1

1 Lëj-lëshcapëni, caj-cani amumui bëshëë dulatati, Buibuja tütüya. Latija tütü lëttai Diostina. Atija emejmesh Dios lacha. 2 Cani dulatatijsha lana elle, ati Buibuja tütü lëttai Diostina. 3 Ati Buibula Diosja dula amumui bëshëë. Ati Buibu nijtata, lëttamash bëshëë nij-nijtashtaychi. 4 Latija limli huinani mambë lana elleibëshëu. Ati limli mambëjbëshëja pu muta mashinojshei. 5 Atija pu cutajti aishëhuë. Ishëhuëja nij-nish caliba cansiyaniti ati pu tajbëshë. 6 - 7 Diosja bache lëtta shunñe Juan imaccatajbëshë calanirirështa-tila ati pu tajbëshë achaya lati mandyujuti, canleleshtau-tila mammui. 8 Juanja nish ati pu tajbëshë. Latija amala mandyujush-ta-tila ati emejme pu tajbëshëla. 9 Ati emejme pu tajbëshëja huitaja pu muta mammui lana elleibëshëu. 10 Ati Buibuja Dios aBonto Jesucristo. Latija huitaja huinani lana ellei. Diosja dulatijsha ana elle aBontola, lati manhuitati, elleibëshëuja nish iyepeu. 11 Aeme aelechi huitatijsha, aeme aaptauja ibisau. 12 Lachamatijsha, huilalaya canlelejbëshëu, Diosja asse mambëjti. 13 Atiuja emejmesh Dios asseunaja. Nish Dios asseu naa lëmmui matataujsha sehuej-bëshëu. Dios asseu naa latija asse mambëtila. 14 Ati Buibu, naa Jesucristoja, shunñej malaja tuhuinani tamujumujui lana ellei. Latija taj-tahuilalatila, emejmesh tandyuju aj-amashitila Dios yoccoshej-bëshë. Bëjtatu emej-emejmejbëshë naa aTata Diosja lachuta ibëbëtila naa latijtija lëttatila aBonto. 15 Juanja huitaja mandyujuja aaptau ashmuta Jesusla: “Ati pandyujuija ashputai, naa sëëjsha limiye amalashtajbëshëja maj-mappëlëlë sëëjsha, naa latija tütütila cani sëë sehueiti putai” muta. 16 Latija taj-tahuilalatila, yitash tambë, tambë chajti. 17 Shij-shinama Diosja teremtë ibëbë abuibu Moisesshama47 naa amashcuta imbëtëya ibaautila aaptau Dios cancuccuntaya. Lachamatijsha, tishilë Diosja tancütchenaja tuhua naa maj-mapacca tahuilalatila, tambache aBonto Jesucristo tandyujushtatila abuibu yoccoshejbëshë. 18 Lëttamash nij-nish bëjtala Dios. Dios aBontojti naa emejmesh lëttai aTata cutütüj-bëshëjtija tandyujuja iyepe tambënaja naa amashitila Dios. Latija emejmesh Dios. 19 Judiu mabuitau Jerusalen-bëshëuja mabacheuja sacerdoteu, Moisesshama ateremtë maileumaj-bëshëutina cuiteya Juan ‘¿tëj-tëtëjbëshëmchi mëë?’ cutashtau-tila. 20 Latija nish ashihuamash emejmesh pujti mandyujuja ashmuta: “Sëja nish papuchachajbëshëi bëti ‘pambacheshti’ puta Diosse” muta. 21 Latijsha cuiteteu yosse: “Atila ¿tëj-tëtëjbëshëmchi? ¿Cusuti Dios abuibutebe Elias-shamam mëë?” cutau. Juanja ‘nijtala’ mutati, cuiteteuja ashcutause: “¿Cusuti naa Dios abuibutebe amalashtajbëshëm mëë?” cutau. Latija ‘nij-nijtala’ muta. 22 Latiuja ashcutau yosejse: “¿Achuta dyajuya, tëj-tëtëjbëshëmchi mëë? Tandyujuma lacha achaya mandyujuntu naa tabachejbëshëu. ¿Tëtëjbëshë tandyujutambë mëëla?” cutau. 23 Juanja ashmuta: “Bëjtap, Dios abuibutebe Isaiasshamaja teremtë shinama: Lëtta malidyajudyajbëshëja huitaya ashmuitatashta pampachi, ‘lidulachap püü tüm cuta taBuita amalashtajbëshë atebeni’ muitatashta. Sëja ati malidyajudyajbëshëi” muta. 24 - 25 Latijsha naa fariseou mabachejtiutija cuiteuja ashcutause: “Achuta nish tapuchachaj-bëshëm, nish Elías, latijsha nish Dios abuibutebem chamamtijsha, ¿ëshë malasamamchi taaptau?” cutau. 26 Juanja ashmuta: “Sëja masamajti sammala. Lachamatijsha, pamujumujui puhuinani lëtta naa nish iyepejtipti. 27 Latija amalashta limiye sëëjsha. Sëja nish tëile camanhuerejhuentai aabarcau-tijsha naa latija mappëlë emejmelëtila sëëjsha” muta. 28 Anuta mandyërërë Juan judiutina pueblo Betaniai, naa samma Jordán achittuchi, naa puini liottojtitchi. Atchi Juanja malasamajti abuibu canlelejbëshëu. 29 Anumajshula, Juanja bëjtaja Jesús amalati, ashmuta cuhuinanijbëshëu: “¡Pijalidepu! Anajajtinaja naa Dios bachejtiti. Atija chama corderoshcuta tuhuiya, mancuhuështa lana elleibëshëu maënnëtë. 30 Ana pandyujuija ashpuitatai ushta, naa ‘sëëjsha limiye amalashtajbëshëja maj-mappëlëlë sëëjsha, naa latija tütütila cani sëë sehueiti’ puitataija. 31 Sëëtijsha nish tëile ushta amajajtitila. Lachamatijsha, sëja malasama amalai achaya judiuja iyepechau lati mutaitila” muta. 32 Latijsha Juanja mandyujuja naa libëjtajtiti ashmuta: “Bëjtai Dios aEspíritu Santo canshoptoja ashaajsha choponi-shcuta shopto shopto amalaja canhuitati Jesús. 33 Sëëtijsha nish iyepei lacha ushta. Lachamatijsha, tibachejbëshë, naa ‘masamacham’ tëtajbëshëja, tindyujuja ashtëta: ‘bëjtaya Espíritu Santo canshop-toya cutütüti, atija mambacheshta aEspíritu Santo canlelejbëshëu’ tëta. 34 Sëja bëjtaitila emejmesh titantila, anëri naa latijajtitila Dios aBonto” muta. 35 Anumajshula, Juanja tütü yosse lati lëshie aëshëtautina. 36 Bëjtaja Jesús malati ashmuta: “¡Pijalidepu! Anajajtinaja naa Dios tambachejtiti chama lëtta corderoshcuta” muta. 37 Aëshëtauja lëshieujcha calahuëshëuja naa Juan mandyujuti, cubaliu Jesús achiila. 38 Jesusja pishitaja mabëjtaja cumalauti ashmuta: “¿Tëtëjbëshë bëbëpchi?” muta. Latiuja ashcutau: “Buita, ¿amchi tütüm mëë?” cutau. 39 Jesusja ashmuta: “Piama baitu achaya tibëj-tachap” muta. Shëhuështati cubaliuja bëjtau Jesús naa amchi tütütila. Latchi cutütüuti mashëhuë latiji. 40 Lëtta naa Juan calahuëshëja Jesús achiila cumalajbëshëja imaccata Andrés. Atija Simón Pedro apaa. 41 Andresja canimash atta bëshëë nish dulamash, malaja libëbënija apii ashcuta: “Bëjtatunaja tapuchachaj-bëshë Cristo, naa Mesías cutatijtiti” cuta. 42 Latijsha Andresja camla apii Simón naa Jesús litütütchi. Jesusja bëjtalëja ashcuta: “Mëja Simón, naa Jonás abontom. Lachamatijsha, sëja mëlimaccatashtinaja Cefas” cuta. (Cefas taya, Pedro tajtiu) 43 Anumajshula, Jesusja cuimaluma malaniti departa-mento Galileachi. Latchi decheja Felipe ‘tëma sëë’ cuta. 44 Felipeja pueblo Betsaidai-bëshë. Pedroja, Andrestina latchi bëshshëu lacha. 45 Latijsha Felipeja libëbënija Natanael ashcuta: “Dechetunaja tapuchachaj-bëshë, naa bëti dyajuja teremtë shinama Moisesshamase, latijsha bëti dyajuja teremtëu lacha Dios abuibutebeshamause. Atijajti-naja naa José abonto Jesús naa pueblo Nazaretshajbëshë” cuta. 46 Natanaelja ashcuta: “¡Amaja yitajbëshë shunñeja ottoshta ati pueblojsha!” cuta. Felipeja ashcuta: “Amalaya, liujanimapu” cuta. 47 Jesusja bëjtaja amalati Natanael ashta: “Amalanaja naa emejmesh Israelbëshë, naa nish ashij-ashiuhuajbëshë” ta. 48 Natanaelja ashcuta: “¿Amaj-amashcuta tinnepemchi?” cuta. Jesusja ashcuta: “Canimash Felipe ‘baitu’ mëtati, sëja mibëjtai cummë higu ajanai tütümti” cuta. 49 Natanaelja ashcuta: “Buita, yoccoshemash mëja Dios aBontom latijsha Israel-bëshëu maBuitam chamam” cuta. 50 Jesusja ashcuta: “Leletim mëë naa ‘cummë higu ajanai tütümti mibëjtai’ mëtaitila. Lachamatijsha, mappëlë bëj-bëmëlë bëshëë yitajbëshë bëjtashtambëla anajsha” cuta. 51 Jesusja ashmutabëla lati massëjbëshëu: “Yoccoshe pandyujui naa paaja bëjtashtap ashaa sëhuëjtati, Dios aángeleu idandumau, ishoptumau chamauti Shunñej Malajbëshë48 adojoi” muta.

2

1 Jesús tütüti lëshie puini ati pueblo Caná, naa departamento Galileai, lëtta shunñe aaptauja dechetauja lijashudyeu abashtishtatila. Jesús amemeja tütü lacha lati. 2 Mandyuju lacha Jesús, aëshëtautina achaya amalachau mutautila. 3 Latijsha mampëlë dëppë enseuti mabinu, Jesús amemeja ashcuta: “Tibonto, pëlënaja mabinu” cuta. 4 Jesusja ashcuta: “Meme, ¿ëshë tindyujumchi achuta? Bëjtam, cani huitabë sëë titupu” cuta. 5 Amemeja ashmuta binula malihuajajbëshëu: “Dulachap amumui naa lati lipandyujutishcuta” muta. 6 Judiuja tëptëtëjtiu bëmëjuta achaya ‘achuta dulaya, cancuccuntu Dios’ tajtiutila, naa lachuta Moises-shama ateremtëja mandyuju-tila. Atila, malattatau seisti matatumau ëshshëj uriyau masamatebeniu. Lëtta uriyai yupajti cincuentatti, cusuti sesentatti litro cuta. 7 Jesusja ashmuta yanaujnau: “Mapujachechap uriyau sammala” muta. Latijsha cürüs mapujachelëuti, 8 Jesusja ashmuta: “Codoya, cajambalichap fiesta ayurujare” muta. Latijsha lachuta dulau latiji. 9 Fiesta ayurujareja chihua ati samma binuj malajbëshë nish cailetijsha amajsha codoutila. Lachamatijsha yanaujnajtiuja maile. Latijsha fiesta ayurujareja cancamaja abashtishtajbëshë ashcuta: 10 “Mammui liushalë malahuajajajtiu binu emejmelëj-bëshëla. Latijsha enseya shinoj-touti, malihuajajtiu latiji binu chalmamash cuccujbëshëula. Lachamatijsha, mëja mattamja malahuajajam binu cuccujbëshëula fiesta lijatoroshtatchi” cuta. 11 Ana limambuitajbëshë dula Jesús, lij-liushalë dulaja. Aticcai mancütche Canaibëshëu naa latija calij-calibatila dulaniti amumui bëshëë. Aëshëtauja bëjtauja, canleleu latiji. 12 Latijsha Jesusja mala pueblo Capernaumchi, ameme, abisiu, aëshëtautina cuta. Nish maamti massëu atchi baliuja. 13 Judiu mafiesta Pascua atupunishiti, Jesusja mala Jerusalenchi. 14 Dios aSibëi yupalëja, mabëjta abendejbëshëu malabendeuti matibau huajjau, ohuejou, choponiu cuta. Mabëjta lacha podejpo ajambiajbëshëu tübbaliuja mamesai, podejpou malajambiauti. 15 Atiu mabëjtaja Jesusja madula biyistau. Latijsha maotche latiji mammui shunñeu, matibautina Dios aSibëjsha. Podejpo malajambiajbëshëu mamesau mamalampërucheja, mamalajarara mapodejpou. 16 Jesusja ashmuta choponiu malabendejbëshëu: “¡Pimapu anajsha ana choponiu! ¡Bëshëë bendetetebe-shcuta pibbëyu tiTata aSibë!”49 muta. 17 Latijsha Jesús aëshëtauja cuhuëshëtëu buibu naa shinama teremtëtëjbëshë. Ati buibuja ashta: “Mapacca tëtojotila miSibë, Tata, tidyoljti anuta imbëtëuti mabëjtaija” ta. 18 Judiu mabuitauja ashcutau: “¿Tëj-tëtëja mindyujuti majoccom atiu? ¿Tëtë litambuitaj-bëshë tancütchemti tailetabë ëshë anuta adulamtila?” cutau. 19 Jesusja ashmuta: “Amumui dëppë chittapti ana Dios aSibë, sëja tiihuilëti lidulashti” muta. 20 Judiuja ashcutau: “Cuarenta y seis añoti mansaya ushta ana sibbë dulauti. ¿Amashcuta lidulashtamchi mëë lihui puinilëti?” cutau. 21 Lachamatijsha, Jesusja nish mandyuju Dios aSibëla. Latija dyaju aeme adojo, naa tuhuiya, lihui puinilëti lilimtashta-tila. 22 Atila, Jesús tuhuija lilimtati, aëshëtauja huëshëtëu latiji naa limandyujujtiti ushta Dios aSibëla. Atila, canleleu Dios ateremtë latijsha canleleu naa Jesús limandyujujtiti lacha. 23 Jesús huinaniti Jerusalenchi, naa mafiesta Pascua atuputi, bëj-bëmë bëjtauja canleleu naa limambuitajbëshë adulati. 24 Lachamatijsha, Jesusja nish mudye naa mannepetila mammui naa amashiutila. 25 Lëttamash nish candyujutijsha, Jesusja amanchijsha caj-caile iyepe mammui majuimalumata.

3

1 Tütü lëtta shunñe judiu mabuita imaccata Nicodemo. Latija fariseo. Ati fariseouja aduj-adulantajtiu naa Moises-shama ateremtë limandyujuti-shcuta. 2 Nicodemoja liujanija Jesús numma ashcuta: “Buita, tailela Diosja mibache-tila naa tuhua tandyujushtam-tila. Bëjtatu lacha limambuitajbëshë adulamti. Lëttamash nish calibala dulaniti ati limambuitajbëshë naa taTata Dios nish caliba dula ibëbëti” cuta. 3 Jesusja ashcuta: “Yoccoshe mindyujuila, naa lëttamash nish calij-calibashtala yupaniti Dios limabuitashtatchi, naa nish linsehuesëtëya” cuta. 4 Nicodemoja ashcuta: “¿Amashcuta lëtta shunñeja cansata shuñeya, sehuetabë yosse? ¿Amaja ameme asoptochi yupaya sehueshta yosse?” cuta. 5 Jesusja ashcuta: “Yoccoshe mindyujuila, naa nish sehuejbëshëja sammala latijsha Espíritu Santola cuta, nish calij-calibashtala yupaniti Dios limabuitashtatchi.50 6 Tatataula sehueya, limlitijti lana ellei, lachamatijsha, Dios aEspíritu Santola sehueti, limli ibëbështa tashinojshe apënnëtë. 7 Limimbuitayu naa limindyujuiti naa maj-mammui linsehuesëtëya ibaaula. 8 Calahuëshëjtim yushë calantata amalati. Lachamatijsha nish mëilejti amajsha amalatila latijsha amchi batatila. Lachuta nish mëileshta lacha amashcuta Espíritu Santoja sehue mambëjti-tila Dios canlelejbëshëu” cuta. 9 Nicodemoja ashcuta: “¿Amashcuta imbëtëya, achuta imbëtëtaybë?” cuta. 10 Jesusja ashcuta: “Mëja judiu mabuitamtijsha, ¿amaj-amashcuta nish mëilechi naa tishilë limindyujuiti? 11 Yoccoshe mindyujui, tuhuaja tandyërërëjti naa litailejtiti latijsha naa libëjtatijtiti pandyujutu chatijti. Lachamatijsha, paaja nish leletijtip naa lipandyujututi. 12 Paaja nish tinleleya lana elleibëshëla pandyujuja, linsata nish leletishtap pandyujuja ashaachibëshëla” cuta. 13 “Sëë, Shunñej Malaj-bëshëija ashaajsha amalaija, huilitashti yosse latchi. Lëttamash attaja nish caliba adulaniti anuta. 14 Moisesshamaja dula mambë aaptau lëtta broncej huohuore shinama pampala huinanija. Bëchuta ati huohuore cummëi pëjpëja pëjta pampaise, lachuta pëjpështau lacha Shunñej Malajbëshë curushai, 15 achaya naa canlelejbëshëuja limlishtautila maj-mapënnëtë” cuta. 16 “Diosja maj-mapacca mahuilalatila elleibëshëu, bache aBonto lëttatijsha lana ellechi tuhuishtatila mammui madojola achaya naa aBonto canlelejbëshëuja nish shamamash limlishtautila maj-mapënnëtë. 17 Diosja nish mambache aBonto lana elleibëshëu benebenesh mambështatila. Mambache achaya puchuchau mammui mutatila. 18 “Diosja nish benebenesh mambështa aBonto canlelejbëshëu. Lachamatijsha, nish canlelej-bëshëu cansata madyajunaja benebenesh imbëtështautila naa Dios aBonto nish canleleutila. 19 Pu tajbëshë huitatijsha lana ellechi, aishëhuëja mappëlë mancucculë shunñeu achaya ‘nish tabëjtachau ënnëtëj-bëshë lëdulalatijtiti’ tautila. Atila, Diosja benebenesh mambështala naa nish majusutila canleleniuti. 20 Naa ënnëtëj-bëshëjtija adulajbëshëja nish cusujti ottoniti apu tachi achaya ‘nish cüttacha naa ënnëtëjbëshë lëdulalajtiti’ tajtitila. 21 Lachama-tijsha naa yitajbëshë adulajbëshëja cusujti apu tai huinaniniti achaya ‘tibëjtachau naa Dios lijancuccuti-shcuta huinanitila sëë’ tatila” cuta Jesusja Nicodemo. 22 Latijsha Jesusja aëshëtau-tina mala departamento Judeachi. Latchi tütüuja malasamau Dios canlelejbëshëu. 23 Juanja malasamajti lacha pueblo Enonchi, naa samma lij-libëmëtchi. Enonja latilëi pueblo Salimchi. Bëmë calihuihuiumauti, Juanja malasama naa abuibu calahuëshëuja canlelejbëshëu. 24 Anuta adulajti Juan cani carcelchi yupapauti. 25 Peshe Juan aëshëtauja lijunsëtëu lëtta judiutina amashcuta imbëtëya nish iënnëtëtabë Dios atantijula tau. 26 Latijsha Juan aëshëtauja baliuja ashcutau: “Buita, bëtija mëtütü ushta Jordán achittuchise, bëti tandyujumja ashtutam ushtase, atija huitaja malasamati, cuhuinaniunaja mammui” cutau. 27 Juanja ashmuta: “Lëttamash nish caliba catütüniti lëttamash bëshëë, Dios nish cancayati. 28 Paaja tëlëhuëshëp ushta emejmesh pujti pandyujuiti ‘sëja nish papuchachaj-bëshëi’ putaiti. Lachamatijsha, Diosja tibache sëë liushalë, canimash huitati tapuchachajbëshë. 29 Bëjtap, abashtishtajbëshëja catütüjti adyaujtitta. Ati achee, naa dap cussëjbëshëja, calahuëshëya candyërërëti, lijashudyejti. Achutashcuta sëja maj-mapacca lijashudyeinaja Jesús bëjtaija ati cuhuinaniutila mammui. 30 Latija maj-mappëlë buj-buitalë buitalë batabëla. Lachamatijsha, sëja chalmalë buita buita batai” muta. 31 Naa ashaajsha amalaj-bëshëja mappëlëlë mammuijsha. Elleibëshëja cuimaluma, candyërërë chajti lana elleibëshëj-tila. Lachamatijsha, ashaajsha amalajbëshëja cailela amuj-amumui. 32 Latija anërijti naa libëjtati naa lëhuëshëti cuta. Lachamatijsha, lëttamash nish canlelejti. 33 Lachamatijsha, leletijbëshëja cütchejti naa Dios abuibuja yoccoshejbëshëtila. 34 Naa Dios bachejtiti, atija calanëri Dios abuibu naa Diosja maj-mapacca cancayatila aEspíritu Santo ajümata. 35 Diosja huilaj-huilalatila aBonto, amuj-amumui bëshëë abuita ibëbënaja. 36 Naa Dios aBonto canlelejbëshëuja limlishtau maj-mapënnëtë. Naa nish canlelejbëshëuja nij-nish batau Dios litütütchi. Diosja benej-benebenesh mambështa latiji atiu maj-mapënnëtë naa nish majusutila canleleniuti aBonto.

4

1 Fariseouja ahuëshëu naa Jesusja malasamati bëmëlëu Juansha latijsha Jesús cuhuinanij-bëshëuja bëmëlëu chamautila. 2 Lachamatijsha Jesusja nish masamajti. Aëshëtajtiuja malasamajtiu leletijbëshëu. 3 Jesús caileti naa fariseouja idyajudyauti, mala departamento Judeajsha huilitashtatila Galileachi. 4 Naa Jesús libatati püüja mala departamento Samariala. 5 Samariala malaja, huita lëtta pueblo Sicar imaccatajbëshëi. Sicarja latilëi ati cucculë naa Jacobshama lijancayajtitchi shinama abonto Joseshama. 6 Shunshatati huita Jesús naa ëuhuëtë naa Jacobshama liëuhuëjtiti shinama asamatebeni. Jesusja eta huitaja tütü lati ilaulashtatila. 7 - 8 Aëshëtauja baliu chata bëbënishtautila pueblochi. Latiu calabalilëuti, huita lëtta yee pueblojsha isamashtatila. Jesusja ashcuta: “Tincodoma samma achaya enseni” cuta. 9 Judiuja, Samariajshabëshëu-tina nish euchetajtiutila, yeeja ashcuta: “¿Amashcuta mëja judium-tijsha, tëitemchi samma, Samariajshabëshëitijsha sëë?” cuta. 10 Jesusja ashcuta: “Mëileta mëë naa Dios limincayantajtiti latijsha mëileta lacha naa amaja mëitetila samma, mëja cuitemyachi lati. Latijsha latija mincayaychi samma limlijbëshë” cuta. 11 Yeeja ashcuta: “Buita, bëjtam, ëuhuëtëja imuju latijsha bëshëëtijsha nish catütüm chamam puunimti samma. ¿Amashcuta tincayantamchi sëë samma limlijbëshë? 12 ¿Amaja mëja yij-yitalëm tatata Jacobshama naa ëuhuëtë litancayajbëshëjsha? Bëjtam, latija ensejti ana samma shinama abontoutina latijsha atibau mannesëjti lacha anai” cuta. 13 Jesusja ashcuta: “Ana samma ensejbëshëja asamtishtabëla. 14 Lachamatijsha, naa samma sëë lijancayashtajtiti enseya, nish asaj-asamtishta latiji. Ati sammaja ashinojshei chuj huojtoya, limli ibëbështa apëj-apënnëtë” cuta. 15 Yeeja ashcuta: “Buita, tincayacham ati samma achaya nish tisamticha yosse achaya nish iyamaluni anchi samma pushtaya” cuta. 16 Jesusja ashcuta: “Cancamaniya camalacham mibba” cuta. 17 Yeeja ashcuta: “Nish abbai sëë” cuta. Jesusja ashcuta: “Yoccoshe tindyujumla, ‘nish abbai sëë’ tëtamja. 18 Achuta cincuttiu malasamtinaja mibbause naa tishilë cuhuinanijtimti nish mieme mibbanaja. Yoccoshe tindyujumla” cuta. 19 Yeeja ashcuta: “Dios abuibutebemya mëë. 20 Shinama tappëshamauja dechetaya ana mororonñui lijashudyejtiu taTata Dios. Lachamatijsha, paa judiup ashtajtip ‘tammui baliya lijashudyentu Dios Jerusalenchi’ tajtip” cuta. 21 Jesusja ashcuta: “Tishoja, tëlëhuëshëcham consono naa limindyujushtajtiti. Ñuñujulë bannanaja lëttamash nish amalaya lijashudyeshtatila Dios ana mororonñuchi, Jerusalenchi malaya lijashudye nish chashtanaja. 22 Paa nish pailejti ama lijashudyeptila. Lachamatijsha, tuhua naa judiujbëshëtu tailejti ama lijashudyetijtitila. Bëjtam, tuhua taaptaula Diosja mapuchacha naa canlelejbëshëu. 23 Huitanishinaja atupu. Cansata tishij-tishilënajala naa Dios emejmesh yoccoshe canlelejbëshëuja lijashudyeshtau-tila emejmesh mashinojsheimala. Anuta cusu taTata Dios lijashudyentuti tashinojsheimala. 24 Diosja shinojshe, nish idojo, nish cütta chamatila, cusu lachuta emejmesh yoccoshemash tashinojshela lijashudyentuti aEspíritu Santola” cuta. 25 Yeeja ashcuta: “Tëile lacha sëë naa tapuchachajbëshë Cristoja amalashtatila. Atija huitaya, tandyujushtala amumui ati bëshëëla” cuta. 26 Jesusja ashcuta: “Bështam tishilëse, lati sëëla” cuta. 27 Lati mandyërërë massëuti, huilitau Jesús aëshëtau pueblojsha. Bëjtauja limambuita Jesús cudyërërëtila ati yee. Lachama-tijsha, lëttamash nish cusu cuiteniti yee tëtëjbëshëja cusutila. Nish majusu lacha cuiteniuti Jesús tëtëjbëshëla mandyërërëtila. 28 Latijsha yeeja auriya tütaja, malaja mandyujuni pueblochi-bëshëu. Latchi huitaja ashmuta: 29 “¡Amalaya lipiujanipu lëtta shunñe! ¡Latija tindyuju amumui naa sëë lëdulalaiti! Cusuti neintaya anajajtilabanaja tapuchachajbëshë” muta. 30 Latijsha mammui amalauja canhuihuiu Jesús. 31 Cani huihuiuti, aëshëtauja ashcutau Jesús: “Buita, chemashima lachabë” cutau. 32 Jesusja ashmuta: “Sëja catütüi chata, naa chata paa nish cuibaliumajtipti” muta. 33 Aëshëtauja mandyërërëja latitilijti ashtau: “Neintaya cajammalaulaba chata” tau. 34 Jesusja ashmuta: “Tibachejbëshë lijancuccuti-shcuta adulaya, atijajti sëë tichata. Tijusubëla amumui timpëlë dulaniti, naa tiTata litindyujujtiti. 35 Paaja ‘lëpsha shuhui bannabëla mapuniuti ballatau masau’ tëtap. ¡Nijtala! Pimalidepu, naa ñesseu matupunaja mapuniuti. 36 Bëchuta ñesse ayurujareja malichejti asahuatatebeuse, lachuta sëja malicheshti lacha naa tinsahuataj-bëshëu. Naa masau mapujtipti tütüshtaula mapënnëtë achaya naa iñesejbëshëuja, mapujbëshëutina lëttai lishudyeshtautila. 37 Yoccoshela ana buibu: ‘Lëttaja iñese, attaja mapu chajtiu.’ 38 Sëja pabachei paa mapuchau putaitila nish iñeseptijsha. Attimau ushta iñeseutijsha, paaja nish pupënimash catütüshtapnaja ñesse asaa” muta Jesús. 39 Bëmë naa pueblo Sicarshaj-bëshëuja canleleu Jesús naa yee mandyujuja ‘amumui naa lëdulalaiti tindyujula’ mutati. 40 Atila, Samariajshabëshëuja canhuihuiuja Jesús, ‘tutütüma-shima lachabë’ cutauti, cashie mutütü latiji. 41 Bëmë pesheu canleleubëla Jesús calahuëshëuja naa limandyu-juti. 42 Latijsha ashcutau yee: “Mëëla leletituijla. Lachama-tijsha, mappëlë leletitubëla naa emejmesh taemeja calahuëshëtu-tila. Tishilë tailenajala naa anajajtitila tammui lana elleibëshëtu tapuchachajbëshë” cutau. 43 Cashie mutütüja Samariai-bëshëu, Jesusja mala Galileachi. 44 Jesusja ashta: “Attajshaj-bëshëu yitash mambëutijsha Dios abuibutebeu, maeme maaptauja nish malahuëshëntajtiu” ta. 45 Lachama-tijsha Galileachi manhuitati, aaptauja emejmesh lishudye bëjtau, naa bëjtautila ushta naa lëdulalati Jerusalenchi, baliuja fiesta Pascua atupui. 46 Latijsha Jesusja huilita pueblo Canachi, naa samma binuj libbëtchi ushta. Ati tütü lëtta buita. Aëtëjñuja caladeche tütü pueblo Capernaumchi. 47 Ati buitaja ahuëshëja Jesús huitati Judeajsha Galileachi liujanija ashcuta: “Buita, tëmalacham tisibëchi achaya tindyajujacham tiëtëjñu. Tuhuishtanaja” cuta. 48 Jesusja ashcuta: “Paaja nish bëjtaya lipambuitaj-bëshë dulaja, nish tij-tinlelejtipla” cuta. 49 Shunñeja ashcuta: “Buita, tëmmalamashi lachabëla canimash tuhuiti tiëtëjñu” cuta. 50 Jesusja ashcuta: “Huilitama misibëchi. Adyaju-naja miëtëjñu” cuta. Latijsha shunñeja leletija naa Jesús lijandyujutishcuta, mala latiji asibëchi. 51 Huitanishiti asibëchi, ayanaujnauja lijantünniuja ashcutau: “Buita, adyajunaja miëtëjñu” cutau. 52 Latija muiteja ashmuta: “¿Amajshija adyajuchi?” muta. Ayanaujnauja ashcutau: “Shëëi elelëtëti calamla aushuri” cutau. 53 Atataja huëshëtë naa latijshija Jesusja ‘adyajunaja miëtëjñu’ cutatila. Latijsha latija amumui abashtitina, asehueutina cuta canleleu Jesús latiji. 54 Lëshiejuta dulanaja Jesús limambuitajbëshë departamento Galileai, Judeajsha huilitaja.

5

1 Latijsha atta judiu mafiesta atuputi, Jesusja mala yosse Jerusalenchi. Ati ciudadja ëshshëula icercu amumui ashëlila. 2 Ati cercu lëtta apillëtëi yupatajtiu matibau ohuejoutina. Atila ‘ohuejou mapillëtë’ cutajtiu ati pillëtë. Ati pillëtë nachimash tütü lëtta matata madula sammatebe, hebreou mabuibula ‘Betzata’ cutajtiuti. Ati ëuhuëtëi libejti bëmë samma. Ati sammatebe ashëlila tütüu lëpsha mahuënnëtëtebeu, sammatebe amujumujui malajbëshëtina cincutti amumui. 3 Ati mahuënnëtëtebei bëj-bëmë pebbalijtiu maladechejbëshëu, sabantantiumau, ënnëtësh imaltumau, litojbëshëu cuta. Latiuja cantütüjtiu samma nomenomecha cutaya. 4 Cajtüttaya lëtta angelja shoptoya nomenomesh ibëbëjti samma. Lati nomenomelëti, naa liusha yupajbeshëja sammai adyajujti, yancala dojjo dechetijsha. 5 Lëtta shunñe treinta y ochotti año caladechejbëshëja bushu lacha lati. 6 Jesusja bëjtaja caileti naa huij-huillë caladechetila ati shunñe ashcuta: “¿Mijusu adyajunimti?” cuta. 7 Caladechejbëshëja ashcuta: “Buita, nijta lëttamash litintoyoya litishopcheniti samachi, naa samma nomenomelëti tati. Lij-lidelentaja, attaja tibense liushalë lidelejti” cuta. 8 Jesusja ashcuta: “Tëssabataya, miyoyoto dulataya, malama” cuta. 9 Jesús ashcutalëti, shunñeja tishilëjti adyajuja, ayoyoto dulataja, huinani latiji. Anuta imbëtë judiu malaulatabai. 10 Atila, judiu mabuitauja ashcutau adyajujbëshë: “Bëjtam, tishilënaja talaulataba. Atila nish mëliba achuta cahuinaninimti miyoyoto” cutau. 11 Latija ashmuta: “Tidyajujajbëshëja ‘dulataya miyoyoto, malama’ tëta” muta. 12 Latiuja ashcutau: “¿Aa mindyujuti dulam achuta?” cutau. 13 Lachamatijsha naa adyajujbëshëja nish caile amaja dyajujatila. Bëj-bëmë dyemedye huinaniutila, nish bëjta Jesús malati. 14 Latijsha Jesusja decheja Dios aSibëchi ashcuta: “Bëchuta adyajumnajase, sëlu ënnëtësh imbëtëyunaja. Neintaya mappëlë ëj-ënnëtëlësh limëlëdechetajse” cuta. 15 Latijsha shunñeja malaja mandyujunija judiu mabuitau, “Jesusja tidyajuja” muta. 16 Atila, judiu mabuitauja cuibaliumau benebenesh ibëbëniuti Jesús naa madyajuja-tila maladechejbëshëu malaulatabai. 17 Lachamatijsha, Jesusja ashmuta: “TiTataja adulajti yitajbëshë tishilëccachi. Atila, lachuta adulaya ibaai lacha sëë” muta. 18 Naa Jesusja adulajtitila limambuitajbëshë malaulatabai,51 latijsha “Dios sëë tiTata, sëja Dios lacha” tajtitila, judiu mabuitauja boj-bobontau. 19 Jesusja ashmutabëla judiu: “Yoccoshe pandyujui naa sëja, Dios aBontoitijsha, nish tëliba adulaniti lëttamash bëshëë timanchijsha. Naa tiTata lidulajtiti bëjtaya, atijtija dulajti sëë. Amumui naa tiTata lidulajtiti, lachuta cürüs adulajti lacha. 20 Diosja tihuillatila sëë, tincütche amumui naa lati adula. TiTataja maj-mappëlë tincütcheshtabëla bëshëë achaya paaja bëjtaya lipambuitashtatila. 21 Bëchuta tiTataja limalimlëjti shamaj-bëshëuse, lachuta sëja limalimlështi lacha naa limalimlështajtiti. 22 - 23 TiTataja nish ‘anajajti yitajbëshë, anajajti ënnëtëjbëshë’ nish tashta. Latija tidyaju sëë madyajushtitila amajajtiutila yitajbëshëu, ennëtëjbëshëu cuta achaya mammui emejmesh tëitatashtautila naa tiTata emejmesh lijuitatajtiuti-shcuta. Naa sëë ënnëtësh tëitataj-bëshëuja ënnëtësh cuitatau lacha tiTata, naa sëë tibachejbëshë” muta. 24 “Yoccoshe pandyujui naa tibuibu calahuëshëu latijsha tibachejbëshë canleleu chaj-bëshëuja limlishtaula maj-mapënnëtë. Diosja nish benebenesh mambështa atiu naa matuhuitajsha puchutila. Atiuja lijanleleuticcashbache limliunaja mapënnëtë. 25 Yoccoshe pandyujui, tishij-tishilë naa mashinojshei shamajbëshëuja calahuëshështautila Dios aBonto muniriti. Canlelejbëshëuja limlishtau mapënnëtë. 26 Bëchuta Diosja limli amanchijshase, lachuta amanchijsha limli ibëbë lacha aBonto. 27 Diosja lachuta candyuju aBonto madyajushtatila amajajtiutila yitajbëshëu, ënnëtëj-bëshëu cuta, naa latija Shunñej Malajbëshëtila. 28 - 29 Lipipam-buitayu naa lipandyujujtiti. Ñuñujulë bannanaja shamaj-bëshëuja calahuëshëya Dios aBonto muniriti, lilimtaya ottoshtautila naa lipebbaliutijsha. Naa yitajbëshë adulajbëshëuja lilimtashtau limlishtautila mapënnëtë. Naa ënnëtëjbëshë adulajbëshëuja lilimtashtau lacha benebenesh imbëtështautila mapënnëtë” muta Jesús. 30 Jesusja ashmutabëla: “Sëja timanchijsha nish tëliba adulaniti lëttamash bëshëë. Emejmesh madyajushti amajajtiutila yitajbëshëu, ënnëtëjbëshëu cuta naa tiTata litindyujutishcuta. Nish adulai litijusutishcuta. Amumui adulai naa tiTata tibachejbëshë lijusutishcuta. 31 Sëja ‘amalai Diossha’ putaja, nish tinleleshtap. 32 Lachamatijsha, tütü lëtta naa sëëla anërijbëshë. Tëile naa atija yoccoshe pandyujujtitila sëëla. 33 Bëjtap, paaja cambachep Juan ushta cuitenichau sëëla mutapja. Latija emejmesh yoccoshe pandyujula sëëla. 34 Lachama-tijsha, ‘yitash tëitatacham’ nish cutai lëttamash. Lëmmui huëshëtë pambëi naa Juan lipandyujujtiti achaya puchuchau putaitila. 35 Yoccoshela, Juan abuibuja pu putajti ushta chama lampara-shcuta. Lati cuhuinanipja nish amaccalë pancuccush lijashudyep abuibu. 36 Naa lipambuitajbëshë sëë lipambëjchejtiti mappëlëmash pandyuju sëëla Juanshama abuibujsha, naa tiTata Diosja tibachetila. Sëja adulai amumui naa tiTata litindyujutishcuta achaya paileshtatila naa Diossha amalaitila. 37 TiTata, naa tibachejbëshëja, anëri lacha sëëla, abuibu nish calahuëshëp, atanti nish bëj-bëjtap chamaptijsha. 38 Dios pandyujutijsha abuibu, nish panyupa pashinojshei naa nish tinleleptila, naa tiTataja tibachetila. 39 Paaja consono calide calide leejtip tappëshama Moisés ateremtë achaya neintaya ati leeya, ‘tailetalaba naa amashcuta imbëtëya limlitabë Diostina tapënnëtë’ taya. Yoccoshela, ati teremtëja anëri sëëla. 40 Lachamatijsha, nish pajusujti paa tinhuihuinipti, limli pambëntaitijsha” muta. 41 “¿Amaja tijusu sëë consono tëitatachauya putaniti? 42 Sëja pannepei paa, naa nish huilaj-huilalaptila Dios pashinojsheimala. 43 Paa nish pajusujti tinlelenipti sëë, panhuitaitijsha tiTata Dios amaccataula. Lachamatijsha, atta panhuitati aeme amaccataula, tishilëjti canleleshtap. 44 ¿Ama-shcuta canleleshtapchi Dios paa? Bëjtap, paa pancuccujti ‘yitash tuitatachauya taaptau’ mutanipti peshujuta paaja nish paj-pajusujti cancuccunipti Dios. 45 Sëja nish dyajushti tiTata atantijula naa ënnëtëjbëshë lëdulalajtipti. Aeme Moisesshama, naa maj-mapacca cudyejtiptija, dyajushta paënnëtë Dios atantijula. 46 Paaja canleletap Moisesshama literemtëti, tinlelepyachi lacha sëë, naa latija teremtëtila sëëla. 47 Lachama-tijsha, nish leletiya Moisesshama ateremtë, linsata nish tinleleshtap sëë pandyujuja” muta.

6

1 Latijsha Jesusja mala cudahua Galilea achittuchi. Ati cudahua attima amaccatauja Tiberias. 2 Bëj-bëmë cubaliu Jesús achiila, bëjtautila maladechejbëshëu madyajujati. 3 Latijsha Jesusja dandaja mororonñui, tütü aëshëtautina. 4 Ñuñujulë bannati judiu mafiesta Pascua atupuniti. 5 Jesusja ishedeja mabëjtaja bëj-bëmë calihuihuiumauti, ashcuta Felipe: “¿Amchi puuya chata manchayatabë ana bëj-bëmë talihuihuiumajbëshëu?” cuta. 6 Jesusja cuite achuta amashtanibë Felipe cutatila. Lati caile amashcuta dulashtatila. 7 Felipeja ashcuta: “Bëj-bëmë podejpola comparatutijsha biscocho, nish mabibështaya ñuñujuma mancayatutijsha” cuta. 8 Lëtta aëshëta, naa Simón Pedro apaa Andresja, cajammalaja lëtta seuhue ashcuta Jesús: 9 “Anai ana seuhueja catütü cincutti biscocho latijsha lëshie petcheu matütü chama. Lachamatijsha ¿amashcuta attilënñuja mabibështachi aj-anttiuti?” cuta. 10 Jesusja ashmuta aëshëtau: “Mandyujuchap mammui achaya lelechau” muta. Ilissijtiuja bac mabushu ati. Ati ilissimujui tübbaliu cincu miltiu shunñeu. 11 Latijsha Jesusja casetaja biscocho cudyërërëja ‘gracias Dios ana biscochola’ cuta. Lati ‘gracias’ cutalëja, mambache aëshëtau achaya mampishacheuti chechau mammui naa tübbalijbëshëu mutatila. Lachuta mambë lacha naa petcheu. Mammui tiyauja shinojtou. 12 Mammui shinojtouti, Jesusja ashmuta aëshëtau: “Puuchap amumui naa mapuchu achaya nish imbëstëtëcha” muta. 13 Latijsha latiuja puuja biscocho malapuchujbëshë, mapujacheu docettiu canastau cincuttinñu biscochojsha. 14 Naa massëjbëshëuja bëjtauja Jesús adulati ana limambuitajbëshë ashtau: “Yoccoshela, anajajtiyanajala naa Dios abuibutebe amalashtaj-bëshë lana ellechi, naa shinama teremtëtëtishcuta” tau. 15 Lachamatijsha, Jesusja manhuëshëtëja naa majusutila cabaliya mabuita ibëbëntautila, malamla nachimash mororonñu ashuyechi, candala tütüshtatila. 16 Shëhuështati Jesús aëshëtauja lishoptou cudahua apepchi. 17 Pojorei lidandauja chitchishtau pueblo Capernaumchi. Shëhuëtijsha, Jesusja nish manhuitabëla. 18 Chitchiuti, dyulujtashtaja yushëja bij-binta iposhshe maimala latiji. 19 Cincutti, cusuti neintaya seisti kilometro baliuja cudahuai, bëjtau Jesús samma adojoi amalati. Maihuitanishiti, caj-cadyulujtau. 20 Jesusja ashmuta: “Tipidyulujtayu. Sëë” muta. 21 Latijsha ‘lidandama’ cutalëuti, tishilëjti huihuiu latiji naa libatautchi. 22 Anumajshula, cudahua achittujsha massëjbëshëuja ahuëshëu naa Jesús aëshëtauja baliutila achittuchi. Maile naa lëtta pojorejtija dajati cabaliutila. Maile lacha naa Jesusja nish mumalatila aëshëtau. 23 Lati massëuti, pueblo Tiberiashaj-bëshëuja amalauja madajau. Atijsha latilëi naa Jesús ‘gracias’ cutaja Dios limampishachej-titchi biscocho. 24 Bëjtauja Jesús, aëshëtautina nijtauti, lidandumauja mapojorei baliu chitchishtautila Capernaumchi, Jesús bëbënishtautila. 25 Huihuiuja Capernaumchi, decheuja Jesús ashcutau: “Buita, ¿amajcha huitam mëë anchi?” cutau. 26 Jesusja ashmuta: “Yoccoshela, lëmmui timbëbëbëp paa biscocho tiyapja shinojtoptila. Nish tibëbëp pailetila tëtëjbëshë dyajutila naa lipambuitajbëshë. 27 Pisahuatayu lëmmui chata pëlështajbëshëjtila. Cuibaliumachap mappëlë naa chata papënnëtë limli pambështaj-bëshëla. Sëë, naa Shunñej Malajbëshëija, pancayashti ati chata, naa tiTata Diosja emejmesh tibëjtatila” muta. 28 Latiuja cuiteu: “¿Tëj-tëtëjbëshë candulaya, cancuccutabë tuhua Dios?” cutau. 29 Jesusja ashmuta: “Canlelechap naa Dios libachejtiti. Atijtija cusu Dios paa candulanipti” muta. 30 Latiuja ashcutau: “¿Tëj-tëtë litambuitajbëshë dulamti, bëjtaya minleletabë? Yutchi, tancütchemachi. 31 Tappë-shamauja chejtiu shinama maná ashaajsha manñetati, naa pampai huinaniuja. Bështa Dios abuibuise: ‘Lati ashaajsha mambacheti chata chejtiu’ ta” cutau. 32 Jesusja ashmuta: “Yoccoshe pandyujui, Moises-shamaja nish ñeta ibëbë shinama chata ashaajsha. Lachamatijsha, tiTataja pancayanaja paa chata ashaajshajbëshë apënnëtë nish pëlëj-pëlështajbëshë. 33 Naa chata tiTata bachejtitija amala ashaajsha. Ati chataja limli mambëjti mashinojshe elleibëshëu” muta. 34 Latiuja ashcutau: “Buita, tishilëccajsha tancayamanaja ati chata” cutau. 35 Jesusja ashmuta: “Sëja ati chatai. Sëja chata-shcuta limli ibëbëjti pashinojshe. Tinleleya tinhuitaj-bëshëja nish ahuështi, nish asamti chashta apënnëtë. 36 Bëchuta ashputai ushtase, ‘tibëjtaptijsha nish tinlelejtip’ putaija. 37 Mammui naa tiTata timambachejtiti tinhuihuishtau. Naa tinhuihuiya tëhuinanijbëshëu nish mabacheshti. 38 Sëja amalai ashaajsha dulashtitila tiTata, naa tibachej-bëshë, lijancuccutishcuta. Nish amalai sëë litijusutishcuta dulashtitila. 39 TiTata Dios, naa tibachejbëshë, nish cusu shetachaya cutaniti lëttamash naa timambachejtiti. Lati cusu sëë limalimcheniti maj-mammui, naa pënchi Dios atantijula lidechetashtauticcai. 40 TiTata cusu naa mammui sëë tinlelej-bëshëuja limliniuti maj-mapënnëtë. Sëja limalimcheshti tinlelejbëshëu pënchi lihuilitashtiticcai lana ellechi” muta. 41 Atila judiuja lidyajudyau Jesús, naa ‘sëja ati chatashcuta shoptoi ashaajsha’ mutatila. 42 Latiuja ashtau: “¿Amaja nish José abonto Jesús ana? Mannepetijti tuhua atata, ameme cuta. ¿Amashcuta ‘sëja shoptoi ashaajsha’ tutachi?” tau. 43 Jesusja ashmuta: “Tipindyajudyayu. 44 Lëttamash nish caliba sëë tinhuitaniti, tiTata naa tibachejbëshë, nish tinhuicheti. Latijsha sëja limalimcheshti naa tinhuihuijbëshëu pënchi, Dios atantijula mammui madeche-cheshtaticcai. 45 Lëtta Dios abuibutebeshamaja teremtë shinama: ‘Diosja malidyaju-dyashta mammui’ ta. Atila, tiTata calahuëshëya mailejbëshëuja tinhuihuijtiu sëë” muta. 46 “Lëttamash nish bëj-bëjtala Dios. Naa Diossha amalaj-bëshëjtija bëjta. 47 Yoccoshe pandyujui, naa tëdye tinlelej-bëshëuja limlishtaula mapënnëtë. 48 Sëja chatashcuta limli mambëjti. 49 Pappëshamauja tiyautijsha maná, pampai maliñetumati, shamau mammui. 50 Lachamatijsha, sëja pandyujui atta chata ashaajsha shoptoj-bëshëla. Ana chata chejbëshëuja nish shamaj-shamashtau mapënnëtë. 51 Sëja shoptoi ashaajsha chatashcuta achaya ati chata chejbëshëuja limlishtautila maj-mapënnëtë. Ati chataja tieme tidojo. Cansata mancayashtinaja elleibëshëu achaya limlishtautila mapënnëtë” muta. 52 Judiuja calahuëshëuja mandyujuti, madyojltija maiyumauja ashtau: “¿Amashcuta ‘chechap’ tutachi ati aeme adojo?” tau. 53 Jesusja ashmuta: “Yoccoshe pandyujui, naa nish cheya Shunñej Malajbëshë adojo, atëbë nish ensep chaya, nish lij-limlishtapla. 54 Naa tidojo tiyau, titëbë enseu chajbëshëuja limlishtaula mapënnëtë. Sëja limalimlështi atiu pënchi Dios atantijula limassështauticcai mammui. 55 Tidojoja chaj-chata, titëbëja ej-este chamala. 56 Naa tidojo tiya, titëbë ense chajbëshëja emejmesh lëttaibëshëtila sëëtina latijsha sëja lëttaibëshëjti latitina lacha. 57 Bëjtap, tiTata naa limlijbëshëja tibache sëë. Bëchuta tiTataja limli timbë sëëse, lachuta sëja limli mambështi lacha naa tidojo chejbëshëu. 58 Pandyujui-naja naa chata ashaajsha shoptojbëshëla. Bëjtap, pappë-shamauja tiyautijsha maná, shamau mammui. Lachamatijsha, ana chata tishilë lipandyujujtiti chejbëshëuja limli huinanishtau maj-mapënnëtë” muta. 59 Ana buibu mandyuju Jesús pueblo Capernaumchi, naa judiu decheta massëuti madechetatebei. 60 Calahuëshëuja Jesús naa limandyujujtiti, bëmë cuhuinanij-bëshëuja ashtau: “¡Pëj-pënila ati buibu! ¿Aja canleletabë?” tau. 61 Jesusja manhuëshëtëja pesheu ënnëtësh cuitatauti ashmuta: “¿Tibuibuja ënnëtësh pambë? 62 ¿Amashtatapbë paa bëjtaya Shunñej Malajbëshë huilitati ashaachi, naa ushta litütüjtitchi? 63 Dios aEspirituja caliba limli pambëniti. Lachamatijsha, padojoja nish dulaj-dulajti yitaj-bëshë. Ana buibu lipan-dyujujtiti limli pambështa Dios aEspiritula. 64 Lachama-tijsha, peshe paaja nish tij-tinlelepbëla” muta. Lëshpëni limandyujutic-cashbache Jesús caile amauja nish canleleshtautila. Caile lacha amaja seta mambështatila judiu mabuitau. 65 Jesusja ashmutabëla: “Atila pandyujui naa lëttamash nish caliba tinhuitaniti, tiTata nish tinhuita ibëbëti” muta. 66 Laticcajsha bëmë Jesús calahuëshëjbëshëuja calabaliu. Atiuja nish majusu latiji cuhuinaniniuti. 67 Latijsha Jesusja muiteja aëshëtau docettijbëshëu ashmuta: “¿Paaja? ¿Pajusu lacha tëlëbalinipti?” muta. 68 Simón Pedroja ashcuta: “Buita, ¿ama cambalitabë? Mëë mibuibujtija limli tambëjti tapënnëtë. 69 Tammui tuhuaja leletitula naa mëja Dios aBontom-tila, naa Dios tambachejtiti” cuta. 70 Jesusja ashmuta: “Sëja palashijmi paa docettipcha. Lachamatijsha, lëttaja ëj-ënnëtësh imbëtëjbëshë” muta. 71 Jesusja ashmutaja dyaju Judas, naa Simón Iscariote abonto naa aëshëtatijsha, ënnëtësh ibëbështatila abuita.

7

1 Latijsha Jesusja huinani departamento Galileala. Nish cusu malaniti Judeachi, naa judiu mabuitauja bobontautila. 2 Ñuñujulë bannati lëtta judiu mafiesta atupuniti. Aticcai adulaya mammui tütüjtiu mateshei. 3 Jesús apaauja ashcutau: “¿Ëshë nish malam mëë Judeachi achaya latchi mëhuinanij-bëshëuja mibëjtachauya naa limambuitajbëshë adulamti? 4 Lëttamash nish dulajti ahuënnëi bëshëë ‘tinnepeya tëhuinanichau’ mutaya. Atila, dulacham limambuitajbëshë mammui matantijula achaya bëjtachau adulamti” cutau. 5 Aeme apaautijsha nish canleleu Jesus Dios aBontotila. 6 Jesusja ashmuta: “Nish batai sëëbë, titupu cani huitatila. Paaja balintaya, balichapbë. 7 Bëjtap, lana elleibëshëuja nish pubuibajtiu paa. Lachamatijsha, sëë timbisajtiu naa sëë mambëjcheitila naa lëdulalajtiuti ënnëtëjbëshëtila. 8 Paajtija pibalibëla fiestachi. Nish batai sëëbë naa cani titupu huitatila” muta. 9 Lashmutalëja, Jesusja tütü Galileai. 10 Lachamatijsha, apaau calabaliuti Jerusalenchi, Jesusja mala lacha fiestachi limiye ahuënnëi achaya ‘nish tibëjtachau mabëmëu’ tatila. 11 Judiu mabuitauja ibëbëbëuja Jesús abëmëmujui muiteteuja ashmutau: “¿Amatinaja naa shunñe?” tau. 12 Mabëmëuja latitilijti idyajudyau Jesús. Pesheuja ‘yitajbëshë ati shunñe’ tajtiu, lachamatijsha attimauja ‘nijta. Lëmmui ateli malidyajudyajti taaptau’ tajtiu. 13 Lachamatijsha, lëttamash nish binta idyajudyau Jesús naa judiu mabuitau malashojtoutila. 14 Majantoronishiti mafiesta, Jesusja yupaja Dios aSibëchi mandyuju Dios aBuibu. 15 Judiu mabuitauja calahuëshëuja Jesús abuibu mandyujuti, limambuitati ashtau: “¿Aj-amacca achuta cailechi ana, nish estudiamashitijsha?” tau. 16 Jesusja ashmuta: “Sëja nish palidyajudyai tieme tibuibu. Palidyajudyai tiTata Dios, naa tibachejbëshë, litindyujuti-shcuta. 17 Naa Dios cancuccuntaj-bëshëja caile huëshëtështa naa lipandyujuiti, sëë tieme tibuibu, cusuti tiTata Dios abuibu chamatila. 18 Naa aeme abuibu dyajujbëshëja cusujti ‘yitash tëitatachauya sëë mammui’ taniti. Lachamatijsha, naa ‘yitash cuitatachauya tibachejbëshë’ tajbëshëja emejmesh candyërërë, nish ashiuhua chajti” muta. 19 Jesusja ashmutabëla: “Moisesshamaja panteremtë ushta paa naa amashcuta huinaniya ibaaptila. Lachamatijsha, paaja lëttamash nish aduj-adulap ati buibu lipandyujutishcuta. ¿Ëshë pajusuchi tibobonipti?” muta. 20 Judiuja ashcutau: “¡Ij! ¿Aj-amaja mibobontachi? Ënnëtëj shinojshe catütüm mëë” cutau. 21 Jesusja ashmuta: “Bëjtap, paaja tëdyojlojtip lëmmui, naa lëtta lipambuitaj-bëshë pandulaiti laulatabai. 22 Lachamatijsha, paaja camansëlëjtip paëtëjñu ahuihuinñu mapëlënñui palaulatabaitijsha naa Moisesshama achuta adulachap liputatishcuta. Lachamatijsha, cani Moisesshama sehueti, tappë-shamauja lachuta mambëjtiuya lacha maëtëjñu. 23 Bëjtap, paaja masëlëjtip paëtëjñu palaulata-baitijsha naa Moisesshama lipandyujutishcuta. Paaja sahuataptijsha achuta, ¿ëshë tëdyojlojtipchi sëë emejmesh dyajujaitijsha caladechejbëshë laulatabai? 24 ‘Ënnëtë ati’ tipëtayu nish pailetijsha. Consono cuibaliumachap cani achuta pandyërërëya” muta. 25 Pesheu Jerusalenshaj-bëshëuja mandyërërëja latitilijti ashtau: “¿Amaja nish anajajti naa shunñe bobontajtiuti tabuitau? 26 ¡Pijalidepu! Mammui matantijula malidyajudyajti abuibu. Nëtëuja lëttamash nish cubuibabë. ¿Canleleujtë lacha tabuitau naa latija tapuchachaj-bëshëtilari? 27 Lachamatijsha, tapuchachajbëshë huitati, lëttamash nish caileshta amajsha amalatila. Bëjtap, tammui taile ana shunñe amajsha amalatila” tau. 28 Jesusja malahuëshëja mandyërërëti, binta mandyujuja ashmuta Dios aSibëi limassëj-bëshëu: “¡Achutapu paa paile naa sëë amajsha amalai latijsha amaitila tinnepep chamap! Pailechaya sëja nish amalaitila timanchijsha. Paaja cudyeya ibaap naa tibachejbëshë abuibu, naa latija emejmesh yoccoshe candyërërëjtitila. Paaja nish iyej-iyepep ati. 29 Sëja emejmesh iyepeila ati naa latija tibacheti, huitaitila anchi” muta. 30 Latijsha pesheu lati massëjbëshëuja majusuychi setaya cabaliniuti Jesús. Lachamatijsha, lëttamash nish cubuiba naa Dios cani cusutila ënnëtësh ibëbëniuti. 31 Bëmë pesheuja canleleu latiji. Latiuja ashtau: “¿Amaja tapuchachajbëshëja huitaya mappëlë dulashta litambuitaj-bëshë ana shunñejsha?” tau. 32 Fariseouja malahuëshëu maaptau idyajudyauti Jesús fiestabai. Atila latiuja, sacerdoteu mabuitautina, mabacheu Dios aSibë ujajbëshëu setaya camalachau Jesús mutautila. 33 Jesusja ashmutabëla naa lati massëjbëshëu: “Nish idojmash puhuinanishti-naja. Ñuñujulë bannanaja huilitaniti tibachejbëshë litütütchi. 34 Tibëbëptijsha, nish tidecheshtap naa nish palibashtatila balinipti naa sëë libataitchi” muta. 35 Judiu mabuitauja mandyërërëja latitilijti ashtau: “¿Amchi malati nish dechetabë? Neintaya attachi batalaba. Neintaya naa nish taaptamujuchi malaya mandyujunishtalaba, cusuti naa taaptau huillëchi tübbalij-bëshëmujuchi batalaba. 36 ¿Tëtëjbëshë tandyujuntachi anuta ‘achuta tibëbëptijsha nish tidecheshtap’ latijsha ‘nish palibashta lacha balinipti naa sëë libataitchi’ tutaja?” tau. 37 Mafiesta pëlështati, Jesusja tëssabataja binta mandyujuja ashmuta: “Naa asamtibëshëja sëë tinhuitaya enseni. 38 Anuta teremtëtë Dios abuibui, ‘samma limlijbëshëja chuj huojtoshta naa tinlelejbëshë ashinojshejsha’ ta” muta. 39 Ashmutaja Jesusja mandyuju aEspíritu Santola, naa pënchi mambacheshtatila canlelejbëshëu. Diosja cani mambachebëla aEspíritu Santo naa Jesusja cani tuhuija, lilimtaja huilitatila ashaachi. 40 Peshe Jesús calahuëshëj-bëshëuja ashtau: “Anajajti Dios abuibutebe” tau. 41 Attimauja ashtau: “Latija tapuchachajbëshë, naa cantütütijtiti” tau. Lachamatijsha attimauja ashtau: “¡Nijtala! ¿Amaja Galileajsha amalashta tapuchachajbëshë? 42 Dios ateremtëja tandyuju naa tapuchachajbëshëja emejmesh Davidshama aleleshtatila. Taile lacha tapuchachajbëshëja amalashtatila Davidshama apueblo Belensha” tau. 43 Atila nish cürüs cuibaliumau mammui Jesusla. 44 Pesheuja majusuychi setaya cabaliniuti. Lachamatijsha, lëttamash nish cubuiba. 45 Latijsha shunñeu Jesús caibalijbëshëuja huilitau mabuitau limassëutchi. Fariseouja, sacer-doteu mabuitautina, ashmutau: “¿Ëshë nish camalap ati?” mutau. 46 Dios aSibë ujajbëshëuja ashmutau: “¡Tëj! ¡Lëttamash nish caj-candyërërëjti naa ati shunñe lijandyërërëtishcuta!” mutau. 47 Fariseouja ashmutau: “¡Achuta dyajuya paatijsha canleleptë ashihuairi! 48 ¿Amaja amai tabuitauja canleleu ati? Lëttamash fariseoja nish caj-canleleu lacha. 49 Mammui naa mabëmëu nish mailetila Dios ateremtë, benej-benebenesh imbëtështau mammui atiu” mutau. 50 Nicodemo, naa ushta numma Jesús calayupatajbëshëja, fariseo lacha. Latija ashmuta aaptau: 51 “Moisesshama ateremtëja tandyuju naa nish talibatila setaya yancala benebenesh mambështatu-tila, cani iteteuti emejmesh calahuëshëya abuibu naa tëtëj ënnëtëjbëshë dulatila” muta. 52 Latiuja ashcutau: “¡Tëj! ¿Galileajshabëshëm lacha mëë? Dios abuibu consono calideya, mëileshta naa lëttamash Dios abuibutebeja nish amaj-amalashtatila Galileajsha” cutau. 53 Latijsha mammui ibaliumau latiji masibëchi.

8

1 Jesusja mala mororonñu Olivos limaccatatchi. 2 Anumajshula numannumalëi, huilita Jerusalenchi, naa Dios aSibëchi. Bëj-bëmë cuñetauti, Jesusja tütüja mandyuju abuibu. 3 Judiu mabuitauja cajanhuihuiu Jesús lëtta yee. Lidecheu ati yee peshe abba cabushuti. Camalauja mammui matantijula mampëjtau. 4 Latiuja ashcutau Jesús: “Buita, lidechetu ana yee naa peshe abbatina neine imbëtëti. 5 Moisesshama ateremtëja tandyuju ahuissmëya ëshshëula cansiyashtatutila achuta imbëtëj-bëshë yee. ¿Amashtama-shim mëëse?” cutau. 6 Lëmmui cuiteu achuta amashcuta mayanibë cutautila achaya ateli mayati, ‘ënnëtësh dyajula’ cutantu tautila. Lachama-tijsha, Jesusja huëtaja ateremtë ellei ashishtala. 7 Latiu cuj-cuiteteuti, Jesusja tëssabataja ashmuta: “Naa nish iënnëtëjbëshëja miiya ëshshë, huissachaya liusha” muta. 8 Latijsha huëtaja ateremtë yosse ellei. 9 Calahuëshëlëuja Jesús ashmutati, ati shunñeuja ottouja ibaliumau lëttuma lëttuma cuta. Pëj-pëpëlëuja ottouja ibaliumau liusha. Latijsha Jesustija litütü latiji candala ati yeetina. 10 Tëssabataja ashcuta yee: “Tishoja, ¿amatiunaja naa limëssëjbëshëu? ¿Lëttamash nish mibobontanaja?” cuta. 11 Yeeja ashcuta: “Nijta, tiBuitala” cuta. Jesusja ashcuta: “Sëëtijsha nish tijusu lacha mëbuibaniti. Malama. Sëlu, neine imbëtëyunaja lanaccajsha” cuta. 12 Latijsha Jesusja malidyaju-dyaja ahuëshëhuëjbëshëu yosse ashmuta: “Sëja pu mutajti lana elleibëshëu mashinojshei. Naa sëë tëhuinanijbëshëja nish huinanishta ishëhuëi naa pu tajbëshëja limli ibëbështatila” muta. 13 Fariseouja ashcutau: “Mëë miemeja mimanchijsha tandyujujtim naa Diossha amalam-tila. Atila, lëttamash nish mij-minleleshtala” cutau. 14 Jesusja ashmuta: “Tieme tibuibu pandyujuitijsha, tinleleya ibaap naa sëë tibuibuja yoccoshejbëshëtila. Sëë tëilela amajsha amalai, amchi batai chashtitila. Lachamatijsha, paa nish paile amajsha amalai, amchi batai chashtitila. 15 Paaja ‘¡tëtëtebeni ati!’ tëitatajtip naa lana elleibëshëjtija cuibaliumajtiptila. Sëja ‘¡tëtëtebeniuchi atiu!’ nish putajti lëttamash. 16 Lachamatijsha, sëë ashputaja tibuibuja yitaychila. Bëjtap, sëja nish dyajujti timan-chijsha. TiTata, naa tibachej-bëshë, litindyujutishcuta dyajujtila. 17 Moisesshama ateremtë, naa paa cudyejtiptija, pandyuju naa lëshie lachuta cürüs mandyërërëti, manlelechap naa lipandyujuti ta. 18 Yoccoshela, sëja timanchijsha tindyërërëjti sëëla latijsha tiTata, naa tibachejbëshëja, anëri lacha sëëla. Bëjtap, lëshietula tuhua” muta. 19 Latiuja ashcutau: “¿Amatichi mitata?” cutau. Jesusja ashmuta: “Sëë nish tinnepep, tiTata nish iyepep chamap. Paaja emejmesh tinnepetap sëë, iyepepyachi lacha tiTata” muta. 20 Jesusja mandyuju ati buibu Dios aSibëi, naa ofrendatebe ashelijsha. Lëttamash nish setabëla naa cani huitatila atupu. 21 Jesusja ashmutabëla: “Sëë palamalaja, paaja timbëbëbëptijsha, nish tidecheya, paënnëtëi lishamashtap. Paa nish paliba tëbalinipti naa sëë libataitchi” muta. 22 Judiu mabuitauja ashtau latitilijti: “Neintaya amanchijsha tuhuishtalaba. Bëjtap, achuta ‘naa libataitchi, nish paliba tëbalinipti’ tutati” tau. 23 Jesusja ashmuta: “Paaja lana elleibëshëp. Sëja ashaajshabëshëi. Paaja lanaibëshëp, sëja nish lanaibëshëi chamatu. 24 Atila pandyujui naa nish tinleleya naa sëja papuchachaj-bëshëitila, paënnëtëi huinaniya, shamashtapla” muta. 25 Latiuja ashcutau: “¿Tëj-tëtëjbëshëmchi mëë?” cutau. Jesusja ashmuta: “Naa shinamajsha palidyaju-dyajtiti, lati sëëla. 26 Sëë tëlibaychi dyajuniti paala amumui ënnëtëjbëshë lëdulalajtipti. Lachama-tijsha, lëmmui mandyu-jujti sëë lana elleibëshëu naa tibachejbëshë litindyujujtiti. Ati abuibuja yoj-yoccoshejbëshëla” muta. 27 Lachamatijsha, judiu mabuitauja nish maile naa Jesusja dyajutila aTata Dios. 28 Atila Jesusja ashmuta: “Paaja pëjpëya Shunñej Malajbëshë curushai, paileshta latiji amaitila sëë, naa ushta lipandyujuitishcuta. Aticcai paileshta latiji naa sëë tiemeja timanchijsha nish dulaj-dulajtitila lëttamash bëshëë. TiTata litindyujuti-shcuta mandyujujti sëë. 29 Naa tibachejbëshëja nish tëlëtëritamash tëhuinanila sëë, naa sëja dulajtitila naa lati lijancuccuti-shcuta” muta. 30 Jesús mandyujuti ati buibu, bëmë canleleu latiji. 31 Jesusja ashmuta peshe judiu leletimashijbëshëu: “Paaja nish lohuolamash adulaya tibuibu lipandyujuti-shcuta, emejmesh sëë tëhuinanij-bëshështap. 32 Paa iyepepti Dios yoccoshejbëshë, latija paosojoshta paënnëtëjsha” muta. 33 Latiuja ashcutau: “Abrahamshama aleletu tuhua. Lëttamash nish taosojoshta tuhua naa nish ibuitatutila. ¿Ëshë osojtoshtap tutamchi?” cutau. 34 Jesusja ashmuta: “Yoccoshe pandyujui, ënnëtëj-bëshëja mabuitashcuta malasahuañejti naa ënnëtëjbëshë adulajbëshëu. 35 Bëjtap, lëmmui asahuatatebeja nish cutütüjti abuita asibëi. Lachamatijsha, buita emejmesh aeme abontoja cutütüjti lëttai atata. 36 Dios aBonto paosojoti paënnëtëjsha, laticcajsha emejmesh osojtoya huinanishtapnaja papënnëtë. 37 Tëilela Abrahamshama aleleptila. Lachamatijsha, paa pajusu tibobonipti naa tibuibu nish canlelentaptila. 38 Naa tiTata tincütchejtiti, pandyujujti sëë. Paaja adulajtip lacha patata lipandyujutishcuta” muta. 39 Latiuja ashcutau: “Abrahamshama tuhua tatata” cutau. Jesusja ashmuta: “Paaja Abrahamshama aleletap, huinanipyachi lati lihuinanitishcuta shinama. 40 Sëë pandyujuitijsha yitajbëshë, naa Dios litindyujutishcuta, lëmmui tibobontajtip. Abrahamja nish achuta imbëtëjti shinama. 41 Paaja adulajtip patata lidulajtitishcuta” muta. Latiuja ashcutau: “Nish naa nish itatajbëshëshitu tuhua. Diostija tuhua tatata” cutau. 42 Jesusja ashmuta: “Diosja patatata, tihuillapyachi sëë naa Diossha amalaija huitaitila anchi. Sëja nish amalai timan-chijsha. TiTata Dios tibacheti, amalaila. 43 ¿Ëshë nish paj-pailentachi naa lipandyujuiti? Paaja nish paile tibuibu naa nish ahuëshëntaptila. 44 ¡Yoccoshe, diablo assep paala! Bëjtap, patata lijusuti-shcuta adulajtip. Latija boboilëla shij-shinamajsha. Ati nish caj-cancuccujti buibu yoccoshej-bëshë, yoccoshej-bëshëla nish candyërërë chajti. Atija matata mammui naa ashiuhuajbëshëu. Atila, nish cupënijti ashiuhuaniti naa latija lëshcapënijsha ashij-ashiuhuaj-bëshëtila. 45 Diablo cuhuinanip-tila, nish leletijtip buibu yoccoshejbëshë naa sëë lipandyujujtiti. 46 ¿Amai paaja tibëjtap sëë ënnëtëjbëshë adulaiti? Sëë yoccoshe buibu pandyujujtitijsha, ¿ëshë nish tinlelejtipchi? 47 Dios asseuja emejmesh calahuëshëjtiu naa Dios limandyujujtiti. Paaja nish asseptila Dios, nish pajusujti calahuëshënipti” muta Jesús. 48 Judiuja ashcutau Jesús: “Yoccoshe, yitash tatula ushta naa ‘ënnëtëj shinojshe catütü’ latijsha ‘Samaritano chama ana’ mëtatuja” cutau. 49 Jesusja ashmuta: “¡Nijtala! Nish catütüi sëë lëttamash ënnëtëj shinojshe. Sëë tijusu mammui yitash cuitatachau tiTata mutaniti. Lachamatijsha, paaja lëmmui ënnëtëjbëshë tëitatajtip sëë. 50 Yoccoshela, nish tijusu sëë yitash tëitatachauya mammui mutaniti. Lachamatijsha, tütü lëtta sëë emejmesh tëitataj-bëshë. Atija dyajushta naa sëë yitajbëshëi, cusuti ënnëtëjbëshëi chamaitila. 51 Yoccoshe pandyujuila, naa tibuibu canlelej-bëshëja nish tuhuij-tuhuishtala apënnëtë” muta. 52 Judiuja ashcutau: “¡Tishilë tailenajala naa mëja catütümtila ënnëtëj shinojshe! Abrahamshamaja tuhui, Dios abuibutebeshamauja shamau chamau. Lachamatijsha mëja, ‘naa tibuibu canlelejbëshëja nish tuhuishta’ tuitatam. 53 ¿Amaja mëja mappëlë emejmelëm tatata Abrahamshamajsha? Bëjtam, latija tuhui latijsha Dios abuibute-be-shamauja shamau chamau. ¿Tëj-tëtëjbëshëi tamlaba mëë?” cutau. 54 Jesusja ashmuta: “Sëja timanchijsha ‘yitajbëshëi sëë’ tatai, lëmmuiyachi sëë tibuibu. Lachamatijsha, tiTataja yitash tëitata sëë, bëti taTata Dios cutajtip paase. 55 Paaja nish iyepep ati. Lachamatijsha, sëja iyepeila. Sëja ‘nish iyepei’ putatai, lëmmui ashiuhuaiyachi, pahua-shcuta. Sëja iyepeitila, adulajtila naa lati litindyujuti-shcuta. 56 Pappëshama Abrahamja cundyete shinama sëë amalashti-tila. Latijsha amalaiti, tibëjtaja lishudye latiji” muta. 57 Judiuja ashcutau Jesús: “¿Achuta cani cincuentatti año catütümtijsha, ‘bëjtai Abrahamshama’ tam mëë?” cutau. 58 Jesusja ashmuta: “Yoccoshe pandyujui, cani sehueti pappëshama Abraham, sëja tütüila shij-shinamajsha” muta. 59 Lati ashmutalëti, judiuja mapu latiji ëshshëu ahuissmëntau-tila. Lachamatijsha, Jesusja abëmëmujui ottoja malamla Dios aSibëjsha.

9

1 Jesusja malaja püüla bëjta lëtta shunñe sabantanti sehuej-bëshë. 2 Aëshëtauja ashcutau: “Buita, ¿ëshë sabantanti sehuechi ana shunñe? Cusuti neintaya atatau maënnëtëla achuta sehue, cusuti aeme aënnëtëla achamalaba” cutau. 3 Jesusja ashmuta: “Nish sabantanti sehue aeme aënnëtëla, nish atatau maënnëtëla sabantanti lacha. Sehue achuta achaya bëjtashtautila mammui naa Diosja caliba dulajtitila amumui. 4 Caj lëjlëti dulantubëla naa tibachejbëshë litandyujutishcuta. Bëjtap, ñuñujulë bannanaja shëhuëniti. Apënnëtë shëhuëti, lëttamash nish calibashta latiji dulaniti lëttamash bëshëë. 5 Caj huinaniya lana ellei, pu mutashti mammui elleibëshëu” muta. 6 Lati ashmutalëja, Jesusja caladyalalaja elle lololonñush ibëbëja, rüta sabantantijbëshë atantijsha. 7 Latijsha Jesusja ashcuta: “Malaya tëptënima mitanti samma Siloechi” cuta. Sabantantijbëshëja malaja tëptënija atanti canchinche huilita latiji. 8 Ati sabantantij-bëshëja itetejti ushta bëshëë. Atila, naa bëjtajbëshëuja ashtau latitilijti: “¿Nish anajajtinnaja naa bëshëë iteteti bëjtatijtiti?” tau. 9 Pesheuja ‘latila’ tau. Attimauja ‘nish ati, lachamashitijsha’ tau. Shunñeja ashmuta: “Sëëla” muta. 10 Latiuja ashcutau: “¿Amashcuta minchincheij-naja?” cutau. 11 Latija ashmuta: “Naa shunñe Jesús imaccataj-bëshëja elle lololonñush ibëbëja, tinrüta titanti. Latijsha ‘malaya tëptënicham mitanti samma Siloei libejbëshëchi’ tëtati, malaija tëptënija tinchinche latiji” muta. 12 Latiuja ashcutau yosse: “¿Amati ati shunñe?” cutau. Latija ashmuta: “A. Nish tëile sëë” muta. 13 - 14 Jesusja dyajuja sabantantij-bëshë judiu malaula-tabai. Atila, cabaliu naa ushta sabantantijbëshë fariseou limassëutchi. 15 Atiuja ashcutau yosse: “¿Amashcuta minchincheij-naja?” cutau. Latija ashmuta: “Jesús tinrütati titanti lololola, tëptëija tinchinche latiji” muta. 16 Peshe fariseouja ashtau: “Dios nish abuibutebeya ati. Bëjtap, talaulatabaitijsha dyajuja ati shunñe” tau. Attimauja ashtau: “¿Amashcuta anuta dulatabë, ënnëtëjbëshëya?” tau. Attaja attaja ateli ateli cuibaliu-mau. 17 Latijsha ashcutau yosejse naa ushta sabantantij-bëshë: “¿Amashtamnaja mëë naa midyajujajbëshëlase?” cutau. Latija ashmuta: “Dios abuibutebela ati cutai sëëla” muta. 18 Judiu mabuitauja nish leletiu naa sabantanti sehuetila ushta. Nish leletiu lacha naa canchinchetila. Atila, mancamauja atatau muiteuja ashmutau: 19 “¿Pabontola ana? ¿Yoccoshe sabantanti sehue ushta? ¿Amashcuta canchincheijnaja tishilë?” mutau. 20 Atatauja ashmutau: “Te. Tabontola. Sabantanti sehuela ushta. 21 Lachamatijsha, nish taile amashcuta canchinche-tila tishilë. Nish taile lacha amaja dyajujatila. Cuitechap lati aeme. ¿Amaja nish shunñe idojopnajase? Latija pandyujushta naa amashcuta adyajutila” mutau. 22 Atatauja anuta ashtau naa judiu malashojtoutila. Judiu mabuitauja mandyërërëja ashtau ‘nish huitachaya Jesús canlelej-bëshë tadechetatebechi’ tau. 23 Atila, atatauja ‘cuitechap lati. ¿Amaja nish cansata shunñepuna-jase?’ mutau. 24 Judiu mabuitauja cancamauja lijuiteuja ashcutau yosse, naa ushta sabantantijbëshë: “Tanshihuayula. Yoj-yoccoshe tandyujucham Dios atantijula. Tuhua tailela ati shunñeja ënnëtëj-bëshëtila” cutau. 25 Latija ashmuta: “Nish tëile sëë naa yitajbëshë, cusuti ënnëtëjbëshë chamatila. Lachamatijsha, lëtta bëshëjtija tëilela. Sabantantija, tinchinchetila” muta. 26 Latijsha ashcutau yosejse: “¿Amashcuta mimbëja adyaju mimbëchi?” cutau. 27 Latija ashmuta: “Cham pandyujuijsira. Pandyujuitijsha, nish tinlelepbëla. ¿Ëshë pajusuchi lipandyujuniti yosse? Neintaya pajusulaba lacha canleleya cuhuinaninipti” muta. 28 - 29 Latijsha ëj-ënnëtësh calamaccauja ashcutau: “Mëja canlelembë ati shunñe. Lachamatijsha, tuhuaja canleletu Moisesshama naa tailetila Diosja cudyërërëtila shinama. Lachamatijsha, nij-nish taile anala, amajsha amalatila” cutau. 30 Shunñeja ashmuta: “Amaj-amashtapchi paa. Paa nish pailetijsha amajsha amalatila ati shunñe, tinchinche timbë sëë. 31 Tailela naa Diosja nish malahuëshëjtitila ënnëtëj-bëshëu. Malahuëshëjti naa huilalaya lijancuccutishcuta adulajbëshëu. 32 Elle dulatatic-cajsha nish ahuëj-ahuëshëtu lëttamash dyajujati sabantanti sehuejbëshë. 33 Ati shunñeja nish amalata Diossha, nish calibayachi adulaniti lëttamash bëshëë” muta. 34 Latiuja ashcutau: “¡Ëj! ¡Tëtëtebenimchi mëë! Tandyujuntamlabbë tuhua, ënnëtëjbëshëmtijsha” cutau. Lashcutauja, bacheu latiji madechetatebejsha. 35 Jesusja caile naa sabantantij-bëshë bacheutila madechetatebejsha. Atila, bëjtaja cuiteja ashcuta: “¿Canlelem lacha mëë naa Shunñej Malajbëshë?” cuta. 36 Latija ashcuta: “Buita, tindyujucham amajajti-tila ati achaya canleleni” cuta. 37 Jesusja ashcuta: “Bëjtam bëjtamtinaja. Lati cudyërërëmnaja” cuta. 38 Latijsha shunñeja toyota cussëja Jesús ashcuta: “Minleleila tiBuita” cuta. 39 Latijsha Jesusja ashcuta: “Sëja amalai lana ellechi achaya sabantantiumajbëshëuja manchinche, naa manchincheumaj-bëshëuja nish bëjtau chachau mutaitila” cuta. 40 Peshe fariseou, naa lati massëjbëshëuja calahuëshëuja ashcutau: “¿Amaja sabantantitu tuhua?” cutau. 41 Jesusja ashmuta: “Paaja sabantantitap, nish iënnëtëpyachi. Naa ‘tanchinche tuhua’ taptila, ënnëtësh liimbëtëpnaja pamanchijsha” muta.

10

1 Jesusja anuta mandyujuja ashmuta: “Yoccoshela, ohuejoula asettentajbëshëja manyupajti majorral mashëlila, pillëtëla nish yupamash. 2 Ohuejou mayurujareja yupajti emejmesh corral mapillëtëla. 3 Pillëtëtebe calisëhuëjsëti pillëtë, ohuejou mayurujareja mancamajti atibau mamaccataula. Latijsha atibauja abuibui iyepeya, cubalijtiu achiila. 4 Atibau dëppë ottouti, latija limausha mamlajti. Achiila cubalijtiu naa abuibui iyepeutila. 5 Nish cubalijtiu yancala. Lëmmui calibaliumajtiu attachi attachi cuta naa nish iyepeutila” muta. 6 Jesús mandyuju ati buibu chama ohuejou mantoyojbëshë-shcuta. Lachamatijsha, nish maile tëtëjbëshë mandyujutila. 7 Jesusja ashmutabëla: “Yoccoshe pandyujui, sëja chama ohuejou majorral mapillëtëshi. 8 Sëëjsha liushalë amalajbëshëuja amalau lëmmui asetentautila. Lachamatijsha, ohuejouja nish manleleu mubaliniuti. 9 Sëja pillëtëi. Sëëla yupajbëshëja puchushta. Ohuejoshcuta yupaya otto, yupaya otto chaya, decheshta achata” muta. 10 “Asettejbëshëja amalajti lëmmui asete, ohuejou mabobo chashtatila. Lachamatijsha, sëja amalai limlichau putai latijsha achaya mappëlë emejmesh huinaniu chachau putaitila. 11 Sëja emejmejbëshë ohuejou mantoyojbëshëi. Naa emejmesh mantoyojbëshëja limutuhuijti atibau. 12 Naa ohuejou maujati calicheshtajtiutija lëmmui limajocco malamlajti matumi maimalati, naa nish lati aeme atibautila. Latijsha matumi mansetati lëtta maapta, ohuejouja cushtaniya yancala yancala ibaliumajtiu. 13 Naa ohuejou nish consono mantoyojbëshëja malamlajti naa lëmmui podejpojti cuimalumajtitila” muta Jesús. 14 - 15 Jesusja ashmutabëla: “Sëja emejmesh mantoyojti naa sëë tëhuinanijbëshëu. Bëchuta tiTataja tinnepe sëëse, lachuta sëja iyepei lacha tiTata. Lachuta sëja mannepejti lacha naa tëhuinanij-bëshëu, chama tiohuejoushcuta. Latiuja tinnepejtiu lacha sëë. Sëja tuhuishtila tiohuejou madojola. 16 Matütüibëla peshe ohuejou naa peshchi lishesheuma huinanij-bëshëu. Malaya mahuicheshtibëla lacha atiu. Latiuja tinleleya tëlëhuëshëya lëttai tëhuinanishtau. Latijsha sëja maujashti latiji mammui” muta. 17 Jesusja ashmutabëla: “TiTataja tihuilla sëë naa tuhuiya lilimtashtitila tiohuejou madojola. 18 Lëttamash nish caliba tinsiyaniti tipënnëtë, sëë nish tijusuti. Sëë tijusuticcai tuhuishti. Sëë tëliba tuhuiya lilimtaniti, naa tiTataja lachuta adulacham tëtatila” muta. 19 Judiuja calahuëshëuja Jesús mandyujuti anuta, latitilijti limaiyumau yosse. 20 Pesheuja ashmutau macheu: “¿Ëshë canlele calahuëshëp ati lojjo, ënnëtëj shinojshe catütütijsha?” mutau. 21 Lachamatijsha, attimauja ashtau: “Ënnëtëj shinojshe catütüta, nish tandyujuychi anuta. ¿Amaja ënnëtëj shinojshe catütüjbëshëja caliba manchinche mambëniti lacha sabantantijbëshëu?” tau. 22 Jerusalenchi dyummëbai, huita lëtta judiu mafiesta. Aticcai cuhuëshëtëya cuibaliumajtiu mammui Dios aSibë naa lati atebetila. 23 Jesusja huinani Dios aSibë ajorredorla, naa Salomón imaccatajbëshëla. 24 Latijsha peshe judiuja cudechetauja Jesús ashcutau: “¿Aj-amaccai tandyujush-tamchi mëë amamtila? Mëja tapuchachajbëshëya, tandyuju-cham emejmesh pujti” cutau. 25 Jesusja ashmuta: “Pujti pandyujuitijsha, nish tinlelejtip. Bëjtaya naa sëë lëdulalajtiti tiTata amaccataula, pailechaya amaitila sëë. 26 Lachama-tijsha, paaja nish tinlelejtip, naa nish tiohuejoptila. 27 Tiohuejouja iyepejtiu sëë tibuibu latijsha sëja mannepejti lacha latiu. Tinnepeutila tibuibu tëbalijtiu tichiila. 28 Sëja limli mambështi maj-mapënnëtë. Latiuja nij-nish shamashtaula mapënnëtë. Lëttamash nish caliba sëë tëmëlëpuniti. 29 TiTata, naa timancayajbëshëja, maj-mappëlëlë mammuijsha. Lëttamash nish caliba lacha camalapuniti tiTata. 30 Sëja, tiTatatina lëttatu” muta. 31 Latijsha judiuja mapuja yosse ëshshëu, majusuychi ahuismëniuti Jesús. 32 Latijsha Jesusja ashmuta: “TiTataja tibache sëë pancütcheshtitila bëj-bëmë bëshëë yitajbëshë. ¿Ama ana tidula yitajbëshëla tëlëhuismëntapchi?” muta. 33 Judiuja ashcutau: “Nish tajusu mëlëhuismëntuti yitajbëshë adulajtimtila. Naa Dios lidyajudyajtimtila mëlëhuismëntatu. Bëjtam, mëja tuhuashcuta shunñem-tijsha, ‘sëja Dios’ tajtim mimanchijsha” cutau. 34 Jesusja ashmuta: “Dios abuibutebeshamaja teremtë shinama: ‘Diosja dyaju naa paaja diosshiptila’ ta. 35 Tailela Dios abuibuja nish shij-shihuajtitila. Naa abuibu limambachejtiti, ‘atiu dioseu’ muta Dios. 36 Diosja tidyajuja tibachetijsha sëë lana ellechi, ¿amashcuta ‘lidyajudya Dios ana’ tëtapchi, naa ‘Dios aBontoi sëë’ putaiti? 37 Tipinleleyu sëë, tiTata lidulatishcuta nish adulaja. 38 Lachama nish tinlelep-tijsha, tiTata lidulatishcuta adulaja tibëjtaya, leletichapla achaya pailechaya naa Diosja litütütila sëëchi latijsha sëja litütüitila lacha Dioschi” muta. 39 Latijsha majusuchi yosse setaya cabaliniuti Jesús. Lachama-tijsha, Jesusja malapuchuja malamla. 40 Latijsha Jesusja huilita Jordán achittuchi naa Juanshama limalasamajtitchi shinama. Latchi tütü latiji. 41 Bëj-bëmë canhuihuiuja ashtau: “Yoccoshela, Juanshamaja nish adulatijsha shinama litambuitajbëshë, amumui naa lidyajujtiti ana shunñela emejmesh lachuta cürüs malala” tau. 42 Latchi bëj-bëmë canleleu naa Jesús mandyujuti.

11

1 Pueblo Betaniai tütü lëtta shunñe caladechejbëshë imaccata Lázaro. Mariaja, aneshu Martatina cutütüu lacha lati. 2 Ati Mariaja cajanhuojhuoja ushta shushuta Jesús atehuei cancuhuë adalaula. Ati adyamaja caladeche. 3 Lázaro ayeeuja buibu camba-cheuja Jesús ashcutau: “Tuhuishtanaja tadyama, naa huilaj-huilalajtimti” cutau. 4 Ati buibu ahuëshëlëja Jesusja ashta: “Lazaroja nish caladeche lëmmui. Caladeche achaya bëjtashtautila mammui naa Dios calibatila dulaniti amumui achaya bëjtashtautila lacha naa Dios aBontoja ijashumash emejmej-bëshëtila” ta. 5 Jesusja maj-mahuilala Marta, Maria, madyama Lázaro cuta. 6 Lázaro caladeche cutautijsha, Jesusja cashie tütübëla naa litütüti. 7 Latijsha ashmuta aëshëtau: “Baitubëse Judeachi” muta. 8 Aëshëtauja ashcutau: “Buita, achuta shëli atchij-bëshë judiuja ëshshëula mëlëhuismëya mibobontautijsha, ¿amashcuta malantamchi latchi yosse?” cutau. 9 Jesusja ashmuta: “Bëjtap, lëtta puinija catütü docetti hora. Atila, lëjlëi huinanij-bëshëja nish pojtomash huinanijti, apu tai huinanijtitila. 10 Naa ishëhuëi huinanijbëshëja apojmë huinanijti naa nish canchinchetila” muta. 11 Latija ashmutabëla: “Lëmmui ateshebë tabisi Lázaro. Sëja malaya limlështi” muta. 12 Aëshëtauja ashcutau: “Buita, lëmmui atesheya adyajushtaya” cutau. 13 Lachamatijsha, Jesusja ‘ateshe Lázaro’ mutaja, ‘tuhui’ mutaychi. Aëshëtauja neintaya lëmmui ateshelaba cutauyachi ashmutati. 14 Latijsha Jesusja mandyujuja pujti ashmuta: “Tuhuila Lazaroshama. 15 Lishudyeinaja naa latchi nish tütüitila achaya mappëlë leletipya paa. Baliya bëjtanintu” muta. 16 Tomás, naa ‘mellizo’ cutajtiutija, ashmuta acheeu: “Cubaitu lacha achaya lëttai cushamantu” muta. 17 Jesusja huitaja Betaniachi ahuëshë Lazaroshama caapshatila tuhuiti. 18 Ati puebloja lihui kilometro Jerusalensha. 19 Atila, bëmë latilëibëshëuja manhuihuiu Marta, Mariatina masibëchi achaya nish adyindyemashichau mabisishamala mutautila. 20 Martaja ahuëshëja ‘amalanaja Jesús’ cutauti, lijantünni. Lachamatijsha, Mariaja tütü asibëi. 21 Martaja decheja Jesús ashcuta: “TiBuita, mëë lanai tütütam nish tuhuiyachi tibisishama. 22 Lachama-tijsha, tëilela tuhuitijsha, Diosja mincayashtatila naa lijuitemti” cuta. 23 Jesusja ashcuta: “Lilimtashta midyamashama” cuta. 24 Martaja ashcuta: “Tëj-tëilela naa tidyamaja lilimtashtatila naa shamajbëshëu lilimtashtauticcai” cuta. 25 Jesusja ashcuta: “Sëja limalimlëya, limli mambëjti tinlelejbëshëu. Naa sëë tinlelejbëshëuja, shamautijsha, lilimtashtaula. 26 Naa limliya tinlelejbëshëuja nish shamaj-shamashtau mapënnëtë. ¿Leletim mëë ana limindyujuiti?” cuta. 27 Latija ashcuta: “Achama, tiBuitala. Leletila naa mëja Dios aBontomtila. Leleti lacha naa mëja tapuchachaj-bëshëm, naa lana ellechi amalashtajbëshëmtila” cuta. 28 Jesús ashcutalëti, Martaja malaja candyujuni adyama María ahuënnëi: “Huitanaja taBuita. Mincama” cuta. 29 Mariaja ahuëshëlëja, tëssabataja malaja liujani Jesús. 30 Jesusja cani huitabëla pueblochi. Tütübëla naa Marta lidechejtitchi. 31 Naa judiu, María cutütüjbëshëuja asibëi, bëjtauja curata tëssabataja malati, ‘neintaya tuishamamujuchi batalaba ahuëhuështatila’ cutauyachi. Latiuja cubaliu latiji lacha. 32 Mariaja huitaja Jesús litütütchi, toyota cussëja ashcuta: “TiBuita, mëë tütütam lanai, nish tuhuiyachi tidyamashama” cuta. 33 Jesusja bëjtaja María ahuëhuimati naa cubalijbëshëu-tina, maj-mapacca adyindye lacha. 34 Jesusja muiteja ashmuta: “¿Amchi bushapchi?” muta. Latiuja ashcutau: “Buita, amalaya calindepu” cutau. 35 Latijsha Jesusja ahuëhuë. 36 Naa lati tëssabalijbëshëuja ashtau: “Pijalidepu naa aj-amacca huilalabë” tau. 37 Pesheuja ashtau: “Bëjtap, latija canchinche ibëbë ushta sabantantijbëshë, ¿amaja nish calibayachi lacha Lázaro dyajujaniti, cani tuhuiti?” tau. 38 Lazaroshama yupapau ëshshë matatima ëuhuëtëi naa ushta liëuhuëjtiuti. Latijsha calabbëu ashonco lëttima ëshshë matatimala. Atchi huitaja, Jesusja adyij-adyindye latiji. 39 Jesusja ashmuta naa cuhuinanijbëshëu: “Pijatëriche ana ëshshë” muta. Marta, naa tuishama abisija ashcuta: “TiBuita, oiyoynaja. Amaja nish caapshapunaja tuhuitise” cuta. 40 Jesusja ashcuta: “¿Nish mindyujui ushta, ‘leletiya, bëjtashtam naa Dios calibatila dulaniti amumui’ mëtai?” cuta. 41 Ëshshë catëricheuti, Jesusja ujtaja ashaachi ashcuta Dios: “Tata, cundyetei naa tëlëhuëshëm-tila. 42 Tëilela tëlëhuëshëjtimtila. Lachamatijsha, anuta mindyujui achaya anai naa ahuëshëjbëshëuja mailecha naa mëja tibachemtila” cuta. 43 Jesusja cudyërërëlëja aTata Dios, binta cunirija ashcuta tuishama: “¡Lázaro! ¡Ottoma pujtachi!” cuta. 44 Latijsha tuhuijbëshëja otto latiji, abanai, atehuei tuntata cuta. Adalai tuntata lacha. Jesusja ashmuta: “Pihuerejhue. Huinanicha” muta. 45 Latijsha bëmë judiu, naa María calayupatajbëshëuja, canleleu Jesús naa lidulati bëjtauja. 46 Lachamatijsha, pesheuja baliuja mandyujuniu fariseou naa Jesús lilimlëtila Lázaro. 47 Latijsha fariseouja dechetauja sacerdoteu mabuitautina ashtau: “¡Tëj! ¿Tëtëjbëshë dulatabë-najari? Bëjtap, ana shunñeja adulanaja maj-mapacca limambuitaj-bëshë. 48 Lachuta dulachaya cutati, bëj-bëmëlë canleleya cuhuinanishtaubëla. Achuta aduj-adulati, romanou buitauja amalaya, Dios aSibë bobou latijsha tuhua dëppë tabobou chashtauyabëla” tau. 49 Aticcai Caifasja judiu masumo sacerdote. Atija ashmuta judiu mabuitau: “Nish paile paa bëshëë. 50 Bëjtap, yitalëla lëtta shunñeja tuhuiya tammui tadojola achaya nish shamashtatu tammui” muta. 51 Lachamatijsha, Caifasja nish amanchijsha candyërërë achuta. Naa latija sumo sacerdote-tila, Diosja dyaju ibëbë ati buibu, naa Jesusja tuhuishtatila mammui judiu madojola. 52 Ati buibuja dyaju naa nish judiujtiula tuhuishtatila Jesús. Tuhuiya madechecheshtatila lacha naa mammui canlelejbëshëu naa yancala litübbaliutijsha. 53 Laticcashbache judiu mabuitauja ‘bobontula Jesús’ tau. 54 Judiu setaya bobontautila, Jesusja nish muhuinani latiji. Atila, mala Judeajsha pueblonñu Efrainchi, naa abëmëu linijtamashiutchi. Atchi tütü latiji aëshëtautina. 55 Ñuñujulë bannati judiu mafiesta Pascua atupuniti, bëmë naa pueblojshabëshëuja ihuihuiumau Jerusalenchi cantebeshtautila fiesta. 56 Ibëbëbë huinaniuja Jesús Dios aSibëchi ashtau latitilijti: “¡Tëj! ¿Tëtëj dyajumaship paa? ¿Amalashtajtë tafiestachiri? ¿Amashtanibë?” tau. 57 Judiu mabuitauja ashmutau mammui: “Bëjtaya Jesús tandyuju-chap achaya setaya cabaitu” mutau.

12

1 Seisti puini bannati fiesta Pascua atupuniti, Jesusja mala Betaniachi, naa Lázaro tuhuiti lilimlëjtitchi. 2 Atchi candulau Jesús chata. Marta madumati, Lazaroja, Jesustina atiya tütüu mesai. 3 Atiyauti, Mariaja cajammalaja medio litro shushuta ichej-icheejbëshë cajanhuojhuo Jesús atehuei. Latijsha camancuhuë atehueu adalaula. Amumui sibbëi oitoto shushutaj ta latiji. Ati shushuta cadulau ballata nardojsha. 4 Latijsha lëtta aëshëta Judas Iscariote, naa pënchimash abuita ënnëtësh ibëbështajbëshëja ashta: 5 “¿Ëshë nish cabendeuchi ana shushuta achaya podejpo miiya, mancayauyachi benebenej-bëshëu?” ta. 6 Lashtatijsha, Judasja nish muimaluma benebenejbëshëu. Lëmmui ashta achuta naa podejpo cusutila. Latija majanhuinanijtitila acheeu mapodejpotebe, lichibiuti malasetejti. 7 Atila Jesusja ashcuta Judas: “Idumajayu. Lachuta dula-chaya. Latija tijanpëjta ati shushuta tituhuitatebeni. 8 Tütüshtaubëla naa benebenejbëshëu paatina. Lachamatijsha, sëja nish huillë puhuinanishtinaja” cuta. 9 Ahuëshëuja Jesús tütütila Betaniachi, bëmë judiuja baliu bëjtanishtautila. Majusu lacha bëjtaniuti Lázaro, naa Jesús lilimchejtiti. 10 - 11 Latijsha judiu mabuitauja bobontau lacha Lázaro naa lati bëjtauja lilimtati, maapta judiuja limajocco malibaliumauja, Jesús canleleuja cuhuinaniutila. 12 Bëj-bëmë ihuihuiumau Jerusalenchi fiesta Pascua dulashtautila. Anumajshula, mammui ahuëshëu naa Jesusja huitashtatila lacha. 13 Atila, huinaileu mapuja lijantünniu Jesús püüchi. Bëjtauja cashëttëbeuja ashcutau: “¡Buita, limishudyetu! TaTata Diosja emejmesh mimbëchaya naa lati amaccataula amalamtila, naa Israelbëshëu maBuitashtamtila” cutau. 14 Jesusja camala mambëja lëtta burro, lijandandaja mala naa latila shinama Dios abuibui literemtëtëtishcuta: 15 “Pishojtoyu Jerusalen-bëshëipa. Bënnaja burroi litütü pammalanaja paBuita” ta. 16 Anuta imbëtëti Jesús, aëshëtau nish maile ëshë achuta dulatila. Lachamatijsha, Jesús tuhuija lilimtaja malati ashaachi, huëshëtëu latiji naa amumui libëjtajtiuti shinama lachuta cürüs imbëtëti naa literemtëtëtishcuta Dios abuibui latila. 17 Jesús bëjtajbëshëuja Lázaro lilimcheti, anërrë huinaniu. 18 Atila, bëj-bëmë lijantünniu Jesús püüchi ahuëshëuja naa limambuitaj-bëshë dulatila. 19 Atila, judiu mabuitauja ashtau latitilijti: “Bëjma, nish taliba amashmutantuti. Mammui latijtija cuhuinaniunaja” tau. 20 Peshe nish judiujbëshëuja huihuiu lacha Jerusalenchi lijashudyeshtautila Dios ati judiu mafiesta Pascuai. 21 Atiuja cuñetauja Felipe, naa pueblo Betsaidajshabëshë, ashcutau: “Tajusu lacha bëjtantuti Jesús” cutau. 22 Felipeja malaja candyuju Andrés. Latijsha lëshieujcha baliuja ‘mimbëbëbëu’ cutau Jesús. 23 Jesusja ashmuta: “Ñuñujulë bannanaja naa Diosja mambëjcheniti mammui naa sëë, Shunñej Malajbëshëi emejmejbëshëitila. 24 Yoccoshe pandyujui, lëtta trigu atantija nish ñesetaya, lëttashtabëla. Lachama-tijsha iñeseuti, sabataya, isaashta. Achutashcuta sëja tuhuiya, limli mambështi naa tinlelejbëshëu. 25 Naa lati aeme lijusutishcuta adulajbëshëja bëjtashta pënchi lëmmuitila naa amumui lëdulalati. Lachamatijsha naa amanchijsha nish puchuntajbëshëja limlishta apënnëtë Diostina. 26 Naa sëë tinsahuatantajbëshëja tëhuinanini achaya tëtütücha naa sëë litütüitchi. TiTataja yitash cuitatashta naa sëë tinsahuatajbëshë” muta. 27 Jesusja adyindyeja ashta: “¡Maj-mapacca cuimalumailab-najala tishilë! Nish tëilenaja tëtëjbëshë dyajuniti. Nish tijusu tiTata ‘tiputchacham’ cutaniti, benebenesh imbëtështitijsha. Benebenesh imbëtështitila amalai lana ellechi. 28 Tata, mambëj-checham mammui naa mëja emejmejbëshëmtila” ta. Jesús ashtalëti, lëtta buibuja cudyërërëja ashaajsha ashta: ‘Cansata mambëjcheinaja emejmejbëshëitila, mappëlë malajütcheshtibëla naa sëja emejmejbëshëitila’ ta. 29 Naa lati massëjbëshëuja calahuëshëuja ashtau ‘neintaya atërrëlaba’ tauyachi. Pesheuja ‘lëtta ashaajshabëshëja cudyërërëlaba’ tauyachi lacha. 30 Jesusja ashmuta: “Ati buibuja nish candyërërë achaya sëë calahuëshështitila. Candyërërë achaya paaja calahuëshështaptila. 31 Tishilë Diosja dyajunaja lana elleibëshëuja benebenesh imbëtështautila pënchi maënnëtëla. Diosja chalma ibëbështanaja Satanás naa lana elleibëshëu mabuita. 32 Lachama-tijsha, sëë curushai tipëjpëya tipëjtauti, maile mambështi mammui naa tinleleya ibaautila” muta. 33 Anmutaja, Jesusja mandyuju naa amashcuta tuhuishta-tila. 34 Lati tütüjbëshëuja ashcutau: “Dios abuibutebeshamau teremtëjtiuti leetuja taile naa tapuchachajbëshëja limlishtatila apënnëtë. ¿Ëshë tandyujum mëë achuta ‘Shunñej Malajbëshë pëjpëya curushai pëjtashtau’ tutam? ¿Amajajtichi ati Shunñej Malajbëshë?” cutau. 35 Jesusja ashmuta: “Pu tajbëshëja nish caamti puhuinanishtanaja paa. Consono huinanichap caj putütüti pu tajbëshë achaya aishëhuëja nish puidechetacha. Bëjtap, naa ishëhuëi huinanijbëshëja nish cailejti amchi huinanitila. 36 Canlelechap pu tajbëshë yampa caj puhuinaniti, achaya pu tai huinanichap” muta. Jesusja ashmutalëja, nij malamla. 37 - 38 Jesús adulatijsha bëj-bëmë limambuitajbëshë mammui matantijula, aaptau judiuja nish canlelejtiu achaya cürüs imbëtështa-tila naa Dios abuibutebe Isaiasshama literemtëtishcuta. Anuta teremtë: “Buita, ¿aja leletichi naa buibu limandyujututi? ¿Aa cancütchemchi naa mëja ijashumash ijümataj-bëshëmtila?” ta. 39 Nish maliba leletiniuti, naa Isaiasshama teremtëtila lachuta: 40 “Diosja sabantanti mambë, nish huëshëtë mambë chamanaja, achaya nish bëjtau, nish huëshëtëu chamauti achaya nish litinhuilitauti, nish madyajujani” ta. 41 Isaiasshamaja anuta ashta naa bëjtaja Jesusja emejmej-bëshëtila. 42 Lachamatijsha, bëmë judiuja, mabuitautina canleleu Jesús. Canleleutijsha, nish cütcheu naa fariseou malashoj-toutila latijsha ‘neintaya ahuëshëya, tajoccotauj tadechetatebejshase’ tautila. 43 Latiu majusujti mappëlë ‘emejmesh tuitatachauya taaptau’ taniuti, naa Dios ‘emejme atiu’ nish muitatatijsha. 44 Jesusja mandyujuja binta ashmuta: “Naa sëë tinlelejbëshëja canlele lacha tiTata, naa tibachej-bëshë. 45 Naa sëë tibëjtajbëshëja bëjta lacha naa tibachejbëshë. 46 Sëja amalai pu mutashtitila lana elleibëshëu mashinojshei achaya naa tinlelejbëshëuja nish tütüchaubëla ishëhuëi mutaitila. 47 Sëja nish benebenesh mambështi naa tibuibu calahuëshëya, nish canleleu, nish dulau chajbëshëu. Sëja nish amalai lana ellechi benebenesh mambështitila. Amalai mapuchachashtitila lana ellei-bëshëu. 48 Naa sëë timbisa latijsha tibuibu ibisa chajbëshëja catütünaja amaja dyajushtatila naa latija dulatila yitajbëshë cusuti ënnëtëjbëshë cuta. Emejmesh tibuibu lijandyujujtitija dyajushta naa ënnëtëjbëshë lëdulalatila naa mammui Dios atantijula limassështauticcai. 49 Sëja nish dyajujti buibu timanchijsha. TiTata tibachejbëshëja tindyuju naa limandyujushtajtiti. 50 Tëilela naa tiTata lipandyujutishcuta adulaya, limlishtaptila papënnëtë. Atila, pandyujui anuta naa tiTataja ‘mandyujucham achuta’ tëtatila” muta Jesús.

13

1 Letta puini bannati fiesta Pascua huitaniti, Jesús caile naa atupu huitashtatila lana ellejsha batatila aTata litütütchi. Jesusja maj-mahuilala naa cuhuinanijbëshëu lana ellei. Lachuta mahuilala atuhuitaccachi. 2 - 4 Diabloja cansata ateli cuimaluma ibëbë Simón Iscariote abonto Judas naa amashcuta imbëtëya mambacheshtatila Jesús judiu mabuitau. Jesús caile aTataja mammui maBuita ibëbëtila. Caile lacha Dios litütütijsha amalaja latijsha latchi huilitash-tatila.‑Shëhuëlëjsha atiyauja aëshëtautina, Jesusja tëssabataja mami aostou adojoi mabalij-bëshëu. Adeshti bosh madaja toallau. 5 Latijsha samma huojhuoja matëptëtebei, mamantëptë aëshëtau matehueu. Latijsha mamancuhuë toallau adeshti madajajbëshëula. 6 Camantëptështati Simón Pedro atehueu, latija ashcuta: “Buita, ¿timantëptështam sëë titehueu?” cuta. 7 Jesusja ashcuta: “Tishilë nish mëilebë tëtëj-bëshë dulaitila. Lachamatijsha, pënchimash mëileshta” cuta. 8 Pedroja ashcuta: “Nij-nish timantëptështam sëë titehueu” cuta. Jesusja ashcuta: “Sëë nish mimantëptëja, nish tëhuinanijbëshështam” cuta. 9 Simón Pedroja ashcuta: “¡Tëj! Titehuejtiu timantëp-tëyu. Timantëptëcham lacha tibanau latijsha tidala tintëptëm chacham” cuta. 10 Jesusja ashcuta: “Bëjtam, naa tishilë ushpëj-bëshëja nish amumui taratarajti. Lëmmui atehuejtiu matëptëya ibaajti. Paaja nish taratarapnaja. Lachamatijsha, taratarash tütü lëtta paatina” cuta. 11 Jesusja ‘tütü taratarash lëtta’ ta, naa cailetila amaja seta ibëbështatila. 12 Campëlë mamantëptëja matehueu, Jesusja limayupaja aostou naa limaosojtojtiti, tütüja yosse mesai ashmuta: “¿Paile naa lipandulaiti? 13 Yitala naa ‘taBuitam mëë’ tëtajtiptila, bëjtap, paBuitaila. 14 Sëja paBuitaitijsha pamantëptëitila patehueu, lachuta paaja attaja attaja antëptëtëchap lacha. 15 Sëja pandulai anuta achaya sëë tibëjtaya, lachuta adulachau putaitila. 16 Yoccoshe pandyujui, yanaujnaja nish mappëlëjti abuitajsha. Buibu camlajbëshëja nish mappëlëjti lacha naa bachejbëshëjsha. 17 Paaja paileya dulapti naa lipandyujujtiti, emejmesh lishudyeshtap” muta. 18 Jesusja ashmutabëla: “Nish padyajui paj-pammui. Sëë tëile amau malashijmitila. Lachama-tijsha, teremtëtë Dios abuibui naa sëë tëchejbëshëja titumitila. Ati buibuja cürüs imbëtështanaja. 19 Canimash achuta imbëtëti, pandyujui achaya lachuta imbëtëti, tinleleshtaptila. 20 Yoccoshe pandyujui naa sëë bachejtiti emejmesh ibëbëj-bëshëja, emejmesh timbëjti lacha sëë. Latijsha naa sëë emejmesh timbëjbëshëja, emejmesh ibëbëjti lacha tiTata, naa tibachejbëshë” muta. 21 Ati buibu mandyujulëja aëshëtau, Jesusja maj-mapacca adyindyeja ashinojsheimala emejmesh pujti mandyujuja ashmuta: “Yoccoshe pandyujui naa lëtta paaja ëj-ënnëtësh timbështala” muta. 22 Latijsha aëshëtauja attaja attaja calindetauja anteñettauja ashtau: ‘¿Amajashtabëri?’ tau. 23 Lëtta aëshëta naa Jesús cuj-cutojojbëshëja, dap cutütü. 24 Simón Pedroja sojotoja ahuënnëi ‘cuitemchi amajashtabë’ cuta. 25 Jesús cutütüjbëshëja mapëlëmash daj-dap cutütüja cuiteja ashcuta: “TiBuita, ¿aj-ama dyajumchi?” cuta. 26 Jesusja ashcuta: “Biscocho liñoñaya, cancayashtajtiti” cuta. Latijsha biscocho miija liñoñaja cancaya latiji Judas, naa Simón Iscariote abonto. 27 Judas setalëti ati biscocho, Satanasja yupa ashinojshei. Latijsha Jesusja ashcuta Judas: “Naa dulashtajtimti, dulachamla curata” cuta. 28 Lachamatijsha, lëttamash naa mesai tübbalibëshëuja nish maile ëshë ashcutatila achuta. 29 Judasja acheeu mapodejpotebe majanhuinanijtitila, neintaya ‘bëshëë comparanima fiestatebeni,’ cusuti neintaya ‘mancayanima benebenejbëshëu’ cutalaba Jesús tauyachi. 30 Judasja biscocho tiyalëja ottoja mala. Cansata shëhuënaja. 31 Judas ottolëja malati, Jesusja ashmuta attima aëshëtau: “Tishilë mammui bëjtashtau-naja Shunñej Malajbëshë emej-emejmejbëshëtila. Lati bëjtaya, bëjtashtau lacha naa Diosja emej-emejmejbëshëtila lacha. 32 Shunñej Malajbëshë mambëj-cheti naa aTata emej-emejmejbëshëtila, aTataja mambëjcheshta lacha naa aBontoja emej-emejmejbëshëtila. Ñuñujulë bannanaja lachuta dulaniuti. 33 Tibontonñuipa, nish amacca puhuinanishtinaja. Bëchuta mandyujui ushta judiuse, lachuta pandyujuinaja lacha paa, naa tibëbëptijsha, nish palibashta-tila tëbalinipti, naa sëë libataitchi. 34 Pandyujui atta buibu oshpej-bëshë: Huilalata-chap attaja attaja cuta. Bëchuta sëja pahuilalai paase, lachuta huilalatachap lacha attaja attaja cuta. 35 Attaja attaja huilalatapti, mammui maileshta naa paaja sëë tëhuinanijbëshëp-tila” muta. 36 Simón Pedroja ashcuta: “Buita, ¿amchi batamchi?” cuta. Jesusja ashcuta: “Naa sëë libataitchi, nish mëliba tëmalanimti tishilë. Lachamatijsha, pënchimash tëbatam” cuta. 37 Pedroja ashcuta: “Buita, ¿ëshë nish tëlibachi mëmalaniti tishilë? Tibobontau-tijsha, mëbataila” cuta. 38 Jesusja ashcuta: “¿Yoccoshemash mibobontau-tijsha tëbatamtëchiri? Canimash talipa apumiti, ‘nish iyepei sëë ati’ tëtashtam lihuijuta” cuta.

14

1 Jesusja ashmutabëla aëshëtau: “Nish lipijuccuyu idojmash. Cudyechap Dios latijsha sëë tëdyep chachap. 2 TiTata asibëchi, maj-mapacca banna sibbë tütüniuti. Nish achamata, nish pandyujuya, ‘malaya pandulashti sibbë paa patebeni’ nish putaiyachi. 3 Malaya, sibbë pandulaya, huilitaya pabatai achaya tëtütüshtaptila naa sëë litütüitchi. 4 Paa pailenaja naa püü sëë libataitchi” muta. 5 Tomasja ashcuta: “Buita, nish tailela amchi batamtila. ¿Amashcuta taileshtachi naa püü libatamchi?” cuta. 6 Jesusja ashcuta: “Sëja yoccoshejbëshë püüi. Sëëla huinanijbëshëja huitaya Dios litütütchi, limlishta apënnëtë. Sëëjtila caliba huitaniti tiTata Dios litütütchi. 7 Paaja sëë tinnepeya, iyepeshtap lacha tiTata. Tishilëccajsha iyepepnaja ibëjtubëptila” cuta. 8 Felipeja ashcuta: “Buita, tambëjchecham taTata Dios achaya lati bëjtaya, litanle-tucha” cuta. 9 Jesusja ashcuta: “Felipe, ¿achuta huij-huillë puhuinanitijsha, nish tinnepem-bëla? Naa sëë tibëjtajbëshëja bëjta lacha tiTata. ¿Ëshë ‘timbëjchecham taTata Dios’ tëtamchi? 10 ¿Nish leletimbëla naa sëja tiTatachi litütüi, tiTataja sëëchi litütü chamatutila? Naa lipandyujujtiti, nish pandyujui tieme tibuibula. TiTata, naa sëëchi litütüjbëshëja, adulajti aeme asahuata. 11 Tinlelecham naa sëja litütüitila tiTatachi, naa tiTataja sëëchi litütü chamatila lacha. Ati buibu nish mëliba leletiya, tinlelecham naa lëdulalaiti bëjtam-tila. 12 Yoccoshe pandyujui, naa sëë tinlelejbëshëja adulashta naa sëë lëdulalajtitishcuta. Sëëjsha mappëlëmash bëshëë adulashtabëla naa sëja malaya cutütüshtitila tiTata. 13 Amumui yancala bëshëë cuitepti tiTata sëë timaccataula, sëja pancayashtila. Achuta dulaya, pambëjcheshti naa tiTataja emejmejbëshëtila. 14 Sëja dulashtila amumui yancala bëshëë iteepti sëë timaccataula” cuta. 15 Jesusja ashmutabëla: “Tihuillaya, adulashtap naa tibuibu lipandyujutishcuta. 16 - 17 Sëja cuiteya ashcutashti tiTata ‘mambachecham atta mantoyoj-bëshëni, naa Espíritu Santo,’ cutashti achaya nij-nish pandala huinanichap. Atija pandyujushta Diosla, naa aj-amashijbëshëtila. Lana elleibëshëuja nish maliba catütüniuti ati, naa nish bëjtau, nish iyepeu chamautila. Lachamatijsha, paaja iyepep naa latija putütütila. Pënchimash litütüshtala paa pashinojshei apëj-apënnëtë” muta. 18 “Sëë palamlaitijsha, nish pandala huinanishtap. Huilitaya puhuinanishti yosse. 19 Ñuñujulë bannanaja lana elleibëshëu nish tibëjtaniuti. Lachamatijsha, paaja tibëjtashtapbëla. Sëja tuhuiya lilimtashtitila, lachuta paaja limlishtap lacha. 20 Sëë lilimtashtiticcai huëshëtështap naa sëja tiTatatina lëttatutila, naa sëja paatina lëttatu chamatutila lacha. 21 Naa tibuibu calahuëshëya adulaj-bëshëja yoccoshemash tihuillaj-tila. TiTata cutojoshta naa tihuillajbëshë. Sëëtijsha huilalaya cancüttashti lati lacha” muta. 22 Judas, naa nish Iscarioteja, cuiteja ashcuta: “¿Ëshë tuhuajtija tancüttash-tamchi, lana elleibëshëu nish mancüttamtijsha?” cuta. 23 Jesusja ashcuta: “Naa tihuillajbëshëja adulajti naa tibuibu lijandyujutishcuta. Atija cutojoshta lacha tiTata. Sëja, tiTatatina huihuiya cutütüshtatu ati. 24 Naa nish tihuillajbëshëja, nish dulaj-dulajti naa sëë lijandyujuitishcuta. Naa buibu calahuëshëhuëjtiptija nish sëë tieme tibuibu. TiTata, naa tibachejbëshë abuibu ati” cuta. 25 “Caj putütüitila, palidyaju-dyai ana buibu. 26 Lachamatijsha, tiTata pambacheti toyotojbëshë Espíritu Santo sëë timaccataula, latija pandyujushta amuj-amumui. Huëshëtë pambështa lacha naa sëë ushta lipandyujujtiti” muta. 27 “Palabatashtaya, lë huinani pambështi pashinojshei. Sëëjtija tëliba lë huinani pambëniti. Lana elleibëshëuja nish lë ishinojshe huinani pambëu naa sëë lë ishinojshe huinani lipambëiti-shcuta. Nish lipijuccuyu pashinojshei, shojtop pichayu lacha. 28 Paaja cansata tëlëhuëshëp-tila pailenaja naa sëja malaya, huilitaya putütüshtitila. Paa yoccoshemash tihuillatap, lishudyepyachi naa sëja bataitila tiTata litütütchi, naa latija maj-mappëlëlë calibatila sëëjsha. 29 Tishilë pandyujui anuta achaya pënchi amumui lachuta imbëtëti, tinlelechap naa sëë lipandyujujtiti” muta. 30 “Nish idojmash pudyërërështi-naja. Amalanaja naa lana elleibëshëu mabuita diablo. Lachamatijsha, sëja mappëlë ijümatalëi latijsha. 31 Sëja dulai amumui naa tiTata litindyujuti-shcuta achaya lana elleibëshëuja maileshtatila naa sëja huilalaitila. “Tëssabatachapnaja, baitu” muta Jesusja aëshëtau.

15

1 Jesusja ashmutabëla aëshëtau: “Sëja chama lëtta ballata uba atooshi. TiTataja ati ballata itoyojbëshëshi. 2 Lëttima uba abanta nish isaati, capuppujti. Lachamatijsha, isaati calaënnëtëjti abanta achaya mappëlëmash isaacha cutaya. 3 Paaja nish iënnëtëpnaja naa tibuibu lipandyujujtitija pajuhuëtila. 4 Bëchuta sëja lëttaibëshëi paatinase, lachuta emejmesh lëttaibëshëchap sëëtina. Bëchuta, lëttima abantaja caputtaya atoojsha, nish isaajtise, lachuta paaja nish paliba lacha isaanipti pamanchijsha, sëë nish lëttai tëtütüya” muta. 5 “Sëja ballata atooshi. Paaja chama abantaship. Paa emejmesh lëttai tëtütüp, latijsha sëja lëttai putütüi chaja, isaj-isaashtap. Bëjtap, sëë nijtaja paai, nish palij-palibala dulanipti lëttamash bëshëë. 6 Naa nish sëë lëttai tëtütüjbëshëja, chama lëttima abanta caputtashijti. Ati camiiya, calapunajtiu” muta. 7 “Paaja emejmesh lëttai tëhuinaniya, latijsha adulaya naa tibuibu lipandyujujtiti, yancala bëshëë cuiteya Dios, catütüshtapla. 8 Paaja emejmesh tëhuinaniya, maj-mapacca isaapti, mammui ‘emej-emejmela ati’ cuitatashtau tiTata. 9 Sëja paj-pahuilalaila paa, bëchuta tiTataja tihuilla sëëse. Paileya sëë pahuilalaitila, emejmesh lëttai tëhuinanichapla. 10 Paa adulapti naa sëë lipandyujuj-titi pahuilalashtila, naa tiTata sëë litihuillatishcuta, naa sëja adulajtitila naa lati litindyujutishcuta” muta Jesús. 11 “Pudyërërëi anuta achaya lëttai sëëtina lishudyeshtaptila achaya emejmesh lishudye huinanichau putaitila. 12 Anajajti buibu lipandyujuiti: Huilalata-chap attaja attaja cuta, bëchuta pahuilalai sëëse. 13 Achee adojola tuhuijbëshëja mancütchejti mammui naa maj-mapacca huilalatila. Nish caliba atta bëshëë adulaya cütcheniti naa maj-mapacca huilalatila. 14 ‘Ticheeu’ putai paa naa adulajtiptila naa sëë lipandyujujti-tishcuta. 15 Nish tiyanaujnau putainaja. Bëjtap, lëtta yanaujnaja nish cailejti naa abuita lidulati. ‘Ticheeu’ putai naa pandyujujtitila amumui tiTata litindyujutishcuta. 16 Paaja nish tëlëshijmip sëë. Sëja palashijmi paa achaya baliya maj-mapacca isaachau putaitila achaya ati pasaaja tütüshta apëj-apënnëtë. Achuta adulapti, tiTataja pancayashta amumui bëshëë cuitepti sëë timaccataula. 17 Anajajti ana buibu lidulashtapti: Huilalatachap attaja attaja cuta” muta Jesús. 18 Jesusja ashmutabëla aëshëtau: “Lana elleibëshëu pambisauti, huëshëtëchap naa sëë timbisautila liusha. 19 Paaja elleibëshëtap, elleibëshëuja yitash pambëuyachi lacha, bëchuta attaja attaja yitash imbëtëjtiu latitilijtise. Sëja papuinaja elleibëshëujsha. Atila, elleibëshëuja pambisajtiu naa latiu lidulajtiutishcuta nish adulajtiptilanaja. 20 Huëshëtëchap naa buibu lipandyujujtiti. Lëttamash yanaujnaja nish mappëlëjti abuitajsha. Bëchuta ënnëtësh timbëu sëëse, lachuta ënnëtësh pambështau lacha paa. Sëë tibuibu canleleya, lachuta panleleshtau lacha paa mandyujupti. 21 Benebenesh pambështau naa sëë tëhuinanij-bëshëptila, naa tibachejbëshë nish iyepeutila” muta. 22 “Sëja nish huitaya mandyujutai, cani maileychibëla ënnëtësh imbëtëjbëshëutila. Lachamatijsha, tishilë tibuibu ahuëshëutila, nish malibanaja ‘nish taile ënnëtëjbëshë adulatutila’ taniuti. 23 Sëë timbisajbëshëuja ibisajtiu lacha tiTata. 24 Sëja adulajti limambuitajbëshë, naa lëttamash atta nish caliba dulajtiti. Nish bëjtatau ati limambuitajbëshë, ‘nish iënnëtëu atiu’ mutaiyachi. Ibëjtubëutijsha, timbisau, tiTata ibisau chajtiu. 25 Lachamatijsha, timbisaya ibaaula achaya cürüs imbëtështatila naa buibu terem-tëtëjtiti ushta Dios abuibui ‘lëmuj-lëmmui timbisajtiu’ ta” muta. 26 “Espíritu Santo, naa yoccoshejbëshë cütchejbëshëja panhuitaya pandyujushta sëëla. Sëja pambacheshti ati pantoyojbëshë naa tiTata litütütijsha. 27 Latijsha paaja tëlënirirështap sëë lacha. Bëjtap, paaja tëhuinanip lëshpëniccajsha limandyujuiticcashbache” muta.

16

1 Jesusja ashmutabëla aëshëtau: “Pandyujui ana buibu achaya nish tëlëtërita tëdye tëhuinanichau putaitila. 2 Pënchimash judiu mabuitauja pajoccoshtau padechetatebeujsha. Pesheuja paboboya, ‘cancuccutubë Dios anuta imbëtëtuja’ tashtau. 3 Anuta pambështau naa sëë nish tinnepeu, tiTata nish iyepeu chamautila. 4 Tishilë pandyujui anuta achaya achuta pambëuti, huëshëtëchap naa sëë lipandyujujtiti ushta, naa lachuta pambështautila” muta. Jesusja ashmutabëla aëshëtau: “Naa sëë tiemeja puhuinanija, nish pandyujui ushta naa benebenesh liimbëtështaptila. 5 Lachamatijsha, tishilë batainaja naa tibachejbëshë cutütünishtitila. Lëttamash paaja ‘¿amchi batam?’ nish tëtap, 6 peshujuta paaja lëmmui adyindyep naa ana buibu pandyujuiti. 7 Lachamatijsha, yoccoshela pandyujui naa yitalëla sëë palamlaja. Sëë nish malaja, Espíritu Santo, naa pantoyoj-bëshëja, nish amalaya nish putütüshta. Lachamatijsha, sëja malaya pambacheshti. 8 Latija amalaya, emejmesh huëshëtë mambështa lana elleibëshëu tëtëjbëshëjtitila ënnëtëjbëshë latijsha yitajbëshë cuta. Latijsha huëshëtë mambështa lacha naa Diosja benebenesh mambështatila ënnëtëjbëshë adulajbëshëu. 9 Espíritu Santoja huitaya, huëshëtë mambështa lana ellei-bëshëu ënnëtëjbëshëutila naa nish tinleleutila. 10 Maile mambështa lacha naa sëja yitajbëshëitila, naa bataitila tiTata litütütchi. Sëë malaja, nish tibëjtashtau latiji. 11 Maile mambështa lacha naa ënnëtësh imbëtëjbëshëuja benebenesh imbëtështautila naa Diosja lachuta cansata candyuju-tila tatumi diablo benebenesh imbëtështatila apënnëtë” muta. 12 “Tijusuijlabbëla maj-mapacca pandyujuniti. Lachama-tijsha nish panyupaynaja idojmash pandyujuja. 13 Espíritu Santo yoccoshejbëshëja panhuitaya, paile pambështa naa amumui yitajbëshëjtija. Latija nish pandyujushta aeme abuibula. Latija pandyujushta naa Dios lijandyujutishcuta naa amashcuta imbëtështatila pënchi. 14 Latija pambëjcheshta naa sëja emejmej-bëshëitila. Sëë tibuibu calahuëshëya, paile pambështa paa. 15 Amumui naa tiTata catütüjtiti, sëë tiitala. Atila, pandyujui naa Espíritu Santoja ahuëshëya tibuibu, paile pambështa paa. 16 “Ñuñujulë bannanaja nish tibëjtanipti. Lachamatijsha pënchimash tibëjtashtap yosse” muta. 17 Latijsha aëshëtauja mandyërërëja latitilijti ashtau: “¿Tëj-tëtëjbëshë tandyujuntachi anuta, achuta ‘ñuñujulë bannanaja nish tibëjtanipti, lachamatijsha pënchimash tibëjtashtap yosse, naa tiTata litütütchi bataitila’ tutaja? 18 ¿Tëtëjbëshë tandyujuchi naa buibu ‘ñuñujulë bannanaja’ tutaja lacha? Nish taile tuhua ati buibu” tau. 19 Jesusja manhuëshëtëja cuitentautila ati buibula ashmuta: “Naa ‘sëë ñuñujulë bannanaja nish tibëjtanipti, lachamatijsha, pënchimash tibëjtashtap yosse’ putaiti, ¿ati tëitentap paa? 20 Yoccoshe pandyujui, naa paaja adyindyeya ahuëhuëbeshtaptila. Lachamatijsha elleibëshëuja lishudyeshtau. Tishilë paaja adyindyeptijsha, pënchi lishudyeshtap. 21 Bëjtap, lëtta yeeja iñushtaya, maj-mapacca nish cuccu calahuitajti. Lachamatijsha, anñu cansehueti, maj-mapacca lishudyeya lijalashetajti latiji naa libintati. 22 Paaja achuta imbëtështap. Tishilë adyindyeptijsha, sëja pabëjtashti yosse. Bëjtabëjtatiya, lij-lishudyeshtap. Latijsha lëttamash nish palaj-palamishta ati pashudyete” muta. 23 “Aticcai nish tëiteshtap latiji lëttamash bëshëë. Lachama-tijsha, tiTata cuitepti yancala bëshëë sëë timaccataula, pancayashtala. 24 Tishilëccachi paaja nish cuj-cuitepbëla Dios lëttamash bëshëë sëë timaccataula. Cuiteya, catütüshtap naa lijuitejtipti achaya maj-mapacca lishudyeshtap” muta. 25 Jesusja ashmutabëla aëshëtau: “Sëja palidyajudyajti amumui ana buibu ejemplola, naa atta bëshëë dyajushcuta. Lachama-tijsha, pënchimash emejmesh pujti pandyujushti tiTatala. 26 Aticcai paeme paaja cuiteshtap bëshëë tiTata sëë timaccataula. Sëja nish pujundyërërështinaja naa latija pahuilalatila paa. 27 Latija pahuilala paa naa sëë tihuillaptila, latijsha ‘Diossha tanhuita’ tëtapja tinleleptila. 28 Sëja amalaija Dios litütütijsha, huitai lana ellechi. Tishilë chitta batainaja lana elle lihuilitashtitila yosse tiTata litütütchi” muta. 29 Aëshëtauja ashcutau: “Tishilë emejmesh pujti tandyujumnaja, atta bëshëë nish dyajushcuta tandyujumtila. 30 Lëttamash nish mëj-mëitentanaja. Tailenaja naa mëë mëiletila amuj-amumui bëshëë. Atila leletitula naa mëja amalamtila Diossha” cutau. 31 Jesusja ashmuta: “Paaja tëdye tinlelepbë tishilë. 32 Lachamatijsha, itayamash nish litihuëshë litichitta ibaliumashtap pasibëchi. Lachamatijsha, nish tindala tütüshti naa tiTataja tëtütüshtatila. 33 Pandyujui anuta achaya paileya naa lëttaptila sëëtina, consono lë huinanichap. Lana ellei huinaniya, benebenesh imbëtështap. Lachamatijsha, pishojto pihuinaniyu naa sëja chalma ibëbëitila lana elleibëshë” muta.

17

1 Jesusja cajantoro mandyujuja aëshëtau, ujtaja ashaachi cudyërërëja Dios ashcuta: “Tata, huitanaja atupu mambëjcheshtamtila lana elleibëshëu naa sëja emejmej-bëshëitila, latijsha sëja mambëj-cheshtitila lacha naa mëja emejmejbëshëmtila. 2 Mëja maBuita timbëm mammui lana elleibëshëu achaya limli mambështitila naa timancayaj-timti. 3 Minnepeya mëë, naa mëja lëttamtila Dios yoccoshejbëshëm latijsha sëë tinnepeu chaya naa mëëjsha amalaitila, limlishtau mapënnëtë. 4 “Cansata mambëjcheinaja lana elleibëshëu naa mëja emejmejbëshëmtila. Timpëlë dulainaja naa sahuata ‘dulacham’ tëtajtimti. 5 Tata, sëë minhuitaja emejmesh timbëcham lëshcapëni-shcuta, bëchuta emejmesh timbëm shinama elle cani dulatatise. 6 “Naa elleibëshëu malashij-mimja timancayajtimti, minnepe mambëinaja. Atiuja mëë miitau ushtajsha. Latijsha timancayamti, dulaunaja naa mëë mibuibu limandyujumtishcuta. 7 Tishilë latiu mailenaja naa amumui sëë catütüjtiti mëëjsha amalatila. 8 Cansata mandyujuiti naa buibu litindyujujtimti, latiuja leletiunaja. Huëshëtëu naa mëë tibachemti, mëëjsha amalaitila lana ellechi. 9 “Mëmëitei, Tata, latiula. Nish mimandyujui naa nish minlelejbëshëula. Mimandyujui naa timambachejtimti, naa mëë malashijmijtimtila. 10 Mammui sëë tëhuinanijbëshëuja mëë miitau lacha latijsha mammui naa mëë mëhuinanijbëshëuja sëë tiitau chamau. Latiula mammui tibëjtajtiu naa sëja emejmej-bëshëitila. 11 “Tishilë mimbatainaja mëtütüshtitila. Sëja nish huinanishtinaja lana ellei, lachamatijsha, latiuja tütüshtaubë lanai. Tata Dios, mantoyocham mijümatala naa mammui timancayajtimti achaya lëttachau, bëchuta sëja mëëtina lëttatuse. 12 Sëja muhuinanija lana ellei, maujai, mantoyoi chamai mëë mijümatala, naa cümata litincayajtimtila. Lëttamash nish shej-shetala. Lachamatijsha naa shetashtajbëshëjtija sheta achaya Dios ateremtë lidyajutishcuta cürüs imbëtështatila. 13 “Tishilë mimbatainaja naa mëë litütümchi. Lachamatijsha, caj lana ellei huinanija dyajuibë ana bëshëë achaya latiuja emejmesh lishudyechau mutaitila naa sëë lij-lishudyejtitishcuta. 14 Sëë mandyujuiti mibuibu minlelej-bëshëu, elleibëshëuja lëmmui mambisau, naa sëhua-shcuta latiuja nish lana elleibëshëutila. 15 Mindyujui nish mapushtamtila lana ellejsha, Tata. Lachama-tijsha, ‘nish mandumajani’ cutacham naa ënnëtësh mambëntaj-bëshë. 16 Bëchuta sëja nish lana elleibëshëise, lachuta naa tëhuinanijbëshëuja nish lana elleibëshëunaja. 17 Mëë mitebe mambëcham Tata, naa mibuibu yoccoshejbëshëla. 18 Bëchuta mëja tibachem sëë lana ellechise, lachuta sëja mabacheinaja lacha naa tëhuinanijbëshëu achaya huinanishtautila elleibëshëu mamujumujui. 19 Tata, sëja dulani naa mëë limijusutishcuta achaya latiuja mëë mitebechau, naa mibuibu yoccoshejbëshëla. 20 “Tata, nish mëmëitei latijtiula. Mimandyujui lacha naa latiu mandyujuti tibuibu calahuëshëya tinleleshtajbëshëula. 21 Mëitei achaya mammui latiuja lëttaibëshëchau lacha tuhuatina. Bëchuta mëja sëëtina lëttai-bëshëtuse, lachuta latiuja lëttaibëshëchau lacha tuhuatina achaya elleibëshëuja leletichau naa mëja tibachemtila. 22 Bëchuta emejmejbëshë timbëm sëëse, lachuta sëja emejmejbëshë mambëinaja lacha latiu achaya tuhuashcuta lëttaibëshështautila. 23 Sëja litütüni latiuchi, Tata, bëchuta mëja litütüm sëëchise achaya latiuja emejmesh lëttai-bëshëchau. Latiuja lëttai-bëshë mambëcham achaya lana ellei-bëshëuja huëshëtëchau naa mëja tibachemtila achaya huëshëtëchau lacha naa mëja mahuilalamtila sëë litihuillamti-shcuta. 24 “Tata, mëja timancayam ana tinlelejbëshëu. Tijusu tëtütüniuti naa sëë litütüshtitchi achaya tibëjtachau naa sëja emejmejbëshëitila, naa caj-cani elle dulatatijsha tihuillamtila. 25 Tata Dios, elleibëshëuja nish mij-minnepeu. Lachamatijsha sëja minnepei. Ana tinlelej-bëshëuja mailenaja naa mëja tibachemtila. 26 Sëja minnepe mambëinaja. Lachuta mambështi-bëla achaya latiuja mahuilalachau lacha attimau naa mëë litihuillamti-shcuta achaya sëja litütüni latiuchi” cuta. Jesusja anuta cudyërërë aTata Dios.

18

1 Jesusja cajantoro cudyërërëja aTata Dios, ottoja mala aëshëtautina arroyo Cedrón achittuchi. Atchi tütüu ballatau, poloris, cummëu cuta. Ati ballatamujuchi Jesusja mala aëshëtautina. 2 Judas, naa Jesús seta ibëbështajbëshëja iyepe lacha ati ballatamuju naa Jesusja malajtitila latchi aëshëtautina. 3 Atila Judasja mamala soldau Jesús setashtautila. Judiu mabuitauja mabacheu Dios aSibë ujajbëshëu mubatautila lacha. Pesheuja maespada, majummë, machehuete camalau. 4 Jesusja mabëjtaja caimalauti, caile amumui naa lijandulashtauti. Mudeleja ashmuta: “¿Ama bëbëp?” muta. 5 Latiuja ashcutau: “Bëbëtu Jesús, naa pueblo Nazaretshajbëshë” cutau. Jesusja ashmuta: “Sëjajti” muta. Judas, naa seta ibëbështaj-bëshëja, mutütü lacha lati. 6 Jesús ‘sëë’ mutalëti, mammui ñetau ellei madyulutala. 7 Jesusja muiteja yosse ashmuta: “¿Aj-ama bëbëpchi?” muta. Latiuja ashcutau yosse: “Jesús, Nazaretshajbëshë bëbëtu” cutau. 8 Jesusja ashmuta yosse lacha: “Sëjajti putaijlabbari. Sëë tibëbëya, balichauya mutachap ana tiëshëtau” muta. 9 Jesusja ‘mabachechap tiëshëtau’ muta, naa ushta aTata cudyërërëja ‘Tata, naa timancayaj-timti, lëttamash nish tëlëshetala’ lijutatishcuta. 10 Latijsha Simón Pedroja camija aespada, campuppu ameye adulujshabëshë naa sumo sacerdote ayanaujna. Atija Malco amaccatai. 11 Jesusja ashcuta Pedro: “Canyupapa miespada. Naa tiTata ‘benebenesh imbëtështam’ litëtatishcuta, tijusu lachuta benebenesh imbëtëniti” cuta. 12 Latijsha soldauja, mabuita-tina, Dios aSibë ujajbëshëutina cuta, setauja irepu Jesús abanai. 13 Liushalë cabaliu Anás asibëchi. Atija Caifás ahuëshshunñe. Aticcai Caifasja judiu masumo sacerdote. 14 Ana Caifasja ‘yitalëla lëtta shunñeja tuhuiti mammui taaptau madojola’ ta ushta. 15 Simón Pedroja, atta Jesús aëshëtatina, cubaliu Jesús achiila. Sumo sacerdoteja iyepejti ati atta aëshëta. Atila, latija caliba cuyupaniti Jesús sibëchi. 16 Lachamatijsha, Pedroja tütü pujtajsha pillëtëi. Latijsha achee inelchi yupajbëshëja ottoja cujundyërërëti naa pillëtëtebe, yupapau Pedro. 17 Naa sehueshoja pillëtëtebeja ashcuta Pedro: “¿Nish ana shunñe cuhuinanijbëshëm mëë?” cuta. Pedroja ashcuta: “¡Nijta!” cuta. 18 Dyummëtila, naa latibëshë yanaujnauja, Dios aSibë ujajbëshëu-tina ducheuja aima lijantütüu. Pedroja lijantütü aima lacha latiutina. 19 Judiu masumo sacerdoteja cuitete Jesús aëshëtaula latijsha naa tëj-tëtëjbëshë malidyajudyaj-titila. 20 Jesusja ashcuta: “Bëjtam, pujti malidyajudyajti taaptau tadechetatebeuchi latijsha Dios aSibëchi malidyajudyai chajti, nish ahuënnëi malidyaju-dyamash. 21 ¿Ëshë tëitetem sëë? Muitecham naa tëlëhuëshëj-bëshëu. Latiuja mindyujuchauya naa limandyujujtiti, naa latiu mailenaja malidyajudyajtiti” cuta. 22 Jesús ashcutalëti, naa lëtta Dios aSibë ujajbëshëja lidëpëja atantijsha ashcuta: “¿Amashcuta achuta cuyamchi ana sumo sacerdote?” cuta. 23 Jesusja ashcuta: “Sëë ënnëtësh mayaja, tindyuju-chamla. Achuta yitash tindyërërëtijsha, ¿ëshë litidëpëmchi?” cuta. 24 Latijsha Anasja shübüjtata bache Jesús Caifás litütütchi. Caifasja judiu masacerdoteu maj-mabuita. 25 Pedro lijansëtibëla aima, cuiteuja ashcutau yosse: “¿Nish ana shunñe cuhuinanij-bëshëm mëë?” cutau. Pedroja manshihuaja ashmuta: “¡Nijtala!” muta. 26 Latijsha sumo sacerdote ayanaujna naa Pedro ameye campup--pujtiti aaptaja ashcuta lacha: “¿Amaja nish mibëjtai lacha ushta sëë ballatamujuchi Jesustina?” cuta. 27 Pedro ‘nish iyepei sëë ati shunñe’ cutati yosse, tishilëjti apumi latiji talipa. 28 Latijsha lëjlështati, cabaliu Jesús Caifás asibëjsha naa mabuita Pilato litütütchi. Atija huitaya ushta pueblo Romajsha mabuitashtatila judiu. Judiu mabuitauja nish yupatantau inele sibëchi naa nish talabecha cutautila, naa Pilatoja nish maaptatila. Mafiesta Pascua atuputila, ‘yupataya, nish taliba chetaj chata, fiestaise’ tautila. 29 Atila, Pilatoja otto pujtachi mudyërërështatila. Latija ashmuta: “¿Tëj-tëtëj ënnëtëjbëshë dulachi ana shunñe?” muta. 30 Judiuja ashcutau: “Nish ënnëtësh imbëtëta, nish mijammalatuyachi” cutau. 31 Pilatoja ashmuta: “Paaja cabaliya, pijandula naa limandulajtiptishcuta ënnëtëj-bëshëu, naa Moisesshama ateremtë lipandyujutishcuta” muta. Judiuja ashcutau: “Bëjtap, paaja, naa romanop, ‘nish bobochauya lëttamash’ tutajtip. Atila, nish taliba tuhua bobontuti” cutau. 32 Jesús lidyajutishcuta ushta naa curushai pëjpëuti tuhuishta-tila, cürüs imbëtështanaja naa lachuta romanouja mabobojtiutila ënnëtëjbëshë adulajbëshëu. 33 Pilatoja yupaja inelchi canca-maja Jesús cuite: “¿Mëja judiu mabuitamla?” cuta. 34 Jesusja ashcuta: “¿Mimanchijsha tëitem anuta, cusuti attimau mindyujuti tëitem?” cuta. 35 Pilatoja ashcuta: “¿Amaja judiui sëë? Mieme miaptauja, mabuitautina mimalau anchi. ¿Tëj-tëtëjbëshë dulamchi?” cuta. 36 Jesusja ashcuta: “Buitaila, lachamatijsha nish lana elleibëshëu mabuitai sëë. Achamata, tëhuinanijbëshëuja litidyojloya limboptouyachi achaya nish cabalichau judiu mabuitau tëtaya. Lachamatijsha sëja nish buitai lana ellei” cuta. 37 Latijsha Pilatoja ashcuta: “¿Achutapu mëja buitamse?” cuta. Jesusja ashcuta: “Bëchuta ‘buitam’ tëtamse, lati sëëla. Sëja amalaija sehuei lana ellechi mandyujushtitila buibu yoj-yoccoshejbëshë. Naa yoccoshejbëshëjtila huinanij-bëshëuja tëlëhuëshëjtiu tibuibu mandyujuja” cuta. 38 Pilatoja ashcuta: “¿Tëj-tëtëjbëshëchi ati buibu yoccoshejbëshë?” cuta. Lati buibu dyajulëja, Pilatoja ottoja yosse ashmuta judiu: “Nish caj-candechei sëë ana shunñe aënnëtë. 39 Lachama-tijsha, sëja palitelejti lëtta preso, anuta pafiesta Pascua atuputi. ¿Pajusu paliteleniti judiu mabuita Jesús?” muta. 40 Mammui caliporessumauja ashcutau: “¡Nijta! ¡Nish tajusu ati talitelenimti! Talitelecham Barrabás” cutau. Barrabasja ëj-ënnëtësh imbëtëjbëshë.

19

1 Latijsha Pilatoja mambache Jesús soldau biyisachau mutatila. 2 Soldauja casheptauja patta coronashcuta lijajannu Jesús adalai. Lijamanyu-papau lacha lëttima bürrüu iterterimau mahuayutaj-bëshëu bëchuta limayupajtiu buitause. 3 Latijsha shüj cudechetauja calaimimëuja ashcutau: “¡Limlichaya naa judiu mabuita!” cutau. Lati ashcutauja lëdëpëu atantijsha. 4 Latijsha Pilatoja ottoja yosse ashmuta judiu: “Pannotcheni achaya bëjtaya pailecha naa sëja nish candechei-tila lëttamash aënnëtë” muta. 5 Latijsha Jesusja otto latiji, pattaj corona linu, bürrüu iterterimau limayupa cuta. Pilatoja ashmuta: “Bënnaja ana shunñe” muta. 6 Jesús bëjtalëujcha, Judiu mabuitauja, Dios aSibë ujajbëshëu-tina caliporessumauja ashtau: “¡Pëjpëchauya curushai! ¡Pëjpëchauya curushai!” tau. Pilatoja ashmuta: “Cabaliya pipëjpë paaja. Nij-nish candechei sëë aënnëtë boboniti” muta. 7 Judiu mabuitauja ashcutau: “Catütütu lëtta teremtë naa tappëshamau literemtëjtiuti shinama. Ati teremtëja tandyuju tuhuiya ibaatila naa ‘Dios aBontoi sëë’ tajtitila” cutau. 8 Ashtauti malahuëshëja, Pilatoja mappëlë dyulujta latiji. 9 Yupaja inelchi cuite Jesús yosse: “¿Amajshabëshëm mëë?” cuta. Jesusja nish cuj-cuya latiji. 10 Pilatoja ashcuta: “¿Ëshë nish mijusuchi tëyanimti, achuta sëë tëlibatijsha curushai mipëjpë mimbëi, mintele mimbëi chaniti?” cuta. 11 Jesusja ashcuta: “Dios nish mëliba mimbëti, nish mëlibala tindulanimti lëttamash bëshëë. Atila, naa mëëchi tihuitajbëshëja mappëlë ënnëtësh imbëtëlëbëla mëëjsha” cuta. 12 Jesús achutaticcashbache, Pilato cuj-cusuychi iteleya bacheniti. Lachamatijsha judiuja bintalë caliporessumauja ashcutau: “Mëja iteleya ati shunñe, atumishtam mieme mibuita César. Bëjtam, yancala buitajbëshëja atumijti ati” cutau. 13 Pilatoja malahuëshëja ati buibu candyujuti, otcheja Jesús pujtachi letuja tütü aasientoi naa matatibima ëshshëu limalattatauti. Latiu mabuibula ‘Gabata’ cutajtiu ati. Ati camanhuihuiuti ënnëtësh imbëtëjbëshëu muiteteya mabobo mambë, cusuti mantele mambë chajti. 14 Shunshatati, lëtta puini bannati mafiesta Pascua, Pilatoja ashmuta judiu: “Bënnaja pabuita” muta. 15 Lachamatijsha, latiuja binta lëshëttëbeuja ashtau: “¡Tuhuichaya! ¡Tuhuichayala curushai!” tau. Pilatoja ashmuta: “¿Amaja pëjpëya boboshti pabuita?” muta. Judiu mabuitauja ashcutau: “Cesartija lëtta tuhua tabuita” cutau. 16 Latijsha Pilatoja mambache Jesús soldau achaya cabaliya pëjpëchau curushai mutati, cabaliu latiji. 17 Latijsha Jesusja tala camlaja ajurusha, caotto pueblojsha naa ‘Tuishamadala’ imaccatajbëshëtchi. Latiu mabuibula imaccata ‘Gólgota.’ 18 Ati huihuiuja pëjpëu Jesús curushai. Mapëjpëu lacha lëshie shunñeu, lëttaja Jesús adulujsha, attaja achobejsha cuta. 19 Pilatoja cateremtë mambë buibu anuta: Latijsha ati teremtë cadapa mambë Jesús adalashchitta. 20 Bëmë judiu leeu ati teremtë naa Jesús lipëjpëuti latilëitila Jerusalensha. Lihui buibula teremtëtë: judiu mabuibu hebreola, romanou mabuibu latinla latijsha griegola cuta. 21 Judiu mabuitauja cabëjtauja ashcutau Pilato: “Cateremtëyu ‘judiu mabuita’ cutau. Cateremtëcham ‘anaja judiu mabuitai sëë tajtiyachi’” cutau. 22 Pilatoja ashmuta: “Cateremtëjtiti, lachuta cassështala” muta. 23 Pëjpëlëuja Jesús, lëpsha soldauja pishacheuja lëttuma lëttuma catütüu abëshë latijsha lëttima abürüu nish ishebutaj-bëshëu cuta. 24 “Ati bürrüu nish mabititëntu” tau. “Lëmmui abëssëya naa bëstë adechechi candelejbëshëja matütüni” tau. Dios abuibutebeshamauja teremtëu shinama anuta: ‘Pishacheu tibëshë. Tibürüula abëssëya, lëttaja matütüshta’ ta. Soldauja adulau naa emejmesh lachuta cürüs shinama literemtëtëtishcuta Dios abuibui. 25 Jesús lipëjpëutishchitta massëtëu ameme, alëlë María, naa Cleofas abashti latijsha María Magdalena cuta. 26 Jesusja bëjtaja ameme dap cussëti aëshëta naa cuj-cutojojtiti ashcuta: “Meme, anaja mibontoshta-naja” cuta. 27 Latijsha ashcuta lacha aëshëta: “Anaja mimemeshtanaja” cuta. Laticcashbache ati cumla latiji asibëchi, cutütüshtatila apënnëtë. 28 Latijsha Jesús caileti naa amumui campëlë dulatila asahuata lana ellei ashta: “Tisamti” ta. Dyaju anuta achaya literemtëtëtishcuta shinama Dios abuibui cürüs imbëtështatila. 29 Lati matütüu binu eiyej-bëshëu lëtta uriyai. Atchi limañoñauja tarapunñu mashübüj-tauja lëtta cummë tëchiccai, camanhuicheu Jesús apillëchi achaya ensecha cutautila. 30 Jesusja madyodyoja ashta: “Timpëlë dëppë dulainaja amumui” ta. Lati ashtalëja, adala huëcheja tuhui latiji. 31 Latijsha judiu mabuitauja baliuja Pilato litütütchi cumuitenish-tau-tila curushai daj balijbëshëu ashcutau: “Numajsha talaulatabaja huita, tafiesta Pascuaja huita chastatila, nish tajusu daj balichauya shamaj-bëshëu mutantuti. Atila, ‘mapishishi malarapaya, mapuchap’ mutacham misoldau, bëjtam, talaulatabai nij-nish talibajti muñetantuti tuishamau” cutau. 32 Atila, soldauja camanrapau apishshiu naa Jesús ashëlijsha dajajbëshë latijsha naa atta ashëlijsha dajajbëshë cuta achaya curata shamachau mutautila. 33 Jesús cuñetauja, bëjtau tuhuiti. Atila nish camanrapau apishshiu. 34 Lachamatijsha, lëtta soldau lojototi Jesusshama asoporoi, tishilëjti otto tëbbë, samma cuta. 35 Naa emejmesh atantila bëjtajbëshëja ati bëshëë yoccoshemash pandyujula naa libëjtajtiti achaya paaja leletishtaptila lacha. Lati cailela ana buibuja yoccoshejbëshëtila. 36 Anuta ibëbëu Jesús naa lachuta teremtëtëtila shinama naa ‘lëttamash atoo nish arambashtau’ tatila. 37 Atta buibu teremtëtëjbëshëja ashta lacha: ‘Latiuja ujashtau naa lilojotojtiuti’ ta. 38 José, pueblo Arimateashaj-bëshëja malaja cuiteni Pilato Jesusshama adojo. Latija Jesús canlelejbëshëtijsha, nish mandyuju lëttamash naa judiu mabuitau malashojtotila. Pilato ‘cammalala’ cutati, Joseja shopcheja curushajsha camla. 39 Nicodemo lacha, naa ushta numma liujanija Jesús cudyërërëj-bëshëja camla lacha mirra, aloetina mujatajbëshë shushuta treinta kilo catütüjbëshë. 40 Joseja, Nicodemotina miiuja Jesusshama, marütauja sabanu shushuta mujatajbëshëla, tuntau naa maaptau tuishamau limandulajtiutishcuta. 41 Naa Jesús curushai lipëjpëutchi bac mabushu poloris, ballatau cuta. Ati ballatamujuchi tütü lëtta oshpe ëuhuëtë ëshshëi naa ushta liëuhuëjtiuti tuishamau matebeni. Lëttamash tuishama nish yupaj-yupapaubëla ati ëuhuëtëi. 42 Latilëi tütütila ati ëuhuëtë, Joseja, Nicodemotina yupapau Jesusshama adojo latchi, naa ñuñujulë bannatila malaulatabaniti.

20

1 Dumincui, canimash emejmesh lëjlëti, María Magdalenaja mala Jesusshama libushautchi. Latchi huitaja, cabëjta matatima ëshshë naa lijalabëjtiuti ëuhuëtë ashelchi catërita catütüti. 2 Lati cabëjtaja, ayajta huilitaja achichi mandyujuni Simón Pedro latijsha Jesús aëshëta naa cuj-cutojojtiti cuta. Mariaja ashmuta: “Miiuja cabaliunaja taBuita-shama ëuhuëtëjsha. Nish taile amchi cabaliutila” muta. 3 Latijsha Pedroja, acheetina baliuja liujaniu naa ëuhuëtë. 4 Ayajta baliuja lëshieujcha lëttai, Pedro acheeja chitta calamlaja huita liusha. 5 Huitalëja, huëtaja liujaja mabëjta sabanu limabushuti. Lachamatijsha nish yupa. 6 Limiye Simón Pedroja huitaja yupa ëuhuëtë inelchi. Latija mabëjta lacha sabanu limabushuti. 7 Mabëjta lacha tarapu, naa Jesusshama adala cantuntajtiuti mandala attachimash tuntata matütüuti. 8 Latijsha liusha huitajbëshëja yupa lacha. Latija mabëjtaja sabanu limabushuti latijsha tarapu matütüu chamauti, leleti naa Jesusja lilimtatila. 9 Bëjtautijsha, cani maile huëshëtëubëla naa tëtëjbëshë dyajutila Dios ateremtë, naa ‘Jesusja tuhuiya lilimtashta’ tatila. 10 Latijsha latiuja huilitau latiji masibëchi. 11 Mariaja ahuëhuima tütü ëuhuëtëshchitta. Ahuëhuimatijsha, huëtaja lishde inele ëuhuëtëi. 12 Mabëjta lëshie ashaajshajbëshë ángeleu bolosh ibëshë limassëuti, naa Jesusshama libushajtiuti. Lëttaja adalajsha tütü, attaja atehuejsha tütü chamau. 13 Angeleuja cuiteuja ashcutau: “Tishoja, ¿ëshë ahuëhui-mamchi?” cutau. Latija ashmuta: “TiBuitashama cabaliutila ahuëhuimai, naa nish tëiletila amchi cabaliutila” muta. 14 Lati ashmutalëja, Mariaja ashëlchi ishedeja bëjta Jesús tësëti. Lachamatijsha, lipeshe naa Jesustila. 15 Jesusja cuite: “Tishoja, ¿ëshë ahuëhuimam? ¿Aa bëbëm?” cuta. Mariaja cuimalumaja ‘neintaya ballatamuju ujajbëshëlaba ati’ cutaychi. Atila ashcuta: “Tata, mëja camlaya, tindyuju-cham amchi camlamja libusham-tila achaya caimalani” cuta. 16 Jesusja cunirija ashcuta latiji: “María” cuta. Latija pishitaja ashcuta: “¡TiBuita!” cuta. 17 Jesusja ashcuta: “Tintelema, bëjtam, cani malaibë tiTata litütütchi. Malaya mandyujunimabë tibisiu naa sëja huilitashtitila tiTata litütütchi. Latija sëë tiTata, paa paTata, sëë tiDios, paa paDios chama” cuta. 18 Latijsha María Magdale-naja malaja mandyujuni latiji Jesús aëshëtau naa maBuita bëjtatila. Mandyuju lacha amumui naa Jesús lijandyujujtiti. 19 Ati dumincui shëhuëti, Jesús aëshëtauja lëbbëuja mapillëtë limassëu, judiu mabuitau malashojtoutila. Jesusja sac mancüttaja mamujumujui mudyërërëja ashmuta: “Nish lipijuccuyunaja. Lë tachap pashinojshei” muta. 20 Lashmutaja mamancütche abanau, asoporo mancütche chama. Latiuja maBuita bëjtauja, lijaj-lijashudyeu. 21 Latijsha Jesusja ashmuta yosse: “Nish lipijuccuyunaja. Lë tachap pashinojshei. TiTata tibachetishcuta lana ellechi, lachuta sëja pabacheinaja lacha paa mandyujunishtaptila tibuibu elleibëshëu” muta. 22 Malashinojoja ashmuta: “Catütüchap Dios aEspíritu Santo. 23 Paa mandyujupti tibuibu attimau, Diosja mancuhuështa maënnëtë naa leletijbëshëu. Lachamatijsha nish leletiuti, Diosja nish mancuhuështa maënnëtë” muta. 24 Lëtta Jesús aëshëta Tomas, naa ‘mellizo’ cutajtiutija, nish mutütü acheeu Jesús mancüttati. 25 Latijsha acheeuja ashcutau: “Bëjtatunaja taBuita” cutau. Tomasja ashmuta: “Sëja nish bëjtaya arebe abanai, nish yupapaya tishishta naa calau lijayupati latijsha nish mayupapaya tibanau asoporoi, nish lej-leletishtila naa lilimtatila” muta. 26 Ochotti puiniti, Jesús aëshëtauja dechetau yosejse, pillëtë emejmesh lëbbëuja. Aticcai Tomasja mutütü latiji. Jesusja sac mancüttaja yosse ashmuta: “Nish lipijuccuyunaja. Lë tachap pashinojshei” muta. 27 Latijsha Jesusja ashcuta Tomás: “Bëchuta nish leletimse, yutchinaja. Yupapamanaja mishishta tibanai latijsha mibanau mayupapamanaja lacha tisoporoi. Sëlu, ‘nish leletishti sëë nish bëjtaya’ tayu. Leletichamla” cuta. 28 Latijsha Tomasja ashcuta latiji: “¡Yoccoshela! ¡Mëja tiBuitam, tiDios chamamla!” cuta. 29 Jesusja ashcuta: “Tibëjtamtila leletimnaja. Diosja lishudye mambështa naa nish tibëjtautijsha leletijbëshëu” cuta. 30 Jesús adulatijsha bëj-bëmëlë limambuitajbëshë aëshëtau matantijula, nish teremtëtë amumui ana libroi. 31 Lachama-tijsha, ana buibuja teremtëtë achaya paaja canleleshtaptila Jesús naa latija tapuchachajbëshë latijsha Dios aBonto chamatila achaya lati canleleya, limlishtap-tila papënnëtë.

21

1 Latijsha Jesusja mancütta yosse aëshëtau cudahua Galilea apepei. Ati cudahua attima amaccatauja Tiberias. Anuta mancütta Jesús. 2 Lëttai huinaniu Simón Pedro, Tomás, (naa ‘mellizo’ cutajtiuti), Natanael (naa pueblo Canajshabëshë), Zebedeo abontou, latijsha naa attima lëshie aëshëtau cuta. 3 Simón Pedroja ashmuta acheeu: “Malaya ahuerrënishti sëëbë” muta. Latiuja ashcutau: “Mëbatatu lacha” cutau. Latijsha lidandauja baliu lëtta pojorei. Amumui numma ahuerrëutijsha, nij-nish miiu lëttamash petche. 4 Lëjlështati bëjtau Jesús lubujlui tësëti, lachamatijsha, nish iyepeu latitila. 5 Jesusja munirija ashmuta: “Tibontoipa, ¿mimashipla?” muta. Latiuja ‘nijtala’ cutau. 6 Jesusja ashmuta: “Lijachittachap pahuerrëtë papojore adulujsha achaya mapuchap petcheu” muta. Jesús mandyujuti, lachuta dulauja lijachittauja, nish mamba camütau latiji mahuerrëtë, petcheu bëj-bëmëutila. 7 Latijsha Jesús aëshëta naa huilaj-huilalajtitija ashcuta Pedro: “¡TaBuitaijlabbari!” cuta. Pedroja ahuëshëlëjcha ‘taBuita’ cutauti, abëshë liyupaja lidele samachi. 8 Pojorei limassëjbëshëuja amërumë amërumë cabaliu mahuerrëtë petcheutina apashchi. Nish idoj-idojolë imuju naa petcheu limaputi. Neintaya cien metro naa limamalautijsha. 9 Madajauja bëjtau aima dutati. Ati aima asolsoi libushu lëtta petche. Bëjtau lacha biscocho. 10 Jesusja ashmuta: “Pimama peshe petcheu naa mapujtipti” muta. 11 Simón Pedroja lidandaja pojorechi, camüta latiji ahuerrëtë lubujluchi matatuma petcheutina. Petcheuja ciento cincuenta y trestiutijsha, nish cabititëu mahuerrëtë. 12 Jesusja ashmuta: “Piama, pitiyabë” muta. Lëttamash aëshëta nish cusu cuiteniti amatila naa mailetila maBuitatila. 13 Latijsha Jesusja mudeleja miija biscocho mampishache latiji. Lachuta mamampishache lacha petcheu. 14 Lihuijutanaja mancüttati Jesús aëshëtau, naa tuhuija lilimtaticcajsha. 15 Tiyauja majantoroti, Jesusja cuiteja Simón Pedro ashcuta: “Simón, Juan abonto, ¿tihuillam mappëlë anaujsha?” cuta. Pedroja ashcuta: “Te. Mëë mëile mihuillaitila, tiBuita” cuta. Jesusja ashcuta: “Mantoyocham tiohuejou” cuta. 16 Latijsha cuiteja ashcuta yosse: “Simón, Juan abonto, ¿tihuillamla?” cuta. Pedroja ashcuta: “Mihuillai tiBuitala. Mëë mëile naa mihuillaitila” cuta. Jesusja ‘mantoyocham tiohuejou’ cuta yosse. 17 Latijsha cuiteja ashcuta yosejse: “Simón, Juan abonto, ¿tihuillamla?” cuta. Pedroja adyij-adyindye latiji naa Jesús lihuijuta cuiteja “¿tihuillamla?” cutatila. Latija ashcuta: “TiBuita, mëë mëile amumui. Mëë mëilela naa mihuillaitila” cuta. Jesusja ashcuta: “Mantoyocham tinlelejbëshëu chama tiohuejoushcuta. 18 Yoccoshe mindyujui, mëja shinama mibontoi liyupaya mibëshë malajtim naa limijusutchi. Lachamatijsha, pëpëmti, bana tësëmti, attaja liminyupapaya, mibata naa nish limijusutchi malanimti” cuta. 19 Jesusja ancutaja candyuju Pedro naa amashcuta tuhuishtatila pënchi. Lati bëjtaya achuta tuhuiti, mammui ‘emejmela Dios’ cuitatashtautila. Latijsha Jesusja ashcuta Pedro latiji: “Tëhuinanichamla” cuta. 20 Pedroja pishitaja bëjta limiye amalati Jesús aëshëta naa cuj-cutojojtiti, naa bëtija atiyauti dap cutütüja cuite ushta aBuitase ‘¿amaja cabalichauya judiu mabuitau mëtashtachi?’ cutaj-bëshë. 21 Pedroja bëjtaja cuiteja Jesús ashcuta: “Buita, ¿amashcuta imbëtështachi ana?” cuta. 22 Jesusja ashcuta: “Sëë tijusuti, tëliba limli huinani ibëbëniti lihuilitashtitic-cachi. ¿Ëshë mëilenta mëë atila? Tëma mëë” cuta. 23 Jesús lashtaticcajsha cuhuinanijbëshëuja latitilijti anërrëuja ashtau ‘nish tuhuishtaya ati’ tau. Lachama-tijsha, Jesus ‘nish tuhuishta ati’ nish taychi. Anuta ashta: ‘Sëë tijusuti, tëliba limli huinani ibëbëniti lihuilitashtiticcachi. ¿Ëshë mëilenta mëë atila?’ ta” cuta. 24 Anajajti Jesús aëshëta anëri, ana libro teremtë chajbëshë. Tailela ana buibu anërijtiti nish shihuatila. 25 Tüj-tütübëla bëj-bëmëlë bëshëë naa Jesús lëdulalajtiti. Amumui lëttuma lëttuma teremtëtëta neintaya nish abibëyachi ana ellei capëjtaniuti amumui ati librou.