1 Дара ауат амшква рагӀан адгьыл шабгу йыквчӀвата йыбзазауа ауагӀа зымгӀва йыпхьадзата йыгӀвыхра атахъыпӀ йхӀван Цезар Аугустус ауаса йыщаквйыргылтӀ. 2 Ауи ауагӀа рыпхьадзара Квириниус Сириа дахъыта йаныйнапӀыцӀаз агӀан йапхъахауа уагӀапхьдзаран. 3 ДасузлакӀгьи тшандыныйцӀарныс дыджвыквылтӀ, дызачӀвызлакӀгьи йара йыкӀвыршарта ахьыла дыцахуан. 4 Ауи апшта Йусуфгьи Даут йытгӀачва-йыжвла даъауаз йыгӀалцӀуата Галилеа дытыцӀын, Назарет кӀвыршарта дытыцӀын, Галилеа йыгӀаланакӀуа БейтлехӀем кӀвыршартахӀва йазпхьауа Даут йыкӀвыршарта ахьыла дыджвыквылтӀ. 5 Йусуфи Йусуф йызырхӀвайыз Марйами тшанддырцӀарныс йыджвыквылтӀ. Марйам ауи асхъан дымгвадууын. 6 Ауаъа йаннадза Марйам лыхьара гӀалщахӀалтӀ. 7 ДыхьатӀ. Дыхьан апхъахъшата па дылоутӀ. ЙыгаракӀасква йыкӀвлыршан аччора дыталцӀатӀ, йауа уыхӀварыкӀвын Йусуфгьи Ларгьи асасырта йыздгылыз йырчвыта йыгӀацӀцӀын даргьи пхьартадаъа йыгӀанхатӀ. 8 Ауи агӀан архъа апны ауасахчачва ыквын, рыуасахӀвычаква уахъынла йырхчалун. 9 Анчва йдыура гӀайкӀачӀчӀауа, акӀкӀара йыхъагыла, Анчва йыхӀвачӀвыгӀвы ауаъапны зынла дыгӀаншан ауасахчачва рпахь дыгӀагылтӀ. Ауасахчачвагьи швара дыу алырхтӀ. 10-12 «Швымшван! Сара ауагӀа зымгӀва зыргвыргъьуш ргвыргӀъарадукӀ швасхӀвитӀ: УахьчӀва Даут йыкӀвыршарта апны швара швызымрыдзуаш ШвыхчагӀвы дыгӀадрийтӀ. Ауи ЙыхӀаракӀу МасихӀ йакӀвапӀ. Абар швара швыхъазла адыргагьи: АцӀайпшка агаракӀасква йыкӀвырша аччора дытата дыжвбуштӀ», — йхӀван йырайхӀватӀ ахӀвачӀвгӀвы. 13 Иара ауаъапны зынла цӀгӀва змам ажвгӀванд ар Анчва йыхӀвачӀвыгӀвы йыгӀайыдзхъагылтӀ. 14 «АжвгӀванд йыквчӀваквугьи Анчва дыдыртшыхъваларагӀатӀ! АчӀвыла ахъахь йыквта Ауи йылпха зыквшваз ауагӀа зымгӀвагьи ргвы-рпсы щтӀакӀызтӀ!» — хӀва ауат Анчва йыхьыз щӀырхуан. 15 «БейтлехӀем хӀыцапӀта ари акӀвапӀ йыгӀаншазхӀвата ЙыхӀаракӀу йыхӀызгӀайыргаз гӀахӀхӀырдырпӀ», — рхӀван ауасахчачва айчважватӀ ахӀвачӀвыгӀвчва ауат йыркъвыцӀхта ажвгӀванд йанхъалх амщтахь. 16 ЙыгӀадрыласын йгӀайын йыгьирбатӀ Марйамгьи, Йусуфгьи, аччора йтаз Апшкагьи. 17 Ауат анырба Апшка йыхъаз ахӀвачӀвыгӀвчва йырхӀваз Марйами Йусуфи йырархӀватӀ. 18 Ауасахчачва йырхӀвауа зыгӀаз зымгӀвадзугьи йырымаджьащахъван. 19 Марйамгьи арат ажваква закӀы агӀв лымщтуа зымгӀва лгвы йыталкӀуан. 20 Ауасахчачвагьи Анчва йыхьыз щтӀырхуа, Анчва дыдырдууа-дыдыртшхъвауа йыгӀахъынхӀвыхын йыгӀайхтӀ.