ЛУКА ЧИИГЕН СŸУНЧИЛУ JАР

ЕВАНГЕЛИЕ

1:1 Бисте болгон керектерди кöп улус куучын эдип чийерге ченешкен. 2 Бу керектерди туку бажынаҥ ала бойы кöргöн, Сöскö иштеп jÿрген улус биске база айдып берген эди. 3 Оныҥ учун, кÿндÿлÿ Феофил, ончозын учы-бажынаҥ ала быжулап шиҥжÿлейле, мен де сеге бир аай тизип, чийип берейин деп шÿÿдим. 4 Сеге ÿредип айткан сöстöр чындык болгонын сени билзин деп турум.

Крестеечи Иоаннык туулатаны керегинде табыш

5 Иудейлердиҥ кааны Ирод тужында Захария деп абыс jур-таган. Захария абыстардыҥ бöлÿгинеҥ болгон, бу бöлÿк олор-дыҥ ада-öбöкöзи Авияныҥ адыла адалган. Ондо база Аарон укту абакай болгон; ады-jолы Елисавета. 6 Олор экилези Кудай алдында акту болгондор, Бийдиҥ ончо салымдарын бÿдÿрип, jаҥдаткан jаҥын тудуп, буспай тургандар. 7 Jе олордо бала-барка jок болгон: Елисавета бала таппас болуп бÿткен; экилези jажай да берген улус. 8 Бир кÿн Захарияныҥ абыстап jÿретен öйи jедип, Кудай алдында мÿргÿ эдип турган. 9 Ого Бийдиҥ Öргööзине кирип, фимиам öртööр ÿлÿ келишкен. 10 Фимиам öртööр тужында тыштында кöп улус мÿргÿп турган. 11 Кенетийин ого Бийдиҥ ангели кöрÿнди; ол фимиам öртöгöн тагылдыҥ оҥ jанында турган. 12 Захария оны кöрöлö jÿрексиреп, коркый берди. 13 Jе ангел Захарияга айтты: - Коркуба, Захария: мÿргÿгениҥ угулды. Абакайыҥ Ели-савета сеге уул бала таап берер, оны Иоанн деп адаарыҥ. 14 Уулыҥ сеге сÿÿнчи ле кежик болор, оныҥ туулганына кöп улус сÿÿнер; 15 Бий алдында ол улу болор, аракы ла эзиртер суузын ичпес, Агару Тынды энезиниҥ ичинде алынар; 16 Израиль уулдарыныҥ кöбизин Бийге, олордыҥ Кудайына, бурултар; 17 Бийдиҥ ичкери алдынаҥ Илиядый тын-сагышту ла кÿчтÿ барар; адалар jÿрегин балдарына jандырайын деп, багынбастарды чындыктыҥ jолына кийдирейин деп, онызыла Бий келерине ка-лыкты белетейин деп. 18 - Мыныҥ чынын канайып билетем? - деп, Захария ангелдеҥ сурады. - Мен карып калдым, абакайым да jажай берген кижи. 19 Ангел каруузын jандырды: - Мен Кудай алдында турган Гавриил; сениле эрмектежерге, бу сÿÿнчилÿ jарды сеге jетирерге ийилгем. 20 Сеге бу айтканым öйи jедип, бÿтпей калбас. Jе сен сöзиме бÿтпедиҥ, оныҥ учун тилиҥ тартылып калар, мыныҥ чыны чыгар кÿн келгенче, унчукпай jÿрериҥ. 21 Ол öйдö улус Захарияны сакып, Öргööдö бу не саадады болбогой деп, кайкажып турды. 22 Захария чыгып келди, jе эрмектенип болбоды; Öргööдö ого кöрÿлте болгон деп, билип ийдилер. Захария улуска колыла имдеп, тил jок бойы артканча болды. 23 Абыстап jÿрген кÿндери тÿгенерде, ол jанып келди. 24 Jаан удабай абакайы Елисавета барланып, беш ай jажынып, айдынып jÿрген: 25 «Улус аразында мен керегинде jÿрген jаман эрмек-куучындарды токтодып, бу кÿндерде Бий меге мыны этти».

Иисустыҥ туулатаны керегинде табыш

26 Елисаветаныҥ барлу болгоны алтынчы айга барадарда, Кудай Бойыныҥ Гавриил ангелин Галилейдеги Назарет калага 27 Давид калдыгыныҥ Иосиф деп кижизиле кол алыштырган кыска ийди; кыстыҥ ады-jолы Мария болгон. 28 Аетел Марияга кирип, айтты: - Сÿÿн, Jакшылыкту! Бий сениле кожо! [Уй улус аразында сен алкалу.] 29 Мария ангелди кöрöлö, айткан сöзин кайкап, бу мынайып уткуганы не атасы болотон деп, санана берди. 30 Ангел ого айтты: - Коркуба, Мария! Кудайдаҥ сеге jакшылык jетти. 31 Барланып, уул бала табарыҥ, Оны Иисус деп адаарыҥ. 32 Ол улу болор, Öрö Турганныҥ Уулы деп адалар; Бий Кудай Ого улу адайы Давидтиҥ ширеезин берер; 33 Иаков кальҥын каан болуп ÿргÿлjиге башкарар, Оныҥ каандьҥыньш учы-куйузы jок болор. 34 Jе Мария ангелдеҥ сурады: - Ол канайып болор? Мен öбööнимле билишпес инем! 35 Ангел ого каруу jандырып, айтты: - Сеге Агару Тын тÿжер, Öрö Турганныҥ кÿчи кöлöткö чилеп сени бÿркеп ийер; онойып табатан балаҥ агару болор, Кудайдыҥ Уулы деп адалар. 36 Бат, тöрööниҥ Елисавета, ол до карыыр jöбинде барланып калды, алтынчы айга барып jат, оны дезе, бала таппас дешкен. Ол база уул бала табар. 37 Кудайдыҥ сöзи бÿтпей калбас. 38 Мария: - Мен Бийдиҥ кулы эдим, сениҥ айтканыҥча болгой - деди. Ангел jÿре берди.

Марияныҥ Елисаветага jолугып jÿргени

39 Бу кÿндерде Мария jолго кöндÿгип, туулу ороонго, Иуда калазына бачымдап барды. 40 3ахарияныҥ айлына келип, Елисаветала эзендешти. 41 Елисавета Марияныҥ ÿнин угарда ла, ичиндеги балазы кыймыктанды; Елисавета Агару Тынла толуп, 42 тыҥ ÿнденип айтты: - Уй улус аразында сен алкышту! Карындап jÿрген балаҥды Бий алкады! 43 Мен кем ондый, меге Бийимниҥ энези келетен? 44 Эзендешкен ÿниҥ кулагыма угуларда, ичимдеги балам сÿÿнип секирди. 45 Сен, Мария, Бийдиҥ сеге айтканыла болор деп бÿткениҥ учун кежиктÿ!

Мариянык сарыны

46 Мария айтты: - Jулам мениҥ Бийди улуркадып jат, 47 тыным мениҥ Аргадаачы Кудайыма сÿÿнип jат, 48 Ол Бойыныҥ кулы jобожыганын кöргöни учун. Бу öйдöҥ ала ончо ÿйелер мени кежиктÿ деп айдар, 49 Кÿчтÿ Бойы, меге улу керек эткени учун. Оныҥ ады агару! 50 Оны байлап, Оноҥ айап jÿрген улуска ÿйедеҥ ÿйеге быйаны jедер! 51 Ол Бойыныҥ колыла улу неме этти; улуркактарды ончо санаазыла кожо тоскурып ийди; 52 jаҥда отургандарды ширеезинеҥ аҥтарып, базынчыкта jÿргендерди кöдÿрди; 53 аштап jÿргендерге jакшылык сыйлады, байларды как куруга тайып ийди. 54-55 Ада-öбöкöлöриске: Авраамга ла оныҥ калдыктарына ÿргÿлjиге быйаным jетирерим деп, айдып салган сöзин Ол эске алынып, Израильге - Бойыныҥ кулына болужарга келди. 56 Мария Елисавета-эште ÿч ай кире jÿреле, jанып ийди.

Крестеечи Иоаннык туулганы

57 Айы-кÿни jедип, Елисавета уул бала тапты. 58 Бий Елисаветага улу быйанын jетиргенин угала, айылдаштары ла тöрö-öндöри оныла кожо сÿÿнижип турдылар. 59 Сегизинчи кÿнде баланы томдоорго келгилеп, оны адазыныҥ адыла Захария деп адаарга санандылар. 60 Jе энези: - Jок, оныҥ ады Иоанн болор - деди. 61 - Сениҥ угыҥда ондый атту кижи jок! - дешкилеп, 62 уулын кем деп адаарга турганын билерге, адазынаҥ имдеп сурадылар. 63 Захария jалбак агаш сурап алала, «Оныҥ ады Иоанн» - деп чийди. Ончолоры кайкашты. 64 Бу ла тушта оныҥ тили-оозы чечилип, Кудайды алкап, эрмектене берди. 65 Айылдаштары сÿрекей коркыды; кайкамчылу учурал керегинде куучын туулу Иудейге текши jайылды. ^Уккан улус ончозы оны кöксине алынып, «Бу бала кем болгой не?» - дежип турдылар. Чындап та, Бий оныла кожо болгон.

Захарияныҥ сарыны

б7 Оныҥ адазы Захария Агару Тынла толуп, jарчы болуп айда берди: 68 - Бийге, Израиль Кудайына, баш болзын! Ол Бойыныҥ калыгына келип барган, ого толу берген. 69-71 Бойыныҥ агару jебрен jарчылары ажыра сöзин берип, бойыс аргаданатан, - öштÿлеристеҥ, бисти jаман кöргöндöрдиҥ колынаҥ аргадайтан кÿчтÿ Аргадаачыны Ол Давид кулыныҥ калдыгынаҥ биске jайап берди. 72 Ол бистиҥ адаларыбыска быйан берерим, Бойымныҥ агару кереезимди сананып jÿрерим деп, сöзин берген. 73-75 Öштÿлердеҥ бисти аргадаар болуп, Ол бистиҥ улу адайыс Авраамга чертенген. Оныҥ эткениле, Оныҥ алдында бис агару ла чындык болорыс, кемнеҥ де jалтанбай, ончо кÿндеристиҥ туркунына Оныҥ керегине jÿрерис. 76 Сен дезе, балам, Öрö Турганныҥ jарчызы деп адаларыҥ, Бийге jолдор белетеерге, Оныҥ алдынаҥ келериҥ, 77 кинчектери ташталганы ажыра аргаданары керегинде Оныҥ калыгына билим берериҥ. 78 Бисти сÿÿген ле биске быйанын берген Кудайыс теҥеридеҥ биске jарык таҥдак ийер - 79 ол чыгып, карачкыда отурган, öлÿмниҥ кöлöткöзинде jÿрген ончо улусты бойыныҥ jарыгыла чалыдып ийер; амыр-энчÿге экелетен jолды ол биске кöргÿзип берер. 80 Бала дезе чыдап, тын-санаазы ойгорып турды; Израиль калыкка ачылар öйи jеткенче, ээн талаларда jÿрди.

Иисустыҥ туулганы

2:1 Ол кÿндерде каган Август ончо jердеги улустыҥ тын-тоо-зын алзын деп jакарган. 2 Квириний Сирияны башкарып турарда, бу баштапкы тооалыш болгон. 3 Ончозы бичидерге, кажызы ла бойыныҥ калазына бардылар. 4 Иосиф Давид угынаҥ, оныҥ калдыгы болгон. Оныҥ учун ол Галилейдеги Назарет каладаҥ Иудейдеги Давидтиҥ Вифлеем дейтен калазына барды. 5 Оныла кожо кол алыштырган, барлу болгон Мария барды. 6 Вифлеемде Марияныҥ бала табар öйи jедип, 7 тун уул бала тапты. Айылчы тÿжер ÿйде олорго jер табылбаган учун, Оны чуулайла, öлöҥ салгышка салып койды. 8 Ол jерде jалаҥда кÿдÿчилер ÿÿрлÿ койын коно каруулдап тургандар. 9 Олорго Бийдиҥ ангели кöрÿнип, Бийдиҥ магы олорды чалыдып ийди; кÿдÿчилер сÿрекей коркыды. 10 Jе ангел олорго: - Коркубагар! - деди. - Мен слерге сÿÿнчилÿ jар - ончо улуска улу сÿÿнчи экелип jадым. 11 Бÿгÿн Давид калазында слерге Аргадаачы туулды - Христос Бий! 12 Бат слерге билди: öлöҥ салгышта чуулу jаткан баланы кöрöригер. 13 Сакыбаган jанынаҥ бу ангелле коштой теҥериниҥ кöп черÿлери кöрÿнип, Кудайды алкай бердилер: 14 - Кöк-теҥеридеги Кудайга мак! Мениҥ jакшылыкту кÿÿн-табым бар улус ортодо jерде энчÿ. 15 Ангелдер теҥери öрö чыга берерде, кÿдÿчилер бой-бойлорына айдышты: - Вифлеем барып, ондо не болгонын, Бийдиҥ биске айтканын кöрöлик. 16 Jылгырлап барала, Марияны, Иосифти ле öлöҥ салгышта jаткан баланы таап алдылар. 17 Баланы кöрöлö, Ол керегинде нени укканын куучындай бердилер. 18 Кÿдÿчилердиҥ куучынын уккан улус ончолоры алаҥ кайкажып турдылар. 19 Мария дезе, бу сöстöрди ончозын кöксине алынып, чеберлеп турган. 20 Кöргöни-укканы учун Кудайды алкап ла мактап, кÿдÿчилер кайра бурулдылар: ончозы ангелдиҥ айтканыла болгон. 21 Сегис кÿнниҥ бажында, баланы томдойтон öй jедерде, Оны Иисус деп ададылар; бу атты ангел Ого табылгалакта берип койгон.

Иисус Öргööдö

22 Моисейдиҥ Jасагыла олордыҥ аруланар кÿндери тÿгенерде, jаш баланы Бийдиҥ алдына тургузарга, Иерусалимге экелдилер. 23 Тун туулган эр киндиктÿ баланыҥ кажызы ла Бийге молjолзын деп, Бийдиҥ Jасагында айдылган. 24 Бийдиҥ Jасагыла олор анайда ок эки кÿÿлечек ол эмезе кÿÿлениҥ эки балазын тайар учурлу болгон. 25 Ол тушта Иерусалимде Симеон деп кижи jуртаган. Ол акту, ак санаалу кижи болгон, Израильди Кудай аргадаар кÿнди сакып jÿрген; Агару Тын оныҥ бойында болгон. 26 Кудай ийген Христосты кöрбöйинчеҥ öлбöзиҥ деп, ого Агару Тыннаҥ кÿн-эртеде айдылып калган. 27 Агару Тын Симеонды Öргööгö экелди. Кудай jаҥын jаҥдаарга, ада-энези Иисус баланы алып келерде, 28 Симеон Оны колго алып, Кудайды алкайла, айтты: 29 - Бий! Бойыҥныҥ айтканыҥча, эм кулыҥды амырын божодып jатканыҥ бу. 30 Мениҥ кöзим Сениҥ аргадажыҥды кöрди. 31 Оны Сен ончо калыктар алдында белетегеҥ: 32 кара jаҥдуларга ачылта, Израиль калыгыҥа мак берип турган jарыкты. 33 Иосиф ле Мария бала керегинде айтканын кайкап уктылар. 34-35 Симеон олорды алкайла, Иисустыҥ энезине, Марияга айтты: - Бу баладаҥ улам Израильде кöп улус jыгылар, кöбизи öрö турар, сениҥ де тын-jулаҥнаҥ ÿлдÿ öдöр. Бу бала Кудайдыҥ билдизи болор, ого удура кöп улус туруп чыгар, онызыла олор jÿректеринде алып jÿрген санааларын ачар. 36 Öргööдö анайда ок jарчы Анна болгон. Ол Асир укту, Фануилдиҥ кызы болгон; бойы бош гсарып калган. Барган кижизиле jети jыл jуртайла, тул калган. 37 Оноҥ ло бери сегизен тöрт jашка jеткенче, тул jÿрген. Öргööдöҥ ырабай, тÿни-тÿжи мÿргÿп, орозо тудуп, Кудайдыҥ керегине jÿрген. 38 Бу öйдö ол базып келеле, Кудайга алкыш jетирип, Кудай Иерусалимди jайымдаарын сакып jÿрген ончо улуска jаш бала керегинде куучындап турды. 39 Иосиф ле Мария Бийдиҥ jаҥын jаҥдайла, Галилейдеги Назарет калазына jанып келдилер. 40 Бала дезе чыдап, кÿчи кирип, ойгорып турган; Кудайдыҥ jакшылыгы Оныҥ Бойында болгон. 41 Иисустыҥ ада-энези jылдыҥ сайын Иерусалимге Пасха байрамга барып туратан. 42 Иисус он эки jашту болордо, олор jаҥжыкканыла Иерусалимге байрамдап бардылар. 43 Байрамныҥ кÿндери божоордо, jанып ийдилер; Иисус дезе, Иерусалимде артып калды. Ада-энези онызын билбей, 44 Иисус öскö улусла кожо келеткен деп бодогон. Кÿндик jерди öдöлö, тöрöгöндöрдиҥ, кöрÿш-таныштардыҥ ортозынаҥ Иисусты бедирей бердилер; 45 таппай салала, Оны бедиреп, Иерусалимге ойто бурулдылар. 46 Иисусты ÿч кÿнниҥ бажында Öргööдöҥ таптылар. Ол ÿредÿчилердиҥ айтканын угуп, сурактар берип, олордыҥ ортозында отурган. 47 Иисусты уккан улус ончолоры Оныҥ керсÿзин ле карууларын кайкажып тургандар. 48 Ада-энези Иисусты кöрöлö, алаҥ кайкадылар; энези Ого айтты: - Балам! Бу Сен кайттыҥ, не онойдо кылындыҥ? Адаҥ да, мен де Сени бедиреп, ачу-коронго тÿштис. 49 - Мени слер не керек бедиредеер? - деп, Иисус сурады. - Мен Адамныҥ айлында болотонымды билбедеер бе? 50 Jе олор Иисустыҥ айтканын оҥдободы. 51 Иисус ада-энезиле кожо барып, Назаретке келди, олорго сöсуккур jÿрди. Энези дезе, Оныҥ айткан сöстöрин jÿрегинде чеберлеп алып jÿрди. 52 Иисус чыдап, ойгорып турды; Кудайдыҥ да, улустыҥ да Ого быйаны тыҥып турган.

Крестеечи Иоаннык jарлыктаганы

З:1 Бу керек каган Тиверий Римди он бежинчи jыл башкарып jадарда болгон. Ол тушта Понтий Пилат Иудейде, Ирод дезе, Галилейде бийлеген, оныҥ карындажы Филипп Итурейде ле Трахонитида тергееде, Лисаний дезе, Авилинейде бийлеген. 2 Анна ла Каиафа улу абыстар болордо, ээн талада Захарияныҥ уулы Иоаннга Кудайдаҥ сöс келген; 3 ол Иордан-сууны сындай jерлерди эбирип, мынайда jарлыктап jÿрген: «Кудайга баштанып, креске тÿжÿгер, кинчектеригер ташталзын деп!» 4 Jарчы Исаияныҥ бичигинде мынайда айдылган: «Ээн талада кыйгырган кижиниҥ ÿни бу: „Бийге jол белетегер, орык jолдорын тÿс эдигер! 5 Не ле кобы-jик толо берзин, не ле туу ла тöҥ jабызазын, бурулчыктар, оҥкок-чиҥкектер тÿзезин! 6 Ол тужында Кудайдыҥ аргадажын кажы ла кижи кöрÿп ийер"». 7 Креске тÿжерге келген улуска Иоанн айдып турган: - Jыланныҥ ач-ÿрени! Кудайдыҥ келер öйдöги чугулынаҥ кыйыжар jолды слерге кем кöргÿзип берди? 8 Кудайга ак сананып баштанганаарды эткен-тутканыгарла керелегер! «Адабыс Авраам» - деп, ичигерде айдарга сананбагар! Айдып турум слерге: Кудай бу таштардаҥ Авраамга балдарды jазап берер аргалу. 9 Ай-малта агаш тöзинде эм белен jадыры: jакшы ÿрен бÿтпес агашты кезип, отко таштайтан. 10 «Бис нени эдетенис?» - деп, калык сураарда, 11 Иоанн олорго каруузын jандырып турган: - Эки чамчалу кижи чамча jок кижиге берзин; аш-курсакту кижи база анайда этсин. 12 Креске тÿжерге албанчылар база келген. - Уредÿчи, бис нени эдетенис? - деп, олор сурагандар. 13 Иоанн олорго: - Улустаҥ артык неме некебегер - деген. 14 Анайып ок jуучылдар: - Бис нени эдетенис? - деп сураарда, Иоанн айткан: - Кемди де тарындырбагар, сайгактабагар, иштеп алган акчагарла болорзынгар. 15 Сакылтада jÿрген калык: «Шак бу кижи Христос болды ба?» - деп, ичинде Иоанн керегинде сананып турган. 16 Jе Иоанн ончо улуска мынайда айткан: - Слерди мен суула крестеп jадым. Jе менеҥ Кÿчтÿ болгоны келедири. Мен Оныҥ öдÿгиниҥ буужын да чечерге турбазым. Слерди Ол Агару Тынла, отло крестеер. 17 Эскин Оныҥ колында. Идиргенин Ол арутайла, буудайын анбарына урар, саламын дезе, öчпöс отко таштап öртööр. 18 Иоанн улусты анайып ла кöп öскö дö сöстöрлö бÿдÿндирип, Сÿÿнчилÿ Jар jарлап jÿрген. 19 Башкаручы Ирод келдин Иродиаданы алганы учун, öскö дö jарабас кылыктары учун, Иоанн оны бурулап турган. 20 Ирод дезе, база бир jарабас керек эдип, Иоаннды тÿрмелеп койгон.

Иисустык креске тÿшкени

21 Калык ончозы креске тÿжÿп турарда, Иисус база креске тÿшти. Мÿргÿп турарда, кöк-теҥери ачылып, 22 Агару Тын, кÿÿле кеберин алынганча, Оныҥ ÿстине тÿжÿп келди, теҥеридеҥ ÿн угулды: - Сен - Мениҥ сÿÿген Уулым, Сенде Мениҥ jакшылыкту табым!

Иисустык ада-öбöкöлöри

23 Иисус Кудайдыҥ керегине jÿрÿп баштаарда, одус jаш ки-релÿ болгон. Оны улус Иосифтиҥ уулы, Илийдиҥ jеен уулы деп бодогон. 24 Иисустыҥ арткан ада-öбöкöлöри: Матфат, Левий, Мелхий, Ианнай, Иосиф, 25 Маттафий, Амос, Наум, Еслим, Наггей, 26 Мааф, Маттафий, Семей, Иосих, Иодай, 27 Иоаннан, Рисай, Зоровавел, Салафиил, Нирий, 28 Мелхий, Аддий, Косам, Елмодам, Ир, 29 Иисус, Елиезер, Иорим, Матфат, Левий, 30 Симеон, Иуда, Иосиф, Иоанам, Елиаким, 31 Мелеай, Меннай, Маттафай, Нафан, Давид, 32 Иессеей, Овид, Вооз, Салы, Наассон, 33 Аминадав, Админ, Арния, Есром, Фарес, Иуда, 34 Иаков, Исаак, Авраам, Фарра, Нахор, 35 Серух, Рагав, Фалек, Евер, Салы, 36 Каинан, Арфаксад, Сим, Ной, Ламех, 37 Мафусал, Енох, Иаред, Малелеил, Каинан, 38 Енос, Сиф, Адам, Кудай.

Иисусты ченегени

4:1 Иисус Агару Тын алынып, Иорданнаҥ jанып келди, Тын Оны ээн талага алып барды. 2 Анда Ол тöртöн конок кöрмöскö ченедип, курсак jибеди; учында аштай берди. 3 Кöрмöс Ого айтты: - Сен Кудайдыҥ Уулы болзоҥ, бу ташка jакарып ий, калаш боло берзин деп. 4 Иисус каруу jандырып, кöрмöскö айтты: - «Кижи jаҥыс калашла тирÿ jÿрер эмес, [jе Кудайдыҥ не ле сöзиле тирÿ jÿрер]» деп чийген сöс бар. 5 Кöрмöс Иисусты бийик тууга алып чыгала, jер-телекейдиҥ ончо каандыктарын элес эттире кöргÿзип, 6 Ого айтты: - Булардыҥ ончозыныҥ бажын билериҥ, магын Сеге берейин. Мыныҥ ончозы меге берилген, олорды кемте берейин дезем, бойымныҥ табым. 7 Меге jаҥыс бажырып ий - ончозы Сенийи болор. 8 Иисус каруузын jандырды: - [Менеҥ кеде тайыл, кöрмöс!] Чийген сöс бар: «Бийге, бойыҥныҥ Кудайыҥа, бажыр, jаҥыс Ого иштеп jÿр». 9 Кöрмöс Иисусты Иерусалимге апарып, Öргööниҥ канадына тургузала, айтты: - Сен Кудайдыҥ Уулы болзоҥ, мыны тöмöн калып ий. 10 Чийген сöс бар эмес беди: «Сени чеберлеп jÿрзин деп, Бойыныҥ ангелдерине jакыыр. 11 Будыҥ ташка бÿдÿрилбезин деп, Сени кол бажына алып баргылаар». 12 Иисус каруузын jандырды: - «Бийди, бойыҥныҥ Кудайыҥды, ченебе» деп айдылган. 13 Ончо ченелтезин туузылтала, кöрмöс бир кезекке Иисустаҥ jÿре берди.

Иисустык jарлыктаганы

14 Тыннаҥ кÿч алынала, Иисус Галилейге бурулды; Ол кере-гинде куучын-эрмек эбире jерлерге jайыла берди. 15 Олордыҥ синагогаларында улус ÿретти, ончолоры Оны макка чыгарып турдылар. 16 Иисус öскöн jерине - Назаретке келди. Бойыныҥ jаҥынча, суббот кÿнде синагогага кирип, Чийим кычырарга öрö турды. 17 Ого Исаия jарчыныҥ тÿрбегин алып бердилер; Ол тÿрбекти jайа тудуп, мынайда чийилген jерди таап алды: 18 «Бийдиҥ Тыны - Мениҥ Бойымда; Ол Меге jаҥ берип, тÿреҥи улуска Сÿÿнчилÿ Jар jетирсин деп, олjого киргендерге jайым керегинде, сокорлорго кöстöри jарыйтаны керегинде jарлазын деп ийген. Мени Ол базынчыкта jÿргендерди божотсын, 19 Бийдиҥ улуска быйан эдетен jылы jедип келгенин jарлазын деп ийген». 20 Тÿрбекти тÿрÿп, синагоганыҥ ищчизине табыштырып, Иисус отура берди; ондо отурган улус ончолоры Иисустаҥ кöс албай турдылар. 21 Иисус олорго айдып баштады: - Мында айдылган, слер уккан сöстöр бÿгÿн бÿтти. 22 Ончолоры мыныҥ чынын керелеп, Оныҥ айткан jакшылык сöстöрин кайкажып, «Бу Иосифтиҥ уулы эмес беди?» - деп, сурап турдылар. 23 Иисус айтты: - «Эмчи, бойыҥды бойыҥ jас» деген кеп сöсти Меге айтпай кайдарыгар; «Бистиҥ укканыбысча, Капернаумда нени эткен эдиҥ, мында, тöрöл jериҥде, база анайда эт» дешкейигер. 24 Jе Мен чынын айдадым слерге: кандый да jарчыны тöрöл jеринде jуутпай jадылар. 25 База чынын айдып турум слерге: Илия тужында ÿч jыл алты ай jааш jаабай, ончо jерлерде ачана-торо болордо, Израильде кöп тул келиндер болгон. 26 Jе Илия олор-дыҥ кемизине де ийилбей, jаҥыс Сидонныҥ jуугындагы Сарептада jаткан тул келинге ийилген. 27 Анайып ок Елисей jарчы тужында Израильде капкаш баалулу улус кöп болгон, jе Сирияныҥ кижизи Нееманнаҥ öскö, олордыҥ бирÿзи де аруталбаган. 28 Мыны угала, синагогада отурган ончо улус аткыйлана берди. 29 Тура jÿгÿрижип, Иисусты каладаҥ алып чыгала, jардаҥ ийде салып ийерге, кала турган тууныҥ ÿстине апардылар. 30 Jе Ол кöп улустыҥ ортозынча öдÿп, jÿре берди.

Оору-jоболду улусты jасканы

31 Иисус Капернаумга, Галилейдеги калага келип, суббот кÿнде улус ÿретти. 32 Иисустыҥ ÿреткенин кайкажып турдылар, Оныҥ айткан сöстöринде кÿч бары билдирип турган. 33 Синагогада öзöк-буурында кара jелбистÿ кижи болгон. Байа кижи кышкыра берди: 34 - Эй, Сениҥ бисте не керегиҥ бар, Назаретте jерлÿ Иисус? Сен бисти öлтÿрерге келдиҥ бе? Кем болгоныҥды мен билер турум, Сен - Кудайдыҥ Агарузы! 35 Jе Иисус: - Унчукпа дейдим, бу кижидеҥ чык! - деп, кара jелбиске jакарды. Jелбис оору кижини улустыҥ ортозына jыга базып, ого каршу jетирбей, öзöк-буурынаҥ чыга берди. 36 Ончолорыныҥ куды чыгып, бой-бойлорына айдыжып турдылар: - Бу не сöс? Ондо jаҥ ла кÿч бар, Ол кара jелбистерди jакарып ийгенде, олор чыга бергилейт! 37 Иисус керегинде табыш эбире jерлерге текши jайылды. 38 Синагогадаҥ чыгала, Ол Симон-эшке кирди; Симонныҥ кайын энези эди-каны изип-кÿйÿп, ооруп jаткан; Иисусты ого болушсын деп сурадылар. 39 Иисус кайын энеге эҥчейип, ооруга jакарып ийерде, ол jазыла берди; тöжöктöҥ туруп, айылчыларды кичееди. 40 Кÿн бадып барадарда, jÿзÿн-jÿÿр оору-jоболду улусты Иисуска экелдилер; Иисус олордыҥ кажызына ла колын салып, jазып турды. 41 - Сен - Кудайдыҥ Уулы! - деп кыйгырганча, jелбистер кöп улустаҥ чыгып турдылар. Оны Христос деп, jелбистер билер учун, неме айтпазын деп, Иисус олорды jакарып турды. 42 Тÿш боло берерде, Иисус чыгып, аалга jерге jÿре берди. Кöп улус Оны бедиреп барды; табала, олордоҥ барбазын деп, сурап турдылар. 43 Jе Иисус айтты: - Кудай Каандыгыныҥ сÿÿнчилÿ jарын Мен öскö дö jерлерге jарлаар учурлу. Мениҥ ийилген керегим ол. 44 Анайып Ол Иудейдиҥ синагогаларында jарлыктап jÿрди.

Баштапкы ÿренчиктер

5:1 Бир кÿн Иисус Геннисарет кöлдиҥ jаказында jÿрерде, калык Кудайдыҥ сöзин угарга, кысталыжып турган. 2 Иисус кöлдö турган эки кемени кöрÿп ийди; балыкчылар дезе, кемелеринеҥ чьпъш, шÿÿндерин чайбап, jунуп тургандар. 3 Ол Симондыйы болгон бир кемеге кирип, jараттаҥ эмеш кеде jÿссин деп сурады; отурып, улусты кемедеҥ ÿреде берди. 4 Уредип божойло, Симонго айтты: - Кöлдиҥ тереҥ деген jерине jÿс, ондо шÿÿндегер. 5 Симон Ого айтты: - Уредÿчи! Бис тÿниле иштенип, неме тутпадыс, jе Сениҥ айтканыҥча, шÿÿндеп кöрöйин. 6 Шÿÿндегилеп, ума jок кöп балык туттылар, керек дезе, шÿÿндери jыртылып турды. 7 Келип болушсын деп, öскö кемедеги нöкöрлöрине кол jаҥыдылар; олор jÿзÿп келдилер. Кемениҥ экилезин балыкла толтурарда, кемелер чöҥÿп баштады. 8 Мыны кöрöлö, Симон Петр Иисустыҥ тизезине jаба тÿжÿп, айтты: - Менеҥ кеде баргын, Бийим, мен кинчектÿ кижи эдим! 9 Олор туткан балыктыҥ кöбинеҥ Симонныҥ ла оныла кожо болгондордыҥ коркужы келди; 10 анайда ок Симонныҥ нöкöрлöри - Зеведей уулдары Иоаков ло Иоанныҥ. Jе Иисус Симонго: - Коркуба, - деди, - бÿгÿннеҥ ала улусты шÿÿндеериҥ. 11 Олор кемелерин jаратка чыгарып, бар-jогын артырып, Иисусты ээчий бастылар.

Капкаш баалулу кижини jасканы

12 Иисус бир калада jÿрерде, бастыра бойы капкаш баалулу кижи келди. Иисусты кöрöлö, Оныҥ алдына кöҥкöрö jыгылып, jалына берди: - Бийим, мени арутайын дезеҥ, арутап ийериҥ! 13 Иисус колын сунуп, ого тийеле, айтты: - Арутайын, ару бол. Ол ло тарый капкаш баалу сойылып, тÿже берди. 14 Кижиге неме айтпазын деп, Иисус ого jакыды. - Абыска барып кöрÿн - деди. - Аруталганыҥ учун Моисей-диҥ салып бергениле тайылга эт, онызын ончо улус кöрзин, сени кадык деп билзин. 15 Jе Иисустыҥ чабы там jайылды, Оныҥ айткан сöзин угарга, оору-jоболын jастырарга, сÿрекей кöп улус келип турды. 16 Иисус дезе, аалга jерлерге барып, ондо мÿргÿÿр болды.

Курулып калган кижини jасканы

17 Бир кÿн Иисус ÿредип турарда, Галилейдиҥ ле Иудейдиҥ ончо jерлеринеҥ, база Иерусалимнеҥ келген фарисейлер ле jасакчылар анда ок отургандар. Иисуста Бийдиҥ улусты jазар кÿчи болгон. 18 Бир кезик улус курулып калган кижини тöжöккö салганча экелдилер; Оны ÿйге кийдирерге, Иисустыҥ алдына салып берерге албаданып турдылар. 19 Улустыҥ кöбине ÿйге кирип болбой салала, оныҥ ÿстине чыгып, базырузын ойоло, оору кижини улустыҥ ортозына, Иисустыҥ чике алдына тöжöгиле катай тÿжÿрип ийдилер. 20 Иисус олордыҥ бÿдÿп турганын кöрöлö, бу кижиге айтты: - Сениҥ кинчектериҥ ташталып калды. 21 Бичикчилер ле фарисейлер бойлоры ортодо табыштылар: «Кудайды мынайып jамандап турган бу не кижи? Кинчекти Кудайдаҥ öскö кем таштаар аргалу?» 22 Иисус олордыҥ ичиндеги сагыжын билип, айтты: - Слер не анайда сананып jадыгар? 23 «Кинчектериҥ таш-талган» деп айдарга jеҥил бе, айса: «Öрö туруп, база бер» деери jеҥил бе? 24 Jе Кижи Уулында jер ÿстинде кинчектерди таштайтан jаҥ барын слерди билзин деп анайда айттым - дейле, оору кижиге баштанды: - Сеге айдадым: тур, тöжöгиҥ тудунганча, айлыҥа jан. 25 Оору кижи ол бойынча, олордыҥ алдына туруп, jаткан тöжöгин алып, Кудайды алкап, jана берди. 26 Ончолоры алаҥ кайкажып, Кудайды алкадылар. Коркуп калган бойлоры, айдыжып турдылар: - Бÿгÿн бис саҥ башка кайкамчылу немелер кöрдибис!

Левийди кычырып алганы

27 Мыныҥ кийнинде Иисус чыгып, калан jуур jердиҥ jанында отурган Левий деп албанчыны кöрÿп ийеле: - Мени ээчий бас! - деди. 28 Онызы ончо немезин артырып, öрö туруп, Иисусты ээчий басты. 29 Иисуска учурлап, Левий айлында jаан кÿндÿ-кÿрее этти; ондо Оныла кожо кыйын jаткан кöп албанчылар ла öскö дö улус болгон. 30 Фарисейлер ле олордыҥ бичикчилери кимиренип, Иисустыҥ ÿренчиктерине айдып турдылар: - Слер албанчыларла, кинчектÿ улусла кожо не керек ичип-jип jадыгар? 31 Иисус олорго айтты: - Эмчини кадык улус керексиир эмес, эмчини оору улус керексиир. 32 Мен Кудайга баштансын деп, актуларды эмес, кин-чектÿлерди кычырарга келгем.

Орозо керегинде сурак

33 Бичикчилер ле фарисейлер Иисуска айттылар: - Иоанныҥ ÿренчиктери улам сайын орозо тудуп, мÿргÿп jат, фарисейлердийи база; Сенийи дезе, ичип-jип jадылар. 34 Иисус олорго айтты: - Кижи ажан уул кожо jÿргенде, тойлоп келген улусты орозо туттурьш болороор бо? 35 Jе кижи алган уулды олордоҥ алып барар кÿндер келер, бу тушта, ол кÿндерде олор орозо тудар. 36 Иисус оноҥ укаа сöс айтты: - Jаҥы кийимнеҥ тилим кезип, эски кийимге jамачылабайтан; анайткажын, jаҥы кийим де ÿрелер, jаҥы jамачы эски кийимге де jарабас. 37 Jаҥы аракыны эски тажуурга урбайтан; анайткажын, jаҥы аракы тажуурды jара тебер, аракызы да тöгÿлер, тажууры да ÿрелер; 38 jаҥы аракыны jаҥы тажуурга уратан. 39 Эски аракыны ичкен кижи ол тарыйында jаҥызын ичпес, эскизи артык деер.

Суббот кÿн керегинде сурак

6:1 Суббот кÿнде Иисус ашту кырала базып бараткан; ÿренчик-тери мажакты ÿзÿп, уужайла, jип тургандар. 2 Фарисейлердиҥ кезиги айдышты: - Суббот кÿнде этпейтенди не керек эдип jадыгар? 3 Иисус каруузын jандырды: - Давид бойы да, кожо jÿрген улузы да аштайла, нени эткен эди, слер кычырбадаар ба? 4 Ол Кудайдыҥ байзыҥына киреле, ыйык калашты бойы алып jиген, бойыныҥ улузына да берген. Байа калашты дезе, абыстардаҥ öскö кемниҥ де jиир учуры jок болгон. 5 Иисус оноҥ айтты: - Кижи Уулы - суббот то кÿнниҥ бийи. б База бир суббот кÿн Ол синагогага кирип, улус ÿретти; ондо оҥ колы кургап калган кижи болгон. 7 Бичикчилер ле фарисейлер Иисусты бурулаар шылтак бедиреп, ол кижини суббот кÿнде jаскай не деп, кетежип турдылар. 8 Jе Иисус олордыҥ сагыжын билип, кургап калган колду кижиге айтты: - Öрö туруп, улустыҥ ортозына чык. Байа кижи туруп, ичкеери öтти. 9 Иисус олорго айтты: - Мен слердеҥ сурап угайын: суббот кÿнде нени эдер керек? Jакшыны ба, айса jаманды ба? Тынды аргадаар ба, айса кыйар ба? [Олор унчукпай турдылар.] 10 Олорды ончозын аjыктап, Иисус байагы кижиге: - Колыҥды сун - деди. Ол сунды, колы кан-кадык боло берди. 11 Бичикчилер ле фарисейлер калjуурып, Иисусты канайып ийели деп, шÿÿшкилеп турдылар.

Он эки апостол тутканы

12 Ол кÿндерде Иисус тууга чыгып, тÿниле Кудайга мÿргÿген. 13 Таҥ адарда, ÿренчиктерин Бойына кычырып алып, олордыҥ ортозынаҥ он эки кижи талдап, апостолдор деп адады. 14 Олор: Симон, оны Петр деп адады, оныҥ карындажы Андрей, Иаков ло Иоанн, Филипп ле Варфоломей; 15 Матфей ле Фома, Алфей уулы Иаков ло Зилот дейтен Симон; 16 Иаков уулы Иуда ла соҥында Иисусты садып ийген Иуда Искариот.

Кежик экелип турган салымдар

17 Иисус олорло кожо туудаҥ тÿжÿп, тÿс jерге турды; кöп ÿренчиктери, база Иудей ичинеҥ, Иерусалимнеҥ, Тир ле Сидонныҥ талай jаказындагы jерлеринеҥ камык улус кожо болгон; 18 олор Иисусты угарга, оору-jоболынаҥ jазыларга келгендер. Кара jелбистерге кыйнаткан бойлоры jазылып тургандар. 19 Ончолоры Иисуска тийип ийерге jÿткÿген, нениҥ учун дезе, Иисустаҥ кÿч чыгып, ончолорын jазып турган. 20 Иисус ÿренчиктери jаар кöрÿп, айтты: - Тÿреҥилер кежиктÿ; Кудайдыҥ Каандыгы слердийи. 21 Эмди аштап jÿргендер кежиктÿ; слер тойорыгар. Эмди ыйлап jÿргендер кежиктÿ; слер каткырарыгар. 22 Кижи Уулы учун улус слерди jаман кöрÿп, айрып, айткьшап, адьҥарды jаман деп чаптап, айдьш турза, кежиктÿ болгоныгар ол. 23 Ол кÿнде сÿÿнигер, jыргагар; теҥериде слерди улу-jаан кайрал сакып jат. Олордыҥ адалары jарчыларга анайып ок эдип jÿргендер. 24 Слерге дезе, байларга, ачу-корон! Слер jедер коодыгарга jединип алганыгар. 25 Эмди öткÿре тойу jÿргендерге ачу-корон! Слер аштап торолорыгар. Эмди каткырып jÿргендерге ачу-корон! Слер ыйлап сыктарыгар. 26 Слерди ончо улус jакшылап айткажын, слерге ачу-корон! Олордыҥ адалары тöгÿн jарчыларга анайып ок эдип jÿргендер. 27 Jе угуп турган слерге айдадым: öштÿлереерди сÿÿп jÿрÿгер, слерди jаман кöргöн улуска jакшыгар jетирип jÿрÿгер; 28 слерди каргаган улусты алкап jÿрÿгер, слерди jамандаган улус учун мÿргÿп jÿрÿгер. 29 Jаагыҥа тажыган кижиге база бир jаагыҥды тöгöп бер; катанчыгыҥды блаап jаткан кижиге чамчаҥды да аларга буудак этпе. 30 Сенеҥ сураганга - бер, сенеҥ алган немени - кайра некешпе. 31 Улус слерге кандый болзын дезегер, бойыгар да олорго анайып эдигер. 32 Слерди сÿÿген улусты сÿÿп турган болзогор, слерге нениҥ учун алкыш-быйан айдатан? Кинчектÿлер де олорды сÿÿп турган улусты сÿÿп jат. 33 Слерге jакшызын jетирип тургандарга jакшыгарды jетирип турган болзогор, ол учун слерге кандый алкыш-быйан? Кинчектÿлер де анайда эдип jадылар. 34 Ойто jандырып бергедий иженчилÿ улуска öдÿшке берип турган болзогор, слерге кандый алкыш-быйан? Кинчектÿлер де кинчектÿлерге ордынча ойто аларым деп берип jадылар. 35 Jе слер öштÿлереерди сÿÿп jÿрÿгер, jакшыгарды jетиригер, öдÿшке беригер, нени де сакыбай; слерге улу кайрал болор, Öрö Турганныҥ уулдары болороор, нениҥ учун дезе, Ол jакшызы jок то, jаман да улуска быйанзак. 36 Адагар улуска буурсак эди, слер де буурсак болугар. 37 Jаргылабагар, слерди де jаргылабас; бурулабагар, слерди де бурулабас; jаманды таштагар, слердийи де ташталар; 38 беригер, слерге де берилер: jакшы кемле, тыктап, тепсеп, эдегеерге толо уруп бергилеер. Кандый кемле кемjизегер, анайда слерге кемjилер. 39 Иисус олорго анайда ок укаа сöс айтты: - Сокор кижи сокорды jединип jÿрер бе? Экилези орого тÿжер эмес пе? 40 Уренчик ÿредÿчизинеҥ бийик болбос, jе ÿренеле, ÿредÿчизиндий ок болор. 41 Карындажыҥныҥ кöзиндеги будакты не кöрÿп jадыҥ, бойыҥныҥ кöзиҥдеги тоормошты дезе, сеспейдиҥ бе? 42 Ол эмезе, кöзиҥдеги тоормошты бойыҥ кöрбöй jадып, «Карын-даш, кöзиҥдеги будакты чыгарып ийейин» деп, канайып айдарыҥ? Опту! Озо бойыҥныҥ кöзиҥдеги тоормошты чыгар, ол тушта карындажыҥныҥ кöзиндеги будакты канайып чыгара-рын кöрÿп аларыҥ. 43 Jакшы агаштаҥ jаман jиилек бÿтпейтен, jаман агаштаҥ jакшы jиилек бÿтпейтен. 44 Агашты бÿткен jиилегинеҥ таныйтан. Амтанду jиилектҥ тегенектеҥ jуубайтан, виноградты тегенектÿ кырчыннаҥ тербейтен. 45 Jакшы кижи jÿрегинде чеберлеген jакшызынаҥ алып чьҥар; jаман кижи jÿрегинде чеберлеген jаманынаҥ алып чыгар. Кижиниҥ jÿреги неле ажа толгон, оозынаҥ чыгары ол. 46 Слер, айтканымды этпес бойыгар, Мени: «Бий! Бий!» деп не айдадыгар? 47 Меге келип, айткан сöзимди угуп, оны бÿдÿрип jÿрген кижи кемге тÿҥейин слерге айдып берейин: 48 ол тура туткан кижиге тÿҥей. Байа кижи jерди тереҥжиде казып, тураныҥ тöзин ташка салган. Чайык чьҥып, турага табарган, jе оны jайрадып болбогон, нениҥ учун дезе, ол чынык тудулган. 49 Сöзимди угарын угуп, оны бÿдÿрбегени, туразын тöзöлгö jокко, jердиҥ бойына туткан кижше тÿҥей. Турага суу табарарда, ол аҥтарыла берген, оноҥ jаҥыс jемирик арткан.

Jÿс бажынык кулын jасканы

7:1 Уккан улуска айдар сöзин туузылтала, Иисус Капернаумга кирип келди. 2 Jÿс бажыныҥ карузыган кулы ооруп, öлÿп jаткан. 3 Ол бий Иисус керегинде угала, Оны келзин, кулын jассын деп сурап, иудейлердиҥ улуларын ийди. 4 Олор Иисуска келип, сурап айттылар: - Сен ого мыны эдериҥе туруп jат: 5 ол бистиҥ калыкты сÿÿп jат, биске синагога тудуп берген. 6 Иисус олорло кожо барды. Айылга jууктагылап келерде, jÿс бажы наjыларын ийип, мынайда айтырып ийди: «Бийим, Бойыҥды jоботпо! Айлым ичине Сени кийдирерге турбас кижи эдим; 7 оныҥ да учун Сеге бойым барарга турбазым деп бодогом; jе сöс айт, кулым jазыла берер. 8 Бажым билер бийлÿ де болзом, меге башкарткан черÿчилдерим бар. Кажы бирÿзин: „Бар" дезем, барар; бирÿзин: „Кел" дезем, келер; кулымды: „Оны эт" дезем, эдер». 9 Иисус мыны угала, ого кайкады; кайа бурулып, кийнинеҥ келеткен улуска айтты: - Айдып турум слерге: мынайып бÿдÿп турган кижини Мен Израиль калыктыҥ ортозынаҥ да таппадым. 10 Элчилер jанып келзе, кул jазылып калтыр.

Тул келинник уулын тиргискени

11 Мыныҥ кийнинде Иисус Наин деп калага барды; Оныла кожо ÿренчиктери ле кöп улус барып jаткан. 12 Каланыҥ каалгазына jууктап келерде, энезиниҥ сок jаҥыс уулыныҥ сööгин чыгарып jаткандар. Бу келин тул болгон; Оныла кожо каладаҥ кöп улус бараткан. 13 Келинди кöрöлö, Бий ого буурсап, «Ыйлаба» деди. 14 Jууктай базып келеле, межикке колыла тийип ийди; апараткан улус токтой тÿшти. Иисус: - Уулчак, айдып турум сеге, тирил! - деди. 15 Öлгöн уулчак öҥдöйип, отурып алды, оноҥ эрмектене берди; Иисус оны энезине берип ийди. 16 Ончо улус сÿрекей коркуп, - Бистиҥ арабыстаҥ улу Jарчы чыкты, Кудай Бойыныҥ калыгына келип барды! - дежип, Кудайды алкап турдылар. 17 Иисус керегинде табыш Иудей jерине, оны эбире ончо jерлерге таркады.

Крестеечи Иоанныҥ сурагы

18 Иоанныҥ ÿренчиктери кöргöн-укканын ончозын ого айдып бердилер. 19 Иоанн эки ÿренчигин бойына кычырып алып, «Келер дегени Сен бе, айса öскöни сакыйлы ба?» - деп сурап угарга, Иисуска ийди. 20 Олор Иисуска келип, - Келер дегени Сен бе, айса öскöни сакыйлы ба деп сурап угарга, Крестеечи Иоанн бисти Сеге ийди - дедилер. 21 Бу öйдö Иисус кöп улусты оорудаҥ ла jоболдоҥ, кара jелбистердеҥ jазып, кöп сокор улустыҥ кöзин jарыдып ийген. 22 Ол Иоанныҥ ÿренчиктерине айтты: - Барып, кöргöн-укканыгарды Иоаннга айдыгар: сокорлор кöрÿп тургулары, аксактар базып jÿргÿлери, капкаш баалулу улус аруталып jат, тÿлей улус угуп jадылар, öлгöндöр тирилип jат, тÿреҥилерге Сÿÿнчилÿ Jар jарлалып jат; 23 эреҥистелбей Меге бÿткен кижи - кежиктÿ. 24 Иоанныҥ элчилери сала берерде, Ол калыкка Иоанн керегинде айда берди: - Куба чöлгö нени кöрöргö jÿрдигер? Салкынга jайкаткан кулузынды ба? 25 Jе нени кöрöргö jÿрдигер? Торко-маҥдык кийген кижини бе? Jе jазалду jараш кийим кийгендер, сайрап jаткандар каанныҥ öргööзинде jÿргилейт. 26 Jе нени кöрöргö jÿрдигер? Jарчыны ба? Эйе, слер jарчыны кöргöнигер, jе айдып турум слерге: ол jарчыдаҥ да улу-jаан. 27 Бу мынайда ол керегинде чийилген: «Бат, Сениҥ алдыҥнаҥ Мен ангелимди ийип jадым, ол Сениҥ алдыҥнаҥ jолыҥды белетеп койор». 28 Айдып турум слерге: кижилик угында Иоаннаҥ jааны jок, jе Кудайдыҥ Каандыгында кичÿ дегени, оноҥ jаан. 29 Иоаннды уккан ончо улус, албанчылар да, Кудайдыҥ чындыгын алынып, Иоаннга келип, креске тÿшкендер; 30 фарисейлер ле jасакчылар дезе, бойлорында Кудайдыҥ табын jектеп, Иоаннга барып креске тÿшпегендер. 31 Мындый ук улусты неге тÿҥдеп айдайын? Олор кемге тÿҥей? 32 Олор тепсеҥде отурып, бой-бойлорына мынайда кыйгырыжып турган балдарга тÿҥей: «Сыбыскы тарткан эдибис, слер биjелебедигер; сыгыт сарын сарнаган эдибис, слер ыйлашпадыгар». 33 Крестеечи Иоанн келип, аш jибесте, аракы ичпесте, «Оныҥ öзöк-буурында кöрмöс бар» дейдигер. 34 Кижи Уулы келип, jиирин jиди, ичерин ичти; слер: «Кöргÿлегер, ажанарга сÿÿр, аракызак кижи бу, албанчылардыҥ ла кинчектÿлердиҥ наjызы» дейдагер. 35 Jе Ойгорлык Ойгорлыктыҥ ончо балдарыла акталган.

Тöлöтирбеген тöлÿ керегинде

36 Фарисейлердиҥ бирÿзи Иисусты бойыла кожо аш jизин деп сураган; Ол фарисей-эшке кирип, кыйын jада отурып алган. 37 Jе бат, ол каланыҥ ÿй кижизи, кинчектÿ бойы, Иисус фарисей-эште отурганын угала, jараш jытту майлу ак балкаштаҥ эткен jыракы экелди; 38 Иисустыҥ кийнине, буды jанына туруп, ыйлап, Оныҥ будын кöзиниҥ jажыла jунуп, чачыла арчып, окшоп, майла сÿркÿштеп турды. 39 Мыны кöрöлö, Иисусты айлына кычырган фарисей ичинде айдынды: «Ол jарчы болгон болзо, Ого кем, кандый ÿй кижи тийип турганын билер эди, нениҥ учун дезе, ол кинчектÿ ÿй кижи». 40 Jе Иисус ого айтты: - Симон! Мен сеге бир неме айдарга турум. Симон: - Айт, Уредÿчи - деди. 41 Иисус айтты: - Öдÿшке береечиге эки кижи тöлÿлÿ болгон: бирÿзи - беш jÿс динарий, экинчизи - бежен. 42 Jе олордыҥ тöлööр акчазы jок болордо, ол кижи тöлÿлерин тöлöтирбеген. Эм айткын, тöлÿлÿ болгон улустыҥ кажызы оны артык сÿÿр? 43 - Мен бодозом, кöбин тöлöтирбегени - деп, Симон кару-узын jандырды. Иисус: - Сен чын сананып jадыҥ - деди. 44 Оноҥ ÿй кижиге бурулып, Симонго айтты: - Бу ÿй кижини кöрÿп туруҥ ба? Мен сениҥ айлыҥа келдим, сен будым jунар суу бербедиҥ; ол дезе, кöзиниҥ jажыла будымды jунуп, чачыла арчыды; 45 сен Меге окшош бербедиҥ; ол дезе, Мен келгеннеҥ бери будымды окшоп божободы; 46 сен бажымды майлабадыҥ; ол дезе, будымды jараш jытту майла сÿркÿштеди. 47 Оныҥ учун айдып турум сеге: ол кöп сÿÿген учун, оныҥ кöп кинчектери ташталып туру; кемниҥ ас кинчеги ташталза, оныҥ сÿÿри де ас. 48 Оноҥ ÿй кижиге: - Кинчектериҥ ташталган - деди. 49 Иисусла кожо кыйын jаткан улус: «Кинчекти таштайтан бу кем андый?» - деп, ичинде айдынып турдылар. 50 Jе Иисус ÿй кижиге айтты: - Бÿдÿп турганыҥ сени аргадап алды; амырыҥ алып, jÿре бер.

8:1 Мыныҥ кийнинде Иисус Кудай Каандыгыныҥ Сÿÿнчилÿ Jарын jарлап, калалар ла jурттар сайын jÿрди; Оныла кожо он эки ÿренчик, 2 Ол кара jелбистердеҥ ле оору-jоболдоҥ jаскан бир кезик ÿй улус jÿргендер: öзöк-буурынаҥ jети кöрмöс чыккан Магдалина дейтен Мария; 3 Иродтыҥ айлы-jуртын башкарган Хузаныҥ абакайы Иоанна, база Сусанна ла öскö дö кöп ÿй улус. Олор Иисуска ла ÿренчиктерге бары-jогыла болужып тургандар.

Аш ÿрендеечи керегинде

4 Кöп улус jуулыжып, ончо калалардаҥ Иисуска улус келип турарда, Ол укаа сöс айтты: 5 - Аш ÿрендеечи бойыныҥ ÿренин ÿрендеерге чыккан; ол ÿрендеп турарда, ÿренниҥ кезиги jол куйнуна тÿшкен, оны тепсеп койгондор, теҥериниҥ куштары чокуп койгон; 6 кезиги ташту jерге тÿшкен; кылганы öзÿп, чык jокко кургап калган; 7 кезиги тегенектÿ jерге тÿшкен, тегенек öзÿп, оны туй базып койгон; 8 кезиги дезе, jакшы jерге тÿшкен. Öскÿлеҥ болуп, ÿрендегенине кöрö, jÿс катапка кöп тÿжÿм берген. Айдып божойло, Иисус ÿнин бийиктедип: «Кем кулакту, ол уксын!» - деди. 9 Уренчиктери бу укаа сöстиҥ учурын сурадылар. 10 Иисус айтты: - Слерге Кудай Каандыгыныҥ jажыттарын билери берилген, öскö улуска дезе, укаалап айдатан - олор кöрзö дö, кöрбöй, укса да, аайлабай jадылар. 11 Бу укаа сöстиҥ учуры мындый: ÿрен - ол Кудайдыҥ сöзи. 12 Jол куйнуна тÿшкени - сöсти угуп тургандары; олор бÿдÿп аргадалбазын деп, олорго соҥында кöрмöс келип, jÿректеринеҥ сöсти алып барат. 13 Ташту jерге тÿшкени - ол сöсти угала, сÿÿнип jууткан улус; jе олор, тазыл jок бойлоры, кыска öйгö бÿдÿп, ченелте болгондо, jана тÿшкилейт. 14 Тегенектÿ jерге тÿшкени - ол сöсти уккан улус; jе jадынды, jööжöни кичеери, сайрап jÿрери сöсти туй базып салат, олор тÿжÿм бербейт. 15 Jакшы jерге тÿшкени - ол сöсти угала, быйанду ла jакшы jÿрегинде чеберлеп алып jÿрген улус; чыдамкай болгондо, олор тÿжÿм берип jат. [Иисус анайда айдала, тыҥ ÿнденип, «Кем кулакту, ол уксын!» - деди.] 16 Jарыткышты камысканда, оны айак-казанла бÿркебейтен эмезе орынныҥ алдына тургуспайтан; карын, ÿйге кирген улус jарыкты кöрзин деп, иле jерге тургузатан. 17 Jарталбай калар jажыт jок, jарлалбай, тыштына чыкпай калар туйук неме jок. 18 Айдарда, канайда угуп турганыгарды аjарыгар; кемде бар - ого берилер, кемде jок - оныҥ бар деп сананган немезин де блаап алгылаар.

Иисустык чын энези ле трындаштары

19 Иисуска энези ле карындаштары келди, jе улустыҥ кöбине Ого jууктап болбой салдылар. 20 - Энеҥ ле карындаштарыҥ Сени кöрöргö, тышкаары тургулары - деп, Ого jетиргиледи. 21 Иисус айтты: - Кудайдыҥ сöзин угуп, Оныҥ сöзинче кылынып jÿргендер - Мениҥ энем ле карындаштарым ол.

Jотконды сыныктырганы

22 Бир кÿн Иисус ÿренчиктериле кожо кемеге кирип, «Кöлдиҥ ол jанына кечели» - деди. Олор jÿзÿп ийдилер. 23 Jÿскилеп барадарда, Иисус уйуктап калды. Кенетийин кöлгö куйун тÿшти, кемеге суу кирип, олор jеткерде болдылар. 24 Базып келип, Иисусты ойгозып, айттылар: - Уредÿчи! Уредÿчи! Чöҥÿп барадырыс! Иисус öрö туруп, салкынды ла толкуны токтозын деп, jакарып ийди; олор токтоп, тымый берди. 25 - Слердиҥ бÿдÿп турганыгар кайда? - деп, Иисус ÿренчиктеринеҥ сурады. Коркуп, кайкап калган ÿренчиктер бой-бойлорына айдыжып тургылады: - Салкынга да, сууга да jакарганда, олор Ого уккур болуп турганда, бу кем болотон?

Кара jелбистерге туттурган кижини jасканы

26 Олор Галилейдиҥ одожындагы Гадара ороонына кечип чыктылар. 27 Иисус jаратка чыгып келерде, Ого каланыҥ кöрмöстöргö туттурган бир кижизи туштады; ол тапту узак öйгö кийим кийбеген, айылда эмес, сööк салар куй-таштарда jаткан. 28 Иисусты кöрöлö, ол кыйгырып, Оныҥ алдына jыгылып, jаан ÿнденип, айтты: - Иисус, Öрö турган Кудайдыҥ Уулы, Сениҥ менде не керегиҥ бар? Jайнап-шилтеп турум, мени кинчектебе! 29 Бу кижидеҥ чыксын деп, Иисус кара jелбиске jакарып ийгени учун, ол мынайда айткан. Кара jелбис оны узак öйгö кыйнап келген. Бу кижини улус кынjылап, кижендеп те турза, ол кÿлÿни ÿзÿп, jелбиске сÿрдÿрип, аалга jерлерде jÿрген. 30 Иисус оныҥ ады-jолын сураарда, ол: «Адым - ал-тÿмен черÿ» - деди, нениҥ учун дезе, ого кöп jелбистер кирген. 31 Иисус таамыныҥ тÿбине тÿжÿрбезин деп, олор jалына бердилер. 32 Анда тууда кöп ÿÿр чочколор одордо jÿргÿлеген; jелбистер ол чочколордыҥ ичине барып кирерге, Иисустаҥ jöп сурадылар. Иисус jöбин берди. 33 Кара jелбистер кижидеҥ чыгып, чочколордыҥ ичине барып киргиледи; чочколор кажаттаҥ кöлгö калып, чöҥÿп калдылар. 34 Кÿдÿчилер не болгонын кöрöлö, калага ла оны эбире jерлер сайын сыр-jÿгÿрикте барып, тил jетирдилер. 35 Улус не болгонын кöрöргö чыктылар. Иисуска келип кöрзö, öзöк-буурынаҥ jелбистер чыккан байагы бир кижи кийим-тудумду, санаазы ордында, Иисустыҥ будыныҥ jанында отурды; олордыҥ коркужы келди. 36 Кöргöн улус бу кижи канайда аргадалганын олорго куучындап бердилер. 37 Гадараныҥ эл-jоны сÿрекей коркуганына Иисусты бу jердеҥ кедип барзын деп сурадылар. Иисус кемеге кирип, кайра jÿзÿп ийди. 38 Öзöк-буурынаҥ кара jелбистер чыккан кижи Иисусла кожо барарга суранды, jе Иисус оны божодып, айтты: 39 - Айлы-jуртыҥа jанып, Кудай сеге нени эткенин айдьш бар. Онызы барып, Иисус ого кандый кöпти эткенин бастыра калага айдып, jарлап jÿрди.

Кызычакты тиргискени ле оору келинди jасканы

40 Jерине jанып келерде, ончолоры сакып турган учун, Иисусты кöп улус сÿÿнчилÿ уткып чыкты. 41 Jе бат, Иаир деп кижи келди. Ол синагоганын jааны болгон. Иисустыҥ будыныҥ алдына jыгылып, Оны айлыма кир деп, jайнап сурай берди. 42 Бу кижиниҥ он эки jаш кирелÿ кара jаҥыс кызычагы божоп jаткан. Иисус барып jадарда, улус Оны кыстап турды. 43 Улустыҥ ортозында эди-канынаҥ он эки jыл кан келип, шыралап jÿрген ÿй кижи болгон. Ол эмчилерди керип, ар-jööжöзин короткон, jе оны кем де jазып болбогон. 44 Jе бат, байагы ÿй кижи Иисустыҥ кийнинеҥ базып келип, Оныҥ эдегине тийип ийди; мында ла кан келери токтой берди. 45 - Меге кемигер тийди? - деп, Иисус сурады. Ончолоры тийбедис дешкилеп турарда, Петр ла Иисусла кожо болгондор айдышты: - Уредÿчи, улус Сени курчай туруп, кыстап jат. Айдарда, Меге кемигер тийди деп, незин сурайдыҥ? 46 Jе Иисус: - Меге кем де тийген, - деди, - Менеҥ кÿч чыкканын сестим. 47 Уй кижи jажырып болбогонын билип, тырлажып базып келеле, Иисустыҥ алдына jыгыла тÿшти, Ого не керектÿ тийгенин, канайып ол тарыйынча jазылганын ончо улус алдында Иисуска куучындап берди. 48 Иисус ого: - Кызым, бÿдÿп турганыҥ сени аргадап алды; амырыҥ альш, jÿре бер - деди. 49 Иисус мынайда айдып турганча, синагоганыҥ jаанынаҥ бир кижи келип, - Кызычагыҥ jада калды, Уредÿчини jоботпо - деди. 50 Jе Иисус мыны угала, Иаирге айтты: - Коркуба, jаҥыс бÿт, кызычагыҥ аргадалар. 51 Уйге келеле, Петрдаҥ, Иаков ло Иоаннаҥ, база баланыҥ ада-энезинеҥ öскö кижи кийдирбеди. 52 Ончо улус ый-сыгытта болгон. Jе Иисус айтты: - Ыйлабагар; кызычак öлбöгöн, jе уйуктап jат. 53 Иисусты электеп-шооттылар, кызычак jада калганын олор билер болгон. ^Иисус дезе, баланы колынаҥ алала, ÿнин бийиктедип, айтты: - Кызычак, тур! 54 Баланыҥ тыны ойто кирип, ол бойынча туруп келди; Иисус кызычакты азыразын деди. 55 Кызычактыҥ ада-энези алаҥ кайкадылар. Не болгонын улуска айтпазын деп, Иисус олорго jакыды.

Он эки ÿренчигин ийгени

9:1 Иисус он эки ÿренчигин алдырып, олорго ончо кöрмöстöрдиҥ бажын билер, оору-jоболды jазар кÿч ле jаҥ берди. 2 Кудайдыҥ Каандьҥы керегинде jарлазын, оору улусты jассын деп, олорды ийип, 3 айтты: - Jолго неме албагар: тайак та, баштык та, калаш та, акча да; артык кийим алып jÿрбегер. 4 Кажы бир айылга тÿшсегер, ол jердеҥ чыкканча, ондо болугар. 5 Слерди кайда jуутпаза, ол каладаҥ барып jада, олорго удура кере-темдек эдип, будыгардаҥ тоозынды кактагар. 6 Уренчиктер барып, jурттарды эбирип, кайда ла Сÿÿнчилÿ Jар jарлап, оору улусты jазып jÿрдилер. 7 Башкаручы Ирод Иисустыҥ эткен керектерин угала, алаҥ кайкады, нениҥ учун дезе, кезиктери: «Бу Иоанн, ол тирилген»; 8 кажылары: «Илия келген»; öскöлöри: «Jебрен jарчылардыҥ бирÿзи тирилген» - дешкен. 9 Jе Ирод айткан: «Иоанныҥ бажын мен кезип койгом; бу мындый кайкамчылу керектерди кем эдет болбогой?» Иродтыҥ Оны кöрöр кÿÿни келип турган.

Беш мук кижини тойдырганы

10 Апостолдор jанып келеле, нени эткендерин Иисуска куучындап бердилер; Иисус олорды jаҥыс бойлорын алганча, Вифсаида дейтен кала jаар jÿре берди. 11 Jе калык билип, ээчий барды; Иисус олорды jуудып алып, олорло Кудайдыҥ Каандыгы керегинде эрмектешти, эмдеерин керексиген улусты jасты. 12 Эҥир кирип бараткан; он эки ÿренчик Иисуска базып келип, айттылар: - Улусты божот, олор эбире jаткан jурттарга барып, конор-тÿнеер jер ле jиир курсак таап алзын, бу дезе, аалга jер эди. Jе Иисус: 13 - Олорды слер азырагар - деди. - Бисте беш болчок калаштаҥ ла эки болчок балыктаҥ öскö неме jок - деп, ÿренчиктер каруузын jандырды. - Айса барып, бу улустыҥ ончозына курсак садып алалы ба? 14 Анда беш муҥ кире кижи болгон. - Улусты беженнеҥ jергелей отургызыгар - деп, Иисус олорго jакыды. 15 Уренчиктер мынайда эдип, улусты отургызып ийдилер. 16 Иисус беш болчок калашты ла эки болчок балыкты алды, теҥери öрö кöрöлö, олорды алкады, сындырала, улуска ÿлезин деп, ÿренчиктерге берди. 17 Ончолоры jиди, тойды; jигенниҥ артканын он эки каламага jууп алдылар.

Иисус кем?

18 Бир катап Иисус jаҥыскандыра мÿргÿп турарда, Ого ÿренчиктери келди. Иисус олордоҥ сурады: - Улус Мени кем деп бодойт не? 19 Уренчиктер каруузын jандырдылар: - Сени Крестеечи Иоанн дешкилейт, кезиктери - Илия; кезиктери jебрен jарчылардыҥ бирÿзи тирилген дейдилер. 20 Иисус сурады: - Слер Мени кем деп бодойдоор? Петр: - Сен - Кудайдыҥ Христосы - деди. 21 Jе Иисус бу керегинде кижиге неме айтпазын деп кату jакарала, 22 айтты: - Кижи Уулы кöп кыйналар учурлу, улулар, улу абыстар ла бичикчилер Оны jектеп салар, Оны öлтÿргилеп койор, ÿчинчи кÿнде дезе, Ол тирилип турар учурлу. 23 Оноҥ Иисус ончолорына айтты: - Мени ээчий барайын дегенигер, бойын бойы jеерип, бойыныҥ кере тартыратан агажын кажы ла кÿн алып jÿрзин - ол тушта Мени ээчип jÿрер аргалу. 24 Тынын аргадаайын дегени, онызын jылыйтар. Меге болуп тынын jылыйтканы, онызын аргадап алар. 25 Кижи jер-телекейди ээленип алала, jе бойын jылыйтып салза эмезе бойына каршу этсе, ого не туза? 26 Кем Менеҥ ле Мениҥ сöзимнеҥ уйалар болзо, Мен, Кижи Уулы, Бойымныҥ магымды, Аданыҥ ла агару ангелдердиҥ магын алганча келзем, ол кижидеҥ уйаларым. 27 Чынын айдадым слерге: мында турган улустыҥ кезиги Кудай Каандыгын öлгöлöктö кöрöр.

Иисустыҥ кубулганы

28 Мынайда айтканныҥ кийнинде, сегис кÿнниҥ бажында Иисус Петрды, Иоанн ла Иаковты алганча, мÿргÿÿрге тууга чыкты. 29 Ол мÿргÿп турарда, чырай-бÿдÿжи кубулды, кийими агарып, мызылдай берди. 30 Jе бат, Иисусла эки эр эрмектеже берди; олор Моисей ле Илия болгондор. 31 Теҥериниҥ магыла jаркындалганча келип, олор Иисустыҥ Иерусалимде бÿдÿретен керектериниҥ учын куучындажып тургандар. 32 Петр ла оныла кожо болгон улус уйкуга jыга бастырып салгандар, jе ойгонгылап келеле, Иисустыҥ магыныҥ jаркынын, Ого коштой эки эр турганын кöрÿп ийдилер. 33 Байагы улус барарга jадарда, Петр Иисуска айтты: - Уредÿчи, биске мында макалу! Уч чадыр тудалы: бирÿзин Сеге, бирÿзин Моисейге, бирÿзин дезе - Илияга. Нени айдып турганын ол бойы да билбес болгон. 34 Айдып турганча, булут чыгып, олорды кöлöткöлöп ийди; булутка кирген бойлоры, коркый бердилер. 35 Булуттаҥ ÿн угулды: - Бу Мениҥ Уулым, Мениҥ талдап алганым; Оны угугар. 36 Ун угулбай барарда, Иисус ойто jаҥыскан артты. Уренчиктер мыны jажытта тудуп, нени кöргöндöрин ол кÿндерде кемге де айтпадылар.

Кара jелбиске туттурган уулчакты jасканы

37 Эртезинде олор туудаҥ тÿшкÿлеп келерде, Иисусты кöп улус уткуп чыкты. 38 Кенетийин улус аразынаҥ бир кижи: - Уредÿчи! - деп, кыйгырып ийди. - Сеге jайнап, сурап турум, мениҥ уулымды келип кöр! Ол мениҥ сок jаҥыс уулым болор! 39 Jелбис оны туткактаганда, ол кенетийин кыйгырып баштайт, тытпактадып, оозынаҥ кöбÿги ажынып турат; jелбис уулымды табы jок кыйнайла, арайдаҥ айрылат. 40 Jелбисти уулымнаҥ чыгарсын деп, ÿренчиктериҥди айбылагам, jе олор болуп албады. 41 Иисус: - О, бÿтпес, jöй ÿйе! - деди. - Слердиҥ ортогордо канчазын jÿрейин? Слерге канчазын чыдажайын? Уулыҥды бери экел! 42 Уулчак келип jадарда, jелбис оны jерге jыга базып, калтырада берди; jе Иисус кара jелбисти токтодып, уулчакты jазала, адазына берип ийди. 43 Кудайдыҥ кÿчин ончолоры кайкажып турдылар. Ончо улус Иисустыҥ эткен керектерин кайкагылап турарда, Ол Бойыныҥ ÿренчиктерине айтты: 44 - Айтканымды лаптап угугар: Кижи Уулы кижи колына берилер. 45 Jе Иисус нени айтканын олор оҥдободылар, бу сöстöр олорго туйук болуп, оныҥ учурын аайлабадылар; сурап угарга дезе, коркуп тургандар.

Кем улу-jаан?

46 Кемизи улу-jаан деп, ÿренчиктер ортодо блааш-тартыш болгон. 47 Иисус дезе, олордыҥ jÿрегинде алып jÿрген сагыжын билип, jаш баланы колго алып, Бойыныҥ алдына тургузып, 48 айтты: - Мениҥ адымда бу баланы бойына jуудып алганы, Мени jуутканы ол; Мени jуутканы дезе, Мени Ийгенди jуутканы ол. Слердиҥ ортогордо эҥ кичÿгер, улу болоры ол. 49 Айдарда, Иоанн айтты: - Уредÿчи! Сениҥ адыҥды адап, кара jелбистерди чыгарып турган кижини кöрдибис; ол бисле кожо jÿрбей турган учун, оны токтодып салдыс. 50 Иисус: - Токтотпогор оны - деди. - Слерге кем удура эмес, ол слер учун.

Иерусалим jаар барган jолдо

51 Оныҥ теҥериге кöдÿрилер кÿни jедип келерде, Иисус Иерусалим барар деп шÿÿп, 52 Бойыныҥ алдынаҥ элчилер ийди; олор Иисуска керектÿ не-немени белетеп койорго, бир самар jуртка келдилер. 53 Иисусты бу jуртта jуутпадылар, нениҥ учун дезе, Ол Иерусалим jаар барып jаткан. 54 Мыны кöрöлö, ÿренчиктер Иаков ло Иоанн айттылар: - Бий! Кÿÿниҥ бар болзо, теҥеридеҥ от тÿжÿп, буларды öртöп салзын деп айдалы ба? 55 Jе Иисус олор jаар бурулып, олорды токтодып койды. [- Кандый тынду эдигер, бойыгар билбей jадыгар - деди. - 56 Кижи Уулы дезе, кижиниҥ тынын кыйарга келген эмес, аргадаарга келген.] Айдарда олор öскö jуртка бардылар.

Иисусты ээчий канайып барар?

57 Jолой бир кижи Иисуска айтты: - Сен кайдаар барзаҥ, Сени ээчий барарым. 58 Иисус ого айтты: - Тÿлкÿ болзо, ичегендÿ, куш болзо, уйалу; Кижи Уулыныҥ дезе, бажын салар jери jок. 59 Иисус öскö кижиге айтты: - Мени ээчий бар. Онызы: - Бийим! - деди. - Мен озо адамныҥ сööгин тудуп саларга барып келейин бе? 60 Jе Иисус ого айтты: - Öлгöн улус öлгöндöриниҥ сööгин бойлоры тутсын; сен дезе барып, Кудай Каандыгыныҥ Сÿÿнчилÿ Jарын jарла. 61 База бир кижи айтты: - Бийим! Мен Сени ээчий барарым, jе озо барып, айылдагы улусла jакшылажып алайын ба? 62 Jе Иисус ого айтты: - Салдага колын салала, кайра аjыктанып турган кижи, Кудай Каандыгына ижемjизи jок.

Jетен эки ÿренчигин ийгени

10:1 Оныҥ кийнинде Бий база jетен эки ÿренчик талдап алды. Бойы барарга санашан ончо калалар ла jурттар сайын олорды Бойыныҥ алдынаҥ экидеҥ ийип, 2 айтты: - Кезер аш кöп эди, ишчилер дезе, ас; Бойыныҥ кыразына ишчилер ийзин деп, кыраныҥ Ээзине эреп-jайнагар. 3 Баргылагар! Бöрÿлердиҥ ÿÿрине кураандарды ийгендий, Мен слерди ийип jадым. 4 Таар да, баштык та, öдÿк те албагар, jолдо улусла эзендешпегер. 5 Кажы бир айылга кирзегер, озо баштап: «Бу айылга амыр!» дегер. 6 Анда амырдыҥ кижизи бар болгожын, амырыгар ого jедер; jок болгожын, бойыгарга бурулар. 7 Ол айылда артып, бары-jогын ичип-jигер, нениҥ учун дезе, иштеп jÿрген кижи ижи учун кайралын алар учурлу. Айылдаҥ айылга кöчÿп jÿрбегер. 8 Кажы бир калага келзегер, слерди jуудып алып, неле кÿндÿлезе, оны jшер; 9 андагы оору улусты jазып, «Кудайдыҥ Каандыгы слерге jууктап келди!» деп, олорго айдыгар. 10 Кажы бир калага келзегер, слерди jуутпаза, оромго чыгала, айдыгар: 11 «Слердиҥ калагардаҥ будыбыска jапшынган тоозынды да слерге кактап турубыс. Андый да болзо, Кудай Каандыгы слерге jууктап келгенин билип jÿрÿгер!» 12 Айдып турум слерге: бу калага кöрö, ол кÿн Содомго jеҥил болор! 13 - Ачу-корон сеге, Хоразин! Ачу-корон сеге, Вифсаида! Слерде эдилген кÿчтер Тир ле Сидондо эдилген болзо, олор кинчектерин алынганныҥ темдеги эдип, самтар кеп кийип, баштарына кÿл сееп, туку качан Кудайга баштанар эди. 14 Оныҥ учун Jаргы тужында Сидон ло Тирге слерге кöрö jеҥил болор. 15 Сен де, Капернаум, теҥериге jетире бийиктедиетен бойыҥ, таамыга jетире jабызарыҥ. 16 Слерди угуп турганы, Мени угуп jат, слерди jектеп турганы, Мени jектеп jат; Мени jектеп турганы дезе, Мени Ийгенди jектеп jат. 17 Jетен эки ÿренчик сÿÿнчилÿ jанып келеле, айттылар: - Бий, Сениҥ адыҥды адап jакарганыста, jелбистер де биске багып турдылар! 18 Иисус айтты: - Кöрмöс jалкын чьшап теҥеридеҥ келип тÿшкенин кöрдим. 19 Бат, слерге Мен jыландардыҥ ла скорпиондордыҥ ÿстине базар, öштÿлерди jеҥер jаҥ берип jадым; слерге не де каршузын jетирип болбос. 20 Jе jелбистер слерге багып турганына сÿÿнбегер; ады-jолыгар теҥериде бичилгенине сÿÿнигер! 21 Бу тужында Иисус Агару Тыннаҥ сÿÿнчи алып, айтты: - Ада, теҥери ле jердиҥ Бийи! Сеге алкыжым, ойгор сагыштулардаҥ ла керсÿлердеҥ мыны jажырып, кичÿлерге ачканыҥ учун. Эйе, Ада, jакшылыкту табыҥ андый болгон эди. 22 Адамнаҥ ончозы Меге берилген; Уулы кем болгонын Адазынаҥ öскö кем де билбес; Уулынаҥ öскö Адазы кем болгонын кем де билбес; анайда ок Уулы кемге ачар кÿÿндÿ, ол билер. 23 Иисус оноҥ ÿренчиктерине бурульш, олорго аҥылап айтты: - Слердиҥ кöрÿп турганыгарды кöргöн кöстöр кежиктÿ! 24 Айдып турум слерге: слердиҥ кöрÿп турганыгарды кöп jарчылар ла каандар кöрöйин дейле, кöрÿп болбогон; слердиҥ угуп турганыгарды угайын дейле, угуп болбогон.

Быйанду самар керегинде

25 Бир jасакчы öрö туруп, Иисусты ченеп, сурады: - Уредÿчи, мöҥкÿ конокту болорго, нени эдейин? 26 Иисус оноҥ сурады: - Jасакта не деп чийилген? Оноҥ сен нени кычырдыҥ? 27 Байагы кижи каруузын jандырды: - «Бийди, бойыҥныҥ Кудайыҥды, бастыра jÿрегиҥле, бастыра тын-jулаҥла, бастыра кÿчиҥле, бастыра сагыжыҥла сÿÿгин». База: «Бойыҥды сÿÿгеҥдий, jуугыҥды сÿÿгин». 28 Иисус ого айтты: - Айтканыҥ jолду; анайда ла кылынып jÿр, jÿрÿм jÿрериҥ. 29 Jе ол актанайын деп, Иисустаҥ сурады: - А мениҥ jуугым кем? 30 Иисус каруузын jандырып, айтты: - Бир кижи Иерусалимнеҥ Иерихон jаар барадала, тонокчыларга туттурган; тонокчылар оны jылаҥаштап, jарым тындуга артырала, сала бергендер. 31 Ол jолло бир абыс бараткан. Оны кöрöлö, кöндÿре öдö берген. 32 Анайып ок бир левит ол jерге келип, кöрöлö, кöндÿре öдö конгон. 33 Кандый да самар кижи дезе, jортуп барадала, оны кöрÿп, ичи ачыган. 34 Базып келеле, шырказын аракыла jунуп, майла сÿртеле, таҥып берген; бойыныҥ эштегине миндиреле, айылчы тÿжер ÿйге экелип, оны кичееген. 35 Эртезинде атанар башта эки динарий чыгарып, ÿйдиҥ ээзине берип, айткан: «Бу кижини кичее; артык акча коротсоҥ, бурулзам, тöлöп берерим». 36 Тонокчыларга учураган бу кижиниҥ jуугы ол ÿчÿниҥ кажызы болгон деп сананып туруҥ? 37 Jасакчы: «Ого быйаны jеткени» - деди. Айдарда, Иисус айтты: - Бар, сен де анайда эдип jÿр.

Мария ла Марфа

38 Jолдо барадып, Иисус бир jуртка келди; анда Марфа деп бир ÿй кижи Оны айлына кычырды. 39 Марфада Мария деп сыйын болгон; ол Иисустыҥ будыныҥ jанына отурып, Оныҥ сöзин тыҥдап турган. 40 Марфа дезе, jаан кÿндÿ-кÿрее эдерге кичеенип, базып келеле, айтты: - Бийим, сыйным ончо ишти меге jоҥдоп бергенин кöрбöй туруҥ ба? Сыйнымды меге болушсын дезеҥ? 41-42 Иисус дезе, ого каруузын jандырды: - Марфа! Марфа! Сен кöпти эдерге кичеенип, шакпырап jадыҥ, jе jÿк jаҥыс неме керек. Мария дезе, jакшылыкту ÿлÿÿзин талдап алды, оны кем де айрып болбос.

Канайда мÿргÿйтени керегинде

11:1 Иисус бир jерде мÿргÿп турган. Мÿргÿп божоордо, ÿренчиктериниҥ бирÿзи Ого айтты: - Бий, Иоанн бойыныҥ ÿренчиктерин ÿреткени чилеп, бисти мÿргÿÿрге ÿреткин. 2 Иисус олорго айтты: - Мÿргÿп турганыгарда, мынайда айдыгар: «Ада! Адыҥ Сениҥ агару болзын! Каандыгыҥ Сениҥ келзин! 3 Биске керектÿ калашты кÿнÿҥ сайын берип тургын. 4 Канайып кажызыныҥ ла jаманын таштайдыс, анайып бистиҥ кинчектеристи таштагын. Jеткерге бисти кийдирбегин». Суранып jÿрген наjы керегинде 5 Иисус оноҥ айтты: - Слердиҥ кажы бирÿгерде наjы бар болзын. Тÿн аразында слер ого келип, мынайда айткан болдыгар: «Наjым, меге тöлÿге ÿч болчок калаш бер. 6 Айлыма jолго jÿрген наjым тÿшти, оны азыраар курсак jок». 7 Слерге ол мынайда айтпай кайтсын: «Мени тÿйметпе! Эжигим бöктÿ, балдарым мениле кожо орында jаткылары; туруп, сеге берип болбозым». 8 Айдып турум слерге: наjы болгон адында, ол туруп, калашты бербезе де, турумкай болзогор, ого туруп, нени сураганаарды ончозын алып берерге келижер. 9 Мен де айдып турум слерге: сурагар - слерге берилер, бедирегер - таап аларыгар; токулдадыгар - слерге ачып бергилеер. 10 Сураган кижи - алып jат, бедиреген кижи - таап jат, токулдаткан кижше - ачып бергилейт. 11 [Уулы калаш сурагажын, ого таш алып берер ада слердиҥ ортогордо табылар ба?] Балык сурагажын, балыктыҥ ордына ого jылан алып берер? 12 Jымыртка сурагажын, ого скорпион алып берер? 13 Слер, кородоп калган бойыгар, балдараарга jакшыны берерин билер болзогор, анчада ла Теҥеридеги Адагар сураган кижиге Агару Тынды берер!

Иисус па айса Веельзевул ба?

14 Бир катап Иисус тил jок кöрмöсти чыгарган; кöрмöс чыгарда, тил jок кижи эрмектене берген, калык алаҥ кайкаган. 15 Кезик улус айдышты: - Кöрмöстöрди Ол кöрмöстöрдиҥ бийи - Веельзевулдыҥ кÿчиле чыгарып jат. 16 Кажылары Иисусты ченеп, теҥеридеҥ билди кöргÿссин деп некеп турдылар. 17 Jе Иисус олордыҥ ичиндеги сагыжын билип, айтты: - Бöлÿнип, öштöшкöн-ööркöшкöн каан jурты ээн калар; бöлÿнип, öштöшкöн-ööркöшкöн биле jайрадылар. 18 Кöрмöс бöлÿнип, öштöжип-ööркöшсö, оныҥ каандыгы турар беди? Слер дезе, Мени кöрмöстöрди Веельзевулдыҥ кÿчиле чыгарып jат дейдигер. 19 Мен Веельзевулдыҥ кÿчиле кöрмöстöрди чыгарып турган болзом, слердиҥ уулдарыгар кемниҥ кÿчиле чыгарып jат? Оныҥ учун олор слердиҥ jаргычыгар болор. 20 Jе Мен кöрмöстöрди Кудайдыҥ кÿчиле чыгарып турган болзом, Кудайдыҥ Каандыгы слерге jеткени бу туру. 21 Кÿчтÿ кижи мылтык-jепсел тудунып, айылын каруулдаза, оныҥ jööжöзи бÿдÿн болор; 22 байагы кижиге оноҥ кÿчтÿ кижи табарза, оны jеҥдеп, ижешен jепселин айрып, jööжöзин ÿлеп берер. 23 Мениле эмези, Меге удура болгоны ол; Мениле jуубаганы, кородоры ол. 24 Кара jелбис кижиниҥ öзöк-буурынаҥ чыкканда, энчÿ бедиреп, суу jок jерлерде тенип jÿрет; таппай салала, «Бойымныҥ айлыма ойто jанатам» деер. 25 Jанып келзе, айлыныҥ ичин сибирип, jуунадып койгон болор; 26 айдарда, ол барып, бойынаҥ казыр база jети jелбисти ээчиткенче келип, кижиниҥ öзöк-буурына кирип, кожо jуртай бергилейт. Байагы кижиге калганчызы башкызынаҥ коомой болор. 27 Иисус мыны айдып турарда, улус аразынаҥ бир ÿй кижи ÿнин бийиктедип: - Сени алып jÿрген карын, Сени эмискен эмчек кежиктÿ! - деди. 28 Jе Иисус айтты: - Кудайдыҥ сöзин угуп, чекчилеп jÿргени кежиктÿ! 29 Улус кöптöҥ jуулыжып турарда, Иисус айда берди: - Кал, кинчектÿ ÿйе бу; ол билдилер бедиреп jат. Jе Ионаныҥ билдизинеҥ öскö, ого билди берилбес. 30 Канайып Иона Ниневияныҥ калыгына билди болгон, анайып Кижи Уулы да бу ÿйеге билди болор. 31 Jаргы болор Кÿн тÿштÿктиҥ абакай-кааны бу улусла кожо туруп, олорды бурулаар, нениҥ учун дезе, ол Соломонныҥ ойгор куучынын угарга, jер куйузынаҥ келген; jе бат, мында Турганы Соломонноҥ jаан. 32 Ниневияныҥ улузы бу ÿйеле jаргылажып, оны бурулаар, нениҥ учун дезе, Ионаныҥ jарлыктаганын угала, олор кинчегин алынып, jÿрÿмин кубулткан; jе бат, мында Турганы Ионадаҥ jаан. 33 Jарыткышты камысканда, оны туйук jерге эмезе табак алдына тургуспайтан; ÿйге кирген улус jарыкты кöрзин деп, иле jерге тургузатан. 34 Эт-канныҥ jарыткыжы - кöс; кöзиҥ ару болзо, ончо эди-каныҥ да jарык болор; кöстöҥ коомой болзоҥ, эди-каныҥ да карачкы болор. 35 Аjыктап кöр: ичиҥдеги jарык карачкы болуп калбазын! 36 Эди-каныҥ ончо jарык болзо, карачкы jери jок болзо, jарыткыш jарыгы сени jарыткандый, ончо бойыҥ jарык болор.

Фарисейлер ле jасакчылар керегинде

37 Айдып божоордо, Иисусты бир фарисей айлына аш jиирге кычырды; Иисус келип, кыйын jатты. 38 Ажанар алдында Ол колын jунбаганын кöрöлö, фарисей кайкай берди. 39 Jе Бий ого айтты: - Слер, фарисейлер, айак-казанаардыҥ тыштын арчып jадыгар, ичигер дезе, тоношло, ачынышла толо. 40 Керсÿ эместер! Тыштын бÿдÿрген Бойы, ичин де бÿдÿрген эмес пе? 41 Ичеерде не барынаҥ тиленип алган неме эдигер, ол тужында слерде ончозы ару болор! 42 Jе слерге, фарисейлер, ачу-корон! Слер мята, рута деген ле öскö дö öзÿмдердиҥ онынчы ÿлÿÿзин берип jадыгар, jе Кудайдыҥ jаргызын ла сÿÿжин туура эдип jадыгар: мыны да эдер, оны да артырбас керек. 43 Слерге, фарисейлер, ачу-корон! Слер синагогаларда тöрдö отурарын, тепсеҥдерде уткударын jакшызынып jадыгар. 44 Слерге ачу-корон! Слер кöскö илинбес, сööк салган jер ошкожыгар: улус онызын билбей, ÿстиле базып jÿргÿлейт. 45 Jасакчылардаҥ кем де Иисуска айтты: - Бу сöзиҥле Сен бисти база тарындырып jадыҥ. 46 Jе Иисус айтты: - Jасакчы слерге де ачу-корон! Улуска слер апарып болбос уур jÿктер артып бередигер, бойыгар дезе, олорго сабарыгардыҥ бирÿзин де тийгиспейдигер! 47 Слерге ачу-корон! Слер jарчылардыҥ сööгине кереестер тудуп jадыгар, олорды дезе, адаларыгар öлтÿрген! 48 Онызыла слер адаларьҥардыҥ эткен керегин jарадып турганыгарды керелейдигер: адаларьҥар jарчыларды öлтÿрген, слер дезе, тудуп jадыгар. 49 Оныҥ учун Кудайдыҥ Ойгоры айткан: «Олорго jарчылар ла апостолдор ийерим; олордыҥ кезшин öлтÿргилеер, öскöзин - истежер. 50 Телекей бÿдердеҥ ала тöгÿлген jарчылардыҥ каны бу ÿйедеҥ некелзин: 51 Авельдиҥ канынаҥ ала тагыл ла Öргöö ортозында öлтÿрткен Захарияныҥ канына jетире». Эйе, айдып турум слерге: бу ÿйедеҥ некелер! 52 Слерге, jасакчыларга, ачу-корон! Слер билгирдиҥ jÿлкÿÿрин алып алганыгар: ого бойыгар да кирбейдигер, кирейин деген улуска да буудак эдедшер. 53 Иисус jÿре берди. Оноҥ ло бери бичикчилер ле фарисейлер Иисуска ачынып, Ого кöп сурактар берип, 54 Оны бурулаарга, айткан сöзинеҥ jик табарга, умзанып турдылар.

12:1 Ол öйдö тÿмен ÿлус jуулып, кысталыжып турарда, Иисус озо ÿренчиктерине айдып баштады: - Фарисейлердиҥ ачыткызынаҥ чеберлешҥер, онызы опту болоры. 2 Ачылбай калар туйук неме jок, jарталбай калар jажыт jок. 3Оныҥ учун карачкыда айтканьҥар, jарыкта угулар, айыл ичинде кулакка айтканьҥар, айылдыҥ jабынчызынаҥ jарлалар.

Кемнек коркыйтан

4 - Слерге, наjыларыма, айдып турум: кем эт-канды öлтÿреле, öскö нени де эдер аргазы jок болзо, оноҥ коркубагар; 5 jе кемнеҥ коркыйтанын слерге айдып берейин: кем öлтÿреле, таамыга тÿжÿрер jаҥы бар, оноҥ коркугар. Эйе, айдып турум слерге: оноҥ коркугар! 6 Беш болчок кичинек кучыйакты эки оок jес акчага садатан эмес беди? Jе Кудай олордыҥ бирÿзин де ундыбаган. 7 Слердиҥ дезе, бажыгардыҥ кылы да ончозы тоололып калган. Анайдарда, коркубагар, слер кöп кучыйактардаҥ баалу эдигер! 8 Айдып турум слерге: Мени jарадып турганын кем улус алдына jажырбай айтса, Кижи Уулы оны jарадып турганын Кудайдыҥ ангелдери алдына айдар. 9 Улус алдында кем Менеҥ jана тÿшсе, Кижи Уулы Кудайдыҥ ангелдери аддында байагы кижидеҥ jана тÿжер. 10 Кижи Уулына кем удура айтса, оныҥ бурузы ташталар, jе Агару Тынды кем jамандап айтса, оныҥ бурузы ташталбас. 11 Слерди синагогаларга, jамылуларга ла jаҥдарга алып келгежин, бойысты канайда корулаарыс, нени айдарыс деп санааркабагар. иАгару Тын ол тушта нени айдарына слерди ÿредер.

Бир бай керегинде

13 Улустыҥ ортозынаҥ бир кижи Иисуска айтты: - Уредÿчи, карындажыма айт, энчини мениле ÿлешсин деп. 14 Иисус ол кижите: - Слерди jаргылап, энчигерди ÿлештирер jаҥ-тапты Меге кем берген? - дейле, 15 калыкка баштанды: - Неме jуурынаҥ чеберленигер, - кижиниҥ jÿрÿми jööжöдöҥ, оныҥ элбегинеҥ камаанду эмес. 16 Оноҥ укаа сöс айтты: - Бир бай кижиниҥ кыразында jакшы аш бÿткен. 17 «Эм канайдайын? - деп, ол сананган. - Ажымды урар jерим jок». 18 Оноҥ айткан: «Мынайда эдедим: анбарларымды оодып, оноҥ jаандарын тудадым, ончо ажымды, бар jööжöмди ого jууп саладым. 19 Оноҥ jулама айдадым: „Jула! Белетеп алган курсагыҥ, jööп алган байлыгыҥ узак öйгö jедер: амыра, ичип-jи, jырга"». 20 Jе Кудай ого айткан: «Сананбас! Бу тÿнде jулаҥды алып баргылаар; белетеп алганыҥ кемге jедижер?» 21Кудайга байыбай, бойына байлык jууган кижиле андый болуп jат.

Jÿрÿмеерди кичееп санааркабагар

22 Иисус ÿренчиктерине айтты: - Оныҥ учун айдып турум слерге: jÿрÿмеерди кичееп, нени jиирис, эди-каныгарды кичееп, нени кийерис деп санааркабагар. 23 Jÿрÿм курсактаҥ баалу, эт-кан кийимнеҥ баалу. 24 Кускундарды кöрÿгер: олор аш чачпай jат, аш кеспей jат, jööжö сугар jери де jок, анбарлары да jок, jе Кудай олорды азырап jат. Слер дезе, куштардаҥ чик-jок артык эмес бедигер? 25 Слердиҥ кемигер де болзын, кичеенип, jÿрÿмин бир де саатка узадып болор бо? 26 Асты да болзо, бойыгарга эдип болбозыгарда, öскöзин не кичееп jадыгар? 27 Чомур чечектерге кöрÿгер, олор канайда öзÿп турганын: олор иштебей jат, иирбей jат; jе айдып турум слерге: керек дезе Соломон до бойыныҥ бастыра магында олордыҥ бирÿзи де чилеп кийинбеген. 28 Бÿгÿн öзÿп, эртен отко ташталатан jалаҥныҥ öлöҥин Кудай анайда кийиндирип турган да, слерди оноҥ артык кийиндирер эмес пе, бÿтпестер! 29 Нени jиирис, нени ичерис дебегер, ого санааркабагар. 30 Мыныҥ ончозын бу телекейдиҥ улузы бедиреп jат; бу ончо неме слерге керек болгонын Адагар билер. 31 Элдеҥ озо Кудайдыҥ Каандыгын бедирегер, артканы слерге берилер. 32 Коркуба, ас ÿÿр! Слерге Каандык берери - Адагардыҥ jакшылык кÿÿни андый. 33 Jööжöгöрди садып, быйан эдип jÿрÿгер. Элебес акчакап белетеп алыгар, коробос байлыкты теҥериде jööгöр, - ого уурчы jедип албас, оны кÿйе jибес; 34 jööжöгöр кайда, jÿрегеер де анда болор.

Белен болугар

35 - Белигер курлу болзын, jарыткыштарыгар кÿйÿп турзын. 36 Бийи тойдоҥ келеле, эжикти токулдаткажын, тургуза ла ачып берерге сакыган кижидий болугар. 37 Бийи jанып келеле, кулдары ойгу болгонын кöргöжин, байагы кулдардыҥ кежиктÿ болгоны ол. Чынын айдадым слерге: ол курчанып, кулдарын отургызып, базып келип, олорды бойы кÿндÿлеер. 38 Тÿнниҥ ÿч те аразында, таҥ алдында да келип, кулдары ойгу болгондорын кöрöр болзо, ол кулдар кежиктÿ. 39 Уурчы качан келерин айыл ээзи билген болзо, ойгу болуп, айлыныҥ тöзин кастырбас эди деп, слер билеригер. 40 Слер де белен болугар: Кижи Уулы слер сакыбаган öйдö келер. 41 - Бий! Бу укаа сöсти jаҥыс биске айдып туруҥ ба, айса ончо улуска ба? - деп, Петр Иисустаҥ сурады. 42 Бий айтты: - Jалчылардыҥ бажын билип, олорго öйинде курсак берип турзын деп, бий кöстöгöн бÿдÿмjилÿ ле керсÿ айыл башкараачы кем? 43 Бийи келип, кулы анайда эдип jÿргенин кöрöр болзо, ол кул кежиктÿ. 44 Чынын айдадым слерге: оны ар-jööжöзи учун каруулу эдер. 45 Jе ол кул ичинде: «Бийим бачым келбес» - деп сананала, jалчыларды, jалчы кыстарды согуп, ичип-jип, аракыдап jатса, 46 ол кулдыҥ бийи сакыбаган кÿнде, сананбаган öйдö келер, оны бойынаҥ кезе чабар, оныҥ салымы бÿтпес улустыҥ салымындый болор. 47 Бийиниҥ табын билип, белен эмес болгон, оныҥ табыла этпеген кул кöп соктурар; 48 билбей jÿрÿп, каруузына турар буруга калганы, ас соктурар. Кемге кöп берилген, оноҥ кöп ок некелер, кемге кöп бÿдÿмjилелген, оноҥ кöп ок суралар. 49 Мен jерге от тÿжÿрерге келгем, ол кÿйзин деп, кÿÿнзеп турум! 50 Мен креске тÿжÿп, крестелер учурлу; оны сакып, кыйналып турганымды! 51 Мени jерге энчÿ экелерге келген деп туругар ба? Jок! - деп, айдып турум слерге. - Бöлÿштирерге келгем! 52 Мынаҥ ары ÿйде беш кижи болзо, олор бöлÿнижер: ÿчÿзи - экÿзине удура болор, экÿзи - ÿчÿзине удура болор. 53 Адазы уулына, уулы адазына удура болор; энези кызына, кызы энезине удура болор; кайын энези келдине, келди кайын энезине удура болор. 54 Калыкка дезе, айтты: - Кÿнбадыштаҥ булут чыгып келгенин кöрзöгöр, ол тарыйын: «Jаҥмырлаар» - дейдигер; айтканаарча болуп jат. 55 Тÿштÿк салкын соккондо, «Изÿ болор» дейдшер, айтканаарча болуп jат. 56 Оптулар! Jерге ле теҥериге кöрÿп, jылдыҥ öйин билип jадыгар, эм кандый öй келгенин дезе, билип болбойдыгар ба? 57 Чын дегенди билип аларга, бойыгарды бойыгар не jаргылабайдыгар? 58 Jамандашкан кижиҥле jаандарга барып jаткаҥда, jолой оныла jаражарга, эптежерге кичеен; сени ол jаргычыга алып барбазын, jаргычы сени тÿрмениҥ ишчизине берип ийбезин, онызы дезе, сени тÿрмелеп койбозын. 59 Айдып турум сеге: калганчы оок акчаҥды бербейинчеҥ, оноҥ чыгарыҥ jок туру.

Кинчегин алынары керегинде

13:1 Бу öйдö Иисуска бир кезик улус келип, Öргööдö Пилатка öлтÿрткен Галилейдиҥ улузы керегинде куучындап бердилер. Пилат олордыҥ канын тайьш jаткан тындуларыныҥ каныла колыштырган. 2 Иисус айтты: - Бу улус Галилейдиҥ öскö улузынаҥ кöп кинчектÿ учун олорло андый болгон деп сананып туругар ба? 3 Jок деп, айдып турум слерге! Jе jÿрÿмигерди кубултпазагар, ончогор анайып ок öлÿп каларыгар! 4 Силоамдагы бакана антарыларда, ого баспактадып öлгöн он сегис кижи, Иерусалимде jуртаган улустаҥ ончозынаҥ кöп тöлÿлÿ болгон деп сананып туругар ба? 5 Jок деп, айдып турум слерге! Jе jÿрÿмигерди кубултпазагар, ончогор анайып ок öлÿп каларыгар. 6 Оноҥ мындый укаа сöс айтты: - Бир кижиниҥ виноград öскöн садында смоква агаш болгон. Ол бу агаштыҥ jиилегин терерге келеле, неме таппаган. 7 Айдарда, бойыныҥ ишчизине айткан: «Бат, бу агаштаҥ jиилек алайын деп, ÿчинчи jыл келип jадым, jе бедиреп таппай турум; оны ары кезип сал, jерди туза jок этпезин». 8 Jе онызы каруу jандырып, айткан: «Бийим, быjылча тургай; мен оны кÿбÿредип, öтöк тöгÿп салайын. 9 Эзенде jиилек берер болор бо; бербезе, кезип койгойыҥ».

Суббот кÿнде кижини jазары

10 Суббот кÿн синагогалардыҥ бирÿзинде Иисус ÿредип турган. 11 Анда jоболдыҥ кöрмöзине туттурала, он сегис jыл jобоп jÿрген ÿй кижи болгон; ол корчойып калган, арка-сыны тÿзелбейтен. 12 Иисус оны кöрÿп ийеле, Бойына кычырьш альш, - Уй кижи, оору-jоболдоҥ сен айрылып jадыҥ - дейле, 13 ого колын салды. Уй кижи ол бойынча тÿзелип, Кудайды алкай берди. 14 Иисус суббот кÿнде jасканына синагоганыҥ jааны кородоп, улуска айтты: - Иш эдетен алты кÿн бар; jазыларга ол кÿндерде келип туругар, суббот кÿнде келбегер. 15 Jе Бий айтты: - Оптулар! Слердиҥ кемшер де болзын, суббот кÿнде чарын эмезе эштегин чечип, сугарарга апарып jат па? 16 Авраамныҥ бу кызын кöрмöс туку он сегис jыл кÿлÿде туткан; суббот кÿнде кÿлÿзин чечип, оны jайымдаарга jарабас па? 17 Бу сöстöрдиҥ кийнинде Иисуска удурлашкан ончо улус кемзине берди; калык Оныҥ мактулу керектерин кöрÿп, сÿÿнижип турды.

Кудайдык Каандыгы керегинде

18 Иисус айтты: - Кудайдыҥ Каандьҥы неге тÿҥей, Оны неге тÿҥдеп айдайын? 19 Ол оп-оок ÿренге тÿҥей. Оны кижи алып, садында отургускан. Ол öзÿп, jаан агаш болуп калган; теҥериниҥ куштары оныҥ будактарына уйа тарткан. 20 Иисус база айтты: - Кудайдыҥ Каандыгын неге тÿҥдеп айдайын? 21 Ол ачыткыга тÿҥей. Уй кижи оны алып, ÿч кемjÿ кулурга саларда, öй öдÿп, ончозы ачып калган. 22 Иисус калаларга ла jурттарга табарып, ÿредип турды; Ол Иерусалим бараткан. 23 - Бий, аргаданып тургандар ас беди? - деп, бир кижи Иисустаҥ сурады. Иисус дезе, олорго айтты: 24 - Тар эжиктеҥ кирерге кÿjÿренетер; айдып турум слерге: кöп улус кирейин де дезе, ого кирип болбос. 25 Айыл ээзи туруп, эжигин бöктöп ийзе, слер тыштында туруп, эжикти токулдадып: «Бий, биске ач!» - деп jайнаарыгар. Jе ол слерге айдар: «Слерди билбезим, кайдаҥ келген улус». 26 Ол тушта слер айдынарыгар: «Бис Сениҥ алдыҥда ичкен-jиген эдис; Сен бистиҥ оромдорыста ÿреткеҥ». 27 Jе ол слерге айдар: «Слерди билбезим, кайдаҥ келген улус; jаман кылынып jÿргендер, ончогор менеҥ кеде тайылыгар!» 28 Авраам, Исаак, Иаков ло ончо jарчылар Кудайдыҥ Каандыгында jÿргендерин, бойыгар дезе, чыгара сÿрдÿрип ийгенеерди кöрöригер. Анда ый-сыгыт, тиш кыjырты болор. 29 Кÿнчыгыштаҥ ла кÿнбадыштаҥ, тÿндÿктеҥ ле тÿштÿктеҥ келгилеп, Кудай Каандыгында кыйын jаткылап алар. 30 Эмди калганчы болгон кижи, баштапкы болор, баштапкы болгоны, калганчы болор.

Иерусалим керегинде сыгыт

31 Ол кÿн бир кезик фарисейлер келип, Иисуска айттылар: - Чыгып, мынаҥ ырбап бар, Ирод Сени öлтÿрер кÿÿндÿ. 32 Иисус олорго каруузын jандырды: - Барып, ол тÿлкÿге айдыгар: «Бат бÿгÿн ле эртен кöрмöстöрди чыгарарым, оору-jоболды jазарым, ÿчинчи кÿнде дезе, керегимди туузылтарым. 33 Jе бÿгÿн, эртен ле соҥзуун Мен jолдо болор учурлу, нениҥ учун дезе, jарчы Иерусалимнеҥ öскö jерде öлтÿртер аргазы jок». 34 Jарчыларды öлтÿреечи, ого ийилген улусты ташла шыбалаачы Иерусалим, Иерусалим! Балдарын канады алдына jууган куш чылап, сениҥ балдарыҥды Мен канча катап jуунадайын дебедим, jе слер болбодыгар! 35 Бат, эмди слердиҥ айлыгар ээн артып jат! Айдып турум слерге: öй jедип, «Бийдиҥ адында Келеткени алкалу!» - деп айтпаганчар, Мени кöрбöзигер.

Иисус фарисей-эште

14:1 Бир катап суббот кÿнде Иисус фарисей бийдиҥ айлына кирип, аш jиди; Оны кетежип турдылар. 2 Jе бат, Иисустыҥ алдында суулу оорудаҥ шыралап jÿрген кижи. 3 Иисус jасакчыларга ла фарисейлерге баштанып, айтты: - Суббот кÿнде улус эмдеерге jараар ба? 4 Олор унчугышпады. Иисус оору кижиге тийип, оны jазала, jандырып ийди. 5 Олорго дезе айтты: - Слердиҥ кажы бирÿтердиҥ уулыгар эмезе чарыгар кутукка тÿшкежин, оныгарды суббот то кÿнде ол тарый чыгарып албас бедигер? 6 Олор нени айдарын билбей турдылар. 7 Айтырылган улус бойлорына баштапкы jерлер талдап тургандарын аjарып, олорго укаа сöс айтты: 8 - Кем сени тойго кычырза, тöргö öдÿп кыйын jатпа; айтырылган улус ортодо сенеҥ кÿндÿлÿ кижи бар болуп калбазын. 9 Оны да, сени де айтырган кижи базып келип, сеге: «Бу jерди ол кижиге божот» дебезин. Ол тушта сеге бу мыныҥ уйадына чыдабай, эжиктиҥ jанына барып, кыйын jадарга келижер. 10 Jе сени айтырса, келип, эжиктиҥ jанына кыйын jат. Сени айтырган кижи базып келип, «Наjы, öрö öт!» дезин; ол тушта сениле кожо кыйын jаткан улус алдында сеге кÿндÿ болор. 11 Бойын бийик тутканы - jабыс кöрдирер, бойын jабыс тутканы - бийикке чыгар. 12 Айтырган фарисейге дезе айтты: - Тÿште бе, эҥирде бе казан аскаҥда, наjыларыҥды да, карындаштарыҥды да, тöрöгöндöриҥди де, бай айылдаштарыҥды да айтырба. Олор качан бирде сени база айлына кычыргылаар, jакшызын jандыра jетирер аргалу. 13 Jе кÿндÿ-кÿрее эткеҥдё, тÿреҥи, кенек, аксак, сокор улусты айтыр. 14 Бат ол тушта кежиктÿ болгоныҥ ол: jандыра jакшызын олор сеге jетирип болбос, jе актулар тирилгежин, сеге jакшы jетирилер. 15 Мыны угала, Оныла кожо кыйын jаткандардыҥ бирÿзи Ого айтты: - Кудайдыҥ Каандыгында аш jиири кежиктÿ! 16 Иисус болзо, ого айтты: - Бир кижи jаан кÿндÿ-кÿрее эдип, кöп улус айтырган. 17 Аш jиир öй jедип келерде, ол кулын ийип, айтырылган улуска мынайда айтсын деген: «Келигер, ончо неме белен». 18 Олор, эрмектежип алгандый, jаманын таштасын деп сурай бергендер. Бирÿзи айткан: «Мен jер садып алдым, оны барып кöрöр керек; jаманымды таштазын деп сурап турум». 19 Экинчизи: «Мен беш эжер чар садып алдым, олорды jегип, кыра сÿрÿп кöрöргö турум; jаманымды таштазын деп сурап турум» деген. 20 Учинчизи айткан: «Мен кижи алдым, оныҥ учун барып болбозым». 21 Кул келип, мыны бийине угускан. Айыл ээзи чугулданып, кулына jакарган: «Капшай барып, каланыҥ jаан ла кичинек оромдоры сайын jÿрÿп, тÿреҥи, кенек, аксак ла сокор улусты бери экел». 22 Кул келип, айткан: «Бийим, jакаруҥды бÿдÿрип салдым, эм де jер бар». 23 Бий кулына база jакарган: «Jолдорды, чеден-кажаандарды кууп, туштаган ла кижини сöстö, айлымныҥ ичине улус толзын! 24 Айдып турум слерге: озо айтырган улустыҥ бирÿзи де ажымнаҥ jибес. [Айтырылганы кöп, jе талдалганы ас]».

Канайып Иисустык ÿренчиги болор

25 Иисусла кожо кöп улус бараткан. Ол улуска бурульш, айтты: 26 - Меге келген кижи ада-энезин, алган эжин, бала-барказын, ага-карындажын, эjе-сыйындарын, акту бойыныҥ jÿрÿмин де jектеп, jаман кöрбöзö, ол Мениҥ ÿренчигим болор аргазы jок; 27 бойыныҥ кере тартыратан агажын албай, Мени ээчип jÿрер кижи, Мениҥ ÿренчигим болор аргазы jок. 28 Слердиҥ кажы бирÿгер бакана тудар кÿÿндÿ болзын. Ол озо отурып алып, оны бÿдÿре тударга не-немези jеткил бе деп, тоолоор эмес пе? 29-30 Оноҥ башка, бакананы тöзöйлö, бÿдÿрип болбостоҥ маат jок. Улус оны кöрöлö, «Бу кижи тудуп баштайла, бÿдÿрип болбоды» деп, электеп каткырышпазын. 31 Кандый бир каан öскö каанга удура jуулажарга барып jаткан болзын. Он тÿмен черÿлÿ бойы, jуулажып келип jаткан jирме муҥ черÿлÿ кааета удурлажар аргазы бар ба деп, озо баштап отурып алып, jöптöжöр эмес пе? 32 Jуулажар аргазы jок болзо, öштÿ ыраак тужында амыр-энчÿ сурап, ого элчилерин ийер. 33 Анайып ок слер де, бойьҥарда не барынаҥ мойнобозогор, Мениҥ ÿренчиктерим болор учурьҥар jок. 34 Тус - jакшы неме; jе тус амтанын jылыйтса, канайьш оны тусту эдер? 35 Jерге де, öтöккö дö jарабас; оны чьҥара чачьш jадьшар. Кем кулакту, ол уксын!

Jылыйган кой керегинде

15:1 Иисусты угарга, ончо албанчылар ла кинчектÿлер Ого jууктап келдилер. Фарисейлер ле бичикчилер кимиренип турдылар: 2 - Ол кинчектÿ улусты jуудып, олорло кожо ажанып jат. 3 Jе Иисус олорго мындый укаа сöс айтты: 4 - Слердиҥ кажы бирÿгер jÿс койлу болзын, бир койыгар jылыйып калган болзын. Jылыйган койды таап алганча бедиреерге, тогузон тогус койын ол куба чöлдö артырып койор эмес пе? 5 Таап алгажын, сÿÿнип, койды jардына артынып алар. 6 Jанып келеле, наjыларын ла айылдаштарын кычырып алып, олорго айдар: «Мениле кожо сÿÿнигер, jылыйган койымды таап алдым!» 7 Айдып турум слерге: Кудайга баштанары керек jок тогузон тогус актуга кöрö, Кудайга баштанган кинчектÿ бир кижиге теҥериде артык сÿÿнгилеер.

Jылыйган акча керегинде

8 - Ол эмезе, бир ÿй кижиде он мöҥÿн акча болзын, бир акчазын jылыйтып салган болзын. Jарыткышты кÿйдÿрип алып, айлыныҥ ичин ол сибирип, онызын таап алганча, кичеенип бедиреер эмес пе? 9 Таап алгажын, ÿÿре-jелелерин, айылдашта-рын кычырып алып, айдар: «Мениле кожо сÿÿнигер, jылыйган акчамды таап алдым!» 10 Айдып турум слерге: Кудайга баш-танган кинчектÿ бир де кижиге Кудайдыҥ ангелдери сÿÿнгилеп jат.

Тенибер уул керегинде

11 Иисус база айтты: - Бир кижиде эки уул болгон; икичÿ уул адазына айткан: 12 Ада! Jööжöгöрдöҥ jедижер ÿлÿÿмди меге беригер». Адазы jööжöни уулдарына бöлип берген. 13 Саадабай кичÿ уул ончозын jууп, ыраак ороонго атанган. Анда ол салдым, балыр jÿрÿп, акчазын ÿреп койгон. 14 Бары-jогын кородып саларда, ол ороондо ачана-торо башталып, немеге jединбей барган; 15 барып, бу ороонныҥ улузыныҥ бирÿзине jалданарда, оны jалаҥына чочко кабыртып ийген. 16 Чочконыҥ jайынтызыла да болзо, кардын толтурайын дезе, оны да берери чыкпай турган. 17 Санаа алынып, айдышан: «Адамныҥ канча jалчылары курсакты jип тÿгезип болбой jат, мен дезе, торолоп öлöргö jеттим! 18 Туруп, адама барьш, айдадым: „Ада, теҥериге удура ла слердиҥ алдыгарда мен кинчек эттим; 19 уулыгар деп аданар учурым jок, мени jалчылараарга кожуп алыгар"». 20 Ол туруп, адазына барган. Адазы уулын ыраагынаҥ кöрÿп ийеле, ичи ачыган; удура jÿгÿрип келеле, мойнынаҥ кучактап, окшой берген. 21 Уулы: «Ада! - деген. - Теҥериге удура ла слердиҥ алдыгарда мен кинчек эттим; уулыгар деп аданар учурым jок». 22 Jе адазы кулдарына jакарган: «Кийимниҥ болзо, jакшызын экелип, баламга кийдиршер, сабарына оныҥ jÿстÿк сугугар, будына оныҥ öдÿк кийдиригер; 23 семирткен бозуны экелип, сойугар: jийлик, jыргайлык! 24 Бу уулым öлгöн бойы тирилди, jылыйган бойы табылды». Оноҥ jыргай бергендер. 25 Jаан уул дезе, jалаҥда иштеп jÿрген; jанып келедип, айылдаҥ кожон чыгып турганын угуп ийген; 26 jалчылардыҥ бирÿзин алдырып алала, ондо не болуп турганын сураган. 27 Онызы айткан: «Карындажыҥ jанып келген. Ол эзен-амыр jанып келгенине адаҥ сÿÿнип, семирткен бозуны сойгон». 28 Jаан уул ööркöйлö, айлына кирбеген. Адазы чыгып келеле, оны кычыра берген. 29 Jе ол адазына айткан: «Бат, канча jылга улай слерге иштеп, айткан сöзигердеҥ чыкпай jÿрдим; jе наjыларыҥла jыргап ал деп, меге уулак та айдып бербедигер. 30 Баскын-тоскын ÿй улуска биригип, ар-jööжöзин кородып салган бу уулыгар jанып келерде, ого семирткен бозу сойдыгар!» 31 Адазы дезе, ого айткан: «Уулым, сен jаантайын мениле кожо, мениҥ не барым - сенийи. 32 Бу карындажыҥ öлгöн бойы тирилди, jылыйган бойы табылды деп сÿÿнип, jыргаар керек».

Чындык байлык керегинде

16:1 Иисус Бойыныҥ ÿренчиктерине дезе айтты: - Бир бай кижиде айыл башкаручы болгон. Ол jööжöзин кородып jат деп, байга jетиргендер. 2 Бийи оны алдырала, айткан: «Бу сен керегинде мен нени угуп турум? Эткен ижиҥе jартамал эт, бу иште сениҥ артар учурыҥ jок». 3 Айыл башкаручызы бойында айдынган: «Эм канайдайын? Бийим мени иштеҥ jайладып jат. Jер казып болбозым, суранчыктап jÿреринеҥ уйалып jадым. 4 А, бу иштеҥ мени чыгарып салза, мени айлына jууткылап алзын деп, нени эдерин билдим!» - дейле, 5 бийине тöлÿлÿ улусты таҥьшаҥ алдыра берген. «Мениҥ бийиме канчаны тöлÿлÿ эдиҥ?» деп, баштапкызынаҥ сураган. 6 Онызы: «Jÿс бочко май» - деген. Айдарда, тöлÿлÿ кижиге айткан: «Кол салган чаазыныҥды алып, отур, „бежен" деп капшай чий». 7 Оноҥ: «Сен канчыйан тöлÿлÿ?» - деп, öскöзинеҥ сураган. Онызы: «Jÿс таар буудай» - деген. Айыл башкаручызы айткан: «Кол салган чаазыныҥды алып, „сегизен" деп чий». 8 Санаа-укаалу эткени учун чынга турбас немелердиҥ башкаручызын бий мактаган. Jердеги jÿрÿмниҥ уулдары бойы ошкош улус ортодо jарыктыҥ уулдарына кöрö санаалу. 9 Мен де слерге айдьт турум: чьшга турбас байлыкла бойлоро-орго нöкöрлöр jайап туругар. Оноҥ, байлыгар корозо, слерди мöҥкÿ айлы-jурттарына jууткылап алзьга. 10 Аска бÿдÿмjилÿ болгоны, кöпкö дö бÿдÿмjилÿ; аска бÿдÿмjи jок болгоны, кöпкö дö бÿдÿмjи jок. 11 Чыша турбас байлыкты слерге бÿдÿмjилеерге jарабас болзо, чындык байлыкты кем бÿдÿмjилеер? 12 Кижинийине бÿдÿмjизи jок болгоньҥарда, бойыгардыйын слерге кем берер? 13 Кандый да кул эки бийге jалчьшаньш болбос: бирÿзин jаман кöрöр, экинчизин сÿÿр; бирÿзине чындык болор, экинчизин керектебес. Слер де экÿге - Кудайга ла байльпска иштеп болбозыгар! 14 Мыны ончозын фарисейлер де угуп, акчага ач бойлоры, Иисусты электеп каткырышты. 15 Иисус олорго айтты: - Улус алдында слер акту болуп кöрÿнедигер, jе jÿрегеерди Кудай билер. Улус ортодо бийик баалалып турганы, Кудайга jескинчилÿ. 16 Иоаннаҥ озо Jасак ла jарчылардыҥ сöзи jарлалган. Эмдидеҥ ала дезе, Кудайдыҥ Каандыгы керегинде Сÿÿнчилÿ Jар jарлалып jат; кажы ла кижи ого кирерге кÿч салып jат. 17 Jасакта бир чийик jоголгончо, jер ле теҥериге jоголорго jеҥил. 18 Уйин jандырып, öскö кижи алганы, оныла кожо кинчекке киргени ол; айрылыжып калганды алганы, оныла кожо кинчек эткени ол.

Бай кижи ле Лазарь 19 Иисус оноҥ айтты:

- Бир бай кижи болгон. Каан чылап кийинип, кÿнÿҥ сайын jыргап-сайрап jÿрер. 20-21 База бастыра бойы ириҥ-баалулу Лазарь деп тÿреҥи кижи болгон. Байдыҥ остолынаҥ тÿшкенин jийин деп, ол байдыҥ каажазыныҥ jанында jадатан. Ийттер jуулыжып, оныҥ баалузын jалап туратан. 22 Jе бат, Лазарь jада калган, ангелдер оны Авраамга коштой кÿндÿлÿ jерге апарып салгандар; бай да jада калган, оныҥ сööгин jууп койгондор. 23 Таамыда кыйналып jÿрген бай öрö кöрзö, ыраагында Авраам jÿрген, койнында дезе - Лазарь. 24 Бай ачу-корон кыйгыра берген: «Авраам адабыс! Меге буурсап, Лазарьды бери ийзеҥ, сабарыныҥ бажын сууга чыктыдып, тилимди соотсын. Бу от-jалбыштыҥ изÿзине кыйналып турум!» 25 Jе Авраам ого айткан: «Эске алынып ийзеҥ, уулым, эзен jÿрериҥде, сен ончо jакшыны алгаҥ; Лазарь дезе, ончо jаманды алган. Эмди ол мында токунап, соотоп jат, сен дезе, кыйналып jадыҥ. 26 Ого ÿзеери, слердиҥ ле бистиҥ ортобыста - алыс jер. Оныҥ учун мынартынаҥ слерге барайын дегени, барып болбос, анартынаҥ биске келейин дегени, келип болбос». 27 Айдарда, бай айткан: «Оны бистиҥ айылга ийгин деп, сурап турум сени, адабыс! 28 Беш карындажым бар эди. Олорго керелеп айдып салзын, кыйынныҥ бу jерине келгилебезин». 29 Авраам айткан: «Олордо Моисей ле jарчылар бар, олорды уккулазын!» 30 «Jок, Авраам адабыс, - деп, бай айткан, - öлгöн улустыҥ бир-бирÿзи олорго барза, олор Кудайга баштанар». 31 Jе Авраам ого айткан: «Моисейди ле jарчыларды уккулабай турган болзо, олорды кем де, керек дезе, тирилген кижи де, бÿдÿндирип болбос».

Кинчек ле бÿдетени керегинде

17:1 Иисус ÿренчиктерине айтты: - Jилбиркедер немелер келбейинче калбас, jе олор кем ажыра келген, ого ачу-корон! 2 Бу кичÿлердиҥ кажы бирÿзин jилбиркеткен кижиниҥ мойнына баспак буулап, оны талайга таштаган болзо, ого торт болор эди! 3 Мынаҥ чеберленип jÿрÿгер! Карындажыҥ сеге jаман эткежин, каарып айт, кинчегин алынза, jаманын таштап кой; 4 кÿнине jети катап jаман эделе, сеге jети катап келип, «Мен бурулу» дегежин, jаманын таштап кой. 5- Кудайга бÿдер кÿÿнибисти тыҥыдарга болушкын - деп, апостолдор Бийдеҥ сурадылар. 6 Бий каруузын jандырды: - Оок ÿрен де кирези бÿдÿп, бу турган агашка: «Тазыл-тамырыҥла кожо кодорылып, бойыҥды бойыҥ талайга апарып отургус!» - деген болзогор, слерге ол багар эди. 7 Слердиҥ кажы бирÿгер кыралап эмезе малдап jÿрген кулду болзын. Байагы кул иштеҥ jанып келзе, ого: «Капшай отурып ажан!» - деп айдар бедигер? 8 Карын, мынайда айдар jогоор бо: «Меге казан ас, мен ичип-jип отурганчам, курчанып алып, мени кичееп кÿндÿле, оноҥ бойыҥ ичип-jиириҥ». 9 Jакаругарды бÿдÿрген кулыгарга алкыш-быйаныгарды айдараар ба? 10 Анайып ок слер де, jакаруны бÿдÿреле, мынайда айдыгар: «Бис неге де турбас кулдар эдибис, бис jÿк молjу-керегисти бÿдÿрдис». 11 Иерусалим jаар jолдо Иисус Самар ла Галилейдиҥ кыйузыла бараткан. 12 Бир jуртка кирип jадарда, Ого капкаш баалулу он кижи учурады; ыраагында токтой тÿжÿп, 13 кыйгырыжа бердилер: - Иисус! Уредÿчи! Биске буурсазаҥ? 14 Олорды кöрöлö, Иисус: - Абыстарга барып кöрÿнигер - деди. Олор барып jадала, арутала бердилер. 15 Бойыныҥ jазылганын кöрöлö, олордыҥ бирÿзи тыҥ ÿнденип, Кудайды алкап, ойто бурулды. 16 Иисустыҥ будыныҥ алдына кöҥкöрö jыгылып, Ого алкыш-быйанын jетирип турды; ол самар кижи болгон. 17 - Аруталганы он кижи эмес беди? Арткан тогус кижи кайда? - деп, Иисус сурады. - 18 Кудайга алкыш-быйанын jетирерге, öскö укту бу кижидеҥ башка, олордыҥ бирÿзи де келбеди бе? - дейле, 19 ого айтты: - Тур, бар; бÿдÿп турганыҥ сени аргадап алды.

Кудайдык Каандыгы керегинде

20 - Кудайдыҥ Каандыгы качан келер? - деп, фарисейлер Иисустаҥ сураарда, Ол каруузын jандырды: - Кудайдыҥ Каандыгы танылу келбес. 21 «Ол мында!» эмезе «Туку ондо!» дешпес, нениҥ учун дезе, Кудайдыҥ Каандыгы - слердиҥ öзöк-кöксигерде. 22 Уренчиктерине дезе, айтты: - Кижи Уулыныҥ ого jÿк бир де кÿнин болзо, кöрöр кÿÿнигер келер öй болор, jе оны кöрбöзигер. 23 Слерге: «Ол мында!», «Туку ондо!» дешкилеер. Тап эдип, олордыҥ кийнинеҥ jÿгÿрбегер. 24 Jалт эделе, теҥериниҥ бир учынаҥ экинчи учына jетире jарыдып ийген jалкынды чылап, Кижи Уулыныҥ келгенин ончозы кöрÿп ийер. 25 Jе озо баштап Ол кöп кыйналар, бу ÿйениҥ улузы Оноҥ jана тÿжер учурлу. 26 Нойдыҥ кÿндеринде чилеп, Кижи Уулыныҥ кÿндеринде ондый ок болор: 27 Ной керепке кирердиҥ киргенче, улус ичкен-jиген, кижи алары - алган, кижиге качары - качкан. Оноҥ jайык чыгып, ончозы чöҥÿп калган. 28 Лоттыҥ кÿндеринде база андый ок болгон: улус ичкен-jиген, садышкан, аш салган, агаш тарыган, туралар туткан. 29 Jе Лот Содомноҥ jÿре берген кÿн теҥеридеҥ от ло кÿкÿр jаап, ончозы кырылып калган. 30 Кижи Уулы ачылар кÿн шак андый болор! 31 Кем ол кÿн jабынтыда турза, не-немези дезе, айылдыҥ ичинде болзо, оны аларга тÿшпезин; jалаҥда jÿрген кижи бурулбазын! 32 Лоттыҥ абакайын сананып jÿрÿгер! 33 Jÿрÿмин аргадайын деген кижи - онызын jылыйтар, jÿрÿмин jылыйтканы - онызын аргадап алар. 34 Айдып турум слерге: ол тÿнде эки кижи бир тöжöктö jадар: олордыҥ бирÿзин алып баргылаар, бирÿзин - артырып койгылаар; 35 эки ÿй кижи кол теермен тартар: бирÿзин алып баргылаар, бирÿзин - артырып койгылаар. 36 [Jалаҥда эки кижи jÿрер: бирÿзин алып баргылаар, бирÿзин - артырып койгылаар.] 37 Айдарда, ÿренчиктер Иисустаҥ сурадылар: - Бу кайда болор, Бий? Иисус айтты: - Кайда сööк jадар, анда кан-кеределер jуулыжар.

Тул келин ле jаргычы керегинде

18:1 Jаантайын мÿргÿп, чöкöбöйтöнин билгилеп jÿрзин деп, Иисус олорго укаа сöс айтты: 2 - Бир калада jаргычы болгон. Ол Кудайдаҥ да коркубай-тан, улустаҥ да уйалбайтан. 3 Бу ок калада бир тул келин болгон. Ол jаргычыга келип, «Мени öштÿмнеҥ корула» - деп, jайнап сурап туратан. 4 Jаргычы узак öйгö jöпсинбей, оноҥ бойында айдынган: «Мен Кудайдаҥ коркубас, улустаҥ уйалбас та болзом, 5 бу тул келин меге амыр бербей турган учун, оны корыйын, мени тÿйметпезин, база келбезин деп». 6 - Ак-чек эмес jаргычы нени айтканын уктыгар ба? - деп, Бий айтты. - 7 Талдап алгандары Ого тÿн-тÿш кыйгырып сураганыла Кудай öч jайаар беди? Jе Кудай олорго ак-чек эмеске узак чыдажып jат. 8 Айдып турум слерге: олор учун саадабай öч jайаар. Jе Кижи Уулы келеле, Ого бÿдÿп турганды jердеҥ табар ба?

Фарисей ле албанчы керегинде

9 Бойлоры акту болгонына бÿдÿп, öскöлöрин jабыс кöргöн бир кезик улуска Иисус укаа сöс айтты: 10 - Эки кижи мÿргÿÿрге, Öргööгö кирген: бирÿзи фарисей, экинчизи дезе, - албанчы. 11 Фарисей туруп, бойында мынайда мÿргÿген: «О Кудай! Мен öскö улустый тонокчыл, кÿjÿрчи, балыр jÿрÿмдÿ эмезе бу албанчыдый эмес болгоныма, Сеге алкыш-быйан jетирип турум. 12 Неделеде эки катап орозо тудуп, алганымныҥ онынчы ÿлÿÿзин берип jадым». 13 Албанчы дезе, ыраагында туруп, теҥери öрö кöрöргö дö кÿÿнзебей, jе тöжине согунып, айдынып турган: «О Кудай, меге, кинчектÿ кижиге, быйанду бол!» 14 Айдып турум слерге: бу кижи, а фарисей эмес, Кудайдыҥ алдында кöп акталып jанган. Бойын бойы бийик тутканы - jабыс кöрдирер, бойын бойы jабыс тутканы - бийикке чыгарылар.

Кудайдык Каандыгына кем кирер?

15 Колыла тийсин деп, Иисуска кичÿ балдарды экелип турдылар; ÿренчиктер оны кöрöлö, улусты токтодып тургандар. 16 Jе Иисус балдарды Бойына кычырып алып, айтты: - Балдар Меге келгилеп турзын, олорды токтотпогор, нениҥ учун дезе, Кудайдыҥ Каандьҥы мындыйлардыйы эди. 17 Чынын айдадым слерге: кем кижи Кудайдыҥ Каандыгын бала чылап алынбаза, Ого кирип болбос. 18 - Быйанду Уредÿчи! Мöҥкÿ конокты энчи эдип аларга, нени эдейин? - деп, бийлердиҥ бирÿзи Иисустаҥ сурады. 19 Иисус ого айтты: - Мени быйанду деп не айдадыҥ? Кем де быйанду эмес, jаҥыс Кудай быйанду. 20 «Чайдам болбо, кижи öлтÿрбе, ууры этпе, тöгÿн керелебе, ада-энеҥди кÿндÿлеп jÿр» деген салымдарды сен билериҥ. 21 Бий: - Мыны ончозын jиит тужымнаҥ ала чек туткан эдим - деди. 22 Мыны угала, Иисус ого айтты: - Сеге база бир неме jетпей jат: не барыҥды садып ий, тÿреҥи улуска ÿлеп бер, теҥериде байлыкту болорыҥ; келип, Мени ээчи. 23 Jе байагы кижи мыны угала, кунуга берди: ол коркушту бай кижи болгон. 24 Иисус оныҥ кунугын кöрöлö, айтты: - Бай кижиге Кудайдыҥ Каандыгына кирерге кандый кÿч дейдигер! 25 Бай кижиге Кудай Каандыгына киреринеҥ, тööгö ийне ÿйдиниҥ öдöргö jеҥил. Мыны уккан улус айттылар: 26 - Айдарда, кем аргаданар аргалу? 27 - Улус эдип албазын, Кудай эдер аргалу - деп, Иисус каруузын jандырды. 28 Петр айтты: - Бат, бисте не барын артырып, Сени ээчиген эдибис. 29 Иисус олорго айтты: - Чынын айдадым слерге: айлы-jуртын, эмезе ада-энезин, эмезе ага-карындажын, эмезе алган эжин, эмезе бала-барказын Кудайдыҥ Каандыгына болуп артырала, 30 бу чакта чик-jок кöпти албаган кижи jок, келер Чакта дезе, - мöҥкÿ конокты. 31 Он эки ÿренчигин туура кычырып алып, Иисус айтты: - Бат бис Иерусалимди öрö чыгып отурыс. Кижи Уулы керегинде jарчылардыҥ ончо чийгени бÿдер. 32 Эйе, Оны кара jаҥдуларга берип ийгилеер, электеп-шооткылаар, базынгылаар, Ого тÿкÿргилеер, 33 Оны камчылагылаар, оноҥ öлтÿргилеп койор; jе ÿчинчи кÿнде Ол тирилер. 34 Уренчиктер мынаҥ нени де аайлабады; бу сöстöр олорго туйук болгон, олор айдылганын оҥдобогондор.

Сокор кижини jасканы

35 Иисус Иерихонго jууктап келерде, jолдыҥ кырында бир сокор кижи суранчыктап отурган; 36 jаныла кöп улус öдÿп jатканын угала, ол бу не атасы деп сурады. 37 Ого Назаретте jерлÿ Иисус öдÿп jат дедилер. 38 Айдарда, сокор кижи: - Давид уулы Иисус, меге буурсагын! - деп, кыйгыра берди. 39 Ичкертинде базып бараткан улус оны унчыктырбаста, ол там ары кыйгырды: - Давид уулы, меге буурсагын! 40 Иисус токтой тÿжÿп, «Оны Меге экелигер» деди. Сокор кижи Ого базып келерде, 41 - Сеге нени эдейин? Сеге не керек? - деп, оноҥ сурады. Ол айтты: - Бий, кöзим jарызын деп турум! 42 Иисус ого: - Кöзиҥ jарызын! - деди. - Бÿдÿп турганыҥ сени аргадап алды. 43 Сокор кижиниҥ кöзи ол бойынча jарый тÿшти; Кудайды алкап, ол Иисусты ээчий басты. Мыны кöрöлö, ончо улус Кудайга алкыш-быйан jетирдилер.

Иисус Закхей-эште

19:1 Иисус Иерихонго кирип, оныҥ ичиле базып бараткан. 2 Бу калада Закхей деп кижи jуртаган. Ол албанчылардыҥ бийи, бай кижи болгон. 3 Иисусты кем болгонын кöрöргö кÿÿнзеп, jе кыскачак сынду болуп, улус ажыра кöрÿп албай турган. 4 Айдарда озолой jÿгÿрип барала, Иисус jаныла öтсö, Оны кöрöргö, смоква агашка чыгып алды. 5 Иисус ол jерге jедип келеле, саҥ öрö кöрÿп, айтты: - Закхей, капшай тÿш! Мен бÿгÿн сениҥ айлыҥа тÿжер учурлу. 6 Закхей агаштаҥ капшай тÿжÿп келеле, Иисусты айлында сÿÿнчилÿ уткыды. 7 Оны кöрöлö, ончо улус Иисус кинчектÿ кижиниҥ айлына кирди деп, арбаныжып турдылар. 8 Закхей дезе туруп, Бийге айтты: - Бий! Jööжöмниҥ кабортозын тÿреҥилерге берейин, кемди кÿjÿреген болзом, тöрт катап кöп jандырып берейин. 9 Иисус айтты: - Бÿгÿн бу айылга аргадаш келди: бу да кижи Авраам уулы. 10 Кижи Уулы болзо, öчкöнди таап, аргадаарга келген. 11 Мыны уккан улуска Иисус база бир укаа сöс айтты. Ол Иерусалимге jуук болгон, оныҥ учун Кудайдыҥ Каандыгы удабас jедип келер деп, олор санангандар. 12 Иисус: - Каандык алып, кайра jанарга, укту-тöстÿ бир кижи ыраак ороонго атанып jаткан - деди. - 13 Он кулын алдырып алып, олорго он мöҥÿн акча берип, айткан: «Мен jанганчам, акчаны эбиртигер». 14 Jаҥыс jердиҥ улузы оны кöрбöс болгон, кийнинеҥ ары элчилер ийип, мынайда айтырдылар: «Ол бистиҥ кааныбыс болзын деп турганыс jок». 15 Jе ол каанныҥ ширеезин алала, jанып келген. Кем кандый кирелте ажанын сурап угарга, мöҥÿн берген кулдарын бойына кычырзын деп jакарган. 16 Бирÿзи келип, «Бийим, сениҥ мöҥÿниҥ он мöҥÿн экелди» - деген. 17 Каан ого айткан: «Jакшы, керсÿ кул! Аска бÿдÿмjилÿ болдыҥ, он каламды башкар». 18 Экинчи кул келип, «Бийим, сениҥ мöҥÿниҥ беш мöҥÿн экелди» - деген. 19 «Сен де беш каламды башкар» - деп, каан ого айткан. 20 Учинчизи келип, айткан: «Бийим, сениҥ мöҥÿниҥ бу, оны арчуулга тÿÿп, чеберлеп jÿрдим. 21 Кату кижи деп, сенеҥ айадым: салбаган немени - алатан эдиҥ, чачпаган немени - кезетен эдиҥ». 22 Каан ого айткан: «Бойыҥныҥ ок сöзиҥле сени jаргылаарым, jаман кул! Мени салбаган немени алатан, чачпаган немени кезетен кату кижи деп, сен билген эмейиҥ. 23 Айдарда, мöҥÿнимди не керек эбиртпедиҥ, мени jанып келеле, оны кирелтелÿ алзын деп?» 24 Оноҥ кожо jÿрген улуска jакарган: «Оныҥ мöҥÿнин алып, он мöҥÿндÿ кулымга беригер!» 25 «Бий, ондо тегин де он мöҥÿн бар» - дешкендер. 26 Каан олорго айткан: «Jе мен слерге айдып турум: кемде бар - ого база берилер, кемде jок - оныҥ барын да айрып алгылаар. 27 Мени каан болбозын деп jÿрген öштÿлеримди дезе, бери экелип, мениҥ алдымда öлтÿре сайыгар».

Иерусалимге киргени

28 Мыны айдала, Иисус Иерусалим öрö чыгып, оноҥ ары барды. 29 Елеон тууныҥ эдегинде турган Виффагия ла Вифанияга jууктап келерде, ÿренчиктердиҥ экÿзин ийип, 30 айтты: - Одоштой jуртка баргылагар; ого кирип, бир де кижи минбеген, буулап койгон эштектиҥ кулунын кöрÿп ийеригер; оны чечеле, бери экелигер. 31 Кем кижи слердеҥ: «Не керек чечип jадыгар?» - деп сураза, «Ол Бийге керек» - дегер. 32 Ийген ÿренчиктер барып, Оныҥ айтканыла, таап алдылар. 33 Кулун эштекти чечкилеп jадарда, «Эштекти не керек чечип jадаар?» - деп, ээлери сурады. 34 Уренчиктер: «Ол Бийге керек» - дедилер. 35 Эштекти экелеле, кийимдерин оныҥ белине арта салгылап, Иисусты ого миндирдилер. 36 Иисус jортуп барадарда, улус кийимдерин jолго jайып турдылар. 37 Елеон тууны тöмöн алган jолго jеткилеп келерде, Иисустыҥ кал-камык ÿренчиктери тыҥ ÿнденип, сÿÿнижип, кöргöн ончо кайкалдары учун Кудайды алкай бердилер: 38 - Бийдиҥ адында келеткен Каан алкалу болзын! Теҥериде энчÿ болзын, эҥ бийиктезине мак! 39 Улустыҥ ортозынаҥ кезик фарисейлер айттылар: - Уредÿчи, ÿренчиктериҥди токтот. 40 Иисус каруузын jандырды: - Айдып турум слерге: олор унчукпай барза, таштар кыйгырыжып чыгар. 41 Калага jууктап келеле, ого кöрöлö ыйлап, 42 айтты: - О, энчÿ сеге нени экелерин ого jÿк бу кÿнде билген болзоҥ кайдат! Jе оны бÿгÿн сениҥ кöзиҥ кöрÿп болбос. 43 Сениҥ кÿндериҥ jедип, öштÿлериҥ сени эбире казыктар кадаар, курчап алар, ончо jанынаҥ кыстап келер. 44 Кудай сеге келип jÿрген öйди таныбаганыҥ учун, сени jемирип, балдарыҥды сенде кырып салгылаар, сенде таш ÿстине таш та калдырбас.

Öргööни арутаганы

45 Иисус Öргööгö киреле, садыжып турган улусты сÿрÿп, 46 олорго айдып турды: - «Мениҥ айлым мÿргÿ айылы болор» деп чийилген, слер дезе, оны тонокчылардыҥ куй-тажы эдип алдыгар! 47 Иисус кÿнÿҥ сайын Öргööдö ÿредер болды. Улу абыстар, бичикчилер ле калыктыҥ башчылары Оны öлтÿрер эбин бедиреп турдылар. 48 Jе оны канайда тудуп öлтÿрерин олор билбей тургандар, нениҥ учун дезе, калык Иисусты угуп, Оноҥ айрылбас болгон.

Иисустыҥ jакы

20:1 Иисус Öргööдö калыкты ÿредип, Сÿÿнчилÿ Jар jарлап jÿрген кÿндердиҥ бирÿзинде улу абыстар, бичикчилер улуларла кожо базып келеле, 2 Ого айттылар: - Мыны ончозын кандый jаҥыҥла эдип турганыҥды, андый jаҥды Сеге кем бергенин, биске айт. 3 Иисус олорго каруузын jандырды: - Мен де слердеҥ бир неме сурап угайын, Меге айдыгар: 4 Иоанныҥ крестеп jÿргени теҥеридеҥ болгон бо эмезе улустаҥ болгон бо? 5 Олор бойлоры ортодо табышты: «„Теҥеридеҥ болгон" дегей эди, jе „Иоаннга не бÿтпедигер?" - деер. 6 „Улустаҥ болгон" дезебис, калык бисти ташла шыбалап öлтÿрер, нениҥ учун дезе, Иоанн jарчы болгонына бÿткилеп jат». 7 «Кайдаҥ болгонын билбезибис» - дештилер. 8 Иисус олорго айтты: - Айдарда, мыны ончозын кандый jаҥымла эдип турганымды Мен де слерге айтпазым.

Jалданган ишчилер керегинде

9 Оноҥ Иисус калыкка мындый укаа сöс айтты: - Бир кижи виноград тарыган. Оны jер ишчилерге берип, бойы узакка атана берген. 10 Кат-jиилек терер öй jедип келерде, виноградтыҥ jиилегинеҥ ого берзин деп, ишчилерге кулын ийген. Jе ийген кулды олор токпоктойло, как куруга jандырган. 11 Виноград ээзи öскö кулын ийген, jе онызын да токпоктоп, уйатка тÿжÿреле, база как куру jандыргандар. 12 Учинчи кулын ийерде, оны балулап, сÿрÿп ийгендер. 13 Айдарда, виноград ээзи айткан: «Эм канайдайын? Карузыган уулымды ийедим, айса болзо, оноҥ уйалгылаар». 14 Jе ишчилер байагы уулды кöрöлö, бой-бойлоры ортодо шÿÿшкендер: «Адазыньпг энчизи калар уул бу; оны öлтÿрип салалы, энчи бистийи болор». 15 Уулды виноградту садтыҥ тыштына чыгара таштап, öлтÿрип койгондор. Виноград ээзи эм олорды канайдар деп туругар? 16 Келип, ишчилерди öлтÿрер, виноградты дезе, öскö улуска берип ийер. Мыны угуп турган улус: - Андый неме болбос! - дештилер. 17 Иисус олорго чике кöрÿп, айтты: - Айдарда, «Тура тудаачылар jектеген таш - булуҥныҥ баш тажы болуп калды» - деп чийген сöс не сöс болотон? 18 Ол ташка jыгылганы - оодылар; кемниҥ ÿстине ол тÿшсе, оны jоголтып салар. 19 Улу абыстар ла бичикчилер бу укаа сöстö олор керегинде айдылганын билип ийдилер; Иисусты тудуп аларга сананала, jе калыктаҥ коркуй бердилер.

Калан керегинде сурак

20 Улу абыстар ла бичикчилер Иисусты кетежип, Ого бир канча улус ийдилер. Олор ак-чек улус болуп кöрÿнип, башкаручыныҥ jаҥына Иисусты табыштырып берерге, Оныҥ сöзинеҥ jик табар учурлу болгон. 21 Ийген улус барып, Иисуска айттылар: - Уредÿчи! Бис билерис, Сениҥ айткан сöзиҥ ле ÿредÿҥ чындык болгонын, улусты ылгаштырбай, Кудайдыҥ jолына чын ÿредип турганыҥды. 22 Бис каганга калан тöлööр учурлу ба, айса jок по? 23 Иисус олордыҥ меке-сÿмезин билип, айтты: 24 - [Мени не ченеп туругар?] Меге динарий акча кöргÿзигер: ондо кемниҥ сÿри ле ады-jолы базылган? Олор каганныҥ дедилер. 25 Иисус айтты: - Анайдарда, кагандыйын - каганга беригер, Кудайдыйын дезе - Кудайга. 26 Калык алдында Иисустыҥ сöзинеҥ олор jик таап болбодылар; берген каруузына кайкажып, унчукпай тура калдылар.

Тирилиш керегинде сурак

27 Öлгöн улус тирилбес дежетен бир кезик саддукейлер келип, Иисустаҥ сурадылар: 28 - Уредÿчи! Моисей биске чийген: «Бала азырабаган эр öлгöжин, карындажы jеҥезин алып, агазыныҥ угын улалтсын». 29 Jети карындаш кижи болтон. Бирÿзи айылду бололо, бала азырабай, jада калган. 30-31 Уй кижини экинчи, ÿчинчи карын-дажы алган, анайып jетилези алып, бала-барка азырабай, ончолоры jада калгандар. 32 Оноҥ ÿй кижи де jада калган. 33 Эм айдарда, тирилгежин, бу jети эрдиҥ кажызыныҥ эмегени болор ол? Ол келинле jетилези jуртаган ийне! 34 Иисус олорго каруузын jандырды: - Бу чактыҥ улузы кижи алып, кижиге качып jадылар. 35 Jе öлöлö тирилерге, келер öйдö jÿрерге jедип алган jарамык улус кижи де албас, кижиге де качпас; 36 öлгÿлеп те болбос, ангелдер чилеп jÿргÿлеер. Олор Кудайдыҥ балдары болгылаар - тиргискен балдар. 37 Кÿйÿп jалбыраган тайа-jыраа керегинде куучынында Моисей Бийди Авраам Кудайы, Исаак Кудайы ла Иаков Кудайы деп адап, öлгöн улус тирилер деп кöргÿскен. 38 Jе Кудай - Ол öлгöндöрдиҥ Кудайы эмес, Ол эзен jÿргендердиҥ Кудайы. Кудайга ончо улус тирÿ. 39 Кезик бичикчилер: - Jакшы айттыҥ, Уредÿчи! - дештилер. 40 Иисустаҥ кем де, нени де сураарга тидинбеди.

Бий кем?

41 Иисус дезе, олорго айтты: - Улус нениҥ учун Христосты Давид уулы дешкилейт? 42 Сарын бичигинде Давид бойы мынайда айткан эмес беди: «Бий Бийиме айткан: 43 „Öштÿлериҥди будыҥныҥ jанына салып бербейинчем, оҥыма отур"». 44 Айдарда, Давид бойы Христосты Бий деп адап турганда, Ол канайып оныҥ уулы болотон? 45 Ончо калык угуп турарда, Иисус ÿренчиктерине айтты: 46 - Узун эдектÿ кеп кийип базып jÿрерин сÿÿр бичикчилердий болбоско бойыгарды тудуныгар. Олор оромдордо ло тепсеҥдерде улуска уткударын, синагогаларда ичкери алдында, той-jыргалда тöрдö отурарын сÿÿгилейт. 47 Булар, тул келиндердиҥ ар-jööжöзин ÿптеп jип, улус кöзинче удаан мÿргÿп турган бойлоры, там буруга калгылаар!

Тул келинник сыйы

21:1 Иисус кöрзö, Öргööдöги акча-jööжöниҥ кайырчагына бай улус сый салгылап турды. 2 Анайда ок оноор эки оок jес акча тÿжÿрип ийген тул келинди кöрöлö, 3 Ол айтты: - Чынын айдадым слерге: бу jокту тул келин ончозынаҥ кöп салды. 4 Сый эдип, ончолоры артыкташканын салган, бу келин дезе, андый jокту бойы, jÿрерге керектÿ калганчызын салган.

Христостык келетени керегинде

5 Кезик ÿренчиктер Öргööни туткан кеен-jараш таштар, Оны кееркеткен баалу-чуулу сыйлар керегинде эрмектежип турарда, Иисус айтты: 6 - Слердиҥ мында кöрÿп турганыгардаҥ таш ÿстине таш калбас кÿндер келер; ончозы jемирилер. 7 - Уредÿчи, бу качан болор? - деп, Оноҥ сурадылар. - Мыныҥ темдеги кандый болор? 8 Иисус айтты: - Чеберленигер, бойыгарды аскырбагар. Кöп улус Мениҥ адымды аданган келер, «Мен - Христос!» эмезе «Öй jуук!» деер. Олорды ээчип барбагар! 9 Jуу-чак, тÿймеендер болуп турганын угар болзогор, чочыбагар: бу озо болор учурлу, jе бу эм- тура учы эмес. 10 Иисус оноҥ айтты: - Калык калыкка, каандык каандыкка удура туруп чыгар; 11 тыҥ jерсилкиништер, кезектей ачана-торо, оору-jобол, коркымчылу немелер болор, теҥеридеҥ улу билдилер кöрÿнер. 12 Jе озо баштап, Мениҥ адым учун слерди истежип тудар, сÿрер, синагогаларга ла тÿрмелерге табыштырар, каандардыҥ, бийлердиҥ алдына апарып тургускылаар; 13 бу слерге кереге болор. 14 Jÿрегерге салып алыгар: бойыбысты корулап, нени айдарыбыс деп, кÿн-эртеде шÿÿбегер: 15 Мен слерге айдатан сöс лö ойгорлык берерим. Öштÿлеригердиҥ бирÿзи де ого удурлажып та, удура сöс тö айдып болбос. 16 Слерди керек дезе ада-энелеригер, ага-карындаштарыгар, тöрöгöндöригер, наjыларыгар öгнтÿлерге садып ийер, кезигерди дезе, öлтÿргилеп койор. 17 Мениҥ адым учун слерди ончо улус jаман кöрöр. 18 Jе бажыгардаҥ чарак кыл да jылыйып калбас. 19 Чыдамкай болугар - тыныгарды аргадап аларыгар. 20 Иерусалимди черÿ курчап алганын кöрöр болзогор, оныҥ ээн калар öйи jууктап келди деп билигер. 21 Ол тужында Иудейде jÿргендер тууларга качсын; Иерусалимде jÿрген улус оноҥ чыгып барзын; оныҥ тыштында jÿрген улус ого кирбезин. 22 Нениҥ учун дезе, бу каруузына тургузатан, чийилгени ончозы бÿдетен кÿндер болор. 23 Ол кÿндерде барлу келиндерге, бала эмискендерге ачу-корон! Jердиҥ ÿстине улу тÿбек тÿжер, бу калыкка Кудай чугулданар. 24 Кезиги кылыш мизинеҥ öлгÿлеер, кезигин öскö калыктарга олjого апаргылаар: кара jаҥдулар, бойыныҥ öйи тÿгенгенче, Иерусалимди будыла тепсегилеер. 25 Кÿнде, айда, jылдыстарда билдилер болор, талай кÿÿлеп, толкулар шуултынаҥ jердеги калыктар тÿймей берер, алаҥ кайкап калган jÿрер. 26 Jерге келип jатканды сакып, оноҥ коркуп, öлгÿлеер, нениҥ учун дезе, теҥериниҥ кÿчтери чайкалар. 27 Ол тушта теҥериниҥ булудында Кижи Уулы кöп кÿчтÿ, улу макту келеткенин кöргÿлеер. 28 Мыныҥ ончозы бÿдÿп баштаза, сыныгарды тÿзедшер, бажыгарды кöдÿригер, - jайымыгар jууктап келеткени ол болор - дейле, 29 Иисус олорго укаа сöс айтты: - Смоквага ла ончо агаштарга кöрÿгер: 30 бÿри jайылза, слер оны кöрÿп, jай jуук деп, бойыгар билип jадыгар. 31 Анайып ок слер де, бу бÿдÿп турганын кöрöр болзогор, Кудайдыҥ Каандыгы jуук деп билигер. 32 Чынын айдадым слерге: мыныҥ ончозы болгончо, бу ÿйе артып калар. 33 Jер ле теҥери jоголор, Мениҥ сöстöрим - артып калар! 34-35 Бойыгарды тудуныгар, jÿрегерди калаҥы ла эзирик болоры, jадын-jÿрÿмниҥ сурактары олjолоп jоботпозын. Оноҥ башка ол Кÿн jер-ÿстинде jаткандардыҥ ончозына сакыбаган jанынаҥ келер ле олорго тузак ошкош болор. 36 Келип jаткан ончо тÿбектеҥ кыйып öдöргö, Кижи Уулыныҥ алдына турарга, jаантайын ойгу болуп, мÿргÿп jÿрÿгер. 37 Иисус тÿште Öргööдö ÿреткен; тÿндерди дезе, чыгып, Елеон тууда öткÿрип турган. 38 Улус Оны угарга, эртен турадаҥ ала Öргööгö келип тургандар.

Иуданык садынганы

22:1 Ачыбаган калаш jийтен, Пасха дейтен байрам jууктап JшJшш келеткен; 2 улу абыстар ла бичикчилер Иисусты тудуп öлтÿрер эбин бедиреп, jе калыктаҥ айап тургандар. 3 Jе бат, он экиниҥ бирÿзи Иуда Искариоттыҥ öзöк-буурына кöрмöс кирди. 4 Ол улу абыстарга, бийлерге барып, Иисусты олорго канайда берип ийерин эрмектешти. 5 Олор сÿÿнип, Иудага акча берер болдылар. 6 Иуда jöпсинип, улус jок тушта Иисусты олорго берип ийерге, эптÿ учурал сакып jÿрди.

Пасханык ажын jигени

7 Ачыбаган калаштыҥ кÿни jедип келди. Бу кÿнде пасханыҥ кураанын сойотон божон. 8 Иисус Петр ла Иоаннды ийип, - Барып, биске пасханы jизин деп белетегер - деди. 9 - Бисти кайда белетезин деп туруҥ? - олор сурадылар. 10 Иисус олорго айтты: - Бат, калага кирип jатсагар, слерге суулу jыракы апараткан кижи туштаар; оны ээчий барыгар. Кажы айылга кирзе, 11 оныҥ ээзине айдыгар: «Уренчиктеримле кожо пасха jийтен кып кажызы деп, Уредÿчи сурап jат». 12 Ол слерге jуунадып койгон ÿстиндеги кыпты кöргÿзер; ондо белетегер. 13 Уренчиктер барып, Иисустыҥ айтканынча, байагы айылды таап, пасханы белетеп койдылар. 14 Öй jедип келерде, Иисус кыйын jатты, Оныла кожо апос-толдор. 15 Иисус олорго айтты: - Кыйналарымнаҥ озо бу пасханы слерле кожо jиирге тыҥ санаган эдим! 16 Айдып турум слерге: бу пасха Кудай Каандыгында болгончо, Мен оноҥ база jибезим. 17 Айак алып, алкыш jетиреле, айтты: - Мыны алып, бойыгар ортодо ичип эбиртигер. 18 Айдып турум слерге: Кудай Каандыгы келбегенче, виноград jиилегинеҥ база ичпезим. 19 Калаш алып, алкыш jетирди, сындырала, ÿренчиктерине берип, айтты: - Бу слер учун берилип jаткан Мениҥ Эди-Каным; Мени эске алынып, анайда эдип jÿрÿгер. 20 Аш jиген кийнинде айакты база анайда берип, айтты: - Бу айак - слер учун тöгÿлип турган Мениҥ Канымдагы jаҥы кереес. 21 Jе бат, Мени садып турганныҥ колы Мениле кожо остолдо. 22 Эйе, Кижи Уулы темдектеп салган jолло барып jат; jе Оны садып jаткан кижиге ачу-корон! 23 - Бистиҥ кемибис оны эдер? - деп,.олор бой-бойлорынаҥ суража бердилер. 24 Уренчиктер сöс блаашкылап, «Кемибис улу-jаан деп бодолор?» - дештилер. 25 Jе Иисус олорго айтты: - Кара jаҥдулардыҥ каандары калыгын бийлейдилер, баш-чылары дезе, бойлорын быйан jетиреечилер дейдилер. 26 Jе слердиҥ ортогордо ондый неме болбозын! Кемшер улу-jаан, кичÿдий болзын, кемигер jамылу, jалчыдый болзын. 27 Кемизи jаан: кыйын jатканы ба, айса jалчы чылап, оны кичеегени бе? Кыйын jатканы эмес пе? Мен дезе, слердиҥ ортогордо - jалчыдый! 28 Мениле кожо слер ончо ченелтелерди öттшер. 29 Адам Меге кереестегени чилеп, Мен де слерге Каандык кереестеп турум. 30 Мениҥ Каандыгымда Мениҥ ажы-тузымды ичип-jииригер, ширеелерге отурып, Израильдиҥ он эки угын jаргылаарыгар. 31 Бий оноҥ айтты: - Симон, Симон! Бат, кöрмöс слерди буудай чылап сееп койсын деп сураган. 32 Jе Мен сен учун мÿргÿдим, бÿдÿп турганыҥ jылыйбазын деп; Меге ойто келзеҥ, карындаштарыҥныҥ бÿдÿп турганын тыҥыт. 33 Петр: - Бий! - деди. - Сениле кожо мен тÿрмеге де отурарга, öлöргö дö белен! 34 Jе Иисус: - Айдып турум сеге, Петр: бÿгÿн пöтÿк эткелекте, Мени билбезим деп айдып, Менеҥ ÿч катап jана тÿжериҥ - дейле, 35 ÿренчиктерине айтты: - Мен слерди таар да, акча да, öдÿк те jок ийеримде, немедеҥ тутадыгар ба? Олор: «Недеҥ де тутабадыс» - дедилер. 36 Айдарда, Иисус айтты: - Jе эмди, таарлу кижи, онызын алзын, акчазын да алзын; кемде jок, кийимин садып ийип, кылыш садып алзын. 37 Айдып турум слерге: «Каршучылдардыҥ тоозына коштылар» деп, Агару Бичикте Мен керегинде айдылганы бÿдер учурлу. Эйе, Мен керегинде айдылганы ончозы бÿдÿп, учына jедип барадыры. 38 Уренчиктер: «Бий, бат мында эки кылыш» - деерде, Иисус: «Jедер» - деди.

Елеон тууда мÿргÿгени

39 Иисус чыгып, Бойыныҥ jаҥынча, Елеон тууга барды; ÿренчиктери де Оны ээчий бардылар. 40 Jедер jерге jедип, Иисус олорго айтты: - Ченелтеге кирбеске, мÿргÿгер! 41 Бойы дезе, таш мергези кире ырайла, тизеленип, мÿргÿй берди: 42 - Ада! Кÿÿниҥ бар болзо, бу айакты Менеҥ jастыктыр; jе Мениҥ табым болбозын, Сенийи болзын! 43 [Теҥеридеҥ Ого ангел кöрÿнип, Оныҥ тын-санаазын сергидип турды. 44 Иисус тартыжуда болуп, там кичеенип мÿргÿди; Оныҥ тери jерге тамчылап турган кандый болды.] 45 Мÿргÿп божойло, ÿренчиктерине келзе, олор, кунуккан бойлоры, уйуктап jаттылар. 46 - Не уйуктап jаткылараар? - деп, Иисус олордоҥ сурады. - Туруп, ченелтеге кирбеске, мÿргÿгер!

Иисусты тутканы

47 Иисус мынайда айдып турганча, кöп улус кöрÿнип келди. Он экиниҥ бирÿзи Иуда дейтени, олорды озолоп келетти; Иисусты окшоп ийерге, Ого jууктай басты. 48 Иисус ого айтты: - Иуда! Кижи Уулын окшошло садып туруҥ ба? 49 Уренчиктер керектиҥ аайын кöрÿп, айттылар: - Бий, кылышла jаҥыйлы ба? 50 Олордыҥ бирÿзи кылыжын суура тартып, Улу абыстыҥ кулыныҥ оҥ кулагын кезе чапты. 51 Иисус: «Болор, токтогор!» - дейле, кулдыҥ кулагына колыла тийип, jазып ийди. 52 Оны тударга келген улу абыстарга, Öргööниҥ каруулыныҥ бийле-рине ле улуларга дезе, мынайда айтты: - Мен тонокчы эмезим, Мени тударга кылышту ла казыкту не келдигер? 53 Кÿнÿҥ сайын слерле кожо Öргööдö болдым, слер Меге кол кöдÿрбедигер; jе эмди - слердиҥ öйигер ле карачкыныҥ jаҥы. 54 Иисусты тудуп алып апардылар; Улу абыстыҥ айлына экелдилер. Петр дезе, ыраагыла ээчий барган. 55 Кÿрентиктиҥ ортозына от салып, кожо отургылай берерде, Петр база олор-дыҥ аразында отурган. 56 Бир jалчы ÿй кижи Петрды оттыҥ jанында отурганын кöрÿп, лаптап аjыктайла, айтты: - Бу да Оныла кожо болгон! 57 Jе Петр Оноҥ jана тÿжÿп: - Мен Оны билбезим, ÿй кижи - деди. 58 Бир эмеш болордо, база бирÿзи оны кöрÿп, «Сен де олордыйы» - деди. Jе Петр бу кижиге «jок» деди. 59 Бир саат кире öйдиҥ бажында база кандый да кижи бÿдÿмjилÿ айда берди: - Бу да Оныла кожо болгоны чын; бу Галилейдиҥ кижизи. 60 Jе Петр байагы кижиге: - Нени айдып турганыҥды билбезим - деди. Ол мынайда айдып турганча, пöтÿк этти. 61 Бий кайа баштанып, Петр jаар кöрди; «Пöтÿк эткелекте, Менеҥ ÿч катап jана тÿжериҥ» - деп, Бийдиҥ ого айтканын Петр эске алды. 62 Кÿрентиктеҥ чыгала, öксöп ыйлай берди. 63 Иисусты тудуп турган улус Оны базынып, согуп турдылар; 64 jÿзин бöктöйлö, сурап турдылар: - Jарчы болзоҥ, Сени кем сокты, таны. 65 Иисуска öскö дö кöп jаман сöстöр айттылар. 66 Тÿш боло берерде, калыктыҥ улулары, улу абыстар, бичикчилер jуулыжып, Иисусты бойлорыныҥ Оток-Кÿреезине альга келдилер. 67 - Сен Христос болзоҥ, биске айт - деп, олор сурадылар. Иисус каруузын jандырды: - Слерге айтсам, бÿтпезигер; 68 суразам, каруузын айтпазыгар. 69 Эмдидеҥ ала Кижи Уулы Кудайдыҥ ширеезиниҥ оҥында отурар. 70 - Айдарда, Сен - Кудайдыҥ Уулы ба? - деп, ончолоры сурады. Иисус каруузын jандырды: - Слер айдып туругар, Мен деп. 71 Олор: - Биске база кандый кере керек? - дештилер. - Бис мыны бойыбыс Оныҥ Бойынаҥ уктыбыс.

Иисус Пилаттык ла Иродтык алдында

23:1 Оноҥ ончолоры öрö туруп, Иисусты Пилатка алып барала, 2 Оны бурулай бердилер: - Бу кижи бистиҥ калыктыҥ кÿÿн-санаазын булгап, каганга калан тöлööргö буудактап, Бойын Христос Каан деп аданып jат. 3 - Сен иудейлер кааны ба? - деп, Пилат Иисустаҥ сурады. Иисус каруу jандырып, - Онойдо сен айтпай кайттыҥ - деди. 4 Пилат улу абыстарга ла калыкка айтты: - Бу кижидеҥ бир де буру таппай турум. 5 Jе олор jана баспай, айдып турдылар: - Ол Иудей ичинде ÿредип, улусты тÿйметкен. Галилейде баштаган эди, эмди бери келгени бу. 6 Пилат Галилей дегенин угала, «Бу Галилейдиҥ кижизи бе?» - деп сурады. 7 Ол Иродтыҥ jеринеҥ деп билеле, Оны Иродко ийди; Ирод бу кÿндерде бойы да Иерусалимде болгон. 8 Иисусты кöрöлö, Ирод сÿрекей сÿÿнди: Оны узактаҥ бери кöрöр кÿÿндÿ болгон. Иисус керегинде кöпти уккан, Оныҥ кандый бир кайкалын кöрöр болорым ба деп, иженип jÿрген. 9 Иисуска кöп сурактар берди; jе бирÿзине де каруу албады. 10 Улу абыстар ла бичикчилер туруп, Иисусты тыҥыда бурулап турдылар. 11 Ирод бойыныҥ jуучылдарыла Иисусты базынала, Ого jарык кеп катанчыктайла, Пилатка кайра ийди. 12 Мынаҥ озо öштöжип jÿрген Пилат ла Ирод ол кÿннеҥ ала наjылажып алдылар. 13 Пилат дезе, улу абыстарды, бийлерди ле калыкты jууйла, 14 олорго айтты: - Калыкты булгап jат деп, слер бу кижини меге экелдигер; jе бат, слердиҥ кöзигерче шиҥжÿлеп, бурулап айткан сöстöрööрди керелеген немени бу кижидеҥ таппадым. 15 Ирод то Оноҥ буру таппай, биске кайра ийген. Айдарда, Ол öлÿмге тургадый неме этпеген. 16 Мен Оны каруузына тургузала, божодып ийерим. 17 [Пилат байрам кÿнге кижендÿлердиҥ бирÿзин олорго божодор учурлу божон.] 18 Jе ончозы кыйгырыжа берди: - Ол öлзин! Биске Варавваны божот! 19 Варавва дезе, калада тÿймеен божоны ла кижи öжöни учун тÿрмелеткен. 20 Пилат Иисусты божодып ийерге, ÿнин бийиктедип, калыкка катап баштанды. 21 Jе олор: - Оны керип кой! Керип кой! - деп, кыйгырыжьш турдылар. Пилат олорго ÿчинчи катап айтты: 22 - Бу кижи кандый каршу эткен? Мен Оны öлтÿрер буру таппадым; каруузына тургузала, божодып ийедим. 23 Jе олор Иисусты кере тартсын деп некеп, там ла там тыҥыда кыйгырыжып турдылар. 24 Пилат олордыҥ некелтезин бÿдÿрер деп нгÿÿди. 25 Тÿймеен божоны ла кижи öжöни учун тÿрмеде отурган кижини олордыҥ сураганыла божодып, Иисусты дезе, олордыҥ табына берип ийди.

Керигени

26 Иисусты алып бардылар. Jалаҥда jÿреле jанып келеткен Киринейдиҥ Симон деп кижизин тудала, Иисустыҥ кийнинеҥ апарзын деп, керÿ агашты ого jÿктендирип бердилер. 27 Иисусты ээчий ал-тÿмен улус, база ыйлашкан-сыкташкан келиндер барып jаттылар. 28 Иисус булар jаар бурулып, айтты: - Иерусалим кыстары, Мен учун ыйлашпагар; оныҥ ордына бойыгар, бала-баркагар учун ыйлажыгар. 29 «Бала таппастар, бала таппагандар, эмчегин эмиспегендер кежиктÿ!» деп айдар кÿндер jедип келедири. 30 Ол тушта тууларды: «Устибиске аҥта-рылыгар!» - деп, тöҥ-кырлаҥдарды: «Бисти кöмÿп салыгар!» - деп, айдып тура бергилеер. 31 Jажарып турган агашка анайда эдип турганда, кургак агашла не болор? 32 Иисусла кожо кыйнап öлтÿрерге эки тонокчыны апаргандар. 33 Куу-Баш деген jерге jедип, Иисусты керип койдылар; Оныла кожо эки тонокчыны база кере тарттылар - бирÿзин оҥ jанына, экинчизин - сол. 34 [Иисус дезе, айтты: - Ада! Олордыҥ jаманын таштап сал. Олор нени эдип тургандарын билбей jадылар!] Шеребей чачып, Оныҥ кийимин бойлоры ортодо ÿлежип алдылар. 35 Калык кöрÿп турган, бийлер Иисусты база шоодып тургандар: - Öскö улусты аргадап jÿрген эди, Ол Христос, Кудайдыҥ талдап алганы болзо, Бойын Бойы аргадап алзын! 36 Jуучылдар Оны база электеп, базып келеле, кымыскы туттурып, 37 - Сен иудейлер кааны болзоҥ, Бойыҥды Бойыҥ аргадап ал! - дежип тургандар. 38 Иисустыҥ ÿсти орто «Бу - иудейлер кааны» деп грек, рим ле еврей сöстöрлÿ бичик илдилер. 39 Керидип койгон тонокчылардыҥ бирÿзи Иисусты jамандап, айдып турды: - Сен Христос болзоҥ, Бойыҥды ла бисти аргада! 40 Экинчизи оны токтодып: - Кудайдаҥ коркыбайдыҥ ба? Сен база анайып ок jаргылаткан эмес бедиҥ? 41 Бисти чын jаргылаган, эткен керектериске турарын алып jадыбыс; бу кижи дезе, бир де jаман неме этпеген - дейле, 42 Иисуска айтты: - Каандыгыҥа келзеҥ, мени эске ал, Иисус! 43 Иисус ого айтты: - Чынын айдадым сеге: бÿгÿн ок Мениле кожо райда болорыҥ.

Иисустык öлÿми

44 Тал тÿш кирезинде тÿштиҥ ÿч саадына jетире ончо jерге карачкы тÿшкен: 45 кÿн jоголо берген. Öргööдöги кöжöгö ортозынаҥ jыртылган. 46 Иисус тыҥ ÿнденип, - Ада! Сениҥ колыҥа тынымды берип турум! - дейле, тыны ÿзÿле берди. 47 Jÿс бажы мыны кöрöлö, Кудайды алкап, айтты: - Бу Кижи чындаптаҥ акту болгон! 48 Бу кöрÿге jуулган улус не болгонын кöрöлö, тöштöрине согунып, jангылап турды. 49 Иисусты билген ончо улус, база Галилейдеҥ бери Оны ээчип келген ÿй улус, ыраагынаҥ кöрÿп тургандар.

Иисустыҥ мöҥкÿзин кöдÿргени

50-51 Иудейдиҥ Аримафей калазынаҥ Иосиф деп кижи болгон. Ол, Кудай Каандыгын сакып jÿрген керсÿ ле ак-чек кижи бойы, Оток-Кÿрееге кирип те турган болзо, оныҥ jöбин jаратпай турган. 52 Jе бат, ол Пилатка келеле, Иисустыҥ сööгин сурады; 53 сööкти тÿжÿреле, кеден бöскö ороп, jылым кайада ойгон межикке апарып салды. Ондо кемниҥ де сööги jуулгалак болгон. 54 Пятница кÿн болгон, суббот кÿн келип jаткан. 55 Галилейдеҥ Иисусла кожо келген ÿй улус Иосифтиҥ кийнинеҥ барып, Иисустыҥ сööгин кайда, канайып тутканын кöрÿп алдылар. 56 Jангылап келеле, jараш jытту немелер ле сÿркÿш белетеп, салымла суббот кÿнде амырадылар.

Тирилгени

24:1 Неделениҥ баштамы кÿнинде эрте таҥда, белетеп алган jараш jытту немелерин алганча, ÿй улус межикке келдилер. 2 Межиктиҥ тажы аҥтарылып калган jатты. 3 Ичине кирип барала, Бий Иисустыҥ сööгин таппадылар. 4 Кайкап калган тургулаарда, jе бат, олордыҥ алдына jылтырууш кийимдÿ эки эр тура тÿшти. 5 Олор коркуганына jабыс эҥчейип ийерде, эрлер айттылар: - Тирÿ кижини öлгöн улус ортозынаҥ не бедиреп туругар? 6 Ол мында jок, тирилип калган. Туку Галилейде jÿрерде, слерге Ол нени айтканын эске алынып ийзегер: 7 «Кижи Уулы кинчектÿ улустыҥ колына берилип, кере тартырар, ÿчинчи кÿнде дезе, тирилип турар». 8 Иисустыҥ айткан сöстöри олордыҥ санаазына кирип келди. 9 Межиктеҥ бурулып, он бир ÿренчикке ле арткан да улуска тил jетирдилер. 10 Олор Магдалина Мария, Иоанна, Иоаковтыҥ энези Мария болгондор. Олорло кожо болгон öскö дö ÿй улус, апостолдорго анайып ок айдып турдылар. 11 Уй улуска кемизи де бÿтпеди, олор мыны сананып тапкан неме дештилер. 12 Jе Петр туруп, межик jаар jÿгÿрди. Оныҥ ичине карап, сööкти оройтон кеден бöстöҥ öскö неме кöрбöди. Не болгонын бойында кайкап, кайра басты.

Эммаус jаар jолдо

13 Ол ло кÿн ÿренчиктердиҥ экÿзи Иерусалимнеҥ он беристе киреде турган Эммаус деп jурт jаар барадып, 14 не болгонын ончозын эрмектежип тургандар. 15 Олор эрмектежип, бойлоры ортодо шÿÿшкилеп турарда, Иисус jууктап келип, олорло кожо басты; 16 jе олордыҥ кöстöри бöктÿдий болуп, Иисусты таныбадылар. 17 - Jолдо нени шÿÿжип барадыгар? - деп, Иисус олордоҥ сурады. Олор токтой тÿштилер, чырайлары бÿркÿк болгон. 18 Олордыҥ бирÿзи, Клеопа дегени, айтты: - Бу кÿндерде Иерусалимде не болгонын ого келген улустаҥ jаҥыс сен билбес болдыҥ ба? 19 - Ондо не болгон? - деп, Иисус сурады. Олор айттылар: - Бис Назаретте jерлÿ Иисусла не болгонын айдадыс. Ол Кудайдыҥ да, ончо улустыҥ да алдында сöстö лö керекте кÿчтÿзин кöргÿскен jарчы болгон. 20 Jе бистиҥ улу абыстарыс ла бийлерис Оны öлтÿрер эдип jаргылайла, керип койгондор. 21 Израильди jайымдаары Ол деп, бис иженген эдибис. Jе бат, бу керектиҥ болгоны ÿчинчи кÿн барып jат. 22 Бир кезик ÿй улузыс бисти кайкатты. Олор таҥ алдында межикке барала, 23 Оныҥ сööгин таппай, биске келип, айткандар: «Бистерге ангелдер кöрÿнди, олор Иисусты тирилип калган дешти». 24 Айдарда, бистиҥ улустыҥ кезиги межикке барып кöрöрдö, ÿй улустыҥ айтканы чын болуп калган, jе Оныҥ Бойын кöрбöгöндöр. 25 Иисус ÿренчиктерине айтты: - О сананбастар, jарчылар айткан сöстöргö бÿдерге, оны jÿрегеерле оҥдоорго бачымдабайдыгар. 26 Бойыныҥ магына jедерге, Христос бу ончо шыраны öтпöс учурлу болгон бо? 27 Моисейдеҥ ле ончо jарчылардаҥ баштайла, Ол Агару Бичикте Бойы керегинде айдылганын jартады. 28 Олор Эммаус jуртка jууктап келерде, Иисус оноҥ ары бараачыҥ болды. 29 Jе ÿренчиктер Оны токтодып, - Эҥир кирип барадыры, бисле кожо артып кал - деп, сурап турдылар. Иисус кирип, олорло кожо артып калды. 30 Олорло кожо кыйын jадып, Иисус калашты алып алкады, сындырала, ÿренчиктерге берди. 31 Олордыҥ кöстöри ачылып, Иисусты танып ийдилер; jе Ол ÿренчиктерине кöрÿнбес боло берди. 32 Уренчиктер бой-бойлорына айдыштылар: - Jолдо Ол бисле эрмектежип, Агару Бичикти jартаарда, кöксибисте jÿректерис кÿйбеген беди? 33 Олор бу бойынча туруп, Иерусалимге бурулдылар. Анда он бир апостолды ла олорло кожо jÿрген улусты таап алдылар. 34 Уренчиктер айттылар: - Бий тирилгени чын, Ол Симонго кöрÿнген. 35 Оноҥ байагы эки ÿренчик jолдо не болгонын, калаш сындырып jадарда, Иисусты канайда таныганын айттылар.

Тирилген Иисустык кöрÿнгени

36 Олор мынайда айдып турганча, Иисус Бойы олордыҥ ортозына тура тÿжÿп, - Слерге энчÿ болзын! - деди. 37 Олор сÿне кöрÿп турус дежип, куйка баштары jимирей берди. 38 - Не чочый бердигер, jÿректеригер нениҥ учун эреҥистелишле толо? - деп, Иисус сурады. - 39 Мениҥ колыма, Мениҥ будыма кöрÿгер - бу Мен Бойым эдим; Мени тудуп-сыймап кöрÿгер: сÿнеде эт-кан да, сööк тö jок, Менде дезе, бар болгонын кöрÿп туругар. 40 Мынайда айдала, Ол колы-будын кöргÿсти. 41 Олор сÿÿнгенине бÿдÿп болбой, кайкажып тургулаарда, Иисус: - Мында слерде jиир курсак бар ба? - деп сурады. 42 Олор каарып койгон балык алып бердилер; 43 Иисус балыкты алып, олордыҥ алдында jиди. 44 Оноҥ айтты: - Моисейдиҥ Jасагында, jарчылардыҥ чийиминде, сарындарда Мен керегинде айдылганы ончозы бÿдер учурлу деп, слерле кожо jÿрер тужымда айдып туратаным бу. 45 Иисус олорго Агару бичиктерди оҥдоор сагыш ачып, 46 айтты: - Мында чийилгениле, Христос кыйналып-шыралаар ла ÿчинчи кÿнде тирилер; 47 Иерусалимнеҥ баштайла, ончо калыктарда кинчектер ташталсын деп, Кудайга баштанары Оныҥ адында jарлалар. 48 Слер мыныҥ керечилери. 49 Адамныҥ берер болгонын слерге ийерим; слер дезе, ÿстигердеҥ кÿч алганчагар, бу калада jÿрÿгер. 50 Иисус ÿренчиктерин каладаҥ Вифанияга jетире алып чыгала, колдорын саҥ öрö кöдÿрип, олорды алкады. 51 Алкап туруп, олордоҥ айрылып, теҥериге кöдÿрилип баштады. 52 Уренчиктер Ого бажырып, сÿÿнчизин бадырып болбой, Иерусалимге бурулдылар. 53 Кудайды алкап, jаантайын Öргööдö болуп турдылар. Аминь.

free web site hit counter