Quichua: Tena - Jesuscristomanda Ali Shimi Juan Cuentashca


CAUSAJ SHIMI AICHA TUCUN

/1 Callari tiempoi Rimashca Shimi nishca tiaj aca. Cai Rimashca Shimi Dioshua
pariju tiaj aca. Cai Rimashca Shimi Dios aca.

2 Callari tiempoi Dioshua pariju tiaj aca.

3 Tucui rashcauna pai rashcami aca. Pai illaj mana unas rashcachu aca.

4 Paihuajpi causai tiaca. Cai causaiga runaunara punzhayachina aca.

5 Cai punzhayachina llandu tutara punzhayachin, astaun llanduga
punzhayachinara mana llanducachu.

6 Shu Dios cachamushca runa, Juan nishca, tiauca.

7 Cai Juanga shamuca cai punzhayachinara ricsichingaj, pai rimashcamanda tucui
runauna quirinauchu.

8 Juan mana cai punzhayachinachu aca, astaun cai punzhayachinara ricsichingaj
shamucami.

9 Chi cierto punzhayachina, tucui runaunara punzhayachij, cai pachama
shamuuca.

10 Paiga cai pachai tiaca. Cai pacha pai rashcami aca. Astaun cai pacha paita
mana ricsicachu.

11 Paihuajma shamuca, randi paihuajguna mana paita chasquinaucachu.

12 Astaumbas tucui paita chasquijgunara ushaira cuca Diospa churiuna tucungaj,
maicans paihua shutii quirisha.

13 Caiguna mana yahuarmanda, mana runa aichamandas, niana runa munaimandas
inachishca anaun. Astaun Diospa munaimandalla inachishca anaunmi.

14 Cai Rimashca Shimiga runa tucuca, nucanchihua pariju causaca. Paihua
sumajta ricucanchi, Yaya Diospa sapalla churi sumaj cuenta. Paiga gracia
nishca ali iyaihua undashca aca; ima llullanas illaca paihua.

15 Juan paimanda rimasha, caparisha nica: Caimi nuca rimaushca runa, iiuca
huashai shamuj nucamanda yalimi, nisha, pai nucamanda naupa ashcaraigu.

16 Pai ashcara charishcamanda tucui nucanchi apishcanchi, maspas paihua mana
tucurihuaj gracia nishca ali iyairas.

17 Ley camachishca shimi Moisesmanda rimashca aca, randi gracia nishca ali
iyai cierto shimis Jesucristomanda shamunauca.

18 Pihuas imahoras Diosta mana ricushcachu. Paihua sapalla Churilla, Yayahua
pariju tiaj, pailla Diosta ricsichicami.

BAUTISAJ JUAN RIMAN

19 Caitaga Juan rimashcami, imahoras judioguna Jerusalen llactamanda
sacerdoteunara Levitas nishcaunandi cachanauca paita tapungaj: Pitanguiri can?
nisha.

20 Paiga rimaca, mana umachicachu, astaun ciertora rimaca: Nucaga mana
Cristochu ani, nisha.

21 Paitaga tapunauca: Shinajpiga, Imarai? Eliaschu angui?  nisha. Paiga: Mana,
nica. Diosmanda rimajchu angui?  ninauca. Paiga cutipaca: Mana.

22 Paita ninauca: Shinasha pitanguiri? Cuentahuai, nucanchira cachamujgunara
cutipangaj. Imara ningui can quiquinmanda?

23 Juan nica: Nuca runa illashca partimanda caparij shimi ani: Senorba nambira
dirichuyachichi, nisha, Diosmanda rimaj Isaias rimashcasna.

24 Cai cachamushca runauna fariseogunamanda anauca.

25 Shinajpi Juanda tapunauca: Imarasha bautisangui, nisha, can mana Cristo
asha, mana Eliaspas, mana Diosmanda rimaj ashas?

26 Juan paigunara cutipasha nica: Nucaga yacui bautisani; randi, canguna
chaupi shungui shu canguna mana ricsishca runa tiaun.

27 Caimi nuca huashai shamuj. Paiga nucamanda yalimi.  Paihua zapatos huascara
pascanallas mana valijchu ani.

28 Caiguna Betabara nishca llactai tucuca, Jordan yacu chim- bara, Juan
bautisaushcai.

DIOSPA BORREGO

29 Cayandi punzha Juan Jesusta paihuajma shamuuta ricuca. Pai Jesusta ricusha:
Caiga, nica, Diospa Borrego, cai pacha uchara llushpichij.

30 Caimi nuca rimaushca runa: Nuca huashai shamuj, paiga nucamanda yalimi, pai
nucamanda naupa ashcaraigu, nisha.

31 Paita mana ricsicanichu; astaun Israelma paita ricsichingaj, iiuca yacui
bautisasha shamucani.

32 Shinallara Juan nica: Espiritura urpisna ahua pachamanda irgumujta
ricucani; paihua ahuai tiauca.

33 Nucaga paita mana ricsicanichu; randi, nucara yacui bautisangaj cachamuj,
paiga nucara nihuaca: Maicamba ahuai Espiritu urmashcara ricungui, paiga Santo
Espirituhua bautisajmi.

34 Paita ricucani. Ciertora rimashcani: Caimi Diospa Churi, nisha.

NAUPA PUNDA YACHACHISHCA RUNAUNA

35 Cayandi punzha, Juan cuti chihui tiauca, ishqui pai yachachishca
runaunandi.

36 Juan Jesusta chihui puriuta ricuusha: Caiga Diospa Borregomi, nica.

37 Chi ishqui yachachishca runauna pai rimashcara uyanauca; Jesusta catinauca.

38 Jesus voltiarisha, paita catijgunara ricuca. Imara mas- canguichi? nica.
Paiguna cutipasha ninauca: Rabi, (caita runa shimii, Yachachij nin) maibira
causaungui?

39 Jesus: Ricuj shamichi, nica. Paiguna rishaga, pai tiaush- cara ricunauca.
Las cuatro mayan tucujpi paihua pariju saqui- rinauca chi punzhai.

40 Cai ishqui Juan rimashcara uyajguna, Jesusta catimujguna, cai ishquimanda
shuj Andres maca, Simon Pedro uqui.

41 Paiga paihua uqui Simonda naupa punda tupasha, paita nica: Mesias nishcara
tupashcanchi; caita runa shimii Cristo nin.

42 Andres paihua uqui Simonda Jesusma pushamuca. Jesus paita ricusha: Can
Simon angui, Jonaspa churi, nica, canda Cefas shutichishca angui; caita Pedro
nin.

JESUS FELIPERA NATANAELDAS CAYAUN

43 Cayandi punzha Jesus Galilea partima risha nica. Paiga Felipera tupasha,
paita nica: Nucahua catihaui.

44 Felipe Betsaida llactamanda runa aca. Shinallara chi llacta Andres Pedros
causaushca llacta aca.

45 Felipe Natanaelda tupaca; paita nica: Moises pai camachishca shimii
quillcaushca runara tupashcanchi. Diosmanda rimajguna shinallara paimanda
quillcanauca. Paimi Nazaretmanda Jesus, Jose churi.

46 Natanael nica: Nazaretmanda ima alira shamunara ushangachui? Felipe
cutipaca: Ricuj shami, nisha.

47 Jesus Natanael paima shamushcara ricusha, Natanaelmanda rimasha nica: Cai
runa cierto Israel runami, pai mana umachijchu.

48 Natanael paita nica: Maimanda ricsihuanguichu nucara?  Jesus cutipasha:
Felipe canda manara cayajllaira, can higo yura ucui shayaushcai, canda
ricucani, nica.

49 Natanael cutipasha rimaca: Rabi, Yachachij, nisha, can Diospa Churi angui,
can Israel Rey apu mangui.

50 Cutipasha, Jesus paita nica: Nuca canda higo yura ucui ricucani nishcamanda
quiriungui? Caigunamanda yaliunara ricunguimi.

51 Jesus nica: Cierto pacha cangunara nini: Caimanda huasha ahua pacha
pascashcara ricunguichi; Diospa angelguna Runa Churi ahuai sicasha irgusha
rajgunara ricunguichimi.

BORARA RAUN CANA LLACTAI

/2 Quinsa punzha tucunahua, borara ranauca Cana llactai.  Cana Galilea partii
tiaca. Jesuspa mama chi borai tiauca.

2 Jesus pai yachachishca runaunandi borama convirashca anauca.

3 Borai, vino pishijpi, Jesuspa mama paita nica: Vino illan.

4 Jesus paita nica: Huarmi, imarasha casna rimahuangui?  Nuca horas chara mana
pactamunzhu.

5 Paihua mama sirvijgunama nica: Tucui pai ima rimash- caras ranguichi.

6 Chihui socta atun rumi quisauna tianauca, judioguna armana yachai tono,
caran quisa quinsa manga tupu aca.

7 Jesus paigunara nica: Quisaunara undachichi yacuhua.  Shinajpi undajta
undachinauca.

8 Shinajpi paigunara nica: Llucchichi cuna; borayuj duenoma apaichi.
Apanaucami.

9 Cai yacumanda rashca vinora camashca huasha, borayuj dueno maimanda
apamushcara mana yachasha, randi yacura llucchij sirvijguna yachanaucami, pai
carira cayaca.

10 Carira nica: Tucui runa naupa punda ali vinora upichin; pactajta upishca
huasha yanga vinora cun; randi can ali vinora cunagama huacachishcangui.

11 Cai naupa punda munanaita ricurinara Jesus Galileai tiaj Cana llactai
rarcami, paihua sumajta ricuchisha. Pai yachachishca runauna paihuajpi
quirinauca.

12 Caimanda huasha Capernaum nishca llactama irgunauca, paihua pariju paihua
mama, paihua uquiuna, pai yachachishca runaunandi. Mana ashca punzhauna chihui
tianaucachu.

CATUJGUNARA ICHUN TEMPLOMANDA

13 Judioguna Pascua ista mayanllayauca. Jesus Jerusalennia sicaca.

14 Templo huasii huagrara borregora urpira catujgunara tupaca; shinallara
cullquira turcajguna chihui tiajtas tupaca.

15 Jesusga huascaunara ahuasha azutinara rarcami. Tucui chigunara templomanda
ichuca, borregounandi, huagraunandi.  Shinallara turcajguna cullquira allpama
talica, paiguna mesaunaras voltiachica.

16 Urpira catujgunara nica: Llucchichi cai tucuira. Nuca Yaya huasira ama
catuna huasira raichichu.

17 Shinajpi pai yachachishca runauna naupa horas quillcashcara iyarinauca,
imasna nin: Camba huasira llaquina tucuchihuanmi.

18 Judiogunaga paita cutipanauca, nisha: Ima munanaita ricurinara
ricuchihuanguichu cai tucuira rashcamanda?