Yowane Babatiso kana paisowa
1 Yesu Keliso Yaubada natuna wasana namwanamwana ye hetubu doha teina: 2 Yaubada yona hedehedede wa Aisaiya peloweta yona buka unai, ye wane: “Yogu tautauwasa ya hetamali bagunaiyawa kowa yom keda ye kabinonohai.” 3 “Tamowai hesau balabala unai ye yogayoga ye wane, ‘Guiyau yona keda kwa kabinonohai, yo yona kabalau kwa hedudulai!’ ” 4 Unai Yowane ye laoma. Balabala unai ye miyamiya na ye hebahebabatiso. Taulaoma udiyedi ye lauguguya: “Nuwamiu kwa buidi, kabo Yaubada yomi yababa ye nuwatugabaedi. Yomi nuwabui ne kaba hemamohoina ede babatiso.” 5 Yudeya kasa taumiyaidi yo Yelusalema unai taumiya se lau iya unai. Yodi yababa se hededehemasalahadi, na Yolidani sagasagana unai ye hebabatisoidi. 6 Yowane kana kwama kamela wiyana unai se ginauli na kana dagilolo meta suisui dahina. Na kana kai meta mwadimwadi yo kamwakamwa. 7 Ye hededehemasalaha ye wane, “Tamowai hesau kabo ye mulitama. Iya ye sae kalili na kabo yau. Na nige gonowagu taba ya dunedobi iya kana buti mainadi ya yailidi. 8 Yau waila unai ya hebabatisoigomiu, na iya kabo Yaluwa Tabuna unai ye hebabatisoigomiu.”
Yesu yona babatiso yo yona laukita
9 Tem huyana ne unai Yesu Galili magaina hesau hesana Nasaleta unai ye laoma ede Yowane ye hebabatisoi Yolidani sagasagana unai. 10 Waila wa unai ye gayo ye sae na kabo ye kitasae galewa ye kita ye taigali, na Yaluwa Tabuna kana kao doha bunebune ye dobima iya kewana ne unai. 11 Na kalina hesau galewa ne unai ye laoma na ye wane, “Kowa natugu! Ya gadosisi kaliliyego yo nuwagu ku henamwa kaliliyei!” 12 Mahanana ne unai Yaluwa Tabuna Yesu ye hetamali ye lau balabala unai. 13 Mayadai 40 balabala unai suisui kaikaikalasidi kalidi wai ye miya. Na Satani Yesu ye laukita, na kabo anelu iya se kitahetete.
Yesu tauyamayama hasi ye yoganedi
14 Huya hesau Heloda wasawasa Yowane ye gudui numa tutugudu unai. Kabotaki Yesu ye lau Galili Yaubada wasana namwanamwana ye lauguguyaei, 15 ye wane, “Huya wa ye lagemako, Yaubada yona basileiya ye hanahanaumako. Nuwamiu kwa buidi yo wasa namwanamwana ta kwa kawamamohoiyei.” 16 Huya hesau Yesu Galili Gabwana dedekana wa unai ye yona ye laulau ede tauyamayama labui ye kitadi, Simona ma kana kaha Andeleya yodi hinaya unai se yamayama. 17 Na kabo ye yoganedi ye wane, “Kwa saema kwa hemuliwatanigau, na kabo ya hekatagomiu tamowai tauyamayamaidi.” 18 Na mahanana ne unai se dahalai yodi hinaya se laugabaedi na iya se hemuliwatani. 19 Yesu ye taulau na kabo Sebedaiyo natunao labui Yowane yo Yamesi ye kitadi yodi waga unai yodi hinaya se polapolaidi. 20 Na ye yogalau yodi labui wa udiyedi na waga wa se pesagabaei, na tamadi Sebedaiyo ma kana hewahewaliyo se laugabaedi na Yesu se hemuliwatani.
Yesu Kapelenauma unai yaluwa yabayababana ye hedede hepesa
21 Yesu yona hekahekatao maiyanao se lage Kapelenauma unai, na kabo Sabati unai ye mwalaesae sunago unai, na ye hetubu ye lauhekata. 22 Yona lauhekata wa se nokoei, matawuwuna ye hedede hasahasaidi ma gigibwalina, nige doha laugagayo taulauhekata tamowaidi. 23 Sunago wa kalona wai tamowai hesau. Yaluwa yabayababana iya ye luwui na ye yogayoga 24 ye wane, “Yesu Nasaleta tamowaina! Ku laoma inai kam paisowa saha? Bena ku hetatagwaligwaligai! Kabim ya kata kowa Yaubada yona hetabu tamowaina ede.” 25 Na Yesu ye hededebayao iya unai ye wane, “Ku mwanou na tamowai me ku pesagabaei!” 26 Yaluwa yabayababana wa tamowai wa ye nukui, na ye yogahi yo ye pesagabaei. 27 Siya maudoidi se noko na se henahenamai uyoidi se wane, “Teina ta saha? Teina ta lauhekata hauhauna? Yona gigibwali yena ye hededelau yaluwa yabayababadi udiyedi, na se kawakabiyei!” 28 Nige bayaona iya wasana ye lau Galili maudoina ye hetakikili.
Yesu tamowai gwaudi ye henamwanamwadi
29 Sunago unai se pesa se lau Simona ma kana kaha Andeleya yodi numa unai se mwalae, Yamesi yo Yowane maiyadiyao. 30 Simona bwasiyana waihiu ye kasiyebwa tauna se gigibwali kalili, unai se hededelau Yesu unai. 31 Ede ye laoma na ye kabilau nimana ne unai na ye kabihetolo. Na waihiu wa ye namwanamwa na kabo kadi kai ye moseidi. 32 Mahana wa ye dui kabo taukasikasiyebwa gwaudi yo hinage tamowai yaluwa yabayababadi siya se luwuidi wa se woyaidima Yesu unai. 33 Magai tamowaidiyao boda lakilaki se lagegogoi numa kawamatana wa unai. 34 Tamowai kadi kasiyebwa udoi udoi ye henamwanamwadi. Yo yaluwa yabayababadi gwaudi ye hedede hepesadi na ye hedede hekaiyawasidi tabu se hedehedede, matawuwuna ede iya kabina se katako.
Yesu Galili unai ye lauguguya
35 Malatomtom gagilina Yesu numa wa ye laugabaei na ye lau balabala hesau unai ye tapwalolo. 36 Na Simona ma kana kahao se lau iya se wasenei. 37 Yesu se lobai ede se hededelau unai se wane, “Tamowai maudoidi se wasewaseneigo!” 38 Na ye hededelau udiyedi ye wane, “Taba ta lau magai hekadiyo udiyedi hinage ya lauguguya. Teina hesabana ede ya laoma ta.” 39 Galili se tauhetakikili, na Yesu ye lauguguya sunago udiyedi, yo hinage yaluwa yabayababadi ye hedede hepesadi.
Yesu taulepela hesau ye henamwanamwa
40 Tamowai hesau kana kasiyebwa lepela ye laoma Yesu unai ye tulibono na ye kaibwada katekamkamna ye wane, “Ena ku henuwa kabo ku henamwanamwagau.” 41 Yesu tamowai wa ye katekamkamnaei na nimana ye helelelaei ye kabilau unai, na ye hededelau iya unai ye wane, “Ya henuwa, kowa kabo ku namwanamwa.” 42 Na mahanana ne unai kasiyebwa lepela wa ye ulu gehe na tamowai wa ye namwanamwa. 43 Na Yesu ye hededebayao iya unai ye wane, 44 “Tabu tamowai hesau yona ku hedehedede. Na ku lau taukaitalasam unai ku hemasalahago na ye kitasipwaigo. Na kabo heꞌaꞌa kaitalasamdi Mose ye hedede wa ku ginaulidi, na kabo tamowai se kitago meta ku namwanamwako.” 45 Na tamowai wa ye pesa ede ye lau wasana wa ye hededehemasalaha yo ye helaki. Unai Yesu nige gonowana ye taumasalaha magai udiyedi, na balabala gaibu udiyedi ye miya. Na teha maudoina tamowaidi se laoma iya unai.
Yesu tamowai bunibunina hesau ye henamwanamwa
1 Mayadai hisa se lau, na kabo Yesu ye uyo Kapelenauma. Wasana se lapui ede 2 tamowai gwaudi se laoma Yesu yona kabamiya unai. Na numa wa nige solasolana hesau, gonogonowana doha hinage dagela wa. Na Yesu wasa namwanamwana ye lauguguya udiyedi. 3 Na tamowai hasi se laoma taubunibuni hesau se baheiyama Yesu unai. 4 Boda ye laki kalili to nige gonowana se sae Yesu unai. Ede gatowa se bolilapai taubunibuni wa ma diyadiyalina se hedalolo dobiyei Yesu unai. 5 Yesu tamowai wa yodi sunuma ye kitadi, unai ye hededelau taubunibuni wa unai ye wane, “Natugu, yom yababa wa ya nuwatugabaedi.” 6 Na laugagayo taulauhekata hekadiyo se tutuli se bom se nuwanuwatu se wane, 7 “Tamowai ne tabu tenem doha ye hedehedede! Yaubada ye hededeheyababa! Yaubada ye bom mo gonowana yababa ye nuwatugabaedi!” 8 Na Yesu saha se nuwanuwatui wa kabina ye katako, unai ye hededelau udiyedi ye wane, “Idohagi to yomi nuwanuwatu doha temeta? 9 Hedehedede sahasahana ye biga kabo ya hedede taubunibuni ta unai: ‘Yom yababa ya nuwatugabaedi’, o ya wane, ‘Yom dam ku bahei na ku lau’? 10 Ya henuwa bena kwa nuwatulobai meta Tau Natuna yona gigibwali kaiyaulina ta unai meta gonowana yababa ye nuwatugabaedi.” Na ye hededelau taubunibuni wa unai ye wane, 11 “Ku tolo, yom dam ne ku bahei na ku lau yom numa.” 12 Iya kabo ye dahalai yona dam wa ye bahei. Maudoidi matadi yena ye lau, na kabo siya se nokoei yo Yaubada se hedebasae se wane, “Teina laulau ta huya wa nige ta kitakita!”
Lewi kana yoga
13 Yesu ye uyo Galili wailana dedekana unai, na boda lakilaki se lagegogoma iya unai, na ye hekatadi. 14 Ye gehe na ye taulau, ede Lewi Alepaiya natuna ye kita takisi kaba tanotano numana unai ye tutuli, na kabo ye hededelau iya unai ye wane, “Ku hemuliwatanigau!” Ede Lewi ye dahalai Yesu ye hemuliwatani. 15 Kabotaki Yesu maiyana hekahekatao se kaikai Lewi yona numa unai. Na takisi tautanotano yo yababa tamowaidi gwaudi Yesu se hemuliwatani wa maiyanao se kaikaigogo. 16 Laugagayo taulauhekata tamowaidi hekadiyo, siya Paliseya tamowaidi, Yesu se kita yababa tamowaidi yo takisi tautanotano maiyadi se kaikaigogo, na se hededelau yona hekahekatao udiyedi se wane, “Iya idohagi to takisi tautanotano yo yababa tamowaidi maiyanao se kaikaigogo?” 17 Yesu yodi hedehedede wa ye lapuidi kabo ye hededelau udiyedi ye wane, “Tamowai namwanamwadi doketa nige se nuwatuidi, na tamowai kasikasiyebwadi mo. Yau nige ya laoma tamowai laulau dudulaidi hesabadi, na tamowai yodi laulau yabayababadi mo, nuwadi bena se buidi.”
Lauhekata hauhauna yo kabikabi beyabeyadi
18 Yowane yona hekahekatao yo Paliseya yodi hekahekatao se kaihudi. Mayadaina ne unai tamowai hekadiyo se laoma Yesu unai se wane, “Yowane yona hekahekatao yo Paliseya yodi hekahekatao se kaikaihudi. Na kowa yom hekahekatao idohagi to nige se kaihudi?” 19 Yesu ye henamaiyedi ye wane, “Huyana tautawasola hauhau ma kana taumanao se miyamiya, kabo se kaihudi e nige? Nige! Huyana ne unai taba nige se kaihudi. 20 Na mayadaina kabo ye lagema iya kabo se laehesuwala. Tenem mayadaina ne unai kabo se kaihudi. 21 Nige tamowai hesau kwama hauhauna ye polai kwama beyabeyana unai. Taba kwama hauhauna ye polai kwama beyabeyana unai kabo beyabeyana tapulisina wa ye helaki. 22 Hinage nige tamowai hesau waina hauhauna ye ini waina pakuna beyabeyana kalona unai. Ena doha temeta, waina hauhauna kabo waina pakuna ye hesese kabo ye tapulisi yo waina wa ye bwalili. Na waina hauhauna mo ye inidobiyei waina pakuna hauhauna kalona ne unai.”
Yesu meta iya Sabati guiyauna ede
23 Sabati mayadaina hesau unai Yesu ye lulau witi koyana unai, na yona hekahekatao ma laulaudi witi kaniyodi se huhudi na se kaidi. 24 Paliseya tamowaidi se hededelau Yesu unai se wane, “Ku kita! Idohagi to mayadai Sabati laugagayona nige se lauwatani?” 25 Iya ye hededelau udiyedi ye wane, “Huyana Dawida ma kana kahao se hasali na saha Dawida ye ginauli wa kwa hasililobai o nige? 26 Abiyata iya taukaitalasam saesaena. Yona huya unai Dawida ye lusae Yaubada yona numa unai pwalawa tabudi wa ye kaidi, na hekadi hinage ye mosedi kana kahao se kaidi. Tenem pwalawa ne meta kai tabuna, na taukaitalasam se bom mo kabo se kai.” 27 Yesu ye hededelau udiyedi ye wane, “Yaubada Sabati ye ginauli tamowai yodi namwanamwa hesabadi. Tamowai nige Sabati yona. 28 Unai Tau Natuna iya Sabati guiyauna ede.”
Sabati unai Yesu ye kabihenamwanamwa
1 Sabati hesau Yesu ye mwalaesae sunago unai, na tamowai hesau nima yabayababana temenai. 2 Paliseya tamowaidiyao hekadi Yesu kana mata se wasenei, unai iya se kitasipwa namwanamwaei, kabo Sabati unai tamowai ne ye henamwanamwa e nige. Ena ye henamwanamwa, kabo unai se hegilu. 3 Kabo Yesu ye hededelau tamowai nima yabayababana wa unai ye wane, “Ku toloma.” 4 Na ye henamaiyedi ye wane, “Laulau saha ye namwa ede mayadai Sabati unai: namwa ta ginauli o yababa, ta kabihenamwa o ta kaiunu?” Maudoidi wa se mwanouhai. 5 Ye kita hetakikilidi, na ye kouyalayala yo nuwana ye yababa, matawuwuna ede se nuwakwailolo kalili. Na ye hededelau tamowai wa unai ye wane, “Nimam ku heleleyama.” Iya kabo nimana wa ye helelelaei, ede Yaubada nimana wa ye henamwanamwa. 6 Na kabo Paliseya tamowaidi se lau Heloda kana bodao maiyadiyao se koitalaliu idohagi Yesu bena kabo se unui.
Boda lakilaki Yesu se hemuliwatani
7 Na kabo Yesu maiyana hekahekatao se dahalai se lau Galili Gabwana unai, na Galili tamowaidi gwaudi se hemuliwatani. 8 Yesu saha ye ginauli wa wasana se lapui meta boda lakilaki teha Yudeya yo Yelusalema yo Idumeya yo Yolidani teha kaluwabu udiyedi yo hinage Taiya yo Sidona magaidi udiyedi se laoma iya unai. 9 Boda ye laki kalili unai madai Yesu se dudukahalaei, ede Yesu ye hededelau yona hekahekatao udiyedi bena waga gagilina se kabinonohai, unai bena kabo ye gelu. 10 Na taukasiyebwa gwaudi ye henamwanamwadiko, unai kabo tamowai kasikasiyebwadi maudoidi se dudu se lau bena se kabilau Yesu unai. 11 Na tamowai yaluwa yabayababadi kalidi yena wa iya se kita ede se tulibono iya talanuwana unai, na yaluwa yabayababadi wa se yogayoga se wane, “Kowa Yaubada natuna ede!” 12 Yesu kabo ye guguyaidi tabu se hededehemasalaha iya kaiteya.
Yesu yona hekahekatao saudoudoi-labui ye hetolodi
13 Yesu ye sae koya hesau tupina unai. Temenai kaiteyadi ye henuwadi wa ye yoganedi, se laoma iya unai. 14 Na Saudoudoi-labui ye kaisunuwaidi yo hesadi ye tole apostolo bena maiyanao se miya, yo bena kabo ye hetamalidi se lau se lauguguya. 15 Na yona gigibwali ye mosei siya udiyedi, kabo yaluwa yababadi se hedede hepesadi. 16 Teina saudoudoi-labui ye yoganedi wa hesadi ede: Simona, hesana hesau ye tole Petelo, 17 Yamesi ma kana kaha Yowane, Sebedaiyo natunao, hesadi ye tole Bowanele, meta kaniyona ede, ‘Tulutululu natunao’, 18 Andeleya, Pilipo, Batolomaiyo, Mataiyo, Tomasi, Yamesi Alepaiya natuna, Tadaiyo, Simona Tauhaikabi, 19 yo Yudasi Isakaliyota, iya ede Yesu kana tauwalohai.
Yesu kana bogao iya bena se woyahai
20 Kabo Yesu ye mwalaesae numa hesau kalona unai, na boda lakilaki se lagegogo uyoma. Na iya maiyana hekahekatao nige yodi solasola bena se kaikai. 21 Huyana Yesu kehanao wasana se lapui meta Yesu nige ye kaikai, unai se lau iya bena se woyahai, matawuwuna ede se nuwatui se wane, “Iya bena ye bwadebwade!”
Laugagayo taulauhekata Yesu yona gigibwali se hededeheyababa
22 Laugagayo taulauhekata hekadi Yelusalema unai se dobima se wane, “Satani iya luwana ne unai! Yaluwa yababadi ye hedede hepesadi yodi wasawasa yona gigibwali yena.” 23 Yesu ye yoganedi na palabole hekadi ye hedededi kalidi wai, ye wane, “Satani kabo idohagi na Satani ye hedede hepesa? 24 Taba basileiya kesega se haitole dagela, kabo basileiya ne nige gonowana ye tolobayao. 25 Taba boga kesega se haitole dagela, kabo boga ne nige gonowana se tolo bayao. 26 Taba Satani ye bom ye hewahewaiunu uyoi na nuwana ye labulabui, kabo nige gonowana ye tolobayao, na ye kaiyawasi. 27 Nige gonowana tamowai hesau ye mwalae tamowai yasiyasiyalana yona numa unai yona gogo ye haidi. Tamowai yasiyasiyalana wa ye paibagunai, na kabo yona numa gogodi ye haidi. 28 Ya hedede mamohoi: Yababa maudoidi yo Yaubada hedede yababaina Yaubada kabo ye nuwatugabaedi. 29 Na taba tamowai hesau Yaluwa Tabuna ye hededeheyababa, kabo yona yababa wa taba nige ye nuwatugabaei. Kana gilu kabo ye bawahai ye lau ee nige kana siga.” 30 Yesu yona hedehedede ta matawuwuna ede se wane, “Yaluwa yababana ye luwu iya unai.”
Yesu kana boga mamohoidi
31 Na Yesu sinana yo kana kahao se lagema dagela wa unai se totolo, na tamowai hesau se hetamali ye sae bena ye woihai. 32 Boda Yesu se tulihetakikili wa se hededelau iya unai se wane, “Sinam yo kam kahao yo loumwao, siya ede dagela ne unai na se henuwago.” 33 Na ye henamai ye wane, “Sinagu kaiteya? Yo kagu kahao kaiteyadi?” 34 Tamowai iya se tulihetakikili wa ye kaikewaidi na ye wane, “Sinagu yo kagu kahao ede teina! 35 Kaiteya Yaubada yona nuwatu ye ginauliwatani meta iya kagu kaha ede, lougu ede, yo sinagu ede.”
Tuma tauhesuhesulu palabolena
1 Na Yesu ye uyo Galili Gabwana dedekana unai na ye lauhekata. Boda lakilaki se lagegogoma iya unai, ede Yesu waga hesau unai ye gelu, na ye kahaisuwala musamusana, na boda wa nagali unai se totolo. 2 Ginauli gwaudi ye hekatadi palabole udiyedi. Na yona lauhekata wa unai ye wane, 3 “Kwa lapulapui! Huya hesau tauhesuhesulu ye lau witi tumadi ye hesuludi yona koya unai. 4 Na hekadi se bekudobi keda kalona wai, na manuwa se laoma ede se kaidi. 5-6 Hekadi se bekudobi debadeba wai na nige bayaona se kini. Mahana ye dalasae na ye sina hewowoyadi, matawuwuna bwatano ye yaloyalo na lamdi nige se dobi kalili. 7 Hekadi se bekudobi gwaligwali luwadi wai. Gwaligwali kabo se kini puluhidi, ede tuma wa nige se kini namwanamwa unai nige se kaniyo. 8 Tuma hekadi hinage se bekudobi bwatano namwanamwana unai, na se kini yo se kaniyo: Witi kewa kesega kesega hekadi kaniyodi badodi 30 , 60 o 100 .” 9 Na Yesu ye hededelau udiyedi ye wane, “Kaiteya beyana unai ye lapui bena ye lapu namwanamwaei.”
Yesu palabole yona hepaisowadi wuwuna ye hemasalaha
10 Boda wa se tatagwaligwali mulina ne unai yona hekahekatao saudoudoi-labui yo tamowai hekadiyo Yesu maiyanao se tuligogoi, na palabole kaniyona se henamaiyei iya unai. 11 Na Yesu ye hededelau udiyedi ye wane, “Yaubada yona basileiya ginauli wadawadamdi kabo ya hemasalahadi kalimiu wai. Na kaiteya Yaubada yona basileiya dagelana wai, kabo palabole mo udiyedi ya hekatadi, 12 unai ‘se kitakita, na taba nige se kitalobai, se lapulapui, na taba nige se lapulobai, madai nuwadi se buidi, na Yaubada yodi yababa kabo ye nuwatugabaedi.’ ”
Yesu tauhesuhesulu palabolena ye hemasalaha
13 Na Yesu ye hededelau udiyedi ye wane, “Ena palabole ta nige kwa nuwatulobai, kabo idohagi na palabole hekadi ne hinage kwa nuwatulobaidi? 14 Tauhesuhesulu Yaubada yona hedehedede ye hesulu. 15 Tamowai hekadi nuwadi doha keda, tuma se bekudobi unai. Yaubada yona hedehedede se lapui, na mahanana ne unai diyabolo ye laoma ede hedehedede wa ye haigabai. 16 Tamowai hekadi nuwadi doha debadeba, tuma se bekudobi unai. Hedehedede wa se lapui yo se hai ma nuwa namwanamwadi. 17 Na hedehedede wa nige ye dobi nuwadi wa udiyedi, unai ede yodi sunuma se basabasa. Na huyana pilipili hesau se hekalo, o tamowai siya se subudi hedehedede wa debana wai, ede yodi sunuma wa se kaiyawasi. 18 Tamowai hekadi nuwadi doha gwaligwali, tuma se bekudobi udiyedi. Siya hedehedede wa se lapui moei. 19 Na kaiyaulina ta nuwamodena yo gogo badobado nuwadi se kaidi yo ginauli hekadi gadosisidi udiyedi hedehedede wa se kini puluhidi na nige ye kaniyo. 20 Na hekadiyo nuwadi doha bwatano namwanamwana, tuma se bekudobi unai. Hedehedede wa se lapui na se kawamamohoiyei, kabo se kaniyo: hekadi 30 , 60 o 100 .”
Lampa palabolena
21 Na Yesu yona hedehedede ye tubei ye wane, “Taba lampa ta gabu, kabo gulewa unai ta buikasini o kabakeno gunina unai ta tole? Nige! Ta tolesae kabatolena unai! 22 Gonogonowana doha hinage Yaubada yona basileiya ginauli maudoidi wadawadamdi kabo ye hemasalahadi, ginauli maudoidi Yaubada ye toletolewadamdi kabo hinage ye tole hemasalahadi. 23 Kaiteya beyana unai ye lapui bena ye lapu namwanamwaei!” 24 Na kabo ye wane, “Saha kwa lapui ta bena kwa lapu namwanamwaedi. Ena kwa lapulapui namwanamwa, kabo kwa nuwatulobai namwanamwaei. Na kabo Yaubada yomi sibasiba ye helakidi. 25 Kaniyona ede kaiteya yogu lauhekata udiyedi ye lapulapui namwanamwa, kabo yona sibasiba ye helaki. Na kaiteya nige ye lapulapui namwanamwa, saha gagilina ye lapulobaiyako kabo ye nuwaluluhiyei.”
Tuma yona kinikini palabolena
26 Na Yesu ye wane, “Yaubada yona basileiya meta doha teina: Tamowai hesau witi tumana ye hesulu bwatano unai. 27 Boniyai huyadi ye keno, na mala ye tom ye tolo, meta nige ye mode na tuma wa se bom se kini kabo se tubu. Tuma yodi kinikini meta tamowai wa nige ye nuwatulobai idohagi. 28 Na bwatano ye bom ye hekinidi: se kini baguna, kabo se kini lakilaki yo se kaniyo. 29 Witi wa kaniyodi se suna, tamowai wa kabo ye bolidi, matawuwuna ede masuli wa ye lage.”
Kaitabu tumana palabolena
30 Yesu ye wane, “Yaubada yona basileiya kana kao kabo idohagi yoda hedehededena? O palabole saha unai kabo ta hekaigonogonowaei? 31 Basileiya ne doha kaitabu tumana. Ye gagili kalili tuma maudoidi udiyedi. 32 Tumana ye bekudobi bwatano unai, kabo ye kini lakilaki doha kaiwa hekadiyo. Lagana lakilakidi se kini, na manuwa kabo se towa yo se kaiyawasi loguloguna ne unai.” 33 Yona lauhekata maudoidi udiyedi palabole unai ye hekatadi yodi nuwatulobai gonogonowana unai. 34 Palabole mo ye hepaisowadi yona lauhekata udiyedi. Na yona hekahekatao maiyanao se bom mo, kabo palabole kaniyodi wa ye hemasalahadi udiyedi.
Yesu wowoli ye hedede hedaumwali
35 Meimeilahina ne unai, Yesu ye hededelau yona hekahekatao udiyedi ye wane, “Ta kawasilau halitana kawasi ne.” 36 Na tamowai maudoidi wa se laugabaedi, na Yesu yona hekahekatao waga wa unai hinage se gelu na Yesu maiyanao se lau, yo waga hekadi hinage se hemuliwatani. 37 Kabo yaumai lakilakina ye lotalu yo bagodu se iniꞌinisae waga wa kalona unai, na musamusana kabo se yoli. 38 Na Yesu waga yiuna wa unai kunuwa unai ye kenokeno. Iya se hanoi se hededelau unai se wane, “Tanuwaga! Ku nuwatui meta kabo ta mwaloi e nige?” 39 Yesu ye tolo ede ye hededelau yaumai yo bagodu wa udiyedi ye wane, “Kwa kaiyawasi yo kwa daumwali!” Kabo yaumai yo bagodu wa se kaiyawasi na ye daumwali kimkim. 40 Na ye hededelau udiyedi ye wane, “Idohagi to kwa matausi? Nuwana nige yomi sunuma?” 41 Siya se siliyata yo se matausi kalili, unai se henahenamai uyoidi, “Teina tamowai ta tamowai sahasaha? Yaumai yo bagodu iya se kawakabiyei!”
Gadala yodi tano unai Yesu yaluwa yababadi ye hedede hepesadi
1 Siya kabo se dunasae halitana kawasi wa unai, Gadala tamowaidi yodi tano unai. 2 Yesu waga wa ye pesagabaei, na tamowai hesau ye laoma Yesu ye hailobai. Yaluwa yabayababadi tamowai wa se luwui. 3 Na bwayabwaya duhadiyao wa udiyedi ye miyamiya, yo nige gonowana tamowai hesau seni yena ye paihekahini. 4 Huya hekadi iya nimana yo kaena seni udiyedi se paidi, meta ye utusidi, na nige gonowana tamowai hesau ye hekaiyawasi. 5 Mayadai yo boniyai, bwayabwaya wa unai yo kuduli udiyedi ye sae ye dobi na ye yogayogahi, yo sapakila ye haidi na tauna wa ye sasa gwadagwadaidi. 6 Tamowai wa Yesu ye kitalae na kedana ye katuloha unai ede ye heloi ye lau ye tulibono Yesu talanuwana wa unai. 7 Ye yogahi lakilaki ye wane, “Yesu, Yaubada saesae kalilina natuna, idohagi to ku laoma kaligu wai? Yaubada hesana unai ku kaigwala, meta taba nige ku hekamkamnagau.” 8 Mata wuwuna ede Yesu ye hededelauko iya unai ye wane, “Yaluwa yababana, kowa tamowai me ku pesagabaei.” 9 Na kabo Yesu ye henamailau iya unai ye wane, “Hesam ede saha?” Iya ye hededebui ye wane, “Yau hesagu ede Legiyona, kaniyona ede ka bado.” 10 Na ye kaibwada kalili ye wane, “Tabu ku hetamaligai ka lau keda lohaloha.” 11 Kuduli hesau papalina unai meta puwaka yawoina lakilaki se dumudumuli. 12 Yaluwa yababadi wa se kaibwadalau Yesu unai se wane, “Ku hetamaligai ka lulau tenem puwaka ne yawoina ne udiyedi.” 13 Yesu ye talam ede yaluwa yababadi wa kabo se pesa na se lulau puwaka wa udiyedi. Na se heloi lidilidi padipadi wa unai se dobi ede se bekudobi gabwa wa unai se yoligogoi na se mwaloi. Na puwaka wa badodi ede nuwana 2000 . 14 Puwaka wa taukitahetetedi kabo se wasabu se lau, wasa wa se helaki magai maudoidi udiyedi. Magai wa tamowaidiyao kabo se lau bena laulau wa se kita. 15 Se lage Yesu unai, na tamowai yaluwa yabayababadi se luwui usei wa se kita ye tuli tautaubigai, ma kalekalekona yo ma nuwa namwanamwana. Unai se matausi. 16 Na saha ye tubu tamowai yo puwaka wa udiyedi taukitadi wa wasadiyao se hedededi taulaoma wa udiyedi. 17 Siya kabo se kaibwadalau Yesu unai bena yodi magai ne ye laugabaei. 18 Yesu waga wa unai ye gelu, na tamowai yaluwa yababadi se luwui usei wa ye kaibwadalau bena iya maiyana se lau. 19 Yesu nige ye henuwa, unai ye hededelau iya kalina wai, ye wane, “Ku lau yom magai yo kehamwao udiyedi, Guiyau yona katekamkamna yo gigibwali ye hemasalahadi kowa kalim wai wa, wasana yodi ku hedehedede.” 20 Iya kabo ye lau Dekapoli tehana unai Yesu saha ye ginauli iya unai wa ye hewasa, ede tamowai maudoidi se noko kalili.
Yesu waihiu ye henamwanamwa yo Yailo natuna waihiu boita unai ye hetolouyoi
21 Yesu ye gelu waga wa unai ye uyo halitana kawasi wa. Ye duna kabo ye pesa nagali wa unai na boda lakilaki temenai se tupagogoma iya unai. 22 Kabo sunago tanuwagana hesau, hesana ede Yailo, iya Yesu ye kita ede ye lau ye tulibono Yesu talanuwana unai. 23 Na ye hedede katekamkamnalau iya unai, ye wane, “Natugu waihiu gagilina ye kasiyebwa kalili. Taba gonowana ku laoma ku kabilau unai to kabo ye namwanamwa.” 24 Unai Yesu maiyana se lau, na boda lakilaki wa se hemuliwatanidi na yodi lau wa unai meta Yesu unai se heduheduna. 25 Waihiu hesau temenai, kana kasiyebwa meta kwasina ye miyamiyagabaei bolimai saudoudoi-labui. 26 Bolimai ne luwadi yena doketa maudoidi yodi sagu kalina wai meta nige gonowana, na waihiu wa meta ye kamkamna kalili. Na hemaisadi mo udiyedi yona moni maudoina ye hegehe, na kana kasiyebwa wa kabo ye helahelaki mo ye lau. 27 Iya Yesu yona laoma wasana ye lapui ede boda luwadi yena ye laoma Yesu dagelana unai na kana kwama ye kabitonogi, 28 unamo ede yona nuwatu ye wane, “Taba kana kwama mo ya kabitonogi, kabo ya namwanamwa.” 29 Mahanana ne unai kwasina kasiyebwana wa ye kaiyawasi, na tauna kamnana ye lapui meta kasiyebwa wa ye tatagwaligwaliko. 30 Na Yesu kamnana ye lapui meta gigibwali ye pesagabaei, unai ye kitabui boda wa udiyedi na ye henamai ye wane, “Kaiteya kagu kwama ta ye kabitonogi?” 31 Yona hekahekatao se hededelau unai, se wane, “Boda wa ku kitadi se heduheduna kalim wai, na ye saha to ku henamai ku wane, ‘Kaiteya ye kabilaoma kaligu wai?’ ” 32 Na Yesu ye kaikewa takikili taba bena laulau ne tauginaulina wa ye kita. 33 Saha ye tubu wa unai ede waihiu wa ye nuwatulobai, unai ye matausi tabutabubu. Kabo ye laoma ye tulibono Yesu talanuwana wa unai, na kabo saha ye ginauli wa ye hededehemasalaha. 34 Yesu kabo ye wane, “Natugu, kowa yom sunuma unai ede ku namwanamwa. Ku lau ma nuwabigam, kam kasiyebwa ye kaiyawasiko.” 35 Sola iya ma hedehededena na sunago tanuwagana wa yona numa unai tamowai hekadi se laoma iya unai se hededelau se wane, “Natum waihiu wa meta ye boitako! Tanuwagada tabu ku hemohemode.” 36 Yesu nige ye lapulau yodi hedehedede wa udiyedi, na ye hededelau sunago tanuwagana wa unai ye wane, “Tabu ku nuwabasabasa, na ku kawamamohoiyeigau mo.” 37 Na kabo boda wa ye hedede nuwahidi, na Petelo yo Yamesi ma kana kaha Yowane mo se hemuliwatani. 38 Se lage numa wa unai tamowai se doudou se lapuidi numakalo wa unai. 39 Yesu ye mwalaesae kalo wa unai ye hededelau udiyedi ye wane, “Saha kwa doudouyei? Wawaya me nige ye boita, iya ye keno meta.” 40 Na siya Yesu se malumaluhiyei. Yesu kabo ye hedede se pesa dagela wai, na kabo wawaya wa tamana yo sinana ye woyaidi maiyana hekahekatao se lusae wawaya wa yona bili unai. 41 Kabo Yesu ye kabilau wawaya waihiu wa nimana unai na ye hededelau ye wane, “Talita koum!”, (kaniyona ede “Wawaya waihiu, ku tolo!”). 42 Ede wawaya wa ye tolo na ye laulau. (Na yona bolimai ede saudoudoi-labui.) Na taukitana meta se noko kalili. 43 Na kabo Yesu ye guguyaidi tabu saha ye ginauli wa se hewahewasa, na ye hededelau udiyedi bena wawaya wa kai se mosei ye kai.
Yesu Nasaleta unai se laukwatakwataei
1 Yesu tenem tupwa ne ye laugabaei kabo ye uyoma yona magai Nasaleta unai maiyana hekahekatao. 2 Sabati mayadaina ye hekalo, na ye hetubu ye lauhekata sunago kalona wai. Boda maudoidi yona hedehedede se lapui ede se nokoei. Se henahenamai uyoidi se wane, “Tamowai ta haedi ginauli maudoidi ta ye kaipateidi yo sibasiba ta haedi ye hai? Idohagi na teina laulau gigigigibwalidi ta ye ginaulidi? 3 Iya meta kapenta. Yo hinage Maliya natuna, na kana kahao ede Yamesi, Yosepa, Yudasi yo Simona. Na lounao hinage maiyadao ta miyamiya.” Unai ede se laukwatakwataei. 4 Na Yesu ye hededelau udiyedi ye wane, “Magai maudoidi peloweta se hekasisiyei, na yona magai tamowaidi yo kana bogao yo kehanao nige se hekasisiyei.” 5 Ede magai wa unai nige gonowana laulau gigibwalina hesau ye ginauli, na nimana ye tolesae tamowai kasikasiyebwadi hisa mo udiyedi na se namwanamwa. 6 Yesu ye noko kalili, matawuwuna ede yona magai tamowaidi nige se sunumai.
Yesu Saudoudoi-labui ye hetamalidi
Na Yesu ye lau magai gagilidi udiyedi tamowai ye hekatadi. 7 Na kabo Saudoudoi-labui wa ye yoganeidi bena labui labui ye hetamalidi. Iya yona gigibwali ye moseidi unai kabo yaluwa yabayababadi se hedede hepesadi. 8 Na kabo ye guguyaidi ye wane, “Tabu ginauli hesau kwa laubahei yomi kabalau ne unai, na tuke mo. Tabu kami kai, yomi tobwa yo moni kwa bahebaheidi. 9 Na gonowana mo buti kwa likwadi, na tabu kami kwama hagahagadi kwa baheidi.” 10 Na ye hedede uyo ye wane, “Kaiteya numa unai se yoganeigomiu na kwa mwalaesae, meta unai kwa miya ye lau ee magai me kwa laugabaei. 11 Ena kaiteya magai nige se yogaisinigomiu, yo yomi hedehedede nige se lapuidi, meta kwa laugabaei na kaemiu nagalidi mo kwa koinihinihiyedi. Temeta ye hemala magai ne yodi hekihekinoi.” 12 Yesu yona hekahekatao wa se pesa se lau, se lauguguya bena tamowai nuwadi se buidi. 13 Yaluwa yabayababadi gwaudi se hedede hepesadi, na bunama unai taukasikasiyebwa gwaudi se heyausidi yo se henamwanamwadi.
Yowane Babatiso se unui wa wasana
14 Heloda wasawasa Yesu wasana ye lapui, matawuwuna Yesu hesana wa tamowai maudoidi kabina se kata. Hekadi se wane, “Nuwana Yowane Babatiso iya boita unai ye tolouyoma, unai ede paisowa gigibwalidi ye hemasalahadi.” 15 Hekadi se wane, “Nuwana Eliya”, yo hekadi se wane, “Nuwana peloweta hesau, yo doha peloweta bagubagunadi wa hesau.” 16 Na huyana Heloda wasa wa ye lapui meta ye wane, “Yesu ede Yowane. Iya gadona ya boliyako, na boita unai ye tolouyoma.” 17 Mata wuwuna Heloda ye bom ye hededeyako unai Yowane se hai, se kau na se tole numa tutugudu unai. Yona ginaulina matawuwuna ede Helodiya. Helodiya meta Heloda yona saeya Pilipo mwanena, na Heloda ye tawasolai. 18 Unai Yowane ye hedehededelau Heloda unai, ye wane, “Kowa laugagayo ku utusi, taba tabu kam kaha mwanena ku tawatawasolai.” 19 Unai na Helodiya ye kouyalayala kalili, na ye henuwa bena Yowane ye unuhemwaloi. Na iyamo nige gonowana ye ginauli, 20 matawuwuna Heloda Yowane ye kitalobai meta tamowai dudulaina yo tamowai tabuna, unai ye hekasisi kaliliyei yo ye kitahetete namwanamwaei. Huya badobado Heloda Yowane yona hedehedede wa ye lapuidi meta nuwana ye haikabi, na iyamo ye henuwa kalili bena ye lapulapulau Yowane unai. 21 Nige bayaona kabo Helodiya yona nuwatu mayadaina wa ye lage. Heloda yona huya labasi unai henuwaisini ye ginauli maiyanao tamowai lakilakidi yo iyala babadadi yo Galili babadadi hekadiyo. 22 Helodiya natuna waihiu, iya kabo ye lau siya matadi wai ye sobu. Heloda yo kana taumanao nuwadi se namwa kalili, unai wasawasa wa ye hededelau wawaya waihiu wa unai, ye wane, “Kowa kam henuhenuwa saha? Kabo ya ginauli, yo kabo ya leyawa.” 23 Iya ye hededehesunuma ye wane, “Ginauli saha ku kaibwadai, kabo ya leyawa yom. Gonogonowana doha yogu basileiya ta tehana ena ku henuwa.” 24 Waihiu wa kabo ye lau sinana unai ye henamai, ye wane, “Saha kabo ya kaibwadai?” Helodiya ye wane, “Yowane Babatiso kulukuluna.” 25 Ede ye lau mwamwayau ye uyo wasawasa wa unai, ye kaibwadalau unai ye wane, “Yau yogu kaibwada mahana mo ta unai ede teina: Yowane Babatiso kulukuluna gaeba unai ku usaei na ku haiyama.” 26 Wasawasa wa nuwana ye yababa kalili, na nige saha hesau ye hedede, matawuwuna kana taumanao yona hedehedede hesunuma wa se lapuiyako. 27 Wasawasa wa taukaiunu hesau ye lauhelili ye wane, “Yowane kulukuluna ku baheiyama.” Iya kabo ye lau numa tutugudu unai, Yowane gadona ye boli utusi. 28 Na kulukuluna wa gaeba unai ye usaei ye baheiyama ye mosei waihiu wa unai. Na ye bahei ye laei sinana wa unai. 29 Huyana Yowane yona hekahekatao wasa se lapui kabo se laoma, tau gaibuna mo se bahei se laei bwayabwaya unai se tole.
Yesu tamowai 5000 ye hekaidi
30 Apostolo se lagegogoma Yesu unai, yodi paisowa yo yodi lauhekata wasadi yona se hedehedede. 31 Na tamowai se bado kalili se hemohemode, unai nige gonowana bena se kaikai. Ede Yesu ye wane, “Kwa laoma, kita ta bom ta lau teha hesau unai. Temenai kabo ta kaiyawasi huya kubwakubwa.” 32 Siya se bom waga unai se gelu se lau balabala hesau unai. 33 Yodi kabalau ne meta tamowai gwaudi se kitayako yo se kitalobaidiko. Unai magai maudoidi se laugabaedi na se heloi na se lage baguna Yesu yona kabalage wa unai. 34 Yesu kabo ye dunasae boda lakilaki ye kitadi, yo ye katekamkamnaedi, matawuwuna ede siya doha mamoe nige taukitahetetedi. Unai kabo ye hetubu ginauli maudoidi ye hekatadi. 35 Mahana ye talukeo, ede yona hekahekatao wa se lau iya unai na se wane, “Teina ta balabala, yo mahana ye lau kalili. 36 Gonowana taba ku hetamalidi se lau kasa gagilidi yo magai dedekadi udiyedi, kadi kai se lokune.” 37 Yesu ye hededelau udiyedi ye wane, “Komiu kadi kai kwa moseidi.” Siya kabo se henamaiyei se wane, “Haidi kabo denali 200 ka hai na kadi kai ka lokune yo ka hekaidi?” 38 Unai kabo ye wane, “Hage, kwa kita, pwalawa hisa kalimiu yena?” Apostolo kabo pwalawa se lobaidi, ede se uyoma iya unai na se wane, “Pwalawa haligigi yo yama labui.” 39 Iya ye hededelau udiyedi ye wane, “Maudoidi kwa hedede se tuligogoi lagau ne unai.” 40 Siya kabo se tuli namwanamwa, pwalu hekadi 100 , yo pwalu hekadi 50 . 41 Iya pwalawa haligigi ye haidi yo yama labui, ye kitasae galewa unai, Yaubada ye lautokiyei. Na kabo pwalawa ye kihi hegahegagili na ye moseidi yona hekahekatao kalidi wai. Siya kabo se soiyei tamowai wa kalidi wai. Na hinage yama labui ye kihi hegahegagili na ye moseidi maudoidi se kai. 42 Na maudoidi se kaikai yo bogadi se sese. 43 Yesu yona hekahekatao kaitole wa se tanogogoidi, meta bosa saudoudoi-labui se hemwayaudi. 44 Taukaikai badodi ede 5000 .
Yesu Galili Gabwana kewana unai ye laulau
45 Yesu yona hekahekatao ye hegelu mwamwayauyedi se kawasi baguna Betesaida, na kabo boda wa ye hetamalidi se lau. 46 Na kabo ye sae koya tupina hesau unai ye tapwalolo. 47 Boniyaina ne unai meta waga wa sola waila duwaduwalina unai ye laulau, na Yesu ye bom mo tano wa unai ye miyamiya. 48 Iya ye kitadi wose unai se kabikabi useidi, matawuwuna ede yaumai ye bayao yo hinage se wosematai. Malatomtom gagilina Galili Gabwana unai ye laulau udiyedi bena kabo ye laugabaedi. 49 Na se kita waila unai ye laulau, na yodi nuwatu bena kaiyabu. Ede se yogahi, 50 matawuwuna maudoidi iya se kita na se matausi kalili. Na ye hededelau udiyedi ye wane, “Nuwamiu se talu. Doha yau. Tabu kwa matausi!” 51 Na kabo ye gelusae waga wa unai maiyanao, na yaumai wa ye kaiyawasi. Siya kabo se noko kalili, 52 matawuwuna pwalawa haligigi laulauna wa nige se nuwatulobai, na nuwadi se kwailolo.
Genesaleta unai Yesu tamowai ye henamwadi
53 Siya se duna Genesaleta unai, menai yodi waga se lowoni. 54 Huyana waga se pesagabaei, tamowai hekadi Yesu se kitalobai, 55 ede magai wa maudoina se tauhetakikili. Taukasikasiyebwa se baheidi diyadiyali udiyedi, na se laedi haedi wasana se lapui wa unai. 56 Yesu haedi yona kabalau ne udiyedi — magai gagilidi o magai lakilakidi udiyedi — tamowai kasikasiyebwadi se bahelaedi yodi kaba koikoigogo udiyedi. Na se kaibwadai bena kana kwama dedekana wai se kabilau, na siya kaiteyadi se kabilau unai wa kabo se namwanamwa.
Kulutubu laugagayodi lauwatanina unai tamowai Yaubada yona laugagayo se utusi
1 Paliseya tamowaidi yo taulauhekata hekadi Yelusalema unai se laoma, se lagegogoma Yesu unai. 2 Yona hekahekatao hekadi se kitadi se kaikai, na nige se nimadeuli doha kadi kulutubu yodi kabikabi mamohoina unai. 3 Paliseya tamowaidi yo Dius tamowaidi maudoidi kadi kulutubu miyamiyadi se hekasisiyedi, unai taba nige se kaikai kana siga nimadi se deulidi doha kulutubu yodi kabikabi mamohoina unai. 4 Ena yodi kaba lokulokune unai se uyoma, se nimadeuli baguna na kabo se kaikai. Kulutubu yodi kabikabi yo laugagayo se bado bena se hekasisiyedi. Hinage kabikabi hekadi doha keyaka yo waila kabayaiyai yo gulewa deudeulidi udiyedi. 5 Unai Paliseya tamowaidi yo laugagayo taulauhekata Yesu se henamai se wane, “Idohagi to kowa yom hekahekatao kulutubu miyamiyadi nige se miyawatanidi, na ma nima bikibikidi se kaikai?” 6 Yesu ye hededelau udiyedi ye wane, “Komiu taukailupolupo, Aisaiya peloweta kami hedehedede ye hededehemasalaha wa mamohoi komiu taukailupolupo doha ye kuliyako ye wane, ‘Siya kawadi unai mo se hedebasaegau, na nuwadi unai se lausuwalaegau. 7 Siya yodi hedebasaegau nige kaniyona, matawuwuna tamowai yodi laugagayo mo se hekahekatadi.’ 8 Yaubada yona laugagayo kwa tolehesuwaladi, na tamowai yodi laugagayo kwa kabihekahinidi.” 9 Na kabo ye wane, “Komiu laugagayo tolebuina unai kwa kata kalili ede Yaubada yona laugagayo kwa tolehesuwala na komiu yomiu kwa lauwatani. 10 Mose ye hededeyako ye wane, ‘Tamam yo sinam ku hekasisiyeidi’ yo ye wane, ‘Ena hesau tamana yo sinana ye hededeheyababadi, iya kabo se unuhemwaloi.’ 11 Na komiu yomi laugagayo doha teina: Ena tamowai hesau sinana yo tamana yodi kainauya ye nonohai na nige ye mosei udiyedi na ye mosei Yaubada unai, 12 kwa hedede temeta laulau ne bena ye dudulai. 13 Komiu yomi laugagayo kwa lauwatani, unai Yaubada yona laugagayo kwa tolehesuwala. Yo hinage Yaubada yona laugagayo hekadi kwa tolebuidi gonogonowana doha teina.”
Ginauli sahasahadi tamowai se hebiki
14 Na kabo tamowai maudoidi wa ye yoganedi se laoma iya unai, na ye hededelau udiyedi ye wane, “Komiu maudoimiu yogu hedehedede kwa lapu namwanamwaei yo bena kwa nuwatulobai. 15-16 Tamowai saha ye kai na ye dobi bogana luwana wai meta nige ye hebiki Yaubada matana wai. Na ginauli saha nuwana wai ye pesama meta iya ye hebiki ede.” 17 Yesu maiyana hekahekatao se mwalaesae numakalo wai, na kabo palabole kaniyona wa se henamaiyei. 18 Iya ye hededelau udiyedi ye wane, “Idohagi to nige kwa nuwatulobai? Komiu taba kabina kwa kata saha tamowai ye kai na ye dobi bogana luwana wai nige ye hebiki. 19 Kana kao ede nige ye dobi nuwana unai, na ye dobi bogana luwana wai, na kabo ye miyagabaei.” (Teina hedehedede ta unai Yesu ye hedede gabaei meta kai maudoidi se aꞌa.) 20 Yo ye wane, “Na saha tamowai nuwana wai ye pesama meta iya ye hebiki ede, 21 matawuwuna saha nuwana wai se pesama wa siya ede teina: nuwatu biki, sikalakumiyai, kaiwahali, kaiunu, 22 ganawali, samagogo, henunu, kailupolupo, matabado, kaikalomagigili, monunu, nuwasaesae, yo walobayao. 23 Teina ginauli yabayababadi maudoidi ne meta tamowai nuwana unai se laoma yo siya tauhebikina ede Yaubada matana unai.”
Dagela waihiuna yona sunuma
24 Temenai kabo Yesu ye lau Taiya yo Sidona tehana ne unai. Na ye mwalaesae numa hesau kalona unai. Yona nuwatu meta bena tabu iya se kita. Na iyamo nige gonowana ye tauwadam. 25 Waihiu hesau natuna sinekuku. Yaluwa yababana ye luwu iya unai. Na waihiu wa Yesu wasana ye lapui ede ye laoma ye tulibono iya talanuwana unai. 26 Waihiu wa dagela waihiuna Siliya tehana tupwa Penesiya unai ye laoma, na ye kaibwada Yesu unai taba yaluwa yababana natuna unai ne ye hedede hepesa. 27 Na Yesu ye hededelau iya unai ye wane, “Sola wawayao ya hekai bagunaidi. Tabu wawayao kadi kai ya gabalae kedewa udiyedi, temeta nige ye namwa.” 28 Waihiu wa ye hededebui ye wane, “Guiyau, mamohoi! Na iyamo wawayao saha se kaidi na mapuladi se bekudobi hatahata gunina ne unai meta kedewa kabo se kaidi.” 29 Na kabo Yesu ye hededelau unai ye wane, “Ku lau yom numa. Mata wuwuna yom hededebui ye namwa kalili. Na yaluwa yabayababana wa natum ye pesagabaeyako.” 30 Unai kabo ye uyo numa, metai natuna wa ye kita ye kenokeno, na yaluwa yabayababana wa ye pesagabaeyako.
Yesu tamowai beya kolakolana yo ye unauna ye henamwanamwa
31 Yesu Taiya kana sigasiga ye laugabaei, na ye lau Sidona, na kabo ye lau Dekapoli koyana unai, kabo ye lage Galili Gabwana unai. 32 Temenai tamowai beya kolakolana yo ye unauna se woyaiyama Yesu unai. Na se kaibwada Yesu unai bena nimana ye tolesae iya unai. 33 Boda wa luwadi yena Yesu tamowai wa ye woya hesuwala. Iya ye kabilau beyana duhadi udiyedi, ye kaiso nimana unai na ye kabilau memenana unai. 34 Yesu ye kitasae galewa unai na katekamkamna nuwana ye hemwayau, na ye hededelau iya unai ye wane, “Epata”, kaniyona ede, “Ku malapai.” 35 Mahanana ne unai beyana se malapai, yo hinage ye hedehedede. 36 Yesu boda wa ye guguyaidi na yona hedehedede ye laubodai uyoi bena tabu se hedehedede hemasalaha. Iyamo nige se nuwatui, na wasana wa kabo se helaki. 37 Siya se noko kalili se wane, “Ginauli maudoidi ye ginaulidi meta se namwa. Tamowai beya kolakoladi ye hemalapaidi, yo tamowai unaunadi memenadi ye henamwanamwadi.”
Yesu tamowai 4000 ye hekaidi
1 Huya hesau boda se tupagogoi uyoma na nige kadi kai. Ede Yesu yona hekahekatao ye yoganedi na ye hededelau udiyedi ye wane, 2 “Boda lakilaki ta ya katekamkamnaedi, matawuwuna mayadai haiyona maiyaguwao ka miyamiya na nige saha hesau ye miya bena kabo se kai. 3 Ena taba ma hasalidi na ya hetamalidi, meta kabo keda ne unai matadi se kamumu na se guli, matawuwuna hekadiyao keda lohaloha udiyedi se laoma.” 4 Yona hekahekatao se hededelau unai se wane, “Teina balabala gaibu. Na kabo haedi kai ta hai na boda lakilaki ta ta hekaidi?” 5 Yesu ye henamailau udiyedi ye wane, “Kami pwalawa hisa?” Siya se wane, “Haligigi-labui.” 6 Na ye hedede boda wa se tuli bwatano unai. Na kabo pwalawa haligigi-labui wa ye haidi na Yaubada ye lautokiyei, na kabo ye kihidi na ye mosedi yona hekahekatao udiyedi, na se soiyedi. 7 Yo hinage yona hekahekatao yama gagilidi hekadi se haidi, ede Yaubada unai ye lautoki uyo, na kabo ye mosedi na se soiyedi. 8 Maudoidi se kaikai na bogadi se sese. Yesu yona hekahekatao kaitole wa se tanogogoidi, meta bosa haligigi-labui se hemwayaudi. 9 Nuwana taukaikai wa badodi ede 4000 . Na kabo ye hetamalidi se lau. 10 Na yona hekahekatao wa maiyanao se gelu mwamwayau se lau Dalemanuta magaina tehana unai.
Paliseya tamowaidi hekihekinoi se kaibwadai
11 Na Paliseya tamowaidi se laoma, na se hetubu Yesu maiyadi se haikawayagala. Siya se henuwa bena se laukita na se kita ena iya galewa unai ye dobima, unai hekihekinoi se kaibwada kalina wai. 12 Yesu nuwana ye kamkamna, na ye wane, “Mata wuwuna saha to teina isi ta hekihekinoi se kaibwadai? Ya hedede mamohoi, taba nige hekihekinoi hesau ya ginauli teina komiu isi ta kalimiu wai.” 13 Na kabo ye laugabaedi waga wa unai ye gelu uyo na ye lau halitana kawasi ne.
Paliseya yo Heloda yodi yisti debana wai Yesu yona hekahekatao ye guguyaidi
14 Yesu yona hekahekatao nuwadi se luluhi na nige kai se bahei, na pwalawa kesega mo waga wa unai. 15 Yesu ye guguyaidi ye wane, “Kwa nanabu! Tabu Paliseya yo Heloda yodi yisti udiyedi se lupohaigomiu!” 16 Na siya se bom yodi se hedehedede se wane, “Doha teina ye hedehedede, matawuwuna ede nige pwalawa ta bahei.” 17 Yodi hedehedede wa Yesu ye nuwatulobai, unai ye wane, “Idohagi to kwa wane, ‘Nige pwalawa ta bahei’? Nuwana sola nige kwa kitalobai yo nuwamiu sola nige se masalaha? Idohagi to kwa nuwa kwailolo? 18 Idohagi to matamiu udiyedi nige kwa kita yo beyamiu udiyedi nige kwa lapui? Taba kwa nuwatulobai! 19 Huyana pwalawa haligigi ya kihidi, na tamowai 5000 ya hekaidi, na kaitoledi wa meta bosa hisa kwa usa hemwayaudi?” Siya se wane, “Saudoudoi-labui.” 20 “Yo pwalawa haligigi-labui ya kihidi na tamowai 4000 ya hekaidi, na kaitoledi wa meta bosa hisa kwa usa hemwayaudi?” Se wane, “Haligigi-labui.” 21 Yesu ye hededelau udiyedi ye wane, “Unai taba kwa nuwatulobai yisti hedehededena ya hededeyako kalimiu wai.”
Yesu tamowai mata gibugibuna hesau ye henamwanamwa
22 Na kabo Yesu maiyana hekahekatao se lage Betesaida. Temenai tamowai hesau mata gibugibuna se woyaiyama Yesu unai na se kaibwadai bena ye kabilau iya unai. 23 Yesu tamowai mata gibugibuna wa nimana unai ye kabi ye woyalae magai dagelana unai. Na kabo Yesu ye kaisolau tamowai wa matana unai na nimana ye tolesae na ye wane, “Saha hesau ku kita e nige?” 24 Tamowai wa ye kaikewa takikili na ye wane, “Tamowai ya kitadi kadi kao doha kaiwa se taitaihile usi.” 25 Yesu nimana ye tolesae uyoi tamowai wa matana unai. Na matana wa se lala yo se nega. Ede kabo ginauli maudoidi ye kita namwanamwaedi. 26 Na Yesu tamowai wa ye hetamali ye lau yona numa na ye wane, “Tabu ku uyo magai ne unai.”
Petelo Yesu ye hededehemasalaha meta iya Keliso
27 Na kabo Yesu maiyana hekahekatao se lau magai udiyedi Sisaliya Pilipi dedekana unai. Yodi kabalau ne unai Yesu ye henamai udiyedi ye wane, “Tamowai se wane, yau meta kaiteya?” 28 Siya Yesu kalinana se bui se wane, “Hekadi se wane, Yowane Babatiso, na hekadi se wane, Eliya. Hekadi se wane, peloweta hesau.” 29 Unai kabo ye henamaiyedi, “Na komiu kabo saha kwa hedede, yau meta kaiteya?” Na Petelo ye wane, “Kowa meta Keliso.” 30 Ede Yesu ye guguyaidi bena tabu tamowai hesau yona se hedehedede.
Yesu yona boita yo tolouyo ye hededehemasalaha
31 Na kabo Yesu ye hetubu yona hekahekatao ye hekatadi meta Tau Natuna kabo ye kamkamna ginauli maudoidi udiyedi. Na tamowai lakilakidi, taukaitalasam babadadi, yo laugagayo taulauhekata iya kabo se laukwatakwataei. Na kabo se unuhemwaloi na mayadai haiyona mulidi wai kabo ye tolouyo. 32 Yesu ye hededehemasalaha namwanamwaei, unai Petelo Yesu ye woya hesuwala na ye wane, “Tabu temeta doha ku hedehedede.” 33 Yesu ye tolobui ye kitalau yona hekahekatao wa udiyedi na ye hedede bayao Petelo unai ye wane, “Ku tausuwalawa, kowa Satani. Temeta nuwatu me nige Yaubada unai ye laoma, na tamowai siya yodi nuwanuwatu.”
Yesu idohagi hemuhemuliwatanina
34 Na kabo boda wa ye yoganedi se laoma yona hekahekatao maiyadiyao na ye hededelau udiyedi ye wane, “Ena kaiteya ye henuwa bena ye hemuliwatanigau, meta tanoubu ta maulina ye nuwagabaei, yona sataulo ye bahei na ye hemuliwatanigau. 35 Ena tanoubu ta maulina ye gadosisiyei, meta yona mauli namwanamwana kabo ye tauwadam. Ena tanoubu ta maulina ye nuwagabaei yau yo ewaneliya debamai wai, kabo mauli namwanamwana ye lobai. 36 Taba tamowai hesau tanoubu ginaulidi maudoidi ye haidi, na yona mauli namwanamwana ye tauwadam, meta yona namwa saha? 37 Saha namwanamwana unai kabo yona mauli ne ye hai uyoi? 38 Ena hesau teina isi ganaganawalina yo yabayababana ta unai ye mwadineigau yo yogu hedehedede ta unai ye mwadine, Tau Natuna hinage kabo ye mwadinei huyana ye uyoma Tamana yona namanamali unai maiyana yona anelu tabudiyao.”
1 Na kabo Yesu ye hededelau udiyedi ye wane, “Ya hedede mamohoi. Hekadi inai taba nige se boita kana siga Yaubada yona basileiya ma gigibwalina ye lagema se kita.”
Yaubada Yesu kana kao ye bui
2 Mayadai haligigi kesega se lau, na kabo Petelo, Yamesi, yo Yowane Yesu ye woyaidi se sae kuduli lohalohana hesau unai. Siya se bom mo menai. Matadi wai se kaikaikewa na Yaubada Yesu kana kao wa ye bui. 3 Na kana kwama ye bui ye posi na ye namanamali kalili, nige gonowana yona posiposi ne tamowai hesau ye deulilobai kaiyaulina ta unai. 4 Na kabo Eliya maiyana Mose se taumasalaha na Yesu maiyadi se hedehedede. 5 Petelo ye hededelau Yesu unai ye wane, “Tanuwaga, ye namwa kalili to kai inai. Unai taba gwau haiyona ka kabidi, hesau kowa yom, hesau Mose yona, yo hesau Eliya yona.” 6 Hedehedede wa ye hedede matawuwuna siya se matausi kalili, unai nige kabina ye kata saha dudulaina kabo ye hedede. 7 Na kabo yada ye taumasalaha ede ye sumadi. Na yada wa unai kalina hesau se lapui ye laoma ye wane, “Natugu ya gadosisi kaliliyei ede teina. Kwa lapulau iya unai!” 8 Nige bayaona na se kaikewa takikili meta Mose yo Eliya nige se kitadi, na Yesu ye bom mo.
Hekahekatao Yesu unai Eliya se henamaiyei
9 Yesu maiyadi kuduli wa unai se lidi se dobidobi na ye hededelau udiyedi ye wane, “Saha wau kwa kita wa tabu tamowai hesau yona kwa hedehedede ye lau ee kana siga Tau Natuna boita unai ye tolouyo.” 10 Siya se bom hedehedede wa se nuwanuwatui yo hinage se hedehededei se wane, “Boita tolouyona meta kaniyona ede saha?” 11 Na kabo se henamaiyei se wane, “Mata wuwuna saha to laugagayo taulauhekata se wane, Eliya taba ye uyoma baguna?” 12 Yesu ye hededelau udiyedi ye wane, “Mamohoi, Eliya ye laoma baguna na ginauli maudoidi ye kabinonohaidi. Yo hinage Buka Tabuna unai se kuliyako se wane, ‘Tau Natuna kabo ye kamkamna kalili yo se lau kwatakwataei.’ 13 Na ya hededelaowa, Eliya ye laomako, na saha yababadi se nuwatuidi na se henuwadi wa tamowai se ginaulidiko iya unai, doha iya wasana unai se kuliyako.”
Yesu wawaya ye henamwanamwa
14 Na kabo se lage kadi kahao wa udiyedi. Na boda lakilaki se kitadi meta kadi kahao wa se tolo hetakikilidi, yo hinage laugagayo taulauhekata hekadi maiyadiyao se haihaikwayagala. 15 Na tamowai wa Yesu se kita meta kaluwadi se loi na se heloi se lau iya se lautokiyei. 16 Na Yesu ye henamaiyedi ye wane, “Komiu saha kwa haihaikawayagalaei?” 17 Boda wa luwadi wai tamowai hesau ye wane, “Tanuwaga, natugu ya woyaiyama kalim wai. Yaluwa yababana iya ye luwui, unai nige gonowana ye hedehedede. 18 Ena yaluwa yababana yona kasiyebwa ye heduwaisini kabo ye gabadobiyei bwatano ne unai, na kawana ne unai kabo gwasapulo se pesa, yo hinage kawana ye kapuyahisi yo tauna se todi. Yom hekahekatao ya kaibwadaidi bena yaluwa yababana ne se hedede hepesa na nige gonowadi.” 19 Na kabo Yesu ye hededelau udiyedi ye wane, “Komiu isi ta, yomi sunuma se gagili! Huya lohaloha ya miya maiyamiu, na iyamo nige kwa kawamamohoiyeigau. Wawaya me ku woyaiyama kaligu wai.” 20 Na kabo wawaya wa se woyalae Yesu unai. Metai na yaluwa yababana Yesu ye kita ede wawaya wa ye gulidobi bwatano unai. Ye tapitapipili yo ye gwasagwasapulo. 21 Yesu gama wa tamana ye henamaiyei ye wane, “Kauyana teina kasiyebwa ta ye tubu iya unai?” Tamana wa ye wane, “Ma gagilina unai. 22 Huya badobado iya ye gabadobiyei kaiwa kalakalasina yo waila unai bena kabo ye unuhemwaloi. Na ena kowa gonowam, kabo ku katekamkamnaegai yo ku saguigai.” 23 Yesu ye wane, “Ye saha to ku wane, ‘ena kowa gonowam’? Ginauli maudoidi kabo se masalaha taukawamamohoiyeigau unai.” 24 Na gama wa tamana ye yogalau ye wane, “Ya kawamamohoiyego. Na yogu sunuma gagilina ta unai ku hebayaogau.” 25 Na Yesu boda wa ye kitadi se lau mwamwayau iya unai, na kabo ye hededelau yaluwa yababana wa unai ye wane, “Yaluwa beya kolakolana yo unaunana, wawaya me ku pesagabae na tabu ku luwu uyo iya unai.” 26 Na yaluwa yababana wa ye yogahi ede wawaya wa ye nukui na ye laugabae. Na gama wa kana kao doha tamowai boiboitana, unai boda wa yodi nuwatu bena ye boitako. 27 Na Yesu ye kabilau wawaya wa nimana unai ye kabihetolo, ede ye tolo. 28 Na kabo Yesu maiyana hekahekatao se mwalaesae numa kalona unai. Metai siya se bom na se henamaiyei se wane, “Ye saha to nige gonowamai wawaya ne unai yaluwa yababana ne ka hedede hepesa?” 29 Yesu ye hededelau udiyedi ye wane, “Yaluwa kana kao doha teina ta, meta tapwalolo mo unai kabo kwa hedede hepesa.”
Yesu yona boita yo tolouyo ye hededehemasalaha uyoi
30 Kabo Yesu maiyana hekahekatao magai wa se laugabae na Galili unai se laulau. Yesu nige ye henuwa bena tamowai kabina se kata meta siya ede haedi, 31 matawuwuna yona hekahekatao wa ye hekatadi. Ye hededelau udiyedi ye wane, “Tamowai hesau kabo Tau Natuna kana ye walohai na ye moselae tamowai hekadi nimadi wai. Na kabo se unuhemwaloi, na mayadai haiyona mulidi wai kabo ye tolouyo.” 32 Na Yesu saha ye hedehededeidi ta, yona hekahekatao wa nige se nuwatulobai. Iya nige se henamaiyei, matawuwuna ede se matausi.
Kaiteya ye sae kalili Yaubada matana wai?
33 Na kabo se lage Kapelenauma unai. Siya numa hesau kalona unai, na Yesu ye henamaiyedi ye wane, “Komiu saha kwa hetahetala keda ne unai?” 34 Siya nige kalinadi, matawuwuna keda wa unai se bom se henahenamai uyoidi luwadi ne unai kaiteya kabo yodi bada. 35 Yesu ye tulidobi na Saudoudoi-labui wa ye yoganedi na ye wane, “Yaubada matana ena kaiteya tamowai ye henuwa bena ye baguna, taba ye lau ye mulita molosi, yo ye hemala heyayai tauhaina mamohoi.” 36 Na kabo Yesu ye kabilau wawaya gagilina hesau nimana unai na ye kabihetolo matadi yena. Iya ye labasiyama na ye wane, 37 “Taba kaiteya wawaya gagilina hesau doha teina ye yogaisini yau hesagu wai, meta hinage yau ye yogaisinigau. Yo kaiteya ye yogaisinigau meta hinage tauhetamaligau ye yogaisini.”
“Kaiteya nige ye guduguduida meta iya kada kaha hesau”
38 Na Yowane ye hededelau Yesu unai ye wane, “Tanuwaga, tamowai hesau ka kita yaluwa yababadi tamowai udiyedi ye hedede hepesadi kowa hesam wai. Na ka hededelau unai taba ye hekaiyawasi, matawuwuna iya nige kada kaha hesau.” 39 Yesu ye wane, “Tabu kwa hekahekaiyawasi, matawuwuna kaiteya laulau gigibwali ye ginauli yau hesagu wai, iya taba nige gonowana ye hededeheyababagau tenem huyana ne unai. 40 Kaiteya nige ye guduguduida, meta kada kaha hesau. 41 Ya hedede mamohoi. Kaiteya waila kaputina ye leyawa yau hesagu wai, matawuwuna kowa Keliso yona, unai iya kainauya kabo ye hai.” Yesu ye guguyaida bena tabu yababa kedadi udiyedi ta laulau 42 “Kaiteya tausunumaigau hesau doha teina wawaya gagilina ta ye woya pwanoli na yababa ye ginauli, taba ye namwa mo weku lakilakina gadona wai se kau, na se tuudobiyei gabwa wai, na kabo Yaubada yona hekamkamna ye lobai. 43-44 Ena nimam hesau unai yababa ku ginauli, ku bolihai. Ye namwa mo nimam kesega unai mauli nige nosina ku hai, na kabo ma nima labulabuim na ku lau kaiwa kalakalasina nige kana siga unai. 45-46 Yo ena kaem hesau ye woya yababaigo, ku bolihai. Ye namwa mo kaem kesega unai mauli nige nosina ku hai, na kabo ma kae labulabuim na Yaubada ye gabalaego kaiwa kalakalasina unai. 47 Yo hinage ena matam hesau yona kaikaikewa ye yababa, ku lamohai. Ye namwa mo matam kesega na Yaubada yona basileiya unai ku lage, na kabo ma mata labulabuim na Yaubada ye gabalaego kaiwa kalakalasina unai, 48 ‘temenai mwatamwata buluma taukaikaidi taba nige se mwaloi, yo kaiwa nige yona kababoso’. 49 Yaubada kabo ye hekalitagomiu kaiwa kalakalasina unai. 50 Kalita meta ye namwa, na taba ye tomatoma, kabo idohagi na ye kalita uyo. Kwa hemala doha kalita, kaniyona ede bena kwa hai nuwa kesega na kwa miya.”
Paliseya tamowaidi Yesu unai inawase laugagayona se henamaiyei
1 Yesu ye dahalai ye lau Yudeya tehana unai ye lage. Na kabo Yolidani wailana unai ye kawasi. Temenai boda lakilaki se lagegogoma Yesu unai na ye hekata uyoidi. Iya yona laulau doha tenem. 2 Paliseya tamowaidi hekadi se laoma iya unai bena se laukita ede se henamaiyei se wane, “Taba tamowai hesau mwanena ye inawasei, meta ye dudulai?” 3 Na Yesu ye henamaiyedi ye wane, “Mose yona laugagayo sahasahana ye leyawa?” 4 Na se wane, “Mose ye talamyei kabo tamowai ye inawase. Na bagubaguna bena inawase pepwana ye kuli kabo mwanena ye hetamali.” 5 Yesu ye hededelau udiyedi ye wane, “Teina laugagayo ta Mose ye kuli komiu yomiu, matawuwuna nuwamiu se kwailolo kalili. 6 Huyana Yaubada tanoubu ye hetubu, meta loheya yo waihiu ye ginaulidi. 7 Unai ede loheya kabo tamana yo sinana ye laugabaedi na ye patulau mwanena unai, 8 na siya taudi labui se hemala buluma kesega. Unai siya nige tamowai labui, na se hemala tamowai kesega. 9 Unai Yaubada saha ye tolekesegai, meta tabu tamowai hesau ye hetatagwaligwali.” 10 Siya se uyo numa kalona unai, ede yona hekahekatao Yesu yona hedehedede wa se henamaiyei. 11 Iya ye hededelau udiyedi ye wane, “Kaiteya tamowai mwanena ye inawasei na waihiu hesau ye tawasolai, meta iya ye ganawali. 12 Yo kaiteya waihiu mwanena ye inawasei na loheya hesau ye tawasolai, meta iya hinage ye ganawali.”
Yesu ye kaibwada Yaubada unai kabo wawayao ye kitahetetedi
13 Tamowai hekadi wawayao gagilidi se woyalaedi Yesu unai bena kabo ye kabilau udiyedi. Na yona hekahekatao tamowai wa se hedede hekaiyawasidi. 14 Yesu ye kitadi, na ye koipili ede ye hededelau yona hekahekatao udiyedi ye wane, “Wawayao gagilidi se laoma kaligu wai, na tabu kwa guduguduidi, matawuwuna tamowai yodi laulau doha siya, Yaubada yona basileiya meta siya yodi. 15 Ya hedede mamohoi. Kaiteya tamowai Yaubada yona basileiya nige ye hai ma sunumana doha wawaya gagilina ta, meta taba nige ye lusola Yaubada yona basileiya unai.” 16 Na kabo wawayao wa kesega kesega ye labasi, na nimana ye tolesai kewana ne unai na ye kaibwada Yaubada unai kabo ye kitahetetedi.
Tamowai gogogogona Yesu unai mauli nige nosina ye henamaiyei
17 Yesu ye hetubu bena ye dahalai, na tamowai hesau ye heloi ye laoma Yesu talanuwana wa unai ye tulibono, na ye henamaiyei ye wane, “Tanuwaga namwanamwana, taba saha ya ginauli kabo mauli nige nosina ya hai?” 18 Yesu ye hededelau unai ye wane, “Ye saha to ku wane yau ya namwa? Nige tamowai hesau ye namwa, na Yaubada ye bom mo. 19 Kowa Yaubada yona laugagayo kabidi ku kata: Tabu ku kaiunu, tabu ku ganawali, tabu ku kaiwahali, tabu lauhetala unai ku hedede lupolupo, tabu tamowai hesau ku lupohai, yo hinage tamam yo sinam ku hekasisiyedi.” 20 Tamowai wa ye hededehemasalaha ye wane, “Tanuwaga, ma gagiligu unai ye laoma teina laugagayo maudoidi ta ya miya watanidi.” 21 Yesu ye kitalau ma gadosisina na ye wane, “Ginauli kesega mo sola nige ku hai. Yom gogo maudoidi ku lokune gabaedi, na monidi ne ku moseidi taudehadeha yodi, na kabo yom kainauya ku hai galewa ne unai. Na kabo ku laoma ku hemuliwatanigau.” 22 Iya hedehedede wa ye lapui ede ye siliyata. Na ye lau ma nuwa kamkamnana, matawuwuna ede iya ye gogo kalili. 23 Yesu yona hekahekatao ye kita hetakikilidi, na ye hededelau udiyedi ye wane, “Tamowai gogogogodi bena se lusola Yaubada yona basileiya unai meta ye pilipili kalili.” 24 Yona hedehedede wa unai se siliyata, na ye hedede uyo ye wane, “Natuguwao, Yaubada yona basileiya lusolana meta ye pilipili kalili. 25 Doha kamela nige gonowana diu duhana wai ye lusola, gonogonowana doha tamowai gogogogona iya hinage nige gonowana ye lusola Yaubada yona basileiya unai.” 26 Yesu yona hekahekatao wa kabo se siliyata na se henahenamai uyoidi se wane, “Kaiteya kabo mauli nige nosina ye hai?” 27 Yesu ye kitalau udiyedi na ye wane, “Tamowai kalidi wai nige gonowadi, na Yaubada kalina wai iya gonowana tamowai ye haidi se lau yona basileiya unai, matawuwuna Yaubada ginauli maudoina gonowana ye ginaulidi.” 28 Na Petelo ye hededelau Yesu unai ye wane, “Ku kitagaiko, yoma ginauli maudoidi ka laugabaedi na ka hemuliwatanigo.” 29 Yesu ye hededelau udiyedi ye wane, “Ya hedede mamohoi. Kaiteya yona numa, kana kahao, lounao, tamana, sinana, natunao, yo yona koya ye laugabaedi yau debagu wai yo ewaneliya debana wai, 30 teina huya ta unai Yaubada kabo ginauli maudoidi udiyedi ye kainauya kaliliyei, yona numa, kana kahao, lounao, sinana, natunao, yo yona koya kabo se bado kalili. Yo hinage pilipili kabo ye hekalodi, na malaitom huya kabo mauli nige nosina ye hai. 31 Tamowai gwaudi siya kaiteyadi wasa laulau tamowaidi huya ta unai, kabo se mulita. Na tamowai gwaudi siya kaiteyadi nige wasa laulau tamowaidi, kabo se baguna.”
Yesu yona boita hedehededena hehaiyonana
32 Yesu yona hekahekatao ye bagunaedi se laulau Yelusalema. Yona hekahekatao wa se siliyata yo tauhemuliwatanina hekadiyo wa se matausi. Iya kabo yona hekahekatao wa ye woya hesuwaladi na saha kabo ye tubu iya unai ye hedede udiyedi. 33 Yesu ye wane, “Kwa lapulapui namwanamwa! Teina ta saesae Yelusalema. Na temenai taukaitalasam babadadi yo laugagayo taulauhekata udiyedi kabo tamowai hesau Tau Natuna kana ye walohai. Se koitalaliu kabo bena se unui, na kabo se moselae dagela tamowaidiyao kalidi wai. 34 Iya kabo se talatalawasiyei yo se kaikaisoi yo se pidili, yo kabo se unuhemwaloi na mayadai hehaiyonana unai kabo ye tolouyo.”
Yamesi yo Yowane yodi kaibwada
35 Sebedaiyo natunao, Yamesi yo Yowane se laoma Yesu unai se wane, “Tanuwaga, saha ka kaibwadai ne, ka henuwa bena ku ginauli yomai.” 36 Yesu ye henamaiyedi ye wane, “Komiu saha kwa henuwa bena ya leyawa?” 37 Na se wane, “Ku hededehesunumagai taba yom basileiya unai kai tauma labui kabo teha saesaena unai ka tuli, hesau kowa nima kahatum na hesau seuseulim unai.” 38 Yesu ye hededelau udiyedi ye wane, “Komiu saha kwa kaikaibwadai ta, nige kabina kwa kata. Numanuma sahasahana kabo ya numa ne gonowamiu kabo kwa numa? Yo hinage babatiso kabo ya hai ne gonowamiu kabo kwa hai?” 39 Na se wane, “Kai gonowamai.” Unai Yesu ye hededelau udiyedi ye wane, “Mamohoi, komiu kabo numanuma ne kwa numa, yo yogu babatiso ne unai kabo kwa babatiso, 40 na yau nige gonowana ya hineli kaiteya kabo kahatugu unai ye tuli, yo kaiteya seuseuligu unai ye tuli. Teina kabatuli ta tamagu ye hineli nonohaidiko kaiteyadi kabo unai se tuli.” 41 Yamesi yo Yowane yodi kaibwada wa Yesu yona hekahekatao hekadi wa se lapui ede se koipili. 42 Unai Yesu ye yogagogoidi na ye wane, “Komiu kabina kwa katako meta dagela tamowaidi yodi wasawasa yodi tamowai se tanuwagaidi yo idohagi yodi tauwoyawoya laugagayo bayabayaona unai se woyaidi. 43 Na komiu tabu doha tenem. Kaiteya ye henuwa bena yomi bada, iya kabo yomi heyayai tauhaina. 44 Kaiteya ye henuwa bena ye baguna, meta iya tamowai maudoidi yodi heyayai tauhaina. 45 Mata wuwuna Tau Natuna nige ye laoma bena ye heyaheyaliyedi, na ye laoma bena iya yodi heyayai tauhaina, unai yona mauli ye mose gabaei tamowai maudoidi yodi mauli maisana.”
Yesu Batimaiyo matana ye helaladi
46 Siya se lage Yeliko unai. Na Yesu maiyana hekahekatao yo boda lakilaki maiyadiyao magai wa se laugabae, na tamowai mata gibugibuna hesau hesana Batimaiyo, Timaiyo natuna, keda dedekana wai ye tutuli na ye kaikaibwada. 47 Na huyana Batimaiyo wasa ye lapui meta Yesu Nasaleta tamowaina ye laoma dedekana ne unai, ye yogalau ye wane, “Yesu, Dawida natuna, ku katekamkamnaegau!” 48 Na tamowai gwaudi iya se dilai se wane, “Ku mwanou!” Na iya kabo ye yoga lakilaki na ye wane, “Dawida natuna, ku katekamkamnaegau!” 49 Ede Yesu ye talutolo na yona hekahekatao wa ye hededelau udiyedi ye wane, “Tamowai ne kwa yoganeiyama.” Ede se yogalau unai se wane, “Nuwam ye talu na ku tolo! Yesu ye yoganeigo!” 50 Iya kana kwama ye haigabae na ye kamposi na ye lau Yesu unai. 51 Yesu ye henamaiyei ye wane, “Saha ku henuwa bena ya ginauli kalim wai?” Tamowai mata gibugibuna wa ye wane, “Tanuwaga, ya henuwa taba matagu ku helaladi.” 52 Yesu ye hededelau unai ye wane, “Yom sunuma debana wai ku namwanamwa. Na yom kabalau yena ku lau.” Na tamowai wa matana se lala ede Yesu ye hemuliwatani keda wa unai se lau.
Yesu se hailobai yo se hedebasae doha wasawasa Yelusalema unai
1 Yesu ma kana bodao Yelusalema se hanahanawui, na se lage Betepago yo Betaniya Olibe koyana unai. Na kabo yona hekahekatao labui ye hetamalidi se lau, 2 na ye hededelau udiyedi ye wane, “Kwa lau na matamiu ne unai magai gagilina hesau unai kwa lage, metai kabo donki natuna kwa kita se paihekahini duu unai, sola nige tamowai hesau ye tulisae unai. Kwa yailihai na kwa woyaiyama. 3 Ena tamowai hesau ye henamaiyeigomiu ye wane, ‘Saha temeta kwa ginauli?’, kwa wane, ‘Kama tanuwaga ye henuwa na mahana kubwakubwa mo unai kabo ye hetamali uyoiyama.’ ” 4 Se lau ede donki natuna wa se kita duu unai se paihekahini. Se yaiyaili, 5 na tamowai hekadi temenai se totolo se hededelau kalidi wai se wane, “Ye saha to donki natuna ne kwa yaili?” 6 Yesu saha ye hedede kalidi wai wa gonogonowana hinage se hedede udiyedi ede suisui wa se talamyei. 7 Donki natuna wa se woyai se leyama Yesu unai. Na kadi kwama se tolesaedi kewana ne unai, na Yesu ye tulisae unai. 8 Tamowai hekadi kadi kwama se yesedi keda wa unai, na hekadi hinage kaiwa lagadi se bolidi na keda wa unai se yesedi. 9 Kaiteyadi se baguna yo se mulita na Yesu maiyadi se laulau na se heyoheyoga se wane, “Hosana!” “Ka hedebasaego, kowa Guiyau hesana wai ku laoma!” 10 “Ka hedebasaego, kowa kama kulutubu Dawida kana isimulita. Ku laoma ku tanuwagaigai!” “Yaubada galewa unai ta hedebasae!” 11 Na kabo Yesu ye lusae Yelusalema, na ye mwalae numa tabuna bakubakuna unai na ginauli maudoidi ye kitasipwaidi. Na ye hetubu ye meimeilahi, unai numa tabuna bakubakuna wa ye pesagabae, na maiyana hekahekatao se uyo Betaniya.
Yesu kaiwa ye kawagulaiyei
12 Mala ye tom Betaniya se laugabae se laulau na Yesu ye hasali. 13 Keda loha wai ye kitalau kaiwa hesau ma lugulugu na ye kita, ede kaniyona hesabana ye lau. Na ye kita wa meta lugu gaibuna. Mata wuwuna kaiwa wa nige yona huya kaniyo. 14 Ede Yesu kaiwa wa ye kawagulaiyei ye wane, “Taba nige tamowai hesau kaniyom ye kai uyoi.” Yona hekahekatao hedehedede wa se lapui.
Yesu taulokune ye henakudi se pesa numa tabuna bakubakuna unai
15 Na kabo se lage Yelusalema ede Yesu ye mwalae numa tabuna bakubakuna unai. Na ye hetubu taulokune yo tauhemahemaisa ye henakudi se pesa. Yo hinage moni tauheduhedudu yodi hatahata ye kahalabuidi. Yo kaitalasam bunebunediyao taulokunedi yodi kabatutuli ye buikahalaedi. 16 Na ye laugagayoidi tabu tamowai hesau lokune ye bahei na ye mwalae numa tabuna bakubakuna unai. 17 Yona lauhekata wa unai ye hededelau udiyedi ye wane, “Se kuliyako se wane: ‘Yogu numa tabuna meta tamowai maudoidi yodi kaba tapwalolo.’ Komiu kwa hai ye hemala taukaiwahali yo taukailupolupo yodi numa.” 18 Taukaitalasam babadadi yo laugagayo taulauhekata hekadi yona hedehedede se lapui, ede keda se wase bena taba idohagi kabo se unui. Na Yesu se matausiyei, matawuwuna ede tamowai gwaudi yona lauhekata wa se nokoei. 19 Ye meimeilahi ede Yesu maiyana hekahekatao Yelusalema se laugabaei.
Sunuma gigibwalina Yesu ye lauhekatae
20 Malatomtom yena se laulau Yelusalema, na kaiwa wa se kita meta ye wowoya yo ye pogi. 21 Saha ye tubu wa Petelo nuwana ne unai ye sae ede ye hededelau Yesu unai ye wane, “Tanuwaga, ku kitalau! Lahi kaiwa wa ku kawagulaiyei wa ye pogi.” 22 Yesu ye hededelau udiyedi ye wane, “Yaubada kwa sunumai. 23 Ya hedede mamohoi. Ena kaiteya ye hededelau teina kuduli ta unai ye wane, ‘Ku tuudobiyego gabwa ne unai’, na nige ye nuwalabulabui, na ye sunuma mo bena yona kaibwada ne Yaubada kabo ye ginauli, meta kabo Yaubada ye ginauli. 24 Unai ya hededelaowa, tapwalolo unai saha kwa kaibwadai na kwa sunumai meta kwa hainonohaiyako, kabo Yaubada ye leyawa. 25-26 Na yomi huya tapwalolo Yaubada unai, na ena yomi pilipili kami kahao hekadi udiyedi, bena kwa nuwatugabaedi, metai kabo Yaubada tamamiu galewa unai yomi yababa hinage ye nuwatugabaedi.”
Yesu yona gigibwali se henamaiyei
27 Se lage uyo Yelusalema unai. Na Yesu numa tabuna bakubakuna unai ye laulau, na kabo taukaitalasam tauwoyaidi yo laugagayo taulauhekata yo tamowai lakilakidi se laoma iya unai. 28 Na se henamaiyei se wane, “Gigibwali sahasaha unai yo kaiteya yona gigibwali unai teina ginauli ta ku ginaulidi?” 29 Yesu ye hededelau udiyedi ye wane, “Hedehedede hesau kabo ya henamaiyeigomiu. Na bena yogu kwa hedehedede, kabo hinage ya hededelaowa kaiteya yona gigibwali unai teina ginauli ta ya ginaulidi. 30 Yowane yona gigibwali haedi ye hai na ye hebahebabatiso? Yaubada unai o tamowai udiyedi? Hage, yogu kwa hedehedede.” 31 Siya se bom se henahenamai uyoidi, “Taba ta wane, ‘Yaubada unai ye hai’, iya kabo ye wane, ‘Ede ye saha to nige kwa kawamamohoiyei?’ 32 O taba ta wane, ‘Tamowai udiyedi’, kabo boda se heyababada.” (Na boda se matausiyedi, matawuwuna maudoidi Yowane se kitayako meta iya peloweta mamohoina.) 33 Unai kabo se hededelau Yesu unai se wane, “Kai nige kabina ka kata.” Unai Yesu ye wane, “Yau hinage taba nige yomiu ya hedehedede kaiteya yona gigibwali unai ginauli ta ya ginaulidi.”
Taukitakitahetete yababadi palabolena
1 Na kabo Yesu ye hetubu ye hedede palabole kalidi wai ye wane, “Tamowai hesau wine koyana ye kumai, na ye gana hetakikili, wine kaniyodi kaba tamtam ye ginauli, yo kaba yaiyaiwa numana ye kabi. Na kabo yona wine koyana ye mosei taukitakitahetete kalidi wai na ye lau magai hesau keda lohaloha unai. 2 Wine yona huya kaniyo ye lage, ede yona heyayai tauhaina hesau ye hetamali ye lau taukitakitahetete kalidi wai bena koya tanuwagana yona wine kaniyona ye haidi. 3 Taukitakitahetete heyayai tauhaina wa se kelebesi yo se pidili, na se hetamali ye uyo ma nima gaibuna. 4 Heyayai tauhaina hesau ye hetamali uyoi. Iya kuluna se koilapai yo se kabihenayai kaliliyei. 5 Hinage hesau ye hetamali uyoi. Iya se koihemwaloi. Na gwaudi kabo ye hetamalidi se lau, meta hekadiyo se pidilidi yo hekadiyo se koihemwaloidi. 6 Na kabo iya natuna tahunuwana ye bom mo maiyana se miyamiya. Na ye hetamali mulitai na ye nuwatui ye wane, ‘Yau natugu, unai kabo se hekasisiyei.’ 7 Taukitakitahetete wa se koitalaliu se wane, ‘Teina ta koya tanuwagana natuna tahunuwana. Kwa laoma ta koihemwaloi, na koya ta kabo kita ta tanuwagai.’ 8 Iya se kelebesi se koihemwaloi na se gabaedikwaei gana dagelana wa unai. 9 Koya tanuwagana kabo saha ye ginauli? Iya kabo ye laoma koya taukitakitahetete ye unuhemwaloidi, na kabo wine koyana wa ye moselaei tamowai hekadi se kitahetete. 10 Komiu taba kabina kwa kata Buka Tabuna unai saha se kuli wa, ‘Taukabinuma duu se subu na se tolehesuwala, na iyamo iya duu salibebe yo numa tauhebayaona ede. 11 Teina Guiyau yona nuwatu na ye namwa kalili matada ne unai.’ ” 12 Yesu yona palabole wa Dius tamowai lakilakidiyao se nuwatulobai meta siya kadi hedehedede, unai bena se pai. Na boda wa se matausiyedi, unai ede se laugabaei.
Takisi monina hedehededena
13 Na kabo Paliseya tamowaidi yo Heloda yona tamowai hekadi se hetamalidi se lau Yesu unai yona hedehedede unai bena se henuwapwanopwano. 14 Se lage iya unai kabo se wane, “Tanuwaga, ka kabina ka kata meta kowa ku dudulai. Tamowai nige ku matausiyedi, matawuwuna tamowai nige ku hekasisi gaibuidi. Na Yaubada yona keda mamohoina mo ku lauhekataei. Ye dudulai kabo takisi ka mosei Sisa unai o nige? 15 Kabo ka tole o tabu ka toletole?” Yodi kailupolupo Yesu ye kita na ye wane, “Idohagi to bena kwa lautonogigau? Hage, denali hesau kwa leyama ya kita.” 16 Ede denali wa se mosei Yesu unai na ye wane, “Teina kaiteya kana kao yo hesana?” Siya se wane, “Sisa.” 17 Yesu ye hededelau udiyedi ye wane, “Ena Sisa yona, kwa mosei Sisa unai, na ena Yaubada yona kwa mosei Yaubada unai.” Siya kabo Yesu se nokoei.
Tolouyoma tawasolana
18 Sadusiya tamowaidi yodi nuwatu tauboiboita taba nige se tolouyoma. Na se laoma Yesu se henamaiyei se wane, 19 “Tanuwaga, Mose yona kulikuli unai ye wane, ena tamowai hesau ye boita, na mwanena ye miyamiya, na nige natunao bena kana kaha hesau kwabulina ne ye tawasolai na natunao ye labasidi, kabo se hemala kana kaha wa natunao. 20 Huya hesau tamowai hesau natunao loheloheyao badodi haligigi-labui. Taubaguna ye tawasola, nige natunao, na ye boita. 21 Kana kaha helabuina kwabuli wa ye tawasolai. Iya hinage nige natunao, na ye boita. Na hehaiyonadi ye tawasolai wa gonogonowana. 22 Yodi haligigi-labui kwabuli wa se tawasolai, na nige natudiyao. Sine wa kabo hinage ye boita. 23 Badodi haligigi-labui wa meta kwabuli wa se tawasolai, na tolouyoma unai waihiu wa kabo kaiteya mwanena?” 24 Yesu ye hededelau udiyedi ye wane, “Komiu yomi kaba nuwapwanopwano ede teina. Yaubada yona hedehedede yo yona gigibwali nige kabina kwa kata. 25 Huyana tauboiboita se tolouyoma taba nige se tawasola yo taba nige se hetahetawasola. Na siya kadi kao kabo doha galewa aneludi. 26 Na tauboiboita yodi tolouyoma Mose yona buka unai saha ye kuli wa, idohagi to nige kwa nuwatui? Temenai, Yaubada ye taumasalaha kaiwa hesau unai, na kana kao doha kaiwa ye kalapulupululu. Na ye hededelau Mose unai ye wane, ‘Yau Abelahama yona Yaubada, yo Isako yona Yaubada, yo Yakobo yona Yaubada.’ 27 Yaubada ta iya nige tauboiboita yodi Yaubada, na iya taumaumauli mo yodi Yaubada. Komiu nuwamiu se pwanopwano kalili.”
Laugagayo saesae kalilidi
28 Na kabo laugagayo taulauhekata hesau ye laoma ede saha se hetahetaladi wa ye lapuidi. Iya ye nuwatulobai meta Yesu hedehedede namwanamwadi ye hedededi udiyedi, ede ye henamai Yesu unai ye wane, “Laugagayo maudoidi ta udiyedi meta sahasahana ye baguna ede?” 29 Yesu ye wane, “Teina laugagayo saesae kalilina ede: ‘Isalaela tamowaidiyao, kwa lapulapui! Guiyau yoda Yaubada, iya Guiyau kesega mo. 30 Unai Guiyau yom Yaubada ku gadosisiyei ma nuwam ye gehe, ma yaluwam ye gehe, yo ma nuwanuwatum ye gehe, yo ma bayaom ye gehe.’ Teina ta laugagayo bagubagunana. 31 Helabuina ede teina: ‘Kowa helem taumiya tamowaina ku gadosisiyei, doha ku bom ku gadosisiyeigo.’ Teina laugagayo labui ta se sae kalili, na kabo hekadi.” 32 Na kabo laugagayo taulauhekata wa ye hededelau Yesu unai ye wane, “Tanuwaga, saha ku hedede wa meta ye dudulai. Ye mamohoi kalili meta Yaubada kesega mo, na nige Yaubada hesau, iya ye bom mo Yaubada. 33 Yaubada bena ta gadosisiyei ma nuwada ye gehe, yo ma sonogada ye gehe, yo ma bayaoda ye gehe. Yo heleda taumiya tamowaina bena ta gadosisiyei, doha ta bom ta gadosisi uyoida. Teina laugagayo ta se sae kalili ede, na kabo kaitalasam gabugabudi yo kaitalasam hekadi.” 34 Yesu ye kita meta tamowai wa ye sibasiba unai ye wane, “Kowa Yaubada yona basileiya ku hanahanawui.” Unai siya maudoidi se matausi ede nige se henamai uyoi.
Dawida natuna hedehededena
35 Yesu numa tabuna bakubakuna unai ye laulauhekata na ye henamaiyeidi ye wane, “Mata wuwuna saha to laugagayo taulauhekata se hedede bena Keliso meta Dawida natuna? 36 Yaluwa Tabuna yona gigibwali unai Dawida ye hededegabae ye wane, ‘Guiyau ye hededelau yogu guiyau unai ye wane, “Nima tuutuugu yena ku tuli ye lau ee kam waiunu ya toledi kaem gunina ena, se hemala kaem kabatoledi.” ’ 37 Dawida Keliso hesana ye katai Guiyau. Na komiu yomi nuwatu saha, iya hinage Dawida natuna?” Boda wa se lapui meta nuwadi se namwa.
Yesu laugagayo taulauhekata ye hededeheyababadi
38 Yesu yona lauhekata unai ye hededelau udiyedi ye wane, “Laugagayo taulauhekata kwa kita namwanamwaedi. Yodi taitaihile udiyedi se henuwa bena kwama lohalohadi se luwuidi yo kaba lokulokune udiyedi bena tamowai siya se hailobaidi, 39 yo hinage sunago yo kaba kaikaigogo udiyedi kabatutuli namwanamwadi se henuwadi. 40 Na kwabukwabuli yodi numa se lupohaidi, yo yodi tapwalolo se helohadi bena kabo tamowai se nokoeidi. Tamowaidiyao ne Yaubada kabo ye hekamkamna kaliliyeidi.”
Kwabuli dehadehana yona kainauya
41 Na Yesu ye tutuli moni kaba usausa dedekadi wai, na ye kaikaikewa na boda se monimonitole. Tamowai monimonidi yodi moni lakilakidi se usaidi kaba usausa wa kalodi udiyedi. 42 Na kabo kwabuli dehadehana hesau ye laoma, na pene gagilidi labui ye usaidi. Pene labui wa lakidi meta se gagili kalili. 43 Yesu yona hekahekatao ye yoganedima na ye hededelau udiyedi ye wane, “Ya hedede mamohoi. Teina kwabuli ta kainauya lakilaki kalilina ye tole, na kabo maudoidi ne. 44 Mata wuwuna ede siya yodi moni lakilakidi udiyedi na kabo hisa mo se haidi na se toledi, na iya yona deha unai moni maudoina kalina wai ye tolehegehe.”
Yesu numa tabuna koigwaligwalina ye hedede nonohai
1 Yesu maiyana hekahekatao numa tabuna unai se pesa, na yona hekahekatao wa hesau ye hededelau Yesu unai ye wane, “Tanuwaga, weku woiyawa udoidi numa lauyahidi ne sola ku kitadi yo hinage numa namwa muyomuyoudi ne!” 2 Yesu ye wane, “Teina numa yo woyo lakilakidi maudoidi ta kwa kitadi? Taba nige weku hesau ye kaitalae weku hesau kewana ne unai. Dius kadi waiunu kabo maudoidi se koigwaligwali hegehedi.”
Tanoubu yona huya gehe hekihekinoina
3 Na Olibe koyana unai Yesu maiyana hekahekatao se tutuli na numa tabuna se kaikaikewalaei. Na Petelo, Yamesi, Yowane yo Andeleya se bom se laoma Yesu unai na se henamaiyei se wane, 4 “Teina ginauli ta kauyana kabo se tubu, yo hekihekinoidi saha kabo se tubu baguna, ku hededehemasalaha kalimai wai?” 5 Yesu ye wane, “Komiu kwa kita namwanamwa, madai se lupohaigomiu. 6 Tamowai gwaudi kabo se laoma yau hesagu se hepaisowa na se wane, ‘Yau Keliso ede.’ Unai kabo tamowai gwaudi se lupohaidi. 7 Huyana iyala dagugudi o wasadi kwa lapuidi, tabu kwa matausi. Teina ginaulidi ta kabo se tubu, na tanoubu ta yona huya gehe meta sola. 8 Magai hesau yo magai hesau kabo se haiꞌiyaꞌiyala uyoidi, basileiya hesau basileiya hesau kabo se haiꞌiyaꞌiyala uyoidi. Yo mwanikuniku teha hekadi udiyedi yo hasahasali hinage. Hekihekinoi ta yodi tubutubu meta kana kao doha sine diyadiyakana ye hetubu bena ye labalaba. 9 Komiu kwa kita namwanamwaegomiu! Tamowai kabo se woyalaegomiu kaba laulauhetala udiyedi, yo sunago kalodi udiyedi kabo se pidiligomiu. Yau debagu wai kabo se woyalaegomiu tamowai lakilakidiyao yo wasawasa udiyedi, kabo kwa hededehemasalahagau siya kalidi wai. 10 Bagubagunana komiu yo tauhemuliwatanigau maudoimiu teina wasa namwanamwana ta bena kwa lauguguyaei basileiya maudoidi udiyedi, na kabo tanoubu yona huya gehe. 11 Na taba huyana se paigomiu yo se laegomiu kaba lauhetala udiyedi, meta tabu kwa nuwadubu, kabo hedehedede saha udiyedi kwa hedehedede. Na saha Yaubada ye leyawa ne unai kwa hedehedede, matawuwuna komiu taba nige yomi nuwanuwatu yena kwa hedehedede, na Yaluwa Tabuna mo iya kabo ye hekatagomiu na kwa hedehedede. 12 Tamowai yona saeya kabo kana ye walohai, yo tama kabo natuna kana ye walohai. Natu kabo tamadiyao yo sinadiyao maiyadi se haikawayagala na kadi se walohai na kabo se unuidi. 13 Tamowai kabo se subugomiu yau debagu wai. Na kaiteya ye tolobayao ye lau ee kamkamna kana siga unai, Yaubada kabo ye hemauli.”
Kamkamna lakilaki huyana
14 Na kabo Yesu ye wane, “Ginauli hesau nuwa matamatausina iya yababa lakilakina tauginaulina kabo kwa kita ye totolo nige yona kabatolo mamohoina unai — tauhasilina bena ye nuwatulobai — huyana ne unai Yudeya taumiyaina bena se wasabu se lau kuduli udiyedi se kenowadam. 15 Kaiteya na yona numa kewana unai ye pesadobi tabu ye mwalaesae numa kalona unai bena gogo hesau ye hai. 16 Hinage kaiteya yona koya unai ye paipaisowa, tabu ye uyo yona numa unai kana kwama hesabana. 17 Huyana ne unai taudiyadiyaka yo waiwaihiuwo labalabadiyao, siya kabo se kamkamna kalili. 18 Komiu kwa tapwatapwalolo bena yomi huya wasabu ne tabu huya gwagwama unai. 19 Tenem mayadaidi ne udiyedi kabo kamkamna lakilakina ye tubu huyana Yaubada tanoubu ye ginauli ye laoma ee teina nige kamkamna hesau doha teina, yo hinage taba nige ye tubu uyo. 20 Tenem mayadaidi ne Guiyau kabo ye hekubwadi. Ena nige ye hekubwadi, taba nige tamowai hesau ye miya. Na iya yona kaisunuwa tamowaidi hesabadi unai kabo huya ye hekubwa. 21 Tenem huyana ne unai, ena tamowai hesau ye hededelaowa kalimiu wai ye wane, ‘Keliso iya ede teinai!’, o ‘Keliso iya ede temenai!’, yona hedehedede ne tabu kwa kawamamohoiyei. 22 Mata wuwuna ede Keliso lupolupodi yo peloweta lupolupodi kabo se masalaha. Siya kabo hekihekinoi yo laulau gigibwalidi se ginaulidi bena tamowai se lupohaidi. Siya hinage se kaipate Yaubada yona kaisunuwa tamowaidi se lupohaidi. 23 Unai komiu kwa kitahetete namwanamwaegomiu! Ginauli maudoidi ya hedede nonohaidiko kalimiu wai!”
Keliso yona uyoma
24 Na kabo Yesu ye wane, “Kamkamna lakilaki mayadaidi gehena ne unai kabo mahana ye wahuwahuhuli, yo waikena taba nige ye dawaya. 25 Galewa kipwaladi kabo se beku, yo galewa ginaulidi hekadi kabo se tabutabubu. 26 Na tamowai maudoidi kabo Tau Natuna se kita yada unai ye laoma ma gigibwalina yo ma namanamalina. 27 Iya yona anelu kabo ye hetamalidi se lau yaumai hasi yodi kabalaoma udiyedi, yo tanoubu yo galewa kadi sigasiga udiyedi na kabo yona kaisunuwa tamowaidi se woya gogoidima.”
Yesu yona huya uyoma kaiwa unai ye heyaheyasoniyei
28 Na kabo Yesu ye wane, “Kaiwa heyaheyasonina hedehededena ne kwa kitalau unai. Huyana lagadi ne udiyedi se bwagu, kabo lugudi se laukaladi, meta kwa nuwatui yaikini huyana ye lage. 29 Doha hinage teina ginauli maudoidi ta kabo kwa kitadi se tubu, meta kwa nuwatui Tau Natuna yona huya uyoma mayadaina ye hanahanaumako numa kawa kedana unai. 30 Ya hedede mamohoi! Teina isi ta taba nige ye gehe, ye lau ee teina ginauli maudoidi ta se tubu. 31 Galewa yo tanoubu kabo se gehe, na yogu hedehedede ta taba nige kana siga.”
Bena ta nonononoha!
32 Na kabo Yesu ye wane, “Mayadaina yo huyana nige hesau kabina ye kata. Galewa aneludi yo Natuna hinage nige kabina se kata, na Tamana ye bom mo. 33 Komiu bena kwa kita namwanamwa yo kwa nonononoha, matawuwuna mahanana nige kabina kwa kata. 34 Tenem huyana ne unai doha teina: Tamowai hesau yona numa ye laugabaei ye lau magai keda lohaloha unai. Yona heyayai tauhaidi ye toledi yona numa se kitahetete. Hesau to hesau yodi paisowa ye moseidi na keda taukitahetetena ye hededelau unai bena ye silasilawa. 35 Unai komiu huya maudoina kwa silasilawa, matawuwuna numa tanuwagana yona huya uyoma nige kabina kwa kata, nuwana kabo meimeilahi, o boniyai duwaduwalina, o pwaole se doudou, o malatomtom gagilina unai. 36 Yona uyoma ne unai tabu bena ye lobaigomiu kwa kenokeno. 37 Hedehedede ta ya hedede kalimiu wai yo tamowai maudoidi udiyedi ya hededelau ya wane, ‘Bena kwa silasilawa yo kwa nonononoha!’ ”
Dius babadadiyao se koitalaliu bena Yesu se unui
1 Mayadai labui mo na kabo Taukiuli yo hinage Pwalawa Nige Yistina Henuwaisinidi, na taukaitalasam tauwoyaidiyao yo laugagayo taulauhekata keda se wasenei kabo idohagi na Yesu se hai bena se unuhemwaloi. 2 Na se wane, “Tabu henuwaisini huyana ne unai, madai boda se luluida.”
Waihiu hesau Yesu ye heyausi Betaniya unai
3 Tenem huyana ne Yesu Betaniya unai. Simona hesana hesau ede Lepela yona numa unai se kaikaigogo. Na waihiu hesau ye laoma yausi panepanena pakuna alabasta unai se ginauli ye bahei. Yausi panepanena wa nadi unai se ginauli yo maisana ye laki kalili. Waihiu wa yausi pakuna wa kabo gadona ye kesihai na yausi wa ye ini Yesu kuluna unai. 4 Tamowai hekadi se kouyalayala, unai se gadigadigugu se wane, “Mata wuwuna saha to yausi ne ye kaiheyai? 5 Taba ye lokunei, denali badodi 300 ye haidi, kabo ye mosedi tamowai dehadehadi yodi.” Na kabo waihiu wa se dilai. 6 Na Yesu ye wane, “Waihiu me kwa kitagabae! Ye saha to kwa kitaheyababa? Iya laulau namwanamwana ye ginauli kaligu wai. 7 Huya badobado tamowai dehadehadi kabo maiyamiu, unai huya hekadi kabo kwa nuwatuidi na kwa kainauyaidi. Na huya badobado taba nige yau maiyamiu. 8 Laulau saha ye ginauliyako ne meta iya gonowana. Iya taugu ye heyausi na ye kabinonohai yogu huya boita hesabana. 9 Ya hedede mamohoi! Kabo ewaneliya ta se lauguguyaei tanoubu ye tauhetakikili unai, teina waihiu ta saha ye ginauli wa kabo hinage se hedehededei, iya kaba nuwanuwatuina.”
Yudasi Isakaliyota Yesu kana ye walohai
10 Na Yudasi Isakaliyota, iya Saudoudoi-labui wa hesau, kabo ye lau taukaitalasam tauwoyaidi udiyedi bena Yesu kana ye walohai. 11 Siya yona hedehedede se lapui meta se gwauyala, na se hededehesunuma kabo moni yona se mosei. Unai yona kabikabina kedana ye wasenei idohagi kabo Yesu ye moselaei udiyedi.
Yesu yona hekahekatao Taukiuli kaina se kabinonohai
12 Na kabo Pwalawa Nige Yistina Henuwaisinina mayadaina bagubagunana unai Dius yodi laulau bena Taukiuli mamoena se kaitalasamyei, unai Yesu yona hekahekatao se henamaiyei se wane, “Haedi kabo kada Taukiuli kaina ka kabinonohai?” 13 Unai yona hekahekatao labui ye hetamalidi se lau Yelusalema, na ye hededelau udiyedi ye wane, “Komiu kwa lau magai ne unai, tamowai hesau waila pakuna ye bahebahei kabo kwa lobai. Iya kwa hemuliwatani, 14 ee numa unai ye mwalaesae. Temeta numa ne tanuwagana kabo kwa henamaiyei kwa wane, ‘Tanuwaga taumana dahalana ye henamaiyei bena unai maiyana hekahekatao Taukiuli kaina se kai.’ 15 Iya kabo numa heisi helabuina unai dahala lakilakina hesau ye hekitagomiu. Iya se kabinonohaiyako. Na metai kabo kada kwa kabinonoha.” 16 Yona hekahekatao se lau magai wa unai se lage, na iya yona hedehedede wa se hemamohoiyei. Unai kabo Taukiuli kaina wa se kabinonohai.
Yesu kana tauwalohai ye hedede nonohai
17 Meimeilahina ne unai Yesu maiyana Saudoudoi-labui wa se lagelau numa wa unai. 18 Siya sola ma kaikaidi na Yesu ye hededelau udiyedi ye wane, “Ya hedede mamohoi! Luwamiu ta unai hesau maiyagu ka kaikai kesega, iya kabo kagu ye walohai.” 19 Siya kabo se nuwayababa kalili na kesega kesega iya se henamaiyei se wane, “Nuwana yau?” 20 Yesu ye hededelau udiyedi ye wane, “Iya meta Saudoudoi-labui ta luwamiu ne unai. Tamowaina ede maiyagu kama pwalawa ka hedakwa dobiyei gaeba kesega unai. 21 Tau Natuna kabo ye boita doha se kuliyako wa. Na yababa mo kabo ye talu kaiteya iya Tau Natuna kana ye walohai ne unai. Taba ye namwa mo iya tabu se labasi.”
Yesu yona hekahekatao maiyanao yodi kaikaigogo gehegehena
22 Sola ma kaikaidi na Yesu pwalawa ye hai, Yaubada ye lautokiyei, na kabo pwalawa wa ye kihi na ye mosedi yona hekahekatao kalidi wai na ye wane, “Kwa hai na kwa kai! Teina ta yau taugu.” 23 Na kabo waina kaputina hinage ye hai, Yaubada ye lautokiyei, na ye mosei kalidi wai. Na maudoidi unai se numagogoi. 24 Na Yesu ye wane, “Teina ta yau kwasinagu ye bwalili tamowai maudoidi hesabadi. Kwasinagu unai Yaubada yona talam hauhauna ye hemamohoiyei yona tamowai udiyedi. 25 Ya hedede mamohoi! Wine masina taba nige ya numa uyoi ye lau ee Yaubada yona basileiya unai kabo waina hauhauna ya numa uyoi.” 26 Wana hesau se wanai yo Yaubada se hedebasaei, mulina ne unai kabo se dahalai se lau Olibe koyana unai.
Yesu Petelo yona uhala ye hedede nonohai
27 Yesu ye hededelau yona hekahekatao udiyedi ye wane, “Maudoimiu kabo kwa laugabaegau, matawuwuna Yaubada ye hededeyako Buka Tabuna unai ye wane, ‘Mamoe taukitahetetedi kabo ya unuhemwaloi, unai kabo yona mamoe se tatagwaligwali.’ 28 Na yogu tolouyo mulina ne unai kabo ya bagunaegomiu Galili.” 29 Na Petelo ye hededelau Yesu unai ye wane, “Nuwana maudoidi kabo se laugabaego, na yau taba nige.” 30 Yesu ye hededelau unai ye wane, “Ya hedede mamohoi! Teina boniyai ta unai kabo ku uhalaegau ma haiyona, na kabo pwaole hakiyana ye dou helabuina.” 31 Na Petelo ye hededebayao ye wane, “Ena yau maiyam kabo ta boita, taba nige ya uhalaego.” Na yona hekahekatao maudoidi wa yodi hedehedede kesega.
Yesu Getesemani unai ye tapwalolo
32 Na kabo se lage teha hesau unai hesana ede Getesemani, na Yesu ye hededelau yona hekahekatao udiyedi ye wane, “Teinai kwa babawa, na ya lau ya tapwalolo.” 33 Petelo, Yamesi yo Yowane maiyanao se lau na kabo ye hetubu ye nuwakamkamna yo nuwana ye dagugu. 34 Na ye wane, “Ya nuwadubu kalili. Teinai kwa miyamiya na kwa silasilawa!” 35 Yesu ye tausigilau na ye gulidobi bwatano unai ye talu na ye tapwalolo taba kamkamna mahanana ne tabu ye hekalo. 36 Na ye wane, “Aba, Tamagu, kowa gonowam ginauli maudoidi ku ginaulidi. Teina kamkamna kaputina ta ku laehesuwala. Iyamo yogu nuwanuwatu ta tabu ku ginauli, na kowa yom nuwanuwatu mo ku ginauli.” 37 Na kabo Yesu ye uyoma ye lobaidi wa ma kenodi. Na ye hededelau Petelo unai ye wane, “Simona, nige gonowana awa kesega ku silasilawa? 38 Kwa silasilawa na kwa tapwatapwalolo, kabo taba nige kwa yababa ena huyana noho kwa hekalo. Yaluwamiu se yali bena ginauli namwanamwadi se ginaulidi, na taumiu se basabasa.” 39 Yesu kabo ye uyo ye tapwalolo na yona kaibwada wa kesekesegana mo. 40 Na ye uyoma ye lobaidi meta se kenoko, matawuwuna ede kamnadi se yababa kalili. Na nige kabina se kata kabo saha se hedede iya unai. 41 Na hehaiyonana unai Yesu ye uyoma na ye hededelau udiyedi ye wane, “Komiu sola ma kenomiu yo kwa kaikaiyawasi? Nabada! Huya wa ye lageko! Tamowai hesau kabo kwa kita Tau Natuna kabo ye mosegabaei yababa tamowaidiyao nimadi yena. 42 Kwa tolo na ta lau! Kagu tauwalohai wa ye laolaoma.”
Yudasi Yesu ye moselae
43 Yesu ma hedehededena, na Yudasi iya Saudoudoi-labui wa hesau, boda lakilaki maiyanao se laoma. Siya taukaitalasam yo laugagayo taulauhekata yo tamowai lakilakidi se hetamalidi se lau ma kelekelepadi yo ma kebukebubulidi. 44 Bagubaguna tauwalohai wa hekihekinoi ye hedede hesibasiba nonohaidi ye wane, “Tamowai ya simtai ne meta iya. Kwa hai na kwa woya hesuwala namwanamwaei.” 45 Yudasi kabo ye dudulai ye lau Yesu unai na ye wane, “Tanuwaga!”, na ye simtai. 46 Na kabo boda wa Yesu se kabihekahini na se hai. 47 Na tamowai hesau Yesu maiyana se totolo kelepa ye niusi na ye heguli ede taukaitalasam saesaena yona heyayai tauhaina hesau beyana ye bolihai. 48 Yesu ye hededelau boda wa udiyedi ye wane, “Yau doha tau kaikaigahu, na kelebesigau hesabana kwa laoma meta ma kelekelepamiu yo ma kebukebubulimiu? 49 Yau maiyamiu mayadai badobado ta miyamiya yo numa tabuna bakubakuna unai ya laulauhekata, na nige menai kwa unuigau. Na saha se kuliyako Buka Tabuna unai, kabo ye laoma ye hemamohoiyei.” 50 Na Yesu yona hekahekatao maudoidi wa se laugabaei na se wasabu gwaligwali. 51 Hewali hesau temenai, kaleko maisa lakilakina ye likwa na iya Yesu ye hemuhemuliwatani. Iya hinage bena se kabihekahini, 52 na kana kaleko wa nimadi wai se kabikabi, na iya ma taugaibuna ye wasabu.
Sunedeli Yesu se helauhetala
53 Na kabo Yesu se woyai se laei taukaitalasam saesaena yona numa unai. Menai taukaitalasam tauwoyaidi, tamowai lakilakidi yo laugagayo taulauhekata maudoidi se koigogo. 54 Boda wa dageladi unai Petelo ye laoma ede ye mwalaesae taukaitalasam saesaena yona numa wa bakubakuna unai. Menai taukaitalasam saesaena yona taupaisowa tamowaidi maiyanao se tuligogoi, na Petelo kaiwa unai ye kaimwaiga. 55 Na kabo taukaitalasam tauwoyaidi yo Sunedeli maudoidi Yesu kana mata se wasenei bena se unuhemwaloi. Na nige kana mata saha se lobai. 56 Tamowai hekadi se hedede lupolupo Yesu unai, na yodi hedehedede wa nige kesega. 57 Na kabo hekadi se tolo se hedede lupolupo Yesu unai na se wane, 58 “Iya doha teina ye hedede na ka lapui ye wane, ‘Teina numa tabuna tamowai nimadi yena se ginauli ta, kabo ya koigwaligwali, na mayadai haiyona mulidi ne unai kabo hesau ya hetolouyoi nige doha tamowai nimadi yena se ginauli.’ ” 59 Na yodi hedehedede wa gonogonowana mo nige kaniyodi. 60 Na kabo taukaitalasam saesaena wa ye tolo matadi wa unai na Yesu ye henamaiyei ye wane, “Kowa nige kalinam? Maudoidi yodi hedehedede ku lapuidiko na nige gonowana ku hededebui?” 61 Na ye mwanomwanou na nige saha hesau ye hedede. Taukaitalasam saesaena kabo ye henamai uyo ye wane, “Kowa Keliso, Saesae Kalilina natuna wa?” 62 Yesu ye hededebui ye wane, “Yau Keliso ede. Na Tau Natuna kabo kwa kita Gigigigibwali Kalilina nima tuutuuna unai ye tutuli yo hinage galewa yadadi udiyedi ye laoma.” 63 Taukaitalasam saesaena wa ye bom kabo kana kwama ye pulisi uyoi na ye wane, “Taba nige kana mata hesau ta wasenei uyoi! 64 Maudoimiu kwa lapuiyako iya Yaubada ye hedede yababai. Na yomi hineli doha saha?” Na maudoidi se talam meta iya yababa ye ginauli, unai taba ye boita. 65 Na kabo hekadi iya se kaikaisoi yo matana se suma kabo nimadi se nokudi na se biteli na se wane, “Hage, ku hededehemasalaha kaiteya ye biteligo?” Na kabo taukaitalasam saesaena yona taupaisowa Yesu se hai na hinage se biteli.
Petelo Yesu ye uhalaei
66 Petelo sola numa bakubakuna wa unai na taukaitalasam saesaena yona heyayai tauhaina waihiuna hesau ye laoma. 67 Na Petelo ye kita ye kaikaimwaiga ede ye kita namwanamwaei na kabo ye hededelau unai ye wane, “Kowa hinage Yesu Nasaleta tamowaina wa maiyam.” 68 Na Petelo ye uhala ye wane, “Saha ku hedehedede me nige kalikalili kabina ya kata.” Na kabo ye sigilau gana kawamatana dedekana wai na pwaole hakiyana ye dou. 69 Na temenai heyayai tauhaina waihiuna wa ye kita uyoi ede ye hededelau tautotolo wa udiyedi ye wane, “Teina tamowai ta meta siya kadi kaha hesau.” 70 Na iya ye uhala uyo. Huya kubwakubwa mo kabo tautotolo temenai wa se hededelau unai se wane, “Mamohoi, kowa kadi kaha hesau, matawuwuna kowa Galili tamowaina.” 71 Petelo kabo ye bom ye kawagulai uyoi na ye kaigwala ye wane, “Temeta tamowai me yau nige kabina ya kata.” 72 Na kabo pwaole hakiyana ye dou helabuina. Mahanana ne unai Yesu yona hedehedede wa Petelo nuwana ne unai ye sae doha teina, “Kabo ku uhalaegau ma haiyona, na kabo pwaole hakiyana ye dou helabuina.” Unai nuwana ye kamkamna kalili na ye dou mwalomwaloi.
Yesu se hetolo Pilato matana unai
1 Malatomtom gagilina unai taukaitalasam tauwoyaidi maiyadi tamowai lakilakidi, laugagayo taulauhekata yo Sunedeli maudoidi nuwatu kesega se kawa namwanamwaei. Na kabo Yesu nimana se paidi na se woyahai se laei Pilato unai se moselaei. 2 Pilato Yesu ye henamaiyei ye wane, “Kowa Dius tamowaidi yodi wasawasa wa?” Yesu ye hededebui ye wane, “Mamohoi, saha ku hedede me iya ede.” 3 Na kabo taukaitalasam tauwoyaidi yodi hedehedede maudoidi udiyedi Yesu se hegilu. 4 Unai Pilato Yesu ye henamai uyoi ye wane, “Kowa nige kalinam? Siya hedehedede maudoidi udiyedi se hegilugo.” 5 Yesu nige saha hesau ye hedede, unai Pilato ye noko kalili.
Dius se henuwa bena Yesu ye boita
6 Bolimai badobado Taukiuli Henuwaisinina huyana unai Pilato yona laulau meta taba Dius tamowaidi numa tutugudu tamowaina hesau se kaibwadai kabo ye yailigabaei. 7 Tenem huyana ne unai taukaiunu hesau hesana Balabasi numa tutugudu unai ye miyamiya. Iya ma kana kahao huyana maiyadi gabemani se haikabi, na tamowai hekadi se koihemwaloidi. 8 Boda lakilaki se lagegogo Pilato unai na se kaibwadai bena Taukiuli Henuwaisinina unai na laulau saha ye ginaginauli wa bena ye ginauli. 9 Pilato ye henamaiyedi ye wane, “Kwa henuwa bena Dius yodi wasawasa ya yailigabaei kalimiu wai?” 10 Na ye henamaiyedi, matawuwuna ye nuwatulobaiyako meta taukaitalasam tauwoyaidi Yesu se kaikalomagigiliyei, unai se moselaei iya unai. 11 Taukaitalasam tauwoyaidi boda se henuwasaedi na se kaibwada Pilato unai bena Balabasi ye yailigabaei. 12 Na Pilato ye henamaiyedi ye wane, “Saha kabo ya ginauli Dius yodi wasawasa ta unai?” 13 Siya se yogasae se wane, “Ku hesatauloyawa!” 14 Pilato kabo ye henamai uyo ye wane, “Mata wuwuna saha? Yababa sahasahana ye ginauli?” Siya kabo se yoga lakilaki se wane, “Ku hesatauloyawa!” 15 Pilato ye henuwa bena boda wa ye henuwanamwadi, unai Balabasi ye yailigabaei. Na kabo ye hedede yona iyala tamowaidi Yesu se pidili wipi unai na mulina ena kabo ye moselaei na se hesataulo.
Iyala tamowaidi Yesu se talatalawasiyei
16 Na kabo iyala tamowaidi Yesu se woyalaei Pilato yona numa bakubakuna unai, na kadi kahao se yogagogoidima. 17 Siya kabo kwama pulupululuna kana kao doha wasawasa kana kwama unai Yesu se heluwui na kaiwa gwaligwalina unai peyaula se hei na se henabai. 18 Na se laulautokiyei se wane, “Dius yodi wasawasa miyamiyahaina, yauwedo!” 19 Kuluna ne didiyali unai se pidili, yo se kaikaisoi, na se tulibono iya talanuwana ne unai na se talatalawasiyei. 20 Se talawasi kaiyawasi, kabo kwama pulupululuna wa se haigabaei na kana kwama wa se helikwa uyoidi. Na kabo se woyalaei Yelusalema dagelana wai na se hesataulo.
Yesu se hesataulo
21 Yelusalema se hetubu bena se laugabaei na tamowai hesau hesana Simona se lobai teha hesau unai ye laoma. Iya Sailini tamowaina, Alesana yo Lupuso tamadi. Iyala tamowaidi Simona se lauhelili Yesu yona sataulo ye bahei. 22 Yesu se woyai se laei teha hesau hesana Golagota, kaniyona ede ‘mwayalu magaina’. 23 Siya kabo mulo yo waina se hebwali kesegaidi na se mosei bena ye numa, na ye laukwatakwata. 24 Na se hesataulo. Tauhesataulona wa Yesu yona kaleko se hinelidi, na se kaiheyaidi kaiteya kabo yona saha ye hai. 25 Malatomtom awa haligigi-hasina unai iya se hesataulo. 26 Yodi kabahegiluna hedehededena wa se kuli molumolu unai na se pawatisae kulubawana wa unai. Kulikuli wa doha teina, “Iya Dius yodi wasawasa.” 27-28 Taukaiwahali labui se hesataulodi iya maiyanao. Hesau kahatuna unai na hesau seuseulina unai. 29 Tamowai se sae yo se dobi se hagahagasiyei yo se kulukulukwadei na se wane, “Kamokisa! Kowa bena numa tabuna tausokegwaligwalina, na mayadai haiyona unai kabo ku hetolouyoi wa! 30 Hage, ku henamwanamwa uyoigo na ku pesa dobima!” 31 Yo hinage taukaitalasam tauwoyaidi yo laugagayo taulauhekata iya se talatalawasiyei, na se wane, “Tamowai hekadi ye henamwanamwadi, na nige gonowana ye bom ye henamwanamwa uyoi! 32 Teina Keliso ta, iya Dius yodi wasawasa, taba sataulo ne unai ye pesa dobima, kabo ka kita yo ka kawamamohoiyei.” Tamowai labui maiyanao se hesataulodi wa Yesu hinage se hagahagasiyei.
Yesu ye boita
33 Mayadailaki unai magai wa maudoina ye masigili ye lau ee meimeilahi awa haiyonana unai. 34 Mahanana ne unai Yesu ye yoga ma kalina lakilakina ye wane, “Eloi, eloi, lama sabatani?”, kaniyona ede, “Yogu Yaubada, yogu Yaubada, idohagi to ku nuwagabaegau ta?” 35 Na tautotolo hekadi dedekana unai, kalinana se lapui ede se wane, “Kwa lapui! Iya Eliya ye yogayoganei.” 36 Tamowai hesau ye heloi ye lau balo ye hedakwa winega unai, na ye pai hepatu didiyali unai, na kabo ye helelesae Yesu unai bena ye numa, na ye wane, “Hage ta kita kabo Eliya ye laoma na ye toledobiyei.” 37 Yesu ye yoga ma kalina lakilakina, na kabo yawasina ye pito. 38 Tenem mahanana ne unai na numa tabuna unai woyo kalekona ye tapulisi labuiyei kewa unai ye dobi guni. 39 Iyala tamowaidi kadi tanuwaga Yesu yona sataulo wuwuna ne unai ye totolo, kalinana ye lapui yo ye kita idohagi ye boita, unai ye wane, “Mamohoi, teina tamowai ta iya Yaubada natuna!” 40 Waiwaihiuwo hekadi keda loha wai se kitakitalau. Luwadi ne unai meta Maliya, Magadala waihiuna, yo Maliya Yamesi gagilina maiyana Yose sinadi, yo Salome. 41 Huyana Yesu Galili unai meta se hemuliwatani yo se kitahetete. Yo waiwaihiuwo gwaudi Yesu maiyanao se saema Yelusalema wa, siya hinage temenai.
Yosepa Yesu ye tole bwayabwaya unai
42-43 Yelusalema unai Alimatiya tamowaina hesau hesana Yosepa. Iya Sunedeli kadi boda saesaena hesau yo Yaubada yona basileiya ye nayanayai. Yesu yona huya boita mayadaina ne meta Sabati kabinonoha mayadaina. Mahana ye duitalu na sola kabo Sabati hekasisina ye hetubu na Yosepa ma nuwa bayaona ye lau Pilato unai na Yesu tauna ye kaibwadai. 44 Yesu yona boita wa wasana Pilato ye lapui meta nige ye kawamamohoi. Unai iyala tamowaidi kadi tanuwaga ye yoganei na ye henamaiyei. 45 Pilato hedehedede wa ye lapui meta mamohoi, unai Yesu tauna ye talamgabaei kabo Yosepa ye hai. 46 Na kaleko maisana lakilakina ye hemaisa na kabo ye lau Yesu tauna ye taluhi dobiyei na kaleko wa unai ye suma, na ye tole bwayabwaya unai. Na kabo weku lakilakina ye builae bwayabwaya duhana wa ye buigudui. 47 Maliya Magadala waihiuna maiyana Maliya Yose sinana matadi yena na Yosepa Yesu tauna ye tole.
Yaubada Yesu ye hetolouyoi
1 Sabati mayadaina gehena unai, Maliya Magadala waihiuna, Maliya Yamesi sinana, yo Salome se lau yausi panepanedi se hemaisadi bena kabo Yesu se heyausi. 2 Mayadai bagubagunana malatomtomna mahana ye dalasae na kabo se dahalai se lau Yesu bwayabwayana unai. 3 Na se bom se henahenamai uyoidi se wane, “Bwayabwaya kawamatana unai weku wa kabo kaiteya ye buihai?” 4 Na se kitalau bwayabwaya guduna weku lakilakina wa se kita meta kawamata wa dedekana wai. 5 Na kabo se lusae bwayabwaya kalona wa unai na hewali hesau se kita meta se matausi. Kana kwama posiposina na ye tutuli teha kahakahatu unai. 6 Na ye hededelau udiyedi ye wane, “Tabu kwa matausi! Yesu Nasaleta tamowaina se hesatauloyako wa kwa wasewasenei na Yaubada ye hetolouyoiyako. Sola kabatolena wa kwa kita, iya nige inai. 7 Na kwa lau yona hekahekatao yo Petelo yodi kwa hedehedede, ‘Iya kabo ye baguna ye lau Galili. Temenai kabo kwa kita doha ye hedede nonohaiyako.’ ” 8 Waiwaihiuwo wa se matausi kalili yo se tabutabubu, ede bwayabwaya wa se pesagabae na se heloi se lau. Na nige tamowai hesau yona se hedehedede, matawuwuna ede se matausi kalili.
Yesu ye taumasalaha Maliya Magadala waihiuna unai
9 Mayadai bagubagunana malatomtom gagilina unai Yesu ye tolouyo na ye taumasalaha baguna Maliya Magadala waihiuna unai. Nabada wa unai yaluwa yabayababadi haligigi-labui Yesu ye hedede hepesadi waihiuna ne unai. 10 Iya ye lau Yesu yona hekahekatao wa yodi ye hedehedede. Siya meta sola ma nuwa dubudi yo ma doudoudi. 11 Na wasa wa se lapui meta Yesu ye tolouyoko yo Malia Yesu ye kitayako, na iyamo nige se kawamamohoiyei.
Yesu ye taumasalaha tauhemuliwatanina labui udiyedi
12 Na kabo Yesu kana kao udoi unai ye taumasalaha tauhemuliwatanina labui udiyedi huyana se laulau magai hesau unai. 13 Siya kabo se uyo Yelusalema unai kadi kahao yodi se hedehedede, na hinage nige se kawamamohoiyedi.
Yesu yona hekahekatao ye hekatadi
14 Na huyana Saudoudoi-kesega wa ma kaikaidi na Yesu ye taumasalaha udiyedi. Na ye dilaidi, matawuwuna se nuwakwailolo yo nige se kawamamohoi taukitana wa udiyedi. 15 Na ye hededelau udiyedi ye wane, “Komiu kwa lau magai maudoidi kaiyaulina unai na Yaubada yona wasa namwanamwana kwa lauguguyaei tamowai maudoidi kalidi wai. 16 Kaiteya ye kawamamohoiyeigau yo se hebabatisoi, Yaubada kabo ye hemauli. Na kaiteya nige ye kawamamohoiyeigau, Yaubada kabo ye hekamkamna. 17 Taukawamamohoiyeigau kabo teina laulau ta se ginaulidi Yaubada yona gigibwali unai: Yau hesagu wai kabo yaluwa yabayababadi se hedede hepesadi tamowai udiyedi. Yo kalina hekadi nige kabidi se kata kabo udiyedi se hedehedede. 18 Siya kabo mwata kaikaikalasidi nimadi udiyedi se haidi, yo ena kaikailewa se numa, taba nige se boita. Yo nimadi se tolesaedi taukasikasiyebwa udiyedi, kabo se namwanamwa.”
Yaubada Yesu ye hai ye sae galewa
19 Guiyau Yesu yona hedehedede gehena unai, na kabo Yaubada ye hai ye sae galewa. Temenai Yaubada nimatuutuuna unai ye tuli. 20 Yesu yona hekahekatao kabo se lau magai maudoidi se tauhetakikilidi na se lauguguya tamowai maudoidi kalidi wai. Na Guiyau maiyadi, yo yodi lauguguya ye hemamohoiyedi laulau gigibwalidi udiyedi. Amen.