An Ger Gwrys Kig
1 Y'n dalleth yth esa an Ger, hag yth esa an Ger gans Duw, ha'n Ger o Duw. 2 Yth esa ev y'n dalleth gans Duw. 3 Pup-tra a veu gwrys ganso, ha hebdho ny veu gwrys travyth a veu gwrys. 4 Ynno yth esa bywnans, ha'n bywnans o golow mab-den; 5 ha'n golow a splann y'n tewlder, ha ny wrug an tewlder y fetha. 6 Yth esa den, dannvenys dhiworth Duw, Yowann y hanow. 7 Ev a dheuth rag dustuni, dhe dhustunia a'n golow, rag may kryssa pub den oll dredho ev. 8 Nyns o ev an golow na, mes ev a dheuth dhe dhustunia a'n golow. 9 Yth esa an gwir wolow, hag a wolow pub den, ow tos y'n bys. 10 Yth esa ev y'n bys, ha'n bys a veu gwrys ganso, ha ny'n aswonnis an bys. 11 Ev a dheuth dh'y byth y honan, ha ny'n degemmeras y dus y honan. 12 Mes kemmys a'n degemmeras, dhedha y ros ev galloes dhe vos fleghes Duw, dhe neb a grys yn y hanow ev, 13 neb na veu genys a woes, nag a vynnas kig, nag a vynnas gour, mes a Dhuw. 14 Ha'n Ger a veu gwrys kig hag a drigas yn agan mysk, ha ni a welas y wolewder, golewder avel dhe'n unn Vab dineythys a'n Tas, leun a ras hag a wirder. 15 Yowann a dhustunias anodho hag a grias, ow leverel, ‘Hemm o neb a leveris vy anodho, Neb a dheu war ow lergh re dheuth ha bos a-dheragov, rag yth esa ev kyns es dell esen vy.’ 16 Rag a'y leunder ni oll re dhegemmeras, ha gras war ras; 17 rag an lagha a veu res dre Moyses; gras ha gwirder a dheuth dre Yesu Krist. 18 Denvyth ny welas Duw bythkweth; an unn Vab dineythys, neb usi yn askra an Tas, ev re'n diskudhas.
Dustuni Yowann Besydhyer
19 Ha hemm yw dustuni Yowann, pan dhannvonas an Yedhewon oferysi ha Levysi dhodho dhiworth Yerusalem, dhe wovynn orto, ‘Piw osta?’ 20 Hag ev a gonfessyas, ha ny naghas; mes ev a gonfessyas, ‘Nyns ov vy an Krist.’ 21 Hag i a wovynnas orto, ‘Piw ytho? Osta Elias?’ Yn-medh ev, ‘Nag ov vy.’ ‘Osta an profoes?’ Hag ev a worthybis, ‘Nag ov.’ 22 Ena yn-medhons dhodho, ‘Piw osta, may hyllyn ri gorthyp dhe'n re neb a wrug agan dannvon? Pandr'a leverydh a-dro dhis dha honan?’ 23 Yn-medh ev, ‘My yw lev onan ow kria y'n gwylvos, “Gwra hyns an Arloedh kompes”, dell leveris Ysay an profoes.’ 24 An re dannvenys a veu a'n Fariseow. 25 Hag i a wovynnas orto ha leverel dhodho, ‘Prag ytho y pesydhydh mar nyns osta an Krist, nag Elias, nag an profoes?’ 26 Yowann a worthybis dhedha ow leverel, ‘My a vesydh gans dowr: mes yn agas mysk y sev nebonan na aswonnowgh; 27 ev yw neb a dheu war ow lergh, neb nag ov vy gwiw dhe dhigelmi kroen y eskis.’ 28 An taklow ma a hwarva yn Bethani a'n tu arall dhe'n Yordan, mayth esa Yowann ow pesydhya.
Oen Duw
29 Ternos ev a welas Yesu ow tos dhodho hag yn-medh ev, ‘Awotta Oen Duw neb a gemmer dhe-ves peghadow an bys. 30 Hemm yw neb a leveris vy anodho, “War ow lergh y teu gour neb re dheuth ha bos a-dheragov, rag yth esa ev a-ragov.” 31 Ha ny'n aswonnis vy; mes rakhenna yth ov vy devedhys, ow pesydhya yn dowr: rag may fo ev diskwedhys dhe Ysrael.’ 32 Ha Yowann a dhustunias ow leverel, ‘My a welas an Spyrys ow tos yn-nans dhiworth nev kepar ha kolomm, hag ev a wortas warnodho. 33 Ha ny wrugavy y aswonn, mes neb a'm dannvonas dhe vesydhya yn dowr, ev a leveris dhymm, “Neb may hwelydh an Spyrys ow tos yn-nans warnodho hag ow kortos warnodho, ev yw neb a vesydh gans an Spyrys Sans.” 34 Ha my a welas hag a dhustunias ev dhe vos Mab Duw.’
An Kynsa Dyskyblon
35 Ternos, Yowann a sevis arta, ha dew a'y dhyskyblon. 36 Hag ow mires orth Yesu ow kerdhes yn-medh ev, ‘Awotta Oen Duw!’ 37 Ha'n dhew dhyskybel a'n klewas ow kewsel, hag a holyas Yesu. 38 Ha Yesu a dreylyas ha'ga gweles owth holya, ha leverel dhedha, ‘Pandr'a hwilowgh?’ Yn-medhons dhodho, ‘Rabbi (henn yw dhe styrya, Dyskador), ple'th esos trigys?’ 39 Yn-medh ev dhedha, ‘Dewgh, ha gwelowgh.’ Ytho i a dheuth ha gweles an le mayth esa trigys, hag a wodrigas ganso an jydh na; rag y feu a-dro dhe'n degves eur. 40 Androw broder Simon Peder a veu onan a'n dhew neb a glewas Yowann ha neb a wrug y holya. 41 Ev a gavas y vroder y honan Simon yn kynsa hag yn-medh ev dhodho, ‘Ni re gavas an Messia’, (yw treylys, Krist). 42 Ev a'n dros dhe Yesu. Yesu a viras orto ha leverel, ‘Ty yw Simon mab Yowann. Ty a vydh henwys Kefas’ (yw treylys, Karrek ).
Galow Felip ha Nathanael
43 Ternos ev a vynnas mos dhe Alile, hag ev a gavas Felip. Ha Yesu a leveris dhodho, ‘Hol vy.’ 44 Ha Felip o dhiworth Bethsaida, sita Androw ha Peder. 45 Felip a gavas Nathanael ha leverel dhodho, ‘Ni re'n kavas neb a skrifas Moyses hag ynwedh an brofoesi anodho y'n lagha, Yesu mab Yosep, a Nazareth.’ 46 Hag yn-medh Nathanael dhodho, ‘A yll travyth da dos mes a Nazareth?’ Yn-medh Felip dhodho, ‘Deus ha gwel.’ 47 Yesu a welas Nathanael ow tos dhodho hag yn-medh ev anodho, ‘Awotta Ysraelit yn hwir, ma nag eus ynno gil!’ 48 Yn-medh Nathanael dhodho, ‘Fatell y'm aswonnydh?’ Yesu a worthybis dhodho, ‘Kyns Felip dhe'th helwel, my a'th welas yn-dann an figbrenn.’ 49 Nathanael a worthybis dhodho, ‘Rabbi, ty yw Mab Duw, ty yw Myghtern Ysrael.’ 50 Yesu a worthybis ha leverel dhodho, ‘Drefenn my dhe leverel dhis, “My a'th welas yn-dann an figbrenn”, a wredh krysi? Ty a wel taklow brassa es henna.’ 51 Hag yn-medh ev dhodho, ‘Yn hwir, yn hwir y lavarav dhywgh, hwi a wel nev igerys, hag eledh Duw owth yskynna ha diyskynna war Vab an den.’
An Demmedhyans yn Kana
1 Y'n tressa dydh, yth esa demmedhyans yn Kana a Alile, hag yth esa mamm Yesu ena; 2 ha Yesu ha'y dhyskyblon a veu gelwys dhe'n demmedhyans. 3 Ha pan fyllis an gwin, mamm Yesu a leveris dhodho, ‘Nyns eus gwin gansa.’ 4 Yn-medh Yesu dhedhi, ‘Pandr'yw henna dhymmo vy ha dhiso jy, a venyn? Nyns yw ow eur hwath devedhys.’ 5 Yn-medh y vamm dhe'n servysi, ‘Gwrewgh pypynag a lavarro dhywgh.’ 6 Hag yth esa ena hwegh seth-dowr gwrys a ven rag glanheansow an Yedhewon, ow synsi pubonan dew po tri firkin. 7 Yn-medh Yesu dhedha, ‘Lenwewgh an sethow a dhowr.’ Hag i a's lenwis bys y'n topp. 8 Hag yn-medh ev dhedha, ‘Tennewgh yn-mes lemmyn ha'y dhoen dhe rewler an kevywi.’ Hag i a'n dug. 9 Ha pan dastyas rewler an kevywi an dowr o devedhys gwin (ha ny wrussa godhvos a-ble feu, mes an servysi a dennas an dowr a wrussa godhvos), rewler an kevywi a elwis an gour pries, 10 ha leverel dhodho, ‘Pub den a worr an gwin da yn kynsa, ha wosa i dhe vedhwi, an gweth; mes ty re withas an gwin da bys lemmyn.’ 11 Yesu a wrug henna, dalleth y doknys, yn Kana a Alile, ha diskwedhes y wolewder; ha'y dhyskyblon a grysis ynno. 12 Wosa hemma, ev eth yn-nans dhe Kapernaum, ev ha'y vamm ha'y vreder ha'y dhyskyblon; ha ny wortsons ena saw nebes dydhyow.
Glanhe an Tempel
13 Hag ogas o pask an Yedhewon, ha Yesu eth yn-bann dhe Yerusalem, 14 hag ev a gavas y'n tempel tus ow kwertha oghen ha deves ha kelemmi, ha'n arghansoryon, esedhys. 15 Hag ow kul skorja a gerdyn ev a's tewlis oll mes a'n tempel, ha'n deves ha'n oghen, hag ev a skoellyas bathow an arghansoryon, ha domhwel an moesow, 16 ha leverel dhe neb a wertha an kelemmi, ‘Kemmerewgh an taklow ma alemma; na wrewgh chi ow Thas yn marghatti.’ 17 Ha'y dhyskyblon a borthas kov bos skrifys, ‘Diwysykter a-barth dha ji a'm devor.’ 18 Ytho an Yedhewon a worthybis ha leverel dhodho, ‘Py tokyn a yll'ta y dhiskwedhes dhyn, rag ty dhe wul hemma?’ 19 Yesu a worthybis ha leverel dhedha, ‘Diswrewgh an tempel ma, ha kyns penn trydydh my a'n drehav.’ 20 Ena yn-medh an Yedhewon, ‘Hwegh blydhen ha dew-ugens yth esa an tempel ma ow pos drehevys, ha ty a'n drehav kyns penn trydydh?’ 21 Mes ev a gewsi a dempel y gorf ev. 22 Ytho pan veu drehevys dhiworth an re varow, y dhyskyblon a borthas kov ev dhe leverel hemma, hag i a grysis an skryptor, ha'n ger a gewsis Yesu.
Yesu yn Yerusalem rag an Pask
23 Ytho pan esa ev yn Yerusalem y'n pask, y'n dy'goel, lies a grysis yn y hanow ev, pan welsons an toknys a wrug. 24 Mes ny omdrestyas Yesu y honan dhedha, rag ev a aswonni peub, 25 ha nyns esa edhomm dhodho denvyth dhe dhustunia a-dro dhe dhen; rag ev a aswonni pandra esa yn den.
Yesu ha Nikodemus
1 Yth esa den a'n Fariseow, Nikodemus y hanow, rewler a'n Yedhewon; 2 ev a dheuth dhodho yn nos ha leverel dhodho, ‘Rabbi, ni a woer ty dhe vos dyskador devedhys dhiworth Duw; rag ny yll denvyth gul an toknys ma a wredh tejy marnas Duw a vo ganso.’ 3 Yesu a worthybis ha leverel dhodho, ‘Yn hwir, yn hwir y lavarav dhis, marnas den a vo genys arta, ny yll gweles gwlaskor Duw.’ 4 Yn-medh Nikodemus dhodho, ‘Fatell yll den bos genys, hag ev den koth? A yll ev entra nessa prys yn torr y vamm ha bos genys?’ 5 Yesu a worthybis, ‘Yn hwir, yn hwir y lavarav dhis, marnas den a vo genys a dhowr hag a Spyrys, ny yll ev entra yn gwlaskor Duw. 6 An pyth yw genys a'n kig yw kig, ha'n pyth yw genys a'n Spyrys yw spyrys. 7 Na vedhes marth dhis my dhe leverel dhis, “Res yw hwi dhe vos genys arta.” 8 An gwyns a hwyth le may fynno ha ty a glew y son, mes ny wodhes a-ble teu na ple'th a; yndella yw peub neb yw genys dhiworth an Spyrys.’ 9 Nikodemus a worthybis ha leverel dhodho, ‘Fatell yll hemma bos?’ 10 Yesu a worthybis ha leverel dhodho, ‘Osta dyskador dhe Ysrael ha ny wodhes an taklow ma? 11 ‘Yn hwir, yn hwir y lavarav dhis, ni a gews an pyth a wodhon, ha ni a dhustuni an pyth a welsyn; ha ny dhegemmerowgh agan dustuni. 12 Mar terivis dhywgh taklow a'n bys ha ny grysowgh, fatell grysowgh mar terivav dhywgh taklow a nev? 13 Ha ny yskynnas denvyth bys yn nev marnas ev neb a dheuth yn-nans, Mab an den. 14 Ha kepar dell dhrehevis Moyses an sarf y'n gwylvos, yndella res yw Mab an den dhe vos drehevys, 15 may fo bywnans heb diwedh dhe beub a grys ynno.’ 16 ‘Rag kemmys y karas Duw an bys, may ros ev y unn Vab dineythys, ma nag ella dhe goll neb a grys ynno ev, mes may fe dhodho bywnans heb diwedh. 17 ‘Rag ny dhannvonas Duw y Vab a-bervedh y'n bys rag breusi an bys, mes may fe an bys selwys dredho. 18 Nyns yw breusys neb a grys ynno ev; mes neb na grys yw breusys seulabrys, rag ny grysis yn hanow an Mab unnik-genys a Dhuw. 19 Ha hemm yw an vreus: golow re dheuth y'n bys, ha'n dus a garas an tewlder moy es an golow, rag bos drog aga oberow. 20 Rag seul a wra drog a gas an golow, ha ny dheu dhe'n golow, ma na vo diskudhys y oberow. 21 Mes neb a wra gwirder a dheu dhe'n golow, may fo diskwedhys y oberow, i dhe vos gwrys yn Duw.’
Yesu ha Yowann Besydhyer
22 Wosa henna, Yesu ha'y dhyskyblon a dheuth dhe bow Yudi, hag ena ev a wortas gansa, ow pesydhya. 23 Hag yth esa Yowann ynwedh ow pesydhya yn Aynon ogas dhe Salim, rag bos meur a dhowr ena; hag yth esa tus ow tos hag ow pos besydhys. 24 Rag ny via Yowann hwath tewlys yn prison. 25 Ena dadhel a sordyas yntra re a dhyskyblon Yowann ha'n Yedhewon a-dro dhe lanheans. 26 Hag i a dheuth dhe Yowann ha leverel dhodho, ‘Rabbi, ev neb a veu genes a'n tu arall dhe'n Yordan, a neb ty re dhustunias, ott, yma ev ow pesydhya, hag yma pub den oll ow tos dhodho.’ 27 Yowann a worthybis ha leverel, ‘Ny yll den degemmeres travyth, marnas henna a vo res dhodho dhiworth an nevow. 28 Hwi agas honan a dhustuni ahanav, my dhe leverel nag ov vy an Krist, mes dannvenys ov a-dheragdho. 29 Ev neb a gyv an briesvyrgh yw an gour pries; mes kar an gour pries neb a sev ha goslowes orto a lowenha yn feur drefenn lev an gour pries. Ytho an lowena ma usi dhymmo vy yw kollenwys. 30 Res yw ev dhe ynkressya, mes my dhe lehe.’
Neb a Dheu dhiworth Nev
31 Ev neb a dheu a wartha yw dres pup-tra; ev neb yw a'n nor yw a'n nor hag ev a gews a'n nor. Ev neb a dheu a nev yw dres pup-tra 32 An pyth re welas ha re glewas, ev a dhustuni anodho, ha denvyth ny dhegemmer y dhustuni. 33 Neb a dhegemmer y dhustuni re worras y sel war hemma: Duw dhe vos lel. 34 Rag ev neb re wrug Duw y dhannvon a gews geryow Duw, rag ny re ev an Spyrys orth musur. 35 An Tas a gar an Mab hag ev re ros pup-tra yn y dhorn. 36 Ev neb a grys y'n Mab a'n jeves bywnans heb diwedh, ha neb na grys y'n Mab ny welvydh bywnans; mes sorr Duw a drig warnodho.
Yesu ha'n Venyn a Samaria
1 Rakhenna pan wodhva Yesu y klewsa an Fariseow Yesu dhe wul ha dhe vesydhya moy dyskyblon es dell wrug Yowann 2 (kyn na wrug Yesu y honan besydhya, mes y dhyskyblon), 3 ev a asas Yudi ha mos arta dhe Alile. 4 Ha res o dhodho tremena dre Samaria. 5 Ytho ev a dheuth dhe sita a Samaria henwys Syghar, ogas dhe'n splatt a ros Yakob dh'y vab Yosep. 6 Ena yth esa fenten Yakob. Yesu ytho, skwith drefenn an vyajya, o esedhys ryb an fenten. A-dro dhe'n hweghves eur o hi. 7 Benyn a Samaria a dheuth rag tenna dowr. Yn-medh Yesu dhedhi, ‘Ro dhymm dhe eva.’ 8 (Rag gylsens y dhyskyblon y'n sita dhe brena boes.) 9 Ena yn-medh an venyn a Samaria, ‘Fatell wredh jy, ha ty Yedhow, pysi dowr ahanav vy, ha my benyn a Samaria?’ Rag ny geskowethons Yedhewon gans Samaritanys. 10 Yesu a worthybis ha leverel dhedhi, ‘Mar kodhves ro Duw, ha piw yw neb a lever dhis, “Ro dhymm dhe eva”, ty a wrusses y bysi, hag ev a rossa dhis dowr byw.’ 11 Yn-medh an venyn dhodho, ‘Syrra, nyns eus genes na hwath kelorn, ha'n puth yw down; a-ble kevsys an dowr byw na? 12 Osta brassa ages agan tas Yakob, neb a ros dhyn an puth, hag ev y honan a evas dhiworto, ha'y vebyon, ha'y flokkys?’ 13 Yesu a worthybis ha leverel dhedhi, ‘Peub a yv a'n dowr ma a'n jevydh syghes arta; 14 mes piwpynag a effo a'n dowr a rov vy dhodho ny'n jevydh syghes bynitha; mes an dowr a rov dhodho a vydh ynno fenten a dhowr ow frosa bys yn bywnans heb diwedh.’ 15 Yn-medh an venyn dhodho, ‘Syrra, ro dhymm an dowr ma, rag na'm bo syghes, ha ma na dhyffiv omma dhe denna.’ 16 Yn-medh ev dhedhi, ‘Ke, galw dha wour ha deus omma.’ 17 An venyn a worthybis ha leverel dhodho, ‘Nyns eus dhymm gour.’ Yn-medh Yesu dhedhi, ‘Yn ewn ty a lever, “Nyns eus dhymm gour”; 18 rag re beu dhis pymp gour, ha neb usi dhis lemmyn nyns yw dha wour; ty a gewsis an gwir.’ 19 Yn-medh an venyn dhodho, ‘Syrra, my a wel ty dhe vos profoes. 20 Agan tasow re wordhyas y'n menydh ma; ha hwi a lever, bos yn Yerusalem an tyller may tegoedh gordhya.’ 21 Yesu a leveris dhedhi, ‘Krys dhymm, benyn, an eur a dheu pan na wordhyowgh an Tas nag y'n menydh ma nag yn Yerusalem. 22 Hwi a wordh an pyth na wodhowgh; ni a wordh an pyth a wodhon, rag yma selwyans dhiworth an Yedhewon. 23 Mes an eur a dheu, ha lemmyn yth yw, pan wra an wordhyoryon wir gordhya an Tas yn spyrys hag yn gwiryonedh; rag an Tas a hwila tus a'n par na dh'y wordhya. 24 Duw yw Spyrys, ha res yw dh'y wordhyoryon y wordhya yn spyrys hag yn gwiryonedh.’ 25 Yn-medh an venyn dhodho, ‘My a woer Messia, henwys Krist, dhe dhos; pan dheu, ev a dheriv dhyn pup-tra.’ 26 Yn-medh Yesu dhedhi, ‘My, neb a gews dhis, yw ev.’ 27 Gans henna y dhyskyblon a dheuth ha marth a's teva ev dhe gewsel gans benyn; byttegyns denvyth ny leveris, ‘Pandr'a hwilydh?’, po ‘Prag y kewsydh gensi?’ 28 Ytho an venyn a asas hy seth-dowr hag eth bys y'n sita, hag yn-medh hi dhe'n dus, 29 ‘Dewgh, gwelewgh den neb a leveris dhymm pup-tra re wrugavy; a nyns yw hemma an Krist?’ 30 I eth yn-mes a'n sita, hag yth esens ow tos dhodho. 31 Y'n keth termyn y dhyskyblon a'n pysis, ‘Mester, gwra dybri.’ 32 Mes yn-medh ev dhedha, ‘Yma dhymm boes ma na wodhowgh hwi anodho.’ 33 Ytho y dhyskyblon a leveris an eyl dh'y gila, ‘A wrug nebonan dri dhodho neppyth dhe dhybri?’ 34 Yn-medh Yesu dhedha, ‘Ow boes vy yw, my dhe wul bolonjedh neb a'm dannvonas ha dhe gowlwul y ober ev. 35 A ny leverowgh, “Yma hwath peswar mis, hag ena a teu an drevas”? Otta, my a lever dhywgh, drehevewgh agas dewlagas yn-bann, ha mirewgh orth an gwelyow, i dhe vos gwynn lemmyn rag an drevas. 36 An myser a gyv y arveth, hag a guntell frut rag bywnans heb diwedh, rag may lowenhaho war-barth an haser ha'n myser. 37 Rag yndella gwir yw an lavar, “Unn den yw an gonador, ha den arall yw an myser.” 38 My a'gas dannvonas mes dhe vysi an pyth na wrussowgh lavurya ragdho; re erell a lavuryas ha hwi re dheuth yn aga lavur.’ 39 Ha lies a'n Samaritanys a'n sita na a grysis ynno drefenn ger an venyn, a dhestas, ‘Ev a leveris dhymm pup-tra re wrugavy.’ 40 Ytho pan dheuth an Samaritanys dhodho, i a'n pysis a wortos gansa; hag ev a wortas ena dew dhydh. 41 Ha lies moy a grysis drefenn y eryow, 42 hag yn-medhons dhe'n venyn, ‘Ny grysyn na fella drefenn dha lavar jy, mes ni agan honan re glewas ha godhvos hemma dhe vos yn hwir Selwador an bys.’
Yaghhe Mab an Soedhek Ryal
43 Dew dhydh a-wosa, ev eth alena bys yn Galile. 44 Rag Yesu y honan a dhestas, nag eus dhe brofoes enor yn y vro y honan. 45 Ytho pan dheuth yn Galile, tus Galile a'n wolkommas, drefenn i dhe weles pup-tra a wrug yn Yerusalem y'n dy'goel, rag gylsens i ynwedh dhe'n dy'goel. 46 Ytho Yesu a dheuth arta bys yn Kana a Alile, le may hwrug an dowr yn gwin. Hag yth esa yn Kapernaum neb soedhek ryal, mayth o klav y vab. 47 Pan glewas ev Yesu dhe vos devedhys yn Galile dhiworth Yudi, ev eth dhodho ha'y bysi a dhos yn-nans ha yaghhe y vab, rag ev a veu yn eneworres. 48 Ytho yn-medh Yesu dhodho, ‘Marnas hwi a wel toknys ha marthusyon, ny grysowgh.’ 49 An soedhek ryal a leveris dhodho, ‘Syrra, deus yn-nans kyns ow flogh dhe verwel.’ 50 Yn-medh Yesu dhodho, ‘Ke yn-rag, dha vab a vyw.’ An den a grysis an ger a gewsis Yesu dhodho, hag yth eth dhe-ves. 51 Hag ev ow mos yn-nans, y gethwesyon a dheuth er y bynn ha leverel dhodho, y vab dhe vos byw. 52 Ytho ev a wovynnas orta an eur mayth omwellhas. Yn-medhons dhodho, ‘De, dhe'n seythves eur an fevyr a'n gasas.’ 53 Ytho an tas a wodhva y feu y'n keth eur na pan leveris Yesu dhodho, ‘Dha vab a vyw.’ Hag ev hag oll y vayni a grysis. 54 Lemmyn hemma a veu an nessa tokyn a wrug Yesu pan dheuth dhe Alile dhiworth Yudi.
An Yaghheans yn Poll Bethesda
1 Wosa hemma yth esa dy'goel dhe'n Yedhewon, ha Yesu eth yn-bann dhe Yerusalem. 2 Yma yn Yerusalem poll ryb Porth an Deves, henwys yn Ebrow Bethzatha, ha dhodho pymp portal. 3 Ynna yth esa ow krowedha myns meur a glevyon, dall, klof ha palsyes, ow kortos movyans an dowr. 4 Rag el an Arloedh e yn-nans y'n poll herwydh an seson ha trobla an dowr; ha'n kynsa den ow mos ynno wosa movyans an dowr a veu yaghhes a by kleves pynag esa dhodho. 5 Hag yth esa ena unn den ha dhodho kleves etek blydhen warn ugens. 6 Yesu pan y'n gwelas ow krowedha, hag ow kodhvos ev dhe vos hirneth yndella, a leveris dhodho, ‘A vynnydh bos yaghhes?’ 7 An den klav a worthybis dhodho, ‘Arloedh, nyns eus genev denvyth a'm gorro y'n poll pan vo troblys an dowr; mes, ha my ow tos, den arall a yn-nans a-dheragov.’ 8 Yn-medh Yesu dhodho, ‘Sav, kemmer dha weli yn-bann, ha kerdh.’ 9 Ha desempis an den a veu yagh, hag a gemmeras y weli yn-bann ha kerdhes. Ha'n jydh na o sabot. 10 Ytho an Yedhewon a leveris dhe'n den a veu yaghhes, ‘An sabot yw, ha nyns yw lafyl dhis ty dhe dhoen dha weli.’ 11 Ev a worthybis dhedha, ‘Ev neb a'm yaghhas, an keth henna a leveris dhymm, “Kemmer dha weli yn-bann, ha kerdh.” ’ 12 I a wovynnas orto, ‘Piw yw an den a leveris dhis, “Gwra y gemmeres yn-bann, ha kerdh”?’ 13 Mes ny wodhva an den a veu yaghhes piw o, rag Yesu re omdennsa, drefenn bos routh y'n le na. 14 Wosa hemma, Yesu a'n kavas y'n tempel, hag a leveris dhodho, ‘Otta, ty yw yaghhes; na wra begha namoy, ma na hwarvo dhis neppyth gweth.’ 15 An den eth dhe-ves, ha derivas dhe'n Yedhewon, Yesu dhe vos neb a wrussa y yaghhe. 16 Ha rag henna an Yedhewon a helghyas Yesu, rag ev dhe wul hemma y'n sabot. 17 Mes Yesu a worthybis dhedha, ‘Ow Thas a ober bys lemmyn, ha my ynwedh a ober.’ 18 Rakhenna ytho an Yedhewon a hwila dhe voy y ladha, ny veu henna yn unnsel rag ev dhe derri an sabot, mes ynwedh rag ev dhe elwel Duw y Das, orth y omwul kehaval dhe Dhuw.
Awtorita an Mab
19 Ena Yesu a worthybis ha leverel dhedha, ‘Yn hwir, yn hwir y lavarav dhywgh, ny yll an Mab gul travyth y honan, marnas an pyth a wel ev an Tas dhe wul; rag pypynag a wra ev, an Mab ynwedh a'n gwra. 20 Rag an Tas a gar an Mab hag a dhiskwa dhodho pup-tra a wra ev y honan; hag ev a dhiskwa dhodho oberow moy es an re ma, rag may kemmerrowgh marth. 21 Rag kepar dell wra an Tas drehevel an re varow ha ri dhedha bywnans, yndella ynwedh an Mab a re bywnans dhe biwpynag a vynno. 22 Rag ny vreus an Tas denvyth, mes ev re ros breus oll dhe'n Mab, 23 may hwrello peub enora an Mab, kepar dell enorons an Tas. Neb na enor an Mab ny enor an Tas neb a'n dannvonas. 24 Yn hwir, yn hwir y lavarav dhywgh, ev neb a glew ow ger hag a grys yn neb a'm dannvonas, yma dhodho bywnans heb diwedh, ha ny dheu dhe dhampnyans, mes re dremenas a vernans dhe vywnans. 25 ‘Yn hwir, yn hwir y lavarav dhywgh, an eur a dheu, ha lemmyn yw, pan glew an re varow lev Mab Duw, ha neb a glew, bywa a wrons. 26 Rag kepar dell eus dhe'n Tas bywnans ynno y honan, yndella ynwedh ev re wrontyas dhe'n Mab kavoes bywnans ynno y honan. 27 Hag ev a ros dhodho galloes dhe vreusi, rag ev dhe vos Mab an den. 28 Na gemmerewgh marth a hemma, rag an eur a dheu pan glewvydh y lev peub eus y'n bedhow, 29 hag i a dheu yn-mes; an re a wrug da bys yn dasserghyans bywnans, an re a wrug drog bys yn dasserghyans dampnyans. 30 ‘Ny allav vy ow honan gul travyth; kepar dell glewav y hwrav vy breusi, ha'm breus yw ewn, rag ny hwilav ow bolonjedh ow honan, mes bolonjedh ev neb a'm dannvonas.
Dustunioryon a-barth Yesu
31 ‘Mar tustuniav ahanav ow honan, nyns yw ow dustuni gwir. 32 Yma nebonan arall neb a dhustuni ahanav, ha my a woer an dustuni a wra ev y dhustunia ahanav dhe vos gwir. 33 Hwi a dhannvonas dhe Yowann, hag ev a dhustunias a'n gwiryonedh. 34 Mes ny dhegemmerav an dustuni dhiworth den, mes my a lever hemma rag may fowgh hwi selwys. 35 Ev a veu lugarn ow leski hag ow splanna, ha hwi a vynnas bos pur lowen pols yn y wolow. 36 Mes yma dhymm dustuni brassa es dell esa dhe Yowann; rag an oberow a ros dhymm an Tas dhe gowlwul, an oberow na a wrav, i a dhustuni ahanav, an Tas dhe'm dannvon. 37 Ha'n Tas neb a'm dannvonas, ev y honan re dhustunias ahanav. Ny glewsowgh hwi y lev bythkweth, na gweles y furv. 38 Ha nyns eus dhywgh y er trigys ynnowgh, rag ny grysowgh ynno ev neb a wrug y dhannvon. 39 ‘Hwi a hwila an skryptors, rag ynna y tybowgh hwi dhe gavoes bywnans heb diwedh. Hag i aga honan yw an re a dhustuni ahanav vy; 40 mes ny vynnowgh dos dhymmo vy rag may fo bywnans dhywgh. 41 Ny dhegemmerav enor dhiworth tus, 42 mes my a'gas aswonn, nag usi kerensa Duw ynnowgh agas honan. 43 My re dheuth yn hanow ow Thas, ha ny wrewgh ow degemmeres: mes mar teu nebonan arall yn y hanow y honan, henna a dhegemmerowgh. 44 Fatell yllowgh hwi krysi, neb a dhegemmer enor an eyl dhiworth y gila, mes ny hwilowgh an enor a dheu a'n unnik Duw? 45 Na dybewgh my dh'agas kuhudhi a-rag an Tas; Moyses yth yw neb a wra agas kuhudhi, ev neb re dres'sowgh ynno. 46 Rag mar kwrellewgh krysi yn Moyses, hwi a gryssa ynnov vy; rag ev a skrifas ahanav. 47 Mes mar ny grysowgh y skrifow ev, fatell grysowgh ow geryow vy?’
Maga an Pymp Mil
1 Wosa hemma, Yesu eth dhe'n tu arall a vor Galile (henn yw, Tiberias). 2 Ha routh veur a'n sywyas, rag yth esons ow kweles an toknys a wre war an glevyon. 3 Ha Yesu eth yn-bann y'n menydh, hag ena ev a esedhas gans y dhyskyblon. 4 Hag yth esa an pask, dy'goel an Yedhewon, ow tos nes. 5 Ytho pan dhrehevis Yesu y dhewlagas, ha gweles routh veur devedhys dhodho, yn-medh ev dhe Felip, ‘A-ble hwren ni prena bara, rag may teppro an dus ma?’ 6 Ev a leveris hemma dh'y brevi; rag ev y honan a wodhva pandr'a vynna y wul. 7 Felip a worthybis dhodho, ‘Ny via bara a dhew kans diner lowr ragdha, rag may kemmerro pubonan temmik.’ 8 Onan a'y dhyskyblon, Androw broder Simon Peder, a leveris dhodho, 9 ‘Yma maw omma, ha dhodho pymp torth bara heydh ha dew bysk vyghan; mes pyth yw henna rag kemmys tus?’ 10 Yn-medh Yesu, ‘Gwrewgh dhe'n wer esedha.’ Lemmyn yth esa meur a wels y'n le. Ytho an wer a esedhas, a-dro dhe bymp mil aga niver. 11 Ytho Yesu a gemmeras an torthow ha wosa ri grasow ev a ros dhe'n re esedhys, hag y'n keth vaner a'n puskes, kemmys dell vynnsons. 12 Pan vons lenwys, ev a leveris dh'y dhyskyblon, ‘Kuntellewgh an brywyon yw gesys, rag na vo kellys travyth.’ 13 Ytho i a's kuntellas, ha lenwel dewdhek kanstellas a vrywyon a'n pymp torth heydh, ha re bia moy es lowr dhe'n re a dhybris. 14 Ena an dus, pan welsens an tokyn a wrug Yesu, a leveris, ‘Hemma dhe wir yw an profoes a dal dos y'n bys.’ 15 Ytho pan wodhva Yesu i dhe dhos dh'y dhalghenna gans nerth rag y wul myghtern, ev eth dhe-ves arta y'n menydh, y honan.
Kerdhes war an Mor
16 Ha devedhys an gorthugher, y dhyskyblon eth yn-nans dhe'n mor, 17 hag entra a-bervedh yn gorhel, ha mos dres an mor, troha Kapernaum. Seulabrys tewl o hi, ha ny veu Yesu hwath devedhys dhedha. 18 Ha'n mor a dhrehevis drefenn gwyns meur esa ow hwytha. 19 Ytho pan wrussens roevya neb pymp erowhys warn ugens, i a welas Yesu ow kerdhes war an mor, hag ow tos nes dhe'n gorhel; hag own a's teva. 20 Mes yn-medh ev dhedha, ‘My yw; na berthewgh own.’ 21 Ena i a vynnas y gemmeres a-bervedh y'n gorhel, ha hware an gorhel a dheuth dhe'n lann mayth esens ow mos.
Yesu, Bara Bywnans
22 Ternos, an routh ow kortos dhe du arall an mor a welas na via gorhel arall ena saw onan, ha na wrussa Yesu mos a-bervedh y'n gorhel dh'y dhyskyblon, saw unnsel y dhyskyblon a wrussa mos dhe-ves. 23 Mes gorholyon erell a dheuth dhiworth Tiberias, ogas dhe'n le may tyb'sens an bara, wosa an Arloedh dhe ri grasow. 24 Ytho pan welas an routh nag esa Yesu ena, nag y dhyskyblon, i ynwedh eth a-bervedh yn gorholyon ha dos dhe Kapernaum, ow hwilas Yesu. 25 Ha pan y'n kavsons dhe du arall an mor, yn-medhons dhodho, ‘Rabbi, p'eur hwrussys dos omma?’ 26 Yesu a worthybis dhedha ha leverel, ‘Yn hwir, yn hwir y lavarav dhywgh, ny'm hwilowgh drefenn hwi dhe weles toknys, mes drefenn hwi dhe dhybri a'n torthow ha bos lenwys. 27 Na lavuryewgh rag boes a wra pedri, mes rag boes a dhur bys yn bywnans heb diwedh, hag a wra Mab an den y ri dhywgh; rag warnodho an Tas re settyas y sel.’ 28 Ytho yn-medhons dhodho, ‘Pandr'a wren rag kowlwul oberow Duw?’ 29 Yesu a worthybis ha leverel dhedha, ‘Hemm yw ober Duw, hwi dhe grysi ynno ev neb a wrug y dhannvon.’ 30 Rakhenna yn-medhons dhodho, ‘Py tokyn a wredh ytho, rag may hwellyn ha krysi ynnos? Pandr'a wredh y oberi? 31 Agan tasow a dhybri manna y'n gwylvos, dell yw skrifys: “Ev a ros dhedha bara a nev dhe dhybri.” ’ 32 Ytho Yesu a leveris dhedha, ‘Yn hwir, yn hwir y lavarav dhywgh, nyns o Moyses neb a ros dhywgh an bara a nev, mes ow Thas yth yw neb a re dhywgh an gwir vara a nev. 33 Rag bara Duw yw ev neb a dheu yn-nans dhiworth nev ha neb a re bywnans dhe'n bys.’ 34 Ytho i a leveris dhodho, ‘Arloedh, ro dhyn an bara ma bynitha.’ 35 Yesu a leveris dhedha, ‘My yw an bara a vywnans; neb a dheu dhymmo vy ny'n jevydh nown bynitha, ha neb a grys ynnov vy ny'n jevydh syghes nevra. 36 Mes my a leveris dhywgh, hwi re'm gwelas, ha ny grysowgh. 37 Pup-tra a re an Tas dhymm a wra dos dhymm, ha piwpynag a dheffo dhymm, ny wrav vy nevra y dewlel mes. 38 Rag nyns ov vy devedhys yn-nans dhiworth nev dhe wul ow bolonjedh ow honan, marnas bolonjedh neb a'm dannvonas. 39 Ha hemm yw bolonjedh neb a'm dannvonas, ma na wrylliv kelli travyth a bup-tra re ros ev dhymm, mes y dhrehevel yn-bann dydh fin. 40 Rag hemm yw bolonjedh ow Thas: pubonan a wel an Mab ha krysi ynno a gyv bywnans heb diwedh, ha my a'n drehav dydh fin.’ 41 Rakhenna an Yedhewon a grodhvolas warnodho, rag ev dhe leverel, ‘My yw an bara a dheuth yn-nans dhiworth nev’, 42 hag yn-medhons, ‘A nyns yw hemma Yesu mab Yosep neb a aswonnyn y das ha'y vamm? Fatell lever ytho, “Devedhys ov vy yn-nans dhiworth nev”?’ 43 Yesu a worthybis ha leverel dhedha, ‘Na grodhvolewgh an eyl gans y gila. 44 Ny yll denvyth dos dhymmo vy marnas an Tas neb a'm dannvonas a'n tenn; ha my a'n drehav dydh fin. 45 Skrifys yw y'n brofoesi, “Hag i oll a vydh dyskys gans Duw.” Seul a woslow orth an Tas ha dyski anodho, a dheu dhymmo vy. 46 Nyns yw, nebonan dhe weles an Tas marnas ev neb usi dhiworth Duw; ev re welas an Tas. 47 Yn hwir, yn hwir y lavarav dhywgh, neb a grys a'n jeves bywnans heb diwedh. 48 My yw an bara a vywnans. 49 Agan tasow a dhybri manna y'n gwylvos, hag i a verwis. 50 Hemm yw an bara a dheu yn-nans dhiworth nev, rag may teppro den anodho, ha na varwo. 51 My yw an bara byw a dheuth yn-nans dhiworth nev; mar teber den a'n bara ma, ev a vyw bynitha; ha'n bara a rov yw ow hig, rag bywnans an bys.’ 52 Rakhenna an Yedhewon a gedrynnas an eyl gans y gila, ow leverel, ‘Fatell yll hemma ri dhyn kig dhe dhybri?’ 53 Ytho Yesu a leveris dhedha, ‘Yn hwir, yn hwir y lavarav dhywgh, marnas hwi a dheber kig Mab an den, hag eva y woes, ny'gas beus bywnans ynnowgh agas honan. 54 Piwpynag a dheber ow hig hag eva ow goes a'n jeves bywnans heb diwedh, ha my a'n drehav dydh fin. 55 Rag ow hig yw boes yn hwir, ha'm goes yw diwes yn hwir. 56 Piwpynag a dheber ow hig hag eva ow goes a drig ynnov vy, ha my ynno ev. 57 Dell y'm dannvonas an Tas byw, ha my a vyw der an Tas, yndella neb a'm deber, henna a'n jevydh bywnans dredhov vy. 58 Hemm yw an bara a dheuth yn-nans dhiworth nev. Nyns yw kepar ha pan dhybri an tasow, hag i a verwis; neb a dheber an bara ma a vyw bynitha.’ 59 Ev a gewsis an taklow ma y'n synaga, hag ev ow tyski yn Kapernaum.
An Geryow a Bywnans heb Dhiwedh
60 Rakhenna, lies a'y dhyskyblon pan glewsons hemma a leveris, ‘Kales yw an lavar ma; piw a yll y glewes?’ 61 Yesu, ow konvedhes y dhyskyblon dhe grodhvolas a-dro dhe hemma a leveris dhedha, ‘A wra hemma agas sklandra? 62 Pandra ytho mar kwelowgh Mab an den owth yskynna dhe'n le mayth esa kyns? 63 An Spyrys yth yw neb a re vywnans; nyns eus prow vydh y'n kig. An geryow a gowsav dhywgh, yth yns i spyrys, ha bywnans. 64 Mes yma re yntredhowgh neb na grysons.’ Rag Yesu a wodhva a'n dalleth piw ens i neb na gryssons, ha piw o neb a wrussa y drayta. 65 Hag yn-medh ev, ‘Rakhenna my a leveris dhywgh, na yll denvyth dos dhymmo vy marnas hemm yw grontys dhodho gans ow Thas.’ 66 Alena rag lies a'y dhyskyblon eth war-dhelergh, ha ny gerdhens ganso namoy. 67 Ena Yesu a leveris dhe'n dewdhek, ‘Hwi ynwedh, a vynnowgh hwi mos yn-kerdh?’ 68 Simon Peder a worthybis dhodho, ‘Arloedh, dhe biw y hwren ni mos? Yma dhis an geryow a vywnans heb diwedh. 69 Ha ni a grys, hag a woer ty dhe vos an Sans a Dhuw.’ 70 Yesu a worthybis dhedha, ‘A ny wrugavy agas dewis, agas dewdhek? Hag onan ahanowgh yw dyowl.’ 71 Ev a gewsi a Yudas mab Simon Skaryoth; rag ev, onan a'n dewdhek, a vedha orth y drayta.
Diskryjyans Breder Yesu
1 Wosa hemma, yth esa Yesu ow kerdhes yn Galile; rag ny vynna kerdhes yn Yudi, rag an Yedhewon a hwila y ladha. 2 Mes ogas veu goel an Yedhewon, an skovvaow; 3 ytho y vreder a leveris dhodho, ‘Voyd alemma, ha ke yn Yudi, rag may hwello dha dhyskyblon, i ynwedh, an oberow a wredh. 4 Rag ny ober denvyth yn-dann gel neb a hwila bos aswonnys apert. Mar kwredh an taklow ma, diskwa dha honan dhe'n bys.’ 5 Rag ny grysi ynno na hwath y vreder. 6 Ytho Yesu a leveris dhedha, ‘Nyns yw devedhys ow eur vy na hwath; mes agas eur hwi yw parys pup-prys. 7 Ny yll an bys agas kasa, mes ev a'm kas, rag my a dhustuni anodho, y wriansow dhe vos drog. 8 Kewgh hwi yn-bann dhe'n goel; my ny av yn-bann dhe'n goel ma; rag nyns yw kowlwrys ow eur na hwath.’ 9 Wosa leverel an taklow ma, ev a wortas yn Galile.
Yesus orth Goel an Skovvaow
10 Mes wosa y vreder dhe vos yn-bann dhe'n goel, ena ev ynwedh eth yn-bann; ny'n gwrug yn apert, mes kepar dell via yn-dann gel. 11 Ytho an Yedhewon a'n hwilas y'n goel hag a leveris, ‘Ple'ma'n den na?’ 12 Hag yth esa krodhvol meur y'n routh yn y gever; rag re a leveri, ‘Dremas yw’, mes re erell a leveri, ‘Nag yw, mes ev a doell an routh.’ 13 Byttegyns ny gewsi denvyth yn apert yn y gever, rag own a'n Yedhewon. 14 Lemmyn yn kres an goel, Yesu eth yn-bann dhe'n tempel hag yth esa ow tyski. 15 Marth a's teva an Yedhewon, ow leverel, ‘Fatell yll ev bos lettrys, pan na studhyas bythkweth?’ 16 Ytho Yesu a worthybis dhedha ha leverel, ‘Nyns yw ow dyskas dhymm ow honan, mes dhe neb a'm dannvonas. 17 Mar mynn nebonan gul y volonjedh, ev a woer a-dro dhe'n dyskas, pyneyl y vos a Dhuw, po my dhe gewsel a'm awtorita ow honan. 18 Neb a gews a'y awtorita y honan a hwila y enor y honan; mes neb a hwila an enor anodho ev neb a'n dannvonas, hemma yw gwir, ha nyns eus ynno anwiryonedh. 19 ‘A ny ros Moyses an lagha dhywgh? Mes denvyth ahanowgh ny with an lagha. Prag y hwilowgh ow ladha?’ 20 An routh a worthybis, ‘Yma dyowl dhis; piw a hwila dha ladha?’ 21 Yesu a worthybis ha leverel dhedha, ‘Unn ober re wrugavy, ha hwi oll a'gas beus marth. 22 Rakhenna Moyses a ros dhywgh an trodreghyans (nyns yw, henna dhe vos dhiworth Moyses, mes dhiworth an tasow); ha hwi a drodregh den y'n sabot. 23 Mar tegemmer den trodreghyans y'n sabot rag na vo lagha Moyses terrys, owgh hwi serrys orthiv rag my dhe yaghhe den yn tien y'n sabot? 24 Na vreusewgh herwydh an semlans, mes breusewgh gans breus gwiryon.’ 25 Ena re a dus Yerusalem a leveris, ‘A nyns yw hemma ev neb a hwilons y ladha? 26 Hag ott, ev a gews yn apert, ha ny leverons dhodho travyth. A aswonnis an rewloryon hemma dhe vos yn hwir an Krist? 27 Mes ni a aswonn an den ma, a ble'ma; ha pan dheu an Krist, ny woer denvyth a ble'ma.’ 28 Ytho Yesu a grias y'n tempel, hag ev ow tyski, hag a leveris, ‘Hwi a'm aswonn, ha hwi a woer a ble'th esov. Ha nyns ov vy devedhys ahanav ow honan, mes gwir yw ev neb a'm dannvonas, neb na aswonnowgh. 29 My a'n aswonn, rag yth esov vy dhiworto, hag ev a'm dannvonas.’ 30 Rakhenna i a hwilas y dhalghenna, mes ny settyas denvyth dorn ynno, rag nyns o devedhys y eur ev. 31 Ha lies a'n routh a grysis ynno ha leverel, ‘Pan dheu an Krist, a wra ev toknys moy es dell wra an den ma?’ 32 An Fariseow a glewas an routh ow krodhvolas yndella a-dro dhodho, ha'n bennoferysi ha'n Fariseow a dhannvonas gwesyon dh'y dhalghenna. 33 Ytho Yesu a leveris, ‘Pols byghan yth esov vy hwath genowgh, hag ena yth av dhe neb a'm dannvonas. 34 Hwi a'm hwila ha ny'm kevowgh; ha le mayth esov vy, dhi ny yllowgh hwi dos.’ 35 Ena an Yedhewon a leveris an eyl dh'y gila, ‘Ple'th a an den ma, ma na yllyn y gavoes? A vynn ev mos dhe'n skattrys yn mysk an Grekys, ha dyski dhe'n Grekys? 36 Pyth yw an lavar a gewsis an den ma, “Hwi a'm hwila ha ny'm kevowgh”, ha “Le mayth esov vy, dhi ny yllowgh hwi dos”?’ 37 Y'n jydh diwettha, dydh meur an goel, Yesu a sevis ha kria, ow leverel, ‘Den mara'n jeves syghes, des ev dhymmo vy, hag eva. 38 Neb a grys ynnov vy, dell lever an skryptor, “Yn-mes a'y dorr, resek a wra avonyow a dhowr byw.” ’ 39 Ev a gewsis hemma a-dro dhe'n Spyrys, a vedha degemmerys gans an re a grys ynno ev; rag ny via an Spyrys res na hwath, drefenn na veu Yesu glorifiys na hwath. 40 Re yn mysk an routh pan glewsons an geryow ma a leveri, ‘Hemm yw yn hwir an profoes.’ 41 Re erell a leveri, ‘Hemm yw an Krist’; mes re a leveri, ‘A dheu Krist a Alile? 42 A ny lever an skryptor, Krist dhe dhos a has Davydh, hag a Bethlehem, an dre mayth esa Davydh?’ 43 Ytho yth esa fols y'n routh a-dro dhodho. 44 Ha re anedha a vynna y dhalghenna, mes denvyth ny settyas diwdhorn warnodho. 45 Ytho an wesyon a dheuth dhe'n bennoferysi ha'n Fariseow; hag i a leveris dhedha, ‘Prag na wrussowgh y dhri?’ 46 An wesyon a worthybis, ‘Ny wrug denvyth bythkweth kewsel yndella, dell wra an den ma.’ 47 Ytho an Fariseow a worthybis dhedha, ‘Owgh hwi ynwedh toellys? 48 A wrug tus vydh a'n rewloryon krysi ynno, po a'n Fariseow? 49 Mes an routh ma, neb na woer an lagha, yw milligys.’ 50 Yn-medh Nikodemus dhedha (ev neb a dheuth dhodho kyns, hag ev onan anedha), 51 ‘A wra agan lagha breusi den heb goslowes orto kyns, ha godhvos pandr'a wra?’ 52 I a worthybis ha leverel dhodho, ‘Es'ta jy ynwedh a Alile? Hwila ha gwel, na sev profoes dhiworth Galile.’ 53 Ha pubonan eth dh'y ji y honan.
An Venyn Kemmerys ow Kul Avoutri
1 Mes Yesu eth dhe'n menydh Oliv. 2 Ha myttin a-varr ev a dheuth arta dhe'n tempel, hag oll an bobel a dheuth dhodho; hag ev a esedhas ha dyski dhedha. 3 Ha'n skribys ha'n Fariseow a dhros dhodho benyn kemmerys ow kul avoutri, ha'y gorra y'n kres. 4 Yn-medhons dhodho, ‘Mester, an venyn ma a veu kemmerys ow kul avoutri, y'n gweythres y honan. 5 Y'n lagha, Moyses a erghis dhyn labydha benynes a'n par na; mes pandr'a leverydh jy?’ 6 I a gewsis hemma dh'y brevi, rag may fe dhedha neb kuhudhans er y bynn. Mes Yesu a blegyas war-nans, ha skrifa war an dor gans y vys. 7 Mes pan besyons ow kovynn orto, ev a sevis yn-bann ha leverel dhedha, ‘Neb ahanowgh a vo heb pegh, bedhes ev an kynsa dhe dewlel men orti.’ 8 Hag ow plegya yn-nans arta, ev a skrifas war an dor. 9 Mes an re a'n klewas eth dhe-ves onan hag onan, ow talleth gans an henavogyon, ha nyns o gesys saw ev, ha'n venyn a-ragdho. 10 Pan sevis, Yesu a leveris dhedhi, ‘Benyn, ple'mons i? A ny'th kuhudhas denvyth?’ 11 Hi a leveris, ‘Denvyth, Arloedh.’ Ha Yesu a leveris, ‘Na ny wrav vy dha guhudha. Ke, hag alemma rag na wra pegha namoy.’
Yesu, Golow an Bys
12 Ytho Yesu a gewsis dhedha arta, ow leverel, ‘My yw golow an bys; neb a'm hol, ny gerdh yn tewlder, mes ev a'n jevydh an golow a vywnans.’ 13 Rakhenna yn-medh an Fariseow dhodho, ‘Dustunia a wredh ahanas dha honan; nyns yw dha dhustuni gwir.’ 14 Yesu a worthybis ha leverel dhedha, ‘Kyn tustuniav ahanav ow honan, ow dustuni yw gwir, rag my a woer a-ble ov devedhys, ha ple'th av. Mes ny wodhowgh hwi a-ble'th esov ow tos na ple'th av. 15 Hwi a vreus war-lergh an kig; ny vreusav vy denvyth 16 Ha mar preusav vy, ow breus yw gwir; rag ny'n gwrav ow honan, mes my ha'n Tas neb a'm dannvonas a'n gwra. 17 Hag yn agas lagha skrifys yw, dustuni dew dhen dhe vos gwir. 18 My yw, neb a dhustuni ahanav ow honan, ha'n Tas neb a'm dannvonas a dhustuni ahanav.’ 19 Ytho yn-medhons dhodho, ‘Ple'ma dha Das?’ Yesu a worthybis, ‘Ny aswonnowgh na my na'm Tas; mar kwrellewgh ow aswonn vy, hwi a wrussa aswonn ow Thas ynwedh.’ 20 Ev a gewsis an geryow ma y'n arghow, hag ev ow tyski y'n tempel; ha ny wrug denvyth y dhalghenna, rag ny veu hwath devedhys y eur.
Ple'th Av, ny Yllowgh Dos
21 Yesu a leveris dhedha arta, ‘My a dhe-ves, ha hwi a vydh orth ow hwilas, ha hwi a verow yn agas pegh. Ple'th av, ny yllowgh dos.’ 22 Ena yn-medh an Yedhewon, ‘A wra ev omladha y honan? rag ev a leveris, “Ple'th av, ny yllowgh dos.” ’ 23 Hag yn-medh ev dhedha, ‘Hwi yw dhiworth a-woeles, my yw a-wartha. Hwi yw a'n bys ma, nyns ov vy a'n bys ma. 24 Ytho my a leveris dhywgh, hwi dhe verwel yn agas peghosow. Rag mar ny grysowgh my dhe vos ev, hwi a verow yn agas peghosow.’ 25 Ena i a leveris dhodho, ‘Piw osta?’ Yn-medh Yesu dhedha, ‘An pyth re leveris dhywgh a'n dalleth 26 Yma dhymm lies tra dhe leverel ha dhe vreusi a-dro dhywgh; mes neb a'm dannvonas yw gwir; ha'n pyth a glewis dhiworto, henna my a lever dhe'n bys.’ 27 Ny gonvedhsons ev dhe gewsel orta a'n Tas. 28 Ena Yesu a leveris dhedha, ‘Pan dhrehevowgh Mab an den, ena hwi a aswonn my dhe vos ev, ha na wrav vy travyth ahanav ow honan; saw kepar dell dhyskas dhymm ow Thas, henna a gowsav. 29 Yma genev vy ev neb a'm dannvonas. Ny'm gasas ow honan, rag pup-prys my a wra an pyth yw plegadow dhodho.’ 30 Hag ev ow kewsel hemma, lies a grysis ynno.
An Gwir a Wra agas Rydhhe
31 Ena Yesu a leveris dhe'n Yedhewon a grysis ynno, ‘Mar pesyowgh y'm ger, yth owgh hwi yn hwir ow dyskyblon, 32 ha hwi a woer an gwir, ha'n gwir a wra agas rydhhe.’ 33 I a worthybis dhodho, ‘Has Abraham on ni, ha nyns en ni bythkweth kethyon dhe dhenvyth. Fatell leverydh, “Hwi a vydh rydhhes”?’ 34 Yesu a worthybis dhedha, ‘Yn hwir, yn hwir y lavarav dhywgh, pubonan a wra pegh yw keth dhe begh. 35 Ny drig an kethwas y'n chi bynitha; an mab a drig bynitha. 36 Ytho mar kwra an Mab agas rydhhe, rydh yn tevri a vydhowgh. 37 My a woer hwi dhe vos has Abraham; mes hwi a hwila ow ladha, rag ow ger ny'n jeves le ynnowgh. 38 My a gews an pyth re welis vy a-rag ow Thas; ha hwi a wra an pyth re welsowgh gans agas tas.’
Agas Tas an Jowl
39 I a worthybis ha leverel dhodho, ‘Abraham yw agan tas.’ Yn-medh Yesu dhedha, ‘Mar pewgh hwi fleghes Abraham, hwi a wrussa oberow Abraham. 40 Mes lemmyn hwi a hwila ow ladha, den neb a dherivis dhywgh an gwir, hag a glewis vy a Dhuw. Ny wrug Abraham henna. 41 Hwi a wra oberow agas tas.’ Ena i a leveris dhodho, ‘Nyns on ni dineythys dre fornikashyon. Yma dhyn unn Tas, Duw.’ 42 Yn-medh Yesu dhedha, ‘Mar pe Duw agas Tas, hwi a wrussa ow hara; rag my a dheuth dhiworth Duw, hag omma yth esov. Nyns ov vy devedhys ahanav ow honan, mes ev a'm dannvonas. 43 Prag na gonvedhowgh ow lavar? Rag na wodhowgh hwi klewes ow ger. 44 Hwi yw dhiworth agas tas an jowl, ha hwi a vynn gul hwansow agas tas. Ev a veu denledhyas a'n dalleth ha ny sevis y'n gwir, rag nyns eus gwiryonedh ynno. Pan lever gow, ev a lever a'y nas y honan, rag gowleveryas yw ev, ha tas gowyow. 45 Mes rag my dhe leverel an gwir, ny wrewgh ow krysi. 46 Piw ahanowgh a'm kuhudh a begh? Ha mar lavarav an gwir, prag na wrewgh ow krysi? 47 Ev neb yw a Dhuw a glew geryow Duw; rakhenna, hwi ny glewowgh, drefenn nag owgh hwi a Dhuw.’
Kyns Abraham dhe Vos, My Yw
48 Ytho an Yedhewon a worthybis, ha leverel dhodho, ‘A ny leveryn yn ta, ty dhe vos Samaritan, ha dyowl dhe vos dhis?’ 49 Yesu a worthybis, ‘Nyns eus dhymm dyowl, mes my a enor ow Thas, ha hwi a'm disenor. 50 Ha ny hwilav ow glori ow honan; yma neb a'n hwila, ha neb a vreus. 51 Yn hwir, yn hwir y lavarav dhywgh, piwpynag a with ow ger, ny welvydh mernans bynitha.’ 52 Ena yn-medh an Yedhewon dhodho, ‘Lemmyn ni a woer bos dyowl genes. Abraham a verwis, ha'n brofoesi, ha ty a lever, “Piwpynag a with ow ger, ny wra ev tastya mernans bynitha.” 53 Osta brassa es agan tas Abraham, neb a verwis? Ha'n brofoesi a verwis. Piw yth omwredh ty dhe vos?’ 54 Yesu a worthybis, ‘Mar kwrav vy ri glori dhymmo vy ow honan, ny dal ow glori travyth; mes ow Thas yw neb a wra ow glorifia, neb a leverowgh anodho, “Ev yw agan Duw.” 55 Hwi ny'n aswonnowgh, mes my a'n aswonn; ha mar lavarren, “Ny'n aswonnav”, my a via gowleveryas, avelowgh hwi. Mes my a'n aswonn, ha my a with y er. 56 Abraham agas tas a lowenhas dhe weles ow dydh; ev a'n gwelas, ha lowen veu.’ 57 Ena yn-medh an Yedhewon dhodho, ‘Nyns osta hwath hanter-kans bloedh, ha ty a welas Abraham?’ 58 Yn-medh Yesu dhedha, ‘Yn hwir, yn hwir y lavarav dhywgh, kyns Abraham dhe vos, my yw.’ 59 Ena i a gemmeras meyn dhe dewlel orto; mes Yesu a omgudhas ha gasa an tempel.
Yaghhe Den Genys Dall
1 Hag ev ow tremena, ev a welas den dall a'y enesigeth. 2 Ha'y dhyskyblon a wovynnas orto ow leverel, ‘Mester, piw a beghas, an den ma, po y gerens, may feu genys dall?’ 3 Yesu a worthybis, ‘Ny beghas naneyl an den ma na'y gerens, mes may fe diskwedhys ynno oberow Duw. 4 Ni a res gul an oberow anodho ev neb a'm dannvonas hedre vo dydh; nos a dheu pan na yll denvyth oberi. 5 Hedre viv y'n bys, golow an bys ov vy.’ 6 Wosa leverel hemma, ev a drewas war an dor ha gul pri gans an trew, hag ura an pri war y dhewlagas 7 ha leverel dhodho, ‘Ke, omwolgh yn poll Siloam’ (hemm yw dhe styrya, Dannvenys). Ytho ev eth hag omwolghi, hag ev a dhehwelis ow kweles. 8 Y gentrevogyon ha'n re a'n gwelsa kyns ow pegya a leveris, ‘A nyns yw hemma an den o esedhys ow pegya?’ 9 Re a leveris, ‘Hemm yw ev’, mes re erell a leveris, ‘Haval yw dhodho’; mes ev y honan a leveris, ‘My yw.’ 10 Ena i a leveris dhodho, ‘Ytho fatell veu dha dhewlagas igerys?’ 11 Ev a worthybis, ‘An den henwys Yesu a wrug pri, hag ura ow dewlagas, ha leverel dhymm, “Ke dhe Siloam hag omwolgh”; ha my eth hag omwolghi, ha gweles arta.’ 12 Hag i a leveris dhodho, ‘Ple'ma ev?’ Yn-medh ev, ‘Ny wonn.’
An Fariseow a Hwither an Yaghheans
13 I a dhros dhe'n Fariseow an den neb o dall kyns. 14 Mes dydh sabot o pan wrug Yesu an pri hag igeri y dhewlagas. 15 Ytho an Fariseow a wovynnas orto arta ynwedh fatell dhaskavas y wolok. Ev a leveris dhedha, ‘Ev a worras pri war ow dewlagas, ha my a omwolghas, ha my a wel.’ 16 Ytho re a'n Fariseow a leveris, ‘Nyns yw an den ma a Dhuw, rag ny with an sabot.’ Yn-medh re erell, ‘Fatell yll den yw peghador gul toknys a'n par ma?’ Hag yth esa fols yntredha. 17 Arta y lavarsons dhe'n den dall, ‘Pandr'a leverydh dha honan anodho, rag ev dhe igeri dha dhewlagas?’ Yn-medh ev, ‘Profoes yw.’ 18 Mes ny grysis an Yedhewon a-dro dhodho, y fia dall ha daskavoes golok, bys pan alwsons kerens an den a dhaskavas golok. 19 Hag i a wovynnas orta ow leverel, ‘Yw hemma agas mab, neb dell leverowgh a veu genys dall? Fatell yw ytho ev dhe weles lemmyn?’ 20 Y gerens a worthybis dhedha ha leverel, ‘Ni a woer hemma dhe vos agan mab, hag ev dhe vos genys dall; 21 mes ny wodhon fatell wel lemmyn, na piw a igoras y dhewlagas; govynnewgh orto, tevesik yw; ev a yll gewsel anodho y honan.’ 22 Y gerens a leveris hemma rag bos own dhedha a'n Yedhewon; rag an Yedhewon a wrussa ervira war-barth seulabrys, piwpynag a gonfessa ev dhe vos Krist dhe vos emskemunys a'n synaga. 23 Rakhenna y gerens a leveris, ‘Ev yw tevesik, govynnewgh orto ev.’ 24 Ena i a elwis nessa gweyth an den o dall ha leverel dhodho, ‘Ro dhe Dhuw an gordhyans; ni a woer an den ma dhe vos peghador.’ 25 Ev a worthybis, ‘Mars yw peghador ny wonn; unn dra a wonn: dall en, lemmyn my a wel.’ 26 Ytho i a leveris dhodho arta, ‘Pandr'a wrug dhis? Fatell igoras dha dhewlagas?’ 27 Ev a worthybis dhedha, ‘My re gewsis dhywgh seulabrys, ha ny woslowsowgh; prag y fynnowgh klewes arta? A vynnowgh hwi ynwedh bos y dhyskyblon?’ 28 I a'n skornyas ha leverel, ‘Ty yw y dhyskybel, mes ni yw dyskyblon a Moyses. 29 Ni a woer, Duw dhe gewsel dhe Moyses, mes an den ma, ny wodhon a-ble teu.’ 30 An den a worthybis ha leverel dhedha, ‘Yma tra varthus yn hemma, na wodhowgh a ble'ma; mes ev a igoras ow dewlagas. 31 Ni a woer na glew Duw peghadoryon, mes mars yw den gordhyer a Dhuw, hag ow kul y volonjedh, ev a wra y glewes. 32 A dhalleth an bys, ny veu klewys denvyth dhe igeri dewlagas den neb a veu genys dall. 33 Mar ny ve an den ma a Dhuw, ny allsa gul travyth.’ 34 I a worthybis ha leverel dhodho, ‘Ty a veu genys oll yn tien yn peghosow, ha ty a vynn dyski dhyn?’ Hag i a'n tewlis yn-mes.
Dellni Spyrysek
35 Yesu a glewas i dh'y dewlel yn-mes, ha pan y'n kavas, yn-medh ev, ‘A grysydh yn Mab an den?’ 36 Ev a worthybis ha leverel, ‘Ha piw yw ev, Arloedh, may kryssiv ynno?’ 37 Yn-medh Yesu dhodho, ‘Ty re'n gwelas, hag ev yw neb a gews genes.’ 38 Yn-medh ev, ‘Arloedh, my a grys.’ Hag ev a'n wordhyas. 39 Ha Yesu a leveris, ‘Dhe vreus yth ov vy devedhys y'n bys ma, rag may hwello kemmys na yll gweles, ha may fo dall kemmys a yll gweles.’ 40 Ha re a'n Fariseow neb esa ganso a glewas hemma, ha leverel dhodho, ‘On ni ynwedh dall?’ 41 Yesu a leveris dhedha, ‘Mar pewgh hwi dall, ny via dhywgh pegh; mes lemmyn hwi a lever, “Ni a wel”, ytho agas pegh a bes.’
Parabolenn an Gorlann
1 ‘Yn hwir, yn hwir y lavarav dhywgh, neb na dheu a-ji yn korlann an deves der an daras mes neb a yskynn war neb fordh arall, henn yw lader ha robbyer. 2 Mes neb a dheu a-ji der an daras yw bugel an deves. 3 Dhodho an porther a iger, ha'n deves a glew y lev, hag ev a elow y dheves y honan orth hanow ha'ga ledya yn-mes. 4 Ha pan worr ev y dheves y honan yn-mes, ev a gerdh a-dheragdha, ha'n deves a'n syw, rag i dhe aswonn y lev. 5 Ny vynnons sywya estren, mes fia a wrons dhiworto, rag ny aswonnons lev estrenyon.’ 6 Yesu a gewsis dhedha an barabolenn ma, mes ny gonvedhsons an pyth a leveri dhedha.
Yesu an Bugel Da
7 Ena Yesu a leveris arta, ‘Yn hwir, yn hwir y lavarav dhywgh, my yw daras an deves. 8 An re oll a dheuth kyns yw ladron ha robbyoryon, mes ny wrug an deves goslowes orta. 9 My yw an daras; piwpynag a dheu a-ji dredhov vy, ev a vydh selwys, ha dos a-ji ha mos yn-mes a wra, ha kavoes peurva. 10 Ny dheu lader saw dhe ladra, ha ladha, ha distrui; my yw devedhys rag may fo dhedha bywnans, ha may fo dhedha palster anodho. 11 ‘My yw an bugel da. An bugel da a dhaskorr y vywnans rag y dheves. 12 Mes an goberwas, neb nag yw an bugel, ha ma nag yw an deves dhodho y honan, ev a wel an bleydh ow tos hag ev a as an deves ha fia, ha'n bleydh a wra aga hachya ha'ga heskar. 13 Henn yw rag ev dhe vos goberwas, ha ny vern dhodho travyth a-dro dhe'n deves. 14 My yw an bugel da, ha my a aswonn ow deves ow honan, ha'm re ow honan a'm aswonn vy. 15 Kepar dell wra an Tas ow aswonn, my ynwedh a aswonn an Tas, ha my a dhaskorr ow bywnans rag an deves. 16 Hag yma dhymm deves erell, nag yns a'n gorlann ma; res yw dhymm aga dri ynwedh, hag i a glew ow lev; hag y fydh unn flokk, unn bugel. 17 Rag hemma, an Tas a'm kar, rag my a dhaskorr ow bywnans, rag may hwrylliv y gemmeres arta. 18 Denvyth ny wra y gemmeres dhiworthiv, mes my a'n daskorr a'm bodh ow honan. Yma dhymm galloes dh'y dhaskorr, hag yma dhymm galloes dh'y gemmeres arta; my re dhegemmeras an arghadow ma dhiworth ow Thas.’ 19 Ena yth esa fols arta yn mysk an Yedhewon drefenn an geryow ma. 20 Lies a leveris, ‘Yma dyowl dhodho, ha varyes yw; prag y hwoslowowgh orto?’ 21 Yn-medh re erell, ‘Nyns yw an re ma an geryow a dhen ha dhodho dyowl. A yll dyowl igeri dewlagas an dhellyon?’
Yesu Skonys gans an Yedhewon
22 Ena y feu dy'goel an Sakrans yn Yerusalem; gwav o hi. 23 Hag yth esa Yesu ow kerdhes y'n tempel, yn portal Solomon. 24 Ena an Yedhewon a dheuth a-dro dhodho ha leverel dhodho, ‘Pes termyn y'gan synsydh yn fienasow? Mars osta an Krist, lavar dhyn yn apert.’ 25 Yesu a worthybis dhedha, ‘My a leveris dhywgh, ha ny wrussowgh hwi krysi. An oberow a wrav yn hanow ow Thas, i a dheg dustuni ahanav; 26 mes ny grysowgh hwi, rag nyns owgh hwi a'm deves vy. 27 Ow deves a glew ow lev, ha my a's aswonn, hag i a'm syw. 28 Ha my a re dhedha bywnans heb diwedh, ha ny wrons i mos dhe goll bynitha, ha denvyth ny wra aga hemmeres yn-mes a'm dorn. 29 Brassa ages pup-tra yw ow Thas, neb a's ros dhymm, ha ny yll denvyth aga hemmeres mes a dhorn an Tas. 30 My ha'm Tas yw onan.’ 31 Ytho an Yedhewon a gemmeras meyn yn-bann arta, rag may hwrellens y labydha. 32 Yesu a worthybis dhedha, ‘My re dhiskwedhas dhywgh lies ober da dhiworth an Tas; rag py ober anedha y fynnowgh ow labydha?’ 33 An Yedhewon a worthybis dhodho, ‘Ny wren dha labydha rag ober da, mes rag blasfemi, ha rag ty, ow pos den, dhe omwul Duw.’ 34 Yesu a worthybis dhedha, ‘A nyns yw skrifys yn agas lagha, My a leveris, Hwi yw duwow? 35 Mar kwrug ev aga henwel duwow may teuth ger Duw dhedha (ha ny yll an skryptor bos terrys), 36 a yllowgh leverel anodho ev neb a wrug an Tas y sakra ha'y dhannvon y'n bys, “Ty a lever blasfemi”, rag my dhe leverel, “Mab Duw ov vy”? 37 Mar ny wrav oberow ow Thas, na grysewgh ynnov. 38 Mes mar kwrav, kyn na wrewgh krysi dhymm, krysewgh an oberow, rag may hwryllowgh godhvos ha krysi an Tas dhe vos ynnov vy, ha my y'n Tas.’ 39 Ytho i a hwilas arta y dhalghenna, mes ev a skapyas a'ga dorn. 40 Hag ev eth dhe-ves arta dhe'n tu arall dhe'n Yordan, dhe'n tyller mayth esa Yowann ow pesydhya y'n dalleth, hag a wortas ena. 41 Ha lies a dheuth dhodho, hag i a leveris, ‘Ny wrug Yowann tokyn vydh, mes pup-tra a leveris Yowann a-dro dhe'n den ma o gwir.’ 42 Ha lies a grysis ynno y'n le na.
Mernans Lazarus
1 Yth esa den neb o klav, Lazarus a Bethani, tre Maria ha'y hwoer Martha. 2 Maria o hi neb a uras an Arloedh gans unyent, ha sygha y dreys gans hy gols, hag a veu hy broder Lazarus klav. 3 Ytho an hwerydh a dhannvonas dhodho ow leverel, ‘Arloedh, ott, ev neb a gerydh yw klav.’ 4 Pan glewas Yesu henna, yn-medh ev, ‘Nyns yw an kleves ma bys yn mernans, mes rag gordhyans Duw, may fo Mab Duw glorifiys dredho.’ 5 Lemmyn Yesu a gara Martha ha'y hwoer, ha Lazarus. 6 Ytho pan glewas ev dhe vos klav, ev a wortas wosa henna dew dhydh y'n le mayth esa. 7 Ena a'y wosa yn-medh ev dh'y dhyskyblon, ‘Gwren ni mos arta dhe Yudi.’ 8 Yn-medh an dhyskyblon dhodho, ‘Mester, an Yedhewon a hwilas dha labydha nammnygen; a vynnydh mos di arta?’ 9 Yesu a worthybis, ‘A nyns eus dewdhek our y'n jydh? Piwpynag a gertho dydhweyth, ny drebuch ev, rag ev a wel golow an bys ma. 10 Mes piwpynag a gertho yn nos, ev a drebuch, rag nyns eus golow ynno.’ 11 Hemma a leveris, hag ena yn-medh ev dhedha, ‘Agan kar Lazarus a gosk; mes yth av rag y dhifuna.’ 12 Yn-medh an dhyskyblon dhodho, ‘Arloedh, mar kosk ev, ev a vydh saw.’ 13 Mes Yesu re bia ow kewsel a'y vernans, mes i a dybis ev dhe gewsel a gosk rag powes. 14 Ena yn-medh Yesu dhedha yn kler, ‘Lazarus re verwis. 15 Ha lowen ov vy a-barth dhywgh, nag esen vy ena, rag may kryssowgh. Mes gwren ni mos dhodho.’ 16 Ena yn-medh Tommas, henwys Didymus, dh'y gestyskyblon, ‘Gwren ni mos ynwedh, rag may ferwyn ganso.’
Yesu, an Dasserghyans ha'n Bywnans
17 Ytho pan dheuth Yesu, ev a'n kavas, growedhys y'n bedh nans o peswar dydh. 18 Bethani o ogas dhe Yerusalem, neb pymthek erowhys dhiworti. 19 Ha lies a'n Yedhewon a dheuth dhe Vartha ha dhe Varia dh'aga honfortya a-dro dh'aga broder. 20 Ytho pan glewas Martha Yesu dhe dhos, hi eth dh'y vetya; mes Maria o esedhys y'n chi. 21 Ena Martha a leveris dhe Yesu, ‘Arloedh, mar pes omma, ny wrussa ow broder merwel. 22 Mes lemmyn ynwedh my a woer, pypynag a wovynni a Dhuw, Duw a'n re dhis.’ 23 Yn-medh Yesu dhedhi, ‘Dha vroder a wra dasserghi.’ 24 Yn-medh Martha dhodho, ‘My a woer, ev dhe sevel arta y'n dasserghyans, dydh fin.’ 25 Yn-medh Yesu dhedhi, ‘My yw an dasserghyans ha'n bywnans; neb a grys ynnov vy, hwath kyn farwo, ev a wra bywa; 26 ha pubonan neb a vyw hag a grys ynnov vy, ny verow bynitha. A grysydh hemma?’ 27 Yn-medh hi dhodho, ‘Arloedh, my a grys ty dhe vos an Krist, Mab Duw, neb a dal dos y'n bys.’
Yesu a Oel
28 Ha wosa leverel hemma, hi eth ha gelwel Maria hy hwoer yn priva, ow leverel, ‘An Mester yw devedhys, hag ev a'th elow.’ 29 Kettell glewas hi hemma, hi a sevis uskis ha mos dhodho. 30 Ny veu Yesu devedhys y'n dre na hwath, mes yth esa y'n le may hwrug Martha y vetya. 31 Ena an Yedhewon esa gensi y'n chi hag orth hy honfortya, ow kweles Maria dhe sevel uskis ha mos yn-mes, a wrug hy sywya, ow tybi hi dhe vos dhe'n bedh dhe oela ena. 32 Ena pan dheuth Maria dhe'n le mayth esa Yesu, ha'y weles, hi a goedhas orth y dreys, ow leverel dhodho, ‘Arloedh, mar pes omma, ny wrussa ow broder merwel.’ 33 Yesu ytho, pan y's gwelas owth oela, ha'n Yedhewon a dheuth gensi ynwedh owth oela, ev a veu mevys y'n spyrys, ha troblys; 34 hag yn-medh ev, ‘Ple hwrussowgh y worra?’ Yn-medhons dhodho, ‘Arloedh, deus dhe weles.’ 35 Yesu a oelas. 36 Ytho an Yedhewon a leveris, ‘Awotta, assa wrug ev y gara!’ 37 Mes re anedha a leveris, ‘A ny allsa an den ma, neb a igoras dewlagas an den dall, gul neppyth ma na wrella an den ma merwel?’
Lazarus Dres dhe Vywnans
38 Yesu ytho, mevys arta ynno y honan, a dheuth dhe'n bedh. Fow ova, hag yth esa men ow krowedha warnodho. 39 Yesu a leveris, ‘Kemmerewgh an men dhe-ves.’ Martha, hwoer an den marow, a leveris dhodho, ‘Arloedh, y fydh flerys lemmyn, rag an peswora dydh yw.’ 40 Yn-medh Yesu dhedhi, ‘A ny leveris dhis, mar krysses, ty a welsa golewder Duw?’ 41 Ytho i a gemmeras an men dhe-ves. Ha Yesu a dhrehevis y dhewlagas ha leverel, ‘A Das, my a woer gras dhis ty dhe'm klewes. 42 Ha my a wodhva, ty dhe'm klewes pup-prys, mes drefenn an routh a sev a-dro my a'n leveris, rag may kryssens ty dhe'm dannvon.’ 43 Ha wosa kewsel yndella, ev a grias gans lev ughel, ‘Lazarus, deus mes!’ 44 Ha'n den marow a dheuth yn-mes, kelmys y dreys ha'y dhiwleuv gans lystennow, ha'y fas maylys gans lien. Yn-medh Yesu dhedha, ‘Gwrewgh y dhigelmi, ha gesewgh ev dhe vos dhe-ves.’
An Bras dhe Ladha Yesu
45 Ytho lies a'n Yedhewon neb a wrussa dos dhe Varia ha gweles an pyth a wrug ev, a grysis ynno. 46 Mes re anedha eth dhe'n Fariseow, ha derivas dhedha an pyth a wrussa Yesu. 47 Ena an bennoferysi ha'n Fariseow a guntellas an konsel ha leverel, ‘Pandr'a wren ni? Rag an den ma a wra lies tokyn. 48 Mara'n gesyn yndella, pub den oll a vydh ow krysi ynno, ha'n Romanyon a dheu ha kemmeres dhe-ves agan le ha'gan kenedhel.’ 49 Mes onan anedha, Kayfas, neb o arghoferyas an vlydhen na, a leveris dhedha, ‘Ny wodhowgh hwi travyth, 50 na ny reknowgh bos 'vas dhywgh, unn den dhe verwel rag an bobel, ma nag ello oll an genedhel dhe goll.’ 51 Ny leveris hemma anodho y honan, mes, rag ev dhe vos arghoferyas an vlydhen na, ev a brofoesas Yesu dhe verwel a-barth an genedhel, 52 ha ny via unnsel rag an genedhel, mes rag kuntell war-barth yn onan fleghes Duw neb a veu skattrys. 53 Ytho a'n jydh na i a dewlis towl dh'y ladha. 54 Rakhenna ny wre Yesu kerdhes namoy yn apert yn mysk an Yedhewon, mes ev eth alena dhe'n vro ogas dhe'n gwylvos, dhe sita henwys Efraym, hag ena ev a wortas gans y dhyskyblon. 55 Ha pask an Yedhewon o ogas, ha lies eth yn-bann dhiworth an pow kyns an pask, dhe omlanhe. 56 Yth esens ow hwilas Yesu, hag ow sevel y'n tempel i a leveri an eyl dh'y gila, ‘Pandr'a brederowgh -- na dheu ev dhe'n goel?’ 57 Mes an bennoferysi ha'n Fariseow a rossa gorhemmynn, piwpynag a wodhve ple'th esa, may rolla derivas, rag may talghennens ynno.
An Untyans yn Bethani
1 Ena, hwegh dydh kyns an pask, Yesu a dheuth dhe Bethani le mayth esa Lazarus neb a wrug ev y dhrehevel dhiworth an re varow. 2 Ytho i a wrug kevywi dhodho ena, hag yth esa Maria ow servya, ha Lazarus a veu onan a'n re esedhys orth an voes ganso. 3 Ena Maria a gemmeras peuns a unyent, nard pur, meur y brys, hag untya treys Yesu, ha sygha y dreys gans hy gols; ha'n chi a veu lenwys a ethenn an unyent. 4 Hag yn-medh Yudas Skaryoth, onan a'y dhyskyblon, neb a vedha orth y drayta, 5 ‘Prag na veu an unyent ma gwerthys a drihans diner, ha'n mona res dhe'n voghosogyon?’ 6 Ny leveris hemma rag bos dhodho bern a-barth an voghosogyon, mes rag ev dhe vos lader, hag ev a witha an pors, ha ladra an pyth o gorrys ynno. 7 Ytho Yesu a leveris, ‘Gwra hy gasa yn kres; hi re'n gwithas rag dydh ow ynkleudhyans. 8 Rag hwi a gyv an voghosogyon pub eur genowgh, mes my ny'm kevowgh pup-prys.’
An Bras erbynn Lazarus
9 Ytho routh veur a'n Yedhewon a glewas ev dhe vos ena, ha ny dheuthons unnsel rag Yesu, mes ynwedh may hwellens Lazarus, neb a wrug ev y dhrehevel dhiworth an re varow. 10 Mes an bennoferysi a dewlis towl dhe ladha Lazarus ynwedh, 11 rag dredho ev y feu lies a'n Yedhewon ow treylya dhe-ves hag ow krysi yn Yesu.
Devedhyans Yesu dhe Yerusalem yn Trygh
12 Ternos an routh veur neb o devedhys dhe'n goel, pan glewsons Yesu dhe dhos dhe Yerusalem, 13 a gemmeras skorrennow palm ha mos yn-mes dh'y vetya, hag i a grias, ‘Hosanna! Bennigys yw neb a dheu yn hanow an Arloedh! Myghtern Ysrael!’ 14 Ha Yesu a gavas asen yowynk, hag ev a esedhas warnodho, dell yw skrifys, 15 ‘Na gemmer own, myrgh Sion; ott, dha vyghtern a dheu, esedhys war ebel asen.’ 16 Ny gonvedhas y dhyskyblon hemma wostalleth, mes pan veu Yesu glorifiys, ena i a borthas kov hemma dhe vos skrifys a-dro dhodho, hag i dhe wul hemma ragdho. 17 Ytho an routh neb esa ganso pan elwis ev Lazarus dhiworth an bedh, ha'y dhrehevel dhiworth an re varow, a dhustunias. 18 Rakhenna an routh eth dh'y vetya, rag i a glewsa ev dhe wul an tokyn ma. 19 Ytho an Fariseow a leveris an eyl dh'y gila, ‘Hwi a wel, nag eus prow vydh dhywgh. Ott, an bys yw gyllys war y lergh.’
Grekys a Hwila Yesu
20 Yth esa Grekys yn mysk an re esa ow tos yn-bann dhe wordhya y'n dy'goel. 21 Ytho an re ma a dheuth dhe Felip, neb o a Bethsaida yn Galile, ha govynn orto ow leverel, ‘Syrra, ni a vynn gweles Yesu.’ 22 Felip a dheuth ha leverel dhe Androw, hag arta Androw ha Felip a leveris dhe Yesu. 23 Yesu a worthybis dhedha ow leverel, ‘Devedhys yw an eur may fo Mab an den glorifiys. 24 Yn hwir, yn hwir y lavarav dhywgh, marnas hasenn a ys a goedh dhe'n dor ha merwel, hi a bes hy honan; mes mar merow, hi a dheg meur a frut. 25 Neb a gar y vywnans a wra y gelli, ha neb a gas y vywnans y'n bys ma a'n gwith bys yn bywnans heb diwedh. 26 Piwpynag a'm serfo, gwres ev ow sywya; hag y'n le mayth esov, ena ynwedh y fydh ow servyas. Piwpynag a'm serv, an Tas a wra y enora.
Yesu a Dhargan y Vernans
27 ‘Lemmyn ow enev yw troblys; ha pandr'a lavarav? “A Das, gwra ow selwel dhiworth an eur ma”? Mes rag hemma y teuth vy bys y'n eur ma. 28 A Das, gwra glorifia dha hanow.’ Ena lev a dheuth dhiworth nev, ‘My a'n glorifias, ha my a'n glorifi arta.’ 29 An routh neb a sevi ena a'n klewas, ha leverel hi dhe wul taran; re erell a leveris, ‘El re gewsis dhodho.’ 30 Yesu a worthybis ha leverel, ‘Ny dheuth an lev a'm govis vy mes ragowgh hwi. 31 Lemmyn yth yw breus an bys ma, lemmyn y fydh pryns an bys ma tewlys yn-mes. 32 Ha my, pan viv drehevys a'n norvys, a denn tus oll dhymmo vy.’ 33 Ev a leveris hemma, ow styrya py par mernans a vedha ow merwel dredho. 34 Ytho an routh a worthybis dhodho, ‘Ni re glewas y'n lagha, Krist dhe besya bynitha; ha fatell leverowgh y tal Mab an den dhe vos drehevys? piw yw an “Mab an den” ma?’ 35 Ena Yesu a leveris dhedha, ‘Hwath pols byghan yma an golow genowgh. Kerdhewgh hedre vo genowgh an golow, ma na wrello tewlder agas dalghenna. Neb a gerdh y'n tewlder ny woer ple'th a. 36 Hedre vo genowgh an golow, trestyewgh y'n golow, rag may fowgh mebyon an golow.’ Yesu a gewsis hemma, hag ev eth dhe-ves hag omgudha ragdha.
Diskryjyans an Yedhewon
37 Kyn hwrussa kemmys toknys a-ragdha, hwath ny gryssons ynno, 38 may fe kollenwys an lavar a gewsis Ysay an profoes, ‘Arloedh, piw re grysis agan pregoth, ha dhe biw re beu bregh an Arloedh diskwedhys?’ 39 Rakhenna ny allsons krysi, rag arta Ysay a leveris, 40 ‘Ev re dhallhas aga dewlagas, hag ev re galeshas aga holonn, rag na hwrellons gweles gans aga dewlagas, na konvedhes gans aga holonn, na bos treylys, may hwrylliv aga sawya.’ 41 Ysay a leveris hemma rag ev dhe weles y wolewder, hag ev a gewsis anodho ev. 42 Byttegyns lies hwath a'n rewloryon a grysis ynno, mes drefenn an Fariseow ny wrussons y gonfessya, ma na vens emskemunys a'n synaga; 43 rag i a garas gormel tus moy es gormel Duw. 44 Yesu a grias ha leverel, ‘Neb a grys ynnov vy, ny grys ynnov vy mes ynno ev neb a'm dannvonas, 45 hag ev neb a'm gwel vy a'n gwel ev neb a'm dannvonas. 46 Devedhys ov y'n bys kepar ha golow, rag na wrello piwpynag a grys ynnov vy triga yn tewlder. 47 Ha piwpynag a glew ow geryow heb aga gwitha, ny wrav vy y vreusi, rag nyns ov vy devedhys dhe vreusi an bys mes dhe selwel an bys. 48 Ev neb a'm nagh, ha na dhegemmer ow geryow, yma dhodho nebonan a wra y vreusi; an ger a gewsis vy, henna a wra y vreusi dydh fin. 49 Rag ny gewsis vy ahanav ow honan, mes an Tas a'm dannvonas, ev a ros dhymm gorhemmynn, pandra dhe leverel ha pandra dhe gewsel. 50 Ha my a woer y worhemmynn dhe vos bywnans heb diwedh. Pup-tra a gowsav ytho, kepar dell leveris an Tas dhymm, yndella y kowsav.’
Golghi Treys an Dhyskyblon
1 Mes kyns dy'goel an pask, pan wodhva Yesu y eur dhe vos devedhys rag tremena a'n bys ma dhe'n Tas, ow kara y dus y honan, ev a's karas bys y'n diwedh. 2 Ha koen gorfennys, wosa an jowl dhe worra yn kolonn Yudas mab Simon Skaryoth dh'y drayta, 3 ow kodhvos an Tas dhe ri pup-tra oll ynter y dhiwleuv, hag ev dhe dhos dhiworth Duw ha dehweles dhe Dhuw, 4 ev a sevis a'n goen ha gorra dhe denewen y dhillas, ha kemmeres towell hag omwrogysa, 5 Ena ev a dhiveras dowr yn bason, ha dalleth golghi treys an dhyskyblon, ha'ga sygha gans an towell ganso mayth o grogysys. 6 Ytho ev a dheuth dhe Simon Peder, neb a leveris dhodho, ‘Arloedh, a wolghydh tejy ow threys vy?’ 7 Yesu a worthybis, ‘Ty ny wodhes lemmyn pandr'a wrama, mes ty a wodhvydh a-wosa.’ 8 Yn-medh Peder dhodho, ‘Nevra ny wolghydh ow threys evy’ Yesu a worthybis dhodho, ‘Mar ny wrav vy dha wolghi, nyns eus dhis rann genev vy.’ 9 Yn-medh Simon Peder dhodho, ‘Arloedh, na wra golghi unnsel ow threys, mes ynwedh ow diwleuv ha'm penn!’ 10 Yn-medh Yesu dhodho, ‘Neb yw golghys, nyns eus dhodho edhomm a wolghi marnas an treys, mes ev yw glan yn tien; ha hwi yw glan, mes nyns owgh hwi oll.’ 11 Rag ev a wodhva neb a vedha orth y drayta, rakhenna y leveris, ‘Nyns owgh hwi oll glan.’ 12 Ytho wosa golghi aga threys ha kemmeres y dhillas hag esedha arta, ev a leveris dhedha, ‘A wodhowgh pandr'a wrugavy dhywgh? 13 Hwi a'm gelow Mester hag Arloedh, ha hwi a gews yn ta, rag yndella yth ov. 14 Ytho mar kwrugavy, agas Mester ha'gas Arloedh, golghi agas treys, peub ahanowgh ynwedh a dal golghi treys y gila. 15 Rag my re ros dhywgh ensampel, may hwryllowgh hwi kepar dell wrugavy dhywgh. 16 Yn hwir, yn hwir y lavarav dhywgh, nyns yw an kethwas brassa es y vester, na nyns yw an gannas brassa es neb a'n dannvonas. 17 Mar konvedhowgh an taklow ma, gwynn vydh agas bys mara's gwrewgh. 18 Ny gowsav ahanowgh hwi oll; my a woer piw a dhewisis; mes hemm yw rag may fo an skryptor kollenwys, “Ev neb a dhybris bara genev re dhrehevis y wewenn er ow fynn.” 19 Lemmyn my a lever dhywgh kyns y hwarvos, rag may kryssowgh pan hwarva, my dh'y vos. 20 Yn hwir, yn hwir y lavarav dhywgh, neb a dhegemmer piwpynag a dhannvonav a wra ow degemmeres vy, ha neb a'm degemmer vy a dhegemmer neb a'm dannvonas.’
Yesu a Dhargan y Fydh Traytys
21 Wosa leverel hemma, Yesu o troblys y'n spyrys, hag ev a dhustunias ha leverel, ‘Yn hwir, yn hwir y lavarav dhywgh, onan ahanowgh a wra ow thrayta.’ 22 An dhyskyblon a viras an eyl orth y gila, owth ombrederi a biw y kewsi. 23 Onan a'n dhyskyblon, ev neb a wre Yesu y gara, esa ow krowedha orth moes ryb askra Yesu; 24 ytho Simon Peder a wrug sin dhodho dhe wovynn a biw y kewsis. 25 Ytho ev a boesas war-dhelergh orth bronn Yesu ha leverel dhodho, ‘Arloedh, piw yw?’ 26 Yesu a worthybis, ‘Ev yw, dhe neb y rov soubenn wosa my dh'y throghya.’ Ytho ev a droghyas an soubenn ha'y ri dhe Yudas mab Simon Skaryoth. 27 Ha wosa an soubenn Satnas a entras ynno. Ytho Yesu a leveris dhodho, ‘An pyth a wredh, gwra yn skon.’ 28 Mes denvyth a'n re growedhys ena ny gonvedhas prag y kewsis dhodho. 29 Rag re a dybis, drefenn Yudas dhe witha an pors, Yesu dhe leverel dhodho, ‘Pren an taklow usi edhomm dhyn anedha rag an goel’; po may rolla neppyth dhe'n voghosogyon. 30 Ytho wosa kemmeres an soubenn, ev eth yn-mes dison. Ha nos o hi.
An Gorhemmynn Nowydh
31 Ytho pan o gyllys yn-mes, Yesu a leveris, ‘Lemmyn glorifiys yw Mab an den, ha Duw yw glorifiys ynno. 32 Mars yw Duw glorifiys ynno, Duw ynwedh a'n glorifi ynno y honan, hag a'n glorifi a-dhistowgh. 33 A fleghes vyghan, hwath termyn berr yth esov genowgh. Hwi a'm hwila, ha dell leveris vy dhe'n Yedhewon, “Dhe'n le mayth av ny yllowgh dos”, lemmyn my a'n lever dhywgh hwi. 34 Gorhemmynn nowydh y rov dhywgh, hwi dhe gara an eyl y gila; dell wrugavy agas kara, hwi ynwedh dhe gara an eyl y gila. 35 Dre hemma pub den oll a woer hwi dhe vos dyskyblon dhymm, mars eus dhywgh kerensa an eyl orth y gila.’
Nagh Peder Dargenys
36 Simon Peder a leveris dhodho, ‘Arloedh, ple'th edh?’ Yesu a worthybis dhodho, ‘Dhe'n le mayth av ny yllydh lemmyn ow sywya, mes a-wosa ty a wra ow sywya.’ 37 Yn-medh Peder dhodho, ‘Arloedh, prag na allav vy dha sywya lemmyn? My a dhaskorr ow bywnans a'th wovis.’ 38 Yesu a worthybis, ‘Ty a dhaskorr dha vywnans a'm govis? Yn hwir, yn hwir y lavarav dhis, ny wra an kulyek kana kyns ty dhe'm nagha teyrgweyth.
Yesu an Fordh dhe'n Tas
1 ‘Na vedhes troblys agas kolonn; hwi a grys yn Duw, krysewgh ynwedh ynnov vy. 2 Yn chi ow Thas yma lies trigva. Mar ny ve, a wrussen vy leverel dhywgh my dhe vos dhe bareusi le ragowgh? 3 Ha mar kwrav vy mos ha pareusi le ragowgh, my a dhehwel arta ha'gas kemmeres dhymm ow honan, may fowgh hwi ynwedh y'n le mayth esov vy ynno. 4 Ha dhe'n le mayth av, hwi a woer an fordh.’ 5 Tommas a leveris dhodho, ‘Arloedh, ny wodhon ple'th edh; fatell yllyn godhvos an fordh?’ 6 Yn-medh Yesu dhodho, ‘My yw an fordh, ha'n gwir, ha'n bywnans. Ny dheu denvyth dhe'n Tas saw dredhov vy. 7 Mar kwrussewgh ow aswonn vy, hwi a wrussa aswonn ow Thas vy ynwedh. Hag alemma rag hwi a'n aswonn, ha hwi re'n gwelas.’ 8 Felip a leveris dhodho, ‘Arloedh, diskwa dhyn an Tas, ha lowr vydh dhyn.’ 9 Yn-medh Yesu dhodho, ‘Esen vy genowgh termyn mar hir, ha ny'm aswonnsys, Felip? Piwpynag re'm gwelas vy re welas an Tas; ha fatell leverydh, “Diskwa dhyn an Tas”? 10 A ny grysydh my dhe vos y'n Tas, ha'n Tas dhe vos ynnov vy? An geryow a gowsav dhywgh, ny's kowsav ahanav vy ow honan, mes an Tas neb a drig ynnov a wra y oberow. 11 Krysewgh dhymm, my dhe vos y'n Tas ha'n Tas ynnov vy; poken krysewgh drefenn an oberow aga honan. 12 Yn hwir, yn hwir y lavarav dhywgh, ev neb a grys ynnov vy, ev ynwedh a wra an oberow a wrav vy, hag oberow brassa agessa a wra, rag yth esov vy ow mos dhe'n Tas. 13 Ha pypynag a wovynnowgh y'm hanow vy, henna a wrav, may fo glorifiys an Tas y'n Mab. 14 Mar kovynnowgh tra y'm hanow vy, my a'n gwra.
Dedhewadow an Spyrys
15 ‘Mara'm kerowgh, hwi a with ow gorhemmynnow. 16 Ha my a vynn govynn orth an Tas, hag ev a re dhy'hwi konforter arall, may hwrello gortos genowgh rag nevra, 17 an Spyrys a wiryonedh, neb na yll an bys y dhegemmeres, rag ny'n gwel na ny'n aswonn. Mes hwi a'n aswonn, rag ev a drig genowgh hag ev a vydh ynnowgh. 18 ‘Ny'gas gasav omdhivas; dos a wrav dhy'hwi. 19 Hwath pols byghan ha'n bys ny'm gwel namoy; mes hwi a'm gwel, rag my a vyw, ha hwi ynwedh a vyw. 20 Y'n jydh na hwi a wodhvydh my dhe vos y'm Tas, ha hwi ynnov vy, ha my ynnowgh hwi. 21 Neb a'n jeves ow gorhemmynnow ha'ga gwitha, ev yw neb a'm kar; ha neb a'm kar a vydh kerys gans ow Thas, ha my a'n karvydh, hag omdhiskwedhes ow honan dhodho.’ 22 Yn-medh Yudas dhodho (nag o Skaryoth), ‘Arloedh, fatell yw, ty dhe vynnes omdhiskwedhes dha honan dhyn ni, a-der dhe'n bys?’ 23 Yesu a worthybis ha leverel dhodho, ‘Piwpynag a'm karro a with ow geryow, ha'm Tas a'n karvydh, ha ni a dheu dhodho ha gul agan trigva ynno. 24 Ev neb na'm kar ny with ow geryow; ha'n ger a glewowgh nyns yw ahanav vy, mes a'n Tas neb a'm dannvonas. 25 ‘My re gewsis hemma dhywgh, ha my hwath genowgh. 26 Mes an Konforter, an Spyrys Sans neb a wra an Tas y dhannvon y'm hanow vy, ev a wra dyski dhywgh pup-tra ha'gas kovha a bup-tra a leveris dhywgh. 27 Kres a asav dhywgh, ow kres a rov dhywgh; ny rov dhywgh kepar dell re an bys. Na vedhes dha golonn troblys, ha na berthes own. 28 Hwi re glewas my dhe leverel dhywgh, yth av dhe-ves, ha my a dhehwel dhywgh. Mara'm karrewgh, lowenhe a wrussewgh, my dhe vos dhe'n Tas, rag ow Thas yw brassa agesov vy. 29 Ha lemmyn my re'n leveris dhywgh kyns ev dhe hwarvos, rag may kryssowgh pan hwer. 30 Ny wrav vy kewsel meur genowgh na fella, rag pryns an bys a dheu; ha ny'n jeves galloes warnav vy. 31 Mes rag may hwodhvo an bys my dhe gara an Tas, ha kepar dell worhemmynnis dhymm an Tas, yndella y hwrav. Sevewgh, deun ni alemma.
Yesu an Gwinbrenn Gwir
1 ‘My yw an gwinbrenn gwir ha'm Tas yw an tiek. 2 Pub skorrenn ynnov ha na dheg frut, ev a's kemmer dhe-ves, ha pubonan hag a dheg frut, ev a's purj, may tokko frut moy. 3 Hwi yw glan seulabrys, drefenn an ger a gewsis dhywgh. 4 Trigewgh ynnov vy, ha my ynnowgh hwi. Dell na yll an skorrenn doen frut hy honan marnas hi a drig y'n gwinbrenn, yndella ny yllowgh hwi, marnas hwi a drig ynnov vy. 5 My yw an gwinbrenn, hwi an skorrennow. Neb a drig ynnov vy ha my ynno ev, ev a dheg meur a frut, rag hebov vy, ny yllowgh gul travyth. 6 Piwpynag na drig ynnov yw tewlys dhe-ves kepar ha skorrenn, hag a wedher; tus a wra aga huntell, ha'ga thewlel y'n tan, ha leskys yns. 7 Mar trigowgh ynnov, ha'm geryow mar trigons ynnowgh, govynnewgh pypynag a vynnowgh, ha gwrys vydh ragowgh. 8 Yn hemma glorifiys yw ow Thas, hwi dhe dhoen meur a frut ha dhe vos dyskyblon dhymm. 9 Dell wrug an Tas ow hara, my ynwedh a wrug agas kara; trigewgh y'm kerensa. 10 Mar kwithowgh ow gorhemmynnow, trigewgh y'm kerensa, kepar dell withis vy gorhemmynnow ow Thas ha triga yn y gerensa ev. 11 My re gewsis an taklow ma dhywgh may fo ow lowena ynnowgh, ha may fo agas lowena kollenwys. 12 ‘Hemm yw ow gorhemmynn, may kyrrowgh an eyl y gila dell wrugavy agas kara hwi. 13 Brassa kerensa es hemma nyns eus dhe dhenvyth, den dhe dhaskorr y vywnans rag y gothmans. 14 Hwi yw ow hothmans mar kwrewgh pypynag a worhemmynnav dhywgh. 15 Ny wrav agas henwel gwesyon na fella, rag ny woer an gwas pandr'a wra y vester; mes my re'gas henwis kothmans, rag pup-tra a wrug vy klewes a'w Thas my a wrug y dheklarya dhy'hwi. 16 Ny wrussowgh hwi ow dewis vy, mes my re'gas dewisas hwi, ha'gas apoyntya mayth yllowgh ha doen frut, ha may hwrello agas frut durya; may rollo ow Thas dhywgh pypynag a wovynnowgh dhiworto y'm hanow vy. 17 Hemma a worhemmynnav dhywgh, hwi dhe gara an eyl y gila. 18 ‘Mar kwra an bys agas kasa, hwi a woer ev dhe'm kasa vy kyns es agas kasa hwi. 19 Mar pewgh a'n bys, an bys a garsa y dus y honan; mes rag nyns owgh a'n bys, mes my re'gas dewisas dhiworth an bys, rakhenna an bys a'gas kas. 20 Perthewgh kov a'n ger a gewsis dhywgh: Nyns yw an kethwas brassa es y vester. Mar kwrussons ow helghya vy, i a'gas helgh hwi ynwedh; mar kwrussons gwitha ow ger vy, ynwedh i a with agas ger hwi. 21 Mes oll an taklow ma a wrons dhywgh a-barth ow hanow, rag ny'n aswonnons neb a'm dannvonas. 22 Mar ny wrellen vy dos ha kewsel orta, ny's tevia pegh; mes lemmyn nyns eus dhedha askus, dre reson aga fegh. 23 Ev neb a'm kas a gas ow Thas ynwedh. 24 Mar ny wrellen vy yn aga mysk an oberow na wrug denvyth arall, ny viens kablus a begh; mes lemmyn i re welas ha'm kasa vy ha'm Tas. 25 Mes hemm yw, rag may fo kollenwys an ger skrifys yn aga lagha, “I re'm kasas heb acheson.” 26 ‘Mes pan dheu an Konforter neb a dhannvonav dhywgh dhiworth an Tas, an Spyrys a wiryonedh neb a dheu yn-mes dhiworth an Tas, ev a dhustuni ahanav vy. 27 Ha hwi ynwedh a dheg dustuni, rag hwi re beu genev a'n dalleth.
1 ‘My re leveris dhywgh an taklow ma, rag na wryllowgh trebuchya. 2 I a wra agas emskemunya a'n synaga; mes an eur a dheu pan dyb peub a wra agas ladha, ev dhe brofya gordhyans dhe Dhuw. 3 Ha hemma a wrons rag ny aswonnsons naneyl an Tas na my. 4 Mes my re leveris an taklow ma dhywgh, rag may perthowgh kov, pan dheu aga eur, my dhe gewsel orthowgh anedha.
Ober an Spyrys
‘Ny leveris vy an taklow ma a'n dalleth, drefenn ow bos genowgh. 5 Mes lemmyn yth av dhe neb a'm dannvonas, ha ny wovynn orthiv denvyth ahanowgh, “Ple'th edh?” 6 Mes rag my dhe leverel hemma dhywgh, tristyns re lenwis agas kolonn. 7 Mes my a lever dhywgh an gwiryonedh, gwell dhywgh yw, my dhe vos yn-kerdh. Rag mar nyns av yn-kerdh, ny dheu an Konforter dhywgh; mes mars av, my a'n dannvon dhywgh. 8 Ha pan dheu ev, ev a guhudh an bys a-dro dhe begh, hag a-dro dhe ewnder, hag a-dro dhe vreus. 9 A-dro dhe begh, rag ny grysons ynnov; 10 a-dro dhe ewnder, rag my dhe vos dhe'n Tas, ha ny'm gwelowgh na fella; 11 hag a-dro dhe vreus, rag pryns an bys ma yw breusys. 12 ‘Yma dhymm hwath lies tra dhe leverel dhywgh, mes ny yllowgh aga ferthi lemmyn. 13 Mes pan dheu ev, an Spyrys a wiryonedh, ev a'gas hembronk yn gwiryonedh oll; rag ny gews a'y awtorita y honan, mes ev a gews an pyth a glew, hag ev a dheriv dhywgh an taklow a dheu. 14 Ev a wra ow glorifia, rag ev a gemmer dhiworth an pyth yw dhymm ha'y dherivas dhywgh. 15 Pup-tra a'n jeves an Tas yw dhymm; rakhenna y leveris vy, y hwra ev kemmeres dhiworth an pyth yw dhymm ha'y dherivas dhywgh.
Tristyns a Dreyl dhe Lowena
16 ‘Unn pols byghan ha ny'm gwelowgh, hag arta unn pols byghan ha hwi a'm gwel.’ 17 Re a'y dhyskyblon ytho a leveris an eyl dh'y gila, ‘Pyth yw hemma a lever ev dhyn, “Unn pols byghan ny'm gwelowgh, hag arta unn pols byghan ha hwi a'm gwel”, ha, “Rag yth av dhe'm Tas”?’ 18 Ytho yn-medhons i, ‘Pyth yw hemma a gews ev anodho, “Unn pols byghan”: ny gonvedhyn pandr'a lever.’ 19 Yesus a wodhva i dhe vynnas govynn orto, hag yn-medh ev dhedha, ‘Hwi a omgusul an eyl gans y gila, rag my dhe leverel, unn pols byghan ha ny'm gwelowgh, hag arta unn pols byghan ha hwi a'm gwel. 20 Yn hwir, yn hwir y lavarav dhywgh, hwi dhe oela ha dhe gyni, mes an bys a lowenha. Mes hwi a vydh trist, mes agas tristyns a dreyl dhe lowena. 21 Benyn pan vo hi yn lavur a's teves tristyns, rag bos devedhys hy eur; mes pan yw genys an flogh gensi, ny berth hi kov a'n payn na fella, drefenn an lowena, bos den genys y'n bys. 22 Hag ytho, hwi a'gas beus tristyns lemmyn; mes my a'gas gwel arta, ha'gas kolonn a lowenha, ha'gas lowena ny wra denvyth hy hemmeres dhiworthowgh. 23 Hag y'n jydh na ny wrewgh govynn orthiv travyth. Yn hwir, yn hwir y lavarav dhywgh, pypynag a wovynnowgh a'n Tas y'm hanow vy, ev a'n re dhywgh. 24 Bys lemmyn ny wovynnsowgh travyth y'm hanow vy; govynnewgh ha hwi a dhegemmer, rag may fo agas lowena kollenwys.
My re Fethas an Bys
25 ‘My re leveris an taklow ma yn parabolennow; termyn a dheu pan na gowsav dhywgh yn parabolennow mes y terivav dhywgh apert a-dro dhe'n Tas. 26 Y'n jydh na hwi a wovynn y'm hanow vy ha ny wrav leverel dhywgh my dhe bysi an Tas ragowgh; 27 rag an Tas y honan a'gas kar, rag hwi re'm karas vy, ha hwi re grysis my dhe dhos dhiworth Duw. 28 My a dheuth dhiworth an Tas, ha devedhys ov y'n bys; arta my a as an bys, ha mos dhe'n Tas.’ 29 Yn-medh y dhyskyblon dhodho, ‘Otta, lemmyn ty a gews apert, ha ny leverydh parabolenn mann. 30 Lemmyn ni a woer ty dhe wodhvos pup-tra, ha nyns eus edhomm dhis may hwrello denvyth govynn orthis; rag hemma ni a grys ty dhe vos devedhys dhiworth Duw.’ 31 Yesus a worthybis dhedha, ‘A grysowgh lemmyn? 32 Otta, termyn a dheu, ha re dheuth, pan vydhowgh skattrys, peub dh'y dre, ha'm gasa ow honan; mes nyns ov vy ow honan, rag bos an Tas genev. 33 My re leveris hemma dhywgh, rag ma'gas bo kres ynnov. Y'n bys hwi a'gas bydh govisyon; mes bedhewgh a gonfort da! My re fethas an bys.’
Pysadow Yesu
1 Wosa kewsel an taklow ma, Yesu a dhrehevis y dhewlagas dhe nev ha leverel, ‘Tas, re dheuth an eur; ro glori dhe'th Vab, rag may hwrello dha Vab ri glori dhiso jy, 2 kepar dell resys dhodho galloes dres oll kig, may rollo bywnans heb diwedh dhe vyns re resys dhodho. 3 Ha hemm yw bywnans heb diwedh: ma'th aswonnons ty, an unn gwir Dhuw, ha Yesu Krist neb re dhannvensys. 4 My re'th glorifiis war an norvys, ow kowlwul an ober a resys dhymm dhe wul. 5 Ha lemmyn gwra ow glorifia, A Das, y'th wolok dha honan, gans an glori a'm beu genes kyns bos an bys. 6 ‘My re dhiskwedhas dha hanow dhe'n dus a resys dhymm yn-mes a'n bys. Dhiso jy yth ens, ha ty a's ros dhymm, hag i re withas dha er. 7 Lemmyn i a woer, pup-tra re resys dhymm dhe vos ahanas jy. 8 Rag my re ros dhedha an geryow a resys dhymm, hag i a's degemmeras hag a gonvedhas yn gwirder my dhe dhos ahanas, hag i a grysis ty dhe'm dannvon. 9 Ragdha i y pysav, ny bysav rag an bys mes rag an re a resys dhymm, rag dhiso jy yth yns, 10 ha dhiso jy yw pup-tra a'm beus, ha glorifiys ov ynna i. 11 Ha lemmyn nyns esov vy y'n bys namoy, mes an re ma ymons y'n bys, ha my a dheu dhis. A Das sans, gwra aga gwitha y'th hanow jy hag a resys dhymm, may fons i onan kepar dell on nyni. 12 Pan esen gansa, my a's synsis y'th hanow jy hag a resys dhymm, ha my a's gwithas, ha ny veu denvyth anedha kellys, marnas an mab a dhiswrians, may fe kollenwys an skryptor. 13 Mes lemmyn y tov dhis, ha'n taklow ma a gowsav y'n bys, rag ma's teffo ow lowender kowlwrys ynna aga honan. 14 My a ros dhedha dha er, ha'n bys a's kasas, rag nyns esons i a'n bys, kepar dell nag esov vy a'n bys. 15 Ny wovynnav ty dh'aga hemmeres yn-mes a'n bys, mes ty dh'aga gwitha rag an tebel el. 16 Nyns yns i a'n bys, kepar dell nag ov vy a'n bys. 17 Gwra aga sakra y'n gwirder; dha er yw gwirder. 18 Kepar dell wrussys ow dannvon vy y'n bys, yndella my ynwedh re's dannvonas i y'n bys. 19 Hag a-barth dhedha i omsakra a wrav ow honan, rag may fons i ynwedh sakrys y'n gwirder. 20 ‘Ny wrav vy pysi rag an re ma yn unnsel, mes rag an re neb a grys ynnov der aga ger, 21 rag may fons i oll onan, kepar ha ty, A Das, ynnov vy ha my ynnos jy, rag may fons i ynwedh onan ynnon ni, may krysso an bys ty dhe'm dannvon. 22 Ha'n glori a resys dhymm, my re'n ros dhedha i, may fons i onan kepar dell on ni onan, 23 my ynna i, ha ty ynnov vy, may fons i gwrys perfydh yn onan, may hwodhvo an bys ty dhe'm dannvon, ha'ga hara i kepar del wrussys ow hara vy. 24 A Das, my a vynn an re a resys dhymm i ynwedh dhe vos genev vy y'n le mayth esov, rag may hwellons ow glori a resys dhymm, rag ty a'm karas kyns gwrians an bys. 25 ‘A Das gwiryon, ny wra an bys dha aswonn, mes my a'th aswonn, ha'n re ma a woer ty dhe'm aswonn. 26 My a dherivis dhedha dha hanow, ha my a wra y dherivas, may fo ynna i an gerensa dredhi may hwrussys ow hara vy, ha my ynna i.’
Yesu Traytys ha Dalghennys
1 Wosa leverel an taklow ma, Yesu eth dhe-ves gans y dhyskyblon dres an keynres Kedron, le mayth esa lowarth, hag ev ha'y dhyskyblon a entras ynno. 2 Ha Yudas, neb a'n traytas, a aswonnis an le, rag Yesu a wre omguntell ena yn fenowgh gans y dhyskyblon. 3 Yudas ytho, wosa kavoes bagas a soudoryon ha soedhogyon dhiworth an bennoferysi ha'n Fariseow, a dheuth di gans lugern ha faglennow hag arvow. 4 Rakhenna Yesu, ow kodhvos pup-tra a vedha ow hwarvos dhodho, eth yn-rag ha leverel dhedha, ‘Piw a hwilowgh?’ 5 I a worthybis dhodho, ‘Yesu a Nazareth.’ Yn-medh Yesus dhedha, ‘My yw.’ Ha Yudas ynwedh, neb a'n traytas, a sevi gansa. 6 Kettell leveris Yesu dhedha, ‘My yw’, i eth war-dhelergh ha koedha dhe'n dor. 7 Ytho arta ev a wovynnas orta, ‘Piw a hwilowgh?’ Hag yn-medhons, ‘Yesu a Nazareth.’ 8 Yesu a worthybis, ‘My re leveris dhywgh ow bos ev; ytho mara'm hwilowgh, gas an re ma dhe vos yn-kerdh’; 9 may fe kollenwys an lavar a leveris ev, ‘A'n re a resys dhymm, ny gellis vy nagonan.’ 10 Ena Simon Peder, ha ganso kledha, a'n tennas ha gweskel kethwas an arghoferyas ha treghi dhe-ves y skovarn dhyghow. Malkus o hanow an gwas. 11 Ena yn-medh Yesu dhe Peder, ‘Gorr an kledha y'n woen. An hanaf a ros dhymm an Tas, a ny wrav vy y eva?’
Yesu a-rag an Arghoferyas
12 Ena bagas an soudoryon ha'n kapten ha soedhogyon an Yedhewon a dhalghennas Yesu ha'y gelmi. 13 Hag i a'n hembronkas dhe-ves yn kynsa dhe Annas, neb o hwegron Kayfas, neb o arghoferyas an vlydhen na. 14 Kayfas yth o neb a gusulsa an Yedhewon bos gwell unn den dhe verwel rag an bobel.
Peder a Nagh Yesu
15 Ha Simon Peder a sywyas Yesu, ha dyskybel arall. An dyskybel na o aswonnys dhe'n arghoferyas, hag ev eth gans Yesu a-bervedh yn lys an arghoferyas. 16 Mes Peder a wortas orth an daras a-ves. Ena an dyskybel arall neb o aswonnys dhe'n arghoferyas eth yn-mes, ha kewsel orth an borthores, ha dri Peder a-bervedh. 17 Ena yn-medh an vaghteth a witha an daras dhe Peder, ‘A nyns osta jy ynwedh onan a dhyskyblon an den ma?’ Yn-medh ev, ‘Nyns ov.’ 18 Ha'n gethwesyon ha'n soedhogyon, neb re wrussa tan glowbrenn, a sevi ena, rag yeyn o, hag omdoemma. Hag yth esa Peder ow sevel gansa, hag owth omdoemma.
Yesu Apposyes gans an Arghoferyas
19 Ena an arghoferyas a wovynnas orth Yesu a-dro dh'y dhyskyblon, hag a-dro dh'y dhyskas. 20 Yesu a worthybis dhodho, ‘My re gewsis yn apert dhe'n bys. Pup-prys my re dhyskas y'n synaga hag y'n tempel, le mayth omguntell an Yedhewon pup-prys, hag yn-dann gel ny leveris travyth 21 Prag y hwovynnydh orthiv? Govynn orth an re a glewas pandr'a leveris dhedha. Ott, i a woer pandr'a leveris.’ 22 Wosa ev dhe leverel hemma, onan a'n soedhogyon neb a sevi ena a ros hwatt dhe Yesu, ow leverel, ‘Yw yndella y hworthybis dhe'n arghoferyas?’ 23 Yesu a worthybis dhodho, ‘Mar kwrug vy kewsel drog, gwra dustunia a-dro dhe'n drog, mes mar lavarav yn ta, prag y'm gweskydh?’ 24 Ena Annas a'n dannvonas kelmys dhe Kayfas an arghoferyas.
Peder a Nagh Yesu arta
25 Hag yth esa Simon Peder ow sevel hag owth omdoemma. Ytho i a leveris dhodho, ‘A nyns osta jy ynwedh onan a'y dhyskyblon?’ Ev a'n naghas, ha leverel, ‘Nyns ov.’ 26 Onan a gethwesyon an arghoferyas, neshevin anodho ev neb a droghas Peder y skovarn dhe-ves, a leveris, ‘A ny wrugavy dha weles y'n lowarth ganso?’ 27 Ena Peder a naghas arta, hag a-dhesempis an kulyek a ganas.
Yesu a-rag Pilat
28 Ena i a hembronkas Yesu dhiworth Kayfas bys y'n pretorium. Myttin a-varr o hi. Nyns ethons i aga honan a-bervedh y'n pretorium, ma na vens i defolys, mes may hallens dybri an pask. 29 Ena Pilat eth yn-mes dhedha ha leverel, ‘Pana guhudhans a dhrowgh erbynn an den ma?’ 30 I a worthybis ha leverel, ‘Mar ny ve ev drogoberer, ny wrussyn ni y dhaskorr dhis.’ 31 Ytho Pilat a leveris dhedha, ‘Kemmerewgh e agas honan, ha'y vreusi herwydh agas lagha.’ Yn-medhons an Yedhewon dhodho, ‘Nyns yw lafyl dhyn, ni dhe worra denvyth dhe'n mernans’; 32 may fe kollenwys an ger kewsys gans Yesu, ow styrya py par mernans a vedha ow merwel dredho. 33 Ena Pilat eth arta a-bervedh y'n lys, ha gelwel Yesu ha leverel dhodho, ‘Osta myghtern an Yedhewon?’ 34 Yesu a worthybis, ‘A leverydh hemma a'th vodh dha honan, po a wrug tus erell y leverel ahanav?’ 35 Pilat a worthybis, ‘Ov vy Yedhow? Dha genedhel dha honan ha'n arghoferyas a'th taskorras dhymm. Pandr'a wrussys?’ 36 Yesu a worthybis, ‘Ow gwlaskor nyns yw a'n bys ma. Mar pe ow gwlaskor a'n bys ma, ow servysi a wrussa omladh, rag na ven vy delivrys dhe'n Yedhewon; mes lemmyn nyns usi ow gwlaskor alemma.’ 37 Ena yn-medh Pilat dhodho, ‘Osta myghtern ytho?’ Yesu a worthybis, ‘Ty a lever, ow bos myghtern. Rakhenna y feuv vy genys, ha rakhenna y teuth vy y'n bys, may hallen dustunia a'n gwiryonedh. Peub neb yw a'n gwiryonedh a glew ow lev.’ 38 Yn-medh Pilat dhodho, ‘Pyth yw gwiryonedh?’
Yesu Dampnys dhe'n Mernans
Hag ow leverel hemma, ev eth yn-mes arta dhe'n Yedhewon ha leverel dhedha, ‘Ny welav ken vyth er y bynn. 39 Mes yma dhywgh us, my dhe dhelivra unn den dhywgh y'n pask. A vynnowgh ytho my dhe dhelivra dhywgh myghtern an Yedhewon?’ 40 Ena i a armas arta, ow leverel, ‘Na wra delivra an den ma, mes Barabbas.’ Lemmyn Barabbas o lader.
1 Ena Pilat a gemmeras Yesu, ha'y skorjya. 2 Ha'n soudoryon a blethas kurun a spern ha'y gorra war y benn, hag i a'n kwethas gans mantell a burpur, 3 hag yth esens ow tos dhodho ha leverel, ‘Hayl, myghtern an Yedhewon!’ hag ow ri dhodho hwattys. 4 Ha Pilat eth yn-mes arta ha leverel dhedha, ‘Otta, my a'n dro yn-mes dhywgh, rag may hwodhvowgh na welav ken vytholl er y bynn.’ 5 Ytho Yesu a dheuth yn-mes, ow kwiska an gurun a spern ha'n vantell a burpur, hag yn-medh ev dhedha, ‘Awott an den!’ 6 Ytho pan y'n gwelas an bennoferysi ha'n soedhogyon, i a armas, ‘Krowsy e, krowsy e!’ Yn-medh Pilat dhedha, ‘Kemmerewgh e agas honan ha'y growsya; rag ny welav ken er y bynn.’ 7 An Yedhewon a worthybis dhodho, ‘Yma dhyn lagha, ha herwydh an lagha na y tal dhodho merwel, rag ev a omwrug y honan Mab Duw.’ 8 Ytho pan glewas Pilat an lavar ma, ev a borthas own dhe voy, 9 hag ev eth a-bervedh y'n lys arta, ha leverel dhe Yesu, ‘A-ble osta jy?’ Mes ny ros Yesu gorthyp dhodho. 10 Ytho yn-medh Pilat dhodho, ‘A ny gewsydh dhymm? A ny wodhes bos dhymm galloes dhe'th telivra, ha bos dhymm galloes dhe'th krowsya?’ 11 Yesu a worthybis, ‘Ny via dhis maystri warnav mar ny ve res dhis a wartha; rakhenna yma dhe neb a'm daskorras dhis an brassa pegh.’ 12 Alena rag, Pilat a hwila y livra; mes an Yedhewon a armas, ow leverel, ‘Mar livrydh an den ma, nyns osta kar Sesar.’ 13 Pilat ytho pan glewas an geryow ma a dhros Yesu yn-mes, hag esedha war an barr yn tyller henwys an Leur a Leghven, hag yn Ebrow Gabbatha. 14 Ha dydh darbar an pask o, a-dro dhe'n hweghves eur. Hag yn-medh ev dhe'n Yedhewon, ‘Awott agas myghtern!’ 15 Ytho i a armas, ‘Kemmer e dhe-ves, kemmer e; krowsy e!’ Yn-medh Pilat dhedha, ‘A wrav vy krowsya agas myghtern?’ An bennoferysi a worthybis, ‘Nyns eus dhyn myghtern marnas Sesar.’ 16 Ena ev a'n delivras dhedha dhe vos krowsys.
Krowsyans Yesu
Ytho i a gemmeras Yesu, 17 hag ow toen y grows y honan ev eth yn-rag bys yn tyller henwys Tyller Krogen, hag yn Ebrow, Golgotha; 18 i a'n krowsyas ena ha ganso dew arall, onan a bub tu, ha Yesu y'n kres. 19 Ha Pilat a skrifas titel, ha'y worra war an grows; ha skrifys veu: Yesu a Nazareth, Myghtern an Yedhewon. 20 Lies a'n Yedhewon a redyas an titel ma, rag bos an le may feu Yesus krowsys ogas dhe'n sita; ha skrifys veu yn Ebrow, Greka ha Latin. 21 Ytho yn-medh pennoferysi an Yedhewon dhe Pilat, ‘Na skrif “Myghtern an Yedhewon”, mes ev dhe leverel “My yw myghtern an Yedhewon”.’ 22 Pilat a worthybis, ‘An pyth a skrifis, my re'n skrifas.’ 23 Ena an soudoryon, pan wrussens krowsya Yesu, a gemmeras y dhillas ha gul peder rann, dhe bub soudor rann, hag ynwedh an bows. Mes an bows o heb gwri, gwiys a'n gwartha yn unn darn. 24 Yn-medhons ytho an eyl dh'y gila, ‘Na wren hy skwardya, mes gwren ni tewlel prenn rygdhi, dhe biw y fydh’; may fe kollenwys an skryptor a lever, ‘I a rannas ow dillas yntredha, ha war ow gwisk i a dewlis prenn.’ Ytho an soudoryon a wrug an taklow ma. 25 Ogas dhe grows Yesu yth esa ow sevel y vamm ha hwoer y vamm, Maria gwreg Klopas, ha Maria Magdalena. 26 Ytho pan welas Yesu y vamm ha'n dyskybel a gara ow sevel yn ogas, yn-medh ev dh'y vamm, ‘Benyn, awotta dha vab.’ 27 Ena yn-medh ev dhe'n dyskybel, ‘Awotta dha vamm.’ Hag alena rag an dyskybel a's kemmeras yn y dre y honan.
Mernans Yesu
28 Wosa hemma, Yesu, ow kodhvos pup-tra lemmyn dhe vos kowlwrys, may fe kollenwys an skryptor, a leveris, ‘Yma syghes dhymm.’ 29 Yth esa lester re beu gorrys ena, leun a aysel; ytho i a worras spong leun a'n aysel war hyssop ha'y brofya dh'y anow. 30 Ytho pan wrussa Yesu kemmeres an aysel, ev a leveris, ‘Kowlwrys yw.’ Hag ow poesa y benn war-rag, ev a dhaskorras an enev. Tenewen Yesu Gwanys gans Guw 31 Ytho rag y vos dydh an darbar, rag na worta an korfow war an grows y'n sabot (rag bos dydh an sabot na dy'goel ughel), an Yedhewon a bysis Pilat may fe terrys aga diwarr ha may fens degys dhe-ves. 32 Ytho an soudoryon a dheuth ha terri diwarr an kynsa, hag a'n arall a veu krowsys ganso. 33 Mes pan dheuthons dhe Yesu ha gweles y vos marow seulabrys, ny dorrsons y dhiwarr. 34 Mes onan a'n soudoryon a wanas y denewen gans guw, ha desempis y teuth yn-mes goes ha dowr. 35 Hag ev neb a'n gwelas re dhustunias, ha'y dhustuni yw gwir; ev a woer ev dhe gewsel gwiryonedh, rag may kryssowgh hwi. 36 Ha'n taklow ma a hwarva may fe kollenwys an skryptor, ‘Ny vydh askorn anodho terrys.’ 37 Hag arta skryptor arall a lever, ‘I a vir warnodho neb a wansons.’
Ynkleudhyans Yesu
38 Wosa hemma, Yosep a Arimathea, onan a dhyskyblon Yesu, mes yn priva rag own a'n Yedhewon, a bysis Pilat may kemmerra korf Yesu. Ha Pilat a ros kummyas. Ytho ev a dheuth ha kemmeres y gorf. 39 Nikodemus ynwedh a dheuth, ev neb a dheuth dhodho wostalleth yn nos, ow tri kemmysk a vyrr hag aloes, a-dro dhe gans peuns. 40 Ytho i a gemmeras korf Yesu ha'y vaylya yn lystennow lien war-lergh us an Yedhewon rag ynkleudhyans. 41 Lemmyn y'n tyller may feu Yesus krowsys yth esa lowarth, hag y'n lowarth yth esa bedh nowydh, na via denvyth bythkweth gorrys ynno. 42 Ytho, drefenn dydh darbar an Yedhewon, ha rag bos an bedh ogas, i a worras Yesu ena.
Dasserghyans Yesu
1 Y'n kynsa dydh a'n seythun, Maria Magdalena a dheuth dhe'n bedh a-varr myttin, pan o hwath tewl, ha hi a welas an men kemmerys dhiworth an bedh. 2 Ytho hi eth yn unn boenya dhe Simon Peder ha dhe'n dyskybel arall a wre Yesu y gara, hag yn-medh hi dhedha, ‘I re gemmeras an Arloedh yn-mes a'n bedh, ha ny wodhon ple'n gorrsons.’ 3 Ytho Peder eth yn-mes, ha'n dyskybel arall, ow mos dhe'n bedh. 4 Ytho i a boenyas aga dew war-barth; ha'n dyskybel arall a boenyas yn-rag skaffa es Peder, hag ev a dheuth yn kynsa dhe'n bedh. 5 Ev a blegyas yn-nans ha gweles an lystennow ow krowedha ena, byttegyns nyns eth ev a-bervedh. 6 Ena Peder a dheuth, orth y sywya, hag eth a-bervedh y'n bedh, hag ev a welas an lystennow ow krowedha, 7 ha'n gweth, re bia a-dro dh'y benn; nyns esa ow krowedha gans an lystennow, mes maylys war-barth yn le arall. 8 Ena an dyskybel arall ynwedh, neb a dhothya yn kynsa dhe'n bedh, eth a-bervedh, hag ev a welas, hag a grysis. 9 Rag ny gonvedhsens na hwath an skryptor, y koedhva dhodho dasserghi dhiworth an re varow. 10 Ena an dhyskyblon eth dhe-ves arta dh'aga threvow aga honan.
An Omdhiskwedhyans dhe Varia Magdalena
11 Mes Maria a sevi a-ves dhe'n bedh, owth oela. Ha hi owth oela, hi a blegyas yn-nans y'n bedh, 12 ha gweles dew el gwiskys yn gwynn, esedhys onan dhe'n penn hag onan dhe'n treys, le may fia korf Yesu ow krowedha. 13 Hag i a leveris dhedha, ‘A venyn, prag yth oelydh?’ Yn-medh hi dhedha, ‘I re gemmeras ow Arloedh dhe-ves, ha ny wonn ple'n gorrsons.’ 14 Ha wosa leverel hemma, hi a dreylyas war-dhelergh ha gweles Yesu ow sevel; mes ny wodhya y vos Yesu. 15 Yn-medh Yesu dhedhi, ‘A venyn, prag yth oelydh? Piw a hwilydh?’ Hi, ow tybi y vos an lowarther, a leveris dhodho, ‘Syrra, mar kwrussys y dhoen dhe-ves, lavar dhymm le ma'n gorrsys, ha my a'n kemmer.’ 16 Yn-medh Yesu dhedha, ‘Maria!’ Hi a dreylyas ha leverel dhodho yn Ebrow, ‘Rabboni’, (henna a styr, Mester). 17 Yn-medh Yesu dhedhi, ‘Na wra ow thochya, rag nyns ov vy yskynnys na hwath dhe'n Tas; mes ke dhe'm dyskyblon ha lavar dhedha, “My a yskynn dhe'm Tas vy ha dh'agas Tas hwi, dhe'm Duw vy ha dh'agas Duw hwi”.’ 18 Maria Magdalena eth ha derivas dhe'n dhyskyblon hi dhe weles an Arloedh, hag ev dhe gewsel an taklow ma dhedhi.
Omdhiskwedhyans Yesu dhe'n Dhyskyblon
19 Ena yn gorthugher an keth jydh ma, an kynsa dydh a'n seythun, ha'n darasow deges y'n le mayth esa an dhyskyblon rag own a'n Yedhewon, Yesu a dheuth ha sevel yn aga mysk, ha leverel dhedha, ‘Kres dhywgh.’ 20 Ha wosa leverel hemma, ev a dhiskwedhas dhedha y dhiwleuv ha'y denewen. Ytho an dhyskyblon a lowenhas, ow kweles an Arloedh. 21 Ena yn-medh Yesu dhedha arta, ‘Kres dhywgh. Kepar dell wrug ow Thas ow dannvon vy, yndella my a's dannvon hwi.’ 22 Ha wosa leverel hemma, ev a anellas warnedha ha leverel dhedha, ‘Degemmerewgh an Spyrys Sans. 23 Dhe biwpynag y hwryllowgh gava aga feghosow, gevys yns dhedha, ha dhe biwpynag y's gwithowgh, gwithys yns.’
Yesu ha Tommas
24 Mes Tommas, onan a'n dewdhek, henwys Didymus, nyns esa gansa pan dheuth Yesu. 25 Ytho an dhyskyblon erell a leveris dhodho, ‘Ni re welas an Arloedh.’ Mes yn-medh ev dhedha, ‘Marnas my a wel yn y dhiwleuv merk an kentrow, ha dri ow bys yn merk an kentrow ha dri ow leuv yn y denewen, ny wrav vy krysi.’ 26 Ha dhe benn eth dydh, yth esa y dhyskyblon a-bervedh arta, ha Tommas gansa. Yesu a dheuth, ha'n darasow deges, ha sevel y'n kres ha leverel, ‘Kres dhywgh.’ 27 Ena yn-medh ev dhe Tommas, ‘Doro dha vys omma ha gwel ow diwleuv; ha doro dha leuv ha'y gorra y'm tenewen, ha na vydh diskryjyk, mes kryjyk.’ 28 Tommas a worthybis, ha leverel dhodho, ‘Ow Arloedh, ha'm Duw!’ 29 Yn-medh Yesu dhodho, ‘Rag ty dhe'm gweles ty re gryssys; gwynnvys kemmys na'm gwelas, mes i a grys.’
Porpos an Lyver
30 Yesu a wrug lies tokyn arall yn golok y dhyskyblon, nag yw skrifys y'n lyver ma. 31 Mes an re ma yw skrifys rag may kryssowgh Yesu dhe vos an Krist, Mab Duw, hag ow krysi may fo dhywgh bywnans yn y hanow ev.
Omdhiskwedhyans Yesu dhe Seyth Dyskybel
1 Wosa hemma, Yesu a omdhiskwedhas y honan arta orth mor Tiberias; hag yndella yth omdhiskwedhas. 2 Yth esa ena war-barth Simon Peder, ha Tommas henwys Didymus, ha Nathanael a Kana yn Galile, ha mebyon Zebede, ha dew arall a'y dhyskyblon. 3 Simon Peder a leveris dhedha, ‘My a dhe byskessa.’ Yn-medhons i dhodho, ‘Ni ynwedh a dheu genes.’ I eth yn-mes ha mos dihwans y'n gorhel; hag y'n nos na ny gavsons travyth. 4 Mes devedhys an bora, Yesu a sevi war an lann, byttegyns ny gonvedhsens an dhyskyblon y vos Yesu. 5 Ena yn-medh Yesu dhedha, ‘Fleghes, a nyns eus genowgh boes?’ I a worthybis dhodho, ‘Nag eus.’ 6 Yn-medh ev dhedha, ‘Tewlewgh an roes dhe du dyghow an gorhel ha hwi a gyv.’ Ytho i a dewlis, ha lemmyn ny allsons hy thenna drefenn myns an puskes. 7 Ytho an dyskybel na a wre Yesu y gara a leveris dhe Peder, ‘An Arloedh yw.’ Simon Peder ytho, pan glewas y vos an Arloedh, a wrogysas y bows a-dro dhodho, rag noeth o, ha lamma y'n mor. 8 Ha'n dhyskyblon erell a dheuth y'n skath vyghan, (rag nyns esens pell a'n lann, mes a-dro dhe dhew kans kevelin), ow tenna an roes gans an puskes. 9 Kettell dirsons dhe'n lann, i a welas ena tan glowbrenn, ha pysk warnodho, ha bara. 10 Yn-medh Yesu dhedha, ‘Drewgh re a'n puskes a gevsowgh nammnygen.’ 11 Simon Peder eth yn-bann ha tenna dhe'n lann an roes leun a buskes bras, kans, trydhek ha dew-ugens. Ha kynth esa kemmys, ny veu terrys an roes. 12 Yn-medh Yesu dhedha, ‘Dewgh, dybrewgh.’ Mes ny vedhas denvyth a'n dhyskyblon govynn orto, ‘Piw os?’ rag i a wodhya y vos an Arloedh. 13 Yesu a dheuth ha kemmeres an bara ha'y ri dhedha, hag y'n keth vaner an pysk. 14 Hemm o lemmyn an tressa gweyth yth omdhiskwedhas Yesu dhe'n dhyskyblon, wosa ev dhe bos drehevys a'n re varow.
Yesu ha Peder
15 Ytho wosa i dhe dhybri, yn-medh Yesu dhe Simon Peder, ‘Simon mab Yowann, es'ta jy orth ow hara vy moy es an re ma?’ Yn-medh ev dhodho, ‘Ya, Arloedh, ty a woer my dhe'th kara.’ Yn-medh ev dhodho, ‘Gwra maga ow eyn vy.’ 16 Yn-medh ev dhodho arta, nessa gweyth, ‘Simon mab Yowann, es'ta jy orth ow hara vy?’ Yn-medh ev dhodho, ‘Ya, Arloedh, ty a woer my dhe'th kara.’ Yn-medh ev dhodho, ‘Mag ow deves vy.’ 17 Yn-medh ev dhodho an tressa gweyth, ‘Simon mab Yowann, es'ta jy orth ow hara vy?’ Peder a gemmeras duwon, rag ev dhe leverel dhodho an tri thorn, ‘Es'ta jy orth ow hara vy?’ Yn-medh ev dhodho, ‘Arloedh, ty a woer pup-tra, ty a woer my dhe'th kara.’ Yn-medh ev dhodho, ‘Gwra maga ow deves. 18 Yn hwir, yn hwir y lavarav dhis, pan esta yowynk omwrogysa a wres ha kerdhes plepynag y fynnes; mes pan vydhydh koth, ty a ystynn dha dhiwleuv, ha den arall a wra dha wrogysa ha dha dhoen dhe le na vynnydh.’ 19 Hemma a leveris, ow sygnyfia gans py maner a vernans y hwre glorifia Duw. Ha wosa leverel hemma, yn-medh ev dhodho, ‘Gwra ow sywya.’
Yesu ha'n Dyskybel Karadow
20 Peder a dreylyas, ha gweles an dyskybel a wre Yesu y gara ow sywya, neb re boessa war-dhelergh orth y vronn y'n goen ha leverel, ‘Arloedh, piw a wra dha drayta?’ 21 Ena pan wrug Peder y weles, yn-medh ev dhe Yesu, ‘Arloedh, pandra a-dro dhe hemma?’ 22 Yn-medh Yesu dhodho, ‘Mar mynnav ev dhe wortos bys pan dhov, pyth yw henna dhis? Ty gwra ow sywya.’ 23 Ytho an lavar ma a lesas yn mysk an vreder, na vedha an dyskybel na ow merwel. Mes ny leveris Yesu dhodho na vedha ow merwel, mes ‘Mar mynnav ev dhe wortos bys pan dhov, pyth yw henna dhis?’ 24 Hemm yw an dyskybel a dheg dustuni a'n taklow ma, ha neb re's skrifas; ha ni a woer y dhustuni dhe vos gwir. 25 Hag yma ynwedh lies tra arall a wrug Yesu. Mar pe pubonan anedha skrifys, ny grysav an bys dhe alloes synsi an lyvrow a via skrifys.