Juwão 1

“Janejare'e Ra'yry ojikuwa uu”, e'i ikusiwa mã'ẽ

1 Yvy reko e'ãve Janejare'e Ra'yry oikopa teãmã iko. Janejare'e Ayvu eu ijupe, Janejare'e Ra'yry pè. Uu pyrive ekoi yvy reko e'ãve. Jane jare'e rõmõ tè teãmã a'e ekoi. 2 Uu reve ekoi, yvy reko e'ãve. Age'e remẽ teve eeve ekoi ky'y. 3 Ãmẽ Janejare'e moma'e kõ oinõoka remẽ, Wa'yry pè tè e'i toinõ kõ. A'e tè pirujẽ oinõ erokwa ãmẽ ky'y. Ãmõ kõ rõwã oinõ kõ. A'e tè oinõ kõ. Nuvei 'ete eminõ e'ã mõ. Janejare'e Ra'yry tè pirujẽ oinõ mã'ẽ rõmõ ekoi. 4 A'e tè poromoigooka mã'ẽ teãmã. A'e teve manyvo Janejare'e ekoi mã'ẽ omojikuwaoka janeupe ipi. Ãwitõ poroyape mã'ẽ omojikuwaoka janerape janeupe ipi. Ãwĩvo ve Janejare'e rekoa omojikuwaoka janeupe ipi. 5 Ãwitõ pãtõnusu rupi jaiko remẽ, poroyape mã'ẽ omojisa katuay. Poroyape mã'ẽ ywesõ ikasiay pãtõnusu wyi. Ãwĩvo ve Janejare'e Ayvu ywesõ ikasiay. Ava jẽ rõwã omoje'otà e'i kuwa. 6 Uve mirà mõ Janejare'e remimuurerà mõ. Juwão [poromojãmorĩ mã'ẽ] eu ijupe. 7 A'e Janejare'e Ra'yry renoneve uu imojikuwa, ãwisõ pirujẽ mirà kõ “aje” te'i ijayvu renu. Kee e'i: “Ãwitõ poroyape mã'ẽ, ãwĩvo Janejare'e Ra'yry”, e'i imojenu. 8 “Poroyape mã'ẽ rõwã ije”, e'i Juwão. “Imome'uarà kõrijõ tè ije”, e'i. 9 Janejare'e Ra'yry tè poroyape mã'ẽ. A'e tè uu mirà kõ pyterà rupi Janejare'e ayvu mojikuwaoka ijupe kõ. 10 A'e tè yvy oinõma karamoeve, ipupewarà kõ revejẽ. Ajaire uu mijẽ mirà kõ pyterà rupi. Ajamã'ẽ mirà kõ omã'ẽ ee remẽ, “Janereinõgarerà tè ãwĩ!” ne'i ijupe kupa, nokuwai kupa rewarà mõ. 11 Uu ipe wetãrãgwerà kõ pyterà rupi. Ajamã'ẽ etãrãgwerà kõ nopotai. Nojirovijai ee kupa. “Janejare'e Ra'yry tè ãwĩ” ne'i ijupe kupa ipi. 12 Ajamã'ẽ ãmõ ãmõgwerà ojirovija ee ipi. “Aje” e'i ijayvu pè kupa. A'e kõ opota katu oõvijã rõmõ wereko ipi. Ijayvu rupi aepo e'i mãe kõ ãmẽ Janejare'e wereko wãkarãgwerà kõ rõmõ toiko kupa. 13 Ãwitõ mirà kõ ijãkarã, ãwĩvo rõwã ajamã'ẽ Janejare'e ãkarãgwerà kõ rõmõ jaiko. Wayvu rupi tè janereinõ wãkarãgwerà kõ rõmõ tijaiko. 14 Janejare'e Ayvu eu ijupe mã'ẽ ojimojane osaky rõmõ. Janepyterà rupi ekoi mijã. Ivo katu teãmã ekoi. A'e rõmõ'ĩte pe'ĩgà Janejare'e Ra'yry rõmõ ekoi. Uu vo ywete Ta'yry. Poroauvay poroereko katuay mã'ẽ tè a'e. Janejare'e rekoa aje ywete mã'ẽ omojikuwaoka mirà kõ pè ipi. Ore ywete oromã'ẽ ee. 15 A'e pewarà mõ Juwão [poromojãmorĩ mã'ẽ] kee e'i: – Kõi kee a'epa itõkõ pejẽ mã'ẽ: “Erakypy rupi uutà mã'ẽ ywesõ ijayvukasiay wetetà ewyi. Ereko e'ã remeve ekoi teãmã, ajawyi”, a'epa pejẽ maekwerà. Ãwĩ pewarà mõ aepo a'e, e'i Juwão imomewa. 16 A'e Janejare'e Ra'yry janeporijauesa mã'ẽ tè. Janerauvay mã'ẽ teve. Janerereko katu jẽ iko ipi mã'ẽ tè. 17 A'e ywesõ ikatuay tãmõ Moisesi wyi. Kee rewarà mõ. Janejare'e opyteporo tãmõ Moisesi tijanemotekokuwa ivo tekoua rè. Jesu Kiristu ãmẽ janerereko katu okatua rupi mã'ẽ omojikuwaoka jane. Ãmõ, ijayvukwerà aje ywete mã'ẽ omojikuwaoka jane. 18 Nomã'ẽytyi Janejare'e rè ipi. Ta'yry pe'ĩgwerà kõrijõ tè omã'ẽ Uu rè, a'e tè ipyri ekoi rewarà mõ. A'e teve omojikuwaoka Uu janeupe.

Juwão poromojãmorĩ mã'ẽ rewarà

19[Ãmẽ Juwão oo poromojãmorĩ mirà kõ aiwererà reitya mojikuwapa rõmõ iko ipi.] Ãmẽ ãmõ 'ary pè Juteu rõvijã kõ mõ ojimogeta Juwão rè: – Ava ayvu rupi põ ãwĩvo Juwão ekoi ipi? e'i kupa. Jerusarẽ taa pewarà rõvijã kõ aepo e'i. Ajawyi kwaima'e kõ mõ omonooka Juwão gyty kupa, tokuwa ava põ Juwão. Janejare'e pè oporegeta mãe kõ mõ omonooka kupa. Revi jeapyrerà kõ mõ teve. A'e kõ oo ãmẽ Juwão pè javo. – Ava põ ene? e'i Juwão pè kupa. Janejare'e Remimuurerà põ ene, Janerõvijã ywete rõmõ? e'i ijupe kupa. 20 Ãmẽ Juwão e'i ijupe kõ: – Ãnĩ. A'e rõwã ije, e'i. 21 Kee e'i jẽ kupa: – Ava sipõ ene ajawyi? e'i kupa. Tãmõ Eriasi põ ene? e'i. [Karamoe remẽ Janejare'e ayvu mojenuarà kõ: “Tãmõ Eriasi ovãe tarà mijẽ”, e'i. Ajawyi aepo e'i ijupe kupa.] – Ãnĩ! A'e rõwã ije! e'i Juwão ijupe kõ. Kee e'i jẽ kupa: – Ava sipõ ene ajawyi? Janejare'e ayvu mojenuarà uutà mã'ẽ rõmõ sipõ ene nejo? e'i kupa. – Ãnĩ! A'e rõwã ije! e'i Juwão ijupe kõ. 22 Ajawyi e'i kupa: – Ava põ ene ajamã'ẽ? e'i mijẽ ijupe kupa. Emome'u ajawyi oreupe, torokuwa, e'i kupa. Torojivy nemomewa oremurokarerà pè ãmẽ! e'i kupa. 23 Ãmẽ Juwão e'i mijẽ ijupe kõ: – Janerõvijã ywete vãea rã mojenuarà tè ije, e'i. Kõitokõ Janejare'e ayvu mojenuarà Isajasi erewarà rã omojenupa amãtejẽ. Kee e'i amãtejẽ eupewarà mõ maekwerà: “Tekoe'ãma pè wapukaità. Kee e'ità wayvo Janerõvijã renone: ‘Tijajipy'amokatuoka amãtejẽ enoneve’, e'ità. Ãwitõ pee aiwerà jamokatu amãtejẽ imoterẽ gatu janeremiãrõ renone. Ãwĩvo ve tijajipy'amokatuoka amãtejẽ Janerõvijã renone”, e'ità imojenu, e'i maekwerà. Eupewarà mõ tè aepo e'i amãtejẽ mã'ẽ tè ije, e'i Juwão ijupe kõ. 24-25 Ãmẽ Pariseu remimuurerà kõ mõ e'i ijupe: – Manyvore põkõ poromojãmorĩ neiko ãmẽ, Janejare'e Remimuurerà rõwã ene remẽ? Ãmõ, tãmõ Eriasi rõwã teve ene remẽ. Ãmõ, Janejare'e ayvu mojenuarà rõmõ uutà mã'ẽ rõwã ene remẽ, e'i kupa. 26-27 Ãmẽ Juwão e'i ijupe kõ: – Ije, yy pupe kõrijõ tè poromojãmorĩ poroereko ipi. Ajamã'ẽ penemikuwa e'ã janepytery pè age'e ekoi epe, a'e ywesõ ikasiay wete mã'ẽ, e'i. Kõi, “Erakypy rupi uutà” a'epa peupe mã'ẽ. A'e sõsi jõvijã ikasiay wete mã'ẽ tè, e'i. Ije ãmẽ emĩgwai rõmõgà tè aiko, e'i Juwão ijupe kõ. [Ojivy oo ãmẽ aepo momewa omuuarerà kõ gyty kupa kyty.] 28 Yy Jotão ovae pè Juwão poromojãmorĩ iko remẽ a'evo ekoi kupa. Petãnia taa pyri'ĩje'ẽ ekoi remẽ.

Jesu ojikuwa Janejare'e Remimuurerà rõmõ remẽwarà

29 Ajaire kõ'ẽme Juwão Jesu rè omã'ẽ, uu ikoty iko remẽ. Ãmẽ kee e'i Juwão jane kõ pè ky'y, Jesu pewarà mõ: – Ãwĩ a'e Janejare'e Remimuurerà ywe'e uu iko ky'y! e'i. Ãwĩ tè pirujẽ jane kõ aiwererà repy rõmõ omãnõtà ky'y, e'i amãtejẽ ijupe kõ imomewa. Ãwitõ kaneiru ra'yry jajuka ime'ẽ Janejare'e pè janeaiwererà repykarà mõ ipi. Ãwĩvotà omãnõ janeaiwererà repykarà mõ, e'i amãtejẽ. 30 E'i jẽ Juwão: – Ãwĩ pewarà mõ itõkõ kee a'e pejẽ: “E'arà kytywarà rõmõ uutà”, a'e itõkõ. “A'e ywesõ ijayvukasiaytà ewyi. Ereko e'ãve ekoi teãmã”, a'e maekwerà. 31 Ije nakuwaive ava pewarà mõ aepo a'e mijã. Nakuwaive Janejare'e Remimuurerà tè ãwĩ mijã. Age'e tè katu akuwa katu ky'y, e'i. Ãwĩ renone teãmã ajo. Ije ajo poromojãmorĩ yy pè, Janejare'e ayvu rupi, ãwisõ Isaeu kõ oõvijã ywete tokuwa, e'i. 32-33 Ãwisõ nakuwai epe Janejare'e Remimuurerà tè ãwĩ mijã. Ajamã'ẽ Janejare'e emono toporomojãmorĩ remẽ, emotekokuwa amãtejẽ manyvo tareko ikuwa. Kee e'i ije: “E'Ãg rè nemã'ẽtà owyjy uu remẽ. Eremimuurerà apyte 'aryvo owyjytà uu opyta. A'e e'Ãg omonotà jane kõ py'a pupe toike kãramõ”, e'i amãtejẽ Janejare'e ije. Ijayvu rupi katu tè akuwapa ky'y, e'i. Janejare'e 'Ãg rè amã'ẽ, owyjy uu ijapyte 'aryvo remẽ. Ãwitõ pykau owyjy uu, ãwĩvo 'ejẽ amã'ẽ ee. 34 Aje ywete amã'ẽ ee. A'evoa rupi akuwa Janejare'e Ra'yry tè sikaepo ãwĩ mã'ẽ. Ajawyi age'e a'evoa amojenu peupe aiko, tapekuwa teve, e'i Juwão jane kõ pè.

Jesu remimo'e ypykwerà kõ rewarà

35 Ãmẽ kõ'ẽme a'e pè Juwão tui mijẽ, mõrijõ wemimo'earà kõ reve. 36 Omã'ẽ mijẽ Jesu rè okwa iko kupa remẽ. E'i ãmẽ Juwão wemimo'earà kõ pè: – Ãwĩ tè sikaepo Janejare'e Remimuurerà! Ãwĩ kaneiru ra'yry vo omãnõtà janeaiwererà repykarà mõ kãramõ, e'i. 37 Ameve emimo'earà kõ oo Jesu rapyky rupi iko. 38 Ãmẽ Jesu ojirova omãjã wapekwerà kyty uu mãe kõ rè, mõrijõ mãe kõ rè. – Moma'e rã mõ põ pejo erupi? e'i Jesu ijupe kõ. – Poromo'e mã'ẽ, mã mè põ neju? oro'età tè neupe, e'i kupa. 39 – Ja'e awi erupi, tapekuwa esa, e'i Jesu ijupe kõ. Oo Jesu rupi ãmẽ kupa, ikea'ypa kyty. Kwaray ijãpẽ remẽ ovãe a'e pè kupa. Opyta rã'ĩ ipyri kupa, ajaate karupa. Ajaire ojivy oo kupa. 40-41 Ãmẽ Juwão remimo'earà mõ pè Aãtere eu. A'e Juwão pyri tui, Jesu rewarà rè oporegeta upa remẽ. A'e ojivy oo paireve, weke'yry wesa imogeta. Simão Peturu eu teke'yry pè. Kee e'i Aãtere ijupe: – Kãkãe! Mesia rè oromã'ẽ, e'i ijupe. (“Janejare'e Remimuu Janerõvijã ywete rõmõ” jaa tè Mesia, e'i ijupe.) 42 Ameve Aãtere weke'yry weraa Jesu rè tomã'ẽ. Ãmẽ Jesu omã'ẽ tesõ rã'ĩ teke'yry rè. E'i ãmẽ ijupe: – Ene nererà pè Simão eu. Juwão ra'yry tè ene. Age'e Sepasi eutà tè ene ky'y, e'i Jesu ijupe. A'e janeayvu pè “takuru” jaa tè Sepasi. Kereku kõ ayvu pè ãmẽ “Peturu” eu.

Piripi Natanaeu reve ojirovija Jesu rè remẽwarà

43 Kõ'ẽme Jesu ojivytà oo, Karireja yvy kyty. Nooive remẽ kwaima'e mõ rè omã'ẽ, Piripi eu ijupe mã'ẽ rè. – Ja'e erupi, e'i Jesu ijupe. “Hoõ” e'i Piripi ijupe. Awyje oo upi ãmẽ. 44 Petesaita taa wãnà tè Piripi. Aãtere kõ Petesaita wãnà kõ teve. 45 Ãmẽ Piripi oo rã'ĩ ãmõ kwaima'e pijarà mõ, Natanaeu eu ijupe mã'ẽ pijarà mõ. – Janejare'e Remimuurerà rè oromã'ẽ! e'i ijupe. Kõitokõ karamoe remẽ tãmõ Moisesi okusiwa amãtejẽ ee. Ãmõ, Janejare'e ayvu mojenuarà kõ ve okusiwa amãtejẽ ee Aekwerà rè oromã'ẽ. Jesu eu ijupe. Nasare taa wãnà tè a'e. Juse ra'yrerà tè a'e, e'i Natanaeu pè. 46 Ãmẽ Natanaeu noerovijari rã'ĩ mijã, aepo e'i remẽ. – Nasare taa wãnà tè sipõ a'e? A'e pewarà rõwã ipõ mijã! e'i. Nikatu ywe'ei mã'ẽ tè Nasare taa wãnà kõ ipi, e'i tite Natanaeu. – Ja'e teremã'ẽ ee ajawyi esa! e'i Piripi ijupe. Oo ãmẽ Piripi rupi Jesu resa. 47 Ãmẽ Jesu omã'ẽ Natanaeu rè, uu iko remẽ. Kee e'i Jesu ijupewarà mõ: – Emã'ẽ. Ãwĩ sitõ aje ywete Isaeu jeapyrerà e'eay. Noporegeta teitetei mã'ẽ tè ãwĩ, e'i Jesu. 48 Ojimonyi Natanaeu aepo renu. – Manyvo põ erereko ekuwa rejupa? Mã mè põ nemã'ẽ ere? e'i. Ãmẽ Jesu e'i ijupe: – Ji'ite Piripi nooive nepijarà mõ remeve amã'ẽ nere. Yvyra wyry pè neju remeve amã'ẽ nere, e'i. 49 Ameve tite Natanaeu werovija katu ky'y. – Poromo'earà, aje ywete Janejare'e Ra'yry tè ene! e'i. Isaeu kõ Rõvijã ywete tè ene! e'i ky'y. 50 Jesu e'i ijupe: – Haa! Aepo a'e remẽ tè tite põ “aje” ere ije ky'y! e'i. Age'e nemã'ẽ ee mã'ẽ wyi wete nemã'ẽtà kãramõ, e'i. 51 Janejare'e rena rè tẽ tesõ pemã'ẽtà, yva oovapyjavo remẽ. Janejare'e remĩgwai yvapewarà kõ rè tẽ tesõ pemã'ẽtà. Ãmõgwerà owyjytà uu ekoty eremĩgwai kõ rõmõ. Ãmõgwerà oẽtà ewyi oo. A'evoa rè pemã'ẽtà kãramõ. “Aje ywete Janejare'e Remimuurerà ojimojane mã'ẽ rõmõ tè Jesu”, pejẽtà ãmẽ ije ky'y, e'i Jesu. Werovija katu Natanaeu ãmẽ ky'y.

Juwão 2

Jesu yy oinõ uvary aisiriri mã'ẽ rõmõ tojinõ remẽwarà

1-2 Ajaire Karireja yvy pè Jesu ovãema orereve, wemimo'ekwerà kõ reve. Ãmẽ mõrijõ ke paire, ava mõ omenatà Kana taa pè. A'e kyty Jesu oo, orereve. Ijy ve oo. 3 Ojimoaty ojimiwa kupa remẽ, uvary aisiriri mã'ẽ opa sikaepo ky'y. Noyi mõropãrà kõ rè. Jesu y okuwapa a'evo remẽ. Ajawyi e'i Jesu pè: – Opa uvary aisiriri mã'ẽ ky'y, e'i tite ijupe. 4 Ãmẽ Jesu e'i ijupe: – Namojikuwa'ãive ekasia. Neayvu rupi rõwã a'evotà aiko, e'i ijupe. 5 Aepo e'i epe Jesu remẽ, ijy e'i jẽ ja'umã'ẽ jarà remĩgwai kõ pè: – Peenu katu ikõ ememyry ayvu nẽ rõnõ, e'i. “Hoõ” e'i ãmẽ kupa. 6-7 Ãmẽ Jesu e'i a'e kõ pè: – Pemoãnẽ ãnẽ warypy kõ yy pupe erokwa, e'i. – Hoõ. A'evotà oroereko, e'i kupa. Uve 6 rõmõ warypy wasu kõ a'e tetã wyry pè. Takuru jinõgwerà tè warypy kõ ajamã'ẽ. Yy rena kõ tè a'e kõ. A'e yy rena mõ pe'ĩ remẽ 80 rituru rõmõ. Ma'e remẽ 100 rituru rõmõ tesõ. A'e yy ojauka rõmõ oporu kupa ipi. Ãmõ, wekoa rupi a'e yy ve oporu kupa ipi, Juteu kõ rõmõ. A'e warypy kõ pupe ja'umã'ẽ jarà remĩgwai kõ omoãnẽ ãnẽ yy ãmẽ, Jesu ayvu rupi. 8 – Awyjepa, e'i ajaire Jesu pè kupa. – Hoõ. Eavoi yy pẽ eraa ja'umã'ẽ jarà pè ime'ẽ, toã'ã rã'ĩ esa, e'i Jesu ijupe kõ. “Hoõ” e'i kupa. Weraa ãmẽ kupa. 9 Weraa kupa remẽ, soõ, uvary aisiriri mã'ẽ rõmõ sikaepo ojinõma yy warypy pupe, Jesu kasia rupi. A'e ja'umã'ẽ jarà wã'ã esa remẽ, kee e'i: – Haa! Aã ywesõ ikatuay wete ji'iwarà wyi! e'i. Nokuwai Jesu tè oinõ uvary aisiriri mã'ẽ rõmõ. Yy omoãnẽ ãnẽ warypy kõ pupe mãe kõ kõrijõ tè okuwa. Ajawyi ja'umã'ẽ jarà wã'ã esa remẽ, omuu rã'ĩ imẽtarà okoty. 10 E'i ja'umã'ẽ jarà ijupe: – Manyvore põ ji'i aã ypy neremosãi? Ikatuay aã ky'y, e'i ijupe. 11 A'evo Jesu omojisaoka ypy okasia, Kana taa pè ekoi remẽ, Karireja yvy pè ekoi remẽ. A'evo ojikuwa ypy Janejare'e Ra'yry rõmõ. “Aje” oro'e ijupe emimo'ekwerà kõ rõmõ, a'evoa rè oromã'ẽ remẽ. 12 Aja paire Jesu ojivy oo Kapanão taa kyty, oy reve. Imõmirĩ kõ ve oo. Ore ve oroo Jesu rupi, emimo'earà kõ rõmõ. Oroo rã'ĩ oropyta a'e pè.

Jesu Janejare'e moe'ea retã rè okãte'ã remẽwarà

13 Ãmẽ ke'ĩ tãmõ kõ jisyryawerà moetea 'arà okwatà. Jerusarẽ taa pè okwatà. Ãmẽ Jesu ve oo Jerusarẽ taa kyty. 14 A'e pè ovãe remẽ, Janejare'e moe'ea retã gyty oo. Tetã ypy rupi omã'ẽ erokwa. Janejare'e pè temime'ẽ ãrã kõ rè omã'ẽ. Teima kõ iteetejẽ a'e pè tui, temime'ẽ ãrã kõ. Kejõ. Pui ra'yry kõ, kaneiru kõ, jirusi kõ. Wãisõ a'e pè tui. A'e kõ rè Jesu omã'ẽ. Ãmõ, karakuri omojituruka mãe kõ rè omã'ẽ teve, namesa 'aryvo oposiko karakuri rè kupa upa remẽ. 15 Ãmẽ Jesu a'evoa rè omã'ẽ erokwa remẽ, nopotai. Ajawyi tõpasã omõjã teima mopua rõmõ. A'e pupe pirujẽ kaneiru kõ pui kõ omopu imoẽ moẽ imono mono, Janejare'e moe'ea retã ypy pe wyi. Pirujẽ karakuri kõ ve omopepeipa imono. Namesa kõ ve tesõ werova ity. 16 Ãmẽ jirusi jarà kõ pè e'i: – Taperojisyry ikõ ãwĩ rapijarà eraa ike wyi nẽ! e'i. Moma'e japyytà mã'ẽ rena rõwã aã Papa retã, e'i. Papa napemoe'eigà wyi moko pejẽ Papa moe'ea retã ypy pè peiko, e'i Jesu ijupe kõ. 17 A'evoa rè oromã'ẽ remẽ, tãmõ Tavi jĩgarerà rè oroja'a katu, kee e'i maekwerà rè: “Papa, apota katuay neretã. Ajawyi epy'a pupe ayay tesõ neretã wereko ai kupa remẽ”, e'i ojĩga maekwerà. [A'e jĩgarerà rupi katu tè Jesu ekoi. Ajawyi tè aepo jaa rè oroja'a, emimo'earà kõ rõmõ.] 18 Ãmẽ Juteu rõvijã kõ omã'ẽ Jesu rè, a'evo wereko Janejare'e moe'ea retã rè remẽ. Naoryi 'ete ãmẽ kupa. Ajawyi e'i Jesu pè kupa: – Ava ayvu rupi põ moko neiko? e'i kupa. Janejare'e ayvu rupi tè põ? e'i kupa. A'e ayvu rupi remẽ, ikasia emojisaoka orerovake ajawyi, terejikuwa! “Aje ywete” oro'età ãmẽ neupe, e'i teywete Jesu pè kupa. 19 Aepo e'i Jesu pè kupa remẽ, – Hoõ, e'i Jesu. Amojikuwatà. Aã tetã pemotararaipa esa ajawyi, Janejare'e moe'ea retã, e'i. Ekovijarerà tè ainõtà ãmẽ. Moapy ke remeve ainõmatà, e'i Jesu. 20 Ãmẽ e'i ijupe kupa: – Aã tetã 46 kwaray rõmõ tesõ werokwapa inõga rè kupa! e'i kupa. Ajawyi manyvo nerereko'ãi moapy ke remeve inõma! e'i Jesu pè kupa. [Jesu e'i aai tègà toenu kupa. Ajawyi noenu katui ijayvu kupa.] 21 Tetã pè rõwã aepo e'i. Oupewarà mõ tè aepo e'i. [“Ãwitõ tetã jamotararaipa remẽ ekovijarerà tè jainõ mijẽ. A'evotà ejuka paire apoeratà moapy ke remeve”, jaa tè aepo e'i Jesu ijupe kõ. Ore ve noroenuive.] 22 Kãramõ opoera remẽ tè oroja'a ijayvukwerà rè ky'y. “Aje ywete Janejare'e ayvukwerà”, oro'e ãmẽ ky'y. “Aje ywete sikaepo Jesu ayvukwerà”, oro'e teve. Jesu okuwa jane kõ py'a pewarà remẽwarà 23 Jesu Jerusarẽ taa pè ekoi remẽ, Janejare'e kasia omojisaoka. Jane kõ mõa'ãrõwã omã'ẽ ee a'evo ekoi remẽ, tãmõ kõ jisyryawerà moetea 'arà rè ojimoaty mãe kõ. A'e kõ Jesu rè “aje” e'i. 24 Ajamã'ẽ Jesu “aje” ne'i ijupe kõ, ipy'a pewarà kõ okuwapa rewarà mõ. 25 Nopotai jamome'u ijupe ipy'a kõ rewarà, okuwapa teãmã rewarà mõ.

Juwão 3

Nikotemu oo pya Jesu resa remẽwarà

1 Ãmẽ oiko kwaima'e mõ, Nikotemu eu ijupe mã'ẽ. A'e Juteu rõvijã mõ tè. A'e Pariseu tè. 2 A'e ãmõ 'ary pè oo pya Jesu resa. Kee e'i Nikotemu Jesu pè: – Poromo'earà, orokuwa aje ywete ere mã'ẽ tè ene, e'i. Janejare'e Remimuurerà teipõ ene, a'e neupewarà mõ. Janejare'e kasia nemojisaoka ipi. Oromã'ẽ nere a'evo neiko remẽ ipi. Janejare'e nanemokasi sõ remẽ, nanekasi'ãi kuwa, e'i ijupe. 3 Ãmẽ Jesu e'i ijupe: – Aje kee a'e ene. Ava mõ sõ opota Janejare'e omoẽoka o'arà kyty iko remẽ, tisaky mijẽ. Nisakyi mijẽ remẽ, na'evo'ãi kuwa, e'i Jesu ijupe. 4 Ãmẽ Nikotemu e'i: – Manyvo nija'e'ãi jaike mijẽ janey mari pupe tijanesaky mijẽ! e'i. 5-6 Ãmẽ Jesu e'i ijupe: – Janey pe wyi jaẽ remẽ, imemyry rõmõ jaiko. Janeruu ãkarã rõmõ jaiko teve. Jaeru janerõvijãgwerà kõ ipi, e'i. Nãwĩvo kuwa'ãi Janejare'e wãkarã rõmõ janererekotà remẽ, e'i. Tekoua pyaukwerà tè ome'ẽtà janeupe. I'Ãg tè janepy'a pupe oike. Ãwĩvo Janejare'e ãkarã rõmõ jaiko. Eruparà rõmõ jaiko ãmẽ. Janejare'e 'Ãg nijanepy'amoteei remẽ, nijamoẽoka kuwa'ãi Janejare'e jane'arà kyty ãmẽ, e'i. Aje ywete aepo a'e ene, e'i. 7 Tanerapy'a e'ã ikõ eayvu nẽ, e'i. 8 Nojisai mã'ẽ teipe Janejare'e 'Ãg. Ãwitõ yvytu nojisai. Jaenu kõrijõ tè yvytu okwa remẽ ipi, e'i. Ajamã'ẽ nijakuwai mape kyty wyi uu. Nijakuwai teve mape kyty ootà. Nojikuwai iko. Ãwĩvo ve Janejare'e 'Ãg nojikuwai iko. Nomã'ẽytyi ee. Ajamã'ẽ ava mõ py'a pupe oike sikaepo remẽ, i'Ãg opy'amoteetà ky'y. Tekoua pyaukwerà rupi tè ekoità ãmẽ ky'y. “Mano põ py'awarà mõ ojimoteepa kupa?” eutà ãmẽ, e'i Jesu ijupe. 9 Ãmẽ Nikotemu e'i Jesu pè: – Manyvo põ ãwĩvo? e'i. 10 Ãmẽ Jesu e'i ijupe: – Haa! Nerekuwai wete sipõ! e'i. Janejare'e ayvu rè Isaeu kõ nemotekokuwa mã'ẽ teipe ene mijã! e'i. Netekokuwavay kuwasi mijã! e'i. 11 E'i jẽ Jesu Nikotemu pè: – Ore, orokuwa katu mã'ẽ tè oromome'u ipi, e'i. Oromã'ẽ ee mã'ẽ teve oromovyvy ipi, e'i. Ajamã'ẽ “aje ywete” napejẽi oreayvu pè. 12 Emã'ẽ. Ikewarà yvy pewarà sõ amovyvy remẽ, naperovija'ãi kuwa. Tysi tõ Janejare'e rena pewarà sõ amovyvy remẽ, nerekuwa'ãi kuwa. “Aje ywete” nere'ãi kuwa eayvukwerà pè, 13 ãwisõ a'e pe wyi tè ajo. Ava jẽ rõwã oo Janejare'e rena kyty ee omãjã ipi. Ije rõmõ'ĩte amã'ẽ ee. A'e tè emuroka tajimojane ike pepyterà rupi, [“Erena rewarà emome'u ijupe kõ tokuwa kupa”, e'i emuroka]. 14 – Aje Janejare'e rena pe wyi tè ajo, e'i. Ajamã'ẽ nererovijai mãe kõ ejukaokatà, e'i. Emõ'ãtà ejuka kupa, yvyra rè. Ãwitõ tãmõ Moisesi karamoe remẽ tekoe'ãma pè moe rã'ãga omõ'ã yvyra rè. A'evotà erereko kupa, e'i. 15 [Amãnõtà jane kõ aiwererà repykarà mõ, e'i] Ajawyi eako'i ere mãe kõ amoigo karuaruokatà Papa pyri, e'i Jesu. 16 – Janejare'e pirujẽ jane kõ wauvay wete. Ajawyi ije, Wa'yry pe'ĩgwerà wyjaveay mã'ẽ rõmõ emuroka ike yvy pè. Ava mõ ojirovija katu ere wereko katuarà rõmõ remẽ, naemavo'ãi ity aa. Areko karuarutà epyri. 17 Kee e'i Papa eupe emuu: “Ekwa yvy kyty poroereko katuarà rõmõ”, e'i. “Ijaiwererà kõ eitypypyipaoka iwyi kõ. Erojivy kõ mijẽ tojimory mijẽ ere kupa ky'y”, e'i ije. Kee ne'i Papa ije: “Ekwa yvy kyty jane kõ momorijauoka ijaiwererà kõ repykarà mõ”, ne'i ije. Kee e'i tè ije: “Ekwa terereko katu kõ”, e'i tè ije Wa'yry rõmõ emuroka. 18 – Ajawyi nejirovija katu ere Janejare'e Ra'yry rõmõ remẽ, kee ne'i'ãi neupe: “Nivoi neiko. Oromonotà ajawyi jimomorijau wasua rena kyty!” ne'i'ãi Papa neupe. Kee e'ità kõrijõ tè neupe: “Noromomorijauoka'ãi, Era'yry rè nejirovija nerako'i rõmõ rewarà mõ”, e'ità kõrijõ neupe. Nojirovijai ee mãe kõ pè ãmẽ, “Era'yry wyjaveay mã'ẽ rè nerejirovijai. Ajawyi ‘nivoi mã'ẽ tè ene’, a'e kõrijõtà neupe”, e'ità. Imomorijaua rã omo'ypa a'evo ekoi mãe kõ rè. Ajawyi a'evotà. 19 – Poroyape mã'ẽ vo 'ejẽ ije aiko. Ãwitõ iky'a mã'ẽ pãtõnusu pè nojikuwai ipi. Jayape esa remẽ tè kuwa iky'akwerà ojikuwa. A'evo mã'ẽ teve ije, e'i Jesu. Janejare'e emuu ike jane kõ pytery pè taiko, e'i. Amojikuwaoka ipe ijaiwererà kõ ijupe kõ ipi. Nojimosĩokai weko aiwerà rè ajamã'ẽ kupa ipi. Noityoka tari waiwererà ije kupa. Ma'e rewarà mõ. Weko aiwerà ywesõ opota ewyi kupa ipi. Nomã'ẽ tari ere ãmẽ kupa ipi. 20 Omoane'e jẽ waiwererà ereko kupa wyi nomã'ẽ tari ere kupa ipi. Nonu tari ekoty kupa ipi. “Eaiwererà tojikuwa e'ã”, e'i tite kupa rewarà mõ a'evo ekoi kupa. Ajawyi nonu tari ekoty kupa. 21 Papa ayvu rupi ekoi mãe kõ ãmẽ omã'ẽtà katu ere Ta'yry rõmõ. Ajawyi, “Ikoty jẽsi taa!” e'i kupa ipi. Ãwĩvo ojikuwa katu Papa remimota rupi ekoi mãe kõ rõmõ kupa, e'i Jesu.

“Jesu ywesõ tè e'arà kytywarà rõmõ ekoi”, e'i Juwão poromojãmorĩ mã'ẽ

remẽwarà 22 Aja paire Jesu oo mijẽ Juteja yvy kyty. Ore ve oroo upi, emimo'earà kõ rõmõ. A'e pè opyta puku rã'ĩ Jesu. Jane kõ omoaty imojãmorĩ rã'ĩ. 23 Ãmẽ jakatu Juwão ve poromojãmorĩ upa. Enõ taa pè a'evo ekoi. A'e taa Sarĩ taa pyri'ĩje'ẽ tui. A'e pè poromojãmorĩ teve upa, mitirõwã yy a'e pè rewarà mõ. A'e kyty jane kõ oo oo ojimojãmorĩoka Juwão pè ãmẽ. 24 (Juwão nomopã'ãive kupa remeve a'evo ekoi.) 25 A'e pè ekoi kupa remẽ, emimo'earà kõ mõ ojiayvuvaja vaja jane mõ reve, Juteu mõ reve. – Mano ja'e kuwa põ jajipikusu remẽ, Janejare'e, “Niky'ai mã'ẽ tè ãwĩ”, te'i jane? e'i kupa. Aepo jaa rè ojiayvuvaja vaja kupa upa. 26 Ãmẽ emimo'earà kõ oo Juwão pè javo. – Jõvijã! Kõi, kwaima'e mõ, nereve yy Jotão ovae kyty ekoi maekwerà. Nekuwa jẽ põ kõi ere maekwerà? Age'e poromojãmorĩ upa. A'e rupi jane kõ pirujẽ oo oo ky'y, e'i kupa. “Nijaneatyi” ejaa tè aepo e'i kupa. 27 Ãmẽ Juwão e'i: – Õ'õ, aje. I'ete! e'i. Emã'ẽ esa! Janejare'e opota remẽ tè katu agyvo. 28 Kõitokõ a'epa pejẽ maekwerà: “Janejare'e Remimuurerà Janerõvijã ywete mã'ẽ rõmõ rõwã ije”, a'epa peupe. “A'e vãea mojenuarà rõmõ tè Janejare'e emuroka”, a'epa itõkõ pejẽ. 29 Ajawyi eroryvay jane kõ ojimoaty ipyri remẽ, e'i. A'e kõ wenu katu Janejare'e Remimuurerà ayvu rewarà mõ erory, e'i. Najimõarõi. Ãwitõ jirekoa pè remẽ, jomẽtarà jimorypa kõ nojimõarõi ipi. “Ererekwarà rõmõ kuwasi mijã”, ne'i'ãi ojimorypa rerekwatarà pè kupa ipi. A'evo ve ije. “Eremimo'earà kõ rõmõ kuwasi mijã”, na'e'ãi teve Jesu remimo'earà kõ pè. 30 A'e ywesõ tè e'arà kytywarà rõmõ ekoi. Iwyri'ĩwarà tè ije ãmẽ aiko, e'i Juwão. “Yva pe wyi uu mã'ẽ Jesu”, e'i mã'ẽ 31 Janejare'e Ra'yry tè yva pe wyi uu mã'ẽ tè. Uu rena pe wyi uu mã'ẽ tè. Ajawyi a'e ywesõ ikasiay jowyi mã'ẽ tè. Jane ãmẽ, yvy rupi teãmã jaiko. Ikewarà rõmõ'ĩte jamovy ipi. Nijakuwai yva pewarà ipi. Yva pe wyi uu mã'ẽ tè okuwa. Ajawyi a'e ywesõ ikasi jowyi. 32 Omã'ẽ ee mã'ẽ tè omome'u ipi. Ãmõ, wenu mã'ẽ teve. Aje ywete ipe oporegeta iko. Ajamã'ẽ “aje ywete” ne'i jane kõ ijupe. Yva pewarà rè nomã'ẽi kupa, ajawyi. 33 Ajamã'ẽ ava mõ wenu katu ijayvu erovija remẽ, “Aje ywete Janejare'e e'i mã'ẽ”, e'ità ijupe enu. 34 Janejare'e omuu Wa'yry wayvukwerà tomojenu erokwa. O'Ãg omuu ijupe imokasiay wete rõmõ. Ajawyi Uu ayvukwerà okuwa katu imomewa. Ta'yry tè rewarà mõ okuwa katu. 35 Janejare'e wauvay Wa'yry. Ajawyi wayvu omokasioka Wa'yry pè. “Jane kõ Rõvijã rõmõ neikotà”, e'i ijupe. 36 Ajawyi Ta'yry rè ojirovija mãe kõ oiko karuarutà ipyri. Nojirovijai ee mãe kõ ãmẽ noiko'ãi ipyri. Janejare'e remimomorijauarà rã mõ tè ootà kupa.

Juwão 4

Wãivĩ Samaria wãnà pè Jesu oporegeta remẽwarà

1-2 Jane kõ mõa'ãrõwã ojimoaty Jesu pyri upa. Ojimojãmorĩoka ijupe kupa. (Jesu rõwã poromojãmorĩ ajamã'ẽ. Ore tè oromojãmorĩ kõ emimo'ekwerà kõ rõmõ.) Ãmẽ Pariseu kõ pè Jesu rewarà ojenu. Kee e'i imojenuarà kõ ijupe kõ: “Jesu mõa'ãrõwã mirà kõ omojãmorĩ upa”, e'i kupa. “A'e ywesõ Juwão wyi poromojãmorĩ ky'y”, e'i kupa. “Ijatyray oo upi mãe kõ ky'y”, e'i Pariseu kõ pè kupa. Aepo Pariseu kõ wenu remẽ, ojimõarõ ãmẽ kupa. 3 Ãmẽ aepo ojenu Jesu pè remẽ, ojisyry rã'ĩ oo orereve Juteja yvy pe wyi. Karireja yvy kyty orojivy oroopa aepo e'i mãe kõ wyi. 4 Oroo remẽ, Samaria yvy pè ypy orovãe. A'e myterà rupi orokwa oroiko. 5 Ãmẽ Samaria wãnà kõ rena mõ pè oroo orovãe. Sikara eu a'e taa rerà pè. A'e taa popy pè karamoe remẽ tãmõ Jako yvy pẽ ome'ẽ wa'yry Juse pè. 6-8 A'e pè uve jẽ yy je'ẽ mõ, Jako remipãkõigwerà. Ajawyi tãmõ Jako yykwerà eu jẽ a'e yy je'ẽ pè. A'e pyri oroo orovãe. Jane 'aryvo katu kwaray remẽ orovãe a'e taa pè. Ãmẽ oroike rã'ĩ taa pè ja'umã'ẽ pyy. Jesu ãmẽ opyta, yy je'ẽ pyri. Wapy okane'õyo rõmõ upa. Ãmẽ ipõ wãivĩ mõ uu yy je'ẽ perã. Samaria wãnà mõ a'e wãivĩ ekoi. Ãmẽ ipõ Jesu omã'ẽ ee remẽ, kee e'i ipõ ijupe: – E'ywa, e'i. Eeru yy pẽ tay'u, e'i ijupe. 9 Ãmẽ ipõ wãivĩ e'i ijupe: – Haa! Juteu tè ene. Samaria wãnà teipe ije. Ajamã'ẽ aepo ere jẽ ije, e'i Jesu pè. (Juteu kõ noporegetai Samaria wãnà kõ pè ipi. Ajawyi aepo e'i.) 10 Ãmẽ ipõ Jesu e'i ijupe: – Neremã'ẽi ere wyi nekuwai rejupa, e'i. Ãmõ, nerekuwai Janejare'e remime'ẽa rã peupewarà. Ekuwa katu rejupa remẽ, yy pẽ ere kuwa ije, tame'ẽ neupe, e'i. Yy poromoigo karuaru mã'ẽ ame'ẽ kuwa neupe ãmẽ, e'i. 11 Ãmẽ ipõ wãivĩ e'i ijupe: – Emã'ẽ esa. Aã yy je'ẽ ke'ĩrõwã typy oo. Moma'e pupe nereekyi'ãi yy. Ajawyi mape wyi põ neekyità yy poromoigo karuaru mã'ẽ ime'ẽ ije? e'i tite. 12 E'i jẽ ipõ wãivĩ: – Nekuwa põ aã yy ikatuay? e'i. Tãmõ Jako tè aã opãkõi ity oreupe. Aekwerà tè aã yy. A'e tè aã yy o'u ipi maekwerà tè. Ta'yry kõ ve o'u ipi mijã. Eima kõ ve o'u ipi mijã, e'i. Ene ywesõ sipõkõ tãmõ kõ wyi? e'i wãivĩ Jesu pè. 13 Kee e'i ipõ Jesu ãmẽ ijupe: – Aã yy pè rõwã aepo a'e neupe, e'i. Aã yy ne'u remẽ, ne'ywa jẽtà neiko, e'i. 14 Ajamã'ẽ eremime'ẽgwerà ne'u remẽ, awyje nane'ywa'ãi neiko ky'y, e'i ijupe. Ãwitõ yy ryapyry nopa'ãi kuwa ipi, ãwĩvo ve kuwa eremime'ẽgwerà ipi. Neiko karuarutà ãmẽ neiko, e'i ijupe. 15 Ajawyi wãivĩ e'i ijupe: – Eme'ẽ ajawyi a'e yy pẽ tay'u ipupe, awyje age'e te'ywa e'ã aiko ky'y, e'i. Tajivy jivy e'ã yy perã ky'y, e'i tite ikuwa e'ã. 16 Ãmẽ ipõ Jesu e'i ijupe ky'y: – Ekwa nemẽnà pijarà mõ, e'i ijupe. 17 Ãmẽ ipõ wãivĩ e'i: – Nuvei ije emẽnà, e'i. – Aje ywete ere, e'i Jesu. 18 Uve ajamã'ẽ nemẽnerà. 5 rõmõ mijã, e'i. Age'e nerevewarà nemẽnà rõwã ky'y. Nemẽnà rã'ãga tè age'e ky'y, e'i. 19 [Ameve tite ipõ ojimonyi wãivĩ aepo renu ky'y. “Manyvo sipõ erewarà okuwa?” e'i oupe.] Ajawyi e'i Jesu pè: – Janejare'e ayvu mojenuarà tè sipõ ene? e'i. 20 Ajawyi põ nemome'u erekokwerà ije? e'i. A'e tè ene remẽ, kee emome'u ajawyi ije. Mã mè põ Janejare'e jamoe'e ipi? a'e ene. Orerãmõi kõ aã yvytyrapyte 'aryvo kõrijõ tè omoe'e Janejare'e ipi, e'i. Pejẽ ãmẽ, “Jerusarẽ taa pè jaa imoe'e ipi”, pejẽ Juteu kõ rõmõ. “A'e pè kõrijõ tè jamoe'e kuwa ipi”, pejẽ. Ava põ okuwa? Maty põ jaatà imoe'e ãmẽ? a'e ene, e'i Jesu pè. 21 Ãmẽ ipõ Jesu e'i ijupe: – Kee a'e mã'ẽ pè “aje” ere. Ke'ĩ napeo'ãi yvytyrapyte 'aryvo Janejare'e moe'e ky'y. Ãmõ, Jerusarẽ taa kyty napeo'ãi teve. 22-23 Aje ywete omoe'e mãe kõ opy'a pupe tè omoe'età ky'y. Ãmẽ tè, “Maty põ jaatà imoe'e?” naoty'ãi ky'y. Pejẽ pemoe'e ipe Janejare'e napekuwai remẽ. Ore ãmẽ orokuwa teãmã, Juteu kõ tè ore rewarà mõ, e'i. Orokuwa manyvotà põ Janejare'e wereko jane kõ rereko katu, omojenupa wayvukwerà orerãmõi kõ pè karamoe remeve rewarà mõ, e'i. Emã'ẽ esa. Janejare'e moe'earà kõ ivo omoe'e ipi. I'ãg kõ tè oporegeta ijupe. A'evo tè Janejare'e opota tijamoe'e ipi. Ory janere ãmẽ ipi. Aje ywete aepo a'e, e'i. 24 E'i jẽ Jesu ijupe: – Jane vo rõwã Janejare'e. Janepirà rupi jaiko mã'ẽ vo rõwã Janejare'e. Nomã'ẽytyi ee. Ajamã'ẽ jamoe'e jẽ ipi, ãwisõ nijamã'ẽi epe ee remẽ. I'Ãg tè janemo'e eewarà aje ywete mã'ẽ tijakuwa ipi. Ãmẽ sõsi ivo jamoe'e kuwa ipi, e'i. 25 Ãmẽ ipõ wãivĩ e'i: – Akuwa Janejare'e Remimuurerà ovãetà Janerõvijã ywete rõmõ, Mesia eu mã'ẽ. (Kiristu eu ve ijupe mã'ẽ.) A'e ovãe janepyri remẽ sõsi janemotekokuwavaytà ky'y. Janemojimoryokatà Janejare'e rè ãmẽ ky'y, e'i wãivĩ. 26 Ãmẽ Jesu e'i ijupe: – A'e tè ije. Aporegeta neupe mã'ẽ tè a'e, e'i ijupe ky'y. 27 Ameve orovãe ipyri ky'y, Jesu remimo'ekwerà kõ rõmõ. Ja'umã'ẽ oroerovãe. Oromã'ẽ ywete orerõvijã rè, oroapy'a rewarà mõ. Wãivĩ pè oporegeta upa rewarà mõ. Norepui ajamã'ẽ ijupe. “Moma'e põ nepota?” noro'ei teve wãivĩ pè. Orerõvijã pè ve, “Manyvo rewarà mõ põ wãivĩ reve neporegeta rejupa?” noro'ei teve. Oromã'ẽ kõrijõ tè ee kõ. 28 Ameve wãivĩ murutuku oity oo. Ojivy rã'ĩ oo wena kyty Jesu ayvu momewa. A'e wãnà kõ pè omome'u erokwa. 29 – Pejo kwaima'e mõ rè tapemã'ẽ, e'i. Pirujẽ erekokwerà omovyvy taenu. Ekuwa teãmã. Janejare'e omuu mã'ẽ tè rõwã põkõ ojisaoka janeupe ky'y? Janeremiãrõgwerà rõwã põkõ ojisaoka janeupe? e'i. Pejo tapemã'ẽ ee ajawyi! e'i ipõ. 30 Ameve aty wasu uu Jesu kyty, wãivĩ ayvu rupi. 31 Ãmẽ jakatu yy je'ẽ pyri oroku jẽ. Ãmẽ kee oro'e ipe Jesu pè: – Jõvijã, e'u rã'ĩ si ja'umã'ẽ mõ, oro'e ipe ijupe. 32 – Ãnĩ. Ekasi katu, e'i oreupe. Arekopa ije eremi'õ, napekuwai mã'ẽ, e'i kõrijõ oreupe. [Ja'umã'ẽ e'e pè rõwã aepo e'i ajamã'ẽ. “Janejare'e emokasi”, jaa pè tè aepo e'i.] 33 Ajamã'ẽ norokuwai. Ajawyi orojimogeta ee: – Ava mõ ajamã'ẽ noerui ja'umã'ẽ ime'ẽ ijupe! oro'e tite ikuwa e'ã. 34-35 Ãmẽ ajaire e'i mijẽ ore: – Emuuarerà eposikoa ome'ẽ ije, e'i. Ajawyi a'evoa rè emokasi ipi. Pemã'ẽ imono, e'i oreupe. Ãmẽ oromã'ẽ imono remẽ, jane kõ mõa'ãrõwã ovãe iko. Ãmẽ Jesu e'i mijẽ ore: – Ãwĩ kõ Janejare'e omuroka ekoty tamotekokuwa kõ age'e ywete, tojirovija katu ypy ere kupa, e'i. Temitãgwerà rè tè poromosã'ãgatà rã'ĩ esa, e'i. “Age'e rõwã temitã ipirãtà. Irõte jay remẽ tẽ tesõ”, e'i Jesu. “Age'e rõwã japo'otà imoaty”, e'i. Pekuwa katu a'evoa ipi. Ãwĩvo rõwã aã jane kõ uu iko mãe kõ. Age'e ywete japosikotà ee kõ, e'i. 36-37 Iteetejẽ eremĩgwai kõ posikoa. Ãmõgwerà eayvukwerà omome'u ypy jane kõ pè. Ãmõ kõ omotekokuwa kõ jẽ tojirovija ypy ere, Janejare'e pyri toiko karuaru kupa. A'evo ekoi kupa remẽ, eremĩgwai kõ oryvaytà ee kõ omãjã, pirujẽ. Janejare'e tè omoryoka kõ ywetetà, iposikoa repy rõmõ. Oryvay jometà ãmẽ kupa. 38 Ãwĩvotà age'e. Uutà janekoty mãe kõ jamotekokuwatà tojirovija ypy ere kupa. Pemome'u eayvukwerà ijupe kõ. Ajamã'ẽ pejẽ ypy rõwã pemome'u ijupe kõ, e'i. Okuwa ypypa teãmã erewarà kupa, Janejare'e ayvu mojenuarà kõ ayvukwerà rupi, e'i. Ajawyi age'e remẽ niwaype'ãi ere ojirovija katu kupa, e'i Jesu ore. 39 Ameve Samaria wãnà kõ ovãe vãe iko orekoty. Mõa'ãrõwã ovãe vãe kupa. Wãivĩ ayvukwerà rupi “aje” e'i Jesu rè ojirovija kupa wyi. “Pirujẽ erekokwerà kõ omovyvy taenu”, e'i wãivĩ ijupe kõ. Ajawyi uu uu kupa. 40 Ãmẽ a'e kõ: – Epyta jẽ rã'ĩ ike oremotekokuwa rejupa, e'i Jesu pè kupa. Opyta jẽ rã'ĩ ãmẽ ipyri kõ, Sikara taa pè. Mõrijõ ke rõmõ opyta a'e pè. 41 Omotekokuwa kõ jẽ rã'ĩ. Ojirovija katu Jesu rè ãmẽ kupa. Mõa'ãrõwã ojirovija ee mãe kõ. 42 A'e kõ e'i ãmẽ wãivĩ pè: – Age'e si neayvu rupi kõrijõ tè rõwã oroerovija katu ijayvukwerà ky'y, e'i kupa. Ore ywete oroenu rewarà mõ oroerovija ky'y, e'i kupa. Aje ywete Janejare'e Remimuurerà tè Jesu, oro'e. Janerereko katuarà tè a'e, e'i kupa.

Karireja yvy kyty oroo oroiko remẽwarà

43 Mõrijõ ke paire a'e taa pe wyi orojisyry oroo. Karireja yvy kyty oroo jẽ, Jesu rupi. 44 Ãmẽ Jesu e'i oreupe: – Janejare'e omuu wayvu mojenuarà kõ remẽ, [ãmõgwerà wenu katu emimojenuwerà ipi.] Etãrã kõ ãmẽ “aje” ne'i emimojenu pè ipi. “Janejare'e ayvu mojenuarà tè ãwĩ”, ne'i wetãrã pè kupa ipi. Nomoe'ei kupa ipi, e'i. 45 Ajamã'ẽ Jesu ovãema Karireja yvy pè remẽ, a'e wãnà kõ oryvay ee. Omã'ẽma Jesu rè Jerusarẽ taa pè manyvo ekoi oo kupa remẽ. Tãmõ kõ jisyryawerà omoete kupa remẽ, omã'ẽ ee kupa. Ajawyi ena kõ pè ovãe remẽ, oryvay ee omãjã kupa.

Ke'ĩrõwã wyi Jesu ja'yry omokatu remẽwarà

46 Orovãema Karireja yvy pè remẽ, Kana taa kyty oroo mijẽ Jesu rupi. Kõitokõ Jesu yy oinõ uvary aisiriri mã'ẽ rõmõ, a'e kyty. A'e pè oroiko remẽ jakatu sikaepo jõvijã ra'yry mõ itekorã ywete. Okãjã taray ipõ ta'yry. Ãmõ taa pè itekorã, Kapanão taa pè. 47 Ãmẽ “Jesu ovãe Juteja yvy pe wyi”, e'i mã'ẽ ojenu sikaepo tuu pè, tõvijã pè. Ajawyi wa'yry oity rã'ĩ oo ojiporijauesaoka Jesu pè. Kee e'i Jesu pè: – Jõvijã! Era'yry okãjã taray upa! Py'ajẽ ejo teremokatu! e'i Jesu pè. 48 Ãmẽ Jesu e'i ijupe. Wã'ã tè ajamã'ẽ. Ajawyi “hoõ” ne'ive. – Ekasia rè pemã'ẽ remẽ tè katu kuwa sipõ “aje” pejẽ ere pejirovija? e'i kõrijõ tè. 49 Ajamã'ẽ tuu e'i jẽ: – Kuise'ẽ ejo! Era'yry okãjã e'ãve ejo teremokatu! e'i. 50 Ãmẽ Jesu e'i tuu pè: – Nokãjã'ãi nera'yry. Opoera jẽtà. Ejivy eo ajawyi nerena kyty, e'i kõrijõ ijupe. Ojivy ãmẽ oo tuu wena kyty, Jesu ayvu rupi. [Nomã'ẽi epe wa'yry mokatua rè remẽ, “aje ywete” e'i jẽ Jesu ayvu pè]. 51 Pe'ĩ oke pee rupi oo remẽ. Ãmẽ kõ'ẽme pee rupi oo iko remẽ ipõ emĩgwai kõ mõ uu õvaisĩ. – Nera'yry opoerapa! e'i ipõ ijupe kupa, pee ku'ai pè. 52 – Manyvo remẽ põ ikatupa? e'i ipõ tuu. – Kwee ikatupa, e'i kupa. Jane 'aryvo katu kwaray remẽ ikatupa, e'i kupa. 53 Ãmẽ tuu aepo okuwapa remẽ ipõ: – Haa! Jesu, “Nokãjã'ãi nera'yry”, e'i ije remeve sipõ opoerapa era'yry! e'i. Ameve ipõ tuu retãrãgwerà kõ pirujẽ “aje” e'i Jesu ayvukasia pè ky'y. Ipyriwarà kõ ve. Emĩgwai kõ teve. Ke'ĩrõwã wyi Jesu itekorã mã'ẽ omokatu rewarà mõ a'evo kupa. 54 A'evo okasia omojisa mijẽ, Juteja yvy pe wyi, Karireja yvy pè uu ovãe paire.

Juwão 5

Jesu omokatu etãmã nomãrãkuwai mã'ẽ remẽwarà

1 Ãmõ 'ary pè Juteu kõ oo mijẽ Jerusarẽ taa kyty, Janejare'e moetea 'arà remẽ. Ajawyi Jesu ve oo mijẽ a'e kyty. 2 A'e pè oiko yy ra'yry kegà mã'ẽ mõ, teminõgwerà mõ. Taa rovaokena pè “kaneiru reroikea” eu mã'ẽ pyri yy rena tui. Petesata e'i Juteu kõ a'e yy rena pè wayvu rupi, Epereu ayvu rupi. Ãmẽ a'e ypy rupi oiko janeikea kõ, 5 rõmõ. 3-4 A'e yy ra'yrygà rupi Jesu okwa remẽ, itekorã mãe kõ rè omã'ẽ erokwa. Naeapyoi mãe kõ rè. Ãmõ, noatai teãmã mãe kõ rè. Ãmõ, etãmã nomãrãkuwai mãe kõ rè. Wãisõ iteetejẽ omã'ẽ ee kõ. (A'e kõ omokatua wãrõ tite upa. Kee rewarà mõ. Mape remẽ tè Janejare'e remĩgwai yvapewarà mõ owyjy sikaepo uu yy ra'yrygà mopipo pipo. A'evo remẽ upi upi yy ra'yry kegà mã'ẽ pupe owyjy ypy mã'ẽ apy'a ikatupatà ipi, e'i kupa. Owyjy ypy mã'ẽ kõrijõ tè ikatupa. Ajawyi wãrõ tite a'e ypy rupi kupa. “Ije ypy tawyjy yy pupe a'evo remẽ”, e'i tite kupa.) 5 Ãmẽ uve kwaima'e mõ a'e pè, etãmã nomãrãkuwai mã'ẽ. Karamoe ipõ itekorã upa. 38 kwaray rõmõ tesõ a'evo ekoi. A'e yy ra'yrygà ypy pè tui upa. Wãrõ tite omokatua upa. Manyvo ne'i'ãi ovote owyjy yy pupe ajamã'ẽ. Ajawyi a'e pè tui tite upa. 6 Ãmẽ Jesu ovãe ipyri remẽ, okuwa karamoeve itekorã upa. E'i ãmẽ ijupe: – Nepota põ nekatua? e'i ijupe. 7 – Manyvo na'e'ãi aa yy ra'yrygà pupe awyjy opipo pipo remẽ, e'i. Ije ypy kuwasi awyjy mijã, e'i. Ajamã'ẽ ãmõ kõ ypy erenone'a ipi, e'i Jesu pè. 8 Ajawyi Jesu e'i ijupe: – Epõ'ã. Nekea ajawyi eropõ'ã eroata eraa, e'i ijupe. 9 Aepo e'i ijupe remeve kwaima'e opoerapa opõ'ã, Jesu ayvu rupi. Okea weropõ'ã eroata eraa ky'y. Ameve aty wasu pyterà rupi sikaepo Jesu ojisyry oo. Jimoava 'arà remẽ a'evo ekoi. 10 Ãmẽ Juteu rõvijã kõ mõ omã'ẽ kwaima'e rè, okea werojivy eraa remẽ. Nopotai a'evoa ajamã'ẽ kupa, jimoava 'arà mẽ a'evo wereko rewarà mõ. Ajawyi oo imogeta kupa. – Jajimoava rã'ĩ age'e, e'i kupa. [Nereenui sipõ tãmõ Moisesi remikusiwarerà, “Moma'e tijamovy e'ã eraa jimoava 'arà mẽ ipi”, e'i maekwerà?] Ajawyi tè nekea nemovy jẽ tesõ ereko! e'i tite ijupe kupa. 11 Ãmẽ noatai maekwerà e'i: – Emokatuarerà tè, “Nekea eropõ'ã eroata eraa”, e'i ije ajamã'ẽ, e'i. 12 – Ava põ aepo e'i ene? e'i kupa. 13 – Nakuwai, e'i. Namã'ẽi ee ipi mijã, e'i. Age'e tè katu amã'ẽ ee. Nakuwai erà ajamã'ẽ, e'i. Ãmẽ omã'ẽ ipe erokwa. Omokatuarerà weka tite. Nojikuwai. Ji'ite sikaepo ojisyry oo. 14 Ajaire Jesu omã'ẽ mijẽ wemimokatukwerà rè, oo Janejare'e moe'ea retã ypy pè remẽ. Kee e'i Jesu ijupe: – Emã'ẽ esa! Nekatupa ky'y! e'i. Ivo katu ikõ eiko ky'y nẽ, e'i ijupe. Nivoi neiko remẽ ywesõ nejimomorijauvaytà ky'y! e'i wemimoatakwerà pè. 15 Aepo e'i Jesu ijupe paireve, okuwapa omokatuarerà ky'y. A'e momewa oo Juteu rõvijã kõ pè ãmẽ ky'y.

“Papa ayvu rupi aposiko ipi”, e'i Jesu mã'ẽ

16 A'evo Jesu wereko noatai mã'ẽ imokatu jimoava 'arà mẽ. Ãmẽ Juteu rõvijã kõ nopotai a'evo Jesu ekoi mã'ẽ. Ajawyi omojaiwe kupa ky'y. 17 Ajawyi Jesu e'i ijupe kõ: – Papa nopi oposikoa wyi ipi, e'i. Ãwĩvo ve ije. Napi'ãi teve eposikoa wyi, e'i. 18 Ãmẽ aepo wenu kupa remẽ, e'i kupa: – Aepo e'i sipõkõ oporegeta! Siraa ajawyi ijuka! e'i kupa. Noerovijai sõ ayvu jimoava 'arà rewarà! e'i kupa. Ãmõ, nomomojyi Janejare'e! “Papa” e'i tẽ tesõ ijupe. “Janejare'e vo ywete ije”, jaa tè aepo e'i! Ajawyi ywesõ siraa ijuka! e'i kupa.

Janejare'e Ra'yry ayvukasia rewarà

19 Aepo e'i kupa remẽ, Jesu e'i mijẽ ijupe kõ: – Eayvu rupi rõwã aposiko ipi, e'i. Amã'ẽ Papa rè oposiko remẽ ipi, e'i. Ijayvu rupi tè aposiko ipi. Ãwitõ Papa a'evo wereko, ãwĩvo ve Ta'yry rõmõ ije. Aje ywete Papa Ra'yry tè ije, e'i. 20 Papa erauvay. Ajawyi oposikoa omojisaoka ije ipi, e'i. Ãwĩvo ve kãramõ okasia age'ewarà wyi wete omojisaokatà ije, a'evo taiko, e'i. Ãmẽ si pejimonyijaytà ãmẽ ikasia rè pemã'ẽ remẽ, e'i. 21 Okãjã mãe kõ omomoeraokatà okasia rupi tè imopõ'ãoka ipi, e'i. Ãwĩvo ve ije. Apota remẽ, poromoigooka kuwa ekasia rupi, e'i. 22 E'i jẽ Jesu ijupe kõ: – Papa tè eayvumokasiay poromosã'ãgaa rè, jane kõ tamoe'y e'yi, e'i. Eayvu rupi tè ivo mãe kõ amowaitetà nivoi mãe kõ wyi. Papa rõwã poromowaitetà. Ije tè ijayvu rupi a'evotà aiko, e'i. 23 “Jane kõ tanemomojy nemoe'e”, e'i Papa ije. “Ãwitõ emomojy emoe'e kupa ipi, tãwĩvo ve nerereko kupa”, e'i Papa. Ajawyi kee a'e. Ava mõ nemomojyi remẽ, ojikuwa Papa nomomojyi mã'ẽ rõmõ, Emuuarerà tè Papa rewarà mõ, e'i Jesu. 24 – Kee ekoi mãe kõ oiko karuarutà. Eayvu wenu katu mãe kõ tè. Emuuarerà rè ojirovija mãe kõ. A'evo ekoi mãe kõ Papa noemavo'ãi ity oo. Kee e'ipa ijupewarà mõ: “Awyje nokãjã'ãi mã'ẽ vo ene ky'y. Epyri oroereko karuarutà”, e'i. Aje ywete aepo a'e, e'i Jesu. 25 E'i jẽ Jesu ijupe kõ: – Papa noerovijai mãe kõ omãnõ mãe kõ vo 'ejẽ ekoi. Ajamã'ẽ eayvu wenu kupa remẽ, opoera mã'ẽ votà ãmẽ kupa ky'y. Kãramõ remẽ rõwã a'evotà ekoi. Ke'ĩ a'evotà ekoi kupa. Aje ywete a'e, e'i Jesu. 26 Nuvei Papa reinõgarerà. A'e ywete poroinõ poromoigooka mã'ẽ tè Papa. Ãwĩvo ve ije, Ta'yry rõmõ, e'i. 27 E'i jẽ Jesu: – Kee e'ipa Papa ije: “Ene tè ivo mãe kõ nemoe'yità nivoi mãe kõ wyi”, e'ipa ije. A'evoa rè eayvumokasipa, jane kõ Rõvijã ywete rõmõ taiko, ajimojane mã'ẽ rõmõ. 28 Tapejimonyi e'ã aepo renu ajamã'ẽ. Omãnõ maekwerà kõ wenutà kãramõ eayvu, e'i. 29 Ãmẽ tè opoeratà opõ'ã oẽ oyvy pe wyi kupa ky'y, e'i. Ãmẽ sõsi ivoa rupi ekoi mãe kõ Papa wereko karuarutà opyri. Nivoi ekoi mãe kõ ãmẽ, wemavotà ity oo, e'i Jesu. “Ekuwa kuwasi Janejare'e Ra'yry rõmõ pekupa”, e'i Jesu mã'ẽ 30 E'i jẽ Jesu: – Papa tè emuroka ike yvy pè. Ijayvu rupi tè aposiko aiko ipi, “Ekwa poromoe'yi eayvu rupi”, e'ipa ije maekwerà rupi katu aiko. Naposiko kuwa'ãi eayvu rupi. Papa ayvukasia rupi tè aposiko aiko ipi. A'e tè emo'e manyvo tareko poromoe'yi mã'ẽ rè ipi. Emimota rupi a'evo areko ãmẽ. Eremimota rupi rõwã aiko. Ajawyi ivo katu aiko ipi, e'i Jesu. 31 – Ije evote manyvo aiko mã'ẽ sõ amome'u peupe remẽ, naperovija'ãi kuwa eayvu. 32 Ajamã'ẽ Janejare'e tè emojikuwaoka. Akuwa aje ywete e'i ipi. Ajawyi ijayvu rupi tè kuwasi ererovija katu pekupa ipi mijã! a'e pejẽ. 33 – Ãmõ, Juwão poromojãmorĩ mã'ẽ ve emojikuwaoka, e'i. Penemĩgwai kõ mõ pemono Juwão resa remẽ, aje ywete e'i eupewarà mõ ijupe kõ, e'i. 34 Ajawyi age'e ijayvukwerà rupi ererovija kuwasi pekupa mijã. Apota Janejare'e penereko katu peneraa wena pè rewarà mõ aepo a'e pejẽ, e'i. Ije jane kõ ayvu rè naja'ai ipi. Akuwa ajamã'ẽ Juwão ayvukwerà rè peja'a ipi. Ajawyi aepo a'e pejẽ, e'i. 35 Peo peo Juwão gyty ijayvu renu ipi mijã. A'evo ve pya eny upa mã'ẽ rè kumyryry kõ oo ojatyka. Penoryvay jome Juwão ayvu renu mijã. Ajawyi ererovija kuwasi pekupa mijã, ijayvukwerà rupi! e'i. 36 – Ajamã'ẽ oiko jẽ ãmõ emojikuwaoka mã'ẽ, e'i Jesu. Eposikoa Papa ome'ẽ ije mã'ẽ teve emojikuwaoka. A'e ywesõ emojikuwaoka Juwão ayvukwerà wyi. A'e rè aposiko aiko ipi. Eposikoa rè omã'ẽ mãe kõ, “Aje ywete, Janejare'e Remimuurerà tè ãwĩ”, e'ità ije kupa. 37 – Ãmõ, Papa emojikuwaoka wayvukwerà rupi, Emuuarerà rõmõ, e'i. Napemã'ẽi ee mã'ẽ tè Papa. Iporegeta napeenui mã'ẽ teve Papa, e'i. A'e tè emojikuwaoka. 38 “Janejare'e Remimuurerà tè ãwĩ”, napejẽi ajamã'ẽ ije, e'i. Papa ayvu sõ pereko pepy'a pè remẽ, ererovija kuwa pekupa mijã, e'i. 39 Ijayvu jikusiwarerà pemogeta ywete ipe. “A'evo remẽ teipõ Janejare'e pyri jaiko karuarutà”, pejẽ ipe. Ajamã'ẽ nekuwai Emimuurerà rõmõ pekupa! Ijayvukwerà rupi kuwasi ekuwa pekupa mijã! 40 Pejirovija sõ ere remẽ, poromoigo karuaruoka kuwa ipyri mijã, e'i. Nererovijai ajamã'ẽ pekupa, e'i. 41 – Ajamã'ẽ, “Emoe'eay kuwasi kupa mijã!” na'ei pejẽ ajamã'ẽ, 42-43 pepy'a pewarà akuwapa rewarà mõ. Akuwa pepy'a pè Papa napeaui mãe kõ tè pejẽ. Peau rã'ãga mãe kõ tè pejẽ, e'i. Naperovijai 'eteay eayvu, ãwisõ Papa ayvu rupi teipe ajo remẽ, e'i. Ãmẽ ava mõ wayvu rupi tè kõrijõ uu remẽ, a'e ywesõ perovija ipi. Pemoe'e teve ipi. [Ajawyi tè, “Emoe'eay kuwasi kupa mijã!” na'ei pejẽ. Papa pè kõrijõ tè aepo a'e. Janejare'e pè tè,] e'i Jesu. 44 – Peupe kõrijõ tè, “Emoe'e kuwasi kupa mijã!” pejẽ ipi, e'i. “Emoe'età sipõ Janejare'e?” napejẽi ipi. Ajawyi nererovijai pekupa! e'i. 45 Ãmõ, “Tãmõ Moisesi remikusiwarerà rupi aiko ipi”, pejẽ ywe'e tite, e'i. “Ajawyi aiko karuarutà Janejare'e pyri”, pejẽ ywe'e tite, e'i. Ajamã'ẽ Moisesi tè omo'ytà peaiwererà pene kãramõ Janejare'e rovake, e'i. [Kee e'ità: “Ãwĩ kõ eremikusiwarerà rupi noikoi ipi”, e'ità peupewarà mõ. “Oiko rã'ãga tè eremikusiwarerà rupi kupa”, e'ità pejẽ.] Ije rõwã nivoi mã'ẽ amo'ytà pene. Tãmõ Moisesi tè omo'ytà pene, ãwisõ penemimoe'e teipe a'e remẽ, e'i. 46 Aje ywete naperovijai emikusiwarerà. Perovija sõ remẽ, pejirovija kuwa ere mijã, e'i. 47 Emã'ẽ. Emikusiwarerà pè “aje” napejẽi. Tysi tõ eayvu pè “aje” napejẽ'ãi tè ky'y! e'i Jesu ijupe kõ.

Juwão 6

Jesu omoypa katu ja'umã'ẽ aty wasu kõ rè remẽwarà

1 Ãmẽ aja paire Jesu Karireja pãranã ovae kyty wasa oo. A'e Karireja pãranã rerà mõrijõ. Tiperiaji pãranã eu teve ijupe. A'e wasa oo Jesu. 2 Ãmẽ ovãe remẽ, aty wasu kõ oo ikoty. Ji'ite Jesu rè omã'ẽma kupa, itekorã mãe kõ omokatu remẽ. Ajawyi oo jẽ apyky rupi kupa. 3 Ãmẽ Jesu ojiupi sa'u yvyty miti rè. A'e ijyke pè wapy upa, orereve. 4 Ke'ĩ tãmõ kõ jisyryawerà moetea 'arà okwatà. Enoneve a'evo ekoi. 5 Ãmẽ Jesu omã'ẽ rã'ĩ aty wasu kõ rè erokwa, janekwerà kõ mõa'ãrõwã uu uu ikoty remẽ. Ãmẽ emimo'earà mõ ipyri wapy upa, Piripi eu ijupe mã'ẽ. Ãmẽ kee e'i Jesu ijupe: – Manyvotà põkõ aã aty wasu kõ remi'õ rã sireko esa? e'i. Mape wyi kuwa põkõ sipyy emi'õ rã kõ? e'i. 6 Okuwapa amãtejẽ manyvo werekotà. Ajamã'ẽ wã'ã Piripi esa. “Okuwa sipõ Piripi eayvukasia?” e'i oupe. Ajawyi aepo e'i ijupe. 7 – Nakuwai, e'i ãmẽ Piripi. Epy wete kuwa emi'õ rã kõ repy mijã, e'i ijupe. Irõ irõte jay mosikoa repykwerà noy'ãi tesõ kuwa epy rã rõmõ, e'i. 8 Ãmẽ Jesu remimo'earà mõ aepo wenu. Simão Peturu mõmirĩ a'e, Aãtere eu ijupe mã'ẽ. A'e e'i Jesu pè: 9 – Emã'ẽ. Aã ja'yry meju weru, e'i. Ta'yrygà weru ajamã'ẽ, 5 rõmõ kõrijõgà, e'i. Pirasisi jimiirerà weru ve, mõrijõgà rõmõ, e'i. Ajamã'ẽ noy'ãi aty wasu kõ o'u, e'i ijupe. 10 Ãmẽ Jesu e'i ore: – Toapy ajawyi pirujẽ kupa, e'i. Wapy aty wasu kõ okwa ãmẽ, kwãkwã 'aryvo. Wapy pirujẽ kupa. Kwaima'e kõ kõrijõ tè jamoirõ irõ imoaty remẽ, 5 .000 rõmõ jamoirõ irõ remẽ. Mõa'ãrõwã janekwerà kõ. 11 Ameve Jesu opyy meju, ja'yry weru maekwerà. A'e rè omoete rã'ĩ Janejare'e. – Nekatuay wete, Papa, e'i. Oreremi'õ rã neme'ẽ oreupe, e'i imoete. Aja paire meju ome'ẽ oreupe toromosãi. Pira ome'ẽ teve toromosãi to'u kõ. A'evo oroereko ãmẽ. Pirujẽ wapy okwa mãe kõ pè oromosãi erokwa. Aty wasu pè tesõ! Ajaate ikasi katupa kupa ky'y. Oykay aty wasu kõ rè ja'umã'ẽ ky'y. 12 Ajaire Jesu e'i oreupe, wemimo'ekwerà kõ pè: – Pemoaty ja'umã'ẽ kurerà kõ, [ajairewarà rã,] e'i. 13 A'evo oroereko ãmẽ, Jesu ayvu rupi. Rykyry kõ pupe 12 rõmõ oromoãnẽ ãnẽ ja'umã'ẽ kurerà erokwa. A'e 5 rõmõgà teipe meju mijã. A'e kurerà kõ oromoaty aty. 14 Ãmẽ a'evoa rè omã'ẽ mãe kõ: – Haa! e'i. Aje ywete Janejare'e ayvu mojenuarà tè Jesu, e'i. Janeremiãrõ tè ãwĩ! Ajawyi ijayvukasiay wete iko! e'i kupa. 15 Ejo ajawyi siraa janerõvijã rõmõ! e'i epe kupa. Ajamã'ẽ Jesu noo'ãi upi kõ tõvijã kõ rõmõ. Ojivy kõrijõ oo iwyi kõ, ovote toiko rã'ĩ. Yvytyry kõ rupi oo rã'ĩ iko.

Jesu yy rova'arà rupi wata remẽwarà

16-17 Karumẽ orojapara oroo pãranã gyty. Kapanão taa kyty orojivytà oroo. Yarà mõ pupe oropo oroo. Ovae rè orojipotatà oroo. Norovãeive remeve oreãpatõma, yy mytery peve oroiko remeve. A'evo remẽ Jesu nonurive orekoty. 18 Ameve py'awarà mõ yvytu ai wasu okwa. Opipo pipo tesõ pãranã upa. 19 Ajawyi oropykui ywe'e ipe yarà eraa, ikasiay yvytu rewarà mõ. Pãranã myterà rupi jẽ oroiko. 5 kirometuru tè oroeraa yarà. Norovãe'ãive ovae rè. Ameve sikaepo Jesu ojisaoka oreupe! Yy rova'arà rupi tẽ tesõ wata uu orekoty. Orepyri'ĩje'ẽ uu. [“Jõvijã” noro'ei ijupe ajamã'ẽ. Norokuwai oromãjã ee.] Orokyje ai tè iwyi. 20 Ajamã'ẽ orerõvijã e'i oreupe: – Pekyje sõ ewyi! e'i. Ije tè ajo! e'i. 21 Ãmẽ oropopyy Jesu oreyarà pupe imuu imo'au. Oreroryvay ee. Ajaire py'awarà mõ oroo wãi ovae rè orovãe. 22 Ãmẽ jakatu aty wasu kõ mõ wãrõ jẽ tesõ Jesu upa, jimi'uawerà pè. Ji'ite omã'ẽ orere oroopa remẽ. Okuwa Jesu nooi orerupi mã'ẽ. Ajawyi wãrõ jẽ tite kupa upa. Wãrõ kõ'ẽ kupa. – Ovãe tarà mijẽ ipõ Jesu janepyri? e'i tite kupa. 23-24 Ajawyi opyta jẽ a'e pè kupa. Ji'ite Janerõvijã ywete aty wasu remi'õ omoypa to'u kõ, Janejare'e omoete paire. A'e pè opyta jẽ kupa. Ajaire Tiperiaji taa wãnà kõ mõ a'e pè ovãe. Yarà rupi uu kupa. A'e kõ rè aty wasu omã'ẽ remẽ, oo opopo oo yarà kõ pupe kupa. Pãranã ovae kyty a'e kõ rupi ãmẽ oo kupa, Kapanão taa kyty. – Jesu naikoi ike rupi, e'i kupa. Emimo'ekwerà kõ ve naikoi, e'i kupa. Ajawyi ãmẽ ojivypa oo kupa ky'y.

Mãerã poromoigo karuarua rè Jesu poromo'e remẽwarà

25 Ãmẽ pãranã ovae rè aty wasu kõ ovãe remẽ, a'e pè omã'ẽ mijẽ Jesu rè kupa. E'i ijupe ãmẽ kupa: – Jõvijã, manyvo remẽ põ nejo kyvo kyty? e'i ãmẽ ijupe kupa. 26 Ãmẽ Jesu e'i ijupe kõ: – Manyvo rewarà mõ põ ereka mijẽ pekupa? Mãrãnà jikuwa e'ã ainõ ekasia rupi mã'ẽ rè pemã'ẽ rewarà mõ rõwã ereka pekupa age'e, e'i. Ma'e, meju pe'u pekasi katu rewarà mõ tè ereka mijẽ pekupa. Aje ywete aepo a'e pejẽ, e'i. 27 Peenu rã'ĩ si aporegeta pejẽ mã'ẽ! Pe'upatà mã'ẽ rè ywesõ peja'a tite. Aje ywete tekoua nopa'ãi mã'ẽ rè ywesõ kuwasi peja'a mijã. Ãmẽ tè kuwa aje ywete ekuwa pekupa, Janejare'e Remimuurerà rõmõ, e'i. Pejirovijaray kuwa ãmẽ ere. Peiko karuaru kuwa epyri. Papa emojikuwapa peupewarà mõ rewarà mõ a'evo kuwa peiko, e'i. 28 E'i Jesu pè kupa: – Manyvo kuwa põ oroiko, Janejare'e remimota rupi katu toroiko? e'i kupa. 29 Aepo rè Jesu e'i: – Kee jaa opota tapejẽ erewarà: “Aje ywete Janejare'e Remimuurerà tè Jesu”, tapejẽ. Tapejirovija ere, e'i ijupe kõ. 30-31 Kee e'i Jesu pè ãmẽ kupa: – Kõitokõ karamoe remẽ tãmõ kõ o'u ja'umã'ẽ yvapewarà, mãnã eu ijupe mã'ẽ, e'i kupa. Kõ'ẽ jawe jawe itõkõ o'u kupa ipi, tekoe'ãma rupi ekoi kupa remẽ. Ja'umã'ẽ reko e'ãma rupi ekoi kupa remẽ itõkõ a'evo ekoi kupa. Aekwerà rè kee e'i Janejare'e ayvu ojikusiwa: “Tãmõ Moisesi omuroka ja'umã'ẽ ijupe kõ ipi, yva pe wyi”, e'i ikusiwarerà. Janejare'e kasia rupi a'evo tãmõ Moisesi ekoi ipi. Ajawyi oroerovija emikusiwarerà, e'i kupa. Ene pa'e. Emojisaoka teve Janejare'e kasia, toromã'ẽ ee, torojirovija nere! e'i epe kupa. Yva pewarà vo mã'ẽ jẽsi toro'u, e'i tite Jesu pè kupa. 32 Ajare Jesu e'i ijupe kõ: – Aje, Janejare'e meju yva pe wyi omuu remẽ, tãmõ Moisesi omosãi tape'u. Ajamã'ẽ ja'umã'ẽ yva peware'e naotyi a'e pè. Papa yva pe wyi omuu mã'ẽ pè yva peware'e eu, e'i. 33 Yva pe wyi uu mã'ẽ tè Janejare'e Remimuure'e. A'e tè poromoigo karuaru kuwa Janejare'e pyri tijaiko ipi. Aje ywete aepo a'e pejẽ, e'i Jesu. 34 – A'e jẽsi eme'ẽ toro'u ky'y, ajawyi, e'i kõrijõ tite ijupe kupa. 35 E'i jẽ Jesu ijupe kõ: – Ja'umã'ẽ ikewarà janemokasi ke'ĩatu tè ipi. Ajamã'ẽ ere pejirovija remẽ, peiko karuarutà epyri. Ajawyi ava mõ uu ekoty ere ojirovija remẽ, ojimi'u katu mã'ẽ vo 'ejẽ ekoi. Ãmõ, oy'u katu mã'ẽ vo 'ejẽ ekoi, e'i. Poromokasità epyri tapeiko karuaru, e'i. 36 E'i jẽ Jesu: – “Napejirovijai ere”, a'epa itõkõ pejẽ. Pemã'ẽma ipe eayvukasia rè, penovake amojisaoka remẽ. Ajamã'ẽ napejirovijai jẽ tesõ ãmẽ ere ajamã'ẽ, e'i. 37 E'i jẽ Jesu: – Pirujẽ Papa ayvu rupi tè emojõvijã mãe kõ emojõvijãtà, e'i. A'e kõ namoisyry pe'ĩ'ãi ewyi, e'i. 38 Papa tè emuu wena pe wyi, ike taposiko, e'i. “Ekwa” e'i Papa ije. Ajawyi ajo pekoty. Papa remimota rupi tè ajo. Eremimota rupi rõwã ajo. Ijayvu rupi jẽsi taiko ãmẽ, a'e. 39-40 Kee e'i ije: “Jane kõ pè oromojõvijãokatà eupewarà kõ rõmõ”, e'i mã'ẽ. “Apota pirujẽ ojirovija nere kupa”, e'i Papa ije. A'evo mãe kõ okãjã remẽ, amomoeratà pirujẽ, epyri mãerã tè toiko kupa, kãramõ ajo mijẽ remẽ. Ãmẽ tè araapa kõtà erupi. Papa opota a'evo aiko remẽ, a'evotà aiko, e'i Jesu. 41 Ãmẽ Juteu kõ mõ ojikõ'õ Jesu ayvu renu, “Yva pe wyi ajo”, e'i rewarà mõ. Oporegeta ai ywe'e tite ãmẽ Jesu rè kupa. 42 – Juse ra'yry tè rõwã sipõkõ ãwĩ mijã! e'i kupa. Janeremikuwa tè rõwã sipõkõ ijy mijã! Ãmõ, janeremikuwa teve tuu. Ajawyi nisirovija'ãi. “Yva pe wyi tè ajo”, e'i teywete, e'i tite kupa. 43 Ãmẽ Jesu e'i ijupe kõ: – Awyjepa rã'ĩ age'e peporegeta ai ere! e'i. 44 Emuuarerà tè Papa. A'e tè weru jane kõ tojirovija katu ere ipi. Ovote rõwã ojirovija ere kupa ipi. Kãramõ ajo mijẽ remẽ, amomoera kõtà, toiko karuaru epyri kupa, e'i. 45 Ajare kee e'i Janejare'e ayvu mojenuarà mõ ikusiwa maekwerà: “Janejare'e pirujẽ jane kõ omotekokuwatà”, e'i ikusiwa. Ajawyi ava mõ Janejare'e ayvukwerà wenu remẽ, Janejare'e tè omotekokuwatà. Erewarà rè teve omotekokuwaokatà. Otekokuwavaytà ãmẽ kupa. A'evo mãe kõ tè uutà ekoty ipi. 46 “Papa rè omã'ẽ kupa”, na'ei ajamã'ẽ. Ije kõrijõ tè amã'ẽ Papa rè, Janejare'e rè, ipyri wyi tè ajo rewarà mõ. Ajawyi aepo a'e pejẽ, e'i. 47 E'i jẽ Jesu: – Ere ojirovija mãe kõ araatà erupi Janejare'e pyri, awyje toiko karuaru, e'i. Aje ywete aepo a'e aporegeta, e'i. 48 [Ja'umã'ẽ ikewarà poromokasi ke'ĩatu tè ipi. Na'evoi ije ekasia ãmẽ.] A'e wyi wete ije. Poromoigo karuarutà Janejare'e pyri eayvukasia rupi, e'i. 49 Karamoe remẽ itõkõ penãmõi kõ ja'umã'ẽ yva pupewarà o'u ipi, ja'umã'ẽ reko e'ãma rupi ekoi kupa remẽ. A'e poromoigo karuaru mã'ẽ rõwã ajamã'ẽ. A'e o'u kupa paire okãjãma jẽ kupa. Ke'ĩatu tè poromokasi mã'ẽ tè o'u kupa. 50 Na'evoi Janejare'e omuu wena pe wyi mã'ẽ. A'e Janejare'e pyri poromoigo karuarutà mã'ẽ tè, e'i. 51 A'e tè ije, e'i oupewarà mõ. Janejare'e rena pe wyi tè ajo. Tekoua pyau me'ẽarà rõmõ ajo. Ava mõ ere ojirovija remẽ, oiko karuarutà epyri, e'i. A'evoa rõmõ [amãnõ remẽ], ero'o ame'ẽtà ikewarà kõ remi'õ rõmõ, e'i. Ero'o o'u mãe kõ oiko karuarutà Janejare'e pyri, e'i. [“Ero'o o'u mãe kõ”, e'i Jesu remẽ, e'i aai tè. “Ere ojirovija katu mãe kõ tè”, ejaa tè aepo e'i.] 52 Ajawyi aepo e'i remẽ, Juteu kõ nokuwai. “Manyvo jaa põ aepo e'i?” e'i tite kupa. Ajawyi ijayvu kõrijõgà aepo renu kupa. – Manyvore põ ãwĩ kwaima'e oo'okwerà ome'ẽtà si'u! e'i ojiupe kupa. 53-54 Ajawyi Jesu e'i jẽ ijupe kõ: – Aje ywete aporegeta. Janejare'e Remimuurerà rõmõ ike ajo pepyterà rupi remẽ. Ero'okwerà ame'ẽtà tape'u. Ero'okwerà o'u mãe kõ oiko karuarutà Janejare'e pyri, e'i. Ãmõ, eruwykwerà o'u mãe kõ teve, e'i. A'evo mãe kõ tè amomoeraokatà imopõ'ãoka too ipyri toiko karuaru ajivy mijẽ ajo remẽ, e'i. Na'evoi ero'okwerà no'ui mãe kõ, eruwykwerà no'ui mãe kõ. A'e kõ noo'ãi Papa kyty. Noiko karuaru'ãi ipyri, e'i. Ovote noiko'ãi ipyri kupa, e'i. 55 Ero'okwerà poromoigo karuaru mã'ẽ tè. Eruwykwerà poromoigo karuaru mã'ẽ teve. 56 Pe'u awi eruwykwerà, ero'okwerà revejẽ. Ãmẽ tè jajimo'yvaytà ojee jaiko, e'i. 57 E'i jẽ Jesu ijupe kõ: – Oiko teãmã iko mã'ẽ tè Papa. A'e tè emuroka ike, e'i. Ikasia rupi aiko. Ãwĩvo ve ekasia rupi ekoi mãe kõ. Tekoua pyaukwerà nopa'ãi mã'ẽ ame'ẽtà ijupe kõ, e'i. 58 E'i jẽ Jesu ijupe kõ: – Ja'umã'ẽ penãmõi kõ o'u maekwerà vo rõwã ije, e'i. A'e o'u kupa remẽ itõkõ okãjãma jẽ kupa, e'i. Na'evoi ije. Yva pewarà tè ije. Ajawyi ero'okwerà o'u mã'ẽ nokãjã'ãi. Janejare'e pyri oiko karuarutà, e'i. 59 Aepo e'i Jesu oporegeta Juteu kõ pè, Kapanão taa pè ekoi remẽ. Janejare'e ayvu rè jimo'ea retã mè poromo'e upa. 60 Ãmẽ emimo'earà kõ aepo wenu remẽ: – Jesu ayvu iwasuay! e'i enu kupa. Nisirovija'ãi aepo e'i remẽ! e'i kõrijõ enu kupa. 61 Ojiupe tè aepo e'i ojimogeta kupa. Ajamã'ẽ Jesu aepo e'i kupa remẽ okuwa jẽ. Ajawyi e'i ijupe kõ: – Ereitytà pawi pekupa? e'i. 62 Emã'ẽ. Janejare'e Remimuurerà ajimojane mã'ẽ tè ije. Manyvo pejẽtà põ aekwerà kyty ajivy aa remẽ, pemã'ẽ ere remẽ? Manyvo napeiko'ãi ãmẽ, e'i. 63 Pevote manyvo napejẽ'ãi Janejare'e pyri peiko karuaru rõmõ peiko. Janejare'e 'Ãg kõrijõ tè poromoigo karuaru mã'ẽ rõmõ ekoi. A'e amurokatà pekoty, eayvu perovija remẽ tè katu, e'i. Pepy'a pè tè ekoità. A'e tè pemoigo karuarutà ãmẽ Janejare'e pyri, e'i. 64 Aje ywete aepo a'e. Ajamã'ẽ pepytery pewarà kõ mõ eayvu noerovijai mãe kõ tè, e'i Jesu ijupe kõ. Jesu okuwapa teãmã wayvu noerovijai mãe kõ. Okuwa teve wemimo'earà mõ ome'ẽtà jõvijã kõ po pè mã'ẽ. Wemimo'ekwerà kõ opyteporo remeve okuwapa amãtejẽ. 65 E'i jẽ ãmẽ Jesu: – Pirujẽ rõwã ojirovijatà ere, e'i. Papa ererovijaoka ijupe mãe kõ kõrijõ tè ojirovijatà ere. Papa kasia rupi tè a'evotà ekoi. Aepo a'epa pejẽ! e'i ijupe kõ. 66 Ameve ikoty rewarà kõ mõ ojisyrypa oopa iwyi. – Iwasuay Jesu oporegeta, e'i ojisyry oo kupa. Nopotai Jesu rupi oo kupa ky'y. Ameve mõa'ãrõwã ojisyrypa oo iwyi kupa. 67 Ajawyi Jesu e'i wemimo'ekwerà kõ pè, 12 rõmõ mãe kõ pè: – Ãmõ pejẽ pa'e? Ereity tary ve põ pekupa? e'i. 68 Ãmẽ Simão Peturu e'i ijupe: – Ãnĩ! Naikoi 'ete nevo ywete mã'ẽ! Ava rupi noroo'ãi ãmẽ! e'i. Ene kõrijõ tè oremotekokuwa Janejare'e ayvu rè, ipyri toroiko karuaru, e'i. 69 Orokuwa ene rõmõ'ĩte Janejare'e Remimuurerà ivo katu teãmã mã'ẽ rõmõ neiko orepytery pè. “Aje ywete” aepo oro'e neupe, e'i. 70 Ãmẽ Jesu e'i ijupe kõ: – Ije tè poropyteporo epyriwarà kõ mõ tapeiko, 12 rõmõ mãe kõ rõmõ tapeiko. Ajamã'ẽ pe'ĩ peneirõarà, ãjãgai rõvijã ayvu wenu mã'ẽ tè, e'i Jesu ijupe kõ. 71 Jutasi, Simão Sikarioti ra'yry pewarà mõ aepo e'i. A'e 12 mã'ẽ mõ epe remẽ, ajamã'ẽ ome'ẽtà Jesu ijãpã kõ po pè [karakuri repy rõmõ].

Juwão 7

Jerusarẽ taa kyty Jesu oo mijẽ remẽwarà

1 A'evo paire Jesu Karireja yvy rupi oo iko. Noo tari Juteja yvy rupi ajamã'ẽ, a'e pè Juteu rõvijã kõ wãrõ tite upa, ojukatà kupa rewarà mõ. 2 Ãmẽ ke'ĩ tãmõ kõ rekoawerà rè oja'atà kupa. Kõitokõ tekoe'ãma rupi ekoi maekwerà rè oja'atà. Ajawyi wetã wyry pe wyi ojisyrytà rã'ĩ tapyina kõ wyry pè oke kupa. Ajare mõa'ãrõwã Juteu kõ Jerusarẽ taa kyty ootà ojatyka kupa. 3-4 Ãmẽ Jesu mõmirĩ kõ kee e'i epe ijupe: – Emã'ẽ. Nemojisaokapa nekasia ike rupi! Juteja yvy kyty ja'e jẽsi ajawyi, neremimo'earà kõ tomã'ẽ nekasia rè! e'i epe ijupe kupa. 5 Ajamã'ẽ “aje ipõ” ne'i imõmirĩ kõ ijayvu pè. “Janejare'e Ra'yry tè” ne'i kupa. Ajawyi aepo e'i epe kupa. 6-8 Ãmẽ Jesu e'i ijupe kõ: – Najikuwa'ãive. Ajawyi naa'ãive, e'i. Ajamã'ẽ pejẽ pepota peo remẽ, pekwa ãmẽ, e'i. Pene rõwã ojikõ'õ kupa, e'i. Ere tè ojikõ'õ kupa, e'i. Ijaiwererà amojikuwaoka ijupe kõ mijã. Ajawyi ojikõ'õ ere kupa, e'i Jesu ijupe kõ. 9-10 Aepo e'i Jesu paire, imõmirĩ kõ oo. Nooive ãmẽ Jesu. Opyta jẽ Karireja yvy pè. Ãmẽ oo kupa paire, Jesu ãmẽ apyky kõ rupi oo. Nojikuwai ajamã'ẽ oo. 11 Ãmẽ jakatu Juteu rõvijã kõ wãrõ tite Jesu vãea upa, Jerusarẽ taa pè. – Maty põ Jesu ekoi? e'i epe aty wasu kõ pè kupa. 12 Aty wasu kõ ve wãrõ Jesu upa. Mõa'ãrõwã wãrõ kupa upa. Ãmõ ãmõgwerà kee e'i: – Ikatuay Jesu! e'i e'i kupa. Ãmõgwerà ãmẽ kee e'i: – Ãnĩ! Nikatui Jesu! e'i. Iwari mã'ẽ tè Jesu! e'i e'i tite ãmẽ kupa. 13 Ajamã'ẽ ojimoevovo 'ejẽ ee iko kupa, tõvijã kõ toenu e'ã, okyje ai iwyi kõ kupa rewarà mõ. 14 Ãmẽ moapy ke remẽ ovãema Jesu ky'y. Ovãe remeve oo Janejare'e moe'ea retã gyty. A'e retã ypy pè poromotekokuwatà. 15 Ãmẽ Juteu rõvijã kõ wenu ijayvu remẽ, ojimonyijay enu kupa. Omã'ẽ mã'ẽ sõ tite ãmẽ ee kupa. – 'O! Manyvo'i pãwĩ otekokuwavay mõ? e'i kupa. Naikoi ajamã'ẽ imotekokuwaarà mijã, e'i kupa. 16 Ajawyi Jesu e'i ijupe kõ: – Evote rõwã ajimotekokuwa, e'i. Evote rõwã teve poromotekokuwa aiko ipi, e'i. Emuuarerà ayvu rupi tè a'evo aiko, e'i. 17 Ava mõ opota Janejare'e py'a rupi katuwarà rõmõ ekoi remẽ, okuwatà ije ijayvu rupi katu tè poromotekokuwavay aiko mã'ẽ rõmõ. Okuwatà teve eayvu rupi rõwã poromotekokuwa aiko ipi, e'i. Janejare'e ayvu rupi tè poromotekokuwa aiko ipi, e'i. 18 Eayvu rupi tè sõ poromotekokuwa remẽ, “Temoe'e kupa”, a'e kuwa. Na'evoi ije ajamã'ẽ. “Emuuarerà tomoe'e kupa”, a'e tè pejẽ. Aje ywete aepo a'e aporegeta, e'i. Noporomoripei mã'ẽ tè ije, e'i. 19 E'i jẽ Jesu ijupe kõ: – Tãmõ Moisesi pemoe'e ipe ipi, a'e tè Janejare'e ayvu omojenu janeupe rewarà mõ! e'i. Ajamã'ẽ ijayvu rupi napeikoi sire'e! Ajawyi manyvo rã mõ rõwã ejukatà pekupa! e'i Jesu ijupe kõ. 20 Ãmẽ aty wasu kõ e'i: – Ava nanejuka'ãi! e'i tite kupa. Ãjãg tè rõwã põkõ, “Nejukatà kupa”, e'i ene! e'i tite kupa. 21 E'i jẽ Jesu ijupe kõ: – Pe'ĩ itõkõ amokatu kwaima'e, owa toiko ky'y. A'evoa rè pejimonyi pemãjã, jimoava 'arà mẽ a'evo aiko rewarà mõ. 22-23 Ajamã'ẽ pejẽ ve peposiko jimoava 'arà mẽ ipi, ja'y kwani kõ peemosĩpire'o remẽ. “Nivoi ekoi mã'ẽ” eu teve põ pejẽ a'evo peiko remẽ? “Ãnĩ!” pejẽ kuwa ãmẽ. “Nimanyvoi jimoava 'arà mẽ a'evo oroereko remẽ”, pejẽ kuwa ije. “Tãmõ Moisesi remikusiwarerà rupi a'evo oroereko!” pejẽ kuwa ije. Aepo rè kee a'e pejẽ. Tãmõ Moisesi ruve remẽ rõwã a'evoa ojiãparõ mijã. Tãmõ Aparão kõ wyive ojiãparõ. 24 Ajawyi, “Nivoi ãwĩ”, taoty e'ã ije. Aepo pejẽ ije remẽ, pemoe'e rã'ãga Janejare'e. Ijayvu rupi peiko rã'ãga kõrijõ tè peiko. Janejare'e moe'ea rè tapeja'a ky'y. Ãmẽ tè pekuwatà poromosã'ãgaa, ava ywete põ ivo ekoi mã'ẽ, e'i Jesu ijupe kõ.

“Janejare'e Remimuurerà rõwã teipõ Jesu”, e'i tite kupa remẽwarà

25 Ãmẽ Jerusarẽ taa wãnà kõ mõ Jesu ayvukwerà rè ojapyaka, Janejare'e moe'ea retã ypy pè poromo'e upa remẽ. A'e kõ mõ kee e'i Jesu pewarà mõ: – Ãwĩ rõwã sipõkõ janerõvijãgwerà remijatarà? e'i. 26 Pemã'ẽ. Tyvija rupi rõwã poromo'e upa remẽ, jõvijãgwerà kõ omã'ẽ tè ee. Manyvore sipõ ne'i ijupe kupa? “Janejare'e Remimuurerà tè ãwĩ, Janerõvijã ywete rõmõ”, e'i sipõ kupa? e'i kupa. 27 Ãmẽ e'i ãmõ kõ: – A'e rõwã maevo ãwĩ! e'i. Janejare'e Remimuurerà tè sõ ãwĩ remẽ, nijakuwa'ãi kuwa maty wyi uu mã'ẽ. Keve ywete kuwa ovãe ojisaoka. Na'evoi Jesu ajamã'ẽ, e'i tite kupa. Jakuwa Nasare taa kyty wyi ovãe iko, e'i tite kupa. 28-29 Janejare'e moe'ea retã ypy pè Jesu poromo'e jẽ remẽ, kee e'i wayvo ijupe kõ: – “Orokuwa katu Jesu”, pejẽ ywe'e tite ije. Ajamã'ẽ nekuwai pekupa, e'i. Emuuarerà napekuwai teve. Ije kõrijõ tè akuwa, ipyri wyi tè ajo rewarà mõ. Evote rõwã ajo ike. Papa tè emuroka rewarà mõ tè ajo ike pepytery pè, e'i Jesu ijupe kõ. 30 [Ãmẽ aepo e'i Jesu remẽ, Juteu rõvijã kõ mõ aepo wenu. A'e kõ okuwa Janejare'e pè tè “Emuuarerà” e'i Jesu remẽ. “Werõarõ ipõ Janejare'e aepo e'i remẽ”, e'i tite enu kupa.] Ajawyi opyy tarepe imopã'ã kupa mijã. Manyvo noereko'ãive ipyy kupa ajamã'ẽ. 31 Ãmõ ve aty wasu kõ ojirovija katu Jesu rè. Mõa'ãrõwã a'evo mãe kõ. A'e kõ e'i: – Janejare'e Remimuurerà tè rõwã sipõkõ Jesu! e'i kupa. Pemã'ẽ rã'ĩ si ee! Ijayvukasiay wete! Nãwĩvoi ãmõ kõ ipi, e'i kupa. Nijayvukasi 'ete kupa. Naikoi pe'ĩgà ãwĩvo mã'ẽ! e'i kupa. 32 Ajamã'ẽ aepo jaa ojenupa sikaepo Pariseu atyry kõ pè, “A'evo sõ Jesu ekoi”, e'i kupa remẽ. Ajawyi osota kõ omono Jesu topyy kupa mijã. Janejare'e pè oporegeta mãe kõ rõvijã ve omono osota kõ. Ojeevejẽ omono kõ kupa. 33 Jesu poromo'e upa remẽ jakatu, sota kõ ovãe iko. Kee e'i Jesu jane kõ pè upa remẽ jakatu: – Naiko puku'ãi pepyri ky'y, e'i. Ajaire ajivytà aa Emuuarerà kyty, e'i ijupe kõ. 34 Ereka titetà pekupa. Ajamã'ẽ napemã'ẽ'ãi 'ete ere ky'y. Napekuwa'ãi pevote peo ekoty, e'i Jesu ijupe kõ. 35 Ãmẽ Juteu rõvijã kõ e'i Jesu ayvu renu: – Maty sipõ ootà? Ãmõ yvy pè tè sipõ ootà? Juteu rõwã mãe kõ yvy pè tè sipõ ootà? e'i tite ãmẽ kupa. A'e pè sipõ poromo'età ky'y? e'i tite kupa. Uve Juteu kõ teve ãmõ yvy kõ pè, e'i kupa. 36 Manyvore põkõ, “Ereka titetà pekupa”, e'i sõ? “Ajamã'ẽ napemã'ẽ'ãi ere ky'y”, e'i sõ? “Napekuwa'ãi pevote peo ekoty!” e'i teve, e'i kupa. [Nokuwai Jesu yva kyty oẽtà oo mã'ẽ kupa. Ajawyi aepo'i kupa.] “Yy reary vo 'ejẽ mã'ẽ Janejare'e 'Ãg”, e'i Jesu mã'ẽ 37 Tãmõ kõ rekoawerà moetea opatà remẽ ywesõ ikatuay wete Juteu kõ pè. Ãmẽ Jesu opõ'ã mijẽ jane kõ mo'e. Mewe rõwã oporegeta javo ijupe kõ: – Ava mõ opota katu Janejare'e rè ojimory remẽ, totuu ekoty, e'i. Ãwitõ ava mõ oo yy kyty oy'u remẽ, ãwĩvo ve totuu ekoty, e'i ijupe kõ. 38 “Ava mõ ere ojirovija katu remẽ, yy reary vo 'ejẽtà ipy'a pupe”, e'i amãtejẽ Janejare'e karamoe remẽ. Eupewarà mõ aepo e'i, e'i Jesu. 39 Janejare'e 'Ãg pè tè “yy reary vo 'ejẽ mã'ẽ” e'i Jesu. Jesu rè ojirovija katu mãe kõ pè Janejare'e o'Ãg omurokatà. Nomuuive ajamã'ẽ, Jesu nojivyive oo Uu kyty rewarà mõ. A'evoa rè Jesu oporegeta amãtejẽ upa. 40 Ãmẽ jane kõ mõa'ãrõwã wenu upa, aepo e'i Jesu upa remẽ. A'e rè ãmõgwerà kee e'i: – Aje ywete e'i Jesu, e'i enu. Janejare'e ayvu mojenuarà ywe'e rõwã sipõkõ Jesu? e'i kupa. 41 Aje ywete, Janejare'e Remimuurerà tè Jesu, Janerõvijã rõmõ, e'i kupa. Ãmõ kõ ãmẽ kee e'i: – A'e rõwã maevo! e'i kupa. Karireja yvy pe wyi rõwã uutà Janejare'e Remimuurerà! e'i kupa. [Juteja yvy pe wyi tè uutà! e'i kupa.] 42 Ajare Janejare'e ayvu kusiwarerà kee e'i: “Jõvijã wasu Tavi jeapyrerà rã rõmõtà tè. Perẽ taa pè isakytà, Tavi rekoawerà pè”, e'i maekwerà rupi tè a'evotà, e'i kupa. 43 A'evo e'i e'i kupa. Ãmõ ãmõgwerà “aje” e'i Jesu pè. Ãmõgwerà “aje” ne'i. 44 Ajawyi noerovijai mãe kõ opota Jesu opyy imopã'ã mijã. Nopyyi ajamã'ẽ kupa. 45 Ãmẽ sota kõ ojivy oo oõvijã kõ gyty. Janejare'e pè oporegeta mãe kõ rõvijã gyty. Pariseu kõ gyty teve. E'i tõvijã kõ osota kõ pè: – Manyvore põ Jesu napepyyi eru? e'i kupa. 46 Ãmẽ sota kõ e'i: – Manyvo nijareko'ãi ipyy! e'i kupa. Ijayvukasiay oporegeta! e'i kupa. Ava jẽ rõwã ijayvukasi ãwĩvo mã'ẽ! e'i kupa. 47 Ãmẽ Pariseu kõ e'i ijupe kõ: – Ha! Pejẽ ve siwã sõ pejimoripeoka ijupe! e'i kupa. 48 Nuvei Juteu rõvijãgwerà mõ pe'ĩgà, Jesu rè ojirovija katu mã'ẽ, e'i kupa. Pariseu kõ ve nuvei 'ete! e'i kupa. 49 Jane notekokuwai mãe kõ kõrijõ tè ojirovija ywe'e tite ee, tãmõ Moisesi remikusiwarerà nokuwai kupa rewarà mõ, e'i tite kupa. Ajawyi a'e kõ Janejare'e remimojaiwe kõ rõmõ ootà, e'i tite wemĩgwai kõ pè kupa, sota kõ pè. 50 Ãmẽ oiko pe'ĩgà jõvijã mõ, Nikotemu eu ijupe mã'ẽ. Kõitokõ oo pya Jesu mogeta. A'e e'i ijupe kõ, ovoarà kõ pè: 51 – Tijamomorijauoka e'ã ava mõ ikuwa e'ã, e'i. A'e tè tojimome'u rã'ĩ, e'i. A'evo rõwã jarekotà! e'i epe. 52 Ajamã'ẽ ãmõ kõ aepo wenu remẽ, oojai wesõ kõrijõ kupa. – Karireja wãnà mõ teve põ ene? Ajawyi põ aepo ere? e'i ijai kupa. Janejare'e kareta emogeta esa! Oikotà pãwĩ Janejare'e ayvu mojenuarà mõ Karireja wãnà, terekuwa esa! e'i ijai kupa. 53 A'evo paire ojivy oo kupa.

Juwão 8

Jesu nojukaokari wãivĩ remẽwarà

1 Ãmẽ ajaire oo Jesu Oriveiraty yvytyry kyty. A'e pè Jesu ikõ'ẽma tesõ iko. 2 Kõ'ẽme oo mijẽ ji'ive Janejare'e moe'ea retã gyty. A'e ypy pè ijatyray jane kõ ojimoaty omãjã ee. Ajawyi wapy imo'e kõ upa. 3 Ãmẽ poromotekokuwa upa remẽ, tãmõ Moisesi remikusiwarerà rè poromo'e mãe kõ mõ uu ikoty, Pariseu kõ mõ reve. A'e kõ kee e'i ojiupe: – Manyvo kuwa sipõ sireko Jesu tojavy wayvu? e'i ojiupe kupa. Ajawyi omoãkwa'ã tarepe Jesu kupa. Wãivĩ mõ weru ikoty kupa. Ji'ite ipõ ojimomy'a upa remẽ, opokou kupa. A'e wãivĩ opyy eru Jesu pè kupa, tijakuwa manyvotà jareko. Jane kõ rovake a'evo werekotà kupa. 4 E'i rã'ãga Jesu pè ãmẽ kupa: – Poromo'earà, aã wãivĩ ojimomy'a upa remẽ, opokou kupa, e'i. 5 Ãwĩ rapijarà pè itõkõ tãmõ Moisesi kee e'i: “Jajapi japi kuwa takuru pupe ijuka ãwĩ rapijarà”, e'i maekwerà. Ene pa'e? Aepo ere teve põ ene? e'i epe Jesu rã'ã tite kupa. 6 “Manyvo jẽ Jesu sireko imoteitete?” e'i tite Jesu pè kupa. Ajamã'ẽ Jesu nipui. Wapy kõrijõ ojayvy yvy kusiwa upa. 7 Ãmẽ jõvijã kõ opõ'ã jẽ tite ijayvu renutà upa. Ajawyi Jesu ijãkãnã'ã omãjã, kee javo jõvijã kõ pè: – Ivo katu teãmã ekoi mã'ẽ ypy tojapi takuru pupe ãmẽ, e'i. 8 Aepo e'i paire, ojayvy mijẽ yvy kusiwa. Wãrõ jẽ upa. 9 Manyvo ne'i ajamã'ẽ kupa. Ojisyry ypy oo kupa, weko aiwerà rewarà mõ. – Aepo e'ità tè sikõ Jesu jane mijã! e'i ojiupe kupa. Ameve pe'ĩpe'ĩ rupi ojisyry oo kupa. Ika'akuwa mãe kõ ypy oo. Ajaire itãivĩ ypy mãe kõ oo. Ajaire kõnomĩokyrerà kõ ãmẽ, tapykypapa rõmõ tè oo. Ajaate ojisyrypa katu oo kupa ky'y. Jesu rõmõ'ĩte a'e pè tui jẽ upa. Wãivĩ ve ipyri tui upa. Opõ'ã jẽ ãrõ upa. 10 Ãmẽ Jesu ijãkãnã'ã mijẽ ee omãjã remẽ, soõ, oopa sikaepo kupa! Ajawyi e'i wãivĩ pè: – Maty põkõ oopa kupa? e'i. Nopytai pe'ĩ sipãwĩ nemojaiwe mã'ẽ? e'i. 11 – Ãnĩ, ojivypa oo kupa, e'i wãivĩ Jesu pè. – Noromojaiwe'ãi ije ãmẽ, e'i Jesu ijupe. Ejivy ekwa ãmẽ ky'y, e'i. Awyjepa ikõ moko ere ky'y nẽ, e'i ijupe.

“Aje ywete mã'ẽ tè ije”, e'i Jesu mã'ẽ

12 Aja paire Jesu poromotekokuwa jẽ kee e'i mã'ẽ rè: – Ije poroereko katuarà tè. Ãwitõ poroyape mã'ẽ omojisaoka pee janeupe ipi. Ãwĩvo mã'ẽ tè ije. Janejare'e rupi tekoua amojikuwaoka pirujẽ jane kõ pè ipi. Ere ojirovija mãe kõ pãtõnusu rupi rõwã ekoi ãmẽ ky'y, e'i. 13 Aepo e'i Jesu remẽ, Pariseu kõ mõ wenu. Ajawyi kee e'i: – “Aje” naoty'ãi neayvu pè, e'i kupa. Nevote oremo'earà rã'ãga rõmõ nepota tite! Nevote nepota torojirovija nere. Ajamã'ẽ ava nanererovija'ãi! e'i Jesu pè kupa. 14 Jesu e'i ijupe kõ: – Aje ywete, evote apota tapejirovija ere. Ajamã'ẽ aje ywete a'e eupewarà mõ ipi. Ajawyi “warite” naotyi eayvu pè. Pejẽ pa'e, nekuwai pekupa. Napekuwai maty wyi ajo. Ãwĩvo ve napekuwai mape kyty aatà ajaire. Ije kõrijõ tè aepo akuwa. Ajawyi manyvo “aje ywete” napejẽ kuwa'ãi ije! e'i. 15 Pemã'ẽ! Ikewarà tè pejẽ rewarà mõ napekuwai poromosã'ãgaa ipi. Ajawyi ivo mã'ẽ rè pemã'ẽ ipe. Ajamã'ẽ a'e nikatu ywe'ei pejẽ. Ãmõ, nivoi mã'ẽ rè pemã'ẽ ipe remẽ, a'e ikatu peupe. Napekuwai jane kõ py'a pewarà rewarà mõ a'evo peiko ipi. Ajamã'ẽ ije na'evoi aiko. 16 Ivo mã'ẽ pè tè “ivo” a'e ipi. Ãwĩvo ve nivoi mã'ẽ pè “nivoi” a'e teve ipi. Najavyi aepo javo, ije rõmõ'ĩte rõwã aepo a'e rewarà mõ. Ojevo jẽ Papa reve aepo oro'e, Emuuarerà reve. Ajawyi aje a'e ipi. 17-18 A'e tè emuu pekoty, e'i. Ojevo jẽ oro'e, kee tãmõ Moisesi pè okusiwaoka maekwerà rupi katu: “Mõrijõ ojevo jẽ e'i kupa remẽ, ‘aje’ taoty ijayvu pè”, e'i maekwerà rupi katu. A'e rupi katu ore. Mõrijõ tè ore, Papa reve. Ajawyi “aje ywete” pejẽ kuwasi eayvu pè mijã, Papa ayvu vo ve a'e ipi rewarà mõ, e'i Jesu ijupe kõ. 19 Ãmẽ aepo wenu kupa remẽ, e'i kupa: – Mape põ ajawyi neruu tui upa? e'i ikuwa e'ã kupa. Ãmẽ Jesu e'i ijupe kõ: – Pemã'ẽ! Pejẽ nekuwai pekupa! Tysi tõ Papa napekuwa'ãi tè, e'i! Ekuwa sõ pekupa remẽ, Papa teve pekuwa kuwa mijã, e'i Jesu Pariseu kõ pè. 20 Aepo e'i Jesu, Janejare'e moe'ea retã ypy pè poromo'e upa remẽ. Janejare'e posikoa pè karakuri me'ẽa pyri'ĩje'ẽ tui remẽ aepo e'i Jesu. Ajamã'ẽ nopyyive imopã'ã kupa, nokwaive ipyya 'arà rewarà mõ. 21 E'i mijẽ Jesu: – Ajivytà aa ajaire, e'i. Aa remẽ ereka ipetà pekupa, e'i. Ajamã'ẽ napeo kuwa'ãi aatà mã'ẽ gyty ekoty, e'i. Peaiwererà revejẽ pekãjãtà eresa e'ãve. Eayvu naperovijai rewarà mõ a'evotà peiko, e'i Jesu ijupe kõ. 22 Ãmẽ aepo Juteu kõ mõ wenu remẽ, kee e'i ojiupe kupa: – Manyvore sipõ, “Napeo'ãi kuwa aatà mã'ẽ gyty ekoty”, e'i sõ? Ojijukatà rewarà mõ sipõ aepo e'i? e'i tite kupa. 23 E'i jẽ Jesu ijupe kõ: – Pejẽ, ike yvy pewarà kõ tè, e'i. Ije ãmẽ a'e rõwã. Yva pewarà tè ije, Janejare'e rena pewarà tè. A'e pe wyi ajo mã'ẽ tè ije. [Aepo a'epa pejẽ rewarà mõ, ererovija kuwasi pekupa.] 24 Aja rewarà mõ sitõ “Peaiwererà reve pekãjãtà”, a'epa pejẽ, e'i. Janejare'e Remimuurerà tè penereko katuarà rõmõ aepo a'e ipe pejẽ. Ajamã'ẽ “aje” napejẽi eayvu pè! Ajawyi tè peaiwererà revejẽ pekãjãtà, e'i Jesu ijupe kõ. 25 Ãmẽ aepo wenu kupa remẽ, e'i ijupe kupa: – Ava sipõ ene ajawyi? e'i Jesu pè kupa. Ãmẽ Jesu e'i ijupe kõ: – Jypy remeve ipe amome'upa ipe pejẽ, e'i. 26 Akuwapa peaiwererà. Amome'upa kuwa pemojaiwea rõmõ, e'i. Temirovija tè Emuuarerà rewarà mõ a'evo aiko kuwa, e'i. A'e ayvu tè pirujẽ jane kõ pè amojenu ipe mã'ẽ, eupe omome'u mã'ẽ tè. [Ajamã'ẽ naperovijai], e'i Jesu ijupe kõ. 27 Ãmẽ ojapyaka ee mãe kõ nokuwai ajamã'ẽ Uu pewarà mõ Jesu aepo e'i mã'ẽ. 28 Ajawyi Jesu e'i jẽ ijupe kõ: – Janejare'e Remimuurerà tè ije ajimojane mã'ẽ rõmõ aiko, e'i. Aepo a'epa ipe pejẽ. Ajamã'ẽ nererovijai pekupa. Awyje rõmõ emõ'ãtà yvyra jipokana rè ejuka pekupa ky'y, e'i. Ãmẽ tè tite ekuwatà pekupa ky'y. “Aje ywete sipõkõ e'i mijã!” pejẽ titetà ije ãmẽ ky'y. “Janejare'e ayvu rupi tè sipõkõ janemotekokuwa tarepe mijã! Noporegeta teywetei sipõkõ mijã!” pejẽ titetà ky'y, e'i. 29 Aje ywete Emuuarerà ereve ekoi. A'e nereity'ãi erereko ipi, emimota rupi aiko ipi rewarà mõ, e'i Jesu. 30 Ãmẽ Jesu aepo e'i paireve tite ãmõgwerà ojirovija ee ky'y. Ijaty sa'u “aje ywete” e'i ijayvu pè mãe kõ ãmẽ ky'y.

“Tãmõ Aparão jeapyrerà kõ tè ore!” e'i tite kupa remẽwarà

31 Ãmẽ Jesu e'i Juteu kõ pè, ojirovija ee mãe kõ pè: – Aje ywete poromo'e aiko ipi. Eayvu rupi ikõ peiko nẽ, a'e pejẽ. A'evo peiko remẽ, aje ywete eremimo'earà rõmõtà tè pejẽ. 32 Ekuwatà pekupa, aje ywete mã'ẽ rõmõ. Nivoi tekoua nikasi'ãi peupe ãmẽ ky'y. Napejimomorijau'ãi ee ãmẽ ky'y, e'i. 33 Ãmẽ noerovijai mãe kõ aepo wenu remẽ, e'i ijupe kupa: – Norojimomorijaui teãmã rõwã sipõ oroiko ipi! Ãmõ, nivoi tekoua nikasi oreupe ipi, ãwisõ tãmõ Aparão jeapyrerà kõ tè ore remẽ! e'i. Ajawyi aepo tere e'ã oreupe, e'i tite kupa. 34 Ãmẽ Jesu e'i ijupe kõ: – Ava mõ nivoi mã'ẽ kasia pè ekoi remẽ, “Eaiwererà aitytà”, e'i epe kuwa. Ajamã'ẽ noity kuwa'ãi ipi. Nikasi'ãi waiwererà reitya rè ovote. Ãwitõ temimomorijau nikasi'ãi kuwa oõvijã ai reitya rè, ãwĩvo ve manyvo napejẽ'ãi peaiwererà wyi pepoi rõmõ. Nojityoka'ãi peupe. Ajawyi pejimomorijau jẽtà peaiwererà rè peiko ipi. Aje ywete aepo a'e pejẽ, e'i Jesu ijupe kõ. 35 E'i jẽ Jesu noerovijai mãe kõ pè: – Temĩgwai nojisu'ui janeatyryjarà kõ pè ipi. Janeãkarãgwerà kõ kõrijõ tè awyje ojisu'u janeatyryjarà kõ rõmõ ipi, e'i. 36 A'evo ve ije. Janejare'e Ra'yry tè ije, e'i. Janejare'e Ra'yry penekyi nivoi tekoua pupewarà wyi remẽ, aje ywete nikasi'ãi peupe ãmẽ ky'y. Nivoi tekoua remĩgwai ai rõwãtà ãmẽ peiko ky'y, e'i. 37 E'i jẽ Jesu ijupe kõ: – Akuwa Aparão jeapyrerà kõ tè pejẽ, e'i. Ajamã'ẽ eruparà mõ rõwã peiko ipi. Eruparà rõmõ sõ peiko remẽ, “aje” pejẽ kuwa eayvu pè, e'i. Emã'ẽ. Eayvu naperovijai, e'i. Ajawyi pepota ejukaoka kõrijõ tè pekupa, e'i. 38 Papa omojisaoka eupe tamojenu maekwerà amojenu ipe pejẽ. Ajamã'ẽ napeenu'ãi, penõvijã rekoa aiwerà rupi kõrijõ tè peiko ipi rewarà mõ, e'i Jesu. [Ãjãgai rõvijã pewarà mõ tè Jesu “penõvijã” e'i.] 39 Ãmẽ aepo wenu kupa remẽ, e'i Jesu pè kupa: – Tãmõ Aparão tè orerãmõi! e'i. A'e rekoa rupi tè oroiko ipi! e'i tite kupa. Ãmẽ Jesu “ãnĩ” e'i ijupe kõ. – A'evo sõ peiko remẽ, eremimojenuwerà perovija kuwa ipi! e'i. “Aje ywete” e'i teãmã tãmõ Aparão Janejare'e ayvu pè. Pejẽ ãmẽ naperovijai, e'i. 40 Janejare'e e'i ije mã'ẽ tè amojenu ipe pejẽ, “Kee ere yvy pewarà kõ pè”, e'i eupe maekwerà rupi katu tè amome'u pejẽ ipi. Ajamã'ẽ aje ywete mã'ẽ amome'u ipe remẽ, naperovijai ipi. Pepota ejukaoka mã'ẽ rè kõrijõ tè peja'a peiko, e'i. Tãmõ Aparão reruparà mõ sõ peiko remẽ, nãwĩ vo'ãi kuwa peiko mijã. 41 Ãwĩvo peiko rewarà mõ, “Penõvijã rekoa aiwerà rupi tè peiko ipi”, a'e pejẽ, e'i Jesu ijupe kõ. – Ãnĩ! e'i tite kupa. Janejare'e rekoa rupi rõmõ'ĩte oroiko ipi, e'i. Janeruu tè Janejare'e! e'i epe Jesu pè kupa. 42 Jesu e'i ijupe kõ: – Janejare'e ãkarãgwerà tè sõ pejẽ remẽ, erau kuwa pekupa mijã, e'i. A'e tè emuu yvy pè pepytery pè taiko, e'i. Eayvu rupi rõwã ajo. Ijayvu rupi tè ajo, e'i. 43 Pejẽ ajamã'ẽ nererovijai pekupa. Napeenui teve eayvu ipi, e'i. 44 Ãjãgai rõvijã remĩgwai tè pejẽ, e'i. [Ajawyi eayvu napeenu tari ipi!] Penõvijã remimotarà rupi kõrijõ tè pepota peiko ipi, ãjãgai rõvijã remimotarà rupi tè, e'i. Ajawyi ijayvu kõrijõ perovija ipi. Nivoi tesõ mã'ẽ tè ãjãgai rõvijã. [Ajawyi noereko miti ekojẽi ivoa mã'ẽ tè ãwĩ.] Porojukaoka mã'ẽ tè a'e ãmẽ. Yvy jinõ ypy remeve a'evo ekoi mã'ẽ tè a'e. Janejare'e ayvu noenu tari rewarà mõ a'evo amãtejẽ ekoi. Ayvu aje ywete mã'ẽ tè noenu tari ipi. Iwari mã'ẽ teãmã ekoi. Poromoripe mã'ẽ teãmã ekoi. Poromowarioka mã'ẽ teãmã ekoi. Wãisõ a'evoa rõmõ ekoi! A'e reruparà mõ tè peiko ipi! 45 Aja rewarà mõ tè nererovijai tesõ pekupa! e'i. Aje ywete mã'ẽ amojenu rewarà mõ nererovijai pekupa ipi, e'i Jesu ijupe kõ. 46 E'i jẽ Jesu ijupe kõ: – Eaiwererà mõ napeesa'ãi kuwa! Moma'e jẽ rõwã nivoi mã'ẽ pemo'y kuwa ere, e'i. “Aje” pejẽ kuwasi Papa ayvu pè amojenu pejẽ remẽ mijã. 47 Janejare'e koty rewarà kõ ijayvu werovija ipi. Ikoty rewarà kõ rõwã pejẽ rewarà mõ sitõ napeenu tari ipi, e'i Jesu ijupe kõ. 48 Ãmẽ a'e kõ e'i Jesu pè: – Samaria wãnà tè sipõ ene! Ajawyi aepo ere oreupe! e'i tite kupa. Kee e'i teve kupa: – Ãjãgai ojimoemija nere mã'ẽ tè ene! e'i teve kupa. 49 Ãmẽ Jesu e'i ijupe kõ: – Ãnĩ! A'e rõwã ije! [Nererovija tari pekupa rewarà mõ tè aepo pejẽ ije!] Papa amoe'eay mã'ẽ tè ije. Ajamã'ẽ pejẽ ererõarõ kõrijõ pekupa ipi, e'i. 50 Ije, “Emoe'e kuwasi kupa”, na'ei ajamã'ẽ pejẽ. Ajamã'ẽ Papa, “Era'yry tomoe'e kupa”, e'i pejẽ mijã. A'e tè poromosã'ãga mã'ẽ teãmã. Ajawyi okuwa ivo aiko mã'ẽ Papa. 51 Aje, ava mõ werovija eayvu remẽ, mãerã oiko karuarutà iko, e'i Jesu. 52-53 E'i ãmẽ ijupe kupa: – Emã'ẽ! Age'e si orokuwa katu! Aje ywete, ãjãg ayvu rupi tè aepo ere nejupa! e'i tite kupa. Jakãjãma mãe rã tè jane, pirujẽ! Tãmõ Aparão okãjãma. Ãmõ, Janejare'e ayvu mojenuarà kõ ve okãjãma. Ãwitõ a'e kõ okãjãma, ãwĩvo tary ve jane. Awyje jẽ jakãjãmatà, pirujẽ. Ava jẽ rõwã na'evo'ãi, e'i kupa. Ajawyi ava põ ene, aepo ere oreupe? Ene ywesõ rõwã tãmõ kõ wyi, Aparão kõ wyi! Nejimoe'e teywete aepo javo rõmõ, e'i tite Jesu pè kupa. 54 Ãmẽ Jesu e'i ijupe kõ: – Evote sõ ajimoe'e teywete remẽ, ajimoe'e pãnẽtà tè. Ava jẽ rõwã “aje ywete” e'ità enu. Ajamã'ẽ Papa tè emoe'e. Janejare'e pejẽ ijupe mã'ẽ tè emoe'eay, e'i. 55 E'i jẽ Jesu ijupe kõ: – Penemikuwa rõwã ajamã'ẽ Janejare'e! Pewarite kuwa, “Akuwa katu”, pejẽ remẽ. Ije kõrijõ tè akuwa, e'i. “Nakuwai” a'e sõ ijupewarà mõ remẽ, ewari teve kuwa aepo a'e remẽ. Ije ãmẽ aje ywete Papa akuwa mã'ẽ, Ta'yry tè ije rewarà mõ. A'e ayvu rupi tè aiko ipi. 56 Tãmõ Aparão amyry okuwa amãtejẽ evãea rã. Ajawyi ory amãtejẽ erenoneve upa, e'i Jesu ijupe kõ. 57 Ãmẽ Juteu kõ e'i aepo renu: – Ka'akuwa rõwã ene! Ajawyi, “Tãmõ Aparão rè amã'ẽ”, nere'ãi! e'i kupa. 58 Ãmẽ Jesu e'i ijupe kõ: – Aje ywete, ije ypy tãmõ Aparão wyi aiko teãmã, e'i. Aparão naikoive remeve aiko teãmã Papa pyri aiko, e'i. 59 Ãmẽ aepo e'i Jesu ijupe kõ remẽ, ojikõ'õ tesõ ee kupa ky'y. Ajawyi ojapi japità takuru pupe ijuka ijayvu rewarà mõ kupa mijã. Ajamã'ẽ Jesu ojisyry tè oo ojinõ gatu iwyi kõ. Janejare'e moe'ea retã ypy pe wyi ojisyry oo.

Juwão 9

Jesu omokatu naeapyoi mã'ẽ remẽwarà

1 Ãmẽ ãmõ 'ary pè Jesu okwa iko, jimoava 'arà mẽ. Ãmẽ naeapyoi mã'ẽ mõ rè omã'ẽ. A'e isaky remeve ipõ a'evo naeapyoi. [Ore ve orokwa upi oroiko, emimo'ekwerà kõ rõmõ mã'ẽ. Ajawyi ore ve oromã'ẽ ee.] 2 Oromã'ẽ ee remẽ, kee oro'e Jesu pè: – Jõvijã. Manyvore põ ãwĩ kwaima'e ãwĩvo sõ isaky? oro'e. Ava põkõ nivoi ekoi, tãwĩvo oẽ? Ãwĩ sipõ nivoi ekoi teãmã? Ãnĩ! Tuu nivoi ekoi wyi sipõ ãwĩvo ta'yry? oro'e ijupe. 3 Ãmẽ Jesu e'i oreupe: – Ãnĩ. Ãwĩ nivoi ekoi rewarà mõ rõwã ãwĩvo isaky. Tõvijãgwerà nivoi ekoi rewarà mõ rõwã teve ãwĩvo isaky. Aje ywete, Janejare'e ayvu rupi teãmã ãwĩvo, “Ekasia tojikuwa”, e'i rewarà mõ tè, e'i. Amokatutà ajawyi jane kõ tomã'ẽ ee, e'i. Omã'ẽ imokatua rè kupa remẽ, Janejare'e kasia okuwatà kupa, e'i. 4-5 Ike yvy pè aju remeve, aje ywete Janejare'e kasia tamojisaoka, pirujẽ yvy pewarà kõ toerovija, e'i. A'evoa mõ emuroka ike, taposiko aiko, e'i. Okwa jẽ mosikoa 'arà remẽ, japosiko jẽ ijupe, e'i. Kãramõ okwapa mosikoa 'arà ky'y remẽ, naiko'ãi mosikoa ky'y, e'i. Ajawyi age'eve japosiko jẽsi, e'i ore. 6 Aepo e'i paire, omokatutà kwaima'e. Wenykwerà pupe yvy omotuju. A'evo wereko mã'ẽ pupe omogy ea rè. 7 Ajaire e'i Jesu ijupe: – Ekwa ejeakusu Siroe eu yy miti pè mã'ẽ pupe, e'i ijupe. (Siroe pè “temimuurerà” jaa tè janeayvu pè.) Oo kwaima'e ojeakusu ãmẽ, Jesu ayvu rupi. Ameve ikatupa ky'y. Ajaire ojivy uu. Eapyo katu ojivy uu ky'y. 8 A'evo paire ipyriwarà kõ omã'ẽ tè jẽ ee maekwerà kõ omã'ẽ mijẽ ee. E'i ãmẽ kupa: – Ãwĩ rõwã sipõkõ naeapyoi jypy remẽ mijã? Ãwĩ rõwã sipõkõ janekarakuri rè oporanu mijã, e'i kupa ee omãjã. A'e kõ, karakuri rè oporanu upa remẽ, okwa tè jẽ ipyryvo kõ ipi mijã. Ajawyi okuwa katu kupa. 9 Ãmõgwerà, “Õ'õ, a'e tè rõwã sipãwĩ!” e'i. Ãmõ kõ, “Ãnĩ, a'e rõwã. A'e voay wete tè ãwĩ ajamã'ẽ!” e'i tite kupa. Ajamã'ẽ a'e teipe mijã. Ovote ajaire ojimome'u ky'y. – Õ'õ, kõi nereapyoi maekwerà tè ije! e'i ky'y. 10 – Manyvo ere põ nereapyo rõmõ? e'i ijupe kupa. 11 – Uve ike kwaima'e mõ, Jesu eu ijupe mã'ẽ, e'i. A'e tuju omogy erea rè. Ajaire, “Ekwa Siroe yy miti pè terejeakusu”, e'i ije. Ãmẽ aa ajeakusu. Ameve ereapyo ky'y! e'i. 12 – Mã põ a'e kwaima'e ajawyi? e'i kupa. – Nakuwai! e'i ajamã'ẽ naeapyoi maekwerà. [Ji'ite Jesu ojisyrypa oo rewarà mõ, nokuwai. Nomã'ẽi ee.]

Naeapyoi maekwerà ojimokasi jõvijã kõ rovake remẽwarà

13 Ãmẽ naeapyoi maekwerà weraa Pariseu kõ gyty kupa, tomã'ẽ ee kupa. 14 Jimoava 'arà remẽ tè Jesu omokatu. 15 Ajawyi Pariseu kõ e'i naeapyoi maekwerà pè: – Manyvo ere ywe'e põ nereapyo rõmõ? e'i kupa. – Tujugà omogy erea rè, e'i. Ajaire aa ajeakusu. Ameve ereapyo katu ky'y! e'i mijẽ. 16 Aepo e'i remẽ, Pariseu kõ e'i tite ojiupe: – Kwaima'e a'evo wereko mã'ẽ, Janejare'e koty rewarà rõwã, e'i. Ikoty rewarà sõ remẽ, werovija kuwa ayvu jimoava 'arà rewarà! Noposiko'ãi kuwa jimoava 'arà mẽ mijã! e'i tite kupa. Ajamã'ẽ ãmõ kõ: – Nivoi mã'ẽ rõmõ ãwĩ ajawyi manyvo noereko'ãi kuwa naeapyoi mã'ẽ imokatu! e'i kupa. Ãmẽ ãmõgwerà “aje ywete” e'i. Ãmõ ãmõgwerà “aje rõwã” e'i teve kupa. Ãmõ ãmõ rupi tè oporegeta kupa. 17 Ãmẽ e'i mijẽ naeapyoi maekwerà pè kupa: – Aje ywete põ “ereamoapyooka” ere? e'i ijupe kupa. – Õ'õ. Aje ywete aepo a'e, e'i ijupe kõ. – Manyvo põ nemokatuarerà rè ajawyi neja'a? e'i kupa. – Janejare'e ayvu mojenuarà teipõ, a'e, e'i naeapyoi maekwerà. 18 Ajamã'ẽ Juteu rõvijã kõ, “Aje ipõ naeapyoi maekwerà tè ãwĩ”, ne'i. “Eapyo teãmã ãwĩ”, e'i kõrijõ kupa. Noerovija tari kupa rewarà mõ aepo e'i kupa. Ajawyi tuu ookwai imuu kupa, ijy revejẽ. 19-20 A'e kõ pè Pariseu kõ e'i: – Aje põ ãwĩ nera'yry tè? e'i kupa. – Õ'õ, aje, era'yry tè, e'i tuu ijupe kõ. – Aje põ nera'yry naeapyoi mã'ẽ rõmõ si isaky mijã? e'i ijupe kupa. – Õ'õ, ekoa teãmã naeapyoi mijã, e'i. – Manyvo e'i sipõ weapyo rõmõ ky'y? e'i kupa. 21 Ãmẽ tuu e'i ijupe kõ: – Nakuwai, e'i. Miratu rõmõ tè era'yry ky'y. Ajawyi pejẽ ijupe, e'i. Ãwĩ tè omome'utà weewarà pejẽ, e'i. Ore norokuwai manyvo e'i okatu rõmõ mã'ẽ. Norokuwai teve imokatuarerà, e'i ijupe kõ. 22 “Jesu tè omokatu”, ne'i tari tè tuu ajamã'ẽ, okyje Juteu rõvijãgwerà kõ wyi rewarà mõ. Jypy remẽ a'e kõ ijayvukasipa kee javo rõmõ: – Ava mõ sõ, “Janejare'e Remimuurerà tè Jesu”, e'i sõ remẽ, awyje toike e'ã Janejare'e ayvu rè jimo'ea retã wyry pè ky'y, e'ipa amãtejẽ kupa. [Aja rewarà mõ tuu okyje, ijy reve, nopotai omoisyrya kupa rewarà mõ.] 23 Ajawyi: – Ere ijupe. Ojimovijapa ky'y, e'i kõrijõ tè ijupe kõ kupa. 24 Ãmẽ ajaire kwaima'e naeapyoi maekwerà omuu mijẽ kupa. Kee e'i mijẽ ijupe kupa: – Ivo ikõ eporegeta nẽ. Janejare'e pè newari sõ remẽ, wenutà newaria. Nemomorijautà ãmẽ. Orokuwa ãwĩ nivoi mã'ẽ tè, e'i Jesu pewarà mõ kupa. 25 Ãmẽ naeapyoi maekwerà e'i: – Nakuwai ãwĩ nivoi mã'ẽ tè remẽ. Kee kõrijõ tè akuwa. Nereapyoi mijã. Age'e ereapyo katu ky'y! Aepo a'e kõrijõtà tè! e'i ijupe kõ. 26 – Manyvo rã'ĩ põ nerereko, nerea moeapyoka? e'i mijẽ ijupe kupa. 27 Ãmẽ naeapyoi maekwerà e'i ijupe kõ ky'y: – A'e ywe'e ipe pejẽ! e'i. Pejẽ py'y py'yi põ ije! Pepota põ emimo'earà rõmõ peiko rewarà mõ põ aepo pejẽ ije? e'i. 28 – Ãnĩ! e'i e'i kupa. Oojai kõrijõ ãmẽ kupa. – Ene si emimo'earà rõmõtà ky'y! e'i kupa. Ore ãmẽ, tãmõ Moisesi ayvu rupi oroiko mã'ẽ tè ore, e'i tite kupa. 29 Janejare'e ayvu rupi tè tãmõ Moisesi oporegeta ipi. Norokuwai ajamã'ẽ ava ayvu rupi põ nemokatuarerà ekoi, e'i kõrijõ kupa. 30 Ãmẽ naeapyoi maekwerà e'i ijupe kõ: – Ha! Napekuwai maty wyi uu mã'ẽ! Ajamã'ẽ Janejare'e ayvu rupi tè emokatu! e'i. 31 Jakuwa Janejare'e nojapyakai nivoi mãe kõ ayvu rè ipi, e'i. Ivo mãe kõ ayvu rè kõrijõ tè ojapyaka ipi, e'i. Ijayvu rupi ekoi mãe kõ ayvu rè ojapyaka ipi, e'i. 32 Ava nokuwai naeapyoi mã'ẽ mokatua ipi mijã, e'i. Nomã'ẽytyi ãwĩ rapijarerà rè mijã, e'i. Yvy jinõ ypy remẽwarerà kõ ve nomã'ẽi ee. 33 Ajamã'ẽ aã kwaima'e emokatu! e'i. Janejare'e ayvu rupi rõwã sõ remẽ, nemokatu'ãi kuwa! e'i ijupe kõ. 34 Ãmẽ ywesõ Juteu rõvijã kõ ojikõ'õ ee. – Nivoi teãmã mã'ẽ tè ene! Ajawyi noremotekokuwa'ãi kuwa rejupa! e'i kupa. Aepo e'i kupa paire, omoisyry wayvukasia rupi Janejare'e ayvu rè jimo'ea retã wyry pe wyi kupa.

Naeapyoi mã'ẽ vo 'ejẽ mã'ẽ rewarà

35 Ãmẽ ajaire a'evoa ojenu Jesu pè. Ajawyi Jesu oo wemimokatukwerà resa. E'i ijupe: – Nejirovija põ Janejare'e Remimuurerà rè, ojimojane mã'ẽ rè? e'i ijupe. 36 – Ava pè põ aepo ere? Ere ajawyi takuwa, tajirovija ãmẽ ee, e'i Jesu pè. 37 – Age'e ywete nemã'ẽ ee rejupa, e'i Jesu ijupe. A'e tè oporegeta neupe upa, e'i. A'e tè ije! e'i Jesu ijupe. 38 Ameve ojimoenãpa'ã yvy pè Jesu pyri imoe'e. – Aa! Orokuwa ky'y, jõvijã! Ajirovijatà ajawyi nere ky'y, e'i Jesu pè. 39 Ãmẽ Jesu e'i ijupe: – Janejare'e pyri wyi tè ajo yvy kyty, nivoi mã'ẽ mojikuwa, e'i. Emoe'e mãe kõ ojikuwatà. Nemoe'ei mãe kõ ve ojikuwatà. Naeapyoi mãe kõ vo 'ejẽ ajamã'ẽ kupa. “Orokuwa Janejare'e ayvu”, e'i epe kupa. Ajawyi nojirovijai ajamã'ẽ ere kupa! Ere ojirovija mãe kõ ãmẽ eapyoay mã'ẽ vo 'ejẽ ekoi. “Natekokuwaive Janejare'e ayvukwerà rè”, e'i kõrijõ kupa. Ajawyi, “Ivo katu mãe kõ tè aã kõ”, e'ità Janejare'e ijupe kõ, e'i Jesu. 40 Aepo e'i Jesu remeve, Pariseu kõ mõ ojapyaka upa ee. A'e kõ e'i Jesu pè: – 'Aa! Norereapyoi mã'ẽ rõwã ore ajamã'ẽ. Aepo tere e'ã oreupewarà mõ! e'i tite kupa. 41 Ajawyi e'i Jesu ijupe kõ: – Kee a'e. Ãwitõ naeapyoi mã'ẽ okuwa weapyo e'ãa. Ajawyi ojiporijauesaoka ije tamokatu. Ãwĩvo kuwasi peaiwererà perekooka ije mijã. Poromokatu kuwa ãmẽ mijã. Ajamã'ẽ na'evoi pejẽ. Ajawyi peaiwererà ojimo'y jẽ pene, e'i Jesu.

Juwão 10

“Kaneiru jarà vo ije”, e'i Jesu mã'ẽ

1 Ãmẽ Jesu poromotekokuwa jẽ. – [Pirujẽ jane kõ jarà tè ije, e'i. Poroereko katu mã'ẽ tè ije. Ere ojirovija mãe kõ ãmẽ ekuwa katu, e'i.] Kaneiru jarà rè tè ajimosã'ãgatà pemotekokuwaarà mõ. Kaneiru jarà omoige weima kõ kurarà pupe ereko kõ ipi. Pe'ĩte kurarà rova kwarà. A'e rupi omoigeoka kõ ipi. A'e kwarà rupi imona mã'ẽ noike'ãi, ijarà rõwã rewarà mõ. Tyvija rupi tè oike imona mã'ẽ. Kurarà 'arà rupi tè ojiupi omona rõmõ. 2 Kaneiru jarà ãmẽ kurarà rova kwarà rupi tè oike ipi, ijarà tè rewarà mõ. 3 Ovãe ijarà remẽ, ikwarà rãrõarà oovapyjavo kurarà kwarà toike upi, ijarà tè rewarà mõ. Wapukai ãmẽ weima kõ pè ipi. Weima rerà kõ okuwa, ijãvijõ kõ jẽ. “Pejo pejimiwa”, e'i ijupe kõ. Eima kõ ojarà poregeta wenu remẽ, oo oo upi kupa ipi, okuwa ojarà poregeta kupa ipi rewarà mõ. Ajawyi oẽ oẽ oo upi kupa ipi. 4 Oẽma kupa remẽ, ijarà tè enone kõ rupi oo. Oo upi kupa ãmẽ, iporegeta okuwa kupa rewarà mõ. 5 Ãmõ kõ sõ oporegeta ijupe kõ remẽ, noenu'ãi kupa. Noo'ãi upi kupa. Ojava kõrijõtà tè oo iwyi kupa, wemikuwa rõwã rewarà mõ, e'i Jesu. 6 Awyjepa rã'ĩ aepo e'i Jesu. Noenui aepo e'i Jesu remẽ kupa ajamã'ẽ. Nokuwai manyvo jaa pè aepo e'i. Ajawyi Jesu kaneiru jarà rè tè ojimosã'ãga tarà mijẽ. Kee e'i ijupe kõ: 7 – Ãwitõ kaneiru kõ ojarà rupi oike kurarà kwarà rupi ipi, ãwĩvo ve ere ojirovija mãe kõ erupi tè oiketà Janejare'e rena pè ipi. Eporegeta okuwa kupa. Ajawyi oike kuwa erupi kupa. Aje ywete aepo a'e, e'i Jesu. 8 – Ãmõ, kee a'e teve. Ãwitõ imona mãe kõ eima kõ rè oposiko, ãwĩvo ve Janejare'e ayvu mojenuarà rã'ãga kõ ekoi. Aje ywete rõwã kupa ipi. Najorive remeve a'evo ekoi kupa. “Kee e'i Janejare'e ayvu”, e'i tite kupa remẽ, wayvu e'e rupi tè e'i kupa ipi. [“Toerovija e'ã Janejare'e ayvu kupa”, e'i tite kupa ipi.] Ãwitõ imona mãe kõ opota eima kõ moisyry ijarà wyi, a'evo ve Janejare'e ayvu mojenuarà rã'ãga kõ opota poromoisyry Janejare'e wyi. Ajamã'ẽ ekoty reware'e kõ nojimoripeoka'ãi ijupe kõ, e'i. Ãwitõ kaneiru kõ ojarà rõwã mã'ẽ pè nojimoripeoka'ãi, ãwĩvo ekoi kupa, e'i. 9 E'i jẽ Jesu ijupe kõ: – Kurarà rova kwarà vo 'ejẽ ije aiko. Ãwitõ kaneiru kõ ikwarà rupi tè oike kurarà pupe opyta ipi, ãwĩvo ve ere ojirovija mãe kõ erupi kõrijõ tè oiketà Janejare'e rena pè. Kaneiru kõ oẽ kurarà pupe wyi wemi'õ rã resa iwa ipi. O'u katu wemimotarà kupa ipi. Ajaire ojivytà oo oike kupa ipi. Ãmẽ a'evo ekoi kupa remẽ, ojarà rupi tè ekoi kupa ipi. A'e teve wereko katu kõ mãrãnai wyi ereko ipi. Ãwĩvo ve areko katu ere ojirovija mãe kõ ipi, e'i Jesu. 10 – Nivoi mãe kõ opota katu omona ipi. Opota porojuka tè kupa. Opota ivo tekoua omoma jimo'yjẽ kupa. A'evo rõwã ije aiko. Kee rõmõ tè ajo. Ere ojirovija mãe kõ tekoua e'eay rupi toiko kupa. A'e rõmõ tè ajo. Aje ywete aepo a'e pejẽ, e'i Jesu.

“Kaneiru jarà e'eay mã'ẽ vo 'ejẽ ije”, e'i Jesu mã'ẽ

11 – Kaneiru jarà e'eay mã'ẽ vo 'ejẽ ije. Aje poroereko katu mã'ẽ tè ije. Ere ojirovija mãe kõ areko katu ipi, e'i. Ãwitõ kaneiru jarà nojipiraui omãnõ weima rekovijarà rõmõ, ãwĩvo ve ije aiko, e'i Jesu. 12 Na'evoi karakuri repy rõmõ kaneiru rè oposiko mã'ẽ ekoi. A'e jawarà ojãrõ mã'ẽ uu ijapisi kõ remẽ, ojava kõrijõtà oo iwyi, okyje ai tè iwyi rewarà mõ. Eima kõ oitytà oo. Ãmẽ aja puku pè ojãrõ mã'ẽ wapisi kõtà ky'y. Ojeja jẽ mãe kõ ãmẽ osãsãimatà oo. 13 A'evo karakuri repy rõmõ kõrijõ tè oposiko mãe kõ ipi. Ajawyi wãrõ maevo sõ tite kupa ipi. Ajamã'ẽ uu ojãrõ mã'ẽ ee remẽ, “Epy mã'ẽ tè ãwĩ”, ne'i'ãi ky'y. Oity kõrijõtà oo. Noau kõ'ãi, ijare'e rõwã rewarà mõ, e'i. 14-15 – Ãwitõ kaneiru jarà e'eay oja'a katu weima kõ rè ipi, ãwĩvo ije pene. Areko katu erima vo mãe kõ ipi, e'i. Akuwa katu kõ teve. Ãwitõ Papa ekuwa katu, ãwĩvo ve akuwa katu erima vo mãe kõ, e'i. Ãwitõ Papa ije akuwa katu, ãwĩvo ve erima vo mãe kõ ekuwa katu teve, e'i. Ajawyi ava mõ uu tarepe imoai kõ remẽ, aa jẽtà ekovijarerà kõ rõmõ. Ajijukaoka jẽ tesõtà imokatuarà kõ rõmõ aiko, e'i. 16 – Oiko jẽ ajamã'ẽ erima rã votà mãe kõ, e'i Jesu. Noikeive epyri mãe kõ, e'i. Ajawyi amoaty kõ jẽtà, e'i. Aporegeta ijupe kõ remẽ, wenu katutà eayvu kupa. Ojirovijatà ere kupa. Oiketà epyri kupa. Pe'ĩypyte rõmõ areko kõtà aã kõ reve. Pe'ĩte ijarà kõ rõmõ aikotà, e'i Jesu ojimosã'ãgaa rupi. 17 E'i jẽ Jesu ijupe kõ: – Papa, “Kee ikõ eiko nẽ”, e'i eupe remẽ, “hoõ” a'e ijupe ipi. Ijayvu rupi aiko ipi. “Teremãnõ nere ojirovija mãe kõ rekovijarà mõ”, e'i ije remẽ, “hoõ” a'età ãmẽ. A'evotà aiko. Ajawyi Papa erauvay. Akuwa emomoera tarà mijẽ a'evo aiko remẽ. 18 Ajamã'ẽ napotai sõ ejuka kupa remẽ, ava nejukaoka'ãi kuwa. Papa eayvumokasipa. Ajawyi eayvu rupi apota remẽ tè amãnõtà. Ajaire apoera tarà mijẽ, e'i. 19 Ãmẽ aepo Juteu kõ wenu remẽ, ojimoe'yi mijẽ kupa. 20 Mõa'ãrõwã kee e'i mãe kõ: – Ha! Emã'ẽ! Ãjãgai omoeawyry, aepo te'i ky'y! Ajawyi tapejapyaka e'ã ijayvu rè erovija, e'i tite kupa. 21 Ãmõgwerà kee e'i: – Ãnĩ! Ãjãgai aepo nomo'eoka'ãi kuwa! Nomokatuoka'ãi kuwa teve naeapyoi mã'ẽ! e'i kupa. Iteetejẽ ijayvu kõ ãmẽ.

“Ejikuwa” e'i jane kõ Jesu pè remẽwarà

22 Ãmõ 'arà pè Juteu kõ oja'atà Janejare'e moe'ea retã mokatuawerà rè, Jerusarẽ taa pè. Kõitokõ tãmõi kõ omokatu imoe'ea retã. A'e rè oja'atà kupa. Ãmãnà mẽ a'evotà. Oryvaytà ãmẽ a'evo okwa remẽ kupa. 23 Ãmẽ Jesu Janejare'e moe'ea retã gyty oo, a'evo tarà mẽ. Tetã ypy rupi okwa, Saromão rena eu mã'ẽ ypy rupi. 24 A'evo ekoi remẽ Juteu kõ ojimoaty ipyri. A'e kõ kee e'i ijupe: – Terejiãrõ pukuoka e'ã ikõ ore ky'y nẽ! Ejimome'u amãtejẽ ikõ oreupe nẽ! Aje ywete rõwã põkõ Janejare'e Remimuurà tè ene, Orerõvijã ywete rõmõ? oro'e ene. Aje ywete ene a'e tè remẽ, ere kuise'ẽ, torokuwa. Ãmẽ tè, “A'e tè sipõ mijã?” noro'e'ãi neupewarà mõ ky'y, e'i Jesu pè kupa. 25 Aepo e'i kupa remẽ, Jesu e'i ijupe kõ: – Ajimome'u ipe rõwã sipõkõ pejẽ! Ajamã'ẽ “aje” napejẽi eayvu pè. Pemã'ẽma ipe ekasia rupi mãrãnà jikuwa e'ã amojisaoka remẽ. Ajamã'ẽ naperovijai jẽ, ãwisõ Papa ayvu rupi tè a'evo aiko remẽ. [A'evoa rupi kuwasi ekuwa pekupa mijã. Ãwitõ kaneiru kõ ojarà okuwa, ãwĩvo kuwasi ekuwa pekupa mijã.] 26 Nererovijai ajamã'ẽ pekupa, erima vo mãe kõ rõwã pejẽ rewarà mõ, e'i. 27 – Erima vo mãe kõ eporegeta wenu ipi. Ãwitõ kaneiru kõ ojarà poregeta wenu remẽ, oo upi. Ãwĩvo ve erupi uu mãe kõ eporegeta wenu kupa ipi. Akuwa erupi uu mãe kõ. 28 Amoigooka karuaru kõtà. Mãerã oiko karuarutà ãmẽ kupa, e'i. Ava jẽ rõwã wekyi kõtà epo pe wyi, e'i. 29 Papa tè erima vo mãe kõ ome'ẽ ije. Namokãjã kõ'ãi teve ewyi. Ikasiay wete teãmã mã'ẽ tè Papa. Ajawyi ava noekyi kõ'ãi ipo pe wyi. 30 Ojevo jẽ ore, Papa reve, pe'ĩypyte rõmõ, e'i Jesu ijupe kõ. 31 Aepo e'i remẽ ywesõ noerovija tari mãe kõ ojuka taray kõrijõ. Ameve takuru opyy kupa. Ojapi japità takuru pupe ijuka kupa mijã. 32 Ajawyi Jesu e'i ijupe kõ: – Papa kasia rupi mãrãnà jikuwa e'ã ipojy mã'ẽ tè rõwã sipõkõ amojisaoka penovake, mõa'ãrõwã. Ajawyi a'e pejẽ. Mã rewarà mõ ywesõ põkõ ejukatà pekupa? a'e pejẽ, e'i. 33 E'i ãmẽ ijupe kupa: – Ãnĩ! A'evo neiko rewarà mõ rõwã oropota nejuka! Neayvu ai rewarà mõ tè! “Ojevo jẽ ore, Janejare'e reve”, ere rewarà mõ tè! Aepo ere remẽ, Janejare'e nerõarõ, e'i kupa. 34 Ãmẽ Jesu e'i ijupe kõ: – Kee e'i Janejare'e ikusiwaokapa tãmõ Moisesi pè karamoe remeve: “Evo tè pejẽ, [eayvu rupi peiko mãe kõ rõmõ]”, e'i itõkõ. 35-36 Ajare kee a'e pejẽ. A'e kõ pewarà mõ, “Evo tè pejẽ”, e'i Janejare'e remẽ, tysi tõ eupe e'i kuwa, Wemimuurerà rõmõ. Ajamã'ẽ, “Janejare'e Ra'yry tè ije”, a'e ipe pejẽ remẽ, pejikõ'õ kõrijõ ere peiko. Ejukaoka kõrijõtà pekupa! e'i Jesu ijupe kõ. 37 E'i jẽ Jesu ijupe kõ: – Papa ayvu rupi rõwã sõ aposiko remẽ, “Nisirovija'ãi”, pejẽ kuwa ije, e'i. Papa remimota rupi rõwã teve sõ aposiko remẽ, aepo pejẽ kuwa ije. 38 Ajamã'ẽ ijayvu rupi teipe aposiko. Ikasia rupi teve ipe. Ajawyi pemã'ẽ ipe ere remẽ, nererovijai pekupa. Ekuwa kuwasi pekupa mijã, Janejare'e Ra'yry tè ije remẽ, e'i. Papa erevejẽ ekoi. Ãmõ, Papa revejẽ aiko, e'i Jesu ijupe kõ. 39 Ãmẽ aepo e'i Jesu ijupe kõ remẽ, opyy tarepe imopã'ã kupa mijã. Ajamã'ẽ Jesu ji'ite oopa iwyi kõ. 40 Ajaire yy Jotão ovae kyty oo mijẽ. Juwão amyry poromojãmorĩ a'e pè maekwerà kyty oo Jesu. A'e pè ekoi rã'ĩ. 41 Ãmẽ jane kõ oo esa, a'e pè tui remẽ. A'e kõ kee e'i ojiupe: – Juwão amyry nikasi epe mãrãnà jikuwa e'ã mojisa rè. Ajamã'ẽ Jesu rewarà omojenu amãtejẽ remẽ, aje ywete e'i, e'i ojiupe kupa. 42 Ajawyi ojirovija katu Jesu rè kupa ky'y. Mõa'ãrõwã a'evo werovija mãe kõ ky'y.

Juwão 11

Jesu jimorypa Rasaru okãjã remẽwarà

1-2 Ãmẽ oiko kwaima'e mõ, Rasaru eu ijupe mã'ẽ. [Jesu jimorypa katu a'e, ikõjã kõ reve.] Mata eu ikõjã tykerà pè. Ikypy'yry pè Maria eu. A'e Maria kãramõ ipije mã'ẽ omogytà Jesu py rè. Wapira pupe opymosikãtà. Petãnia taa wãnà kõ tè a'e kõ. Ãmẽ ipõ Rasaru itekorã ywete, ke'ĩrõwã Jesu ekoi remẽ. [Okãjã ipõ awyje rõmõ ky'y. Ãmẽ ipõ ikõjãgwerà kõ eãgwerà omokatu teãgwerà rena pupe ajaire, pareti kwarà pupe. Ojõvã jõvã ipõ kamisa pupe imokatu kupa.] 3 Ãmẽ nokãjãive remẽ ipõ, ikõjã kõ wayvukwerà omonooka Jesu pè, yy Jotão ovae pè ekoi remẽ. – Totuu Jesu, e'i imonooka kupa mijã. Nejimorypa katu itekorã ywete upa, e'i imono kupa. 4 Aepo jaa wenu Jesu remẽ, e'i oreupe: – Ãwĩ tekorãnà, Rasaru mokãjãa mõ rõwã, e'i. Janejare'e moe'ea rõmõtà tè itekorãnà, e'i. Imokatua rupi Janejare'e kasia tẽ tesõ ojikuwatà jane kõ pè. Ãmẽ si kee e'ità jane kõ ije a'evoa rè omãjã: “Aje ywete Janejare'e Ra'yry tè Jesu”, e'ità ije ãmẽ kupa ky'y, e'i. 5 Jesu wauvay ikõjã kõ reve Rasaru. 6 A'evo ipe remẽ, nooive ikoty kõ. Opyta jẽ rã'ĩ Karireja yvy pè. Mõrijõ oke jẽ a'e pè. 7 Ãmẽ tè ootà Petãnia taa kyty ky'y. E'i ãmẽ oreupe, wemimo'ekwerà kõ pè: – Ja'e jajivy jaa Juteja yvy kyty, e'i oreupe. 8 Ajamã'ẽ ore noropotai oroo, orokyje Jesu jukatarà kõ wyi rewarà mõ. Ajawyi oro'e ijupe: – Jõvijã, kwee ywete a'e wãnà kõ opota nejapi japi takuru pupe nejuka mijã. Nepota jẽ tesõ neo moko kyty! oro'e ijupe. Neo ky'y ne! Epyta ike ãmẽ, oro'e ipe ijupe. 9-10 Ajamã'ẽ Jesu oo jẽ. Nojipiraui tesõ oo. Kee e'i oreupe: – Papa omojikuwaokapa eupe manyvo taiko, e'i. Ajawyi oterẽ jẽ ijayvu rupi aikotà. Najavy'ãi emimota. Ãwitõ poroyape mã'ẽ omojisa janerape rã, upi tijaa remẽ, nijajavyi pee. Nojisai remẽ tè kuwa jajavy kuwa. Ãwĩvo ve Janejare'e omojikuwaoka wemimota janeupe manyvo tijaiko. Ja'e jẽsi ajawyi, e'i Jesu. 11 E'i jẽ Jesu oreupe: – Janejimorypa Rasaru oke tè upa, e'i. Aatà ãmẽ imõtã tomã'ẽ, e'i. 12 Ãmẽ oro'e: – Jõvijã, oke upa remẽ, ikatupatà ajawyi, oro'e tite ikuwa e'ã ijupe. 13 “Rasaru okãjãma” jaa tè aepo e'i Jesu ajamã'ẽ. Ore ãmẽ, “Jake mã'ẽ pè teipõ Jesu e'i”, oro'e tite. 14 Ajawyi Jesu omome'u oreupe ky'y. – Okãjãma tè, e'i ky'y. [Ava nomome'ui epe ijupe. Ovote okuwa.] 15 E'i jẽ Jesu oreupe: – Eroryvay najuive ipyri ãwĩvo remẽ, e'i. Ãwĩvo remẽ tè pekuwatà Janejare'e kasia, e'i. “Aje ywete si Janejare'e ikasiay wete!” pejẽtà ãmẽ ky'y, e'i. Ja'e awi jamãjã ejimorypa rè, e'i. 16 Ãmẽ orepytery pewarà mõ e'i oreupe, Tome eu ijupe mã'ẽ. Ojipupewarà tè a'e Tome. A'e kee e'i oreupe: – Jane ve ja'e upi! e'i. Ãmẽ janerõvijã ojuka kupa remẽ, jane ve tijanejuka kupa eevejẽ, e'i tite. Oroo ãmẽ Jesu rupi oroiko.

“Okãjãma mãe kõ amomoera mã'ẽ tè ije”, e'i Jesu mã'ẽ

17-18 Ãmẽ orovãerĩ oroiko Petãnia taa pyri'ĩje'ẽ remẽ, jane kõ mõ uu orerõvaisĩ. – Okãjãma nejimorypa, e'i kupa. Irõte oke remẽ eãgwerà omokatupa pareti kwarà pupe kupa, e'i kupa. 19 Ãmẽ jakatu ipõ ikõjãgwerà kõ wãpirõ upa. Mata. Ãmõ, Maria. Ajawyi ijimorypa kõ uu uu imopyte'u kõ ãmẽ, Juteu kõ. Jerusarẽ taa pe wyi uu kupa. Jerusarẽ pyri'ĩje'ẽ sa'u Petãnia taa, ajawyi. 20 Ãmẽ ipõ Mata okuwapa Jesu ovãetà mã'ẽ. Ajawyi oo ipõ õvaisĩ, pee rupi. Ikypy'yry ãmẽ opyta tetã wyry pè. 21 Ãmẽ Mata ovãe Jesu pè remẽ, kee e'i ijupe: – Okãjãma rõwã sipõ ekywyry, jõvijã, e'i. Ike rupive sõ neiko remẽ, nokãjã'ãi kuwa ekywyry mijã! e'i. 22 Ajamã'ẽ akuwa Janejare'e pè neporegeta remẽ, wenu jẽtà neayvu janepãtavõ, e'i. 23 Ãmẽ Jesu e'i ijupe: – Nekywyry opoera tarà mijẽ, e'i. 24 – Õ'õ, akuwa, e'i Mata. Kãramõ poromoe'yia 'arà mẽ, opoera tarà mijẽ, e'i. 25 Ãmẽ Jesu e'i ijupe: – Okãjãma mãe kõ amomoeraoka mã'ẽ tè ije, e'i. Eayvu rupi tè opoera tarà mijẽ kupa, e'i. Ere ojirovija mã'ẽ mõ okãjã remẽ, opoeratà, e'i. 26 Awyje nokãjã'ãi ky'y, e'i. Janejare'e pyri oiko karuarutà, ere ojirovija mãe kõ rõmõ, e'i. “Aje ywete” ere põ aepo a'e mã'ẽ pè? e'i. 27 – Õ'õ, e'i ikõjãgwerà. “Aje ywete” a'e. Akuwa Janejare'e Remimuurerà tè ene, Orerõvijã mõ, e'i. Janejare'e Ra'yry tè ene. Oreremiãrõgwerà tè ene, e'i Mata Jesu pè.

Jesu oja'o remẽwarà

28 Aepo e'i paire, ojivy rã'ĩ oo okypy'yry pijarà mõ. E'i mewegà ijupe: – Ejo, jõvijã ovãema iko, e'i. “Totuu” e'i ene, e'i. 29 Ãmẽ Maria wenu aepo jaa remeve, opõ'ã oo õvaisĩ. 30 Pee ku'ai jẽ Jesu ekoi. Ji'i Mata oporegeta ijupe, aekwery peve ekoi. 31 Ãmẽ oiko Juteu kõ mõ Mata retã wyry pè. Omopyte'u Maria upa mãe kõ. A'e kõ omã'ẽ Maria rè opõ'ã oo remẽ. Oo upi ãmẽ kupa. – Okywyry reãgwerà resa teipõ oo ojawa rõmõ, e'i tite kupa. 32 Ãmẽ Maria ovãe Jesu pyri remẽ, ojimoenãpa'ã ipyri javo: – Ike sõ neju remẽ, nokãjã'ãi kuwa ekywyry mijã, e'i. 33 Ãmẽ Jesu omã'ẽ ee, wãpirõ okywyry reãgwerà upa remẽ. Ãmõ, uu imopyte'u mãe kõ ve wãpirõ upa. Ãmẽ Jesu ijãgyoay wete omãjã ee kõ. Oporijauesa kõ ywete. 34 E'i ãmẽ ijupe kõ: – Mape põ pemokatu eãgwerà? e'i. – Wãime! Ja'e teremã'ẽ tyvy rè ajawyi! e'i ijupe kupa. Weraa a'e kyty ãmẽ kupa. 35 Ãmẽ Jesu oja'o ywete ve ee. 36 Ãmẽ Juteu kõ e'i ojiupe: – Emã'ẽ ee esa! Wauvay okãjã mã'ẽ ipi mijã, e'i kupa. 37 Ãmẽ ãmõgwerà e'i: – Naeapyoi maekwerà itõkõ omokatu ipi, e'i kupa. Ike sõ tui remẽ, nomokãjãoka'ãi kuwa mijã, e'i kupa.

Jesu Rasaru omomoera remẽwarà

38 Ãmẽ Jesu oo teãgwerà rena kyty ky'y. Rasaru ryvy rena kyty oo. Ijãgyoay oo. Pareti kwarà tè a'e tyvy rena. Ovapyka teve takuru, ta'yrõwã mã'ẽ. 39 Ãmẽ Jesu e'i jane kõ pè: – Peovapyjavo! e'i. Ãmẽ Mata: – Ãnĩ! e'i. Inẽma maevo ky'y, irõtepa tesõ oke ky'y rewarà mõ! e'i. 40 – Ãnĩ, e'i Jesu. “Ere aje ywete nejirovija remẽ tè, Janejare'e kasia rè nemã'ẽtà”, na'ei sipõkõ ene! Ta'evo ikenẽ! e'i. 41 Oovapyjavo ãmẽ kupa, Jesu ayvu rupi. Ãmẽ Jesu oyvatesa oporegeta rã'ĩ Janejare'e pè. – Papa, eroryvay nere, eayvu rè nejapyaka katu ipi rewarà mõ, e'i. 42 Akuwa neenu eayvu ipi, e'i. Atyry ike tui rewarà mõ tè aepo a'e maevo sõ tite ene, e'i. Omã'ẽ ãwĩvoa rè kupa remẽ tè, “Aje ywete Janejare'e Remimuurerà tè Jesu”, e'ità ije kupa, e'i. 43 Aepo e'i paire, wayvo oporegeta ky'y. – Rasaru! Eẽ ejo! e'i ijupe. 44 Ameve opoera oẽ uu Jesu kasia rupi. Kamisa e'eay pè ookwa okwa kupa mijã. A'e revejẽ oẽ uu. Ipy kõ ve ojeokwa okwa. Ãmõ, ipo kõ. Ãmõ, ova rupi ve. A'e revejẽ opõ'ã oẽ uu. Ãmẽ Jesu e'i: – Pejora iwyi ikwaawerà! e'i. A'evo wereko kupa ãmẽ. 45 Ãmẽ Juteu kõ mõa'ãrõwã omã'ẽ ee a'evo remẽ, oo Maria resa kupa mãe kõ. A'e kõ ojirovija katu Jesu rè ãmẽ ky'y, a'evoa rè omã'ẽ kupa rewarà mõ.

Rasaru momoeraawerà ojenu jõvijãgwerà kõ pè remẽwarà

46 Ãmẽ ajaire ãmõgwerà ojivy oo Rasaru momoeraawerà mojenu Pariseu kõ mõ pè. 47 A'evo paire yveve Pariseu kõ ojimoaty, Janejare'e pè oporegeta mãe kõ rõvijã kõ reve. Jõvijãgwerà kõ atyry rõmõ ojimoaty kupa. Rasaru momoeraawerà rè ipõ ojimogeta kupa. – Manyvo kuwa sipõ sireko ta'evo e'ã Jesu ky'y? e'i kupa. Moko e'i ai tesõ Jesu iko! e'i kupa. 48 Nisimomi sõ remẽ, mapejõ jẽ jane kõ ojirovijatà ee imojõvijã ãmẽ! A'evo sõ remẽ Romã pewarà jõvijã wasu ojikõ'õtà ãmẽ janere, e'i kupa. Omuutà teve osota kõ tijaneapisipa, e'i kupa. Nijanemokasioka'ãi teve Juteu rõvijãgwerà kõ rõmõ kupa, aepo wenu kupa remẽ, e'i kupa. Janejare'e moe'ea retã teve omomatà kupa, e'i kupa. 49 Ãmẽ ipõ Janejare'e pè oporegeta mãe kõ rõvijã wasu oporegeta. Kaipasi eu erà pè mã'ẽ oporegeta ijupe kõ. Kee e'i ijupe kõ: – Napetekokuwai 'ete sipõ a'evoa rè! e'i. 50 Poromotekokuwatà tapekuwa awi manyvotà Jesu sireko ajawyi, e'i. Sijukaokatà. Ãmẽ tè sota kõ nijanemoma'ãi, e'i. Ikatu pe'ĩte omãnõ remẽ, ãwisõ tijaneapisi e'ã kupa, e'i ijupe kõ. 51 Janejare'e pè oporegeta mãe kõ rõvijã wasu rõmõ aepo e'i Kaipasi oporegeta. Wayvu rupi rõwã sikaepo aepo e'i ajamã'ẽ. Janejare'e 'Ãg tè aepo omo'eoka ijupe. “Jesu tomãnõ wetãrãgwerà rekovijarerà rõmõ”, jaa tè aepo e'i mã'ẽ. 52 Ajamã'ẽ a'e kõ pewarà rõmõ'ĩte rõwã omãnõtà. Juteu rõwã mãe kõ pewarà mõ teve. Pirujẽ jane kõ maipe ipe rupiwarà kõ pewarà mõ teve omãnõtà. Ãmẽ tè a'evoa rupi ojevo jẽ jane kõ pirujẽ Janejare'e ãkarãgwerà kõ rõmõ jaikotà ky'y. Aepo e'ipa amãtejẽ sikaepo Kaipasi. 53 Ameve sikaepo jõvijãgwerà kõ ojimogetapa Jesu jukaa rã rè. “Sijukaokatà Jesu”, e'i kupa ky'y. 54 Ajamã'ẽ Jesu okuwapa teãmã aepo jaa. Ajawyi nooi jopyterà rupi Juteja yvy rupi ky'y. Ãmõ taa kyty tè oo iko. Eparãi eu a'e taa pè. Tekoe'ãma pyri'ĩje'ẽ a'e taa. A'e rupi ekoi rã'ĩ, orereve, wemimo'ekwerà kõ reve. 55 Ãmẽ nikuipei tãmõ kõ jisyryawerà moetea 'arà okwatà. Ajawyi Juteu kõ mõa'ãrõwã oo oo amãtejẽ Jerusarẽ taa pè kupa. Oo ojipiky'a'o amãtejẽ kupa, tiky'a e'ã Janejare'e pè kupa. Ekoa kõ teãmã a'evo ekoi kupa. 56-57 Ãmẽ jõvijãgwerà kõ opota Jesu opyy imopã'ã kupa. Kejõ aja mãe kõ. Janejare'e pè oporegeta mãe kõ rõvijã kõ. Pariseu kõ. Mokopejõ kupa aja mãe kõ. Ajawyi e'i jane kõ pè kupa: – Ava mõ Jesu okuwa mape tui remẽ, tomome'u ikõ oreupe ãmẽ nẽ, toropyy imopã'ã, e'i kupa. Ajawyi jane kõ weka eka tite kupa. Janejare'e moe'ea retã wyry pè ojimoaty kupa remẽ, kee e'i ojiupe kupa: – Manyvo pejẽ põkõ Jesu pewarà mõ? e'i kupa. Uutà põkõ ike, tãmõ kõ moisyryawerà moetea 'arà okwa remẽ? e'i e'i kupa. Maevo nonu'ãi, e'i e'i kupa.

Juwão 12

Ipije mã'ẽ wãivĩ ojoẽ Jesu rè imogy remẽwarà

1 Ke'ĩ wãmõi kõ jisyryawerà moetea 'arà okwatà. 6 'arà remẽ okwatà. A'evoa e'ãve Jesu oo mijẽ Petãnia taa kyty, Rasaru rena kyty. Omomoera maekwerà rena kyty oo. 2 Rasaru kõjã kõ jimi'ua oinõ Jesu kõ pè. Tykerà Mata ja'umã'ẽ moẽa rè oposiko upa. Ikywyry namesa 'aryvo ojimi'u upa, Jesu pyri. 3 Ojimi'u kupa upa remẽ, ikypy'yry Maria ipije katu mã'ẽ weru ena reve, tãnẽ ipupe mã'ẽ. Ipije katu mã'ẽ e'eay tesõ a'e. Moma'eyva jinõgwerà tè a'e, natukary eu ijupe mã'ẽ. A'e jinõgwerà weru. Epy wete mã'ẽ tè a'e. A'e ojoẽ Jesu py 'aryvo. Ajaire wapira pè opymosikã. [Wauvay rewarà mõ a'evo wereko.] Ipije katu tesõ tetã wyry rupi ãmẽ. Oporakapa tesõ ipijekwerà upa oka wyry. 4 A'evo remẽ Jesu remimo'ekwerà mõ omã'ẽ upa. Jutasi Sikarioti eu ijupe mã'ẽ a'e. Oõvijã ome'ẽtà ãpã kõ po pè mã'ẽ a'e. A'e e'i ee omãjã: 5 – Ãwĩ ipije mã'ẽ epy wete mã'ẽ tè! Nojimorarai sõ ee remẽ, karakuri mõa'ãrõwã opyy kuwa epy rõmõ mijã, e'i. Pe'ĩ kwaray mosikoa repykwerà vo tesõ opyy kuwa mijã! A'e repykwerà jamosãi kuwa iporijau mãe kõ pãtavõa mõ mijã! e'i Jutasi ijupe. 6 Iporijau mãe kõ oporijauesa rewarà mõ rõwã aepo e'i ajamã'ẽ. Imona vija mã'ẽ tè rewarà mõ tè aepo e'i. A'e tè Jesu kõ karakuri omokatu mã'ẽ tè. Ajamã'ẽ a'evo remẽ, omokatu vija sikaepo karakuri mõ oupe ipi. Ajawyi tè aepo e'i Maria pè. 7 Ãmẽ aepo e'i remẽ, Jesu e'i ijupe: – Teene. Aepo ere sõ ijupe! Ojiãparõ emãnõa rewarà mõ a'evo erereko. Ãwĩvo eryvy rã renone emokatu amãtejẽ, e'i. 8 Iporijau mãe kõ ãmẽ oiko jẽtà pepytery pè, tapeporijauesa kõ jẽ ereko, e'i ijupe.

Jõvijãgwerà kõ opota Rasaru juka remẽwarà

9 Ãmẽ jakatu Juteu atyry kõ okuwapa Jesu Petãnia taa pè tui. Oo esa ãmẽ kupa. Jesu resa kõrijõ tè rõwã oo kupa ajamã'ẽ. Opota teve Rasaru rè omã'ẽ kupa, Jesu remimomoerakwerà rè. 10 Ãmẽ a'evoa ojenu Janejare'e pè oporegeta mãe kõ rõvijã kõ pè remẽ, ojimõarõ tesõ enu kupa. E'i ojiupe kupa: – Rasaru teve sijukaokatà ajawyi! e'i kupa. 11 A'e rewarà mõ sõ jane kõ mõa'ãrõwã janereity oo Jesu koty rewarà kõ rõmõ ky'y! Rasaru ve sijuka remẽ, ava nojirovija'ãi Jesu rè ky'y! e'i tite ojiupe kupa.

Jumẽtu rupi Jesu ovãe Jerusarẽ taa pè oike remẽwarà

12 Ãmẽ aja paire Juteu kõ ojimoatypa Jerusarẽ taa pè, tãmõ kõ jisyryawerà moetea 'arà renone. Aty wasu rõmõ ekoi kupa. A'e kõ pè Jesu vãerĩa ojenu. 13 Ajawyi warakuri ro vo mã'ẽ opo'o eraa Jesu rõvaisĩ kupa. Wapuka pukai tesõ oory rõmõ iko kupa. Kee e'i kupa: “Janerõvijã ywete simoe'e!” e'i kupa. “Janejare'e tomoryoka Wemimuurerà imoe'eoka, Isaeu kõ Rõvijã ywete rõmõ uu mã'ẽ!” e'i e'i wapuka pukai kupa. 14 Ji'itepa Jesu jumẽtu memyry wesa. A'e rupi Jerusarẽ taa pè ovãe iko. Janejare'e ayvukwerà rupi katu tè a'evo ekoi, kee e'i maekwerà rupi katu: 15 “Jerusarẽ taa wãnà kõ! Tapekyje e'ã ky'y! Pemã'ẽ! Penõvijã ywete rã Jõvijã wasu rõmõ ovãe iko! Jumẽtu memyry rupi ovãe iko!” e'i maekwerà rupi katu tè ekoi. 16 Ajamã'ẽ ore norotekokuwaive. Ajawyi “Manyvo jaa põ ovãe Jesu jumẽtu memyry rupi mijã?” oro'e tite. Kãramõ tè orojimotekokuwatà ee ky'y. Jesu omãnõtà. Ajaire opoeratà. Ajaire ojivytà oo wena e'e yva kyty tè ky'y. A'evo paire tè tite oroja'a Janejare'e ayvukwerà rè ky'y. – Haa! Janejare'e ayvu rupi katu tè sipõkõ Jerusarẽ taa pè oike, jumẽtu rupi! oro'età ky'y. Janejare'e ayvu rupi katu teve aty wasu kõ omoe'e! oro'età ky'y. 17 Ãmẽ Jesu ovãe iko jumẽtu rupi remẽ, Rasaru momoeraawerà rè omã'ẽ maekwerà kõ aty wasu pytery pè ekoi. A'e kõ ji'ite omojenu jenupa sikaepo imomoerawerà erokwa kupa. Omojenu jenu jẽ erokwa kupa. 18 Ajawyi tè Jesu ovãe Jerusarẽ taa pè remẽ, aty wasu kõ oo ikoty. Aekwerà ojenupa ijupe kõ rewarà mõ a'evo ekoi kupa. 19 Ãmẽ Pariseu kõ omã'ẽ Jesu rè ovãe iko remẽ. E'i ãmẽ ojiupe kupa: – Emã'ẽ esa ãwĩ rè! Ãwĩ ywesõ jane kõ opota janewyi! e'i ojiupe kupa. 20-21 Ãmẽ ãmõ kõ pè Jesu rewarà ojenu, Kereku wãnà kõ pè. Juteu rõwã mãe kõ tè a'e kõ. A'e kõ ke'ĩrõwã wyi uu Jerusarẽ taa kyty, Janejare'e moe'ea rõmõ. A'e kõ ve opota Jesu rè omã'ẽ. Ajawyi oporegeta Piripi pè kupa. Petesaita taa wãnà tè Piripi, Karireja yvy pewarà. A'e pè e'i kupa: – Oropota Jesu rè oromã'ẽ mijã! e'i kupa. 22 Ajawyi Piripi oo rã'ĩ imomewa Aãtere pè. – Kereku kõ mõ opota Jesu rè omã'ẽ, e'i. Aepo momewa oo Jesu pè ãmẽ kupa. 23 Ajamã'ẽ Jesu a'evoa okuwapa. Ajawyi e'i jane kõ pè: – Õ'õ, ke'ĩ Janejare'e emojikuwaokatà pejẽ Wemimuurerà rõmõ. Amãnõ maire emojikuwaokatà. 24 Moma'e rã'ãigwerà rè tè ajimosã'ãgatà tapekuwa, e'i Jesu. Ã'ãigwerà mõ okui ojitã yvy pupe remẽ, omãnõ rã'ĩ maevo sõ tite ipi. Ãmẽ tè oẽtà ojimovija. Ajaate i'a ywetetà ky'y. [Ãwĩvo vetà ije, e'i. Amãnõtà rã'ĩ. Ajaire apoeratà. Ãmẽ tè jane kõ amoatytà Janejare'e pyri mõa'ãrõwã ky'y.] Ãwitõ ã'ãigwerà nijaõtãi remẽ, ni'a'ãi kuwa. [Ãwĩvo vetà namãnõi sõ remẽ, noporoeraa'ãi kuwa Janejare'e pyri ãmẽ mijã, e'i.] Aje ywete aepo a'e, e'i. 25 E'i jẽ Jesu imogeta kõ: – Kee e'i mã'ẽ okãjã jẽtà: “Janejare'e ayvu rupi sõ aiko remẽ, ejukatà maevo kupa. Napotai ajimomorijau amãnõ. Ajawyi maevo naa'ãi upi ky'y”, e'i mã'ẽ. Aepo e'i epe remẽ, okãjã jẽtà ajaire. Ajamã'ẽ kee e'i mã'ẽ na'evo'ãi: “Naity'ãi 'ete Janejare'e rupi aiko mã'ẽ. Ajawyi emãnõa pe'ĩ ajirovija jẽtà ee”, e'i mã'ẽ. A'e sõsi oiko karuarutà Janejare'e pyri, e'i. 26 Ajawyi pepota eremĩgwai rõmõ peiko remẽ, erupive tapeiko jẽ. Maipe kyty aa remẽ, erevejẽ tapeiko. A'evo peiko remẽ, kee e'ità Papa pene omãjã: “Aje ywete era'yry remĩgwai e'eay tè ene”, e'ità pejẽ, e'i Jesu imogeta kõ.

Jesu ojukaa rã rè oporegeta remẽwarà

27 E'i jẽ Jesu a'e pè tui mãe kõ pè: – Age'e 'arà ajimopirai ywete amãtejẽ ejukaa rã rè. Aporanu kuwa ipe Papa pè terereko katu a'evoa wyi mijã. Ajamã'ẽ amãnõ rã'ĩtà tè aiko. A'evoa rã mõ teãmã ajo ike kyty yvy pè aiko, e'i. 28 Ajawyi Jesu e'i Uu pè: – Papa! Nekatuaya emojikuwaoka jane kõ pè emãnõa rupi! e'i. Aepo e'i remeve Janejare'e poregeta ojenu yva pupe wyi. Kee e'i imuu: – Amojikuwaokapa nekatuaya ijupe kõ, e'i imuu. Ajaire amojikuwaoka tarà mijẽ ijupe kõ, e'i Janejare'e Wa'yry pè imuu. 29 Aty wasu kõ aepo wenu remẽ, kee e'i tite kupa: – Tõpã teipõ! e'i tite kupa. Ãmõgwerà ãmẽ: – Janejare'e remĩgwai yvapewarà tè aepo e'i imuu! e'i. 30 Ajamã'ẽ Jesu e'i ijupe kõ: – Eupe rõwã aepo e'i imuu. Peupewarà mõ tè aepo e'i imuu, e'i. [Ãmẽ tè pekuwa aje ywete Janejare'e wenu eayvu, aporegeta ijupe remẽ, e'i.] 31 Age'e Janejare'e poromosã'ãgaa 'arà okwatà ky'y. Ãjãgai rõvijã namokasioka'ãi age'e ky'y, e'i. 32 E'i jẽ Jesu ijupe kõ: – Ke'ĩ emõ'ãtà ejuka kupa, e'i. A'evoa rupi pirujẽ jane kõ amuutà ekoty, e'i tè Jesu. 33 Omãnõa renone aepo e'i oporegeta. “Yvyra jipokana rè emõ'ãtà ejuka”, jaa tè aepo e'i mã'ẽ. 34 Ajawyi aty wasu e'i Jesu pè: – Janejare'e Remimuurerà Janerõvijã ywete rõmõ uu remẽ, nomãnõ'ãi mã'ẽ rõmõ uutà. Aepo e'i Moisesi remikusiwarerà, e'i tite kupa. Ajawyi manyvore põ kee ere: “Janejare'e Remimuurerà ajimojane mã'ẽ rõmõ emõ'ã 'atà tè kupa”, ere! Manyvore põ aepo ere? Ava pewarà mõ põ “ojimojane mã'ẽ” ere? e'i Jesu pè kupa. 35 E'i Jesu ãmẽ ijupe kõ: – Poroyape mã'ẽ rè tè ajimosã'ãgatà tapekuwa. Poroyape mã'ẽ vo ije, e'i. Ãwitõ poroyapea omojisaoka pee janeupe, ãwĩvo ve amojikuwaoka Janejare'e rekoa pejẽ, e'i. Naiko puku'ãi pepyri ky'y, e'i. Ajawyi Papa rekoa e'e rupi jẽsi tapeiko, aiko jẽ pepyri aiko remeve, a'e pejẽ. A'evo peiko remẽ, pãtõnusu rupi oo mãe kõ vo rõwã ãmẽ peikotà erakypyre kyty. Pãtõnusu rupi oo mãe kõ nokuwai maty ootà mã'ẽ. Ãwĩvo tapeiko e'ã. 36 Ajawyi aiko jẽ pepyri remẽ, tapejirovija ere. Janejare'e rekoa amojikuwatà peupe mã'ẽ rupi peikotà ãmẽ, e'i Jesu ijupe kõ. Aepo e'i paire, Jesu ojisyry rã'ĩ oo. Ovote ekoi rã'ĩ. 37 A'evo Jesu okasia omojisaoka ipe ovake kõ imojikuwa. Ajamã'ẽ nojirovijai jẽ ee kupa. 38 Ajare Janejare'e ayvu mojenuarà Isajasi kee e'i amãtejẽ karamoe remeve: “Erõvijã, neayvukwerà oromojenu ipe remẽ, noerovija'ãi kupa. Nekasia rè omã'ẽ ipe kupa remẽ, noerovija'ãi kupa. ‘Aje ywete Janerõvijã wasu kasia rupi a'evo ekoi’, ne'i kupa”, e'i maekwerà. 39 Aekwerà rupi katu noerovijai sire'e kupa. Kee e'i teve Isajasi maekwerà rupi katu ekoi kupa: 40 “Janejare'e nomoeapyooka kõi, ikasia rè tomã'ẽ e'ã, omã'ẽ ipe ee kupa remẽ. Nomomãrãkuwaoka kõi teve, ãwisõ totekokuwa e'ã ijayvu rè kupa. Na'evoi sõ remẽ ojirova kuwa ojivy uu Janejare'e kyty mijã. A'e opãtavõ kõ kuwa imomoi kõ ijaiwererà kõ kasia wyi imokatu kõ mijã”, e'i Isajasi maekwerà. 41 Janejare'e omojisaokapa amãtejẽ Jesu kasia Isajasi pè, aepo te'i amãtejẽ. 42 Ajamã'ẽ uve ijatyray Juteu rõvijãgwerà kõ, Jesu rè ojirovija mãe kõ. A'e kõ ojirovija ipe Jesu rè kupa, opy'a kõ pupe. Ajamã'ẽ nomojikuwai Jesu rè ojirovija mã'ẽ kupa, Pariseu kõ wyi okyje kupa rewarà mõ. “Emoisyrytà Janejare'e ayvu rè jimo'ea retã pupe wyi kupa ky'y”, e'i oupe kupa. Ajawyi nopotai ojimojikuwaoka kupa. 43 Jõvijãgwerà kõ opota omoe'ea kõrijõ tè ipi. “Janejare'e tè temoe'e”, ne'i kupa ajamã'ẽ. “Pariseu kõ temoe'e”, e'i tè kupa. Ajawyi a'evo ekoi kupa. 44 Ãmẽ ajaire Jesu oporegeta mijẽ jane kõ pè. Wayvo oporegeta. Kee e'i ijupe kõ: – Ere ojirovija mãe kõ Emuuarerà rè ve ojirovija ipi. 45 Ava mõ omã'ẽ ere remẽ, Emuuarerà rè omã'ẽ teve, e'i. 46 Poroyape mã'ẽ rõmõ ajo ike yvy pè, ãwisõ ere ojirovija mãe kõ tè totekokuwa Janejare'e rekoa rè. Pãtõnusu rupi ekoi mã'ẽ vo rõwãtà ekoi ãmẽ kupa ky'y. 47 Jane kõ rereko katuarà rõmõ tè ajo, e'i. Ava mõ eayvu wenu paire katu noerovijai sõ remẽ, ije rõwã amosã'ãgatà apijarà. A'evoa rõmõ rõwã ajo. Ovote waiwererà omojikuwaokatà. 48 Ava mõ eayvu wyi ojirova kõrijõ remẽ, oikopa imomorijaua rã ijaiwererà rewarà mõ, e'i. Kãramõ omãnõ remẽ, eayvukwerà a'epa ijupe maekwerà rupi katu ijaiwererà ojikuwatà ky'y, e'i. Poromoe'yia 'arà mẽ a'evotà, e'i. 49 Eayvu rupi rõwã aporegeta ipi, e'i. Papa ayvu rupi tè aporegeta ipi, e'i. Ajo e'ãve emogetapa emuu. “Kee ere ikõ jane kõ pè nẽ”, e'i amãtejẽ. A'e tè amome'u pejẽ, e'i Jesu. 50 Pirujẽ “emojenu” e'i maekwerà rupi katu amojenu. Ijayvukwerà rupi ekoi mãe kõ oiko karuarutà ipyri, e'i Jesu.

Juwão 13

Jesu wemimo'earà kõ opykusu remẽwarà

1 Jesu orerauvay jome, wemimo'ekwerà kõ rõmõ. Pirujẽ okoty rewarà kõ wauvay. Poroauvay mã'ẽ teãmã Jesu. Nopi'ãi 'ete poroaua wyi. Okuwapa noiko puku'ãi orereve. Ke'ĩma imãnõa rã. Ajaire opoera tarà mijẽ ojivy oo Uu kyty. Ajawyi omojisaokatà orerauvaya oreupe nomãnõive remẽ. Pe'ĩte oke paireve Juteu kõ omoetetà wãmõi kõ jisyryawerà 'arà. 2 Ãmẽ karupa upa remẽ, Jesu ojimi'u orereve upa. Ãmẽ emimo'earà mõ sikaepo ome'ẽtà Jesu jõvijã kõ po pè. Jutasi eu ijupe mã'ẽ a'evotà ekoi. Simão Sikarioti ra'yry tè Jutasi. A'e tè ome'ẽtà Jesu jõvijã kõ po pè. Ãjãgai rõvijã tè omoane'e ta'evo ekoi Jutasi ajamã'ẽ. 3 Ajamã'ẽ Jesu okuwapa Tuu ome'ẽma okasia ijupe Wa'yry rõmõ. Okuwapa teve Janejare'e kyty wyi uu mã'ẽ. A'e kyty teve ojivytà oo. 4 [A'evo remẽ orerauvaya omojikuwa rã'ĩ ore.] Opõ'ã oyru poko mopyso, oyru 'arà rupi opypy mã'ẽ. Tuaja oinõ okõ'ã rè. 5 Ajaire yy oinõ orepykusua mõ parapi pupe. A'e pupe orepykusu orejãvijõ jẽ oremoaty. Ãwitõ janeremĩgwai janepykusu, ãwĩvo orerereko. Orepykusu paire orepymosikã tuaja pupe. A'evo orerereko Jesu. 6 Ãmẽ Simão Peturu opykusutà remẽ, – Ãnĩ! e'i. Epykusutà sipõ rejupa, [ãwisõ eremĩgwai rõwã ene remẽ? Erõvijã tè rõwã sipõ ene!] e'i. 7 Ãmẽ Jesu e'i: – Nerekuwai manyvo rewarà mõ tè oropykusutà, e'i. Kãramõ tè nekuwatà manyvo jaa tè oropykusu mã'ẽ, e'i ijupe. 8 Ãmẽ Peturu e'i mijẽ: – Ãnĩ! Terekusu e'ã epy! e'i e'i jẽ. Ajawyi Jesu e'i ijupe: – Noropykusui sõ remẽ, ekoty rewarà rõmõ rõwãtà ene ãmẽ ky'y, e'i ijupe. 9 Ameve tite Simão Peturu e'i ijupe: – Epykusu awi rejupa, jõvijã! e'i ky'y. Epy kõ ekusu. Epo kõ. Eãkãg teve. [Emojaupa 'ejẽ ajawyi rejupa,] e'i ãmẽ Jesu pè ky'y. 10 Ãmẽ Jesu e'i: – Ãnĩ! Ojaupa mã'ẽ niky'ai ipi. A'evo ve pejẽ, ojaupa mã'ẽ vo 'ejẽ. Ajawyi napeky'ai. Pepy kõrijõ tè iky'a jẽ. Ajawyi a'e kõrijõ tè akusutà. Pirujẽ peupe rõwã aepo a'e ajamã'ẽ. Uve jẽ ajamã'ẽ pe'ĩ iky'a jẽ mã'ẽ mõ, e'i. 11 “Ipy'a ky'a mã'ẽ” jaa tè aepo e'i. Omoãkwa'ãarà rã pè tè aepo e'i. Okuwapa amãtejẽ a'evotà werekooka mã'ẽ. 12 Orepykusu paire, Jesu opypy mijẽ oyru poko oo mijẽ wapy namesa pyri. Ãmẽ e'i oreupe: – Pekuwa põ manyvo jaa agyvo poroereko? e'i. 13 “Emo'earà” pejẽ ije. Ãmõ, “jõvijã” pejẽ teve ije, e'i. Õ'õ aje, upi katu tè aepo pejẽ. Penõvijã tè ije. 14-15 Ajamã'ẽ penõvijã teipe ije remẽ, poropykusu jẽ. Ãwĩvo ve tapeiko jane kõ rerekoarà mõ ipi, ereruparà mõ. 16 [Tapejimoe'e tite e'ã, eremĩgwai kõ rõmõ. Aje kee rewarà mõ.] Tõvijã ywesõ wemĩgwai wyi ipi. Oõvijã wyry kytywarà tè, temĩgwai ipi. Ãwĩvo ve ayvu jarà ywesõ wayvu mojenuarà wyi ipi. 17 Ãwĩvoa pekuwa ky'y. Penoryvaytà peiko ãmẽ, ereruparà mõ peiko remẽ, e'i Jesu oreupe. 18 E'i jẽ Jesu oreupe: – [Age'e poromotekokuwapa Janejare'e peaiwererà oky'a'o mã'ẽ rè, e'i.] Pirujẽ peupewarà mõ rõwã aepo a'e ajamã'ẽ, e'i. Aepo e'i Jesu remẽ, e'i jẽ oreupe: – Akuwapa pepy'a pewarà kõ eremipyteporokwerà kõ rõmõ, e'i. Ajawyi akuwa peneirõarà mõ ojimoãpãtà ere. Kee ojikusiwapa maekwerà rupi katu tè a'evotà ekoi: “Ereve ojimi'u mã'ẽ mõ ojimoãpã ere”, e'ipa ojikusiwa. Aekwerà rupi katu tè tãwĩvo ky'y, e'i. 19 Aepo a'e amãtejẽtà tapekuwa a'e. A'evoa rè pemã'ẽ remẽ, pekuwatà aje ywete Janejare'e Remimuurerà tè ije, e'i oreupe. 20 Kee a'e teve. Poromonotà eayvu mojenuarà kõ rõmõ tapeiko. Ajawyi ava mõ oryvay pene remẽ, ere oryvay tary ve, eremimono kõ tè pejẽ rewarà mõ, e'i. Ãwĩvo ve ava mõ oryvay ere remẽ, Emuuarerà rè oryvay tary ve. Aje aepo a'e pejẽ, e'i Jesu.

Jesu ome'ẽa rã omojikuwapa amãtejẽ remẽwarà

21 Aepo e'i paire Jesu ijãgyoay. Ji'i nomome'u ywe'ei oreupe. Ãmẽ tè katu oporegeta katu ky'y. – Pepytery pewarà mõ ojimoãpãtà ere. Eme'ẽtà jõvijã kõ po pè. Aje ywete aepo a'e pejẽ, e'i. 22 Aepo e'i remeve, norokuwai 'ete ava upewarà mõ aepo e'i mã'ẽ. Ajawyi oromã'ẽ pirujẽ ojee erokwa. – Eeee! Ava pewarà mõ aepo e'i? oro'e ojiupe. 23-24 Ije, Juwão, Jesu uvuri aapy ajupa, a'evo oroiko remẽ. Jesu remiau tè ije. Ajawyi Simão Peturu opojai ekoty. Kee e'i ije: – “Ava upewarà mõ põ aepo ere?” ere jõvijã pè esa, e'i ije. 25 Ajawyi ajisyry sa'u Jesu pyri'ĩje'ẽ sa'u javo. – Ava pè põ aepo ere, jõvijã? a'e ijupe. 26 Ãmẽ Jesu e'i ije: – Aã meju pẽgwerà amõsõtà ime'ẽ ijupe mã'ẽ tè a'evotà erereko, e'i ije. Aepo e'i remẽ, meju omõsõ ime'ẽ Jutasi pè, Simão Sikarioti ra'yry pè. 27 Ãmẽ Jutasi opyy iwa. Ameve ãjãgai rõvijã Satanasi omoane'e jẽ Jutasi, tome'ẽ Jesu ãpã kõ po pè ky'y. Ãmẽ Jesu e'i amãtejẽ ijupe: – Ekwa amãtejẽ awi ãwĩvo tereiko, e'i. 28 Norokuwai manyvo rewarà mõ Jesu aepo e'i ijupe. Ava jẽ rõwã okuwa. 29 Karakuri omokatu mã'ẽ tè Jutasi. Ajawyi kee oro'e tite: – Ootà maevo moma'e pyy eru aã jimi'u wasu pè, Jesu ayvu rupi, oro'e tite. Ootà maevo karakuri me'ẽ iporijau mãe kõ pè, oro'e tite ve. 30 Ãmẽ Jutasi opyy meju pẽgwerà iwa paireve, opõ'ã oo. Pãtõma remẽ a'evo ekoi. “Tapejiauvay ikõ peiko nẽ”, e'i Jesu mã'ẽ 31 Jutasi ojisyry paire, Jesu oremotekokuwa jẽ upa: – Age'e si Janejare'e emojikuwaokatà Wemimuurerà rõmõ, ajimojane mã'ẽ rõmõ. Ekatuaya omojikuwaokatà pejẽ. Ãwĩvo ve ikatuaya amojikuwaokatà pejẽ ky'y. 32 Ãwitõ Janejare'e katuaya ojikuwatà erupi, ãwĩvo ve ekatuaya ojikuwatà upi, ãwisõ jane kõ toremoe'e oremomojy, e'i. Age'eve a'evotà, e'i. 33 Naiko puku'ãi pepyterà rupi aiko ky'y, eãkarãgwerà kõ. Ereka titetà ajaire pekupa, e'i. Aatà mã'ẽ gyty napeo'ãi, e'i. Aepo jaa amojenupa Juteu rõvijãgwerà kõ pè, e'i. Peupe ywete aepo a'e age'e, e'i. 34 Eayvu pyau rè ywesõ poromo'età, a'e rupi katu tapeiko ky'y. Kee a'e pejẽ. Tapejiauvay ikõ peiko nẽ, a'e pejẽ. Ãwitõ ije poroauvay aiko ipi, ãwĩvo ikõ peiko nẽ, a'e pejẽ. 35 Ãmẽ tè pejikuwatà eremimo'ekwerà kõ rõmõ peiko. Pejiauvaya rupi pejikuwatà, e'i Jesu oreupe.

“Nekuwai rã'ãgatà rejupa”, e'i Peturu pè mã'ẽ

36 Ãmẽ Simão Peturu e'i Jesu pè: – Jõvijã, “Aatà mã'ẽ gyty napeo'ãi”, ere põkõ oreupe? Maty põkõ neotà ajawyi? e'i tite ikuwa e'ã Jesu pè. Ãmẽ Jesu e'i ijupe: – Age'eve napeo'ãi aatà mã'ẽ gyty, e'i. Kãramõ peotà erupi, e'i. 37 Ãmẽ Peturu e'i mijẽ ijupe: – Manyvo rewarà mõ põ age'eve naa'ãi nerupi? e'i. Ije tè kuwa amãnõ nerekovijarerà rõmõ, e'i tite. 38 Aepo e'i remẽ, Jesu e'i ijupe: – Neremãnõ'ãi kuwa erekovijarerà rõmõ! e'i. Age'e pya, “Nakuwai Jesu”, ere rã'ãgatà eupewarà mõ. Moapy rõmõ tesõ aepo eretà. Masakara noje'ẽive remẽ aepo eretà, e'i. Aje ywete aepo a'e ene, e'i Jesu Peturu pè.

Juwão 14

Janejare'e rape rupiwarà rewarà

1 E'i jẽ Jesu oreupe: – Tapeãgyo e'ã ikõ ere nẽ. Tapejipy'amopirai e'ã ikõ erewarà mõ nẽ, e'i. [Kee tapejẽ e'ã ikõ ije nẽ: “Janereitytà oo”, tapejẽ e'ã, e'i.] Tapejirovija jẽ kõrijõ ikõ ere nẽ, e'i. Janejare'e rè ikõ tapejirovija jẽ teve nẽ, e'i. 2 Age'e ije ypy aatà penenone rupi Papa rena kyty, e'i. Penena rã mokatu aatà ajupa, e'i. Taa wasu tè Papa rena, e'i. A'e kyty aatà penena rã mokatu penenone. Nãwĩ vo'ãi sõ remẽ, na'e'ãi kuwa pejẽ, e'i. 3 Kãramõ amokatupa penena rã ky'y remẽ, ajo tarà mijẽ pepijarà mõ. Ãmẽ si peotà erupi ky'y. Maipe rupi aiko remẽ, pejẽ ve peikotà ereve ky'y, e'i. 4 Age'e pekuwapa maty põ aatà mã'ẽ ky'y, e'i. Pekuwapa pee, e'i oreupe. 5 Ajamã'ẽ Tome e'i ijupe: – Ãnĩ! e'i. Norokuwai maty põ neotà ajamã'ẽ, e'i. Manyvo noroereko'ãi Janejare'e rena rape orevote ikuwa? e'i ijupe. 6 Ãmẽ Jesu e'i oreupe: – Papa rena rape vo mã'ẽ tè ije. Ajawyi ava mõ opota Papa rena kyty oo remẽ, tojirovija rã'ĩ ere. Ayvu aje ywete mã'ẽ mojenuarà tè ije. Ije kõrijõ tè poroerovãe kuwa Papa pyri tapeiko karuaru, e'i. Ava jẽ rõwã ovãe kuwa Papa pyri narovãei remẽ, e'i. 7 Aje ywete ekuwa pekupa remẽ, Papa ve pekuwatà. Penemikuwa ajamã'ẽ Papa. Pemã'ẽma ee, e'i oreupe. 8 Ãmẽ Piripi e'i Jesu pè: – Ãnĩ, jõvijã! [Norokuwai neruu. Noromã'ẽive ee! e'i.] Emojisaoka oreupe ajawyi, “aje” toro'e ãmẽ, e'i. 9 Ãmẽ Jesu e'i ijupe: – Emã'ẽ, Piripi. Ije, age'e rõwã peneve aiko. Nekuwaive sipõ pekupa? e'i. Ije ojevo jẽ Papa reve aiko. Ajawyi pemã'ẽ ere remẽ, Papa rè ve pemã'ẽma. Ajawyi, “Emojisaoka neruu oreupe torokuwa”, napejẽ'ãi ije, e'i. 10 Pe'ĩypyte mã'ẽ rõmõ aiko Papa reve. Ajawyi ekuwa pekupa remẽ, Papa pekuwa teve. “Aje ywete” napejẽive põ aepo a'e mã'ẽ pè? e'i ijupe. E'i jẽ oreupe: – Eayvu rõwã amojenu pejẽ ipi. Papa ayvukwerà tè amojenu. A'e tè ereve ekoi ipi, e'i. Ijayvu rupi tè aposiko ipi, e'i. 11 Tapejirovija ere ãmẽ. Eayvu teve taperovija, “Pe'ĩypyte mã'ẽ rõmõ aiko Papa reve”, a'e maekwerà. “Aje ywete” napejẽi eayvu pè remẽ, “aje ywete” pejẽ jẽ kuwasi ekasia rè pemã'ẽ remẽ, e'i. 12 Pemã'ẽma manyvo aiko Papa kasia rupi ipi. A'e wyi wete ikasia rupi peikotà kãramõ. Ajivytà ikoty rewarà mõ aepo a'e pejẽ. Aje ywete a'e pejẽ. 13 Peporanu ije ekoty rewarà kõ rõmõ remẽ, “hoõ” a'età pejẽ ãmẽ ipi. A'evo poroerekotà ãmẽ. A'evoa rupi Papa katuaya amojisaokatà pejẽ. 14 Peporanu ije remẽ, “hoõ” a'età, ekoty rewarà kõ tè pejẽ rewarà mõ, e'i Jesu oreupe.

“Janejare'e omuutà o'Ãg pejẽ”, e'i Jesu mã'ẽ

15 E'i Jesu oreupe: – Erauvay pekupa remẽ, eayvukwerà rupi peikotà ãmẽ, e'i. 16 Papa kyty ajivy aa remẽ, aporegetatà ijupe peupewarà mõ, e'i. “Ne'Ãg emono ere ojirovija mãe kõ pè, erekoarà kõ rõmõ toiko”, a'età ijupe. “Hoõ” e'ità ãmẽ. O'Ãg tẽ tesõ omuutà pejẽ ãmẽ ky'y, awyje toiko pepyri ky'y. 17 Aje ywete mã'ẽ Janejare'e rewarà omojikuwaoka peupe mã'ẽ a'e. Janejare'e noerovijai mãe kõ nomojimoenaoka'ãi kuwa i'Ãg opy'a pupe. Nomã'ẽ'ãi kuwa ee kupa. Nokuwa'ãi kuwa teve kupa. Pejẽ ãmẽ pekuwatà Janejare'e 'Ãg. Peneve ekoità, ajawyi. A'e pepy'a pupe ojimoenatà, e'i oreupe. 18 E'i jẽ Jesu oreupe: – Papa kyty ajivytà aa. Ajamã'ẽ i'Ãg peneve ekoità, penerekoarà rõmõ, e'i. Ajaire ajo tarà mijẽ pekoty, e'i. 19 Ke'ĩ nererovijai mãe kõ nomã'ẽ'ãi ere ky'y, e'i. Pejẽ ãmẽ pemã'ẽ tarà mijẽ ere. Ajisaoka tarà mijẽ pejẽ amãnõ maire, e'i. Namãnõi mã'ẽ rõmõ aikotà ãmẽ ky'y. Ajawyi pejẽ ve peiko karuarutà, e'i. 20 Pemã'ẽ ere remẽ pekuwatà aje ywete ojevo jẽ ore Papa reve oroiko mã'ẽ. Pe'ĩypyte oroiko. A'evo ve pejẽ. Pe'ĩypyte ve peiko ereve. Papa 'Ãg uu pekoty remẽ, aepo pekuwatà ky'y, e'i oreupe. 21 – Ãmõ, kee a'e pejẽ. Eayvu rupi ekoi mãe kõ ojikuwa erauparà kõ rõmõ iko. A'evo mãe kõ Papa remiau rõmõtà tè ekoi. Eremiau rõmõtà teve ekoi kupa. Ajikuwaokatà ijupe kõ, e'i oreupe. 22 Ãmẽ Jutasi e'i Jesu pè. Jutasi Sikarioti rõwã ajamã'ẽ. Erà vo mã'ẽ tè. A'e kee e'i: – Jõvijã, manyvore põ oreupe kõrijõgà nejikuwaokatà? e'i. Manyvore põ pirujẽ jane kõ pè nerejikuwa'ãi? e'i Jutasi Jesu pè. 23 Ãmẽ Jesu e'i ijupe: – Erau mãe kõ eayvukwerà rupi ekoità teãmã. Papa wauvaytà a'evo ekoi mãe kõ. Ajawyi orojotà ipyri kõ oroiko, Papa reve, e'i. 24 Neraui mãe kõ ãmẽ eremimojenuwerà rupi noiko'ãi ipi, e'i. Eayvu rõwã amojenu pejẽ ajupa ajamã'ẽ. Papa ayvu tè amojenu ajupa. Emuuarerà ayvu tè amojenu ajupa, e'i. 25 – Age'e aiko jẽ peneve remeve aepo a'e pejẽ. 26 Ajivy aa remẽ, Papa o'Ãg omuutà pepy'a pè penerekoarà rõmõ toiko. Eayvu rupi tè omuutà, e'i. A'e tè pemoja'arokatà pirujẽ eayvukwerà rè, tapeja'a jẽ ee, e'i. 27 – Poropy'amopiryvypy katutà tè peneity aa, e'i. Nererovijai mãe kõ ãmẽ nokuwa'ãi poropy'amopiryvypya, e'i. Ije tè ãmẽ akuwa ãwĩvoa, e'i. Ajawyi tapejimopirai e'ã ikõ eoa rã rè nẽ. Tapekyje e'ã teve ikõ nẽ, e'i. 28 Kee a'epa itõkõ pejẽ: “Ke'ĩ Papa kyty aatà”, a'epa itõkõ pejẽ. “Ajaire ajo tarà mijẽ pekoty”, a'epa itõkõ pejẽ. Erauvay pekupa remẽ, penory kuwa Papa kyty aa tarà mẽ, a'e ywesõ ikasiay ewyi rewarà mõ. 29 Aepo a'epa amãtejẽ pejẽ, najivyive aa remeve. Ajawyi a'evo aiko remẽ, “Aje ywete aepo e'i Jesu oporegeta”, pejẽtà ije, e'i oreupe. 30 – Naporegeta puku'ãi pejẽ ky'y, ãjãgai rõvijã ovãerĩ ky'y rewarà mõ. A'e nikasi ije ajamã'ẽ, e'i. 31 Papa aauvay. Ajawyi ijayvu rupi tè aatà ajimomorijauoka, e'i. Ãwitõ pirujẽ e'i mã'ẽ rupi aiko ipi, ãwĩvo jẽtà aiko. Pepõ'ã! Ja'e jẽsi ike wyi! e'i oreupe ãmẽ ky'y.

Juwão 15

Moma'eyva'y rè tè Jesu ojimosã'ãga remẽwarà

1 Ajaire Jesu e'i: – Ajivy aa remẽ, tapeja'a jẽ ikõ ere ipi nẽ. Tapejimokasioka Papa pè, ereve jẽ tapeiko, e'i. Moma'eyva'y rè tè ajimosã'ãgatà tapekuwa. Moma'eyva'y vo tè ije, e'i. Papa ãmẽ oposiko ee mã'ẽ vo, e'i. 2 Ãwitõ moma'eyva rãkã kõ o'y rè ekoi, ãwĩvo ve ereve peiko, e'i. Ãwitõ moma'eyva'y rè oposiko mã'ẽ omopai ãkã ni'ai mã'ẽ eraa ity ipi, ãwĩvotà Papa wetatà ereve ekoi rã'ãga mãe kõ ipi. Ãkã i'a katu jome mã'ẽ ãmẽ wauvaytà. Iky'a mã'ẽ wekyipatà iwyi. Ãmẽ oryvaytà. Ãmẽ ywesõ i'a katu jometà. Ãwĩvo ve ere ojimo'y mãe kõ Papa werekotà, e'i. 3 Perovija ywete eayvu ipi rewarà mõ, Janejare'e pepy'aky'a'opa ky'y, e'i. 4 Ãwitõ moma'eyva rãkã nuvei o'y rè remẽ, ni'a'ãi ky'y. Osinĩma kõrijõtà tè omãnõ. A'evotà ereity ywe'e tite mãe kõ. Ajawyi tapejimo'yjẽ ere, a'e pejẽ. Ije ãmẽ pe'y rõmõ aiko karuarutà aiko. Ãmẽ tè penoryvaytà peiko, e'i Jesu oreupe. 5 – Moma'eyva'y vo mã'ẽ tè ije, e'i. Pejẽ ãmẽ erãkã kõ rõmõ tè, e'i. Ãwitõ i'y omokasi wãkã ti'a katu ipi, ãwĩvo ve poromokasi eayvu rupi tapeiko. Ajawyi tè ivo peiko, e'i. 6 Ereity ywe'e tite sõ pekupa remẽ, ãkã osinĩ mã'ẽ votà tè pejẽ peiko ãmẽ. Ajawyi ãwitõ oposiko mã'ẽ weta osinĩma mã'ẽ eraa imomo, ãwĩvotà Papa penereko, ereity ywe'e tite sõ pekupa remẽ. 7 Tapejimo'yvay ikõ ere ãmẽ nẽ. Eayvukwerà rupi katu ikõ tapeiko nẽ. Ãmẽ si moma'e rè peporijau remẽ Papa ome'ẽtà pejẽ ipi, peokwai ijupe remẽ. 8 Ãmẽ sõsi pejikuwatà eremimo'ekwerà kõ rõmõ peiko. Ãmẽ tè, “Janejare'e ikatuay wete!” e'ità jane kõ pene omãjã, e'i oreupe. 9 – Poroauvay. Ãwitõ Papa erauvay, ãwĩvo ve poroauvay, e'i. Ajawyi pe'ĩypyte rõmõ tapeiko jẽ eremiau kõ rõmõ, a'e pejẽ. 10 Papa ayvu rupi aiko rewarà mõ erauvay ipi. Ãwĩvo ve eayvu rupi peiko remẽ, poroauvay teve ipi. 11 Aepo a'e pejẽ pemorya rõmõ, e'i. Napotai penory a'u kõrijõ tè. Apota penoryvay peiko, evo. 12 Tapejiauvay ikõ peiko nẽ. Ãwitõ ije poroauvay penereko, ãwĩvo ikõ peiko nẽ, a'e pejẽ, e'i. 13 E'i Jesu oreupe: – Aje poroauvay penereko. Ajawyi amãnõtà penekovijarerà rõmõ. Ava mõ sõ ojimorypa kõ rekovijarerà rõmõ remẽ, ojikuwa a'e ywesõ ojimorypa kõ wauvay mã'ẽ rõmõ, e'i. 14 Ejimorypa kõ rõmõ tè pejẽ, eayvu rupi peiko remẽ, e'i. 15 “Eremĩgwai kõ” na'ei pejẽ. Temĩgwai rõvijã nomome'ui manyvo ekoi mã'ẽ wemĩgwai kõ pè ipi, e'i. Ije ãmẽ pirujẽ amome'u pejẽ ipi, e'i. Pirujẽ Papa omome'upa eupe maekwerà tè amome'upa pejẽ, ejimorypa kõ tè pejẽ rewarà mõ. 16 Ãmõ, kee a'e pejẽ. Penemipyteporokwerà rõwã ije, e'i. Ije tè poropyteporo ejimorypa kõ rõmõ tapeiko, e'i. Poromonotà eayvu mojenuarà kõ rõmõ, ãmẽ erewarà tapemojenu ãmõ kõ pè, e'i. Mãerã tè ojirovijatà ere ãmẽ kupa. Nereity'ãi ãmẽ kupa ky'y. Eayvu rupi peokwai Papa pè remẽ, penemikwaiwerà ome'ẽtà pejẽ. 17 Ajawyi tè kee a'epa itõkõ pejẽ: Tapejiauvay ikõ peiko nẽ, a'epa itõkõ pejẽ.

“Pemomorijautà kupa”, e'i Jesu mã'ẽ

18 E'i Jesu oreupe: – Pekuwapa ere ypy ojikõ'õ kupa, e'i. Ajawyi a'evoa rè tapeja'a, ojikõ'õ pene kupa remẽ, e'i. 19 A'e kõ ojee kõrijõ tè nojikõ'õi kupa ipi. Ajawyi ivo kõ jẽ sõ pejẽ remẽ, nojikõ'õ'ãi kuwa pene kupa mijã, e'i. Pepota katu kuwa kupa mijã, e'i. Ivo kõ jẽ rõwã peiko ajamã'ẽ ky'y, poropyteporopa poropy'amoteepa rewarà mõ. Ajawyi tè ojikõ'õ pene kupa, e'i. 20 Kee a'epa itõkõ pejẽ maekwerà rè tapeja'a jẽ: “Temĩgwai noapyrasai oõvijã ipi”, a'epa itõkõ pejẽ. Penõvijã tè ije. Ajawyi emomorijau mãe kõ evo jẽ pemomorijautà. Eayvu werovija mãe kõ ãmẽ peayvu werovijatà, ekoty rewarà kõ tè pejẽ rewarà mõ, e'i. 21 Erewarà mõ nererovijai mãe kõ nivoi penerekotà, Emuuarerà nokuwai kupa rewarà mõ, e'i. 22 Ajawyi Papa “nivoi mãe kõ” e'ità ijupe kõ. Najori sõ imotekokuwa kõ remẽ, aepo ne'i'ãi kuwa ijupe kõ mijã, e'i. Ajopa ike ajamã'ẽ. Amotekokuwa kõ ipe. [Ajamã'ẽ ojimoape kõrijõ eayvu renu tare'ã kupa.] Ajawyi tè “nivoi mãe kõ” e'ità Papa ijupe kõ. “Nakuwai rewarà mõ a'evo aiko tite mijã”, ne'i'ãi kupa. 23 Ojikõ'õ ere mãe kõ a'evo ve Papa reve ojikõ'õ, e'i. 24 Ekasia namojisaokai sõ ovake kõ remẽ, Papa nomo'y'ãi kuwa nivoi mã'ẽ ee kõ mijã. Ajamã'ẽ ãwĩ kõ ywete omã'ẽ ere, manyvo aiko mã'ẽ rè. Ekasia rè omã'ẽ ipe kupa remẽ, ojikõ'õ ywete kõrijõ ere kupa, e'i. Papa rè ve ojikõ'õ kupa ãwĩvo aiko remẽ, e'i. 25 A'evoa rã Papa omojenu amãtejẽ karamoe remeve. “Manyvo a'e remẽ rõwã ojikõ'õ ere kupa”, e'ipa amãtejẽ ijupe kõ. Aekwerà rupi katu ekoi kupa, e'i. 26 – Ke'ĩma ajivytà aa Papa kyty, a'epa pejẽ. Papa pè, “Ne'Ãg emono ere ojirovija mãe kõ pè”, a'età avãe Papa pè. Ãmẽ tè omuutà, penerekoarà rõmõ. Ãmẽ sõsi aje ywete mã'ẽ rè pemotekokuwatà, e'i. Erekoa rè pemotekokuwatà imojikuwa, e'i. 27 Ãmẽ pejẽ tè erewarà pemojenutà erokwa, e'i. Pejẽ ypy eremimo'ekwerà kõ rõmõ peiko. Ajawyi a'evotà peiko, e'i.

Juwão 16

Janejare'e 'Ãg rè oremotekokuwa remẽwarà

1 E'i Jesu oreupe: – Aepo amome'upa eayvu pejẽ, ãwisõ tapejimokasi jẽ ere pejirovija. Tapenearai e'ã ewyi, e'i. 2 Keetà kãramõ penereko kupa rewarà mõ aepo a'e. Iwasuaytà pejẽ. Ere ojikõ'õ mãe kõ pemoisyrytà Janejare'e ayvu rè jimo'ea retã kõ pe wyi, e'i. Pemomijarĩtà pejuka kupa. A'evo penereko mãe kõ, “Janejare'e orytà sijuka kõ remẽ”, e'i titetà ikuwa e'ã ojiupe kupa. 3 Papa nokuwai kupa rewarà mõ tè a'evotà penereko kupa, e'i. Ãmõ, nekuwai kupa rewarà mõ teve a'evotà ekoi kupa, e'i Jesu. 4 – Age'e a'evotà mã'ẽ amome'upa amãtejẽ pejẽ, tapekuwa. Ajawyi a'evo peiko remẽ, “Ãwĩ pè tè sipõkõ e'i janerõvijã?” pejẽtà ije peja'a ere, e'i. Namome'uive aepo jaa pejẽ mijã, peneve aiko jẽ rewarà mõ, e'i. 5 Age'e tè katu aepo amome'u pejẽ. Emuuarerà kyty ajivytà aa. Ajawyi tè amome'u pejẽ age'e ky'y. “Maty põ neotà?” napejẽive ije ajamã'ẽ. 6 – Age'e peãgyoay aepo a'e mã'ẽ rè. 7 Ajamã'ẽ ikatutà peupe ajivy aa remẽ. Avãema Papa pyri remẽ tè o'Ãg tẽ tesõ omuutà pekoty penerekoarà rõmõ ky'y, e'i. Naa'ãi remẽ, nonu'ãi i'Ãg pekoty mijã, e'i. Ajivy aa remẽ tè, ije tè amurokatà pekoty ãmẽ ky'y, e'i. Aje ywete aepo a'e pejẽ, e'i Jesu oreupe. 8 – Ike yvy pewarà kõ nokuwai aje ywete mã'ẽ. “Janejare'e nijanemomorijau'ãi kãramõ”, e'i tite kupa. “Jesu nivoi janemo'e ivo tekoua rè”, e'i tite teve kupa. Ãmõ, “Ivo aiko teãmã”, e'i tite teve kupa. Ajamã'ẽ Janejare'e 'Ãg uu remẽ, poromotekokuwavaytà aje ywete mã'ẽ rè. “Ivo aiko ipi”, e'i tite mãe kõ pè ijaiwererà kõ omojikuwaokatà, ãwisõ “Aje ywete, nivoi aiko”, te'i kupa ky'y. Ivo tekoua ve omojikuwatà ijupe kõ. Ãmõ, kãramõ Janejare'e poromosã'ãgatà poromoe'yi mã'ẽ Janejare'e 'Ãg omojikuwaokatà jane kõ pè, “Aje ywete a'evotà”, te'i kupa. 9 Kee jaa rewarà mõ a'evo werekotà. Ere nojirovijai mãe kõ nekuwa'ãi. Ajawyi ivo mã'ẽ Janejare'e nomo'y'ãi ee kõ, ãwisõ “Ivo aiko”, e'i epetà kupa remẽ. 10 Janejare'e rekoa rupi katu poromo'e aiko ipi. Najavy ekojẽi ijayvu momewa ipi. Age'e Papa kyty ajivytà aa ky'y. Napemã'ẽ'ãi ere ky'y. A'evo remẽ kee e'ità Janejare'e 'Ãg imojikuwaoka pejẽ: “Aje ywete Jesu Janejare'e rekoa rupi katu poromo'e iko ipi, ãwisõ a'e tè Janejare'e pyri ekoi”, e'ità. 11 Kee jaa rè teve Janejare'e 'Ãg poromotekokuwatà. Ãwitõ karamoe remẽ ãjãgai rõvijã Janejare'e omokuipe'e owyi imomorijauoka, ãwĩvotà pirujẽ nivoi ekoi mãe kõ werekotà. A'evo 'evoa rè Janejare'e 'Ãg poromotekokuwatà, ãwisõ “aje ywete aepo” te'i enu kupa ky'y, e'i Jesu. 12 – Apota ipe pemotekokuwavay jẽ. Iteetejẽ mã'ẽ rè apota pemotekokuwa. Ajamã'ẽ napeenu'ãi kuwa. 13 Ajamã'ẽ Janejare'e 'Ãg uu pekoty remẽ, a'e pemotekokuwa jẽtà penereko, ãwisõ pirujẽ aje ywete mã'ẽ tapekuwa ky'y. Aje ywete mã'ẽ e'i teãmã mã'ẽ tè a'e. Wayvu rõwã omome'utà pejẽ. Papa ayvu tè omome'utà. Wenu mã'ẽ tè omome'utà, Papa e'i mã'ẽ tè. Ãmõ, ije a'e mã'ẽ teve omome'utà pejẽ. Kãramõwarà rã ve omome'utà amãtejẽ pejẽ, a'evo e'ãve, e'i. 14 Eayvu tè omome'utà pejẽ, tapekuwa, e'i. Ãmẽ sõsi ekatuaya omojisaokatà jane kõ pè, e'i. 15 Papa ayvu vo jẽ ve eayvu. Ajawyi i'Ãg okuwatà eayvu pirujẽ peupewarà imome'u pejẽ, a'e pejẽ, e'i Jesu.

“Peãgyo paire penoryvaytà ky'y”, e'i Jesu mã'ẽ

16 E'i Jesu oreupe, wemimo'ekwerà kõ pè: – Ajaire sa'u napemã'ẽ'ãi rã'ĩ ere, e'i. Ajamã'ẽ a'evo paire pemã'ẽ tarà mijẽ ere, e'i. 17 Ãmẽ aepo renu kee oro'e ojiupe: – Iteetejẽ e'i janeupe. “Ajaire sa'u napemã'ẽ'ãi rã'ĩ ere”, e'i. Ãmõ, “A'evo paire pemã'ẽ tarà mijẽ ere”, e'i. Ãmõ, “Papa kyty ajivytà aa rewarà mõ a'evotà”, e'i teve. Manyvo jaa pè põ aepo e'i mã'ẽ? 18 Manyvo jaa pè põ, “Ajaire sa'u napemã'ẽ'ãi ere”, e'i? oro'e tite. Nisikuwai aepo e'i remẽ, oro'e ojiupe. 19 Ãmẽ Jesu okuwapa teãmã oroporanutà ijupe remẽ. Ajawyi e'i mijẽ: – Akuwa kee pejẽ pejimogeta: “Manyvo jaa pè põ aepo e'i Jesu jane?” pejẽ mã'ẽ. Aje ywete aepo a'e pejẽ. Napemã'ẽ'ãi rã'ĩ ere. A'evo paire tè pemã'ẽ tarà mijẽ ere, a'e pejẽ. 20 Pejapyaka rã'ĩ. Akuwa peja'o ywetetà rã'ĩ emãnõa rè, e'i. Nererovijai mãe kõ ãmẽ noja'o'ãi ere. Oryvaytà kõrijõ kupa ãmẽ. Peãgyo ywetetà rã'ĩ peiko. Ajamã'ẽ ajaire penoryvaytà ere pemã'ẽ mijẽ remẽ ky'y. Aje ywete aepo a'e, e'i oreupe. 21 – Ãwitõ wãivĩ imemy taray remẽ, naoryi 'ete iko ipi, ayay imemyry ijupe rewarà mõ. Ãmẽ ajaire imemy sakytà ky'y. Ãmẽ sõsi oryvaytà ky'y. Earaipatà ayay maekwerà wyi ky'y, e'i. Oryvaytà kõrijõ ky'y, e'i. 22 A'evo 'ejẽtà pejẽ. Age'e ãmẽ peãgyotà rã'ĩ. Ajamã'ẽ ajaire penoryvaytà, pemã'ẽ mijẽ ere remẽ. Awyje mãerã tè penoryvaytà ky'y. Ava jẽ rõwã omomità penorya ãmẽ pewyi ky'y, e'i. 23 – Ãmẽ tè katu, “Emotekokuwa rejupa”, napejẽ'ãi peporanu eupe ky'y. Papa pè peporanutà. Aje ywete kee a'e pejẽ. Peporijau ee mã'ẽ rè peporanu eayvu rupi Papa pè remẽ, “hoõ” e'ità. Ome'ẽtà pejẽ ãmẽ. Nokãte'ã'ãi pejẽ. 24 Age'e napeporanuive eayvu rupi Papa pè, e'i. Age'e si peporanu ijupe ky'y, e'i. Peporijau ee mã'ẽ ome'ẽtà pejẽ ãmẽ, e'i. Ãmẽ ywesõ penoryvaytà peiko ky'y, e'i Jesu oreupe.

“Ije ywesõ ekasiay aiwea wyi”, e'i Jesu mã'ẽ

25 – Poromotekokuwa remẽ, moma'e ma'e kõ rè tè poromosã'ãga poromotekokuwa ipi. Kãramõ na'evo'ãi aiko ky'y, e'i. Oterẽ jẽtà amome'utà Papa rekoa pejẽ ky'y. 26 A'evo remẽ pevote peporanutà Papa pè eayvu rupi. Ije rõwã a'età ijupe ky'y. Pejẽ tè pejẽtà ijupe. 27 Emã'ẽ. Papa penauvay. Erauvay pekupa rewarà mõ penauvay ipi. Ãmõ, kee pejẽ rewarà mõ penauvay. “Aje ywete Janejare'e pyri wyi tè Jesu uu”, pejẽ ije rewarà mõ. 28 Aje ywete Papa pyri wyi tè ajo rã'ĩ ike pepyterà rupi aiko. Age'e Papa rena kyty ajivytà aa, e'i Jesu oreupe. 29 Aepo e'i remẽ, kee oro'e ijupe: – Haa! Oterẽ jẽ aepo ere oreupe ky'y! Moma'e rè tè noremosã'ãgai oremotekokuwa rõmõ rejupa ky'y. 30 Age'e si orokuwa pirujẽ nekuwapa mã'ẽ tè ene. Oroenu ywete neremikuwarerà nemovyvy oreupe remẽ. Ava mõ sõ oporanutà neupe remẽ, nekuwapa amãtejẽ ijayvu rã! Ãwĩvo neiko rewarà mõ orokuwa aje ywete Janejare'e pyri wyi tè nejo, oro'e ijupe. 31 Aepo oro'e remẽ, Jesu e'i oreupe: – Age'e tè tite sipõ “aje” pejẽ eupe ky'y? 32 Age'e ywe'e pejavapatà rã'ĩ peo ewyi! Pejimosãsãimatà rã'ĩ peo peo penetã gyty, pejãvijõ jẽ. Ije rõmõ'ĩte apytatà rã'ĩ ajupa ky'y. A'evo ipe aiko remẽ, Papa epyri ekoi jẽtà ajamã'ẽ, e'i. 33 Apota tapepy'a piryvypy katu jẽ erevejẽ peiko mãe kõ rõmõ. Ajawyi a'evoa a'epa amãtejẽ pejẽ ajupa. Ike rupi yvy rupi pejimomorijau 'atà tè rã'ĩ. A'evo ipe remẽ, tapejimokasi jẽ ikõ penory rõmõ peiko nẽ. Ije ywesõ ekasiay aiwea wyi, e'i Jesu oreupe.

Juwão 17

Jesu oporanu Uu pè okoty rewarà kõ pewarà mõ remẽwarà

1 Ãmẽ Jesu aepo e'i oreupe paire, oyvatesa oporegeta Uu pè. [Oupewarà mõ rã'ĩ oporegeta omãnõa rã rè.] Kee e'i: – Ovãema emãnõa 'arà ky'y, Papa. Amãnõ maire, emomoeraokatà rejupa. Ereraatà nekoty rejupa, Papa, e'i. A'evoa rupi emojikuwaokatà Nera'yry rõmõ rejupa jane kõ pè, e'i. 2 Pirujẽ jane kõ 'arà kyty ereinõokapa rejupa. Eayvumokasipa rejupa, pirujẽ tamoigo karuaruoka nemojirovijaoka ere mãe kõ. 3 Kee oiko karuaru mãe kõ ekoi. Nekuwa katu kupa. “Janejarywe'e tè” e'i neupe kupa. Ãmõ, ekuwa katu teve kupa. “Janejare'e Remimuurerà ywe'e tè Jesu Kiristu”, e'i eupe kupa. Aepo e'i oiko karuarutà mãe kõ. 4 Amojisaoka nekasiay wetea ike jane kõ pè yvy pè, tanemoe'e nemomojy kupa. Neayvu rupi a'evo aiko. Nekatuaya ve amojisaoka ijupe kõ ipi. Eposikoa neme'ẽ eupe maekwerà amoawyjepa age'e ky'y, e'i. 5 Ajawyi ajivytà aa nerena kyty ky'y, e'i. Emoe'eoka mijẽ nerena pè rejupa, Papa, e'i. Ãwitõ yvy jinõ e'ãve emoe'eoka rejupa, ta'evo mijẽ, e'i Jesu Uu pè. 6-8 Kee e'i teve Jesu oporegeta Uu pè: – [Ereko katu ekoty rewarà kõ, Papa, e'i.] Neremipyteporokwerà kõ tè a'e kõ, e'i. Nojirovijai nere mãe kõ pytery pe wyi nepyteporo kõ ekoty rewarà kõ rõmõ toiko kupa, e'i. Oromojikuwaokapa ijupe kõ, Papa, e'i. Nekoty rewarà kõ rõmõ ekoi kupa ky'y, e'i. Neayvukwerà ere ije maekwerà amojenupa ijupe kõ. “Aje ywete” e'i amojenu ijupe kõ maekwerà pè kupa ãmẽ. “Aje ywete Jesu kõrijõ tè uu Janejare'e rena pe wyi”, e'i teve kupa. “Aje ywete Janejare'e Remimuurerà tè ãwĩ”, e'i eupewarà mõ kupa. 9 – Ajawyi a'e kõ pewarà mõ aporegeta neupe ajupa, terereko katu kõ, e'i. Pirujẽ jane kõ pè rõwã aepo a'e ajamã'ẽ, e'i. Ererovijaoka ijupe kõ rejupa mãe kõ pè tè a'e, neremĩgwai kõ tè kupa rewarà mõ, e'i. 10 Ekoty rewarà kõ rõmõ ekoi kupa wyi nekoty rewarà kõ rõmõ ekoi teve kupa. Emojikuwaokapa ijupe kõ Nera'yry rõmõ rejupa, ãwisõ temojikuwaoka jane kõ pè kupa ipi. 11 Age'e naiko puku'ãi ipyri kõ ky'y. Ajivytà aa nekoty ky'y, e'i. Ekoty rewarà kõ opyta jẽtà ãmẽ ike rupi iko, e'i. Ereko katu kõ jẽ ikõ ajawyi nẽ, Papa, e'i. – Ivo katu teãmã mã'ẽ tè ene, Papa! Neayvukasia neme'ẽma eupe. Emã'ẽ jẽ ikõ nekoty rewarà kõ rè neayvukasia rupi nẽ, ãwisõ pe'ĩypyte rõmõ toiko kupa. Ãwitõ pe'ĩypyte rõmõ jaiko, tãwĩvo ve ikõ kupa nẽ, e'i. 12 Ike ipyterà kõ rupi aiko jẽ aiko remẽ, areko katu kõ ipi. Amã'ẽ jẽ ee kõ aiko ipi, neayvu rupi. Ajawyi ojirovija jẽ ere kupa, e'i. Nerekoa rupi oiko jẽ kupa, pirujẽ, e'i. Pe'ĩgà kõrijõ tè ereity ywe'e tite oo mã'ẽ. A'e ootà jimomorijau wasua rena kyty. Nekusiwaoka amãtejẽ maekwerà rupi katu tè a'evo ekoi ajamã'ẽ, e'i. Ãmõ kõ ãmẽ erevejẽ ekoi, e'i. 13 Age'e ajivytà aa nekoty ky'y, Papa. Ajawyi emokasi kõ tojirovija jẽ nere kupa, Papa. Ike aju remeve aepo a'e ene. Epy'amoryoka kõ jẽ ereko kõ. Ãwitõ ije eroryvay, tãwĩvo kupa, e'i. 14 – Neayvukwerà amojenupa ijupe kõ. Pirujẽ ere ije tamojenu maekwerà rupi katu amojenu ijupe kõ. Nerekoa rupi ekoi ãmẽ kupa. Ãwitõ ije nerekoa rupi aiko, ãwĩvo ve ekoty rewarà kõ ekoi. Nekuwai mãe kõ remisa tare'ã rõmõ tè ekoi ãmẽ kupa. A'e kõ kee e'i ekoty rewarà kõ pè ipi: “Orevo rõwã pejẽ. Ajawyi noromã'ẽ tari pene”, e'i ekoty rewarà kõ pè kupa, e'i. 15 A'evo ipe remẽ: “Eekyi kõ nivoi mãe kõ pytery pe wyi”, na'ei ajamã'ẽ ene, e'i. Emokasi kõ tojimo'yjẽ ere, a'e ene. Ereko katu kõ kõrijõ nivoi mã'ẽ rõvijã wyi, a'e tè ene, e'i. 16 Ãwitõ ije evo rupi teve aiko, nijanererovijai mãe kõ wyi, ãwĩvo ve ekoty rewarà kõ ekoi ky'y, e'i. 17 Aje ywete mã'ẽ tè neayvu ipi. A'e rupi ikõ ereko katu kõ neupewarà kõ rõmõ nẽ, oterẽ jẽ neremimota rupi toiko kupa ky'y, e'i. 18 Neayvu rupi tè ajo jane kõ pyterà rupi aiko. Ãwitõ emuu nivoi mãe kõ pyterà rupi rejupa, ãwĩvo ve amono ekoty rewarà kõ nivoi mãe kõ pyterà rupi toiko kupa, e'i. 19 Aauvay ekoty rewarà kõ, e'i. Ajawyi ajime'ẽma nepo pè. Neremimota rupi'ĩte aa aiko, ãwisõ ekoty rewarà kõ ve nepo pè toiko, e'i. 20 – Ekoty rewarà kõ neayvu mojenuarà mõ ekoità, ãmõ kõ toenu, e'i. Ãmẽ a'e kõ ve ojirovijatà ere. Ekoty rewarà kõ rõmõ tè ekoità ãmẽ kupa, e'i. Ajawyi ereko katu ekoty rewarà rã kõ, a'e ene, Papa, e'i. 21 Emokasi kõ pe'ĩypyte rõmõ toiko kupa, neremimota rupi toiko kupa ipi, e'i. Ãwitõ ije nereve pe'ĩypyte rõmõ aiko, tãwĩvo ekoi kupa, a'e ene, Papa. Ãmẽ nojirovijai ere mãe kõ omã'ẽ ee kõ remẽ, ojirovijatà ere kupa ky'y. “Aje ywete Janejare'e Remimuurerà tè Jesu”, e'ità ije kupa ky'y. 22 Ãwitõ tekou katua neme'ẽ ije, ãwĩvo ve tekou katua ame'ẽ ekoty rewarà kõ pè, pe'ĩypyte rõmõ toiko kupa, janevo, e'i. 23 Ekoty rewarà kõ erevejẽ ekoi. Ãwitõ ije nerevejẽ aiko, ãwĩvo erevejẽ ekoi kupa. A'evoa rupi pe'ĩypyte rõmõ toiko kupa. A'evo ekoi kupa remẽ, ãmõ kõ ojirovijatà ere, ee kõ omã'ẽ kupa remẽ. “Aje ywete Janejare'e Remimuurerà tè Jesu”, e'ità ãmẽ kupa. “Aje ywete Janejare'e wauvay Jesu koty rewarà kõ. Ãwitõ Janejare'e remiau rõmõ Jesu, ãwĩvo ve emiau kõ rõmõ Jesu koty rewarà kõ ekoi”, e'ità teve kupa. 24 – Aje ywete, erauvay wete rejupa, Papa. Yvy jinõ e'ãve a'evo erauvay rejupa. Emokasiokapa teve rejupa. Emoe'eokapa neremĩgwai yvapewarà kõ pè rejupa. Emã'ẽ jẽ eremĩgwai kõ rè, Papa. Nepyteporo kõ eremĩgwai kõ rõmõ toiko kupa. Apota erupi araa kõ nerena kyty, ereve toiko kupa, e'i. A'evo ekoi kupa remẽ, emoe'ea rè omã'ẽtà kupa, neremĩgwai yvapewarà kõ emoe'e remẽ, e'i. 25 – Ivo teãmã mã'ẽ tè ene, Papa, e'i. Nererovijai mãe kõ nanekuwai. Ije ãmẽ orokuwa katu. Ãmõ, ekoty rewarà kõ ekuwa katu Neremimuurerà rõmõ. 26 Age'e si awyjepa oromojikuwaokapa ijupe kõ. Ajamã'ẽ oromojikuwaoka jẽtà aiko, ãwisõ neremiau kõ rõmõ toiko kupa. Ãwitõ neremiau rõmõ aiko, tãwĩvo ekoi kupa. Pe'ĩypyte rõmõ ereve toiko teve kupa, e'i Jesu. Awyjepa rã'ĩ Jesu oporegeta Uu pè.

Juwão 18

Jesu opyy kupa remẽwarà

1 Ãmẽ Jesu oporegeta Uu pè paire, ojisyry oo orereve, wemimo'ekwerà kõ reve. Yy miti ovae kyty oroo. Setorõnà eu a'e yy pè. Uve temitãgwerà ty a'e pè. A'e kyty oroo orovãe. 2 [Jutasi Sikarioti kõrijõ tè nooi orerupi. Ojisyrypa amãtejẽ orojimi'u remeve.] Ajamã'ẽ okuwa a'e pè orojimoaty. A'e pè tè jẽ Jesu oremoaty oremogeta ipi. 3 A'e pè oroiko ãmẽ. Ãmẽ Jutasi weru sota kõ orekoty, [Romã yvy pewarà sota kõ]. Ãmõ kõ ve Jutasi weru, Janejare'e moe'ea retã rãrõarà kõ. A'e kõ oõvijã kõ ayvu rupi uu, Janejare'e pè oporegeta mãe kõ rõvijã kõ ayvu rupi. Ãmõ, Pariseu kõ ayvu rupi ve uu kupa. Mokopejõ uu Jutasi Sikarioti rupi mãe kõ. Marija poko pawete weru opo pè. Turi jijõvãgwerà sota kõ weru teve oyapea mõ. Ãmõ, raparina kõ ve weru kupa. 4 Ãmẽ Jesu okuwapa amãtejẽ weewarà mãrãnaitarà. Ajawyi wenone'apa amãtejẽ weewarà rã. Oo amãtejẽ õvaisĩ kõ. – Ava ywe'e sipõ peeka peiko? e'i ijupe kõ. 5 – Jesu, Nasare taa wãnà, e'i ãmẽ kupa. – Ije tè a'e, e'i. 6 Aepo e'i Jesu remeve, py'awarà mõ o'a ãmẽ wapekwerà kyty kupa. 7 – Ava ywe'e sipõ peeka peiko? e'i mijẽ ijupe kõ. – Jesu, Nasare taa wãnà, e'i mijẽ kupa. 8 – Ije tè a'e, a'epa rõwã sipõ pejẽ! Ereka tè sipõkõ pejo ãmẽ! e'i. Ije tè ereka pekupa remẽ, tojisyry rã'ĩ ereve ekoi mãe kõ ajawyi, e'i ijupe kõ. “Hoõ” e'i sota kõ ãmẽ. 9 Ji'ite Jesu Uu pè oporegeta upa remẽ, kee e'ipa: “Papa. Ererovijaoka ijupe kõ rejupa mãe kõ, erevejẽ ekoi kupa. Pe'ĩ namokãjãoka'ãi ãmõ”, e'ipa. Aekwerà rupi katu tè, “Tojisyrypa rã'ĩ ereve ekoi mãe kõ”, e'i sota kõ pè. 10 Ameve Simão Peturu marija poko wekyi. A'e pupe kwaima'e mõ onamimopai. Mauku eu ijupe mã'ẽ onamimopai. Janejare'e pè oporegeta mãe kõ rõvijã wasu remĩgwai tè a'e. 11 A'evo remẽ Jesu e'i Peturu pè: – Teene. Nemarija poko emokatu! e'i. Akuwa Papa ayvu rupi tè ajimomorijau 'atà tè amãnõ, e'i. Ajawyi najirokyjei, e'i Jesu ijupe.

Anasi retã gyty weraa Jesu kupa remẽwarà

12 Ãmẽ sota kõ Jesu opyy ky'y, oõvijã miti ayvu rupi. Janejare'e moe'ea retã rãrõarà kõ reve opyy Jesu kupa. Opokwa eraa kupa. 13 Anasi eu ijupe mã'ẽ retã gyty rã'ĩ weraa Jesu kupa. A'e Janejare'e pè oporegeta mãe kõ rõvijã wasu ratyu tè, Kaipasi eu mã'ẽ ratyu tè. 14 Kõitokõ Juteu rõvijã kõ atyry pè Jesu mãnõa rã rè rewarà mõ ojimoaty remẽ, a'e Kaipasi tè kee e'i jõvijãgwerà pè: “Ikatu pe'ĩte jane mõ omãnõ amãtejẽ, pirujẽ jane kõ pewarà mõ. [Ãmẽ tè nijaneapisi'ãi kupa”,] e'i maekwerà. Aepo e'i maekwerà ratyu retã gyty weraa Jesu kupa.

Peturu, “Jesu nakuwai”, e'i rã'ãga remẽwarà

15 Ãmẽ Simão Peturu oo Jesu rapyky rupi iko. Ije ve aa apyky rupi. Ajaate Anasi retã mè orovãe. Ije aike a'e pari kwarà pè. Tetã ypy pè aike, Jesu pyri'ĩje'ẽ sa'u. Anasi remikuwa tè ije. Ajawyi okarà rãrõarà “eike” e'i ije. 16 Ajamã'ẽ Peturu noikei. Opyta ikatu pè, ovaokenapa ypy upa. Ãmẽ ajivy rã'ĩ wãivĩ pè aporegeta, ovaokena rãrõarà pè. A'e wãivĩ pè kee a'e: – Ejimorypa toike, a'e ijupe. “Hoõ” e'i ãmẽ. 17 Ãmẽ Peturu oike remẽ, a'e wãivĩ e'i ijupe: – Wãi kwaima'e remimo'earà rõwã sipõkõ ene! e'i ijupe. – Ãnĩ! A'e rõwã ije! e'i rã'ãga owari rõmõ. 18 Ãmẽ irõwã wete rewarà mõ temĩgwai kõ tata omoipota. A'e ypy pè ojipe'e kupa upa. Ãmõ sota kõ ve a'e pè tui. A'e kõ pyri Peturu oo opõ'ã ojipe'e upa.

Jesu Janejare'e pè oporegeta mãe kõ rõvijã rovake remẽwarà

19 Ãmẽ Janejare'e pè oporegeta mãe kõ rõvijã wasu oporanu Jesu pè, a'e tetã wyry pè. – Ava põ neremimo'earerà kõ? e'i. Manyvo ere põ imotekokuwa kõ ipi? e'i Jesu pè. 20 Ãmẽ Jesu e'i ijupe: – Ije poromotekokuwa aiko remẽ, jovake tè poromotekokuwa ipi, tijaenu. Tyvija rupi rõwã poromotekokuwa. Juteu kõ ojimoaty mãe kõ rovake tè a'evo aiko. Janejare'e moe'ea retã ypy pè amotekokuwa kõ ipi. Ãmõ, Janejare'e ayvu rè jimo'ea retã kõ rupi teve. 21 Ajawyi eupe rõwã kuwa aepo ere! e'i ijupe. Eayvu wenu maekwerà kõ pè tè kuwa aepo ere. Ere ajawyi esa! A'e kõ okuwa eporegetakwerà, wenupa kupa rewarà mõ, e'i. 22 Ãmẽ aepo e'i oporegeta Jesu remẽ, ãmẽ sota mõ wetoapepete Jesu. – Aepo ere sõ Janejare'e pè oporegeta mãe kõ rõvijã wasu pè! e'i. Ajawyi ejimomeme ikõ ee kõ imogeta nẽ! e'i. 23 Ãmẽ Jesu e'i ijupe: – Newari ije ajamã'ẽ. Aje ywete aporegeta ipi! Ajawyi moma'e rewarà mõ põ eretoapepete pekupa, ãwisõ aje ywete aporegeta remẽ? e'i. 24 Ãmẽ Anasi nokuwaive manyvotà wereko. Ajawyi Jesu omojivy mijẽ Kaipasi kyty imonooka, Janejare'e pè oporegeta mãe kõ rõvijã wasu pè. Ipoapy ãpasĩa revejẽ omojivy imono.

Peturu, “Jesu nakuwai”, e'i rã'ãga mijẽ remẽwarà

25 Ãmẽ jakatu Simão Peturu ojipe'e jẽ tata ypy pè upa. Ãmẽ ãmõ kõ e'i mijẽ ijupe: – Wãi kwaima'e remimo'ekwerà mõ rõwã põkõ ene? e'i. – Ãnĩ! A'e rõwã ije! e'i rã'ãga. 26 Ãmẽ temĩgwai mõ e'i: – Nere itõkõ amã'ẽ ka'a miti pè, eeve neiko remẽ! e'i ijupe. Peturu onamimopai maekwerà retãrã tè sikaepo aepo e'i. Janejare'e pè oporegeta mãe kõ rõvijã wasu remĩgwai mõ a'e. Aepo e'i remẽ, Peturu ojimonyi. Ajawyi kee e'i: 27 – Ãnĩ! A'e rõwã ije! e'i mijẽ. Ãmẽ aepo e'i remeve masakara oje'ẽ.

Kovenatu Piratu rovake weraa Jesu kupa remẽwarà

28 Kõ'ẽ tarà mẽ weraa mijẽ Jesu kupa, Kaipasi retã pe wyi. Romã yvy pewarà kovenatu posikoa rena kyty weraa kupa. [Piratu eu kovenatu pè.] A'e retã gyty weraa Jesu kupa. A'e tetã pè Juteu rõvijã kõ noikei ipi. Juteu rõwã mã'ẽ retã tè rewarà mõ noikei kupa. Ekoa kõ teãmã a'evo, kee e'i kupa rewarà mõ: “Jaike sõ remẽ, janeky'a kuwa Janejare'e kyty. Ni'e'ãi tãmõ kõ jisyryawerà rè jaja'a remẽ ãmẽ”, e'i kupa. Aepo e'i kupa rewarà mõ, noikei kovenatu retã wyry pè kupa. Tetã ypy pè tè wãrõ kupa. 29 Ajare kovenatu Piratu oẽ oo õvaisĩ kõ, Jesu weru kupa remẽ. – Manyvo rewarà mõ põ aã kwaima'e peeru erovake? e'i ijupe kõ. 30 Ãmẽ Juteu rõvijãgwerà kõ e'i ijupe: – Nivoi ekoi rewarà mõ! Nekuwa nãwĩvoi sõ remẽ, noroeru kuwa'ãi nekoty! e'i ywe'e tite kupa. 31 Ãmẽ Piratu e'i ijupe kõ: – Pevote tapekuwa penekoa rupi, e'i. Ãmẽ Juteu kõ e'i: – [Manyvo toroereko e'ã oreremikuwa rupi, Romã pewarà jõvijã wasu omoteepa tekoua rewarà mõ, e'i. Ãwĩ rapijarà tãmõ kõ ojapi japi takuru pupe ijuka ipi, Janejare'e werõarõ mã'ẽ tè rewarà mõ. A'evo kuwasi oroereko mijã.] Ajamã'ẽ Romã pewarà jõvijã wasu ayvu rupi nijajuka'ãi. [Ene kõrijõ tè neayvukasi ijukaa rè.] Ajawyi tè oroeru nekoty, e'i kupa. 32 Ajawyi Romã pewarà jõvijã ayvu rupi tè Jesu omãnõtà ky'y. Yvyra jipokana rè omõ'ãtà ijuka kupa ky'y. Ajamã'ẽ, “Emõ'ã 'atà tè ejuka”, e'i Jesu maekwerà rupi katu tè a'evotà wereko ãmẽ kupa. 33 Ãmẽ Piratu oike rã'ĩ mijẽ oo posikoa rena wyry kyty. Aja paire Jesu omuroka mijẽ imogeta. – Aje ywete põ Juteu kõ rõvijã tè si ene? e'i ijupe. 34 Ajawyi Jesu e'i ijupe: – Nevote põ aepo ere? Ãmõ kõ ayvu rupi tè rõwã põkõ aepo ere ije? e'i Jesu ijupe. 35 Ãmẽ Piratu e'i: – “Juteu teipõ ãwĩ” ere tite sipõ ije? e'i. Neretãrã Juteu kõ tè nereru ike neme'ẽ epo pè. Janejare'e pè oporegeta mãe kõ rõvijã kõ reve. A'e kõ manyvo jẽ neiko rewarà mõ nereru ekoty. Ajawyi ejimome'u ije, takuwa nerewarà, e'i. 36 Ãmẽ Jesu e'i: – Ãwitõ pejẽ jõvijã ikewarà rõmõ tè, ãwĩvo rõwã ije, e'i. Evo rupi teve ije, jõvijã rõmõ, ikewarà rõwã ije rewarà mõ. Pevowary vo sõ ije remẽ, eremĩgwai kõ ojiapisi kuwa erereko katu Juteu rõvijã kõ po pe wyi mijã. Pejẽ, napemã'ẽ kuwa'ãi ajimojõvijã remẽ ere, e'i Jesu. 37 Ãmẽ Piratu e'i ijupe ky'y: – Jõvijã wasu tè sipõ ene? e'i. – Õ'õ! e'i Jesu. Ene tè aepo erepa ije. Jõvijã tè ije. A'e rõmõ tè ajo esaky mõ ike yvy pè pepytery pè. Ayvu aje ywete mã'ẽ mojenuarà rõmõ ajo, e'i. Ava mõ sõ ayvu aje ywete mã'ẽ opota remẽ, eayvu wenutà ipi, e'i. Eayvu rupi ekoità ãmẽ ipi, e'i. 38 Ãmẽ kovenatu Piratu e'i: – Ava nokuwa kuwa'ãi kuwa ayvu aje ywete mã'ẽ! e'i tite ikuwa e'ã.

Kovenatu Piratu ojukaoka Jesu remẽwarà

Aepo e'i paire, oẽ mijẽ oo javo Juteu kõ pè: – Naesai pe'ĩ nivoi mã'ẽ mõ tijamo'y ee, e'i. 39 Pepota põ amoẽoka? Ãwitõ penãmõi kõ jisyryawerà rè peja'a remẽ upi upi, pe'ĩ temimopã'ãgwerà amoẽoka ipi, ãwĩvo? e'i. “Juteu kõ rõvijã wasu” eu mã'ẽ põ pepota tamoẽ? e'i. 40 – Ãnĩ! Ãnĩ! Ãwĩ rõwã! e'i e'i kõrijõ wapukai rõmõ kupa. Parapa tè oropota nemoẽ! e'i e'i wapukai rõmõ kupa. Pirujẽ aepo e'i wapuka pukai rõmõ kupa. Aepo e'i kupa rewarà mõ, “hoõ” e'i Piratu ãmẽ ky'y. Parapa tè omoẽoka ãmẽ ky'y, ojimijajuka maekwerà teipe Parapa remẽ.

Juwão 19

1 Ãmẽ kovenatu Piratu e'i sota kõ pè: – Peraa aã kwaima'e inõpã nõpã! e'i Jesu pewarà mõ. A'evo wereko ãmẽ kupa. Weraa inõpã nõpã kupa. 2 Ojimorarai wete ee kupa. Wãkãnytanõ joõ asĩasĩ mã'ẽ pupe kupa. Jõvijã ãkãnytarà rã'ãga rõmõ a'evo wereko kupa. Jõvijã yru poko karary vo mã'ẽ pè oyrunõ rã'ãga rã'ĩ kupa. 3 Ãmẽ oo ipyri kupa remẽ, – Age'e si tereiko puku Juteu kõ rõvijã rõmõ! e'i rã'ãga ijai kupa. Oovapete pete teve kupa. A'evo ojimorarai wete ee kupa. 4 Ãmẽ kovenatu Piratu oẽ mijẽ oo javo aty wasu kõ pè: – Peenu rã'ĩ si eayvu! e'i. Aã kwaima'e peeru maekwerà ivo katu mã'ẽ tè. Ajawyi namojaiwe'ãi. Ajawyi aeruoka tarà mijẽ aã ike, e'i. Pemã'ẽtà tè ee ky'y, e'i. 5 Ãmẽ sota kõ weru Jesu ikatukwery pè, kovenatu Piratu ayvu rupi. Ãkãnytarà rã'ãga irõromõ ve weru kupa. Jõvijã ryru poko rã'ãga irõromõ ve weru kupa. Weru kupa remẽ, kovenatu Piratu e'i Juteu kõ pè: – Wãi penemierukwerà! e'i. 6 Ãmẽ Janejare'e pè oporegeta mãe kõ rõvijã kõ omã'ẽ mijẽ Jesu rè remẽ, wapuka pukai mijẽ kupa. Janejare'e moe'ea retã rãrõarà kõ ve wapuka pukai. – Emoputuputurioka ãwĩ yvyra jipokana rè ijukaoka! e'i e'i kupa. Ajaate kovenatu Piratu “hoõ” e'i ijayvu kõ rupi ky'y. – Peraa ajawyi ijuka ky'y, e'i. Ije ajamã'ẽ nivoi mã'ẽ na'e teywete'ãi ijupe, e'i. 7 Ãmẽ Juteu atyry kõ kee e'i: – Emã'ẽ. Oropota orerãmõi kõ remikusiwarerà rupi orojuka, “Janejare'e Ra'yry tè ije”, e'i teywete rewarà mõ, e'i kupa. 8 Ãmẽ kovenatu Piratu aepo jaa wenu remẽ, ojimonyi. – ['O! Aje rõwã põkõ ãwĩ Janejare'e Ra'yry tè? e'i oupe.] 9 Ajawyi weroike mijẽ Jesu eraa javo ijupe: – Ava ywe'e põ ene? e'i. Mape kytywarà põ ene? e'i Jesu pè. Ajamã'ẽ Jesu nipui ijupe. 10 Ãmẽ Piratu e'i: – Nanepui ywe'e tite põ eupe? e'i. Eayvukasiay wete mã'ẽ tè ije! e'i. Napotai nejukaoka remẽ, oromoẽ kuwa. Apota nejukaoka remẽ, noromoẽ'ãi. Orojukaoka kõrijõtà ãmẽ yvyra jipokana rè! e'i ijupe. 11 Ãmẽ Jesu e'i ijupe: – “Evote ipõ eayvukasi” ere tite. Ãnĩ! Janejare'e tè neayvumokasioka. Ijayvu rupi kõrijõ tè ejukaokatà rejupa. Ajawyi ereru nepo pè eme'ẽ mãe kõ ywesõ nivoiay Janejare'e pè ekoi, e'i. 12 Ãmẽ aepo jaa wenu remeve, kovenatu Piratu opota Jesu omoẽoka mijã. Ajamã'ẽ atyry wapuka pukai jẽ tesõ javo: – Jõvijã wasu Sesa ãpã tè Jesu, “Jõvijã tè ije”, e'i rewarà mõ! Ajawyi a'e nemoẽoka sõ remẽ, nerõvijã wasu ojikõ'õtà ãmẽ nere ky'y! e'i ijupe kupa. 13 Ãmẽ Piratu aepo jaa wenu remẽ, weruoka mijẽ Jesu oka wyry pe wyi ikatu pè. Jõvijã ayvukasia rena kyty weraa. Nivoi tekoua mojenua rena tè a'e. A'e tena pè “Kapata” e'i Juteu kõ wayvu pè. A'e pè Piratu oẽ wapy oporegeta wayvukasia rõmõ. 14 Jane 'aryvo kwaray paire a'evo ekoi. Ãmẽ jakatu Juteu kõ wãparõ ypytà wãmõi kõ jisyryawerà rè ja'aa. Ãmẽ jakatu Piratu e'i mijẽ Juteu rõvijã kõ pè: – Aã penõvijã! e'i. 15 Ajamã'ẽ kee e'i jẽ wapuka pukai kupa: – Pejuka ikenẽ! Emoputuputurioka jẽsi yvyra jipokana rè ijuka! e'i kupa. Ãmẽ Piratu e'i ijupe kõ: – Pepota katu põ penõvijã yvyra jipokana rè jamoputuputuri ijuka? e'i ijupe kõ. Ãmẽ Janejare'e pè oporegeta mãe kõ rõvijã kõ kee e'i: – Orerõvijã rõwã ãwĩ! e'i. Pe'ĩte orerõvijã! Romã yvy pewarà jõvijã wasu rõmõ'ĩte! e'i ywe'e tite kupa. 16 Ajawyi Piratu ojimoane'e jẽ sota kõ pè javo ky'y: – Pepyy awi eraa! e'i. Pemoputuputuri awi yvyra jipokana rè ijuka! e'i ijupe kõ. Weraa ãmẽ kupa.

Jesu omoputuputuri yvyra jipokana rè kupa remẽwarà

17 Ãmẽ sota kõ omono Jesu yvyra jipokana tomovy eraa. Imirai mã'ẽ jukaa rena kyty omovy eraa ãmẽ. “Joãkãgwerà” eu a'e tena pè. (Kokota e'i Juteu kõ wayvu rupi ãmẽ.) 18 A'e pè omoputuputuri ãmẽ imõ'ã kupa. Ãmẽ mõrijõ kwaima'e kõ omoputuputuri ijuvuri imõ'ã kupa. Omojeovai kupa. 19 Ãmẽ kee jaa okusiwaoka amãtejẽ kovenatu Piratu pè Jesu rewarà: “Jesu Nasare taa wãnà. Juteu kõ rõvijã wasu”, ejaa. A'e jikusiwarerà omono toinõ Jesu apyte 'aryvo kupa, yvyra jipokana rè. 20 Juteu kõ ayvu rupi ojikusiwa. Ãmõ, Romã pewarà kõ ayvu rupi teve. Ãmõ, Kereku kõ ayvu rupi teve. Pee atyi tè a'evo Jesu wereko kupa. Ãmẽ ijatyray Juteu kõ omogeta emikusiwarerà, a'e rupi okwa kupa remẽ, Jerusarẽ taa pyri'ĩje'ẽ ojuka kupa rewarà mõ. 21 Ãmẽ Janejare'e pè oporegeta mãe kõ rõvijã kõ omã'ẽ a'e jikusiwarerà rè remẽ, kee e'i kupa: – Ãnĩ, “Juteu kõ rõvijã wasu”, jaa tè ere sõ ikusiwaoka! e'i. Kee jaa ekusiwaoka: “Aã kwaima'e, ‘Juteu kõ rõvijã tè ije’, e'i mã'ẽ”, jaa tè jẽsi ekusiwaoka, e'i epe Piratu pè kupa. 22 Ajamã'ẽ kovenatu Piratu e'i: – Awyjepa akusiwa. Namotee'ãi ky'y, e'i ijupe kõ. 23 Ãmẽ ajaire, Jesu omoputuputuri kupa paire, sota kõ omosãi Jesu yrukwerà ojiupe kupa. Wãvasĩ vãsĩ imosãi ojiupe kupa, irõte rõmõ. Ãmõ, yru poko ikatuay mã'ẽ, a'e jareve ipõ ojinõ tyru poko rõmõ mã'ẽ. Ajawyi nuvei emiasakwerà. 24 Ajare sota kõ e'i ojiupe: – Nisimokei'ãi aã ãmẽ imosãi. Ejo jajimarai kõrijõ tè ee, ava põ opyytà, e'i ojiupe kupa. Janejare'e kareta rè ojikusiwapa amãtejẽ a'evoa rã karamoe remẽve. Kee ojikusiwa Jesu ayvu rã mõ: “Eyrukwerà omosãità ojiupe kupa. Ãmõ, eyru poko rè ojimaraità rã'ĩ kupa. ‘Ava ywesõ põ opyytà?’ e'ità kupa. Ãmõ, ojeã'ã ã'ãtà eewarà mõ kupa”, e'i ojikusiwa amãtejẽ maekwerà. Aekwerà rupi katu tè sota kõ a'evo wereko ajaire. 25 A'evo remẽ Jesu y ipyri'ĩje'ẽ tui, Maria. Ãmõ, ikypy'yry ipyri tui. Maria eu teve ikypy'yry pè. Koropasi rerekwarà tè a'e. Ãmõ, Maria Matarena ipyri kõ tui. Mokopejõ a'e pè tui kupa. [Ije ve a'e pè aju. Juwão, Jesu remiau.] 26 Ãmẽ Jesu oy rè omã'ẽ. Ãmõ, ere teve omã'ẽ. E'i ãmẽ oy pè eupewarà mõ: – Ãwĩ tè nememyry rõmõtà ky'y, e'i. 27 Aepo e'i teve ije: – Ãwĩ tè ney rõmõtà ky'y, e'i. Ajawyi araa eretã gyty, awyje toiko epyri ky'y.

Jesu mãnõa rewarà

28 Aepo e'ipa Jesu remẽ, okuwa oposikoa omoawyjepa ike yvy pè ky'y. Ãmẽ kee e'i: – E'ywa, e'i. Aepo jaa ojikusiwapa amãtejẽ ijayvu rã rõmõ karamoe remeve. Aekwerà rupi tè aepo e'i Jesu. 29 Ãmẽ a'e pè uve kui mõ. Uvary ai mã'ẽ uve ipupe tãnẽ mã'ẽ. Ãmẽ sota kõ a'e pè omoãkã ipyu mã'ẽ mõ. A'e oinõ yvyra turisara rè imoja Jesu juru rè kupa, tomosusu. 30 Ãmẽ omosu paire, e'i Jesu: – Papa, awyjepa eposikoa ky'y, e'i. Ameve ojayvy ojikyi oo ky'y.

Jesu reãgwerà oturuso imomu kupa remẽwarà

31 Ãmẽ Juteu rõvijã kõ nokuwaive Jesu omãnõma sikaepo. Ajawyi, “Tomãnõ jimoava 'arà e'ãve”, e'i kupa. “Tijatypa amãtejẽ kuise'ẽ, timanyvo e'ã Janejare'e pè jimoava 'arà pè”, e'i tite ikuwa e'ã kupa. Ajawyi oo mijẽ kovenatu Piratu pè javo kupa: – Emono sota kõ toetãmãaka'a ka'a tomãnõ kuise'ẽ, jimoava 'arà e'ãve, e'i kupa. Tijaekyi amãtejẽ ãmẽ teãgwerà kõ yvyra jipokana re wyi imokatupa pãtõma e'ãve, e'i kupa. 32 “Hoõ” e'i Piratu ãmẽ. Ãmẽ sota kõ uu Jesu uvuriwarà retãmã aka'a. Ãmõ, ijuvuriwarà a'evo wereko kupa. 33 Ajaire Jesu teve a'evo werekotà kupa mijã. Ajamã'ẽ omã'ẽ ee kupa remẽ, omãnõma sikaepo. Ajawyi noetãmãaka'ai kupa. 34 Ajamã'ẽ eãgwerà oturuso imomu kurumuri rã'ãga pupe kupa. A'evo wereko kupa remẽ, wyy tesõ oẽ iwyi. Ãmõ, yy oẽ teve iwyi. 35-37 Ajare kee e'i amãtejẽ Janejare'e ayvukwerà ojikusiwa karamoe remeve: “Ijukaarerà kõ omã'ẽtà ee, ooso kupa maekwerà rè”, e'ipa amãtejẽ maekwerà. Ãmõ, kee e'i amãtejẽ maekwerà: “Noetãmãaka'a ka'a'ãi kupa. Mape jẽ rõwã ikãgwerà mõ waka'atà kupa”, e'i amãtejẽ maekwerà. Aepo ojikusiwa maekwerà rupi katu tè a'evo wereko Jesu reãgwerà kupa. Amã'ẽ ee a'evo wereko kupa remẽ. Ajawyi akuwa katu aekwerà. Ajawyi akusiwa ajupa a'evoa momewa pejẽ, tapekuwa. Aje ywete akusiwa eayvukwerà Jesu rewarà, tapejirovija ee.

Jesu reãgwerà mokatua rewarà

38 Ãmẽ oiko kwaima'e mõ a'e pè, Juse Arimateja taa wãnà eu ijupe mã'ẽ. Jesu remimo'earà tè sikaepo a'e. Ajamã'ẽ tyvija rupi tè a'evo ekoi, Juteu rõvijãgwerà kõ tokuwa e'ã. Okyje iwyi kõ rewarà mõ tyvija rupi ekoi. Jesu mãnõa ojenu ijupe remẽ, oo Piratu pè oporanu. Kee e'i: – Apota Jesu reãgwerà araa imokatu mijã, e'i. – Hoõ, eraa ajawyi, e'i Piratu ijupe. Ajawyi ojivy oo eãgwerà kyty ekyi eraa imokatu, omokatutà mã'ẽ pè. 39 Ãmẽ Nikotemu ve oo upi. Kõi oo pya Jesu resa maekwerà. Ipije katu mã'ẽ weraa eãgwerà rè imogy kupa. Miha ysykwerà eu ipije mã'ẽ mõ pè. Ãmõ pè, aroe ysykwerà eu. A'e jimonãgwerà miturakwerà weraa kupa. Kejavu tesõ weraa kupa. 35 kiru tesõ ipowyijay. 40 A'e kõ ovãe Jesu reãgwerà pyri remẽ, wekyi ijõvã teãgwerà jõvãa pupe kupa. Kamisa e'eay “rijõ” eu mã'ẽ pupe ojõvã kupa. Ipije katu mã'ẽ revejẽ ojõvã kupa. A'evo tè Juteu kõ wereko teãgwerà imokatu ipi. 41 A'evo wereko paire, weraa imokatu kupa ky'y. Ãmẽ uve ka'a miti mõ Jesu jukaawerà pyri'ĩje'ẽ. A'e pè uve teãgwerà rena, pareti kwarà. Ipyau mã'ẽ a'e, nomokatuytyive teãgwerà mõ ipupe mã'ẽ pupe. 42 A'e kwarà pupe Jesu reãgwerà omokatu kupa, nikuipei rewarà mõ. Pãtõmatà. Ajawyi ojikõtevẽjẽ imokatu jimoava 'arà e'ãve kupa.

Juwão 20

Jesu omãnõ maire opoera mijẽ remẽwarà

1 Ãmẽ jimoava 'arà paire ipõ Maria Matarena oo tite Jesu reãgwerà rena resa mijã. Nikõ'ẽi ve remeve oo tite esa. Ãmẽ ipõ oo ovãe, soõ, pareti kwarà ojiovapyjavo 'ejẽ upa. 2 Ameve ojirova ojã oo javo Simão Peturu pè. Eupe teve. Kee e'i oreupe: – Janerõvijã reãgwerà wekyi ena pe wyi kupa! e'i tite ikuwa e'ã. Norokuwai mape kyty weraa inõ kupa, e'i tite. 3 Ãmẽ aepo oroenu remẽ, oroo esa, ije, Peturu reve. 4 Orojã oroo. Ãmẽ ije ypy aa avãe iwyi. 5 Ãmẽ ajayvy amãjã ikwarà rè remẽ, soõ, kamisa rè kõrijõ amã'ẽ. Jesu reãgwerà jõvãnawerà rè amã'ẽ. Ajamã'ẽ naikei ikwarà kyty aa. 6 Ãmẽ Simão Peturu uu ovãe a'e pè remẽ, oike ikwarà pupe oo. A'e ve omã'ẽ Jesu reãgwerà jõvãnawerà rè. 7 Ijãkãg jõvãnawerà rè teve omã'ẽ. Ijõvãnawerà reve rõwã ijãkãg jõvãnawerà tui. Waite tui upa. Waite ojapakwa upa. 8 Ije ve aike ikwarà pupe aa ky'y. Amã'ẽ erokwa remẽ akuwapa. “Aje ywete” a'e ky'y. 9 (Ajamã'ẽ noroja'aive Janejare'e ayvukwerà rè a'evoa rewarà rè, okusiwaokapa amãtejẽ maekwerà rè. Norokuwaive Janejare'e omojenuoka amãtejẽ ipoeraa rã rewarà.) 10 Ãmẽ aja paire orojivy oroo.

Jesu ojimojikuwaoka Maria Matarena pè remẽwarà

11 Ãmẽ ipõ Maria Matarena opyta jẽ Jesu reãgwerà renawerà pyri'ĩje'ẽ. Noikei ajamã'ẽ. Ikatu pè Jesu wãpirõ upa. A'evo remẽ ojayvy omãjã eãgwerà renawerà kwarà rè omãjã imono. 12 Ãmẽ, soõ, Janejare'e remĩgwai yvapewarà kõ rè omã'ẽ. Mõrijõ ipõ a'e pè tui. Isuky katu jome yru kõ. A'e pè Jesu reãgwerà renawerà pè katu ipõ wapy kupa upa, ikupykwerà renawerà kytyre. Ãmõ, ijãkãg renawerà kytyre wapy omãjã kupa upa. 13 A'e kõ e'i Maria pè: – Manyvo rewarà mõ põ neja'o rejupa? e'i kupa. Ãmẽ Maria Matarena e'i: – Erõvijã reãgwerà weraa kupa rewarà mõ, e'i tite. Nakuwai maty põ weraa inõ kupa, e'i tite ijupe kõ. 14 Aepo e'i paire ojirova rã'ĩ omãjã Jesu rè. Opõ'ã ijuvuri upa. Maria nokuwai ajamã'ẽ Jesu tè, [nomoa'ui rewarà mõ]. 15 Ãmẽ Jesu e'i ijupe: – Manyvo rewarà mõ põ neja'o rejupa? Ava rè põ neãgyo rejupa? e'i Jesu ijupe. Ãmẽ Maria, “Ka'a miti rè oposiko mã'ẽ teipõ”, e'i tite ijupewarà mõ. Ajawyi kee e'i kõrijõ ijupe: – Ene põ erõvijã reãgwerà neekyi eraa ike wyi? e'i tite ijupe. Emome'u ije mape põ tui. Mape põ teãgwerà neinõ, taa ipijarà mõ? e'i tite ikuwa e'ã. 16 Ãmẽ si Jesu ojimojikuwaoka ijupe ky'y. – Maria! e'i. Ameve Maria ojirova Jesu rè omãjã ky'y. – Raponi! e'i. (Juteu kõ ayvu pè aepo e'i. “Poromo'earà” jaa tè aepo e'i.) 17 Ãmẽ Jesu e'i: – Napotari emomyta rejupa, naẽive aa Papa kyty rewarà mõ. Aatà rã'ĩ ikoty, e'i. Penuu rõmõ ve Papa ekoi, e'i. Janejare'e tè a'e, e'i. A'e kyty tè aatà. Ekwa awi aepo mojenu emõmirĩ kõ pè, e'i. 18 Ameve Maria Matarena uu javo oreupe, Jesu remimo'ekwerà kõ pè. – Janerõvijã ywete rè amã'ẽ! e'i. Ãmẽ omome'u Jesu ayvukwerà oreupe.

Jesu ojisaoka wemimo'ekwerà kõ pè remẽwarà

19 Ãmẽ karumẽ orojimoaty aty tetã wyry pè orokupa, Jesu remimo'ekwerà kõ rõmõ. Jimoava 'arà okwa paire. Ajamã'ẽ tetã oroovapy Juteu jõvijãgwerà kõ wyi, orokyje iwyi kõ rewarà mõ. Ãmẽ Jesu keve ywete ojisaoka orepytery pè oreupe. Kee e'i oreupe: – Tapepy'a piryvypy katu ikõ peiko nẽ! e'i. 20 Aepo e'i paire, ojipomomojai toromã'ẽ gatu putuputuri kwarerà rè. Ãmõ, oturu momuawerà rè teve omome'u toromã'ẽ. Oreroryvay ãmẽ orerõvijã rè oromãjã. 21 Ãmẽ Jesu oporegeta mijẽ oreupe: – Tapepy'a piryvypy katu ikõ peiko nẽ! Ãwitõ Papa emuroka ike, ãwĩvo ve ije tè poromonookatà erekoa mojenuarà kõ rõmõ tapeiko ky'y, e'i oreupe. 22 Aepo e'i paire, opeju imuu orekoty. Kee e'i oreupe: – Aã Janejare'e 'Ãg peneve toiko, e'i. 23 Ajawyi eayvu rupi “awyjepa” pejẽ jane kõ aiwererà pè remẽ, Janejare'e tè aepo e'i tary ve ãmẽ ky'y. Nomo'y'ãi ijaiwererà kõ ãmẽ ee kõ ky'y. Ãwĩvo ve “awyjepa” napejẽi jane kõ aiwererà pè remẽ, Janejare'e ve “awyjepa” ne'i'ãi. Ojimo'y jẽtà ijaiwererà ee kõ iko, e'i.

Tome “aje ywete” ne'ive remẽwarà

24 Jesu ojisaoka oreupe remẽ, pe'ĩgà sikaepo natui orepyri, Tome eu ijupe mã'ẽ. Ojipupewarà tè a'e. 25 Ajawyi ajaire tè aepo oromome'u ijupe. – Janerõvijã ywete! oro'e ijupe. Ore ywete oromã'ẽ ee! oro'e ipe ijupe. Ajamã'ẽ “aje” ne'i oreayvu pè. Kee e'i kõrijõ tè oreupe: – Amã'ẽ ee remẽ tè katu kuwa “aje ywete sipõ” a'e kuwa ãmẽ, e'i. Opomoputuputuri maekwerà rè omome'u tamã'ẽ remẽ “aje ywete sipõ”, a'e kuwa ãmẽ! Apoko iputuputuri kwarerà pupe remẽ tè katu kuwa arovija. Ãmõ, ituru kwarà rè apoko remẽ tè katu kuwa ve arovija, e'i kõrijõ Tome.

Jesu ojisaoka Tome pè remẽwarà

26 Ajaire pe'ĩ semana paire, orojimoaty mijẽ sikaepo orokupa, tetã mõ wyry pè. Oroovapy mijẽ tetã. Tome ve orepyri tui ky'y. Ãmẽ Jesu ojisaoka mijẽ oreupe. Oporegeta mijẽ oreupe. – Tapepy'a piryvypy katu ikõ peiko nẽ! e'i oreupe. 27 Ameve e'i Tome pè: – Emã'ẽ putuputuri kwarerà rè. Emoige nepo ipupe esa, e'i. Eturu rè ve jẽ emoige nepo esa, e'i. “Aje rõwã ipõ” tere tite e'ã apoera mã'ẽ pè ky'y. “Aje ywete” tere ije ky'y, e'i Jesu Tome pè. 28 Ãmẽ tè tite Tome e'i: – Haa! Aje ywete sipõ erõvijã ywete tè ene! e'i ky'y. Aje ywete sipõ Janejare'e tè ene! e'i Jesu pè. 29 Ãmẽ Jesu e'i ijupe: – Ere nemã'ẽ wyi tè nejirovija ere ky'y, e'i. Ãmõ kõ, ãwisõ nomã'ẽi epe ere remẽ, ojirovija jẽ ere kupa, e'i. A'e kõ ywesõ Janejare'e remimory kõ rõmõ ekoità, e'i Jesu ijupe ky'y. 30 Jesu wyi tè mõa'ãrõwã mãrãnà jikuwa e'ãa ipojy mã'ẽ omojisaoka orerovake okasia rupi. Pe'ĩpe'ĩ akusiwa aã kareta rè ajupa. Nakusiwapai pirujẽ. 31 Ãmõ ãmõgwerà tè akusiwapa tapekuwa, “Aje ywete Janejare'e Remimuurerà tè Jesu Janerõvijã rõmõ”, tapejẽ. Ãmõ, “Aje ywete Janejare'e Ra'yry tè Jesu”, tapejẽ. Ãmẽ sõsi mãerã peikotà ikasia rupi peiko. Ijayvu rupi tè a'evotà ãmẽ peiko.

Juwão 21

Pãranã reme pè Jesu ojisaoka mijẽ remẽwarà

1 Ãmẽ aja paire Jesu ojisaoka mijẽ oreupe, wemimo'ekwerà kõ rõmõ. Karireja pãranã reme pè ojisaoka oreupe. 2 Kejõ a'e pè oroku. Simão Peturu. Ãmõ, Tome. Ojipupewarà eu ijupe mã'ẽ a'e. Ãmõ, Natanaeu. A'e Kana taa wãnà tè, Karireja yvy wãnà. Ore tè ky'y, Semeneu ra'yry kõ rõmõ. Ãmõ mõrijõ emimo'ekwerà kõ ve a'e pè tui. Mokopejõ. 3 Ãmẽ kee e'i Simão Peturu oreupe: – Aatà pira rè, e'i. Ajawyi oro'e ijupe: – Ore ve orootà nerupi, oro'e ijupe. Oroopa katu upi ãmẽ. Oroo yarà pè oropopo. A'e rupi oroo ãmẽ. Orekõ'ẽ tesõ ipe pira rè. Ajamã'ẽ orepãnẽmusu. 4 Ãmẽ kõ'ẽsĩmapa iko remẽ, Jesu tè sikaepo yy reme pè tui, ysĩ 'aryvo. Ajamã'ẽ “Jesu ipõ” noro'ei. Norokuwai, ajawyi. 5 Kee e'i imuu oreupe: – Peekyi põ pira mõ? e'i. – Ãnĩ, oro'e. 6 – Peraa awi pira mo'auta wãime inõ, e'i Jesu. Pe'ekatu kytyre ikõ peinõ nẽ, e'i. A'e pè pira peekyità, e'i. A'evo oroereko ijayvu rupi ãmẽ. Oroeraa pira mo'auta inõ yy pè. Oroinõ remẽ, py'awarà mõ pira mo'auta rè tãnẽ 'ete pira. Noromovy'ãi tesõ yarà pupe inõ. 7 Ãmẽ tè tite a'e Peturu pè: – Janerõvijã Jesu tè ãwĩvooka janerereko! a'e. Aepo a'e remeve Simão Peturu opypy oyru poko eropo eraa yy pè, Jesu koty. A'e oyru poko omopyso oposikoarà mõ mijã. 8 Ore ãmẽ yarà rupi tè oroo ikoty. Pira mo'auta oromõtã ereko. Yy reme kuipe'e sa'u tè orewyi. 100 meturu rõmõ kõrijõ tè. 9 Ajaate orovãema yy reme pè. Ãmẽ oroẽ roẽ yarà pe wyi. Ãmẽ oromã'ẽ imono remẽ, tata ojimoipotapa upa. Pira ojimii ipupe upa. Meju ve ipyri tui. 10 Ãmẽ Jesu e'i oreupe: – Eeru pira mõ age'e pepyy mã'ẽ mõ ike, e'i oreupe. 11 Ameve Simão Peturu oo pira pijarà mõ. Yarà pupe opo pira mo'auta mõtã eru, pira revejẽ, yy reme kyty. Mõa'ãrõwã pira ee. 153 rõmõ tesõ pira! Tuuwerà pawete tesõ pira. Mõa'ãrõwã tesõ ipe pira remẽ, nomokei omo'auta ajamã'ẽ. Ãmẽ pira mõ weru imii. 12 – Pejo pejimiwa, e'i Jesu oreupe. Aepo e'i remẽ, “Ava põ ene?” noro'ei ijupe, ipojy tesõ oreupe rewarà mõ. Orokuwapa Janerõvijã tè ajamã'ẽ. 13 Ãmẽ Jesu uu orepyri remẽ, meju opyy ime'ẽ oreupe, pira jimiirerà revejẽ. 14 A'evo moapy 'arà tesõ ojisaoka Jesu ãmẽ oreupe ky'y, omãnõ maire, opoera paire.

Jesu oporegeta Peturu pè remẽwarà

15 Ajaire orojimi'u paire, e'i Jesu Simão Peturu pè: – Simão, Juwão ra'yry. Aã nereirõarà kõ erauvay. Ene pa'e? Ene ywesõ põ erauvay rejupa iwyi kõ? e'i Peturu pè. – Õ'õ. Nekuwa oroauvay, e'i Peturu ijupe. Ajare Jesu e'i: – Ajawyi erima kaneiru ra'yry vo mãe kõ ikõ tereko katu ajawyi nẽ, e'i ijupe. 16 E'i jẽ Jesu ijupe: – Simão, Juwão ra'yry, “Aje ywete oroau”, ere ãmãtè põ ije? e'i mijẽ Peturu pè. – Õ'õ. Nekuwapa aje ywete oroau, e'i ijupe. – Erima kaneiru kõ awi ereko katu, e'i mijẽ ijupe. 17 Ajaire e'i mijẽ Jesu Peturu pè: – Simão, Juwão ra'yry, aje ywete põ erauvay rejupa? e'i ijupe. Moapy rõmõ tesõ e'i ijupe ky'y. Ajawyi Simão Peturu ijãgyoay ky'y, moapy rõmõ tesõ Jesu aepo e'i ijupe rewarà mõ. Ãmẽ e'i Jesu pè: – Õ'õ, pirujẽ nekuwa mã'ẽ tè ene. Ajawyi nekuwapa oroauvay, jõvijã, e'i ijupe. E'i jẽ Jesu ijupe: – Erima kaneiru vo mãe kõ ereko katu ajawyi, e'i mijẽ Jesu ijupe. 18 Aepo e'i paire, Jesu kãramõwarà rã omojikuwa Peturu pè. Kee e'i ijupe: – Kekejẽ nererekotà kupa. Nekõnomĩokyry remẽ, nejimokatupa mã gyty neotà ipi mijã, e'i. Ajamã'ẽ neka'akuwapa ky'y remẽ, neremimotarà rupi rõwã nereraatà kupa ky'y. Nepokwa 'atà tè nereraa kupa ky'y, e'i. Aje ywete aepo a'e ene, e'i Jesu ijupe. 19 Imãnõa rã tè Jesu omosã'ãga ijupe. Omome'u ijupe, manyvo e'ità tè omãnõ kãramõ. Omãnõa pe'ĩ tesõ Jesu rè ojirovija jẽtà. Nojipirau'ãi ee. A'evo ipe remẽ omoe'e jẽtà Janejare'e, jaa tè aepo e'i ijupe. Aepo e'i paire, – Ejo erupi, e'i Jesu Peturu pè ky'y. 20 Ãmẽ Peturu ojirova rã'ĩ wapekwerà kyty ere omãjã. Jesu remiau rè omãjã. (Ije tè tãmõ kõ jisyryawerà rè oroja'a remẽ, Jesu pyri'ĩje'ẽ aju maekwerà. Ije teve, “Ava põ neme'ẽtà jõvijã kõ po pè?” a'e Jesu pè maekwerà.) 21 Ãmẽ Peturu ojirova ere omãjã remẽ, e'i Jesu pè eupewarà mõ: – Wãi pa'e? Manyvotà kãramõ ãmẽ ekoi? e'i. 22 Ajawyi Jesu e'i ijupe: – Neja'a sõ ãwĩ rè. Nere kõrijõ tè eja'a, e'i. Apota sõ ãwĩ oiko jẽ remẽ, evãea pe'ĩ oiko jẽ kuwa iko. Neayvu rupi rõwã kuwa a'evo ekoità. Ejo jẽsi erupi ajawyi! e'i kõrijõ tè Jesu ijupe. 23 Ãmẽ Jesu remimo'earà kõ aepo wenu remẽ, – Nomãnõ'ãi teipõ Juwão! e'i tite eupewarà mõ kupa. Aepo jaa omojenu jenu ipe erokwa ãmẽ kupa. Ajamã'ẽ aepo ne'i Jesu. Kee e'i kõrijõ tè: “Apota sõ oiko jẽ remẽ, evãea pe'ĩ oiko jẽ kuwa iko. Neayvu rupi rõwã kuwa a'evo ekoi”, e'i kõrijõ tè Jesu maekwerà. 24 Awyjepa Jesu rekoawerà akusiwa. Juwão eu ererà pè. Jesu remimo'earà rõmõ ije aepo akusiwa imomewa. [Amã'ẽ ee maekwerà tè akusiwa. Aje ywete tè Jesu e'i ipi.] Aje ywete tè ijayvukwerà.

Kareta moawyjepaa

25 Wãisõ iteetejẽ Jesu wereko. Pirujẽ sõ jakusiwapa remẽ, mape nijainõma'ãi kuwa kareta jikusiwarerà kõ ky'y! [Awyjepa ãmẽ eremikusiwarerà ky'y.]