Аның соондох Худай Худы хоостыра Иисус хуу чазызар парған. Айнаа хычаландырып, Ол хуу чазыда хырых күн полған. Аңнар аразында чуртаан. Ангеллер Ағаа полыс турғаннар. Иоанн харибге чаптырған соонда, Иисус, Галилеязар киліп, Худай Хан Чирінің Чахсы хабарына үгреткен. Ол теен: Тус чит килген паза Худай Хан Чирі чағыннап килді. Постарыңның чазыхтарын сығарынып, пыросынаңар паза чахсы хабарға киртініңер.
Иисус, Галилей көл хазынча парчатханда, Симонны паза аның харындазын, Андрейні, көр салған. Олар көлзер сөзірбе тастапчатханнар. Ікізінең палыхчылар полғаннар. Иисус оларға теен: Минің соомча парыңар. Мин сірерні кізілер тулар иде ит саларбын. Олар, сах андох, сөзірбелерін артызып, Аның соонча пар сыхханнар. Үр дее парбаанда, Ол Зеведей оолғын, Иаковты, паза аның харындазын, Иоанны, көр салған. Олар, кимеде одырып, сөзірбелерін тағырапчатханнар. Иисус оларны сах андох хығырып алған. Олар, Зеведей пабазын чалчылар-наң хада кимеде артыс салып, Аның соонча пар сыхханнар.
Олар Капераум городсар читкеннер. Түрчедең, суббота күнде, Иисус, синагогазар кіріп, кізілерні үгреткен. Кізілер Аның үгредиине хайхааннар. Иисус оларны, үлгү үгретчілері чіли нимес, че үлгүліг кізі чіли үгреткен. Ол туста синагогада чабал хутха хаптырған кізі пол парған. Ол хысхыра түскен: Ниме кирек сағаа пісте, Назареттең сыххан Иисус? Син пісті чох идерге килгезің! Мин пілчем, кемзің Син, Худай Кізізі! Че Иисус ол кізідегі чабал хутты тымылдырыбысхан паза ағаа теен: Сым пол, сых ол кізідең! Андада ол чабал хут, ол кізіні сілігіп, улуғ табыснаң аннаң сых парыбысхан. Кізілер прайзы хорих парғаннар, удур-төдір сурастырғлааннар: Нимедір пу? Хайдағ хаа үгредір пу, іди Ол чабал хуттарға даа чахығлар пирчетсе паза олар Аның чооғын исчетселер?
Үр ниместең не аразына прай Галилея чирінче Иисустаңар чоох тарап парған. Түрче полғанда синагогадаң сыххан соонда, Иисус Иоаннаң паза Иаковнаң хада Симон паза Андрейнің туразынзар килген. Симонның хазинезі төзекте тудан ағырығнаң чатчатхан, Иисусха аннаңар сах андох чоохтааннар. Иисус ол ипчізер пас килген, аның холын алып, турғызыбысхан. Ол ипчі, сах андох чазыл парып, оларға хайын сыххан. Иирде, күн хончатхан туста, Иисуссар прай ағырығ паза чабал хуттарға иреелетчеткен кізілерні ағыл турғаннар. Прай город ол тураның ізии хыринда чыылыс парған. Ол аймах ағырығларнаң ағырчатхан көп кізілерні имнебіскен. Кізілердең чабал хуттарын сығара сүрген. Чабал хуттарға Позы Христос полчатханынаңар кізілерге чоохтабасха чахығ пирген. Иртен иртөк Иисус, турып, кізі чох чирзер парып, анда пазырған. Симон паза пасха үгренчілері дее Аны тілеп парғаннар. Анаң, Иисусты таап алып, Ағаа чоохтааннар: Прайзы Сині тілепче. Иисус оларға теен: Чағынғы аалларзар паза городтарзар парааңар. Анда үгредіг апарарбыс. Мин аның үчүн килгем нооза. Анаң Ол, Галилеяча чөріп, синагогаларда үгреткен паза чабал хуттарны кізілердең сығара сүрген.
Пірсінде Иисуссар ходырлығ кізі килген. Аның алнында тізекке түзіп, Ағаа алданған: Сынап көңнің полза, Син мині арығлап поларчыхсың. Иисус, аны айап парып, холын сунып, ағаа теңен. Анаң чоохтанған: Көңнім пар, арығ пол пар. Ол сөстер соонда ағырығ кізінің ходырии сах андох чіт парыбысхан. Ол кізі арығ пол парған. Иисус, аныңзар хатығ көрібізіп, сах андох аны хыйа ысхан. Паза ағаа теен: Көр, пірдеезіне чоохтаба пу нимедеңер. Парып, абысха көрініп ал, Моисей чахаан чіли, арығланған үчүн Худайға тайығ сал. Анзы синің чазыл парғаныңны оларға киречілир. Че анзы, сых парыбызып, полған нимедеңер чоохтап чөр сыххан. Іди Иисус городсар іле кір полбиныбысхан, город тастында, кізілер чох чирде, полған. Че кізілер прай чирлердең Андар килглееннер.