Quichua: Chimborazo 1st John /1 Cancunamanca chai manaraj ima tiyajpi tiyajmantami quillcanchij; Paitaca nucanchij nahuihuan ricurcanchijmi, uyarcanchijmi, pai ima shina cajtapish alli ricurcanchijmi; Nucanchij maquihuan japircanchijmi, Paica causaita cuj Rimashca shutimi. Causaita cujtaca Dios nucanchijman ricuchijpimi ricurcanchij; Paita ricushcatapish paica huinai causaita cuj cashcatapish huillajcunami canchij; Paica Yayahuanmi cashca; Paica nucanchijman ricurishcami. Taita Dioshuantaj paipaj Churi Jesucristohuantaj nucanchij shuj yuyailla cashca shinallataj cancunapish nucanchijhuan shuj yuyailla cachun nishpami, imata ricushcata uyashcataca cancunamanca huillacunchij. Chashna cajpimi caicunataca cancunamanca cushijlla cachun nishpa quillcanchij. Jesucristo nucanchijman yachachishcatami cancunamanca huillacunchij; Cai huillanaca cashnami: Diosca achij luzmari, paipica ima amsaca mana tiyanchu. Paihuanmi shuj yuyailla canchij nishpapish, amsallapitaj causashpaca, mana llullashpa huillashcapi nishcata mana rurashpaca llullanchijmi. Diosca luzpi cashca shinallataj nucanchijpish luzpi causashpaca, caishuj chaishujhuan shuj yuyaillami canchij; Chashna cajpica Diospaj Churi Jesucristopaj yahuarmi nucanchij tucui juchacunataca anchuchin. Ima juchata mana charinchijchu nishpaca, nucanchij quiquinllataj umarishca tucushpami chashnaca ninchij; Chashna cajpica mana llullashpa huillashcapi nishca shina causana yuyaica nucanchijpica mana tiyanchu. Shina cashpapish nucanchij juchacunata huillajpica Diosca imatapish pajtachij, cashcata ruraj cashcamantaca juchacunataca perdonangami, tucui ima millaitapish anchuchigami. Mana ima juchayuj canchijchu nishpaca, Diostamari llulla cashcata ruranchij; Paipaj Shimi nishca shina causana yuyaipish nucanchijpica mana tiyanchu. /2 Nuca c'uyashca huahuacuna, cancunaca ima millaita ama rurachun nishpami caicunataca quillcani; Shina cajpipish maijanpish ima millaita rurashpaca, Yayahuan rimajta charinchijmari; Paica imatapish cashcata ruraj Jesucristomi.