Aiwaggeljo Thairh Marku Anastodeith
1 Anastodeins aiwaggeljons Iesuis Christaus sunaus guths. 2 Swe gamelith ist in Esaiin praufetau: Sai, ik insandja aggilu meinana faura thus, saei gamanweith wig theinana faura thus. 3 Stibna wopjandins in authidai: Manweith wig fraujins, raihtos waurkeith staigos guths unsaris. 4 Was Iohannes daupjands in authidai jah merjands daupein idreigos du aflageinai frawaurhte. 5 Jah usiddjedun du imma all Iudaialand jah Iairusaulymeis, jah daupidai wesun allai in Iaurdane ahwai fram imma, andhaitandans frawaurhtim seinaim. 6 Wasuth-than Iohannes gawasiths taglam ulbandaus jah gairda filleina bi hup seinana, jah matida thramsteins jah milith haithiwisk; 7 Jah merida kwithands: kwimith swinthoza mis sa afar mis, thizei ik ni im wairths anahneiwands andbindan skaudaraip skohe is. 8 Aththan ik daupja izwis in watin, ith is daupeith izwis in ahmin weihamma. 9 Jah warth in jainaim dagam, kwam Iesus fram Nazaraith Galeilaias, jah daupiths was fram Iohanne in Iaurdane. 10 Jah suns usgaggands us thamma watin gasahw usluknans himinans, jah ahman swe ahak atgaggandan ana ina. 11 Jah stibna kwam us himinam: thu is sunus meins sa liuba, in thuzei waila galeikaida. 12 Jah suns sai, ahma ina ustauh in authida. 13 Jah was in thizai authidai dage fidwor tiguns fraisans fram Satanin, jah was mith diuzam; jah aggileis andbahtidedun imma. 14 Ith afar thatei atgibans warth Iohannes, kwam Iesus in Galeilaia merjands aiwaggeljon thiudangardjos guths, 15 Kwithands, thatei usfullnoda thata mel jah atnehwida sik thiudangardi guths: idreigoth jah galaubeith in aiwaggeljon. 16 Jah hwarbonds faur marein Galeilaias gasahw Seimonu jah Andraian brothar is, this Seimonis, wairpandans nati in marein; wesun auk fiskjans. 17 Jah kwath im Iesus: hirjats afar mis, jah gatauja igkwis wairthan nutans manne. 18 Jah suns afletandans tho natja seina laistidedun afar imma. 19 Jah jainthro inn gaggands framis leitil gasahw Iakobu thana Zaibaidaiaus jah Iohanne brothar is, jah thans in skipa manwjandans natja. 20 Jah suns haihait ins. Jah afletandans attan seinana Zaibaidaiu in thamma skipa mith asnjam, galithun afar imma. 21 Jah galithun in Kafarnaum; jah suns sabbato daga galeithands in synagogen laisida ins. 22 Jah usfilmans waurthun ana thizai laiseinai is: unte was laisjands ins swe waldufni habands jah ni swaswe thai bokarjos. 23 Jah was in thizai synagogen ize manna in unhrainjamma ahmin, jah ufhropida, 24 Kwithands: fralet, hwa uns jah thus, Iesu Nazorenai, kwamt frakwistjan uns? Kann thuk, hwas thu is, sa weiha guths. 25 Jah andbait ina Iesus kwithands: thahai, jah usgagg ut us thamma, ahma unhrainja. 26 Jah tahida ina ahma sa unhrainja, jah hropjands stibnai mikilai usiddja us imma. 27 Jah afslauthnodedun allai sildaleikjandans, swaei sokidedun mith sis misso kwithandans: hwa sijai thata? hwo so laiseino so niujo, ei mith waldufnja jah ahmam thaim unhrainjam anabiudith jah ufhausjand imma? 28 Usiddja than meritha is suns and allans bisitands Galeilaias. 29 Jah suns us thizai synagogen usgaggandans kwemun in garda Seimonis jah Andraiins mith Iakobau jah Iohannen. 30 Ith swaihro Seimonis lag in brinnon; jah suns kwethun imma bi ija. 31 Jah duatgaggands urraisida tho undgreipands handu izos, jah aflailot tho so brinno suns, jah andbahtida im. 32 Andanahtja than waurthanamma, than gasaggkw sauil, berun du imma allans thans ubil habandans jah unhulthons habandans. 33 Jah so baurgs alla garunnana was at daura. 34 Jah gahailida managans ubil habandans missaleikaim sauhtim, jah unhulthons managos uswarp, jah ni fralailot rodjan thos unhulthons, unte kunthedun ina. 35 Jah air uhtwon usstandands usiddja, jah galaith ana authjana stath, jah jainar bath. 36 Jah galaistans waurthun imma Seimon jah thai mith imma. 37 Jah bigitandans ina kwethun du imma, thatei allai thuk sokjand. 38 Jah kwath du im: gaggam du thaim bisunjane haimom jah baurgim, ei jah jainar merjau, unte duthe kwam. 39 Jah was merjands in synagogim ize and alla Galeilaian jah unhulthons uswairpands. 40 Jah kwam at imma thrutsfill habands, bidjands ina jah kniwam knussjands jah kwithands du imma, thatei jabai wileis, magt mik gahrainjan. 41 Ith Iesus infeinands, ufrakjands handu seina attaitok imma, jah kwath imma: wiljau, wairth hrains. 42 Jah bithe kwath thata Iesus, suns thata thrutsfill aflaith af imma, jah hrains warth. 43 Jah gahwotjands imma, suns ussandida ina, 44 Jah kwath du imma: saihw ei mannhun ni kwithais waiht; ak gagg thuk silban ataugjan gudjin, jah atbair fram gahraineinai theinai thatei anabauth Moses, du weitwodithai im. 45 Ith is usgaggands dugann merjan filu jah uskwithan thata waurd, swaswe is juthan ni mahta andaugjo in baurg galeithan, ak uta ana authjaim stadim was; jah iddjedun du imma allathro.
1 Jah galaith aftra in Kafarnaum afar dagans, jah gafrehun thatei in garda ist. 2 Jah suns gakwemun managai, swaswe juthan ni gamostedun nih at daura, jah rodida im waurd. 3 Jah kwemun at imma uslithan bairandans, hafanana fram fidworim. 4 Jah ni magandans nehwa kwiman imma faura manageim, andhulidedun hrot tharei was Iesus; jah usgrabandans insailidedun thata badi jah fralailotun, ana thammei lag sa uslitha. 5 Gasaihwands than Iesus galaubein ize kwath du thamma uslithin: barnilo, afletanda thus frawaurhteis theinos. 6 Wesunuh than sumai thize bokarje jainar sitandans jah thagkjandans sis in hairtam seinaim: 7 Hwa sa swa rodeith naiteinins? hwas mag afletan frawaurhtins, niba ains guth? 8 Jah suns ufkunnands Iesus ahmin seinamma thatei swa thai mitodedun sis, kwath du im: duhwe mitoth thata in hairtam izwaraim? 9 Hwathar ist azetizo du kwithan thamma uslithin: afletanda thus frawaurhteis theinos, thau kwithan: urreis jah nim thata badi theinata jah gagg? 10 Aththan ei witeith thatei waldufni habaith sunus mans ana airthai afletan frawaurhtins, kwath du thamma uslithin: 11 Thus kwitha: urreis, nimuh thata badi thein jah gagg du garda theinamma. 12 Jah urrais suns jah ushafjands badi usiddja faura andwairthja allaize, swaswe usgeisnodedun allai jah hauhidedun mikiljandans guth, kwithandans thatei aiw swa ni gasehwun. 13 Jah galaith aftra faur marein, jah all manageins iddjedun du imma, jah laisida ins. 14 Jah hwarbonds gasahw Laiwwi thana Alfaiaus sitandan at motai jah kwath du imma: gagg afar mis; jah usstandands iddja afar imma. 15 Jah warth, bithe is anakumbida in garda is, jah managai motarjos jah frawaurhtai mith anakumbidedun Iesua jah siponjam is; wesun auk managai jah iddjedun afar imma. 16 Jah thai bokarjos jah Fareisaieis gasaihwandans ina matjandan mith thaim motarjam jah frawaurhtaim, kwethun du thaim siponjam is: hwa ist [thatei mith motarjam jah] frawaurhtaim matjith jah driggkith? 17 Jah gahausjands Iesus kwath du im: ni thaurbun swinthai lekeis, ak thai ubilaba habandans; ni kwam lathon uswaurhtans, ak frawaurhtans. 18 Jah wesun siponjos Iohannis jah Fareisaieis fastandans; jah atiddjedun jah kwethun du imma: duhwe siponjos Iohannis jah Fareisaieis fastand, ith thai theinai siponjos ni fastand? 19 Jah kwath im Iesus: ibai magun sunjus bruthfadis, und thatei mith im ist bruthfaths, fastan? swa lagga hweila swe mith sis haband bruthfad, ni magun fastan. 20 Aththan atgaggand dagos than afnimada af im sa bruthfaths, jah than fastand in jainamma daga. 21 Ni manna plat fanins niujis siujith ana snagan fairnjana; ibai afnimai fullon af thamma sa niuja thamma fairnjin, jah wairsiza gataura wairthith. 22 Ni manna giutith wein juggata in balgins fairnjans; ibai aufto distairai wein thata niujo thans balgins, jah wein usgutnith jah thai balgeis frakwistnand; ak wein juggata in balgins niujans giutand. 23 Jah warth thairhgaggan imma sabbato daga thairh atisk, jah dugunnun siponjos is skewjandans raupjan ahsa. 24 Jah Fareisaieis kwethun du imma: sai, hwa taujand siponjos theinai sabbatim thatei ni skuld ist? 25 Jah is kwath du im: niu ussuggwuth aiw hwa gatawida Daweid, than thaurfta jah gredags was, is jah thai mith imma? 26 Hwaiwa galaith in gard guths uf Abiathara gudjin jah hlaibans faurlageinais matida, thanzei ni skuld ist matjan niba ainaim gudjam, jah gaf jah thaim mith sis wisandam? 27 Jah kwath im: sabbato in mans warth gaskapans, ni manna in sabbato dagis; 28 Swaei frauja ist sa sunus mans jah thamma sabbato.
1 Jah galaith aftra in synagogen, jah was jainar manna gathaursana habands handu. 2 Jah witaidedun imma hailidediu sabbato daga, ei wrohidedeina ina. 3 Jah kwath du thamma mann thamma gathaursana habandin handu: urreis in midumai. 4 Jah kwath du im: skuldu ist in sabbatim thiuth taujan aiththau unthiuth taujan, saiwala nasjan aiththau uskwistjan? 5 Ith eis thahaidedun. Jah ussaihwands ins mith moda, gaurs in daubithos hairtins ize, kwath du thamma mann: ufrakei tho handu theina! Jah ufrakida, jah gastoth aftra so handus is. 6 Jah gaggandans than Fareisaieis sunsaiw mith thaim Herodianum garuni gatawidedun bi ina, ei imma uskwemeina. 7 Jah Iesus aflaith mith siponjam seinaim du marein, jah filu manageins us Galeilaia laistidedun afar imma, jah us Iudaia, 8 Jah us Iaimsaulymim, jah us Idumaia, jah hindana Iaurdanaus; jah thai bi Tyra jah Seidona, manageins filu, gahausjandans hwan filu is tawida, kwemun at imma. 9 Jah kwath thaim siponjam seinaim ei skip habaith wesi at imma in thizos manageins, ei ni thraiheina ina. 10 Managans auk gahailida, swaswe drusun ana ina ei imma attaitokeina, 11 jah swa managai swe habaidedun wundufnjos jah ahmans unhrainjans, thaih than ina gasehwun, drusun du imma jah hropidedun kwithandans, thatei thu is sunus guths. 12 Jah filu andbait ins ei ina ni gaswikunthidedeina. 13 Jah usstaig in fairguni jah athaihait thanzei wilda is, jah galithun du imma. 14 Jah gawaurhta twalif du wisan mith sis, jah ei insandidedi ins merjan, 15 Jah haban waldufni du hailjan sauhtins jah uswairpan unhulthons. 16 Jah gasatida Seimona namo Paitrus; 17 Jah Iakobau thamma Zaibaidaiaus, jah Iohanne brothr Iakobaus, jah gasatida im namna Bauanairgais, thatei ist: sunjus theihwons; 18 Jah Andraian jah Filippu jah Barthaulaumaiu jah Matthaiu jah Thoman jah Iakobu thana Alfaiaus, jah Thaddaiu jah Seimona thana Kananeiten, 19 Jah Iudan Iskarioten, saei jah galewida ina. 20 Jah atiddjedun in gard, jah gai'ddja sik managei, swaswe ni mahtedun nih hlaif matjan. 21 Jah hausjandans fram imma bokarjos jah antharai usiddjedun gahaban ina: kwethun auk, thatei usgaisiths ist. 22 Jah bokarjos thai af Iairusaulymai kwimandans kwethun thatei Baiailzaibul habaith, jah thatei in thamma reikistin unhulthono uswairpith thaim unhulthom. 23 Jah athaitands ins in gajukom kwath du im: hwaiwa mag Satanas Satanan uswairpan? 24 Jah jabai thiudangardi withra sik gadailjada, ni mag standan so thiudangardi jaina. 25 Jah jabai gards withra sik gadailjada, ni mag standan sa gards jains. 26 Jah jabai Satana usstoth ana sik silban jah gadailiths warth, ni mag gastandan, ak andi habaith. 27 Ni manna mag kasa swinthis galeithands in gard is wilwan, niba faurthis thana swinthan gabindith; ja [than] thana gard is diswilwai. 28 Amen, kwitha izwis, thatei allata afletada thata frawaurhte sunum manne, jah naiteinos swa managos swaswe wajamerjand; 29 Aththan saei wajamereith ahman weihana ni habaith fralet aiw, ak skula ist aiweinaizos frawaurhtais. 30 Unte kwethun: ahman unhrainjana habaith. 31 Jah kwemun than aithei is jah brothrjus is, jah uta standandona insandidedun du imma, haitandona ina. 32 Jah setun bi ina managei; kwethun than du imma: sai, aithei theina jah brothrjus theinai jah swistrjus theinos uta sokjand thuk. 33 Jah andhof im kwithands: hwo ist so aithei meina aiththau thai brothrjus meinai? 34 Jah bisaihwands bisunjane thans bi sik sitandans kwath: sai, aithei meina jah thai brothrjus meinai. 35 Saei allis waurkeith wiljan guths, sa jah brothar meins jah swistar jah aithei ist.
1 Jah aftra Iesus dugann laisjan at marein, jah galesun sik du imma manageins filu, swaswe ina galeitha[nda]n in skip gasitan in marein; jah alla so managei withra marein ana statha was. 2 Jah laisida ins in gajukom manag, jah kwath im in laiseinai seinai: Hauseith! 3 Sai, urrann sa saiands du saian fraiwa seinamma. 4 Jah warth, miththanei saiso, sum raihtis gadraus faur wig, jah kwemun fuglos jah fretun thata. 5 Antharuth-than gadraus ana stainahamma, tharei ni habaida airtha managa, jah suns urrann, in thizei ni habaida diupaizos airthos; 6 At sunnin than urrinnandin uf brann, jah unte ni habaida waurtins, gathaursnoda. 7 Jah sum gadraus in thaurnuns; jah ufarstigun thai thaurnjus jah af hwapidedun thata, jah akran ni gaf. 8 Jah sum gadraus in airtha goda, jah gaf akran urrinnando jah wahsjando; jah bar ain 'l' jah ain 'j' jah ain 'r'. 9 Jah kwath: saei habai ausona hausjandona, gahausjai. 10 Ith bithe warth sundro, frehun ina thai bi ina mith thaim twalibim thizos gajukons. 11 Jah kwath im: izwis atgiban ist kunnan runa thiudangardjos guths, ith jainaim thaim uta in gajukom allata wairthith, 12 Ei saihwandans saihwaina jah ni gaumjaina, jah hausjandans hausjaina jah ni frathjaina, nibai hwan gawandjaina sik jah afletaindau im frawaurhteis. 13 Jah kwath du im: ni wituth tho gajukon, jah hwaiwa alios thos gajukons kunneith? 14 Sa saijands waurd saijith. 15 Aththan thai withra wig sind, tharei saiada thata waurd, jah than gahausjand unkarjans, suns kwimith Satanas jah usnimith waurd thata insaiano in hairtam ize. 16 Jah sind samaleiko thai ana stainahamma saianans, thaiei than hausjand thata 17 waurd, suns mith fahedai nimand ita, Jah ni haband waurtins in sis, ak hweilahwairbai sind; thathroh, bithe kwimith agio aiththau wrakja in this waurdis, suns gamarzjanda. 18 Jah thai sind thai in thaurriuns saianans, thai waurd hausjandans, 19 Jah saurgos thizos libainais jah afmarzeins gabeins jah thai bi thata anthar lustjus inn atgaggandans afhwapjand thata waurd, jah akranalaus wairthith. 20 Jah thai sind thai ana airthai thizai godon saianans, thaiei hausjand thata waurd jah andnimand jah akran bairand, ain 'l' jah ain 'j' jah ain 'r'. 21 Jah kwath du im: ibai lukarn kwimith duthe ei uf melan satjaidau aiththau undar ligr? niu ei ana lukarnastathan satjaidau? 22 Nih allis ist hwa fulginis thatei ni gabairhtjaidau; nih warth analaugn, ak ei swikunth wairthai. 23 Jabai hwas habai ausona hausjandona, gahausjai. 24 Jah kwath du im: saihwith, hwa hauseith! In thizaiei mitath mitith, mitada izwis, jah biaukada izwis thaim galaubjandam. 25 Unte thishwammeh saei habaith, gibada imma; jah saei ni habaith, jah thatei habaith afnimada imma. 26 Jah kwath: swa ist thiudangardi guths, swaswe jabai manna wairpith fraiwa ana airtha. 27 Jah slepith jah urreisith naht jah daga, jah thata fraiw keinith jah liudith swe ni wait is. 28 Silbo auk airtha akran bairith: frumist gras, thathroh ahs, thathroh fulleith kaurnis in thamma ahsa. 29 Thanuh bithe atgibada akran, suns insandeith giltha, unte atist asans. 30 Jah kwath: hwe galeikom thiudangardja guths, aiththau 31 in hwileikai gajukon gabairam tho? Swe kaurno sinapis, thatei than saiada ana airtha, minnist allaize fraiwe ist thize ana airthai; 32 Jah than saiada, urrinnith jah wairthith allaize grase maist, jah gataujith astans mikilans, swaswe magun uf skadau is fuglos himinis gabauan. 33 Jah swaleikaim managaim gajukom rodida du im thata waurd, swaswe mahtedun hausjon. 34 Ith inuh gajukon ni rodida im, ith sundro siponjam seinaim andband allata. 35 Jah kwath du im in jainamma daga, at andanahtja than waurthanamma: usleitham jainis stadis. 36 Jah afletandans tho managein andnemun ina swe was in skipa; jah than anthara skipa wesun mith imma. 37 Jah warth skura windis mikila jah wegos waltidedun in skip, swaswe ita juthan gafullnoda. 38 Jah was is ana notin ana waggarja slepands, jah urraisidedun ina jah kwethun du imma: laisari, niu kara thuk thizei frakwistnam? 39 Jah urreisands gasok winda jah kwath du marein: gaslawai, afdumbn! Jah anasilaida sa winds jah warth wis mikil. 40 Jah kwath du im: duhwe faurhtai sijuth swa? hwaiwa ni nauh habaith galaubein? 41 Jah ohtedun sis agis mikil jah kwethun du sis misso: hwas thannu sa sijai, unte jah winds jah marei ufhausjand imma?
1 Jah kwemun hindar marein in landa Gaddarene. 2 Jah usgaggandin imma us skipa, suns gamotida imma manna us aurahjom in ahmin unhrainjamma, 3 Saei bauain habaida in aurahjom: jah ni naudibandjom eisarneinaim manna mahta ina gabindan. 4 Unte is ufta eisarnam bi fotuns gabuganaim jah naudibandjom eisarneinaim gabundans was, jah galausida af sis thos naudibandjos jah tho ana fotum eisarna gabrak, jah manna ni mahta ina gatamjan. 5 Jah sinteino nahtam jah dagam in aurahjom jah in fairgunjam was hropjands jah bliggwands sik stainam. 6 Gasaihwands than Iesu fairrathro rann jah inwait ina, 7 Jah hropjands stibnai mikilai kwath: hwa mis jah thus, Iesu, sunau guths this hauhistins? biswara thuk bi gutha, ni balwjais mis! 8 Unte kwath imma: usgagg, ahma unhrainja, us thamma mann! 9 Jah frah ina: hwa namo thein? Jah kwath du imma: namo mein Laigaion, unte managai sijum. 10 Jah bath ina filu ei ni usdrebi im us 11 landa. Wasuh than jainar hairda sweine haldana at thamma fairgunja. 12 Jah bedun ina alios thos unhulthons kwithandeins: insandei unsis in tho sweina, ei in tho galeithaima. 13 Jah uslaubida im Iesus suns. Jah usgaggandans ahmans thai unhrainjans galithun in tho sweina, jah rann so hairda and driuson in marein; wesunuth-than swe twos thusundjos, jah afhwapnodedun in marein. 14 Jah thai haldandans tho sweina gathlauhun, jah gataihun in baurg jah in haimom, jah kwemun saihwan hwa wesi thata waurthano. 15 Jah atiddjedun du Iesua, jah gasaihwand thana wodan sitandan jah gawasidana jah frathjandan thana saei habaida laigaion, jah ohtedun. 16 Jah spillodedun im thaiei gasehwun, hwaiwa warth bi thana wodan jah bi tho sweina. 17 Jah dugunnun bidjan ina galeithan hindar markos seinos. 18 Jah inn gaggandan ina in skip bath ina, saei was wods, ei mith imma wesi. 19 Jah ni lailot ina, ak kwath du imma: gagg du garda theinamma du theinaim, jah gateih im, hwan filu thus frauja gatawida jah gaarmaida thuk. 20 Jah galaith jah dugann merjan in Daikapaulein, hwan filu gatawida imma Iesus; jah allai sildaleikidedun. 21 Jah usleithandin Iesua in skipa aftra hindar marein, gakwemun sik manageins filu du imma, jah was faura marein. 22 Jah sai, kwimith ains thize synagogafade namin Jaeirus; jah saihwands ina gadraus du fotum Iesuis, 23 Jah bath ina filu, kwithands, thatei dauhtar meina aftumist habaith, ei kwimands lagjais ana tho handuns, ei ganisai jah libai. 24 Jah galaith mith imma; jah iddjedun afar imma manageins filu jah thraihun ina. 25 Jah kwinono suma wisandei in runa blothis jera twalif, 26 Jah manag gathulandei fram managaim lekjam jah frakwimandei allamma seinamma jah ni waihtai botida, ak mais wairs habaida, 27 Gahausjandei bi Iesu, atgaggandei in managein aftana attaitok wastjai is. 28 Unte kwath, thatei jabai wastjom is atteka, ganisa. 29 Jah sunsaiw gathaursnoda sa brunna blothis izos, jah ufkuntha ana leika thatei gahailnoda af thamma slaha. 30 Jah sunsaiw Iesus ufkuntha in sis silbin tho us sis maht usgaggandein; gawandjands sik in managein kwath: hwas mis taitok wastjom? 31 Jah kwethun du imma siponjos is: saihwis tho managein threihandein thuk, jah kwithis: hwas mis taitok. 32 Jah wlaitoda saihwan tho thata taujandein. 33 Ith so kwino ogandei jah reirandei, witandei thatei warth bi ija, kwam jah draus du imma, jah kwath imma alla tho sunja. 34 Ith is kwath du izai: dauhtar, galaubeins theina ganasida thuk; gagg in gawairthi, jah sijais haila af thamma slaha theinamma. 35 Nauhthanuh imma fodjandin, kwemun fram thamma synagogafada, kwithandans, thatei dauhtar theina gaswalt; hwa thanamais draibeis thana laisari? 36 Ith Iesus sunsaiw gahausjands thata waurd rodith, kwath du thamma synagogafada: ni faurhtei; thatainei galaubei. 37 Jah ni fralailot ainohun ize mith sis afargaggan, nibai Paitru jah Iakobu jah Iohannen brothar Iakobis. 38 Jah galaith in gard this synagogafadis, jah gasahw auhjodu jah gretandans jah waifairhwjandans filu. 39 Jah inn atgaggands kwath du im: hwa auhjoth jah gretith? thata barn ni gadauthnoda, ak slepith. 40 Jah bihlohun ina. Ith is uswairpands allaim ganimith attan this barnis jah aithein jah thans mith sis, jah galaith inn tharei was thata barn ligando. 41 Jah fairgraip bi handau thata barn kwathuh du izai: taleitha kumei, thatei ist gaskeirith: mawilo, du thus kwitha: urreis. 42 Jah suns urrais so mawi jah iddja; was auk jere twalibe; jah usgeisnodedun faurhtein mikilai. 43 Jah anabauth im filu ei manna ni funthi thata; jah haihait izai giban matjan.
1 Jah usstoth jainthro jah kwam in landa seinamma, jah 2 laistidedun afar imma siponjos is. 2 Jah bithe warth sabbato, dugann in synagoge laisjan, jah managai hausjandans sildaleikidedun kwithandans: hwathro thamma thata, jah hwo so handugeino so gibano imma, ei mahteis swaleikos thai'rh handuns is wairthand? 3 Niu thata ist sa timrja, sa sunus Marjins, ith brothar Iakoba jah Iuse jah Iudins jah Seimonis? jah niu sind swistrjus is her at unsins? Jah gamarzidai waurthun in thamma. 4 Kwath than im Iesus thatei nist praufetus unswers, niba in gabaurthai seinai jah in ganithjam jah in garda seinamma. 5 Jah ni mahta jainar ainohun mahte gataujan, niba fawaim siukam handuns galagjands gahailida. 6 Jah sildaleikida in ungalaubeinais ize, jah bitauh weihsa bisunjane, laisjands. 7 Jah athaihait thans twalif jah dugann ins insandjan twans hwanzuh, jah gaf im waldufni ahmane unhrainjaize. 8 Jah faurbauth im ei waiht ni nemeina in wig, niba hrugga aina, nih matibalg nih hlaif nih in gairdos aiz, 9 Ak gaskohai suljom: jah ni wasjaith twaim paidom. 10 Jah kwath du im: thishwaduh thei gaggaith in gard, thar saljaith, unte usgaggaith jainthro. 11 Jah swa managai swe ni andnimaina izwis, nih hausjaina izwis, usgaggandans jainthro ushrisjaith mulda tho undaro fotum izwaraim du weitwodithai im. Amen, kwitha izwis: sutizo ist Saudaumjam aiththau Gaumaurjam in daga stauos thau thizai baurg ja[i]nai. 12 Jah usgaggandans meridedun ei idreigodedeina. 13 Jah unhulthons managos usdrihun, jah gasalbodedun alewa managans siukans, jah gahailidedun. 14 Jah gahausida thiudans Herodes, swikunth allis warth namo is, jah kwath thatei Iohannis sa daupjands us dauthaim urrais, duththe waurkjand thos mahteis in imma. 15 Antharai than kwethun thatei Helias ist; antharai than kwethun thatei praufetes ist swe ains thize praufete. 16 Gahausjands than Herodes kwath, thatei thammei ik haubith afmaimait Iohanne, sa ist: sah urrais us dauthaim. 17 Sa auk raihtis Herodes insandjands gahabaida Iohannen jah gaband ina in karkarai in Hairodiadins kwenais Filippaus brothrs seinis, unte tho galiugaida. 18 Kwath auk Iohannes du Heroda, thatei ni skuld ist thus haban kwen brothrs theinis. 19 Ith so Herodia naiw imma jah wilda imma uskwiman, jah ni mahta; 20 Unte Herodis ohta sis Iohannen, kunnands ina wair garaihtana jah weihana, jah vvitaida imma jah hausjands imma manag gatawida jah gabaurjaba imma andhausida. 21 Jah waurthans dags gatils, than Herodis mela gebaurthais seinaizos nahtamat waurhta thaim maistam seinaize jah thusundifadim jah thaim frumistam Galeilaias, 22 Jah atgaggandein inn dauhtr Herodiadins jah plinsjandein jah galeikandein Heroda jah thaim mith anakumbjandam, kwath thiudans du thizai maujai: bidei mik thishwizuh thei wileis, jah giba thus. 23 Jah swor izai, thatei thishwah thei bidjais mik, giba thus, und halba thiudangardja meina. 24 Ith si usgaggandei kwath du aithein seinai: hwis bidjau? Ith si kwath: haubidis Iohannis this daupjandins. 25 Jah atgaggandei sunsaiw sniumundo du thamma thiudana bath kwithandei: wiljau ei mis gibais ana mesa haubith Iohannis this daupjandins. 26 Jah gaurs waurthans sa thiudans in thize aithe jah in thize mith anakumbjandane ni wilda izai ufbrikan. 27 Jah suns insandjands sa thiudans spaikulatur, anabauth briggan haubith is. Ith is galeithands afmaimait imma haubith in karkarai. 28 Jah atbar thata haubith is ana mesa, jah atgaf ita thizai maujai, jah so mawi atgaf ita aithein seinai. 29 Jah gahausjandans siponjos is kwemun jah usnemun leik is jah galagidedun ita in hlaiwa. 30 Jah gaiddjedun apaustauleis du Iesua jah gataihun imma allata jah swa filu swe gatawide[dun]
[Text is missing in the manuscript from 6:30 through 6:53]
53 jah duatsniwun. 54 Jah usgaggandam im us skipa, sunsaiw ufkunnandans ina, 55 Birinnandans all thata gawi dugunnun ana badjam thans ubil habandans bairan, thadei hausidedun ei is wesi. 56 Jah thishwaduh thadei iddja in haimos aiththau baurgs aiththau in weihsa, ana gagga lagidedun siukans jah bedun ina ei thau skauta wastjos is attaitokeina; jah swa managai swe attaitokun imma, ganesun.
1 Jah gakwemun sik du imma Fareisaieis jah sumai thize bokarje, kwimandans us Iairusaulymim. 2 Jah gasaihwandans sumans thize siponje is gamainjaim handum, that-ist unthwahanaim, matjandans hlaibans; 3 Ith Fareisaieis jah allai Iudaieis, niba ufta thwahand handuns, ni matjand, habandans anafilh thize sinistane, 4 Jah af mathla niba daupjand ni matjand, jah anthar ist manag thatei andnemun du haban, daupeinins stikle jah aurkje jah katile jah ligre; 5 Thathroh than frehun ina thai Fareisaieis jah thai bokarjos: duhwe thai siponjos theinai ni gaggand bi thammei anafulhun thai sinistans, ak unthwahanaim handum matjand hlaif? 6 Ith is andhafjands kwath du im, thatei waila praufetida Esayas bi izwis thans liutans, swe gamelith ist: So managei wairilom mik sweraith, ith hairto ize fairra habaith sik mis. 7 Ith sware mik blotand, laisjandans laiseinins, anabusnins manne; 8 Afletandans raihtis anabusn guths habaith thatei anafulhun mannans, daupeinins aurkje jah stikle, jah anthar galeik swaleikata manag taujith. 9 Jah kwath du im: waila inwidith anabusn guths, ei thata anafulhano izwar fastaith. 10 Moses auk raihtis kwath: swerai attan theinana jah aithein theina; jah saei ubil kwithai attin seinamma aiththau aithein seinai, dauthau afdauthjaidau. 11 Ith jus kwithith: jabai kwithai manna attin seinamma aiththau aithein: kaurban, thatei is maithms, thishwah thatei us mis gabatnis, 12 Jah ni fraletith ina ni waiht taujan attin seinamma aiththau aithein seinai, 13 Blauthjandans waurd guths thizai anabusnai izwarai, thoei anafulhuth; jah galeik swaleikata manag taujith. 14 Jah athaitands alla tho managein kwath im: hauseith mis allai jah frathjaith. 15 Ni waihts ist utathro mans inn gaggando in ina thatei magi ina gamainjan; ak thata ut gaggando us mann thata ist thata gamainjando mannan. 16 Jabai hwas habai ausona hausjandona, gahausjai. 17 Jah than galaith in gard us thizai managein, frehun ina siponjos is bi tho gajukon, 18 Jah kwath du im: swa jah jus unwitans sijuth? Ni frathjith thammei all thata utathro inn gaggando in mannan ni mag ina gamainjan: 19 Unte ni galeithith imma in hairto, ak in wamba, jah in ur runsa usgaggith, [jah] gahraineith allans matins. 20 Kwathuththan thatei thata us mann usgaggando thata gamaineith mannan. 21 Innathro auk us hairtin manne mitoneis ubilos usgaggand: kalkinassjus, horinassjus, maurthra, 22 Thiubja, faihufrikeins, unseleins, liutei, aglaitei, augo unsel, wajamereins, hauhhairtei, unwiti. 23 Tho alla ubilona innathro usgaggand jah gagamainjand mannan. 24 Jah jainthro usstandands galaith in markos Tyre jah Seidone, jah galeithands in gard ni wilda witan mannan jah ni mahta galaugnjan. 25 Gahausjandei raihtis kwino bi ina, thizozei habaida dauhtar ahman unhrainjana, kwimandei draus du fotum is. 26 Wasuth-than so kwino haithno, Saurini-fynikiska gabaurthai, jah bath ina ei tho unhulthon uswaurpi us dauhtr izos. 27 Ith Iesus kwath du izai: let faurthis sada wairthan barna, unte ni goth ist niman hlaib barne jah wairpan hundam. 28 Ith si andhof imma jah kwath du imma: jai, frauja; jah auk hundos undaro biuda matjand af drauhsnom barne. 29 Jah kwath du izai: in this waurdis gagg; usiddja unhultho us dauhtr theinai. 30 Jah galeithandei du garda seinamma bigat unhulthon usgaggana jah tho dauhtar ligandein ana ligra. 31 Jah aftra galeithands af markom Tyre jah Seidone kwam at marein Galeilaie mith tweihnaim markom Daikapaulaios. 32 Jah berun du imma baudana stammana, jah bedun ina ei lagidedi imma handau. 33 Jah afnimands ina af managein sundro, lagida figgrans seinans in ausona imma jah spewands attaitok tuggon is, 34 Jah ussaihwands du himina gaswogida, jah kwath du imma: aiffatha, thatei ist, uslukn. 35 Jah sunsaiw usluknodedun imma hliumans jah andbundnoda bandi tuggons is jah rodida raihtaba. 36 Jah anabauth im ei mann ni kwetheina. Hwan filu is im anabauth, mais thamma eis meridedun, 37 Jah ufarassau sildaleikidedun kwithandans: waila allata gatawida, jah baudans gataujith gahausjan jah unrodjandans rodjan.
1 In jainaim than dagam aftra at filu managai managein wisandein jah ni habandam hwa matidedeina, athaitands siponjans kwathuh du im: 2 Infeinoda du thizai managein, unte ju dagans thrins mith mis wesun, jah ni haband hwa matjaina; 3 Jah jabai fraleta ins lauskwithrans du garda ize, ufligand ana wiga; sumai raihtis ize fairrathro kwemun. 4 Jah andhofun imma siponjos is: hwathro thans mag hwas gasothjan hlaibam ana authidai? 5 Jah frah ins: hwan managans habaith hlaibans? 6 Ith eis kwethun: sibun. Jah anabauth thizai managein anakumbjan ana airthai; jah nimands thans sibun hlaibans jah awiliudonds gabrak jah atgaf siponjam seinaim, ei atlagidedeina faur; jah atlagidedun faur tho managein. 7 Jah habaidedun fiskans fawans, jah thans gathiuthjands kwath ei atlagidedeina jah thans. 8 Gamatidedun than jah sadai waurthun; jah usnemun laibos gabruko sibun spyreidans. 9 Wesunuth-than thai matjandans swe fidwor thusundjos; jah fralailot ins. 10 Jah galaith sunsaiw in skip mith siponjam seinaim jah kwam ana fera Magdalan. 11 Jah urrunnun Fareisaieis jah dugunnun mithsokjan imma sokjandans du imma taikn us himina, fraisandans ina. 12 Jah ufswogjands ahmin seinamma kwath: hwa thata kuni taikn sokeith? Amen, kwitha izwis: jabai gibaidau kunja thamma taikne. 13 Jah afletands ins, galeithands aftra in skip uslaith hindar marein. 14 Jah ufarmunnodedun niman hlaibans jah niba ainana hlaif ni habaidedun mith sis in skipa. 15 Jah anabauth im kwithands: saihwith ei atsaihwith izwis this beistis Fareisaie jah beistis Herodis. 16 Jah thahtedun mith sis misso kwithandans: unte hlaibans ni habam. 17 Jah frathjands Iesus kwath du im: hwa thaggkeith, unte hlaibans ni habaith? ni nauh frathjith nih wituth, unte daubata habaith hairto izwar. 18 Augona habandans ni gasaihwith, jah ausona habandans ni gahauseith, jah ni gamunuth. 19 Than thans fimf hlaibans gabrak fimf thusundjom, hwan managos tainjons fullos gabruko usnemuth? Kwethun du imma: twalif. 20 Aththan than thans sibun hlaibans fidwor thusundjom, hwan managans spyreidans fullans gabruko usnemuth? 21 Ith eis kwethun: sibun. Jah kwath du im: hwaiwa ni nauh frathjith? 22 Jah kwemun in Bethaniin jah berun du imma blindan, jah bedun ina ei imma attaitoki. 23 Jah fairgreipands handu this blindins ustauh ina utana weihsis jah speiwands in augona is, atlagjands ana handuns seinos frah ina gau-hwa-sehwi? 24 Jah ussaihwands kwath: gasaihwa mans, thatei swe bagmans gasaihwa gaggandans. 25 Thathroh aftra galagida handuns ana tho augona is jah gatawida ina ussaihwan; jah aftra gasatiths warth jah gasahw bairhtaba allans. 26 Jah insandida ina du garda is kwithands: ni in thata weihs gaggais, ni mannhun kwithais in thamma wehsa. 27 Jah usiddja Iesus jah siponjos is in wehsa Kaisarias thizos Filippaus; jah ana wiga frah siponjans seinans, kwithands du im: hwana mik kwithand mans wisan? 28 Ith eis andhofun: Iohannen thana daupjand, jah antharai Helian; sumaih than ainana praufete. 29 Jah is kwath du im: aththan jus, hwana mik kwithith wisan? Andhafjands than Paitrus kwath du imma: thu is Christus. 30 Jah faurbauth im ei mannhun ni kwetheina bi ina. 31 Jah dugann laisjan ins thatei skal sunus mans filu winnan, jah uskiusan skulds ist fram thaim sinistam jah thaim auhumistam gudjam jah bokarjam, jah uskwiman Jah afar thrins dagans usstandan. 32 Jah swikunthaba thata waurd rodida; jah aftiuhands ina Paitrus dugann andbeitan ina; 33 Ith is gawandjands sik jah gasaihwands thans siponjans seinans andbait Paitru kwithands: gagg hindar mik, Satana; unte ni frathjis thaim guths, ak thaim manne. 34 Jah athaitands tho managein mith siponjam seinaim kvvath da im: saei wili afar mis laistjan, inwidai sik silban jah nimai galgan seinana jah laistjai mik. 35 Saei allis wili saiwala seina ganasjan, frakwisteith izai; ith saei frakwisteith saiwalai seinai in meina jah in thizos aiwaggeljons, ganasjith tho. 36 Hwa auk boteith mannan, jabai gageigaith thana fairhwu allana jah gasleitheith sik saiwalai seinai? 37 Aiththau hwa gibith manna inmaidein saiwalos seinaizos? 38 Unte saei skamaith sik meina jah waurde meinaize in gabaurthai thizai horinondein jah frawaurhton, jah sunus mans skamaith sik is, than kwimith in wulthau attins seinis mith aggilum thaim weiham.
1 Jah kwath du im: amen, kwitha izwis thatei sind sumai thize her standandane, thai ize ni kausjand dauthaus, unte gasaihwand thiudinassu guths kwumanana in mahtai. 2 Jah afar dagans saihs ganam Iesus Paitru jah Iakobu jah Iohannen, jah ustauh ins ana fairguni hauh sundro ainans: jah inmaidida sik in andwairthja ize. 3 Jah wastjos is waurthun glitmunjandeins, hweitos swe snaiws, swaleikos swe wullareis ana airthai ni mag gahweitjan. 4 Jah ataugiths warth im Helias mith Mose; jah wesun rodjandans mith Iesua. 5 Jah andhafjands Paitrus kwath du Iesua; Rabbei, goth ist unsis her wisan, jah gawaurkjam hlijans thrins, thus ainana jah Mose ainana jah ainana Helijin. 6 Ni auk wissa 7 hwa rodidedi; wesun auk usagidai. 7 Jah warth milhma ufarskadwjands im, jah kwam stibna us thamma milhmin: sa ist sunus meins sa liuba, thamma hausjaith. 8 Jah anaks insaihwandans ni thanaseiths ainohun gasehwun, alja Iesu ainana mith sis. 9 Dalath than atgaggandam im af thamma fairgunja, anabauth im ei mannhun ni spillodedeina thatei gasehwun, niba bithe sunus mans us dauthaim usstothi. 10 Jah thata waurd habaidedun du sis misso sokjandans: hwa ist thata us dauthaim usstandan? 11 Jah frehun ina kwithandans: unte kwithand thai bokarjos thatei Helias skuli kwiman faurthis? 12 Ith is andhafjands kwath du im: Helias swethauh kwimands faurthis aftra gaboteith alia; jah hwaiwa gamelith ist bi sunu mans, ei manag winnai jah frakunths wairthai. 13 Akei kwitha izwis thatei ju Helias kwam jah gatawidedun imma, swa filu swe wildedun, swaswe gamelith ist bi ina. 14 Jah kwimands at siponjam gasahw filu manageins bi ins, jah bokarjans sokjandans mith im. 15 Jah sunsaiw alla managei gasaihwandans ina usgeisnodedun, jah durinnandans inwitun ina. 16 Jah frah thans bokarjans: hwa sokeith mith thaim? 17 Jah andhafjands ains us thizai managein kwath: laisari, brahta sunu meinana du thus habandan ahman unrodjandan. 18 Jah thishwaruh thei ina gafahith, gawairpith ina, jah hwathjith jah kriustith tunthuns seinans jah gastaurknith; jah kwath siponjam theinaim ei usdreibeina ina, jah ni mahtedun. 19 Ith is andhafjands im kwath: o kuni ungalaubjando! und hwa at izwis sijau? und hwa thulau izwis? Bairith ina du mis. 20 Jah brahtedun ina at imma. Jah gasaihwands ina sunsaiw sa ahma tahida ina; jah driusands ana airtha walwisoda hwathjands. 21 Jah frah thana attan is: hwan lagg mel ist ei thata warth imma? Ith is kwath: us barniskja. 22 Jah ufta ina jah in fon atwarp jah in wato, ei uskwistidedi imma; akei jabai mageis, hilp unsara, gableithjands unsis. 23 Ith Iesus kwath du imma thata jabai mageis galaubjan; allata mahteig thamma galaubjandin. 24 Jah sunsaiw ufhropjands sa atta this barnis mith tagram kwath: galaubja; hilp meinaizos ungalaubeinais! 25 Gasaihwands than Iesus thatei samath rann managei, gahwotida ahmin thamma unhrainjin, kwithands du imma: thu ahma, thu unrodjands jah bauths, ik thus anabiuda: usgagg us thamma, jahthanaseiths ni galeithais in ina. 26 Jah hropjands jah filu tahjands ina usiddja; jah warth swe dauths, swaswe managai kvvethun thatei gaswalt. 27 Ith Iesus undgreipands ina bi handau urraisida ina; jah usstoth. 28 Jah galeithandan ina in gard, siponjos is frehun ina sundro: duhwe weis ni mahtedum usdreiban thana? 29 Jah kwath du im: thata kuni in waihtai ni mag usgaggan, niba in bidai jah fastubnja. 30 Jah jainthro usgaggandans iddjedun thairh Galeilaian; jah ni wilda ei hwas wissedi, 31 Unte laisida siponjans seinans, jah kwath du im thatei sunus mans atgibada in handuns manne, jah uskwimand imma, jah uskwistiths thridjin daga usstandith. 32 Ith eis ni frothun thamma waurda, jah ohtedun ina fraihnan. 33 Jah kwam in Kafarnaum, jah in garda kwumans frah ins: hwa in wiga mith izwis misso mitodeduth? 34 Ith eis slawaidedun; du sis misso andrunnun, hwarjis maists wesi. 35 Jah sitands atwopida thans twalif jah kwath du im: jabai hwas wili frumists wisan, sijai allaize aftumists jah allaim andbahts. 36 Jah nimands barn gasatida ita in midjaim im, 37 jah ana armins nimands ita kwath du im: Saei ain thize swaleikaize barne andnimith ana namin meinamma, mik andnimith; jah sahwazuh saei mik andnimith, ni mik andnimith, ak thana sandjandan mik. 38 Andhof than imma Iohannes kwithands: laisari! sehwum sumana in theinamma namin usdreibandan unhulthons, saei ni laisteith unsis, jah waridedum imma, unte ni laisteith unsis. 39 Ith is kwath: ni warjith imma; ni mannahun auk ist saei taujith maht in namin meinamma jah magi sprauto ubilwaurdjan mis; 40 Unte saei nist withra izwis, faur izwis ist. 41 Saei auk allis gadragkjai izwis stikla watins in namin meinamma, unte Christaus sijuth, amen kwitha izwis ei ni frakwisteith mizdon seinai. 42 Jah sahwazuh saei gamarzjai ainana thize leitilane thize galaubjandane du mis, goth ist imma mais ei galagjaidau asilukwairnus ana halsaggan is jah frawaurpans wesi in marein. 43 Jah jabai marzjai thuk handus theina, afmait tho; goth thus ist hamfamma in libain galeithan, thau twos handuns habandin galeithan in gaiainnan, in fon thata unhwapnando, 44 Tharei matha ize ni gaswiltith jah fon ni afhwapnith. 45 Jah jabai fotus theins marzjai thuk, afmait ina; goth thus ist galeithan in libain haltamma, thau twans fotuns habandin gawairpan in gaiainnan, in fon thata unhwapnando, 46 Tharei matha ize ni gaswiltith jah fon ni afhwapnith. 47 Jah jabai augo thein marzjai thuk, uswairp imma; goth thus ist haihamma galeithan in thiudangardja guths, thau twa augona habandin atwairpan in gaiainnan funins, 48 Tharei matha ize ni gadauthnith jah fon ni afhwapnith. 49 Hwazuh auk funin saltada jah hwarjatoh hunsle salta saltada. 50 Goth salt; ith jabai salt unsaltan wairthith, hwe supuda? Habaith in izwis salt, jah gawairtheigai sijaith mith izwis misso.
1 Jah jainthro usstandands kwam in markom Iudaias hindar Iaurdanau; jah gakwemun sik aftra manageins du imma, jah, swe biuhts, aftra laisida ins. 2 Jah duatgaggandans Fareisaieis frehun ina, skuldu sijai mann kwen afsatjan, 3 fraisandans ina. Ith is andhafjands kwath: hwa izwis anabauth Moses? 4 Ith eis kwethun; Moses uslaubida unsis bokos afsateinais meljan jah afletan. 5 Jah andhafjands Iesus kwath du im: withra harduhairtein izwara gamelida izwis tho anabusn. 6 Ith af anastodeinai gaskaftais gumein jah kwinein gatawida guth. 7 Inuh this bileithai manna attin seinamma jah aithein seinai, 8 Jah sijaina tho twa du leika samin, swaswe thanaseiths ni sind twa, ak leik ain. 9 Thatei nu guth gawath, manna thamma ni skaidai. 10 Jah in garda aftra siponjos is bi thata samo frehun ina. 11 Jah kwath du im: sahwazuh saei afletith kwen seina jah liugaith anthara, horinoth du thizai. 12 Jah jabai kwino afletith aban seinana jah liugada antharamma, horinoth. 13 Thanuh atberun du imma barna, ei attaitoki im; ith thai siponjos is sokun thaim bairandam du. 14 Gasaihwands than Iesus unwerida jah kwath du im: letith tho barna gaggan du mis jah ni warjith tho, unte thize ist thiudangardi guths. 15 Amen, kwitha izwis: saei ni andnimith thiudangardja guths swe barn, nih thauh kwimith in izai. 16 Jah gathlaihands im, lagjands handuns ana tho thiuthida im. 17 Jah usgaggandin imma in wig, duatrinnands ains jah knussjands bath ina kwithands: laisari thiutheiga, hwa taujau ei libainais aiweinons arbja wairthau? 18 Ith is kwath du imma: hwa mik kwithis thiutheigana? ni hwashun thiutheigs, alja ains guth. 19 Thos anabusnins kant: ni horinos; ni maurthrjais; ni hlifais; ni sijais galiugaweitwods; ni anamahtjais; swerai attan theinana jah aithein theina. 20 Tharuh andhafjands kwath du imma: laisari, tho alla gafastaida us jundai meinai. 21 Ith Iesus insaihwands du imma frijoda ina jah kwath du imma: ainis thus wan ist; gagg, swa filu swe habais frabugei jah gif tharbam, jah habais huzd in himinam; jah hiri laistjan mik nimands galgan. 22 Ith is ganipnands in this waurdis galaith gaurs; was auk habands faihu manag. 23 Jah bisaih wands Iesus kwath siponjam seinaim: sai, hwaiwa agluba thai faiho gahabandans in thiudangardja guths galeithand. 24 Ith thai siponjos afslauthnodedun in waurde is. Tharuh Iesus aftra andhafjands kwath im: barnilona, hwaiwa aglu ist thaim hugjandam afar faihau in 25 thiudangardja guths galeithan. 25 Azitizo ist ulbandau thairh thairko nethlos galeithan, thau gabigamma in thiudangardja guths galeithan. 26 Ith eis mais usgeisnodedun kwithandans du sis misso: jah hwas mag ganisan? 27 Insaihwands du im Iesus kwath: fram mannam unmahteig ist, akei ni fram gutha; allata auk mahteig ist fram gutha. 28 Dugann than Paitrus kwithan du imma: sai, weis aflailotum alla jah laistidedum thuk. 29 Andhafjands im Iesus kwath: amen, kwitha izwis: ni hwashun ist saei aflailoti gard aiththau brothruns aiththau aithein aiththau attan aiththau kwen aiththau barna aiththau haimothlja in meina jah in thizos aiwaggeljons, 30 Saei ni andnimai 'r' faith, nu in thamma mela gardins jah brothruns jah swistruns jah attan jah aithein jah barna jah haimothlja mith wrakom, jah in aiwa thamma anawairthin libain aiweinon. 31 Aththan managai wairthand frumans aftumans, jah aftumans frumans. 32 Wesunuth-than ana wiga gaggandans du Iairusaulymai jah faurbigaggands ins Iesus, jah sildaleikidedun jah afarlaistjandans faurhtai waurthun. Jah andnimands aftra thans twalif dugann im kwithan thoei habaidedun ina gadaban. 33 Thatei sai, usgaggam in Iairusaulyma jah sunus mans atgibada thaim ufargudjam jah bokarjam, jah gawargjand ina dauthau, [text missing] 34 Jah bilaikand ina jah bliggwand ina, jah speiwand ana ina jah uskwimand imma, jah thridjin daga usstandith. 35 Jah athabaidedun sik du imma Iakobus jah Iohannes, sunjus Zaibaidaiaus, kwithandans: laisari, wileima ei thatei thuk bidjos, taujais uggkis. 36 Ith Iesus kwath im: hwa wileits taujan mik igkwis? 37 Ith eis kwethun du imma: fragif ugkis ei ains af taihswon theinai jah ains af hleidumein theinai sitaiwa in wulthau theinamma. 38 Ith Iesus kwathuh du im: ni wituts hwis bidjats; maguts-u driggkan stikl thanei ik driggka, jah daupeinai thizaiei ik daupjada, ei daupjaindau? 39 Ith eis kwethun du imma: magu. Ith Iesus kwathuh du im: swethauh thana stikl thanei ik driggka, driggkats, jah thizai daupeinai thizaiei ik daupjada [daupjanda]; 40 Ith thata du sitan af taihswon meinai aiththau af hleidumein nist mein du giban, alja thaimei manwith was. 41 Jah gahausjandans thai taihun dugunnun unwerjan bi Iakobu jah lohannen. 42 Ith is athaitands ins kwath du im: wituth thatei [thaiei] thuggkjand reikinon thiudom, gafraujinond im, ith thai mikilans ize gawaldand im. 43 Ith ni swa sijai in izwis; ak sahwazuh saei wili wairthan mikils in izwis, sijai izwar andbahts; 44 Jah saei wili izwara wairthan frumists, sijai allaim skalks. 45 Jah auk sunus mans ni kwam at andbahtjam, ak andbahtjan jah giban saiwala seina faur managans lun. 46 Jah kwemun in Iairikon. Jah usgaggandin imma jainthro mith siponjam seinaim jah managein ganohai, sunus Teimaiaus, Barteimaiaus blinda, sat faur wig du aihtron. 47 Jah gahausjands thatei Iesus sa Nazoraius ist, dugann hropjan jah kwithan: sunau Daweidis, Iesu, armai mik! 48 Jah hwotidedun imma managai ei gathahaidedi; ith is filu mais hropida: sunau Daweidis, armai mik! 49 Jah gastandans Iesus haihait atwopjan ina. Jah wopidedun thana blindan, kwithandans du imma: thrafstei thuk; urreis, wopeith thuk. 50 Ith is afwairpands wastjai seinai ushlaupands kwam at Iesu. 51 Jah andhafjands kwath du imma Iesus: hwa wileis ei taujau thus? Ith sa blinda kwath du imma: Rabbaunei, ei ussaihwau. 52 Ith Iesus kwath du imma: gagg, galaubeins theina ganasida thuk. Jah sunsaiw ussahw jah laistida in wiga Iesu.
1 Jah bithe nehwa wesun Iairusalem, in Bethsfagein jah Bithaniin at fairgunja alewjin, insandida twans siponje seinaize, 2 Jah kwath du im: gaggats in haim tho withrawairthon iggkwis, jah sunsaiw inn gaggandans in tho baurg bigitats fulan gabundanana, ana thammei nauh ainshun manne ni sat: andbindandans ina attiuhats. 3 Jah jabai hwas iggkwis kwithai: duhwe thata taujats? kwithaits: thatei frauja this gairneith; jah sunsaiw ina insandeith hidre. 4 Galithun than jah bigetun fulan gabundanana at daura uta ana gagga; jah andbundun ina. 5 Jah sumai thize jainar standandane kwethun du im: hwa taujats andbindandans thana fulan? 6 Ith eis kwethun du im, swaswe anabauth im Iesus, jah lailotun ins. 7 Jah brahtedun thana fulan at Iesua; jah galagidedun ana wastjos seinos, jah gasat ana ina. 8 Managai than wastjom seinaim strawidedun ana wiga; sumai astans maimaitun us bagmam jah strawidedun ana wiga. 9 Jah thai fauragaggandans hropidedun kwithandans: osanna, thiuthida sa iokwimanda in namin fraujins! 10 Thiuthido so kwimandei thiudangardi in namin attins unsaris Daweidis, osanna in hauhistjam! 11 Jah galaith in Iairusaulyma Iesus jah in alh; jah bisaihwands alla, at andanahtja juthan wisandin hweilai usiddja in Bethanian mith thaim twalibim. 12 Jah iftumin daga usstandandam im us Bethaniin gredags was. 13 Jah gasaihwands smakkabagm fairrathro habandan lauf atiddja, ei aufto bigeti hwa ana imma; jah kwimands at imma ni waiht bigat ana imma niba lauf; ni auk was mel usmakkane. 14 Jah usbairands kwath du imma: ni thanaseiths us thus aiw manna akran matjai. Jah gahausidedun thai siponjos is. 15 Jah iddjedun du Iairusaulymai. Jah atgaggands Iesus in alh dugann uswairpan thans frabugjandans jah bugjandans in alh, jah mesa skattjane jah sitlans thize frabugjandane ahakim uswaltida. 16 Jah ni lailot ei hwas thairhberi kas thairh tho alh. 17 Jah laisida kwithands du im: niu gamelith ist thatei razn mein razn bido haitada allaim thiudom? ith jus gatawideduth ita du filigrja waidedjane. 18 Jah gahausidedun thai bokarjos jah gudjane auhumistans jah sokidedun, hwaiwa imma uskwistidedeina: ohtedun auk ina, unte alla managei sildaleikidedun in laiseinais is. 19 Jah bithe andanahti warth, usiddja ut us thizai baurg. 20 Jah in maurgin faurgaggandans gasehwun thana smakkabagm thaursjana us waurtim. 21 Jah gamunands Paitrus kwath du imma: Rabbei, sai, smakkabagms thanei frakwast gathaursnoda. 22 Jah andhafjands Iesus kwath du im: habaith galaubein guths! 23 Amen auk kwitha izwis, thishwazuh ei kwithai du thamma fairgunja: ushafei thuk jah wairp thus in marein, jah ni tuzwerjai in hairtin seinamma, ak galaubjai thata, ei thatei kwithith gagaggith, wairthith i'mma thishwah thei kwithith. 24 Duththe kwitha izwis, allata thishwah thei bidjandans sokeith, galaubeith thatei nimith, jah wairthith izwis. 25 Jah than standaith bidjandans, afletaith, jabai hwa habaith withra hwana, ei jah atta izwar sa in himinam aflelai izwis missadedins izwaros. 26 Ith jabai jus ni afletith, ni thau atta izwar sa in himinam afletith izwis missadedins izwaros. 27 Jah iddjedun aftra du Iairusaulymai. Jah in alh hwarbondin imma, atiddjedun du imma thai auhumistans gudjans jah bokarjos jah sinistans. 28 Jah kwethun du imma: in hwamma waldufnje thata taujis? jah hwas thus thata waldumi atgaf, ei thata taujis? 29 Ith Iesus andhafjands kwath du im: fraihna jah ik izwis ainis waurdis jah andhafjith mis, jah kwitha izwis in hwamma waldufnje thata tauja. 30 Daupeins Iohannis uzuh himina was thau uzuh mannam? andhafjith mis. 31 Jah thahtedun du sis misso kwithandans, jabai kwitham: us himina, kwithith: aththan duhwe ni galaubideduth imma? 32 Ak kwitham: us mannam, uhtedun tho managein. Allai auk alakjo habaidedun Iohannen thatei bi sunjai praufetes was. 33 Jah anhafjandans kwethun du Iesua: ni witum. Jah andhafjands Iesus kwath du im: nih ik izwis kwitha in hwamma waldufnje thata tauja.
1 Jah dugann im in gajukom kwithan: weinagard ussatida manna, jah bisatida ina fathom jah usgrof dal uf mesa jah gatimrida kelikn, jah anafalh ina waurstwjam, jah aflaith aljath. 2 Jah insandida du thaim waurstwjam at mel skalk, ei at thaim waurstwjam nemi akranis this weinagardis. 3 Ith eis nimandans ina usbluggwun jah insandidedun laushandjan. 4 Jah aftra insandida du im antharana skalk; jah thana stainam wairpandans gaaiwiskodedun jah haubith wundan brahtedun jah insandidedun ganaitidana. 5 Jah aftra insandida antharana; jah jainana afslohun, jah managans antharans, sumans usbliggwandans, sumanzuh than uskwimandans. 6 Thanuh nauhthanuh ainana sunu aigands, liubana sis, insandida jah thana du im spedistana, kwithands thatei gaaistand sunu meinana. 7 Ith jainai thai waurstwjans kwethun du sis misso thatei sa ist sa arbinumja, hirjith! uskwimam imma, jah unsar wairthith thata arbi. 8 Jah irndgreipandans ina uskwemun, jah uswaurpun imma ut us thamma weinagarda. 9 Hwa nuh taujai frauja this weinagardis? Kwimith jah uskwisteith thans waurstwjans, jah gibith thana weinagard antharaim. 10 Nih thata gamelido ussuggwuth: Stains thammei uswaurpun thai timrjans, sah warth du haubida waihstins? 11 Fram fraujin warth sa, jah ist sildaleiks in augam unsaraim. 12 Jah sokidedun ina undgreipan, jah ohtedun tho managein; frothun auk thatei du im tho gajukon kwath. Jah afletandans ina galithun. 13 Jah insandidedun du imma sumai thize Fareisaie jah Herodiane, ei ina ganuteina waurda. 14 Ith eis kwimandans kwethun du imma: laisari, witum thatei sunjeins is jah ni kara thuk manshun ni auk saihwis in andwairthja manne, ak bi sunjai wig guths laiseis: skuldu ist kaisaragild giban kaisara, thau niu gibaima? 15 Ith Iesus gasaihwands ize liutein kwath du im: hwa mik fraisith? atbairith mis skatt, ei gasaihwau. 16 Ith eis atberun, jah kwath du im: hwis ist sa manleika jah so ufarmeleins? Ith eis kwethun du imma: Kaisaris. 17 Jah andhafjands Iesus kwath du im: usgibith tho Kaisaris Kaisara jah tho guths gutha. Jah sildaleikidedun ana thamma. 18 Jah atiddjedun Saddukaieis du imma thaiei kwithand usstass ni wisan, jah frehun ina kwithandans: 19 Laisari, Moses gamelida unsis thatei jabai hwis brothar gadauthnai, jah bileithai kwenai, jah barne ni bileithai, ei nimai brothar is tho kwen is, jah ussatjai barna brothr seinamma. 20 Sibun brothrahans wesun; jah sa frumista nam kwen, jah gaswiltands ni bilaith fraiwa. 21 Jah anthar nam tho; jah gadauthnoda, jah ni sa bilaith fraiwa. Jah thridja samaleiko. 22 Jah nemun tho samaleiko thai sibun, jah ni bilithun fraiwa. 23 Spedumista allaize gaswalt jah so kwens. In thizai usstassai, than usstandand, hwarjamma ize wairthith kwens? Thai auk sibun aihtedun tho du kwenai. 24 Jah andhafjands Iesus kwath du im: niu duthe airzjai sijuth, ni kunnandans mela nih maht guths? 25 Allis than usstandand usdauthaim, ni liugand ni liuganda, ak sind swe aggiljus thai in himinam. 26 Aththan bi dauthans, thatei urreisand, niu gakunnaideduth ana bokom Mosezis ana aihwatundjai, hwaiwa imma kwath guth kwithands: ik im guth Abrahamis jah guth Isakis jah Iakobis? 27 Nist guth dauthaize, ak kwiwaize. Aththan jus niu airzjai sijuth. 28 Jah duatgaggands ains thize bokarje, gahausjands ins samana sokjandans, gasaihwands thatei waila im andhof, frah ina: hwarja ist allaizo anabusne frumista? 29 Ith Iesus andhof imma thatei frumista allaizo anabusns: hausei Israel, frauja guth unsar frauja ains ist. 30 Jah frijos fraujan guth theinana us allamma hairtin theinamma jah us allai saiwalai theinai jah us allai gahugdai theinai jah us allai mahtai theinai. 31 So frumista anabusns. Jah anthara galeika thizai: frijos nehwundjan theinana swe thuk silban. Maizei thaim anthara anabusns nist. 32 Jah kwath du imma sa bokareis: waila, laisari, bi sunjai kwast thatei ains ist, jah nist anthar alja imma; 33 Jah thata du frijon ina us allamma hairtin jah us allamma frathja jah us allai saiwalai jah us allai mahtai, jah thata du frijon nehwundjan swe sik silban, managizo ist allaim thaim alabrunstim jah saudim. 34 Jah Iesus gasaihwands ina thatei frodaba andhof, kwath du imma: ni fairra is thiudangardjai guths. Jah ainshun thanaseiths ni gadaursta ina fraihnan. 35 Jah andhafjands Iesus kwath laisjands in alh: hwaiwa kwithand thai bokarjos thatei Christus sunus ist Daweidis? 36 Silba auk Daweid kwath in ahmin weihamma: Kwithith frauja du fraujin meinamma, Sit af taihswon meinai, unte ik galagja fijands theinans fotubaurd fotiwe theinaize. 37 Silba raihtis Daweid kwithith ina fraujan, jah hwathro imma sunus ist? Jah alla so managei hausidedun imma gabaurjaba. 38 Jah kwath du im in laiseinai seinai: saihwith faura bo[karjam]
[Text is missing in the manuscript from 12:38 through 13:16]
16 wastja seina. 17 Aththan wai thaim kwithuhaftom jah daddjandeim in jainaim dagam. 18 Aththan bidjaith ei ni wairthai sa thlauhs izwar wintrau. 19 Wairthand auk thai dagos jainai agio swaleika, swe ni was swaleika fram anastodeinai gaskaftais thoei gaskop guth, und hita, jah ni wairthith. 20 Jah ni frauja gamaurgidedi thans dagans, ni thauh ganesi ainhun leike; akei in thize gawalidane thanzei gawalida, gamaurgida thans dagans. 21 Jah than jabai hwas izwis kwithai: sai, her Christus, aiththau sai, jainar, ni galaubjaith; 22 Unte urreisand galiugachristjus jah galiugapraufeteis, jah giband taiknins jah fauratanja du afairzjan, jabai mahteig sijai, jah thans gawalidans. 23 Ith jus saihwith, sai, fauragataih izwis allata. 24 Akei in jainans dagans afar tho aglon jaina sauil rikwizeith jah mena ni gibith liuhath sein. 25 Jah stairnons himinis wairthand driusandeins jah mahteis thos in himinam gawagjanda. 26 Jah than gasaihwand sunu mans kwimandan in milhmam mith mahtai managai jah wulthau. 27 Jah than insandeith aggiluns seinans jah galisith thans gawalidans seinans af fidwor windam fram andjam airthos und andi himinis. 28 Aththan af smakkabagma ganimith tho gajukon. Than this juthan asts thlakwus wairthith jah uskeinand laubos, kunnuth thatei nehwa ist asans. 29 Swah jah jus, than gasaihwith thata wairthan, kunneith thatei nehwa sijuth at
[Text is missing in the manuscript from 13:29 through 14:4]
4 [frakwis]teins this balsanis warth? 5 Maht wesi auk thata balsan frabugjan in managizo thau thrija hunda skatte jah giban unledaim. 6 Jah andstaurraidedun tho. Ith Iesus kwath: letith tho! duhwe izai usthriutith? thannu goth waurstw waurhta bi mis. 7 Sinteino auk thans unledans habaith mith izwis, jah than wileith, maguth im waila taujan; ith mik ni sinteino habaith. 8 Thatei habaida so gatawida; faursnau salbon mein leik du usfilha. 9 Amen, kwitha izwis: thishwaruh thei merjada so aiwaggeljo and alla manaseth, jah thatei gatawida so rodjada du gamundai izos. 10 Jah Iudas Iskarioteis, ains thize twalibe, galaith du thaim gudjam, ei galewidedi ina im. 11 Ith eis gahausjandans faginodedun jah gahaihaitun imma faihu giban; jah sokida hwaiwa gatilaba ina galewidedi. 12 Jah thamma frumistin daga azyme, than paska salidedun, kwethun du imma thai siponjos is: hwar wileis ei galeithandans manwjaima, ei matjais paska? 13 Jah insandida twans siponje seinaize kwathuh du im: gaggats in tho baurg, jah gamoteith igkwis manna kas watins bairands: gaggats afar thamma, 14 Jah thadei inn galeithai, kwithaits thamma heiwafraujin thatei laisareis kwithith: hwar sind salithwos tharei paska mith siponjam meinaim matjau? 15 Jah sa izwis taikneith kelikn mikilata, gastrawith, manwjata; jah jainar manwjaith unsis. 16 Jah usiddjedun thai sipon[jos]
[Text is missing in the manuscript from 14:16 through 14:41]
41 sai, galevvjada sunus mans in handuns frawaurhtaize. 42 Urreisith, gaggam! Sai, sa lewjands mik atnehwida. 43 Jah sunsaiw nauhthanuh at imma rodjandin kwam Iudas, sums thize twalibe, jah mith imma managei mith hairum jah triwam fram thaim auhumistam gudjam jah bokarjam jah sinistam. 44 Atuh-than-gaf sa lewjands im bandwon kwithands: thammei kukjau, sa ist: greipith thana jah tiuhith arniba. 45 Jah kwimands sunsaiw, atgaggands du imma kwath: Rabbei, Rabbei! jah kukida imma. 46 Ith eis uslagidedun handuns ana ina jah undgripun ina. 47 Ith ains sums thize atstandandane imma uslukands hairu sloh skalk auhumistins gudjins jah afsloh imma auso thata taihswo. 48 Jah andhafjands Iesus kwath du im: swe du waidedjin urrunnuth mith hairum jah triwam greipan mik. 49 Daga hwammeh was at izwis in alh laisjands jah ni griputh mik: ak ei usfullnodedeina bokos. 50 Jah afletandans ina gathlauhun allai. 51 Jah ains sums juggalauths laistida afar imma bivvaibiths leina ana nakwadana; jah gripun is thai juggalaudeis. 52 Ith is bileithands thamma leina nakwaths gathlauh faura im. 53 Jah gatauhun Iesu du auhumistin gudjin; jah garunnun mith imma auhumistans gudjans allai jah thai sinistans jah bokarjos. 54 Jah Paitrus fairrathro laistida afar imma, unte kwam in garda this auhumistins gudjins; jah was sitands mith andbahtam jah warmjands sik at liuhada. 55 Ith thai auhumistans gudjans jah alla so gafaurds sokidedun ana Iesu weitwoditha du afdauthjan ina; jah ni bigetun. 56 Managai auk galiug weitwodidedun ana ina, jah samaleikos thos weitwodithos ni wesun. 57 Jah sumai usstandandans galiug weitwodidedun ana ina kwithandans: 58 Thatei weis gahausidedum kwithandan ina thatei ik gataira alh tho handuwaurhton, jah bi thrins dagans anthara unhanduwaurhta gatimrja. 59 Jah ni swa samaleika was weitwoditha ize. 60 Jah usstandands sa auhumista gudja in midjaim frah Iesu kwithands: niu andhafjis waiht, hwa thai ana thuk weitwodjand? 61 Ith is thahaida, jah waiht ni andhof. Aftra sa auhumista gudja frah ina jah kwath du imma: thu is Christus sa sunus this thiutheigins? 62 Ith is kwathuh: ik im; jah gasaihwith thana sunu mans af taihswon sitandan mahtais, jah kwimandan mith milhmam himinis. 63 Ith sa auhumista gudja disskreitands wastjos seinos kwath: hwa thanamais thaurbum weis weitwode? 64 Hausideduth tho wajamerein is: hwa izwis thugkeith? Tharuh eis allai gadomidedun ina skulan wisan dauthau. 65 Jah dugunnun sumai speiwan ana wlit is jah huljan andwairthi is jah kaupatjan ina, jah kwethun du imma: praufetei! jah andbahtos gabaurjaba lofam slohun ina. 66 Jah wisandin Paitrau in rohsnai dalatha jah atiddja aina thiujo this auhumistins gudjins, 67 Jah gasaihwandei Paitru warmjandan sik, insaihwandei du imma kwath: jah thu mith Iesua thamma Nazoreinau wast. 68 Ith is afaiaik kwithands: ni wait, ni kann hwa thu kwithis. Jah galaith faur gard, jah hana wopida. 69 Jah thiwi gasaihwandei ina aftra dugann kwithan thaim faurastandandam, thatei sa thizei ist. 70 Ith is aftra laugnida. Jah afar leitil aftra thai atstandandans kwethun du Paitrau: bi sunjai, thizei is; jah auk razda theina galeika ist. 71 Ith is dugann afaikan jah swaran thatei ni kann thana mannan thanei kwithith. 72 Jah antharamma sintha hana wopida. Jah gamunda Paitrus thata waurd, swe kwath imma Iesus, thatei faurthize hana hrukjai twaim sintham, inwidis mik thrim sintham. Jah dugann greitan.
1 Jah sunsaiw in maurgin garuni taujandans thai auhumistans gudjans mith thaim sinistam jah bokarjam, jah alla so gafaurds gabindandans Iesu brahtedun ina at Peilatau. 2 Jah frah ina Peilatus: thu is thiudans Iudaie? Ith is andhafjands kwath du imma: thu kwithis. 3 Jah wrohidedun ina thai auhumistans gudjans filu. 4 Ith Peilatus aftra frah ina kwithands: niu andhafjis ni waiht? sai, hwan filu ana thuk weitwodjand. 5 Ith Iesus thanamais ni andhof, swaswe sildaleikida Peilatus. 6 Ith and dulth hwarjo[h] fralailot im ainana bandjan thanei bedun. 7 Wasuh than sa haitana Barabbas mith thaim mith imma drobjandam gabundans, thaiei in auhjodau maurthr gatawidedun. 8 Jah usgaggandei alla managei dugunnun bidjan, swaswe sinteino tawida im. 9 Ith Peilatus andhof im kwithands: wileidu fraleitan izwis thana thiudan Iudaie? 10 Wissa auk thatei in neithis atgebun ina thai auhumistans gudjans. 11 Ith thai auhumistans gudjans inwagidedun tho managein ei mais Barabban fralailoti im. 12 Ith Peilatus aftra andhafjands kwath du im: hwa nu wileith ei taujau thammei kwithith thiudan Iudaie? 13 Ith eis aftra hropidedun: ushramei ina. 14 Ith Peilatus kwath du im: hwa allis ubilis gatawida? 15 Ith eis mais hropidedun: ushramei ina. Ith Peilatus wiljands thizai managein fullafahjan, fralailot im thana Barabban, ith Iesu atgaf usbliggwands, ei ushramiths wesi. 16 Ith gadrauhteis gatauhun ina innana gardis, thatei ist praitoriaun, jah gahaihaitun alla hansa, 17 Jah gawasidedun ina paurpurai, jah atlagidedun ana ina thaurneina wipja uswindandans, 18 Jah dugunnun goljan ina: hails, thiudan Iudaie! 19 Jah slohun is haubith rausa, jah bispiwun ina, jah lagjandans kniwa inwitun ina. 20 Jah bithe bilailaikun ina andwasidedun ina thizai paurpurai, jah gawasidedun ina wastjom swesaim, jah ustauhun ina ei ushramidedeina ina. 21 Jah undgripun sumana manne, Seimona Kyreinaiu, kwimandan af akra, attan Alaiksandraus jah Rufaus, ei nemi galgan is. 22 Jah attauhun ina ana Gaulgautha stath thatei ist gaskeirith hwairneins staths. 23 Jah gebun imma drigkan wein mith smyrna; ith is ni nam. 24 Jah ushramjandans ina disdailjand wastjos is wairpandans hlauta ana thos, hwarjizuh hwa nemi. 25 Wasuh than hweila thridjo, jah ushramidedun ina. 26 Jah was ufarmeli fairinos is ufarmelith: sa thiudans Iudaie. 27 Jah mith imma ushramidedun twans waidedjans, ainana af taihswon jah ainana af hleidumein is. 28 Jah usfullnoda thata gamelido thata kwithano: jah mith unsibjaim rahniths was. 29 Jah thai faurgaggandans wajameridedun ina, withondans haubida seina jah kwithandans: o sa gatairands tho alh jah bi thrins dagans gatimrjands tho, 30 Nasei thuk silban jah atsteig af thamma galgin! 31 Samaleiko jah thai auhumistans gudjans bilaikandans ina mith sis misso mith thaim bokarjam kwethun; antharans ganasida, ith sik silban ni mag ganasjan. 32 Sa Christus, sa thiudans Israelis, atsteigadau nu af thamma galgin, ei gasaihwaima jah galaubjaima. Jah thai mith ushramidans imma idweitidedun imma. 33 Jah bithe warth hweila saihsto, rikwis warth ana allai airthai und hweila niundon. 34 Jah niundon hweilai wopida Iesus stibnai mikilai kwithands: ailoe ailoe, lima sibakthanei, thatei ist gaskeirith: guth meins, guth meins, duhwe mis bilaist? 35 Jah sumai thize atstandandane gahausjandans kwethun: sai, 36 Helian wopeith. Thragjands than ains jah gafulljands swam akeitis, galagjands ana raus, dragkida ina kwithands: let, ei saihwam kwimaiu Helias athafjan ina. 37 Ith Iesus aftra letands stibna mikila uzon. 38 Jah faurahah al[h]s disskritnoda in twa iupathro und dalath. 39 Gasaihwands than sa hundafaths sa atstandands in andwairthja is thatei swa hropjands uzon, kwath: bi sunjai, sa manna sa sunus was guths. 40 Wesunuth-than kwinons fairrathro saihwandeins, in thaimei was Marja so Magdalene jah Marja Iakobis this minnizins jah Iosezis aithei jah Salome. 41 Jah than was in Galeilaia, jah laistidedun ina jah andbahtidedun imma, jah antharos managos thozei mith iddjedun imma in Iairusalem. 42 Jah juthan at andanahtja waurthanamma, unte was paraskaiwe, saei ist fruma sabbato, 43 Kwimands Iosef af Areimathaias, gaguds ragineis, saei was silba beidands thiudangardjos guths, anananthjands galaith inn du Peilatau jah bath this leikis Iesuis. 44 Ith Peilatus sildaleikida ei is juthan gaswalt; jah athaitands than[a] hundafath frah ina juthan gadauthnodedi. 45 Jah finthands at thamma hundafada fragaf thata leik Iosefa. 46 Jah usbugjands lein jah usnimands ita biwand thamma leina jah galagida ita in hlaiwa thatei was gadraban us staina, jah atwalwida stain du daura this hlaiwis. 47 Ith Marja so Magdalene jah Marja Iosezis sehwun hwar galagiths wesi.
1 Jah inwisandin[s] sabbate dagis Marja so Magdalene jah Marja so Iakobis jah Salome usbauhtedun aromata, ei atgaggandeins gasalbodedeina ina. 2 Jah filu air this dagis afarsabbate atidd[j]edun du thamma hlaiwa at urrinnandin sunnin. 3 Jah kwethun du sis misso: hwas afwalwjai unsis thana stain af daurom this hlaiwis? 4 Jah insaihwandeins gaumidedun thammei afwalwiths ist sa stains; was auk mikils abraba. 5 Jah atgaggandeins in thata hlaiw gasehwun juggalauth sitandan in taihswai biwaibidana wastjai hweitai; jah usgeisnodedun. 6 Tharuh kwath du im: ni faurhteith izwis, Iesu sokeith Nazoraiu thana ushramidan; nist her, urrais, sai thana stath tharei galagidedun ina. 7 Akei gaggith kwithiduh du siponjam is jah du Paitrau thatei faurbigaggith izwis in Galeilaian; tharuh ina gasaihwith, swaswe kwath izwis. 8 Jah usgaggandeins af thamma hlaiwa gathlauhun; dizuh-than-sat ijos reiro jah usfilmei, jah ni kwethun mannhun waiht; ohtedun sis auk. 9 Usstandands than in maurgin frumin sabbato ataugida frumist Marjin thizai Magdalene, af hizaiei uswarp sibun unhulthons. 10 Soh gaggandei gataih thaim mith imma wisnandam, kwainondam jah gretandam. 11 Jah eis hausjandans thatei libaith jah gasaihwans warth fram izai, ni galaubidedun. 12 Afaruh than thata
[Text is missing in the manuscript from 16:12 through 16:20]