1

1 Somi tä sai tä, hi masita tä uli kua paia mi tä, a haö wi, ĩ a kuo somama. Teusö a na ĩ a kutioma. A haö wi, ĩ a hai ĩ Teusö a kuoma. 2 Somi tä, Teusö a na a kutioma. 3 Teusö anö, a haö wi ĩ a na ĩ tä pewö thapamanöma. A haö wi, ĩ a kuo maama aköna, tä pewö thapa maa noa kipi. 4 Ĩ anö töpö õsi palimipamanöma. Töpö õsi palimipamanö noai, ĩ anö sanöma töpö na wakala tä totoköma. 5 Mumi mumi tä kuo pa ĩ wakala tä waloköma, tä wakalapasoö. Mumi mumi tänö ĩ tä wakala sii lupo tai mio opama. 6 Ĩ na tä kua tä, Teusö anö ai tä simönöma. João a hilo kua wi a simönöma. 7 'Ĩ tä wakala hai, Jesus Cristo tä wakala' ĩ na João a kuupö, a simönöma. 'Ĩ pitili ta' töpö pewö pi thama pia salo, a waloköma. 8 João a hai, ĩ tä wakala kuo maama. 9 A haö wi, ĩ a hai, ĩ tä wakala sai kuo totioma. Hi masita tä uli ha a waloiki nö, sanöma töpö pewö pi hatukupamanöma. 10 A haö wi, hi masita tä uli ha a kuoma. Teusö anö ĩ a na masita tä uli thapamanöma maaki, sanöma töpönö ĩ a taö naio soata maama. 11 Kama hai ĩ tä uli na a waloköma maaki, kama hai ĩ töpönö a naka läo pasio maama. 12 Kama hai ĩ töpö pewönö a naka läo maa noai maaki, ai töpönö a naka läa pasia pälöma. Ĩ töpö na, 'Teusö ulupö makö kua asapasopöö!' a kuu asama. 'A haö wi ĩ a pitili' töpö pi kuu noai, ĩ töpö na a kuu asama. 13 Sanöma töpö ulu pö hasulupo kua wi na, ĩ na Teusö ulupö töpö hasulupo kua pasio maama. 'Ulu ma thaköpöö!' sanöma töpö kuu nö, ulu a thaa kua wi na, ĩ na Teusö ulu pö töpö thaa kua pasio maama. 'Teusö ulupö ma töpö thapalö nököö!' sanöma töpö pi kuu wi, ĩ tänö Teusö ulupö töpö thapa pasio maama. Sanöma töpönö kuno mai. Teusö anö kama töpö ulu thalalöma. 14 A haö wi, ĩ sanöma tä kupasoma. Sanöma tä kupalo nö, sanöma makö na a pilia naiköma. Makö pi ipatima kutenö, makö totiapala apa kuköma. Ĩ a pitilio opama. Teusö a hai ĩ pelupö a samii, ĩ a möamö toita apa sinomoma. A möamö toita apii, a wakala apii, ĩ sama tä tapa kuköma. 15 João anö a wäsäma. Lope epii a hapalo nö, '“Kamisa hai ĩ pata sa hö̃tö waikiwö maaki, kamisa noa ha a kule, ĩ a patamo tolehe epö. Kamisa mai ha a kuo somama kutenö, a patamo tolehe epö” sa kuupili, hi ĩ a' João a kuuma. 16 Ĩ anö makö pi ipa sinomo opa kutenö, makö totiapala apaö. 17 '“Ĩ na pö kua totihoö!” wa kuu!' ĩ na Teusö anö ĩ na Moisés a noa thaö ha, Moisés anö ĩ ta wäsä tolea paioma. Moisés anö makö noa thaa tolea paioma maaki, huki Teusö anö makö totiapala sinomo pia salo, Jesus Cristo a simönöma. A simönö noai, ĩ anö makö totiapala apaö, a pitilimo opaö, ĩ na ĩ a kuaö. 18 Ai tä sanömanö Teusö a tapa tai mi ipö. Pö̃ Teusö a kotö na pelupö a samii, ĩ Teusö a naiwö, ĩ a kuo paitio noai ĩ anö, 'Ĩ na Teusö a kuati ta o' makö pi thama päoma. 19 Ĩ na tä kua tä, Jetusalẽi tä uli hamö juteu töpö hai ĩ pata töpö pilio wi, ĩ töpönö João a na ai töpö simönöma. Teusö a täpä sinomo wi ĩ töpö, Teusömo wi a sai ha töpö kalipalo sinomo wi ĩ lepii töpö, ĩ na töpö kui töpö simönöma. Ĩ töpö simöpa piale, ĩ töpö na, '“Ĩ witi wa totiwö?” João a na ĩ na makö kutöö!' pata töpönö töpö noa thama. 20 Töpö noa thaö ha, João a na ĩ töpö waloikitö nö, 'Ĩ witi wa totiwö?' töpö kuu ha, '“Ĩ kaikana tänö makö noama totio kitäö!” Teusö tä waheta kuu noai, ĩ Cristo sa mai kitäö!' João a kuu hö̃töoma. 21 A kuu ha, 'Ĩ witi pili wa sai pasiwö? Elias a hai, ĩ anö Teusö a kai wäsä sinomo noai, ĩ wa pasi hãtowö?' ĩ töpö kuu ha, 'Mawö' João a kuu hö̃töoö ha, 'Teusö a kai a wäsäpö, ĩ a huu piale, ĩ wa hãtowö?' töpö kuu ha, 'Mawöö!' João a kuuma. 22 Ĩ na João a kuu ha, 'Ĩ witi pili wa sai totiwö?' töpö kuu nö, 'Samakö simönipili, ĩ töpö na, “Ĩ na João a kuu kipiliö!” ĩ na samakö kuu hö̃töopöö!' ĩ na töpö kuuma. 23 Ĩ na töpö kuu ha, 'Pi naka. Ai töpö pilia mai tä uli na sa huti pamö sa ta wäsä wi, ĩ sa. Sa ta wäsä tä, “Kaikana tä walo pia manu kule, tä pewö makokoa läpalöö!” lope epii sa kuu kuleö!' ĩ na João a kuuma. Isaías a kuu soma kua noai na, ĩ na João a kuu nömöoma. 24 João a na töpö simönö noai, ĩ patiseu töpö kuoma. 25 Ĩ töpönö João a hapalama kota nö, '“‘Ĩ kaikana tänö makö noama totio kitäö!’ Teusö tä waheta kuu noai, ĩ Cristo a hilo wi, ĩ sa mai kitäö! Elias sa mai kitäö! Teusö a kai a wäsä wi, ĩ a huu piale, ĩ sa mai kitäö!” ĩ na wa kuu wi maaki, wa töpö mãi õma pikitiowö. Wi na wa pi kuu salo, wa töpö mãi õma pikitia kule?' ĩ na ĩ töpö kuuma. 26 Ĩ na ĩ töpö kuu ha, 'Kamisanö, maa tuu ha sa töpö mãi õma pasia päa kule. Ma möö tai mi ipii, kamakö na ĩ a huu tikiliapalo naia kule. 27 Kamisa noa ha a huu pole, “Kamisa na ĩ a totiatalo toleha apa asaö” sa pi kuu salo, ĩ a na sa pakä kili ipaö. A ami halole, ĩ sa tä kusöpa kili ipaö' ĩ na João a kuuma. 28 Johotão u pata na João anö töpö mãi õmati noai, ĩ pökatö hamö Petânia tä uli kulali hamö ĩ töpönö João a hapalama lasoma. 29 Ĩ hena tä, Jesus a huima tä, João anö a talalö nö, 'Ma tä möö nökö. Teusö a hai ĩ oweha a ose wai hai, ki ĩ a. Sanöma töpönö wanisala tä thaa sinomoti wi, ĩ anö ĩ tä mapama kuköpö, ĩ a' ĩ na João a kuuma. 30 A kuu nö, 'Ĩ sa wäsä kipili. “Kamisa hai, pata sa hö̃tö waikiwö maaki, a patamo nömöne, ĩ a hai, pata tä sai. Kamisa mai ha a kuo somama. Önö kutenö, ĩ a hai, pata tä sai” sa kuupili, ki ĩ a. 31 Kamisanö ĩ sa tai mio hö̃töo paioma maaki, isöhaeu makö na ĩ sa tapamomanöpö, kamakö na sa waloki kipili. Sa waloikiso nö, maa u ha kamisanö makö mãi õmati kule' ĩ na João a kuuma. 32 Ĩ na a kuu nö, 'Sa mamo tetela tä, Teusö a õsi kua tolele, ĩ a ithololö nö, Jesus a na a kua naiki kipili. Holeto a katä kua wi na, ĩ na Teusö a õsi kua tolele, ĩ na ĩ a õsi itho kua kuikölö nö, Jesus a na a uni kukö solö kipili. 33 Kamisanö Jesus sa tai mio opa paioma maaki, “Wa töpö mãi õmananö nö, maa tuunö töpö salulalöö!” kamisa na Teusö a kuu noai, ĩ aiki, “Ai tä na sa õsi kua tolele, ĩ a ithopaso wi, ĩ wa tä taa kitäö! Ĩ anö kamisa õsi kua tolele, ĩ a na töpö uni saluma kitäö!” ĩ na kamisa na, ĩ na Teusö a kuu kipiliö!' João a kuuma. 34 Ĩ na a kuu nö, '“Jesus a na Teusö a õsi kua tolele, ĩ a ithopaso noai, ĩ sa tä taa kipili. Jesus a hai, ĩ Teusö a ulupö sai” ĩ na sa kuu kuleö!' João a kuuma. 35 Ĩ hena tä kotawö, João a kai a hua sinomoti wi, ĩ ai polakapi töpö na João a öpa naitia tä, 36 Jesus a hasuo pole, ĩ a talalö nö, 'Möö nökö. Teusö anö oweha a ose wai totopö noai, ki ĩ a' a kuu ha, 37 João a kai a hua sinomoti wi, ĩ töpönö ĩ ta hininö nö, Jesus a na ĩ töpö nokapalo nömököma. 38 Töpö nokapalo nömöki ha, Jesus a öpa nomöhöpalo nö, 'Wi na makö pi kuu salo, makö nokapalo kule?' Jesus a kuu ha, 'Pata täö! Witi hamö wa kuamö kua pasia kule?' töpö kuu ha, 39 'Hapo. Ma tä mööpököö!' a kuu ha, Jesus a na töpö noka soatalolö nö, motokö akäto tä, töpö kopolö nö, Jesus a na töpö noimo opimo soa tä, tä wisa lälasoö. 40 Ĩ ai polakapi tökönö, João a kuu noai, ĩ ta hininö nö, Jesus a na ai töpö nokapö noai, ĩ ai tä hai, Simão Pedro a poose André a hilo kuama. 41 Kama hai ĩ pepala a tae nö, a taa soatalalö nö, 'Teusö anö kamakö na a kaikanamoma kuköpö, a saia totilö noai, ĩ Mesiias a hilo wi, ĩ Cristo a hilo sätäa naia soatale, ĩ sama talali kipiliö!' André a kuuma. 42 A kuu nö, Jesus a na pepala a hilakötasoma. A kai walokötasoma, Simão a na Jesus a mamo teteiki nö, 'João a pelupö Simão wa. Sepasö wa hilo kua nömököpöö!' a kuuma. Sepasö a lö kui, ĩ Pedro a nai soatawö. A hilo polaka alu kule. Kamisamakö kai a pasiwö, 'Maa ma ai' samakö kuuto pasioö. 43 Ĩ na tä kua tä, ĩ hena tä, Jesus aiki, 'Kaliléia tä uli pata hamö sa hulasolöpökö o!' a pi kuu tä, Filipe a talalö nö, 'Kamisa na a noka totipaloö!' Jesus a kuuma. 44 Filipe a lö kui, Petösaita tä uli ha a kuoma. Ĩ tä sai ha André a, Pedro a, ĩ na kilii töpö kuo kuo naioma. 45 'Kamisa na a nokapaloö!' Jesus a kuu ha, Filipe anö Natanaeu a talalö nö, 'Moisés anö nö patapö töpö noa thaa noai, ĩ waheta tä na Moisés anö tä sãökökö nö, a kateha noai, ĩ sama tapa kipiliö! Teusö a kai a wäsä sinomo noai, ĩ töpönö ĩ a kateha naioma. A kateha noai, ĩ sama talalö noai, ĩ nasaté tili Jesus a. José a pelupö hai, ĩ a' ĩ na Filipe a kuuma. 46 A kuu ha, 'Nasaté tä uli ha ai tä toitai ai tä kule kitä ta o?' Natanaeu a kuu ha, 'Hapo. Wa tä möö soatasolö nökö' Filipe a kuu hö̃töoö ha, töpö hua soatasolöma. 47 Töpö hua soatalolö nö, Jesus a na töpö walo tasoa tä, Jesus anö Natanaeu a möö läo nö, 'Ma tä möö nökö. Mi a huu pole, ĩ isöhaeu tä toitai, ĩ a. A holisimo tai mi ipii, ĩ a' Jesus a kuu ha, 48 'Huua! Kawanö sa tapa sinomo paio maapili maaki, sa taö öpöle' Natanaeu a kuu ha, 'Filipe anö wa naka paio mai ha, piku ti kolo ha wa lotia tä, kamisanö wa tapa toleha waikioma' Jesus a kuuma. 49 A kuu ha, 'Samakö pi hatukama wi ĩ wa. Kawa hai, ĩ Teusö a hai ĩ pelupö wa. Isöhaeu samakö na wa kaikanamo totio piale ĩ wa' Natanaeu a kuu hö̃töoma. 50 A kuu hö̃töoö ha, '“Piku ti kolo na wa lotia tä, wa tapa soatama” kawa na sa kuu soatama kutenö, “Teusö a hai ĩ pelupö wa” wa pi kuu totia kule?' Jesus a kuu nö, 'Huki aipö wa tä tapa ke maaki, tökö aipö sati ipii, waiha ĩ wa tökö tapa totio kitäö!' Jesus a kuuma. 51 Jesus a kuu nö, '“Waiha hutu mosökö hãkopaso wi, ĩ wa tä taa nö, Teusö anö kama hai ĩ töpö simöta sinomo wi, ĩ ãju töpö ösösolö wi, ĩ wa töpö tapa kitäö! Ĩ na tä kua tä, sanöma sa kupaso noai, ĩ sa na ĩ ãju töpö ithoa kopaso wi, ĩ wa töpö taa kuki kitäö!” sa kuu kuleö! Sa holisi mai kitäö!' ĩ na Jesus a kuuma.

2

1 Ĩ na tä kua tä, polakapi tä mumi matalo nö, Kaliléia tä uli pata ha Kanátä uli kule ha, ĩ ha töpö supaso piale, ĩ töpönö ai töpö kokamomanö nö, ĩ töpönö, Jesus a kai a hua sinomoti wi ĩ töpö, Jesus a, Jesus a hai ĩ pöpönö a, ai satehe epii töpö, ĩ na töpö kui töpö kai iapaloma. 3 Ĩ töpö pewö kokamo pole, ĩ töpö pewö iapalo tä, upa mo puu matasoö ha, Jesus a na kama hai ĩ pöpönö aiki, 'Upa mo puu matalo heö!' a kuu ha, 4 'Napa. Kamisa na a kuu tihöö! Huki sa tä thama paio mai kitäö!' Jesus a kuuma. 5 Jesus a kuu ha, nii tä na töpö kalipalo pole, ĩ töpö na Jesus a hai ĩ pöpönö aiki, '“Ĩ na tä thamaö!” Jesus a kuu ha, ĩ na ma tä thama totiatalo hö̃töoö!' ĩ na pöpönö a kuuma. 6 Töpö ia kai lotio pa, hapoka kökö pata hĩtatioma. 'Makö pewö wanisala apati wi, ĩ ma tä pewö matamanöpö, ĩ maa ma hapoka pata na maa tuu pi hĩtale, ĩ tuu ha makö sanumopököö!' ĩ na juteu töpö kuu sinomo noai, töpö ia kai loo pa, ĩ kökö hapoka hĩtatioma. Ai kökö hapoka, 6 kökö hapoka pata kui kökö hapoka pata pe epii kökö hapoka hĩtatioma. 7 Upa mo puu matasoö ha, Jesus aiki, 'Ki maa makö hapoka pata na maa tuu lösasoheö! Maa ma tuu lösaso nö, tuu pewö lahoa totimaköheö!' ĩ na nii tä na töpö kalipaloti wi, ĩ töpö na Jesus a kuu ha, ĩ töpönö tuu lösa solö pa, tuu pewö lahoa totiamaköma. 8 Ĩ na tä kua tä, 'Ma tuu hikilölö nö, makö kalipalama sinomoti wi, ĩ a pata na tuu pi totokötöö!' ĩ na Jesus a kuu ha, tuu pi totoa hö̃tökö tasoma. 9 Töpö kalipalama sinomoti wi, ĩ a pata aiki, 'Maa ma hapoka pata ha hi tuu kuo hãtoma' a pi pata kuu tao maama. Töpö kalipalo pole, ĩ töpönö tä taö asama. Ĩ töpö kalipalama pole, ĩ a patanö maa tuu kuo paio noai ĩ upa tuu kua soataso noai, ĩ tuu koalöma, töpö supaso piale, ĩ a wano nakalö nö, 10 a hapalo nö, 'Ai töpö kokamo tä, tuu koamö toita apii, ĩ tuu koama somataö. Ĩ tuu koamö toita apii, ĩ tuunö töpö pötöa waikilaso noai ha, tuu toita mai ĩ tuu koama nömötaö. Ĩ na tä kua sinomoö maaki, ĩ na wa kua maa ke. Upa mo puu koamö toita apö asai, ĩ wa tuu koama somata mai, samakö pötöa waikilaso noai ha, tuu koamö toita apii, ĩ wa tuu koama nömöo ke. Ĩ na tä kua wi tä aipa apöle' töpö kalipalama wi, ĩ na ĩ a pata kuuma. 11 Jesus anö sanöma töpö pi hatukama pia salo, Jesus anö tä aipamatima. Kaliléia tä uli pata na Kanátä uli kule ha, ĩ ha Jesus anö aipö pili tä kolo thama kuköma. Ĩ aipö tä kolo thama kuiki nö, 'Jesus a loteteapalo opa asatiowö. A kilihia apatiwö' ĩ na töpö pi thamama. 'Jesus a aipa apatiwö. A totiatalo opatiwö' ĩ na töpö pi thamaö ha, Jesus a kai a hua sinomoti noai, ĩ töpö aiki, 'Ã ãi. “Kaikana tänö juteu makö noama wi, ĩ sa simöpali kitäö!” Teusö a kuu noai, hi ĩ a. Teusö anö Jesus a simöpalömaö!' ĩ na ĩ töpö pi kuuma. 12 Ĩ na tä kua tä, Jesus a, pöpönö a, poose töpö, kama kai a hua wi ĩ töpö, ĩ na töpö kui töpö alulö nö, Kapahanaũ tä uli hamö töpö waloikitö nö, ĩ ha polakapi tä mumi thapamanö tasoma. 13 Ĩ ha töpö kuiki nö, ki hamö, Jetusalẽi tä uli ha pásökoa tä na juteu töpö kokamo pialati, ĩ hamö Jesus a hulasolöma. 14 A hulolö nö, a waloikitö nö, Teusömo wi a sai pata ha a lisipalo nö, tä möö ha, töpö Teusömo totiopö, paka kökö totokö nö, sitipa kökö täli, Teusö a na oweha kökö totokö nö, sitipa kökö täli, Teusö a na holeto kökö totokö nö, sitipa kökö täalali, mesa tiki hamö ai töpö loa pasile, ĩ töpönö sitipa kökö totoma nomöha pasia, 15 ĩ na töpö kuaö ha, Jesus anö thoo totokö täa soatalö nö, töpö soapalöpö, toto totia soatalö nö, ĩ totonö ĩ töpö pewö sasua soatalöma. Töpö sasua soatalö nö, mesa tiki laköa soatalö nö, sitipa kökö pewö kea soatamanöma. 16 Sitipa kökö pewö kea soatamanö nö, holeto kökö noa na sitipa kökö sualali wi, ĩ töpö pewö na soatawö, 'Mi hamököö! Holeto kökö pewö kai kõa soatalolöö! Ipa hao a sai pö maaki, “Hi wani tä suta wi, ĩ a saiö!” makö pi ku upa pikiowö. Ĩ na kuno maiö!' Jesus a kuuma. 17 Ĩ na Jesus a kuu ha, kama kai a hua wi, ĩ töpö aiki, 'Ã ãi. “Ipa hao Teusö ai. Koa taka hili kua wi na, ĩ na kamisanö au sai sa pi ipa kutenö, ĩ na kamisa õsi na ĩ na tä uni hilima kua hö̃töoö” tä kuu wi, ĩ tä sãöka thali ta pi kuu mi sai' ĩ na ĩ töpö kuuma. 18 Ĩ na tä kua tä, juteu töpö aiki, 'Ka pi wa tä thati kule?' töpö kuu nö, 'Teusö anö tä thama asa wi, ĩ nasimö wa tä thama naio aköna, “Hãu. Teusö anö wa simöama kutenö, wa töpö sasupali ke” samakö pi kuu pola pi' töpö kuu ha, 19 'Hi Teusö ma sai pö kemanöma, 3 tä mumi hasuo kupo pola tä kuno mai, sa sai topa kõki kitäö!' Jesus a kuuma. 20 A kuu ha, '3 tä mumi hasuo kupo maa noai ha, hi wa sai thaa kõki kitä ta o? Hi a sai thaa tä, 46 tä inama kui tä inama hasupamanöma pi kuu mai' töpö kuuma. 21 Ĩ na töpö kuuma maaki, juteu töpö Teusömo sinomo wi, Jesus anö ĩ a sai a kateha maama. Kama õsi na Teusö a pilio pasitioma kutenö, kama a kateho sapao kõoma. 22 Kama a kateho sapao kõoma kutenö, waiha a nomasoma maaki, a temöa konasoö ha, 'Ã ãi. “Sa temöa hö̃töa komani kitäö!” ĩ na Jesus a kuu waikio kipili nököö!' ĩ na Jesus a kai a hua sinomoti wi, ĩ na ĩ töpö kuuma. Ĩ na töpö kuu nö, 'Teusö tä waheta pitili. Jesus a kuupili, ĩ pitili ta' töpö pi kuuma. 23 Ĩ na tä kua tä, Jetusalẽi tä uli ha pásökoa tä na juteu töpö kokamo tä, ĩ ha Jesus a kokamo naioma. Ĩ tä, töpö pi hatukupamani pia salo, Teusö anö tä thama taö öpa asa wi, Jesus anö ĩ nasimö tä thama taö öpa asa naia kutenö, ĩ nasimö tä aipamatima. Ĩ tä aipamati ha, 'Teusö anö a saia totilö noai, ki ĩ a. Ĩ a na samakö nokapalotipököö!' ĩ na töpö satehe epii töpö pi kuuma. 24 Satehe epii, ĩ na töpö pi kuuma maaki, 'Hi töpö pitilimo opöle' ĩ töpö na Jesus a pi kuu maama. Jesus anö sanöma töpö õsi taö öpa asa kutenö, ĩ na a pi kuu maama. 25 Jesus anö sanöma töpö õsi taö öpa waikia kutenö, '“Ĩ na ĩ töpö pi kuu totia kule” kamisa na ai tä kuu mi salo' ĩ na Jesus a pi kuu pasio maama.

3

1 Nikotemosö a hai, juteu pata tä kuoma. Patiseu tä kuoma. 2 Mumai ha Jesus a na ĩ a waloa haluiki nö, Jesus a huama nö, 'Wa töpö pi hatukama sinomo wi, ĩ wa. Kawa na Teusö a kua kule. “Kawa na Teusö a kua mi aköna, wa tä aipama mi kipi. Teusö anö wa simöpalöma kutenö, wa töpö pi hatukama sinomoö” ĩ na samakö pi kuu kuleö!' ĩ na Nikotemosö a kuuma. 3 Ĩ na a kuu ha, '“Wa ose wai kupo kua noai na, ĩ na wa kupo kua kõo mi tä, Teusö a kaikanamo wi, ĩ ha wa kuo naio mai kitäö!” kawa na sa kuu totia kuleö! Sa holisimo maneö!' Jesus a kuuma. 4 A kuu ha, 'Häö. Sa pata waikilaso wi sa ositia kopaso kitä ta o? Pili a thalupökö na sa titia kõki kitä ta o? Sa pata waikilaso wi sa kupo kota mai kitä pi kuu mai' ĩ na Nikotemosö a kuu ha, 5 '“Maa tuu ha wa uni kupo mi tä, Teusö ulupö wa kupo mai kitäö! Teusö a õsi kua tolele, ĩ anö wa thapa mi tä, Teusö a kaikanamo wi, ĩ ha wa lisipo mai kitäö!” kawa na sa kuu totia alu kuleö! Sa holisimo maneö!' ĩ na Jesus a kuu nö, 6 'Au hao a, au nao a, ĩ na kilii töpönö wa thama maaki, Teusö a õsi kua tolele, ĩ anö wa õsi palimia sisapali. 7 “Makö ose wai kupo kua noai na, ĩ na makö kua kõopököö!” ĩ na sa kuuhe, ĩ tä na, “Wi na taköö!” a pi kuu tihöö!' Jesus a kuuma. 8 A kuu nö, 'Ki hamö ipoko tä walimoö, ki hamö walimo hö̃töoö, ki hamö walimo hö̃töoö, ipoko tä kuaö. Ĩ ipoko wa ta hini kule maaki, “Witi ha ipoko tä kuoma? Witi ha tä huu pia kule?” ipoko tänö ĩ na wa pi thamaö. Ĩ na ipoko tä kalipalo kua wi na, ĩ na Teusö a õsi kua tolele, ĩ anö wa õsi palimipalöpö, kawa na Teusö a õsi kua tolele, ĩ a kalipalo kua hö̃töoö. Teusö a õsi kua tolele, ĩ wa tapa mai maaki, “Teusö a õsi kua tolele, ĩ a kalipalo opa noa” wa pi thama päoö' ĩ na Jesus a kuuma. 9 Jesus a kuu ha, 'Wa kuuhe, ĩ sa ta hini maahe' Nikotemosö a kuu ha, 10 'Isöhaeu tili wa töpö pi hatukama sinomo wi, ĩ wa sai maaki, sa kuuhe, ĩ wa tä tai mio opapa wi. 11 “Sama tä taö wi, ĩ sama ta kateha kule maaki, ‘Ĩ pitili ta’ makö pi kuu mi ipö. Sama tä tapapili, ĩ sama ta wäsä kule maaki, ĩ ma ta hini wani ipö” kawa na sa kuu totia alu kule. Sa holisimo mai kitäö!' Jesus a kuu nö, 12 'Hi masita tä uli ha tä kua wi, kamakö na ĩ sa ta kateha tä, “Ĩ pitili ta” makö pi kuu maa thaliö! Hi tä hẽtu pata hamö tä kupoli, kamakö na ĩ sa ta kateha tä, “Ĩ pitili ta” makö pi kuu makoka kitä ta o? 13 Hi tä hẽtu pata hamö ai sanöma makö huu pasio laso maama. Ĩ hamö, sanöma sa kupaso noai, ĩ sa huu sisa lasoma. Ĩ hamö sa kuoma, sa ithopasoma' ĩ na Jesus a kuuma. 14 Ĩ na Jesus a kuu nö, 'Ai töpö kuo maa pa, ĩ tä uli na ösö tömö Moisés anö hii ti na olö kökö ukutupö pi hĩta thakö noai na, ĩ na sanöma sa kupaso noai, ĩ na ai töpönö sa thama kuki kitäö! 15 “Jesus a pitili” wa pi kuu kuköma, wa õsi palimia totipaso kitäö! 16 Teusö anö sanöma makö pewö pi ipa salo, kama hai ĩ pelupö sa sami maaki, sanöma makö na sa totoköma. Önö kutenö, “Jesus a pitili” makö pi kuu kuköma, makö õsi noma mai ha, makö õsi palimipaso kitäö! 17 Teusö anö, hi masita tä uli na pelupö sa simöpalö nö, “‘Makö tomöpo mi ipö manu kui, töpö pea soatio wi, ĩ tä uli ha makö huu kuki kitäö!’ sanöma töpö na ĩ na wa kuu!” kamisa na ĩ na Teusö a kuu maama. “Sanöma wa töpö õsi palimipamanöö! Töpö pea soatio wi, ĩ tä uli na ĩ töpö noamaö!” ĩ na Teusö a kuu pasiomaö!' ĩ na Jesus a kuuma. 18 Ĩ na Jesus a kuu nö, '“Teusö a hai ĩ pelupö a pitili” wa pi kuu wi, Teusö anö ĩ wa peama mai kitäö! “Wa tomöpo mi ipö tä, töpö peati wi, ĩ tä uli hamö wa huu kuki kitä” ĩ na kawa na Teusö a kuu mai kitä. Ĩ na tä kua tä, “Teusö a hai ĩ pelupö a pitili” wa pi kuu pasia mane, Teusö anö ĩ wa peama pasio kuki kitä. “Wa tomöpo mi ipö tä, töpö peati wi, ĩ tä uli hamö wa hua pasisolöpöö!” ĩ na Teusö a kuuma. “Teusö a hai ĩ pelupö a samii, ĩ a pitili” wa pi kuu totia mi manu kui, “Töpö peati wi, ĩ tä uli hamö wa hua pasisolö kitäö!” ĩ na Teusö a kuuma. 19 Hi masita tä uli na sanöma töpö kupai, ĩ töpö na wakala tä waloköma maaki, ĩ töpönö wakala tä pii maama. Mumi mumi tä pii sisamae. Sanöma töpönö wanisala tä tha apati kutenö, mumi mumi tä pi ipa sisama. Ĩ na tä kuaö ha, “Makö tomöpo mi ipöö!” ĩ na Teusö a hai ĩ pelupö sa kuu kule. 20 Wanisala tä tha apati wi, ĩ anö wakala tä sai pii mi ipö. “Wakala tä na sa huu ha, wanisala sa tä thati wi, ĩ tä hatuka apöle kitäö!” a pi kuu salo, wakala tä na a huu mai kitä. 21 Ai tä pitilimo asa wi, wakala tä na ĩ a huu asapö, tä kua kuleö! “Teusö sa hini asa kutenö, toitai sa tä thaa wi, ĩ sa tä hatukupamani pia salo, wakala tä na sa huu pi topa apa sisaö” ĩ na ĩ a pi kuu asa kuköma, wakala tä na ĩ a huu asaö' ĩ na Jesus a kuu totiatalotima. 22 Ĩ na tä kua tä, Jutéia tä uli pata ha Jesus a, kama kai a hua sinomo wi ĩ töpö, ĩ na töpö kui töpö asulöma. Ĩ tä uli ha töpö waloikitö nö, ĩ ha ĩ töpö na Jesus a kutia tä, ai töpö mãi õhomama. 23 Ki hamö, Salĩ tä uli kotö ha Enõ tä uli kule, ĩ ha João anö ai töpö mai õhoma hö̃töo tasoma. Ĩ hamö maa tuu kua apa soata tasoa kutenö, töpö mãi õmatima. 24 Sai a päka lototota totio wi, ĩ a sai ha João a titio paio mi tä, ĩ ha töpö mai õhomatima. 25 Ĩ na tä kua tä, João a kai a hua sinomo wi ĩ töpö, ai juteu tä hö̃töwö, ĩ na töpö kui töpö hapalo hẽtupasoö. Juteu töpö õsi ausipamonasopö, töpö salumamo sinomo wi, ĩ tä pi na töpö hapalo hẽtupasotima. 26 Töpö hapalo hẽtupasoiki nö, João a kai a hua sinomo wi, João a na ĩ töpö hua kononö nö, 'João ai. Johotão u pökatö pata hamö kawa na a kuo naiopili, kawanö ĩ wa katehapili, ĩ anö töpö mai õhoma thaliö! Ĩ a na töpö pewö nokapalo silia apatiwö' töpö kuu ha, 27 João aiki, 'Sanöma makö kuati wi, Teusö anö ĩ tä totoki. 28 “Teusö anö tä saia totilö noai, ĩ Cristo a hilo wi, ĩ sa mai kitäö! Jesus a palu na sa paluapalo totiopö, Teusö anö sa simönöma” ĩ na sa kuu totio kipili nökö. “Hö̃ ö̃. Awai. Ĩ na wa kuu totio kipili” makö kuupököö!' ĩ na João a kuuma. 29 Ĩ na a kuu nö, 'Pi naka. A husopö kuköpö, a hapaloö ha, kama hai ĩ noi tä pi topa apa. Ĩ a pi topa kua apa noai na, ĩ na sa pi topa kua hö̃töa. Jesus anö kama hai ĩ töpö nakapala manu kule, sa pi mönaha apöpasoö. 30 Kamisa patamo pasio mai, Jesus a patamo hasua asapököö!' ĩ na João a kuuma. 31 Hi masita tä uli ha pata töpö kua hö̃töa waikia kule maaki, hi tä hẽtu hamö a kuo noai, ĩ a hai, ĩ pata tä sai asawö. Hi masita tä uli na ai tä wani huu pätile, ĩ a waninö hi masita tä uli ha tä kua wi, ĩ ta kateha pasio päoö. Ĩ a wani patamo hö̃töa waikia kule maaki, hi tä hẽtu pata ha a kuo noai, ĩ a patamo satia apa asaö. 32 Jesus a hai, ĩ pata tä sai asawö. Ĩ anö tä tapa noai ĩ ta wäsäö, tä hini noai ĩ ta wäsäö, ĩ na ta wäsä thama kule maaki, 'Pitili ta' ai tä pi kuu mi. 33 'Jesus anö ta wäsä wi, ĩ pitili ta' wa pi kuu tä, 'Teusö a pitilimo opaö' ĩ na wa pi kuu naia soatasoö. 34 Pe epii Teusö anö kama õsi kua tolele, ĩ a õsi totoma apa kutenö, Teusö anö a simöpalö noai, ĩ anö Teusö a kai a wäsäö. 35 Pö̃ Teusö anö pelupö Jesus a pi ipaö. Pelupö a na, 'Töpö pewö na wa simöo totihoö!' Teusö a kuuma. 36 Ĩ na tä kuaö ha, pelupö Jesus wa hini nö, 'Jesus a pitili' ĩ na wa pi kuu tä, wa õsi palimipalo nö, Teusö a na wa kuo soatio kitä. Pelupö Jesus wa hini pasio mi tä, wa õsi palimipo pasio mai kitä. Teusö anö wa hĩsu thaa pasio soatio kuki kitä.

4

1 Ĩ na tä kua tä, 'João anö töpö nokapalama nö, töpö mãi õhomati wi maaki, Jesus anö satehe epii töpö nokapalama satia apa asa kulaliö! Satehe epii töpö mãi õma satia apa asa kulaliö!' ĩ na patiseu töpönö ĩ na ta kuu hinima. 2 Ĩ na ta kuu hinima maaki, Jesus anö töpö mãi õma totio maama. Jesus a kai a hua sinomoti wi, ĩ töpönö töpö mãi õma pätioma. 3 '“Jesus anö töpö satehe epii töpö nokapalama kulaliö!” ĩ na patiseu töpönö ĩ na ta kuu hininöma thaliö!' ĩ na ta kuu wi, Jesus anö ĩ ta hininö nö, Jutéia tä uli pata ha a kutio maama. Kaliléia tä uli pata hamö a konasolöma. 4 A koonö tä, 'Samatia tä uli mötali hamö sa hasua kõkö tasopököö!' ĩ na Jesus a pi kuu nö, 5 a hasuo kõo tä, Samatia tä uli ha Jacó anö pelupö José a na tä uli totokö noai, ĩ tä uli kotö ha Sikaa tä uli kule ha, ĩ ha Jesus a walokö tasoma. 6 Ĩ tä uli na maa tuu hikita wi, ĩ taka kuoma. Jacó a hai ĩ taka kuo somama. Motokö hẽtuto tä, Jesus a mota apö salo, ĩ taka kotö ha a loköma. 7 Kama kai a hua sinomoti wi, ĩ töpönö nii tä täli pia salo, Sikaa tä uli na töpö hulasolöma. Töpö hulasolö noai ha, thaka taka kotö na Jesus a loa haitia tä, samatia tilisoma tänö maa tuu hikilöpö, a waloköma. A waloki ha, 'Maa tuu pita. Sa amisi ipö sai' Jesus a kuuma. 9 A kuu ha, juteu töpönö samatia tili töpö wanipo opa sinomo kutenö, 'Häö. Juteu tili wa maaki, samatia tilisoma sa na maa wa tuu naka pikia alu kule' a kuu ha, 10 'Teusö anö tä totoma wi, ĩ wa tä taö aköna, wa tä nakali pi. Kawa na maa sa tuu naka pole, kawanö ĩ sa taö aköna, kamisa na wa nako pi. Wa nako aköna, wa toa konasopö, ĩ sa tuu totoki pi' Jesus a kuu soatasoma. 11 A kuu soatasoö ha, 'Maa tuu hiki wi, ĩ wa hapoka po mane. Hi thaka taka pata pã apa pikipokili. Sa toa konaso wi, witi ha ĩ wa tuu hikilöpö?' samatia tilisoma tä kuu nö, 12 'Hi maa tuu hikita wi, ipa hao tolewö nö patapö Jacó anö kamisamakö na hi taka totopöma. Hi taka na tuu kule, ĩ tuu na Jacó a, kama hai ĩ ulu töpö, kama hai ĩ hiima pö, ĩ na töpö kui töpö amisio sinomoma. “Jacó a hai, ĩ pata tä sai” samakö pi kuu tä, kawa hai, pata wa sai kuo satio opapawö?' ĩ na samatia tilisoma tä kuuma. 13 Ĩ na samatia tilisoma tä kuu ha, 'Hi maa wa tuu koa waikio noai maaki, wa amisia apa konaso kitäö! 14 Kamisanö kawa na maa sa tuu totoki wi, ĩ wa tuu koalöma, wa amisi kota mai kitä. Kawa na maa sa tuu totoki wi, kawa õsi na ĩ tuu hẽasi haapo opa nö, ĩ tuunö wa õsi topa koiki nö, wa õsi palimipaso kitäö!' ĩ na Jesus a kuuma. 15 Ĩ na a kuu ha, 'Ĩ tuu totopaö! Ĩ sa tuu koalö nö, sa amisi kota maapököö! Maa sa tuu hikilöpö, hisa ha sa huu kota maapököö!' ĩ na samatia tilisoma tä kuuma. 16 Ĩ na samatia tilisoma tä kuu ha, 'Wa hua kononö nö, au heano wa naka konötö nö, au heano wa kai waloa kõikisoö!' ĩ na Jesus a kuu ha, 17 'Ipa heano a kua mai kitä' a kuu ha, '“Ipa heano a kua mai kitä” wa kuuhe, pitili ta. 5 au heano töpö kui wa töpö po waikioma. Huki wano wa tä po nömöa kõone, ĩ au heano a mai kitä. Önö kutenö, wa kuuhe, ĩ pitili ta' Jesus a kuuma. 19 Jesus a kuu ha, 'Hãu. Teusö wa kai a wäsä totio wi, ĩ wa ta o' ĩ na samatia tilisoma tä kuu nö, 20 'Ipa pata tolewö töpö kuo noai, hi maa makö ha ĩ töpö Teusömo sinomoma maaki, juteu makö aiki, “Jetusalẽi tä uli na makö Teusömopököö!” makö kuuwö' ĩ na a kuuma. 21 Ĩ na a kuu ha, '“Pitili wa” a pi kuu totihoö! Waiha hi maa makö na makö Teusömo mi, ki Jetusalẽi tä uli na makö Teusömo mi, ĩ na makö kua kuki kitä. 22 Samatia tili makö Teusömo wi maaki, Teusö ma tai mi. Juteu samakönö Teusö sama taö asa kutenö, samakö Teusömo päo mi. Teusö anö sanöma töpö täapa kõo läo nö, töpö õsi palimipama wi, ĩ tä na juteu samakönö ai tiko töpö pewö pi hatukama apa kutenö, samakö Teusömo totio asaö. 23 Pi naka. Waiha ĩ na töpö kua kitä. Huki ĩ na töpö kua waikia kule. Töpö Teusömo holisimo päo mai kitä. Pili töpö õsi sai Teusömo totio kitä. Teusö aiki, “Sanöma töpö Teusömo kuköma, ĩ na töpö kuapököö! Töpö õsi Teusömo nö, töpö Teusömo pitilimo totiopököö!” ĩ na Teusö a pi kuu. 24 Teusö pili a ösö kua mai kitä. Pili a ösö höpöpo mai kitä. Önö kutenö, wa Teusömo kuköma, pili wa õsi sai Teusömo totiopököö! Wa Teusömo pitilia totiopököö!' ĩ na Jesus a kuuma. 25 A kuu ha, 'Teusö anö a kaikanapa piale, Mesiias a hai, ĩ Cristo a hilo kua naine, ĩ a huu kitäö! Cristo a huu kitäö! Ĩ a waloiki nö, ĩ tä pewö na makö pewö pi hatukupamani kitä. Ĩ sa tä taö kule' ĩ na samatia tilisoma tä kuu ha, 26 'Kawanö wa kateha pole, ĩ sa waikiwö. Kawa na sa hapalo pole, ĩ Cristo sa. Teusö anö sa kaikanapalö noai, ĩ sa' Jesus a kuuma. 27 Ĩ na Jesus a hapalo kuu soa tä, kama kai a hua sinomoti wi, ĩ töpö waloa kõköma. Töpö walo kõa tä, samatia tilisoma tä na Jesus a hapaloti ha, 'Wi na taköö!' ĩ na töpö pi kuu kai walopa kõoma. Ĩ na töpö pi kuuma maaki, 'Ka pi wa tä thaa kule? Wi na wa pi kuu salo, hi suö tä na wa hapaloti kule?' töpö kuu maama. 28 Ĩ na tä kua tä, samatia tilisoma tänö kama hai ĩ holokoto a hĩta taa soa pätakölö nö, a wani kõa soatasolöma. A kotapolö nö, kama hai ĩ töpö na, 29 'Ki wano tänö sa tati maa noai maaki, sa kuati noai, ĩ tä pewö a taö öpa thai! Ĩ tä pewö a kateha totio opa kilia thai. Hapo. Ĩ ma möö nököö! Sanöma makö pewö na Cristo a kaikanamo totio piale, ĩ a hãto thai?' a kuuma. 30 A kuu nö, 'Hapo' samatia tilisoma tä kuu ha, ĩ töpö lisia soatalo nö, Jesus a na ĩ töpö hua soatasolöma. 31 Ĩ tä, Jesus a kai a hua sinomoti wi, Jesus a na ĩ töpö hapalo nö, 'Pata! Wa ia mi salo' töpö kuuma maaki, 32 'Nii ma tä möö tai mi ipii, ĩ nii sa tä po kule' Jesus a kuu ha, 33 'Jesus a na ai tänö nii tä hila haia hãtokö solökö?' ĩ na Jesus a kai a hua sinomoti wi, ĩ na ĩ töpö kuuma. 34 Ĩ na ĩ töpö kuu ha, 'Teusö sa kai a hini totio wi, ĩ nasimö tä nii pasiwö. Nii wa tä oalöma, wa lotete epö, wa pi mönaha apaö, ĩ na tä kua kua wi na, ĩ na kamisanö Teusö sa kai a hini totio kutenö, sa lotete epö, sa pi mönaha apaö, ĩ na sa kua hö̃töoö. “Ĩ na wa kuapököö!” Teusö a kuu ha, “Awai. Ĩ na sa kua hö̃töo kitäö!” ĩ na sa pi kuu. “Ĩ na wa tä thamaö!” a kuu ha, ĩ na sa tä thama totiatalo opa hö̃töoö. Önö kutenö, “Teusö sa kai a hini totio wi, ĩ ipa nii tä pasiwöö!” ĩ na sa kuu alu kule nökö' Jesus a kuuma. 35 A kuu nö, '“4 pilipoma kökö matalo nö, hikali a na nii tä patasipöso kitäö!” sanöma töpö kuu sinomoö. “Hikali a na nii ma tä täpa kua kõo wi na, ĩ na sanöma ma töpö thama kõpöö! Hikali a na nii ma tä patasipö möö kua kõo wi na, ĩ na sanöma ma töpö möö kuapököö! Ai sanöma töpönö Jesus sa täa pia wi, ĩ töpö satehe epii töpö kua waikia kule. Waiha kuno mai. Sanöma ma töpö naka wi, huki ipii ĩ tä kua waikia kuleö!” ĩ na kamakö na sa kuu alu kule' ĩ na Jesus a kuuma. 36 Ĩ na Jesus a kuu nö, 'Hikali a na ai tänö nii tä töki, waiha tä nii patasipölaso noai ha, ai tänö nii tä täli, ĩ na tä kuaö. Ĩ na tä kua kua wi na, ĩ na Teusö ma kai a wäsä wi, ĩ na ĩ makö kua kua hö̃töoö. Ai wanö Teusö wa kai a wäsä somata kule maaki, ai töpönö ĩ ta hini tomöpo paio mi, waiha ai wanö Teusö wa ta wäsä nömöta kuköma, ĩ töpönö ta hini tomöpo paio maa noai, opii ĩ töpönö ĩ wa kai a hinia makoka totilö nö, töpö õsi palimia totipasoö, ĩ na tä kuaö. Önö kutenö, Teusö wa kai a wäsä somata noai, ĩ wa pi mönaha apa, Teusö wa kai wäsä nömöta noai, ĩ wa pi mönaha apa naia, ĩ na makö kuaö. 37 “Ai tänö nii tä töki, ai tänö nii tä täli,” ĩ na tä kuu wi, ĩ pitili ta. 38 Kamisa pi aiki, “Sanöma ma töpö nakalö nö, ma töpö täalalöpököö!” sa pi kuu salo, makö simönöma. Ai töpö kasiapalo nö, ĩ sanöma töpö na Teusö ta wäsä somama. “Ĩ töpö na ta wäsä soma noai, ĩ töpö na ma kai a wäsä nömöo nö, ĩ ma töpö täalalö nö, Teusö a na töpö totoaköö!” ĩ na kamisanö makö noa thaa nö, makö simönöma' ĩ na Jesus a kuuma. 39 Ĩ na tä kua tä, Sikaa tä uli ha samatia tili töpö pililati, ĩ töpö na samatia tilisoma tä hapalo nö, 'Ki wano tänö sa tati maa noai maaki, sa kuati noai, ĩ tä pewö a kateha thaiö!' ĩ na samatia tilisoma tä kuu ha, ai töpö satehe epii töpö aiki, 'Jesus a pitili. Sanöma makö pewö na Cristo a kaikanamo totio wi, ĩ a totiwöö!' ĩ na ĩ töpö satehe epii töpö pi kuu soata kuköma. 40 Önö kutenö, Jesus a na ĩ töpö waloikitö nö, 'Hapo. Kamisamakö sai pö na a kua paikisoö!' töpö kuu ha, Jesus a hulolö nö, ĩ ha polakapi tä mumi hasupamanöma. 41 Ĩ ha Jesus a kua tä, ai töpönö Jesus a hini kutenö, 'Sanöma makö pewö na a kaikanamo piale, hi ĩ a' ĩ na ĩ töpö pi kuu soatalo nö, 'Sanöma makö pewö täapa kõo läo wi, ĩ a' ĩ na ai töpö satehe epii töpö pi kuu naia soataköma. 42 Samatia tilisoma tä na ĩ töpö aiki, '“Sanöma makö pewö na Cristo a kaikanamo piale, ĩ a toti hãtowö” kawanö wa tä wäsäö ha, samakö pi kuu kipili maaki, huki kama sama kai a hini totia kutenö, “Awai. Jesus a pitili. Kamakö pewö na a kaikanamo piale, ĩ a totiwöö!” ĩ na samakö pewö pi kuu totia kuleö! “Jesus a hai, sanöma makö pewö täapa kõo läo wi, ĩ a” ĩ na samakö pewö pi kuu totia kuleö!' ĩ na ĩ töpö kuu soatasoma. 43 Ĩ na tä kua tä, polakapi tä mumi hasupalo nö, Kaliléia tä uli pata hamö Jesus a konasolöma. 44 'Teusö a kai a wäsä sinomo wi, ĩ a hai ĩ tä uli na töpö pilia naine, ĩ töpönö ĩ a kai a hini wani ipö kitä' Jesus a kuu waikioma kutenö, Kaliléia tä uli pata hamö a kõamö kulasolöma. 45 Kaliléia tä uli pata hamö a kõpö tasoma, kaliléia tili töpönö a hini pi topa apama. Jetusalẽi tä uli hamö juteu töpö pewö kokamo nö, pásökoa tä thaa tä, ĩ hamö ĩ kaliléia tili töpö kokamopalo naia tä, Jesus anö tä thati noai, ĩ tä tama kutenö, Jesus a hini pi topa apama. 46 Ĩ na tä kua tä, Kaliléia tä uli pata ha Kaná tä uli hilo kua wi ĩ tä uli kule, ĩ ha Jesus anö maa tuu na upa mo puu thapalö noai, ĩ ha Jesus a waloa kõkö tasoma. Ĩ tä, Kapahanaũ tä uli ha ai pata tä hai ĩ pelupö a salia apama. A salia tä, 'Ki ha, Jutéia tä uli pata hamö Jesus a kuoma, Kaliléia tä uli pata hamö a konasolöma thaliö!' tä kuu wi, ĩ pata tänö ĩ ta kuu hininö nö, Jesus a na a hulasolöma. A hua hailolö nö, kama hai ĩ pelupö a noma piaö ha, 'Jesus ai! Ipa ulu wa möö haita nö, wa toma kõo mi salo. Ipa a toa komanöö!' a kuuma. 48 A kuu ha, 'Sa tä aipama wi, ĩ ma tä taa mi tä, “Aipa apawöö! Kilatiha” ĩ na makö pi kuu paio mi tä, “Jesus a pitili” ĩ na makö pi kuu mai kitä. “Jesus anö sanöma makö täapa kõo läo wi, ĩ a” makö pi kuu mai kitä' Jesus a kuu ha, 49 'Jesus ai! Ipa ulu a nasi tuo maa noai ha, a huu haimonöö! A sutua haitalolöö!' ĩ na pata tä kuuma. 50 A kuu ha, 'A kononöö! Au ulu a noma mai kitäö!' Jesus a kuu ha, 'Kamisa na a kuuhe, ĩ pitili ta waikiwö päwö lökö o!' ĩ na pata tä pi kuu kai konasolöma. 51 A huu koonö tä, kamanö töpö kalipalamati wi, ĩ töpö paa lälasoma. Ĩ töpö paa lälo nö, 'Au ulu a toa kõa waikiso kipiliö!' töpö kuu ha, 52 'Witi ha tä motokö kua tä, a toa konasoma?' a kuu ha, 'Hi wisa ha, tä motokö akäto tä, a sopi mataso kipiliö!' töpö kuu ha, 53 'Ã ãi. Hi wisa ha, tä motokö akäto tä, “Au ulu a toa konaso kitäö! A noma mai kitäö!” ĩ na Jesus a kuu kipili ta o' a pi kuu nö, 'Teusö anö a saia totili wi, ĩ a. Samakö täapa kõo läo wi, ĩ a' a pi kuu nö, 'Jesus a pitili' ĩ na kama hai ĩ ai töpö pi kuu soatasoma. Ĩ na kama ai töpö pi kuu naio soatalasoma. 54 Jutéia tä uli pata ha Jesus a kuoma, Kaliléia tä uli pata ha a kopolö nö, Teusö anö tä thama taö öpa asa wi, Jesus anö ĩ nasimö tä thamatima. Jesus anö tä aipama soma noai, ĩ tä hai, maa tuu kuoma maaki, upa mo puu thapalöma. Ĩ tä noa ha, tä aipama nömöo noai, ĩ tä hai, pata tä hai ĩ pelupö a toa komanöma.

5

1 Ĩ na tä kua tä, Jetusalẽi tä uli ha juteu töpö kokamo nö, töpö Teusömoö, töpö iapaloö, ĩ na töpö kua pialati hamö Jesus a hulasolöma. 2 Jetusalẽi tä uli ha hiima oweha kökö holeto wi, ĩ kökö päka kotö ha, töpö sanumo wi, ĩ kosoto u kuoma. Epöteu töpönö ĩ kosoto u a hila pasioö ha, Petesata kosoto u a hila thama pasiomae. Ĩ tuu kasö ha, töpö lota sinomo wi, ĩ 5 kökö sai kuoma. 3 Ĩ kökö sai na töpö saliati wi, ĩ töpö patioma. Ai töpö mamo höpöpö öpii ĩ töpö, ai töpö huu kasitiapalo wi ĩ töpö, ai töpö kõheo sinomo wi ĩ töpö, ĩ na töpö kui töpö patioma. 'Maa tuu supa supamo wi, ĩ tuu na sa kepasoma, sa temöa hãtoa konaso kitä' ĩ na töpö pi kuu nö, töpö patioma. 4 'Teusö a hai ĩ ãju tä ithopalo nö, hi tuu supa supamoma tä, ĩ tuu na ai tä salia apa wi, ĩ a wani kea somapasoma, ĩ a wani toa konaso kitäö!' ĩ na ĩ töpö pi kuuma kutenö, tuu supa supamo wi ĩ tä taa läo sinomoma. 5 Ĩ na tä kua tä, sutu upa ai tä salia kukö noai, satehe epii, ĩ 38 tä inama hasua kua waikipaso noai, ĩ a aulu wani paa naitioma. 6 Jesus anö ĩ a wani paa talalö nö, 'Sutu upa a wani kua somatioma' ĩ na Jesus a pi kuu salo, 'Wa temöpo pi topa kõa kule?' Jesus a kuuma. 7 A kuu ha, 'Sa pasilipo pasio wi, ai tä kua pasia mi. Maa tuu supa supamoti wi, ĩ tuu na ai tä sanömanö sa salupalöpö, ai tä sanöma kua pasia mi. Önö kutenö, maa tuu na sa kãa pia tä, ai töpö kãa läapalo sinomo opa thali' ĩ na a salia apati wi, ĩ na ĩ a wani kuuma. 8 Ĩ na a kuu ha, 'Wa pata wi ĩ wa ösökö tälö nö, a hoköpaloö! Wa hoköpalo nö, a huataloö!' Jesus a kuuma. 9 Jesus a kuu ha, a wani saliati noai, lope epii a wani temöa kõo soatasoma. A temöa kõo soatalo nö, a pata sinomo wi, ĩ ösökö tälö nö, a huatalo kõo soatama. Sanöma töpö mota mapo sinomo wi, ĩ tä wakala ha a temöa konasoma kutenö, juteu töpö aiki, 'Mota mapo sinomo wi, ĩ tä wakala pasiwö ta pi kuu mai. “Ĩ tä wakala na, ĩ ösökö po tihöö!” ĩ na Moisés a kai sãököle, ĩ ta kuu thali ta pi kuu mai' ĩ na a temöa konaso noai, ĩ a na ĩ na töpö kuuma. 11 Töpö kuu ha, 'Sa temöa komane, ĩ aiki, “Wa pata wi, ĩ ösökö tälö nö, a hoköpaloö! Wa hoköpalo nö, a huatalo kõoö!” ĩ na a kuu ha, sa huatalo kõa kule nökö' ĩ na a kuuma. 12 A kuu ha, '“Wa patio noai, ĩ wa ösökö tälö nö, a hoköa kopaloö! Wa hoköa kopalo nö, a huatalo kõoö!” a kuu noai, ĩ witi a?' juteu töpö kuu ha, 13 'Kui. Ĩ sa wani tai mi ipöö!' a kuu hö̃töoma. Satehe epii, ĩ ha töpö öpa sototoa apa tä, Jesus a hua konasolöma kutenö, 'Sa tai mi' ĩ na a kuuma. 14 Ĩ na tä kua tä, waiha Teusömo sinomo wi a sai na Jesus anö ĩ a taa konanö nö, 'Hiki. Wa temöa kõo waikisoma. Önö kutenö, wanisala tä thaa kota hãto tihöö! Wanisala wa tä thaa kotaköma, wa salia satia apa kukö matimöö!' Jesus a kuuma. 15 A kuu ha, ĩ a wani hulolö nö, juteu töpö na, 'Jesus anö sa temöa komani kipii' ĩ na a kuuma. 16 Ĩ na tä kua tä, ĩ tä wakala ha Jesus anö ĩ a wani temöa komanöma kutenö, juteu töpönö Jesus a peamama. 17 A peamaö ha, 'Mota mapo wi ĩ tä wakala na ipa hao anö töpö pasilipopö, a kalipalo mapo mi. Kamisa kalipalo mapo naio mi, ĩ na samakö kuatii' Jesus a kuuma. 18 Ĩ na Jesus a kuu ha, 'Jesus ma säpalö nököö!' ĩ na töpö kupalo opama. 'Mota mapo sinomo paio wi, ĩ tä wakala ha Jesus a kalipalo satia apa pikio saiö! Ma säpalö nököö!' juteu töpö kuuma. 'Teusö a hai, ipa hao a' Jesus a kuu ha, '“Teusö a kui na, ĩ na kamisa kuö nai totiwö” ĩ na Jesus a kuu hãtoa alu kuleö!' juteu töpö pi kuuma kutenö, 'Ma säa totipalö nököö!' ĩ na töpö kupalo opama. 19 Ĩ na töpö kupalo opa tä, Jesus a hapalo nö, '“Pelupö sa kua saimo pätia mane. Ipa hao anö tä thama wi, ĩ sa tä möö nö, ĩ nasimö sa tä thama naio päoö. Ipa hao a kuati wi na, ĩ na pelupö sa kua tolea totiatalo opati päoö” ĩ na sa kuu kule. Pitili sa. 20 Ipa hao anö sa pi ipa salo, kamanö tä thati wi, kamisa na ĩ tä pewö möma sinomoö. Ĩ na ipa hao anö sa thama sinomo kutenö, ipa hao sa uöma toleatii. Ipa hao aiki, “Ĩ nakö totiwöö! Ĩ na wa tä thama kua totiopököö! Kamisanö sa tä thama totitio wi, ĩ nasimö tä thama totioö!” ĩ na kamisa na ipa hao a kuu wi, ĩ nasimö sa tä thama waikio nö, “Kilatiha” makö pewö pi thama waikio kipili nökö. Makö pewö pi thama waikio kipili maaki, waiha, “Tä kilia apa nö kiliawö” ĩ na pe epii makö pewö pi kuu satia apa kuki kitä. Ipa hao aiki, “Sa tä thama wi, ĩ nasimö wa tä thama sinomopököö!” ĩ na ipa hao a kuu ha, sa tä thama sinomo nö, “Kilia apa sinomo nö kiliawö” ĩ na pe epii makö pi thama kitä. 21 Töpö noma waikiso noai, ipa hao anö ĩ töpö temöapama kua kõo wi na, ĩ na pelupö sanö ĩ na sa töpö temöapama thama naio kõoö. Sa töpö temöapama pi topa kõo wi, ĩ sa töpö temöapama kõo nö, sa töpö õsi palimipamaö. 22 Ipa hao aiki, “Wa wanisala apa kutenö, töpö pea soatio wi, ĩ tä uli na wa kuo soatiopöö!” ai tä sanöma na ĩ na ipa hao a kuu mai kitä. “Wa toita apö kutenö, kamisa na wa kuo soatiopöö!” ai tä sanöma na ĩ na ipa hao a kuu naio mai kitä. Kamisa kuu sisa kitä. Kamisa na ipa hao a hapalo nö, “Tä makokama läapalo wi, ĩ wa kutenö, kawa aiki, ‘Wa wanisala apa kutenö, wa pea soatiopöö!’ ai tä sanöma na wa kuu! Wa kuu nö, ai töpö na, ‘Wa toita apö kutenö, Teusö a na wa kutio asapöö!’ ai tä na wa kuu toleapöö!” ĩ na ipa hao anö ĩ na pelupö sa noa thama. 23 Ĩ na ipa hao anö sa noa thaa nö, “‘Teusö a hai, ĩ kaikana tä sai. A totiatalo opa asawö’ kamisa na ĩ na sanöma töpö kuu kua wi na, ipa ulu Jesus a na ĩ na töpö sanöma kuuto kuköpököö! ‘Jesus a hai, kaikana tä sai. A totiatalo opa asawöö!’ ĩ na töpö kuuto kuköpöö!” ĩ na ipa hao a pi kuu. Önö kutenö, “Kawa hai, ĩ kaikana wa sai. Wa totiatalo opawö” kamisa na ĩ na wa kuu mi tä, ipa hao anö sa simönipili, ĩ a na, “Kawa hai, ĩ kaikana wa sai. Wa totiatalo opawö” ĩ na wa kuu naio mi. 24 “Kawanö sa kai a hininö nö, sa simökipili, ĩ a na wa pi tapoiki nö, ‘Teusö a pitili’ ĩ na wa pi kuu nö, ĩ na wa kua tä, wa õsi palimipasoö. Ĩ na wa kuaö ha, ‘Töpö pea toleati wi, ĩ hamö a alulöö!’ kawa na sa kuu mai kitäö! Wa õsi nomawöo opama maaki, wa õsi palimia waikia kõpasomaö” kamakö na sa kuu totia kuleö! Sa holisimo mai kitä' ĩ na Jesus a kuuma. 25 A kuu nö, 'Pitili sa. “Töpö õsi nomawö öpii, waiha ĩ töpönö Teusö ulupö sa kai a hini kuki kitäö! Sa kai a hini kuköma, töpö õsi palimipaso kitäö! Ĩ na tä kua waikia kuleö!” ĩ na sa kuu kule. 26 Ipa hao aiki, “Kamisanö sanöma sa töpö õsi palimipama kua wi na, ĩ na wa kua naiopöö!” ipa hao anö ĩ na sa noa thama. 27 Sanöma sa kupaso noai, ĩ sa kutenö, “Wa tä makokama läapalopöö!” ipa hao anö ĩ na pelupö sa noa thama. 28 Sa kuu wi, ĩ sa kai na, “Kilatiha” pö pi kuu tihöö! Pi naka. Ĩ na tä kua kitä. Nomawö töpö titita sinomo wi, ĩ taka ha nomawö töpö titiköma maaki, ĩ töpö pewönö sa hini kuki kitä. Sa hini kuköma, 29 ĩ töpö pewö lisia sapa kopaso kitä. Toitai tä thaa noai, ĩ töpö hoköpalo nö, Teusö a na töpö waloa asa koikilö nö, Teusö a na ĩ töpö kua totia asa kõki kitä. Wanisala tä thaa pasio noai, ĩ töpö hoköa naia kopalo nö, töpö pepalo sinomo pasitio wi, ĩ tä uli na ĩ töpö waloa pasia kõikitö nö, ĩ töpö pepalo opa pasia kõkötaso kitäö!' ĩ na Jesus a kuu nö, 30 'Kama sa saimo päta mane. “Ĩ nakö” ipa hao a kuu ha, sa tä makokama läapalo päoö. Kama sa pi saimoti nö, sa tä thama pätio mai kitä. Ipa hao anö sa simönö noai, ĩ ipa hao a kuu ha, sa tä thama päoö. Önö kutenö, sa tä makokama läapalo wi ĩ tä pitilia apa' ĩ na Jesus a kuuma. 31 Ĩ na Jesus a kuu nö, 'Sami kamisa pi saimoti nö, “Ĩ na sa kuaö” sa kuu päa tä, “Pitili ta” töpö pi kuu maapököö! 32 Sami sa hapalo sisa mane. Ai tä hapalo naio nö, “Ĩ na Jesus a kua pasioö” ĩ na ĩ a kuu naioö. “Ĩ na ĩ a kuu wi, ĩ pitili ta waikiwö” ĩ na sa kuu. 33 João a kulati hamö, ĩ hamö ai ma töpö simöni ha, João anö ta pitili toti ipii ta katehama. “Ĩ na Jesus a kua pasitioöö!” a kuuma. 34 “Häö. Ai sanöma wanö sa wäsä mi salo” sa pi kuu mai kitä maaki, makö nomano nö, makö pea soatio wi, ĩ tä na makö noamapö, “João anö sa katehati noai, ĩ ta pitilia apa kule” ĩ na sa kuu ke. 35 Koa taka hilimanöma, makö wakalapamanö nö, makö hatukupama kua wi na, ĩ na João anö ĩ pitili tä na makö pi hatukama kua hö̃töoma. Koa taka na makö pi mönahapalo kua wi na, ĩ na João anö ta wäsä noai, ĩ na ĩ tä na makö pi mönahapalo kua hö̃töa soatasoma. 36 João anö sa wäsä nö, “Ö̃kö. Ĩ na Jesus a kuati ta o” ĩ na makö pi thamatima maaki, “Ö̃kö. Ĩ na Jesus a kuati ta o” ĩ na sa tä thama sinomo wi, ĩ na ĩ tänö makö pewö pi thama satia apaö. “Ĩ na tä thamaö!” kamisa na ipa hao a kuu noai, ĩ sa tä thamati asa kutenö, “Ö̃kö. Ĩ na Jesus a kuati ta o. Kama hai ĩ pö̃ anö Jesus a ta simöpalö noa” ĩ na makö pi thama päoö. 37 Ipa hao anö sa simönö noai, ĩ ipa hao anö sa wäsä hö̃töoö. Kamakönö ipa hao ma kai a hini maa noai kitä. Ipa hao ma tapa maa noai kitä. 38 Teusö anö sa simönö noai, ĩ sa na, “Ĩ pitili wa” ĩ na makö pi kuu totio mi salo, kamakönö Teusö ma kai a hini mi. 39 “Teusö sa tä waheta möti ha, sa õsi palimipasopöö!” makö pi kuu salo, Teusö ma tä waheta mötii. Ma tä waheta möti kule maaki, “Teusö tä wahetanö Jesus a wäsä totioö ta” pi kuu mai. 40 “Sa õsi palimipamonasopö, Jesus a na sa hulolöheö!” makö pi kuu mi. “Päla. Jesus a na sa huu wani” makö pi kuu sinomoö' ĩ na Jesus a kuuma. 41 Ĩ na a kuu nö, 'Kamisanö makö taö öpa waikia kule. Teusö ma pii pitilia totia mane. Önö kutenö, “‘Jesus a totiatalo opa sai taköö!’ kamisa na ĩ na sanöma töpö kuu totio mi salo” ĩ na sa pi kuu mane' ĩ na Jesus a kuuma. 43 Ĩ na a kuu nö, 'Ipa hao anö sa simöa nö, “Sanöma töpö pi hatukamaö!” ĩ na ipa hao a kuu ha, sanöma makö na sa waloköma. Sa waloköma maaki, kamakönö sa hini wanio opama. Teusö anö ai tä sanöma simöa maa noai kitä maaki, kamakö na ĩ ai tä waloköma, kama pi saimo päo nö, “Sa töpö pi hatukamatiköö!” a pi kuu päo wi, ĩ ma ta hini pi topa sisa päo kitä. 44 Kamakö aiki, “‘Makö totiatalo opawö’ kamakö na ĩ na Teusö a kuupököö!” ĩ na sami Teusö a kua wi, ĩ na ĩ a na makö pi kuu mai, “‘Makö totiatalo opawö’ ĩ na sanöma ma töpö pi thamapökö o” makö pi kuu pälaso noa. Ĩ na makö kuu päo salo, “Jesus a pitili” ĩ na makö pi kuu kuki kitä ta o? 45 “Pö̃ a na Jesus aiki, ‘Hi juteu töpö wanisala apa sinomo saiö!’ a kuu kitä” ĩ na pö pi kuu hãto ti! “Moisés a pitili” makö pi kuu wi, ĩ aiki, “Ĩ juteu töpö wanisala apa sinomo saiö!” ĩ na ĩ a kuu pasio kitä. 46 Moisés anö tä sãökati pola nö, sa wäsäma. Önö kutenö, “Moisés a pitilimo opaö” ĩ na makö pi kuu totia aköna, “Jesus a pitilimo opaö” ĩ na makö pi kuu totia hö̃töla pi. 47 “Moisés anö tä sãöka noai, ĩ tä waheta pitilimo opaö” ĩ na makö pi kuu mi tä, “Jesus a kuu wi, ĩ ta pitili ipö” ĩ na makö pi kuu mai kitä' ĩ na Jesus a kuuma.

6

1 Ĩ na tä kua tä, waiha kosoto tuu pata kule, ĩ Kaliléia tuu pata hilo wi, ĩ Sipetíasisö tuu kosoto pata hilo kua naine, ĩ kosoto u pata na Jesus a pökatökö lasoma. 2 Töpö satehe epii töpö nokaalöma. Teusö anö tä thama taö öpa wi, Jesus anö ĩ nasimö tä thama naio nö, töpö salia apati wi, ĩ töpö toapama kotioma. Töpö toapama kotio noai, ai töpö satehe epii töpönö ĩ tä tama kutenö, kosoto tuu pökatö pata hamö Jesus a na ĩ töpö noka soatasolöma. 3 Jesus a pökatöpalolö nö, heuma tä pata ha a hemopalolö nö, kama kai a hua sinomoti wi, ĩ töpö kai lokö lasoma. 4 Juteu töpö pásökoamopö, tä atea waikioma. 5 Ĩ na tä kua tä, Jesus anö tä möö ha, satehe epii töpö huu tasoma. Töpö huu tasoa ha, 'Ki töpö satehe epii töpö huu polati, ĩ ka pi tä nii na ma töpö ösö poteha läpamanöpö? Witi ha ĩsa ãi kuo pa ma tä tälöpö?' Filipe a na a kuuma. 6 Filipe a wapaö ha, a kuuma. 'Wi na sa kua pätakö?' Jesus a pi kuu hö̃töo maama. 'Ĩ na sa kua läo mosawiapalo hö̃töo soata kitäö!' a pi kuu hö̃töolöma. 7 'Ka pi tä na ki ma töpö ösö potehepamanöpö?' Filipe a na Jesus a kuu ha, 'Ki töpö pewö na wani ipii ĩsa ãi ose wai totoma hätäpo kuköma, ĩ ãi noa apö kitä ta pi kuu mai. 8 pilipoma kökö na ai sanöma tä kalipalo pi kua hö̃töa kule maaki, ĩ ĩsa ãi noa tolea satia apa soale kitä' Filipe a kuuma. 8 A kuu ha, Jesus a kai a hua sinomoti wi, ĩ ai tä hai, ĩ Simão Pedro poose André aiki, 9 'Sepaata mo kopeke kuo noai, ki ulu tänö ĩ nasimö ĩsa ãi wai po kua kulati. 5 ĩsa ãi po kule. Ĩ na tä kua tä, polakapi salaka kökö po naia kule. Ĩ na nii tökö ose wai kui tökö wainö ĩ na töpö satehe epö kui töpö ösö pewö poteha totilaso kitä ta o?' André a kuuma. 10 A kuu ha, Jesus aiki, '“Pö loa paikiö!” ki töpö na pö kuu!' ĩ na kama hai ĩ töpö na ĩ na Jesus a kuuma. Ĩ na Jesus a kuu ha, sĩsipö tökö kuo topa apa pa ĩ töpö pewö loköma. Töpö satehe epii, ĩ 5 .000 wano töpö, suö töpö, ĩ na töpö kui töpö kuoma. 11 Ĩ na tä kua tä, Jesus anö ĩsa ãi tälö nö, Teusö a na, 'Hi ĩsa wa ãi totopi ke. Wa totiatalo opawöö!' a kuu nö, töpö lole, ĩ töpö pewö na ĩ ãi totoa hätähäköma. Ĩ ãi totoa hätähäa totia paitakö nö, salaka kökö täa nömötalö nö, 'Hapa. Kawanö hi salaka wa kö totopi ke. Wa totiatalo opawö' a kuu nö, ĩ töpö pewö na salaka sãi totoa hätähäa totia nömöaköma, ĩ töpö pewö pötöa totia hö̃tösoma. 12 Ĩ töpö pewö pötöa totia waikilasoö ha, 'Ai tä see koananöö! Tä see wanio päo matimö' ĩ na Jesus a kai a hua sinomoti wi, ĩ töpö na a kuu ha, 5 ĩsa ãi na töpö iapalohe, ĩ tä see koananö nö, wöö kökö ha ĩsa ãi see titiaköma, ĩ ãiki seenö, wöö kökö satehe epii, ĩ 12 kökö wöö kua kule maaki, kökö wöö pewö matia apa konasoma. 14 Ĩ na tä kua tä, Teusö anö aipö tä thama wi, Jesus anö ĩ nasimö ai tä thama hö̃töoö ha, ĩ töpönö ĩ tä tapa noai ĩ töpö aiki, '“Teusö a kai a wäsä totio wi, kamakö na ĩ a waloki kitäö!” Teusö tä waheta kuupili, ki ĩ Jesus a' ĩ na töpö kupaloma. 15 Ĩ na töpö kupaloö ha, Jesus aiki, 'Hi töpönö sa nokamanö nö, sa kaikanapa pia kuleö!' ĩ na Jesus a pi kuu salo, heuma tä pata hamö sami a hemopasolöma. 16 Heuma tä pata hamö Jesus a hemopasolöma, tä mumahapalo tä, kosoto tuu na kama kai a hua sinomoti wi, ĩ töpö timöiki nö, 17 kutiata a na töpö titiki nö, pökatö hamö Kapahanaũ tä uli kulali hamö töpö pi pökatökö lasoma. Ĩ töpö na Jesus a walo kõo mai ha, tä mumasoö. 18 Ĩ töpö pi pökatö soaalö tä, ipoko tänö maa tuu pata supa supamo opa läoma. 19 Tuu supa supamo opa tä, pai hamö, kosoto tuu mötali pata hamö ĩ töpönö tä sakaalö tä, Jesus a huu tapama. Maa tuu hösöka hamö Jesus a huu läo tasoma. Maa tuu hösöka hamö Jesus a huu ha, töpö kilipalo opama. 20 Töpö kilipalo opaö ha, 'Pö kilipalo tihöö! Kamisaö!' Jesus a kuuma. 21 A kuu ha, 'Ai taköö! A titia naikiö!' töpö kuu ha, Jesus a titia naia soataköma. Jesus a titia naia soataki ha, töpö pi mönaha apii töpö pi pökatökö lasoma. 22 Ĩ na tä kua tä, ĩ hena tä, pökatö ha töpö kuo haio soa laso noai, ĩ töpö aiki, 'Jesus a maneö! Sami kutiata ösö wai kãpili, ĩ ösö ha, a kai a hua sinomoti wi, ĩ töpö pi pökatöa waikikö laso kipiliö! Jesus a kuo haio soa kipili maaki, huki a kua maneö!' töpö kuuma. 23 Ĩ na töpö kuu tä, Sipetíasisö tä uli ha töpö kuo taso noai, ĩ töpö pi walokö solöö. 'Hi ĩsa wa ãi totopi ke' Teusö a na Jesus a kuu noai, ĩ ha töpö satehe epii töpönö ĩsa ãi oalalö noai, ĩ tä kotö na ĩ töpö pi walokö solöma. 24 Töpö pi walokö solö ha, 'Jesus a maneö!' töpö kuu noai, kutiata kökö ha ĩ töpö titiki nö, Jesus a tae laso pia salo, Kapahanaũ tä uli na ĩ töpö pi pökatölasolöma. 25 Töpö pi pökatölolö nö, Jesus a talalö nö, 'Jesus a pata! Witi ha motokö kua tä wa walokö solöma?' töpö kuu ha, 26 Jesus aiki, '“Jesus anö makö pi hatukupamani pia salo, tä aipamati kipiliö! Önö kutenö, Jesus ma tae haiolö nököö!” ĩ na makö pi kuu pola nö kuno mai, “Ĩsa ãinö makö ösö potehea asa pasoma kutenö, Jesus ma tae haiolö nököö!” makö pi kuu pälaso lasoma. Ĩ na sa kuu kuleö! Pitili sa' ĩ na Jesus a kuuma. 27 Ĩ na a kuu nö, 'Nii tä oa wi, ĩ nasimö tä na pö kalipalo opa päo tihöö! Nii tä hoteso kitäö! Makö õsi palimipaso wi, ĩ tä na pö kasiapalo sisaaö! Ipa hao Teusö anö sa simöpalö noai, ĩ sanöma sa kupaso noai, ĩ sanö makö õsi palimipamani kitäö! Kamisanö makö õsi palimipamani wi, ĩ tä na pö kasiapalo sisatioö!' ĩ na Jesus a kuuma. 28 Ĩ na a kuu ha, 'Wi na samakö kasiapalo kuapö? Ĩ tä na wi na Teusö a kuu?' ĩ na ĩ töpö kuu ha, 29 '“Ĩ tä na pö kasiapaloö!” Teusö a kuu wi, ĩ ma ta hini pi topa salo, Teusö anö sa simöpalö noai, ĩ sa na makö pi tapoiki nö, “Jesus a pitili” ĩ na pö pi kuu totioö! Kamisa na pö noamamo totioö!' ĩ na Jesus a kuuma. 30 Ĩ na a kuu ha, 'Wa tä aipama wi, kamisamakö na ĩ wa tä mömaö ha, “Teusö anö Jesus a simöpalö noa” samakö kuu kitä. “Jesus a pitili” samakö pi kuu totio kitä' töpö kuu nö, 'Önö kutenö, wa tä aipama kitä? 31 Tä uli pokea apöle, ĩ tä uli ha nö patapö töpönö nii tä aipö öpii nii tä opalatimae. “Hi tä hẽtu ha nii tä kupoli, ĩ tä nii na Moisés anö töpö kai ösö potehepalotima” ĩ na Teusö tä waheta kuu' ĩ na Jesus a na ĩ na ĩ töpö kuuma. 32 Ĩ na töpö kuu ha, 'Ĩ na sa kuu kuleö! Pitili sa: “Hi tä hẽtu ha nii tä sai kupoli, Moisés anö kamakö na ĩ nii tä sai totoma maama. Hi tä hẽtu ha nii tä sai kupoli, ipa hao anö ĩ nii tä sai totoma sisaö. 33 Sanöma makö temöpama totio wi, ĩ tä hai ĩ nii tä sai. Ipa hao Teusö anö ĩ tä nii totoma sisaö. Ĩ tä nii hai, ĩ kamisa. Kamakö na Teusö anö sa totokö noai ĩ nii tänö makö temöapalamatii. Önö kutenö Teusö a na sa kuoma, hi masita tä uli ha sa ithopaköma” ĩ na sa kuu kuleö!' Jesus a kuuma. 34 Jesus a kuu ha, 'Jesus ai. Nii wa tä sai kateha pole, kamisamakö na ĩ tä nii sai totoma sinomoö!' ĩ na töpö kuuma. 35 Ĩ na töpö kuu ha, Jesus aiki, 'Nii wa tä oalöma, wa pi honipo mi kui na, ĩ na kawanö sa kai a hinia totilöma, wa pi honipo maa kua hö̃töpasoö. Wa amisio opa noai maaki, maa wa tuu kotalöma, wa amisi maa kua toitaso wi na, ĩ na sa kai a hinia makokoa thaa totilöma, wa pi honipo wi, ĩ tä maa kua kua totia hö̃tötasoö' ĩ na Jesus a kuuma. 36 Jesus a kuu nö, 'Ĩ na sa kuu kule maaki, “Kamakönö sa tapa apati wi maaki, kamisa na makö mamo teteo mi ipö nö kiliwö. ‘Jesus a pitili’ makö pi kuu mi ipö” ĩ na sa kuu kipili' Jesus a kuuma. 37 A kuu nö, 'Kamisa na ipa hao anö ai sanöma makö totopi wi, kamisa na ĩ makö waloki kitä. Kamisa na makö waloköma, makö hãsiapo mai kitä. 38 Hi tä hẽtu hamö sa kua tä, sanöma makö na sa huu pia tä, kama sa pi saimo päta maama. “Sanöma töpö na sa waloiki nö, ĩ na sa kua kitäö!” sa pi kuu päta maama. Ipa hao anö sa simönö noai, ĩ aiki, “Ĩ na wa kua totioö!” ipa hao anö sa noa thaö ha, sanöma makö na sa waloköma. 39 Sa simönö noai, ĩ aiki, “Kawa na sa töpö totokipili, ĩ töpö thaa totiapala totioö! Ai wa töpö motöma maapököö! Masita tä uli mapo pia tä, ĩ wa töpö temöa kõo soapamanöpököö!” ĩ na ipa hao a kuu nö, 40 “Sanöma töpönö ipa ulu wa taa nö, ‘Wa pitili’ ipa ulu wa na ĩ na töpö pi kuu nö, ĩ töpönö wa tälöma, ĩ töpö õsi palimipaso kitä” ĩ na ipa hao Teusö a kuu' Jesus a kuu nö, 'Ĩ töpö õsi palimia totipasoö ha, hi masita tä uli mapo pia tä, kamisanö ĩ töpö temöa kõa hö̃töa soapamani kitäö!' ĩ na Jesus a kuuma. 41 Ĩ na tä kua tä, 'Hi tä hẽtu pata ha nii tä kupoli, sanöma makö na Teusö anö ĩ tä totoa wi, ĩ kamisa' Jesus a kuu ha, juteu töpönö Jesus a päsäpama. 42 'Ki a hai, Jesus a pasiwö. José a hai ĩ pelupö a pasiwö. Kama hai pö̃ a, kama hai pöpönö a, ĩ na kilii ma töpö taö öpa kule ta o. Wi na a pi kuu salo, “Hi tä hẽtu ha sa kuoma, sanöma töpö na sa walokö solöma sa” a kuu?' töpö kuu ha, 43 'Sa kateha wanisala hãtotio pola tihöö!' Jesus a kuu nö, 44 'Ipa hao anö sa simöa totio noai, ĩ anö kamisa na wa waloama mi tä, kamisa na wa walo pasio mai kitä. Kamisa na wa waloköma, masita tä uli mapo pia tä, kamisanö wa temöa kõa sisapamani kitäö! 45 “Teusö anö ĩ töpö pewö taömani kitä” ĩ na Teusö a kai a wäsäti noai, ĩ na ĩ töpö kuu noai, ĩ ta sãökama. Önö kutenö, ipa hao Teusö wa hini nö, wa pi hatukupamonasoma, kamisa na wa waloa sisaki kitä. 46 Ai tänö pö̃ Teusö a möö tai mi pasiwö. Teusö a na sa kutio noai, ĩ sanö Teusö sa möö taö öpa sisaö. 47 “‘Jesus a pitilimo opaö’ wa pi kuu tä, wa õsi palimipasoö” kamakö na sa kuu kule. Sa holisimo mai kitäö!' Jesus a kuu nö, 48 'Nii tänö wa temöo soatio kua wi na, ĩ na kamisanö wa õsi temöama kua sinomo hö̃töoö' Jesus a kuuma. 49 A kuu nö, 'Poke poke tä uli ha kamakö nö patapönö maná tä oa sinomotima maaki, ĩ töpö nomanasoma. 50 Ĩ na töpö kuama maaki, hi tä hẽtu ha nii tä kupoli, Teusö anö kawa na ĩ tä totoki wi, ĩ wa tä oalöma, wa noma pasio mai kitä. 51 Hi tä hẽtu ha nii tä kupoli, ĩ tä niinö wa õsi palimipamani wi, ĩ kamisa waikiwöö! Ĩ nii wa tä oalöma, kawanö sa täa totilöma, wa õsi palimipaso kitä. Wa noma mai, Teusö a na wa kuo naio soatio kitäö!Nii sa ta kateha pole, ĩ pili sa sãi. Sanöma makö õsi palimipasopö, sa sãi totoki kitä' Jesus a kuuma. 52 Ĩ na Jesus a kuu ha, juteu kama töpö hapalo hẽtupasoma. 'Wi na taka? Wi na kama nii tä totoa thaki taka?' töpö kuu ha, 53 Jesus aiki, 'Ĩ na sa kuu kuleö! Pitili sa: “Sanöma sa kupaso noai, ĩ sa sãi oa mi, pili sa iä pö koa mi, ĩ na makö kua mi tä, makö õsi palimipo mai kitä. 54 Pili sa sãi oali, pili sa iä pö koali, ĩ na makö kua kuköma, ĩ makö õsi palimia totipasoö. Ĩ makö õsi palimia totipamani wi, hi masita tä uli mapo pia tä, makö temöa kopamani kitäö! 55 Pili sa sãi hai, ĩ nii tä sai. Pili sa iä pö hai, ma tuu koa wi, ĩ tuu sai. 56 Kawanö pili sa sãi oaö, pili sa iä pö koaö, wa kua wi, kamisa na ĩ wa kuo soatio kitä. Kawa na sa kuo hö̃töo soatio kitä. 57 Ipa hao Teusö a palimii, ĩ anö sa simönöma. Ĩ anö sa palimipalöma. Ipa hao Teusö anö sa palimia thapalipili na, ĩ na kamisa sãi na wa ia sinomo kuköma, kamisanö ĩ na ĩ wa õsi palimia thaa hö̃töpamani. 58 Hi tä hẽtu ha nii tä kupoli, ĩ tä nii ithopaso noai, ĩ kamisa waikiwö. Kamakö nö patapönö nii tä aipö öpii, ĩ maná tä oama maaki, ĩ töpö nomasoma. Nii sa ta kateha pole, ĩ wa tä nii oaö ha, wa õsi palimipalo nö, wa temöo soatio kitä” kamakö na sa kuu alu kule. Pitili sa' ĩ na Jesus a kuuma. 59 Kapahanaũ tä uli ha juteu töpö kokamo wi, ĩ a sai kulati, ĩ a sai na Jesus anö töpö pi hatukupama tä, ĩ na Jesus a kuuma. 60 Jesus a kuu noai, Jesus a na töpö nokapaloti wi ĩ töpö satehe epii töpönö ĩ ta hini ha, 'Jesus anö makö pi hatukama pole, ĩ ta amatosia apöle. Ĩ ma ta hini totia kule ta o? Ĩ ta hinio mi ipö kitä' töpö kuuma. 61 Töpö kuu ha, töpö hapalo pi hĩsuhapalo pole, Jesus anö ĩ tä taa nö, 'Sa kuuhe, ĩ tä na makö pi honipo kule? 62 Sanöma sa kupaso noai, ki hamö ĩ sa kuo soma laso noai, ĩ hamö sa hoköamö kua kõa soapasolö wi, ĩ ma tä taa totia tä, wi na makö pi kuu kitä? 63 Teusö a õsi kua tolele, ĩ anö wa õsi palimia sisapamani. Kama wa pi saimo opa päköma, wa õsi palimipo mai kitä. Kamakö na sa hapalo sinomoti kutenö, kamakö na Teusö a õsi kua tolele, ĩ a waloiki nö, makö õsi palimipamani kitäö! 64 Sa kuu pole, ĩ tänö makö õsi palimipaso kitä maaki, “Jesus a pitili mai kitä” ĩ na ai makö pi kuu pasia kule' Jesus a kuuma. Somi tä, ĩ tä na Jesus a pi hatuko soatama. '“Jesus a holisi” töpö pi kuu wi ĩ töpö' ĩ na Jesus a pi kuu soatama. 'Ki a waninö sa monini pia salo' ĩ na a pi kuu naio soatama. 65 Ĩ na tä kua tä, Jesus a hapalo kota nö, 'Önö kutenö, “Ipa hao anö kamisa na wa waloama mi tä, kamisa na kama wa walo päo mai kitäö!” sa kuu ke' ĩ na Jesus a kuu totio opama. 66 Ĩ na Jesus a kuu totio opaö ha, Jesus a na töpö nokapaloti noai, ĩ ai töpö satehe epii töpö sapa pasia kopasoma. Jesus a na ĩ töpö nokapalo maa pasipasoma. 67 Önö kutenö, Jesus a kai a hua sinomoti wi, ĩ kama 12 töpö na a hapalo nö, 'Kamakö hai kini? Kamisa na makö nokapalo wania naia kule?' a kuu ha, 68 Simão Pedro aiki hö̃töwö, 'Kaikana ai. Samakö nokapalo wani mai kitäö! Ĩ witi a na samakö nokapalo nömöopö? Ai tä kua mai kitä. Kamisamakö na wa hapalo sinomo wi, ĩ tänö samakö õsi palimipo sisaö. 69 “Kawa pitili” ĩ na samakö pi kuu kule. Kawa toita sati ipii, Teusö anö ĩ wa simöa asapalöma thali' ĩ na Pedro a kuuma. 70 Ĩ na Pedro a kuu ha, 'Kamisanö 12 makö kui makö saia totili kipili maaki, Sai tä sai patanö ai wa simöa sinomo wi ĩ wa' Jesus anö töpö noa thama. 71 Simão Isökatiosisö a hai ĩ pelupö Jutasö a katehama. Jesus anö 12 töpö kui töpö sailö noai, ĩ ai tä hai, ĩ Jutasö a kuoma maaki, ĩ anö Jesus a monima piama.

7

1 Ĩ na tä kua tä, Kaliléia tä uli pata hamö Jesus a huatalotima. Ki hamö, Jutéia tä uli pata hamö juteu töpönö Jesus a säpalöpö, töpö lälati hamö, ĩ hamö Jesus a huu wanio opa tasoma. 2 Ĩ na tä kua tä, juteu töpönö sai pö pakitai sai pö thakö nö, töpö iapalo sinomoma. Töpö iapalo kõo pia wi tä atea waiki ha, 3 Jesus a hai ĩ poose töpö aiki, 'Jesus ai. Jutéia tä uli pata na wa huu mi salo. Ĩ hamö wa huu nö, wa tä aipama sinomo wi, ĩ nasimö wa tä mömapököö! Kawa kai a hua sinomoti wi, ĩ töpö na ĩ wa tä aipö möma taso mi salo. 4 “Ĩ na Jesus a kuati ta o” wa töpö pi thama maapa wi, wa kuo soatio maikiö! Wa tä aipama sinomo kutenö, ai töpö pewö na a tamo hö̃töotöö!' ĩ na poose töpönö pepala Jesus a noa thamae. 5 Jesus a hai ĩ poose töpö sai maaki, 'Jesus a pitili' ĩ na ĩ töpö pi kuu maama. 'Teusö anö ĩ a kaikanapalö noai, ĩ a' ĩ na ĩ töpö pi kuu maama. 6 'Ĩ töpö pewö na a tamo hö̃töotöö!' ĩ na poose töpö kuu ha, 'Huki sa huu mai kitä. “A alulöö!” ipa hao Teusö a kuu ha, sa hua sisasolö kitä. Kama makö huu pi topa tä, pö hulolöö!' Jesus a kuuma. 7 A kuu nö, 'Sanöma töpönö kamakö wanipo tai mi ipö asawö. Kamisa wanipo pasio sinomoö. Sanöma töpö na, “Wanisala ma tä thaa sinomo opawö” sa kuu ha, sa wanipo opa sinomo sai thaliö! 8 Töpö iapalo pialati ha, ĩ hamö pö hua pailolöö! Sa huu paio mai kitäö! “A hua hailolöö!” ipa hao Teusö a kuu ha, sa huu haio kitä' Jesus a kuu nö, 9 Kaliléia tä uli pata ha a kuo haio paitioma. 10 A kuo haitioma maaki, ĩ hamö poose töpö asulö noai hamö töpö iapalo pialati, ĩ hamö Jesus a hua haia hãtosolöma. 11 Töpö iapaloti tä, töpö lämo pasio hãto nö, 'Witi ha Jesus a kua?' ĩ na töpö kuuma. 12 Satehe epii töpö hapalo nö, 'Jesus a totiatalo opa nö kiliawö ia!' ĩ na ai töpö kuuma. Ĩ na ai töpö kuu kule maaki, ai töpö aiki pasiwö, 'Nai. Jesus anö töpö mönama apa päo thaliö!' ĩ na ai töpö kuu pasioma. 13 Juteu pata töpö na ĩ töpö kili salo, Jesus a kateha hoka totio mai ha, Jesus a kateha hãtomopalo pätiomae. 14 Ĩ hamö töpö iapalo mötalipo waikia tasoa tä, Jesus a waloa haikitö nö, Teusömo sinomo wi ĩ a sai ha a ekua soataiki nö, töpö pi hatukama soata tasoma. 15 Töpö pi hatukamati tä, 'Tä aipa apa nö kiliawö' juteu töpö kuu nö, 'Ai tänö ki a pi hatukama maa noai maaki, ki anö tä taö öpöle' töpö kuu ha, 16 'Kama sa pi saimo nö, sa töpö pi hatukama mane. Sa simönö noai, ĩ aiki, “Ĩ nakö totiwöö! Ĩ nakö totiwöö!” a kuu sinomo wi, ĩ sa ta wäsä toleati päoö. 17 Kamakö aiki, “‘Ĩ na wa kuapöö!’ Teusö a kuu wi, ĩ sama ta hini pi topa sisaö. ‘Ĩ na a kua totihoö!’ Teusö a kuu ha, ‘Hai. Awai’ ĩ na samakö kuu hö̃töo sinomo päoö” ĩ na makö kuu ha, sa ta wäsäti wi, ĩ tä na wa pi hatukua totipaso kitä. “Jesus anö ta wäsä wi, Teusö anö ĩ ta totoa päköma” ĩ na wa pi kuu tao opa waikile kitä. Kama sa pi saimo päoö aköna, “Jesus a pi saimo päo nö, ta wäsätii” makö kuu tao opa hö̃töla pi. 18 “Ai tänö sa simöa pasio mai, kama sa pi saimo päo nö, sa ta wäsä pasio päoö” ĩ na ai tä kuu wi, ĩ anö, “Ta wäsä pole, ĩ anö tä taö öpapawö” ĩ na töpö pi thama pi topa apa päa salo, ta wäsäti päoö. Ai tä aiki hö̃töwö, “Ki a patanö sa simönöma kutenö, sa ta wäsä toleati päoö” ĩ na ĩ a kuu wi, ĩ anö, “Pata tänö a simönö noai, ĩ a patanö tä taö öpa asawöö!” ĩ anö ĩ na töpö pi thama pia salo, ta wäsä päoö. Ĩ a pitilimo totio opa asaö. A holisimo mi. 19 Moisés anö kamakö na kama kai totoköma maaki, ĩ makö pewönö Moisés ma kai a hini mi. Wi na makö pi kuu salo, sa säpa pi topa pikia kule?' Jesus a kuuma. 20 Jesus a kuu ha, 'A hole kuu päo ti! Kawa na sai tä sapäko hãtoa päa kule. Wa säpa pi topa mane' töpö kuu ha, 21 'Teusö anö tä aipama asa wi, ĩ nasimö ai sa tä aipamaö ha, “Kilatiha!” makö pi kuuma. A wani salia apati noai, ĩ sa toa komanöma ha, “Kilatiha!” makö kupalo opama. 22 Sutu upa Moisés a kua paia mi tä, kamakö hai nö patapö töpönö ulu töpö isi ola ösö wai hanöpalö nö, ĩ ösö wai hosa sinomoma. Waiha Moisés aiki, “Ulu töpö isi ola ösö hosa sinomoö!” a kuu tolea totioma kutenö, mota mapo wi, ĩ tä wakala päla tä maaki, kamakö hai ĩ ulu ma töpö isi ola hosa hö̃töo sinomoö. 23 “Ulu töpö na 8 tä mumi kuto tä, pili a isi ola ösö hosa sinomoö!” Moisés a kuu noai, ĩ ma kai peama wani salo, mota mapo paio wi, ĩ tä wakala ha maaki, ulu ma töpö isi ola ösö wai hosa sinomoö. Ĩ na makö kuati maaki, mota mapo wi ĩ tä wakala ha ki sa toa totia komanöma ha, kamakönö sa wanipotiwö. Wi na makö pi kuu salo? 24 Ai ma tä möö nö, “Ĩ a wanisala” pö kuu soa päto tihöö! Ĩ a kuati wi, ĩ a na wa pi tapoa totia paiki nö, “Ĩ a kuati wi, Teusö anö ĩ tä taa wani” ĩ na makö pi kuu totio nö, “Awai. Ĩ anö wanisala tä thama” ĩ na pö kuu makoka totihoö!' ĩ na Jesus a kuuma. 25 Ĩ na tä kua tä, Jetusalẽi tä uli hamö töpö kulali, ĩ ai töpö aiki, 'Ai töpönö a säpa piale, ki ĩ a hãtowö. 26 Ki ĩ a maaki, hoka totio opa pa a hapaloti kule maaki, ĩ a na ĩ töpö ta haa hö̃töo mi ipö nö ta kiliwö. “Teusö anö Jesus a sailö nö, a kaikanapa piale, ki Jesus a hãtowö” ĩ na pata töpö pi kuu hãtoa kule. 27 Ĩ na makö kupalo pasia mane. Teusö anö a sailö nö, a kaikanapa piale, ĩ a waloköma, ĩ a piliomö kuo soma noai, ĩ ma tä uli taö mai kitä maaki, Jesus a piliomö kuo noai, ĩ ma tä uli taö waikia kule. Ĩ ma tä uli taö waikia kutenö, Teusö anö ĩ a kaikanapa mai kitä' ĩ na töpö kupalotima. 28 Ĩ na töpö kupaloti tä, Teusömo wi a sai pata hamö Jesus anö töpö pi hatukamati pola nö, lope epii a hapaloma. 'Kamakönö sa taö kule ta o? Sa pilio soma noai, ĩ ma tä uli taö naia kule ta o? “Teusö anö a simöpa mai ha, Jesus kama pi saimo päo nö, a huma” pö pi kuu ti! Sa simöa noai, kamakönö ĩ ma taö mai kitä. Ĩ a pitili ipö. 29 Ĩ ma taö pasia mai kitä maaki, kamisanö sa taö öpa asa sisaö. Ĩ a na sa kutio asa waikioma kutenö, ĩ sa taö öpa asaö. Ĩ anö sa simöpalöma' Jesus a kuuma. 30 Jesus a kuu ha, ĩ töpönö Jesus a hua pi topama maaki, 'A säpali wi, ĩ tä wakalaö!' Teusö a pi kuu mi kutenö, ĩ töpönö Jesus a huöpa soata maamae. 31 Ĩ na tä kuama maaki, 'Teusö anö a saia totilö noai, ĩ Jesus a' ai töpö pi kuu nö, 'Jesus a pitili' ĩ na ĩ töpö pi kuu soatama. 'Teusö anö a saia totilö noai, ĩ a kaikanapa piale, ĩ a waloiki nö, Jesus a na ĩ a tolehea asapaso solö kitä ta o? Jesus anö tä aipama kua wi na, ĩ na ai tä walokiso nö, ĩ na ai tänö tä aipama tolea satia kua asakö solö kitä ta o?' ĩ na töpö kutima. 32 Ĩ na töpö kuti noai, ai juteu pata töpö, ĩ patiseu töpö a hilo wi, ĩ töpönö ĩ ta kuu hininöma. Ĩ ta kuu hininö nö, ĩ patiseu töpö, Teusö a täpä sinomo wi ĩ pata töpö, ĩ na töpö kui töpönö, Teusömo wi a sai pata na töpö läapalo sinomo wi, ĩ töpö noa thaa nö, 'Jesus a huölöheö!' ĩ na töpö kuuma. 33 Ĩ na tä kua tä, Jesus aiki, 'Kamakö na sa kuo tetepo opati mai kitäö! Tä tetepo totila tä kuno mai, sa simönö noai, ĩ a na sa konasolö kitä. 34 Kamakönö sa taeti kitä maaki, sa tapamo kota mai kitä. Sa kuo kõo pialali ha, ĩ ha makö walo haio solö mai kitä' Jesus a kuuma. 35 A kuu ha, juteu töpö hapalo hẽtupaso nö, 'Witi tä uli hamö a kuamö kua kõkö noai ha, ma tapa maapö? Ai juteu makö selekepaso noai, juteu töpö pasi mai, köteeku töpö a hilo wi, ĩ töpö na ĩ juteu töpö pilio sätäa naitile, ĩ töpö na Jesus a pilia nömöikitö nö, ĩ köteeku töpö pi hatukama nömöo hãto taso pia salo? 36 “Kamakönö sa taeti kitä maaki, sa tapamo mai kitä. Sa kuo kõo pialali ha, ĩ ha makö walo haio solö mai kitäö!” wi na ĩ a pi kuu salo, a kuu kule?' ĩ na ĩ töpö kuuma. 37 Ĩ na tä kua tä, töpö iapalo mapo totio piale, ĩ tä wakala na töpö pewö kokamo pole, ĩ tä Jesus a öpaiki nö, lope epii a hapalo nö, 'Wa amisi ipö salo, kamisa na wa waloa hö̃köa toitaiki nö, kamisa na wa tuu nakalö nö, wa tuu koalöpöö! Wa amisi ipö salo, maa tuu kuo pa wa walotaiki nö, maa wa tuu kotalöma, wa pi topa kua kotaso kua wi na, ĩ na wa pi otatalo opa kua kule maaki, kamisa na wa waloa hö̃köa toitaiki nö, sa hini kuköma, wa pi topa apa hö̃töa kotaso kitä. 38 “‘Jesus a pitili’ ĩ na wa pi kuu ha, õsi palimipamani wi, pili wa õsi ha ĩ nasimö tuu haapo opaö, tuu kaläpo opaö, ĩ na tä kua kitäö!” ĩ na Teusö tä waheta kuu' ĩ na Jesus a kuuma. 39 'Tuu haapo opaö' Jesus a kuu pole, ĩ Teusö a õsi kua tolele, ĩ ta kateha kule. 'Jesus a pitili' ĩ na töpö pi kuu wi, ĩ töpönö Teusö a õsi kua tolele, ĩ a pi sua piale, Jesus anö ĩ a katehama. Hi tä hẽtu ha Teusö a kulali, ĩ hamö Jesus a kõo paiolö mi tä, hi tä uli ha a kuo soa paioma kutenö, Teusö a õsi kua tolele, ĩ a totoa paio maama. 40 Jesus a kuu noai, ĩ töpönö ĩ ta hini ha, 'Jesus a hai, Teusö a kai a wäsä sinomo wi, ĩ a' ai töpö kuuma. 'Teusö anö a saipalö noai, kamakö na a kaikanamo piale, ki ĩ a' ĩ na ai töpö kuu asama. 41 Ai töpö aiki, '“A kaikanamo totio wi, ĩ Cristo a hilo wi, kaliléia tili tä kule kitä” ĩ na Teusö tä waheta kuu mane nökö. 42 “Cristo a hai, kaikana Davi tä ola. Pelẽi tä uli ha Davi a pilio noai, ĩ tä uli ha Cristo a pilia nömöki kitäö!” ĩ na Teusö tä waheta kuu sisa kule. Jesus a hai, ĩ Cristo a mai kitä' ai töpö kuuma. 43 Ĩ na Jesus a na ĩ töpö hapalo setekeapalo kua apama. Ai töpö aiki, 'Jesus a holisi' ĩ na ĩ töpö pi kuu pasioma. 44 Ai töpönö Jesus a wanipo opa salo, a huöa pi topa apama maaki, ai tänö a hua maama. 45 Ĩ na tä kua tä, Teusömo wi a sai pata ha töpö läapalo sinomo wi, ĩ töpö hua kononö nö, Teusö a täpä sinomo wi ĩ pata töpö, patiseu töpö, ĩ na kilii töpö na ĩ töpö walokö tasoma. Töpö walokö tasoö ha, töpö läapalo sinomo wi, ĩ töpö na, 'Jesus ma kai walo totio mai. Wi na makö kuatima?' pata töpö kuu ha, 46 'Jesus a hapalo toita kui na, ĩ na ai tä hapalo toita kui tä kua mai kitäö!' töpö läapalo sinomo wi, ĩ na ĩ töpö kuuma. 47 Ĩ na ĩ töpö kuu ha, 'Jesus anö makö mönama hö̃töo hãtomakö?' ĩ na patiseu töpö kuu nö, ĩ na ĩ töpö noa thama. 48 'Ai juteu pata töpö, ai patiseu samakö, ĩ na samakö kui, ĩ samakönö Jesus a hai ĩ pitili sama ta pii ta o? 49 Ma. Pata samakönö Jesus a hai ĩ pitili sama ta hila mai kitä. Satehe epii hi töpö loa sototole, ĩ töpönö Jesus a hai ĩ pitili ta hila sisaöe. Moisés anö töpö noa thaa noai, hi töpö lole, ĩ töpönö ĩ ta tai mi ipö. Teusö anö ĩ töpö peama apa kitä' ĩ na patiseu töpö kuuma. 50 Ĩ na töpö kuu ha, ai patiseu tä aiki, Jesus a na a huu halu taso noai, ĩ Nikotemosö aiki, 51 '“Ai ma tä hini paio mai ha, ‘Ĩ na sa kua kipiliö!’ ma tä kuu hini paio mai maaki, ‘Wa wanisala apawö. Wa peama pia alu kule’ ĩ na pö kuu totioö!” ĩ na Moisés a kuu pasio maama ta pi kuu mai' Nikotemosö a kuu ha, 52 'Kaliléia tili wa nai hãtowö? Teusö wa tä waheta möö mi salo. Teusö wa tä waheta möö totioö aköna, “Hai a. Teusö a kai a wäsä totio wi, Kaliléia tä uli ha ĩ ai tä pilio maa noai kitä” ĩ na wa pi thama pola pi' ĩ na patiseu töpö kuuma. 53 Ĩ na töpö kuu hötötöa totipalo nö, ĩ töpö pewö konasolöma.

8

1 Ĩ na tä kua tä, töpö pewö konasolöma maaki, Olipa tä heu pata hamö Jesus a hua pasisolöma. 2 Ĩ hena tä, tä halu pia tä, Teusömo wi a sai pata hamö a hua konasolöma kutenö, Jesus a na töpö satehe epii töpö sotototile, Jesus anö ĩ töpö pi hatukama pia salo, a loa naiköma. 3 A lotia tä, Moisés a kai a wäsä sinomo wi ĩ töpö, patiseu töpö, ĩ na töpö kui töpönö suö tä hilakö solöma. Ai tiko tä wano na ĩ a suö mamopaloti noai, ai tänö tä talöma kutenö, Moisés a kai a wäsä sinomo wi ĩ töpö, patiseu töpö, ĩ na töpö kui töpönö ĩ a suö hilakö solöma. A hilaköso nö, töpö lole ha, ĩ ha ĩ suö a öpamakö solöma. 4 A öpamakö nö, Jesus a na, 'Samakö pi hatukama sinomo wi, ĩ ai! Hi suö anö tiko tä wano mamoma tä, ai tänö tä tama. 5 “Ai suö tänö tiko tä wano mamomanö noai, maa manö ĩ a säsä nö, a säpalöheö!” ĩ na Moisés anö tä sãököpalö nö, ĩ na tä waheta thamama thaliö! Wi na kawa kuu kule? Wi na hi suö ma tä thamapö? Ma säpalö nökö hãtowö?' töpö kuuma. 6 Jesus a wapa pia salo, töpö kuuma. 'Jesus a wanisala' töpö kuu pi topa apama. 'Wi na wa kuu kule?' töpö kuuma maaki, Jesus a mãi poa soataiki nö, pili a aminö masita tä sãöka soataköma. 7 Tä sãökaö ha, 'Wi na wa pi kuu kule?' töpö kupaloö ha, a öpa kotalo nö, 'Hi makö kule, ĩ ai wanö wanisala wa tä thatala tai mi ipii ĩ wanö maa wa ma täa soatalö nö, a säsäa somapalöö!' ĩ töpö na Jesus a kuu nö, 8 a mãi poa kotaiki nö, masita tä sãököa kõo soatama. 9 Ĩ na Jesus a kuuhe, ĩ töpönö ĩ ta hini nö, töpö pi tapoa soataiki nö, 'Sa wanisala hö̃töo kitä' töpö pi kuu nö, ai pata tä kõa somatasolöö, ai tä kõa nömöa haitasolöö, ai tä kõa nömöa haisolöö, ĩ na töpö kuama. Ĩ na töpö pewö kupa kõoma. Jesus a na ĩ suö tä öpa sätäo haio soa asama. 10 Ĩ na töpö kuaö ha, Jesus a öpa sononoa haia kotalo nö, tä möö ha, sami suö tä öpa sisa sö. Sami suö tä öpa ha, 'Witi ha wa säpa pi topahe, ĩ töpö? “Hi suö tä wanisala apa wi, ĩ ma säpalö nökö” töpö kuuhe, ĩ ai tä öpa soa kule?' Jesus a kuu ha, 11 'Ma. Ai tä öpa soa mane' suö tä kuu hö̃töoö ha, 'Kamisa aiki, “Hi suö tänö wanisala tä thaö ha, a säpalöö!” sa pi kuu hö̃töo mai kitä. A kononöö! Wanisala tä thaa hãto kota tihöö!' Jesus a kuuma. 12 Ĩ na tä kua tä, ĩ töpö na Jesus a hapalo kõo nö, 'Pili motokönö uli tä uli pewö hatukutama kua wi na, ĩ na kamisanö sanöma sa töpö pi hatukutama thama hö̃töo soataö. Kamisa na wa nokapalo kuköma, mumi mumi tä kuo pa wa huu mai kitä. Sa wakala apii ĩ sanö wa õsi palimia totipalöma, kawanö ĩ sa thapo totiki kitäö!' ĩ na Jesus a kuuma. 13 A kuu ha, patiseu töpö aiki hö̃töwö, 'Sami wa kuu sisa kule. Ai tä kuu sätäapalo naio mi kutenö, “Pitili ta” samakö pi kuu mai kitä' patiseu töpönö ĩ na Jesus a noa thaö ha, 14 'Sa kuo somapili, kama sanö ĩ sa tä uli taö sisaö. Waiha sa kuo nömöo kõo piale, ĩ kama sanö ĩ sa tä uli taö nömöa kõo waikia kule. Önö kutenö, “Ĩ na sa kua asaö” sami sa kuuhe, ai tä kuu sätäapalo naio mi päla tä maaki, ĩ pitili tä sai a' Jesus a kuu nö, 'Sa kuo soma noai, kamakönö ĩ ma tä uli taö pasia mai kitä. Sa kuo nömöo kõo piale, ĩ ma tä uli tai mi naiwö. 15 Kama makö pi saimo päo nö, ma tä makokama läapalo sinomo päoö. Ai tä na sami sanö sa tä makokama läapalo pasio sisa päo mai kitä. 16 Ipa hao anö sa simöpalipili, kamisa na ĩ a kuo sinomo opa kutenö, sa tä makokama läapalo tä, ĩ pitili tä sai a totiwö. 17 Moisés a patanö tä sãököpalö nö, “Polakapi töpönö ta kateha ösöhapala totioö ha, ‘Ĩ pitili ta’ ai töpö kuupö” ĩ na Moisés a kuuma. 18 “Ĩ na sa kua asaö” ĩ na kamisa kuu kule. Ipa hao anö sa simöpalö noai, ĩ na ĩ ipa hao a kuu pasiliapalo naia kule' Jesus a kuuma. 19 Ĩ na Jesus a kuu ha, 'Witi hamö au hao a kuamö kua?' töpö kuu ha, 'Kamakönö sa tai mi, ipa hao ma tai mi, ĩ na tä kua kule. Kamakönö sa taö aköna, ipa hao ma taö naia soatala pi' Jesus a kuuma. 20 Töpö Teusömo wi a sai pata na Jesus anö töpö pi hatukamati pola nö, ĩ na a kuuma. Ĩ a sai õsi pata ha sitipa kökö titipa sinomo wi, ĩ tä hĩtale, ĩ tä kotö na Jesus a loiki nö, ĩ töpö pi hatukamatima. A hapalo peliapalo opatima maaki, 'Huki Jesus a säpamonaso wi, huki ĩ tä wakala' ĩ na Teusö a pi kuu paio maama kutenö, ĩ tökö soatawö Jesus a hua soata maamae. 21 Ĩ töpö na Jesus a hapalo kõo nö, 'Sa hua konasolö pia salo. Kamakönö sa taepala haitia kule maaki, makö wanisala haitio nö, makö nomapo haitiopö tä kua kuleö! Sa huumö kua kõo piale hamö ĩ hamö makö huumö kua haio wi tä kua mai kitä' Jesus a kuuma. 22 A kuu ha, 'Jesus kama a säa sapa kõa hãtoa päpaso pia salo, “Sa huumö kua kõo piale hamö, ĩ hamö makö huumö kua haio wi tä kua mai kitä” tä kuu hãtoa alu kule' ĩ na töpö kuuma, 23 'Hi masita tä uli ha makö kuo somama. Hi tä uli na sa kuo soata naio maapili. Hi tä hẽtu hamö sa kuo somatio paio kipili. 24 Önö kutenö, “Makö wanisala haitio nö, makö nomapo haitio kitä” ĩ na sa kuu alu kule. “Jesus a hai, ĩ Teusö a ulupö. Teusö anö samakö noama pia salo, pelupö Jesus a simönöma” ĩ na makö pi kuu mi tä, makö wanisala haitio nö, makö nomapo totio haitio kitä' ĩ na Jesus a kuuma. 25 Ĩ na a kuu ha, 'Ĩ witi pili wa totiwö?' töpö kuu ha, 'Kamakö na sa kuu somatiopili, ĩ na sa kuu pasia soa kule' Jesus a kuu nö, 26 'Kamisanö ĩ makö pewö a kateha taö öpa soa kule maaki, makö a kateha mai kitä. Makö a kateha nö, “Makö wanisala apa nö kiliawö” sa kuu taö öpa kitä maaki, huki ĩ na sa kuu paio mai kitä. Sa simöa totio noai, ĩ a pitilimo opaö. Kamisa na a kuupili, ĩ sa ta hini nö, sanöma töpö pewö na sa ta wäsä tolea apaö' Jesus a kuuma. 27 A kuuma maaki, Jesus anö kama pö̃ a katehatima maaki, ĩ töpönö ĩ ta hini maama. 28 Ĩ ta hini pasio mi kutenö, Jesus aiki, 'Sanöma sa kupaso noai, hii ti pakalai ti ha kamakönö sa pi ösötama totia tä, “Awai. Teusö a hai pelupö Jesus a sai ta o” ĩ na makö pi kuu totiso kitä. “‘Töpö noama sinomoö!’ ĩ na Teusö pö̃ a pi kuu nö, pelupö Jesus a simönömaö! Jesus kama pi saimo mane. Pö̃ anö ta taöma noai, pelupö Jesus anö ĩ ta kateha sisaö” ĩ na makö pi kuu kitä. 29 “Ĩ na a kua totioö!” ĩ na ipa hao a kuu wi, ĩ sa tä thaa sinomo hö̃töoö ha, ipa hao sa pi mönahapalama sinomo hö̃töoö. Ĩ na sa tä thamaö ha, ipa hao anö sa simönö noai, ĩ anö sami sa taatala maama. Kamisa na a kuo naio soatiotii' ĩ na Jesus a kuuma. 30 Ĩ na Jesus a kuu ha, ĩ ai töpö satehe epii töpö aiki, 'Jesus a pitili' töpö pi kuu totisoma. 'Jesus a hai, Teusö a hai pelupö a. Samakö täapa kõo läo wi, ĩ a' ĩ töpö pi kuuma. 31 Ĩ na tä kua tä, 'Jesus a pitili' ĩ na juteu töpö õsi pi kuu noai, ĩ töpö na, 'Kamakönö sa kai a hini totio sinomo kuköma, kamisa na makö nokapalo totio wi, ĩ makö kupasoö. 32 Sa kai a hini sinomoti kuköma, pitili ma ta taö öpa kuki kitä. Pitili ma ta taö öpa kuköma, makö uni kusöa kopali kitäö!' ĩ na Jesus a kuuma. 33 A kuu ha, 'Ai tänö Abraão samakö ola uni õka maapili nökö. Ai tänö samakö noa mi kalipalama maapili nökö. Wi na wa pi kuu salo, “Makö uni kusöa kopali kitäö!” wa kuu kule?' töpö kuuma. 34 Töpö kuu ha, Jesus aiki, 'Ĩ na sa kuu kuleö! Pitili sa: “Wanisala wa tä tha apati kuköma, ĩ wanisala tä uni patanö wa õkapali. Wanisala tänö wa õka totipalöma, wanisala wa tä thaa sipa apa kuki. 35 Ai töpönö wa thapo päo wi, ĩ töpönö wa noa mi kalipalama sinomoti wi, ĩ töpö na, ‘Ipa ai pö’ wa kuu totio mai kitä. Ĩ töpö na, ‘Ipa töpö saiö!’ kama töpö hai ĩ pelupö a sai kuu sisaö. 36 Önö kutenö, Teusö a hai ĩ pelupö sanö makö uni kusöa kopalöma, makö uni õka mi tä, wanisala ma tä thaa husoolö mai kitä. Makö kusöa kõo totia asapali kitä. 37 Awai. Abraão makö ola. Abraão makö ola maaki, kamakönö sa kai a hini wani ipö kutenö, kamakönö sa säpa pi topa kule. 38 Kamisa na ipa hao anö ta wäsäpili, kamakö na ĩ sa ta wäsäti kule maaki, kamakö hai ĩ pö̃ aiki, ‘Ĩ na ma tä thama totioö!’ a kuu läoö ha, ĩ na ma tä thama totio hö̃töoö” ĩ na kamakö na sa kuu kule. Ĩ pitili sa sai a totiwöö!' Jesus a kuuma. 39 A kuu ha, 'Nö patapö Abraão a hai, kamisamakö hai ĩ hao a pasiwö' töpö kuu hö̃töoö ha, Jesus aiki, 'Abraão ulupö makö aköna, Abraão a kuati noai na, ĩ na makö kua tolea totitila pi. 40 Teusö anö pitili ta wäsä noai, ĩ sa ta hini nö, kamakö na sa ta wäsä totioma maaki, sa säpa pi topa apa pikia kulai. Kamakö kuati wi na, ĩ na Abraão a kuati pasio maama. 41 Kamakö hai ĩ pö̃ a kuati wi na, ĩ na kamakö kuati hö̃töoö' ĩ na Jesus a kuuma. A kuu ha, 'Teusö a hai ĩ pelupö samakö asawö. Kamakö hai ĩ pö̃ a sami ipö. Ai tä kua mai kitä. Teusö a hai ĩ pelupö samakö sai' töpö kuuma. 42 Ĩ na töpö kuu ha, Jesus aiki, 'Teusö a na sa kutioma, huki hi tä uli na sa kua nömötia kule. Önö kutenö, Teusö a hai, kamakö hai ĩ pö̃ a aköna, kamakönö sa noima pola pi. Kama sa pi saimo päo nö kuno mai. Ipa hao anö sa simöaö ha, hisimö sa huma. 43 Wi na makö pi kuu salo, kamakönö sa kai a hini mi ipö? Sa kai a hini wani ipö salo, kamakönö sa kai a hini totio mi. 44 Sai tä sai pata hai ĩ pelupö makö pasiwö. Au hao Sai tä patanö tä thama wi, ĩ pelupö makönö ĩ ma tä thama pi topa naio hö̃töoö. Somi tä sai tä, Sai tä sai patanö sanöma makö sätima, huki töpö sä soatioö. A pitilimo wi ĩ tä pii mi. A pitilimo tai mi. A holisimo sinomoö. Töpö holisimo wi, ĩ töpö hai ĩ pö̃ a. 45 Önö kutenö, pitili sa ta wäsä tä, “Jesus a pitili” makö pi kuu mi. 46 Ai wa aiki, “Jesus anö wanisala tä thama” ai wa kuu pitilimo totio kitä ta o? Ma. Ĩ na ai wa kuu pitilimo mai kitä. Pitili tä sai a wäsäti kule ta makö pi kuu mai, wi na makö pi kuu salo, “Holisimo hãtoa kule” makö pi ku upaö? Wi na makö pi kuu salo, sa kai a hini wani ipö? 47 Teusö wa thapo totio kuköma, Teusö wa kai a hinini kitä. Teusö ma thapo mi kutenö, Teusö ma kai a hini mi päwö' ĩ na Jesus a kuuma. 48 Ĩ na Jesus a kuu ha, '“Samatia tili wa. Sai wa tä thapo pasio wi, ĩ wa” samakö kuupili, ĩ pitili ta kuoma' ĩ na ĩ juteu töpö kuuma. 49 Töpö kuu ha, 'Sai sa tä thapo wi ĩ sa mai kitäö! Sa isi wanihipaloti maneö!' Jesus a kuu nö, 'Ipa hao sa komoapalama mai, ipa hao sa hini totiatalo opaö. Kamakönö sa komoapalama pasioö. 50 “Pata tä Jesus a totiatalo opawö” kamisanö sa töpö pi thama pi topa mi. “Pata tä Jesus a totiatalo opatiwö” ĩ na ai tänö töpö pi thama pi topa pasioö. Kamisa na ĩ anö tä makokama läapalo pasio kitä. 51 “Kawanö sa kai a hini totio wi, ĩ wa noma mai kitäö! Teusö a na ĩ wa kuo soatio kitäö!” kamakö na sa kuu kuleö! Pitili sa' Jesus a kuuma. 52 Ĩ na Jesus a kuu ha, 'Sai wa tä thapo totia alu kule. Wa isi waniha totia waikia alu kule' töpö kuu nö, 'Abraão a pata nomasoma. Teusö a kai a wäsä totio noai, ĩ töpö noma naisoma. Ĩ töpö nomasoma maaki, “Kawanö sa kai a hininöma, wa noma pasio mai kitäö!” wa kuu pasia alu kule. 53 Kamisamakö hai ĩ hao Abraão kolo tä nomasoma. “Abraão a na sa patamo hasua apa asa wi sa” wa kuu alu kule? Teusö a kai a wäsä totio noai, ĩ töpö noma naisoma. Ĩ witi pili wa pasiwö? Wi na wa kuu kule?' ĩ na juteu töpö kuuma. 54 Ĩ na töpö kuu ha, '“Sa totiatalo opawö” kama sa sai kuu aköna, “Ĩ pitili tä sai a totiwöö!” makö pi kuu mi kipi. Ipa hao Teusö a na, “Ipa Teusö a” makö holisi kuu wi, ĩ aiki, “Jesus a totiatalo opawö” kama kuu kule. 55 Kamakönö Teusö ma tai mi pasiwö. Kamisanö Teusö sa taö öpa asa sisaö. “Teusö sa tai mi” sa kuu aköna, kamakö holisimo kua wi na, ĩ na sa holisimo kua naina pi. Teusö sa taö öpaö. Kamisanö Teusö sa kai a hini totio opaö. 56 Kamakö hai ĩ pö̃ Abraão kolo tä aiki, “Teusö anö kaikana tä simöpa piale, ĩ sa huu tati kuleö!” a pi pata kuu nö, a pi mönaha apama. Abraão a patanö sa huu talalö nö, a pi pata topa apama' Jesus a kuuma. 57 A kuu ha, 'Hĩsa wa soawö. Kawa na 50 tä inama kupo paio mai ha, wa kua soa kule nökö. Kawanö Abraão wa tapa waikioma ta o?' töpö kuu ha, 58 '“Abraão a pata kua paia mi tä, kamisa kuo soma paitioma” ĩ na sa kuu kule. Sa holisi mai kitäö!' Jesus a kuuma. 59 Ĩ na Jesus a kuu ha, maa manö Jesus a säsäpö, maa mapö sua soatalalöma maaki, Jesus a sosa läiki nö, Teusömo wi a sai sika pata hamö a kuoma, a hua kõa soa pätasolöma.

9

1 Ĩ na tä kua tä, Jesus a huulö tä, ai tä mamo höpöpöi tä talalöma. A ositi wai thapa tute tä a ositi mamo huu maa soatama. 2 Ĩ a talalö nö, Jesus a kai a hua sinomoti wi, ĩ töpö aiki, 'Jesus ai. Wi na tä kuaö ha hi a ositi höpöpii a thaa soapalöma? Kamanö wanisala tä thaa piale, ĩ tä noa na a ositi mamo höpöpii a thaa soa hãtopalöma? Pö̃ a, pöpönö a, ĩ na kilii töpönö wanisala tä thaa noai, ĩ tä noa na a ositi mamo höpöpii a thaa soa hãtopalöma?' töpö kuu ha, 3 'Kamanö kuno mai. Pö̃ a, pöpönö a, ĩ na kilii töpönö kuno mai. “Wanisala tä thaa noai, ĩ tä noa na a höpöpöa kuleö!” pö pi kuu tihöö!' Jesus a kuu nö, 'Ĩ a na Teusö a kalipalo lotetea apa piale, ĩ tä tamomapö, a ositi höpöpöo soatama. 4 Ĩ na tä wakala kuö soata tä, makö kalipalo haitapököö! Sa simönö noai, ĩ aiki, “Ĩ tä na a kalipaloö!” ĩ na ĩ a kuu ha, ĩ tä na makö kalipalo haitapököö! Tä wisa waikia saileö! Mumai ha makö kalipalo mai kitäö! 5 Hi masita tä uli na sa kua soaiki nö, sanöma sa töpö pewö wakalapalama sinomoö' Jesus a kuuma. 6 Ĩ na Jesus a kuu nö, masita tä nakipömanö nö, kosoto tä ösö walehepalö nö, a wani höpöpö öpii, ĩ a mamo na tä kosoto pãhi wai huluka soataköma. 7 Tä huluka soatakö nö, 'Siloé tuu kosoto ha a sanumoa kõa soatalo kölöö!' Jesus a kuuma. Siloé tuu hai, 'A simökö noai tuu' ta kuu alu kule. Ĩ na Jesus a kuu ha, a höpöpö öpii a sanumoa hö̃töa soa tasoma, a mamo huu topa kõo soataköma. 8 A mamo huu topa kõo soataki ha, ĩ tä kotö na töpö pilia naine, ĩ töpönö, sitipa kökö na a höpöpö öpii, ĩ a nako taa sinomo noai, ĩ töpö aiki, 'Ki ĩ a hãtowö? Sitipa kökö naka sinomopili, ĩ a wani hãtowö?' töpö kuu ha 9 'Awai. Ĩ a sai wani totiwö' ai töpö kuuma. Ĩ na ai töpö kuuma maaki, 'Nai. Tiko tä pasiwö. A höpöpö öpii, ĩ anö sitipa kökö naka sinomopili, ĩ a moikömö kuopili na, ĩ na ĩ a moikömö kuö päwökö' ĩ na ai töpö kuu pasioma. Ĩ na ai töpö kuu pasia päla tä maaki, 'Sitipa kökö na sa höpöpö wani nako sinomopili, ĩ sa wani soawö' ĩ na ĩ a kuu hö̃töoma. 10 Ĩ na a kuu ha, 'Wi na wa kua hö̃töo nö, wa mamo huu topa kõa hö̃tököma?' töpö kuu ha, 11 'Jesus a hilo wi, ĩ anö kosoto tä heuhupamanö nö, pili sa mamo na tä pãhi huluka soatakö nö, “Siloé tuu na a sanumoa soatalo kölöö!” a kuu ha, sa sanumoa soataso kölöma, sa mamo huu topa kõa soataki kipili' a kuuma. 12 A kuu ha, 'Witi hamö ĩ a?' töpö kuu ha, 'Kui. Sa tä tai mi ipö' a kuu hö̃töoma. 13 Ĩ na tä kua tä, a höpöpöo noai, patiseu töpö na ĩ a hilakö tasoma. 14 Jesus anö kosoto tä heuhupalö nö, a höpöpii, ĩ a mamo huu topa komakö noai, ĩ tä wakala hai, mota mapo sinomo wi, ĩ tä wakala kuoma. 15 Önö kutenö, patiseu töpönö, a höpöpöo noai, ĩ a na ĩ töpö hapalo nö, 'Wi na wa kuati nö, wa mamo huu topa kõa hö̃tököma a?' töpö kuu ha, 'Pili sa mamo na Jesus anö kosoto tä hulukukö nö, “A sanumoa kõa soatalo kölöö!” ĩ na Jesus a kuu ha, sa sanumoa hö̃tösoma, sa mamo huu topa kõa soataköma' ĩ na a kuuma. 16 Ĩ na a kuu ha, ai patiseu töpö aiki, '“Mota mapo wi, ĩ tä wakala na pö kalipalo ti!” Moisés a kuu pasio thali maaki, ĩ tä wakala na Jesus anö hi a mamo huu topa kõkö noa. Teusö a na Jesus a kuo maamakö. Teusö a na a kuo totioma aköna, mota mapo wi, ĩ tä wakala na a kalipalo maa noa kipi' ai töpö kuuma maaki, ai töpö aiki, 'Jesus a wanisala mai kitä. A wanisala aköna, tä aipama tai mi ipö kipi. Hi a mamo wani huu topa kõo maa noa kipi' ai töpö kuuma. Ĩ na töpö kuu hätäatalo hẽtupaso opa kuama. 17 Töpö hapalo hätäatalo hẽtupaso opama kutenö, a höpöpöo noai, ĩ a na patiseu töpö hapaloma. Töpö hapalo nö, 'Jesus anö wa mamo topa kõköma kutenö, wi na wa pi kuu kule? Jesus a hai, ĩ witi pili a pasiwö?' töpö kuu ha, '“Teusö a kai wäsä sinomoti wi, ĩ a” ĩ na sa pi kuu kule' a kuu hö̃töoma. 18 Ĩ na tä kua tä, juteu töpö aiki, 'Ki a wani höpöpöo kipili maaki, a mamo topa kõkö noa' ĩ töpö pi kuu maama kutenö, a höpöpöo noai, ĩ a hai ĩ pö̃ a, pöpönö a, ĩ na töpö kui töpö nakalöma. 19 Töpö nakalö nö, 'Ki a lole, ĩ au ulu a?' juteu töpö kuu nö, '“A ositi thapa tute tä, a ositi höpöpöo soata kipili” makö kuu thali, ki ĩ a? Huki wi na tä kuaö ha a mamo huu topa kõa kule?' töpö kuu ha 20 'Ki a hai, ipa ulu a totiwö. “A ose wai höpöpö soatai, a thaa soatali kipili” ĩ na samakö pi kuu taö öpa kule maaki, 21 “Ĩ nasimö tänö a mamo topa kõkömaö!” samakö kuu taö maneö! “Ki anö a mamo huu topa komakömaö!” samakö pi kuu taö naia mane. Kamakönö ipa ulu ma huama mi salo. Ĩ ipa ulu a hai, ĩ pata tä waikiwö. A hapalo moti soa mai kitä' ĩ na pö̃ a, pöpönö a, ĩ na kilii töpö kuuma. 22 Juteu töpö na ĩ töpö kili ipa salo, ĩ na töpö kuuma. 'Jesus a hai, Teusö anö a kaikanapa piale, ĩ a' ĩ na ai tä kuu kuköma, 'Juteu makö pewö kokamo sinomo wi, ĩ a sai ha ĩ a kokamo naio kota ti!' ĩ na juteu pata töpö kuu waikioma kutenö, ĩ pö̃ a, pöpönö a, ĩ na kilii töpö hapalo kili ipama. 23 Töpö hapalo kili ipa salo, 'Ipa ulu a hai, pata tä waikiwö. Ipa ulu kama ma huama saimo päo mi salo' töpö kuuma. 24 Ĩ na töpö kuu ha, juteu töpönö, a höpöpöo noai, ĩ a naka konö nö, 'Teusö a na wa hapalo nö, “Sa hapalo holisimo mai kitäö” wa kuu!' ĩ na juteu töpö kuu nö, 'Jesus a wanisala wi, ĩ sama tä taö' töpö kuuma. 25 Töpö kuu ha, 'Sa tä tai mi. A wanisala hãtowö, a toita hãtowö, ĩ na a kuö hãtowö. Ĩ na tä kuu wi sa tä tai mia pasia kule. Pi naka. Ĩ na tä kua wi ĩ sa tä taö pasia sisa kule. Sa mamo höpöpöo opa kipili maaki, huki sa mamo huu topa kõa kule. Ĩ na sa pi kuu taö pasia sisa kule' ĩ na a kuuma. 26 Ĩ na a kuu ha, 'Jesus anö wi na wa mamo thama nö, wa mamo huu topa komaköma?' töpö kuu ha 27 'Kamakö na sa kuu waikio ke maaki, ma ta hini pi topa satia apa hãtoa alu kule? Wi na makö pi kuu salo, “A kuu kota” makö kuu kõatalo kule? Jesus a na makö nokapalo pi topa naia kule ta o?' a kuuma. 28 Ĩ na a kuu ha, a päsäpamae. 'Jesus wa kai a hiniti wi, ĩ wa pasiwö. Kamisamakönö Moisés sama kai a hini sinomo pasio wi ĩ samakö pasiwö. 29 Moisés a na Teusö a hapalo noai, ĩ sama tä taö öpaö. Jesus a lö kui, witi hamö ĩ a kuo somama kuno mai? Ĩ sama tä taö pasio mi' töpö kuuma. 30 Töpö kuu ha, 'Wi na taka? Jesus a kuo soma noai, ĩ ma tä tai mi ipö maaki, ĩ anö sa mamo huu topa komaköma. 31 Töpö wanisalai, Teusö anö ĩ töpö hapalo hini mai kitä. Ĩ ma tä taö waikia kule. A Teusöpii, Teusö a kai a hini totio wi, Teusö anö ĩ a hini asa sisaö. 32 “Ai sanöma tä ositi thapa tä, a ositi höpöpöo soata noai, ĩ a mamo huu topa kõkömaö!” tä kuu wi, tä hinio paio maa noai kitä. Somi tä sai tä, tä hinio maa noai, ĩ tä hinio mi soawö. 33 Teusö anö Jesus a simöpa maama aköna, Jesus anö sa mamo huu topama kõo maa noa kipi' a höpöpöo noai, ĩ na ĩ a kuuma. 34 Ĩ na a kuu ha, 'Wa kupo tute tä, wa wanisala soatama, ĩ na wa wanisala kuö soawö. Kawanö samakö pi hatukupama pi topa tihöö! Mi hamököö!' töpö kuu soatalo nö, juteu töpö kokamo sinomo wi, ĩ a sai atu hamö a hãsia soatalöma. 35 Ĩ na tä kua tä, a wani hãsia soka soatalö noai, Jesus anö ĩ ta hininö nö, a höpöpöo noai, ĩ a taa konanötö nö, ĩ a na a hapaloma. A hapalo nö, '“Sanöma tä kupaso noai, ĩ a pitili” wa pi kuu waikia kule?' Jesus a kuu ha, 36 'Sanöma tä kupaso noai, ĩ witi pili a? “Ĩ a pitili” sa pi kuu pi topa apa kule' a kuu hö̃töoma. 37 Ĩ na a kuu ha, 'Sanöma sa kupaso noai, kawanö ĩ sa tapa waikitio kipili. Kawa na ĩ sa hapalo waikia kule. Sanöma sa kupaso noai, ĩ sa waikiwö' Jesus a kuu ha, 38 'Kaikana ai. “Wa pitili” huki sa pi kuu kuki keö!' a kuu nö, 'Hi Jesus a hai, ĩ pata tä sai' a pi kuu salo, Jesus a kotö ha a loa soataiki nö, masita tä na a maeko hĩta thaa soataköma. 39 Ĩ a na Jesus a hapalo kõo nö, 'Sanöma sa töpö sokapali pia salo, hi masita tä uli ha sa waloköma. Sa waloiki nö, töpö õsi höpöpö öpii, ĩ töpö pi hatukupo mi ipii, ĩ sa töpö pi hatukupamani pia salo. Ai töpö aiki, “Sa õsi höpöpö mi ipöö! Sa pi hatuku upö waikiwö” töpö holisi pi kuu wi, ĩ töpö moti pasiwö. Ĩ sa töpö pi hatukupama pasio mai kitäö!' ĩ na Jesus a kuuma. 40 Ĩ na a kuu ha, Jesus a kotö ha ai patiseu töpö lole, ĩ töpö aiki, 'Samakö õsi höpöpö naiwö ta o?' töpö kuuma. 41 Ĩ na töpö kuu ha, 'Makö õsi höpöpö aköna, “Wanisala ma tä thaa sinomo wi, ĩ makö” kamakö na ĩ na Teusö a pi kuu mana pi. “Kamisamakö õsi höpöpö pasi mi. Samakö pi hatuku upö waikiwö” makö pi kuu ha, “Makö wanisala soaö” ĩ na Teusö a pi kuu kule' ĩ na Jesus a kuuma.

10

1 Ĩ na tä kua tä, Jesus a hapalo kõo nö, 'Ĩ na sa kuu kuleö! Pitili sa: “Hiima kökö, ĩ oweha kökö hokolo wi ĩ taka ha ai sanöma tä lisipo mai, tä hokolomö kuo pamö a tuiki nö, a sutuköma, ĩ a hai, thomömo wi, ĩ a wani. 2 Ĩ taka sai ha a lisipo totio asa wi, ĩ a hai, oweha kökö thapo sinomo wi, ĩ a sai asawö. 3 Ĩ a waloki ha, ĩ taka ha a läo sinomo wi, ĩ anö oweha kökö päka lata wi ĩ ti hãkopa sinomoö. Ti hãkopali ha, oweha kökö thapo wi, ĩ anö kökö nakaö ha, oweha kökönö kama kai a hinia totiatala apaö. Kökö thapo wi, ĩ anö kama oweha kökö hila hätäpo nö, kökö nakalö nö, kökö kai asulöö. 4 Kökö kai pewö lisia kopalo nö, a huu paluo olö ha, kama hai ĩ oweha kökönö, a hapalo wi, ĩ a kai a hini taö öpa salo, ĩ a na ĩ kökö nokasolöö. 5 Ai tiko tä na kökö noka mai kitä. Ai tiko tä kai a hini tai mi ipö salo, ĩ a na kökö tokösolöö” ĩ na kamakö na sa kuu kule. Sa holisi mai kitäö!' Jesus a kuuma. 6 Jesus anö uni ta thaa nö, oweha kökö a katehama maaki, ĩ töpönö ĩ ta hini maama. 7 Jesus a kai a hini mi kutenö, Jesus a hapalo kõoma. A hapalo kõo nö, '“Oweha kökö lisito wi, ĩ taka kui na, ĩ na kamisa kuö hö̃töwö” ĩ na sa kuu kule. Pitili sa. 8 Kamisa huu paio mai ha töpö huu noai, ĩ töpö thomömo wi, ĩ töpö pewö. Oweha kökönö ĩ töpö kai a hini maama. 9 Ĩ taka ha kökö lisito sinomo wi, ĩ taka kui na, ĩ na kamisa kuö hö̃töwö. Kamisa na wa waloiki nö, wa lisipasoma, wa täa kõa läli kitä. Wa kili mai, wa lisi lisimo nö, nii wa tä talali kitä. Nii tä na wa honimo mai kitä. 10 Thomömo sinomo wi, ĩ anö makö thomöni, makö säpali, makö matamani, ĩ na ĩ anö makö thamapö, a waloki. Kamisanö, sanöma makö õsi palimipamani, makö pi topa totipamani, ĩ na makö thama pasiopö, sa waloköma. 11 Oweha kökö thapo wi, ĩ anö kökö noama kua totio wi na, ĩ na kamisanö ipa sanöma makö thapo wi, ĩ sanö makö noama kua totio hö̃töoö. Oweha kökö thapo wi, ĩ a hai, “Ai tänö sa säpali kitä maaki, ipa oweha sa kökö noama satimo kitäö!” ĩ na ĩ a pi kuu kua wi na, ĩ na kamisa hai, “Ai tänö sa säpali kitä maaki, ipa sanöma sa töpö noama satia apa kitäö!” ĩ na sa pi kuu hö̃töoö. 12 Oweha kökö na ai tä kalipalama päo wi, ĩ anö oweha kökö thapo totio mi kutenö, a tokösolöö. Oweha kökö kuo pa, ĩ anö pole a waitili kui na ĩ na lopu a wani kui, ĩ a wani huu taa tä, oweha kökö taa soa päta kölö nö, a wani tokösolöö. A tokösoö ha, lopu a waninö oweha kökö namo keköma, kökö läläo selekeoki. 13 Ĩ na lopu a wani kua tä, oweha kökö na a kalipalo päo wi, ĩ anö oweha kökö thapo totio mi kutenö, a tokösolöö. Oweha kökö pii mi ipö kutenö. 14 Oweha kökö thapo wi, ĩ anö kökö noama totio kua wi na, ĩ na kamisanö ipa sanöma sa töpö thapo wi, ĩ sanö ĩ na sa töpö noama thama totio kua hö̃töoö. Ipa hao anö sa taö öpaö, kamisanö ipa hao sa taö öpa hö̃töoö, ĩ na tä kua kua wi na, ĩ na kamisanö, sa töpö noama wi, ĩ sa töpö taö öpaö, sa töpö noama wi, ĩ töpönö sa taö öpa hö̃töoö, ĩ na tä kuaö. Oweha kökö thapo wi, ĩ a hai, “Ai tänö sa säpa pia hãtole kitä maaki, ipa oweha sa kökö noama satimo opa kitä” ĩ na a pi kuu kua wi na, ĩ na sa pi kuu hö̃töo soata kutenö, kamisanö ipa sanöma sa töpö noama pia salo, sa säpamo kili mai kitäö! 16 Hi oweha kökö hokolole, ĩ sa kökö thapo hö̃töa waikia kule maaki, ai tiko sa kökö thapo tikilipo hö̃töa kule. Ĩ sa kökö hilakö solöpököö! Ĩ kökönö sa kai a hinia hö̃töli kitä. Oweha kökö hokolole, ĩ kökö na ai tiko kökö koka naipaso kitä. Kökö koka naipasoö ha, sami sanö sa kökö pewö thalö nö, sami sanö sa kökö kai hupalo hö̃tötio kitä. 17 Ipa sa kökö noamaö, sa kuiki nö, sa säpamonaso kitä. Önö kutenö, ipa hao anö sa pii sinomoö. Sa säpamonaso kitä maaki, sa temöa hö̃töa konaso kitä. 18 “Sa säpalöpöö!” sa pi kuu mi tä, ai tänö sa säpa mai kitä. Kama sa pi saimo nö, “Sa säpalöö!” sa pi kulasoma, sa säpamoa sisasoö. Ipa hao aiki, “A säpamonoö! Wa säpamono nö, wa temöa hö̃töa konaso kitäö!” ĩ na a kuuma salo, “Sa säpamono nö, sa temöa hö̃töa konaso kitä” sa pi kuu kule' ĩ na Jesus a kuuma. 19 Ĩ na Jesus a kuu ha, juteu töpö hapalo selekeo kõoma. 20 'Jesus anö sai tä thapo kuleö! A isi waniho poleö! Ĩ a kai wani a hini tihöö!' töpö satehe epii töpö kupaloma maaki, 21 'Jesus anö sai tä thapoö aköna, Jesus anö ta kateha pole, ĩ nasimö ta kateha taö mana pi. Sanöma töpö mamo höpöpöi, sai tänö ĩ töpö mamo huu topa komaki kitä ta o?' ai töpö kuu pasioma. 22 Ĩ na tä kua tä, pe epii tä maa hälä tä, Teusömo sinomo wi a sai na töpö hapalo sotota nö, 'Teusö ai. Hi a sai na a kua totia pasikiö!' ĩ na töpö kuu sinomo noai, ĩ tä, Jetusalẽi tä uli hamö töpö iapalopö, töpö kokamoma. 23 Ĩ tä, Teusömo wi a sai sika ha ai sai a tipöle, ĩ tä sai ha töpö huu sinomo wi, ĩ Salomão a sai hilo wi, ĩ ha Jesus a huu tä, 24 Jesus a na juteu töpö kokamo nö, Jesus a huamama. A huama nö, '“Jesus a hai, ĩ witi a?” samakö pi thamati ti! Teusö anö wa kaikanapa piale, ĩ wa hãtowö manu kui, ta kateha makokoa haitalöö! “Awai. Teusö anö sa kaikanapa piale, ĩ sa” a kuu makokoa haitaloö!' töpö kuuma. 25 Töpö kuu ha, 'Kamakö na ĩ na sa kuu waikio kipili maaki, “Hai. Awai. Pitili ta” makö pi kuu waikio maapa wi. Kamisa na, “Ĩ na tä thamaö!” ipa hao a kuti wi, ĩ sa tä thama sinomo kutenö, “Jesus a hai, Teusö anö a kaikanapali wi, ĩ a” makö pi kuupöö!' Jesus a kuu nö, 26 'Kamisanö makö thapo wi, ĩ makö mi kutenö, “Jesus a hai, pitili tä sai a totiwö haö!” makö pi kuu mi. 27 Oweha kökö thapo wi, oweha kökönö ĩ a hini kua wi na, kamisanö sa töpö thapo wi, ĩ na ĩ töpönö sa hini kua hö̃töoö. Ipa sa töpö taö öpa hö̃töoö. Kamisa na ipa ai töpö nokapalo sinomoö. 28 Ipa sa töpö õsi palimia totipali. Önö kutenö, ipa töpö noma pasio mai kitä. Sa töpö thapo wi, ĩ sa töpö umapoti kutenö, ai töpönö ipa töpö thomöa pasio mai kitä. 29 Ipa hao anö kamisa na ipa töpö totopö noai, ai töpö pewö na ĩ a pata lotete sati ipö. Önö kutenö, ipa hao anö ipa töpö thapo naio wi, ai töpönö ĩ ipa töpö läkäa kõo mai kitä. 30 Kamisa, ipa hao a, ĩ na kilii, sami samakö' ĩ na Jesus a kuuma. 31 Ĩ na Jesus a kuu ha, ĩ juteu töpönö Jesus a säpalöpö, maa mapö täa soatalalöma maaki, 32 ĩ töpö na Jesus a hapalo läoma. A hapalo nö, 'Kamisa na ipa hao aiki, “Toitai tä thama totihoöö!” ipa hao a kuu sinomoö ha, ĩ sa tä thama sinomoö. Kamakö mamo tetela tä, ĩ sa tä thama sinomo opaö. Ka pi sa tä thaa sinomo wi tä noa na maa manö sa säpa pia kule?' Jesus a kuu ha, 33 'Toitai wa tä thati wi, ĩ tä noa na kuno mai. Teusö wa pata wäsä hiopöa apati kutenö, wa säpa pia kule. Sanöma wa pätawö maaki, “Teusö sa hilo wi, ĩ sa” ĩ na wa kuu ha, wa säpa pia kule' töpö kuuma. 34 Töpö kuu ha, 'Kamakö hai ĩ nö patapö töpönö Teusö tä waheta sãöka noai, ĩ na ĩ tä waheta kuu: “‘Kamakö hai, pata makö sai’ ĩ makö pewö na Teusö sa pata kuuma” ĩ na Teusö tä waheta kuuma. 35 Teusö tä waheta pitili sati ipö. Nö patapö töpö na Teusö a kai a walokö noai, ĩ töpö a kateha nö, “Pata makö pata totiwöö!” ĩ na Teusö tä waheta kuuma. “Teusö a hai, ĩ pata tä sai pata totiwö” tä kuu kua wi na, ĩ na ĩ töpö a kateha nö, “Pata makö sai totiwöö!” ĩ tä kuu kua hö̃töoma. 36 Ipa hao anö sa sailö nö, hi masita tä uli ha sa simönöma maaki, kamakö aiki, “‘Teusö ulupö sa’ Jesus a kuu manu kule, Jesus anö Teusö a kai wäsä hiopöa kule” ĩ na makö kuuwö. Wi na makö pi kuu salo, makö kuu pikia kule? 37 Ipa hao anö tä thama wi, ĩ sa tä thama naio mi tä, “Jesus a pitili” pö pi kuu tihöö! 38 “Jesus a kuu wi, ĩ pitili tä sai a. A pitilimo sinomo opaö” makö pi kuu mi päla tä maaki, ipa hao anö tä thama wi, ĩ sa tä thama naia tä, kamakö aiki, “Awai. Teusö anö tä thama wi, Jesus anö ĩ nasimö tä thama sinomo naioö” ĩ na makö pi kuu totiopökö. Ĩ na makö kuu toitio kuköma, makö pi hatukua totipaso kitä. “Jesus a õsi na pö̃ a kua. Pö̃ a õsi na pelupö Jesus a kua hö̃töa” ĩ na makö pi kuu tao opa kitä' ĩ na Jesus a kuuma. 39 Ĩ na a kuu ha, ĩ juteu töpönö a säpalöpö, a moni huölöma maaki, tiko hamö Jesus a hua lälasolöma. 40 Ĩ na tä kua tä, somi tä, Johotão u pökatö pata hamö João anö töpö mãi õmati noai, ĩ hamö Jesus a kononö nö, ĩ hamö a kuo kõtio tasoma. 41 Ĩ hamö a kua kõtia tasoa tä, kama na töpö satehe epii töpö waloa haiki nö, 'João anö tä aipama naio maa noai maaki, ĩ anö Jesus a katehati noai, ĩ tä pewö a pitilia totia apa' töpö kuuma. 42 Ĩ na tä kua tä, ĩ hamö töpö satehe epii töpö kuo naio noai, ĩ töpö aiki, 'Jesus a pitilimo opa nö kiliawö' ĩ na töpö satehe epii töpö pi kuu kuköma.

11

1 Ĩ na tä kua tä, Lásatu a salia apama. Lásatu a, pese Maria a, pese Marta a, ĩ na töpö kui, Petânia tä uli na töpö pilioma. 2 Pese Maria anö Jesus pata tä huu wi ĩ a ami hõo ha tuu hälälä toita apii, tuu noa apii, tuu lökö nö, pili a hunukunö tä sanöma kõo noai, ĩ a. Kama hai ĩ pese Lásatu a salia apama. 3 Lásatu a salia apaö ha, pese töpönö Jesus a na ai tä simönö nö, '“Au noi tä salia apölaliö!” ĩ na Jesus a na ĩ na wa kuu!' ĩ na Lásatu a hai ĩ pese töpö kuuma. 4 Ĩ na töpö kuu ha, Jesus a na ĩ a waloikitö nö, ta wäsä tasoma. Ĩ ta wäsä pole, Jesus anö ĩ ta hininö nö, a hapalo hö̃töo nö, '“Lásatu a nomasopö, a salia pasia kule” ĩ na a pi kuu tihöö! “Teusö a totiatalo opa asawöö!” ĩ na Teusö anö töpö pi thama pia salo, Lásatu a salia apa päa kule. “Teusö a hai ĩ pelupö a totiatalo opa asawöö!” ĩ na töpö pi thama päo pia salo, Lásatu a salia apa päa kule' ĩ na Jesus a kuuma. 5 Jesus anö Marta a, poose Maria a, pese Lásatu a, ĩ na kili töpö pi ipama maaki, 6 Lásatu a salia apa wi, Jesus anö ĩ ta hininö nö, Lásatu a kuo pa a huu soata mai, polakapi tä mumi hasupamanöma. 7 Polakapi tä mumi hasupamanö nö, kama kai a hua sinomoti wi, ĩ töpö na, 'Jutéia tä uli pata na makö hua kononö nököö!' a kuu ha, 8 'Jesus ai. Ĩ hamö a huulö tihöö! Hi wisa ha, juteu töpönö wa säpa pi topa apa salo, maa manö wa säsä pi topa noa thali ta wa pi kuu mai. Wi na wa pi kuu salo, ĩ tä uli hamö wa huu pi topa kõa kule? Ĩ tä uli hamö a huu pi topa kõo tihöö!' ĩ na töpö kuuma. 9 Ĩ na töpö kuu ha, 'Tä halulo nö, tä wakala lape epö kutenö, ĩ tä wakala a na wa huulö pamö, wa wäkäpa mai, wa huu soatiolö kitä. 10 Mumai ha kawa na wakala tä kua mi kutenö, wa wäkäpa päoö' Jesus a kuuma. 'Wakalai ha wa huu makoka kua wi na, Teusö anö wa simöa wi ĩ wa ta hininöma, ĩ na wa huu makoka kua hö̃töo kitä' ĩ na Jesus a pi kuu salo, ĩ na a kuuma. 11 Ĩ na Jesus a kuu nö, 'Kamakö hai ĩ noi tä Lásatu a mikölöma maaki, ĩ a na sa waloikitö nö, sa naa komani kitä' Jesus a kuu ha, 12 kama kai a hua sinomoti wi, ĩ töpö aiki, 'Jesus ai. Lásatu a mitia manu kule, a salia apa kule maaki, a ononoa kotaso kitäö!' ĩ na töpö kuuma. 13 Jesus ta hini makokoa totio maama kutenö, ĩ na töpö kuuma. Lásatu a noma waikilaso noai, Jesus anö ĩ tä taö waikia päla nö maaki, 'Lásatu a mikölömaö!' ĩ na a kuuma. Ĩ na a kuu ha, 'Lásatu a mia pätia kule' ĩ na ĩ töpö pi kuu pasioma. 14 Ĩ na töpö pi kuu pasioö ha, 'Lásatu a noma totisomaö!' ĩ na Jesus a kuu makokoa toitasoma. 15 Ĩ na a kuu nö, 'Lásatu a noma tä, ĩ hamö sa kuo maa noai maaki, sa pi mönaha kule. Ĩ hamö sa kuo maama kutenö, “Jesus a pitilimo opaö. Jesus a hai, ĩ Teusö a ulupö” waiha ĩ na makö pi thama kitä. Önö kutenö, sa pi mönaha kule' ĩ na Jesus a kuu nö, 'Pei. Lásatu a na makö pewö ekua soataiki nököö!' Jesus a kuuma. 16 Jesus a kuu ha, kökö poakapaso noai ĩ ai a na, 'Sísimu' töpö kuuto wi, ĩ Tomé aiki, 'Awai. Jesus a na makö pewö nokalolö nököö! Kamakö solo makö pewö säpamoa soa pätasopököö!' a kuuma. 17 Ĩ na tä kua tä, Petânia tä uli na Jesus a waloki ha, ĩ ha töpö hapalo nö, 'Maa maka pata ha Lásatu a nomawö titikö noai, 4 tökö mumi hasua kua waikikömaö!' ĩ na töpö kuuma. 18 Jetusalẽi tä uli na Petânia tä uli atepa apa soata kule. 19 Ĩ tä uli na Lásatu a nomaso noai, ĩ tä uli atepa apa soata kutenö, ĩ tä uli hamö juteu töpö satehe epii töpö asulöma. Lásatu a nomasoma kutenö, pese Marta a, pese Maria a, ĩ na kilii töpö pi topapalama päo pia salo, töpö asulöma. 20 Ĩ na tä kua tä, 'Jesus a huu kulaliö!' Marta anö tä kuu hininö nö, Jesus a na a hua lälasolöma. Marta a hua asa pälasolö noai ha maaki, Maria a kuo hisa pasioma. 21 Jesus a na Marta a paa lälotö nö, 'Pata! Hisa ha wa kuoma aköna, ipa sao a noma maa noa kipi. 22 Hisa ha wa kuo maa päo noai maaki, huki Teusö na wa hapalo nö, “Ĩ na wa tä thamaö!” ĩ na wa kuu ha, Teusö anö wa hinia totia hö̃töli kitä' ĩ na Jesus a na ĩ na Marta a kuuma. 23 Ĩ na a kuu ha, 'Au sao a temöa konaso kitä' Jesus a kuu ha, 24 'Awai. Hi masita tä uli mapo pia tä nomawö töpö temöa konaso wi, ĩ tä, ipa sao a temöa naia konaso kitä' ĩ na Marta a kuu ha, 25 Jesus aiki, 'Sanöma töpö nomasoma maaki, kamisanö sa töpö temöma kõo wi, ĩ sa. Kamisa na sanöma töpö aiki, “Wa pitili” ĩ na ĩ töpö pi kuu wi, ĩ töpö nomasoma maaki, kamisanö ĩ sa töpö temöma kõo kitä. 26 Kamisa na, “Wa pitili” ĩ na wa pi kuu asa wi, ĩ wa temii, wa õsi palimi asai, ĩ wa õsi noma mai kitä. “Ĩ pitili tä sai haö!” wa pi kuu kule?' ĩ na Marta a na ĩ na Jesus a kuuma. 27 Ĩ na a kuu ha, 'Awai, pata! Pitili wa haö! Teusö anö kamisamakö na wa kaikanamoma wi, ĩ wa. Teusö pelupö wa. “Masita tä uli na wa simöpali kitäö!” Teusö a kuu noai, ĩ wa' ĩ na Marta a kuuma. 28 Ĩ na Marta a kuu nö, poose Maria a na a kotapolö nö, a nakalö nö, 'Makö pi hatukama sinomoti wi, ĩ a huu kulaiö! Wa naka polaiö!' Marta a kuuma. 29 Ĩ na a kuu ha, Jesus a kulati ha Maria a hua soatasolöma. 30 Ĩ töpö sai pö na Jesus a walo totio mai ha, Marta a pao läo taso noai ha, ĩ ha Jesus a öpa haio soa tasoma. 31 Maria a pi topapalamapö ĩ juteu töpönö, lope epii Maria a hua soatasolö wi, ĩ tä taa nö, Maria a na ĩ töpö nokasolöma. 'Lásatu a titilali hamö Maria a hua hãtosolö alu keheö! Ĩ hamö a ö̃kö hãtolaso pia alu kuleö!' töpö pi kuuma. 32 Ĩ na tä kua tä, Jesus a öpalali hamö Maria a waloikitö nö, Jesus a talalö nö, masita tä ha a loa soataiki nö, masita tä ha a maeko hĩta thaiki nö, a hapalo soata nö, 'Pata! Hisa ha wa kuoma aköna, ipa sao a noma maa noa kipi' Maria a kuuma. 33 Ĩ na Maria a kuu ha, Jesus anö Maria a ö̃kö talalö nö, Maria a na töpö nokapalo pole, ĩ töpö ö̃kö naine, ĩ töpö taa naio nö, Jesus a pi ota apötasoma. A pi honipo opama. 34 Ĩ tä, 'Witi ha ma titiköma?' ĩ töpö na Jesus a kuuma. A kuu ha, 'Pata! Hapo! Tä mööso' töpö kuu ha, 35 Jesus a ö̃kösoma. 36 A ö̃kösoö ha, 'Hiki. Ma tä taa nökö. Jesus anö ĩ a wani pi ipa hãto nö kilia noa a' ĩ ai juteu töpö kuuma maaki, 37 ai töpö aiki, 'Hi anö ai tä mamo höpöpö öpö tä, a mamo huu topa komaki kipili maaki, wi na a pi kuu salo, Lásatu a salia apa tä, a ononopa kõo maama? A ononoa kopalöma aköna, a noma maa noa kipi' ĩ na ai töpö kuuma. 38 Ĩ na tä kua tä, Jesus a pi honipo opa kõo nö, Lásatu a nomawö titio pa, Jesus a walotaköma. Maa maka ha Lásatu a titile, ĩ ma päka na maa ma kasöoma. 39 Maa ma kasöa tä, 'Ma thaa kopalöö!' Jesus a kuu ha, 'Pata! Tä hĩthani ipö waiki kitä ta wa pi kuu mai. Lásatu a titikö noai, 4 tä mumi kua waikile ta wa pi kuu mai' ĩ na Lásatu a hai ĩ pese Marta a kuuma. 40 Ĩ na a kuu ha, '“‘Teusö a pitili’ ĩ na wa pi kuu tä, Teusö a lotete epii, a wakala apii, ĩ wa tä talali kitäö!” ĩ na sa kuu alu kipili nökö' ĩ na Jesus a kuuma. 41 Ĩ na tä kua tä, maa ma kasöle, ĩ töpönö ĩ ma pata pulumanöma. Ĩ ma pata pulutama tä, Jesus a nonoa soataiki nö, 'Hapa. Kawanö sa hinini ke. Sa hini kutenö, “Aitaköö! Kawa totiatalo opaö” sa kuu kule' ĩ na Jesus a kuu nö, 42 'Kawanö sa hini sinomo wi, ĩ sa tä taö waikia kule maaki, “Teusö anö Jesus a simönö noai, ĩ a totiwö” ĩ na sa töpö pi thama pia salo, ĩ töpö sömöka tala tä, “Hapa. Kawanö sa hinini ke” ĩ na sa kuu hasulua apa ke' ĩ na Jesus a kuuma. 43 Ĩ na Jesus a kuu nö, a komö nö, 'Lásatu ai! A lisia kopaloö!' a kuuma. 44 Ĩ na a kuu ha, Lásatu a lisia kopasoma. Watata ösökönö nomawö tä halo õka kolilipa sinomo wi, ĩ watata ösökönö Lásatu a nomawö halo õka kolilia waikipalöma. Ai watata ösökönö pili a ami pewö õka kolilipa soa, ai watata ösönö pili a he õka kolilipa naia soa, ĩ na a õka koliliama kuö soai, a lisia kopasoma. A lisipo kõa tä, 'A kusöa kopalöö! A huu konöpököö!' ĩ na ĩ töpö na Jesus a kuuma. Ĩ na tä kuama. 45 Ĩ na tä kua tä, Maria a na juteu töpö noimomö huu noai, ĩ töpö aiki, 'Teusö anö Jesus a simönö noai, ĩ a totiwö. Ĩ a pitilimo opaö' ĩ na ĩ töpö satehe epii, ĩ na ĩ töpö pi kuuma. Lásatu a temöa komanö noai, ĩ tä taa nö, 'Jesus a pitilimo opa nö kiliawö' ĩ na ĩ töpö pi kuu nö, Jesus a hini totikömae. 46 Ĩ na ai töpö kuama maaki, ai töpönö Jesus a wanipoti nö, patiseu töpö na ĩ töpö alulö nö, 'Jesus anö Lásatu a temöa komani keheö!' töpö kuu nö, Jesus a kuati noai, ĩ ta wäsä tasoma. 47 Ĩ ta wäsäö ha, Teusö a täpä sinomo wi ĩ pata töpö, patiseu töpö, ĩ na töpö kui töpönö pata töpö kokamo sinomo wi, ĩ töpö nakalö nö, 'Wi na makö kuapö?' töpö kuu nö, 'Jesus anö tä aipama apa nö kiliawö. 48 Ma wani wasu mi tä, “Jesus a pitilimo opaö. Jesus a hai, ĩ pata tä asawöö!” ĩ na ĩ töpö pewö pi kuu nö, Jesus a hini totia asakö matimöö!' ĩ na patiseu pata töpö kuu nö, '“Teusö anö Jesus a kaikanamoma wi, ĩ a” ĩ na Jesus a na ĩ na töpö pewö pi kuu ha, homa tili pata töpö waloikiso nö, Teusömo wi a sai wania soapalö solöö, juteu makö mapamani, ĩ na makö thama solö kitäö!' ĩ na ĩ töpö kuuma. 49 Ĩ na töpö kuu ha, Teusö a täpä totio wi ĩ pata tä Kaipásö, ĩ tä inama ha Teusömo wi, ĩ a sai ha ĩ a patamo pole, ĩ a hapalo nö, 'Ma tä tai mio opapawö. 50 Makö pewö noamapö, sami tä nomaso wi ĩ tä topa. Ĩ a noma paio mai ha, makö pewö mataso matimö ta pi kuu mai. Önö kutenö, ma säpamanöpöö! Sami ĩ a säpamonasoma, makö pewö säpamo maapököö!' ĩ na a kuuma. 51 A pi saimo päo nö, ĩ na a kuu maama. Ĩ tä inama ha, Teusömo wi ĩ a sai ha a patamo asa kutenö, 'Jesus anö juteu töpö pewö täapa kõo läo pia salo, a säpamonaso kitä' ĩ na a kuu kuköpö, ĩ uni ta. 52 'Juteu töpö sino aiki kuno mai, Teusö ulupö töpö pewö selekepaso wi, ĩ töpö täapa kõo naio läo pia salo, Jesus a nomaso kitä. Ĩ töpö pewö täapa kõo läo nö, ĩ töpö kokapali pia salo, a nomaso kitä' ĩ na a kuu kuköpö, ĩ uni ta. 53 Ĩ na a pata kuu ha, ĩ tä wakala ha soatawö, 'Jesus ma säpamanöpöö!' ĩ töpö kuu kuköma. 54 Ĩ na tä kuaö ha, hoka apa pa juteu töpö kule, ĩ hamö Jesus a huu maama. A alulö nö, pokei tä uli kotö ha tä uli pata kulati, ĩ tä uli na Epötaĩ uli a hilo wi, ĩ tä uli kulati, ĩ tä uli ha a talalotö nö, ĩ hamö kama kai a hua sinomoti wi, ĩ töpö solo töpö kutioma. 55 Ĩ na tä kua tä, juteu töpö pásökoamo ateo tä, sai pö sololoi, ĩ tä uli ha töpö pilile, ĩ ai töpö satehe epii töpö asulöma. Töpö pásökoamo paio mai ha, Teusö a na töpö õsi ausipamo pia salo, Jetusalẽi tä uli ha töpö asulöma. 56 Ĩ hamö töpö talalotö nö, Jesus a möti nö, Teusömo wi ĩ a sai ha töpö öpapalo tä, töpö hapalo hẽtupaso nö, 'Wi na makö pi kuu kule? Hi tä sai na Jesus a pásökoamo naio hãto pia kule?' ĩ na töpö kuuma. 57 Ĩ na tä kua tä, Teusö a täpä sinomo wi ĩ pata töpö, patiseu töpö, ĩ na töpö kui töpönö Jesus a huölöpö, kama hai ĩ töpö noa thaa nö, 'Jesus wa talali salo, kamisamakö na ĩ wa ta wäsäö!' ĩ na pata töpö kuuma.

12

1 Ĩ na tä kua tä, '6 tä mumi hasua kutalo nö, makö pásökoamo pia kuleö!' töpö pi kupalo tä, Petânia tä uli ha Jesus a talasoma. Ĩ tä uli ha Lásatu a pilioma. Jesus anö a temöa komanö noai, ĩ a. 2 Jesus a talasoö ha, ĩ ha töpö iapaloma. Töpö iapalopö, töpö lota wi, ĩ ti na Jesus a lotio pa Lásatu a loo sätäo naitioma. Töpö loa tä, Marta anö nii tä pi makeköma. 3 Jesus a lotia tä, Maria anö, tuu hälälä toita apii, tuu noa apii, ĩ tuu komi pi tälö nö, Jesus a konona ami ha tuu lököma. Tuu lökö nö, kama hunukunö Jesus a ami hãsitia kopalöma. Ĩ a sai õsi pewö hamö ĩ tuu häläläa tipolea apöpasoma. 4 Ĩ na tä kua tä, Jutasö Isökatiosisö anö Jesus a kai a hua sinomoti wi, ĩ anö Jesus a monima piale, ĩ aiki, 5 'Ĩ na kuno mai. Sami tä inama na ai tä kalipalo soatio wi, ĩ tä noa kui na, ĩ na ĩ tuu noa kuö pasiwö ta pi kuu mai. “Hi tuu noa na, sitipa sa kökö tälö nö, sitipa kökö thapo mai, ĩ töpö na ĩ sitipa sa kökö totoköpöö!” ĩ na a pi kuu mai' Jutasö a kuuma. 6 Sitipa kökö thapo pasia mane, ĩ töpö na Jutasö a pi honipo mane maaki, a kuu pasio päoma. Sitipa kökö na a thomömo sinomoma kutenö, ĩ na a kuu päoma. Jesus a, Jesus a kai a hua sinomoti wi ĩ töpö, ĩ na töpö kui töpö na ai töpönö sitipa kökö totoma sinomo noai, Jutasö anö ĩ kökö pewö pi po sinomo asama. Ĩ kökö pewö pi po tä, ĩ sitipa kökö ose na a thomömo sinomotima. 7 'Ĩ tuu lösa pikio maiki' Jutasö a kuuma maaki, Jesus aiki, 'Maria a päsäpa maikiö! Sa nomasoö ha, maa maka na sa titio piale, ĩ tä na Maria a pi tapomo sinomo kutenö, ĩ tuu pi thapotima. 8 Sitipa kökö thapo pasia mane, kamakö na ĩ töpö kuo pasio soatio kitä. Ĩ ma töpö pasilipo pi topa tä, ma töpö pasilipalöpököö! Kamakö na kamisa kuo pasio soatio mai kitä' ĩ na Jesus a kuuma. 9 Ĩ na tä kua tä, 'Ki Petânia tä uli na Jesus a kua kulaliö!' tä kuu wi, juteu töpö satehe epii töpönö ĩ na ta kuu hininö nö, Jesus a möö pi topa salo, ĩ hamö töpö hua soatasolöma. Lásatu a temöa komanö noai, ĩ a möö pi topa naioma. 10 Jesus anö Lásatu a temöa komanöma ha, juteu töpö satehe epii töpönö kama töpö hai ĩ pata töpö saimo pätio nö, ta katehati wi, ĩ ta hini wani ipö salo, 'Jesus a pitili' ĩ na töpö pi kuu nö, Jesus a hini pi topa nömöoma. Önö kutenö, Teusö a täpä sinomo wi ĩ pata töpö aiki, 'Lásatu ma säpalöpököö!' ĩ na ĩ töpö kuuma. 12 Ĩ hena tä, Jetusalẽi tä uli na töpö satehe epii töpö pásökoamopö töpö huu noai, ĩ töpö na, 'Hisimö Jesus a walo pia kuleö!' tä kuu ha, 13 koanata amösökö hena kui na, ĩ na amösökö hena kui, Jesus a na ĩ amösökö hena kai huu paa läoimatö nö, 'Teusö a totiatalo opawöö!' '“Teusö pata tänö a simöpalö noai, isöhaeu tili makö pewö na ĩ a kaikanamo totio wi, ĩ a totiatalo opa asawöö!” ĩ na makö pewö kuu kuköpöö!' ĩ na töpö komö kuu kai huu läolöma. 14 Ĩ na tä kua tä, Jesus anö jumẽtu a okalo täa paitalö nö, pili a hõo na a tikäa soataiki nö, a kai hua soatasolöma. Teusö tä waheta kuu noai, ĩ pitili ta kuo totioma: 15 'Sião tili pö! Pö kili ti! Kamakö na a kaikanamo wi, ĩ a huu kulaliö! Jumẽtu a okalo hõo na a tikäla tä, a kai huu kulaliö!' ĩ na Teusö tä waheta kuu noai, ĩ pitili ta kuo totioma. 16 Jesus anö jumẽtu a kai huu tä, Jesus a kai a hua sinomoti wi, ĩ töpö pi motio opa läoma. 'Ã ãi. Teusö tä waheta kuu noai, ĩ pitili ta kuo totioma ta o' ĩ na töpö pi kuu tao maama. Jesus a noma waikilasoma maaki, a temö hoköa kopalo nö, Teusö a kuo pa tä toita apii, tä wakala apii, ĩ ha a kõa waikisolö noai ha, ĩ tä, Jesus a kai a hua sinomoti wi ĩ töpö pi hatukupasoma. 'Ã ãi. Teusö tä waheta na Jesus a kateha noai, ĩ pitili ta kuo toitioma ta o' töpö pi kuu totia haia pälasoma. 17 Ĩ na tä kua tä, Jesus anö Lásatu a nomawö nakalö nö, a temöa komanö noai, ai töpö satehe epii töpönö ĩ tä taa totio noai, ĩ töpö wäo nö, 'Maa maka na Lásatu a nomawö titia waikioma maaki, Jesus aiki, “Lásatu ai. A lisia kopaloö! A huo kõki solöö!” a kuu nö, a temii a lisia kopamani kipiliö!' ĩ na ai töpö na ĩ na ĩ töpö kuu hätäpotima. 18 Ĩ na töpö kuti ha, Jesus anö Lásatu a temöa komanö noai, ai töpö satehe epii töpönö ĩ ta hininö nö, Jesus a möömö hulasolöma. 19 Ĩ töpö satehe epii töpönö Jesus a möömö hulasolöma kutenö, patiseu kama töpö hapalo hẽtupasoti nö, 'Ma tä taa nökö. Wi na makö kuatipökö? Hi tä uli na töpö pewö pilipai, Jesus a na ĩ töpö pewö nokapalo kuköma' ĩ na ĩ töpö kuuma. 20 Ĩ na tä kua tä, töpö pásökoamoti tä, ai köteeku töpö Teusömo naio pia salo, Jetusalẽi tä uli hamö ĩ töpö huu hö̃töoköma. 21 Ĩ töpö talalotö nö, Filipe a na töpö waloköma. Filipe a hai, Kaliléia tä uli pata ha Petösaita tä uli kule, ĩ tä uli na Filipe a pilile, ĩ a. Ĩ a na töpö waloiki nö, 'Jesus sama möö pi topa apa kuleö!' töpö kuuma. 22 Töpö kuu ha, André a na Filipe a waloikitö nö, 'Ki töpönö Jesus a möö pi topa thaiö!' a kuu ha, Jesus a na André a, Filipe a, ĩ na töpö kui töpö hulolö nö, Jesus a na ta wäsä tasoma. 23 Ta wäsäö ha, 'Sanöma sa kupaso noai, ipa hao Teusö anö ĩ sa möamö totia apöpalö nö, ai töpö na sa möma pia kule' Jesus a kuu nö, 24 'Ĩ na sa kuu kuleö! Pitili sa: “Masita tä uli ha tötiiku mo töa paio mi tä, mo ãke mai kitä. Ĩ na tä kua tä, mo töa waikiköma maaki, mo homopo paio mi tä, mo ãke mi. ‘Sa kua pätio wi na, ĩ na sa kua pätio nökö’ mo pi kuu aköna, ai mo lalo kõo mai ha, tä kuo pi. Ĩ mo homopasoma, satehe epii ai mopö laloa kõki. 25 Kama sanöma wa pii sapao pasio kõo nö, Teusö a na kama wa umao sapao pasio kõoö ha, wa pea kitä. Wa õsi palimipo mai kitä. Hi masita tä uli ha wa kuiki nö, kama wa pii sapao kõo mai, Teusö a na wa umao sapao kõo mai, ĩ na wa kuaö ha, wa pea mai kitä. Wa palimipaso kitä” kamakö na ĩ na sa kuu kule. Sa holisi mai kitäö!' Jesus a kuuma. 26 A kuu nö, '“Sa simöa totio sinomoö!” kamisa na wa kuu pi topa tä, kamisa na a nokapaloö! Kamisa na wa nokapalo nö, kamisa kutio pa wa kutio naio kitä. “Sa simöa sinomoö!” kamisa na wa kuti ha, ipa hao aiki, “Wa totiatalo opawö” a kuu kitä' Jesus a kuuma. 27 Jesus a kuu nö, 'Huki sa pi ota apa kule. Wi na sa kuu pätaköö? “Hapa. Sa pea piale, ĩ tä thama tihöö!” ĩ na sa kuupö? Ma. Ĩ na sa kuu mai kitä. “Sa säpamonaso kölöpökö o!” sa kuu nö, sa huma. 28 Hapa. Teusö wa totiatalo opa asa wi, ĩ tä mömaö!' ĩ na Jesus a kuu ha, 'Sa totiatalo opa asa wi, ĩ sa tä möma waikioma. Ĩ sa tä möma kõo kitä' ĩ na hi tä hẽtu ha ta kuuma. 29 Ĩ ha töpö satehe epii töpö öpa sototoa apöle, ĩ töpönö ĩ ta hininö nö, 'Sanö ta pata kuo ke' ai töpö kuu kule maaki, 'Jesus a na ãju ta hapalo alu keheö!' ĩ na ai töpö kuu pasioma. 30 Jesus aiki, 'Kamisa na ta kuu mae. Kamakö pi hatukupamanöpö, ta kuu ke. 31 Huki sanöma töpö pewö na Teusö anö tä makokama läapalo pia kule. Sai tä sai patanö sanöma töpö simöa sinomo wi, huki Teusö anö ĩ a sasupa pia kule. 32 Ĩ na tä kua tä, sa pi ösömanöma, ĩ sanö sa töpö pewö matoma kõki kitä' ĩ na Jesus a kuuma. 33 'Hii ti pakalai ti ha Jesus a sätämaköma, a nomaso kitä' ĩ na Jesus anö töpö pi thama pia salo, ĩ na a kuuma. 34 Ĩ na a kuu ha, ĩ töpö aiki, 'Juteu makönö Teusö tä waheta thapo wi, ĩ na ĩ tä waheta kuu: “Ĩ juteu makö pewö na a kaikanamo piale, ĩ a noma mai ha, a kuo soatio kitäö!” ĩ na tä waheta kuu wi maaki, wi na wa pi kuu salo, “Sanöma tä kupaso noai, hii ti pakalai ti ha ĩ a pi ösömani kitä” wa kuuma? Sanöma tä kupaso noai, ĩ witi pili a pasiwö?' töpö kuu ha, 35 'Pili motokö siinö tä uli hatukumapo kua wi na, ĩ na kamisanö makö pi hatukama thama hö̃töoö. Pili motokö sii kui na, ĩ na sa kuö. Kamakö na sa kuo tetepo totio mai kitä. Sa kua soatila tä, tä muma kõo totio paio mai ha, makö huatalo totiopököö! Mumai ha wa huu päköma, wa monöso kitä. 36 Kamisanö makö wakalapamani wi, kamakö na ĩ sa kua soala tä, kamakö aiki, “Jesus a pitili” ĩ na makö pi kuupököö! Ĩ na makö pi kuu kuköma, makö wakala apöpasoö. Makö pi hatuka apöpasoö' ĩ na Jesus a kuuma. A kuu nö, a hapalo waikipalo nö, ĩ töpö pewö taa soata kölö nö, a sosa soatakö tasoma. 37 Ĩ töpö mamo tetela tä, Jesus anö tä aipama apatima maaki, ĩ töpö aiki, 'Jesus a pitili' ĩ na töpö pi kuu maama. 38 'Jesus a pitili' ĩ na ĩ töpö pi kuu maama kutenö, Teusö ta wäsä totio noai, ĩ Isaías a kuu noai, ĩ pitili ta kuo totioma: 'Teusö ai. Sama ta wäsä totile, ĩ töpö pewönö ĩ ta hini maneö! “Ĩ pitili ta” ĩ na töpö pewö pi kuu mi. Teusö a lotete epii, ĩ töpö na ĩ tä möma pasio maama' ĩ na Isaías a kuuma. 39 Ĩ na a kuu nö, ĩ na Isaías a kuu naioma: 'Teusö anö ĩ töpö mamo pewö höpöpöa soatamanöma. Töpö pi motöa soatamaköma. Önö kutenö, töpö mamo teteapalo maama. Töpö pi hatukuapalo maama. “Ĩ na töpö kuati salo, kamisa na töpö pi luluo sapao kõo mi” Teusö a kuu. “Kamisa na töpö pi luluo sapao kõo aköna, ĩ sa töpö pewö temöa komani pi” Teusö a kuu' ĩ na Isaías a kuuma. 41 Jesus a wakala apii, a toita apii, Isaías anö ĩ tä tapama kutenö, Jesus a huu paio mai ha, ĩ ta katehama. 42 Teusö a na ai töpö satehe epii töpö pi luluo sapao wanio opa pasio kõoma maaki, ai juteu pata töpö satehe epii töpö aiki, 'Jesus a pitili' ĩ na ĩ töpö pi kuu kuköma. 'Jesus a pitili' ĩ na ai töpö satehe epii töpö pi kuu kuköma maaki, ĩ töpö aiki, '“Jesus a pitili” ĩ na sa kuu hoka apaö ha, “Juteu makö kokamo sinomo wi, ĩ a sai ha a lisipo kõo tihöö!” kamisa na ĩ na patiseu pata töpö kuu matimöö!' ĩ na töpö pi kuu salo, 'Jesus a pitili' ĩ na töpö pi kuu noai, ĩ töpönö ĩ ta hasulupa pasio maama. 43 'Wa totiatalo opawö' Teusö a kuu wi, ĩ töpönö ĩ ta hini pi topa totio mai, 'Wa totiatalo opawö' kama ai sanöma töpö kuu pasile, ĩ ta hini pi topa sisa pasio päomae. Önö kutenö, '“Jesus a pitili” sa pi kuu wi ĩ sa' ĩ na ĩ töpö kuu kilipalo opama. 44 Ĩ na tä kua tä, lope epii Jesus a hapalo nö, '“Jesus a pitili” ĩ na wa pi kuu tä, “Jesus a pitili” wa pi kuu sisa mai kitä. “Jesus a simönö noai, ĩ a pitili” ĩ na wa pi kuu naio soataö. 45 Kawanö sa tapa tä, sa simönö noai, kawanö ĩ wa tapa naio soataö. 46 Hi masita tä uli na sa huu kuköma, pili motokö siinö tä uli wakalapalo kua wi na, ĩ na kamisanö sanöma sa töpö õsi wakalapalama thama hö̃töoö. Önö kutenö, “Jesus a pitili” wa pi kuu kuköma, muma pa wa kutio mai kitä. 47 Kamisa kuti wi, ĩ wa ta hini kule maaki, “Hai o. Ĩ na sa kua naiokö o!” wa pi kuu mi ha, “Wa wanisala” kamisa kuu pasio mai kitä. “Sanöma töpö wanisala apa sai o!” sa kuupö, sa huu maama. Sanöma sa töpö täapa kõo läopö, sa huu sisama. 48 Kawanö sa hãsiama nö, sa hini totio mi ha, hi masita tä uli mapo pia tä, wanisala wa tä thati noai, ai tänö ĩ wa peama totio opa kitä. Sa kuu waikitio noai, ĩ tänö wa peama totio opa kitä. 49 Kama sa hapalo pi topa päo maama. Ipa hao anö sa simönö noai, ĩ ipa hao aiki, “Ĩ na a kuu totihoö! Ĩ wa ta wäsä totihoö!” kamisa na a kuuma. 50 Ipa hao a kuu noai, ĩ tänö sanöma töpö õsi palimipaso kitä. Ĩ sa tä taö öpaö. Önö kutenö, “Ĩ na a kuu totihoö!” ipa hao a kuu noai, ĩ sa ta wäsä tolea totiatalo opaö' ĩ na Jesus a kuuma.

13

1 Ĩ na tä kua tä, sami töpö pi mio nö, ĩ hena tä töpö pásökoamo pia wi, ĩ tä wakala kupo pia tä, Jesus aiki, 'Hi masita sa tä uli taa kõkölö nö, ipa hao a na sa huu koonö pia kuleö!' ĩ na Jesus a pi kuuma. Hi masita tä uli na sanöma töpö kule, Jesus anö ĩ kama hai ĩ töpö thapo noai, ĩ töpö pi ipama. Ĩ töpö pii mapo maama. 2 Ĩ tä mumi ha, Jesus a, kama kai a hua sinomoti noai ĩ töpö, ĩ na töpö kui töpö iapalo halutima. Sai tä sai patanö Simão Isökatiosisö a hai ĩ pelupö Jutasö a õsi kalipalama waikioma kutenö, Jutasö aiki, 'Jesus sa monima nököö!' Jutasö a pi kuuma. Ĩ na a pi kuu waikita noai ha, ĩ töpö iapalo halutima. 3 Ĩ na tä kua tä, sanöma töpö pewö na Teusö anö Jesus a kaikanamoma noai, ĩ tä na Jesus a pi hatuko opama. A pi hatuka apa salo, 'Ipa hao Teusö a na sa kuo paioma, huki ipa hao a na sa kõo nömöoonö pia kuleö!' ĩ na a õsi pi kuu tao opama. 4 Ĩ na a õsi pi kuu tao opa nö, a öpa soatalo nö, haloi ösö halopo hösökapo pole, ĩ ösö hasua soatalö nö, pili pesokö ha sawana tökö ose hãsoka soatakö nö, 5 hapoka a pata na maa tuu löa soataköma, Jesus a hai, pata tä sai maaki, kama kai a hua sinomoti wi, ĩ töpö konona ami salu hätäpo läapalotima. Töpö konona ami salulalö nö, pili pesokö na sawana tökö ose hãsokole, ĩ tökönö töpö ami hãsitiama kõo soatalotima. 6 Töpö ami salu hätäpoti tä, Simão Pedro a loo pa, Jesus a ateo opa tä, Pedro aiki, 'Pata! Sa ami salupa naio pia alu kule?' Pedro a kuu ha, 7 'Kamisanö wa thama piale, huki ĩ tä na wa pi hatuka mane maaki, waiha wa pi hatukua totipaso kitä' Jesus a kuuma. 8 Ĩ na a kuu ha, 'Naiö! Kawanö sa ami salupa mai kitäö!' Pedro a kuu hö̃töoö ha, 'Wa ami salupa mi tä, sa kai a hua sinomoti wi, ĩ ai wa mai kitä' Jesus a kuuma. 9 Ĩ na Jesus a kuu ha, 'Pata! Ĩ na wa kuu salo, pili sa konona ami aiki sisatawö kuno mai. Sa ia wi, ĩ sa ami pewö, pili sa he, ĩ na sa pewö salua thapalöö!' Simão Pedro a kuuma. 10 Ĩ na a kuu ha, Jesus aiki, 'Pi naka. Wa sanumo waikilasoma, wa ausi ipö waiki kutenö, wa sanumo kota mai kitä. Kama wa ami sanumoa kõa sisatasoö. Makö lole, ĩ makö pewö ausi ipö waikiwö. Ĩ makö pewö aiki kuno mai. Sami ai wa sami' Jesus a kuuma. 11 'Ĩ a waninö sa monima pasio pia alu kule' ĩ na Jesus a pi kuu salo, 'Sami ai wa sami' a kuuma. 12 A kuuma, ĩ töpö ami salu matalo nö, haloi ösö halopo hösökapo wi ĩ ösö haloa totia kotalö nö, ia sinomo wi, ĩ tiki ha a loa kotaiki nö, 'Kamisanö makö thamahe, ĩ tä na makö pi hatuka totia kule?' Jesus a kuuma. 13 Ĩ na a kuu nö, 'Kamisa na makö hapalo nö, “Kawanö samakö pi hatukama sinomo wi, ĩ wa” ĩ na makö kuu sinomoö. “Samakö simöa sinomo wi, ĩ wa” ĩ na makö kuu naioö. Ĩ na kamisa na makö kuti wi, ĩ pitili ta. Pata sa. Makö pi hatukama sinomoti wi, ĩ sa. 14 Pata sanö makö pi hatukamati wi, ĩ sanö pili makö ami salupalöma kutenö, makö ami salupaso hẽtupaso sinomoö! 15 Kamisa uömaheö! Kamisanö makö thama kuae na, ĩ na makö kuaö! 16 “Ai tä na a kalipalo päo wi, ĩ pata tä toita mai kitä. Ai tänö ĩ a kalipalama sinomo totio wi, ĩ pata tä sai asawö. A simöa sinomoti ha, a huu sinomo wi, ĩ a hai, pata tä mai kitä. A simöa totio sinomoti wi, ĩ a hai, pata tä asaö” ĩ na sa kuu kule. Pitili sa. 17 Kamakö aiki, “Wa kuuhe, ĩ pitili ta” ĩ na makö pi kuu manu kule, kamisanö makö thama kuae na, ĩ na makö kua tä, makö pi mönaha apa kitä' ĩ na Jesus a kuuma. 18 Ĩ na Jesus a kuu nö, '“Kamisa na a ia naiopili, ĩ anö sa monima päoma” ĩ na Teusö tä waheta kuu noai, ĩ pitili ta kuo tolea totio kitä. Önö kutenö, kamakö pewö na sa hapalo mane. Kamisanö makö saia asapalipili, ĩ makö pewö taö öpaö. 19 “Jesus a hai, hi masita tä uli kua paia mai ha a kua somatio noai, ĩ a pasiwö” ĩ na makö pi thama pia salo, ai tänö sa monima paio mi tä, ĩ na sa kuu kule: “Kamisa na ai tä monimo totio kitä” huki kamakö na ĩ na sa kuu paia kule. Waiha kamisa na ai tä monimo kuköma, “Ã ãi. Ĩ na Jesus a kuu soata kipili ta o” ĩ na makö pi kuu nö, “Hi masita tä uli kua paia mai ha Jesus a kuo soatio noai, ĩ a pasiwö ta o” makö pi kuu kitä' ĩ na Jesus a kuuma. 20 Ĩ na a kuu nö, '“Kamisanö ai sa tä simöni wi, ĩ wa tä tälöma, kamisa täa naia soatali. Kawanö sa tälöma, ipa hao anö sa simönö noai, ĩ wa täa naia soatali” ĩ na sa kuu kule. Sa holisimo mai kitäö!' ĩ na Jesus a kuuma. 21 Ĩ na Jesus a kuu nö, a pi ota apa nö, '“Makö lole, ĩ ai wanö sa monia päli pia salo” ĩ na sa kuu kuleö! Pitili sa' ĩ na a kuuma. 22 Ĩ na a kuu ha, kama kai a hua sinomoti wi, ĩ töpö loa naia soatale, ĩ kama töpö pewö möpaso hẽtupaso nö, 'Ĩ witi anö Jesus a monini pia salo?' ĩ na ĩ töpö pi kutima. 23 Önö kutenö, Jesus a kotö ha Jesus a kai a hua sinomo wi, Jesus a na ĩ ai tä loa hö̃köa apöle, Jesus anö ĩ a pi ipa wi, 24 ĩ a na Simão Pedro anö Jesus a hima nö, '“Ĩ witi pili anö wa monima pia salo?” Jesus a na ĩ na wa kuu!' ĩ na a kuuma. 25 Ĩ na a kuu ha, Jesus a na a loa hö̃köa apöle, ĩ aiki, 'Pata! Ĩ witi pili a monimo pasio pia kule?' ĩ na a kuu ha, 26 'Ĩsa ãi asawösönö sa tuu hälö nö, ai tä na ĩ sa ãi ose totoa piale, ĩ anö sa monima pia kule' ĩ na Jesus a kuu nö, ĩsa ãi asawösönö tuu häalö nö, Simão Isökatiosisö a pelupö Jutasö a na ĩ ãi ose totoköma. 27 Ĩ ãi ose totoköma, ĩ tökö soatawö, Jutasö a na Sai tä sai pata lisia soatasoma. Jutasö a na Sai tä sai pata lisia soatasoö ha, ĩ a na Jesus a hapalo nö, 'Wa tä thama piale, ĩ tä thama soataö!' ĩ na Jesus a kuuma. 28 Ĩ na Jesus a kuu ha, kama kai a hua sinomoti wi, ĩ töpö aiki, '“Wa tä thama piale, ĩ tä thama soataö!” Jesus a kuuhe, wi na a pi kuu salo, a kuu ke?' ĩ na ĩ töpö pi kuu nö, 29 'Jutasö anö sitipa kökö pi thapo sinomotima kutenö, “Makö iapalo pia waikita manu kule, nii tä täa haitalötöö!” ĩ na Jesus a kuu hãtomakö' ĩ na ai töpö pi kuuma. Ĩ na ai töpö pi kuuma maaki, ai töpö aiki hö̃töwö, '“Töpö honimopalo opati wi, ĩ wa töpö täpäa haitalöpököö!” ĩ na Jesus a kuu hãtomakö' ĩ na ai töpö pi kuu pasioma. 30 'Wa tä thama piale, ĩ tä thama soataö!' ĩ na Jesus a kuu ha, Jutasö anö ĩsa ãi asawösö tälö nö, a hua kõo soatasolöma. A muma konasolöma. 31 Jutasö a muma konasolö noai ha, Jesus a hapalo haio nö, '“Jesus a toita apö asawö” ĩ na huki sanöma sa kupaso noai, ĩ sanö ĩ na ai sa töpö pi thama pia salo. “Teusö a toita apö asawö” ĩ na sa töpö pi thama naio pia salo. 32 “Teusö a toita apö asawöö!” ĩ na kamisanö sa töpö pi thamaö ha, “Jesus a hai, ĩ sanöma tä kupaso noai, ĩ a totiatalo opa naioö” Teusö anö ĩ na töpö pi thama hö̃töo kitä. “Jesus a totiatalo opawöö!” ĩ na Teusö anö töpö pi thama soata pia kule' ĩ na Jesus a kuuma. 33 Ĩ na Jesus a kuu nö, 'Ipa pö. Kamakö na sa kutio naio mai kitä. Sa konasolö pia salo. Kamakönö sa tae kitä maaki, sa koonö piale hamö makö nokapalo tai mi ipö kitä. Juteu pata töpö na ĩ na sa kuu waikioma. “Sa koonö piale hamö makö nokapalo taö mai kitä” ĩ na juteu pata töpö na sa kuu waikio kua noai na, ĩ na kamakö na ĩ na sa kuu nömöa kule. 34 Ai tänö makö noa thaa paio kua noai na, ĩ na huki kamisanö makö noa thaa mai kitä. Makö noa thaa wi, ĩ tute sa ta totoa pia kule. “Pö noimaso totihoö! Kamisanö makö noima kuatipili na, ĩ na makö noimaso kua nömöo haio totiopököö!” kamisanö ĩ na makö noa thaa kule. 35 Makö noimaso totio kuköma, ai töpö pewö aiki, “Ĩ töpö noimasoti wi, ĩ töpönö Jesus a hini totia apa asalö noa. Jesus a kai a hua sinomoti wi, ĩ töpö” ĩ na ai töpö kuu kitä' ĩ na Jesus a kuuma. 36 Ĩ na Jesus a kuu ha, Simão Pedro aiki, 'Pata! Witi hamö wa kõamö kulasolö pia kule?' ĩ na a kuu ha, 'Sa kõamö kulasolö piale hamö, huki ĩ hamö wa noka mai kitä. Waiha kamisa na wa nokapalo totio kitä' ĩ na Jesus a kuuma. 37 Ĩ na Jesus a kuu ha, 'Pata! Wi na tä kua pikioö ha, “Huki wa noka mai kitäö” wa kuu pikia kule? Kawa na sa nokapalo tä, ai töpönö sa säpa pi topa kule maaki, kawa na sa nokapalo satimo opa kitäö!' ĩ na Pedro a kuuma. 38 Ĩ na a kuu ha, Jesus aiki hö̃töwö, '“Kawa na sa nokapalo hö̃töa kutenö, ai töpönö sa säpa pi topa kule maaki, sa tokö mai kitäö!” ĩ na wa kuu totia kule ta o? Kalaka a komö paio mai ha, “Jesus sa tai mi ipö pasiwö” 3 wa kuu pi kupaso kitä. Sa kuu pole, ĩ pitili ta' ĩ na Pedro a na, ĩ na Jesus a kuuma.

14

1 Ĩ na tä kua tä, Jesus a hapalo kõo nö, 'Pö pi honipo ti! “Teusö a pitili” ĩ na pö pi kuu totioö! “Jesus a pitili” ĩ na pö pi kuu naio totioö! 2 Ipa hao a pililali hamö sai pö kua apa lasoa. Ĩ hamö sai pö kua apa lasoa mi aköna, “Sai pö kua apa lasoa” sa kuu mi kipi. Kamakö hai ĩ sai sa thaapö, sa huu koonö pia kule. 3 Sa kopölöma, kamakö hai ĩ sai sa thakö nö, kamisa na makö pilia koka naiki pia salo, sa waloa sapa kõikiso nö, makö naka konö nö, makö kai konasolö kitä. 4 Sa kõo piale, ĩ hamö pili tiso walopoli, ĩ ma tiso taö waikia' ĩ na Jesus a kuuma. 5 Ĩ na tä kua tä, Tomé aiki, 'Pata! Witi hamö wa koonö pia kule? Wa koonö piale ĩ sama tä tai mi. Önö kutenö, ĩ sama tiso taö naia soata kule ta o? Ĩ sama tiso taö maneö!' ĩ na Tomé a kuu ha, 6 Jesus aiki, 'Ĩ pili tiso lö kui, hi ĩ kamisa. Hi kama pitili sa. Õsi palimipama wi, hi ĩ sa. Kamisa na wa walo mi tä, ipa hao Teusö a na wa walo pasio mai kitä. 7 Kamakönö sa taö totioö aköna, ipa hao ma taö naia soatala pi. Huki ipa hao ma taö waikia kule. Ipa hao ma tapa waikioma' ĩ na Jesus a kuuma. 8 Ĩ na Jesus a kuu ha, 'Pata! Kamisamakö na au hao a mömaö! Au hao wa mömaö ha, “Aitaköö! Ĩ na pätawö” samakö kuu kitä' ĩ na Filipe a kuuma. 9 Ĩ na a kuu ha, Jesus aiki hö̃töwö, 'Filipe ai. Kamakö na sa kutia tä, tä tetepo opa waikia kule maaki, kawanö sa tai mia soatile? Ai wanö sa tapa waikio noai, ĩ wanö ipa hao a tapa naio waikioma. “Kamisamakö na au hao a mömaö!” wi na wa pi kuu salo, ĩ na wa kuu ke? 10 “Ipa hao a õsi na sa pilitia kule. Kamisa õsi na ipa hao a pilia hö̃tötia kule” ĩ na sa kuu totia kule. Filipe ai. “Jesus a kuuhe, ĩ pitili tä sai a” ĩ na wa pi kuu maa kule?' ĩ na Jesus a kuuma. Ĩ na a kuu nö, 'Kama sa pi saimo päo maneö! Ipa hao a pinö kamakö na sa hapalama päo ke. Kamisa õsi na ipa hao a pilitile, ĩ a kalipalo pasioö. Ĩ anö tä thama sinomo pasioö. 11 “Ipa hao a õsi na sa pilia, kamisa õsi na ipa hao a pilia hö̃tötia” ĩ na sa kuule, ĩ tä na, “Pitili ta” pö kuu! Sa hapaloö ha, “Ĩ pitili ta” makö pi kuu maama tä, sa tä aipama sinomoö ha, “Jesus a õsi na Teusö a pilitia salo! Jesus a õsi na Teusö a kalipalo opatiwö” ĩ na pö pi kuu! 12 “‘Jesus a pitili’ ĩ na wa pi kuu totio kuköma, sa tä aipama sinomo kua noai na, ĩ na wa tä thama totia hö̃töki kitä. Ipa hao a na sa koonö pia manu kule, pe epii wa tä aipama hasua apa haitio kitä” ĩ na sa kuu kuleö! Sa holisimo mai kitäö! 13 “Jesus a hai ĩ pö̃ a toita apö asawö” ĩ na sanöma sa töpö pi thama pia salo, ipa hao a na makö hapalo tä, kamisanö makö a hini ipa kitä. “Jesus sa thapo salo, ĩ nasimö wa tä thama mi salo” ĩ na makö kuu ha, ĩ na sa tä thama totiatalo opa hö̃töo kitä. 14 Kamisa na wa hapalo nö, “Kamisanö wa thapo salo, ĩ tä thamaö!” ĩ na makö kuu ha, sa tä thama totiatalo opa hö̃töo kitä' ĩ na Jesus a kuuma. 15 Ĩ na Jesus a kuu nö, 'Kamakönö sa noima sinomoti tä, kamisanö makö noa thati wi, ĩ ma ta hinini kitä. “Päla” makö kuu mai kitä. 16 Ipa hao a na sa nakoö ha, makö pasilipo sinomo wi, ipa hao anö ĩ ai a totoki kitä. Teusö a õsi kua tolele, ĩ a pitilimo opa wi, ĩ a totoki kitä. Ĩ a totoköma, kamakö na ĩ a kuo soatio kitä. Teusö a thapo pasio mai, ĩ töpönö Teusö a õsi kua tolele, ĩ a möö tai mi. Ĩ a na ĩ töpö moti ipö. Önö kutenö, Teusö a thapo mai, ĩ töpönö Teusö a õsi kua tolele, ĩ a pi täa tai mi pasiwö. Kamakö na Teusö a õsi kua tolele, ĩ a kuo soatio nö, kamakö õsi na a pilitia manu kule, Teusö a õsi kua tolele, ĩ ma taö öpa asaö. 18 Kamisanö makö hosa pasio mai kitä. Kamakö na sa waloa kõki kitä. 19 Tä tetepo pola tä kuno mai, Teusö a thapo mai, ĩ töpönö sa tapa kõo mai kitä. Kamakönö sa taa sisa konani kitä. Sa õsi palimi ipö kutenö, kamakö õsi palimia naipaso kitä. 20 Ĩ tä, “Pö̃ a õsi na Jesus a kutia. Jesus a õsi na sa kua hö̃tötia. Kamisa õsi na Jesus a kua hö̃tötia” ĩ na makö pi kuu hö̃töo kitä. 21 Kamisanö makö noa thatalati wi, ĩ wa ta hinia totilöma, ĩ wanö sa noima pasioö. Kawanö sa noimaö ha, ipa hao anö wa noima hö̃töo soata kitä. Kamisanö wa noima hö̃töo nö, kawa na sa tapamo sisa asa kitä' ĩ na Jesus a kuuma. 22 Ĩ na Jesus a kuu ha, Jutasö a hai, Jutasö Isökatiosisö aiki kuno mai, ai Jutasö aiki, 'Pata! Wi na wa pi kuu salo, sanöma töpö pewö na wa tapamo mai maaki, kamisamakö na wa tapamo sisa pia salo?' ĩ na a kuuma. 23 Ĩ na a kuu ha, 'Kawanö sa noima kuköma, kawanö sa kai a hinia totili kitä. Ipa hao anö wa noima hö̃töo soata kitä. Kawa na samakö waloiki nö, kawa õsi na samakö kuo soatio kitä. 24 Kawanö sa noima mi tä, kawanö sa kai a hini pasio mai kitä. “Päla” wa pi kuu totio kitä. Sa ta wäsäti wi, ĩ kamisa kai sai a mai kitä. Sa ta wäsä pia salo, sa pi saimo päo mai kitä. Ipa hao anö ta wäsä sinomo wi, ĩ sa ta hini sinomo nö, sa ta wäsä tolea päoö' ĩ na Jesus a kuuma. 25 Ĩ na Jesus a kuu nö, 'Kamakö na sa kua soala nö, ĩ sa ta wäsäti kipili. 26 Ipa hao a na sa nakoö ha, makö pasilipo sinomo wi, ĩ ipa hao a õsi kua tolele, ĩ a simöpali kitä. A simöpalöma, kamakö na ĩ Teusö a õsi kua tolele, ĩ anö ĩ tä pewö na makö pi hatukumani pia salo. Kamakö na sa kuu sinomopili, Teusö a õsi kua tolele, ĩ anö ĩ ta wäsä tolea kõo kitä. 27 Kamisanö makö pi topapalamaö. Kamisa pi topa kua wi na, ĩ na makö pewö pi topapalama thama hö̃töoö. Teusö a thapo mai, ĩ töpönö makö pi holisi topapalama kua wi na, ĩ na kamisanö makö pi holisi topapalama kua pasio mai kitä. Pö pi honipo ti! Pö kili ti! 28 “Sa konasolöma maaki, kamakö na sa huu sapa hö̃töo kõo kitäö! Sa sapa hö̃töa kopalo nö, kamakö na sa kutio kitäö!” ĩ na sa kuuhe, ĩ ma ta hinini ke. Ipa hao a na sa konasolö kitä. Pata sa hö̃töwö maaki, ipa hao a hai, ĩ pata tä sai totiwö. Ipa hao a na sa koonö pia manu kule, pö pi topaikiö! Kamakönö sa pii totia aköna, makö pi topapalo opöla pi. 29 “Jesus a kuupili, ĩ ta kuu pitilimo toleo totiatalo opa noa. Jesus a pitilimo totio opa nö kilia noa” waiha ĩ na makö pi thama pia salo, huki sa ta wäsä ke' ĩ na Jesus a kuuma. 30 Ĩ na Jesus a kuu nö, 'Sai tä sai patanö sanöma töpö pewö simöa sinomoti wi, ĩ a huimaö. Önö kutenö, kamakö na sa ta wäsä waikita pia kule. Sai tä sai patanö kamisa simöa pasio mi. 31 “Jesus anö pö̃ a noima apawö. Pö̃ anö Jesus a simöati ha, Jesus anö kama hai ĩ pö̃ a hinia totiatala apatiwö” ĩ na sanöma sa töpö pi thama pia salo, ipa hao sa hini totio sinomo pasioö' ĩ na Jesus a kuu nö, 'Pei. Makö huu konöö!' ĩ na a kuu soatama.

15

1 Ĩ na tä kua tä, Jesus a hapalo kõo nö, 'Upa mokö lalo wi, ĩ toto kua wi na, ĩ na sa kua hö̃töo asaö. Upa toto na sanöma tä kalipaloti wi, ĩ a kalipaloti kua wi na, ĩ na ipa hao a kalipalo kua hö̃töoö. 2 Ola toto tipöo kua wi na, ĩ na kamisa na töpö uni tipöa kua hö̃töa. Ai ola toto na ai mo lalo pasio mi ha, ĩ toto ola päpalö nö, toto ola hosa thata wi na, ĩ na kamisa na töpö kokale, ĩ ai tä tomöpo mi tä, ĩ na ipa hao anö ĩ a wani hosa thata hö̃töoö. Ai toto ola na mo lalo asa wi, ĩ toto ola na mokö siko lalotama apa pia salo, ĩ toto na ai toto kau kapisopö paale, ĩ toto kau päta pätama sinomotii. Ĩ na tä kua kua wi na, ĩ na makö kuaö. Kamisa na töpö kokale, ipa hao anö pe epii ĩ töpö totiama pia salo, ola toto na sanöma tä kalipalo kua wi na, ĩ na kamisa na töpö kokale, ĩ töpö na ĩ na ipa hao a kalipalo kua hö̃töoö. 3 Kamakö na wanisala tä kokakö noai, ĩ wanisala sa tä hosa waikilöma. Kamakö na sa ta wäsäti noai, ĩ tänö makö totiama waikioma' ĩ na Jesus a kuuma. 4 Ĩ na a kuu nö, 'Kamisa na makö kokapalo toitioö ha, kamakö õsi na sa kokapalo hö̃töo soatio kitä. Kolo toto na ai toto kolo kapisopö paa mi tä, ĩ toto na ai mokö lalo mi kui na, kamisa na ĩ na makö koka kua mi tä, toitai ma tä thati mai kitä. 5 Upa toto kolo kui na, ĩ na sa kuö hö̃töwö. Ĩ upa toto ola pakala kua kua wi na, ĩ na kamakö kua hö̃töoö. Kamisa na wa koka soatia, kawa na sa koka hö̃töa soatia, ĩ na makö kuati tä, pe epii toitai wa tä thaa soatio kitä. Kamisa na makö kokapalo mi tä, toitai ma tä thaa mai kitäö! 6 Toto ola hosalöma, toto hotea kulaso wi na, kamisa na wa kokapalo pasio mi tä, ĩ na wa hotea kulaso kitä. Ĩ toto ola hoteso noai ha, koa taka na ĩ toto saa thapi kitä. 7 Kamisa na makö koka totia soatia, kamakö na sa kai a koka totia hö̃töa soatia, ĩ na makö kua soatia tä, ma tä pi ipa wi, Teusö a na ĩ ma tä nakaö ha, Teusö anö tä totoa hö̃töki kitä. 8 Pe epii toitai ma tä thati tä, “Jesus a hai ĩ pö̃ Teusö a totiatalo opa asawöö!” ĩ na ma töpö pi thama kitä. Pe epii toitai ma tä thati tä, sa kai a hua sinomoti wi, ĩ makö sai kupaso kitä. 9 Ipa hao anö sa pi ipa sinomo kua wi na, ĩ na kamisanö makö pi ipa kua hö̃töoö. Kamisa na pö kokapalo soatioö! Kamisa na makö kokapalo soatio kuköma, kamisanö makö pi ipa kitä. 10 “Ĩ na a kua totihoö!” ipa hao a kuu wi, ĩ sa ta hini makoka totiatala apa salo, ipa hao a na sa kokapalo soatioö. Sa kokapalo soatio kutenö, ipa hao anö sa pi ipaö. Ĩ na makö kua hö̃töoö. “Ĩ na pö kua totihoö!” sa kuu wi, ĩ ma ta hini totio tä, kamisa na makö kokapalo soatio kitä. Kamisanö makö pi ipa soatio kitä' ĩ na Jesus a kuu nö, 11 'Kamisa pi topa kua wi na, ĩ na makö pi thama pia salo, ĩ sa ta wäsä ke. Makö pi topapalo opapö, ĩ sa ta wäsä ke. 12 “Kamisanö makö noima kua wi na, ĩ na pö noimaso kua totihoö!” ĩ na makö noa thaö. 13 Au noi wa töpö noama pia salo, wa säpamonasoma, ĩ wa töpö noima satia apa wi, ĩ wa. 14 “Ĩ na pö kua totihoö!” sa kuu pole, ĩ ma ta hini totioö ha, ipa noi makö. 15 Pata tänö töpö simöa sinomo wi, pata tä pi kuu pole, ĩ töpönö ĩ tä tai mi ipö. Önö kutenö, “Kamisanö makö simöa sinomo wi, ĩ makö” ĩ na sa kuu kõo mai kitä. Ipa hao a na sa ta hinipili, kamakö na ĩ sa tä pewö a wäsä waikioma kutenö, “Kamakö hai, ĩ ipa noi makö” huki kamakö na sa kuu totio nömöoö. 16 Kamakönö sa saipa maama. Kamisanö makö saia asapalöma. “Makö saipalö noai, ĩ makönö, ‘Jesus a pitili’ ai ma töpö pi thamapöö! Ĩ na ma töpö pi thama wi, ĩ töpönö sa hosa mai, sa thapo soatio wi, sa tä pi ipaö” ĩ na sa pi kuu soatama kutenö, makö saipalöma. “Jesus a pitili” ĩ na ai ma töpö pi thama kuköma, kamakönö sa thapo kutenö, kamakö hai ĩ pö̃ a na ma tä naka wi, kamakö hai ĩ pö̃ anö ĩ tä totoa hö̃töki kitä. 17 Önö kutenö, “Makö noimasopököö” kamisanö makö noa thaa kule' Jesus a kuuma. 18 Ĩ na Jesus a kuu nö, 'Teusö a thapo mai, ĩ töpönö makö wanipoö ha, pö pi hatukuikiö! Teusö a thapo mai, ĩ töpönö sa wanipo paio kipili ta pi kuu mai. 19 Teusö a thapo mai, ĩ töpö kua kua wi na, ĩ na makö kua hö̃töoö aköna, ĩ töpönö makö noima pola pi. “Ipa töpö” ĩ na töpö pi kuu nö, makö noima pola pi. Kamisanö makö saia pälöma kutenö, Teusö a thapo pasia mane, ĩ tiko töpö pasiwö. Önö kutenö, Teusö a thapo pasia mai, ĩ töpönö makö wanipoö. 20 “Töpö simöa sinomo wi, ĩ töpö hai, ĩ pata töpö mai kitä. Töpö simöa totio wi, ĩ a hai, ĩ pata tä sisawö” sa kuupili, ĩ tä na pö pi motimo tihöö! Ai töpönö sa peamatima kutenö, makö peama hö̃töo kitä. Ai töpönö sa kai a hininöma kutenö, makö kai hini hö̃töo kitä. 21 Kamakönö sa thapo waikia kutenö, sa thapo pasia mane, ĩ töpönö makö peama kitä. Sa simönö noai, ĩ töpönö ĩ a tai mi kutenö, makö peama kitä. 22 Ĩ töpö na sa wäo maama aköna, “Ĩ töpö wanisala apaö” Teusö a pi kuu maa noa kipi. Ĩ töpö na sa ta wäsä totioma kutenö, ĩ töpö aiki, “Teusö sa ta hini tai mi ipö salo, wanisala sa tä thaa päoma” ĩ na ĩ töpö kuu pasio mai kitä. 23 Sa wanipo opati wi, ĩ töpönö ipa hao a wanipo hö̃töoö. 24 Sa wanipo wi, ĩ töpö mamo tetela tä, ai töpö sanömanö tä thama tai mi pasii, ĩ sa tä thama asatioma. Ĩ sa tä thama maama aköna, “Ĩ töpö wanisala apaö” Teusö a pi kuu maa noa kipi. Sa tä thati asa noai, ĩ töpönö ĩ tä taa waikioma maaki, ĩ töpönö ipa hao a wanipoö, kamisa wanipoö, ĩ na töpö kua sinomoö. 25 Ĩ töpö noa thaa wi, ĩ tä waheta na ĩ na tä sãököo kuoma: “Sa wanisala maama maaki, ĩ töpönö sa wanipoma” ĩ na tä waheta kuuma. Ĩ töpönö sa wanipo sinomo kutenö, ĩ na ĩ tä waheta kuu noai, ĩ pitili ta kuo toleo totioma. 26 Makö pasilipo sinomo wi ĩ a waloki kitä. Teusö a õsi kua tolele, ĩ a lö kui, ĩ a. Teusö a õsi kua tolele, ĩ anö Teusö ta pitilii ta wäsä wi, Teusö a na ĩ a kutile, ĩ a waloki kitä. Teusö a na a kutio wi, kamisanö ĩ sa simöpali kitä. Ĩ anö sa wäsä kuki kitä. 27 Somi tä, kamisa na makö kutioma, huki kamisa na makö nokapalo soa kule. Önö kutenö, kamakönö sa wäsä hö̃töo kitä' ĩ na Jesus a kuuma.

16

1 Ĩ na Jesus a kuu nö, '“Sa kuuhe, ĩ ma ta hini totia manu kule, ‘Jesus a pitili’ ĩ na makö pi kuu mapo pasio mai kitä” ĩ na sa pi kuu salo, ĩ na sa kuu ke' ĩ na Jesus a kuu nö, 2 '“Hi juteu samakö kokamo sinomo wi, ĩ a sai na makö lisipo naio mai kitäö! Makö Teusömo naio mai kitäö!” kamakö na ĩ na ai töpö kuu läo kitä. Ĩ na tä kua tä, ai töpönö makö säpalö nö, “Teusö sama pasilia asa nö topali ke ö̃” ĩ na ĩ töpö pi kuu kitä. 3 Ĩ töpönö ipa hao a tai mi ipö. Kamisa tai mi nai soatawö. Önö kutenö, “Juteu samakö kokamo sinomo wi, ĩ a sai na makö lisipo naio mai kitäö!” ĩ töpö kuu nö, makö säpali kitä. Ĩ na ĩ töpönö makö thama läo kitä. 4 Waiha ĩ na makö thama läoö ha, “Ã ãi. ‘Ĩ na makö thama läo kitä’ ĩ na Jesus a kuu kipili ta o” ĩ na makö pi thama pia salo, sa kuu ke' ĩ na Jesus a kuuma. Ĩ na Jesus a kuu nö, 'Somi tä, makö nokapalama tute tä, kamakö na sa kuo sinomoma kutenö, “Waiha ai töpönö makö peama totio kitäö!” sa kuu maama. 5 Huki kamakö na sa kuo soatio mai kitä. Sa simöa totilö noai, ĩ a na sa konasolö pia salo. Ĩ hamö sa konasolö kitä maaki, “Witi hamö wa konasolö pia salo?” ai makönö sa noa thatala tikilia pasio mi. 6 “Sa konasolö pia salo” ĩ na sa kuu ha, makö pi wanitaloa apati kule. 7 Makö pi wanitaloa apati kule maaki, sa koonö piale, kamakö na ĩ tä topa kitä. Sa kononö nö, ĩ tä makö pasilipa sinomopö, kamakö na ĩ sa simöa hö̃töpali kitä. Sa kõo pailö mi tä, ĩ a walo paio mai kitä. Ĩ pitili ta. 8 Makö pasilipa sinomopö, ĩ Teusö a õsi kua tolele, ĩ a waloa haiki nö, sanöma töpö pi hatukumani, töpö pi taopamani, ĩ na a kua nö, “‘Wanisala sa tä thatala mi ipöö!’ ĩ na sa pi hole kuuma maaki, huki ĩ na sa pi kuu mai kitä” ĩ na ĩ anö sanöma töpö pi thama kitä. “‘Jesus anö toitai tä thaa sinomo mi’ sa pi hole kuuma maaki, huki ĩ na sa pi kuu mai kitä” ĩ na ĩ anö sanöma töpö pi thama naio kitä. Ĩ na töpö pi thama nö, “‘Wanisala tä thatala wi, ĩ tä noa na Teusö anö ĩ töpö peama mai kitä’ ĩ na sa pi hole kuuma maaki, huki ĩ na sa pi kuu maneö!” ĩ na Teusö a õsi kua tolele, ĩ anö ĩ na ĩ töpö pi thama kitä. 9 “Sa wanisala mai kitä” ĩ na sanöma töpö pi kuu hö̃töa kule maaki, “‘Jesus a pitili’ ĩ na sa pi kuu mi kutenö, sa wanisala apawöö!” ĩ na ĩ anö töpö pewö pi thama kitä. 10 Ipa hao Teusö a na sa konasolöma, kamakönö sa tapa soatio mai kitä. Sa tapa mi kutenö, sanöma töpö pi tapotiki nö, “Jesus a totiatalo opaö. A wanisala aköna, pö̃ a na a koonö maa noa kipi” ĩ na ĩ anö töpö pi thama kitä. 11 “Wanisala tä thatalati wi, ĩ tä noa na Teusö anö ĩ töpö peama mai kitä” töpö pi kuu kule maaki, “Sai tä sai patanö sanöma töpö simöa sinomo wi, ĩ sa wani peama totio kitäö!” Teusö a pi kuu waikioma kutenö, sanöma töpö aiki, “Wanisala ma tä thatala wi, ĩ tä noa na Teusö anö sanöma makö peama hö̃töo kitä” ĩ na ĩ töpö pi kuu kitä' ĩ na Jesus a kuuma. 12 Ĩ na Jesus a kuu nö, 'Kamakö na ai sa ta wäsä pi topa kule maaki, huki ĩ ma ta hini tai mi ipö kitä. 13 Huki ma ta hini tai mi ipö manu kui, kamakö na Teusö a õsi kua tolele, ĩ a waloki kitäö! A waloiki nö, makö pi hatukupamanöma, ma ta hinia totili kitä. Teusö ta pitilii, Teusö a õsi kua tolele, ĩ anö ĩ ta wäsä sinomoö ha, pitili ma tä pewö a hinini kitä. Kama a wäo saimo päo mai kitä. Kamisanö sa ta wäsäti wi, ĩ ta hiniti nö, ĩ ta wäsä tolea nömötio kitä. Ta wäsäti nö, “Waiha ĩ na tä kua kitä” Teusö a õsi kua tolele, ĩ a kuu kitäö! 14 Kamisanö sa ta wäsäti wi, Teusö a õsi kua tolele, ĩ anö ĩ ta hiniti nö, kamakö na ĩ ta wäsä tolea nömötio kitäö! Önö kutenö, “Jesus a totiatalo opa asawöö!” ĩ na ĩ anö makö pi thama kitäö! 15 Teusö anö tä thapo wi, ĩ sa tä thapo naioö. Önö kutenö, “Sa ta wäsäti wi, Teusö a õsi kua tolele, ĩ anö ĩ ta hiniti nö, kamakö na ĩ ta wäsä tolea nömötio kitä” ĩ na sa kuu ke' ĩ na Jesus a kuuma. 16 Ĩ na Jesus a kuu nö, 'Huki kamakönö sa tapati kule maaki, ĩ tökö soatawö, waiha waiha waiha sa tapamo maa soa pätasoö. Sa tapamo maa soapätalo nö, ĩ tökö soatawö, waiha, waiha, waiha, kamakö na sa tapamo kõa hö̃töa soataso kitäö!' ĩ na Jesus a kuuma. 17 Ĩ na Jesus a kuu ha, Jesus a kai a hua sinomoti noai, ĩ ai töpö aiki, 'Jesus a kuuhe, wi na ĩ pili ta kua totia kule? “Waiha waiha waiha kamakönö sa tapa maa soa pätasoö. Ĩ tä noa ha kõo soatawö, sa taa kõa soa hö̃tötalali kitä” a kuuhe, wi na ĩ pili ta kua totia kule? “Ipa hao a na sa konasolö pia salo” a kuu naioö. 18 “Ĩ tä noa ha kõo soatawö” ta kutalohe, wi na ĩ ta kua totia pasia kule? Ta kutalohe, ĩ ma ta hini mae' ĩ na töpö kuu hẽtupasoma. 19 Ĩ na töpö kuti tä, Jesus aiki, '“Wi na wa kuu totio ke? Ta wäsä makokoa totihoö!” ĩ na hi töpö pi kuu hãtoa alu kule' ĩ na Jesus a pi kuu nö, '“Waiha waiha waiha kamakönö sa tapa maa soa pätaso kitä. Ĩ tä noa ha kõo soatawö, sa taa kõa soa hö̃tötalali kitä” sa kuuhe, ĩ tä na makö pi wi na takömo nö, makö hapaloti alu kule?' ĩ na Jesus a kuu nö, 20 '“Hi tä uli pewö hamö sanöma töpö pewö pilipai, ĩ töpönö sa pii mi ipii, ĩ töpö pi mönahapalo opati tä, makö ö̃köpalo opa kuki kitä. Makö ö̃köpalotima maaki, makö ö̃köpalo wi ĩ tä mataso kitä. Makö pi mönaha apii makö kua kõki kitä” ĩ na sa kuu kule. Sa holisimo mai kitäö! 21 Suö tänö ulu tä thapa pia salo, a pea pia manu kule, a pi honipo opa kule maaki, ulu tä ositi wai thaa waikipalö nö, a pea wi ĩ tä matasoma kutenö, “Ulu sa ositi wai thapali ke” a pi kuu salo, a pi mönaha apaö. 22 Ĩ na kamakö kua hö̃töo kitä. Huki makö pi honipo kule maaki, kamakö na sa waloa kõköma, makö pi mönaha apa kõpaso kitä. Makö pi mönahapalo opati wi, ai tä sanömanö ĩ tä mapama kõo mai kitä. 23 “Ĩ tä, kamisa na ma tä hini kota mai kitä. Ĩ na tä kua tä, kamakönö sa thapo kutenö, ipa hao a na ma tä naka pi topa wi, ipa hao anö kamakö na ĩ tä totoa hö̃töki kitä” ĩ na sa kuu kule. Pitili sa. 24 “Jesus sa thapo kutenö, hao a na sa nako pia kule” ĩ na makö pi kuu mai ha, makö kua soa kule. Pö nako totihoö! Makö nako totioö ha, ipa hao anö tä totoa totia hö̃töki kitäö! Tä totoki ha, makö pi mönahapalo totio opa kitä. 25 Uni sa ta wäsä pätioma maaki, sa ta wäsä hatukua totio kuki kitä. “Ĩ na ipa hao a kuaö” sa kuu hatukua totio kitä. 26 Ĩ tä, kamakönö sa thapo kutenö, ipa hao a na makö nako kuki kitä. Ipa hao anö makö pi ipa waikia kutenö, “Kamisa na ma tä nakaö ha, ipa hao a na ĩ sa tä naka toleli kitä” ĩ na sa kuu mai kitä. Ipa hao anö makö pi ipa manu kui, ipa hao a na kama makö nako pasio soatapö. 27 Kamakönö sa pi ipa waikitioö. “Teusö a na Jesus a kuo noai, hi masita tä uli ha a walokö solöma” ĩ a na makö pi ku upaö. Ĩ na makö kuaö ha, ipa hao Teusö anö makö pi ipa hö̃töoö. 28 Ipa hao a na sa kutio kipili maaki, hi masita tä uli ha sa walokö solö kipili. Hi masita tä uli na sa kutioma, huki ipa hao a na sa koonö pia kule' ĩ na Jesus a kuuma. 29 Ĩ na Jesus a kuu ha, 'Huki uni wa ta wäsä päa maa kule. Wa hapalo hasulua totia kule. 30 “Ĩ wa tä pewö taö öpaö” huki kawa na samakö kuu kule. Kawa na sama ta hini paia maa kule maaki, samakö pewö pi tapotile, ĩ wa tä pewö taö toleha waikia. Önö kutenö, “Teusö a na wa kuo paitioma” samakö pi kuu totia kule' ĩ na Jesus a kai a hua sinomoti noai, ĩ na ĩ töpö kuuma. 31 Ĩ na ĩ töpö kuu ha, Jesus aiki, '“Teusö a na Jesus a kuo paitioma. Ĩ pitili tä sai a totiwö” huki ĩ na makö pi kuu totia kule ta o' ĩ na Jesus a kuu nö, 32 'Huki makö toköpalo pia alu kule. Makö toköoiki nö, sa takölö pia alu kule. Makö pewö kõo hätäho asakö noai ha, sami sa kuo haio hö̃töo kitä. Kamisa na ipa hao a kua hö̃töa kutenö, sami sa kuo toitio mai kitä' ĩ na Jesus a kuuma. 33 Ĩ na a kuu nö, '“Kamisa na makö kua sätäa naia totiki nö, makö pi topapalotipököö!” ĩ na sa pi kuu kutenö, sa kuu ke. Sa thapo pasia mane, ĩ töpönö makö peama soa pätaki ha, “Wi na taköö!” pö pi kuu tihöö! Pö pi honipo tihöö! Sa thapo mai, Sai tä sai patanö ĩ töpö simöa sinomoti wi, kamisanö ĩ sa töpö peama totio waikioma kutenö, pö pi topaikiö!' ĩ na kama kai a hua sinomoti noai, ĩ töpö na ĩ na Jesus a kuuma.

17

1 Ĩ na Jesus a kuuma, hi tä hẽtu hamö Teusö a kupoli hamö, ĩ hamö Jesus a nonoiki nö, 'Hapa. Hukikiö! Wa toita apö, wa wakala apö, ĩ na wa kui, pelupö sanö ĩ sa tä pewö mömapö, pelupö sa toita apö, sa wakala apö, ĩ na sa kui, sanöma töpö na kawanö ĩ tä mömaö! 2 “Kawanö sanöma wa töpö pewö simöa sinomoö!” kawanö ĩ na sa noa thama. Sa noa thaa nö, “Ipa ulu wa na sanöma sa töpö nokapalama wi, ĩ töpö õsi palimipalöö!” ĩ na kamisa na wa kuuma. 3 Kawa hai, Teusö pata wa asawö. Sanöma töpönö wa taö, kawanö Jesus Cristo sa simönö noai, ĩ töpönö ĩ sa taö hö̃töa, ĩ na sanöma töpö kua wi, ĩ töpönö makö taö kuköma, töpö õsi palimipasoö. 4 Hi masita tä uli na sa simönö nö, “Ĩ na wa kua totiopöö!” wa kuu noai, ĩ sa ta hinia totili kipili. Wa kuupili, ĩ na sa kua totio hö̃tötioma. Önö kutenö, wa toita apö, wa wakala apö, ĩ na wa kui, sanöma töpö na ĩ sa tä möma waikitioma. 5 Hapa. Hi masita tä uli kua paia mi tä, kawa na sa kutia tä, sa toita apö, sa wakala apö, ĩ na sa kui sa kutiopili na, ĩ na huki kawa na sa kutia kõo tä, ĩ na sa thama kõopököö! 6 Hi masita tä uli na sanöma töpö kule, kamisa na ai wa töpö totopipili, kawa na ĩ sa töpö pi hatukupamani kipili. Ĩ töpö hai, ĩ au töpö kuoma. Kamisa na kawanö ĩ wa töpö totopi kipili. Ĩ töpönö kawa kai a hinia totilöma. 7 Kawanö kamisa na wa tä totopipili, kawa na ĩ tä pewö kuo somama. Ĩ töpönö ĩ tä taö waikia kule. 8 Kawanö kamisa na wa kai totopipili, ĩ töpö na ĩ sa ta wäa nömöki ha, ĩ töpönö ĩ ta hininöma. Kawa na sa kua totiopili, ĩ töpönö ĩ tä taö. “Teusö pö̃ anö Jesus a simönöma” ĩ na ĩ töpö pi kuu totioö. 9 Kawa na sa hapalo tä, ĩ sa töpö a wäsäö. Kawa thapo mai, ĩ sa töpö a wäsä pasio mi. Kamisa na wa töpö totopipili, ĩ au töpö kutenö, ĩ sa töpö a wäsä asaö. 10 Sa töpö pewö thapo pole, ĩ au töpö pewö naiwö. Ĩ na tä kua tä, kawanö wa töpö pewö thapo pole, ĩ ipa töpö pewö naiwö. “Jesus a toita apö. A wakala apö” ĩ na ĩ töpönö ĩ na ai töpö pi thamati kule. 11 Hi masita tä uli na sa kutio mai kitä. Huki kawa na sa kopi pia kule. Hi masita tä uli na ĩ töpö kuo haio kitä. Hapa. Wa totiatalo opa asawö. Kawa, kamisa, ĩ na kilii makö koka kua wi na, ĩ na ĩ töpö sätäapalo kua naiopö, kamisa na wa töpö totopipili, ĩ töpö noama naioö! Wa lotete epii, kamisa na ĩ wa tä totopipili, ĩ tänö ĩ töpö noama totihoö! 12 Ĩ töpö na sa kua naitia tä, wa lotete epii, kamisa na ĩ wa tä totopipili, kamisanö ĩ tänö ĩ sa töpö noama totio opama. Töpö pea sinomoti wi, ĩ tä uli hamö ĩ ai tä huu pasio mai kitä. “Töpö pea sinomoti wi, ĩ tä uli hamö ĩ a wani hua pasisolö kitäö!” au waheta tä kuu wi, ĩ ta pitilio opa kuköpö, ai tä wani hai, ĩ töpö pea sinomoti wi, ĩ tä uli hamö ĩ a wani huu sisa pia salo. 13 Huki kawa na sa kopi pia kule. Hi masita tä uli na sa kua soaiki nö, ĩ töpö na sa ta wäsä kule. Sa pi topapalo opa kua wi na, ĩ na sa töpö pi topapalama thama pia salo, sa ta wäsä kule. 14 Ĩ töpö na kamisanö kawa kai a wäsäö ha, wa thapo pasia mane, ĩ töpönö ĩ ipa töpö hĩsu thama. Wa thapo mai, ĩ töpö kuati kua wi na ĩ na sa kua mai kitä. Kamisa kua wi na, ĩ na ipa töpö kua hö̃töoö. Wa thapo mai, ĩ töpö kuati kua wi na, ĩ na ipa töpö kua pasio mai kitä. Önö kutenö, wa thapo pasia mane, ĩ töpönö ipa töpö hĩsu thama. 15 “Wa thapo mai ĩ töpö na ipa töpö pilia sätäa naia manu kule, ipa töpö soka kopamanöö!” kawa na sa kuu mai kitä. “A wanisala apa wi, ĩ Sai tä sai pata na ipa töpö noamaö!” ĩ na sa kuu kitä. 16 Wa thapo mai ĩ töpö kua wi na, ĩ na sa kua pasio mai kitä. Kamisa kua kua wi na, ĩ na ipa töpö kua hö̃töoö. Wa thapo mai ĩ töpö kua kua wi na, ĩ na ipa töpö kua pasio mai kitä. 17 Kawanö ĩ wa töpö ausia totipalö nö, ĩ wa töpö thapo totiopököö! Tä pitili ipii, ĩ tänö wa töpö ausipalö nö, wa töpö thapo totiopököö! Tä pitili ipii, ĩ kawa kai a. 18 Hi masita tä uli hamö sanöma töpö pewö pilipai, ĩ töpö na kawanö sa simöa kuapili na, kamisanö ĩ na ipa sa töpö simöa kua hö̃töoma. 19 Ĩ sa töpö pasilipo pia salo, kawa na kama sa toto sapao kõoö. Kawanö ĩ wa töpö thapo totiopö, kawa na kama sa toto sapao kõoö. 20 Kawa na sa hapalo pola nö, ipa sa töpö a wäsä sisa mane. Ai töpönö ipa töpö kai a hininö nö, “Jesus a pitili” ĩ na töpö õsi pi kuu piale, ĩ sa töpö a wäsä naia kule. 21 Ipa töpö pewö noimaso toitiopöö! Ipa töpö wanihaso mai, töpö kutiopöö! Kamisa na wa koka hö̃töa, kawa na sa koka hö̃töa, ĩ na makö koka kua kua wi na, ĩ na kamakö na ipa töpö koka kua naia hö̃tököpöö! Ĩ na ipa töpö kuaö ha, wa thapo pasia mane, ĩ töpö aiki, “Teusö anö Jesus a simönöma. Pitili ta” töpö kuu kitä. 22 Kawa, kamisa, ĩ na kilii makö koka kua wi na, ĩ na ĩ töpö koka kua naiopö, kawanö sa wakalapamani kipili. Ĩ na ipa sa töpö wakala thaa naipali kipili. 23 Ĩ töpö koka toitiopö, ĩ ipa töpö na sa koka hö̃töa, kamisa na kawa koka hö̃töa, ĩ na makö koka kuaö! Ĩ töpö kokapalo toitioö ha, wa thapo pasia mane, ĩ töpö aiki, “Teusö anö Jesus a simönö noa. Teusö anö Jesus a pi ipa kua wi na, ĩ na Teusö anö kama hai ĩ töpö pi ipa kua hö̃töoö” ĩ na töpö kuu kitä. 24 Hapa. “Kamisa na ipa wa töpö simöapili, kawa na sa kuo piale ha, ĩ ha ĩ töpö kutio pasiopöö!” ĩ na sa kuu kule. Ĩ ha ĩ töpö kua pasitiki nö, kawanö sa wakalapamanipili, ĩ töpönö ĩ tä tapa totio naiopöö! Hi masita tä uli kua paia mi tä, kawanö sa pi ipa salo, sa wakalapamani kipili. 25 Hapa. Wa totiatalo opawö. Sanöma töpönö wa thapo mai, ĩ töpönö wa tai mi ipö sai maaki, kamisanö wa taö öpaö. Ipa töpö aiki, “Awai. Teusö anö Jesus a simönöma” ĩ na töpö kuu totioö. Ĩ tä na töpö pi moti mi. 26 Kawanö sa noima kuapili na, ĩ na ipa töpönö ai töpö noima kua hö̃töoö, ipa töpö õsi na sa pilia totia asaa, ĩ na ipa töpö kuapö, kawa na kamisanö ipa sa töpö pi hatukupamanöma. Kawa na ipa sa töpö pi hatukupama soatio kitäö!' Teusö a na ĩ na Jesus a kuuma.

18

1 Ĩ na tä kua tä, Teusö a na Jesus a hapalo matalo nö, Jesus a, kama kai a hua sinomoti wi ĩ töpö, ĩ na töpö kui töpö hua kononö nö, Setötõ tuu pökatö wai hamö hikali a paa laso pamö töpö hulasolöma. 2 Ĩ na tä kua tä, ĩ a hikali na Jesus anö kama hai ĩ töpö kai huu sinomotima kutenö, Jutasö anö Jesus a monima piale, ĩ aiki, 'Ĩ tä hikali na Jesus a huu hãtoa waikia lasoa' a pi kuuma. 3 Ĩ na tä kua tä, Teusö a täpä sinomo wi ĩ pata töpö, patiseu töpö, ĩ na töpö kui töpönö, sotatu töpö, Teusömo wi a sai na töpö läapalo sinomo wi ĩ töpö, ĩ na töpö kui Jutasö a na ĩ ai töpö simönöma. Ĩ töpö simöni ha, hikali a na Jesus a kuo laso pamö Jutasö anö ĩ töpö kai hua haia soatasolöma. Ĩ töpönö koa taka sii hili wi ĩ tä, asakosi halo, poo kökö, hii tiki, sokopi kökö, ĩ na tökö kui tökö kai hua haia soatasolöma. 4 Töpö hua haia soatasolö ha, Jesus a pi tao opa salo, 'Ĩ na tä kua kitä' a pi kuu waikia tä, ĩ töpö na a paa lälo nö, 'Ĩ witi pili ma taeti kule?' a kuu ha, 5 'Nasaté tili Jesus sama taeti kule' töpö kuu ha, 'Hi ĩ sa waikiwö' Jesus a kuuma. Jutasö anö Jesus a monima pole, ĩ töpö na ĩ a wani öpa tikilio naioma. 6 'Ĩ sa waikiwö' ĩ na Jesus a kuu ha, töpö kililo nö, ĩ tä töpö tekukua kotalo nö, töpö kelasoma. 7 Ĩ tökö soatawö, 'Ĩ witi pili ma taeti kule?' Jesus a kuu kotasoö ha, 'Nasaté tili Jesus sama taeti kule' töpö kuu ha, 8 '“Hi ĩ sa waikiwö” ĩ na sa kuu waikio ke nökö' Jesus a kuu nö, 'Kamakönö sa taeti waikia manu kule, ipa töpö hula kopalöö!' ĩ na Jesus a kuuma. 9 'Kamisa na wa töpö totopipili, ĩ sa töpö pewö noama hö̃töa soatia kule' pö̃ a na Jesus a kuu noai, ĩ na ĩ tä kuo toleo totiatalo hö̃töopö, 'Ipa töpö hula kopalöö!' Jesus a kuuma. 10 Ĩ na tä kua tä, Simão Pedro anö, poo a po pole, ĩ a po läkäa soatalö nö, Teusö a täpä totio wi ĩ pata tä na a kalipalo sinomo wi, ĩ a sömöka wani pasopalöma. Kate a poko kuamö kule hamö a sömöka kule, ĩ a sömöka pasopalöma. Mauku a hiloma. 11 Ĩ a sömöka pasopali ha, 'Au poo a titia kõköö!' ĩ na Jesus anö Pedro a noa thaa nö, '“Wa pea totiopökö” kamisa na ĩ na ipa hao a kuu totioma maaki, “Jesus a peama tihöö!” pö pi kuu tihöö! “Wa peapököö!” ipa hao anö sa noa thaa waikioma kutenö, “Awai. Sa peama päoö!” sa kuu kuleö!' Jesus a kuuma. 12 Ĩ na tä kua tä, ĩ sotatu töpö, ĩ sotatu töpö simöa sinomo wi ĩ a, Teusömo wi a sai ha töpö läapalo sinomo wi ĩ töpö, ĩ na töpö kui töpönö Jesus a huöa soatalö nö, a poko õka soatakö nö, 13 Anásö a pata kuo taso pamö a täa soatalölömae. Anásö a pata hai, Kaipasö hai ĩ pĩsi a. Ĩ tä inama na, Teusö a täpä totio wi ĩ Kaipasö a pata kuoma. 14 Kaipasö aiki, 'Ai töpönö sami ai tä säa sisapalöpököö! Sami ai tä säa sisapalöma, kamakö pewö säpa naio mai kitä' ĩ na Kaipasö anö töpö noa thaa noai, ĩ a. 15 Ĩ na tä kua tä, Simão Pedro a, Jesus a kai a hua sinomoti wi ĩ ai tä, Jesus a na ĩ na kilii töpö nokalolö nö, Teusö a täpä totio wi ĩ pata tä hai ĩ sai a na töpö walokö tasoma. Töpö waloikitö nö, Jesus a kai a hua sinomoti wi, pata tänö ĩ a taö öpama kutenö, pata tä sai pö sika na tä hokale ha, ĩ ha Jesus a kai lisipo tä, Jesus a kai a hua sinomoti wi ĩ a lisia tikilia naipasoma. 16 Sai a päka holeo pa Pedro a öpa haitioma. Jesus a kai a hua sinomoti wi, pata tänö ĩ a taö öpa noai, ĩ a lisia sapa kotalo nö, sai a päka holeo pa suö tä läapalo pole, ĩ a na a hapalo nö, õsimö hamö Pedro a kai lisia sapa nömöpasolöma. 17 A kai lisipo pia tä, sai a päka holeo pa suö tä läapalo pole, Pedro a na ĩ aiki, 'Jesus wa kai a hua sinomoti wi wa hãtowö?' ĩ na a kuu ha, 'Ma. Ĩ sa pasi mai kitä' Pedro a kuu hö̃töoma. 18 Ĩ na tä kua tä, töpö pewö wati ipö salo, ĩ tä sai na töpö kalipalo sinomo wi ĩ töpö, töpö läapalo sinomo wi ĩ töpö, ĩ na töpö kui töpönö koa taka thakö nö, ĩ taka kasö na töpö öpa sototoiki nö, töpö pomopaloma. Ĩ ha Pedro a öpa tikilia naiki nö, a pomo naioma. 19 Ĩ na tä kua tä, Teusö a täpä totio wi, ĩ pata tänö Jesus a hapalama nö, 'Kawa kai a hua sinomoti wi, wi na ĩ töpö kua totioö? Wa ta wäsä sinomo wi, wi na ĩ ta kua totia?' a kuuma. 20 A kuu ha, 'Hoka apa pa ĩ töpö pewö na sa ta wäsä sinomoti thali. Juteu töpö kokamo sinomo wi, ĩ a sai na sa ta wäsätii, Teusömo wi a sai ha sa ta wäsätii, ĩ na sa ta wäsä kuati thali. Sa ta wäsä hãtomo maa thaliö! 21 Önö kutenö, wi na wa pi kuu salo, kawanö sa huama kule? Sa ta wäsäti ha, töpö sömöka taa pasitio noai, ĩ wa töpö huama mi salo. Sa ta wäsätipili, ĩ töpönö ĩ ta taö waikile kitä' Jesus a kuuma. 22 Ĩ na Jesus a kuu ha, töpö läapaloti wi, ĩ ha ĩ töpö öpa sototole, ĩ ai tänö Jesus a moikömö na tä tĩathoa soatakö nö, 'Teusö a täpä totio wi, ĩ pata tä na, ĩ na wa kuu kili maapa wi' ĩ na a kuu ha, 23 Jesus aiki hö̃töwö, '“Jesus a hapalo wanisala hãto alu kule” wa pi kuu salo, hi töpö öpa sototole, ĩ töpö pewö na ĩ ta kateha totioö! Sa kuuhe, ĩ pitili ta maaki, wi na wa pi kuu salo, sa sä ke?' ĩ na Jesus a kuuma. 24 Ĩ na Jesus a kuuma, Teusö a täpä totio wi, ĩ pata tä Kaipasö a na Anásö a patanö Jesus a õkama simöpalöma. 25 Ĩ na tä kua tä, Simão Pedro a öpatiki nö, a pomoti tä, 'Jesus a kai a hua sinomoti wi, ĩ wa hãtowö?' töpö kuu ha, 'Ma. Ĩ sa pasi mai kitä' Pedro a kuu hö̃töoma. 26 A kuu ha, Teusö a täpä totio wi ĩ pata tä na töpö kalipalo sinomo wi, Pedro anö ĩ ai tä sömöka wani pasopalö noai, ĩ a wani na, 'Ipa ai tä' a kuuto wi, ĩ aiki, 'Ki hikali a na Jesus a na wa huu naio hãto kipili?' a kuu ha, 27 'Naiö!' Pedro a kuu kõoma. Ĩ tä soatawö kalaka a komöa soatasoma. 28 Ĩ na tä kua tä, Kaipasö a sai pö ha töpö kuoma, homa tili pata tä sai pö pata hamö Jesus a noka nömömanönömae. Tä halu waikioma. Ĩ tä wakala na juteu töpö pásökoamo nö, töpö iapalo waikio piaö ha, homa tili pata tä sai pö na ĩ töpö lisipo maama. 'Makö iapalo pia tä, tiko töpö sai pö na lisipaso wi, ĩ tä kua pasia mai kitä' juteu töpö pi kuu salo, homa tili pata tä sai pö ha ĩ töpö lisipo maama. 29 Önö kutenö, homa tili pata tä hai, ĩ Pilatosö a pata lisia kopalo nö, '“Hi a wani wanisala apa pasioö” makö kuu pole, ĩ anö ĩ ka pi tä thaa totioma?' Pilatosö a pata kuu ha, 30 'Ĩ anö wanisala tä thaa maama aköna, kawa na sama wani hilapala solöa mana pi' töpö kuuma. 31 Töpö kuu ha, 'Kamakönö a noka komanönöö! Kamakö hai ĩ pata töpönö töpö noa thaa noai, ĩ ma tä waheta möö paio nö, “‘Ĩ na pö kua ti!’ pata töpönö töpö noa thaa thali maaki, ĩ na hi a wani kua satimo opa kutenö, a wanisala apaö. Önö kutenö, ma wani säpalö nököö!” ĩ na makö kuupököö!' ĩ na Pilatosö a kuuma. A kuu ha, '“Ai tä säpa maikiö!” ĩ na homa tili pata töpönö makö noa thama kutenö, kama samakönö Jesus sama säpa mai kitäö!' ĩ na ĩ juteu töpö kuuma. 32 'Sa säpamonaso pia wi, ĩ na tä kua kitä' Jesus a kuu waikio noai, ĩ ta pitilio opa kuköpö, 'Homa tili töpönö hii ti pakalai ti ha a säpalöpöö!' ĩ na juteu töpö pi a kuu nö, 'Kamisamakönö kuno maiö!' töpö kuuma. 33 Ĩ na töpö kuuma, kama sai pö ha Pilatosö a lisia kotalo nö, Jesus a naka soatalö nö, 'Juteu töpö na wa kaikanamo wi, ĩ wa?' a kuu ha, 34 'Kama wa pi saimo nö, wa kuu ke? Ai töpönö kawa na ĩ ta wäa hãtokömakö?' Jesus a kuu ha, 35 'Wi na wa pi kuu totia kule? Kama sa pi saimo päo mai kitä. Juteu sa pasi mai kitä. Au ai juteu töpö, Teusö a täpä sinomo wi ĩ pata töpö, ĩ na töpö kui töpönö kamisa na wa namo simökömae. Wi na pili wa kua totioma?' Pilatosö a kuuma. 36 A kuu ha, 'Hi masita tä uli na töpö kule, ĩ töpönö sa kaikanapa maama. Ĩ töpönö sa kaikanapalöma aköna, kamisa na töpö nokapaloti wi, ĩ töpö waitilimo opöla pi. “Juteu pata töpö na Jesus a namo simöki pia salo” ipa töpö pi kuu nö, töpö waitilimo pola pi. Sanöma tä kaikana kua wi na, ĩ na sa kua pasio mai kitä' Jesus a kuuma. 37 Ĩ na Jesus a kuu ha, 'Ĩ na wa kuu manu kule, kaikana wa totihiwö?' Pilatosö a kuu ha, '“Kaikana wa” kama wa kuu ke' Jesus a kuu nö, 'Pitili sa ta wäsä sisapö, sa kupalo nö, hi masita tä uli na sa huma. Ai sanöma töpö pitilimo totio opa wi ĩ töpönö sa hini kitä' Jesus a kuu ha, 38 '“Pitili ta” wa kuu pole, ĩ ka pi wa ta kateha kule?' Pilatosö a kuuma. Ĩ na Pilatosö a kuu nö, atu hamö juteu töpö sototole, ĩ hamö a lisia kotalo nö, ĩ töpö na a hapalo nö, 'Hi a wanisala mi ipöö! A wanisala mi kutenö, “A säpalöö!” sa kuu mai kitä' ĩ na Pilatosö a kuu nö, 39 'Pi naka. Ĩ tä inama pewö na makö pásökoamo tä, titita wi a sai na töpö titile, ĩ ai ma tä saili ha, ĩ sa tä kusöa kopamanö nö, sa tä atupama sinomo kõo thali. Önö kutenö, hi a kaikanamo wi, juteu makö na ĩ sa atupamanöpö? “Awai” makö kuu kitä?' ĩ na Pilatosö a kuuma. 40 Ĩ na Pilatosö a kuu ha, 'Ma. Ĩ aiki, kuno mai. Pahapásö a atua kõa pasipamanöö!' töpö lalupalo pola nö, töpö pewö a kuuma. Pahapásö a lö kui, homa tili pata töpö na a waitilimo sinomo noai, ĩ a.

19

1 Ĩ na tä kua tä, Pilatosö a patanö Jesus a nakalö nö, a soapamanöma. 2 A soapamanöma, sotatu töpönö toto mösököpö öpii totonö kaikana tä hesowa pö kui na, ĩ na tä hesowa kui tä tiäpalö nö, Jesus a he na hesowa a mösököpö öpii a hesowa sohomakömae. Ĩ a hesowa sohomakö nö, kaikana töpö haloi ösöpö usi kui na, ĩ na ösö usi kui ösö na Jesus a halomakö nö, 3 Jesus a na sotatu töpö walopa nö, 'Juteu töpö na wa kaikanamo wi ĩ waö! Wa kaikanamo totio wi ĩ waö! Siwawö' töpö kuu pi wasöa soatalo nö, pili töpö ami kotopönö Jesus a soa soatamae. 4 Ĩ na tä kua tä, juteu töpö sototole, ĩ hamö Pilatosö a lisia kotalo nö, 'Pi naka. “‘Jesus anö wanisala tä thaa mi kutenö, Jesus sa peama wani ipöö!’ ĩ na Pilatosö a pi kulaso noa” ĩ na makö pi thama pia salo, kamakö na Jesus sa hila pia kulasoi' Pilatosö a kuuma. 5 Ĩ na tä kua tä, hesowa mösököpö öpii a hesowa sohopoö, haloi ösö usii ösö halopoö, ĩ na Jesus anö tä pewö thaa thalö nö, Pilatosö a öpa taso pamö Jesus a lisia kõo soatasolöma. A lisia kõo soatasoö ha, juteu töpö na Pilatosö aiki, 'Hi wano tä möö!' Pilatosö a kuuma. 6 Ĩ ha, Teusö a täpä sinomo wi ĩ pata töpö, töpö läapalo sinomoti wi ĩ töpö, ĩ na kilii töpönö Jesus a talalö nö, 'Hii ti pakalai ti ha a sätäa ösömaköö! Hii ti pakalai ti ha a sätäa ösömaköö!' ĩ na töpö kuu pola nö, töpö lalupalo opama. Ĩ na töpö kuu ha, 'Kamakönököö! Kamakönö ma tä läkälölö nö, ti pakalai ti ha a pi hĩtaköheö! Kamisa aiki, “Jesus a wanisala” sa kuu pasio mai kitä. A wanisala mi ipö' Pilatosö a kuu ha, 7 juteu töpö aiki hö̃töwö, '“‘Teusö pelupö sa’ ĩ na ai tä kuu ha, a säpamanöpöö!” ĩ na pata töpönö juteu samakö noa thaa noai, ĩ na ĩ tä waheta kuu. Ĩ sama tä waheta hini taö öpa salo, “Jesus a säpamanöpö” samakö kuu kule. “Teusö pelupö sa” a kuu thali manu kui, a säpamanöpököö!' töpö kuuma. 8 '“Teusö pelupö sa” a kuu thaliö!' ĩ na töpö kuu ha, Pilatosö a kilia apösoma. 9 A kilia apölo nö, sai a õsi na a lisia kopalolö nö, Jesus a na, 'Witi hamö wa kuomö kuo somama?' ĩ na a kuuma maaki, Jesus a hapalo hö̃töo maama. 10 Jesus a hapalo hö̃töo mi ha, 'Kamisa na wa hapalo hö̃töo mi ipö? Pata sa kutenö, “Jesus a kusöa kopalöö!” sa kuu ha, wa kusöa hö̃töa kopali kitä ta pi kuu mai. “Ti pakalai ti ha a pi hĩtaköö!” sa kuu ha, wa pi hĩtaki kitä ta pi kuu mai' Pilatosö a kuuma. 11 A kuu ha, 'Teusö a hai, ĩ pata tä sai aiki, “‘Ĩ na Jesus a thamaheö!’ Pilatosö a kuupöö!” ĩ na Teusö a kuu mi aköna, “Ĩ na Jesus a thamaheö!” wa kuu taö mana pi. Önö kutenö, kawa na sa namo simökö noai, ĩ a wanisala satia apaö' Jesus a kuuma. 12 Ĩ na Jesus a kuu ha, Pilatosö anö Jesus a kusöpa pi topa kõoma. A kusöpa pi topa kõa kule maaki, juteu töpö hapalo lalupalo läatalo opama. 'Kawanö hi wa kusöa kopalöma, Sesa kaikana tänö wa noimapö wa mai kitä. Ai tä hai, “Kaikana sa” a kuti wi, ĩ anö Sesa a pata wanipo wi, ĩ a ta pi kuu mai. “Kaikana sa” Jesus a kuti manu kule, Sesa a pata wanipo wi, ĩ a kutenö, a kusöpa kõo tihöö!' ĩ na juteu töpö kupaloma. 13 Ĩ na juteu töpö kuu wi, Pilatosö anö ĩ ta hininö nö, Jesus a atua kopamanö nö, tä makokama läapalo sinomo wi, ĩ ti na Pilatosö a loköma. Maa makö patete pata paale ha, ĩ ha lotami ti hõtole, ĩ 'Kapatá' ĩ na epöteu töpö kuu thali. Ĩ ha Pilatosö a lokö tasoma. 14 A lotia tasoa tä, tä motokö hẽtupo pia kule. Ĩ hena tä, juteu töpö pásökoamopö tä wakala kupasoö. Pilatosö a loiki nö, juteu töpö na a hapalo hö̃töo kõoma. A hapalo nö, 'Ma tä möö nökö. Jesus a öpale, ĩ kamakö hai ĩ kaikana tä' a kuuma. 15 A kuu ha, 'A säpalöö! A säpalöö! Ti pakalai ti ha a pi hĩtaköö!' töpö kuu lalupalo opama. Töpö kuu ha, '“Kamisamakö hai ĩ kaikana tä säpalöö!” makö kuu saile ta?' Pilatosö a kuu ha, Teusö a täpä sinomo wi ĩ pata töpö aiki hö̃töwö, 'Sesa a pata hai, kamisamakö hai ĩ kaikana tä pata sisawö' töpö kuuma. 16 Ĩ na töpö kuu ha, sotatu töpö na Pilatosö aiki, 'Pei. Ti pakalai ti ha a sätämaköö!' ĩ na Pilatosö a kuu nö, ĩ töpö na Jesus a totoköma. Jesus a totoki ha, sotatu töpönö Jesus a nokamanönöma. 17 Ĩ ha, ti pakalai ti ha Jesus a pi hĩtaköpö, Jesus kamanö ĩ ti maoa soatalölö nö, He manokosi tä heu na ĩ ti kai walokö tasoma. 'Kókota heuma' epöteu töpö kuuto wi, ĩ tä heu hamö a walokö tasoma. 18 Ĩ tä heu na hii ti pakalai ti ha Jesus a sätämaköma. Ai polakapi töpö solo. Ai tä hẽtu ha ai tä sätämakö nö, a pi hĩtaki, ai tä hẽtu ha soatawö ai tä sätämakö nö, a pi hĩta kotöa soataki, mötali tä sai ha Jesus a sätämakö nö, a pi hĩtaki, ĩ na tä thaköma. 19 Ĩ ha, Pilatosö anö tä sãököpamanö nö, Nasaté tili Jesus a. Juteu töpö hai ĩ kaikana tä tä sãököle, ĩ na ĩ tä sãökama kuuma. Tä sãököpamanö nö, pakalai ti hösöka na tä sätämaköma. 20 Juteu töpö kai, homa tili töpö kai, köteeku töpö kai, ĩ na töpö kai kui töpö kai sãökököma. Jetusalẽi tä uli hö̃köa apa kutenö, Jesus a pi hĩtale tä heuma hamö jetusalẽi tili töpö ekuiki nö, tä sãököle, ĩ tä möpala apamae. 21 Tä möpala apa nö, Teusö a täpä sinomo wi, Pilatosö a na ĩ pata töpö aiki, '“Juteu töpö hai ĩ kaikana täö!” tä kuu wi tä sãöka maikiö! “‘Juteu töpö hai ĩ kaikana sa’ hi a kuu thaliö!” ĩ na tä sãökama kuu wi, ĩ tä sãököa totia pasikiö!' töpö kuu ha, 22 'Sa tä sãöka noai, ĩ tä sai waikiwö. Ai sa tä sãöka kota mai kitä' Pilatosö a kuu hö̃töoma. 23 Ĩ na tä kua tä, hii ti pakalai ti ha sotatu töpönö Jesus a pi hĩtakö noai ha, Jesus a hai ĩ haloi ösö pewö tälö nö, ai sotatu tänö ai ösö täli, ai sotatu tänö ai ösö täli, ai sotatu tänö ai ösö täli, ai sotatu tänö ai ösö täli, ĩ na ösö täa hätäha thalalömae. Ĩ na ösö sua hätäha thalalöma maaki, sami ai ösö paa haipasoma. Ĩ ösö hẽhama pasi mai ha, ösö paa haipasoma. 24 'Ösö kakapa mai nököö! Sami ai wanö ĩ ösö komii ösö täa totia pasilöö!' töpö kuu nö, 'Maa ma ose säsäha nö, “Ĩ anökö” makö kuupököö!' töpö kuuma. 'Ĩ töpönö ipa haloi ösö täa hätähäalalöma. Maa makö ose wai säsäha nö, sami ai tänö ipa ai ösö komi täa totia pasilöma' ĩ na sutu ha Teusö tä waheta kuu noai, ĩ pitili ta kuo totio opama. 25 Ĩ na tä kua tä, ti pakalai ti ha Jesus a pi hĩtale, ĩ ti kotö ha Jesus a hai ĩ pöpönö a sai, pöpönö osa a, Klopasö a hai ĩ pusopö Maria a, matala tilisoma Maria a, ĩ na töpö kui töpö öpa sätätioma. 26 Töpö öpa sätätia tä, Jesus anö kama hai ĩ pöpönö a möö nö, kama kai a hua sinomoti noai, ĩ a pi ipa noai, ĩ a möö naio nö, 'Napa. Mi a hai ĩ au ulu a' a kuu nö, 27 kama kai a hua sinomoti noai, ĩ a na, 'Mi a hai, ĩ au nao a' a kuuma. A kuu ha, Jesus a kai a hua sinomoti noai, ĩ anö Jesus a hai ĩ pöpönö a tälö nö, 'Kamisa sai pö ha a pilia nömötikiö!' a kuuma. 28 Ĩ na tä kua tä, Jesus aiki, '“Ĩ na tä thama totioö!” kamisa na ipa hao Teusö a kupili, ĩ sa tä pewö thaa hö̃töa waikipalöma' Jesus a pi kuuma, 'Teusö tä waheta kuu noai na, ĩ na sa kua tolea totio pia kule' Jesus a pi kuu nö, 'Sa amisi ipö sai' a kuuma. 29 Ĩ na Jesus a kuu ha, hapoka a õsi na tuu nasii tuu kule, ĩ tuu na tä kauko opii tä kemakö nö, hisopo ösö ola na tä kauko opii ĩ tä tikimakö nö, Jesus a kai na tuu pi tipömaköma. 30 Jesus anö ĩ tuu koa nö, 'Sa tä pewö thama hötötöa waikio ke. Ĩ naköö!' Jesus a kuuma. A kuu nö, a mãi poa soataiki nö, Teusö a na a õsi totokö nö, a noma soatasoma. 31 Ĩ na tä kua tä, juteu töpö aiki, 'Hena tä, kalipalo mai, ĩ sápatu tä wakala. Makö Teusömo totio wi tä wakala. Önö kutenö, hena tä ti pakalai ti ha töpö pi hĩta soale, ĩ tä wanisala apöle kitä' juteu töpö pi kuu kutenö, Pilatosö a pata na, 'Ti pakalai ti ha töpö pi hĩtalati, ĩ töpö konona pewö kälalötö nö, töpö koananötöö!' töpö kuuma. 32 Ĩ na töpö kuu ha, sotatu töpö ekua soataiki nö, Jesus a pi hĩtale, ĩ ai tä tutakö ha ai tä pi hĩtale, ĩ a konona käpali, ai tä tutakö hẽtu ha ai tä pi hĩta soatale, ĩ a konona käa naia soapali, ĩ na tä kua tä, 33 Jesus a noma pasia waikilasoma kutenö, a konona käpa pasio maama. 34 A konona käpa maama maaki, ai sotatu tänö sokopi anö Jesus a lepuku tiwöhököma. Tä tiwöhököma, iä iä tä nia soatasoö. Maa tuu nia tikilia soasoö. Ĩ na tä kuama. 35 Ĩ sa tä taa pasio noai, ĩ sanö sa ta wäsä pasioma. 'Jesus a pitili' ĩ na makö pi kuu kuköpö, sa ta wäsäma. Sa ta wäsä noai, ĩ pitili ta. 'Pitili sa totiwö a' ĩ na sa kuu kule. 36 Sotatu töpönö Jesus a konona käpa maama kutenö, 'Ai sami tu käpa mai kitä' ĩ na sutu ha ĩ na Teusö tä waheta kuu waikio noai, ĩ pitili ta kuo toleo totioma. 37 'Ai töpönö a tiwöhölö noai, ĩ töpönö ĩ a möö kitä' ĩ na Teusö tä waheta kuu naio waikioma. 38 Ĩ na tä kua tä, atimatéia tili tä José anö Pilatosö a na Jesus a nomawö kai nakama. José anö Jesus a kai a hua naitioma maaki, juteu töpö na a kili ipa kutenö, 'Jesus sa kai a hua naitio wi ĩ sa' ĩ na a kuu kili ipama. José anö Jesus a nomawö kai nakaö ha, 'A nomawö tälölöö!' Pilatosö a pata kuu ha, José a ekua soataiki nö, a nomawö täa soatalölöma. 39 Mumai ha Jesus a na Nikotemosö a noimo noai, José a na ĩ a ekua naiköma. Nomawö tä hulukua sinomo wi, Nikotemosö anö ĩ pãhi pãhi tä kai ekua naiköma. Miha tä pãhi, aloésö tä pãhi, ĩ na tä kui, pãhi pãhi tä hute pata, ĩ 35 kilu kui, ĩ na tä kai ekua kuköma. 40 Ĩ polakapi töpönö Jesus a nomawö tälölö nö, watata ösökönö a nomawö haloa kolilipali, pãhi pãhi tänö watata ösökö hulukulali, ĩ na tä thamama. Ĩ na nomawö töpö na juteu töpönö ĩ nomawö töpö thama läo sinomotima. 41 Ki hamö ti pakalai ti ha Jesus a pi hĩta laso noai, ĩ tä uli kulali hamö ai töpönö hikali a thakö noai, ĩ a hikali na nomawö tä titita wi, ĩ nasimö maa maka kuoma. Ĩ maa maka na nomawö tä titia paio mai ha maa maka kuo soatio paioma. 42 Jesus a nomaso noai, ĩ hena tä juteu töpö kalipalo mai, ĩ sápatu tä wakala kua soataköma kutenö, ĩ maa maka atepa apa salo, ĩ ha ĩ töpönö Jesus a titia atea soataköma.

20

1 Ĩ na tä kua tä, tomĩku tä wakala halu pia tä, maa maka hamö matala tilisoma tä Maria hua halusolöö. A hua halulolö nö, maa maka pata hamö Jesus a nomawö pi titio taso noai hamö a waloikitö nö, maa ma patanö taka lakö noai, taka hãkoa kõa waikipalö noai taka tapama. 2 Ĩ taka hãkoa talalö nö, Simão Pedro a, Jesus a kai a hua sinomoti noai, Jesus anö a pi ipa noai ĩ a, ĩ na töpö kui töpö na matala tilisoma tä Maria läläa soatalolö nö, 'Taka poke thaiö! Ai töpönö Jesus a Kaikana tälölöpa noa thaiö! Witi hamö ai töpönö a thaköma kuno mai?' a kuuma. 3 Ĩ na a kuu ha, Pedro a, Jesus a kai a hua naitio noai ĩ a, ĩ na kilii, maa maka hamö Jesus a nomawö titio noai, ĩ taka poke hamö ĩ töpö hua soatasolöma. 4 Ĩ polakapi töpö läläa soatasolöma maaki, Jesus a kai a hua naitio noai, Jesus a nomawö titio taso noai, ĩ ha ĩ a läläa toleha asasolöma, a waloa somakö tasoma. 5 A walotaikitö nö, a mãi poa soataiki nö, watata ösökönö Jesus a nomawö halopalö noai, ĩ ösö makea tapa kule maaki, a lisipo maama. 6 Simão Pedro a läläa haioolö nö, a waloa haitaikitö nö, Jesus a titio noai, ĩ taka poke hamö a luköa soatasolöma. A luköa soatalolö nö, tä möapalalö ha, watata ösökö makea tapa kõo päoma. 7 Jesus a he halo noai, ĩ ösö taa nömöa kõa pälalö tasoma. Ĩ ösö kõhehamai, ösö makeo soka pasioma. 8 Ĩ ha, Jesus a kai a hua naitio noai, maa maka ha ĩ a waloa somakö taso noai, ĩ a luköa nömötalolö nö, tä talalö nö, 'Jesus a temöa konasomakö' a pi kuuma. 9 'Cristo a nomaso kitä maaki, a temöa konaso kitä' ĩ na Teusö tä waheta kuu noai, ĩ töpönö ĩ tä hini pasio mai ha, ĩ töpö kuo paitioma. 10 Ĩ na tä kua tä, Jesus a kai a hua sinomoti noai ĩ töpö konasolö noai ha, 11 atu ha Maria Matalena a ö̃kö kai öpa haio soatioma. A ö̃köti tä, a mãi poiki nö, maa maka na tä möö tikilitalöma, 12 polakapi ãju töpö loa talalöma. Ĩ töpönö watata ösö ausi ipii ösö halopoma. Jesus a he makeomö kuoma hamö, ĩ hamö ai tä loa kule. Jesus a konona kuomö kuoma hamö ai tä loa kule. 13 Maria a na töpö hapalo nö, 'Suö ai! Wi na wa pi kuu salo, wa ö̃köti kule?' ĩ na ĩ töpö kuu ha, 'Ai töpönö ipa Jesus pata tä täa hãtolölömaö! Witi hamö a täamö thalölöma kuno mai?' ĩ na Maria a kuu nö, 14 a nomöhöa soatalo nö, Jesus a öpa taa soatalalöma maaki, 'Ã ãi. Jesus aö!' a pi kuu soata maama. 15 Ĩ na tä kua tä, Jesus aiki, 'Suö ai! Wi na wa pi kuu salo, wa ö̃köti kule? Ĩ witi pili wa taeti kule?' ĩ na a kuu ha, 'Hi hikali a na a kalipalo sinomo wi, ĩ a hãtowöö!' Maria a pi kuu nö, 'Kawanö Jesus wa täa hãtolöma? Jesus wa täa hãtolöma salo, “Ĩ hamö sa tä tälölö keheö!” kamisa na wa kuu hatukua totiatalo mi salo. Ĩ na wa kuu ha, kamisanö sa täa konöpö' a kuuma. 16 A kuu ha, 'Maria ai!' Jesus a kuuma. Jesus a kuu ha, Jesus a öpamö kuo pamö Maria a öpa nomöhöa soatalo nö, juteu töpö kai a thaa soata nö, 'Haponi ai!' a kuuma. 'Haponi' tä kuu pole, 'Samakö pi hatukama sinomo wi ĩ wa' ta kuu alu kule. 17 'Haponi ai!' ĩ na Maria a kuu ha, 'Hi tä hẽtu ha ipa hao a na sa koonö mai ha, tä kua soa manu kule, sa huöpoti maiki. Ipa hoose töpö na wa waloa koikitö nö, wa wäo nö, “Pi naka. ‘Ipa hao Teusö a, kamakö hai ĩ pö̃ Teusö a, hi tä hẽtu ha ĩ a na sa konasolö pia salo’ ĩ na Jesus a kuu thaiö!” ĩ na wa kuu!' Jesus a kuuma. 18 Jesus a kuu ha, matala tilisoma tä Maria a hua kononö nö, Jesus a kai a hua sinomoti wi ĩ töpö na, 'Pata tä Jesus sa taa konani keheö! “Ipa hao Teusö a, ĩ kamakö hai ĩ pö̃ Teusö a, hi tä hẽtu ha ĩ a na sa konasolö pia salo!” Jesus a kuu thaiö!' ĩ na a kuuma. 19 Ĩ na tä kua tä, tomĩku tä wakala mumano nö, sai õsimö ha Jesus a kai a hua sinomoti wi ĩ töpö kokamonö nö, juteu pata töpö na ĩ töpö kili ipa salo, lata wi ti lototoa soatamaköma. Ti lototoa soatamaköma maaki, Jesus a waloa soataikiso nö, ĩ töpö lole ha a öpa soataköma. A öpa soataiki nö, 'Pö pi topapaloö!' Jesus a kuuma. 20 Ĩ na a kuu soatalo nö, a ami mömo soatama. A lepuku mömo naio soatama. Kama kai a hua sinomoti wi ĩ töpönö Jesus pata tä taa konanö nö, töpö pi pewö mönaha apama. 21 'Pö pi topapaloö!' Jesus a kuu kõo nö, 'Ipa hao anö sa simöa thapalö noai na, ĩ na kamisanö makö simöa thama hö̃töa kule' a kuu nö, 22 ĩ töpö na kama hẽasi holasia soataiki nö, 'Teusö a õsi kua tolele, ĩ a tälöheö! 23 Ai tä na makö hapalo nö, “Wa wanisala apati noai, ĩ tä na Teusö a hĩso maa waikipasomaö!” ĩ na makö kuu ha, ĩ a wani wanisala apa noai, ĩ tä na Teusö a hĩso maa waikipaso noai kitä. Ĩ na tä kua tä, “Wa wanisala apa noai, ĩ tä na Teusö a hĩso soaleö!” ĩ na makö kuu ha, a wani wanisala apati noai, ĩ tä na Teusö a hĩso soale kitä' ĩ na Jesus a kuuma. 24 Ĩ na tä kua tä, Tomé anö Jesus a kai a hua sinomoti wi, ĩ ai a maaki, Jesus a kai a hua sinomoti wi ĩ töpö na Jesus a tapamo kõa tä, ĩ tä, ĩ töpö na Tomé a kuo naio pasio maama. Kökö poakapaso noai ĩ ai a na, 'Sísimu' töpö kuuto wi, ĩ Tomé a. 25 Tomé a kuo naio maama kutenö, 'Jesus sama kaikana taa konani kipiliö!' Tomé a na töpö kuuma. Töpö kuu ha, 'Pili ami na söpala sa ösö uno tapaö, ĩ sa tä uno höpöa totioö, pili a lepuku na tä uno kua naine, ĩ sa tä uno höpöa totio naioö, ĩ na sa tä thama paio mi tä, “Ĩ pitili ta waikiwöö! Jesus a temöa konasoma ta o!” ĩ na sa pi kuu mai kitä' Tomé a kuuma. 26 Waiha sami tomĩku tä wakala hasutaso noai ha, sai a õsi na Tomé a, Jesus a kai a hua sinomoti wi ĩ ai töpö pewö, ĩ na töpö kui töpö kokamo tä, lata wi ĩ ti lototoa kule maaki, Jesus a waloiki nö, ĩ töpö mötali na a öpa mötalia soataiki nö, 'Pö pi topaikiö!' a kuu solöma. 27 A kuu nö, Tomé a na, 'Hisa ha tä höpöaö! Pili sa ami möö! Wa poko tototalo nö, pili sa lepuku höpöaö! “Jesus a temö kõo maa noai kitä” a pi kuti ti! “Jesus a temöa konaso noa” ĩ na wa pi kuu totio mi salo' Jesus a kuuma. 28 Jesus a kuu ha, 'Ipa kaikana ai! Ipa Kaikana Teusö ai!' ĩ na Jesus a na ĩ na Tomé a kuuma. 29 Ĩ na a kuu ha, 'Kawanö sa tapa manu kule, “Jesus a temöa totia konaso noa” wa kuu ke. Ai töpönö sa tapa tai mi ipö maaki, “Jesus a temöa totia konasoma” töpö kuu wi, ĩ töpö pi mönaha apa kitä' Jesus a kuuma. 30 Pi naka. Jesus a kai a hua sinomoti wi ĩ töpö mamo tetela tä, Jesus anö pe epii tä aipamatima. Jesus anö pe epii tä aipamati noai, hi tä waheta na sa tä pewö a wäsä maa ke. Wani ipii sa ta wäsä päo ke. 31 'Teusö anö a simöpalö nö, a kaikanapalö noai, ĩ Jesus a. Teusö a hai ĩ pelupö a' ĩ na makö pi thama pia salo, Jesus anö tä aipamati noai, hi tä waheta na ĩ ai sa tä wäsä nö, sa tä sãöka ke. Ĩ na makö pi thamaö ha, '“Jesus a pitili” ĩ na makö pi kuu kuköma, makö õsi palimipaso kitä' ĩ na sa kuu wi sa tä sãököpali ke.

21

1 Ĩ na tä kua tä, ki hamö, Sipetíasisö tä kosoto pata hamö, kama kai a hua sinomoti wi ĩ töpö na Jesus a tapamoa konasoma. Ĩ na tä kuama: 2 Simão Pedro a, kökö poakapaso noai ĩ ai a na, 'Sísimu' töpö kuuto wi ĩ Tomé a, Kaliléia tä uli pata ha Kaná tä uli kule, ĩ ha Natanaeu a pilio soma noai ĩ a, Sepeteu a pelupö töpö, Jesus a kai a hua sinomoti noai, ĩ ai polakapi töpö, ĩ na töpö kui töpö sototoa tä, 3 ĩ töpö na Simão Pedro aiki, 'Salaka sa hikita lasoköö!' a kuuma. A kuu ha, 'Kamisa solo' ĩ töpö pewö kupaloma. Töpö kupalo nö, kutiata a na ĩ töpö pewö titiköma, ĩ tä mumi na töpö pi kalä halutima maaki, salaka pö hikipa maama. 4 Tä halua pälasoma ha, hena tä sai tä, kosoto u kasö pata ha maka maka tä palali, ĩ ha Jesus a öpa kulali maaki, 'Ki tä öpalali, ĩ Jesus a hãtowö' ĩ na töpö pi kuu maama. 5 Ĩ ha, Jesus a komöa soataso lasoma. 'Ai pö! Salaka ma hiki ke?' a kuu ha, 'Salaka sama hiki ke maaki, sama hikipa maaheö!' töpö kuu hö̃töoö ha, 6 'Kate makö poko kuamö kule hamö wahi ma tökö pata säsäamö thalöma, salaka ma taa soatalali kitäö!' Jesus a komö kuu lasoö ha, kate töpö poko kuamö kule ha wahi tökö pata säsäamö thaa hö̃tölöma, salaka satehe epii salaka kökö kua soataköma kutenö, tökö pata läkäpo kõa kule maaki, tökö pata hute epö salo, tökö pata läkäo maama. 7 Ĩ ha, Jesus a kai a hua naitio noai, Jesus anö ĩ a pi ipa noai, ĩ aiki, 'Ki a lö kui, ĩ Jesus a Kaikana' ĩ na Simão Pedro a na ĩ na ĩ a kuuma. Ĩ na tä kuu ha, Simão Pedro anö kama hai ĩ haloi ösö haloa kõo soatalö nö, maa tuu na a sutua soataköma. 8 Maa tuu kasö pata atepa apa kutenö, ĩ 100 metötu tä kui tuu kasö pata wäa soata kutenö, Jesus a kai a hua sinomoti wi ĩ töpö pi kalä haile, ĩ töpönö salaka pi pata läkäpo nö, kase tä ha töpö pi katöa haiköma. 9 Töpö pi katöa haiki nö, töpö söposöpalo nö, koa taka ane pata topa apa pa salaka kökö sapala pole ĩ kökö, ĩsa ãi, ĩ na tä tapa kuama. 10 Ĩ ha, Jesus aiki, 'Salaka ma hikipalöhe, ĩ ai salaka kökö ose pihoö!' a kuu läoö ha, 11 kutiata a na Simão Pedro a tititaiki nö, salaka a pi pata läkäpo soatama. Ĩ wahi tökö pata na salaka pö pe epii, kökö satehe epii, ĩ 153 salaka kökö pata kui, kökö pata kuoma. Satehe epii salaka kökö kuoma maaki, wahi tökö pata huitipo maama. 12 Ĩ na tä kua tä, 'Hapo. Pö iasoö!' ĩ töpö na ĩ na Jesus a kuuma. 'Ki a hai, ĩ Jesus Kaikana a' töpö pi kuu kutenö, 'Ĩ witi wa totiwö?' töpö kuu kili ipama. 13 Önö kutenö, Jesus a ekuiki nö, ĩsa ãi tälö nö, ĩ töpö na ĩ ãi totoaköma. Salaka kökö totoa sätäa naia soataköma. 14 Jesus a temöa kono nö, ĩ tökö soatawö a tapamoa konasoö, waiha a tapamoa nömöa konasoö, ĩ na Jesus a tapamo pi kua toitalo nö, waiha kosoto tuu kasö na a tapamoa nömöa konasoma. 15 Ĩ na tä kua tä, töpö ia matalo nö, Simão Pedro a na Jesus a hapaloma. A hapalo nö, 'Joãö a hai ĩ pelupö Simão ai! Hi töpönö sa pii hö̃töa kule maaki, kawanö sa pii satia apa asa kitä?' a kuu ha, 'Pata täö! Awiö! Wa pi ipawöö! Ĩ wa tä taö waikia alu kuleö!' Simão Pedro a kuu hö̃töoma. A kuu hö̃töoö ha, 'Oweha wa kökö ose wai hĩkati nö, wa kökö patama kua wi na, ai töpönö sa thapo wi, ĩ na ĩ wa töpö patama kua hö̃töopököö!' Jesus a kuuma. 16 A kuu nö, 'João a hai ĩ pelupö Simão ai! Sa pii hö̃töo kitä?' Jesus a kuu kõoö ha, 'Awai. Pata täö! Wa pi ipawöö! Ĩ wa tä taö waikia alu kuleö!' Simão Pedro a kuu hö̃töo kõoma. A kuu ha, 'Oweha kökö patama kua wi na, ĩ na sa thapo wi, ĩ na wa töpö patama kua hö̃töopököö!' Jesus a kuuma. 17 A kuu nö, 'João a hai ĩ pelupö Simão ai! Sa pii totio kitä?' Jesus a kuu kõoma. 'Sa pii totio kitä?' Jesus a kuu kõatalo opaö ha, Pedro a õsi wanisala apöpalo nö, 'Pata täö! Ĩ wa tä pewö taö öpa waikia kule. Kamisanö wa pi ipa wi, ĩ wa tä taö öpa waikia alu kuleö!' Pedro a kuu ha, 'Oweha kökö patama kua wi na, ĩ na sa thapo wi, ĩ na ĩ wa töpö patama kua hö̃töopököö! 18 “Wa hĩsa soa tä, au haloi wa ösökö thaa topa totiki nö, kama wa na au haloi wa ösökö õka kõo soatakö nö, wa huu pi topamö kua totile hamö wa hutima. Ĩ na wa kua somatioma maaki, wa patasipöa totisoma, wa poko tototasoma, ai tänö wa poko õkatakö nö, wa huu waniomö kuo noai hamö wa läkäamö thaa soatalölö kitä” ĩ na kawa na sa kuu kule. Sa kuu pole, ĩ pitili ta' ĩ na Jesus a kuuma. 19 'Ĩ na ai tänö Pedro a säpali kitä. Ĩ na a säa thapali ha, “Teusö a totiatalo opa asawö” ĩ na Pedro anö töpö pi thama kitä' Jesus a pi kuu salo, a onihamo nö, 'Wa poko õka soatakö nö, wa läkäa soatalölö kitäö!' ĩ na Pedro a na ĩ na Jesus a kuuma. A kuu nö, 'Kamisa na a noka soataloö!' Pedro a na Jesus a kuuma. 20 Ĩ na tä kua tä, Pedro a nomöhöa soatalo nö, Jesus a kai a hua sinomoti noai, ĩ ai tä huu haile, Pedro anö ĩ a tapama. Töpö iapalo tä, Jesus anö a pi ipa noai, Jesus a na ĩ a loo pakäho totio noai, ĩ aiki, 'Pata täö! Witi pili anö wa monini pia salo?' a kuu noai, ĩ a huu haio tasoma. 21 A huu haile, Pedro anö ĩ a talalö nö, Jesus a na, 'Pata täö! Ki aiki kini? Wi na ĩ a kua pasio kitä?' Pedro a kuu ha, 22 '“Sa walo kõo paio mi tä, ĩ a noma paio mai kitä” ĩ na sa kuu ha, “Häö! Wi na taköö!” a pi kuu tihöö! Kamisa na kawa noka totipasopöö!' ĩ na Jesus a kuuma. 23 Ĩ na Jesus a kuuma kutenö, Jesus a thapo wi ĩ töpö aiki, 'Ĩ anö Jesus a kai a hua sinomoti wi, ĩ a noma mai kitä' töpö kupalotima. Töpö kupalotima maaki, 'Ĩ a noma mai kitä' Jesus a kuu makokoa totio maama. '“Sa walo kõo paio mi tä, ĩ a noma paio mai kitäö!” sa kuu ha, “Wi na taköö!” a pi kuu tihöö!' ĩ na Jesus a kuu pasio päoma. 24 Jesus a kai a hua naitio noai, Jesus anö ĩ a pi ipati noai, ĩ João sa. Jesus anö ta kateha noai, kamisanö ĩ sa ta wäsä nö, sa tä sãöka ke. Sa ta wäsähe, ĩ tä na, 'Pitili ta' ĩ na samakö pewö kuu. 25 Jesus anö tä thati noai, pe epii ĩ ai tä kuo opama. 'Ĩ tä pewö a wäsä nö, tä pewö sãökama aköna, tä waheta satehe epii tä waheta kulapi. Hi masita tä uli na ĩ tä waheta sai paa totioö aköna, masita tä uli alukusia apa pasia kopaso pi' ĩ na sa pi kuu kule.