shimiunahuas mana yachajcunara umachinaun. 19 Canguna caźushca tucuigunama uyarishcami; chiraigumanda cangunamanda cushiyauni. Maspas, ñuca munani canguna ali ranaunai iyaiyuj tucungaj, astaun manali ranaunai mana yachajcuna. 20 Cushira cuj Dios uctalla Satanasta aitanga canguna chaqui ucui. Ñucanchi Señor Jesucristo gracia ali llaquina iyai cangunahua tiachu. 21 Ñucara yanapaj Timotea, ñuca ailluuna Lucio, Jasón, Sosípater cangunara saluranaun. 22 Ñuca, Tercio, cai quillcara quillcaj, cangunara salurauni Señorbi. 23 Gayo, ñucara pasiachij, shinallara tucui iglesiaras, cangunara saluraun. Erasto, llacta cullquira tandachij runa, cangunara saluraun, shinallara ñucanchi uqui, Cuarto. 24 Ñucanchi Señor Jesucristo gracia ali llaquina iyai tucui cangunahua achu. 25 Dios ushan cangunara shinzhiyachinara, imasna nin ñuca evangelio ali shimii, shinallara Señor Jesucristo camachishcais, imasna Dios pai pacashca shimira ricuchin, huiñaimanda pacashcara. 26 Astaun cuna huras ricuchishcami, shinallara Diosmanda rimajcuna Quillcashcaunai ricurin, imasna huiñai tiaj Dios mandashcasna, tucui runaunama rimashca, paiguna quirisha uyangaj. 27 Sapalla yachaj Diosta ahuayachishca achu Jesucristomanda huiñai huiñaigama. Amen.
1 Pablo, Diospa munaimanda cayashca Jesucristo cachashca runa tucungaj, ñucanchi uqui Sostenesndi, 2 Corinto llactai tiaj Diospa iglesiama quillcanchi, Cristo Jesuspi sumajyachishcaunama, chuyaj tucungaj cayashcauna, shinallara tucui Señor Jesucristo shutii mañajcunaras, maibi tiaushas, quillcanchi. Paiga paiguna Señormi, shinallara ñucanchijpas. 3 Gracia ali llaquina iyairas cushi shunguras charichi ñucanchi Yaya Diosmanda, shinallara Señor Jesucristomandas. 4 Tucui huras ñuca Diosta agrasiuni cangunaraigumanda, shinallara cangunama cushca Diospa gracia ali llaquina iyaimandas Cristo Jesuspi; 5 imasna canguna Cristoi pactajta bindisiai tucushcanguichi tucui shimiunais, tucui intindinais; 6 imasna Cristomanda cuintashca shimi ali sirtu ajta ricuchishcara cangunama. 7 Shina ajllaira canguna ñucanchi Señor Jesucristo ricurimunara chapausha, mana imas Dios cuyashca pishinzhu cangunahua. 8 Pai canguna quirishcai cangunara shinzhiyachingami puchucai punzhagama, canguna cauźa illaj tucungaj ñucanchi Señor Jesucristo shamuna punzhai. 9 Dios sirtu quirihuajllami. Pai cangunara cayaca paihua Churi ñucanchi Señor Jesucristohua pariju cumpañasha causangaj. 10 Cangunara rugauni, uquiuna, Señor Jesucristo shutira llaquishcamanda, canguna tucui chi tunui rimanguichi, ama chican chican chaupirisha, astaun tucui parijulla shu iyaillahua tucusha, shu iyarinallahua, shu ricunallahua. 11 Cloeguna cuintahuanauca imasna cangunapura piñanaushcara, uquiuna. 12 Casna rimasha nini: Cangunamanda shu runa nin, “Ñuca Pablo runami ani;” shuj, “Ñuca Apolospaj ani;” shuj, “Ñuca Cefaspaj ani;” shuj, “Cristojmi ani.” 13 ¿Cristo chaupirishcachu aca? ¿Pablo canguna randimanda chacatashcachu aca? ¿Pablo shutiichu bautisaricanguichiri? 14 Diosta agrasini imasna cangunamanda mana pitas bautisacanichu, randi Crispollara, Gayollara, 15 ama pihuas rimachu: “Pablo shutiimi bautisaricani.” 16 Maspas Estéfanaspa aillura bautisacani. Chishujcunamanda mana pitas bautisacani yachin. Mana iyai tianzhu. 17 Ñucara Cristo mana cachahuacachu bautisangaj, astaun evangelio ali shimira camachingaj. Mana rimacanichu yachashca shimihua, Cristo cruzta ama yanga rashca tucuchu. 18 Cruzmanda cuintana shimi yanga shimimi iyanaun chingariujcuna, randi ñucanchima, quishpichishcaunama, cai shimi Diospa ushaimi iyanchi. 19 Quillcashcami tian: “Yachajcuna yachanara huajlichishami, iyaiyujcuna iyaira ichushami.” 20 ¿Maibirairi yachaj? ¿Maibirairi ley shimira yachachij? ¿Maibirairi cuna huras rimaisiqui runa? ¿Manzhu Dios cai pacha yachanara yanga lucu shimira cuinta rashca? 21 Dios pai yachashcamanda cushcasna, mundu paita mana ricsicachu yachanamanda. Astaun Dios cucami quirijcunara quishpichingaj lucu cuinta shimira camachishcamanda. 22 Judiuguna munanaita rashcaunara ricunara munanaun; grieguuna yachanara mascanaun. 23 Astaun ñucanchi Cristora chacatashcara camachinchi, judiuguna ricujpi shu nijtana cuinta, gentilguna ricujpi shu yanga lucu shimi cuinta. 24 Randi cayashcauna ricujpi, judiu ashas, gentil ashas, Cristo Diospa ushaimi, Diospa yachanami. 25 Dios yanga samira rashca ima runa yachairas yalin. Dios irqui samira rashca runamanda yali shinzhimi. 26 Ricuichi uquiuna, imasna cayashca acanguichi. Cangunahua mana yapa ashca yachajcuna tian, runa ricujpi, mana yapa ashca ushajcuna, mana yapa ashca charijcuna. 27 Astaun Dios mundumanda upaunara ajllacami yachaiyujcunara pingachingaj; shinallara mundumanda mana ushajcunara Dios ajllacami ushajcunara pingachingaj. 28 Mundumanda pugriunaras, chijnishcaunaras Dios ajllaca, maspas imas illajta ajllaca tiajcunara tucuchingaj. 29 Dios shinami rarca pihuas ama ahuayarichu paihua ñaupajpi. 30 Cristo Jesuspi Diospajcuna anguichi. Dios rashcamanda Cristo ñucanchihua yachanas, ali dirichu tucunas, chicanyachinas, randinas tucushcami; 31 imasna quillcashcami tian: “Pihuas alabasha nisha, Diosta alabachu.”
1 Shina ajllaira, uquiuna, ñuca cangunajma shamushca huras, Diospa shimira rimangaj, sumaj shimiunahua yachana shimiunahuas mana shamucanichu. 2 Casna nisha iyacani: “Cangunajpi tiausha mana imaras yachashachu astaun Jesucristollara pai chacatarishcallara.” 3 Ñuca sambayashca asha, manzhasha chucchusha, cangunahua tiaucani. 4 Ñuca rimasha, ñuca camachisha, mana uyanalla shimihua, mana runa yachanahua rimacani, astaun Ispíritu ricuchishcahua, ushaihua rimacani. 5 Casna rimacani canguna quirina ama runauna yachashcai shayarichu astaun Diospa ushanai. 6 Shinajpi, yachana shimira ña yachajcunahua rimanchi. Cai yachana mana cai timpumandachu, mana cai timpu apuunamandachu. Chiguna tucui huañunaun. 7 Ñucanchi Dios pacashca yachana shimira rimanchi, paihua mana ricurij yachanara. Cai yachanara callari hurasmanda pacha Dios cuca ñucanchira sumajyachingaj. 8 Cai yachanara cai timpu apuunamandas mana pihuas intindicachu. Paiguna cai yachanara intindishca asha, Sumaj Ahua Pacha Señorda mana chacatanaunmachu aca. 9 Astaun, imasna quillcashca tian: “Ima ñahui mana ricushcaras, ima rinri mana uyashcaras, runa shungüi mana iyashcaras, caigunara Dios puruntushcami paita llaquijcunama.” 10 Shinajpi Dios caigunara ñucanchima ricuchishcami paihua Ispiritumanda. Ispirituga tucuira mascan, ricun, Diospa atun yachanandi. 11 ¿Pita yachan runa iyarishcaunara? Duiñu ispiritullami yachan. Shinallara Ispíritu iyarishcaunara mana pihuas yachacachu. Diospa Ispiritullami yachaca. 12 Cai pachamanda ispiritura mana apishcanchichu, astaun Diosmanda Ispiritura apishcanchi, pai ñucanchima cuyashcara ricsingaj. 13 Caita mana rimanchichu runamanda yachana shimiunahua, astaun Ispíritu yachachishca shimiunahua, Ispíritu iyarishcara, Ispíritu cushca shimiunahua rimasha. 14 Randi, yanga runa Diospa Ispíritu iyaigunara mana ansas ricsinzhu, “Yanga lucu shimimi,” nisha. Shinallara intindinara mana ushanzhu. Ispiritui intindinallami. 15 Ispirituyuj runa tucuira caman, randi mana pihuas paita camanzhu. 16 ¿Pita Señorba iyaira yachan? ¿Pita paita yachachinga? Astaun ñucanchi quiquin Cristo iyaira charinchimi.
1 Uquiuna, cangunahua rimanara mana ushanichu Ispirituyujcunara cuinta, astaun ucha aicha munaira catijcunara cuinta, Cristoi huahuauna cuinta ajcunara. 2 Lichi yacullara upichisha, micunara mana caracanichu. Chi huraspi, micunara mana ushacanguichi, cunagamas mana ushanguichichu. 3 Chara aicha munaira catijcuna anguichi. Chijnijcuna, piñanaujcuna cangunahua tiausha, ¿manzhu aicha munaira catijcuna anguichi, yanga runauna cuinta? 4 Shu runa nin: “Ñuca Pablomanda quirij ani;” shuj, “Ñuca Apolosmanda ani;” nin. Shina nisha rimasha, ¿manzhu aicha munaira catijcuna anguichi? 5 ¿Imami Pablo? ¿Imami Apollos? Diosta sirvijcunami anchi cangunara quirichingaj, Dios caran duiñuma cushcasna. 6 Ñuca tarpucani, Apolos yacura talica, astaun Dios iñachica. 7 Shinajpi tarpujpas, yacura talijpas mana imaschu, randi iñachij Dioslla valin. 8 Tarpujpas talijpas shujllami; shina ajllaira caran duiñu pai rashca tupura apingami. 9 Ñucanchi Dioshua pariju tarabajcuna anchi, cangunaga Diospa chagra, Dios shayachishca huasi cuinta anguichi. 10 Imasna Dios paihua gracia ali llaquina iyaira cuhuaca, ñuca shu huasi rana yachaj cuinta istandi siquira churacani. Shu runa chi ahuai huasira shayachin. Caran duiñu cuirachu imasna rashara shayachishcara. 11 Shu istandi siquira mana pihuas ushanzhu churanara. Ña churashca istandi siqui JesucristoIlami. 12 Cai istandi siqui ahuai, maicambas curira, cullquira, valij rumiunara, caspira, quihuara, pangaunara paltasha shayachisha, 13 caran duiñu rashca tunu ricuringami. Ricuchina punzhai ricsichishca anga. Ninai ricsichishca anga. Caran duiñu rashcara ninahua camashca anga, ima tunu ajpis. 14 Maican runa rashcauna shayachishcai paltashca mana rupajpi, paganara apingami. 15 Maican runa rashca rupajpi, pai pirdinga. Astaun pailla quishpingami, ninamanda quishpishcasna. 16 ¿Manzhu yachanguichi canguna Diospa templo huasi ashcara, imasna Diospa Ispíritu cangunajpi causashcara? 17 Maicambas Diospa huasira tulajpi, Dios paita tulangami. Diospa huasi santumi, cangunaga cai huasi anguichi. 18 Ama pihuas paillara umachichu. Cangunamanda maican runas, “Cai timpui yachajmi ani,” nisha, paihua yachanara saquichu, ali yachanara apingaj. 19 Dios ricujpi, cai mundu yachana yanga upa cuinta yachanami. Quillcashca tian: “Yachajcunara paiguna quiquin yachaushcai apin.” 20 Shinallara nin: “Yachajcuna iyarishcaunaras Señor yachan, imasna mana imajpas valinzhu.” 21 Chiraigumanda pihuas runaunai ama ahuayarichu. 22 Tucui imas cangunajmi: Pablo, Apolos, Cefas, cai pacha, causai, huañui, cuna huras, huasha huras, tucui, tucui cangunajllami. 23 Canguna Cristojmi anguichi, Cristoga Diospajmi.
1 Runauna ñucanchira ricsinauchu Cristora sirvijcunara cuinta, Dios pacashca shimiunara yachachijcunara cuinta. 2 Maspas ministirinmi yachachijcunahua shimira pactachijcuna anauchu. 3 Cangunas, shu camajcunas ñucara camajpi, mana yapa manzhanichu. Ñuca quiquinllaras mana camaunichu. 4 Ñucajpi ima manali rana iyairas mana charinichu. Shina ajllaira mana chimandachu ali tucuni. Ñucara camaj Señormi. 5 Shinajpi ama ñaupara taripanguichichu, Señor shamunagama. Pai tucui llandui pacashcaras punzhai ricuchingami, tucui runa shungüi rasha nisha iyarishcaunaras. Chi hurasllaira caran duiñu Diosmanda paita alabashcara apingami. 6 Cai tucuira ricuchishcani, uquiuna, ñucajpis Apolospajpis, shu ricuchina cuinta, cangunara llaquishcamanda, cangunara yachachingaj quillcashca shimira caźusha puringaj, ama mas tucusha, shu yachachijta valichisha shujta mana valichisha. 7 ¿Pita canda chicanyachin shujcunamanda? ¿Imara mana cuyashcara charinguiri? ¿Cuyashca ajpi, ima rasha mas tucungui mana apij cuinta? 8 Ña basta sacsashcanguichi. Ña charijcuna tucushcanguichi. Ñucanchi illaushcai rey apuuna cuinta mandanguichi. Canguna rey apuuna tucunauchu nisha munanchi, ñucanchis shinallara cangunahua pariju rey apuuna tucungaj. 9 Ñuca ricujpi, ñucanchi Dios cachashca runauna ajpi, pai ñucanchira churashcami puchucaigunara cuinta ricui tucungaj, huañungaj taripashcauna cuinta. Ricui tucushcanchi mundu ñaupajpi, angelguna ñaupajpi, runauna ñaupajpis. 10 Cristora llaquishcamanda upauna cuinta tucushcanchi, astaun canguna iyaiyujcuna anguichi; ñucanchi sambauna, randi canguna ursayujcuna; canguna ali rimashcauna, randi ñucanchi mana valishcauna. 11 Cunagama yarcachisha, upinaichisha, llushti asha, sajmai tucusha, huasi illaj tiashcanchi. 12 Sambayasha tarabanchi, ñucanchi quiquin maquillahua. Maldisiai tucusha, bindisianchi. Turmindachinaupis ahuantanchi. 13 Caminaupis ruganchi. Cunagama cai mundumanda shu chinda cuinta tucushcanchi, tucui runauna ichushca basura cuinta. 14 Caita mana quillcaunichu cangunara pingachingaj, randi camachingaj, ñuca quiquin llaquishca churiunara cuinta. 15 Canguna Cristoi chunga huaranga yachachijcunara charishallara, mana ashca yayaunara charinguichi. Ñuca Cristo Jesuspi canguna yaya tucucani, paihua evangelio ali shimimanda. 16 Chimanda nini, ñucara catirijcuna tucuichi. 17 Chiraigumandalla Timoteora cachacani, pai ñuca llaquishca churimi Señorbi, ñuca shimira pactachij. Cangunara iyarichingami ñuca Cristo ñambii puriushcara, ima samira yachachiuni tucui partii, tucui iglesiaunai. 18 Huaquinguna mas tucuisiquiuna tucushcanguichi, ñuca mana ima huraspas shamungaraushca cuinta. 19 Astaumbas Señor munajpi uctalla shamushami. Shamusha, mas tucuisiquiunara ricsisha; mana paiguna shimira, astaumbas paiguna ushaira yachangaj. 20 Dios mandana pacha mana shimiunamandallachu, astaun ushaimandami. 21 ¿Imara munanguichi? ¿Caspihuachu livachingaj shamusha? ¿Llaquij mansu shunguhuachu shamusha cangunajma?
1 Sirtu pacha uyarin, “Cangunahua shujhua tacarina tian,” nisha, gentilgunahua mana rimashca tunu. Shu runa paihua quiquin yaya huarmihua causaun, ninaun. 2 Canguna mas tucuisiqui anguichi. ¿Manzhu llaquirina acanguichi, casna raj runara cangunajmanda anzhuchingaj? 3 Sirtu pacha ñuca, cangunahua pariju mana tiaushallara ñuca aichai, astaun ispiritui tiausha, cangunahua tiaushcasna chita raj runara ña taripashcani. 4 Ñucanchi Señor Jesucristo shutii, canguna tandarisha, ñuca ispíritu shinallara cangunahua tiaushas, ñucanchi Señor Jesucristo ushaihua, 5 chi runara Satanasma intrigaichi, paihua aichara tucuchingaj, randi paihua ispíritu quishpichi tucuchu Señor Jesuspa punzhai. 6 Mana valinzhu canguna, “Alimi anchi” nishcara. ¿Manzhu yachanguichi imasna ansalla tanda punguichina pulvu intirura punguichin? 7 Shinajpi, rucu punguichina pulvura ichuichi, canguna mushuj tanda tucungaj, punguichina pulvu illaj, canguna ashcasna. Cristora, ñucanchira quishpichina burigura, ña huañuchishcami ñucanchimanda, ñucanchi pascua nishca cuinta. 8 Shinajpi, istara rashunchi, mana rucu punguichina pulvuhua, mana manali shungu manali rana punguichina pulvuunahua, astaun mana punguichishca tanda cuinta, ali ranahuas sirtu shimihuas istara rashunchi. 9 Cangunara quillcacani cartai shujhua tacarijcunahua ama cumpañangaj, nisha. 10 Randi, ñuca casna nisha, mana nicanichu cai pachai tiaj shujhua tacarijcunahua, cullquira yapajta munajcunahua, shuhuajcunahua, runa rashca diosta adurajcunahua ama cumpañangaj. Ñuca casna nisha rimashca ajpi, cai mundumanda llucshinara ministinguichima. 11 Astaun casna nishami quillcacani: “Shu uqui nishca runa shujhua tacarij ajpi, cullquira yapajta munaj ajpi, runa rashca diosta aduraj ajpi, maldisiaj ajpi, machaisiqui ajpi, shuhuaj ajpi, ama paihua puringuichi. Cai sami runahua micunais ama micunguichichu.” 12 ¿Ima rasha iglesiamanda canzhai aj mana quirijcunara taripaimacani? ¿Manzhu canguna iglesia ucui tiajcunara taripanguichi? 13 Iglesiamanda canzhai ajcunara Dios taripanga. Chi uchara raj runara cangunajmanda anzhuchichi.
1 Cangunamanda shuj shu uquira piñasha, ¿manzhu pingaringuichima mana quirijcuna ñaupajpi taripachingaj? ¿Manzhu quirijcuna ñaupajma rina aca taripachingaj? 2 ¿Manzhu yachanguichi imasna quirijcuna mundura taripanga ranaun? Canguna mundura taripanauna asha, ¿manzhu ushanguichi ichilla taripanaunaras? 3 ¿Manzhu yachanguichi imasna angelgunara taripana anchi? Shinajpi, maspas cai causaimanda taripanaunara taripanami anchi. 4 Cai causaimanda ima taripana tiajpis, ¿ima rasha quiricunamanda pishi valijcuna ñaupajpi taripachinguichi? 5 Cangunara pingachingaj shina nini. ¿Illanzhuiri cangunajpi shu iyaiyuj runa uquipura taripangaj? 6 Astaun, shu uqui shu uquira taripachin, astaun maspas mana quirijcuna ñaupajpi raun. 7 Cangunapura piñanujpi yapa mana valinzhu. Astaun, ¿ima rasha mana ahuantangui canda manali rashcara? ¿Ima rasha mana ahuantangui quichusha nishcara quichunauchu? 8 Randi canguna quiquin uquiunara manalira raunguichi, shinallara uquiunamandas quichunguichi. 9 Randi, ¿manzhu yachanguichi, Dios mandana pachara mana apinaungachu manalira rajcuna? Ama pandanguichichu: shujhua tacarijcunas, runa rashca diosta adurajcunas, huarmihua tacarijcunas, irusta rajcunas, caripura tacarijcunas, 10 shuhuajcunas, cullquira yapajta munaisiquiunas, machajcunas, camijcunas, umachisha quichujcunas, Dios mandana pachara mana apinaungachu. 11 Casna tunui causajcuna acanguichi huaquinguna. Astaumbas maillashca acanguichi, sumajyachishca acanguichi, ali dirichu tucushcanguichi Señor Jesucristo shutii, ñucanchi Diospa Ispiritumandas. 12 Tucui imaras ranallami ñucahua, astaun mana tucui valinzhu; tucui imaras ranallami ñucahua, shina ajllaira lugarda mana cunichu ima ranas ñucara vinsingaj. 13 Micunaga icsajmi, icsas micunajmi. Ishquindira Dios huasha tucuchinga. Runa aicha mana rashcachu aca shujhua tacarisha causangaj. Runa aicha Señorbajmi, Señorbas runajmi. 14 Señorda atarichij Dios shinallara ñucanchira atarichingami paihua ushaihua. 15 ¿Manzhu yachanguichi imasna canguna aicha quiquin Cristo aicha partimi? ¿Shinajpi Cristo aicha partira quichusha, shujhua tacarij huarmihua llutachishachu? ¡Mana! 16 ¿Manzhu yachanguichi imasna shu cari shujhua tacarij huarmihua llutarisha paigunapura shu aichalla tucun? Quillcashca tian: “Chi ishqui shu aichalla tucunaunga.” 17 Randi maicambas Señorhua llutarisha, paihua shu ispiritulla tucun. 18 Shujhua tacarinamanda miticuichi, Shu tunu uchauna aichamanda canzhaimi, randi shujhua tacarisha, duiñu paihua quiquin aichara huajlichin. 19 ¿Manzhu yachanguichi imasna canguna aicha Santu Ispíritu causana huasi ashcara, paiga canguna shungüi tian, Diosmanda paita charinguichi? Mana canguna quiquimbajchu anguichi. 20 Randishca acanguichi. Shina asha, Diosta ahuayachinguichi canguna aichai, canguna ispirituis. Diospajmi anaun.
1 Canguna quillcai tapushcamanda rimasha nini. Alimi anma cari huarmira ama llangangaj. 2 Astaun tacarisha tintarinamanda, caran duiñu paihua quiquin huarmira charichu, huarmis quiquin carira charichu. 3 Cariga huarmihua casarashcai ranaunara pactachichu, shinallara huarmis carihua. 4 Huarmi aicha mana paihuajchu astaun paihua carijmi. Shinallara cari aicha mana paihuajchu astaun huarmijmi. 5 Ama mitsanuichichu. Huaquin hurasllai ishquindimanda munashaga saquinauchu, cungaillai Diosta mañangaj. Chi huasha cutillara llutarinauchu, ama supai cangunara tintangaj ahuantanara mana ushashcamanda. 6 Ñuca casna rimani, mana mandasha astaun lugarda cusha. 7 Ñuca munani astaun tucui runauna ñuca cuinta anauchu. Randi caran duiñu Diosmanda paihua quiquin cuyashcara charin, shuj shu tunura, shujpas shu tunura. 8 Maltaunaras, huaccha huarmiunaras nini: “Alimi anmaca ñuca cuinta saquiringaj.” 9 Randi ahuantanara mana ushasha, casaranauchu; casaranaipi huañuusha, astaun alimi casarangaj. 10 Casarashcaunara mandani, huarmi carimanda ama llushpirichu. Caita mana ñuca mandashca astaun Señor mandashcami. 11 Llushpirishaga, ama shujta apichu; mana casna rasha cutillara llutarichu paihua quiquin carihua. Shinallara, cari ama ichuchu paihua huarmira. 12 Shujcunama casna nini ñuca, mana Dios rimanzhu: “Maican uqui shu mana quirij huarmira charisha, huarmi paihua pariju causasha nijpi, cari paita ama ichuchu. 13 Shinallara huarmi mana quirij carira charisha, cari paihua pariju causasha nijpi, huarmi paita ama ichuchu. 14 Mana quirij cari Diosma sumajyachishca tucun paihua huarmiraigumanda; shinallara mana quirij huarmi paihua cariraigumanda Diosma sumajyachishca tucun. Mana shina ajpi, canguna churiuna yanga huahuaunami anaunma, astaun cuna sumajyachishca huahuaunami. 15 Mana quirij llushpirisha nijpi, llushpirichu. Shina llushpirijpi, quirij uqui quirij pani lugaryanmi. Dios ñucanchira cayaca cushihua causangaj. 16 Huarmiga, ¿imarara yachangui, camba carira quishpichina ashca imaras? Cariga, ¿imarara yachangui camba huarmira quishpichina ashca imaras? 17 Caran duiñu Señor cushcallai causachu, Dios cayashcallai. Casnami mandani tucui iglesiaunai. 18 ¿Shu runa pai cayashcai circuncisionda rashcachu acai? Shina rashca asha saquirichu. ¿Shuj mana circuncisionda rashcai cayai tucucai? Ama rachu circuncisionda. 19 Circuncisionda ranas mana ranas mana imaschu, randi mandashca shimira pactachina yapa valin. 20 Caran duiñu Dios cayashca huraspi tiashcasna tiachu. 21 ¿Can cayashca huraspi, sirvijchu acangui? Ama llaquirichu. Randi lugaryana usharijpi, llushpiringuilla. 22 Maican runa sirvij ashcai cayashca tucujpi, Señorbi cacharishca runa cuinta tucun. Shinallara pihuas lugar ashcai cayashca tucujpi, Cristora sirvij runami tucun. 23 Paganahua randishca acanguichi. Shinajpi runaunara sirvijcuna ama tucunguichichu. 24 Shinajpi, uquiuna, imasna shu runa pai cayai tucushcasna, shinallara achu Diospa ñaupajpi. 25 Huanra huarmiunamanda ima mandashca shimiras mana charinichu Señormanda, randi ñuca iyaimandalla rimani. Shina ajllaira, Señor ñucara llaquishcamanda, ñuca shimi quirinallami. 26 Ñuca ricujpi, casna turmindarina huraspi alimi shu runa pai tiashcasnalla tiangaj. 27 Canga, ¿huarmiujchu angui? Ama mascaichu llushpirinara. ¿Huarmi illajchu angui? Casaranara ama mascaichu. 28 Randi can huarmira apisha, mana uchara rangui. Huanra huarmis casarasha, mana uchara ran. Shina ajllaira casarajcuna turmindarinaungami cai causaibi. Cai turmindarinamanda cangunara quishpichisha nicani. 29 Shina ajllaira uquiuna, cangunara nini, timpuuna tucurinaun. Cunamanda huarmiyujcuna mana huarmiyujcunasna causanauchu. 30 Huacajcuna mana huacajcunasna anauchu. Cushiyujcuna mana cushiyujcunasna anauchu. Randijcunas mana imaras charijcunasna anauchu. 31 Cai mundura gustajcuna mana gustajcunasna anauchu. Cai mundu ricurina tunu ña pasariunmi. 32 Ñuca munani canguna ama turbarisha tianauchu. Malta runa Señorbajta iyarin imasna rasha Señorda cushiyachingaj. 33 Randi, huarmiyuj cari mundura ricun paihua huarmira cushiyachingaj. 34 Cariyuj mana cariyujpas shinallara caran tunura iyarinaun. Huanra huarmi Señorbajta ricun sumajyachishca tucungaj, aichais ispirituis. Randi cariyuj huarmi cai mundumandara iyarin, imasna rasha carira cushiyachingaj. 35 Ñuca caita nini cangunara yanapangaj; canguna mana shu tujllai cuinta urmachingaj, astaun ima aliras, ima ali ricurijtas rai tucuchu, shinallara mana imais arcarichu canguna Señorbajma mayanllayamungaj. 36 Shu runa paihua huanra ushushira huanra charina mana valinzhu nisha iyajpi, pai ña rucuyaupi casarangaj, shinallara ministirijpi huarmi casarachu, shina rasha mana uchara ran. 37 Astaun pai shinzhi runa asha, ushushi casarangaj mana ministijpi, paihua munaira shinzhi huacachij asha, paihua ushushira mana casarachisha nisha iyasha, paita huanralla huacachisha nisha, alirami ran. 38 Shinajpi casarachij yaya alirami ran, mana casarachij yaya astaun mas alirami ran. 39 Casarashca huarmi paihua carihua huatashcami cari causaushcai. Randi cari huañujpi, huarmi ña lugaryashcami maicandas casarangaj, pai Señorbi quirij ajpi. 40 Randi, ñuca ricujpi, huarmi shinalla tiasha mas cushi tucunma. Casna rimasha, Diospa Ispíritu munaira charinimi nisha iyauni.
1 Runa rashca dioscunama ricuchishca micunamanda rimasha, ricsinchimi imasna tucui ñucanchi, “Yachanimi,” nisha iyaunchi. Yachana runara yanga atunyachin, randi llaquinaga iñachin. 2 Maicambas, “Ñuca yachanimi,” nisha, chara mana imaras yachanzhu, imasna rasha yachanara. 3 Maicambas Diosta llaquijpi, Dios paita ricsin. 4 Shinajpi runa rashca dioscunama ricuchishca micunamanda rimasha, ñucanchi yachanchi shu runa rashca dios mana imaschu cai mundui. Shu sapalla Diosmi tian. 5 Huaquin yanga dios nishcauna tiashas ahua pachais cai pachais, imasna ashca dioscunas ashca señorgunas tianaun, 6 shina ajllaira ñucanchihua shu sapalla Dios tian, Dios Yayami. Paimandalla tucui rashcauna llucshinaun, ñucanchis paihuajta causaunchi. Shinallara shu Señor Jesucristollami tiaun. Paimandalla tucui imaras rashca aca, ñucanchis paimanda anchi. 7 Randi mana tucui runauna caita intindinaunzhu. Huaquinguna ñaupa hurasmanda runa rashca dioscunara adurajcuna asha, cunagamas chi micunara micunaun chi dioscunama ricuchishcasna iyasha; shina rajpi, paiguna ali rana iyai samba asha huajlirin. 8 Micunamanda mana mas chasquihuaj tucunchi Diospa ñaupajpi. Micushas mana mas valij tucunchichu, mana micushas mana pishi valij tucunchichu. 9 Ricuichi canguna liuri ashcara samba uquiunara ama urmachingaj. 10 Shu runa canda runa rashca diospa huasi mesai tiajta ricusha, can Diosta ricsij runa ajpi, paiga samba runa asha, ¿manzhu runa rashca diosma ricuchishca micunara mas mas micungairi? 11 Shina rasha, can yachashcamanda chi samba uqui urmasha chingarin. Chi uquiraigumanda Cristo huañuca. 12 Shina rasha, can uquiuna ñaupajpi uchara rasha, paiguna samba iyaira chugrichisha, Cristo ñaupajpi uchara raungui. 13 Chiraigumanda, micuna ñuca uquira urmachijpi, ñuca ima huraspas mana micushachu aichara, ñuca uquira ama urmachingaj.
1 ¿Manzhu Dios cachashca runa ani? ¿Manzhu lugar runa ani? ¿Manzhu ricushcani ñucanchi Señor Jesucristora? ¿Manzhu Señorbi canguna ñuca tarabana anguichi? 2 Shujcuna ñucara mana cachashca runachu ninaupis, sirtu pacha canguna ricujpi cachashcami ani. Canguna mari ñucara cachashca ajta ricuchina anguichi Señorbi. 3 Ñucara cauźayachijcunama caimi ñuca cutipana. 4 ¿Manzhu dirichura charinchi micungajpas, upingajpas? 5 ¿Manzhu dirichura charinchi quiquin casarashca quirij huarmira pushangaj chishu cashashca runaunasna, Señorba uquiunasna, Cefasna? 6 ¿Ñucalla Bernabellahua dirichura mana charinchichu tarabanara saquingaj? 7 ¿Pi suldarus paihua quiquin cullquihuachu guirara rarca? ¿Pi runas uvillas yurara tarpusha, paihua muyumanda manzhu upingai? ¿Pi runas chivuunara cuirasha, paigunamanda lichira manzhu upingai? 8 ¿Yanga runasna caita rimasha ninichu? ¿Manzhu shinallara nin ley mandashca shimi? 9 Moisés cushca ley shimii casna nin: “Muyura aitasha llushtiu huagra shimira ama huataichu.” ¿Dios huagrallarachu casna rimasha cuiran? 10 ¿Manzhu ñucanchimandas iyarin? Ari, ñucanchira yachachingaj quillcashcami. Huachuj runa cushihua chapasha huachun. Muyura llushtij runas cushihua chapasha llushtichu, huasha micunara iyarisha. 11 Ñucanchi canguna ispiritui imaras tarpusha, ¿manzhu pallana anchi canguna charishcaunamanda? 12 Shujcuna cangunajmanda pallanaupi, manzhu ñucanchi maspas dirichura charinchi pallangaj? Casna rana dirichura mana apishcanchichu. Astaun imaras ahuantashcanchi Cristo ali evangelio shimira ama arcachingaj. 13 ¿Manzhu yachanguichi imasna Diospa huasii santu cosascunai tarabajcuna Diospa huasimanda micunaun, shinallara altarbi sirvijcuna altarmanda micunaun? 14 Shinallara Señor mandashca casnami: “Evangelio ali shimira camachijcuna evangelio shimimanda causanauchu.” 15 Astaun mana imaras apishcanichu caimanda, shinallara mana quillcashcanichu, “Shina tucuchu,” nisha ñucahua. Manara quichunaullaira cai ñuca cushi causaira, astaun huañunara munaima. 16 Ñuca evangelio ali shimira camachisha, ahuayanara mana ushanichu. Ursamanda camachinami ani. ¿Imara tucushairi Diospa shimira mana camachisha? 17 Caita ñuca munaimanda rasha, paganara charishami. Randi mana ali munaihua rasha, ñucara mandashca shimira pactachiuni. 18 Shina rasha ¿ima cuyashcarara apishairi? Caimi ñucara pagana: Cristo evangelio ali shimira camachisha, mana imaras apisha, yangamanda camachiuni, shimira camachishcamanda apinara ushashas, mana apinichu. 19 Mana pihuas ñucara mandajllaira, ñuca tucui runaunara sirvij tucushcani mas runaunara ganangaj. 20 Judiugunahua judiu cuinta tucucani judiugunara ganangaj. Ley mandashca shimira uyajcunahua ley shimira uyajsna tucucani uyajcunara ganangaj, ñuca mana uyaj ashallara. 21 Ley shimira mana charijcunahua ley shimira mana charij cuinta tucucani paigunara ganangaj, ñuca mana Dios mandashca shimi illaj asha, astaun Cristo mandashca shimira uyaj ani. 22 Samba ajcunahua samba sami tucucani, sambaunara ganangaj. Tucui runaunahua ima tunus tucucani, ima tunuras rasha huaquingunara quishpichingaj. 23 Cai tucuira rauni evangelio ali shimira llaquishcaraigumanda, paihua bindisianamanda imaras apingaj. 24 ¿Manzhu yachanguichi imasna pulasai callpaujcuna tucui callpanaun, astaun shujlla cuyashcara ganan? Shina callpaichi, ganangaj. 25 Maicambas callpasha nisha, paihua aicha munaira arcan; paiguna callpanaun ismunalla panga llaitura ganangaj, astaun ñucanchi mana ismuihuaj llaitura ganangaj callpaunchi. 26 Ñuca casna callpauni, mana yanga callpasha. Ñuca casna macanauni, mana huairallara macasha. 27 Astaun ñuca quiquin aichallara macauni, ñuca quiquin aichara sirvichinimi, ñuca shujcunara camachij tucushca huasha ama ichui tucungaj.
1 Uquiuna, mana munanichu canguna cungaringaj imasna ñucanchi yayauna tucui puyu ucui tianauca, tucui Puca Lamarda pasanauca. 2 Moiseshua tucui bautisarinauca puyuis lamarbis. 3 Ispíritu micunara tucui chi tunullara micunauca. 4 Ispíritu upinara tucui chi tunullara upinauca, Dios cushca rumimanda llucshijta, paigunara catij rumimanda. Cai rumi Cristomi aca. 5 Shina ajllaira paigunamanda ashcaunahua Dios mana cushiyacachu. Chimanda tiyu pambai ichurinauca. 6 Casna tucuca ñucanchira yachachingaj, ama paiguna cuinta irusta munangaj paiguna munashcasna. 7 Ama runa rashca dioscunara aduranguichichu, paigunamanda huaquinguna rashca cuinta, imasna quillcashcasna: “Runauna tiarinauca micungaj, upingaj; chihuasha atarinauca pujllangaj.” 8 Ama shujcunahua tacarishunchi, paigunamanda huaquinguna rashca cuinta, imasna paiguna shina rashcamanda ishqui chunga quinsa huaranga tupu huañunauca shu punzhallai. 9 Ama tintashunchi Señorda, paigunamanda huaquinguna rashca cuinta, imasna ashcauna shina rajpi machacuiguna huañuchinauca. 10 Ama piñashunchi Diosta, paiguna piñashca cuinta; huañuchij angel paigunara huañuchica. 11 Cai tucui tucuca shu ricuchina cuinta, ñucanchira yachachingaj quillcashca aca, ñucanchi puchucai punzhaunai causaujcuna ajta. 12 Shinasha, maicambas Alimi shayauni, nisha iyasha, ali iyarichu ama urmangaj. 13 Runaunara apina tintanaunalla cangunara apishcami. Dios paihua shimira pactachijmi, mana lugarda cungachu shu mana ahuantaihuaj tintana canda apingaj, astaun tintanahua pariju shu quishpinara cachamungami canguna ahuantangaj. 14 Shinajpi, llaquishcauna, runa rashca diosta aduranamanda miticuichi. 15 Iyaiyujcunara cuinta cangunara rimauni. Ñuca rimashcara camaichi. 16 Ñucanchi bindisiana vasura bindisiasha, ¿manzhu upiusha Cristo yahuarda pariju iyariunchi? Ñucanchi paquina tandara, ¿manzhu micusha Cristo aichara pariju iyariunchi? 17 Imasna tanda shujlla ajpi, ñucanchi ashcauna ashas, shu aichallami anchi, tucui ñucanchi shu tandallara micushcamanda. 18 Israel runaunara iyarichi paiguna causana tunui. Sacrifício rashcaunara micujcuna, ¿manzhu altarmanda micunaun? 19 ¿Imasna ajpira shina nini? ¿Runa rashca dios sirtu diosmi ninichuiri? ¿Runa rashca dioscunama sacrificioi ricuchishca micuna valijmi ninichuiri? 20 Mana shina ninichu. Astaun caita nini: Gentilguna sacrificiora rasha, supaigunama ricuchinaun, mana Diosma. Canguna supaigunahua pariju rangaj mana munanichu. 21 Señorba vasura upiusha, supaihua vasuras mana ushanguichichu upinara. Señorba mesai tiarisha, supaiguna mesais mana ushanguichichu tiarinara. 22 ¿Señorda piñachishunzhuiri? ¿Paimanda yali ushajchu anchi? 23 Tucuira rangaj lugarmi ani, shina ajllaira mana tucuichu sirvin rangaj. Tucuira rangaj lugar ani, shina ajllaira mana tucuichu sirvin rangaj. Tucuira rangaj lugar ani, shina ajllaira mana tucuichu ñucara shinzhiyachin. 24 Pihuas paihua quiquin ali tucunara ama mascachu, astaun shujpaj ali tucunara mascachu. 25 Imaras aicha catuna huasii catushcara micuichilla, ama imaras tapusha ali rana iyaimanda. 26 Cai pacha Señorbajmi, shinallara cai pachai tiajpas paihuajllami. 27 Shu mana quirij runa cangunara cayajpi micungaj, canguna rinara munasha, imara carashcaras micuichilla, mana imaras tapusha ali rana iyaimanda. 28 Randi shuj cangunama nijpi: “Caiga runa rashca diosma sacrificioi ricuchishcami aca,” ama micunguichichu, chi runaraigumanda, paihua ali rana iyaimanda. 29 Paihua ali rana iyaimanda, nini, mana cambajchu. ¿Imaraigu shujpa ali rana iyaimanda ñuca taripashca ashairi? 30 Ñuca, “Pagarachu,” nisha micusha, ¿ima rasha cami tucushai chi ñuca agrasishca micunamanda? 31 Shinajpi, micushas upishas, imara rashas, tucuira raichi Diosta ahuayachingaj. 32 Ama imaras raichichu shujcunara urmachingaj, judiu ajpis, griegu ajpis, Diospa iglesia ajpis. 33 Ñucas shinallara imara rashas, tucui runaunara cushiyachini, mana ñuca quiquin ali tucunara iyarisha, astaun ashcaunara iyarisha, quishpinauchu, nisha.
1 Ñucara catirichi, imasna ñucas Cristora catirini. 2 Cangunara nini: alimi rashcanguichi, uquiuna, tucuibi ñucara iyarishcamanda, shinallara yachachishca shimiunara ñuca rimashcasna huacachishcanguichi. 3 Shina ajllaira canguna yachangaj munani imasna caran cari uma Cristomi; shinallara caran huarmi uma paihua carimi. Cristo uma Diosmi. 4 Maican cari paihua umara quillpashcahua Diosta mañasha, Diosmanda rimashas, paihua umara pingachin. 5 Randi huarmi, Diosta mañasha, Diosmanda rimasha, mana umara quillpasha, paihua umara pingachin. Paihua uma llambu rutushcasna tucun. 6 Shu huarmi paihua umara mana quillpasha, acchara pitichu. Pinganaita tucuna ajpi acchara pitingaj, rutungaj, umara quillpachu. 7 Cariga umara ama quillpachu. Pai Diospa ricurinami, Diospa sumajta ricuchin. Astaun huarmi cari sumajta ricuchin. 8 Cari mana huarmimandachu, astaun huarmi carimanda rashca aca. 9 Shinallara cari mana huarmiraigumandachu rashca aca, randi huarmi cariraigumanda rashca aca. 10 Chimanda huarmi caźuna quillpaira charinami anga umai angelguna ricuushcamanda. 11 Astaun Señorbi cari huarmira ministin, shinallara huarmis carira mistin. 12 Imasna huarmi carimanda rashca aca, shinallara cuna cari huarmimanda pagarin. Randi tucui Diosmanda shamun. 13 Canguna ricujpi, ¿shu huarmi umara mana quillpasha Diosta mañajpi alichu? 14 ¿Manzhu canguna quiquin iyaibi pinganaita shu cari suni acchara charingaj? 15 Astaun huarmi suni acchayuj asha, cai paihuajta valin. Acchara paima cushcami quillpangaj. 16 Shina ajllaira huaquinguna cai shimira mana munajpis, ñucanchi huarmi mana quillpana yachaira mana charinchichu; shinallarami tucun Diospa iglesiaunai. 17 Ñuca ña rimangaraushcai cangunara mana alabaunichu. Canguna tandarisha, alira mana raunguichichu astaun manalira. 18 Ñaupa punda, uyauni: canguna iglesiai tandarisha chicanyanguichi, caran muntun tucusha. Caita ñaca ñaca quirinimi. 19 Ministirinmi huaquin shu tunu iyarijcuna tiangaj cangunahua, alimi nishcauna ricsi tucungaj cangunahua. 20 Shinajpi canguna tandarisha, Señorba cenara micungaj mana shamunguichichu. 21 Astaun, caran duiñu paihua quiquin micunara uctalla micusha nin. Shina rajpi, shu runa yarcaihua tian, shuj machan. 22 ¿Manzhu huasiunara charinguichi, chihui micungaj upingaj? ¿Casna rasha, Diospa iglesiara pishiyachinguichichu? ¿Mana charijcunaras pingachinguichichu? ¿Imara nishairi ñuca? ¿Cangunara alabashachu? ¡Mana! Caimanda mana alabanichu cangunara. 23 Ñuca cangunara yachachishcara quiquin Señormanda apicani. Señor Jesús paita intrigana tutai tandara apica; 24 Diosta agrasishca huasha tandara paquica.”Apichi, micuichi,” nica; “caiga ñuca aichami cangunajta paquishca. Caita ranguichi ñucara iyaringaj.” 25 Shinallara micui pasashca huasha vasura apica, casna nisha: “Cai vasu mushuj pactachina shimimi, ñuca yahuarbi cushca. Caran cuti upisha, ñucara iyarisha ranguichi.” 26 Shinajpi caran cuti cai tandara micusha, vinura upishas, Señor huañushcara ricuchinguichi pai shamunagama. 27 Maicambas cai tandara mana iyarishcahua micusha, Señorba vasura mana iyarishcahua upishas, Señorba aicharas yahuardas pishyachishcamanda cauźayachi tucungami. 28 Chimanda caran duiñu paillara camachu, shina rasha tandara micuchu, vasura upichu. 29 Maicans yangamanda micusha upisha, Señorba aichara mana iyarisha, taripanara micun, upin paihuajta. 30 Chimanda ashca sambauna, ashca ungushcauna tianaun cangunahua, ashcauna huañuibi puñunaun. 31 Ñucanchi ñucanchillara tariparisha, mana taripai tucunchimachu. 32 Astaun taripai tucujpi, Señor ñucanchira livachin, ñucanchi ama munduhua pariju cauźayai tucungaj. 33 Shina ajpi, ñuca uquiuna, canguna micungaj tandarisha, parijumanda chapaichi. 34 Maicambas yarcachishca asha, paihua quiquin huasii micuchu, canguna tandarishcai ama taripai tucungaj. Ñuca shamusha charaj mana alichishcaunara alichishami.
1 Mana munanichu, uquiuna, canguna yachai illaj tucungaj Ispíritu cuyashcaunamanda. 2 Canguna yachanguichi imasna mana quirishca huraspi maimas pushai tucusha runa rashca upa dioscunara caticanguichi. 3 Chimanda intindipaichi mana pihuas Diospa Ispirituhua rimanzhu: “Jesús maldisiashca achu,” nisha. Shinallara mana pihuas rimanara ushanzhu, “Jesús Señormi,” nisha, Santu Ispíritu mana paita yanapajpi. 4 Ima tunu cuyashcas tianmi, randi Ispíritu chi tunullarami. 5 Ima tunu sirvinas tianmi, randi Señor chi tunullarami. 6 Ima tunu tarabanas tianmi, randi tucuira raj Dios chi tunullarami. 7 Caran duiñuma Ispíritu ricurinara cushcami yanapangaj. 8 Shujma ali iyarina shimira cushcami Ispiritumanda, shujma ali yachana shimira cushcami chi quiquin Ispiritumanda. 9 Shujma quirinara chi Ispiritumanda cushcami; shujma ungüigunara alichinara chi Ispiritumanda cushcami. 10 Shujma munanaita ranara rangaj cushcami; shujma Diosmanda shimira rimangaj; shujma ispirituunara ricsinara; shujma shu tunu shimiunara rimanara; shujma shu tunu shimiunara chimbachinara cushcami. 11 Cai tucui ranauna shu Ispiritumandallami, caran duiñuma cun pai munashcasna. 12 Imasna runa aicha shujllami, shina ajllaira ashca partiunara charin, chi tucui partiuna ashcauna ajllaira shu aichallami tucun; shinallarami Cristo. 13 Shu Ispiritullai tucui bautisashca acanchi shu aichallai, judiuguna ashas, grieguuna ashas, sirvijcuna ashas, lugarguna ashas. Tucui ñucanchi chi Ispiritumandalla upichishca anchi. 14 Aicha mana shu partillachu, astaun ashca partiunara charin. 15 Chaqui, “Mana ñahui asha, mana aichamandachu ani,” nijpi, shina nijpi ¿manzhu aichamanda tucun? 16 Rinri, “Mana ñahui asha, mana aichamandachu ani” nijpi, shina nijpi, ¿manzhu aichamanda tucun? 17 Intiru aicha ñahuilla ajpi, ¿maibirairi rinri? Intiru aicha rinrilla ajpi, ¿maibirairi muctina? 18 Cuna Dios caran partira aichai churashcami, pai munashcasna. 19 Tucui aicha shuj partilla ajpi, ¿maibirai intiru aicha? 20 Cuna randi, ashca partiuna tiashallara, shu aichallami tucun. 21 Ñahui maquira rimanara mana ushanzhu, “Canda mana ministinichu,” nisha. Shinallara uma chaquiunara rimanara mana ushanzhu, “Cangunara mana ministinichu,” nisha. 22 Astaun aichamanda samballa yachij partiuna maspas ministirinaun. 23 Aicha partiuna pishi valijcuna yachijpi, mas sumajlla churachinchi, mana ali ricurij partiunara mas alira cuiranchi. 24 Ali ricurij partiuna mana ministinaun yanapanara. Astaun Dios tucui aicha partiunara ali churashcami, mana ali ricurij partiunara mas valichisha, 25 tucui aicha partiuna ama chican chican anauchu, astaun tucui partiuna parijumanda cuiranauchu. 26 Shina ajpi shu parti turmindarijpi, tucui partiuna turmindarinaun. Shu parti ahuayachishca ajpi, tucui partiuna pariju cushiyanaun. 27 Canguna Cristo aichami anguichi, caran duiñu paihua aichamanda shu partillami. 28 Dios paihua iglesiai caran tunu cuyashcaunara churashcami; ñaupa punda pai cachashca runauna, chi huasha Diosmanda rimajcuna, chi huasha yachachijcuna, chi huasha munanaita rajcuna, chi huasha ungüigunara alichijcuna, shujcunara yanapajcuna, mandajcuna, shu tunu shimiunara rimajcuna 29 ¿Tucuichu cachashca runauna anaun? ¿Tucuichu Diosmanda rimajcuna? ¿Tucuichu yachachijcuna? ¿Tucuichu munanaita rajcuna? 30 ¿Tucuichu ungushcaunara alichinara ushanaun? ¿Tucuichu shu tunu shimiunara rimanaun? ¿Tucuichu shu tunu shimiunara chimbachinaun? 31 Mas valij cuyashcaunara mascaichi. Randi shu yali valij ñambira cangunara ricuchini.
1 Ñuca runa shimira rimashas, angelba shimira rimashas, mana llaquishcahua rimajpi uyarij, yanga tilin, tilin uyarij campana cuintalla ani. 2 Diosmanda shimira rimanara ushashas, tucui pacashcara, tucui yachanara intindiushas, urcura anzhuchina tupu quirinara charishas, astaun mana llaquisha, mana imajpas valinichu. 3 Ñuca tucui charishcaunara cuyashas mana charijcunara carangaj, ñuca quiquin aichara rupachingaj cushas, astaun mana llaquisha, mana imajpas sirvinzhu. 4 Llaquina unaira chapanmi, ali shunguyujmi; mana chijninzhu, mana pimandas yali tucusha ninzhu, “Yapa valinimi,” nisha mana rimanzhu. 5 Ima mana ricuihuajtas mana ranzhu, paihuajllara mana mascanzhu, mana dsaslla piñarinzhu, ima manali rashcaras mana iyarinzhu. 6 Manali ranaunai mana cushiyanzhu, randi sirtu shimira uyasha cushiyanmi. 7 Tucuira ahuantan, tucuira quirin, tucuira chapan, tucuira ahuantasha chasquin. 8 Llaquina mana ima huras tucuringachu, astaun Diosmanda rimashcauna illanaunga, shu tunu shimiuna tucurinaunga, shinallara yachana pasangallami. 9 Ñucanchi chaupira ricsinchi, Diosmanda rimanara chaupira rimanchi. 10 Shina ajllaira ali pactajta aj shamusha, ima mana pactajtas pasangami. 11 Ñuca huahua ashcai, huahua cuinta rimacani, huahua cuinta iyaricani, huahua cuinta intindicani. Astaun shunguyuj tucusha, huahua tunu ranara saquicani. 12 Cuna ispijui ricushca cuinta, mana chiujlla ricunchichu, randi huasha huras ñahuipura ricushun. Cuna chaupira yachani, huasha tucuira ricsishami, imasna ñuca ali ricsishca acani. 13 Shinajpi quirinas, chapanas, llaquinas saquirinaunmi, cai quinsa. Randi caigunamanda yali valij llaquinami.
1 Llaquina ñambira catichi. Ispiritui cuyashcaunara mascaichi, maspas Diosmanda shimira rimangaj. 2 Shu tunu shimiunara rimaj Diosmalla riman, mana runaunama. Mana pihuas intindinzhu pai rimashcara, Ispiritumanda pacashca shimira rimajpi. 3 Astaun Diosmanda rimaj runaunama riman, paigunara iñachingaj, cariyachingaj, cushiyachingaj. 4 Shu tunu shimira rimaj pai quiquinllara shinzhiyachin, randi Diosmanda rimaj iglesiara iñachin. 5 Shina ajllaira, ñuca munani tucui canguna shu tunu shimiunara rimanauchu, astaun mas munani canguna Diosmanda rimangaj. Shu tunu shimiunara rimaj pishi valijmi, pai shimira mana chimbachijpi iglesia intindingaj. Yali valinmi Diosmanda rimaj. 6 Uquiuna, ñuca cangunajma shamusha, shu tunu shimiunara rimasha, ¿imajta valingai cangunara yanapangaj, ñuca mana rimajpi shu ricuchishca shimira, shu yachana shimira, shu Diosmanda rimashcara, shu camachina shimira? 7 Causana illaj tucanauna uyarijpi, llautasna, guitarasna, mana intindinalla uyarijpi, ¿imasna rashara llautahua guitarahua tucashcara yachana angai? 8 Curmetara mana ali tucajpi, pita yachangai guirara ranara puruntungaj? 9 Shinallara canguna mana intindihuajta rimajpi, ¿pita intindingai canguna rimashcara? Huairai yanga rimashca cuinta tucunga. 10 Cai mundui ashca ima tunu shimiunas tianmi. Tucui shimi alimi uyarin. 11 Shina ajllaira ñuca mana chi shimira intindisha, chi shimira rimajhua ñuca shu carumanda shamuj cuinta tucusha, shinallara paihuas shu carumanda runa cuinta angami ñucahua. 12 Cangunahua shinallarami. Ispiritumanda cuyashcaunara munaichi; iglesiara shinzhiyachina cuyashcaunara ashcara mascaichi. 13 Chiraigumanda maicambas shu tunu shimira rimasha, chimbachina ushaira Diosmanda mañachu. 14 Ñuca shu mana ricsishca shimii Diosta mañajpi, ñuca ispíritu mañan, randi ñuca iyaibi mana imaras intindinichu. 15 ¿Imara rashai? Ispirituhua mañasha, shinallara iyaihuas; ispirituhua cantasha, shinallara iyaihuas. 16 Can ispiritullai Diosta bindisiajpi, shu mana intindij runa can rimashcara uyasha, mana intindisha, ¿ima rashara “Amen” nishcara ningairi can agrasishcai, can rimashcara mana intindisha? 17 Canga ali pacha agrasiungui, shina ajllaira chi runa mana intindisha, mana shinzhiyai tucun. 18 Diosta agrasini ñuca tucui cangunamanda yali shu tunu shimiunahua rimauni. 19 Iglesiai ima chunga huaranga shimiunara mana ricsishca shimii rimashcamanda yali, shu pichca shimiunara intindinahua rimangaj munani, shujcunara yachachingaj. 20 Uquiuna, ama huahuauna cuinta iyanguichichu, astaun uchara ranaunai huahuauna cuinta aichi; randi iyarinaiga rucuuna cuinta tucuichi. 21 Ley mandashca shimii quillcashca tian: “Shu tunu shimiunahuas, shu tunu rimaj shimi caraunamandas, cai runaunama rimashami, shina ajpis mana uyahuanaungachu,” Señor nin. 22 Shinajpi, shu tunu shimiuna ricuchina cuinta tucunaun, quirijcunamaga mana, randi mana quirijcunama, astaun Diosmanda shimiuna shu ricuchina cuinta tucunaun, mana mana quirijcunama randi quirijcunama. 23 Intiru iglesia shujpi tandarijpi, tucui runauna mana ricsishca shimiunahua rimanaupi, mana intindij runauna, mana quirij runaunas icusha, ¿manzhu “Lucuunami,” nisha rimanaungai? 24 Randi tucui quirijcuna Diosmanda rimaupi, shu mana quirij, shu mana intindij runa icusha, uyasha, tucui runauna rimashcamanda paihua uchara riparanga, tariparinga. 25 Paihua shungüi pacashca ricuringami. Shina tucujpi tuama urmasha, Diosta adurangami, “Sirtu pacha Dios caibimi tiaun cangunahua,” nisha. 26 Shinajpi, ¿imarai, uquiuna? Canguna tandarijpi, caran duiñu shu cantanara, shu yachachina shimira, shu Diosmanda shimira, shu mana ricsishca shimira, shu shimira chimbachishcara charin. Tucuira raichi shujcunara shinzhiyachingaj. 27 Mana ricsishca shimiunara rimanaupi, ishquilla quinsalla rimanauchu, shuj shujlla rimasha; shuj chimbachichu rimashca shimiunara. 28 Shu chimbachij runa illajpi, chunlla saquirichu iglesiai. Pailla shungu ucullai rimachu Diostas. 29 Shinallara Diosmanda rimajcuna ishquilla quinsalla rimanauchu, shujcuna paiguna rimashcara camanauchu. 30 Ima shimira ricuchishca ajpi shu tiau runara, ñaupa rimaj saquichu. 31 Tucui Diosmanda rimanara ushanguichimi, shuj shujlla rimasha, tucui yachanauchu, tucui cariyashca anauchu. 32 Diosmanda rimajcuna ispirituuna Diosmanda rimajcunara uyanaun. 33 Dios mana mulujta rajchu, randi sumajta raj Diosmi. 34 Imasna tucui quirijcuna iglesiaunai, canguna huarmiuna chunlla tianauchu tandarishcaunai. Paigunara mana lugarda cushcachu rimangaj, astaun caźunauchu, ley mandashca shimi rimashcasna. 35 Huarmiuna imaras yachasha nisha, cariunara tapunauchu huasii. Shu huarmi tandarishcai rimajpi pinganaitami. 36 ¿Imarairi? ¿Cangunamandachu llucshica Diospa shimi? ¿Cangunamallachu pactamuca? 37 Maicambas, “Diosmanda rimajmi ani, Ispirituyujmi ani,” nisha, pai ñuca quillcashcara Señor mandashcauna ajta ricsichu. 38 Maicans caita mana ricsisha, paihuas ama ricsi tucuchu. 39 Shinajpi, uquiuna, Diosmanda rimanara mascaichi; shinallara runauna shu tunu shimiunara rimanara ama arcaichichu. 40 Tucui ranaunara ali sumajlla raichi, caran shuj paihua turnui.
1 Uquiuna, cangunara iyachisha nini ñuca cangunara camachishca evangelio ali shimira. Cai shimira uyacanguichi, shinallara catiunguichi. 2 Cai shimi cangunara quishpichinmi, canguna ñuca camachishca shimira ali huacachijpi, mana yanga quirishca ajpi. 3 Naupa punda ñuca quiquin uyashcara cangunara yachachicani: Cristo ñucanchi uchamanda huañuca, Quillcai quillcashcasna. 4 Pambashca aca, quinsa punzhai causarica, Quillcai quillcashcasna. 5 Cefasma ricurica, huasha chunga ishqui yachachishca runaunamas. 6 Chimanda huasha, pichca patsaj yali quirijcunama ricurica. Chigunamanda ashcauna cunagama causanaun, huaquinguna ña huañusha puñunaun. 7 Chimanda huasha, Jacoboma ricurica, huasha tucui cachashca runaunama. 8 Tucuimanda puchucaibi, ñucaras ricurica, shu cungaimanda llucshij huahuara cuinta. 9 Ñucaga cachashca runaunamanda pishi mani, mana valinichu cachashca runa nii tucungaj, ñuca Diospa iglesiara turmindachij ashcamanda. 10 Shina ajllaira Diospa gracia nishca ali llaquishcamanda, ñuca casna tucushcani. Pai llaquishcara ñucama mana yangachu ricuchishca aca. Astaun ñuca tucui chishu cachashca runaunamanda yali shinzhira tarabacani. Shina ajllaira mana ñucachu acani astaun ñucajpi tiau Diospa gracia nishca ali llaquina. 11 Shina ajpi, ñuca ashas, paiguna ashas, shinami camachicanchi, shinallara quiricanguichi. 12 Shina ajpi, Cristo huañushcaunamanda causarishcami nisha camachijpi, ¿imasna ajpira cangunamanda huaquinguna ninaun: “Huañuimanda ima causarinas illanmi?” 13 Huañuimanda causarina illajpi, Cristos shinallara mana causarinmachu aca. 14 Cristo mana causarishca ajpi, yangami anmaca ñucanchi camachishca shimi, yangamanda quirishcanguichimaca. 15 Ñucanchi Diosmanda yanga llullasha rimajcuna anchima. Ñucanchi, “Dios Cristora causachica,” nicanchi, astaun mana shinachu aca, huañushcauna sirtu pacha mana causarijpi. 16 Huañushcauna mana causarijpi, Cristos mana causarishcachu, 17 Cristo mana causarishca ajpi, yangamanda quirishcanguichi, chara canguna uchai causaunguichi. 18 Shinallara Cristoi huañusha puñujcunas chingarinaushcami. 19 Cai causallai ñucanchi Cristoi quirisha chapausha, tucuigunamanda yali llaquinaitauna manchi. 20 Randi, sirtu pacha Cristo huañuimanda causarishcami, puñushcaunamanda ñaupa punda causarij tucushca. 21 Imasna shu runamanda huañuna shamuca, shinallara shu runamanda huañunamanda causarinas shamucami. 22 Imasna Adanmanda tucui huañunaun, shinallara Cristomanda tucui causarinaungami. 23 Caran duiñu paihua huraspi causaringa, Cristo ñaupa punda causarij, chimanda huasha Cristoi ajcuna pai shamushcai. 24 Chimanda huasha tucurina huras pactamungami. Cristo pai mandana pachara intrigangami Yaya Diosma, tucui mandanaras, tucui gubirnuras, tucui ushanaras tucuchishca huasha. 25 Ministirinmi Churi mandangaj tucui paita chijnijcunara paihua chaqui ucui churangagama. 26 Puchucai chijnij tulai tucuj huañuimi anga. 27 Dios tucuira paihua Churi chaqui ucui mandasha churaca. Randi shina nijpis, tucui pai mandashcallai churashcami nisha, intindinchi imasna mandaj duiñura paihua chaqui ucui mana churashcachu aca. 28 Shinajpi, tucuira Churi mandashcallai churashca huasha, quiquin Churi shinallara paillarara tucuira mandau Dios mandashcallai churangami. Casna tucujpi, Dios tucuira mandaj sapalla Dios tucuibi tucungami. 29 Causarina illajpi, ¿ima rasha huañushcauna randimanda huaquinguna bautisarinaun, huañushcauna mana sirtu causarijpi? ¿Ima rashara huañushcaunamanda bautisarinaunri? 30 ¿Ima rasha caran huras ñaca ñaca huañunallai causaunchi? 31 Sirtumi nini, uquiuna, imasna cangunamanda ahuayauni ñucanchi Señor Jesucristoi, caran punzha huañuchingaraushca cuinta causauni. 32 Ñuca runaunasna rimasha, Efeso llactai milli animalgunahua macanaushca ajpi, ¿imajta valinmacairi ñucara? Huañushcauna mana causarinaupi, “micushunchi, upishunchi, cayandi punzha huañushunmi,” nisha causashunchi. 33 Ama pandaichichu. Manali runaunahua cumpañausha, ali causanara huajlichin. 34 Ripararus purisha ama uchara raichichu. Huaquinguna Diosta mana ricsinaunzhu. Caita nini cangunara pingachingaj. 35 Maicambas tapunga: “¿Imasna rashara huañushcauna causarinaunga? ¿Ima sami aichayujta shamunaunga?” 36 Iyai illaj angui. Can tarpushca muyu mana ñaupara huañusha, mana iñanzhu. 37 Mana tarpunguichu llucshina tunura. Astaun llushtishca muyura tarpungui, trigu muyu ajpis, shu muyuuna ajpis. 38 Dios pai quiquin ajllashca tunu muyura cunmi, caran tunu muyuma paihua quiquin tunu aparijta cun. 39 Tucui aicha mana chi tunullachu. Runauna shu tunu, sacha aicha shu tunu, yacu aichahua shu tunu, pishcuuna shu tunu aichayujcunami. 40 Ahua pachai tiajcunas shu tunu ricurij, allpai tiajcunas shu tunu ricurij. Randi ahua pachai tiajcuna sumaj ricurina shujmi, allpai tiajcuna sumaj ricurina shujmi. 41 Indi sumaj ricurina shujmi, quilla sumaj ricurina shujmi, istrillascuna sumaj ricurina shujmi. Shu istrillas shu istrillasmanda chican tunu ricurijmi. 42 Shinallara huañushcauna causarina. Ismushca aichara tarpushcami, causarisha mana ismuihuajchu. 43 Pingaihua tarpushca, randi sumajlla causarin. Sambayanai tarpushca, ushaihua causarin. 44 Runa aichara tarpushca, ispíritu sami aichai causarinmi. Tianmi runa aicha, tianmi ispíritu sami aicha. 45 Quillcashca tian: “Adán nishca ñaupa punda runa causaj alma tucuca,” puchucai Adán causaira cuj Ispíritu tucuca. 46 Ispirituga mana ñaupachu, astaun aicha ñaupa shamuj aca, chimanda huasha ispíritu. 47 Ñaupa punda runa allpamandami, allpa pulvumanda rashca, huasha tucuj runa Señor asha, ahua pachamandami. 48 Imasna allpa pulvumanda runa, shinallarami allpamanda ajcuna. Imasna ahua pachamanda aj, shinallarami ahua pachamanda ajcuna. 49 Imasna ñucanchi allpamanda runa tunui ricurij ashcanchi, shinallara ahua pachamanda aj tunui ricurij tucushun. 50 Caita cangunara nini, uquiuna: aichas yahuarbas mana ushanaunzhu Dios mandana pachara apinara. Shinallara ismuihuaj mana ismuihuajtas apinara mana ushanzhu. 51 Shu pacashca shimira cangunara cuintauni: Mana tucui huañusha puñushunzhu, astaun tucui turcai tucushunmi, 52 shu ratullai, shu ñahui pin rashcallai, puchucai curmitara curmitaushcai; curmitara curmitashca anga, huañushcauna mana ismuna aichahua causarinaunga, ñucanchis turcai tucushunmi. 53 Ministirinmi cai ismuna mana ismuihuajta churaringaj, ministirinmi cai huañuna mana huañuihuajta churaringaj. 54 Cai ismuihuaj mana ismuihuajta churarijpi, huañuihuaj mana huañuihuajta churarijpi, chi huraspi quillcashca shimi pactaringa: “Vinsina ña huañuira ganashcami.” 55 ”Huañui, ¿maitiri can tucsina? Ucu pacha, ¿maitiri can vinsina?” 56 Huañuihua tucsina uchami, ucha ushaiga ley mandashca shimimi. 57 ”Pagarachu,” nisha, Diosta agrasinchi; pai ñucanchira vinsichinmi, ñucanchi Señor Jesucristomanda. 58 Shina ajpi, ñuca llaquishca uquiuna, shinzhi shayarichi, ama cuyunguichichu, tucui huras Diospa tarabanai yaparisha ringuichi. Caita yachanguichi, canguna Señorbi tarabashcauna mana yangachu.
1 Quirijcunama cuyana cullquira tandachinamanda rimasha nini. Ñuca Galacia llactai tiaj iglesiaunara mandashcasnallara ranami anguichi cangunas. 2 Caran simana ñaupa punda punzhai, caran duiñu pai ganashca tupumanda cullquira chicanyachisha huacachinami, pai ushashca tupura. Shina rasha mana ñuca shamushcaira tandachina anga cuyana cullquira. 3 Ñuca pactamusha, canguna quillcai rimaushca runaunara Jerusalenma cachasha, canguna cuyashcara apangaj. 4 Ñucas ringaj ministirijpi, paiguna ñucahua cumpañasha rinaunga. 5 Macedonia partira pasanami ani, Macedonia llactara pasashca huasha cangunajma shamushami. 6 Cangunahua saquirisha chari, tamia huraspas pasasha chari, ñuca chihuasha maima rina ajpis canguna ñucara pushahuanguichi. 7 Ñuca cuna dsas pasaushcai cangunara ricungaj mana munanichu. Astaun unaira saquirinara munani cangunahua, Dios munajpi. 8 Efeso llactai saquirishami Pentecostés istagama. 9 Shu atun pungu cuinta pascarishcami ñucaj, ñuca tarabangaj. Shina ajllaira ashca arcajcuna tianaun. 10 Timoteo shamujpi, paita ali chasquipanguichi, pai cungailla cangunahua tiangaj, Pai Diospa tarabanara alimi raun, ñuca cuintallara. 11 Chimanda ama pihuas paita pishiyachichu, astaun paita sumajlla pushanguichi paihua ñambii, uctalla ñucajma pactamungaj. Paita chapaunimi chishu uquiunahua. 12 Ñucanchi uqui, Apólosta, mañacani chishu uquiunahua pariju cangunajma ringaj. Astaun mana ansas munacachu ringaj cuna.”Huasha risha,” nicami, “ñuca ushashca huraspi.” 13 Ripararus tiaichi. Shinzhi shayarichi canguna quirinai. Shinzhi runauna cuinta raichi. Shinzhiyaichi. 14 Tucui imara rashas, llaquishcahua raichi. 15 Ña yachanguichi, uquiuna, imasna Estéfanascuna ñaupa punda quirijcuna anauca Acaya partii. Paigunallara cunauca quirijcunara yanapangaj. 16 Cangunara nini, cai samiunara uyaichi, shinallara tucui pariju yanapajcunaras, tarabajcunaras. 17 Estéfanas, Fortunatos, Acaicos shamushcamanda yapa cushiyani. Canguna illashcai ñucara cushiyachihuanauca. 18 Paiguna ñuca ispirituras cangunajtas cushiyachinauca. Shina rajcunara llaquina anguichi. 19 Asia partii tiaj iglesiauna cangunara saluranaun. Aquila Priscilandi, paiguna huasii tandarij iglesiandi cangunara saluranaun ashcara, Señorba shutii. 20 Tucui uquiuna cangunara saluranaun. Cangunapura parijumanda chuyaj muchanahua saluraichi. 21 Ñuca, Pablo, ñuca quiquin maquihua cai saluranara cangunama quillcauni. 22 Maicambas Señorda mana llaquisha maldiciashca achu. Ñucanchi Señor shamunmi. 23 Ñucanchi Señor Jesucristo gracia ali llaquina iyai cangunahua tiachu. 24 Ñuca Cristo Jesuspi llaquishcahua tucui cangunara dispirini. Amen.
1 Pablo, Jesucristo cachashca runa, Dios munashcamanda, ñucanchi uqui Timoteondi, Corinto llactai tiaj Diospa iglesiama quillcauni, shinallara tucui Acaya partii tiaj sumajyachishca runaunamas. 2 Gracia ali llaquina iyairas cushi shunguras charichi ñucanchi Yaya Diosmanda, Señor Jesucristomandas. 3 Bindisiashca achu Dios, ñucanchi Señor Jesucristo Yaya. Paiga llaquij Yaya, cushiyachij Diosmi. 4 Pai tucui turmindariushcai ñucanchira cushiyachin. Chimanda shinallara imais turmindarijcunaras cushiyachinara ushanchi, Dios ñucanchira cushiyachishcahua. 5 Imasnara Cristo turmindarishcaunara ashcara apiunchi, shinallara quiquin Cristomanda ashca cushiyuj tucunchi. 6 Ñucanchi turmindarijpis, ñucanchi cushiyajpis, shinami tucun cangunara cushiyachingaj, quishpichingajpas; casna tucun canguna ñucanchi turmindarina samihua shinallara turmindarijpi. 7 Alimi iyaunchi cangunamanda. Yachanchi imasna ñucanchihua turmindarishcanguichi, shinallara ñucanchihua cushi tucunguichimi. 8 Uquiuna, canguna yachangaj munanchi ñucanchi turmindarishcara Asia partii. Chihui huañunalla turmindaricanchi, ñucanchi ahuantana tupumandas yalijta, chimanda “Huañushun,” nisha iyaricanchi. 9 Ñucanchi quiquin shungu ucui, “Huañungaraunchi,” nisha iyaricanchi, ama quiringaj ñucanchi quiquinllai, astaun huañushcaunara causachij Diosllai quiringaj. 10 Pai ñucanchira llushpichica, cunas llushpichin, shinallara chapaunchi pai chara ñucanchira llushpichingami casna atun huañuimanda. 11 Canguna Diosta mañasha ñucanchira yanapaichi, ashca runauna Diosta agrasinauchu ñucanchira yanapashcamanda, ashca runauna mañashcamanda cuyashcara agrasisha. 12 Caimanda Diosta agrasinchi, shinallara ñucanchi iyai shina riman, imasnara mundu ñaupajpi, maspas canguna ñaupajpis, chuya shunguhua ali iyaihuas causashcanchi, mana mundu yachaihua astaun Diospa gracia ali llaquina iyaihua. 13 Ricunalla, intindinalla ajcunara cangunama quillcaunchi. Canguna puchucaigama ali intindinauchu munani. 14 Canguna ña ansalla intindinguichi imasna Señor Jesuspa punzhai canguna ñucanchimanda ahuayanguichi; ñucanchi shinallara ahuayashun cangunamanda. 15 Casna iyarisha, ñuca munacani cangunajma ñaupa punda shamungaj, canguna ishqui cuti bindisiai tucungaj, ñuca tigrasha cuti cangunajpi pasiangaj. 16 Shina rasha, cangunara ricusha nicani ñuca Macedonia partima pasaushcai, shinallara chimanda tigramushcais cuti cangunajma shamungaj, canguna ñucara Judea partima cachangaj. 17 Ñuca casna rasha nijpi, ¿yangamanda ishqui shimiyujchu tucucani? Ñuca rasha nishcara ¿yanga aicha munaibichu rimacani, ñuca yangamanda “Ari, Mana,” nisha umachingaj? 18 ¡Mana! Imasna Dios ali quirihuajmi, ñucanchi cangunara mana rimanchichu, “Ari,” nisha, “Mana,” nisha. 19 Astaun ñucanchi cangunama rimashca camachiushca Diospa Churi Jesucristo—ñucas, Silvanos, Timoteos rimaushca, mana acachu “Ari,” nishcas, “Mana,” nishcas, astaun Cristoi rimasha, “Ari,” nishcami aca. 20 Tucui Dios cusha nishca shimiuna, quiquin Diospi, “Ari, sirtumi” nishcami anaun; astaun ñucanchimanda, “Amen,” nishcami Diosta ahuayachingaj. 21 Dios ñucanchiras cangunaras Cristoi shinzhiyachin, shinallara ñucanchira chicanyachica. 22 Pai shinallara Ispíritura ñucanchima cuca, shu sellu nishca cuinta, huasha shamuj bindisiashcaunara ricuchina cuinta. 23 Ñuca Diosta cayauni ñuca almara ricuj tucungaj, imasna cangunara llaquishcamanda mana ñaupa shamucani Corinto llactama. 24 Ñucanchi canguna quirinara mana mandaunchichu, astaun yanapaunchimi canguna cushi yaparingaj. Canguna quirinai ali shayaringuichi.
1 Ñuca iyacani cangunajma ama cuti shamungaj llaquirishcahua. 2 Ñuca cangunara llaquichijpi, ¿pita ñucara cushiyachinga? Ñucara llaquichishca runami anga. 3 Caita cangunama quillcashcani, ñuca cangunajma shamusha nisha ama llaquiringaj huaquingunamanda, ima huras paigunamanda cushi tucuna macani, caita iyarisha imasna ñuca cushiyauni, cangunas shinallara cushiyanguichi. 4 Ashca turmindarishcahua, ashca shungu nanarishcahua, shinallara ashca huacashcahua, ñaupa punda quillcacani cangunama. Shina quillcasha, mana munacanichu cangunara llaquichingaj, astaun canguna yachangaj ñuca cangunama ashcara llaquishcara. 5 Pi runas ñucara llaquichishca ajpi, mana ñucallara llaquichishcachu, astaun, shu shimii rimajpi, tucui cangunaras llaquichishcami—ama yapajta rimangaj. 6 Ña basta chi runama paita piñashca, ashca runauna rimashca ajpi. 7 Shinajpi cuna canguna paita perdonana anguichi, shinallara paita cushiyachina, pai yapa ashca llaquirishcahua ama vinsi tucungaj. 8 Chimanda cangunara rugauni paita llaquishcara ali ricuchichi. 9 Shinallara cangunara quillcacani canguna tucuibi ñucara caźujcuna ashcara camangaj. 10 Shinajpi canguna perdonashca runara ñucas shinallara perdonauni. Ñuca imaras charisha perdonangaj cangunara llaquishcamanda ña perdonashcani Cristo ñaupajpi. 11 Casna nini Satanás supai apu imaras ama ganangaj ñucanchimanda. Pai ima rana tunuras ña yachanchi. 12 Ñuca Troas llactama pactamusha Cristo evangelio ali shimira rimangaj, pajlla pambai ushacani, Señorbi. 13 Shina ajllaira cungailla samanara mana ushacanichu ispiritui, ñuca uqui Titora mana tupashcamanda. Shinajpi dispirisha, Macedonia partima llucshicani. 14 Diosta agrasini imasna maita rishas pai ñucanchira vinsijcuna cuinta pushan Cristo Jesuspi, ñucanchimanda tucui partiunai Cristora ricuchingaj, shu gustu mishqui asnaj cuinta. 15 Sirtu pacha Diospa ñaupajpi ñucanchi shu Cristomanda ali gustu mishqui asnaj cuintami anchi quishpiucunai, chingariucunais. 16 Chingariucunaj, huañuna asnaj cuinta anchi paiguna huañuibaj. Randi quishpiucunaj causana asnaj cuinta anchi causaibaj. ¿Pita pactajta angai caihua? 17 Ñucanchi mana ashca runauna cuintachu anchi Diospa shimira huajlichisha catusha, astaun ali shungumanda, quiquin Diosmanda, quiquin Diospa ñaupajpis rimaunchi, Cristo shutii.
1 ¿Cutillara callarinchichu ñucanchimanda ali rimangaj canguna ñaupajpi? ¿Cuti ministinchichu ali rimana quillcaunara cangunahua, shujcuna ministishca cuinta? ¿Cangunamanda ali rimashcara ministinchichu? 2 Cangunami ñucanchi quillcauna cuinta anguichi, ñucanchi shungüi quillcashca, tucui runauna ricsishca, tucui runauna ricushca. 3 Canguna shu Cristomanda quillca cuinta anguichi, ñucanchi maquihua quillcashca, mana tintahua astaun causaj Diospa Ispirituhua; mana rumi palaunai quillcashcachu, astaun runa shungu palaunai. 4 Casna iyarinara charinchi Diospa ñaupajpi Cristomanda. 5 Ñucanchilla mana valinchichu imaras iyaringaj, astaun ñucanchi valishca Diosmandami shamun. 6 Dios shinallara ñucanchira valichica shu mushuj pactachina shimira camachijcuna tucungaj. Cai shimi mana quillcamandallachu aca, astaun Diospa Ispiritumandami. Quillca huañuchin, astaun Ispíritu causaira cun. 7 Chi huañuchina shimi, rumi palai quillcashca, sumajhua shamuca, imasna Israel churiuna ricunara mana ushanaucachu Moisespa ñahuira, paihua ñahui chiujlla ricurishcamanda. Cai sumaj pasanallami aca. 8 ¿Manzhu Ispíritu camachishca shimi astaun ali sumajhua shamushca anga? 9 Cauźayachina shimi sumajhua shamujpi, astaun mas ali sumajhua almara alichina shimi shamungami. 10 Cai mas ali sumaj ricurijpi, ñaupa huras sumaj ña pishimi ricurin. 11 Huañunalla aj sumajhua ricurijpi, unaira duraj astaun mas ali sumajhua ricuringa. 12 Casna chapanara charisha, pajlla pambai rimauni, 13 mana Moisés cuinta, imasna pai shu llachapahua paihua ñahuira quillpaca, Israel churiuna paihua sumaj pasaushcara ama riparangaj. Chi sumaj tucuchinami aca. 14 Astaumbas paiguna shungura shinzhiyachinauca. Cuna punzhagama, ima huras rucu pactachina shimira uyajpi, chi quillpana llachapa cuinta paiguna shungüi sirin. Cristo chi quillpana llachapara cuinta anzhuchin. 15 Cuna punzhagama, Moisés quillcashcara ricushca ajpi, chi quillpana llachapa cuinta paiguna shungüi chara churashcami tian. 16 Astaun paiguna Señorbi quirijpi, chi quillpana llachapa anzhuchishca anga. 17 Señorga Ispiritumi. Maibi Señorba Ispíritu tiajpi, chihuimi lugar tucun. 18 Tucui ñucanchi pascashca ñahuihua ispijui cuinta Señorba sumajta ricunchi. Chimanda turcarinchi shu tunu sumajmanda shu tunu sumajcama pai ricurishca tunui Señormanda. Señorga Ispiritumi.
1 Dios llaquishcamanda, ñucanchi cai camachinai paita sirvisha, mana dismayarinchi. 2 Randi tucui pacashcaras, tucui pinganaras saquishcanchi, mana sabiru cuinta tucusha, mana Diospa shimira chapusha. Astaun sirtu shimira pajlla pambai rimasha, tucui runauna ali rana iyaima ñucanchi ali ashcara ricuchishun Diospa ñaupajpi. 3 Ñucanchi rimaushca evangelio ali shimira pacashca ajpi, chingariucunahua pacashcami. 4 Caigunahua, cai mundu dios mana quirijcuna iyaira ñausayachishcami, sumajyachishca Cristo evangelio ali shimi ama paigunara punzhayachingaj. Cristo quiquin Dios cuinta ricurin. 5 Mana ñucanchi quiquin shutira rimaunchichu astaun Jesucristo shutira, pai Señor ajpi. Ñucanchi cangunara sirvijcuna anchi Jesusta llaquishcamanda. 6 ”Llandumanda punzhayachu,” nisha mandaj Dios ñucanchi shungüi punzhayachica, ñucanchi iyaira punzhayachingaj Diospa sumajta yachashcahua, Jesucristo ñahuii ricurij. 7 Cai valijta allpa mangaunai cuinta charinchi, paihua ali valij ushai Diosmandalla achu, mana ñucanchimanda. 8 Tucuibi turmindarinchi, shina ajllaira mana huacanchichu; mulistarinchi astaun mana turbarinchichu. 9 Turmindachishcauna anchi, astaun Dios mana saquishcauna. Urmachishcauna anchi, astaun mana tucuchishcauna. 10 Maima rishas, Jesús huañushcara apaunchi ñucanchi aichai, Jesuspa causai shinallara ricurichu ñucanchi aichai. 11 Ñucanchi causajcuna asha, tucui huras huañunama intrigashcami anchi Jesusta llaquishcamanda, Jesuspa causai shinallara ricurichu ñucanchi huañunalla aichai. 12 Shina ajllaira ñucanchi aichai huañuna tarabaun, astaun cangunajpi causai tarabaun. 13 Chi quirina ispiritura charisha, imasna quillcashca aca: “Quiricani, chimanda rimacani,” nisha, ñucanchi shinallara quirinchi, chimanda rimanchi. 14 Caita yachanchi imasna Señor Jesusta sicachij Dios shinallara ñucanchira sicachingami Jesushua pariju, ñucanchira cangunahua pariju ricuchingami paihua ñaupajpi. 15 Cai tucuira turmindarinchi cangunara llaquishcamanda, Diospa gracia ali llaquina iyai ashca runamanda yaparisha, paiguna agrasishcauna yaparinauchu Diosta ahuayachingaj. 16 Casna ajpi mana dismayarinchi. Astaun ñucanchi ricurij aicha gastarisha rishallara, ñucanchi ucui tiaj runa caran punzha mushujyasha rin. 17 Cai uctalla pasaj ichilla turmindarina ñucanchijpi shu yali valij huiñai duraj sumajta iñachinmi. 18 Ricurijcunara mana ricunchichu, astaun mana ricurijcunara ricunchi. Ricurijcunaga mana duranaunzhu, randi mana ricurijcuna huiñaigama duranaungami.
1 Ñucanchi cai pachai causaushca huasi tularijpi, Diosmanda shu huasira charinchi, mana maquihua rashcara, shu huiñaigama duraj huasira, ahua pachai. 2 Ñucanchi tiaushca huasii huacaunchi, ñucanchi ahua pachamanda huasira churarisha nisha. 3 Shina rasha, churarishca asha, mana llatan tucushun. 4 Ñucanchi cai huasii tiajcuna, iyaibi nanarisha turmindarinchi. Mana munanchichu llatan tucungaj, astaun churarishca, ñucanchi huañunalla aicha causaibi chingarichu. 5 Cai quiquimbajta Dios ñucanchira rarcami. Pai Ispiritura cuca huasha shamuj bindisiashcaunara ricuchina cuinta. 6 Shinajpi quirisha causaunchi tucui huras, caita ricsisha imasna ñucanchi cai aicha huasii causausha, Señorbajmanda illaunchi. 7 Quirisha purinchi, mana ñahuihua ricushalla. 8 Quirisha cushi tucunchi. Yali munanchi aichamanda llucshingaj Señorhua pariju tiangaj. 9 Chiraigumanda aichai tiaushas mana tiaushas, mascanchi paita cushiyachingaj. 10 Ministirinmi tucui ñucanchi Cristo taripana ñaupajpi shayaringaj, Caran duiñu paihua aichai rashca tupura cui tucungami, ali ajpis mana ali ajpis. 11 Diosta manzhasha, runaunara yachachinchi. Diospa ñaupajpi ricui tucunchi ima sami ashas, shinallara canguna iyaibi ricsi tucunara munanchi. 12 Mana cuti ñucanchira ahuayachinchi canguna ñaupajpi, astaun cangunama lugarda cunchi ali rimangaj ñucanchimanda, canguna runaunama imaras cutipanara charingaj ima huras paiguna canzhai ricurij tunullara ali rimausha, shungu ucui tiaj tunura mana ricunaun. 13 Ñucanchi lucu sami tucusha, shina tucunchi Dioshua; ñucanchi iyaiyuj tucusha, shina tucunchi cangunahua. 14 Cristo llaquina ñucanchira mandan, casna iyasha: Shu runa tucui runauna randimanda huañushca ajpi, shinajpi tucui runauna huañunauca. 15 Maspas, pai tucui randimanda huañuca, causajcuna ama mas paiguna quiquimbajta causangaj, astaun paiguna randimanda huañujpajtas causarijpajtas causanauchu. 16 Shina ajpis, cuna hurasmanda pacha, mana pitas ricsinchichu aichai. Ñucanchi quiquin Cristora ricsishca asha paihua aichai, ña mana shina tunullaira ricsinchichu paita. 17 Shina ajllaira maican runas Cristoi ajpi ña mushuj runa tucushcami. Rucu causana pasashcami. Tucui mushujyachishcami. 18 Cai tucui Diosmandami shamun. Pai Cristomanda ñucanchira alichica paihua amiguuna tucungaj, maspas cai amigu tucuna shimira ñucanchima cuca camachingaj. 19 Casna nin: Dios Cristoi tiauca mundura alichisha paihua amiguuna tucungaj, runauna ucharashcara mana iyarisha. Ñucanchimas cai amigu tucuna shimira cuca camachingaj. 20 Shinajpi Cristo shutii cachashcauna manchi. Dios ñucanchimanda mañasha cayaun. Cristo shutii cangunara rugaunchi: Dioshua alichichi amigu tucungaj. 21 Cristo uchara mana rarcachu. Randi Dios paima cuca ucha tucungaj ñucanchiraigumanda, ñucanchi paimanda Diospa ali dirichu tunu tucungaj.
1 Shinajpi ñucanchi cangunahua yanapajpura cuinta asha, cangunara rugaunchi Diospa gracia ali llaquina iyaira ama yangamanda apingaj. 2 Dios casnami nin: “Chasquina huraspi canda uyashcani. Quishpina punzhai canda yanapashcani.” Shinajpi cunallarami chasquina huras, cunallarami quishpina punzha. 3 Ama pitas ama imais urmachishunchi, ñucanchi Diosta sirvina ama cami tucungaj. 4 Astaun tucuibi ñucanchi Diosta sirvijcuna ajta ricuchinchi ashca chapanahua, turmindarinaunais, ministishcaunais, llaquirishcaunais, 5 azutishcaunais, chunda culargunais, runauna caparishcaunais, tarabashcaunais, chapaushcaunais, yarcaigunais, 6 chuyaj shungüis, yachanais, ahuantanais, ali shungüis, Santu Ispirituis, ali llaquinais, 7 sirtu shimiis, Diospa ushanais, ali causana yanapashcahuas ali maqui partiis lluqui partiis; 8 ahuayachishcamanda mana ahuayachishcamandas; manali rimashcamanda ali rimashcamandas; umachijcuna cuinta astaun ali sirtuuna; 9 mana ricsishcauna cuinta shina ajllaira ali ricsishcauna, huañujcuna cuinta astaun causajcuna; livachishcauna cuinta astaun mana huañushcauna; 10 llaquirijcuna cuinta astaun cushiuna; tsuntsuuna cuinta astaun ashca runaunara charijyachijcuna; mana imaras charijcuna cuinta astaun tucuira charisha, 11 Cangunahua pajlla pambai rimashcanchi, Corintioscuna; ñucanchi shungu atun tucushcami. 12 Ñucanchi shungu mana quishqui tucushcachu cangunahua, astaun canguna quiquin shungu quishqui tucushcami. 13 Canguna shinallara rangaj shungura pascaichi, nini; churiunahua cuinta rimauni. 14 Mana quirijcunahua ama llutarichichu. ¿Imasnara ali causana manali causanahua pariju puringairi? Punzha, ¿imasnara pariju puringairi tutahua? 15 ¿Imasnara Cristo Satanashua pariju puringairi? ¿Imasnara shu quirij runa shu mana quirij runahua llutaringairi? 16 ¿Imasnara runa rashca yanga dioscuna quiquin Diospa alabana huasii tianaungai? Canguna causaj Diospa tiana huasimi anguichi, imasna Dios nica: “Paigunahua causasha, purisha; ñuca paiguna Dios tucusha, paiguna ñuca runauna tucunaunga.” 17 Chiraigumanda “Llucshichi paiguna chaupi shungumanda, paigunamanda anzhurichi,” Señor nin. Irusta ama llangaichichu; ñuca cangunara chasquishami,” Señor nin. 18 ”Ñuca Yaya tucusha cangunahua, cangunaga churiuna ushushiuna tucunguichimi ñucahua” tucuira ushaj Señor, nin.
1 Shinajpi, llaquishcauna ñucanchi casna ali valij cushca shimiunara charisha, pichashunchi ñucanchira ima aicha ismunamandas, ima alma ismunamandas, ñucanchi chuyaj causanara alichisha Diosta manzhashcahua. 2 Chasquihuapai ñucanchira. Mana pitas llaquichishcanchichu, mana pitas huajlichishcanchichu, mana pitas umachishcanchichu. 3 Caita mana ninichu cangunara cauźayachingaj. Ña nicani cangunara, canguna ñucanchi shungüi tiaunguichimi parijulla huañungaj, parijulla causangaj. 4 Pajlla pambai cangunahua rimauni. Ashcara ahuayauni cangunamanda; cushihua undariuni; ñucanchi tucui turmindariushcai yalijta cushiyauni. 5 Ñucanchi Macedonia partima shamushca huras, mana ansas samacanchi aichai. Astaun tucuibi turmindariucanchi, canzhai macanaunara charisha, ucuiga manzharishcaunahua. 6 Astaun mansuunara cushiyachij Dios ñucanchira cushiyachihuaca Tito shamushcamanda; 7 mana pai shamushcamandalla, astaun pai quiquin cushiyashcamanda cushiyacani cangunamanda. Cuintahuaca canguna ñucara ali llaquishcara, canguna huacashcara, canguna ñucamanda cuirangaj iyarishcara; shinajpi ñuca astaun mas cushiyacani. 8 Ñuca quillcashca cangunara llaquichishca ajpi, chimanda mana sintinichu, shina ajllaira quillcaushca huraspi ansa llaquiricani. Ñuca ricujpi chi quillcashca shu ratulla cangunara llaquichica. 9 Cuna cushiyauni, mana canguna llaquimanda, astaun canguna aripintirinagama Uaquirishcamanda. Diospa ñaupajpi llaquiricanguichi, shinajpi mana imaras pirdishcanguichi ñucanchi rashcamanda. 10 Diospa ñaupajpi llaquirina aripintirinara cun, almara quishpichingaj. Cai aripintirinaga mana llaquirinallachu. Mundu llaquirina tunuga huañunara cun. 11 Canguna Diospa ñaupajpi llaquiricanguichi. Shina rasha, cuiraisiqui tucucanguichi; alichingaj munacanguichi; piñaricanguichi uchamanda; manzharicanguichi; shinzhira turbaricanguichi. Canguna shinzhira llaquicanguichi, shinzhira munacanguichi uchara raj runara livachingaj. Tucuibi cangunara alichishcanguichi cai uchamanda. 12 Shinajpi uchara raj runamandas uchara apijmandas mana quillcacanichu, astaun canguna ñucanchi cangunara llaquishcara yachangaj Diospa ñaupajpi. 13 Caimanda ñucanchi cangunahua pariju cushiyashcanchi. Maspas cushiyanchi Tito cushiyashcamanda, paihua ispíritu tucui cangunamanda cariyashcaraigu. 14 Ima ali shimimanda ñuca Titora cuintashcara cangunamanda mana pingaricanichu; astaun imasna tucui ñucanchi cangunara rimashca shimi sirtu aca, shinallara ñucanchi Titoma cangunamanda ali cuintashca sirtumi aca. 15 Pai cangunara astaun mas ashcara llaquinmi, pai tucui canguna uyashcara iyarisha, imasna canguna paita manzhashcahua chasquicanguichi. 16 Canguna tucuibi ali ranara rajcuna ashcara yachani, caimanda yapa cushiyani ñuca.
1 Shinallara, uquiuna, cangunara cuintaunchi imasna Dios paihua gracia ali llaquina iyaira cushcami Macedonia iglesiaunama. 2 Paiguna atun turmindarinaunahua ashcara camai tucusha, paiguna ashca cushimanda, yapa tsuntsu ashallara yaparinauca cuyaisiqui shungumanda ashcara cuyangaj. 3 Ñuca nini: Cushihua paiguna ushashcagama maspas yalijtas cuyanaushcami. 4 Lugarda cuhuai, nisha, ashcara mañahuanauca cai sirvinara rangaj, quirijcunara yanapangaj. 5 Mana ñucanchi chapaushcasna cunauca, astaun ñaupa punda paigunallarara Señorma cunauca, chihuasha ñucanchimas, Dios munashcasna. 6 Shina ajllaira, Titora rimaunchi imasna pai caita rangaj callarica, shinallara cangunahua cai llaquishcamanda ali ranara tucuchichu. 7 Shinajpi imasna tucuibi canguna yaparinguichi quirinais, rimanais, yachanais, tucui cuiranais, ñucanchira llaquinais, shinallara cai llaquishcamanda ali ranais yaparichi. 8 Ñuca casna nisha, mana mandanichu, astaun canguna llaquina sirtu ashcara camasha nini, canguna shujcuna yanapashcara yachasha. 9 Ñucanchi Señor Jesucristo gracia yanga manda llaquishcara ña yachanguichi, imasna pai charij ashallara, cangunara llaquishcamanda pugri tucuca, pai pugri ashcamanda canguna charij tucungaj. 10 Casna nini ñuca: Caita valinmi canguna rangaj. Alimi callaricanguichi ñaupa huatai, canguna rashcara ali munaihua rasha. 11 Cunaga pactachichi cai ali ranara. Imasna ali munaihua callaricanguichi, shinallara cai ranara ali munaihua tucuchichi canguna charishca tupuhua. 12 Ali munaira charisha cuyangaj, Dios caran duiñu charishca tupura chasquin, mana pai mana charishca tupura. 13 Caita mana rimaunichu shujcuna yapajta charingaj canguna illaj tucusha. 14 Cuna canguna yalijta charishca paiguna ministishcara yanapanga. Huasha huras paiguna yalijta charisha canguna ministishcara yanapangami, tucui chi tupullara charingaj, 15 imasna quillcashcasna: “Ashca micunara tandachij runa mana yalijta charicachu, shinallara ansahuallara tandachij runa mana pishicachu.” 16 Diosta agrasini imasna pai Tito shungüi churaca cangunara cuirangaj ñucanchi rashcasna. 17 Tito ali shunguhua ñucanchi mañashcara uyaca, maspas paihua quiquin munaihua llucshica cangunajma ringaj. 18 Paihua pariju shu uquira cachacani, cai uqui evangelio ali shimira camachishcamanda tucui iglesiaunai paita alabashca uyarin. 19 Maspas, cai uquira tucui iglesiauna ajllashcami ñucanchira cumpañangaj ñucanchi purishcaunai, quirijcuna cuyashcara apangaj. Cai cuyashcara tandachiunchi quiquin Señorda ahuayachingaj, shinallara ñucanchi ali munaira ricuchingaj. 20 Casna rasha raunchi, ama pihuas cauźayachihuanauchu cai ñucanchi apishca atun cuyanamanda. 21 Tucuira ali tunui rashun, mana Señorbaj ñaupajllai astaun shinallara runauna ñaupajpis. 22 Paigunahua shu uquira cachaunchi. Cai uqui ali rana iyaira ashca cuti ashca ranaunais ricushcanchi. Cunas pai astaun mas yanapasha nin, cangunara llaquishcamanda. 23 Tito ñucahua cumpañajmi, ñucara yanapajmi cangunamanda. Chishu uquiuna iglesiaunamanda rimajcunami, Cristora ahuayachijcunas. 24 Iglesiauna ñaupajpi canguna paigunara llaquishcara ricuchichi, shinallara ñucanchi cangunamanda ali rimashcaunara.
1 Quirijcunama cuyashcamanda mana ministinichu cangunara quillcangaj. 2 Canguna ali munaira yachani, caimandas ali rimashcani Macedonia partii tiajcunama, “Acayauna ña puruntushcami,” nisha, “ñaupa huatamanda pacha.” Canguna alira rashca shujcunara animachishcami shinallara alira rangaj. 3 Shina ajllaira, cai uquiunara cachashcani ñucanchi cangunamanda rimashca ali shimiuna ama yanga tucungaj, canguna ñuca cuintashcasna ali pumntushca angaj. 4 Mana shina tucujpi, huaquin Macedonia runauna ñucahua pariju shamusha, cangunara mana puruntushcara tupasha, ñucanchi pingarinchimaca, cangunas shinallara, ñucanchi shimi mana sirtu ajta tupasha. 5 Chiraigumanda ministirinmi nisha iyaricani, cai uquiunara ñaupara cangunajma cachangaj. Paiguna canguna ñaupa cusha nishca cuyanara alichinaunga puruntu tucungaj, canguna cuyashca ali munaihua rashca ricuringaj, mana ñucanchi mandashca cuinta. 6 Caita nini: Tarpuj runa ansalla tarpusha, ansallara pallangami; ashca muyura tarpusha, ashcara pallangami. 7 Caran duiñu paihua shungu munashcasna cuyachu, mana llaquirisha, mana mandashcasna. Dios cushihua cujta llaquinmi. 8 Dios ushajmi tucui gracia ali llaquina iyaira yapangaj cangunajpi, tucuibi pactajta charisha yaparinguichi ima ali ranaras rangaj. 9 Imasna quillcashcasna: “Dios chaupichisha, tsuntsuunama cuca. Paihua ali shungu huiñaigama duranga.” 10 Muyura tarpujma cuj Dios, tandara micujma cuj Dios carangami, mirachingami canguna tarpushcara, shinallara canguna ali rashcamanda aparishcaunara mirachingami. 11 Shina tucusha, tucuibi charij tucunguichimi shujcunama cuyangaj. Casna rajpi ñucanchimanda Diosta agrasishca angami. 12 Casna rasha, quiricuna paiguna ministishcaunara apinaunga, shinallara ashcauna Diosta agrasinaungami. 13 Casna yanapashcamanda Diosta ahuayachinaun canguna “Quirinchimi” nishca Cristo evangelio ali shimira uyashcamanda, shinallara canguna atun cuyashcamanda paigunajtas tucuihuajtas. 14 Shinallara paiguna Diosta mañasha cangunamanda, paiguna cangunara llaquinaunmi Diospa gracia ali llaquina iyai yaparishcamanda canguna shungüi. 15 Diosta agrasinchi paihua mana rimaihuaj atun cuyashcara.
1 Ñuca, Pablo, cangunara rugauni, Cristo mansu shungumanda, paihua llaquij shungumandas, ñuca mansu shunguyuj asha canguna ñaupajpi, astaun shinzhi shunguyuj asha carui tiausha, 2 cangunara rugauni ñuca cangunajpi pactashca huraspi ama ministirichu ñuca shinzhi tucungaj. Huaquinguna ninaun: “Pablo aicha munaibi yanga causasha purin.” Casnaunahua shinzhi tucunami ani. 3 Ñucanchi aichai purishas, mana aichaisna macanaunchichu. 4 Ñucanchi macanauna sami mana aichamandachu, astaun Dios yanapashcahua ushaiyujmi ima shinzhiunaras tulangaj. 5 Yanga iyaigunaras, tucui ahuayashca shunguunaras tulanchi, Diosta yachanara arcajcuna ajpi. Tucui iyaira mandanchi Cristora uyaj tucungaj. 6 Canguna ali caźujcuna tucujpi, puruntumi anchi mana caźujcunara livachingaj. 7 Tucuira ricunguichi paiguna sirtu ricurishcasna. Pi runas, “Cristojmi ani,” nisha iyasha, pai shinallara iyachu imasna pai sirtu Cristoj ajpi, ñucanchis shinallara Cristojcunami anchi. 8 Ñuca ñucanchi mandanamanda ansa mas ahuayarisha, mana pingarishachu. Dios cai mandanara cuhuaca shayachingaj, mana cangunara tulangaj. 9 Quillcaunahua cangunara manzhachij cuinta ricurinara mana munanichu. 10 Runauna ninaun:”Sirtu pacha pai quillcashcauna shinzhimi; astaun ñucanchi ñaupajpi tiausha cai runa irqui sami ricurin, paihua shimi mana uyaihuaj.” 11 Casna rimaj runa riparachu imasna ñucanchi quillcashcasna, ñucanchi illaushcai, chi tunullarami tucushun cangunahua pariju tiaushcais. 12 Huaquinguna paigunallara alabarijcuna ajpi, mana munanchichu casnaunahua pariju shayarisha camangaj. Paigunapura tupunaun, paigunapuralla shayarinaun camangaj. Casna rana mana valinzhu. 13 Ñucanchi quiquinllara ama yapajta ahuayarishun, astaun Dios tupusha cushcasna, ñucanchi cangunajma pactangaj. 14 Dios cushca tupura mana pasacanchichu, cangunajma shamusha. Ñucanchi ñaupa punda pactajcuna acanchi, Cristo evangelio ali shimira cangunajma apasha. 15 Ñucanchi mana yapajta ahuayanchichu shujpa tarabanaunai, astaun imasna canguna quirina yaparisha rin, chapaunchi ñucanchi tarabana cangunajpi talirijta atunyachishca achu, ñucanchi ushashcagama. 16 Munanchi canguna huashai tiaj partiunama ringaj, evangelio shimira rimangaj. Shina rasha shu runa tarabashcai mana icusha nini ahuayangaj pai ñaupa tarabashcai. 17 Pi runas ahuayasha, Señorbi ahuayachu. 18 Mana ali rimashcachu shu runara pai quiquinllara alabarijpi, astaun Dios alabashca runa valinmi.
1 Uyahuai shu ratulla ñuca yanga rimashcara. Ahuantapaichi ñucara. 2 Ñuca cangunara llaquishcani Dios llaquishcahua. Cangunara casarachishcani Cristohua, shu sapalla carihua, cangunara shu chuyaj huanra huarmihua cuinta, Cristoma cungaj. 3 Astaun manzhani imasna machacui sabiru asha Evara umachica, shinallara canguna iyaibi Cristoi ali quirishcamanda anzhuchi tucunguichimi. 4 Shu runa shamujpi, shu tunu Jesusta camachijpi, mana ñucanchi camachishcasna, alira ahuantanguichimi. Shinallara canguna shu tunu ispiritura chasquisha, mana canguna ñaupa apishca Ispíritu ajpi, shu tunu evangelio shimira uyasha, mana canguna ñaupa uyashca ali evangelio shimi ajpi, alira ahuantanguichimi. 5 Iyauni mana imais pishiyashcani chishu atun cachashca runaunamanda. 6 Ñuca mana ali rimaj ajpi, mana shinachu ñuca yachana. Tucuibi tucuimanda caita cangunara ricuchishcanchi. 7 ¿Ñucaga ñucallara pishiyarisha cangunara ahuayachingaj, ucharachu rarcani, ñuca Diospa evangelio ali shimira yangamanda camachijpi? 8 Shu iglesiaunamanda cullquira apicani, paganara chasquisha cangunara sirvingaj. 9 Ñuca cangunahua tiaushcai ministiucani, shina ajllaira mana pimandas mañacanichu. Ñuca ima ministishcaras Macedoniamanda shamuj uquiuna cuyahuanauc. Tucuibi cuiracani, shinallara cuirashcami ama imais canguna cullquira gastachingaj ñucamanda. 10 Imasna Cristo sirtu shimi ñucahua tiashcasna, ama pihuas ñuca ahuayashcara arcachu Acaya partiunai, 11 ¿Imaraigu? nini. ¿Cangunara mana llaquishcamandachu? Dios yachanmi. 12 Ñuca imasna cuna rashcasna shina rashallami, lugarda ama cungaj casna munajcunama, paiguna alabarisha ama rimangaj: “Quiquin Pablo cuinta raunchi,” nisha. 13 Cai runauna, llulia cachashca runauna, llullasha tarabajcuna anaun, Cristo sirtu cachashca runauna cuinta ricurijcuna tucushun nisha. 14 Caita mana manzharihuajchu. Quiquin Satanasllara punzhajlla ricurij angel cuinta tucusha ricurin. 15 Shina asha, mana manzharihuajchu paita sirvijcuna shinallara alira raj sirvijcuna cuinta ricurinaun. Puchucaibi paiguna rashca tupura pagai tucunaungami. 16 Cutillara nini: Pis ñucara: “Lucumi,” nisha ama iyaichu. Shina iyausha, shu lucu runara cuinta lugarda cuhuapai ñuca ansa ahuayangaj. 17 Ñuca rimaushcara mana Señormanda rimaunichu, astaun ansalla lucu cuinta ñucallara ahuayachisha. 18 Ashca runauna paiguna aichai rashcaunamanda ahuayanaun. Ñucas shinallara rasha. 19 Canguna cushihua upa runaunara ahuantanguichi, canguna umayujcuna ashallara. 20 Ahuantanguichi shu runa cangunara sirvichijpi, shu runa cangunajta tucuchijpi, shu runa cangunara sajmajpi. 21 Ñucanchi chi tupullara rangaj irqui macanchi. Casna nisha pingarini. Shujcuna imais ahuayachijpi, (lucu cuinta rimauni), ñuca shina rashcaunais ñucallara ahuayachiuni. 22 Paiguna, hebreoscuna ajpi, ñucas shinallara; Israel runauna ajpi, ñucas shinallara; Abrahanmanda miraiguna ajpi, ñucas shinallara. 23 Paiguna Cristora sirvijcuna ajpi, (lucu cuinta rimauni), ñuca astaun mas, paita sirvij ani. Tarabashcaunai, ñuca yali ani; azutishcaunai, mana yupaihuaj; chunda cularbi ishcashcaunai, ñuca astaun mas; huañunallaunai, ñuca ashca cuti. 24 Judiugunamanda pichca cuti azutishca acani, quinsa chunga iscun azutira apicani. 25 Quinsa cuti caspihua huactashca ashcani, shu cuti rumihua shitashca, quinsa cuti ñuca barcu pambarica lamarbi, shu punzha shu tuta pagarijta atun lamarbi tiacani. 26 Ñambiunai ashca cuti, yacuunamanda huañunalla ashcai, shuhuajcunamanda huañunalla ashcai, ñuca llactamanda huañunalla ashcai, gentilgunamanda huañunalla ashcai, atun llactai huañunalla ashcai, tiyu pambai huañunalla ashcai, lamarbi huañunalla ashcai, llulla uquiunamanda huañunalla ashcai tiashcani. 27 Tarabashcai, sambayashcai, ashca tutaunara mana puñusha, yarcaibi, upinaibis, ashca cuti mana micushcais, chiri ashcai, llatan ashcai tiashcani. 28 Maspas tucui chigunamanda yali, caran punzha turmindarishcani, tucui iglesiaunamanda iyarisha turbarisha. 29 ¿Pita ungun, ñucas shinallara unguni paihua? ¿Pita urmachishca, ñucas paihua llaquirini? 30 Ministirijpi ñuca ahuayaringaj, ñuca samba ashcamanda ahuayarisha. 31 Dios, ñucanchi Señor Jesucristo Yaya huiñaigama bindisiashca achu. Pai ali pacha yachan imasna ñuca mana llullanichu. 32 Damasco llactai, Aretas rey apuhua gubirnadur llactara ishcaca ñucara apingaj. 33 Shina ajllaira, rumi quinzhai aj vintanamanda atun tasai huarcusha irguchihuanauca, shina rasha paihua maquimanda quishpicani.
1 Sirtu pacha mana valinzhu ñucallara ahuayaringaj. Astaun nuspashcai cuinta ricushcaunara, Señormanda ricuchishcaunara, cuintasha nini. 2 Shu Cristoi quirij runara ricsinimi, aichai tiashcara mana aichai tiashcara ima chari, mana yachanichu, Dioslla yachan; chunga chuscu huata tupu pasashca, ahua pachama apai tucuca. 3 Chi runara ricsinimi, aichai tiaj mana tiaj mana yachanichu. Dioslla yachan. 4 Paiga Paraíso nishca Dios tiashcama apai tucuca. Chihui mana rimaihuaj gustu shimiunara uyaca, mana lugarda cushcachu aca casna shimiunara rimangaj. 5 Casna runamanda, ñuca ahuayarishami, randi ñuca quiquinmanda mana imais ahuayarishachu, astaun ñuca samba tucushcaunai ahuayarishami. 6 Ñuca ñucara ahuayarisha nishallara, mana rimanichu, pi runas ñucamanda pai ricushca yali pai uyashca yali ama yapajta iyarichu ñucamanda. 7 Ñuca ricushcauna yapa ali sumaj ashcamanda, ñuca ama mas tucuisiqui tucungaj, shu casha cuinta turmindarinara cushca acani aichai, shu Satanasmanda rimaj ñucara turmindachingaj, ñuca ama yapajta ahuayangaj. 8 Caimanda quinsa cuti Diosta mañacani: “Llushpichihuapai,” nisha. 9 Pai ñucara nica: “Basta ñuca gracia ali llaquina iyai cambaj. Ñuca ushai pactarinmi samba ashcail.” Shinajpi munaihua cushi tucuni ñuca samba ashcaunai, Cristo ushai ñucajpi tiangaj. 10 Chimanda, Cristora llaquishcamanda, samba ashcaunai cushiyauni, camishcaunais, ministishcaunais, turmindachishcaunais, llaquirishcaunais. Ñuca samba ashcai, chi hurasllaira shinzhimi ani. 11 Upa macani, ñucallara ahuayachisha. Canguna rimashcamanda chita rarcani, randi canguna ñucara alabanami acanguichi. Mana imais pishi ashcanichu chi atun cachashca runaunamanda. Shina ajllaira mana imaschu ani. 12 Ñuca rashcaunai, cachashca runa ricuchinauna ricurinauca canguna chaupi shungüi, ashca chapanahua, ashca munanaita ricurinaunahuas rashcaunahuas. 13 Canguna, ¿imai shu iglesiaunamanda pishi tucushcanguichichu? ¿Manzhu caibi, ñuca mana carga cuinta cangunahua tucucani? Perdonahuapaichi caita. 14 Ña quinsa cuti puruntushca ani cangunajma shamungaj. Cunas, mana carga cuinta tucushachu cangunahua. Cangunajta mana mascaunichu astaun canguna quiquingunallara. Churiuna mana tandachinachu yayaunara yanapangaj, astaun yayauna huahuaunara yanapangaj tandachina anaun. 15 Ali munaihua ñucajta gastasha, maspas ñucallara illajta gastasha canguna almara yanapangaj, ñuca cangunara astaun mas llaquisha, canguna ñucara pishi llaquijpis. 16 Caita ricsisha, ñuca mana carga cuinta acani cangunahua, shina ajllaira sabiru asha, cangunara apicani ñuca sabiru ashcamanda. 17 ¿Shu ñuca cangunama cachashca runahua cangunara umachishcani chari? 18 Titora rugacani ringaj, shu uquira cachacani paihua pariju. ¿Tito cangunara umachica chari? ¿Manzhu ñucas paihuas chi ispirituhua chi aitaushcai purishcanchichu? 19 ¿Charajchu iyaunguichi ñucanchi canguna ñaupajpi, “Perdonahuai,” nisha rugaunchi? Mana. Diospa ñaupajpi rimashcanchi Cristoi. Tucuira rimashcanchi, llaquishca uquiuna, cangunara shinzhiyachingaj. 20 Ñuca manzhauni, cangunajma pactamujpi, cangunara mana ñuca munashcasna tupasha chari, ñucas mana canguna iyashcasnas tupanguichi chari. Tupasha chari caigunara: macanaunara, munapayasha ricunaunara, piñanaunara, chaupirishcaunara, maldisiashcaunara, manali shimiunara, mas tucuisiqui shunguunara, turbarinaunara. 21 Manzhauni imasna ñuca tigrajpi cangunajma, Dios ñucara pishiyachichu canguna ñaupajpi, huacasha chari ñaupa huras ucharajcunamanda, ashcauna mana aripintirishcamanda paiguna irus rashcamanda, shujhua tacarinamandas, ucha aicha munaira catishcamandas.
1 Ña quinsa cuti cangunajma shamunimi. Tucuira ishqui quinsapura ricujcunamanda rimashca anga, alichishca anga. 2 Ñaupa rimacani, cuna cutillara nini, cangunahua tiashcasna, cuna cuti illausha, ñaupa ucha rajcunama tucui chishujcunamas quillcauni, ñuca cuti shamusha mana yangamanda perdonashachu. 3 Cristo ñucajpi sirtu rimashcara yachasha ninguichi. Pai mana sambachu cangunahua, astaun ushaj tucun cangunajpi. 4 Cristo sirtu pacha pai samba ashcai chacatashca aca, cunaga pai causaun Diospa ushaimanda. Shinallara ñucanchi paihua pariju samba sami anchi, shina ajllaira paihua pariju causashunmi Diospa ushaimanda, cangunara sirvingaj. 5 Cangunallara ricuichi, quirij ashas mana quirij ashas, cangunallara camaichi. ¿Manzhu ricsinguichi Jesucristo cangunajpi tiaujta? Mana shina asha, ichushcauna anguichi. 6 Canguna yachangaj munanchi imasna ñucanchi mana ichushcaunachu anchi. 7 Diosta mañanchi cangunamanda, canguna ama ima manaliras ranauchu; mana ñucanchi ali nii tucungaj, astaun canguna alira rangaj, ñucanchi ichushcauna cuinta ricurijllaira. 8 Quiquin sirtu shimira arcangaj mana ima ranaras ushanchichu, randi yanapangaj. 9 Chiraigumanda cushi tucunchi ñucanchi samba ashcai, shinallara canguna shinzhi ashcais. Maspas mañanchi cangunamanda canguna ali pactajta tucungaj. 10 Chiraigumanda quillcauni manara shamujllaira, ama piñasha rimangaj ñuca shamushcai. Casna rimana ushaira Señor cuhuaca, cangunara shayachingaj, mana cangunara tulangaj. 11 Uquiuna cushiyaichi, ali tucuichi, cariyaichi. Chi tupullara iyaichi. Cushi shunguhua causaichi. Cushi shungura cuj Dios, llaquij Dios, cangunahua tiangami. 12 Cangunapura parijumanda saluranuichi chuya muchanahua. 13 Tucui quirijcuna cangunara saluranaun. 14 Señor Jesucristo gracia ali llaquina iyai, Dios llaquishca, Santu Ispíritu cumpañanas tucui cangunahua tiachu. Amen.
1 Pablo, apóstol, Dios cachashca runa, mana runaunamandachu, astaun Jesucristo cachashca, shinallara Dios Yaya cachashca, Jesucristora huañushcaunamanda causachij, 2 tucui ñucahua tiaj uquiunandi, Galacia partii tiaj iglesiaunara saluranchi. 3 Gracia ali llaquina iyaira, cushi shunguras charichi Dios Yayamanda, Señor Jesucristomandas. 4 Pai quiquinllara cuca ñucanchi uchamanda, ñucanchira cai manali causaimanda lugaryachingaj, ñucanchi Dios Yaya munashcasna. 5 Pai sumajyachishca achu huiñai huiñaigama. Amen. 6 Manzharisha tiauni imasnara canguna uctalla anzhurishcanguichi cangunara cayaj Diosmanda. Pai cangunara cayaca Cristo gracia yangamanda ali llaquishcamanda, astaumbas shu tunu evangelio ali shimira catishcanguichi. 7 Shinashas, shu tunu evangelio shimis illan, astaumbas huaquinguna cangunara turbachinaun, Cristo evangelio shimira turcasha nisha. 8 Maspas, ñucanchis, shu ahua pachamanda angelbas, shu tunu evangelio shimira rimajpi, mana ñucanchi rimashca tunura, pai maldiciashca achu. 9 Imasnara ñaupas rimacanchi, shinallara cuti nini: Maican runas shu tunu evangelio shimira rimajpi cangunara, mana canguna ñaupa apishca tunu ajpi, pai maldiciashca achu. 10 ¿Cuna runauna llaquishcarachu mascauni? ¿Manzhu Dios llaquishcara mascauni? ¿Runaunara cushiyachingajchu mascauni? Ñuca chara runaunara cushiyachiusha, mana Cristora sirvijchu aima. 11 Shinasha canguna yachangaj munani, uquiuna, ñuca rimaushca evangelio ali shimi mana runamandachu. 12 Ñuca cai shimira mana apicanichu, mana yachacanichu ima runaunamandas, astaun Jesucristo ñucara ricuchihuaca. 13 Ñuca ñaupa huras causashca tunura ña uyashcanguichi, ñuca judiu yachaira catishca huraspi, imasna Diospa iglesiara ashcara turmindachicani, tulacani. 14 Ñuca judiuguna yachaibi ashca ñuca timpui causajcunara yalicani ñuca llactai. Ashca munaihua ñuca yayauna yachaigunara llaquicani. 15 Randi, Dios munashca huraspi, ñuca mama icsamanda pacha ñucara chicanyachisha, cayahuacami pai llaquishcamanda, 16 paihua Churira ñucajpi ricuchingaj, ñuca paihua shutira yachachingaj gentilgunama; aichahuas yahuarhuas mana chi ratullai rimacanichu. 17 Shinallara Jerusalenma mana ricanichu ñucamanda ñaupa aj cachashca runaunajma, astaun Arabia partima ricani, chi huasha cuti tigracani Damasco llactama. 18 Shinajpi, quinsa huata huasha, Jerusalenma ricani Pedrohua rimangaj, paihua pariju chunga pichca punzhara tiaucani. 19 Jacobo, Señorba uquira, ricucani, maspas shu cachashca runaunara mana ricucanichu. 20 Cai ñuca cangunama quillcashcai, Diospa ñaupajpi mana ansas llullanichu. 21 Chimanda huasha, Siria Cilicia partiunama ricani. 22 Cristoi tiaj iglesiauna Judea partii ñucara chara mana ricsihuanaucachu ñahuipura. 23 Chi rimashcallara uyanauca: “Ñucanchira ñaupa huras turmindachij runa, pai ñaupa huras chijnishca quirinara cuna camachiun.” 24 Ñucamanda Diosta ahuayachinauca.
1 Chunga chuscu huata huasha, cutillara Jerusalenma ricani Bernabehua, Titoras ñucahua pariju pushasha. 2 Dios ñucara ricuchishcaraigu chima sicacani. Sapallai atun ricurijcunahua ñuca gentilgunama rimashca evangelio ali shimira cuintacani, alichu manzhu ali nisha tapungaj. 3 Astaun, ñucahua pariju tiaj Tito, griegu ashallara, circuncisionda rangaj mana mandai tucucachu. 4 Huaquin llulla uquiuna pacalla pacalla icunauca, ñucanchi Jesucristoi charishca lugar causanara ricungaj, ñucanchira cutillara sirvijcunara rangaj. 5 Caigunara mana shu hurashuallas uyacanchichu caźungaj, evangelio sirtu shimi cangunahua saquiringaj. 6 Randi atun ricurijcuna, (paiguna ñaupa huras imasna ashcaras mana imas tucuhuanzhu, Dios runaunara mana chicanyachisha ricunzhu), cai atunguna ñucama mana ima mushuj shimiras cuintahuanaucachu. 7 Randi, paiguna ricunauca imasna ñucama cushca aca evangelio shimira rimangaj circuncisionda mana rajcunama, shinallara Pedrora circuncisionda rajcunama cushca aca rimangaj. 8 Ushaira cuj Dios Pedrora cachaca circuncisionda rajcunama, shinallara ñucamas ushaira cuhuaca gentilgunama yachachisha ringaj. 9 Shinajpi Jacobo, Cefas, Juandi, iglesia istandi cuinta iyashcauna, ñucama cushca gracia ali llaquina iyaira ricusha, ali maquira cuhuanauca yanapangaj ñucamas Bernabemas, ñucanchi gentilgunama ringaj, paigunaga circuncisionda rajcunama ringaj. 10 Ñucanchi tsuntsuunara iyaringaj, caillara rugahuanauca. Shinallara caita munaihua rangaj camacani. 11 Pedro Antioquía llactama shamujpi, paita ñahui pambai piñacani, pai cauźayuj ajpi. 12 Jacobomanda huaquinguna manara shamushcai, Pedro gentilgunahua micuj aca; astaumbas paiguna shamushca huasha, chican micuj aca, circuncisionda rajcunara manzhashcamanda. 13 Chishu judiugunas paihua pariju shina ranauca, shinallara Bernabé paiguna manali raushcara catica. 14 Ñuca imasna paiguna evangelio shimii mana dirichu purishcara ricusha, Pedrora rimacani tucui runauna ñaupajpi: “Can, judiu ashallara, gentilguna cuinta causausha, mana judiu cuinta, ¿imaraigu gentilgunara camachingui judiuguna yachaira catingaj?” 15 Ñucanchi judiu miraimanda anchi, mana uchasapa gentilgunamanda. 16 Yachanchi imasnara shu runa Dioshua ali dirichu tucun, mana ley shimira rashcaunamanda, astaun Jesucristoi quirishcamanda. Ñucanchis shinallara Jesucristoi quirishcanchi ali dirichu tucungaj Cristoi quirishcamanda, mana ley shimi rashcaunamanda, imasna ley shimi rashcaunamanda mana pihuas ali dirichu tucungachu. 17 Shinallara, ñucanchi Dioshua alichishcauna tucusha nijpi Cristoi, shina ashallara chara uchara raunchi, ¿caimandachu Cristo uchara rachij tucun? ¡Mana! 18 Ñuca ñaupa huras tulashcaunara cutillara sicachisha, uchara raj tucuni. 19 Shinajpi ley shimiraigumanda ñuca chi leyhuajta huañushcani, Diospa ñaupajllai causangaj. 20 Cristohua pariju chacatashcami ani, ña mana causaunichu ñuca, astaumbas Cristo ñucajpi causaun. Ñuca cai aichai cuna causaushca causaiga Diospa Churii quirishcai causauni. Pai ñucara llaquica, pai quiquinllara cuca ñuca randimanda. 21 Diospa gracia yangamanda llaquishcara mana ichunichu. Ali dirichu causana ley shimimanda shamushca ajpi, Cristo yangamanda huañushca anmaca.
1 ¡Upa Gálatascuna! ¿Pita cangunara umachicachu sirtu shimira ama uyangaj? Canguna ñahui pambai, canguna chaupi shungüi Jesucristo chacatashcara pajlla pambai ricuchishca aca. 2 Caillara cangunamanda yachasha nini: ¿Ley shimi ranaunamandachu Ispiritura apicanguichi? ¿Manzhu uyasha quirishcamanda apicanguichi? 3 ¿Casna upauna anguichi? ¿Ispirituhua callarishallara, cuna aichamandachu ali dirichu tucunara iyanguichi? 4 ¿Yangamandachu chi tucuira turmindarishcanguichi? Yangamanda chari aca. 5 Ispiritura cangunama cuj Dios, canguna chaupi shungüi munanaita raj, ¿pai cai tucuira rarca ley shimi ranaunamandachu? ¿Manzhu uyasha quirishcamanda aca? 6 Shinallarami Abraham Diosta quirica, Dioshua dirichu alichishcami nishca aca. 7 Caita yachaichi, quirijcuna Abrahamba churiunami. 8 Quillcashcaunai ñaupa ricurica imasnara Dios gentilgunara paihua dirichu alichinma paiguna quirishcamanda. Ñaupa hurasmanda caita rimasha, ali shimira Abrahanda cuintaca, shina nisha: “Canmanda tucui ailluuna bindisiai tucunaungami.” 9 Shinajpi, quirijcuna quirij Abrahanhua pariju bindisiai tucunaushcami. 10 Tucui ley shimii rashcaunai quimirijcuna maldisiashcaunami. Quillcashcami tian: “Maican runas tucui ley shimii quillcashca ranaunaras mana rasha causausha, maldisiashcami.” 11 Imasna ley shimiunamanda mana pihuas Diospa ñaupajpi ali dirichu tucun, casnami quillcashca tian: “Ali dirichu runa pai quirishcamanda causanga.” 12 Ley shimi mana quirinamandachu, astaumbas nin: “Chita raj runa chimanda causanga.” 13 Cristo ñucanchira randica ley shimi maldisiashcamanda; ñucanchimanda pai maldisiai tucuca. Quillcashca tian: “Maldisiashcami tucui runa yurai huarcushca huañuj.” 14 Cristo Jesús maldiciai tucuca Abrahanmanda bindisiashca gentilgunama pactachu, ñucanchi quirishcamanda cusha nishca Ispiritura apingaj. 15 Uquiuna, runa tunui rimauni. Shu pactachina shimi, runamanda ashas, ña “Alimi” nishca ajpi, pi runas mana tucuchin, pi runas mana yapan. 16 Dios cushca shimiunara Abrahanma cushca aca, paihua miraimas. Mana ninzhu paihua miraigunama, ashcaunama cushca cuinta, astaumbas shujmalla: “Camba miraima,” nisha. Cai mirai Cristomi. 17 Caitami nini: Chi ñaupa cushca pactachina shimira ñaupa huras Dios alimi nica. Shinajpi ley shimi, chuscu patsaj quinsa chunga huata huasha shamujpi, ñaupa shamuj cushca shimira mana tucuchinzhu chi shimira huajlichingaj. 18 Herencia nishca, yaya cushca, ley shimimanda shamujpi, ña mana cushca shimimandachu. Astaumbas Dios Abrahanma cusha saquica, cushca shimimanda. 19 Shinajpi, ¿imajta sirvin cai ley shimi? Manali rashcaunamanda cushca aca, ñaupa huras cushca shimi rimashca mirai shamunagama, paihuajma shimira cushcaraigu, Chi shimi angelgunamanda cushca aca, shu alichij runahua. 20 Alichij runa mana ministirinzhu shu runallahua; Dios shujllami. 21 Shinajpi, ¿ley shimihua Dios cushca shimiunahua cuntrachu? ¡Mana! Ley shimi causachina ushajpi, sirtu pacha ali dirichu causana ley shimimanda shamunmaca. 22 Quillcashca shimiga tucuira ucha ucui ishcaca, Jesucristoi quirishcamanda cushca shimira quirijcunama cushca achu. 23 Quirina huras manara pactamujllaira huacachishca acanchi ley shimi ucui, ishcashca cuinta acanchi quirinara ricuchinagama. 24 Shinasha, ley shimi ñucanchira cuiraj maca, ñucanchira Cristoma pushangaj, ñucanchi Cristo Jesuspi quirishalla ali dirichu tucungaj. 25 Quirina huras pactamujpi, cuirajta ña mana ministinchichu. 26 Canguna tucui Diospa churiuna anguichi Cristo Jesuspi quirishcamanda. 27 Tucui canguna Cristoi bautisashcauna Cristora churarishcanguichi. 28 Ña judiu illan, griegu illan; sirvijpas lugar runas illan; shinallara caris huarmis illan. Tucui canguna shujlla anguichi Cristo Jesuspi. 29 Shinallara, canguna Cristojcuna asha, sirtu pacha Abrahamba miraiguna anguichi, maspas shimi cushcamanda herencia nishcara apijcuna anguichi.
1 Caitami nini: Herencia nishca yayamanda cushcara apij huahua asha, mana imais sirvij runamanda shu tunu ricurinzhu, pai tucuimanda duiñu ashallara. 2 Paiga cuirajcuna yachachijcuna maquiunai causaun, yaya rimashca huras pactamunagama. 3 Shinallarami ñucanchis huahua huraspi mundu yachaira sirvijcunami acanchi. 4 Astaumbas timpuuna pactarijpi, Dios paihua Churira cachamuca, huarmimanda pagarishca, ley shimi ucui pagarishca, 5 ñucanchira, ley shimi ucui tiajcunara randingaj, ñucanchiga paihua churiuna tucungaj. 6 Cangunaga, churiuna asha, Dios paihua Churi Ispiritura cachamuca canguna shungüi: “Abba, Yaya,” nisha caparin. 7 Shinasha, ña mana sirvijchu angui, astaumbas churi tucushcangui. Maspas, churi asha, Diosmanda herencia nishca Yayamanda cushcara apij tucungui Cristoi. 8 Sirtu pacha ñaupa huras, Diosta mana ricsisha, yanga dioscunara sirvicanguichi. 9 Cunaga, Diosta ña ricsisha, astaun ali, Diosmanda ricsishca asha, ¿imarasha cutillara cai mana valij mundu yachaima tigrasha ninguichi chita cutillara sirvingaj? 10 Huaquin punzhaunara, quillaunara, timpuunara, huataunara huacachinguichi. 11 Cangunamanda manzhauni, cangunara yangamanda chari yachachishcani. 12 Uquiuna, cangunara rugauni, ñucasna aichi, imasna cangunasna tucucani. Ñucajta ima manaliras mana rahuashcanguichichu. 13 Canguna iyaringuichimi imasna ñuca aichai tiaj ungüimanda, ñaupa punda cangunama evangelio ali shimira rimacani. 14 Ñuca aichai ricurij ungüimanda ñucara mana piñahuacanguichichu, mana ichuhuacanguichichu. Astaumbas ñucara chasquihuacanguichi shu Diospa angelda cuinta, quiquin Cristo Jesusta cuinta. 15 Canguna chi huras charishca llaquina shungu, ¿cuna maibirai? Cangunara nini, usharijpi canguna quiquin ñahui muyura llucchinguichimaca ñucama cungaj. 16 Sirtu shimira cangunara rimashcamanda, ¿ñucara chijnihuanguichichu? 17 Chi runauna cangunara mascanaun, mana ali shungumanda, astaumbas cangunara ñucanchimanda anzhuchingaj, canguna paigunajma llutaringaj. 18 Alimi alira mascangaj tucui huraspi, mana ñuca cangunahua tiaushca hurasllai. 19 Ñuca churihuauna, cangunamanda cutillara nanachiuni huahuara pagarichingarau cuinta, Cristo canguna ucui iñanagama. 20 Cunallara cangunahua tiangaj munaimacani, ñuca rimana tunura turcangaj. Cangunamanda turbariuni. 21 Canguna, ley camachishca shimira catisha nijcuna, rimahuaichi: ¿Manzhu uyashcanguichi chi ley shimi rimashcara? 22 Quillcashca tian imasna Abraham ishqui churiyuj maca, shuj sirvij huarmimanda, chishuj liuri huarmimanda. 23 Sirvij huarmimanda huahua aichamanda pagarimuca, astaumbas liuri huarmimanda huahua Dios shimira cushcamanda pagarimuca. 24 Caiga shu pacashca shimimi. Cai ishqui huarmi ishqui pactachina shimiunara iyarichin. Shuj sirtu pacha Sinai urcumanda cushca aca, huahuaunara sirvingajlla pagarichij, caimi Agar aca. 25 Cai Agar Sinai urcura iyarichin, Arabia partii; shinallara cuna tiaj Jerusalenda ricuchin. Paiga paihua huahuaunandi sirvijcuna tucunaushcami. 26 Astaumbas, ahuamanda Jerusalén lugarmi, paimi tucui ñucanchi mama cuinta. 27 Quillcashca tian: “Cushiyai, huahuara mana ricuj, mana pagarichij, Cushihua capari, huahuamanda nanai illaj huarmi. Ichushca huarmi mas huahuaunara charin cariyujmanda yali.” 28 Cunaga, uquiuna, ñucanchi Isaac cuinta, shimira cushcamanda churiunami anchi. 29 Shinashas, imasna ñaupa huraspi aichamanda pagarishca runa Ispiritumanda pagarishca runara turmindachica, shinallarami tucun cuna huraspas. 30 ¿Quillcashca imara nin? Shinami nin: “Sirvij huarmira paihua churindi ichui, sirvij huarmimanda churi ama herencia nishcara apingaj liuri huarmimanda churihua pariju.” 31 Shinasha, uquiuna, ñucanchi mana sirvij huarmimanda churiunachu anchi, astaun liuri huarmimanda churiuna.
1 Shinzhi tucuichi canguna lugar tucushcai, imasnara Cristo ñucanchira lugaryachica. Ama vultiarichichu cutillara sirvijcuna tucungaj. 2 Caita ñuca, Pablo, cangunara nini: Canguna circuncisionda rajpi, Cristo mana imajpas valinzhu cangunaj. 3 Cutillara nini: Maican runas circuncisionda rasha, intiru ley shimira pactachina anga, 4 Cristomanda anzhurishcanguichi, canguna ley ranaunamanda ali dirichu tucusha nijcuna. Gracia ali llaquina iyaimanda urmashcanguichi. 5 Ñucanchi Diospa Ispiritumanda pai cushca ali dirichu tucunara chapaunchimi, ñucanchi quirishcamanda. 6 Cristo Jesuspi quirijpi, circuncisionda ranas mana ranas imajpas mana valinzhu, astaumbas valinmi ñucanchi llaquij shungumanda quirina. 7 Ñaupa huras alimi purijcuna acanguichi, ¿pita cangunara arcaca sirtu shimira mana pactachingaj? 8 Casna iyai mana cangunara cayaj Diosmandachu shamun. 9 Ansalla punguichina pulvu intiru masashcara punguichin. 10 Cangunamanda chapauni Señorbi, canguna shu tunui ama iyaringaj. Astaun cangunara turbachij runa taripai tucungami, maican ashas. 11 Ñuca, uquiuna, circuncisionda rana shimira chara camachiullaira, ¿imaraigu chara ñucara turmindachihuanaun? Casna ajpi cruzmanda turmindarina ña tucurishcami. 12 Cangunara turbachijcuna paigunallara pitinauchu. 13 Uquiuna, canguna lugar tucungaj cayashca acanguichi. Shinallara canguna lugar tucushcara ama huajlichinguichichu ucha aicha munaira sirvisha, astaumbas cangunapura parijumanda sirvinuichi llaquinaushcahua. 14 Intiru ley camachishca shimi cai shimillai pactachishca tian: “Camba mayambi tiajta canda cuintallara llaquinami angui.” 15 Cangunapura parijumanda caninaushas micunaushas, ricuichi cangunapura ama tucuchinguichichu. 16 Shinajpi nini: Ispiritui purichi, ucha aicha munashcara ama raichichu. 17 Aicha Ispirituhua, Ispíritu aichahua macananaun. Caiguna chijninanaun, can munashcara ama rangaj. 18 Canguna Ispíritu pushaushcauna asha, ley shimira mana uyanachu. 19 Aicha ranauna pajllai ricurinaun, caigunami: shujpa huarmira quichuna, shujhua tacarina, irus iyai, aicha munashcara rana, 20 runa rashca dioscunara alabana, sagranauna, chijninauna, piñanausha causana, tumbanauna, piñarinauna, macanauna, piñanauna, llulla quirinauna, 21 shujcuna charishcamanda chijninauna, huañuchinauna, machanauna, yali micuna upina istauna, casna ranaunandi. Cangunara nini: shina rajcuna Dios mandana pachara mana apinaungachu. 22 Astaumbas, Ispíritu apachishcauna caigunami: Llaquina, cushiyana, ganaslla causana, ali chapana iyai, alirana iyai, ali shungu, quirina, 23 mansu shungu, aicha munaira arcana. Casnaunahua ima ley shimis mana tianzhu. 24 Cristojcuna aichara chacatanaushcami, pai llaquishcaunandi, pai munashcaunandi. 25 Ñucanchi Ispiritui causausha, shinallara Ispiritui purishunchi. 26 Ama alabarishunchi, parijumanda ama piñanausha, parijumanda ama chijninausha.
1 Uquiuna, shu runa uchai urmajpi, canguna Ispirituhua undashcauna cai runara alichichi mansu shunguhua, canllara iyarisha cambas ama shinailara tintai tucungaj. 2 Canguna shujcuna cargara aparichi, shina rasha Cristo mandashca shimira pactachichi. 3 Maican runas, “Valij mi ani,” nisha iyarisha, mana imas ashallara, pai quiquinllarara umachin. 4 Shinajpi, caran duiñu pai quiquin rashcara ricuchu, pai quiquin rashcamanda alabai tucungaj, astaun mana shujpajmanda. 5 Caran duiñu paihua quiquin cargara apangami. 6 Diospa shimira yachachishca runa ima ali ranahuas yanapachu paita yachachij runara, 7 Cangunallarara ama umachichichu, Dios mana burlaihuajchu. Imaras shu runa tarpusha chillarara pallangami. 8 Pi runas paihua quiquin aicha munashcara tarpusha, aichamanda ismura pallangami. Astaumbas maicambas Ispíritu munashcara tarpusha, Ispiritumanda huiñai causaira pallangami. 9 Ama sambayashunchi alira rangaj. Ñucanchi mana sambayasha, pactarishca punzhai pallashunmi. 10 Shinajpi, lugar tiajpi, alira rashunchi tucuigunahua, maspas quirijcunahuas. 11 Ricuichi ima atun letraunahua cangunama quillcauni, ñuca quiquin maquihua. 12 Aichai ali ricurishun nijcuna cangunara circuncisionda rangaj mandanaun, paiguna ama turmindari tucungaj Jesuspa cruzraigumanda. 13 Quiquin circuncisionda rajcunallara ley camachishca shimira mana pactachinaun. Astaumbas cangunara circuncisionda rangaj munanaun canguna aichamanda alabai tucungaj. 14 Ñucajpi ama lugar tiachu ñucallara alabaringaj, astaumbas ñucanchi Señor Jesucristo cruzpi cushiyasha, paimanda mundu ñucajma chacatashca aca, ñucas munduma. 15 Cristo Jesuspi, circuncisionda ranas mana ranas imajpas mana valinzhu, astaumbas mushuj causanami valin. 16 Tucui cai camachishcai purijcuna cushiras llaquinaras charinauchu, shinallara Diospa Israelma. 17 Cunamanda ñaupajma pihuas ama mulistahuachu. Ñuca aichai Señor Jesuspa siñalgunara charinimi. 18 Uquiuna, ñucanchi Señor Jesucristo gracia ali llaquina iyai canguna ispirituhua tiachu. Amen.
1 Pablo, Jesucristo cachashca runa Dios munashcamanda, Efesoi tiaj quirijcunama quillcashca, Cristo Jesuspi ali sirtu quirijcunama: 2 ñucanchi Yaya Diosmanda, Señor Jesucristomandas, gracia ali llaquina iyaira, cushi shunguras charichi. 3 Dios, Señor Jesucristo Yaya, alabashca achu. Pai tucui almai bindisiashcaunahua ñucanchira bindisiashcami Cristoi, ahua pacha partiunai. 4 Cai pachara manara rashcaira, Dios ñucanchira ajllaca Cristoi, ñucanchi paihua ñaupajpi chuyajlla, ima iruspas illaj tucungaj. 5 Dios ñucanchira llaquisha, ñaupa hurasmanda pacha ñucanchira chicanyachica paihua quiquin churiuna tucungaj Jesucristomanda, pai ali munashcasna, 6 paihuaj sumaj gracia ali llaquina iyai alabai tucungaj, pai llaquishca Churii ñucanchira chasquingaj. 7 Jesucristoi randishcaunami anchi paihua yahuar talishcamanda, ñucanchi ucharashcaunara perdonashcami, paihua yapa valij gracia ali llaquina iyai tupura, 8 Dios cai gracia ali Haquina iyaira yalijta cuca ñucanchima tucui yachanais, tucui intindinais. 9 Paihua ñaupa huras pacashca munaira cuna yachachihuashcami, paihua ali munaimanda, pai quiquinllara casna munasha, 10 timpuuna pactarijpi tucuira Cristoi tandachica, ahua pachai tiajcunandis, cai pachai tiajcunandis. 11 Paihuajllai, shinallara, herencia apinara charicanchi, Dios ajllashcaunami acanchi, pai munashcasna, paihua munaibi iyarishcasna. 12 Dios casna rarca, ñucanchimanda Diospa sumajta ahuayachingaj, ñucanchi ñaupa punda Cristoi chapajcuna asha. 13 Cristoi shinallara canguna cusha nishca Santu Ispiritura apishcanguichi shu sellura cuinta; canguna sirtu shimira uyashcanguichi, caimi almara quishpichina ali shimi, shinallara Cristoi quirishcanguichi. 14 Cai Ispirituca ñucanchima ñaupamanda cushcami, ñucanchi huasha bindisiai tucungaraushcara sirtu ajta ricuchingaj, Dios ñucanchira randina pactaringagama, Diospa sumajta ahuayachingaj. 15 Chiraigumanda ñucas, canguna Señor Jesuspi quirishcara uyasha, canguna tucui quirijcunara llaquishcaras uyasha, 16 ñuca cangunamanda Diosta agrasinara mana saquinichu, cangunara iyarisha ñuca mañaushcaunai. 17 Ñuca mañani, ñucanchi Señor Jesucristoj Dios, atun sumaj Yaya, cangunara shu ali intindinara, ali yachana iyairas cuchu, paita ricsinai, 18 canguna iyaimanda ñahuiuna punzhayachishca anauchu, canguna yachangaj ima gustu aliunara chapaunguichi Cristo cangunara cayashcamanda, shinallara quirijcunai Cristo gustu sumaj herencia nishca apinara yachangaj. 19 Mañauni canguna Diospa atun ushaira yachangaj ñucanchira yanapangaj, imasna paihua shinzhi ushaihua rashcasna. 20 Dios cai atun ushaira ricuchica pai Cristora huañushcaunamanda causachisha, paita paihua ali maqui partima tiachica ahua pachai. 21 Tucui gubirnu ahuai, tucui apu, tucui ushana, tucui mandana ahuais, tucui rimashca shuti ahuais ahuayachishca aca cuna huraspis, huasha shamuna huraspis. 22 Shinasha, Dios tucuira Cristo chaqui ucui churashcami. Shinallara paita tucui ahuai uma cuinta churashcami iglesiama. 23 Iglesia Cristo aicha cuintami. Tucui imas Cristoi tiaj iglesiai tiaun. Cristo tucuira tucuibi undachin.
1 Canguna ucharanais manali ranaunais huañushca ashca huraspi, Dios cangunara causaira cucami. 2 Ñaupa huras canguna chi ucharanaunai causacanguichi, cai mundu causashcasna, huairai mandaj supai apu causana tupui. Cai supai cunallara tarabaun mana caźuj runauna shungüi. 3 Shinallara ñaupa huras tucui ñucanchi caigunahua causacanchi ñucanchi aicha munashcaunai, aicha munairas iyai munairas rasha. Ñucanchi quiquin rashcaunamanda Diosta piñachisha tiaucanchi, tucui chishu runauna cuintallara. 4 Shinasha, Dios yapa llaquij asha, pai ñucanchira ashcara llaquishcamanda, 5 ñucanchi chara ucharanai huañushca ajllaira, pai ñucanchira causaira cuca Cristohua pariju. Paihua gracia ali llaquishcamanda quishpichishca anguichi. 6 Cristohua pariju pai ñucanchira causachica, shinallara ñucanchira ahuai tiachica Cristo Jesushua pariju, 7 huasha timpuunai paihua gracia ali llaquina ashca valishcara ricuchingaj, pai ñucanchira llaquishcamanda Cristo Jesuspi. 8 Gracia yanga llaquishcamanda quishpichishca anguichi, canguna quirishcamanda. Caiga mana cangunamandachu, astaumbas Dios cuyashcami. 9 Cai quishpina mana runaunamandachu, pihuas pai quiquinllara ama alabarichu. 10 Ñucanchiga Dios rashcauna manchi, Cristo Jesuspi iñachishcauna, alira rangaj. Cai ali ranaunara Dios ñaupamandallara puruntuca ñucanchi caigunara rasha causangaj. 11 Chimanda iyarichi imasna ñaupa huras canguna gentilguna ajpi aichai, circuncisionda mana rajcuna nishca acanguichi circuncisionda rajcunamanda, paiguna aichai maquihua rajcunamanda. 12 Chi hurascunai, Cristo illajcuna acanguichi, Israel aillumanda chicanyachishca, Dios cushca pactachina shirniuna illajcuna, ima chapanas illajcuna, Diospas illajcuna cai pachai. 13 Astaumbas Cristo Jesuspi, canguna ñaupa huras carui tiajcuna, cuna huras mayanllayachishca anguichi, Cristo yahuarraigumanda. 14 Paiga ñucanchi cushimi. Ishqui runa muntunmanda shujllara rarca, chicanyachina quinzhara cuinta tulasha. 15 Cristo Jesús, paihua aichai chi piñanaunara tucuchicami, ley camachishca shimii rimashcaunandi paihua ranaunandi. Pai quiquimbi ishqui muntunmanda shu mushuj runara cuinta rarca, cushira cusha. 16 Cruzraigumanda Cristo ishqui runa muntungunara Dioshua amiguunara rarca shu aichallai, cruzpi piñanaunara huañuchisha. 17 Pai shamuca ali cushi shimira rimangaj canguna carui tiajcunama, mayallai tiajcunamas. 18 Jesucristomanda ñucanchi ishquindi muntun shu Ispiritumandalla Yaya ñaupajpi icunchi. 19 Shinajpi cuna canguna mana carumandaunachu anguichi, mana pasiajcunas, astaun quirijcunahua pariju causajcuna anguichi, Diospa ailluuna. 20 Dios cachashca runauna ahuai, Diosmanda rimajcuna ahuais shayachishca anguichi, istandi siqui rumiga quiquin Jesucristomi. 21 Intiru huasi Jesuspi ali rashca asha, iñasha rin shu santu templo huasi cuinta tucungaj Señorbi. 22 Paihuajpi canguna shinallara pariju shayachishca anguichi shu huasira rangaj, Dios chi huasii causangaj Ispiritui.
1 Chiraigumanda, ñuca, Pablo, canguna gentilgunamanda chunda cularbi Cristo Jesús ishcashca runami ani. 2 Canguna uyashcanguichi chari imasna Dios ñucara ajllacami paihua gracia ali llaquishcara cangunara yachachingaj. 3 Pai ricuchishcamanda cai pacashca shimira ñucama rimashca aca, imasna ñaupa ansallara quillcacani. 4 Chi quillcara ricusha, ricsinara ushanguichi imasna Cristo pacashca shimira intindiuni. 5 Cai pacashca shimi, ñaupa hurascunai runa churiunama mana ricuchishcachu aca, astaumbas cuna huras santu cachashca runaunama, Diosmanda rimajcunamas Ispíritu ricuchishcami, 6 imasna gentilguna judiugunahua pariju Dios cushca shimira apijcunami, shinallara pariju Cristo aichamanda partiunami, pariju Dios cushca shimira apijcunami Cristo Jesuspi, evangelio ali shimimanda. 7 Cai shimira yachachij tucucani Diospa gracia ali llaquina iyaira ñucama cushcamanda, paihua ushai rashcasna. 8 Ñuca tucui quirijcunamanda pishi ajllaira, cai gracia ali llaquina iyai ñucama cushca aca gentilgunama evangelio ali shimira rimangaj, Cristoi mana tupuihuaj valijcunara. 9 Shinallara ñucama cushca aca tucui runaunara pajlla pambai ricuchingaj Dios pacashca shimira, unai timpuunamanda tucuira raj Diospi pacashcara. 10 Dios casnami rarca, paihua atun yachashcara iglesiamanda cuna yachachingaj ahua pachai tiaj mandajcunamas, ushajcunamas, 11 imasna pai huiñaimanda iyashcasna ñucanchi Señor Jesucristoi rangaj. 12 Paihuajpi huacachishcami anchi, maspas Diospa ñaupajpi icunara charinchi mana manzhasha, Cristoi quirishcaraigumanda. 13 Chiraigumanda cangunara rugauni ama llaquiringaj ñuca turmindarinaunamanda cangunaraigu. Randi, caiguna cangunara ahuayachinami. 14 Caimandami Señor Jesucristo Yaya ñaupajpi cungurini. 15 Paimanda tucui aillu ahua pachais cai pachais shutichishcami. 16 Diosta mañauni imasna pai ali sumajyachishcasna, paihua ushaihua cangunara shinzhiyachingaj canguna shungu ucui, paihua Ispiritumanda. 17 Shinallara mañauni Cristo canguna shungu ucui causachu canguna quirishcamanda, canguna ali shinzhi shayachishca, ali pigarishca asha llaquinai, 18 tucui quirijcunahua ali intindijcuna aichi Cristo llaquishca anzhu ashcara, suni ashcara, ucu ashcara, ahua ashcaras, 19 maspas Cristo llaquishcara yachanara, tucui yachanaras pasajta, shinallara canguna shungu quiquin Dioshua tali tali undajta angaj. 20 Dios ushajmi tucuira ñucanchi mañashcamanda intindishcamandas yalijta rangaj, imasna ñucanchi ucui paihua ushai taraban. 21 Paiga sumajyachishca achu iglesiai Cristo Jesuspi tucui timpuunai huiñai huiñaigama. Amen.
1 Ñuca, Señorda sirvishcamanda chunda cularbi ishcashca runa, cangunara rugauni canguna cayashcasna ali tunui puringaj. 2 Mansu shunguhua, ali shunguhua, ali chapanahua, parijumanda ahuantanuichi llaquishcahua. 3 Ali ricuichi shujlla tucungaj Ispiritui, cushi shunguhua causangaj: 4 shu aicha, shu Ispíritu, imasna shu chapanallahua cayai tucucanguichi. 5 Shu Señor tian, shu quirina, shu bautisana, 6 shu Dios, tucuihua Yaya. Paimi tucui ahuai, tucuibajpis, tucuibis. 7 Shinashas, ñucanchimanda caran shujma gracia ali llaquina iyaira cushca aca, imasna Cristo cushcasna. 8 Chiraigumanda quillcashca tian: “Ahuama sicasha, ishcashca runaunara paihua pariju pushaca; runaunama cushcaunara cuca.” 9 Cai “sicashca” nishca, ¿manzhu nin pai cai pacha ucumanda mas huashama irguca? 10 Cai irguj shinallarami ahuama sicaca tucui ahua pachauna ahuai, tucuira undachingaj. 11 Paillara cuca huaquingunara apóstoles nishca Dios cachashca runauna tucungaj, shujcunara Diosmanda rimajcuna, shujcunara evangelio ali shimira rimajcuna, shujcunara ricujcunas, yachachijcunas, 12 quirijcunara alichingaj Diosta sirvinauchu, shinallara Cristo cuerpu nishca aichara shinzhiyachingaj; 13 tucui ñucanchi shujllai pactanagama, quirinais, Diospa Churira ricsinais, caran duiñu ali shunguyuj runa pactanagama, pactajta runa tucungaj, Cristohua undachishca; 14 ñucanchi ama istu istu purij huahuaunasna angaj, ama ima yachachina huaira cuinta pai munashcama apai tucungaj, ama umachij runauna umachishcahua pandarina shimihuas umachi tucungaj. 15 Astaumbas, sirtu shimira llaquinahua catisha, tucuibi Cristoi iñashunchi, paimi ñucanchi uma. 16 Paimanda, intiru aicha ali tandachishca, ali pigarishca asha, tucui paihua mucuuna parijumanda yanapananaun, caran parti paihua tunui rasha, iñasha ringaj laquinai. 17 Shinajpi caita Señorbi rimauni, shinallara mandauni, canguna cuna ama puringuichi shu gentilguna cuinta, paiguna manali iyashcaunai. 18 Paiguna intindinai llanduyashca anaun, Diospa causanamanda anzhurishca, paiguna yachana illaj ashcamanda, paiguna shungu shinzhiyashcamanda. 19 Paiguna sintina illajcuna asha, pingai illaj causangaj intriganauca, ima irus ranaras munaihua rangaj. 20 Astaumbas canguna cai tunura rangaj mana yachacanguichichu Cristomanda, 21 sirtura pacha paita uyashca, paimanda yachachishca, imasna sirtu shimi Jesuspi tian. 22 Rucu runa ñaupa causana samira saquichi, umachina munashcaunahua huajlishcami. 23 Shinallara mushujyashca aichi canguna alma iyaibi. 24 Dios samillai rashca mushuj runara churachichi ali shunguhua, sirtura rimaj chuyaj shunguhuas. 25 Chiraigumanda, llulla shimira saquisha, caran duiñu paihua mayambi causajhua sirtu shimira rimachu. Parijumanda shu aichamanda partiunami anchi. 26 Canguna piñarishca huras ama uchara raichichu. Canguna piñarishcara alichichi indi manara icushcaira. 27 Supai apura ama lugarda cuichichu cangunara tintangaj. 28 Ñaupa huras shuhuaj ama mas shuhuachu, astaumbas alira tarabasha paihua quiquin maquihua tarabachu, chimanda charingaj ministijcunama cungaj. 29 Canguna shimimanda ama ima manali shimis llucshichu, astaumbas ali yanapana shimiuna, uyajcunara cariyachingaj. 30 Diospa Santu Ispiritura ama llaquichichichu. Paimanda selluhua cuinta canguna Diospaj ajta ricuchishca acanguichi randina punzhagama. 31 Cangunamanda tucui ayaj iyaira, piñarinara, piñanara, caparinaunara, milli shimiunara anzhuchichi, shinallara tucui manaliras. 32 Randi cangunapura, parijumanda ali shungupura aichi, llaquisiquiuna, parijumanda perdonanausha, imasna Dios cangunara perdonaca Cristoi.
1 Diosta catirijcuna aichi, llaquishca churiunasna. 2 Llaquinai purichi, imasna Cristo ñucanchira llaquica, shinallara ñucanchimanda pai quiquinllara intrigaca, cuyashca cuinta, Diospa ñaupajpi shu gustu asnaj sacrificiora cuinta. 3 Randi, shujhua tacarina, tucui irusta rana, cullquira yapajta llaquina, ama rimashcallas uyarichu cangunapura, canguna chuyaj shunguyujcuna asha. 4 Shinallara ima irus shimis, ima upa cuinta rimanas, ima yanga burlanas mana rimaihuajchu. Mana valinaunzhu. Astaumbas Diosta agrasisha rimaichi. 5 Caita sirtu pacha yachaichi: Ima shujhua tacarij runa, ima irus shungu runa, ima cullquira yapajta llaquij runa, (caimi runa rashca diosta alabana cuinta), mana imaras charingachu Cristohua, Diospa mandana pachai. 6 Pihuas cangunara ama umachichu, yanga shimira rimasha. Cai quiquin ucharashcaunamanda Dios mana caźujcunahua piñarin. 7 Casna rajcunahua ama llutarichichu. 8 Ñaupa huras llandui tiaucanguichi, astaun cunaga punzhai tiaunguichi Señorbi. Punzhamanda churiunasna purichi. 9 Punzhai purishcamanda aparishcauna caigunami: llaquij shungu, ali shungu, sirtu shungu. 10 Dios munashcara ricsichichi. 11 Ucha llandui mana valij rashcaunara ama raichichu, astaumbas piñaichi. 12 Paiguna pacallai rashcaunara pinganaitami rimangaj. 13 Tucui rashcauna punzhai churashca ricurinaun. Punzha tucuira ricuchin. 14 Chiraigumanda rimashca tian: “Llicchari, puñuj runa. Huañushcaunamanda atari. Cristo canda punzhayachingami.” 15 Shinasha ricuichi imasna purishcaras, ricushalla puringaj, ama upauna cuinta astaun iyaiyuj cuinta, 16 timpura mana pirdisha, punzhauna mana ali ashcamanda. 17 Chimanda ama upa cuinta tucuichichu, astaumbas Dios munashcara intindijcuna. 18 Vinuhua ama machaichichu, paihuajpi nusparina tian; astaun Ispirituhua undashca aichi, 19 cangunapura rimanausha salmos nishca cantanaunahua, alma cantanaunahua shungumanda cantasha, Diosta alabasha canguna shungüi. 20 Tucui huras Yaya Diosta agrasichi tucuimanda, ñucanchi Señor Jesucristo shutii. 21 Parijumanda caźuichi, Diosta manzhashcahua. 22 Casarashca huarmiuna paiguna quiquin cariunara uyanauchu, Señorda uyashca cuinta. 23 Cariga paihua huarmi umami, imasna Cristo iglesia umami; iglesia paihua aichami, Cristo iglesiara Quishpichijmi. 24 Imasna iglesia Cristora uyan, shinallara huarmiuna tucuibi paiguna cariunara uyanauchu. 25 Cariuna, canguna huarmiunara llaquichi, imasna Cristo iglesiara llaquica, iglesia randimanda paillara cuca, 26 iglesiara sumajyachingaj, pai Quillcashca Shimihua paita maillaca, chuya yacuhua maillashca cuinta, 27 iglesiara sumajlla pai quiquinmallara cungaj, ima iruspas illaj, ima sipus illaj, ima manalis illaj, chuya achu, ima tinirishcas illaj. 28 Shinallara cariuna paiguna huarmiunara llaquinami, paiguna quiquin aicharasna. Maican runa paihua huarmira llaquisha, pai quiquinllarara llaquinmi. 29 Mana imahuraspas pi runas paihua quiquin aichara chijnicachu, astaumbas carán, cuiran, imasna Cristo iglesiara cuirashcasna. 30 Ñucanchi paihua aichamanda partiunami anchi, paihua aichamanda paihua tullunamandas. 31 Caimanda shu runa paihua yayara paihua mamara saquinga, paihua huarmihua llutaringami. Paiguna ishqui shu aichalla tucunaungami. 32 Cai pacashca shimi valijmi. Caita rimauni Cristoras iglesiaras iyarisha. 33 Maspas, cangunamanda caran duiñu paihua quiquin huarmira llaquichu, pai quiquinllara llaquishcasna. Huarmiga paihua carira uyachu.
1 Huahuauna, yayaunara uyaichi, Señorda llaquij huahuaunasna. Caimi ali. 2 Yayaras mamaras llaquinami angui. Caimi ñaupa camachishca shimi shu cusha nishca shimihua rimashca. 3 Can caita rasha ali tucungui, unaira causangami cai pachai. 4 Yayauna, canguna huahuaunara ama piñachichichu, astaumbas paigunara ali iñachichi cangunara caźungaj, Señorba shimira yachachisha. 5 Sirvijcuna, canguna cai pachai tiaj patrungunara uyaichi, manzhashcahua, ali shunguhua, Cristora sirvina cuinta, 6 mana ricushcallai tarabasha, runaunara cushiyachingaj munajcunasna, astaun Cristora sirvijcuna cuinta, shungumanda Diospa munaira rasha; 7 ali munaihua sirvisha, Señorda sirvina cuinta, mana runaunara, 8 caita yachasha, runa ima alira rasha caillara cuti chasquinga Diosmanda, sirvij ashas, lugar ashas. 9 Canguna, patrunguna, shinallara raichi paigunahua, piñanara saquisha. Caita ricsichi, paiguna Señor canguna Señorbas ahua pachai tian. Paiga sirvijcunara patrungunara mana chicanyachinzhu. 10 Cuna, ñuca uquiuna, Señorbi shinzhiyaichi, paihua ushaj ursahua. 11 Tucui Diospa iru churarinaunara cuinta churarichi, canguna shinzhi tucungaj, supai apu tucui almara apina tujllara vinsingaj. 12 Ñucanchi macanauna mana aichahua, mana yahuarhua, astaumbas atungunahua, shinzhiunahua, llandu tuta mundu apuunahua, ahua huairai tiau milli supaigunahuas. 13 Chiraigumanda Diospa iru churarina cuinta intirura apichi, manali punzhai canguna shayarinara ushangaj, tucui chigunara tucuchishca huasha canguna shinzhira shayaringaj. 14 Shinzhira shayarichi, sirtu shimihua chumbillishca, ali causanahua churarishca, pichura quillpana iru carahua cuinta. 15 Canguna chaquii, zapátusta cuinta, evangelio cushi shimira churarichi. 16 Maspas, Diosta quirina, lurirara cuinta, apaichi, manali supai shitashca tucui nina balistaunara cuinta arcangaj. 17 Shinallara, alma quishpichina iru gurara cuinta apaichi, shinallara Ispíritu ispararas, caimi Diospa shimi. 18 Tucui huras mañaichi tucui mañanahuas tucui ruganahuas Ispiritui, canguna mañashcara mana sambayasha chapausha, tucui quirijcunamanda rugasha. 19 Shinallara ñucamanda mañaichi, ñuca shimira pascanai, rimanara ñucama cui tucungaj, evangelio pacashca shimira mana manzhasha yachachingaj. 20 Ñuca Dios cachashca rimaj ani, cadena iru huascahua huatashca evangelio shimimanda. Mañaichi ñucamanda, ñuca mana manzhasha, imasna rimana ashcaras Cristomanda rimangaj. 21 Canguna yachangaj ñucamanda, ñuca rashcaunaras, llaquishca uqui Tíquico tucuira cangunara cuintanga. Pai Diosta ali sirvijmi. 22 Paita cangunama cachashcani, canguna imasna ñucanchihua tucushcara yachangaj, pai canguna shungura cariyachingaj. 23 Uquiuna cushi shungura charinauchu, quirij shungura, llaquij shungura, Dios Yayamanda, Jesucristomandas. 24 Tucui Señor Jesucristora mana pishiyana llaquinahua llaquijcuna gracia ali llaquina iyaira charinauchu. Amen.
1 Pablo, Timoteo, Jesucristora sirvijcuna, tucui Filipospi tiaj Cristo Jesuspi quirijcunama quillcaunchi, cuiraj rucuunamas, yanapajcunamas. 2 Dios Yayamanda, Señor Jesucristomanda, gracia ali llaquina iyairas cushi shunguras charichi. 3 Tucui huras cangunara iyarisha, Diosta agrasini, 4 caran cuti cushihua Diosta mañauni tucui cangunamanda, 5 imasna ñaupa punzhamanda pacha cuna hurascama paiijumanda ñucara yanapahuashcanguichi evangelio ali shimira rimaushcai. 6 Caita ali yachani, canguna shungüi alira rangaj callarij Dios, tucui pai rashcara pactachingami Jesucristo shamuna punzhagama. 7 Tucui cangunamanda ñuca casna iyashca alimi, imasna tucui cangunara ñuca shungüi charini. Ñuca ishcarishcaunais, evangelio ali shimira yanapashcais sirtu ajta rimashcais, tucui canguna ñucahua pariju cumpañajcuna anguichi gracia ali llaquina iyaibi. 8 Yaya Dios yachan ñuca tucui cangunara llaquishcara, Jesucristo ashca munaihua llaquishcasna. 9 Diosta rugauni canguna llaquina mas mas yaparichu, ali intindinahuas, tucui yachanahuas. 10 Canguna tucui ima ali ashcaras ricsingaj, canguna ali shunguyuj, cauźa illaj tucungaj, Cristo shamuna punzhagama. 11 Shinallara rugauni canguna ali ranaunahua talirijta aparisha tianauchu Jesucristomanda, Diosta alabanais, paita ahuayachinais. 12 Uquiuna, canguna yachangaj munani imasna ñucahua tucushcauna ali yaparinaushcami evangelio ali shimira yanapangaj. 13 Shinallara ñuca Cristomanda ishcarishcauna yacharinaushcami tucui gubirnadurba huasii, tucui chishujcunamas. 14 Ñaca tucui uquiuna ñuca ishcarishcaunara yachasha cariyanaushcami, chimanda shinzhi tucunaushcami, mana manzhasha, Diospa shimira mas mas rimangaj. 15 Huaquinguna chijnishcamanda, ñucara turmindachingaj Cristo shutira rimanaun, astaun shujcunaga ali munaimanda 16 Huaquinguna Cristo shimira rimanaun piñashcamanda, mana ali shungumanda, ñuca turmindariushcara mas yapangaj nisha: 17 astaun shujcunaga, llaquishcamanda, ñuca evangelio ali shimira rimashcamanda ishcai tucushcara yachasha. 18 Shinajpi, ¿imarai? Tucuibi, umachisha nijpis, sirtu ajpis, Cristo shutira rimashcami. Caimanda cushiyauni, maspas cushiyashami. 19 Ñuca yachani, canguna mañashcamanda, Jesucristo Ispíritu yanapashcamandas, cachari tucushami. 20 Ñuca munani, shinallara chapauni, mana imais pingachishca tucungaj, astaumbas ñuca ali cariyasha, cunallara tucui huras cuinta, ñuca causaushcais huañushcais, yapa ashcara munani Cristo ahuayachishca achu ñuca aichai. 21 Ñucaj causana Cristomi, huañunaga gananami. 22 Ñuca cai aichai causanai Diosta sirvingaj valijpi, mana yachanichu maicanda ajllanara. 23 Cai ishquimanda maicanda chari mascasha. Rinara munani Cristohua pariju tiangaj. Caimi imamandas yali valin. 24 Randi, aichai ñuca saquirina mas ministirinmi cangunaraigumanda. 25 Yachani cangunahua saquirishami, tucui cangunahua chara tiashami, canguna quirinai ñaupajma ringaj, canguna quirishcai cushiyangaj, 26 canguna Cristo Jesusta alabana mas yaparingaj ñucaraigumanda, ñuca cangunahua cuti tiaushcamanda. 27 Cristo evangelio valishca tunui causaichi, ñuca cangunara ricungaj shamushas, illashas, cangunamanda uyasha nini imasna canguna shinzhira shayaushcara shu almallahua, shu iyaillahua, evangelio quirinamanda macanausha. 28 Cangunara arcajcunara ama imais manzhaichichu. Caita paigunama paiguna tularingaraushcara rimanga, astaun cangunama canguna quishpingaraushcara. Caiga Diosmandami. 29 Cangunara cushcami, Cristora llaquishcamanda mana paihuajpi quiringajlla, astaumbas shinallara paihuajpi turmindaringajpas. 30 Shina turmindarinara charinguichi, imasna ñucajpi ricucanguichi, maspas cuna ñucajpi tiashcara uyanguichi.
1 Ima cariyanas tiajpi Cristoi, ima cushiyanas tiajpi pai llaquishcamanda, ima cumpañanas Ispirituhua, ima munaihua llaquinas, ima llaquishcahua ricunas, 2 ñuca cushira undachichi, cangunapura chi tunullara iyarisha, chi tunullara llaquinausha, shu iyaillahua, parijulla chi tunullara iyarisha. 3 Piñanaunamandas, ima mas tucunamandas imaras ama raichichu, astaun mansu shunguhua. Caran duiñu shujcunara paimanda yali ajta iyachu. 4 Caran duiñu ama paihua quiquimbajllara ricuchu, astaumbas shinallara shujcunajtas. 5 Cangunajpis tiachu cai Cristo Jesús iyashca tunu. 6 Paiga Dios tunu ashallara, Diospa quiquin tupu tucungaj mana yapajta iyacachu. 7 Astaun, pai quiquinllara imas illaj tucuca, sirvij cuinta tucusha, runa tunui rashca aca. 8 Runa tunui ricurimusha, pai quiquinllara mas mas mansuyarica, huañunagama caźusha, cruzpi huañuca. 9 Chiraigumanda Dios paita yalijta ahuayachica. Tucui shutiunamanda yali atun shutira paita cuca, 10 Jesuspa shutii tucui cungurinauchu, ahua pachais, cai pachais, cai pacha ucuis. 11 Shinallara tucui shimi rimachu, “Jesucristo señormi,” nisha, Yaya Diosta ahuayachingaj. 12 Shinasha llaquishcauna, canguna tucui huras ñucara caźusha, mana ñuca cangunahua tiaushcallai, astaun mas ñuca cuna illaushcais, canguna alma quishpinamanda manzhashcahua chucchushcahua tarabaichi. 13 Dios canguna shungüi munaira cun, ranaras cun, paihua munaira pactachingaj. 14 Tucuira raichi, mana rimarisha, mana piñarisha. 15 Canguna cauźa illajcuna aichi, ali shunguuna, Diospa churiuna, ima iruspas illajcuna manali causaj runauna chaupi shungüi; paiguna chaupii vilaunasna punzhayachinguichi cai pachai. 16 Causana shimira rimaichi ñuca cangunamanda cushiyangaj Cristo shamuna punzhai, ñuca ama yangamanda causashca achu, ama yangamanda tarabashca achu, 17 Imasna asiti yacu shu sacrificio ahuai talishcasna, ñuca canguna quirina sacrificio ahuai, canguna sirvishca ahuais talishca asha, cushimi ani; ñuca cushiyauni tucui cangunahua. 18 Shinallara canguna cushiyaichi ñucahua pariju. 19 Shinasha, Señor Jesús yanapajpi, Timoteora uctalla cangunajma cachasha nini, ñuca canguna ali ashcara uyasha cariyangaj. 20 Shu pai cuinta iyaiyujta mana charinichu, shungumanda cangunara llaquijta. 21 Tucui runauna paiguna quiquimbajllara mascanaun, mana Cristo Jesuspajta. 22 Canguna Timoteo rashcaunara yachanguichimi imasna pai, quiquin churi cuinta paihua yayara sirvishcasna, ñucara sirvishcami evangelio ali shimira rimaushcai. 23 Chiraigumanda, imasna ñucahua tucungaraushcara yachasha, paita cangunama cachasha nini. 24 Shinallara Diospi quirini ñucas uctalla risha cangunajma. 25 Epafroditora cangunajma cachanara ministicani. Paimi ñuca uqui, ñucara yanapaj, ñucahua cumpañaj suldarupura cuinta. Paimi cangunamanda rimaj, canguna cachamushca ñucara yanapangaj ñuca ministishcaunai. 26 Tucui cangunara ricungaj ashcara munaca, maspas yapajta turbarica canguna pai ungushcara uyashcaraigu. 27 Sirtu pacha pai huañunalla unguca, astaumbas Dios paita llaquisha ricuca, mana paillara astaun ñucaras, ñuca ama yapajta llaquiringaj. 28 Chimanda paita munaihua cangunajma cachauni, canguna paita cuti ricusha cushiyangaj, ñucas ama yapa llaquiringaj. 29 Paita cushihua chasquinguichi Señorbi. Casnaunara ashcara llaquisha apinguichi. 30 Pai Cristora sirvinamanda ñaca ñaca huañuca, paihua causaira cusha, canguna ñucara yanapana pishishcara ñucajma pactachingaj.
1 Puchucaibi uquiuna, Señorbi cushiyaichi. Caita cangunama cuti quillcangaj mana amirinichu, cangunaj valinmi, 2 Allcu cuintaunamanda cuirarichi. Manali rajcunamanda cuirarichi. Aichara pitijcunamanda cuirarichi. 3 Ñucanchiga, ispirituhua Diosta sirvijcuna anchi, sirtu circuncisión nishcauna, ñucanchi Cristo Jesuspi cushiyajcuna, aicha ranaunara mana ansas iyarijcuna. 4 Shinashas, ñuca aichai rashcaunamanda cushiyangaj charinimi. Shu runa aichamanda “Cushiyangaj charinimi,” nisha iyarijpi, ñucas mas charinimi: 5 pusaj punzhai circuncisionda rai tucucani, Israel atun aillumanda, Benjamin muntunmanda, quiquin hebreo runa, camachishca shimii fariseo acani. 6 Ñuca ñaupa quirishca tunui shinzhi acani, iglesiara turmindachij. Ñuca ali rananunai, ley camachishca shimi ñaupajpi, cauźa illaj acani. 7 Astaun ñucaj ñaupa huras valishcaunara chingarishca cuinta iyashcani Cristora llaquishcamanda. 8 Sirtu pacha tucuira chingarishca cuinta iyauni, Cristo Jesús ñuca Señorda yachana tucuira yali valishcamanda. Paita llaquishcamanda tucuira pirdishcani, basurara cuinta iyauni, Cristora ganangaj. 9 Cristo Jesuspi tupashca tucunai, mana ñuca quiquin ali dirichu causanara charisha ley camachishca shimira pactachishcamanda, astaumbas Cristoi quirishcamanda, Dios cushca ali dirichu causanara charisha. 10 Ñuca paita yachasha nini, pai causarimuna ushairas. Pai turmindarishcaunai paihua pariju tiasha nini, pai huañunai ñuca pai cuinta tucungaj, 11 ima tunuis usharijpi ñuca huañushcaunamanda causarinama pactasha chari. 12 Caigama chara mana pactashcanichu, chara mana ali pactajta tupu tucushcanichu. Shina ajllaira ñaupajma riuni, Cristo Jesús ñucara imajta apishcara pactasha chari. 13 Uquiuna, ñucallara chigama pactangaj charajmi ani. Astaumbas caita rauni: ñaupa huras rashcaunara sirtu pacha cungarisha, ursahua ñaupajma riuni ñaupajpi tiajcunama pactangaj, 14 ganashcamanda cuyanara apingaj ñaupajma riuni. Cai cuyana Dios ahua pachama cayanami Cristo Jesuspi. 15 Shinajpi tucui ñucanchi pactajta ajcuna asha, chi tunullara iyarishunchi. Canguna shu tunura iyajpi, Dios caitas cangunara ricuchingami. 16 Ñucanchi maibis pactamusha, chi tunullara catishunchi, chi tunu iyaillahua. 17 Uquiuna, ñucara catirijcuna aichi. Shinallara tucui cai tunura causajcunara ricuichi, ñucanchi rashca tunui catijcunara. 18 Ashca runaunamanda ñuca cangunara ashca cuti cuintashcani, cutillara huacasha cuintauni, paiguna Cristo cruzhua cuntrauna tucunaushcami. 19 Puchucaibi casnauna ucu pachama cachai tucunaunga, paiguna dios paiguna quiquin icsami, paiguna ahuayarina paiguna quiquin pingarinami. Paiguna iyaibi cai pacha ranaunamandalla iyarinaun. 20 Ñucanchi ahua pacha runaunami anchi, Chimanda ñucanchi Quishpichij Señor Jesucristora chapaunchi. 21 Pai ñucanchi mana valij aichara turcangami, paihua sumaj aicha cuinta tucungaj, imasna paihua ushaihua tucuira vinsinara ushanmi.
1 Shinajpi, ñuca uquiuna, llaquishcauna, munashcauna, ñuca cushi, ñuca llaitu, Señorbi ali shayarichi, llaquishcauna. 2 Evodiara Sintiquiras mañauni shina iyaillahua tucunauchu Señorbi. 3 Shinallara canda rugauni, ñucara ali cumpañaj uqui, yanapai cai huarmiunara. Paiguna ñucahua pariju tarabanauca evangelio ali shimira rimangaj. Clementes, shujcunas paigunahua pariju ñucara yanapajcuna anauca. Paiguna shutiunara causana quillcai quillcashca tianaun. 4 Señorbi tucui huras cushiyaichi. Cutillara cangunara nini: “Cushiyaichi.” 5 Canguna ali shungura tucui runauna yachanauchu. Señorga mayanllaimi. 6 Imais ama turbarichichu, astaun canguna mañashcauna Diospa ñaupajpi uyarinauchu tucui mañashcahua, rugashcahua, agrasishcahua. 7 Shinasha, Diospa tucui intindinara pasaj cushi canguna shunguras, canguna iyairas huacachingami Cristo Jesuspi. 8 Puchucaibi, uquiuna, tucui sirtu ajta, tucui ali ajta, tucui ali gustu ajta, tucui chuyaj ajta, tucui llaquinallara, tucui ali rimashcara, ima ali sumaj ajtas, ima alabanalla ajtas, caigunai iyarichi. 9 Imara ñucamanda yachashcanguichi, apishcanguichi, uyashcanguichi. ricushcanguichi, caigunara raichi. Cushira cuj Dios cangunahua tiangami. 10 Diospi ashcara cushiyacani imasna puchucaibi canguna ñucara cuti cuirahuashcanguichi. Sirtu pacha ñucamanda iyarishcanguichi, astaun imasna ranaras mana yachacanguichi ñucara yanapangaj. 11 Caita mana ninichu ñuca ministishcamanda. Ñucaga ña yachashcani ima charishca tupuhuas cushiyangaj. 12 Cullqui illaj causanara yachani, shinallara charinara yachani. Tucuibi, tucuimanda ña yachani, sajsanara, yarcachinara, ashcara charinara, ima ministishcaras. 13 Tucuira ushani ñucara shinzhiyachij Cristoi. 14 Shina ajllaira alira rashcanguichi ñucahua, yanapanara cachamusha ñuca turmindariushcai. 15 Cangunas shinallara yachanguichi, Filipos runauna, ñuca evangelio alishimira camachingaj callariushcai, Macedoniamanda riushcai, mana maican iglesias ñucara yanapacachu cuyanais, chasquinais, astaun cangunalla yanapahuacanguichi. 16 Tesalónica llactamas huaquin cuti ñuca ministishcaunara cachacanguichi. 17 Cuyanaunara ñuca mana mascanichu, astaumbas canguna charishca cuintai yaparingaj munani. 18 Shinajpi, tucuira charini, talirijta, Epafroditomanda canguna cuyashcara pactajta apishcani, gustu asnajta cuinta, chasquinalla sacrificiora, Dios munashcasna. 19 Ñuca Dios tucui canguna ministishcaunara cungami, pai ahua pacha sumajpi charishca ashca valij tupura Cristo Jesuspi. 20 Dios, ñucanchi Yaya, ahuayachishca achu huiñai huiñaigama. Amen. 21 Tucui Cristo Jesuspi quirijcunara saluraichi. Ñucahua pariju tiaj uquiuna cangunara saluranaun. 22 Tucui quirijcuna cangunara saluranaun, maspas Cesarba huasimanda ajcuna. 23 Ñucanchi Señor Jesucristo gracia ali llaquina iyai tucui cangunahua achu. Amen.
1 Pablo, Jesucristo cachashca runa, Dios munashcamanda, Timoteo uquindi, 2 Cristoi ali shinzhi quirijcunama quillcanchi, Colosas llactai tiajcunama: Gracia ali llaquina iyaira, cushi shungura charichi, ñucanchi Dios Yayamanda, Señor Jesucristomandas. 3 Diosta, ñucanchi Señor Jesucristo Yayara, agrasinchi, tucui huras cangunamanda Diosta mañasha. 4 Canguna Cristo Jesuspi quirishcara uyashcanchi, shinallara canguna tucui quirijcunara llaquishcaras, 5 cangunajta ahua pachai huacachishca ali chapanamanda. Caimanda ña uyashcanguichi evangelio sirtu ali shimii. 6 Cai evangelio ali shimi cangunajma pactamushca imasna tucui mundui shamushcasna. Aparisha rin, iñasha rin cangunajpi, canguna uyashca punzhamanda pacha sirtu pacha yachacanguichi Diospa gracia ali llaquina iyaira. 7 Caita Epafrasmanda uyacanguichi. Pai ñucanchi llaquishca ñucahua pariju sirvij runa, Cristora ali sirvij cangunara yanapangaj. 8 Pai cangunajpi tiaj Espíritu cushca llaquinara cuintahuashcami. 9 Chiraigumanda, ñucanchi uyashca punzhamanda pacha, cangunamanda Diosta mañanara mana saquinchichu, canguna Diospa munaira pactajta yachangaj, tucui yachanahua, tucui almai intindinahuas. 10 Shinallara mañanchi canguna Señor valishca tupui causangaj, paita tucuibi cushiyachisha, tucui ali ranaunara muyura cuinta aparisha, Diosta yachanai mas mas iñasha ringaj. 11 Canguna tucui ursahua shinzhiyachishca tucungaj mañanchi, paihua gustu sumaj ushanahua, ahuantaisiqui shungura, chapaisiqui iyairas charingaj. 12 Cushihua Yayara agrasinchi pai ñucanchira alichica quirijcuna herencia nishca Yayamanda apinara punzhai apingaj. 13 Pai ñucanchira llandu ushaimanda llushpichica. Ñucanchira paihua llaquishca Churi mandana pachama pasachica. 14 Churi paihua yahuarhua pagasha, randishcaunami anchi, ucharashcaunaras perdonashcami. 15 Cristo mana ricuihuaj Dios ricurinami, tucui causajcunamanda ñaupa punda pagarij. 16 Tucuira paihuajllai rashca anauca, ahua pachai tiajcunara cai pachai tiajcunaras, ricurijcunara mana ricurijcunaras, rey apu tiarinaunara asha, mandajcunara asha, atun apuunara asha, ushajcunara ashas. Tucuira paimanda paihuajta rashca anauca. 17 Pai tucui imamandas ñaupami, tucuinguna paimandami anaun. 18 Iglesia paihua aichami, paiga aichamanda umami. Paiga callarinami, huañushcaunamanda ñaupa punda pagarij, pailla tucuimanda ñaupa punda aj tucungaj; 19 imasna Yayara cushiyachica Cristo ucui intiru Dios causangaj; 20 shinallara paimanda tucui Dioshua amigu tucungaj, cai pachais ahua pachais tiajcunandi, cushira rasha paihua cruzpi talishca yahuarmanda. 21 Shinallara cangunas ñaupa huras manali rashcaunamanda carui tiajcuna, chijnijcuna acanguichi canguna iyaibi, cunaga Dios cangunara amiguunara rashcami 22 Cristo aichai, pai huañushcamanda, cangunara chuyajcunara, ima tinishca illajcunaras, mana cauźayujcunaras paihua ñaupajpi ricuchingaj. 23 Dios caita rangami canguna ali shayarijpi, ali shinzhiuna tucujpi canguna quirinai, canguna uyashca evangelio ali shimimanda mana anzhurijpi. Cai shimira camachishcami tucui ahua pacha urai causajcunama. Cai shimira rimangaj ñuca, Pablo, sirvij tucucani. 24 Cuna huras ñuca cangunaraigumanda turmindariushcai cushiyani. Shinajpi ñuca quiquin aichai pishishcara ña pactachiuni Cristo turmindarishcaunamanda paihua aicha nishca iglesiaraigu. 25 Caimanda sirvij tucushcani, Dios ñucara cushcasna cangunajta, ñuca Diospa shimira ali pactajta rimangaj. 26 Cai pacashca shimi callarimanda pacha tucui timpuunais pacashca aca; cuna huras pascarishcami quiricunama. 27 Dios quirijcunara ricuchisha nica cai pacashca shimi sumaj valishca tupura gentilguna ñaupajpi. Cai pacashca shimi casnami: Cristo cangunajpimi, canguna sumaj tucungaj chapanami. 28 Cai Cristo shutira rimanchi, tucui runara camachisha, tucui yachaihua yachachisha, tucui runara Cristo Jesuspi ali pactajta ajta ricuchingaj. 29 Caimanda shinallara tarabauni, Cristo cushca ushaihua macanausha, cai ushai ñuca shungüi shinzhira tarabaun.
1 Ñuca munani canguna yachangaj imasna cangunamanda mañasha ashcara turmindarishcani, Laodicea llactai tiajcunamandas, shinallara tucui ñuca ñahuira ima huraspas mana ricujcunamandas. 2 Paiguna shunguuna cariyashca anauchu, parijumanda llaquinausha, ali intindina valishca tupura pactanagama, Yaya Diospi pacashcara yachangaj, shinallara Cristoi pacashcaras; 3 paihuajpi tucui intindina, tucui yachana valijcuna pacashca tianaun. 4 Caita cangunara nini, pi runas cangunara ama umachichu uyanalla shimiunahua. 5 Ñuca aichai cangunahua mana tiaushas, ispiritui cangunahua pariju tiaunimi. Canguna ali tucushcara cushihua ricuni, shinallara canguna Cristoi shinzhi quirishcaras. 6 Shinajpi imasna canguna Señor Jesucristora chasquishcanguichi, shinallara paita catisha purichi; 7 canguna causaira paihuajpi charisha sapiuna cuinta, canguna paihua ahuai shayachishca asha, canguna quiriushcai shinzhiyachishca cangunara yachachishcasna, Diosta talirijta agrasisha. 8 Ricuichi ama pihuas cangunara umachichu yachana shimiunahua, yanga umachina shimiunahuas, runa yachaimanda, mundu iyarina tunui, mana Cristo rimashcasna. 9 Cristoi intiru Dios causaun runa aichai. 10 Cangunas Cristoi pactajta anguichi. Paiga tucui atun apuunamanda, tucui ushajcunamanda umami. 11 Shinallara canguna Cristoi circuncisionda rai tucushcanguichi, mana maquihua rashcara, astaun canguna ucha raisiqui aichara ichusha Cristo circuncisionda raushcai. 12 Paihua pariju pambashca acanguichi canguna bautisarishcai, shinallara chihui paihua pariju causarimucanguichi, Diospa ushaibi quirisha, imasna pai Cristora huañushcaunamanda atarichica. 13 Canguna huañushcauna ajpi, canguna ucharashamanda, aichai circuncisionda mana apishcamandas, Dios cangunara causaira cuca Cristohua pariju, tucui ucharashcaunara perdonasha. 14 Ley shimimanda ñucanchira cauźayachij quillcara, ñucanchira cauźayachijta, chingachicami, ñucanchi chaupimanda quichusha, cruzpi quilavacami. 15 Casna rasha supai atun apuunaras ushajcunaras vinsica, paigunara pajlla pambai pingachisha, cruzpi vinsica. 16 Chiraigumanda pihuas cangunara ama taripachu micunamandas, upinamandas, ista punzhaunamandas, mushuj quillamandas, sahuaro punzhaunamandas. 17 Cai tucuiguna huasha shamujcuna almami. Astaumbas almara llucchij Cristomi. 18 Ama lugarda cuichichu pihuas cangunamanda canguna ganashcara quichungaj, “Mansu shungura charinimi,” nisha, angelgunara alabasha, paiguna mana ricushcai satirisha, yangamanda umai punguirisha paiguna ucha aicha iyaibi. 19 Casnauna Cristora mana charinaun Uma cuinta, Paimanda intiru aicha carashca asha, tucui tullu mucuuna anguunahua pigarishca asha, iñasha rin Dios cushca iñanahua. 20 Canguna Cristohua pariju huañushca asha mundu yachanamanda, ¿ima rashara mundui causajcuna cuinta mundu camachishcaunara uyanguichi, 21 casna samiunara: “Ama apichu, ama gustaichu, ama llangaichu?” 22 Caigunami runauna camachishcauna, yachachishcaunas. Tucui caiguna paiguna raushcai pasanaun. 23 Casna ranauna sirtu pacha sabiru cuinta yachin, runa yanga alabanai, yanga mansu shungüi, aichara livachinai. Astaumbas, casna ranauna imajpas mana sirvinaunzhu ucha aicha munaira vinsingaj.
1 Canguna Cristohua pariju causarishca asha, ahuai tiajcunara mascaichi, Cristo Diospa ali maqui partii tiarishcai. 2 Ahuai tiajcunara ricuichi, mana cai pachai tiajcunara. 3 Huañushcanguichi, canguna causai Cristohua pariju Diospajpi pacashcami. 4 Ima huras Cristo ricurimujpi, paimi canguna causai, chi hurasllaira cangunas paihua pariju ricuringuichimi paihua sumajpi. 5 Shinajpi, cangunajpi tiaj mundu munaira huañuchichi: shujhua tacarinara, irus iyaira, ucha aicha munaira, manali rana munaira, cullquira yapajta munanaras, caimi runa rashca diosta alabana cuinta. 6 Casna ranaunamanda Diospa piñarina shamun mana caźujcunama. 7 Canguna casna ranaunai ñaupa huras puricanguichi, imasna chigunai causacanguichi. 8 Cuna huras, canguna tucui casna ranaunara saquichi: piñarina, piñana, manali shungu, Diosta camina, irus shimiuna canguna shimimanda. 9 Ama llullanuichichu cangunapura, canguna rucu causaira ichushcaraigumanda pai rashcaunahua. 10 Astaumbas mushuj causaira churarichi. Caimi mushujyasha rin, canguna pactajta yachanagama, paita iñachij Cristo ricurina tunui. 11 Cai mushuj causaibi, illan ima griegus, ima judius, ima circuncisionda ranas mana ranas, ima aucas, ima carumanda shamujpas, ima sirvijpas, ima lugar runas. Astaumbas Cristo tucuimi tucuigunais. 12 Shinajpi, canguna Dios ajllashcauna asha, chuyajcuna, llullu shungura churarichi, shinallara ali shunguras, mansu shunguras, ahuantaisiqui shunguras. 13 Parijumanda ahuantanuichi. Parijumanda perdonanuichi maican runa shujta piñajpi. Imasna Cristo cangunara perdonashcasna, shinallara perdonanuichi cangunapura. 14 Cai tucuimanda ahuai, llaquina shungura churarichi, tucui alira pactachingaj. 15 Diospa ganas causana mandachu canguna shungu ucui, Chi cushimallara cayashca acanguichi shu aichallai. Shinallara Diosta agrasichi. 16 Cristo shimi canguna shungüi undajta tiachu. Cangunapura yachachichi, camachichi tucui yachanahua, salmos cantanaunahua, alma cantanaunahua, gracia ali llaquina iyaihua Señorda cantasha canguna shungüi. 17 Imara rashas, rimana ajpi, rana ajpis, tucuira raichi Señor Jesuspa shutii, paimanda Dios Yayara agrasisha. 18 Huarmiuna, canguna cariunara caźuichi, imasna Señorbi quirijcunahua aiimi tucun. 19 Cariuna, canguna huarmiunara llaquichi. Paigunahua ama milli tucuichichu. 20 Churiuna, canguna yayaunara uyaichi tucuibi. Casna rasha Señorda cushiyachinguichi. 21 Yayauna, canguna churiunara ama yapajta piñachinguichichu, paigunara ama llaquichingaj. 22 Sirvijcuna, canguna cai pachai aj patrungunara tucuibi uyaichi, mana paiguna ricushcallai tarabasha runaunara cushiyachingaj munajcunasna, astaumbas ali shunguhua, Diosta manzhasha. 23 Tucui imara rashas, shungumanda raichi, Diospajta cuinta mana runajta. 24 Caita yachaichi, Señormanda pagai tucunguichimi herencia nishca Dios cushcara, canguna Cristo Señorda sirvishcamanda. 25 Astaumbas manali raj runa pai manali rashcallarara cuti apingami, Dios tucui runaunara chi tunullara ricun.
1 Patrunguna, alira raichi canguna tarabaj runaunahua, caita yachasha, cangunas shu Patrunda charinguichimi ahua pachai. 2 Ama sambayasha mañaichi, canguna mañashcara chapasha, Diosta agrasishcahua. 3 Shinallara chi hurasllaira ñucanchimanda mañaichi, Señor ñucanchira lugarda cuchu Cristo pacashca shimira rimangaj. Caimanda chunda cularbi ishcariani. 4 Ñucamanda mañaichi ñuca pajlla pambai rimangaj ñuca ministishcasna. 5 Yachanahua purichi mana quirijcuna ñaupajpi, punzhaunara mana pirdisha. 6 Canguna rimashca shimiuna ali iyaihua rimashca anauchu tucui huras, cachihua mishquiyachishca cuinta, canguna caran duiñura imasna cutipana ashcaras yachangaj. 7 Ñuca tucui rashcaunara Tíquico cangunara cuintangami. Paiga llaquishca uquimi, ali sirvij, ñucahua pariju ali yanapaj Señorda sirvinai. 8 Caimanda paita cangunajma cachacani, canguna imasna ashcaras yachangaj, canguna shungura cariyachingaj. 9 Paihua pariju Onésimora cachacani, paimi llaquishca ali uqui cangunajmandallara. Tucui caibi ima tucushcaras cangunara rimanaunga. 10 Aristarco, ñucahua pariju chunda cularbi ishcarij, cangunara saluraun. Shinallara Marcos, Bernabehua panimanda churi, cangunara saluraun. Paimanda rimaj camachishca shimira uyacanguichi. Pai cangunajma shamujpi, paita chasquichi. 11 Shinallara Justo nishca Jesús cangunara saluraun. Caigunalla circuncisionda rana muntunmanda ñucara yanapanaun Dios mandana pacha shimira rimangaj. Ñucara cariyachihuanaun. 12 Cangunamanda aj Epafras, Cristora sirvij runa, cangunara saluraun. Tucui huras pai mañashcaunai cangunamanda ashca llaquishcahua rugaun, canguna shinzhiuna tucungaj, aliuna, Dios tucui munashcara ali pactachijcuna. 13 Paimanda caita nini: Paimi cangunara ashcara llaquin, shinallara Laodicea, Hierapolis llactaunai tiajcunaras. 14 Lucas, llaquishca ambij doctor, cangunara saluraun, shinallara Demas. 15 Laodiceai tiaj uquiunara saluraichi, shinallara Nimfasta, paihua huasii tiaj iglesiaras. 16 Cai quillcara cangunajpi ricushca huasha, ricuchinguichi Laodicea iglesiai. Shinallara Laodiceama cachashca quillcara ricuichi cangunas. 17 Arquipora rimaichi: “Riqui,” nisha, “can Señormanda apishca sirvinara pactachi.” 18 Ñuca, Pablo, quiquin maquihua quillcasha, cangunara salurauni. Ñuca huatariashcara iyarichi. Gracia ali llaquina iyai cangunahua tiachu. Amen.
1 Pablo, Silvano, Timoteondi tesalónicauna iglesiama quillcanchi, Yaya Diospa Señor Jesucristoi tiaj iglesiama. Gracia ali llaquina iyairas cushi shunguras charichi, ñucanchi Dios Yayamanda, Señor Jesucristomandas. 2 Tucui cangunamanda, tucui huras, Diosta agrasinchi, ñucanchi Diosta mañaushcaunai, cangunara iyarisha. 3 Mana saquisha, Dios Yaya ñaupajpi iyariunchi canguna quirishcamanda rashcara, canguna llaquishcamanda tarabashcaras, shinallara canguna chapaisiqui shunguras, ñucanchi Señor Jesucristoi. 4 Ricsinchi, Dios llaquishca uquiuna, imasna Dios ajllashcaunami anguichi. 5 Ñucanchi rimaushca evangelio ali shimi mana shimi caramandallachu cangunama shamuca, astaumbas ushanahua, Santu Ispirituhuas, sirtu shimihuas. Canguna ali yachanguichi ima samis acanchi canguna chaupi shungüi, cangunara llaquishcamanda. 6 Canguna ñucanchira catirijcuna tucucanguichi, Señordas catirijcuna; ashca turmindushua Diospa shimira chasquicanguichi, Santu Ispíritu cushca cushihua. 7 Shinajpi tucui Macedonia Acaya partiunai tiaj quirijcunama, ali ranara ricuchijcuna tucushcanguichi. 8 Cangunamanda Diospa shimi Macedonia Acaya partiunama pasashcami, maspas tucui llactaunai canguna Diospi quirishcara yachanaushcami. Chiraigumanda ñucanchi rimangaj mana ministirinzhu. 9 Paiguna ñucanchimanda cuintanaun imasna canguna ñucanchira apicanguichi, imasna canguna runa rashca dioscunamanda vultiaricanguichi, sirtu causaj Diosta sirvingaj; 10 shinallara, paihua huañushcaunamanda causachishca Churi Jesusta ahua pachamanda chapangaj. Paiga huasha shamuj piñarinamanda llushpichijmi.
1 Uquiuna, cangunallara yachanguichi imasna ñucanchi cangunajma shamushca mana yanga pasacachu. 2 Canguna yachanguichi ñucanchi Filipos llactai turmindarishcara, cami tucushcaras, astaun Diospi shinzhi tucucanchi, paihua evangelio ali shimira cangunama rimangaj, ashca arcashcaunai. 3 Ñucanchi cangunara camachina mana pandarishcahua, mana irus shimihua, mana umachinahua rimashcachu aca. 4 Astaun imasna Dios ñucanchira munaca evangelio ali shimira ñucanchira cungaj, shinallara rimaunchi, mana runara cushiyachijcunasna astaun Diosta cushiyachingaj. Pai ñucanchi shungura camaun. 5 Ima huraspas runaunara mana yanga alabanchichu, imasna canguna ali yachanguichi; shinallara mana yapajta munaisiquiuna ashcanchichu. Dios caita ricujmi. 6 Runaunamandas, cangunamandas, shujcunamandas, alabashcara mana mascanchichu. Shinashas, munajpi cangunamanda yanapanara mascanara ushacanchi, Cristo cachashca runauna ashcamanda. 7 Astaun, cangunahua ali shunguunami acanchi, huahuara iñachij mamasna, paihua quiquin churiunara llaquishcahua cuiraj cuinta. 8 Cangunara yapa llaquinchi. Cangunama intriganara munanchimaca mana Diospa evangelio ali shimillara, astaumbas ñucanchi quiquin causairas. Ashcara cangunara llaquishcanchi. 9 Canguna ña iyaringuichi, uquiuna, ñucanchi sambayashcaras, imasna tutandi punzhandi tarabacanchi, ama turmindus tucungaj cangunahua. Shina rasha, Diospa evangelio ali shimira rimacanchi. 10 Canguna ricujcuna anguichi, shinallara Dios ricun, imasna ñucanchi chuya shunguhua, ali shunguhuas, cauźa illaj causacanchi cangunahua, quirijcunahua. 11 Shinallara yachanguichi imasna cangunara camachicanchi, cushiyacanchi caran duiñura, shu yaya paihua churiunara cushiyachishca cuinta. 12 Cangunara camachicanchi Diosta valichina tunui puringaj. Pai cangunara cayaca paihua sumaj ahua pachama. 13 Caimanda shinallara, mana saquisha Diosta agrasinchi, imasna canguna ñucanchimanda uyasha, Diospa shimira chasquicanguichi. Mana runaunamanda shimirasna astaumbas Diosmanda shimirasna chasquicanguichi, imasna sirtu ashcara. Cai shimi taraban canguna quirijcuna shungüi. 14 Uquiuna, canguna Judea partii tiaj Cristo Jesuspi quirij Diospa iglesiaunara catirijcuna ashcanguichi. Canguna shina tunui turmindarishcanguichi canguna quiquin llactai tiajcunamanda, imasna judiuguna judiugunamanda. 15 Cai judiuguna Señor Jesusta huañuchinauca, paiguna quiquin Diosmanda rimajcunandi. Ñucanchiras ichunauca. Diosta mana cushiyachinaun, tucui runaunara mulistanaun. 16 Chiguna ñucanchira mitsanauca gentilgunama rimangaj, paiguna ama quishpinauchu nisha. Shina rasha paiguna ucharana tupura undachinaun. Shina rasha piñarina paigunajma yalijta shamuca. 17 Shinajpi, uquiuna, unaira canguna ñahuimanda anzhurishca ashas, astaumbas mana shungumanda, mas mas munanchi canguna ñahuira ricungaj. 18 Chiraigumanda cangunajma ringaj nicanchi; ñuca, Pablo, sirtu pacha huaquin cuti risha nicani, astaumbas Satanás arcahuacami. 19 ¿Imarai ñucanchi chapana, ñucanchi cushi, ñucanchi llaitu, ñuca alabaringaj? ¿Manzhu canguna casna anguichi ñucanchi Señor Jesucristo ñaupajpi, pai shamushcai? 20 Canguna ñucanchi ahuayana, ñucanchi cushiyana anguichi.
1 Chiraigumanda ñucanchi mas mas chapanara mana ushasha, Atenas llactai ñuca sapalla saquiringaj iyaricanchi. 2 Ñucanchi uqui Timoteora, Diosta sirvijta, ñucanchihua yanapajta Cristo evangelio shimira rimanai, paita cachacanchi cangunara shinzhiyachingaj, yachachingajpas canguna quiriushcai. 3 Pihuas ama turbarichu cai turmindarinaunamanda. Imasna cangunallara yachanguichi, casnaunai ahuantangaj tiaunchi. 4 Chara cangunahua tiaushallara, ñaupallara cangunara nicanchi imasna turmindarina acanchi, imasna cuna cangunahua pasashcasna ña yachanguichi. 5 Chiraigumanda mas chapanara mana ushasha, cachashcani canguna quirinara yachangaj, tintaj supai cangunara tintashca chari, ñucanchi tarabashca yanga tucushca chari, nisha. 6 Shinajpi Timoteo cangunajmanda ñucanchima tigramusha, alira cuintaca canguna quirinara, canguna llaquinaras, shinallara canguna tucui huras ñucanchira iyarishcaras, ñucanchira ricusha nisha imasna ñucanchi cangunara ricushun ninchi. 7 Caimanda uquiuna, ñucanchi tucui ministishcai, ñucanchi turmindarishcais, cariyacanchi cangunamanda, canguna quirishcamandas. 8 Cuna causaunchimi, canguna Señorbi shinzhi tianaupi. 9 Chiraigumanda, ¿imasna rashara Diosta agrasishun cangunamanda, canguna ñucanchira cushiyachishcamandas ñucanchi Diospa ñaupajpi, 10 tutandi punzhandi Diosta ashcara mañanchi, ñucanchi canguna ñahuira ricungaj canguna quirina pishishcara undachingaj? 11 Quiquin Dios, ñucanchi Yaya, ñucanchi Señor Jesucristondi, ñucanchi ñambira pascachu cangunajma shamungaj. 12 Señor canguna llaquinara iñachichu, ashcara yapachichu, cangunapura shinallara tucuigunahua imasna ñucanchi cangunara llaquishcasna, 13 canguna shungu shinzhiyachishca achu, chuyajlla, cauźa illajlla, ñucanchi Yaya Diospa ñaupajpi, ñucanchi Señor Jesucristo shamunai tucui paihua quirijcunahua.
1 Cunaga, uquiuna, cangunara ruganchi, shinallara camachinchi Señor Jesuspi, imasna ñucanchimanda yachashcanguichi ima tunu purinara Diosta cushiyachingaj, casna rasha yaparisha richi. 2 Ña yachanguichi imara camachicanchi cangunara Señor Jesusmanda. 3 Dios munan cangunara sumaj dirichu causanauchu, shujhua tacarinamanda anzhurisha. 4 Caran duiñu paihua quiquin huarmira charichu, sumaj dirichu causanahua, ali shunguhua; 5 mana ucha aicha munaihua, Diosta mana ricsij gentilguna cuinta. 6 Pihuas imais ama huajlichichu, ama umachichu paihua uquira. Señorga tucui cai tunu ranaunara cutipajmi, ñucanchi cangunara ña rimashcasna, ña camachishcasna. 7 Dios ñucanchira mana cayacachu irusta rasha causangaj, astaumbas sumaj causangaj. 8 Shinajpi, maican runa cai shimira mana uyasha, mana runarachu mana uyan astaun Diosta. Paihua Santu Ispiritura shinallara ñucanchima cuca. 9 Uquipura cuinta llaquinaunamanda mana ministirinzhu ñuca cangunama quillcangaj. Cangunallara Diosmanda yachashcanguichi parijumanda llaquinaunara. 10 Shinallara ranguichi tucui uquiunahua, tucui Macedonia partii tiajcunahua. Shinashas, uquiuna, cangunara rugaunchi cai llaquinaunai mas mas yaparingaj. 11 Ganas causanara mascaichi, canguna tarabanaunara ali raichi, maquihua tarabasha, imasna cangunara mandashcanchi, 12 canguna sumajlla causangaj mana quirijcuna ñaupajpi, shinallara canguna ama imaras ministingaj. 13 Maspas, uquiuna, huañuibi puñujcunamanda canguna yachangaj munanchi, canguna ama llaquiringaj chapana illajcuna cuinta. 14 Ñucanchi Jesús huañushcaras causarishcaras quirijpi, shinallara Dios tucui Jesuspi puñujcunara paihua pariju pushamungami. 15 Caita cangunara ninchi Dios rimashcamanda, ñucanchi causajcuna, Señor shamuna hurascama tiajcuna, puñujcunara mana ñaupashunzhu. 16 Quiquin Señor ahua pachamanda irgumungami, mandasha caparinahua, atun angel shimihua, Diospa curmitahua, Cristoi huañushcauna ñaupa punda atarinaungami. 17 Chimanda huasha ñucanchi, causajcuna, saquirijcuna, paigunahua pariju apishca tucushun puyui, Señorda huairai tupangaj. Casnami huiñai huiñaigama Señorhua pariju tiashun. 18 Chiraigumanda cai shimiunahua cangunapura cariyanuichi.
1 Timpuunamanda, hurascunamanda, uquiuna, mana ministinguichichu ñuca cangunama quillcangaj. 2 Alimi yachanguichi imasna Señorba punzha tutai shuhuaj runa cuinta shamunga. 3 Ima huras runauna ninaunga: “Cushimi anchi, alimi causaunchi” chi hurasllaira cungaimanda paiguna tucurinaunga, icsayuj huarmi cungaimanda nanachishcasna. Mana pihuas quishpinaungachu. 4 Cangunaga, uquiuna, mana llandu tutai tianguichichu, chi punzha shuhuaj shamushca cuinta cangunara cungaimanda apingaj. 5 Tucui canguna punzhamanda churiuna anguichi, mana tuta churiuna, mana llandumandachu anchi. 6 Chiraigumanda ama puñushunchi shujcuna cuinta, astaumbas chapashunchi, limpiuna ashunchi. 7 Puñujcuna tutai puñunaun. Machajcuna tutai machanaun. 8 Ñucanchiga, punzhamanda asha, limpiuna ashunchi, quirinaras llaquij shunguras churarisha pichura quillpanara cuinta, shinallara quishpingaj chapanara churarisha shu iru gurara cuinta. 9 Ñucanchira piñarinara tupangaj Dios mana munacachu, astaumbas quishpinama pactangaj, ñucanchi Señor Jesucristomanda. 10 Pai ñucanchi randimanda huañuca, ñucanchi ricuj ajpis, puñuj ajpis, paihua pariju causangaj. 11 Chiraigumanda, cangunapura animarichi, shinzhiyaichi, imasna canguna rashcasna. 12 Shinallara cangunara ruganchi, uquiuna, canguna chaupi shungüi tarabajcunara ricsichi, cangunara Señorbi pushajcunaras, cangunara camachijcunaras. 13 Paigunara ashcara llaquina anguichi, paiguna rashcaunamanda. Cangunapura cushi shungura charichi. 14 Shinallara cangunara ruganchi, uquiuna, quillajcunara camachichi, huacaisiquiunara animachichi, irquiunara shinzhiyachichi, tucuigunahua ahuantaj aichi. 15 Ricuichi ama pihuas manalira manalihua cutipachu, astaumbas tucui huras alira ranara catichi parijumanda, tucuigunahua. 16 Tucui huras cushiyaichi. 17 Mana saquisha mañaichi. 18 Tucuibi agrasichi, casnami Diospa munai tucui cangunahua Cristo Jesuspi. 19 Ispiritura ama chunllayachichichu. 20 Diosmanda rimajcuna rimashcaunara ama pishiyachichichu. 21 Tucuira camasha ricuichi, alira huacachichi. 22 Tucui ima manali tunumandas anzhurichi. 23 Cushira cuj Diosllara cangunara tucuibi sumajyachichu, camba intiru runara, camba ispiritura, camba almara, camba aicharas cauźa illajta huacachishca achu, ñucanchi Señor Jesucristo shamunagama. 24 Cangunara cayajta quirinallara; shinallara cai tucuira pactachingami. 25 Uquiuna, ñucanchimanda mañaichi. 26 Tucui uquiunara chuya muchanahua saluraichi. 27 Señorba shutii cangunara mandani tucui chuyaj uquiuna cai quillcara ricunauchu. 28 Ñucanchi Señor Jesucristo gracia ali llaquina iyai cangunahua achu. Amen.
1 Pablo, Silvano, Timoteo, tesalónicauna iglesiama quillcanchi, ñucanchi Yaya Diospi Señor Jesucristoi tiaj iglesiama. 2 Gracia ali llaquina iyairas cushi shunguras charichi Dios ñucanchi Yayamanda, Señor Jesucristomandas. 3 Tucui huras Diosta agrasina anchi cangunamanda, uquiuna. Casna rana valinmi, imasna canguna quirina iñasha rin, shinallara tucui canguna shujcunara llaquina yaparisha rin. 4 Ñucanchillara alabarinchi Diospa iglesiaunai cangunamanda, canguna ahuantaj shungumanda, canguna turmindarishcaunai quirishcamandas, canguna turbarishcaunai ahuantashcamandas. 5 Caimi Diospa ali taripanara ricuchin, canguna ali valijcuna iyashca anguichi Dios mandana pachai icungaj. Caimandami turmindachishca anguichi. 6 Dioshua alimi cangunara turmindachijcunara turmindachinahua pagangaj. 7 Canguna, turmindachishcauna ajpis, Dios cangunara samachina ñucanchihua pariju, Señor Jesús ahua pachamanda ricurimujpi paihua ushaj angelgunahua, 8 sindij ninahua shamunaunga, Diosta mana ricsijcunaras ñucanchi Señor Jesucristo evangelio ali shimira mana caźujcunaras pagangaj. 9 Caiguna livachishca anaunga, huiñai huiñaigama chingachishca anaunga, Señorba ñaupajmanda, paihua gustu sumaj ushanamandas, 10 pai shamuna punzhai ahuayachi tucungaj paita quirijcunamanda, tucui quirijcuna paihua sumajta gustasha alabangaj chi punzhai, imasna canguna ñucanchi shimira quirijcuna ashcanguichi. 11 Chiraigumanda tucui huras cangunamanda mañanchi, ñucanchi Dios cangunara, “Valijcunami,” nisha iyahcu pai cayashcamanda, shinallara Dios canguna tucui alirana munairas, tucui quirinamanda ranaras, paihua ushaihua pactachichu. 12 Mañanchi ñucanchi Señor Jesucristo shutira ahuayachishca achu cangunajpi, cangunas paihuajpi, ñucanchi Dios ñucanchi Señor Jesucristo gracia ali llaquina iyai yanapashcamanda.
1 Shinajpi, uquiuna, Ñucanchi Señor Jesucristo shamunamanda, ñucanchi paihuajma tandarinamandas rimajpi, cangunara rugaunchi, 2 ama uctalla anzhuringaj canguna iyaushca tunumanda. Ama turbarichichu ima ispiritumandas, ima shimimandas, ima quillcamandas ñucanchimanda nishca ajpis, “Señorba punzha ña caibimi tiaun,” nisha. 3 Pihuas ama imais cangunara umachichu. Cai punzha mana shamungachu manara shamujllaira Diosmanda vultiarina, Ucupachamanda Churi nishca Ucha Runa manara ricurimujllaira. 4 Paiga tucui Diosmi nishcaras, tucui alabashcaras tulasha ninga; pai Diospa templo huasii tiaringami, “Dios mani,” nisha, paillara quiquin Dios cuinta ricuchisha. 5 ¿Manzhu iyaringuichi imasna ñuca chara cangunahua tiaushcai caita cangunara cuintacani? 6 Cunaga paita arcajta yachanguichi, paihua quiquin huraspi ricurimunga. 7 Cunallara manalira rana ushai pacalla tarabaun. Astaun cuna huras shu paita arcaj tian, cai arcaj chaupimanda anzhuchinagama. 8 Chimanda huasha manali raj runa ricurimungami, paitaga Señor paihua shimimanda samaihua huañuchingami; paita tucuchingami pai shamushca limpiashcahua. 9 Cai manali raj runa Satanás rashcamanda shamungami, shinzhi ushaihua, atun ricurinahua llullasha rashcaunahua. 10 Tucui umachinahua manalira ranga chingarijcunahua, paiguna sirtu shimira llaquinara mana munashcaraigu quishpichi tucungaj. 11 Chiraigumanda, Dios paigunara shu umachij ushaira cachanga, llulla shimira quiringaj, 12 tucui sirtu shimira mana quirijcuna, tucui manali ranara munajcunas cauźayuj tucungaj. 13 Ñucanchi tucui huras Diosta agrasinami cangunamanda, Señor llaquishca uquiuna, Dios callari hurasmanda cangunara ajllashcaraigu quishpingaj, Ispíritu chicanyachishcamanda, sirtu shimira quirishcamandas. 14 Caihuajta Dios cangunara cayaca ñucanchi rimashca evangelio ali shimii, ñucanchi Señor Jesucristo ali sumajma pactangaj. 15 Shinasha, uquiuna, shinzhira shayarichi, canguna uyasha yachashcara huacachichi, rimashca shimimanda ajpi, ñucanchi quillcashcamanda ajpis. 16 Ñucanchi quiquin Señor Jesucristo, Dios ñucanchi Yaya, ñucanchira llaquij, ñucanchira huiñaigama cariyachij, ñucanchi paihua gracia ali llaquina iyaimanda ali chapanara cuj, 17 canguna shungura cariyachichu, cangunara shinzhiyachichu tucui ali rimanais, tucui ranais.
1 Cunaga, uquiuna, ñucanchimanda mañaichi, Señorba shimi tucui partima uctalla pasachu, ahuayachishca achu, imasna cangunahua tucushcasna. 2 Mañaichi ñucanchira manali shunguyujcunamandas manali rajcunamandas quishpi tucungaj; mana tucui runauna quirinaunzhu. 3 Señor quirihuajllami, cangunara shinzhiyachingami, ima manalimandas huacachingami. 4 Cangunamanda Diospi quirinchi imasna ñucanchi cangunara mandashcara raunguichi, shinallara rangaraunguichi. 5 Señor canguna shungura pushachu Diospa llaquinai, Cristomanda chapanais. 6 Cangunara mandanchi, uquiuna, ñucanchi Señor Jesucristo shutii, tucui manali purij uquimanda anzhurichi, paiguna ñucanchimanda uyashca shimira mana catijcuna asha. 7 Cangunallara yachanguichi imasna ñucanchira catirinami anguichi, ñucanchi manalihua mana puricanchichu canguna chaupi shungüi. 8 Ñucanchi pimandas yanga cuyashca tandara mana micushcanchichu, astaun tutandi punzhandi shinzhira tarabasha sambayasha tiaucanchi, cangunara ama pitas gastachingaj. 9 Ushashcanchi canguna yanapashcara apingaj, shina ajllaira mana apishcanchichu, ñucanchi ali ricuchijcuna tucungaj, canguna ñucanchira catiringaj. 10 Ñucanchi chara cangunahua tiausha caita mandacanchi: “Runa mana tarabasha nijpi, shinallara ama micuchu.” 11 Uyashcanchimi imasna cangunamanda huaquinguna mana ali purisha, mana imais tarabanaun, astaumbas shujpajpi inquitashalla causanaun. 12 Casna rajcunara mandanchi, shinallara camachinchi Señor Jesucristo shutii, ganashua tarabasha paiguna quiquin tandara micunauchu. 13 Cangunaga, uquiuna, ama sambayanguichichu alira rangaj. 14 Maican runas ñucanchi quillcashca shimira mana caźusha nijpi, caita paima ricuchichi, paihua ama llutarichichu, paita pingachingaj. 15 Shinashas, paita ama chijnishca cuinta charichichu, astaumbas uquirasna paita camachichi. 16 Quiquin cushira cuj Señor, tucui huras tucuibi cushira cuchu cangunama. Señor tucui cangunahua tiachu. 17 Cai saluranara, ñuca, Pablo, ñuca quiquin maquihua quillcashcani. Caimi ñuca ricuchina tucui ñuca quillcashcaunai, casna quillcauni. 18 Ñucanchi Señor Jesucristo gracia ali llaquina iyai tucui cangunahua achu. Amen.
1 Ñuca, Pablo, apóstol, Jesucristo cachashca runa, ñucanchira Quishpichij Dios mandashcamanda, shinallara Señor Jesucristo mandashcamanda, pai ñucanchi chapana, 2 Timoteoma, ñucanchi quirinai ñuca sirtu churima quillcauni: Gracia ali llaquina iyairas, llaquij shunguras, cushi shunguras chari, ñucanchi Yaya Diosmanda, Cristo Jesús ñucanchi Señormandas. 3 Ñuca Macedonia llactama riushcai, canda rugacani, “Efeso llactai saquiripai,” nisha, huaquin chihui ajcunara camachingaj shu tunu yachaira ama yachachinauchu; 4 yanga cuintanaunaras, unaimanda miramuj shutiunaras ama uyanauchu. Casna samiuna macanuchinaun, Diospa yachaira quiringaj mana yachachinaunzhu shungura shinzhiyachingaj. Caita canda cuna mandauni. 5 Caita mandauni cangunapura llaquinaungaj, sumaj shungumanda, ali rana iyaimandas, sirtu quirinamandas. 6 Huaquinguna caigunamanda anzhurisha yanga rimanaunama rinaushca. 7 Ley shimira yachachijcuna tucusha nisha, paiguna nishcaras, paiguna shinzhi rimashcaras mana intindinaunzhu. 8 Ñucanchi yachanchi imasna ley shimi alimi, maican runas cai shimira ali apijpi; 9 caita ricsisha, ley shimira alira rajcunara mana cushcachu aca astaun manalira rajcunara, mana caźujcunara, mana quirijcunara, uchayujcunara, burlajcunara, yayaunara mamaunara huañuchijcunara, runaunara huañuchijcunara, 10 shujhua tacarijcunara, caripura tacarijcunara, runara shuhuajcunara, llullajcunara, Diospa shutihua rimasha llullajcunara, shinallara pi ali yachachina shimira mana uyajtas. 11 Cai yachachina bindisiashca Diospa sumaj evangelio ali shimimandami. Cai ali shimi ñucara mingashca aca. 12 Cristo Jesusta, ñucanchi Señorda agrasini, ñucara shinzhiyachina ursara cuhuaca, “Ali quirijmi angui,” ñucara nisha, paita sirvijta rahuaca. 13 Ñaupa huras ñuca paimanda irusta rimaj acani, paita turmindachicani, burlacani. Randi llaquishcahua chasquihuaca, mana yachashcamanda rashcaraigu, ñuca chara mana quirij ashcai. 14 Ñucanchi Señorba gracia ali llaquina iyai yali tucuca ñucahua, ali quirinahuas llaquinahuas Cristo Jesuspi. 15 Cai shimi sirtumi, tucui runauna quiringaj valin, imasna Cristo Jesús cai pachama shamuca uchayujcunara quishpichingaj. Ñucaga ñaupa punda uchayujmi ani. 16 Shina ajllaira, ñucara llaquishcahua chasquihuaca, ñuca ñaupa punda uchayuj ajpi, Jesucristo paihua ali chapanara ñucajpi ricuchingaj tucui paihuajpi quiringaraucunara paiguna huiñai causaira charingaj. 17 Chiraigumanda, huiñaigama causaj Rey Apuma, mana huañuihuaj, mana ricuihuaj sapalla yachaj Diosma, ahuayanas, sumaj ricurinas achu, huiñai huiñaigama. Amen. 18 Cai mandashca shimira canda mingauni, ñuca churi Timoteo, Dios canmanda ñaupa rimashcasna. Chi shimiunara caźusha, ali macanaunara macanaungui, 19 ali quirinaras, ali rana iyairas huacachisha. Huaquinguna caigunara ichusha, paiguna quirishcara huajlichinaushca. 20 Casnami ranauca Himeneo Alejandrondi. Paigunara Satanasma intrigacani, ama irusta rimangaj yachanauchu.
1 Ñaupa punda caita munani: tucuiguna ruganauchu, mañanauchu, agrasinauchu, tucui runaunamanda; 2 rey apuunamanda, tucui mandajcunamanda, ñucanchi ganashua alilla causangaj, Diosta iyarisha, ali shunguhua. 3 Ñucanchira Quishpichij Diospa ñaupajpi, cai sami causai alimi, munaihuajmi. 4 Pai munanmi tucui runauna quishpinauchu, sirtu shimira yachanama shamunauchu. 5 Shu sapalla Dios tian. Dioshua runahua chaupi shungüi shu sapalla alichij tian. Paiga Jesucristo, runa. 6 Pai quiquinllara cuca, tucuira cuti randingaj. Chita pai ricuchina huraspi ricuchishca aca. 7 Chihuaj ñuca camachijpas cachashca runas rai tucucani. Cristo shutii sirtura rimani, mana llullanichu. Shinallara gentilgunara yachachij tucucani, quirinahuas, sirtu shimihuas. 8 Shinajpi munani cariuna mañanauchu tucui partiunai, chuyaj maquira atarichisha, mana piñarishcahua, mana macanaushcahua. 9 Shinallara huarmiuna ali tunura churarinauchu, ali quillparisha, mana yapajta ricurijta paiñashcahua, mana curihua, mana perlaunahua, mana yapajta valij churarinahua, 10 astaun ali ranaunahua churarinauchu, “Quirinimi” nij huarmiuna rana tunui. 11 Huarmiuna chunlla tiasha yachanauchu, ali caźusha. 12 Huarmiunara lugarda mana cunichu yachachingaj, cariunara mandangajpas, astaumbas chunlla tianami. 13 Adán ñaupa punda rashca aca, chi huasha Eva. 14 Adán mana umachishcachu aca, randi huarmi umachishca asha, uchayuj tucuca. 15 Astaun huarmi quishpichishca anga huahuaunara pagarichisha, pai quirisha, llaquishcahua sumajlla causasha, ali sumaj shunghua.
1 Cai shimi sirtumi. Maicans iglesiai cuiraj runa tucusha nisha, ali ranara munan. 2 Ministirinmi shu cuiraj runa mana cauźayuj achu, shu huarmiyujlla, ali iyaira charij, iyaiyuj, ali causaj, ali pasiachij, ali yachachij, 3 mana machaisiqui, mana macaisiqui, manali rashcamanda ganashcara mana apisha nij, randi ali shungu, mana shinzhira rimaj, mana cullquira llaquij, 4 paihua huasii tiajcunara ali mandaj, churiunara ali caźujta raj ali dirichu shunguhua. 5 Shu runa paihua quiquin huasii tiajcunara mana mandanara ushasha, ¿imasna rashara Diospa iglesiara cuirangairi? 6 Cuiraj runaga ama mushuj quirij achu; mushuj ajpiga mas tucusha ninga, supai cauźayachishcai urmangami. 7 Shinallara ministirinmi shujcuna paimanda “Ali runami” nishca uyarichu, pai ama piñai tucungaj, ama supaihua tujllai urmangaj. 8 Diáconos nishca iglesiara yanapajcuna shinallara ali shunguyujcuna anauchu, mana ishqui shimiyujcuna, mana machaisiquiuna, manali rashcamanda ganashcara mana apisha nijcuna. 9 Quirinamanda pacashca shimira sumaj iyaihua huacachinauchu. 10 Shinallara ñaupa punda camashca anauchu. Chimanda huasha cauźa illaj asha, iglesiara sirvijcuna tucunauchu. 11 Huarmiunas shinallara ali shunguyujcuna anauchu, mana camijcuna, ali causajcuna, tucuibi pactachijcuna. 12 Diáconos iglesiara yanapajcuna shu huarmiyujlla anauchu, paiguna huahuaunara paiguna huasii tiajcunaras ali mandajcuna. 13 Diáconos iglesiara yanapajcuna ali sirvijpi, ali rimai tucunaun. Shinallara mas shinzhi tucunaun Cristo Jesuspi quirinai. 14 Caita canda quillcauni, shina ajllaira chapauni uctalla shamusha nisha canda ricungaj. 15 Randi, ñuca unaiyausha caita quillcauni can yachangaj imasna rasha causana angui Diospa huasii, causaj Diospa iglesiai, sirtu shimi istandi cuintami, sirtu shimira shayachij. 16 Sirtu pacha, yapa atunmi ñucanchi quirinamanda pacashca shimi: “Dios aichai ricuchishca aca, ‘Ali dirichumi’ nishca aca Ispiritui, Angelguna paita ricunauca. Paihua shutira yachachishca aca gentilgunama. Quirishca aca cai pachai. Sumaj ahua pachai apishca aca.”
1 Ispíritu pajlla pambai riman imasna puchucai punzhaunai huaquinguna ali quirinara saquinaunga, umachij ispirituunara supaiguna yachachishcaunara uyasha. 2 Llullaj runauna huashai rimasha umachinaungami, paiguna ali rana iyai tujlu tujlu rishca cuinta asha. 3 Paiguna, “Ama casaraichichu,” ninaunga. Huaquin micunaunara, “Ama micuichichu,” ninaunga; astaun Dios cai micunaunara cuca quirijcunas sirtu shimira yachajcunas micunauchu agrasishcahua. 4 Tucui Dios iñachishca alimi, mana ichunachu, “Pagarachu,” nisha agrasishcahua apisha micunami. 5 Shina rasha apijpi, alichishcami Diospa shimihua Diosta mañanahuas. 6 Can uquiunara casna yachachisha, Jesucristora ali sirvij tucungui, quirina shimiunahua carashca cuinta, can catishca ali yachanahuas. 7 Mundu yanga cuintanaunaras, rucu apamauna yanga cuintanaunaras ama uyaichu. Randi can quiquinllara shinzhiyari, Diosta mas mas llaquisha catingaj. 8 Aichara shinzhiyachina ansalla valin, randi Diosta llaquisha causana tucuihuaj valin, cuna causaibi, huasha shamuna causaibis, cushca shimi rimashcasna. 9 Cai shimi sirtumi, tucui runauna quiringaj valinmi. 10 Chiraigumanda tarabanchi, turmindarinchi. Causaj Diosta chapaunchi. Pai tucui runara Quishpichijmi, astaun mas quirijcunara. 11 Caita mandai, yachachi. 12 Pihuas ama burlachu can malta ashcara. Astaun can quirijcunara ali ricuchina cuinta tucungui imasna rimanaras, imasna causanaras, imasna llaquinaras, camba ispirituis, imasna quirinaras, sumaj iyanaras. 13 Ñuca shamunagama, runauna ñaupajpi Diospa shimira ricunai catingui, shinallara camachinais, yachachinais. 14 Canma cuyashcara ama cungarichu, canma cushca aca Diosmanda shimiunara rimashcahua, cuiraj rucuuna muntun maquiunara can ahuai palltashcai, 15 Caigunara rai, casna rasha catingui, tucui runauna can ñaupajma riushcara ricunauchu. 16 Canllarara cuirari, shinallara can yachachinara. Casna rasha cati, Casna rasha candas, canda uyajcunaras quishpichingui.
1 Rucu apayara ama shinzhira piñangui, astaumbas yayara cuinta paita camachingui, shinallara maltaunara uquiunara cuinta. 2 Rucu apamaunaras mamara cuinta rimasha camachingui, malta huarmiunara panira cuinta, ali sumaj shunguhua. 3 Huaccha huarmiunara llaqui, sirtu huacchaunami ajpi, 4 Ima huaccha huarmis churiyuj ajpi, churimanda huahuayuj ajpi, caiguna yachanauchu ñaupa punda llaquijcuna tucungaj, paiguna quiquin ailluunara iyaringaj, paiguna iñachishcara cutipangaj. Caimi ali munashca Diospa ñaupajpi. 5 Maican huarmis sirtu huaccha huarmi asha, sapalla tucusha, Diosta chapaun tutandi punzhandi, Diosta mañasha, Diosta rugasha causaun. 6 Astaun maican huarmis aicha munashcai causasha, causaushallara huañushcami. 7 Cai shimiunara camachi, paiguna ama cauźayuj tucungaj. 8 Shu runa paihua aillura mana carasha, maspas paihua quiquin huasii tiajcunara mana carasha, pai quirishcara huajlichishcami, shu mana quirijmandas yali tucun. 9 Huaccha huarmi shutiuna quillcai casnaunallara quillcangui: Sucta chunga huata yali ajcunallara churai, shuj cariyujllara. 10 Paiga ali rimashca achu pai ali rashcamanda, churiunara iñachij, pasiachij, quirijcuna chaquira maillaj, llaquiyujcunara yanapaj, tucui alira raj. 11 Astaun malta huaccha huarmiunara quillcai ama churaichu. Ima huras paiguna aicha munaira sintisha, Cristora mana caźunaun, cuti casarasha ninaun. 12 Shina rasha cauźayuj tucunaun, paiguna ñaupa quirishcara saquishcamanda. 13 Maspas, quillauna tucunaun, tucui huasiunai pasiasha; mana quillaunalla astaun maspas rimaisiquiuna, satirisiquiuna, manali shimira atarichijcuna tucunaun. 14 Chiraigumanda ñuca munani malta huaccha harmiuna casaranauchu, churiunara iñachinauchu, paiguna huasira cuiranauchu, maican chijnijtas mana lugarda cusha irusta rimangaj. 15 Huaquinguna ña Satanásta catiusha anzhurinaushcami. 16 Maican quirij caris quirij huarmis huaccha huarmiunara charisha, paigunara cuiranauchu, iglesia ama pagangaj paigunamanda, iglesia sirtu huaccha huarmiunajta ali tupu cullquira charingaj. 17 Cuiraj rucuuna ali mandajcuna ajpi ashca valichishca anauchu, maspas paiguna camachijcuna, yachachijcuna ajpi. 18 Quillcai quillcashca tian: “Tarabaj huagra shimira ama tapaichu,” shinallara, “Tarabaj runa paihua gananara apingaj valinmi.” 19 Shu cuiraj rucu runara ama cauźayachinauchu mana ishqui quinsa ricujcunara charijpi. 20 Ucharanallai causajcunara piñangui tucuiguna ñaupajpi, chishujcuna manzharinauchu. 21 Canda nini Diospa ñaupajpi, Señor Jesucristo ñaupajpis, pai ajllashca angelguna ñaupajpis, cai shimiunara huacachi, mana shujmalla tucusha, ama huaquingunallara llaquisha shujcunara chijnisha. 22 Ama uctalla maquiunara ima runa ahuais palltaichu, shinallara shujpa uchaunai ama satirichu. Camba shungura sumajta huacachi. 23 Can ama yacullara upichu, astaun ansa vinura upi camba icsa huajlishcamanda, can caran ratu ungushcamanda. 24 Huaquin runauna ucharashcauna ñaupajmanda ricurinaun, paiguna taripanama manara shamujllaira, huaquinguna ucharashcaunara huasha tupai tucunaun. 25 Shinallarami ali rashcauna ricurinaun, shu tunuuna mana ricurijpi, mana ushanaunzhu pacanara.
1 Tucui isclavus nishca sirvijcuna paiguna patrungunara ali llaquinauchu, Diospa shutiras, paimanda yachachinaras ama piñai tucungaj. 2 Maicanguna quirij patrungunara charisha, ama paigunara pishii churanauchu uqui ashcamanda, randi paigunara astaun ali sirvinauchu quirijcuna ashcaraigu, maspas paiguna ali sirvishcara apijcuna quirijcuna asha, llaquishcauna asha. Caita yachachi, shinallara camachi. 3 Pi runas shu tunura yachachijpi, ñucanchi Señor Jesucristo ali shimiunara, ali causana yachachinaras mana chasquijpi, 4 casna runa mas tucuisiqui tucushca, imaras mana yachanzhu, rimaisiqui tucushca, shimillahua macanaun. Caimanda chijninauna, macanaunas, manali rimanaunas, manali iyaigunas llucshinaun, 5 iyai huajlishca runauna, sirtu shimi illajcuna, upa shimiunahua macananaun, ali causanamanda, “Gananara apishun,” nisha iyanaun. Caigunamanda anzhuri. 6 Astaumbas ali causana cushi shunguhua ali gananami. 7 Imaras cai pachama mana apamushcanchichu, sirtu pacha mana imaras llucchinara ushashunzhu. 8 Shina ajpi, churarinaras micunaras charisha, cushiyashunchi caigunahua. 9 Randi charij tucunara munajcuna tintarinai urmanaun, tujllais; shinallara upa huajlina munanaunai urmanaun. Caiguna runaunara urmachisha tucuchinaun, chingachinaun. 10 Cullquira llaquina mana valin, shu angu cuinta tucun, paimanda tucui manaliuna iñanaun. Huaquinguna cullquira yapajta munasha, quirina ñambimanda anzhurinaushca, ashca nanaihua turmindachi tucunaushcami. 11 Canga, Diospa runa, chi samiunamanda miticui. Astaun, aliranara cati, Diosta llaquij shungura, ali quirinara, llaquinara, ahuantanara, mansu shungura. 12 Quirinamanda ali macanaunara macanui, huiñai causaira api. Chihuaj cayashca acangui, can ashca ricujcuna ñaupajpi can quirishcara ali rimasha ricuchicangui. 13 Tucuira causaira cuj Diospa ñaupajpi canda mandauni, shinallara Jesucristo ñaupajpis, pai Poncio Pilato ñaupajpi ali shimira rimaca, 14 canda mandauni cai camachishca shimira huacachingui, ima huajlis illaj, ima cauźas illaj, ñucanchi Señor Jesucristo ricurimunagama. 15 Caitaga bindisiashca sapalla mandaj Dios ricuchingami paihua punzhai. Paiga rey apuunamanda Rey Apumi, señorgunamanda Señormi, 16 paiga sapalla huañui illajmi, mana pactaihuaj punzhai causaj Diosmi. Paita pi runas mana ricushcachu, mana ushanzhu ricunara. Paihuajmi ali shutis, huiñaigama duraj mandanas. Amen. 17 Cai timpui causaj charijcunama rimai, ama mas tucuisiqui anauchu, ama paiguna charishcaunai chapanauchu, charishcauna mana quirihuaj ashcamanda. Astaun, paiguna causaj Diospi quirisha chapanauchu. Dios ñucanchira tucuira pactajta cunmi ñucanchi gustangaj. 18 Paiguna alira ranauchu, charij tucunauchu ali ranaunahua, cuyaisiquiuna, cuyaj shunguyujcuna tucunauchu; 19 casna ali ranaunara tandachisha, huasha shamuj causai istandi rumira cuinta charinaunga, paiguna huiñai causaira apinauchu. 20 Timoteo, canda mingashcara huacachi. Yanga upa shimiunara ama uyaichu, llulla rimashca ciencia nishca yachai rimashcaunaras. 21 Huaquinguna cai yanga yachaira uyasha, quirina ñambimanda anzhurinaushcami. Gracia ali llaquina iyai canhua achu. Amen.
1 Ñuca, Pablo, apóstol nishca Jesucristo cachashca runa, Dios munashcamanda, imasna pai causanara cusha nishcasna Cristo Jesuspi. 2 Ñuca llaquishca churi Timoteoma quillcauni. Gracia ali llaquina iyairas, llaquij shunguras, cushi shunguras chari, Yaya Diosmanda, Cristo Jesús ñucanchi Señormandas. 3 Diosta agrasini, paita sumaj iyaihua sirvini ñuca yayaunamanda pacha. Mana saquisha canmanda iyariuni, Diosta mañausha tutandi punzhandi; 4 camba ñahui iquira talishcara iyarisha, ashcara munani canda ricungaj, ñuca ashcara cushiyangaj. 5 Can shunguhua quirishcara iyariuni. Shinallara ñaupa punda quirinauca camba Loida rucu mama, camba Eunice mamas. Maspas, sirtumi ani can shinallara quiriungui. 6 Chimanda canda nini, cambajpi tiaj Dios cuyashcara causachingui ninara huairachishca cuinta; chi cuyashca ñuca maquira camba ahuai churashcamanda shamuca. 7 Dios mana ñucanchira cucachu manzhana iyaira, randi ushana iyaira, llaquina iyaira, aicha munaira arcana iyairas. 8 Ama pingarichu ñucanchi Señormanda rimangaj, shinallara ñucamandas, ñuca pai ishcashca runa asha. Randi, evangelio ali shimimanda ñucahua pariju turmindarinara apingui, Diospa ushaira cushcasna. 9 Pai ñucanchira quishpichica, sumaj cayanahua cayasha, mana ñucanchi rashcaunaraigumanda, astaun pai quiquin munashcamanda, shinallara Cristo Jesuspi cushca gracia ali llaquina iyaimandas, timpuuna manara callarishcaira cushca, 10 astaun cuna ricuchishcami ñucanchira Quishpichij Cristo Jesús ricurimushcai. Pai huañuira vinsica, causairas, mana huañuihuaj causairas punzhajlla ricuchica evangelio ali shimii. 11 Cai evangelio ali shimira camachij, cachashca runa, gentilgunara yachachijpas ñuca churai tucucani. 12 Chiraigumanda casna turmindarini; randi mana pingarinichu, ñuca maicanda quirishcara yachani, pai sirtu pacha ñuca mingashcara ushanmi huacachinara chi punzhagama. 13 Ñucamanda uyashca ali shimi tunura catingui, Cristo Jesuspi quirinais, llaquinais. 14 Canda mingashca ali shimira huacachi ñucanchijpi causaj Santu Ispíritu yanapashcahua. 15 Ña yachangui imasna tucui Asiai tiajcuna ichuhuanauca, Figelo Hermógenes nishcauna rashcasna. 16 Onesíforounara Señor llaquipachu. Pai ashca cuti cariyachihuaca, Ñuca cadenaunamanda mana pingaricachu. 17 Maspas, pai Roma llactai tiaushcai llaquishcahua mascahuaca ñucara, tupahuacami. 18 Señor paita cupachu llaquinara tupangaj Señormanda chi punzhai, Alimi yachangui imasna Efesoi ashcara yanapahuaca ñucanchira.
1 Can, ñuca churi, Cristo Jesuspi tiaj gracia ali llaquina iyaibi shinzhiyari. 2 Can ñucamanda ashca ricujcuna ñaupajpi uyashcara ali quirij runaunama pasachingui, paiguna ushaj asha shujcunara yachachingaj. 3 Can turmindarinaunara ahuantangui Cristo Jesuspa ali suldaru cuinta. 4 Pi runas, suldaru asha, mana satirinzhu causana ranaunai, paita suldaru tucungaj apijta cushiyachingaj. 5 Maicambas pujllanaunai macanausha, mana ali macanausha, llaitura mana apinzhu. 6 Tarabaj runa aparishca muyuunara apingaj, ñaupara tarabana anga. 7 Ñuca rimashcara uyai. Señor tucuira canda intindichingami. 8 Jesucristora iyari, Davidmanda mirai, huañuimanda causarij, ñuca evangelio ali shimii rimashcasna. 9 Chi ali shimimanda turmindariuni, huatai tucushca ani cauźayuj runasna, randi Diospa shimira mana huatashcachu. 10 Ajllashca runaunara llaquishcamanda tucuira ahuantani, paigunas quishpinara charinauchu. Chi quishpichina Cristo Jesuspi tiaun huiñaigama duraj sumajhua, 11 Cai shimi sirtumi: “Ñucanchi paihua pariju huañushca ajpi, shinallara paihua pariju causashun. 12 ”Ñucanchi turmindarishas, shinallara paihua pariju rey apuuna tucushun. Ñucanchi, ‘Paita mana ricsinichu,’ nijpi, pai shinallara ñucanchima, ‘Mana ricsinichu,’ ningami. 13 Ñucanchi mana quirihuaj ajpi, pai ali quirihuajmi. Paihua quiquin quirihuaj tunura saquinara mana ushanzhu.” 14 Caita iyachingui paigunara, Diospa ñaupajpi camachingui ama shimiunamanda macananauchu. Chita mana ansas valinzhu, astaun uyajcunara huajlichin. 15 Diospa ñaupajpi canllara ricuchingui shu “Alimi,” nisha rimashca runa cuinta, shu pingarina illaj tarabaj runa cuinta, sirtu shimira ali camachij. 16 Yanga shimiunara ama uyaichu. Chigunara uyajcuna Diosmanda mas mas caruyanaunga. 17 Paiguna shimi ismushca aicha cuinta micurisha rin. Himeneo Fileto nishcauna cai samiunami. 18 Paiguna sirtu shimimanda pandarinaushca, “Causarina ña pasashcami,” nisha. Shina nisha huaquinguna quirinara huajlichinaun. 19 Randi, Dios churashca urcun siqui cuinta shimi shinzhimi, casna nin: “Señor paihua quiquimbajcunara ricsin;” shinallara, “Tucui Cristo shutira rimasha rugaj uchamanda anzhurichu.” 20 Atun huasii, mana curillahua cullquillahua rashca puruuna tianaunzhu, astaun caspi batias, allpa mangas tianaun, huaquinguna valijcuna, huaquingunaga yanga apinauna. 21 Shinajpi maican runa paillara cai puchucaigunamanda pichajpi, valij puru cuinta tucunga, sumajyachishca, Señorbaj valijmi anga, ima ali ranaras rangaj puruntushca. 22 Shina ajpi maltauna ucha munaigunamanda miticui; ali dirichu ranaunara, quirinara, llaquinara, cushi shunguras cati, Señorda sumaj shunguhua rugajcunandi. 23 Astaun iyai illaj upa rimanaunara ama uyaichu, macanauna shimiunara llucchinaun. 24 Señorda sirvij ama piñarisiqui achu, astaun llaquisiqui tucui runaunahua, ali yachachij, ahuantaj, 25 piñajcunara mansu shunguhua camachisha, Dios munajpi aripintirinaunga chari, sirtu shimira yachangaj. 26 Shina rajpi supai tujllamanda quishpinauchu, paita sirviushcamandas, paihua munaira ranamandas.
1 Shinallara caita yachangui: puchucai timpuunai turmindus punzhauna shamunaungami. 2 Runauna paiguna quiquinllarara llaquijcuna tucunaunga, cullquira llaquijcuna, mas tucuisiquiuna, “Valijmi ani.” nijcuna, irusta rimajcuna, yayaunara mana caźujcuna, mana agrasijcuna, manaliuna, 3 llaquina illajcuna, mana mañaihuajcuna, camijcuna, mana ahuantajcuna, milliuna, alira ranara chijnijcuna, 4 amiguunara intrigajcuna, mana iyaihua rajcuna, pai quiquinllara llaquijcuna, aicha munashcaunara Diosmanda yali llaquijcunas. 5 Ali causaj cuinta ricurinaun, randi ali causana ushaira mana ricsinaunzhu. Casna runaunahua ama llutarichu. 6 Caigunamanda huaquinguna huasii icusha, mana iyaiyuj huarmiunara apinaun. Cai huarmiuna yapa uchayujcunami, ima aicha munaihuas undarishcaunami. 7 Paiguna tucui huras yachasha ririanaun, astaumbas sirtu shimira yachanama mana ima huraspas pactanara ushanaunzhu. 8 Imasna Janes Jambresndi Moisesta arcanauca, shinallara cai runauna sirtu shimira arcanaun. Casna runauna iyaibi huajlishcaunami, quirinamanda ichushcauna. 9 Paiguna mana mas ñaupajma rinaungachu. Tucui runauna riparanaunga imasna paiguna mana ali iyaiyujcuna ashcara, chi ishqui runaunasna. 10 Can ñuca yachachishcara catishcangui, ñuca causashcaras, iyashcaras, quirinaras, chapaisiqui shunguras, llaquinaras, ahuantanaras, 11 ñuca mulistai tucushcaras, ñuca turmindarishcaras, imasna ñuca Antioquía, Iconio, Listra llactaunai tiaushcai tucushcaras yachangui, imasna yapa turmindachihuanauca. Randi tucuimanda Señor quishpichihuaca. 12 Shinallara tucui Cristo Jesuspi ali causasha nijcuna turmindachi tucunaungami. 13 Astaun manali runaunas umachijcunas mas manalii rinaunga, umachisha, shinallara umachi tucushas. 14 Canga, can yachashcara, can sirtu ajta ricsishcaras cati, canda camachijta ricsisha. 15 Shinallara yachangui imasna can ichilla huahua hurasmanda pacha Diospa Santu Quillcashcaunara ricsishcangui. Cai shimiuna canda alma quishpichina yachanara cunaun Cristo Jesuspi quirijpi. 16 Tucui Dios Quillcashca Diosmanda rimashcami. Valinmi yachachingaj, camachingaj, alichingaj, ali causanara yachachingaj, 17 Diospa runa ali tucungaj, pactajta alichishca tucui ali ranara rangaj.
1 Canda nini Diospa ñaupajpi, Señor Jesucristo ñaupajpis, pai causajcunaras huañushcaunaras taripaj, pai ricurimushcai, pai mandana pachais. 2 Shimira camachi, shinzhira rimai, huras ajpis mana ajpis, intindichi, camachi, yachachi, tucui chapanahua, ali yachanahuas. 3 Huras shamunga runauna ali yachachinara mana uyanaungachu. Randi paiguna rinri shicshishca cuinta, paiguna quiquin aicha munashcasna yachachijcunara tandachinaunga. 4 Shinallara sirtu shimiunara uyangaj rinrira tapanaunga, yanga cuintanaunama vultiarinaunga. 5 Canga, tucuibi alilla causai, turmindusta ahuantai, evangelio ali shimira rimai, canma cushca sirvinara pactachi, 6 Ñuca ñallami sacrifïciora rai tucungarauni. Ñuca llucshina huras ña pactariunmi. 7 Ali macanaunara macanaushcanimi; callpanara tucuchishcani; quirinara huacachishcani. 8 Cunamanda ñucajta ali causana llaitura huacachishcami. Chi Uaitura ali taripaj Señor chi punzhai cuhuangami ñucama; mana ñucamalla astaun shinallara tucui pai shamunara llaquijcunamas. 9 Ñucara ricungaj uctalla shamunara iyaringui. 10 Demas, cai pachara llaquisha ñucara saquihuaca, Tesalonicama rica. Crescente Galacia partima rica, Tito Dalmacia partima. 11 Lucaslla ñucahua tiaun. Marcosta apisha, canhua pariju pushamui, pai valijmi ñucara yanapangaj. 12 Tíquicora Efesoma cachacani. 13 Can shamuusha, ñuca Troaspi Carpo huasii mingashca punchura apamui, shinallara ñuca quillcaunaras, maspas carai quillcashca pangaunaras. 14 Alejandro, paila irura tarabaj runa, yapa manalira rahuaca. Señor paita cutichichu pai shina rashcamanda. 15 Cambas cuirai ama paihua llutaringaj; pai ñucanchi shimiunara ashcara arcashcami. 16 Ñucara ñaupa punda taripaushcai, mana pihuas ñucahua cumpañahuaca. Tucui ichuhuanauca. Ama cauźayuj tucunauchu chimanda. 17 Randi Señor ñucahua tiauca, ursara cuhuaca paihua shimira ali rimangaj, tucui gentilguna uyangaj. Shina rasha, liun puma shimimanda quishpicani. 18 Señor quishpichihuangami tucui manalimanda; paihua ahua pachai tiaj rey apu mandanama pactanagama ñucara huacachingami. Paihuaj ali sumaj achu, huiñai huiñaigama. Amen. 19 Priscaras, Aquilaras, Onesíforounaras, salurai. 20 Erasto Corintoi saquirica. Trofimora ungushca ajpi saquicani Miletoi. 21 Tamia huras manara pactamujllaira shamungui. Eubulo canda saluran, shinallara Pudente, Lino, Claudia, tucui uquiunandi canda saluranaun. 22 Señor Jesucristo camba ispirituhua tiachu. Gracia ali llaquina iyai cangunahua achu. Amen.
1 Ñuca, Pablo, Diosta sirvij, Jesucristo apóstol nishca cachashca runa, imasna Dios ajllashca runauna quirishcasna sirtu shimira yachashcasna ali causanai, 2 huiñai huiñai causairá chapasha tiauni, imasna mana llullaj Dios paihua shimira cuca timpuuna manara callarishcaira. 3 Dios pai munashca timpui paihua shimira ricuchica ñucama mingashca camachinamanda, imasna ñucanchira Quishpichij Dios ñucara mandaca. 4 Titoma quillcauni, ñuca quiquin churima ñucanchi pariju quiriushcai, gracia ali llaquina iyaira, llaquij shunguras, cushi shunguras chari Dios Yayamanda, ñucanchira Quishpichij Jesucristomandas. 5 Canda Creta islai saquicani ima pishishcaras alichingaj, caran llactai cuiraj rucuunara churangaj, ñuca canda mandashcasna. 6 Cuiraj runa cauźa illaj achu, shuj huarmiyujlla, paihua churiuna quirijcuna, mana irus causajcuna, ali caźujcuna. 7 Ministirinmi cuiraj runa cauźa illaj achu, Diosta sirvij. Casna runa mana mas tucuisiqui achu, mana piñarisiqui, mana machaisiqui, mana macanuisiqui, manali rashcaunamanda ganashcaunara mana apisha nij. 8 Astaun pasiachisiqui achu, ali ranara llaquij, ali causaj, ali shungu, sumajlla causaj, paillara ucha munaira arcarij. 9 Casna runa sirtu shimira huacachij achu imasna ñaupa yachachishcasna, shinallara ali yachanara camachij achu, manali rimajcunara cutipangaj. 10 Chara ashca mana uyajcuna tian, yanga rimajcuna, umachijcuna, maspas caiguna circuncisionda rana yachachijcunahua tianaun. 11 Casnauna shimira tapangaj ministinaun. Intiru ailluunara mulistanaun, mana valij shimiunara yachachisha yangamanda cullquira ganangaj. 12 Paigunamanda shuj, paiguna quiquin rimaj asha, nica: “Creta runauna, tucui huras llullaisiquiuna, manali animalguna, quilla sacsaisiquiuna.” 13 Cai shimi sirtumi. Chiraigumanda shinzhira piñangui paigunara, paiguna ali quirijcuna tucunauchu; 14 paiguna ama uyanauchu judiuguna yanga cuintashcaunara, sirtu shimimanda anzhurishca runauna mandashcaunaras ama caźunauchu. 15 Chuyaj shunguyuj runaunaj tucui chuyajmi. Irus iyaiyujcunaj, mana quirijcunaj, mana imas chuyachu. Paiguna iyarinas, paiguna ucha rana iyais irusyashcami. 16 ”Diosta ricsinchimi,” nisha, astaun paiguna rashcaunahua: “Illanmi Dios,” ninaun, paiguna manaliuna, mana caźujcuna ashcamanda, mana valijcuna ima aliranaras rangaj.
1 Canga ali sirtu yachanara rimangui. 2 Rucu apayauna ali causajcuna anauchu, iyaiyujcuna, ali quirinara quirijcuna, llaquinahua, chapaisiqui shunguhuas. 3 Rucu apamaunas ali causanauchu, mana irusta rimajcuna shujcunamanda, mana machaisiquiuna, aliranara yachachijcunas, 4 malta huarmiunara yachachijcuna quiquin cariras churiunaras llaquingaj; 5 caiguna ali iyaiyujcuna tucungaj, sumaj causajcuna, quiquin huasira cuirajcuna, ali shunguuna, carira caźujcuna. Shina rajpi Diospa shimi ama camishca tucungaj. 6 Shinallara maltaunara camachi iyaiyujcuna tucungaj. 7 Cambas tucui ali ranaunai ricuchij tucungui; can yachachinai sumaj shunguhua, ali causanahuas. 8 Shinallara ali shimihuas, mana piñachihuaj shimihuas yachachi; casna rajpi chijnij runa pingaringami, mana ima manaliras rimanara ushangachu cangunamanda. 9 Sirvijcunara camachi paiguna patrungunara ali uyangaj, tucuibi paigunara cushiyachisha, ama cutipaisiquiuna; 10 mana shuhuasha, astaun tucuibi ali pactachij ajta ricuchisha, shina rasha tucuibi ñucanchira Quishpichij Diospa yachachinara ali sumajyachinaungami. 11 Diospa gracia ali llaquina iyai ricurimushcami tucui runauna quishpichi tucungaj, 12 ñucanchira yachachisha imasna yanga causairas, cai pacha ucha munairas saquisha, cai timpui iyaihua alihua, Diosta manzhashcahua causashunchi. 13 Cushi chapanara chapaunchi, ñucanchi atun Dios Quishpichij Jesucristo ashca sumaj ricurinara chapaunchimi. 14 Paiga paillarara cuca ñucanchi randimanda, ñucanchira randingaj tucui manalimanda, paihuajllarara shu runa muntunda sumajyachingaj, ali ranaunara munajcunara. 15 Caita rimai, camachi, yachachi tucui mandanahua. Pihuas canda ama pishii churachu.
1 Paigunara iyachi mandajcunara apuunaras caźungaj, uyaisiquiuna tucungaj, puruntuuna ima ali ranaras rangaj. 2 Pitas ama llullasha huajlichinauchu, ama macanuisiquiuna tucunauchu, randi llaquisiquiuna, mansu shunguyujcuna anauchu tucui runaunahua. 3 Ñucanchis ñaupa huras iyai illajcuna acanchi, mana caźujcuna, chingarishcauna, aicha ucha munairas, ima gustashcaras sirvijcuna acanchi, manali rana munaibis, chijninais causasha, chijnijcunahua, parijumanda chijninausha. 4 Astaun ñucanchira Quishpichij Diospa ali shungu ricurimujpi, pai runaunara llaquishcas, 5 quishpichihuaca, mana ñucanchi alirashcaunamandachu, astaun pai llaquishcamanda, ñucanchi quishpichishcai maillashcamandas, shinallara Santu Ispiritui mushujyachishcamandas. 6 Dios Santu Ispiritura ñucanchijpi pactajta talica, ñucanchira Quishpichij Señor Jesucristomanda, 7 ñucanchi paihua gracia ali llaquina iyaimanda ali dirichu alichishca, heredero nishca apijcuna tucushcanchi, imasna huiñai causaira chapashcasna. 8 Caiga sirtu shimimi. Cai shimiunara shinzhira yachachi, Diospi quirijcuna ali ranaunara ranauchu. Caiguna aliunami valijcunami runaunaj. 9 Upa tunu tapunaunara, unaimanda miramuj shutiunaras, macanauna shimunaras, ley shimimanda tapunaunaras saqui. Caiguna mana valinaun, mana sirvinaun. 10 Chaupichij runara ichui, shu cuti ishqui cuti camachishca huasha, 11 caita yachasha, casna runa manalima ña tigrashcami, uchara raun, pai quiquin ucharashcamanda cauźayachishcami. 12 Ima huras ñuca Artemasta, Tiquicora cambajma cachajpi, uctalla shami ñucajma Nicópolis llactama. Chihui tamia timpura pasasha iyauni. 13 Zenas abogado runara Apolostas yanapai paiguna ñambii, ama imas paigunaj pishichu. 14 Ñucanchijcuna shinallara yachanauchu ali ranaunara rangaj, ministijcunara yanapangaj, paiguna mana aparishcauna illaj anauchu. 15 Tucui ñucahua tiajcuna canda saluranaun. Quirijpuramanda ñucanchira llaquijcunara salurai. Gracia ali llaquina iyai tucui cangunahua achu. Amen.
1 Pablo, Jesucristora llaquishcamanda chunda cularbi ishcarij, uqui Timoteondi, llaquishca Filemonda saluranchi, ñucanchira yanapaj amigura. 2 Llaquishca Apia paniras saluranchi, Arquiporas, pai ñucanchihua pariju tarabaj, shinallara camba huasii tiaj iglesiaras. 3 Gracia ali llaquina iyairas cushi shunguras charichi ñucanchi Dios Yayamandas, Señor Jesucristomandas. 4 Ñuca Diosta agrasini, tucui huras canda iyarisha ñuca mañaushcaunai. 5 Can Señor Jesucristora llaquishcaras quirishcaras uyashcani, shinallara tucui quirijcunaras llaquishcara. 6 Diosta mañauni can ñucanchihua pariju quirisha, astaun ali intindinguima tucui ñucanchi charishca aliunara Cristo Jesusmanda. 7 Can llaquishcamanda ashca cushiras cariyanaras charinchi canmanda, uqui, imasna can quirijcuna shunguunara cariyachishcangui. 8 Caimanda lugarda charishallara Cristoi canda mandangaj ima rana ashcaras, 9 llaquishcmanda canda rugauni, imasna ñuca rucu Pablo ashas, maspas Jesucristomanda chunda cularbi ishcariaj; 10 canda rugauni ñuca churi Onésimomanda, ñuca ishcariashcai paihua yaya tucucani Cristoi. 11 Pai ñaupa huras cambaj mana valijchu aca, astaun cuna huras cambajpas ñucajpas valijmi. 12 Paita cuti cambajma cachauni. Can paita ñucara cuinta apingui. 13 Paita arcasha nicani ñucahua pariju, can randimanda ñucara sirvingaj, ñuca evangeliomanda ishcariushcai. 14 Astaun imara rangajpas mana munacanichu manara canda tapusha, camba yanapana ama ursamanda achu, astaun can munashcamanda. 15 Caimanda chari, pai canmanda anzhurishca aca unaillara, can paita huiñaigama charingaj; 16 cuna mana sirvijchu, astaun sirvijmanda yali, llaquishca uquimi, sirtu pacha ñucama, astaun maspas canma, imasna aichais shinallara Señorbis. 17 Shinajpi can ñucara canda cumpañajsna iyasha, paita ñucarasna apingui. 18 Pai imais canda huajlichishca ajpi, canda dibijpis, chita churai ñuca cuintai. 19 Ñuca, Pablo, quiquin maquihua canda quillcashcani, canda pagashami. Shinashas, mana ninichu imasna shinallara can quiquinllara ñucama dibihuangui. 20 Ari, uqui, yanapahuapai ñucara Señorbi. Ñuca shungura cushiyachihuapai Cristoi. 21 Ñuca canda quillcashcani, can caźushcara yachasha, caitas yachasha: Can ñuca rimashcara yalijta pactachingui. 22 Shinallara ñucajta shu tiana ucura alichingui. Canguna mañaushcaunamanda ñuca cachari tucungaj chapauni. 23 Canda saluran Epafras, ñucahua pariju chunda cularbi ishcariaj, Cristo Jesusmanda. 24 Shinallara Marcos, Aristarco, Demas, Lucas, ñucara yanapajcuna, canda saluranaun. 25 Ñucanchi Señor Jesucristo gracia ali llaquina iyai camba ispirituhua achu. Amen.
1 Callari huras, Dios ashca cuti ashca tunui yayaunama rimaca paimanda rimajcunahua. 2 Cai puchucai punzhaunai Dios ñucanchira rimashca Churimanda. Dios paita heredero nishca tucuira apijta churaca. Churis shinallara tucuira rarca. 3 Churiga Diospa sumajhua chiuyachishcami, Diospa quiquin tunu ricurijmi. Churi tucuira huacachiun paihua ushaj shimihua. Pai ñucanchi ucharashcara pichaca, pai quiquin rashcahua. Chihuasha sumaj Diospa ali maqui partii tiarica ahua pachai. 4 Angelgunamanda yalii churashca aca imasna paihua shuti angelguna shutimanda yalin. 5 ¿Diosca maican angeldara ima huraspas nica: “Ñuca Churimi angui, cuna punzha canda iñachicani,” shinallara, “Ñuca paihua Yaya tucusha, pai ñucaj Churi tucunga?” 6 Cutillara, ima huras ñaupa pagarishca Churira munduma icuchisha, nin: “Tucui Diospa angelguna paita aduranauchu.” 7 Sirtu pacha angelgunamanda nin: “Paihua angelgunara ispirituunara ranmi, paita sirvijcunara sindij ninara cuinta ranmi.” 8 Randi, Churimanda nin: “Camba tiarina, O Dios, huiñai huiñaigama duran, camba gubirnu vara alirana varami. 9 Ali ranara llaquishcangui, manali ranara chijnishcangui. Chiraigumanda camba Dios asitira camba umai talishcami, ali cushi shungu asitihua, canda cumpañajcunamanda yalira.” 10 Shinallara, “Canga, Señor, callari huraspi mundura rarcangui, ahua pacharas camba maquihua rashcami. 11 Paiguna tucurinaunga, astaun can tiaunguimi; chiguna tucui rucuyanaunga shu llachapa cuinta, 12 churanara cuinta can paigunara lapungui, turcarinaungami; astaun canga mana turcaringuichu, camba huatauna mana turcarinaungachu.” 13 ¿Maican angelgunamara Dios ima huraspas nica: “Ñuca ali maqui partii tiari, ñuca canda chijnijcunara camba chaqui ucui churanagama?” 14 Angelgunaga, ¿manzhu paiguna tucui sirvij ispirituuna, quishpichina ajcunara yanapangaj cachamushcauna?
1 Chiraigumanda ministirinmi ñucanchi uyashcaunara astaun ali caźungaj, ñucanchi paigunamanda ama caruyangaj. 2 Angelguna rimashca shimiuna sirtu ajpis, tucui ucharana tucui mana caźunas paihua quiquin paganara apijpis, 3 ¿imasna rashara quishpishun, ñucanchi casna valij quishpina shimira mana ali uyasha? Cai quishpina shimira ñaupa punda Señor rimashca aca, chi huasha paita uyajcuna ñucanchima rimanauca. 4 Dios paigunahua pariju rimaca, sumaj ricurinaunara munanaita rashcaunaras ricuchisha, Santu Ispiritura cushcaunara cusha pai munashcasna. 5 Shamuj mundura mana angelguna maquiunai churacachu, ñucanchi cuna rimaushca mundura; 6 shinasha shu runa shu quillcai casna rimaca: “¿Imarai runa, can paita iyaringaj, runa churis can paihuajma pasiangaj? 7 Paita angelgunamanda ansalla pishira rarcangui, paita ali sumajhua, ali rimashca shutihua, llaitura cuinta churachicangui, camba maquihua rashcauna ahuai paita churacangui. 8 Tucuira paihua chaqui ucui churacangui.” Imasna tucuira paihua chaqui ucui churashca aca, imas mana quishpicachu. Shina ajllaira tucuira chihui churashcara chara mana ricunchichu. 9 Astaun Jesusta angelgunamanda ansa pishi rashcara ricunchi, Dios runaunara yangamanda llaquishcaraigu, pai tucui runauna randimanda huañuira gustangaj, paita ña ricunchi ali sumajhua ali rimashca shutihuas llaitushca cuinta, pai huañuibi turmindarishcamanda. 10 Dios, tucui paihuaj ajpi, tucui paimanda ajpi, ashca churiunara ahuai tiaj sumajma pushasha nisha, paiguna almara Quishpichijpajpi turmindarinaunahua pactachingaj munaca. 11 Sumajyachijca sumajyachishcaunandi shu Diosmandallami anaun, chiraigumanda mana pingarinzhu, “Uquiuna,” nisha paigunara rimangaj, 12 casna nisha: “Ñuca uquiunara camba shutira rimasha, tandarina chaupi shungüi canda alabashami.” 13 Cutillara nin: “Paita quirisha samashami.” Shu cuti nin: “Ñucas, Dios ñucama cushca churiunandi.” 14 Shinajpi imasna churiuna aichahua yahuarhua rashcauna ajpi, Jesuspas shinallara aicharas yahuardas apica, pai huañusha, huañuchina ushaira charij supai apura tucuchingaj, 15 shinallara casna rasha huañuira manzhajcunara llushpichica, paiguna intiru causana huras manzhashcaraigumanda sirvij tucushcaunara. 16 Sirtu pacha Jesús angelgunara mana yanapacachu, astaun Abrahamba miraigunara yanapacami. 17 Chiraigumanda tucuibi paihua uquiuna cuinta tucuna maca, shu ali llaquij ali sirvij sacerdote atun apu tucungaj tucui Dios ranaunai, runauna ucharashcaunara pagangaj. 18 Jesús paillara tintai tucushca asha, camashca asha, tintai tucushcaunara ushanmi yanapanara.
1 Chiraigumanda, ali dirichu uquiuna, ahua pachamanda cayashcauna, Cristo Jesústa iyarichi, pai ñucanchi quirinai Apóstol nishca Dios cachashcami, shinallara ñucanchi sacerdote atun apumi. 2 Paiga paita cayaj Diosta ali uyajmi aca imasna Moisespas ali uyaj aca tucui Diospa huasii. 3 Imasna huasira raj huasimanda yali valijmi, shinallara Jesús Moisesmanda yali valijmi. 4 Tucui huasi shu runa rashcami, astaun tucuira raj Diosmi. 5 Sirtu pacha Moisés ali pactachij aca Diospa huasii, shu sirvij cuinta, huasha huras rimangaraushcara ricuchingaj; 6 Cristoga, quiquin Churi cuinta, ali pactachij aca Diospa huasii. Ñucanchiga chi huasimi anchi ñucanchi quirinaras ñucanchi chapanai ahuayanaras puchucaigama shinzhira huacachisha. 7 Chiraigumanda, Santu Ispíritu nishcasna: “Canguna cuna punzha paihua shimira uyasha, 8 canguna shungura ama shinzhiyachichi imasnara tucuca Diosta piñachina huras, tintana punzhai, runa illashca partii, 9 ima huras canguna yayauna ñucara tintahuanauca, camahuanauca, chuscu chunga huatara ñuca rashcaunara ricunauca. 10 Chimanda chi miraigunahua piñaricani. ‘Tucui huras paiguna shungüi pandana ñambira purisha chingarinaun,’ nicani, ‘ñuca ñambiunara mana ricsinaushcachu. ’ 11 Chiraigumanda piñarisha, ñuca shutii rimasha nicani: ‘Mana icunaungachu ñuca samanai. ’ “ 12 Ricuichi, uquiuna, cangunahua ima manali mana quirij shungu ama tiachu, Diosmanda anzhuringaj. 13 Astaun cangunapura caran punzha rimanuichi, “Cuna punzha” niushca chara mana tucurishcaira, pihuas cangunamanda ama shinzhi shunguyuj tucuchu, ucha umachishcamanda. 14 Ñucanchi Cristohua pacta apijcunami anchi, callari huras quirinara shinzhira huacachisha puchucai hurascama, 15 casna niushca hurasllaira: “Cunallara paihua shimira uyasha, shungura ama shinzhiyachichi, imasna ranauca ñucara piñachina punzhai.” 16 ¿Maicangunara anaucairi, uyajcuna ashallara, Diosta piñachijcuna? ¿Manzhu tucui Egiptomanda Moiseshua pariju llucshijcuna anauca? 17 ¿Maicangunahuara chuscu chunga huata tupura piñarica? ¿Manzhu ucharajcunahua aca, paiguna aichauna runa illaj partii urmajcunahua? 18 ¿Maicangunamara Dios paihua shutii rimaca, “Ñuca samanai mana icunaungachu,” nisha? ¿Manzhu mana uyajcunama acai? 19 Ricunchi imasna paiguna mana quirishcamanda mana ushanaucachu icunara.
1 Manzhashunchi Dios cushca shimi chara tiaullaira paihua samanai icungaj, cangunamanda shuj mana pactashca ima cuinta. 2 Ñucanchimas imasna paigunamas ali shimira rimashca aca. Astaun paigunaj shimira uyana mana valicachu, uyajcuna mana quirinahua uyajpi. 3 Ñucanchiga quirijcuna asha samanai icunchi, randi Dios mana quirijcunamanda nica: “Chiraigumanda piñarisha, ñuca quiquin shutii rimacani, Mana icunaungachu ñuca samanai,” Shina ajllaira Dios rashcauna mundu callarishcamanda pacha tucuchishcami anauca. 4 Huaquin Quillcai, canzhis punzhamanda rimasha, casnami nin: “Dios pai tucui rashcaunamanda samacami canzhis punzhai.” 5 Cutillara chi Quillcai nin: “Mana icunaungachu ñuca samanai.” 6 Chiraigumanda, huaquinguna samanai icungaj chara pishijpi, maspas ali shimira ñaupa rimashca runauna mana icunaucachu Diosta mana caźushcaraigumanda, 7 cutillara, ashca huatauna huasha, Dios shu punzhara cuca, David shimimanda rimasha: “Cuna punzha, canguna ñuca shimira uyasha, ama shinzhiyachichi canguna shunguunara.” 8 Josué paigunara samanara cushca ajpi, Dios mana rimanmaca shu samana punzhamanda. 9 Chimanda Diospa runaunaj shu samana chara tiaun. 10 Paihua samanai icuj shinallara pai rashcaunamanda samacami, imasna Dios pai rashcaunamanda samashcasna. 11 Mascashunchi chi samanai icungaj, ama pihuas chiguna mana caźushca samii urmangaj. 12 Diospa shimi causajmi, ushajmi, tucui ishqui iluyuj isparamanda yali. Ushan almara ispiritumanda, tullu mucuunara tullu ñuctumandas chicanyachingaj. Shungu iyairas munairas ricsin. 13 Tucui ima rashcas Diospa ñaupajpi ricurin, maspas tucui llatan, pascashca, pajlla pambai ricurin paihua ñahuii. Paihuami tucui ucha dibira alichina anchi. 14 Chiraigumanda shu sacerdote atun apura charisha ahua pachara pasajta, Diospa Churi Jesústa, ñucanchi quinna shimira huacachishunchi. 15 Shu ñucanchi turmindarishcara mana sintij sacerdote atun apura mana channchichu, paiga ñucanchisna tucuibi tintashca aca, astaun ucha illaj. 16 Mayanllayamushunchi ñucanchira yangamanda llaquij Diospa tiarinama, mana ansas manzhasha, paihua llaquinama pactangaj, paihua gracia ali llaquina iyaira tupangaj, ministishca huraspi yanapai tucungaj.
1 Tucui sacerdote atun apu, runaunamanda ajllashca asha, Dios mandashcaunai runaunara yanapangaj churashcami, cuyashcaunaras sacrificiounaras uchaunamanda ricuchingaj; 2 pai chapaisiqui tucungaj mana intindijcunahuas, pandajcunahuas, imasna paihuas irquimi. 3 Chiraigumanda, pai sacrificounara ricuchinami anga, pai quiquin ucharashcamandas, shinallara runaunajmandas. 4 Pi runa cai valij ranara mana paihua quiquimbajta apinzhu, astaumbas Dios cayashcalla, Aaronda cayashcasna. 5 Shinallara quiquin Cristo mana paillarara ahuayaricachu sacerdote atun apu tucungaj, astaun Dios caita rarca, casna nisha: “Can ñuca Churimi angui, cuna punzha canda tupashcanimi.” 6 Imasna shinallara nin shu Quillcai: “Huiñaigama sacerdote tucushcangui Melquisedec tunu cuinta.” 7 Maspas, Cristo pai runa aichai causaushca punzhaunai, mañashcahua, rugashcahuas caparisha, ñahuimanda iquira talisha, paita huañuimanda llushpichij Diosta mañaca, pai uyai tucuca mansu shunguhua manzhashcamanda. 8 Churi ashallara, uyanara yachacami pai turmindarishcamanda; 9 pai sumajyachishca asha, huiñaigama Quishpichij tucuca, tucui paita uyajcunama; 10 Dios paita shu Melquisedec tunu sacerdote atun apura shutichica. 11 Caimanda ashcara charinchi rimangaj, turmindushua intindichinami, canguna upa rinriyuj tucushcamanda. 12 Canguna ña yachachij tucuna ajcuna ashallara, unai timpu yachashca huasha, chara ministinguichi cutillara Diospa shimimanda ñaupa punda yachanaunara yachangaj. Cuti lichira ministiujcuna tucushcanguichi ali shinzhi aichara micujcuna tucunarandimanda. 13 Tucui lichira upij ali causana shimira rimangaj chara mana yachanzhu, chara huahua ashcamanda. 14 Shinzhi micuna shunguyujcunajmi, ashcara rashcaunamanda ña yachaiyujcuna tucunaushca, aliras manaliras ricsingaj.
1 Chiraigumanda Cristomanda yachangaj ñaupa yachachishcaunara pasasha, ñaupajma rishunchi tucuira pactachingaj; mana cutillara urcun siquira cuinta churasha: Huañushca rashcaunamanda aripintirinara, Diosta quirinara, 2 bautisanamanda yachanaunara, maquira palltanara, huañushcauna causarishcaunara, huiñaigama taripanaras. 3 Caillara rashun, Dios sirtu pacha lugarda cujpi. 4 Runauna, shu cuti shungüi punzhayachishcauna, ahua pachamanda cuyashcara gustajcuna, Santu Ispiritura apijcuna, 5 shinallara Diospa ali shimira gustajcuna, shamuna timpuuna ushanaunara gustajcuna ashas, 6 shinasha cuti urmajpi, mana usharinzhu paigunara cutillara mushujyachinara aripintiringaj; paiguna quiquin maquiunahua cutillara Diospa Churira chacatanaun, paita pajlla pambai pingachisha. 7 Allpa caran ratui urmamuj tamiara upiusha, ali micuna pangaunara iñachisha tarabaj runauna micungaj, Dios bindisiashcara charin. 8 Randi allpa cashaunaras chiniunaras iñachijpi, ichunallami, maldisianallami, puchucaibi rupachinami anga. 9 Randi, cangunamanda llaquishcauna, astaun alira iyaunchi, alma quispichina iyaira, ñucanchi casna rimaushallara. 10 Dios mana cungarinzhu canguna rashcara, canguna llaquishcamanda rashcaunaras, paihua shutira ahuayachingaj, canguna quirijcunara sirvishca asha, charajpas sirviusha. 11 Munanchi cangunamanda caran duiñu shina ali cuiraj shungura charingaj puchucaigama, canguna chapaushca iyaira pactajta gustangaj, 12 canguna ama quillaisiquiuna tucungaj, astaun imasna huaquin runauna paiguna quirishcamanda chapaushcamanda cushca shimiunara apinaun, canguna shinallara catirichi. 13 Dios Abrahanma shimira cushca huraspi, yali ali shuti illajpi, paihua quiquin shutii shimira cuca, 14 casna nisha: “Sirtu pacha canda ashcara bindisiashami, ashcara mirachishami.” 15 Paiga alimanda chapasha, Dios cusha nishcara apica. 16 Sirtu pacha runauna shu paigunamanda yali shutii shimira cunaun, maspas imara Diospa shutii rimashcahua alichishca ajpi ña mana turcaihuajchu. 17 Shinajpi Dios cushca shimira apijcunama pai rimashca mana turcaihuaj ajta astaun ali ricuchisha nisha, paihua quiquin shutii shimira cuca; 18 shinasha ishqui mana turcaihuaj shimiunara charinchi, caigunai Dios mana ushan llullanara, cai shimiunamanda paihuajma shamunchi, ñucanchi ñaupajpi churashca chapanara apisha ashca cushira charingaj. 19 Cai ali chapanara charinchi, shu almara huatana cuinta. Chi huatana huayurij llachapa ucugama icunmi. 20 Chi huayurij llachapa ucui, ñaupara rij cuinta, Jesús ñucanchimanda icuca, pai ña shu Melquisedec tunu sacerdote atun apura rashca asha huiñai huiñaigama.
1 Cai Melquisedec, Salem llacta rey apu, ahuai tiaj Diospa sacerdote, Abrahanda tupangaj llucshica, pai rey apuunara vinsisha tigramushcai, maspas paita bindisiaca. 2 Paimallara Abraham tucuimanda shu chunga partira cuca. Paihua shuti ñaupa punda, “Ali dirichu causana Rey Apu,” nin, shinallara “Salem llacta Rey Apu,” caita “Cushi shungu Rey Apu,” nin. 3 Paihua yaya, paihua mama, paihua aillu mana quillcashcachu, paihua causana callarinas, paihua causana tucurinas. Astaun Diospa Churi samii rashca asha, sacerdote cuinta huiñaigama duranmi. 4 Iyarichi cai runa valij ashcara, quiquin Abraham paita shu chunga partira cuca pai guirai apishcamanda. 5 Sirtu pacha Levi churiunamanda sacerdote tucujcuna runaunamanda chi chunga partira apingaj mandashcaunami, ley shimi rimashcasna; caimi nin paiguna quiquin uquiunamanda apingaj, caigunas Abrahamba aichamanda llucshijcuna ajllaira. 6 Chi Melquisedec, mana paiguna aillui cuintashca ashallara, Abrahanmanda chi chunga partira apica, maspas pai Dios cushca shimira charij runara bindisiacami. 7 Sirtu pacha ñaupa aj runa quipa aj runara bindisianmi. 8 Caibi sirtu pacha huañunalla runauna chi chunga partira apinaun, astaun chihui shu “Causaunmi,” nishca runa apinmi. 9 Casna rimasha nijpi, quiquin Levi, huasha huras chunga partira apij, Abrahambi chi chunga partira pagaca, 10 pai chara Abrahamba aicha ucui tiauca Melquisedec paita tupangaj llucshiushcai. 11 Shinajpi, ali pactajta causana Levi sacerdoteunamanda ajpi, paigunamanda runauna ley shimira apinauca, ¿imaraigumanda shu Melquisedec tunu sacerdote cuti ataringaj ministirinma, mana Aarón muntunmanda cayashca asha? 12 Sacerdote muntun turcashca ajpi, ursamanda ley camachishca shimiras shinallara turcangaj ministirinmi. 13 Casna rimashca Señorga shu aillumanda llucshin; chi aillumandaga pihuas mana sirvishcachu altarbi. 14 Ricsinallami ñucanchi Señor shamuca Judá aillumanda, Moisés cai aillumanda imaras mana rimacachu runauna sacerdoteuna tucungaj. 15 Caita mas ricsihuajllami tucun Melquisedec cuinta shu sacerdote cuti atarijpi. 16 Paiga sacerdote tucuca, mana shu runa aillu miraigunamanda mandashca shimimanda, astaun shu mana tulaihuaj causana ushaimanda sacerdote tucuca. 17 Paimanda rimashca tian: “Can huiñaigama sacerdotemi angui Melquisedec tunui.” 18 Casna ajpi, ñaupa huras mandashca shimi chingachishcami, irqui ashcaraigu, mana sirvij ashcamanda. 19 Ley shimiga imaras mana alichicachu, astaun shu yali valij chapanara cushcami aca, chimanda Diosma mayanllayamunchi. 20 Caita Diospa shutii rimashcahua rashcami aca. 21 Chishu runauna sirtu pacha Diospa shutii rimashca illaj ashallara sacerdoteuna tucunauca, randi caiga Diospa shutii rimashcahua, caita rimaj casna nica: “Señor paihua quiquin shutii rimaca, mana aripintiringachu: Canmi huiñaigama sacerdote tucungui Melquisedec tunui.” 22 Chiraigumanda shu yali valij pactachina shimira Jesús valichij tucushcami. 23 Chishu sacerdoteuna ashcaunami anauca, huañusha mana ushanaucachu catinara. 24 Jesúsca huiñaigama causaj asha, shu mana turcaihuaj sacerdote tunura charin. 25 Chiraigumanda Jesús paimanda Diospajma shamujcunara shinallara puchucaigama quishpichinara ushanmi, pai huiñaigama causaj asha paigunamanda Diosta mañangaj. 26 Casna tunu sacerdote atun apu ñucanchij valica: chuyaj, ucha illaj, ima iruspas illaj, ucharajcunamanda anzhurishca, ahua pachaunamanda yali ahuayachishca. 27 Paiga mana ministinzhu caran punzhai, chishu sacerdote atun apuuna rashca cuinta, ñaupa punda pai quiquin ucharashcaunamanda sacrificiora rangaj, chihuasha runaunajmanda. Cai sacerdotega casna rarca shu cutilla huiñaigama, pai quiquinllara intrigarica sacrificioi. 28 Ley shimiga irqui sami runaunara churaun sacerdote atun apuuna tucungaj, astaun ley shimi huashai shamuj Diospa shutii cushca shimi Churira churaun, paiga huiñaigama sumajyachishcami.
1 Ñucanchi rimashcaunamanda caimi yali valij parti: Casna sacerdote atun apura charinchi, pai ahua pachai tiaj ali sumaj Diospa tiarinai ali maqui partii ña tiarishcami. 2 Paiga Diospa huasii sirvijmi, chi sirtu tabernáculo huasii, mana runa shayachishca astaun Señor shayachishca. 3 Tucui sacerdote atun apu churashcami cuyashcaunara sacrificiounaras ricuchingaj. Chiraigumanda ministirinmi pai shinallara imaras charichu ricuchingaj. 4 Paiga cai pachai tiaushca asha, mana sacerdote tucunmachu aca, shu sacerdoteuna ña tianaupi ley shimii nishcasna sacrificiounara ricuchingaj. 5 Chiguna ahua pachai tiajcuna ricurijllara almallara sirvinaun, imasna Dios Moisesta rimaca tabernáculo huasira shayachingaraushcai: “Riqui, tucuira rai canda urcui ricuchishcasna ricurijta.” 6 Cunaga Cristo yali valij sirvinara charin, imasna pai shu yali valij pactachina shimira alichij tucushcami; cai pactachina shimi yali valij cushca shimiunahua rashcami. 7 Chi ñaupa punda pactachina shimi mana pishishca ajpi, sirtu pacha mana mascashca anmaca mushujta. 8 Dios paigunahua piñarisha nica: “Punzhauna shamunaungami, Señor nin, ima huras shu mushuj pactachina shimira alichishami Israelba huasihua Judá huasihuas. 9 Cai mushuj pactachina shimi mana paiguna yayaunahua ñaupa huras rashca pactachina shimi cuinta tucungachu, ñuca paiguna maquimanda apishca punzhai, paigunara Egipto llactamanda llucchingaj. Paiguna chi pactachina shimira mana huacachinauca, ñucas paigunara saquicani, Señor nin. 10 Chiraigumanda, caimi mushuj pactachina shimi, Israel huasihua alichisha chi punzhauna huashai, Señor nin. Ñuca mandashca shimiunara paiguna iyaibi churashami; paiguna shungüis quillcashami. Ñuca paigunaj Dios tucushami, paigunas ñucaj ailluuna tucunaungami. 11 Pihuas paihua rayai causaj runara mana yachachingachu, pihuas paihua uquira mana yachachingachu: ‘Señorda ricsi,’ nisha. Tucui runauna ñucara ricsihuanaungami, ichilla huahuamanda rucu runagama paigunamanda. 12 Perdonaisiqui tucushami paiguna manali rashcaunara, paiguna ucharashcaunaras mana cuti iyarishachu.” 13 Mushuj pactachina shimimanda, Dios “mushuj,” nijpi, ñaupa aj pactachina shimi ña rucu tucushcami. Rucu tucushcaga maucayasha ña chingarinallami.
1 Sirtu pacha ñaupa pactachina shimi Diosta alabana camachishcara charicami, shinallara shu cai pachai tiaj Diosta alabana huasiras. 2 Tabernáculo Diospa huasi casnami aca: Ñaupa partii, Santu Lugar nishcai, vilara shayachina, mesandi, ricuchina tandandi tianauca. 3 Chaupii huayurij llachapa huashai, Santísimu Lugar nishca aca. 4 Chihui curihua rashca insinsura rupachina puru tiaca, shinallara curihua quillpashca arca nishca pactachina shimi santu cajún. Cai arca cajumbi maná nishcara huacachina curi purus, Aaromba iñaj caspi varas, shinallara pactachina shimi rumi palaunas tianauca. 5 Arca ahuai ishqui sumaj querubín nishcauna shayanauca, uchamanda pagana nishca arca tapa ahuai. Caigunamanda cuna mana ashcara rimana usharinzhu. 6 Cai tucuiguna casna churashca ajpi, tabernáculo ñaupa parti ucui tucui punzhauna sacerdoteuna icunaun alabana ranaunara rangaj. 7 Randi huasha parti ucui sacerdote atun apulla icun shu cutilla caran huatai, shina ashallara yahuar illaj mana icunzhu. Cai yahuarda ricuchinmi pai quiquinmanda, runauna mana yachasha ucharashcaunamandas. 8 Santu Ispíritu caimanda yachachin imasna Santísimu Lugar nishca ucu partima chara mana icuihuajchu aca tabemáculo ñaupa parti chara shayaullaira. 9 Cai tabernáculo shu cuna hurascama ricuchina cuintami, chihui cuyashcaunaras sacrificiounaras ricuchinaunmi, shina ajllaira cai ranauna shina raj runara alichinara mana ushanaunzhu paihua alirana iyaibi. 10 Caiguna micunaunalla, upinaunalla, huaquin armanaunalla, aichai rangaj mandashcaunalla anaun, mushuj tunura rana huras pactamunagama churashcaunami. 11 Astaumbas Cristo ña shamushcami, shamuj aliunara cuj sacerdote atun apu. Paihua tabernáculo huasi yali valij, yali sirvij, mana runa maquihua rashca, mana cai mundumandachu. 12 Pai shu cutilla huiñaigama Santísimu Lugarbi icuca, mana cari chivo yahuarhua, mana huagra huahua yahuarhua, astaun paihua quiquin yahuarhua icuca, shina rasha almaunara huiñai huiñaigama randica. 13 Huagra yahuar, cari chivo yahuar, malta huarmi huagra ushpas, irus runauna ahuai chausishca sumajyachijpi aichara pichangaj, 14 ¿imasna mas Cristo yahuar yali valinga canguna iyaira pichangaj huañushca ranaunamanda, canguna causaj Diosta sirvingaj? Cristo huiñai duraj Ispiritumanda paillara ucha illaj Diosma ricuchica. 15 Shinajpi chimanda, Cristo shu mushuj pactachina shimira alichij tucun, pai huañushcaraigu ñaupa pactachina shimimanda ucharashcaunara perdonangaj, cayashca runauna cushca shimii rimashca huiñaigama duraj herencia nishca cuyashcara apinauchu. 16 Testamento nishca pactachina quillca tiajpi, duiñu huañuna anga chi quillca valij tucungaj. 17 Testamento quillcaga duiñu huañushca huasha valinmi, astaun mana valinzhu pai chara causaullaira. 18 Chiraigumanda ñaupa pactachina shimis mana yahuar illaj cushcachu aca. 19 Moisesca tucui mandashca shimiunara tucui runaunama rimashca huasha, huagrauna yahuarda cari chivuuna yahuardas apisha, yacuhua, puca illmahua, chausina pangaunahuas, quiquin quillcara chausica, shinallara tucui runaunaras, 20 casna nisha: “Caiga Dios cangunama mandashca pactachina shimira alichina yahuarmi.” 21 Maspas, Moisés tabernáculo huasiras tucui sirvina vasuunaras shinallarami yahuarhua chausica. 22 Ley shimii ñaca tucuira yahuarhua pichashcami. Yahuar mana talirijpi, uchara mana perdonashcachu. 23 Ministiricami ahua pachai tiajcuna ricurijcuna pichai tucunauchu casna sacrificiounahua, astaun ahua pachai quiquin tiajcuna yali valij sacrificiounahua. 24 Cristo mana icucachu maquihua rashca Diosta alabana huasii, chi huasi sirtu aj huasimanda ricuchijlla aca, astaumbas Cristo quiquin ahua pachai icuca, paillara ñucanchimanda Diospa ñaupajpi cuna ricuchingaj. 25 Maspas, mana ashca cuti paillara cungaj icucachu, imasna caran huatai sacerdote atun apu Santísimu Lugarbi icushcasna shujpa yahuarhua. 26 Mana shina ajpi ministirinmaca Cristo ashca cuti turmindarinara, mundu callarinamanda pacha; astaun cunaga timpuuna pactariushcai, paillarara shu cutilla cuca huiñaigama, pai quiquinllara sacrificiora cuinta cungaj uchara quichungaj. 27 Imasna runaunama cushcami shu cutilla huañungaj, chihuasha taripai tucungaj, 28 shinallarami Cristo shu cutilla cushca aca ashcauna ucharashcaunamanda. Chihuasha cutillara ricuringami, mana ucharaigumanda, astaun paita chapaucunara quishpichingaj.
1 Ley mandashca shimi shamuj aliunara almallara charin, astaun paiguna quiquin ricurinara mana charinzhu. Chiraigumanda caran huatai cuti rashca sacrificiounahua shamujcunara mana ima huraspas ushanzhu alichinara. 2 Mana shina ajpiga cai sacrificiounara cungaj ña tucurinmaca, casna rasha alabajcuna shu cuti pichashca asha, ucha iyaira ña mana charinaunmaca. 3 Randi cai sacrificiounaiga, caran huatai ucharashcaunara cuti iyarinaun, 4 cari huagra, cari chivu yahuar ucharashcaunara quichunara mana ushashcaraigumanda. 5 Chiraigumanda, Cristo mundui icusha, nin: “Sacrificioras cuyanaras mana munacangui; randi aichara ñucajta alichishcangui. 6 Rupachishca sacrificiounas, uchamanda pagashcaunas canda mana cushiyachinauca. 7 Shinajpi nicani: ‘Ñuca shamunimi, O Dios, camba munaira rangaj, imasna ñucamanda quillcai quillcashcasna. ’ “ 8 Naupa nisha: “Sacrificioras, cuyashcaras, rupachishcaunaras, uchamanda pagashcaunaras mana munacangui, canda mana cushiyachinauca” cai tucuira ley shimi mandashcasna cushca ajllaira, 9 shinallara huasha nica: “Shamunimi, O Dios, camba munaira rangaj;” pai ñaupa ajta anzhuchin, puchucai ajta icuchingaj. 10 Cai munaibi, ñucanchi sumajyachishca anchi, Jesucristo aicha shu cutilla cushcaraigu huiñai huiñaigama. 11 Sirtu pacha tucui sacerdote caran punzha sirvisha, ashca cuti shina sacrificiounara rasha tiaunmi. Casna sacrificiounaga ima huraspas mana ushanaunzhu ucharashcaunara quichungaj. 12 Randi Cristo shu sacrificiollara ucha rashcaunamanda, shu cutilla rashca huasha, huiñai huiñaigama ña tiarishcami Diospa ali maqui partima. 13 Chimanda ñaupajma chapaun Dios tucui paita chijnijcunara paihua chaqui ucui churanagama. 14 Paiga shu sacrificiollahua sumajyachishcaunara huiñaigama alichicami. 15 Caillarara Santu Ispíritu ñucanchira ricuchin, casna nisha: 16 ”Caimi ñuca pactachina shimi paigunahua, chi punzhauna pasashca huasha, Señor nin. Ñuca ley shimiunara paiguna shungüi churasha, paiguna iyaibi quillcasha.” 17 Chita rimashca huasha nin: “Paiguna ucharashcaunara, paiguna manali rashcaunaras ima huraspas mana cuti iyarishachu.” 18 Shinajpi caigunara ña perdonashca ajpi, uchamanda mas sacrificio mana tianzhu. 19 Shina ajllaira uquiuna, lugarda charinchi Santísimu Lugarbi icungaj Jesucristo yahuarmanda, 20 mushuj causaj ñambira, pai ñucanchijta pascashca, huayurij llachapara pasasha, caimi paihua aicha. 21 Shinallara ñucanchi Diospa huasi ahuai shu atun sacerdotera charisha, 22 mayanllayamushunchi, ali shunguhua, ali shinzhi quirinahua, shungumanda manali iyaira pichashca, aichara ali chuya yacuhua maillashca. 23 Ñucanchi chapana shimira shinzhira huacachishunchi, mana cuyurisha, shimira cuj Diosta quirihuaj ashcamanda. 24 Ñucanchipura parijumanda iyarishunchi, mas mas llaquinausha, alira rausha yanaparingaj; 25 ñucanchi tandarimunara mana saquisha, huaquinguna rashcasna, astaun animarisha rimanausha, shinallara mas mas casna rasha canguna Cristo shamuna punzha mayanllayaushcara ricuusha. 26 Ñucanchiga quiquin munaimanda uchara rasha, sirtu shimira uyashca huasha, mas sacrificio ña mana tianzhu uchamanda, 27 astaun taripanas, rupachina ninas Dioshua piñarijcunara manzhanaita chapanaunmi nillpungaj. 28 Moisés cushca ley shimira paquij runas, ishqui quinsa ricujcuna rimanaupi, ursamanda huañunami. 29 ¿Manzhu yali livachihuaj anga maican runas, Diospa Churira aitaj, pactachina shimira valichij yahuarda, paita sumajyachij yahuarda, ‘Trusmi,” nisha rimaj, gracia ali llaquina iyaira cuj Ispiritura camij? 30 Casna nisha rimaj Señorda ricsinchi: “Cutipana ñucajmi, ñucallara pagashami,” Señor nin. Cuti: “Señor paihua runaunara taripangami,” nin. 31 ¡Manzhanaitami causaj Diospa maquii urmangaj! 32 Iyarichi ñaupa punzhaunara, ima huras intindichishca huasha, ashca macanaunahua turmindaricanguichi. 33 Sirtu pacha runauna cangunara manali rimashcaunara turmindachishcaunaras ricunauca, maspas shina tucujcunahua pariju cumpañajcuna tucucanguichi. 34 Shinallara chunda cularbi ishcashcaunahua llaquiricanguichi, canguna charishcaunara quichushcaras cushiyasha ahuantacanguichi, caita yachasha: Ahua pachai yali valij yali duraj cuyashcara charinguichimi. 35 Ama pirdichichu canguna quirina iyaira; cai quirina valij gananara charin. 36 Chapaisiqui shungura ministinguichi Diospa munaira pactachishca huasha, pai cushca shimira apingaj. 37 Unaillai, “shamuna aj shamungami, mana unaiyangachu. 38 Ali dirichu runa pai quirishcamanda causangami. Pai manzharisha vultiarijpiga, ñuca alma paihuajpi mana cushiyangachu.” 39 Randi, ñucanchi mana huashama vultiarijcunachu anchi, almara pirdingaj; astaun quirijcunami anchi, almara quishpichingaj.
1 Quirina ima chapashcaras “Sirtu apinimi,” nisha iyanami; mana ricurijtas “Sirtu pacha apingarauni,” nisha iyanami. 2 Paiguna quirinamanda callari timpui causajcuna ali rimai tucunauca. 3 Ñucanchi quirinamanda, tucui istrillascunara Dios rimashcamanda rashca ajta intindinchi. Shinajpi ricurijcuna mana ricurijcunamanda rashcara quirinchi. 4 Abel, pai quirishcamanda shu sacrificiora Diosma cuca, Caimbajmanda yalira. Caimanda pai ali dirichu runa nishca aca, Dios Abel cushcaunara ricsisha. Paiga huañushca ajllaira, pai quirishcamanda chara rimaun. 5 Enoc, pai quirishcamanda ahuama apai tucuca, huañunara ama ricungaj. Mana tuparicachu, Dios paita apashcaraigu. Pai manara apai tucujllaira, paimanda rimashca aca, “Diosta cushiyachishcami,” nisha. 6 Quirina illaj, mana ushaihuajchu Diosta cushiyachingaj. Ministirinmi Diospajma shamuj runa Dios ajta quiringaj, shinallara Dios paita mascajcunara pagajmi. 7 Noé quirisha, chara mana ricurijcunamanda Dios paita rimajpi, manzhasha shu barcura puruntuca, paihua aillura quishpichingaj. Pai casna quirishcamanda, Noé mundura cauźayachica, shina rasha ali dirichu causanara apij tucuca. 8 Abraham quirisha, pai cayashca asha caźucami, Dios paita cungaraushca allpama ringaj, Maita rinaras mana yachasha llucshicami. 9 Pai quirisha, carumanda shamuj cuinta, Dios cusha nishca allpai causaca, shujpa allpaisna. Carpa huasiunai causaca Jacobhuas Isaachuas, paihua pariju cushca shimira apijcuna asha. 10 Rumi ahuai sicachishca llactara chapauca, Dios iyarishca, Dios shayachishca llactara. 11 Sara shinallara, pai quirishcamanda, huahuara mana tupaj ashallara, ursara apica huahuara tupangaj; huahuara pagarichica, yapa rucu ashallara. Sara quirica, imasna shimira cuj Dios pai cushca shimira pactachijmi. 12 Chiraigumanda shu ñaca huañushca cuinta runamanda ashca miraiguna llucshinauca, ahua pachai tiaj istrillascuna cuinta, lamar patai tiaj tiyu cuintas. 13 Quirishcahua tucui cai runauna huañunauca, cushca shimira chara mana apishallara. Shina ajllaira carumandalla ricunauca, quirinauca, saluranauca, caita nisha: “Carumandauna, yanga purijcunas cai pachai anchi.” 14 Casna rimajcuna pajllai ricuchinaun imasna shu allpara mascaushcasna. 15 Paigunaga paiguna llucshishca llactara iyariushca asha, sirtu pacha lugarda charinauca tigrangaj. 16 Astaun, paiguna shu yali llactara munanauca, shu ahua pachai tiajta. Chiraigumanda Dios mana pingarinzhu paiguna Dios nishca tucungaj. Paigunajta shu llactara alichishcami. 17 Abraham quirishcaraigumanda, paita camashca huraspi, Isaacta cuca sacrificiora rangaj. Cushca shimira apij paihua sapalla churira cuca, 18 paita nishca aca: “Isaacmanda camba miraiguna rimashca anga.” 19 ”Diosca ushajmi huañushcaunamanda atarichingaj,” nisha iyarisha, chimanda paihua iyaibi cuti paihua churira chasquicami. 20 Isaac quirisha, Jacobtas Esauras bindisiacami, huasha shamungaraucunara ricusha. 21 Jacob quirisha, pai huañuna huras pactarijpi José churiunara caran shujta bindisiaca, paihua tauna pundai quimirisha Diosta aduraca. 22 José quirisha, pai huañuna huras pactarijpi, Israelba churiuna Egiptomanda llucshinara rimaca, paihua tulluunara apangaj mandasha rimaca. 23 Quirishcamanda, Moisés pagarimushcai, paihua yayauna paita pacanauca quinsa quilla tupura, paita shu gustu sumaj huahua ashcara ricusha, rey apu mandashcara mana manzhasha. 24 Moisés quirisha, ña rucu runa tucusha, pai Faraomba ushushi churi nisha rimashcara mana munacachu. 25 Uchamanda mana duraj gustanaunai causangaj mana munacachu, randi Diospa runaunahua pariju turmindachi tucungaj yali munacami. 26 Egipto llacta valishcaunamanda yali, Cristohua pariju chijni tucunara munaca. Paganara ricuucami. 27 Moisés quirisha Egipto llactara saquicami, rey apu piñarishcara mana manzhasha. Mana ricuihuaj Diosta ricushcasna shinzhi tucuca. 28 Pai quirisha, Pascua istara rarca, yahuarda chausinaras, ñaupa llucshij churira huañuchij ángel paigunara ama llangangaj. 29 Quirishcamanda, Israel runauna Puca Lamarda chimbanauca chaquishca allpara cuinta. Egipto runauna casna ranara camasha, yacui chucasha huañunauca. 30 Paiguna quirishcamanda, Jericó llactamanda quinzhauna urmanauca, runauna canzhis punzhara llacta muyujta purishca huasha. 31 Quirishcamanda Rahab nishca shujhua tacarisiqui huarmi mana huañucachu mana caźujcunahua pariju, chi pacalla puriu runaunara ali shunguhua chasquishcaraigu. 32 ¿Imara mas nishachu? Lugar illan rimangaj Gedeón, Barac, Sansón, Jefté, David nishcaunamanda, shinallara Samuelmanda, Diosmanda rimajcunamandas. 33 Caiguna quirishcamanda llactaunara vinsinauca, aliranara ranauca, cushca shimiunara apinauca, liun pumauna shimira ishcanauca, 34 huaquinguna atun ninaunara huañuchinauca, ispara quirumanda quishpinauca, samba ashcamanda ursara apinauca, guiraunai shinzhi tucunauca, carumanda shumuj suldaruunara callpachinauca. 35 Huarmiuna paiguna huañushcaunara causarishcamanda apinauca. Shujcunaga turmindachishca anauca, quishpinara mana munasha, yali valij causarinara apingaj. 36 Shujcuna burlashca anauca, azutishca anauca, maspas cadena huascahua huatai tucunauca, chunda cularbi ishcai tucunauca. 37 Rumihua shitashca, siruchuhua partishca, nanachishca, isparahua huañuchishca anauca. Maitas purinauca, burigu carahua chivu carahuas churarishca, tsuntsuuna, turbarishcauna, turmindachishcauna anauca. 38 Cai samiunamanda mundu mana valijchu aca, runa illashca partiunai urcuunais purinauca, allpa uctuunais, rumi uctuunais. 39 Tucui caiguna, paiguna quirishcamanda ali rimai tucushca ashallara, shimi cushcara mana apinaucachu; 40 Dios ñucanchijta yali valijta cusha nisha, ñucanchi chara illajllaira paiguna ama sumajyachi tucungaj.
1 Chimanda ñucanchis casna atun muntun ricujcunara charisha ñucanchi muyujta, tucui llashajtas, ñucanchira arcaj ucharas saquishunchi, ahuantasha ñucanchi callpanai callpashunchi. 2 Jesústa ricushun, pai ñucanchi quirinara iñachij, ñucanchi quirinara pactachij, Paiga paihua ñaupajpi churashca cushira riparasha, cruzpi turmindarica, pingarinara ichusha, chihuasha Diospa tiarina ali maqui partii tiaricami. 3 Paita iyarichi, imasna uchayuj runauna ashca chijnishcahua turmindarica, canguna alma ama sambayasha dismayaringama. 4 Cangunaga chara yahuarda talinagama mana ahuantashcanguichichu uchahua macanausha. 5 Cungarishcanguichi cai camachina shimira, cangunara churiunasna rimashcara: “Ñuca churi, ama pishii churaichu Señor piñashcara Ama dismayarichu ima huras pai canda piñasha rimajpi. 6 Señor pai llaquishca runara livachin, tucui pai chasquishca churira azutin. 7 Canguna Dios livachishcara ahuantajpi, pai cangunara shu churiunara cuinta chasquin. ¿Maican yayara churira mana livachinga? 8 Cangunara mana livachisha saquijpi tucui churiunara livachishcasna, shinajpi yanga huachashca huahuauna anguichi, mana sirtu churiuna. 9 Maspas, ñucanchi cai pachai tiaj yayaunara charicanchi, paiguna ñucanchira livachinauca, ñucanchi paigunara manzhacanchi. ¿Ima rashara mana ispirituuna Yayara mas mas uyashun, uyasha causashun? 10 Chiguna sirtu pacha ansa punzhaunara livachihuanauca paiguna munashcasna, astaun cai Yayaga ñucanchira livachinmi ñucanchi ali tucungaj, ñucanchi paisna chuya shunguyuj tucungaj. 11 Sirtu pacha mana ima livachinas chi ratullaira cushiyachinzhu, astaun llaquirichinmi. Shina ajllaira huasha, ganas ali causanara cungami uyajcunama. 12 Shinajpi urmashca maquiunara atarichichi, api cunguri mucuunara shinzhiyachichi. 13 Dirichu ñambiunara raichi canguna chaquiuna puringaj, anga chaqui purij paihua ñambimanda ama anzhurichu, astaun aliyashca achu, 14 Cushi shungura charichi tucui runaunahua, chuyaj shunguras. Cai illaj pi runas Señorda mana ricungachu. 15 Ali cuiraichi maicans Diospa gracia ali llaquina iyaimanda ama anzhuringaj, ima ayaj shungus iñasha cangunara arcangaj, ashcaunara chimanda huajlichingaj. 16 Ali cuiraichi shujhua tacarij runa ama tiangaj cangunahua, shu manalirajpas, Esaú cuinta, pai shu micunamandalla paihua ñaupa aj churi apina dirichura catuca. 17 Canguna ña yachanguichi imasna pai huasha huras bindisianara apisha nisha rashallara ichui tucucami, pai aripintiringaj mana lugar tiacachu, pai huacasha mascajpis. 18 Ninahua rupaj llanganalla urcuma mana pactamushcanguichichu; shinallara llandu tutamas, rayuunamas mana shamushcanguichichu. 19 Curmita uyarishcamas, rimaj shimimas mana shamushcanguichichu, chi shimi casna manzhanaita ajpi uyajcuna ama cuti uyarichu nisha mañanauca. 20 Shimi mandashcara mana ushanaucachu ahuantangaj: “Ima huagra ashas urcuma pactajpi, rumihua shitai tucuchu, lanzahua tucsishca achu,” nisha. 21 Urcura ricuna manzhanaita ajpi, Moisés nica: “Chucchusha manzhaunimi.” 22 Astaumbas Sión urcumä shamushcanguichi, causaj Diospa llactama, ahua pacha Jerusalenma, ashca huaranga angelguna muntunmas. 23 Shamushcanguichi ahua pachai quillcashca ñaupa llucshij churiuna tandarinama, shinallara tucuira taripaj Diosma, ali runauna ispirituunara ña alichishcaunama. 24 Shamushcanguichi Jesúsma, mushuj pactachina shimira Alichijma, paihua chausishca yahuarmas, Abelbajmanda yalira rimaj. 25 Ricuichi rimajta ama ichungaj. Cai pachai camachijta mana caźujcuna mana quishpijpi, maspas mana quishpichishunzhu ñucanchi, ahua pachamanda rimajta mana caźusha. 26 Paihua shimi chi ñaupa huras cai pachara cuyuchica, randi cuna shimira cushca nin: “Cutillara ñuca cuyuchishami mana cai pachallara, astaumbas ahua pacharas.” 27 Cai shimi, “Cutillara,” nisha, tucui cuyurijcunara anzhuchinara riman, rashcaunara cuinta, mana cuyurinaunalla saquirinauchu. 28 Shinajpi ñucanchi shu mana cuyurihuaj mandana pachara chasquisha, Diosta agrasishunchi, chimanda Diosta sirvishunchi, paita cushiyachisha ali llaquij ali manzhaj shunguhua. 29 Ñucanchi Dios shu rupachij nina cuintami.
1 Uquipurasna llaquinausha causaichi. 2 Pasiajcunara cuirangaj ama cungaringuichichu. Huaquinguna pasiajcunara chasquisha, mana yachashallara, angelgunara chasquinaucami. 3 Chunda cularbi ishcariajcunara iyarichi, canguna paigunahua pariju ishcariaj cuinta; shinallara turmindachishcaunaras iyarichi, cangunas chara aichai causajcuna asha. 4 Tucui cangunahua, casarana ali apishca achu, caitus uchalina illaj. Shujhua tacarijcunaras, shujpa huarmira apijcunaras Dios taripangami. 5 Ama cullquira llaquichichu; canguna cuna huras charishcaunahua cushi tucuichi. Dios casna nica: “Canda mana cungarishachu, mana saquishachu.” 6 Shinajpi cushi shunguhua rimanara ushanchi: “Señor ñucara yanapajmi; Mana manzhashachu runa ñucara imara rasha nijpis.” 7 Cangunara cuirajcunara ama cungarichichu, Diospa shimira cangunara rimajcuna ajpi. Paiguna causana tunura iyarichi, paiguna quirinara catirichi. 8 Jesucristo shinallarami, cainas, cunas, huiñaigamas. 9 Ama apai tucuichichu ima yanga mana iyaihuaj yachachishcaunahua. Valinmi gracia ali llaquina iyaihua shungura shinzhiyachingaj, mana aichara carana camachishcaunahuas, chiguna mana ima huraspas yanapanauca paigunara catijcunara. 10 Ñucanchi shu altar nishca sacrificiora rana mesara charinchi, tabernáculo huasii sirvijcunaga chimanda mana ushanaun micunara. 11 Sacerdote atun apu sacrificiora rasha, huagrauna yahuarda Diosta alabana huasii icuchisha ucharashcaraigumanda, sacrificio aichara llactamanda canzhai rupachishcami. 12 Shinallara Jesús runaunara sumajyachingaj paihua quiquin yahuarhua, pungumanda canzhai turmindarica. 13 Llucshingaichi paihuajma, llactamanda canzhama, paihua pingarishcara apasha. 14 Caibi shu durana llactara mana charinchichu, astaun huasha shamujta mascaunchi. 15 Shinasha, tucui huras paimanda alabana sacrificiora Diosta cushunchi, ñucanchi shimihua paihua shutira rimasha. 16 Ali ranaras yanapanaunaras ama cungarichichu. Casna sacrificiounahua Dios cushiyanmi. 17 Cangunara cuirajcunara uyaichi, paigunara caźuichi. Paiguna ricusha cuiranaun canguna almaunara, imasna paiguna cangunamanda Diosta rimana anaunga. Caita cushihua ranara munanaun, mana piñarinahua, caiga cangunaj mana valinzhu. 18 Ñucanchimanda mañaichi. Ñucanchi ali rana iyaira charinchimi nisha iyaunchi, tucui alirasha causangaj munasha. 19 Maspas cangunara rugauni, ñucamanda mañaichi, ñuca uctalla cangunajma cuti shamungaj. 20 Cushi shungura cuj Dios, ñucanchi Señor Jesucristora huañushcaunamanda causachij, buriguunara atun Cuiraj, huiñaigama duraj pactachina shimi yahuarmanda, 21 cangunara alichichu tucui ali ranaunai pai munashcara rangaj, pai ali munashca tunura cangunajpi rasha Jesucristomanda, paiga ali sumaj tucuchu huiñai huiñaigama. Amen. 22 Cangunara rugauni, uquiuna, cai camachishca shimira uyaichi, ansahuallara cangunama quillcashcani. 23 Yachaichi, ñucanchi uqui Timoteo ña llushpirishcami. Pai uctalla shamujpi, pariju shamushun cangunara ricungaj. 24 Tucui cangunara cuirajcunara saluraichi, tucui quirijcunandi. Italia llactamanda ajcuna cangunara saluranaun. 25 Gracia ali llaquina iyai tucui cangunahua achu. Amen.
1 Ñuca, Santiago, Diosta Señor Jesúscristoras sirvij, judiuguna chunga ishqui ailluuna chausirishcaunama salurasha quillcauni. 2 Ñuca uquiuna, canguna caran tunui camai tucusha, ashcara cushiyaichi. 3 Caita yachasha canguna quirinara camashca asha, ali ahuantana iyaira cun. 4 Shinallara lugarda cunguichi cai ahuantana iyai pactarichu, canguna pactajta ali iyaiyuj tucungaj imas mana pishisha. 5 Cangunamanda maicambas yachana iyai pishijpi, Diosta mañai. Dios tucuigunama pactajta cunmi, mana mitsasha. Paima cushca anga. 6 Astaun ali, quirinahua mañai, ima quirinais mana pishisha. Maican runas mana ali quirisha, lamar atun tsaglas cuinta tucun, huaira caran partima apashca, 7 Casna iyaiyuj runa ama iyachu: “Imaras Diosmanda apishami,” nisha. 8 Ishqui iyaiyuj runa tucui pai ranaunai yapa turcarisiqui. 9 Mana charij uqui cushiyachu pai ahuayashcai. 10 Charij uqui cushiyachu pai ichillayashcai. Paiga quihua sisa cuinta pasangami. 11 Imasna indi llucshmujpi rupai tucujpi, quihua chaquirin, paihua sisa urman, paihua sumaj ricurina chingarin, shinallara charij runa huañuringami pai tucui rashcaunai. 12 Cushimi tintashcara ahuantaj runa. Camanara vinsishca huasha, causana llaitura apinga. Cai llaitura Dios paita llaquijcunama cusha nishcami. 13 Shu runa tintai tucusha, ama nichu “Diosmanda tintashca ani,” Dios mana ushanzhu manalihua tintai tucungaj, shinallara mana pitas tintanzhu. 14 Astaun shu runa tintai tucujpi, paihua quiquin ucha munaimanda aisai tucunmi, umachishca tucunmi. 15 Shinajpi ucha munai, huahuara cuinta tupashca huasha, uchara pagarichin. Ucha pactarijpi huañuira pagarichin. 16 Ñuca llaquishca uquiuna, ama pandaichichu. 17 Tucui ali cuyana, tucui ali sumaj cuyashca ahuamanda irgumun istrillascunara raj Yayamanda. Paihuajpi turcarinas llanduyanas illan. 18 Paiga paihua quiquin munaimanda ñucanchira pagarichica paihua sirtu shimimanda, ñucanchi pai tucui iñachishcaunamanda ñaupa punda pucujcuna cuinta tucungaj. 19 Caimanda, ñuca llaquishca uquiuna, tucui runa puruntu achu uyangaj, randi rimangaj piñaringajpas unaiyaj achu. 20 Runa piñarina Diospa ali dirichu ranara mana ranzhu. 21 Chiraigumanda tucui irus ranaunaras yaparij manali ranaunaras ichusha, canguna iyaibi tarpushca shimira apinguichi mansu shunguhua. Caimi canguna almara quishpichinara ushan. 22 Uyashca shimira pactachijcuna tucuichi, ama uyajcunalla, cangunallara umachisha. 23 Maicambas cai shimira uyashallara, mana rausha, shu ispijui ricuj runa cuinta tucun, paihua quiquin ñahuira ricusha, 24 Paillara ricun, randi rishca huasha uctalla imasna ashcaras cungarin. 25 Astaun maicambas lugaryachij ali ley shimii ricusha, catisha, mana cungarisha uyaj ajpi, astaun alira raj, casna runa cushi tucungami pai tucui rashcaunai. 26 Maican runas cangunamanda, “Diospi quirij ani,” nisha iyashallara, shina ajllaira paihua callura mana arcajpi, paillara umachiun, pai Diospi quirishca mana valinzhu. 27 Dios Yaya ñaupajpi ali sirtu quirina, mana imas huajlishcahua casnami: huaccha huahuaunajpi huaccha huarmiunajpis pasiai rinami paiguna llaquiriushcais, shinallara duiñura mundumanda ima huajlinamandas huacachingaj.
1 Ñuca uquiuna, canguna ñucanchi sumaj Señor Jesucristoi quiriushcai, charijcunara mana charijcunara ama chicanyachinguichichu. 2 Shu charij runa ali curi anilluhua, ali valij churarishca, canguna tandarinama icujpi, shinallara shu irus tsuntstu churarinara churarishca runa icujpi, 3 canguna valij churarishca runara ricusha, paita nijpi: “Tiaripai cai ali tiarinai” randi tsuntsu churarishca runara: “Chillai shayari,” mana shinasha, “Ñuca chaqui rayai tiari” nijpi, 4 ¿manzhu casna rasha, cangunapura runaunara chicanyachinguichi? Shinallara ¿manzhu manali iyaihua taripajcuna tucushcanguichi? 5 Uyaichi, ñuca llaquishca uquiuna, ¿manzhu Dios cai pachai tiaj mana charijcunara ajllaca, paiguna quirinahua charij tucungaj, ahua pachara apijcuna tucungaj, Dios paita llaquijcunama cusha nishcara? 6 Cangunaga tsuntsu runara pingachishcanguichi. Charijcunaga, ¿manzhu caiguna cangunara turmindachijcuna? ¿manzhu caiguna cangunara apuuna ñaupajma aisachijcuna? 7 ¿Manzhu caiguna cangunara cushca ali valij shutira irusta camisha rimanaun? 8 Canguna sirtu pacha yapa valij mandashca shimira pactachisha, Quillcai quillcashcasna: “Shu runara llaquina angui can quiquinllara llaquishcasna,” alirami rangui. 9 Astaun runaunara chicanyachisha, uchara raunguichi, ley shimimanda cauźayujcuna tucunguichi, ley shimira paquijcunasna. 10 Maicans tucui ley shimira pactachij ashas, randi shu mandashcallara mana pactachisha, pai tucui cai shimiunamanda cauźayuj tucun. 11 Chi “Ama shujhua tacarichu,” nisha nij, shinallara “Ama huañuchinguichu,” nisha nica. Shinajpi can mana shujhua tacariushcallara randi shujta huañuchisha, can ley shimira paquij tucushcangui. 12 Lugaryachina ley shimimanda taripanauna asha, casna rimaichi, casna raichi. 13 Maicans llaquina illaj taripasha, paihuas llaquina illaj taripai tucunga, Llaquina taripanara vinsin. 14 Ñuca uquiuna, shu runa “Quirinara charinimi,” nisha nij, shina ajllaira ali ranaunara mana rajpi, ¿imajta valin? ¿Chi tunu quirina paita quishpichinara ushanzhu? 15 Shu uqui shu pani llushti ajpi, caran punzha micunara ministijpis, 16 cangunamanda shuj paita nijpi: “Cushihua ri, rupajyai, amijta micui,” shina nisha rimashallara ima aicha ministishcaras mana cujpi, ¿imajta valin? 17 Shinallarami quirina sapalla ajpi, ali ranauna illajpi, paillara huañushcami. 18 Shu runa ninga: “Can quirinara charingui, ñuca ali ranaunara charini.” Shina rimajpi, camba alirana illaj quirinara ricuchihuai, randi ñuca ali rashcaunamanda ñuca quirinara canda ricuchisha. 19 Can Dios shujlla ashcara quiringui. Alirami quiringui, supaigunas shinallara quirinaun, chucchunaun. 20 ¿Yachasha ningui, upa runa, imasna quirina ali ranauna illaj huañushcami? 21 Ñucanchi yaya Abraham ¿manzhu ali rashcaunamanda ali tucuca, paihua churi Isaacta ricuchisha altar sacrificio rana rumi ahuai? 22 ¿Manzhu ricungui imasna paihua quirina ali rashcaunahua pariju tiajta, shinallara ali rashcaunamanda paihua quirina pactajta tucuca? 23 Shinallara Quillcai quillcashca pactarica, casna nisha: “Abraham Diosta quirica, shinamanda pai ali dirichu tucuca,” shinallara Diospa amigu nishca aca. 24 Shinajpi ricunguichi imasna shu runa ali rashcaunahua ali dirichu tucun, mana quirinamandalla. 25 Shinallara, ¿manzhu Rahab nishca tacarisiqui huarmi pai ali rashcaunamanda ali dirichu tucuca, ricuj runaunara apisha shu ñambira cachasha? 26 Imasna runa aicha alma-illaj huañushcami, shinallara quirinas ali ranauna illaj huañushcami.
1 Ñuca uquiuna, cangunamanda ama ashca yachachijcuna tucunguichichu. Yachanguichi imasna ñucanchi yachachijcuna mas cauźayachishca tucushun. 2 Tucui ñucanchi caran cuti pandanchi. Maicans shimihua mana pandajpi, pactajta runa anga, shinallara tucui paihua aichara mandanara ushan, 3 Caballo shimii ñucanchi irura amulichinchi pai ñucanchira caźungaj, shina rasha paihua intiru aichara mandanchi. 4 Atun barcuunara iyarichi. Atun ashallara, shinzhi huairahua apai tucushas, shu ichilla cahuinallahua muyuchishcami, pushaj duiñu maima rinara munajpis. 5 Shinallara, runa callu ichilla calluhuami, randi atun sami rimanara riman, Iyarichi imasna ansalla nina ashca atun sachara sindichin. 6 Runa callu shu nina cuintami, ashca manali rimaisiqui. Callu ñucanchi aichai tiausha, intiru aichara irushua tinichin. Nina cuinta, callu tucui causaira sindichin, paillara ucupachamanda sindirishcami. 7 Tucui tunu aichara, pishcuras, machacuiras, lamarbi tiaj aichahuaras huivaihuajmi, shinallara runauna paigunara huivashcami. 8 Randi, mana pihuas callura mansuyachinara ushanzhu, Callu manali asha, mana arcaihuajchu, huañuchina ambihua cuinta undashcami. 9 Ñucanchi calluhua Dios Yayara alabanchi, shinallara calluhua Diospa tunui rashca runaunara manalira rimanchi. 10 Chi shimi caramandallara ali shimiuna manali shimiunas llucshinaun. Ñuca uquiuna, casna mana valinzhu. 11 ¿Yacu bujyu shu uctumandalla mishqui yacus ayaj yacus pahuamunzhu? 12 Ñuca uquiuna, ¿higu muyu yurai aceituna nishca muyura aparinara ushanzhu? Shinallara, ¿uvillas yurai higu muyura aparinara ushanzhu? ¡Mana! Shinallara shu yacu bujyumanda, ayaj yacus mishqui yacus mana ushanaunzhu llucshinara. 13 ¿Cangunamanda pita ali iyaiyuj, pita intindij anga? Pai ali causashcamanda paihua ali ranaunara ricuchichu, ali mansu shunguhua. 14 Canguna shungüi piñana iyaira chijnina iyairas charisha, ama “Atun mani,” nisha iyaichichu, shinallara ama llullaichichu sirtu shimimanda. 15 Chi sami yachana mana ahuamandachu irgumushca, astaun cai pachamandami, aichamandami, supaimandami. 16 Maibis piñana iyais chijnina iyais tiajpi, chihui turbarina tiaun, shinallara caran tunu manali ranauna. 17 Randi ahuamanda yachana ñaupa punda chuyaj, chi huasha cushi shungu, shinallara llaquisiqui, ali perdonaisiqui, ali rashcaunahua undachin, mana ishqui iyaihua rana, mana ishqui shimiyuj. 18 Ganas causanara mascajcuna ganashua tarpunaun, ali dirichu causana aparishcara pallangaj.
1 ¿Cangunapura maimandara shamunaun guirauna, macananauna? ¿Manzhu shamunaun canguna irus munashcaunamanda, canguna aicha ucui macananaupi? 2 Yapajta munanguichi, shina ajllaira mana charinguichichu. Huañuchinguichi, chijnishcahua sindinguichi, shina ajllaira mana pactanguichichu canguna munashcaunara. Macanaunguichi, guirara raunguichi, shina ajllaira canguna munashcaunara mana charinguichichu, mana mañashcaraigumanda. 3 Mañanguichi, shina ajllaira mana apinguichichu manali mañashcamanda, canguna irus munashcaunai yanga gastangaj. 4 ¡Shujhua tacarij almauna! ¿Manzhu yachanguichi? Mundura llaquina Diosta chijninami. Maicans mundura llaquij tucusha nisha, Diosta chijnij tucun. 5 ¿Iyanguichi yangamandami riman Diospa Shimi: “Dios ñucanchi ucui causangaj cushca Ispíritu ñucanchira ashcara munan,” nisha? 6 Paiga mas gracia ali llaquina iyaira cun. Chiraigumanda Diospa Shimii nin: Dios mas tucuisiquiunara arcan, astaun mansu shunguyujcunara gracia ali llaquina iyaira cun.” 7 Shinajpi Diosta uyaichi. Supai apu ñaupajpi shinzhira shayarichi, shina rajpi cangunamanda miticungami. 8 Diospajma mayanllayamuichi, shina rajpi pai cangunama mayanllayamungami. Uchayujcuna, maquira maillaichi; canguna, ishqui iyaiyujcuna, shungura sumajyachichi. 9 Turmindarichi, llaquirichi, huacaichi. Canguna asina huacana tucuchu, shinallara canguna cushi llaqui tucuchu. 10 Canguna ichillayaichi Diospa ñaupajpi. Shina rajpi pai cangunara ahuayachingami. 11 Uquiuna, cangunapura ama piñanuichichu. Maicans uquira piñajpi, taripajpis, ley shimiras piñan, taripan. Ley shimira taripashaga, mana ley shimira rajchu angui, astaumbas taripaj tucungui. 12 Shujllami ley shimira cuj. Paillami quishpichij, shinallara chingachij. ¿Canga pitangui shujta taripangaj? 13 Uyaichi, casna rimajcuna: “Cuna punzha asha, caya punzha asha, chi llactama rishun, chihui shu huata tucushun, catushas, randishas, cullquira ganashun,” nisha. 14 Randi caya tucunara mana yachanguichi. ¿Canguna causana ima cuintara angairi? Sirtu pacha canguna causana shu puyu cuintami, shu ratulla ricurisha chihuasha chingarin. 15 Cai randimanda, casna rimana anguichi: “Dios munajpi causashun, caita rashun, chita rashun.” 16 Cunaga canguna mas tucuisiqui iyaibi ahuayanguichi. Tucui cai sami ahuayana manalichu. 17 Alira rana yachaj mana alira rajpi uchami.
1 Cuna uyaichi, charijcuna. Huacaichi, caparichi, huasha shamuna llaquiunamanda. 2 Canguna charishcauna ismushcaunami, canguna churarinaunara taula curu micushcami. 3 Canguna curis cullquis huacarishcami. Cai huacarishca cangunara cauźayachinga, shinallara nina cuinta canguna aichara micungami. Puchucai punzhaunajta canguna valijcunara tandachicanguichi. 4 Canguna allpaunamanda pallajcunara mana pagashca cullqui huacasha cayaun, umachisha canguna mana paigunara pagashca cullqui. Shinallara pallajcuna huacashcauna mandaj Diospa rinrima pactashcami, 5 Canguna cai pachai munanaita causashcanguichi, aicha munaira rasha. Canguna shungura racuyachishcanguichi, aichara huañuchina punzhaisna. 6 Ali dirichu runara cauźayachisha huañuchishcanguichi. Pai cangunara mana arcachin. 7 Chiraigumanda uquiuna, alilla chapanguichi Señor shamunagama. Ricuichi imasna tarpuj runa chapaun allpamanda llucshij valij muyuunara, ñaupa punda shamuj tamiaras puchucai tamiaras alimanda chapaun. 8 Canguna shinallara alimanda chapaichi. Canguna shungura shinzhiyachichi. Señor shamuna punzha mayallayaunmi. 9 Uquiuna, parijumanda ama piñanaunguichi, canguna ama cauźayachi tucungaj. Taripaj pungüimi shayaun. 10 Ñuca uquiuna, Señorba shutii rimajcunara iyaringuichi, turmindarinas chapanas ricuchina cuintami. 11 Turmindarijcuna cushimi anaun, ninchi. Uyashcanguichi Job alimanda chapashcara, shinallara ricushcanguichi Señor puchucaibi rashcaunara, Señor yapa llaquij shunguyuj, sintij shunguyuj ashcara. 12 Ñuca uquiuna, tucuimanda yali nini: Ama Diospa shutihua rimaichichu, ama ahua pacha, ama cai pacha, ama ima shu shutihuas. Astaun casna rimaichi, canguna.”Ari,” nisha Ari achu, shinallara “Mana,” nisha, Mana achu, canguna ama taripanai urmangaj. 13 ¿Cangunamanda shu runa turmindarinzhu? Mañachu. ¿Shujca cushiyanzhu? Alabasha cantachu. 14 ¿Cangunamanda shu runa ungushcachu? Iglesia cuirajcunara cayachu, paimanda mañangaj, asitira talingaj paihua ahuai Señorba shutii. 15 Quirishcahua mañajpi, ungushca runara quishpichishca anga. Señor paita atarichinga. Ucharashcajpi, pai ucharashcara perdonashca anga. 16 Shinajpi canguna ucharashcaunara parijumanda rimanaunguichi. Shinallara cangunapura parijumanda mañanuichi, canguna aliyashca tucungaj. Ali dirichu runa shungumanda pacha mañashca ashca ranara ushajmi, maspas imaras pactangami. 17 Elías, ñucanchisna sintij runa ashallara, shungumanda pacha mañaca, “Ama tamiachu,” nisha. Shina mañajpi, quinsa huata sucta quillara mana tamiacachu allpai. 18 Cutillara mañajpi tamiaca, shinallara allpa micuna muyura cuca. 19 Uquiuna, cangunamanda maicambas sirtu shimimanda anzhurishca ajpi, shina ajllaira shu runa paita tigrachijpi, 20 caita yachaichi: pihuas ucharajta paihua pandarishca ñambimanda cutillara tigrachisha, shu almara quishpichinga huañuimanda, shinallara ashca uchara quillpangami.
1 Ñuca, Pedro, Jesucristo cachashca runa, carui chausirishca rununama quillcauni, Ponto, Galacia, Capadocia, Bitinia llactaunai chausirishcaunama. 2 Dios Yaya cangunara ajllashcami, pai ñaupa hurasmanda yachashcaraigu. Ispiritui sumajyachishca anguichi, paita uyangaj, Jesucristo yahuarhua chausi tucungaj. Gracia ali llaquina iyais cushi causanas cangunajpi mirarinauchu. 3 Dios, ñucanchi Señor Jesucristo Yaya, bindisiashca achu. Paiga paihua llaquij shungumanda ñucanchira shu causaj chapanahua cuti pagarichihuaca, Jesucristo huañushcaunamanda causarishcaraigu, 4 Diosmanda shu mana ismuihuaj herencia nishca cuyashcara apingaj, mana huajlichishcachu, mana panga cuinta chaquirinallachu, cangunajta huacachishcami ahua pachai. 5 Canguna Diospa ushanahua huacachishca anguichi quirishcamanda, alma quishpichinama pactangaj, ña alichishcami puchucai punzhai ricurimungaj. 6 Caimanda canguna cushiyanguichi, astaun cuna ratui ansa hurascamas ministirijpi, turmindarina anguichi huaquin camanaunai. 7 Canguna quirina curimanda yali valijmi, curi ismuihuaj ajpis ninahua camanaun. Camashcai ali tucujpi, canguna quirina alabashca, sumajyachisca, ahuayachishca anga Jesucristo ricurimuna punzhai. 8 Paita mana ricushallara llaquinguichi; mana ricujllaira quirisha, ima sumaj mana rimaihuaj cushihua cushiyanguichi. 9 Casnami, canguna quirina pactarin, caimi canguna almaunara quishpichina. 10 Cai quishpinamanda Diosmanda rimajcuna tapunauca, ali mascasha mascanauca. Cangunama shamuj gracia ali llaquina iyaira rimanauca. 11 Paiguna tapunauca pi runaras, ima hurasta paigunajpi tiau Cristo Ispíritu rimauca, pai Cristo turmindaringaraushcara ñaupara rimasha, shinallara huashai shamuj sumajyachingaraushcaras. 12 Paigunama ricuchishca aca imasna mana paigunajta astaumbas ñucanchijta cai shimiunara rimanauca. Cai shimiuna cangunama ña shamunaushcami, evangelio ali shimira rimajcunamanda, ahua pachamanda cachamushca Santu Ispíritu yanapashcahua. Cai shimiunara quiquin angelguna yachanara munanaun. 13 Chiraigumanda canguna iyaira chumbillishca cuinta charichi, ali iyanahua tiaichi, pactajta chapaichi chi cangunama shamuna gracia ali llaquina iyaibi, Jesucristo ricurimuna huraspi. 14 Ali uyaisiqui churiuna cuinta chapaichi, canguna yachai illaj huras munashcaunara mana catisha. 15 Astaun imasna cangunara cayaj Dios sumajmi, shinallara cangunas sumaj tucuichi canguna tucui causana tunui. 16 Quillcashca tian: “Sumaj aichi, ñuca sumaj ashcaraigu.” 17 Imasna Dios caran duiñura taripan pai quiquin rashca tunumanda, pi runaras mana quishpichisha, shinajpi canguna paita “Yaya,” nisha cayasha, manzhasha causaichi canguna tucui cai pachai purina punzhaunai. 18 Caita yachaichi, canguna yayaunamanda apishca yanga sami causana tunumanda randishca acanguichi, mana ismuihuaj paganahua, curihua cuinta, cullquihua cuinta, 19 astaumbas, Cristo valij yahuarhua randishca acanguichi, pai ima iruspas illaj, ima huajlis illaj burigu cuinta. 20 Manara mundu callarishcaira paimi cushca aca, astaun puchucai punzhaunai ricurimuca, Dios cangunara llaquishcaraigu. 21 Cai Cristomanda canguna Diospi quiringuichi. Dios paita causachica huañushcaunamanda, paita sumajyachica, canguna quirina canguna chapanas Diospi tiangaj. 22 Canguna almaunara sumajyachishca ajpi sirtu shimira uyashcaraigu, Ispiritumanda, uquipurasna sirtu llaquisha, parijumanda ashcara llaquinuichi sumaj shunguhua. 23 Canguna cutillara pagarishca anguichi, mana ismuihuaj causanahua, astaumbas ali causanahua, Dios rimashca shimimanda. Paihua shimi causan, duranmi huiñai huiñaigama. 24 Imasna quillcashca tian: “Tucui aicha quihua cuintami. Tucui runa sumajca quihua sisa cuintami. Quihua chaquirin, paihua sisa urman; 25 Astaumbas Diospa shimi huiñai huiñaigama duran.” Chi shimi evangeliomanda cangunama rimashcami.
1 Chiraigumanda tucui manali shunguras, tucui umachinaras, tucui ishqui shimiyuj rimashcaras, chijninaras, manali shimiras saquisha, 2 mushuj pagarishca huahuauna cuinta alma chuchura munaichi, mana imahuas masarishca, canguna caimanda iñangaj quishpinagama. 3 Canguna gustashcanguichi chari imasna Señor ali shungu ashcara. 4 Paihuajma mayanllayamusha, shu causaj rumima cuinta, paita sirtu pacha runauna ichushca aca, astaun Diospajta ajllashcami, ashca valijmi. 5 Cangunas shinallara, causaj rumiunasna, shu ispiritui iyashca huasira cuinta shayachishca aichi, shinallara shu sumaj sacerdote muntun tucungaj, ispiritui iyashca sacrificiounara rangaj, Dios munashcasna, Jesucristoi. 6 Chiraigumanda Diospa Quillcai quillcashca tian: “Caiga, Sión llactai shu istandi siqui rumira churauni, ajllashcami, valijmi; maicans paihuajpi quirisha mana pingaringachu.” 7 Cangunajmi cai valij tupu, canguna quirijcuna ajpi. Astaumbas, mana quirijcunama: “Sicachijcuna mana munashca rumi istandi siqui rumi tucushca.” 8 Shinallara: “Shu nijtana rumi, shu arcana rumi tucushcami.” Paiguna Diospa shimii nijtasha urmanaun, mana uyajcuna asha. Chigamalla cushca anauca. 9 Astaun canguna ajllashca miraiguna anguichi, rey apu sacerdoteuna muntun, sumaj runauna, Dios randishca runauna, canguna Dios valishcaunara ricuchingaj, pai cangunara ucha llandumanda paihua sumaj punzhama cayacami. 10 Canguna ñaupa huras mana Diospa runauna acanguichi, cunaga Diospa runauna tucushcanguichimi. Ñaupa huras Diospa llaquinara mana tupacanguichi, astaumbas cuna huras tupashcanguichimi. 11 Llaquishcauna, cangunara rugauni, carumanda shamujcunasna, caruma purijcunasna, ucha aicha munaimanda anzhurichi, cai ucha aicha munai almahua macananaun. 12 Canguna causana samira sumajlla charichi gentilguna ñaupajpi. Shinashas, imaras paiguna cangunamanda piñarianaupi manali rajcunarasna, Diosta alabanauchu taripana punzhai, canguna ali rashcaunara ricusha. 13 Tucui gubirnu camachishcara uyaichi, Diosta llaquishcamanda; rey apuras uyaichi, pai tucuimanda yali mandaj ashcaraigu. 14 Shinallara apuunaras uyaichi, paiguna rey atun apumanda cachashcauna ajpi, manali rajcunara livachingaj, ali rajcunara alabangaj. 15 Caimi Dios munashca: canguna alira rasha, manali runa mana yachasha yanga rimashcara chunllayachingaj. 16 Lugar asha, canguna lugaryashcara ama charinguichichu manali ranara umachisha rangaj; astaumbas Diosta sirvijcunasna aichi. 17 Tucui runaunara ahuayachichi. Uquiunara llaquichi. Diosta manzhaichi. Rey apura ahuayachichi. 18 Sirvijcuna, manzhashcahua canguna patrungunara uyaichi; mana ali shunguyujcunallara llaquijcunallara, astaun shinallara mana ahuantaihuajcunaras. 19 Caimi ali rimaihuaj, shu runa Diospa ñaupajpi alirana iyaimanda yangamanda turmindachishca asha. 20 ¿Imai alabai tucunguichi canguna ucharashcamanda livachi tucusha ahuantanguichi? Astaumbas, canguna alira rashcamanda turmindarishcara ahuantajpi, caimi Diospa ñaupajpi “Alimi” nishca. 21 Caihuaj cayai tucucanguichi. Shinallara Cristo ñucanchimanda turmindarica, ñucanchima shu ricuchinara saquica, canguna pai aitashca chaquii catingaj. 22 Paiga ima ucharas mana rarcachu, paihua shimii ima umachinas mana tiacachu. 23 Paiga maldisiashca asha, mana cutipacachu maldisianahua, turmindachishca ashas mana piñacachu; astaumbas pailiarara ali taripajpa maquii churacami. 24 Cristo, pai quiquinllara ñucanchi ucharashcaunara paihua aichai aparica yurai, ñucanchi ucharangaj huañushca asha ali dirichu ranai causashunchi. Pai chugrishcamanda alichishca acanguichi. 25 Canguna chingarishca buriguuna cuinta acanguichi, astaumbas cuna canguna almara Cuirajma, canguna almara Ricujma tigramushcanguichi.
1 Huarmiuna, canguna cariunara uyana anguichi. Shinashas, shimira mana quirij cariunara ganashca anaunga, shimira mana uyashas, paiguna huarmiuna ali causashcara ricusha. 2 Cariuna canguna sumaj causashcara canguna manzhashcaras ricusha quirinaungami. 3 Canguna sumajyarina ama canzhallara achu, accha quindiyachishcahua, curihua, valij churarinaunahua, 4 astaumbas canguna sumajyarina ucuma achu, shungüi, ali cushi llaquij almahua, mana ismuihuaj sumajhua. Caimi ashca valin Diospa ñaupajpi. 5 Shinallara chi tunui callari huras aj Diospi chapau quirij huarmiuna sumajyachinauca, cariunara uyasha; 6 imasna Sara Abrahamda uyaca, paita, “Señor,” nisha. Paihua ushushiuna tucunguichimi, alira rasha, imaras mana manzhasha. 7 Cariuna, canguna shinallara, intindinahua canguna huarmiunahua causaichi, huarmira llaquisha pai pishi ursayuj ashcamanda, paiguna cangunahua pariju causana cushira apinauchu, canguna mañashcauna ama arcaringaj. 8 Puchucaibi, canguna tucui shu iyaillahua, shu sintinallahua, uquipurasna llaquinaucuna, llaquij shunguyujcuna, mansu shunguyujcuna. 9 Manalira ama cutipaichi mana alihua, maldisianaras maldisianahua, astaumbas bindisianahua randipaichi. Caita ricsichi, cayashca acanguichi bindisianara apingaj. 10 Chiraigumanda: “Causanara llaquisha nisha rau, ali punzhaunara ricusha nij, paihua callura manalimanda arcachu, paihua shimi cara ama umachisha rimachu; 11 manalimanda anzhurichu, alira rachu, cushi causaira mascasha catichu. 12 Señorba ñahui ali dirichuunara ricun. Paihua rinriuna paiguna mañashcaunara uyanaun. Astaun, Señorba ñahui manali rajcunara cuntra ricun.” 13 ¿Pita cangunara huajlichinga canguna ali ranara catijpi? 14 Astaun imais turmindachishca asha aliranamanda, cushiyaichi. Chiraigumanda paigunara ama manzhaichichu, ama turbarichichu. 15 Canguna shungüi Cristora quiquin Señor cuinta ahuayachichi, chicanyachichi, tucui huras puruntushca asha ali shunguhua mansu shunguhuas cutipangaj, tucui cangunara tapujcunara: “¿Imai quirishara chapaunguichiri?” nisha. 16 Ali rana iyaira charichi, imais runauna cangunamanda rimasha manali rajcunasna, paiguna pingachishca anauchu, canguna Cristoi ali causashca tunura camishcamanda. 17 Dios casna munajpi, yali valin aliranamanda turmindachi tucungaj, astaun manali ranamanda mana valinzhu. 18 Shinallarami Cristo, shu cutilla turmindachishca aca uchamanda, alira rajca manalira rajcunamanda, ñucanchira Diospajma pushangaj. Paiga sirtu pacha aichai huañuca, astaumbas ispiritui causachishca aca. 19 Cristo paihua ispiritui rimai rica ishcariaj ispirituunama. 20 Chi ispirituuna callari huras mana uyajcuna aca, imasna Dios shu cutilla chapauca Noé causaushca punzhaunai pai arca nishca atun barcura puruntushca huraspi. Chihui ansalla runa yacumanda quishpichishca anauca, paiguna pusajpura anauca. 21 Cunaga, bautisana, chi rimaushca yacu cuinta, ñucanchira quishpichin, mana ucha aicha irusta pichasha, astaun ali rana iyai rimashca Diospa ñaupajpi; cai quishpichina Jesucristo causarishcaraigumanda. 22 Paiga ahua pachama sicashca asha, Diospa ali maquima tiaun. Chihui angelguna, mandajcunas, ushajcunas paita uyanaun.
1 Imasna Cristo paihua aichai turmindachishca aca, shinallara canguna casna iyaihua puruntuichi; shu runa aichai turmindachishca asha ña ucharanara saquishcami, 2 paihua aichai causana puchuj punzhauna ama runauna ucha munaibi causachu, astaumbas Diospa munaira rasha. 3 Ña basta ñucanchi ñaupa huras gentilguna munaira rasha causana timpui, imasna puricanchi irus iyaibi, ucha aicha munaibis, machanaunais, istai yalijta micunais, manali causanais, chijnihuaj runa rashca dioscunara alabaushcais. 4 Casna rajcunahua mana intindihuajchu imarasha canguna mana paigunahua pariju catinguichi yapajta irusta rangaj, chimanda cangunara caminaun. 5 Chiguna cuintasta ranaungami taripaj Diospa ñaupajpi. Paiga puruntumi causajcunandi huañushcaunandi taripangaj. 6 Chiraigumanda shinallara evangelio ali shimi huañushcaunama rimashca aca, paiguna aichai taripai tucungaj runara taripashcasna, astaun ispiritui causanauchu Dios causashcasna. 7 Tucui ñalla tucuringaraun. Chiraigu ali causaichi, mañasha chapaichi. 8 Maspas shinzhira llaquinuichi. Llaquij shungu ashca uchara quillpangami. 9 Cangunapura carumanda shamujcunara icuchichi canguna huasiunai, mana mitsasha. 10 Caran duiñu imara Diosmanda cushcara charisha, shujcunara sirvi, ima tunuis Diosmanda gracia ali llaquina iyaira ricuchijcuna tucungaj. 11 Pi runas rimasha, Dios rimashcasna rimachu. Pi runas shujcunara sirvisha nijpi, Dios cushca ursahua sirvichu. Tucuibi Dios ahuayachishca achu Jesucristomanda. Paihuajmi sumajyachinas, tucui mandanas huiñai huiñaigama. Amen. 12 Llaquishcauna, ama manzharinguichichu cangunama shamushca shinzhi camashcara, ninahua camashcasna, shu mana iyaihua tucushca cuinta; 13 astaumbas cushiyaichi, canguna Cristora turmindachishcara apijcuna asha. Shina rasha pai sumaj ricurimushcai, canguna ashcara cushiyanguichimi. 14 Canguna cami tucusha Cristo shutira llaquishcamanda cushimi anguichi. Diospa sumaj Ispíritu canguna ahuai tian. Sirtu pacha chigunamanda Cristo camishcami, astaun cangunamanda pai ahuayachishcami. 15 Shinajpi cangunamanda ama shujpas turmindarichu huañuchijsna, shuhuajsna, manali rajsna, shujpajpi satirijsna. 16 Astaun maican runa turmindachishca asha cristiano nishca ashcamanda, ama pingarichu, astaumbas Diosta ahuayachichu caimanda. 17 Taripana huras ña callarimunmi Diospa huasii. Ñaupara ñucanchihua callarijpi, ¿imasnara angai Diospa evangeliora mana uyajcunahua? 18 Maspas, “Ali runa turmindushua quishpijpi, ¿imara tucungairi Diosta mana ricsij runahua, uchasapa runahuas?” 19 Chiraigumanda, Dios munashcaraigumanda turmindarijcuna paiguna almara paigunara raj ali quirinalla Diosma intriganauchu. Shinallara alira ranauchu.
1 Cangunahua tiaj cuiraj rucuunara rugauni, ñucas shinallara paigunahua pariju cuiraj runa asha, ñuca Cristora turmindachishcaunara ricuj asha, maspas huasha ricurimuj sumajyachishcara apina ashas: 2 cangunahua tiaj Diospa buriguunara caraichi, ali cuirasha, mana mandashca cuinta astaumbas ali munaimanda, mana yapajta cullquira ganangaj, astaumbas ali iyaimanda. 3 Ama duiñuuna cuinta canguna cuiraushca buriguunara mandaichichu, astaun buriguunara ricuchinauna cuinta. 4 Ima huras buriguunara atun Cuiraj Apu ricurimujpi, canguna mana ismuihuaj sumaj llaitura apinguichimi. 5 Shinallara, maltauna, cuiraj rucuunara uyaichi. Tucui parijumanda uyanuichi. Mansu shunguhua churarichi; “Dios mas tucuisiqui shunguunara arcan, astaun mansuunama gracia ali llaquina iyaira cun.” 6 Shinajpi mansuyarichi Diospa ushaj maqui ucui, pai cangunara ahuayachingaj pai munashca huraspi. 7 Canguna tucui turbarishcara paihua ahuai churaichi, pai cangunara cuiranmi. 8 Alilla causaichi, chapaichi; cangunara chijnij supai apu, milli liun puma cuinta muyujta purin, pitas mascasha nillpungaj. 9 Paihua ñaupajpi shinzhira shayarichi, shinzhira quirisha, caita yachasha: canguna turmindarishcasnallara canguna uquiuna intiru mundui turmindarinaushcami. 10 Tucui gracia ali llaquina iyaira cuj Dios Jesucristoi ñucanchira cayashcami paihua huiñai duraj sumaj tiashcama. Canguna unaillara turmindarishca huasha, paillarami cangunara alichinga, shinzhiyachinga, shayachinga. 11 Paima sumajyachinaras, rey apu mandanaras cushca achu huiñai huiñaigama. Amen. 12 Silvano maquii cachasha, cangunara ansahuallara quillcashcani. Paimi ali uqui ajta iyauni. Quillcacani cangunara camachingaj, cangunara cuintangaj imasna caimi Diospa sirtu gracia ali llaquina iyai; caillai shayaunguichi. 13 Babiloniai tiaj iglesia, cangunahua pariju ajllashcami, cangunara saluraun, shinallara ñuca churi Marcos. 14 Parijumanda saluranuichi llaquisha muchanahua. Tucui canguna Jesucristoi tiajcuna, cushi shungu cangunahua achu. Amen.
1 Simón Pedro, Jesucristora sirvij, apóstol nishca pai cachashca runa, quirijcunama quillcauni. Canguna ñucanchihua pariju shina tunu valij quirinara charinguichimi, Jesucristo ñucanchi Dios ñucanchira Quishpichij ali ashcamanda. 2 Gracia ali llaquina iyai cushi causanas cangunama mirarinauchu, Diostas ñucanchi Señor Jesucristoras ricsiushcai. 3 Tucui ministishcaunara Diosta llaquisha causangaj, Dios paihua ushaimanda ñucanchima cushcami, ñucanchira cayajta ricsishcamanda, pai sumaj ali valij ashcamandas. 4 Caigunamanda ashca valij atun shimi cushcaunara charinchi. Cai shimiunamanda Diospa causanara apijcuna anchi, ñucanchi cai mundui tiaj ucha munai ismunamanda miticujcuna asha. 5 Caimanda ali iyaihua canguna quirinama ali shungura yapaichi, canguna ali shunguma yachanara yapaichi. 6 Yachanama aicha munaira arcanara yapaichi, aicha munaira arcanama shu chapaisiqui shungura, chapaisiqui shunguma sumaj causanara, 7 sumaj causanama uquisna llaquinaunara yapaichi, uquisna llaquinaunama llaquinaras. 8 Canguna caigunara yalijta charisha lugarda mana charinguichichu quillangaj, mana aparishca cuinta tucungaj, ñucanchi Señor Jesucristora ricsishcai. 9 Astaumbas, caigunara mana charij ñausami, mayanllai ricuj, pai ñaupa huras ucharashcamanda pichashcara cungarishcami. 10 Chiraigumanda, uquiuna, canguna cayashcara canguna ajllashcaras mas sirtura rangaj mascaichi. Casna rasha, ima huraspas mana urmanguichichu. 11 Shina ajllaira cangunama cushca anga ñucanchira Quishpichij Jesucristo huiñaigama duraj mandana pachai lugarlla icungaj. 12 Shinajpi, cai yachachishcaunara cangunara iyachingaj mana saquishachu, canguna ña yachajllaira, canguna charishca sirtu shimira shinzhi quirijcuna ajpi. 13 Alimi yachin ñuca chara cai aichai tiausha, camachishca shimiunahua cangunara llicchachingaj: 14 caita yachasha, uctalla cai ñuca aichara saquinami ani, imasna ñucanchi Señor Jesucristo ñucara rimashcasna. 15 Shinallara, ñuca mascasha imasna rasha cangunara yanapangaj, canguna tucui huras cai yachachishcaunara iyaringaj ñuca huañushca huasha. 16 Ñucanchiga, ñucanchi Señor Jesucristo ushana tupuras pai shamushcaras cangunara yachachisha, mana runauna iyashca yanga cuintanaunara rimashcanchichu, astaun imasna paihua gustu sumaj ricurishcara ñucanchi quiquin ñahuihua ricushcasna. 17 Paiga Dios Yayamanda ahuayachishca, sumajyachishca ajpi, shu shimi ahua pacha gustu sumajmanda uyarica: “Caimi ñuca llaquishca Churi, paihuajpi cushiyauni.” 18 Ñucanchi cai ahua pachamanda rimashca shimira uyacanchi, paihua pariju tiaushcai, santu urcui. 19 Shinallara shu ali sirtu shimira charinchi, Diosmanda rimashcara. Valinmi chita uyangaj, shu vilara llandu ucui sindichishcasna punzhayangagama, tutamanda ricurimuj istrillas canguna shungüi sicamungagama. 20 Ñaupa punda caita yachaichi, Quillcashcamanda ima Diosmanda rimashcaras pi runas paihua quiquin iyaillahua yachanara mana ushanzhu. 21 Mana ima huras Diosmanda rimashca shimi runa munaimandallachu shamuca, astaun Diospa santu runauna rimanauca Santu Ispíritu yachachishcasna.
1 Imasna llulla shimira rimajcuna runauna chaupi shungüi llucshinauca, shinallara llulla yachachijcuna canguna chaupi shungüi tianaungami. Paiguna huajlichij llulla shimira pacalla rimanaungami, paigunara randij Señorda, “Mana ricsinichu,” nisha, chiraigumanda paigunallara cungaimanda tucurinaunga. 2 Ashcauna paiguna irus manali causana tunura catinaunga. Paigunamanda sirtu ñambira camishca anga. 3 Paiguna cullquira munaisiqui shunguhua cangunara catunaunga umachina shimiunahua. Paiguna cauźayachina unaimanda asha mana unaiyangachu, paigunara tucuchina sirtu shamungami. 4 Imasna Dios uchara raj angelgunara mana perdonacachu, astaumbas ucu pacha ucuma cachaca, llandu tutai cadenaunahua huatasha, paigunara huacachica taripanagama chapangaj; 5 imasna rucu mundura mana perdonacachu, astaumbas Noera huacachica, pai ali causanara camachij runa ajpi, chishu canzhiscunahua pariju, Dios yacu izhura apamuca manali munduma; 6 imasna Sodoma Gomorra llactaunara cauźayachica, paigunara tulaca, ushpa tucungagama, shina rasha Dios paigunara ricuchina cuinta cuca, tucui Diosta mana manzhajcuna ricungaj; 7 imasna Dios ali causaj Lotda quishpichica, pai yapa mulistarica manali runauna irus causashcaraigu; 8 (Cai ali runa manali runauna chaupi shungüi causasha, paiguna manali rashcaunara ricushas, uyashas, paihua ali almara tucui punzha llaquichica. ) 9 shinallarami Señor yachan paita llaquijcunara tintanamanda llushpichingaj, manaliunaras huacachingajpas taripana punzhai turmindachingaj; 10 maspas, ucha aichara catijcunara, ucha aicha munaibi purijcunara, irus iyaibi purijcunaras huacachingami turmindachingaj. Caiguna apuunara chijnijcuna, manzhai illajcuna, mas tucuisiquiuna, atun ushajcunara camingaj mana manzhanaun. 11 Quiquin angelguna, yali shinzhi asha, yali ushaj, Señorba ñaupajpi caigunara mana camisha cauźayachinaunzhu. 12 Cai manaliunaga, iyai illaj animalguna cuinta, api tucungajpas huañungajpas pagarishcaunami, paiguna mana intindishcaunara caminaun, paiguna quiquin tulariushcai huañunaungami. 13 Paiguna manali rashcaunara pagai tucunaunga, caran punzha paiguna manali rashcaunara gustashcamanda. Caiguna iruscunami, huajlishcaunami; cangunahua pariju micushallara paiguna manali ranaunai cushiyanaun. 14 Paiguna ñahuiuna tacarinahua undarishcami. Ucharanahua mana aminaun. Irqui almaunara ucharachinaun. Paiguna yapajta munaisiqui shunguhua causanaun. Maldisiashca anaun. 15 Caiguna dirichu ñambira saquisha chingarinaushcami, Beorba churi Balaamba ñambira catisha. Paiga manali rashcamanda paganara llaquica. 16 Paiga piñai tucuca pai manali rashcamanda. Upa buru runa shimihua rimaca rimaj runa lucu tunu rangaraushcara arcangaj. 17 Caiguna yacu illaj bujyuunami, shinzhi huaira apashca puyuuna. Paigunajta huacachishcami llandu tutai huiñagama tiangaj. 18 Caiguna yanga umachina shimiunara rimasha, ucha aicha munaihua, irus causanahua, ucharanai causajcunamanda sirtu miticujcunara cutillara tintasha urmachinaun. 19 Paiguna, “Cangunara llushpichishun,” nisha, shimira cunaun, paiguna chara irusta sirvijcuna asha. Maicans imais vinsi tucusha, paita vinsijta sirvij tucun. 20 Sirtu pacha, chiguna mundui irus ranamanda llushpirishca asha, Señor Jesucristo Quishpichijta yachashcamanda, astaun cutillara chi uchaunai urmasha, paiguna puchucai causana tunu ñaupa ajmanda yali mana valij tucunga. 21 Astaun ali anmaca ali dirichu causana ñambira ñaupara mana yachangaj, randi yachashca huasha paigunama cushca ali mandashca shimimanda huashama vultiaringaj. 22 Paigunajma sirtu shimi rimashcasna pactarishcami: “Allcu paihua quiquin quijnama tigran” shinallara, “Cuchi armachishca huasha cutillara turui cahuirin.”
1 Llaquishcauna, cutillara cangunara quillcauni. Ishquindi quillcaunai canguna chuyaj iyaira llicchachisha nini, camachishcahua. 2 Canguna ñaupa hurasmanda Diosmanda santu rimajcuna rimashcaunara iyaringaj quillcauni, shinallara ñucanchi Señor Quishpichij mandashcaunara, imasna cangunama cachashca runauna rimanauca. 3 Caita ñaupa punda yachaichi, puchucai punzhaunai burlajcuna shamunaunga, paiguna quiquin aicha munaibi purijcuna. 4 Burlasha ninaunga: “¿Maibirai pai ‘Cuti shamushami,’ nishca shimi?” Yayauna huañushca punzhamanda pacha tucui shinallara catin, mundu callarishca hurasmanda pacha. 5 Caiguna paiguna munaimanda cungarinaun imasna callari hurasmanda Dios pai rimashca shimimanda ahua pacharas cai pacharas rarca. Cai pacha yacumanda llucshin, yacumanda causan. 6 Chi huraspi tiaj mundu yacu quillpashca chingarica. 7 Astaun, cuna huras tiaj ahua pachas cai pachas, chi quiquin shimimanda huacachishca anaun, taripana punzhai ninahua rupachingaj, mana quirij runaunara tucuchina huraspi. 8 Caitaga, uquiuna, ama cungarichichu: Señorba ñaupajpi shu punzha shu huaranga huata cuintami, shinallara shu huaranga huata shu punzha cuintallami. 9 Señorga pai shimi cushcara mana unaiyanzhu runauna iyashcasna, astaumbas ñucanchihua chapaisiqui, pihuas ama pirdirichu nisha, astaun tucui runauna uchamanda aripintirinauchu. 10 Señorba punzha shamungami shuhuaj runa tutai shamushcasna. Chi huras ahua pachauna shinzhi uyarinahua tucurinaunga, tucui tiajcuna rupasha pasanaunga, cai pachara paihuajpi tiaj rashcaunaras rupachishca anaunga. 11 Shinajpi tucui caiguna tucurina ajpi, ¡ima sami tucunara ministinguichi canguna chuyajlla Diosta catishalla causasha, 12 canguna chapasha puruntusha Diospa punzha shamunagama, chi punzhai ahua pachauna sindisha tucurinaungami, allpas rupasha nuyuringami! 13 Ñucanchiga, Diospa shimi cushcasna, mushuj ahua pachaunaras mushuj cai pacharas chapaunchi, maibi ali dirichu causana tuparingami. 14 Chiraigumanda llaquishcauna, canguna tucui caigunara chapausha, ali pacha mascaichi canguna ima iruspas ima cauźas illaj cushi shunguhua tucungaj Cristo cangunara tupaushcai. 15 Intindinguichi ñucanchi Señor chapashca quishpinami, imasna ñucanchi llaquishca uqui Pablo cangunama quillcaca, paita cushca yachanahua. 16 Paiga tucui pai quillcashcaunai caigunamanda riman. Chigunai huaquin ñaca ñaca mana intindihuaj shimiuna tianaun. Chi shimiunara huaquin mana yachajcuna huaquin irqui shunguuna istuyachinaun, chishu Quillcashcaunandi, paiguna quiquin almara pirdingaj. 17 Shinajpi, canguna, llaquishcauna, caita ñaupara yachasha, cuiraichi ama apai tucungaj manaliuna pandashcaunai, canguna shinzhi shayarishcamanda ama urmangaj. 18 Astaumbas, ñucanchira Quishpichij Señor Jesucristo gracia ali llaquina iyaibi paita ricsinais iñaichi. Paiga sumajyachishca achu, cunallara huiñai huiñai punzhagamas. Amen.
1 Callari hurasmanda ajta, ñucanchi uyashcara, ñucanchi ñahuihua ricushcara, ñucanchi riparashcara, ñucanchi maquihua llangashcaras Causana Shimimanda, cangunara cuintanchi. 2 Cai causai ricuchishca aca, ñucanchis ricushcanchi, ricsichinchi. Shinallara cangunara cuintanchi cai huiñai causaira. Cai causai Dioshua tiaca, ñucanchimas ricurica. 3 Ñucanchi ricushcara uyashcaras cangunama cuintanchi, canguna shinallara ñucanchihua parijumanda llaquinausha tiangaj. Ñucanchi parijumanda llaquinaushca sirtu pacha Dioshua pariju paihua Churi Jesucristohua pariju tucun. 4 Cai tucuira cangunama quillcanchi canguna cushi pactaringaj. 5 Caimi Diosmanda uyashca shimi. Caitas cangunara cuintanchi. Dios punzhami. Paihuajpi ima llandus illan. 6 Ñucanchi Dioshua parijumanda shu iyaillahua llaquinaunchimi nishas, astaun ucha llandullaira puriusha, llullanchimi. Mana sirtura raunchi. 7 Randi, ñucanchi punzhai purisha, imasna Dios punzhai tiashcasna, ñucanchipura llaquinaunchi. Shinallara Diospa Churi Jesúspa yahuar ñucanchira tucui uchamanda pichan. 8 Ñucanchi, “Ucha illaj anchi,” nisha, ñucanchillarara umachinchi. Sirtu shimi mana tianzhu ñucanchijpi. 9 Ñucanchi ucharashcaunara Diosta cuintajpi, pai cushca shimira pactachin ñucanchi ucharashcaunara perdonangaj, maspas ñucanchira tucui manalimanda pichangaj. 10 Ñucanchi, “Mana ucharashcanchichu,” nisha, Diosta llullai churanchi; pai rimashca shimira mana charinchichu ñucanchi shungüi.
1 Ñuca churihuauna, cai tucuira cangunama quillcauni, canguna uchara ama rangaj. Maicans ucharashca ajpi, Diospa ñaupajpi shu Yanapajta charinchi, ali dirichu shunguyuj Jesucristo. 2 Jesucristo ñucanchi ucharanamanda paganami, mana ñucanchijmandallachu, astaun tucui mundu ucharanamandas. 3 Caimanda yachanchi ñucanchi paita ricsishcanchi, pai mandashcaunara pactachisha. 4 Maicans rimasha: “Paita ricsinimi,” nisha, shina nishas pai mandashcaunara mana pactachisha, pai llullaj tucun; paihuajpi sirtu shimi illan. 5 Randi, maicans paihua shimira pactachisha, paihuajpi Diospa llaquina sirtu pacha pactarishcami. Caimanda yachanchi ñucanchi Diospajpi tiaushcara. 6 Maicans: “Paihuajpimi tiauni,” nisha, pai quiquin causashcasna causanami anga. 7 Uquiuna, mana mushuj mandashca shimira cangunara quillcauni, astaun rucu mandashcara, callari hurasmanda ajta. Cai rucu mandashca canguna callarimanda uyashca shimimi. 8 Shina ajllaira mushuj mandashcara cangunara quillcauni. Caiga sirtumi Diospajpis cangunajpis. Tuta pasasha rin, sirtu punzha ña punzhayachin. 9 Maicans: “Ñucaga punzhai causauni,” nisha, shina rimashas paihua uquira chijnisha, casna runa chara llandu tutallaira causaunmi. 10 Maicans paihua uquira llaquisha punzhai causaun. Paihuajpi ima nijtanas illan. 11 Randi maicans paihua uquira chijnisha, llandui tiaun, llandui purin, maima riushcaras mana yachanzhu. Ucha llandu paihua ñahuira ñausayachishcami. 12 Cangunara quillcauni, churihuauna, canguna ucharashcaunara Jesúspa shutii perdonashcaraigu. 13 Cangunara quillcauni, yayauna, callarimanda aj Diosta ricsinguichi. Cangunara quillcauni, maltauna, canguna manali supaira vinsishcanguichi. Cangunara quillcauni, churihuauna, Yayara ricsishcanguichimi. 14 Cangunara quillcashcani, yayauna, callarimanda aj Diosta ricsishcanguichi. Cangunara quillcashcani, maltauna, canguna shinzhi ashcamanda, Diospa shimi canguna shungüi tiaun, manali supaira vinsishcanguichimi. 15 Cai pachara ama llaquinguichi, shinallara cai pachai tiajcunara ama llaquinguichi. Maicans cai pachara llaquisha, Yayara mana llaquinzhu. 16 Tucui cai pachai tiaj, runa aicha munashca, runa ñahuihua munashca, cai pachai mas tucuna iyai, cai tucui mana Yaya Diosmandachu, astaun cai pachamandami. 17 Cai pacha pasanmi, shinallara pai munashcauna, astaun maicans Dios munashcara rasha, huiñaigama causangami. 18 Churihuauna, cuna puchucai timpuunami. Canguna uyashcanguichi imasna anticristo nishca Cristora chijnij shamunga. Shinallara cunallara ashca anticristo nishcauna tianaunmi. Caimanda ricsinchi ñucanchi puchucai timpuunai causaunchi. 19 Ñucanchijmanda llucshinaushca. Randi mana ñucanchipuramandachu anauca. Paiguna ñucanchipuramanda ashca asha, ñucanchihua pariju saquirinaunmaca. Astaumbas llucshinaucami mana tucu¿ñucanchipuramanda ashcara ricuchingaj. 20 Astaun canguna Santu Ispiritumanda talishcara charinguichi; tucuira yachanguichi. 21 Cangunara mana quillcashcanichu canguna sirtu shimira mana yachashcaraigu, astaun yachashcaraigumanda, shinallara mana ima llulla shimi llucshinzhu sirtu shimimanda. 22 ¿Pita llullajri? “Jesús mana Cristochu,” nij, paimi llullaj. Maican runa: “Yaya Dios mana sirtu Dioschu, Churis mana Cristochu,” nij, cai runa anticristo nishca Cristora chijnij anga. 23 Maican runas: “Churira mana ricsinichu,” nisha, cai runa Yayara mana charinzhu. Randi maican runas: “Diospa Churi Cristomi,” nisha, pai shinallara Yayara charinmi. 24 Canguna callarimanda uyashca shimiuna cangunahua saquirichu. Callarimanda uyashca shimiuna cangunahua saquirijpiga, Churijpis Yayajpis saquiringuichimi. 25 Dios ñucanchima cushca shimi casnami, huiñai causaira charinchimi. 26 Caita cangunara quillcashcani, umachijcunamanda cuintasha. 27 Randi, Santu Ispíritu talishca, Jesucristomanda apishca, cangunajpi tiaun, pihuas cangunara yachachingaj mana ministinguichichu, astaumbas pai talishcamanda tucuira yachanguichi. Cai yachachishca sirtumi, mana llullachu. Pai yachachishcasna canguna paihuajpi tiaichi. 28 Cuna churihuauna, paihuajpi tiaichi, pai ricurimushca huras ñucanchi cushi shunguyuj tucungaj, ama pingaringaj paihua ñaupajpi pai shamushcai. 29 Canguna Dios ali dirichu ajta ricsisha, shinallara caita ricsichi: tucui ali dirichura raj runa Diosmanda pagarishcami.
1 Ricuichi imasna Dios ñucanchira llaquishcara, ñucanchi Diospa churiuna nishca angaj. Caimanda cai pacha runauna ñucanchira mana ricsinaun, imasna paiguna Diostas mana ricsisha. 2 Llaquishcauna, cunallara Diospa churiunami anchi. Ñucanchi huasha huras tucuna sami chara mana ricurinzhu. Astaun caita yachanchi, ima huras Cristo ricurimujpi, ñucanchi pai tunu ricurij tucushun; paita ricushun imasna pai ashcasna. 3 Maican runa cai chapanara charisha paihuajpi, paillara sumajyanmi, imasna Cristo sumaj ashcasna. 4 Maicans uchara rasha, Dios mandashca shimira paquin. Ley mandashca shimira paquina uchami. 5 Yachanguichi Cristo ricurimuca ñucanchi ucharashcaunara quichungaj. Paihuajpi ima uchas illanmi. 6 Maicans Jesúspi tiausha, uchara mana raunzhu. Maicans uchara rausha Jesústa mana ricushcachu, mana ricsishcachu. 7 Churihuauna, pihuas cangunara ama umachichu. Ali dirichura raj runa ali dirichumi, Cristo ali dirichu ashcasna. 8 Uchara rasha causaj runa supai apumandami. Callari timpumanda pacha, supai apu uchara ran. Chiraigumanda Diospa Churi ricurimuca supai apu rashcaunara tucuchingaj. 9 Maican runa Diosmanda pagarishca asha, mana uchara rasha causaunzhu, Diospa causai paihuajpi tiashcamanda. Uchara rasha causanara mana ushanzhu, Diosmanda pagarishca asha. 10 Caimanda Diospa churiuna supai apu churiunas ricsi tucunaun. Maican runa mana alira rasha, paihua uquira mana llaquisha, cai runa mana Diosmandachu. 11 Caimi canguna callarimanda uyashca shimi: Ñucanchipura parijumanda llaquinaunami anchi. 12 Mana Caín rashcasna, pai manali supaimanda asha, paihua uquira huañuchica. ¿Imamanda uquira huañuchica? Caimandami: Caín rashcauna manali anauca, astaumbas paihua uqui rashcauna ali dirichu anauca. 13 Ñuca uquiuna, ama manzharichichu cai pacha runauna cangunara chijninaupi. 14 Yachanchimi ñucanchi huañuimanda causanama ña pasashcanchi, ñucanchi uquiunara llaquishcamanda. Maicans paihua uquira mana llaquisha huañuibi causaun. 15 Maicans paihua uquira chijnisha, runara huañuchijmi. Yachanguichi pis runara huañuchij huiñai causaira mana charinzhu paihuajpi. 16 Caimanda llaquinara ricsishcanchi: Cristo paihua causaira cuca ñucanchirandimanda. Shinallara ñucanchi causaira uquiunamanda cunami anchi. 17 Shinajpi maican runa cai pachai charij asha, paihua uqui ministijta ricushallara, paihua shungura ishcajpi, ¿Diospa llaquinaga imasnara tiaun paihua shungüi? 18 Ñuca churihuauna, ama shimillahua ama callullahua llaquishunchi, astaun rashcaunahua sirtu pacha llaquishunchi. 19 Caimanda ñucanchi sirtu shimira quirijcuna ashcara yachanchi; caita yachajpi, ñucanchi shunguuna paihua ñaupajpi samanaunga. 20 Ñucanchi shungu ñucanchira cauźayachijpi, Dios ñucanchi shungumanda yalimi. Paimi tucuira yachan, 21 Llaquishcauna, ñucanchi shungu ñucanchira mana cauźayachijpi, Diosta mana manzhasha samaunchi. 22 Shinajpi, imaras Diosta mañasha paimanda charishun, pai mandashca shimiunara pactachishcamanda. Shinallara pai munashcaunara raunchi. 23 Caimi Dios mandashca shimi, ñucanchi Diospa Churi Jesucristoi quiringaj, ñucanchi parijumanda llaquinaungaj, pai mandashcasna. 24 Maicans Dios mandashcara pactachisha, Diospajpi tiaun, Dios paihuajpi. Caimanda yachanchi Dios ñucanchijpi tiaushcara, pai ñucanchira cushca Ispiritumanda.
1 Llaquishcauna, ama tucui ispiritura quiringuichi. Astaun paigunara camaichi, paiguna Diosmanda ashcara mana ashcaras. Ashca llulla rimaicuna llucshinaushcami cai pachai. 2 Caimanda Diospa Ispiritura ricsichi. Tucui ispíritu casna rimasha: “Jesucristo runa aichahua shamushcami,” nijpi, cai ispíritu Diosmandami. 3 Randi tucui ispíritu, “Jesucristo runa aichahua mana shamushcachu,” nijpi, cai ispíritu mana Diosmandachu. Caimi ‘anticristo’ nishca ispíritu. Pai shamungaraushcara uyashcanguichimi. Cunallara cai pachai tiaun. 4 Churihuauna, canguna Diosmandami anguichi; cai supaigunara vinsishcanguichi. Cangunara cumpañaj Dios cai pachai tiaj supaira yalinmi. 5 Paiguna cai pachamandami anaun. Chiraigumanda cai pachamandaunara rimanaun. Cai pachai aj runauna paigunara uyanaun. 6 Ñucanchiga Diosmandami anchi; Diosta ricsij runa ñucanchira uyan. Maicans Diosta mana ricsisha ñucanchira mana uyan. Caimanda sirtura rimaj ispiritura ricsinchi, shinallara llullaj ispirituras. 7 Llaquishcauna, parijumanda llaquinaushunchi. Llaquinaga Diosmandami. Tucui llaquij runa Diosmanda pagarishcami, Diosta ricsinmi. 8 Mana llaquij runa Diosta mana ricsishcachu. Dios llaquijmi. 9 Casnami Dios ñucanchira llaquishca ricurimuca, Dios paihua sapalla Churira cai pachama cachamuca, ñucanchi paimanda causangaj. 10 Dios llaquishca caimi, mana ñucanchi Diosta llaquishcamanda, astaun Dios ñucanchira llaquica, paihua Churira cachamuca ñucanchi ucharashcamanda pagana tucungaj. 11 Llaquishcauna, Dios ñucanchira casna llaquishca ajpiga, shinallara ñucanchis parijumanda llaquinaunami anchi. 12 Ima huraspas pihuas Diosta mana ricushcachu. Ñucanchi parijumanda llaquinaupi, Dios ñucanchijpi tiaun, paihua llaquina ñucanchi shungüi pactarishcami. 13 Caimanda ñucanchi Diospajpi, pais ñucanchijpi tiauta ricsinchi, Dios paihua Ispiritura ñucanchima cushcamanda. 14 Ñucanchi ricushcanchi, shinallara ricsichishcanchi Dios paihua Churira cachamushcara, cai pachara Quishpichijta. 15 Maicans: “Jesús Diospa Churimi,” nisha, shungumanda rimasha, Dios cai runajpi tiaun, cai runas Diospajpi. 16 Dios ñucanchira llaquishcara yachashcanchi, quirishcanchi. Dios llaquijmi. Maicans llaquij shunguyuj causajpi, Dios paihuajpi tiaun, paihuas Diospajpi. 17 Casna rasha ali llaquina ñucanchi shungüi pactarishcami, taripana punzhai ñucanchi ama manzharingaj. Pai imasna ashcasna, shinallarami anchi cai pachai. 18 Llaquij shungüi manzhai illan. Ali llaquij shungumanda ima manzhairas ichushcami. Manzhaiga livachinara paihuajpi charin. Shinasha maican runas manzhaira charisha, ali tupu llaquina mana pactarishcachu paihuajpi. 19 Ñucanchi Diosta llaquinchi, pai ñucanchira ñaupara llaquishcamanda. 20 Maicans: “Diosta llaquinimi,” nisha, shina rimashas paihua uquira chijnisha, cai runa llullajmi. Maican runa pai ricushca uquira mana llaquisha, ¿imasnara pai mana ricushca Diosta llaquingairi? 21 Cai mandashca shimira Diosmanda charinchi: maicans Diosta llaquisha, paihua uquira shinallara llaquichu.
1 Maicans Jesucristo ajta quirisha Diosmanda pagarishcami. Maicans causaira cuj Diosta llaquisha, shinallara Diosmanda pagarijta llaquin. 2 Caimanda ñucanchi Diospa churiunara llaquishcara ricsinchi, ima huras Diosta llaquinchi, shinallara pai mandashca shimiunara pactachinchi. 3 Diosta llaquina casnami, ñucanchi pai mandashcaunara pactachingaj. Dios mandashcaunaga mana turminduscunachu. 4 Tucui Diosmanda pagarishca runa cai pachara vinsin. Mundura vinsinaga ñucanchi quirinami. 5 ¿Pita mundura vinsijri? Jesús Diospa Churi ajta quirij, paimi cai pachara vinsij. 6 Cai Jesucristo yacumandas yahuarmandas shamuca, mana yacumandallachu, astaun yacumandas, yahuarmandas. Diospa Ispíritu caita rimajmi. Cai Ispíritu sirtumi. 7 Ahua pachai quinsa rimaj tian: Yaya Dios, Causana Shimi, Ispíritu. Cai quinsa shujllami. 8 Cai pachai quinsa rimaj tian: Diospa Ispíritu, yacus, yahuars. Cai quinsa chi tunullarami rimanaun. 9 Ñucanchi runauna rimashcara chasquijpi, Dios rimashca astaun yalimi. Cai shimira Dios rimashca paihua Churimanda. 10 Maican runas Diospa Churii quirisha, Dios rimashca shimira paihuajpi charin. Randi, maican runas Diosta mana quirisha, Diosta llullai churashcami, Dios paihua Churimanda rimashcara mana quirishcamanda. 11 Caimi Dios rimashca: “Dios ñucanchira huiñai causaira cushcami, cai causaiga paihua Churii tianmi.” 12 Maicans Diospa Churira charisha, shinallara causaira charin. Maicans Diospa Churira mana charisha, causaira mana charinzhu. 13 Caigunara cangunama, Diospa Churii quirijcunama, quillcashcani, canguna huiñai causaira charishcara yachangaj, canguna Diospa Churi shutii quiringaj. 14 Caimi ñucanchi Diospi quirishca, ñucanchi imaras mañajpi pai munashcasna, pai ñucanchira uyan. 15 Ñucanchi pai uyashcara yachashaga imaras mañashcai, shinallara yachanchi ñucanchi paita mañashcaunara apishcaras. 16 Maican runas paihua uquira shu mana huañuna tupu uchara rauta ricusha, Diosta mañachu; Dios paita causaira cungami, mana huañuna tupu uchara rajcunama. Huañuna tupu ucha tianmi. Cai sami uchara rajmanda canguna mañangaj mana ninichu. 17 Tucui ima manali ranas uchami. Mana huañuna tupu uchas tianmi. 18 Yachanchi maican runa Diosmanda pagarishca asha mana uchara rasha causaun; astaumbas Diosmanda pagarishca Churi paita huacachin, manali supai paita mana apinzhu. 19 Shinallara yachanchi Diosmandami anchi. Intiru munduga manali supai maquii tian. 20 Astaumbas yachanchi Diospa Churi ña shamushcami. Pai ñucanchira intindinara cushcami sirtu Diosta ricsingaj. Sirtu Diospajpis tiaunchi, paihua Churi Jesucristois. Caiga sirtu Diosmi, shinallara huiñai causaimi. 21 Churihuauna, runa rashca dioscunamanda huacachirichi. Amen.
1 Ñuca, cuiraj runa, ajllashca señorama quillcauni, camba churiunamas. Cangunara sirtu pacha llaquini, mana ñucalla astaun tucui sirtu shimira yachajcunandi, 2 ñucanchijpi tiau sirtu shimiraigumanda, maspas cai shimi ñucanchihua huiñaigama tiangami. 3 Cangunahua gracia ali llaquina iyais, ali perdonana iyais, cushi shungus tianauchu, sirtu shimiis, llaquinais, Dios yayamanda, Señor Jesucristomandas; paiga Yayamanda Churimi. 4 Ashcara cushiyacani huaquin camba churiunara sirtu shimii purijcunara tupasha, Yayamanda mandashcara pactachisha. 5 Cuna canda rugauni, señora, mana mushuj mandashcara quillcashcasna, astaun callarimanda charishcara, ñucanchi parijumanda llaquinaushunchi. 6 Caimi llaquina, Dios mandashcasna purina, Caimi pai mandashca, canguna llaquinaushcahua causangaj, canguna callarimanda uyashcasna. 7 Ashca umachijcuna mundui llucshinaushcami, Jesús aichai shamushcara mana sirtuchu niucuna. Casna rimaj umachijmi, anticristo nishca, 8 Ricuichi cangunallara, canguna tarabashcamanda aparishcara ama pirdingaj, astaun intiru paganara apingaj. 9 Maicans ali ñambira saquisha, Cristo yachachishcai mana catisha, Diosta mana charinzhu. Randi Cristo yachachishcai catij Yayaras Churiras charin. 10 Maicans cangunajma shamujpi, cai yachachishcara mana rimaj ajpi, huasii paita ama chasquichu, ama nichu: “Alirami shamushcangui.” 11 Maicans paita: “Alirami shamushcangui,” nisha pai manali ranaunai cumpañaun. 12 Ashcara charini cangunama quillcangaj, astaun mana munacanichu quillcahua tintahuas rangaj, astaun chapauni cangunajma shamungaj, ñahuipura rimanaungaj, ñucanchi pariju pactajta cushiyangaj. 13 Camba Dios ajllashca ñaña churiuna canda saluranaun. Amen.
1 Ñucaga, cuiraj runa, llaquishca Gayoma quillcauni; sirtu pacha paita llaquinimi. 2 Llaquishca amigu, ñuca munani can tucuibi ali tucuchu, ali causasha, imasna camba alma ali tucunmi. 3 Ashcara cushiyacani, uquiuna caima shamujpi, can ali sirtu shimira catij ajta rimajpi, imasna can sirtu shimii purishcaras. 4 Cushiyauni ñuca churiuna sirtu shimii purishcara uyasha. Caimanda yali cushira mana charinichu. 5 Llaquishca amigu alimi raungui ima uquiunaras yanapasha, maspas mana ricsishca purijcunaras. 6 Caiguna iglesia ñaupajpi alimi rimanaushca imasna can ali llaquij ashcara. Alimi raungui paigunara ñambii cachangaj Diosta sirvina valishca tupui, paiguna ñambira catisha ringaj. 7 Paiguna Diosta llaquishcamanda llucshinauca, imaras mana apisha gentilgunamanda. 8 Ñucanchi casna runaunara chasquinami anchi, sirtu shimira yanapangaj. 9 Ñuca iglesiama quillcashcani, astaun Diótrefes mana chasquihuanzhu ñucanchira. Paimi ñaupa punda tucusha nin paigunahua. 10 Chiraigumanda, ñuca rishaga, pai rashcaunara iyachisha, imasna manali shimiunahua ñucanchira piñasha riman. Maspas, casna rashcaunahua mana cushi tucusha, uquiunaras mana chasquinzhu, chasquisha niucunaras arcan, paigunara iglesiamanda ichun. 11 Llaquishca amigu, manalira ama catirichu, astaun alira rai. Alira raj Diosmandami. Manalira raj Diosta mana ricushcachu. 12 Tucui runauna alirami rimanaun Demetriomanda, sirtu shimillara paimanda shinallara riman. Ñucanchis paimanda ali rimanchi. Cangunas ñucanchi rimashca shimiuna sirtu ajta yachanguichi. 13 Ashcara charicani canda quillcangaj, astaun mana munacanichu tintahua plumahuas quillcanara. 14 Astaun, uctalla canda ricunara munani, shinajpi ñahuipuralla rimanaushun. 15 Cushi shungura chari. Amiguuna canda saluranaun. Salurai amiguunara, caran shujta rimasha.
1 Ñuca, Judas, Jesucristora sirvij, Jacobo uqui, Dios cayashcaunama quillcauni, Dios Yaya sumajyachishcaunama, Jesucristoi huacachishcaunama. 2 Ali shungu, cushi shungus, llaquinas mirachishca anauchu cangunahua. 3 Llaquishcauna, ashcara munacani cangunara quillcangaj ñucanchi pariju quishpichinamanda. Shina ajllaira ministirinmi ñuca cangunara quillcangaj, cangunara rugasha ñucanchi quirishcara huacachingaj, iyaihua macanausha, imasna cai quirina shu rai quirijcunama cushca aca. 4 Huaquin runauna pacalla icunaushca, ñaupa hurasmanda cauźayuj tucungaj nishcauna, Diosta mana llaquij runauna, ñucanchi gracia ali llaquina iyaira turcanaun manali causanahua. Sapalla tucuira ushaj Diosta, ñucanchi Señor Jesucristoras mana ricsinaun. 5 Astaun canguna ña ali yachashcara cuti iyarichisha nini, imasna Señor runaunara Egiptomanda quishpichishca huasha, mana quirijcunara tucuchica. 6 Maspas huaquin angelgunara, paiguna gustu sumajta mana huacachijpi, paiguna quiquin tianara saquinauca, Dios paigunara llandui huacachica, huiñaigama duraj cadenahua huatasha, atun taripana punzhagama. 7 Shinallara tucuca Sodoma Gomorra llactaunahua, chi rayai tiaj llactaunandi, chigunas shina rajcuna anauca, shujhua tacarijcuna, mana rimaihuaj irusta rashcaunara catijcuna, castigai tucunauca, shu ricuchina cuinta tucunauca. Huiñaigama duraj ninai castigai tucunauca. 8 Shina ajllaira, chi tunullaira cai nuspajcuna paiguna aichara huajlichinaun, apuunara mana valichisha, ahua pachai tiaj ushajcunaras camisha. 9 Randi Miguel, angelcuna atun apu, supaihua macanausha Moisespa huañushca aichara charingaj, mana munacachu paita maldisiangaj, astaun paita nica: “Señor canda cauźayachichu.” 10 Caiguna ima mana yachashcaras caminaun; paiguna yachaibi ricsishcaunai iyai illaj animalguna cuinta paigunallara huajlirinaun. 11 ¡Ayailla paigunamanda! Caímba ñambira catinaushca, cullquira apingaj Balaam manali rashcaunai callpasha rinauca, Coré manali rashcai chingarinauca. 12 Caiguna canguna istaunara huajlichinaun; yapajta micujcuna, paigunallara carajcuna; tamia illaj puyuuna cuinta, maitas apashcauna huairaunai; muyu illaj chaquishca yurauna cuinta; ishqui cuti huañushca, sapimanda aisashcauna; 13 shinzhi lamar tsajlascuna cuinta, paiguna quiquin pingarinara puscu cuinta shitajcuna; yanga purij istrillascuna cuinta, paigunajta llandu tuta huiñaigama huacachishcami. 14 Casna runaunamanda, Enoc Diosmanda rimaca. Enoc Adanmanda canzhis runami aca.”Riqui,” nica, “Señor shamuca paihua ashca huarangauna sumajcunahua, 15 tucuigunara taripangaj, tucui manaliunara cauźayachingaj, paiguna tucui manali rashcaunara manali rashca ajpi, shinallara tucui piñashca shimiunara manali uchayujcuna paimanda rimashcaunara taripangaj.” 16 Cai runauna piñajcunami, macanuisiquiunami. Paiguna quiquin munashcaunai purijcuna, paiguna shimi cara atun shinzhi shimira rimajcuna, runaunara yanga alabasha imaras ganangaj. 17 Randi, llaquishcauna, iyarichi ñucanchi Señor Jesucristo cachashca runauna rimashca shimiunara. 18 Paiguna ninauca: “Puchucai timpui burlajcuna tianaunga, paiguna manali munashcaunai purijcuna. 19 Caiguna chaupichijcunami, uchalina iyaiyujcunami, Ispiritura mana charijcunachu. 20 Randi canguna, llaquishcauna, canguna sumaj quirinai iñasha, Santu Ispíritu yanapashcahua Diosta mañasha, 21 Dios llaquiushcai tiaichi, ñucanchi Señor Jesucristo llaquishcara chapasha, huiñai causaira charingaj. 22 Huaquingunara, mana sirtu quirijcunara, shinzhira quirichichi. 23 Shujcunara quishpichichi, ninamanda dsas quichusha; shujcunaraga manzhashcahua llaquichi, paiguna churarinara chijnisha, aicha irusmanda huajlishcaraigu. 24 Dios ushajmi cangunara mana urmasha huacachingaj, shinallara cangunara ima huajlis illaj paihua sumaj ñaupajpi ashca cushihua ricuchingaj. 25 Paita, shu sapalla yachaj Diosta, ñucanchira Quishpichijta sumajyachishca achu, alabashca achu, mandaj achu, ushaj achu, cunas, huiñai huiñaigamas. Amen.
1 Caimi Jesucristo charishca ricuchina shimi, Dios paita ricuchishca, huasha uctalla tucunaunara paita sirvijcunara ricuchingaj. Caita paita sirvij Juanma ricuchica, shu paihua angelhua cachamusha. 2 Juan Diospa shimira ricuchica, shinallara Jesucristo rimashcaras, tucui pai ricuchishcaunaras. 3 Cushiunami cai ñaupamanda rimashca shimira ricuj, shimira uyajcunandi, cai quillcai quillcashcaunara pactachijcunandi. Pactarina huras mayanllami. 4 Ñuca, Juan, Asia partii tiaj canzhis iglesiaunama quillcauni: Gracia ali llaquina iyairas, cushi shunguras charichi Diosmanda; pai tianmi, tiacami, shamunami; shinallara canzhis ispiritumanda, Diospa tiarina ñaupajpi tiajcunamanda; 5 shinallara paihua sirtu rimaj Jesucristomanda, huañushcaunamanda ñaupa punda pagarij, cai pacha rey apuunara mandaj. Jesucristo ñucanchira llaquica, ñucanchira llushpichica ucharashcaunamanda paihua yahuarhua, 6 ñucanchira rey apuunara sacerdoteunaras rarca paihua Yaya Diospa ñaupajpi. Pailla ali sumaj, ali mandaj achu huiñai huiñaigama. Amen. 7 Puyui shamungami. Tucui ñahui paita ricunaungami, paita tucsijcunas ricunaungami. Tucui mundu ailluunas paimanda llaquirinaunga. Ari, amen. 8 ”Ñuca Alfa nishcami ani, Omega nishcas ani, callarinas tucurinas ani,” Señor nin. Pai tianmi, tiacami, shamunami, Tucuira Ushajmi. 9 Ñuca, Juan, canguna uqui, cangunahua pariju tiaj turmindarinais, Dios mandanais, Jesucristoi ahuantasha chapanais, Patmos islai tiaucani, Diospa shimiraigumanda, Jesucristo shimira rimashcaraigumandas. 10 Ispiritui tiaucani Diospa punzhai. Ñuca huashai shu shinzhi shimira uyacani, shu atun curmita uyarishcasna. 11 Casna rimaca: “Ñuca Alfami ani, Omegas ani, ñaupa punda aj, puchucai ajpas. Can ricushcara quillcai, quillcashcara canzhis Asia partii tiaj iglesiaunama cachai: Efeso, Esmirna, Pérgamo, Tiatira, Sardis, Filadelfïa, Laodicea llactaunai tiaj iglesiaunama.” 12 Ñuca vultiaricani ñucahua rimaj shimira ricungaj; vultiarisha, canzhis curihua rashca vila shayachinara ricucani. 13 Chi canzhis vila shayachina chaupi shungüi shu runara ricucani, Runa Churi cuinta ricurijta, shu suni churarinahua churarishcara, paihua chaquigama quillpajta, pichui chumbillishcara shu curi chumbillinahua. 14 Paihua uma, paihua accha yuraj anauca, yuraj illma cuinta, rasu cuinta ricurij; paihua ñahui muyuuna sindij nina cuinta ricurij anauca. 15 Paihua chaquiuna paila cuinta chiujlla ricurij anauca, ninai churashca pucayashca cuinta; pai rimashca shimi ashca yacu undasha uyarishca cuinta aca. 16 Paihua ali maquii canzhis istrillascunara charica. Paihua shimimanda shu ishqui iluyuj ispara llucshica. Paihua ñahui indi cuinta aca pai shinzhi aitashcai ricurijsna. 17 Ñuca paita ricusha, paihua chaquii huañushcasna urmacani. Paiga paihua ali maquira churaca ñuca ahuai, casna nisha: “Ama manzhaichu, ñuca ñaupa punda aj ani, puchucai ajpas ani. 18 Causaj ani, astaun huañushca acani, maspas causauni huiñai huiñaigama. Amen. Ñuca huañuna llaviras ucu pacha llaviras charini. 19 ”Can ricushcaunara quillcai, shinallara tiajcunaras, caigunamanda huasha tucunaunaras. 20 Can ñuca ali maquii ricushca canzhis istrillascuna, canzhis curi vila shayachinauna pacashca shimi casnami canzhis istrillascuna iglesia angelcunami, canzhis vila shayachinauna canzhis iglesiaunami.”
1 ”Efeso iglesiai tiaj angelmaquillcai: Ali maquii canzhis istrillasyuj nin, canzhis curi vila shayachinauna chaupi shungüi purij casna nin: 2 Can rashcaunara yachani, can shinzhi tarabashcaras, can ahuantaisiqui ashcaras. Ñuca yachani can manali runaunara mana ahuantashcara, shinallara, ‘Cachashca runami ani’ nijcunara camashcaras; mana sirtuchu anaun, paiguna llullajcuna ajta tupashcangui. 3 Can turmindarishcangui, ahuantasha chapashcangui, shinzhira tarabashcangui ñuca shutira llaquishcamanda, mana sambayasha. 4 ”Shina ajllaira canda caita rimanara charini: Can ñaupa punda llaquishcara saquishcangui. 5 ”Chiraigumanda can maimanda urmashcara iyari, aripintiri, ñaupa rashcaunara cuti rai. Can mana shina rajpi, uctalla cambajma shamusha, camba vila shayachinara quichusha paihua pistumanda, can mana aripintirishca ajpi. 6 Caita charingui, nicolaítas nishcauna rashcaunara chijningui, ñucas paigunara chijnini. 7 Uyaj rinriyuj Ispíritu iglesiaunama rimashcara uyachu. Ñuca vinsij runara Diospa sumaj llacta chaupi shungüi shayaj Causana Yuramanda carasha. 8 ”Esmirna iglesiai tiaj angelma quillcai: Ñaupa pundai aj, puchucai ajpas, huañushca aj causarishca ajpas casna nin: 9 Can rashcaunara yachani, can turmindarishcaunaras, can tsuntsu ashcaras, shina ajllaira can charij angui. Ñuca yachani ‘judiu ani’ nijcuna manali rimashcara; mana judiucunachu anaun, astaun shu Satanaspa tandarinami. 10 ”Ama manzhaichu can turmindaringaraushcara. Supai apu cangunamanda huaquingunara chunda cularbi ishcachingami camangaj, chunga punzha tupura cangunara turmindachinga. Can huañunagama ali catijpi, causana llaitura ñuca canda cushami. 11 Uyaj rinriyuj Ispíritu iglesiaunama rimashcara uyachu. Vinsij runaga huasha huañuimanda mana turmindaringachu. 12 ”Pérgamo iglesiai tiaj angelma quillcai: Ishqui iluyuj isparara charij caita nin: 13 Can rashcaunara yachani, can maibi causashcaras; chihuimi Satanás supai apu tiarina tian. Shina ajllaira ñuca shutira huacachiungui. Ñucara quirinara mana ichushcangui, Antipas, ali quirij ali rimaj runa, canguna chaupi shungüi huañuchishca punzhaunai, Satanás causaushca llactai. 14 ”Shina ajllaira, ansallara charini canma rimangaj: Chihui huaquingunara charingui Balaam yachachishcaunara catijcunara; pai Balacta yachachica Israelba churiunara urmachingaj runa rashca dioscunara cushca sacrificiounara micungaj, shujcunahua tacaringajpas. 15 Shinallara nicolaítauna yachachishcara catijcunara charingui. Chi yachachishcara chijnini. 16 Chiraigumanda aripintiri. Mana shina rajpi, cambajma uctalla shamusha, paigunahua macanausha ñuca shimimanda llucshij isparahua. 17 Uyaj rinriyuj Ispíritu iglesiaunama rimashcara uyachu.”Vinsij runara pacashca maná micunara ñuca carasha, paita shu yuraj rumihuara cusha, rumii shu mushuj shutira quillcashca tian, pihuas chi shutira mana yachangachu, astaun apijlla yachanga. 18 ”Tiatira iglesiai tiaj angelma quillcai: Diospa Churi, sindij nina cuinta ñahuiyuj, chiujlla ricurij paila cuinta chaquiyuj, caita nin: 19 Can rashcaunara yachani, can llaquishcara, can quirishcara, can sirvishcara; can ahuantaisiqui ashcaras yachani, imasna can puchucai rashcauna ñaupa ajcunara yalinaunmi. 20 ”Shina ajllaira ansallara charini canma rimangaj, can chi Jezabel huarmira ahuantaungui. ‘Rimaj huarmi ani,’ nin. Ñucara sirvijcunara umachisha yachachin shujcunahua tacaringaj, runa rashca dioscunama cushca sacrificiounara micungajpas yachachin. 21 Lugarda cucani aripintiringaj, astaumbas shujhua tacarinamanda aripintirinara mana munanzhu. 22 Paita caitui shitasha, paihua tacarijcunara ashcara turmindachisha, paiguna mana aripintirijpi pai rashcaunara. 23 Paihua churiunara huañuihua huañuchisha, maspas tucui iglesiauna yachanaunga imasna iyairas shunguras ñuca ricuj ani, caran duiñuma canguna rashca tupura cusha. 24 Astaun cangunama, chishu Tiatira llactai tiajcunamas, maicambas cai yachachishcara mana yachajcuna asha, Satanás irus yachairas nishcauna mana yachajcuna asha, ñuca cangunara nini: ‘Yali llashajta mana apachishachu.’ 25 Astaun canguna charishcara huacachichi ñuca shamunagama. 26 ”Maican runa vinsijpi, ñuca rashcaunara huacachijpi puchucaigama, ñuca paita ushaira cushami llactaunara mandangaj. 27 Iru varahua paigunara mandangami, allpa manga cuinta paqui paqui tucunaungami, imasna ñuca yayamanda apishcasna. 28 Paita tutamanda ricurimuj istrillasta cushami. 29 Uyaj rinriyuj Ispíritu iglesiaunama rimashcara uyachu.
1 ”Sardis iglesiai tiaj angelma quillcai: Diospa canzhis ispiritura canzhis istrillascunara charij caita nin: Can rashcaunara yachani, imasna ‘Causaunmi,’ nishca angui, astaun huañushcami angui, 2 Llicchari, huañungaraugunara shinzhiyachi; can rashcaunara mana ali tupura ricushcanichu Diospa ñaupajpi. 3 Can chasquishcara, can uyashcaras iyari; chita huacachi; aripintiri. Can mana chapajpiga, shuhuaj cuinta cambajma shamusha; ñuca cambajma shamuna hurasta mana yachanguichu. 4 Astaumbas ansalla runaunara charingui Sardis llactai, paiguna churarinara mana irusyachishcaunara. Ñucahua pariju yuraj churarinahua purinaungami. Caiguna valijcunami. 5 ”Vinsij runara yuraj churarinara churachishca anga. Paihua shutira mana chingachishachu causana quillcamanda; paihua shutira ñuca Yaya ñaupajpi paihua angelguna ñaupajpis rimashami. 6 Uyaj rinriyuj Ispíritu iglesiaunama rimashcara uyachu. 7 ”Filadelfia iglesiai tiaj angelma quillcai: Casnami nin Santu nishca, Sirtu Aj nishca, Davidpa llavira Charij, pascajmi ani, pihuas ñuca pascashcara mana ishcangachu; ishcajmi ani, pihuas ñuca ishcashcara mana pascangachu. 8 Can rashcaunara yachani. Camba ñaupajpi shu pascashca pungura churashcani, pihuas mana ushangachu ishcanara. Can ansalla ursara charisha, ñuca shimira huacachishcangui, ñuca shutira, ‘Mana ricsinichu,’ nisha mana rimashcanguichu. 9 Satanaspa tandarinamanda, ‘Judiugunami anchi,’ yanga rimasha nijcunara, llullajcuna ajllaira, ñuca cachasha cangunama shamungaj, canguna chaquii tuama urmangaj, ñuca canda llaquishcara ricsinauchu. 10 ”Imasna can ñuca, ‘Ahuantai,’ nisha mandashca shimira huacachishcangui, ñuca shinallara canda huacachisha camana hurasmanda. Cai camana huras tucui munduma shamunga mundui causajcunara camangaj. 11 Uctalla shamunimi. Huacachi can charishcara pihuas camba llaitura ama quichungaj. 12 ”Vinsij runara istandira rasha ñuca Diospa templo huasii, chimanda mana ima huraspas llucshingachu. Ñucaga ñuca Diospa shutira paihuajpi quillcasha, shinallara Diospa llacta shutira, mushuj Jerusalén nishcara, ahua pachamanda Diospajmanda irgumujta, shinallara ñuca quiquin mushuj shutira paihuajpi quillcasha. 13 Uyaj rinriyuj Ispíritu iglesiaunama rimashcara uyachu. 14 ”Laodiceai tiaj iglesia angelma quillcai: ‘Amen’ nishca, ali sirtu ricusha Rimaj, Dios Iñachishcara Callarij, caita nin: 15 Can rashcaunara yachani, mana chiri mana rupaj angui. Ñuca munaima can chiri angaj, manasha rupaj angaj. 16 Shinajpi can cunujlla ajpi, mana chiris mana rupaj, ñuca shimimanda canda quijnashami. 17 Canmi ningui: ‘Charij ani, charijyashca ani. Imaras mana ministinichu.’ Mana yachangui imasna can yanga mana valij, llaquirij, pugri, ñausa, llatan ashcara. 18 ”Chiraigumanda canda camachisha nini, ninai alichishca curira randingui can charij tucungaj, yuraj churarinaunara ñucamanda randingui churaringaj, can llatan ashcamanda pingarishca ama ricuringaj. Ñahui ambira ñahuii churai can ali ricungaj. 19 ”Tucui ñuca llaquishcaunara camachini, livachini. Cuiraisiqui tucui, aripintiri. 20 Ñuca pungüi cayasha shayauni. Pihuas ñuca shimira uyajpi, pungura pascajpi, ñuca paihuajpi icusha, paihua pariju micusha, pais ñucahua. 21 ”Vinsij runara ñuca cushami pai ñucahua pariju tiaringaj ñuca apu tiarinai, imasna ñuca vinsicani, ñuca Yayahua tiaricani paihua apu tiarinai. 22 Uyaj rinriyuj Ispíritu iglesiaunama rimashcara uyachu.”
1 Caimanda huasha shu pungu pascashcara ricucani ahua pachai. Ñuca ñaupa uyashca shimi, curmita cuinta uyarij, ñucahua rimasha nica: “Sicai caima, caiguna huasha tucunaunara canda ricuchishcangui.” 2 Chi ratullai Ispiritui acani. Ñuca shu apu tiarina churashcara ricucani ahua pachai, tiarinai shuj tiauta. 3 Tiarijca jaspe cornalina sumaj puca rumiuna cuinta ricurij aca. Tiarina muyujta shu cuichi tiaca, ismiralda virdi rumi cuinta ricurij. 4 Apu tiarina muyujta shu ishqui chunga chuscu apu tiarinauna tianauca, chi tiarinaunai ishqui chunga chuscu cuiraj rucuunara tiajcunara ricucani, yuraj churarinara churarishcaunara, curi llaituunara umai churarishcaunara. 5 Tiarinamanda rayu limpiashcauna uyarishcauna shimiunas llucshinauca. Tiarina ñaupajpi canzhis nina vilauna sindinauca, cai vilauna Diospa canzhis ispirituunami. 6 Tiarina ñaupajpi shu vidriu lamar cuinta tiaca, chiu chiu ricurij rumi cuinta. Tiarina rayais, tiarina muyujtas, chuscu causajcuna tianauca, paiguna intiru aichai, ñaupajmas huashamas, ñahuiunayuj anauca. 7 Ñaupa causaj liun puma cuinta ricurij aca; ishqui causaj huagra huahua cuinta; quinsa causaj runa ñahuiyuj cuinta aca; chuscu causaj shu huamburij atun anga cuinta ricurij aca. 8 Chi chuscu causajcuna caran shuj sucta rigra pangayuj aca, paiguna ahuaras ucuras ñahuiunayuj anauca. Tutandi punzhandi mana saquisha caparinauca: “Santu, santu, santu,” nisha, “Tucuira Ushaj Señor Dios, ñaupa tiaj, cuna tiajpas, huasha shamuna ajpas.” 9 Caran cuti chi causajcuna tiarinai tiajta alabanaun, ahuayachinaun, agrasinaun, pai huiñai huiñaigama causaj ajpi, 10 chi ishqui chunga chuscu cuirajcuna tiarinai tiajpa ñaupajpi tuama urmanaun, huiñai huiñaigama causajta aduranaun, paiguna llaituunara tiarina ñaupajma shitanaun, casna nisha: 11 ”Señor, can valijmi angui sumajyachishcaras, ahuayachishcaras, ushairas apingaj. Can tucuira rarcangui, paiguna can munashcamanda tianaun, shinallara rashca anauca.”
1 Tiarinai tiajpa ali maquii shu quillcara ricucani. Chi quillca pajllais ucuis quillcashca aca. Canzhis sellu nishcaunahua ishcashca aca. 2 Shu shinzhi angelda ricucani shinzhi shimihua caparijta: “¿Pita valinri,” nisha, “quillcara pascangaj?” 3 Pihuas mana valijchu aca, ahua pachais, cai pachais, cai pacha ucuis, quillcara pascangaj ricungajpas. 4 Ashcara huacacani pi valijpas mana tuparijpi quillcara pascangaj, ricusha rimangaj, ricungajpas. 5 Shu cuiraj rucu runa nihuaca: “Ama huacaichu. Caibimi Judá aillumanda Liun Puma, Davidmanda Angu. Pai vinsishcami quillcara pascangaj, paihua canzhis sellu huatashcaunaras pascangaj.” 6 Ricucani. Apu tiarina, chuscu causajcuna, ishqui chunga chuscu cuirajcuna chaupi shungüi, shu huañuchishca cuinta Burigura shayauta ricucani, canzhis curnusyuj, canzhis ñahui muyuyuj. Chi canzhis ñahui muyu Diospa canzhis ispirituunami, tucui munduma cachashcauna. 7 Burigu shamuca, quillcara apica tiarinai tiajpa ali maquimanda. 8 Burigu quillcara apishca huasha, chuscu causajcuna, ishqui chunga chuscu cuirajcunandi paihua ñaupajpi tuama urmanauca. Tucuiguna arpa tucanaunara charinauca, insinsuhua undachishca curi vasuunaras. Caiguna quirijcuna mañashcaunami. 9 Shu mushuj cantanara cantanauca, casna nisha: “Can valijmi angui quillcara apingaj, paihua selluscunara pascangaj. Can sacrificioi cushca acangui, camba yahuarhua ñucanchira randishcangui Diospajta, tucui ailluunamanda, tucui shimimandas, tucui llactamandas, tucui partimandas. 10 Ñucanchira rey apuunara sacerdoteunaras rashcangui ñucanchi Diospajta. Cai pachai mandashun.” 11 Ricucani, ashca angelguna shimiunara uyacani. Paiguna apu tiarina muyujta, causajcunas cuirajcunas muyujta, shayanauca. Ashca huaranga huarangauna anauca. 12 Shinzhi shimihua caparisha ninauca: “Sacrificioi cushca Burigu valijmi ushairas, charishcaras, yachairas, shinzhiyachinaras, ali rimashca ajtas, sumajtas, alabashcaras apingaj. 13 Tucui rashcaunara, ahua pachai tiajtas, cai pachai tiajtas, cai pacha ucura tiajtas, lamarbi tiajtas, tucui paiguna ucui tiajcunaras rimashcara uyacani: “Tiarinai tiajma, Burigumas, alabanas, ahuayachinas, sumaj ajpas, ushais huiñai huiñaigama achu.” 14 Chuscu causajcuna: “Amen,” ninauca. Ishqui chunga chuscu cuirajma tuama urmanauca huiñai huiñaigama Causajta aduranauca.
1 Burigu shu sellura pascashcara ricucani. Chuscu causajcunamanda shuj, rayu cuinta uyarij shimihua caparijta uyacani: “Ricuj shami,” nica. 2 Ricucani shu yuraj caballura; caballui muntashca runa shu arcura charica. Paima shu llaitura cunauca. Llucshica vinsisha, vinsingajpas. 3 Ishqui sellura pascashcai, ishqui causaj rimajta uyacani: “Ricuj shami,” nica. 4 Shu puca caballu llucshica. Caballui muntajma ushaira cushca aca ganas causanara mundumanda quichungaj, runauna parijumanda huañuchingaj. Paima shu atun isparara cunauca. 5 Quinsa sellura pascashcai, quinsa causaj rimajta uyacani: “Ricuj shami,” nisha. Shu yana caballura ricucani; paihuajpi muntashca runa shu balanzara charica paihua maquii. 6 Chuscu causajcuna chaupi shungumanda shimi rimajta uyacani: “Ishqui libra trigu muyu pichca chunga sucre valin!’ Ama huajlichichu asitiras vinuras. 7 Chuscu sellura pascashcai, chuscu causaj rimajta uyacani: “Ricuj shami.” 8 Shu quillu caballura ricucani. Caballui muntashca runa shuti “Huañui” nishca aca.”Ucu Pacha” nishca shutiyuj paita catimuca. Paima ushaira cushca aca mundu shu chuscu parti ahuai, isparahua huañuchingaj, yarcaihuas, huañuihuas, cai pachai tiaj milli pumaunahuas. 9 Pichca sellura pascashcai, altar siquii huañushca runauna almaunara ricucani, Diospa shimira llaquishcamanda Diospa shimira rimashcamandas huañuchishcauna. 10 Shinzhi shimihua caparisha ninauca: “¿Ima hurascama Señor, sumaj, sirtu ajpas, ñucanchi yahuarmanda mana taripangui, mana cutipangui mundui causajcunara?” 11 Yuraj churarinaunara paigunara cunauca.”Shu ratura samaichi” paigunara ninauca, “cangunahua pariju sirvijcunas uquiunas yupashca tupu pactarinagama, paigunas cangunasna huañuchishca anaunga.” 12 Sucta sellu pascashcara ricucani. Allpa shinzhira cuyuca, indi yana tucuca, yana llachapa cuinta, intiru quilla yahuar cuinta ricurij tucuca. 13 Ahua pachamanda istrillascuna cai pachama urmanauca, imasna shu higu yura shinzhi huairaushcai cuyujpi paihua muyu talirishcasna. 14 Ahua pacha chingarica, shu quillca cullu pillurishca cuinta. Tucui urcu, tucui isla anzhuricami pai tiashcamanda. 15 Mundu rey apuuna, atun runauna, charijcuna, capitanguna, ushajcuna, tucui sirvijcuna, tucui lugar ajcuna, tucui miticunauca rumi uctuunai urcu peñascunais. 16 Urcuunara, peñascunara ninauca: “Urmaichi ñucanchi ahuai, tapaichi ñucanchira apu tiarinai tiajpa ñahuimanda Burigu piñarinamandas. 17 Paiguna atun piñarina punzha pactamushcami, ¿pita shayarinara ushangachu?”
1 Caimanda huasha, chuscu angelgunara shayajta ricucani, cai pacha chuscu pundai, mundui chuscu huairaunara arcajcuna anauca, ama huairangaj allpa ahuai, lamar ahuais, ima yura ahuais. 2 Shinallara shu angelda ricucani, indi llucshinamanda sicamujta, Causaj Diospa sellura charijta. Chi angel chishu chuscu angelgunara caparica shinzhi shimihua. Chi chuscu angelcunama ushaira ñaupa cushca aca allpara lamardas huajlichingaj, 3 Angel casna nica: “Ama huajlichichu allparas, lamardas, yuraunaras, ñucanchi Diosta sirvijcunara urintii sellura churana tucurinagama!’ 4 Sellura churashcaunara yupashcara uyacani; tucui Israelba churiunamanda 144,000 sellura churashcauna anauca. 5 Judá aillumanda 12,000 sellura churashca anauca; Rubén aillumanda 12,000 sellura, Gad aillumanda 12,000 sellura, 6 Aser aillumanda 12,000 sellura, Neftalí aillumanda 12,000 sellura, Manasés aillumanda 12,000 sellura, 7 Simeón aillumanda 12,000 sellura, Leví aillumanda 12,000 sellura, Isacar aillumanda 12,000 sellura, 8 Zabulón aillumanda 12,000 sellura, José aillumanda 12,000 sellura, Benjamín aillumanda 12,000 sellura churashca anauca. 9 Caimanda huasha, shu ashca atun muntun runaunara ricucani, mana yupaihuajta, tucui ailluunamanda, tucui llactaunamanda, tucui shimiunamanda ajcunara. Apu tiarina ñaupajpi tianauca, Burigu ñaupajpis. Yuraj churarinahua churarishca anauca, paiguna maquii ramos pangaunara charinauca. 10 Shinzhi shimihua caparisha ninauca: “Quishpichina ñucanchi tiarinai tiaj Diospajmi Burigujmi.” 11 Tucui angelguna apu tiarina muyujta, shinallara cuirajcunas, chuscu causajcunas muyujta shayanauca. Paiguna tuama urmasha apu tiarina ñaupajpi, Diosta aduranauca. 12 Ninauca: “Amen, bindisiana, ali sumaj, yachana, agrasina, ahuayachina, ushana, ali shinzhiyanas ñucanchi Diospaj achu, huiñai huiñaigama. Amen. 13 Shinajpi cuirajcunamanda shuj ñucahua rimasha nica: “Caigunaga, yuraj churarinahua churarishcauna, ¿pitai caiguna? ¿Maimandara shamunaushcai?” 14 Paita cutipasha, “Señor, can yachanguimi,” nicani. Pai ñucara nica: “Caiguna atun turmindarinamanda llucshinaushcami, paiguna churarinaunara tacsanaushcami, yurajyachinaushcami Burigu yahuarbi. 15 Chimanda Diospa apu tiarina ñaupajpi tianaunmi. Paita sirvinaun tutandi punzhandi paihua templo huasii. Tiarinai tiaj paigunahua causangami paihua huasii. 16 Ña mana mas yarcachinaungachu, upinaichinaungachu, indis mana cuti paiguna ahuai aitangachu, mana ima rupajhuallas aitangachu. 17 Buriguga, tiarina chaupi shungüi tiaj, paigunara carangami, causaj yacu bujyuunama pushangami. Dios paiguna ñahuimanda tucui iquira pichangami.
1 Canzhis sellura pascarishcai, chunlla tucuca ahua pachai shu chaupi huras tupura. 2 Chi canzhis Diospa ñaupajpi shayaj angelgunara ricucani. Paigunara canzhis curmitara cunauca. 3 Shinajpi shu angel shamuca, altar ñaupajpi shayarica, shu curi insinsu purura charica. Ashca insinsura paita cushca aca, tucui quirijcuna mañashcaunara yapangaj, apu tiarina ñaupajpi tiaj curi altarbi. 4 Angel maquimanda insinsu cushni Diospa tiashcama sicaca, quirijcuna mañashcaunahua. 5 Angel insinsu purura apisha, altarmanda ninahua undachisha, cai pachama shitaca. Rayuuna shimiunandi uyarinauca, rayu limpiashcauna ricurinauca, allpas cuyuca. 6 Chi canzhis curmitayuj angelguna puruntunauca tucangaj. 7 Ñaupa punda angel paihua curmitara tucaca. Rasu paquiunas ninas yahuarhua masarishca cai pachama shitashca anauca. Shu quinsa parti yuraunara rupachishca aca, tucui virdi quihuandi. 8 Ishqui angel paihua curmitara tucaca. Shu atun ninahua sindij urcu cuinta lamarbi shitashca aca. Shu quinsa parti lamar yacu yahuar tucuca. 9 Shu quinsa parti lamarbi causajcuna huañunauca, shu quinsa parti barcuuna chingarinauca. 10 Quinsa angel paihua curmitara tucaca. Ahua pachamanda shu atun sindij istrillas urmaca, shu atun cupal vila cuinta; shu quinsa parti yacuuna ahuai, yacuuna llucshiushca ahuais urmaca. 11 Istrillaspa shuti “Ayajmi.” Shu quinsa parti yacuuna ayaj tucunauca. Ashca runauna chi yacuunamanda huañunauca, yacu ayaj tucushcamanda. 12 Chuscu angel paihua curmitara tucaca. Shu quinsa partira indira huajlichishca aca, quillaras shu quinsa partira, istrillascunamanda shu quinsa partira huajlichishca aca, paigunamanda shu quinsa partira llanduyangaj, punzharas shu quinsa partira llanduyangaj, shinallara tutaras. 13 Ricucani, shinallara uyacani shu atun angelda ahua pacha chaupii huamburijta. Shinzhi shimihua caparica “¡Ayailla, ayailla, ayailla,” nisha, “cai pachai causajcunamanda, shu curmitauna tucanaunamanda, shu quinsa angelguna ña tucangaraushcara!”
1 Pichca angel paihua curmitara tucaca. Shu istrillasta, ahua pachamanda cai pachama urmamujta ricucani. Paimi atun ucu uctu llavira cushca aca. 2 Atun ucu uctura pascaca. Uctumanda cushni llucshica, shu atun ninamanda cushni cuinta. Indis huairas llanduyamuca uctumanda cushnihua. 3 Cushni ucumanda atun ijiuna llucshinauca cai pachai. Paigunama ushaira cushca aca imasna cai pachai uputindiunama cushcasna. 4 Paigunara mandashca aca cai pachai tiaj quihuara, ima virdi pangaras, ima yuraras ama huajlichingaj, astaun runaunallara, paiguna urintii Diospa sellura mana charijcunallara huajlichingaj. 5 Paigunama cushca aca mana huañuchingaj astaun turmindachingajlla picha quilla tupura. Paiguna turmindachina uputindi runara tucsishca cuinta aca. 6 Chi punzhaunai runauna huañunara mascanaunga, astaun mana tupanaungachu. Huañungaj munanaunga, astaun huañui paigunamanda miticungami. 7 Ijiuna caballuuna cuinta ricurinauca, macanaungaj puruntushcauna. Paiguna umai curi llaitura cuinta charinauca, paiguna ñahui runa ñahui cuinta aca. 8 Paiguna accha huarmi accha cuinta aca, paiguna quiruuna liun puma quiru cuinta anauca. 9 Pichu quillpanara charinauca, iruhua rashca cuinta. Paiguna rigra pangauna uyarishca ashca caballu aisashca caritauna uyarishca cuinta aca, guirama callpaushcai uyarishcasna. 10 Paiguna chupauna uputindi chupa cuinta anauca, tucsinayuj. Paiguna chupahua runaunara chugrichinara ushanauca, picha quilla tupura. 11 Atun ucu uctu angel paiguna rey apu aca. Paihua shuti hebreo shimii Abadón nishca aca; griegu shimii paihua shuti Apolión nishca aca. 12 Ñaupa punda “Ayailla” rimashca ña pasashcami. Chara ishqui cuti “Ayailla” rimashcauna caimanda huasha shamunaunga. 13 Sucta angel paihua curmitara tucaca. Shu shimira uyacani, Diospa ñaupajpi tiaj curi altar chuscu curnus chaupi shungumanda llucshijta. 14 Chi curmitayuj angelda shu shimi rimasha nica: “Pascairi chi chuscu huatashca angelgunara, Eufrates nishca atun yacu rayai huatashcaunara. 15 Chi chuscu angelguna pascashca anauca. Puruntushca anauca chi hurascama, chi punzhagama, chi quillagama, chi huatagama, runaunamanda shu quinsa partira huañuchingaj. 16 Caballui muntashcauna, ishqui patsaj huaranga huaranga tupu anauca. Paiguna yupashcara uyacani. 17 Ñuca nuspashca cuinta ricushcai caballuunara ricucani, paiguna ahuai muntashcaunaras; pichu quillpana palaunara charinauca, ninahua virdi rumihuas azufrihuas rashca anauca. Caballuuna umauna liun puma umauna cuinta anauca, paiguna shimiunamanda ninas cushnis azufris llucshinauca. 18 Cai quinsa turmindachinahua shu quinsa parti runauna huañunauca: ninahua cushnihua azufrihua, caballu shimimanda llucshijcunahua. 19 Caballuuna chugrichingaj ushaira charinauca paiguna shimii, paiguna chupais. Paiguna chupa machacui cuinta umayuj aca, umaunahua chugrichinauca. 20 Chishu runauna, cai turmindachishcaunamanda mana huañuchishcauna mana aripintirinaucachu paiguna maquihua rashcaunara; supaigunara adurangaj mana saquinaucachu; shinallara curi, cullqui, rumi, caspira rashca yanga dioscunara adurangaj mana saquinaucachu; cai yanga dioscuna mana ricujcuna, mana uyajcuna, mana purijcuna ajllaira. 21 Mana aripintirinaucachu paiguna runaunara huañuchinaunaras, sagraunaras, tacarinaunaras, shuhuanaunaras.
1 Shu shinzhi angelda ahua pachamanda irgumujta ricucani, puyuhua quillparishca, shu cuichi paihua umai tiauca, paihua ñahui indi cuinta aca, paihua chaquiuna nina culluuna cuinta ricurinauca. 2 Paihua maquii shu ichilla quillcahuara pascashcara charica. Paihua ali chaquira lamarbi churaca, lluqui chaquiraga allpai churaca. 3 Shinzhi shimihua caparica, shu liun puma rungashca cuinta. Pai caparishca huasha, canzhis rayuuna uyarinauca. 4 Chi canzhis rayuuna uyarishca huasha, ñuca quillcangaj raucani. Shina ajllaira shu ahua pachamanda shimira uyacani: “Sellura churasha ishcangui, chi canzhis rayuuna rimashcaunara. Ama quillcaichu,” nica. 5 Ñuca ricushca angel, shu chaqui lamarbi shu chaqui allpai shayau, maquira ahuama ricuchica, 6 Diospa shutii shimira cuca, huiñai huiñaigama Causajpa shutii rimasha, pai ahua pachara paihuajpi tiajcunaras, cai pachara paihuajpi tiajcunaras, lamarda paihuajpi tiajcunaras raj ajpi: “Dios mana mas chapangachu,” nica, 7 ”astaun ahua pachamanda canzhis angel curmitaushca punzhaunai, pai curmitangaj callarijpi, Dios pacashca shimi pactaringami imasna pai rimashcasna paita sirvij rimajcunama. 8 Ahua pachamanda uyashca shimi cutillara ñucara rimaca: “Ri, quillcara api, pascashcami tian lamarbi allpais shayaj angelba maquii.” 9 Angelma ricani.”Quillcara cuhuapai,” nicani. Pai ñucara nica: “Apisha micui. Icsai ayaj tucunga, astaun shimii mishqui anga, sacha mishqui cuinta.” 10 Shinajpi angelba maquimanda ichilla quillcara apisha, micucani. Ñuca shimii mishqui aca, sacha mishqui cuinta, astaumbas micushca huasha ayaj tucuca icsai. 11 Angel ñucara nica: “Ministirinmi can Diosmanda cuti rimangaj ashca runaunama, llactaunamas, shimiunamas, rey apuunamas.”
1 Shinajpi shu pindujta, tupuna vara cuinta, cui tucucani. Shu shimi: “Atari,” nisha rimashca uyarica, “Diospa templo huasira tupui, altardas, chihui adurajcunaras. 2 Astaun templo canzhai aj patiura saqui, ama tupuichu. Gentilgunama cushcami. Paiguna aitasha huajlichinaunga santu llactara chuscu chunga ishqui quilla tupura, 3 Ñuca ishqui ricusha rimaj runaunama cushami ñucamanda rimangaj shu huaranga ishqui patsaj sucta chunga punzhagama, yana custal llachapahua churarishcauna.” 4 Cai rimajcuna chi ishqui olivo yura, chi ishqui vila shayachinami, cai pacha Diospa ñaupajpi shayajcuna. 5 Maican runas paigunara huajlichisha nisha rajpi, nina llucshin paiguna shimimanda, paigunara chijnijcunara rupachisha tucuchingaj; maican runas paigunara huajlichisha nijpi, shina tunullaira huañuna anga. 6 Caiguna ushaira charinaun ahua pachara ishcangaj, ama tamiangaj paiguna rimana punzhaunai. Ushaira charinaun yacuunara turcangaj, yahuar tucungaj, allpara huajlichingajpas ima tunu turmindushuas, imasna cuti paiguna munashcasna. 7 Paiguna rimanauna tucurishca huasha, atun ucu uctumanda llucshimuj milli Animal nishca paigunahua macananaunga, paigunara vinsinga, paigunara huañuchinga. 8 Paiguna huañushca aichauna atun llacta pulasai ichushca sirinaunga. Cai llacta, almai iyarijpi, Sodoma nisha, Egipto nisha rimashcami. Chi llactai ñucanchi Señor chacatashca aca. 9 Runaunamanda, ailluunamanda, shimiunamanda, llactaunamanda runauna paiguna huañushca ayaunara ricunaunga quinsa punzha chaupira. Lugarda mana cunaungachu ayaunara pambangaj. 10 Cai pachai causajcuna cushiyanaunga rimajcuna huañushcamanda, cushi tucunaunga; parijumanda cuyanaunara cuyanaunga, cai ishqui Diosmanda rimajcuna cai pachai tiajcunara turmindachishcaraigumanda. 11 Shina ajllaira quinsa punzha chaupi pasashca huasha, Diosmanda cachashca causana ispíritu paiguna huañushca aichai icuca. Paiguna atarisha shayarinauca. Paigunara ricujcuna ashcara manzharisha ricunauca. 12 Ahua pachamanda shu atun shimira uyanauca, paigunara nisha: “Sicaichi caima.” Ahua pachama sicanauca shu puyui. Chijnijcuna paigunara ricunauca. 13 Chi ratullaira allpa shinzhira cuyuca, Llactamanda shu chunga parti tularica, allpa cuyushcamanda shu canzhis huaranga runauna huañunauca. Shujcuna ashcara manzharisha, ahua pacha Diosta ahuayachinauca. 14 Ña pasanaushcami ishqui “Ayailla” shimiuna. Quinsa “Ayailla” shimi ñalla pactaringami. 15 Canzhis angel paihua curmitara tucaca. Shinzhi shimiuna ahua pachai uyarinauca, rimasha ninauca: “Cai pacha gubirnuuna ña ñucanchi Señorbaj tucunaun, paihua Cristojpas. Pai huiñai huiñaigama mandangami.” 16 Ishqui chunga chuscu cuiraj rucuuna paiguna apu tiarinaunai tiajcuna Diospa ñaupajpi urmasha Diosta aduranauca, 17 casna nisha: “Canda agrasinchi Tucuira Ushaj Señor Dios, tiajpas, tiashca ajpas, shamuna ajpas, camba atun ushaira apishcangui, rey apu tucusha mandashcangui. 18 Hactauna piñarisha caparinauca, cambas piñarishcangui. Huañushcaunara taripana timpu pactamushcami, shinallara timpu pactamun premio cuyanaunara cuyangaj canda sirvij rimajcunaras, quirijcunaras, camba shutira manzhajcunaras, ichillaunandi, atungunandi. Timpu pactamun cai pachara tulajcunara tulangaj.” 19 Diospa templo huasi pascashca aca ahua pachai. Diospa pactachina shimimanda arca santu cajón ricurimuca ahua pachai. Rayu limpiashcauna, shimiuna, rayu uyarishcauna, allpa cuyunas, atun rasu paquiunas tianauca.
1 Shu atun ricurina ricurimuca ahua pachai: shu huarmi ricurimuca, indihua churarishca, quillas paihua chaqui ucui, paihua umai shu chunga ishqui istrillasyuj llaitu aca. 2 Huarmi huahuayuj aca icsai, huacacami huahua nanachishcamanda, pagarina huras pactamujpi. 3 Shinallara shu ricurinas ricurica ahua pachai: shu atun puca dragún, canzhis umayuj, chunga curnusyuj. Umaunai canzhis rey apu llaituunara charica. 4 Paihua chupahua shu quinsa parti ahua pacha istrillascunara aisasha, cai pachama urmachica. Dragún huarmi ñaupajpi shayarica, huarmi ñalla pagarichingaraupi, huahuara micungaj pai pagarishca ratullaira. 5 Huarmi shu cari huahuara pagarichica. Pai tucui llactaunara mandangami iru varahua. Huahuaga apai tucuca Diospajma, paihua apu tiarinama. 6 Huarmiga runa illashca partima miticuca, Dios alichishca partima, chihui cuirai tucungaj shu huaranga ishqui patsaj sucta chunga punzhagama. 7 Chihuasha atun macanauna tiauca ahua pachai, Miguel paihua angelgunandi macananauca dragunhua. Dragumbas paihua angelgunandi macananauca. 8 Astaun dragunguna mana vinsinaucachu, maspas paigunaj mana lugar tiacachu ahua pachai. 9 Atun dragún canzhama ichushca aca, pai callari timpumanda machacui, supai apu, paihua shuti Satanás, intiru mundura umachij. Cai pachama shitashca aca paihua angelgunahua pariju. 10 Shinajpi, shu shinzhi shimihua rimauta uyacani ahua pachai, casna nisha: “Cuna pactamunaushcami ñucanchi Diospa quishpichinas, paihua ushais, pai mandanas, paihua Cristo mandana ushais, ñucanchi uquiunara cauźayachijta canzhama ichushcaraigu. Paiga paigunara cauźayachica ñucanchi Diospa ñaupajpi tutandi punzhandi. 11 Uquiuna paita vinsinaushca Burigu yahuarraigumanda, paiguna rimashca shimiunamandas. Maspas paiguna causaira mana llaquinaucachu huañunagama. 12 Chiraigumanda cushiyaichi, ahua pachauna, chihui causajcunandi. ¡Ayailla, cai pachai causajcuna, lamarbi causajcunas! Supai apu cangunajma irgushcami ashcara piñarisha, paihua timpu ña pactariupi yachasha. 13 Dragún pai cai pachama shitashcara riparasha, churira pagarichij huarmira catica turmindachingaj. 14 Huarmira ishqui atun anga rigra pangaunara cunauca, machacui ñaupjamanda huamburisha miticungaj runa illashca partima, paihua tianama, chihui cuirai tucungaj shu timpura, timpuunaras, chaupi timpuras. 15 Machacui paihua shimimanda huarmi huashai ashca yacura shitaca, yacu paita apangaj. 16 Astaumbas allpa huarmira yanapaca, paihua shimira pascasha yacura nillpuca, dragumba shimimanda shitashca yacura. 17 Shinajpi dragún piñarica huarmihua. Guirangaj rica huarmimanda miraiguna puchujcunahua, Diospa camachishcaunara huacachijcunahua, Jesucristo shimira huacachijcunahuas.
1 Lamar pulaya tiyui shayaricani. Lamarmanda shu milli Animal sicamujta ricucani, canzhis umayuj, chunga curnusyuj aca, curnuspi chunga rey apu llaitu tianauca, paihua umaunais shu Diosta piñaj shutiras charica. 2 Ñuca ricushca Animal atun muru puma cuinta ricurij aca, paihua chaquiuna oso chaqui cuinta, paihua shimi liun puma shimi cuinta aca. Dragún paihua ushairas paihua apu tiarinaras, paihua atun mandana ushairas Animalma cuca. 3 Paihua umaunamanda shujta huañunalla chugrishcara ricucani, astaumbas huañunalla chugrishca aj aliyaca. Tucui cai pacha runauna Animalda manzharisha, paita catinauca. 4 Paiguna dragunda aduranauca, paihua ushaira Animalma cushcaraigu, shinallara Animaldas aduranauca, casna nisha: “¿Pitairi cai Animal cuinta, pita paihua macanaunara ushangairi?” 5 Shinallara paima lugarda cushca aca irus shimira rimangaj, Diosta camisha. Ushaira paima cushca aca mandangaj chuscu chunga ishqui quilla tupura. 6 Shimira pascaca Diostas paihua shutiras piñangaj, paihua tabernáculo huasiras ahua pachai causajcunaras. 7 Paita lugarda cushca aca quirijcunahua macanaungaj, paigunara vinsingajpas. Maspas, paita cushca aca tucui aillura, tucui llactara, tucui shimira, tucui runauna muntunda mandangaj. 8 Paita aduranauca tucui cai pachai causajcuna, paiguna shutiunara callarimanda sacrificioi cushca Burigu causana quillcai mana quillcashcauna. 9 Uyaj rinriyuj uyachu. 10 Chunda cularbi ishcaj ishcashca anga. Isparahua huañuchij isparahua huañuchishca anga. Caibimi quirijcuna ahuantana iyai, paiguna quirinas. 11 Chimanda huasha shu milli Animalda allpamanda sicamujta ricucani. Ishqui curnusyuj aca, burigu cuinta, astaumbas dragún cuinta rimaca. 12 Cai Animal ñaupa ricurij Animalba tucui mandanahua mandan paihua ñaupajpi. Cai Animal cai pacharas cai pachai causajcunaras ñaupa aj Animalda alabachin, huañunalla chugrishca aliyajta. 13 Atun munanaita ranaunara ricuchin, maspas ahua pachamanda ninara urmachin cai pachama, runauna ñaupajpi. 14 Cai pachai causajcunara umachin paima cushca munanaita ricuchishcaunahua, ñaupa aj Animalba ñaupajpi. Cai pachai causajcunara mandaca ñaupa Animal cuinta ricurijta rangaj, chi isparahua chugrichishca huasha causaj Animalda. 15 Paita lugarda cushca aca Animal cuinta ricurij rashca samaira charingaj, rimangajpas, tucui paita mana adurajcunara huañuchingajpas. 16 Paiga tucuira, ichillauna ajpi atunguna ajpis, charijcuna ajpi pugriuna ajpis, lugarguna ajpi mana lugarguna ajpis, shu siñalda churachica ali maquii, urintii. 17 Mana pihuas randinara catunara ushacachu chi siñalda mana charisha, Animalba shutira, Animalba shuti yupashcara mana charisha. 18 Caibimi yachana tian. Intindij runa Animal yupashcara yupachu, runa shuti yupanami. Paihua yupana sucta patsaj sucta chunga sucta.
1 Chimanda huasha Burigura Sión urcui shayajta ricucani. Paihua pariju shu patsaj chuscu chunga chuscu huaranga runauna tianauca. Paihua shutira paihua Yaya shutiras urintii quillcashcara charinauca. 2 Ahua pachamanda shu shimira uyacani, ashca yacuuna huactarishca cuinta uyarijta, atun rayu cuinta. Ñuca uyashca shimi arpara tucajcuna tucashca cuinta uyarica. 3 Shu mushuj cantanara cantanauca apu tiarina ñaupajpi, chuscu causajcuna ñaupajpis, cuiraj rucuuna ñaupajpis. Pihuas cai cantanara mana ushacachu yachanara astaun cai patsaj chuscu chunga chuscu huarangaunalla, cai pacha runaunamanda randishcauna. 4 Caiguna mana huarmiunahua huajlijcuna anauca, huanraunami anauca. Caiguna Burigura catijcunami anauca pai maita rijpis. Caiguna runaunamanda randishcaunami anauca, shu yura ñaupa punda aparij muyuuna cuinta, Diospajtas Burigujtas. 5 Paiguna shimii ima llullaras mana tupashcachu aca, huajli illaj anauca Diospa apu tiarina ñaupajpi. 6 Shu angel huamburijta ricucani ahua pacha chaupi shungüi. Pai huiñai huiñaigama duraj evangelio ali shimira charica cai pachai tiajcunara rimangaj, tucui llactara, tucui aillura, tucui shimira, tucui runaunaras. 7 Shinzhi shimihua caparisha nica: “Diosta manzhaichi, paita ahuayachichi. Pai taripana huras ña pactamushcami. Ahua pacharas, cai pacharas, lamardas, yacu bujyuunaras raj Diosta aduraichi.” 8 Shu angel paita catica, casna nisha: “Urmashcami, urmashcami, Babilonia atun llacta, tucui llactaunara pai tacarisha causana urti vinura cuinta upichishcaraigu.” 9 Shu quinsa angel chishujcunara catimuca, shinzhi shimihua caparisha: “Pihuas Animalda pai cuinta ricurijtas adurasha, pihuas paihua siñalda apishca asha urintii, maquii, 10 shinallara Diospa piñarina vinura upingami, mana imahuas masashcara, paihua upina purui talishcara. Ninahuas azufrihuas turmindachishca anga sumaj angelguna ñaupajpi Burigu ñaupajpis. 11 Paiguna turmindachishcamanda cushni huiñai huiñaigama sicangami. Maspas tutas punzhas mana samanaunzhu Animalda adurajcuna, pai cuinta ricurijtas adurajcuna, shinallara Animalmanda shuti siñalda apijcunas mana samanaunzhu.” 12 Caibimi quirijcuna ahuantana iyai, Dios mandashcaunara Jesúspi quirishcaras huacachijcuna. 13 Ahua pachamanda shu shimira uyacani, ñucama casna nisha: “Quillcai. Cuna hurasmanda ñaupajma, cushimi anaunga tucui Señorbi quirisha huañujcuna.” Ispíritu, “Ari,” nin, “paiguna tarabashcaunamanda samanaungami. Paiguna rashcauna paigunahua catinaun.” 14 Ricusha, shu yuraj puyura ricucani. Puyu ahuai tiajta ricucani, Runa Churi cuinta ricurij, paihua umai shu curi llaitura, paihua maquii shu ilu saulira charica. 15 Templo huasimanda shu angel llucshica, shinzhi shimihua puyui tiajta caparisha nica: “Saulira cachai pallangaj. Pallana huras ña pactamushcami. Cai pachai pallana ña chaquishcami.” 16 Shinajpi puyui tiaj paihua saulira cachaca cai pachama. Cai pachara pallashca aca. 17 Shu angel ahua pachai tiaj templomanda llucshica, pai shinallara ilu saulira charica. 18 Altarmanda shu angel llucshica, ninara mandaj. Shinzhira caparisha, saulira charijta cayaca: “Cachai,” nica, “camba ilu saulira. Uvillas huanguunara pallai cai pachamanda. Paihua uvillas muyuuna pucushcami.” 19 Angel saulira cachaca cai pachai; cai pacha uvillasta pallaca; uvillasta chahuanai shitaca, Diospa atun piñarina chahuanai. 20 Chahuana aitashca aca llactamanda canzhama. Chahuanamanda yahuar llucshica, caballu frinu huascagama pactajta, quinsa patsaj kilumitrugama.
1 Ahua pachai shu atun gustu ricurinara ricucani: Canzhis angelgunara ricucani, canzhis puchucai turmindachinaunara charijcunara. Caigunahua Diospa piñarina tucurin. 2 Shinallara shu ninahua masarishca vidriu cuinta lamarda ricucani. Vidriu lamarbi vinsijcuna shayajta ricucani; paiguna chi milli animalda, pai cuinta ricurijtas, paihua siñaldas, paihua shuti yupashcaras vinsinauca. Diospa arpa tucanaunara charinauca. 3 Diosta sirvij Moisespa cantanara Burigu cantanaras cantanauca: “Can rashcauna, Tucuira Ushaj Señor Dios, atunmi anaun, manzhanaitami anaun. Camba ñambiuna dirichuunami, sirtuunami, quirijcuna Rey Apu. 4 ¿Pita canda mana manzhangairi, Señor, camba shutira mana ahuayachingairi? Canlla santu angui. Chiraigumanda tucui llactauna canda adurangaj shamunaunga, camba taripanauna ricurinaushcami.” 5 Caigunamanda huasha, ahua pachai templo nishca Diospa shimira ricuchij santu huasi pascashcara ricucani. 6 Templo huasi ucumanda chi canzhis turmindachinara charij angelguna llucshinauca, sumaj chiujlla ricurij linu llachapahua churarishca, paiguna pichui curi chumbillinahua chumbillishca anauca. 7 Chuscu causajcunamanda shuj chi canzhis angelgunara canzhis curi vasura cuca, caran vasu huiñaigama causaj Dios piñarishcahua undashca aca. 8 Templo huasi cushnihua undashca aca, Diospa sumajmanda, paihua ushaimandas. Mana pihuas templo huasii icunara ushacachu chi canzhis angel canzhis turmindachinauna pactaringagama.
1 Templo huasimanda shinzhi shimihua rimashcara uyacani, canzhis angelgunama rimashcara: “Richi, canzhis Diospa piñarina vasura cai pacha ahuai talichi.” 2 Ñaupa punda aj angel rica, paihua vasura cai pacha ahuai talica. Runauna aichai ismuchij llaga iñaca milli Animalba siñalda charijcuna ahuai, pai cuinta ricurijta adurajcuna ahuais. 3 Ishqui angel paihua vasura talica lamar ahuai. Lamar yahuar tucuca, huañushca runa yahuar cuinta. Tucui lamarbi causajcuna huañunauca. 4 Quinsa angel paihua vasura talica yacuuna ahuai, yacu llucshina bujyuuna ahuais. Yacuuna yahuar tucunauca. 5 Yacura mandaj angel rimajta uyacani: “AIimi angui can, Señor, cuna ajpas ñaupa ajpas, santu Dios, caigunara taripashcangui. 6 Imasna paiguna quirijcuna, Diosmanda rimajcuna yahuarda talinauca, shinallara paigunama can yahuarda cushcangui upingaj; casna tucungaj alimi aca.” 7 Shinallara shujta uyacani, altarmanda rimajta: “Tucuira ushaj Señor Dios, can taripashcauna sirtumi, alimi anaun.” 8 Chuscu angel paihua vasura indi ahuai talica. Indima cushca aca runaunara ninahua rupachingaj. 9 Runauna ashca rupajhua rupanauca. Diospa shutira piñanauca, pai cai turmindachinaunara mandaj ajpi. Mana aripintirinaucachu Diosta sumajyachingaj. 10 Pichca angel paihua vasura talica milli Animalba tiarina ahuai. Paihua llacta llandu tuta tucuca. Runauna paiguna callura caninauca nanashcamanda. 11 Ahua pacha Diosta piñanauca paiguna nanaigunamanda, paiguna llagaunamandas. Paiguna rashcaunamanda mana aripintirinaucachu. 12 Sucta angel paihua vasura atun Eufrates yacu ahuai talica. Yacu chaquirica, indi llucshina partimanda rey apuuna ñambira puruntushca angaj. 13 Dragumba shimimanda, milli Animalba shimimandas, llulla rimajpa shimimandas quinsa irus supaiguna, tulumba cuinta ricurij, llucshimujta ricucani. 14 Caiguna supaiguna almaunami, ricurinaunara ricuchijcuna. Cai pacha rey apuunama rinaun tucui mundui, paigunara macanaunama tandachingaj, Tucuira Ushaj Diospa atun punzhai. 15 ”Ñuca shuhuaj cuinta shamunimi. Cushimi chapaj runa, paihua churarinara huacachij, ama llatan puringaj, shujcuna pai pingarishcara ama ricungaj.” 16 Chi rey apuunara tandachica shu pambai, hebreo shimii Armagedón nishca pambai. 17 Canzhis angel paihua vasura talica huairai. Ahua pacha templo huasimanda apu tiarinamandas shinzhi shimi rimashca uyarica, casna nisha: “Ña rashcami.” 18 Rayu limpiashcauna, shimiuna, rayu uyarishcauna tianauca, shinallara allpa shinzhira cuyuca, imasna allpa mana ima huras cuyushca sami runauna cai pachai causashca huraspi. 19 Atun llacta quinsa partii chaupirica, runauna llactauna tularinauca. Atun Babilonia llacta Diospa ñaupajpi iyarishca aca, Dios shinzhira piñarishca vinu vasura cuinta cungaj. 20 Tucui isla miticuca. Urcuuna mana tuparinauca. 21 Ahua pachamanda atun rasu paquiuna urmanauca runauna ahuai, caran paqui pichca chunga libra tupu llashaj. Runauna Diosta caminauca rasuhua turmindachishcamanda; cai turmindarina imamandas yali atun turmindus aca.
1 Canzhis vasura charij angelgunamanda shuj ñucajma shamuca. Ñucahua rimasha, casna nica: “Caima shami. Canda ricuchisha yapa tacarisiqui huarmi taripashcara, huarmi ashca yacu ahuai tiajta. 2 Cai pacha rey apuuna cai huarmihua tacarinaushcami, cai pachai causajcuna machanaushcami pai tacarinamanda vinuhua.” 3 Ispiritui ñucara pushaca shu runa illashca partima. Chihui shu huarmira shu puca animalbi tiajta ricucani. Puca animalga ashca Diosta piñachina shutiunahua undashca aca, canzhis umayuj, chunga curnusyuj aca. 4 Huarmi yana pucahua ali pucahuas churarishca aca; curihuas, chiú chiú ricurij rumiunahuas, perla muyuunahuas sumajyachishca aca. Paihua maquii shu curi vasura charica, vasu ima ismuhuas, pai tacarina irushuas undashca aca. 5 Paihua urintii shu shutira quillcashca aca: PACASHCA SHIMI, ATUN BABILONIA, TACARISIQUI HUARMIUNA MAMA, CAI PACHA IRUSGUNA MAMA. 6 Huarmira ricucani, quirijcuna yahuarhua machashca aca, Jesústa llaquishcamanda huañushcauna yahuarhuas. Ñuca paita ricusha ashcara manzharicani. 7 Angel ñucara nica: “¿Imarasha manzharingui? Ñuca canda cuintasha cai huarmimanda rimaj pacashca shimira, paita aparij canzhis umayuj chunga curnusyuj animalmanda. 8 Can ricushca animal tiauca, cuna illanmi, atun ucu uctumanda sicanga, ucu pachama ringa. Cai pachai causajcuna, maicanguna paiguna shutira mana quillcashcara charijcuna causana quillcai mundu callarishcamanda pacha, caiguna manzharinaunga animalda ricusha, ñaupa tiajta, cuna illajta, cuti tianaras. 9 Cai shimira iyaiyuj runa iyarinami: Cai canzhis umauna canzhis urcuunami, chi urcuuna ahuai huarmi tiarin. 10 Shinallara canzhis rey apuunami anaun. Paigunamanda pichca ña urmanaushca, shuj tiaun, shuj chara mana shamushcachu, pai shamusha ansahuallara durana anga. 11 Ñaupa tiaj animal, cuna illaj, shinallara pusaj aj rey apu tucunga. Pai shinallara chi canzhiscunamandami. Ucu pachama rin. 12 Shinallara can ricushca chunga curnuscuna chunga rey apuunami. Chara mandana llactara mana apinaushcachu. Shina ajllaira shu huras tupura mandanara apinaunga rey apuuna cuinta animalhua pariju. 13 Caiguna chi tunulla iyaiyuj anaun, paiguna ushaira mandanaras animalma cunaungami. 14 Buriguhua macananaunga, Burigu paigunara vinsingami. Burigu señorgunamanda Señormi, rey apuunamanda Rey Apumi. Paihua pariju tiajcuna cayashcaunami, ajllashcaunami, sirtu quirihuajllami. 15 Shinallara angel ñucara nica: “Can ricushca tacarij huarmi tiarishca yacuuna caigunami, runauna, intiuna, llactauna, shimiuna. 16 Can animalbi ricushca chunga curnuscuna tacarij huarmira chijninaunga, huarmira illajtas llatandas saquinaunga, paihua aichara micunaunga, ninahua paita rupachinaunga. 17 Dios paiguna shungüi churaca pai munashcara pactachingaj, paiguna shina iyaringaj, paiguna mandanara animalma cungaj, Dios rimashca shimiuna pactaringagama. 18 Can ricushca huarmi atun llactami, cai pacha rey apuunara mandaj.”
1 Caimanda huasha, shu angelda ahua pachamanda irgumujta ricucani, ashca ushaihua shamuca. Cai pachara paihua sumajhua punzhayachishca aca. 2 Shinzhi uyarij shimihua caparisha nica: “Urmashcami atun Babilonia llacta, urmashcami. Supaiguna causana tucushcami, ima sami irus supais causana, ima irus chijnihuaj pishcuunas causana. 3 Tucui llactauna paihua tacarishcamanda urti vinura cuinta upinaushca. Cai pacha rey apuuna paihua tacarinaushca. Cai pacha catujcuna paihua gustu munanaita charishcaunamanda charij tucunaushca.” 4 Shu shimira mas ahua pachamanda rimaujta uyacani: “Paimanda llucshichi, ñuca inti, ama llutaringaj pai ucharashcaunai, paihua turmindustas ama apingaj. 5 Pai ucharashcauna ahua pachagama pactanaushcami. Dios pai manali rashcaunara iyarishcami. 6 Paima cuichi imasna pai shujcunara cuca; pai rashcaunamanda ishqui cuti masta pagaichi; pai upinara alichina vasui, ishqui cuti masta alichichi pai upingaj. 7 ”Imasna paillara ahuayarica, ima munanaita gustashcahuas causasha, shina tupura paita cuichi turmindarinaras huacanaras; imasna nica paihua shungüi: ‘Tiauni reina huarmi apu cuinta, mana huaccha huarmichu ani, ima huacanaras mana ricushachu.’ 8 Chiraigumanda shu punzhallai paihua turmindarinauna shamunaunga: huañuna, huacana, yarcais; ninahua rupachishca anga, paita taripaj Señor Dios ushaj ashcamanda. 9 ”Cai pachai tiaj rey apuuna, paihua tacarijcuna, paihua pariju ima munanaita gustashcaunahua causashcauna, huacanaungami; paimanda llaquirinaunga, llacta rupashcamanda cushnira ricusha. 10 Carui shayarisha, pai turmindarishcara manzharisha, ninaunga: ‘¡Ayailla, ayailla atun Babylonia llactamanda, shinzhi llacta, shu hurasllai canda taripana shamushcami!’ 11 ”Cai pachamanda catujcuna huacanaun, llaquirinaun paimanda, pihuas paiguna charishcaunara mana randijpi: 12 Curihua rashcaunara, cullquiras, valij rumiunaras, perlaunaras, ñutu linu llachaparas, yana puca llachaparas, seda llachaparas, puca llachaparas, tucui gustu asnaj caspiras, marfilhua rashcaunaras, valij caspihua rashcaunaras, pailaras, iruras, marmol rumiras, 13 ishpingu cararas, gustu asnaj ambiras, insinsuras, miraras, ulíbanuras, vinuras, asitiras, yuraj harina pulvuras, trigu muyuras, animalgunaras, buriguunaras, caballuunaras caritaunandi, sirvijcunaras, runauna almaunaras. 14 ”Camba shungu munashca micuna muyuuna cambajmanda anzhurinauca. Tucui ima munanaitas ima gustu ricurijpas ña illan, ima huraspas mana tupanguichu. 15 ”Caigunara catujcuna, ñaupa huras llactamanda charij tucujcuna, carui shayanaunga, huacasha, llaquirisha, llacta turmindarishcara manzhasha. 16 Casna nisha ninaunga: ‘¡Ayailla, ayailla, atun llactamanda! ¡Ali yuraj linu llachapahua churarishca aca, yana pucahuas, ali pucahuas sumajyachishca aca, curihuas, valij rumiunahuas, perlaunahuas!’ 17 Shu hurasllai ashca valijcuna chingarinaushca.”Tucui barcura pushaj, tucui barcui purijcuna, tucui barcui tarabajcuna, tucui lamarbi tarabajcunas carui shayanauca. 18 Llacta rupashcamanda cushnira ricusha, caparinauca: ‘¿Maican llacta cai atun llacta cuinta aca?’ 19 Paiguna umai pulvura shitanauca. Huacasha, llaquirisha caparinauca: ‘¡Ayailla, ayailla, atun llactamanda! Tucui lamarbi barcuunara charijcuna chi llactai charij tucunauca pai charishcaunamanda. Shu hurasllai tularishcami.’ 20 Cushiyaichi paimanda, ahua pacha, shinallara canguna, quirijcunas, cachashca runaunas, Diosmanda rimajcunas. Dios cangunajta ali dirichura rashcami paihuajpi.” 21 Shu shinzhi ushaj angel shu rumira apica, atun cutana rumi cuinta; rumira lamarbi shitaca, casna nisha: “Shinallara tulashcami anga Babilonia atun llactara. Ima huraspas mana cuti tuparingachu. 22 Arpa tucajcuna shimi, música, pingulluunas, curmitaunas mana cuti uyarinaungachu cambajpi. Ima maquihua tarabaj runas mana cuti tuparingachu cambajpi. Ima cutasha tulupushcas mana cuti uyaringachu cambajpi. 23 Ima vila purus cambajpi mana cuti punzhayachingachu. Ima cari shimis ima huarmi shimis mana cuti uyaringachu cambajpi. Camba catujcuna mundui atun runauna anauca. Astaun can sagrashcaunamanda tucui llactaunara umachishca anauca. 24 Paihuajpi Diosmanda rimajcunamanda quirijcunamanda tucui cai pachai huañushcaunamanda yahuarda tupanauca.”
1 Caimanda huasha ashca runauna shinzhira capariuta uyacani ahua pachai.”¡Diosta alabaichi!” ninauca.”Quishpinas, ahuayachishcas, ali sumajpas, ali ushais ñucanchi Señor Diospajmi. 2 Pai taripashcauna sirtumi, alimi, imasna atun tacarisiqui huarmira taripashcami, cai pachara huajlichijta pai tacarishcaunahua. Diosta sirvijcuna yahuarda, tacarij huarmi maquihua talishcara, cutipashcami.” 3 Cutillara “¡Diosta alabaichi!” ninauca.”Paihua cushni huiñai huiñaigama sicasha rin.” 4 Ishqui chunga chuscu cuiraj rucuuna, chuscu causajcunandi, tuama urmanauca, apu tiarinai tiaj Diosta aduranauca, casna nisha: “¡Amen! ¡Diosta alabaichi!” 5 Apu tiarinamanda shu shimi uyarica, casna nishca: “Ñucanchi Diosta alabaichi, tucui paita sirvijcuna, paita manzhajcuna, ichillaunandi, atungunandi. 6 Ashca runa shimiuna cuinta rimashcara uyacani, ashca yacuuna cuinta huactarishcaras, atun rayuuna cuinta uyarishcaras, casna nisha: “¡Diosta alabaichi, ñucanchi Tucuira Ushaj Señor Dios mandanmi! 7 Cushiyashunchi, cariyashunchi, paita ahuayachishunchi. Burigu burana huras pactamushcami, paihua huarmi ña puruntushcami.” 8 Huarmira cushca aca gustu inu linu llachapahua churaringaj, sumajlla, chiujlla. Chi inu linu llachapa quirijcuna ali rashcaunami. 9 Angel ñucara nica: “Quillcai: ‘Cushiunami Burigu bura micunama cunvirashcauna.’ “ Ñucara nihuaca “Cai shimiuna Dios sirtu rimashcami.” 10 Ñuca paihua chaquii tuama urmacani, paita adurangaj. Paiga, “Ama casna raichu,” nica, “ñuca canhua pariju sirvij ani camba uquiunahua, paiguna Jesúspa shimira huacachijcunami. Diosllara aduraichi. Jesúsmanda cuintana shimi Diosmanda rimashca shimi almami.” 11 Shinajpi ahua pacha pascashcara ricucani. Shu yuraj caballu ricurimuca, caballui tiajpa shuti Quirihuajmi, Sirtumi, aca. Pai ali taripanahua taripan, macanaun. 12 Paihua ñahui muyu nina cuintami aca. Paihua umai ashca rey apu llaituuna tianauca. Shu shuti quillcashcara charica, pihuas mana ricsicachu, pailla ricsij aca, 13 Paihua churarinara yahuarhua tinishca aca. Paihua shuti: DIOSPA SHIMI. 14 Ahua pacha suldaruuna, inu linu llachapahua churarishca anauca, yuraj, chiujlla. Paita catinauca yuraj caballuunai. 15 Paihua shimimanda shu ilu ispara llucshica, llactaunara chugrichingaj, Paigunara mandangami iru varahua, Pai Tucuira Ushaj Diospa piñarina urti vinu chahuanara aitanmi. 16 Paihua churarinais, paihua changais shutira quillcashca tiaca: REY APUUNAMANDA REY APU, SEÑORGUNAMANDA SEÑOR. 17 Shu angel indii shayajta ricucani. Shinzhi shimihua caparisha, tucui ahua huairai huamburij pishcuunara cayaca: “Shamichi, Diospa atun micunama tandarichi, 18 rey apuuna aichara micungaj, capitanguna aicharas, shinzhiuna aicharas, caballuuna aicharas, muntajcuna aicharas, tucuiguna aicharas, lugarguna ajtas, sirvijcuna ajtas, ichillauna ajtas, atunguna ajtas, paiguna aichara micungaj. 19 Ñuca Animalda ricucani, cai pacha rey apuunandi, paiguna suldaruunandi macanaungaj tandarishcaunara, caballui tiajhua paihua suldaruunahuas macanaungaj. 20 Animalda apishca aca, paihua pariju llulla rimajndi. Pai munanaita rashcaunara raj aca Animalba ñaupajpi, casna rasha Animalba siñalda apijcunara pai cuinta ricurijta alabajcunaras umachica. Cai ishquiunara causajta azufrihua sindij nina cuchai shitashca anauca. 21 Chishujcuna caballui muntaj shimimanda llucshij isparahua hauñuchishca anauca. Tucui pishcuuna sacsajta micunauca paiguna aichara.
1 Shu ahua pachamanda irgumuj angelda ricucani, atun ucu uctu llavira charijta. Atun cadenara charica paihua maquii. 2 Dragunda apica. Cai dragún callarimanda machacui aca, supai apu Satanás. Paita shu huaranga huatagama huataca. 3 Angel paita atun ucu uctui shitaca. Chihui paita ishcaca, sellura churasha, pai llactaunara ama cuti umachingaj huaranga huata pactaringagama. Chimanda huasha cacharina aca ansa ratuhuara. 4 Apu tiarinaunara ricucani. Chihui tiajcunama taripana ushaira cushca aca. Jesúspa shutira rimashcamanda Diospa shimimandas cungara pitishcauna almaunara ricucani. Caiguna Animaldas pai cuinta ricurijtas mana adurajcuna anauca, shinallara paihua siñalda mana charinauca urintiis maquiis, Caiguna causanauca, shinallara mandanauca Cristohua pariju huaranga huatara. 5 Randi chishu huañushcauna mana cuti causanaucachu huaranga huatauna pactaringagama. Caimi ñaupa causarina. 6 Cushimi, sumajmi ñaupa causarinai causarij runa. Ñaupa huañunamanda huasha huañuna caigunahua ushaira mana charingachu, astaumbas caiguna Diospaj Cristoj sacerdoteuna anaungami. Rey apuunasna paihua pariju mandanaungami huaranga huataunara. 7 Chi huaranga huata pasashca huasha, Satanás pai uctui ishcashcamanda cacharishca anga. 8 Llucshingami tucui mundui tiaj llactaunara umachingaj, Gog llactara Magog llactaras, paigunara macanaunama tandachingaj. Paigunara yupajpi, lamar tiyu cuinta anauca. 9 Allpa tapajta sicamunauca, quirijcuna campamintura llaquishca llactaras muyujta shamunauca. Diospajmanda nina ahua pachamanda urmamusha paigunara tucuchica. 10 Paigunara umachij supai apu azufrihua sindij nina cuchama shitashca aca. Chihui tianauca Animalndi llulla rimajndi. Chihui turmindarinaunga tutandi punzhandi huiñai huiñaigama. 11 Shu atun yuraj apu tiarinara ricucani, chihui tiajtas. Paihua ñaupajmanda cai pachas ahua pachas miticunauca. Paigunaj ima lugarbas mana tuparicachu. 12 Huañushcaunara ricucani, atungunaras, ichillaunaras. Diospa ñaupajpi shayanauca. Quillcaunara pascashca anauca. Shu quillcaras pascashca aca, causana quillca nishcara. Huañushcauna taripashca anauca, quillcaunai quillcashca tiaj tupura, paiguna rashca tupura taripashca anauca. 13 Lamar yacu paihuajpi tiaj huañushcaunara cuca. Huañuis, ucu pachas paigunajpi tiaj huañushcaunaras cunauca. Caran duiñu pai rashca tupura taripashca aca. 14 Huañunas ucu pachas nina cuchai shitashca anauca. Caimi ishqui cuti huañuna. 15 Maicambas paihua shutira causana quillcai mana quillcashcara charij, nina cuchama shitashca aca.
1 Mushuj ahua pachara mushuj cai pacharas ricucani. Ñaupa aj ahua pacha, ñaupa aj cai pachas ña illanauca, lamarbas illacami. 2 Ñuca, Juan, sumaj llactara ricucani, mushuj Jerusalenda, Diosmanda, ahua pachamandas irgumujta, imasna shu huarmi paihua carira tupangaj churarishca cuinta. 3 Ahua pachamanda shu shimira rimajta uyacani, casna nisha: “Diospa tabernáculo causana huasi runaunahua tian, Dios paigunahua causangami, paiguna paihua runauna tucunaungami. Diosllara paigunahua tianga, paiguna quiquin Dios tucusha. 4 Dios tucui iquira paiguna ñahuimanda pichangami. Ña huañuna illanga; huacanas, caparinas, nanais illangami. Ñaupa ajcuna ña pasanaushcami.” 5 Apu tiarinai tiaj: “Uyai,” nica, “tucuira mushujllara rauni.” Pai ñucara nica: “Quillcai, cai shimiuna quirihuajllami, sirtu shimiunami.” 6 Ñucara nica: “Ña rashcami. Ñuca Alfami ani, Omegas ani, callarinas, tucurinas ani. Upinaichijta yangamanda cuyauni causana yacu bujyumanda. 7 Vinsij tucuira apingami, ñuca paihua Dios tucusha, pai ñuca churi tucunga. 8 Astaun manzhaisiquiuna, mana quirijcuna, irusta rajcuna, huañuchijcuna, shujhua tacarijcuna, sagrauna, runa rashca diosta alabajcuna, tucui llullajcunas, ninahua azufrihua sindij nina cuchai anaungami. Caimi ishqui cuti huañuna. 9 Shu angel ñucama shamuca, pai chi canzhis puchucai turmindarinahua undachishca vasura charij angelgunamanda shuj. Angel ñucama rimaca, casna nisha: “Caima shami, pactachishca huarmira canda ricuchisha, Burigu huarmiraï.” 10 Ñucara Ispiritui shu atun ahua urcuma pushahuaca, atun sumaj Jerusalén llactara ricuchihuaca, ahua pachamanda Diospajmanda irgumujta. 11 Diospa sumajta charica. Paihua ricurina shu yapa ashca valij jaspe nishca gustu chiujlla pasajta ricurij rumi cuinta aca. 12 Llacta atun ahua rumi quinzhara charica, chunga ishqui punguyuj. Caran pungüi shu angel shayaca, shinallara caran pungu quillcashca shutira charica, Israelba chunga ishqui aillu shutira; 13 indi llucshinapurama quinsa pungu, ichaipurama quinsa pungu, uraipurama quinsa pungu, indi icunapurama quinsa pungu. 14 Llacta quinzha chunga ishqui rumi siquira charica. Cai rumiunai Burigu chunga ishqui cachashca runauna shutira quillcashca aca. 15 Ñucahua rimaj angel shu tupuna varara charica, curihua rashca, llactara tupungaj, paihua punguunandi, quinzhandi. 16 Llacta sunimas anzhumas chi tupulla aca. Llactara varahua tupuca, ishqui huaranga ishqui patsaj kilúmitru tupu aca; sunimas, anzhumas, ahuamas, tucui chi tupulla aca. 17 Paihua quinzhara tupuca, canzhis chunga ishqui rigra tupu aca, runa tupuna tunui; angel tupuna shinallara aca. 18 Llacta quinzha jaspe rumihua rashca aca, llactaga ali curihua, chuyaj vidriu cuinta aca. 19 Quinzha siqui rumiuna valij rumiunahua sumajyachishca anauca. Ñaupa siqui rumi jaspe aca, ishqui zafiro, quinsa ágata, chuscu esmeralda, 20 Pichca siqui rumi ónica aca, sucta cornalina, canzhis crisólito, pusaj berilo, iscun topacio, chunga crisopraso, chunga shuj jacinto, chunga ishqui amatista. 21 Chunga ishqui punguuna perlauna anauca, caran pungu shu perla. Llacta ñambi ali curihua rashca aca, vidriu cuinta pasajta ricurij. 22 Llactai, templo huasira mana ricucanichu; Tucuira Ushaj Señor Dios Burigundi paihua templo huasimi. 23 Llacta indiras quillaras mana ministinzhu paihuajpi punzhayachingaj. Diospa sumaj llactara punzhayachin, Burigus paihua vilami. 24 Quishpichishca llactauna pai punzhayachishcai purinaunga. Cai pacha rey apuuna paiguna sumajta paiguna ali shutiras apamunaunga llactama. 25 Punzha paihua punguuna mana ima huras ishcashcachu anaunga. Chihui tuta illan. 26 Llactauna sumajta, paiguna ali shutiras chima apanaunga. 27 Paihuajpi ima iruspas mana icungachu, ima huajlichijpas, ima llullajpas. Astaumbas, Burigu causana quillcai quillcashcaunalla chi llactai icunaunga.
1 Chimanda huasha, shu chuyaj causana yacura ricuchihuaca, chiujlla ricurij. Chi yacu Diospa Buriguhua tiarinamanda llucshica. 2 Llacta ñambi chaupi shungüi, yacu caran chimbama, causana yura shayaca. Yura chunga ishqui cuti muyura aparin, caran quilla shu tunu muyura. Yura pangauna llactaunara alichina aca. 3 Maldisiana ña illangami. Diospa Buriguhua apu tiarina chihui tianga. Paita sirvijcuna sirvinaunga. 4 Paihua ñahuira ricunaungami, paihua shutira charinaungami paiguna urintii. 5 Tuta ña mana tiangachu chihui. Vila purus indis mana ministirinzhu punzhayachingaj. Señor Dios paigunara punzhayachinga; huiñai huiñaigama mandanaungami. 6 Angel ñucara nica: “Cai shimiuna quirinallami, sirtumi. Señor, rimajcuna ispirituuna Dios, paihua angelda cachashcami paita sirvijcunara ricuchingaj uctalla tucunaunara.” 7 ”¡Uctalla shamunimi! Cushimi cai quillcai tiaj Diosmanda rimashca shimiunara huacachij.” 8 Ñuca, Juan, cai tucuira uyacani, ricucani. Cai tucuira uyashca huasha, ricushca huasha, ñucara ricuchij angelba chaquii tuama urmacani adurangaj. 9 Randi ñucara nihuaca: “Riqui, ama casna raichu; canhua pariju ñuca sirvij ani camba Diosmanda rimaj uquiunahua, cai quillcai tiaj shimiunara huacachijcunahuas. Diosta alabai.” 10 Angel ñucara nica: “Cai quillcai tiaj Diosmanda rimashca shimiunara ama ishcaichu selluunahua. Timpu mayanllaimi. 11 Manali runa chara manali achu; irus runa chara irus achu; ali dirichu runa chara alira rachu; chuyaj runa chara chuyaj achu. 12 Ñuca uctalla shamuni, ñuca pagana ñucahuami tian, caran duiñura pagangaj pai rashca tupura. 13 Ñuca Alfami ani, Omegas ani, callarinas, tucurinas, ñaupa aj, puchucai ajpas. 14 Cushiunami churarinaunara tacsajcuna, dirichura charingaj causana yurama pactai ringaj, llacta punguunai icungajpas. 15 Astaumbas allcuuna canzhama tianaunga, sagraunandi, shujhua tacarijcunandi, huañuchijcunandi, runa rashca diosta alabajcunandi, tucui llullara llaquijcunandi rajcunandis. 16 ”Ñuca, Jesús, ñuca angelda cachashcani cai shimiunara cangunara rimangaj iglesiaunai. Ñuca Davidmanda angus mirais ani, tutamanda shinzhira ricurij istrillas ani.” 17 Ispíritus Corderu Huarmis, “Shami,” ninaun. Maican uyaj, “Shami,” nichu. Upinaichij shamuchu. Munaj causana yacura upichu, yanga munaimanda apisha. 18 Tucui cai quillcai quillcashca Diosmanda rimashca shimiunara uyajcunama nini: “Pi runas imaras yapasha cai shimiunara, Dios cai quillcai quillcashca turmindarinaunara paita cungami. 19 Pihuas cai Diosmanda rimashca shimiunara quillcashcamanda imaras apastajpi, Dios paihua shutira apastanga causana quillcamanda, sumaj llactamandas, cai quillcai quillcashcaunamandas.” 20 Cai shimiunara rimaj casna nin: “Sirtu pacha uctalla shamunimi.” Amen. Ari, shami, Señor Jesús. 21 Ñucanchi Señor Jesucristo gracia ali llaquina iyai tucui cangunhua tiachu. Amen.