Иудейлердиң кааны Ирод тужында Захария деп абыс јуртаган. Захария абыстардың бөлүгинең болгон, бу бөлүк олордың ада-өбөкөзи Авияның адыла адалган. Ондо база Аарон укту абакай болгон; ады-јолы Елисавета. Олор экилези Кудай алдында акту болгондор, Бийдиң ончо салымдарын бүдүрип, јаңдаткан аңын тудуп, буспай тургандар. Је олордо бала-барка јок болгон: Елисавета бала таппас болуп бүткен; экилези јажай да берген улус.
Бир күн Захарияның абыстап јүретен өйи једип, Кудай алдында мүргү эдип турган. Ого Бийдиң Өргөөзине кирип, фимиам өртөөр үлү келишкен. Фимиам өртөөр тужында тыштында көп улус мүргүп турган.
Кенетийин ого Бийдиң ангели көрүнди; ол фимиам өртөгөн тагылдың оң јанында турган. Захария оны көрөлө јүрексиреп, коркый берди. Је ангел Захарияга айтты: Коркуба, Захария: мүргүгениң угулды. Абакайың Елисавета сеге уул бала таап берер, оны Иоанн деп адаарың. Уулың сеге сүүнчи ле кежик болор, оның туулганына көп улус сүүнер; Бий алдында ол улу болор, аракы ла эзиртер суузын ичпес, Агару Тынды энезиниң ичинде алынар; Израиль уулдарының көбизин Бийге, олордың Кудайына, бурултар; Бийдиң ичкери алдынаң Илиядый тын-сагышту ла күчтү барар; адалар јүрегин балдарына јандырайын деп, багынбастарды чындыктың јолына кийдирейин деп, онызыла Бий келерине калыкты белетейин деп.
Мының чынын канайып билетем? деп, Захария ангелдең сурады. Мен карып калдым, абакайым да јажай берген кижи.
Ангел каруузын јадырды: Мен Кудай алдында турган Гавриил; сениле эрмектежерге, бу сүүнчилү јарды сеге јетирерге ийилгем. Сеге бу айтканым өйи једип, бүтпей калбас. Је сен сөиме бүтпедиң, оның учун тилиң тартылып калар, мының чыны чыгар күн келгенче, унчукпай јүрериң.
Ол өйдө улус Захарияны сакып, Өргөөдө бу не саадады болбогой деп, кайкажып турды. Захария чыгып келди, је эрмектенип болбоды; Өргөөдө ого көрүлте болгон деп, билип ийдилер. Захария улуска колыла имдеп, тил јок бойы артканча болды.
Абыстап јүрген күндери түгенерде, ол јанып келди. Јаан удабай абакайы Елисавета барланып, беш ай јажынып, айдынып јүрген: Улус аразында мен керегинде јүрген јаман эрмек-куучындарды токтодып, бу күндерде Бий меге мыны этти.
Елисаветаның барлу болгоны алтынчы айга барадарда, Кудай Бойының Гавриил ангелин Галилейдеги Назарет калага Давид калдыгының Иосиф деп кижизиле кол алыштырган кыска ийди; кыстың ады-јолы Мария болгон. Ангел Марияга кирип, айтты: Сүүн, Јакшылыкту! Бий сениле кожо! Үй улус аразында сен алкалу.
Мария ангелди көрөлө, айткан сөзин кайкап, бу мынайып уткуганы не атасы болотон деп, санана берди. Ангел ого айтты: Коркуба, Мария! Кудайдаң сеге јакшылык јетти. Барланып, уул бала табарың, Оны Иисус деп адаарың. Ол улу болоп, Өрө Турганның Уулы деп адалар; Бий Кудай Ого улу адайы Давидтиң ширеезин берер; Иаков калыгын каан болуп үргүлјиге башкарар, Оның каандыгының учы-куйузы јок болор.
Је Мария ангелдең сурады: Ол канайып болор? Мен өбөөнимле билишпес инем!
Ангел ого каруу јандырып, айтты: Сеге Агару Тын түжер, Өрө Турганның күчи көлөткө чилеп сени бүркеп ийер; Онойып табатан балаң агару болор, Кудайдың Уулы деп адалар. Бат, төрөөниң Елисавета, ол до карыыр јөбинде барланып калды, алтынчы айга барып јат, оны дезе, бала таппас дешкен. Ол база уул бала табар. Кудайдың сөзи бүтпей калбас,
Мария: Мен Бийдиң кулы эдим, сениң айтканыңча болгой - деди. Ангел јүре берди.
Бу күндерде Мария јолго көндүгип, туулу ороонго, Иуда калазына бачымдап барды. Захарияның айлына келип, Елисаветала эзэндешти. Елисавета Марияның үнин угарда ла, ичиндеги балазы кыймыктанды; Елисавета Агару Тынла толуп, тың үнденип айтты: Үй улус аразында сен алкышту! Карындап јүрген балаңды Бий алкады! Мен кем ондый, меге Бийимниң энези келетен? Эзендешкен үниң кулагыма угуларда, ичимдеги балам сүүнип секирди. Сен, Мария, Бийдиң сеге айтканыла болор деп бүткениң учун кежиктү!
Мария айтты: Јулам мениң Бийди улуркадып јат, тыным мениң Аргадаачы Кудайыма сүүнип јат, Ол Бойының кулы јобожыганын көргөни учун. Бу өйдөң ала ончо үйелер мени кежиктү деп айдар, Күчтү Бойы, меге улу керек эткени учун. Оның ады агару! Оны байлан, Оноң айап јүрген улуска үйедең үйеге быйаны једер! Ол Бойының колыла улу неме этти; улуркактарды ончо санаазыла кожо тоскурып ийди; јаңда отургандарды ширеезинең аңтарып, базынчыкта јүргендерди көдүрди; аштап јүргендерге јакшылык сыйлады, байларды как куруга тайып ийди. Ада-өбөкөлөриске: Авраамга ла оның калдыктарына үргүлјиге быйаным јетирерим деп, айдып салган сөзин Ол эске алынып, Израильге - Бойының кулына болужарга келди. Мария Елисавета-эште үч ай кире јүреле, јанып ийди.
Айы-күни једип, Елисавета уул бала тапты. Бий Елисаветага улу быйанын јетиргенин угала, айылдаштары ла төрөөндөри оныла кожо сүүнижип турдылар. Сегизинчи күнде баланы томдоорго келгилеп, оны адазының адыла Захария деп адаарга санандылар. Је энези: Јок, оның ады Иоанн болор - деди. Сениң угыңда ондый атту кижи јок! дешкилеп, уулын кем деп адаарга турганын билерге, адазынаң имдеп сурадылар. Захария јалбак агаш сурап алала, Оның ады Иоанн деп чийди. Ончолоры кайкашты. Бу ла тушта оның тили-оозы чечилип, Кудайды алкап, эрмектене берди. Айылдаштары сүрекей коркыды; кайкамчылу учурал керегинде куучын туулу Иудейге текши јайылды. Уккан улус ончозы оны көксине алынып, Бу бала кем болгой не? дежип турдылар. Чындап та, Бий оныла кожо болгон.
Оның адазы Захария Агару Тынла толуп, јарчы болуп айда берди: Бийге, Израиль Кудайына, баш болзын! Ол Бойының калыгына келип барган, ого тоду берген. Бойының агару јебрен јарчылары ажыра сөзин берип, бойыс аргаданатан, - өштүлеристең, бисти јаман көргөндөрдиң колынаң аргадайтан күчтү Аргадаачыны Ол Давид кулының калдыгынаң биске јайап берди. Ол бистиң адаларыбыска быйан берерим, Бойымның агару кереезимди сананып јүрерим деп, сөзин берген. Өштүлердең бисти аргадаар болуп, Ол бистиң улу адайыс Авраамга чертенген. Оның эткениле, Оның алдында бис агару ла чындык болорыс, кемнең де јалтанбай, ончо күндеристиң туркунына Оның керегине јүрерис. Сен дезе, балам, Өрө Турганның јарчызы деп адаларың, Бийге јолдор белетеерге, Оның алдынаң келериң, кинчектери ташталганы ажыра аргаданары керегинде Оның калыгына билим берериң. Бисти сүүген ле биске быйанын берген Кудайыс теңеридең биске јарык таңдак ийер - ол чыгып, карачкыда отурган, өлүмниң көлөткөзинде јүрген ончо улусты бойының јарыгыла чалыдып ийер; амыр-энчүге экелетен јолды ол биске көргүзип берер. Бала дезе чыдап, тын-санаазы ойгорып турды; Израиль калыкка ачылар өйи јеткенче, ээн талаларда јүрди.