1 Эхиткэн, экун мит бугадут овувчаван, кэтэ бэел дукулчатын. Тара мэртын ичэчэл бэелдук, Сэвэки турэнмэн бэелдулэ ихивдярилдук, мит сарап. Тара би, тэкэмэдукин алагукса, синду, сомат аяври Пеопил, улбули дукудави дялдам, си Исустули долдынас тар тэдедук тэде бихивэн садас.

Ирод Иудеяду тэгэмэр биңэхин, хирури Сахария бичэн, Авия сменадукин. Нуңан ахин Елисавета Арондук тэкэчи бичэн. Нуңартын Сэвэки дюлэдун ңунңэт бинит бидечэтын, упкат Бэгин-Сэвэки одёкичилван, нюңнинмэн-дэ дялувдячатын. Ңи-дэ нуңардулитын эрувэ эңэт гунэ бичэн. Тар-да бичэлин нуңартын хутэе ачир бичэтын. Елисавета эвки балдыра бичэ, тыкэн биденэл, сагданчатын. Умнэ Сахария тадук гил хирурил Авия сменадукин Сэвэки Дюдун хавалкичитын инэңил очатын. Тэли Сахария хулгакитту ая унңучил чукава дегдыңэтын бичэн, хулганикит инэңин тыкчэ бичэн. Тарит нуңан Бэгин Дюлан ичэн. Умивупчал бэел, тулинэ илитчахал, уңкеродерэктын, Сахария хулганидячан. Умнэт Сахарияду Сэвэки тэдэвумнин ичэврэн, нуңан хулгакит анңудун аял унңучил чукал, ду саңнядяридутын илитчачан. Сахария, нуңанман ичэксэ, олочон, ңэлэлчэн-дэ.

Сэвэки тэдэвумнин-кэ нуңантыкин гунчэ: - Сахария, экэл ңэлэрэ: си, уңкеронэ, гэлэнэс долдывран. Синңи ахис Елисавета синду омолгияс балдывяңан, си нуңанман, Иоан гуннэ, гэрбикэл. Меванни хэлды урункэкунди, сэвденкэкунди дялувувдяңан, кэтэ илэл нуңан балдынадун урундеңэтын. Бэгин дюлэдун нуңан хэгды бэе одяңан. Нуңан экуды-кат аракива этэн умна. Энинин ургэхи бидеңэхин, нуңан Сэвэки Эриндин дялувувдяңан. Кэтэ Исраиль бэелвэтын нуңан Бэгиндулэ, Сэвэкилэтын мучувдяңан. Нуңан, омитви, эңэхитви-дэ Ильява урэденэ, Бэгин дюлэдун ңэнэдедеңэн, амтыл меварватын хутэлтыкитын дагамавкандяңан, дюлэвэр эвкил бурэ бэелбэ Сэвэки дялилдин дялувдяңан. Тыкэн Иоан бэелбэ Бэгинтыки эмувдеңэн, нуңандулан эмэрилэн итыгавувчалва. - Тавар гуннэс тэдевэн он-ка би садяңав? - гуннэ, Сахария Сэвэки тэдэвумнидукин ханңуча. - Би-кэ этыркэн бихим, ахив нян сагданча. Таду Сэвэки тэдэвумнин гунэн: Би Гаврил бихим, Сэвэки дюлэдун илитчари. Нуңан минэвэ элэ уңчэн, би синду эр аяпчу улгурвэ мэтэвдэв. Би синду мэтэвнэв гуннэгэчинми дялувдяңан. Си-кэ би гуннэвэв эчэс тэдерэ, тарит симуладяңас, эвки турэттэ одяңас, би гуннэв дялувдалан си турэнэ ачин бидеңэс. Тар инэңивэ Сэвэки синмача. Сахариява тулилэ алатчарил бэел нуңан горово Сэвэки Дюдун бидеридукин дивэдечэтын. Де, тадук Сахария, турэңэ окса, юрэн. Бэел нуңан Сэвэки Дюдун сохива ичэнэвэн тылчэтын. Сахария, турэңэ окса, тара ңалалдиви ичэвкэнчэ. Сэвэки Дюдун хавалкичин инэңилин илтэнчэлэтын, нуңан дюлави мучучан. Тар амардукин Елисавета, нуңан ахин, дагали ургэхивки, тадук тунңа бегава дюдукви энэ юрэ бидечэн. Эрэ тыкэн минду Бэгин оран, би эхидукви балдыра бэелдук эдэв халдятта, - гунивки бичэ нуңан.

Елисавета ургэхинэдукин нюңи беган очалан, Сэвэки Гаврил гэрбичи тэдэвумниви Насаретту бидери хунаттула уңчэн. Тар бикит Галилея гунмури дуннэду бичэн. Тар хунат Давидтук тэкэчи Осиптула эдылэңэт бичэн. Хунат гэрбин Мария бичэн. Гаврил, нуңандулан эмэксэ, гунчэ: - Мэнду бигин синду, Сэвэки синманан хунат! Синнун Бэгин! Тэдэвумни гуннэвэн долдыкса, хунат олочон, тадук дялдалчан: Эда тыкэн нунан гунэн? Сэвэки тэдэвумнин нуңантыкин гунчэ: - Мария, экэл ңэлэрэ! Сэвэки синэвэ аявдерэн. Си ургэхидеңэс тадук омолгива балдывдяңас, Нуңанман Исус, гуннэ гэрбидэви. Нуңан хэгдыткумэ одяңан, Нуңанман Угутмэр Омолгидин гэрбидеңэтын, Бэгин-Сэвэки Нуңандун Давид тэгэмэр тэгэквэн будеңэн. Исус Давидтук тэкэчи бинэ, Якиптук тэкэчил бэел оёлитын тэгэмэр одяңан. Тар тэгэмэрин этэн манавра, нуңан окин-да тэгэмэр бидеңэн. - Он-ка би ургэхидеңэв? Би эдые ачин бихим эчэ! Таду нуңан гунчэ: - Сэвэки эринин синдулэ исчаңан, Угутмэр эңэхин синэ ханяндиви дасчаңан, тарит си балдывңат хутэс Сэвэкини бидеңэн. Нуңан Сэвэки Омолгин, гуннэ, гэрбивдеңэн. Тар ичэткэл Елисаветава, дагалтави, нуңан сагды, бэел-дэ эңэт балдыра ахи гуниңкитын эчэ. Тар-да бичэлин, нуңан омолгит ургэхинэн нюңи беган ңэнэрэн. Сэвэки эхин ора экун-кат ачин. Мария гунчэ: - Би Бэгин боканин бихим. Бэгин синдули гуннэгэчинин бигин. Сэвэки тэдэвумнин тадук суручэн.

Адыллали-вал Мария городтула, хэлинчэнэ, суручэн. Тар город урэчи Иудеяду бичэ. Нуңан, Сахария дюлан иксэ, Елисавета мэндучэ. Мария мэндуривэн Елисавета долдычалан, Елисавета урдун хутэн курбухинчэ, мэнин-кэ Сэвэки Эриндин дялувча. Елисавета игдыт - Мария, Сэвэки синэвэ аявдерэн, синэвэ ахалдук синмача, балдывривас хутэвэс нян аявдерэн. Би экунма оналив миндулэ Бэгинми энинин эмэрэн? Си мэндури турэрис сердулав идекентын, додув хутэв, урунденэ, курбухинчэрэн, Бэгин турэрин дялувриватын тэдечэ ахи кутучи!

- Би дялдуви Бэгинмэ угиривдем, упкат дотпи Сэвэкиду сот урундэм. Би хэгды-дэ бэе эчэв бихи, тар-да бичэлин, нуңан минтыки ичэхинэн. Эдук дюлэски упкат бэел тэкэн тэкэндуквэр минэ кутучи ахи гундедеңэтын. Эңэхичи минду со хэгдывэ оран. Нуңан гэрбин одёври! Сэвэки упкат бэелвэ тэкэн тэкэндуктын Нуңанман одёдерилва, муландяран. Нуңан эңэхи ңалатпи арпуллан - сокатчарил бэелвэ ахадяран, эңэхил бэгсэлвэ тэгэкилдуктын тыкивдерэн, тырэвувчэл бэелвэ угиривдерэн, дёгордёрилду дялум будерэн, баяхалва-ка экуна-да ачин тындерэн. Сэвэки Исраиль тэгэдун, мэнңилдуви бокардуви, бэлэдэви, эмэчэн, Нуңан бэелду бэлэтңэт турэнми эчин омңоро. Сэвэки Аврамду тадук нуңан хутэлдун окин-да бэлэтңэт очан. Тар турэрви нуңан амтылдут бучэн. Мария, Елисаветаду илан-мал бегава биксэ, дюлави мучучан.

Елисавета, балдырин инэңин эмэчэлэн, омолгичанма балдывча. Нимэкилин, дялин-да Бэгин, нуңанман муланикса, бэлэнэдун Елисаветанун умунду урундечэтын. Дяпки инэңиду нуңартын омолгичанду минэври итыва одавар умунупчэтын, аминин гэрбидин Сахария, гуннэл, гэрбидэвэр эетчэтын. Энинин-кэ тара энэ дёкта, гунчэ: - Эчэ, нуңан гэрбин Иоан бигин. - Си тэкэндус таргачин гэрбичи ңи-кэт ачин эчэ! - гунчэл нуңартын. Тадук куңакан аминдукин ңалалдивар ичэвкэнденэл, нуңан хутэви он гэрбидэви эетчэривэн ханңучатын. Сахария, олдоксоконмо будэтын гэлэчэ тадук дукуча: Нуңан гэрбин Иоан. Тариңдун упкат сохичатын. Тармалду нуңан турэчилчэ, улгучэмэтты окса, Сэвэкивэ кэнелчэ. Нимэкилин упкат ңэлэлчэл. Тара долдычал бэел, упкат дялдувар дяваксал, гунчэвкил бичэл: Ңи-кэ тар куңакан одяңан? Тэдемэ-ты, нуңанман Бэгин, одёдёно, дыхучиңкин.

Сахария, Иоан аминин, Сэвэки Эриндин дялувукса, экунма Сэвэки нунандун нинэвэн улгучэнилчэн: - Бэгинмэ кэнедерэв - Исраиль Сэвэкивэн! Нуңан миттулэ, Мэнңилэви тэгэлэви, бэлэдэви эмэчэн. Нуңан эңэхи Айңат бэевэ миттулэ уңдерэн. Тар бэе Давидтук тэкэчи, Давид Нуңан боканин. Тара Сэвэки синманаливи бэелдуливи Нуңан турэнмэн ихивдатын, он Нуңан нонон гуннэдин гунчэн. Тар Айңат бэе булэсэгилдук тадук митпэ ичэмэиндерилдук айдяран. Тыкэн нуңан мэнңидуви тэгэдуви бэлэтчэрэн, амтылты тэкэрдутын бунэви турэнми маннит дявучадяран. Тэкэрты аминдутын Аврамду митпэ булэсэгилдук айңат турэнми Нуңан бучэн. Тарит мит ңидук-кэт энэл ңэлэрэ, Нуңан нюңнинэдин бидедеңэт. Мит Сэвэки бэелин бинэл, Нуңан экунма миттук эетчэрэн, Нуңан дюлэдун упкат бинидувэр тара дялувнатыт. Си-кэ, хутэ, Угутмэр Сэвэки турэнмэн ихиври бэе, гуннэ, гэрбивдеңэс - Нуңандун хоктоён осчана, Бэгин дюлэдун нёрадяңас, тадук Сэвэки тэгэви, ңэлумухилвэ лукчана, айриван мэтэвдеңэс. Митпэ упкат мевандиви аявдэри Сэвэкиңит миттулэ няннядук ңэрин геванма уңдеңэн. Тар геван, ичэвуксэ, буни хактырадун бидерилвэ упкатватын ңэриндиви гарпадяңан, тарит аяралдындула ихиври хоктово нюңнидеңэн.

Куңакан-ка ихэвдечэ, дялирбудяча, нуңан Исраиль тэгэлэн эмэри инэңин одалан бэел экичитын бирэ дуннэду бидечэн.

2

free web site hit counter