1

Лукайи Феафилас ликІиная

1 Гьал ппараттар алучІуная ахъакьас че мисаъ хьуна, ккеттушу курарихъас. 2 Час ге курарикес хабарди аяфе Аллагьдин гаф файде инсанарикес, ге курар чиппин уларилди ке цІае кІилиас мич агуна. 3 Зунна кьастт акьуная, кІилди ке удигьас ягІар акьуна, садпеттилас мич вас ликІенас, хІуьлматлу Феафил, 4 вас агурай пуна, те вас ягІар акьунаттар дуз идеф.

Малайикди Захарияйис акьуна идже хабар, пайгъамбар ЯхІъя хасе пуна

5 Ягьудея агъа дерейин хІавелдиъ Ирод агъа паччагь ая вахттуни, ахьуная тисаъ ешемиш вей Захария агъа са малла, Абияйин инсанарикес. Захарияйин хьир хьуная Арунан тухумдиас, агъай хьуная гис Элизаветта. 6 Іудара Аллагьдин юлайиъ ая инсанар хьуная гебур, дузди аркьай кІилди Аллагьди пунаттара, ликІинаттара. 7 Элизаветта шиниккв кидаф идехІела, шиникквар хъахьуна адава гебурихъ. Іудара хІа яшариъ ахьуная гебур. 8 Захарияйихъай ая маллабурин нубатиъ ай вахтт хъучадиная чиппил але фарз акьас Аллагьдис. 9 Маллабурин арайиъ ая гІедатилди, ихьуная кІур. Захарияйис агъдиная ге кІур: батІар ниъ хъая шамар кикІас Аллагьдин хулаъ. 10 Ги Аллагьдин хулаъ батІар ниъ хъая шамар кикІа вахттуни, кІилди халкь гъузуна ахьуная хІеятиъ дуьгІебур аркьай. 11 Гисаъ, шамар кикІа усан хІурджал багулихъ, малайик гъузуна агуная Захарияйис. 12 Малайик агуф, фиркьайчира дагІай, гучІ хьуна гъузуная Захария. 13 Малайикди пуная гис: – ГучІ мева, Захария, ве дуьгІе унихьуная. Хьира ве Элизаветтайи хасе вас кІиркІ, вун алихьуна кканхьасе гил ттур ЯхІъя. 14 Вас ппара хІа шадвел гъасе ги, ацІунттар шад хьасе ге хегуна. 15 Аллагьдин улиъ ахьасе ге зурба инсан суман, ухай ахьасттава ги я чехир, я джуьре ухаттар, Аллагьдин РуьхІ ахьасе гихъай уч хуру ягъанилас мич. 16 Ппараттар Іизраилдин халкьдигІас алдаркас акьасе ги Аллагьдилди. 17 Ге вей ахьасе Аллагьдин удигь, пайгъамбар Илйайин суман руьхІна кьуват хъай, ги дадарин юркІвар дахъасе шиниккварис, ги дава рекъуьъ аяттар дуз рекъуьъ ихьасе, ги хІезур акьасе халкь Аллагьдил юркІв алиянас. 18 Захарияйи хабар гъушуная малайикдифас: – Фиштти ягІархьасе зас ле дуз идеф? Зун гьал Іуьссеф э, хьира зе джигьилф дава. 19 Малайикди пуная гис: – Зун Джабрагьил э, зун Аллагьдин удигь гъузунаф э. Ли зун гьикунафе вас гьеме пас, вас идже хабар акьас. 20 Зун вас пеф аларкьвасе учин вахттуни, амма агьал вун Іебаб хьасе, зе чІаларихъ хъудугъухІела. Вун Іебаб хьуна гъургъас девей ахьасе джалла зун петтар аларкьвасттегьен. 21 Халкь гъузуна ахьуная Захарияйихъ, муьхІтал хьуна, фас гин кьана хьефегьан агъай аттес Аллагьдин хулаас. 22 Захария аттиная, амма гъургъас вей хьуна адава гифас. Гебур гъавурдиъ архьуная Аллагьдин хулаъ гис фиичира агвар акьуф. Іебаб хьуна, инсанарихъай ишаратарилди гъургъай хьуная ге. 23 Аллагьдин хулаъ кар ккиркІуна, ушуная ге учин хулади. 24 Са чІукь вахттунилас гин хьир Элизаветта хьуная фуниъ. ГІифу ваз хьасттегьен уч фуниъ аяф джин аркьай, ги агъай хьуная: 25 Аллагьди йинаф э зас ме, Учи амур акьугуна, заалас инсанарин чІаларин къакъ алттивуна.

Малайикди акьуная идже хабар, Іиса хасе пуна

26 Ерхьидпе ваз хьегуна Элизаветта фуни ай, Аллагьди гьикуная малайик Джабрагьил Галилея дерейин Назарет агъа хІуриди, 27 Юсуф агъа инсандис хъаттийина са рушалди. Юсуф хьуная Давудан тухумдиас. Ге рушас агъай хьуная Майрам. 28 Малайикди адина пуная Майрамас: – Салам! Шад ухь, Аллагьдин иджвеликк кичархьуна дишагьли! Аллагь ая вахъай. 29 Майрам муьхІтал хьуная ге чІаларил, ги фикир аркьай хьуная, фас гишттин салам ефегьан агъай малайикди. 30 Малайикди пуная гис: – ГучІ мева, Майрам! Вун Аллагьдин иджвеликк кичархьуная. 31 Вун фуни хьуна, хасе вас кІиркІ, алихьасе вун гил ттур Іиса. 32 Зурба хьасе Ге, Гис Аллагьдин КІиркІ агъай ахьасе. Аллагьди Гис есе Гин дадарин, Давудан тахтт. 33 Ги гьемишанди паччагьвел аркьай ахьасе Якьубан халкьдил, Гин Паччагьвелдин ахир хьасттава. 34 Майрама пуная малайикдис: – Зун шувас душунагуна, Фиштти э ле вереф?! 35 Малайикди джуваб йиная: – Аллагьдин РуьхІ аладесе ваалди, Аллагьдин кьуватра архьасе ваъ, дехІела, вас хуру гирами шиникквдис, Аллагьдин КІиркІ агъай ахьасе. 36 Тагьа Элизаветтара, ве багунф, шиниккв кидаваф э агъаф, фуниъ ая учин хІа яшариъ ай магьа ерхьидпе ваз э, кІиркІ э тинфра. 37 Аллагьдифас агъдарукьаф фера афттава. 38 Майрама пуная: – Зун Аллагьдин гъиликк ккеяфе. КІилди гьеле вун пегъилди хьурай. Хуппай малайик ушуная гигьас.

Майрам ушуная Элизаветайилди

39 Са чІукь гагьдилас Майрам тегІди кей ушуная Ягьудеяйин сувари ая хІуриди. 40 Адина Захарияйин хулади, салам йиная ги Элизаветтайис. 41 Майраман салам унихьугуна, Элизаветтайин фуниъ тІушуная шиниккв. Аллагьдин РуьхІ архьуная Элизаветтайиъ. 42 Элизаветтайи гьавайикес гъургъуна пуная: – Вун хумбаригІас, Аллагьдин иджвел але дишагьли! Аллагьдин иджвел алдея ве шиникквдилла! 43 Зун фуше, заалди зе ХІаттин баб адесттегьен? 44 Ве джил зе ибурихъди ахъадегуна, шиниккв ишине зе гІанаъ шад хьуна. 45 Бахттлу э Аллагьдихъ хъугъу дишагьли, Аллагьди гис педегьенттар аларкьвасе. 46 Майрама пуная: – Шукур аркьая зе руьхІди Аллагьдис, 47 Бахилдея зе руьхІ Аллагьдил, зун УхІуттил, 48 заал, учин лукІул, ул алчихьухІела, Ли зун хІисабикк акьуна. Магьа гьалдихъас хаб бахттлу агъай ахьасе зас кІилди джилилас алавередегьен инсанари, 49 зас хІа зурба иджвел акьухІела Гуджлуйи. Лин Ттур – гирами э! 50 Лин иджвел алдея дуьнйайилас алавередегьен инсанарил, Лигьас гучІаттарил. 51 Ли дагъуна Учин гуджлу гъил, далгъванас акьуне дамакъар кеяттар, кІилди гебурин фикирара хъай. 52 Кьуват хъаяттар алайкуна тахттарилас, Ли кегъдивуне уджуз акьунаттар, 53 гашила аяттарис Ли иджвелар йине, девлетлубур фера фадавай гьикуне. 54 Адине кумакис Іизраилдис, учин лукІус, кІвал хьуна 55 иджвел акьасе пуна гаф йинаеф хье дадарис, Ибригьимасра гин халкьдисра гьемишанди. 56 Са хьибу вазала дегьен Элизаветтайихъай экьуна, хаб адиная Майрам учин хулади.

Хуная пайгъамбар ЯхІъя

57 Вахтт хъучадегуна, хуная Элизаветтайис кІиркІ. 58 Элизаветтайис Аллагьди йина иджвелихъас унихьугуна, Элизаветтайин къуншибура, багунттара шад хьуная. 59 Муядпе ягъа адиная гебур шиникквдин суннат акьас, ттура алихьас кканхьуная шиникквдил, учин дадас агъаф суман, Захария. 60 Баб рази хьуна адава: – Ваъ, гил алихьасе ЯхІъя, – пуная баба. 61 – Ве тухумди фушра лишттин ттур алеф адава! – пуная гебури Элизаветтайис. 62 Ишаратарилди хабар гъушуная шиникквдин дадафас, ттур фуш алихьас кканде вас пуна. 63 Захарияйи, нан пуна тахтта, ликІиная: «Гин ттур ЯхІъя э». Джалла муьхІтал хьуная. 64 Гьеге сеІетти чІал агьадиная Захарияйин, учифас гъургъас хьегъилди, шукур акьуная ги Аллагьдис. 65 Джаллабурис гучІ хьуная. КІилди Ягьудеяйин сувариъ Іаре гьеге Іеламатихъас хьуная ахттилат аяф. 66 КІилдибури, гихъас унихьуттари, хияликк кичушуна, агъай хьуная чаб чиппикди: «Фуш хьасегьан ге шиникквдикес?» ХІекьданди, Аллагьдин гъил алхьуная ге шиникквдил.

Захарияйи учин кІиркІахъас пуна гаф

67 Шиникквдин дад, Захария, Аллагьдин РуьхІ архьуна, гъургъуная пайгъамбар суман: 68 – Шукур хьурай Аллагьдис, Аллагь адина Учин Іизраилдин халкьдилди азадвел йине Учин халкьдис. 69 Дагь заманайилас мич Учин пайгъамбарарилас хабар акьуна, хьес пунаф суман, Ли гьикуне Учин лукІ Давудан тухумдиас, Кьудратлу хьин УхІаф. 71 Ли хьин ухІасе хье душманариккесра, кІилди хьяъ хъел аттариккесра. 72 Ли гаф йинафи, иджвелар акьасе пуна хье дадарис, юркІуралла атасе пуна Учин гирами китабиъ ликІина, 73 Хье дад Ибригьимас йина гаф, хьин душманарин гъиликкес Учи ккеттивасе пуна. 74 Сайигьасра дагучІай, хьин Лин лукІвел аркьай ахьасе, 75 ХІекьди Гирами хьас Лин удигь кІилди хье Іуьмурди. 76 Вас, зе шиниккв, агъай ахьасе Аллагьдин пайгъамбар, вун Аллагьдин удигь ушуна кканеф идехІела, Гис рекъ хІезур акьас. 77 ЯгІар акьас Гин халкьдис, чве гунагьарилас гъил гъушуна, чун Аллагьди ухІасе пуна. 78 Аллагьди, Учин кканевелдина иджевелди, гьикасе хьес заварин нур, 79 мучІаъ ешемиш вей, Іеджаликк ккеяттарис, хьес маслихІетин рекъ агвар акьас. 80 БицІи ЯхІъя хІа вей, фагьумра ппара хьуная. Ге ешемиш вей ахьуная къумариъ, учин вахтт хъучадесттегьен Іизраилдин халкьдигьди айчІвас.

2

Хуная Іиса

1 Те вахттуни Август агъа паччагьди буюрмиш акьуная, сан аркьай ликІен пуна джалла учин джилил ешемиш веядегьен инсанар. 2 Гиштти сан аркьаяф инсанарин садпегелай хьуная Сирия агъа хІуькуматтин хІаф Квириний идегуна. 3 Джаллабур ушуная чаб учётариъ ихьас чиппин шагьурариди, хІурариди, гьерф учин дадарин ватандилди. 4 Юсуфра ушуная Галилея дерейин Назарет агъа хІуриас Ягьудеяйиди, Вифлеем агъа Давудан хІуриди, Юсуф уч Давудан тухумдиас идехІела. 5 Юсуфахъай ушуная гин фуни ая хьир Майрамра. 6 Са чІукь гагьдилас Вифлеемдиъ хъучадиная хьиран руха вахттар. 7 Хуная Майрамас садпе шиниккв – кІиркІ. ГІадиджина чаппаригІ, икІуная ги шиниккв тІунаъ, гІалашувар гъурзан хулаъ мукь ахьуна адава гебурис.

Малайикари хІуьппехъенарис акьуна идже хабар

8 Майрамна Юсуф ая мукьуйигьас Іайи варха давай хІуьппехъенар алхьуная чІирил Іуьшан къаравулдиъ. 9 Сад пуна, заварин нур ичай, бадил хьуная гебурин удигьди малайик. ГучІ хьуна тІушас девей гъузуная хІуьппехъенар. 10 – Чвас гучІ мева, – пуная гебурис малайикди. – Зун кІилди инсанарис, идже хабар фай адинафе. 11 ЯгІа Давудан хІуриъ Вифлеемдиъ хуная Месигь, инсанар УхІаф. 12 Чвас те Шиниккв магьмилди ягІархьасе: чаппаригІ гІадиджина тІунаъ ахьасе Те. 13 Садпуна ге малайикдин багуливди бадил хьуная хъара ппара малайикар, дуьгІебура аркьай: 14 – Шукур варттал але Аллагьдис. Дуьхьуьвелна нуьхІуьбат Аллагь рази ая джилил аледегьен инсанарис. 15 Малайикар уларигьас гулугуна, хІуьппехъенари пуная: – Див хьин, хьес Аллагьди акьуна хабарихъди Вифлеемдиди вес, агвас тисаъ хьунаеф. 16 ТегІди кей учІуная хІуьппехъенар рекъуьъ. Адегуна, джикІиная гебури Юсуфна Майрам. ТІунаъ икІуна бицІи шиникквра ахьуная. 17 Шиниккв агуф, хІуьппехъенари ахъакьуная чиппис малайикди Ге Шиникквдихъас петтар. 18 Джалла юркІв алийинаттар муьхІтал хьуна гъузуная, хІуьппехъенари файдина хабарил. 19 Майрама кІилди ге курар учин юркІураъ икІуна атуная. 20 ХІуьппехъенар адиная хаб алдаркуна, шукур аркьай Аллагьдисра, кІилди чиппис агуттарисра унихьуттарисра. Малайикди гебурис пунагъилди хьуная. 21 Муйе ягъалас суннат аркьа вахтт хьегуна, алихьуная шиникквдил ттур Іиса. Фуниъ хьастти алийина ттур хьуная ге малайикди.

Іиса Аллагьдис бахш акьуб

22 Шиниккв хуна хумбеф мертт вере вахтт алттархьегуна, Юсуфана Майрама, Мусайин закунилди, файдиная Шиниккв Ерусалимдиди Аллагьдис бахш акьас, 23 Аллагьдин закуниъ ликІинагъилди: «Гьертти учин садпе кІиркІ бахш акьуна кканефе Аллагьдис», 24 садакьара акьас, Аллагьдин закуниъ пунагъилди: «Іу гІуд я луфуран Іу чарккв». 25 Ахьуная те вахттуни Ерусалимдиъ Симеон агъа са инсан. Ге хьуная Аллагьдин юлайиъ ай дуз юркІуран инсан, гъузунаф Аллагьдин Кумакихъ Іизраилдис. Гил алхьуная Аллагьдин РуьхІ. 26 Симеонас Аллагьдин РуьхІди пуна ахьуная: – Вун кІесттава Месигь дагуна. 27 Аллагьдин РуьхІди ях агъаф суман, адиная ге Аллагьдин хулади. Гьеге ягъа Юсуфана Майрама файдиная гич бицІи Іиса, закуниъ агъилди акьас пуна. 28 Гебур ачадегуна, Симеона училди гъушуна Шиниккв, шукур акьуна Аллагьдис, пуная: 29 – Гьал Вун фартая юркІв сакинди Ве лукІ, Аллагь ТегІела. Аларкьуне Вун пуна гаф: 30 Зе уларис агуне инсанар УхІаф, 31 Вун джалла халкьарис гьикунаф. 32 Іекв, кІилди халкьарин улар дархъаф, ТегІрифе, Ве Іизраилдин халкьдин. 33 Дадна баб муьхІтал хьуная Симеона Шиникквдихъас петтарил. 34 Симеона гебурис хайир дуьгІера акьуна, Майрамас, Гин бабас, пуная: – Ме Шиниккв багьана хьуна, ппара инсанар Іизраилдиъ ахтт хьасе, ацІунттар Гин кумак фай гъайшасе. Михъас ппара хІуьджатар, гъургъубар хьасе, 35 ве юркІураас ханджал аттирхІу суман хьасе вас джуьреттарин юркІураъ ая джинабан хиялар ягІархьегуна. 36 Гисаъ ахьуная пайгъамбар Аннара, Фануилан руш, Асиран тухумдиас. ХІа яшарин Іуьссе хьир хьуная ге, шувас ушуна ери исалас джигьилди ами ашкІин хьунаеф. 37 Аме Іуьмур фатуная ги ашкІинди. МайцІурна якьу ис хьуная гин. Сивара ухІай, дуьгІебура аркьай, гьемишан Аллагьдин хулаъ ахьуная Анна. 38 Те арайи Аннара гьучушуна гебуригьди шукур акьуная Аллагьдис. Ерусалимдис Кумакихъ гъузунадегьен инсанарис ахъакьуная Аннайи ге шиникквдихъас.

Юсуфна Майрам хаб адиная Назаретиди

39 Аллагьдин закуниъ пунадегьенттара акьуна, адиная Майрамна Юсуф Галилея дерейиди, чиппин Назарет агъа хІуриди. 40 Шиниккв хІа вей батІар джанра акьуная, фагьумра ппара хьуная, Аллагьдин дуьгІебурин иджвел алхьуная Гил.

Іиса ахьуная Аллагьдин хулаъ

41 Гьер иса Іисайин дадар-бабар вей хьуная Ерусалимдиди Пасхайин хІа-ягъас. 42 Іисайин цІеІу ис хьегуна, адиная гебур, гьемишан чаб верегъилди суман, хІа-ягъарис Ерусалимдиди. 43 ХІа-ягъар кІиркІухаб, дадна баб ушуная хулади, Іиса экьуная Ерусалимдиъ. Дадар-бабарис ягІай хуна адава, Ге тисаъ амеф. 44 Гебурин фикир хьуная джуьре инсанаригІай рекъуьъ ай Ме пуна. Гиштти ушуная мебур кІилин ягъди. Хабди, руцуная Майрамна Юсуф Гихъас багунттаригІ, ягІаттаригІ. 45 ДаджикІина, хаб адиная мебур Ерусалимдиди Гихъас руцас. 46 Хьибу ягъалас джикІиная мебурис Ге Аллагьдин хулаъ. Ге гІахьуная мегІелимаригІ, гебурил юркІв алийина, гебурис суалар ирцІанди. 47 Джалла Гил юркІв алихьунаттар муьхІтал вей хьуная Гин фикирарил, Гин гъургъубарил. 48 Дадна баб ппара муьхІтал хьуная Ге агуф. Баба пуная Гис: – Е зе кІиркІ, Вун фас миштти акьуфе час? Ве дадра зунна гъамар аркьай руцай уйи Вахъас. 49 Іисайи гебурис пуная: – Фас руцаттар э чун Захъас? Чвас ягІай адавуйив Зун Зе Дадан хулаъ ахьуна кканеф? 50 Гебур гъавурдиъ архьуна адава Іисайи чиппис петтин. 51 Іиса адиная гебурихъай Назаретиди, гебурин юлайиъ ахьуная Ге. Джалла хьунаттар Іисайин баба учин юркІураъ икІуна атуная. 52 Іиса хІа вей, Іисайин фагьумра ппара хьуная, батІар джанна акьуная. Іиса кканхьуная Аллагьдисра, инсанарисра.

3

Пайгъамбар ЯхІъя ушуная ягІар аркьай, инсанарис хьеттигІ гІучІуна-гІайчІва гІедат акье агъай

1 Тиберия агъа паччагь Римдин паччагьвелди ай цІегІифудпе ис хьегуна, Ягьудея дерейин хІавелдиъ ахьуная Понтий Пилат агъаф. Ирод хьуная Галилея дерейин хІаф, гин чу Филип – Итурея дерейинна Трахания дерейин хІаф. Лисаний хьуная Абилена дерейин хІаф. 2 Кайяфана Ханан агъаттар хьуная хІа маллабур. Гьете иса, къумариъ ая Захарияйин кІиркІас, ЯхІъяйис, Аллагьди гьикуная хабар. 3 ЯхІъя ушуная Иордан агъа нецІун къирагъарихъ хъая джиларилди. Ги инсанарис агъай хьуная хьеттигІ гІучІуна-гІайчІва гІедат акье агъай, чве гунагьар чве гардандиъ гъушен агъай, чве гунагьарилас гъил гъушанас. 4 Пайгъамбар Ишаяйин китабиъ ликІина суман: «Къумариъ унихьая сес: ХІезур акье Аллагьдис рекъ, майдан акье Ги лек иша мукьар 5 АчІар гьава хьурай гунтІарна сувар хьеба хьурай, рекъер майдан хьурай уркІар шергве хьурай; 6 Хуппай джалла инсанарис агвасе, Аллагьди чаб ухІаяф». 7 ЯхІъяйилди вей хьуная ппара инсанар хьеттигІ гІучІуна-гІайчІва гІедат акьас. ЯхІъяйи гебурис агъай хьуная: – Иланарис хуруттар! Гьина э чвас пеф чвафас Аллагьдин дивандиккес ккейчІвас хьасе пуна? 8 Иджвелин курарилди агваракье чве гунагьар чун чве гардандиъ гъушунаеф! Чун имикІа юркІураъ: Че дад – Ибригьим э пуна! Зун чвас агъая, Аллагьдифас гьеме гъванарикес акьас хьасе Ибригьимас шиникквар. 9 ЯкІв хъихьуная кІурарин мерІерихъ, идже емиш алгъадеве кІур, атІуна гІихьая цІигІ. 10 – Айчин, фикьуна кканде чин? – пуна хабар гъуланди ахьуная гифас халкьди. 11 ЯхІъяйи пуная: – Іу берхІем хъаятти, са берхІем йирай садра хъадаваттис, Іелеф аяттира гьегиштти акьурай. 12 Налукар завал аркьаттара адиная хьеттигІ гІучІуна-гІайчІва гІедат акьас. Гебури хабар гъушуная: – Е мегІелим, фикьуна кканде чин? 13 ЯхІъяйи гебурис пуная: – Фаша магъа инсанарис алттухъинф, чвас дарукьаф. 14 Хаб са-Іу аскерари хабар гъушуная гифас: – Чин фикьуна кканде? ЯхІъяйи гебурис пуная: – Фаттмадива инсанарифас гуджунилдина гучІар гьихьай пулар. Сайикра дава тахсир кимикІа. Рази ухь чве ваджибил. 15 Халкь ппара Іайи гъузуна ахьуная Месигьахъ. Джаллабури фикир аркьай хьуная Месигь эгьан ЯхІъя, агъай. 16 ЯхІъяйи гебурис пуная: – Зун мертт аркьая чун хьеттилди, амма адесе Те, заалас кьудрат хъаяф. Зун Гин лекаригІ гІайа ччеІер гІатасра кехІей хІисаби ккея инсан дава. Ги чун мертт аркьай ахьасе Аллагьдин РуьхІуьлдина цІилди. 17 Гин кьур мертт аркьа кІетІа, сумар гІадархъай, Гин гъилив фая. Кьур Ги завал акьасе тахаъ, сумар угасе кеттдеве цигІ. 18 Гьегишттира хъара джуьре гафарилдира ягІар аркьай, ЯхІъяйи гъай хьуная халкьдис идже хабар. 19 Тегуна хІавелдиъ ая Ирода ацІуна дава курар акьуна ахьуная. Ги хьирди акьуна ахьуная Ирадиада агъа учин ччуччун хьир, ппара Іайвелара акьуна ахьуная инсанарис. ЯхІъяйи агъай хьуная ги акьунадегьен дава курарихъас. 20 Гьегихъас Ирода ачикуная ЯхІъя дусттагъиъ, хъучихьуна джалла учин Іайвеларихъди сад сара.

Іисара ушуная ЯхІъяйилди Учис хьеттигІ гІучІуна-гІайчІва гІедат акьас

21 КІилди халкьдис хьеттигІ гІучІуна-гІайчІва гІедат аркьагуна, Іисара адиная Учис гьеге гІедат акьас ЯхІъяйилди. ХьеттигІас гІайчІуна Іисайи дуьгІе аркьагуна, дахъуная завар. 22 Гилди аладиная луфуран ухшарар кея Аллагьдин РуьхІ. Завариас унихьуная сес: – Вун Зе ппара ккане КІиркІ. Вун Зе мурадар бегьем аркьаф э!

Іисайин тухум

23 Инсанаригьди Аллагьдин гаф фай айчІугуна, Іисайин вей хьуная хьибцІур ис. 24 Инсанари фикир аркьа суман, Іиса хьуная Юсуфан кІиркІ. Юсуф – Іелин кІиркІ. Джуьре Гин дадар хьуная: Матат, Леви, Малки, Янай, Юсуф, 25 Матитай, АмуцІ, Наум, Хесли, Нагъай, 26 Махат, Матитай, Шими, Ясих, Яуда, 27 Юханан, Риса, Зарубавил, Салафиэл, Нери, 28 Малки, Ади, Хъусам, Элмадам, Эр, 29 Яшуа, Іелизар, Ярим, Матат, Леви, 30 Симеон, Юда, Юсуф, Янам, Элаким, 31 Мали, Мина, Матата, Натан, Давуд, 32 Ишай, Авид, Буаз, Сала, Нахшун, 33 Аминадав, Админ, Арни, Гьесрум, Перец, Яуда, 34 Якьуб, ИсхІекь, Ибригьим, Терах, Нахур, 35 Серух, Реу, Фалек, Эвер, Шалах, 36 Каинан, Арпахшад, Сим, НухІ, Ламех, 37 Мафусал, Энух, Иред, Магьалай, Каинан, 38 Энус, Сиф, Адам – Аллагь.

4

Иблисас Іиса рекъуьас адихьас кканхьуная

1 Аллагьдин РуьхІ архьуна, ушуная Іиса Иордандин къирагъарихъас. РуьхІди файдиная Ге къумариди. 2 Къумариъ, ягъцІур ягъди Іисайихъ Иблис хъуруцай хьуная, Ге тІулаас адихьас кканди. Гьеге ягъцІур ягъди фера ІуьтІунара адава Іисайи. ЯгъцІур ягъ ккеттушугуна, гаш хьуная Гис. 3 Иблиса пуная Іисайис: – Вун – Аллагьдин КІиркІ идехаб, гьеме гъвандикес гуни верегъилди акье. 4 Іисайи джуваб йиная гис: – Гирами китабариъ ликІиная: «Са гунилди дава инсан ешемиш веяф». 5 Хаб, Иблиса файшуна Іиса гьава мукьуйилди, агвар акьуная Гис гьеге сеІетти кІилди дуьнйайин паччагьвелар. 6 Иблиса пуная Іисайис: – КІилди ге паччагьвелар, гебурин кьудратара, девлетара хъай Вас есе зун. Гебур зас йинаттаре, дехІела зафас гьинас кканчира ес вея гебур. 7 Магьа, Вун зе удигь кьвакьварилди гъузуна, Вун зе юлайиъ архьухаб, джалла гебур Веттар хьасе. 8 Іисайи джуваб йина пуная: – ЛикІиная: «Са Аллагь ТегІелайин удигь дала кьвакьварилди магъурзана, са Лин юлайиъ ухь». 9 Хаб Иблиса файдина Іиса Ерусалимдиди, алихьуная Ге Аллагьдин хулан ке гьава кІукІал. Иблиса пуная Гис: – Вун Аллагьдин КІиркІ идехаб, алайш гьемисалас ахтт. 10 ЛикІина аду: «Аллагьди Учин малайикарис буюрмиш акьасе Вас гъил гьучихьас, 11 гебури Вун гъиларил алгъикІуна гъасе, Ве лек гъвандигь гьучидирхІас». 12 Іисайи джуваб йина, пуная гис: – ЛикІиная: «Азмурар маркьа Аллагь ТегІелайикес». 13 Сара фи пуна тІулаас адихьайчира дагІай, са вахттунисттегьен сакинди атуная Иблиса Іиса.

Сагелай Іиса Назаретиъ дуьгІебур хура хулаъ аягуна

14 РуьхІдин кьуват ай адиная Іиса Галилея дерейиди. КІилди ге дерейин багулив фая мукьариъ ад архьуная Іисайихъас. 15 Гисаъ дуьгІебур хура хулариъ Іисайи ягІар аркьай хьуная инсанарис Аллагьдин гаф. Джаллабури тегІриф аркьай хьуная Гин. 16 Іиса адиная Назаретиди, Уч хІа хье хІуриди. Гьемишан суман, адиная Ге киш ягъа дуьгІебур хура хулади. Іиса гъайшиная гирами китабариъ ликІинаттар хурас. 17 Гилди йиная пайгъамбар Ишаяйин китаб. Дахъуна китаб, джикІиная Іисайи ме гафар ликІина мукь: 18 «Аллагьдин РуьхІ алдея Заал, Зун Аллагьди гІаттивунаф идехІела гІеджизарис идже хабар акьас. Ли гьикунафе Зун, фацунаттарис азадвел хьасе пас, сукъурарис Іекв агвасе пас. Ли гьикунафе Зун, азиятикк ккеяттар фатас, 19 Аллагьдин иджвелин вахтт хъучадиная пас». 20 Алакьуна китабра, йина гисаъ кар аркьаттилди, Іиса экьуная. ДуьгІебур хура хулаъ адегьенттарин улар гил алхьуная. 21 Іисайи пуная: – ЯгІа, те чун юркІв алийина вахттуни, аларкьуная гирами китабиъ ликІина гафар. 22 Джаллабури тегІриф аркьай хьуная Гин, Гебур муьхІтал вей Ги агъа иджвелин гафарил, хабар гъуланди ахьуная: «Юсуфан кІиркІду Ге?» – агъай. 23 Іисайи гебурис пуная: – Агьал чун Зас мишттин мисала пасе: «Е духттур, вун сагелай вун сагъ акье!» «Фидегьен унихьуная час Вун Кафернагьум агъа шагьурдиъ акьуна Іеламатарихъас. Мисара акье, Ве ватандил». 24 Зун чвас дузди агъая, – пуная Іисайи, – са пайгъамбара адава, учин ватандил кьабул акьунаф. 25 Іизраилдиъ ппара ашкІинар ахьуная пайгъамбар Илйайин вахттуни. Гьете вахттуни, хьибу исна сура угъвалар дугъай, кІилди хІуькуматтиъ ппара Іайи гашра ахьуная. 26 Амма Іизраилдин ашкІинарилди сайилдира гьидикуна, пайгъамбар Илйа гьикуна ахьуная сасра милатин са ашкІин хьиралди, Сидун дерейин багулив фая Сарепта агъа шагьурдиди. 27 Іизраилдиъ ппара кабкар кеяттар ахьуная пайгъамбар Элисеян вахттуни, амма гебурикес садра сагъ хьуна адава, са Нааман дала, Сирия агъа хІуькуматтиас. 28 Ге гафар унихьугуна, джалла дуьгІебур аркьа хулаъ аяттарис хъел адиная. 29 Гъагьахъуна, хъучІирхІай файшуная гебури Іиса хІуригІас багулив фая дагьарин кІукІуйилди, тисалас ахтт алайхьас. 30 Іиса, гІадишина гебуригІас, ушуная.

Кафернагьумдиъ Іисайи сагъ акьуная гІанаъ шейтІан ая инсан

31 Іиса адиная Галилея дерейиди, Кафернагьум агъа шагьурдиди. Киш ягъари халкьдис ягІар аркьай хьуная Ги. 32 Джалла муьхІтал вей хьуная Іисайи ягІар аркьагъилди, Ге дагучІай, хІаф суман, гъургъахІела. 33 ДуьгІебур хура хулаъ са инсан ахьуная, гІанаъ шейтІан аяф. Садпуна ги гьараяр акьуна пуная: 34 – Эй, Назаретарин Іиса, фи э Вас чакес ккандеяф? Вун чин пуч акьас адинаф эв? Зас ягІая Вун фуш ичин. Вун Аллагьдин Гирами э. 35 Іисайи, гъургъас адатуна, пуная гис: – БуІ! АйчІв лиас! ШейтІанди алгъадаркас акьуна ге инсан дуьгІебур хура хулан яІаниъ, айчІуная гиас, гис зарар дакьуна. 36 Джаллабурис гучІ хьуная. Чаб чиппигІди агъай хьуная гебури: – Фи Іеламатар э гебур? Гив гьегишттин хІавелна кьуват фая, шейтІанарисра кехІей буюрмиш акьуна, шейтІанар айчІвая! 37 КІилди дерейиъ ад архьуная Іисайихъас.

Іисайи сагъ акьуная Симонан хьеджарбабра джуьре итта инсанара

38 ДуьгІебур хура хулаас ушуная Іиса Симонан хулади. Симонан хьеджарбаб иттай ахьуная, куче цІа ай джандиъ. Іисайис тІалаб акьуная гис кумак акьас. 39 АгьукІуна гилди, Іисайи сакин акьуная иттал. Иттал айчІуная гиас. Дишагьли гьеге сеІетти гъайшина, агьийиная суфра. 40 Рагъ учІухаб, инсанар вей хьуная Іисайилди чиппин иттаттар хъай. Гьерттил алихьай гъилар, сагъ аркьай хьуная гебур Іисайи. 41 АцІунаттариас шейтІанар айчІвай хьуная гьараяр аркьай: «Вун – Аллагьдин КІиркІ э!» – агъай. Іисайи буІас аркьай хьуная шейтІанар, пас адартай, гебурис ягІай ахьунахІела Уч Месигь идеф.

Іисайи Аллагьдин гаф ягІар аркьай хьуная инсанарис Ягьудеяйиъ

42 Багамин гагь хьегуна, Іиса ушуная хІуриас садра адава сакин мукьуйиди. Инсанар руцай хьуная Гихъас. Ге джикІигуна, инсанар алучІуная Гил мева, чиппихъай гисаъ экьве агъай. 43 Іисайи пуная гебурис: – Зун джуьре мукьариъра идже хабар акьуна ккандея, Аллагьдин Паччагьвел хьасе пуна. Зун гьеге пас гьикунафе. 44 Ягьудея дерейин дуьгІебур хура хулариъ ягІар аркьай хьуная Іисайи инсанарис Аллагьдин гаф.

5

Іисайин садпе ученикар

1 Сагелай, Іиса Генисарет агъа хІуьлин къирагъихъ хъаягуна, Гигьди завал хьуная ацІуна инсанар, Іисайи агъа Аллагьдин Гафттил юркІв алиянас. 2 Іисайис агуная къирагъихъ Іу лодка. Балугъар фарцанттари, айчІуна лодкабуриас, Іуьрччанди ахьуная чалар. 3 Іисайи, учІуна са лодкайиъ (ге хьуная Симонан лодка), гІачаях пуная са чІукь къирагъихъас тич. Экьуна ге лодкайиъ, Аллагьдин Гаф ягІар аркьай хьуная Іисайи инсанарис. 4 Учи пуна ккиркІугуна, Іисайи пуная Симонас: – ГІачушуна уьркІе мукьуйигІди, гІихь чве чалар балугъар фацанас. 5 Симона джуваб йиная: – Е МегІелим, чин кІилин Іуьштти аяттаре мисаъ ул алдакьуна, амма фера фацуна адава. Вун лиштти агъахаб, зун гІихьасе чалар. 6 ГІихьуна, фацуная гебури гьеге къайда балугъар, къикъе хьуна, чалар чІургъай хьуная. 7 Гъилар акьуная гебури сасра лодкайиъ ая илдешарис, кумак акьас гІаттшаб пуна. Илдешар гІаттиная. Іудар лодкабуриъ ахъуная гебури балугъар. Къакъ ппара хьуна, адивай ахьуная лодкабур. 8 Гебур агугуна, Симон-Петтруйи, экьуна кьвакьварилди Іисайин удигь, пуная: – Е зе ХІаф, ях загьас, зун гунагьар кея инсан э! 9 Симонна, гихъай аяттара муьхІтал хьуна ахьуная гидегьен ппара балугъар агуф. 10 Гин илдешарисра, Якьубасна ЯхІъяйис, Зебедайин шиниккварис, гучІ хьуна ахьуная. Іисайи пуная Симонас: – ГучІ мева. Гьалдихъас хаб вун инсанар фарцанф хьасе. 11 ГІаттивуна лодкабур къирагъихъди, кІилди атуна, гебур чаб ушуная Іисайихъай.

Іисайи кабкар кеяф мертт акьуная

12 Іиса ахьуная са шагьурдиъ. Багулифас гьаттвей хьуная кІилди кабкари алацІуна са инсан. Іиса агуф, Гин лекарикк аккерхьуна, миннат акьуная ге инсанди: – Е зе ХІаф, Вафас зун мертт акьас хьасе, Вас кканхьехаб! 13 Іисайи дагъуна гъил, кирхІуна гик, пуная: – Кканде, мертт ухь. Гьеге сеІетти гулуная иттал. 14 Іисайи пуная гис: – Сайисра ахъамаркьа михъас. Ушуна маллайилди, хъуттурфанас акье вахъ, садакьара акье вун сагъ хьебахъас, Мусайин Закуни агъилди, джаллабурис вун сагъ хьунаф ягІархьас. 15 Гьер усари унихьай хьуная Іисайихъас. Ппара халкь завал вей хьуная Гил юркІв алиянас, Ги чаб сагъ акьас. 16 Уч Іиса ппара сакин мукьуйиди ушуна, дуьгІебур аркьай хьуная.

Іисайи сагъ акьуная фалиджайи фацуна инсан

17 Сагелай, Іисайи Аллагьдин гаф ягІар аркьагуна, Гил юркІв алийинаттаригІ гІахьуная экьуна фарисеярна Іелимар, адинаттар Галилеяна Ягьудея агъа деребурин хІурариасна Ерусалимдиас. Іисайис Аллагьди кьуват йина ахьуная иттаттар сагъ акьас. 18 Са-Іу инсанари файдиная гисади ахунил алди, фалиджайи фацуна са инсан, Гебури ачагъас алучІуная ге хулади, Іисайин удигь атас. 19 Инсанар ппара ай, сагъилдира гІачавес дахьуна, алгъушуная гебур хулагъилди. Алттивуна гъвад, вартталас ахтт аладивуна гебури иттаф, ахунил алди, хулан яІаниъ атуная Іисайин удигь. 20 Гебурин хъугъувел агуна, Іисайи пуная иттаттис: – Ве гунагьарилас гъил гъушуная. 21 Фарисеярина Іелимари чиппикди фикир аркьай хьуная: «Фуш э ме мидегьен Аллагьсуз курар аркьа инсан? Са Аллагьдифас ду вереф гунагьарилас гъил гъушанас?» 22 Іисайис, ягІархьуна фиттихъас ичин гебури фикир аркьаяф, пуная гебурис: – Фи фикирар э чве юркІураъ аяф? 23 «Ве гунагьарилас гъил гъушуная», рехІет ду пас, «Гъайшина ях», пас дала? 24 Магьа чвас ягІар ухь, Инсандин КІиркІав хІавел фая джилил гунагьарилас гъил гъушанас. Фалиджайи фацунаттис Ги пуная: – Зун вас агъая, гъайш, гъушуна ве ахунна ях хулади. 25 Джаллабурин удигь гьеге сеІетти гъайшиная ге, гъушуна уч алде уйи ахунна, ушуная хулади Аллагьдис шукур аркьай. 26 Джалла ппара Іайи муьхІтал хьуная. Гебури шукур аркьай Аллагьдис, агъай хьуная гучІ архьуна: – Час ягІа Іеламатар агуне.

Іисайи файшуная Учихъай налукар завал аркьа инсан

27 Гисаас аттушуна ушугуна, Іисайис агуная налукар завал аркьа Леви агъа са инсан. Ге экьуна ахьуная учи кар аркьа усан багулив. – Шаб захъай, – пуная гис Іисайи. 28 Леви гъайшина, фадахъуна джалла, ушуная Іисайихъай. 29 Левияйи хъаттфайшуна Іиса учихъди, дуьхьуьная Іисайис батІар суфра. Гисаъ ахьуная ацІуна налукар завал аркьаттара, хъара сасра инсанара. 30 Фарисеярина Іелимари хъел кей, агъай хьуная Гин ученикарис: – Фас чун Іелди-ухай аяфе налукар завал аркьаттарихъайна гунагьар кеяттарихъай? 31 Іисайи джуваб йиная гебурис: – Духттур герек идеф сагъди аяттарис дава, иттаттарис э. 32 Зун Аллагьдин рекъуьъ аяттарилди дава адинаяф, зун адинаяфе Аллагьдилди алдарк пас гунагьар кеяттарис.

Іисайифас хабар гъушуная сивар ухІубахъас

33 Хаб гебури пуная Іисайис: ЯхІъяйин ученикари ппара сивара ухІа, дуьгІебура аркьа, фарисеярин ученикарира гьегиштти, Веттар Іелди-ухай ая! 34 Іисайи гебурис пуная: – Фиштти э гІулар хъучикаф цІакинил сивар ухІас, наврузбег гебурихъай амедегьен гагьди? 35 Амма хъучадесе, наврузбег гебуригІас гуджуникестти гІаттиву вахтт, тагьа гьетегуна сивара ухІасе, гьете ягъари. 36 Іисайи ахъакьуная гебурис мишттин мисала: – Сайира цІае кандикес кьатІ аркьайдава кьурц, цІуьре кандил алатІас. АлатІухаб, цІае канна чІир акьасе, цІуьре кандис хъудуьхьесра дава цІае кьумашин кьурц. 37 Сайира агьартайдава цІае чехир цІуьре кІечІариди, агьатухаб цІае чехири чурхъвас акьасе кечІар – чехира адавесе, кІечІара бат хьасе. 38 ЦІае чехир агьатуна кканде цІае кІечІариди! 39 Ерсе чехир ухухаб, цІаеф сайисра кканхьасттава, ги пасе: «Ерсеф иджеф э».

6

«Инсандин КІиркІ – киш ягъанна ХІаф э»

1 Сагелай киш ягъа Іиса вей хьуная хуйиас. Гин ученикари алдартІай кІетІар, тІиршанди гъилиъ, Іелди хьуная. 2 ФарисеяригІас са-Іудари пуная: – Фи э чун аркьаяф? Киш ягъа ахттигьар адава лишттинттар акьас! 3 Іисайи гебурис пуная: – Чун хуруфтту, фикьуф ичин Давуда, учра учин инсанара гашила агуна? 4 Давуда, ачушуна Аллагьдин хулади, гъушуна садакьайин гуни, учира ІуьтІуная, учин инсанарисра йиная. Амма ге гуни сайисра ІуьтІанас ахттигьар адава, са маллабурис дала. 5 Іисайи гебурис пуная: – Инсандин КІиркІ – киш ягъанна ХІаф э.

ХІуьрджал гъил рукъуна инсан

6 Сасра киш ягъа Іиса адина дуьгІебур хура хулади, ягІар аркьай хьуная Аллагьдин гаф. Тисаъ ахьуная хІуьрджал гъил рукъуна са инсан. 7 Фарисеярна Іелимар алгъузуна ахьуная сагъ аркьайчугвас Іисайи ге инсан киш ягъа, хаб Іисайик тахсир кикІас хьас. 8 Іисайис ягІай ахьуная гебурин фикирар. Ги пуная гъил рукъуна инсандис: – Гъайш, шаб мич, яІанилди. Те гъайшина адиная. 9 Іисайи гебурис пуная: – Зун чвафас хабар гъуландея, фикьас ахттигьар ая киш ягъа: иджвел акьас эв хъара Іайвел акьас? Джан ухІас эв хъара пуч акьас? 10 Хъуттурфуна джаллабурихъ, Іисайи пуная ге инсандис: – Дагъ гъил. Ги дагъуная, гъил сагъ хьуная ге инсандин. 11 Фарисеярисна Іелимарис хъел алгъадиная. Чиппин арайиъ гъургъай хьуная гебур, фиркьагьан агъай Іисайис.

Іисайин цІеІу вакил

12 Гьете ягъари Іиса ушуная сувалди дуьгІебур акьас, кІилин Іуьштти илгуная Ге, Аллагьдис дуьгІебур аркьай. 13 Багамингагь хьегуна, унахъуная Іисайи учин ученикарис. ГІаттивуна гебуригІас цІеІуд, пуная гебурис вакилар. Гебур хьуная: 14 Симон, Іисайи гил алихьуная Петтру пуна ттур, гин чу Андрей, Якьуб, ЯхІъя, Филип, Варфаламей, 15 Матфей, Фума, Алфеян кІиркІ Якьуб, Симон, гихъ хъитІуна ахьуная Зилут, 16 Якьубан кІиркІ Ягьуда, Ягьуда Искариут, хабди Іиса масса еф.

Иджвелин гафарна агьар

17 Алайшуна гебурихъай ахтт, Іиса гъузуная майдандил. Гисал завал хьуная Іисайин ученикара, кІилди Ягьудея дерейинна, хІуьлин къирагъари хъая Сидуна Тир агъа шагьураринна Ерусалимдин ппара халкьра. 18 Гебур адинаттар хьуная Іисайил юркІв алиянас, чиппин итталара сагъ акьас. ГІанаъ шейтІан аяттара сагъ вей хьуная. 19 Джаллабурис гъил кирхІас кканди ахьуная Іисайик, Гиас аттвере кьувати джалла сагъ аркьахІела. 20 Іисайи, хъуланди Учин ученикарихъ, пуная: – Бахттлубур э гІеджизар! Аллагьдин Паччагьвел чвефе. 21 Бахттлубур э агьал гашила аяттар! Аллагьди чун тухъ акьасе. Бахттлубур э чун, агьал Іешаяттар! Чун элхъенди ахьасе. 22 Бахттлубур э чун, инсанарис чвакес хъел адина, чун уджуз акьуна адикая гуна, чве ттур беябур аркьая гуна Инсандин КІиркІахъас. 23 Шад ухь ге ягъа, бахил ухь! Заварил чвас зурба пай ая. Чун дакканттарин дадара, гьелиштти ахьуная пайгъамбарарихъайра. 24 Язукъ э чве девлетлубур! Чвас кІукІ алди хьуная иджвелар. 25 Язукъ э чве, агьал фун ацІунаттар! Чун гашила ахьасе. Язукъ э чве, агьал элхъендеттар! Чун, ав алихьуна, Іешай ахьасе. 26 Язукъ э чве, кІилди инсанари чве хІа гаф аркьагуна! Дузди гьелиштти хІа гаф аркьай хьуная чІире пайгъамбарарина гьеле инсанарин дадари.

Ккан ухь чве душманара

27 – Чвас, Заал юркІв алийинаттарис, Зун агъая: Ккан ухь чве душманар, иджвел акье чун дакканттарис, 28 иджвелин гаф уп, чвас рукъалар аркьаттарис, дуьгІе акье чун уджуз аркьаттарис. 29 Ве суратин са багулигІас чІепІ гІадивучин, джуьре багвра кичикІ. Ве варттал але кан фаттивуттис, берхІемра фачи. 30 Вафас тІалаб аркьаттарис, джаллабурис фачи, веф гъушуттис, хаб фаша магъа. 31 Чвас джуьре инсанари чвас фиштти акьуна кканчин, гьегиштти чун гьегебурисра акье. 32 Нагагь чвас Іаре те чун кканеттар идехаб кканеф, фи баркаллагь э чвас авеф? Гунагьар кеяттарисра те чаб кканеттар э кканеф. 33 Нагагь чун иджвел аркьаф Іаре, те чвас иджвел аркьаттарис идехаб, фи баркаллагь э чвас авеф? Гунагьар кеяттарира гьегиштти аркьа. 34 Нагагь чун бурджуни ирцІанф Іаре те хаб ирцІанттарис ичин, фи баркаллагь э чвас авеф? Гунагьар кеяттарира бурджуни ирцІанде гунагьар кеяттарис, гебури хаб есе пуна. 35 Чун гиштти маркьа! Ккан ухь чве душманар, иджвелар акье гебурис, бурджуни фачи, хаб зе есе пуна дагъузуна. Гьетегуна чвас зурба пай хьасе. Чун Варттал Алеттин шиникквар хьасе, Ли Учира баркаллагь адаттарисра кехІей, Іаттарисра кехІей иджвел аркьахІела. 36 Чве Заварин Дадан суман идже юркІв, чвера ухь.

Сайинна диван маркьа, чвера акьасттава

37 – Сайинна диван маркьа, чве диванна акьасттава. Сайикра тахсир кимикІа, чвакра тахсир кикІасттава. Гъил гъуршанди акье, чвааласра гъил гъушанасе. 38 ИрцІанди акье, чвасра есе. Чвас Іуьрджанди, кІукІ алди есе, багварихъас алархъай. Чун фишттин кьуларилди алцанчин, гьегишттинттарилди чвасра алцанасе. 39 Іисайи ахъакьуная гебурис мишттин мисала: – Хьасев сукъурафас сукъур гъас? Іудара къуйди архьастту гебур? 40 Ученикдифас учин мегІелимдилас хІаф хьас верефттава, хуруна ккиркІугуна дала, гифас агърукьасттава учин мегІелим суманф хьас. 41 Фас вас сасрайин улиъ ая са бицІи чІирхІ аргвафе, веттиъ ая цІагъун даргвай? 42 Фиштти пас ве вафас сасрайис: «Нан зун ве улиъ ая чІирхІ аттивас», вас ве улиъ цІагъун даргвахаб? Агь мезрухІ! Сагелай ве улиас цІагъун аттив – гьетегуна вас агвасе, фиштти аттивайчин чІирхІ сасрайин улиас.

Идже кІуранил, идже емиш алгъавей

43 Идже кІуранил чІирхІе емишар алгъавейдава, утІуф ке кІуранил батІар емишар алгъавейдава. 44 Гьер кІур ягІарве учин емишарилди. МеркІварилас инджирар завал аркьайдава, зазарилас тІибитІарин лукар алдартІайдава. 45 Идже инсандин юркІураас иджвел э аттвереф, Іа инсандин юркІураас Іайвел э аттвереф. Фитти юркІв ацІуна аячин, гьеге э инсандин мезурал алвеф.

Іу хандаг

46 Фас чун Зас агъафе: «Е хІаф, е хІаф», Зун агъаттар даркьагуна. 47 Те Заалди вереф, Зе гафарил юркІв алихьуна, Зун пеф аркьаф гъинахъай фачикІас хьасичин ягІав? 48 Те фачикІас хьасе уьркІе хандаг рукІуна, дагьар ккея мукьуйил хал алихьу инсандихъай. ХІа нецІв адина хулалди алгъархьугуна, хал тІушуна адава, мехІкамди алихьунаф идехІела. 49 Те Зе гафарил юркІв алихьуна, амма Зун петтар даркьаф фачикІас хьасе хандаг дарукІуна, джилил хал алихьу инсандихъай. Хулалди нецІв алгъархьугуна, хал садпуна арчІуная. Хулакес са арчІу гъванарин пус э илгунаф.

7

Іисайи сагъ акьуная эскерарин хІекиман лукІ

1 Халкьдис джалла пас ккандеттар пехаб, Іиса адиная Кафернагьумдиди. 2 Римдин са эскерарин хІекиман ппара ккане лукІ Іайи иттай аккихьуна ахьуная. 3 Іисайихъас унихьуна, эскерарин хІекима гьикуная Іисайилди джугьутІарин хІа къуджабур тІалаб акьас Тикес, шаб пуна учин лукІ сагъ акьас. 4 ХІа къуджабури адина Іисайилди ппара Іайи миннат акьуна пуная: – Те лайикь иде инсан э, Вун кумак акьас. 5 Тис хье халкь кканве, дуьгІебур хура халла кехІей алихьуная ти хьес. 6 Іиса ушуная къуджабурихъай. Іиса гьучарукьагуна, эскерарин хІекиман хулагьди, хІекима гьикуная Гилди учин дусттар, пас: – Вун бизар мева, зе хІаф. Вун зе хулади ачадес, зун лайикьлу инсан дава. 7 Зун Ваалди душуф гьемихъас э, зун лайикьлу инсан давахІела. Вун Іаре са гаф уп – зе лукІ сагъ хьасе. 8 Зунна хІуькуматтис мутІеІ иде инсан э, амма зе гъиликкра ккея эскерар. Сайис агъа зун: «Ях» – ге ве; сасрайис: «Мич шаб» – ге гьучаве; лукІус агъа: «Акье гьеме-гьеме» – ги аркьа. 9 Ге гафар унихьугуна, Іиса муьхІтал хьуная, алдаркуна учин кьабахъай вея инсанарилди, Ги пуная: – Зун чвас агъая миштти хъугъуна инсан Зас Іизраилдира кехІей гьучархьуна адава. 10 Эскерарин хІекима гьикунаттар хулади адегуна, гебурис агуная лукІ сагъ хьуна. 11 Са чІукь вахттунилас Іиса ушуная Наин агъа шагьурдиди. Гихъай ахьуная Учин ученикара, ппара халкьра. 12 Іиса шагьурдин къапубуригьди гьучарукьугуна, шагьурдиас аттгъай хьуная ашкІин бабахъ хъая са кІиркІан майит. Шагьурдиас бабахъай вей хьуная ппара инсанара. 13 Ге баб агугуна, баб Іегвал хьуна Іисайи пуная: – МеІеша. 14 Гьучушуна, гъил кирхІуная Іисайи суьрик. Суьри гъая инсанар гъузуная. Іисайи пуная: – Е джигьил идеми, Зун вас агъая, гъайш! 15 КІинаф гъайшина гъургъуная. Іисайи хаб йиная бабас кІиркІ. 16 Джаллабуриъ гучІ архьуная, гебури шукур аркьай Аллагьдис агъай хьуная: – ЧагІди зурба пайгъамбар адиная! Аллагь Учин халкьдилди адиная! 17 Іисайин ад архьуная кІилди Ягьудея дерейиъра кІилди Ягьудея дерейин багулив фая мукьвариъра.

Пайгъамбар ЯхІъяйи гьикуная Іисайилди учин инсанар

18 ЯхІъяйис учин ученикари ахъакьуная кІилди ге курарихъас. 19 ЯхІъяйи унахъуна учин Іу ученикдис, гьикуная гебур Іисайилди хабар гъушанас: «Вун эв – Те, чаалди адина ккандеф, хъара чин сасрайихъ гъузуна ккандеяв?» 20 Ученикари адина Іисайилди пуная: – ХьеттигІ гІучІуна-гІайчІва гІедат аркьа ЯхІъяйи гьикунаттар э чин Ваалди хабар гъушанас: «Вун эв – Те, чаалди адина ккандеф, хъара чин сасрайихъ гъузуна ккандеяв?» 21 Те вахттуни Іисайи сагъ аркьай хьуная итталар кея инсанар, гІанаъ шейтІанар аяттар, сукъурар. 22 Іисайи джуваб йиная гьикунаттарис: – Ушуна ахъакь ЯхІъяйис джалла чвас агуттара, чвас унихьуттара: сукъурарис – Іекв аргвая, хъурунаттар – вея, кабкар кеяттар – мертт вея, карабурис – унихьая, кІинаттарик – джан керхьая, гІеджизарис – иджвелин хабар аркьая. 23 Бахттлу инсан э те, Захъ хъугъуф.

Пайгъамбар ЯхІъяйихъас Іисайи пунаеф

24 ЯхІъяйи гьикунаттар ушугуна, Іисайи пуная халкьдис ЯхІъяйихъас: – Фи агвас ушунаттари чун къумариди? Кулаки къамиш фиштти турттанчин агвас эв? 25 Фи агвас ушунаттари чун? Багьа кунар але инсан агвас пуна эв? Багьа кунар але инсанар, ухьтанди ешемиш веттар, паччагьарин къалабуриъ э аяф. 26 Фуш агвасе пуна юркІураъ уйи чве? Пайгъамбар эв? Э, чвас пайгъамбар э агуф, Зун агъая чвас, те пайгъамбардиласра хІаф э. 27 ЯхІъяйихъас Гирами Китабиъ ликІиная: «Магьа Зун гьикая Ве удигьай Зе хабар фаяф, Ве удигь, Вас рекъ хІезур акьас». 28 Зун агъая чвас, джилил але инсанаригІ, ЯхІъяйилас хІа пайгъамбар гІадава. Амма Аллагьдин Паччагьвелдиъ джаллабурилас бицІифра кехІей хІаф э, те далара. 29 КІилди халкьди ЯхІъяйил юркІв алихьуная. Налукар завал аркьаттарира кехІей, Аллагь хІекь акьуная, адина ЯхІъяйилди хьеттигІ гІучІуна-гІайчІва гІедат акьас. 30 Фарисеярина Іелимари ЯхІъяйин гІедат дакьуна, Аллагьди чиппис акьуна ният кьабул акьуна адава. 31 Іисайи пуная: – Гьинахъай фачикІа Зун ме гьалдин инсанар? Фушар суманттар э мебур? 32 Мебур гимил экьуна бицІи шиникквар суман э, са сайис гьараяр аркьай: «Чин чвас суьретІ йирхІуне, чун лихъундава, чин Іешалар акьуне, чун Іешундава». 33 Адине ЯхІъя, ги я гуни Іелдава, я чехир ухайдава – чун агъа: «Гиъ шейтІан ая!» 34 Адине Инсандин КІиркІ, Ги Іелдира э, ухайра э – чун агъа: «Хъуттурфен, тагьа фунтай, чехир ухас кканеф, налукар завал аркьаттаринна сасра гунагьар кеяттарин дустт». 35 Аллагьдин хІа Іекьул аргвая Гин Іекьул фацунаттариъ.

Іисайи гъил гъушуная гунагьар кея дишагьлилас

36 Са фарисея шаб пуная Іисайис учихъди гуни ІуьтІанас. Іиса адина фарисеян хулади, са багулихъди къархьил ирхІуна экьуная суфрайихъ. 37 Гьеге шагьурдиъ ая гунагьар кея са хьирас ягІархьуная Іиса фарисеян хулаъ аяф. Ге хьир адиная тисади Іачин бицІи гаджини ая батІар ниъ хъая ччамра фай. 38 Кьабахъас Іисайин лекарикк ккерхуна, Іешуная ге. Гин негъвар алавей хьуная Іисайин лекарилди, учин чІарарилди джикай хьуная ги Іисайин лекар. Лекарис мачар икІай, батІар ниъ хъая ччам китІиршанди хьуная ги Іисайин лекарик. 39 Гьегиштти агугуна, Іиса хъаттфайшуна фарисеяйи, фикир акьуная: «Эгер ме инсан хІекьданди пайгъамбар ичин, Мис ягІай ахьаси, Учик гъилар кирхІая хьир, гунагьар кеяф идеф». 40 Іисайи пуная фарисеяс: – Е Симон, Зас вас са чІал пас ккандея. – Уп, МегІелим, – пуная ги. 41 Іисайи пуная: – Іу инсандик кехьуная са эессин бурдж. Сайик кехьуная гІифуверш арсуран манат, сасрайик – гІифцІур. 42 Гебурифас бурдж ес девехІела, Іударисра бурджар хуьлал акьуная эесси. Магьа гебурикес гьинас ппара кканхьасе эесси? 43 Симона джуваб йиная: – Зун фикир аркьа, те ппара бурдж хІуьлал акьуттис. – Вун дузди фикир акьуне, – пуная Іисайи. 44 Іисайи, алдаркуна ге хьиралди, пуная Симонас: – Аргваяв вас ме дишагьли? Зун ве хулади адегуна, вун зас хьед йиндава лекар Іуьччанас. Ппай ме дишагьли учин негъварилди Іуьччуна Зе лекар, учин чІарарилди джикуне. 45 Зун ачадегуна, вун Зас мач икІундава. Ппай ме дишагьли, Зун мисаъ а вахттунилас мич, гьайчІундава Зе лекарис мачар икІай. 46 Вун ччам Зе кІилик китІишиндава, ппай ме дишагьли батІар ниъ хъая ччам Зе лекарик китІишине. 47 Зун вас пасе фас ичин: Ме дишагьлин ппара гунагьарилас гъил гъушуная, дехІела э мис ппара кканди аяф. Гьиналас чІукь гъил гъушуна айчин, тис чІукь кканди ая. 48 Дишагьлис Іисайи пуная: – Гъил гъушуная ве гунагьарилас. 49 Гихъай экьуна сасра гІулари чаб чиппикди агъай хьуная: «Фуш эгьан Ме, гунагьариласра гъил гъуландеф?» 50 Іисайи пуная ге дишагьлис: – Ве хъугъувелди вун ухІуне. ЮркІв сакинди ях.

8

Іисайин рекъуьъ ушу дишагьлибур

1 Тегунанхаб са чукь вахттунилас Іиса ушуная шагьурариди, хІурариди инсанарис Аллагьдин Паччагьвелдихъас иджвелин хабар фай. Гихъай ахьуная цІеІу ученик. 2 Хъара Іисайихъай ахьуная са-Іу дишагьлира, гІанаас шейтІанар адикуна, итталарикесра сагъ акьунаттар: Майрам, Магдалина агъа ттур хъитІунаф, гиас Іисайи адикуна ахьуная ери шейтІан, 3 Югьана, Иродан мулкарин хІавел аркьа Хуза агъаттин хьир, Сусана, хъара ацІуна джуьреттара. Ге дишагьлибури, Іисайинна Гин ученикарин гереквеларис, чиппикес аркьай хьуная харджар.

Тум узаттихъас мисала

4 Сагелай гьер джуьре усариас адина завал хьунагуна ацІуна инсанар, Іисайи ахъакьуная гебурис мисала: 5 – Са неджбер айчІуна ахьуная тум узас. Узагуна, са-Іу ударар алархьуная рекъуьлди – гебурил лекара алишиная, джакьварира ІуьтІуная. 6 Сур ударар алархьуная гъванарилди, гебур кегъучІуная, амма Іаш адавай – кегъучІуттар рукъуная. 7 Сур ударар гІархьуная меркІваригІ – меркІвар къалин хьуна, тум вартт гІагъучІуна адава. 8 Сур ударар алархьуная гІане ругулди, кегъучІуна, вершпай алтухъди мехІсул йиная. Ме мисалара ахъакьуна, Іисайи пуная: – ЮркІв алийинаттарис, унихьурай.

Мисалайин мегІна

9 Ученикари хабар гъушуная Іисайифас: «Ле мисалайин мегІна фи э?» 10 Іисайи джуваб йиная: – Чвас дахъуная Аллагьдин Паччагьвелдин сирар, аме инсанарис гебур мисалабурилди э ягІаяф, хъуланди аячира, гебурис аргвай адава, унихьай аячира, гебур гъавурдиъ архьай адава. 11 Ме мисалайин мегІна ме э: Тум – Аллагьдин гаф э. 12 Рекъуьлди алархьу тумун ударар – гебур Аллагьдин гаф унихьуна инсанар э; амма хаб адина Иблис, ге гаф юркІуралас вес аркьа гебурин, гебур хъудугъурай пуна, гебур духІас. 13 Гъванарилди алархьуна тумун ударар, гебур чиппис унихьуна Аллагьдин гаф, шатти кьабул аркьа инсанар э; амма мерІер хъудава гебурин хъугъувелдихъ, дехІела са вахттунисттегьен хъугьа гебур, четинвелар алчархьегуна, хаб йирхІа. 14 МеркІваригІ гІархьу тумун ударар, гебур Аллагьдин гаф унихьуна инсанар э; амма хаб гІачІугъуна, девлетарихъ, рехІетарихъ ахъихьуна ве гебурин Іуьмур. Гебурин кІетІу бегьер ирцІандава. 15 Авадан ругулди алархьу тумун ударар, гебур чиппис унихьуна Аллагьдин гаф, чиппин идже дуз юркІураъ икІуна, ухІа инсанар э. Сабур хъахІела, гебурин кІетІу бегьера ирцІанде. 16 Сайира, лампа кикІуна, гин варттал бахІти алияндава, я ккараватин кІенаккра ккичикІайдава. Лампа алиланде кьасал, ачавереттарис Іекв агвас. 17 Фера афттава джинабанф, ашкара девеф, фера афттава джин акьас вереф, ягІархьуна вартталди агъдархьаф. 18 Фикир акье чвас унихьа гафарил: хъаяттис – хъара ппара есе, хъудаваттифас, учихъ хъая суман верефра, фаттивасе.

Іисайин бабна чуппар

19 Адиная Іисайилди Учин бабна чуппар, халкь ппара ай, гІайчІвас хьуна адава гебурифас Іисайилди. 20 Іисайис хабар акьуна пуная: – Ве бабна Ве чуппар гъузуная раккахъ, Вун агвас кканди. 21 Іисайи пуная гебурис: Зе бабна чуппар гьетебур э, Аллагьдин гафттил юркІв алийина, гихъ хъучавереттар.

Іисайи сакин акьуная тІурфан

22 Са ягъа, Іиса учІуна Учин ученикарихъай лодкайиъ, пуная гебурис: – Див хьин алттвес сасра къирагъихъди. Гебур гІачушуная. 23 Лодкайи ай алттверегуна, Іиса гІачушуная ахунигІ. Садпуна хІуьлилди тІурфан гъайшиная, лепебур гІагъархьуна, лодкайиди авей хьуная хьед. Ппара хІа бала кьадайикк кичархьуная гебур. 24 Ученикари кегъикуна Іиса пуная: – МегІелим, МегІелим хьин луькІея! КетІуна, Ги къадагъа акьуная кулакисра, гуджлу хІа лепебурисра. Фера андавай, хІуьл сакин хьуная. 25 Іисайи пуная ученикарис: – Нахьи чве хъугъувел? ГучІра муьхІталла хьуна ученикари агъай хьуная сайи сайис: – Фуш э Ме? Ми кулакисра, хьеттисра кехІей буюрмишар аркьа, гебура Мис мутІеІ ве.

ГІанаъ шейтІан аяф сагъ акьуная

26 Гебур гІаттиная Галилея дерейис гьучадаркуна Гераса агъа мукьуйин джилилди. 27 Іиса къирагъихъди гІайчІугуна, Гис гьучархьуная гьеге дерейин шагьурдиас гІанаъ шейтІанар ая са инсан. Ге инсан ацІуна гагь хьуная кунар алдавай вей, хулаъ ешемиш девей, некьваригІ ешемиш вей. 28 Іиса агугуна, ге инсанди акьуна вевер, ккерхьуна Гин лекарикк, гьавайикес пуная: – Фи э Вас закес ккандеф, Аллагь ТегІелайин КІиркІ Іиса? Миннате Вас, азият майицІана зас! 29 Ге инсанди гиштти пеф, Іисайи шейтІандис буюрмиш акьухІела хьуная, айчІв лин гІанаас пуна. АцІуна гагь хьуная гис гІезаб ирцІанди шейтІанди. Гъилара лекара итІуна синджилариъ алгъузучира, кьатІ акьуна синджилара гъишай хьуная ге, шейтІанди агьихьуна, инсан адава мукьвариди. 30 Іисайи хабар гъушуная гифас: – Фуш агъа вас? – Къушум, – пуная ге инсанди, учин гІанади ппара шейтІанар ачушунахІела. 31 ШейтІанари миннат аркьай хьуная Іисайис, гьимика чин кІен ккедава мукьуйиди агъай. 32 Тисаъ сувал алхьуная ваккарин хІа лудж. ШейтІанари тІалаб акьуная Іисайис чиппис ахттигьар тин пуна, ваккарин гІанаъ учІас. Іисайи йиная ахттигьар. 33 ШейтІанар, айчІуна инсандиас, учІуная ваккариъ. Ваккарин кІаратІ дивуна адина аратІихъди, алахъуна хІуьлигІди, адивуная. 34 Ккабанари, ге хьуна кар чиппис агугуна, ушуна ахъакьуная гихъас шагьурдира, багулив фая галарира. 35 Инсанар ушуная хъуттурфанас фи ичугвас хьунаф. Іисайилди адегуна, гебурис агуная те шейтІанар айчІуна инсан, кунара алди, учин гъавурдира ай, экьуна Іисайин лекаригь. Инсанарис гучІ хьуная. 36 Ге Іеламат агуттари, ахъаркьай хьуная инсанарис, фиштти сагъ хьучин гІанаъ шейтІанар ая инсан. 37 Гераса дерейиъ ешемиш вея инсанарис ппара Іайи гучІ хьуная, гебури миннат акьуная Іисайис ях пуна чиппин мукьариас. Іиса учІуна лодкайиъ, хаб алттушуная. 38 Ге гІанаас шейтІанар айчІу инсанди, учра хъай ях пуна тІалаб акьуная Іисайис. Амма Іисайи хаб гьикуная ге, пуна: 39 – Ушуна ве хулади ахъакь вас Аллагьди акьудегьенттарихъас. Ге инсанди ушуна, кІилди шагьурдис ахъаркьай хьуная, фикьунчин учис Іисайи.

«Ве хъугъувелди вун сагъ хьуне»

40 КІилди ахъутІуна ахьуная Іисайихъ, дехІела Іиса адегуна, халкьди шатти кьабул акьуная Ге. 41 Гьеге вахттуни адиная Ягьир агъа са инсан, ге хьуная дуьгІебур хура хулан хІаф. Ягьир, ккерхьуна Іисайин лекарикк, миннат акьуная Гис учин хулади шаб пуна. 42 Ягьиран цІеІу ис вея хъая са руш луькІей хьуная. Іиса ушуная Ягьирахъай; джалла багварихъас алчахъуна, халкьдин арайиъ ахьуная Іиса. 43 Са дишагьлин цІеІу ис хьуная, хъаттдартІай, иъер вей. Ги учихъ хъаеф-хъудаваф кІилди хардж акьуна ахьуная духттурарис, амма сайифасра сагъ акьас вей хьуна адава ге. 44 Кьабахъас гьучадина, ге дишагьли кирхІуная гъил Іисайин палашин мурттук, гьеге сеІетти иъ атІуная. 45 Іисайи хабар гъушуная: – Гьина э Зак кирхІуф? Сайира чиппи кирхІундава пегуна, Петтруйи пуная: – Е МегІелим, Вун халкьдин арайиъ ая агуна, гьер багулихъас Вахъ хъузиландея. 46 Іисайи пуная: – Дава, гьина ичин Зак кирхІуне. Зас хабар хьуне, Заас кьуват аттушуна. 47 Ге дишагьли, гъавурдиъ архьуная учифас джинихьвас девеф. КІакІ архьуна гьучадина, ккерхьуна Іисайин лекарикк, кІилди халкьдин удигь ахъакьуная ге дишагьли, фиттихъас кирхІуф ичин учи Іисайик, фиштти гьеге сеІетти уч сагъ хьучин. 48 Іисайи пуная ге дишагьлис: – Е руш, ве хъугъувелди вун сагъ хьуне. Архайин хьуна ях.

Іисайи джан кихьуная Ягьиран рушак

49 Іиса гъургъай ай, адина Ягьиран хулаас са инсанди пуная: – Е Ягьир, ве руш кІине. Сара бизар маркьа мегІелим. 50 Ге гафар унихьугуна, Іисайи пуная Ягьирас: – ГучІ мева. Вун хъугъ, ве руш сагъ хьасе. 51 Ягьиран хулади адегуна, Іисайи сайисра ахттигьар йина адава Учихъай ачавес, са Петтруйисна, ЯхІъяйисна, Якьубас дала. Рушан дадасра, бабасра ахттигьар йиная. 52 Джалла Іешай-рахвай ахьуная ге рушахъас. Іисайи гебурис пуная: – МеІеша. Ге кІина адава, ге гъархьунаф э. 53 Гебур элхъенди ахьуная Іисайил, ге кІинаф ягІахІела. 54 Іисайи, фацуна ге рушан гъил, гьавайикес пуная: – Е руш, гъайш! 55 Руш гьеге сеІетти, джан керхьуна гъайшиная. Іисайи Іелеф фачи пуная гис. 56 Дадна баб муьхІтал хьуная. Іисайи сайисра магъа пуная гебурис ме кардихъас.

9

Іисайи гьикуная Учин цІеІу ученик

1 Унахъуна Учин цІеІу вакилас, Іисайи йиная гебурис хІавелна кьуват кІилди шейтІанар адикасра, итталар сагъ акьасра. 2 Іисайи гьикуная гебур Аллагьдин Паччагьвелдихъас хабар акьас, итталара сагъ акьас. 3 Іисайи пуная вакиларис: – Фера магъуяна рекъуьди: я Іесса, я чанта, я гуни, я пул, я духІуба аркьа кунар. 4 Нае хулади ачушучин, гьетисаъ экьве, чун хаб рекъуьъ учІасттегьен. 5 Чун кьабул дакьу мукьуйиъ, тебурин хІуриас верегуна, чве лекарил алекьуна кумра кехІей кейхІуна ате тебурис. Гьегилди ягІархьурай тебурис. 6 Вакилар ушуна алдаркай хьуная хІурарил иджвелин хабар аркьай, джалла усари итта инсанара сагъ аркьай.

Иродас агвас кканди ахьуная Іиса

7 Іисайи аркьа джалла курарихъас унихьуная хІекимвелдиъ ая Иродас. Гис фи фикир аркьайчира ягІай хьуна адава, сур инсанари, кІина ЯхІъя э Те гъайшинаф агъай хьуная, 8 сури – Илйа пайгъамбар э Те адинаф, сасрабури – фушчин са авалдин пайгъамбар э Те джан керхьунаф агъахІела. 9 Ирода пуная: – ЯхІъяйин зун кІил алдихьуне. Те инсан фуш эгьан, мидегьенттар унихьа зас Тихъас? Иродас агвас кканди ахьуная Іиса.

ГІифу агъзур инсан тухъ хьуная

10 Адегуна, вакилари ахъакьуная Іисайис джалла чиппи акьуттарихъас. Сасрабури мушат дакьас, Іиса хъай Учин вакилара ушуная Вифсаида агъа шагьурдин багулив фая сакин мукьуйиди. 11 Амма инсанарис хабар хьуна, Іисайин кьабахъай чабра ушуная. Іисайи гебур ачухъди кьабул акьуная, агъай хьуная гебурис Аллагьдин Паччагьвелдихъас, иттаттара сагъ аркьай хьуная. 12 ГІуьбехъми гагь вей хьуная. Вакилари, гьучадина, пуная Іисайис: – Фадат инсанар, ушуна багулив фая хІураридина галариди, джикІирай чиппис Іуьш акьас эркьва мукьна Іелеф, хьин мисаъ инсан адава мукьуйи э аяф. 13 Іисайи пуная вакиларис: – Чун фачи гебурис Іелеф. Вакилари пуная: – Чав фера фадава, Іаре гІифу гунира Іу балугъ дала, гьал ягІайдава чин ушуна джалла ге инсанарис гъуланчин Іелеф. 14 Гебур гІифу агъзур дегьен инсан ахьуная. Іисайи пуная Учин ученикарис: – Гьер усагь гІифцІур инсан аркьай, экьвас акье гебур. 15 Гьегиштти акьуна, гебури джаллабур экьвас акьуная. 16 Гъушуна гІифу гунира Іу балугъ, аккедурфуна завариккди, Іисайи акьуная дуьгІе, ая баракатис шукур аркьай. Хуппай пай акьуна йиная ученикарилди, инсанарис алихьас. 17 ІуьтІуна, джаллабур тухъ хьуная, хъара цІеІу кІватт ацІу кьурцар амилгуна, завал акьуная гебури.

Аллагьдин Месигь. Іисайи пуная Учин Іеджалихъас

18 Сагелай Іиса ахьуная дуьгІебур аркьай инсанар адава сакин мукьуйиъ. Гихъай ахьуная Учин ученикара. Іисайи хабар гъушуная гебурифас: – Фуш хІисаб аркьа Зун халкьди? 19 Ученикари пуная: – Сури агъа, Вун – хьеттигІ гІучІуна-гІайчІва гІедат аркьа ЯхІъя э пуна, сури – Илйа э пуна, сасрабури агъа, Те авалдин са пайгъамбар э джан керхьуна гъайшинаф. 20 Іисайи хабар гъушуная ученикарифас: – Ппай чун фуш хІисаб аркьа Зун? – Вун – Аллагьдин Месигь э, – пуная Петтруйи. 21 Іисайи кьацІра сайисра гихъас варттал маркьа пуна, 22 пуная Учин ученикарис: – Инсандин КІиркІ ацІуна гІезабарикк ккихуна ккандея, хІа къуджабурира, хІа маллабурира, Іелимарира Ге кьабул акьасттава, гебури Ге кІесе, амма хьибудпе ягъас Ге джан керхьуна гъайшасе.

Фикьуна кканчин Іисайихъай вес кканетти

23 Хуппай джаллабурис Іисайи пуная: – Захъай вес кканетти, учихъас кІвалас гьатуна кканде, гьер ягъа ге хІезурди кканде четинвеларин къакъ гъадивас, герек хьучин, учин Іуьмур есра кехІей. Тагьа гьетегуна ге Захъай вей ахьасе. 24 Учин Іуьмур ухІас кканеттифас Іуьмур фаттархьасе. Зун бадала Іуьмур фаттархьетти, Іуьмур ухІасе. 25 Фи муфиІет кея инсандис, кІилди дуьнйа фацуна, учи уч пуч акьухаб, яра учис зарар хьехаб? 26 Захъасра, Зе гафарихъасра неч хье инсан, Инсандин КІиркІасра неч хьасе кьабул акьас, Учинна, Учин Даданна гирами малайикаринна тегІриф хъай адегуна. 27 Зун чвас агъая, мисагь гъузунаттаригІас са-Іу инсанар, джилил Аллагьдин Паччагьвел дагуна, кІесттава.

Пайгъамбар Мусана Илйа агуная Іисайихъай

28 Ге гафар пуна, са муя ягъалас, Іиса хъай Петтрура, ЯхІъяра, Якьубра алгъушуная сувалди дуьгІе акьас. 29 ДуьгІе аркьа арайи, Іисайин сурат садпуна джуьре хьуная, кунар нур ичай, ибхь суман, джагвар хьуная. 30 Іу инсан гъургъай ахьуная Іисайихъай, гебур хьуная Мусана Илйа, 31 заварин нуругІай адинаттар. Гебур гъургъай хьуная Ерусалимдиъ хьас ккея, Іисайин Іеджалихъас. 32 Петтруна гин илдешар цІуьппи гъархьуна ахьуная, кетІугуна, гебурис агуная Іисайин Іекун нура, Іисайин багулив гъузуна Іу инсанна. 33 Мусана Илйа Іисайигьас верегуна, Петтруйи пуная Іисайис: – Е МегІелим, фи иджи ая хьин мисаъ! Див чин хьибу чардах акьас: сад Вас, сад Мусайис, сад Илйайис. Петтруйис учис ягІай хьуна адава, фи ичин учи агъаяф. 34 Петтру гъургъа арайи, алчадина къири, кичадивуная гебур учин эхъуьккди. Къири ахтт аладина, ученикар дифугІ гІачархьегуна, ученикарис гучІ хьуная. 35 КъиригІас унихьуная сес: «Ле Зе КІиркІ э, Ле Зун гІаттивунаф э. Лил юркІв алихь!» 36 Ле сес хъайшугуна, Іиса хаб сатти ахьуная. Ученикари джин акьуна, сайисра те вахттуни ахъакьуна адава те чиппис агуттарихъас.

Іисайи сагъ акьуная гІанаъ шейтІан архьа кІиркІ

37 Сасра ягъас, гебур сувалас алаверегунас, Іисайигьди гьучадина гъузуна ахьуная ппара халкь. 38 Садпуна халкьдигІас са инсанди гьараяр акьуна пуная: – МегІелим, Вас миннат э, хъуттурф зе кІиркІахъ! Ге хъая са кІиркІ э зе! 39 ШейтІан архьуна, кІиркІа садпуна вевер аркьа. ШейтІанди гин джан зурзас аркьа, сивигІас гъурт гІархьасттегьен. АцІуна гІезаб егуна дала, сакинди артайдава кІиркІ шейтІанди. 40 Зун тІалаб акьунуйи Ве ученикарис шейтІан адик пуна, амма гебурифас хьундава. 41 Іисайи пуная: – Агь чун инсанар, хъудугъаттар, чІир хьунаттар! Фидегьен вахттунисттегьен Зун чвахъай ахьасе? Фидегьен Зун чвакк ккиха? Фаша мич ве кІиркІ. 42 КІиркІ гьучаверегуна, шейтІанди гин джан зурзас акьуна, фадихьуная ге джилилди. Іисайи къадагъа акьуная шейтІандис, кІиркІ сагъ акьуна гьикуная дадалди.

Іисайи Учин Іеджалихъас пегуна, ученикар гъавурдиъ архьуна адава

43 Джалла муьхІтал хьуная Аллагьдин кьудратил. КІилди Іисайи аркьа курарил муьхІтал хьуна арайи, Іисайи пуная Учин ученикарис: 44 – Ме гафарил юркІв алийина кІвалди ате: Инсандин КІиркІ инсанарин гъилиъ ихьасе. 45 Амма ученикар ге гафарин гъавурдиъ архьуна адава, ге гафарин мегІна ягІар акьас вей хьуна адава гебурифас. Іисайифас хабар гъушанасра, фиттихъас ичин Ги пеф, гебурис гучІай хьуная.

Фуш хІаф ичин

46 Ученикарин арайиъ хІуьджат хьуная, фуш ичин чиппигІас ке зурба. 47 Іисайи, гебурин фикирар ягІай, гъушуна бицІи шиниккв, атуна Учин багулив, 48 пуная ученикарис: – Зун бадалди гьина ме бицІи шиниккв кьабул аркьаячин, ти Зунна кьабул аркьая, гьина Зун кьабул акьучин, ти Варттал Алефра кьабул аркьая, Зун джилилди Гьикунаеф. ЧвагІас ке бицІи инсан – джаллабурилас зурба инсан э.

«Чвас Іайвел даркьаф, те чвахъди э»

49 ЯхІъяйи пуная Іисайис: – МегІелим, час ве ттур гъургъай, шейтІанар адика са инсан агуне, амма чин гис къадагъа акьуне, ге хьехъай аяф давахІела. 50 Іисайи пуная: – Къадагъа маркьа. Чвас Іайвел даркьаф, те чвахъди э.

Самари дерейин хІуриъ, Іиса кьабул акьуна адава

51 Іиса, Аллагьди уч завариди агъагъа вахтт хъучавехІела, хІезур хьуная вес Ерусалимдиди. 52 Іисайи Учин удигьай гьикуная Учин инсанар. Гебур адиная Самари дерейиъ ая са хІуриди, джалла Іисайис геректтар хІезур акьас. 53 Амма Іиса кьабул акьуна адава тисаъ, Іиса Ерусалимдиди веяф идеф ягІархьегуна. 54 Гебури акьу кар агугуна, Іисайин ученикари, Якьубана ЯхІъяйи, пуная Іисайис: – Е ХІаф, кканчин заварин цІа йирхІуна ккедихь агъав чин ме инсанар? 55 Іисайи, алдаркуна ученикарилди, маркьа пуная. 56 Хаб ушуная гебур джуьре хІуриди.

Іисайихъай вере инсан

57 Гебур рекъуьъ ай верегуна, са инсанди пуная Іисайис: – Зун хІезурди ая Вун вере усади найич кканчира Вахъай вес. 58 Іисайи ге инсандис пуная: – Суларихъ мугар хъая, заварин нахширарихъ мугар хъая, Инсандин КІиркІахъ кІил йирхІас мукь хъудава. 59 Сасра инсандис Іисайи пуная: – Шаб захъай вес. – Е зе ХІаф, Іуьссе дад ая зе, те сакин дакьуна, зафас вес хьасттава, – пуная ги. 60 Іисайи гис пуная: – ЮркІвар кІинаттари икІурай чиппин кІинаттар. Вун ях Аллагьдин Паччагьвелдихъас иджвелин хабар фай. 61 Джуьре инсанди пуная Іисайис: – Е зе ХІаф, зун весе вахъай, амма сагелай ахттигьар тин зас хулаъ аттарис сагъди илгурай пас. 62 Іисайи гис пуная: – Сагелай гъилив дуруц гъушуна, хаб кьабахъди алдаркаф, герек дава Аллагьдин Паччагьвелдис.

10

Іисайи гьикуная ярцІурна Іу ученик

1 Тегунанхаб Іисайи гІаттивуна хъара ярцІурна Іу ученик сара, гьикуная гебур Іу-Іутти Учин удигьай, Уч вес ккея шагьураридина хІурариди. 2 Іисайи пуная гебурис: – Уцаф ппара ая, амма уца инсанар чукь ая. ТІалаб акье Эессис, хъара инсанар гьик пуна хуппуриди уцас. 3 Ях! Магьа Зун гьикая чун, хІучарин кІаратІигІди ккелар суман. 4 Чвав фай магъуяна я пІапІушник, я чанта, я лекар, сайихъайра рекъуьъ гьучархьуттарихъай магъургъа. 5 Нае хулади ачушучира, сагелай уп: «МаслихІет хьурай ме хулаъ». 6 Эгер те хулаъ ешемиш веяф маслихІеттин инсан ичин, чве маслихІет тихъай илгвасе, нагагь давайчин – хаб чваалди адесе. 7 Гьете хулаъ экьве, ІуьтІен, ух тебурин аяф, лихандеттис кьиматра рукьафе. Са хулаас джуьре хулади амайчІва. 8 Са шагьурдиди адина, чун тисаъ кьабул акьухаб, кІилди чвас тисаъ ирцІанттар ІуьтІен. 9 Тебурин итталар кеяттара сагъ акьуна, уп тебурис: «Аллагьдин Паччагьвел чве багулив фая!» 10 Эгер са шагьурдиди адина, чун тисаъ кьабул дакьухаб, куьчайиди айчІуна уп: 11 «Че лекарил алекьуна чве шагьурдин кумра кехІей чин кеджикуна артая. Амма чвас ягІарухь: Аллагьдин Паччагьвел багулив фая». 12 Зун чвас агъая, Садамди ешемиш вея инсанарис рехІетти ахьасе Кьияматин Ягъа те шагьурдин инсанарис дала!

Язукъ э Галилея дерейин шагьурарин

13 Язукъ э чве Хазаринди ешемиш вея инсанар! Язукъ э чве Вифсаидайи ешемиш вея инсанар! Сидундина Тирди хьунахаб, те чве усаъ хьуна Іеламатар, тебур дахи димари чувалин кьумашикес акьуна кунара, аликІуна чиппин кІилил, руькъ алархъай, руькъуьгІ экьуна тахсирар чиппин гардандиъ гъушуна ахьаси. 14 Амма Сидундина Тирди ешемиш вея инсанарис рехІетти ахьасе Диван аркьагуна, чвас далара. 15 Кафернагьумдиъ ешемиш вея инсанар, чвас чун завариккди аккетІасттегьен вартт акьас пун кІваъ аяв? Ваъ, чун джилин кІенади ихьасе. 16 Учин ученикарис Іисайи пуная: – Гьина чваал юркІв алихьаячин, ти заалла юркІв алихьая. Гьина чун кьабул даркьаячин, ти Зунра кьабул аркьай адава. Гьина Зун кьабул даркьаячин, ти кьабул аркьай адава Варттал алефра, Зун джилилди гьикунаеф.

ЯрцІурна Іу ученик адиная

17 ЯрцІурна Іу ученик шатти адина Іисайилди пуная: – ХІаф, шейтІанара кехІей мутІеІ ве час, чин Ве ттур гъургъай буюрмиш акьугуна. 18 Іисайи пуная гебурис: – Зас Иблис агуне, цІарп суман, завариас адархьуна. 19 Магьа, Зун чвас йиная хІавел, чвас зарар кидавай, алишас иланарила Іекьрабарилла, хІавел – кІилди душманарин кьуватилла. 20 Чун шейтІанар чвас мутІеІ вея пуна шад мева, чун шад ухь чве ттурар заварил ликІиная пуна!

Іисайин шадвел

21 Гьеге сеІетти Аллагьдин РуьхІ архьуна Іисайи шатти пуная: – Дад, заваринна джилинна ХІаф! Зун шукур аркьая Вас, Іекьуллубиригьасна хурунаттаригьас джин акьуна, кар Вун ягІар акьухІела са бицІи инсанарис. Э, Дад, Ве иджвелин амур и ле. 22 Зе Дада кІилди йиная Заалди. Сайисра ягІай адава КІиркІ, са Дадас дала, сайисра ягІай адава Дадра, са КІиркІасна КІиркІа гІаттиваттарис дала, тебурис Дад ягІар акьас пуна. 23 Іиса алдаркуна Учин ученикарилди, гебурис дала ундихьагъилди, пуная: – Те чвас аргваттар, аргва улар, бахттлубур э. 24 Зун чвас агъая, ацІуна пайгъамбарарисна паччагьарис агвас кканди уйи ле чвас аргваттар, амма агундава, унихьасра кканди ле чвас унихьаттар, амма унихьундава.

Самари дерейин идже юркІуран инсандихъас мисала

25 Са Іелима кьасустти хабар гъушуная Іисайифас, Ги фигъайчугас: – МегІелим, фикьуна кканде зун зас ккидиркІва Іуьмур ес? 26 Іисайи ге Іелимафас учифас хабар гъушуная: – Закуниъ фиштти ликІиная? Фи хурая вун лисакес? 27 Іелима джуваб йиная: – «Ккан ухь Аллагь ТегІела лап юркІураастти, лап гІанаас, кІилди ве кьудратилди, кІилди ве фикирарилди». «Ккан ухь багу инсанна, вас вун суман». 28 Іисайи пуная Іелимас: – Вун дузди джуваб йине. Гьелиштти аркьай акье, вун ешемиш хьасе. 29 Іелима, уч дузди агвар акьас кканди, хабар гъушуная Іисайифас: – Фуш э зас багу идеф? 30 Іисайи мисалайилди пуная гис: – Вей хьуная са инсан Ерусалимдиас Эрихундиди. Фацуная ге къачагъари. Фаттивуна гин шейъера, йирхІуна гис, къачагъар ушуная, фадихьуна атуна луькІе хІелдил файдина инсанна. 31 Гьеге рекъди вей хьуная са малла. Маллайис фаттархьуна инсан агугуна, малла рекъуьн джуьре багуликди кейчІуная. 32 Гьегиштти акьуная Левин тухумдиас са инсандира: йирхІунар але инсан агугуна, рекъуьн джуьре багуликди кейчІуная. 33 Ппай гьеге рекъди вея Самари дерейин са инсан гъузуная, йирхІунар але инсан агугуна, ге Іегвал хьуна. 34 Самари дерейин инсан, гьучушуна, мертт акьуна чехирилди йирхІунара, китІишина ччамра, алитІуная гин йирхІунар. Хуппай алихьуна учин дагил файдиная ми ге гасттиницайиди, гисаъра ахъаджихІуная ме гихъас. 35 Сасра ягъа, уч гисаас верегуна, йина гасттиницайин эесис арсуран Іу манатра пуная ми: «АхъаджихІ ме иттаттихъ, нагагь ме гьудуркІуна веф хардж хьучин, зун хаб верегуна есе ве пул». 36 – Ве фикирдилди, фуш ге хьибуйикес багу хьуне къачагъарикк кичархьу инсандис? 37 – Ге Іегвал хьуна, гис иджвел акьуф, – пуная Іелима. – Ях, гьегиштти вунна акье, – пуная Іисайи.

Марфайин хулаъ

38 Рекъди вей Учин ученикара хъай, Іиса адиная са хІуриди. Тисаъ са Марфа агъа хьира хъаттфайшуная гебур учин хулади. 39 Тихъ хъахьуная Майрам агъа чи. Майрама, экьуна Іисайин лекаригь, юркІв алийина ахьуная Ги агъаттарил. 40 Марфа Іайи гІачІугъуна ахьуная батІар Іелеттар хІезур аркьай. Марфайи гьучушуна пуная Іисайис: – Е зе ХІаф, Вас аргвай аду ччиччи кІилди кар заал алчихьуна? Зас кумак акье уп лис! 41 – Ай Марфа, Марфа, – пуная гис Іисайи, – вун кураригІ гІачІугъуна ппара задарихъас фикир аркьая, 42 амма кканди аяф сад э. Магьа Майрама учис иджвелин пай гІаттивуная, ге гифас фаттивасттава.

11

Іисайи ученикарис дуьгІе акьас ягІар акьуная

1 Сагелай Іисайи са мукьуйиъ дуьгІе аркьай хьуная. ДуьгІе акьуна ккиркІугуна, Гин са ученикди пуная: – ХІаф, часра ягІар акье дуьгІебур акьас, ЯхІъяйи учин ученикарис ягІар акьуф суман. 2 Іисайи пуная гебурис: – ДуьгІе акье миштти: «Дад, Ве ттур гирами хьурай; Ве Паччагьвел адирай. 3 ТІалаб аркьая чин Вакес гьер ягъас гуни. 4 Гъил гъушен че гунагьарилас, чинна гъил гъуршанду кІилди час Іайвелар аркьаттарилас. ХІа темехІера хьас амарта час».

ТІалаб аркьаттис ирцІанде

5 Іисайи пуная ученикарис: – Белекин, чвагІас гьинаичира ушуна сурІуьшари дусттуралди пасе: «Е дустт, фаша зас бурджуни хьибу гуни. 6 Захъди агьал рекъуьас дустт ачадиная, гис ес фера адава зе». 7 Ти раккахъас пеб мункине: «Бизар маркьа зун, раккара хъикІуна зун зе шиниккварихъай ахуникк ккея. Зафас вей адава гъайшина вас гуни ес». 8 Зун чвас агъая, гъайшина дусттвел бадала дайичира, тис алчархьасе гъайшина ес кІилди геректтар, ге тилас есттегьен алттадархьухаб. 9 Зун чвас агъая: ТІалаб аркьай акье – чвас есе, руцай акье чвас джикІесе, хъирхІай акье – чвас дахъасе. 10 Гьер тІалаб аркьаттис – ирцІанде, руцаттис – джиркІенде, хъирхІаттис – дархъа. 11 Нае дада чвагІас, кІиркІа балугъ тин пичин, балугъин еринди есе илан? 12 Е кІиркІа гъурагъал тин пичин, гьина гис гъурагъалдин еринди есе Іекьраб? 13 Чун фидегьен Іаттар ичира, чвафас чве шиниккварис иджвел акьас верехаб, Заварин Дадафас хъара ппара акьас хьасе, Лифас ес хьасе Аллагьдин РуьхІ те Учикес тІалаб аркьаттарис.

Гьинан кьуватилди э Іисайи шейтІанар адикаф?

14 Сагелай, Іисайи адикуная инсан Іебаб аркьа шейтІан. ШейтІан аттушугуна, инсан гъургъуная. Гисаъ завал хьуна халкь муьхІтал хьуная. 15 Са-Іудари гебуригІас пуная: – Ги шейтІанар адикаф Велзевул агъа шейтІанарин хІаттин кумакилди э. 16 Сасрабури, Іисайиас азмурар аттивай, заварин Іеламат агваракь агъай хьуная. 17 Іисайи, гебурин фикирар ягІай, пуная гебурис: – Нае паччагьвел ичира, чиппин арайиъ душманвел аяф, ккеттархьасе, чиппин арайиъ дуьхьуьвел адава хизанара далгъванасе. 18 Нагагь Иблис уч учихъай дадуьхьуьнахаб, фиштти э гин паччагьвел илгванф? Ппай чун Зас агъая, Велзевулдин кумак фай э пуна Зун шейтІанар адикаф. 19 Эгер Зун шейтІанар Велзевулдин кумакилди ичин адикаф, чве ученикари гьинан кумакилди э гебур адикаяф? Гьете ученикар хьурай чве диванчибур. 20 Зун Аллагьдин кьуватилди э шейтІанар адикаф, гагьа гьегилди аргвая Аллагьдин Паччагьвел чваалди адинаяф. 21 Кьуват кея инсан, гъилив яракьра фай учин хулал алгъузуна аячин, гин шейъерис фера акьасттава. 22 Амма фушчира гилас гуджлу адичин, фаттивуна гин эхІттибар але яракьра, тІараш акьасе гин хал. 23 Захъди даваф, те Зас Іайвел аркьаф э. Захъай завал даркьаф, те фадархъаф э.

Инсандиас айчІу шейтІан хаб адегуна

24 – Чиркин руьхІ инсандиас айчІугуна, руьхІ адаркай аве хьед адава къумариъ, учис сакин мукьуйихъас руцай. Мукь даджикІигуна, ги агъа: «Зун хаб весе те зун ай уйи хулади». 25 Адегуна, гис аргва джикуна мертт акьуна хал. 26 Хаб ушуна, ге шейтІанди гъа учихъай ери шейтІан сара, хъара училасра Іаттар, шейтІанар учІуна инсандиъ эркьва. Гегуна хаб инсандин гьава удигьай аттиласра Іае ве.

ХІекьданди бахттлу

27 Іисайи гебур агъагуна, халкьдигІас са дишагьли гьавайикес пуная: – Бахттлу э те баб, Вун хуна хІа акьуф. 28 Ппай Іисайи пуная: – Бахттлубур э тебур, Аллагьдин гаф унихьуна, гисаъ агъагъилди аркьаттар.

Пайгъамбар Юнусан Іеламат

29 Вей-вей ппара халкь завал вей хьуная, Іисайи пуная гебурис: – Іаттар э гьалдин инсанар. Ме инсанари тІалаб аркьая заварин Іеламат, амма са Іеламатра агвасттава мебурис, са пайгъамбар Юнусан Іеламат дала. 30 Ниневи дерейин халкьдис Юнус фиштти Іеламат суман хьучин, гьегиштти гьалдин инсанарис Инсандин КІиркІра Іеламат суман хьасе. 31 Кьибла багухъас паччагь-дишагьли гъайшасе кьияматин ягъа гьалдин инсанарихъай, ме гьалдин инсанарин диван акьас, ле паччагь-дишагьли адеф идехІела Сулейманан Іекьуллу гафарил юркІв алихьас дуьнйайин те кІилиъ ая хІуькуматтиас. Агьал мисаъ чвахъай аяф, Сулейманаласра ХІаф э. 32 Кьияматин ягъа Ниневи дерейин халкь гъайшасе гьалдин инсанарин диван акьас, те халкьди чиппин гунагьар чиппин гардандиъ гъушухІела, Юнуса Аллагьдин гаф чиппис пегуна. Агьал мисаъ чвахъай аяф, Юнусаласра ХІаф э.

Инсандин лампа

33 Сайира кикІуна лампа алихьайдава даргва мукьуйил, я кичикІайдава бахІтикк. Лампа хъихьа кьасахъ, ачавереттарис Іекв агвас. 34 Улар – инсандин лампа хІисаб э. Улар сагъди агуна, кІилди инсандис Іекв ичина аве, улар иттагуна, инсан мучІаъ аве. 35 Хъуттурфен гьа, ваъ ая Іекв мучІе дахьас! 36 Нагагь ваъ Іекв аяхаб, фера мучІеф адавай, вун Іекун нур ичай ахьасе, лампайи вас учин Іекун нур ичаф суман.

Іисайи тахсирар кикІуная фарисеярикна Іелимарик

37 Іиса гъургъуна ккиркІугуна, са фарисея хъаттфайшуная Ге учихъди абкьанттар акьас. Іиса ачушуна хулади, экьуная суфрайихъ. 38 Фарисей муьхІтал хьуная, Іисайи сагелай гуни ІуьтІанастти гъилар даІуьччухІела. 39 Іисайи пуная гис: – Магьа чун, фарисеяри, вартталас мертт аркьайчира чве вакъна курушка, чве гІанаъ ппара гашна, Іайвел ая. 40 Эй фагьумсузар! Сайи ду яратмиш акьунаф варттал багвра, гІана багвра. 41 Чве аяф Іеджизарис пай аркьай акье, гьетегуна чве кІилди мертт хьасе. 42 Язукъ э чве, фарисеяр! Чун ирцІанде чве багъдиъ узуна уриариласра кехІей хъара джуьре ІуькІериласра кехІей закатин йицІудпе пай, амма Аллагьдин дузвелдихъасна кканевелдихъас, чве кІвалас ушуная! Удигьай гьеле э кканди аяф, джуьре курарихъасра кІвалас девей. 43 Язукъ э чве, фарисеяр! Чвас кканве экьвас дуьгІебур хура хулариъ хІуьлматин мукьарил. Чвас кканве гимил чун тегІрифилди кьабул аркьагуна. 44 Язукъ э чве, чун ттаргъунар хъудава некьвар суман э: инсанар ве гисарилас, некьвар ккеяф дагІай. 45 Са Іелима пуная Іисайис: – МегІелим, ле гафарилди Вун часра гиран аркьая! 46 Іисайи пуная: – Язукъ э чвера, Іелимар! Чун гъас деве къакъ алчихьа инсанарил, амма чун тІуб тІубук кирхІайдава гебурис кумак акьас. 47 Язукъ э чве, чун, чве дадари кІе пайгъамбарарис пирар алихьахІела. 48 Чун шихьидвел аркьая, хІекь э пуна, чве дадари акьуна курар: чве дадари луькІей хьуная пайгъамбарар, амма чун те пайгъамбарарис пирар алихьая. 49 ДехІела хьуная Аллагьди пунаф: «Зун гьикасе гебурилди пайгъамбарарна вакилар, амма сур пайгъамбарарна вакилар кІесе гебури, сасрабурис Іайвелар акьасе». 50 ДехІела чун, гьалдин инсанари, джуваб йина ккандея ме дуьнйа яратмиш акьугуналас мич кІина пайгъамбарарихъас, 51 ХІебилилас Закарияйилди. (Закария йирхІуна кІиная Аллагьдин хулаъ садакьа аркьа мукьуйина Гирами мукьуйин арайиъ.) Зун чвас агъая, чун джалла курарихъас джуваб есе. 52 Язукъ э чве, Іелимар, чун чваалди гъушуна Аллагьдин гафттин гуьлегвар, е чун ачушундава, е те ачевес ккандеттар ачатундава. 53 Іиса ушугуна, фарисеярна Іелимар ахьуная фи тахсирар кикІагьан агъай Іисайик, Іисайикес хъел адина. Гебури гьер джуьре суалар алихьай хьуная Іисайис, 54 алгъузуна фи аттархьайчугас Гин сивиас.

12

ЭхІттият ухь сурат Іуьрччан курар аркьа фарисеяригьас

1 Те вахттунис агъзурарилди завал хьуная халкь, инсанар гІукъуна ахьуная са сайихъ хъузиланди. Іисайи сагелай Учин ученикарис пуная: – ЭхІттият акье фарисеяригьас, гебурин сурат Іуьрччан кураригьас. 2 Фера адава джинабанф, вартталди агъдархьуна илгванф, фера адава ашкаранф, ягІардахьуна илгванф. 3 Чун Іуьшуй пеф, ягъуй унихьасе, чун хазин хулаъ ибурихъди пеф, хулагъарилас ун алихьуна агъай ахьасе. 4 – Зун чвас агъая, Зе дусттар: ГучІ мева тебуригьас, чун кІина сара чвас фера акьас деветтаригьас. 5 Зун пасе чвас, гьинагьас гучІ хьуна кканчин: гучІ ухь Тигьас, чун кІина, хаб чун джегьенемдиъ ихьас вереттигьас. Зун чвас агъая, Гьетигьас гучІ ухь. 6 Іу кепекигьас ду гІифу джакьв масса ирцІанф? Амма ге джакьварикес садра Аллагьдин кІвалас ушуна адава. 7 Чве кІилил але чІарара кехІей кІилди сан акьуная! ГучІ мева, чун ппара багьайи э джакьварилас!

Іиса кьабул акьубахъас

8 – Зун агъая чвас: гьина Зун инсанарин удигь кьабул акьучин, те Инсандин КІиркІара кьабул акьасе Аллагьдин малайикарин удигь, 9 амма гьина Зун инсанарин удигь кьабул дакьучин, те Инсандин КІиркІара кьабул акьасттава Аллагьдин малайикарин удигь. 10 Инсандин КІиркІахъас дава гаф петтилас, гъил гъушанасе, амма Аллагьдин РуьхІдихъас гиран вере чІире гаф петтилас, гъил гъушанасттава. 11 Чун дуьгІебур хура хулариди файдегуна, хІекимарилдина хІаттарилди, чун фикир маркьа, фишттин джувабар ирцІангьан пуна, я фигъагьан пуна. 12 Аллагьдин РуьхІди гьеге сеІетти ягІар акьасе чвас, чун фи пуна кканчин.

Гаш имикІа юркІураъ

13 ХалкьдигІас гьинаичин пуная Іисайис: – Е МегІелим, уп зе ччуччус, дада атуная девлет засра пай акье пуна. 14 Іисайи пуная гис: – Е идеми, гьина э Закес диванчи акьунаеф, чве арайиъ учІуна пайяр акьас? 15 Іисайи хаб пуная: – Хъуттурфен гьа, гаш имикІа юркІураъ. Инсандин Іуьмур девлетилди дава алцандеяф.

Мисала са гашин девлетлу инсандихъас

16 Іисайи ахъакьуная гебурис мисала: – Са девлетлу инсандис учин хуппуриас идже бегьер завал хьуная. 17 Ги фикир аркьай хьуная: «Фиркьагьан Зун, Завал акьуна ризкь атас, мукь адава зе. 18 Зун миштти акьасе, – пуная ги, – зе цІуьре тахар аргІуна, цІае хІа тахар акьасе, тисади завал акьасе зун кІилди зе кьура, зе сасра девлетра. 19 Тагьтегуна зафас зас пас хьасе: – Гьал вахъ икІуна ппара девлет хъая, ацІуна исарис гьуркьасе. РехІет акье джандис, ІуьтІен, ух, кеф кеттив Іуьмурдикес». 20 Аллагьди пуная ге инсандис: «Агь эхІмакь! ЯгІа Іуьшуй вун кІесе. Гьинас хьасе ле ве завал акьунаттар?» 21 Гьерттис, Аллагьдин девлет завал даркьай, учис девлет завал аркьаттис, гьетиштти хьасе.

Фикирар гъамар маркьа

22 Хаб Іисайи пуная Учин ученикарис: – ДехІела Зун чвас агъая: фикир маркьа Іеле гунихъасна аликІа кандихъас. 23 Іуьмур хІайи э Іелеттилас, джанна хІайи э кандилас. 24 Хъуттурфен хъветтарихъ, гебури е узайдава, е уцайдава, хъудава гебурихъ е хазина хулара, е тахара, амма Аллагьди ирцІанде гебурис Іелеф. Ппай чун ацІуна багьайи э джакьварилас. 25 Гьинафас чвакес хьасе, гъамар акьунегъай, учин Іуьмурдихъди са сеІет хьунара хъучихьас? 26 Гьеге са бицІифра кехІей чвафас акьас девегуна, фас чун сасра курарихъас фикирар аркьаттар э? 27 Хъуттурфен, фиштти кегъучІайчин цІантукар: гебури е загьмат аркьайдава, е ттунар аркьайдава. Амма, Зун чвас агъая: паччагь Сулейманара кехІей, гьетидегьен девлетар хъай, ге цІантукари суман батІарди аликІайдавуйи. 28 Нагагь, ягІа ай, багагь пичиди агъихьа чІирин ІуькІил Аллагьди гиштти аликІахаб, чваал хъара иджи аликІастту, хъудугъаттар! 29 Чун маруца чвас Іелеттихъасна ухаттихъас, гъамра маркьа. 30 Ме гунагьарин дуьнйайи гьеле задарихъ э джалла инсанар ахъихьунаф. Чве Заварин Дадас ягІая чвас лебур герекди идеф. 31 Ке удигьай Аллагьдин Паччагьвелдихъас руц, аметтар чвас Ли есе. 32 ГучІ мева, бицІи кІаратІ! Чве Дада Учин иджвелин амур акьуная, шатти чвас Паччагьвел ес. 33 Масса йина чве шейъер, кумак акье касибарис, джикІен чвас кьацІра ерсе деве пІапІушникар, завал акье девлетар заварил: лич е тІафал адесттава, лисал е кьабкІ архьасттава. 34 Чве девлет нанди аячин, гьетисаъ чве юркІвра ахьасе.

Эессихъ гъузуна лукІ

35 Гьемишан хІезурди ухь, яІарилас чІилла дивуна, лампабура кикІуна. 36 Эесси цІакІинаригІас адесттегьен, ти хъирхІугъилди ракк дахъас гъузуна лукІ суман, гьетиштти хІезурди чунна гъузен. 37 Бахттлубур э те лукІар, эесси адесттегьен гъадархьуна гъузунаттар. Зун чвас дузди агъая, эесси учин яІариккес чІилла ккейтІуна, экьвас акьуна лукІар суфрайихъ, уч гьударкай ахьасе гебуригь. 38 Бахттлубур э тебур, эесси мус адичира, кканчин сурІуьшари, кканчин завкураригІди, гъадархьуна, эессихъ гъузунахаб. 39 ЯгІарухь, хулан эессис хабарди уйихаб, нае вахттуни адес ичин тІафал, эесси тІараш акьас атасттавуйи учин хал. 40 Чунна хІезурди ухь, чвасра ягІай адава нае вахттуни адесичин Инсандин КІиркІ. 41 Петтруйи хабар гъушуная Іисайифас: – Е ХІаф, Вун ле мисала агъаяф час эв, хъара джаллабурис эв? 42 Іисайи пуная: – Гьал фуш э те, эессин хулан хІаф, эессин эхІттибар але Іекьуллу хІеким, эесси учин лукІарил хІавел йинаеф, гебурис вахттуни Іелеф ес? 43 Бахттлу э те лукІ, эесси адегуна, эессис кар аркьай алчархьуф. 44 Зун чвас дузди агъая, эесси кІилди учин хулан хІавелдиъ алихьасе ге. 45 Нагагь те лукІу учин юркІураастти фикир акьучин: «Кьана аркьая зе эесси адес», пуна, йирхІай хьичин лукІарис, хумбарисра, идемарисра, Іелди, ухай, пиянди авейчин, 46 ге лукІун эесси хабарсузди адесе, кьацІра лукІ дагъузуна ягъа, дагъузуна вахттуни. Эесси гин диван акьуна, сасра эхІттибар алдава инсанаригІ гІачихьасе гера. 47 Нагагь учин эессин кьасттра ягІай ай, лукІ хІезур дахьухаб, я учин эесси пеф дакьухаб, гишттин лукІус зулумилди йирхІасе. 48 Нагагь эессин кьастт дагІай, лукІу фиичира дава кар акьухаб, лукІус чукь йирхІасе. Гьинас Аллагьди ппара йичин, ти хІа джувабра есе, гьинал ппара эхІттибар акьучин, ти хъара хІа джуваб есе.

Зун Іаре маслихІет фай дава адинаеф

49 Зун цІа фай адинаф э джилилди, фидегьен ккандея Зас цІа тегІди бугъмиш хьуна! 50 Зун цІигІди гІучІуна ккандея, цІигІас ушуна, гІадайчІудегьен гагьди, Зун гІезабикк ккея! 51 Чун фикир аркьаяв, Зун Іаре маслихІет фай адинаеф э пуна джилилди? Зун чвас агъая, дава! Іаре са маслихІет фай дава, къигІ файра э! 52 Гьалдин хаб, хулаъ гІифуд аячин, гебур Іу пай хьасе: хьибуд са усал хьуна, Іуйихъай гІахъасе, Іуд са усал хьуна, хьибуйихъай гІахъасе. 53 ГІахъасе дад кІиркІахъай, кІиркІ дадахъай, баб рушахъай, руш бабахъай, хьиджарбаб сусахъай, сус хьиджарбабахъай.

Фас ме вахттунин чун гъавурдиъ архьафттава?

54 Халкьдис Іисайи пуная: – Завар алчадивугуна къирибури, чун агъа: «Угъвал угъвасе». Угъайра э. 55 Ппай кьибла багуйихъас кулак ичагуна, чун агъа: «Куче хьасе». Куче вейра э. 56 Эй, Іу сурат гІаттар! Джилихъна заварихъ хъуланди чвафас гьава ягІар акьас ве, ппай агьал фишттин вахтт хьунаячин гъавурдиъ архьас вейду чвафас? 57 – Фикьас чвафас чвас фи дузди ичин ягІар акьас верефттава? 58 Ваалас гІерз аркьаттихъай суттиди верегуна, рекъуьъ ами димари алучІ тихъай маслихІет акьас. Давайчин вун гъасе ти суттилди, сутти есе вун дусттагъин къаравуларилди, къаравулари ачикасе вун дусттагъиъ. 59 Зун вас дузди агъая, вун тисаас аттесттава, вак кІаре Іебасин бурдж кимедегьен гагьди.

13

Чве гунагьар чве гардандиъ гъушен

1 Те вахттуни са-Іу инсанари ахъакьуная Іисайис, Пилата кІина Галилея дерейин инсанарихъас. Пилата те инсанарин иъ гІачатуная тебурин садакьайин маларин иихъай. 2 Іисайи пуная ге инсанарис: – Чун фикир аркьаяв, те Галилея дерейин инсанар джуьре инсанарилас ппара гунагьар кеяттар и пуна, тебурис тиштти хьухІела? 3 Зун чвас агъая, дава! Нагагь чун чвак тахсирар кеяф мутІеІ хьуна, чве гунагьар чве гардандиъ дагъушухаб, джалла чунна тебур суман кІесе! 4 Я Силамдиъ минара арчІуна, тисакк ккикъуна кІе те цІемуя инсан? Чун фикир аркьаяв, тебур джаллабурилас Ерусалимдиъ ешемиш веяттарилас ппара тахсирар кеяттар и пуна? 5 Зун чвас агъая, дава! Амма чун чвак тахсирар кеяф мутІеІ хьуна, чве гунагьар чве гардандиъ дагъушухаб, джалла чунна кІесе, тебур суман!

Мисала, емиш алгъадеве инджиран кІуранихъас

6 Хуппай Іисайи ахъакьуная гебурис мисала: – Са инсандин тІибитІарин багъдиъ узуна ахьуная инджирин кІур. Эесси адиная кІуранил емишар алчугас хъуттурфанас, емишар алхьуна адава. 7 Емишар алдавай агуф, ги пуная учин багъдихъ ахъаджихІа инсандис: «Магьа хьибу ис э зун мисади вей хъуттурфанас, емишар алгъадина айчугас ме кІуранил, емишар вей адава. АтІ ме кур. Фас муфиІет кидавай фацанасе ми мукь». 8 Багьдихъ ахъаджихІатти пуная гис: «Е эесси, са иса сара ате ме кІур. Зун мис ругра есе, джилла гІане акьасе. 9 Сасра иса хьас идеф хьасе емишар, нагагь дахьучин, атІ».

Киш ягъа са дишагьли сагъ акьуная Іисайи

10 Іисайи киш ягъа Аллагьдин гаф ягІар аркьай хьуная инсанарис са дуьгІебур хура хулаъ. 11 Тисаъ ахьуная гІанаъ шейтІан учІуна, иттали цІакас акьуна са дишагьли. ЦІемуя ис хьуная гифас утун дуз акьуна, вартт гъайшас девей. 12 Ге дишагьли агугуна, Іисайи учигьди унахъуна пуная гис: – Вун сагъ хьуная. 13 Іисайи алихьуная ге дишагьлил гъилар, дишагьли гьеге сеІетти дуз хьуна гъайшина, шукур акьуная Аллагьдис. 14 ДуьгІебур хура хулан хІатти, хъел адина Іисайикес, Ги киш ягъа сагъ акьухІела, пуная халкьдис: – Кар акьас ерхьи ягъ ая. Гьете ягъари шаб чве итталар сагъ акьас, киш ягъа сагъ маркьа. 15 Іисайи джуваб йиная гис: – Іу сурат гІаттар! Чвакес гьертти, хъатуна тІунахъас е вец, е даги киш ягъа гъайду хьед ес? 16 Ме дишагьли Ибригьиман тухумдиас э. ЦІемуя истти шейтІанди итІуна уйи ме, гьал киш ягъ э пунегъай, ахттигьар аду, мис рехІет акьуна, ме атас? 17 Іисайи гиштти пегуна, Іиса дакканттарис неч хьуная, ппай кІилди халкь шатти ахьуная Іисайи аркьа адлу курарил.

Фиттихъай фачикІас хьасе Аллагьдин Паччагьвел

18 Іисайи пуная: – Фи суманф э Аллагьдин Паччагьвел? Фиттихъай фачикІа Зун Ле? 19 Аллагьдин Паччагьвел фачикІас хьасе, инсанди учин багъди узу бицІи кІуранин тумунин удухъай. Ге уд кегъучІуна, заварикк аккертІадегьен кІур хьуне. Ле кІуранин куларигІ завун нахширари чиппис мугар акьуне. 20 Іисайи сагелай сара пуная: – Фиттихъай фачикІа Зун Аллагьдин Паччагьвел? 21 Ле дишагьли хьибу кІватт гІуригІ гІихьуна химир хІисаб э. Са чукь химирилди кІилди гІур акефуруная.

Исал къапубур

22 Іиса вей хьуная Учин рекъди Ерусалимдиди шагьураригІас, хІураригІас, ягІар аркьай инсанарисра. 23 Са инсанди хабар гъушуная Іисайифас: – Е ХІаф, са чукь инсанар дала ухІастту Аллагьди? Іисайи пуная халкьдис: 24 – Ачадес алучІ исал раккариас, хъугъ Захъ, ацІунаттар ачадес алучІасе ге раккариас, амма хьасттава. 25 Хулан эесси гъайшина ракк алакъугуна, чун раккан къабахъ илгванасе, чун раккахъ хъирхІай ахьасе, агъай: «Е ХІаф, дахъ час». Ли пасе чвас: «Зас ягІайдава чун фушар ичира, нандиас ичира». 26 Хуппай чун агъай ахьасе: «Чин вахъай Іелди-ухай ай уйи. Вун час Аллагьдин гаф ягІар аркьайи куьчабуриъ». 27 Ппай Ли чвас пасе: «Зас ягІайдава чун фушар ичира, нандиас ичира. Ях Загьас, джалла Іайвелар аркьаттар!» 28 Чун Іешасе, силебар ругІасе, чвас Ибригьимра, ИсхІекьра, Якьубра, джалла пайгъамбарара Аллагьдин Паччагьвелдиъ агуна, чун лисаас адикугуна! 29 Инсанар адесе дуьнйайин якьудар багварихъас, экьвасе маджлисин усттулихъ Аллагьдин Паччагьвелдиъ. 30 Агьал кьабахъ хъаяттар, лисаъ удигь хьасе, агьал удигь гьаяттар, лисаъ къабахъ хьасе.

Ерусалимдихъас Іисайин дардар

31 Те вахттуни са-Іу фарисеяр адина пуная Іисайис: – Вун ушуна ккандея мисаас. Ях, Иродас Вун кІес ккандея. 32 Іисайи гебурис пуная: – Ушуна уп те сулас: «Зун шейтІанара адикасе, инсанара сагъ акьасе ягІара, багагьра, хьибудпе ягъас Зун ккиркІвасе Зе кар. 33 Амма ягІара, багагьра, сае ягъара Зун Зе рекъди ушуна ккандея, пайгъамбар луькІеф Ерусалимдиъ идехІела, сасра усаъ дава». 34 Агь Ерусалим! Ерусалим, пайгъамбарар луькІеф, училди гьикунаттарис гъвандинф аркьаф! Хьимугелай кканди уйи Зас кІилди халкь Зе багуливди завал акьас, пеІела учин чаркквар завал аркьаф суман учин хилариккди, амма чвас кканхьундава! 35 Магьа Аллагьдин хал Іар хьуне! Зун чвас агъая, чвас Зун агвасттава, чун дапедегьен гагьди: «Бахттлу э Аллагь бадала Веяф!»

14

Фарисеян хулаъ

1 Сагелай киш ягъа Іиса адиная гуни ІуьтІанас фарисеярин хІекиман хулади. Фарисеярин улар Іисайил алхьуная, Ги фиркьайчугас. 2 Іисайигьди гьучадаркуна экьуна ахьуная иттали акетІагІуна инсан. 3 Іисайи хабар гъушуная Іелимарифасна, фарисеярифас: – Ахттигьар аяв сагъ акьас киш ягъа хъара аду? 4 Гебур буІуная. Іисайи Учигьди гьучафайдина, сагъ акьуная иттаф, 5 ппай гебурис пуная: – Нагагь чве кІиркІ, я чве вец къуйдиъ архьухаб, гьеге сеІетти аттивастту чун, киш ягъ ичира? 6 Гебурифас фера пас хьуна адава.

Хулан эессисна гин гІуларис Іисайи пуная

7 Іисайис агуна, гІалашувари гьертти чиппис идже мукьвар фацанас алучІаяф, ахъакьуная гебурис мисала: 8 – Нагагь вас маджлисилди унахъунахаб, идже мукь фамарцана, белекин валасра хІуьлматлуйис унахъуна ахьури. 9 Хулан эесси, ачадина, пасе вас: «Ле мукьуйил ме инсан экьурай!» Тегуна вас неч хьуна, ке ахиран мукьуйилди вес алчархьасе. 10 Вас шаб пунагуна, ушуна экьве раккаригІ гІая мукьуйил, эесси гІуларигьди аттегуна, вас пасе: «Дустт, гьара мич гІайчІуна экьве!» Тагьа тегуна вас сасра гІуларин удигь алтухъ хІуьлмат хьасе. 11 Учис уч хІайи аргваф, ахтт хьасе, уч бицІи аргваф, вартт хьасе. 12 Хулан эессис Іисайи пуная: – Вун вахъди абкьанттар я Іуьшанттар акьас хъаттгъарегуна, шаб магъа я дусттарис, я чуппарис, я багунттарис, я девлетлу къуншибурис. Гебурифас хаб вунна хъаттгъас агърукьасе, хаб ве пай хъатІас. 13 Шаб уп вахъди гІеджизарис, хъурмутІарис, Іаттеттарис, сукъурарис. 14 Тагьа тегуна вафас вун бахттлу хІисаб акьас хьасе. Гебурифас хаб вас фера иджвел акьас агърукьай адава, дехІела вас Аллагьди есе иджвелин пай, Уч юркІурал але инсанар джан керхьуна гъайши ягъа.

Мисала зурба маджлисихъас Аллагьдин паччагьвелдиъ

15 Гебур унихьугуна, са гІалашува пуная Іисайис: – Бахттлу э Аллагьдин Паччагьвелдиъ гуни Іеле инсан! 16 Іисайи пуная гис: – Са инсанди шаб пуна ахьуная учихъди ацІуна гІуларис. 17 Вахтт хъучадегуна, эесси гьикуная учин лукІ унахъунаттарилди пас: «Шаб, че джалла хІезурдея». 18 Джаллабури, чІал сад акьунаттари суман, гъил гъушен агъай хьуная. Садпетти пуная гис: «Зун ху гъушуная, зун хъуттурфанас ушуна ккандея тихъ. Гъил гъушен сара заалас». 19 Іудпетти пуная: «Зун йицІу вец гъушуная, гебурихъ хъуттурфуна кканде иджеттар ичугвас. Гъил гъушен сара заалас». 20 Хьибудпетти пуная: «Зун хьир акьуная, зафас адес вей адава». 21 ЛукІу адина кІилди пуная эессис. Тегуна хулан эесси хъел адина пуная лукІус: «ТегІди ях шагьурдин куьчабуригІди, тураригІди, завал акьуна гІеджизар, хъурмутІар, сукъурар, Іаттеттар, хъай шаб мич». 22 ЛукІу пуная эессис: «ХІаф, вун зас буюрмиш акьу кар, зун акьуне, амма хъара Іаре мукьар аме». 23 Эесси пуная учин лукІус: «Ушуна шагьурдин къирагъарихъ хъая куьчабуриди, джалла вас гьучархьеттар, мич верегъилди акье, зе хал гІулари ацІас. 24 Зун чвас агъая, те зун шаб пуна уйиттарикес, садра ахьасттава зе суфрайихъ!»

Гьинафас хьасичин Іисайин ученик хьас

25 Іисайихъай вей хьуная ацІуна инсанар. Алдаркуна, Іисайи пуная гебурис: 26 – Нагагь Заалди аде инсандис, Зун ппара дакканхаб дадалас, бабалас, хьиралас, шиниккварилас, чуппарилас, чиярилас, учин Іуьмурдилас, – тифас хьасттава Зе ученик хьас. 27 Захъай вереттифас, хьасттава Зе ученик хьас Учин гІезабарин къакъ дагъа хаб. 28 Чвакес гьинас хьунара хІа гьава къала алихьас ккандеячин, сагелай экьуна учин харджар хІисаб акьастту ги, фидегьен ачевесичин къала алихьас. 29 Хандагар ихьуна, аме курар гифас ккиркІвас девеячин, джаллабур гил элхъенди ахьасе, 30 агъай ахьасе: «Магьа ме, къала алихьуна ккиркІвас дахьу инсан!» 31 ДегІви акьас вес кканди ая паччагьдира, сагелай экьуна фикир акьуна кканде, хьасичин учифас, учин йицІу агъзур эскер хъай дегІви акьас, сасра къа агъзур эскер хъай вея паччагьдихъай. 32 Девехаб, паччагьди гьикасе учин вакилар маслихІетар акьас те сасра паччагьдилди, те вархайи ами. 33 Чун кІилди чвахъ хъая шейъер ккандава дапедегьен гагьди, чвакес сайифасра хьасттава Зе ученик хьас.

Мисала къелахъас

34 – Кьел – идже шейъ э. Амма кьел кьеланди идилгухаб, фиштти э кьел хаб кьелан аркьаф? 35 Тегуна кьел фиттисра герек дава, джилил алахъасра кехІей. Ге фадархъа. ЮркІв алийинаттарис, унихьурай!

15

Мисала, гулуна хІуппахъас

1 Іисайил юркІв алихьас завал вей хьуная кІилди налукар завал аркьаттарна гунагьар кеяттар. 2 Фарисеярина Іелимари, хъел вей, агъай хьуная: – Ге инсанди гунагьар кеяттар кьабул аркьа, гунира кехІей Іелди гебурихъай! 3 Тегуна Іисайи ахъакьуная гебурис мисала: 4 – Белекин, чвакес сайихъ верш хІуб хъая. Гебурикес са хІуб гулучин, атуна чІирил ежчІурна ерчІу хІубра, гулуна сайихъас руцастту ге, джикІесттегьен? 5 ДжикІигуна, шатти алгъихьуна учин гІунил хІубра, 6 весе ге хулади. Унахъуна дусттарисра, къуншибурисра, пасе ги: «Шад ухь захъай, зас зе гулуна хІуб джикІине!» 7 Зун чвас агъая, гьегиштти заварилла шатти ахьасе са инсандихъас, нагагь ги учик тахсирар кеяф мутІеІ хьуна, учин гунагьар, учин гардандиъ гъушухаб, ежчІурна ерчІу гунагьар кидава инсандихъас дала.

Мисала, гулуна манатихъас

8 – Магьа хъара мисала: Нагагь са дишагьлин йицІу арсуран манатикес са манат гулухаб, кикІуна лампара джикастту ги хал, руцай учин манат джикІесттегьен? 9 ДжикІигуна, унахъуна къучмабурисра, къуншибурисра, пасе ги: «Шад ухь захъай, зас зе гулуна манат джикІине!» 10 Хъугъ Захъ, гьелиштти шад хьасе Аллагьдин малайикара, учик тахсирар кеяф мутІеІ хьуна, учин гунагьар учин гардандиъ гъушу са инандихъас.

Мисала дава рекъуьъ архьу кІиркІахъас

11 Іисайи хъара ахъакьуная: – Са инсандихъ хъахьуная Іу кІиркІ. 12 БицІи кІиркІа пуная дадас: «Е дад, нан ве девлетикес зас рукьа пай». Дадара пай акьуная девлет Іудар шиниккварис. 13 Са-Іу ягъалас бицІи кІиркІа учин пай кІилди масса йиная, фай пулла ушуная ге варха са хІуькуматтиди. Тисаъ, кефунилди ешемиш вей, кІилди учин аяттар хардж акьуная ги. 14 Ги кІилди хардж акьугуна, те хІуькуматти ппара Іайи гаш архьуная, ге кІиркІ дарвелдиъ архьуная. 15 Ушуная ге тисаъ ешемиш вея са инсандис кар акьас. Те инсанди гьикуная ге учин галуди ваккар ухІас. 16 Гашила луькІей, ге рази ахьуная ваккарис ккерхъа хурар ІуьтІанас, сара фера адавай. 17 КІилиъ ачархьуна, пуная ги учи учис: «Фидегьен курар аркьа инсанар хъая зе дадахъ, тебурис фун ацІасттегьен гуни ая, хъамилгвайра кехІей э, ппай зун мисаъ гашила луькІея! 18 Ушуна зе дадалди, пасе зун: „Е дад, Аллагьдин удигьра, ве удигьра зак гунагьар кея. 19 Ве кІиркІ э пас сара зун лайикьлу дава. Ве кар аркьа инсанаригІди хьунара кьабул акье сара зун“». 20 Ге ушуная учин дадалди. Дадас вархайил алми димари агуна, Іегвал хьуная учин кІиркІ. Дад гьуккай гьучушуна, архьуна кІиркІан гардандиъ, мач икІуная гис. 21 КІиркІа пуная дадас: «Е дад, зун Аллагьдин удигьра, ве удигьра гунагьин курар акьуная. Ве кІиркІ э пас сара зун лайикьлу дава». 22 Дада пуная учин лукІарис: «ТегІди файдина ке батІар кунара аликІ мил, гъилихъ тІубулла хъикІ мин, лекара аликІ мил. 23 Файдина, рукк идже кук урчра, ягІа хьин Іелди-ухай шадвел акьасе. 24 Ме зе кІиркІ кІина уйи, гьал джан керхьуне мик, ме гІачагулунуйи, гьал джикІине ме». Гебури ІуьтІуб-ухуб акьуна шадвелар акьуная. 25 Ппай хІа кІиркІ ге вахттуни хуйиъ ахьуная. Тисаас адина, хулагьди гьучарукьагуна, макьамаринна лехъунарин ун унихьуная гис. 26 Унахъуна са лукІус, хабар гъушуная ги: «Фи э тисаъ аркьаяф?» 27 ЛукІу пуная гис: «Ве чу адиная, те сагъ-саламатти адехІела, ве дада идже кук урч руккуная». 28 ХІа ччуччус, Іайи хъел адина, хулади ачевесра кехІей кканхьуна адава. Дада, аттина миннат акьуная гис, хулади ачашаб пуна. 29 ХІа кІиркІа пуная дадас: «Магьа хьиму ис э зун, ве лукІ суман, кар аркьай, вун петтара аркьай, амма вун зас мудур хьунара ефттава, зе дусттарихъай ІуьтІуб-ухуб акьас. 30 Ппай ве ме кІиркІ адегуна, вун йина пайра кефунилди хардж акьуна, вун гис идже кук урч руккуная». 31 Дада пуная гис: «Е зе кІиркІ, вун гьемишан захъай аяф э, кІилди зе аяттар вас э. 32 Вун шад хьуна кканеф э, ве чу кІинуйи, гьал джан керхьуне, гІачагулунуйи, гьал джикІине».

16

Мисала, учин эессис Іемалар аркьа хулан хІаттихъас

1 Іисайи Учин ученикарис пуная: – Са девлетлу эессихъ гин хулан хІавел аркьа инсан хъахьуная. Эессис гІерза акьуная, ве хулан хІавелдиъ аятти, вун Іелди ккедихьая пуна. 2 Эесси, унахъуна гис, пуная: «Фи э зас вахъас унихьаттар? Нан ве кардин хІекь-хІисабра, сара вун хІавел акьасттава». 3 Тегуна хулан хІавелдиъ аятти учи-учикди пуная: «Гьал фиркьагьан зун? Кардилас зун алайкая. Ушуна къанавар рукІас, зак яхІ кидава, гъил ккедикІуна пул тІалаб акьас, зас нечтти э. 4 Зас ягІа фикьуна кканчин! Зун ме хулаас кардилас адикугуна, сасра инсанари чиппин хулади кьабул аркьагъилди акьуна кканде». 5 Хулан хІавелдиъ аятти унахъуная учин эессин бурджар кея инсанарис. Садпеттифас хабар гъушуная ги: «Фидегьен йина ккандея вун зе эессис?» 6 «Верш маргай ччаман», – пуная ти. Хулан хІавелдиъ аятти пуная: «Магьа вак кея бурдж ликІина кІедж, тегІди экьуна ликІен верш бахІтин еринди гІифцІур бахІти». 7 Хаб джуьреттифас хабар гъушуная: «Ппай вун фидегьен э йина ккандеяф?» «Верш чувал кьваран», – пуная ти. Хулан хІавелдиъ аятти пуная: «Магьа вак кея бурдж ликІина кІедж, вершан еринди, ликІен якьукъад». 8 Хулан хІавелдиъ ая инсан нехІекь ичира, эесси тегІриф акьуная гин, гин кІилиъ гишттин Іемал архьухІела. Аллагьдин рекъуьъ ая инсанарифас дала, гьалдин дуьнйайи гишттин инсанарифас э чаб суман инсанарихъай Іемалин курар акьас вереф. 9 Зун чвас агъая, чве джилин девлетар хардж акье инсанарис кумакисра, дусттари хьасра. Чве джилин девлетар ккиркІугуна, чун джанаттиъ кьабул акьасе. 10 БицІи кардис дугъри инсан, хІа кардисра дугъри хьасе. БицІи Іемал аркьатти, хІа Іемалла акьасе. 11 Нагагь чваал джилин девлетар аманат акьас девехаб, гьина э чваал заварин девлетар аманат аркьаф? 12 Нагагь чваал сасрайинф аманат акьас девехаб, гьина э чвас чвеф ирцІанф. 13 Са лукІуфасра Іу эессис кар акьас хьасттава. Са эесси кканди ахьасе гис, джуьреф кканди ахьасттава, сайис маил аркьай ахьасе ги, джуьреттис ахьасттава. Чвафасра хьасттава Аллагьра, девлетра кканхьас.

Мусайин Закунихъасна Аллагьдин Паччагьвелдихъас

14 Ге гафар унихьугуна, пулар ккане фарисеяр элхъенди ахьуная Іисайил. 15 Іисайи пуная гебурис: – Инсанарин удигь чвас чун Аллагьдин рекъуьъ аяттар суман агвар акьас ккандея, амма Аллагьдис чве юркІураъ фи аячин ягІая. Инсанарис иджи аргва курар, Аллагьдин удигь алчагъсузвелар э. 16 ЯхІъя хьастти аяттари Мусайин Закунна, пайгъамбарара. Гьал иджевелин хабар аркьая Аллагьдин Паччагьвелдихъас. Гьерттис гуджуникестти Лич ачархьас ккандея. 17 Амма Мусайин Закуниъ са хатІ хьунара гулангунас, заварна джилар гуланасе. 18 Учин хьирахъай джуьре хьуна, сасра хьир аркьа идеми, гунагь гъуландея. Гьегишттин гунагь гъуландея, учин шувахъай джуьре хьуна хьир, хьирди аркьа идемира.

Мисала, са девлетлу инсандихъасна Лазарихъас

19 Іисайи ахъакьуная мисала: – Са девлетлу инсан ахьуная. Ги паччагьди суман аликІайра хьуная, Іуьмура гин вей хьуная хІа-ягъ суман. 20 Лазар агъа са касиб инсанна ахьуная, кІилди джан кабкари алацІунаф. Лазар ге девлетлу инсандин къапубуригь ахьуная ахъухьуна, 21 муш кей гин суфрайилас алархьу кьурцар хьунара учис есегьан пуна. Гъурури вей мез атай хьуная гин кабкарис. 22 Учин вахтт хъучадегуна, касиб инсан кІиная. Малайикари файшуная ге Ибригьиман багуливди. Девлетлу инсанна кІиная, гера икІуная некьвариъ. 23 Джегьенемдиъ гІезабарикк ккей вартт аккедурфугуна, девлетлу инсандис агуная варттал Ибригьимра, гин багулив Лазара. 24 Девлетлуйи вевер акьуна пуная: «Е Ибригьим, дад! Іегвал ухь зун, гьик заалди Лазар, тІубун кІекІв хьеттигІ гІикІуна зе мез Іашас акьурай ли. Фидегьен гІезабикк ккея зун джегьенемдин цІигІ!» 25 Ибригьима пуная гис: «КІвал акье, зе кІиркІ, вас джилил алми йине кІилди иджвелар, ппай Лазарас – кІилди Іайвелар. Гьал мис мисал иджвелар йиная, вун гІезабарикк ккея. 26 Ле кидавай, хье арайиъ ппара хІа кІен ккидава мукь ая. Мисаас чваалди вес кканхьучира кехІей, сайифасра хьасттава. Лисаас чаалди адесра сайифасра хьасттава». 27 Девлетлуйи пуная: «Миннат э вас, айчин зе дадан хулади гьик Лазар. 28 Захъ гІифу чу хъая. Лазара ахъакьурай тебурис ме гІезабарихъас, дахьичин тебура мишттин гІезабарикк ккерхьасе». 29 Ибригьима пуная: «Тебурис Мусайина пайгъамбардин китабар ая. Гебурил юркІв алихьурай». 30 Ге девлетлуйи пуная: «Ваъ, Ибригьим дад, нагагь кІинаттаригІас фуш хьунара тебурилди ушучин, тебур хаб алдаркуна Аллагьдин рекъуьъ весе». 31 Тегуна Ибригьима пуная гис: «Нагагь тебури Мусайилна пайгъамбарарил юркІв алдихьахаб, тебури сайилла юркІв алихьасттава, некьвариас гъайшиттилла кехІей».

17

Гунагьин курарихъасна хъугъувелдихъас

1 Іисайи учин ученикарис пуная: – Гунагьин курар акьас инсандин темехІер гьемишан хьасе. Амма язукъ э гунагьвелар акьас тІемехІер хъучарта инсандин. 2 Сасра инсандин темехІер хъучартая инсандис идже хьаси, гардандиъ ихьуна рагІун гъванна, уч хІуьлиъ ихьухаб. 3 Хъуттурфен гьа, эхІттият акье! Нагагь ве ччуччу гунагьвел акьухаб, маркьа уп гис, нагагь учин гунагь учин гардандиъ фацухаб, гъил гъушен гилас. 4 Нагагь са ягъан арайиъ, чвас ги еригелай гунагьин курар акьучира, хаб гъил гъушен агъай еригелай чваалди адичира, чун гъил гъушен гилас. 5 Вакилари пуная Іисайис: – Алтухъ акье че хъугъувел! 6 Іисайи пуная гебурис: – Нагагь чвахъ са бицІи удун дехІера хъугъувел хъаячин, чвафас пас хьасе тутун кІуранис: «МерІера хъай аттархьуна, хІуьлигІ кегъучІ!» – ге кІур чвас мутІеІ хьасе.

ЛукІар суман чунна ухь

7 – Белекин чвакес гьинахъ хьунара хъая чве хуппур дарка, я чве хІуппар ухІа лукІ. ЛукІ хуйиас адегуна, вун пасев гис: «ТегІди экьве суфрайихъ!»? 8 Дузди уп, вун гис пастту: «ХІезур акье зас Іуьшанттара, мухуригьанна гьайхьуна, гьуруц загь, зун ІуьтІуна, ухуна ккиркІвасттегьен, хуппай вун ІуьтІен, ух». 9 Вун чухсагъул пасттавахи лукІус, учи акьуна ккандея кар акьухаб? 10 Гьегиштти чунна э, чун акьуна кканде кар, чун акьугуна, уп: «Чин лукІар дала дава, чин чаал але бурджлу кар э акьунаф».

Кабкар кея инсанар сагъ акьуная

11 Іиса вей хьуная Ерусалимдиди, Самари дерейинна Галилея дерейин арайиъ ая рекъуьас. 12 Са хІуриди гІачаверегуна, Іисайис гьучархьуная кабкари алацІуна йицІу инсан. Вархал гъузуна, 13 гьавайикес пуная гебури: – Іиса! МегІелим! Іегвал ухь чин! 14 Гебур агуф, Іисайи пуная: – Ушуна агваракь чун маллабурис. Гебур ушуная, рекъуьъ сагъ хьуная гебур. 15 Гебурикес са инсан, уч сагъ хьуна агуф, хаб алдаркуна адиная, гьавайикес Аллагьдис шукура аркьай. 16 Ге ккерхьуна Іисайин лекарикк, чухсагъул пуная Іисайис. Ге инсан хьуная Самари дерейиас. 17 Іисайи гис пуная: – Чун джалла йицІудара сагъ хьунду? Ппай аме ерчІуд нахьи? 18 Тебурикес садра хаб адиндава Аллагьдис шукур акьас, са гьеме сасра халкьдин инсан дала? 19 Іисайи пуная гис: – Гъайшина ях, ве хъугъувелди вун ухІуне.

Мус хьасе Аллагьдин Паччагьвел

20 Фарисеяри хабар гъушуная Іисайифас, мус хьасе пуна Аллагьдин Паччагьвел. Іисайи джуваб йиная гебурис: – Аллагьдин Паччагьвел уларилди аргвафттава. 21 Сайира пасттава: «Магьа ме мисаъ ая!» я «Тисаъ ая!» Аллагьдин Паччагьвел чве юркІураъ ая. 22 Іисайи ученикарис пуная: – Хъучадесе гишттин вахтт, чвас са ягъа хьунара Инсандин КІиркІ агвас кканди ахьасе, амма чвас Ге агвасттава. 23 Чвас пасе: «Тагьа гьо тисаъ ая!» я «Магьа мисаъ ая!» Хъумугъа гебурихъ, мева гебурихъай. 24 Заварин са кІилихъас джуьре кІилихъди ича цІарп суман, адесе Инсандин КІиркІ, Учин ягъ хъучадегуна. 25 Сагелай Ге ацІуна гІезабарикк ккихуна ккандея, ме гьалдин инсанари Ге кьабул акьасттава. 26 НухІдин вахттунира, фиштти айуйичин, гьегиштти Инсандин КІиркІан вахттунира хьасе: 27 инсанари Іелдира хьуная, ухайра, хумбара аркьай хьуная, шуварисра вей хьуная. Гиштти ахьуная НухІ учин хьеттилас вере хулади ачушу ягъасттегьен, хаб кІилди джилил хьед алгъархьуна, джалла инсанар кІиная. 28 Гьегиштти хьуная Лут агъаттин вахттарира: инсанари Іелдира хьуная, ухайра, ариш-вариш аркьайра, тум узайра, хулар алихьайра; 29 амма Лут Садамдиас ушу ягъа, завариас цІанна гъван угъуна, джалла инсанар кІиная. 30 Гьегиштти хьасе Инсандин КІиркІ аде ягъара. 31 Те ягъа хулагъил але инсан, учин шейъер гъушанас хулади аладайдирай! Хуйиъ ая инсанна, хаб алдаркуна дайдирай. 32 Лут агъа инсандин хьир кІвал акье. 33 Учин Іуьмур ухІас алучІу инсанди, учин Іуьмур пуч акьасе; учин Іуьмур Аллагьдил аманат акьу инсанди, учин Іуьмур ухІасе. 34 Зун чвас дузди агъая, те Іуьшуй са ахуникк Іуд ккеячин, сад гъасе, сад атасе; 35 рагІуъ кьур ругІай Іу хьир аяхаб, са хьир гъасе, сад атасе. 36 Хуйиъ Іу инсан аяхаб, сад файшуна, сад атасе! 37 Ученикари хабар гъушуная Іисайифас: – Нандиъ хьасе ле кар, ХІаф? Іисайи джуваб йиная: – ХьиликІи яхв нандиъ аячин къаджарарисра хабар вереф э.

18

Мисала, ашкІин хьирахъасна суттихъас

1 ЮркІвар пушмал дахьуна, гьемишан дуьгІебур акьурай пуна, Іисайи ахъакьуная Учин ученикарис мисала. 2 – Са шагьурдиъ ахьуная я Аллагьдигьас дагучІа, я инсанаригьас неч гІадава са сут. 3 Гьеге шагьурдиъ ахьуная са ашкІин хьира, ге ашкІин хьир ягъди вей, агъай хьуная суттис: «Кумак акье зас дузвел арайилди аттивас!» 4 Ппара гагь хьуная сут рази девей гис кумак акьас, ахирара, сутти уч-учикди пуная: «Зас я Аллагьдигьасра дагучІайчира, я инсанаригьасра неч гІадавайчира, 5 ме ашкІин хьира зун сакинди атас, зун мин кар дуз акьасе, ягъди ме заалди вей, зун бизар дакьас». 6 Іисайи пуная гебурис: – Чвас унихьунев ге нехІекь сутти фи пичин? 7 Аллагьди хІекьвел аттивас кумак акьастту, Учикес ягъдира Іуьшттира тІалаб аркьа Учин инсанарис? Ппара гагьди ахъутІанас атасттавахи Ли гебур Учин кумакихъ? 8 Зун чвас агъая, Ли кьана дакьуна, кумак акьасе гебурис. Амма Инсандин КІиркІ джилилди адегуна, ахьасегьан джилил гишттин хъугъувел?

Мисала, фарисеяхъасна лукар завал аркьаттихъас

9 Са чаб дала дузди даргвай, сасрабур хІисаба ккидава инсанарис кетІурай пуна, Іисайи ахъакьуная мишттин мисала: 10 – Іу инсан адиная Аллагьдин хулади дуьгІе акьас. Сад хьуная фарисей, сад – налукар завал аркьаф. 11 Фарисея, гъузуна, учи учихъас миштти агъай аркьай хьуная дуьгІе: «Е Аллагь, зун вас шукур аркьая зак сасра инсанарик суман хъаттрикІвелар, Іемалар аркьавелар, къехІппавелар кидавахІела, я магьме налукар завал аркьа суманф зун давахІела. 12 Зун хІефттайи Іугелай сив ухІа, зе гьер къазалмишттикес йицІудпе пай Аллагьдин хулади ирцІанде». 13 Ппай налукар завал аркьатти, вархайил гъузуна, завариккди кІил гъадивасра кехІей нечтти, учи учин мухурис атай, агъай хьуная: «Е Аллагь, язукъ ухь зе, гъил гъушен зе гунагьарилас». 14 Зун чвас агъая: фарисей дава, налукар завал аркьаф э гунагьарикес мертт хьуна ушуф учин хулади. Учи учин хІа гафар аркьа инсан, ге Аллагьди кейхьасе, уч бицІи аргва инсан, ге Аллагьди кегъдивасе.

Іисана бицІи шиникквар

15 Іисайилди гъай хьуная бицІи шиникквар, Іисайи гебурил Учин гъил алихьурай пуна. Ученикарис агугуна, ученикар алурхІанди ахьуная магъа агъай шиникквар Іисайилди. 16 Іисайи, гьучафайдина Учигьди шиникквар, пуная: – Вей акьурай Заалди шиникквар, мушат маркьа гебурис. Аллагьдин Паччагьвел ме шиникквар суманттаринф э. 17 Зун чвас агъая, Аллагьдин Паччагьвел шиникквди суман кьабул дакьу инсан, Лисади фишттира ачавесттава.

Девлетлу хІеким

18 ХІекимвелдиъ ая са инсанди хабар гъушуная Іисайифас: – Е идже МегІелим, фикьуна кканде Зун, зас ккидиркІва Іуьмур ес? 19 Іисайи пуная гис: – Фас агъаф э вун Зас иджеф? Иджеф садра дава, са Аллагь дала. 20 Аллагьдин васиятар вас ягІая: «КъехІппавел маркьа», «ЙирхІуна малуькІе», «ХъадмиркІена», «Дава кардин шигьидвел маркьа», «Ве дадасна бабас хІуьлмат акье». 21 Ге инсанди пуная Іисайис: – Зе наши вахттарилас мич зун аркьаттар э джалла лебур. 22 Ге унихьугуна, Іисайи пуная: – Са кар э вас гьудуркІаяф. Джалла ве хъаяттар масса йина, пул пай акье касибарис, хаб вахъ девлет ле заварил хьасе. Хуппай вун захъай шаб. 23 Ге гафар унихьугуна, ге инсан ппара Іайи пушмал хьуная, ге девлетлу инсан хьуная. 24 Ге пушмал хьуна агуф, Іисайи пуная: – Девлет хъая инсанарис фидегьен четин э Аллагьдин Паччагьвелдиъ ачавес. 25 Девейис рубун гІуниас аттвес рехІет э, девлетлу инсандис Аллагьдин Паччагьвелдиъ ачавес дала. 26 Ге гафар унихьуттари пуная Іисайис: – Давайчин гьинафас хьасе ккейчІвас? 27 Іисайи пуная гебурис: – Инсанарифас акьас девеф, Аллагьдифас акьас вереф э. 28 Петтруйи Іисайис пуная: – Магьа чин кІилди че атуна, Вахъай ушуне. 29 Іисайи гебурис пуная: – Зун чвас дузди агъая, Аллагьдин паччагьвел бадала учин хал, я хьир, я чуппар, я дадар бабар, я шиникквар атуттис, 30 сасрабурилас алтухъди агьал есе, хаб вере дуьнйайи, ккидиркІва Іуьмур есе.

Іисайи хьибудпегелай пуная Уч кІесе пуна, хаб Учик джан керхьасе пуна

31 Багулихъди гьаттивуна, Учин цІеІу вакилас Іисайи пуная: – Магьа хьин вея Ерусалимдиди, тисаъ алуркьасе кІилди Инсандин КІиркІахъас пайгъамбарари ликІинаттар. 32 Инсандин КІиркІ гавурарин гъилиъ ихьасе, Гик келхъенди ахьасе, Ге уджуз аркьай ахьасе, Гил туьтуь алчихьай ахьасе, 33 ахира, зулумдалди йирхІуна, Ге кІесе. Амма хьибудпе ягъас Гик джан керхьасе. 34 Амма вакилар петтарин фиттина гъавурдиъ архьуна адава, Іисайи пе гафарин мегІна ахъарукьуна адава гебурихъди.

Іисайи сукъур инсандин Іекв алгьадес акьуная

35 Іиса Ерихун агъа шагьурдигьди гьучарукьагуна, рекъуьн багулихъ экьуна ахьуная гъил ккедикІуна са сукъур. 36 Багулифас халкь вей унихьуна, сукъура хабар гъушуная: «Фи э хьунаф?» 37 Гис пуная: «Назаретарин Іиса вея». 38 Сукъура вевер акьуна пуная: – Е Давударин кІиркІ Іиса, язукъ ухь зе! 39 Удигьаттари буІ, агъай хьуная гис, амма ги хъара Іайи гьараяр аркьай, агъай хьуная: – Е Давударин кІиркІ, язукъ ухь зе! 40 Іиса гъузуна, гьучафаша пуная Училди те сукъур. Сукъур гьучадегуна, Іисайи хабар гъушуная гифас: 41 – Фиркьа Зун вас? Фи ккандея вас Закес? Сукъура пуная: – Е ХІаф, зе уларил Іекв алгьадина ккандея зас. 42 Іисайи пуная: – Алгьадесе ве Іекв! Ве хъугъувелди ухІуне вун. 43 Гьеге сеІетти алгьадиная сукъуран Іекв. Ге ушуная Іисайихъай, шукур аркьай Аллагьдисра. Гьеге кар агу инсанари, джаллабури шукур аркьай хьуная Аллагьдис.

19

Налукар завал аркьа Закай

1 Іиса, ачадина Ерихун агъа шагьурдиди, гІаттвей хьуная шагьурдин куьчабуригІас. 2 Ге шагьурдиъ ахьуная Закай агъа са девлетлу инсан, налукар завал аркьаттарин хІаф. 3 Гис ппара Іайи агвас кканди ахьуная Іиса, Ге фишттинф ичугвас, амма уч джикъеф идехІела, халкьдигІас аргвай хьуна адава гис Іиса. 4 Ге гьуккай гьайчІуна удигьди, алгъучІуная тутун кІуранил, учис Іиса агвас гисагьас гьаттверегуна. 5 Іисайи, ге мукьуйигьди гьучарукьугуна, вартт хъуттурфуна, пуная: – Закай! ТегІди алайчІв! ЯгІа Зун вахъди ушуна ккандея. 6 ТегІди алайчІуна, шатти кьабул акьуная ги Іиса. 7 Іиса гихъай ушухІела, джаллабури чаб-чиппигІди агъай хьуная: – Гьеге гунагьар кея инсандин хулади ушуне Іиса?! 8 Іисайин удигь гъузуна, Закая пуная: – Е ХІаф, зе девлетин са пай, зун касибарис есе. Нагагь зун гьинас хьунара Іемалар акьуна, алтухъди гъушунахаб, зун тис якьутти ппара есе. 9 Іисайи пуная гис: – ЯгІа ме хал Аллагьди ухІуне, ме хулан эесси Ибригьим суман хъугъухІела. 10 Инсандин КІиркІ мич адинаф э, гІачагулунаттихъас руцас, ге балайиккес ккеттивас.

Мисала, суьре килав арсуран манатарихъас

11 Іиса Ерусалимдин багулив фахІела, халкьди фикир аркьай хьуная Аллагьдин Паччагьвел хьасе пуна. ДехІела, Іисайи Учил юркІв алийинаттарис ахъакьуная мисала: 12 – Девлетлу тухумдиас са инсан хІезур хьуная вес варха хІуькуматтиди паччагьвел учин ттуранихъди акьуна, хаб адес. 13 Уч вестти, унахъуна учин йицІу лукІус, гьерттис йина суьре килав арсуран манатаринна, пуная ги лукІарис: «Магьа, зун хаб верегунас, са кардигІ гІихьуна муфиІет кеттив ле пулукес». 14 Ге хІуькуматтиъ ая инсанарис, кканвей хьуна адава ге. Ге ушухаб, гин кьабахъай гьикуная гебури чиппин инсанар пас: «Гикес че паччагь хьуна ккандава час». 15 Учикес паччагь хьуна адегуна, унахъас акьуная ги учи пул е лукІарис, фидегьен гебури къазалмиш акьучин ягІархьас гьете пулулди. 16 Садпе лукІу, адина пуная гис: «Зе хІаф, ве суьре килав арсуран пул, зун йицІутти алтухъ акьуне». 17 Паччагьди пуная гис: «Вун зе идже лукІ э! Ле са бицІи кардиъ зафас ваал эхІттибар акьас хьухІела, зун ваалди йицІу шагьурдин хІавел ирцІандея». 18 Іудпетти адина пуная гис: «Зе хІаф, ве суьре килав арсуран пул, зун гІифутти алтухъ акьуне». 19 Паччагьди гис пуная: «Ваалдира ирцІандея зун гІифу шагьурдин хІавел». 20 Хьибудпетти адина пуная: «Магьа, зе хІаф, ве суьре килав арсуран манатар. ЯгълукъигІ гІикІуна атунауйи зун ме пул, 21 вагьас гучІай, вун ппара Іае инсан идехІела; веф даваф вун гъуланхІела, вун дузуф, вун уцахІела». 22 Паччагьди пуная гис: «Ле вун пе гафарихъас, зун ве диван акьасе, Іа лукІ. Вас ягІай уйи зун, зе гаф хІекь аркьа инсан идеф, зеф даваф зун гъуланф идеф, зун дузунаф зун уцаф идеф. 23 Фас ихьундава вун ле пул ккасттиъ? Зун адегуна, алтухъди гъушанас хьаси зафас зе пул!» 24 Паччагьди пуная учин инсанарис: «Мифас фаттивуна, фачи ле арсуран манатар, те йицІутти алтухъ акьуттилди». 25 Гебури паччагьдис пуная: «Е хІаф, ппай тихъ йицІутти ппара хъаду?» 26 Паччагьди гебурис джуваб йиная: «Зун чвас агъая: йинаф гъушанас вере инсандис хъара ппара есе, йинаф гъушанас деве инсандифас, аяфра фаттивасе. 27 Закес паччагь хьуна дакканди айуйи зе душманар, файдина зе удигьди, йуькІ».

Іиса Паччагь суман адиная Ерусалимдиди

28 Ге мисалара ахъакьуна, Іиса учІуная рекъуьъ Ерусалимдиди вес. 29 Элеун сувал але Вифагина Вифани агъа хІураригьди гьучарукьагуна, Іисайи гьикуная Учин ученикаригІас Іу инсан, 30 пуна: – Ях гьоте хьес гьучадаркуна хІуриди. ХІуригІди гІачавере усагІ чвас агвасе хъерт йирхІуна дагин къемч, мехІелдис са инсанна алдекьунаф. Хъатуна, фаша те мич. 31 Нагагь чвафас гьина-хьунара хабар гъушучин: «Фас хъартафе чун ле?» – пуна, чун уп: «ХІаттис, Іисайис герекдея ме къемч». 32 Ученикар гич ушугуна, джалла Іисайи пегъилди хьуная: 33 Къемч хъартагуна, къемчун эесси хабар гъушуная гебурифас: «Фас хъартаф э чун ме къемч?» 34 Гебури пуная: «Іисайис герекдея ме къемч». 35 Файдина къемч Іисайилди, алчихьуна къемчул чиппин къунджара, алихьуная гебури Іиса къемчул. 36 Іиса вегуна, гебури чиппин кунар аккихьай хьуная Ге вере рекъуькк. 37 Іиса Элеун сувалас алаверегуна, джалла Гин ученикари шатти гьавайикес шукур аркьай хьуная Аллагьдис, кІилди чиппис агу Іеламатарихъас. 38 Гебури агъай хьуная: – Шукур хьурай Аллагьдин ттур фацуна вея Паччагьдис! Заварил – инсанаринна Аллагьдин арайиъ маслихІет, Вас тегІриф э завариъ. 39 ХалкьдигІас са-Іу фарисеяри пуная Іисайис: – МегІелим, буІ уп Ве ученикарис! 40 – Зун чвас агъая, – пуная фарисеярис Іисайи, – гебур буІучин, гъванари гьараяр аркьай пасе. 41 Ерусалимдигьди багу хьегуна, Іиса Іешуна ге шагьурдихъас, 42 пуная: – Агь Ерусалим! Гьеме ягъа хьунара вун гъавурдиъ архьучин, фи ккандеячин вас маслихІет хьас! Амма ве уларис агвасттава ге маслихІет. 43 Хьасе мишттин вахттар, ве душманари акьуна джалла багварихъас ругун гунтІар, ихьасе вун арайиъ, алзиянасе ваал джалла багварихъас. 44 Душманари вун аккетасе, ве инсанар кІина ккедихьасе, ве къутт къуттул алми атасттава, вас ягІардахьухІела Аллагь ваалди аде вахтт.

Іиса Аллагьдин хулаъ

45 Хаб, Аллагьдин хулан хІеятиди ачушуна, Іисайи адикай хьуная кІилди гисаъ ариш-вариш аркьая инсанар, 46 гебурис агъай: – Гирами китабариъ ликІиная: «Зе хал, дуьгІебур хура хал э», чун микес къачагъарин муг акьуная! 47 Іисайи гьер ягъа Аллагьдин гаф ягІар аркьай хьуная инсанарис Аллагьдин хулаъ. ХІа маллабурис, Іелимарис, халкьдин улиъ ая инсанарис кІес кканди ахьуная Іиса. 48 Фиркьайчира ягІай хьуна адава гебурис, Іисайихъай гьемишанди халкь авехІела, Гин гьер гафунил юркІв алийина.

20

Гьина э Іисайис хІавел йинаф?

1 Са ягъа, Іиса Аллагьдин хулаъ аягуна, халкьдис иджвелин хабар аркьай, Іисайигьди гьучадина хІа маллабур, Іелимар, хІа къуджабур, 2 пуная Іисайис: – Уп час, гьинан хІавел фай аркьаеттар э Вун ле курар, гьина э Вас ле хІавел йинаф? 3 Іисайи гебурис пуная: – Зун чвасра са суал алихьасе, чун Зас джуваб тин. 4 ЯхІъяйис хьеттигІ гІучІуна-гІайчІва гІедат акьас гьина э хІавел йинаф? Аллагьди эв хъара инсанари? 5 Гебури фикир акьуна, чаб-чиппигІди пуная: – Нагагь хьин «Аллагьди э» пичин, хьефас Іисайи хабар гъушанасе: «Фас чун пайгъамбардихъ хъугъундава?» 6 Нагагь хьин пичин «инсанари», кІилди халкьди хьес гъвандинф акьасе, чиппис хІекьди ягІахІела ЯхІъя пайгъамбар хьунаф. 7 Гебури джуваб йиная, чиппис ягІайдава пуна, гьина ичин ге гІедат акьас хІавел йинаф. 8 Іисайи гебурис пуная: – Давайчин Зун чвасра пасттава гьинан хІавел фай ичин Зун мебур аркьаяф.

Мисала багъдихъанарихъас

9 Хаб Іисайи ахъакьуная ме мисала: – Узуная са инсанди тІибитІин багъ. Йина ге тІибитІарин багъра багъдихъанарилди, уч ушуная ме са хубджи вахттунисттегьен варха мукьварихъди. 10 Вахтт хъучадегуна, багъдин эесси гьикуная учин лукІ багъдихъанарилди багъдилас алттархьу учин пай гъас. Багъдихъанари йирхІуна, фера дайина гьикуная лукІ. 11 Багъдин эесси гьикуная учин Іудпе лукІ. Багъдихъанари йирхІуна, келхъуьна, фера дайина, ге лукІра гьикуная. 12 Хьибудпе лукІ гьикуная ги. Ге лукІусра йирхІуна, адикуна гьикуная гебури. 13 Гегуна багъдин эесси пуная: «Фиркьагьан зун? Нан гва Зун зе юркІв але кІиркІ гьикас, белекин, гис хІуьлмат акьасе тебури». 14 Эессин кІиркІ агугуна багъдихъанари чаб-чиппигІди пуная: «Ме эессин кІиркІ э, див хьин ме кІес, мин дадан девлет хьес хьас». 15 БагъдигІас гІаттфайшуна, кІиная гебури ге. Фикьасе гебурис багъдин эесси? 16 Эесси адина кІесе ге багъдихъанар, багъ есе сасрабурилди. – Аллагьди адатурай лишттин курар хьас! – пуная Іисайил юркІв алийина инсанари. 17 Іисайи гебурихъ хъуттурфуна, пуная: – Фи э ме ликІина гафарин мегІна?: «Усттабури хІисабикк ккидавай фадихьу гъвандикес, мурттуъ ихьа гъван хьуне». 18 Ге гъвандил алирхІуф чурхъвасе, ге гъвандикк кичархьуф, ругІасе. 19 ХІа маллабурисна Іелимарис гьеге сеІетти фацуна кІес кканди ахьуная Іиса, гебур гъавурдиъ архьуная ге мисала чиппис файдинаф идеф. Амма халкьдигьас гучІай, гебурифас кирхІас хьуна адава Іисайик.

Паччагьдис ирцІан налукихъас

20 Гебури гьикуная Іисайил алгъузанас чиппин фитначибур. Ге фитначибур чаб иджи агвар аркьай, алгъузуна ахьуная Іисайин сивиас фи гаф аттархьайчугас, хаб хІекимарис шикат акьуна, Іиса суттис ес. 21 Гебури пуная Іисайис: – МегІелим, час ягІа Ве гафара Вун ягІар аркьаттара хІекь идеф. Час ягІа Вун сайинна хъуьсу дафарцанф, Вун инсанарис Аллагьдин рекъуьъ вес ягІар акьа. 22 Уп час, чин Римдин паччагьдис йина ккандев налук, хъара кканду? 23 Іисайи, гебурин гІифритвеларин гъавурдиъ архьуна, пуная гебурис: 24 – Агваракь Зас ле манат. Гьинан ишкилна ттур э ле манатик кеяф? – Римдин паччагьдин, – пуная гебури. 25 Іисайи пуная гебурис: – Айчин, паччагьдинф фачи паччагьдис, Аллагьдинф – Аллагьдис. 26 Халкьдин удигь дава гафунил фацанас хьуна адава гебурифас Іиса. Іисайин джувабил муьхІтал хьуна, буІуная гебур.

КІеттарик джан керхьубахъас

27 Іисайигьди гьучадиная садуккеярикес са-Іу инсанар. Садуккеяр хъугъай хьуна адава кІе инсанарик джан керхьа пуна. Ге садуккеяри хабар гъушуная Іисайифас: 28 – МегІелим, Мусайи хьес ликІиная, нагагь гьинан хьунара чу кІехаб шиникквар хъудавай, гин хьир акьуна кканде сасра ччуччу, кІе ччуччунттар хІисаб акьуна хуна хІа акьас шиникквар. 29 Ахьуная ери чу. Садпе чу, хьирра акьуна, шиникквар хъудавай кІиная. 30 Іудпе ччуччу акьуная ге кІе ччуччун хьир. Шиникквара хъудавай Іудпе чура кІиная. 31 Хаб хьибудпе ччуччу акьуная ге хьир, шиникквара хъудавай, ге чура кІиная. Гьегиштти еридар чуппар кІиная, са шиникквра дахьуна. 32 Джаллабурин кьабахъай ге хьирра кІиная. 33 КІина инсанарик джан керхьу ягъа, нае ччуччун хьир хІисаб акьасе ге, ге хьир еридар ччуппарис ушуна адавуйив? 34 Іисайи пуная гебурис: – Ме дуьнйайин инсанари э хумбар аркьаф, шуварис вереф. 35 Хаб вере дуьнйайи кІинаттаригІас ккидиркІва Іуьмур есе лайикьлу инсанарис. Ге инсанари я хумбар аркьай ахьасттава, я шуварис вей ахьасттава. 36 Гебур Іеджал хъудаваттар хьасе, малайикар суман. КІинаттаригІас Аллагьди гебурик джан кихьухІела, гебур Аллагьдин шиникквар э. 37 КІе инсанарик хекьданди джан керхьа пуна Мусайира пуная, учис агуна зазарин тІурухъас ахъаркьагуна. Сес унихьуная Мусайис: «Зун Ибригьиман Аллагь э, ИсхІекьан Аллагь э, Якьубан Аллагь э», – агъай. 38 КІина инсанар, Аллагьдис садра кІина адава. Джаллабурин руьхІер аме. 39 ІелимаригІас са-Іудари пуная: – МегІелим, идже джуваб йине Вун гебурис. 40 Гебурифас сара фиттихъасра хабар гъушанас вей хьуна адава Іисайифас.

Гьинан кІиркІ э Месигь?

41 Іисайи гебурис пуная: – Фиштти агъагьан инсанари Месигь Давудан кІиркІ э пуна? 42 Учи Давуда Забуриъ агъая: «Аллагьди зе ХІаттис пуная: Вун экьве Зе хІуьрджал багулихъди, 43 Зун Ве душманар Ве лекарикк ккерхьас акьасттегьен». 44 Давуда Гис ХІаф агъагуна, фиштти э Месигь Давудан кІиркІ вереф?

ЭхІттият акье Іелимаригьас

45 КІилди халкьди Іисайил юркІв алийинагуна, Іисайи Учин ученикарис пуная: 46 – ЭхІттият акье ирхе кунара аликІуна ккируцас ккане Іелимаригьас. Гебурис кканве чаб гимил хІуьлматилди кьабул аркьагуна; гебурис кканве дуьгІебур хура хулариъ удигь ке идже мукьвариъ экьвас, шадвел ая хулариъра, ке хІуьлматин мукьвариъ экьвас. 47 Іелимари ашкІин хумбарис Іемалар аркьай гебурин хулар Іелде, хаб инсанарис чаб иджи агвас, ацІуна дуьгІебур хура. Гишттин Іелимарин ппара хІа диван акьасе.

21

АшкІин хьиран садакьа

1 Іисайис агуная Аллагьдин хулаъ девлетлу инсанари садакьайин къабудиъ пулар ихьай. 2 Іисайис агуная са гІеджиз ашкІин хьирара ифан Іу кепек ихьай ге къабуди. 3 Тегуна Іисайи пуная: – Зун чвас дузди агъая, ге гІеджиз ашкІин хьира джаллабурилас ппара ихьуная пуна. 4 Джаллабури садакьайис ихьуне чиппин алтухъди аяттикес, ппай ге гІеджиз хьира, учихъ хъая-хъудаваф кІилди ихьуне.

Аллагьдин хал аккетасе

5 Аллагьдин хулахъас гъургъагуна, Іисайин ученикарикес са-Іудари пуная: «Фидегьен батІар гъванарикес акьуная ме Аллагьдин хал, фидегьен багьайин садакьайин шейъерилди дуьхьуьная ме хал». Іисайи пуная гебурис: 6 Хъучадесе, лишттин вахттар, чвас аргваттикес гъван гъвандил илгванасттава, кІилди аккетасе. 7 Іисайифас хабар гъушуная гебури: – МегІелим, мус хьасе лишттин кар, фи ишарат агвар акьасе ле верегунас? 8 Іисайи гебурис пуная: – Хъуттурфен гьа, чун элдемиш дакьас. Ппараттар адесе чваалди «Зун Месигь э!» «Вахтт хъучадиная!» агъай. Чун мева гебурихъай. 9 ДегІвибурихъас, къал-макъаларихъас унихьугуна, гучІ мева. Гебур дахьуна илгван курар дава, амма гебурилди ахир хьасттава. 10 Хаб Іисайи гебурис пуная: – ГІахъасе са халкь сасра халкьдихъай, са паччагь сасра паччагьдихъай. 11 Сур усари зурбадалди джилар ттуттанасе, сур усариъ азарарна гаш архьасе, завариас гучІ гьархьа курарна хІа Іеламатин ишаратар агвар акьасе. 12 Сагелай гебур хьастти, чун Захъ хъугъуна, Захъай вехІела, чваал алгъузуна, чун фарцанди ахьасе. ДуьгІебур хура хулариъ чве сутар аркьай ахьасе, чун дусттагъариъ ачикай ахьасе, чун паччагьарина хІекимарин удигь джуваб йина кканхьасе. 13 Гьетегуна Заалас шигьидвел акьас хьасе чвафас. 14 Чун фикир маркьа, фишттин джувабар ицІандегьан чин тисал пуна. 15 Зун чвас гьелишттин Іекьулдин гафар ягІар акьасе, сайифасра чвахъай гъургъуна, хаб чвас джуваб ес девегъилди. 16 Дадар бабарира, чуппарира, багунттарира, дусттарира чун масса есе, са хубджи инсанар чвакес йирхІуна кІесе. 17 Захъас Чун сайисра кканди ахьасттава. 18 Амма чвас гучІ мева, са чІара кехІей чве кІилилас алархьасттава. 19 Чве сабурди чун ухІасе.

Ерусалим аккетасе

20 – Чвас Ерусалим якьу багухъас эскерари фацуна агугуна, ягІарухь, ге шагьур гебури аккетасе. 21 Тегуна Ягьудея дерейиъ аяттар гьиширай дагьарариди; Ерусалимдиъ аяттара тегІди гьишина ушурай; шагьурдиас аттушунаттар, хаб шагьурдиди ачадайдирай. 22 Хъучадиная инсанарин диван аркьа ягъар, алуркьвая кІилди ликІинаттар. 23 Язукъ хьасе фуни аяттаринна бизихъ шиниккв хъая хумбарин. Ппара хІа гуджлу зулумар хьасе ме джилил. Аллагьдин хъелакк ккичархьасе ме халкь. 24 Сур ханджалифас кІесе, сур фацуна сасра вилаятариди гъасе. Сасра халкьди аккертай ахьасе Ерусалим, чаб гисаъ амедегьен гагьди.

Инсандин КІиркІ адесе

25 – Завариъ рагъулла, вазуралла, гІадарилла Іеламатин ишаратар агвар акьасе; джилил халкь гучІ гьархьуна, фиркьайчира дагІай, зар-загьла хьуна ахьасе; хІуьлар гъутуна лепебурин ун алхьасе. 26 Инсанар, джилил вея бедбахттвелар аргвай, юркІвар чурхъай алгъадаркай ахьасе, сара фи агвас амегьан час агъай. Завун гІадара кехІей ттуттанасе. 27 Ттагьтегуна Инсандин КІиркІ агвасе дифу гІай вей ппара хІа кьуватна тегІриф хъай. 28 – Ме курар хьас хъучучІугуна, чвас гучІ мева. Дузди гъайшина, кІилар вартт акье. Чвас азадвел вере вахтт хъучавея.

Аллагьдин паччагьвел багу ая

29 Хаб Іисайи ахъакьуная гебурис мисала: – Хъуттурфен инджирин кІуранихъра, джалла сасра кІурарихъра. 30 Гебуриъ тук архъай агугуна, чвас ягІай аве, гІул хъучавеяф. 31 Гьегиштти, Зун педегьенттара аларкьвай чвас агугуна, ягІарухь, Аллагьдин Паччагьвел багу хьунаф. 32 Зун чвас дузди агъая, ме гьалдин инсанар дуьйилас алаверегунас, Зун Ерусалимдихъас петтар джалла аларкьвасе. 33 Заварна джилар гуланасе, Зе гафар амилгвасе.

Гьемишанди хІезурди ухь

34 – Те ягъ хабарсузди адесе. Хъуттурфен гьа чун ухай адахьас, пиянди адахьас, я ппара фикирар аркьай, гъамар аркьай адахьас. 35 ТІабариъ архьаттис учис тІабар гьахъунаф хабарди адаф суман, гьегиштти джилил ешемиш вея инсанарисра сайисра хабарди ахьасттава мус хъучадес ичин те ягъ. 36 Чун гьемишанди хІезурди ухь, дуьгІебура аркьай, те хьас кке бедбахттвелариккес чун ккеттархьас, чвафас Инсандин КІиркІан удигь гъузанас хьас. 37 Ягъуй Іиса Аллагьдин хулаъ авей хьуная халкьдис ягІар аркьай, ппай Іуьш акьас вей хьуная Элеун сув агъа кІунтІалди. 38 Багами дахи халкь хаб завал вей хьуная Аллагьдин хулаъ Іисайил юркІв алиянас.

22

Ягьуда рази хьуная Іиса масса ес

1 Хъучавей хьуная химир кидава лавашар аркьа Пасха агъа хІа-ягъ. 2 ХІа маллабурисна Іелимарис кІес кканди ахьуная Іиса, амма халкьдигьас гучІай ахьуная гебурис. 3 Іисайин цІеІу вакилакес, Ягьуда-Искариут агъа вакилаъ учІуная Иблис. 4 Ягьудайи, ушуна маслихІет акьуная хІа маллабурихъайна Аллагьдин хулан къаравуларин хІаттихъай, зун чвас Іиса фацанас кумак акьасе пуна. 5 Гебур шад хьуна, рази хьуная Ягьудайис арсуран пул ес. 6 Гаф йина гебурис, Ягьуда гъузуна ахьуная халкь гьудава, хІуьчІан вахттунихъ, Іиса гебурин гъилиъ ихьас.

Пасхайис хІезурвелар

7 Хъучадиная химир кидава лавашар аркьа хІа-ягъ. Ге хІа-ягъас руккай хьуная Пасхайин ккел. 8 – Ушуна, хІезур акье Пасхайин ккел, хьес ІуьтІанас, – пуна, гьикуная Іисайи Петтруна ЯхІъя. 9 Гебури хабар гъушуная Іисайифас: – Нандиъ хІезур акьуна ккандея Вас чин? 10 Іисайи гебурис пуная: – Чун шагьурдиди ачушугуна, чвас агвасе хьеттин гвар фай вея са инсан. Гьегин кьабахъай ушуна, ачаях гьеге ачавере хулади. 11 Ачушугуна, чун ге хулан эессис уп: «МегІелимди вафас хабар гъуланде уйи, нае хулаъ э пуна, Учи Учин ученикара хъай Пасха аркьаф?» 12 Ге хулан эесси агваракьасе чвас дуьхуьна варттал але хІа хал; гьетисаъ хІезур акье Пасхайин ямагар. 13 Гебури, Іисайи чиппис пегъилди, джикІина хІезур акьуная Пасхайин ямагар.

Іиса Учин вакиларихъай Пасайин суфрайихъ

14 Вахтт хъучадегуна, Іиса Учин вакилара хъай, экьуная суфрайихъ. 15 Іисайи Учин вакиларис пуная: – Зун гІезабарикк ккерхьагунас, фидегьен кканде уйи Зас чвахъай экьуна Пасхайин ямагар ІуьтІанас. 16 Зун чвас агъая, сара Зун ме Пасхайин ямагар ІуьтІанасттава, Пасха Аллагьдин Паччагьвелдиъ дахьудегьен гагьди. 17 Іисайи, гъушуна чехир ая курушка, шукур акьуна Аллагьдисра, пуная Учин вакиларис: – Ма, чве арайи пай акье ме. 18 Зун чвас агъая, гьалдин хаб Зун ухасттава ме тІибитІарин чехир, Аллагьдин Паччагьвел хьасттегьен. 19 Іисайи, гъушуна гуни, шукур акьуна Аллагьдисра, пай акьуна йина вакиларис, пуная: – Ме гуни Зе джан э, Зун чвахъас ирцІандеяф. Гьемиштти чун завал хьуна гуни Іелегуна, Зун кІвал аркьай акье. 20 ІуьтІуна кІиркІугуна, Іисайи гьетиштти гъушуна сасра курушка чехира, пуная: – Ме Зун чвахъас аларта Зе иилди ликІина ЦІае МаслихІет э. 21 Магьа Зун масса ирцІанде инсан, Захъай са суфрайихъ хъая. 22 Инсандин КІиркІ Учис ликІина рекъуьъ ай э веяф. Амма язукъ э Ге масса е инсандин. 23 Вакилари са-сайис агъай хьуная: «Гьинас эгьан хьегІас Іиса масса ес ккандеф?»

ХІавелдихъас хІуьджат

24 Ученикарин арайиъ хьуная хІуьджат, фуш чиппикес хІавелдиъ хьуна кканчин. Іисайи пуная гебурис: 25 – Паччагьари чиппин халкьарин хІавел аркьа, чиппин гъилиъ хІавел аяттари, чаб халкьдис иджвелар аркьаттар э агъа. 26 Чун гиштти маркьа. ЧвагІас хІатти, уч бицІиф суман фацурай, хІавелдиъ аятти, уч лукІ суман фацурай. 27 Фуш э хІаф? Суфрайихъ хъаяф эв, хъара гигь гьуруцаяф эв? Суфрайихъ хъаяф ду хІаф?! Магьа Зун чве лукІ суман ая. 28 Чун Захъай кІилди азиятар гъадивунаттар э. 29 Зун ирцІандея чвас Паччагьвел, Зас Зе Дада еф суман. 30 Чун Зе Паччагьвелдиъ Зе суфрайихъ Іелди-ухай ахьасе, чун экьуна тахттарил Іизраилдин цІеІу тухумдин диван аркьай ахьасе.

Вун хьибугелай пасе, вас Зун ягІафттава пуна

31 – Симон, я Симон! Магьа Иблисас чун гІаттирхІас ккандея, кьурагІас ттузар гІаттирхІаф суман. 32 Зун вахъас дуьгІе акьуне ве хъугъувел дагулурай пуна; хаб мус хьунара, вун хъугъуна адегуна, ве чуппарин хъугъувелла цІуьппе акье. 33 Симон-Петтруйи Іисайис пуная: – Е ХІаф, Вахъай зун дусттагъидира, Іеджал акьасра вес хІезурдея. 34 Іисайи пуная: – Зун вас агъая, Петтру, завкураригІди ккеккела ІуьІуь ахъасра хъучархьасттава, вун хьибугелай пасе, вас Зун ягІафттава пуна. 35 Іисайи хабар гъушуная вакиларифас: – Зун чун я пул фадавай, я чанта фадавай, я шумар алдавай гьикугуна, чвас фера гьудуркІуф хьунев? – Хьундава, – пуная гебури. 36 – Гьал, – пуная гебурис Іисайи, пІапІушник хъаятти гъушурай папушникІра, гъушурай чІилІанна, ханджал хъудатти, учин къундж масса йина, гъушурай ханджалла. 37 Зун чвас агъая, Захъас ликІинаттар, закунар хІисабсуз акьуф э пуна, аларкьвасе. Джалла Захъас пунаттар аларкьвасе. 38 Вакилари пуная Іисайис: – Е ХІаф, магьа мисаъ Іу ханджал ая. – ЧІевене, – пуная гебурис Іисайи.

Іиса Учин ученикарихъай Элеун сувалди ушуная

39 Хулаас аттина, Іиса Уч гьемишанди суман, ушуная Элеун сувалди. Гихъай ушуная ученикара. 40 Гисалди адегуна, Іисайи гебурис пуная: – ТІемехІвелариъ адархьас, дуьгІебур акье. 41 Іисайи гебуригьас са чІукь манзили гьайчІуна, гъузуна кьвакьварилди, дуьгІе акьуная: 42 – Дад, Ве амур акьуна, ккеттив сара Зун ме гІезабиккес. Зе амур ваъ, Ве амур хьурай. 43 Іисайилди завариас малайик аладиная, Гин юркІв цІуьппе акьас. 44 ГІезабикк ккей, Іисайи хъара Іайи юркІураастти дуьгІебур аркьай хьуная. Гилас эмкІ алавей хьуная джилилди, иин тІинкІар суман. 45 ДуьгІебур акьухаб, Іиса гъайшина гьучушуная Учин ученикаригьди. Гъамра хьуна, гъархьуна ахьуная ученикар. 46 Іисайи гебурис пуная: – Фас гъархьунаттар э? Гъайшина дуьгІебур акье, чун тІемехІвелдиъ адархьас.

Ягьудайи Іиса масса йина, Іиса фацуная

47 Іиса гъургъай ай, гисагьди аттархьуная ацІуна инсанар. Ке удигь гьахьуная цІеІуйигІас сад, Ягьуда агъаф. Ге гьучадиная Іисайигьди мач икІас пуна. 48 Іисайи пуная гис: – Ягьуда, мачра икІуна масса ирцІандеяв вун Инсандин КІиркІ? 49 Іисайихъай аяттарис агуная гисаъ фи хьунара вереф. Гебури хабар гъушуная Іисайифас: – Е ХІаф, ханджалар аттивав чин? 50 ГебуригІас сайи ханджалилди йирхІуна алдихьуная хІа малайин лукІун хІуьрджал ибур. 51 – Маркьа, гъузен! – пуная гебурис Іисайи. Гъил кирхІуна, сагъ акьуная Іисайи лукІун ибур. 52 Уч гъас адина хІа маллабурис, Аллагьдин хулан къаравуларин хІаттарис, хІа къуджабурис Іисайи пуная: – Чун къачагъ фацанас адеттар суман адиная Заалди ханджаларна ресар фай. 53 Зун чвахъай гьер ягъа Аллагьдин хулаъ авейи, чун Заалди гъил гъадивундава. Гьал чве вахтт хъучадиная, Иблиса хІавел аркьа вахтт.

Петтруйи учис Іиса ягІафттава пуная

54 Іиса фацуна файшуная гебури хІа маллайин хулади. Петтру гебурин кьабахъай вей хьуная. 55 ХІеятин яІаниъ акьуна цІа, инсанар экьуна ахьуная цІихъ. Петтрура экьуная гебурихъай. 56 ЦІихъ экьуна са къараваш-руша, ачадаркуна Петтруйиъ, Петтру ягІархьуна пуная: – Гьемера ай уйи Іисайихъай! 57 Петтру мутІеІ хьуна адава: – Е руш, зас ягІафттава Ге, – пуная Петтруйи. 58 Са чІукь гагьдилас сасра инсандира, Петтру агуна, пуная: – Вунна гьегебурихъай аяф э. – Дава, – пуная Петтруйи. 59 Са сеІет дегьен вахтт ккеттушугуна, джуьреттира Петтру ягІархьуна, пуная: – ХІекьди гьемера ай уйи Іисайихъай, Галилея дерейиас ду ме? 60 – Зас ягІайдава фиттихъас ичин вун агъаяф, – пуная Петтруйи ге инсандис. Петтруйи гиштти агъай ай, ккеккела ІуьІуь ахъуная. 61 Іиса, алдаркуна, хъуттурфуная Петтруйихъ. Петтруйис кІвал хьуная Іисайи учис пе гафар: ккеккела ІуьІуь ахъасра хъучархьасттава, вун хьибугелай пасе, вас Зун ягІафттава пуна. 62 Петтру гисаас аттушуна, юркІурак хьуна, Іешуная.

Іисайик келхъенди ахьуная

63 Іиса фацуна инсанари, келхъенди ахьуная Іисайик, йирхІай хьуная Гис. 64 ГьайтІуна Іисайин уларигьас, гебури агъай хьуная Гис: – Нагагь Вун Пайгъамбар идехаб, уп, магьа гьина э Вас йирхІуф? 65 Хъара ппара келхъен чІалар агъай хьуная Іисайис.

Іисайин диван акьас завал хьуная

66 Багамингагь хьегуна, завал хьуная хІа къуджабур, хІа маллабур, Іелимар Іисайин диван акьас. Іиса аттивуная гебурин удигьди. 67 Гебури пуная Іисайис: – Уп час, Вун Месигь эв? Іисайи пуная: – Зун чвас пичин, чун хъугъасттава; 68 Зун чвафас фас хъугъафттава пуна, хабар гъушучин, чун джуваб есттава. – 69 Гьалдилас тич Инсандин КІиркІ экьуна ахьасе Аллагьдин хІуьрджал багулихъ. 70 – Айчин, Вун Аллагьдин КІиркІ эв? – пуная джаллабури. Іисайи гебурис пуная: – Чун агъая Зун э пуна. 71 Гебури пуная: – Фиттис герек э хьес хъара шигьидвел? Хьес джалла Гикес Учикес унихьуне!

23

Іиса файшуная Пилатагьди

1 Іисайин диван аркьаяттари гъайшина, файшуная Іиса Пилаталди. 2 Гебури Іисайик тахсирар кикІай, пуная: – Час ягІархьуне, гьеме инсанди э че халкь рекъуьас адихьаяф, халкьди ккесардис налукар ес адартаяф, Уч Месигь Паччагь э агъай. 3 Пилата хабар гъушуная Іисайифас: – Вун эв «ДжугьутІарин Паччагь?» – Гьеле вун агъагъилди э, – пуная гис Іисайи. 4 Пилата хІа маллабурисра, халкьдисра пуная: – Зас ме инсандик са тахсира кей аргвай адава. 5 Гебури агъай хьуная гуджуникестти чиппин чІал хІекь аркьай: – Галилея дерейиас мич хъучучІуна, Учингъилди ягІар аркьай, Ги гьал кІилди Ягьудея дерейин халкь тІулаас адихьая.

Іиса файшуная Иродалди

6 Галилея агъай унихьуна, Пилата хабар гъушуная: – Галилеяйиас эв ме инсан? 7 ЯгІархьегуна, Іиса Ирод хІавелдиъ ая дерейиас идеф, Пилата гьикуная Іиса Иродалди. Гьеге ягъари Иродра адина Ерусалимдиъ ахьуная. 8 Іиса агугуна, Ирод са Іайи шад хьуная. Гис ацІуна гагь хьуная Іиса агвас кканди, учис Гихъас ппара унихьунахІела. Хъара Иродас Іисайи аркьа фичира са Іеламатра агвас кканди ахьуная. 9 Ирода ппара суалар йиная Іисайис, амма Іисайи са джувабра йина адава. 10 ХІа маллабурна Іелимар гъузуна, гуджунилди тахсирар кикІай хьуная Іисайик. 11 Иродан эскерарира Ге уджуз акьуна, келхъуьная Гик, аликІуна Гил паччагьдин суман кунара гьикуная Ге хаб Пилаталди. 12 Гьеге ягъанин хаб Иродна Пилат дусттар хьуная, авала душманар.

Завал хьуна инсанари йуькІ пуная Іиса

13 Пилата завал акьуна хІа маллабура, хІекимара, халкьра 14 пуная: – Чун заалди файдиная ме инсан, ми халкь рекъуьас адихьая пуна. Магьа зун чве удигь диван акьуне Мин. Зас ме инсандик, чун кикІая тахсирарикес, са тахсира кей аргвай адава. 15 Иродара, Мик тахсир кидаф агуна, Ме хаб хьелди гьикуная, йирхІуна кІес, Ме инсанди фера мишттин кар акьуна адава. 16 Къемчинф акьуна, зун Ме фатасе. 17 Пилата Пасхайин хІа-ягъас атуна кканди ахьуная фуш хьунара са ачикунаф. 18 Джаллабури вевер акьуна, пуная: – Ле йуькІ, Варава фат! 19 Варава агъаф, шагьурдиъ къалабулугъ акьуна фушчин кІина, ачикунаф хьуная дусттагъиъ. 20 Іиса фатас кканди, Пилата хаб сагелай сара пуная гебурис. 21 Гебури вевер аркьай, агъай хьуная: – Къадакъарилди цІагъунил алирхІуна кейхь Ле! Кейхь Ле! 22 Хьибудпегелайра пуная гебурис Пилата: – Фи Іайвел э Ми акьунаф? Ме кІес, зас Мик са тахсира кей аргвай адава. Къемчинф акьуна, зун Ме фатасе. 23 Гебури мертти Іайи вевер аркьай хьуная, йуькІ агъай Іиса. Гебурин чІал варттал хьуная. 24 Пилата гебурис ккандегъилди акьуна, 25 атуная дусттагъиас гебури адат пе Варава агъаф, шагьурдиъ къалабулугъ акьуна, фушчин са инсанна кІина ачикунаф. Ппай Іиса ихьуная кІилихъди гебурин гъилиъ.

Къадакъарилди цІагъунил алирхІуна, кейхьуная Іиса

26 Іиса кІес гъагуна, эскерари фацуная хуйиас вея Симон агъа са инсан. Гебури хъучикуная ге инсан Іисайин кьабахъай Іиса алирхІуна кейхьа цІагъун гъас. Симон хьуная Кирена агъа хІуриас. 27 Іисайин кьабахъай ппара халкь вей хьуная. Ге халкьдигІас хумбар Іешай-рахвай хьуная Іисайихъас. 28 Іисайи, гебурилди алдаркуна, пуная: – Ерусалимдин дишагьлибур, Захъас меІеша! Чвахъас Іеш, чве шиниккварихъас Іеш! 29 Хъучавея мишттин вахттар, инсанари агъай ахьасе: «Бахттлубур э шиниккв кидаваттар, шиниккв дахуруттар, шиникквдис бизи даеттар!» 30 Тегуна агъай ахьасе дагьарарис: «АрчІуна, алахъ чаалди!» – кІунтІарис агъай ахьасе: «Кичадив чин!» 31 Гъазе цІаб адахъуна кІуранис миштти аркьагуна, рукъу кІуранис фикьасе? 32 Іисайихъай кІес гъай хьуная Іу къачагъра. 33 «Келла» агъа мукьуйиди адегуна, гебури къадакъарилди цІагъунил алирхІуна кейхьуная Іиса, Гин багулив Іудар къачагъара, сад хІуьрджал багулихъ, сад чиппил багулихъ. 34 Іисайи пуная: – Дад! Гъил гъушен гебурилас, гебурис ягІай адава, фи ичин чиппи аркьаяф. КІур ихьуна, пай аркьай хьуная гебури Іисайин кунар. 35 Халкь гъузуна хъуланди ахьуная. ХІекимар элхъенди ахьуная Іисайил, агъай: – Сасрабур ухІуне, гьал Учи Уч ухІурай, нагагь Уч Месигь идехаб, Уч Аллагьди гІаттивунаф идехаб. 36 Эскерара келхъенди ахьуная Іисайик. Гебури Гис сирка гьучагъай, 37 агъай хьуная: – Нагагь Вун джугьутІарин паччагь идехаб, Вун Вас кумак акье. 38 Іисайин кІилихъ ликІина ахьуная: «Ме джугьутІарин паччагь э». 39 Іисайихъай кейхьуна са къачагъа, алурхІанди агъай хьуная Іисайис: – Месигь ду Вун? Кумак акье васра, часра. 40 Сасра къачагъа гис джуваб йина, ге гъургъас адатуна пуная: – Вас Аллагьдигьас гучІайду, васра ме Іисайис суман джаза идегуна йинаф? 41 Хьес хІекьданди хьин акьуна дава курарихъас йинаф э ме джаза, ппай Іисайи са дава кара акьуна адава. 42 Іисайис ге къачагъа пуная: – Вун ве Паччагьвелдиъ ушугуна, кІвал акье зун, Іиса. 43 Іисайи пуная гис: – Зун вас дузди агъая, вун ягІа Захъай джайнаттиъ ахьасе.

Іиса кІиная

44 СеІет цІеІударис кІилди джилил мучІ атІуная сеІет хьибударисттегьен, 45 рагъ гулуна. Аллагьдин хулаъ Гирами мукьуйик кея парда, яІанилас чІургъуна, Іу кьатІ хьуная. 46 Іисайи, гьавайикес гъургъуна, пуная: – Дад! Ве гъилиди ицІандея Зун Зе руьхІ. Гьегера пуна, Іисайин руьхІ дивуная. 47 Эскерарин хІатти, гисаъ хье кар агуна, Аллагьдис шукур акьуна, пуная: – ХІекьданди, ге инсандик тахсир кидавуйи. 48 КІилди гисаъ завал хьуна халкь, гисаъ хье кар агуна, чиппин мухурис гъурданф аркьай далгъуная. 49 КІилди Іисайис ягІаттара, Гихъай Галилеяйиас мич адина хумбара, вархайилас хъуттурфанди гъузуна ахьуная.

Іиса некьвариъ икІуная

50 Гисаъ ахьуная са Юсуф агъа юркІуран дуз идже инсан. Юсуф гІахьуная Іисайин диван аркьа инсанаригІ, 51 амма ге рази хьуна адава Іисайис гебури аттивуна, акьу диванил. Ге Юсуф хьуная ягІударин Аримафей агъа шагьурдиас, гъузунаф Аллагьдин Паччагьвелдихъ. 52 Юсуфа, ушуна Пилатагьди, тІалаб акьуная Іисайин майит. 53 Юсуфа, кеттивуна Іисайин майит, гІадиджина кафанигІ, дагьар атІуна икІуная некьвдиъ. Тисаъ гегунасттегьен садра икІуна ахьуна адава. 54 ДжумІе ягъан гІуьбехъмин гагь хьуная, вей хьуная киш ягъ. 55 Галилея дерейиас Іисайихъай адина уйи хумбарисра агуная Гин некьвра, Гин майит некьвариъ икІайра. 56 Тисаас адегуна, ге хумбари хІезур акьуная батІар ниъ хъая ччамар. Киш ягъа гебури са кара акьуна адава, Мусайин Закуниъ ликІинаф суман.

24

Іисайик джан керхьуная

1 ЭлхІед ягъа, багами дахи, чиппи хІезур акьуна батІар ниъ хъая шейъера фай, адиная ге хумбар Іисайин некьваригьди. 2 Некьвдигь гьихьуна гъван гебурис гьаттивуна алчархьуная. 3 ГІанади ачушуна хъуттурфугуна, Іисайин майит аме хьуна адава гисаъ. 4 Хумбар муьхІтал хьуна гъавурдиъ ачадархьай гъузуная. Те вахттуни садпуна аттархьуная гебурин удигьди Іу инсан, джагвар нур ицІан кунара алди. 5 Хумбари, гучІ хьуна, кІилар агьукІуная. Гебури пуная хумбарис: – Фас джан кеттихъас руцаф э чун кІинаттаригІ? 6 Ле мисаъ андава, Лик джан керхьуне. КІвал акье, чвас Ли фиштти пичин, Уч Галилея дерейиъ ами: 7 «Инсандин КІиркІ гунагьар кеяттарин гъилиъ архьасе, гебури Те къадакъарилди цІагъунил алирхІасе, амма хьибудпе ягъас Тик джан керхьасе». 8 КІвал хьуная гебурис Іисайин ге гафар. 9 Некьваригьас адегуна, ге хумбари джалла ахъакьуная цІеса вакиласра, сасра инсанарисра. 10 Ге хумбар хьуная Магдалина-Майрамра, Югьанара, Якьубан баб Майрамра. Гебурихъай ахьуна сасра хумбарира дузди гьегиштти ахъаркьай хьуная вакиларис. 11 ХъиртІанди ахъаркьаттар суман хьуна, вакилар хъугъуна адава хумбарихъ. 12 Петтру гъагьархьуна гьуккай ушуная Іисайин некьваригьди. КІил алчикІуна хъуттурфугуна, гис агуная Іаре кафанар. Петтру муьхІтал хьуна ушуная хулади.

Рекъди ученикарихъай веяф Іиса хьуная

13 Гьеге ягъа Іисайин Іу ученик вей хьуная Ерусалимдиас Эммаус агъа хІуриди. Ерусалимдиас ге хІуриди цІеса километр дегьен рекъ ахьуная. 14 Гебури ахттилатар аркьай хьуная Іисайихъас, тисаъ хьуна ге курарихъас. 15 Гебур гъургъай, ахттилатар аркьай веягуна, Уч Іиса, багу хьуна гебуригьди, ушуная гебурихъай. 16 Гебурин улар сукъур хьуттар суман акьуная, Іиса ягІардахьас. 17 Іисайи хабар гъушуная гебурифас: – Фи ахттилатар э чун рекъди вей аркьаяттар? Гебур пушмалди гъузуная. 18 Гебурикес Клеупа агъатти пуная Іисайис: – Са Вас идеф хьасе ме ягъари Ерусалимдиъ хьуна кар дагІаяф? 19 – Фи кар э? – пуная Іисайи. Гебури пуная: – Назаретарин Іисайихъас. Ге инсан Аллагьдин удигьра, кІилди халкьдин удигьра гуджлу пайгъамбар и Учин курарилдира, гафарилдира. 20 Че хІа маллабурина хІекимари Ге йуькІ пуне. Ге къадакъарилди кІуранил алирхІуна кейхьуне. 21 Чин гъузунуйи, Іизраилдин халкь азад аркьа инсан Гьеге э пуна. Магьа хьибудпе ягъ э те кар хьуна. 22 Гьал са-Іу хумбарира муьхІтал акьуная чин. Багами дахи Іисайин некьваригьди ушугуна, 23 тебурис майит андавай алчархьуная. Тебур адиная чагьди, чиппис тисаъ малайикар агвар акьуне агъай, малайикари Іисайик джан керхьуная пуне агъа. 24 Четтарикес са-Іу инсан ушуна некьваригьди хъуттурфугуна, гьеге хумбари пеф суман ахьуная, Іисайин майит агуна адава гебурис. 25 – Агь кІилиъ адаттар! – пуная гебурис Іисайи. – Фидегьен яваштти хъугъа чве юркІвар кІилди пайгъамбарари пунаттарихъ. 26 КІилди ле гІезабарикк ккихуна кканди адавуйив Месигь, Учис тегІриф хьас? 27 Хуппай Іисайи гъавурдиъ ихьуная гебур кІилди Гирами китабариъ Учихъас ликІинаттарин, Мусайилас мич джалла пайгъамбарари. 28 Гьучарукьуная гебур чаб вея хІуригьди. Іисайи Уч хъара гисаас тич ушуна ккандеяф суман акьуная. 29 Гебури гудж аркьай Іиса гьадартай, агъай хьуная: – Мева, гьал сара гІуьбехъмин гагьра хьуная, экьве чахъай. Іиса ачушуна экьуная гебурихъай. 30 Гебурихъай суфрайихъ экьугуна, Іисайи гъушуна гуни, шукур акьуна Аллагьдисра, кьатІ акьуна йиная гебурис. 31 Гьеге арайи улар дахъуттар суман, ягІархьуная гебурис Іиса. Амма садпуна Іиса гулуная гебурин уларигьас. 32 Гебури са сайис пуная: – Хье юркІвар тегІде хьуна ишай адавуйив, Ге рекъди хьехъай гъургъай веягуна, Ги хьес Гирами китабариъ ликІинаттар ахъаркьагуна? 33 Гебур Іудара гьеге сеІетти гъайшина, хаб ушуная Ерусалимдиди. Тич адегуна, гебури джикІиная цІеса вакил сасра ученикара хъай завал хьуна мукь. 34 Вакилари агъай хьуная: – Іисайик хІекьданди джан керхьуная, Симонагьди адинуйи Ле. 35 Хуппай ге Іуйира ахъакьуная фи хьучин рекъуьъ, фиштти хаб ягІархьунчин чиппис Іиса, Ги гуни кьатІ аркьагуна.

Іиса адиная Учин ученикаригьди

36 Гебури ахъаркьагуна, Іиса гебуригІди аттархьуна, пуная: – Чве маслихІет хьурай. 37 ГучІ хьуна, кІакІар хьуная гебур, руьхІ эгьан пуна чиппис агвар аркьаяф. 38 Іисайи пуная гебурис: – Фас лидегьен Іайи гучІ хьунаф э чвас? Фас хъудугъаттар э чве юркІвар? 39 Хъуттурфен Зе гъиларихъ, Зе лекарихъ – магьа ме Зун э. Зак кирхІуна, хъуттурфен, руьхІдин джан ирккар авефттава, Зе ая, магьа чвас аргваф суман. 40 Гишттира пуна, Іисайи агвар акьуная гебурис Учин гъиларна лекар. 41 Шад хьуна, хъугъас девей, муьхІтал хьуная гебур. Іисайи пуная гебурис: – Фичира Іелеф аяв чве мисаъ? 42 Гебури йиная Іисайис уджуна балугъин кьурц. 43 Іисайи, гъушуна, гебурин удигь ІуьтІуная. 44 Хуппай Іисайи гебурис пуная: – Зун чвахъай ами, ме гафар Зун чвас пунуйи: кІилди Захъас ликІинаттар Мусайин Закунира, Пайгъамбарарин китабариъра, Забуриъра аларкьуна ккандея пуна. 45 Іисайи ягІар акьуная гебурис Гирами китабарин гъавурдиъ архьас. 46 Іисайи гебурис пуная: – Гирами китабариъ гьемиштти ликІиная: Месигь гІезабарикк ккихуна, хьибудпе ягъас джан керхьуна гъайшина ккандея; 47 Гин ттур фацуна иджвелин хабар акьуна ккандея Ерусалимдиас тич кІилди халкьарис, чве гунагьар чве гардандиъ гъушен пуна, Аллагьди чве гунагьарилас гъил гъушанас. 48 Магьа чун шигьидар э. 49 Магьа Зун гьикая чвас Зе Дада чвас йина гаф. Чун сагелай Ерусалим шагьурдиъ экьве, чвас Аллагьди кьуват есттегьен.

Іиса агъафайшуная завариди

50 Іисайихъай ушуная ученикар шагьурдиас Вифани агъа хІуригьди рукьуна. Гъадивуна гъилар, Іисайи акьуная гебурис иджвелин дуьгІе. 51 Гьеге дуьгІера аркьай, варха вей ученикаригьас, Іиса агъафайшуная завариди. 52 Гебур кьвакьварилди джилил алирхІуная Лин удигь. Хаб зурба шадвел фай адиная ученикар Ерусалимдиди. 53 Гебур гьемишанди Аллагьдин хулаъ авей хьуная, Аллагьдис Шукур аркьай.