МАРКТЫҢ ЧАХСЫ ХАБАРЫ

Кірӧске тӱзірцең Иоанн

1:1 Худай Оолғы нанар, Иисус Христостаңар, Чахсы хабар піди пасталча. 2 Худай ухаанчылар пастыра чарлаан: «Синің пурун мин позымның илчімні ызарбын. Ол сағаа чол тимнеп пирер. 3 Хуу чазыда ӱн истілген: „Хан Худайыбысха чол тимнеңер, кӧні ползын Аның чорығы"». 4 Иоанн, киліп, хуу чазыда кізілерні чазыхтарынаң арығланар ӱчӱн, пыросынарға ӱгреткен паза кірӧске тӱзірген. 5 Прай Иудей чирінең паза Иерусалимде чуртапчатхан кізілер андар килгеннер. Олар, постарының чазыхтарын сығарынып, Иордан суғда Иоаннаң кірӧске тӱскеннер. 6 Иоанн тибе хылынаң палғаан кип-азахтығ чӧрчең паза тууп хурнаң хурчанчаң. Чазы мӧӧдінең паза сарысхаларнаң азыранчаң. 7 Кізілерні ӱгредіп, ол піди чоохтаан: «Минің соомӌа миннең хай-хай илбек Кізі килче. Мин, мӧкейіп, Аның ӧдігінің пағларын даа систерге турыстығ нимеспін. 8 Мин сірерні суғнаң кірӧстеем, Ол, тізең, сірерні Худай Худынаң кірӧстир».

Иисустың кірӧске тӱскені

9 Ол кӱннерде Иисус, Галилея чиріндегі Назарет городтаң киліп, Иордан суғда Иоаннаң кірӧске тӱскен. 10 Хаӌан Иисус суғдаң сых килгенде, азыл парған тигірдең голубок хус полып, Худай Худы Аныңзар тӱсчеткенін кӧр салған. 11 Тигірдең ӱн истіле тӱскен: «Син Минің хынған Оолғымзың. Синде Минің паарсастығ кӧңнім».

Хуу чазыда хыӌаландырғаны

12 Аның соондох Худай Худы хоостыра Иисус хуу чазызар парған. 13 Айнаа хыӌаландырып, Ол хуу чазыда хырых кӱн полған. Аңнар аразында чуртаан. Ангеллер Ағаа полыс турғаннар. 14 Иоанн харибге чаптырған соонда, Иисус, Галилеязар киліп, Худай Хан Чирінің Чахсы хабарына ӱгреткен. 15 Ол теен: «Тус чит килген паза Худай Хан Чирі чағыннап килді. Постарыңның чазыхтарын сығарынып, пыросынаңар паза Чахсы хабарға киртініңер».

Пастағы ӱгренчілері

16 Иисус, Галилей кӧл хазынӌа парчатханда, Симонны паза аның харындазын, Андрейні, кӧр салған. Олар кӧлзер сӧзірбе тастапчатханнар. Ікізінең палыхчылар полғаннар. 17 Иисус оларға теен: «Минің соомӌа парыңар. Мин сірерні кізілер тудар иде ит саларбын». 18 Олар, сах андох, сӧзірбелерін артызып, Аның соонӌа пар сыхханнар. 19 Ӱр дее парбаанда, Ол Зеведей оолғын, Иаковты, паза аның харындазын, Иоанны, кӧр салған. Олар, кимеде одырып, сӧзірбелерін тағырапчатханнар. 20 Иисус оларны сах андох хығырып алған. Олар, Зеведей пабазын чалӌыларынаң хада кимеде артыс салып, Аның соонӌа пар сыхханнар.

Иисус кізілерні имнебіскені

21 Олар Капернаум городсар читкеннер. Тӱрчедең, суббота кӱнде, Иисус, синагогазар кіріп, кізілерні ӱгреткен. 22 Кізілер Аның ӱгредиине хайхааннар. Иисус оларны, ӱлгӱ ӱгретчілері чіли нимес, че ӱлгӱліг кізі чіли ӱгреткен. 23 Ол туста синагогада чабал хутха хаптырған кізі пол парған. Ол хысхыра тӱскен: 24 «Ниме кирек сағаа пісте, Назареттең сыххан Иисус? Син пісті чох идерге килгезің! Мин пілчем, кемзің Син, Худай Кізізі!» 25 Че Иисус ол кізідегі чабал хутты тымылдырыбысхан паза ағаа теен: «Сым пол, сых ол кізідең!» 26 Андада ол чабал хут, ол кізіні сілігіп, улуғ табыснаң аннаң сых парыбысхан. 27 Кізілер прайзы хорых парғаннар, удур-тӧдір сурастырғлааннар: «Нимедір пу? Хайдағ наа ӱгредіг пу, іди Ол чабал хуттарға даа чахығлар пирчетсе паза олар Аның чооғын исчетселер?»

Пётрның хазинезін имнебіскені

28 Ӱр ниместең не аразына прай Галилея чирінче Иисустаңар чоох тарап парған. 29 Тӱрче полғанда синагогадаң сыххан соонда, Иисус Иоаннаң паза Иаковнаң хада Симон паза Андрейнің туразынзар килген. 30 Симонның хазинезі тӧзекте тудан ағырығнаң чатчатхан. Иисусха аннаңар сах андох чоохтааннар. 31 Иисус ол ипчізер пас килген, аның холын алып, турғызыбысхан. Ол ипчі, сах андох чазыл парып, оларға хайын сыххан. 32 Иирде, кӱн хончатхан туста, Иисуссар прай ағырығ паза чабал хуттарға иреелетчеткен кізілерні ағыл гурғаннар. 33 Прай город ол тураның ізии хыринда чыылыс парған. 34 Ол аймах ағырығларнаң ағырчатхан кӧп кізілерні имнебіскен. Кізілердең чабал хуттарын сығара сӱрген. Чабал хуттарға Позы Христос полчатханыңаңар кізілерге чоохтабасха чахығ пирген. 35 Иртен иртӧк Иисус, турып, кізі чох чирзер парып, анда пазырған. 36 Симон паза пасха ӱгренчілері дее Аны тілеп парғаннар. 37 Анаң, Иисусты таап алып, Ағаа чоохтааннар: «Прайзы Сині тілепче». 38 Иисус оларға теен: «Чағынғы аалларзар паза городтарзар парааңар. Анда ӱгредіг апарарбыс. Мин аның ӱчӱн килгем нооза». 39 Анаң Ол, Галилеяча чӧріп, синагогаларда ӱгреткен паза чабал хуттарны кізілердең сығара сӱрген.

Ходырлығ кізіні имнебіскені

40 Пірсінде Иисуссар ходырлығ кізі килген. Аның алныңда тізекке тӱзіп, Ағаа алданған: «Сынап кӧңнің полза, Син мині арығлап поларчыхсың». 41 Иисус, аны айап парып, холын сунып, ағаа теңен. Анаң чоохтанған: «Кӧңнім пар, арығ пол пар». 42 Ол сӧстер соонда ағырығ кізінің ходырии сах андох чіт парыбысхан. Ол кізі арығ пол парған. 43 Иисус, аныңзар хатығ кӧрібізіп, сах андох аны хыйа ысхан. 44 Паза ағаа теен: «Кӧр, пірдеезіне чоохтаба пу нимедеңер. Парып, абысха кӧрініп ал, Моисей чахаан чіли, арығланған ӱчӱн Худайға тайығ сал. Анзы синің чазыл парғаныңны оларға киречілир». 45 Че анзы, сых парыбызып, полған нимедеңер чоохтап чӧр сыххан. Іди Иисус городсар іле кір полбиныбысхан, город тастында, кізілер чох чирде, полған. Че кізілер прай чирлерден Андар килглееннер.

Чадыға кір парған кізіні имнебіскені

2:1 Нинчеде кӱн ирт парғанда, Иисус пазох Капернаумзар килген. Ол килгеннеңер ибіре тылаас табырах тарап парыбысхан. 2 Сах андох туразар кізілер чыылыс сыхханнар. Ізік хыринда даа орын чох полыбысхан. Иисус оларға чооғын чоохтаан. 3 Ол туста андар чадыға кір парған кізіні ағыл килгеннер. Аны тӧрт кізі хаап килген. 4 Кізі толдыра полғаннаңар, олар Иисуссар ирт полбанннар. Аннаңар, Ол полчатхан тура хырын кӧп нимес сайабызып, чадыға кір парған кізіні ӧӧртін тӧзекте тӱзірібіскеннер. 5 Иисус, оларның іди киртінгеннерін кӧріп, чадыға кір парған кізее чоохтаан: «Оолғым! Чазыхтарың синің позыдылча». 6 Мында ӱлгӱ ӱгретчілерінің хай-піреезі одырған. Олар пос алынча сағын салғаннар: 7 «Нимедеңер Ол іди чоохтапча? Чазыхтарны Худай ла позытча нимес пе?» 8 Иисус, оларның сағыстарын сах андох піл салып, оларға теен: «Ноға сірернің пастарыңа андағ сағыстар кірче? 9 Ағырығ кізее хайзын чоохтирға оой? „Синің чазыхтарың позыдылча" алай „Тур, тӧзегің алып, пар"? 10 Че сірер пілер ӱчӱн, Кізі Оолғының чир ӱстӱнде кізілерге чазыхтарын позыдар ӱлгӱзі пар». Анаң чадыға кірген кізее чоохтаан: 11 «Сағаа чоохтапчам: „Тур, тӧзегің алып, ибіңзер нан". 12 Ол кізі сах андох тур килген, тӧзегін алып, прайзының кӧзіне сых парыбысхан. Кізілер, аны кӧріп, хайхасханнар паза Худайны сабландырғаннар. «Піс мындағ ниме хачан даа кӧрбеебіс»,— тіп чоохтасхлааннар.

Левийні хығыртханы

13 Иисус пазох кӧл хазынзар парған. Прай чон Аның соонча андарох килген. Иисус оларны анда ӱгреткен. 14 Албан чыыпчатхан орын хыринча парчатханда, Иисус Алфейнің оолғы Левийні анда одырчатханың кӧр салған. Иисус ағаа теен: «Минің соомӌа пар». Левий, тур киліп, Аның соонӌа парған. 15 Хаӌан Иисус Левийнің туразында азыранчатханда, Иисуснаң паза ӱгренӌілерінең хада албан чығӌаң паза чазыхтығ кӧп кізілер азыранғаннар. Оларның кӧбізі Иисустың соонӌа чӧрӌеңнер. 16 Ӱлгӱ ӱгретчілері паза фарисейлер, Иисусты албан чығӌаңнарнаң паза чазыхтығ кізілернең хада азыранчатханың кӧр салып, Аның ӱгренӌілеріне чоохтанғаннар: «Ноға Ол албан чығӌаңнарнаң паза чазыхтығ кізілернең хада азыранча?» 17 Аны истіп салып, Иисус оларға теен: «Хазых кізі имӌі кирексібинче, ағырығ кізі кирексіпче. Мин ах сағыстығ кізілерні нимес, че чазыхтығ кізілерні, пыросынзыннар тіп, хығырарға килгем».

Оразадаңар талазығ

18 Ол туста Иоанның ӱгренӌілері паза фарисейлер ораза тутханнар. Анаң олар, Иисуссар киліп, сурғаннар: «Ноға Иоанның ӱгренӌілері паза фарисейлер ораза тутчалар, че синің ӱтренӌілерің ораза тутпинчалар?» 19 Андада Иисус оларға нандырған: «Той полчатса, хончатхан оол хада полза, аалӌылар хайди ораза тударлар? Той парчатса, оол хада полза ораза тут полбастар. 20 Че чидер кӱн, хаӌан наа хонған оол парыбысса, андада аалӌылар ораза тударлар. 21 Пірдеезі наа иснең намачыны иргі кип-азахха тікпинче. Іди тік салза, наа тігілген намачы иргізін талир, тизік улам улуғ пол парар. 22 Пірдеезі наа арағаны иргі торсыхха урбинча. Іди урзалар, наа араға иргі торсыхты талап салар. Араға ах чӧрібізер, торсых таа нимее чарабас. Наа арағаны наа тууп торсыхха урарға кирек».

Кізі Оолғы суббота кӱннің дее ээзі

23 Пірсінде Иисусха суббота кӱнде тамах ӧсчеткен хыра хыринча парарға киліскен. Аның ӱгренӌілері, парчадып, пазахтарны ӱсклепчеткеннер. 24 Андада фарисейлер Ағаа чоохтааннар: «Кӧрдек, ноға олар суббота кӱнде итпес нимені итчелер?» 25 Иисус оларға нандырған: «Нӧӧс сірер хаӌан даа хығырбаазар, Давид паза аның кізілері астап парғанда ниме ол иткен? 26 Хайди ол Авиафара теен улуғ абыстың тузында, Худай туразынзар кір киліп, абыстарға ла чирге чарадылчатхан Худайға салылған халасты чеен паза хада полған кізілеріне пирген?» 27 Аннаң андар піди чоохтаан: «Суббота кӱн кізілерге иділген, че кізілер ол кӱнге нимес. 28 Аннаңар Кізі Оолғы суббота кӱннің дее ээзі полча».

Хуруп парған холлығ кізіні суббота кунде имнебіскені

3:1 Иисус пазох синагогазар килген. Анда пір холы хуруп парған кізі полған. 2 Піреелері Иисусты, ағырығ кізіні суббота кӱнде имнезӧк, пыролабызарға тіп, китееннер. 3 Иисус, тізең, хуруп парған холлығ кізее теен: «Тур прайзының алныңда». 4 Анаң кізілерге теен: «Суббота кӱнде чахсы ниме алай чабалны идерге кирек пе? Кізі тының арачылирға ба алай чох идерге бе?» Че олар тапсабааннар. 5 Иисус оларзар тарынып кӧрген паза, кізілернің нимее хайбас чӱректіг пол парғаннарына хомзынып, ол ағырығ кізее чоохтаан: «Холыңны кӧдір». Ол кізі холын кӧдірібіскен. Холы, пір холох чіли, хазых пол парған. 6 Анаң фарисейлер, сых киліп, иродианнарнаң хада Иисусты чох идерге сах андох чӧптес сыхханнар. 7 Че Иисус Позының ӱгренчілерінең хада кӧл хазынзар парыбысхан паза Иисустың соонча кӧп кізілер парғаннар. Олар Галилеядаң, Иудеядаң, 8 Иерусалимнең, Идумеядаң паза Иордан суғ олзаринаң полғаннар. Тир, Сидон городтар ибіре чуртапчатхан чон, Иисустың иткен нимелерінеңер истіп алып, ідӧк Андар кӧп чыылысхан. 9 Андада Иисус Позының ӱгренчілеріне, ибіре кӧп чыылыс парған кізілерге хыстырбас ӱчӱн, Позына киме тимнебізерге чахаан. 10 Ол кӧп кізіні имнебіскен полған, аннаңар палығлығ кізілер, Аның кипазаана даа тееп аларға тіп, Иисуссар сыынғаннар. 11 Чабал хуттар даа, Аны кӧр салып, Аның алныңда тӱңдере тӱс парып, хысхырысханнар: «Син - Худай Оолғызың». 12 Че Иисус оларға, Позы кем полчатханың, пірдеезіне чоохтабасха хатығ чахығ пир салған.

Иисус он ікі ӱгренчіні таллапча

13 Анаң Ол, тағзар сығып, Позы хынған ӱгренӌілерні хығырып алған. Олар Иисуссар читкеннер. 14 Оларның аразынаң, Позынаң хада полчаң паза кізілер ӱгредерге ысчаң, он ікі кізі таллап алған. 15 Оларға кізілерні ағырығлардаң имнирге паза чабал хуттарны сығара сӱрерге ӱлгӱ пирген. 16 Мына ол он ікі ӱгренчі: Симон, Иисус ағаа Пётр тіп сола пирген; 17 Иаков, Зеведей оолғы паза Иаковтың харындазы, Иоанн. Оларға Воанергес алай ба «Кӱгӱрт ооллары» тіп сола пирілген. 18 Андрей, Филипп, Варфоломей, Матфей, Фома, Алфей оолғы Иаков, Фаддей, Симон Кананит 19 Паза Иуда Искариот, хайзы соонаң Иисусты садыбысхан.

Хайди айна позын сӱрер?

20 Иисус паза ӱгренчілері туразар кіргеннер, сооларынчд чон пазох сыыспас иде чыылысханнаңар, Ағаа паза ӱгренчілеріне азыранчаң даа оңдай чох пол парған. 21 Иисусты килгенін истіп, Аның чағыннары, «Ол пазынаң алӌаахча» тіп чоохтасханнаңар, Иисусты апарыбызарға килгеннер. 22 Иерусалимнең килген ӱлгӱ ӱгретчілері, тізең, «Ағаа веельзевул кір парған, аннаңар чабал хуттарны Ол айна кӱзінең сығара сӱрче», - тіп чоохтасханнар. 23 Андада Иисус, оларны хығырып, оларға кип-чоохтарнаң чоохтап сыххан: «Хайди айна айнаны сӱр полар? 24 Хачан пірее ханның чирі ікі чардыхха, ыырлазып, чарыл парза, ол чир паза тур полбас; 25 Хаӌан пір чурттығлар удур-тӧдір ыырлас сыхсалар, ол тура пӱдӱн полбас; 26 Хачан айна позы позынаң тоғыр кӧдірілзе, алай ікі чарыл парза, ол тур полбас, ағаа ӧлім полар. 27 Пірее кӱстіг кізінің туразынзар кіріп, аны палғап албаанда, турадаң пір дее ниме сығар полбас. Ээзін палғап алған соонда ла, ниме-нооларын апар полар. 28 Сынны чоохтапчам сірерге: кізілернің хайдағ даа сӧклестері паза чазыхтары тасталар, хайдағ даа олар аар ползалар. 29 Че кем Худай Худын сӧклир, аның пырозы хачан даа тасталбас. Ол хачан даа пыролығ полар». 30 Пу сӧстерні Иисус Позына чабал хут кір парған тіп чоохтасчатханнаңар чоохтанған.

Иисустың іӌезі паза харындастары

31 Андада Иисуссар Аның ічезі паза харындастары чиде тӱскеннер. Тасхар турып, Аны хығырыбызарға кізі ызыбысханнар. 32 Иисустың хыринда чон одырған. Ағаа чоохтааннар: «Тасхар Синің іӌең, Синің харындастарың паза хыс туңмаларың турчалар. Сині сурчалар». 33 Иисус оларға нандырған: «Кем Минің іӌем паза Минің харындастарым?» 34 Ибіре одырчатхан чонны кӧріп, теен: «Мына Минің іӌем паза Минің харындастарым. 35 Кем Худай кӧңнін толдырча, ол Мағаа харындас таа, пиӌе дее паза іӌе дее».

Таарығцыдаңар кип-чоох

4:1 Иисус, пазох кӧл хазында кізілерні ӱгрет сыххан. Аныңзар кӧп кізі чыылыс парған. Аннаңар Иисус, суғдағы кимеге кіріп, анда одырыбысхан. Чон, тізең, кӧл хазында чарда полған. 2 Оларға кӧп кип-чоохтар чоохтап ӱгреткен. Позының ӱгредиинде оларға чоохтаан: 3 «Истіңер: мына таарығӌы таарирға сыххан. 4 Хаӌан ол таарып сыхханда, пірее ӱреннер чол хазында тоолап парғаннар. Хустар, учух киліп, оларны хахлап салғаннар. 5 Піреезі тастығ орынға тӱс парған, хайда хара чир асхынах полған. Чир чуға полғаннаңар, хулғу табырах ӧс килген. 6 Че кӱн сых килгенде, хулғу, чилегелері чохтаңар, салых парып, хуруп парған. 7 Піреезі, хазалӌых оттар аразына тӱс парған. Оттар, ӧзіп, хулғуны чабыра пазыбысханнар, хулғу нимістенмин халған. 8 Че піреезі, маңат чирге тӱзіп, нимістеніп алған. Хулғу ӧс парған. Піреезі отыс, піреезі алтон, хайзы чӱс тее ниміс пирген. 9 Анаң оларға чоохтаан: «Кемнің истерге хулағы пар, иссін!» 40 Хаӌан Ол чалғызан халғанда, ибіркілері он ікі ӱгренӌізінең хада ол кип-чоохтаңар Аның сурғаннар. 11 Иисус оларға теен: «Сірерге Худай Хан Чирінің чазыттарын пілерге пирілген, че пасха чонға аны кип-чоохтарнаң чоохтирға кирек. 12 Іди олар постарының харахтарынаң кӧрчелер, че ниме кӧр полбинчалар. Постарының хулахтарынаң исчелер, че испинчелер паза піл полбинчалар. Сынап Худайға айланған ползалар, оларның чазыхтары позыдыларӌыхтар.

Кип-чоохты чарытханы

13 Анаң оларға чоохтаан: «Нӧӧс сірер пу кип-чоохты піл полбадыңар? Андағда сірер пасха кип-чоохтарны хайди піліп аларзар? 14 Таарығӌы Худай сӧстерін таарыпча. 15 Чол хазында тоолаан ӱреннер таныхтапча андағларны, хайзыларында сӧс таарылған, че сӧсті, искен соонда, сах андох андар айна, киліп, оларның чӱректерінде таараан сӧсті оғырлап парыбысча. 16 Андағох оңдайнаң тастығ орында тоолатхан ӱреннер таныхтапча андағларны, хайзылары, сӧсті ис салып, сах андох ӧрчіліг аны алчалар. 17 Че оларның постарында чилегелері чохтаңар паза сағыстары хубулӌахтаңар, пірее чобағ пол сыхса алай сӧс ӱчӱн сӱрдір сыхсалар, постарының киртінізінең табырах хыйа полыбысчалар. 18 Хазалӌых оттарда тоолаан ӱреннер ол сӧсті исчеткеннерні таныхтапча, 19 Че хайзыларында пӱӱнгі кӱннің сағыссырастары, пайирға сағынғаны паза пасха даа оох-теек сағыстар сӧстерні чабыра пазыбысчалар. Олар ниміс пирбинчелер. 20 Че маңат чирде тоолаан ӱреннер таныхтапча андағларны, хайзылары сӧсті исчелер паза аны чӱректеріне алчалар. Андағлар отыс хати алай алтон хати алай чӱс тее хати кӧп ниміс ағылчалар».

Сівечідеңер кип-чоох

21 Анаң Иисус оларға чоохтаан: «Ниме ӱчӱн сівечіні ағылчалар? Аны ыраға істіне алай орған алтына турғызарға ба? Сівечіні кӧріндіре турғызарға кирек нимес пе? 22 Тастына сых парбас пір дее чазырған ниме чоғыл, ілезіне сыхпас пір дее чазыт чоғыл. 23 Кемнің истерге хулағы пар, ол иссін!» 24 Анаң оларға чоохтаан: «Ниме искезер, аны сағынып ал турыңар: хайдағ синнең сірер пасхаларын паалирзар, андағох оңдайнаң сірерні паалирлар. Че сірерні, исчеткеннерні, артых таа полар. 25 Кемнің ниме пар, ағаа хоза пирілер. Че кемнің ниме чоғыл, аның асхынах таа пар нимезі алылар».

Ӧсчеткен ӱреннецер кип-чоох

26 Иисус аннаң андар чоохтаан: «Худай Хан Чирі чирге ӱреннер тастапчатхан кізее тӧӧй. 27 Ол хараазын узупча, кӱнӧрте тур килче. Че ӱрен хайди, ӧт киліп, ӧсче ол аны пілбинче. 28 Чир позы ол ӱренні ӧскірче. Ӱрен пастап саптанча, анаң пазахтанча, соонаң пазағына тамах толча. 29 Тамах пыс парза, кізі сах андох орғах алча, ас кизері пасталча».

Горчица тамағынацар кип-чоох

30 Анаң ол чоохтаан: «Худай Хан Чирін паза нимее тӧӧйлирге чарир? Алай хайдағ кип-чоохнаң аны кӧзіт пирербіс? 31 Ол горчица тамағына тӧӧй. Аны таарыпчатса, ол прай чир ӱстӱндегі ӱреннердең кічіг. 32 Че таараан соонда ӧс парза, ол прай тамахтардаң улуғ пол парча. Саптары аның андағ парбахтар, оларның аразында тигірдегі хустар даа чазын поларлар». 33 Олар нинче піл полғанӌа, анӌа кип-чоохтарнаң Худай сӧзіне ӱгреткен. 34 Кип-чоохтар чох Ол ниме чоохтабаан, че ӱгренӌілерінең хада халза, оларға прай чарыт пирчең.

Хазыр чилні амыратханы

35 Олох кӱн иирде Иисус ӱгренӌілеріне чоохтаан: «Кӧлнің тігі саринзар кис парыбызааңар». 36 Андада олар, кізілерні позыдыбызып, кимедӧк одырған Иисуснаң хада чӱс сыхханнар. Оларнаң хада пасха даа кимелер полғаннар. 37 Мында уғаа хазыр чил полыбысхан. Салғахтар кимеге саабыл турғаннар паза суғ кимеге тол сыххан. 38 Иисус киме соонда, пазына нимеде частанып, узупчатхан. Аны усхурыбызып, Ағаа чоохтапчалар: «Ӱгретчі! Піс ӧлерте чӧрбіс, нӧӧс синің киреең пісте халбинча?» 39 Ол, тур киліп, чилге тохтабызарға чахаан паза кӧлге чоохтаан: «Сым пол, тохтап пар!» Чил тохтап парған. Улуғ амыр полыбысхан. 40 Иисус ӱгренӌілеріне теен: «Ноға сірер андағ хортыхсар? Сірерде киртініс чоғыл ба?» 41 Олар, уғаа хорых парып, удур-тӧдір чоохтасханнар: «Кемдір Ол андағ? Чил дее паза кӧл дее Аның сӧзін толдырчалар?»

Иисустың чабал хутха хаптырған кізіні имнебіскені

5:1 Олар, кӧлнің пір саринзар кизіп, Гадарин чирінзер читкеннер. 2 Иисус кимедең сых килгенде, чабал хутха хаптыр салған кізі, сыырат хуюзынаң сых киліп, Аны удурлаан. 3 Ол кізі сыыраттығ хуюларда чурттығ полған паза пірдеезі аны ілӌірбедең дее палғап полбаӌаң. 4 Аны нинӌе-нинӌе хати ілӌірбедең паза кинӌіден палғааннар, че ол ілӌірбені ӱзе тартыбысчаң, кинӌілерні оот салчаң. Пірдеезі аны амырат полбаӌаң. 5 Хараа-кӱнӧрте ол сыыраттарда паза тағлар аразында хысхыр чӧрӌең паза тастарға сабынӌаң. 6 Иисусты ырахтынох кӧр салып, Аныңзар чағын чӱгӱр киліп, Ағаа азахха тӱскен. 7 Паза улуғ табыснаң хысхыра тӱскен: «Ниме кирек Сағаа миннен, Иисус, Ӧӧркі Худайның Оолғы? Худайнаң сурынчам, иреелебе мині!» 8 Иисус ағаа теен: «Чабал хут! Сых пу кізідең!» 9 Паза аннаң сурған: «Адың кем полча?» Анзы нандырып чоохтаан: «Минің адым легион, піс кӧптеңер». 10 Анаң ол кізінің чабал хуттары, оларны пу чирден ырах ыспасха уғаа сурынғаннар. 11 Тағ хабырғазында сосхаларның улуғ ӧӧрі оттап чӧрген. 12 Андада олар Иисустаң сурынғаннар, чоохтанып: «Пісті сосхаларзар ызыбыс, піс оларзар кір парыбызарбыс». 13 Иисус оларға сах андох аны чаратхан. Чабал хуттар, кізідең сых парып, сосхаларға кір парғаннар. Сосхалар ӧӧрі, олар пірее ікі муңа чағын полған поларлар, пӧзік чардаң кӧлзер сегірібізіп, суғда пурлух парғаннар. 14 Сосха хадарчатханнар, тізең, чӱгӱрібіскеннер, анаң городта паза аалларда аннаңар чоохтап пиргеннер. Чуртағӌылар ниме пол парғаның кӧрерге пар сыхханнар. 15 Олар Иисуссар пас килгеннер. Пайаағы алӌаахчатхан кізі, хайзында кӧп чабал хут полған, иптіг тонан салып, позының сағызында одырчатханың кӧріп, хорых парғаннар. 16 Кӧрген кізілер пуларға пайаағы алӌаахчатхан кізідеңер паза сосхаларнаң ниме пол парғаныңаңар чоохтап пиргеннер. 17 Андада кізілер Иисусты постарының чирінең парыбызарға сурынғаннар. 18 Иисус кимеге одырыбысханда, пайаағы алӌааххан кізі Аныңаң хада парарға сурынған. 19 Че Иисус ағаа чаратпаан паза чоохтанған: «Ибіңзер парып, кізілеріңе чоохтап пир, ниме ит пирген сағаа Хан Худай паза хайди Ол сағаа ачын парған». 20 Ол кізі парыбысхан, анаң Десятиградия чирінде Иисус ниме аның иткенінеңер чоохтап сыххан. Прайзы чапсааннар.

Иаирнін хызы тірілгені паза ағырығ ипчінің хазыхтанғаны

21 Иисус пазох кӧлнің пасха саринзар кизіп алғанда, Аныңзар кӧп кізілер чыылыс килгеннер. Ол кӧл хазында халған. 22 Мына Иаир тіп аттығ синагоганың пастыхтарының пірсі килген. Иисусты кӧр салып, ол Аның азахтарынзар тӱскен. 23 Ол Иисустаң, алданып, сурынған: «Минің хызыӌаам ӧлерге чӧр. Парып, холларыңны ағаа салыбыс. Ол, андада чазылып, тіріг халар». 24 Иисус аныңаң хада парған. Оларның соонча, Аны ітклеп ала, кӧп кізілер субалысханнар. 25 Кізілернің аразында, он ікі чыл хан ахчатханыңаң ағырып, ирееленчеткен ипчі полған. 26 Ол ипчі, имӌілерде полып, кӧп ирееленген, прай нимепарын хоратхан, че пір дее туза полбаан. Улам хомай пол парған. 27 Ол Иисустаңар истіп салғанда, кізілернең хада парған. Иисустың кистінең пас киліп, Аның кип-азаана холынаң теңен. 28 Істінде піди сағынған полған: «Мин Аның кип-азаана даа теңзем, андада хазыхтанып аларбын». 29 Сах андох аның хан ахчатханы тохтап парған. Ол ипчі ағырығдаң имненіп алғаның піл салған. 30 Олох туста Иисус, Позынаң хайдағда кӱзі сых парыбысханың сизін салып, кізілерзер айланып, сурған: «Кем Минің кип-азаама теңен?» 31 Ӱгренӌілері Ағаа тееннер: «Син кӧрчезің нооза, хайди чон Сині хысча, че „Кем Мағаа теңен?" тіп сурчазың». 32 Че Иисус, Позының кип-азаана теңен кізіні таап аларға тіп, ибіре кізілерзер кӧрген. 33 Андада ол ипчі, позынаң ниме пол парғаның сизініп, хорыхханыңа халтырап ала, Иисустың алныңда тізекке тӱзіп, Ағаа прай чоохтап пирген. 34 Иисус, тізең, ағаа теен: «Хызым! Синің киртінізің сині арачылап халған. Амыр-хазыхнаң пар паза пу ағырығдаң хазых пол пар». 35 Иисус іди чоохтас турчатханда, синагога устағчызының ибінең килген кізілер чоохтааннар: «Синің хызың ӱреп парған. Ӱгретчіні хығырбасха даа чарир». 36 Че Иисус, ол сӧстерні истіп, синагога устағӌызына чоохтаан: «Хорыхпа, киртін не тур». 37 Анаң Пётр, Иаков паза Иаковтың харындазы Иоаннаң пасха Позының соонча пірдеезіне парарға чаратпаан. 38 Ол синагога устағӌызының туразынзар килгенде, кізілернің ӱрӱгісчеткеннерін, ылғасчатханнарын паза сыхтасчатханнарын кӧр салған. 39 Иисус, кір киліп, оларға теен: «Нимее ӱрӱгісчезер паза ылғасчазар? Хызычах ӱребеен, ол узупча». 40 Кізілер Ағаа хатхырыс сыхханнар. Че Иисус турадаң кізілерні сығарыбысхан. Позынаң хада ӱгренӌілерін паза хызыӌахтың паба-іӌезін алып, хызычах чатхан орынзар парған. 41 Анаң Ол, хызычахтың холын тудып, ағаа теен: «Талифа, куми». Мынзы «Хызыӌах, сағаа тіпчем, тур», - теені полча. 42 Хызычах сах андох тур килген, анаң пас чӧр сыххан. Ағаа он ікі час полған. Кӧрген кізілер уғаа хайхааннар. 43 Иисус оларға пу нимедеңер пірдеезіне чоохтабасха хатығ чахаан паза хызычахты азырабызарға чоохтаан.

Иисусха Назаретте киртінмеешіері

6:1 Иисус, ол чирлердең парып, Позының чирінзер килтен. Аныңаң хада ӱгренчдлері полғаннар. 2 Хачан суббота кӱн пол килгенде, Иисус синагогада ӱгредіг апарып пастаан. Аны искен кӧп кізілер, чапсып, чоохтасханнар: «Хайдаңдыр пу ниме Анда? Хайдағ хыйға Ағаа пирілген паза хайди андағ хайхастар иділче Аның холларынаң? 3 Ол ағас узы нимес пе? Марияның оолғы, харындастары Аның Иаков, Иосий, Иуда паза Симон? Аның пиӌелері пістіңӧк арабысталар?» Аннаңар Аны нимее салбааннар. 4 Иисус, тізең, оларға теен: «Ухаанчыны прай чирде улуғлапчалар, че чирінде ле, туғаннары паза чуртындағылары улуғлабин саларға полчалар». 5 Аннаңар Ол мында пір дее хайхастығ нимелер ит полбаан. Кӧп нимес ле ағырығ кізілерні, холларын салып, имнебіскен. 6 Кізілернің киртінминчеткеннеріне хайхаан. Соонаң Ол, ибіркі аалларча чӧріп, ӱгреткен.

Иисус он ікӧлеңні ӱгредіг апарарға ысча

7 Анаң Ол, он ікі ӱгренчші хығырып, оларны ікілердең ысхлап пастаан. Оларға чабал хутгарны сӱрерге ӱлгӱ пирген. 8 Паза оларға чолға тайахтаң пасха пір дее ниме албасха чахаан: халас таа, ахча даа, сӱӱмек тее. 9 Олаңай ла ӧдік кизіп аларға паза пасха кип-азах албасха чоохтаан. 10 Анаң оларға теен: «Пірее тураа кір парзар, анда ол чирдең сыхханча полыңар. 11 Пірее туразар сірерні кирбезелер алай истерге хынмазалар, сірер, постарыңның азахтарындағы тозынны анда хахтабыс турыңар. Анзы оларның тоғыр киречіленіс полар. Сынны чоохтапчам сірерге: Содом паза Гоморра городтарға тӱгенңі кӱн чарғызында пу городтаң тиме чахсы полар». 12 Ӱгренңілер чӧр сыхханнар паза кізілерні, чазыхтарының ӱчӱн пыросынзыннар тіп, ӱгреткеннер. 13 Ағырығ кізілернің чабал хуттарын сығара сӱргеннер паза кӧп ағырығ кізілерні хайахнаң сӱртклееннер паза чазылдырғаннар.

Кірӧске тӱзірчең Иоанның ӧлімі

14 Ирод хан, Иисустаңар тылаасты истіп, - Аның ады прай чирге тарап парған полған, - чоохтанған: «Ол Кірӧске тӱзірчең Иоанн тіріл килген, ам аннаңар хайхастар ит чӧрче». 15 Пасхалары тееннер: «Ол Илия полар». Че піреелері чоохтанғаннар: «Ол ухаанчы алай пурунғы ухаанчыларның піреезі полар». 16 Ирод, тізең, истіп, теен: «Ол Иоанн полар. Мин аның мойның ӱзе сабызарға чахаан полғам. Ол тіріл килді». 17 Пу Ирод алында, Иоанны тудып алып, аны харибге чаап саларға чахаан. Аны ол Филипп харындазының ипчізі Иродиаданың ӱчӱн иткен. Ирод харындазының ипчізін алып алған полған. 18 Иоанн Иродха чоохтачаң: «Сағаа харындазыңның ипчізінең чуртирға чарабас». 19 Иродиада, тізең, Иоаннға чабалланып, аны ӧдірібізерге сағынӌаң, че полынмачаң. 20 Ирод, Иоанның ах паза Худай чарытхан кізі полчатханың піліп, аның хорыхчан, аны хайраллачаң. Ирод, Иоанны истіп, кӧп ниме итчең паза чоохтарын хынып исчең. 21 Иродиадаға килістіре кӱн пол парған, хачан Ирод, позының тӧреен кӱніне сылтанып, улуғ пайларға, чаачылар пастыхтарына паза Галилейдегі ах сағалларға той иткен. 22 Иродиаданың хызы, кір киліп, плесет сал пирген. Плесет салғаны Ирод ханның паза аалчыларның кӧңніне уғаа кірген. Хан хысха чоохтаан: «Хынған нимені кіле, прай пирем». 23 Анаң ағаа сӧс пирген: «Ниме дее миннең сурзаң, аны пирербін. Чирімнің чарымын даа пирібізербін». 24 Хыс, сых нарыбызып, позының іңезінең сурған: «Ниме кілечең?» Анзы нандырған: «Кірӧске тӱзірчең Иоанның пазын». 25 Хыс, сах андох ханзар сала маңзыри айланып, аннан сурынған: «Син мағаа сағамох Кірӧске тӱзірчең Иоанның пазын, чаймахха салып, сыйлап пир». 26 Хан хомзын парған, че кізілер кӧзіне сӧс пиргеннеңер, ол хысха тоғыр пол полбаан. 27 Сах андох, тиріг ал чӧрчең чалӌызын ызып, хан Иоанның пазын ағыл килерге чахаан. 28 Чалңызы, харибзер парып, анда Иоанның мойның кизе саабысхан. Анаң, пазын чаймахта ағыл киліп, хысха пирібіскен. Хыс, тізең, аны ічезіне пирген. 29 Иоанның ӱгренчілері, ол тылаасты истіп салып, пеер килгеннер. Аның сӧӧгін алып алып, хомдаа сал салғаннар.

Пис муң кізінің тосханы

30 Ӱгренӌілер, айланып, Иисуссар чыылыс килгеннер. Олар ниме иткеннерінеңер паза нимее ӱгреткеннерінеңер прай Ағаа чоохтап пиргеннер. 31 Иисус оларға теен: «Кізі чох чирзер ағылахти парып, ӱр нимес тынанып алааңар». Олар полған орында килчеткен паза парчатхан кізілер кӧп полған, аннаңар оларға азыранарға даа маң чох полған. 32 Олар, кимеге постары ла одырып, кізі чох орынзар чӱс парыбысханнар. 33 Чон оларның іди чӱс париғаннарын кӧрген, кӧбізі оларны танып салған. Прай городтардаң кізілер, «ӱгӱрікнең парып, андар пулардаң пурун чидіп, анда чыылысханнар. 34 Иисус, кимедең сых киліп, кӧп чонны кӧр салғанда, оларға айап парған. Олар хадағчы чох хойларға тӧӧй полғаннар. Иисус оларны кӧп нимее ӱгрет сыххан. 35 Илееде тус ирт парғанда, Иисустың ӱгренчілері, Аныңзар пас киліп, чоохтааннар: «Мында ээн чазы чир, че орай пол парир. 36 Позыдыбыс кізілерні. Оларның чіӌең нимелер' чоғыл. Хости аалларзар парып, постарына халас таа алып алзыннар». 37 Иисус оларға нандырған: «Сірер оларға чіӌең ниме пиріңер». Ӱгренңілер сурғаннар: «Арса піске, парып, ікі чӱсче динарийге халас садып алып, оларға ӱлебізерге кирек?» 38 Че Иисус олардаң сурған: «Сірернің нинче халас пар? Парып, кӧр киліңер». Олар, кӧр киліп, чоохтааннар: «Пис халас паза ікі палых пар». 39 Андада Иисус ӱгренчілеріне кізілерні кӧк отта кизекти одырт саларға чахыбысхан. 40 Кізілер илігердең паза чӱзердең изерістіре одырыбысханнар. 41 Иисус, ол пис халасты паза ікі палыхты алып, тигірзер кӧріп, алғабысхан. Анаң, халасты сындырып, ӱгренчілеріне пирген, олар, тізең, кізілерге ӱлееннер. Ікі палыхты ідӧк прай чонға ӱлеп пирген. 42 Прайзы тосханӌа азыранып алғаннар. 43 Анаң артхан халас кизектерін паза палыхтың халғаннарын он ікі харачахха толдыра чыып алғаннар. 44 Прайзы пис муңа чағын ир кізі азыранған полар.

Суғча чӧргені

45 Аның соонаң Иисус, Позы чонны ибзер позытханча, ӱгренчілеріне, кимеге одырып, кӧл олзаринзар, Вифсаидазар, парарға чахаан. 46 Анаң, кізілерні позыдыбызып, Ол тағзар пазырарға парған. 47 Иирде ӱгренчілер кимеліг кӧл ортызында полғаннар, Иисус, тізең, чалғызан тағда халған. 48 Ол, чилге удур табырах пар полбин, кимедеғілернің ирееленчеткеннерін кӧрген. Орты хараа соонда, иртензер Иисус, оларзар суғ ӱстӱнӌе пас парьш, хыринча ирте халарға иткен. 49 Ӱгренӌілері, Аны суғ ӱстӱнче килчеткенін кӧр салып, сӱне полар тіп, хысхырыза тӱскеннер. 50 Прайзы, Аны кӧріп, хорых парғаннар. Иисус сах андох оларнаң чоохтас сыххан: «Пу Минмін, хорыхпаңар». 51 Анаң Иисус оларның кимелеріне одырыбысхан. Чил тохтап парған. Ӱгренчілері уғаа тын хайхап парғаннар. 52 Олар пис халасты анча кізее хайди таңнастығ читіргенін піл полбин халғаннар, чӱректері оларның тас чіли хат парғаннаңар.

Кӧп кізіні имнебіскені

53 Кӧлні кис киліп, олар Геннисарет чирінде чарға сыхханнар. 54 Олар, кимедең сых килгеннерінде, андағы чуртағӌылар Иисусты танып салғаннар. 55 Аның килгенінеңер прай чирлерде искірібіскеннер паза ағырығ кізілерні тӧзектерінең хада андар, хайда ол полған, ағыл турғаннар. 56 Анаң Иисус, хайдар даа парза, пірее аалзар алай городсар кір килзе, кізілер, ағырығ кізілерні ағыл киліп, ачых чирлерде чатыр салчалар. Ағырығ кізілер Иисустаң кип-азаана даа холнаң теертіп аларға сурынғаннар. Ағаа теңен кізілер чазыл парчатханнар.

Улуғларның кибірлері

7:1 Иисуссар фарисейлер паза Иерусалимнең килген хай-пірее ӱлгӱ ӱгретчілері чыылыс парғаннар. 2 Олар Иисустың хай-пірее ӱгренңілері, халасты арығ нимес алай чуғбаан холларынаң тудып, чіпчеткеннерін кӧр салып, пыролааннар. 3 Кибір хоостыра фарисейлер паза пасха даа иудейлер, холларын иптеп чууп албаанда, азыранминчалар. 4 Садығдаң ниме ал килзелер, постарын кибір хоостыра чууп албаанда, чібинчелер. Пасха даа кибірлері оларның пар: айахтарын, чірчелерін, хазаннарын паза сіреелерін ідӧк арығ иде чуупчалар. 5 Соонаң фарисейлер паза ӱлгӱ ӱгретчілері Аның сурғаннар: «Ноға синің ӱгренчілерің, пурунгыларның иргі кибірін сайбап, чуғбаан холларынаң халас чіпчелер?» 6 Иисус оларға, нандырып, чоохтанған: «Сірер осхас чойырхостардаңар орта чоохтаан ухаанчы Исаия: „Пу кізілер мині тіллерінең не улуғлапчалар. Чӱректері, тізең, миннең оортахтар. 7 Че тикке ле олар, кізілер кибірлеріне пасхаларын ӱгредіп, мині улуғлапчалар". 8 Сірер, Худай чахиин тастап, кізілер кибірлерінең устанчазар. Чірчелер, айахтар чуупчазар паза пасха даа андағ нимелер итчезер». 9 Анаң оларға леен: «Сірер іди Худай чахиин постарыңның кибірлерінің ӱчӱн тутпинчатсар чахсы ба? 10 Моисей чоохтаан полған: „Пабанны паза ічеңні улуғла", „Паба-іӌезін сӧклепчеткен кізі ӧлімге чарғыладар". 11 Сірер, тізең, чоохтапчазар: „Кізі позының паба-іӌезіне: „Мин сірерге пирчең нимені Худайға пир салғам", - тіпче». 12 Ол оңдайнаң сірер кізі паба-іӌезіне паза полыспазын тіп ол кізее чаратчазар. 13 Андағ оңдайнаң сірер Худай сӧзін постарың турғысхан кибірге алыстырчазар. Пасха даа андағ кӧп нимелер итчезер». 14 Анаң, прай чонны чыып алып, Иисус оларға теен: «Истіңер Мині прайзыңар паза пілерге кӱстеніңер. 15 Кізее тастынаң кірчеткен пір дее ниме кізіні ардатпинча. Кізідең сыхчатхан ниме кізіні ардатча. 16 Кемнің истерге хулаа пар, ол иссін!» 17 Ол, кізілердең чарылып, туразар кір килгенде, Аның ӱгренчілері пайаағы кип-чоохтаңар сурғаннар. 18 Иисус оларға теен: «Нӧӧс сірер дее піл полбадыңар? Нӧӧс сірер оңарбинчазар, ноға кізее тастынаң кірген ниме аны ардатпинча? 19 Кізізер тастынаң кірген ниме чӱреензер парбин, аның хурсағынзар парча. Анаң, кирек чох ниме полып, сых парыбысча. Ол оңдайнаң полған на чиис арығ полча». 20 Аннаң андар Иисус чоохтаан: «Кізідең сыхчатхан ниме кізіні ардатча. 21 Кізі істінең, кізі чӱреенең сыхчатхан хомай сағыстар, суғдыр хылых, ӧдірістер, 22 Оғырлас, кізі алаахтырғаны, ӧкпеленіс, чабалыныс, атаанас, Худайны нимее салбааны, кӧдірілчік полғаны, алаахханы сыхча. 23 Прай пу хомай нимелер, кізі істінең сығып, кізіні ардатчалар».

Иисустың ипчее полысханы

24 Пу чирлердең сығып, Иисус Тир паза Сидон чирлерінзер читкен. Ол, тураа кіріп, Позын таныттырбасха сағынған, че Аны танып салғаннар. 25 Хызы чабал хутха хаптыр салған пір ипчі, Аннаңар ис салып, Иисуссар киліп, Аның азаанзар тӱзібіскен. 26 Че ол ипчі, еврей нимес, сирофиникиянкар тӧлінең полған. Амды, хызынаң ол чабал хутты сығара сӱрібізерге тіп, Иисусха алданған. 27 Че Иисус ағаа теен: «Пастап олғаннарны тосхыр саларға кирек. Халасты, олғаннарға пирбин, адайларға тастабысса, чахсы полбас». 28 Ипчі ағаа нандырған: «Іди, Хан Худайым! Че адайлар даа стол алтында олғаннарның халас унахтарын чіпчелер». 29 Андада Иисус ағаа теен: «Андағ чахсы нандырығ ӱчӱн ибіңзер пар. Чабал хут синің хызыңнаң сых парыбысхан». 30 Ибінзер киліп, ол ипчі кӧрзе, хызы тӧзекте чатча, чабал хут аннаң сых парыбыстыр.

Туных паза тіл чох кізіні имнебіскені

31 Тир паза Сидон чирлерінең сығып, Иисус Десятиградия чирлерін тобыра пазох Галилей кӧлзер пар сыххан. 32 Пірсінде Иисуссар туных паза чоохтан полбинчатхан кізіні ағыл килгеннер. Иисусты холларын ағаа салыбызарға сурынғаннар. 33 Иисус ол кізіні чоннаң оортах апарып алған. Анаң, хол салааларын аның хулахтарына суғыбызып, тӱкӱрібіскен паза аның тіліне теерткен. 34 Анан, тигірзер кӧрібізіп, улуғ тыныбызып, чоохтанған: «Еффафа!» /«Ачыл пар!»/ 35 Сах андох ол кізінің хулахтары ис сыхханнар, тілі, маңат айланып, арығ чоохтан сыххан. 36 Анаң Иисус оларға пу нимедеңер пірдеезіне чоохта-басха чоохтаан. Че нинче дее чаратпинчатса, кізілер улам чоох таратханнар. 37 Кізілер, уғаа таңназып, чоохтасханнар: «Ол прай нимені чахсы итче: туных кізілерні имнебісче паза тілі чохтарны чоохтандыртча».

Тӧрт муң кізінің тосханы

8:1 Ол кӱннерде Иисуссар пазох кӧп кізі чыылыс парған. Оларның чіӌең нимелері чох полған. Иисус, Позының ӱгренчілерін хығырып алып, оларға чоохтаан: 2 «Мағаа пу чон айастығ. Миннең хада ӱс кӱн пол парирлар, аннаңар амды чиистері халбады. 3 Оларны иблерінзер азырабин нандырыбыссам, чолда майых парарлар. Піреелері пеер уғаа ырахтаң килгеннер». 4 Аның ӱгренӌілері Ағаа нандырғаннар: «Пу хуу чазыда мынча чонны азырачаң халасты хайдаң таап алар?» 5 Иисус олардаң сурған: «Сірернің нинче халас пар?» Олар нандырғаннар: «Читі». 6 Андада Ол кізілерге чирге одырыбызарға чахыбысхан. Анаң Ол, читі халасты алып, Худайны алғыстап, халастарны сындырған паза ӱгренчілеріне пирген. Олар кізілерге ӱлеп пиргеннер. 7 Оларның нинчеде палығас пар полған. Алғабызып, Ол палыхты ідӧк ӱлебізерге чахаан. 8 Прайзы, азыранып, тос парғаннар. Чиистің артханы читі корзинаа тол парған. 9 Азыранған кізілернің саны тӧрт муңча полған полар. Анаң оларны Иисус нандырыбысхан. 10 Анаң, ӱгренӌілерінең хада кимеге одырыбызып, Иисус Далмануфа чирлерінзер читкен.

Фарисейлер танығ тілепчелер

11 Ідӧк пеер фарисейлер читкеннер паза Иисуснаң талас сыхханнар. Олар, Иисусты хыңаландырып, Аның, тигірдең пірее танығ ит пирзін тіп, сурынғаннар. 12 Иисус, улуғ тыныбызып, чоохтан салған: «Ноға пу тӧл танығ хысча? Сынны чоохтапчам, сірерге пір дее танығ полбас». 13 Анаң, олардаң хыйа парып, пазох кимеге одырыбысхан. Кӧлнің пір саринзар кис парыбысхан. 14 Аныңаң хада парчатхан ӱгренчілер халас аларға ундуп салтырлар. Кимеде оларның пір ле халас полтыр. 15 Иисус ӱгрет парған: «Сибер чӧріңер. Фарисейлернін паза Иродтың ачытхыларынаң китеніңер». 16 Ӱгренӌілер удур-тӧдір чоохтас сыхханнар: «Пістің халас чохтаңар ол іди тіпче полар». 17 Нимедеңер олар чоохтасчатханың піліп, Иисус ӱгренчілеріне теен: «Ноға сірер халас чоғыл тіп чоохтас-чазар? Нӧӧс сірер ам даа кӧрбинчезер паза піл полбин-чазар? Нӧӧс чӱректерің сірернің іди хат парған? 18 Харахтарың парда, хайди кӧрбинчезер? Хулахтарың парда хайди испинчезер? Нӧӧс ундуп салғазар? 19 Хайди мин пис халасты пис муң кізее ӱлебіскем? Сірер халастың артхан-халғаның нинӌе харачах чыып алғазар?» Ағаа нандырғаннар: «Он ікі». 20 «Че хаӌан читі халасты тӧрт муң кізее пиргенде, нинңе корзинаа чіңең-ниме арт халған?» Чоохтааннар: «Читі». 21 Андада ол теен: «Нӧӧс сірер амға теере ниме піл полбинчазар?»

Харах чохты имнебіскені

22 Олар Вифсаидазар читкеннер. Иисуссар харах чох кізіні чидін килгеннер. Ағаа холын теертібіссін тіп, Иисустаң сурынғаннар. 23 Ол, харах чох кізіні холынаң тудып, аал тастынзар апарған. Анаң, аның харахтарына тӱкӱріп, ағаа холын салыбысхан, анаң сурған: «Пірее ниме кӧрчезің ме?» 24 Ол кізі, кӧрібізіп, теен: «Мин иртчеткен кізілерні кӧрчем. Олар ағастарға тӧӧйлер». 25 Иисус пазох аның харахтарына холларын салыбысхан. Анаң пазох кӧрерге чахаан. Амды ол кізі, чазыл парып, прай нимені чахсы кӧр сыххан. 26 Иисус аны ибінзер ысчатханда, чоохтап пирген: «Аалзар кірбин, наныбыс паза пірдеезіне ниме чоохтаба». 27 Иисус Позының ӱгренчілерінең хада Кесария Филиппова чирнің аалларынзар аннаң андар пар сыххан. Чолда парчадып, Ол Позының ӱгренңілерінең сурған: «Кізілер Мині кем тіп санапчалар?» 28 Олар нандырғаннар: «Піреелері, Сині Кірӧске тӱзірчең Иоанн полча тіп, санапчалар. Пасхалары, тізең, Илия тіп чоохтасчалар, хайзылары, ухаанӌыларның пірсі полар тіп, таласчалар». 29 Иисус оларға теен: «Сірер чи Мині кемге санапчазар?» Пётр Ағаа нандырған: «Син - Христоссың». 30 Андада Ол ӱгренчілеріне Позыныңар пір дее кізее чоохтабасха чахаан.

Иисус Позының ирееленерінеңер, ӧлімінеңер паза тірілерінеңер ухаанчылапча

31 Анаң оларны ӱгрет сыххан. Кізі Оолғы кӧп чобағ кӧрер, ах сағаллар, улуғ абыстар паза ӱлгӱ ӱгретчілері Аның тоғыр поларлар. Аны ӧдір саларлар, че ӱзінчі кӱнінде Ол тіріл килер. 32 Ол прайзына аннаңар кӧні чоохтап пирген. Пётр, тізең, Аны хыйа апарып, тоғыр чоохтанған. 33 Че Иисус, айланып, Позының ӱгренчілерінзер кӧрібіскен. Анаң Пётрға хатығ чоохтанған: «Хыйа пар Миннең, айна! Син Худайдаң сағынминчазың, че кізілер чіли сағынчазың». 34 Анаң кізілерні паза Позының ӱгренчілерін хығырып алып, оларға чоохтаан: «Кем Минің соомча парарға хынча, ол Позынаңар сағынмасха кирек. Позының кірезін алып, Минің соомча парзын. 35 Кем позының тының арачылап халарға сағынча, ол аны чідір салар, че кем позының тының Минің паза Чахсы хабар ӱчӱн пирібізер, ол тының хайраллап халар. 36 Прай даа тилекейні холға киріп алып, че позының тының чідір салза, ол кізее хайдағ туза полар? 37 Алай нименең соонаң тоолап алар ол позының тының? 38 Пу ай-пораан паза чазыхтығ тӧл аразында піреезі Миннең алай Минің сӧстерімнең уйатса, андада Кізі Оолғы, хаӌан Ол Позының Адазының сабланызынаң паза Худай ангеллерінең хада килзе, ідӧк аның уйадар.

Иисустың хубулғаны

9:1 Иисус оларға теен: «Сынны чоохтапчам сірерге. Мында турчатханнарның хай-піреезі позының чуртазындох Худай Хан Чирін прай кӱзінде килгенін кӧріп алар». 2 Аның соонаң алты кӱн ирт парғанда, Иисус, Пётрны, Иаковты паза Иоанны ла Позынаң хада алып, пӧзік тағзар апарған. Анда Ол оларның алныңда хубул чӧрібіскен. 3 Аның кип-азағы ах хар осхас чылтырах пол парыбысхан. Андағ ах полған, хайзын пір дее кізі, пу чир ӱстӱнде чууп, іди ағарт полбасчых. 4 Оларға Илиянаң Моисей кӧріне тӱскеннер. Олар Иисуснаң чоохтас сыхханнар. 5 Андада Пётр Иисуссар айланған: «Ӱгретчі! Хайдағ чахсы піске мында поларға. Ӱс отах турғыс пирербіс. Пірсі - Сағаа, ікінӌізі - Моисейге паза ӱзінчізі - Илияға». 6 Олар уғаа хорых парғаннаңар, Пётр іди, ниме тирін пілбин, чоохтанған. 7 Пулут сых килген паза кӧлеткізінең оларны чабысхан. Пулутсартын ӱн истіле тӱскен: «Пу Минің хынчатхан Оолғым. Истіңер Аны!» 8 Анаң ӱгренңілер ибіре кинетін кӧрібіскенде, хыриларында Иисустаң пасха пір дее кізі чох полған. 9 Олар тағдаң тӱсчеткеннерінде, Иисус оларға кӧрген нимедеңер, Кізі Оолғы ӱреен соонда тірілбеенче, пірдеезіне чоохтабасха чоохтаан. 10 Олар пу нимені пірдеезіне чоохтабааннар, че удур-тӧдір сурастырысхлааннар: «Нимедір анзы, ӧлім соонда тіріл килері?» 11 Анаң ӱгренңілері Иисустаң сурғаннар: «Ноға ӱлгӱ ӱгретчілері чоохтачаңнар, пурун Илия килерге кирек полған?» 12 Иисус оларға нандырған: «Анзы орта. Пурун Илия, киліп, прай ниме тимнеп саларға кирек полған паза хайди пазылған, Кізі Оолғына кӧп ирееленерге паза хыйыхтатырарға ӱлӱс тӱсче. 13 Че сірерге чоохтапчам, Илия килген полған, че аны, хайди аннаңар пазылча, хайди хынғаннар, іди иткеннер».

Оолағасты имнебіскені

14 Олар ӱгренчілерінзер килгенде, оларның ибіре кізілер чыылыс парғаның паза ӱлгӱ ӱгретчілері оларнаң таласчатханнарын кӧр салғаннар. 15 Олох туста, Иисусты кӧр салып, кізілер таңнап парғаннар паза, Аны удурлап, чағын чӱгӱріс килгеннер. 16 Иисус ӱлгӱ ӱгретчілерінең сурған: «Сірер оларнаң нимедеңер таласчазар?» 17 Чон аразынаң пір кізі Ағаа нандырған: «Ӱгретчі! Мин Синзер тіл чох итчеткен чабал хутха хаптырған оолғымны ағылдым. 18 Чабал хут, аны хайда ла полза, чирге тастапча. Аның ахсынаң кӧбік ахча, тістерін хыңырадып, тыып парча. Мин Синің ӱгренңілеріңзер айланғам, ол чабал хутты сығара сӱрзіннер тіп, че олар сӱр полбааннар». 19 Ағаа нандырып, Иисус теен: «О, киртізі чох тӧл! Нинчезін Мин сірернең хада поларбын? Хачанға теере Мин сірернең сыдазарбын? Ағылыңар аны Минзер». 20 Оолағасты Иисуссар ағыл килгеннер. Чабал хут Иисусты кӧргендӧк, оолағасты чирге тастап, талдыр сыххан. Оолғычах, чирге аңдарыл парып, тітіреп сыххан, аның ахсынаң кӧбік ахчатхан. 21 Иисус аның пабазынаң сурған: «Іди ӱр ағыр парир ба?» Анзы нандырған: «Кічігдең сығара. 22 Кӧп хати чабал хут, аны чох идерге тіп, отха паза суға тастаан. Пірее ниме ит полар ползаң, піске айап, полыс пир». 23 Иисус ағаа нандырған: «Ноға іди тіпчезің „пірее ниме ит полар ползаң". Киртінчеткен кізее прай ниме полар». 24 Сах андох оолағастың пабазы, харах чазын тӧгіп, хысхырған: «Киртінчем. Минің киртінізім читпинчеткеніне полыс пир». 25 Иисус, ибіре чон чыылысчатханың кӧріп, чабал хутха чоохтанған: «Тілі чох паза туных итчеткен чабал хут! Мин сағаа чахыпчам: сых пу оолағастаң паза кірбе андар!» 26 Чабал хут хысхыра тӱскен, оолағасты тың тітіредібізіп, аннаң сых парыбысхан. Оолағас ӧліг ле чіли чатхан. Кізілернің кӧбізі, «ол ӧл парды» тіп, чоохтас сыхханнар. 27 Че Иисус аны, холынаң алып, кӧдірібіскен. Оолах сах андох тур килген. 28 Иисус, тураа кір килгенде, ӱгренңілері Аның ағылахха сурғаннар: «Ноға піс ол чабал хутты сығара сӱр полбаабыс?» 29 Иисус оларға нандырған: «Андағларны пазырып ла паза ораза ла тудып сығара сӱрерге кирек».

Иисус Позынаңар пазох ухаанцылапча

30 Аннаң сығып, олар Галилеяча парғаннар. Че Иисус, олардаңар пірдеезі пілбезін тіп, сағынған. 31 Ол, Позының ӱгренӌілерін ӱгредіп, оларға Кізі Оолғын кізі холларына пиріл парарынаңар, анаң Аны ӧдір саларларынаңар паза ӱзінчі кӱнінде тіріл килерінеңер чоохтаан полған. 32 Ӱгренңілері ол сӧстерні піл полбааннар, че Аның сурарға тідінмееннер.

Кем улуғдыңар талазығ

33 Олар Капернаумзар килгеннер. Анаң, хаңан олар турада полғаннарында, Иисус ӱгренңілерінең сурған: «Чолда нимедеңер іди пос алынңа чоохтас килгезер?» 34 Ӱгренңілері тапсабааннар. Олар, чолда килчедіп, кем оларның аразында улуғ полчатханыңаңар таласханнар. 35 Анаң одырыбызып, Иисус, он ікі ӱгренчізін хығырып, оларға чоохтаан: «Кем сірернің иң пастағызы поларға сағынча, ол прайзының халғанчызы паза прайзына чалчы поларға кирек». 36 Анаң, паланы алып, оларның алныңда турғызып, аны хуңахтап, ӱгренчілеріне чоохтаан: 37 «Кем Минің ӱчӱн мындағ кічіг палаларның піреезін маңат удурлапча, ол Мині маңат удурлапча. Паза кем Мині удурлапча, ол Мині нимес, че Мині ысхан Худайны маңат удурлапча».

Кем сірернің тоғыр нимес, ол сірернең хада

38 Андада Иоанн теен: «Ӱгретчі! Піс Синің адыңнаң чабал хуттарны сығара сӱрчеткен кізіні кӧргебіс. Ол пістің арабыстаң полбааннаңар, піс аны тохтатхабыс». 39 Иисус нандырған: «Тохтатпаңар аны. Кем Минің адымнаң хайхастар итче, ол соонаң Мині сӧклеп полбас. 40 Кем сірердең тоғыр нимес, ол сірернең хада полча. 41 Кем Минің ӱчӱн сірерге, Христостың ӱгренңілеріне тіп, пірее чірче суғ пирер, ол кізі, сынны чоохтапчам, позына сыйых чох халбас.

Хыцаланыстаңар

42 Че кем Мағаа киртінчеткеннернің кічіглернің дее піреезінің киртінізін сайғапча, аны мойныңа теербен тазын палғап, суғзар тастабысса, артых поларчых. 43 Сынап синің холың чазыхха сухчатса ӱзе сабыс аны. Тоозылбас чуртасха кинек полып кірзе чахсы полар, ікі холлығ геенна ӧртінзер, успас отсар парғанңа. 44 Ол чирде оларның хурттары ӧлбинчелер паза успас от кӧйче. 45 Сынап сині азааң чазыхха сухчатса, ӱзе сабыс аны. Тоозылбас чуртасха пір азахтығ кірзе чахсы полар, ікі азахтығ геенна ӧртінзер, успас отсар парғанңа. 46 Ол чирде оларның хурттары ӧлбинчелер паза успас от кӧйче. 47 Сынап сині харааң чазыхха сухчатса, сығара тартыбыс аны. Худай Хан Чирінзер пір харахтығ кірзе чахсы полар, геенна ӧртінзер ікі харахтығ тӱскенңе. 48 Ол чирде оларның хурттары ӧлбинчелер паза успас от кӧйче. 49 Анда полғаны ла отнаң арығлалча, хайди тайыға салған ит туснаң тусталча. 50 Тус — маңат ниме. Че тустың тадии чох пол парза, аны хайди хатап ачығ идіп аларзар? Тӧӧле тустығ полыңар паза удур-тӧдір ынағ чуртаңар».

Хоныхтаңар паза чарылыстаңар ӱгредіг

10:1 Иисус андартын сығара Иордан суғның пір саринзар Иудей чирінзер килібіскен. Пазох Иисуссар кізілер чыылысханнар. Ол оларны пазох Позы кӧніккен хоостыра ӱгреткен. 2 Фарисейлер пас киліп, Аны хыӌаландырып, сурғаннар: «Чарадылча ба ирепчі кізее чарылызарға?» 3 Иисус оларға теен: «Ниме сірерге чахаан Моисей?» 4 Олар нандырғаннар: «Моисей ир кізее, ипчізіне чарылызарынаңар пічік пас пирзе, чарылызарға чаратхан». 5 Иисус оларға чоохтаан: «Ол, сірернің хатығ чӱректеріңні кӧріп, ол чахығдағы пічікті пасхан. 6 Чир-чайаан пӱдірчеткенде, Худай иренні паза ипчіні чайап салған. 7 Аннаңар ир кізі, пабазын паза іӌезін халғызып, ипчізіне хозылча. 8 Андада олар, ікі кізі нимес, че пір кізі осхас пол парчалар. 9 Аннаңар Худай піріктір салғаны кізі чарбасха кирек». 10 Соонаң турада ӱгренчілері Иисустаң аннаңар хатабох сурғаннар. 11 Иисус оларға нандырған: «Кем, ипчізінең чарылып, пасха ипчіні ал салза, ол ипчізінең тоғыр чазых итче. 12 Че хачан ипчізі, ирінең чарылып, пасха ирге пар салча, ол ирінең тоғыр чазых итче».

Иисус олғаннарны алғапча

13 Иисуссар кізілер палаларын, Ол оларны алғабыссын тіп, ағылғаннар. Че ӱгренӌілері оларны Ағаа чағын итпин турғаннар. 14 Аны кӧр салып, Иисус, тарын парып, оларға чоохтанған: «Килзіннер палалар Минзер. Тохтатпаңар оларны. Худай Хан Чирі оларға пирілче. 15 Сынны чоохтапчам сірерге, кем, олған чіли, Худай Хан Чирін удурлабас, ол андар хачан даа кір полбас». 16 Анаң, олғаннарны хуӌахтап, оларны, пастарына холларын салып, алғаан.

Пай полары хорғыстығ

17 Хачан Иисус чорыхха сығарға тимненчеткенде, хай-дағ-да кізі, чӱгӱр киліп, Аның алныңда тізекке тӱзібіскен: «Паарсах Ӱгретчі! Ӱзілбес чуртас алар ӱчӱн, мин ниме идерге кирекпін?» 18 Иисус ағаа теен: «Ноға син Мині паарсах тіпчезің? Чалғыс Худайдаң пасха пірдеезі паарсах нимес. 19 Пілчезің ме чахығларны: кізі ӧдірбе, суғдыр полба, оғырлаба, чой ниме киречілебе, кізіні хыйыхтаба, паба-іңеңні улуғла». 20 Ол кізі нандырған: «Ӱгретчі! Мин ол чахығлар хоостыра чииттең сығара чуртапчам». 21 Иисус паарсах кӧрібіскен ол кізізер, анаң теен: «Сағаа ам даа пір ниме читпинче. Парып, прай пар нимеңні садыбыс. Ахчаларны чох кізілерге пирглебіс, андада син тигірде испайлығ поларзың. Анаң Минзер киліп, кірезіңні алып алып, Минің соомӌа парарзың». 22 Пу сӧстерні истіп, ол кізінің сырайы алыс парған. Хомзын парып, хыйа пазыбысхан. Ол уғаа пай кізі полған. 23 Иисус, ибіре кӧрібізіп, Позының ӱгренӌілеріне чоохтаан: «Хайдағ сидіктір пай кізілерге Худай Хан Чирінзер кірерге». 24 Ӱгренӌілері ол сӧстерге хахап парғаннар. Че Иисус пазох оларға чоохтаан: «Палаларым, пайына ізенчеткеннерге хайдағ сидіктір Худай Хан Чирінзер кірерге! 25 Пай кізі Худай Хан Чирінзер кіргенӌе, тибе малға іңе ӱттерінӌе ирт парыбызарға оой полар». 26 Ӱгренӌілер, тізең, улам хахап парып, удур-тӧдір чоохтасханнар: «Андағда кем арачылан халар?» 27 Иисус, оларзар кӧріп, чоохтанған: «Кізілернің пірдеезі арачылан полбас, Худай ла арачылир. Полған на ниме Худайдаң полар». 28 Пётр ағаа чоохтанған: «Мына, піс прай нимебіс тасти синің сооңӌа парғабыс». 29 Иисус нандырған: «Сынны чоохтапчам сірерге, Минің паза Чахсы хабар ӱчӱн позының туразын алай харындас-пиӌелерін, алай пабазын, алай іӌезін, алай ипчізін, алай палаларын, алай чирін халғысхан кізілер, 30 Амғы туста, сӱрдірчеткенде, чӱс хати кӧп тураларға, харындас-пиӌелерге, пабаларға, іӌелерге, палаларға, чирге чидерлер, че ідӧк килчеткен туста тоозылбас чуртас аларлар. 31 Сағам пастағызы полчатханнарның кӧбізі халғанӌызы, халғанӌылары, тізең, пастағылар пол парарлар».

Иисус ӧлімінеңер пазох ухаанчылапча

32 Олар Иерусалимзер чорых тутчатханда, Иисус алныңда парчатхан. Ӱгренӌілері Аның соонӌа таңнап паза пасха кізілер хорығып ала парғаннар. Анаң Иисус, он ікі ӱгренӌізін хығырып алып, Позынаң ниме пол парарынаңар пазох чоохтап сыххан: 33 «Мына піс Иерусалимзер парчабыс. Анда Кізі Оолғын улуғ абыстарға паза ӱлгӱ ӱгретчілеріне садыбызарлар. Олар Аны ӧлімге чарғылабызарлар паза Аны худайы чохның холына пирібізерлер. 34 Олар Аны иреелирлер, соғарлар, чаба тӱкӱрерлер, анаң ӧдір саларлар. Че ӱзінңі кӱнінде Ол тіріл килер».

Зеведей оолларының сурынызы

35 Андада Иисуссар Зеведейнің ооллары, Иаков паза Иоанн, пас киліп, тееннер: «Ӱгретчі! Піс Сині пір ниме толдыр пирерге сурынчабыс». 36 Иисус олардаң сурған: «Ниме Мин сірерге ит пирерге кирекпін?» 37 Олар Ағаа нандырғаннар: «Синің ӱлгӱң читсе, пірсібіске Синің оң сариңда паза пірсібіске сол сариңда одыр саларға чарат». 38 Че Иисус оларға чоохтанған: «Ниме сурчатханнарыңны даа пілбинчезер. Мин ісчеткен чірчедең іс поларзар ба, Мин кірӧске тӱскен чіли кірӧске тӱзерзер бе?» 39 Олар нандырғаннар: «Пол поларбыс». Андада Иисус оларға теен: «Сірер Мин ісчеткен чірчедең ізерзер паза сірер Мин кірӧске тӱскен чіли кірӧске тӱзерзер. 40 Че кем Минің оң саринда паза сол саринда одырары Миннең нимес. Анда, кемге тимнелген, олар одырарлар». 41 Пасха он ӱгренӌізі, пу чоохты истіп, Иаковха паза Иоаннға тарыныбысханнар. 42 Андада Иисус, оларны хығырып алып, чоохтанған: «Сірер пілчезер, хайди чонда кнестерге саналчатханнар аның пиглері полчалар, оларның улуғ пайлары ол чонны ӱлгӱлерінде тутчалар. 43 Че сірернің араларыңда іди полбазын. Кем сірернің араңарда иң улии поларға сағынча, ол прайзына чалӌы поларға кирек. 44 Паза кем сірернің араңарда пастағызы поларға сағынча, ол прайзына хул поларға кирек. 45 Кізі Оолғы ідӧк Позына нымысчы ползыннар тіп килбеен. Ол, Позы пасхаларына нымысчы полып, кізілернің ӱчӱн Позының тының тоолирға килген».

Харах чох Вартимейнің кӧр сыхханы

46 Анаң олар Иерихонзар килгеннер. Хачан Иисус Позының ӱгренңілерінең паза кӧп кізілернең хада Иерихоннаң сыхчатханда, чол хазында Тимейнің оолғы, харах чох Вартимей, кіленіп, одырған. 47 Назареттең сыххан Иисустың парчатханың истіп салып, ол хысхырған: «Давид тӧлі, Иисус, мині айадах!» 48 Кӧп кізі аны, сым ползын тіп, тысхан, че ол улам тың хысхырған: «Давид тӧлі! Мині айадах!» 49 Иисус, тохти тӱзіп, аны хығыр килерге чахаан. Ол харах чох кізіні хығырып, чоохтааннар ағаа: «Чалтанма! Тур! Ол сині хығырча». 50 Ол тастындағы кип-азаан суурыбысхан, тур киліп, Иисуссар пас килген. 51 Иисус аның сурған: «Ниме кирек сағаа Миннең?». Харах чох кізі Ағаа нандырған: «Ӱгретчі! Мині кӧрер иде имнебіс». 52 Иисус ағаа теен: «Пар, синің киртінгенің сині имнеді». Сах андох ол кізі кӧр сыххан, анаң чолчд Иисустың соонңа парған.

Иисустың Иерусалимзер улуғласнаң кіргені

11:1 Иерусалимге чидіп одырғанда, Елеон тағның хыриндағы Виффагия паза Вифания аалларзар чағдап килгенде, Иисус Позының ӱгренӌілерінің ікізін алныңзар ызыбысхан. 2 Оларға чоохтаан: «Пістің алныбыстағы аалзар парыңар. Андар читсер, кізі мӱнмеен чиит осёлны палғап салғаның таап аларзар. Аны, систіп алып, пеер чидін киліңер. 3 „Сірер ниме итчезер?" - тіп піреезі сурза, сірер нандырыңар: „Ол Хан Худайыбысха кирек, Ол аны анаң нандыра ызыбызар"». 4 Ӱгренңілері, аалзар парып, тасхар ізік алныңда палғап салған чиит оселны тапханнар. Анаң аны систіп алғаннар. 5 Оларны кӧрген кізілер сурғаннар: «Сірер ниме итчезер? Ноға осёл палазын систіп алдыңар?» 6 Ӱгренңілер Иисус чоохтаан чіли нандыр пиргеннер. Кізілер оларны позыдыбысханнар. 7 Осёл палазын, Иисуссар ағыл киліп, аның арғазына постарының кип-азахтарын салыбысханнар. Иисус осёлға мӱнібіскен. 8 Кӧп кізілер чолда постарының кип-азахтарын часханнар паза пасхалары ағастар салааларын, кизіп, чолға салғаннар. 9 Аның алныңңа паза соонӌа парчатхан чон хысхырған: «Осанна! Ӧӧркі Чайаан адынаң килчеткен кізі аарлалзын! 10 Пістің Давид пабабыстың Хан Худай адынаң килчеткен Ӱлгӱзі аарлалзын! Осанна тигірдегілерге!» 11 Иерусалимзер кір киліп, Иисус худай ӧргезінзер кірген. Прай ибіре кӧрглеп алған, че орай полчатханда, он ікі ӱгренчізінең хада Вифаниязар парыбысхан.

Смоковница ағазын харғааны

12 Пір кӱнінде Иисус ӱгренңілерінең хада, Вифаниядаң сығып, чолча парчатханда, астап парған. 13 Халын пӱрліг смоковница ағазын Ол ырахтынох кӧр салған. Пірее чистек таап аларға тіп, Ол андар чағын парған, че чистектер пысхалахтаңар, пӱрлердең пасха пір дее ниме таппаан. 14 Андада Ол смоковниңа ағазын харғабысхан: «Пірдеезі паза хачан даа синің чистегің чібезін». Аның ӱгренңілері ол сӧстерні искеннер. 15 Иерусалимзер килгенде, Иисус, худай ӧргезінзер кір киліп, анда садығ итчеткен паза нименоо алчатхан кізілерні сығара сӱр сыххан паза ахча орнасчатханнарның столларын, голубоктар сатчатханнарның сіреелерін тӱңдерібіскен. 16 Худай ӧргезінӌе постарының ниме-нооларынаң ирт чӧрчеткен кізілерге тоғыр полған. 17 Анаң оларны ӱгрет сыххан: «Піди пазылған нимес пе: „Минің турам прай чоннарға пазырӌаң тура тіп адалар?" Сірер, тізең, аны сайбағӌыларның туразына айландыр салғазар». 18 Аны истіп, ӱлгӱ ӱгретчілері паза улуғ абыстар Аны ӧдірӌең ондай тілеп сыхханнар, че прай чон, Аның ӱгредиине чапсыпчатханнаңар, олар Иисустаң хорыхханнар. 19 Орай полыбысханда, Иисус городтаң сых парыбысхан.

Хуруп парған смоковница

20 Иртен олох чолӌа парчатханда, олар пайаағы смоковниңа ағастың прай хуруп парғаның кӧр салғаннар. 21 Аны сағын киліп, Пётр Иисусха теен: «Ӱгретчі! Кӧрдек Син харғаан смоковница прай хуруп партыр». 22 Иисус оларға нандырған: «Худайға киртініс ал чӧріңер. 23 Сынны чоохтапчам сірерге, кем тігі таға „кӧдіріл киліп, суға тӱс пар" тізе, олох туста чооғы хоостыра поларына пір дее ікінӌілебин, прай чӱреенең киртініп, чоохтаза, ол ниме толдырыл парар. 24 Аннаңар чоохтапчам сірерге, Худайға пазырып, сірер ниме дее сурзар, киртініңер, ол ниме толдырылар. 25 Худайға пазырчатсар, піреезіне тарынған ползаңар, аның пырозын тастаңар. Андада Тигірдегі Адаңар сірернің чазыхтарыңны ідӧк тастир. 26 Оларның пырозын тастабазар, сірернің Титірдегі Адаңар сірернің чазыхтарыңны ідӧк тастабас».

Хайдаңдыр Иисустың ӱлгӱзі?

27 Олар пазох Иерусалимзер килгеннер. Иисус худай ӧргезінде пас чӧрчеткенде, Аныңзар улуғ абыстар, ӱлгӱ ӱгретчілері паза ах сағаллар пас килгеннер. 28 Анаң Ағаа чоохтааннар: «Кемнің ӱлгӱзінең Син прай пу нимелерні итчезің? Іди идер ӱлгӱні Сағаа кем пирген?» 29 Иисус оларға нандырған: «Мин дее сірердең аннаңарох сурарбын. Сірер нандыр пирзер, пу нимелерні хайдағ ӱлгӱнең итчеткенімні чоохтабох пирербін. 30 Иоанның кірӧске тӱзіргені кізілердең ме алай Худайдаң ма? Нандырыңар Мағаа». 31 Олар, тізең, удур-тӧдір чоохтас сыхханнар: «Худайдаң тізебіс, Ол тир: «Андағда сірер ноға ағаа киртінмеезер?» 32 «Кізілердең», - тіп нандырарға чоннаң хорыхханнар. Прай чон Иоанны ухаанӌы тіп санаан. 33 Анаң Иисусха піди нандырғаннар: «Пілбинчебіс». Андада Иисус оларға теен: «Мин дее чоохтабаспын сірерге, пу нимелерні хайдағ ӱлгӱнең итчеткенімні».

Виноград ӧскірчецнердецер кип-чоох

12:1 Анаң Иисус оларға кип-чоохтар чоохтап сыххан: «Пір кізі виноград одыртып салтыр. Аны ибіре сиденнебіскен, виноград суун ағысчаң оймах хас салған паза хадағ башнязын пӱдірген. Анаң, виноград ӧскірчеткен кізілерге ол чирні чалға пирібізіп, позы чӧрібіскен. 2 Анаң виноград пыс парғанда, ол кізі позының чалчызын виноград ӧскірӌеңнерзер позының ӱлӱзін ал килерге ызыбысхан. 3 Олар, тізең, чалчызын тудып алып, соғып, пір дее ниме пирбин, нандыра ызыбысханнар. 4 Ээзі кізі пазох пасха чалчызын ысхан. Ол чалңызын, пазын таснаң чара саап, хыйыхтап, нандырыбысханнар. 5 Ол кізі пасхох чалңызын ысхан. Анзын ӧдір салғаннар. Аннаң даа пасха ысхан чалчыларның піреезін, соғып, нандырғаннар, піреелерін, тізең, ӧдір салғаннар. 6 Аның хынған чалғыс оолғы полтыр. Халғанчызын виноградха аны ысча: „Минің оолғымнаң чалтанарлар, арса". 7 Че виноград ӧскірчеңнер пос аразында чоохтазы-бысханнар: „Пу аның пабазының пайын холға алӌаң чалғыс оолғы. Аны ӧдір салзабыс, прай пайы пістің холға кірер". 8 Аның оолғын, тудып алып, ӧдір салғаннар. Анаң сӧӧгін оортах тастабысханнар. 9 Хайди полар амды виноградник ээзі? Киліп, ол виноград ӧскірчеңнерні ӧдір салып, виноградникті, тізең, пасха кізілернің холына пирібізер. 10 Нӧӧс, сірер Ызых Пічіктерде хығырбаазар: „Пӱдірігңілер хыйа тастаан тас, соонаң уғаа кирек пол парған. 11 Анзы - Худайдаң, пістің хараабысха ол улуғ чапсыс"». 12 Фарисейлер Иисусты тудып аларға сағынғаннар, че чоннаң хорыхханнар. Олар пу кип-чоох олардаңар чоох-талғаның сизін салғаннар. Анаң, аны артыс салып, хыйа парыбысханнар.

Ханнин — ханға

13 Че соонаң Иисуссар хай-пірее фарисейлерні паза иродианнарны ысчалар. Олар Иисусты саба чоохтанарын китееннер. 14 Пас киліп, Иисусха чоохтааннар: «Ӱгретчі! Піс пілчебіс, Син сын хылыхтығ кізізің, пірдеезінің кӧңніне кірерге сағынминчазың. Кем дее полза, Син Худай чолындағы сын киректердеңер ӱгретчезің. Ханға албан тӧлирге кирек пе алай чох па піске?» 15 Че Иисус, оларның кӧйтіктенчеткеннерін сизініп, оларға чоохтаан: «Нимее Мині хыңаландырчазар? Мағаа динарий ахчаны ағыл киліңер. Мин кӧріп алим аны». 16 Олар ахча ағыл килгеннер. Иисус оларға теен: «Кемнің мында сомы паза ады хоостал парған?» Олар нандырғаннар «Хан кізіни». 17 Андада Иисус оларға чоохтаан: «Ханның нимезін ханға пиріңер, Худайнин - Худайға». Ағаа прайзы хахаан. 18 Анаң Иисуссар саддукейлер пас килгеннер. Олар ӧлім соонда кізі тірілбинче тіӌеңнер. Амды Иисустаң олар сурғаннар: 19 «Ӱгретчі! Моисей піске піди пасхан: „Пірее кізінің харындазы ӱреп парып, позының пала чох ипчізін артыс салза, аны туңмазы алып, харындазының тӧӧлін узарадарға кирек." 20 Читі харындас полған полтыр. Иң улуғлары, ипчі алған соонда, ӱреп партыр. Палазы чох полған. 21 Аның ипчізін ікінӌі харындазы алған. Ідӧк, пала тӧрітпин, ӱреп парған. Ӱзінчізі ол ипчіні алып, ӱребӧк парған. 22 Іди аны читі харындас, соон сӱрістіре алып, чуртаптыр, че прайлары пала артыспин, ӱрееннер. Прайзының соонаң ол ипчі ӱребӧк парған. 23 Ам олар прайзы тіріл килзелер, ол ипчі хайзыни поларға кирек? Прай читі харындас ол ипчінің ирі полған нооза». 24 Иисус оларға нандырған: «Сірер, Ызых Пічіктерні дее, Худай кӱзін дее пілбин, іди алӌаасха кірчезер, неке? 25 Кізілер ӧлген соонда тірілзелер, олар паза ипчі албинчалар, ирге дее парбинчалар. Олар тигірдегі ангеллер осхас поларлар. 26 Ӧліглер тірілерінеңер сірер Моисейнің пічиинде хығырбаазар ба, хаңан Худай кӧйчеткен ыдырбан хыринда теен: „Мин Авраамның Худайы, Исаактың Худайы паза Иаковтың Худайы полчам?" 27 Ол ӧліглернің Худайы полбинча, че Ол тіріглернің Худайы полча. Сірер уғаа алңаастапчазар».

Иң улуғ чахығ

28 Ӱлгӱ ӱгретчілерінің пірсі, оларның таласханнарын паза Иисустың маңат нандырчатханың истіп, Иисустаң сурған: «Чахығларның хайзы иң улуғдыр?» 29 Иисус ағаа нандырған: «Иң улуғ чахығ мындағ: „Ис, Израиль! Пістің Худайыбыс чалғыс ла Худай полча. 30 Син Худайға прай чӱрееннең, прай тыныңнаң, прай сағызыңнаң паза прай кӱзіңнең хынарға кирексің." Мына иң улуғ чахығ! 31 Ікінӌізі ағааох тӧӧй: „Пасха кізее позыңа чіли хын". Пу ікі чахығдаң улуғ ниме чоғыл». 32 Ӱлгӱ ӱгретчізі Иисусха теен: «Чахсы нандырдың, Ӱгретчі! Орта тіпчезің Син, Худай пір ле полча, Аның пасха пір дее Худай чоғыл. 33 Ағаа прай чӱрекнең, прай сағызыңнаң, прай тыныңнаң, прай кӱзіңнең хынары паза пасха кізее посха чіли паарсиры прай ағылған паза тайыға салған нимелердең артых полча». 34 Иисус кӧрче, ол ӱлгӱ ӱгретчізі хыйға чоохтапча. Аннаңар, ағаа теен: «Син Худай Хан Чирінең ырах нимес полтырзың». Аның соонаң Иисусха сурығлар пирерге пірдеезі тідінмеен.

Ӱлгӱ ӱгретчілерінең китеніңер

35 Анаң Иисус, кізілерні худай ӧргезінде ӱгредіп, чоох-таан оларға: «Хайди тіпчелер ӱлгӱ ӱгретчілері, Христос Давидтің тӧлі полча тіп? 36 Давид позы, Худай Худына кӧңнін кӧдіріп, чоохтанған: «Худай чоохтаан минің Хан Худайыма: „Минің оң саримда одыр сал, Мин Синің ыырңыларыңны азахтарыңның алныңа салғанңа"». 37 Іди Давид позы Аны Хан Худайым тіп адапча. Хайди Иисус аның тӧлі пол парар?» Кӧп чон Аны ӧрчіліг искен. 38 Ол позының ӱгредиинде ідӧк чоохтаан: «Ӱлгӱ ӱгретчілерінең китеніңер. Олар узун киптер кизерге паза кізілер чыылысхан чирлерде алғыстар аларға хынчалар. 39 Синагогаларда паза тойларда пастағы орыннарда одырчалар. 40 Олар ӧкіс ипчілерні ӱретчелер, кізі кӧзіне ӱр пазырчалар. Олар Худайның чарғызына кірерлер».

Ӧкіс ипчінің хозымы

41 Анаң Иисус, сыйыхтар салчатхан ідістің хыринда одырып, кізілер ол ідіссер хайди ахча салчатханнарын кӧрчеткен. Пай кізілер кӧп ахча тастапчатханнар. 42 Че пір чох чуртапчатхан ӧкіс ипчі, киліп, ікі оох ахча салыбысхан. 43 Иисус, Позының ӱгренңілерін хығырып, оларға чоохтаан: «Сынны чоохтапчам сірерге, пу ӧкіс ипчі ідіссер прайзының кӧп ахча салыбысхан. 44 Кӧбізі постарының артых ахчаларын салғаннар, че ол ӧкіс ипчі, тізең, чіңең ниме алңаң парчох ахчазын салыбысхан.

Иерусалимнің иңзерілердеңер ухаанӌылааны

13:1 Иисус худай ӧргезінең сыхчатханда, Аның ӱгренңілерінің пірсі Ағаа теен: «Ӱгретчі! Кӧр хайдағ илбек тура, хайдағ маңат тастардаң иділген ол!» 2 Иисус ағаа нандырған: «Син илбек тураны кӧрчезің? Мында, прай ниме иңзеріліп, тас ӱстӱнде тас халбас». 3 Анаң Иисус худай ӧргезінең тоғыр Елеон тағда одырчатханда, Пётр, Иаков, Иоанн паза Андрей Иисустаң ағылахха сурғаннар: 4 «Ол ниме хачан пол парар паза пу ниме полар алныңда піске хайдағ танығ кӧрінер?» 5 Иисус оларға піди нандырған: «Китеніңер, пірдеезі сірерні алчаахтыр салбазын. 6 Кӧп кізі минің адымнаң кил турар, „Мин - Христос-пын!" тир, анаң кӧбізін алаахтырар. 7 Хачан сірер чаадаңар алай чаа полардаңар чоохтарны ис салзар, хорыхпаңар. Ол полңаң ниме. Анзы тӱгенңізі полғалах полар. 8 Чоннар чоннардаң тоғыр кӧдірілібізерлер, ханнар ханнардаң тоғыр чаалазарлар. Хай-пірее чирлерде чир тітірир паза хоорылыс, ӧзӧгіс пол сығар. Анзы ағырығларның пасталғаны полар.

Ирее паза чобағ полар

9 Че сірер китеніңер. Сірерні чарғаа тартарлар паза синагогаларда соғарлар. Минің ӱчӱн сірерні, Миннеңер киречілирге тіп, ханнарның паза пиглернің алныңда турғызарлар. 10 Че иң пурун прай чоннарны Чахсы хабарға ӱгредерге кирек. 11 Хаңан сірерні, тудып алып, чарғаа апарчатсалар, нимедеңер чоохтирынаңар азындыра сағыссырабаңар. Ол туста сірерге хайдағ сағыс пирілзе, аны чоохтап турыңар. Аны сірер нимес, че Худай Худы чоохтанар. 12 Харындазы харындазын паза пабазы олғаннарын ӧдірер. Паза олғаннары паба-іңезінең тоғыр кӧдірілерлер, оларны ӧлімге пирерлер. 13 Минің ӱчӱн сірерні прайзы хырт кӧрер. Че кем, халғанңызына теере прай сыдазар, ол арачылан халар. 14 Хаңан ухаанңы Даниил чоохтаан хоостыра полбас чирде кізі кӧрңее чох ай-пораан полчатса - хығырығңы пілерге кирек, ниме полчатханың - андада иудеядағылар тағларзар тизерге киректер. 15 Кем тура хырында полар, ол ибінзер ниме-ноо аларға кірбезін. 16 Кем чазыда полар, кип-азаан аларға нандыра килбезін. 17 Ол кӱннерде хыйал полар тойлығ паза час пала азырапчатхан ипчілерге. 18 Пу ниме хысхызын пол парбазын тіп, пазырыңар. 19 Ол кӱннерде, Худай чир-чайаан пӱдіргеннең пеер амға теере полбаан улуғ чобалыс полар. Соонаң даа андағ хорғыстығ полбас. 20 Худай ол хорғыстығ кӱннерні хызырбаан полза, пірдеезі арачылан полбасчых. Че Позының таллап алған кізілерінің ӱчӱн ол кӱннерні хызырған. 21 Андада сірерге піреезі: „Мына Христос мында" алай „Ол анда" тізе, киртінмеңер. 22 Андада чой христос паза чой ухаанчылар сых килерлер. Турыстығ кізілерні алаахтырарға тіп танығлар паза хайхастар кӧзідерлер. 23 Сірер, тізең, китеніңер. Мин сірерге азынадох прай чоохтап пирдім. 24 Ол саай пол парған кӱннерде кӱн пӱлестел парар паза ай чариин пирбес. 25 Чылтыстар тигірдең тоолап парарлар. Тигірде прай ниме алыс чӧрібізер. 26 Олар андада Кізі Оолғын пулуттарда илбек кӱстіг паза саблыт пас парчатханың кӧр саларлар. 27 Андада Ол Позының ангеллерін ызыбызар. Олар прай чир ӱстӱндегі Позының турыстыгларын чығарлар.

Хаӌан полар ол кӱн?

28 Кӧзідімге, смоковница ағазын алыңар: аның салаалары, нымзах полыбызып, пӱрленіп пастабыссалар, чайғы чидіп одырғаның пілерзер. 29 Ідӧк сірер, анзын кӧріп, ол мында чағын, ізік хыринда читкенін піліңер. 30 Сынны чоохтапчам сірерге, амғы тӧл парғалахох, пу прай ниме пол парар. 31 Чир паза тигір чіт парар, че Минің сӧстерім халар. 32 Ол кӱн алай тус хаңан поларынаңар Кізі Оолғы даа, тигірдегі ангеллер дее - пірдеезі пілбинче. Адабыс ла пілче. 33 Ол тус хаңан пол парарын пілбинчеткенде, кӧріңер, узубаңар, пазырыңар. 34 Хайди пірее кізі, ырах чорыхха парчатса, позының нымысчыларының полғаныңа ла ниме идерге паза хадағңаа сиргек поларға чахып салча. 35 Аннаңар сиргек полыңар. Сірер пілбинчезер нооза, хаңан чиде тӱзер тура ээзі: иирде, алай хараа, алай иртен, петух тапсирда ба, алай кӱнӧрте бе. 36 Кинетін чиде тӱзіп, сірерні узупчатханнарыңны тудып албазын. 37 Сірерге чоохтапчатхан нимені прайзына чоохтапчам: узубаңар.»

Иисустаң тоғыр чӧптезіг

14:1 Пасха паза Ачытпаан халастар ӱлӱкӱннеріне ікі кӱн халған. Улуғ абыстар паза ӱлгӱ ӱгретчілері Иисусты, пірее кӧйтікнең тудып алып, ӧдір саларға сағыныбысханнар. 2 «Че чонны тарындырбас ӱчӱн, ӱлӱкӱн тузында ла нимес», - тіп олар чоохтасханнар.

Иисусты сӱртклеені

3 Иисус Вифанияда ходырлығ Симонның туразында стол кистінде одырчатханда, андар алавастр ідістіг ипчі кір килген. Ідісте нард ӧзімінең сығарған аарлығ хайах полған. Ипчі, ол ідісті одып, Иисустың пазына ол хайахты урған. 4 Піреелері, ачырған парып, удур-тӧдір чоохтасханнар: «Нимее ол аарлығ хайахты піди ӱретче? 5 Ол хайахты ӱс чӱс динарийдең артығох садыбызып, ахчазы чох кізілерге ӱлеп пирерчік», - тіп перініскеннер. 6 Че Иисус теен: «Чоохтанмаңар ағаа. Ноға хырысчазар аны? Ол Мағаа чахсы ниме ит пирген. 7 Чох кізілер сірернің хыриңарда хаңан даа поларлар. Сірер оларға хаңан даа полыс поларзар. Че Мин сірернең хада тӧӧле полбинчам. 8 Пу ипчі итчең киреен ит салған. Мині чыырға тимнеп, азынада Мағаа аарлығ хайах сӱрткен. 9 Сынны чоохтапчам сірерге, Чахсы хабарны хайдағ даа чирде ӱгрензелер, анда пу ипчідеңер паза ниме иткенінеңер прай чоохталар».

Иуда улуғ абыстарда

10 Аның соонаң Иуда Искариот, он ікі ӱгренңінің пірсі, Иисусты садыбызарға улуғ абыстарзар парған. 11 Аны истіп салып, улуғ абыстар ӧрін парғаннар паза ағаа ахча пирер полғаннар. Анаң Иуда Иисусты оларның холына пирібізерге оңдай тілеп сыххан.

Пасха чиизі

12 Ачытпаан халастар ӱлӱкӱннің пастағы кӱнінде, тайыға хураған соғыбысханнарында, ӱгренңілері Иисустаң сурғаннар: «Син иирде хайда азыранарзың? Піс, андар парып, чіӌең ниме тимнебізербіс». 13 Иисус, Позының ікі ӱгренңізін ысчадып, оларға чоохтаан: «Парыңар городсар. Ырағада суғ апарчатхан кізее тоғазарзар. Аның соонңа парыңар. 14 Анаң ол кірген тураа соонңа кіріп, тура ээзіне чоохтаңар: „Ӱгретчі Позының ӱгренңілерінең хада ӱлӱкӱн астамағын чирге орын сурча". 15 Ол сірерге тӧрдегі улуғ пӧлікті кӧзіт пирер. Анда прай ниме тимде полар. Андох піске чіңең ниме тимнеп саларзар». 16 Ӱгренӌілері, городсар парып, Иисус чоохтаан чіли, ол тураны таап алғаннар. Анда ӱлӱкӱн ас-тамағын тимнебіскеннер. 17 Иир пол килгенде, Ол он ікі ӱгренңізінең хада килген. 18 Олар стол кистінде одырып, азыранчатханда, Иисус чоохтанған: «Сынны чоохтапчам сірерге, Миннең хада азыранчатханнарның пірсіңер, Мині ыырңылар холына пирібізер». 19 Ӱгренӌілері хомзын парғаннар, пірсі пірсінең соонңа Иисусха тееннер: «Мин ол нимеспін?» 20 Ол ӱгренңілеріне нандырған: «Ол он ікі кізінің пірсі, хайзы Миннең хада айахта халазын сӱртклепче. 21 Кізі Оолғы, итседе, Ағаа пирілген ӱлӱс хоостыра парар. Че Кізі Оолғын садыбысхан кізее хыйал полар. Ол кізі тӧрібеен полза, артых поларңых». 22 Олар азыранчатханда, Иисус, халас алып, алғабысхан. Анаң, сындырып, ӱгренңілеріне пирген: «Алыңар, чіңер. Пу Минің Идім». 23 Анаң чірче алып, алғабысхан соонда, аны ӱгренңілеріне пирген. Прайзы аны іскеннер. 24 Иисус оларға теен: «Пу Минің Наа Молңағ Ханым, кӧп кізілернің ӱчӱн ол тӧгілер. 25 Сынны чоохтапчам сірерге, ам Мин пу виноград арағазын паза мында іспеспін. Наа арағаны Мин Худай Хан Чирінде ле ізербін».

Пётрның хыйа поларынаңар чоохтааны

26 Анаң Худайны сабландырчатхан сарыннар сарназып ала, олар Елеон тағзар парғаннар. 27 Иисус оларға теен: «Пу хараазын сірер прайзыңар Мині тастирзар. Хайди пазылча: „Хадағңыны чох ит салза, хойлары пытырас парар". 28 Че Мин, тірілген соонда, сірерні Галилеяда сағирбын». 29 Пётр Иисусха чоохтаан: «Сині прайлары даа тастаза, мин тастабаспын». 30 Андада Иисус ағаа теен: «Сынны чоохтапчам сағаа, син пуох хараазын, петух ікі хати тапсаанңа, Миннең ӱс хати хыйа поларзың». 31 Че Пётр хатап-хатап чоохтаан: «Мағаа Синнең хада ӧлерге киліссе дее, мин Синнең хыйа полбаспын». Пасха ӱгренңілері ідӧк чоохтанғаннар.

Иисус Гефсиманияда

32 Анаң олар Гефсимания теен аалзар читкеннер. Иисус Позының ӱгренңілеріне теен: «Мин пазырып алғанңа, мында одыр турыңар». 33 Позынаң хада ол Пётрны, Иаковты паза Иоанны алып алған. Анаң Позы хомзынып паза мӧңіссіреп пастаан. 34 Ӱгренчілеріне теен: «Минің тыным чоо хомзынча. Пол турыңар мында, узубаңар». 35 Ырах таа парбин, Иисус, чирге тӱзіп, оңдай полчатса, ол килчеткен ӱлӱс Ағаа тӱспезін тіп, пазыр сыххан. 36 Піди чоохтанған: «Адам Минің! Син прай ниме ит полчазың. Пу килчеткен ӱлӱсті Миннең хыйа идібіс. Че Син, Мин сағынғанни итпин, Позың кӧңнін толдыр тур». 37 Айлан киліп, кӧрзе, ӱгренңілері узупчалар. Андада Пётрға чоохтаан: «Симон, син узупчазың ма? Пір час таа узубин одыр полбадың ма? 38 Хыңаланысха кірбес ӱчӱн, узубаңар, пазырыңар. Кізі тыны кӱстіг, че ит-сӧӧгі уйан». 39 Пазох хыйа парып, пайаағох сӧстерні чоохтанып, пазыр сыххан. 40 Анаң нандыра киліп, Иисус оларның хатабох узуп-чатханнарын кӧр салған. Харахтарын даа ас полбин-чатханнар. Олар Ағаа ниме нандырарын даа пілбееннер. 41 Анаң Ол, ӱзінңізін киліп, пазох оларға чоохтаан: «Сірер ам даа, тынанып, узупчазар ба? Чидер. Тус чит килді. Кізі Оолғы чазыхтығларның холына пирілче. 42 Турыңар, парааңар. Мині садыбысхан кізі киліп одыр».

Иуданың садышаны

43 Олох туста, Иисус чоохтанчатхандох, он ікі ӱгренңінің пірсі, Иуда кӧріне тӱскен. Аныңаң хада холларында хылыстығ паза ӧзектіг кӧп кізілер полғаннар. Оларны пеер улуғ абыстар, ӱлгӱ ӱгретчілері паза ах сағаллар ысханнар. 44 Иуда ол кізілерге теен: «Мин, парып, Кемні охсаныбызам, ол Иисус полар. Парып, Аны хабаңар, сибер апарыңар». 45 Анаң ол, сах андох Иисуссар пас киліп, теен: «Ӱгретчі! Ӱгретчі!» Анаң Аны охсаныбысхан. 46 Тирігліг кізілер Иисусты, хаап алып, апар сыхханнар. 47 Хости турчатханнарның пірсі, хылыс сығар киліп, улуғ абыстың чалчызының хулаан ӱзе саабысхан. 48 Андада Иисус оларға чоохтаан: «Сірер Миннең тоғыр, улуғ сайбағңыны ла тударға килген чіли, хылыстығ паза ӧзектіг читтіңер. 49 Мин сірернең хада кӱннің сай худай ӧргезінде пол турғам. Мин сірерні ӱгреткем паза сірер Мағаа теңмеезер. Че Пічікте пазылған ниме - ол толзын». 50 Иисустың ӱгренңілері, Аны тастап, чӱгӱрібіскеннер. 51 Пір оол, чалаас идіне чабынңахнаң ораанып, Иисустың соонңа парған. Чааңылар аны тудыбох алғаннар. 52 Че ол, чабынӌағын оларның холында артыс салып, чалаас чӱгӱре халған.

Иисус ӧӧркі чарғы алныңда

53 Иисусты улуғ абыссар ағыл килгеннер. Прай улуғ абыстар, ах сағаллар паза ӱлгӱ ӱгретчілері пеер чыылысханнар. 54 Пётр, оларның соонңа оортахтаң сӱріс киліп, улуғ абыстың туразының сиден істіне кіріп алған. Анда чалңыларнаң хада от хыринда чылынған. 55 Улуғ абыстар паза ӧӧркі чарғы, Иисустаң тоғыр пірее пыро таап алып, Аны ӧлімге чарғылирға харасханнар. Че пір дее сылтағ таап полбин турғаннар. 56 Кӧп кізі Аның тоғыр чой оңдайнаң киречілеен, че оларның чоохтанғаннары нимее чарабаан. 57 Хай-піреелері, турып, Аның тоғыр ӧнетін сын нимес нимелер чоохтааннар: 58 «Піс Аның піди теенін искебіс: „Мин пу кізі холларынаң иткен худай ӧргезін иңзерібізербін, анаң ӱс кӱн аразына кізі холы теңмеен пасханы идібізербін"». 59 Че пу даа тайма чоох читкіңі полбаан. 60 Андада улуғ абыс, аның алныңда турыбызып, сурған: «Ноға Син пір дее ниме нандырбинчазың? Хайдағ чоохтар олар Синің тоғыр сығарчалар?» 61 Че Иисус сым на полған, пір дее ниме нандырбаан. Улуғ абыс пазох сурған: «Синзің ме Христос, Худай Оолғы?» 62 Иисус нандырған: «Я, сірер Худайның оң саринда одырчатхан паза тигірдегі пулуттарда килчеткен Кізі Оолғын кӧрерзер». 63 Андада улуғ абыс, кип-азаан тали тартып, хысхырған: «Піске паза хайдағ киречілер кирек? 64 Сірер истер, хайди Ол Худайны нимее салбинча. Сірер хайди сағынчазар?» Олар прайзы Аны, пыролыға санап, ӧлімге чарғылабысханнар. 65 Піреелері Ағаа чаба тӱкӱр сыхханнар, хараан сӱбӱрекнең палғабызып, Аны сапхлааннар, анаң чоохтанғаннар: «Че амды ухаанңылап кӧр, кем сапты?» Нымысчылары даа Иисусты наахтарынаң сапханнар.

Пётрнъщ хыйа полганы

66 Пётр сиден істінде полчатханда, андар улуғ абыстың чалңы полчатхан ипчі пас килген. 67 Пётрны от хыринда чылын турчатханың кӧріп, ол ипчі чоохтанған: «Син дее Назареттең сыххан Иисуснаң хада полғазың». 68 Че Пётр, тоғыр саап, чоохтанған: «Піл полбинчам нимедеңер син чоохтапчазың?» Позы ограда ізігі хыринзар паза халған. Ол туста петух тапсабысхан. 69 Ол чалңы ипчі, соонаң Пётрны кӧріп, хости турчатхан кізілерге пазох чоохтаан: «Пу кізі оларның пірсі полча». 70 Пётр пазох тоғыр сапхан, че тӱрчедең анда турчатхан кізілер Пётрға чоохтан сыхханнар: «Син сынап таа оларның кізізі поларзың. Чооғың даа хоостыра син Галилеядаңзың». 71 Пётр, пазырып, сӧс пирген: «Мин пілбинчем Ол кізіні, кемненер сірер чоохтапчазар». 72 Ол туста петух ікінңізін тапсабысхан. Андада Пётрның сағызына Иисустың чооғы кір килген «Петух ікі хати тапсаанңа, син Миннең ӱс хати хыйа поларзын». Пётр ылғабысхан.

Иисус Пилаттың алныңда

15:1 Иртен пол килгендӧк, улуғ абыстар, ах сағаллар паза ӱлгӱ ӱгретчілері паза прай ӧӧркі чарғы, чӧптескен соонда, Иисусты палғап алып, Пилатсар апарғаннар. 2 Пилат Иисустаң сурған: «Син Иудей ханы полчазың ма?» Иисус ағаа нандырған: «Син іди чоохтапчазың». 3 Улуғ абыстар Иисусты кӧп нимеде пыролааннар. 4 Пилат пазох Иисустаң сурған: «Син пір дее ниме чоохтабинчазың? Кӧрчезің, хайдағ кӧп пыро Сағаа артчалар?» 5 Иисус андада даа пір дее ниме нандырбинчатханнаңар, Пилат таңнаан. 6 Полған на ӱлӱкӱнде Пилат, чон сурынған хоостыра, харибдең пір кізі позыдыбыс турған. 7 Ол туста харибде, сайбағңыларнаң хада Варавва теен кізі полған. Олар хоорылыстар тузында кізі ӧдір салтырлар. 8 Амды чыылған чон Пилатты ол кибірні иртірерге сурынған. 9 Пилат олардаң сурған: «Позыдим ма сірерге Иудей ханың?» 10 Ол улуғ абыстар Иисусты, істі чохтанып, аның холына пирібіскеннерін пілген. 11 Че улуғ абыстар, Иисустың орныңа Варавваны позыдыбызарға сурынзыннар тіп, кізілерні кӧӧктіргеннер. 12 Пилат пазох кізілерге айланған: «Хайди идим сірер Иудей ханы тіпчеткен кізіні?» 13 Кізілер пазох хысхырыс сыхханнар: «Хазирға Аны!» 14 Пилат оларға теен: «Хайдағ хомай ниме ит салған Ол сірерге?» Че кізілер улам тың хысхырғаннар: «Хазирға Аны!» 15 Андада Пилат, чон кӧңнінче полып, Варавваны позыдыбысхан, че Иисусты, соғып, анаң кіреске хазап саларға чахаан. 16 Чааңылар, тізең, Иисусты ах ӧрге туразар, преторияның істінзер апарыбысханнар паза Аны хадарарға прай полкты чыып алғаннар. 17 Анаң Ағаа узун хызыл кӧгенек кизіртібіскеннер, анаң харағаннаң венок палғап алып, Аның пазына салыбысханнар. 18 Ағаа хысхырғаннар: «Изен ползын, Иудей ханы!» 19 Чааңылар Аны пазынаң тайахнаң сапхлааннар, чаба тӱкӱргеннер паза, тізекке тӱзіп, Ағаа, кӱрленіп, пазырғаннар. 20 Читіре иреелеп алып, олар Иисустың хызыл кӧгенеен суурыбысханнар, анаң, Позының кип-азахтарын кизіртібізіп, Аны кіреске хазирға апарғаннар.

Голгофада

21 Чазыдаң парчатхан Киринеядағы Симонны, Александрнаң паза Руфьтың пабазын, Иисустың кірезін апардырғаннар. 22 Иисусты Голгофа теен чалаас тигейзер ағыл килгеннер. 23 Иисусха смирна хайахтығ араға ізерге пиргеннер, че Ол іспеен. 24 Анаң, Иисусты кіреске хазап салып, чааңылар, ӱлег ӱлӱзі тастап, Аның кип-азаан ӱлескеннер. 25 Аны кіреске хазаан туста кӱн сыхханнаң ӱс час тузы полған. 26 Иисусты пыролап, «Иудей ханы» тіп пазыл парған чардычахты кіреске хазааннар. 27 Иисуснаң хада ікі сайбағңыны хазап салғаннар. Пірсін Аның оң саринда, ікінңізін, тізең, сол саринда. 28 Ызых Пічікте азылған ниме толған: «Сайбағңыларға тиңнелген». 29 Хыринңа парчатхан кізілер Иисусты сӧклеп турғаннар, пастарын чайхап, хысхырғаннар: «Эй, Син, худай ӧргезін, иңзеріп, ӱс кӱнге пӱдірӌең Кізі! 30 Арачыла Позыңны, тӱзіп ал кірестең!» 31 Улуг абыстар паза ӱлгӱ ӱгретчілері ідӧк хатхырысханнар, удур-тӧдір чоохтасханнар: «Пасхаларын арачылап турған, че Позын, тізең, арачылап полбинча! 32 Израиль ханы, Христос кірестең позып алзын. Андада, Аны кӧріп, піс киртінербіс». Иисуснаң хада хазаттырған сайбағӌылар ідӧк Аны сӧклееннер. 33 Алты час тузында прай чир ӱстӱнде харасхы полыбысхан. Іди тоғыс часха теере полған. 34 Тоғыс час тузында Иисус ӧтіг табыснаң хысхыра тӱскен: «Элои, Элои! Ламма савахфани?» Мынзы «Худайым, Худайым! Ноға Син Мині тастадың?» теені полча. 35 Мында хости турчатхан кізілер, ол сӧстерні истіп, чоохтасханнар: «Мына, Илияны хығырча». 36 Пір кізі, чӱгӱр парып, сӱбӱрекке уксус арағазын сигдіріп алып, аны узун сырғайға хаптырып, Иисусха ізерге сунған: «Кӧрербіс, килер бе Илия Аны кірестең суурарға?» 37 Иисус, тізең, хысхыра тӱзіп, тының позыдыбысхан. 38 Олох туста худай ӧргезінде кӧзеңе ӱстӱнең алтына читіре ікі чара талал парған. 39 Иисустаң тоғыр турған сотник Аның іди, хысхырып, тоозыл парғаның кӧріп, чоохтанған: «Пу Кізі сынап таа Худай Оолғы полтыр». 40 Мында оортахтын кӧр турған ипчілер дее полғаннар. Оларның аразында Мария Магдалина, Иосий паза кічіг Иаков харындастарның іңезі Мария паза Саломия полғаннар. 41 Олар Иисустың соонңа Галилеядаңох сығара килгеннер паза Ағаа полыс турңаңнар. Олардаң даа пасха Иерусалимзер килген кӧп кізілер полғаннар.

Иисусты чығаны

42 Суббота кӱн алныңдағы пятница кӱн иир пол килген. 43 Аримафеядаң пастыхтарның саблығ кізізі Иосиф читкен. Ол позы даа Худай Хан Чирі килерін сағаан. Ол туртухпин, Пилатсар кіріп, Иисустың сӧӧгін сурған. 44 Пилат Иисустың іди табырах ӱреп парғаныңа таңнап таа парған. Сотникті хығыр киліп, сурған: «Хаңан ӱреен Ол?» 45 Сотниктің чооғын истіп алып, ол Иисустың сӧӧгін Иосифке пирібіскен. 46 Иосиф, лӧн исті садып алып, Иисусты кірестең суурып, иске ораабысхан. Анаң хайада кирт салған хую істінде Аны сал салған. Хуюның ахсын улуғ таснаң пазыр салған. 47 Мария Магдалина паза Иосийнің іңезі Мария Иисусты хайда чығаннарын кӧргеннер.

Ипчілер хуруғ хую хыринда

16:1 Суббота кӱн ирт парғанда, Мария Магдалина, Иаковтың іңезі Мария паза Саломия, Иисустың сӧӧгін сӱртерге тіп, тадылығ чыстығ хайах садып алғаннар. 2 Неделяның пастағы кӱнінде, позырахта, иртен иртӧк, кӱн наа ла сыхчатханда, олар Иисустың хомдызынзар килгеннер. 3 Анаң удур-тӧдір чоохтасханнар: «Кем піске хую ахсын пазырған тасты оортах ит пирер?» 4 Кӧрібісселер, ол тасты кем-де хыйа ит салтыр. Ол, тізең, уғаа килкім полған. 5 Хую істінзер кір килгенде, анда оң саринда одырчатхан аппағас кип-азахтығ чиит оолны кӧр салып, уғаа тың чочып парғаннар. 6 Оол, тізең, оларға теен: «Хорыхпаңар миннең. Сірер кіреске хазаттырған Назареттең сыххан Иисусты тілепчезер. Ол тіріл килген, мында чоғыл. Мына чатхан орны. 7 Амды, парып, Аның ӱгренңілеріне паза Пётрға чоохтаңар. Иисус сірерні Галилеяда сағир. Анда сірер Аны, хайди Ол сірерге чоохтаан, кӧрерзер». 8 Ол ипчілер, хуюдаң сых киліп, андартын хыйа чӱгӱргеннер. Олар, уғаа тың хорых парып, пірдеезіне пір дее ниме чоохтабааннар.

Иисус ӱгренчілеріне кӧрінче

9 Неделяның пастағы кӱнінде иртен иртӧк тіріл килген Иисус пастап Мария Магдалинаа кӧрінген. Ол ипчідең Иисус хаңан-да читі чабал хутты сығара сӱрген. 10 Мария, парып, чобалып ылғасхлап одырчатхан ӱгренңілеріне прай чоохтап пирген. 11 Че олар Иисустың тіріл парғаның паза Марияның Аны кӧргеніне киртінмееннер. 12 Аның соонаң Иисус, хубулып алып, аалзар парчатхан ікі ӱгренӌізіне чолда тоғасхан. 13 Олар, айлан киліп, пасхаларына чоохтап пиргеннер. Че пу ікӧлеңе дее киртінмееннер. 14 Соонаң Иисус иирде азыранып одырчатхан он пір ӱгренчізіне кӧріне тӱскен. Ол ӱгренңілерін Позы тіріл килгенінеңер чоохха киртінмеен паза хатығ чӱректіглері ӱчӱн кӧксеен. 15 Анаң оларға чоохтаан: «Прай чир ӱстӱнңе чӧріп, Чахсы хабарға полған на тіріг нимені ӱгредіңер. 16 Кем, киртініп, кірӧске тӱзер, арачылан халар, кем киртінмес, ол чарғыладар. 17 Киртінчеткеннерге, мындағ таңма тӱзер: олар Минің адымнаң чабал хуттарны сӱрерлер паза наа тіллернең чоохтазарлар. 18 Олар, чыланнарны холнаң тударлар, оохтырчатхан нимелерні ізібісселер, хайтпастар паза ағырығ кізілерге холларын салзалар, аннары хазых пол пар турарлар». 19 Пу чоохтың соонда, Ол, тигірзер ӧӧрлебізіп, Худайның оң саринда одыр салған. 20 Ӱгренңілері, тізең, прай чир ӱстӱнңе чӧріп, Худай полызиинаң хайхастығ нимелер идіп, кізілерні киртіністіг иде ӱгреткеннер. Аминь.