1

So Na'aqtac ỹacona da lataxac ca shiỹaxaua

1 Co'ollaq saxanaxa da qaỹo'ot 'enauacna, qaq nale'ena da huo'o So Na'aqtac. Qaq se'eso Na'aqtac hueta'aguet Ñim Lo'onatac 'Enauacna, qaq So Na'aqtac nacheñi Ñim Lo'onatac 'Enauacna. 2 Qaq Ñim Lo'onatac 'Enauacna co'ollaq ỹo'ot 'enauacna, nache So Na'aqtac hueta'aguet Ñimaye. 3 Qaq Ñim Lo'onatac 'Enauacna co'ollaq ỹo'ottacna, nache ỹachegoxotchigui So Na'aqtac 'enauac nam ỹo'otpi. Qaq 'enauac nam huo'o, qaica ca saq chegoqchigui So Na'aqtac. 4 Qaq se'eso Na'aqtac, nacheso so chegoqchigui da nca'alaxa, qaq de'era nca'alaxa, nachera da yo'oqoolec naqa'en na shiỹaxauapi. 5 Qaq de'era yo'oqchiguiñi, damaye icoỹarelec na napalaxa, qaq na napalaxa saishet da ỹalamat. 6 Huo'o so ỹale maye lamaxashec Ñim Lo'onatac 'Enauacna, somaye le'enaxat Juan. 7 Qaq somaye anac, da yaqto' ỹa'axatem na shiỹaxauapi de'era, yaqto' 'enauac na shiỹaxauapi ishet da ỹa'amaqten de'era yo'oqchiguiñi. 8 Qaq so Juan saishet da nacheso som yo'oqchiguiñi, somaye anac da yaqto' ỹachaxan de'era yo'oqchiguiñi. 9 Qaq som ỹoqta 'eesa da yo'oqchiguiñi mashe nvira ana 'alhua, nacheso nagui so icoỹarelec 'enauac na shiỹaxauapi. 10 Qaq se'eso Na'aqtac nale'ena da hueta'a ana 'alhua. Qaq na'aictaxa da Ñim Lo'onatac 'Enauacna ỹachegoxotchigui co'ollaq ỹo'ot ana 'alhua, qalaxaye nam huetalec ana 'alhua saishet da ỹaconeguet. 11 Qaq So Na'aqtac anaỹa ana 'alhua, qalaxaye na lauo' le'ecpi saishet da ỹaconeguet. 12 Qalaxaye nam ỹaconeguet qataq ỹa'amaqten, qaq nachena na ỹoqta 'itchiguiñi da llalaqpi Ñim Lo'onatac 'Enauacna. 13 Qaq namayepi nagui ỹataqta llalaqpi Ñim Lo'onatac 'Enauacna, chegoqchigui da maiche lhuennataxa Ñimaye, qaq saishet da nachera da maiche lhuennataxa na shiỹaxauapi. 14 Qaq se'eso Na'aqtac qomi' hueta'agueta, 'eeta'am ca 'oonolec da shenaqta. Qataq qomi' sauanaqchigui da la'añaxac maye maiche lalamaxat som 'oonolec Llalec Ñim Lo'onatac 'Enauacna, cha'aye qomi' ỹachaxanalo 'enauac da lsoxoyec qataq da 'eesa lataxac. 15 Qaq so Juan ỹa'axattac co'ollaxa, 'eeta': «'Era da aỹem sa'axatta'aguet co'ollaq sheeta': ‹Huo'o ca aỹem nca'attaueegue, qaq que'eca aỹem nca'attaueegue, camaye aỹem napacalec, cha'aye nale'ena da huo'o co'ollaq saxanaqca aỹem.›» 16 Qaq 'enauac da shenaqta saconaxaguet dam chochaq huañi lsallaxa, qaq nachera dam lqouagaxanaqtaic maye nacalec lỹa da qomi' ỹanema. 17 Na namaxasoxonaxacpi co'ollaq ỹan Ñim Lo'onatac 'Enauacna, qalaq chegoqchigui naqa'en so Moisés, qalaxaye dam lqouagaxanaqtaic qataq dam 'eesa lataxac, damaye chegoqchigui So Jesucristo. 18 Qaica ca ishet da nma'ai' da ila'a Ñim Lo'onatac 'Enauacna, qalaxaye so 'oonolec Llalec maye ỹataqta neto'ot Ñimaye, Somaye nacheso so qomi' ỹauattonaxanaxaneque Ñimaye.

So Juan maye nachelaxanataxanaq ỹa'axatta'aguet So Jesucristo

19 Qaq 'era da la'aqtaxanaxac so Juan, co'ollaq so lataxala'pi na judiopi ỹauo'o so lamaxashecpi chegoqchiguiña ye Jerusalén, nam ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq na leviitapi da yaqto' nqo'ona qataq inat so Juan da chaq negue't somaye. 20 Nache so Juan 'enapeco': –Aỹem ỹataqta ñechoxotta da saishet da nachaỹem Lca'aguishec Ñim Lo'onatac 'Enauacna maye qaiuattaique. 21 Nache somayepi ỹe'eguelaxalec da inat, 'eeta': –Qaq ¿chaq negue't 'am qone'? ¿Peta'a nache 'am Elías? Nache so Juan 'enapeco': –Saishet; saishet da aỹem Elías. Qaq somayepi qaltaq ỹe'eguelaxalec da inat, 'eeta': –¿Peta'a nache 'am que'eca na'aqtaxanaxanec maye qaỹa'axatta'aguet da naỹa'acna? Nache somaye ỹasat, 'eeta': –'A'i, saishet da nachaỹem. 22 Nache somayepi 'eetega somaye, 'eeta': –Qaq ¿negue'to' 'am qone'? –Cha'aye qomi' sauoqtaique da huo'o ca qaya'ac 'ara'aqtaxanaxac da seraxa ñim qomi' nama'q. ¿Ña qomi' 'aua'aqtaxanemactaxa chaq negue't 'am? 23 Nache so Juan 'enapeco': –Qomye nachaỹem, maye aỹem ỹa'axatta'aguet so la'aqtaxanaxanec Ñim Lo'onatac 'Enauacna. Qaq nachaỹem maye aỹem chemaqtapeguelec ca toolec 'alhua, qaq da iỹaxanaxac, sheeta': «Qauqataxañiỹai' ca ỹataqta ỹashectec nqa'aic Ñim Lca'aguishec Ñim Nataxala'.» 24 Qaq se'eso lamaxashecpi na fariseopi inattac so Juan, 25 'eeta': –Da saishet da 'am Lca'aguishec Ñim Lo'onatac 'Enauacna, huo'otaq 'am Elías, huo'otaq ca lỹa la'aqtaxanaxanec Ñim Lo'onatac 'Enauacna. Qalaq ¿ta'ainco' qone' ye 'auachelaxanataxaatac? 26 Nache so Juan 'enapeco': –Aỹem sachelaxanataxana na 'etaxat. Qalaxaye da qoñiita huo'o dam qami' huetanguilo maye saishet da qauauattoñi. 27 Na'aictaxa da aỹem hua'auñi da ñevi', qalaxaye damaye ỹataqta ỹactec da la'amaqchec. Na'aictoxo' da choche aỹem l-latac ỹataqta sa yaloua'a. 28 Qaq 'enauac de'era huaña ye nỹecpi ye Betania, maye pa'aigue da nala' lliguisheguem ye tala Jordán, yem huaña co'ollaq dachelaxanataxaatac so Juan.

So Jesús nacheso so ỹapalaxat na lasouaxashet 'enauac na shiỹaxauapi

29 Qaq so lỹa na'a'q, nache so Juan ila'aguet So Jesús da naỹaxaama somaye, nache somaye 'enapega so shiỹaxauapi 'eeta': –Ña qauloỹeeguet, 'ena cha'aguet na Jesús, nachena na 'eeta'am ca nachetaqtaxanaxat Qagueta Llalec maye ỹachegoxotchigui Ñim Lo'onatac 'Enauacna da ỹapalaxat na lasouaxashetpi na shiỹaxauapi. 30 Qaq aỹem sa'axattac namaye co'ollaq sheeta': «Huo'o na aỹem nca'attalec, namaye aỹem napacalec da la'amaqchec, cha'aye namaye nale'ena da huo'o co'ollaq saxanaxa ñañiguiñi.» 31 Qaq aỹem saishet da ỹoqta sauattoota chaq negue't Namaye. Qalaxaye aỹem ñanacto'ot da sachelaxanataxaatega na 'etaxat, yaqto' na Israel le'ecpi ishet da ỹauatton Namaye. 32 Nataqa'en so Juan 'enapeco': –Aỹem sauaateguet So Saqcha'a Na'añaxac Qui'itta da chegoqtot na piguem, 'eeta'am na qoto', nache talec Namaye. 33 Qaq aỹem ñaq saxanaxa da sauatton co'ollaxa Namaye. Qalaxaye Ñim aỹem namaq da yaqto' sachelaxanataxana na 'etaxat, Ñimaye aỹem 'enapega co'ollaxa, 'eeta': «Qom 'am 'auauaachigui So Saqcha'a Na'añaxac Qui'itta da huo'otaq anac, nache talec ca shiỹaxaua, qaq que'eca shiỹaxaua, nacheca ca dachelaxanataxana So Saqcha'a Na'añaxac Qui'itta.» 34 Qaq aỹem mashe sauaachigui Namaye, nache sa'axattac da Namaye, nachena na Llalec Ñim Lo'onatac 'Enauacna.

Soua hua'auchiyiñi lapaxaguenataqa So Jesús

35 Qaq so lỹa na'a'q, nache so Juan qaltaq hueta'a yi'iye 'alhua, qataq soua dos soua lapaxaguenataqa. 36 Qaq co'ollaq ỹauaateguet So Jesús, nache 'enapeco': –Ña qauloỹa, 'ena cha'aguet na Jesús, nachena na 'eeta'am ca nachetaqtaxanaxat Qagueta Llalec maye chegoqo'ot Ñim Lo'onatac 'Enauacna. 37 Nache soua dos lapaxaguenataqa so Juan co'ollaq hua'aqchiguilo de'era, nache ca'atregue So Jesús. 38 Qaq So Jesús co'ollaq namatapec, nache ila'agueta soomaye da nca'attrauo, nache inatta'ape, 'eeta': –¿Negue't ca qoñiitapeguec? Nache soomaye 'ena'apo': –'Am Napaxaguenataxanaq, ¿hua'ague ca qoneta'ague? 39 Nache So Jesús 'enapeco': –Qauanaqui, ña qaumeenaxañiỹa. Nache soomaye je'c da demeenaxara, nache ỹauanalo ca netaña Somaye. Nache huetra'asop Somaye se'eso avit, cha'aye mashe huo'o ca las cuatro se'eso avit. 40 So 'oonolec soomaye, nacheso so Andrés maye lqaỹa so Simón Pedro. 41 Qaq so Andrés somaye ỹataqta ỹa'auaxaachiguiñi da nqo'ona so lqaỹa Simón, nache 'enapega, 'eeta': –Qomi' ñauanaxai' Ñim Lca'aguishec Ñim Lo'onatac 'Enauacna maye qaiuattaique le'enaxat Cristo. 42 Ime, nache so Andrés ỹauec so Simón da ỹauega ca netaña So Jesús. Qaq So Jesús co'ollaq ila'aguet somaye, nache 'enapega, 'eeta': –'Am Simón maye 'am llalec so Jonás, 'am qaỹamata'ac da 'are'enaxat Cefas. (De'era ne'enaxat naigui da Pedro, nataqa'en naigui da Coma'.)

So Jesús iỹaxana so Felipe qataq so Natanael

43 Qaq so lỹa na'a'q nache So Jesús taigue da 'alhua Galilea. Nache huaña yemaye da natenalec so Felipe, nache 'enapega, 'eeta': –Aỹem qoquegue. 44 Qaq se'eso Felipe, somaye lma' ye Betsaida, yem nataqa'en lma' so Andrés qataq so Pedro. 45 Nache so Felipe jec da nmitaique so Natanael. Nache da'aqtaxanem, 'eeta': –Qomi' mashe ñauanaxai' ñim ỹale maye ỹa'axattac co'ollaxa so Moisés maye huetalec ana lere, ñim nataqa'en ỹa'axatta'aguet co'ollaxa so la'aqtaxanaxanecpi Ñim Lo'onatac 'Enauacna. Ñimaye nacheñi Ñi Jesús, ñim llalec so José maye lma' ye Nazaret. 46 Nache so Natanael 'enapeco': –¿Peta'a isheto' da huo'o ca no'on da lataxac da chegoqchiguiña ye Nazaret? Nache so Felipe 'enapeco': –'Aỹala, ña 'ameenaxana Ñimaye. 47 Nache So Jesús co'ollaq ila'aguet so Natanael da naỹaua'a, nache 'enapega, 'eeta': –'Ena na ỹoqta 'eesa da Israel le'ec, namaye saishet da tenataxanaxaic. 48 Nache so Natanael denataxan, 'eeta': –¿Ca hua'ague co'ollaxa, qaq aỹem 'auauatton? Nache So Jesús 'enapeco': –Qomye 'am selota'a can saxanaxa da 'am iỹaxana da Felipe, can qoueto'ot ara higo lcheyec. 49 Nache so Natanael 'enapeco': –'Am Napaxaguenataxanaq, nache 'am Llalec Ñim Lo'onatac 'Enauacna, qataq nache 'am Lta'a na Israel le'ecpi. 50 Nache So Jesús 'enapeco': –¿Aỹem 'aua'amaqten peta'a, souaxat da sheetega da 'am selota'a can qoueto'ot ara higo lcheyec? Qalaxaye nagui 'am sa'aqtaxanem da ỹataqta ỹactec da lyac, qataq lta'araic ca 'arauanaqchec qome saq 'ena'am de'era. 51 Nataqa'en 'enapeco' So Jesús: –Ỹataqta 'eesa de'era, qami' sa'axatema nagui, da qami' qauloỹa'a qome na piguem qom nauatoigui, qataq na lamaxashecpi Ñim Lo'onatac 'Enauacna naỹaña Aỹem Shiỹaxaua Llalec qaltaq ỹe'eguelaxasheguem.

2

So naronaxac maye huaña ye Caná maye huaigui ye 'alhua Galilea

1 Qaq co'ollaq mashe inoxoore'c soua tres na'axa'te, nache huo'o so naronaxac huaña ye Caná huaigui ye 'alhua le'enaxat Galilea. Qaq aso late'e So Jesús nache hueta'a yemaye. 2 Nache So Jesús qataq soua lapaxaguenataqa, soomaye nataqa'e'n qaicoyegue'n da yaqto' ỹalectraua'a se'eso naronaxac. 3 Qaq co'ollaq imeuo so lataxa, nache aso late'e So Jesús 'enapega Somaye, 'eeta': –Mashe imeuo so lataxa. 4 Nache So Jesús 'enapega asomaye, 'eeta': –'Am ỹate'e, ¿ta'ainco' ye qonetec de'era da Aỹem qonapega? Ye Aỹem saxanaxa da ivita ye laloqo' da ñachaxan. 5 Qalaxaye asomaye 'enapega som huetapecpi, 'eeta': –Qauo'oche qome 'enauac cam 'enapec Damaye. 6 Qaq huo'oi soua seis naco'oña coma' maye laỹe' naxa na 'etaxat maye lỹoxonaxat na judiopi da ỹo'ot da maiche lataxac naxa da nỹoxoc. Qaq añi 'oonole se'esoua naco'oña, huo'o ana ivi' ochenta litro na le'ec 'etaxat, qataq huo'o ana ivi' cien. 7 Nache So Jesús 'enapego' som huetacpi, 'eeta': –Qauỹoqoiguilo na 'etaxat ñi'iñiua naco'oña. Nache soomaye iỹoxoguilo, ỹataqta nlaxatchiguilo. 8 Nache So Jesús qataq 'enapegalo soomaye, 'eeta': –Nagui, nache huo'o ca qanqacheesheguem na 'etaxat. Ime, nache qaroiua'a ñim ilotague' ne'ena naronaxac, yaqto' ỹe'eguen. Nache soomaye ỹo'o't da 'enapec So Jesús. 9 Nache se'eso ilotague' so naronaxac co'ollaq ỹe'eguen se'eso 'etaxat maye nañigui na lataxa, nache ỹataqta ỹe'elaq, cha'aye sa ỹaỹaten ca chegaqa'ague so lataxa. Qalaxaye som huetacpi somayepi ỹaỹaten. Nache se'eso ilotague' so naronaxac sa ỹaỹaloxon da iỹaxana som cheta'ague da huaron. 10 Nache 'enapega, 'eeta': –'Enauac na shiỹaxauapi ỹa'auaxaachiguiñi naxa da nỹomaxangui na no'on lataxa na namaxasoxoic, qaq da mashe qaỹoqtegue da nỹomaxac, nache qaltaq qanỹomaxangui na lataxa maye saqallegueme da no'on. Qalaxaye 'am 'aupa'axaatec da 'aumenec na no'on lataxa. 11 Qaq de'era ỹo'ot So Jesús co'ollaq huaña ye nỹecpi ye Caná maye huaigui ye 'alhua Galilea. Damaye, nachera da hua'auchiguiñi nam ỹo'otpi na'anec maye sa qaỹauanapega co'ollaq ỹachaxan da llo'oxoyec. Nache soua lapaxaguenataqa ỹataqta ỹa'amaqte'n Somaye. 12 Qaq co'ollaq ime de'era, nache So Jesús taỹa ye nỹecpi ye Cafarnaúm, lỹatac aso late'e, nataqa'en soua lqaỹa't qataq soua lapaxaguenataqa. Nache ỹataqta huo'oi soua na'axa'te da hueta'a yemaye.

So Jesús do'otaxaalec aso no'onaxanaxaqui late'erai

13 Qaq co'ollaq mashe saqaỹapeque so laponaxac na judiopi maye le'enaxat da Lapascua, nache So Jesús nqo'oneua'a ye Jerusalén. 14 Qaq co'ollaq ivireua'a ye nqasoxoc aso no'onaxanaxaqui late'erai, nache ilalec na imeetac na huacapi qataq ana qaguetapi qataq na qoto'pi. Nataqa'en ilalec na shiỹaxauapi nso'ootañipi, datatalec na nmenaxala'pi, nmenaxanaxaatega't ana alom na shiỹaxauapi. 15 Qaq co'ollaq ilalec ne'enapi, nache So Jesús ỹacona so nañec da ỹauo'o lalashenaxanaxat. Nache ỹo'orauec 'enauac na nmenaxaicpi, lỹaueegue' naqa'en ana lmena qaguetapi, qataq na huacapi. Qataq icorec ana alom na nmenaxanaxaatega't ana alom na shiỹaxauapi, qataq ỹamaxañi na nmenaxala'pi. 16 Nache 'enapega na imeetac na qoto'pi, 'eeta': –¡Qanqacheeuec 'enauac ne'enapi! ¡Saishet da qauo'ochec na lma' Ñim Ita'a da menaqa'! 17 Nache soua lapaxaguenataqa iuennate naua nanettraleguete ana nere maye huetalec na la'aqtacpi Ñim Lo'onatac 'Enauacna, maye 'eeta': «Da ỹauoche ñi 'arma', ỹataqta 'eco' 'eroigui naqa'en da sheeta.» 18 Nache so lataxala'pi na judiopi inattac Somaye, 'eeta': –¿Negue't ca na'anec qomi' 'auachaxanalo, da yaqto' ishet da 'am sa'amaqtenaq da ỹoqta 'eesa da huo'o ca qonec da 'auo'ot de'era? 19 Nache So Jesús 'enapeco': –Qomye qanlaxachiiñi ana no'onaxanaxaqui late'erai, nache Aỹem qaltaq ño'oxoosheguem qome; tres na'axa'te, nache qaltaq semat. 20 Nache som lataxala'pi na judiopi 'enapeco': –Ivi', naua cuarenta y seis vi'iye da qano'oxootapiguisheguem ana'ana no'onaxanaxaqui, nache qaimat. ¿Qalaq 'am qonapec ye tres na'axa'te, nache 'aumat da 'ano'oxoosheguem? 21 Qalaxaye aso no'onaxanaxaqui maye detaqtega So Jesús, nachera da maiche lalamaxat lo'ocỹaxac. 22 Qaq ỹoqo'oye So Jesús co'ollaq mashe qaltaq nca'alec, nache soua lapaxaguenataqa tachigui lauel de'era la'aqtac Somaye. Huaña, nache ỹataqta ỹa'amaqte'n naua nanettralec ana nere maye huetalec na la'aqtacpi Ñim Lo'onatac 'Enauacna, qataq naua la'aqtaqa So Jesús.

So Jesús ỹauatto'n naua lhuennataxaco na shiỹaxauapi

23 So Jesús co'ollaq ñaq hueta'a ye Jerusalén da ỹalectaua'alo soua na'axa'te maye laloxoqui' da qaiuennate so na'a'q maye le'enaxat da Lapascua, nache ỹataqta qalota na ỹa'amaqten Somaye, souaxat da ỹauaachigui na ỹo'otpi na'anecpi maye sa qaỹauanapega. 24 Qalaxaye So Jesús saishet da ỹoqta ỹa'amaqten somayepi, cha'aye ỹaỹaten na lhuennataxac 'enauac somayepi. 25 Qaq saishet da iuen da huo'otaq huo'o ca da'aqtaxanem Somaye da lataxac so shiỹaxauapi, cha'aye Somaye maiche ỹaỹateetac da lquiyaqteỹaxac so shiỹaxauapi.

3

So Jesús qataq so Nicodemo

1 Huo'o so ỹale le'enaxat Nicodemo. Somaye ỹalectaigui na fariseopi qataq na lataxala'pi na judiopi. 2 Se'eso Nicodemo huo'o so pe, nache somaye nqo'ona So Jesús. Nache 'enapega, 'eeta': –'Am Napaxaguenataxanaq, qomi' saỹaanaq da 'am namaq Ñim Lo'onatac 'Enauacna da qomi' 'auapaxague'n. Cha'aye qaica ca ishet da ỹo'ot na 'auo'otpi na'anec maye sa qaỹauanapega. Nachaqcata cam hueta'aguet Ñim Lo'onatac 'Enauacna. 3 Nache So Jesús 'enapega somaye, 'eeta': –Aja', ỹataqta 'eesa de'era 'am sa'axatem, da ca shiỹaxaua da saishet da ỹe'eguelaxalec da qaltaq ñiguiñi, qaq camaye saishet da ila'a da lo'onataxanaxac Ñim Lo'onatac 'Enauacna. 4 Nache so Nicodemo denataxan, 'eeta': –Qaq ¿hua'ago' ca 'eetec ca shiỹaxaua, da huo'otaq mashe ỹe, nache qaltaq ỹe'eguelaxalec da ñiguiñi? ¿Peta'a isheto' da ỹe'eguelaxaigui na lauel aca late'e, ime, qaltaq ñiguiñi? 5 Nache So Jesús 'enapeco': –Aja', ỹataqta 'eesa de'era 'am sa'aqtaxanem, da ca saishet da nañan da qaltaq qanachelaxangui na 'etaxat qataq da nañanot So Saqcha'a Na'añaxac da naralaxat, nache camaye saishet da inoxoneua'a da lo'onataxanaxac Ñim Lo'onatac 'Enauacna. 6 Ca chegoqchigui da lañoxoc ca yo'oqchigui shiỹaxaua, camaye ipacchigui da choche shiỹaxaua. Qalaxaye ca chegoqchigui da lañoxoc So Saqcha'a La'añaxac Ñim Lo'onatac 'Enauacna, camaye ỹaatañi da achaalataxac maye chegoqo'ot Somaye. 7 Saishet da 'are'elaqchet de'era 'am sa'axattapeguem, da 'enauac na shiỹaxauapi iuen da taigui da dalaxaic nañoxoc. 8 Na la'at da nashiiyisheguem, qalaq maiche ỹoiqueetac ca dataigue. Qaq 'am 'aua'aqtega na l-lamaxa, qalaxaye saishet da 'auaỹaten cam chegoqchiguiña qataq cam taỹa'ague. Qaq, nache 'eeta'am da lataxac 'enauac na chegoqo'ot da lañoxoc So Saqcha'a Na'añaxac. 9 Nache so Nicodemo qaltaq ỹe'eguelaxalec da denataxan, 'eeta': –¿Chaq hua'ago' ca 'eetec ca lataxac de'era? 10 Nache So Jesús 'enapeco': –'Am maye 'auapaxagueetac naxa na Israel le'ecpi, qalaq ¿ta'ainco' ye sa 'auaỹaten de'era? 11 Aja', qalaxaye ỹataqta 'eesa de'era 'am sa'axatem, da qomi' saỹatenaqta da sa'axataqtac, cha'aye ỹataqta sauanaqchigui. Qalaxaye qami' saishet da qaua'amaqchiñi da sa'axataqtac. 12 Cha'aye qami' da saishet da Aỹem qaua'amaqchiñi da huo'otaq qami' sa'aqtaxaateguema da lataxac ana 'alhua, nache ¿hua'aguectoxo' da ishet da Aỹem qaua'amaqchiñi da qami' sa'axatema cam hueta'ague da piguem? 13 Cha'aye saishet da huo'o ca taigue da piguem, nachaqcata cam chegaqa'ague da piguem, maye nachena nam Shiỹaxaua Llalec. 14 Qaq de'era 'eetec co'ollaxa so Moisés da ỹanasheguem so le'enaqtac na'araxanaq co'ollaq hualec so toolec 'alhua, qaq nache 'eetec nataqa'en da qoỹanasheguem qome na Shiỹaxaua Llalec, 15 yaqto' 'enauac nam Aỹem ỹa'amaqten, nache saishet da ileu, nachaqrata da huo'o da lca'alaxa maye chochaq tatec.

Da lauotaxanaqtaic Ñim Lo'onatac 'Enauacna nam huetalec ana 'alhua

16 Cha'aye Ñim Lo'onatac 'Enauacna ỹataqta lta'araic da lauotaxanaqtaic na shiỹaxauapi ana 'alhua, nache ỹan na 'oonolec Llalec. Yaqto' 'enauac nam ỹa'amaqten namaye saishet da ileu, nachaqrata da huo'o da lca'alaxa maye chochaq tatec. 17 Ñim Lo'onatac 'Enauacna saishet da namaxa na Llalec ana 'alhua, da yaqto' ỹauo'o ca nhuaxanaguec na shiỹaxauapi. Nachaqrata da nca'alaxatec, chegoqchigui Namaye. 18 Ca ỹa'amaqten na Llalec Ñim Lo'onatac 'Enauacna, nache camaye saishet da huo'o ca nhuaxanaguec. Qalaxaye cam sa ỹa'amaqten Namaye, nache sogote da huetalec da huo'o da nhuaxanaguec qanqa'en, souaxat da saishet da ỹa'amaqten na 'oonolec Llalec Ñim Lo'onatac 'Enauacna. 19 Qaq dam 'eetec da Ñim Lo'onatac 'Enauacna nmit 'enauacna: qaq nache 'eetec da Aỹem ñanaỹa ana 'alhua, qaq Aỹem maye Aỹem lcoỹaraqte na napalaxa. Qalaxaye na shiỹaxauapi ye ỹo'otta'ape naua qauema, nache ỹaỹamaxareeta da netaigui na napalaxa saq 'ena'am da yo'oqchiguiñi. 20 'Enauac nam ỹo'ottac na qauem, namayepi ỹataqta nquiỹa na yo'oqchiguiñi, nache namayepi netaigui na napalaxa, cha'aye nshetaique da saishet da ya'aqaleguete naua ỹo'otta'ape qauema. 21 Qalaxaye nam ỹo'ottac da 'eesa lataxac, namayepi nqo'oneua'a de'era yo'oqchiguiñi, cha'aye nshetaique da qaila'a da 'enauac nam ỹo'ottacpi da ỹachaxan da ỹalaxagueta naua lamaxasoxonaxaco Ñim Lo'onatac 'Enauacna.

So Juan maye nachelaxanataxanaq qaltaq ỹe'eguelaxalec da ỹa'axattac So Jesús

22 Qaq co'ollaq ime de'era, nache So Jesús jec, nnaicapegueto soua lapaxaguenataqa da nqo'oora ye 'alhua Judea. Nache ỹataqta huo'oi soua na'axa'te da hueta'aguet somayepi da dachelaxanataxaatac. 23 So Juan nataqa'en dachelaxanataxaatac, hueta'a ye Enón yem saqaỹapeque ye Salín, cha'aye ỹataqta qalota na 'etaxat. Nache na shiỹaxauapi nqo'ona so Juan, da yaqto' somaye nachelaxan namayepi. 24 Qaq 'era da 'eetec co'ollaq saxanaxa da qoỹanaigui aso ncoñetaxanaxaqui so Juan. 25 Huo'o so na'a'q, nache huo'oi soua lapaxaguenataqa so Juan da ncotategueto so 'oonolec judío le'ec, ncotatrapigui da lataxac dam nỹoxoc na judiopi. 26 Nache se'esoua napaxaguenataqa nqo'ooreua'a so Juan da da'aqtaxaarem, 'eetra': –'Am Napaxaguenataxanaq, ñaq 'antoueeta'ac peta'a so ỹale maye qomi' 'aua'aqtaxaateguema, som 'am hueta'aguet so lỹa na'a'q dam lỹa le'ego aso tala Jordán, Somaye nagui dachelaxanataxaatac. Nache 'enauac na shiỹaxauapi ca'attague'. 27 Nache so Juan 'enapegalo soomaye, 'eeta': –Qaica ca shiỹaxaua maiche nallegoxottela't da huo'o ca ỹo'ot da huo'otaq saishet da ỹanem Ñim Lo'onatac 'Enauacna camaye. 28 Qaq qami' mashe qaua'aqaichigui aỹem co'ollaq sa'axatta da aỹem saishet da nachaỹem que'eca Lca'aguishec Ñim Lo'onatac 'Enauacna maye qaiuattaique, chaqrata da aỹem qana'auaxaata'ague na llec Camaye. 29 Da huo'otaq huo'o ca naronaxac, qaq cam ỹataqta huaroneguet aca auonaxaua, nacheca cam nauonaxaua. Qaq cam nauochaxaua que'eca auonaxaua, camaye ỹataqta machiguiñi da choche hua'aqtega da lvilỹaxac. Qaq nache 'eetec nataqa'en nagui aỹem ỹataqta aỹem nlaqchigui da ñetonaxac, cha'aye ca Lca'aguishec Ñim Lo'onatac 'Enauacna mashe hueta'a ne'ena. 30 Qaq Camaye taỹa'a da nquictasheguem da la'amaqchec, qaq aỹem qalaxaye iuen da nquictañi da ỹa'amaqchec.

Cam chegoqo'ot na piguem

31 Qalaxaye cam chegaqa'ague da piguem, camaye nataỹaña 'enauacna, qaq cam huetalec ana 'alhua camaye 'alhua le'ec, nache ipacchigui da ỹa'axattac nam huetalec ana 'alhua, qalaxaye cam chegaqa'ague da piguem camaye nataỹaña 'enauacna, 32 qataq ỹa'axat nam maiche ỹauaachigui qataq hua'aqchigui. Qalaxaye saishet da huo'o ca ỹa'amaqten cam 'enapec camaye. 33 Qaq da huo'o ca ỹa'amaqten camaye, nache que'eca da'amqaanataxan, ỹataqta 'eesa naqa'en cam 'enapec Ñim Lo'onatac 'Enauacna. 34 Cha'aye da detaqa nam namaq Ñim Lo'onatac 'Enauacna, nache nacheñi Ñim Lo'onatac 'Enauacna da detaqa, cha'aye Ñimaye ỹami' Namaye da la'añaxac So Saqcha'a La'añaxac. 35 Qaq Ñim Lo'onatac 'Enauacna maye Ita'a ỹataqta ỹauotec na Llalec, ỹoqo'oye ỹataqta imato'ot da la'añaxac da ilo'ogue 'enauacna. 36 Qaq cam ỹa'amaqten na Ñalec, nache camaye huo'o da lca'alaxa chochaq tatec. Qaq cam saishet da ỹa'amaqten, nache camaye saishet da taỹot de'era nca'alaxa, nachaqrata da huetalec camaye dam qaica ca 'ena'am da lchec lhuaxanaxanaxac Ñim Lo'onatac 'Enauacna.

4

So Jesús qataq aso 'alo maye lma' ye Samaria

1 Na fariseopi co'ollaxa ỹaỹaten da So Jesús nquictauec na lataxanatacpi qataq napacalec so Juan na lachelaxanatacpi. 2 Qaq na'aictaxa da So Jesús saishet da nacheso so dachelaxanataxaatac, cha'aye nachesoua soua lapaxaguenataqa soua dachelaxanataxaata'ape. 3 Qaq co'ollaq ỹaỹaten de'era So Jesús, nache ca'ai ye 'alhua Judea, nache ỹe'eguelaxa ye 'alhua Galilea. 4 Qaq de'era lle'eguelaxasoxoc Somaye, iuen da ỹa'axasoxoolec ye 'alhua Samaria. 5 Qaq co'ollaq ỹa'axasoxoolec yi'iye 'alhua, nache ivita ye saq 'amaqtaq nỹecpiolec le'enaxat Sicar. Qaq yemaye saqaỹapeque aso lshere co'ollaxa so Jacob. Qaq co'ollaq mashe ileu so Jacob, nache se'eso dalaxaic lalamaxat se'eso 'alhua maye naña aso nshere somaye nacheso so llalec José. 6 Qaq co'ollaq mashe laiñi so na'a'q, nache So Jesús ỹataqta nasamñi souaxat da lqueuoxoc. Ỹoqo'oye Somaye nso'oolec na laỹe aso nshere, 7 -8 qaq soua lapaxaguenataqa taua'alo so nỹecpiolec da desheenaxaraique ca alo'q. Huaña, nache huo'o aso 'alo lma' ye Samaria, nviraxaama aso nshere da nqatsheguem ca laquip. Nache So Jesús 'eetego' aso 'alo, 'eeta': –Aỹem 'aỹa'anem ca qapio'olec 'etaxat. 9 Qalaxaye na judiopi ye saishet da nhuoone' na Samaria le'ecpi, nache aso 'alo inat So Jesús, 'eeta': –¡Qalaxaye 'am judío le'ec! ¿Ta'ainco' ye aỹem 'auỹaxaatacot ye aỹem Samaria lashe? 10 Nache So Jesús 'enapeco': –'Am saishet da 'auaỹaten dam huotaique 'am ỹanem Ñim Lo'onatac 'Enauacna, qataq nataqa'en saishet da Aỹem 'auauatton. Cha'ayectaxa da 'auaỹaten, nache 'am Aỹem 'auỹaxanot taxa ca 'etaxat, nache Aỹem 'am sanem ca 'etaxat maye chegaqaigui da nca'alaxa. 11 Nache aso 'alo 'enapeco': –'Am Nataxala', qaica ca 'arasaxasoxonaxat da 'anqatsheguem ca 'etaxat, qataq anam ñi'illoxoqui ye ỹataqta qaỹoqtegue. Qaq ¿chaq hua'ago' ca 'auachegoxota'ague que'eca 'etaxat maye nca'altauec da Aỹem 'aỹa'anem? 12 Som hua'au qarta'a Jacob co'ollaxa qomi' no'onaxata'agueta ana'ana lli'illoxoqui. Anamaye, nachana co'ollaxa ana nỹomtapigui qataq soua llalqa, qataq som na'atetpi. Qaq ¿'am peta'a 'anapacaleco' somaxa? 13 Nache So Jesús 'enapeco': –'Enauac nam nỹomtapigui ana'ana, namayepi qaltaq ỹe'eguelaxalec da huo'o na laquip. 14 Qaq cam nỹomgui ca 'etaxat maye sanem, camaye saishet da ỹe'eguelaxalec da huo'o na laquip. Cha'aye cam 'etaxat maye sanem, 'eeta'am na 'etaxat maye npaxaatasheguem, da huetaigui camaye. Qaq nacheca ca iviraxata'a cam nca'alaxa maye chochaq tatec. 15 Nache aso 'alo 'enapega Somaye, 'eeta': –'Am Nataxala', aỹem 'aỹa'anem taxa que'eca 'etaxat, yaqto' aỹem saishet da qaltaq huo'o na ỹaquip, qataq sa iuen da ñanaxaama ana'ana ñi'illoxoqui da ñeqatsheguem ca 'etaxat. 16 Nache So Jesús 'enapega asomaye, 'eeta': –'Asoma qome, 'avi'iguena'ata ca 'arhua, nache 'anauegaxaama ne'ena. 17 Nache aso 'alo 'enapeco': –Aỹem qaica ca ihua. Nache So Jesús 'enapeco': –Ỹataqta 'eesa de'era qonapec da qonetega qaica ca 'arhua. 18 Cha'aye 'am maye ivi' cinco co'ollaxa soua 'arhua't. Qaq ñim qoneta'aguet nagui ñaqaiyeta saishet da ỹoqta 'arhua. Qaq ỹoqo'oye de'era qonapec, damaye ỹataqta 'eesa. 19 Qaq co'ollaq hua'axaỹa de'era aso 'alo, nache 'enapeco': –'Am Nataxala', aỹem sela'a da ỹoqta 'eesa da 'am la'aqtaxanaxanec Ñim Lo'onatac 'Enauacna. 20 Qaq som hua'au qarta'alpi co'ollaxa maye lma' na Samaria, somayepi co'ollaxa da natamnot Ñim Lo'onatac 'Enauacna, qalaq hualec añi qaỹoqotcheguemec 'alhua. Qalaxaye qami' judío lashe' qoñiỹapec da nacheye ye Jerusalén yem huaña da ñatamnaqot Ñim Lo'onatac 'Enauacna. 21 Nache So Jesús 'enapeco': –'Am 'alo, Aỹem 'aua'amaqten nagui, ten anacta ca na'a'q da qami' saishet da iuen da qanqo'oñiisheguemec añi qaỹoqotcheguemec 'alhua, huo'otaq da qanqo'oñiỹa ye Jerusalén, da qavio'oxoyiñi Ñim Lo'onatac 'Enauacna. 22 Qami' Samaria lashe', qami' saishet da qauauattoñiita cam qavio'oxoyiñiitac. Qomi', qalaxaye ỹataqta saỹaanaqta ñim sho'oxorenaqtac. Cha'aye ca Nta'a Nca'alaxaqui camaye chegoqtoigui na judiopi. 23 -24 Ñim Lo'onatac 'Enauacna saqcha'a, ỹoqo'oye cam ỹo'oxoren Ñimaye qalaq iuen da chegoqchigui da ltaunaxanaxac So Saqcha'a La'añaxac Ñimaye. Yaqto' da ỹo'oxoren qalaq ipacchigui da lataxac maye ỹaỹamaxareeta Ñimaye. Mashe nayeetai' ca laloqo' da nam ỹo'oxoren Ñim Lo'onatac 'Enauacna maye Nta'a, ipagaqchiichigui dam ỹataqta lataxac da qaỹo'oxoren Ñimaye, chegoqchigui da ltaunaxanaxac som saqcha'a la'añaxac, cha'aye Ñim Nta'a huotaique da, nache 'eetec da qaỹo'oxoren. Qaq yi'iye laloqo' mashe ivita. 25 Nache aso 'alo 'enapeco': –Aỹem saỹaten da anac qome ca Lca'aguishec Ñim Lo'onatac 'Enauacna maye qaiuattaique, maye na griegopi da iỹaxana qalaq Cristo. Qaq qom ivita da nvi' camaye, nache qomi' da'aqtaxanema 'enauac na lataxaguesat. 26 Nache So Jesús 'enapega asomaye, 'eeta': –Que'eca 'aua'axattac, camaye Nachaỹem maye 'am setaqtague'. 27 Huaña, nache nvi't soua lapaxaguenataqa So Jesús, nache soomaye ỹataqta huo'o da la'aalaqa' co'ollaq ila'alo Somaye da detaqtague' aso 'alo. Qalaxaye qaica ca ishet da inat Somaye da chaq negue't ca 'eetapeguec qataq chaq negue't ca na'aqtaxaatrapigui. 28 Nache aso 'alo no'onaxatchigui aso laco'oña da jec da nqo'oneua'a so nỹecpiolec. Nache da'aqtaxaatapeguem qataq 'eetega na shiỹaxauapi, 'eeta': 29 –Ña qauanaqui, ña qameenaxañeuga da ỹale maye ỹa'axataua'a 'enauac nam so'otpi co'ollaxa. ¡Peta'a nachera da Lca'aguishec Ñim Lo'onatac 'Enauacna maye qaiuattaique! 30 Nache anac nam chegaqaua'a ye nỹecpiolec, da nauga ca hueta'a So Jesús. 31 Nache soua lapaxaguenataqa ỹoqopitaxaata'ape da nachoxoreetracot Somaye, 'eetra': –'Am Napaxaguenataxanaq, ña cara'ac 'auque'e. 32 Qalaxaye So Jesús 'enapeco': –Aỹem huo'o da anoq maye qami' sa qauaỹaañi. 33 Nache soua lapaxaguenataqa nnattega't, 'eetra': –¿Ỹoqta da huo'o co'ollaxa ca ndoi' ca aloq damaxa? 34 Qalaxaye So Jesús 'enapeco': –Dam anoq, nachera da 'eetapeguec Ñim Aỹem namaq qataq da yaqto' semat da lo'onataxanaxac. 35 Da ime naxa da qaỹa'añiiñi na trigo, nache qoñiita' naxa da qara'aqtaqui: «Saxanaqcaua caua cuatro ca'agoxoiqa, nache iviteuga ca laloqo' da qanqat na ala na nañiguishec.» Qalaxaye Aỹem qami' shenapegalo: qanamachiỹasheguem, qataq qauloilec na nañiguishec da mashe ỹe na ala, da yaqto' qanqat. 36 Qaq cam deqataxaatac, camaye ỹaconeguet ca nsheetenaguec. Qaq nam ala na nañiguishec maye nqattac namaye naigui ca nca'alaxa maye chochaq tatec. Yaqto' cam danaxaatac qataq cam deqataxaatac ishet da 'eeta'a't da ntootapigui'salo. 37 Cha'aye ỹataqta 'eesa de'era 'enapec da na'aqtac naxa maye 'eeta': «Huo'o cam danaxaatac, qataq huo'o ca deqataxaatac.» 38 Aỹem qami' sama'q, da yaqto' qanqache na ala na nañiguishec maye saishet co'ollaxa da qanque'etaxañi da qaỹa'añiitapiguiñi. Qaq ỹaqa'a co'ollaxa som do'onataxaatacpi, qaq qami' choche qauacoñiitelec dam lo'onataxanaxac somayepi co'ollaxa. 39 Qaq ỹataqta qalota nam lma' yi'iye nỹecpiolec maye huaigui ye 'alhua Samaria nam ỹa'amaqten So Jesús, souaxat de'era la'aqtaxanaxac asa'aso 'alo co'ollaq 'eeta': «Ỹa'axataua'a 'enauac nam so'otpi co'ollaxa.» 40 Nache som lma' yi'iye nỹecpiolec maye huaigui ye 'alhua Samaria, nauga So Jesús, nache nachoxoreetacot Somaye da ñaq no'onaisop somayepi. Nache So Jesús dos na'axa'te da hueta'a yi'iye nỹecpiolec yi'iye 'alhua. 41 Nache qalota so laỹepi shiỹaxauapi da da'amqaanataxan co'ollaq maiche na'axaỹaxaatega na la'aqtacpi Somaye. 42 Nache somayepi 'eetega aso 'alo, 'eeta': –Nagui saishet da nachaqrata da 'ara'aqtaxanaxac da sa'amaqtenaq, cha'aye qomi' nataqa'en maiche ña'axaỹaxanaqtega damaye qataq saỹaanaqta da ỹoqta 'eesa da nachera da Nta'a Lca'alaxaqui nam shiỹaxauapi maye huetalec ana 'alhua.

So Jesús nataren so llalec so ltaua so huataxanaq lta'a

43 Qaq co'ollaq mashe inoxoore'c soua dos na'axa'te, nache So Jesús ca'ai ye 'alhua Samaria, nache taỹa ye 'alhua Galilea. 44 Cha'aye Somaye maiche la'aqtaxanaxac co'ollaxa da 'eeta': Qaica ca la'aqtaxanaxanec Ñim Lo'onatac 'Enauacna da qaỹo'oxoreetac da hueta'a ca maiche lalamaxat lma'. 45 Qaq co'ollaq mashe ivita ye 'alhua Galilea, nache na lma' yi'iye 'alhua, ỹataqta huo'o da lqochoxo da ilo'oguet Somaye. Cha'aye somayepi nataqa'en ỹalectaua'a so naponaxac le'enaxat da Lapascua maye huaña ye Jerusalén, qataq ỹauaachigui 'enauac nam ỹo'otpi So Jesús co'ollaq huaña yemaye. 46 Nache Somaye qaltaq nqo'ona ye Caná, maye huaigui yi'iye 'alhua Galilea, yem huaña co'ollaq so 'etaxat da nañigui naqa'en na lataxa Somaye. Qaq huo'o so ỹo'oxoraic huataxanaq lta'a maye ltaua so nta'a Herodes Antipas, somaye huo'o so llalec sa no'on, hueta'a ye Cafarnaúm. 47 Qaq se'eso huataxanaq lta'a co'ollaq la'axaỹaxac So Jesús da chegaqa'ague da 'alhua Judea da mashe nvita ye 'alhua Galilea, nache nqo'ona cam hueta'a, nache nachoxoreetacot Somaye, da yaqto' taỹa ca lma' da nataren so llalec maye mashe ileetapigui'. 48 Nache So Jesús 'enapega somaye, 'eeta': –Qami' saishettaxa da qaua'amqaanataxañi da huo'otaq saxanaxa da qauauañiichigui na na'anecpi qataq nam sa qaỹauanapigui. 49 Qalaxaye se'eso huataxanaq lta'a 'enapeco': –'Am Nataxala', sa 'anaỹaloxon da qojec da 'anqo'ona ye ima', yaqto' 'aviralec ye ỹalec da saxanaxa da ileu. 50 Nache So Jesús 'enapeco': –'Aue, 'avi'eguelaxa ca 'arma'; ca 'aỹa'alec nca'alec. Nache se'eso ỹale ỹataqta ỹa'amaqten da la'aqtac So Jesús. Nache jec. 51 Qaq co'ollaq mashe nayeetaua'a so lma', nache so l-latacpi huaqata'aguet somaye, nache da'aqtaxaatapeguem, 'eeta': –Ye 'aỹa'alec, mashe nca'alec. 52 Nache somaye ina't soua l-lataqa da chaq ñichiguiña co'ollaxa aso nala' da ỹaỹamaxañi so llalec. Nache soomaye, 'eetra': –Qomye shecait so dasheta añi nala', nache ỹaxanec so le'eraxa. 53 Nache so lta'a so nsoqolec ỹaỹaten da nacheso so huetoigui co'ollaq So Jesús 'enapega somaye, 'eeta': «Ca 'aỹa'alec, camaye nca'alec.» Nache somaye qataq 'enauac so netaña ye lma' ỹa'amaqten So Jesús. 54 Qaq 'era da lỹa na'anec sa qaỹauanapega maye ỹo'ot So Jesús co'ollaq huaña ye 'alhua Galilea, co'ollaq chegoqta'a ye 'alhua Judea.

5

So Jesús nataren so ỹale maye sa da'añiigue

1 Qaq co'ollaq qaỹata'ague de'era, nache So Jesús ỹe'eguelaxa ye Jerusalén, da yaqto' ỹalegueua'a so laponaxac na judiopi. 2 Qaq se'eso lpaqtaxat ye nỹecpi ye Jerusalén, huo'o som lasom maye qaỹamata'ac «Nasom ana Qagueta.» Somaye, nache saqaỹapeque asom laỹe' na 'etaxat maye huo'oi soua cinco ñeguereuo maye nataqa'en ishet da qanayeeto'ot na lpaqal, qaq na la'aqtac na hebreo da iỹaxana qalaq Betzatá. 3 Qaq asomaye, nache hueta'a so qalota sa no'onpi, huo'o na tagoxoicpi, qataq huo'o na ñe'eerauo naua lchel qataq na sa da'añiiguepi maye choche iuatta'a da ndaxanataguec na le'ec 'etaxat asomaye, 4 cha'aye som namaxashec piguem le'ec huo'o naxa ye na'a'q da naỹa asa'aso laỹe' na 'etaxat da iraxan na le'ec. Nache cam hua'auchiguiñi da tangui asomaye da ime da qairaxan na le'ec, nache camaye ishet da no'oita na'aictaxa cam 'eetec ca lalolaxa. 5 Qaq huo'o so ỹale, nache hueta'asop asomaye. Somaye mashe ivi' naua treinta y ocho vi'iye da lalolaxa. 6 Qaq So Jesús co'ollaq ila'a somaye da nnaatai', qataq qaỹa'aqtaxanem da mashe qaỹoqteguelo naua vi'iye da nache 'eeta'ac de'era somaye. Nache inat, 'eeta': –¿Peta'a 'anshetaique da 'am no'oita? 7 Nache se'eso sa no'on 'enapeco': –'Am Nataxala', qaica ca aỹem itauan da sangui añi laỹe' na 'etaxat naxa da ivita da qairaxan na le'ec. Cha'aye naxa da ñeshetaique da sangui añimaye, nache mashe sogote naxa da huo'o na hua'auñigui da tangui. 8 Nache So Jesús 'enapega somaye, 'eeta': –Qoñisheguem, 'auacona na 'aracanec, ime, nache 'auqueuoỹapigui' nagui. 9 Huaña, nache se'eso ỹale no'oita, inana't so lacanec, nache queuoỹapigui'. Qaq se'eso na'a'q maye huetoigui de'era, somaye mataxaqui, se'eso na'a'q ỹataqta saishetapec na judiopi. 10 Ỹoqo'oye huo'o so lataxala'pi na judiopi 'eetega som ỹale maye qanataren, 'eeta': –Na na'a'q, namaye mataxaqui, qaq ỹoqo'oye saishet da qaỹashen da 'am 'analleguisheetac na 'aracanec. 11 Nache somaye 'enapeco': –Som aỹem nataren maye aỹem 'enapega, 'eeta': «Qoñisheguem, 'auacona na 'aracanec ime, nache 'auqueuoỹapigui'.» 12 Nache so lataxala' na judiopi inattaco' somaye, 'eeta': –¿Negue't ca 'am 'enapega co'ollaxa da 'auo'ot de'era? 13 Qalaxaye se'eso ỹale sa ỹauatton co'ollaxa cam nataren somaye, cha'aye So Jesús sa naỹaloxon da taigui se'eso qalota shiỹaxauapi maye hueta'a yemaye. 14 Qaỹata'ague co'ollaxa de'era, nache So Jesús ilalec somaye huaigui aso no'onaxanaxaqui late'erai, nache 'enapego', 'eeta': –Nagui da mashe 'am no'oita, qaq no'on da saishet da qaltaq huo'o 'anqa'en ca 'arasouaxashet, yaqto' saishet da 'avira'aguet ca ỹapac qauem. 15 Nache se'eso ỹale jec da da'aqtaxanema soua lataxala'ate so judiopi da, nacheso So Jesús som nataren somaye co'ollaxa. 16 Qaq ỹoqo'oye soomaye icaatrac So Jesús, souaxat Somaye da datannaxangui so na'a'q mataxaqui. 17 Qalaxaye So Jesús 'enapegalo soomaye, 'eeta': –Ñi Ita'a, saishet da ỹaxaañi da lo'onataxanaxac, qaq nache 'eetec nataqa'en Aỹem. 18 Qaq ỹoqo'oye na lataxala'pi na judiopi nquictec da lyaxa da ỹalauat So Jesús, cha'aye saishet da nachaqrata da sa ỹalaxalec da lataxac ye na'a'q mataxaqui, cha'aye nataqa'en 'eetega da ỹataqta Lta'a Ñim Lo'onatac 'Enauacna, qaq ỹoqo'oye da lataxac 'eeta'am Ñimaye.

Da 'enec So Llalec Ñim Lo'onatac 'Enauacna

19 Nache So Jesús 'enapega somayepi, 'eeta': –Ỹataqta 'eesa de'era qami' sa'axatema, da ne'ena Llalec Ñim Lo'onatac 'Enauacna, namaye saishet da huo'o ca ỹo'ot da huo'otaq maiche ndotelec, cha'aye namaye ỹo'ot cam ỹauaachigui da ỹo'ot Ñim Lta'a. Qaq ỹoqo'oye 'enauac nam ỹo'otpi Ñim Ita'a, qaq nataqa'en Aỹem so'ot. 20 Ñimaye ỹataqta Aỹem ỹauotec, ỹoqo'oye Aỹem ỹachaxana nam ỹo'otpi. Qataq Aỹem ỹachaxana na lta'araic ỹo'otpi, nam qami' ỹo'oteque da lta'araic da qara'aalaqai. 21 Cha'aye de'era 'eetec da Ñi Ita'a da ishet da qaltaq nca'alaxatec ca leuaxaic, qaq nache 'eetec nataqa'en nam Llalec, da ishet da ỹanem da lca'alaxa cam taalec da ỹanem. 22 Qataq Ñi Ita'a, saishet da nmit na shiỹaxauapi, chaqrata da ỹanem na Llalec 'enauac da la'añaxac da nmit namayepi, 23 yaqto' 'enauac na shiỹaxauapi ishet da ỹo'oxoren na Llalec, 'eeta'am naqa'en da 'eetec da ỹo'oxoren Ñim Lta'a. Qaq cam saishet da ỹo'oxoren na Llalec, qaq camaye saishet nataqa'en da ỹo'oxoren Ñim Lta'a maye namaq Namaye. 24 Qaq ỹataqta 'eesa de'era qami' sa'axatema, da ca na'axaỹaxana de'era sa'axattac, qataq ỹa'amaqten Ñim Aỹem namaq, nache camaye mashe inoxoneua'a da lataxac da nca'alaxa maye qaica ca loga't. Qaq camaye nataqa'en saishet da qaỹauo'o qome ca nhuaxanaguec, cha'aye mashe sogote da ca'ai da nleuaxa da inoxoneua'a da nca'alaxa. 25 Qaq huo'o nataqa'en da ỹataqta 'eesa 'eeta': nagui nam ỹataqta qaỹoqta naqa'en Ñim Lo'onatac 'Enauacna, Aỹem hua'aqtague', Aỹem maye Aỹem Llalec Ñimaye. Qaq da ỹalaxalec 'enauac nam shenapec, nache huo'o ca lca'alaxa chochaq tatec. 26 Cha'aye Ñim Lo'onatac 'Enauacna maye Ita'a, huo'o da la'añaxac da ỹan da nca'alaxa. Qaq de'era na'añaxac, damaye mashe Aỹem ỹanem. 27 Qataq nataqa'en Aỹem ỹanem da ỹa'añaxac da ishet da ñimit na shiỹaxauapi, cha'aye Aỹem maye Aỹem Shiỹaxaua Llalec. 28 Qaq saishet qome da qami' ỹe'elaqche't de'era qami' sa'aqtaxanema, cha'aye ivita ca na'a'q qome da nataqa'en na leuaxaicpi, hua'axaỹa da ivilỹaxac, 29 nache chegoqchiguingui ana nhuachiquipi da ñesheguem. Nache nam ỹo'ottac ca ỹaỹamaqchiguiñi qaltaq nca'alec, da yaqto' chochaq tatec da hueta'aguet Ñim Lo'onatac 'Enauacna. Qaq nam ỹo'ottac ca sa ỹaỹamaxañi qalaq nca'alec, da yaqto' qaỹauo'o ca nhuaxanaguec.

Dam ỹoqta yo'oq naqa'en da la'añaxac So Jesús

30 Aỹem saishet da maiche ñerotelec da huo'o ca so'ot. Ñim Ita'a maye Aỹem namaq, Ñimaye Aỹem da'aqtaxanem da lataxac da ñimit 'enauac na shiỹaxauapi. Ỹoqo'oye da huo'o ca ñimit qalaq ỹaỹamaqchiguiñi, cha'aye saishet da so'ot ca maiche sheetapeguec, nachaqrata da ỹataqta salaxaguet Ñim Ita'a. 31 Cha'aye da huo'otaq Aỹem da no'on ca ỹa'aqtaxanaxac da maiche ña'axattapeguela't, nache qami' qoñiitega da satenataxaatac. 32 Qalaxaye sauattoota Ñim Aỹem ỹa'axattac, qaq Aỹem saỹaten da ca 'enapec ñimaye ỹataqta 'eesa. 33 Qami' huo'o co'ollaxa so qaramaxashequi da inat so Juan, qaq da la'aqtaxanaxac so Juan ỹataqta 'eesa. 34 -35 Da lapaxaguenataxanaxac so Juan, damaye ỹataqta 'onaxaic, 'eeta'am na le'eraxa aca ncoỹaraxanaxaqui da 'ettaigui da huetaigui na napalaxa, qaq qami' ỹataqta sa qaỹauec da qantonaxaqui co'ollaq qaua'aqaichigui. Qalaxaye Aỹem saishet da seuen da huo'o ca no'on ltaxaỹaxac ca yo'oqchigui shiỹaxaua da Aỹem detaqlec. Sa'axattac so Juan da yaqto' qami' qaua'amqaanataxañi, yaqto' Ñim Lo'onatac 'Enauacna qami' nca'alaxatre'c. 36 Qalaxaye Aỹem huo'o da ña'aqtaguec maye ỹataqta napacalec da la'aqtaxanaxac so Juan. Cha'aye nam so'ot, nachena na Aỹem ỹamaxalec Ñim Ita'a. Qaq nachena na ỹoqta ichoxot da 'eesa da Aỹem namaq Ñimaye. 37 Nataqa'en Ñim Ita'a maye Aỹem namaq, Ñimaye ỹataqta 'eesa naqa'en de'era ña'aqtaguec. Qaq na'aictaxa da qami' sa qauauañiỹapega da qaua'aqaichigui ca lavilỹaxac Ñimaye, qataq saishet da qauauattoñi ca lasheguiỹaxac. 38 Qaq naua nanettrañi la'aqtaqa Ñimaye nataqa'en saishet da qami' taiguilo, cha'aye qami' saishet da qaua'amaqchiñi Aỹem maye Aỹem namaq Ñimaye. 39 Qami' ỹataqta huo'o da qanaquitaxaqui da qanapaxaguiñeetegalo naua nanettrañi la'aqtaqa Ñim Lo'onatac 'Enauacna, cha'aye qaua'amaqchiñi da nache qoñiitec de'era, nache qami' taỹoto da nca'alaxa maye chochaq tatec. Qalaxaye ne'enaua na'aqtaqa maye nanettrañi, naamaye Aỹem ỹa'axatta'ape, 40 qalaxaye qami' saishet da huotaique da Aỹem qaua'amaqchiñi, da yaqto' qami' taỹoto de'era nca'alaxa maye chochaq tatec. 41 Aỹem saishet da choche ñaquitta'a da Aỹem ỹo'oxoren na shiỹaxauapi. 42 Qataq da lỹa, ye ỹataqta qami' sauattoote' qataq saỹateeta da saishet da qauauochec Ñim Lo'onatac 'Enauacna. 43 Ñimaye maiche Ita'a, qaltaq Aỹem namaq, qalaxaye qami' saishet da Aỹem qauacoñiiguet. Qalaxaye da huo'o ca anac da maiche ỹacoolec ca maiche 'eetapeguec, nache camaye qami' qauacoñiiguet. 44 Qaq ¡Ca 'eeteco' da qami' Aỹem qaua'amaqchiñi, ye qami' qarqopitaxache da qami' ỹo'oxoreeta'ape na shiỹaxauapi, qaq saishet da ỹo'oxoren Ñim Lo'onatac 'Enauacna maye 'oonolec! 45 Saishet qome da qaupi'itaxañiitega da Nachaỹem da sa'aqtaxanem Ñim Ita'a ca qarasouaxashechi. Cha'aye qami' qauacheeto'ot da qarpi'iỹaxaqui naua leregui'she so Moisés, qaq nacheso somaye da ỹa'axat ca qarasouaxashechi. 46 Cha'ayectaxa da qami' qaua'amaqchiñi cam 'enapec so Moisés, nache nataqa'en taxa Aỹem qaua'amaqchiñi, cha'aye so Moisés Nachaỹem maye Aỹem ỹiyiñi co'ollaxa. 47 Qalaxaye da qami' saishet da qaua'amaqchiñi dam ỹiyiñi co'ollaxa somaye, qaq ¿ca 'eeteco' da ishet da qaua'amaqchiñi cam shenapec?

6

So Jesús iquia'axan so napacalec ca cinco mil shiỹaxauapi

1 Qaq co'ollaq ime de'era, nache So Jesús taitague da le'ego aso Lapel Late'erai ye Galilea qataq da lỹa le'enaxat Lapel Late'erai ye Tiberias. 2 Qaq ỹataqta qalota na shiỹaxauapi ca'attague' Somaye, souaxat da ỹauaachigui na ỹo'ottac na'anecpi maye sa qaỹauanapega, qataq natareetac na sa no'onpi. 3 Nache So Jesús tasheguemec aso qaỹoqotcheguemec 'alhua. Nache huaña da nso'ooñi qataq soua lapaxaguenataqa. 4 Qaq mashe saqaỹapeque soua na'axa'te maye laponaxaqui' na judiopi da iuennate so na'a'q le'enaxat da Lapascua. 5 Nache co'ollaq namatasheguem So Jesús, nache ila'aguet so qalota shiỹaxauapi, da nca'attaueegue Somaye. Nache inat so Felipe, 'eeta': –¿Chaq hua'ago' ca sachegoxotaqa'ague da sesheenaxanaxa ca aloq ne'ena qalota shiỹaxauapi? 6 Qalaxaye So Jesús mashe ỹaỹaten dam huotaique ỹo'ot, qalaxaye inat somaye, cha'aye huotaique da ỹaỹaten ca la'aqtac so lapaxaguenatac. 7 Nache so Felipe 'enapeco': –Na'aictaxa da ivi' doscientos na'axa'te da do'onataxaatac ca shiỹaxaua, qalaxaye ñaqaiyeta saishet da nalolec da desheenaxana ca sa 'amaqtaq aloq ca ỹataqta qalota shiỹaxauapi, 'eeta'am ne'ena. 8 Nache so Andrés, som 'oonolec soua lapaxaguenataqa So Jesús, maye lqaỹa so Simón Pedro, somaye 'enapego' So Jesús, 'eeta': 9 –Huo'o da nogotolec hueta'a ne'ena. Damaye huo'oi daua ỹacheta'ape cincole nauolel chegaqaigui na cebada, qataq daua dos nỹaxaye. Qalaxaye, daamaye ỹataqta qaica ca la'amaqche'c, saishet da nalouec da qoỹanoigui ne'ena shiỹaxauapi. 10 Nache So Jesús 'enapegalo soua lapaxaguenataqa, 'eeta': –Qoñiỹapega 'enauac na shiỹaxauapi da nso'ooñi. Qaq ỹataqta qalota na 'auaqpi se'eso qanayeeta'a. Nache nso'ooñi 'enauac somayepi, qaq somayepi ivi' ca cinco mil ỹalleppi. 11 Nache So Jesús ỹaconalo soua nauolel, ime, nache ỹanot da na'achecỹaxac Ñim Lo'onatac 'Enauacna. Qaq co'ollaq imat da ỹanot da na'achecỹaxac Ñimaye, nache ỹanoiguilo soua lapaxaguenataqa. Qaq soomaye, nache ỹanoiguilo 'enauac som nso'ootañipi. Nataqa'en ỹe'enaxatchigui naqa'en soua nỹaxaye da ỹanoigui 'enauac somayepi, choche ivitta'a da comaraxaicpi. 12 Qaq co'ollaq mashe comaraxaicpi somayepi, nache So Jesús 'enapegalo soua lapaxaguenataqa, 'eeta': –Qalapoñiỹa't 'enauac na ñi'iỹoxotpi, yaqto' saishet da huo'o ca ne'en. 13 Nache soomaye lapona't so ñi'iỹoxot, nache ivi' soua doce no'oxonal soua nlaxatchiguilo so ñi'iỹoxot soua cincole nauolel maye chegaqaigui na cebada. 14 Nache som shiỹaxauapi maye ỹauaachigui de'era na'anec maye sa qaỹauanapega maye ỹo'ot So Jesús, somayepi 'enapeco': –Ỹoqta 'eesa damaye, da la'aqtaxanaxanec Ñim Lo'onatac 'Enauacna maye qaỹa'axatta'aguet co'ollaxa da naỹa ana 'alhua. 15 Qalaxaye So Jesús co'ollaq noma da qaỹauotaique da qaỹaconeua'a da qoỹanagui da nta'a, nache Somaye qaltaq ca'ai somayepi da tasheguemec aso qaỹoqotcheguemec 'alhua, da yaqto' nda'a't ca hueta'a.

So Jesús quetalec so 'etaxat

16 -17 Qaq co'ollaq mashe napalchiguiñi, nache soua lapaxaguenataqa So Jesús, huenooyingui aso nllocta, nache ỹa'axasoxoorelec aso lapel da nqo'ootra ye nỹecpi ye Cafarnaúm. Qaq mashe ỹataqta napalñi co'ollaxa, qalaq So Jesús ñaq saxanaxa da nviraxasom. 18 Nache anac so la'at lta'araic, nache ỹataqta ỹo'ot ana lapaxa so 'etaxat. 19 Qaq co'ollaq mashe qaỹoqteueeguelo soomaye, nache ỹauaategueta So Jesús da naỹa'a aso nllocta petalec na 'etaxat, nache soomaye ỹataqta huo'o da lcolanaqa'. 20 Qalaxaye So Jesús 'enapegalo soomaye, 'eeta': –¡Nachaỹem, saishet da qayi'i! 21 Nache soomaye ỹataqta huo'o da lyaqa' da huenotsheguemec Somaye aso nllocta. Huaña, nache saqaỹaloq da ivittra so loigue yem taỹa'ata 'alhua.

Na shiỹaxauapi nmittaique So Jesús

22 Qaq so lỹa na'a'q, nache na shiỹaxauapi maye no'ona'atague da le'ego aso lapel, namayepi nomta'a da soua lapaxaguenataqa So Jesús ndotre'c co'ollaq huenooyingui aso 'oonole nllocta, qaq So Jesús saishet da nnaictagueto soomaye. 23 Qaq huo'oi soua lỹa't nllocta, chegoqra'a ye Tiberias, nvira yem saqaỹapeque yem huaña co'ollaq qanallecta'ape soua nauole, co'ollaq ime da ỹan da na'achec so Nataxala'. 24 Nache se'eso shiỹaxauapi, co'ollaq ila'a da saishet da hueta'a yi'iye So Jesús qataq soua lapaxaguenataqa, nache somayepi huenooñiguilo se'esoua nllocta da qanqo'oota ye Cafarnaúm, da qanmitaique Somaye.

So Jesús nacheso so 'eeta'am aca nauole maye chegaqaigui da nca'alaxa

25 Nache somayepi co'ollaq ivittague da le'ego aso lapel, nache ilalec So Jesús. Nache inattac, 'eeta': –'Am Napaxaguenataxanaq, ¿chaq lagui co'ollaxa da 'anvitta ne'ena? 26 Qalaxaye So Jesús 'enapega somayepi, 'eeta': –Ỹataqta 'eesa de'era qami' sa'axatema, da qami' Aỹem qanmichiitaique, cha'aye qami' qauqui'i, ivira'a da qami' comaraxaiqa, qaq saishet da souaxat da qami' qauaỹaañi ca naigui na na'anecpi maye sa qaỹauanapega. 27 Saishet da qauo'onataxañiitapeguelec cam nallec maye taỹa'a da imeuo, nachaqcata cam nallec maye saishet da imeuo qataq chegaqaigui da nca'alaxa maye chochaq tatec. Qaq 'eca cam nallec maye qami' ỹanema na Shiỹaxaua Llalec. Cha'aye Ñim Ita'a maye Lo'onatac 'Enauacna, ỹachaxan da Aỹem huo'o da shenec. 28 Nache qainattac Somaye, qoỹeeta': –¿Hua'ago' ca shenaqtec da yaqto' qomi', ishet da so'otaq cam 'eetapeguec Ñim Lo'onatac 'Enauacna? 29 Nache So Jesús 'enapeco': –'Oonolec da 'eetapeguec Ñim Lo'onatac 'Enauacna, nshetaique da qami' qaua'amaqchiñi nam namaq Ñimaye. 30 Nache qainat Somaye, qoỹeeta': –Qaq ¿negue'to' ca na'anec da ishet da qomi' 'auachaxanalo da yaqto' seloxogui, nache ishet da 'am sa'amaqtenaq? ¡Ñaq 'auo'ot cam qomi' 'auachaxanalo! 31 Som hua'au qarta'alpi co'ollaxa chectac aso maná co'ollaq hualec so toolec 'alhua, cha'aye nache 'ena'ape naua nanettralec ana nere maye huetalec na la'aqtacpi Ñim Lo'onatac 'Enauacna maye 'eeta': «Ñim Lo'onatac 'Enauacna iquia'axanec somayepi aso nauole maye chegoqo'ot na piguem.» 32 Nache So Jesús 'enapeco': –Aja', ỹataqta 'eesa de'era qami' sa'axatema, da saishet da nacheso so Moisés som qami' ỹanema aso nauole maye chegoqo'ot na piguem, nachaqñita Ñim Ita'a maye nacheñi ñi qami' ỹanema acam ỹataqta 'eesa nauole, maye chegoqo'ot na piguem. 33 Cha'aye aca nauole maye ỹan Ñim Lo'onatac 'Enauacna, nachaca acam chegoqo'ot na piguem qataq anac da ỹami' da lca'alaxa 'enauac na shiỹaxauapi. 34 Nache somayepi 'enapeco': –'Am Nataxala', no'onctaxa da nache 'eetai' da qomi' 'aỹa'anema aca'aca nauole. 35 Nache So Jesús 'enapeco': –Aỹem Nachaỹem nauole maye san da nca'alaxa. Ca Aỹem naua'a, nache sa nauane' na lqouaxa; qataq ca Aỹem ỹa'amaqten, nache sa nauane' na laquip. 36 Qalaxaye Aỹem mashe ime da qami' sheetegalo, da qami' saishet da Aỹem qaua'amaqchiñi, na'aictaxa da qauloitagui na so'otpi. 37 'Enauac nam lca'aguishecpi Ñim Ita'a da yaqto' sauo'o ỹapaxaguenatacpi, namayepi Aỹem naua'a; qaq Aỹem saishet da semaqa'aguet. 38 Cha'aye Aỹem saishet da sachegoqtot na piguem da ñanac da so'ot ca maiche sheetapeguec, chaqrata da ñanac da so'ot ca 'eetapeguec Ñim Lo'onatac 'Enauacna, cha'aye nacheñi Ñim Aỹem namaq. 39 Qaq dam 'eetapeguec Ñi Ita'a maye Aỹem namaq nshetaique da Aỹem qaica ca seqataqchet nam Aỹem ỹanem Ñimaye, chaqrata da qaltaq ñeca'alaxatec qom iviteuga ca pa'atec na'a'q. 40 Qataq Ñimaye, nshetaique da 'enauac nam ỹamato'ot na Llalec qataq ỹa'amaqten, nache huo'o da lca'alaxa chochaq tatec, qataq Aỹem ñeca'alaxatec qom iviteuga ca pa'atec na'a'q. 41 Huaña, nache huo'o na judiopi le'ecpi da quetapeguelec So Jesús, souaxat co'ollaxa da 'eeta': «Aỹem Nachaỹem nauole, maye sachegoqo'ot na piguem.» 42 Nache somayepi 'eeta': –¿Damaye saisheto' peta'a da nachera da Jesús, dam llalec so José? Qomi' sauattonaq so lta'a qataq aso late'e. Qalaq ¿ta'ainco' da 'eetega chegoqo'ot na piguem? 43 Nache So Jesús 'enapegalo soomaye, 'eeta': –Saishet da Aỹem qoquiitapeguelec. 44 Qaica ca ishet da choche Aỹem naua'a da huo'otaq sa nauegueuo Ñim Ita'a maye Aỹem namaq; nache camaye ishet da qaltaq ñeca'alaxatec ca pa'atec na'a'q. 45 Naua nanettrañi la'aqtaqa som la'aqtaxanaxanecpi Ñim Lo'onatac 'Enauacna naamaye, 'eeta': «Ñim Lo'onatac 'Enauacna ỹapaxaguen 'enauac na shiỹaxauapi.» Qaq ỹoqo'oye 'enauac nam na'axaỹaxana Ñim Ita'a qataq napaxaguena Ñimaye, namayepi Aỹem naua'a da yaqto' Aỹem ca'ategue. 46 Saishet da huo'o ca ilogui da lasheguiỹaxac Ñim Ita'a; Nachaqaỹemta maye sachegoqtot Ñimaye. 47 Qaq ỹataqta 'eesa de'era qami' sa'axatema, da cam Aỹem ỹa'amaqten, nache 'eesa da huo'o da lca'alaxa maye chochaq tatec. 48 Aỹem, Nachaỹem nauole maye san da nca'alaxa. 49 So hua'au qarta'ailpi co'olloxoche quetalec so toolec 'alhua, nache somayepi chectac aso nauole chegaqasheguem le'enaxat maná, qalaxaye nache 'ena'am ileu somayepi. 50 Qalaxaye Aỹem sa'axattac aso nauole maye chegoqo'ot na piguem, da ca chec asomaye, nache saishet da ileu. 51 Aỹem maye Nachaỹem nauole maye ñeca'altauec, qataq sachegoqo'ot na piguem. Ca chec ana'ana nauole, nache qaica ca loga't da nachaalataxac. Ana nauole maye san, nachera da ỹo'ocỹaxac. Qaq damaye san yaqto' nca'alec 'enauac na shiỹaxauapi. 52 Nache nam judiopi maye sa iyacnapec da detaqtega So Jesús, maiche taỹa't da ncotatega't, 'eeta': –¿Hua'ago' ca 'eetec dam da', da qomi' ỹanema da maiche lo'ocỹaxac da sacheguenaq? 53 Nache So Jesús, 'eeta': –Aja', ỹataqta 'eesa de'era qami' sa'axatema, da huo'otaq saishet da qolliqui da lo'ocỹaxac na Shiỹaxaua Llalec, qataq da saishet da qanỹomiiguilo naua ltago'q, nache saishet da huo'o ca qarca'alaqai chochaq tatec. 54 Qaq ca chec da ỹo'ocỹaxac qataq nỹomguilo naua itago'q, nache huo'o da lca'alaxa maye chochaq tatec. Nache camaye qaltaq ñeca'alaxatec ca pa'atec na'a'q. 55 Cha'aye da ỹo'ocỹaxac, nachera da ỹoqta 'eesa nallec, qataq naua itago'q, nachenaua na ỹoqta 'eesa naquip. 56 Ca chec da ỹo'ocỹaxac qataq ca nỹomguilo naua itago'q, nache camaye nache 'eetai' da Aỹem na'attaua'a, qaq nache 'ena'am Aỹem soota'aguet camaye. 57 Ñim Ita'a maye Aỹem namaq, Ñimaye huo'o da la'añaxac da ỹan da nca'alaxa chochaq tatec, qaq Ñimaye nacheñi ñi chegoqo'ot da ica'alaxa. Qaq ỹoqo'oye 'enauac nam Aỹem ỹa'amaqten qataq chec da ỹo'ocỹaxac, huo'o qome da lca'alaxa chochaq tatec. 58 Qaq Aỹem sa'axattac aso nauole maye chegoqo'ot na piguem. Qaq asa'aso nauole, asomaye saishet da 'eeta'am aso maná, maye chectac co'ollaxa som hua'au qarta'ailpi, qalaxaye nache 'ena'am 'enauac somayepi ileu. Qaq cam chec asa'aso nauole maye sa'axattac, nache camaye nache 'eetai' da nca'altauec. 59 Qaq de'era dapaxaguenataxaatapeguec So Jesús, damaye huaigui aso napaxaguenaxaqui na judiopi maye naña ye Cafarnaúm.

Da na'aqtac maye chegaqaigui da nca'alaxa maye chochaq tatec

60 Qaq co'ollaq qaỹa'aqchigui de'era lapaxaguenataxanaxac Somaye, nache ỹataqta qalota nam quetague' So Jesús na, 'eeta': –De'era qonetega, damaye ỹataqta huo'o da lqalaic da qaỹaconeguet; ¿negue'tom ca ishet da 'am naỹamaxareete'? 61 Nache So Jesús 'enapeco': –¿Peta'a sa qauaỹamaxayiñi de'era? 62 Qaq ¿hua'ago' ca qoñiitec qone' da huo'otaq qami' qauloỹa'a na Shiỹaxaua Llalec da ỹe'eguelaxasheguema yem hueta'a co'ollaxa? 63 Som Saqcha'a La'añaxac Ñim Lo'onatac 'Enauacna, nacheso so chegoqo'ot da nca'alaxa maye chochaq tatec; qaica ca chochaq shiỹaxaua da ỹan de'era achaalataxac. Qaq dam shenapec, damaye chegoqo'ot som Saqcha'a Na'añaxac maye ỹan de'era achaalataxac. 64 Qalaxaye ñaqaiyeta huo'o na saishet da da'amqaanataxan da qoñiita. Qaq 'enapec de'era So Jesús, cha'aye nale'ena da ỹaỹaten co'ollaq cheta'ague da do'onataxan nam saishet da da'amqaanataxan qataq som huotaique co'ollaxa da ỹaneuo Somaye. 65 Nataqa'en 'enapeco': –Qaica ca ishet da Aỹem ca'attague' da huo'otaq Ñim Lo'onatac 'Enauacna maye Ita'a saishet da la'aqtac. 66 Huaña, nache ỹataqta qalota nam quetague' So Jesús da ỹaxaañi da quegue Somaye. 67 Nache So Jesús inatta'ape soua doce lapaxaguenataqa, 'eeta': –¿Qami' peta'a nataqa'en qansheetaique da qoqui? 68 Qalaxaye so Simón Pedro 'enapeco': –¿Negue'tom ca lỹa seca'ataxague, 'am Qarataxala'? Ye nache'amta maye naua 'ara'aqtaqa naamaye ỹa'n da achaalataxac maye chochaq tatec. 69 Qomi' mashe sogote da 'am sa'amaqtenaq, qataq saỹaanaqta da nache 'am Lca'aguishec qataq 'am Llalec Ñim Lo'onatac 'Enauacna maye nache 'eetai' da nca'altauec. 70 Nache So Jesús 'enapeco': –¿Saisheto' da qami' doce da qami' ica'agui'she? Ñi 'oonolec da qoñiita netaigui ñi pa'aguenataxanaxaic. 71 Qaq nacheso som Judas maye llalec so Simón Iscariote som detaqtega So Jesús. Cha'aye so Judas, nacheso so 'oonolec soua doce lapaxaguenataqa maye ỹaneuo Somaye.

7

Soua lqaỹa't So Jesús saishet da ỹa'amaqte'n Somaye

1 Qaq co'ollaq ime de'era, nache So Jesús coleetac ye 'alhua Galilea. Somaye saishet da taỹa ye 'alhua Judea, cha'aye nam lataxala' na judiopi maye lma' yemaye nshetaique da ỹalauat Somaye. 2 Qalaxaye mashe saqaỹapeque so naponaxac maye ivittre'c soua siete na'axa'te maye laloxoqui' da qanayenaiguilo naua qaỹa'ara'a't npe'lolqa qo'oipaq lcouepi. 3 Qaq ỹoqo'oye soua maiche lqaỹa't 'eetegalo Somaye, 'eetra': –Saishet da qoueta'a ne'ena. No'on da 'anqo'ona ye 'alhua Judea, yaqto' na 'am quetague'pi maye hueta'a yemaye, ishet nataqa'en da ỹauaachigui na lta'araic 'auo'otpi. 4 Cha'aye ca shiỹaxaua da nshetaique da qaỹauatton, nache saishet da nqañoxottañi da huo'o ca ỹo'ot. Qaq 'am, no'on da 'auachaxana 'enauac na shiỹaxauapi nam 'auo'otpi. 5 Qaq la'aqta'c de'era soomaye, cha'aye nataqa'en saishet da huotaique da ỹa'amaqte'n So Jesús. 6 Qalaxaye So Jesús 'enapeco': –Saxanaxa da ivita ye laloqo' da 'enauac da qaỹaỹaten negue't Aỹem. Qalaxaye qami' camachaqca ca na'a'q, nache 'onaxaic qanqa'eñi. 7 Nam shiỹaxauapi maye huetalec ana 'alhua, qaica cam ỹoqta 'eesa da qauasoviilec da huo'omshe qami' nquiỹategalo. Aỹem, qalaxaye Aỹem nquiỹa, cha'aye Aỹem ỹataqta sa'aqtaxaatem namayepi naua lataxaco maye sa ỹaỹamaxayiñi. 8 Qauesomiỹa, qanqo'oñiiua'a que'eca naponaxac. Aỹem, qalaxaye saishet da ñeqo'ona, cha'aye saxanaxa da ivita ye laloqo' da 'enauac qaỹaỹaten da chaq negue't Aỹem. 9 Qaq co'ollaq ime de'era 'enapec So Jesús, nache Somaye no'onaña ye 'alhua Galilea.

So Jesús ỹalectaua'alo soua na'axa'te maye naponaxaqui'

10 Qalaxaye co'ollaq mashe ỹoxoguelo soua maiche lqaỹa't, nache So Jesús nataqa'en nqo'oneua'a se'eso naponaxac. Qalaxaye Somaye saishet da huo'o ca da'aqtaxanem. 11 Nache na lataxala'pi na judiopi nmittaique Somaye co'ollaq huaigui se'eso naponaxac. Nache denataxaatac, 'eeta': –¿Chaq hueta'ague que'eca ỹale? 12 Nache qalota na shiỹaxauapi na na'aqtaxaatapigui Somaye. Huo'o na 'eeta': «Se'eso Jesús, Somaye ỹataqta no'on da lataxac.» Qalaxaye huo'o na laỹepi na 'eeta': «Somaye choche ỹatenachettac na shiỹaxauapi.» 13 Qalaxaye namayepi saishet da ỹoqta ỹa'axaỹaqchet 'enauac na shiỹaxauapi da 'eetega Somaye, souaxat da ñe'etega na lataxala'pi na judiopi. 14 Qalaxaye co'ollaq mashe laiñi soua naponaxaqui', nache So Jesús taigui aso no'onaxanaxaqui late'erai, nache dapaxaguenataxan. 15 Nache na lataxala'pi na judiopi ỹataqta huo'o da la'aalaxa Somaye, nache nnattega't, 'eeta': –¿Chaq hua'ago' ca 'eetec damaye ye ỹataqta qalota na ỹaỹaten, qamaq saishet co'ollaxa da huo'o cam ỹapaxaguen? 16 Nache So Jesús 'enapeco': –Da ỹapaxaguenataxanaxac, damaye saishet da ỹalamaxat, damaye chegoqo'ot Ñim Aỹem namaq. 17 Da huo'o ca nshetaique da ỹo'ot cam 'eetapeguec Ñim Lo'onatac 'Enauacna, nache camaye ishet da ỹaỹateeta da naua ỹapaxaguenataxanaxaco chegoqtoto Ñim Lo'onatac 'Enauacna, huo'otaq da choche maiche Aỹem chegoqtoto. 18 Ca shiỹaxaua da huo'otaq maiche nallegoxottela't ca ltaxaỹaxac, camaye 'eetec de'era, cha'aye nshetaique da na shiỹaxauapi ỹo'oxoren. Qalaxaye Aỹem ñeshetaique da Ñim Lo'onatac 'Enauacna maye Aỹem namaq, nacheñi Ñim talec cam llo'oxoyec maye maiche lalamaxat; qaq ỹoqo'oye Aỹem nache 'eetai' da sa'axattac ca 'eesa. 19 So Moisés qami' ỹanema co'ollaxa na lqataxacpi, qalaxaye ñaqaiyeta saishet da qaualaqaiguet. ¿Ta'ainco' da huotaique Aỹem qaualauache? 20 Nache so shiỹaxauapi 'enapeco': –'Am ỹataqta huo'o da 'oic, cha'aye ¿negue'to' ca nshetaique da 'am ỹalauat? 21 Nache So Jesús 'enapeco': –Aỹem 'oonolec da so'ot sa qaỹauanapega co'ollaq huaigui so na'a'q mataxaqui, nache 'enauac da qoñiita ỹataqta huo'o da qara'aalaqai. 22 Qalaxaye so Moisés qami' ỹamaxaleguete co'ollaxa da qauauo'oi ca na'anaxat na lo'oc ca ỹale. Qaq de'era chegoqtot co'ollaxa som hua'au qarta'ailpi, saishet da ỹoqta chegoqtot so Moisés. Qaq qami' ishet da qauo'oche ca na'anaxat ca nogotolec, na'aictaxa da huetoigui ca na'a'q mataxaqui. 23 Qaq ỹoqo'oye da qansheetaique da qaupaquiichigui na namaxasoxonaxacpi maye chegoqo'ot so Moisés, nache qami' ishet da qauo'oche ca na'anaxat ca nogotolec, na'aictaxa da huo'otaq huetoigui ca na'a'q mataxaqui, qalaq ¿ta'ainco' qone' ye Aỹem qaualemataỹai souaxat da ñataren so ỹale so na'a'q mataxaqui? 24 Qami' saishet da qoñiitega huo'o ca sa ỹaỹamaxañi da choche qaupicheetega. Iuen da hua'auñi da ỹoqta qauaỹaañita.

So Jesús ỹa'axat cam chegoqchiguiña

25 Nache huo'o na netaña ye Jerusalén na denataxaatac, 'eeta': –¿Saisheto' peta'a da nachera dam da', dam qanmittaique da qaỹauotaique qaỹalauat? 26 Cha'aye damaye ỹataqta nachaxaata da detaqtac, qalaq qaica ca ishet da 'enapega da de'enaxaatai'. ¿Yo'oqta da nataqa'en peta'a na qarta'alpi maye qomi' ilotegueto da ỹa'amaqten damaye, da nachera dam Lca'aguishec Ñim Lo'onatac 'Enauacna? 27 Qalaxaye qomi' saỹaanaqta da chegaqa'ague damaye. Cha'aye qom ivita da nvi' que'eca Lca'aguishec Ñim Lo'onatac 'Enauacna, qalaq qaica ca ishet da ỹaỹaten ca chegaqa'ague. 28 Qaq co'ollaq hua'aqchigui de'era So Jesús maye dapaxaguenataxaatapoigui aso no'onaxanaxaqui late'erai, nache ỹataqta na'axannec da la'aqtac, 'eeta': –Ỹataqta 'eesa da Aỹem sa qauauattoñi, qataq sa qauaỹaañi cam sachegoqta'ague. Aỹem saishet da maiche ñallegoxottela't da ñanac, cha'aye Aỹem lamaxashec Ñim ỹataqta 'eesa, Ñim qami' saishet da qauauattoñi. 29 Aỹem, qalaxaye sauatton, cha'aye sachegoqtot Ñimaye, qataq Ñimaye Aỹem namaq. 30 Huaña, nache qanshetaique da qaỹaconeua'a Somaye da qaicoñe'. Qalaxaye saishet da huo'o ca nañoxot da ỹaconeua'a, cha'aye Somaye saxanaxa da ivita ca laloqo' da qaỹaỹaten da chaq negue't Somaye. 31 Qalaxaye ỹataqta qalota na ỹa'amaqten Somaye. Nache namayepi 'eeta': –Ca Lca'aguishec Ñim Lo'onatac 'Enauacna qom nvi', qalaq ivira'a sa ỹañoxot da ỹo'ot na na'anecpi maye ỹo'ot de'era ỹale.

Na fariseopi nama'q soua huataxanaq lashe' da icoñe't So Jesús

32 Na fariseopi co'ollaq hua'aqtapogoigui na shiỹaxauapi da 'eetega So Jesús, nache namayepi qataq nam lataxala'pi na ntaxaỹaxanaxanecpi nama'q soua huataxanaq lashe' maye ilotegueto aso no'onaxanaxaqui late'erai, da yaqto' ỹaconeua'alo Somaye da icoñe't. 33 Nache So Jesús 'enapeco': –Aỹem ñaq cara'acolec da qami' soota'agueta. Qaq qom ime, nache Aỹem she'eguelaxa Ñim Aỹem namaq. 34 Qaq qami' qome Aỹem qanmichiitaique, qalaq saishet da Aỹem qauanachiỹa, cha'aye saishet da qauañoxoche da qaviyiỹa'a cam soota'a. 35 Nache nam judiopi maiche nnattega't, 'eeta': –¿Chaq hua'ago' ca dataigue damaye da yaqto' saishet da sanataxa? ¿Qalqo' nqo'ona nam judiopi maye netaña na ỹaqa'a 'alhuapi, da yaqto' ỹapaxaguen nataqa'en nam saishet da judiopi? 36 ¿Chaq negue't cam naigui de'era la'aqtac quiye maye 'eeta': «Aỹem qanmichiitaique qome, qalaxaye saishet da Aỹem qauanachiỹa, cha'aye saishet da qauañoxoche da qaviyiỹa'a cam soota'a?»

Ca 'etaxat maye 'ena'am ca la'auaxac

37 Qaq som pa'atec na'a'q soua na'axa'te maye laloxoqui' da qanayenaiguilo naua npe'lolqa, qo'oipaq lcouepi som ỹataqta ỹactec da la'amaqchec. Nache se'eso na'a'q nachaañi So Jesús, nache ỹataqta nlamaxaren da detaqa, 'eeta': –Ca huo'o na laquip, qaq no'on da Aỹem naua'a, yaqto' nỹom. 38 Qaq añi lquiyaqte cam Aỹem ỹa'amaqten, chegoqtoigui ca 'etaxat maye 'eeta'am na la'auaxac da npaxaatasheguem. Cha'aye nache 'ena'ape naua nanettraleguete ana nere maye huetalec na la'aqtacpi Ñim Lo'onatac 'Enauacna. 39 Qaq de'era 'enapec So Jesús, damaye naigui da ca ỹa'amaqten Somaye, nache camaye ỹaconeguet So Saqcha'a La'añaxac Ñim Lo'onatac 'Enauacna. Cha'aye So Saqcha'a Na'añaxac Qui'itta saxanaxa co'ollaxa da anac, cha'aye So Jesús saxanaxa da ivita ca laloqo' da ileu qataq da nca'alec.

Colaxagui da lhuennataxac na shiỹaxauapi

40 Nache huo'o na shiỹaxauapi na hua'aqchigui co'ollaxa de'era, nache 'eeta': –De'era shiỹaxaua ỹoqta 'eesa da nachera da la'aqtaxanaxanec Ñim Lo'onatac 'Enauacna, maye qaỹa'axatta'aguet co'ollaxa da naỹa'acna. 41 Qataq huo'o na laỹepi 'eeta': –Damaye nachera da Lca'aguishec Ñim Lo'onatac 'Enauacna. Qalaxaye huo'o na laỹepi 'eeta': –¿Taloxocheyo' da chegoqchiguiña ye 'alhua Galilea cam Lca'aguishec Ñimaye? 42 Ye naua nanettaleguete ana la'aqtac lmalate Ñim Lo'onatac 'Enauacna, naamaye ỹa'axa't da que'eca Lca'aguishec Ñimaye, camaye chegoxoguet na llalaqpi so nta'a David, qataq lañoqo' ye Belén, yem nỹecpi maye lma' co'ollaxa so David. 43 Nache na shiỹaxauapi colaxagui da lhuennataxac, souaxat da saishet da qaỹauatton So Jesús. 44 Qataq huo'o na huotaique da ỹaconeua'a Somaye da icoñi', qalaxaye saishet da huo'o ca nañoxot da ỹaconeua'a.

Na lataxala'pi na judiopi saishet da ỹa'amaqten So Jesús

45 Nache soua huataxanaq lashe' maye nauaataleguete aso no'onaxanaxaqui late'erai ñe'eguelaxalo ye hueta'a so fariseopi qataq som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Nache se'eso nta'alpi denataxaatac, 'eeta': –¿Ta'ainco' ye sa qanaviquiiuo Camaye? 46 Nache soua huataxanaq lashe' 'ena'apo': –¡Ỹataqta sa ỹauano' da huo'o ca 'eeta'am da ltaxaỹaxac de'era ỹale! 47 Nache so fariseopi 'enapeco': –¿Qache nataqa'eno' da qoñiita qanashiñiita da choche qami' ỹatenache't? 48 ¿Peta'a huo'o ca 'oonolec na qarataxala'pi, huo'otaq nam fariseopi, da huo'otaq ỹa'amaqten Somaye? 49 Qalaxaye na ỹa'amaqten Somaye, namayepi sa ỹaỹaten na namaxasoxonaxacpi maye chegoqo'ot so Moisés, qaq ỹoqo'oye Ñim Lo'onatac 'Enauacna ỹauo'o ca nhuaxanaguec namayepi. 50 Qaq, nache hueta'a yemaye so fariseo le'enaxat Nicodemo. Somaye huo'o so pe co'ollaxa da nqo'ona So Jesús, nache 'enapeco': 51 –Nam namaxasoxonaxaco maye qomi' qoỹanema co'ollaxa, naamaye ỹa'axa't da qomi' saishet da so'otaq ca nhuaxanaguec ca shiỹaxaua, da huo'otaq saxanaxa da ña'axaỹaxanaxa. 52 Nache qoỹenapego' somaye, qoỹeeta': –¿'Am peta'a nataqa'en 'am Galilea le'ec? Ña 'anapaxaguenalo naua nanettraleguete ana la'aqtac lmalate Ñim Lo'onatac 'Enauacna, yaqto' ishet da 'auaỹaten da qaica ca la'aqtaxanaxanec Ñimaye da huo'otaq chegoqchiguiña co'ollaxa ye 'alhua Galilea.

Aso 'alo maye quisheguetaxai

53 Nache ñi 'oonolec somayepi taua'alo naua lma'ate,

8

1 qaq So Jesús tasheguemec aso qaỹoqotcheguemec 'alhua, maye Nanqa' ana Olivo. 2 Qaq so ña nte'etom so lỹa na'a'q, nache Somaye qaltaq ỹe'eguelaxaua'a aso no'onaxanaxaqui late'erai. Nache 'enauac na shiỹaxauapi nquigueua'a, nache Somaye nso'ooñi, nache ỹapaxaguen somayepi. 3 Nache huo'oi soua dapaxaguenataxaatapegueque na namaxasoxonaxacpi qataq soua chegoqraigui na fariseopi, nauegueua'a Somaye aso 'alo maye qaỹauanalec da ncachetague' ca sa lhua. Nache qanachaalataxangui na laiñi som shiỹaxauapi. 4 Nache soomaye 'enapegalo' So Jesús, 'eetra': –'Am Napaxaguenataxanaq, ara'ara 'alo, aramaye sauanaqalec da ncachetague' so saishet da lhua. 5 Qaq naua namaxasoxonaxaco maye chegoqo'oto co'ollaxa so Moisés, qomi' ỹamaxaleguete da sauoqta'a na coma' da salauataq aca 'alo da huo'otaq 'eeta'am aramaye. Qaq 'am ¿ca 'eetec ca 'ara'aqtac nagui? 6 Qaq soomaye 'enapec de'era, da choche ỹe'egue'n So Jesús, da yaqto' ishet da ỹauo'o ca lasouaxashet. Nache So Jesús nqollemñi, nache ỹettac ana 'alhua, huota'a ana llaxaata. 7 Qalaxaye soomaye, nache quetro'oto da denataxaata'ape. Nache So Jesús nachaañi, nache 'enapegalo soomaye, 'eeta': –Da huo'o ca 'oonolec da qoñiita da qaica ca lasouaxashet, qaq nacheca ca la'auaxanec da ỹasaq ca coma' aramaye. 8 Nache qaltaq ỹe'eguelaxalec da nqollemñi So Jesús, nache qaltaq ỹettac ana 'alhua. 9 Qalaxaye soomaye co'ollaq hua'axaỹa de'era, nache nqo'onaxattagui da jec, hua'auchiguiñi so ỹa'axaiquipi, choche ivitta'a da So Jesús nda'aguet aso 'alo. 10 Nache So Jesús nachaañi, nache 'enapeco': –'Am 'alo, ¿Cam huetra'ague caua 'am nauectrauo? ¿Qaica peta'a ca ỹañoxot da ỹauo'o ca 'arasouaxashet? 11 Nache asomaye 'enapeco': –Qaica, 'am Ỹataxala'. Nache So Jesús 'enapego' asomaye, 'eeta': –Aỹem nataqa'en saishet da sauo'o ca 'arasouaxashet. Qaq nagui 'am qojec, qalaxaye saishet da qaltaq 'avi'eguelaxalec da 'auo'ot som qauem maye 'auo'ottac.

So Jesús nacheso so lcoỹaraxanaqte na shiỹaxauapi

12 Nache So Jesús qaltaq 'enapega so shiỹaxauapi, 'eeta': –Aỹem Nachaỹem lcoỹaraxanaqte 'enauac na huetalec ana 'alhua. Aỹem qauca'acheegue, yaqto' saishet da qoquiitaigui na napalaxa, nachaqrata da qoviitaigui na yo'oqchiguiñi maye nachera da nca'alaxa. 13 Nache na fariseopi 'eetega Somaye, 'eeta': –'Am maiche 'ana'axattapeguela't, qaq ¿ca 'eeteco' da saỹatenaq da 'eesa da 'aua'axattac? 14 Nache So Jesús 'enapeco': –De'era ỹa'aqtaxanaxac, damaye ỹataqta 'eesa, na'aictaxa da huo'otaq Aỹem maiche ña'axattapeguela't. Cha'aye saỹateeta ye sachegoqchiguiña, qataq dam sata'ague. Qami', qalaxaye saishet da qauaỹaañi. 15 Qami' da qanmichi ca nasouaxashet, qalaq qaupaquiichigui ca maiche lhuennataxac na yo'oqchigui shiỹaxauapi. Aỹem, qalaxaye saishet da sauo'o ca lasouaxashet ca shiỹaxaua. 16 Qalaxaye da huo'otaq ñimit ca nasouaxashet, qalaq ca imitaxanaxac ỹataqta 'eesa, cha'aye saishet da ñerotec da huo'o ca ñimit. Cha'aye Ñim Ita'a maye Aỹem namaq, Ñimaye Aỹem itauan da huo'o ca ñimit nasouaxashet. 17 Nam nanettañi namaxasoxonaxacpi maye qami' qoỹanema co'ollaxa 'eeta': da huo'oi caua dos da huo'otaq nateeta't ca la'aqtaxanaxa'c, nache caamaye ishet da qaỹa'amaqte'n. 18 Aỹem qalaq maiche ña'axattapeguela't, qaq Ñim Ita'a maye Aỹem namaq, Ñimaye nataqa'en Aỹem ỹa'axattac. 19 Nache qainattac Somaye, qoỹeeta': –¿Hua'ague ca neta'ague ca 'arta'a? Nache So Jesús 'enapeco': –Qami' saishet da Aỹem qauauattoñi, qaq nache 'ena'am Ñim Ita'a saishet da qauauattoñi. Cha'ayectaxa da Aỹem qauauattoñi, nache nataqa'en ishet da qauauattoñi Ñimaye. 20 Qaq So Jesús 'enapec de'era, co'ollaq ñaq huetaigui aso no'onaxanaxaqui late'erai da dapaxaguenataxaatac, hueta'a yem naña aso laỹe' ana nachetaqtaxanaqte anom. Qalaxaye saishet da huo'o ca ỹañoxot da ỹaconeua'a Somaye da icoñi', cha'aye saxanaxa da ivita ye laloqo' da yaqto' qaỹauattoota Somaye.

Cam saigue qami' saishet da qauañoxoche da qaviyiỹa'a

21 So Jesús qaltaq ỹe'eguelaxalec da detaqa, 'eeta': –Aỹem ashec, qaq qami' qome Aỹem qanmichiitaique, qalaxaye qami' saishet da qauañoxoche da qaviyiỹa'a cam soota'a, cha'aye choche ivitta'a qome da qaullivi da saishet da qaỹa'axañiiñi da qauo'ocheetac na qarasouaxashechi. 22 Nache na lataxala'pi na judiopi 'enapeco': –¿Peta'a iuennatega da maiche nalaala't damaye, ỹoqo'oye 'enapec da saishet da ñeqo'onaxa cam taỹa? 23 Nache So Jesús ỹataqta ỹa'axatta da 'eetega, 'eeta': –Qami' 'etaxaloxoicpi, qoñiita'am 'enauac na huetalec ana 'alhua. Qalaxaye Aỹem saishet da ima' ana 'alhua, cha'aye Aỹem sachegoqta'ague da piguem. 24 Qaq ỹoqo'oye Aỹem qami' sa'aqtaxaateguema da saishet da Aỹem qaua'amaqchiñi qataq sa qauauattoñi da Nachaỹem, nache choche qaulliviitañito naua qarasouaxashe'echilli'. 25 Nache qainattac Somaye, qoỹeeta': –¿Negue't 'am? Nache So Jesús 'enapeco': –Mashe sogote mque' da qami' sa'aqtaxaateguema so hua'auchiguiñi. 26 Aỹem ỹataqta qalota na ỹa'aqtacpi da sa'axat 'enauac nam qauemsat maye qauo'ocheetac. Qaq Ñim Aỹem namaq, Ñimaye ỹataqta 'eesa dam la'aqtac, qaq 'enauac nam sa'axatem nam huetalec ana 'alhua, nachena na sa'aqchigui la'aqtacpi Ñimaye. 27 Qalaxaye somayepi saishet da ỹaỹaaneguet da Somaye, nacheñi Ñim Lo'onatac 'Enauacna maye Lta'a Ñim detaqtega. 28 Ỹoqo'oye So Jesús 'enapego' somayepi, 'eeta': –Qami' qom ivita da qanauaxaỹaxañiisheguem na Shiỹaxaua Llalec, nache huaña, qaq ishet da qauaỹaañi chaq negue't Aỹem, qataq saishet da maiche ñallegoxottela't ca so'ot, nachaqrata da Aỹem sa'axat cam Aỹem ỹapaxaguenec Ñim Ita'a. 29 Cha'aye Ñim Aỹem namaq, Ñimaye Aỹem hueta'aguet; Ñim Ita'a saishet da Aỹem ndoqteetec, cha'aye Aỹem nache 'eetai' da so'ottac cam ỹaỹamaxareeta Ñimaye. 30 Nache co'ollaq 'enapec de'era So Jesús, nache ỹataqta qalota na ỹa'amaqten Somaye.

Nam llalaqpi Ñim Lo'onatac 'Enauacna qataq nam l-latacpi da ñe'etaxaloxo

31 Nache So Jesús 'enapego' nam judiopi maye ỹa'amaqten Somaye, 'eeta': –Qami' qom ỹataqta qauo'oche de'era qami' sa'axatema, nache ỹoqta 'eesa da qami' ỹapaxaguenataqa. 32 Nache qami' ỹataqta qauauattoñiita da 'eesa lataxac, qaq de'era 'eesa lataxac, nachera da ỹataqta qami' huesochiyiñi naqa'en. 33 Nache somayepi 'enapeco': –Qomi' maiche qomi' llalqa so Abraham, qaq ỹataqta sa ỹauano' da huo'o ca qomi' l-lataqa. Qalaq ¿ta'ainco' da 'am qonapec da ishet da qomi' huesochiyiñi? 34 Nache So Jesús 'enapega somayepi, 'eeta': –Ỹataqta 'eesa de'era qami' sa'axatema, da 'enauac nam ỹo'ottac da lle'etaxaloxo, namayepi 'eeta'am da l-latacpi de'era ñe'etaxaloxo. 35 Qaq cam choche nlatac, camaye saishet da nache 'eetai' da ỹalectaigui cam llalaqpi ca do'onataxaatacot, chaqcata cam ỹoqta ñalec maye nache 'eetai' da ỹalectaigui ca laỹepi ñalaqpi. 36 Qaq ỹoqo'oye ne'ena Ñalec da qami' huesochiyiñi naqa'en, nache ỹataqta 'eesa da qami' huesochiyiñi. 37 Aỹem mashe sogote da saỹaten da maiche qami' llalqa so Abraham. Qalaxaye qami' qansheetaique da Aỹem qaualauache, cha'aye saishet da qauacoñiigueta naua ỹapaxaguenataxanaxaco. 38 Aỹem nachaqrata da sa'axatta'ape naua Aỹem ỹapaxagueneque Ñim Ita'a. Qalaxaye qami' qauo'ocheeta'ape naua lapaxaguenataxanaxaco so qarta'ai. 39 Nache somayepi 'enapeco': –Qomi' qarta'a so Abraham. Nache So Jesús 'enapega somayepi, 'eeta': –Qami', da ỹoqta 'eesactaxa da qarta'ai so Abraham, nache ishettaxa da qauo'oche nam ỹo'otpi somaye. 40 Qalaxaye qami', na'aictaxa da huo'otaq qami' sa'axattapeguema nam 'eesa lataxacpi maye Aỹem ỹapaxaguenec Ñim Ita'a maye Lo'onatac 'Enauacna, qalaq ñaqaiyeta qansheetaique da Aỹem qaualauache. ¡Qamaq so Abraham ỹataqta sa ỹauano' da huo'o ca ỹo'ot da 'eeta'am de'era! 41 Qami', qalaxaye nache qaue'enaxachiichigui nam ỹo'otpi so qarta'ai. Nache somayepi 'enapeco': –Qomi' saishet da choche qomi' na'aalec ñalqa; qomi' 'oonolec Ñim Qarta'a maye Lo'onatac 'Enauacna. 42 Nache So Jesús 'enapega somayepi, 'eeta': –Da ỹoqta 'eesactaxa da Qarta'ai Ñim Lo'onatac 'Enauacna, nache qami'ctaxa ỹataqta Aỹem qauauochec. Cha'aye Aỹem nache sachegoqtot Ñimaye. Aỹem saishet da maiche ñallegoxottela't da ñanac, cha'aye Ñim Lo'onatac 'Enauacna maye Aỹem namaq. 43 Qami' saishet da qauaỹaañi dam qami' sa'axattapeguema, cha'aye saishet da ỹoqta qana'axaỹaxañiỹa dam ỹa'aqtaxanaxac. 44 Qami', som qarta'ai, nacheso som pa'aguenataxanaxaic, ỹoqo'oye qansheetaique da qauo'oche cam 'eetapeguec somaye. Se'eso pa'aguenataxanaxaic, somaye ỹataqta laataxanaxaic qataq tenataxanaxaic. 'Enauac nam ỹa'axat saishet da 'en qataq ỹo'oteguet ca shiỹaxaua da tenataxanaxaic. 45 Qaq ỹoqo'oye, qami' saishet da qaua'amaqchiñi da Aỹem sa'axattac dam 'eesa lataxac. 46 ¿Negue't ca 'oonolec da qoñiita da ishet da ỹa'axat da huo'otaq huo'o ca ỹasouaxashet? Cha'aye da huo'otaq sa'axattac dam 'eesa lataxac, qalaq ¿ta'ainco' ye saishet da Aỹem qaua'amaqchiñi? 47 Nam llalaqpi Ñim Lo'onatac 'Enauacna, ỹataqta na'axaỹaxaachigui 'enauac nam la'aqtacpi Ñimaye. Qalaxaye qami' saishet da qana'axaỹaxañiỹa, cha'aye saishet da qami' llalqa.

So Cristo nache 'eetai' da huo'o co'ollaq saxanaqca so Abraham

48 Nache huo'o nam judiopi da 'eetega Somaye, 'eeta': –Qomi' ỹataqta 'eesa de'era qara'aqtac co'ollaq shenaqapec da choche 'am Samaria le'ec qataq huo'o ñi saqcha'a na'añaxac leguemaxaic 'am netaigui. 49 Nache So Jesús 'enapeco': –Aỹem saishet da huo'o ca Aỹem netaigui saqcha'a na'añaxac leguemaxaic. Cha'aye dam so'ottac sho'oxoreetac Ñim Ita'a, qalaxaye qami' saishet da Aỹem qavio'oxoyiñi. 50 Aỹem saishet da ñeshetaique da Aỹem qaỹo'oxoren, qalaxaye huo'o Ñim nshetaique da Aỹem qaỹo'oxoren, qaq nacheñi Ñim ỹaỹaten da naua iuennataxaco da ỹataqta 'eesora. 51 Qaq ỹataqta 'eesa de'era qami' sa'axatema, da ca ỹalaxaguet dam shenapec, nache camaye chochaq tatec da hueta'aguet Ñim Lo'onatac 'Enauacna. 52 Nache soomaye 'enapegalo' So Jesús, 'eeta': –Qomi' nagui ỹataqta saỹaanaqta da 'am huo'o ñi saqcha'a na'añaxac leguemaxaic 'am netaigui. Cha'aye so Abraham qataq 'enauac so la'aqtaxanaxanecpi Ñim Lo'onatac 'Enauacna, somayepi co'ollaxa ileu, qalaq 'am qonapec: «Da ca 'am ỹalaxaguet, nache camaye chochaq tatec da hueta'aguet Ñim Lo'onatac 'Enauacna.» 53 'Am ¿'aupettega peta'a da 'anapacalec so qarta'a Abraham? Somaye, qataq 'enauac som la'aqtaxanaxanecpi Ñim Lo'onatac 'Enauacna ileu co'ollaxa. Qalaq ¿negue't 'am? 54 Nache So Jesús 'enapegalo' soomaye 'eeta': –Da Aỹem maiche ño'oxoreetapeguela't, nache de'era ño'oxonnaxac, damaye qaica ca naigui. Qalaxaye Ñim Aỹem ỹo'oxoreetac, nacheñi Ñim Ita'a Ñim qami' qaupicheetega nataqa'en da Qarta'ai. 55 Qalaxaye qami' saishet da qauauattoñi Ñimaye; Aỹem, qalaxaye sauatton qataq salaxaguet. Cha'aye da Aỹem shenapec da sa sauatton, nache Aỹem choche satenataxaatac, sheeta'ama qami'. 56 So Abraham maye qarta'ai, somaye ỹataqta huo'o da ntonaxac co'ollaxa da choche iuennatega ca na'a'q da ñevira ana 'alhua. Qaq co'ollaq ilogui, nache somaye ỹataqta nlaqchigui da ntonaxac. 57 Nache soomaye 'enapegalo' So Jesús, 'eeta': –'Am saxanaxa da 'avi' caua cincuenta vi'iye, qalaq ¿ca 'eetec da qonetega 'auauatton so Abraham? 58 Nache So Jesús 'enapeco': –Aỹem ỹataqta 'eesa de'era qami' sa'axatema, da co'ollaq saxanaqca so Abraham, qalaq nale'ena da Aỹem huo'o. 59 Huaña, nache soomaye ỹaconalo na coma' da ỹauotaique da ỹasa'q So Jesús. Qalaxaye Somaye nqañoxotoigui na shiỹaxauapi, ime nache ca'ai aso no'onaxanaxaqui late'erai.

9

So Jesús nataren so ỹale maye nacteueegue' da lqanamaxa

1 Qaq co'ollaq jec So Jesús, nache natenalec so ỹale maye nacteueegue' da lqanamaxa. 2 Nache soua lapaxaguenataqa inatta'ape Somaye, 'eeta': –'Am Napaxaguenataxanaq, ¿chaq ta'ainco' ñi'iñi ỹale ye nacteueegue' da lqanamaxa? ¿Peta'a souaxat da huo'o ca lasouaxashe't caua lta'al, qalqo' chaq souaxat ca maiche lasouaxashet ñimaye? 3 Nache So Jesús 'enapegalo soomaye, 'eeta': –Saishet da chegoqchigui ca maiche lasouaxashet ñimaye, huo'otaq ca lasouaxashe't caua lta'al. Cha'aye damaye, nache qoỹena'ac, yaqto' ishet da qaila'a cam ỹo'ot Ñim Lo'onatac 'Enauacna da chegoqchigui ñimaye. 4 Cha'aye nagui da ñaq qami' soota'agueta, nache iuen da so'otaq da lo'onataxanaxac maye Aỹem ỹamaxalec Ñim Lo'onatac 'Enauacna maye Ita'a; qalaxaye anata ca na'a'q maye qaica ca ishet da do'onataxan. 5 Nagui da Aỹem ñaq soota'a ana 'alhua, qalaq Aỹem maye Nachaỹem lcoỹaraqte 'enauac ana 'alhua. 6 Qaq co'ollaq ime da 'enapec de'era, nache So Jesús nqaigoxoña na 'alhua, nache ỹo'ot so nshaxa, ime, nache ỹa'ameeleguete naua la'ai'te som qanamaic. 7 Nache 'enapega somaye, 'eeta': –'Aue qome, 'anỹo, 'anqo'onaxaama añi laỹe' na 'etaxat le'enaxat Siloé. Nache se'eso qanamaic jec da nỹo. Qaq co'ollaq ñe'eguelaq, nache nauaachiguiñi. 8 Nache nam lauoreuapi qataq nam ỹauaachigui somaye co'ollaxa da dashelaxaatac naxa, namayepi 'eeta': –¿Saisheto' peta'a da nachera de'era dam nso'ootañecnaxa da dashelaxaatac? 9 Nache huo'o na 'eeta': –Aja', nachera. Qataq huo'o na 'eeta': –'A'i, saishet, damaye choche lashiquiaxaua. Qalaxaye som ỹale maiche na'aqtaxaala't, 'eeta': –Aja', nachaỹem. 10 Nache somayepi inattac somaye, 'eeta': –¿Hua'ago' ca 'eetec da 'am ishet da 'anauaañi? 11 Nache somaye 'enapeco': –Som ỹale maye le'enaxat Jesús, Somaye ỹo'ot so nshaxa. Ime, qaq ỹa'ameeleguete naua ỹa'ai'te. Nache Aỹem 'enapega, 'eeta': «'Anqo'onaxaama qome añi laỹe' na 'etaxat, le'enaxat Siloé, nache 'anỹo.» Nache Aỹem ashec, qaq can ime da ñeỹo, nache ishet da ñauaañi. 12 Nache somayepi inattac somaye, 'eeta': –¿Hua'ague ca hueta'ague que'eca ỹale? Nache somaye 'enapeco': –Aque'.

Na fariseopi ichemaxattac so qanamaic maye qanataren

13 Nache qaỹauegueua'a na fariseopi se'eso ỹale maye qanamaic co'ollaxa. 14 Cha'aye souaxat da mataxaqui se'eso na'a'q maye huetoigui da ỹo'ot so nshaxa So Jesús da nataren se'eso qanamaic, 15 nache na fariseopi qaltaq ỹe'eguelaxalec da inattac so ỹale chaq hua'ague ca 'eetec da ishet da nauaañi. Nache somaye 'enapeco': –Somaye ỹa'ameeleguete naua ỹa'ai'te so nshaxa. Ime, nache ñeỹo, nache nagui ishet da ñauaañi. 16 Nache se'eso fariseopi 'eeta': –Se'eso ỹale maye ỹo'ot de'era, Somaye saishet da chegoqtot Ñim Lo'onatac 'Enauacna, cha'aye saishet da huo'o ca ỹanaigui ye na'a'q mataxaqui. Qalaxaye huo'o na 'eeta': –¿Hua'ago' ca 'eetec da ishet da ỹo'ot de'era na'anec maye sa qaỹauanapega, da huo'otaq Somaye 'etaxaloxoic? Huaña, nache colaxagui da lhuennataxac se'eso shiỹaxauapi. 17 Nache somayepi ỹe'eguelaxalec da inattac se'eso ỹale maye qanamaic co'ollaxa, 'eeta': –Qaq 'am, ¿hua'ague ca 'eetec ca 'ara'aqtac som ỹale maye 'anauaañi naqa'en? Nache somaye 'enapeco': –Qomye aỹem, Somaye 'eeta'am ñaqa'en da la'aqtaxanaxanec Ñim Lo'onatac 'Enauacna. 18 Qalaxaye nam fariseopi saishet da ỹa'amaqten se'eso ỹale da sanauaañi co'ollaxa, qaq nagui nauaachiguiñi. Nache qaiỹaxaneugalo soua lta'al somaye, 19 nache qainatta'ape qoỹeeta': –¿Peta'a nachera da qaỹa'alqui de'era? ¿'Eesa peta'a da nacteueegue' da sanauaañi damaye? Qaq, ¿chaq hua'ague ca 'eetec damaye da ishet da nauaañi nagui? 20 Nache soua lta'al 'ena'apo': –Qomi' saỹaanaq damaye, da nachera da qoyalec maye nacteueegue' da sanauaañi. 21 Qalaxaye qomi' saishet da saỹaanaq chaq hua'ague ca 'eetec da nauaañi nagui, qataq saishet da saỹaanaq chaq negue't cam natare'n naua la'ai'te damaye. Qaq no'on da maiche qaunache, cha'aye damaye mashe ỹe, damaye ishet da maiche qami' da'aqtaxanema. 22 Qaq 'enapec de'era soua lta'al, souaxat da ñe'etrega na lataxala'pi na judiopi, cha'aye namayepi mashe nasachigui da saishet da ỹalegoigui naqa'en nam tategueua'a aso napaxaguenaxaqui nam judiopi, 'enauac nam ỹa'amaqten qataq 'eetega da So Jesús, nacheso So Lca'aguishec Ñim Lo'onatac 'Enauacna. 23 Qaq ỹoqo'oye, soua lta'al 'ena'apo': «Qaunache damaye, cha'aye damaye mashe ỹe.» 24 Nache na lataxala'pi na judiopi, qaltaq ỹe'eguelaxalec da iỹaxaneuga so ỹale maye qanamaic co'ollaxa. Nache 'eetega, 'eeta': –Nagui qomi' 'aua'aqtaxaatema cam ỹataqta 'eesa, ỹauaachigui 'anqa'en Ñim Lo'onatac 'Enauacna. Cha'aye qomi' saỹaanaqta da se'eso ỹale, Somaye 'etaxaloxoic. 25 Nache somaye 'enapeco': –Aỹem saishet da saỹaten da Somaye 'etaxaloxoic. Nachaqrata da aỹem saỹaten da sa ñauaañi co'ollaxa, qalaxaye nagui nache ñauaachiguiñi. 26 Qaq somayepi qaltaq ỹe'eguelaxalec da inattac, 'eeta': –¿Ca 'eetec Somaye co'ollaxa? Qataq ¿chaq 'eetec co'ollaq da 'am nataren? 27 Nache somaye 'enapeco': –Mashe ime mque' da qami' sa'axattapeguema, qalaq saishet da aỹem qaua'amaqchiñi. Qalaq ¿ta'ainco' ye qansheetaique da qaltaq qami' sa'aqtaxanema? ¿Qalqo' nataqa'en qami' qansheetaique da qoquiigue Somaye? 28 Nache somayepi ỹe'enai' somaye, nache 'eetega, 'eeta': –'Am peta'a qoquetague' se'eso ỹale; qomi', qalaxaye qolaqtague' so Moisés. 29 Cha'aye qomi' saỹaanaqta da Ñim Lo'onatac 'Enauacna, detaqtague' co'ollaxa so Moisés. Qaq se'eso ỹale, qomi' saishet da saỹaanaq cam chegaqa'ague. 30 Nache se'eso ỹale 'enapeco': –¡Ỹataqta ỹoxosa'a de'era! ¡Qache qami' saishet da qauaỹaañi ca chegaqa'ague Somaye! ¡Qalaq Somaye ye isheto' da aỹem nataren! 31 Qomi' saỹaanaqta da Ñim Lo'onatac 'Enauacna saishet da hua'axaỹa na 'etaxaloxoicpi; chaqnata nam ỹo'oxoreetac qataq ỹo'ot cam 'eetapeguec Ñimaye. 32 Cha'aye ỹataqta sa ỹauano' da huo'o ca qaỹa'axaỹapeguelec da huo'otaq nauaañi naqa'en ca shiỹaxaua da huo'otaq nacteueegue' da sanauaañi. 33 Qaq se'eso ỹale, da huo'otaq saq chegoqtot Ñim Lo'onatac 'Enauacna, nache saishettaxa da huo'o ca ỹo'otec aỹem. 34 Nache somayepi 'enapego' somaye, 'eeta': –'Am maye ỹataqta 'ananacteueegue' da 'am 'etaxaloxoic, ¿qaq huotaique da qomi' 'auapaxague'n? 'Am mashe sa 'am seuenaq da 'aualectaigui nam nategueua'a ana qanapaxaguenaxaqui.

Da nqanamaxa maye saqcha'a

35 Qaq So Jesús la'axaỹaxac da qaỹamaqauec som qanamaic co'ollaxa. Nache nmitaique, qaq co'ollaq nauane', nache 'eetega, 'eeta': –¿'Am peta'a 'aua'amaqten So Llalec Ñim Lo'onatac 'Enauacna? 36 Nache somaye 'enapeco': –Ñaq aỹem 'aua'aqtaxanem chaq negue't camaxa, yaqto' ishet da sa'amaqten camaye. 37 Nache So Jesús 'enapeco': –Mashe sogote da 'auloto'ot Namaye. Nachaỹem, maye Aỹem 'autaqtague'. 38 Nache se'eso ỹale ỹa'aroto naua l-llectel So Jesús, nache 'enapega, 'eeta': –'Am Ỹataxala', 'am sa'amaqten. 39 Ime, nache So Jesús 'enapeco': –Aỹem ñanaỹa ana 'alhua, da sami' da nauaañi nam saq nauaañipi, qaq nam 'eetega da nauaachiguiñipi qalaq sanauaañi ñaqa'en. Qaq 'era da sheetec da ñimit 'enauacna. 40 Qaq huo'oi soua chegoqraigui na fariseopi maye hueta'a yi'iye hua'aqchigui de'era, nache inattac So Jesús, 'eeta': –¿Damaye peta'a naigui nataqa'en da saishet da ñauanaxañi? 41 Nache So Jesús 'enapegalo' soomaye 'eeta': –Qami'ctaxa da qanauattoñeetela't da sa qanauañiiñi, nache qaicactaxa ca qarasouaxashechi. Qalaxaye qami' ye qoñiitega da qanauañiichiguiñi, qaq ỹoqo'oye Ñim Lo'onatac 'Enauacna qami' ỹasaxaleguete da qarasouaxashechi.

10

Qaỹaloqnaxana aso laỹe' ana qagueta

1 So Jesús 'eeta': Ỹoqta 'eesa de'era qami' sa'axatema, da ca saishet da tateua'a ca lasom aca laỹe' ana qaguetapi da inoxoneuo, chaqrata da tateua'a na laỹe, nache camaye cachaxaic qataq huotaxanaxaic. 2 Qalaxaye cam tateua'a ca lasom, qache nacheca cam ilotague' ana qaguetapi. 3 Nache cam lasom lo'o ỹauateguet camaye, da yaqto' pa'auo, qaq anam qaguetapi ỹauatton da lavilỹaxac camaye. Nache camaye iỹaxaataua'a na le'enaxatpi añi 'oonole ana qaguetapi, ime, nache nqateeguesop aca laỹe' da ỹauec. 4 Qaq da ime da nqatec 'enauac ana lalopi qaguetapi, nache camaye hua'auta. Qaq anam qaguetapi nca'ataxaatauo, cha'aye anamayepi ỹauatton da lavilỹaxac camaye. 5 Qaq anamayepi, saishet da ca'ategue cam saishet da ỹauatton. Chaqrata da dataueeguesop camaye, cha'aye saishet da ỹauatton da lavilỹaxac. 6 Qaq So Jesús ỹo'ot de'era laloqnaxanaxat, qalaxaye nam na'axaỹaxaatega Somaye saishet da ỹaỹaten dam 'eetega.

So Jesús nacheso so lasom maye llegueuo ana qagueta

7 Nache So Jesús qaltaq ỹe'eguelaxalec da da'aqtaxan, 'eeta': –Ỹataqta 'eesa de'era qami' sa'axatema, 'eeta': Aỹem maye Nachaỹem lasom, maye Aỹem llegueuo ana qagueta. 8 Qaq 'enauac nam na'au co'ollaq saxanaxa da ñanac, namayepi cachaxaicpi qataq huotaxanaxaicpi, ỹoqo'oye anam qaguetapi saishet da iqocha'a namayepi. 9 Aỹem Nachaỹem lasom. Qaq ca Aỹem tateua'a, nache camaye nca'alec. Nache camaye 'eeta'am aca qagueta da pa'auo qataq da npa'aueeguesop aca laỹe', nache ỹanata ca aloq. 10 Ca cachaxaic da anac, qalaq camaye nalemaqte' da lcachaxac, lalaataxanaxac qataq delaqtaxan. Aỹem, qalaxaye ñanac, da yaqto' qami' huo'o da qarca'alaqai qataq qaica ca qaviñiỹa'a.

So Jesús nacheso so ỹataqta no'on qagueta lo'o

11 Aỹem Nachaỹem no'on qagueta lo'o. Ca no'on qagueta lo'o, camaye ỹaalec da nachaalataxac ana qaguetapi. 12 Qaq cam choche do'onataxaatapeguelec aca lasheue, camaye saishet da ỹoqta lo'o ana qagueta. Qaq camaye da huo'otaq ila'aguet ca dequi'iỹapec, nache no'onaxatchigui aca qaguetapi da datauec, cha'aye saishet da ỹoqta lalamaqtepi. Nache cam dequi'iỹapec ishet da ỹaconeua'a aca 'oonole ana qaguetapi, qaq ana laỹepi qalaq nlagaxattac. 13 Qaq se'eso shiỹaxaua datauec, cha'aye somaye choche do'onataxaatapeguelec aca lasheue, ỹoqo'oye saishet da itena'a ana qaguetapi. 14 -15 De'era 'eetec da Ñim Ita'a Aỹem ỹauattoota, qataq Aỹem sauatton Ñimaye; nache 'eeta'am da 'eetec Aỹem da sauatton nam Aỹem quetague', qaq namayepi nataqa'en Aỹem ỹauattoota. Aỹem Nachaỹem no'on qagueta lo'o maye selotague' namayepi. De'era 'eetec ca no'on qagueta lo'o da na'aictaxa da ileetalec ana lalo qaguetapi, qaq nache sheetec nataqa'en Aỹem da ỹataqta qaica ca shectega, da na'aictaxa da seleetalec nam Aỹem ca'attague'pi. 16 Nataqa'en huo'o anam ilopi qaguetapi maye saxanaxa da ỹalectaigui anam netaigui ana'ana laỹe', anamayepi iuen nataqa'en da ñauegueuo. Qaq anamayepi qome ỹataqta Aỹem ỹalaxaguet. Huaña, nache ishet da 'oonolec ca laponqa'. Ime, nache Aỹem 'oonolec da seuattague'. 17 Ñim Ita'a ỹataqta Aỹem ỹauotec, cha'aye san da ñachaalataxac, qaq da ime, nache qaltaq ñe'eguelaxaala't. 18 Qaica ca ishet da deuotaxanec de'era ñachaalataxac, qalaxaye maiche Aỹem chegoqchigui da san damaye. Qaq Aỹem huo'o da shenec da san damaye, qataq da ñe'eguelaxaala't. Qaq 'era dam Aỹem ỹamaxalec Ñim Ita'a. 19 Nache so judiopi co'ollaq hua'axaỹa de'era la'aqtac Somaye, nache qaltaq ỹe'eguelaxalec da colaxagui da lhuennataxac. 20 Nache qalota somayepi na 'eeta': –¿Ta'ainco' ye qana'axaỹaxañeetega damaye? Ye huo'o ñi saqcha'a na'añaxac leguemaxaic maye netaigui, qaq ỹoqo'oye huo'o da aloic. 21 Qalaxaye huo'o somayepi na 'eeta': –Qaica ca shiỹaxaua da huo'otaq huo'o ca netaigui saqcha'a na'añaxac leguemaxaic da 'eetec de'era da ltaxaỹaxac. Cha'aye ¿isheto' peta'a da huo'o ca netaigui ca saqcha'a na'añaxac leguemaxaic da nauaañi naqa'en ca qanamaic?

Na lataxala'pi na judiopi huotaique da ỹalauat So Jesús

22 Qaq huetoiguilo soua ca'agoxoiqa maye laloxoqui' na no'omaxa co'ollaq So Jesús taigue da Jerusalén, da yaqto' ỹalegueua'a so naponaxac maye huetoigui da qaiuennate so na'a'q co'ollaq qoỹanot Ñim Lo'onatac 'Enauacna aso no'onaxanaxaqui late'erai. 23 Qaq co'ollaq So Jesús ñaq coleetac da hueta'a so qaỹamata'ac nasom so Salomón, 24 nache na shiỹaxauapi laponeua'a Somaye, nache qainattac, qoỹeeta': –¿Chaq laguio', qaq qomi' 'anqateeguesopa de'era qarqolectaxanaxac? Ñaq qomi' 'aua'aqtaxanemactaxa da nache 'am, maye 'am Lca'aguishec Ñim Lo'onatac 'Enauacna. 25 Nache So Jesús 'enapeco': –Mashe ime mque' da qami' sa'aqtaxaateguema, qalaxaye saishet da Aỹem qaua'amaqchiñi. Nam so'ottacpi, namayepi nachena na Aỹem ỹamaxalecpi Ñim Ita'a, qaq nachena nam 'eeta'am da qami' da'aqtaxanema. 26 Qalaxaye saishet da Aỹem qaua'amaqchiñi, cha'aye saishet da nacheqami' anam selotague' qaguetapi. 27 Qaq anam qagueta maye selotague', anamayepi ỹauatton da ivilỹaxac, qataq Aỹem sauatton anamayepi, qaq anamayepi Aỹem ca'attague'. 28 Qaq Aỹem sanem da lca'alaxa maye chochaq tatec anamayepi. Huaña, nache saishet da ivireguet ca nleuaxa maye chochaq tatec, qataq saishet da huo'o ca ishet da nqateeguesop da ihuaqỹaxac anamayepi, 29 cha'aye saishet da huo'o ca nqateeguesop da lhuaqỹaxac Ñim Ita'a. Cha'aye Ñimaye napacalec 'enauacna. 30 Aỹem, qataq Ñim Ita'a, 'oonolec da qarataxac. 31 Nache na lataxala'pi na judiopi qaltaq ỹacona na coma' da huotaique da ỹasaq Somaye. 32 Nache So Jesús 'enapeco': –Aỹem ỹataqta qalota na so'ot ỹaỹamaqchiguiñipi da qami' qauauañiichigui, chegoqchigui da la'añaxac Ñim Ita'a. Qaq ¿chaq negue't cam sasoilec cam huo'omshe qansheetaique da Aỹem qauasaqai? 33 Nache somayepi 'enapeco': –Saishet da 'am sasaxasoq na coma' da souaxat cam ỹaỹamaqchiguiñi 'auo'ottac. Maye 'am sasaxasoq, souaxat da naua 'ara'aqtaqa ỹataqta da sa iyacna'ape Ñim Lo'onatac 'Enauacna. Qamaq 'am choche 'am ỹale, qalaq qonetega da qoneta'am Ñimaye. 34 Nache So Jesús 'enapega somayepi, 'eeta': –Na namaxasoxonaxacpi maye qami' qoỹanema co'ollaxa, nanettañi da la'aqtac Ñim Lo'onatac 'Enauacna maye 'eeta': «Qami' sa'axatema da qami' piguem le'ecpi.» 35 Qaq qomi' saỹaanaq da naua nanettrañi la'aqtaqa Ñim Lo'onatac 'Enauacna, naamaye saishet da qaiqolegue't. Ỹoqo'oye 'eesa da Ñim Lo'onatac 'Enauacna ỹamata'ac da piguem le'ecpi som shiỹaxauapi maye ỹaconeguet da la'aqtac. 36 Qaq da huo'otaq Ñim Lo'onatac 'Enauacna Aỹem namaxa co'ollaxa ana 'alhua, qaq ¿ta'ainco' qami' ye qoñiitega da naua ỹa'aqtaqa sa iyacna'ape Ñimaye, souaxat da sheetega da Aỹem Llalec Ñimaye? 37 Da huo'otaq saishet da so'ot dam lo'onataxanaxac Ñimaye, nache saishettaxa da Aỹem qaua'amaqchiñi. 38 Qalaxaye da huo'otaq so'ottac damaye, nache na'aictaxa da Aỹem sa qaua'amaqchiñi, qalaxaye qaua'amaqchiñi nam so'otpi, yaqto' ishet da imauec da qauaỹaañi da Ñim Ita'a qataq Aỹem 'oonolec da qarataxac. 39 Huaña, nache qaltaq qanshetaique da qaỹaconeua'a da qaicoñe', qalaxaye So Jesús naneltaxan. 40 Nache So Jesús taigue dam pa'aigue da nala' lliguisheguem, ỹa'axasoxoolec so tala Jordán, taỹa yem 'alhua maye hueta'a co'ollaq dachelaxanataxaatac so Juan. Nache huo'oi soua na'axa'te da hueta'a yemaye. 41 Nache ỹataqta qalota na shiỹaxauapi na tauga ca hueta'a Somaye. Nache namayepi 'enapeco': –Ỹoqta 'eesa co'ollaxa da so Juan saishet da huo'o ca ỹo'ot na'anec maye sa qaỹauanapega, qalaxaye 'enauac co'ollaxa na ỹa'axat can ỹa'axatta'aguet ñi'iñi ỹale, ỹataqta ipacchigui. 42 Nache ỹataqta qalota na ỹa'amaqten So Jesús, co'ollaq huaña se'eso 'alhua.

11

Da l-leuaxa so Lázaro

1 Qaq huo'o so shiỹaxaua le'enaxat Lázaro, somaye sa no'on. Qaq somaye naigui so lma' ye nỹecpi le'enaxat Betania, yem nataqa'en lma' aso María qataq aso lqaỹa Marta. 2 Qaq asa'aso María, maye lqaỹa so Lázaro som sa no'on, nachaso asom icoreleguete co'ollaxa naua lapia'ate So Jesús, so ỹataqta no'on coraxat, qataq deqaxaỹaqtaxana na laue. 3 Nache se'esoua dos nqaỹa't, ỹamaxalo co'ollaxa da la'aqta'c So Jesús, 'eeta': –'Am Nataxala', yem 'anauochaxaua Lázaro, yemaye sa no'on. 4 Nache So Jesús co'ollaq hua'axaỹa de'era, nache 'eeta': –De'era lalolaxa, damaye saishet da taỹa'a ca l-leuaxa. Chaqrata da yaqto' damaye ishet da chegoqchigui da ỹachaxan da la'añaxac Ñim Lo'onatac 'Enauacna, qataq da na'añaxac maye Aỹem hueto'ot, Aỹem maye Aỹem Llalec Ñim Lo'onatac 'Enauacna. 5 Qaq So Jesús ỹataqta nauochaxaua aso Marta, qataq aso lqaỹa, qataq so Lázaro. 6 Qalaxaye co'ollaq qaỹa'aqtaxanem da so Lázaro sa no'on, nache Somaye queuoiguilo soua dos na'axa'te da ñaq hueta'a cam netaña. 7 Qaq co'ollaq ime, nache 'enapegalo soua lapaxaguenataqa, 'eeta': –'Onaxaic da she'eguelaxasoxogue da 'alhua Judea. 8 Nache soua lapaxaguenataqa, 'eetegalo Somaye, 'eeta': –'Am Napaxaguenataxanaq, ñaq cheta'ague da huo'o nam judiopi maye lma' yi'iye 'alhua, nshetaique da 'am ỹalauat, da 'am ira'a na coma' qalaq ¿ta'ainco' ye qaltaq 'anshetaique da 'aỹa yemaye? 9 Nache So Jesús 'enapeco': –¿Saisheto' da ye 'oonolec na'a'q, ivi' naua doce hora? Ye ñi 'oonolec shiỹaxaua da huo'otaq queuotapigui' ye na'a'q, qalaq saishet da huo'o ca ỹe'egueneguet, cha'aye na le'eraxa añi nala' yo'oqtegue naqa'en ca llec camaye. 10 Qalaxaye ca queuotapigui' ye pe, nache camaye ishet da huo'o ca ỹe'egueneguet, cha'aye qaica na yo'oqchiguiñi. 11 Qaq co'ollaq ime, nache So Jesús qaltaq 'enapeco': –Ye qanauochaxaua Lázaro, yemaye do'ocheta, qalaxaye Aỹem ñeqo'ona da ñequetoxon. 12 Nache soua lapaxaguenataqa 'ena'apo': –'Am Nataxala', da choche do'ocheta camaye, nache ỹoqta qome da ỹaỹamaxañi. 13 Qalaxaye So Jesús detaqtega da l-leuaxa so Lázaro, qalaxaye soua lapaxaguenataqa ipi'itaxaatrega da yo'oqchigui no'ochaxa. 14 Ỹoqo'oye So Jesús, ỹoqta da'aqtaxaatema soomaye, 'eeta': –Ye Lázaro, yemaye ỹoqta ileu. 15 Qaq Aỹem ỹataqta huo'o da ña'achec da saishet da soota'a yemaye. Qaq damaye ỹaỹamaqchiguiñi souaxat da qoñiita, yaqto' ishet da huo'o da qardaqa'ai da Aỹem qaua'amaqchiñi. Qalaxaye ¡qolaq ñeqo'onaxa ca hueta'a camaye! 16 Nache som Tomás maye qaỹamata'ac da huaya', 'enapegalo' soua lỹa't maye napaxaguenaxau', 'eeta': –Qolaq nataqa'en qomi', yaqto' nataqa'en qarleuaxaua damaye.

So Jesús nacheso so nca'alaxa

17 Qaq co'ollaq ivi' So Jesús, nache natenalec da so Lázaro mashe ivi' naua cuatro na'axa'te da qailareñi. 18 Qaq yem nỹecpi ye Betania, yemaye saqaỹapeque ye Jerusalén, ivi' tres kilómetros ye lshecta. 19 Qaq ỹoqo'oye qalota na shiỹaxauapi na nqo'ona aso Marta qataq aso María da ỹa'añaqchetta'ape soomaye, souaxat ye lqaỹa't maye saqca. 20 Qaq aso Marta co'ollaq ỹaỹaten da So Jesús mashe nvi', nache huaqata'aguet; qaq aso María, qalaxaye no'onaña ca lma'. 21 Nache aso Marta 'enapego' So Jesús, 'eeta': –'Am Nataxala', da 'am qoueta'actaxa ne'ena, nache saishettaxa da ileu ye ỹaqaỹa. 22 Qalaxaye Aỹem saỹaten da Ñim Lo'onatac 'Enauacna ishet da 'am ỹanem 'enauac cam 'auỹaxanaique. 23 Nache So Jesús 'enapega asomaye, 'eeta': –Ye 'arqaỹa qaltaq nca'alec. 24 Nache aso Marta 'enapeco': –Aỹem saỹaten da yemaye qaltaq nca'alec qom qanca'alaxatec na leuaxaicpi cam pa'atec na'a'q. 25 Nache So Jesús 'enapego' asomaye, 'eeta': –Aỹem Nachaỹem nca'alaxa, qataq ishet da ca leuaxaic ỹe'eguelaxalec da nca'alec ñaqa'en. Qaq cam huo'o da naquitaxac Aỹem, nache camaye na'aictaxa da ileu, qalaxaye qaltaq nca'alec. 26 Qataq 'enauac nam ña nca'altauec nagui qataq Aỹem ỹa'amaqten, nache namayepi saishet da ivireguet ca nleuaxa maye chochaq tatec. Qaq ¿'aua'amaqten peta'a de'era? 27 Nache asomaye 'enapeco': –Aja', 'am Nataxala'. Aỹem sa'amaqten da nache 'am Lca'aguishec qataq 'am Llalec Ñim Lo'onatac 'Enauacna maye 'am qaỹa'axatta'aguet co'ollaxa da 'auanaỹa ana 'alhua.

So Jesús nỹen co'ollaq hueta'a aso nhuachiqui so Lázaro

28 Qaq co'ollaq ime de'era la'aqtac aso Marta, nache asomaye jec da iỹaxana aso lqaỹa María. Nache isoxootot da 'enapega, 'eeta': –Dam Napaxaguenataxanaq hueta'a ne'ena, qaq damaye 'am nỹaxaneua'a. 29 Qaq co'ollaq choche hua'aqchigui de'era aso María, nache sa naỹaloxon da ñesheguem, nache nqo'oneuga So Jesús. 30 Qaq So Jesús saxanaxa co'ollaxa da inoxoneua'a ca lma't soomaye. Ñaq hueta'a cam huaña co'ollaq natena'aguet aso Marta. 31 Qaq na shiỹaxauapi maye hueta'a ca lma' aso María da ỹa'añaqchettac, co'ollaq ila'a da sa naỹaloxon da ñesheguem qataq jec asomaye, nache somayepi ca'attaueegue, cha'aye ipi'itaxaatega da asomaye tauga aso huachiqui da yaqto' huaña da nỹen. 32 Nache aso María co'ollaq ivireuga ca hueta'a So Jesús, nache ỹa'aroto naua l-llectel, nache 'eetega, 'eeta': –'Am Nataxala', da 'am qoueta'actaxa ne'ena, nache saishettaxa da ileu ye ỹaqaỹa. 33 Nache So Jesús co'ollaq ila'a da nỹeetac aso María qataq so judiopi maye nnaictague', nache Somaye ỹataqta huo'o da laquicoxo, qataq nomteguet da 'eeta lta'araic da lquiyaqteỹaxac. 34 Nache inat somayepi, 'eeta': –¿Chaq hua'ague ca qaỹachaña co'ollaq qailareñi camaxa? Nache somayepi, 'eeta': –'Am Nataxala', 'auanaicna'a, 'ena namaye. 35 Nache So Jesús nỹeetac. 36 Nache so shiỹaxauapi maiche na'aqtaxaatega't, 'eeta': –Ña qauloỹa damaye ỹataqta 'eesa da lauotaxat yemaye. 37 Qalaxaye huo'o na laỹepi 'eeta': –De'era ỹale, ishet da co'ollaxa da nauaañi naqa'en so qanamaic, qalaq ¿taloxocheyectoxo' da saq huo'o ca 'eetec damaye, da yaqto' sa ipaca'aguet naqa'en da l-leuaxa ye Lázaro?

Da 'eetec co'ollaq qaltaq nca'alec so Lázaro

38 Qaq So Jesús qaltaq nomteguet da 'eeta lta'araic, nache nqocheneua'a aso huachiqui maye no'onata naigui so coma' lta'araic, asomaye huo'o so lapoxot coma' som ñegueuo. 39 Nache So Jesús 'enapeco': –Ña qanqache na coma'. Nache aso Marta maye lqaỹa som saqca, asomaye 'enapeco': –'Am Nataxala', yemaye ỹoqta da mashe huo'o na laita, cha'aye mashe ivi' naua cuatro na'axa'te da saqca. 40 Qalaxaye So Jesús 'enapeco': –¿Saisheto' da 'am sheetega quiye da huo'otaq 'aua'amaqten Aỹem, nache ishet da 'aulogui da la'añaxac Ñim Lo'onatac 'Enauacna? 41 Nache qanqat so coma'. Nache So Jesús ỹamato'ot na piguem, nache 'enapeco': –'Am Ita'a, 'am sanot da ña'achecỹaxac, cha'aye 'am Aỹem 'aua'axaỹa. 42 Qaq Aỹem saỹaten da 'am, nache 'eetai' naxa da Aỹem 'aua'aqtega. Qalaxaye Aỹem shenapec de'era souaxat nam shiỹaxauapi maye hueta'a ne'ena, yaqto' namayepi ishet da ỹa'amaqten da 'eesa da Aỹem 'aramaxashec. 43 Qaq co'ollaq ime da nasaxauec de'era, nache deỹaxan, 'eeta': –¡Lázaro, 'ampa'auec! 44 Nache som leuaxaic mpa'auec. Somaye qoỹaxatta'aguelo naua lhua'q qataq naua lchel som laxataxat qataq qoỹaxattagui na lashec so hualoq laỹe. Nache So Jesús 'enapega somayepi, 'eeta': –Ña qanqache na laxataxat damaye, nache qauaqaỹa'a da queuoỹapigui'.

Da qoỹoxottañi ỹamaxataxac da qaỹaconeua'a So Jesús

45 Huaña, nache ỹataqta qalota nam ỹa'amaqten So Jesús nam judiopi maye anaỹa aso María da ỹa'añaqchet, co'ollaq ỹauaachigui dam ỹo'ot So Jesús. 46 Qalaxaye huo'oi soua je'c somayepi, da nqo'ooreua'a na fariseopi, nache da'aqtaxanem da ỹo'ot So Jesús. 47 Nache nam fariseopi qataq nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, namayepi dataỹa't, huaxaiguet so 'amaqtaqaicpi maye nmit da huo'o ye nasouaxashet. Nache somayepi 'enapeco': –¿Hua'ague ca shenaqtec? Cha'aye se'eso ỹale ỹataqta qalota na ỹo'ot na'anecpi maye sa qaỹauanapega. 48 Cha'aye qomi' da sa'axasoqta'a Somaye, nache 'enauac na shiỹaxauapi ỹa'amaqten da nacheso So Lca'aguishec Ñim Lo'onatac 'Enauacna. Nache anac na romanopi, nache ilaxachigui añi qaro'onaxanaxaqui late'erai qataq nam qarhuo' le'ecpi. 49 Qalaxaye huo'o so 'oonolec somayepi som le'enaxat da Caifás. Maye lataxala' nam ntaxaỹaxanaxanecpi da qaitaxaỹapegue' Ñim Lo'onatac 'Enauacna se'eso vi'i. Somaye 'enapeco': –Qami' qaica ca qauaỹaañiỹapec. 50 ¿Sa qauaỹaañiỹo' da ỹaỹamaqchiguiñi da 'oonolec ca ileualec na lauo' le'ecpi, qaq saq ishet da 'eeta'am da qailaxachigui 'enauac na qarhuo' le'ecpi? 51 Qaq so Caifás saishet da 'enapec de'era da maiche chegoqchigui da lhuennataxac. Qaq cha'aye somaye, nacheso so lataxala' na ntaxaỹaxanaxanecpi se'eso vi'i, nache somaye ilota'aguet da So Jesús ileualec 'enauac na judiopi; 52 qaq saishet da nachaqnata nam judiopi, cha'aye nataqa'en 'enauac nam llalaqpi Ñim Lo'onatac 'Enauacna maye nlagaxattac da yaqto' lapona't. 53 Qaq, nache chegoqchiguiña se'eso na'a'q da na lataxala'pi na judiopi, detaxaỹapigui ca lataxac da yaqto' ỹalauat So Jesús. 54 Qaq ỹoqo'oye So Jesús mashe saishet da ỹoqta nachaxaata da ỹalectaigui na judiopi, cha'aye sa ỹaỹamaxaren da qaỹauana ca hueta'a. Chaqrata da Somaye ca'ai ye 'alhua Judea da nqo'ona yem nỹecpiolec maye le'enaxat Efraín yem saqaỹapeque ye toolec 'alhua. Huaña, nache hua'a yemaye nnaictagueto soua lapaxaguenataqa. 55 Qaq mashe saqaỹauga so na'a'q maye laponaxaqui na judiopi da qaiuennate so na'a'q le'enaxat Lapascua. Nache ỹataqta qalota so shiỹaxauapi maye nañalo naua lỹa't 'aleu' taỹa ye Jerusalén, da yaqto' ỹo'ot da lataxac da nqui'itaxat ca shiỹaxaua, da yaqta'a nvireuo se'eso na'a'q naponaxaqui. 56 Qaq qanmittaique So Jesús, qaq co'ollaq qaivita aso no'onaxanaxaqui late'erai, nache nnattega't somayepi, 'eeta': –¿Chaq 'eetec ca qara'aqtaqui? ¿Peta'a anac camaxa, huo'otaq saishet? 57 Na fariseopi qataq na lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, namayepi ỹan da la'aqtac co'ollaxa da huo'otaq huo'o ca ỹaỹaten ca hueta'a So Jesús, nache ishet da ỹa'axat, da yaqto' ỹaconeua'a da qaicoñe'.

12

Aso 'alo maye icoreleguete naua lapia'ate So Jesús so coraxat

1 Qaq saxanaqcaua caua seis na'axa'te da iviteuga so naponaxac maye le'enaxat Lapascua. Nache So Jesús taỹa ye Betania yem netaña so Lázaro som qaltaq nca'alaxatec co'ollaxa Somaye. 2 Nache qaỹo'ot so nallec da qaique'elec So Jesús. Nache aso Marta huetac, qaq so Lázaro ỹalectauo da lquia'axaua So Jesús. 3 Nache aso María maye lqaỹa't soomaye, asomaye ndouo so ivi' na medio litro na coraxat maye le'enaxat nardo. Somaye ỹataqta late'erai añi lasheue, nache icoreleguete naua lapia'ate So Jesús. Ime, nache deqaxaỹaqtaxana na laue. Qaq 'enauac se'eso nỹec ỹataqta ỹe'eguelaxaigui na laita so coraxat. 4 Nache so Judas Iscariote, som 'oonolec soua lapaxaguenataqa So Jesús maye taỹa'a da ỹaneuo So Jesús somaye, 'eeta': 5 –¿Ta'ainco' ye sa qaimeno' de'era coraxat da ivi' qanqa'en da lashiichiỹaxac caua trescientos na'axa'te da lo'onataxanaxac ca shiỹaxaua, da yaqto' ishet da qaitauan na choxoraqpi? 6 Qaq so Judas saishet da 'enapec de'era, da souaxat da huo'otaq ichoxoreetac na choxoraqpi, cha'aye somaye choche cachaxaic. Qataq nacheso som ilotague' aso nme anom So Jesús qataq soua lapaxaguenataqa, qalaxaye somaye decachetega naxa anamaye. 7 Nache So Jesús 'enapega so Judas, 'eeta': –'Aua'axaỹa'a aramaye. Cha'aye aramaye ỹaỹamaxattac co'ollaxa de'era coraxat, da yaqto' lhuotta qom iviteuga ca na'a'q da Aỹem qailareñi. 8 Qami' nache 'eetai' da qoviita'aguet na choxoraqpi; Aỹem, qalaxaye saishet da nache 'eetai' da Aỹem qoviita'aguet.

Qaỹauotaique da qaỹalauat so Lázaro

9 Qaq ỹataqta qalota na judiopi maye lma' ye Jerusalén, da la'axaỹaxac So Jesús da hueta'a ye Betania. Nache nqo'ona yemaye. Qaq saishet da nachaqsota So Jesús da qaỹauotaique da qanauane', cha'aye nataqa'en so Lázaro som qaltaq nca'alaxatec co'ollaxa Somaye. 10 Nache nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, namayepi detaxaỹapigui co'ollaxa nataqa'en da ỹauotaique da ỹalauat so Lázaro, 11 cha'aye lasouaxashet qanqa'en da chegoqchigui somaye da ỹataqta qalota na judiopi na ca'ai somayepi, nache ỹa'amaqten So Jesús.

So Jesús inoxoneua'a so Jerusalén

12 Qaq ỹataqta qalota na shiỹaxauapi na mashe nvita ye Jerusalén da ỹalegueua'alo soua na'axa'te maye laloxoqui' da qaiuennate so na'a'q le'enaxat Lapascua. Qaq se'eso lỹa na'a'q, nache qaỹaỹaten So Jesús da mashe nayeetaua'a ye Jerusalén. 13 Nache so shiỹaxauapi, iquesoq ana laue ana chaic, nache qata'aguet So Jesús. Nache ỹa'alaqtalec, 'eeta': –¡Sho'oxorenaq Ñim Lo'onatac 'Enauacna! ¡Ỹataqta ỹo'oxoraq da llecỹaxac, nam nactaigui da lamaxasoxonaxac Ñim Nataxala'! ¡Ỹataqta ỹo'oxoraq da llecỹaxac nam Lta'a na Israel le'ecpi! 14 Qaq So Jesús natenalec so 'ashenolec, nache nelec somaye. Qaq 'era da 'eetec da ipacchiguilo dam 'ena'ape naua nanettrañi la'aqtaqa Ñim Lo'onatac 'Enauacna, 'eeta': 15 Saishet da qayi'i, qami' maye qoñiitaigui na nỹecpi na Jerusalén; ña 'aulo'oguet na 'Arta'a, 'ena cha'aguet, netalec na 'ashena. 16 Qaq co'ollaq cheta'ague, nache soua lapaxaguenataqa saishet da ỹaỹate'n ca llec de'era. Qalaxaye co'ollaq qaỹata'ague de'era, co'ollaq mashe ime da ileu qataq da nca'alec So Jesús, nache cheta'ague da tachiguilo ye lauel da 'enauac nam qaỹo'otec So Jesús, mashe ỹa'axata'alo co'ollaxa naua nanettrañi la'aqtaqa Ñim Lo'onatac 'Enauacna. 17 Nache so shiỹaxauapi maye hueta'aguet So Jesús co'ollaq iỹaxaneua'a so Lázaro co'ollaq huetaigui aso huachiqui da nca'alec naqa'en, namayepi ỹa'axattac dam lauanaqchec. 18 Qaq ỹoqo'oye so shiỹaxauapi huaqata'aguet So Jesús, cha'aye ỹaỹaten dam ỹo'ot na'anec maye sa qaỹauanapega. 19 Qalaxaye nam fariseopi maiche detaqtega't, 'eeta': –Ña qauloỹa Namaye, 'enauac na shiỹaxauapi ca'attague'. Qaq qomi' nagui sa sañoxotaq da huo'o ca so'otaq.

Huo'o so griegopi nmittaique So Jesús

20 Qaq huo'oi soua ỹalectrauo griego som huetra'a ye Jerusalén da ỹo'oxoren Ñim Lo'onatac 'Enauacna se'esoua na'axa'te maye naponaxaqui' maye le'enaxat Lapascua. 21 Soomaye nqocheneua'a so Felipe, maye lma' ye Betsaida yem huaigui ye 'alhua Galilea. Nache nachoxoreetracot somaye, 'eetra': –Qomi' 'anqouagueque, qomi' sauoqtaique da ñauanaxai' ca Jesús. 22 Nache so Felipe jec da da'aqtaxanem so Andrés, nache soomaye je'c da da'aqtaxaarem So Jesús. 23 Nache So Jesús 'enapegalo soomaye, 'eeta': –Nagui mashe ivita ye laloqo' da 'enauac qaỹaỹaten da negue't cam ỹoqta Shiỹaxaua Llalec. 24 Qaq ỹataqta 'eesa de'era qami' sa'axatema, da aca ala na trigo, da huo'otaq saishet da taigui qanqa'en na 'alhua da yaqto' ileu, nache acamaye qaca aca ala. Qalaxaye acamaye da huo'otaq ileu, nache ỹataqta qalota ana ala da qanqat. 25 Ca ndotec da ỹauotec da maiche nachaalataxac, nache camaye ishet da deqat, qaq cam sa ỹauotec da nachaalataxac nagui da ñaq hueta'a ana 'alhua, nache camaye qaỹaỹamaxat da nachaalataxac da yaqto' chochaq tatec. 26 Qaq da huo'o ca nshetaique da Aỹem do'onataxanot, qaq no'on da Aỹem quegue, qaq ca Aỹem soota'ague, nache camaye nataqa'en hueta'a. Da huo'o ca Aỹem do'onataxanot, nache Ñim Ita'a ỹauo'o qome da llo'oxoyec camaye.

So Jesús ỹa'axata'a da nalaataguec

27 Qaq nagui ỹataqta lta'araic da ñeque'eenaxac, qataq sa saỹaten ca sheetec. Qaq Aỹem huo'o da iyaxa da shenapega Ñim Ita'a da saishet da Aỹem ỹasheneguet de'era ñeque'eenaxac. Qalaxaye Aỹem saishet da sheetec de'era, cha'aye Aỹem ñanaỹa ana 'alhua da so'ot ca 'eetapeguec Ñimaye. 28 Nachaqrata da shenapega Ñimaye, sheeta': «'Am Ita'a ñaq 'auachaxana na shiỹaxauapi da 'ara'añaxac.» Huaña, nache qaỹa'axaỹa so nvilỹaxac, chemaqot na piguem, 'eeta': –Mashe sogote da sachaxan da ỹa'añaxac, qalaxaye nagui qaltaq she'eguelaxalec da sachaxan. 29 Nache nam shiỹaxauapi maye na'axaỹaxaatac, namayepi 'eetega da hua'aqchigui ca nalataxa, qataq huo'o na 'eeta': –Namaxashec piguem le'ec so ntaxaỹapiguiña Damaye. 30 Nache So Jesús 'enapego' somayepi, 'eeta': –Da huo'omshe qaua'aqaỹa se'eso nvilỹaxac; huotaique da qami' itaua'n da yaqto' Aỹem qaua'amaqchiñi. 31 Nagui mashe ivita ye laloqo' da Ñim Lo'onatac 'Enauacna nmit na huetalec ana 'alhua, qataq da ỹamaqauec som damaxasoxonapec ana 'alhua. 32 Qaq qom ivita da Aỹem qaiuaxaneguet ca ñepe'enaxaqui, nache huaña qome, nache so'otec da 'enauac Aỹem qaỹa'amaqten. 33 Qaq So Jesús co'ollaq 'eetega da qaiuaxaneguet ca npe'enaxaqui, nache ỹa'axattac da 'eetec qome ca l-leuaxa Somaye. 34 Nache na shiỹaxauapi 'enapega Somaye, 'eeta': –Qomi' saỹatenaq chegoqchigui ana nere maye huetalec na la'aqtacpi Ñim Lo'onatac 'Enauacna da que'eca Lca'aguishec Ñimaye maye qaiuattaique, nache 'eetai' da nca'altauec. Qalaq ¿ta'ainco' ye 'am qonetega da que'eca Shiỹaxaua Llalec, qaiuaxaneguet qome ca npe'enaxaqui? Qaq ¿chaq negue'to' que'eca Shiỹaxaua Llalec? 35 Nache So Jesús 'enapega somayepi, 'eeta': –Ñaq cara'acolec da qami' hueta'agueta nam lcoỹaraqte ana 'alhua, qalaxaye sa qaỹaraue'c caua na'axa'te da qami' hueta'agueta. Qaq ỹoqo'oye qauqueuoitapigui' nagui da ñaq huo'o na yo'oqchiguiñi, yaqto' saishet da qami' ique'elaxa't ca napalaxa. Cha'aye cam queuotapigui na napalaxa, camaye saishet da ỹaỹaten cam tata'ague. 36 Qaq nagui da ña qami' hueta'agueta nam chegoqchigui nam yo'oqchiguiñi, nache qaua'amaqchiñi Namaye, yaqto' qami' ishet da qoñiita'am na yo'oqchiguiñi. Qaq co'ollaq ime de'era 'enapec So Jesús, nache jec da nqañoxocheesop somayepi.

Da 'eetec na judiopi da huo'omshe saishet da ỹa'amaqten So Jesús

37 Qaq na'aictaxa da So Jesús ỹataqta qalota na ỹo'ot na'anec maye sa qaỹauanapega da ỹauaachigui naqa'en somayepi, qalaxaye ñaqaiyeta saishet da qaỹa'amaqten Somaye. 38 Qaq ỹataqta ipacchigui dam la'aqtaxanaxac som la'aqtaxanaxanec Ñim Lo'onatac 'Enauacna, le'enaxat Isaías maye, 'eeta': 'Am Ỹataxala', ¿negue'tom ca ishet da ỹa'amaqten da qara'aqtaxanaxac? Qataq ¿negue'tom ca ỹachaxana da la'añaxac Ñim Nataxala'? 39 Qaq ỹoqo'oye nache saishet da huo'o ca da'amqaanataxan. Cha'aye so Isaías nataqa'en ỹiyiñi co'ollaxa da 'eeta': 40 Ñim Lo'onatac 'Enauacna ỹo'otec naqa'en namayepi da sanauaañi qataq ỹataqta qaramchiguilo naqa'en naua lquiyaqtel, yaqto' namayepi saishet da nauaayiñi naua yo'oqchiguilo la'ai'te, qataq qaica ca ỹaỹaten da lquiyaqteỹaxac, qataq da saishet da Aỹem ñe'eguelaxa, da yaqto' ñataren. 41 Qaq so Isaías 'enapec co'ollaxa de'era, cha'aye souaxat da ỹauaachigui da llo'oxoyec So Jesús. Huaña, nache ỹa'axattac Somaye. 42 Qalaxaye ñaqaiyeta ỹataqta qalota na judiopi na ỹa'amaqten So Jesús, ivira'a nam ỹataqta 'amaqtaqaicpi. Qalaxaye namayepi saishet da ỹataqta nachaxaata, souaxat da ñe'etega na fariseopi da huo'otaq ỹamaqauec namayepi da huaigui ana napaxaguenaxaquipi, 43 qataq souaxat da namayepi nqopita da maiche ỹo'oxoreetac na 'eeta'am shiỹaxauapi, qaq saishet da ipacapegue' cam llo'oxoyec maye ỹanem Ñim Lo'onatac 'Enauacna.

So Jesús naỹa na shiỹaxauapi da nca'alaxatec

44 Nache So Jesús ỹataqta nlamaxaren da detaqa, 'eeta': –Ca Aỹem ỹa'amaqten, camaye saishet da Nachaqaỹemta da Aỹem ỹa'amaqten, cha'aye nataqa'en Ñim Ita'a maye Aỹem namaq. 45 Qataq ca Aỹem ila'a, camaye nataqa'en ila'a ñim Aỹem namaq. 46 Aỹem maye Aỹem lcoỹaraqte ana 'alhua. Ñanaỹa anamaye, da yaqto' ca Aỹem ỹa'amaqten, nache camaye saishet da huetaigui na napalaxa. 47 Qalaxaye da huo'o ca choche na'axaỹaxaategalo naua ỹa'aqtaqa qalaq saishet da ỹo'o't, qaq saishet da Nachaỹem da so'ot ca nhuaxanaguec camaye, cha'aye Aỹem saishet da ñanaỹa ana 'alhua da sauo'o ca nhuaxanaguec na shiỹaxauapi, nachaqrata da Aỹem ñanac, da yaqto' ñeca'alaxatec namayepi. 48 Qaq ca Aỹem ỹo'otan, qataq saishet da ỹo'o't naua ỹa'aqtaqa, camaye sogote da huo'o qome ñim ỹo'ot ca nhuaxanaguec. Cha'aye naua ỹa'aqtaqa maye ñasaxarec, nachenaua qome naua ỹo'o't ca nhuaxanaguec na shiỹaxauapi ca pa'atec na'a'q. 49 Cha'aye Aỹem nam ỹa'aqtaqa saishet da maiche ñallegoxottela't; cha'aye Ñim Ita'a maye Aỹem namaq, Ñimaye chegoqtot cam ỹa'aqtac qataq cam sapaxaguenataxanec. 50 Qaq Aỹem saỹaten da lamaxasoxonaxac Ñim Ita'a, damaye chegaqaigui da nca'alaxa maye chochaq tatec. Qaq 'era da 'eetec da cam ñasaxauec qalaq nacheca ca Aỹem ỹamaxalec Ñim Ita'a.

13

So Jesús iỹoi' naua lapia'ate soua lapaxaguenataqa

1 Qaq nacheso se'eso lỹa na'a'q maye huetoiguilo soua na'axa'te da qaiuennate so na'a'q le'enaxat Lapascua. Qaq So Jesús mashe ỹaỹaten da ivita ye laloqo' da ca'ai ana 'alhua, da ỹe'eguelaxa Ñim Lta'a maye Lo'onatac 'Enauacna. Qaq Somaye nache 'eetai' da lauotaxanaqtaic na lalamaxatpi maye huetalec ana 'alhua, qaq da lauotaxanaqtaic ỹachaxana somayepi choche ivitta'a da loga't da nachaalataxac. 2 -4 Qaq so pa'aguenataxanaxaic mashe sogote da ỹachaigui da lquiyaqteỹaxac so Judas Iscariote, da lhuennataxac da yaqto' ỹaneuo So Jesús. Qaq So Jesús, Somaye ỹaỹateeta da chegoqtot Ñim Lo'onatac 'Enauacna, qataq ỹaỹateeta da ỹe'eguelaxa Ñimaye, qataq da Ñim Lta'a ỹanem Somaye 'enauac da la'añaxac. Nache co'ollaq mashe deque'etacpi somayepi, nache So Jesús nachaañi, nache nqat so lapo', qataq nsaachigui so pilotaxat hualoq laỹe. 5 Nache icoyingui so 'etaxat so pilotaxaqui, nache iỹoi' naua lapia'ate soua lapaxaguenataqa qataq ỹaqaxaỹaxa't, huota'a naqa'en so pilotaxat hualoq laỹe. 6 Qaq co'ollaq taỹa'a so Simón Pedro da huotaique da iỹoi' naua lapia'ate, nache somaye 'enapeco': –'Am Ỹataxala', ¿'am 'auauotaique peta'a da 'auỹoi' naua ỹapia'ate? 7 Nache So Jesús 'enapeco': –Nagui 'am saishet da 'auaỹaten da so'ottac, qalaxaye qom qaỹata'ague, nache ishet da 'auaỹaten. 8 Qalaxaye so Pedro 'enapeco': –'A'i, saishet da 'am sashenem da 'auỹoi' naua ỹapia'ate. Nache So Jesús 'enapega somaye, 'eeta': –Da saishet da seỹoi' naua 'arapia'ate, nache saishet da 'am ỹapaxaguenatac. 9 Nache so Simón Pedro 'enapeco': –Hua' qone', 'am Ỹataxala', qalaxaye saishet da nachaqnauate' naua ỹapia'ate da 'auỹoi', nataqa'en naua ihua'q qataq na ỹaqaic. 10 Qalaxaye So Jesús 'enapeco': –Cam ñaq cheta'ague da nacheltac, camaye sa iuen da qaltaq nỹo, nachaqnauate' naua lapia'ate iỹoi', cha'aye camaye sogote da qui'itta. Qaq qami' sogote da qami' qui'itte', na'aictaxa da saishet da imauec da qoñiita. 11 Somaye 'enapec de'era, 'eeta': «Saishet da imauec da qoñiita da qami' qui'itte',» cha'aye ỹaỹateetac da huo'o som huotaique da ỹaneuo Somaye. 12 Qaq co'ollaq imat da iỹota'ape naua lapia'ate somayepi, nache So Jesús qataq napogoña so lapo', nache nso'ooñi da datalec so nquia'axala', nache 'enapeco': –¿Qami' peta'a qauaỹaañi de'era qami' so'oteque? 13 Qami' naxa da Aỹem qauỹaxañiỹa, qalaq qoñiỹapec da Aỹem Napaxaguenataxanaq, qataq Aỹem Qarataxala'ai. Qaq damaye saishet da seqoleguet, cha'aye ỹataqta 'eesa da Aỹem Napaxaguenataxanaq qataq Aỹem Nataxala'. 14 Qaq Aỹem, maye Aỹem Qarataxala'ai qataq Aỹem Qanapaxaguenaxala'ai seỹota'ape naua qarapia'achilli', qaq nagui no'on da ñi 'oonolec da qoñiita nataqa'en iỹoi' naua lapia'ate ca lỹa. 15 Aỹem qami' sachaxanalo de'era, da yaqto' nataqa'en qami' qauo'oche. 16 Qaq ỹataqta 'eesa de'era qami' sa'axatema, da qaica ca nlatac da napacalec da la'amaqchec ca na'aco', qataq qaica ca namaxashec da ishet da napacalec cam ỹamaqtac camaye. 17 Qaq qami' da qauaỹaañita de'era, nache qauo'oche, qaq huaña, nache ỹataqta qauamaichiguiñi. 18 Qaq Aỹem saishet da imauec da qoñiita da qami' setaqtapoiguilo, cha'aye Aỹem sauattoota nam ỹataqta ica'aguishecpi. Qalaxaye no'on da ỹataqta ipacchiguilo naua nanettralec ana nere maye huetalec na la'aqtacpi Ñim Lo'onatac 'Enauacna maye 'eeta': «Cam maiche iquia'axaua, qalaq camaye Aỹem dataỹa'aguet.» 19 Qaq Aỹem qami' sa'axatema de'era, yaqto' qom ivita da ipacchigui, nache qami' ishet da qaua'amaqchiñi da Aỹem maye Nachaỹem. 20 Qaq ỹataqta 'eesa de'era qami' sa'axatema, da ca ỹaconeguet cam ỹamaxashec, qaq camaye Aỹem maye Aỹem ỹaconeguet. Qaq cam Aỹem ỹaconeguet, camaye ỹaconeguet Ñim Aỹem namaq.

So Jesús ỹa'axata'a so Judas Iscariote da ỹaneuo Somaye

21 Qaq co'ollaq ime da nasaxauec de'era la'aqtac, nache So Jesús ỹataqta sa nalo'oguet da 'eeta. Huaña, nache ỹataqta ỹa'axatta de'era, 'eeta': –Ỹataqta 'eesa de'era qami' sa'axatema, da 'oonolec da qoñiita ñi Aỹem ỹaneuo qome. 22 Nache soua lapaxaguenataqa namatapega't, cha'aye sa ỹaỹate'n chaq negue't cam qoỹeetega soomaye. 23 Qaq huo'o so 'oonolec soua lapaxaguenataqa So Jesús, som ỹataqta nauochaxaua, qaq somaye nache netaua'a na laỹe da lquia'axaua. 24 Nache so Simón Pedro ỹo'ot so la'anec da yaqto' somaye inat So Jesús, da chaq negue't ca 'eetega Somaye. 25 Nache somaye nquigueua'a So Jesús, nache inat, 'eeta': –'Am Ỹataxala', ¿chaq negue't camaxa cam 'am ỹaneuo? 26 Nache So Jesús 'enapeco': –Aỹem qome ñauolchiiñi ca laỹe ana nauole 'ayiiña, qaq cam sami', qaq nacheca camaye. Ime, nache Somaye nauolchiiñi so laỹe aso nauole, nache ỹami' so Judas Iscariote. 27 Qaq co'ollaq lcopa'a da ỹaconeguet so laỹe aso nauole so Judas, nache so pa'aguenataxanaxaic taigui da lquiyaqteỹaxac somaye. Nache So Jesús 'enapego', 'eeta': –'Am Judas, 'auỹalapegue' dam huotaique da 'auo'ot. 28 Qalaxaye saishet da huo'o ca 'oonolec soua lquia'axau' maye datataleguete so nquia'axala' da huo'otaq ỹaỹaten da chaq ta'ainec da 'enapec de'era. 29 Cha'aye so Judas, somaye nacheso so ilotague' aso nme anom So Jesús qataq soua lapaxaguenataqa, qaq ỹoqo'oye huo'o na ipi'itaxaatega da qoỹeetega somaye da huo'o ca desheenaxana nallec, souaxat se'eso naponaxac le'enaxat Lapascua, huo'otaq da huo'o aca ỹami' anom nam choxoraqpi. 30 Nache so Judas co'ollaq ime da ỹaconeguet so nauole laỹe, nache pa'auec. Qaq mashe pe.

Da dalaxaic namaxasoxonaxac

31 Qaq co'ollaq mashe jec so Judas, nache So Jesús 'enapegalo soua lỹa't lapaxaguenataqa, 'eeta': –Nagui qaỹachaxan da llo'oxoyec na Shiỹaxaua Llalec, qataq da llo'oxoyec Ñim Lo'onatac 'Enauacna, qaỹachaxan da chegoqchigui qanqa'en Namaye. 32 Qaq da ne'ena Shiỹaxaua Llalec da ỹachaxan da llo'oxoyec Ñim Lo'onatac 'Enauacna, nache Ñimaye nataqa'en ỹachaxan qome da llo'oxoyec namaye, qaq mashe saqaỹaloq da ỹachaxan damaye. 33 Qami' ỹalqolqa, mashe saqaỹapeque da qami' saq soota'agueta. Qaq qami' qome Aỹem qanmichiitaique, qalaxaye nache 'eeta'am de'era ỹa'aqtac co'ollaq sheetega na judiopi da sheeta': Saishet da qauañoxoche da qanqo'oñiỹa cam soota'a. 34 Qaq nagui qami' sanema da dalaxaic namaxasoxonaxac, 'eeta': Ñi 'oonolec da qoñiita ỹataqta ỹauotec ca lỹa. 'Eeta'am da sheetec da ỹataqta qami' sauoteque, qaq nachera qome da qoñiitec da ñi 'oonolec da qoñiita ỹataqta ỹauotec ca lỹa. 35 Qaq ñi 'oonolec da qoñiita ỹataqta ỹauotec ca lỹa, nache 'enauac na huetalec ana 'alhua ỹaỹaten da ỹataqta 'eesa da qami' ỹapaxaguenataqa.

So Jesús ỹa'axata'a da so Pedro nqoleguet da 'eetega sa ỹauatton Somaye

36 Nache so Simón Pedro inat So Jesús, 'eeta': –'Am Ỹataxala', ¿chaq hua'ague ca 'aigue? Nache So Jesús 'enapeco': –Cam saigue nagui, 'am saishet da 'auañoxot da 'aigue. Qalaxaye qom mashe lcopa'a, nache 'am ishet da Aỹem qoquegue. 37 Nache so Pedro 'enapeco': –'Am Ỹataxala', ¿ta'ainco' ye saishet da 'am seca'ategue nagui? Ye aỹem qaica ca shega da na'aictaxa da 'am saalec da ñachaalataxac. 38 Nache So Jesús 'enapego' somaye, 'eeta': –¿Ỹoqta 'eesa peta'a da 'am lhuotta da Aỹem 'aỹa'aalec da 'anachaalataxac? Qalaxaye Aỹem ỹoqta 'eesa de'era 'am sa'aqtaxanem nagui, da qom yaqta'a da nỹen ca 'olgaxa, qaq mashe sogote da ivi' tres da 'avi'eguelaxalec da qonetega Aỹem sa 'auauatton.

14

So Jesús nacheso so nqa'aic maye taỹa'a Ñim Qarta'a

1 Saishet da huo'o ca tatapigui qarvilli. Nachaqrata da qaupi'iỹa'ai Ñim Lo'onatac 'Enauacna, nataqa'en Aỹem. 2 Cha'aye ye lma' Ñim Ita'a ỹataqta qalota ye ndaqa'pi. Qaq da saishet da 'eetec taxa de'era, nache saishettaxa da qami' sa'aqtaxanema da sheeta', ashec da seqataxanai' ca qarmaye. 3 Qaq qom mashe ime da ashec da seqataxanai' ca qarmaye, nache qaltaq ñe'eguelaq da qami' saue'c, yaqto' qami' nache 'eetai' da Aỹem qoviita'aguet que'eca soota'a. 4 Qaq qami' mashe qauauañiỹa so nqa'aic da qa'aỹeegue dam saigue. 5 Nache so Tomás 'enapego', 'eeta': –'Am Ỹataxala', qomi' sa saỹatenaq cam 'aigue; qaq ¿ca 'eeteco' da sauanaxa ca nqa'aic? 6 Nache So Jesús 'enapega somaye, 'eeta': –Aỹem Nachaỹem nqa'aic, qataq Nachaỹem 'eesa lataxac, qataq Nachaỹem nca'alaxa. Qaica ca lỹa ñegueuo da qainoxoneua'a Ñim Ita'a, Nachaqaỹemta. 7 Qaq da qami' Aỹem qauauattoñi, nache nataqa'en qauauattoñi Ñim Ita'a. Qaq nagui mashe sogote da qauauattoñi, cha'aye mashe qauloito'ot Namaye. 8 Nache so Felipe 'enapego' 'eeta': –'Am Qarataxala', ña qomi' 'auachaxanalo ca Qarta'a. Qaq 'era nachaqrata seuenaqtac. 9 Nache So Jesús 'enapego' somaye, 'eeta': –Felipe, Aỹem mashe huo'oi soua vi'iye da qami' soota'agueta, ¿qalaq ñaq saxanoxo' da Aỹem 'auauatton? Cha'aye ca Aỹem ila'a, camaye nataqa'en ila'a Ñim Ita'a, qaq ¿ta'ainco' ye Aỹem 'auỹaxaatacot da qami' sachaxanalo Ñim Ita'a? 10 Qataq ¿saisheto' peta'a da 'aua'amaqten da Ñim Ita'a qataq Aỹem da 'oonolec da qarataxac? Naua ỹa'aqtaqa maye ñasaxarec, naamaye saishet da maiche ñallegoxottela't. Aỹem nachaqrata da so'ot ca Aỹem ỹamaxalec Ñim Ita'a, qaq Ñimaye ỹo'ot ca maiche 'eetapeguec ỹachegoxotchigui Aỹem. 11 Qaua'amaqchiñi da shenapec, da Aỹem qataq Ñim Ita'a, 'oonolec da qarataxac. Qaq da saishet, nache nachaqrata da Aỹem qaua'amaqchiñi, souaxat nam so'otpi. 12 Qaq ỹataqta 'eesa de'era qami' sa'aqtaxanema, da ca Aỹem ỹa'amaqten, nache camaye ishet nataqa'en da ỹo'ot nam so'otpi, qaq cha'aye Aỹem nagui saỹa ye netaña Ñim Ita'a, nache qami' ishet da ỹactec ca qauo'oche, napacalec nam so'otpi. 13 Qaq 'enauac nam qauỹaxañiỹaique da qoviilec da ỹe'enaxat, nache Aỹem so'ot, yaqto' ne'ena Llalec Ñim Lo'onatac 'Enauacna ishet da ỹachaxan da llo'oxoyec Ñim Lta'a. 14 Nache Aỹem so'ot 'enauac cam qauỹaxañiỹaique da qoviilec da ỹe'enaxat.

So Jesús ỹachaxanapec da namaq So Saqcha'a Na'añaxac Qui'itta

15 Da qami' Aỹem qauauochec, nache qaualaqaileguete naua ỹamaxasoxonaxaco. 16 Qaq Aỹem ñachoxonnot Ñim Ita'a, da yaqto' qami' namaxalo ca Saqcha'a Na'añaxac Qui'itta da qami' itaua'n, qataq nache 'eetai' da qami' hueta'agueta, 17 Qataq camaye qami' ỹapaxagueneque cam ỹoqta 'eesa lataxac. Qaq nam shiỹaxauapi maye sa ỹa'amaqten Ñim Lo'onatac 'Enauacna, namayepi saishet da ỹaconeguet camaye, cha'aye saishet da ila'a, qataq saishet da ỹauatton. Qami' qalaxaye qauauattoñi, cha'aye qami' hueta'agueta, qataq camaye nache 'eetai' da qami' netaiguilo. 18 Aỹem saishet da qami' sala't; Aỹem ñe'eguelaq qome da yaqto' qami' soota'agueta. 19 Qaq mashe yaqta'a da ivita ye laloqo' da na shiỹaxauapi saishet da Aỹem ila'a, qalaxaye qami' qalaq Aỹem qauloita'a. Cha'aye Aỹem na'aictaxa da seleu, qalaxaye qaltaq ñeca'alec, nache qami' so'oteque da nataqa'en qanca'alliiuec. 20 Nache que'eca na'a'q qami' qauaỹachiñi da Ñim Ita'a qataq Aỹem 'oonolec da qarataxac. Qataq nataqa'en qami' qataq Aỹem 'oonolec da qarataxac. 21 Qaq ca ỹaỹateeteguet qataq ỹalaxaguet na ỹamaxasoxonaxacpi, camaye yo'oq da ỹataqta 'eesa da Aỹem ỹauotec. Qaq cam Aỹem ỹauotec, nache Ñim Ita'a nataqa'en ỹauotec camaye. Qaq Aỹem nataqa'en ỹataqta sauotec camaye, qataq ỹataqta ñachaxana. 22 Qaq som Judas maye le'enaqteua so Iscariote 'enapeco': –'Am Qarataxala', ¿ta'ainco' da nacheqomaqta da qomi' 'anachaxanalo, qaq saishet da nataqa'en 'anachaxana nam laỹepi shiỹaxauapi? 23 Nache So Jesús 'enapeco': –Ca Aỹem ỹauotec, camaye nataqa'en ỹalaxaguet cam shenapec, nache Ñim Lo'onatac 'Enauacna maye Ita'a ỹauotec camaye. Nache Ñimaye qataq Aỹem ñanaguenaq da souaqta'aguet camaye. 24 Qaq cam saishet da Aỹem ỹauotec, camaye nataqa'en saishet da Aỹem ỹalaxaguet. Qaq de'era ỹa'aqtaxanaxac maye qana'axaỹaxañeetega, damaye saishet da ỹalamaxat; damaye chegoqo'ot Ñim Ita'a maye Aỹem namaq. 25 Qaq qami' sa'axatema 'enauac de'era, nagui da ñaq qami' soota'agueta. 26 Qalaxaye ca Saqcha'a Na'añaxac Qui'itta maye Ñim Ita'a qami' namaxalo nactaigui naqa'en da ỹe'enaxat da yaqto' qami' itaua'n qataq qami' ỹa'añaqche't, camaye qami' ỹapaxagueneque 'enauac na lataxaguesat qataq qami' iuennataxanaxaneque 'enauac na ỹa'aqtacpi maye qami' sa'aqtaxaateguema nagui. 27 Qami' sanema da nlagaxayec, qalaxaye saishet da nachera da nlagaxayec maye huetalec ana 'alhua. Cha'aye dam qami' sanema, nachera da maiche ỹalamaxat ilagaxayec. Saishet qome da leuapigui ye qarvilli, huo'otaq da qayi'i, souaxat de'era maye yaqta'a da qaviyeeguet. 28 Qami' mashe qaua'aqaichigui naxa Aỹem da sheeta', ashec, qalaxaye ỹoltaq qami' ñe'eguelaxalo. Qaq da ỹoqta 'eesa da Aỹem qauauochec, nache iuen da qantoñiitapeguec de'era, cha'aye Aỹem she'eguelaxa ca hueta'a Ñim Ita'a, qaq Ñimaye ỹactec da la'amaqchec saishet da sheeta'am. 29 Qaq Aỹem nagui qami' sa'axatema de'era, yaqto' qom ivita da ipacchigui, nache ishet da Aỹem qaua'amaqchiñi. 30 Qaq nagui saishet da qaltaq huo'o ca sa'axat, cha'aye mashe nayeetai' nam pa'aguenataxanaxaic maye damaxasoxonapec ana 'alhua. Qalaxaye namaye qaica ca la'añaxac da ishet da Aỹem ỹachiguiñi. 31 Qalaxaye, iuen da salaxaguet Ñim Ita'a yaqto' 'enauac da qaỹaỹaten da ỹataqta sauotec Ñimaye. Nache huaña, nache So Jesús, 'enapeco': –Qoñiisheguem. Qolqa'ai ne'ena.

15

Aca nañiguishe uva qataq ana lcouepi

1 So Jesús queto'ot da da'aqtaxaatapeguema soua lapaxaguenataqa 'eeta': Aỹem Nachaỹem maye sheeta'am aca 'eesa nañiguishe uva, qaq Ñim Ita'a, qalaq Ñimaye 'eeta'am cam ilotague' aca'aca nañiguishe. 2 Qaq da huo'o aca 'oonole ana icouepi da saishet da huo'o ana ala, nache Ñi Ita'a iquesoxouec; qalaxaye nqat ana llaxataxa ana lcouepi maye huo'o ana ala, da yaqto' nquictec da alaỹaxac. 3 Qaq qami' sogote da qami' qui'itte', souaxat naua ỹapaxaguenataxanaxaco maye qami' sanema. 4 Qaq qami' da qoquiito'ot da Aỹem qana'ayeetaua'a, nache Aỹem nataqa'en shecto'ot da qami' ña'atta'agueta. Cha'aye acam lcoue, saishet da maiche huo'o ana ala da saishet da ỹoqta na'attaua'a acam lamo. Qaq nache 'eetec nataqa'en da saishet da maiche huo'o ca alaỹaxac da qoñiita, da huo'otaq saishet da Aỹem qana'ayeetaua'a. 5 Qaq Aỹem maye sheeta'am aca 'eesa nañiguishe, qaq qami' nacheqami' icoue. Qaq cam nache 'eetai' da Aỹem na'attaua'a qataq ña'atta'ai', nache camaye ỹataqta qalota da alaỹaxac, cha'aye saishet da huo'o ca 'eneque qami' da huo'otaq saishet da Aỹem qana'ayeetaua'a. 6 Qaq cam saishet da Aỹem na'attaua'a, nache camaye 'eeta'am aca lcoue da saishet da huo'o aca ala, nache qaicheguec qataq qaỹasaxauec, qaq da deqaqa, nache qaỹavigaxat. 7 Qaq qami' da nache 'eetai' da Aỹem qana'ayeetaua'a, qaltaq qaualaqaiguet 'enauac nam qami' sapaxagueneque, nache Ñim Ita'a qami' ỹanema 'enauac cam qauỹaxañiỹaique. 8 Ñim Ita'a huo'o da ntonaxac da huo'otaq ỹataqta qalota da alaỹaxac da qoñiita, qaltaq qanachacheetaigui da ỹataqta qami' ỹapaxaguenataqa. 9 Qaq da 'eetec Ñim Ita'a da ỹataqta Aỹem ỹauotec, qaq nache sheetec nataqa'en da ỹataqta qami' sauoteque. Qaq qami' qome ỹataqta qoquiitegue da 'eetec de'era ỹauotaxanaqtaic. 10 Qataq da qaualaqaiguet 'enauac na ỹamaxasoxonaxacpi; nache, Aỹem nache 'eetai' da qami' sauoteque, 'eeta'am Ñim Ita'a da Aỹem ỹauotec, cha'aye Aỹem ỹataqta salaxaguet. 11 Qami' sa'aqtaxanema de'era, yaqto' qami' ỹataqta qauamaichiguiñi, qoñiita'am Aỹem. 12 Qaq dam ỹamaxasoxonaxac maye qami' sanema 'eeta': Ñi 'oonolec da qoñiita ỹataqta ỹauotec ca lỹa, 'eeta'am da 'eetec da ỹataqta qami' sauoteque. 13 Qaica ca napacalec da lauotaxanaqtaic cam ỹan da nachaalataxac da ỹaalec na nauochaxauapi. 14 Qaq qami' nacheqami' ñauochaxau', da qauo'oche dam qami' samaxaleguete. 15 Nagui saishet da qami' samata'aque da qami' nlataqa, cha'aye ca choche nlatac saishet da ỹaỹaten cam ỹo'ot ca na'aco'. Qaq nagui qami' samata'aque da qami' ñauochaxau', cha'aye qami' sa'aqtaxaatema 'enauac nam la'aqtacpi Ñim Ita'a maye Aỹem ỹami'. 16 Qami' saishet co'ollaxa da Aỹem qarca'aguishiqui, Aỹem maye qami' ica'agui'she. Nache qami' shenapegalo da yaqto' ỹataqta qalota da alaỹaxac da qanachaalataxaqui, qaq de'era alaỹaxac da qanachaalataxaqui, damaye nache 'eetai'. Yaqto' Ñim Ita'a qami' ỹanema 'enauac nam qauỹaxañiỹaique da qoviilec da ỹe'enaxat. 17 Qaq 'era da qami' samaxaleguete, 'eeta': Ñi 'oonolec da qoñiita ỹataqta ỹauotec ca lỹa.

Nam shiỹaxauapi nquiỹa So Jesús

18 Nam shiỹaxauapi maye imatalec da lqopitaxanaqtaic na huetalec ana 'alhua, da qami' nquiỹalo, nache qauaỹaañi da Aỹem maye Aỹem nquiỹatega. 19 Na shiỹaxauapi qami' ỹauoteque da qoñiita'am namayepi da lataxac. Qalaxaye qami' saishet da qoñiita'am namayepi, cha'aye qami' lleca'aua'alo da yaqto' saishet da qoñiita'am da lataxac namayepi, ỹoqo'oye ỹataqta saishet da qami' iuote'n. 20 Qaq qauennachiỹa'a da ỹa'aqtac maye qami' sanema quiye da sheeta': «Qaica ca nlatac da huo'otaq ishet da napacalec ca na'aco'.» Qaq da huo'otaq Aỹem qaicaatac, qaq nataqa'en da qoñiita huo'o da qancanaguiiqui. Qaq da ỹataqta ỹalaxalec da ỹapaxaguenataxanaxac na shiỹaxauapi, qaq nataqa'en ỹataqta ỹalaxaguet da qarapaxaguenataxanaxaqui. 21 Qaq 'enauac qome ne'ena qami' qaỹo'oteque souaxat da qami' ỹapaxaguenataqa, cha'aye na shiỹaxauapi saishet da ỹauatton Ñim Lo'onatac 'Enauacna maye Aỹem namaq. 22 Na shiỹaxauapi saishettaxa da huo'o ca lasouaxashet, da huo'otaq sa ñanac da setaxaỹot. Qalaxaye namayepi nagui saishet da iqoleguet da huo'o da lasouaxashet, 23 cha'aye ca Aỹem nquiỹa, camaye nataqa'en nquiỹa Ñim Ita'a. 24 Qataq namayepi saishettaxa da huo'o ca lasouaxashet, da saishet da huangui ñaqa'en namayepi da so'ot nam saishet da huo'o ca ỹañoxot da ỹo'ot; qaq namayepi sogote da ỹauaachigui ne'ena so'otpi, qalaxaye ñaqaiyeta Aỹem nquiỹa, qataq Ñim Ita'a. 25 Qalaxaye damaye iuen da yo'oq, da yaqto' ipacchigui dam nanettalec ana nere maye huetalec na la'aqtacpi Ñim Lo'onatac 'Enauacna maye 'eeta': «Aỹem nquiỹa namayepi, qamaq qaica ca sasouaxat.» 26 Qalaxaye qom ivita da anac cam qami' itaua'n qataq qami' ỹa'añaqche't, Cam Saqcha'a Na'añaxac maye ỹoqta 'eesa, cam qami' ñamaxalo maye chegoqo'ot Ñim Ita'a, camaye qome Aỹem ỹa'axat. 27 Qataq qami' nataqa'en Aỹem qaua'axache, cha'aye nache 'eetai' da Aỹem qoviita'aguet co'ollaq cheta'ague da so'onataxan.

16

1 Qaq qami' sa'axatema nagui de'era, yaqto' saishet da qaỹa'axañiiuec da qarpi'iỹaxaqui Aỹem. 2 Qami' qaỹamaqraue'c qome da huaigui ana napaxaguenaxaquipi na judiopi, qataq ivira'a qome ca na'a'q da huo'o ca qami' ỹalaua't, nache camaye ipi'itaxaatega da ỹo'ottac dam 'eetapeguec Ñim Lo'onatac 'Enauacna. 3 Qaq ỹo'ot qome de'era namayepi, cha'aye saishet da ỹauatton Ñim Ita'a, nataqa'en Aỹem. 4 Qaq nagui qami' sa'axatema de'era, yaqto' qom ivita ca laloqo', nache qami' ishet da qauennache da mashe sogote da qami' sa'aqtaxaateguema de'era.

Da lo'onataxanaxac som Saqcha'a Na'añaxac Qui'itta

Saishet da qami' sa'axatema de'era co'ollaq cheta'ague da so'onataxan, cha'aye Aỹem ñaq qami' soota'agueta. 5 Qalaxaye nagui Aỹem she'eguelaq da yaqto' soota'aguet Ñim Aỹem namaq; qaq saishet da huo'o ca 'oonolec da qoñiita da Aỹem inattac da chaq hua'ague ca saigue. 6 Nachaqrata da qami' qauaquicoita, souaxat da qami' sa'aqtaxaateguema de'era. 7 Qalaxaye ỹataqta 'eesa de'era qami' sa'axatema, maye 'eeta': Aỹem ỹaỹamaqchiguiñi da ashec souaxat da qoñiita. Cha'aye da saishet da ashec, nache ca Saqcha'a Na'añaxac maye qami' itaua'n qataq qami' ỹa'añaqche't saishet da anac. Qalaxaye da Aỹem ashec, nache ñamaq Camaye. 8 -11 Qaq qom ivita da anac Camaye, nache ỹaỹaanaxanaxanec nam shiỹaxauapi maye huetalec ana 'alhua da ca sa ỹa'amaqten Aỹem, nache huo'o da lasouaxashet. Qataq nataqa'en ỹa'axat da Aỹem qaica ca so'ot qauem, qataq qaica ca ỹasouaxashet. Qaq da pa'atec, Camaye ỹachaxan da Ñim Lo'onatac 'Enauacna mashe nmit som ilotague' ana 'alhua, qataq ỹauo'o da nhuaxanaguec. Aỹem qalaxaye she'eguelaxa ca hueta'a Ñim Ita'a, nache qami' qome saishet da Aỹem qauloỹa'a. 12 Qaq Aỹem qalota na ỹa'aqtacpi da qami' sa'axatema, qalaxaye saishet da qauaỹaañi nagui. 13 Qalaxaye qom anac cam Saqcha'a Na'añaxac Qui'itta maye ỹoqta 'eesa, nache Camaye qami' ỹapaxagueneque 'enauac nam lataxaguesat maye 'eesa; cha'aye Camaye saishet da maiche nallegoxottela't ca la'aqtaxanaxac, nachaqrata da ỹa'axat 'enauac nam hua'aqchigui, qataq qami' ỹaỹaanaxanaxaneque cam ñaq naỹa'acna. 14 Nataqa'en qami' ỹaỹaanaxanaxaneque 'enauac da sheeta, cha'aye Aỹem ỹo'oxoreetac. 15 Cha'aye 'enauac nam lalamaxatpi Ñim Ita'a, namayepi nataqa'en ỹalamaxatpi. Qaq ỹoqo'oye Aỹem shenapec da que'eca Saqcha'a Na'añaxac Camaye qami' ỹaỹaanaxanaxaneque 'enauac da sheeta. 16 Qaq mashe yaqta'a da qami' saishet da Aỹem qauloỹa'a. Qalaxaye saqaỹaloq da qaltaq Aỹem qauloỹa'a.

Da naquicoxo nmeneguet da tonaxac

17 Nache soua lapaxaguenataqa huo'oi soua maiche nnattega't, 'eetra': –¿Chaq negue't ca naigui de'era? Da 'eetega da saqaỹaloq da sa selaqa'a, qalaxaye nataqa'en saqaỹaloq da qaltaq selaqa'a. Qataq 'eetega da 'enauac de'era qome ipacchigui, cha'aye souaxat da taigue da neta'ague Ñim Lo'onatac 'Enauacna maye Lta'a. 18 Qataq ¿negue't ca naigui de'era 'enapec maye 'eeta': «mashe saqaỹaloq»? Qomi' saishet da saỹaanaq dam ỹa'axattac. 19 Nache So Jesús noma da soua lapaxaguenataqa huotraique da ina't Somaye, qaq ỹoqo'oye 'enapegalo, 'eeta': –¿Qanchemaxacheetague' cam naigui som ỹa'aqtac? 20 Ỹataqta 'eesa de'era qami' sa'axatema nagui, da qami' qome ỹataqta qauaquicoita qataq qanỹiñiitac; qalaxaye na shiỹaxauapi maye ndota't da iuennatega na lataxacpi maye huetalec ana 'alhua, namayepi ỹataqta machiguiñi. Qalaxaye na'aictaxa da qami' ỹataqta qauaquicoita, qalaxaye de'era qaraquicoqoi, damaye nmeneguet qome ca qantonaxaqui. 21 Aca 'alo da deco'otac, qalaq ỹataqta dachetata qataq lta'araic da nqui'ic. Qalaxaye da mashe ñiguiñi ca llalec, nache acamaye icoua'ai so nqui'ic, nache ndota't da ntonaxac, cha'aye nviraxata ca nogotolec ana 'alhua. 22 Qaq nache 'eetec nataqa'en da qoñiita nagui huo'o da qarachetataiqui, qalaxaye Aỹem qami' ñe'eguelaxalo qome, nache da qarquiyaqteỹaxaqui ỹataqta nlaqchigui da qantonaxaqui, qaq que'eca qantonaxaqui saishet da huo'o ca nqat. 23 Qaq que'eca na'a'q qome, nache saishet da huo'o ca Aỹem inattac da qoñiita. Qaq ỹataqta 'eesa de'era qami' sa'axatema, da Ñim Ita'a qami' ỹanema 'enauac ca qauỹaxañiỹaique, souaxat da qami' ỹapaxaguenataqa. 24 Qaq choche ivitta'a nagui da qami' saxanaxa da huo'o ca qauỹaxañiỹaique da qoviilec da ỹe'enaxat. Qaq qauỹaxañi qome, nache qauacoñiiguet ca qauỹaxañiỹaique, yaqto' ỹataqta qami' nlaqchiguilo da qantonaxaqui.

So Jesucristo loxonec na 'onataxac ana 'alhua

25 Qaq qami' sa'axatema 'enauac ne'ena, qalaxaye sauota'alo naua ỹaloqnaxanaqa'ate. Qalaxaye nayeetai' ca laloqo' da saishet qome da sauota'aisalo naua ỹaloqnaxanaqa'ate, nachaqrata da ỹataqta qami' sa'axattema Ñim Ita'a. 26 Cha'aye mashe ime da sa iuen da qami' ñachoxoreetapegueleguete da seỹaxanot Ñim Ita'a, nachaqrata da maiche qami' qauỹaxañiỹot Ñimaye, cha'aye qami' ỹapaxaguenataqa. 27 Ñimaye qami' ỹauoteque, souaxat da Aỹem qauauochec, qataq qaua'amaqchiñi Ñim Ita'a maye Aỹem namaq. 28 Aỹem sachegoqtot co'ollaxa Ñim Ita'a da ñanaỹa ana 'alhua, qaq nagui qalaq Aỹem sheca'ai ana 'alhua da she'eguelaxa Ñimaye. 29 Nache soua lapaxaguenataqa 'ena'apo': –Nagui maye ỹataqta ỹataqteguelo naua 'ara'aqtaqa, qataq saishet da 'auauota'a ca 'araloqnaxanaxat. 30 Qaq nagui mashe saỹaanaq da 'am 'auaỹaten 'enauac na lataxaguesat, qaq saishet da 'auen da huo'o ca 'am inat. Qaq ỹoqo'oye sa'amaqtenaq da 'am 'auachegoqtot Ñim Lo'onatac 'Enauacna. 31 Nache So Jesús 'enapeco': –Qaq ¿'eesa peta'a da qami' qaua'amqaanataxañi nagui? 32 Qalaxaye nagui mashe nayeeta'a da ivita ye laloqo' da qami' qauataiuec, ñi 'oonolec maiche ỹoiqueetac ca dataigue, nache Aỹem qaualachiỹa'a't qome. Qalaxaye Aỹem saishet da Aỹem 'oonolec, cha'aye Ñim Lo'onatac 'Enauacna maye Ita'a Aỹem hueta'aguet. 33 Qaq Aỹem qami' sa'axatema 'enauac de'era, yaqto' huo'o da qarlagaxayiqui da Aỹem qana'ayeetaua'a. Qami' ana 'alhua maye qoviitalec huo'o da qanque'eenaxaqui. Qalaxaye qana'añaxache qome, cha'aye Aỹem mashe sogote da ỹoxonec nam 'onataxacpi maye huetalec ana 'alhua.

17

So Jesús nqouagaxaueeleguete soua lapaxaguenataqa

1 Qaq co'ollaq ime da 'eetegalo soua lapaxaguenataqa So Jesús, nache ỹamato'ot na piguem, nache 'enapeco': –'Am Ita'a, mashe ivita ye laloqo' da 'auachaxana na shiỹaxauapi da ỹa'amaqchec qataq da ỹa'añaxac. Qaq nache sheetec nataqa'en Aỹem da sachaxana na shiỹaxauapi da 'ara'amaqchec qataq da 'ayo'oxoyec. 2 Cha'aye Aỹem 'aỹa'anem co'ollaxa da 'ara'añaxac da yaqto' ñataỹaña 'enauac na huetalec ana 'alhua. Qataq nataqa'en Aỹem 'aỹa'anem da ỹa'añaxac da yaqto' sanem da lca'alaxa maye chochaq tatec 'enauac nam Aỹem 'aỹa'anem da Aỹem ca'ategue. 3 Qaq de'era achaalataxac maye chochaq tatec, damaye nachera da naigui da 'am qaỹauatton, 'am maye 'Aro'onatac 'Enauacna, maye nache'amta qataq 'am 'eesa, qataq nam 'Arca'aguishec maye 'anamaxa ana 'alhua co'ollaxa. 4 Qaq Aỹem ỹataqta 'am sho'oxoreetac nagui da soota'a ana 'alhua, cha'aye ỹataqta sematta da Aỹem 'auamaxalec da so'ot. 5 Qaq nagui, 'am Ita'a, ñeshetaique da sootaua'a na 'araỹe, da Aỹem 'aỹa'anem da ỹo'oxoyec maye saatañi co'ollaq 'am sooto'ot co'ollaq saxanaqaca ana 'alhua. 6 Qaq naua 'arca'agui'she maye 'auachegoxottoigui co'ollaxa nam huetalec ana 'alhua da yaqto' Aỹem 'aỹa'anem, naamaye sogote da sa'axattema da qoneta. Naamaye 'aralamqa'ate, qalaxaye Aỹem 'aỹa'anema, qaq naamaye ỹataqta ỹalaxareguet da 'ara'aqtac. 7 Qataq naamaye nagui ỹaỹateeta da 'enauac nam Aỹem 'aỹa'anem 'am chegoqtot, 8 cha'aye mashe sanema dam 'ara'aqtac maye Aỹem 'aỹa'anem. Qaq naamaye ỹaconegueta, qataq ỹaỹateeta da ỹoqta 'eesa da 'am sachegoqtot, qataq ỹa'amaqte'n da Aỹem 'aramaxashec. 9 Qaq Aỹem 'am ñachoxonnot, souaxat naamaye. Qaq saishet da ñachoxoreetapeguelec nam huetalec ana 'alhua, nachaqnauate' naua Aỹem 'aỹa'anema, cha'aye 'aralamqa'ate. 10 Cha'aye 'enauac nam ỹalamaxatpi, namayepi 'aralamaxatpi, qaq nam 'aralamaxatpi, namayepi nataqa'en ỹalamaxatpi. Nache 'enauac de'era ỹachaxan da ỹa'amaqchec qataq da ỹa'añaxac. 11 Qaq Aỹem mashe yaqta'a da saishet da soota'a ana 'alhua, cha'aye Aỹem saỹa cam qoueta'a. Qalaxaye naamaye ñaq huetralec ana 'alhua. Qaq ỹoqo'oye 'am seỹaxanot da 'antela'alo, qataq 'anema da 'ara'añaxac dam Aỹem 'aỹa'anem co'ollaxa, da yaqto' naamaye nache 'eetai' da na'atta'a't, 'eeta'am da 'eetec 'Am qataq Aỹem. 12 Nagui da ñaq soota'agueta naamaye ana 'alhua, qalaq Aỹem so'ogoxona da 'ara'añaxac da ñetela'alo qataq da ñepaxattaleguete. Qaq saishet da huo'o ca deqat naamaye, nachaqsota so Judas maye lca'ateua'a so nqa'aic maye ỹauega da deqat, nache ipacchigui dam 'enapec naua nanettaleguete ana 'ara'aqtac lmalate. 13 Qaq nagui ñeqo'ona cam qoueta'a. Qalaxaye shenapec de'era nagui da ñaq sootalec ana 'alhua, yaqto' naamaye ỹataqta nlaqchiguilo da ntonaxa'c, 'eeta'am Aỹem. 14 Qaq Aỹem sanema naamaye da 'ara'aqtac, qaq ỹoqo'oye nam huetalec ana 'alhua ỹataqta nquiỹalo, cha'aye naamaye mashe saishet da 'eeta'am da lataxac na shiỹaxauapi ana 'alhua, 'eeta'am da 'eetec Aỹem da saishet da sheeta'am namayepi. 15 Qaq Aỹem saishet da 'am seỹaxaatacot da yaqto' 'anqateeguesop naamaye ana 'alhua, nachaqrata da 'anpaxattaleguete qataq saishet da 'auasheneguet so pa'aguenataxanaxaic. 16 Qaq de'era 'eetec da Aỹem saishet da ima' ana 'alhua, qaq nachera da 'eetec naamaye da saishet da lma' ana 'alhua. 17 Qaq 'auỹotaugalo qome naamaye, 'auachegoxotchigui dam 'eesa lataxac; dam 'ara'aqtac maye ỹataqta 'eesa. 18 Qaq de'era 'eetec da Aỹem 'anamaxa na huetalec ana 'alhua, qaq nachera da sheetec nataqa'en da Aỹem samaxa naamaye nam huetalec ana 'alhua. 19 Qataq souaxat naamaye, nache Aỹem ỹataqta 'am ñañanot yaqto' naamaye nataqa'e'n ishet da 'am nañaarot, chegoqchigui dam 'eesa lataxac. 20 Qaq saishet da nachaqnauate' naamaye da ñachoxoreetapegueleguete, nataqa'en cam Aỹem ỹa'amaqtenpi qome, qom hua'axaỹa ca la'aqtaxanaxa'c naamaye. 21 Qataq 'am seỹaxanot, 'am Ita'a, da yaqto' naamaye ỹataqta na'atta'a't, 'eeta'am da 'eetec 'am qataq Aỹem da ña'araqta'a't, nataqa'en naamaye qomi' na'attaua'alo. Yaqto' nam shiỹaxauapi maye huetalec ana 'alhua ỹa'amaqten da Aỹem 'aramaxashec. 22 -23 Qataq Aỹem sanema naamaye dam na'añaxac maye Aỹem 'aỹa'anem co'ollaxa, yaqto' naamaye nache queto'ot da na'atta'a't. Qaq ỹoqo'oye naamaye iue'n da nache 'eetai' da Aỹem na'attaua'alo, 'eeta'am da 'eetec da 'am ña'attaua'a. Yaqto' de'era lataxac da na'atta'a't naamaye ỹataqta nalochiguiñi, yaqto' nam shiỹaxauapi maye huetalec ana 'alhua ỹaỹaten da Aỹem 'aramaxashec qataq ỹataqta 'auauoteque naamaye 'eeta'am da 'eetec da Aỹem 'auauotec. 24 'Am Ita'a, naua Aỹem ca'attegueto naamaye Aỹem 'aỹa'anema, qaq ỹoqo'oye ñeshetaique da naamaye Aỹem hueta'agueta cam soota'a, yaqto' ỹauaachigui cam na'añaxac maye Aỹem 'aỹa'anem. Cha'aye nale'ena co'ollaxa da ỹataqta Aỹem 'auauotec co'ollaq saxanaqaca ana 'alhua. 25 'Am Ita'a, 'am ỹataqta no'on da 'arataxac, qalaxaye nam huetalec ana 'alhua saishet da ỹauatto'n naua ỹaỹamaqchiyiñi 'auo'o't. Aỹem qalaxaye 'am sauatton, qaq naua Aỹem 'anema mashe sogote da ỹaỹate'n da Aỹem 'aramaxashec. 26 Aỹem mashe saỹaanaxanaxaneque naamaye da qoneta, qalaxaye ñaqaiyeta Aỹem ñaq shecto'ot da 'am sa'axattac, yaqto' naamaye nache queto'oto da Aỹem na'attaua'alo qataq ỹauotec na laỹepi, 'eeta'am 'am qataq Aỹem da ỹataqta ñauotaxa't.

18

So Jesús qaỹaconeua'a da qaicoñe'

1 Qaq co'ollaq ime da natamnaxac So Jesús, nache jec, nnaicapegueto soua lapaxaguenataqa da nqo'ootra so nañiguishe lma' maye na'atague da le'ego so la'auaxac le'enaxat Cedrón. 2 -5 Qaq so Judas Iscariote maye ỹauotaique da ỹaneuo So Jesús. Somaye nataqa'en ỹauana se'eso nanataqa' maye hueta'a So Jesús qataq soua lapaxaguenataqa. Cha'aye mashe qalota naxa da So Jesús hueta'a yemaye. Qaq ivireua'a yemaye co'ollaxa so Judas nnaictague' so huataxanaqpi Roma le'ecpi. Nataqa'en huo'oi soua nnaictagueto huataxanaq lashe' maye ilotegueto aso no'onaxanaxaqui late'erai maye lamaxa'she soua lataxala'ate na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som fariseopi. Qaq somayepi ỹataqta na'atchiguiñi na lo'ogoxonaxatpi qataq ỹachetac ana lcoỹaraxanaqtepi. –Qaq So Jesús mashe ỹaỹateeta'a de'era, ỹoqo'oye co'ollaq ila'aguet somayepi, nache ca'ata'aguet da inat 'eeta': –¿Negue't ca qanmichiitaique? –Nache somayepi 'enapeco': –Ñimitaqtaique ca Jesús maye Nazaret le'ec. Nache So Jesús 'enapeco': –«Nachaỹem.» 6 Nache huañi so huataxanaqpi qataq soua lỹa't huataxanaq lashe' maye ilotegueto aso no'onaxanaxaqui late'erai. 7 Nache So Jesús qaltaq ỹe'eguelaxalec da denataxan, 'eeta': –¿Negue't ca qanmichiitaique? Nache somayepi 'enapeco': –Qomye ñimitaqtaique ca Jesús maye Nazaret le'ec. 8 Nache So Jesús 'enapeco': –Mashe qami' sheetegalo mque' da Nachaỹem. Da ỹoqta 'eesa da Aỹem qanmichiitaique, qaq no'on da qauaqaita'a ne'ena ỹaỹepi da jec. 9 Qaq de'era 'enapec, damaye ipacchigui dam maiche la'aqtac So Jesús co'ollaq 'eeta': «Nam Aỹem ỹanempi Ñim Ita'a, namayepi qaica ca deqat.» 10 Nache so Simón Pedro, maye huo'o so lainec, somaye nqatsheguem, nache iquesoxouec ana aloiguishe ltela som 'oonolec maye le'enaxat Malco. Somaye nache lamaxashec som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. 11 Qalaxaye So Jesús 'enapego' so Pedro, 'eeta': –'Avi'eguelaxaañi na 'ainec, 'anshiiñi. Ñim Ita'a da Aỹem ipagaqaana'aguet da ñeque'eenaxac maye 'eeta'am da qanỹomigui ca deshenataxan, qaq ¿peta'a saisheto' da saigui damaxa?

So Jesús qaỹataxanot so lataxala' na ntaxaỹaxanaxanecpi

12 Nache som alleppi maye Roma le'ecpi qataq som lta'a, qataq som huataxanaqpi maye nauaatalec naxa aso no'onaxanaxaqui late'erai, somayepi ỹaconeua'a So Jesús, nache icoñera't naua lhua'q. 13 Ime, nache hua'auchiguiñi da qaỹauegueua'a so lma' so Anás maye lacho' so Caifás, som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna se'eso vi'i. 14 Qaq se'eso Caifás nacheso' co'ollaxa so 'eetega na lataxala'pi na judiopi da ỹaỹamaqchiguiñi da 'oonolec ca ileualec na lauo' le'ecpi, qaq sa 'ena'am da 'enauac qailaxachigui na nhuo' le'ecpi.

So Pedro nqoleguettac, 'eetega da sa ỹauatton So Jesús

15 So Simón Pedro qataq so lỹa napaxaguenatac, soomaye ca'attraueegue So Jesús. Qaq se'eso lỹa napaxaguenatac, somaye nauattonaxaua som lataxala' na ntaxaỹaxanaxanecpi. Qaq ỹoqo'oye somaye nache lỹateuo So Jesús da pa'aua'a so nqasoxoc se'eso nataxala'. 16 Qaq som Pedro, qalaq pa'ataueegue da laỹe so lasom. Qaq ỹoqo'oye ishet da pa'auec se'eso napaxaguenatac maye maiche nauattonaxaua som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Nache somaye detaxaỹapegue' asom ilotague' so lasom, nache ipa'axaneuo so Pedro. 17 Nache asa'aso lasom lo'o inattaco' so Pedro, 'eeta': –¿Saishet peta'a da nache 'am 'oonolec nam lapaxaguenatacpi de'era ỹale? Nache so Pedro 'enapeco': –'A'i, saishet da nachaỹem. 18 Qaq cha'aye ỹataqta atom, nache som namaxashecpi qataq som huataxanaqpi maye nauaatalec aso no'onaxanaxaqui late'erai ỹo'ot so l-le', nache nachattañipi da ntootac. Qaq so Pedro nataqa'en ỹalectaigui somayepi, ntootac se'eso norec.

So lataxala' na ntaxaỹaxanaxanecpi inattac So Jesús

19 Nache som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, somaye ichemaxattega So Jesús, denataxaatapegueque soua lapaxaguenataqa, qataq chaq 'eetec ca lapaxaguenataxanaxac Somaye. 20 Nache So Jesús 'enapeco': –Aỹem ỹataqta ñachaxaata naxa 'enauac nam shiỹaxauapi da setaqtac, qataq saq ỹet da huaigui ana napaxaguenaxaquipi na judiopi da sapaxaguenataxaatac qataq añim no'onaxanaxaqui late'erai maye huaña naxa da lapona't 'enauac na judiopi. Qaq Aỹem saishet da huo'o ca ỹa'aqtac soxottañi. 21 Qaq ¿ta'ainco' da Aỹem 'aunattac? No'onctaxa da 'aunat nam shiỹaxauapi maye Aỹem na'axaỹaxaatega, yaqto' namayepi ishet da ỹa'axat cam ỹa'aqtaxanaxac maye sami' namayepi. Cha'aye namayepi ỹaỹateeta dam ỹa'aqtaxanaxac. 22 Nache So Jesús co'ollaq 'enapec de'era, nache som 'oonolec som huataxanaqpi maye ilotague' aso no'onaxanaxaqui late'erai maye ỹalectauo, somaye iuaxanoigui na lashec So Jesús. Nache 'eetega, 'eeta': –¿Nache qoneteco' de'era da 'aua'aqtaxanem ñim lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna? 23 Nache So Jesús 'enapeco': –Da huo'otaq sa ỹaỹamaxañi ca ỹa'aqtac, qaq no'on da 'aua'axat chaq hua'ague ca 'eetec ca sa ỹaỹamaxañi. Qalaxaye da huo'otaq ỹaỹamaqchiguiñi dam shenapec, qaq ¿ta'ainco' da Aỹem 'auaxan? 24 Nache so Anás ỹamaq So Jesús ỹaxatta'a't naqa'en naua lhua'q da ỹamaxa so Caifás som 'oonolec lataxala' nam ntaxaỹaxanaxanecpi.

So Pedro qaltaq ỹe'eguelaxalec da 'eetega sa ỹauatton So Jesús

25 Qaq so Pedro ñaq queto'ot da nachattañi, ntootapigui so norec. Nache qaltaq huo'o so inattac somaye, 'eeta': –¿Saishet peta'a da nache 'am 'oonolec nam lapaxaguenatacpi de'era ỹale? Nache so Pedro qataq nqoleguettac, 'eeta': –'A'i, saishet da nachaỹem. 26 Nache qaltaq denataxan som 'oonolec nam lamaxashecpi som lataxala' na ntaxaỹaxanaxanecpi, maye maiche lauo' le'ec so ỹale maye iquesoxouec co'ollaxa ana ltela so Pedro, 'eeta': –¿Saisheto' da nache 'am selota'a can huaña ye nañiguishe lma' da qoueta'aguet damaye? 27 Nache so Pedro qaltaq nqoleguettac. Huaña, nache nỹen so 'olgaxa.

So Jesús qaỹataxanot so nta'a Pilato

28 Nache qaỹauec So Jesús, qaỹachegoxotchiguiña so lma' so Caifás da qaỹauega so lma' so nta'a Pilato. Qaq mashe yaqta'a co'ollaxa da yo'oxoñi, qaq nam judiopi saishet co'ollaxa da pa'aua'a so nqasoxoc so nta'a, cha'aye ivittaique da nshepaxan da nachaalataxac. Cha'aye da nache 'eetec de'era, nache saishet da dequi'iỹapegueua'a na nallec se'eso na'a'q maye le'enaxat Lapascua. 29 Qaq ỹoqo'oye so nta'a Pilato npa'auec co'ollaxa, nache inattac somayepi, 'eeta': –¿Negue't cam qauasaqaitapeguelec da lasouaxashet de'era ỹale? 30 Nache somayepi 'enapeco': –Damaye da saishettaxa da qauemaic, nache saishet da 'am ñauegaxaua'a. 31 Nache so Pilato 'enapego' somayepi, 'eeta': –Damaye qauaviqui, nache qauroilec nam namaxasoxonaxacpi maye qami' qoỹanema co'ollaxa da maiche qanmichi. Nache somayepi 'enapeco': –Qalaxaye qomi' judío lashe' saishet da huo'o ca qana'aqtac, da yaqto' huo'o ca salauataq. 32 Huaña, nache ỹataqta ipacchigui da 'enapec So Jesús co'ollaq ỹa'axata'a da 'eetec qome da nalaataguec. 33 Nache so Pilato qaltaq ỹe'eguelaxaigui aso lo'onataxanaxaqui, nache iỹaxaneuga So Jesús, nache inattac, 'eeta': –¿Peta'a nache 'am Lta'a na judiopi? 34 Nache So Jesús 'enapeco': –¿'Am peta'a maiche 'andotelec de'era 'annataxanaxac, qalqo' huo'o ca 'am ỹa'axatem da sheeta? 35 Nache so Pilato 'enapeco': –¿Peta'a aỹemo' judío le'ec? Ye nam maiche 'arhuo' le'ecpi qataq nam lataxala'pi na ntaxaỹaxanaxanecpi, nachena na 'am nauegueua'a aỹem. Qaq ¿chaq negue'to' cam 'auo'ot sa ỹaỹamaxañi? 36 Nache So Jesús 'enapeco': –Da ỹo'onataxanaxac da Aỹem nta'a, damaye saishet da lma' ana 'alhua. Cha'aye da nache 'eetec taxa de'era, nache nam ca'attague'pi Aỹem sogotectaxa da deloqui, da yaqto' saishet da Aỹem qoỹaneua'a na judiopi. Qalaxaye da ỹo'onataxanaxac da Aỹem nta'a, damaye saishet da lma' ana 'alhua. 37 Nache so Pilato 'enapego' Somaye, 'eeta': –¿Qache ỹoqta 'eesa da 'am nta'a? Nache So Jesús 'enapeco': –Aja', Aỹem nta'a, nachera dam qonapec. Aỹem sañiguiñi da ñanaỹa ana 'alhua, da yaqto' sa'axat cam 'eesa. Qaq 'enauac nam ỹalaxalec dam 'eesa, namayepi na'axaỹaxana dam ỹa'aqtaxanaxac. 38 Nache so Pilato 'enapego' Somaye, 'eeta': –¿Chaq negue't cam 'eesa lataxac?

So Jesús qoỹaneguet da nalaataguec

Qaq co'ollaq imat da lnataxanaxac so Pilato, nache qaltaq pa'auec da da'aqtaxanem so judiopi, 'eeta': –Aỹem saishet da huo'o ca sanata lasouaxashet de'era ỹale. 39 Qalaxaye qami' huo'o naxa da maiche qarataxaqui da qansheetaique da sesouec ca ncoñeteguishec, souaxat da qoñiita da iviteuga ye na'a'q maye le'enaxat Lapascua. Qaq ¿qansheetaique peta'a da aỹem sesouec Ñim Lta'a na judiopi? 40 Nache 'enauac somayepi qaltaq ỹe'eguelaxalec da ỹa'alqagui, 'eeta': –¡'A'i, saishet da nachera de'era ỹale! ¡Nachaqcata ca Barrabás 'ausouec! Qaq se'eso Barrabás ỹataqta cachaxaic co'ollaxa.

19

1 Nache so Pilato damaxasoxoolec da qaỹaconeua'a So Jesús, nache qaiuaxan. 2 Nache som alleppi ỹanaxanaxaangui na lqaic So Jesús aso lo'onata ỹaxat, qataq ỹanaxanaxaanguilo soua anogo maye naueraleguete da ltogaxa. 3 Qaq co'ollaq ime, nache qanquigueua'a Somaye, nache qoỹeetega, qoỹeeta': –¡La', 'am maye 'am Lta'a na judiopi! Nache qaiuaxaatapigui na lashec. 4 Nache so Pilato qaltaq pa'auec, nache 'enapego' somayepi, 'eeta': –Ña qauloỹa, nagui damaye ñeqatec yaqto' ishet da qauaỹaañita da aỹem qaica ca sanata lasouaxashet damaye. 5 Nache qanpa'axanec So Jesús, netagui qanqoỹen na lqaic aso ỹaxat maye no'onata, qataq ỹaatrañi soua anogo maye naueraleguete na ltogaxa. Nache so Pilato 'enapego' somayepi, 'eeta': –¡'Era dam ỹale! 6 Qaq co'ollaq ila'a Somaye na lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq nam nauaatalec naxa añi no'onaxanaxaqui late'erai, nache ỹa'alqagui, 'eeta': –¡Qaiuaxaneuo qome damaye! ¡Qaiuaxaneuo qome damaye! Nache so Pilato 'enapego' somayepi, 'eeta': –Qauaviquiiuec qone' damaye, nache maiche qauaxañiiuo, cha'aye aỹem saishet da huo'o ca sanata lasouaxashet damaye. 7 Qalaxaye na judiopi 'enapeco': –Qomi' huo'o dam nqataxac maye qomi' qoỹanema co'ollaxa, qaq damaye 'enapec ye ishet da qaỹalauat ca 'ena'am de'era, cha'aye damaye 'eetega da Llalec Ñim Lo'onatac 'Enauacna. 8 Qaq co'ollaq hua'axaỹa de'era so Pilato, nache ỹataqta nquictec da lcolanaxa. 9 Nache qaltaq taigui aso lo'onataxanaxaqui, nache qaltaq inattac So Jesús, 'eeta': –¿Chaq hua'ague ca ỹoqta 'auachegoqta'ague? Qalaxaye So Jesús saishet da ỹasat. 10 Nache so Pilato 'enapego' Somaye, 'eeta': –¿Qalaq saishet da aỹem 'auasateguet? ¿Sa 'auaỹateno' peta'a da aỹem huo'o da shenec da samaxasoxoolec da 'am qaiuaxaneuo, qataq da seshet da 'am sesouec? 11 Nache So Jesús 'enapeco': –'Am qaica ca qonec da huo'otaq saishet da 'am ỹanem Ñim Lo'onatac 'Enauacna ca 'ara'añaxac, da yaqto' ishet da huo'o ca 'auo'otec Aỹem. Qaq ỹoqo'oye cam Aỹem ỹaneua'a 'am, camaye ỹataqta ỹactec da lta'araic da lasouaxashet, qaq saq 'ena'am da qoneta. 12 Huaña, nache so Pilato nmittaique ca lataxac, da yaqto' ishet da isouec So Jesús, qalaxaye na judiopi ỹataqta ỹa'alaqtagui, 'eeta': –¡Da 'am 'ausouec damaye, nache saishet qone' da 'anauochaxaua ñim lta'a na nta'alpi maye neta'ague da Roma! ¡Cha'aye camachaqca ca huotaique da maiche ỹoiqueetac ca ỹo'ot da 'eetega da nta'a, nache camaye npa'aguenaxaua ñim lta'a na nta'alpi! 13 Nache so Pilato co'ollaq hua'axaỹa de'era, nache damaxasoxoolec da qanqatec So Jesús. Nache somaye nso'ootaña som huaña da qanmit ca nasouaxashet, maye qaỹamata'ac da le'enaxat Gabata nam hebreo la'aqtaqa. Damaye naigui da ndotec na coma' ca napiaqa'. 14 Qaq se'eso na'a'q nacheso so pa'aiguet som na'a'q maye le'enaxat Lapascua. Qaq mashe na'a'q laiñi co'ollaq so Pilato 'eetega na judiopi, 'eeta': –¡'Era dam qarta'ai! 15 Qalaxaye somayepi ỹa'alaqtagui, 'eeta': –¡Qaỹalauat qome damaye! ¡Qaỹalauat qome damaye! Qataq ¡qaiuaxaneuo qome! Nache so Pilato 'enapeco': –¿Peta'a isheto' da aỹem seuaxaneuo dam qarta'ai? Qalaxaye som lataxala'pi na ntaxaỹaxanaxanecpi 'enapeco': –Qomi' qaica ca lỹa qarta'a, nachaqñita ñim lta'a na nta'alpi maye neta'ague da Roma. 16 Huaña, nache so Pilato ỹanoigui So Jesús somayepi da yaqto' iuaxaneuo. Nache somayepi ỹauec Somaye.

Da 'eetec co'ollaq qaiuaxaneuo So Jesús

17 Qaq co'ollaq ime, nache qanayecot So Jesús, maiche ỹachetac qanqa'en so npe'enaxaqui, da nqo'oneuga so 'alhua maye qaỹamata'ac da nqaic lpi'inec lma'. Qaq nam hebreo la'aqtaqa ỹamata'ac Gólgota. 18 Qaq huaña yemaye, nache qaiuaxaneuo So Jesús, nataqa'en soua dos ỹale't. So 'oonolec soomaye pa'ata'ague qanqa'en da aloic, qaq so lỹa pa'ata'ague da ne'emaq. 19 Nache so Pilato damaxasoxoolec da qoỹanagui na pa'asheguem so qo'oipaq so nerec maye 'eeta': «Jesús Nazaret le'ec, maye Lta'a na judiopi.» 20 Qaq ỹataqta qalota na judiopi na itaxaỹaxaatac se'eso nerec, cha'aye se'eso 'alhua maye huaña co'ollaq qaiuaxaneuo So Jesús, somaye saqaỹapeque so nỹecpi. Qaq se'eso nerec qoỹettrañi naua la'aqtaqa na hebreo qataq griego qataq na latín. 21 Qaq ỹoqo'oye na lataxala'pi na ltaxaỹaxanaxanecpi na judiopi 'eetego' so Pilato, 'eeta': –Saishet qome da 'iyiñi da ñimaye «Lta'a na judiopi.» Nachaqrata da 'iyiñi da «Ñimaye maiche 'eetega da lta'a na judiopi.» 22 Qalaxaye so Pilato 'enapego' somayepi, 'eeta': –Dam shiyiñi, damaye nache 'eetai' qome da nanettañi. 23 Qaq so huataxanaqpi co'ollaq imat da iuaxaneuo So Jesús, nache ỹaconalo soua alogo, nache icolaxatapiguilo cuatro naqa'en naua laỹel ime, nache naloguilo soomaye. Qataq ỹacona aso lapoto, qalaxaye asomaye ye ima'a't qaica ca ltetaxat, 24 nache soua huataxanaq lashe' 'ena'apo': –Saishet qome da secolaxataqa'ague anamaye. Nachaqrata da ñalletaxagui, yaqto' saỹaanaq chaq negue't ca talec. Huaña, nache ỹataqta ipacchiguilo da 'ena'ape naua nanettrañi la'aqtaqa Ñim Lo'onatac 'Enauacna maye 'eeta': «Qanaloguilo qome naua aỹogo, qanallichiguilo da yaqto' huo'o ca talec.» 25 Qaq se'eso npe'enaxaqui So Jesús, nache saqaỹapeque ca huetaua'a aso late'e, qataq aso lỹa María maye lhua so Cleofas asom lasoro So Jesús, qataq aso María maye lma' ye Magdala. 26 Nache So Jesús co'ollaq ila'a aso late'e da nachattañi, huaqta'ai' som lapaxaguenatac maye ỹataqta lauotaxat, nache 'enapego' aso late'e, 'eeta': –'Am 'alo, 'era qome da 'aỹa'alec. 27 Ime, qataq 'enapego' so lapaxaguenatac, 'eeta': –'Ara qome ara 'arate'e. Nache chegoqchiguiña se'eso na'a'q da se'eso lapaxaguenatac ỹauegueua'a so lma' aso María.

Da l-leuaxa So Jesús

28 Qaq So Jesús co'ollaq ỹaỹaten da mashe ipacchigui 'enauac nam ỹamaxalec Ñim Lo'onatac 'Enauacna. Qaq ỹoqo'oye da yaqto' ipacchiguilo naua nanettralec ana nere maye huetalec na la'aqtacpi Ñimaye, nache Somaye 'enapeco': –Huo'o na ỹaquip. 29 Qaq huo'o aso ỹomaxaqui nlaqchigui na lataxa 'euaxaic. Nache qaipet aso 'eeta'am ana auol, nache qoỹanagui aso coqta maye le'enaxat hisopo. Nache qoỹaasheguemec da yaqto' napigoxoi'. 30 Nache So Jesús nỹomgui se'eso lataxa 'euaxaic. Ime, nache 'enapeco': –Nagui mashe 'enauac ipacchigui. Huaña, nache naqchiguiñi na lqaic, nache ileu.

So ale ỹa'areua'a na laỹe So Jesús aso lataquiaxai

31 Qaq se'eso na'a'q, nache pa'aiguet so na'a'q maye huetoigui da qaiuennate so na'a'q le'enaxat Lapascua. Nache na lataxala'pi na judiopi sa ỹaỹamaxaren da nache netragui da lo'ocỹaxa'c soomaye soua npe'enaxaqui' se'eso na'a'q mataxaqui. Cha'aye se'eso na'a'q ỹataqta ỹactec da qairen. Qaq ỹoqo'oye qaiỹaxanot so Pilato da yaqto' damaxasoxoolec da qaỹacagaxa't naua lchel soua tres ỹale't maye qaiuaxaatrauo, da yaqto' saqaỹaloq da ileu', nache qaiỹalapegueto da qanqaayiñi da lo'ocỹaxa'c soomaye. 32 Nache soua ale't je'c, nache ỹacagaxa't naua lchel soua npe'enaxau' So Jesús. 33 Qalaxaye co'ollaq nqo'onalo So Jesús, nache ilora'a da mashe ileu, nache saishet da inoxo'n naua lchel. 34 Qalaxaye so 'oonolec soua ale't, somaye ỹa'areua'a na laỹe So Jesús aso lataquiaxai, nache anac so ltago'q qataq so 'etaxat. 35 Qaq som ỹa'axat de'era, somaye co'ollaxa ỹauaachigui qataq ỹataqta 'eesa de'era 'enapec. Cha'aye somaye ỹaỹateeta da ỹataqta 'eesa de'era la'aqtac, yaqto' qami' nataqa'en ishet da qaua'amqaanataxañi. 36 Cha'aye de'era qanayeuaigui, damaye yo'oq, yaqto' ishet da ipacchigui da 'enapec naua nanettralec ana nere maye huetalec na la'aqtacpi Ñim Lo'onatac 'Enauacna maye 'eeta': «Saishet qome da huo'o ca qainoxon naua lpi'ineqa.» 37 Qataq ye lỹa nanettañi, 'eeta': «Ỹauaachigui qome nam ỹa'arapec Somaye.»

So Jesús qailareñi

38 Qaq co'ollaq ime de'era, nache so José maye lma' ye Arimatea, somaye iỹaxanot so Pilato da yaqto' irouec so lo'ocỹaxac So Jesús. Qaq se'eso José, somaye quetague' So Jesús, qalaxaye saishet da ỹoqta nachaxaata, souaxat da ñe'etega na lataxala'pi na judiopi. Nache so Pilato ỹanem somaye dam iỹaxaneua'a, nache jec so José da irouec so lo'ocỹaxac So Jesús. 39 Qaq nataqa'en so Nicodemo, maye huo'o so pe co'ollaq naua'a da detaxaỹapegue' So Jesús, somaye nachetac so treinta kilos na qaỹalecna't qo'oipaq lcha'q, le'enaxat mirra qataq áloe. 40 Nache so José qataq so Nicodemo, soomaye iroue'c so lo'ocỹaxac So Jesús, nache ỹaxateguelo so laxataxat hualoq laỹe maye ỹataqta late'erai añi lasheue, ime nache qaỹa'amñigui se'esoua qaỹalecna't qo'oipaq lcha'q maye ama na laita, cha'aye damaye maiche lataxac na judiopi da ivita da ilayiñi na lqatacpi. 41 Qaq se'eso 'alhua maye huaña co'ollaq qaiuaxaneuo So Jesús, somaye huo'o so nañiguishe lma', qaq somaye nache naigui aso huachiqui dalaxai maye saxanaxa da huo'o ca qaỹachangui. 42 Qaq asomaye nache qaỹachangui So Jesús, cha'aye asa'aso huachiqui, asomaye saqaỹapeque, qataq souaxat da mashe yaqta'a da ivita da nnoxoneuo so nmataxaqui na judiopi.

20

Da 'eetec co'ollaq qaltaq nca'alec So Jesús

1 Qaq som la'auaxanec na'a'q naua na'axa'te, nache aso María maye lma' ye Magdala, asomaye tauga aso huachiqui co'ollaq nte'etom, co'ollaq ñaq napaltañi, qaq co'ollaq mashe saqaỹapeque aso huachiqui, nache asomaye ila'a da so coma' maye lapoxot asomaye da mashe qanqat. 2 Nache asomaye jec, nqalgoqtaua'a ca hueta'a so Simón Pedro qataq so lỹa napaxaguenatac som ỹataqta nauochaxaua So Jesús. Nache 'enapegalo', 'eeta': –So Qarataxala' qanqateeguesop co'ollaxa añi nhuachiqui, qaq qomi' saishet da saỹaanaq ca qaỹacha'ague camaye. 3 Nache so Pedro qataq so lỹa napaxaguenatac, soomaye je'c da nqo'ooreuga aso huachiqui. 4 Qaq soomaye nqalgoqte', nnaictega't, qalaxaye so 'oonolec sa ilaua'ague ana naloxo, napacalec so Pedro. Nache somaye hua'auñi da ivireuga aso huachiqui. 5 Nache somaye ỹamataigui asomaye da imeten. Nache ila'a so laxataxat da huetaiya', qalaxaye saishet da ỹoqta taigui. 6 Qaq co'ollaq mashe nvi' so Pedro, nache somaye ỹataqta taigui aso huachiqui. Nache somaye nataqa'en ila'a se'eso lpataxaqui Somaye da huetaiya'. 7 Qataq nataqa'en ila'a som hualoq laỹe maye qoỹaxattagui na lqaic So Jesús co'ollaxa. Qaq somaye saishet da huaqta'ai' se'eso lpataxaqui, cha'aye somaye qainaata'a't, qataq ỹaqa'a ye huetaña. 8 Nache se'eso lỹa napaxaguenatac maye hua'auchiguiñi co'ollaxa da ivita aso huachiqui, somaye nataqa'en taigui, nache ỹauaachigui 'enauac de'era, nache ỹataqta ỹa'amaqten. 9 Cha'aye soomaye saxanaxa da ỹaỹate'n ca llec naua nanettrañi la'aqtaqa Ñim Lo'onatac 'Enauacna, da So Jesús iuen da qaltaq nca'aleeguesop qanqa'en na leuaxaicpi. 10 Nache so Pedro qataq se'eso lỹa napaxaguenatac, soomaye ỹe'eguelaxareua'a ca lma't.

So Jesús nachaxana aso María maye lma' ye Magdala

11 Qalaxaye aso María no'onañi, pa'ataueegue da laỹe aso huachiqui. Qaq co'ollaq ña nỹeetac, nache nqollemñi da ỹamataigui aso huachiqui. 12 Nache ila'alo soua dos namaxa'she piguem lashe' lapagaxaiqa naua alogo, nso'ootraña som qaỹachaña co'ollaxa So Jesús. So 'oonolec soomaye nso'ootaña so na'axanaqa', qaq so lỹa neta'ague da nchennaqa'. 13 Nache se'esoua namaxa'she inatta'apo' asomaye, 'eeta': –'Am 'alo, ¿ta'ainco' ye 'anỹeetac? Nache asomaye 'enapeco': –Qomye souaxat da qaỹache so Ỹataxala', qaq aỹem sa saỹaten ca qaỹacha'ague ca lo'ocỹaxac. 14 Qaq co'ollaq choche 'enapec de'era, nache qaltaq namatasheguem. Nache ila'a So Jesús da nachattauo, qalaxaye saishet da ỹaỹaten da nacheso So Jesús. 15 Nache So Jesús inattac asomaye, 'eeta': –'Am 'alo, ¿ta'ainco' ye 'anỹeetac? Qataq ¿negue't ca 'anmittaique? Nache asomaye ipi'itaxaatega da somaye nacheso som ilotague' se'eso nañiguishe lma'. Nache 'eetego', 'eeta': –'Am ỹale, da huo'otaq nache 'am maye 'auache ca Ỹataxala', qaq no'on da aỹem 'aua'axatem cam 'auacha'ague yaqto' aỹem she'eguena'a camaye. 16 Nache So Jesús 'enapego' asomaye, 'eeta': –¡María! Nache asomaye ỹamato'ot, nache huota'ai naua la'aqtaqa na hebreo da 'enapega, 'eeta': –¡Raboni! (Damaye naigui da 'eeta': 'Am Napaxaguenataxanaq). 17 Nache So Jesús 'enapego' asomaye, 'eeta': –Aỹem 'axanec, cha'aye Aỹem saxanaxa da saigue da neta'ague Ñim Ita'a. Qalaxaye 'am qome qojec, nache 'aua'aqtaxanema caua ỹapaxaguenataqa da Aỹem saigue da neta'ague Ñimaye, Ñim nataqa'en Qarta'ai. Ñimaye Ỹataxala', qataq nataqa'en Qarataxala'ai. 18 Nache aso María maye lma' ye Magdala, asomaye jec da da'aqtaxanema soua napaxaguenataqa da asomaye nauane' som Qarataxala', qataq da Somaye da'aqtaxaatapeguem asomaye de'era.

So Jesús nachaxanalo soua lapaxaguenataqa

19 Qaq se'eso na'a'q maye la'auaxanec naua na'axa'te co'ollaq mashe pe, nache soua napaxaguenataqa, soomaye lapoota'a't hueta'a ca nỹec. Qaq so lasom se'eso nỹec ỹataqta napochigui, souaxat da qañe'etega na lataxala'pi na judiopi. Nache So Jesús pa'auo, nache vichiguinguilo na laiñi soua lapaxaguenataqa. Nache iqui'n, 'eeta': –Ñim Lo'onatac 'Enauacna qami' ỹanema da lqouagaxanaqtaic qataq da nlagaxayec. 20 Qaq co'ollaq ime da 'enapec de'era Somaye, nache ỹachaxa'n naua lhua'q qataq na laỹe. Nache soomaye ỹataqta huo'o da ntonaxa'c da iloro'ot So Qarataxala'. 21 Ime, nache So Jesús qaltaq ỹe'eguelaxalec da 'enapegalo soomaye, 'eeta': –Qami' huo'o da qarlagaxayiqui. Qaq de'era 'eetec co'ollaxa da Aỹem namaq Ñim Ita'a, qaq nachera qome da sheetec da qami' sama'q. 22 Nache Somaye iquetetoiguilo soomaye so la'at, nache 'enapegalo, 'eeta': –Qauacoñiiguet qome na Saqcha'a Na'añaxac Qui'itta. 23 Qaq cam qami' qauapalaxache na lasouaxashetpi, nache Ñim Lo'onatac 'Enauacna ỹapalaxat na lasouaxashetpi. Qaq cam saishet da qauapalaxache na lasouaxashetpi, nache Ñimaye saishet da ỹapalaxat na lasouaxashetpi.

So Tomás nauane' So Jesús

24 Qalaxaye so Tomás, som 'oonolec soua doce napaxaguenataqa maye qaỹamata'ac da huaya', somaye saishet co'ollaxa da ỹalectaiguilo soua lỹa't co'ollaq nauaneto So Jesús. 25 Qaq ỹoqo'oye co'ollaq nvireuo so Tomás, nache soua lỹa't napaxaguenataqa da'aqtaxaatapeguema somaye, 'eetra': –Qomi' ñauanaxai' So Qarataxala'. Qalaxaye so Tomás 'enapegalo' soomaye, 'eeta': –Saishet da sa'amaqten de'era aỹem qaua'aqtaxañiiteguem da huo'otaq saxanaxa da sela'alo caua lliguiyiñi ana clavo naua lhua'q camaye, qataq da ỹataqta sa'aroigui ana ỹaxaata, qataq da sepoteua'a ca lque'emaxa na laỹe. 26 Qaq co'ollaq mashe ivi' naua ocho na'axa'te, nache soua napaxaguenataqa qaltaq lapoota'a't da huetra'a so nỹec, nache ỹalectauo so Tomás da hueta'agueta soomaye. Qaq na'aictaxa da ỹataqta ỹapochigui so lasom, qalaq So Jesús pa'auo, nache vichiguinguilo soomaye. Nache iqui'n, 'eeta': –Ñim Lo'onatac 'Enauacna qami' ỹanema da lqouagaxanaqtaic qataq da qarlagaxayiqui. 27 Ime, nache 'enapego' so Tomás, 'eeta': –Ñaq 'aumete'n naua ihua'q qataq na ỹaỹe. Qataq 'aua'aroiguilo naua 'aya'axaatal na ique'emaxa. Saishet qome da 'am qolectaxanaxaic, nachaqrata da 'aua'amqaanataxan. 28 Nache so Tomás 'enapeco': –¡'Am Ỹataxala' qataq 'am Ita'a maye 'Aro'onatac 'Enauacna! 29 Nache So Jesús 'enapego' somaye, 'eeta': –'Am Tomás, nagui 'aua'amqaanataxan, cha'aye Aỹem 'anauane'. Qalaxaye ỹataqta machiguiñi qome ca na'aictaxa da saishet da Aỹem ilogui, qalaxaye da'amqaanataxan.

Dam 'eetec da huo'omshe qoỹiyiñi ana'ana nere

30 So Jesús nataqa'en qalota na ỹo'ot na'anecpi maye sa qaỹauanapega da ỹauaachiguilo naqa'e'n soua lapaxaguenataqa da saishet da qoỹettalec ana'ana nere. 31 Qalaxaye de'era qoỹiyiñi, damaye qoỹiyiñi, yaqto' qami' ishet da qaua'amaqchiñi da So Jesús, nacheso Som Lca'aguishec Ñim Lo'onatac 'Enauacna maye maiche Llalec, qataq yaqto' qami' ishet da huo'o da qarca'alaqai chochaq tatec da qaua'amaqchiñi Somaye.

21

So Jesús nachaxanalo soua siete lapaxaguenataqa

1 Qaq co'ollaq ime de'era, nache So Jesús qaltaq nachaxanalo soua lapaxaguenataqa huaña ye loigue aso lapel ye Tiberias. 'Era da 'eetec co'ollaq nachaxanalo, 'eeta': 2 Som lapoota'a'tpi Simón Pedro, Tomás som qaỹamata'ac da huaya', qataq so Natanael maye lma' ye Caná yem huaigui ye 'alhua Galilea, Santiago qataq so Juan maye llalqa so Zebedeo, qataq soua lỹa't dos lapaxaguenataqa So Jesús. 3 Nache so Pedro 'enapegalo' soomaye, 'eeta': –Aỹem ashec da sha'aco. Nache soomaye 'ena'apo': –Qomi' nataqa'en 'am seca'ataxague. Nache je'c soomaye, nache huenooyingui aso l-llocta', qalaxaye se'eso pe saishet da huo'o ca lalliiguishe'c. 4 Qaq co'ollaq mashe yaqta'a da yo'oxoñi, nache So Jesús nachattañi neto'ot so loigue aso lapel, qalaxaye se'esoua lapaxaguenataqa saishet da ỹaỹate'n da nacheso Somaye. 5 Nache So Jesús inatta'apo' soomaye, 'eeta': –Ỹale't ¿huo'o peta'a ca qaralliiguishiqui? Nache soomaye 'ena'apo': –Qaica. 6 Nache So Jesús 'enapegalo' soomaye, 'eeta': –Qauasaqaiñi qome na qaralliiguiqui, qalaxaye qauasaqaigue da aloic ana qarlloctai, yaqto' huo'o ca qaralliiguishiqui. Nache soua napaxaguenataqa ỹalaxalec de'era na'aqtac. Qaq co'ollaq ime, nache saishet da naloreguet da nqatyesheguem so lalegue'c, souaxat da ỹaguec na huetaigui nỹaq. 7 Nache so lapaxaguenatac maye ỹataqta nauochaxaua So Jesús, somaye 'enapego' so Pedro, 'eeta': –¡Nachera da Qarataxala'! Nache co'ollaq choche hua'aqchigui de'era so Simón Pedro da nacheso So Qarataxala', nache ỹaayiñi soua alogo maye nqa't co'ollaxa da ya'aco, nache parenaxangui so 'etaxat. 8 Qaq soua lỹa't napaxaguenataqa qalaq ivittra'ata so loigue da netrangui aso l-llocta', ỹauogoleeta'atalo so lalegue'c ỹataqta nlaqchigui na nỹaq, cha'aye se'eso le'ego ivi' ca cien metro ye lshequetta. 9 Qaq co'ollaq ivittra so lqaxaỹaxa, nache ilaleguete so norec, qaq nache huetangui so nỹaq qataq huo'o aso nauole. 10 Nache So Jesús 'enapegalo' soomaye, 'eeta': –Ñaq huo'o ca qandoita nam nỹaqpi maye cheta'ague da qanqacheesheguem. 11 Nache so Simón Pedro huenooñigui aso nllocta, nache nauogonna'ata so loigue so naleguec maye ỹataqta nlaqchigui na nỹaqpi, ndotec na lta'araic. Qaq se'eso nỹaqpi ivi' ciento cincuenta y tres. Qaq na'aictaxa da ỹataqta qalota, qalaxaye saishet da icolaxata'ague so naleguec. 12 Nache So Jesús 'enapegalo' soomaye, 'eeta': –Qauanaỹeecna'a, qauqui'i. Nache se'esoua napaxaguenataqa saishet da huo'otaq huo'o ca ỹañoxot da inat da chaq negue't Somaye, cha'aye ỹaỹate'n da Somaye nacheso So Qarataxala'. 13 Nache So Jesús nquigueuo, nache ỹacona aso nauole 'ayiiña, nache ỹanoiguilo soomaye, qataq nache 'eeta'am naqa'en so nỹaq. 14 Qaq 'era da 'eetec co'ollaq mashe ivi' tres da ỹe'eguelaxalec So Jesús da nachaxanalo soua lapaxaguenataqa co'ollaq ime da mashe qaltaq nca'alec.

So Jesús detaxaỹapegue' so Simón Pedro

15 Qaq co'ollaq ime da lquia'axa'c, nache So Jesús inat so Simón Pedro, 'eeta': –'Am Simón maye 'am llalec so Jonás, ¿peta'a ỹoqta Aỹem 'arauotaxat, qaq saishet da qoneta'am ne'ena 'araỹepi? Nache so Pedro 'enapeco': –Aja', 'am Ỹataxala', 'am 'auaỹaten mque' da 'am sauotec. Nache So Jesús 'enapego' somaye, 'eeta': –'Antela'a qone' na ilopi qagueta llalaqpi. 16 Nache qaltaq ỹe'eguelaxalec da inat somaye, 'eeta': –'Am Simón maye 'am llalec so Jonás, ¿ỹoqta Aỹem 'arauotaxat peta'a? Nache so Pedro 'enapeco': –Aja', 'am Ỹataxala', 'am 'auaỹaten mque' da 'am sauotec. Nache So Jesús 'enapego' somaye, 'eeta': –'Aulo'ogue qone' ana ilopi qaguetapi. 17 Nache qaltaq ỹe'eguelaxalec da inat, 'eeta': –'Am Simón maye 'am llalec so Jonás, ¿peta'a 'eesa da Aỹem 'auauotec? Nache so Pedro ỹataqta naquicochiguiñi, souaxat da mashe ivi' tres da ỹe'eguelaxalec da qainat da 'eesa da huo'o da lauotaxanaqtaic. Nache somaye 'enapeco': –'Am Ỹataxala', 'am 'auaỹaten mque' 'enauac da ỹataxac, qataq 'auaỹateeta da ỹataqta 'am sauotec. Nache So Jesús 'enapego' somaye, 'eeta': –'Aulo'ogue qone' ana ilopi qagueta. 18 Qaq ỹataqta 'eesa de'era 'am sa'axatem nagui, da co'ollaq ñaq 'am nsoqolec, qalaq 'am maiche 'aỹa'aayiñi naua 'ogo da 'ano'ot qataq 'am maiche 'oiqueetac cam 'aigue. Qalaxaye da ivita da 'am ỹa'axaiquiolec, nache 'am 'aỹa'aatrauec naua 'arhua'q qataq ỹaqa'a ca 'am no'otaxanaxan, qataq 'am qaỹaueegue cam saishet da ỹoqta 'atapeegue. 19 Qaq de'era 'enapec So Jesús, damaye naigui da huotaique da ỹaỹaanaxanaxanec da 'eetec qome da l-leuaxa so Pedro qataq da 'eetec da ỹo'oxoren Ñim Lo'onatac 'Enauacna. Qaq co'ollaq ime, nache 'enapego' somaye, 'eeta': –¡Aỹem 'auca'ategue!

So Jesús qataq so lapaxaguenatac maye nauochaxaua

20 Qaq co'ollaq namatapec so Pedro, nache ila'aguet so napaxaguenaxaua maye ỹataqta nauochaxaua So Jesús, som huetaua'a co'ollaxa na laỹe co'ollaq huo'o so lquia'axa'c so na'a'q le'enaxat Lapascua, som inattac somaye co'ollaq 'eeta': «'Am Ỹataxala', ¿chaq negue't cam taỹa'a da 'am ỹaneuo?» 21 Qaq so Pedro co'ollaq ila'aguet somaye, nache inattac So Jesús, 'eeta': –'Am Ỹataxala', qaq ne'ena cha'aguet ¿chaq 'eetec qome ca taỹa'a? 22 Nache So Jesús 'enapeco': –Da Aỹem ñeshetaique da namaye nache 'eetai' da nca'altauec, choche ivitta'a qom Aỹem ñe'eguelaq, qaq ¡'aua'aqta'a qome namaye, saishet da 'atapegueua'a! 'Am, qalaxaye Aỹem qoquegue. 23 Nache jec de'era na'aqtaxanaxac da huetaigui som ca'attague'pi So Jesús da se'eso paxaguenaxaua, somaye qoỹeetega da saishet da ileu. Qalaxaye So Jesús saishet da 'eetega somaye da saishet da ileu. Cha'aye de'era 'enapec, 'eeta': «Da Aỹem ñeshetaique namaye da nache 'eetai' da nca'altauec, choche ivitta'a qom Aỹem ñe'eguelaq, qaq ¡'am saishet qome da 'atapegueua'a namaye!» 24 Qaq nacheso se'eso napaxaguenatac, som ỹa'axattac 'enauac de'era, qataq maiche ỹiyiñi. Qaq qomi' saỹaanaq da ỹoqta 'eesa de'era 'enapec. 25 Nataqa'en ỹataqta qalota co'ollaxa na laỹepi ỹo'otpi So Jesús, qaq namayepi ctaxa da 'enauac da qoỹiyiñi, nache aỹem sepeta'a da saishet da nalolec ana 'alhua aca nerepi maye ishet da qoỹeraxaalec. Aja', nache 'eetec de'era.