Parada-karu Pidantinan
1 Amazada toma-kao ua'ii na'a'ora'a naa Parada-karu, uruu Tominkaru tuma'o, na'iki uruu Tominkaru. 2 Uruu na'a'ora'a naa Tominkaru tuma amazada toma-kao ua'ii. 3 Uruu ida'ana'o Tominkaru toman ipai aimaakan. Aonaa aimaakan tominan sha'apa'oram ida'an karikaonan, soo Uruu ida'an. 4 Uruu ida'a kakupa-kinai, na'iki wuru'u kakupa-kinaiz uruu kanadapa'oraz pidannao ati. 5 Kanada'o kanadapan maruta'o-karu'u, aonaa turuu maruta'o makadanuzu. 6 Kaina'a'o da'i pidan, John kia'o u'uu, Tominkaru dyuudanii. 7 Ukaawan ukakuwaapa'anan pidannao ati kanada'o dau'u, ukuwaa ida'an kizi ipai ĩabatan na'iki ĩmishidan kanada'o dau'u. 8 Aonaa John mani wuru'u kanada'oraz, mazan ukaawan, ukakuwaapa'anan kanada'o dau'u. 9 Wuru'u kanada'oraz, kaina'iki uwa'atipan imi'i baara ati, uruu pa'an kanadapa'oraz ipai pidannao. 10 Kaawanka'o Parada-karu imi'i baara ati. Uruu ida'ana'o Tominkaru toman imi'i baara na'iki pidannao, mazan upu'u aonaa ĩaitapan kanom wuru uruuz. 11 Ukaawan pawiizi ida'ati'o padamata, mazan uiribannao, aonaa ĩnaubaan uruu. 12 Mazan na'ia'oram pidan nauba'o na'iki mishida'o uruu, utaapada ĩtominan Tominkaru dainao nii. 13 Aonaa ĩtominan Tominkaru dainao nii koraidaonaa shakatan kawan, oo pidan aipan kawana'ati mani, soo Tominkaru aipan kawana'ati pa'an. 14 Aizii wuru'u Parada-karuz, utominan pidan nii na'iki umashaapankan wabii an. Watukapa na'apam uruu mishi'o umanawunun. Usha'apanum kau'an bauda'apauzon Tominkaru dani wuru'u uruuz. Uruu ida'ana'o Tominkaru kainaabatan kaimanaiman pakamunanban na'iki uruu ida'ana'o mishi'o kuwai kainaabata-kao wa'ati. 15 John kakuwaapan udau'an pidannao ati, ukian diiwa'o ida'an ĩ'ati: “Di'i naa tawuru'u õkaunamunaataniaz: Kaini'iki'o nii uwa'atin õdawu'ati, mazan uruu powa'a'o zii umanawunun õ'ai, usha'apanum kau'an uruu na'a'ora'a naa õshakatan ua'ii, õkii-kiziz.” 16 Ukamunanun idi manawun, powa'an kida usha'apatan kaiman kida'o aimaakan wa'ati. 17 Tominkaru taa-kidan Moses ida'an pakakinaori; mazan utaan mishi'o kuwai na'iki utukapa-kidan pakamunanun Jesus Christ ida'an pa'an. 18 Aonaa pidan tukapauzon Tominkaru. Soo Udani bauda'apauzoz, karikaonanu'oraz una'an Tominkaru tuma, uruu kaimanaiman ukainaabatan Tominkaru.
John Chikaawunuupauzo kowaadan kanom ni'o pakaawan
19-20 Jewnao zowaunaanao Jerusalem iainaouz dyuudan faadaanao na'iki ĩminka'u Levitenao pishaa'anan John kanom kaduz manawun wuru'u uruuz. Ukowaada ĩ'ati kaimanaiman, ipai kizi pidannao aitapan, “Õgaru, aonaa Christ mani,” ukian ĩ'ati. 21 Aizii ĩkian u'ati, “Ukau'an kanom mooko pugaru? Elijah sha'a pugaru?” “Aonaa!” John kian ĩ'ati. “Pugaru sha'a Prophet, tawuru'u kaawa'o ni'oraz?” ĩkian u'ati. “Aonaa,” ukian koshan ĩ'ati. 22 Uruu idi ĩkian u'ati, “Ukau'an kanom kaduz mooko manawun wuru'u pugaruz? Waaipan wakuwaa nii, wunao ati'o ni'i dyuudainaouz waunao. Pukowaada'aka'a naa kanom kaduz wuru'u pugaruz!” 23 John kian ĩ'ati, “Õgaru dau'ana'o tawuru'u prophet Isaiah saadauzonuz kaikapa'a: ‘Kaina'a'o pidan kadakoinpan diiwa mapidantaka'o amazada ii aka: Usaaba'a naa dunapo Naobanai mako kizi nii.’” 24 Phariseenao kapam wuru'u dyuuda-kariwai ĩpishaa'anan John. 25 Uru'u naa ĩkian John ati, “Pukian pu'u aonaa Christ mani pugaru, aonaa Elijah mani, na'iki aonaa Tominkaru Prophetin mani, tawuru'u wazaudapaniaz, mazan kandii nii mooko puchikaawunuupan?” 26 Aizii John kian ĩ'ati, “Õgaru, õchikaawunuupan wunu idi. Mazan kaina'a ubii'i ba'oran pidan, aona'o uaitapan kanom kaduz uruu. 27 Uruu'o ni'i naa tukapa-kao umanawunu'o nii õna'an pu'u zii. Õgaru aonaa õturuan õbuzuutan udazkidi zunaa.” 28 John kakuwaapatinanuz kaikapa'a, Bethany ia'o, waoko ia'oraz Jordan Wa'o ai, uchikaawunuupauzo-kiziz.
So'ota'o pidannao oian
29 Ba'oran kamoo John tukapan Jesus wa'atin pa'ida'ati, na'iki ukian pidannao ati: “Di'i naa wuru'u Tominkaru taaniaz Kaznizo-dani kawanu'o ni'oraz, so'ota'oraz pidannao oian! 30 Uruu dau'ati'o tawuru'u õkianuz, ‘Utukapa-kao ni'i naa umanawunu'o nii õna'an pu'u zii, mazan uruu powa'a'o umanawunun õ'ai, usha'apanum kau'an uruu kiwiitapa'o õ'ai.’ 31 Õgaru, aonaa õaitapan kanom kaduz uruu, mazan õchikaawunuupan wunu idi, Israelitenao aitapa-kinaa ni'o kanom kaduz uruu.” 32 John kowaadan kaimanaiman patukapanii dau'u: “Õtukapanii Kaimana'o Doronaa wa'atin aokazi iki orid kawan, na'iki upakotan uruu ida'a. 33 Kiwiin zii, aonaa õaitapan kanom kaduz uruu. Mazan dyuuda'oraz õchikaawunuupan wunu idi kian õ'ati, ‘Putukapan an Kaimana'o Doronaa wa'atin doko iki na'iki umashaadinan dono pidan ida'a, uru'u naa wuru'u chikaawunuupa'o ni'oraz Kaimana'o Doronaa idi.’ 34 Õtukapan idi usha'apan na'apa, ukau'an, õkian u'ati, Tominkaru Dani wuru'u di'orazu'u.”
Jesus ikodan kiwiini'o patominapa-kidaniinao
35 Ba'oran kamoo na'ia'o koshan John na'iki na'ia'o utuma, dya'utam utominapa-kidaniinao. 36 Utukapan Jesus dobatapan na'iki, ukian udau'an, “Di'i naa wuru'u Tominkaru taaniaz Kaznizo-dani kawanu'o ni'oraz!” 37 Aizii dya'utamainaouz John tominapa-kidaniinao, ĩabatanii uparadan na'apa, uru'u naa ĩda'anpa'akan Jesus. 38 Jesus awunuuankan powaa iti, utukapa ĩwa'atin padawu'ati. Uru'u naa upishaan ĩdyaun, “Kanom udawatapan?” Ĩkian u'ati, “Tiichaa. Na'ia'o dii pumashaadinpan?” 39 “Uwa'ati, utukapa kizi,” ukian ĩ'ati. Uru'u naa ĩmakon utuma na'iki ĩtukapa na'iam umashaadinpan, ( 4 o'clock wachuupunin wuru'u) uruu na'ia'a naa ĩchuupudinan utuma. 40 Aizii wuru'u da'anpa'akainaouz Jesus, paabatan dauna'an John paradan, bauda'apa'o uu Andrew, uruu Simon Peter inawuzu. 41 Kiwiin zii chaapi'iki, Andrew tukapan pa'inawuzu Simon na'iki ukakuwaapan u'ati, “Waikoda'a naa Messiah!” ukian. (Messiah, kii-karu Christ kia'o kapam wuru'u.) 42 Uru'u naa una'akan Simon, Jesus di'iti. Jesus awunuupan u'idi'iti, ukian u'ati, “Pugaru Simon, John dani. Aizii pu'uu Cephas kia'o nii.” (Peter kia'o kapam wuru'u, na'iki kuba kia'o wuru'u.)
Jesus dapadan Philip na'iki Nathanael
43 Ba'oran chaapi'iki Jesus di'itinpan umako'ozon Galilee Baara iti. Uikodapan Philip na'iki ukian u'ati, “Puwa'ati õtuma, putominapa kizi.” 44 (Philip, uruu Bethsaida san, na'ia'o Andrew na'iki Peter mashaapan kapam.) 45 Uruu dauna'an Philip ikodan Nathanael na'iki ukian u'ati, “Waikoda'a naa tawuru'u Moses na'iki prophetnao saadauzoniaz Kakinaorii Kaaritannaa ida'a udau'an. Uruu Jesus, Joseph dani, Nazareth sanaz.” 46 “Nazareth san!” Nathanael kian, “Na'apa di'i naa aimaakan kaimana'o sha'apan uruu wiizai di'iki pa'an?” “Puwa'ati putukapa kizi,” Philip kian u'ati. 47 Aizii Jesus tukapan Nathanael wa'atin pa'ida'ati, sariapa ukian udau'an, “Arawu'u mishi'o Israelite, aonaa na'itim umariidinan.” 48 Nathanael pishaan uruu, “Na'apa dii puaitapan õdau'an?” Jesus kian u'ati, “Philip dapadan ua'ii pugaru, õtukapanii pugaru paoribai fig waranu ii.” 49 “Tiichaa,” Nathanael kian u'ati, “Pugaru Tominkaru Dani! Pugaru King Israelitenao ati.” 50 Jesus kian u'ati, “Õkowaadan idi'o pu'ati, ‘Õtukapan pugaru paoribai fig waranu ii,’ uruu idi'o pumishida'akan? Putukapan nii zii umanawun kida'o aimaakan sha'apan wuru aia'a!” 51 Na'iki ukian ĩ'ati, “Mishi'o kaiwuru'u õkianuz: Utukapan nii aokazi da'atinan, na'iki Tominkaru angelinnao mako'anpan doko iti, na'iki ĩwa'ati'anpan apowa ati Daonaiora Aokazi Iki'o ida'an!”
Jesus pana'adan wunu wine nii
1 Dya'utam kamoo dauna'an kaina'a mazidainao aroopa'azon Cana ii, Galilee Baara ia'oraz donoi. Jesus daro na'ia'o oroo. 2 Jesus na'iki utominapa-kidaniinao, na'iti'o ĩdapada-kao kapam. 3 Aizii riwunii wine ipain idi'i naa, sariapa Jesus daro kian u'ati, “Ipai'i naa ĩriwun.” 4 “Kanom nii punyukunuupa'azon õgaru?” Jesus kian o'ati. “Aonaa zii amazada kaawan õsha'apata-kinaa nii aimaakan.” 5 Sariapa udaro kian na'ia'o poitoruinao ati, “Usha'apata pa'i na'apam dono ukian u'ati!” 6 Na'ii kaina'a 6 dowada kida, kuba idi'o ĩtoma-kao. Uruu kaduz dowada kida Jewnao kaiwauzonii wunu kinnaa nii pachikain-kinaa nii, ĩchoochin kakinaorinaa kawana'ati. Uwazoo kida tuubarun 20 oo 30 gallon kida. 7 Jesus kian naa poitoruinao ati, “Upaidada wuru'u dowada kidaz wunu idi.” Uru'u naa ĩkapowan wunu na'iki ĩkawazootan naa dowada kida atii ĩpaidan. 8 Udauna'an Jesus kian ĩ'ati, “Aizii ukapota'a naa dowada wazoo, utaa kizi kazowautapa'o aroapa-karu atiz.” Uru'u naa ĩna'akan u'idi'iti wuru'u wunuz, 9 pana'adina'aka'oraz naa wine nii, na'iki uru'u naa utiwaanuz. Mazan aonaa uaitapan na'iki'oram ukaawa-kida-kao. (Soo poitoruinao kapotainaouz wunu, ĩaitapa pa'an.) Sariapa udapadan wuru'u mazida'oraz 10 na'iki ukian u'ati, “Kiwiini'o padamata kaimana'oraz wine maokodauzo-kao. Aizii morowautapainao tuzan dono'o naa kaimanaiman, udauna'an zii turuu sha'apa'oram karikaonan wine maokoda-kao. Mazan pugaru pakawan zii putaapan wuru'u kaimana'oraz wine, atii kai!” 11 Cana ia'o wuru'u kiwiini'oraz Jesus sha'apatan umanawunu'o aimaakan. Na'ii uaida-kidan na'apam paugaru umanawunun. Uruu idi kaimanaimana'a naa utominapa-kidaniinao mishidapan uruu. 12 Uruu dauna'an umakon naa donoi Capernaum iti padaro na'iki pa'inawuzunao tuma, na'iki patominapa-kidaniinao tuma kapam. Mazan aonaa ĩna'ian kotua'iki.
Jesus kodita-kidan Tominkaru Dapu iki puraataapainao
13 Aizii maonapa'a naa Passover Kamoon sakadinan, uru'u naa Jesus makon Jerusalem iti. 14 Uikoda Tominkaru Dapu ii, selliipainao tapi'iza, kaznizo, na'iki wakokoonao. Uikoda kapam na'ii pidannao shakataaka-kidauzo puraata. 15 Uzaamata'akan do'ooribai paba'izin nii, uru'u naa uwaatan Tominkaru Dapu iki ipai ĩ'uzanao, kaznizonao na'iki tapi'izanao. Aizii shakataaka-kidauzonao puraatan miisan kida, udorau-kida'akan, ĩpuraatan zokota'akan kida'a naa ubaara'a kida'o. 16 Jesus kian selliipainao ati wakokoonao, “Ukodita-kida wuru kida'a di'iki'i! Aonaa turuu utaapan õdaru dapu puraataapa-kizai nii.” 17 Sariapa utominapa-kidaniinao nyukunuuan Tominkaru Paradan saada-kariwaiz kian, “Tuukii manawun õkaziwadapan õnyukunuu, õmarainpan idi pudapu.” 18 Jewnao zowaunaanao kian u'ati, “Turuu mooko pusha'apatan waawun za'a umanawunu'o aimaakan, wamishida-kinaa nii Tominkaru aipan ati'o wuru'u pusha'apatanuz aimaakan kaikapa'a?” 19 Jesus kian ĩ'ati, “Umainaabata wuru'u Tominkaru Dapuz, na'iki idikinauda'u kamoo ida'a õkadishita-kidan nii powaa itiz.” 20 Aizii ĩkian u'ati, “Di'ora'a Tominkaru Dapu 46 wunu utomapa-kao. Aizii turuu mooko puzauda-kidan pukadishita-kida'akanuzu idikinauda'u kamoo ida'a?” 21 Mazan Tominkaru Dapu Jesus kianuz, pananaa dau'ati'o wuru'u. 22 Tominkaru kadishita-kidan dauna'an Jesus mawaka-karu di'iki, utominapa-kidaniinao nyukunuitapan wuru'u uparadanuz. Ĩmishida wuru'u saada-kariwaiz kida Tominkaru Paradan, na'iki ĩmishida Jesus paradan kapam. 23 Una'ian pu'u Jerusalem ii Passover Kamoon dono, iriba pidannao mishidan uruu ĩtukapan idi usha'apaapan umanawun kida'o aimaakan. 24 Mazan Jesus aitapan idi ipai pidan kaduz, aonaa ukainaabatinan kaimanaiman ĩ'ati. 25 Aonaa kanom nii uaipan pidan kakuwaapan pa'ati pamin-pidanan dau'u, usha'apanum kau'an uaitapanii ipai pidan nyukunuu.
Jesus ikodaakan Nicodemus tuma
1 Kaina'a pidan, Nicodemus kia'o da'i u'uu, kazowautapa'o Jewnao, na'iki Phariseenao tonaazinaa di'iti'o uzaamatinpan. 2 Ukaawan aiwaka'an Jesus ida'ati na'iki ukian u'ati, “Tiichaa, waaitapa Tominkaru di'iki'o pukaawan putominapa-kida'anan waunao. Usha'apanum kau'an aonaa kanom ka'iitan pasha'apatan umanawun kida'o aimaakan wuru'u pusha'apaapaniaz, soo Tominkaru kaina'an dono utuma.” 3 Jesus kian u'ati, “Mishi'o kaiwuru'u õkianuz: Aonaa turuu pidan tukapan Tominkaru Naobanai-tinapa-kizi, soo ushakatan an koshan.” 4 Nicodemus kian u'ati, “Na'apa dii mooko pidan tunarunao shakatan koshan? Aonaa turuu umorotan padaro toba nazo iti ushakata kizi itamau!” 5 Jesus kian u'ati, “Mishi'o kaiwuru'u õkianuz: Aonaa turuu pidan morotan Tominkaru Naobanai-tinapa-kizi iti, soo ushakatan an wunu ida'an na'iki Doronai ida'an. 6 Padaronao di'iki'o pidan shakatan pananaa zo'o, mazan Doronai ida'ana'o pidan shakatan padoronaa ia'o. 7 Aonaa pumaaitapaka'ana'a kaiwuru'u, ‘Unao shakata pa'i powa'a koshan,’ õkianuz pu'ati. 8 Awaru makon pamako'ozoo-kizi iti. Puabata mishi uwa'idan, mazan aonaa puaitapan na'iki'oram uwa'atin oo na'iti'oram umakon. Na'apa'o kapam wuru'u pidan Kaimana'o Doronaa di'iki'oraz ushakatan.” 9 Nicodemus pishaan Jesus, ukian, “Na'apa dii mooko turuu na'apa kida'o aimaakan sha'apan?” 10 Jesus kian u'ati, “Pugaru aitapa-kariwai putiichaa-tinpan Israelitenao ati, mazan na'apa dii pumaaitapakan na'apa kida'o aimaakan? 11 Mishi'o kaiwuru'u õkianuz: Waparadan waaitapanii daua'o, na'iki wakowaadan watukapanii daua'o, mazan upu'u aonaa pumishida'azon wakuwaa. 12 Õkowaadan pu'ati imi'i baara'a'o aimaakan kida sha'apan dau'u, mazan aonaa pumishidan. Na'apam nii mooko pumishidan õgaru, õkowaadan an pu'ati aokazi ii kida'o aimaakan dau'u? 13 Aonaa kanom makouzon aokazi iti, soo Daonaiora Aokazi Iki'o, uruu wa'ati'oraz aokazi iki. 14 “Kotua'a naa mapidantaka'o amazada di'ii, Moses sawatauzon tooro muna'a kowazaz toma-kariwai chipirari idi. Na'apa'o nii manawun Daonaiora Aokazi Iki'o sawata-kao. 15 Ukau'an, na'ia'oram pidan mishidan dono uruu, mishi'o nii uikodan karikaonanu'o kakupa-karu. 16 “Tominkaru marainpan idi manawun pidannao, utaa paudani bauda'apauzon. Ukau'an na'ia'oram pidan mishidan dono uruu, aona'o nii umawakauzon, mazan uikodan nii karikaonanu'o kakupa-karu. 17 Tominkaru dyuudan pauDani imi'i baara ati, aonaa pataka'uta'o ni'o mani pidannao pa'oian dikin ii, mazan ĩkazannaatin-kinaa ni'o pa'an. 18 “Aona'o nii Tominkaru pataka'utan mishidainaouz uDani. Soo upataka'utan nii wunao pa'ana'a, aona'oraz ĩmishidan ubauda'apauzon udani. 19 Kaikapa'o wuru'u, Tominkaru dakota-kinaaz pidannao oia'o nii: Kaawa'ora'a naa kanada'o imi'i baara ati, mazan pidannao tuukii ĩmarainpan maruta'o wuru aia'a kanada'oraz, Tominkaru di'iki'oraz ukaawan. Ĩsha'apaapan idi soo oia'o pa'idiwaru. 20 Pidan sha'apaapa'o oia'o aimaakan kida, aonaa unaudapan kanada'o na'iki aona'o nii uwa'atin kanada'o ida'ati. Usha'apanum kau'an na'apa'o pidan aonaa uaipan pa'oian kida kainaabata-kao. 21 Mazan pidan mishi'o umashaapan Tominkaru ati, utaapada pa'an kanada'o kanadapan paugaru, kanada'o kainaabata kizi wuru'u usha'apaapanuz aimaakan kida uizo'atin idi'o pa'an Tominkaru.”
John Chikaawunuupauzo kakuwaapan Jesus dau'u
22 Uruu dauna'an, Jesus makon Judea Baara iti patominapa-kidaniinao tuma. Tomunu'iki una'ian ĩtuma, na'iki na'ii uchikaawunuu-kida'akan pidannao. 23 John chikaawunuupa'o kapam pidannao Aenon ii maonapa Salim iti, wunu baoko tuubarun idi kida na'ii. Pidannao kaawa-kaawan kida ĩchikaawunuina'anan na'ati. 24 (Uruu sha'apan John taraa-kao ua'ia'o zii.) 25 John tominapa-kidanii bii ikiinao kashadaakapan ba'oran Jew tuma chikain-karu dau'an choochi kakinaopan kawana'ati'oraz. 26 Aizii ĩkaawan naa John di'iti, ĩkian u'ati, “Tiichaa, puaitapa tawuru'u pidan putuma'oraz Jordan baza ii, tawuru'u pukowaadapaniaz pidannao ati? Mazan aizii kaina'a'a naa uchikaawunuuapa-kidan pidannao, na'iki iriba, iriba pidannao makon u'idi'iti!” 27 John kian ĩ'ati, “Aonaa kanom ka'iitan pasha'apatan aimaakan paaipan ati, soo Tominkaru dyuudan an uruu. 28 Unao abata sha'atii tawuru'u õkianuz, ‘Õgaru aonaa Christ mani, õgaru dyuuda-kariwai karikaonan uruu ua'ati.’ 29 Mazida-kizai ii, mazida'akaiba pa'an mako'oraz pamin-mazidan tuma. Mazan upu'u zii mazida'aka'o paonaru konaukian uabatan idi mazida'o imodapan, ukonaukian idi paudaiaro dau'an. Na'apa'o manawun wuru'u õkonaukianuz, na'iki aizii õturuuda õkonaukian. 30 Uruu mishi'o ni'i naa umanawun-dinan, mazan õgaru, õawutapaanan naa wuru'u.”
Kanom nii Tominkaru dyuudan paudani
31 Kaawa'oraz doko iki uruu umanawunu'o ipai pidan ai. Aizii wuru'u imi'i baara'a'oraz, uruu imi'i baara san, na'iki ukakuwaapan imi'i baara'a'o dau'u. Wuru'u kaawa'oraz aokazi iki, 32 ukakuwaapan patukapanii na'iki paabatapanii dau'u aokazi ii, mazan aonaa pidan mishidan zoobaba ukuwaa. 33 Kanom mishidan an ukuwaa, na'apa'o ida'an ukainaabatan Tominkaru kuwaa mishiin. 34 Wuru'u Tominkaru dyuudaniaz, ukowaada Tominkaru paradan, usha'apanum kau'an kaimanaimana'o Tominkaru taan u'ati Kaimana'o Doronaa. 35 WaDaru Tominkaru marainapanii pauDani, na'iki utaa ipai daunuuda'u aimaakan uka'u iti. 36 Pidan mishida'o uDani, kaina'a'o karikaonanu'o kakupa-karu u'ida'a. Aizii pidan aona'oraz umishidan uDani, aonaa na'apainim nii uikodan karikaonanu'o kakupa-karu, mazan karikaonanu'o nii ubaiatan Tominkaru to'oran.
Jesus paradinan Samaria sanaaba tuma
1 Phariseenao abata'a naa kuwai Jesus zaamatin-kidan daua'o pidannao pa'ida'ati, na'iki uchikaawunuuan iriba pidannao, powa'a zii ĩiriban John di'iti'o zaamatinan ai. 2 (Jesus mishi aonaa uchikaawunuupan padamata, soo utominapa-kidaniinao.) 3 Aizii Jesus abatan idi na'apam pidannao kakuwaapan padau'u, uru'u naa ukiwan Judea Baara iki, Galilee Baara iti. 4 Umakopan pu'u na'iti, Samaria Baara ana'o nii udobatan. 5 Aizii udobatapan pu'u Samaria Baara an, ukaawan donoi iti, Sychar kia'o u'uu. Maonapa'o na'ii Jacob taauzonii zakapu paudani Joseph ati. 6 Na'ia'o Jacob kichada-kidauzon pakapoo-kizi nii. Sakitapa kamoo, Jesus mizainan naa kowas pachi'ikapa-kinaa. Usakanatan maonapa kapoo-kizai ii. 7-8 Utominapa-kidaniinao mako aka donoi iti ĩtoria'ana'akan wanyukunui. Upu'a'a naa Samaria sanaaba wa'atin okapowa'anan na'ati kapoo-kizai ida'ati. “Õtuza'azoo wunu,” Jesus kian o'ati. 9 “Pugaru Jew, aizii õgaru Samaria sanaaba, mazan kandii nii pupishaan wunu õ'ai?” okian u'ati. (Ona'apan u'ati, usha'apanum kau'an aona'o turuu Jewnao kaiwaan aimaakan Samaria Baara sannao kaiwaanii.) 10 Jesus kian o'ati, “Puaitapan an mani kanom Tominkaru taa'azoonii, na'iki kanom wuru'u pishaa'oraz pugaru wunu dau'ati, pupishaa mani uruu padamata na'iki utaa mani pu'ati wunu kakupa-kinai, aona'o umaarauzon pa'an.” 11 Okian u'ati, “Aonaa kanom ida'an mazan pukapotan wunu, usha'apanum kau'an kapoo-kizai ida'a munapo wunu. Na'ikim nii pu'itiiman puikodan wunu aona'o umaarauzon? 12 Wadokozu-daun Jacob kichadanii wuru'u wakapoo-kizi ni'oraz. Uruu, udainao na'iki ĩ'uzanao, na'iki'o ĩtuzan wunu kapam. Powa'a'o zii mooko pugaru umanawunun Jacob ai?” 13 Jesus kian, “Pidan tuza'o wunu di'ora'a kapoo-kizai di'iki'i, maaradako'o nii uruu koshan; 14 mazan pidan tuza'o pa'an õtaan ni'oraz wunu, aonaa na'apainim nii umaaradakouzon. Õtaan ni'oraz wunu, una'an ni'i naa u'ida'a, ikoda'o nii wunu ma'ozaka'oraz ununudapan, taa'o ni'oraz karikaonanu'o kakupa-karu.” 15 Aizii okian u'ati, “Aushaa putaa mooko uruu wunu õ'ati, aonaa kizi õmaaradakouzon, na'iki aonaa kizi õkapowa'anan powa'a da'ati'i.” 16 Jesus kian o'ati, “Pudapadanaka pudaiaru na'iki puwa'ati utuma da'ati'i.” 17 “Aona'o mazan õkaudaiarun,” okian u'ati. Jesus kian o'ati, “Mishi'o kaiwuru'u, ‘aona'o õkaudaiarun,’ pukianuz. 18 Pugaru, baka'iau'ora'a naa pumazidan. Aizii kai'oraz pumin-mashaapan, aonaa mishi pudaiaru mani uruu, ukau'an mishi'o kaiwuru'u puparadanuz.” 19 Okian u'ati, “Aizii õaitapa! Pugaru Tominkaru prophetin! 20 Waunao Samaria Baara sannao dokozu-daunnao, di'ora'a midukuo ida'a'o ĩaida-kidauzon pataapan Tominkaru umanawunu'o nii. Mazan unao Jewnao kian, Jerusalem ii pa'an Tominkaru aipan pidannao aida-kidan ĩtaapan uruu umanawunu'o nii.” 21 Aizii Jesus kian o'ati, “Pumishida õparadan, kaina'iki kamoo wa'atin, uruu dono aona'o nii pidannao nyukunuitapan di'ora'a midukuo oo Jerusalem, ĩaida-kida'azon an pataapan Tominkaru umanawunu'o nii. 22 Unao Samaria Baara sannao, aonaa uaitapan kaimanaiman kanom wuru'u utaapaniaz umanawunu'o nii; waunao Jewnao, waaitapa pa'an kanom wuru'u wataapaniaz umanawunu'o nii. Usha'apanum kau'an Jewnao ati'o wuru'u pidan kazannaatin-kinaa kainaabata-kaoaz. 23 Mazan kaina'iki pa'ina'o kamoo wa'atin, aizii uruu kamo'o naa wuru'u kaawa'oraz! Uruu dono, pidannao mishi'oraz manawun ĩtaapan Tominkaru umanawunu'o nii, ĩtaainan nii u'ati padoronaa ii, na'iki mishi'o ida'ana'o nii. Na'apainao wuru'u Tominkaru aipaniaz papidanannao nii. 24 Tominkaru uruu Doronai. Pidan taapa'oraz uruu umanawunu'o nii, marii utukapa-kidanuz Tominkaru ati, pataainan ida'an padoronaa ii na'iki mishi'o ida'an.” 25 Aizii Samaria sanaaba kian Jesus ati, “Õaitapanii kaina'iki Messiah wa'atin. (Christ kia'o kapam wuru'u.) Ukaawan dono, ukainaabatan nii ipai aimaakan wa'ati.” 26 Udauna'an Jesus kian, “Õgaru uruu. Uruu paradina'oraz pu'ati.” 27 Upu'a'a naa Jesus tominapa-kidaniinao kaawa'akan donoi iki; tuukii ĩdi'itinpan ĩtukapan idi ukadakotinan zunaaba tuma. Mazan aonaa na'ia'oram kian o'ati, “Kanom puaipan u'ai?” oo “Kandii ni'o pukadakotinan otuma?” aonaa ukian u'ati. 28 Uru'u naa owa'aka'akan pawunun kinnaa, okiwa'akan naa donoi iti. Na'ia'a naa okakuwaapan pidannao ati. 29 “Aushaa uwa'ati, utukapanaka pidan kaidi'ia'a, ukowaada'aka õ'ati ipai õsha'apatauzonii kida. Uru'u naa sha'a Christ?” okian. 30 Uru'u naa pidannao makon donoi iki, ĩtukapa'anan Jesus. 31 Upu'u Jesus tominapa-kidaniinao dapadautan uruu, “Tiichaa, puaroopa'a naa zii!” ĩkian. 32 Mazan Jesus kian ĩ'ati, “Õgaru kaina'a wanyukunui õnikan ni'o, aona'oraz unao aitapan udau'u.” 33 Uruu idi utominapa-kidaniinao pishautaakan, “Pidan na'akani'i naa sha'a uwanyukunuu nii?” ĩkian. 34 Jesus kian ĩ'ati, “Õwanyukunuu pa'an wuru'u õsha'apatanuz dyuuda'o õgaru aiapanii õsha'apatan, atii õipaianuzu. 35 Karikaonan da'i puabatan pidan kian: ‘Kaina'iki 4 kauzu, udauna'an paoribai aka karaoda-kao.’ Mazan õkian u'ati, uawunuapa kaimanaiman zakapu kawana'ati kida. Dyuua'a naa paoribai aka, turua'a naa ukaraoda-kao! 36 Aizii wuru'u karaodapainaouz kawinipinaata-kaoa'a naa ĩdyaun. Ĩkaraodapaniinao baokopata-kao karikaonanu'o kakupa-karu di'iti. Paowa'oraz paoribai uuda, na'iki karaoda'oraz paoribai aka baokopa'o nii ĩkonaukian. 37 “Mishi'o wuru'u kiauzo-karuz kaikapa'a: ‘Bauda'apa'o pidan paowan, ba'oran pidan karaodan.’ 38 Õdyuudan ukaraodapa'anan paoribai aka zakapu kawana'ati, aonaa ukaudinauzon na'ii padamata; ba'orainao kowas baiaapanii unao ua'ii dadara'o kaudin-kizai, aizii unaou'u naa naubaapa ĩkaudin-kizi.” 39 Iriba Samaria Baara sannao, mashaapainaouz donoi ii mishidan Jesus, zunaaba kian idi, “Ukowaada õ'ati ipai aimaakan õsha'apatauzonii.” 40 Aizii Samaria Baara sannao kaawainaouz u'ida'ati, ĩpishaan uruu tuukii, “Waaipan puna'a'akan watuma,” ĩkian u'ati. Uruu idi dya'utam kamoo Jesus na'ia'akan ĩtuma. 41 Iriba baokoinao mishidan ĩabatan idi Jesus kuwaa, 42 na'iki ĩkian zunaaba ati, “Aizii wamishida, aonaa pukowaadan idi mani wa'ati, mazan waabatan idi sariapa uruu di'iki. Aizii waaitapa uruu mishi wuru'u kazannaata'o ni'oraz ipai pidannao.”
Jesus kakudan naobanai dani munapo'o pa'ai
43 Una'ia'akan dauna'an dya'utam kamoo, uru'u naa Jesus dobatan Galilee Baara iti. 44 Jesus kian: “Tominkaru prophetin, aonaa utaapauzo-kao umanawunu'o nii pawiizi ii.” 45 Galilee Baara iki'o pidannao, makonka'o Passover Kamoon dau'ati Jerusalem ii, ipai ĩtukapan Jesus sha'apatanii kida baokopainapa-karu dono na'ii. Ukau'an, Jesus kaawan dono Galilee Baara iti, konaukii pidannao dapaapan uruu. 46 Jesus kaawan naa koshan donoi Cana ati, Galilee Baara ia'oraz, (na'ia'o tawuru'u upana'adan wunu wine nii, kiwiini'o dono.) Aizii uruu dono Capernaum ii, kaina'a'o wiizai zowaunaa karina'o udani daonaiora. 47 Uabatan idi kaina'a Jesus kaawan Judea Baara iki Galilee ati, uru'u naa umakon Jesus di'iti. Tuukia'o ida'an upishaan Jesus, “Pumako õtuma Capernaum iti pukakuda kizi õdani; maonapa'ora'a naa umawakan kowas kaiwuru'u!” 48 Jesus kian u'ati, “Aonaan an unao tukapan umanawun kida'o aimaakan sha'apata-kao, aona'o nii umishidan.” 49 Aizii pidan karina'oraz udani kian Jesus ati, “Puwa'ati kadiman õtuma Naobanai, mawaka'o ni'i naa õdani.” 50 Jesus kian u'ati, “Pukiwa'a naa powaa iti, kakuda'a naa pudani!” Umishida Jesus paradan, uruu idi ukiwa'akan naa powaa iti. 51 Dunapo ii zii upoitorunao ikodapan uruu. Ĩkian u'ati, “Kakuda'aka'a naa pudani.” 52 Uru'u naa upishaan ĩdyaun, “Na'iam dii kamoo ukakudan?” “Munumun, masakauda'u kamoo daawadatan, uruu umada wadidin,” ĩkian u'ati. 53 Udaru aitapa na'a'o kamoo wuru'u, “Kakuda'a naa pudani!” Jesus kianuz u'ati. Ukau'an tuukii umishidan Jesus, na'iki baokopa udapu ainao pidannao mishidan kapam. 54 Uruu itamautannaa Jesus sha'apatan umanawunu'o aimaakan, pakaawan dono Galilee Baara ati koshan, Judea Baara iki.
Jesus kakudan karinaapa'o pidan wunu baoko danoma ii
1 Udauna'an Jesus makon Jerusalem iti Jewnao baokopainpauzon kamoo dau'ati. 2 Jerusalem awauribanaa ida'a, kaina'a paniinom, Kaznizo Paniinomizinaa kia'o udakota-kao. Maonapa udazaba'a kaina'a wunu baoko, Bethzatha kia'o udakota-kao Jewnao paradan ida'an. Maonapa wunu baoko danoma an, kaina'a baka'iauda'u kabaun dikin-dinapa-kizai kida. 3 Aizii dikin-dinapa-kizai kida nazo ii, kaina'a iriba karinainao washatinpan kida, ishaawunnao na'iki pabi'inaaka machi'ika-kainao kaduz kida. Ipai ĩdyaun ĩzaudapan wunu koboinan. 4 Panaadon kida'o da'i angel kaawauzon, na'iki ukoboan nii wuru'u wunuz. Karinaa-ziiwa kiwiini'o udamotinan ubaoko iti, ukoboo-kao dauna'an aka, uruu kakuda'o nii sha'apa'oram karikaonan parinaa ai. 5 Kaina'a karinaapa'o pidan na'ii kapati'ora'a naa, ubaiatinan 38 wunu. 6 Jesus tukapan uruu, uaitapa kotua'ora'a naa ukarinaapan. Jesus kian u'ati, “Puaiapa pukakudan?” 7 Karinaapa'o kian u'ati, “Aonaa pidan kaminka'uta'o nii õgaru, õkaawa kizi wunu baoko iti ukoboo-kao dono. Õtiwaina'akan dono'o naa õmakon na'iti, ba'oran pidan kaawa'aka'a naa kiwiin õ'ai.” 8 Sariapa Jesus kian u'ati, “Aushaa, pukadishita! Pumako'o naa, puna'aka'a naa puwashatinapa-kizi.” 9 Sariapa uma'ozaka'akan. Ukadishita'akan, uzaamata'akan pawashatinapa-kizi, na'iki uchi'ika'akan naa. Aizii uruu dono, Sookapa-karu Kamoon wuru'u. 10 Uruu idi Jewnao zowaunaanao kian pidan kakuda-kariwai ati, “Aizii Sookapa-karu Kamoon. Pudikintapan wakakinaorinaa wuru'u puna'akanuz puwashatinapa-kizi.” 11 Mazan ukian ĩ'ati, “Pidan kakuda'oraz õgaru, ukian õ'ati, ‘Pumako, puna'aka'a naa puwashatinapa-kizi.’” 12 Na'iki ĩpishaan uruu, “Kanom mooko wuru'u dyuuda'oraz pumakon na'iki puna'akan puwashatinapa-kizi?” 13 Mazan aonaa uaitapan kanom wuru'u kakuda'oraz paugaru, usha'apanum kau'an iriba'o pidannao uruu dono na'ii, na'iki kadiman kapam Jesus mako'okan ĩbii an. 14 Uruu dauna'an, Jesus ikodan naa uruu Tominkaru Dapu ii. Ukian u'ati, “Puabata, aizii ma'ozaka'a naa pugaru; ukau'an marina'a naa oia'o, panaadon kasha'ora'o aimaakan sha'apan powa'a zii pu'ati.” 15 Uru'u naa umako'okan, ukakuwaapa'ana'akan naa Jewnao zowaunaanao ati. Ukian ĩ'ati, “Jesus karikaonan tawuru'u kakuda'oraz õgaru.” 16 Jesus sha'apatan idi na'apa'o aimaakan Sookapa-karu Kamoon dono, uruu dikin ii Jewnao dadaradan naa amazada u'ati. 17 Uruu idi Jesus kian ĩ'ati, “Õdaru, ipai kamoo ukaminka'uupan pidannao. Õgaru na'apa'o kapam uruu kawan.”
Jesus mishi'o Tominkaru Dani
18 Jesus kian dikin ii na'apa, powa'a zii Jewnao zowaunaanao dawatan na'apam pazowii-kida-kinaa nii uruu. Aonaa soo uwazootapan idi mani ĩsookapauzon kamoon kakinaorinaa, mazan udakotan idi kapam Tominkaru paDaru nii, uruu ida'an upatumaakadinan Tominkaru tuma. 19 Uruu idi Jesus kian ĩ'ati, “Mishi'o kaiwuru'u õkianuz, aonaa Tominkaru Dani sha'apatan aimaakan paaipan ati, soo usha'apata patukapanii paDaru sha'apatan. Kanom uDaru sha'apatanii, na'apa kapam uDani sha'apatan. 20 ÕDaru marainapanii pauDani na'iki utukapa-kida u'ati ipai pasha'apaapanii. Na'iki utukapa-kidan nii u'ati aimaakan powa'a'o zii umanawunun kida, unao di'itinapa-kinaa nii. 21 Na'apa õDaru kadishita-kidan kawan mawakainao na'iki utaan kakupa-karu ĩ'ati, na'apa'o manawun uDani taan kakupa-karu na'ia'oram ati utaa'azon. 22 ÕDaru, aonaa ukabootan pidan oia'o di'iti oo kaimana'o di'iti. PauDani ati pa'an utaan ipai wuru'u na'apa'oraz sha'apatin-karu, 23 ipai kizi pidannao taapan uDani umanawunu'o nii, na'apa ĩtaapan kawan uDaru. Mazan pidannao aona'oraz ĩtaapan Tominkaru Dani umanawunu'o nii, na'apa kapam aonaa ĩtaapan mani uDaru umanawunu'o nii wuru'u, dyuuda'oraz uruu. 24 “Mishi'o kaiwuru'u õkianuz u'ati: Pidan abata'o na'iki izo'ati'o õkuwaa, na'iki mishida'o dyuuda'oraz õgaru, kaina'a'ora'a naa karikaonanu'o kakupa-karu u'ida'a wuru'u. Aona'o nii upataka'uta-kao pa'oian dikin ii. Aonaa powa'a mawakapa-karu di'itanpu'ora'a naa mani uruu, mazan kaina'a'ora'a naa uruu ida'a karikaonanu'o kakupa-karu. 25 Mishi'o kaiwuru'u õkianuz u'ati: Kaina'iki kamoo wa'atin, aizii uru'u naa wuru'u kaawa'oraz. Uruu dono'o ni'i naa mawakainao abatan Tominkaru Dani paradan. Pidan abata'o na'iki izo'ati'o Ukuwaa uruu kakupa'o nii. 26 WaDaru di'iki'o kakupa-karu ikoda-kao. Na'apa'o manawun waDaru toman pauDani, uruu di'iki kapam kakupa-karu ikoda-kao. 27 “WaDaru kiini'i naa pauDani ati, ‘Turua'a naa aizii pubuutan pidannao,’ usha'apanum kau'an uruu pa'an wuru'u Daonaiora Aokazi Iki'o. 28 Aonaa umaaitapaka'ana'a õkuwaa! Mishi'o, kaina'a'o nii kamoo kaawan, na'iki uruu dono ipai'o nii pabaaranaa iki kida mawakainao abatan Uparadan. 29 Pidannao sha'apata'o kaimana'o, ĩkadishitan nii na'iki karikaonanu'o nii ĩkakupan; mazan pidannao sha'apata'o oia'o, ĩkadishitan nii na'iki pataka'uta-kao nii ĩdyaun.
Kakuwaapainao Jesus dau'u
30 “Aonaa turuu õsha'apatan aimaakan õaipan ati karikaonan. Õbuutan pidannao soo Tominkaru aipan kawana'ati manawun. Ukau'an sakitapa'o pa'an wuru'u õbuutanuz pidannao ĩsha'apainpan kawana'ati. Usha'apanum kau'an, aonaa õtiwaan õsha'apatan aimaakan õaipan ati karikaonan, soo dyuuda'oraz õgaru aipan kawana'ati õsha'apatinan. 31 “Õkakuwaapan an mani õdau'u, õ'ida'a karikaonan, aonaa turuu õparadan mishida-kao. 32 Mazan kaina'a ba'oran kakuwaapa'o õdau'u, õaitapa mishi'o wuru'u uparadanuz õdau'an. 33 “Unao, udyuudan pidannao John Chikaawunuupauzo di'iti. Uruu dono ukowaada mishi'o õdau'an. 34 Aonaa õaipan manawun mani pidan kakuwaapan õdau'an kaiwuru'u; mazan õkowaadan unao ati kaikapa kida'ora'a, turuu kizi ukazannaatinan. 35 John uruu lamp kawanu'o, ma'ozaka'oraz ukanadapan; aizii unao masakauda'u karikaonan ukonaukii-kidan ukanadapanuzu. 36 “Powa'a zii John kuwaa ai umanawunun wuru'u kakuwaapa'oraz õdau'u: wuru'u õsha'apatanii kidaz õdaru aipan kawana'ati, na'iki wuru'u Uaipaniaz zii õsha'apatan, ĩnao wuru'u kakuwaapa'oraz õdau'u. Na'iki õsha'apatanii kida ukainaabata õdaru wuru'u dyuuda'oraz õgaru. 37 Na'iki õdaru kapam kakuwaapa'o õdau'u. Unao, aonaa uabatauzon uparadan oo utukapauzon uruu. 38 Aonaa uzaamatan Ukuwaa, usha'apanum kau'an aonaa unao mishidan õgaru wuru'u Udyuudaniaz. 39 Utominpan padamata kaimanaiman saada-kariwaiz kida Tominkaru Paradan dau'u, uzauda-kidan uruu ida'a'o nii unao ikodan karikaonanu'o kakupa-karu, mazan uruu kida kakuwaapa'oraz õdau'u! 40 Mazan upu'u aonaa uzaamatina'azon õ'ida'ati, turuu kizi uzaamatan karikaonanu'o kakupa-karu. 41 “Õsha'apatan aimaakan aonaa õaipan idi'o mani pidannao dakotan õgaru umanawunu'o nii. 42 Mazan õaitapa unao, aonaa na'ia'oram marainpan Tominkaru kaimanaiman. 43 Õgaru, õkaawan õdaru uu ida'ana'o, mazan unao, aonaa unaubaan õgaru. Mazan ba'orainao kaawan an paaipan ati karikaonan, ĩnaou'o nii pa'an unaubaapa. 44 Upaonarunao naubaan an unao, tuukii ukonaukian, mazan aonaa zoobaba usha'apatan aimaakan Tominkaru bauda'apauzon naubaa-kinaa nii unao. Ukau'an, na'apam nii mooko umishidan uruu? 45 “Aonaa õgaru'o nii mani wuru'u kia'o ni'oraz õdaru ati, ‘oia'o ĩnao,’ unao dau'an. Kaina'a Moses saadauzonii, uru'o nii pa'an wuru'u ‘oia'o ĩnao,’ kia'o ni'oraz, unyukunuu Moses saadanii dau'atin pu'u padamata. 46 Umishidan an mani mishi manawun Moses saadanii, umishida mani padamata õgaru. Usha'apanum kau'an, õgaru daua'o wuru'u usaadaniaz. 47 Mazan umamishidakan pu'u Moses saadauzonii kakinaorii, na'apam nii dii umishidan õparadan?”
Jesus paan 5000 pidannao
1 Aizii udauna'an Jesus taraukan Galilee Karishiiz baza iti, (Tiberias Karishiiz, kia'o udakota-kao kapam.) 2 Iriba pidannao da'anpan uruu ĩtukapan idi usha'apatan umanawun kida'o aimaakan, ukakudanuz karinainao. 3 Jesus makon patominapa-kidaniinao tuma naawazi paawa iti, na'ii usakanatan ĩtuma. 4 Aizii udono, maonapata'o Jewnao Passover Kamoon. 5 Jesus awunuudanaan, utukapa iriba pidannao wa'atin pa'ida'ati. Sariapa ukian Philip ati, “Na'ikim nii watorian wanyukunui wapaa-kinaa nii ipai wunaou'a?” 6 Jesus pishaanuz Philip, utiwaa-kidapan karikaonan uruu, mazan Jesus, uaitapani'i naa na'apam nii pasha'apainpan. 7 Philip kian u'ati, “ 8 kauzu pidan kaudinan winipinaa, aonaa turuu utorian wunao aroapa-kinaa ni'i, utaa-kao pu'u mani masakauda'u sodi kida.” 8 Andrew, Simon Peter inawuzuz, uruu kapam Jesus tominapa-kidanii. Ukian Jesus ati, 9 “Kaina'a koraidaonaa diida'a'a, kaina'a u'ida'a baka'iauda'u barley-ba'i na'iki dya'utam kopaunao sodi kida. Mazan na'apam nii mooko masakauda'u sodi'o wanyukunui turuan iriba'o manawun pidannao ati?” 10 Jesus kian patominapa-kidaniinao ati, “Marii pidannao sakanatan.” Uru'u naa ĩdyuudan pidannao sakanatan naa. Pinidi baawu wuru'u na'ia'oraz amazada. Aizii daonaioranao uikoda mani 5000 ĩdyaun. 11 Uru'u naa Jesus zaamatan bread na'iki utoriinapa-kidan naaz Tominkaru ati, “Kaimana'o pugaru Tominkaru, putaan idi wanyukunui.” Uruu dauna'an udyuudan naa utaabi'ii-kao sakanatapainao ati, aizii kopau na'apa kapam una'apatan. Ipai pidan aroopan abaapa kida. 12 Aizii ĩturuudan dauna'an paaroopan, Jesus kian patominapa-kidaniinao ati, “Aizii uzawada wanyukunui wa'akun, aonaa uwakuda'ana'az.” 13 Uruu idi baka'iauda'u'oraz barley-ba'i wa'akun di'iki, ĩpaidada 12 dazowan kida. 14 Aizii pidannao tukapan idi Jesus sha'apatan umanawunu'o aimaakan, sariapa ĩkian, “Di'i naa wuru'u Prophet, saada-kariwai Tominkaru paradan kaunamunaataniaz uwa'atin nii.” 15 Jesus aitapan idi pidannao zaamata'azon naa paugaru King nii aonaan pu'u unyukunuu na'apan, uruu idi umako'okan ĩ'ai paba'orantin koshan midukuo iti.
Jesus chi'ikan wunu paawa an
16 Uruu wachuupunin, Jesus tominapa-kidaniinao makon naa Galilee Karishiiz iti. 17 Ĩzaamatan kanawa na'iki uru'u naa ĩtaraukan Capernaum iti. Maruta'aka'a naa amazada, aonaa zii Jesus kaawan ĩ'ida'ati. 18 Aizii uruu wamarutan ida'a, ma'ozaka'o awaru kaawan na'iki kichana'iki-kii utoman wunu paran. 19 Jesus tominapa-kidaniinao pooratan pakanawan na'apa'o bii an, 3 oo 4 mile umunapon. Uru'u naa ĩtukapan Jesus wa'atin, wunu paawa an uchi'ikapan. Uwa'atin, atii umaonapatan ĩkanawan ida'ati. Tuukii ĩtarian u'ai. 20 Mazan upu'a'a naa uparadan ĩ'ati, “Mana'a utaria'ana'a! Õgaru wuru'u!” 21 Uparadan dauna'an, ĩaipan naa upaidinan patuma kanawa zo'iti, mazan masha'apakiaka ĩkaawa'akan naa pamako-kizi iti.
Pidannao dawatinan Jesus dau'u
22 Ba'oran chaapi'iki, pidannao karishii danoma ia'oraz ĩwa'akinan, ĩaitapanii na'a'o soo bauda'apa kanawa karikaonan. Na'iki ĩaitapa kapam aonaa Jesus makon patominapa-kidaniinao tuma uruu kanawa zo'an, soo ĩnao karikaonan mako. 23 Mazan kaina'a ba'oran kanawa kida kaawan Tiberias iki, maonapa Naobanai paa-kizi ii pidannao, utoriinapa-kidan dauna'an wanyukunui. 24 Aizii pidannao tukapan idi aonaa Jesus nii, na'iki aonaa utominapa-kidaniinao nii kapam, uru'u naa ĩpaidinan kanawa kida zo'iti, na'iki ĩmakon naa Capernaum iti, ĩdawatina'anan naa Jesus dau'u.
Jesus, uruu wanyukunui aokazi iki'o
25 Ĩikoda Jesus karishii baza ia'a naa. Uru'u naa ĩkian u'ati, “Tiichaa, na'apainim di'i naa pukaawan da'ati'i?” 26 Jesus kian ĩ'ati, “Mishi'o kaiwuru'u õkianuz: Udawatinan õdau'u soo uaroopan idi'o abaapa karikaonan, aonaa utukapan idi'o mani õsha'apatan umanawun kida'o aimaakan. 27 Aonaa ukaudina'ana'a pataka'uinauzo wanyukunui dau'ati. Ukaudin pa'an wanyukunui dau'ati karikaonanu'oraz kakupa-karu u'ida'an. Uruu wuru'u Daonaiora Aokazi Iki'o taan ni'oraz unao ati, usha'apanum kau'an Tominkaru tukapa-kida mishi panyukunuu kaimanan u'ati.” 28 Aizii ĩkian u'ati, “Kanom mooko manawun Tominkaru aiapanii washa'apatan?” 29 Jesus kian ĩ'ati, “Tominkaru aipan soo umishidan õgaru, padyuudaniaz.” 30 Na'iki ĩkian u'ati, “Kandii mooko umanawunu'o aimaakan puaida-kidan nii wa'ati, wamishida-kinaa nii wuru'u puparadanuz? 31 Wadokozu-daunnao, ĩnikauzonii wanyukunui, ‘manna’ kia'oraz udakota-kao, mapidantaka'o amazada ii. Na'apa usaadinpan Tominkaru Paradan ida'a, ‘Utaanii ĩ'ati ĩnikan nii aokazi iki'o wanyukunui.’” 32 Jesus kian ĩ'ati, “Mishi'o kaiwuru'u õkianuz: Aonaa Moses mani wuru'u taa'oraz aokazi iki'o wanyukunui u'ati. Õdaru pa'an wuru'u taa'oraz aokazi iki'o wanyukunui, mishi'oraz kakupa-kinai. 33 Wanyukunui, Tominkaru dyuudaniaz aokazi iki, uruu pa'an taa'oraz kakupa-kinai manawun, pidannao ati.” 34 Sariapa pidannao kian u'ati, “Naobanai! Putaa mooko wa'ati uruu wanyukunui, na'iki ipai kamoo pa'i putaa wa'atiz!” 35 Jesus kian ĩ'ati, “Õgaru wuru'u wanyukunui kakupa-kinaiz. Na'ia'oram pidan zaamatina'o õ'ida'ati na'iki mishida'o õgaru, aona'o nii uzamaziizon na'iki aona'o nii umaaradakouzon. 36 “Mazan õkii sha'atii u'ati, utukapa'a naa padamata õgaru, mazan upu'u aonaa umishidan õgaru. 37 Ipai pidan õdaru taaniaz õ'ati, zaamatina'o nii õ'ida'ati. Na'iki pidan wuru'u zaamatina'oraz õ'ida'ati aonaa na'apainim nii õkashanauan. 38 Usha'apanum kau'an õwa'atin da'ati'i aokazi iki, õsha'apata'anan dyuuda'oraz õgaru aipan kawana'ati õsha'apatan. Aonaa õwa'atin õsha'apata'anan aimaakan õnyukunuu aipan kawana'ati. 39 Na'iki dyuuda'oraz õgaru, aonaa bauda'apa uaipan õwaziwaan pidan pataaniinaouz õ'ati. Mazan uaipan pa'an õkadishita-kidan ĩdyaun na'iki õtaan ĩkakupa-kinaa nii, Tominkaru Ainaa dono. 40 ÕDaru aipan ipai pidan tukapa'oraz na'iki mishida'oraz uDani, zaamatan karikaonanu'o kakupa-karu; na'iki õkadishita-kidan nii ĩdyaun karikaonanu'o kakupa-karu di'iti Tominkaru Ainaa dono.” 41 Uru'u naa Jewnao kadakotin-kidan uruu na'iki ĩto'oran naa u'ati, ukian idi, “Õgaru wuru'u wanyukunui aokazi iki'oraz kaawan.” 42 Ukau'an ĩkian pa'atiaaka, “Aonaa mooko Jesus mani uruu, Joseph daniz? Waaitapanii na'apain udaronao! Na'apa di'i naa mooko kaiwuru'u ukianuz, ‘Õgaru aokazi iki'o õwa'atin?’” 43 Jesus kian ĩ'ati, “Aona'a naa ukadakoinpa'ana'a na'apa. 44 Õdaru wuru'u dyuuda'oraz õgaru; na'iki aonaa turuu pidan zaamatinan õ'ida'ati, soo õdaru minziiwatan dono uruu uzaamatin-kinaa nii õ'ida'ati. Na'iki õkadishita-kidan nii uruu Tominkaru Ainaa dono. 45 Na'apa kotua'o prophet saadauzonii kian, ‘Ipai'o nii Tominkaru tominapa-kidan pidannao.’ Ukau'an kanom dyauta'o unyukunuu õdaru paradan dau'ati, na'iki tominpa'o uruu di'iki, zaamatina'o nii õ'ida'ati. 46 “Mazan aonaa na'ia'oram pidan tukapauzon õdaru, soo wuru'u wa'ati'oraz Tominkaru di'iki, uruu pa'an tukapa'oraz õdaru. 47 Mishi'o kaiwuru'u õkianuz: Na'ia'oram pidan mishida'o, zaamata'ora'a naa karikaonanu'o kakupa-karu wuru'u. 48 Õgaru wuru'u wanyukunui kakupa-kinaiz. 49 Udokozu-daunnao nikauzon pu'u ‘manna’ mapidantaka'o amazada di'ii, upu'u ĩmawakan. 50 Mazan di'i naa pa'an wuru'u wanyukunuiz, kaawa'oraz aokazi iki, pidan nika'oraz uruu, karikaonanu'o nii ukakupan. 51 Õgaru pa'an wuru'u wanyukunui, kaawa'oraz aokazi iki, taa'oraz kakupa-kinai. Pidan nikan an wuru'u wanyukunuiz, uruu karikaonanu'o nii ukakupan. Wanyukunui õtaan ni'oraz u'ati, uruu õdunaa. Uruu õtaaniaz pidannao kakupa-kinaa nii.” 52 Uru'u naa Jewnao shokorodinan u'ati na'iki ĩkian pa'atiaaka, “Na'apam nii mooko arawu itiiman pataan wa'ati padunaa, wanyukunui nii?” 53 Jesus kian ĩ'ati, “Mishi'o kaiwuru'u õkianuz: Umanikakan an Daonaiora Aokazi Iki'o dunaa na'iki umatuzakan an uizain, aona'o kakupa-karu nii u'ida'a. 54 Mazan kanom aroopa'o õdunaa dau'u na'iki tuza'o õizain, uruu karikaonanu'o nii pa'an ukakupan na'iki õkadishita-kidan nii uruu Tominkaru Ainaa dono. 55 Õdunaa, uruu mishi'o wanyukunui na'iki õizain mishi'o riwunii. 56 Na'ia'oram pidan aroopa'o õdunaa dau'u na'iki tuza'o õizain, uruu zaamatinpa'o õ'ida'ati, na'iki õgaru zaamatinpa'o uruu ida'ati kapam. 57 Õdaru Tominkaru taapa'oraz kakupa-karu, uruu wuru'u dyuuda'oraz õgaru. Uruu di'iki'o õikodan kakupa-karu. Ukau'an pidan aroopa'oraz õdau'u, uikodan nii kakupa-karu õgaru di'iki. 58 Ukau'an di'ora'a wuru'u wanyukunui kaawa'oraz pa'an aokazi iki, aonaa udokozu-daunnao nikauzonii manna kawanu'o mani. Ĩnikauzon pu'u padamata manna, mazan upu'u zii ĩmawakan. Mazan pidan aroopa'o di'ora'a wanyukunui dau'u, karikaonanu'o nii pa'an ukakupan.” 59 Jesus kakuwaatinanuz kaikapa'a, utominapatin-kidan dono'o pidannao synagogue ii.
Jesus kuwaa taa'oraz karikaonanu'o kakupa-karu
60 Aizii ĩabatan idi na'apa'o kuwai, iriba da'anapatinainaouz uruu, kian, “Dadara'o manawun ukuwaa. Kanom turuu uabatapan kaiwuru'u ukuwaaz?” 61 Mazan Jesus, uaitapa na'apam patominapa-kidaniinao kadakotin-kidan pakuwaa. Sariapa ukian ĩ'ati, “Ukaziwaa-kida zii õparadan? 62 Na'apam dii mani ukian utukapan an Daonaiora Aokazi Iki'o sawatinan powaa iti pawa'ati-kizi iti? 63 Pudi'itapan an soo nanai daua'o karikaonan, uruu mazanu'o karikaonan wuru'u. Kaimana'o Doronaa pa'an wuru'u kaawa-kida'oraz kakupa-karu. Wuru'u õparadan kidaz, unao ati'oraz, aonaa nanai daua'o mani, mazan doronai daua'o, na'iki ukakupa-kinaa ni'o. 64 Mazan upu'u zii kaina'a pabi'i kida unao aonaa umishidan.” (Jesus aitapanii sariapa patominapa-kidan di'iki'o ĩdyaun, na'ia'oram aona'o nii ĩmishidan. Na'iki uaitapa na'ia'oram nii kaakapaa paugaru tarubainao ati.) 65 Na'iki Jesus kian koshan, “Kaikapa'o ati'o tawuru'u õkianuz u'ati, aonaa turuu pidan zaamatinan õ'ida'ati, soo õdaru Tominkaru na'akan dono õ'ida'ati ĩdyaun.” 66 Na'iki'ora'a naa iriba utominapa-kidaniinao muudinan naa u'ai, aonaa powa'a ĩmakon utuma. 67 Uruu idi Jesus kian wunao ati'i 12 patominapa-kidaniinaouz, “Unao mani, umuudinan ni'i naa kapam õ'ai?” 68 Simon Peter kian u'ati, “Naobanai, kanom di'iti'o nii mooko wamakon? Pugaru ida'a pa'an parada-karu kida taa'oraz karikaonanu'o kakupa-karu. 69 Na'iki, aizii wamishida na'iki waaitapa pugaru umanawunu'o, Tominkaru di'iki'o puwa'atin!” 70 Jesus kian ĩ'ati, “Õgaru zaamata'oraz 12 unao. Mazan bauda'apa unao, Satan!” 71 Una'apanuz Judas Iscariot daua'o wuru'u (Simon Iscariot daniz); uruu 12 tuma'o uaitinpan, uru'o nii zaamata-kida Jesus.
Pa'inawuzunao dyuudan Jesus makon Judea Baara iti
1 Uruu dauna'an, Jesus morowautapan na'ii'aka wiizai kawana'ati, Galilee Baara ii kida'oraz. Aonaa uaipan pachi'ikinan Judea Baara ii aka, usha'apanum kau'an Jewnao zowaunaanao zaudapanii uruu na'ii, ĩaipan pazowiinuzu. 2 Na'iki uruu dono maonapata'o Jewnao baokopainpauzon kamoon, ĩkawiizibatinauzon. 3 Uruu idi Jesus inawuzunao kian u'ati, “Pugaru mani? Kanom nii aona'a naa pumakon Judea Baara iti, abatauzonao pukuwaa tukapa kizi wuru'u pusha'apaapanii kidaz? 4 Aonaa na'ia'oram pidan dizapa'o pasha'apaapan aimaakan, uaipan an pidannao aitapan kaimanaiman kanom kaduz paugaru. Pusha'apaapan an aimaakan, marina'a naa ipai pidannao aitapan!” 5 (Aizii wuru'u u'inawuzunaouz, aonaa ĩmishidan uruu.) 6 Jesus kian ĩ'ati, “Aonaa zii mazan amazada kaawan õ'ati õmako-kinaa nii na'iti. Mazan unao, turuu umakon na'apainim karikaonan, uaipan kawana'ati. 7 Aonaa kanom dikin ii pidannao to'ora-kizaitapan unao. Mazan õgaru ĩto'ora-kizaitapanii, õkakuwaapan idi ĩ'oian dau'u. 8 Umako'o naa baokopainapa-kizai iti. Mazan õgaru, aona'o nii zii õmakon, usha'apanum kau'an aonaa zii amazada kaawan õ'ati.” 9 Jesus paradan dauna'an na'apa, una'ian zii Galilee Baara ii.
Jesus Jerusalem ii
10 Mazan u'inawuzunao makon dauna'an baokopainapa-kizai iti, uru'u naa Jesus makon kapam. Umakon na'iti dizinapa, aonaa kizi pidannao aitapan na'iam uruu. 11 Na'ii, baokopainapa-kizai ii, Jewnao zowaunaanao dawatinan udau'u pidannao bii an, “Aonaa utukapan tawuru'u pidanaz?” ĩkian pidannao ati. 12 Aizii uruu dono, iriba pidannao paradinan mashauda'u kida Jesus dau'u. Ba'orainao kian, “Kaimana'o pidan uruu.” Mazan ba'orainao kian, “Aonaa kaimana'o pidan mani uruu, soo umariidapan karikaonan pidannao.” 13 Mazan aonaa na'ia'oram pidan diwadan paparadan, ĩtarian idi Jewnao zowaunaanao ai. 14 Aizii 4 kamo'o naa baokopainapa-karu, uruu zii Jesus makon Tominkaru Dapu iti. Na'ia'a naa utominapa-kidan pidannao. 15 Aizii Jewnao zowaunaanao abatan idi utominapa-kidan pidannao kaimanaiman manawun, tuukii ĩdi'itinpan uaitapan dau'an. Sariapa ĩkian udau'ati, “Na'apam dii mooko arawu aitapan kaikapa'a naa manawunu'u? Aonaa na'apainim padamata tiichaanao tominapa-kidauzon uruu!” 16 Jesus kian ĩ'ati, “Wuru'u õkuwaa kidaz aonaa õtomanii mani. Tominkaru, dyuuda'oraz õgaru, uruu di'iki'o wuru'u õkuwaa kidaz. 17 Pidan minziiwata'o panyukunuu Tominkaru kaudin-kizi dau'ati, uru'o nii pa'an aitapa õkuwaa, Tominkaru di'iki'o, oo õtomanii karikaonan. 18 Pidan kakuwaapan an paaipan ati karikaonan, utiwaan pamanawun-tinan wuru'u. Mazan pidan kakuwaapa'o pamanawunutapa'azon idi dyuuda'o paugaru; uruu kaimana'o pidan, na'iki mishi'o uparadan. 19 Mishi, Moses taanii unao ati ukakinaorinaa. Mazan aonaa na'ia'oram unao mishi'o utaapan wuru'u kakinaoriiz. Mazan kandii nii uzowia'azon õgaru?” 20 Aizii pidannao kian u'ati, “Kaina'a oia'o doronai pu'ida'a! Kanom mooko pu'itiiman zowia'azoo pugaru?” 21 Jesus kian ĩ'ati, “Kaina'a bauda'apa õsha'apatanii umanawunu'o aimaakan Sookapa-karu Kamoon dono, na'iki tuukii unao di'itinpan udau'u. 22 Mazan upu'u zii, utaapadan udani daonaioranao choota-kao sookapauzo-karu kamoo dono, ĩkainaabatin-kinaa Jewnao nii, Moses taan idi na'apa'o kakinaorii. (Mazan aonaa Moses di'iki'o mani wuru'u na'apa'o sakadinanuz, uruu dokozu-daunnao pa'an wuru'u sakada'oraz na'apa'o.) 23 Aizii utaapadan pu'u udani choota-kao Sookapa-karu Kamoon dono, uruu aonaa kizi unao dikintapan Moses taaniaz kakinaorii. Kandii nii mooko uto'oran õ'ati õsaabaan idi pa'an kaimanaiman pidan nanaa Sookapa-karu Kamoon dono? 24 Aona'a udi'itapa'ana'a õsha'apataniaz aimaakan oia'o nii. Mazan udi'itapa wuru'u õsha'apataniaz aimaakan kaimana'o nii pa'an.”
Christ mani wuru'u Jesus?
25 Kaina'a Jerusalem sannao bii ikiinao pidannao, ĩkian Jesus dau'ati pa'atiaaka, “Aonaa mooko arawu'u mani tawuru'u ĩtiwautaniaz pazowii-kidan? 26 Aizii di'i naa uparadinan iriba'o pidan ati. Na'iki aonaa kanom wa'atin ĩtowauda'ua'anan uruu! Jewnao zowaunaanao aitapani'i naa sha'a uruu Christ kii-kizaiz? 27 Mazan Christ kaawan dono, aona'o nii pidan aitapan na'iki'oram uwa'atin. Mazan arawu'u, waaitapa na'iki'oram uwa'atin.” 28 Aizii Jesus tominapatin-kidan pu'u pidannao Tominkaru Dapu ii, ukian diiwa'o ida'an, “Uaitapanii mooko õgaru na'iki na'iki'oram õwa'atin? Aonaa õ'ida'a'o mani õwa'atin! Dyuuda'oraz õgaru, uruu mishi'o, na'iki uruu di'iki'o õwa'atin. Unao aonaa uaitapauzon uruu. 29 Mazan õgaru õaitapanii uruu, usha'apanum kau'an uruu di'iki'o õwa'atin, na'iki uruu pa'an wuru'u dyuuda'oraz õgaru.” 30 Uru'u naa ĩaipan pazaamata'akan Jesus sariapa na'ii, mazan aonaa kanom zaamatan uruu, usha'apanum kau'an aonaa zii amazada kaawan uzaamata-kinao nii. 31 Mazan iriba na'iainao pidannao mishidan uruu, na'iki ĩkian, “Ba'oran kaawan an, dakotina'o Christ nii, turuu mani mooko usha'apatan powa'a zii umanawun kida'o aimaakan arawu'u sha'apatanii kida aia'a?”
Jewnao zowaunaanao aipan pazaamata-kidan Jesus
32 Aizii Phariseenao abatankan naa na'apam pidannao kian pa'atiaaka, mashauda'u padamata Jesus dau'an. Uru'u naa ĩbaokopatinan faadaanao zowaunaanao tuma, udauna'an ĩdyuudan naa watchmantapainao Tominkaru Dapu ĩzaamatanaka kizi Jesus. 33 Jesus kian, “Õna'an nii zii utuma baukapa'a naa, udauna'an õkiwan ni'i naa dyuuda'oraz õgaru di'iti. 34 Udawatinan nii õdau'u mazan aona'o nii uikodan õgaru. Aonaa turuu unao makon õmako'ozoo-kizi iti.” 35 Uru'u naa Jewnao zowaunaanao kian pa'atiaaka, “Na'iti'oram mani umako'ozon, aonaa kizi turuu waikodan uruu? Umako'ozon sha'a Jewnao di'iti, mashaapainaouz Greeknao wiizi ii aka, utominapa-kida'anan Greeknao? 36 Na'apa'oram dau'ati'o dii wuru'u, ‘Udawatinan nii õdau'u, mazan aona'o nii uikodan õgaru,’ na'iki ‘Aonaa turuu umakon õmako'ozoo-kizi iti,’ ukianuz?” ĩkian.
Wunu kakupa-kinai
37 Dawu'itiini'o kamoo baokopainapa-karuz, uruu umanawunu'o manawun kamoo. Uruu kamoo ida'a Jesus kadishitan na'iki uparadan diiwa'o ida'an, “Kanom maaradako'o marii uwa'atin õ'ida'ati, õtaa kizi u'ati utuzan nii. 38 Saada-kariwaiz Tominkaru Paradan kian kawana'ati, ‘Kanom mishida'o õgaru, uruu di'iki'o nii wunu taa'oraz kakupa-kinaa shootapan.’” 39 Jesus kadakotinanuz, Kaimana'o Doronaa daua'o wuru'u. Uruu wuru'u taa-karu ni'oraz mishidainao ati. Uruu dono aonaa zii Kaimana'o Doronaa taa-kao mishidainao ati, usha'apanum kau'an aonaa zii Jesus sawata-kao umanawunu'o ida'an.
Pana'a kida parada-karu Jesus dau'an
40 Jesus paradan dauna'an, iriba abatainaouz uparadan, ĩkian udau'an, “Di'ora'a pidan uru'u naa Prophet, uru'u naa wazaudapaniaz!” 41 Ba'orainao kian, “Uru'u naa Christ!” Mazan ba'orainao kian, “Aonaa uruu mani wuru'u! Galilee Baara iki'o nii mooko Christ wa'atin? 42 Aonaa mooko saada-kariwaiz kida Tominkaru Paradan kian, David Takaan-daunu'o nii Christ, na'iki ushakatan nii Bethlehem ii, David mashaapauzo-kizi ii?” 43 Uruu pana'a kida pidannao paradan Jesus dau'an. 44 Aizii ba'orainao, ĩaipan naa padamata pazaamata'akan Jesus, marii kizi utaraa-kao, mazan aonaa kanom zaamatan zii uruu.
Jewnao zowaunaanao aonaa ĩmishidan Jesus
45 Uruu dauna'an watchmantapainao Tominkaru Dapu (tawuru'u dyuuda-kariwainaouz ĩzaamata'anan Jesus) ĩkaawan naa powaa ati faadaanao zowaunaanao na'iki Phariseenao ida'ati. Uru'u naa ĩkian, “Kandii nii aonaa una'akan uruu wa'ida'ati?” 46 Aizii watchmantapainao kian ĩ'ati, “Aonaa na'ia'oram pidan paradauzon na'apa uruu kawan!” 47 Uru'u naa Phariseenao kian ĩ'ati, “Upozawata-kidan naa mooko kapam unao kaiwuru'u? 48 Uabatauzo mooko faadaanao zowaunaanao bii iki'o, oo bauda'apa Pharisee mishida'o uruu? 49 Mazan wuru'u da'anpainaouz uruu, aonaa ĩaitapan Moses taauzonii kakinaorii dau'u. Ukau'an Tominkaru pataka'utan nii ĩdyaun!” 50 Na'a'o ĩtuma Nicodemus, uruu Pharisee kapam; uruu makonka'oraz Jesus di'ii kiwiini'o dono zii. Ukian patumainao ati, 51 “Wakakinaorinaa kian kawana'ati, aonaa turuu wakabootan pidan oia'o di'iti, wamaabatakan ua'ii zii na'apam ukian na'iki wamaaitapakan ua'ii zii kanom manawun wuru'u usha'apaapanuz.” 52 Aizii ĩkian u'ati, “Pugaru kapam Galilee Baara san, mishii? Putominpan an Tominkaru Paradan saada-kariwai dau'u, putukapan nii, aonaa na'apainim nii prophet wa'atin Galilee Baara iki.” 53 Uruu dauna'an ipai pidannao kiwa'akan kida'a naa padapu iti.
Zuna kootowapa-kida-kao oba'orantapan idi
1 Aizii Jesus, umakon naa Olive Naawa iti. 2 Ba'oran kamoo, wakanada'akan zii ukaawa'akan naa powaa ati Tominkaru Dapu ati. Pidannao kaawa-kaawan kida'a naa u'ida'ati. Jesus sakanatan na'iki uru'u naa utominapa-kidan koshan pidannao. 3 Upu'u tiichaapauzonao Moses kakinaori dau'u na'iki Phariseenao kaawa-kida'akan zun, zaamata-kariwai oba'orantapan idi. Oroo'o naa ĩkadishita-kidan pidannao kanaapu ii. 4 Udauna'an ĩkian Jesus ati, “Tiichaa. Di'ora'a zun ikoda-kariwai oda'awupan ba'oran daiaru tuma. 5 Moses taanii kakinaorii kian, zun na'apa'o, marii ozowii-kao, oboo-kao ida'an kuba idi. Aizii pugaru mani, na'apam dii pukian na'apa'o dau'ati?” 6 Ĩna'apanuz u'ati, ĩabata'azon karikaonan na'iam uparadan pana'itin kakinaorii ai, ĩdakoapa-kinaa nii uruu naobanainao kanaapu ii. Mazan Jesus dawuka'akan pasakanatapa-kizi'i, usaadapa'akan paka'u shuwu idi kaatu ida'a. 7 Ĩpishautan pu'u zii uruu, Jesus saabaina'akan koshan pasakanatapa-kizi'i. Uru'u naa ukian ĩ'ati, “Na'ia'oram pidan unao bii a'o aonaa na'apaini'oram usha'apatan oia'o. Marii uruu kiwiini'o nii boowan oroo.” 8 Udauna'an udawuka'akan koshan. Na'apa koshan usaadapan paka'u shuwu idi. 9 Ĩabatan idi na'apam Jesus kian pa'ati, bauda'apa kida ĩmakon Jesus ai, atii ipai ĩmakon. Tunarunaonao kiwiin ĩmako'okan, udauna'an pa'inainao, ĩwa'aka'akan naa Jesus. Aizii wuru'u zunaabaz, pakawan zii okadishitapan na'ii. 10 Jesus saabainan pasakanatapa-kizi'i koshan. Uru'u naa ukian o'ati, “Na'iam naa ĩdyaun? Aonaa kanom wa'akinan, kaboota'o nii pugaru oia'o di'iti?” 11 “Aonaa,” okian u'ati. Na'iki Jesus kian o'ati, “Õgaru, aona'o nii kapam õkabootan oia'o di'iti pugaru. Pumako'o naa, mazan aona'a naa pusha'apata'ana'a oia'o koshan.”
Jesus kanada'o kawanu'o imi'i baara sannao ati
12 Bauda'apa kamoo, Jesus kakinaopan koshan pidannao, ukian ĩ'ati, “Õgaru wuru'u kanadapa'oraz imi'i baara sannao ati. Pidan zaamatinan an õ'ida'ati, kanada'o-karua'o nii umashaapan, na'iki aonaa na'apainim nii ubaiaapan maruta'o. Wuru'u kanada'oraz, uruu kakupa-kinai manawun.” 13 Phariseenao kian u'ati, “Pugaru, pu'ida'a'ora'a naa karikaonan pukakuwaapan, aonaa turuu puparadan mishida-kao.” 14 Jesus kian ĩ'ati, “Mishi õ'ida'a'o õkakuwaapan, mazan upu'u turuu õkuwaa mishida-kao! Usha'apanum kau'an õaitapa na'iki'oram õwa'atin na'iki na'iti'oram õmakopan. Unao, aonaa uaitapan na'iki'oram õwa'atin oo na'iti'oram õmakopan. 15 Unao, udakotan pidan oia'o nii, soo uzauda-kidan karikaonan. Õgaru, aonaa na'apa mani õdakotan pidan oia'o nii. 16 Mazan ‘oia'o uruu,’ oo, ‘kaimana'o uruu,’ õkian an pidan dau'ati, uruu mishi'o pa'an wuru'u õna'apanuz, usha'apanum kau'an, aonaa õba'orantina'o mani wuru'u õna'apanuz. Õdaru dyuuda'oraz õgaru, tuma'o wuru'u õgaruz. 17 Ukakinaorinaa kian, ‘Dya'utama'o pidannao kakuwaapan an na'apa kida manawun bauda'apa'o aimaakan dau'u, uruu aitapa-kao mishi'o wuru'u ĩkuwaaz.’ 18 Õkakuwaapan õdau'u, na'apa manawun õdaru, dyuuda'oraz õgaru kakuwaapan kawan õdau'u.” 19 Ĩkian u'ati, “Na'iam dii mooko puDaru?” Jesus kian ĩ'ati, “Unao, aonaa uaitapan kanom õgaru, ukau'an aonaa uaitapan õDaru! Uaitapan an mani õgaru, uaitapa mani õDaru kapam.” 20 Jesus paradan na'apa utominapa-kidan dono'o pidannao Tominkaru Dapu ii, maonapa puraata tauzo-kizinao ii, (Tominkaru Dapu tannaa ni'oraz). Mazan aonaa na'ia'oram pidan zaamatan uruu, usha'apanum kau'an aonaa zii amazada kaawan uzaamata-kinao nii.
Jesus kakinaopan mamishida-kainao paugaru
21 Aizii Jesus kian ĩ'ati koshan, “Õmakon ni'i naa di'iki'i. Udawatan nii õgaru, mazan umawakan nii u'oian bii'i. Õmako'ozoo-kizi iti, aonaa unao ka'iitan umakon.” 22 Ukau'an, Jewnao zowaunaanao kian pa'atiaaka. “Pazowiina'azon dau'ati'o õaitapan wuru'u ukianuz, ‘Õmako'ozoo-kizi iti, aonaa unao ka'iitan umakon,’ ukianuz?” 23 Jesus kian, “Unao, da'a sannao karikaonanu'u; õgaru, doko iki'o pa'an õwa'atin. Unao imi'i baara sannao! Õgaru, aonaa imi'i baara san mani. 24 Uruu idi'o tawuru'u õkianuz u'ati, umawakan nii u'oian bii'i. Mishi'o nii umawakan u'oian bii'i, umamishidakan idi õgaru'u naa wuru'u.” 25 “Kanom mooko pugaru?” ĩkian u'ati. Jesus kian, “Õgaru wuru'u, õkowaadaniaz u'ati kiwiin zii. 26 ‘Oia'o,’ turua'o õkian unao dau'ati, mazan aona'o nii õna'apan, usha'apanum kau'an, õparadan soo dyuuda'oraz õgaru dyuudan kawana'ati, na'iki õaitapa uruu sakitapa'o uparadan. Kanom õabatanii uruu di'iki, uruu õkowaada pidannao ati da'a'a imi'i baara'a.” 27 Aonaa ĩaitapan uparadinan paDaru aokazi ia'o daua'o wuru'u. 28 Uruu idi Jesus kian ĩ'ati, “Usawatan dono'o naa Daonaiora Aokazi Iki'o, uaitapan ni'i naa mishi õgaru'u naa wuru'u. Uruu dono uaitapan nii, õsha'apatan aimaakan aonaa õaipan ati'o mani, mazan õparadan na'apa manawun õdaru tominapa-kidan kawana'ati õgaru. 29 Aizii dyuuda'oraz õgaru, karikaonanu'o una'auzon õtuma, aona'o nii uwa'akauzon õgaru õba'orantin, usha'apanum kau'an ukonaukii-kidanii ipai aimaakan õsha'apatanii.” 30 Iriba pidannao mishidan Jesus, ĩabatan idi na'apam ukian.
Abraham dainao
31 Ukau'an Jesus kian Jewnao ati mishidainaouz uruu, “Karikaonanun an uizo'atipan õkakinaori, uruu mishi'o õpidanannao unao. 32 Uaitapan nii mishi'o kuwai Tominkaru di'iki'o. Na'iki mishi'o kuwai muudin-kidan nii unao upoitoruitapa-kao ai.” 33 Ĩkian Jesus ati, “Abraham takaan-daunnao mazan waunao, na'iki aonaa na'apaini'oram ba'oran naobanai poitoruitapauzon waunao. Na'apa'oram ati'o dii kaiwuru'u, ‘mishi'o kuwai muudin-kidan nii unao upoitoruitapa-kao ai,’ pukianuz?” 34 Jesus kian ĩ'ati, “Mishi'o kaiwuru'u õkianuz u'ati: Pidan sha'apata'o oia'o, uruu oia'o poitoru wuru'u. 35 Aonaa karikaonanu'o nii mani naobanai taapan papoitoru padapu'u. Mazan udani, karikaonanu'o nii pa'an utaapa-kao naobanai dani nii. 36 Ukau'an Tominkaru Dani muudin-kidan an unao upoitoruitapa-kao ai, mishi'o nii manawun aonaa poitorui'i naa mani unao. 37 Õaitapa Abraham takaan-daunnao unao. Mazan upu'u zii uzowia'azon õgaru, usha'apanum kau'an, aonaa utaapan kaimanaiman õkuwaa unyukunuu ii. 38 Õgaru, õkakuwaapan õDaru tukapa-kidanii daua'o õ'ati. Unao, usha'apatan aimaakan udaru kian kawana'ati.” 39 Aizii ĩkian u'ati, “Abraham mazan wadaru nii.” Jesus kian ĩ'ati, “Umishiin an mani Abraham dainao unao, na'apa mani umashaapan uruu mashaapauzon kawan. 40 Õabatan kawana'ati mishi'o kuwai Tominkaru di'iki, uruu õkowaada unao ati. Mazan upu'u zii uzowia'azon õgaru. Abraham, aonaa na'apa'o mani ukaduz! 41 Unao sha'apaapanii kidaz, udaru kaudin-kizi pa'an wuru'u.” Na'iki ĩkian u'ati, “Tominkaru, uruu mazan bauda'apa wadaru. Aonaa ba'oran wadaru nii.”
Satan dainao
42 Jesus kian ĩ'ati, “Umishiin an mani udaru Tominkaru, umarainapa mani õgaru, usha'apanum kau'an uruu di'iki'o õwa'atin. Uruu dyuudanii õgaru, aonaa õaipana'ati'o mani wuru'u õwa'atinuz. 43 Kandii nii aonaa uaitapan zoobaba kaiwuru'u õparadanuz? Usha'apanum kau'an aonaa uzaamata'azon õkuwaa. 44 Unao Satan dainao, uruu idi'o usha'apata'azon aimaakan udaru aipan kawana'ati. Uruu, sakadin-kizai iki'o uzowian pidan, na'iki aonaa na'apainim ukonaukii-kidan mishi'o kuwai, usha'apanum kau'an aonaa na'apainim uparadan mishiin. Uruu mariidinauzo na'iki ipai mariidinauzonao tomin-kizi! 45 “Õgaru, mishi'o pa'an õkuwaa, mazan uruu idi'o aonaa unao mishidan õparadan. 46 Na'ia'oram dii pidan kaida'a'a, turua'o ukainaabatan õ'oian? Õkowaadan pu'u mishi'o, mazan kandii nii aonaa umishidan õparadan? 47 Tominkaru pidanan, uruu abata Tominkaru paradan. Unao, aonaa uzaamatan Tominkaru paradan kida, usha'apanum kau'an aonaa upidanannao mani unao.”
Jesus paradan padau'an
48 Aizii Jewnao kian Jesus ati, “Waaitapa sha'atii, wakianuz pudau'ati, Samaria san pugaru, na'iki oia'o doronai zaamatapanii.” 49 Jesus kian ĩ'ati, “Aonaa oia'o doronai zaamatapan õgaru, aonaa masakauda'u. Õgaru, umanawunu'o nii õtaapan õDaru, mazan unao, aonaa utaapan õgaru umanawunu'o nii. 50 Õgaru, aonaa õaipinan umanawunu'o nii. Mazan kaina'a bauda'apa pa'an, aipa'o õtaapa-kao umanawunu'o nii, na'iki uru'o nii aitapa na'apam pasha'apatan õgaru. 51 Mishi'o kaiwuru'u õkianuz: Pidan izo'atipan an õkakinaori, aonaa na'apainim nii umawakauzon.” 52 Uru'u naa Jewnao kian u'ati, “Aizii waaitapa, kaina'a mishi oia'o doronai pu'ida'a! Abraham mawaka uruu, prophetnao mawaka ĩnao kapam. Mazan upu'u zii pukian, ‘Pidan izo'atipan an õkakinaori, aonaa na'apainim nii umawakauzon.’ 53 Oo puwazootapanii sha'a wadaru Abraham umanawunun? Uruu mawaka'a naa, prophetnao na'apa kapam. Kanom kaduz mooko pu'itiiman pugaru?” 54 Aizii Jesus kian ĩ'ati, “Õdakotinan an õ'ida'a umanawunu'o nii, madiwautapa-ka'o wuru'u. ÕDaru pa'an wuru'u umanawunutapa'oraz õgaru. Uruu unao dakotaniaz uTominkarun nii. 55 Unao, aonaa uaitapauzon uruu, mazan õgaru, õaitapa pa'an uruu. Aizii ‘Aonaa õaitapauzon uruu,’ õkian an, mariidinauzo õgaru, na'apa unao kawan. Mazan õgaru, õaitapanii pa'an uruu, ukau'an õizo'ati uparadan. 56 Udaru Abraham, tuukii ukonaukian uaitapan idi patukapan nii zii õkaawan. Na'iki utukapa mishi õkaawan, uruu idi tuukii ukonaukian.” 57 Jewnao kian u'ati, “Aonaa zii putunarunaoun, mazan na'apa dii mooko putukapan Abraham?” 58 Jesus kian ĩ'ati, “Mishi'o kaiwuru'u õkianuz: Õgaru na'a'ora'a naa Abraham tominan ua'ii.” 59 Uru'u naa ĩzaamata'akan kuba kida paboori nii, ĩzowia'aka'azon naa uruu. Mazan Jesus dizina'akan ĩ'ai, umako'okan pidannao bii an aka, na'iki umako'okan naa Tominkaru Dapu iki.
Jesus saabaan ishaawunu'o awun
1 Pamakopan pu'u, Jesus tukapan pidan pashakatan iki'o u'ishaawunun. 2 Sariapa utominapa-kidaniinao pishaanuzu, “Tiichaa, kanom oian idi'o arawu shakatan ishaawun nii, pa'oian idi'o oo udaronao oian idi'o?” 3 Jesus kian ĩ'ati, “Ushakatan ishaawun nii, aonaa pa'oian, oo udaronao oian idi'o mani, mazan u'ishaawunun ida'ana'o nii Tominkaru ma'ozakan kainaabata-kao. 4 Wakanadan pu'u zii, marii washa'apaapa dyuuda'oraz õgaru aiapanii washa'apatan; kaina'iki maruta'o wa'atin, uruu dono aonaa na'itim ni'i naa kaudin-karu. 5 Õna'an kawana'ati da'a'a imi'i baara'a, õgaru wuru'u kanada'oraz imi'i baara ida'a.” 6 Jesus kian dauna'an na'apa, usopitan pazaadako imi'i baara ati. Udauna'an uraua'akanuz imi'i tuma, na'iki uruu idi uzichian naa ishaawun awun. 7 Ukian u'ati, “Aizii puchikaanaka daari puawun ai Siloam Baoko ii.” (Siloam, kii-karu dyuuda-kariwai kia'o Jewnao paradan ida'an.) Uru'u naa umakon uchikaankan naa paawun. Ukiwan powaa ati kaimana'a naa utukapa'akan. 8 Aizii umin-dazabazinao, na'iki ba'oran pidannao naudina'oraz naa ĩtukapauzon upishautan aimaakan pidannao ai, ĩkian pa'atiaaka, “Aonaa mooko arawu mani tawuru'u sakanatapauzoz na'iki pishautauzoz pidannao aimaakan kida dau'ati?” 9 Ba'orainao kian, “Uruu wuru'u,” mazan ba'orainao kian, “Aonaa uruu mani, soo uaidinpan karikaonan na'apa uruu kawan.” Mazan uruu kian ĩ'ati, “Õgaru da'i tawuru'u pishautauzoz pidannao aimaakan dau'ati.” 10 Ĩkian u'ati, “Mazan na'apa di'i naa puawun saabaina'akan, putukapa-kinaa nii?” 11 Ukian ĩ'ati, “Pidan Jesus kia'o u'uu, utoma'akan daari na'iki udauna'an uzichian õawun u'idi, udauna'an udyuudan õchikaankan õawun Siloam Baoko ii. Õchikaan dauna'an daari õawun ai, kaimana'a naa õtukapa'akan.” 12 Ĩpishaan uruu, “Na'iam dii uruu?” ĩkian. “Aonaa õaitapan,” ukian ĩ'ati.
Phariseenao aitapa'azon kanom tukapa-kidanii ishaawun
13 Udauna'an ĩ'ua'atiitan naa uruu Phariseenao di'iti. 14 Jesus tomanuz daari na'iki usaabaanuz pidan awun, Sookapa-karu Kamoon dono'o. 15 Uru'u naa Phariseenao pishaan koshan uruu, na'apa'oram naa uikodan patukapa-kinaa nii. Ukian ĩ'ati, “Uzichia'akan daari õawun ida'an, udauna'an õchikaan õawun baara, na'iki'o kaimana'a naa õtukapa'akan.” 16 Baokoinao Phariseenao kian, “Pidan sha'apata'oraz aimaakan kaikapa'a, aonaa Tominkaru di'iki'o mani uwa'atin wuru'u, usha'apanum kau'an, kaudin uruu Sookapa-karu Kamoon dono.” Baokoinao kian, “Mazan na'apa dii mooko oia'o pidan turuan pasha'apatan umanawunu'o aimaakan kida kaikapa'a?” Uruu pana'a sodi kida ĩdi'itinpan. 17 Uru'u naa Phariseenao pishaan uruu koshan, “Pukian usaabaanii puawun, ukau'an na'apam dii pukian udau'an?” Ukian ĩ'ati, “Tominkaru prophetin uruu.” 18 Jewnao zowaunaanao, aonaa ĩmishida'azon ishaawunu'o da'i uruu, uruu idi ĩdapada-kidan naa udaronao. 19 Uru'u naa ĩpishaan ĩdyaun, “Udani mishi arawu'u? Ishaawunu'o da'i mishi uruu pashakatan di'iki? Mazan na'apa di'i naa wuru'u utukapanuz aizii?” 20 Aizii udaronao kian ĩ'ati, “Waudani mishi uruu, na'iki ishaawunu'o ushakatan. 21 Mazan wuru'u utukapanuz naa, aonaa waaitapan na'apa'oram, na'iki aonaa waaitapan kanom aipan ati'o. Upishaa'a naa uruu, aonaa duusodi'o zii mani uruu, turua'o nii ukowaadan paaipan ati.” 22 Aizii udaronao kianuz na'apa, ĩtarian idi'o Jewnao zowaunaanao ai. Usha'apanum kau'an, Jewnao baokopatanii panyukunuu, kanom kian an, “Jesus, uruu Christ,” aona'o ni'i naa powa'a utaapada-kao ubaokopatinan synagogue ii, choochiipauzonao tuma. 23 Uruu idi'o udaronao kian, “Aonaa duusodi'o zii mani uruu, upishaa'a naa uruu.” 24 Powa'a koshan, itamautannaa aizii ĩdapada-kidan wuru'u ishaawunuz da'i. Ĩkian u'ati, “Pukowaada Tominkaru awun za'a mishi'o wuru'u puparadanuz! Usha'apanum kau'an waaitapa Jesus kakuda'oraz pugaru, oia'o pidan uruu.” 25 Ukian ĩ'ati, “Aonaa õaitapan, oia'o mani uruu oo aonaa. Mazan bauda'apa aimaakan õaitapanii pa'an: kiwiin ishaawunu'o da'i õgaru, mazan aizii kaimana'a naa õtukapan.” 26 “Na'apa dii mooko usha'apatan pugaru putukapa-kinaa nii?” ĩkian u'ati. 27 “Õkowaada'a naa sha'atii u'ati, mazan aonaa umishidan õkuwaa,” ukian ĩ'ati. “Kandii ni'i naa uabata'azon powa'a zii koshan da'i? Oo uaipan sha'a unao kapam utominapa-kidaniinao nii?” 28 Uru'u naa ĩdakoopa'akan uruu, ĩkian u'ati, “Pugaru pa'an wuru'u pumin-na'apaimanan tominapa-kidanii, mazan waunao Moses tominapa-kidaniinao pa'an. 29 Waaitapa Tominkaru paradanii Moses ati pa'an, mazan arawu'u Jesus kii-kizaiz, aonaa waaitapan na'iki'oram uwa'atin!” 30 Ukian ĩ'ati, “Mazan na'apam dii mooko? Aonaa mishi uaitapan na'iki'oram uwa'atin, mazan usaabaa õawun! 31 Waaitapa aonaa Tominkaru nyukunuupan pidan oia'o paradan an pa'ati. Mazan pidan marainpa'o uruu na'iki sha'apatina'o uaipan kawana'ati, uruu mishi'o nii pa'an Tominkaru nyukunuupan uparadan. 32 Na'iki aonaa na'apainim zii uabatauzo-kao, pidan pashakatan di'iki'o uawun ishaan, ikodan patukapa-kinaa nii ba'oran pidan di'iki. 33 Soo mishi uruu pidan wa'atin an Tominkaru di'iki, turuu pa'an usha'apatan na'apa'o aimaakan.” 34 Ĩkian u'ati, “Pugaru oia'o manawun pushakatan, mazan upu'u zii kaikin putominapa-kida'azon waunao?” Na'iki'ora'a naa aona'a naa ĩkashaapan ubaokopatinan powa'a pidannao tuma synagogue ii.
Pidannao ishaawunnao kawanu'o
35 Aizii Jesus abatan dono'o naa, aonaa ĩkashaapan umorotan synagogue iti powa'a, uru'u naa umakon u'idi'iti. Ukian u'ati, “Pumishida wuru'u Daonaiora Aokazi Iki'oraz?” 36 Ukian u'ati, “Pukowaadan dono na'ia'oram uruu, õmishidan nii uruu!” 37 Na'iki Jesus kian u'ati, “Putukapani'i naa uruu, na'iki kai'oraz uruu wuru'u paradina'oraz putuma.” 38 Sariapa pidan kian u'ati, “Õmishida, õNaobanaa!” Ukodoru'ukan u'ati na'iki utaan ipai padi'itinpan u'ati. 39 Jesus kian, “Õkaawan da'ati'i õtukapa-kida'anan na'apam pidannao oian. Ukau'an ishaawun kawanuinaouz, ĩtukapan nii. Na'iki dakotinpainaouz aitapainao nii, ishaawunnao kawanu'o nii.” 40 Kaina'a Phariseenao udazaba'a, ĩabata wuru'u uparadanuz na'apa, uru'u naa ĩpishaan uruu, “Waunao mani, ishaawunnao mooko kapam?” 41 Jesus kian ĩ'ati, “U'ishaawunun dono mani, aonaa mani na'apam kii-karu u'oian dikin ii padamata. Mazan ukian idi aonaa u'ishaawunun, ukau'an u'oian na'auzon nii karikaonan u'ida'a wuru'u.”
Kaznizo daua'o kuwai
1 Jesus kian, “Mishi'o kaiwuru'u õkianuz: Soo koidimikinao na'iki antamikinao wuru'u zaida'oraz kaznizo korarannaa paawa an aka. Aonaa ĩmorotan paniinom ida'an korara nazo iti. 2 Mazan pidan morota'oraz paniinom ida'an, uruu pa'an kaznizonao ka'uzatiki. 3 Uruu ati'o pa'an korara paniinomizinaa taapiki da'atan paniinom. Kaznizonao aitapani'i naa uparadan. Udapadan ĩdyaun udakotan ida'an ĩ'uu bauda'apa kida, na'iki ukiwiitan naa ĩ'ua'ati ukodita-kidan dono ĩdyaun. 4 “Aizii ukodita-kidan dono'o naa ĩdyaun, uru'u naa umakon ĩ'ua'ati. Kaznizonao da'anan naa uruu ĩaitapan idi'i naa uparadan. 5 Mazan tawarai aona'o nii ĩda'anan, ĩkidoopa'akan nii pa'an u'ai, usha'apanum kau'an aonaa ĩaitapan uparadan.” 6 Jesus kowaadan wuru'u kuwaiz, mazan aonaa Phariseenao aitapan na'apa'oram manawun wuru'u ukuwaaz.
Kamarainpanu'o kaznizo ka'uzatiki
7 Ukau'an Jesus kian ĩ'ati koshan, “Mishi'o kaiwuru'u õkianuz: Õgaru wuru'u paniinom, kaznizonao dobaapa-kiziz. 8 Ipai baokoinao kaawainaouz kiwiitapa õ'ai, ĩnao koidimikinao na'iki antamikinao. Mazan aonaa kaznizonao nyukunuu-atin ĩdyaun. 9 Õgaru wuru'u paniinomizi. Kanom morotan an õgaru ida'an, uruu kazannaatapa-karu nii. Õgaru ida'ana'o nii umorotan na'iki ukoditan, na'iki uikodan nii paaroapa-kizi nii. 10 Koidimiki kaawan soo ukoidapa'anan, uzowiibi'ia'anan na'iki umainaabata'anan kaznizonao. Õgaru, õkaawan pa'an turuu kizi ĩkakupan, na'iki kaimanaiman kizi manawun ĩkakupan. 11 “Õgaru wuru'u kamarainpanu'oraz kaznizonao ka'uzatiki. Aizii wuru'u kamarainpanu'oraz kaznizonao ka'uzatiki, turuu pa'an umawakan pakaznizonnao dikin ii ukazannaata kizi ĩdyaun. 12 Pidan kawinipinaapa-kariwaiz utaapan ba'oran pidan uzanao, aonaa kaznizonao ka'uzatiki kawanu'o mani wuru'u, usha'apanum kau'an aonaa u'uzanao mani wuru'u utaapaniaz. Utukapan an baudokoru wa'atin, ukidoopa'akan nii, uwa'aka'akan naa wuru'u kaznizonaouz. Uru'u naa mishi baudokoru zaamata'akan naa kaznizo, aizii ba'orainao dimaadanaa'akan naa. 13 Kawinipinaapa-kariwaiz kidoopa'akan, ukaudinan idi'o soo puraata dikin ii karikaonan, aona'o umarainpan kaznizonao. 14-15 “Õgaru kamarainpanu'o kaznizonao ka'uzatiki. Õdaru aitapanii õgaru na'iki õaitapanii õdaru, na'apa'o manawun wuru'u õaitapanuz õkaznizonnao na'iki ĩaitapanuz õgaru kapam; na'iki turuu õmawakan ĩ'ati õkazannaata kizi ĩdyaun. 16 Kaina'a ba'oran õkaznizonnao, aonaa di'ora'a tonaazinaa di'iki'o mani. Ĩnao, õna'akan nii na'iki ĩmishidan nii õparadan kapam, na'iki uruu dono soo bauda'apa'o nii kaznizonao tonaazinaa, na'iki bauda'apa'o nii ĩka'uzatiki. 17 “Õdaru marainpan õgaru, usha'apanum kau'an õkashaapinan idi mawaka-karu ati, turuu kizi õkakupan powa'a iti koshan 18 Aonaa kanom turua'o uzowian õgaru paaipan kawana'ati. Soo õ'ida'a'o karikaonan wuru'u õkashaapinanuz! Õka'iita õtaainan na'iki turuu õkakudan powaa iti õdaru aipan kawana'ati.” 19 Ĩabatan idi na'apa'o Jesus kuwaaz, sariapa koshan Jewnao di'itinpan pana'a kida pairiban ai. 20 Iriba ĩkian udau'an, “Kaina'a'o oia'o doronai u'ida'a, uruu idi'o umadoronaa-ziiwan! Kandii nii uabata'azon ukuwaa.” 21 Mazan ba'orainao kian, “Turuu mooko pidan kaina'a'o oia'o doronai u'ida'a kakuwaapan kaikapa'a? Aonaa turuu na'apa'o tukapa-kidan ishaawunu'o pidan.”
Jewnao mamishidakan
22 Amazada wadidiizon dono, Jesus na'ia'o Jerusalem ii, Tominkaru Dapu Saabauzo-kao Kamoon konaukii-kida-kao dau'ati. 23 Jesus chi'ika'anpan waoko itinapu, Solomon's Porch kia'oraz udakotapa-kao di'ii'aka, Tominkaru Dapu ia'oraz. 24 Pidannao wa'atin ĩkasaba'ukinan naa udazaba ati. Na'iki ĩkian u'ati, “Na'apam nii dii ukotua'ikin wazaudapan pukowaadan wa'ati kanom wuru'u pugaruz? Pugarun dono Christ, pukowaada'aka'a naa wa'ati kai.” 25 Jesus kian ĩ'ati, “Õkowaadani'i naa sha'atii u'atizu, mazan aonaa umishidan. Õsha'apataniaz umanawun kida'o aimaakan, õdaru dyuudan kawana'ati'o wuru'u, kainaabata'o nii kanom õgaru. 26 Mazan unao aonaa umishidan, usha'apanum kau'an aonaa õkaznizonnao mani unao. 27 Mazan õkaznizonnao, ĩaitapa pa'an õparadan na'iki õaitapa ĩdyaun kapam, na'iki uruu idi ĩda'anan õgaru. 28 Aizii da'anpainaouz õgaru, õtaa ĩ'ati karikaonanu'o kakupa-karu aonaa kizi ĩmawakauzon. Aonaa turuu ĩkazata-kao õka'u iki. 29 ÕDaru taanii ĩdyaun õ'ati, na'iki uruu umanawunu'o ipai ba'orainao ai. Aonaa turuu ĩkazata-kao õdaru ka'u iki. 30 ÕDaru na'iki õgaruz bauda'apa'o.” 31 Uru'u naa koshan Jewnao zaamata'akan kuba paboori kida nii, ĩzowia'aka'azon naa uruu. 32 Jesus kian ĩ'ati, “Õsha'apata iriba kaiman kida'o aimaakan unao awun za'a, õDaru dyuudan kawana'ati. Na'ia'oram dikin ia'o wuru'u uzowia'azoonuz õgaru kuba idi?” 33 Ĩkian u'ati, “Aonaa pusha'apatan idi'o mani kaiman kida'o aimaakan waboowa'azon pugaru, mazan puwazootapa'azon idi'o Tominkaru. Pugaru pidan karikaonan, mazan upu'u zii pudakotinpan Tominkaru nii!” 34 Jesus kian ĩ'ati, “Aonaa mooko Tominkaru kian unao kakinaorinaa saada-kariwai ida'a, ‘Unao tominkarunao’ kii? 35 Tominkaru dakotan wuru'u pakuwaa kaawa-kizinaouz pidannao, ‘tominkarunao’ kii, na'iki waaitapa, saada-kariwaiz kida Tominkaru paradan karikaonanu'o nii umishiin. 36 Mazan kandii nii ukian, ‘puwazootapa'azon Tominkaru pudakotinpan ida'an Tominkaru dani nii’? Õgaru, Tominkaru saabaani'i naa na'iki udyuudanii imi'i baara ati. Ukau'an turuu pa'an õdakota-kao Tominkaru Dani nii. 37 Õmasha'apatakan an mani õdaru dyuudanii õsha'apatan, aonaa kanom nii umishidan õgaru; 38 mazan õsha'apatan dono õdaru kaudin-kizi, umamishidakan pu'u padamata õgaru, turua'o padamata umishidan wuru ida'ana'a õsha'apatanii kidaz. Uruu ida'ana'o nii uaitapan kaimanaiman õgaru na'iki õdaru bauda'apa'o, na'iki na'apa kida'o waunao.” 39 Ĩaipan naa koshan pazaamata'akan uruu, mazan sariapa Jesus kidoopa'akan ĩ'ai. 40 Udauna'an Jesus makon powaa iti Jordan baza iti, John Chikaawunuupauzo-kizi iti. Una'ia'akan pu'u, 41 iriba pidannao kaawan u'ida'ati, na'iki ĩkian pa'atiaaka, “Aonaa mishi John sha'apatan umanawun kida'o aimaakan, mazan ipai ukuwaa mishiin di'ora'a pidan dau'a'a!” 42 Na'iki iriba na'iainao pidannao mishidan uruu.
Lazarus mawakan
1 Kaina'a'o da'i pidan Lazarus kia'o u'uu, ukarinauzon. Bethany ia'o umashaapan. Dya'utam udadakoonao Mary na'iki Martha kia'o ĩ'uu, na'ia'o ĩmashaapan kapam. 2 (Mary ramauda'oraz da'i Naobanai Jesus kidiba kaduunu'o ramau idi, na'iki o'inoonuzu padizo idi. Oroo azu Lazarus wuru'u karina'oraz.) 3 Uruu idi udadakoonao dyuudan paparadan Jesus di'iti. Ĩkian, “Naobanai, pumarainpaniaz pupaonaru, tuukii ukarinaan kai.” 4 Mazan Jesus abatan dono wuru'u kuwaiz, ukian, “Lazarus karinaanuz, aonaa umawaka-kinaa ni'o mani wuru'u; mazan Tominkaru ma'ozakan umanawunu'o, kainaabata-kinao ni'o, na'iki na'apa'o ida'ana'o nii pidannao aitapan Tominkaru Dani umanawunun.” 5 Aizii Jesus, umarainapanii Martha, Mary, na'iki Lazarus. 6 Mazan uabatan pu'a'a naa kuwai Lazarus karinaan dau'u, una'ian zii dya'utam kamoo. 7 Uruu dauna'an Jesus kian patominapa-kidaniinao ati, “Aizii, wamako powaa iti Judea Baara iti.” 8 “Tiichaa,” ĩkian u'ati, “Diiki'i sha'atii Jewnao zowia'azon pugaru na'ii kuba idi, mazan upu'u zii pumako'ozon powaa iti?” 9 Jesus kian ĩ'ati, “Kaina'a 12 hours wakandan bauda'apa'o kamoo ida'a. Mishii na'apa? Pidan chi'ikapan an wakandan pu'u aona'o nii ukaboinan, usha'apanum kau'an kaina'a zii kanadapa'o imi'i baara. 10 Mazan pidan chi'ikapan an wamarutan pu'u, ukaboinan nii, usha'apanum kau'an aonaa kanada'o nii u'ida'a.” 11 Ukakuwaapan dauna'an, ukian ĩ'ati, “Da'awu'uka'a naa wapaonaru Lazarus, mazan õmakon nii na'iti õpokowaua'anan uruu.” 12 Utominapa-kidaniinao kian u'ati, “Naobanai, kaimana'o wuru'u uda'awunuz, ukakudan nii wuru'u.” 13 Jesus paradanuz Lazarus mawakan daua'o, mazan ĩ'itiiman mishi'o nii manawun Lazarus da'awun. 14 Uru'u naa Jesus kowaadan ĩ'ati kaimanaiman, “Mawaka'a naa Lazarus. 15 Mazan kaiman zii, aonaa õgaru nii na'ii, usha'apanum kau'an na'apa'o ida'ana'o nii unao mishidan kanom wuru'u õgaruz. Aizii wamako'o naa u'idi'iti.” 16 Thomas (Shamaan kia'oraz udakotapa-kao) kian pamin-tominpannao ati, “Aushaa, wamako wanaobanaa tuma, marii wazowii-kao utuma.”
Jesus uruu kakupa-kinai
17 Aizii, Jesus kaawan dono'o naa Bethany iti, ukowaada-kao u'ati 4 kamoo dobatan naa Lazarus nanaa na'ian baaranai ii. 18 Bethany maonapa'o Jerusalem iti, aonaa uikodan dya'utam mile. 19 Aizii Lazarus mawakan dauna'an, iriba pidannao kaawan Judea Baara iki'o, ĩmorowauta'anan Martha na'iki Mary ida'ati, ĩkonaukiida'anan ĩnyukunuu kowas, ĩ'azu mawakan idi. 20 Martha abatan dono'o naa pidannao kian, “Wa'ati'i naa Jesus!” Uru'u naa oikodapa'ana'akan uruu, mazan Mary ona'ian kabaun ii. 21 Martha kian Jesus ati, “Naobanai, puna'an dono mani da'a'a, aonaa mani õ'azu mawakan padamata! 22 Mazan õaitapa, pupishaan an Tominkaru kai kanom dau'ati karikaonan, ukawana'ati'o nii usha'apan.” 23 Jesus kian o'ati, “Pu'azu kadishitan nii powaa iti.” 24 Martha kian u'ati, “Õaitapa, ukadishitan nii koshan, kadishita-karu kamoo dono.” 25 Jesus kian o'ati, “Õgaru wuru'u kadishita-kinaiz, na'iki õgaru wuru'u kakupa-kinaiz. Pidan mishida'oraz õgaru, kakuda'o nii umawakan pu'u padamata. 26 Aizii kanom mishi'o ukakupan, na'iki mishida'o õgaru, aonaa na'apainim nii umawakauzon. Pumishida?” 27 “Oo, Naobanai!” okian u'ati. “Õmishida kaimanaiman, pugaru wuru'u Christ, Tominkaru Dani, kaawa'o ni'oraz imi'i baara ati.”
Jesus kasha'ora-kidan mawaka-karu
28 Martha paradan dauna'an Jesus ati, okiwa'akan naa powaa iti. Uru'u naa oparadan pa'inaozo Mary ati karikaonan. “Kaina'a'ora'a naa mishi watiichaan, utukapa'azon pugaru,” okian o'ati. 29 Mary abatan idi kaikapa'ora'a, uru'u naa omako'okan, oikodapa'anan uruu. 30 (Aizii Jesus, aonaa zii ukaawan wiizai ati, pakawan zii na'ii Martha ikodapanaka-kizi ii uruu.) 31 Aizii kabaun nazo iainaouz pidannao, konaukiida'anainaouz onyukunuu, ĩtukapan idi Mary kodita'akan dopiauda'u kabaun nazo iki, ĩ'itiiman omuraapa'anan nii baaranai iti kowas, uruu idi ĩmakon odawu'ati. 32 Aizii Mary ikodapan dono'o naa Jesus, sariapa okodoru'ukan u'ati ukanaapu'u na'iki okian u'ati, “Naobanai, puna'an dono mani da'a'a, aonaa zii mani õ'azu mawakan padamata!” 33 Jesus tukapan idi Mary na'iki pidannao otumainaouz zaadinan, sariapa uto'oran panyukunuu ii mazan tuukii ukasha'oran kapam. 34 Ukian ĩ'ati, “Na'iam dii ubaaranaa?” Ĩkian u'ati, “Puwa'ati da'ati'i, Naobanai, putukapa kizi.” 35 Jesus zaada'akan naa. 36 Pidannao kian pa'atiaaka, “Aushaa utukapa, tuukia'o umarainpan Lazarus!” 37 Mazan baokoinao kian, “Utukapa-kidanii sha'atii ishaawun, mishii? Ukau'an, ukaawan dono mani Lazarus karinaapan pu'u zii, ukakuda mani uruu padamata.”
Jesus kakudan Lazarus
38 Powa'a zii koshan Jesus nyukunuu kasha'oran tuukia'o ida'an, uru'u naa umakon na'iki ukaawan naa baaranai ida'ati. Kuba uun ida'a'o wuru'u ubaaranaaz, na'iki taratapa-kariwai udaru'o kuba idi. 39 Uru'u naa Jesus dyuudan pidannao zikadan wuru'u kuba, baaranai taratapa-kinaoaz. Martha kian u'ati, “Naobanai, dyupusha'ora'a naa wuru'u, puaitapanii 4 kamo'o naa udida-kao dauna'an.” 40 Na'iki Jesus kian o'ati, “Aonaa mooko õkian, pumishidan an, putukapan nii na'apam Tominkaru umanawunun kainaabatinan?” 41 Uru'u naa pidannao kidu'ukan naa wuru'u kubaz. Udauna'an Jesus awunuupan doko iti na'iki ukian, “Õdaru, kaiman mishi manawun pugaru õ'ati, puabata da'i õparadauzon an pu'ati. 42 Õaitapa karikaonan da'i puabatauzon õparadan. Mazan õparadan pu'ati kaikapa'a, di'oraz pidannao na'an idi'o, marii kizi ĩmishidan pudyuudanii õgaru.” 43 Utoriinpan dauna'an, ukian diiwa'o ida'an, “Lazarus, pukodita da'ati'i!” 44 Mawaka'oraz pidan kodita'akan naa. Uka'u na'iki ukidiba watudinapa kida kamicha idi, na'iki uawun baara kamicha idi ubazobatinpan. Jesus kian pidannao ati, “Ubuzuuta kamicha u'ai, marii kizi'i naa umakon.”
Jesus zowia'azoo-kao daua'o
45 Iriba morowautankainaouz Mary ida'ati, tukapainaouz Jesus sha'apatan aimaakan, mishidan uruu. 46 Mazan baokoinao kiwan na'iki ĩkakuwaapan naa Phariseenao ati, Jesus sha'apatanii dau'u. 47 Uruu idi'i naa Phariseenao na'iki faadaanao zowaunaanao miitiniipan baokoinao Jewnao zowaunaanao tuma. “Na'apa dii washa'apatan uruu?” ĩkian. “Aushaa udi'itapa, wuru'u pidanaz, iriba'a naa usha'apatan umanawun kida'o aimaakan! 48 Wataapadan dono usha'apaapan na'apa kida'o aimaakan, ipai'o ni'i naa pidannao zaamatinan u'idi'iti, na'iki udauna'an Romannao wa'atin nii ĩkaboobi'ian nii Tominkaru Dapu na'iki ĩzowia'anan wawiizi sannao!” 49 Bauda'apa ĩbii ia'o, Caiaphas kia'o u'uu. Uruu Umanawunu'o Faadaa uruu wunu ida'a. Ukian, “Unao pidannao, maaitapin-kainao karikaonan! 50 Aona'a mooko uaitapan, powa'a'o nii ukaimanan bauda'apa'o pidan mawakan an pidannao dikin ii, wawiizi sannao mainaabata-kao ai manawun?” 51 Caiaphas na'apanuz aonaa paaipan kawana'ati'o mani. Uruu wuru'u Umanawunu'o Faadaa uruu wunu ida'a. Ukau'an uparada'akanuz na'apa ukowaada'akan naa Jesus wuru'u mawaka'o ni'oraz Jewnao donozinaa ati. 52 Mazan aonaa soo ĩnao ati'o nii mani karikaonan. Umawakan nii Tominkaru pidanannao baokopatin-kinaa nii, mashaapainaouz ba'oran wiizai ii aka kida kapam. 53 Ĩbaokopatinankan di'iki'ora'a naa, Jewnao zowaunaanao sakadan pakadakotinan pazowia'azon dau'u Jesus. 54 Uruu idi aona'a naa Jesus chi'ika'anpan kainaabatinapa Jewnao bii an powa'a. Na'iki'ora'a naa umakon Ephraim iti, amazada mapidantaka'o di'itanpu'oraz, na'ia'a naa uruu patominapa-kidaniinao tuma. 55 Maonapa'a naa Passover Kamoo kaawan, na'iki iriba pidannao munapo kida'o ĩmashaapan makon Jerusalem iti, ĩchikaina'anan naa Jewnao kakinaorinaa kawana'ati, turuu kizi ĩbaokopainpan pidannao tuma Passover Kamoon dono. 56 Ĩzaudapan Jesus na'iki ĩkian pa'atiaaka udau'an pabaokopatinpan pu'u Tominkaru Dapu ii, “Wa'ati'o nii puzauda-kidan uruu da'ati'i baokopainapa-kizai ati?” 57 Aizii faadaanao zowaunaanao na'iki Phariseenao kii akani'i naa pidannao ati, “Kanom aitapan dono na'iam Jesus, marii pa'i ukowaadan sariapa wa'ati, wazaamata kizi na'iki wakootowapa-kida kizi uruu.”
Mary ramaudan Jesus kidiba
1 Aizii 6 kamoo Passover Kamoon ua'ii Jesus makon Bethany iti, Lazarus mashaapa-kiziz, tawuru'u ukakudaniaz pidan. 2 Jesus paonarunao konaukii-kidan na'iki ĩaroapa-kidan wuru'u ukaawanuz. Martha maokoda'o nii wanyukunui udono, Lazarus na'iki Jesus sakanatapan pu'u miisa di'ii baokoinao tuma. 3 Mary zaamatankan pootozu zo'a'o kawinipina'o ramau, paoribai nard kiwin idi'o pa'idiwaru utoma-kao, uru'u naa oshootanuz Jesus kidiba iti, udauna'an o'inoan ukidiba padizo idi. Ipai ukaduunua'akan kabaun nazoo. 4 Sariapa Judas Iscariot, Jesus tominapa-kidaniinao bii iki'o, kaakapa'o ni'oraz Jesus, uruu kian, 5 “Kandii nii ramau wakuda-kao? Turua'o usellii-kao padamata 300 wizi'i kida'o puraata dikin ii. Udauna'an uwinipinaa taa-kao pataka'utinainao ati.” 6 Ukianuz kaikapa'a pakoidimikin idi'o, aonaa umarainpan idi'o mani pataka'utinainao. Uruu wuru'u taapa'oraz puraata, ĩ'ati'oraz taauzo-kao kida, na'iki'o da'i ukaiwa'akauzon patorii-kinaa nii aimaakan pa'idiwau nii. 7 Jesus kian, “Mana'a putowauda'ua'ana'a oroo! Kaiman zii otaapan ramau, ominziiwata-kinaa nii õnanaa õdida-kao ua'ii. 8 Pataka'utinainaouz karikaonanu'o nii ĩna'an unao tuma, mazan õgaru aonaa karikaonanu'o nii mani õna'an utuma.” 9 Iriba Jewnao abatan kaina'a Jesus Bethany ii; uruu idi ĩmakon na'iti. Ĩmakonuz na'iti Jesus na'ian idi'o, na'iki ĩtukapa'azon idi'o kapam Lazarus, wuru'u Jesus kakudaniaz pamawaka-kizi iki. 10 Uruu idi'i naa faadaanao zowaunaanao di'itinpan na'iki ĩtoman panyukunuu ĩzowii kizi Lazarus kapam. 11 Usha'apanum kau'an iriba'a naa Jewnao muudinan ĩ'ai na'iki ĩmishidan naa Jesus, ukakudan idi Lazarus.
Pidannao dapaapan Jesus Jerusalem ii
12 Aizii ba'oran kamoo dono'o naa, wuru'u iriba'oraz pidannao, kaawainaouz Passover Kamoon dau'ati, ĩabata kaina'iki Jesus wa'atin Jerusalem ati. 13 Uruu idi ĩdukuan pokoridi anaba kaduz kida na'iki ĩna'akan kida'a naazu, ĩikodapa'anan naa Jesus. Ĩkian paimori bii an, “Kaiman manawun wakazannaatiki! Marii Tominkaru kaimanan Naobanai ati, kaawa'oraz uaipan kawana'ati, King ni'oraz Israelitenao ati.” 14 Jesus zaidan chaakashi pa'ina'o zii, na'iki uruu barau ana'a naa umakon. Usha'apan na'apa Tominkaru Paradan saadauzo-kariwaiz kawana'ati: 15 “Mana'a utaria'ana'a, Jerusalem sannao! Diina'iki unaobanaa King wa'atini'i, uzaidapa pa'ina'o chaakashi.” 16 Uruu dono aonaa utominapa-kidaniinao aitapan na'apa'oram wuru'u kaikapa'oraz aimaakan sha'apan kida'a. Mazan Jesus kadishitan dauna'an pamawaka-kizi iki, uruu zii ĩnyukunuuan wuru'u saadauzo-kariwai udau'an, na'iki ĩnyukunuuan wuru'u pasha'apatanuz kaikapa'o aimaakan u'ati'i. 17 Jesus tumainaouz pidannao ukadishita-kidan dono'oraz Lazarus pabaaranaa iki, ĩnao kakuwaapan naa baokoinao ati aimaakan sha'apa'o dau'u. 18 Ĩabatan idi Jesus sha'apatan umanawunu'o aimaakan, uruu idi iriba pidannao ikodapa'anan uruu. 19 Uruu idi Phariseenao kian naa pa'atiaaka, “Aonaa na'itim washa'apatinan! Aushaa utukapa, ipai'i naa pidannao da'anpan uruu!”
Jesus kowaadan pazowii-kao nii
20 Aizii na'ia'o Greeknao wunao bii ia'a makoinaouz Jerusalem iti konaukii-kida'anan Tominkaru baokopainapa-karu dono. 21 Ĩwa'atin Philip ida'ati (Philip Bethsaida san uruu, Galilee Baara ia'oraz). Ĩkian u'ati, “Kaina'a'o watukapa'azon Jesus, waparada'azon utuma.” 22 Philip kowaadanuz Andrew ati, uru'u naa ĩmako'okan na'iki ĩkowaadan naa Jesus ati Greeknao parada'azon utuma. 23 Jesus kian ĩ'ati, “Aizii kaawa'a naa amazada, Daonaiora Aokazi Iki'o tukapa-kinao ni'i naa umanawunu'o nii. 24 Mishi'o kaiwuru'u õkianuz: Aonaa na'apainim nii bauda'apa'o maziki dako waota'oraz imi'i baara ati iribainan, soo umawakan an. Mazan umawakan idi, uru'o nii zii ukaakan madowaaka. 25 Pidan marainpa'oraz pakakupan, uwaziwaan niiz; mazan pidan aona'oraz umarainpan pakakupan di'ora'a amazada ida'a'a, uruu ati taa-kao nii karikaonanu'o kakupa-karu. 26 Na'ia'oram pidan aipan an õgaru panaobanaa nii, marii uda'anan õgaru; na'iam dono õgaru, õpoitorunao õtuma'o nii ĩnao kapam. Wuru'u pidan naobanaitapa'oraz õgaru, õdaru aida-kidan nii na'apam pamarainpan uruu.”
Jesus sawata-kao nii
27 Jesus kian, “Aizii kii'an! Na'apa dii õkian? Turuu mani õkian, ‘Õdaru, aonaa putaapada'ana'a dadara'o manawun kamoo kaawan õ'ati?’ Mazan aonaa turuu õna'apan. Na'apa'o ni'o wuru'u õkaawanuz imi'i baara ati, baiaapa'o ni'o kasha'ora'o. 28 Õdaru, putukapa-kida pumanawunun pidannao ati!” Udauna'an Parada-karu aokazi iki'o kian, “Õtukapa-kidani'i naa õmanawunun, na'iki õtukapa-kidan nii õmanawunun powa'a koshan.” 29 Pidannao, na'a'oraz ĩkadishitapan abata wuru'u parada-karuz. “Toroanaru!” ĩkian udau'ati. Baokoinao kian, “Angel paradan u'ati!” 30 Mazan Jesus kian ĩ'ati, “Aonaa õmishida-kinaa ni'o mani wuru'u parada-karu abata-kaoaz, mazan unao mishida-kinaa ni'o pa'an. 31 Aizii kaawa'a naa kamoo Tominkaru tiwaa-kinaa ni'i naa imi'i baara sannao. Aizi'o ni'i naa di'ora'a amazada baara'a'o naobanai kaboota-kao. 32 Õsawata-kao dono'o naa, na'apa'o ida'ana'o nii õdapadan ipai pidannao õ'ida'ati.” 33 Jesus kianuz kaikapa'a, ukowaadan na'apam nii pamawakan wuru'u. 34 Pidannao kian u'ati, “Wakakinaorinaa saada-kariwai kowaadan wa'ati, Christ karikaonanu'o nii ukakupan. Mazan na'apa'o dii kaiwuru'u, sawata-karu nii Daonaiora Aokazi Iki'o pukianuz? Kanom mooko wuru'u Daonaiora Aokazi Iki'oraz?” 35 Jesus kian ĩ'ati, “Kanada'o nii zii amazada masakauda'u'u naa. Umako'o naa zii sariapa, amazada kanadan pu'u, aonaa kizi ubaiaapan maruta'o. Usha'apanum kau'an, pidan chi'ikapa'o amazada marutan pu'u, aonaa uaitapan na'iti'oram naa pamakon. 36 Ukaiwaa wuru'u kanada'oraz, ukaina'an pu'u zii, unao kizi kanada'o sannao nii.”
Iriba Jewnao mamishida'azookan Jesus
Aizii Jesus paradan dauna'an ĩ'ati kaikapa'a umako'okan naa ĩ'ai, aonaa kizi ĩaitapan na'iam uruu. 37 Jesus sha'apatan pu'u padamata iriba umanawun kida'o aimaakan ĩawun za'a, mazan upu'u zii aonaa ĩmishidan uruu. 38 Ipai usha'apan kaikapa'a, Prophet Isaiah kuwaa mishiinan naa wuru'u: “Naobanai, kanom mishida paabatanii wakuwaa? Kanom ati dii Naobanai aida-kidan pama'ozakan?” 39 Mazan aonaa ĩmishida'azon, usha'apanum kau'an, kaikapa'o koshan da'i Isaiah kiauzon ĩdau'ana'a: 40 “Tominkaru ishada'akan ĩawun kida, aonaa kizi ĩtukapan. Na'iki udadaradan ĩnyukunuu kida, aonaa kizi ĩaitapan. Aonaa zoobaba ĩwa'atin Tominkaru ida'ati, usaabaa kizi ĩdyaun.” 41 Isaiah kian kaikapa'a, usha'apanum kau'an aida-kida-kariwai u'ati na'apam nii Jesus umanawunun diina'iti'o, na'iki uru'u naa ukakuwaapan udau'u. 42 Mazan upu'u iriba kaina'a Jewnao zowaunaanao mishida'o Jesus. Mazan ĩtarian idi Phariseenao ai, aonaa kanom nii ĩkowaadan baokoinao ati pamishidan dau'u, aonaa kizi ĩkashanau-kao pabaokopainpan ai synagogue ii. 43 Tuukii manawun ĩnaudapan pidannao naubaan paugaru, Tominkaru naubaan ai paugaru.
Jesus kaawan ukazannaata'anan pidannao
44 Diiwa'o ida'an Jesus kian, “Ipai pidan mishida'oraz õgaru, aonaa õgaru karikaonan mani wuru'u umishidaniaz, dyuuda'oraz õgaru kapam wuru'u umishidaniaz. 45 Na'iki ipai pidan tukapa'oraz õgaru, uruu tukapa'o kapam dyuuda'oraz õgaru. 46 Õgaru, õkaawan kanadapa'o nii imi'i baara sannao ida'ati. Pidan mishidan an õgaru, aona'o nii una'ian maruta'o di'ii. 47 Na'ia'oram pidan abatan an õkuwaa, mazan aonaa uizo'atin, aonaa õgaru'o nii mani kaboota'oraz uruu oia'o di'iti. Õkaawan da'ati'i aonaa õkaboota'anan mani pidannao oia'o di'iti mazan õkazannaata'anan pa'an ĩdyaun. 48 Pidan kashada'o õgaru na'iki dikintapa'o õparadan, kaina'a'ora'a naa kaboota-kida'o nii uruu oia'o di'iti. Õparadanu'o nii wuru'u kaboota'oraz uruu pataka'utin-karu di'iti, amazada tokon dono'o naa! 49 Usha'apanum kau'an, aonaa õaipan ati'o mani wuru'u õparadanuz, soo õdaru dyuuda'oraz õgaru, dyuudan kawana'ati'o. 50 Na'iki õaitapa, wuru'u ukakinaori kidaz uruu karikaonanu'o kakupa-kinai. Õkakuwaapan u'ati, kaikapa'a õdaru dyuudan kawana'ati'o.”
Jesus chikaan patominapa-kidaniinao kidiba
1 Aizii baokopainpauzo-karu Passover Kamoon ua'ii zii. Jesus aitapa kamoo kaawa'akan naa aizii wuru'u, umako-kinaa ni'i naa padaru di'iti, di'ora'a amazada di'iki'i. Karikaonan umarainpan papidanannao, umarainapa ĩdyaun tuukii, atii na'apa umawakan. 2 Wachuupun dono Jesus aroopan patominapa-kidaniinao tuma. Satan di'itinapa-kidani'i naa Judas, Simon Iscariot daniz, marii kizi ukaakapan Jesus. 3 Jesus aitapanii kaimanaiman Tominkaru taanii pa'ati panyukunuu ma'ozaka-kinaa nii, paka'iita-kinaa nii pasha'apatan ipai daunuuda'u aimaakan. Uaitapa pawa'atin Tominkaru di'iki'o na'iki ukiwan nii powaa iti Tominkaru di'iti koshan. 4 Uruu idi Jesus kadishita'akan paaroapa-kizi miisa di'iki, udauna'an unarakadan pachaakitan. Udauna'an uzaamatan towel na'iki upapidanuz pakonoon an. 5 Uruu dauna'an ukapotan wunu basii zo'ati, na'iki uchikaan naa patominapa-kidaniinao kidiba. Udauna'an uinoan ĩkidiba kida towel idi, upapidapaniaz pakonoon an. 6 Mazan ukaawan Simon Peter ida'ati, sariapa Peter kian u'ati, “õNaobanaa, puchikaan nii õkidiba?” 7 Jesus kian u'ati, “Pugaru, aonaa puaitapan kai kanom wuru'u õsha'apaapaniaz, mazan puaitapan nii zii diina'iti'i.” 8 Peter kian u'ati, “Õgaru, aonaa na'apainim nii puchikaan õkidiba!” Mazan Jesus kian u'ati, “Aonaan an õchikaan pukidiba, aona'o nii puzaamatinpan powa'a õ'ida'ati.” 9 Simon Peter kian u'ati, “Naobanai, ukau'an aonaa puchika'ana'a õkidiba karikaonan! Mazan puchikaa mooko õka'u, na'iki õzowau kapam!” 10 Jesus kian, “Pidan kaokopa'ora'a naa, aona'ora'a naa ukaniriban wuru'u. Ukau'an aonaa kanom nii uchikainan powa'a zii, soo uchikaan nii pakidiba'a naa karikaonan. Ipai unao, aona'ora'a naa ukaniriban. Soo kaina'a bauda'apa unao bii'i kaniriba'o.” 11 (Jesus aitapani'i naa kanoma'o nii kaakapaa paugaru. Uruu idi'o ukianuz, “Ipai unao, soo kaina'a bauda'apa unao bii'i kaniriba'o.”) 12 Uipaian dauna'an pachikaan ĩkidiba kida, Jesus morokodan naa pakamichan, na'iki usakanatan powaa iti miisa di'iti. Uru'u naa upishaan ĩdyaun, “Uaitapa kanom wuru'u õsha'apata'akaniaz u'ati?” ukian. 13 “Unao dakotan õgaru, ‘Tiichaa’ oo ‘Naobanai’ kii. Na'apa'o mishi manawun wuru'u õgaruz. 14 Õgaru uNaobanaa na'iki uTiichaan. Mazan upu'u õchikaan ukidiba kida. Ukau'an, na'apa'a naa pa'i uchikaa uiriban kidiba kida kapam. 15 Õsha'apatan aimaakan, unao tamakapan ni'o. Na'apa'a naa usha'apata õsha'apatan kawan unao ati. 16 Mishi'o kaiwuru'u õkianuz: Aonaa na'ia'oram poitorui umanawunun panaobanaa ai. Aonaa na'ia'oram pidan dyuuda-kariwaiz ukakuwaapa'anan, umanawunun dyuuda'o ai paugaru. 17 Aizii uaitapan an kaikapa kida'ora'a, konaukia'o nii manawun unao, usha'apatinan an ukawana'ati. 18 “Mazan õkadakotinanuz aonaa ipai unao daua'o mani. Õaitapanii sha'apa'oram kaduz kida pidannao õzaamatanii. Mazan kaina'a saada-kariwaiz kida Tominkaru Paradan ida'a kaikapa'a: ‘Õmin-aroopan tominan õtaruba nii.’ Uruu mishiin-kinaa ni'o wuru'u usha'apanuz na'apa. 19 Õkowaadan u'ati kanoma'o nii sha'apa, usha'apan ua'ii zii. Aizii usha'apa'akan dono'o naa, umishidan nii ‘Õgaru wuru'u.’ 20 Mishi'o kaiwuru'u õkianuz: Na'ia'oram pidan konaukia'o udapaapan õdyuudanii, õgaru kapam wuru'u udapaapaniaz; na'iki na'ia'oram pidan konaukia'o udapaapan õgaru, dyuuda'oraz õgaru kapam wuru'u udapaapaniaz.”
Jesus kowaadan kanoma'o nii sha'apan pa'ati
21 Jesus kian dauna'an na'apa, tuukii udopian panyukunuu ii, uruu idi aona'a naa udizapa'akan paparadan, ukian ĩ'ati, “Mishi'o kaiwuru'u õkianuz: Bauda'apa pidan unao bii iki'o zaamata-kidan nii õgaru õtarubanao ati.” 22 Utominapa-kidaniinao awunuuaakan pa'atiaaka, aonaa ĩaitapan kanom dau'ati'o wuru'u una'apanuz. 23 Bauda'apa Jesus tominapa-kidanii, tawuru'u umarainpaniaz, Jesus dazaba a'o usakanatapan udono. 24 Ukau'an Simon Peter sawaan paka'u u'ati. “Pupishaa uruu kanom wuru'u sha'apata'o ni'oraz dikauda'o aimaakan kaikapa'a,” ukian. 25 Uru'u naa umaonapadan pazowau Jesus ida'ati, na'iki ukian, “Naobanai, kanom daua'o manawun wuru'u puparadanuz?” 26 Jesus kian, “Õdamotan nii bread ka'uz uu di'iti, udauna'an kanom ati õtaanuzu, uruu wuru'u zaamata-kida'o ni'oraz õgaru.” Uru'u naa Jesus zaamatan bread na'iki udamotanuzu ka'uz uu di'iti, utaanuzu Judas ati, Simon Iscariot daniz. 27 Sariapa Judas zaamatan dono wuru'u bread, Satan morotina'akan naa uruu. Uru'u naa Jesus kian Judas ati, “Kadiman zoobaba pusha'apata wuru'u pusha'apata'azooniaz!” 28 Aizii aroopainaouz utuma, aonaa ĩaitapan kanom ni'o Jesus na'apanuz u'ati. 29 Judas taapan idi ĩpuraatan, ba'orainao zauda-kidan Jesus dyuudanii utorian aimaakan ĩkaiwaan nii Baokopainapa-kizai ii. Ba'orainao itiiman, Jesus dyuudanii utaan aimaakan pataka'utinainao ati. 30 Judas zaamatan dauna'an bread, ukodita'akan naa ĩ'ai paniba iti. Uruu dono amazada maruta'aka'ora'a naa. 31 Judas mako'okan dauna'an, Jesus kian, “Aizii Daonaiora Aokazi Iki'o umanawunun aida-kaoa'a naa wuru'u, na'iki uruu ida'ana'o nii Tominkaru umanawunun aidinan. 32 Aizii Tominkaru umanawunun aidinan an Uruu ida'an, ukau'an Tominkaru aidan nii pidannao ati na'apam Daonaiora Aokazi Iki'o umanawunun. Na'iki kai'o ni'i naa uaidanuz. 33 “Õdainao, aona'o ni'i naa õna'an tomunu'iki unao tuma. Õkiauzon kawan Jewnao ati, na'apa õkian u'ati aizii: udawatan nii õgaru, mazan aonaa turuu umakon õmakopa-kizi iti. 34 Ukau'an õtaan unao ati pa'ina'o kakinaorii: umarainpaaka. Na'apa õmarainpauzon kawan unao, na'apa pa'i manawun umarainpaaka. 35 Umarainpaakan an, ipai'o nii pidannao aitapan unao mishi'o õpidanannao.”
Jesus kowaadan Peter ati, utaapa-kidan nii paaitapan paugaru
36 Simon Peter pishaan uruu, “Naobanai, na'iti'oram pumako'ozon?” Jesus kian u'ati, “Na'iti'oram õmakon, aonaa turuu puda'anpan õgaru aizii, mazan puda'anpan nii zii diina'iti'i.” 37 Peter kian u'ati, “Naobanai, kandii nii mazan aonaa turuu õda'anpan pugaru kai? Õgaru turuu õmawakan pugaru dikin ii!” 38 Jesus kian u'ati, “Puka'iita mooko pu'itiiman pumawakan õgaru dikin ii? Mishi'o kaiwuru'u õkianuz pu'ati: Kuruku ka'aranpan ua'ii, idikinau'o nii pukian pidannao ati aonaa puaitapan õgaru.”
Jesus uruu dunapo Tominkaru di'iti'o
1 Jesus kian patominapa-kidaniinao ati, “Aonaa pa'i unyukunuu ukasha'ora'ana'a! Umishidapa Tominkaru; umishida õgaru kapam. 2 Kaina'a iriba kabaun nazoo kida õdaru dapu ii. Ukau'an õmakon naa wuru'u õsaaba'anan naa uwiizi nii. Aonaan an mani una'apan, aonaa mani õkowaadan u'ati na'apa. 3 Aizii õsaabaan dauna'an uwiizi nii, õwa'atin nii koshan unao dau'ati, turuu kizi una'ian õtuma kapam õna'ii-kizi ii. 4 Unao, uaitapanii dunapo õmako-kizi iti'oraz.” 5 Aizii Thomas kian u'ati, “Wanaobanaa, aonaa waaitapan na'iti'oram pumako'ozon. Na'apam nii mooko waaitapan dunapo na'iti'o?” 6 Jesus kian, “Õgaru wuru'u dunapoz, õgaru wuru'u mishi'oraz, na'iki õgaru wuru'u kakupa-kinaiz. Soo õgaru ida'an turuu kaawa-karu õdaru di'iti. 7 Aizii unao, uaitapan an õgaru, uaitapan nii õdaru kapam. Aizii wuru di'iki'i uaitapa'a naa na'iki utukapa'a naa uruu.” 8 Philip kian u'ati, “Wanaobanaa, putukapa-kida wa'ati puDaru, uruu turua'o nii wa'ati.” 9 Jesus kian, “Kotua'iki õmashaapan unao tuma, mazan upu'u zii mooko aonaa puaitapan õgaru, mishii Philip? Ipai pidan tukapa'oraz õgaru, uruu tukapa'o kapam õdaru wuru'u. Mazan na'apa di'i naa kaiwuru'u, ‘Putukapa-kida wa'ati puDaru,’ pukianuz? 10 Aonaa mooko pumishidan, õgaru na'iki õDaru, bauda'apa'o waunao? Kuwai kida õkowaadaniaz unao ati, aonaa õ'ida'a'o mani õtoman. ÕDaru, mashaapa'oraz õ'ida'a, uruu pa'an wuru'u sha'apaapa'oraz pakaudin-kizi kida õgaru ida'an. 11 Umishida õgaru na'iki õDaru, bauda'apa'o waunao õkianuz. Oo, umishida pa'i õDaru sha'apataniaz umanawun kida'o aimaakan õgaru ida'an. 12 Mishi'o kaiwuru'u õkianuz: Ipai pidan mishida'o õgaru, usha'apatan nii õsha'apaapanii kaduz kida kapam. Na'iki usha'apatan nii powa'a'o zii umanawunun kida, usha'apanum kau'an õmakon naa õDaru di'iti wuru'u. 13 Upishaan an õgaru kanom dau'ati karikaonan, õpidanannaoun idi unao, õsha'apatan nii u'ati. Na'apa'o ida'ana'o nii uDani aida-kidan pidannao ati paDaru umanawunun. 14 Upishaan an õgaru kanom dau'ati karikaonan, õpidanannaoun idi unao; õsha'apatan nii u'ati.
Jesus taan nii Kaimana'o Doronaa
15 “Umarainpan an õgaru, uizo'atipan nii õkakinaori kida. 16 Õpishaan nii õDaru na'iki utaan nii unao ati ba'oran Minka'ui kakinaota'o nii unao, na'iki karikaonanu'o nii una'auzon unao tuma. 17 Uruu Kaimana'o Doronaa tominapa-kida'o nii unao mishi'o Tominkaru daua'o. Mazan mamishida-kainao pidannao, aonaa turuu ĩzaamatan uruu paminka'u nii, usha'apanum kau'an aonaa ĩtukapan na'iki aonaa ĩaitapan uruu. Mazan unao, uaitapa pa'an uruu, usha'apanum kau'an, kaina'a'o uruu unao tuma, na'iki karikaonanu'o nii una'auzon unao ida'a. 18 “Aona'o nii õwa'akan unao, maudaniiwai wa'aka-kao kawan; õkaawan nii powaa ati u'ida'ati. 19 Kadimana'o ni'i naa pidannao matukapakan õgaru. Mazan unao utukapan nii pa'an, usha'apanum kau'an õkakupan nii powaa iti koshan, ukau'an unao ukakupan nii kapam õkakupan idi. 20 Aizii uruu dono, uaitapan nii õgaru na'iki õdaru bauda'apa'o waunao. Aizii unao na'iki õgaru, na'apa'o manawun bauda'apa'o pidan kawan. 21 “Na'ia'oram pidan abata'o na'iki izo'atipa'o õkakinaori kida, uruu wuru'u marainpa'oraz õgaru. Õdaru marainpan nii pidan marainpa'oraz õgaru; aizii õgaru, õmarainpan nii uruu kapam na'iki õaitapa-kidinan nii u'ati.” 22 Judas kian u'ati (aonaa Judas Iscariot mani), “Naobanai, na'apam nii puaidan pumanawunun waunao ati karikaonan, ba'orainao ati aona'o nii mooko puaida-kidan?” 23 Jesus kian u'ati, “Pidan marainpa'o õgaru, uizo'atipan nii õparadan, na'iki õDaru marainpan nii uruu. Wawa'atin nii uruu ida'ati na'iki wamashaapan nii utuma. 24 Mazan na'ia'oram pidan aona'o umarainpan õgaru, aonaa uizo'atin õparadan kida. Wuru'u kuwai kidaz, unao abataniaz, aonaa õtomanii mani karikaonan, õDaru pa'an wuru'u dyuuda'oraz õkakuwaapan na'apa. 25 “Õkowaadan u'ati kaikapa kida'ora'a õna'an pu'u zii utuma. 26 Wuru'u Minka'ui, Kaimana'o Doronaaz, õDaru dyuudan ni'oraz u'ida'ati õgaru aipan ati; uru'o nii pa'an tominapa-kida unao ipai õkuwaa kida dau'u, na'iki unyukunuu-kidan nii unao ati ipai daunuuda'u wuru'u õkuwaa kidaz. 27 “Õwa'akan unao tuma kaimana'o nyukunui; soo õgaru turuu õtaan na'apa'o. Aonaa da'i sannao taan kawanu'o mani õtaan nyukunui kaimanan. Aonaa pa'i unyukunuu kasha'ora'ana'a oo utariidina'ana'a. 28 Õkowaadanii sha'atii u'ati, ‘Õmakon ni'i naa õdaru di'iti, mazan õkaawan nii koshan powaa ati.’ Umishiin an mani umarainpan õgaru, ukonaukii mani õmakon idi'i naa õDaru di'iti, usha'apanum kau'an umanawunu'o õgaru ai wuru'u uruuz. 29 Õkowaadan naa u'ati kai kanoma'o nii sha'apa, usha'apan ua'ii zii; aizii usha'apan dono'o naa uaitapan nii õkuwaa mishiin. 30 Aona'o ni'i naa õparadinan tomunu'iki utuma, usha'apanum kau'an wa'ati'i naa wuru'u di'ora'a amazada baara'a'oraz naobanai. Mazan aonaa uka'iitan pamashaatan õgaru. 31 Mazan õsha'apata pa'an ipai aimaakan õdaru dyuudan kawana'ati õgaru, pidannao aitapa-kinaa nii mishi'o õmarainpan uruu. “Aizii, wamako'o naa.”
Paoribai kadunaa manawun
1 “Õgaru wuru'u mishi'oraz paoribai kadunaa, na'iki õDaru saabaapauzo paoribai baawu. 2 Ipai'o nii udukutan paoribai waoda kida aona'oraz ĩkaakan. Mazan kaaka'oraz kida usaabaan nii pa'an, aonaa kizi kazamaka'o nii ukadu'u, na'iki madowaaka kizi koshan ukaakan. 3 Unao, saabaa'aka-kariwai'i naa õkuwaa ida'an. 4 Pakawan pa'i uzaamatinapa õ'ida'ati, õzaamatinpan nii u'idi'iti kapam. Aonaa paoribai waoda kaakan paaipan ati karikaonan, soo uzaamatinpan an pakadunaa ida'ati. Unao na'apa'o kapam, aonaa uka'iitan usha'apatan kaimana'o aimaakan uaipan ati karikaonan. Soo uzaamatinpan an õ'ida'ati. 5 “Õgaru wuru'u paoribai kadunaaz. Aizii unao, uwaoda kida kawanu'o. Pidannao, karikaonanu'oraz ĩna'an õ'ida'a, õgaru na'apa õna'an nii ĩ'ida'a, ĩnao sha'apatan ni'i naa dobata kaiman kida'o aimaakan. Unao, aonaa uka'iitan usha'apatan aimaakan u'ida'a karikaonan, soo õkaminka'utan an unao. 6 Mazan pidan aona'oraz una'an õ'ida'a, uawu'uta-kao ni'i naa, na'iki umaririn ni'i naa amazada ii, na'apa paoribai waoda awu'uta-kariwai maririn kawan. Udauna'an ukasaba'uka-kao na'iki ukaboota-kaoa'a naa tikazi wu'iti. 7 Mazan unao, una'an an pakawan õ'ida'a, na'iki umishidapan an õparadan kida, turuu utoriinpan kanom dau'ati karikaonan, na'iki utaa-kao nii u'ati. 8 Kaikapa'o ida'ana'o wuru'u õDaru umanawunun aida-kida-kaoaz: Unao sha'apaapan ida'an dobata kaiman kida'o aimaakan, na'iki na'apa'o ida'an utukapa-kidinan õpidanannao unao. 9 Na'apa õDaru marainpan kawan õgaru, na'apa õmarainpan kapam unao. Uzaamatinapa pakawan õ'ida'ati, õmarainapa kizi unao. 10 Uizo'atipan an õkakinaori kida, pakawanu'o nii õmarainpan unao, na'apa õizo'atipan kawan õDaru kakinaori kida, na'iki pakawan umarainpan õgaru. 11 “Õkowaadan u'ati ipai kaikapa kida'ora'a, unao konaukii kizi na'apa manawun õgaru konaukian kawan, na'iki aonaa kizi kanom towauda'uan ukonaukian. 12 “Aizii kaikapa õkakinaori'i, umarainpaaka, na'apa manawun õmarainpan kawan unao. 13 Aonaa na'ia'oram pidan kamarainpanu'o powa'a zii wuru aia'a, pidan kashaapa'oraz pazowii-kao papaonarunao kazannaatin-kinaa nii. 14 Õpaonarunao unao, uizo'atipan an õkakinaori kida. 15 Aona'a naa õdakotan unao õpoitorunao nii, usha'apanum kau'an poitorui, aonaa uaitapan na'apa'oram panaobanaa sha'apainpan. Mazan õdakotan unao õpaonarunao nii, usha'apanum kau'an ipai õkowaadan u'ati õabatanii kida õDaru di'iki. 16 Aonaa uaipan ati'o mani uzaamatinan õ'ida'ati; õgaru aipan ati'o pa'an unao zaamatinan. Ukau'an õgaru aipan ati'o unao makon usha'apata'anan dobata kaiman kida'o aimaakan. Na'iki karikaonan kizi usha'apaapan na'apa'o aimaakan. Uzaamatinpan idi õ'ida'ati, õDaru taan nii unao ati kanom karikaonan upishaan an u'ati. 17 Ukau'an kaikapa õkakinaori unao ati'i: ‘Umarainpaaka.’
Jesus di'itiinao zaamatinpan to'ora-kizaitapa-kao
18 “Pidannao to'ora-kizaitapan an unao, unyukunuitapa na'apa'o ĩto'ora-kizaitapauzon õgaru. 19 Umashaapan an mani na'apa imi'i baara sannao mashaapan kawan, ĩmarainapa mani unao pairibannao nii. Mazan õaipana'ati'o uzaamatinan õ'ida'ati. Ukau'an, aonaa imi'i baara sannaou'u naa mani unao; uruu idi'o pidannao to'ora-kizaitapan unao. 20 Udi'itapa õkianuz u'ati kaikapa'a: ‘Aonaa na'ia'oram poitorui umanawunun panaobanaa ai.’ Kaina'a antamikitainao õgaru, na'apa'o nii ĩantamikitan unao kapam; mazan kaina'a ba'orainao izo'ati'o õparadan, ukau'an na'apa'o nii ĩizo'atin uparadan kapam. 21 “Pidannao sha'apatan nii unao na'apa, usha'apanum kau'an uzaamatinpan idi'o õ'ida'ati. Mazan ĩnao, aonaa ĩaitapauzon wuru'u dyuuda'oraz õgaru. 22 Aonaan an mani õkaawan da'ati'i na'iki aonaan an mani õkakuwaapan ĩ'ati, aonaa mani ĩ'oian kainaabatinan padamata. Mazan aizii, ‘aonaa waaitapan oia'o wuru'u na'apa'oraz,’ aonaa turuu ĩkian. 23 Pidan to'ora-kizaitapa'o õgaru, ĩto'ora-kizaitapan õDaru kapam wuru'u. 24 Aonaan an mani õsha'apatan ĩawun za'a ĩmatukapauzokanii pidan sha'apatan kida, aonaa mani padamata ĩ'oian kainaabatinan. Mazan aizii, ĩtukapani'i naa õsha'apatan na'apa'o, mazan upu'u zii ĩto'ora-kizaitapan baokopa waunao, õgaru na'iki õDaru. 25 Mazan na'apa'o ida'an, ĩkakinaorinaa mishiinan: ‘Ĩto'ora-kizaitapan õgaru madiwautapaka karikaonan,’ kia'oraz usaadinpan. 26 “Kaawa'o nii Minka'ui, uruu Kaimana'o Doronaa, uruu kainaabata'o mishi'o kuwai Tominkaru daua'o. Õdyuudan nii uwa'atin õDaru di'iki unao ida'ati, na'iki uru'o nii kakuwaapa õdau'an. 27 Aizii unao, ukakuwaapan nii õdau'u kapam, usha'apanum kau'an unao na'a'o õtuma õsakadinan di'iki õtominapatin-kidan pidannao.
1 “Õkowaadani'i naa u'ati kaikapa kida'ora'a, uruu aonaa kizi umuudina'akan umishidapan ai. 2 Uiribannao kashanauan nii unao synagogue kida iki, uchoochiipan ai ĩtuma. Na'iki kaina'a'o ni'i naa kamoo kaawan, uruu dono pidannao zowian an unao, ĩ'itiiman kaimana'o nii aimaakan wuru'u pasha'apataniaz Tominkaru ati. 3 Pidannao sha'apatan nii unao na'apa, usha'apanum kau'an aonaa ĩaitapauzon õDaru, oo õgaru. 4 Mazan õkowaadani'i naa u'ati kaikapa kida'ora'a. Ukau'an uruu kamoo kaawan dono'o naa, unyukunuitapan nii õkuwaa na'apa kida'o daua'oraz. Õsakadinan di'iki õtominapa-kidan unao, aonaa õkowaadauzon u'ati na'apa kida'o, usha'apanum kau'an õna'an idi zii utuma.
Kaimana'o Doronaa kaudin-kizi
5 “Mazan aizii õkiwan ni'i naa powaa iti dyuuda'oraz õgaru di'iti. Mazan aonaa na'ia'oram zoobaba unao pishaan õgaru na'iti'oram wuru'u õmako'ozoonuz. 6 Õkowaadan idi zii u'ati kaikapa'ora'a, uruu idi unyukunuu kasha'oran naa. 7 Mazan mishi'o kaiwuru'u õkianuz: Aona'o nii Minka'ui kaawan u'ida'ati, soo õmakon an. Ukau'an kaimana'o nii manawun unao ati wuru'u õmakonuz. Mazan õmakon an, õdyuudan ni'i naa uruu unao ida'ati. 8 Aizii ukaawan dono, ukainaabatan nii pidannao ati na'apa'oram manawun oia'o; na'iki, na'apa'oram manawun ĩdi'itapan kaimana'o; na'iki na'apa'oram manawun ĩdi'itapan Tominkaru kowaadan oia'o pataka'uta-kao. 9 Pana'iti karikaonan ĩdi'itapan oia'o, usha'apanum kau'an aonaa ĩmishida'azon õgaru. 10 Pana'iti karikaonan ĩdi'itapan kaimana'o, usha'apanum kau'an õmakon nii powaa iti õDaru di'iti, na'iki aona'o nii powa'a utukapan õgaru. 11 Na'iki pana'iti karikaonan ĩdi'itapan pataka'utin-karu, usha'apanum kau'an Tominkaru pataka'utani'i naa naobanai di'ora'a amazada baara'a'oraz. 12 “Kaina'a dobata zii õkowaada'azoonii u'ati padamata, mazan dobata'o ni'i naa manawun wuru'u õkuwaaz, aona'o nii uka'iitanuz. 13 Mazan Kaimana'o Doronaa kaawan nii, uruu mishi'o ukuwaa Tominkaru daua'o. Uruu aipan ati'o ni'i naa uaitapan mishi'o kuwai Tominkaru di'iki'o. Aona'o nii ukakuwaapan pa'ida'a karikaonan, mazan ukakuwaapan nii paabatanii dau'u, na'iki ukowaadan nii unao ati kanom kida'o nii sha'apa diina'iti'i. 14 Uru'o nii kainaabata õmanawunun, ukowaadan ida'an kanom dii õgaru, na'iki na'apa'oram wuru'u õkuwaaz. 15 Õkowaadauzon ipai aimaakan õDaru dau'u, aizii na'apa'o nii kapam Kaimana'o Doronaa kowaadan u'ati ipai õgaru dau'an, na'iki na'apam õkiauzon.”
Kasha'ora-karu konaukii-karu ua'ii
16 Jesus kian, “Masakauda'u dauna'an aona'o ni'i naa utukapan õgaru powa'a, mazan masakauda'u uruu dauna'an utukapan nii õgaru koshan.” 17 Aizii kaina'a utominapa-kidaniinao bii iki'o, ĩkian pairiban ati kida, “Na'apa'oram dau'ati'o ukianuz, ‘Masakauda'u dauna'an aona'o ni'i naa utukapan õgaru powa'a, mazan masakauda'u uruu dauna'an utukapan nii õgaru koshan;’ na'iki na'apa'oram dau'ati'o dii, ‘usha'apanum kau'an õmakon naa powaa iti wuru'u õDaru di'iti,’ ukianuz?” 18 Aonaa ĩmashaadan ĩpishautaakan, “Na'apa'oram dau'ati'o dii wuru'u, ‘Masakauda'u dauna'an,’ ukianuz? Aonaa waaitapan kanom daua'o ukadakotinan,” ĩkian. 19 Jesus aitapa ĩpishaa'azon paugaru, uruu idi ukian ĩ'ati, “Õkian kaikapa'a: ‘Masakauda'u dauna'an aona'o ni'i naa utukapan õgaru, mazan masakauda'u uruu dauna'an utukapan nii õgaru koshan.’ Mishii, uruu dau'ati'o upishautaakan? 20 Mishi'o kaiwuru'u õkianuz u'ati: Uzaadan nii na'iki diiwa'o nii umuraapan, ba'orainao konaukian pu'u. Kiwiin zii ukasha'oran nii, mazan uruu dauna'an ukonaukian nii. 21 Zuna kaudanipa'azon dono, kasha'ora kowas onyukunuu okaziwapan kamoo kaawan idi'i naa, mazan okaudanipan dauna'an, aona'a naa onyukunuitapan pakaziwapauzon. Soo okonaukian naa pa'an, usha'apanum kau'an koraidaonaa sodi shakatan idi. 22 Na'apa'o kawanu'o wuru'u unao baiaapaniaz: kai unyukunuu kasha'ora-kida, mazan õtukapan nii koshan da'i unao, na'iki uruu dono ukonaukian nii, na'iki aona'o nii kanom mashaatan ukonaukiitinan. 23 “Aizii uruu dono, aona'o ni'i naa kanom nii upishaan zii õgaru aimaakan dau'ati. Mishi'o kaiwuru'u õkianuz u'ati: Upishaan an õDaru kanom karikaonan dau'ati, utaan nii u'ati õpidanannaoun idi unao. 24 Aonaa zoobaba upishaan uruu kanom karikaonan dau'ati, õpidanannaoun idi unao. Upishaa, Tominkaru taan nii u'ati upishaanii. Uruu kaimanaiman kizi ukonaukiitinan. 25 “Õkakuwaapauzon u'ati di'itinapa-kinai kuwai ida'an di'ora'a aimaakan kida dau'a'a. Mazan kaina'a'o ni'i naa kamoo kaawan, aizii uruu dono aona'o ni'i naa õkakuwaapan powa'a di'itinapa-kinai kuwai ida'an, mazan õparadan nii sariapa kizi pidannao uaitapan õkuwaa õdaru daua'o. 26 Uruu dono, turua'o ni'i naa upishaan uruu aimaakan dau'ati, õ'uu ida'an, õpidanannaoun idi unao; aonaa kanom nii õpishaan zii õDaru unao ati, 27 usha'apanum kau'an, õDaru marainapanii unao. Umarainpan unao, usha'apanum kau'an unao marainpan idi'o õgaru, na'iki unao mishidan idi uruu di'iki'o õwa'atin. 28 Mishi, õwa'atin õDaru di'iki'o, imi'i baara ati. Aizii õmakon ni'i naa imi'i baara iki, õkiwan naa õDaru di'iti.” 29 Uru'u naa utominapa-kidaniinao kian u'ati, “Aizii, uruu zii puparadan kainaabatinan, aonaa pukaiwaan di'itinapa-kinai kuwai. 30 Aizii watukapa, puaitapa mishi ipai aimaakan; turuu pudako'atin pupishaa-kao ua'ii zii aimaakan dau'ati. Ukau'an aizii wamishida puwa'atin Tominkaru di'iki.” 31 Jesus kian ĩ'ati, “Uruu zii umishidan? 32 Kaina'iki kamoo wa'atin, aizii uruu kamo'o naa wuru'u kaawa'oraz, uruu dono pana'itinapu kida'o nii umakoodanainan, ukidoopan nii õ'ai udapu iti kida, uwa'akan nii õgaru õba'orantin. Mazan aonaa õba'orantina'o manawun mani õgaru, usha'apanum kau'an õDaru karikaonanu'o una'auzon õtuma. 33 Õkowaadan unao ati aimaakan kaikapa kida'ora'a, unyukunuu konaukii-kinaa nii, uzaamatinpan idi õ'ida'ati. Di'ora'a amazada baara'a'a, ubaiaapan nii kasha'ora'o. Mazan uma'ozakadapa unyukunuu! Õgaru, õwazootani'i naa di'ora'a amazada baara'a'o kasha'ora kida'o aimaakan!”
Jesus toriinpan papidanannao ati
1 Jesus kakuwaapan dauna'an patominapa-kidaniinao ati, uawunuupan doko iti na'iki uru'u naa utoriinpan. “ÕDaru, aizii kaawa'a naa kamoo. Putukapa-kida pidannao ati puDani umanawunun, utukapa-kida kizi ĩ'ati pumanawunun kapam. 2 Pugaru aipan ati'o ukazowautapan ipai pidannao, utaa kizi karikaonanu'o kakupa-karu ipai wunao ati'i, puzaamatin-kidaniinaouz u'ida'ati. 3 Kaikapa'o wuru'u karikaonanu'oraz kakupa-karu ikoda-kao: pidannao aitapan ida'an soo bauda'apa pugaru mishi'o Tominkaru, na'iki ĩaitapan ida'an õgaru, Jesus Christ, pudyuudaniaz imi'i baara ati. 4 Õtukapa-kida'a naa imi'i baara'a'o pidannao ati pugaru umanawunun, õsha'apatan ida'an ipai pudyuudanii õsha'apatan. 5 Õdaru, marii õtukapa-kao umanawunu'o nii aizii, na'apa õtukapauzo-kao kawan pugaru tuma amazada tominan ua'ii zii. 6 “Õaitapa-kidani'i naa pukaduz wunao ati'i, putaaniinaouz õ'ati di'ora'a amazada baara ainao bii iki. Pupidanannao ĩdyaun na'iki putaaniinao õ'ati ĩdyaun, na'iki ĩizo'atipa pukakinaori. 7 Aizii ĩaitapa'a naa, ipai aimaakan putaanii õ'ati, pugaru di'iki'o wuru'u. 8 Õkowaada'a naa pukuwaa ĩ'ati, na'iki ĩzaamata kaimanaiman panyukunuu itiz. Ĩaitapa õwa'atin pugaru di'iki'o na'iki ĩmishida pudyuudanii õgaru. 9 “Aonaa õtoriinpan ipai pidannao ati, mazan õtoriinpan wunao ati'i putaaniinaouz õ'ati, usha'apanum kau'an pupidanannao pa'an ĩdyaun. 10 Ipai õpidanannao, pupidanannao kapam ĩdyaun. Ukau'an ipai pupidanannao õpidanannao kapam ĩdyaun. Ĩnao ida'ana'o nii õmanawunun aitapa-kao. 11 Aizii, aona'o ni'i naa õna'an imi'i baara'a, kadimana'o ni'i naa õmakon pu'idi'iti. Mazan õpidanannao, ĩna'an nii zii imi'i baara'a. ÕDaru, kaimana'o manawun, pukazannaatapa pa'i wunaou'u putaapa-kidaniinaouz õ'ati. Ĩnyukunuu patumaaka kizi pa'atiaaka, pugaru na'iki õgaru nyukunuu patumaakan kawan. 12 Õna'an dono zii ĩtuma imi'i baara'a, õkazannaatapa ĩdyaun, pakawan kizi ĩmashaapan pupidanannao nii. Õkazannaatapa ĩdyaun, aonaa na'ia'oram waziwadinan, soo bauda'apa pidan waziwadina'o ni'oraz aita-kao, na'apa'o ida'an kizi saada-kariwaiz kida puparadan mishiinan. 13 “Aizii kadimana'o ni'i naa õmakon pu'idi'iti. Õtoriinpan ĩ'ati kaikapa'a õna'an pu'u zii ĩtuma imi'i baara'a, ĩnyukunuu konaukii kizi kaimanaiman na'apa õnyukunuu konaukian kawan manawun. 14 Õkowaada'a naa pukuwaa ĩ'ati, na'iki uruu idi ba'oran pidannao kashanau-kidan ĩdyaun. Ĩkashanau-kida-kao, usha'apanum kau'an õgaru kawanu'o ĩdyaun, aonaa ĩdi'itinpan ba'orainao di'itinpan kawan. 15 Õtoriinpan, aonaa õaipan mani puso'otan ĩdyaun di'oraz amazada baara iki'i, mazan õpishaan pa'an pukazannaatapan ĩdyaun Satan ai. 16 Õgaru, aonaa õdi'itinpan imi'i baara sannao di'itinpan kawan. Ĩnao na'apa kapam ĩdi'itinpan õgaru kawan, aonaa imi'i baara sannao kawan mani. 17 Pusaabaa ĩdyaun pu'idiwaunao nii, puaitapa-kidan ida'an ĩ'ati mishi'o manawun puparadan. Puparadan, uruu mishi'o manawun. 18 Pudyuudan kawan õgaru imi'i baara ati, na'apa õdyuudan ĩnao kapam amazada kawana'ati. 19 Kaimanaiman õtaainan pu'ati ĩnao dikin ii, turuu kizi ĩnao kapam taainan kaimanaiman pu'ati. 20 “Aonaa ĩnao ati mani karikaonan õtoriinpan, mazan õtoriinpan ba'orainao ati kapam, mishidainao ni'oraz õgaru, paabatan ida'an õdaua'o kuwai õpidanannao ida'an. 21 Õtoriinpan ĩ'ati, marii kizi ĩbauda'apatan panyukunuu, na'apa pugaru na'iki õgaru bauda'apatapan kawan wanyukunuu. ÕDaru, na'apa pugaru bauda'apatinpan õgaru ida'ati, na'iki õgaru bauda'apatinpan pugaru ida'ati, na'apa kizi ĩnao bauda'apatinpan waunao ida'ati, pidannao mishida kizi pugaru wuru'u dyuuda'oraz õgaru. 22 Õtaanii umanawun-karu ĩ'ati na'apa putaan kawan õ'atiz, marii kizi ĩbauda'apatapan panyukunuu, na'apa pugaru na'iki õgaru bauda'apatapan kawan wanyukunuu. 23 Kaina'a ĩnyukunuu ii õgaru; na'iki kaina'a õnyukunuu ii pugaru. Marii kizi kaimanaiman ĩbauda'apatapan panyukunuu, ba'oran pidannao aitapa-kinaa nii, pugaru wuru'u dyuuda'oraz õgaru. Na'iki pumarainapanii mishidainaouz õgaru na'apa pumarainpan kawan õgaru. 24 “ÕDaru, na'iam õgaru, na'ii õaipan õtuma wuru'u putaaniinaouz õ'ati, ĩtukapa kizi õmanawunun, wuru'u putauzoniaz õ'ati pumarainpan idi õgaru amazada tominan ua'ii. 25 Kaimana'o manawun õdaru, aonaa pidannao aitapauzon pugaru. Mazan õgaru, õaitapanii pugaru, na'iki õtominapa-kidaniinao ĩaitapa pudyuudanii õgaru. 26 Õkainaabatani'i naa ĩ'ati kanom kaduz pugaru, na'iki karikaonanu'o nii õkainaabaapan ĩ'ati kanom kaduz pugaru. Ĩmarainpaaka kizi na'apa pumarainpan kawan õgaru, turuu kizi õzaamatinpan ĩnao di'iti kapam.”
Soldyaanao zaamata'anan Jesus
1 Jesus toriinpan dauna'an paDaru ati, umakon naa patominapa-kidaniinao tuma Kidron Wa'o baza itinapu. Kaina'a'o da'i paoribai baawu na'ii, na'iti'i naa Jesus morotan patominapa-kidaniinao tuma. 2 Judas, kaakapa'o ni'oraz uruu tarubainao ati, uaitapanii kapam uruu amazada, usha'apanum kau'an, na'iti'o Jesus makouzon patominapa-kidaniinao tuma. 3 Ukau'an na'iti'i naa Judas makon, una'akan bauda'apa utonazinaa soldyaanao. Na'iki watchmantapainao Tominkaru Dapu bii ikiinao kapam, ĩnao faadaanao zowaunaanao na'iki Phariseenao dyuudaniinao. Ĩna'akapanii mizaataaka-kinai kida. Aizii ba'orainao ĩna'akapanii palampan kida. 4 Jesus aitapani'i naa na'apam nii ĩsha'apaapan paugaru. Uruu idi uwa'ati'ikan ĩ'ida'ati, na'iki ukian ĩ'ati, “Kanom uaipan?” 5 “Jesus, Nazareth san,” ĩkian u'ati. “Õgaru uruu,” Jesus kian ĩ'ati. (Judas, kaakapa'oraz uruu, na'ia'a naa ĩtuma.) 6 “Õgaru uruu,” Jesus kian idi ĩ'ati, sariapa ĩdandanaa'akan, na'iki ĩdorautan imi'i baara iti. 7 Powa'a koshan Jesus pishaan ĩdyaun, “Kanom uaipan?” “Jesus, Nazareth san,” ĩkian u'ati koshan. 8 Jesus kian ĩ'ati, “Õkii sha'atii u'ati, ‘Õgaru uruu.’ Umishiin an õgaru udawatapan, ukau'an marina'a wunaou'u õtumainaouz.” 9 (Ukian ĩ'ati na'apa, uparadan mishiin-kinaa ni'o utoriinpan dono'oraz. “Õdaru, aonaa bauda'apa õwaziwaan wuru'u putaaniinaouz õ'ati,” ukianuz.) 10 Aizii Simon Peter, una'akapanii marii. Uso'ota'akan pakinnaa aiazu, na'iki sa'ukan Umanawunu'o Faadaa poitoru tain diwa'ora antanpu'o, waota'aka. Malchus kia'o u'uu wuru'u poitoruiz. 11 Jesus kian Peter ati, “Pushakada pumarian powaa iti pakinnaa zo'iti! Pu'itiiman aona'o nii õbaiaapa'azon kasha'ora'o, õdaru taaniaz õbaiaapan nii?”
Jesus na'aka-kao Annas di'iti
12 Aizii, soldyaanaouz na'iki ĩzowaunaa, na'iki watchmantapainao Tominkaru Dapu, ĩzaamata'akan naa Jesus na'iki ĩdo'ota'akan naa uka'u kida. 13 Ĩna'akan uruu Annas di'iti kiwiin zii. Annas, uruu Caiaphas imadokozu. Aizii Caiaphas, uruu Umanawunu'o Faadaa uruu dono, 14 na'iki uruu kia'oraz kiwiin zii Jewnao zowaunaanao ati kaikapa'a: “Kaimana'o nii manawun bauda'apa'o pidan mawakan an ipai pidannao dikin ii.”
Peter kian aonaa uaitapauzon Jesus
15 Simon Peter, na'iki ba'oran Jesus tominapa-kidanii, ĩda'anpan Jesus. Aizii ba'oraniz, uruu kaimanaimana'o Umanawunu'o Faadaa aitapan. Ukau'an morota kootowapa-kizai iti uruu Jesus tuma, Umanawunu'o Faadaa dapu iti. 16 Mazan Peter, una'ian paniinom ii, aonaa umorotan. Aizii, ba'oraniz Jesus tominapa-kidanii, kaimanaimana'oraz Umanawunu'o Faadaa aitapan, umako'okan powaa iti na'iki uparada'akan zunaaba ati, awunuutapaibaz paniinom, na'iki uru'u naa umorota-kidan Peter. 17 Aizii zunaaba, awunuutapaibaz paniinom, okian Peter ati, “Pugaru õaitapan diidi'ia'ora'a pidan tominapa-kidanii kapam?” “Aonaa,” Peter kian o'ati. 18 Aizii poitoruinao na'iki watchmantapainao, ĩpu'ukada ni'i naa tikazi na'ii, amazada wadidin idi, uruu na'ia'a naa ĩkadishitapan ĩtanaapan kida. Peter na'ii kapam ukadishitapan utanaapan ĩtuma.
Umanawunu'o Faadaa pishautan Jesus
19 Uru'u naa Umanawunu'o Faadaa pishaan Jesus, “Kanomnao putominapa-kida nii? Kanom daua'o putominapa-kidan ĩdyaun?” 20 Jesus kian u'ati, “Karikaonan õkakuwaapan, turuu kizi ipai pidannao abatan õkuwaa. Karikaonan õtominapa-kidan pidannao synagogue ii, na'iki Tominkaru Dapu ii. Aonaa na'apainim õdizapan õkuwaa pidannao ai. 21 Kanom nii pupishaan õgaru? Pupishaa pidannao abatainao na'apam õkian. Ĩnao, ĩaitapa na'apa'oram õkiauzon.” 22 Jesus paradan idi na'apa, bauda'apa watchman udazaba a'o kadishitapan, uta'ika'akan naa Jesus paawun baara ati. Ukian Jesus ati, “Kanom dyuudan pudako'atin Umanawunu'o Faadaa paradan na'apa.” 23 Jesus kian u'ati, “Puaitapan an õparadan pozawatan, pukowaada ipai da'ainao pidannao ati'i. Mazan puaitapan an õparadan sakitapan, kanom ni'i naa puta'ika'akan õgaru?” 24 Udauna'an Annas dyuudan una'aka-kao Caiaphas di'iti, Umanawunu'o Faadaa, pakawan uka'u kida do'otinpan.
Peter powa'atan pakian pidannao ati, aonaa uaitapauzon Jesus
25 Aizii Peter, pakawan zii ukadishitapan na'ii utanaapan, uru'u naa upishaa-kao koshan, “Aonaa pugaru mani kapam utominapa-kidaniinao tuma'oraz, mishii?” “Aonaa,” Peter kian. 26 Na'a'o pidan, uruu kapam Umanawunu'o Faadaa poitoru, na'iki uruu iriban tawuru'u Peter sa'ukaniaz utain; ukian Peter ati, “Aonaa mooko pugaru mani tawuru'u õtukapaniaz utuma paoribai baawu ii, mishii?” 27 “Aonaa,” Peter kian koshan. Una'apan dauna'an, uru'u naa kuruku ka'aranpa'akan.
Jesus na'aka-kao Pilate kanaapu iti
28 Wakankanaanin Jesus na'aka-kaoa'a naa Caiaphas di'iki, Romannao dapunaa iti'i naa. Aizii Jewnao, aonaa ĩmorotan Romannao dapunaa iti, usha'apanum kau'an aonaa ĩkaniribaina'azon pakakinaorinaa kian kawana'ati, turuu kizi ĩaroopan Passover Kamoon dono. 29 Uruu idi, Pilate koditan ĩ'ida'ati na'iki upishaan ĩdyaun, “Kanom mooko oia'o nii di'ora'a pidan sha'apatan, ukootowapa-kida-kinaa niizu?” 30 Aizii ĩkian u'ati, “Uruu dikintapauzo kakinaorii, una'apan idi'o wana'akan uruu pu'ida'ati.” 31 Pilate kian ĩ'ati, “Usha'apata'a naa uruu uaipan kawana'ati, ukakinaorinaa kawana'ati.” Jewnao kian u'ati, “Waunao, aonaa Rome iki'o kakinaorii taapadan wazowian pidan.” 32 Usha'apan na'apa, Jesus paradan mishiin-kinaa ni'o, tawuru'u ukowaadanuz na'apam nii pamawakan. 33 Pilate morotan powaa iti Romannao dapunaa iti. Uru'u naa udapada-kidan Jesus na'iki upishaanuzu, “Pugaru mishi Jewnao naobanaa king?” ukian. 34 Jesus kian u'ati, “Puaipan ati'o kaiwuru'u pupishaanuz õgaru na'apa? Oo ba'oran pidannao kakuwaapan idi'o pu'ati õdau'an?” 35 Pilate kian u'ati, “Õgaru, aonaa Jew mani. Pumin-Jewnnao na'iki faadaanao zowaunaanao pa'an wuru'u na'aka'oraz pugaru õ'ida'ati. Kanom mooko wuru'u pusha'apataniaz, puto'orada-kinaa nii ĩdyaun?” 36 Jesus, kian, “Õnaobanai-tinapanuz, aonaa imi'i baara'a'o kingnao naobanai-tinpan kaduz mani. Da'ainao naobanai-tinpan kawanun an mani wuru'u õnaobanai-tinapanuz, mizaataaka mani õpidanannao, aonaa kizi Jewnao zowaunaanao zaamatan õgaru. Mazan aonaa da'a'o nii mani wuru'u õnaobanai-tinapanuz!” 37 Pilate kian u'ati, “Ukau'an, king wuru'u pugaruz?” Jesus kian, “Pugaru, pudakotan õgaru king nii. Na'apa'o ni'o õshakatan, na'iki õkaawan imi'i baara ati, õkakuwaapa'anan mishi'o dau'u. Na'ia'oram pidan mishi'o ida'antanpu'o, uru'o nii zaamata õparadan.” 38 Pilate kian u'ati, “Kanom mooko mishi'o nii?” Udauna'an Pilate koditan koshan Jewnao ida'ati, na'iki ukian ĩ'ati, “Aonaa kanom dikauda'o nii arawu sha'apatanu'u, õkaboota-kinaa nii uruu oia'o di'iti. 39 Mazan ipai wunu Passover Kamoon dono õkodita-kidauzo nii unao aipan kawana'ati bauda'apa taraapa-kariwai pidan. Ukau'an, turuu õmuudan unao aipan ati, Jewnao naobanaa king kii-kizaiz?” ukian ĩ'ati. 40 Uru'u naa ĩkadako'okan diiwa'o ida'an, na'iki ĩkian u'ati, “Aonaa arawu mani'i! Mazan waaiapan Barabbas pa'an!” Aizii Barabbas uruu antamiki.
Pilate kashaapa Jesus zowii-kao
1 Uru'u naa Pilate dyuudan soldyaanao ba'izian tuukii Jesus. 2 Soldyaanao tinokan kaiwada-karu, uruu idi'i naa ĩkakowamtan uruu. Udauna'an ĩkakamichantan uruu, wuza'o kamicha idi, 3 na'iki uru'u naa ĩwa'ati'anpan u'ida'ati, ĩta'ii'anpan uruu paawun baara ati, na'iki ĩkian u'ati, “Pugaru King, umanawunu'o Jewnao naobanaa!” 4 Pilate koditan koshan, Jewnao kasaba'ukinapa-kizi iti na'iki ukian ĩ'ati, “Aushaa uabata! Aizii õkodita-kidan ni'i naa uruu unao ida'ati, mazan õaipan uaitapan kaimanaiman, aonaa kanom õikodan oia'o nii usha'apatan.” 5 Uru'u naa Jesus kodita-kida-kao, umorokodapa wuru'u kowamaiz kaiwada-karu idi'oraz utoma-kao, na'iki wuza'oraz kamicha. Uru'u naa Pilate kian ĩ'ati, “Aizii, di'i naa wuru'u pidanaz!” 6 Aizii, faadaanao zowaunaanao, na'iki watchmantapainao tukapa'akan naa uruu, sariapa ĩkadakon diiwa'o ida'an, “Marii utauka-kao cross di'iti! Marii utauka-kao cross di'iti!” Na'iki Pilate kian ĩ'ati, “Una'aka'a naa uruu, utauka kizi'i naazu cross di'iti. Õgaru, aonaa kanom õikodan oia'o nii usha'apatan.” 7 Jewnao kian u'ati, “Waunao, kaina'a wakakinaorinaa, pidan na'apa'o marii uzowii-kao, udakotinpan idi Tominkaru Dani nii.” 8 Aizii Pilate abatan idi na'apam Jewnao kian, tuukii utarian. 9 Udauna'an umorota-kidan koshan Jesus Romannao dapunaa iti. Na'ia'a naa upishaan uruu, “Na'ikim san mooko pugaru?” ukian u'ati. Mazan aonaa Jesus dako'atin uparadan. 10 Aizii Pilate kian u'ati, “Kanom nii aonaa pudako'atin õparadan? Õgaru, turuu õkazannaatan pugaru puzowii-kao ai, na'iki turuu õtauka-kidan pugaru cross di'iti.” 11 Jesus kian u'ati, “Aonaa turuu pusha'apata-kidan õgaru, soo Tominkaru taapadan an. Ukau'an, wuru'u pidan na'aka-kida'oraz õgaru pu'ida'ati, powa'a'o zii manawun usha'apatan oia'o pu'ai.” 12 Pilate abatan idi na'apam ukian, utiwaan padamata na'apam pakazannaatan uruu. Mazan Jewnao kadakon u'ati, “Pukazannaatan an uruu, aonaa Caesar paonaru mani wuru'u pugaruz! Pidan dakotinpa'o king nii, Caesar taruba wuru'u uruuz!” 13 Pilate abatan idi na'apam Jewnao kian, uru'u naa ukodita-kidan koshan Jesus ĩ'ida'ati, na'iki uruu dauna'an usakanatan pakootoopauzo-kizi tabai ida'a, panibazoo di'ii, Kuba Baara kia'oraz udakota-kao. (Gabbatha, kia'o udakota-kao Hebrew ida'an.) 14 Aizii uruu dono maonapa'a naa sakitapa kamoo, na'iki uruu dono minziiwatin-karu kamoo wuru'u Passover dau'ati. Uru'u naa Pilate kian Jewnao ati, “Di'i naa unaobanaa king!” 15 Uru'u naa ĩkadako'okan, “Marii uzowii-kao! Marii uzowii-kao! Marii utauka-kao cross di'iti!” ĩkian. Na'iki Pilate kian ĩ'ati, “Uaiapa mooko õtauka-kidan unaobanaa king cross di'iti?” Aizii faadaanao zowaunaanao kian u'ati, “Soo Caesar, uruu bauda'apa wanaobanaa king!” 16 Uru'u naa Pilate taan Jesus ĩ'ati, marii kizi'i naa soldyaanao taukan uruu cross di'iti.
Jesus tauka-kao cross di'iti
Uru'u naa soldyaanao na'aka'akan naa Jesus, 17 Ukodita-kida-kao donoi iki uwaodatapa'a naa pacrossannaa, na'iki una'aka-kao Pidan-Zowau-Niwa'uz-naawa kia'o amazada dakota-kao di'iti. (Golgotha, kia'o udakota-kao Hebrew ida'an.) 18 Na'ia'a naa ĩtaukan Jesus cross di'iti. Na'iki dya'utam pidannao tauka-kao udazaba'a, ba'oran cross kida di'iti. Bauda'apa tauka-kao udiwa'ora antanapu, ba'oran tauka-kao uwashabaron antanapu. 19 Pilate saada-kidanii Jesus daua'o paranka daara'a, na'iki utauka-kidanuzu cross paawa'a, doko atanapa Jesus zowau ai. “Jesus, Nazareth San, uruu King, Jewnao ati,” kia'o wuru'u saada-kariwaiz. 20 Iriba pidannao aitaan wuru'u saada-kariwaiz, umaonapan idi donoi ati. Wuru'u usaada-kaoaz idikinauda'u'o parada-karu ida'ana'o, Hebrew ida'an, Latin ida'an, na'iki Greek ida'an. 21 Jewnao faadaannao zowaunaanao kian Pilate ati, “Aonaa pusaada'ana'a, ‘uruu King, Jewnao ati’ kii; mazan pusaada kaikapa'a: ‘Di'ora'a pidan kian, Õgaru King, Jewnao ati’ kii pa'an.” 22 Mazan Pilate kian ĩ'ati, “Kanom õsaadanii, aonaa turuu upana'adan.” 23 Aizii soldyaanao taukan dauna'an Jesus cross di'iti, ĩzaamata'akan naa ukamichan na'iki ĩbuutanuzu pamina'utamkida, soldyaanao zaamata kizi pakawana'ati kida. Ĩzaamata kapam ushooton za'aba'i; aizii uruu toma-kao aonaa na'iam ukanotinpan. 24 Aizii ĩkian pa'atiaaka, “Di'ora'a shooto, aonaa washushuuda'ana'a. Wamakinaotin aka, watukapa kizi kanoma'o nii zaamata pa'anazu.” Ĩsha'apatanuz aimaakan na'apa, saada-kariwaiz Tominkaru Paradan mishiin-kinaa ni'o wuru'u: “Ĩbuutan õkamichan kida pakawana'ati na'iki ĩmakinaotina'akan õshooton dikin ii.” Na'apa soldyaanao sha'apatan aimaakan. 25 Na'ia'o Jesus crossannaa dazaba ii, udaro kadishitapan pa'inaozo tuma. Na'ia'o kapam ĩtuma Clopas daiaro Mary, na'iki Mary Magdala sanaabaz. 26 Jesus tukapan padaro, na'iki umarainpaniaz patominapa-kidanii kadishitapan odazaba'a. Ukian padaro ati, “Pudani ni'i naa uruu!” 27 Udauna'an ukian patominapa-kidani ati, “Pudaro ni'i naa oroo!” Na'iki'ora'a naa utaapan oroo.
Jesus mawakan
28 Jesus aitapan idi ipai'i naa pasha'apatan wuru'u Tominkaru aipaniaz pasha'apatan; saada-kariwaiz Tominkaru Paradan mishiin-kinaa nii, ukian, “Õmaradako.” 29 Aizii uruu dono na'a'o boon zo'o pasaata-kariwai kibia'o riwunii. Uruu baoko iti ĩdamotan sponge, na'iki ĩsawadanuz Jesus dako iti, hyssop kadunaa saba ida'an. 30 Usoosokanuzu na'iki ukian, “Aizii ipai'i naa õsha'apatinan!” Aizii una'apa'akan dauna'an, uru'u naa usawiki-kida'akan pazowau, na'iki umanizowanta'akan naa.
Jesus aradu'u dakata-kao
31 Aizii Jewnao zowaunaanao, aonaa ĩaipan tauka-kariwainao na'ian cross paawa ii atii kamoo tipitan di'iti, usha'apanum kau'an uruu di'iki Sookapa-karu Kamoo sakadinan. Na'iki umanawunu'o Sookapa-karu Kamoo, Passover Kamoon wuru'u udono'oraz. Uruu idi ĩpishaan Pilate marii kizi udyuudan cross paawa iainao taba'u kida ramita-kao ĩmawaka kizi kadiman, uruu dauna'an turuu kizi ĩnanaa kida toka-kida-kao. 32 Uru'u naa soldyaanao makon, na'iki ĩramita'akan naa Jesus dazaba ainao ĩtauka-kao taba'u kida. 33 Mazan ĩkaawan Jesus ida'ati ĩtukapan uruu mawaka'a naa, uruu idi aonaa ĩramitan utaba'u. 34 Mazan bauda'apa soldyaa dakata'akan uruu paaradu'u ati dimana'o pachipararin idi, sariapa izai na'iki wunu shoota'akan udakata-kizinao iki. 35 (Pidan tukapa'oraz kaikapa'o sha'apan, uruu wuru'u kakuwaapa'oraz. Ukau'an turuu ukuwaa mishida-kao. Ukowaadan wuru'u mishi'oraz kuwai turuu kizi unao mishidan kapam.) 36 Di'ora'a aimaakan kida sha'apan, saada-kariwaiz Tominkaru Paradan mishiin-kinaa ni'o wuru'u: “Aona'o nii bauda'apa uniwa'uz ramita-kao,” kia'oraz usaadinpan. 37 Na'iki kaina'a koshan saada-kariwai Tominkaru Paradan ida'a kaikapa'ora'a: “Pidannao awunuupan nii padakatanii di'iti,” kii.
Jesus dida-kao daua'o
38 Aizii na'apa kida'o sha'apan dauna'an, Joseph, Arimathea san pishaan naa Pilate Jesus nanaa dau'ati, turuu kizi una'akanuzu na'iki udida-kizi'i naazu. (Wuru'u Joseph, uruu mishida'o Jesus, mazan aonaa ukowaadan ba'oran pidan ati, utarian idi Jewnao zowaunaanao ai.) “Turuu puna'akanuzu,” Pilate kian dauna'an u'ati; uru'u naa umakon na'iki una'akan naa Jesus nanaa. 39 Aizii, Nicodemus, tawuru'u makonkauzoz aiwaka'an Jesus di'ii, uruu kapam mako Joseph tuma. Una'aka 30 kilogram kasarai, myrrh na'iki aloes idi'o ukawiki'ita-kao. 40 Ĩnaou'u naa na'aka Jesus nanaa na'iki ĩpapidan naaz baraka'o kamicha mada kasarai-tinpa'o idi. Na'apa'o Jewnao saabauzon mawaka'o, una'aka-kao ua'ii baaranai iti. 41 Aizii, Jesus zowii-kizinao ii kaina'a'o da'i paoribai baawu. Na'iki kaina'a'o na'a pa'ina'o kichada-kariwai baaranai, aona'o zii ukaiwauzo-kao. 42 Jewnao minziiwauzon idi Passover Kamoon dau'ati uruu dono, na'iki baaranai kaina'an idi na'ii, na'ia'a naa ĩpaida'akan Jesus nanaa.
Jesus kadishitan pamawaka-kizi iki
1 Ishawaka zii amazada Sunday chaapi'iki, Mary Magdala sanaabaz kaawa'akan naa Jesus baaranaa ati. Otukapa zikada'aka-kaoa'a naa kuba baaranai tarata'aka-kinaoaz. 2 Uru'u naa odima'akan, okowaada'anan Simon Peter na'iki Jesus marainpaniaz patominapa-kidanii ati. Okian ĩ'ati, “Na'aka-kaoa'a naa wanaobanaa nanaa pabaaranaa iki, aizii aonaa waaitapan na'iam naa ĩsha'apatanuzu!” 3 Uru'u naa Peter na'iki ba'oran Jesus tominapa-kidaniaz makon, ĩtukapa'anan Jesus baaranaa. 4 Baokopa dya'utam ĩdyaun dimapa ĩmakon na'iti. Mazan wuru'u ba'oraniz, ukadimandina'akan naa na'iki ukiwiita'akan Peter ai, ukau'an kiwiin ukaawan Peter ai baaranai iti. 5 Udawukan, uawunuutaa-kidan ka'unaru nazo iti, utukapa mawaka'o watuu-kinao kamicha mada unazo ii; mazan aonaa umorotan na'iti. 6 Mazan Simon Peter kaawa'akan udawu'ati, sariapa umorotanaakan unazo iti. Utukapa wuru'u nanai watuu-kinaoaz kida kamicha mada na'ii, 7 na'iki utukapa kapam wuru'u kamichaz Jesus zowau watuu-kinaoaz. Pakawan uwatudinpan na'iki pana'itinapu wuru aia'a ba'oran kamicha mada kidaz. 8 Udauna'an, tominapa-kida-kariwai, kiwiini'oraz ukaawan baaranai ati, umorotan naa kapam ka'unaru nazo iti. Ukau'an utukapa na'iki umishida. 9 (Uruu dono aonaa zii ĩaitapan na'apa'oram saada-kariwaiz Tominkaru Paradan ida'a'oraz, kadishita'o nii uruu pamawaka-kizi iki, kia'oraz.)
Jesus aidinan Mary Magdala sanaaba ati
10 Uruu dauna'an ĩkiwan naa powaa iti pamashaapa-kizi iti, wuru'u tominapa-kida-kariwainaouz. 11 Mazan Mary, ona'ian zii okadishitapan, ozaadinan Jesus baaranaa ii. Pazaadan pu'u, odawukan na'iki omorota-kidan pazowau ka'unaru iti, oawunuutaa-kidan unazoo. 12 Otukapa dya'utam angelnao na'ii, baraka kida'o ĩkamichan. Ĩsakanatapan Jesus nanaa-daunuz ida'a. Bauda'apa'o sakanatapan uzowau antanapu, na'iki ba'oran sakanatapan ukidiba antanapu. 13 Ĩkian Mary ati, “Kandii nii puzaadinan?” Okian ĩ'ati, “Ĩna'akan idi õNaobanaa di'iki'i, aizii aonaa õaitapan na'iam naa ĩsha'apatanuzu!” 14 Oparada'akan dauna'an, okiwa-kiwaa'akan padikin iti, otukapa pidan padazaba'a. Jesus padamata wuru'u kadishitapa'oraz, mazan aonaa oaitapanuzu. 15 Jesus kian o'ati, “Kandii nii puzaadinan? Kanom pudawatapan?” Ozauda-kidan saabaapauzo paoribai baawu wuru'u uruuz. Okian u'ati, “Pugarun an wuru'u zikada'oraz uruu di'iki'i, pukowaada õ'ati na'iam pusha'apatanuzu, õnanaka kizi uruu powaa ati.” 16 Upu'a'a naa Jesus dakotan o'uu, “Mary!” ukian o'ati. Uru'u naa otanawatina'akan u'ida'ati, na'iki okian u'ati, “Rabboni!” (Hebrew ida'an, “Tiichaa,” kia'o wuru'u.) 17 Jesus kian o'ati, “Mana'a puzaamatina'ana'a õ'ida'ati, usha'apanum kau'an aonaa zii õkiwan õdaru di'iti. Mazan pumako õ'inawuzunao di'iti, pukowaada'an õparadan ĩ'ati. Pukii ĩ'ati, ‘Õkiwan naa õDaru na'iki õTominkarun di'iti wuru'u. Uruu ĩDaru na'iki ĩTominkarun kapam.’” 18 Uru'u naa Mary Magdala sanaaba makon Jesus tominapa-kidaniinao di'iti na'iki okowaadan naa ĩ'ati patukapan Naobanai, na'iki okowaadan naa ĩ'ati na'apam ukian.
Jesus aidinan patominapa-kidaniinao ati
19 Uruu Sunday wachuupunin, Jesus tominapa-kidaniinao baokopatinan kabaun nazo ii. Ĩtarian idi Jewnao zowaunaanao ai ipai ĩdadaradapan paniinom kida. Masha'apakiaka Jesus aidinan ĩbii ii, na'iki ukian ĩ'ati, “Kaiman utaapa unyukunuu.” 20 Uparadan dauna'an na'apa, utukapa-kidan ĩ'ati potopotori daunizi paka'u kida ida'a'o, na'iki paaradu'u dakata-kizinao. Ĩtukapan idi wuru'u Naobanaiz, tuukii, tuukii utominapa-kidaniinao konaukian. 21 Udauna'an Jesus kian ĩ'ati koshan, “Kaiman utaapa unyukunuu. Õdaru dyuudan kawan õgaru imi'i baara ati, ukau'an na'apa õdyuudan kapam unao amazada kawana'ati.” 22 Uipaian dauna'an paparadan, upootan panizowan ĩ'ida'ati na'iki ukian ĩ'ati, “Õtaan Kaimana'o Doronaa u'ati. 23 Ukau'an turuu ukian pidan ati, ‘Marina'ata-kaoa'a naa u'oian,’ Tominkaru marina'ata'akani'i naa kapam wuru'u pidan oianuz. Aonaan an umarina'atan pidan oian, aona'o nii Tominkaru marina'atan kapamazu.”
Jesus aidinan Thomas ati
24 Thomas (Shamaan kia'o ba'oran u'uu), uruu kapam 12 , Jesus tominapa-kidanii bii iki'o, aona'o uruu nii ĩtuma Jesus aidinan dono ĩ'ati. 25 Ĩkian u'ati, “Watukapanii Naobanai!” Thomas kian ĩ'ati, “Aona'o nii õmishidan utukapan Naobanai, soo õtukapan an zii potopotori daunizi uka'u kida ida'a, na'iki õshakadan an zii õka'u shuwu na'iti, na'iki õshakadan an zii õka'u uaradu'u dakata-kizinao shaawa iti.” 26 Bauda'apa soondii dauna'an, baokopa'o koshan Jesus tominapa-kidaniinao kabaun nazo ii. Uruu dono, na'a'a Thomas ĩtuma. Paniinom kida dadaradinpan pu'u padamata, Jesus na'ia'a naa uaidinan ĩbii ii. Ukian ĩ'ati, “Kaiman utaapa unyukunuu.” 27 Udauna'an ukian Thomas ati, “Putukapa potopotori daunizi õka'u kida ida'a, putaa puka'u shuwu na'ati; pushakada puka'u õaradu'u dakata-kizinao shaawa iti. Aona'a naa pumamishidaka'ana'a, mazan pumishidapa'a naa pa'an!” 28 Thomas kian u'ati, “Pugaru õNaobanaa na'iki õTominkarun!” 29 Jesus kian u'ati, “Thomas, pumishida aizii, putukapan idi õgaru? Konaukia'o manawun pidan mishida'oraz pamatukapakan pu'u.”
Kanom ni'o di'ora'a Kaarita Saada-kao
30 Jesus sha'apatanii iriba umanawun kida'o aimaakan patominapa-kidaniinao awun za'a, aonaa usaadinpan di'ora'a kaarita ida'a. 31 Mazan di'ora'a saada-kao, turuu kizi unao mishidan Jesus, uruu wuru'u Christ, Tominkaru Dani; na'iki uruu ma'ozakan ida'ana'o nii unao kakupan, umishidan ida'an uruu.
Jesus aidinan Galilee Baara ii patominapa-kidaniinao ati
1 Aizii uruu dauna'an, Jesus aidinan koshan patominapa-kidaniinao ati Tiberius Karishiiz danoma ii. Kaikapa aizii uaidinan ĩ'ati'i. 2 Aizii 7 utominapa-kidaniinao baokopa'o udono: Simon Peter, Thomas (Shamaan kia'oraz ba'oran u'uu), Nathanael (Galilee Baara ia'o Cana sanaz), Zebedee dainao, na'iki dya'utam ba'orainao Jesus tominapa-kidaniinao. 3 Simon Peter kian ĩ'ati, “Õmako'ozon wuru'u, õsairoopa'anan.” Ĩkian u'ati, “Wamakon nii putuma.” Uru'u naa ĩmakon utuma kanawa zo'an; mazan uruu aiwaka'an aonaa kanom ĩsairotan. 4 Chaapi'iki, kamoo koditan ua'ii, na'ia'a naa Jesus kadishitapan unaawa ii, wunu danoma'a. Mazan utominapa-kidaniinao aonaa ĩaitapan Jesus wuru'u kadishitapa'oraz. 5 Jesus kian ĩ'ati, “Õpaonarunao, usairota kopau?” Ĩkian u'ati, “Aonaa kanom wasairotan.” 6 Mazan Jesus kian ĩ'ati, “Ukaboota usairon ukanawan diwa'ora antanapu, usairotan nii kopau.” Uru'u naa ĩkabootan pasairon, ĩsairota iriba, iriba kopau. Na'iki aona'a naa ĩka'iitan pasawatan pasairon kanawa zo'ati. 7 Aizii Jesus tominapa-kidaniaz, tawuru'u umarainpaniaz, ukian Peter ati, “Naobanai uruu!” Simon Peter abatan idi Naobanai uruu kii-karu, sariapa umorokada'akan pakamichan (unarakada'akanii pakamichan pasairoopan idi), na'iki uzaka'uta'akan naa wunu baoko iti, umako'ozon idi kadiman Jesus di'iti. 8 Ba'orainao utumainao kanawa ida'an zii ĩwa'atin, ĩkozootapaanan pasairon paida'oraz kopau idi. Aonaa munapo'ora'a naa mani ĩdyaun wuru'u wunu danoma ai, 100 meters mani umunapon. 9 Ĩmaaratinan dono'o naa, ĩtukapa wizi'i'o tikazi tiriizi na'ii na'iki kaina'a upaawa'a kopau kazimata-kariwai, na'iki kaina'a bread udazaba'a. 10 Jesus kian ĩ'ati, “Una'aka da'ati'i na'apauda'um karikaonan kopau, aizi'oraz uzaamata'akan.” 11 Simon Peter kiwa'akan powaa iti, na'iki upaidinan kanawa zo'iti. Uru'u naa ukaminka'utan pairibannao kozootan sairo unaawa ati. Paida wuru'u sairoz kopau tu'uz kida idi, 153 ipai'ika'o sairota-kariwai kopau: mazan sairo aonaa udadoobi'iinan, kopau iriban pu'u padamata. 12 Jesus kian ĩ'ati, “Waaroopa'a naa.” Aonaa na'ia'oram utominapa-kidaniinao papishaanuzu kanom uruu. Usha'apanum kau'an ĩaitapa kaimanaiman Naobanai Jesus wuru'u. 13 Jesus zaamatan bread na'iki uru'u naa utaabi'ian ĩkawana'atiz; kopau na'apa kapam utaan ĩkawana'ati. 14 Ukau'an, idikinautan naa aizii wuru'u Jesus aidinanuz patominapa-kidaniinao ati, pakadishitan dauna'an mawaka-karu di'iki.
Jesus pishaan Peter
15 Aizii ĩaroopan dauna'an, Jesus kian Simon Peter ati, “Simon, John dani, mishi'o pumarainpan õgaru powa'a zii wunao ai'i?” Peter kian u'ati, “Oo, Naobanai; puaitapanii õmarainpan pugaru.” Jesus kian u'ati, “Puawunuutapa õpidanannao, na'apa kaznizo dainao awunuutapa-kao kawan.” 16 Powa'a koshan Jesus kian u'ati, “Simon, John dani, mishi'o pumarainpan õgaru?” Peter kian u'ati, “Oo, Naobanai; puaitapanii õmarainpan pugaru.” Jesus kian u'ati, “Putaapa õpidanannao, na'apa kaznizonao taapa-kao kawan.” 17 Aizii idikinautan naa Jesus pishaan Peter, “Simon, John dani, mishi'o pumarainpan õgaru?” Sariapa Peter nyukunuu kasha'oran, Jesus pishaan idi paugaru idikinau'u naa manawun, “Mishi'o pumarainpan õgaru?” kii. Ukau'an Peter kian u'ati, “Naobanai, pugaru puaitapanii ipai aimaakan; puaitapanii õmarainpan pugaru!” Jesus kian u'ati, “Puawunuutapa õpidanannao, na'apa kaznizonao awunuutapa-kao kawan. 18 Mishi'o kaiwuru'u õkianuz: Pupa'inan dono zii puaipan ati puminziiwauzon, na'iki pumakon pumako'ozoo-kizi iti; mazan putunarunaoun dono'o naa, pusawadan nii puka'u na'iki ba'oran pidannaou'o nii minziiwa-kida pugaru na'iki puna'aka-kao nii, aonaa pumako'ozoo-kizi iti mani.” 19 (Jesus paradanuz na'apa, ukainaabatan na'apam nii Peter mawakan. Na'iki na'apa'o ida'ana'o nii uaida-kidan Tominkaru umanawunun.) Udauna'an Jesus kian u'ati, “Puda'an õgaru!” 20 Peter awunuuankan powa'a iti, utukapa Jesus tominapa-kidanii umarainpaniaz wa'atin ĩdawu'ati. (Uruu tawuru'u sakanatapa'oraz Jesus dazaba'a aroapa-karu dono, Passover Kamoon dono'oraz, pishaa'oraz Jesus kaikapa'a: “Naobanai, kanoma'o nii mooko manawun wuru'u kaakapa'o ni'oraz pugaru putarubanao ati?”) 21 Peter tukapan idi uwa'atin, uru'u naa upishaan Jesus, “Naobanai, arawu mani'i, na'apam nii usha'apata-kao?” 22 Jesus kian u'ati, “Na'apa dii pu'ati õaipan an ukakupan zii atii õkaawan powaa ati? Pugaru, puda'an õgaru!” 23 Na'iki'i naa parada-karu iribainan mishidainao kawana'ati, na'iki ĩabatan ukowaada-kao aona'o nii umawakauzon, wuru'u utominapa-kidaniaz. Mazan, “aona'o nii umawakauzon,” aonaa Jesus kian udau'ati. Mazan, “Na'apa dii pu'ati õaipan an ukakupan zii atii õkaawan powaa ati?” kia'o ukian. 24 Wuru'u Jesus tominapa-kidaniaz, uru'u naa kakuwaapa'oraz di'ora'a aimaakan kida dau'a'a, na'iki uruu kapam saada'oraz di'ora'a kaarita. Na'iki waaitapa mishi'o wuru'u ukuwaa kidaz. 25 Kaina'a iriba ba'oran kida aimaakan Jesus sha'apatanii, aonaa usaada-kao. Usaada-kao an mani ipai daunuuda'u, aonaa mani udaua'o saada-kariwai kida kaarita wiizi nii di'ora'a amazada ida'a'a.