The New Testament of our Lord and Saviour Jesus Christ
1 Исус Кристослöн ордпуыс петö Öвраамсянь, сэсся Давидсянь. Сылöн чужанвужйыс татшöм: 2 Öвраамлöн чужöма Исаак, Исааклöн – Яков, Яковлöн чужöмаöсь Иуда да сылöн вокъясыс. 3 Иудалöн чужöмаöсь Фарес да Зарей, налöн мамныс вöлöма Фамар. Фареслöн чужöма Есром, Есромлöн – Арам, 4 Арамлöн – Аминадав, Аминадавлöн – Наассон, Наассонлöн – Салмон. 5 Салмонлöн чужöма Вооз, сылöн мамыс вöлöма Ракав. Воозлöн чужöма Овид, сылöн мамыс вöлöма Руфа. Овидлöн чужöма Ессей, 6 Ессейлöн чужöма Давид öксы. Давид öксылöн чужöма Соломон, сылöн мамыс вöлöма Урийлöн гöтыр. 7 Соломонлöн чужöма Ровоам, Ровоамлöн – Авей, Авейлöн – Аса, 8 Асалöн – Иосафат, Иосафатлöн – Иорам, Иорамлöн – Озей. 9 Озейлöн чужöма Иоафам, Иоафамлöн – Аказ, Аказлöн – Езекей. 10 Езекейлöн чужöма Манассей, Манассейлöн – Амон, Амонлöн – Иосей. 11 Иосейлöн чужöма Иоаким, Иоакимлöн чужöмаöсь Еконей да сылöн вокъясыс. Тайö вöлöма Израиль войтырöс Вавилон муö вöтлытöдз на. 12 Вавилонö вöтлöм бöрын Еконейлöн чужöма Салафиль, Салафильлöн – Зоровавель, 13 Зоровавельлöн – Авиуд, Авиудлöн – Елиаким, Елиакимлöн – Азор. 14 Азорлöн чужöма Садок, Садоклöн – Аким, Акимлöн – Елиуд, 15 Елиудлöн – Елеазар, Елеазарлöн – Матфан, Матфанлöн – Яков. 16 Яковлöн чужис Öсип. Сылöн Мария гöтырыс чужтiс Исусöс, кодöс шуисны Кристосöн. 17 Тадзи Öвраамсянь Давидöдз ставнас вöлi дас нёль чужанвуж. Вавилонö вöтлытöдз Давидсянь дас нёль чужанвуж. Вавилонö вöтлöмсянь Кристосöдз бара дас нёль чужанвуж. 18 Исус Кристос чужис тадзи. Исуслöн Мария мамыс вöлi кикутöма Öсипкöд. Öтлаасьтöдзныс на тöдмалiсны Мариялöн Вежа Ловсянь сьöктöм йылысь. 19 Öсип вöлi веськыда олысь морт. Сiйö эз кöсйы йöзöдны Марияöс, та вöсна шуис гусьöн лэдзны сiйöс. 20 Кор Öсип мöвпалiс тадзи, Господьлöн андел петкöдчис сылы вöтас да шуис: «Öсип, Давид пи, эн пов босьтны Мариятö гöтырö. Сьöлöм улас сылöн кагаыс Вежа Ловсянь. 21 Марияыд ваяс пи, пуктан Сылы Исус ним, Сiйö мездас Ассьыс войтырсö мыжъяссьыныс». 22 Ставыс тадзи артмис, медым инiс пророк пыр Господьлöн шуöмыс: 23 – Ныв сьöктас, сэсся пи чужтас. Эммануил ним Сылы пуктасны. Нимыс висьталö: миянкöд Ен. 24 Садьмöм бöрас Öсип вöчис Господьлöн андел тшöктöм серти: босьтiс Марияöс гöтырö, 25 но эз инмöдчыв сы дiнö. Мария чужтiс пи, ассьыс медводдза кагасö, и Öсип пуктiс Сылы Исус ним.
1 Исус чужис Юдея муын, Виплием карын, Ирöд öксы веськöдлан кадö. Исуслöн чужöм мысти асыввылысь Ерусалим карö воисны кодзув тöдысьяс. 2 Найö юалiсны: «Кöнi юдейяслöн пузчужöм öксыыс? Асыввылысь ми аддзылiм Сылысь кодзувсö да локтiм Сылы копыртчывны». 3 Тайöс кылöмысь Ирöд öксы инас эз кут öшйыны, шызис тшöтш дзоньнас Ерусалим карыс. 4 Ирöд корис аркирейясöс Индöдö велöдысьяскöд да юалiс налысь: «Кöнi Кристос чужас?» 5 Найö вочавидзисны: «Юдея муын, Виплием карын. Тадзи пророклöн гижöма: 6 – Тэ, Иуда муын Виплием кар, Иудалöн мукöд юрнуöдан каръясысь абу ичöтджык. Тэнад карысь буретш юралысь петас, Менсьым ыжъясöс, Израиль войтырöс, Сiйö видзны кутас». 7 Тöдысьясöс ас дiнас гусьöн корöмöн Ирöд юалiс налысь кодзув петан кадсö. 8 Сэсся мöдöдiс найöс Виплиемö да шуис: «Ветлöй, кага йывсьыс ставсö тöдмалöй. Кагасö аддзöм бöрын юöртöй меным, ме тшöтш вола копыртчывны Сылы». 9 Öксылöн шуöм бöрын тöдысьяс петiсны туйö. Асыввылысь аддзылöм кодзулыс кывтiс на водзвылын. Сэсся сiйö сувтiс буретш сэтчö, кöнi вöлi кагаыс. 10 Кодзув аддзöмысь тöдысьяслы лои зэв нимкодь. 11 Керкаö пырöм бöрын найö аддзисны кагаöс Мария мамыскöд. Пидзöс выланыс уськöдчöмöн найö копыртчылiсны кагалы да сетiсны Сылы дона козинъяс: зарни, ладан да смирна. 12 Узиганыс Ен öлöдiс тöдысьясöс Ирöд дiнö бöр мунöмысь, та вöсна найö мöдiсны ас муаныс мöд туйöд. 13 Тöдысьяслöн мунöм бöрын Господьлöн андел петкöдчис Öсиплы вöтас да шуис: «Чеччы, босьт кагатö мамыскöд да пышйы Египет муö, ов сэнi менам шутöдз. Ирöд кутас корсьны кагатö, мед вины Сiйöс». 14 Öсип садьмис, босьтiс кагасö мамыскöд да войнас мöдöдчис Египет муö. 15 Сэнi сiйö олiс Ирöд кувтöдз. Тадзи инiс пророк пыр Господьлöн шуöмыс: «Египет муысь Ме кори Пиöс». 16 Ирöд тöдмалiс тöдысьяслысь ылöдлöмсö да ёна скöрмис таысь. Сiйö мöдöдiс шыпуртаясöс, тшöктiс вины Виплием карысь да сы гöгöрысь кык арöса да ичöтджык став пи кагасö, тöдысьяссянь тöдмалöм кадö чужöмаясöс. 17 Тадзи инiс Еремей пророклöн шуöмыс: 18 – Рама карын ырзöм-бöрдöм кылö. Ракель аслас ныв-пи вöсна бöрдö, оз кöсйы ланьтны бöрдöмсьыс, öд найö абуöсь нин. 19 Ирöд кулöм бöрын Египет муын Господьлöн андел петкöдчис Öсиплы вöтас 20 да шуис: «Чеччы, босьт кагатö мамыскöд да бöр мун Израиль муö. Кагатö вины кöсйысьяс абу нин ловъяöсь». 21 Öсип чеччис, босьтiс кагасö мамыскöд да мунiс Израиль муö. 22 Сэки Юдея муын веськöдлiс Ирöд öксылöн Аркелай пиыс. Тайöс кывлöм бöрын Öсип повзис сэтчö мунöмысь. Сэки вöтас сылы вöлi шуöма мунны Галилея муö. 23 Сэтчö воöм бöрын Öсип овмöдчис Назарет карö. Тадзи инiс пророкъяс пыр шуöмыс: «Назаретсаöн Сiйöс шуасны».
1 Сiйö кадö локтiс Пыртысь Иоан да юöртiс Юдея овтöминын: 2 «Бергöдчöй мыжъяссьыныд! Енэжвыв Юралöмыс матын нин». 3 Иоан йылысь Исай пророк висьтавлöма тадзи: – Овтöминын кылö горзысьлöн шы: «Лöсьöдöй туйсö Господьлы, веськöдöй-шыльöдöй ордымъяс Сылы!» 4 Иоан новлiс верблюд гöнысь кыöм паськöм да коскас кучик тасма, сёйлiс чирк да видзвыв ма. 5 Сы дiнö локтiс уна йöз Ерусалим карысь, Юдея му пасьталаысь да Йöрдан ю пöлöнысь. 6 Асланыс мыжъясысь висьтасьöм бöрын Иоан пыртiс йöзсö Йöрдан юын. 7 Уна фарисей да саддукей локтiсны Иоан дiнö пыртчыны. Иоан аддзис найöс да шуис: «Вижля йылöм! Кодi туйдöдiс тiянöс пышйыны локтана скöрлунысь? 8 Олöмнад петкöдлöй мыжъяссьыныд бергöдчöмнытö. 9 Энö лысьтöй мöвпавны, мый тiян батьныд Öвраам. Висьтала тiянлы: тайö изъясысь Ен вермö вöчны Öвраамлы ныв-писö. 10 Черыс пу вужйыс дорын нин куйлö. Пуыс кö оз вай бур вотöс, сiйöс кералöны да шыбитöны биö. 11 Ме пырта тiянöс ваöн. Тайö петкöдлас мыжъяссьыныд бергöдчöмнытö. Ме бöрын Локтысьыс ме дорысь вынаджык, ме ог шогмы пöрччöдны Сылысь кöмсö. Сiйö пыртас тiянöс Вежа Лолöн да биöн. 12 Сы киын тöлöдчан зырйыс. Сiйö весалас гумласö: шобдiсö йöртöдö чукöртас, кыдсö куслытöм биын сотас». 13 Сэки Исус локтiс Галилеяысь Йöрдан ю дорö, мед Иоан пыртас Сiйöс. 14 Иоан öлöдiг шуис: «Тэ-ö локтан ме дiнö? Тэныд колö менö пыртнысö!» 15 Исус шуис: «Эн сувт паныд. Миянлы колö вöчны веськыдлуныс серти». Сэки Иоан пыртiс Сiйöс. 16 Пыртчöм бöрас Исус петiс васьыс. Сэки енэжыс воссис, и Исус аддзис: Енлöн Лолыс гулю моз лэччис Сы вылö. 17 Енэжсянь кылiс гöлöс шы: «Тайö Менам муса Пиöй, Ме нимкодяся Сыöн».
1 Та бöрын Лов нуöдiс Исусöс овтöминö, медым омöльыс ыштöдiс Сiйöс. 2 Нелямын лун да нелямын вой видзалöм бöрын Исуслöн кынöмыс сюммис. 3 Сэки Сы дiнö локтiс ыштöдысь да шуис: «Тэ кö Ен Пи, пöрт тайö изъяссö няньö». 4 Исус воча шуис: «Гижöма: "Оз куш няньöн мортыд ов, а Енсянь быд шуöм кывйöн"». 5 Сэсся омöль нуöдiс Исусöс вежа карö, сувтöдiс Сiйöс крам вевт вылö 6 да шуис: «Тэ кö Ен Пи, шыбитчы увлань. Öд гижöма: "Аслас анделъяслы Сiйö тшöктö видзны Тэнö. Найö нуасны Тэнö ки выланыс, видзасны изйö крукасьöмысь"». 7 Исус воча шуис: «Гижöма тшöтш: "Эн дöзмöд ассьыд Господь Ентö!"» 8 Омöль бара вайöдiс Исусöс зэв джуджыд керöс йылö да петкöдлiс Сылы таладор югыдсьыс став мусö, налысь мичлун-озырлунсö. 9 Сэсся шуис: «Ставсö тайöс сета Тэныд, копыртчылан кö меным». 10 Исус шуис сылы: «Вешйы Ме дiнысь, сöтана! Гижöма: "Аслад Господь Енлы копрась да сöмын Сылы кесъяв"». 11 Сэки омöль эновтiс Исусöс. Сэсся воисны анделъяс да кесъялiсны Исуслы. 12 Кор Исус тöдмалiс Иоанöс дзескыдiнö пуксьöдöм йылысь, мунiс Галилеяö. 13 Сiйö колис Назарет карсö да овмöдчис тыдорса Капернаум карö, Завулон да Неффалим муö. 14 Тадзи инiс Исай пророклöн шуöмыс: 15 – Завулон му, Неффалим му, саридз туй вылын, Йöрдан ю сайын мукöд войтыра Галилея му! 16 Пемыдын олысь войтыр яр биа югыд аддзис. Кулан вуджöр улын олысьяслы югыд кыа петiс. 17 Тайö кадсянь Исус пондiс юöртны-висьтавлыны: «Бергöдчöй мыжъяссьыныд! Енэжвыв Юралöмыс матын нин». 18 Галилея ты пöлöн мунiгöн Исус аддзис кык вокöс: Симонöс, кодöс нимтiсны Петырöн, да сылысь Öндрей воксö. Найö вöлiны чери кыйысьяс. Кык вок буретш вöйтасисны ты вылын. 19 Исус шуис налы: «Локтöй Ме бöрся. Ме вöча тiянысь морт кыйысьясöс». 20 Кык вок дзик пыр эновтiсны тывъяснысö да мунiсны Исус бöрся. 21 Исус мунiс водзö да аддзис пыжысь мöд кык вокöс: Яковöс да Иоанöс. Зеведей батьныскöд найö дзоньталiсны тывъяс. Исус чукöстiс вокъясöс. 22 Найö дзик пыр колисны пыжсö, батьнысö да мунiсны Исус бöрся. 23 Исус ветлöдлiс Галилея му пасьтала. Сiйö велöдiс синагогаясын, висьтавлiс Ен Юралöм йылысь Евангелльö да бурдöдалiс йöзöс быд висьöм-доймöмысь. 24 Сы йылысь юöрыс разалiс Сирия му пасьтала. Исус дiнö вайöдлiсны быдсикас висьысьöс-вермытöмöс, пеж лолöн кутöмаясöс, шыблалан висьöмöн висьысьясöс, ки-коксö вöрзьöдны вермытöмъясöс. Сiйö быдöнöс бурдöдiс. 25 Исус бöрся мунiс зэв уна йöз Галилеяысь, Даскарысь, Юдеяысь, Ерусалим карысь да Йöрдан ю сайысь.
1 Уна йöзöс аддзöм бöрын Исус кайис керöсö да пуксис. Сы дiнö матыстчисны велöдчысьяс. 2 Исус пондiс велöдны: 3 «Шудаöсь ловныслы корысьяс, öд налöн эм Енэжвыв Юралöм. 4 Шудаöсь шогсьысьяс, öд найöс шогсьыс пальöдасны. 5 Шудаöсь рамъяс, öд налы вуджас кöсйысьöм муыс. 6 Шудаöсь веськыдлуннас пöткöдчыны кöсйысьяс, öд найöс пöткöдасны. 7 Шудаöсь бур сьöлöмаяс, öд налы бур сьöлöмсянь вöчасны. 8 Шудаöсь сöстöм сьöлöмаяс, öд найö Енмöс аддзасны. 9 Шудаöсь йöзöс бурöдысьяс, öд найöс Енлöн ныв-пиöн шуасны. 10 Шудаöсь веськыдлун вöсна вöтлöмаяс, öд налöн эм Енэжвыв Юралöм. 11 Тi шудаöсь, Ме вöсна кö тiянöс лёкöдöны, вöтлöны да быдногыс омöльтöны-суклялöны. 12 Долыда нимкодясьöй, öд ыджыд тырдон виччысьö тiянöс енэжас. Тадзи войдöр тшöтш вöтлiсны пророкъясöс». 13 «Тi муюгыдыслы сов. Солыс кö воштас ассьыс вынсö, кыдзи сiйöс бöр соланас вöчан? Сэки сiйö нинöм вылö оз шогмы, сiйöс сöмын койыштöны ветлысьяс кок улö. 14 Тi йöзыслы югыд. Керöсын сулалысь кар оз вермы саявны. 15 Öзтöм битö оз пуктыны доз улö, сiйöс пуктöны бикок вылö. Сэки керкаын югыдыс быдлаö веськалö. 16 Тадзи мед югдöдас тiян югыдныд, медым йöзыс аддзасны тiянлысь бур вöчöмнытö да ошкасны енэжвыв Батьнытö». 17 «Тi чайтанныд, Ме локтi бырöдны Индöдсö да пророк гижöдъяс? Энö мöвпалöй тадзи. Ме эг лок бырöдны, а локтi олöмö пöртны. 18 Веськыда висьтала тiянлы: енэжыс да муыс быртöдз да ставыс збыльмытöдз весиг öти ичöт шыпас да чуттор оз вош Индöдысь. 19 Кодi торкас Ен тшöктöмъясысь весиг öти ичöттор да велöдас тадзи вöчны мукöдöс, Енэжвыв Юраланiнын сiйöс медiчöтö пуктасны. Кодi олас тшöктöмъясыс серти да велöдас тадзи овны мукöдöс, Енэжвыв Юраланiнын сiйöс ыджыд мортö пуктасны. 20 Висьтала тiянлы: тiян веськыда олöмныд кö оз ло Индöдö велöдысьяслöн да фарисейяслöн дорысь бурджык, Енэжвыв Юраланiнö онö пырöй». 21 «Тi кывлiнныд, важ йöзлы вöлi шуöма: "Эн ви", и нöшта шуöма: "Виысьöс мыждасны". 22 Ме шуа тiянлы: кодi лöгалö вокыс вылö нинöм абусьыс, сiйöс мыждасны. Кодi вокыслы шуас: "Тэ бöб", сiйöс вылыс ёрд мыждас. Кодi йöйöн шуас, сiйö куслытöм биö веськалас. 23 Сетантортö вайигад кö висьпуктанiн дорын тöд вылад усяс, мый вокыд лöгалö тэ вылö, 24 сэки коль висьпуктанiн дорö сетантортö. Мун, водзджык бурась вокыдкöд, сэсся лок да пукты висьпуктанiнö сетантортö. 25 Тэнö мыжалыськöд бурась öдйöджык, ёрдö вотöдз на. Он кö вöч тадзи, сiйö сетас тэнö ёрдысьлы, ёрдысь сетас тэнö видзысьлы, сэсся тэнö йöртасны дзескыдiнö. 26 Веськыда висьтала тэныд: бöръя сьöмтö сеттöдз он пет сэтысь». 27 «Тi кывлiнныд, важ йöзлы вöлi шуöма: "Гозъя олöмтö эн пежав!" 28 Ме шуа тiянлы: ань вылö ыштöмöн видзöдысь сьöлöмас гозъя олöмсö пежалiс нин. 29 Веськыд синмыд кö ыштöдö тэнö, перйы сiйöс да шыбит. Бурджык син пöвтö воштыны вир-яйтö дзоньнас куслытöм биö шыбитöм дорысь. 30 Веськыд киыд кö ыштöдö тэнö, керышт сiйöс да шыбит. Бурджык ки пöвтö воштыны вир-яйтö дзоньнас куслытöм биö шыбитöм дорысь. 31 Нöшта шуöма: "Гöтырсö эновтысь мед сетас сылы торйöдчан гижöд". 32 Ме шуа тiянлы: верöсыс кö эновтö гöтырсö, а гöтырыс оз кырсав, сiйö сетö помка гöтырыслы пежавны гозъя олöмсö. Юксьöм аньöс гöтырö босьтысь тшöтш пежалö». 33 «Тi кывлiнныд, важ йöзлы вöлi шуöма: "Сетöм кывтö эн торк! Господь водзын сетöм кывтö кут!" 34 Шуа тiянлы: кыв сеттöг ов! Эн сет кывтö енэж водзын – сiйö Енлöн пукаланiныс. 35 Эн сет кывтö му водзын – сiйö Енлöн кок улыс. Эн сет кывтö Ерусалим кар водзын – сiйö ыджыд Öксылöн кар. 36 Аслад юрöн эн кöсйысь, öд тэ весиг öти юрси сi он вермы пöртны еджыдö либö сьöдö. 37 Тiян "да"-ныд мед лоö сöмын "да", тiян "ог"-ныд мед лоö сöмын "ог", а содтöд кывъясыс – омöльсяньыс». 38 «Тi кывлiнныд, вöлi шуöма: "Син понда син, пинь понда пинь". 39 Ме шуа тiянлы: тэныд лёксö вöчысьлы паныд эн сувт. Веськыд банад кö кучкасны, лöсьöд шуйгасö. 40 Зiльö кö кодкö ёрд пыр дöрöмтö босьтны, сет сылы тшöтш вылыс паськöмтö. 41 Тшöктö кö кодкö мунны сыкöд öти верст, мун сыкöд кыкöс. 42 Тэнсьыд корысьлы сет, водзöсöн босьтысьöс эн вöтлы». 43 «Тi кывлiнныд, вöлi шуöма: "Радейт матыссатö да мустöмт тэныд паныд мунысьöс". 44 Ме шуа тiянлы: радейтöй тiянлы паныд мунысьясöс, бурсиöй тiянöс ёрысьясöс, бурсö вöчöй тiянöс мустöмтысьяслы, кевмысьöй тiянöс öтдортысьяс да вöтлысьяс вöсна. 45 Сэки лоанныд енэжвыв Батьныдлы ныв-пиöн. Сiйö тшöктö шондiыслы öтмоза шонтыны лёк да бур йöзöс, сетö зэрсö веськыда да лёк нога олысьяслы. 46 Радейтанныд кö тiянöс радейтысьясöс, мыйысь удждонсö виччысянныд? Оз öмöй тадзи вöчны тшöтш вот перйысьяс? 47 Тi кö чолöмаланныд-сибöданныд сöмын вокъяснытö, тi öмöй бурджыка вöчанныд? Оз öмöй тадзи вöчны тшöтш ентöдтöмъяс? 48 Лоöй енэжвыв Батьныд моз тырвыйö бурöсь».
1 «Видзчысьöй, тiян бур вöчöмныд мед оз ло йöз водзын петкöдлöм могысь. Тадзи кö, оз ло тiянлы енэжвыв Батьныдсянь удждон. 2 Корысьлы кö сетан, эн йöзöд тайöс. Тадзи вöчöны кык бана шаньгаяс синагогаясын да йöзаинъясын, öд найö йöзсянь ошкöм виччысьöны. Веськыда висьтала тiянлы: найö босьтöны нин ассьыныс удждонсö. 3 Корысьлы сетiгад шуйга киыд мед оз тöд веськыд киыдлысь вöчöмсö. 4 Тэнад бур вöчöм йылысь мукöдлы тöднысö оз ков. Гусясö аддзысь Батьыд сетас тэныд аддзымöнъя». 5 «Эн кевмысь кык бана шаньгаяс моз. Асьнысö йöз водзын петкöдлöм могысь найö радейтöны синагогаясын да туйвежъясын сулалöмöн кевмысьны. Веськыда висьтала тiянлы: найö босьтöны нин ассьыныс удждонсö. 6 Но тэ пыр аслад вежöсö, öдзöстö пöдлав да кевмысь тыдавтöм Батьыдлы. Гусясö аддзысь Батьыд сетас тэныд аддзымöнъя. 7 Кевмысиганыд ентöдтöмъяс моз энö шуалöй ковтöмсö. Найö чайтöны, мый уна кыв шуöмнысла Енмыс кылас найöс. 8 Энö лоöй на кодьöсь. Тiян кортöдз на Батьныд тöдö тiянлы коланасö. 9 Кевмысьöй тадзи: – Батьöй миян, Тэ енэжъяс вылын олан. Мед лоö вежаöн Тэнад нимыд. 10 Мед воас Тэнад Юралöмыд. Мед инас Тэнад кöсйöмыд му вылын енэжын моз. 11 Сет миянлы талун кежлö няньнымöс. 12 И прöстит миянлысь мыжъяснымöс, кыдзи ми прöститам миян водзын мыжаясöс. 13 Эн сет миянлы ылавны, но видз миянöс омöльысь. Öд Тэнад Юралöмыд, выныд да дзирдлуныд помасьлытöм. Аминь. 14 Прöститанныд кö мöдлысь мыжъяссö, сэки енэжвыв Батьныд прöститас тiянöс. 15 Онö кö прöститöй, сэки Батьныд тiянлысь мыжъяснытö оз прöстит». 16 «Видзалiганыд энö лоöй жугыльöсь кык бана шаньгаяс моз. Найö ветлöны шог чужöмöн видзалöмсö петкöдлöм могысь. Веськыда висьтала тiянлы: найö босьтöны нин ассьыныс удждонсö. 17 Мöдарö, видзалiгад юрситö шыльöд, чужöмтö мыськы, 18 йöзыс мед оз тöдлыны тэнсьыд видзалöмтö. Видзав аслад тыдавтöм Батьыд водзын. Гусясö аддзысь Батьыд сетас тэныд аддзымöнъя». 19 «Энö чöжöй аслыныд озырлун му вылын. Танi воз да сiм сiйöс сёйö, гусясьысьяс пырöны да нуöны ставсö. 20 Мöдарö, чöжöй озырлунтö енэжö. Сэнi воз да сiм оз сёй сiйöс, гусясьысьяс оз пырны да оз нуны. 21 Кöнi озырлунныд, сэнi лоö и сьöлöмныд. 22 Синмыд – вир-яйтö югдöдысь. Синмыд кö бур, став вир-яйыд югыдын. 23 Синмыд кö лёк, став вир-яйыд пемыдын. Югыдыс кö тэ пытшкын пемыд, сэки кутшöм ачыс пемыдыс? 24 Морт оз вермы кесъявны кык ыджыдлы. Öтисö кö радейтö, мöдсö мустöмтö. Öтисö кö пыдди пуктö, мöдсö увтыртö. Тi онö вермöй кесъявны Енлы, кесъяланныд кö озырлунлы». 25 «Та вöсна шуа тiянлы: энö майшасьöй сёян-юан да паськöм вöсна. Олöмныд абу öмöй донаджык сёян-юанысь да вир-яйныд паськöмысь? 26 Видзöдлöй енэжвыв лэбачьяс вылö: найö оз кöдзны, оз вундыны, оз чукöртны йöртöдъясö, но енэжвыв Батьныд вердö найöс. Тi öмöй наысь абу донаджыкöсь? 27 Вермас-ö тiян пиысь кодкö зiльöмöн-тöждысьöмöн нюжöдыштны ассьыс олан нэмсö? 28 Мыйла паськöмныд вöсна майшасянныд? Видзöдлöй видзвыв дзоридзьяслöн быдмöм вылö: найö оз мырсьыны, оз печкыны. 29 Висьтала тiянлы: ачыс Соломон став озырлун дырйиыс эз пасьтасьлы весиг öти татшöм дзоридзысь мичаджыка. 30 Енмыс кö тадзи пасьтöдö видзвыв турунöс, кодi талун быдмö, а аски шыбитасны пачö, оз öмöй Сiйö пасьтöд тiянöс, этша эскысьяс! 31 Та вöсна энö шуалöй: "Мый сёйны-юны да мый пасьтавны?" 32 Тайö ставыс майшöдлö ентöдтöмъясöс. Но енэжвыв Батьныд тöдö, мый ставыс тайö колö тiянлы. 33 Медводз корсьöй Енлысь Юралöмсö да Сылысь веськыдлунсö, сэки тiян ставыс тайö лоö. 34 Энö майшасьöй аскиа луныс вöсна, аскиыс ас вöснаыс тöждысяс. Быд лунлы аслас тöждыс тырмö».
1 «Энö мыждöй, сэки тiянöс оз мыждыны. 2 Öд тiян мыждöмныд ас выланыд бöр воас. Асланыд мурталöм серти тiянлы мурталасны. 3 Кыдзи тэ верман вокыд синмысь ёгторсö аддзыны, аслад синмысь кö керсö он казяв? 4 Кыдзи тэ верман шуны вокыдлы: "Вай перъя синсьыд ёгторсö", аслад синмад кö кер? 5 Кык бана шаньга! Водзджык аслад синмысь керсö перйы, сэки вокыдлöн синмысь ёгторсö верман перйыны. 6 Вежасö энö сетöй понъяслы да донаторнытö энö коялöй порсьяслы. Вöчанныд кö тадзи, понъяс уськöдчасны да косявласны тiянöс, а порсьяс ставсö таляласны». 7 «Корöй, и тiянлы сетасны, корсьöй, и тi аддзанныд, игöдчöй, и тiянлы восьтасны. 8 Öд корысьлы сетöны, корсьысьлы сюрö да игöдчысьлы восьтöны. 9 Кодi тiян пöвстысь пиыслы сетас из, корас кö сiйö нянь? 10 Сетас-ö змейöс, корас кö пиыс чери? 11 Тi лёкöсь, а сямманныд бурсö сетны асланыд ныв-пилы. Дерт нин, енэжвыв Батьныд уна пöвстöн бурсö сетас Сылысь корысьяслы. 12 Мый кöсъянныд, медым йöзыс вöчисны тiянлы, сiйöс и тi вöчöй налы. Тадзи Индöд да пророк гижöдъяс велöдöны». 13 «Пырöй векньыд öдзöсöд. Öд паськыд öдзöсыс да паськыд туйыс кулöмö нуöдöны, и унаöн сэтi мунöны. 14 Векньыд öдзöсыс да векньыд туйыс олöмö нуöдöны, и тайöс аддзысьыс этша». 15 «Видзöй асьнытö ылöгпророкъясысь. Найö локтöны тiян дiнö ыжъяс кодьöн, а збыльвылас найö горш кöинъяс. 16 Вотöсныс серти тi тöдмаланныд найöс. Чукöртлöны öмöй лежнöг вылысь виноград да тусяпу вылысь инжир? 17 Бур пу вайö бур вотöс, лёк пу – лёкöс. 18 Бур пу оз вермы вайны лёк вотöс, лёк пу – бур вотöс. 19 Пуыс кö оз вай бур вотöс, сiйöс кералöны да шыбитöны биö. 20 Тадзи вайöм вотöс сертиыс тi тöдмаланныд ылöгпророкъясöс. 21 Оз быдöн, кодi шуö Меным: "Господьöй, Господьöй", пыр Енэжвыв Юраланiнö. Пырас сöмын Менам енэжвыв Батьлöн кöсйöм серти олысь. 22 Сiйö лунö Меным унаöн шуасны: "Господьöй, Господьöй, эг-ö Тэнад нимсянь ми пророкалöй? Эг-ö Тэнад нимöн пеж ловъясöс вöтлалöй? Эг-ö Тэнад нимöн шензьöданаторъяс вöчалöй?" 23 Сэки Ме вочавидза налы: "Ог тöд тiянöс. Мунöй Ме дорысь, лёксö вöчысьяс!"» 24 «Кодi кылö Менсьым кывъясöс да олö на серти, сiйö из вылö керкасö лэптысь сюсь вежöра морт кодь. 25 Чорыда кö зэрмас, юяс ойдасны, ыджыд тöвныр петас да керкасö мöдас пöрöдны, тайö керкаыс сэки оз пöр, öд сiйöс из вылö лэптöма. 26 А кодi кылö Менсьым кывъясöс да оз ов на серти, сiйö лыа вылö керкасö лэптысь вежöртöм морт кодь. 27 Чорыда кö зэрмас, юяс ойдасны, ыджыд тöвныр петас да керкасö мöдас пöрöдны, тайö керкаыс сэки дзоньнас киссяс». 28 Исусöс кывзöм бöрын йöзыс ёна шензисны Сылöн велöдöмысь. 29 Öд Исус велöдiс ыджыдалысьö пуктöм морт моз, эз Индöдö велöдысьяс да фарисейяс моз.
1 Кор Исус лэччис керöсысь, уна йöз вöтчис Сы бöрся. 2 Проказаöн висьысь матыстчис Исус дiнö да Сы водзö уськöдчöмöн шуис: «Господьöй, кöсъян кö, верман менö сöстöммöдны». 3 Исус нюжöдiс кисö, инмöдчылiс сы дiнö да шуис: «Кöсъя. Сöстöммы». Висьысьлöн дойясыс дзик пыр бырисны, да сiйö бурдiс. 4 Исус шуис сылы: «Та йылысь некодлы эн висьтав. Мун, петкöдлы асьтö поплы, сэсся Мöисей тшöктöм серти вай вись. Тадзи тöдмаласны тэнад бурдöм йылысь». 5 Исус пырис Капернаум карö. Сы дiнö локтiс шыпуртаяслöн веськöдлысь да корис отсавны: 6 «Господьöй, менам кесйöгöй гортам куйлö, ки-коксö вöрзьöдны оз вермы, вывтi сьöкыда висьö». 7 Исус шуис сылы: «Ме локта, бурдöда сiйöс». 8 Веськöдлысь воча шуис: «Господьöй, ме ог сулав сы доныс, медым Тэ пырин менам керка вевт улö. Сöмын кыв шу, и кесйöгöй бурдас. 9 Ме ачым киподувса морт, но и менам кипод улын эмöсь шыпуртаяс. Öтилы шуа: "Мун", и сiйö мунö. Мöдлы тшöкта локны, и сiйö локтö. Кесйöглы шуа: "Вöч тайöс", и сiйö вöчö». 10 Тайö мортыслöн висьталöмыс шензьöдiс Исусöс. Сiйö шуис Ас бöрсяыс мунысьяслы: «Веськыда висьтала тiянлы: татшöм ыджыд эскöмсö Ме весиг Израильысь эг аддзыв. 11 Висьтала тiянлы: унаöн локтасны асыввылысь да рытыввылысь Енэжвыв Юраланiнö. Найö öти пызан сайö пуксясны Öвраамкöд, Исааккöд да Яковкöд. 12 А кодлы водзысяньыс вöлi дасьтöма Енлысь Юраланiнсö, найöс шыбитасны пемыдас. Сэнi лоö бöрдöм да пинь йирöм». 13 Сэсся шыпуртаяслöн веськöдлысьлы Исус шуис: «Мун гортад. Мед лоас эскöмыд серти». Веськöдлысьлöн кесйöгыс дзик пыр бурдiс. 14 Исус локтiс Петыр ордö. Сэнi аддзис, мый Петыр гöтырлöн мамыс куйлö вольпасьын биа висьöмöн. 15 Исус инмöдчылiс висьысьлы киас, и биа висьöмыс эновтiс сiйöс. Ань чеччис да пондiс кесъявны налы. 16 Рытнас Исус дiнö вайöдiсны пеж лолöн кутöм уна йöзöс. Исус кыв шуöмöн вöтлалiс пеж ловъясöс, бурдöдалiс висьысьясöс, 17 медым инiс Исай пророклöн шуöмыс: – Миянлысь нёрпалöмъяс Сiйö босьтiс да миянлысь висьöмъяс Сiйö вештiс. 18 Ас гöгöрсьыс уна йöзöс казялöм бöрын Исус тшöктiс велöдчысьясыслы вуджны ты мöдлапöлö. 19 Индöдö велöдысьясысь öти матыстчис Сы дiнö да шуис: «Велöдысьöй, ме быдлаö Тэ бöрся муна». 20 Исус шуис сылы: «Ручьяслöн эмöсь пырмöсъяс, и енэжвыв лэбачьяслöн эмöсь позъяс, сöмын Морт Пилöн шойччанiныс абу». 21 Исуслöн öти велöдчысь корис: «Господьöй, лэдзлы менö медводз батьöс дзебны». 22 Исус шуис сылы: «Лок Ме бöрся, кулöмаяс мед дзебасны кулöмаяснысö». 23 Исус пуксис пыжö, велöдчысьясыс Сы бöрся. 24 Виччысьтöг ты вылын кыптiс ыджыд тöвныр, ёна гызис, да пыжыс кутiс тырны ванас. Исус вöлi узьö. 25 Велöдчысьяс садьмöдiсны Сiйöс шуалöмöн: «Господьöй, мезды миянöс! Вöям!» 26 Исус шуис: «Мыйла тi сэтшöм полысьöсь, этша эскысьяс?» Сэсся Исус чеччис, öлöдiс тöвсö да васö, и вöвлытöм чöв-лöнь пуксис. 27 Велöдчысьяс чуймисны, öта-мöдныслысь пондiсны юасьны: «Кодi Сiйö? Весиг тöлыс да ваыс кывзысьö Сылысь». 28 Та бöрти Исус вуджис ты мöдлапöлö, Гергесин муö. Сылы воча петiсны шойгу кыртаысь кык морт, пеж ловъясöн кутöмаяс. Найö вöлiны лёксьыс-лёкöсь, та вöсна йöзыс полiсны ветлыны тайö туйöдыс. 29 «Мый Тэныд миянсянь колö, Исус, Ен Пи? Локтiн-ö индöм кадысь водзджык песны миянöс?» – горзiсны найö. 30 Ылынкодь йирсис ыджыд порсь чукöр. 31 Пеж ловъяс корисны Исусöс: «Вöтлан кö миянöс, ысты порсьяс пытшкö». 32 Исус шуис налы: «Мунöй!» Пеж ловъяс петiсны да пырисны порсьяс пытшкö. А порсьяс кыр йывсянь уськöдчисны тыö да ставныс пöдiсны. 33 Порсь видзысьяс котöрöн пышйисны сэтысь карö да висьталiсны сэнi аддзывлöмтор йывсьыс, пеж ловъясöс вöтлöм йылысь. 34 Сэки став карыс петiс Исуслы воча. Исусöс аддзöм бöрын йöзыс корисны Сiйöс мунны налöн муысь.
1 Исус пуксис пыжö, бöр вуджис тысö да воис Аслас карö. 2 Сэнi вайисны Сы дiнö вольпасьын куйлысь, вöрзьöдчыны вермытöм мортöс. Налысь эскöмсö аддзöмöн Исус шуис висьысьлы: «Эн пов, пиöй! Тэнсьыд мыжъястö прöститöма». 3 Индöдö велöдысьясысь кодсюрö ас пытшканыс мöвпалiсны: «Сiйö Енмöс омöльтö». 4 Налысь мöвпъяссö тöдöмöн Исус шуис: «Мыйла сьöлöманыд лэдзанныд лёк мöвпъяссö? 5 Мый кокньыдджык шуны: "Тэнсьыд мыжъястö прöститöма" либö "Чеччы да ветлы"? 6 Öнi тi тöдмаланныд: Морт Пи вермö прöститны мыжъяс му вылын». Сэсся шуис висьысьлы: «Чеччы, босьт вольпасьтö да мун гортад». 7 Сiйö чеччис да мунiс гортас. 8 Тайöс аддзöм бöрын йöзыс шензьöмöн ошкисны Енмöс, öд та ыджда вын сетöма мувывса йöзлы. 9 Исус водзö мунiс да аддзис вотчукöртанiнын пукалысь Матвей нима мортöс. Исус шуис сылы: «Лок Ме бöрся». Сiйö чеччис да мунiс Исус бöрся. 10 Исус сёйö вöлi Матвей ордын, кор сэтчö локтiсны вот перйысьяс да мукöд мыжа йöз. Исускöд да Сылöн велöдчысьяскöд найö пукалiсны öти пызан сайын. 11 Тайöс аддзисны фарисейяс да юалiсны Исуслöн велöдчысьяслысь: «Мыйла тiян Велöдысьныд сёйö-юö вот перйысьяскöд да мыжа йöзкöд?» 12 Исус кылiс тайöс да шуис налы: «Дзоньвидзалы бурдöдысьыд оз ков, сiйö висьысьлы колö. 13 "Буралöм тiянсянь кöсъя, ог вись вайöм" – мунöй да гöгöрвоöй тайö кывъяссö. Ме локтi корны Ен дiнö мыжаясöс, эг веськыда олысьясöс». 14 Иоанлöн велöдчысьясыс локтiсны Исус дiнö да юалiсны: «Ми уна видзалам, фарисейяс тшöтш уна видзалöны. Мыйла Тэнад велöдчысьясыд оз?» 15 Исус вочавидзис: «Вермöны-ö ёртъясыс шогавны кöлысь вылын, кор верöспуыс накöд? Воасны на сійö лунъясыс, кор колясны верöспутöг, сэки и видзаласны. 16 Важ паськöмтö оз дöмны выль дöра дöмасöн. Тадзи кö вöчан, выль дöмас дортiыс нёйдас-косяссяс паськöмыд, розьыс ёнджыка на ыдждас. 17 Выль винатö оз кисьтны важ кучик дозйö. Тадзи кö вöчан, кучик дозйыс потас, и винаыс киссяс. Выль винатö кисьтöны выль кучик дозйö. Сэки кыкнанныс дзонь колясны». 18 Исуслöн сёрнитiгкостi локтiс Сы дiнö öти юралысь да пидзöс вылас уськöдчöмöн корис: «Менам нылöй муртса на кулiс. Лок, пуктыв сы вылö китö, мед сiйö ловзяс». 19 Исус чеччис да мунiс велöдчысьясыскöд юралысь бöрся. 20 Исус дiнö мышсяньыс матыстчис ань да инмöдчылiс Исуслы паськöм дорышас. Дас кык во чöж тайö аньыс висьöма вир мунöмöн. 21 Сiйö мöвпалiс: «Сöмын инмöдчыла кö Сылöн паськöмö, бурда». 22 Исус бергöдчис, аддзис аньöс да шуис: «Эн пов, нылöй. Эскöмыд мездiс тэнö». Аньыс дзик пыр бурдiс. 23 Юралысь керкаö воöм мысти Исус аддзис пöлянöн ворсысьясöс да гораа бöрдысь йöзöс. 24 Исус шуис налы: «Мунöй татысь! Нылыс эз кув, сiйö узьö». Исус вылын пондiсны серавны. 25 Йöзöс вöтлöм бöрын Исус пырис нывка дiнö да босьтiс сiйöс киöдыс. Нывка чеччис. 26 Та йылысь юöрыс разалiс сэтчöс му пасьтала. 27 Сэтысь мунiгöн Исус бöрся вöтчисны кык синтöм морт. Найö горöдiсны: «Ло бур сьöлöма миян дiнö, Давид Пи!» 28 Исус пырис керкаö, синтöмъяс Сы бöрся. Исус юалiс налысь: «Эсканныд-ö, мый Ме верма бурдöдны тiянöс?» Найö шуисны: «Эскам, Господьöй!» 29 Сэки Исус инмöдчылiс налы синмас да шуис: «Мед лоö тiянлы эскöм сертиныд». 30 Найö кутiсны аддзыны. Исус кыкнаннысö чорыда öлöдiс: «Та йылысь некодлы энö висьтавлöй». 31 Но керкаысь петöм бöрын найö висьтавлiсны Исус йылысь сэтчöс му пасьталаыс. 32 Бурдöмаяслöн мунöм бöрын Исус дiнö вайöдiсны пеж лолöн кутöм сёрниттöм мортöс. 33 Исус вöтлiс сы пытшкысь пеж ловсö, да мортыс пондiс сёрнитны. Йöзыс шензисны, татшöмторйыс пö Израиль муын эз на вöвлы. 34 А фарисейяс шуисны, Сiйö пö вöтлалö пеж ловъясöс налöн юралысь вынöн. 35 Исус ветлiс-кытшовтiс став сикт-карсö. Сiйö велöдiс синагогаясын, висьтавлiс Ен Юралöм йылысь Евангелльö да бурдöдалiс йöзсö быд висьöм-доймöмысь. 36 Йöз вылö видзöдiгöн Исуслöн сьöлöмыс нормис, öд найö вöлiны сэтшöм мудзöсь, эбöстöм-вынтöмöсь, видзысьтöг кольöм ыжъяс кодьöсь. 37 Сiйö шуис велöдчысьясыслы: «Вунданыс уна, а вундысьыс этша. 38 Кевмöй вунданiнын Ыджыдыслы, мед ыстас Аслас вунданiнö уджалысьясöс».
1 Исус корис дас кыкнан велöдчысьсö да сетiс налы вын вöтлавны пеж ловъясöс да бурдöдавны йöзöс быд висьöм-доймöмысь. 2 Дас кык апостолсö шуисны тадзи: Симон, кодöс шуисны Петырöн, сылöн Öндрей вокыс, Зеведей Яков да сылöн Иоан вокыс, 3 Филип, Варфоломей, Фома, вот перйысь Матвей, Алфей Яков, Леввей, кодöс шуисны Фаддейöн, 4 Кананит Симон да Искариот Иуда, Исусöс вузалысь. 5 Тайö дас кыксö мöдöдiгöн Исус велöдiс найöс: «Йöз муясö энö мунöй, Самария каръясö энö пырöй. 6 Мунöй израильса вошöм ыжъяс дiнö 7 да юöртöй: "Енэжвыв Юралöмыс матын нин". 8 Висьысьясöс бурдöдалöй, кулöмаясöс ловзьöдöй, проказаысь сöстöммöдöй, пеж ловъясöс вöтлалöй. Дон мынтытöг босьтiнныд, дон босьттöг и сетöй. 9 Туяныд энö босьтöй зарни, эзысь, ыргöн, 10 ноп, вежан кöм-пась да бедь. Öд уджалысь кынöмпöттöг оз коль. 11 Сиктö-карö пыриганыд корсьöй туяна-шогмана мортöс, мунтöдзныд олöй сы ордын. 12 Керкаас пыриганыд сиöй лöнь олöм. 13 Олысьясыс кö шогмöны, бурсиöмныд коляс налы. Оз кö шогмыны, бурсиöмныд бергöдчас тiянлы. 14 Оз кö сибöдны-кывзыны тiянöс, сэки сiйö керкасьыс либö карсьыс петiганыд пыркöдöй коксьыныд буссö. 15 Веськыда висьтала тiянлы: Мыждан лунö Содом да Гомора каръяслы лоас кокньыдджык сiйö карыслы дорысь. 16 Ме мöдöда тiянöс ыжъясöс моз кöинъяс пöвстö. Лоöй змей кодь сюсьöсь да гулю кодь рамöсь. 17 Видзчысьöй йöзысь, öд найö кыскасны тiянöс ёрдö да асланыс синагогаясын нöйтасны тiянöс. 18 Ме вöсна нуöдасны тiянöс юралысьяс да öксыяс водзö, медым найö да ентöдтöмъяс тöдiсны Ме йылысь. 19 Кор нуöдасны тiянöс ёрдö, энö майшасьöй, кыдзи да мый шуны, öд сiйö кадас тiянлы воасны колана кывъяс. 20 Сэки онö тi кутöй сёрнитны, но Ен Батьныдлöн Лолыс сёрнитас тiян пыр. 21 Вокыс воксö сетас вины, батьыс – писö. Ныв-пи сувтасны бать-мамыслы паныд да виасны найöс. 22 Менам ним вöсна унаöн мустöмтасны тiянöс, но сьöкыдсö помöдз нуысь мездмас. 23 Öти карысь кö тiянöс вöтласны, пышйöй мöдö. Веськыда висьтала тiянлы: Израильысь став карсö кытшовттöдзныд на Морт Пи локтас. 24 Велöдчысь абу ыджыдджык велöдысьысь, да кесйöг абу ыджыдджык аслас ыджыдысь. 25 Велöдчысьлы тырмымöн быдмыны велöдысьыс кодьöдз, кесйöглы – ыджыдыс кодьöдз. Керка кутысьöс кö Вельзевулöн шуасны, сылысь гортсасö лёкджыка на нимтасны. 26 Энö полöй тiянöс мустöмтысьясысь. Став дзебöмаыс тыдовтчас да став гусяыс йöзасяс. 27 Мый Ме шуа тiянлы пемыдын, висьталöй югыдын. Пеляныд вашкöдöмасö юöртöй керка вывсянь. 28 Энö полöй вир-яйтö виысьясысь, ловтö найö вины оз вермыны. Полöй Сыысь, кодi вермö бырöдны ловтö да вир-яйтö куслытöм биын. 29 Оз-ö сöмын öти урысь вузавны кык пышкайöс? На пиысь весиг öти оз усь муö тiян Батьлöн шутöг. 30 А тiянлысь став юрсинытö лыддьöма. 31 Сiдзкö, энö полöй, тi öд донаджыкöсь пышкайясысь». 32 «Кодi оз яндысь Меысь йöз водзын, сыысь Ме ог яндысь Аслам енэжвыв Бать водзын. 33 Кодi соссяс Меысь йöз водзын, сыысь Ме сосся Аслам енэжвыв Бать водзын. 34 Энö мöвпалöй, мый Ме локтi вайны му вылö лöнь олöм. Локтi вайны эг лöнь олöм, но шыпурт. 35 Ме локтi торйöдны писö батьсьыс, нывсö мамсьыс, моньсö энькасьыс. 36 Мортлы паныд мунысьыс – сылöн гортсаяс. 37 Кодлы бать-мамыс Ме дорысь мусаджык, Меным сiйö оз шогмы. Кодлы ныв-пиыс Ме дорысь мусаджык, Меным сiйö оз шогмы. 38 Кодi оз босьт ассьыс крестсö да оз мун Ме бöрся, Меным сiйö оз шогмы. 39 Ассьыс олöмсö видзысь воштас сiйöс, Ме вöсна олöмсö воштысь аддзас сiйöс. 40 Тiянöс сибöдысь Менö сибöдö, а Менö сибöдысь сибöдö Менö Мöдöдысьöс. 41 Кодi пророкöс сибöдас пророкöс моз, сылы сетасны пророклы кодь удждон. Кодi веськыда олысьöс сибöдас веськыда олысьöс моз, сылы сетасны веськыда олысьлы кодь удждон. 42 Веськыда висьтала тiянлы: кодi кöдзыд ваöн юкталас тайö медiчöтъясысь öтиöс Менсьым велöдчысьöс моз, сiйö оз коль удждонтöг».
1 Дас кыкнан велöдчысьсö велöдöм-туйдöдöм бöрын Исус мунiс юöртны да велöдны мукöд каръясö. 2 Дзескыдiнын пукалiгас Иоан кывлiс Кристослöн уджъяс йылысь. Сiйö мöдöдiс ассьыс кык велöдчысьсö 3 юавны Исуслысь: «Тэ-ö сiйö Локтысьыс? Колö-ö миянлы мöдöс виччысьны?» 4 Исус вочавидзис: «Мунöй, висьталöй Иоанлы, мый кыланныд да аддзанныд: 5 – Синтöмъяс аддзöны, коктöмъяс ветлöны, проказаысь сöстöммöны, пельтöмъяс кылöны, кулöмаяс ловзьöны, коньöръяслы Бур Юöр висьтавлöны. 6 Шуда сiйö, кодi оз ылав Меысь». 7 Кор Иоанлöн велöдчысьясыс мунiсны, Исус пондiс висьтавны йöзыслы Иоан йылысь: «Мый видзöдны ветлiнныд овтöминас? Тöлöн вöрöдысь идзас-ö? 8 Мый видзöдны ветлiнныд? Мича да озыр паськöма мортöс? Татшöм паськöма йöзыс олöны öксы оланiнъясын. 9 Кодöс видзöдны ветлiнныд? Пророкöс-ö? Шуа тiянлы: тi аддзылiнныд пророкысь ыджыдöс. 10 Сы йылысь гижöма: – Ыста Ассьым юöртысьöс Тэ водзвылын, сiйö Тэныд туйсö дасьтас. 11 Веськыда висьтала тiянлы: му вылын чужысьясысь эз вöвлы Пыртысь Иоанысь ыджыдджыкыс, но Енэжвыв Юраланiнын медiчöтыс сы дорысь ыджыдджык. 12 Пыртысь Иоан лунъяссянь да öнöдз Енэжвыв Юралöмсö дзескöдöны, и паныд мунысьяс зiльöны мырддьыны сiйöс. 13 Став пророкыс да Индöдыс Иоанöдз на юöртлiсны Енлöн Юралöм йылысь. 14 Кöсъянныд кö тöдны, сiйö буретш Илля, кодлы колö вöлi локны. 15 Кодлöн эм пель, мед кылö! 16 Кодкöд Ме öткодяла öнiя олысьясöс? Найö изэрд вылын пукалысь челядь кодьöсь, кодъяс ёртъясыслы 17 шуалöны: "Ми ворсiм тiянлы пöлянöн, а тi энö йöктöй. Ми сьылiм тiянлы бöрдöдчанкывъяс, а тi энö бöрдöй". 18 Иоан локтiс, оз сёй, вина оз ю, шуöны, сы пытшкын пö пеж лов. 19 Морт Пи локтiс, сёйö-юö, Сы йылысь шуöны, рушку тыртысь да вина юысь пö, вот перйысьяскöд да мыжаяскöд ёртасьысь пö. Мывкыдлунсö пыдди пуктöны мывкыдлуныслöн челядьыс». 20 Сэсся Исус пондiс мыжавны каръяс сыысь, мый сэтчöс йöзыс эз бергöдчыны мыжъяссьыныс, öд тайö каръясас Исус вöчис медуна шензьöданатор. 21 «Курыд шог тэныд, Коразин кар! Курыд шог тэныд, Випсаида кар! Тир да Сидон каръясын кö аддзылiсны тiянын кодь вöчöм шензьöданаторъяссö, сэки эськö сэтчöс олысьясыс важöн нин бергöдчисны мыжъяссьыныс, шогалан паськöм пасьталiсны да юрнысö пöимöн киськалiсны. 22 Висьтала тiянлы: Мыждан лунö Тир да Сидон каръяслы лоас кокньыдджык тiянлы дорысь. 23 Тэ, Капернаум кар, чайтан енэжöдз кыпöдчыны? Ад пыдöсöдз усян! Содом карын кö аддзылiсны тiянын кодь вöчöм шензьöданаторъяссö, сiйö эськö öнi на сулалiс. 24 Висьтала тiянлы: Мыждан лунö Содом мулы лоас кокньыдджык тэныд дорысь». 25 Сэки Исус шуис: «Ошка Тэнö, Батьöй, енэжыс да муыс вылын Ыджыдалысьöс! Тэ дзебин тайöс сюсь вежöраясысь да восьтiн кага коддьöмлы. 26 Татшöм вöлi Тэнад бур кöсйöмыд, Батьöй. 27 Батьöй ставсö сетiс Меным. Сöмын Батьыс тöдö Писö, да сöмын Пиыс тöдö Батьсö, и нöшта сiйö, кодлы Пиыс кöсйö восьтны. 28 Локтöй Ме дiнö мудзöмаяс да сьöкыда мырсьысьяс, Ме тiянöс шойччöда. 29 Босьтöй Менсьым сийöсöс да велöдчöй Месянь, öд Ме рам да небыд сьöлöма. Сэки тiян ловлы сюрас шойччöг. 30 Öд Менам сийöсöй оз личкы, да Менам нöбйöй оз сьöктöд».
1 Шойччан лунö Исус мунö вöлi кöдзöм муяс вомöн. Велöдчысьяслöн кынöмыс кутiс сюмавны, и мунiгмозныс найö пондiсны нетшкыны шепсö да сёйны. 2 Тайöс аддзылiсны фарисейяс да шуисны Исуслы: «Видзöдлы, мый Тэнад велöдчысьясыд вöчöны! Тайöс оз позь вöчны шойччан лунö». 3 Исус воча шуис: «Тi öмöй энö лыддьылöй, мый вöчис Давид, кор тшыгъялiс аслас йöзкöд? 4 Сiйö пырис Ен керкаö да сёйис аслас йöзкöд Енлы вайöм няньсö. Тайöс налы вöчнысö эз позь, сöмын попъяслы позис. 5 Тi öмöй энö лыддьылöй Индöдысь, мый шойччан лунö попъяс уджалöны крамын, но шойччан лунсö торкалöмысь найö абу мыжаöсь. 6 Висьтала тiянлы: танi Сiйö, кодi крам дорысь ыджыдджык. 7 Тöдiнныд кö тайöс, мый "буралöм тiянсянь кöсъя, ог вись вайöм", сэки эськö энö мыжалöй мыжтöмъясöс. 8 Морт Пи шойччан лун вылын ыджыдыс». 9 Сэтысь мунöм бöрын Исус пырис синагогаö. 10 Сэнi вöлi косьмöм киа морт. Фарисейяс корсисны помка мыжавны Исусöс да юалiсны Сылысь: «Позьö-ö шойччан лунö бурдöднысö?» 11 Исус вочавидзис: «Тiян ыжныд кö шойччан лунö усяс гуö, онö öмöй лэптöй сiйöс сэтысь? 12 Мортыс абу öмöй донаджык ыжысь? Сiдзкö, бурсö позьö вöчны шойччан лунö». 13 Сэсся Исус шуис висьысьлы: «Нюжöд китö». Сiйö нюжöдiс, и киыс пырысь-пыр бурдiс, лои мöдыс кодь. 14 Сэки фарисейяс петiсны да панiсны сёрни Исусöс виöм йылысь. 15 Кор Исус тöдмалiс та йылысь, мунiс сэтысь. Сы бöрся вöтчис уна йöз. Исус бурдöдалiс висьысьясöс 16 да öлöдiс найöс Сы йылысь висьтавлöмысь. 17 Тадзи инiс Исай пророклöн шуöмыс: 18 – Тайö Менам бöрйöм кесъялысьöй, сьöлöм бурöдысьöй да олан гажöй. Ме сета Сылы Ассьым Лолöс. Сiйö юöртас Менсьым веськыда мыждöмöс быд кыла войтырлы. 19 Оз вензьы, оз горзы Сiйö, ывлаысь Сiйöс он кыв. 20 Веськыда мыждöмсö пöрттöдз Сiйö идзастор оз чег да дзузган би оз кусöд. 21 Сы вылö лача пондас кутны быд кыла войтыр. 22 Исус дiнö вайöдiсны пеж лолöн кутöмаöс. Тайö мортыс вöлi синтöм да эз сёрнит. Исус бурдöдiс сiйöс, мöдыс пондiс сёрнитны да аддзыны. 23 Став йöзыс чуймисны, öта-мöдныслысь юасисны: «Збыльысь-ö сiйö Давид Пи?» 24 Тайöс кывлiсны фарисейяс да шуисны, Сiйö пö вöтлалö пеж ловъясöс налöн Вельзевул юралысь вынöн. 25 Налысь мöвпъяссö тöдöмöн Исус шуис: «Ас муын олысьяс кö ас костаныс тышкасьöны, тайö муыс кушмас. Зыксьöмöн олысь карыд да керкаыд дыр оз сулав. 26 Сöтанаыс кö сöтанасö вöтлö, сiйö аслыс паныд тышкасьö. Дыр-ö кутчысяс сылöн ыджыдалöмыс? 27 Ме кö вöтлала пеж ловъясöс Вельзевул вынöн, кутшöм вынöн, сiдзкö, тiян йöзыд вöтлалöны? Найö тiянöс мыждасны. 28 Ме кö Ен Лолöн вöтлала пеж ловъясöс, сiдзкö, Енлöн Юралöмыс воис тiянöдз. 29 Вермас-ö кодкö пырны вына мортлöн керкаö да сiйöс кöртавтöг босьтны сылысь эмбурсö? Вына мортöс кöрталöм бöрын сöмын вермас босьтны эмбурсö. 30 Кодi абу Мекöд, сiйö Меным паныд, кодi оз чукöрт Мекöд, сiйö разöдö. 31 Та вöсна висьтала тiянлы: мортлысь быд мыж да быд омöльтöм лоö прöститöма, но Вежа Лолöс омöльтöм оз ло прöститöма. 32 Лёкöдан кö Морт Пиöс, лоан прöститöма. Лёкöдан кö Вежа Лолöс, он ло прöститöма тайö олöмас, весиг локтанаас». 33 «Бур пу вайö бур вотöс, лёк пу – лёкöс. Путö донъялöны вотöс сертиыс. 34 Вижля йылöм! Верманныд-ö бурсö висьтавны, асьныд кö лёкöсь? Öд мыйöн тырöма мортыслöн сьöлöмыс, сiйö вомсьыс и петö. 35 Бур морт аслас бур видзанiнысь бурсö петкöдö, лёк морт аслас лёк видзанiнысь лёксö петкöдö. 36 Шуа тiянлы: быд ковтöм кывйысь Мыждан лунö ковмас кывкутны. 37 Аслад кывъясысь мыжман, аслад кывъясысь мездман мыждöмысь». 38 Сэки фарисейяс да Индöдö велöдысьяс пиысь кодсюрö корисны: «Велöдысь, петкöдлы миянлы индысьпас». 39 Исус воча шуис: «Лёк да пежас ылалöм йöз кöсйöны аддзывны индысьпас, но Иона пророк пасысь кындзи оз ло налы мöдыс. 40 Куим лун да куим вой Иона вöлi ыджыд чери рушкуын. Тадзи Морт Пи лоö му пыдöсын куим лун да куим вой. 41 Ниневия карын олысьяс сувтасны Мыждан лунö öнiя олысьяскöд да мыжаласны найöс. Öд Ионалöн юöртöм бöрын ниневияса йöз бергöдчисны асланыс мыжъясысь. Танi Иона дорысь ыджыдджык. 42 Лунвыв муысь öксы-ань сувтас Мыждан лунö öнiя олысьяскöд да мыжалас найöс. Öд сiйö му помсяньыс волiс кывзыны Соломонлысь мывкыд сёрнисö. Танi Соломон дорысь ыджыдджык». 43 «Морт пытшкысь петöм бöрын пеж лов шöйтö ватöминъястi, корсьö шойччанiн да оз аддзы. 44 Сэки шуö: "Бöр муна важ оланiнö, кытысь петi". Локтöм бöрас аддзö: оланiнсö чышкöма-пелькöдöма, и олысьыс сэнi абу. 45 Сэки мунö да босьтö аскöдыс сизим пеж лолöс, ассьыс на лёкджыкъясöс, сэсся ставныс найö овмöдчöны важ оланiнас. Тайö мортыслы воддза дорсьыс нöшта на лёкджык лоö. Тадзи жö лоö öнiя лёк йöзлы». 46 Йöзкöд сёрнитiгкостiыс локтiсны Исуслöн мамыс да вокъясыс. Найö сулалiсны ывлаас да кöсйисны сёрнитыштны Сыкöд. 47 Öти морт шуис Исуслы: «Мамыд вокъясыдкöд ывлаасöсь, Тэкöд кöсйöны сёрнитны». 48 Исус воча шуис: «Кодi Меным мамыс? Кодъяс Меным вокъясыс?» 49 Велöдчысьяс вылас индöмöн шуис: «Найö Менам вокъясöй да Менам мамöй. 50 Енэжвыв Батьлöн кöсйöм серти олысь – Меным вок, чой да мам».
1 Сiйö лунö керкаысь петöм бöрын Исус лэччис ты дорö да пуксис. 2 Зэв уна йöз чукöртчис Исус дiнö, Сылы весиг ковмис пуксьыны пыжö, а йöзыс сулалiсны вадорас. 3 Исус висьталiс налы уна велöданвисьт: «Морт кöдзны петас. 4 Кöдзигас кымынкö кöйдыс усяс туй бокö. Сэтчö воасны лэбачьяс да кокаласны. 5 Кымынкö кöйдыс усяс изъяинö. Этша муыс вöсна ляпкыдiнад найö öдйö чужасны. 6 Петас шондi, пöжны пондас, и омöль вужъя петасыд косьмас. 7 Кымынкö кöйдыс усяс лежнöг пöвстö. Быдмигас лежнöгыс пöдтас петассö. 8 Мукöд кöйдысыс усяс бур муö да ваяс уна тусь: öтияс – сё пöв, мöдъяс – квайтымын пöв, коймöдъяс – комын пöв. 9 Кодлöн эм пель, мед кылö!» 10 Велöдчысьяс матыстчисны Исус дiнö да юалiсны: «Мыйла Тэ сёрнитан йöзыскöд велöданвисьтъясöн?» 11 Исус вочавидзис: «Енэжвыв Юралöмлысь гусяторъяссö тiянлы сетöма тöдны, а налы абу. 12 Кодлöн эм, сылы коланасьыс унджык на сетасны. Кодлöн абу, сылысь бöръясö босьтасны. 13 Найö видзöдöны да оз аддзыны, кывзöны да оз кывны и оз гöгöрвоны. Та вöсна сёрнита накöд велöданвисьтъясöн. 14 Исай пророклöн шуöмыс инö: – Пельнаныд кутанныд кывзыны да онö гöгöрвоöй, синнаныд кутанныд видзöдны да онö аддзöй. 15 Чорзьöма тайö войтырыслöн сьöлöмыс, сьöкыд пеляöсь, куньса синмаöсь. Аддзынысö оз зiльны, кывзынысö оз кöсйыны, сьöлöмнаныс оз гöгöрвоны. Мелань бергöдчынысö оз кöсйыны, медым Ме бурдöдi найöс. 16 Тi шудаöсь, öд тiян синныд аддзö да пельныд кылö. 17 Веськыда висьтала тiянлы: уна пророк да веськыда олысь кöсйисны аддзывны, мый тi аддзанныд, но эз аддзывны. Кöсйисны кывны, мый тi кыланныд, но эз кывлыны». 18 «Кывзöй, Ме гöгöрвоöда тiянлы кöдзысь йылысь велöданвисьтöс. 19 Мортыс кылö Енлöн Юралöм йылысь да оз гöгöрво. Сы дiнö локтö омöльыс да гусялö сьöлöмас кöдзöмасö. Тайöс петкöдлö туй бокö усьöм кöйдыс. 20 Изъяинö усьöм кöйдысыс петкöдлö: мортыс кылö Кывсö да дзик пыр долыдпырысь босьтö сiйöс сьöлöмас, 21 но вужъясьтöмысла оз дыр эскы, Ен Кыв вöсна дзескöдiгöн-вöтлiгöн сiйö эновтчö эскöмсьыс. 22 Лежнöг пöвстö усьöм кöйдысыс петкöдлö: мортыс кылö Кывсö, но быдлунъя тöждыс да озырмыны ыштöмыс пöдтö кöдзöм Кывсö, и сiйö оз вай вотöссö. 23 Бур муö кöдзöм кöйдысыс петкöдлö: мортыс кылö Кывсö, гöгöрвоö сiйöс да вайö вотöс: öтияс – сё пöв, мöдъяс – квайтымын пöв, коймöдъяс – комын пöв». 24 Исус висьталiс мöд велöданвисьт: «Енэжвыв Юралöмыс татшöм. Морт кöдзас аслас муö бур кöйдыс. 25 Войнас узигкостiыс локтас паныд мунысь да шобдi кöйдыс костас ёг турун кöдзас, сэсся мунас. 26 Шобдi петас, кутас шептасьны, ёг турун тшöтш мыччысяс. 27 Кесйöгъяс локтасны овмöс кутысьныс дiнö да шуасны: "Ыджыдöй, эн-ö бур кöйдыс тэ кöдзлы муад? Кытысь нö ёг туруныс сэтчö петöма?" 28 Сiйö вочавидзас: "Паныд мунысь тайöс вöчöма". Кесйöгъяс шуасны: "Кöсъян кö, ёг турунсö ми нетшкам". 29 Мöдыс вочавидзас: "Оз ков. Ёг турун сорнас шобдi петассö тшöтш верманныд нетшыштны. 30 Кольöй, мед быдмасны öтлаын вундан кадöдзыс. Сэки ме тшöкта вундысьяслы: медводз ёг турунсö чукöртöй, сэсся кольтаясö кöртавлöй да сотöй, а шобдiсö идралöй менам йöртöдö"». 31 Мöд велöданвисьт Исус висьталiс налы: «Енэжвыв Юралöмыс муö кöдзöм горчица тусь кодь. 32 Став кöйдыссьыс сiйö медпосни. Сiйö быдмö да лоö пу кодь, став пуктассьыс ыджыд, весиг енэжвыв лэбачьяс поздысьöны вожъясас». 33 Исус нöшта öти велöданвисьт висьталiс: «Енэжвыв Юралöмыс няньшом кодь. Ань гудралас сэтчö куим шомöс тыр пызь, кад мысти няньыс ловзяс». 34 Ставсö тайöс Исус висьталiс йöзыслы велöданвисьтъясöн. Висьтъястöг эз сёрнитлы накöд, 35 медым инiс пророклöн шуöмыс: – Ме велöданвисьтъясöн сёрнита, му пуксьöмсяньыс дзебöмасö юöрта. 36 Йöзсö кольöм бöрын Исус пырис керкаö. Сэтчö локтiсны велöдчысьясыс да найö корисны: «Гöгöрвоöд миянлы ёг турун йылысь висьттö». 37 Исус висьталiс: «Бур кöйдыссö кöдзысьыс – Морт Пи. 38 Кöдза муыс – муюгыд. Бур кöйдысыс – Енлöн йöзыс, ёг туруныс – омöльлöн йöзыс. 39 Паныд мунысьыс, ёг турунсö кöдзысьыс, – омöль. Вундан кадыс – нэм пом, вундысьясыс – анделъяс. 40 Кыдзи чукöртöм ёг турунсö сотöны, тадзи лоö нэм помасигöн. 41 Морт Пи Ассьыс анделъяссö мöдöдас чукöртны Аслас Юраланiнысь став ыштöдысьсö да лёк вöчысьсö. 42 Сэсся шыбитасны найöс биö. Сэнi лоö бöрдöм да пинь йирöм. 43 Веськыда олысьяс сэки Батьныс Юраланiнын шондi моз кутасны югъявны. Кодлöн эм пель, мед кылö!» 44 «Енэжвыв Юралöмыс муö дзебöм озырлун кодь. Морт аддзас муысь озырлун да сiйöс бöр гуалас. Нимкодьысла сiйö мунас, вузалас ассьыс став овмöссö да ньöбас тайö мусö. 45 Енэжвыв Юралöмыс татшöм. Дона изъясöн вузасьысь мунас корсьны мича изъяс 46 да аддзас донасьыс-дона из. Сiйö мунас, вузалас ассьыс став овмöссö да ньöбас тайö изсö». 47 «Енэжвыв Юралöмыс саридзö вöйталöм тыв кодь. Быдсяма чериыс сэтчö шедас. 48 Тывсö вадорö лэптöм бöрын чери кыйысьяс бур черисö дозйö чукöртасны, лёксö шыблаласны. 49 Тадзи лоö нэм помасигöн: анделъяс локтасны, торйöдасны лёк йöзöс веськыда олысьясысь 50 да биö шыбитасны. Сэнi лоö бöрдöм да пинь йирöм». 51 Исус юалiс: «Ставсö-ö гöгöрвоинныд?» Велöдчысьяс вочавидзисны: «Гöгöрвоим, Господь». 52 Исус шуис налы: «Индöдö велöдысь, кодi тöдö Енлысь Юралöмсö, керка кутысь кодь, кодi аслас видзанiнысь выльсö и важсö петкöдö». 53 Тайö велöданвисьтъяссö висьталöм бöрын Исус мунiс сэтысь 54 Аслас карö. Сэнi велöдiс йöзсö синагогаын. Кывзысьяс шензьöмöн шуалiсны: «Кытысь Сылöн татшöм мывкыдлуныс да татшöм выныс? 55 Абу-ö Сiйö тшупсьысьлöн пи? Абу-ö Сылöн мамыс Мария, а вокъясыс – Яков, Иосей, Симон да Иуда? 56 Оз-ö танi овны Сылöн чойясыс? Кытысь Сылöн ставыс тайö?» 57 Тадзи Сiйöс öтдортiсны. Исус шуис налы: «Пророкöс пыдди пуктöны быдлаын, сöмын ас карас да ас гортас оз». 58 Йöзыслöн эскытöм вöсна Исус эз вöч сэнi уна шензьöданаторсö.
1 Сiйö кадö Ирöд öксы кылiс Исус йылысь. 2 Аслас кесъялысьяслы Ирöд шуис: «Тайö Пыртысь Иоан, сiйö ловзьöма, та вöсна вермö вöчны шензьöданаторъяс». 3 Филип вокыслöн Ирöдиада гöтырыс вöсна Ирöд тшöктылiс босьтны Иоанöс да дорöмöн пуксьöдны дзескыдiнö. 4 Öд Иоан öлöдлiс Ирöдöс: «Тайö аньыскöд тэныд оз позь овнытö». 5 Ирöд кöсйис вины Иоанöс, сöмын йöзсьыс полiс, öд найö пуктiсны Иоанöс пророкö. 6 Ирöд нимлунасигöн Ирöдиадалöн нылыс йöктiс гажöдчысьяс водзын. Тайö воис Ирöдлы сьöлöм вылас. 7 Сiйö кыв сетiс нывлы: «Сета тэныд, мый коран». 8 Мамыс велöдöм серти ныв шуис: «Вай меным тасьтiын Пыртысь Иоанлысь юрсö». 9 Öксы шогö усис. Гажöдчысьяс водзын сетöм кывйыс вöсна сiйö тшöктiс вöчны нывлöн корöм серти. 10 Ирöд ыстiс ассьыс йöзсö дзескыдiнö керыштны Иоанлысь юрсö. 11 Сэсся вайисны тасьтiын юрсö да сетiсны нывлы, нылыс нуис сiйöс мамыслы. 12 Иоанлöн велöдчысьясыс локтiсны шойысла да дзебисны сiйöс. Сэсся мунiсны да юöртiсны лоöмтор йывсьыс Исуслы. 13 Тайöс кылöм бöрын Исус öтнас пыжöн мöдiс овтöминö. Йöзыс тöдмалiсны та йылысь да подöн мунiсны каръяссьыныс Сы бöрся. 14 Пыжысь чеччигöн Исус аддзис уна йöзöс. Сылöн сьöлöмыс нормис на вöсна, и Сiйö бурдöдiс висьысьясöс. 15 Рытнас матыстчисны Исус дiнö велöдчысьясыс да шуисны: «Танi овтöмин, и кадыс сёр нин. Ысты йöзсö сиктъясö сёянтор ньöбны». 16 Исус шуис: «Оз ков налы муннысö. Тi сетöй налы сёянсö». 17 Велöдчысьяс воча шуисны: «Миян сьöраным сöмын вит нянь да кык чери». 18 Исус шуис: «Вайöй меным татчö». 19 Сiйö тшöктiс йöзыслы пуксявны муас. Ачыс босьтiс вит няньсö да кык черисö, видзöдлiс енэжö да Енмöс аттьöалöмöн чегис няньсö, сэсся сетiс велöдчысьясыслы. Велöдчысьяс разöдiсны йöзыслы. 20 Ставныс пöттöдзныс сёйисны, коляссö дас кык куд тыр чукöртiсны. 21 Аньясысь да челядьысь öтдор сёйысьыс вöлi вит сюрс гöгöр. 22 Та бöрын Исус тшöктiс велöдчысьясыслы пуксьыны пыжö да вуджны Сытöг ты мöдлапöлö. Ачыс кольччис да мöдöдалiс йöзсö. 23 Йöзöс ыстöм бöрын Исус кайис керöсö кевмысьны да рытсö сэнi вöлi öтнас. 24 Сiйö кадö пыжаяс вöлiны ты шöрасöсь, вермасисны гыяскöд да паныд тöвкöд. 25 Асъядорыс Исус мöдöдчис ва вывтi велöдчысьяс дiнас. 26 Кор найö аддзисны ва вывтi восьлалысь Исусöс, повзьöмнысла горöдiсны: «Тайö орт!» 27 Исус шуис: «Лöньöй, тайö Ме. Энö полöй». 28 Сэки Петыр шуис: «Господьöй, тайö кö Тэ, тшöкты меным ва вывтiыс локны Тэ дiнö». 29 Исус шуис: «Лок». Пыжсьыс воськовтöмöн Петыр мöдiс ва вывтiыс Исус дiнö. 30 Ыджыд тöвнырысь Петырöс полöм босьтiс. Сiйö вöйны пондiс да горöдiс: «Господьöй, мезды менö!» 31 Исус дзик пыр нюжöдiс кисö Петырлы, кутiс сiйöс да шуис: «Этша эскысьöй, мыйла падъялан?» 32 Пыжö пуксиганыс тöлыс лöнис. 33 Пыжын пукалысьяс уськöдчисны Исус водзö да шуисны: «Тэ збыльысь Ен Пи». 34 Тысö вуджöм бöрын найö воисны Генесарет муö. 35 Сэтчöс йöзыс тöдмалiсны Исусöс да юöртiсны та йылысь матiгöгöрас олысьяслы. Найö вайöдiсны Исус дiнö став висьысьсö 36 да корисны, мед висьысьяслы Исус лэдзас инмöдчывны паськöм дорышас. Инмöдчылысьяс ставöн бурдiсны.
1 Сэки Ерусалимысь Исус дiнö воисны фарисейяс Индöдö велöдысьяскöд да шуисны Сылы: 2 «Мыйла велöдчысьясыд пöрысьяслысь шуöмсö торкöны: сёйöм водзвылас кинысö оз мыськавны?» 3 Исус воча шуис налы: «Асьныд тi мыйла кутчысянныд батьяслöн шуöмö да торканныд Енлысь тшöктöмсö? 4 Енмыс шуöма: "Пыдди пукты ассьыд бать-мамтö", "Омöльтан кö бать-мамтö, тэнö кулöм вылö мыждасны". 5 А тi велöданныд: морт кö бать-мамыслы сетöм пыдди кöсйысяс сетны Енлы, 6 тайöн бать-мам пыдди пуктöмсö сiйö оз торк. Батьяслöн шуöм вöсна тi вештанныд Енлысь тшöктöмсö. 7 Кык бана шаньгаяс! Бура шуöма тiян йылысь Исай пророк: 8 – Тайö йöзыс вомнас пыдди пуктöны Менö, но налöн сьöлöмыс ылын Меысь. 9 Весьшöрö ыдждöдлöны Менö мортсянь тшöктöмъясö велöдiгöн». 10 Ас дiнас йöзöс корöмöн Исус шуис: «Кывзöй да гöгöрвоöй. 11 Мортöс оз пежав сiйö, мый вомас пырö, а пежалö, мый вомсьыс петö». 12 Велöдчысьясыс матыстчисны Исус дiнö да шуисны: «Тöдан-ö Тэ, мый фарисейяс дöзмöмаöсь Тэнад сёрнияссьыд?» 13 Сiйö вочавидзис: «Быдмöгсö кö абу енэжвыв Батьöй пуктöма, сiйöс вужнас нетшыштасны. 14 Кольöй найöс, найö синтöмъясöс синтöм нуöдысьяс. Синтöм кö нуöдö синтöмöс, кыкнанныс гуранö усясны». 15 Петыр шуис: «Гöгöрвоöд миянлы висьталöмтö». 16 Исус вочавидзис: «Весиг тi онö на гöгöрвоöй! 17 Онö öмöй вежöртöй: мый пырö вомö, сiйö веськалö кынöмö, сэсся ортсö петö. 18 Мый петö вомысь, сiйö петö сьöлöмысь да пежалö мортöс. 19 Буретш сьöлöмысь петöны лёк мöвпъяс, морт виöм, гозъя олöм пежалöм, кырсалöм, гусясьöм, пöръясьöм да омöльтöм. 20 Тайö пежалö мортсö. А мыськавтöм киöн сёйöмыд морттö оз пежав». 21 Сэсся Исус мунiс Тир да Сидон муясö. 22 Сы дiнö локтiс сэнi олысь ханаанса ань да пондiс горзыны: «Господьöй, Давид Пи! Ло бур сьöлöма ме дiнö! Пеж лов пырöма менам ныв пытшкö да чорыда песлöдлö сiйöс». 23 Исус кыв эз шу аньлы. Велöдчысьясыс матыстчисны Исус дiнö да шуисны: «Лэдз аньсö, сiйö горзöмöн бöрсяньным ветлöдлö». 24 Исус шуис: «Менö мöдöдöма сöмын израильса вошöм ыжъяс дiнö». 25 Ань матыстчис да Исус водзö уськöдчöмöн корис: «Господьöй, отсав меным!» 26 Исус шуис: «Абу бур мырддьыны ныв-пилысь няньсö да шыбитны сiйöс понпиянлы». 27 Ань воча шуис: «Сiдз, Господьöй. Но понъяс тшöтш сёйöны кöзяиныслöн пызан вылысь гылалöм торпыригсö». 28 Исус шуис: «Ыджыд тэнад эскöмыд, аньöй. Мед лоö тэнад кöсйöм сертиыд». Аньлöн нылыс дзик пыр бурдiс. 29 Сэтысь Исус водзö мöдiс. Сiйö мунiс Галилея ты пöлöн, сэсся кайис керöсö да пуксис. 30 Сы дiнö чукöртчис уна йöз. На пöвстын вöлiны китöм-коктöмъяс, синтöмъяс, сёрниттöмъяс да мукöд висьысьяс. Найöс вайöдiсны Исус водзö, и Сiйö бурдöдалiс найöс. 31 Йöзыс чуймисны, кор налöн син водзын сёрниттöмъяс кутiсны сёрнитны, китöмъяс бурдны, коктöмъяс ветлыны да синтöмъяс аддзыны. Ставöн ошкисны Израильлысь Енмöс. 32 Исус корис велöдчысьяссö да шуис: «Менам сьöлöмöй висьö тайö йöзыс вöсна. Найö куим лун нин танöсь, а налöн сёяныс абу. Ог кöсйы мöдöдны найöс сёйтöгыс, мед туяс дзикöдз оз эбöстöммыны». 33 Велöдчысьяс шуисны: «Кытысь босьтны овтöминас сы мында няньсö, медым вердны та мындасö?» 34 Исус юалiс: «Уна-ö тiян няньныд?» Найö вочавидзисны: «Сизим. Кымынкö посни чери на эм». 35 Исус тшöктiс йöзыслы пуксявны муас. 36 Ачыс босьтiс сизим няньсö да черисö, Енмöс аттьöалöмöн чегис няньсö да сетiс велöдчысьясыслы, а велöдчысьяс – йöзыслы. 37 Ставöн пöттöдзныс сёйисны, коляссö сизим куд тыр чукöртiсны. 38 Аньясысь да челядьысь öтдор сёйысьыс вöлi нёль сюрс морт. 39 Йöзсö мöдöдалöм бöрын Исус пуксис пыжö да кывтiс Магдала муö.
1 Фарисейяс да саддукейяс локтiсны Исус дiнö да Сiйöс кыйöм могысь корисны петкöдлыны енэжсянь индысьпас. 2 Исус шуис налы: «Рытнас тi шуанныд: "Енэжыс гöрд – аски лоö мича". 3 Асывводзнас шуанныд: "Енэжыс пемыдгöрд – кыптас бушков". Кык бана шаньгаяс! Енэжлысь чужöмбансö кужанныд тöдмавны, а кадлысь пасъяссö онö. 4 Лёк да пежас ылалöм йöз кöсйöны аддзывны индысьпас, но Иона пророк пасысь кындзи оз ло налы мöдыс». Сэсся Исус колис найöс да мунiс сэтысь. 5 Ты мöдлапöлö вуджиганыс велöдчысьяс казялiсны, мый вунöдöмаöсь босьтны няньсö. 6 Исус шуис налы: «Видзчысьöй фарисей да саддукей няньшомысь». 7 Велöдчысьяс ас костаныс сёрнитiсны: «Няньтö тай босьтны вунöдiм». 8 Тайöс казялöмöн Исус шуис налы: «Этша эскысьяс! Мый нö сёрнитанныд нянь абутöм йывсьыд? 9 Онö öмöй гöгöрвоöй? Вунöдiнныд öмöй вит сюрс мортöс вит няньöн вердöм йылысь? Кымын куд тыр сэки коляссö чукöртiнныд? 10 А нёль сюрс мортöс сизим няньöн вердiгöн, кымын куд тыр чукöртiнныд? 11 Кыдзи тi онö гöгöрвоöй, эг öд нянь йылысь Ме тiянлы висьтав, мися, видзчысьöй фарисей да саддукей няньшомысь!» 12 Сэки найö гöгöрвоисны, мый Исус тшöктiс видзчысьны налы фарисейяслöн да саддукейяслöн велöдöмысь, эз няньшомысь. 13 Исус воис Филиплöн Кесария муö да юалiс велöдчысьясыслысь: «Код туйö йöзыс пуктöны Менö, Морт Пиöс?» 14 Найö вочавидзисны: «Öтияс шуöны, Пыртысь Иоан пö, мöдъяс шуöны, Илля пö, кодсюрö шуöны, Еремей пö, а гашкö, нöшта на мöд пророк». 15 Исус юалiс: «Код туйö тi Менö пуктанныд?» 16 Симон-Петыр вочавидзис: «Тэ – Кристос, ловъя Енлöн Пи». 17 Исус шуис Петырлы: «Тэ шуда, Симон, Ионалöн пи. Öд тайöс тэныд эз морт висьтав, но Менам енэжвыв Батьöй восьтiс тэныд. 18 Ме шуа тэныд: Тэ – Петыр, из. Тайö из вылас Ме лэпта Ассьым Вичко, да сiйöс адлöн выныс оз вермы. 19 Ме сета тэныд Енэжвыв Юраланiнысь восьтанъяс. Мый кöрталан му вылын, сiйö кöрталöма лоö енэжын. Мый разян му вылын, сiйö разьöма лоö енэжын». 20 Исус öлöдiс велöдчысьяссö, медым некодлы эз висьтавны, мый Сiйö – Кристос. 21 Тайö кадсянь Исус кутiс висьтавлыны велöдчысьясыслы, мый Сылы ковмас мунны Ерусалимö да уна сьöкыд сэнi нуны пöрысьяссянь, аркирейяссянь да Индöдö велöдысьяссянь. Сiйöс виасны, но коймöд луннас Сiйö ловзяс. 22 Исусöс бокö корöмöн Петыр шуис: «Ен мед видзас Тэнö, Господьöй. Мед оз ло тайö!» 23 Бергöдчöмöн Исус шуис Петырлы: «Вешйы Ме дiнысь, сöтана! Тэ Менö крукöдан, öд тэнад мöвпъясыд мортсянь, абу Енсянь». 24 Исус шуис велöдчысьясыслы: «Кодi кöсйö мунны Ме бöрся, мед вунöдас асьсö, мед босьтас ассьыс крестсö да локтас Ме бöрся. 25 Кодi кöсйö видзны ассьыс олöмсö, воштас сiйöс. Ме вöсна олöмсö воштысь аддзас сiйöс. 26 Лоас-ö мортыслы бур, босьтас кö аслыс став муюгыдсö, а олöмсö воштас? Вермас-ö бöр ньöбны ассьыс олöмсö? 27 Морт Пи локтас Батьыслöн дзирдлунöн Сылöн анделъяскöд да быдöнлы уджъяс сертиыс мынтас. 28 Веськыда висьтала тiянлы: кодсюрö танi сулалысьяс пиысь кувтöдзныс на аддзасны юравны локтысь Морт Пиöс».
1 Квайт лун мысти Исус босьтiс Аскöдыс Петырöс да Яковöс Иоан вокыскöд да кайис накöд джуджыд керöсö. 2 Велöдчысьяс син водзын Исуслöн мыгöрыс вежсис: чужöмыс пондiс шондi моз югъявны, паськöмыс лои дзирдалана еджыд. 3 Сэки велöдчысьяс аддзисны Мöисейöс да Илляöс, найö сёрнитiсны Исускöд. 4 Петыр шуис Исуслы: «Господьöй, миянлы танi лöсьыд. Кöсъян кö, куим чом татчö сувтöдам: Тэныд, Мöисейлы да Иллялы». 5 Петырлöн сёрнитiгкостi югыд кымöр вевттис найöс, кымöрсянь кылiс гöлöс шы: «Тайö Менам муса Пиöй, Ме нимкодяся Сыöн. Сiйöс кывзöй». 6 Тайöс кылöмысь велöдчысьяс ёна повзисны, чужöмнысö тупкöмöн уськöдчисны муас. 7 Исус матыстчис, инмöдчылiс на дiнö да шуис: «Чеччöй, энö полöй». 8 Юрнысö лэптöм бöрын найö аддзисны сöмын Исусöс. 9 Керöсысь лэччиганыс Исус шуис налы: «Морт Пилöн ловзьытöдз некодлы энö висьталöй, мый аддзылiнныд». 10 Велöдчысьяс юалiсны Исуслысь: «Мыйла Индöдö велöдысьяс шуöны, Иллялы пö колö водзджык локны?» 11 Сiйö вочавидзис: «Дерт, Иллялы колö водзджык локны да ставсö лöсьöдны. 12 Висьтала тiянлы: Илля локтiс нин. Сöмын йöзыс сiйöс эз тöдны, сыкöд вöчисны, мый кöсйисны. Тадзи тшöтш Морт Пилы уна сьöкыд насянь вичмас». 13 Велöдчысьяс сэки гöгöрвоисны, мый Исус висьталiс налы Пыртысь Иоан йылысь. 14 Найö мöдöдчисны йöз чукöрлань. Мунiганыс матыстчис Исус дiнö морт, сiйö пидзöс вылас сувтöмöн 15 корис: «Господьöй, ло бур сьöлöма менам пи дiнö. Сiйö шыблалан висьöмöн висьö, тшöкыда биö-ваö усьлö, таысь сылы ёна сьöкыд. 16 Ме вайöдлi сiйöс велöдчысьяс дiнад, но найö бурдöднысö эз вермыны». 17 Исус шуис: «Эскытöм-ылалöм йöз! Дыр-ö на Меным овнысö тiянкöд? Дыр-ö на Меным видзöдны тiянöс? Вайöдöй Ме дiнö зонкасö». 18 Исус öлöдiс пеж лолöс. Сэки пеж лов петiс зонка пытшкысь, и зонка пырысьтöм-пыр бурдiс. 19 Ас кежаныс кольöм бöрын велöдчысьяс юалiсны Исуслысь: «Мыйла ми эгö вермöй вöтлыны пеж ловсö?» 20 Исус шуис: «Онö эскöй да. Веськыда висьтала тiянлы: лоас кö тiян эскöмныд горчица тусь ыджда, верманныд шуны тайö керöсыслы: "Вешйы тасянь сэтчö" – и сiйö вешъяс. Тiянлы нинöм вермытöмыс оз ло. 21 Видзавтöг да кевмысьтöг татшöм пеж ловъяссö вöтлыны онö вермöй». 22 Галилеяö локтöм бöрын Исус шуис велöдчысьясыслы: «Морт Пиöс сетасны йöзлöн киö. 23 Сiйöс виасны, но коймöд луннас Сiйö ловзяс». Велöдчысьяс шогö усисны. 24 Исус велöдчысьясыскöд локтiс Капернаум карö. Сэнi Петыр дiнö матыстчисны крамлы вот чукöртысьяс да юалiсны: «Мынтö-ö тiян Велöдысьныд вотсö?» 25 Петыр вочавидзис: «Мынтö». Кор Петыр пырис керкаö, Исус дзик пыр юалiс: «Симон, тэ ногöн, кодлысь öксыяс вотсö перйöны: ас войтырыслысь али мукöдлысь?» 26 Сiйö вочавидзис: «Мукöдлысь». Исус шуис: «Сiдзкö, ас войтырыс вотсö оз мынтыны. 27 Мед оз дöзмыны найö, мун ты дорас да чöвт вугыртö. Медводдза шедöм чери вомсьыс тэ аддзан эзысь сьöм. Босьт сiйöс да мынты налы Ме пыдди и ас пыддиыд».
1 Сэки локтiсны Исус дiнö велöдчысьясыс да юалiсны Сылысь: «Кодi Енэжвыв Юраланiнас ыджыдджыкыс?» 2 Исус корис кагаöс да на шöрö сiйöс сувтöдöмöн 3 шуис: «Веськыда висьтала тiянлы: онö кö вежсьöй да лоöй челядь кодьöсь, Енэжвыв Юраланiнö онö пырöй. 4 Тайö кага кодьö асьсö пуктысь лоас Енэжвыв Юраланiнын ыджыдджык. 5 Кодi Менам ним вöсна сибöдö öти татшöм кагаöс, сiйö сибöдö Менö». 6 «Кодi ыштöдас тайö ичöтъясысь öтикöс, Меным эскысьöс, сылы бурджык лоö, сьылiас кö ыджыд изки öшöдасны да вöйтасны джуджыд саридзö. 7 Курыд шог муюгыдыслы ыштöдöмъясысь! Ыштöдöмъяслы колö локнысö, но курыд шог сiйö мортлы, код пыр локтöны ыштöдöмъясыс! 8 Ки-кокыд кö ыштöдö тэнö, керышт да шыбит сiйöс. Бурджык пырны помтöм олöмö ки пöлаöн либö кок пöлаöн куслытöм биö тэнö киа-кокаöн шыбитöм дорысь. 9 Синмыд кö ыштöдö тэнö, перйы да шыбит сiйöс. Бурджык пырны помтöм олöмö син пöлаöн куслытöм биö тэнö синмаöн шыбитöм дорысь». 10 «Кывзöй, тайö ичöтъясысь весиг öтикöс энö öтдортöй. Висьтала тiянлы: енэжын налöн анделъясныс пыр енэжвыв Батьлöн чужöмбан водзынöсь. 11 Морт Пи локтiс корсьны да мездыны вошöмаясöс. 12 Мый тi шуанныд? Мортлöн кö сё ыжсьыс öти вошас, оз-ö сiйö коль öкмысдас öкмыссö керöсö да мун корсьны вошöмасö? 13 Веськыда висьтала тiянлы: аддзас кö сiйöс, ёнджыка нимкодясяс öти вöснаыс вошлытöм öкмысдас öкмысыс дорысь. 14 Тадзи енэжвыв Батьныд оз кöсйы, медым тайö ичöтъясысь весигтö öти вошис». 15 «Вокыд кö мыж вöчас тэныд паныд, мун да ас кежаныд янöд сiйöс. Кывзас кö тэнö, сiйö тэныд вокöн кольö. 16 Оз кö кывзы тэнö, босьт аскöдыд öти-кык мортöс, öд "ставсö колö подулавны кык либö куим мортлöн висьталöмöн". 17 Оз кö сiйö кывзы найöс, висьтав вичко водзын. Весиг кö найöс оз кывзы, лыддьы сiйöс ентöдтöмöн, вот перйысьяс лыдö пукты. 18 Веськыда висьтала тiянлы: мый кöрталанныд му вылын, сiйö кöрталöма лоö енэжын. Мый разянныд му вылын, сiйö разьöма лоö енэжын. 19 Висьтала тiянлы: тiян пиысь кö кыкöн öтвыв корасны мыйкö, енэжвыв Батьöй сетас налы. 20 Öд кöнi кыкöн-куимöн чукöртчасны Менам нимöн, сэнi Ме на шöрын лоа». 21 Сэки Петыр матыстчис Исус дiнö да юалiс: «Господьöй, меным кö вокöй лёк вöчö, кымынысь колö сiйöс прöститнысö? Сизимысь-ö?» 22 Исус вочавидзис: «Оз сизимысь, а сизимдас пöв сизимысь! 23 Енэжвыв Юралöмыс татшöм. Öксы шуис артавны аслас кесйöгъяслысь уджйöзсö. 24 Арталiгас öксы водзö вайöдiсны öти кесйöгöс, кодлöн уджйöзыс вöлi дас сюрс талант. 25 Мынтынысö сiйö эз вермы. Сэки öксы тшöктiс вузавны тайö кесйöгсö, сылысь гöтырсö, ныв-писö да овмöссö, медым тадзи бергöдны уджйöзсö. 26 Кесйöг уськöдчис öксы водзö да пондiс корны: "Ыджыдöй, ло бур сьöлöма! Ме ставсö тэныд мынта". 27 Öксылöн сьöлöмыс небзис. Сiйö шуис лэдзны кесйöгсö да вунöдны уджйöзсö. 28 Ывлаö петöм бöрын кесйöг аддзис уджъёртсö. Ёртыс вöлi уджйöза сылы сё динар. Сiйöс джагöдöмöн шуалiс: "Мынты уджйöзтö!" 29 Ёртыс пидзöс вылас уськöдчöмöн корис: "Ло бур сьöлöма! Ставсö мынта". 30 Мöдыс эз кöсйы виччысьнысö да йöртiс ёртсö дзескыдiнö уджйöзсö мынтытöдзыс. 31 Тайöс аддзылöмысь мукöд кесйöгыс шогö усисны. Найö мунiсны öксы дiнö да висьталiсны сылы ставсö. 32 Öксы корис ас дiнас сiйö кесйöгсö да шуис: "Лёк морт тэ вöлöмыд! Тэнад корöм серти ме вунöдi тэнсьыд став уджйöзтö. 33 Эз öмöй ков тэныд ме моз лоны бур сьöлöмаöн?" 34 Скöрмöм öксы чорыда мыждiс кесйöгсö да йöртiс сiйöс дзескыдiнö уджйöзсö дзоньнас вештытöдзыс. 35 Тадзи Менам енэжвыв Бать вöчас тiянлы, онö кö сьöлöмсяньныд прöститöй вокнытö».
1 Тайöс висьталöм бöрын Исус петiс Галилея муысь да мунiс Йöрдан ю мöдлапöлöд Юдея муö. 2 Зэв уна йöз вöтчис Сы бöрся, и Сiйö бурдöдалiс найöс. 3 Исус дiнö матыстчисны фарисейяс да Сiйöс кыйöм могысь юалiсны: «Быд помка вöсна-ö морт вермас юксьыны гöтырыскöд?» 4 Исус вочавидзис: «Энö öмöй лыддьылöй, мый медводз Ен вöчис аймортöс да аньöс? 5 Сiйö шуис: "Та вöсна морт кольö бать-мамсö да öтлаасьö гöтырыскöд, и тайö кыкыс лоöны öти вир-яйöн". 6 Сiдзкö, найö абу нин кык, а öти вир-яй. Мый йитöма Енмыс, морт мед оз торйöд». 7 Фарисейяс шуисны: «Мыйла нö Мöисей тшöктiс гöтыртö эновтiгöн сетны сылы торйöдчан гижöд?» 8 Исус вочавидзис: «Чорыд сьöлöмныд вöсна Мöисей лэдзис тiянлы эновтны гöтыръяснытö. Водзынсö эз вöв тадзи. 9 Ме шуа тiянлы: верöсыс кö эновтö гöтырсö, а гöтырыс оз кырсав, да гöтрасьö мöдкöд, сiйö гозъя олöм пежалö. Юксьöм аньöс гöтырö босьтысь тшöтш пежалö». 10 Велöдчысьясыс шуисны: «Бурджык, сiдзкö, гöтрасьтöг овны». 11 Исус шуис: «Оз быдöн вермы тадзи овнысö, сöмын кодлы тайöс сетöма. 12 Уна помка вöсна морт оз вермы гöтрасьны: öтияс мам кынöмсяньыс нин татшöмöсь, мöдъясöс вöчисны татшöмъясöн, коймöдъяс Енлы кесъялöм вöсна гöтрасьтöг олöны. Верман кö тадзи овны, ов». 13 Исус дiнö вайöдiсны челядьöс, медым Сiйö кисö пуктылöмöн кевмысис. Велöдчысьяс шуасисны вайöдысьяс вылö. 14 Исус шуис: «Лэдзöй челядьсö. Энö кутöй найöс Ме дiнö локтöмысь. Енэжвыв Юраланiнсö öд на коддьöмлы лöсьöдöма». 15 Исус пуктылiс на вылö кисö, сэсся мунiс сэтысь. 16 Öти морт локтiс Исус дiнö да юалiс: «Бур Велöдысьöй, кутшöм буртор меным колö вöчны, мед менам вöлi помтöм олöм?» 17 Исус вочавидзис: «Мыйла тэ шуан Менö бурöн? Некод абу бурыс, сöмын Енмыс бур. Кöсъян кö пырны помтöм олöмö, ов тшöктöмъяс серти». 18 Мортыс юалiс: «Кутшöм тшöктöмъяс серти?» Исус вочавидзис: «Эн ви, гозъя олöмтö эн пежав, эн гусясь, эн пöръясь, 19 пыдди пукты ассьыд бать-мамтö, радейт матыссатö асьтö моз». 20 Том морт шуис: «Ме ола тайö тшöктöмъяс сертиыс. Мый нöшта оз тырмы?» 21 Исус шуис: «Кöсъян кö тырвыйö бурöн лоны, мун, овмöстö вузав да сьöмсö сет гöльяслы. Сэки тэныд енэжын озырлуныс вичмас. Сэсся лок Ме бöрся». 22 Тайö кывъяссö кылöм бöрын том морт жугыля мунiс, öд сылöн озырлуныс вöлi уна. 23 Велöдчысьясыслы Исус шуис: «Веськыда висьтала тiянлы: озырлы сьöкыд пырны Енэжвыв Юраланiнö. 24 Нöшта шуа: озырлы Енлöн Юраланiнö пырöм дорысь верблюдлы кокньыдджык пырны ем пысöд». 25 Велöдчысьясöс тайö чуймöдiс, и найö юалiсны: «Кодi нö, сiдзкö, вермас мездмынысö?» 26 На вылö видзöдлöмöн Исус шуис: «Мортлы тайö вермытöмтор, но Енмыслы ставыс вермана». 27 Сэки Петыр шуис: «Ми ставсö эновтiм да мунiм Тэ бöрся. Мый миянлы вичмас таысь?» 28 Исус шуис: «Веськыда висьтала тiянлы: выль олöмын Морт Пи пуксяс дзирдлуныслöн юралан пуклöсö. Тшöтш тi, Ме бöрся мунысьяс, пуксянныд дас кык юралан пуклöсö мыждыны израильса дас кык чужанкотырöс. 29 Кодi Менам ним вöсна коляс керкасö, чой-воксö, бать-мамсö, гöтырсö, ныв-писö, видз-мусö, сылы сё пöвстöн бöр воас, нöшта помтöм олöм сылы вичмас. 30 Воддзаясысь унаöн лоöны бöръяöн, бöръяясысь – воддзаöн».
1 «Енэжвыв Юралöмыс татшöм. Овмöс кутысь водз асывнас мунас медавны аслас виноград йöрö уджалысьясöс. 2 Уджалысьяскöд сёрнитчас лунысь динар мынтыны, сэсся мöдöдас найöс виноград йöрас. 3 Öкмыс часын овмöс кутысь петас да аддзас медасянiнысь уджтöг сулалысь йöзöс. 4 Сiйö шуас налы: "Мунöй менам виноград йöрö. Ме мынта тiянлы лöсялан удждонсö". 5 Найö мунасны. Дас кыкын, сэсся куим часын овмöс кутысь бара петас да воддза мозыс вöчас. 6 Сэсся вит час гöгöрын петас да аддзас, кодсюрö сулалöны на. Сiйö юалас налысь: "Мый танi сулаланныд кузь лунтырсö?" 7 Найö вочавидзасны: "Миянöс эз медавны". Сэки сiйö шуас налы: "Мунöй менам виноград йöрö. Ме мынта тiянлы лöсялан удждонсö". 8 Рытнас овмöс кутысь шуас уджöн веськöдлысьыслы: "Кор уджалысьястö да мынтысь налы. Бöрынджык локтöмаяслы мынты водзджык, сэсся воддзаясыслы". 9 Вит часын локтöмаяс босьтiсны динарöн. 10 Воддза локтöмаяс мöвпыштiсны, мый унджык босьтасны, но налы тшöтш динар мынтiсны. 11 Удждон босьтöм бöрын найö элясясны овмöс кутысьлы: 12 "Ми кузь лунтыр гож водзын мырсим, а бöрынджык локтöмаяс сöмын час уджалiсны, да налы тэ дзик миянлы моз мынтiн". 13 Овмöс кутысь на пиысь öтилы шуас: "Ёртöй, ме эг пöрйöдлы тэнö. Тэ öмöй эн динарысь сёрнитчыв мекöд? 14 Бость динартö да мун. Ме кöсъя бöрынджык локтöмалы мынтыны тшöтш тэныд моз. 15 Ог öмöй ме вермы ассьым сьöмöс видзны ас кöсйöм серти? Тэнад öмöй вежыд петö, мый ме бур сьöлöма?" 16 Тадзи бöръяяс лоöны воддзаöн, а воддзаяс – бöръяöн. Унаöс корöма, но этшаöс бöрйöма». 17 Ерусалимö кайигöн Исус корис дас кыкнан велöдчысьсö да мунiгмозыс висьталiс налы: 18 «Öнi ми мунам Ерусалимö. Сэнi Морт Пиöс сетасны аркирейяслы да Индöдö велöдысьяслы. Найö шуасны вины Сiйöс, 19 сетасны ентöдтöмъяс киö. Найö сераласны Сiйöс, чорыда нöйтасны, сэсся тувъяласны крестö. Но коймöд луннас Сiйö ловзяс». 20 Зеведей пиянлöн мамыс пияныскöд локтiс аслас корöмöн Исус дiнö. Ань копыртчис Исус водзö. 21 Исус юалiс: «Мый тэ кöсъян?» Ань вочавидзис: «Пуксьöд Аскöдыд Юраланiнад менсьым кыкнан пиöс, öтисö веськыдладорад, мöдсö шуйгаладорад». 22 Исус шуис: «Онö тöдöй, мый коранныд. Верманныд-ö юны Меным лöсьöдöм чашасö да Менам пыртчöмöн пыртчыны?» Найö вочавидзисны: «Вермам». 23 Исус шуис: «Менсьым чашасö понданныд юны да Менам пыртчöмöн понданныд пыртчыны. Но мед пуксьöдны веськыдладорам да шуйгаладорам – тайö абу Ме сайын. Менам Бать сэтчö пуксьöдысьыс». 24 Кык воклöн сёрниыс дöзмöдiс мукöд дас велöдчысьсö. 25 Исус корис велöдчысьяссö да шуис: «Тi тöданныд, мый юралысьяс ыджыдалöны йöз вылын, да веськöдлысьяс кипод улас кутöны йöзöс. 26 Но тi тадзи энö вöчöй. Кöсъян кö ыджыдö пуксьыны – кесъяв, 27 кöсъян кö юралысьö пуксьыны – ло кесйöг туйын. 28 Öд Морт Пи эз лок, медым Сылы кесъялiсны. Сiйö локтiс кесъявны да сетны Ассьыс олöмсö унаöс ньöбöм могысь». 29 Ерикон карысь петiганыс Исус бöрся вöтчис зэв уна йöз. 30 Туй дорас пукалiсны кык синтöм морт. Кор кылiсны Исуслысь на дортi мунöмсö, горöдiсны: «Господьöй, Давид Пи! Ло бур сьöлöма миян дiнö!» 31 Йöзыс öлöдiсны найöс горзöмысь, но найö ёнджыка на пондiсны горзыны: «Господьöй, Давид Пи! Ло бур сьöлöма!» 32 Исус сувтiс, корис найöс да юалiс: «Мый тi кöсъянныд?» 33 Найö вочавидзисны: «Господьöй, кöсъям аддзыны». 34 Исуслöн сьöлöмыс нормис на вöсна. Сiйö инмöдчылiс налы синмас, да найö дзик пыр кутiсны аддзыны. Сэсся кыкнанныс мунiсны Исус бöрся.
1 Ерусалимлань матыстчигöн Исус велöдчысьясыскöд воис Олив керöсын сулалысь Виффагия сикт дорö. Ассьыс кык велöдчысьсö мöдöдiгöн Исус 2 шуис: «Мунöй тайö сиктас. Сэтчö пыриганыд аддзанныд домалöм чаня осёлöс. Разьöй да вайöдöй найöс Ме дiнö. 3 Тiянлы кö мыйкö шуасны, вочавидзöй, мый найö колöны Господьлы. Сэки тiянлы дзик пыр сетасны». 4 Ставыс тадзи артмис, медым инiс пророклöн шуöмыс: 5 – Висьталöй Сион нывлы: Видзöд, Öксыыд локтö тэ дiнö! Сiйö рам, пукалö осёл вылын, сийöсалöм осёллöн чань вылын. 6 Велöдчысьяс мунiсны да вöчисны Исуслöн тшöктöм серти. 7 Вайöдiсны осёлöс чаньыскöд да пукталiсны на вылö паськöмнысö, сэсся Исус пуксис. 8 Унаöн вольсавлiсны ассьыныс паськöмнысö туй вылас, мукöдыс чегъялiсны пу вожъяс да тшöтш пукталiсны туй вылас. 9 Водзас да бöрас мунысьяс горзiсны: – Осанна! Ошкöм Давид Пилы! Бурсиöма Господь нимöн Локтысьöс! Ошкöм Медвылыссалы! 10 Кор Исус пырис Ерусалимö, став карыс шызис, быдöн юасис: «Кодi тайö?» 11 Йöзыс шуалiсны: «Тайö Исус, Галилеяса Назарет карысь Пророк». 12 Исус пырис Енлöн крамö да вöтлалiс сэтысь став вузасьысь-ньöбасьысьсö, пöрлöдлiс сьöм вежысьяслысь пызанъяссö да гулюöн вузасьысьяслысь пуклöсъяссö. 13 Сiйö шуис налы: «Гижöма: "Менам керкаöй кевмысян керка лоö". А тi сыысь вöчинныд лёк вöчысьяслы дзебсянiн». 14 Крамын матыстчисны Исус дiнö синтöмъяс да коктöмъяс. Исус бурдöдалiс найöс. 15 Кор аркирейяс Индöдö велöдысьяскöд аддзисны Сылысь шензьöданаторъяс вöчöмсö да кылiсны крамын челядьлысь горзöм: «Ошкöм Давид Пилы!», ёна дöзмисны. 16 Исуслы шуисны: «Кылан-ö, мый найö шуалöны?» Исус вочавидзис: «Кыла. Тi öмöй энö лыддьылöй: "Тэ лöсьöдiн, медым кагаяс да челядь ошкисны Тэнö"». 17 Сэсся Исус эновтiс найöс, петiс карсьыс да мунiс вой кежлас Вифания сиктö. 18 Асывводзнас карö бöр локтiгас Исуслöн кынöмыс пондiс сюмавны. 19 Туй дорсьыс Сiйö аддзис инжир пу. Матыстчис да аддзис сы вылысь сöмын коръяссö. Исус шуис пуыслы: «Пыр кежлö вотöстöг колян». Инжир пуыс пырысь-пыр косьмис. 20 Тайöс аддзылiсны велöдчысьяс да чуймöмöн шуисны: «Мыйла пуыс татшöм öдйö косьмис?» 21 Исус вочавидзис: «Веськыда висьтала тiянлы: эсканныд кö да онö майшасьöй, сэки онö сöмын тайöс вöчöй. Шуанныд кö тайö керöсыслы: "Кыпöдчы да шыбитчы саридзас", лоö тадзи. 22 Мый коранныд эскöмöн кевмысигад, лоö тiянлы». 23 Исус локтiс крамö. Сэнi велöдiгас Сы дiнö матыстчисны аркирейяс пöрысьяскöд да юалiсны: «Кутшöм вынöн Тэ ставсö тайöс вöчан? Кодi Тэнö пуктiс тайöс вöчнысö?» 24 Исус воча шуис: «Ме тшöтш тiянлысь öтитор юала. Вочавидзанныд кö, висьтала, кутшöм вынöн ставсö тайöс вöча. 25 Иоанлöн пыртöмыс кодсянь вöлi? Енсянь али мортсянь?» Найö ас костаныс сёрнитiсны: «Шуам кö: "Енсянь", Сiйö миянлы шуас: "Мыйла сылы энö эскöй?" 26 Шуам кö: "Мортсянь", йöзсьыс ковмас повны, öд Иоанöс ставныс пророкö пуктöны». 27 Найö вочавидзисны: «Огö тöдöй». Сэки Исус шуис: «Сiдзкö, Ме тшöтш ог висьтав, кутшöм вынöн ставсö тайöс вöча». 28 «Мый тi шуанныд та йылысь? Öти мортлöн вöлi кык пи. Öти пи дiнас матыстчöмöн сiйö шуас: "Пиöй, мун талун уджышт виноград йöрын". 29 Пиыс вочавидзас: "Ог кöсйы". Бöрынджык вежас мöвпсö да мунас. 30 Батьыс матыстчас мöд пиыс дiнö да тшöтш тадзи шуас. Пиыс вочавидзас: "Батьöй, муна, дерт", но ачыс оз мун. 31 Кодныс нö батьыслöн кöсйöм сертиыс вöчис?» Вочавидзисны: «Воддзаыс». Исус шуис: «Веськыда висьтала тiянлы: вот перйысьяс да кырсалысь аньяс тiян водзвылын мунöны Енлöн Юраланiнö. 32 Иоан локтiс индыны тiянлы веськыдлуныслысь туйсö, а тi сылы энö эскöй. Вот перйысьяс да кырсалысь аньяс эскисны сылы. Тi весиг тайöс аддзылöм бöрын энö бергöдчöй мыжъяссьыныд да энö эскöй сылы». 33 «Кывзöй мöд велöданвисьт. Овмöс кутысь пуктас аслас йöрö виноград, гöгöрыс потшас, вотöс ныранiн кодъяс да джуджыд лэбув лэптас. Сэсся йöрсö виноград быдтысьяслы кöртымö сетас, ачыс мунас. 34 Вотöс чукöртан кадö овмöс кутысь мöдöдас кесйöгъяссö босьтны вотöсысь ассьыс пайсö. 35 Виноград быдтысьяс кутасны кесйöгъяссö: öтиöс нöйтасны, мöдöс виасны, мукöдсö изъяласны. 36 Овмöс кутысь мöдöдас мукöд кесйöгъясöс, воддза сертиыс унджыкöс. Накöд тшöтш сiдзи вöчасны. 37 Медбöрти виноград быдтысьяс дiнö овмöс кутысь мöдöдас ассьыс писö, мöвпыштас: "Менам пиысь, гашкö, яндысясны". 38 Писö аддзöм бöрын виноград быдтысьяс шуасны öта-мöдныслы: "Тайö мортыслы вуджас овмöсыс. Мунам да виам сiйöс, медым овмöсыс миянлы коляс". 39 Найö кутасны сiйöс, петкöдасны виноград йöрсьыс да виасны. 40 Мый вöчас овмöс кутысь виноград быдтысьяскöд локтöм мыстиыс?» 41 Вочавидзисны: «Тайö лёк йöзсö сiйö лёк нога виас. Виноград йöрсö кöртымö сетас мукöдлы, кодъяс индöм кадö сетасны сылы вотöсысь пайсö». 42 Исус шуис: «Энö öмöй Гижöдсьыс лыддьылöй: – Изйыс, кодöс шыбитiсны керка лэптысьяс, лоис пельöс изйöн. Тайö Господьсянь да шензяна миян синъяслы. 43 Та вöсна шуа тiянлы: Енсянь Юралöмсö мырддясны тiянлысь да сетасны войтырлы, кодi вайö Ен Юралöмлысь вотöссö. 44 Кодi усяс тайö изйыс вылö, сiйö пасьмунас. Код вылö изйыс усяс, сiйöс лямöдас». 45 Тайö велöданвисьтъяссö кылöм бöрын аркирейяс да фарисейяс гöгöрвоисны, мый Исус висьталiс на йылысь. 46 Найö кöсйисны кутны Сiйöс, но полiсны йöзсьыс, öд йöзыс Сiйöс пророкö пуктiсны.
1 Исус висьталiс нöшта öти велöданвисьт: 2 «Енэжвыв Юралöмыс татшöм. Öксы аслас пиыслы кöлысь вöчас. 3 Сiйö ыстас ассьыс кесйöгъяссö корны йöзöс кöлысь вылö. Корöмаяс оз кöсйыны локнысö. 4 Öксы бара мöдöдас мукöд кесйöгъясöс да тшöктас висьтавны корöмаяслы: "Сёян-юан менам дасьтöма, öшъяс-куканьяс начкöма, ставыс дась. Локтöй кöлысясьны!" 5 Корöмаяс пыдди оз пуктыны корöмсö: öтияс мунасны видз-му выланыс, мöдъяс вузасьны. 6 Мукöдыс кутасны öксылысь кесйöгъяссö да кувтöдзыс найöс нöйтасны. 7 Öксы кывлас та йылысь да ёна скöрмас. Сiйö мöдöдас ассьыс шыпуртаяссö вины морт виысьясöс, а карсö тшöктас сотны. 8 Сэсся аслас кесйöгъяслы шуас: "Кöлысь дась. Корöмаясыд вöлöмкö шогмытöмöсь. 9 Мунöй туйвежъясö да корöй кöлысь вылö быдöнöс". 10 Кесйöгъяс мунасны да корасны быдöнöс: лёкъясöс и буръясöс. Кöлысь гажöдчанiн тырас. 11 Öксы пырас гажöдчанiнö видзöдлыны воöмаясöс да аддзас мортöс, кодi абу кöлысь паськöма. 12 Öксы юалас сылысь: "Ёртöй, кыдзи тэ пырин татчö кöлысь паськöмтöгыс?" Сiйö кыв оз шу. 13 Сэки öксы тшöктас кесйöгъясыслы: "Ки-коксö кöрталöмöн шыбитöй сiйöс пемыдас. Сэнi лоö бöрдöм да пинь йирöм". 14 Шуа тiянлы: унаöс корöма, но этшаöс бöрйöма». 15 Фарисейяс мунiсны да ас костаныс сёрнитчисны кыйны Исусöс сёрниас. 16 Найö мöдöдiсны Сы дiнö Ирöдлысь йöзсö да ассьыныс велöдчысьяссö. Локтöмаяс шуисны: «Велöдысь, ми тöдам, мый Тэ веськыда сёрнитан да веськыда велöдан Енлöн туйö. Тэ он пов йöзлöн шуасьöмысь, он видзöд морт вылö. 17 Висьтав, колö-ö кесарлы вот мынтыны?» 18 Налысь наянлунсö тöдöмöн Исус шуис: «Кык бана шаньгаяс! Мыйла тi зiлянныд кыйны Менö? 19 Петкöдлöй Меным вот мынтан сьöмнытö». Найö мыччисны Сылы динар. 20 Исус юалiс: «Кодлöн танi чужöмыс-нимыс?» 21 Найö вочавидзисны: «Кесарлöн». Исус шуис налы: «Кесарлысь сетöй кесарлы, а Енлысь – Енлы». 22 Тайöс кылöмысь найö чуймисны, сэсся колисны Исусöс да мунiсны. 23 Сiйö лунö локтiсны Исус дiнö саддукейяс, кодъяс шуöны, ловзьöмыс пö абу. Найö юалiсны Исуслысь: 24 «Велöдысь, Мöисей шулöма, мый "ныв-питöм морт кö кулас, вокыслы колö босьтны сылысь гöтырсö да нюжöдны аслас вокыслысь рöдсö". 25 Танi миян вöлi сизим вок. Ыджыдыс гöтрасис, сэсся кулiс, ныв-пиыс эз коль. Гöтырсö вокыс босьтiс. 26 Тадзи лои мöд вокыскöд, коймöдыскöд, став сизимнанныскöд. 27 Медбöрын аньыс кулiс. 28 Ловзьöм бöрас кодлы сiйö гöтырöн лоас, öд сизим верöс сылöн вöлi?» 29 Исус вочавидзис: «Тi ылалöмныд Гижöдъяссö да Енлысь вынсö тöдтöмныдла. 30 Ловзьöмаяс оз гöтрасьны да верöс сайö оз мунны. Найö Енлöн енэжвыв анделъяс кодьöсь. 31 Ловзьöм йылысь шуа – тi öмöй энö лыддьылöй, Енмыс öд шуöма: 32 "Ме Öвраамлöн Ен, Исааклöн Ен да Яковлöн Ен"? Енмыс абу кулöмаяслöн Ен, Сiйö ловъяяслöн Ен». 33 Йöзыс шензисны Сылöн велöдöмысь. 34 Фарисейяс кор кылiсны, мый Исус ланьтöдöма саддукейясöс, чукöртчисны öтлаö. 35 На пиысь öти, Индöдö велöдысь, Исусöс кыйöм могысь юалiс: 36 «Велöдысь, Индöдас кутшöм тшöктöм медыджыд?» 37 Исус шуис: «Радейт ассьыд Господь Ентö став сьöлöмнад, став олöмнад да став мывкыднад. 38 Тайö медыджыд да медтöдчана тшöктöм. 39 Сы кодь мöд тшöктöмыс: радейт матыссатö асьтö моз. 40 Тайö кык тшöктöмыс вылö подуласьö став Индöдыс да пророк гижöдъяс». 41 Исус юалiс чукöртчöм фарисейяслысь: 42 «Мый шуанныд Кристос йылысь? Кодлöн Сiйö пи?» Найö вочавидзисны: «Давидлöн». 43 Сэки Исус юалiс: «Мыйла нö Ловсянь сёрнитiгас Давид шуö Сiйöс Господьöн: 44 – Господь шуис менам Господьлы: "Пукав Менам веськыдладорын, кытчöдз ог пукты Тэнад кок улö Тэныд паныд мунысьясöс". 45 Давид кö шуö Сiйöс Господьöн, кыдзи нö Сiйö сылы пиöн лоö?» 46 Исуслы некод эз вермы воча кыв шуны. Сiйö лунсянь некод нин эз лысьт юасьны Сылысь.
1 Йöз чукöрлы да велöдчысьясыслы Исус висьталiс: 2 «Мöисей пуклöсö пуксисны Индöдö велöдысьяс да фарисейяс. 3 Кывзöй найöс да вöчöй ставсö налöн шуöм серти. Сöмын на ног энö олöй: найö öтитор шуöны, а мöдтор вöчöны. 4 Найö кöртавлöны сьöкыд, нуны вермытöм нöбъяс да пуктöны йöзлы пельпом вылас. Но асьныс весиг чунь помнас вöрзьöдны оз кöсйыны. 5 Найö ставсö вöчöны йöзлы петкöдлöм могысь: öшлöны ас выланыс ыджыд кудъяс, кузьмöдöны паськöм дорыш тугъяссö. 6 Найö радейтöны гажöдчанiнын бурджыклаö пуксьыны, синагогаын водзын пукавны 7 да йöзаинын чолöмалöмъяс кывзыны. Налы сьöлöм вылас воö, ыдждöдлöны кö найöс велöдысьöн. 8 Но тi энö пуксьöй велöдысьö, öд Велöдысьыс тiян öти – Кристос, а тi öта-мöдныдлы вокъяс. 9 Тайö му вылас некодöс энö ыдждöдлöй батьöн, öд Батьыс тiян öти – енэжъяс вылын. 10 Энö пуксьöй туйдöдысьö, öд Туйдöдысьыс тiян öти – Кристос. 11 Тiян пöвстысь ыджыдджыкыс мед лоö тiянлы кесъялысьöн. 12 Öд асьсö вылö пуктысьöс лэдзасны, асьсö улö пуктысьöс кыпöдасны». 13 «Курыд шог тiянлы, Индöдö велöдысьяс да фарисейяс! Кык бана шаньгаяс! Тi Енэжвыв Юраланiнысь öдзöссö йöз водзын пöдлаланныд. Асьныд онö пырöй да пырны кöсйысьясöс онö лэдзöй. 14 Курыд шог тiянлы, Индöдö велöдысьяс да фарисейяс! Кык бана шаньгаяс! Тi дöваяслысь керкасö куштанныд да асьнытö петкöдлöм могысь дыр кевмысянныд. Таысь тiянöс чорыда мыждасны. 15 Курыд шог тiянлы, Индöдö велöдысьяс да фарисейяс! Кык бана шаньгаяс! Тi мусö да васö вуджанныд, медым аддзыны тiян бöрся öти мунысьöс. А сюрас кö, тi вöчанныд сыысь куслытöм биö мунысьöс, кык пöв лёкджыкöс на ас дорсьыныд. 16 Курыд шог тiянлы, синтöм нуöдысьяс! Тi шуанныд: "Мортыс кö крам водзын кыв сетас, тайö кывсö позьö торкны. Сетас кö кывсö крамлöн зарни водзын, таысь кывкутас". 17 Синтöмъяс да мывкыдтöмъяс! Мый ыджыдджык: зарниыс али зарнисö вежöдысь крамыс? 18 Тi шуанныд: "Мортыс кö висьпуктанiн водзын кыв сетас, тайö кывсö позьö торкны. Сетас кö кывсö висьпуктанiнö вайöмтор водзын, таысь кывкутас". 19 Синтöмъяс! Мый ыджыдджык: вайöмторйыс али вайöмторсö вежöдысь висьпуктанiныс? 20 Мортыс кö висьпуктанiн водзын кыв сетö, сiйö кыв сетö тшöтш став вайöмторйыс водзын. 21 Крам водзын кö кыв сетö, сiйö кыв сетö тшöтш сэнi Олысьыс водзын. 22 Мортыс кö енэж водзын кыв сетö, сiйö кыв сетö Ен пуклöс водзын да Пукалысьыс водзын. 23 Курыд шог тiянлы, Индöдö велöдысьяс да фарисейяс! Кык бана шаньгаяс! Тi сетанныд исань турунысь, укропысь да тминысь дасöд юкöнсö. А Индöдысь коланаджыкторсö эновтiнныд: веськыда мыждöмсö, буралöмсö да эскöмсö. Тайöс колö вöчны да мукöдторсö оз ков вунöдны. 24 Синтöм нуöдысьяс! Номйöс сöдзöданныд да верблюдöс ньылаланныд! 25 Курыд шог тiянлы, Индöдö велöдысьяс да фарисейяс! Кык бана шаньгаяс! Тi тасьтi-дозмуклысь ортсысö весаланныд, а пытшкöсыс гусясьöмöн да ылöдчöмöн тырöма. 26 Синтöм фарисей, медводз пытшкöссяньыс весав тасьтi-дозмуктö, сэки ортсысяньыс тшöтш сöстöммас. 27 Курыд шог тiянлы, Индöдö велöдысьяс да фарисейяс! Кык бана шаньгаяс! Тi еджыдöн мавтöм гортъяс кодьöсь. Ортсысяньыс сiйö мича, а пытшкöсас тырыс шой лы да быд пежыс. 28 Ортсысяньныд, видзöдны кö, веськыда олысьяс кодьöсь, а пытшкöсныд пöръясьöмöн да лёк вöчöмöн тырöма. 29 Курыд шог тiянлы, Индöдö велöдысьяс да фарисейяс! Кык бана шаньгаяс! Тi сувтöданныд пророкъяс дзебанiнö казьтылан изъяс да мичмöданныд веськыда олысьяслысь дзебанiнъяссö. 30 Тi шуанныд: "Овлiм кö ми батьяслöн кадö, эгö эськö öтувтчöй накöд кисьтны пророкъяслысь вирсö". 31 Тi асьныд висьталанныд, мый тi пророк виысьяслöн пиян. 32 Тыртöй батьясныдлысь лыдсö! 33 Змейяс! Вижля йылöм! Мынанныд-ö куслытöм биö мыждöмысь? 34 Ме мöдöда тiян дiнö пророкъясöс, сюсь вежöра йöзöс да велöдысьясöс. Öтиясöс вианныд да крестö тувъяланныд, мöдъясöс синагогаын чорыда нöйтанныд да карысь карö вöтланныд. 35 Тадзи тiянöс мыждасны став веськыда олысьыслöн вирысь: веськыда олысь Авель вирсянь Варакейлöн Закар пи вирöдз, кодöс тi виинныд крам да висьпуктанiн костын. 36 Веськыда висьтала тiянлы: таысь ставсьыс мыжыс усьö öнiя олысьяс вылö!» 37 «Ерусалим, Ерусалим! Пророкъясöс виалысь да тэ дiнö ыстöмаясöс изъялысь! Кымынысь Ме кöсйи чукöртны тэнсьыд ныв-питö, кыдзи лэбач чукöртö ассьыс пиянсö борд улас, но тi энö кöсйöй. 38 Со, тiян крамныд тыртöммас. 39 Шуа тiянлы: онö аддзöй Менö тайö кывъяссö шутöдз: "Бурсиöма Господь нимöн Локтысьöс!"»
1 Исус петiс крамысь да мöдöдчис мунны. Сы дiнö матыстчисны велöдчысьясыс, медым петкöдлыны Сылы крамсö. 2 Исус шуис налы: «Аддзанныд-ö ставсö тайöс? Веськыда висьтала тiянлы: татчö из вылö из оз коль, ставсö жугöдасны». 3 Кор Исус вöлi пукалö Олив керöсын, Сы дiнö локтiсны велöдчысьясыс да юалiсны: «Висьтав, кор ставыс тайö лоас? Мый серти ми тöдмалам Тэнсьыд локтöмтö да нэм помасьöмсö?» 4 Исус шуис: «Видзчысьöй, мед эз ылöдны тiянöс. 5 Унаöн Менам нимöн локтасны да шуасны, ме пö Кристос, да унаöс ылöдасны. 6 Тi кыланныд тыш мунöмъяс да тыш йылысь юöръяс, сöмын энö полöй. Тайö ставыслы колö лонысö, сöмын тайö абу на пом. 7 Войтыр войтырлы паныд сувтас, муяс öта-мöдныслы паныд кыпöдчасны. Уналаын лоас му вöрöм да тшыгъялöм, йöзсö суас кулан висьöм. 8 Но тайö ставыс чужтöм водзвывса дойяс на. 9 Тiянöс пондасны дзескöдны да унаöс виасны. Менам ним вöсна став йöзыс мустöмтасны тiянöс. 10 Сэки унаöн эновтчасны эскöмсьыс, öта-мöднысö вузаласны да мустöмтасны. 11 Уна ылöгпророк локтас, унаöс найö ылöдасны. 12 Лёкыс содöм вöсна уналöн муслуныс кöдзалас. 13 Но сьöкыдсö помöдз нуысь мездмас. 14 Ен Юралöм йылысь Евангелльöсö висьталасны муюгыд пасьтала, быд кыла войтырлы тöдмöнъя. Сэсся воас пом». 15 «Кор тi аддзанныд вежаинсьыс пеж зывöксö, мый йылысь Даниил пророк на висьтавлiс, – лыддьысьысь мед гöгöрвоö – 16 сэки Юдея муын олысьяс мед пышъясны керöсъясö. 17 Кодi лоас керка вылас, мед оз пыр керкаас босьтны мыйкö. 18 Кодi лоас видз-му вылас, мед оз кос гортас паськöмысла. 19 Сiйö лунъясö ёна сьöкыд лоö нöбасьысьяслы да нёньöдчысьяслы. 20 Кевмысьöй, мед эз ковмы пышйынытö тöлын либö шойччан лунö. 21 Сэки ыджыд шог суас йöзсö, татшöмыс му пуксьöмсяньыс эз на вöвлы да оз нин ло. 22 Енмыс кö тайö кадсö оз дженьдöд, ловъя морт оз коль. Но Аслас бöрйöмаяс вöсна Сiйö дженьдöдас тайö кадсö. 23 Сэки шуасны кö тiянлы: "Кристос танi", либö шуасны: "Кристос сэнi", энö эскöй. 24 Öд ылöгкристосъяс да ылöгпророкъяс локтасны да пондасны вöчны ыджыд шензьöданаторъяс, медым ылöдны, позяс кö, весиг бöрйöмаясöс. 25 Со, Ме водзвыв висьталi тiянлы. 26 Тiянлы кö шуасны: "Сiйö овтöминын", энö мунöй. Шуасны кö: "Сiйö керка пытшкын", энö эскöй. 27 Енэжсö асыввывсянь рытыввылöдз югдöдысь чардби моз Морт Пи локтас. 28 Кöнi шой, сэтчö чукöртчасны кутшъяс». 29 «Регыд тайö шог лунъяс бöрын шондiыс пемдас, тöлысьыс кусас, енэжысь кодзувъяс усясны, енэжвыв вынъяс вöрзясны. 30 Сэки енэжас тыдовтчас Морт Пилöн пас. Мувывса став йöзыс ырзöмöн бöрддзасны, кор аддзасны кымöръяс вылын ыджыд вынöн да дзирдлунöн локтысь Морт Пиöс. 31 Кор кылас трубалöн гора шыыс, Сiйö мöдöдас анделъяссö нёльнан му вежтасас, медым чукöртны Ассьыс бöрйöмаяссö став му пельöссьыс. 32 Инжир пу вылö кö видзöдам, аддзам: вожъясыс кö ловзьöны да коръясыс потöны, сiдзкö, гожöмыс матын. 33 Тадзи, ставсö тайöс аддзигöн тöдöй: сiйö кадыс матын, öдзöс дорад нин. 34 Веськыда висьтала тiянлы: ставыс тайö лоас öнiя олысьяс дырйи на. 35 Енэжыс да муыс бырас, а Менам кывъясöй оз бырны. 36 Сiйö лунсö да сiйö кадсö некод оз тöд. Анделъяс оз тöдны, сöмын Батьöй тöдö. 37 Кыдзи вöлi Ной лунъяс дырйи, сiдзи лоö Морт Пи локтiгöн. 38 Ыджыд ойдöм водзвылас, ковчегö Нойлöн пыртöдз йöзыс сёйисны-юисны, гöтрасисны да верöс сайö мунiсны. 39 Кытчöдз эз су найöс ойдöмыс да ваö пöдöмыс, найö эз вежöртны, мый виччысьö найöс. Тадзи жö лоас Морт Пи локтiгöн. 40 Сэки видз-му вылын лоасны кыкöн: öтисö босьтасны, мöдсö колясны. 41 Изанiнын лоасны кык ань: öтисö босьтасны, мöдсö колясны. 42 Лоöй дасьöсь, öд онö тöдöй Господьныдлысь локтан кадсö. 43 Тi тöданныд: керка кутысь кö тöдiс гусясьысьлысь локтан кадсö, сэки эськö эз узь да эз лэдз керкаас. 44 Лоöй дасьöсь, öд Морт Пи локтас виччысьтöг». 45 «Лоöй эскана да мывкыда кесйöг кодьöсь. Татшöмсö ыджыдыс пуктас веськöдлыны мукöд кесйöгъясöн, медым ас кадö налы сёян-юан сетны. 46 Кесйöгыс шуда, ыджыдыс кö гортас воигöн аддзас сiйöс тадзи вöчöмöн. 47 Веськыда висьтала тiянлы: ыджыдыс пуктас сiйöс веськöдлыны став аслас овмöсöн. 48 Шогмытöм кесйöг вермас мöвпыштны: "Ыджыдöй дыр на оз лок". 49 Сiйö пондас нöйтны уджъёртъяссö да сёйны-юны кодалысьяскöд. 50 Но виччысьтöм лунö, лöсявтöм кадö кесйöглöн ыджыдыс воас. 51 Сiйö кералас кесйöгсö да шыбитас сiйöс кык бана шаньгаяс дiнö. Сэнi лоö бöрдöм да пинь йирöм».
1 «Енэжвыв Юралöмыс татшöм. Дас ныв биясöн верöспулы воча петасны. 2 Витыс вöлi мывкыдтöм, мöд витыс – мывкыда. 3 Мывкыдтöмъяс бинысö босьтасны, а выйсö оз. 4 Мывкыдаяс биысь öтдор вый тыра дознысö босьтасны. 5 Верöспуыс дыр оз во, и ставныс вугыртасны да унмовсясны. 6 Вой шöрнас кылас горöдöм: "Верöспу локтö. Петöй сылы воча!" 7 Нывъяс садьмасны да лöсьöдасны бияснысö. 8 Мывкыдтöм нывъяс шуасны мывкыдаяслы: "Миян биным кусö, вайыштöй выйнытö!" 9 Мывкыдаяс шуасны: "Огö. Ставнымлы выйыс оз тырмы. Мунöй да ньöбöй вузалысьяслысь". 10 Мывкыдтöм нывъяслöн выйла ветлiгкостi верöспуыд воас. Нывъяс, кодъяс вöлiны дасьöсь, пырасны сыкöд кöлысь вылö, да на бöрся öдзöссö йигналасны. 11 Сёрöнджык мöд витыс локтас. Найö пондасны вöзйысьны: "Ыджыдöй, ыджыдöй, восьт миянлы!" 12 Сiйö вочавидзас: "Веськыда висьтала тiянлы: ог тöд тiянöс". 13 Лоöй дасьöсь, öд онö тöдöй Морт Пилысь локтан лунсö да кадсö». 14 «Öти морт ылi туйö мöдöдчигас корас ас дорас кесйöгъяссö да коляс налы ассьыс овмöссö. 15 Быдöнлы сямыс-выныс серти сетас зарни сьöм: öтилы вит талант, мöдлы кык, коймöдлы öти талант. Сэсся мунас. 16 Вит талант босьтысь пырысь-пыр сьöмсö уджö бергöдас да содтöд босьтас вит талант. 17 Тадзи вöчас тшöтш мöдыс да содтöд босьтас кык талант. 18 Öти талант босьтысь мунас, кодъяс гу да аслас ыджыдлысь сьöмсö гуалас. 19 Дыр мысти кесйöгъяслöн ыджыдыс локтас да юалас найöс сьöм йывсьыс. 20 Вит талант босьтысь содтöд ваяс вит талант да шуас: "Ыджыдöй, тэ меным витöс сетлiн. Видзöдлы, нöшта менам вит содiс". 21 Ыджыдыс шуас: "Бура вöчин. Тэ бур да эскана кесйöг. Ичöтас тэ эскана вöлiн, уна вылö тэнö пукта. Лок, öтлаын гажöдчам-нимкодясям". 22 Кык талант босьтысь локтас да шуас: "Ыджыдöй, тэ меным кык талант сетлiн. Видзöдлы, нöшта менам кык содiс". 23 Ыджыдыс шуас сылы: "Бура вöчин. Тэ бур да эскана кесйöг. Ичöтас тэ эскана вöлiн, уна вылö тэнö пукта. Лок, öтлаын гажöдчам-нимкодясям". 24 Сэсся öти талант босьтысь локтас да шуас: "Ыджыдöй, ме тöда, тэ чорыд морт: вундан, кытчö эн кöдзлы, да чукöртан, кытчö кöйдыссö эн шыбитлы. 25 Тэысь полöмöйла ме мунi да гуалi таланттö. Со, тэнад сьöмыд". 26 Ыджыдыс шуас сылы: "Тэ шогмытöм дыш кесйöг. Тэ тöдiн, мый ме вунда, кытчö эг кöдзлы, да чукöрта, кытчö кöйдыссö эг шыбитлы. 27 Тэныд колö вöлi менсьым талантöс сьöмчукöртанiнö пуктыны, локтöм бöрам эськö содтöдöн босьтi. 28 Мырддьöй сылысь талантсö да сетöй дас талантаыслы. 29 Кодлöн эм, сылы коланасьыс унджык на сетасны. Кодлöн абу, сылысь бöръясö босьтасны. 30 Тайö шогмытöм кесйöгсö шыбитöй пемыдас. Сэнi лоö бöрдöм да пинь йирöм"». Тайöс висьталöм бöрын Исус горöдöмöн шуис: «Кодлöн эм пель, мед кылö!» 31 «Морт Пи локтас Аслас дзирдлунöн вежа анделъяскöд да пуксяс дзирдлуныслöн юралан пуклöсö. 32 Сэки чукöртчас Сы водзö быд кыла войтыр, да Сiйö торйöдас найöс, кыдзи видзысь торйöдö ыжъяссö кöзаяссьыс. 33 Ыжъяссö сувтöдас веськыдладорас, кöзаяссö шуйгаладорас. 34 Сэки веськыдладорын сулалысьяслы Öксы шуас: "Локтöй, менам Батьлöн бурсиöмаяс. Тiянлы вуджö Енлöн Юраланiныс, кодöс дасьтöма тiянлы му пуксьöмсяньыс. 35 Кор Менам кынöмöй сюмалiс, тi Менö вердiнныд, кор горшöй косьмис, тi Менö юкталiнныд. Кор Ме локтi мöд муысь, тi Менö керкаад сибöдiнныд, 36 кор вöлi пасьтöм, тi Менö пасьтöдiнныд. Висигöн тi видлалiнныд Менö, дзескыдiнын пукалiгöн волывлiнныд Ме дiнö". 37 Сэки веськыда олысьяс Сылы шуасны: "Господьöй, кор ми аддзылiм Тэнö тшыгъялöмöн да вердiм, горш косьмöмöн да юкталiм? 38 Кор ми аддзылiм Тэнö мöд муысь локтысьöн да сибöдiм, пасьтöмöн да пасьтöдiм? 39 Кор ми аддзылiм Тэнö висьöмöн да видлалiм, дзескыдiнын пукалысьöн да волывлiм Тэ дiнö?" 40 Öксы шуас налы: "Веськыда висьтала тiянлы: тайöс кö тi вöчинныд Менам ичöт вокъясысь öтилы, сiдзкö, вöчинныд Меным". 41 Сэсся Сiйö шуйгаладорын сулалысьяслы шуас: "Вешйöй Ме дiнысь, ёрöмаяс. Мунöй омöльыслы да сылöн анделъяслы дасьтöм куслытöм биö. 42 Кор Менам кынöмöй сюмалiс, тi Менö энö вердöй, кор горшöй косьмис, тi Менö энö юкталöй. 43 Кор Ме локтi мöд муысь, тi Менö энö сибöдöй, кор вöлi пасьтöм, тi Менö энö пасьтöдöй. Висигöн тi энö видлалöй Менö, дзескыдiнын пукалiгöн энö волывлöй Ме дiнö". 44 Сэки найö юаласны Сылысь: "Господьöй, кор ми аддзылiм Тэнö тшыгъялöмöн, горш косьмöмöн, мöд муысь локтысьöн, пасьтöмöн, висьöмöн, дзескыдiнын пукалысьöн да эгö отсалöй Тэныд?" 45 Сэки Сiйö вочавидзас: "Веськыда висьтала тiянлы: тайöс кö тi энö вöчöй ичöтъяс пиысь öтилы, сiдзкö, энö вöчöй Меным". 46 Сэсся найö мунасны помтöм мучитчöмö, а веськыда олысьяс – помтöм олöмö».
1 Тайöс ставсö висьталöм бöрын Исус шуис велöдчысьясыслы: 2 «Кык лун мысти, тi тöданныд, Ыджыд лун лоö. Тайö кадö Морт Пиöс вузаласны да крестö тувъяласны». 3 Аркирейяс, Индöдö велöдысьяс да пöрысьяс чукöртчисны Каиаф нима аркирей керкаö. 4 Найö сёрнитчисны ылöдлöмöн босьтны Исусöс да вины. 5 Но шуисны, Ыджыд лунö пö оз ков, öд йöзыс вермасны шызьыны. 6 Исус вöлi Вифания сиктын, проказаысь бурдöм Симон ордын. 7 Исус дiнö локтiс ань, сiйö вайис вальдi дозйын дона вый. Исуслöн сёйигöн ань кисьталiс выйсö Исуслы юр вылас. 8 Велöдчысьяс аддзисны да пондiсны шуасьны: «Мыйла, бара, лотö-а? 9 Тайö выйсö позис ыджыд донысь вузавны да сьöмсö сетны гöльяслы». 10 Тайöс казялöмöн Исус шуис налы: «Мыйла тi шöйöвоштанныд аньсö? Сiйö буртор вöчис Меным. 11 Гöльяс пыр лоасны тiянкöд, а Ме тiянкöд ог пыр ло. 12 Выйöн киськалöмнас аньыс дасьтiс Менö дзебигкежлö. 13 Веськыда висьтала тiянлы: муюгыд пасьтала, кöнi висьталасны тайö Евангелльöсö, сэнi казьтыштасны тайö аньсö да висьталасны, мый сiйö вöчис». 14 Искариот Иуда вöлi дас кык велöдчысьысь öти. Сiйö мунiс аркирейяс дiнö 15 да шуис: «Мый сетанныд, вузала кö тiянлы Исусöс?» Найö вöзйисны сылы комын эзысь сьöм. 16 Сэксянь Иуда пондiс корсьны лöсялан кад, медым вузавны Исусöс. 17 Шомтöм нянь сёян лунъяс дырйи медводдза лунö Исус дiнö локтiсны велöдчысьясыс да юалiсны: «Кöнi кöсъян сёйны Ыджыд лунся ыжöс? Ми мунам да дасьтам». 18 Исус шуис: «Мунöй карö сэтшöмтö морт дiнö да висьталöй сылы: "Велöдысь шуис: Менам кадöй матысмö. Тэ ордын велöдчысьяскöд пасъя Ыджыд лунсö"». 19 Велöдчысьяс вöчисны Исуслöн тшöктöм серти, дасьтiсны Ыджыд лунся сёян. 20 Рытнас Исус пуксис дас кыкнан велöдчысьыскöд сёйны. 21 Сёйиганыс шуис налы: «Веськыда висьтала тiянлы: тiян пиысь öти вузалас Менö». 22 Шогö усьöмöн быдöн кутiс юасьны: «Ог-ö ме, Господьöй?» 23 Исус вочавидзис: «Менö вузалысь Мекöд öти тасьтiысь сёйö. 24 Морт Пи мунö, кыдзи гижöма Сы йылысь. Но курыд шог Сiйöс вузалысьлы! Бурджык сылы вöлi, эз кö чужлы». 25 Сэки Сiйöс вузалысь Иуда шыасис: «Велöдысьöй, абу-ö ме?» Исус вочавидзис: «Тэ шуин». 26 Сёйиганыс Исус босьтiс нянь, Енмöс аттьöалöмöн чегис няньсö да велöдчысьяслы сетiгас шуис: «Босьтöй, сёйöй, тайö Менам Яй». 27 Сэсся босьтiс чаша, аттьöалiс Енмöс да велöдчысьяслы сетiгас шуис: «Юöй татысь быдöн. 28 Тайö Менам Вир – Выль Йитöдлöн Вир – киссьö уналысь мыжъяссö прöститöм вöсна. 29 Висьтала тiянлы: öнiсянь ог понды юны тайö виноград юансö сiйö лунöдз, кор понда юны тiянкöд выльöс Менам Батьлöн Юраланiнын». 30 Енлы сьылöм бöрын найö кайисны Олив керöсö. 31 Исус шуис велöдчысьясыслы: «Тавой тi ставныд эновтанныд Менö. Гижöма: "Видзысьсö кувмöн дойда, да ыжъясыс разаласны". 32 Ловзьöм бöрам Ме виччыся тiянöс Галилеяын». 33 Петыр шуис: «Ставныс кö эновтасны Тэнö, ме ог». 34 Исус вочавидзис: «Веськыда висьтала тэныд: тавой петук чукöсттöдз на тэ куимысь соссян Меысь». 35 Петыр шуис: «Весиг кö кувны ковмас Тэкöд, ог соссьы». Тадзи шуалiсны тшöтш мукöд велöдчысьыс. 36 Сэсся Исус велöдчысьясыскöд локтiс Гефсиманö. Сiйö шуис налы: «Пукалыштöй танi, Ме ветла кевмысьны». 37 Аскöдыс босьтiс Петырöс да Зеведейлысь кыкнан писö. Исусöс гажтöм да шогалöм босьтiс. 38 Сiйö шуис: «Шогöй кувмöн топöдö лолöс. Олыштöй танi Мекöд да энö узьöй». 39 Ачыс водзлань муныштiс да чужöмнас муö уськöдчöмöн кевмысис: «Батьöй, позьö кö, вешты Ме дiнысь тайö чашасö. Сöмын мед лоас Тэнад кöсйöм серти, а оз Менам». 40 Исус матыстчис велöдчысьяс дiнас да аддзис: найö унмовсьöмаöсь. Петырлы шуис: «Öти час весиг энö вермöй узьтöг олыштны Мекöд. 41 Энö узьöй, кевмысьöй, мед ыштöдöмыс эз вермы тiянöс. Лолыд öд пыр дась, а вир-яйыд жеб». 42 Исус мöдысь мунiс да бара кевмысис: «Батьöй, Ме дiнысь кö оз позь вештыны тайö чашасö, а Меным кö колö юны сiйöс, мед лоас Тэнад кöсйöм серти». 43 Локтöм бöрас бара аддзис: велöдчысьяссö унмыс топыда личкöма. 44 Исус колис найöс да бара мунiс, воддза мозыс коймöдысь кевмысис. 45 Сэсся локтiс велöдчысьяс дiнас да шуис налы: «Пыр на узянныд да шойччанныд? Кадыс воис. Морт Пиöс мыжаяс киö сетöны. 46 Чеччöй, мунамöй. Менö вузалысь матын нин». 47 Исуслöн сёрнитiгкостi локтiс Иуда, дас кык велöдчысьысь öти. Сыкöд тшöтш локтiсны зоръясöн да шыпуртъясöн уна йöз. Найöс мöдöдöмаöсь аркирейяс да пöрысьяс. 48 Исусöс вузалысь шуöма локтöмаяслы, кодöс пö окышта, Сiйöс и босьтöй. 49 Иуда веськыда мунiс Исус дiнö да шуис: «Видза олан, Велöдысьöй», сэсся окыштiс Сiйöс. 50 Исус шуис сылы: «Ёртöй, та понда-ö тэ локтiн!» Сэки кытшалiсны да босьтiсны Исусöс. 51 Исускöд вöлысьясысь öти перйис шыпуртсö да керыштiс аркирей кесйöглысь пельсö. 52 Исус шуис сылы: «Бöр сюй шыпурттö. Шыпурт босьтысь шыпурт помысь кулас. 53 Он öмöй тöд, Ме кö öнi кора Батьöйлысь, Сiйö вермас мöдöдны уна дас сюрс анделöс. 54 Кыдзи нö сэки Гижöдъясыс инасны? Сэнi шуöма, тадзи колö лоны». 55 Йöз чукöрлы Исус шуис: «Лёк вöчысьöс моз зорйöн-шыпуртöн локтiнныд босьтны Менö. Ме быд лун тiян крамын пукалi-велöдi, да тi энö босьтöй Менö. 56 Ставыс тадзи артмис, медым инiсны пророк гижöдъяс». Сэки велöдчысьяс ставныс эновтiсны Исусöс да пышйисны. 57 Исусöс кутысьяс вайöдiсны Сiйöс Каиаф аркирей ордö, кöнi вöлi чукöртчöмаöсь Индöдö велöдысьяс пöрысьяскöд. 58 Петыр бöрö кольччöмöн вöтчис Исус бöрся аркирей керка дорöдз. Пырис йöрас да пуксис кесйöгъяскöд орччöн – кöсйис помсö аддзывны. 59 Аркирейяс, пöрысьяс да став веськöдлан котырыс корсисны Исуслы паныд ылöгвисьталысьясöс, медым сэсся мыждыны да вины Сiйöс. 60 Уна пöръясьысь волiс, но колана висьталысьыс эз сюр. Бöрынджык нöшта кык ылöгвисьталысь локтiсны. 61 Найö висьталiсны: «Сiйö шулiс, верма пö Енлысь крамсö жугöдны, сэсся пö куим лунöн сiйöс бöр лэптыны». 62 Сэки аркирей сувтiс да юалiс Исуслысь: «Мый воча шуан?» 63 Исус чöв олiс. Аркирей шуис: «Ловъя Ен водзын висьтав миянлы, Тэ-ö Кристос, Ен Пи». 64 Исус вочавидзис: «Тэ шуин. Висьтала тiянлы: öнiсянь аддзанныд Морт Пиöс, Ставсöвермысьлöн веськыдладорас пукалысьöс да кымöръяс вылын локтысьöс». 65 Сэки аркирей косялiс ассьыс паськöмсö да шуис: «Сiйö Енмöс омöльтö! Висьталысьяс миянлы оз нин ковны, тi асьныд кывлiнныд Сылысь омöльтöмсö. 66 Мый шуанныд?» Вочавидзисны: «Мыжа! Вины Сiйöс!» 67 Сэсся сьöлалiсны Исуслы чужöмас, нöйтiсны Сiйöс да чужöмас кучкалöмöн 68 шуалiсны: «Висьтав, Кристос, кодi кучкис Тэнö?» 69 Петыр пукалiс йöрас. Öти кесйöг ань матыстчис сы дiнö да шуис: «Тэ тшöтш галилеяса Исускöд вöлiн». 70 Петыр став йöз водзас соссис: «Ог гöгöрво, мый висьталан», 71 сэсся вешйис дзиръя дорö. Петырöс казялiс мöд ань да шуис сэнi сулалысьяслы: «Тайö мортыс Назаретса Исускöд вöлi». 72 Петыр бара соссис, чорыда шуис: «Ме ог тöд тайö Мортсö!» 73 Бöрынджык сэнi сулалысьяс матыстчисны да шуисны Петырлы: «Тэ дзик на пиысь, сёрниыд на кодь». 74 Петыр енмасьöмöн пондiс соссьыны: «Ог тöд тайö Мортсö». Дзик пыр кылiс петуклöн чукöстöм. 75 Сэки Петырлы уси тöд вылас Исуслöн шуöмыс: «Петук чукöсттöдз на тэ куимысь соссян Меысь». Петыр петiс да курыда бöрддзис.
1 Асывводзнас чукöртчисны став аркирейыс пöрысьяскöд, сёрнитчöмöн найö воисны öти кывйö: вины Исусöс. 2 Сiйöс кöрталöмöн нуöдiсны юралысь Понтий Пилат дiнö да сетiсны сылы. 3 Исусöс мыждöм йылысь тöдмалöм бöрын Иуда, Сiйöс вузалысь, гöгöрвоис ассьыс мыжсö. Сэки бöр нуис комын эзысь сьöмсö аркирейяслы да пöрысьяслы 4 да шуис налы: «Ме мыж вöчи, мыжтöм мортöс вузалi». Найö вочавидзисны: «Миянлы нö мый? Ачыд öд тöдiн». 5 Иуда шыбитiс сьöмсö крамас, сэсся петiс сэтысь, мунiс да джагöдчис. 6 Аркирейяс сьöмсö чукöртöм бöрын шуисны: «Оз позь тайö сьöмсö пуктыны крамса сьöм видзанiнö, сiйö вирлöн дон». 7 Сёрнитчöм бöрын найö ньöбисны гырнич вöчысьлысь мусö, шуисны вöчны сэтчö йöз муысь воöмаяслы шойна. 8 Та вöсна тайö муыслы пуктiсны "Вир му" ним, тадзи öнöдз на нимтöны. 9 Тадзи инiс Еремей пророклöн шуöмыс: – Босьтiсны найö комын эзысь сьöмсö, Израиль войтырöн тайö Мортысь шуöм донсö, 10 да ньöбисны сы вылö гырнич вöчысьлысь мусö. Тадзи шуис меным Господь. 11 Исусöс вайöдiсны юралысь водзö. Юралысь юалiс: «Тэ-ö юдейяслöн Öксыыс?» Исус вочавидзис: «Тэ шуан». 12 Аркирейяс да пöрысьяс мыжалiсны Исусöс, но Сiйö чöв олiс. 13 Пилат сэки шуис Сылы: «Тэ öмöй он кыв, кымынöн висьталöны Тэныд паныд?» 14 Исус весиг воча кыв эз шу. Юралысьöс тайö ёна шензьöдiс. 15 Быд во Ыджыд лунö йöз корöм серти юралысь лэдзлiс дзескыдiнысь öти мортöс. 16 Сэки дзескыдiнын пукалiс ставлы тöдса Варавва нима морт. 17 Чукöртчöм йöзлысь Пилат юалiс: «Кодöс кöсъянныд, мед ме лэдза, Варавваöс али Исусöс, кодöс шуöны Кристосöн?» 18 Пилат тöдiс, мый Исусöс вайöдiсны вежалöмныс понда. 19 Сэки Пилатлöн гöтырыс мöдöдас мыжданiнö висьтавны верöсыслы: «Тайö веськыда олысьыслы лёксö эн вöч. Тавой вöтын ме ёна шогси Сы понда». 20 Аркирейяс пöрысьяскöд ыззьöдiсны йöзсö, мед корасны лэдзны Варавваöс, а Исусöс вины. 21 Пилат юалiс: «Кодöс на пиысь шуанныд лэдзны?» Воча шуисны: «Варавваöс». 22 Пилат юалiс: «Мый шуанныд вöчны Исускöд, кодöс Кристосöн шуöны?» Ставныс горöдiсны: «Тувъявны!» 23 «Мый лёксö Сiйö вöчис?» – юалiс Пилат. Йöзыс гораджыка на горöдiсны: «Тувъявны Сiйöс!» 24 Пилат аддзис: йöзыс оз лöньны, мöдарö, ёнджыка на шызьöны. Сэки налöн син водзын Пилат мыськис кисö да шуис: «Ме абу мыжа тайö веськыда олысь мортсö виöмысь. Видзöдöй асьныд». 25 Став йöзыс воча горöдiсны: «Мед Сылöн вирыс миян вылö да миян челядьным вылö коляс». 26 Сэки Пилат лэдзис Варавваöс, а Исусöс нöйтöм бöрын сетiс тувъявны. 27 Шыпуртаяс нуöдiсны Исусöс юралысьлöн керкаö, сэтчö чукöртiсны и мукöд шыпуртаясöс. 28 Сэсся пöрччöдiсны Исусöс да пасьтöдiсны Сiйöс гöрд кышанö, 29 юрас пуктiсны лежнöгысь кыöм юркытш, веськыд киас сетiсны бедь. Сэсся пидзöс выланыс Сы водзö сувтöмöн шуалiсны сералiгтырйи: «Мед олас юдейяслöн Öксы!» 30 Сьöлалiсны Сiйöс да кучкалiсны юрас беддьöн. 31 Сералöм-лёкöдöм бöраныс найö босьтiсны Исус вылысь гöрд кышансö да бöр пасьтöдiсны Сiйöс Аслас паськöмö, сэсся нуöдiсны тувъявны. 32 Карсьыс петiганыс налы вочаасис киринеяса Симон, сылы тшöктiсны нуны Исуслысь крестсö. 33 Сэсся воисны Голгопа керöсö, нимыслöн вежöртасыс лоö "Юр лы". 34 Сэнi Исуслы сетiсны юны сöп сора вина, но видлöм бöрас Сiйö эз кут юны. 35 Исусöс тувъялöм бöрын шыпуртаяс пудъясьöмöн юкисны Сылысь паськöмсö. 36 Сэсся пуксисны видзны Сiйöс. 37 Юр весьтас öшöдiсны мыжалан пасйöд: «Тайö Исус, юдейяслöн Öксы». 38 Сыкöд орччöн тувъялiсны кык лёк вöчысьöс: öтисö веськыдладорас, мöдсö шуйгаладорас. 39 Сэтi мунысьяс лёкысь видзöдöмöн омöльтiсны Исусöс: 40 «Крам жугöдысь да куим лунöн сiйöс лэптысь, мезды Асьтö! Тэ кö Ен Пи, лэччы крест вывсьыд!» 41 Сiйöс лёкöдiсны тшöтш аркирейяс, Индöдö велöдысьяс, пöрысьяс да фарисейяс: 42 «Мукöдöс мездiс, а Асьсö мездыны оз вермы! Сiйö кö Израиль Öксы, мед лэччас крест вывсьыс, сэки эскам Сылы! 43 Сiйö Ен вылö лачаöн олiс. Мед Енмыс мездас öнi, дона кö Сылы. Шулiс öд, Ме пö Ен Пи». 44 Тадзи тшöтш лёкöдiсны Исусöс орччöн тувъялöм лёк вöчысьяс. 45 Лун шöр кадö пемдiс став му пасьталаыс, пемыдыс сулалiс куим часöдз. 46 Куим час гöгöрын Исус ыджыд шыöн горöдiс: «Эли, Эли, лама сабактани? Енмöй, Енмöй, мыйла Тэ колин Менö?» 47 Сэнi сулалысьясысь кодсюрö шуисны, Илляöс пö корö. 48 На пиысь öти дзик пыр котöртiс, босьтiс губка да кöтöдiс шома винаöн, сэсся бедь помö сатшкöмöн мыччис сiйöс Исуслы. 49 Мукöдыс шуисны: «Энлы! Видзöдлам, локтас оз Илля мездыны Сiйöс». 50 Исус ыджыд шыöн горöдöм бöрын лэдзис ловсö. 51 Сэки крамын öшалысь дöраыс вывсяньыс улöдзыс кык пельö косяссис. Муыс вöрзис, из керöсъяс потiсны. 52 Шойгу кыртаяс воссялiсны, уна вежа войтырлöн шойыс ловзис, 53 да найö петiсны дзебанiнъясысь. Исуслöн ловзьöм бöрын найö пырисны вежа карö, унаöн аддзылiсны найöс. 54 Му вöрöмысь да став лоöмторсö аддзöмысь Исусöс видзысьяс веськöдлысьныскöд ёна повзисны да шуисны: «Тайö Мортыс збыльысь Ен Пи вöлöма». 55 Сэнi вöлi уна ань, кодъяс ылiсянь видзöдiсны. Найö Галилеясянь ветлöдлiсны Исускöд да кесъялiсны Сылы. 56 На пöвстын вöлiны Магдала Марья, Яковлöн да Иосейлöн Марья мамныс да Зеведей пиянлöн мамныс. 57 Рытнас Аримафея карысь воис Öсип нима озыр морт, Исуслöн велöдчысь. 58 Сiйö мунiс Пилат дiнö да корис Исуслысь шойсö. Пилат тшöктiс сетны. 59 Öсип босьтiс шойсö, гартыштiс сöстöм шабдi дöраö 60 да пуктiс кыртаö кералöм выль дзебанiнö. Пыранiнас путкыльтiс ыджыд из, сэсся мунiс. 61 Дзебанiнлы воча пукалiс Магдала Марья мöд Марьякöд. 62 Мöд луннас, шойччан лунö, аркирейяс фарисейяскöд локтiсны Пилат дiнö 63 да шуисны: «Ыджыдöй, миянлы тöд выланым усис: ловъя дырйиыс на эсiйö пöръясьысьыс шулiс, куим лун мысти пö ловзя. 64 Тшöкты видзны дзебанiнсö коймöд лунöдзыс. Велöдчысьясыс вермасны локны войнас да гусявны шойсö, сэсся шуны йöзыслы, Сiйö пö ловзьöма. Тайö бöръя пöръялöмыс лоас воддзасьыс на лёкджык». 65 Пилат шуис: «Босьтöй видзысьясöс да видзöй, колöкö». 66 Найö мунiсны, пасйисны пыранiнысь изсö печатьöн да тшöктiсны шыпуртаяслы видзны.
1 Шойччан лун бöрын водз асывнас Магдала Марья да мöд Марья локтiсны видзöдлыны дзебанiнсö. 2 Виччысьтöг муыс ёна вöрзис: Господьлöн андел лэччис енэжсяньыс. Сiйö вештiс изсö пыранiнсьыс да пуксис сы вылö. 3 Андел югъялiс чардби моз, паськöмыс вöлi лым кодь еджыд. 4 Видзысьяс кувмöныс повзисны, найöс дзöрöм босьтiс. 5 Андел шыасис аньяс дiнö: «Энö полöй. Ме тöда, тi корсянныд тувъявлöм Исусöс. 6 Сiйö танi абу. Сiйö ловзис Аслас шуöм серти. Локтöй, видзöдлöй Господьлысь куйланiнсö. 7 Мунöй öдйöджык да юöртöй велöдчысьясыслы, мый Исус ловзьöма да виччысьö найöс Галилеяын, сэтысь найö аддзасны Сiйöс. Татшöм юöр менам тiянлы». 8 Аньяс пырысьтöм-пыр петiсны дзебанiнысь да полiгтыр, но ёна нимкодясьöмöн, котöртiсны юöртны та йылысь Исуслöн велöдчысьяслы. 9 Туй выланыс аньяскöд паныдасис Исус да шуис: «Нимкодясьöй!» Найö уськöдчисны Сы водзö да кутчысисны кокас. 10 Исус шуис: «Энö полöй! Мунöй, висьталöй вокъяслы, мед мунасны Галилеяö, сэтысь аддзасны Менö». 11 Аньяслöн мунöм бöрын дзебанiн видзысьясысь кодсюрö мунiсны карас да висьталiсны став лоöмтор йывсьыс аркирейяслы. 12 Аркирейяс чукöртчисны пöрысьяскöд, сёрнитчöм бöраныс сетiсны шыпуртаяслы уна сьöм 13 да шуисны: «Висьталöй, мый войнас тiян узигкостi велöдчысьясыс волöмаöсь да гусялöмаöсь шойсö. 14 Кывсяс кö тайö юралысьöдз, ми сiйöс эскöдам да тiянöс доръям». 15 Шыпуртаяс босьтiсны сьöмсö да вöчисны аркирейяслöн тшöктöм серти. Тайö юöрыс паськалiс юдейяс пöвстын, весиг öнöдз на олö. 16 Исуслöн тшöктöм серти дас öти велöдчысьыс мунiсны Галилеяö да кайисны керöсö. 17 Исусöс аддзöм бöрын найö муöдзыс копыртчылiсны Сы водзö, кодсюрöлы сьöкыд вöлi эскынысö. 18 Велöдчысьяс дiнö матыстчöмöн Исус шуис: «Меным сетöма ыджыдавны енэжын да му вылын. 19 Мунöй быд кыла войтыр дiнö, вöчöй найöс Менам велöдчысьясöн да пыртöй найöс Бать, Пи да Вежа Лов нимöн. 20 Велöдöй найöс овны став Менам тшöктöм серти. Тöдöй: Ме пыр тiянкöд нэмъяс помасьтöдз». Аминь.
1 Исус Кристос, Ен Пи йылысь Евангелльö пансьö, 2 кыдзи висьталöма пророк гижöдъясын: – Ыста Ассьым юöртысьöс Тэ водзвылын, сiйö Тэныд туйсö дасьтас. 3 Овтöминын кылö горзысьлöн шы: «Лöсьöдöй туйсö Господьлы, веськöдöй-шыльöдöй ордымъяс Сылы!» 4 Локтiс Иоан. Сiйö пыртiс йöзöс овтöминын да юöрталiс: «Бергöдчöй мыжъяссьыныд да пыртчöй, медым Ен прöститас мыжъяснытö». 5 Иоан дiнö локтiс уна йöз Юдея му пасьталаысь да Ерусалим карысь. Асланыс мыжъясысь висьтасьöм бöрын Иоан пыртiс найöс ставнысö Йöрдан юын. 6 Иоан новлiс верблюд гöнысь кыöм паськöм да коскас кучик тасма, сёйлiс чирк да видзвыв ма. 7 Сiйö юöртiс: «Ме бöрын локтö меысь вынаджык, ме ог шогмы копыртчыны да разьны Сылысь кöмкот кöвсö. 8 Ме пыртi тiянöс ваöн, а Сiйö пыртас тiянöс Вежа Лолöн». 9 Сiйö лунъясö локтiс Галилеяса Назарет карысь Исус. Иоан пыртiс Сiйöс Йöрдан юын. 10 Ваысь петiгас Исус аддзис: енэжыс воссис да Сы вылö гулю моз лэччис Лов. 11 Енэжсянь кылiс гöлöс шы: «Тэ Менам муса Пиöй, Ме нимкодяся Тэöн». 12 Дзик пыр Лов нуöдiс Исусöс овтöминö. 13 Сэнi нелямын лун чöж сöтана ыштöдiс Сiйöс. Исус олiс вöрса пемöсъяс пöвстын, Сылы кесъялiсны анделъяс. 14 Иоанлöн дзескыдiнö веськалöм бöрын Ен Юралöм йылысь Евангелльö висьталiгтыр Исус мунiс Галилеяö. 15 Сiйö юöртiс: «Воис кад. Енлöн Юралöмыс матын нин. Бергöдчöй мыжъяссьыныд да эскöй Евангелльöö». 16 Галилея ты пöлöн мунiгöн Исус аддзис Симонöс да сылысь Öндрей воксö. Найö вöлiны чери кыйысьяс. Кык вок буретш вöйтасисны ты вылын. 17 Исус шуис налы: «Локтöй Ме бöрся. Ме вöча тiянысь морт кыйысьясöс». 18 Кык вок дзик пыр эновтiсны тывъяснысö да мунiсны Исус бöрся. 19 Исус муртса муныштiс да аддзис пыжысь Зеведей Яковöс Иоан вокыскöд. Найö дзоньталiсны тывъяс. 20 Исус чукöстiс вокъясöс. Найö колисны пыжас Зеведей батьнысö меда йöзкöд да мунiсны Исус бöрся. 21 Воисны Капернаум карö. Медводдза шойччан лунö Исус пырис синагогаö да пондiс велöдны. 22 Йöзыс шензисны Сылöн велöдöмысь, öд Сiйö велöдiс ыджыдалысьö пуктöм морт моз, эз Индöдö велöдысьяс моз. 23 Синагогаын вöлi пеж лолöн кутöм морт. Сiйö горöдiс: 24 «Мый Тэныд колö миянсянь, Назаретса Исус? Тэ локтiн бырöдны миянöс? Тöда, кодi Тэ. Тэ – Енлöн Вежаыс!» 25 Исус öлöдiс пеж лолöс: «Ланьт! Пет сы пытшкысь». 26 Пеж лов песовтiс мортсö, лёкысь горöдiс да петiс сы пытшкысь. 27 Став йöзыс весьöпöрисны, öта-мöдныслысь юасисны: «Мый тайö? Мыйсяма выль велöдöм? Сылысь кывзысьöны весиг пеж ловъяс». 28 Исус йылысь сёрниыс öдйö паськалiс став Галилея му пасьтала. 29 Синагогаысь петöм бöрын Исус локтiс Яковкöд да Иоанкöд Симон да Öндрей ордö. 30 Симон гöтырлöн мамыс куйлiс биа висьöмöн. Та йылысь дзик пыр висьталiсны Исуслы. 31 Исус матыстчис ань дiнö да киöдыс босьтöмöн чеччöдiс сiйöс. Биа висьöмыс дзик пыр эновтiс аньöс, и сiйö пондiс кесъявны налы. 32 Рытнас, шондi лэччöм бöрын, Исус дiнö вайöдiсны став висьысьсö да пеж лолöн кутöмасö. 33 Став карыс чукöртчис керка öдзöс дорö. 34 Исус унаöс бурдöдiс быдпöлöс висьöмысь да вöтлiс уна пеж лолöс. Сiйö эз лэдз сёрнитны пеж ловъясöс, öд найö тöдiсны, мый Сiйö – Кристос. 35 Аскинас, югдытöдзыс на, Исус чеччис да мунiс кевмысьны овтöминö. 36 Симон да сыкöд вöлысьяс мунiсны Исус бöрся. 37 Исусöс аддзöм бöрын висьталiсны: «Ставныс корсьöны Тэнö». 38 Исус шуис налы: «Мунамöй матi сиктъясö. Меным тшöтш сэнi колö висьтавлыны Бур Юöрсö, öд та могысь Ме локтi». 39 Сiйö ветлöдлiс Галилея му пасьтала, висьтавлiс синагогаясын Бур Юöр да вöтлалiс пеж ловъясöс. 40 Исус дiнö локтiс проказаöн висьысь да Сы водзö пидзöс вылас сувтöмöн корис: «Кöсъян кö, верман менö сöстöммöдны». 41 Исуслöн сьöлöмыс нормис. Сiйö нюжöдiс кисö, инмöдчылiс висьысь дiнö да шуис: «Кöсъя. Сöстöммы». 42 Висьысьлöн дойясыс дзик пыр бырисны, сiйö бурдiс. 43 Исус пырысьтöм-пыр ыстiс сiйöс да чорыда öлöдiс: 44 «Та йылысь некодлы эн висьтав. Мун, петкöдлы асьтö поплы, сэсся Мöисей тшöктöм серти аслад сöстöммöмысь вай вись. Тадзи тöдмаласны тэнад бурдöм йылысь». 45 Мунöм бöрас бурдöм морт пондiс висьтавлыны лоöмтор йывсьыс. Та вöсна Исус эз нин вермы восьсöн пырны карö. Сiйö олiс кар саяс, овтöминын, и Сы дiнö быдласянь волiсны йöзыс.
1 Кымынкö лун мысти Исус бара локтiс Капернаумö. Йöзыс кылiсны, мый Сiйö гортас, 2 и дзик пыр уна йöз чукöртчис Сы ордö, весиг пыранiнас сулалiсны. Исус висьталiс налы Енлысь Кывсö. 3 Сэки нёльöн вайисны вöрзьöдчыны вермытöм мортöс. 4 Уна йöз вöсна найö эз вермыны матыстчыны Исус дiнö. Сэки найö разисны керка вевтсö да Исус весьттi лэдзисны висьысьöс вольпасьнас. 5 Налысь эскöмсö аддзöмöн Исус шуис висьысьлы: «Пиöй, тэнсьыд мыжъястö прöститöма». 6 Сэнi пукалiсны Индöдö велöдысьясысь кодсюрö да мöвпалiсны ас кежас: 7 «Мыйла Сiйö Енмöс омöльтö? Ен кындзи вермас-ö кодкö прöститны мыжъяс?» 8 Исуслöн лолыс дзик пыр тöдiс налысь мöвпъяссö. Сiйö шуис: «Мыйла тi мöвпаланныд тадзи? 9 Мый кокньыдджык шуны вöрзьöдчыны вермытöмлы: "Тэнсьыд мыжъястö прöститöма" либö "Чеччы, босьт вольпасьтö да ветлы"? 10 Öнi тi тöдмаланныд: Морт Пи вермö прöститны мыжъяс му вылын». Сэсся шуис висьысьлы: 11 «Тэныд шуа: чеччы, босьт вольпасьтö да мун гортад». 12 Сiйö дзик пыр чеччис, босьтiс вольпасьсö да ставныслöн син водзын петiс. Йöзыс шензьöмöн ошкисны Енмöс да шуалiсны, татшöмсö пö ми эгö на аддзылöй. 13 Исус бара мунiс ты дорö. Йöзыс ставныс локтiсны Сы дiнö, и Сiйö велöдiс найöс. 14 Сэтысь мунiгас Исус аддзис Алфей Левийöс, сiйö пукалiс вотчукöртанiнын. Исус шуис сылы: «Лок Ме бöрся». Левий чеччис да мунiс Исус бöрся. 15 Сэсся Исус локтiс Левий ордö. Сэнi Исускöд да Сылöн велöдчысьяскöд сёйисны тшöтш вот перйысьяс да мукöд мыжа йöз. Унаöн на пиысь вöлiны Исус бöрся мунысьяс. 16 Индöдö велöдысьяс да фарисейяс аддзисны, мый Исус сёйö мыжа йöзкöд да вот перйысьяскöд. Сэки юалiсны Исуслöн велöдчысьяслысь: «Мыйла Сiйö сёйö-юö вот перйысьяскöд да мыжа йöзкöд?» 17 Исус кылiс тайöс да шуис налы: «Дзоньвидзалы бурдöдысьыд оз ков, сiйö висьысьлы колö. Ме локтi корны Ен дiнö мыжаясöс, эг веськыда олысьясöс». 18 Иоанлöн да фарисейяслöн велöдчысьясыс вöлi видзалöны. Йöзыс локтiсны Исус дiнö да юалiсны: «Иоанлöн да фарисейяслöн велöдчысьяс видзалöны. Мыйла Тэнад оз?» 19 Исус вочавидзис: «Вермöны-ö видзавны кöлысь вылын верöспукöд гажöдчысь ёртъяс? Верöспуыс кö накöд, найö оз вермыны видзавнысö. 20 Воасны на сійö лунъясыс, кор колясны верöспутöг, сэки и видзаласны. 21 Важ паськöмтö оз дöмны выль дöра дöмасöн. Тадзи кö вöчан, выль дöмас дортiыс нёйдас-косяссяс паськöмыд, розьыс ёнджыка на ыдждас. 22 Выль винатö оз кисьтны важ кучик дозйö. Тадзи кö вöчан, кучик дозйыс потас, и винаыс киссяс. Выль винатö кисьтöны выль кучик дозйö». 23 Шойччан лунö Исус мунö вöлi кöдзöм муяс вомöн. Сылöн велöдчысьясыс мунiгмозныс нетшкисны шепсö. 24 Фарисейяс шуисны Исуслы: «Видзöдлы, мый Тэнад велöдчысьясыд вöчöны! Тайöс оз позь вöчны шойччан лунö». 25 Исус воча шуис: «Тi öмöй энö лыддьылöй, мый вöчис Давид, кор тшыгъялiс аслас йöзкöд да налöн эз вöв сёяныс? 26 Авиафар аркирей дырйи сiйö пырис Ен керкаö, сёйис Енлы вайöм няньсö да аслас йöзлы тшöтш сетiс. Тайö няньсö сöмын попъяслы позис сёйны». 27 Сэсся Исус шуис фарисейяслы: «Шойччан лунсö лöсьöдöма мортлы, абу мортсö шойччан лунлы. 28 Та вöсна Морт Пи шойччан лун вылын ыджыдыс».
1 Исус бара локтiс синагогаö. Сэнi вöлi косьмöм киа морт. 2 Исус бöрся сюся видзöдiсны, бурдöдас-ö шойччан лунö, öд корсисны помка мыжавны Сiйöс. 3 Исус тшöктiс косьмöм киа мортлы: «Сувт шöрас». 4 Сэсся юалiс мукöдыслысь: «Мый позьö вöчны шойччан лунö: бурсö али лёксö, мездыны мортöс али вины сiйöс?» Найö чöв олiсны. 5 Исус шогсис налöн чорзьöм сьöлöмныс вöсна да чорыда видзöдлiс на вылö. Сэсся шуис висьысьлы: «Нюжöд китö». Сiйö нюжöдiс, и киыс пырысь-пыр бурдiс, лои мöдыс кодь. 6 Сэки фарисейяс петiсны да Ирöдлöн йöзкöд дзик пыр панiсны сёрни Исусöс виöм йылысь. 7 Исус мунiс велöдчысьясыскöд ты дорö. Сы бöрся вöтчис унасьыс-уна йöз Галилеяысь, Юдеяысь, 8 Ерусалим карысь, Идумеяысь, Йöрдан ю сайысь, Тир да Сидон каръясысь. Найö локтiсны Исус дiнö, öд кывлöмаöсь, мый Сiйö вöчö. 9 Исус тшöктiс велöдчысьясыслы лöсьöдны Сылы пыж, медым йöзыс эз дзескöдны Сiйöс. 10 Исус унаöс бурдöдiс сэнi. Та вöсна висьысьяс сюйсьöмöн сюйсисны, медым инмöдчывны Сы дiнö. 11 Исусöс аддзигöн пеж ловъяс уськöдчылiсны Сы водзö да горзiсны: «Тэ Ен Пи!» 12 Исус чорыда öлöдiс найöс Сы йылысь висьтавлöмысь. 13 Исус кайис керöсö. Сiйö корис Ас дiнас, кодöс кöсйис, и найö локтiсны Сы дiнö. 14 Сiйö бöрйис дас кыкöс лоны Сыкöд, медым мöдöдны найöс висьтавны Бур Юöр 15 да сетны налы вын бурдöдавны висьысьясöс да вöтлавны пеж ловъясöс. 16 Дас кыкыс вöлiны: Симон, кодлы сетiс Петыр ним, 17 Зеведей Яков да сылöн Иоан вокыс, кодъяслы сетiс Воанергес ним, вуджöдны кö: гым пиян, 18 Öндрей, Филип, Варфоломей, Матвей, Фома, Алфей Яков, Фаддей, Кананит Симон 19 да Искариот Иуда, Исусöс вузалысь. 20 Кор найö бöр локтiсны гортас, бара чукöртчисны йöз. Исуслы да велöдчысьясыслы эз вöв позянлуныс весиг сёйыштнысö. 21 Та йылысь кылiсны Исуслöн матыссаясыс. Найö локтiсны Сыла, öд сёрнитiсны, Сiйö пö абу Ас вежöрас. 22 Ерусалимысь локтысь Индöдö велöдысьяс сёрнитiсны, Сы пытшкын пö Вельзевул, вöтлалö пö пеж ловъясöс налöн юралысь вынöн. 23 Исус корис йöзсö да висьталiс налы велöданвисьтъясöн: «Вермас-ö сöтана вöтлыны сöтанаöс? 24 Ас муын олысьяс кö ас костаныс тышкасьöны, сэнi олöмыс киссяс. 25 Зыксьöмöн олысь керка дыр оз сулав. 26 Сöтанаыс кö аслыс паныд кыпöдчö-тышкасьö, сiйö вынсö воштас, сылы воас пом. 27 Некод оз вермы пырны вына мортлöн керкаö да сiйöс кöртавтöг босьтны сылысь эмбурсö. Вына мортöс кöрталöм бöрын сöмын вермас босьтны эмбурсö. 28 Веськыда висьтала тiянлы: мортлысь быд мыж да быд омöльтöм лоö прöститöма. 29 Кодi омöльтас Вежа Лолöс, сылысь мыжсö некор оз ло прöститöма. Сылöн мыжыс пыр кежлö кольö». 30 Исус висьталiс тайöс, öд сёрнитiсны, мый Сы пытшкын пеж лов. 31 Локтiсны Исуслöн мамыс да вокъясыс. Ывлаас сулалiгöн найö мöдöдiсны корны Сiйöс. 32 Исус гöгöр пукалысь йöз шуисны Сылы: «Мамыд да чой-вокыд ывлаасöсь, Тэнö юасьöны». 33 Исус воча шуис: «Кодi Меным мамыс да вокыс?» 34 Ас гöгöрыс пукалысьяс вылö видзöдлöмöн шуис: «Найö Менам вокъясöй да Менам мамöй. 35 Ен кöсйöм серти олысь – Меным вок, чой да мам».
1 Исус бара велöдiс ты дорын. Сы дiнö чукöртчис зэв уна йöз, Сылы весиг ковмис пуксьыны пыжö. Пыжыс сулалiс ва вылын, а йöзыс – вадорас. 2 Исус висьталiс налы уна велöданвисьт: 3 «Кывзöй. Морт кöдзны петас. 4 Кöдзигас кымынкö кöйдыс усяс туй бокö. Сэтчö воасны лэбачьяс да кокаласны. 5 Кымынкö кöйдыс усяс изъяинö. Этша муыс вöсна ляпкыдiнад найö öдйö чужасны. 6 Петас шондi, пöжны пондас, и омöль вужъя петасыд косьмас. 7 Кымынкö кöйдыс усяс лежнöг пöвстö. Быдмигас лежнöгыс пöдтас петассö, и сiйö оз вай тусьсö. 8 Мукöд кöйдысыс усяс бур муö. Петас, быдмас да ваяс уна тусь: öтияс – комын пöв, мöдъяс – квайтымын пöв, коймöдъяс – сё пöв». 9 Сэсся Исус шуис: «Кодлöн эм пель, мед кылö!» 10 Ас кежаныс кольöм бöрын дас кыкыс мукöд велöдчысьыскöд пондiсны юасьны Исуслысь велöданвисьт йылысь. 11 Исус шуис: «Тiянлы сетöма тöдны Ен Юралöмлысь гусяторъяссö, а мукöдыс кылöны та йылысь сöмын велöданвисьтъясысь. 12 – Найö видзöдöны, аддзöны – да оз казявны, кывзöны, кылöны – да оз гöгöрвоны. Оз бергöдчыны Енланьö, и налысь мыжъяссö оз ло прöститöма». 13 Исус шуис налы: «Энö öмöй гöгöрвоöй тайö велöданвисьтсö? Кыдзи нö мукöд велöданвисьтсö гöгöрвоанныд? 14 Кöдзысь Ен Кыв кöдзö. 15 Туй бокö усьöм кöйдыс петкöдлö: мортыс кылö Кывсö, но дзик пыр локтö сöтана да гусялö сьöлöмас кöдзöм Кывсö. 16 Изъяинö усьöм кöйдысыс петкöдлö: мортыс кылö Кывсö да дзик пыр долыдпырысь босьтö сiйöс сьöлöмас, 17 но вужъясьтöмысла оз дыр эскы, Ен Кыв вöсна дзескöдiгöн-вöтлiгöн сiйö эновтчö эскöмсьыс. 18 Лежнöг пöвстö усьöм кöйдысыс петкöдлö: мортыс кылö Кывсö, 19 но быдлунъя тöждыс, озырмыны ыштöмыс да мукöд кöсйöмыс пöдтö кöдзöм Кывсö, и сiйö оз вай вотöссö. 20 Бур муö кöдзöм кöйдысыс петкöдлö: мортыс кылö Кывсö, босьтö сiйöс сьöлöмас да вайö вотöс: öтияс – комын пöв, мöдъяс – квайтымын пöв, коймöдъяс – сё пöв». 21 Исус висьталiс: «Öзтöм битö öмöй пыртлöны керкаö, мед доз улö пуктыны либö лабич улö сувтöдны? Оз öмöй сiйöс бикок вылö пуктыны? 22 Став гусяыс воссяс да став дзебöмаыс йöзасяс. 23 Кодлöн эм пель, мед кылö!» 24 Исус шуис: «Тöд выланыд босьтöй, мый кыланныд. Асланыд мурталöм серти тiянлы мурталасны, нöшта содтасны на тiянлы, кывзысьяслы. 25 Кодлöн эм, сылы сетасны. Кодлöн абу, сылысь бöръясö босьтасны». 26 Исус шуис: «Енлöн Юралöмыс татшöм. Морт кöдзö кöйдыс муö. 27 Войсö сiйö узьö, лунсö олö, а кутшöм ногöн няньыс чужö-быдмö, оз тöд. 28 Муыс ачыс быдтö: медводз петö веж турун, сэсся сiйö шептасьö, а сэсся нин шепъясас артмöны тусьяс. 29 Кор няньыс воас, дзик пыр сiйö мöдöдö вундысьясöс, öд вундан кадыс воис». 30 Исус шуис: «Мыйкöд öткодялам Енлысь Юралöмсö? Кутшöм велöданвисьтöн петкöдлам сiйöс? 31 Сiйö муö кöдзöм горчица тусь кодь. Став кöйдыссьыс сiйö медпосни. 32 Кöдзöм бöрас быдмö да став пуктассьыс ыджыд лоö, весиг енэжвыв лэбачьяс вермöны поздысьны гырысь вожъясыслöн вуджöр улö». 33 Уна татшöм велöданвисьтöн Исус юöртiс налы Енлысь Кывсö, мыйта найö вермисны гöгöрвоны. 34 Велöданвисьтъястöг эз сёрнитлы йöзыскöд, а велöдчысьясыслы ас кежаныс гöгöрвоöдлiс ставсö. 35 Сiйö лунö, рытнас, Исус шуис велöдчысьясыслы: «Вуджамöй ты мöдлапöлö». 36 Найö колисны йöзсö, асьныс пуксисны пыжö Исус дiнö. Накöд вöлiны тшöтш мукöд пыжаяс. 37 Кыптiс ыджыд тöвныр, ёна гызис, да пыжыс кутiс тырны ванас. 38 Юрлöс вылö нёровтчöмöн Исус узис пыж бöжас. Сiйöс садьмöдiсны да шуисны: «Велöдысь! Тэныд öмöй веськодь, мый ми вöям?» 39 Исус чеччис, öлöдiс тöвсö да тшöктiс ваыслы: «Ланьт, лöнь!» Тöлыс ланьтiс, и вöвлытöм чöв-лöнь пуксис. 40 Исус шуис велöдчысьясыслы: «Мыйла тi сэтшöм полысьöсь? Кöнi тiян эскöмныд?» 41 Найö ыджыд полöмöн тырисны, öта-мöдныслысь пондiсны юасьны: «Кодi Сiйö? Весиг тöлыс да ваыс кывзысьö Сылысь».
1 Та бöрти найö вуджисны ты мöдлапöлö, Гадара муö. 2 Пыжсьыс чеччöм бöрын Исуслы дзик пыр паныд петiс шойнаысь пеж лолöн кутöм морт. 3 Сiйö олiс шойгу кыртаын, сiйöс сьöкыд вöлi кöртавны весиг чепъясöн. 4 Унаысь дорлiсны сылысь ки-коксö, но сiйö орйöдлывлiс чепсö да жугöдлiс дорöмсö. Некод сiйöс лöньöдны эз вермы. 5 Лун и вой сiйö дугдывтöг горзiс шойгу кыртаын да керöсъясын, дойдалiс асьсö изйöн. 6 Сiйö ылiсянь аддзис Исусöс, котöрöн локтiс да уськöдчис Сы водзö, 7 сэсся лёк горшöн горöдiс: «Мый Тэныд месянь колö, Исус, Медвылысса Енлöн Пи? Енмöн кора, эн пес менö!» 8 Тадзи шуалiс, öд Исус тшöктiс пеж ловлы петны морт пытшкысь. 9 Исус юалiс сылысь: «Мый тэнад нимыд?» Сiйö вочавидзис: «Легион менам нимöй, ми öд унаöнöсь». 10 Сiйö ёна корис Исусöс, мед эз вöтлы найöс тайö муысь. 11 Сэнi керöс бокын йирсис ыджыд порсь чукöр. 12 Пеж ловъяс корисны Исусöс: «Лэдз миянöс пырны порсьяс пытшкö». 13 Исус лэдзис. Пеж ловъяс петiсны да пырисны порсьяс пытшкö. А порсьяс кыр йывсянь уськöдчисны тыö да пöдiсны. Порсьыс вöлi кык сюрс гöгöр. 14 Порсь видзысьяс пышйисны сэтысь, котöрöн мунiсны карö да орчча сиктъясö висьтавны аддзывлöмтор йывсьыс. Йöзыс петiсны видзöдлыны, мый лоöма. 15 Найö локтiсны Исус дiнö да аддзисны коркöя пеж лолöн кутöм мортöс, код пытшкысь петiс дзонь легион. Сiйö, паськöма да ас вежöра, пукалiс сэнi. Йöзыс ёна повзисны. 16 Аддзылысьяс висьталiсны локтöмаяслы, мый лоис пеж лолöн кутöм морткöд да порсь чукöркöд. 17 Йöзыс пондiсны корны Исусöс мунны налöн муысь. 18 Кор Исус пуксис пыжö, пеж лолысь мездмöм морт вöзйысис мунны Сыкöд. 19 Исус эз лэдз, а шуис: «Мун гортад да висьтав гортсаыдлы, мый вöчис тэныд Господь да кутшöм бур сьöлöма Сiйö вöлi тэ дiнö». 20 Сiйö мунiс да Даскар му пасьтала пондiс висьтавны, мый сылы вöчис Исус. Став йöзыс шензисны. 21 Исус бöр вуджис пыжöн ты мöдлапöлö. Сы дiнö чукöртчис уна йöз. Кор Сiйö вöлi вадорас, 22 локтiс Явир нима морт, синагогаса юралысь. Исусöс аддзöм бöрын Явир уськöдчис Сы водзö 23 да ёна корис: «Менам нылöй кулан выйын. Лок, пуктыв сы вылö китö, мед бурдас да коляс ловйöн». 24 Исус мунiс юралыськöд. Уна йöз вöтчис Исус бöрся да дзескöдiс Сiйöс. 25 Йöз чукöрын вöлi ань, сiйö дас кык во чöж висьöма вир мунöмöн 26 да уна сьöкыд нуöма бурдöдысьяссянь. Сiйö видзöма ставсö, мый сылöн вöлöма, но отсöг пыдди сылы нöшта на лёкджык лоöма. 27 Ань водзынджык нин кывлöма Исус йылысь. Йöз пöвсттiыс сiйö матыстчис Исус дiнö мышсяньыс да инмöдчылiс Сылы паськöмас. 28 Ань мöвпалiс: «Сöмын инмöдчыла кö Сылöн паськöмö, бурда». 29 Вир мунöмыс пырысьтöм-пыр дугдiс, сiйö ас пытшкас кылiс бурдöмсö. 30 Исус дзик пыр казялiс, мый Сы пытшкысь петiс вын. Сiйö бергöдчис йöз чукöрлань да юалiс: «Кодi инмöдчылiс Менам паськöмö?» 31 Велöдчысьясыс шуисны: «Тэ аддзан, йöзыс дзескöдöны Тэнö, и юасян, кодi инмöдчылiс Тэ дiнö». 32 Исус видзöдлiс гöгöрбок, медым аддзыны инмöдчылысьöс. 33 Ань гöгöрвоис, мый сыкöд лои. Повзьöмысла дзöригтыр сiйö матыстчис да уськöдчис Исус водзö, висьталiс ставсö веськыда. 34 Исус шуис аньлы: «Нылöй, эскöмыд мездiс тэнö. Мун повтöг да ло дзоньвидза, тэ мынiн висьöмсьыд». 35 Исуслöн сёрнитiгöн локтiсны синагогаса юралысьлöн гортсяньыс да шуисны: «Нылыд кулi, эн мудзтöд Велöдысьсö». 36 Исус кылiс тайöс да шуис синагогаса юралысьлы: «Эн пов, сöмын эскы». 37 Сэсся босьтiс Аскöдыс Петырöс, Яковöс да сылысь Иоан воксö, мукöдсö эз лэдз локнысö. 38 Юралысь керкаö воöм мысти Исус аддзис: йöзыс шызьöмаöсь, сыркъялöмöн бöрдöны. 39 Исус пырис керкаö да шуис налы: «Мыйла нö шызьöмныд да бöрданныд? Нывкаыс эз кув, сiйö узьö». 40 Исус вылын пондiсны серавны. Сiйö вöтлiс керкаысь ставнысö, босьтiс Аскöдыс сöмын нывкалысь бать-мамсö да Сыкöд локтысьясöс. Исус пырис нывка дiнö, 41 босьтiс сiйöс киöдыс да шуис: «Талита куми». Тайö лоö: «Нылöй, тэныд шуа: чеччы». 42 Нывка дзик пыр чеччис да пондiс ветлöдлыны; сылы вöлi дас кык арöс. Аддзылысьяс ёна чуймисны. 43 Исус чорыда öлöдiс найöс та йылысь мукöдлы висьтавлöмысь, а нывкаöс Сiйö тшöктiс вердны.
1 Сэтысь Исус мунiс Аслас карö, Сылöн велöдчысьясыс мунiсны Сы бöрся. 2 Шойччан лунö Сiйö велöдiс синагогаын. Кывзысьяс пиысь унаöн шензьöмöн шуалiсны: «Кытысь Сылöн тайö? Мыйсяма мывкыдлун Сылы сетöма? Сiйö вöчö татшöм шензьöданаторъяс! 3 Абу-ö Сiйö тшупсьысь? Абу-ö Мариялöн пиыс, Яковлöн, Иосейлöн, Иудалöн да Симонлöн вокыс? Оз-ö танi овны Сылöн чойясыс?» Тадзи Сiйöс öтдортiсны. 4 Исус шуис налы: «Пророкöс пыдди пуктöны быдлаын, сöмын ас карас, ас рöдвужас да ас гортас оз». 5 Исус эз вермы сэнi вöчны шензьöданаторъяс, сöмын кымынкö висьысь вылö кисö пуктылöмöн бурдöдiс найöс. 6 Йöзлöн эскытöмлуныс шензьöдiс Сiйöс. Исус ветлöдлiс матiгöгöр сиктъясöд да велöдiс йöзсö. 7 Сiйö корис дас кыкнан велöдчысьсö да сетiс налы вын вöтлавны пеж ловъясöс. Сэсся кыкöн-кыкöн мöдöдалiс найöс. 8 Исус шуис налы: «Туяныд бедь кындзи нинöм энö босьтöй, весиг нянь, ноп, сьöм 9 да вежан кöм-пась». 10 Нöшта Исус висьталiс: «Кутшöм керкаö пыранныд, водзö мунтöдзныд олöй сэнi. 11 Оз кö сибöдны-кывзыны тiянöс, сэтысь петiганыд пыркöдöй коксьыныд буссö. Тайö лоö найöс öлöдöм. Веськыда висьтала тiянлы: Мыждан лунö Содом да Гомора каръяслы лоас кокньыдджык сiйö карыслы дорысь». 12 Велöдчысьяс мунiсны да юöрталiсны, йöзыс мед бергöдчисны мыжъяссьыс. 13 Найö вöтлiсны уна пеж лолöс да выйöн мавтöмöн бурдöдiсны уна висьысьöс. 14 Ирöд öксы кылiс Исус йылысь, öд тайö нимыс быдлаын вöлi тöдса. Сiйö шуис, Пыртысь Иоан пö ловзьöма, та вöсна вермö вöчны шензьöданаторъяс. 15 Мукöдыс шуалiсны, тайö пö Илля, кодсюрö шуисны, Сiйö пö пророкъясысь öти. 16 Татшöм сёрнияс бöрын Ирöд шуис, тайö пö Иоан, кодлысь ме юрсö керыштi, ловзьöма. 17 Öд Филип вокыслöн Ирöдиада гöтырыс вöсна Ирöд тшöктiс босьтны Иоанöс да дорöмöн пуксьöдны дзескыдiнö. Ирöдиадаöс гöтырö босьтöмысь 18 Иоан öлöдлiс Ирöдöс: «Вок гöтырыдкöд тэныд оз позь овнытö». 19 Ирöдиада скöралiс Иоан вылö да кöсйис вины сiйöс, но эз вермы. 20 Ирöд полiс Иоанысь, öд тöдiс, мый Иоан веськыда олысь да вежа морт. Ирöд дорйис Иоанöс, унатор вöчис сылысь кывзысьöмöн да окотапырысь кывзiс сiйöс. 21 Ирöд чужан лунö Ирöдиадалы лоис позянлун вины Иоанöс. Тайö лунö Ирöд котыртiс гаж юралысьяслы, тышкайöзöн веськöдлысьяслы да галилеяса пыдди пуктана войтырлы. 22 Ирöдиадалöн нылыс пырис да йöктiс гажöдчысьяс водзын. Тайö воис Ирöдлы да сыкöд пукалысьяслы сьöлöм вылас. Öксы шуис нывлы: «Кор менсьым, мый кöсъян, и ме сета тэныд». 23 Ирöд кыв сетiс: «Сета, мый сöмын коран, весиг аслам веськöдлан мулысь джынсö». 24 Ныв петiс да юалiс мамыслысь: «Мый эськö корны?» Мамыс шуис: «Пыртысь Иоанлысь юрсö». 25 Ныв дзик пыр тэрмасьöмöн мунiс öксы дiнö да шуис: «Кöсъя, мед дзик öнi сетiн меным тасьтiын Пыртысь Иоанлысь юрсö». 26 Öксы шогö усис, но гажöдчысьяс водзын сетöм кывйысь эз вермы соссьыны. 27 Дзик пыр сiйö ыстiс шыпуртаöс да тшöктiс вайны Иоанлысь юрсö. 28 Шыпурта мунiс дзескыдiнö да керыштiс Иоанлысь юрсö. Сэсся вайис тасьтiын юрсö да сетiс нывлы, а нылыс – мамыслы. 29 Та йылысь кывлiсны Иоанлöн велöдчысьясыс. Найö локтiсны шойысла да нуисны дзебанiнö. 30 Апостолъяс чукöртчисны Исус дiнö. Найö висьталiсны Сылы ставсö, мый вöчисны да мыйö велöдiсны. 31 Исус шуис налы: «Мунöй овтöминö да шойччыштöй сэнi». Йöзыс век öтарö локтiс-мунiс, велöдчысьяслы весиг некор вöлi сёйыштнысö. 32 Та вöсна найö öтнаныс мöдöдчисны пыжöн овтöминö. 33 Йöзыс аддзылiсны налысь мунöмсö да тöдiсны найöс. Котöрöн петiсны каръяссьыныс да воисны сэтчö на дорысь водзджык. 34 Пыжысь чеччигöн Исус аддзис уна йöзöс. Сылöн сьöлöмыс нормис, öд найö вöлiны видзысьтöг кольöм ыжъяс кодьöсь. Сэки Исус пондiс велöдны найöс, Сiйö унатор йылысь висьталiс налы. 35 Сёр рытнас матыстчисны Исус дiнö велöдчысьясыс да шуисны: «Танi овтöмин, и кадыс сёр нин. 36 Ысты йöзсö матiгöгöр сикт-грездö сёянтор ньöбны». 37 Исус воча шуис: «Тi сетöй налы сёянсö». Велöдчысьяс шуисны: «Миянлы-ö колö ветлынысö? Та мындаыслы нянь вылад кыксё динар ковмас». 38 Исус юалiс налысь: «Уна-ö тiян няньныд? Мунöй видзöдлöй». Тöдмалöм бöрын найö висьталiсны: «Вит нянь да кык чери». 39 Исус тшöктiс велöдчысьясыслы пуксьöдавны йöзсö чукöръясö веж турун вылö. 40 Йöзыс пуксялiсны сёöн да ветымынöн. 41 Исус босьтiс вит няньсö да кык черисö, видзöдлiс енэжö да Енмöс аттьöалöмöн чегис няньсö, сэсся сетiс велöдчысьясыслы. Велöдчысьяс разöдiсны йöзыслы. Кык черисö тшöтш юкис ставныслы. 42 Ставныс пöттöдзныс сёйисны, 43 а нянь да чери коляссö дас кык куд тыр чукöртiсны. 44 Сёйысьыс вöлi вит сюрс гöгöр морт. 45 Исус дзик пыр тшöктiс велöдчысьясыслы пуксьыны пыжö да вуджны Сытöг мöдлапöлö, Випсаидаö. Сэккостi Исус мöдöдалiс йöзсö. 46 Йöзöс ыстöм бöрын Ачыс кайис керöсö кевмысьны. 47 Рытнас пыжаяс вöлiны ты шöрын, а Исус öтнас сулалiс вадорын. 48 Сiйö аддзис: паныда тöлыс вöсна велöдчысьяслы сьöкыд вöлi сыннысö. Асъядорыс Исус мöдöдчис ва вывтi велöдчысьяс дiнас да кöсйис ордйыны найöс. 49 Кор велöдчысьяс аддзисны ва вывтi восьлалысь Исусöс, чайтiсны, мый тайö орт, и кутiсны горзыны. 50 Ставныс ёна повзисны. Исус дзик пыр шыасис на дiнö: «Лöньöй, тайö Ме. Энö полöй». 51 Сiйö пуксис на дiнö пыжас. Тöлыс лöнис. Велöдчысьяс ёна шензисны. 52 Няньöн вердöм шензьöданаторйыс, буракö, нинöм эз висьтав налöн измöм сьöлöмлы. 53 Тысö вуджöм бöрын найö сувтiсны Генесарет муö. 54 Кор найö чеччисны пыжсьыс, йöзыс дзик пыр тöдмалiсны Исусöс. 55 Тайö юöрнас найö котöрöн кытшовтiсны став матiгöгöрсö да, кöнi кывсис Исус, сэтчö пондiсны вольпасьöн вайны висьысьясöс. 56 Быдлаын, кытчö волiс Исус – сиктö, карö, грездö – эрдъяс вылö водтöдавлiсны висьысьясöс да корисны Исусöс, мед висьысьяслы лэдзас инмöдчывны паськöм дорышас. Сы дiнö инмöдчылысьяс ставöн бурдiсны.
1 Исус дiнö локтiсны фарисейяс да Ерусалимысь воöм Индöдö велöдысьяс. 2 Кор найö аддзисны, мый кодсюрö Сылöн велöдчысьясыс сёйöны няньсö мыськытöм пеж киöн, кутiсны шуасьны на вылö. 3 Юдейяс, торйöн нин фарисейяс, кутчысисны пöрысьяслöн шуöмö: кинысö мыськытöг эз пуксьывны сёйны 4 и вузасянiнысь локтöм бöрын эз сёйлыны мыссьытöг. Нöшта уна мукöдторйö на кутчысисны: дозмук, тасьтi-пöрт да вольпась мыськалöмö. 5 Фарисейяс да Индöдö велöдысьяс юалiсны Исуслысь: «Мыйла велöдчысьясыд оз овны пöрысьяслöн шуöм серти: мыськытöм киöн нянь сёйöны?» 6 Исус шуис налы: «Кык бана шаньгаяс! Бура шуöма Гижöдас тiян йылысь Исай пророк: – Тайö йöзыс вомнас пыдди пуктöны Менö, но налöн сьöлöмыс ылын Меысь. 7 Весьшöрö ыдждöдлöны Менö мортсянь тшöктöмъясö велöдiгöн. 8 Тi эновтiнныд Енлысь тшöктöмсö, кутчысянныд мортлöн шуöмъясö: тасьтi-дозмук мыськалöмö да уна мукöдторйö на». 9 Исус водзö висьталiс: «Сюся тi вештанныд Енлысь тшöктöмсö, медым кутчысьны батьяслöн шуöмö. 10 Мöисей шуöма: "Пыдди пукты ассьыд бать-мамтö". "Омöльтан кö бать-мамтö, тэнö кулöм вылö мыждасны". 11 А тi мöдарö велöданныд. Морт кö бать-мамыслы сетöм пыдди шуас: "Корбан, Енлы тайöс кöсйыси", 12 сэки тi онö нин лэдзöй вöчны бурсö бать-мамыслы. 13 Тадзи батьяслöн шуöмö кутчысьöмöн да велöдöмöн тi вештанныд Енлысь Кывсö. Уна татшöмтор на тi вöчанныд». 14 Исус бара корис йöзсö да шуис налы: «Кывзöй Менö ставныд да гöгöрвоöй. 15 Мортöс оз пежав сiйö, мый пытшкас пырö, а пежалö, мый сы пытшкысь петö. 16 Кодлöн эм пель, мед кылö!» 17 Исус колис йöзсö да пырис керкаö. Велöдчысьясыс корисны Сiйöс гöгöрвоöдны висьталöмсö. 18 Сiйö шуис налы: «Весиг тi онö гöгöрвоöй! Онö öмöй вежöртöй: мортöс оз вермы пежавны сiйö, мый пытшкас пырö, 19 öд сiйö оз сьöлöмас пыр, а веськалö кынöмас, сэсся ортсö петö». Тадзи Исус гöгöрвоöдiс, мый став сёяныс сöстöм. 20 Водзö висьталiс: «Мый петö морт пытшкысь, сiйö пежалö мортсö. 21 Буретш морт пытшкысь, сылöн сьöлöмысь, петöны лёк мöвпъяс, гозъя олöм пежалöм, кырсалöм, морт виöм, 22 гусясьöм, горшасьöм, лёк вöчöм, ылöдчöм, лэдзчысьöм оласног, колысь син, омöльтöм, асьсö вылö пуктöм да мывкыдтöмлун. 23 Став тайö лёкыс петö морт пытшкысь да пежалö сiйöс». 24 Сэтысь Исус мунiс Тир да Сидон муясö. Сiйö пырис öти керкаö да эз кöсйы, мед кодкö тöдiс та йылысь, но тöдмалiсны Сылöн воöм йылысь. 25 Кывлiс Сы йылысь öти ань, кодлысь нывсö вöлi кутöма пеж лов. Ань локтiс да уськöдчис Исус водзö. 26 Тайö аньыс вöлi Сирияысь, финикияса, сiйö сёрнитiс грек кывйöн. Ань корис Исусöс вöтлыны ныв пытшкысь пеж ловсö. 27 Исус шуис: «Медводз мед ныв-пи пöттöдзныс сёясны. Абу бур мырддьыны ныв-пилысь няньсö да шыбитны сiйöс понпиянлы». 28 Ань воча шуис: «Сiдз, Господьöй. Но понъяс тшöтш пызан улысь сёйöны ныв-пилысь нянь торпыригсö». 29 Исус шуис сылы: «Тадз кö мöвпалан, мун, пеж лов петiс тэнад ныв пытшкысь». 30 Гортас локтöм бöрын ань аддзис: нылыс куйлö вольпасьын, пеж лов петöма сы пытшкысь. 31 Тир да Сидон муясысь петöм бöрын Исус локтiс Даскар му пыр Галилея ты дорö. 32 Сы дiнö вайöдiсны пыскыль кывъя пельтöм мортöс да корисны Исусöс пуктывны кисö тайö мортыс вылö. 33 Исус нуöдiс сiйöс йöз дiнсьыс бокö, пуктiс чуньяссö сылы пеляс да сьöлыштöмöн инмöдчис сылы кывъяс. 34 Сэсся енэжö видзöдлöмöн ышловзис да шуис пельтöмлы: «Эффата!» Тайö лоö: «Воссьы!» 35 Дзик пыр тайö мортыслöн пельыс воссис да кыв-ворыс разьсис, сiйö пондiс ясыда сёрнитны. 36 Исус öлöдiс йöзсö та йылысь мукöдлы висьталöмысь. Но кымын ёна öлöдiс, сымын ёнджыка найö висьтавлiсны. 37 Йöзыс шензьöмöн шензисны да шуалiсны: «Сiйö уна бурсö вöчö. Пельтöмъяслы сетö кывны, кывтöмъяслы сёрнитны».
1 Сiйö лунъясö бара чукöртчис зэв уна йöз. Налöн эз вöв аскöдныс сёяныс. Исус корис велöдчысьяссö да шуис: 2 «Менам сьöлöмöй висьö тайö йöзыс вöсна. Найö куим лун нин танöсь, а налöн сёяныс абу. 3 Сёйтöгыс кö мöдöда найöс гортаныс, туяс дзикöдз эбöстöммасны, öд кодсюрö локтiсны ылiсянь». 4 Велöдчысьяс шуисны: «Кытысь босьтны овтöминас няньсö, медым вердны найöс?» 5 Исус юалiс: «Уна-ö тiян няньныд?» Найö вочавидзисны: «Сизим». 6 Исус тшöктiс йöзыслы пуксявны муас. Ачыс босьтiс сизим няньсö, Енмöс аттьöалöмöн чегис няньсö да сетiс велöдчысьясыслы, а велöдчысьяс – йöзыслы. 7 Налöн вöлi нöшта кымынкö посни чери. Бурсиöм бöрын Исус тшöктiс сетавны черисö. 8 Ставöн пöттöдзныс сёйисны, коляссö сизим куд тыр чукöртiсны. 9 Сёйысьыс вöлi нёль сюрс гöгöр морт. Йöзсö мöдöдалöм бöрын 10 Исус велöдчысьясыскöд дзик пыр пуксис пыжö да кывтiс Далманута муö. 11 Локтiсны фарисейяс да пондiсны вензьыны Исускöд. Сiйöс кыйöм могысь корисны петкöдлыны енэжсянь индысьпас. 12 Исус сьöкыда ышловзис да шуис: «Мыйла öнiя олысьяслы колö индысьпасыс? Веськыда висьтала тiянлы: оз ло налы индысьпасыс». 13 Сэсся Исус колис найöс, бöр пуксис пыжö да вуджис мöдлапöлö. 14 Велöдчысьяс вунöдiсны босьтны аскöдныс няньсö, а пыжас вöлi сöмын öти няньтор. 15 Исус шуис налы: «Видзчысьöй фарисей да Ирöд няньшомысь». 16 Велöдчысьяс ас костаныс сёрнитiсны: «Няньыс öд миян абу». 17 Тайöс казялöмöн Исус шуис налы: «Мый нö сёрнитанныд нянь абутöм йывсьыд? Онö öмöй вежöртöй? Измöма öмöй сьöлöмныд? 18 Синмаöсь да, онö аддзöй? Пеляöсь да, онö кылöй? Вунöдiнныд öмöй 19 вит сюрс мортöс вит няньöн вердöм йылысь? Кымын куд тыр сэки коляссö чукöртiнныд?» Шуисны: «Дас кыкöс». 20 «А нёль сюрс мортöс сизим няньöн вердiгöн, кымын куд тыр коляссö чукöртiнныд?» Шуисны Сылы: «Сизимöс». 21 Исус шуис налы: «Кыдзи тi онö вежöртöй?» 22 Исус воис Випсаидаö. Сы дiнö вайöдiсны синтöмöс да корисны инмöдчывны сы дiнö. 23 Исус босьтiс синтöмöс киöдыс да петкöдiс сиктсьыс. Синмас сьöлыштöм бöрын пуктiс кисö сы вылö да юалiс: «Аддзан-ö мыйкö?» 24 Синтöм видзöдлiс да шуис: «Аддза ветлöдлысь йöзöс, найö пуяс кодьöсь». 25 Исус бара пуктылiс кисö сылы синмас да тшöктiс видзöдлыны. Синтöм бурдiс да ставсö аддзис ясыда. 26 Исус мöдöдiс сiйöс гортас да шуис: «Сиктас эн пыр». 27 Исус мунiс велöдчысьясыскöд Филиплöн Кесария сиктъясö. Мунiганыс юалiс налысь: «Код туйö йöзыс пуктöны Менö?» 28 Найö вочавидзисны: «Öтияс шуöны, Пыртысь Иоан пö, мöдъяс шуöны, Илля пö, кодсюрö шуöны, пророкъясысь пö öти». 29 Исус юалiс: «Код туйö тi Менö пуктанныд?» Петыр вочавидзис: «Тэ – Кристос». 30 Исус öлöдiс найöс, мед эз висьтавны Сы йылысь мукöдлы. 31 Исус пондiс висьтавны велöдчысьясыслы: «Морт Пилы уна сьöкыд ковмас нуны. Пöрысьяс, аркирейяс да Индöдö велöдысьяс пондасны вöтлыны да виасны Сiйöс, но коймöд луннас Сiйö ловзяс». 32 Та йылысь Исус сёрнитiс восьсöн. Сiйöс бокö корöмöн Петыр паныд шуасьны пондiс. 33 Велöдчысьяслань бергöдчöмöн Исус чорыда вомалiс Петырöс: «Вешйы Ме дiнысь, сöтана! Тэнад мöвпъясыд мортсянь, абу Енсянь». 34 Исус чукöстiс йöзсö да велöдчысьяссö да шуис налы: «Кодi кöсйö мунны Ме бöрся, мед вунöдас асьсö, мед босьтас ассьыс крестсö да локтас Ме бöрся. 35 Кодi кöсйö видзны ассьыс олöмсö, воштас сiйöс. Ме вöсна да Евангелльö вöсна олöмсö воштысь видзас сiйöс. 36 Лоас-ö мортыслы бур, босьтас кö аслыс став муюгыдсö, а олöмсö воштас? 37 Вермас-ö бöр ньöбны ассьыс олöмсö? 38 Кодi тайö мыжа да пежас ылалöм йöз пöвстын яндысяс Меысь да Менам кывъясысь, сыысь яндысяс Морт Пи, кор локтас вежа анделъяскöд Батьыслöн дзирдлунöн».
1 Исус шуис налы: «Веськыда висьтала тiянлы: кодсюрö танi сулалысьяс пиысь кувтöдзныс на аддзасны Ен Юралöмлысь вына локтöмсö». 2 Квайт лун мысти Исус босьтiс Аскöдыс Петырöс, Яковöс, Иоанöс да кайис накöд джуджыд керöсö. Велöдчысьяс син водзын Исуслöн мыгöрыс вежсис, 3 паськöмыс лои лым кодь дзирдалана еджыд. Татшöм еджыд дöрасö му вылын он аддзы. 4 Велöдчысьяс аддзисны Илляöс да Мöисейöс, найö сёрнитiсны Исускöд. 5 Петыр шуис Исуслы: «Велöдысьöй, миянлы танi лöсьыд, сувтöдам куим чом: Тэныд, Мöисейлы да Иллялы». 6 Петыр ачыс эз гöгöрво, мый висьталiс, öд ставныс найö вöлi ёна повзьöмаöсь. 7 Сэки локтiс кымöр да вевттис найöс, кымöрсянь кылiс гöлöс шы: «Тайö Менам муса Пиöй, Сiйöс кывзöй». 8 Велöдчысьяс видзöдлiсны гöгöрбок да аддзисны, мый накöд сöмын Исус. 9 Керöсысь лэччиганыс Исус öлöдiс велöдчысьяссö, мед эз висьтавны аддзывлöм йывсьыс Морт Пилöн ловзьытöдз. 10 Найö тöд выланыс босьтiсны тайö кывъяссö да öта-мöдныслысь юасисны, кыдзи гöгöрвоны ловзьöмсö. 11 Велöдчысьяс юалiсны Исуслысь: «Мыйла Индöдö велöдысьяс шуöны, Иллялы пö колö водзджык локны?» 12 Сiйö вочавидзис: «Дерт, Иллялы колö водзджык локны да ставсö лöсьöдны. А Морт Пи йылысь гижöма, мый уна сьöкыд Сылы ковмас нуны да лоны увтыртöмаöн. 13 Висьтала тiянлы: Илля локтiс нин. Сыкöд вöчисны, мый кöсйисны. Тадзи вöлi водзвыв гижöма сы йылысь». 14 Исус локтiс велöдчысьяс дiнö да аддзис на дiнысь уна йöзöс да накöд вензьысь Индöдö велöдысьясöс. 15 Исусöс аддзöм бöрын став йöзыс чуймисны да котöрöн матыстчисны чолöмасьны Сыкöд. 16 Исус юалiс Индöдö велöдысьяслысь: «Мый йылысь вензянныд?» 17 Йöз пöвстысь öти шуис: «Велöдысьöй, ме вайöдi Тэ дiнö ассьым пиöс. Сiйö оз сёрнит, сы пытшкын пеж лов. 18 Кор пеж лов топöдö сiйöс, шыбитö муас. Сэки пиöй пиньсö йирö, сiйöс йöрсöналö, да вомсьыс быг петö. Ме кори Тэнсьыд велöдчысьястö вöтлыны пеж ловсö, но найö эз вермыны». 19 Исус шуис: «Эскытöмъяс! Дыр-ö на Меным овнысö тiянкöд? Дыр-ö на Меным видзöдны тiянöс? Вайöдöй Ме дiнö зонкасö». 20 Сiйöс вайöдiсны Исус дiнö. Исусöс аддзöм бöрын пеж лов дзик пыр кутiс песлöдлыны зонкасö. Сiйö усис муас, пондiс туплясьны, вомсьыс кутiс быг петны. 21 Исус юалiс зонка батьлысь: «Важысянь-ö тайö пиыдлöн?» Сiйö вочавидзис: «Кагадырсяньыс. 22 Унаысь сiйöс пеж лов биö-ваö шыбитлiс, мед вины. Верман кö, отсав миянлы, ло бур сьöлöма». 23 Исус шуис сылы: «Эскан кö, эскысьлы ставыс вермана». 24 Зонкалöн батьыс дзик пыр бöрдöмöн горöдiс: «Эска, Господьöй! Отсав меным эскыны!» 25 Исус аддзис: йöзыс котöрöн чукöртчöны. Сэки öлöдöмöн шуис пеж ловлы: «Кыв-вор кутысь, пельяс тупкысь пеж лов, тшöкта тэныд: пет зонка пытшкысь да бöрсö эн лысьт пырны сы пытшкö». 26 Пеж лов горöдiс, песовтiс зонкасö да петiс сы пытшкысь. Зонка куйлiс шой кодь, унаöн весиг шуисны, кулiс пö. 27 Исус босьтiс зонкаöс киöдыс, и сiйö чеччис. 28 Керкаö пырöм бöрын велöдчысьяс ас кежаныс юалiсны Исуслысь: «Мыйла ми эгö вермöй вöтлыны пеж ловсö?» 29 Исус шуис налы: «Видзавтöг да кевмысьтöг татшöм пеж ловъяссö вöтлыны онö вермöй». 30 Сэтысь петöм бöрын найö мунiсны Галилея пыр. Исус эз кöсйы, медым кодкö тöдлiс та йылысь. 31 Сэнi Сiйö велöдiс Ассьыс велöдчысьяссö. Сiйö шуис налы: «Морт Пиöс сетасны йöзлöн киö. Сiйöс виасны, но коймöд луннас Сiйö ловзяс». 32 Велöдчысьяс эз гöгöрвоны, мый йылысь Исус висьталö, а юавнысö полiсны. 33 Исус воис Капернаумö. Гортас пырöм мысти Сiйö юалiс велöдчысьясыслысь: «Мый йылысь тi сёрнитiнныд локтiгмозныд?» 34 Найö чöв олiсны. Локтiганыс найö вензисны, кодi на пиысь ыджыдджыкыс. 35 Исус пуксис, корис дас кыкнансö да шуис налы: «Кодi кöсйö лоны медводдзаöн, мед лоас став пиас медбöръяöн да быдöнлы кесъялысьöн». 36 Сiйö босьтiс кагаöс, сувтöдiс на шöрö да сiйöс кутыштлöмöн шуис: 37 «Кодi Менам ним вöсна сибöдö öти татшöм кагаöс, сiйö сибöдö Менö. А Менö сибöдысь сибöдö Менö Мöдöдысьöс, оз сöмын Менö». 38 Иоан шуис: «Велöдысьöй, ми аддзылiм мортöс, сiйö Тэнад нимöн пеж ловъясöс вöтлалö. Ми öлöдiм сiйöс, öд сiйö абу миян пöвстысь». 39 Исус шуис: «Энö öлöдöй сiйöс. Менам нимöн кö шензьöданаторсö вöчö, сiйö оз вермы пырысь-пыр омöльтны Менö. 40 Кодi абу тiянлы паныд, сiйö тiян дор. 41 Веськыда висьтала тiянлы: кодi юкталас тiянöс ваöн, сы вöсна мый тi Кристослöн, сiйö оз коль удждонтöг». 42 «Кодi ыштöдас тайö ичöтъясысь öтикöс, Меным эскысьöс, сылы бурджык лоö, сьылiас кö ыджыд изки öшöдасны да шыбитасны саридзö. 43 Киыд кö ыштöдö тэнö, керышт сiйöс. Бурджык пырны помтöм олöмö ки пöлаöн куслытöм биö киаöн веськалöм дорысь. 44 Сэнi "номырыс оз кувлы да биыс оз куслы". 45 Кокыд кö ыштöдö тэнö, керышт сiйöс. Бурджык пырны помтöм олöмö кок пöлаöн куслытöм биö тэнö кокаöн шыбитöм дорысь. 46 Сэнi "номырыс оз кувлы да биыс оз куслы". 47 Синмыд кö ыштöдö тэнö, шыбит сiйöс. Бурджык пырны Енлöн Юраланiнö син пöлаöн куслытöм биö тэнö синмаöн шыбитöм дорысь. 48 Сэнi "номырыс оз кувлы да биыс оз куслы". 49 Быдöнöс сöстöммöдасны биöн да солаласны висьöс моз. 50 Солыд – буртор. Но солыс кö лоас дуб, кыдзи сiйöс бöр соланас вöчан? Тiян пытшкын мед пыр лоö солыс, лöня олöй ас костаныд».
1 Сэтысь Исус мунiс Йöрдан ю мöдлапöлöд Юдея муö. Сы дiнö бара чукöртчис уна йöз. Сiйö велöдiс найöс, кыдзи пыр вöчлiс. 2 Исус дiнö матыстчисны фарисейяс да Сiйöс кыйöм могысь юалiсны: «Позьö-ö верöслы юксьыны гöтырыскöд?» 3 Исус воча шуис: «Мый тiянлы гижöма Мöисей?» 4 Найö вочавидзисны: «Мöисей лэдзис верöслы эновтны гöтырсö, сöмын верöсыслы колö вöлi сетны гöтырыслы торйöдчан гижöд». 5 Исус шуис налы: «Тiян чорыд сьöлöмныд вöсна Мöисей гижис тайö тшöктöмсö. 6 Му пуксьöмсяньыс Ен вöчис аймортöс да аньöс. 7 "Та вöсна морт кольö бать-мамсö да öтлаасьö гöтырыскöд, 8 и тайö кыкыс лоöны öти вир-яйöн". Сiдзкö, найö абу нин кык, а öти вир-яй. 9 Мый йитöма Енмыс, морт мед оз торйöд». 10 Керкаö пырöм бöрын велöдчысьяс та йылысь юалiсны Исуслысь. 11 Исус шуис налы: «Верöсыс кö эновтö гöтырсö да гöтрасьö мöдкöд, сiйö гозъя олöм пежалö. 12 Гöтырыс кö юксьö верöсыскöд да мунö мöд сайö, сiйö тшöтш гозъя олöм пежалö». 13 Исус дiнö вайöдiсны челядьöс, медым Сiйö инмöдчылiс на дiнö. Велöдчысьяс шуасисны вайöдысьяс вылö. 14 Исус казялiс тайöс да чорыда шуис налы: «Лэдзöй челядьсö локны Ме дiнö. Энö кутöй найöс. Енлысь Юраланiнсö öд на коддьöмлы лöсьöдöма. 15 Веськыда висьтала тiянлы: кодi оз сибöд Енлысь Юралöмсö кага моз, сiйö оз пыр Енлöн Юраланiнö». 16 Исус кутыштлiс челядьöс да кисö пуктылöмöм бурсиис найöс. 17 Туйö петiгас Исус дiнö котöрöн локтiс öти морт да Исус водзö пидзöс вылас сувтöмöн юалiс: «Бур Велöдысьöй, мый меным колö вöчны, мед вичмис меным помтöм олöм?» 18 Исус вочавидзис: «Мыйла тэ шуан Менö бурöн? Некод абу бурыс, сöмын Енмыс бур. 19 Тэ öд тöдан тшöктöмъяссö: гозъя олöмтö эн пежав, эн ви, эн гусясь, эн пöръясь, эн мырддьы мукöдлысь, пыдди пукты ассьыд бать-мамтö». 20 Сiйö шуис: «Велöдысьöй, том кадсянь ме ола тайö тшöктöмъяс сертиыс». 21 Исус видзöдлiс сы вылö мусапырысь да шуис: «Öтитор оз тырмы тэныд: мун, вузав ставсö, мый тэнад эм, да сьöмсö сет гöльяслы. Сэки тэныд енэжын озырлуныс вичмас. Сэсся босьт кресттö да лок Ме бöрся». 22 Исуслöн кывъясыс шöйöвоштiсны морттö. Сiйö жугыля мунiс, öд сылöн озырлуныс вöлi уна. 23 Исус видзöдлiс велöдчысьясыс вылö да шуис налы: «Кутшöм сьöкыд озырлы пырны Енлöн Юраланiнö!» 24 Велöдчысьяс чуймисны Сылöн кывъясысь. Исус выльысь шуис: «Челядь, кутшöм сьöкыд пырны Енлöн Юраланiнö сылы, кодi озырлун вылö лачаöн олö! 25 Озырлы Енлöн Юраланiнö пырöм дорысь верблюдлы кокньыдджык пырны ем пысöд». 26 Велöдчысьяс ёнджыка на чуймисны, юасисны öта-мöдныслысь: «Кодi нö вермас мездмынысö?» 27 На вылö видзöдлöмöн Исус шуис: «Мортлы тайö вермытöмтор, но абу Енлы. Енмыслы ставыс вермана». 28 Петыр шуис Исуслы: «Ми ставсö эновтiм да мунiм Тэ бöрся». 29 Исус шуис: «Веськыда висьтала тiянлы: кодi Ме вöсна да Евангелльö вöсна коляс керкасö, чой-воксö, бать-мамсö, гöтырсö, ныв-писö, видз-мусö, 30 сылы тайö олöмас на вöтлöмъяс дырйи керкаыс, чой-вокыс, мамыс, ныв-пиыс да видз-муыс сё пöвстöн бöр воас, нöшта локтан нэмас сылы помтöм олöм вичмас. 31 Воддзаясысь унаöн лоöны бöръяöн, бöръяясысь – воддзаöн». 32 Ерусалимö кайигöн Исус мунiс водзвыланыс. Велöдчысьяс шензисны, а мукöдыслöн, Исус бöрся мунысьяслöн, вöлi полöм. Исус корис Ас дiнас дас кык велöдчысьсö да пондiс висьтавны, мый Сiйöс виччысьö: 33 «Öнi ми мунам Ерусалимö. Сэнi Морт Пиöс сетасны аркирейяслы да Индöдö велöдысьяслы. Найö шуасны вины Сiйöс, сетасны ентöдтöмъяс киö. 34 Найö сераласны Сiйöс, сьöлаласны да чорыда нöйтасны, сэсся виасны. Но коймöд луннас Сiйö ловзяс». 35 Исус дiнö матыстчисны Зеведейлöн Яков да Иоан пияныс. Найö шуисны: «Велöдысь, миян эм корöм Тэ дiнö». 36 Исус юалiс: «Мый тi кöсъянныд?» 37 Найö вочавидзисны: «Пуксьöд миянöс Аскöдыд Юраланiнад, öтинымöс веськыдладорад, мöднымöс шуйгаладорад». 38 Исус шуис налы: «Онö тöдöй, мый коранныд. Верманныд-ö юны Менсьым чашасö да Менам пыртчöмöн пыртчыны?» 39 Найö вочавидзисны: «Вермам». Исус шуис: «Менсьым чашасö понданныд юны да Менам пыртчöмöн понданныд пыртчыны. 40 Но мед пуксьöдны веськыдладорам да шуйгаладорам – тайö абу Ме сайын. Сэтчö пуксясны найö, кодлы лöсьöдöма». 41 Яковлöн да Иоанлöн сёрниыс дöзмöдiс мукöд дас велöдчысьсö. 42 Исус корис велöдчысьяссö да шуис: «Тi тöданныд, мый юралысьяс ыджыдалöны йöз вылын, да веськöдлысьяс кипод улас кутöны йöзöс. 43 Но тi тадзи энö вöчöй. Кöсъян кö ыджыдö пуксьыны – кесъяв, 44 кöсъян кö юралысьö пуксьыны – ло кесйöг туйын. 45 Öд Морт Пи эз лок, медым Сылы кесъялiсны. Сiйö локтiс кесъявны да сетны Ассьыс олöмсö унаöс ньöбöм могысь». 46 Исус велöдчысьясыскöд воис Ерикон карö. Карысь петiганыс накöд вöлi уна йöз. Туй дорас пукалiс синтöм корысь Вартимей, Тимейлöн пиыс. 47 Сiйö кылiс, Назаретса Исус пö локтö, да пондiс горöдны: «Исус, Давид Пи! Ло бур сьöлöма ме дiнö!» 48 Унаöн öлöдiсны сiйöс горзöмсьыс, но сiйö ёнджыка на пондiс горзыны: «Давид Пи, ло бур сьöлöма!» 49 Исус сувтiс да шуис: «Корöй сiйöс». Синтöмöс корисны, шуисны сылы: «Эн пов, чеччы. Исус корö тэнö». 50 Сiйö шыбитiс ассьыс вылыс паськöмсö, чеччис да локтiс Исус дiнö. 51 Исус юалiс: «Мый тэ кöсъян?» Синтöм вочавидзис: «Велöдысьöй, кöсъя аддзыны». 52 Исус шуис: «Мун, эскöмыд мездiс тэнö». Синтöм дзик пыр кутiс аддзыны да мунiс Исус бöрся.
1 Ерусалимлань матыстчигöн Исус велöдчысьясыскöд воис Олив керöсын сулалысь Виффагия да Вифания сиктъяс дорö. Ассьыс кык велöдчысьсö мöдöдiгöн 2 Исус шуис: «Мунöй тайö сиктас. Сэтчö пыриганыд аддзанныд домалöм том осёлöс, сы вылö некод на эз пуксьыв. Разьöй сiйöс да вайöдöй татчö. 3 Юаласны кö, мыйла тайöс вöчанныд, вочавидзöй, мый сiйö колö Господьлы, и дзик пыр мöдöдасны осёлсö татчö». 4 Мöдöдöмаяс мунiсны, аддзисны дзиръя дорö домалöм том осёлöс да разисны сiйöс. 5 Кодсюрö сэнi сулалысьяс пиысь юалiсны: «Мый вöчанныд? Мыйла разянныд осёлсö?» 6 Велöдчысьяс вочавидзисны, кыдзи Исус тшöктiс. Сэки лэдзисны босьтны осёлöс. 7 Том осёлöс вайöдiсны Исус дiнö. Шлапкисны осёл вылö паськöмнысö, сэсся Исус пуксис сы вылö. 8 Унаöн вольсавлiсны ассьыныс паськöмнысö туй вылас, мукöдыс чегъялiсны туй бокысь пу вожъяс да тшöтш пукталiсны туй вылас. 9 Водзас да бöрас мунысьяс горзiсны: – Осанна! Бурсиöма Господь нимöн Локтысьöс! 10 Бурсиöма Господь нимöн миян Давид батьлысь локтан юралöмсö! Ошкöм Медвылыссалы! 11 Ерусалимö воöм мысти Исус пырис крамö. Ставсö видзöдалöм бöрын сёр рытнас мунiс дас кыкнан велöдчысьыскöд Вифанияö. 12 Мöд луннас Вифанияысь мунiгас Исуслöн кынöмыс пондiс сюмавны. 13 Ылысянь Сiйö аддзис коръя инжир пу да мунiс видзöдлыны, оз-ö сюр сэтысь тусьтор. Матыстчис пу дiнас да аддзис сöмын коръяссö, öд эз на во тусь гöрддзасян кадыс. 14 Исус шуис пуыслы: «Öнiсянь оз пондыны сёйны тэнсьыд вотöстö». Велöдчысьясыс кывлiсны тайöс. 15 Сэсся найö локтiсны Ерусалимö. Крамö пырöм бöрын Исус пондiс вöтлавны сэтысь вузасьысь-ньöбасьысьясöс. Пöрлöдлiс сьöм вежысьяслысь пызанъяссö да гулюöн вузасьысьяслысь пуклöсъяссö, 16 эз лэдз крам пырыс нуны нинöмтор. 17 Сiйö велöдiс найöс шуалöмöн: «Абу-ö гижöма, мый "Менам керкаöй быд кыла войтырлы кевмысян керка лоö"? А тi сыысь вöчинныд лёк вöчысьяслы дзебсянiн». 18 Аркирейяс Индöдö велöдысьяскöд кывлiсны тайöс да кутiсны мöвпавны, кыдзи эськö вины Исусöс. Найö полiсны Сыысь, öд став йöзыс шензисны Сылöн велöдöмысь. 19 Рытнас Исус петiс карсьыс. 20 Асывводзнас инжир пу дiнтi мунiгöн аддзисны: сiйö вужйöдзыс косьмöма. 21 Петырлы тöд вылас уси Исуслöн шуöмыс. Сiйö шуис Исуслы: «Велöдысьöй, видзöдлы! Инжир пуыд, кодöс Тэ ёрин, косьмöма». 22 Исус шуис налы: 23 «Эскöй Енлы. Веськыда висьтала тiянлы: шуас кö кодкö тайö керöсыслы: "Кыпöдчы да шыбитчы саридзас", лоö тадзи. Сöмын мед став сьöлöмнас майшасьтöг эскас, мый шуöмыс инас. 24 Та вöсна висьтала тiянлы: мый коранныд кевмысигад, эскöй, мый сiйö лоö тiянлы, и лоö тадзи. 25 Кевмысьны сувтiганыд прöститöй тiян водзын мыжмöмаöс, медым енэжвыв Батьныд прöститас тiянлысь мыжъястö. 26 Онö кö прöститöй, сэки енэжвыв Батьныд тiянлысь мыжъястö оз прöстит». 27 Найö бара локтiсны Ерусалимö. Кор Исус ветлöдлiс крамöд, Сы дiнö матыстчисны аркирейяс, Индöдö велöдысьяс да пöрысьяс. 28 Найö юалiсны: «Кутшöм вынöн Тэ ставсö тайöс вöчан? Кодi Тэнö пуктiс тайöс вöчнысö?» 29 Исус воча шуис: «Ме тшöтш тiянлысь öтитор юала. Вочавидзанныд кö, висьтала, кутшöм вынöн ставсö тайöс вöча. 30 Иоанлöн пыртöмыс вöлi Енсянь али мортсянь? Вочавидзöй Меным». 31 Найö ас костаныс сёрнитiсны: «Шуам кö: "Енсянь", Сiйö шуас: "Мыйла сылы энö эскöй?" 32 Шуам-ö: "Мортсянь"?» Но найö полiсны йöзсьыс, öд Иоанöс ставныс збыльысь пуктiсны пророкö. 33 Найö вочавидзисны: «Огö тöдöй». Сэки Исус шуис: «Сiдзкö, Ме тшöтш ог висьтав, кутшöм вынöн ставсö тайöс вöча».
1 Исус кутiс висьтавны налы велöданвисьтъясöн: «Морт пуктас аслас йöрö виноград, гöгöрыс потшас, вотöс ныранiн кодъяс да джуджыд лэбув лэптас. Сэсся йöрсö виноград быдтысьяслы кöртымö сетас, ачыс мунас. 2 Вотöс чукöртан кадö овмöс кутысь мöдöдас кесйöгсö босьтны вотöсысь ассьыс пайсö. 3 Виноград быдтысьяс кутасны кесйöгсö, нöйтасны да вöтласны сiйöс куш киöн. 4 Овмöс кутысь мöд кесйöгöс мöдöдас. Сiйöс вачкаласны изйöн юрас, лёкысь сераласны сы вылын да вöтласны. 5 Мöдöдас коймöдöс, а сiйöс виасны. Уна мукöдöс на мöдöдас, но öтиясöс нöйтасны, мöдъясöс виасны. 6 Овмöс кутысьлöн нöшта вöлi öти, аслас муса пиыс. Медбöрти виноград быдтысьяс дiнö мöдöдас писö, мöвпыштас: "Менам пиысь, гашкö, яндысясны". 7 Виноград быдтысьяс шуасны öта-мöдныслы: "Тайö мортыслы вуджас овмöсыс. Мунам да виам сiйöс, медым овмöсыс миянлы коляс". 8 Найö кутасны сiйöс да виасны, шойсö виноград йöр сайö шыбитасны. 9 Мый вöчас овмöс кутысь? Сiйö локтас, виноград быдтысьясöс виас, а йöрсö мукöдлы сетас. 10 Энö öмöй Гижöдсьыс лыддьылöй тайöс: – Изйыс, кодöс шыбитiсны керка лэптысьяс, лоис пельöс изйöн. 11 Тайö Господьсянь да шензяна миян синъяслы». 12 Найö гöгöрвоисны, мый велöданвисьтыс вöлi на йылысь. Кöсйисны кутны Исусöс, но полiсны йöзсьыс. Сэки эновтiсны Сiйöс да мунiсны. 13 Сэсся найö мöдöдiсны Исус дiнö Ирöдлысь йöзсö да фарисейяс пиысь кодсюрööс, медым кыйны Исусöс сёрниас. 14 Найö локтiсны да шуисны Сылы: «Велöдысь, ми тöдам, мый Тэ веськыда сёрнитан да он пов йöзлöн шуасьöмысь. Тэ он видзöд морт вылö, а веськыда велöдан Енлöн туйö. Висьтав, колö-ö кесарлы вот мынтыны?» 15 Исус тöдiс, мый найö кык бана шаньгаяс, да шуис налы: «Мыйла тi зiлянныд кыйны Менö? Петкöдлöй Меным динартö». 16 Найö вайисны. Исус юалiс: «Кодлöн танi чужöмыс-нимыс?» Найö вочавидзисны: «Кесарлöн». 17 Исус шуис налы: «Кесарлысь сетöй кесарлы, а Енлысь – Енлы». Исус шемöсмöдiс найöс. 18 Исус дiнö локтiсны саддукейяс, кодъяс шуöны, ловзьöмыс пö абу. Найö юалiсны Исуслысь: 19 «Велöдысь, Мöисей гижöма, мый "ныв-питöм морт кö кулас, вокыслы колö босьтны сылысь гöтырсö да нюжöдны аслас вокыслысь рöдсö". 20 Сизим вок вöлi. Ыджыдыс гöтрасис, сэсся кулiс, ныв-пиыс эз коль. 21 Гöтырсö мöд вокыс босьтiс, сiйö тшöтш ныв-питöг кулiс. Сэсся коймöдыс босьтiс. 22 Тадзи сизимнанныс гöтрасисны да кулiсны ныв-питöг. Медбöрын аньыс кулiс. 23 Ловзьöм бöрас кодлы сiйö гöтырöн лоас, öд сизим верöс сылöн вöлi?» 24 Исус вочавидзис: «Тi ылалöмныд Гижöдъяссö да Енлысь вынсö тöдтöмныдла. 25 Ловзьöмаяс оз гöтрасьны да верöс сайö оз мунны. Найö енэжвыв анделъяс кодьöсь. 26 Ловзьöм йылысь шуа – тi öмöй энö лыддьылöй Мöисей небöгысь сотчысь лежнöг дорын вöвлöмтор йылысь? Ен шуис Мöисейлы: "Ме Öвраамлöн Ен, Исааклöн Ен да Яковлöн Ен". 27 Енмыс абу кулöмаяслöн Ен, Сiйö ловъяяслöн Ен. Тi ёна ылалöмныд». 28 Индöдö велöдысьясысь öти казялiс вензьöмсö да кылiс Исуслысь бура вочавидзöмсö. Сiйö матыстчис Исус дiнö да юалiс: «Став тшöктöм пиысь кутшöм медыджыдыс?» 29 Исус вочавидзис: «Медыджыд тшöктöмыс: Кывзы, Израиль! Господь, миян Ен, Сiйö öти Господь. 30 Радейт ассьыд Господь Ентö став сьöлöмнад, став олöмнад, став мывкыднад да став выннад. Тайö медыджыд тшöктöм. 31 Сы кодь мöд тшöктöмыс: радейт матыссатö асьтö моз. Тайö тшöктöмъясысь ыджыдджыкыс абу». 32 Индöдö велöдысь шуис Исуслы: «Тадз, Велöдысьöй! Тэ веськыда висьталiн, эм öти Ен, мöдыс абу. 33 Енмöс колö радейтны став сьöлöмнад, став мывкыднад, став олöмнад, став выннад да матыссатö радейтны асьтö моз. Тайö сотöм пемöсъясысь да став мукöд вись дорысь коланаджык». 34 Исус аддзис, мый сiйö сюся сёрнитö, да шуис: «Тэ абу ылын Енлöн Юралöмысь». Та бöрын некод нин эз лысьт юасьны Исуслысь. 35 Крамын велöдiгöн Исус шуис: «Мыйла нö Индöдö велöдысьяс шуöны, Кристос пö Давид пи? 36 Вежа Ловсянь сёрнитiгас Давид ачыс шуö: – Господь шуис менам Господьлы: "Пукав Менам веськыдладорын, кытчöдз ог пукты Тэнад кок улö Тэныд паныд мунысьясöс". 37 Давид шуö Сiйöс Господьöн. Кыдзи нö Сiйö сылы пиöн лоö?» Унаöн окотапырысь кывзiсны Исусöс. 38 Велöдiгас Сiйö висьтавлiс: «Видзчысьöй Индöдö велöдысьясысь. Найö радейтöны кузь паськöмöн ветлыны, йöзаинын чолöмалöмъяс кывзыны, 39 синагогаын водзын пукавны да гажöдчанiнын бурджыклаö пуксьыны. 40 Найö куштöны дöваяслысь керкасö да асьнысö петкöдлöм могысь дыр кевмысьöны. Но найöс лоö чорыда мыждöма». 41 Исус пуксис сьöм чукöртан кудлы паныд да видзöдiс, кыдзи йöзыс пуктiсны сэтчö сьöм. Озыръяс уна пуктiсны. 42 Локтiс гöль дöва да пуктiс кык ыргöн сьöм, тайö лоö öти ур мында. 43 Исус корис велöдчысьяссö да шуис налы: «Веськыда висьтала тiянлы: тайö гöль дöваыс быдöнысь унджык пуктiс. 44 Ставныс унасьыс чуктöдiсны, а тайö дöваыс этшасьыс сетiс ставсö, мый сылöн вöлi кынöмпöт вылас».
1 Кор Исус вöлi петö крамсьыс, öти велöдчысь шуис: «Велöдысьöй, видзöдлы, кутшöм изъясысь тэчöма керкаяссö!» 2 Исус шуис: «Аддзан тайö ыджыд керкаяссö? Татчö из вылö из оз коль, ставсö жугöдасны». 3 Кор Исус вöлi пукалö Олив керöсын, крамлы паныд, Петыр, Яков, Иоан да Öндрей ас кежаныс юалiсны Сылысь: 4 «Висьтав, кор ставыс тайö лоас? Мый серти ми тöдмалам сiйö кадсö?» 5 Исус шуис: «Видзчысьöй, мед эз ылöдны тiянöс. 6 Унаöн Менам нимöн локтасны да шуасны, ме пö Сiйö, да унаöс ылöдасны. 7 Кор кыланныд тыш мунöмъяс да тыш йылысь юöръяс, энö полöй. Тайö ставыслы колö лонысö, сöмын тайö абу на пом. 8 Войтыр войтырлы паныд сувтас, муяс öта-мöдныслы паныд кыпöдчасны. Уналаын лоас му вöрöм, тшыгъялöм да шызьöм. Но тайö ставыс чужтöм водзвывса дойяс на. 9 Видзöдöй ас бöрсяныд. Тiянöс кыскасны ёрдö да нöйтасны синагогаясын. Ме вöсна нуöдасны тiянöс юралысьяс да öксыяс водзö, медым найö тöдiсны Ме йылысь. 10 Помыс вотöдз Евангелльöсö колö висьтавны быд кыла войтырлы. 11 Кор нуöдасны тiянöс ёрдö, водзвыв энö майшасьöй, мый шуны. Висьталöй сiйö, мый лоö сетöма тiянлы сiйö кадас, öд Вежа Лов пондас сёрнитны, онö тi. 12 Вокыс воксö сетас вины, батьыс – писö. Ныв-пи сувтасны бать-мамыслы паныд да виасны найöс. 13 Менам ним вöсна унаöн мустöмтасны тiянöс, но сьöкыдсö помöдз нуысь мездмас». 14 «Кор тi аддзанныд пеж зывöксö сэтысь, кöнi сылы оз позь лоны, – та йылысь Даниил пророк на висьтавлiс; лыддьысьысь мед гöгöрвоö – сэки Юдея муын олысьяс мед пышъясны керöсъясö. 15 Кодi лоас керка вылас, мед оз пыр керкаас босьтны мыйкö. 16 Кодi лоас видз-му вылас, мед оз кос гортас паськöмысла. 17 Сiйö лунъясö ёна сьöкыд лоö нöбасьысьяслы да нёньöдчысьяслы. 18 Кевмысьöй, мед эз ковмы пышйынытö тöлын. 19 Сiйö лунъясö ыджыд шог суас йöзсö, татшöмыс Енмöн муюгыдсö вöчöмсянь эз на вöвлы да оз нин ло. 20 Господь кö тайö кадсö эз дженьдöд, ловъя морт эськö эз коль. Но Аслас бöрйöмаяс вöсна Сiйö дженьдöдiс тайö кадсö. 21 Сэки шуасны кö тiянлы: "Кристос танi", либö шуасны: "Кристос сэнi", энö эскöй. 22 Öд ылöгкристосъяс да ылöгпророкъяс локтасны да пондасны вöчны шензьöданаторъяс, медым ылöдны, позяс кö, весиг бöрйöмаясöс. 23 Видзчысьöй наысь. Ме тiянлы ставсö водзвыв висьталi». 24 «Сiйö лунъясö, тайö шог бöрас, шондiыс пемдас, тöлысьыс кусас, 25 енэжысь кодзувъяс усясны, енэжвыв вынъяс вöрзясны. 26 Сэки аддзасны кымöръяс вылын ыджыд вынöн да дзирдлунöн локтысь Морт Пиöс. 27 Сiйö мöдöдас анделъяссö нёльнан му вежтасас да чукöртас Ассьыс бöрйöмаяссö став му пельöссьыс. 28 Инжир пу вылö кö видзöдам, аддзам: вожъясыс кö ловзьöны да коръясыс потöны, сiдзкö, гожöмыс матын. 29 Тадзи, ставсö тайöс аддзигöн тöдöй: сiйö кадыс матын, öдзöс дорад нин. 30 Веськыда висьтала тiянлы: ставыс тайö лоас öнiя олысьяс дырйи на. 31 Енэжыс да муыс бырас, а Менам кывъясöй оз бырны. 32 Сiйö лунсö да сiйö кадсö некод оз тöд. Анделъяс оз тöдны, весиг Пиыс оз тöд, сöмын Батьыс тöдö. 33 Видзчысьöй, мед энö унмовсьöй, да пыр кевмысьöй, öд онö тöдöй, кор сiйö кадыс воас. 34 Тайöс позьö öткодявны морткöд, кодi гортсьыс мунiгöн кольö ассьыс керкасö кесйöгъяслы да быдöнлы сетö удж, а керкасö видзысьлы тшöктö лоны дасьöн. 35 Сiдзкö, лоöй дасьöсь, öд онö тöдöй, рытын-ö, вой шöрын-ö, петук чуксасигöн-ö, асывводзын-ö локтас керка кутысь. 36 Мед эз су тiянöс узьöмöн тöдлытöг локтöмнас! 37 Мый висьтала тiянлы, висьтала быдöнлы: лоöй дасьöсь».
1 Ыджыд лунöдз, Шомтöм нянь сёян лунъясöдз кык лун на вöлi. Аркирейяс да Индöдö велöдысьяс корсисны, кыдзи эськö ылöдлöмöн босьтны Исусöс да вины. 2 Но шуисны, Ыджыд лунö пö оз ков, öд йöзыс вермасны шызьыны. 3 Исус вöлi Вифания сиктын, Сiйö сёйис проказаысь бурдöм Симон ордын. Сэтчö локтiс ань, сiйö вайис вальдi дозйын зэв дона нард вый. Ань жугöдiс дозсö да кисьталiс выйсö Исуслы юр вылас. 4 Кодсюрö дöзмöмпырысь шуасисны ас костаныс: «Мыйла, бара, лотö-а? 5 Тайö выйсö позис вузавны куимсё динарысь донаджыка да сьöмсö сетны гöльяслы». Тадзи найö шуасисны аньыс вылö. 6 Исус шуис: «Öвсьöй сыысь! Мыйла тi сiйöс шöйöвоштанныд? Сiйö буртор вöчис Меным. 7 Гöльяс пыр лоасны тiянкöд, и тi верманныд вöчны налы бурсö, кор кöсъянныд, а Ме тiянкöд ог пыр ло. 8 Тайö аньыс вöчис, мый вермис: дасьтiс Менö дзебигкежлö. 9 Веськыда висьтала тiянлы: муюгыд пасьтала, кöнi висьталасны тайö Евангелльöсö, сэнi казьтыштасны тайö аньсö да висьталасны, мый сiйö вöчис». 10 Искариот Иуда вöлi дас кык велöдчысьысь öти. Сiйö мунiс аркирейяс дiнö вузавны налы Исусöс. 11 Тайöс кылöм бöрын найö нимкодьпырысь кöсйысисны сетны сылы сьöм. Иуда пондiс корсьны лöсялан кад, медым вузавны Исусöс. 12 Шомтöм нянь сёян лунъяс дырйи медводдза лунö, кодыр начкисны Ыджыд лунся ыжöс, велöдчысьяс юалiсны Исуслысь: «Кöнi кöсъян сёйны Ыджыд лунся ыжöс? Ми мунам да дасьтам». 13 Кык велöдчысьöс мöдöдiг Исус шуис налы: «Мунöй карас. Тiянлы паныдасяс гырничын ва нуысь морт, мунöй сы бöрся. 14 Кытчö сiйö пырас, висьталöй сэнi керка кутысьыслы: "Велöдысь юасьö, кутшöм вежöсын Аслас велöдчысьяскöд вермас сёйны Ыджыд лунся ыжöс". 15 Сiйö петкöдлас тiянлы вылыс судтасьыс ыджыд вежöс, кодöс дасьтöма да вольсавлöма. Сэнi и лöсьöдöй». 16 Велöдчысьяс мунiсны, воисны карас да аддзисны: ставыс лои Исуслöн висьталöм серти. Найö дасьтiсны Ыджыд лунся сёян. 17 Рытнас Исус локтiс дас кыкнан велöдчысьыскöд. 18 Сёйиганыс шуис налы: «Веськыда висьтала тiянлы: тiян пиысь öти, Мекöд тшöтш сёйысь, вузалас Менö». 19 Шогö усьöмöн быдöн кутiс юасьны Сылысь: «Ог-ö ме?» 20 Исус вочавидзис: «Тiян пöвстысь, дас кыксьыс öти, сiйö Мекöд öти тасьтiысь сёйö. 21 Морт Пи мунö, кыдзи гижöма Сы йылысь. Но курыд шог Сiйöс вузалысьлы! Бурджык сылы вöлi, эз кö чужлы». 22 Сёйиганыс Исус босьтiс нянь, Енмöс аттьöалöмöн чегис няньсö да велöдчысьяслы сетiгас шуис: «Босьтöй, сёйöй, тайö Менам Яй». 23 Сэсся босьтiс чаша, аттьöалiс Енмöс да сетiс велöдчысьясыслы. Ставныс юисны сэтысь. 24 Исус шуис налы: «Тайö Менам Вир – Выль Йитöдлöн Вир – киссьö уна вöсна. 25 Веськыда висьтала тiянлы: Енлöн Юраланiнын выльöс ютöдз ог понды юны виноград юансö». 26 Енлы сьылöм бöрын найö кайисны Олив керöсö. 27 Исус шуис велöдчысьясыслы: «Тавой тi ставныд эновтанныд Менö. Гижöма: "Видзысьсö кувмöн дойда, да ыжъясыс разаласны". 28 Ловзьöм бöрам Ме виччыся тiянöс Галилеяын». 29 Петыр шуис: «Ставныс кö эновтасны Тэнö, ме ог». 30 Исус вочавидзис: «Веськыда висьтала тэныд: тавой петуклöн кыкысь чукöсттöдз на тэ куимысь соссян Меысь». 31 Петыр ёнджыка на шуалiс: «Весиг кö кувны ковмас Тэкöд, ог соссьы». Тадзи шуалiсны тшöтш мукöд велöдчысьыс. 32 Исус велöдчысьясыскöд локтiс Гефсиманö. Сiйö шуис налы: «Пукалыштöй танi Менам кевмысигкостi». 33 Аскöдыс босьтiс Петырöс, Яковöс да Иоанöс. Исусöс полöм да шогалöм босьтiс. 34 Сiйö шуис: «Шогöй кувмöн топöдö лолöс. Кольччöй татчö да энö узьöй». 35 Ачыс водзлань муныштiс да муö уськöдчöмöн пондiс кевмысьны, медым, позис кö, тайö кадыс ордйис Сiйöс. 36 Сiйö шуалiс: «Авва, Батьöй! Тэныд ставыс вермана. Вешты Ме дiнысь тайö чашасö. Сöмын мед лоас Тэнад кöсйöм серти, а оз Менам». 37 Исус бöр локтiс да аддзис: велöдчысьясыс унмовсьöмаöсь. Петырлы шуис: «Симон, узян-ö? Öти час весиг эн вермы узьтöг олыштны. 38 Энö узьöй, кевмысьöй, мед ыштöдöмыс эз вермы тiянöс. Лолыд öд пыр дась, а вир-яйыд жеб». 39 Исус мöдысь мунiс да воддза мозыс кевмысис. 40 Локтöм бöрас бара аддзис: велöдчысьяссö унмыс топыда личкöма. Найö эз тöдны, мый вочавидзны Сылы. 41 Коймöдысь локтiгас Исус шуис налы: «Пыр на узянныд да шойччанныд? Тырмас. Кадыс воис. Морт Пиöс мыжаяс киö сетöны. 42 Чеччöй, мунамöй. Менö вузалысь матын нин». 43 Исуслöн сёрнитiгкостi локтiс Иуда, дас кык велöдчысьысь öти. Сыкöд тшöтш локтiсны зоръясöн да шыпуртъясöн уна йöз. Найöс мöдöдöмаöсь аркирейяс, Индöдö велöдысьяс да пöрысьяс. 44 Исусöс вузалысь шуöма локтöмаяслы, кодöс пö окышта, Сiйöс босьтöй да нуöдöй, син увсьыныд энö лэдзöй. 45 Иуда веськыда мунiс Исус дiнö да шуис: «Велöдысьöй», сэсся окыштiс Сiйöс. 46 Сэки кытшалiсны да босьтiсны Исусöс. 47 Сэнi сулалысьясысь öти перйис шыпуртсö да керыштiс аркирей кесйöглысь пельсö. 48 Исус шуис: «Лёк вöчысьöс моз зорйöн-шыпуртöн локтiнныд босьтны Менö. 49 Ме быд лун тiян крамын велöдi, да тi энö босьтöй Менö. Тадзи инöны Гижöдъяс». 50 Сэки велöдчысьяс ставныс эновтiсны Исусöс да пышйисны. 51 Öти зон вöтчис Исус бöрся, но сiйöс кутiсны. Зонка нетшыштчис да пасьтöгыс пышйис. Куш яй вылас плавгöм дöраыс колис шыпуртаяслöн киö. 53 Исусöс вайöдiсны аркирей ордö. Сэтчö чукöртчисны пöрысьяс, Индöдö велöдысьяс да став аркирейыс. 54 Петыр бöрö кольччöмöн вöтчис Исус бöрся аркирей керка дорöдз. Пырис йöрас да пуксис кесйöгъяскöд орччöн би дорö шонтысьны. 55 Аркирейяс да став веськöдлан котырыс корсисны Исуслы паныд висьталысьясöс, медым сэсся мыждыны да вины Сiйöс. Но колана висьталысьыс эз сюр. 56 Унаöн пöръясьöмöн висьталiсны Исус йылысь, но налöн висьталöмыс торъялiс öта-мöдсьыс. 57 Кодсюрö висьталiсны: 58 «Ми кывлiм: Сiйö шулiс, жугöда пö киöн вöчöм тайö крамсö, сэсся пö куим лунöн лэпта мöдöс, киöн вöчтöмöс». 59 Но весиг налöн висьталöмыс торъялiс öта-мöдсьыс. 60 Сэки аркирей сувтiс шöрас да юалiс Исуслысь: «Мый воча шуан?» 61 Исус чöв олiс, нинöм эз вочавидз. Аркирей юалiс Сылысь: «Тэ-ö Кристос, Ошканаыслöн Пиыс?» 62 Исус вочавидзис: «Ме. И тi аддзанныд Морт Пиöс, Ставсöвермысьлöн веськыдладорас пукалысьöс да кымöръяс вылын локтысьöс». 63 Ассьыс паськöмсö косялiг аркирей шуис: «Висьталысьяс миянлы оз нин ковны, 64 тi асьныд кывлiнныд, Сiйö Енмöс омöльтö. Мый шуанныд?» Ставныс мыжалiсны Исусöс да öти вомöн шуисны вины Сiйöс. 65 Кодсюрö пондiсны сьöлавны Сылы, Сылысь чужöмсö вевттьöмöн нöйтiсны да шуалiсны: «Висьтав, Пророк, кодi кучкис?» Видзысьяс тшöтш кучкалiсны Сылы чужöмас. 66 Петыр вöлi керка йöрас. Аркирейлöн кесйöгъяс пиысь öти ань локтiс сэтчö. 67 Сiйö аддзис би дорын шонтысьысь Петырöс да сы вылö видзöдлöмöн шуис: «Тэ тшöтш Назаретса Исускöд вöлiн». 68 Петыр соссис: «Ог тöд Сiйöс. Ог гöгöрво, мый висьталан», сэсся петiс водз йöрас. Кылiс петуклöн чукöстöм. 69 Аньыс бара казялiс Петырöс да пондiс висьтавлыны сэнi сулалысьяслы, тайö мортыс пö на пиысь. 70 Петыр бара соссис. Бöрынджык сэнi сулалысьяс шуисны Петырлы: «Тэ дзик на пиысь. Тэ Галилеяысь, сёрниыд на кодь». 71 Петыр енмасьöмöн пондiс соссьыны: «Ог тöд тайö Мортсö, код йылысь висьталанныд». 72 Кылiс петуклöн мöдысь чукöстöм. Сэки Петырлы уси тöд вылас Исуслöн шуöмыс: «Петуклöн кыкысь чукöсттöдз на тэ куимысь соссян Меысь». Петыр ырзöмöн бöрддзис.
1 Асывводзнас аркирейяс, пöрысьяс, Индöдö велöдысьяс да став веськöдлан котырыс чукöртчисны öтлаö. Сёрнитчöм бöрын Исусöс кöрталöмöн нуöдiсны Пилат дiнö да сетiсны сылы. 2 Пилат юалiс Исуслысь: «Тэ-ö юдейяслöн Öксыыс?» Исус вочавидзис: «Тэ шуан». 3 Аркирейяс унаторйысь мыжалiсны Исусöс. 4 Пилат бара юалiс Сылысь: «Он тай нö нинöм шу? Кылан, кутшöма Тэнö мыжалöны». 5 Исус весиг воча кыв эз шу. Пилатöс тайö шензьöдiс. 6 Быд во Ыджыд лунö йöз корöм серти Пилат лэдзлiс дзескыдiнысь öти мортöс. 7 Сэки дзескыдiнын пукалiсны зык лэптысьяс. На лыдын тшöтш вöлi Варавва. Зык дырйиыс найö мортöс виöмаöсь. 8 Чукöртчöм йöз пондiсны горзöмöн корны Пилатöс вöчны налы сiйö, мый пыр вöчлывлiс. 9 Пилат юалiс: «Кöсъянныд-ö, медым ме лэдзи тiянлы юдейяслысь Öксысö?» 10 Пилат тöдiс, мый аркирейяс вайöдiсны Исусöс вежалöмныс понда. 11 Аркирейяс ыззьöдiсны йöзсö, мед Исус пыдди корасны лэдзны Варавваöс. 12 Пилат юалiс: «Мый шуанныд вöчны Сыкöд, кодöс юдейяслöн Öксыöн нимтанныд?» 13 Найö горöдiсны: «Тувъяв Сiйöс!» 14 «Мый лёксö Сiйö вöчис?» – юалiс Пилат. Йöзыс гораджыка на горöдiсны: «Тувъяв Сiйöс!» 15 Йöзлы шогмöм могысь Пилат лэдзис Варавваöс, а Исусöс нöйтöм бöрын сетiс тувъявны. 16 Шыпуртаяс нуöдiсны Исусöс римса юралысьлöн керка йöрö, сэтчö чукöртiсны и мукöд шыпуртаясöс. 17 Найö пасьтöдiсны Исусöс пемыдгöрд кышанö, юрас пуктiсны лежнöгысь кыöм юркытш, 18 сэсся пондiсны нимöдны Сiйöс: «Мед олас юдейяслöн Öксы!» 19 Кучкалiсны юрас беддьöн, сьöлалiсны Сiйöс да пидзöсчанясьöмöн копрасисны Сы водзын. 20 Сералöм-лёкöдöм бöраныс найö босьтiсны Исус вылысь пемыдгöрд кышансö да бöр пасьтöдiсны Сiйöс Аслас паськöмö, сэсся нуöдiсны тувъявны. 21 Исуслысь крестсö тшöктiсны нуны видз-му вылысь локтысь киринеяса Симонлы, Öльöксанлöн да Руфослöн батьлы. 22 Исусöс вайöдiсны Голгопа керöсö, нимыслöн вежöртасыс лоö "Юр лы". 23 Сэнi Сылы сетiсны смирна сора вина, но Сiйö эз ю. 24 Исусöс тувъялöм бöрын шыпуртаяс пудъясьöмöн юкисны Сылысь паськöмсö. 25 Исусöс тувъялiсны öкмыс час асылö. 26 Юр весьтас öшöдiсны мыжалан пасйöд: «Юдейяслöн Öксы». 27 Сыкöд орччöн тувъялiсны кык лёк вöчысьöс: öтисö веськыдладорас, мöдсö шуйгаладорас. 28 Тадзи инiс Гижöдыс: «Сiйöс пуктiсны Индöдтöг олысьяс лыдö». 29 Сэтi мунысьяс лёкысь видзöдöмöн омöльтiсны Исусöс: «Крам жугöдысь да куим лунöн сiйöс лэптысь, 30 мезды Асьтö, лэччы крест вывсьыд». 31 Сiйöс лёкöдiсны тшöтш аркирейяс да Индöдö велöдысьяс: «Мукöдöс мездiс, а Асьсö мездыны оз вермы! 32 Кристос, Израиль Öксы, мед лэччас крест вывсьыс. Аддзылам кö тайöс, сэки эскам». Исусöс лёкöдiсны тшöтш орччöн тувъялöмаяс. 33 Лун шöр кадö пемдiс став му пасьталаыс, пемыдыс сулалiс куим часöдз. 34 Куим час гöгöрын Исус ыджыд шыöн горöдiс: «Эли, Эли, ламма сабактани? Енмöй, Енмöй, мыйла Тэ колин Менö?» 35 Сэнi сулалысьясысь кодсюрö шуисны, Илляöс пö корö. 36 Öти морт котöртiс, кöтöдiс шома винаöн губка, сэсся бедь помö сатшкöмöн мыччис сiйöс Исуслы да шуис: «Энлöй! Видзöдлам, локтас оз Илля лэдзны Сiйöс». 37 Исус горöдiс ыджыд шыöн, сэсся лолыс петiс. 38 Сэки крамын öшалысь дöраыс вывсяньыс улöдзыс кык пельö косяссис. 39 Шыпуртаяслöн веськöдлысь сулалiс Исуслы воча. Кор сiйö аддзис, кыдзи Исуслöн горöдöм бöрын лолыс петiс, шуис: «Тайö Мортыс збыльысь Ен Пи вöлöма». 40 Сэнi вöлiны аньяс, кодъяс ылiсянь видзöдiсны. На пöвстын вöлiны Магдала Марья, томджык Яковлöн да Иосейлöн Марья мамныс да Саломия. 41 Галилеяын найö ветлывлiсны Исускöд да кесъявлiсны Сылы. Нöшта сэнi вöлi уна мукöд ань, кодъяс локтiсны Исускöд Ерусалимö. 42 Вöлi рыт, шойччан лунлы паныд. 43 Аримафея карысь воис Öсип, веськöдлан котырысь пыдди пуктана морт. Сiйö виччысис Ен Юралöмлысь воöмсö. Сiйö повтöг мунiс Пилат дiнö да корис Исуслысь шойсö. 44 Пилат чуймис, мый Исус кулöма нин. Сiйö корис шыпуртаяслысь веськöдлысьöс да тöдмалiс, важöн-ö кулiс. 45 Кор Пилат тöдмалiс Исуслöн кулöм йылысь, лэдзис Öсиплы босьтны шойсö. 46 Öсип ньöбис шабдi дöра, босьтiс крест вылысь шойсö, гартыштiс дöраö да пуктiс кыртаö кералöм дзебанiнö. Пыранiнас путкыльтiс из. 47 Магдала Марья да Иосейлöн Марья мамыс видзöдiсны, кытчö дзебасны Исусöс.
1 Шойччан лун бöрын Магдала Марья, Яковлöн Марья мамыс да Саломия ньöбисны чöскыд дука выйяс, медым мавтны Исусöс. 2 Шойччан лун бöрын водз асывнас, шондi петiгöн, найö мунiсны дзебанiнö, 3 ас костаныс сёрнитiсны: «Кодi путкыльтас изсö пыранiнсьыс?» 4 Воиганыс найö аддзисны: изсö вöлi вештöма. Изйыс вöлi зэв ыджыд. 5 Дзебанiнö пыриганыс найö аддзисны веськыдладорсьыс еджыд паськöма пукалысь зонмöс да ёна повзисны. 6 Сiйö шуис налы: «Энö полöй. Ме тöда, тi корсянныд тувъявлöм Назаретса Исусöс. Сiйö ловзис. Сiйö танi абу. Видзöдлöй куйланiнсö, татчö Сiйöс пуктылiсны. 7 Мунöй, юöртöй велöдчысьясыслы, тшöтш Петырлы: Исус виччысьö найöс Галилеяын. Сэтысь аддзасны Сiйöс, тадзи Сiйö Ачыс висьтавлiс налы». 8 Аньяс петiсны да шöйöвошöмöн котöртiсны дзебанiнысь. Найöс тiралöм босьтiс. Найö нинöм эз висьтавлыны, полiсны да. 9 Шойччан лун бöрын водз асывнас ловзьöм Исус медводз петкöдчис Магдала Марьялы, код пытшкысь Сiйö вöтлiс коркö сизим пеж лолöс. 10 Марья мунiс да юöртiс лоöм йывсьыс Исускöд ветлысьяслы, кодъяс öнi шогсисны да бöрдiсны. 11 Кор кылiсны, мый Исус ловъя да Марья аддзылöма Сiйöс, найö эз эскыны. 12 Та бöрти Исус петкöдчылiс мöд мыгöрöн на пиысь кыклы, кодъяс вöлi мунöны орчча сиктö. 13 Найö бöр косiсны да юöртiсны мукöдыслы, но весиг налы эз эскыны. 14 Медбöрын Исус петкöдчис дас öти велöдчысьыслы, кор найö вöлi сёйöны. Сiйö янöдiс найöс эскытöмсьыс да сьöлöмнысö чорзьöдöмысь, öд найö эз эскыны налы, кодъяс аддзылiсны Сiйöс ловзьöм бöрас. 15 Сэсся шуис налы: «Мунöй став муюгыд пасьтала да висьталöй Евангелльöсö ставныслы. 16 Кодi эскас да пыртчас, сiйö мездмас. Кодi оз эскы, сiйöс лоö мыждöма. 17 Эскысьяслöн лоасны татшöм индысьпасъяс: Менам нимöн пондасны вöтлавны пеж ловъясöс да сёрнитны выль кывъяс вылын. 18 Босьтасны кö кианыс змейöс да юасны кö мыйкö кулантор, таысь налы лёкыс оз ло. Найö пуктасны кинысö висьысьяс вылö, да найö бурдасны». 19 Тайöс висьталöм бöрын Господь кыпöдчис енэжö да пуксис Ен веськыдладорö. 20 А велöдчысьясыс мунiсны да быдлаын висьтавлiсны Бур Юöр. Господь отсалiс налы да вынсьöдiс Юöрсö индысьпасъясöн. Аминь.
1 Дона Феофил! Унаöн нин босьтчылiсны гижны миянын вöвлöмторъяс йылысь. Тайö лоöмторъяс йылысь миянлы юöртiсны найö, кодъяс ставсö тайöс аддзылiсны да лоисны сэсся Ен Кывлы кесъялысьясöн. Водзысяньыс ставсö лючки-бура туялöм бöрын тшöтш ме шуи гижны тэныд став йывсьыс сьöрсьöн-бöрсьöн. 4 Тэныд вöлi висьталöма тайö вöвлöмторъяс йывсьыс, но ме кöсъя подулалöмöн петкöдлыны тэныд Бур Юöрлысь збыльсö. 5 Ирöд öксыалан лунъясö Юдея муын олiс Закар нима поп, сiйö вöлi Авей поп котырысь. Закарлöн Елизавета гöтырыс вöлi Аарон чужанвужйысь. 6 Найö кыкнанныс олiсны Ен водзын веськыда, ставсö вöчисны Господьлöн тшöктöм серти. 7 Челядьыс налöн эз вöв, öд Елизавета эз вермы вайны кагасö, и кыкнанныс вöлiны ыджыд арлыдаöсь нин. 8 Воис кад Закар котырлы кесъявны Ен водзын. 9 Попъяслöн лöсьöдöм серти пудъясисны, и Закар пырис Господьлöн крамö тшынöдны. 10 Закарлöн тшынöдiгкостi став йöзыс кевмысисны ортсыас. 11 Сэки петкöдчис Закарлы Господьлöн андел. Сiйö сулалiс тшынöдчан пызан веськыдладорын. 12 Анделöс аддзöмысь Закар шöйöвошис, сiйöс полöм босьтiс. 13 Андел шуис: «Эн пов, Закар. Енмыс кылöма тэнсьыд кевмöмтö. Елизавета гöтырыд чужтас тэныд пи. Пукты сылы Иоан ним. 14 Долыд гажöн тырас тэнад сьöлöмыд, да уна йöзлы нимкодьлун ваяс сылöн чужöмыс. 15 Господь водзын сiйö лоас ыджыд мортöн, вина-сур оз кут юны, мам кынöмас на сiйö тырас Вежа Лолöн. 16 Израиль войтырысь сiйö унаöс бергöдас налöн Господь Енлань. 17 Сiйö мунас Господь водзын Илля лов-вынöн, бергöдас батьяслысь сьöлöмсö ныв-пиланьыс, кывзысьтöмъясöс – веськыда олысьлöн мывкыдлунö, медым дасьтыны войтырсö Господьлы». 18 Закар юалiс анделлысь: «Кыдзи ме тöдмала тайöс? Ачым пöрысь, дай гöтырöй абу нин том». 19 Андел вочавидзис: «Ме, Гавриил, сулала Ен водзын. Менö мöдöдöма сёрнитны тэкöд, висьтавны тайö Бур Юöрсö тэныд. 20 Но меным эскытöмыдла тэ воштан кыв-вортö, он вермы сёрнитнытö менам кывъяслöн ас кадö интöдз». 21 Сэккостi йöзыс виччысисны Закарöс да шензисны крамын сылöн дыр олöмысь. 22 Сэтысь петöм бöрын Закар эз вермы сёрнитнысö. Йöзыс гöгöрвоисны, мый сiйö аддзылöма Енсянь петкöдчылöм. Закар сёрнитiс йöзыскöд пасъясöн. 23 Кесъялан лунъяс бöрын Закар локтiс гортас. 24 Елизавета гöтырыс регыд пондiс нöбасьны. Вит тöлысь чöж сiйö эз петкöдчыв йöз син водзö, олiс татшöм мöвпъясöн: 25 «Господь вöчис тайöс. Сiйö видзöдлiс мелань да вештiс менсьым йöз водзын яналöмöс». 26 Квайтöд тöлысьнас Ен мöдöдiс Гавриил анделöс Галилеяса Назарет карö 27 Мария нима ныв дiнö. Мария вöлi кикутöма Давид чужанвужйысь Öсип нима морткöд. 28 Мария дiнö пырöм бöрын андел шуис: «Нимкодясь, бурсиöм аньöй! Господь тэкöд!» 29 Мария чуймис анделöс аддзöмысь да сылöн кывъясысь. Сiйö мöвпалiс, мый водзын нö сылы татшöм чолöмалöмыс. 30 Андел шуис сылы: «Эн пов, Мария, тэныд вичмис Енсянь буралöмыс. 31 Тэ сьöктан, чужтан пи да пуктан Сылы Исус ним. 32 Ыджыд морт Сыысь петас, Сiйöс шуасны Медвылыссалöн Пиöн. Господь Ен сетас Сылы Давид батьыслысь юралан пуклöссö. 33 Сiйö кутас ыджыдавны Яков котырын нэмъяс чöж, да Сылöн Юралöмлы оз ло помыс». 34 Мария юалiс анделлысь: «Вермас öмöй тадзисö лоны, ме öд ныв на?» 35 Андел вочавидзис: «Вежа Лов лэччас тэ вылö, Медвылыссалöн выныс вевттяс тэнö. Та вöсна тайö чужысьыс вежа, Сiйöс шуасны Ен Пиöн. 36 Тэнад рöдвужыд, ныв-питöм Елизавета, пöрысьö-нэмö квайтöд тöлысь нин пиöн нöбасьö. 37 Енлы нинöм вермытöмыс абу». 38 Сэки Мария шуис: «Ме Господьлöн кесйöг, мед лоас тэнад висьталöм серти». Сэсся андел мунiс. 39 Кымынкö лун мысти Мария тэрмасьöмöн мöдöдчис керöсвыв муö, Иуда карö. 40 Закар керкаö пыригöн сiйö чолöмалiс Елизаветаöс. 41 Мариялöн чолöмалöмысь Елизаветалöн кынöмас кагаыс чеччыштiс. Елизавета тырис Вежа Лолöн 42 и гораа шыасис: «Бурсиöма тэнö аньяс пиысь, бурсиöма сьöлöмув кагатö! 43 Кодi нö ме, мый Господьöйлöн мамыс локтö ме ордö? 44 Мыйöн сöмын кылi чолöмасьöмтö, кагаöй долыда чеччыштiс кынöмын. 45 Тэ шуда, эскин да, öд Господьлöн тэныд шуöмыс инас». 46 Мария шуис: – Ошкö сьöлöмöй Господьöс, 47 нимкодясьö лолöй Ен вöсна, Мездысьöй вöсна, 48 öд Сiйö видзöдлiс Аслас коньöр кесйöглань. Öнiсянь став чужысьыс шуас менö шудаöн, 49 öд татшöм ыджыдтор вöчис меным Вына Енмыс. Вежа Сылöн нимыс! 50 Нэмсянь нэмöдз Сiйö буралö Сыысь полысьяс дiнö. 51 Сылöн киыс вöчис ыджыдсьыс-ыджыд уджъяс: разöдiс вылö кыпöдчысь сьöлöмаясöс, 52 юралан пуклöсъясысь юралысьясöс чöвтiс, улö пуктöмаясöс кыпöдiс, 53 тшыгъялысьясöс пöттöдзныс вердiс, озыръясöс куш киöн мöдöдiс. 54 Сибöдiс Израильöс, Ассьыс кесъялысьсö, да казьтыштiс миян батьяслы, Öвраамлы да сысянь чужысьяслы нэмъяс кежлö кöсйысьöм буралöмсö. 56 Мария олiс Елизавета ордын тöлысь куим, сэсся бöр мунiс гортас. 57 Елизаветалы воис кад чужтыны, да сiйö чужтiс пи. 58 Матiгöгöр олысьяс да рöдвужыс тöдмалiсны Господьлысь буралöмсö Елизавета дiнö да тшöтш нимкодясисны сыкöд. 59 Кöкъямысöд луннас локтiсны вундыштны кагасö да кöсйисны сетны сылы Закар батьыслысь нимсö. 60 Мамыс шуис: «Энöй. Пуктам сылы Иоан ним». 61 Сылы шуисны: «Тэнад рöдвужын татшöм нимаыс некод абу». 62 Сэсся пасъяс отсöгöн юалiсны батьыслысь, кутшöм ним сiйö кöсйö сетны кагаыслы. 63 Закар корис пöвтор да сэтчö гижис: «Иоан лоö нимыс». Ставныс чуймисны. 64 Сэки воссис Закарлöн кыв-ворыс, да сiйö кутiс ошкыны Енмöс. 65 На гöгöр олысьясöс полöм босьтiс. Став тайö лоöмтор йывсьыс сёрниыс паськалiс керöсвыв Юдея му пасьтала. 66 Тайöс кывлысьяс чуймöмöн юасисны: «Кодöн лоö тайö кагаыс?» Господьлöн киыс збыльысь вöлi сы вылын. 67 Кагалöн Закар батьыс тырис Вежа Лолöн да пондiс пророкавны: 68 – Ошка Господьöс, Израильлысь Енмöс! Сiйö бергöдчис Аслас войтырлань, дасьтiс сылы мездмöм. 69 Давид кесъялысьлöн чужанвужйысь Сiйö сетiс миянлы Вына Мездысьöс. 70 Тадзи важысянь Сiйö кöсйысьлiс Аслас вежа пророкъяс пыр. 71 Сiйö кöсйысис мездыны миянöс паныд мунысьясысь, дорйыны мустöмтысьяслöн киысь, 72 лоны бур сьöлöмаöн миян батьяс дiнö да кутны тöд вылас Ассьыс вежа йитöдсö, 73 Öвраам батьнымлы Ассьыс сетöм кывсö. 74 Паныд мунысьяс киысь мездмöм бöрын ми вермам повтöг 75 кесъявны Сылы вежалунöн да веськыда став олöм чöжным. 76 Тэнö, кагаöй, пуктасны Медвылыссалöн пророкö. Тэ мунан Господь водзын дасьтыны туйяс Сылы, 77 юöртны Сылöн войтырлы мездмöм йылысь да налысь мыжъяссö прöститöм йылысь. 78 Миян бур сьöлöма Ен ыстас миянлы енэжсянь асъя кыа, 79 сетас югыдсö пемыдын да кулан вуджöр улын олысьяслы, Сiйö веськöдас кокнымöс лöньлуна туй вылö. 80 Кага быдмис да ловнас вынсялiс. Израильлы аслас петкöдчан лунöдз сiйö олiс овтöминъясын.
1 Сiйö лунъясö Римын ыджыдалысь Август кесар тшöктiс гижавны ас мусьыс став йöзсö. 2 Тайö медводдза гижалöмыс вöлi Сирияын Квириний ыджыдалан кадö. 3 Быдöн мунiс гижасьны аслас чужан карö. 4 Öсип вöлi Давид чужанвужйысь. Та вöсна аслас Мария гöтырпукöд, кодi вöлi нöбасьö, сiйö мунiс гижасьнысö Галилеяса Назарет карысь Юдея муö, Виплием нима Давид карö. 6 Виплиемö воöм мысти Мариялы воис кад чужтыны. 7 Сiйö чужтiс Пи, ассьыс медводдза кагасö. Рузумö гартыштöмöн Мария пуктiс кагасö лясниö, öд туйморт керкаын налы узянiныс эз сюр. 8 Сэнi матiгöгöрас вöлiны ыж видзысьяс. Войнас найö видзисны ыжъяснысö видз вылын. 9 Виччысьтöг на водзö сувтiс Господьлöн андел. Господьлöн дзирдлуныс югзьöдiс ыж видзысьясöс, да найö ёна повзисны. 10 Андел шуис налы: «Энö полöй! Ме висьтала тiянлы нимкодьсьыс-нимкодь юöр, тайö ваяс ыджыд долыдлун став войтырлы. 11 Талун Давид карын тiянлы чужис Мездысь – Господь Кристос. 12 Лясниысь тi аддзанныд рузумö гартыштöм кагаöс – тайö лоö тiянлы пасöн». 13 Виччысьтöг анделкöд орччöн тыдовтчис лыдтöм-тшöттöм андел чукöр. Найö ошкисны Енмöс: 14 – Ошкöм Медвылысса Енлы! Му вылын лöнь олöм, йöз костын бур кöсйöм! 15 Анделъяслöн енэжö кайöм бöрын ыж видзысьяс шуисны öта-мöдныслы: «Мунамöй Виплиемö, видзöдлам Господьсянь миянлы юöртöм лоöмторсö». 16 Найö тэрмасьöмöн мунiсны сэтчö да аддзисны сэтысь Марияöс, Öсипöс да лясниын куйлысь кагаöс. 17 Сэсся висьталiсны кага йылысь кывлöмторсö. 18 Кывзысьясöс шензьöдiс ыж видзысьяслöн висьталöмыс. 19 Мария видзис тайö висьталöмсö сьöлöмас да мöвпалiс та йылысь. 20 Ыж видзысьяс бöр мунiсны Енмöс ошкöмöн да аттьöалöмöн ставсьыс, мый кывлiсны да аддзылiсны. Ставыс лои анделлöн висьталöм серти. 21 Кöкъямыс лун мысти воис кад вундыштны кагаöс. Сылы сетiсны Исус ним, öд Мариялöн нöбасьтöдз на тадзи нимтiс Сiйöс андел. 22 Мöисей Индöд серти сöстöммöдчан лунö Исусöс вайисны Ерусалимö Господь водзö. 23 Öд Господьлöн Индöд серти медводдза чужысьöс, пи кагаöс, колö вöлi сины Господьлы. 24 Господьлöн Индöд серти нöшта колö вöлi вайны вись: кык гулюöс, абу кö, кык гулюпиöс. 25 Сэки Ерусалимын вöлi Симеон нима вежавидзысь морт. Сiйö олiс веськыда да виччысис Израильöс мездöм. Вежа Лов вöлi сы вылын. 26 Вежа Лов водзвыв висьтавлiс сылы, Господьлысь Кристосöс аддзывтöдз пö он кув. 27 Вежа Лов нуöдöмöн Симеон локтiс крамö. Кор Исуслöн бать-мамыс пыртiсны сэтчö кагасö, медым ставсö вöчны Индöд серти, 28 Симеон босьтiс Сiйöс киас да Енмöс ошкигтырйи шуис: 29 – Ыджыдöй, Аслад шуöмыд серти öнi лэдзан Ассьыд кесйöгтö лöня мунны. 30 Аслам синмöн аддзылi став йöзлы Тэнсьыд дасьтöм мездöмтö: 32 ентöдтöмъяслы вайöм югыдтö, Тэнад Израиль войтырлы восьтöм дзирдлунтö. 33 Кага йылысь висьталöмыс шензьöдiс Сылысь мамсö да Öсипöс. 34 Симеон бурсиис найöс да шуис Мариялы, Исус мамлы: «Тайö кагаыс понда Израильын унаöн усясны да унаöн сувтасны. Сiйö – Енсянь индысьпас. Унаöн кутасны мунны Сылы паныд, 35 и тадзи воссясны налöн гуся мöвпъясыс. Тэнсьыд сьöлöмтö шогыс шыпуртöн моз бытшкас». 36 Сэнi вöлi Анна нима пророк, Фануил ныв, Асир чужанкотырысь. Тайö пöрысь аньыс ныв кадсяньыс сизим во олöма верöсыскöд, 37 сэсся кöкъямысдас нёль арöсöдз олöма дöваöн. Сiйö эз петавлы крамысь, видзалöмöн-кевмысьöмöн кесъялiс Енлы лун и вой. 38 Буретш тайö кадö Анна матыстчис, пондiс ошкыны Енмöс да висьтавлыны кага йылысь ставныслы, Ерусалимын мездмöмсö виччысьысьяслы. 39 Господьлöн Индöд серти ставсö вöчöм бöрын Öсип да Мария бöр мунiсны Галилеяö, асланыс Назарет карö. 40 Кага быдмис, ловнас вынсялiс, Сылöн мывкыдлуныс содiс. Енлöн бурсиöмыс вöлi Сы вылын. 41 Быд во Ыджыд лун кежлö Исуслöн бать-мамыс ветлiсны Ерусалимö. 42 Исуслы дас кык арöс тырöм бöрын найö мукöд воясö моз бара мунiсны сэтчö. 43 Ыджыд лун бöрын Öсип да Исуслöн мамыс бöр мöдöдчисны гортаныс. Зонка кольччис Ерусалимö. Та йылысь найö эз тöдны, 44 чайтiсны, мый Сiйö мунö мукöдыскöд. Лунтыр мунöм бöрын пондiсны корсьны Исусöс рöдвуж да тöдсаяс пöвстысь, 45 но эз аддзыны. Сэки бöр косiсны Ерусалимö корсьны Сiйöс. 46 Куим лун мысти найö аддзисны Исусöс крамысь. Сiйö пукалiс велöдысьяс пöвстын, кывзiс-юасис найöс. 47 Сылöн мывкыдлуныс да вочавидзöмъясыс шензьöдiсны кывзысьясöс. 48 Исусöс аддзöм бöрын бать-мамыс чуймисны. Мамыс шуис Сылы: «Пиöй, мыйла нö Тэ тадзи вöчин? Ми батьыдкöд сьöлöм потмöн корсим Тэнö». 49 Сiйö шуис налы: «Мыйла тi корсинныд Менö? Энö öмöй тöдöй, мый Меным колö лоны Бать керкаын?» 50 Но Сылысь кывъяссö найö эз гöгöрвоны. 51 Исус бöр локтiс бать-мамыскöд Назаретö да быдторйын кывзысис налысь. Сылöн мамыс ставсö тайöс видзис сьöлöмас. 52 Исус сöвмис, мывкыдлуныс содiс. Сiйö вöлi муса Енмыслы, и йöзыс бурö пуктiсны Сiйöс.
1 Тайö вöлi Тиверий нима кесарлöн дас витöд веськöдлан воö. Сэки Юдея муöн веськöдлiс Понтий Пилат. Ирöд веськöдлiс Галилея муöн, сылöн Филип вокыс веськöдлiс Итурея-Траконит муясöн, Лисаний веськöдлiс Авилинея муöн. 2 Аннас да Каиаф вöлiны аркирейясöн. Тайö кадö Енсянь кыв воис Иоанлы, Закар пилы, кодi олiс овтöминын. 3 Йöрдан юдорса став муöд ветлöдлiгöн Иоан юöрталiс: «Бергöдчöй мыжъяссьыныд да пыртчöй, медым Ен прöститас мыжъяснытö». 4 Исай пророк небöгын тадзи гижöма: – Овтöминын кылö горзысьлöн шы: «Лöсьöдöй туйсö Господьлы, веськöдöй-шыльöдöй ордымъяс Сылы! 5 Быд увтасiн мед тырас, быд керöс да мыльк мед ляпкалас, чукыльяс мед веськаласны, гуранъяс мед шыляласны! 6 Сэки ставöн аддзасны Енлысь мездöмсö». 7 Иоан шуалiс сы дiнö пыртчыны воöмаяслы: «Вижля йылöм! Кодi туйдöдiс тiянöс пышйыны локтана скöрлунысь? 8 Олöмнад петкöдлöй мыжъяссьыныд бергöдчöмнытö. Энö лысьтöй мöвпавны, мый тiян батьныд Öвраам. Висьтала тiянлы: тайö изъясысь Ен вермö вöчны Öвраамлы ныв-писö. 9 Черыс пу вужйыс дорын нин куйлö. Пуыс кö оз вай бур вотöс, сiйöс кералöны да шыбитöны биö». 10 Йöзыс юасисны Иоанлысь: «Мый миянлы колö вöчнысö?» 11 Сiйö вочавидзис: «Тэнад кö кык дöрöм, öтисö сет, кодлöн абу. Тэнад кö эм сёян, тшöтш тадзи вöч». 12 Пыртчыны воисны тшöтш вот перйысьяс, найö юалiсны: «Велöдысь, мый миянлы колö вöчнысö?» 13 Сiйö вочавидзис налы: «Энö босьтöй тiянлы тшöктöмасьыс унджыксö». 14 Шыпуртаяс тшöтш юалiсны сылысь: «Мый нö миянлы колö вöчнысö?» Иоан шуис налы: «Мырдысьöн да повзьöдлöмöн энö босьтöй йöзлысь сьöм, тырмöдчöй асланыд удждонöн». 15 Йöзыс мöвпалiсны, абу-ö Иоаныс Кристос, öд найö виччысисны Кристосöс. 16 Иоан шуис налы: «Ме пырта тiянöс ваöн, но локтö меысь вынаджык, ме ог шогмы разьны Сылысь кöмкот кöвсö. Сiйö пыртас тiянöс Вежа Лолöн да биöн. 17 Сы киын тöлöдчан зырйыс. Сiйö весалас гумласö: шобдiсö йöртöдö чукöртас, кыдсö куслытöм биын сотас». 18 Уна ногöн велöдöмöн Иоан висьтавлiс Бур Юöрсö йöзыслы. 19 Иоан янöдiс Ирöд öксыöс вокыслöн Ирöдиада гöтырыс вылö гöтрасьöмысь да мукöд лёкторйысь. 20 Таысь Ирöд пуксьöдiс Иоанöс дзескыдiнö, тадзи содтiс аслас лёк вöчöмъяслысь лыдсö. 21 Уна йöз пыртчис, и тшöтш Исус пыртчис. Пыртчöм бöрас Исуслöн кевмысигöн енэжыс воссис. 22 Вежа Лов гулю кодьöн лэччис Сы вылö. Енэжсянь кылiс гöлöс шы: «Тэ Менам муса Пиöй, Ме нимкодяся Тэöн». 23 Комын арöссянь Исус пондiс кесъявны. Йöзыс лыддисны Сiйöс Öсиплöн пиöн. Öсип вöлi Илийлöн пи, 24 Илий – Матфатлöн, Матфат – Левийлöн, Левий – Мелкийлöн, Мелкий – Яннайлöн, Яннай – Öсиплöн, 25 Öсип – Маттафейлöн, Маттафей – Амослöн, Амос – Наумлöн, Наум – Еслилöн, Если – Наггейлöн, 26 Наггей – Маафлöн, Мааф – Маттафейлöн, Маттафей – Семейлöн, Семей – Öсиплöн, Öсип – Иудалöн, 27 Иуда – Иоаннанлöн, Иоаннан – Рисайлöн, Рисай – Зоровавельлöн, Зоровавель – Салафильлöн, Салафиль – Нирийлöн, 28 Нирий – Мелкийлöн, Мелкий – Аддийлöн, Аддий – Косамлöн, Косам – Елмодамлöн, Елмодам – Ирлöн, 29 Ир – Иосейлöн, Иосей – Елиезерлöн, Елиезер – Иоримлöн, Иорим – Матфатлöн, Матфат – Левийлöн, 30 Левий – Симеонлöн, Симеон – Иудалöн, Иуда – Öсиплöн, Öсип – Ионанлöн, Ионан – Елиакимлöн, 31 Елиаким – Мелеайлöн, Мелеай – Маинанлöн, Маинан – Маттафайлöн, Маттафай – Нафанлöн, Нафан – Давидлöн, 32 Давид – Ессейлöн, Ессей – Овидлöн, Овид – Воозлöн, Вооз – Салмонлöн, Салмон – Наассонлöн, 33 Наассон – Аминадавлöн, Аминадав – Арамлöн, Арам – Есромлöн, Есром – Фареслöн, Фарес – Иудалöн, 34 Иуда – Яковлöн, Яков – Исааклöн, Исаак – Öвраамлöн, Öвраам – Фарлöн, Фар – Накорлöн, 35 Накор – Серуклöн, Серук – Рагавлöн, Рагав – Фалеклöн, Фалек – Еверлöн, Евер – Саллöн, 36 Сал – Каинанлöн, Каинан – Арфаксадлöн, Арфаксад – Симлöн, Сим – Нойлöн, Ной – Ламеклöн, 37 Ламек – Мафусаллöн, Мафусал – Еноклöн, Енок – Яредлöн, Яред – Малелеиллöн, Малелеил – Каинанлöн, 38 Каинан Енослöн, Енос – Сифлöн, Сиф – Адамлöн, Адам – Енлöн.
1 Исус мунiс Йöрдан ю дорысь Вежа Лолöн тыр. Лов нуöдiс Сiйöс овтöминö. 2 Сэнi нелямын лун чöж омöль ыштöдiс Сiйöс. Став тайö кадсö Исус нинöм эз сёй, бöрыннас кынöмыс сюммис. 3 Сэки омöль шуис Сылы: «Тэ кö Ен Пи, пöрт тайö изсö няньö». 4 Исус воча шуис: «Гижöма: "Оз куш няньöн мортыд ов, а Енсянь быд шуöм кывйöн"». 5 Омöль вайöдiс Исусöс джуджыд керöс йылö да петкöдлiс Сылы син лапнитiгкостi таладор югыдсьыс став мусö. 6 Сэсся шуис: «Сета Тэныд став мусö мичлун-озырлуннас, öд ставсö тайöс сетöма меным. Ме верма сетны сiйöс кодлы кöсъя. 7 Копыртчылан кö меным, ставыс тайö лоö Тэнад». 8 Исус вочавидзис: «Вешйы Ме дiнысь, сöтана! Гижöма: "Аслад Господь Енлы копрась да сöмын Сылы кесъяв"». 9 Омöль нуöдiс Исусöс Ерусалимö, сувтöдiс Сiйöс крам вевт вылö да шуис: «Тэ кö Ен Пи, шыбитчы тасянь. 10 Öд гижöма: "Аслас анделъяслы Сiйö тшöктö видзны Тэнö. 11 Найö нуасны Тэнö ки выланыс, видзасны изйö крукасьöмысь"». 12 Исус воча шуис: «Шуöма: "Эн дöзмöд ассьыд Господь Ентö!"». 13 Быдногыс ыштöдöм бöрын омöльыс кад кежлö эновтiс Исусöс. 14 Исус бöр локтiс Галилеяö, Сiйö вöлi тырöма Лов вынöн. Сы йылысь сёрниыс паськалiс сэтчöс му пасьтала. 15 Исус велöдiс синагогаясын, став йöзыс ошкисны Сiйöс. 16 Исус локтiс Назаретö, кöнi Сiйö быдмис. Шойччан лунö, кыдзи пыр вöчлiс, Сiйö мунiс синагогаö. Сэнi сувтiс лыддьыны Гижöд. 17 Сылы сетiсны Исай пророклысь небöг. Исус восьтiс небöгсö, корсис тайö кывъяссö да лыддис: 18 – Господьлöн Лолыс Ме вылын. Сiйö мавтiс Менö висьтавны коньöръяслы Бур Юöр. Сiйö мöдöдiс Менö бурдöдны доймöм сьöлöмаясöс, юöртны дзескöдöмаяслы мездлун йылысь, восьтны синтöмъяслысь синъяссö, мездыны нартитöмаясöс, 19 юöртны Господьлöн буралан кад йылысь. 20 Исус тупкис небöгсö да сетiс синагогаса кесъялысьлы, Ачыс пуксис. Синагогаын ставöн сюся видзöдiсны Сы вылö. 21 Сэки Исус пондiс висьтавны налы: «Öнi, тiян кывзiгöн, инiс тайö гижöдыс». 22 Ставöн ошкисны Исусöс да шензисны Сы вомысь петöм буралан кывъясысь да шуалiсны: «Абу-ö Сiйö Öсиплöн пи?» 23 Исус шуис налы: «Тi, дерт, Меным шуанныд тайö кывйöзсö: "Бурдöдысь, бурдöд Асьтö", да шуанныд: "Ми кывлiм Капернаум карын лоöмтор йылысь. Вöч сiйöс тшöтш танi, Аслад карын"». 24 Исус водзö шуис: «Веськыда висьтала тiянлы: пророкöс ас муас оз сибöдны. 25 Збыльысь висьтала тiянлы: уна дöва вöлi Израильын Илля пророк дырйи. Сэки куим во да джын зэр тусь эз усьлы енэжсьыс, та вöсна унаöн тшыгъялiсны му пасьталаыс. 26 На пиысь весиг öти дiнö эз вöв мöдöдöма Илляöс, сöмын Сидонса Сарепта карын олысь дöва дiнö. 27 Елисей пророк дырйи Израильын унаöн висисны проказаöн, но сирияса Нееманысь кындзи некод эз бурд». 28 Тайöс кылöм бöрын синагогаын ставныс пузисны. 29 Найö сувтiсны да вöтлiсны Исусöс карсьыс, нуöдiсны Сiйöс кыр йылö, кöнi сулалiс карыс, да сэсянь кöсйисны йöткыштны Сiйöс увлань. 30 Но Исус мунiс на шöрöд да ылыстчис. 31 Сэсся Исус локтiс Галилеяса Капернаум карö. Шойччан лунö Сiйö велöдiс сэнi. 32 Йöзыс шензисны Сылöн велöдöмысь, öд Сiйö сёрнитiс ыджыдалысьö пуктöм морт моз. 33 Синагогаын вöлi пеж лолöн кутöм морт. Сiйö ыджыд шыöн горöдiс: 34 «Мый Тэныд колö миянсянь, Назаретса Исус? Тэ локтiн бырöдны миянöс? Тöда, кодi Тэ. Тэ – Енлöн Вежаыс!» 35 Исус öлöдiс пеж лолöс: «Ланьт! Пет сы пытшкысь». Пеж лов шыбитiс мортсö синагога джодж шöрö, сэсся сiйöс дойдавтöг петiс сы пытшкысь. 36 Ставныс чуймисны да öта-мöдныслы шуалiсны: «Мый тайö? Сылöн сэтшöм вын! Весиг пеж ловъяс петöны Сылöн тшöктöмысь». 37 Исус йылысь сёрниыс паськалiс сэтчöс му пасьтала. 38 Синагогаысь петöм бöрын Исус локтiс Симон ордö. Симон гöтырлöн мамыс ёна висис биа висьöмöн. Исусöс корисны отсавны сылы. 39 Ань дiнö матыстчöмöн Исус öлöдiс биа висьöмсö, и биа висьöмыс эновтiс аньöс. Сiйö дзик пыр чеччис да пондiс кесъявны налы. 40 Шондi лэччигöн вайöдiсны Исус дiнö быдсикас висьысьöс. Сiйö бурдöдалiс найöс кисö быдöн вылö пуктылöмöн. 41 Уна пытшкысь пеж ловъяс петiсны да горзiсны: «Тэ Кристос, Ен Пи!» Исус öлöдiс найöс тайöс висьтавлöмысь, öд найö тöдiсны, мый Сiйö – Кристос. 42 Асывводзнас Исус мунiс сэтысь овтöминö. Йöзыс корсисны Сiйöс да аддзöм бöраныс эз лэдзны Сiйöс мунны на дiнысь. 43 Исус шуис налы: «Мукöд каръясын Меным тшöтш колö висьтавлыны Ен Юралöм йылысь Бур Юöрсö, öд та могысь Менö мöдöдöма». 44 Сiйö ветлöдлiс Галилея муöд да висьтавлiс Бур Юöр синагогаясын.
1 Öтчыд Исус сулалiс Генесарет ты дорын. Сiйöс кытшалiсны йöз, мед кывзыны Енлысь Кывсö. 2 Вадорысь Исус аддзис кык пыж. Чери кыйысьяс чеччисны пыжъясысь да мыськалiсны тывъяснысö. 3 Исус пуксис Симон пыжö да корис сiйöс йöткыштчыны вадорсьыс. Пыжын пукалöмöн Исус велöдiс йöзсö. 4 Велöднысö помалöм бöрын Исус шуис Симонлы: «Сын джуджыдiнас. Сэтчö чöвтöй тывъяснытö». 5 Симон воча шуис: «Велöдысьöй, ми войбыд мырсим, весиг öти чери эз шед, но Тэнад тшöктöм серти чöвта». 6 Тывсö чöвтлöм бöрын тыв косясьмöн чериыс шедi. 7 Сэки кинас öвтыштiсны мöд пыжын пукалысьяслы, корисны ёртъяссö отсавны. Найö локтiсны, сэсся кыкнан пыжсö вöян выйöдзыс тыртiсны чериöн. 8 Тайöс аддзöм бöрын Симон-Петыр уськöдчис Исус водзö да шуис: «Господьöй, мун ме дiнысь! Ме мыжа морт». 9 Симонöс да сыкöд вöлысьясöс, тшöтш сылысь ёртъяссö, Зеведейлысь Яков да Иоан пиянöс, шемöсмöдiс та мында чери шедöмыс. Исус шуис Симонлы: «Эн пов. Öнiсянь пондан кыйны йöзöс». 11 Пыжъяснысö вадорö кыскöм бöрын найö колисны ставсö да мунiсны Исус бöрся. 12 Öти карын локтiс Исус дiнö проказаöн висьысь, сылöн кучикыс дзоньнас улялiс. Сiйö кымыньöн уськöдчис Исус водзö да корис: «Господьöй, кöсъян кö, верман менö сöстöммöдны». 13 Исус нюжöдiс кисö, инмöдчылiс сы дiнö да шуис: «Кöсъя. Сöстöммы». Висьысьлöн дойясыс дзик пыр бырисны. 14 Исус öлöдiс сiйöс мукöдлы та йылысь висьталöмысь да тшöктiс: «Мун, петкöдлы асьтö поплы, сэсся Мöисей тшöктöм серти аслад сöстöммöмысь вай вись. Тадзи тöдмаласны тэнад бурдöм йылысь». 15 Исус йылысь сёрниыс паськалiс пыр ёнджыка. Зэв уна йöз волiс кывзыны Сiйöс да бурдöдчыны. 16 Ачыс Исус тшöкыда мунлывлiс овтöминö да сэнi кевмысьлiс. 17 Öтчыд Исус вöлi велöдö. Сэнi пукалiсны фарисейяс да Индöдö велöдысьяс. Найö вöлi локтöмаöсь Галилея да Юдея сиктъясысь, тшöтш Ерусалим карысь. Исус бурдöдалiс висьысьясöс Господь вынöн. 18 Кодъяскö сэтчö вольпасьнас вайисны вöрзьöдчыны вермытöм мортöс. Найö кöсйисны пыртны сiйöс керкаö да пуктыны Исус водзö. 19 Но уна йöз вöсна пыртнысö эз вермыны. Сэки кайисны керка вылö, разисны вевтсö да сэтi лэдзисны висьысьöс вольпасьнас Исус водзö. 20 Налысь эскöмсö аддзöмöн Исус шуис висьысьлы: «Мортöй, тэнсьыд мыжъястö прöститöма». 21 Индöдö велöдысьяс да фарисейяс мöвпалiсны: «Кодi тайö? Сiйö Енмöс омöльтö. Ен кындзи вермас-ö кодкö прöститны мыжъяс?» 22 Налысь мöвпъяссö тöдöмöн Исус шуис: «Мыйла тi мöвпаланныд тадзи? 23 Мый кокньыдджык шуны: "Тэнсьыд мыжъястö прöститöма" либö "Чеччы да ветлы"? 24 Öнi тi тöдмаланныд: Морт Пи вермö прöститны мыжъяс му вылын». Сэсся шуис висьысьлы: «Тэныд шуа: чеччы, босьт вольпасьтö да мун гортад». 25 Ставныслöн син водзын сiйö чеччис, босьтiс вольпасьсö да мунiс гортас Енмöс ошкигтырйи. 26 Йöзыс чуймисны да полöмöн тырины. Найö ошкисны Енмöс да шуалiсны, талун пö ми вöвлытöмтор аддзылiм. 27 Сэтысь мунiгас Исус аддзис вотчукöртанiнысь Левий нима вот перйысьöс. Исус шуис сылы: «Лок Ме бöрся». 28 Левий чеччис, ставсö колис да мунiс Исус бöрся. 29 Сэсся Левий корис Исусöс ас ордас гажöдчыны. Сэтчö локтiсны тшöтш вот перйысьяс да мукöд корöмаяс. Найö ставныс пукалiсны öти пызан сайын. 30 Фарисейяс да Индöдö велöдысьяс шуасисны Исуслöн велöдчысьяс вылö: «Мыйла тi сёянныд-юанныд вот перйысьяскöд да мыжа йöзкöд?» 31 Исус вочавидзис налы: «Дзоньвидзалы бурдöдысьыд оз ков, сiйö висьысьлы колö. 32 Ме локтi корны Ен дiнö мыжаясöс, эг веськыда олысьясöс». 33 Найö шуисны Исуслы: «Мыйла нö Иоанлöн велöдчысьясыс тшöкыда видзалöны-кевмысьöны, фарисейяслöн велöдчысьясыс тшöтш, а Тэнад сёйöны-юöны?» 34 Исус вочавидзис: «Верманныд-ö тшöктыны видзавны кöлысь вылын верöспукöд гажöдчысь ёртъясöс? 35 Воасны на сійö лунъясыс, кор колясны верöспутöг, сэки и видзаласны». 36 Исус висьталiс налы велöданвисьт: «Важ паськöмтö оз дöмны выль паськöмысь вундöм дöмасöн. Тадзи кö вöчан, выльсö тшыкöдан, и важас выль дöмасыс оз туй. 37 Выль винатö оз кисьтны важ кучик дозйö. Тадзи кö вöчан, кучик дозйыс потас, и винаыс киссяс. 38 Выль винатö кисьтöны выль кучик дозйö. Сэки кыкнанныс дзонь колясны. 39 Сулöдöм винатö юöм бöрын мортыс оз кöсйы юны выль винатö, шуас, сулöдöмыс пö бурджык».
1 Ыджыд лун бöрын медводдза шойччан лунö Исус мунö вöлi кöдзöм муяс вомöн. Сылöн велöдчысьясыс мунiгмозныс нетшкисны шепсö да кианыс ниртöмöн сёйисны тусьсö. 2 Фарисейясысь кодсюрö шуисны: «Мый тi вöчанныд? Тайöс оз позь вöчны шойччан лунö». 3 Исус воча шуис: «Тi öмöй энö лыддьылöй, мый вöчис Давид, кор тшыгъялiс аслас йöзкöд? 4 Сiйö пырис Ен керкаö, босьтiс Енлы вайöм няньсö да сёйис, и аслас йöзлы тшöтш сетiс. Тайö няньсö сöмын попъяслы позис сёйны». 5 Исус шуис фарисейяслы: «Морт Пи шойччан лун вылын ыджыдыс». 6 Мöд шойччан лунö Исус пырис синагогаö да велöдiс. Сэнi вöлi морт, кодлöн веськыд киыс вöлi косьмöма. 7 Индöдö велöдысьяс да фарисейяс сюся видзöдiсны Исус бöрся, бурдöдас-ö шойччан лунö, öд корсисны помка мыжавны Сiйöс. 8 Налысь мöвпъяссö тöдöмöн Исус шуис косьмöм киа мортлы: «Чеччы да пет шöрас». Сiйö чеччис да воськовтiс водзлань. 9 Исус шуис: «Вочавидзöй, мый позьö вöчны шойччан лунö: бурсö али лёксö, мездыны мортöс али вины сiйöс?» Найö чöв олiсны. 10 Исус синнас кытшовтiс ставнысö, сэсся шуис висьысьлы: «Нюжöд китö». Сiйö нюжöдiс, и киыс пырысь-пыр бурдiс, лои мöдыс кодь. 11 Фарисейяс да Индöдö велöдысьяс скöрысла пузисны, ас костаныс пондiсны сёрнитны, мый вöчны Исускöд. 12 Сiйö лунъясö Исус кайис керöсö кевмысьны да войбыд кевмысис сэнi Енмыслы. 13 Луннас Сiйö корис Ассьыс велöдчысьяссö да бöрйис на пöвстысь дас кыкöс, кодъясöс нимтiс апостолъясöн. Тайö вöлiны: 14 Симон, кодлы сетiс Петыр ним, сылöн Öндрей вокыс, Яков, Иоан, Филип, Варфоломей, 15 Матвей, Фома, Алфей Яков, Симон, кодöс нимтiсны Зилотöн, 16 Яков Иуда да Искариот Иуда, Исусöс вузалысь. 17 Велöдчысьясыскöд керöсысь лэччöм бöрын Исус сувтiс шыльыдiнö. Сэнi вöлi чукöртчöмаöсь Сылöн уна велöдчысь, нöшта став Юдея муысь, Ерусалим карысь, саридздорса Тир да Сидон каръясысь унасьыс-уна йöз. 18 Ставныс найö вöлi локтöмаöсь кывзыны Исусöс да бурдöдчыны асланыс висьöмъясысь. Весиг пеж лолöн кутöмаяс бурдалiсны. 19 Йöз чукöрысь быдöн зiлис инмöдчывны Исус дiнö, öд Сысянь петiс вын да тайö выныс бурдöдiс быдöнöс. 20 Аслас велöдчысьяс вылö видзöдлöмöн Исус висьталiс: «Шудаöсь тi, ловныдлы корысьяс, öд тiян эм Енлöн Юралöм. 21 Шудаöсь тi, öнi тшыгъялысьяс, öд тi пöтанныд. Шудаöсь тi, öнi бöрдысьяс, öд тi понданныд серавны. 22 Тi шудаöсь, Морт Пи вöсна кö йöзыс тiянöс мустöмтöны, вöтлöны, лёкöдöны да няйтöсьтöны тiянлысь нимнытö. 23 Налöн батьясныс тадзи вöчлiсны пророкъяслы. Нимкодясьöй да чеччалöй долыда, öд ыджыд тырдон виччысьö тiянöс енэжас. 24 Курыд шог тiянлы, озыръяс! Тi курыштiнныд нин аслыныд олан гажсö. 25 Курыд шог тiянлы, öнi пöтöмаяс! Тi кутанныд на пыкны тшыглунсö. Курыд шог тiянлы, öнi сералысьяс! Тi понданныд на шогсьыны-бöрдны. 26 Курыд шог тiянлы, став йöзыс кö сёрнитöны тiян йылысь бура. Налöн батьясныс тадзи вöчлiсны ылöгпророкъяслы». 27 «Тiянлы, Менö кывзысьяслы, шуа: радейтöй тiянлы паныд мунысьясöс, бурсö вöчöй тiянöс мустöмтысьяслы, 28 бурсиöй тiянöс ёрысьясöс да кевмысьöй тiянöс öтдортысьяс вöсна. 29 Чужöмбанад кучкысьлы бергöд тшöтш мöдарсö. Вылыс паськöмтö мырддьысьлы лэдз босьтны тшöтш дöрöмтö. 30 Тэнсьыд корысьлы сет, тэнсьыд босьтысьлысь бöр эн кор. 31 Мый кöсъянныд, медым йöзыс вöчисны тiянлы, сiйöс и тi вöчöй налы. 32 Радейтанныд кö тiянöс радейтысьясöс, мыйсяма ошкöм тiянлы таысь? Мыжаяс öд тшöтш радейтöны найöс радейтысьясöс. 33 Вöчанныд кö бурсö тiянлы бур вöчысьяслы, мыйсяма ошкöм тiянлы таысь? Тадзи вöчöны тшöтш мыжаяс. 34 Водзöсаланныд кö бöр виччысьöмöн, мыйсяма ошкöм тiянлы таысь? Мыжаяс тшöтш водзöсалöны мыжаяслы ставсö бöр босьтöм могысь. 35 Тi, мöдарö, радейтöй тiянлы паныд мунысьясöс, вöчöй бурсö да водзöсалöй, но энö виччысьöй бöрсö. Сэки вичмас тiянлы ыджыд тырдон. Тi лоанныд Медвылыссалы ныв-пиöн, öд Сiйö бур сьöлöма бурсö вунöдысьяс дiнö да лёкъяс дiнö. 36 Лоöй Батьныд моз бур сьöлöмаöсь». 37 «Энö мыждöй, сэки тiянöс оз мыждыны. Энö мыжалöй, и тiянöс оз мыжавны. Прöститöй, и тiянöс прöститасны. 38 Сетöй, сэки тiянлы сетасны. Сетасны бур муртöсöн, топыда тувкöдöмöн, моздор тырныд сöвтöмöн. Асланыд мурталöм серти тiянлы мурталасны». 39 Исус висьталiс налы нöшта велöданвисьт: «Вермас-ö синтöм нуöдны синтöмöс? Оз-ö кыкнанныс усьны гуранö? 40 Велöдчысь абу ыджыдджык аслас велöдысьысь. Но сöмын велöдчöм бöрас сiйö лоас аслас велöдысь кодьыс. 41 Кыдзи тэ верман вокыд синмысь ёгторсö аддзыны, аслад синмысь кö керсö он казяв? 42 Кыдзи тэ верман шуны вокыдлы: "Вай перъя синсьыд ёгторсö", аслад синмысь кö керсö он аддзы? Кык бана шаньга! Водзджык аслад синмысь керсö перйы, сэки вокыдлöн синмысь ёгторсö верман перйыны». 43 «Бур пу оз вай лёк вотöс, лёк пу оз вай бур вотöс. 44 Путö донъялöны вотöс сертиыс. Лежнöг вылысь öд оз чукöртны инжир да тусяпу вылысь виноград. 45 Бур морт аслас бур сьöлöмысь бурсö петкöдö, лёк морт аслас лёк сьöлöмысь лёксö петкöдö. Öд мыйöн тырöма мортыслöн сьöлöмыс, сiйö вомсьыс и петö». 46 «Мыйла тi шуанныд Меным: "Господьöй, Господьöй", но онö вöчöй Менам висьталöм серти? 47 Висьтала тiянлы, кутшöм сiйö мортыс, кодi локтö Ме дiнö, кылö Менсьым кывъясöс да олö на серти. 48 Сiйö керка лэптысь кодь, кодi джуджыда кодйысяс да пуктас керка подувсö из вылö. Ытва дырйи ойдöм ваыс оз вермы вöрзьöдны тайö керкасö, öд сiйöс из вылö лэптöма. 49 А кодi кылö Менсьым кывъясöс да оз ов на серти, сiйö подувтöм керка лэптысь кодь. Ытва дырйи сылöн керкаыс дзик пыр дзоньнас киссяс».
1 Йöзкöд сёрнисö помалöм бöрын Исус мöдöдчис Капернаум карö. 2 Сэнi олiс шыпуртаяслöн веськöдлысь, кодлöн кесйöгыс вöлi кулан выйын. Веськöдлысьлы сiйö вöлi зэв дона. 3 Исус йылысь кылöм бöрын веськöдлысь мöдöдiс юдейяслысь пöрысьясöс корны Сiйöс, медым локтас да бурдöдас кесйöгсö. 4 Найö локтiсны Исус дiнö да сьöлöмсяньыс корисны Сiйöс: «Тайö бур мортыслы колö отсавны. 5 Сiйö радейтö войтырнымöс. Буретш сiйö лэптiс миянлы синагогасö». 6 Исус мунiс накöд. Керка дорас вотöдз на Сылы паныдасисны веськöдлысьлöн ёртъясыс. Сiйö мöдöдöма найöс висьтавны: «Господьöй, эн мудзты Асьтö. Ме ог сулав сы доныс, медым Тэ пырин менам керка вевт улö. 7 Ачымöс эг лыддьы шогманаöн локны Тэ дiнö. Сöмын кыв шу, и кесйöгöй бурдас. 8 Ме ачым киподувса морт, но и менам кипод улын эмöсь шыпуртаяс. Öтилы шуа: "Мун", и сiйö мунö. Мöдлы тшöкта локны, и сiйö локтö. Кесйöглы шуа: "Вöч тайöс", и сiйö вöчö». 9 Исус чуймис тайö кывъясысь. Сэсся бöрсяньыс мунысь йöзлань бергöдчöмöн шуис: «Висьтала тiянлы: татшöм ыджыд эскöмсö Ме весиг Израильысь эг аддзыв». 10 Керкаö пырöм бöраныс веськöдлысьлöн ёртъясыс аддзисны: кесйöгыс вöлi бурдöма. 11 Регыд мысти Исус мунiс Наин карö, Сыкöд тшöтш мунiсны Сылöн велöдчысьяс да уна мукöд йöз. 12 Исус матыстчис карса дзиръя дорö. Сэтысь вöлi петкöдöны кулöм мортöс, дöвалысь öтка писö. Уна йöз анькöд тшöтш петiс карсьыс. 13 Господьлöн сьöлöмыс нормис дöва вöсна, Сiйö шуис аньлы: «Эн бöрд». 14 Сэсся матыстчис да инмöдчис гортъяс, нуысьяс сувтiсны. Исус шуис: «Зонмöй, тэныд шуа: чеччы!» 15 Кулöм морт пуксис да пондiс сёрнитны. Сэки Исус сетiс сiйöс мамыслы. 16 Ставнысö полöм босьтiс. Енмöс ошкигтыр шуалiсны: «Ыджыд пророк миян пöвстын! Ен локтiс отсавны Аслас войтырлы!» 17 Татшöм сёрниыс Исус йылысь паськалiс Юдея му пасьтала да быдлаын матiгöгöрас. 18 Иоанлöн велöдчысьясыс висьталiсны став йывсьыс велöдысьныслы. 19 Иоан корис ас дiнас на пиысь кыкöс да мöдöдiс найöс юавны Исуслысь: «Тэ-ö сiйö Локтысьыс? Колö-ö миянлы мöдöс виччысьны?» 20 Исус дiнö локтöм бöрын найö шуисны: «Пыртысь Иоан мöдöдiс миянöс Тэ дiнö юавны: "Тэ-ö сiйö Локтысьыс? Колö-ö миянлы мöдöс виччысьны?"» 21 Буретш тайö кадö Исус унаöс бурдöдiс висьöм-вермытöмысь, вöтлiс пеж ловъясöс, уна синтöмлысь синсö восьтiс. 22 Исус вочавидзис: «Мунöй, висьталöй Иоанлы, мый аддзанныд да кыланныд: – Синтöмъяс аддзöны, коктöмъяс ветлöны, проказаысь сöстöммöны, пельтöмъяс кылöны, кулöмаяс ловзьöны, коньöръяслы Бур Юöр висьтавлöны. 23 Шуда сiйö, кодi оз ылав Меысь». 24 Кор Иоанлöн велöдчысьясыс мунiсны, Исус пондiс висьтавны йöзыслы Иоан йылысь: «Мый видзöдны ветлiнныд овтöминас? Тöлöн вöрöдысь идзас-ö? 25 Мый видзöдны ветлiнныд? Мича да озыр паськöма мортöс? Татшöм паськöма да лышкыда олысь йöзыс олöны öксы оланiнъясын. 26 Кодöс видзöдны ветлiнныд? Пророкöс-ö? Шуа тiянлы: тi аддзылiнныд пророкысь ыджыдöс. 27 Сы йылысь гижöма: – Ыста Ассьым юöртысьöс Тэ водзвылын, сiйö Тэныд туйсö дасьтас. 28 Висьтала тiянлы: му вылын чужысь пророкъясысь эз вöвлы Пыртысь Иоанысь ыджыдджыкыс, но Енлöн Юраланiнын медiчöтыс сы дорысь ыджыдджык. 29 Иоанöс кывзöм бöрын став йöзыс, весиг вот перйысьяс, эскисны Ен веськыдлунö да пыртчисны Иоан пыртöмöн. 30 А фарисейяс Индöдö велöдысьяскöд паныд сувтiсны Ен кöсйöмлы да эз пыртчыны Иоан пыртöмöн». 31 Господь шуис: «Кодкöд Ме öткодяла öнiя олысьясöс? Код кодьöсь найö? 32 Найö изэрд вылын пукалысь челядь кодьöсь, кодъяс öта-мöдныслы шуалöны: "Ми ворсiм тiянлы пöлянöн, а тi энö йöктöй. Ми сьылiм тiянлы бöрдöдчанкывъяс, а тi энö бöрдöй". 33 Пыртысь Иоан локтiс, нянь оз сёй, вина оз ю, тi шуанныд, сы пытшкын пö пеж лов. 34 Морт Пи локтiс, сёйö-юö, Сы йылысь шуанныд, рушку тыртысь да вина юысь пö, вот перйысьяскöд да мыжаяскöд ёртасьысь пö. 35 Мывкыдлунсö пыдди пуктöны мывкыдлуныслöн челядьыс». 36 Öти фарисей корис Исусöс гортас сёйны. Исус пырис фарисей керкаö да пуксис. 37 Та йылысь тöдмалiс сiйö карас олысь мыжа ань. Сiйö вайис вальдi дозйын чöскыд дука вый. 38 Исуслöн кок дорö копыртчöмöн сiйö бöрдiс, сылöн синваыс визувтiс Исуслы кок вылас. Сiйö чышкалiс Исуслысь коксö аслас юрсиöн да окалiгмоз мавтiс выйöн. 39 Исусöс корысь фарисей аддзис тайöс да мöвпыштiс: «Вöлi кö тайö Мортыс пророк, тöдiс эськö, мыйсяма ань инмöдчö Сы дiнö. Тайö аньыс öд мыжа». 40 Фарисейлань бергöдчöмöн Исус шуис: «Симон, Ме тэныд öтитор кöсъя висьтавны». «Висьтав, Велöдысь», – шуис мöдыс. 41 Исус шуис: «Öти мортлы кыкöн вöлiны уджйöзаöсь: öтиыс – витсё динар, мöдыс – ветымын. 42 Мынтынысö найö эз вермыны, та вöсна тайö мортыс шуис вунöдны кыкнанныслысь уджйöзсö. Висьтав, кодныс ёнджыка кутас радейтны сiйöс?» 43 Симон вочавидзис: «Чайта, унджык уджйöзаыс». Исус шуис сылы: «Тэ веськыда мöвпалан». 44 Аньлань бергöдчöмöн Исус шуис Симонлы: «Аддзан-ö тайö аньсö? Ме локтi тэ ордö, да тэ Меным ватор эн сет кокöс мыськыны, а сiйö синванас киськалiс Менсьым кокöс да юрсинас чышкалiс. 45 Тэ эн окышт Менö, а сiйö локтöмсяньыс эз на дугдыв окавны кокöс. 46 Тэ Менсьым юрöс выйнад эн мавтышт, а сiйö чöскыд дука выйнас кокöс мавтiс. 47 Висьтала тэныд, мыйла сiйö ёна радейтö – уна мыж сылысь прöститöма. Кодлысь этша прöститöма, сiйö этша радейтö». 48 Сэсся Исус шуис аньлы: «Прöститöма тэнсьыд мыжъястö». 49 Сыкöд сёйысьяс сёрнитiсны ас костаныс: «Кодi Сiйö, мый весиг мыжъяс прöститö?» 50 Исус шуис аньлы: «Эскöмыд мездiс тэнö. Мун повтöг».
1 Та бöрын Исус ветлöдлiс карысь карö, сиктысь сиктö да висьтавлiс Ен Юралöм йылысь Бур Юöр. Сыкöд ветлöдлiсны дас кыкнан велöдчысьыс 2 да нöшта аньяс, кодъясöс Сiйö бурдöдiс висьöмъясысь да мездiс пеж ловъясысь. Тайö вöлiны: Магдала Марья, код пытшкысь петiс сизим пеж лов, 3 Иоанна – Ирöд овмöсöн веськöдлысь Кузлöн гöтырыс, Сусанна да мукöдъяс. Овмöснаныс найö отсасисны Исуслы. 4 Уна карысь локтiсны йöзыс Исус дiнö. Сiйö шыöдчис на дорö велöданвисьтöн: 5 «Морт кöдзны петас. Кöдзигас кымынкö кöйдыс усяс туй бокö. Сэнi найöс таляласны, да енэжвыв лэбачьяс кокаласны. 6 Кымынкö кöйдыс усяс изъяинö, но ваыс тырмытöмла петалiгмозыс найö косьмасны. 7 Кымынкö кöйдыс усяс лежнöг пöвстö. Быдмигас лежнöгыс пöдтас петассö. 8 Мукöд кöйдысыс усяс бур муö, быдмас да ваяс тусьсö сё пöвстöн». Тайöс висьталöм бöрын Исус горöдöмöн шуис: «Кодлöн эм пель, мед кылö!» 9 Велöдчысьяс юалiсны Исуслысь, кыдзи гöгöрвоны тайö велöданвисьтсö. 10 Исус шуис: «Тiянлы сетöма тöдны Ен Юралöмлысь гусяторъяссö, а мукöдыс кылöны та йылысь велöданвисьтъясысь: найö видзöдöны да оз аддзыны, кывзöны да оз гöгöрвоны. 11 Тайö велöданвисьтыс петкöдлö: кöйдысыс – тайö Ен Кыв. 12 Туй бокö усьöм кöйдысыс петкöдлö: мортыс кылö Кывсö, но сэсся локтö омöльыс да гусялö сьöлöмсьыс Кывсö, медым мортыс эз эскы да эз мездмы. 13 Изъяинö усьöм кöйдысыс петкöдлö: мортыс кылö Кывсö да долыдпырысь босьтö сiйöс сьöлöмас, но вужъясьтöмысла оз дыр эскы, ыштöдöмъяс дырйи сiйö кежö эскöмсьыс. 14 Лежнöг пöвстö усьöм кöйдысыс петкöдлö: мортыс кылö Кывсö, но быдлунъя тöждыс, озырлуныс да лышкыда олöмыс пöдтö кöдзöм Кывсö, и сiйö оз вай вотöссö. 15 Бур муö кöдзöм кöйдысыс петкöдлö: мортыс кылö Кывсö, видзö сiйöс бур-сöстöм сьöлöмас да сьöкыдлунсö венöмöн вайö вотöс». Тайöс висьталöм бöрын Исус горöдöмöн шуис: «Кодлöн эм пель, мед кылö!» 16 «Öзтöм битö оз вевттьывны дозйöн да оз сувтöдны лабич улö. Сiйöс пуктöны бикок вылö, медым пырысьяс аддзисны югыдсö. 17 Став гусяыс воссяс да став дзебöмаыс йöзасяс, петас ортсö. 18 Видзöдöй, кыдзи кывзанныд. Кодлöн эм, сылы сетасны. Кодлöн абу, сылысь весиг чайтанасö босьтасны». 19 Исус дiнö локтiсны мамыс да вокъясыс, но уна йöз вöсна найö эз вермыны матыстчыны Сы дiнö. 20 Исуслы висьталiсны: «Мамыд вокъясыдкöд ывлаасöсь, Тэнö кöсйöны аддзöдлыны». 21 Исус шуис: «Енлысь Кывсö кывзысьяс да сы серти олысьяс – Меным мам да вокъяс». 22 Öтчыд Исус Аслас велöдчысьясыскöд пуксис пыжö да шуис налы: «Вуджамöй ты мöдлапöлö». Найö мöдöдчисны. 23 Вуджиганыс Исус унмовсис. Ты вылын кыптiс ыджыд тöвныр, да пыжыс кутiс тырны ванас. Найö вöлiны вöян выйынöсь. 24 Велöдчысьяс садьмöдiсны Исусöс шуалöмöн: «Велöдысь, Велöдысь! Вöям!» Исус чеччис, öлöдiс тöвсö да гызьöм васö. Ставыс ланьтiс, пуксис чöв-лöнь. 25 Исус шуис велöдчысьясыслы: «Кöнi тiян эскöмныд?» Найö полöмöн-шензьöмöн öта-мöдныслысь пондiсны юасьны: «Кодi Сiйö? Весиг тöлыс да ваыс кывзысьö Сылысь». 26 Та бöрти найö вуджисны Галилеялы паныда Гадара муö. 27 Пыжсьыс чеччöм бöрын Исуслы паныдасис карсьыс пеж ловъясöн кутöм морт. Сiйö пыр ветлiс пасьтöг, керкаын пыдди олiс шойгу кыртаын. 28 Исусöс аддзöм бöрын сiйö горзöмöн уськöдчис Сы водзö да горöдiс: «Мый Тэныд месянь колö, Исус, Медвылысса Енлöн Пи? Кора Тэнö, эн пес менö!» 29 Тадзи шуалiс, öд Исус тшöктiс пеж ловлы петны морт пытшкысь. Пеж лов унаысь песлöдлывлöма тайö мортсö. Сiйöс кöртавлiсны чепъясöн да видзисны дорöмöн, но сiйö орйöдлывлiс кöртöдъяссö. Сэки пеж лов нуöдлывлiс сiйöс овтöминö. 30 Исус юалiс сылысь: «Мый тэнад нимыд?» Сiйö вочавидзис: «Легион», öд сы пытшкын вöлi уна пеж лов. 31 Пеж ловъяс корисны Исусöс, мед эз ысты найöс пыдöстöминö. 32 Сэнi керöсын йирсис ыджыд порсь чукöр. Пеж ловъяс корисны Исусöс, мед лэдзас найöс пырны порсьяс пытшкö. Исус лэдзис. 33 Сэки морт пытшкысь петöм пеж ловъяс пырисны порсьяс пытшкö. А порсьяс кыр йывсянь уськöдчисны тыö да пöдiсны. 34 Порсь видзысьяс пышйисны сэтысь, котöрöн мунiсны карö да орчча сиктъясö висьтавны аддзывлöмтор йывсьыс. 35 Йöзыс петiсны видзöдлыны лоöмторсö. Найö локтiсны Исус дiнö да аддзисны сiйö мортсö, код пытшкысь петiсны пеж ловъяс. Сiйö, паськöма да ас вежöра, пукалiс Исуслöн кок дорын. Йöзыс ёна повзисны. 36 Аддзылысьяс висьталiсны локтöмаяслы, кыдзи бурдiс пеж лолöн кутöм мортыс. 37 Сэки Гадара муын олысьяс корисны Исусöс мунны на дiнысь, сэтшöм ыджыд полöм босьтiс найöс. Исус пуксис пыжö да бöр мöдöдчис. 38 Пеж лолысь мездмöм морт вöзйысис мунны Исускöд, но Исус шуис сылы: 39 «Мун гортад да висьтав, мый Енмыс вöчис тэныд». Сiйö мунiс да висьталiс став карыслы, мый сылы вöчис Исус. 40 Ты мöдлапöлын Исусöс паныдалiс уна йöз, найö виччысьöмаöсь Сiйöс. 41 Сэтчö локтiс Явир нима морт, синагогаса юралысь. Исус водзö уськöдчöмöн Явир корис Сiйöс волыны сы ордö. 42 Сылöн дас кык арöса öтка нылыс вöлi кулан выйын. Исус мунiс Явиркöд. Мунiганыс йöзыс быдласянь топöдiсны Исусöс. 43 Йöз чукöрын вöлi ань, сiйö дас кык во чöж висьöма вир мунöмöн. Ассьыс став эмбурсö сiйö сеталöма бурдöдысьяслы, но найö абу вермöмаöсь отсавны сылы. 44 Сiйö матыстчис Исус дiнö мышсяньыс да инмöдчылiс паськöм дорышас. Вир мунöмыс пырысьтöм-пыр дугдiс. 45 Исус юалiс: «Кодi инмöдчылiс Ме дiнö?» Ставöн соссисны. Петыр да мукöдыс шуисны: «Велöдысь, йöзыс быдласянь топöдöны Тэнö, а Тэ юасян, кодi инмöдчылiс Тэ дiнö». 46 «Кодкö инмöдчылiс Ме дiнö. Ме кылi, мый Ме пытшкысь петiс вын», – шуис Исус. 47 Ань гöгöрвоис, мый сiйöс казялiсны. Дзöригтыр сiйö матыстчис да уськöдчис Исус водзö. Став йöз водзас висьталiс Исуслы, мыйла инмöдчылiс Сы дiнö да кыдзи дзик пыр бурдiс. 48 Исус шуис аньлы: «Нылöй, эскöмыд мездiс тэнö. Мун повтöг». 49 Исуслöн сёрнитiгöн синагогаса юралысь дiнö матыстчис гортсяньыс локтысь морт да висьталiс сылы: «Нылыд кулi, эн мудзтöд Велöдысьсö». 50 Исус кылiс тайöс да шуис Явирлы: «Эн пов, сöмын эскы, нылыд ловъя лоас». 51 Явир керка дорö воöм бöрын Исус босьтiс Аскöдыс Петырöс, Иоанöс, Яковöс да нывкалысь бать-мамсö, мукöдсö эз лэдз пырнысö. 52 Ставныс сыркъялöмöн бöрдiсны кулöм нывка вöсна. Исус шуис: «Энö бöрдöй, сiйö эз кув, сiйö узьö». 53 Исус вылын пондiсны серавны, öд тöдiсны, мый нывкаыс кулiс. 54 Ставнысö вöтлöм бöрын Исус босьтiс нывкаöс киöдыс да гораа шуис: «Нылöй, чеччы!» 55 Сэки лолыс бöр пырис нывка пытшкö, да сiйö пырысь-пыр чеччис. Исус тшöктiс вердны нывкаöс. 56 Бать-мамыс чуймисны, но Исус öлöдiс найöс, медым эз висьтавлыны лоöмтор йывсьыс мукöдыслы.
1 Исус корис дас кыкнан велöдчысьсö да сетiс налы вын вöтлавны пеж ловъясöс да бурдöдавны йöзöс висьöмъясысь. 2 Сiйö мöдöдiс найöс юöртны Енлöн Юралöм йылысь да бурдöдавны висьысьясöс. 3 Исус шуис налы: «Туяныд нинöм энö босьтöй, весиг бедь, ноп, нянь, эзысь да вежан паськöм. 4 Кутшöм керкаö пыранныд, водзö мунтöдзныд олöй сэнi. 5 Оз кö сибöдны тiянöс, сэки карсьыс петiганыд пыркöдöй коксьыныд буссö. Тайö лоö найöс öлöдöм». 6 Велöдчысьяс петiсны туйö. Найö ветлöдлiсны сиктысь сиктö, быдлаын висьтавлiсны Бур Юöр да бурдöдалiсны висьысьясöс. 7 Ирöд öксы кор кылiс тайö ставыс йылысь, шöйöвошис. Öтияс сёрнитiсны, Пыртысь Иоан пö ловзьöма. 8 Мöдъяс шуалiсны, Илля пö локтöма, кодсюрö шуисны, важ пророкъясысь пö öти ловзьöма. 9 Ирöд шуис: «Иоанлысь юрсö ме керыштi. Но кодi нö тайö мортыс, мый татшöмторъяс кыла Сы йылысь?» Ирöд ёна кöсйис аддзывны Исусöс. 10 Локтöм бöраныс апостолъяс висьталiсны Исуслы, мый найö вöчисны. Исус босьтiс найöс Аскöдыс, медым олыштны накöд ас кежаныс овтöминын, кодi вöлi Випсаида карсянь матын. 11 Тайöс кылöм бöрын йöзыс мöдöдчисны Исус бöрся. Сiйö сибöдiс найöс, сёрнитiс накöд Енлöн Юралöм йылысь да бурдöдалiс висьысьясöс. 12 Луныс нёровтчис рытлань. Сэки дас кыкнан велöдчысьыс матыстчисны Исус дiнö да шуисны: «Ми танi овтöминынöсь. Ысты йöзсö вой кежлас матiгöгöр сикт-грездö, мед нуръясьыштасны». 13 Исус шуис: «Тi сетöй налы сёянсö». Найö воча шуисны: «Миян сöмын вит нянь да кык чери. Ми öмöй вермам ньöбны та мындаыслы сёянсö?» 14 Сэнi вöлi вит сюрс гöгöр морт. Исус шуис велöдчысьясыслы: «Пуксьöдалöй йöзсö чукöръясö, морт ветымынöн». 15 Найö тадзи и вöчисны, пуксьöдалiсны ставнысö. 16 Исус босьтiс вит няньсö да кык черисö, видзöдлiс енэжö да Енмöс аттьöалöмöн чегис няньсö, сэсся сетiс велöдчысьясыслы. Велöдчысьяс разöдiсны йöзыслы. 17 Ставныс пöттöдзныс сёйисны, коляссö дас кык куд тыр чукöртiсны. 18 Öтчыд Исус кевмысис йöзтöминын. Сыкöд тшöтш сэнi вöлiны велöдчысьясыс. Исус юалiс налысь: «Код туйö йöзыс пуктöны Менö?» 19 Найö вочавидзисны: «Öтияс шуöны, Пыртысь Иоан пö, мöдъяс шуöны, Илля пö, кодсюрö шуöны, важ пророкъясысь пö öти ловзьöма». 20 Исус юалiс: «Код туйö тi Менö пуктанныд?» Петыр вочавидзис: «Тэ – Енлöн Кристос». 21 Исус чорыда öлöдiс найöс, мед эз висьтавны та йылысь мукöдлы. 22 Сэсся шуис: «Морт Пилы уна сьöкыд ковмас нуны. Пöрысьяс, аркирейяс да Индöдö велöдысьяс пондасны вöтлыны да виасны Сiйöс, но коймöд луннас Сiйö ловзяс». 23 Исус шуис ставныслы: «Кодi кöсйö мунны Ме бöрся, мед вунöдас асьсö, мед босьтас ассьыс крестсö да локтас Ме бöрся. 24 Кодi кöсйö видзны ассьыс олöмсö, воштас сiйöс. Ме вöсна олöмсö воштысь видзас сiйöс. 25 Лоас-ö мортыслы бур, босьтас кö аслыс став муюгыдсö, а асьсö бырöдас да олöмсö воштас? 26 Кодi яндысяс Меысь да Менам кывъясысь, сыысь яндысяс Морт Пи, кор локтас Аслас дзирдлунöн, Батьыслöн да вежа анделъяслöн дзирдлунöн. 27 Збыльысь висьтала тiянлы: кодсюрö танi сулалысьяс пиысь кувтöдзныс на аддзасны Енлысь Юралöмсö». 28 Тайö сёрни бöрас лун кöкъямыс мысти Исус босьтiс Аскöдыс Петырöс, Иоанöс, Яковöс да кайис накöд керöсö кевмысьны. 29 Кевмысигас Исуслöн чужöмыс вежсис, паськöмыс лои дзирдалана еджыд. 30 Сэки тыдовтчисны кык морт: Мöисей да Илля. 31 На вылын вöлi Енлöн дзирдлуныс. Найö сёрнитiсны Исускöд Сылöн мунöм йылысь, кодi збыльмас Ерусалимын. 32 Петыр ёртъясыскöд чорыда узисны. Садьмöм бöраныс аддзисны Исуслысь дзирдлунсö да Сыкöд сулалысь кык мортöс. 33 Кор тайö кык мортыс кутiсны ылыстчыны Исусысь, Петыр шуис Исуслы: «Велöдысьöй, миянлы танi лöсьыд, сувтöдам куим чом: Тэныд, Мöисейлы да Иллялы». Петыр ачыс эз гöгöрво, мый висьталiс. 34 Петырлöн сёрнитiгкостi локтiс кымöр да вевттис найöс. Велöдчысьяс ёна повзисны. 35 Кымöрсянь кылiс гöлöс шы: «Тайö Менам муса Пиöй, Сiйöс кывзöй». 36 Тайö кывъяс бöрас найö аддзисны сöмын Исусöс. Велöдчысьяс сiйö кадас некодлы эз висьтавлыны аддзывлöм йывсьыс, найö чöв олiсны та йылысь. 37 Аскинас керöсысь лэччиганыс Исусöс паныдалiс уна йöз. 38 Йöз пöвстысь öти горöдiс: «Велöдысьöй, кора Тэнö, видзöдлы менсьым пиöс, сiйö менам öтка пи. 39 Пеж лов топöдлö сiйöс. Сэки сiйö лёкысь горзö, чашйысьö, да вомсьыс быг петö. Ёна песöм бöрын пеж лов вöлисти эновтö сiйöс. 40 Ме кори Тэнсьыд велöдчысьястö вöтлыны пеж ловсö, но найö эз вермыны». 41 Исус шуис: «Эскытöм-ылалöм йöз! Дыр-ö на Меным овнысö тiянкöд? Дыр-ö на Меным видзöдны тiянöс? Вайöд татчö питö». 42 Кор зонка вöлi матыстчö Исус дiнö, пеж лов шыбитiс зонкаöс муас да кутiс песлöдлыны. Исус öлöдiс пеж лолöс, бурдöдiс зонкаöс да сетiс сiйöс батьыслы. 43 Ставнысö шензьöдiс Енлöн ыджыд выныс. Йöзыс шензисны Исуслöн уджъясысь. Сэки Сiйö шуис велöдчысьясыслы: 44 «Пель саяныд сюркнялöй Менсьым кывъясöс: Морт Пиöс сетасны йöзлöн киö». 45 Велöдчысьяс эз тöдны, мый йылысь Исус висьталö, Сылöн кывъясыс вöлiны налы пöдсаöсь. Найö эз гöгöрвоны Сiйöс, а юавнысö полiсны. 46 Велöдчысьяс костын чужис вен, кодi на пиысь ыджыдджыкыс. 47 Налысь мöвпъяссö тöдöмöн Исус босьтiс кагаöс да сувтöдiс сiйöс Аскöдыс орччöн. 48 Велöдчысьясыслы шуис: «Кодi Менам ним вöсна сибöдö тайö кагасö, сiйö сибöдö Менö. А Менö сибöдысь сибöдö Менö Мöдöдысьöс. Медся ичöтыс тiян пиысь лоас медыджыдöн». 49 Сэки Иоан шуис: «Велöдысьöй, ми аддзылiм мортöс, сiйö Тэнад нимöн пеж ловъясöс вöтлалö. Ми öлöдiм сiйöс, öд сiйö абу миян пöвстысь». 50 Исус шуис: «Энö öлöдöй. Кодi абу тiянлы паныд, сiйö тiян дор». 51 Кор матыстчис Исусöс енэжö босьтан луныс, Сiйö шуис мунны Ерусалимö. 52 Водзвылас Сiйö ыстiс юöртысьясöс. Найö мунiсны самарияса сиктö, медым ставсö лöсьöдны Исус локтiгкежлö. 53 Сэтчöс олысьяс эз сибöдны Исусöс, öд Сiйö вöлi Ерусалимö мунысь. 54 Яков да Иоан – Исуслöн велöдчысьясыс – тайöс кылöм бöрын шуисны: «Господьöй, кöсъян кö, ми би корам енэжсяньыс, мед бырöдны найöс? Буретш тадзи Илля вöчлiс». 55 Велöдчысьяслань бергöдчöмöн Исус öлöдiс найöс. Сiйö шуис: «Тi онö тöдöй, мыйсяма лов тiян пытшкын. 56 Морт Пи эз лок бырöдны мортлысь олöмсö, Сiйö локтiс мездыны». Сэсся найö мунiсны мöд сиктö. 57 Мунiганыс öти морт шыасис Исус дiнö: «Господьöй, ме быдлаö Тэ бöрся муна». 58 Исус шуис сылы: «Ручьяслöн эмöсь пырмöсъяс, и енэжвыв лэбачьяслöн эмöсь позъяс, сöмын Морт Пилöн шойччанiныс абу». 59 Мöдлы Исус шуис: «Лок Ме бöрся». Сiйö воча шуис: «Господьöй, лэдзлы менö медводз батьöс дзебны». 60 Исус шуис сылы: «Кулöмаяс мед дзебасны кулöмаяснысö. Тэ мун да юöрт Енлысь Юралöмсö». 61 Нöшта öти морт шуис: «Господьöй, ме муна Тэ бöрся, сöмын лэдзлы менö колльöдчыны гортсаяскöд». 62 Сылы Исус вочавидзис: «Гöрйö кутчысьысь кö видзöдö бöрлань, сiйö оз шогмы пырны Енлöн Юраланiнö».
1 Та бöрын Господь бöрйис нöшта сизимдас велöдчысьöс, сэсся кыкöн-кыкöн мöдöдiс найöс сикт-каръясö, кытчö кöсйис Ачыс ветлыны. 2 Сiйö шуис налы: «Вунданыс уна, а вундысьыс этша. Кевмöй вунданiнын Ыджыдыслы, мед ыстас Аслас вунданiнö уджалысьясöс. 3 Мунöй! Ме мöдöда тiянöс баляпиянöс моз кöинъяс пöвстö. 4 Энö босьтöй аскöдныд сьöм, ноп да кöм. Туй выланыд энö сувтöй чолöмасьны йöзкöд. 5 Керкаö пыриганыд медводз шуöй: "Лöнь олöм тайö керкаыслы!" 6 Сэнi кö олö бур сьöлöма морт, бурсиöмныд коляс сылы. Оз кö, бурсиöмныд бергöдчас тiянлы. 7 Кольччöй сiйö керкаас, сёйöй-юöй мый тiянлы сетасны, öд уджалысьыд сулалö удждоныс. Энö вуджöй мöд керкаö. 8 Карö пыриганыд кö тiянöс сибöдасны, сёйöй мый тiянлы сетасны. 9 Бурдöдалöй сэнi висьысьясöс да юöртöй: "Енлöн Юралöмыс воис тiянöдз". 10 Оз кö сибöдны карас, туйяс кузя ветлöмöн юöртöй: 11 "Буссö, мый кöласис коканым тiян карын, ми бöр пыркöдам тiянлы. Тöдöй: Енлöн Юралöмыс воис тiянöдз". 12 Висьтала тiянлы: Мыждан лунö Содом карлы лоас кокньыдджык сiйö карыслы дорысь». 13 «Курыд шог тэныд, Коразин кар! Курыд шог тэныд, Випсаида кар! Тир да Сидон каръясын кö аддзылiсны тiянын кодь вöчöм шензьöданаторъяссö, сэки эськö сэтчöс олысьясыс важöн нин бергöдчисны мыжъяссьыныс, шогалан паськöм пасьталiсны да юрнысö пöимöн киськалiсны. 14 Мыждан лунö Тир да Сидон каръяслы лоас кокньыдджык тiянлы дорысь. 15 Тэ, Капернаум кар, чайтан енэжöдз кыпöдчыны? Ад пыдöсöдз усян! 16 Тiянöс кывзысь Менö кывзö, тiянöс öтдортысь Менö öтдортö, а Менö öтдортысь öтдортö Менö Мöдöдысьöс». 17 Сизимдас велöдчысь бöр воисны нимкодясигтыр да шуисны: «Господьöй, Тэнад нимöн тшöктiгöн весиг пеж ловъяс кывзысьöны миянлысь». 18 Исус шуис налы: «Ме аддзылi сöтаналысь чардби моз енэжсянь усьöмсö. 19 Со, Ме сета тiянлы вын талявны змейясöс, скорпионъясöс да омöльыслысь став вынсö, и тiянöс нинöм оз дойд. 20 Энö нимкодясьöй сыысь, мый пеж ловъяс кывзысьöны тiянлысь, а нимкодясьöй сыысь, мый тiянлысь нимъяснытö гижöма енэжас». 21 Сэки Исус тыри Вежа Ловсянь нимкодьлунöн. Сiйö шуис: «Ошка Тэнö, Батьöй, енэжыс да муыс вылын Ыджыдалысьöс! Тэ дзебин тайöс сюсь вежöраясысь да восьтiн кага коддьöмлы. Татшöм вöлi Тэнад бур кöсйöмыд, Батьöй». 22 Исус висьталiс велöдчысьясыслы: «Батьöй ставсö сетiс Меным. Сöмын Батьыс тöдö, кодi Пиыс, да сöмын Пиыс тöдö, кодi Батьыс, и нöшта сiйö, кодлы Пиыс кöсйö восьтны». 23 Сэсся велöдчысьясыс дiнö бергöдчöмöн Исус торйöн шуис налы: «Шудаöсь найö, кодъяслöн синмыс аддзö, мый тi аддзанныд! 24 Висьтала тiянлы: уна пророк да öксы кöсйисны аддзывны, мый тi аддзанныд, но эз аддзывны. Кöсйисны кывны, мый тi кыланныд, но эз кывлыны». 25 Индöдö велöдысьясысь öти Исусöс кыйöм могысь юалiс: «Велöдысь, мый меным колö вöчны, мед вичмис меным помтöм олöм?» 26 Исус юалiс сылысь: «Мый гижöма Индöдас? Мый сэтысь лыддян?» 27 Индöдö велöдысь вочавидзис: «Радейт ассьыд Господь Ентö став сьöлöмнад, став олöмнад, став выннад, став мывкыднад да радейт матыссатö асьтö моз». 28 Исус шуис сылы: «Бура вочавидзин. Вöч тадзи, сэки кутан овны». 29 Асьсö дорйöм могысь Индöдö велöдысь юалiс Исуслысь: «Кодi меным матыссаыс?» 30 Исус вочавидзис тадзи: «Öти морт ветлас Ерусалимысь Ерикон карö. Туяс сiйö веськалас лёк вöчысьяс киö. Найö пöрччöдасны сiйöс, вирöдз нöйтасны да колясны туй вылас кулан выйын. 31 Сiйö туйöдыс мунас поп, казялас нöйтöм мортöс да туй мöдарас вуджас. 32 Сы моз вöчас тшöтш левит: воас сэтчö, аддзас нöйтöм мортöс да вуджас туй мöдарас. 33 Сэсся локтас сэтчö самарияса морт. Кор аддзас нöйтöм мортöс, сылöн сьöлöмыс нормас. 34 Матыстчас сы дiнö, дойяссö мыськалас винаöн, мавтас выйöн да кöртавлас. Пуксьöдас сiйöс аслас осёл вылö да ваяс туйморт керкаö, сэнi тöждысяс сы вöсна. 35 Аскинас самарияса морт сетас туйморт керка кутысьлы кык динар да шуас: "Тöждысь сы вöсна. Оз кö тырмы, локтöм бöрын содтöд мынтыся". 36 Тэ ногöн, кодi тайö куим письыс нöйтöм мортыслы матыссаыс?» 37 Индöдö велöдысь вочавидзис: «Сылы бур вöчысьыс». Исус шуис сылы: «Мун да тшöтш тадзи вöч». 38 Исус велöдчысьясыскöд мунiс водзö да пырис öти сиктö. Сэнi Марпа нима ань корис Исусöс гортас. 39 Марпалöн вöлi Марья нима чой. Сiйö пуксис Господь Исуслöн кок дорö да кутiс кывзыны Сылысь висьталöмсö. 40 Марпа унатор вöсна котралiс-тöждысис. Сэсся Исус дiнö матыстчöмöн шуис: «Господьöй, Тэныд öмöй веськодь, мый чойöй менö öтнамöс колис тöждысьнысö. Висьтав сылы, мед отсалас меным». 41 Господь Исус вочавидзис: «Марпа, Марпа, тэ тöждысян-мырсян унатор вöсна, 42 а коланаыс сöмын öтитор. Марья бöрйис бурджыксö, и тайöс сылысь оз мырддьыны».
1 Öтчыд Исус кевмысис. Кевмысьöм бöрас велöдчысьяс пиысь öти шуис Сылы: «Господьöй, велöд миянöс кевмысьны, кыдзи Иоан велöдiс ассьыс велöдчысьяссö». 2 Исус шуис налы: «Кевмысиганыд шуöй: – Батьöй миян, Тэ енэжъяс вылын олан. Мед лоö вежаöн Тэнад нимыд. Мед воас Тэнад Юралöмыд. Мед инас Тэнад кöсйöмыд му вылын енэжын моз. 3 Сет миянлы быд лун кежлö няньнымöс. 4 И прöстит миянлысь мыжъяснымöс, öд ми прöститам миян водзын мыжаясöс. Эн сет миянлы ылавны, но видз миянöс омöльысь». 5 Исус нöшта шуис: «Шуам, кодкö тiян пиысь вой шöр кадö мунас ёртыс ордö да шуас: "Ёртöй, водзöсав меным няньтор. 6 Öд менам ёртöй пырис ме ордö туй вывсянь, да нинöмöн верднысö". 7 Мöдыс воча шуас öдзöс сайсяньыс: "Эн дöзмöдчы. Ме йигнаси нин, и ныв-пиöй узьöны нин. Ог вермы чеччыны няньтö сетны". 8 Висьтала тiянлы: сiйö кö оз чеччы да оз сет сылы ёртасьöмыс понда, вöчас тайöс ёртыслöн мырдöн корöмыс вöсна да сетас сылы колана мындасö. 9 Висьтала тiянлы: корöй, и тiянлы сетасны, корсьöй, и тi аддзанныд, игöдчöй, и тiянлы восьтасны. 10 Öд корысьлы сетöны, корсьысьлы сюрö да игöдчысьлы восьтöны. 11 Эм-ö тiян пöвстын бать, кодi пиыслы сетас из, корас кö сiйö нянь? Сетас-ö змейöс, корас кö пиыс чери? 12 Сетас-ö скорпионöс, корас кö пиыс кольк? 13 Тi лёкöсь, а сямманныд бурсö сетны асланыд ныв-пилы. Дерт нин, енэжвыв Батьныд сетас Вежа Ловсö Сылысь корысьяслы». 14 Исус вöтлiс сёрниттöм морт пытшкысь пеж лолöс. Пеж ловлöн петöм бöрын мортыс пондiс сёрнитны. Йöзсö тайö шензьöдiс, 15 а кодсюрö шуисны, Сiйö пö вöтлалö пеж ловъясöс налöн Вельзевул юралысь вынöн. 16 Мукöдыс Исусöс кыйöм могысь корисны петкöдлыны енэжсянь индысьпас. 17 Налысь мöвпъяссö тöдöмöн Исус шуис: «Ас муын олысьяс кö ас костаныс тышкасьöны, тайö муыс кушмас, да керкаясыс сэнi киссясны. 18 Сöтанаыс кö аслыс паныд тышкасьö, дыр-ö кутчысяс сылöн ыджыдалöмыс? Менö тi мыжаланныд пеж ловъясöс Вельзевул вынöн вöтлöмысь. 19 Ме кö вöтлала пеж ловъясöс Вельзевул вынöн, кутшöм вынöн, сiдзкö, тiян йöзыд вöтлалöны? Найö тiянöс мыждасны. 20 Ме кö Ен вынöн вöтлала пеж ловъясöс, сiдзкö, Енлöн Юралöмыс воис тiянöдз. 21 Вына морт кö видзö керкасö шыпуртöн, сылöн эмбурыс дзонь коляс. 22 Но сы вылö кö уськöдчас сыысь вынаджык, дерт, вынаджыкыс вермас сiйöс, мырддяс шыпуртсö, мый вылö сiйö лача кутiс, да юклас босьтöм эмбурсö. 23 Кодi абу Мекöд, сiйö Меным паныд, кодi оз чукöрт Мекöд, сiйö разöдö». 24 «Морт пытшкысь петöм бöрын пеж лов шöйтö ватöминъястi, корсьö шойччанiн да оз аддзы. Сэки шуö: "Бöр муна важ оланiнö, кытысь петi". 25 Локтöм бöрас аддзö: оланiнсö чышкöма-пелькöдöма. 26 Сэки мунö да босьтö аскöдыс сизим пеж лолöс, ассьыс на лёкджыкъясöс, сэсся ставныс найö овмöдчöны важ оланiнас. Тайö мортыслы воддза дорсьыс нöшта на лёкджык лоö». 27 Исуслöн сёрнитiгöн йöз чукöрысь öти ань гораа шуис: «Шуда тэнö кынöмас новлöдлысь да морöснас нёньöдысь!» 28 Исус шуис: «Шудаöсь Енлысь Кывсö кылысьяс да Ен Кыв серти олысьяс!» 29 Йöзыс чукöрмис пыр унджык и унджык. Исус висьталiс налы: «Öнiя олысьяс – лёкас сетчöм йöз. Найö кöсйöны аддзывны индысьпас, но Иона пророк пасысь кындзи оз ло налы мöдыс. 30 Ниневия карын олысьяслы индысьпасöн вöлi Иона, öнiя олысьяслы – Морт Пи. 31 Лунвыв муысь öксы-ань сувтас Мыждан лунö öнiя олысьяскöд да мыжалас найöс. Öд сiйö му помсяньыс волiс кывзыны Соломонлысь мывкыд сёрнисö. Танi Соломон дорысь ыджыдджык. 32 Ниневия карын олысьяс сувтасны Мыждан лунö öнiя олысьяскöд да мыжаласны найöс. Öд Ионалöн юöртöм бöрын ниневияса йöз бергöдчисны асланыс мыжъясысь. Танi Иона дорысь ыджыдджык». 33 «Öзтöм битö оз дзебны да оз пуктыны доз улö. Сiйöс пуктöны бикок вылö, медым пырысьяс аддзисны югыдсö. 34 Синмыд – вир-яйтö югдöдысь. Синмыд кö бур, став вир-яйыд югыдын. Синмыд кö лёк, вир-яйыд пемыдын. 35 Видзöд, мед югыдыс тэ пытшкын эз вöв пемыд! 36 Тэнад кö став вир-яйыд югыдын, и весиг öти юкöн абу пемыдын, сэки тэ ставнас пондан югъявны югдöдысь би моз». 37 Кор Исус помалiс сёрнисö, öти фарисей корис Сiйöс гортас пажнайтны. Исус локтiс фарисей ордö да пуксис сёйны. 38 Исуслöн мыссьытöг сёйны пуксьöмыс шензьöдiс фарисейöс. 39 Господь шуис сылы: «Тi, фарисейяс, тасьтi-дозмуклысь ортсысö весаланныд, а пытшкöсныд горшлунöн да лёкöн тырöма. 40 Вежöртöмъяс! Эз-ö ортсысö вöчысьыс вöч тшöтш пытшкöссö? 41 Сетöй корысьяслы, мый дозмук пытшкас. Сэки ставыс тiян лоö сöстöм. 42 Курыд шог тiянлы, фарисейяс! Тi сетанныд исань турунысь, рута корйысь да став пуктасысь дасöд юкöнсö, а веськыда мыждöмсö да Енмöс радейтöмсö бокö вештанныд. Тайöс колö вöчны да мукöдторсö оз ков вунöдны. 43 Курыд шог тiянлы, фарисейяс! Тi радейтанныд синагогаын водзын пукавны да йöзаинын чолöмалöмъяс кывзыны. 44 Курыд шог тiянлы, Индöдö велöдысьяс да фарисейяс! Кык бана шаньгаяс! Тi пасйытöм шойгуяс кодьöсь, йöзыс тöдтöгныс ветлöны на вывтi». 45 Сэки Индöдö велöдысьясысь öти шуис Сылы: «Велöдысь, татшöм сёрнинад тэ дойдан тшöтш миянöс». 46 Исус воча шуис: «Курыд шог тшöтш тiянлы, Индöдö велöдысьяс! Тi пуктанныд йöзлы пельпом вылас нуны вермытöм нöбъяс, но асьныд весиг чунь помнытö онö инмöдлöй сэтчö. 47 Курыд шог тiянлы! Тi сувтöданныд изъяс пророкъяслы, кодъясöс батьясныд виисны. 48 Тайöн тi петкöдланныд, мый öтувтчанныд батьясныдлöн уджъясö: найö виисны пророкъясöс, а тi сiйö пророкъясыслы изъяс сувтöданныд. 49 Та вöсна Енлöн мывкыдлуныс висьталö: "Мöдöда на дiнö пророкъясöс да апостолъясöс. Öтиясöс найö виасны, мöдъясöс вöтласны". 50 Тадзи öнiя олысьяслы ковмас мынтысьны став пророкыслöн вирысь, кодöс кисьтöма му пуксьöмсяньыс: 51 Авель вирсянь Закар вирöдз, кодöс виисны висьпуктанiн да крам костын. Висьтала тiянлы: öнiя олысьяслы ковмас мынтысьны таысь. 52 Курыд шог тiянлы, Индöдö велöдысьяс! Тi босьтiнныд тöдöмлуныслысь восьтансö. Асьныд энö пырöй и пырны кöсйысьяслы потшинныд туйсö». 53 Исуслöн сёрнитiгöн Индöдö велöдысьяс да фарисейяс пондiсны ёна топöдны Сiйöс юалöмъясöн, 54 найö зiлисны крукыштны Сiйöс, корсисны помка мыжавны Сiйöс.
1 Сэккостi чукöрмис уна сюрс морт, найö весиг дзескöдiсны öта-мöднысö. Исус медводз шыасис велöдчысьяс дiнас: «Видзчысьöй фарисей няньшомысь, налöн кодь кык бана оласногысь. 2 Став дзебöмаыс тыдовтчас да став гусяыс йöзасяс. 3 Пемыдын шуöмтö кыласны югыдын, керка пытшкын пельö вашкöдöмтö юöртасны керка вывсянь». 4 «Висьтала тiянлы, менам ёртъясöй: энö полöй вир-яйтö виысьясысь, унджыксö найö сэсся вöчны оз вермыны. 5 Висьтала, кодысь колö повнысö. Полöй Сыысь, кодi виöм бöрас вермö шыбитны куслытöм биö. Шуа тiянлы: Сыысь полöй. 6 Оз-ö сöмын кык урысь вузавны вит пышкайöс? На пиысь весиг öтиöс абу вунöдöма Енмыс. 7 А тiянлысь став юрсинытö лыддьöма. Сiдзкö, энö полöй, тi öд донаджыкöсь пышкайясысь». 8 «Висьтала тiянлы: кодi оз яндысь Меысь йöз водзын, сыысь Морт Пи оз яндысь Енлöн анделъяс водзын. 9 Кодi соссяс Меысь йöз водзын, сыысь Ме сосся Енлöн анделъяс водзын. 10 Лёкöдан кö Морт Пиöс, лоан прöститöма. Омöльтан кö Вежа Лолöс, он ло прöститöма. 11 Кор тiянöс нуöдасны синагогаясö да юралысь-веськöдлысьяс водзö, энö майшасьöй, кыдзи дорйыны асьнытö да мый шуны. 12 Сiйö кадас Вежа Лов туйдöдас тiянöс, мый колö шунысö». 13 Йöз чукöрысь öти морт шуис Исуслы: «Велöдысь, шу вокöйлы, мед бать-мамсянь кольöм овмöссö юкас мекöд». 14 Исус шуис: «Кодi сувтöдiс Менö ёрдысьнас, мед тiянлысь овмöснытö юкны?» 15 Сэсся шуис ставныслы: «Видзчысьöй горшасьöмысь, öд мортыдлöн олöмыс абу сылöн ыджыд озырлун сайын». 16 Исус висьталiс налы велöданвисьт: «Озыр мортлöн муыс бур быдтас сетас. 17 Сiйö мöвпыштас: "Мый вöчны? Быдтасöй видзанiнъясö оз тöр". 18 Сэсся шуас: "Косяла йöртöдъясöс да вöча гырысьджыкъясöс, чукöрта сэтчö став няньöс да ассьым став эмбурöс. 19 Сэки шуа аслым: уна буртор уна во кежлö чöжöма тэнад – шойччы, сёй, ю да гажöдчы!" 20 А Ен шуас сылы: "Вежöртöмöй, тавой босьтасны тэнсьыд ловтö. Кодлы коляс тэнад чöжöмаыд?" 21 Тадзи лоö быдöнкöд, кодi аслыс чукöртö озырлунсö, а оз Енсянь озырмöдчы». 22 Исус шуис велöдчысьясыслы: «Та вöсна шуа тiянлы: энö майшасьöй сёян да паськöм вöсна. 23 Олöмныд öд донаджык сёянысь да вир-яйныд паськöмысь. 24 Видзöдлöй кырнышъяс вылö: найö оз кöдзны, оз вундыны, налöн абу йöртöдъяс, абу эмбур видзанiнъяс. Енмыс вердö найöс. Кымын пöв тi донаджыкöсь лэбачьясысь! 25 Вермас-ö тiян пиысь кодкö зiльöмöн-тöждысьöмöн нюжöдыштны ассьыс олан нэмсö? 26 Тi кö весиг ичöтикторсö онö вермöй, мыйла мукöдторйыс вöсна майшасянныд? 27 Видзöдöй дзоридзьяслöн быдмöм вылö: найö оз мырсьыны, оз печкыны. Висьтала тiянлы: ачыс Соломон став озырлун дырйиыс эз пасьтасьлы весиг öти татшöм дзоридзысь мичаджыка. 28 Енмыс кö тадзи пасьтöдö видзвыв турунöс, кодi талун быдмö, а аски шыбитасны пачö, оз öмöй Сiйö пасьтöд тiянöс, этша эскысьяс! 29 Энö корсьысьöй, мый сёйны-юны. Энö майшасьöй та вöсна. 30 Тайö ставыс майшöдлö ентöдтöмъясöс. Но тiян Батьныд тöдö, мый тайö колö тiянлы. 31 Корсьöй Енлысь Юралöмсö, сэки тiян ставыс тайö лоö. 32 Эн пов, ичöт чукöр! Öд тiян Батьныд шуис сетны тiянлы Юралöм. 33 Вузалöй ассьыныд овмöстö, сьöмсö сетöй гöльяслы. Лöсьöдöй аслыныд важмытöм видзанiнъяс да чöжöй бырлытöм озырлун енэжö. Сэтчö гусясьысь оз пыр да сэнi воз оз сёй. 34 Кöнi озырлунныд, сэнi лоö и сьöлöмныд». 35 «Вöнясьöй да öзтöй бинытö. 36 Лоöй кесйöгъяс кодьöсь, кодъяс виччысьöны асланыс ыджыдлысь кöлысь вылысь локтöмсö. Воöм бöрас ыджыдныс тотшкöдчас öдзöсас, да найö пырысь-пыр восьтасны. 37 Кесйöгъяс шудаöсь, ыджыдыс кö гортас воигöн аддзас, мый найö виччысьöны сiйöс. Веськыда висьтала тiянлы: ыджыдыс сэки вöнясяс, корас кесйöгъяссö пызан сайö да ачыс пондас кесъявны налы. 38 Ыджыдыс кö воас весиг вой шöрнас либö вой шöр бöрас да аддзас, мый кесйöгъясыс виччысьöны сiйöс – тайö кесйöгъясыс шудаöсь! 39 Тi тöданныд: керка кутысь кö тöдiс гусясьысьлысь локтан кадсö, сэки эськö эз узь да эз лэдз керкаас. 40 Лоöй дасьöсь, öд Морт Пи локтас виччысьтöг». 41 Петыр юалiс: «Господьöй, тайö велöданвисьтсö висьталан миянлы али быдöнлы?» 42 Господь шуис: «Лоöй эскана да мывкыда кесйöг кодьöсь. Татшöмсö ыджыдыс пуктас веськöдлыны мукöд кесйöгъясöн, медым ас кадö налы сёян-юан сетны. 43 Кесйöгыс шуда, ыджыдыс кö гортас воигöн аддзас сiйöс тадзи вöчöмöн. 44 Збыльысь висьтала тiянлы: ыджыдыс пуктас сiйöс веськöдлыны став аслас овмöсöн. 45 Но кесйöгыс вермас мöвпыштны: "Ыджыдöй дыр на оз лок". Сiйö пондас нöйтны мукöд кесйöгъясöс, сёйны-юны да кодавны. 46 Но виччысьтöм лунö, лöсявтöм кадö кесйöглöн ыджыдыс воас. Сiйö кералас кесйöгсö да шыбитас сiйöс эскытöмъяс дiнö. 47 Кесйöг кö тöдö ыджыдыслысь кöсйöмсö да оз дасьтысь-вöч сы ног, сiйöс чорыда нöйтасны. 48 А тöдтöг кö вöчас мыжсö, сiйöс нöйтасны этшаджык. Кодлы уна сетöма, сылысь уна корасны. Кодлы уна эскöма, сылысь уна юаласны». 49 «Ме локтi би вайны му вылö да ёна кöсъя, медым сiйö öзйис нин. 50 Пыртчöмöн колö Меным пыртчыны, и Ме ёна сьöкыдала, кытчöдз тайö оз ло. 51 Тi ног, Ме локтi вайны му вылö лöнь олöм? Эг! Ме локтi торйöдны йöзсö. 52 Öнiсянь öти керкаын вит олысь öта-мöдныслы паныд сувтасны: куимыс – кыкыслы паныд, кыкыс – куимыслы. 53 Батьыс паныд сувтас пиыслы, пиыс – батьыслы, мамыс – нылыслы, нылыс – мамыслы, энькаыс – моньыслы, моньыс – энькаыслы». 54 Исус висьталiс йöзыслы: «Рытыввывсянь кыпöдчысь кымöр аддзигöн тi шуанныд: "Зэрмас". Тайö тадзи. 55 Лун тöв кö петас, шуанныд: "Пöжны кутас". Тадзи и эм. 56 Кык бана шаньгаяс! Енэжлысь да мулысь чужöмбансö кужанныд тöдмавны, мыйла öнiя кадсö онö вермöй тöдны?» 57 «Мыйла асьныд онö вермöй гöгöрвоны, кыдзи колö вöчнысö? 58 Ковмас кö мунны ёрдö, зiль бурасьны тэнö мыжалыськöд ёрдö вотöдз на. Он кö вöч тадзи, сiйö нуöдас тэнö ёрдысь дiнö, ёрдысь сетас тэнö видзысьлы, а видзысь йöртас тэнö дзескыдiнö. 59 Висьтала тэныд: бöръя сьöмтö сеттöдз он пет сэтысь».
1 Сэки матыстчисны Исус дiнö кодсюрö да висьталiсны галилеясаясöс крамын виöм йылысь. Найöс виöмаöсь вись вайиганыс Пилат тшöктöм серти, да налöн вирыс сорласьöма вись виркöд. 2 Исус шуис: «Тi ног, найö вöлiны мыжаджыкöсь мукöд галилеясаяс дорысь, тадзи кö кулiсны? 3 Эз. Шуа тiянлы: на моз тi ставныд куланныд, онö кö бергöдчöй мыжъяссьыныд. 4 Мый шуанныд дас кöкъямысыс йылысь, кодъяс вылö Силоамын уси башня да лямöдiс кувтöдзныс? Вöлiны-ö найö мыжаджыкöсь Ерусалимын мукöд олысьяс дорысь? 5 Эз. Шуа тiянлы: на моз тi ставныд куланныд, онö кö бергöдчöй мыжъяссьыныд». 6 Исус висьталiс татшöм велöданвисьт: «Öти мортлöн виноград йöрас вöлi быдмö инжир пу. Сiйö локтас инжирла, но вотöсыс оз сюр. 7 Сэки сiйö шуас виноград йöрын уджалысьлы: "Куим во чöж нин виччыся тайö инжир пуыслысь вотöссö, но аддза, мый весьшöрö. Керышт сiйöс, öд сöмын муыслысь вынсö босьтö". 8 Уджалысь вочавидзас: "Ыджыдöй, коль на сiйöс тайö во кежлас. Ме сiйöс мудъя да мусö куйöдала. 9 Локтан вонас кö оз вай вотöссö, сэки керыштан сiйöс"». 10 Шойччан лунö Исус велöдiс синагогаын. 11 Сэнi вöлi мышкыртчöм, веськöдчыны вермытöм ань. Дас кöкъямыс во чöж пеж лов кутöма сiйöс тайö висьöмнас. 12 Исус аддзис аньöс, корис сiйöс да шуис: «Аньöй, тэ мездмин висьöмсьыд». 13 Исус пуктылiс кисö ань вылö, и сiйö дзик пыр веськöдчис да пондiс ошкыны Енмöс. 14 Шойччан лунö висьысьöс бурдöдöмыс скöрмöдiс синагогаса юралысьöс. Сiйö шуис йöзыслы: «Вежонас квайт лун сетöма уджавнысö, сэки локтöй бурдöдчынытö, а энö шойччан лунö». 15 Господь воча шуис: «Кык бана шаньга! Шойччан лунö онö öмöй разьлöй лясни дорысь öш-осёлнытö да онö öмöй нуöдлöй найöс юктавны? 16 Öвраамлысь тайö нывсö сöтана кöрталöмöн кутiс дас кöкъямыс во чöж. Эз öмöй ков мездыны сiйöс шойччан лунö?» 17 Исуслöн кывъясысь яналiсны Сылы паныд мунысьяс. Йöзыс, мöдарö, нимкодясисны Сылöн чуймöдана уджъясысь. 18 Сэсся Исус шуис: «Кутшöм Енлöн Юралöмыс? Мыйкöд öткодяла сiйöс? 19 Сiйö муö кöдзöм горчица тусь кодь. Сiйö быдмö да лоö ыджыд пу кодь, весиг енэжвыв лэбачьяс поздысьöны вожъясас». 20 Исус бара шуис: «Мыйкöд öткодяла Енлысь Юралöмсö? 21 Сiйö няньшом кодь. Ань гудралас сэтчö куим шомöс тыр пызь, кад мысти няньыс ловзяс». 22 Исус мöдöдчис Ерусалимö. Сикт-каръяс пыр мунiгöн Сiйö велöдiс йöзсö. 23 Кодкö юалiс Исуслысь: «Господьöй, этшаöн öмöй мездмасны?» Исус вочавидзис: 24 «Став вынтö пуктöй, медым пырны векньыд öдзöсöд. Висьтала тiянлы: унаöн зiлясны пырны, сöмын оз вермыны. 25 Воас кад, кор керка кутысь чеччас да йигналас öдзöссö. Ывласяньыс öдзöсö игöдчöмöн понданныд вöзйысьны: "Ыджыдöй, Ыджыдöй, восьт миянлы!" Сiйö вочавидзас: "Кодъяс тi? Ме ог тöд тiянöс". 26 Тi шуанныд: "Ми тэкöд öтлаын сёйлiм-юлiм. Тэ велöдлiн миян каръясын". 27 Сiйö шуас: "Висьтала тiянлы: ог тöд тiянöс. Кытысьöсь тi? Мунöй Ме дорысь, ставныд тi лёк вöчысьяс!" 28 Кор тi аддзанныд Енлöн Юраланiнысь Öвраамöс, Исаакöс, Яковöс да став пророксö, а асьнытö ортсыас шыбитöмаöн, сэки лоö бöрдöм да пинь йирöм. 29 Асыввылысь да рытыввылысь, войвылысь да лунвылысь локталасны Енлöн Юраланiнö да пуксясны пызан сайö. 30 Сэки бöръяяс лоöны воддзаöн, а воддзаяс – бöръяöн». 31 Сiйö лунö фарисейясысь кодсюрö локтiсны да шуисны Исуслы: «Тэныд колö мунны татысь, Ирöд кöсйö вины Тэнö». 32 Исус воча шуис налы: «Мунöй, висьталöй тайö ручыслы: талун да аски Ме вöтлала пеж ловъясöс да бурдöда йöзöс, а коймöд луннас эштöда уджöс. 33 Но талун, аски да аскомысь Меным колö водзö мунны, öд оз овлы, медым пророкöс виисны Ерусалимысь кындзи мöдлаын. 34 Ерусалим, Ерусалим! Пророкъясöс виалысь да тэ дiнö ыстöмаясöс изъялысь! Кымынысь Ме кöсйи чукöртны тэнсьыд ныв-питö, кыдзи лэбач чукöртö ассьыс пиянсö борд улас, но тi энö кöсйöй. 35 Со, тiян крамныд тыртöммас. Шуа тiянлы: онö аддзöй Менö тайö кывъяссö шутöдз: "Бурсиöма Господь нимöн Локтысьöс!"»
1 Шойччан лунö Исус мунiс фарисейяслöн öти юралысь ордö сёйны. Сэнi ставöн сюся видзöдiсны Исус бöрся. 2 Сы дiнö локтiс ва пыкталöмöн висьысь морт. 3 Исус юалiс Индöдö велöдысьяслысь да фарисейяслысь: «Позьö-ö шойччан лунö бурдöднысö?» 4 Найö чöв олiсны. Исус инмöдчылöмöн бурдöдiс висьысьöс да ыстiс сiйöс гортас. 5 Исус бара юалiс: «Шойччан лунö кö тiян осёлныд либö öшныд усяс юкмöсö, онö öмöй пырысь-пыр лэптöй сiйöс сэтысь?» 6 Найö нинöм эз вермыны воча шуны. 7 Исус казялiс, мый пызан сайö пуксигöн корöмаяс корсисны бурджыкинсö. Сэки Сiйö шыасис на дiнö велöданвисьтöн: 8 «Корасны кö тэнö кöлысь вылö, эн пуксьы бурджыкинас. Сэнi вермас лоны тшöтш кодкö, кодi корöмаяс пиысь пыдди пуктанаджык тэысь. 9 Сэки кöлысь вылö корысь матыстчас тэ дiнö да шуас: "Тайö мортыс мед пуксяс татчö". Сэки тэ яналан, öд тэныд ковмас вуджны пызан помас. 10 Кор тэ локтан кöлысь вылö, пуксьы пызан помланьыс. Тэнö корысь кö матыстчас да шуас: "Ёртöй, пуксьы матöджык", сэки тэ лоан корöмаяс водзын пыдди пуктöмаöн. 11 Öд асьсö вылö пуктысьöс лэдзасны, асьсö улö пуктысьöс кыпöдасны». 12 Сэсся Исус шуис Сiйöс корысьлы: «Лöсьöдан кö пызан, эн корав ёртъястö, вокъястö, рöдвужтö, орччöн озыра олысьястö. Öд найö сэсся коркö асьныс корасны тэнö, тадзи мынтысясны тэныд. 13 Мöдарö, лöсьöдан кö пызан, кор гöльясöс, доймалöмаясöс, коктöмъясöс да синтöмъясöс. 14 Тэ шуда лоан, öд найö оз вермыны мынтысьнысö тэныд. Тэныд лоö мынтöма веськыда олысьяслöн ловзьöм дырйи». 15 Тайöс кылöм бöрын сёйысьясысь öти шуис: «Шуда Енлöн Юраланiнын пызан сайö пуксьысь!» 16 Исус воча шуис: «Öти морт ыджыд пызан лöсьöдас да унаöс корас. 17 Пызан сайö пуксян кад матыстчигöн сiйö мöдöдас ассьыс кесйöгсö висьтавны корöмаяслы: "Локтöй, ставыс нин дась". 18 Водзвыв сёрнитчöмöн моз ставныс шуасны, огö пö вермöй локнысö. Öти шуас: "Ме му ньöби, колö ветлыны видзöдлыны сiйöс. Эн дöзмы, ог эшты". 19 Мöд шуас: "Дас öш ньöби, муна видлыны найöс. Эн дöзмы". 20 Коймöд шуас: "Ме гöтраси да, ог вермы локнысö". 21 Кесйöг бöр локтас да висьталас та йылысь ыджыдыслы. Сiйö ёна скöрмас да шуас кесйöгыслы: "Мун дзик пыр туйвежъясö да йöзаинъясö, вайöд татчö гöльясöс, доймалöмаясöс, коктöмъясöс да синтöмъясöс". 22 Локтöм бöрас кесйöг шуас: "Ыджыдöй, тэнсьыд тшöктöмтö вöчи, но пызан саяд эм на пуксянiныс". 23 Мöдыс вочавидзас: "Пет карсьыс, ветлы туйяс-потшöсъяс пöлöн да тшöкты локнысö, медым менам керкаöй вöлi тыр. 24 Висьтала тiянлы: воддза корöмаясысь весиг öти морт оз видлы менсьым пызанвыв сёянöс". Унаöс корöма, но этшаöс бöрйöма». 25 Уна йöз мунiс Исускöд. Налань бергöдчылöмöн Сiйö шуис: 26 «Ме дiнö локтысьлы кö бать-мамыс, гöтырыс, ныв-пиыс, чой-вокыс да аслас олöмыс Ме дорысь мусаджык, сiйö оз вермы лоны Менам велöдчысьöн. 27 Кодi оз ну ассьыс крестсö да оз лок Ме бöрся, сiйö оз вермы лоны Менам велöдчысьöн. 28 Кодкö тiян пиысь кö мöвпыштас ыджыд керка лэптыны, оз-ö сiйö водзджык пуксьы да артышт, тырмас-ö сылöн сьöмыс керкасö лэптыны. 29 Вермас артмыны, мый подувсö пуктас, а помавнысö оз вермы. Сэки пондасны серавны сiйöс: 30 "Видзöдлöй, лэптынысö босьтчис, а помавнысö эз вермы!" 31 Öксылы кö ковмас тышö петны мöд öксылы паныд, оз-ö сiйö водзджык пуксьы да бура мöвпышт, вермас-ö сiйö дас сюрса тышкайöзнас водзсасьны кызь сюрса тышкайöзкöд. 32 Оз кö вермы, сiйö мöдöдас сёрнитчысьясöс паныд локтысь öксы дiнö, мед бурасьны сыкöд. 33 Тi кö онö кольöй ставсö, мый тiян эм, онö вермöй лоны Менам велöдчысьясöн». 34 «Солыд – буртор. Но солыс кö воштас ассьыс вынсö, кыдзи сiйöс бöр соланас вöчан? 35 Сiйöс весиг оз шогмы муö сюйны, сöмын кольö шыбитны. Кодлöн эм пель, мед кылö!»
1 Вот перйысьяс мукöд мыжаяскöд локтiсны Исус дiнö кывзыны Сiйöс. 2 Фарисейяс да Индöдö велöдысьяс шуасисны: «Сiйö ветлö мыжаяскöд, весиг öтлаын сёйö накöд». 3 Сэки Исус висьталiс налы велöданвисьт: 4 «Мый вöчас морт, вошас кö сылöн сё ыжсьыс öти? Оз-ö сiйö коль öкмысдас öкмыссö овтöминö да мун корсьны вошöмасö? 5 Аддзöм бöрас долыдпырысь босьтас ыжсö пельпом вылас. 6 Локтас гортас, корас ёртъяссö, орччöн олысьяссö да шуас налы: "Нимкодясьöй! Ме аддзи ассьым вошлöм ыжöс". 7 Висьтала тiянлы: енэжын нимкодясьöмыс öти морт вöсна, кодi бергöдчис мыжъяссьыс, лоö ёна ыджыдджык öкмысдас öкмыс веськыда олысь дорысь, кодъяслöн абу коланлуныс бергöдчыны мыжъяссьыс». 8 «Ань кö воштас дас эзысь сьöмсьыс öтикöс, оз-ö биасьöмöн сiйö кут чышкыны джоджсö да корсьны вошöмторсö. 9 Аддзöм бöрас корас нывъёртъяссö, орччöн олысь аньяссö да шуас налы: "Нимкодясьöй! Ме аддзи воштылöм сьöмöс". 10 Висьтала тiянлы: тадзи тшöтш нимкодясьöны Енлöн анделъяс мыжъяссьыс бергöдчысь öти морт вöсна». 11 Нöшта Исус висьталiс: «Öти мортлöн вöлi кык пи. 12 Ичöтыс шуас батьыслы: "Батьöй, сет овмöссьыд менсьым пайöс". Батьыс юкас овмöссö кыкнан пиыслы. 13 Кымынкö лун мысти ичöт пиыс став аслас овмöснас мунас ылi муö, сэнi кокньыд оласногысла лотас ставсö. 14 Сэки тайö муас пуксяс тшыг олöм. Тшыглуныс топöдас сiйöс. 15 Сiйö медасяс сэтчöс öти морт дiнö видзны порсьяссö. 16 Сiйö дась вöлi пöткöдчыны быдмöгöн, мый сёйлiсны порсьяс, но весиг тайö сылы эз вичмыв. 17 Ас садяс воöм бöрын сiйö шуас: "Батьöлöн меда йöзыс пöттöдзныс сёйöны, а ме танi тшыглы кула. 18 Чечча да муна бать дiнö, шуа сылы: Батьöй, ме мыжа енэжыс водзын да тэ водзын. 19 Ме ог шогмы шусьыны тэнад пиöн, босьт менö медалöм уджалысь пыдди". 20 Сiйö чеччас да мöдöдчас батьыс ордö. Ылiсянь на батьыс аддзас писö, да сылöн сьöлöмыс нормас. Сiйö котöрöн уськöдчас пиыслы паныд, сывйыштас да окалас писö. 21 Пиыс шуас: "Батьöй, ме мыжа енэжыс водзын да тэ водзын. Ме ог шогмы шусьыны тэнад пиöн". 22 Батьыс тшöктас кесйöгъясыслы: "Вайöй медбур паськöмсö да пасьтöдöй менсьым пиöс, чунькытшöдöй да кöмöдöй сiйöс. 23 Начкöй тшöгöдöм кукань. Пондам сёйны-гажöдчыны талун! 24 Менам пиöй вöлi кулöма, а öнi ловъя, вöлi вошöма, а öнi сюрис". Ставныс пондасны гажöдчыны. 25 Ыджыд пиыс вöлi видз вылын. Керка дорас матыстчигöн сiйö кылас сьылöм-гажöдчöмсö, 26 чукöстас öти кесйöгöс да юалас: "Мый танi?" 27 Сiйö вочавидзас: "Тэнад вокыд бöр локтiс. Батьыд тшöктiс начкыны тшöгöдöм куканьöс, öд вокыд ловйöн воис". 28 Ыджыд пиыс ёна скöрмас, весиг оз пыр керкаас. Батьыс петас корны сiйöс. 29 Пиыс шуас батьыслы: "Кымын во ме тэныд уджала, тэнсьыд пыр кывзыся, но тэ весиг кöзапитö эн сет меным, медым ёртъясöйкöд гажöдчыштны. 30 Тэнад тайö пиыд лотiс став овмöссö кырсалысь аньяскöд. Öнi локтiс, да тшöгöдöм куканьöс начкин сылы!" 31 Батьыс шуас: "Пиöй, тэ öд пыр вöлiн мекöд. Ставыс мый менам – тэнад. 32 Вокыд вöсна колö гажöдчыны-нимкодясьны, öд сiйö вöлi кулöма, а öнi ловъя, вöлi вошöма, а öнi сюрис"».
1 Исус висьталiс велöдчысьясыслы: «Öти озыр мортлöн вöлi овмöс нуöдысь. Озыр мортлы норасясны, овмöс нуöдысьыд пö куштö овмöстö. 2 Сiйö корас овмöс нуöдысьсö ас дiнас да шуас сылы: "Тöдан-ö, мый кывсьö тэ йылысь? Петкöдлы удж нуöдöмтö, талунсянь тэ он кут веськöдлыны менам овмöсöн". 3 Овмöс нуöдысь кутас мöвпавны: "Ыджыдöй вöтлö менö. Мый вöчны? Му бергöдлыны ог вермы, корысьöдз усьны яндзим. 4 Со мый колö вöчны, медым мукöдыс сибöдасны менö асланыс керкаö". 5 Сiйö корас öти бöрся мöдöс ыджыдыслы уджйöзаясöс. Öтилысь юалас: "Уна-ö тэ уджйöза?" 6 Сiйö вочавидзас: "Сё пельса вый". Овмöс нуöдысь шуас: "Танi тэнад уджйöз гижöдыд. Пуксьы да гиж ветымынöс". 7 Сэсся мöдлысь юалас: "Тэ уна-ö уджйöза?" Сiйö вочавидзас: "Сё мешöк шобдi". Овмöс нуöдысь шуас: "Танi уджйöз гижöдыд. Гиж кöкъямысдасöс". 8 Ыджыдыс ошкыштас пöръялысь овмöс нуöдысьöс сылöн сюсьлунысь. Тайö муюгыдса пияныс ас костаныс сюсьджыкöсь югыдыслöн пиян дорысь. 9 Висьтала тiянлы: лöсьöдöй аслыныд ёртъяснытö мувывса ылöг озырлун отсöгöн, медым озырлунныд бырöм бöрын найö сибöдасны тiянöс бырлытöм оланiнö». 10 «Кодi эскана ичöтас, сiйö лоö эскана ыджыдас. Ичöтас ылöдлысь ылöдлас и ыджыдас. 11 Тi кö лёка веськöдланныд мувывса ылöг озырлуннас, сетасны-ö тiянлы збыльысь донасö? 12 Тi кö лёка веськöдланныд йöз озырлунöн, сетасны-ö тiянлы ассьыныд? 13 Кесйöг оз вермы кесъявны кык ыджыдлы. Öтисö кö радейтö, мöдсö мустöмтö. Öтисö кö пыдди пуктö, мöдсö увтыртö. Тi онö вермöй кесъявны Енлы, кесъяланныд кö озырлунлы». 14 Тайöс кывлiсны фарисейяс. Найö сералiсны Исусöс, öд налы вöлi муса озырлуныс. 15 Исус шуис налы: «Йöз водзын тi петкöдланныд асьнытö веськыда олысьясöн, но Енмыс тöдö тiянлысь сьöлöмнытö. Мый йöзыс донъялöны вылö, сiйö Енмыслы зывöк». 16 «Индöдыс да пророкъяс вöлiны Иоанöдз. Öнi юöртöны Енлöн Юралöм йылысь, да быдöн ёна зiльö пырны сэтчö. 17 Индöдысь öти чуттор вошöм дорысь енэжыс да муыс öдйöджык бырас. 18 Гöтырсö эновтысь да мöдкöд гöтрасьысь гозъя олöм пежалö. Юксьöм аньöс гöтырö босьтысь тшöтш пежалö». 19 «Вöлi озыр морт. Сiйö новлiс дона мича паськöм да быд лун лышкыда гажöдчис. 20 Лазар нима корысь куйлiс сылöн дзиръя дорын да виччысис, оз-ö вичмы сылы озыр мортлöн пызан вывсьыс гылалöм торпыригыс. Лазарлöн кучикыс ставнас вöлi лöмöсь, весиг понъяс волывлiсны нювны лöмсö. 22 Лазар кулi, и анделъяс нуисны сiйöс Öвраам дiнö. Кулiс тшöтш озыр морт, и сiйöс дзебисны. 23 Адын мучитчигöн озыр морт лэптiс синсö да аддзис ылынкодь Öвраамöс да сы дорысь Лазарöс. 24 Озыр морт горöдiс: "Öвраам батьöй, ло бур сьöлöма ме дiнö! Мöдöд Лазарöс, мед кöтöдас чунь помсö да кöдзöдас менсьым кывйöс, öд ме мучитча танi би пытшкас". 25 Öвраам шуис: "Пиукöй, тöд вылад уськöд: тэ босьтiн нин бурсö, а Лазарлы лёкыс уси. Öнi сiйö сьöлöмсö бурмöдö танi, а тэ мучитчан. 26 Таысь öтдор миянöс торйöдö ыджыд пыдöстöмин – тадзи миянсянь тiян дiнö кöсйысьяс вуджны оз вермыны, тшöтш тiянсянь миян дiнö оз вермыны вуджны". 27 Сэки озыр морт шуис: "Кора тэнö, Öвраам батьöй, мöдöд сiйöс менам бать керкаö, 28 мед öлöдас менсьым витнан вокöс тайö мучитчанiнас веськалöмысь". 29 Öвраам шуис сылы: "Налöн эм Мöисей да пророкъяс, мед найöс кывзасны". 30 Сiйö шуис: "Оз кывзыны, Öвраам батьöй. Но найö бергöдчасны мыжъяссьыныс, локтас кö на дiнö кодкö кулöмаясысь". 31 Сэки Öвраам шуис сылы: "Мöисейöс да пророкъясöс кö оз кывзыны, найö оз эскыны весиг кулöмаясысь ловзьысьлы"».
1 Исус висьталiс велöдчысьяслы: «Ыштöдöмъяслы колö локнысö, но курыд шог сылы, код пыр локтöны ыштöдöмъясыс! 2 Бурджык сылы, сьылiас кö ыджыд изки öшöдасны да шыбитасны саридзö, тайö ичöтъясысь öтикöс ыштöдöм дорысь. 3 Видзчысьöй таысь! Вокыд кö мыж вöчас тэныд паныд, öлöд сiйöс. Ассьыс мыжмöмсö кö восьтас, прöстит сiйöс. 4 Сизимысь кö луннас тэ водзын мыжмас да сизимысь кö тэ дiнö локтöмöн шуас: "Ме мыжа", прöстит сiйöс». 5 Апостолъяс шуисны Господьлы: «Содты миянлы эскöмсö». 6 Господь шуис: «Лоас кö тiян эскöмныд горчица тусь ыджда, верманныд шуны тайö пуыслы: "Нетшыштчы вужнад да вужъясь саридзас" – и сiйö кывзысяс тiянлысь». 7 «Гöрöм бöрын либö пемöсъясöс видзöм бöрын кö кесйöгныд локтас, шуанныд-ö сылы: "Медводз пуксьы да сёй". 8 Дерт, онö. Тi шуанныд: "Дасьты меным сёян-юан, вöнясь да кесъяв меным. А меным кесъялöм бöрын ачыд верман сёйны-юны". 9 Кесйöг кö вöчö тшöктöм серти, сэки сiйöс оз аттьöавлыны. 10 Тадзи тшöтш тi, вöчанныд кö тшöктöм серти, вöчöм бöраныд шуöй: "Ми сöмын кесйöгъяс. Мый колö вöлi вöчны, ми вöчим"». 11 Ерусалимö мунiгöн Исус мунiс Самария да Галилея муяс пыр. 12 Öти сиктö воигöн Сiйöс паныдалiсны проказаöн висьысь дас морт. Ылö сувтöмöн 13 найö горзiсны: «Исус, Велöдысь, ло бур сьöлöма миян дiнö!» 14 Исус видзöдлiс на вылö да шуис: «Мунöй да петкöдлöй асьнытö попъяслы». Мунiганыс найö сöстöммисны. 15 Ассьыс бурдöмсö казялöм бöрын öти косiс Енмöс гораа ошкигтырйи. 16 Сiйö кымынь уськöдчис Исус водзö да аттьöалiс Сiйöс. Тайö мортыс вöлi Самарияысь. 17 Исус юалiс: «Эз öмöй даснаныс сöстöммыны? Кöнöсь нö öкмысыс? 18 Тайö бокыса мортысь кындзи некод эз лок ошкыны Енмöс». 19 Исус шуис сылы: «Чеччы да мун. Эскöмыд мездiс тэнö». 20 Фарисейяс юалiсны, корджык воас Енлöн Юралöмыс. Исус вочавидзис: «Енлöн Юралöмыс оз во тыдалана ногöн. 21 Он вермы шуны: "Видзöд, сiйö танi" либö "Сiйö сэнi". Енлöн Юралöмыс öд тiян пытшкын». 22 Исус шуис велöдчысьясыслы: «Воас кад, кор тi кöсъянныд аддзывны Морт Пилöн лунъясысь öтиöс, но онö аддзылöй. 23 Тiянлы кö шуасны: "Сiйö танi", либö шуасны: "Сiйö сэнi", энö мунöй да энö вöтчöй на бöрся. 24 Енэж öтар помсяньыс мöдарöдзыс югнитысь чардби моз Морт Пи тыдовтчас Аслас лунö. 25 Но таöдз Сылы ковмас нуны уна сьöкыд да öтдортöм öнiя олысьяссянь. 26 Кыдзи вöлi Ной лунъяс дырйи, сiдзи лоö Морт Пи локтiгöн. 27 Ковчегö Нойлöн пыртöдз йöзыс сёйисны-юисны, гöтрасисны да верöс сайö мунiсны. Сэки ыджыд ойдöм дырйи ваыс пöдтiс ставнысö. 28 Тадзи вöлi тшöтш Лот лунъясö: йöзыс сёйисны-юисны, ньöбасисны-вузасисны, кöдзисны да керкаяс лэптiсны. 29 Содом карысь Лотлöн петан лунö енэжсянь киссис тэгъя биа зэр да бырöдiс ставнысö. 30 Тадзи лоас Морт Пилöн петкöдчан лунö. 31 Кодi сiйö лунö лоас керка вылас, мед оз пыр керкаас босьтны мыйкö. Кодi лоас видз-му вылас, мед оз кос гортас. 32 Энö вунöдöй, мый лои Лот гöтыркöд. 33 Кодi зiльö видзны ассьыс олöмсö, воштас сiйöс. Ассьыс олöмсö воштысь видзас сiйöс. 34 Висьтала тiянлы: сiйö войö öти вольпасьын лоасны кыкöн: öтисö босьтасны, мöдсö колясны. 35 Öтлаын пондасны изны кык ань: öтисö босьтасны, мöдсö колясны. 36 Видз-му вылын лоасны кыкöн: öтисö босьтасны, мöдсö колясны». 37 «Кöнi тайö лоö, Господьöй?» – юалiсны велöдчысьясыс. Сiйö вочавидзис: «Кöнi шой, сэтчö чукöртчасны кутшъяс».
1 Исус висьталiс пыр кевмысьöм йылысь велöданвисьт: 2 «Öти карын вöлi ёрдысь, сiйö Енсьыс эз пов да йöзысь эз яндысь. 3 Сiйö карас олiс дöва, кодi волывлiс ёрдысь дiнö да корис: "Дорйы менö дзескöдысьысь". 4 Ёрдысь дыр эз босьтчы дорйынысö. Сэсся шуис: "Дерт, ме Енсьыс ог пов да йöзысь ог яндысь. 5 Но тайö дöваыс дзикöдз менö дöзмöдiс – ковмас дорйыны. Ог кö дорйы, бурöн ог мын сыысь"». 6 Господь шуис: «Кыланныд, мый шуö шогмытöм ёрдысь? 7 А Енмыс öмöй оз дорйы Ассьыс бöрйöмаяссö, кодъяс лун и вой корöны отсöгсö Сылысь? Сёрмас öмöй Сiйö сетны отсöгсö? 8 Висьтала тiянлы: Сiйö регыдöн доръяс найöс. Но аддзас-ö Морт Пи му вылысь татшöм эскöмсö локтöм бöрас?» 9 Асьнысö веськыда олысьö пуктысьяслы да мукöдöс увтыртысьяслы Исус висьталiс татшöм велöданвисьт: 10 «Кык морт пырисны крамö кевмысьны: öтиыс вöлi фарисей, мöдыс – вот перйысь. 11 Фарисей сувтöмöн кевмысис вомгорулас: "Енмöй, аттьöала Тэнö, мый ме абу мукöдыс кодь: ог горшась, ог пöръясь, гозъя олöм ог пежав. Ме абу тайö вот перйысьыс кодь. 12 Видзала вежоннас кыкысь, ставсьыс дасöд юкöнсö сета Енлы". 13 А вот перйысь сулалiс бокын да весиг синсö эз лысьт лэптывны енэжланьыс, сöмын морöсас кучкалöмöн шуалiс: "Енмöй, ло бур сьöлöма ме дiнö, мыжа морт дiнö!" 14 Висьтала тiянлы: Ен водзын веськыдöн мунiс гортас вот перйысь, эз фарисей. Öд асьсö вылö пуктысьöс лэдзасны, асьсö улö пуктысьöс кыпöдасны». 15 Исус дiнö вайöдiсны посни челядьöс, медым Сiйö инмöдчылiс на дiнö. Велöдчысьяс аддзисны тайöс да пондiсны шуасьны вайöдысьяс вылö. 16 Исус корис челядьöс Ас дiнас да шуис: «Лэдзöй челядьсö локны Ме дiнö. Энö кутöй найöс. Енлысь Юраланiнсö öд на коддьöмлы лöсьöдöма. 17 Веськыда висьтала тiянлы: кодi оз сибöд Енлысь Юралöмсö кага моз, сiйö оз пыр Енлöн Юраланiнö». 18 Öти юралысь юалiс Исуслысь: «Бур Велöдысьöй, мый меным колö вöчны, мед вичмис меным помтöм олöм?» 19 Исус вочавидзис: «Мыйла тэ шуан Менö бурöн? Некод абу бурыс, сöмын Енмыс бур. 20 Тэ öд тöдан тшöктöмъяссö: гозъя олöмтö эн пежав, эн ви, эн гусясь, эн пöръясь, пыдди пукты ассьыд бать-мамтö». 21 Юралысь шуис: «Том кадсянь ме ола тайö тшöктöмъяс сертиыс». 22 Тайöс кылöм бöрын Исус шуис сылы: «Öтитор оз тырмы тэныд: вузав ставсö, мый тэнад эм, да сьöмсö сет гöльяслы. Сэки тэныд енэжын озырлуныс вичмас. Сэсся лок Ме бöрся». 23 Тайöс кылöм бöрын юралысь шогö усис, öд сiйö вöлi зэв озыр. 24 Исус аддзис юралысьлысь шогö усьöмсö, сэсся шуис: «Кутшöм сьöкыд озырлы пырны Енлöн Юраланiнö! 25 Озырлы Енлöн Юраланiнö пырöм дорысь верблюдлы кокньыдджык мунны ем пысöд». 26 Тайöс кылысьяс юалiсны: «Кодi нö вермас мездмынысö?» 27 Исус шуис: «Мортлы вермытöмыс – вермана Енлы». 28 Сэки Петыр шуис: «Ми ставсö эновтiм да мунiм Тэ бöрся». 29 Исус шуис налы: «Веськыда висьтала тiянлы: кодi Енлöн Юралöм вöсна коляс керкасö, бать-мамсö, чой-воксö, гöтырсö, ныв-писö, 30 сылы тайö олöмас на уна пöвстöн бöр воас, нöшта локтан нэмас сылы помтöм олöм вичмас». 31 Исус корис дас кыкнан велöдчысьсö да шуис налы: «Öнi ми мунам Ерусалимö. Сэнi инас пророкъяслöн Морт Пи йылысь став гижöмаыс. 32 Сiйöс сетасны ентöдтöмъяс киö. Найö сераласны, увтыртасны да сьöлаласны Сiйöс. 33 Чорыда нöйтасны, сэсся виасны, но коймöд луннас Сiйö ловзяс». 34 Велöдчысьяслы тайö вöлi гöгöрвотöм, кывъясыс вöлiны налы пöдсаöсь. Найö эз вермыны гöгöрвоны Исуслысь висьталöмсö. 35 Исус матыстчис Ерикон карлань. Туй дорас пукалiс синтöм корысь морт. 36 Сiйö кылiс йöзлысь сы дортi мунöмсö да юалiс: «Мый тайö?» 37 Сылы висьталiсны, Назаретса Исус пö локтö. 38 Сэки синтöм горöдiс: «Исус, Давид Пи! Ло бур сьöлöма ме дiнö!» 39 Исус водзвылын мунысьяс öлöдiсны синтöмöс горзöмсьыс, но сiйö ёнджыка на пондiс горзыны: «Давид Пи, ло бур сьöлöма!» 40 Исус сувтiс да тшöктiс вайöдны синтöмсö, сэсся юалiс сылысь: 41 «Мый тэ кöсъян?» Сiйö вочавидзис: «Господьöй, кöсъя аддзыны». 42 Исус шуис: «Аддзы. Эскöмыд мездiс тэнö». 43 Синтöм дзик пыр кутiс аддзыны да Енмöс ошкигтыр мунiс Исус бöрся. Тайöс аддзöм бöрын став йöзыс аттьöалiсны-ошкисны Енмöс.
1 Ериконö воöм бöрын Исус мунiс кар пырыс. 2 Сэнi олiс Заккей нима озыр морт, вот перйысьяслöн юралысьыс. 3 Сiйö ёна кöсйис аддзывны Исусöс да тöдмавны, кодi Сiйö сэтшöмыс. Но ичöт тушаыс вöсна йöз сайсяньыс эз вермы аддзынысö. 4 Заккей котöртiс водзö да кавшасис пу вылö, медым аддзыны Исусöс. Буретш сiйö туйöдыс локтö вöлi Исус. 5 Пу весьтö воигöн Исус видзöдлiс вывлань, аддзис Заккейöс да шуис: «Заккей, лэччы öдйöджык. Талун Меным колö лоны тэ ордын». 6 Заккей тэрмасьöмöн лэччис да долыдпырысь сибöдiс Исусöс гортас. 7 Тайöс аддзылысьяс шуасисны, мыжа морт ордö пö мунiс. 8 Заккей сувтiс да шуис: «Господьöй, овмöслысь джынсö сета гöльяслы да кодлысь ылöдлöмöн босьтi, сылы нёль пöвстöн вешта». 9 Исус шуис сылы: «Талун воис мездмöм тайö керкаас. Öд сiйö тшöтш Öвраам пи. 10 Морт Пи локтiс корсьны да мездыны вошöмаöс». 11 Кывзысьяслы Исус висьталiс нöшта öти велöданвисьт, öд Сiйö матыстчис Ерусалимлань, и унаöн чайтiсны, мый регыд нин воас Енлöн Юралöмыс. 12 Исус висьталiс: «Öксы рöдысь öти морт мöдöдчас ылi муö, медым сэнi öксы ним босьтны да бöр локны аслас муö öксыöн. 13 Сiйö корас ас дорас дас кесйöгöс, быдöнлы сетас зарни сьöм да шуас: "Менам локтöдз тайö сьöмсö уджö бергöдöй". 14 Ас войтырыслы тайö мортыс вöлi мустöм, та вöсна бöрсяньыс найö мöдöдасны юöртысьясöс висьтавны, огö пö кöсйöй, медым сiйö вöлi миян öксыöн. 15 Öксыöн локтöм бöрын сiйö тшöктас корны кесйöгъяссö, кодъяслы сетлiс сьöмсö. Кöсъяс тöдмавны, уна-ö найö содтöд босьтiсны. 16 Öти локтас да шуас: "Ыджыдöй, тэнад зарни сьöмыд вайис содтöд дасöс". 17 Öксы шуас: "Бура вöчин. Тэ бур кесйöг. Ичöтас тэ эскана вöлiн, дас карöн веськöдлыны кутан". 18 Локтас мöд кесйöг да шуас: "Ыджыдöй, тэнад зарни сьöмыд вайис содтöд витöс". 19 Сылы öксы шуас: "Вит карöн веськöдлыны кутан". 20 Локтас коймöд кесйöг да шуас: "Ыджыдöй, со, тэнад сьöмыд, чышъянö гартыштöмöн видзи сiйöс. 21 Ме полi тэысь, тэ öд чорыд морт: босьтан, мый эн пуктывлы, да вундан, мый эн кöдзлы". 22 Öксы шуас сылы: "Шогмытöм кесйöг! Аслад кывъясыд серти ме мыжда тэнö. Тэ тöдiн, мый ме чорыд морт, босьта, мый эг пуктывлы, да вунда, мый эг кöдзлы. 23 Мыйла сьöмчукöртанiнö эн пукты менсьым сьöмöс, локтöм бöрам эськö содтöдöн босьтi?" 24 Öксы шуас сыкöд сулалысьяслы: "Мырддьöй сылысь сьöмсö да сетöй дас сьöмаыслы". 25 Найö шуасны: "Ыджыдöй, сылöн эм нин дас сьöмыс". 26 Öксы шуас: "Висьтала тiянлы: кодлöн эм, сылы сетасны. Кодлöн абу, сылысь бöръясö босьтасны. 27 Меным паныд мунысьясöс, менам юралöмлы паныд сувтысьясöс вайöдöй татчö да виöй найöс менам син водзын"». 28 Тайöс висьталöм бöрын Исус мунiс водзö Ерусалимлань. 29 Олив керöсын сулалысь Виффагия да Вифания сиктъяслань матыстчигöн Исус мöдöдiс Ассьыс кык велöдчысьсö 30 да шуис: «Мунöй тайö сиктас. Сэтысь аддзанныд домалöм том осёлöс, сы вылö некод на эз пуксьыв. Разьöй сiйöс да вайöдöй татчö. 31 Юаласны кö, мыйла разянныд, вочавидзöй, мый сiйö колö Господьлы». 32 Мöдöдöмаяс мунiсны да аддзисны: ставыс вöлi Исуслöн висьталöм серти. 33 Том осёлöс разиганыс видзысьыс юалiс: «Мыйла разянныд?» 34 Велöдчысьяс вочавидзисны: «Сiйö колö Господьлы». 35 Том осёлöс вайöдiсны Исус дiнö. Сэсся шлапкисны осёл вылö паськöмнысö да отсалiсны Исуслы пуксьынысö. 36 Кор Сiйö мунiс осёл вылын, йöзыс вольсавлiсны паськöмнысö туй вылас. 37 Кор Исус матыстчис Олив керöсысь лэччанiнö, став Сылöн велöдчысьыс кыпыда да гора шыöн пондiсны ошкыны Енмöс став аддзылöм шензьöданаторсьыс. 38 Найö шуалiсны: – Бурсиöма Господь нимöн локтысь Öксыöс! Лöнь олöм енэж вылын, ошкöм Медвылыссалы! 39 Йöз чукöрысь фарисейясысь кодсюрö шуисны Исуслы: «Велöдысь, öлöд велöдчысьястö!» 40 Исус воча шуис: «Висьтала тiянлы: найö кö ланьтасны, изъяс шыасясны». 41 Ерусалимлань матыстчигöн Исус видзöдлiс кар вылас да бöрдöмöн 42 шуалiс: «Тöдiн кö эськö тэ талун, мый вайö тэныд лöнь олöмсö! Öнi тайö тупкыса тэнад синлы. 43 Воас лун, кор тэныд паныд мунысьяс лэптасны тэ гöгöр тымöд, кытшаласны тэнö да быд боксянь дзескöдасны. 44 Тэнö жугöдасны дзоньнас, олысьястö виаласны – из вылö из оз кольны, öд тэ эн кöсйы тöдны тэ дiнö Енлысь волöмсö». 45 Исус пырис крамö да пондiс вöтлавны сэтысь вузасьысь-ньöбасьысьясöс. 46 Сiйö шуис налы: «Гижöма: "Менам керкаöй – кевмысян керка". А тi сыысь вöчинныд лёк вöчысьяслы дзебсянiн». 47 Исус быд лун велöдiс крамын. Аркирейяс, Индöдö велöдысьяс да веськöдлысьяс кöсйисны вины Сiйöс. 48 Сöмын эз тöдны, кыдзи тайöс вöчны, öд став йöзыс вешйывтöг кывзiсны Исусöс.
1 Öтчыд Исус велöдiс йöзсö крамын, висьталiс налы Бур Юöр. Аркирейяс, Индöдö велöдысьяс да пöрысьяс матыстчисны Исус дiнö 2 да юалiсны: «Висьтав миянлы, кутшöм вынöн Тэ ставсö тайöс вöчан? Кодi Тэнö пуктiс тайöс вöчнысö?» 3 Исус воча шуис: «Ме тшöтш тiянлысь öтитор юала. Висьталöй Меным, 4 Иоанлöн пыртöмыс вöлi Енсянь али мортсянь?» 5 Найö ас костаныс сёрнитiсны: «Шуам кö: "Енсянь", Сiйö шуас: "Мыйла сылы энö эскöй?" 6 Шуам кö: "Мортсянь", йöзыс изъяласны миянöс, öд Иоанöс збыльысь пророкö пуктöны». 7 Найö вочавидзисны: «Огö тöдöй кодсянь». 8 Сэки Исус шуис: «Сiдзкö, Ме тшöтш ог висьтав, кутшöм вынöн ставсö тайöс вöча». 9 Сэсся Исус висьталiс йöзыслы татшöм велöданвисьт: «Морт пуктас аслас йöрö виноград, сэсся йöрсö виноград быдтысьяслы кöртымö сетас, ачыс дыр кад кежлö мунас. 10 Вотöс чукöртан кадö овмöс кутысь мöдöдас кесйöгсö босьтны вотöсысь ассьыс пайсö. Виноград быдтысьяс нöйтасны кесйöгсö да вöтласны сiйöс куш киöн. 11 Овмöс кутысь мöд кесйöгöс мöдöдас. Сiйöс тшöтш нöйтасны, лёкысь сераласны сы вылын да вöтласны куш киöн. 12 Мöдöдас нöшта коймöдöс. Сiйöс вирöдз дойдаласны да шыбитасны ортсö. 13 Сэки овмöс кутысь шуас: "Мый вöчны? Мöдöда ассьым муса пиöс, гашкö, сыысь яндысясны". 14 Писö аддзöм бöрын виноград быдтысьяс пондасны сёрнитны ас костаныс: "Тайö мортыслы вуджас овмöсыс. Мунам да виам сiйöс, медым овмöсыс миянлы коляс". 15 Найö петкöдасны сiйöс виноград йöрсьыс да виасны. Мый вöчас накöд овмöс кутысь? 16 Сiйö локтас, виноград быдтысьясöс виас, а йöрсö мукöдлы сетас». Тайöс кылысьяс шуисны: «Мед оз ло тадзи». 17 На вылö видзöдлöмöн Исус шуис: «Мый йылысь висьталöны Гижöдас тайö кывъясыс: – Изйыс, кодöс шыбитiсны керка лэптысьяс, лоис пельöс изйöн. 18 Кодi усяс тайö изйыс вылö, сiйö пасьмунас. Код вылö изйыс усяс, сiйöс лямöдас». 19 Индöдö велöдысьяс да аркирейяс гöгöрвоисны, мый велöданвисьтыс вöлi на йылысь. Найö кöсйисны босьтны Исусöс, но полiсны йöзсьыс. 20 Индöдö велöдысьяс да аркирейяс помся кыйöдiсны Исусöс. Найö мöдöдiсны Сы дiнö веськыда олысьö пуксьысь наян йöзöс, медым кыйны Сiйöс сёрниас да сетны Сiйöс юралысь киö. 21 Локтöмаяс шуисны Исуслы: «Велöдысь, ми тöдам, мый Тэ веськыда сёрнитан-велöдан. Тэ он видзöд морт вылö, а веськыда велöдан Енлöн туйö. 22 Висьтав, колö-ö кесарлы вот мынтыны?» 23 Налысь наянлунсö казялöмöн Исус шуис: «Мыйла тi зiлянныд кыйны Менö? 24 Петкöдлöй Меным динартö. Кодлöн сэнi чужöмыс-нимыс?» Найö вочавидзисны: «Кесарлöн». 25 Исус шуис налы: «Кесарлысь сетöй кесарлы, а Енлысь – Енлы». 26 Тадзи найö эз вермыны став йöз водзас кыйны Исусöс. Сылöн воча кывйысь найö чуймисны да ланьтiсны. 27 Исус дiнö локтiсны саддукейяс, кодъяс шуöны, ловзьöмыс пö абу. Найö юалiсны Исуслысь: 28 «Велöдысь, Мöисей гижöма, мый "ныв-питöм морт кö кулас, вокыслы колö босьтны сылысь гöтырсö да нюжöдны аслас вокыслысь рöдсö". 29 Сизим вок вöлi. Ыджыдыс гöтрасис, сэсся кулiс, ныв-пиыс эз коль. 30 Гöтырсö мöд вокыс босьтiс, сiйö тшöтш ныв-питöг кулiс. 31 Сэсся коймöдыс босьтiс. Тадзи сизимнанныс кулiсны ныв-питöг. 32 Медбöрын аньыс кулiс. 33 Ловзьöм бöрас кодлы сiйö гöтырöн лоас, öд сизим верöс сылöн вöлi?» 34 Исус вочавидзис: «Тайö муюгыдас йöзыс гöтрасьöны да верöс сайö мунöны. 35 А мöдаръюгыдас веськавны да ловзьыны шогманаяс оз гöтрасьны да верöс сайö оз мунны. 36 Найö оз нин кувны, а лоöны анделъяс кодьöсь. Найö Енлöн ныв-пи, öд найöс ловзьöдöма. 37 Сотчысь лежнöг дорын вöвлöмторйыс петкöдлö, мый кулöмаяс ловзьöны. Мöисей шуö Господьöс Öвраамлöн Енмöн, Исааклöн Енмöн да Яковлöн Енмöн. 38 Енмыс абу кулöмаяслöн Ен, Сiйö ловъяяслöн Ен. Сылы ставыс ловъя». 39 Индöдö велöдысьясысь кодсюрö шуисны: «Велöдысь, бура висьталiн». 40 Водзö найö эз нин лысьтны мыйкö юасьны Сылысь. 41 Исус шуис налы: «Мыйла нö шуöны, Кристос пö Давид пи? 42 Давид ачыс шуö Псалом небöгын: – Господь шуис менам Господьлы: "Пукав Менам веськыдладорын, 43 кытчöдз ог пукты Тэнад кок улö Тэныд паныд мунысьясöс". 44 Давид шуö Сiйöс Господьöн. Кыдзи нö Сiйö сылы пиöн лоö?» 45 Став йöзыс кывзiсны Исусöс. Сiйö шуис велöдчысьясыслы: 46 «Видзчысьöй Индöдö велöдысьясысь. Найö радейтöны кузь паськöмöн ветлыны, йöзаинын чолöмалöмъяс кывзыны, синагогаын водзын пукавны да гажöдчанiнын бурджыклаö пуксьыны. 47 Найö куштöны дöваяслысь керкасö да асьнысö петкöдлöм могысь дыр кевмысьöны. Но найöс лоö чорыда мыждöма».
1 Исус видзöдлiс да аддзис, кыдзи озыръяс пуктiсны сьöм чукöртан кудйö сьöм. 2 Сэтысь аддзис тшöтш гöль дöваöс. Сiйö пуктiс кудйö кык ыргöн сьöм. 3 Исус шуис: «Збыльысь висьтала тiянлы: тайö гöль дöваыс быдöнысь унджык пуктiс. 4 Ставныс унасьыс чуктöдiсны Енлы, а тайö дöваыс этшасьыс сетiс ставсö, мый сылöн вöлi кынöмпöт вылас». 5 Öткымынöн сёрнитiсны мича изъясöн да донаторъясöн мичмöдöм крам йылысь. Исус шуис: 6 «Воас лун, татчö из вылö из оз коль, ставсö жугöдасны». 7 Исуслысь юалiсны: «Велöдысь, кор ставыс тайö лоас? Мый серти ми тöдмалам сiйö кадсö?» 8 Исус шуис: «Видзчысьöй, мед эз ылöдны тiянöс. Унаöн Менам нимöн локтасны да шуасны, ме пö Сiйö, кадыс пö воис нин. Энö мунöй на бöрся. 9 Кор кыланныд тышъяс да шызьöмъяс йылысь, энö повзьöй. Тадзи водзджык колö лонысö, сöмын тайö абу на пом». 10 Сэсся Исус шуис налы: «Войтыр войтырлы паныд сувтас, муяс öта-мöдныслы паныд кыпöдчасны. 11 Уналаын лоас му вöрöм да тшыгъялöм, йöзсö суас кулан висьöм. Лоасны повзьöдана петкöдчöмъяс да енэжсянь индысьпасъяс. 12 Но таöдз пондасны вöтлысьны тiян бöрся да дзескöдны тiянöс, вайöдасны синагогаясö мыждыны, йöртасны дзескыдiнö да Менам ним вöсна нуöдасны öксыяс да юралысьяс водзö. 13 Тайö лоö, медым тi висьталiнныд Ме йылысь. 14 Кутöй тöд выланыд: водзвыв энö тöждысьöй, мый шуны асьнытö дорйöм могысь. 15 Ме сета тiянлы мывкыдлун сёрнитны. Мыжалысьяс оз вермыны паныд сувтны тiянлы да налы оз сюр воча кывйыс. 16 Бать-мамныд, вокныд, рöдвужныд да ёртъясныд вузаласны тiянöс, кодсюрööс весиг виасны. 17 Менам ним вöсна унаöн мустöмтасны тiянöс. 18 Но тöдöй, весиг юрси сi оз усь юр вывсьыныд. 19 Сьöкыдлунсö венöмöн тi мезданныд ловнытö». 20 «Кор тi аддзанныд, мый Ерусалимсö кытшалöма, тöдöй: матыстчис сiйöс бырöдöмыс. 21 Сэки Юдея муын олысьяс мед пышъясны керöсъясö. Кодi лоö кар пытшкас, мед петас сэтысь; кодi лоö кар саяс, мед оз пыр сэтчö. 22 Тайö мынтысян лунъяс, сэки став гижöмаыс инас. 23 Сiйö лунъясö ёна сьöкыд лоö нöбасьысьяслы да нёньöдчысьяслы. Тайö мусö ыджыд шог суас, да тайö войтыр вылас киссяс скöрлуныс. 24 Öтияс куласны шыпурт помысь, мöдъясöс мырдöн нуöдасны йöз муö. Ерусалим карсö индöм кадöдз пондасны талявны мукöд войтыр». 25 «Шондiын, тöлысьын да кодзувъясын тыдовтчасны индысьпасъяс. Саридз ыджыд шыöн гызяс, йöзыс му вылын шызясны да шöйöвошасны. 26 Енэжвыв вынъяс вöрзясны, сьöкыдлунъяс суöмысь йöзыс повзьöмнысла кутасны садьсö воштыны. 27 Сэки аддзасны кымöр вылын ыджыд вынöн да дзирдлунöн локтысь Морт Пиöс. 28 Кор ставыс тайö пондас инны, сэки веськöдчöй да лэптöй юрнытö, öд матысмö тiян мездмöмныд». 29 Исус висьталiс налы велöданвисьт: «Инжир пу да мукöд пуяс вылö кö видзöдам, аддзам: 30 корйыс кö потö, сiдзкö, гожöмыс матын. 31 Тадзи, ставсö тайöс аддзигöн тöдöй: Енлöн Юралöмыс матын нин. 32 Веськыда висьтала тiянлы: ставыс тайö лоас öнiя олысьяс дырйи на. 33 Енэжыс да муыс бырас, а Менам кывъясöй оз бырны. 34 Видзчысьöй, медым сьöлöмныд эз кöртась кодалöм-гажöдчöмас да олöм тöждас, öд ставыс тайö чорзьöдö тiянлысь сьöлöмнытö. Мед сiйö луныс оз су тiянöс виччысьтöг. 35 Öд кыдзи налькйö шедöны, сiдзи жö сiйö луныс суас став мувывса олысьсö. 36 Лоöй дасьöсь да пыр кевмысьöй, медым верминныд мынны ставсьыс, мый виччысьö тiянöс, да сувтны Морт Пи водзö». 37 Луннас Исус велöдiс крамын, а войяссö коллялiс Олив керöсын. 38 Йöзыс водз асывсяньыс волiсны крамö кывзыны Сiйöс.
1 Матыстчисны Шомтöм нянь сёян лунъяс, мöд ногöн кö, Ыджыд лун. 2 Аркирейяс да Индöдö велöдысьяс корсисны, кыдзи эськö вины Исусöс, сöмын полiсны йöзсьыс. 3 Сöтана пырис Искариот Иуда пытшкö, сiйö вöлi дас кык велöдчысьысь öти. 4 Иуда мунiс аркирейяс да крам видзысьяслöн веськöдлысьяс дiнö да сёрнитчис накöд Исусöс вузалöм йылысь. 5 Найö нимкодьпырысь кöсйысисны сетны сылы сьöм. 6 Иуда налы кыв сетiс, сэсся кутiс корсьны лöсялан кад, медым вузавны Исусöс йöз тöдлытöг. 7 Воис Шомтöм нянь сёян лун, кодыр колö вöлi начкыны Ыджыд лунся ыжöс. 8 Петырöс Иоанкöд мöдöдiг Исус шуис налы: «Мунöй, лöсьöдöй миянлы Ыджыд лунся сёян». 9 Найö юалiсны: «Кытчö шуан лöсьöднысö?» 10 Исус шуис: «Карас пыриганыд тiянлы паныдасяс гырничын ва нуысь морт. Мунöй да пырöй сы бöрся керкаас. 11 Керка кутысьыслы висьталöй: "Велöдысь юасьö, кутшöм вежöсын Аслас велöдчысьяскöд вермас сёйны Ыджыд лунся ыжöс". 12 Сiйö петкöдлас тiянлы вылыс судтасьыс вольсалöм ыджыд вежöс. Сэнi и лöсьöдöй». 13 Найö мунiсны да аддзисны: ставыс лои Исуслöн висьталöм серти. Найö дасьтiсны Ыджыд лунся сёян. 14 Кор воис кадыс, Исус пуксис дас кыкнан апостолыскöд сёйны. 15 Сiйö шуис налы: «Сьöкыдсö нутöдз Ме ёна кöсйи сёйны тiянкöд тайö Ыджыд лунся ыжсö. 16 Висьтала тiянлы: ог нин понды сёйны тайö сёянсö сiйö лунöдз, кор тайöс лоö пöртöма Енлöн Юраланiнын». 17 Исус босьтiс чаша да Енмöс аттьöалöмöн шуис: «Босьтöй да юöй татысь быдöн. 18 Висьтала тiянлы: Енлöн Юралöмыс вотöдз ог понды юны виноград юансö». 19 Сэсся Исус босьтiс нянь, Енмöс аттьöалöмöн чегис няньсö да велöдчысьяслы сетiгас шуис: «Тайö Менам Яй, кодöс лоö сетöма тiян вöсна. Вöчöй тайöс Менö казьтывлöм могысь». 20 Сёйöм бöрас босьтiс чаша да сiйöс сетiгас шуис: «Тайö чашаыс – Выль Йитöд, кöрталöма Менам Вирöн, сiйö киссьö тiян вöсна. 21 Со, Менö вузалысьлöн киыс Мекöд öти пызанысь судзöдö. 22 Дерт, Морт Пи мунö водзвыв лöсьöдöм туйöдыс. Но курыд шог Сiйöс вузалысьлы!» 23 Сэки велöдчысьяс пондiсны юасьны öта-мöдныслысь, кодi тайö на пиысь. 24 Велöдчысьяс вензисны ас костаныс, кодi на пиысь ыджыдджыкыс. 25 Исус висьталiс налы: «Öксыяс ыджыдалöны йöз вылын, юралысьяс бур вöчысь ним шедöдöны. 26 Но тi тадзи энö вöчöй. Тiян пиысь ыджыдыс мед лоас ичöт. Юралысь кö, мед лоас кесъялысьöн. 27 Пызан сайын пукалысьыс али кесъялысьыс ыджыдджык? Абу-ö пызан сайын пукалысьыс? Ме тiян пöвстын кесъялысь. 28 Тi энö эновтöй Менö сьöкыдлунъяс дырйи. 29 Та вöсна Ме сета тiянлы Юралöм, кыдзи Батьöй сетiс Меным. 30 Менам Юраланiнын тi понданныд сёйны-юны Мекöд öти пызан сайын да пуксянныд юралан пуклöсö мыждыны израильса дас кык чужанкотырöс». 31 Господь шуис: «Кылан, Симон! Сöтана корис шердйыны тiянöс шобдiöс моз. 32 Но Ме кевмыси тэ вöсна, медым эскöмыд эз быр. Кор тэ бергöдчан бöр, ёнмöд вокъястö». 33 Петыр шуис Исуслы: «Господьöй, Тэкöд ме дась пуксьыны дзескыдiнö, весиг кувны». 34 Исус вочавидзис: «Петыр, тэныд шуа: талун петук чукöсттöдз на тэ куимысь соссян, мый тöдан Менö». 35 Исус юалiс велöдчысьяслысь: «Кор Ме мöдöдлi тiянöс сьöмтöг, ноптöг да кöмтöг, тiянлы öмöй эз тырмывлы мыйкö?» Найö шуисны: «Ставыс вöлi». 36 Исус шуис налы: «Öнi мöдарö. Сьöмыд кö эм, босьт сiйöс сьöрсьыд, тшöтш ноптö босьт. Абу кö, вузав вылыс паськöмтö да ньöб шыпурт. 37 Висьтала тiянлы: Ме йылысь гижöма: "Сiйöс пуктiсны Индöдтöг олысьяс лыдö". Тайö гижöмыслы колö инны. Ме йылысь став шуöмыс öнi инö». 38 Найö шуисны: «Господьöй, танi кык шыпурт». Исус шуис: «Тырмас». 39 Карысь петöм бöрын Исус, кыдзи пыр вöчлiс, мöдöдчис Олив керöсö. Велöдчысьяс мунiсны Сы бöрся. 40 Сэтчö воöм бöрын Исус шуис налы: «Кевмысьöй, мед ыштöдöмыс эз вермы тiянöс». 41 Ачыс ылыстчис наысь из шыбитöм ылнаö да пидзöс вылас сувтöмöн кевмысис: 42 «Батьöй, кöсъян кö, вешты Ме дiнысь тайö чашасö. Сöмын мед лоас Тэнад кöсйöм серти, а оз Менам». 43 Сэки андел лэччис енэжсянь да ёнмöдiс Сiйöс. 44 Шогыскöд вермасигöн Исус ёнджыка на кевмысис. Сылöн пöсьыс вирöн войталiс муö. 45 Кевмысьöм бöрас Исус чеччис да локтiс велöдчысьяс дiнас. Аддзис: найö шогысла унмовсьöмаöсь. 46 Сэки шуис налы: «Мый тi узянныд? Чеччöй, кевмысьöй, мед ыштöдöмыс эз вермы тiянöс». 47 Исуслöн сёрнитiгкостi сэтчö локтiсны йöз. Найöс вайöдiс Иуда, дас кык велöдчысьысь öти. Сiйö матыстчис Исус дiнö, медым окыштны Сiйöс. Öд Иуда шуöма локтöмаяслы, кодöс пö окышта, Сiйö – Исус. 48 Исус шуис сылы: «Иуда, окыштöмнад тай вузалан Морт Пиöс». 49 Исускöд вöлысьяс гöгöрвоисны, мый водзö лоö, сэсся шуисны Сылы: «Господьöй, перйыны-ö шыпуртнымöс?» 50 На пиысь öти керыштiс аркирей кесйöглысь веськыд пельсö. 51 Исус шуис: «Тырмас! Дугдöй!» Кесйöглы пеляс инмöдчылöмöн Исус бурдöдiс сiйöс. 52 Сэсся аркирейяслы, крам видзысьяслöн веськöдлысьяслы да пöрысьяслы, кодъяс локтiсны кутны Сiйöс, шуис: «Лёк вöчысьöс моз зорйöн-шыпуртöн локтiнныд босьтны Менö. 53 Ме быд лун вöлi тiянкöд крамын, но тi энö лэптылöй кинытö Ме вылö. Öнi тiян кадыс да пемыдыслöн ыджыдалöмыс». 54 Исусöс кутысьяс вайöдiсны Сiйöс аркирей керкаö. Петыр бöрö кольччöмöн вöтчис на бöрся. 55 Йöр пытшкас öзтiсны бипур, йöзыс пуксялiсны сы гöгöр. Петыр тшöтш пуксис. 56 Öти кесйöг ань аддзис Петырöс бипур дорысь да сы вылö сюся видзöдлöмöн шуис: «Тайö мортыс тшöтш Сыкöд вöлi». 57 Петыр соссис: «Ме ог тöд Сiйöс, дона аньöй». 58 Недыр мысти мöд морт аддзис сiйöс да шуис: «Тэ дзик на пиысь». Петыр шуис сылы: «Абу». 59 Час мысти нöшта öти морт эскöдöмöн шуис: «Тайö мортыс збыльысь вöлi Сыкöд. Сiйö тшöтш Галилеяысь». 60 Петыр шуис: «Бур мортöй, ог гöгöрво, мый висьталан». Тайöс шуигöн кылiс петуклöн чукöстöм. 61 Бергöдчылöмöн Господь видзöдлiс Петыр вылö. Сэки Петырлы уси тöд вылас Господьлöн шуöмыс: «Петук чукöсттöдз на тэ куимысь соссян Меысь». 62 Петыр петiс да курыда бöрддзис. 63 Исусöс видзысьяс сералiсны-лёкöдiсны да нöйтiсны Сiйöс. 64 Сылысь чужöмсö вевттьöмöн найö кучкалiсны Сылы чужöмас да шуалiсны: «Висьтав, Пророк, кодi кучкис Тэнö?» 65 Сэсся ёна на омöльтiсны Сiйöс. 66 Асывнас чукöртчисны пöрысьяс, аркирейяс да Индöдö велöдысьяс. Исусöс вайöдiсны веськöдлан котыр водзö. 67 Найö шуисны: «Висьтав миянлы, Тэ-ö Кристос?» Исус воча шуис: «Висьтала кö тiянлы, тi онö эскöй. 68 Юала кö, онö вочавидзöй да онö лэдзöй Менö. 69 Öнiсянь Морт Пи пондас пукавны Ставсöвермысь Ен веськыдладорын». 70 Ставöн шуисны: «Сiдзкö, Тэ Ен Пи?» Исус вочавидзис: «Тi асьныд тайöс шуанныд». 71 Сэки найö шуисны: «Висьталысьяс миянлы оз нин ковны, ми асьным кылiм тайöс Сы вомсянь».
1 Сэки чукöртчöмаяс чеччисны да нуöдiсны Исусöс Пилат дiнö. 2 Найö мыжалöмöн висьталiсны: «Ми аддзылiм: тайö Мортыс шызьöдö миянлысь войтырöс, öлöдö кесарлы вот мынтöмысь, асьсö ыдждöдлö öксыöн да Кристосöн». 3 Пилат юалiс Исуслысь: «Тэ-ö юдейяслöн Öксыыс?» Исус вочавидзис: «Тэ шуан». 4 Пилат шуис аркирейяслы да став йöзыслы: «Ог аддзы помкасö, мед мыждыны тайö Мортсö». 5 Но найö öтарö мыжалiсны: «Велöдöмнас Сiйö шызьöдö йöзсö став Юдея му пасьтала. Пондiс Галилеяын, öнi татчö воис». 6 Галилея йылысь кылöм бöрын Пилат юалiс: «Сiйö öмöй Галилеяысь?» 7 Кор тöдмалiс, мый Исус Ирöд веськöдлан муысь, мöдöдiс Сiйöс сы дiнö. Буретш сiйö лунъясö Ирöд вöлi Ерусалимын. 8 Исусöс аддзöмысь Ирöдлы нимкодь лои, öд сiйö важöн нин кöсйис аддзывны Сiйöс. Ирöд уна кывлiс Сы йылысь да виччысис аддзывны шензьöданатор. 9 Ирöд ёна юасис Исусöс, но Сiйö воча кыв эз шу. 10 Сэнi сулалысь аркирейяс да Индöдö велöдысьяс öтарö мыжалiсны Исусöс. 11 Ирöд аслас шыпуртаяскöд сералiс-лёкöдiс Исусöс, пасьтöдiс Сiйöс озыр паськöмö да бöр мöдöдiс Пилат дiнö. 12 Водзынсö Ирöд да Пилат лöгалiсны öта-мöд вылас, но тайö лунсяньыс найö кутiсны ёртасьны. 13 Пилат чукöртiс аркирейясöс, юралысьясöс да войтырсö, 14 сэсся шуис налы: «Тi вайöдiнныд тайö Мортсö ме водзö да мыжаланныд Сiйöс йöзсö шызьöдöмысь. Ме тiян дырйи юаси Сiйöс да эг аддзы мыжсö. Сiйö абу мыжа, мыйысь тi Сiйöс мыжаланныд. 15 Ме мöдöдi Сiйöс Ирöд дiнö, но Ирöд тшöтш абу аддзöма Сылысь мыжсö. Сiйö эз вöч сэтшöм мыжсö, мыйысь эськö колö вины Сiйöс. 16 Тшöкта нöйтны, сэсся лэдза». 17 Быд во Ыджыд лунö йöз корöм серти Пилатлы колö вöлi лэдзны дзескыдiнысь öти мортöс. 18 Став йöзыс горöдiсны: «Вины Сiйöс! Лэдз миянлы Варавваöс!» 19 Варавва пукалiс дзескыдiнын карас зык лэптöмысь да мортöс виöмысь. 20 Пилат бара шыасис йöз дiнö, öд кöсйис мездыны Исусöс. 21 Но найö горöдiсны: «Тувъяв! Тувъяв Сiйöс!» 22 Пилат коймöдысь шыасис на дiнö: «Мый лёксö Сiйö вöчис? Ме ог аддзы сэтшöм мыжсö, мыйысь эськö колö вины Сiйöс. Тшöкта нöйтны, сэсся лэдза». 23 Йöзыс лёкысь горзiсны, тшöктiсны тувъявны Исусöс. Йöзыслöн да аркирейяслöн горзöмыс венiс. 24 Пилат шуис вöчны на ног. 25 Налöн корöм серти сiйö лэдзис дзескыдiнысь зык лэптысьöс, кодi виис тшöтш мортöс. Исусöс сетiс тувъявны, тадзи могмöдiс йöзыслысь кöсйöмсö. 26 Исусöс нуöдiгöн паныдасис киринеяса Симон, сiйö локтö вöлi видз-му вылысь. Сы вылö пуктiсны крестсö да тшöктiсны мунны Исус бöрся. 27 Уна йöз мунiс Исус бöрся. Аньяс сыркъялöмöн бöрдiсны Сы вöсна. 28 На дiнö бергöдчöмöн Исус шуис: «Ерусалимса аньяс, энö бöрдöй Ме вöсна. Бöрдöй ас вöснаныд да ныв-пиныд вöсна! 29 Воасны лунъяс, кор шуасны: "Шудаöсь нöбасьлытöмъяс, кага вайлытöмъяс да морöснас нёньöдлытöмъяс". 30 Сэки шуасны керöсъяслы: "Усьöй миян вылö!" Мылькъяслы шуасны: "Вевттьöй миянöс!" 31 Тадзи кö вöчöны веж пуыскöд, косыскöд мый лоас!» 32 Исускöд тшöтш вины нуöдiсны кык лёк вöчысьöс. 33 Воисны Юр лы нима керöсö. Сэнi тувъялiсны Исусöс да Сыкöд орччöн лёк вöчысьясöс: öтисö веськыдладорас, мöдсö шуйгаладорас. 34 Исус кевмис: «Батьöй, прöстит тайö йöзсö, öд найö оз тöдны, мый вöчöны». Шыпуртаяс пудъясьöмöн юкисны Исуслысь паськöмсö. 35 Йöзыс сулалiсны да видзöдiсны. Юралысьяс накöд сералöмöн шуалiсны: «Мукöдöс мездiс – мед Асьсö öнi мездас, Сiйö кö Кристос, Енлöн бöрйöмаыс». 36 Сералiсны-лёкöдiсны Исусöс тшöтш шыпуртаяс. Найö матыстчöмöн мыччывлiсны Сылы шома вина 37 да шуалiсны: «Тэ кö юдейяслöн Öксы, мезды Асьтö». 38 Исус юр весьтын грек, латин да еврей кывйöн вöлi гижöма: «Тайö юдейяслöн Öксы». 39 Крестö тувъялöм лёк вöчысьясысь öтиыс Исусöс омöльтiгмоз шуалiс: «Тэ кö Кристос, мезды Асьтö да миянöс!» 40 Мöдыс öлöдiс сiйöс: «Тэ öмöй Енсьыс он пов? Тэнö öд Сы моз жö тувъялöма. 41 Миянöс веськыда мыждöма, асланым лёк вöчöмъясысь, а тайö Мортыс лёксö эз вöчлы». 42 Сэсся шуис Исуслы: «Господьöй, казьтышт менö, кор воан Аслад Юраланiнö!» 43 Исус шуис: «Веськыда висьтала тэныд: талун лоан Мекöд райын». 44 Лун шöр кадö пемдiс став му пасьталаыс, пемыдыс сулалiс куим часöдз. 45 Шондi югыдыс быри, крамын öшалысь дöраыс шöрипельö косяссис. 46 Исус ыджыд шыöн горöдiс: «Батьöй, Тэнад киö сета Ассьым лолöс!» Тайöс шуöм бöрын лолыс петiс. 47 Ставсö тайöс аддзöм бöрын шыпуртаяслöн веськöдлысь Енмöс ошкигтырйи шуис: «Тайö Мортыс збыльысь веськыда олысь вöлöма». 48 Став йöзыс, кодъяс вöлi чукöртчöмаöсь видзöдны ыджыд ворсöм, ставсö тайöс аддзöм бöрын морöсаныс кучкалiгтыр пондiсны мунавны. 49 Исуслöн тöдсаясыс ылiсянь видзöдiсны ставсö тайöс. Сэнi вöлiны тшöтш Галилеяысь Сыкöд ветлысь аньяс. 50 Сэнi вöлi Юдеяысь, Аримафея карысь Öсип нима морт. Тайö бур да веськыда олысь мортыс виччысис Енлысь Юралöмсö. Öсип вöлi веськöдлан котырысь, но паныд сулалiс Исусöс виöмлы. 52 Сiйö мунiс Пилат дiнö да корис Исуслысь шойсö. 53 Öсип босьтiс крест вылысь шойсö, гартыштiс дöраö да пуктiс кыртаö кералöм дзебанiнö, кытчö некодöс на эз дзеблыны. 54 Вöлi рыт, шойччан лунлы паныд. 55 Öсипкöд тшöтш вöлiны Галилеяысь Исускöд локтöм аньяс. Найö аддзылiсны, кыдзи пуктiсны Исуслысь шойсö дзебанiнö. 56 Дзебанiнысь воöм бöрын аньяс дасьтiсны чöскыд дука мавтасъяс, а шойччан лунö Индöд серти найö шойччисны.
1 Шойччан лун бöрын водз асывнас аньяс дасьтöм мавтасъясöн да накöд нöшта кодсюрöяс локтiсны дзебанiнö. 2 Найö аддзисны: изсö вöлi вештöма пыранiнсьыс. 3 Кор пырисны пытшкас, эз аддзыны Господь Исуслысь шойсö. 4 Аньяс шöйöвошисны. Виччысьтöг на водзö сувтiсны дзирдалан паськöма кык морт. 5 Повзьöмнысла аньяс копыртiсны юрнысö. Тайö кык мортыс шуисны налы: «Мый тi корсянныд ловъяöс кулöмаяс пöвстысь? 6 Сiйö танi абу. Сiйö ловзис. Уськöдöй тöд выланыд, мый Сiйö шулiс тiянлы Галилеяын на: 7 "Талы колö лоны: Морт Пиöс сетасны мыжаяс киö да тувъяласны крестö, но коймöд луннас Сiйö ловзяс"». 8 Сэки тöд вылас уси налы Исуслöн висьтавлöмыс. 9 Дзебанiнысь локтöм бöрын аньяс висьталiсны ставсö тайöс дас öти велöдчысьыслы, тшöтш мукöдыслы. 10 Тайö аньясыс вöлiны Магдала Марья, Иоанна, Яковлöн Марья мамыс да нöшта мукöд аньяс на. Аньяс юöртiсны лоöмтор йывсьыс апостолъяслы, 11 но найö эз эскыны, чайтiсны, мый лöсьöдлöны. 12 Петыр котöрöн уськöдчис дзебанiнö. Видзöдлiс пытшкас да аддзис сöмын дзебан дöраяссö. Петыр мунiс сэтысь тайö лоöмторсьыс ёна шензьöмöн. 13 Сiйö лунö Исуслöн кык велöдчысь мунiсны Эммаус нима сиктö, кодi вöлi Ерусалимсянь дас верст ылнаын. 14 Найö сёрнитiсны ас костаныс став тайö лоöмтор йывсьыс. 15 Сёрнитiганыс Ачыс Исус матыстчис да пондiс мунны накöд. 16 Но найö эз тöдны Сiйöс, синнысö вöлi пöртöма. 17 Исус юалiс налысь: «Мый йылысь сёрнитанныд, туй йöз? Мыйла тi жугыльöсь?» 18 На пиысь Клеоп нима вочавидзис: «Буракö, Тэ дзик öтнад Ерусалимö локтысьясысь он тöд, мый сэнi лои тайö лунъясö?» 19 Исус юалiс: «Мый лои?» Найö вочавидзисны: «Лёктор лои Назаретса Исускöд. Тайö Мортыс Ен водзын да йöз водзын кывнас и уджнас вöлi вына пророк. 20 Аркирейясным юралысьяскöд мыждiсны сiйöс да сетiсны тувъявны крестö. 21 Ми лача кутiм, мый Сiйö мездас Израильöс. Но тайö абу на ставыс. Талун коймöд лун нин лоöмторсяньыс. 22 Миян пиысь кодсюрö аньяс чуймöдiсны миянöс. Водз асывнас найö ветлöмаöсь дзебанiнас 23 да шойсö абу аддзöмаöсь сэтысь. Локтöм бöрас висьталiсны, аддзылiм пö анделъясöс. Анделъяс шуöмаöсь, Исус пö ловъя. 24 Миян пиысь кодсюрö тшöтш ветласны дзебанiнас да аддзасны, мый аньясыд збыль вöлöм висьталöны. Исустö сэтысь оз аддзыны». 25 Исус шуис налы: «Гöгöрвотöмöсь тай тi. Сьöкыда эсканныд пророк кывъясö. 26 Эз-ö тайö сьöкыдыс пыр ков мунны Кристослы да пырны Аслас дзирдлунö?» 27 Мöисей да пророк небöгъяссянь Исус пондiс гöгöрвоöдны налы став Гижöдсьыс Ас йывсьыс шуöмсö. 28 Найö матыстчисны сиктлань, кытчö мунiсны. Исус петкöдлiс, быттьö кöсйö водзö мунны. 29 Но найö эз лэдзны Сiйöс, шуалiсны: «Кольччы миянкöд. Луныс рытлань нёровтчö». Исус пырис накöд керкаö да кольччис сэтчö. 30 Сёйиганыс Исус босьтiс нянь, Енмöс аттьöалöмöн чегис няньсö да сетiс налы. 31 Сэки налöн синныс воссис, и найö тöдiсны Сiйöс. Тайö здукас Исус лои налы тыдавтöм. 32 Сэки найö шуисны: «Эз-ö сьöлöмным ыпъяв, кор Сiйö сёрнитiс миянкöд туй вылын да гöгöрвоöдiс миянлы Гижöдсö?» 33 Найö дзик пыр чеччисны да бöр мунiсны Ерусалимö. Сэнi аддзисны дас öтикнан велöдчысьсö да накöд тшöтш мукöдсö. 34 Велöдчысьяс шуисны воöмаяслы: «Господьным збыльысь ловзьöма! Сiйö петкöдчылöма Симонлы». 35 Тайö кыкыс висьталiсны, мый лои туйын, да кыдзи тöдiсны Исусöс нянь чегигас. 36 Сёрнитiганыс Ачыс Исус сувтiс на шöрö да шуис: «Лöнь олöм тiянлы!» 37 Повзьöмнысла найö мöвпыштiсны, мый тайö орт. 38 Исус шуис налы: «Мый тi поланныд? Мый тiянöс майшöдлö? 39 Видзöдлöй Менам ки-кок вылö, тайö Ме Ачым. Инмöдчылöй Ме дiнö, и тi асьныд аддзанныд. Öд ловлöн лы-яйыс абу, а Менам, видзöдлöй, эм». 40 Тайöс шуöм бöрын Сiйö петкöдлiс налы Ассьыс ки-коксö. 41 Найö ёна шензисны, нимкодьнысла эз вермыны эскыны. Исус юалiс налысь: «Эм-ö тiян мыйкö сёйыштны?» 42 Сылы сетiсны пöжалöм чери да малязi ма. 43 Сiйö босьтiс да налöн син водзын сёйис. 44 Сэсся Исус шуис налы: «Кор на Ме вöлi тiянкöд, Ме висьтавлi, мый инас ставыс, мый гижöма Ме йылысь Мöисей Индöдын, пророк гижöдъясын да псаломъясын». 45 Сэки Исус восьтiс налысь вежöрсö гöгöрвоны Гижöдъяс. 46 Сiйö шуис налы: «Тадзи гижöма: Кристослы колö мунны сьöкыдыс пыр, кувны да коймöд луннас ловзьыны, 47 сэсся колö юöртны Сы нимöн Ерусалимын и водзö быд кыла войтырлы мыжъясысь бергöдчöм да мыжъяс прöститöм йылысь. 48 Тi асьныд ставсö кывлiнныд да аддзылiнныд. 49 Ме мöдöда тiянлы Батьöйлысь кöсйысьöмасö. Тi кольччöй Ерусалимö, кытчöдз тiян вылö оз лэччы енэжсянь выныс». 50 Исус петкöдiс велöдчысьяссö Вифаниялань, сэсся кисö лэптöмöн бурсиис найöс. 51 Бурсиигмозыс Сiйö кутiс ылыстчыны наысь да кыпöдчыны енэжö. 52 Найö муöдзыс копыртчылiсны Сылы, сэсся ёна нимкодясигтыр локтiсны бöр Ерусалимö. 53 Енмöс ошкöмöн найö пыр вöлiны крамынöсь. Аминь.
1 Медводз вöлi Кыв. Кывйыс вöлi Енкöд. Кывйыс вöлi Ен. 2 Кывйыс водзысяньыс вöлi Енкöд. 3 Ставсö Сы пыр вöчöма. Сытöг немтор абу вöчöма. 4 Сы пытшкын вöлi олöм. Олöмыс йöзыслы вöлi югыдöн. 5 Пемыдас югдöдö югыдыс, эз пöдты сiйöс пемыдыс. 6 Ен мöдöдiс Иоан нима мортöс. 7 Сiйö локтiс висьтавны Югыдыс йылысь, медым быдöн эскис Югыдыслы. 8 Ачыс сiйö эз вöв югыдыс, сiйö локтiс висьтавны Югыдыс йылысь. 9 Збыль Югыдыс, быд мортöс Югдöдысь, локтiс муюгыдас. 10 Сiйö вöлi муюгыдас, Сы пыр вöчöма муюгыдсö, но муюгыдыс эз тöд Сiйöс. 11 Сiйö локтiс Ас йöз дiнас, но найö эз сибöдны Сiйöс. 12 Сiйöс сибöдысьяслы, Сылы эскысьяслы, Сiйö сетiс позянлун лоны Енлöн ныв-пиöн. 13 Найö чужисны эз вирсянь, эз морт кöсйöмсянь да верöс кöсйöмсянь, найö чужисны Енсянь. 14 Кывйыс лоис мортöн, Сiйö олiс миянкöд буралöм-збыльнас тыр. Ми аддзылiм Сылысь дзирдлунсö. Сöмын öтка Пиыслы вуджö татшöм дзирдлуныс Батьсяньыс. 15 Иоан гораа юöртлiс Сы йылысь: «Тайö дзик сiйö Мортыс, код йылысь ме висьтавлi, мый ме бöрся Локтысьыс меысь ыджыдджык, öд Сiйö меысь водзджык вöлöма». 16 Миянлы быдöнлы Сы озырлунысь вичмис буралöм вылö буралöм. 17 Индöдсö вöлi сетöма Мöисей пыр, а буралöмыс да збыльыс воис Исус Кристос пыр. 18 Йöзыс Енсö эз аддзывлыны, сöмын öтка Пиыс, Бать дiнас олысьыс, восьтiс Сiйöс миянлы. 19 Юдейяслöн веськöдлысьяс мöдöдiсны Ерусалимысь попъясöс да левитъясöс юавны Иоанлысь: «Кодi тэ?» 20 Иоан соссьытöг веськыда шуис: «Ме абу Кристос». 21 Сэки сылысь юалiсны: «Кодi нö тэ? Илля?» Сiйö шуис: «Абу». Найö бара юалiсны: «Пророк-ö тэ?» Сiйö вочавидзис: «Абу». 22 Сэки сылы шуисны: «Кодi нö тэ? Мый миянлы вочавидзны миянöс мöдöдысьяслы? Мый шуан ас йывсьыд?» 23 Иоан вочавидзис налы: «Ме овтöминын горзысьлöн шыыс: "Веськöдöй-шыльöдöй туйсö Господьлы". Тадзи коркö висьталiс Исай пророк». 24 Фарисейяссянь мöдöдöмаяс 25 юалiсны Иоанлысь: «Тэ кö абу Кристос, абу Илля, абу пророк, мыйла, сiдзкö, йöзсö пыртан?» 26 Иоан вочавидзис налы: «Ме пырта сöмын ваöн, но тiян пöвстын эм морт, кодöс тi онö тöдöй. 27 Сiйö ме бöрын локтö, но Сiйö меысь водзджык нин вöлöма. Ме ог шогмы разьны Сылысь кöмкот кöвсö». 28 Тайö вöлi Вифаварын, Йöрдан ю сайын, кöнi Иоан пыртлiс йöзсö. 29 Аскинас Иоан аддзис сы дiнö локтысь Исусöс да шуис: «Видзöдлöй, тайö Енлöн Баля. Сiйö вештö йöзлысь мыжъяссö. 30 Сы йылысь ме висьтавлi нин, мый ме бöрся локтö Морт, кодi меысь ыджыдджык, öд Сiйö меысь водзджык вöлöма. 31 Сiйöс ме эг тöдлы, но локтi ваöн пыртны, медым Израиль тöдмалiс Сiйöс». 32 Иоан веськыда висьталiс: «Ме аддзылi, кыдзи енэжсянь гулю моз лэччис Лов да кольччис Сы вылö. 33 Ме эг тöдлы Сiйöс, но ваöн пыртны менö Мöдöдысь шуис меным: "Кор Тэ аддзан, мый код вылö кö лэччас Лов да кольччас Сы вылö, буретш Сiйö кутас пыртны Вежа Лолöн". 34 Ме аддзылi тайöс да эскöда тiянöс: Сiйö – Ен Пи». 35 Мöд луннас Иоан аслас кык велöдчыськöд бара сулалiс ю дорын. 36 Локтысь Исусöс аддзигöн сiйö шуис: «Видзöдлöй, тайö Енлöн Баля!» 37 Тайöс кылöм бöрын кыкнан велöдчысьыс мöдöдчисны Исус бöрся. 38 Исус бергöдчылiс, аддзис Сы бöрся локтысьясöс да юалiс налысь: «Мый тiянлы колö?» Найö вочавидзисны: «Велöдысь, кöнi Тэ олан?» 39 Исус шуис налы: «Локтöй да видзöдлöй». Найö мунiсны, аддзисны Сылысь оланiнсö да кольччисны сэтчö лунтыр кежлö. Вöлi нёль час гöгöр. 40 Иоанлöн велöдчысьяс да Исус бöрся мунысьяс пиысь öтиыс вöлi Öндрей, Симон-Петырлöн вокыс. 41 Сiйö медводз корсис Симон воксö да висьталiс сылы: «Ми аддзим Мессияöс!» Мöд ногöн кö, тайö лоö Кристос. 42 Öндрей вайöдiс воксö Исус дiнö. Исус видзöдлiс сы вылö да шуис: «Тэ Симон, Ионалöн пи. Тэнад нимыд лоас Кифа». Сылöн вежöртасыс – из, мöд ногöн кö – Петыр. 43 Аскинас Исус мöдöдчис Галилея муö. Сэтысь аддзис Филипöс да шуис сылы: «Лок Ме бöрся». 44 Öндрей да Петыр моз Филип вöлi Випсаида карысь. 45 Филип аддзис Нафанаилöс да шуис сылы: «Ми аддзим Сiйöс, код йылысь вöлi висьталöма Мöисей Индöдын да пророк гижöдъясын. Тайö Назаретысь Исус, Öсиплöн пи». 46 Нафанаил шуис Филиплы: «Вермас-ö мыйкö бурыс лоны Назаретысь?» Филип вочавидзис: «Лок да ачыд видзöдлы». 47 Исус аддзис Сы дiнö локтысь Нафанаилöс да шуис сы йылысь: «Тайö збыльысь израильса морт, сiйö оз ылöдчы». 48 Нафанаил юалiс Сылысь: «Кытысь Тэ тöдан менö?» Исус вочавидзис: «Филип кортöдз на Ме аддзылi тэнö инжир пу улысь». 49 Нафанаил шуис: «Велöдысьöй, Тэ Ен Пи, Тэ Израиль Öксы!» 50 Исус шуис сылы: «Ме шуи, мый аддзылi тэнö инжир пу улысь, да та вöсна тэ эскан. Но таысь ыджыдджыкöс на тэ аддзан». 51 Сэсся содтiс: «Веськыда, веськыда висьтала тiянлы: öнiсянь тi кутанныд аддзыны восьса енэжсö да Енлысь анделъяссö, кодъяс лэччöны Ен Пи дiнö да кыпöдчöны енэжас».
1 Кык лун мысти Галилеяса Кана карын вöлi кöлысь. Сэнi вöлi Исуслöн мамыс. 2 Исусöс да велöдчысьяссö тшöтш вöлi корöмаöсь кöлысь вылас. 3 Кор винаыс помасис, Исуслöн мамыс шуис Сылы: «Налöн винаыс бырöма». 4 Исус вочавидзис: «Аньöй, мый Меным таöдз, öд Менам кадыс эз на во». 5 Мамыс шуис кесйöгъяслы: «Ставсö вöчöй Сылöн шуöм серти». 6 Сэнi вöлi изйысь вöчöм квайт ва доз, быд дозйö ваыс вöлi тöрö сё литра гöгöр. Тайö дозъяснас юдейяс вöдитчисны сöстöммöдчöм могысь. 7 Исус шуис кесйöгъяслы: «Тыртöй дозъяссö ваöн». Найö тырысöдзыс кисьталiсны васö дозъясас. 8 Сэсся шуис налы: «Öнi гумовтöй васö да мыччöй сiйöс кöлысь нуöдысьлы». Найö мыччисны. 9 Кöлысь нуöдысь видлiс ваысь артмöм винасö, но сiйö эз тöд, кытысь тайö винаыс. Та йылысь тöдiсны сöмын ва дозъяссö тыртысьяс. Сэки кöлысь нуöдысь корис верöспусö 10 да шуис сылы: «Ставныс медводз бур винанас юктасьöны, сэсся йöз коддзöм бöрас лёкджыкнас. А тэ öнöдз бур винасö видзöмыд». 11 Тайö медводдза шензьöданаторсö Исус вöчис Галилеяса Кана карын. Тадзи петкöдлiс Сiйö Ассьыс дзирдлунсö, и велöдчысьясыс кутiсны эскыны Сылы. 12 Та бöрти Исус мамыскöд, вокъясыскöд да велöдчысьясыскöд мунiсны Капернаум карö. Сэтчö найö кольччисны лун-мöд кежлö. 13 Матыстчис юдейяслöн Ыджыд лун, и Исус локтiс Ерусалимö. 14 Сiйö аддзис: крамын вузалöны öшъясöс, ыжъясöс, гулюясöс да вежлалöны сьöм. 15 Исус кöвъясысь кыыштiс орс да кутiс вöтлавны сiйöн крамысь вузасьысьяссö, тшöтш налысь ыжъяссö да öшъяссö. Сiйö пöрлöдлiс сьöм вежысьяслысь пызанъяссö да кисьталiс налысь сьöмнысö. 16 Гулюöн вузасьысьяслы Сiйö шуис: «Босьтöй найöс татысь! Энö пöртöй Менам Батьлысь керкасö вузасянiнö!» 17 Сэки Исуслöн велöдчысьяслы тöд выланыс уси Гижöдас висьталöмыс: «Тэнад керка вöсна вежöгтöмыс топöдö Менсьым сьöлöмöс». 18 Юдейяслöн веськöдлысьяс шуисны Исуслы: «Кутшöм ногöн Тэ эскöдан миянöс, мый Тэныд позьö тадзи вöчнысö?» 19 Исус вочавидзис: «Жугöдöй тайö крамсö, и Ме куим лунöн выльысь лэпта сiйöс». 20 Найö воча шуисны Исуслы: «Тайö крамсö лэптiсны нелямын квайт во чöж, а Тэ куим лунöн кöсъян лэптыны сiйöс?» 21 Крам йылысь сёрнитiгöн збыльвылас Исус висьталiс Аслас вир-яй йылысь. 22 Исуслöн ловзьöм бöрын велöдчысьясыслы усины тöд выланыс Сылöн кывъясыс. Сэки найö эскисны Гижöдö да Исуслöн кывъясö. 23 Ерусалимын Ыджыд лун дырйи унаöн аддзылiсны Исуслысь шензьöданаторъяс вöчöмсö да эскисны Сылы. 24 Но Исус эз эскы налы, öд Сiйö тöдiс найöс ставнысö. 25 Сылы эз ковны йöз йылысь висьталысьяс, öд Сiйö тöдiс быд мортлысь сьöлöмсö.
1 Юдейяслöн веськöдлысьяс пöвстын вöлi Никодим нима фарисей. 2 Войнас сiйö локтiс Исус дiнö да шуис Сылы: «Велöдысьöй, ми тöдам: Тэ Енсянь локтöм Велöдысь. Öд Тэ моз некод оз вермы вöчны шензьöданаторъяссö, оз кö ло сыкöд Ен». 3 Исус вочавидзис: «Веськыда, веськыда висьтала тэныд: мортыс оз вермы аддзыны Енлысь Юраланiнсö, оз кö сiйö выльысь чуж». 4 Никодим юалiс Сылысь: «Вермас-ö мортыс выльысь чужны, пöрысь кö нин сiйö? Öд сiйö оз вермы мам кынöмас бöр пырны да мöдысь чужны». 5 Исус вочавидзис: «Веськыда, веськыда висьтала тэныд: мортыс кö оз чуж васянь да Ловсянь, сiйö оз вермы пырны Енлöн Юраланiнö. 6 Вир-яйсянь чужысь эм вир-яй, а Ловсянь чужысь эм лов. 7 Эн шензьы, Ме кö висьтала, мый тiянлы колö выльысь чужны. 8 Тöв пöльтö, кöнi кöсйö. Сылысь шысö кылан, сöмын он тöд, кысянь сiйö локтö да кытчö мунö. Ловсянь чужыськöд тшöтш тадзи овлö». 9 Никодим юалiс Сылысь: «Вермас öмöй тадзи лоны?» 10 Исус вочавидзис: «Ачыд тэ – Израиль войтырöс велöдысь, а тайöс весиг он тöд? 11 Веськыда, веськыда висьтала тэныд: ми сёрнитам сы йылысь, мый тöдам, да висьталам сы йылысь, мый аддзылiм, но тi миян висьталöмö онö эскöй. 12 Ме висьталi тiянлы мувывсаыс йылысь, но тi энö эскöй Меным. Эсканныд-ö, висьтала кö тiянлы енэжвывсаыс йылысь? 13 Енэжас олысь да енэжсянь лэччöм Морт Пиысь кындзи енэжас некод на эз кыпöдчыв. 14 Кыдзи овтöминын Мöисей вывлань кыпöдiс змейöс, тадзи лоö кыпöдöма тшöтш Морт Пиöс, 15 медым Сылы эскысь эз быр, а помтöг олiс. 16 Öд Енмыслы сэтшöм мусаöсь йöзыс, мый сетiс Ассьыс öтка писö, медым Сылы эскысь эз быр, а помтöг олiс. 17 Енмыс мöдöдiс Ассьыс Писö муюгыдас йöзöс мездыны, а эз мыждыны. 18 Сылы эскысьöс оз ло мыждöма, а эскытöмöс мыждöма нин, öд сiйö эз эскы Енлöн öтка Пилы. 19 Мыждöмыс сыын, мый му вылас локтiс югыдыс, но йöзыслы мусаджык вöлi пемыдыс, öд налöн уджъясыс лёкöсь. 20 Лёксö вöчысь мустöмтö югыдсö. Сiйö оз лок югыдас, медым сылöн лёк уджъясыс эз йöзасьны. 21 Збыль серти олысь локтö югыдас, медым тыдовтчисны сылöн Енсянь уджъясыс». 22 Та бöрти Исус локтiс велöдчысьясыскöд Юдея муö, сэнi олiс накöд да пыртiс йöзсö. 23 Иоан тшöтш пыртiс йöзсö Енонын, Салимсянь матын, öд ваыс сэнi уна вöлi. Йöзыс волiсны сэтчö пыртчыны. 24 Сэки Иоанöс абу на вöлi пуксьöдöмаöсь дзескыдiнö. 25 Öтчыд Иоанлöн велöдчысьясыс венö воисны юдейяскöд сöстöммöдчöм йылысь. 26 Велöдчысьясыс локтiсны Иоан дiнö да шуисны: «Велöдысь, сiйö Мортыс, кодi вöлi тэкöд Йöрдан ю мöдлапöлын да код йылысь тэ висьтавлiн, öнi Сiйö тшöтш пыртö. Сы дiнö ставныс мунöны». 27 Иоан вочавидзис: «Мортыс нинöм оз вермы босьтны аслыс, оз кö ло сетöма сылы енэжсянь. 28 Тi асьныд кывлiнныд менсьым висьталöмöс: "Ме абу Кристос, ме сöмын Сы водзвылын мöдöдöмаыс". 29 Верöспуöн шуöны сiйöс, кодлöн эм гöтырпу. Верöспулöн ёртыс орччöн сулалö да нимкодясьöмöн кывзö сылысь сёрнисö. Ме тшöтш тадзи нимкодяся, и менам нимкодьлунöй помтöм-дортöм. 30 Кристослы колö быдмыны, а меным ичöтмыны». 31 Вылiсянь Локтысьыс ставсьыс вылын. Мувывса мортсö вöчöма муысь, сiйö сёрнитö мувывсаыс йылысь. А енэжсянь Локтысьыс ставсьыс вылын. 32 Сiйö висьталö, мый аддзылiс да кывлiс, но Сылысь висьталöмсö йöзыс сьöлöманыс оз сибöдны. 33 Мортыс кö сибöдö Сылысь кывъяссö, тайöн петкöдлö, мый Енмыс висьталö збыльсö. 34 Кодöс Енмыс мöдöдiс, Сiйö Енлысь кывъяссö висьталö, öд Енмыс Сылы лышкыда Ловсö сетö. 35 Пиыс муса Батьыслы, и Батьыс ставсö сетiс Сы киö. 36 Кодi эскö Пиыслы, сылöн эм помтöм олöм. Кодi оз эскы Пиыслы, сылöн оз ло олöмыс, но Енлöн скöрлуныс лоас сы вылын.
1 Фарисейяс кывлöмаöсь, Исуслöн пö Иоан дорысь унджык нин велöдчысьыс, Сiйö пö унджык йöзöс пыртö. Дерт, Исус эз Ачыс пырт, а пыртiсны Сылöн велöдчысьясыс. Кор Исус тöдмалiс, мый фарисейяс кывлöмаöсь та йылысь, 3 Сiйö эновтiс Юдея му да бöр мунiс Галилеяö. 4 Сылы ковмис мунны Самария му пыр. 5 Исус воис Самария муö, Сикар нима карö. Тайö карсяньыс матын вöлi му, кодöс Яков сетлöма Öсип пиыслы. 6 Сэнi вöлi Яковлöн юкмöс. Дыр мунöмысла Исус мудзис да пуксис шойччыштны юкмöс дорас. Вöлi лун шöр гöгöр. 7 Самарияса ань локтiс сэтчö вала. Исус шыасис сы дiнö: «Юктöдышт Менö ванад». 8 Исуслöн велöдчысьясыс вöлi мунöмаöсь карö сёян ньöбны. 9 Ань шуис Исуслы: «Ачыд Тэ юдей, а коран менсьым, самарияса аньлысь, ва юны?» Юдейяс öд самарияса войтыркöд оз волысьны. 10 Исус вочавидзис аньлы: «Тэ кö тöдiн Енлысь сетöмторсö да Сiйöс, кодi шуö тэныд тайö кывъяссö: "Юктöдышт Менö ванад", тэ эськö ачыд корин Сылысь васö, и Сiйö сетiс тэныд ловъя ва». 11 Ань шуис Сылы: «Господьöй, юкмöсыс öд джуджыд, мыйöн нö Тэ сэтысь гумовтан? Кытысь Тэ ловъя васö босьтан? 12 Тэ öмöй Яков батьным дорысь ыджыдджык? Тайö юкмöссö сiйö сетöма миянлы. Татысь сiйö ачыс юлöма, тшöтш сылöн пияныс да пемöсъясыс». 13 Исус вочавидзис: «Тайö васö юысьлöн горшыс бара на косьмас. 14 Но Ме сета ва, и кодi кутас юны тайö васö, сылöн горшыс некор оз кут косьмыны. Ваыс, кодöс Ме сета сылы, лоö сы пытшкын помтöм олöмö визувтысь дзулькйöн». 15 Ань шуис Сылы: «Господьöй, вай меным тайö васö, медым менам горшöй эз нин косьмы. Сэки татчö ваысла волыны оз ковмы». 16 Исус шуис аньлы: «Ветлы, кор верöстö да лок татчö». 17 Ань вочавидзис: «Верöсöй менам абу». Исус шуис: «Тэ веськыда висьталiн, мый тэнад верöсыд абу. 18 Тэ витысь верöс сайын вöлiн, но сiйö мортыс, кодкöд тэ öнi олан, абу верöс тэныд. Тэ збыльсö висьталан». 19 Ань шуис Сылы: «Господьöй, ме аддза, мый Тэ – пророк. 20 Миян батьяс копрасисны-кевмысисны Енмыслы тайö керöсас. А тi, юдейяс, шуанныд, колö пö копрасьны Енмыслы сöмын Ерусалимын». 21 Исус шуис сылы: «Аньöй, эскы Меным, воас кад, кор тi онö кутöй копрасьны Батьлы тайö керöсас да Ерусалимын. 22 Тi, самарияса войтыр, копрасянныд Сылы, кодöс онö тöдöй. А ми копрасям Сылы, кодöс тöдам, öд мездмöмыс воö юдейяссянь. 23 Воас кад да воис нин, кор Батьлы збыльысь копрасьысьяс кутасны кевмысьны Сылы Ловсянь да збыльыс серти. Татшöм кевмысьысьясöс корсьö Аслыс Бать. 24 Енмыс эм Лов. Сiдзкö, Енлы кевмысьысьяслы колö кевмысьны Ловсянь да збыльыс серти». 25 Ань шуис Исуслы: «Тöда, мый локтас Мессия-Кристос. Сiйö локтас да, ставсö висьталас миянлы». 26 Исус шуис аньлы: «Тайö Ме, тэкöд Сёрнитысьыс». 27 Сiйö кадас воисны велöдчысьясыс. Найö шензисны, мый Исус сёрнитö анькöд. Сöмын некод на пиысь эз юав, мыйла да мый йылысь Сiйö сёрнитö анькöд. 28 Сэки ань колис ва дозсö, мунiс карас да шуис йöзыслы: 29 «Локтöй, видзöдлöй тайö Мортыс вылö. Сiйö висьталiс меным ставсö, мый ме вöчлi. Абу-ö Сiйö Кристос?» 30 Йöзыс петiсны карсьыс да локтiсны Исус дiнö. 31 Сэккостi велöдчысьясыс корисны Исусöс: «Велöдысь, лок сёйны!» 32 Исус шуис налы: «Менам эм сёян, код йылысь тi онö тöдöй». 33 Велöдчысьясыс ас костаныс шензисны: «Эз-ö кодкö вай Сылы сёянсö?» 34 Исус шуис налы: «Менам сёянöй – ставсö вöчны Менö Мöдöдысьлöн кöсйöм серти да эштöдны Сылысь уджсö. 35 Тi шуанныд, нёль тöлысь мысти пö воас вундан кад. Висьтала тiянлы: видзöдлöй кöдзöм муяс вылö. Найö кельдöдöмаöсь нин вундiгкежлö. 36 Вундысь босьтö удждонсö öнi нин, сiйö чукöртö няньсö помтöм олöмö. Та вöсна кöдзысь да вундысь öтвыв нимкодясьöны. 37 Кывйöз веськыда висьталö: "Öти кöдзö, а мöд вундö". 38 Ме мöдöдi тiянöс вундыны му вылö, кытчö тi энö кöдзлöй. Сэнi мырсисны мукöдыс, но тi накöд тшöтш идраланныд быдтöмторсö». 39 Ань шуис сiйö карас олысьяслы: «Исус висьталiс меным ставсö, мый ме вöчлi». Та вöсна самарияса йöз унаöн пондiсны эскыны Исуслы. 40 Найö локтiсны Исус дiнö да корисны олыштны Сiйöс на ордын. Сiйö кольччылiс сэтчö кык лун кежлö. 41 Ачыс Исус сёрнитiс накöд, та вöсна нöшта на унджыкöн эскисны Сылы. 42 Найö шуисны аньлы: «Öнi ми эскам огö сöмын тэнад висьталöм вöсна. Ми эскам сы понда, мый асьным кывлiм Сiйöс да тöдам: Сiйö збыльысь муюгыдсö Мездысь, Кристос». 43 Кык лун мысти Исус мунiс сэтысь Галилея муö. 44 Исус шулiс, пророкöс пö ас муас оз пыдди пуктыны. 45 Кор Исус локтiс Галилеяö, сэтчöс йöзыс сибöдiсны Сiйöс. Öд найö тшöтш ветлiсны Ерусалимö Ыджыд лун кежлö да аддзылiсны, мый Исус вöчлiс сэнi. 46 Исус бара локтiс Галилеяса Кана карö, кöнi Сiйö васö пöртлiс винаö. Галилеяса Капернаум карын олiс öксылöн отсасьысь, кодлöн пиыс вöлi висьö. 47 Отсасьысь кывлiс, мый Исус локтöма Юдея муысь Галилеяö. Сiйö локтiс Исус дiнö да корис Сiйöс бурдöдны писö, кодi вöлi кулан выйын. 48 Исус шуис сылы: «Тi онö эскöй, онö кö аддзылöй индысьпасъяс да шензьöданаторъяс!» 49 Öксылöн отсасьысь шуис Исуслы: «Господьöй, волы кытчöдз пиöй ловъя на!» 50 Исус шуис сылы: «Мун, тэнад пиыд бурдiс». Öксылöн отсасьысь эскис Исуслöн кывъясö да мунiс гортас. 51 Туяс сылы паныдасисны кесйöгъясыс. Найö шуисны: «Тэнад пиыд бурдiс!» 52 Сiйö юалiс налысь, корджык пиыслы кокньöдiс. Найö вочавидзисны: «Тöрыт, час лунö, биа висьöмыс эновтiс сiйöс». 53 Сэки батьыс гöгöрвоис, мый буретш сiйö кадас воис бурдöмыс, кор Исус шуис сылы: «Тэнад пиыд бурдiс». Сэки батьыс да став сылöн гортсаыс эскисны Исуслы. 54 Тайö вöлi мöд шензьöданатор, кодöс вöчис Исус Юдея муысь Галилеяö воöм бöрын.
1 Исус мöдöдчис Ерусалимö, сэки вöлi юдейяслöн гажöдчан кад. 2 Ерусалимын, Ыж дзиръя дорын, вöлi ва йöртöд. Юдейяс ва йöртöдлы сетлöмаöсь Вифезда ним. Ва йöртöд дiнас вöлi вит пыранiн, найö вöлiны вевт улынöсь. 3 Пыранiнъясас куйлiсны уна висьысь: синтöмъяс, коктöмъяс, косьмöм ки-кокаяс. Найö виччысисны ва гызьöм. 4 Господьлöн анделыс корсюрö лэччывлiс йöртöдö гызьöдны васö. Гызьöм ваö медводдза пырысьыс быдпöлöс висьöмысь бурдлiс. 5 Сэнi пыранiнас куйлiс комын кöкъямыс во чöж висьысь морт. 6 Исус тöдiс, мый тайö мортыс дыр нин висьö. Исус аддзис сiйöс да юалiс: «Кöсъян-ö тэ бурдны?» 7 Висьысь вочавидзис: «Господьöй, гызьöм ваас пырнысö отсалысьыс меным абу. Менам пыртöдз кодкö мöд нин удитö пырны». 8 Исус шуис сылы: «Чеччы, босьт вольпасьтö да ветлы». 9 Сiйö дзик пыр бурдiс, босьтiс вольпасьсö да пондiс ветлöдлыны. Тайö вöлi шойччан лунö. 10 Та вöсна юдейяслöн веськöдлысьяс шуисны бурдöм мортлы: «Талун шойччан лун, тэныд оз позь вольпасьтö нуны». 11 Сiйö вочавидзис: «Бурдöдысьöй шуис меным: "Босьт вольпасьтö да ветлы"». 12 Сылысь юалiсны: «Кодi тэныд тшöктiс босьтны вольпасьтö да ветлыны?» 13 Но бурдöм мортыс эз тöд, кодi Сiйö, öд Исус саялiс йöз пöвстас. 14 Та бöрти Исус аддзис бурдöм мортöс крамысь да шуис сылы: «Öнi тэ бурдiн. Водзö эн вöч мыжсö, медым тэныд лёкджык эз ло». 15 Мортыс мунiс да висьталiс юдейяслöн веськöдлысьяслы, мый сiйöс бурдöдiс Исус. 16 Шойччан лунö татшöмторсö вöчöмысь юдейяслöн веськöдлысьяс пондiсны дзескöдны Исусöс да кöсйисны вины Сiйöс. 17 Исус шуис налы: «Менам Батьöй дугдывтöг уджалö, и Ме уджала». 18 Сэки юдейяслöн веськöдлысьяс ёнджыка на кöсйисны вины Исусöс, öд Сiйö торкис шойччан лунсö да шуис Енсö Аслас Батьöн. Тадзи öткодялiс Асьсö Енкöд. 19 Исус шуис налы: «Веськыда, веськыда висьтала тiянлы: Пиыс нинöм оз вермы вöчны Ассяньыс, оз кö аддзыв Батьыслысь вöчöмсö. Öд мый Батьыс вöчö, сiйöс тшöтш Пиыс вöчö. 20 Пиыс муса Батьыслы. Ставсö, мый вöчö Батьыс, Пиыслы петкöдлö. Батьыс нöшта на ыджыдджык уджъяс Пиыслы петкöдлас, тi весиг чуйманныд. 21 Батьыс ловзьöдö кулöмаясöс да сетö налы олöм. Пиыс тшöтш сетö олöм, кодлы кöсйö. 22 Батьыс некодöс оз мыжды. Мыждан вынсö Сiйö сетiс Пиыслы, 23 медым став йöзыс бурö пуктiсны Писö Батьсö моз. Кодi оз бурö пукты Писö, сiйö оз бурö пукты и Батьсö, кодi мöдöдiс Писö. 24 Веськыда, веськыда висьтала тiянлы: кодi кывзö Менсьым кывъясöс да эскö Менö Мöдöдысьлы, сылöн эм помтöм олöм. Сiйöс оз кутны мыждыны, но кулöмсьыс сiйö вуджис нин олöмас. 25 Веськыда, веськыда висьтала тiянлы: воас кад да воис нин, кор кулöмаяс кыласны Ен Пилысь гöлöс шысö. Сэки Сiйöс кылысьяс ловзясны. 26 Батьыс сетö олöм быдöнлы, Пиыслы Сiйö тшöтш сетiс вын – сетны олöм быдöнлы. 27 Батьыс сетiс Пиыслы вын мыждыны, öд сiйö Морт Пи. 28 Энö шензьöй, мый воас кад, кор гуын куйлысьяс кыласны Морт Пилысь гöлöс шысö 29 да найö ловзясны. Бур вöчысьяс кутасны овны, а лёк вöчысьясöс лоö мыждöма. 30 Ме нинöм ог вöч Ассянь. Ме мыжда сы серти, мый кыла Батьсянь, та вöсна Менам мыждöмöй веськыд. Öд Ме вöча ог Ас кöсйöм серти, а Менö мöдöдысь Батьлöн кöсйöм серти». 31 «Ме кö Ачым Ас йылысь висьтала, сэки Менам висьталöмöй абу эскана. 32 Но Ме йылысь мöд висьталö. Ме тöда, мый сылöн висьталöмыс веськыд. 33 Тi мöдöдлiнныд йöзöс Иоан дiнö, медым тöдмавны Ме йылысь. Сiйö збыльсö висьталiс. 34 Дерт, меным оз ков йöзлöн висьталöмыс. Ме шуа тайöс сы могысь, медым тi мездминныд. 35 Иоан вöлi яръюгыда öзъялысь би, сöмын этша кад тi кöсйинныд нимкодясьны сылöн югöр улын. 36 Но Ме йылысь висьталö мöдтор, Иоан висьталöмысь на мöрччанаджык. Батьлöн тшöктöм серти вöчöм уджъясöй петкöдлöны, мый Менö Батьöй мöдöдiс. 37 Менö мöдöдысь Батьöй Ачыс висьталö Ме йылысь. Тi Сылысь гöлöс шысö некор энö кывлöй, Сылысь чужöмсö энö аддзылöй, 38 Сылысь кывъяссö сьöлöманыд онö видзöй, öд тi онö эскöй Сысянь Мöдöдöмалы. 39 Тi тöдмаланныд-туяланныд Гижöдъяссö, медым тiянлы вичмис помтöм олöм, а Гижöдъясыс висьталöны Ме йылысь. 40 Но тi онö кöсйöй локны Ме дiнö, медым тiянлы вичмис олöм. 41 Йöзлöн ошкöмыс Меным оз ков. 42 Ме тöда тiянöс: Енмыс тiянлы абу муса. 43 Ме локтi тiян дiнö Бать нимсянь, но тi онö сибöдöй Менö. Локтас кö кодкö ас нимсяньыс, сiйöс тi сибöданныд. 44 Тi сибöданныд ошкöмсö öта-мöдсяньныд, но öти Енсянь петысь ошкöмсö онö корсьöй. Сiдзкö, кыдзи тi верманныд эскыны! 45 Энö мöвпалöй, мый Бать водзын кута мыждыны тiянöс. Тiянöс мыждысьыс – Мöисей, код вылö тi лача кутанныд. 46 Тi кö эсканныд Мöисейлы, эскинныд эськö тшöтш Меным, öд сiйö гижис Ме йылысь. 47 Но сылöн гижöдъясö кö онö эскöй, верманныд-ö эскыны Менам кывъясö?»
1 Сэсся Исус вуджис Галилея ты, мöд ногöн кö, Тиверия ты, мöдлапöлö. 2 Сы бöрся мунiс уна йöз, öд найö аддзылiсны, кыдзи Исус вöчис шензьöданаторъяс висьысьясöс бурдöдiгöн. 3 Исус кайис керöсö да пуксис сэтчö велöдчысьясыскöд. 4 Матыстчис Ыджыд лун, юдейяслöн гажöдчан кад. 5 Исус видзöдлiс да аддзис, мый Сы дiнö локтö уна йöз. Сiйö шуис Филиплы: «Кытысь миянлы ньöбны найöс вердмöн няньсö?» 6 Исус шуис тайöс, медым тöдмавны Филиплысь эскöмсö. Но Ачыс Сiйö тöдiс нин, мый вöчны. 7 Филип вочавидзис: «Кыксё динар вылö ньöбöм няньыс этша лоö, весиг ичöтиктор оз вичмы быдöнлы». 8 Öндрей нима велöдчысь, Симон-Петырлöн вокыс, шуис Исуслы: 9 «Танi öти зонкалöн эм вит ид нянь да кык чери. Тайö öмöй тырмас та мындаыслы?» 10 Исус шуис: «Тшöктöй йöзыслы пуксявны». Сiйö местаыс вöлi туруна. Йöзыс пуксялiсны, вöлi вит сюрс гöгöр морт. 11 Исус босьтiс няньсö, аттьöалiс Енмöс да сетiс велöдчысьясыслы. Велöдчысьяс разöдiсны няньсö пукалысьяслы. Черисö тшöтш разöдiсны быдöнлы, кодi мыйта кöсйис. 12 Кор йöзыс пöтiсны, Исус шуис велöдчысьясыслы: «Чукöртöй коляссö, нинöм энö воштöй». 13 Велöдчысьяс чукöртiсны вит ид няньысь коляссö да тыртiсны дас кык куд. 14 Сэки найö, кодъяс аддзылiсны Исуслысь шензьöданатор вöчöмсö, шуисны: «Тайö збыльысь сiйö Пророкыс, кодлы колö вöлi локны муюгыдас». 15 Исус тöдiс, мый йöзыс мырдöн кöсйöны пуктыны Сiйöс öксыö, та вöсна öтнас бöр кайис керöсö. 16 Рытнас велöдчысьясыс лэччисны ты дорö, 17 пуксисны пыжö да мöдöдчисны ты мöдлапöлö, Капернаум карö. Пемдiс нин, но Исус пыр на эз лок на дiнö. 18 Пöльтiс ыджыд тöв, тыыс ёна гызис. 19 Нёль-ö-вит верст сынöм бöрын велöдчысьясыс аддзисны Исусöс: Сiйö ва вывтi матыстчис налöн пыж дiнö. Найö ёна повзисны. 20 Исус шуис: «Энö полöй, тайö Ме». 21 Найö кöсйисны босьтны Исусöс пыжас, но пыжыс пырысь-пыр матыстчис мöдлапöлас, кытчö найö кывтiсны. 22 Мöд луннас, ты дорын сулалiгöн йöзыслы тöд выланыс уси, мый тöрыт танi вöлi сöмын öти пыж, и тайö пыжнас велöдчысьясыс вуджисны öтнаныс, Исус эз вöв накöд. 23 Тиверия карсянь локтiсны пыжаяс да сувтiсны сэтчö, кöнi Енмöс аттьöалöмöн Господь водзынджык вердiс йöзсö. 24 Кор йöзыс аддзисны, мый Исус да велöдчысьясыс абуöсь сэнi, найö пуксисны пыжъясö да вуджисны Капернаумö корсьны Исусöс. 25 Найö аддзисны Исусöс ты мöдлапöвсьыс да юалiсны Сылысь: «Велöдысь, Тэ нö кор татчö вуджин?» 26 Исус вочавидзис: «Веськыда, веськыда висьтала тiянлы: тi корсянныд Менö онö шензьöданаторъяс аддзылöм вöсна, а сы понда, мый пöттöдзныд няньсö сёйинныд. 27 Энö тöждысьöй бырана сёян вöсна, а тöждысьöй помтöм олöмсö сетысь сёян вöсна. Тайö сёянсö сетас тiянлы Морт Пи, кодöс пасйöма Ачыс Ен Бать». 28 Йöзыс юалiсны Исуслысь: «Мый миянлы вöчны, медым уджъясным вöлiны шогманаöсь Енмыслы?» 29 Исус вочавидзис: «Эскöй Енсянь Мöдöдöмалы. Тайö шогмана Енмыслы». 30 Найö шуисны Исуслы: «Кутшöм шензьöданатор Тэ вöчан, медым сiйöс аддзылöм бöрын ми эским Тэныд? Мый Тэ вöчан? 31 Миян батьяс овтöминын сёйисны манна. Та йылысь висьталö Гижöдыс: "Енэжсянь Сiйö сетiс налы сёйны нянь"». 32 Исус шуис налы: «Веськыда, веськыда висьтала тiянлы: эз Мöисей сет тiянлы няньсö енэжсянь, но Менам Батьöй сетö тiянлы збыль няньсö енэжсянь. 33 Енлöн няньыс лэччö енэжсянь да сетö йöзыслы олöм». 34 Найö шуисны Исуслы: «Господьöй, татшöм няньсö пыр сет миянлы». 35 Исус шуис: «Ме олöмыслöн нянь. Ме дiнö локтысь некор оз кут тшыгъявны, Меным эскысьлöн горшыс некор оз кут косьмыны. 36 Тiянлы Ме висьтавлi нин: тi аддзылiнныд Менö, сöмын онö эскöй. 37 Быдöн, кодöс сетö Меным Бать, локтас Ме дiнö. Ме дiнö локтысьöс ог вöтлы. 38 Ме öд лэччи енэжсянь эг Ас кöсйöм серти вöчны, но лэччи, медым вöчны Менö мöдöдысь Батьлöн кöсйöм серти. 39 Менö мöдöдысь Батьöй кöсйö, медым Меным сетöмаясысь весиг öтикöс эг вошты да ставнысö найöс ловзьöдi медбöръя лунö. 40 Менö Мöдöдысьöй кöсйö, медым быдöнлы, кодi аддзö Писö да эскö Сылы, вичмис помтöм олöм. Медбöръя лунö Ме ловзьöда найöс». 41 Юдейяс дöзмисны, мый Исус шуис: «Ме енэжсянь лэччöм нянь». 42 Найö сёрнитiсны: «Абу-ö тайö Исус, Öсиплöн пи? Ми öд тöдам Сылысь бать-мамсö. Мыйла нö Сiйö шуö, Ме пö лэччи енэжсянь?» 43 Исус шуис налы: «Энö шуасьöй ас костаныд. 44 Некод оз вермы локны Ме дiнö, оз кö вайöд сiйöс Менö мöдöдысь Батьöй. Ме дiнö локтысьöс Ме ловзьöда медбöръя лунö. 45 Пророкъяслöн гижöма: "Енмыс быдöнöс велöдас". Быдöн, кодi кывзö Батьöс да Сысянь велöдчö, локтö Ме дiнö. 46 Йöзыс эз аддзывлыны Батьöс, сöмын Енсянь Локтысь аддзылiс Батьöс. 47 Веськыда, веськыда висьтала тiянлы: Меным эскысьлöн эм помтöм олöм. 48 Ме олöмыслöн нянь. 49 Тiян батьясныд овтöминын сёйлiсны манна, но найö кулiсны. 50 А енэжсянь лэччöм няньсö сёйысь оз кув. 51 Ме енэжсянь лэччöм ловъя нянь, тайö няньсö сёйысь помтöг олö. Няньыс, кодöс Ме сета, – тайö Менам Яй. Ме сета сiйöс йöзыслöн олöм вöсна». 52 Сэки юдейяс пондiсны вензьыны ас костаныс: «Кыдзи Сiйö вермас сетны Ассьыс Яйсö сёйны миянлы?» 53 Исус шуис налы: «Веськыда, веськыда висьтала тiянлы: онö кö сёйöй Морт Пилысь Яйсö да юöй Сылысь Вирсö, тiян пытшкын олöмыс оз ло. 54 Менсьым Яйöс сёйысь да Менсьым Вирöс юысь помтöг олö, и сiйöс Ме ловзьöда медбöръя лунö. 55 Менам Яйöй öд збыльысь сёян, Менам Вирöй öд збыльысь юан. 56 Менсьым Яйöс сёйысь да Менсьым Вирöс юысь олö Ме пытшкын, а Ме – сы пытшкын. 57 Менö мöдöдiс ловъя Бать, Меным олöмыс вичмис Батьсянь. Тадзи Месянь олöмыс вичмас Менö сёйысьлы. 58 Тайö енэжсянь лэччöм нянь, тайö мöдсикас сёян. Тiян батьясныд сёйисны манна да кулiсны, а тайö няньсö сёйысь помтöг олö». 59 Исус висьталiс тайöс Капернаумын, синагогаын велöдiгöн. 60 Исуслысь висьталöмсö кывзiгöн велöдчысьяс пöвстысь унаöн шуасисны: «Кутшöм гöгöрвотöмторъяс Сiйö висьталö! Кодi вермас кывзыны тайöс?» 61 Исус тöдiс, мый велöдчысьясыс шуасьöны, да шуис налы: «Тiянöс öмöй дöзмöдö Менам висьталöмöй? 62 Мый эськö шуанныд, аддзанныд кö Морт Пилысь кыпöдчöмсö сэтчö, кöнi Сiйö вöлi водзынджык? 63 Сöмын Лов вермö ловзьöдны, а вир-яй тайöс вöчны оз вермы. Менам кывъясöй сетöны тiянлы Лов да олöм. 64 Но кодсюрö тiян пиысь оз эскыны». Исус водзвыв тöдiс, кодi оз эскы Сылы да кодi вузалас Сiйöс. 65 Исус водзö сёрнитiс: «Та понда Ме висьтавлi тiянлы, мый некод оз вермы Ме дiнö локнысö, оз кö ло тайö Батьсянь». 66 Та бöрти уна велöдчысь эновтiсны Сiйöс, эз нин ветлöдлыны Сыкöд. 67 Сэки Исус юалiс дас кык велöдчысьыслысь: «Гашкö, тi тшöтш кöсъянныд эновтны Менö?» 68 Симон-Петыр вочавидзис: «Господьöй, код дiнö миянлы муннысö? Öд Тэнад кывъясыд сетöны помтöм олöмсö. 69 Ми эскам да тöдам: Тэ – Кристос, ловъя Енлöн Пи». 70 Исус шуис налы: «Эг öмöй Ме бöрйы тiянöс дас кыкнаннытö? Но тiян пиысь öтиыс – сöтана». 71 Тайöс шуигöн Исус кутiс тöд вылас Иудаöс, Симон-Искариот пиöс. Сiйö вöлi дас кыксьыс öтиыс, кодi сэсся вузалас Исусöс.
1 Та бöрти Исус ветлöдлiс Галилеятi. Юдея муöд Сiйö эз кöсйы ветлöдлыны, öд юдейяслöн веськöдлысьяс кöсйисны вины Сiйöс. 2 Матыстчис юдейяслöн гажöдчан кад, чомъяс вöчан лунъяс. 3 Исуслöн вокъясыс шуисны Сылы: «Эн кольччы татчö, мун Юдея муö, медым велöдчысьясыд тшöтш аддзисны Тэнсьыд уджъястö. 4 Öд мортыс кö кöсйö, медым тöдiсны сы йылысь, сiйö оз кут дзебны ассьыс уджъяссö. Тэ сы ыджда уджъяс вöчан, сiдзкö, петкöдчы йöзыслы». 5 Исуслöн вокъясыс эз эскыны Сылы. 6 Исус шуис налы: «Менам кадöй эз на во, а тiянлы быд кад лöсялö. 7 Тiянöс йöзыс оз мустöмтны, а Менö мустöмтöны, öд Ме висьтала, мый налöн уджъясыс лёкöсь. 8 Тi мунöй гажöдчанiнас, а Ме ог на мун, öд Менам кадöй эз на во». 9 Тайöс шуöм бöрын Исус кольччис Галилеяö, 10 но кор вокъясыс мунiсны гажöдчанiнö, Исус тшöтш мунiс сэтчö гусьöн. 11 Юдейяслöн веськöдлысьяс корсисны Исусöс гажöдчанiнысь да юасисны: «Кöнi Сiйö?» 12 Йöз пöвстын унаöн вензисны Сы йылысь. Öтияс сёрнитiсны, Сiйö пö бур, мöдъяс шуисны, Сiйö пö ылöдлö йöзсö. 13 Но йöзыс сёрнитiсны Исус йылысь гусьöн, öд найö полiсны юдейяслöн веськöдлысьясысь. 14 Гажöдчан кад шöрас Исус пырис крамö да кутiс велöдны. 15 Юдейяслöн веськöдлысьяс шензисны: «Кытысь Сiйö велöдчытöгыс тöдö Гижöдъяссö?» 16 Исус вочавидзис: «Менам велöдöмöй абу Месянь, но Менö Мöдöдысьсянь. 17 Кодi кöсйö вöчны Ен кöсйöм серти, сiйö тöдмалас, Енсянь-ö тайö велöдöмыс, либö Ассянь Ме висьтала. 18 Кодi ассяньыс висьталö, сiйö аслыс ошкöмсö корсьö. Кодi тöждысьö, медым ошкöмыс вичмис Сiйöс Мöдöдысьлы, Сiйö збыльсö висьталö да оз ылöдчы. 19 Эз-ö Мöисей сет тiянлы Индöдсö? Но некод тiян пиысь оз ов Индöд сертиыс. Сiдзкö, мыйла кöсъянныд Менö винысö?» 20 Йöзыс шуисны: «Пеж лов Тэ пытшкын! Кодi кöсйö Тэнö винысö?» 21 Исус вочавидзис: «Ме вöчи öтитор, да тi ставныд шензянныд. 22 Мöисей тшöктiс тiянлы вундыштчыны. Дерт, тайö тшöктöмыс абу Мöисейсянь, а батьяссяньныд. Тi весиг шойччан лунö вундыштанныд мортсö. 23 Тi кö вундыштанныд мортсö шойччан лунö, медым энö торкöй Мöисейлысь Индöдсö, сiдзкö, мыйла Ме вылö скöраланныд, Ме кö дзоньнас мортсö бурдöдi шойччан лунö? 24 Энö мыждöй чужöм вылö видзöдöмöн, а мыждöй веськыда». 25 Кодсюрö ерусалимсаяс пöвстысь сёрнитiсны: «Абу-ö тайö сiйö Мортыс, кодöс вины кöсйöны? 26 Сiйö сёрнитö восьсöн, и некод весиг оз öлöд Сiйöс. Гашкö, веськöдлысьяс збыльысь Сiйöс Кристос туйö пуктöны? 27 Ми тöдам, кытысь тайö Мортыс. А кор локтас Кристос, некод оз кут тöдны, кытысь Сiйö». 28 Крамын велöдiгöн Исус гораа шуис: «Тi тöданныд Менö, и тöданныд, кытысь Ме. Ме локтi эг Ассянь. Менö мöдöдiс Сiйö, кодi эм Збыльыс, сöмын Сiйöс тi онö тöдöй. 29 А Ме тöда Сiйöс, öд Сы дорысь локтi, Сiйö мöдöдiс Менö». 30 Сэки кöсйисны кутны Исусöс, но некод эз лысьт инмöдчыны Сы дiнö, öд Сылöн кадыс эз на во. 31 Йöзыс унаöн эскисны Исуслы. Найö сёрнитiсны: «Кор локтас Кристос, Сiйö öмöй тайö Мортыс дорысь унджык шензьöданаторсö вöчас?» 32 Кор фарисейяс кылiсны Исус йылысь татшöм сёрнисö, аркирейяскöд öтвыв найö мöдöдiсны крам видзысьясöс кутны Исусöс. 33 Исус шуис налы: «Ме ог нин дыр ло тiянкöд, регыд муна Менö Мöдöдысь дiнö. 34 Тi кутанныд корсьны Менö, но онö аддзöй. Кöнi Ме лоа, сэтчö тi онö вермöй локнысö». 35 Юдейяслöн веськöдлысьяс ас костаныс сёрнитiсны: «Кытчö Сiйö кöсйö мунны, мый огö вермöй аддзыны Сiйöс? Оз-ö кöсйы мунны миян йöз дiнö, кодъяс олöны грекъяс пöвстын? Оз-ö кöсйы грек войтырöс велöдны? 36 Кыдзи гöгöрвоны Сылысь кывъяссö: "Тi кутанныд корсьны Менö, но онö аддзöй. Кöнi Ме лоа, сэтчö тi онö вермöй локнысö"?» 37 Бöръя медыджыд гажöдчан лунö Исус сувтiс да гораа шуис: «Кодлöн горшыс косьмö, мед локтö Ме дiнö да юö! 38 Кодi эскö Меным, сылöн пытшкöсысь визувтасны ловъя валöн юяс. Тадзи висьталö Гижöдыс». 39 Исус висьталiс тайöс Лов йылысь, кодöс сибöдасны Сылы эскысьяс. Öд Вежа Ловсö эз на вöв сетöма налы, Исуслöн дзирдлуныс эз на воссьы да. 40 Тайö кывъяссö кылöм бöрын йöз пöвстысь унаöн шуалiсны: «Сiйö збыльысь пророк». 41 Öтияс шуисны: «Тайö Кристос». Мöдъяс сёрнитiсны: «Локтас öмöй Кристос Галилеяысь? 42 Оз öмöй висьтав Гижöдыс, мый Кристос петас Давид вужйысь, Виплием карысь, Давид чужанiнысь?» 43 Тадзи йöзыс кутiсны вензьыны Сы йылысь. 44 Кодсюрö кöсйисны кутны Исусöс, но некод эз лысьт инмöдчыны Сы дiнö. 45 Исусöс кутны мöдöдлöмаяс бöр локтiсны аркирейяс да фарисейяс дiнö. Найö юалiсны: «Мыйла тi энö вайöдöй Сiйöс?» 46 Мöдöдлöмаяс вочавидзисны: «Тайö Мортыс моз öнöдз на некод эз сёрнитлы». 47 Фарисейяс шуисны налы: «Гашкö, тiянöс тшöтш ылöдлiс да? 48 Эскö-ö Сылы кодкö веськöдлысьяс да фарисейяс пöвстысь? 49 Но йöзыс оз тöдны Индöдсö, найöс ставнысö ёрöма». 50 Никодим нима фарисей, кодi войнас волiс Исус дiнö, шуис аркирейяслы да фарисейяслы: 51 «Миян Индöд серти позьö öмöй мыждыны мортсö, оз кö медводз кывзыны сiйöс да тöдмавны, мый сiйö вöчис?» 52 Сылы вочавидзисны: «Гашкö, тэ тшöтш Галилеяысь? Лыддьы Гижöдсö да тэ аддзан, мый Галилеяысь пророкыд оз лок». 53 Сэки ставныс муналiсны гортаныс.
1 Исус кайис Олив керöсö. 2 Асывводзнас Сiйö бара локтiс крамö. Сы гöгöр чукöртчис уна йöз. Исус пуксис да кутiс велöдны найöс. 3 Индöдö велöдысьяс да фарисейяс вайöдiсны Исус дiнö аньöс, кодöс вöлi кутöмаöсь гозъя олöм пежалöмысь. Йöз водзö сiйöс сувтöдöмöн 4 найö шуисны Исуслы: «Велöдысь, тайö аньсö кутöма гозъя олöм пежалöмысь. 5 Мöисей Индöдас тшöктöма вины татшöмъяссö изъясöн. Мый Тэ шуан?» 6 Найö шуалiсны тадзи, медым кыйны да мыжавны Исусöс. Но Исус эз кывзы найöс, а улö копыртчöмöн чуньнас кутiс гижны муас. 7 Найö водзö дöзмöдiсны Исусöс юасьöмъяснас. Сэки Сійö веськöдчис да шуис налы: «Тiян пöвстысь мыжтöмыс медводз мед лыяс аньсö изнас». 8 Сэсся копыртчис да бара кутiс гижны муас. 9 Исуслысь кывъяссö кылöм бöрын йöзыс кутiсны разöдчыны сьöрсьöн-бöрсьöн, öд налöн сьöлöмыс мыждiс найöс. Медводз мунiсны пöрысьджыкъяс, сэсся мукöдыс. Колис сöмын Исус, и Сы водзын сулалысь ань. 10 Исус веськöдчис да аддзис сöмын аньöс. Сiйö юалiс: «Аньöй, кöнöсь тэнö мыждысьясыд? Мыждiс-ö кодкö тэнö?» 11 Ань вочавидзис: «Эз, Господьöй!» Исус шуис сылы: «Ме тшöтш ог мыжды. Мун да водзö мыжтö эн нин вöч». 12 Исус бара сёрнитiс йöзыскöд. Сiйö шуис: «Ме йöзыслы югыдыс. Ме бöрся мунысь оз кут ветлыны пемыдас, сылöн лоö олöмыслöн югыдыс». 13 Фарисейяс шуисны: «Тэ Ачыд Ас йывсьыд висьталан, та вöсна Тэнад висьталöмыд абу эскана». 14 Исус вочавидзис: «Ме кö висьтала Ас йылысь, Менам висьталöмöй веськыд, öд Ме тöда, кытысь локтi да кытчö муна. А тi онö тöдöй, кытысь Ме локтi да кытчö муна. 15 Тi мыжданныд мортсö йöзыс моз. Ме некодöс ог мыжды. 16 А мыжда кö, мыжда веськыда, öд Ме абу öтнам. Мекöд Менö мöдöдысь Батьöй. 17 Тiян Индöдын гижöма, мый кык мортлöн висьталöмыс эскöдана. 18 Ме Ачым висьтала Ас йылысь. Ме йылысь висьталö тшöтш Менö мöдöдысь Батьöй». 19 Сэки юалiсны Исуслысь: «Кöнi Тэнад Батьыд?» Исус вочавидзис: «Тi онö тöдöй Менö и онö тöдöй Менсьым Батьöс. Тi кö эськö тöдiнныд Менö, сэки тöдiнныд тшöтш Менсьым Батьöс». 20 Тайö кывъяссö Исус висьталiс крамын велöдiгöн, сьöм чукöртан куд дорын. Сiйöс некод эз кут, öд Сылöн кадыс эз на во. 21 Исус бара висьталiс йöзыслы: «Ме регыд муна. Тi кутанныд корсьны Менö, но мыж пытшканыд куланныд. Кытчö Ме муна, сэтчö тi онö вермöй локнысö». 22 Юдейяслöн веськöдлысьяс шензисны: «Гашкö, Сiйö кöсйö вины Асьсö, öд шуалö, кытчö пö Ме муна, сэтчö тi онö вермöй локнысö». 23 Исус шуис налы: «Тi улiсянь, а Ме вылiсянь. Тi тайö муюгыдсьыс, а Ме абу тайö муюгыдсьыс. 24 Ме шуи тiянлы: тi куланныд мыж пытшканыд. Онö кö эскöй, мый Ме збыльысь Сiйö, кодöн шуа Ачымöс, куланныд мыж пытшканыд». 25 Найö юалiсны: «Кодi нö Тэ?» Исус вочавидзис: «Ме – Сiйö, кодöн шулi Ачымöс водзысяньыс. 26 Ме унатор на верма висьтавны тiян йылысь, унаторйысь мыждыны тiянöс. Но Ме юöрта муюгыдыслы сöмын сiйö, мый кывлi Менö Мöдöдысьсянь, öд Сiйö збыльсö висьталö». 27 Найö эз гöгöрвоны, мый Исус висьталö Батьыс йылысь. 28 Исус шуис налы: «Морт Пиöс кыпöдöм бöрын тi тöдмаланныд: Ме збыльысь Сiйö, кодöн шуа Ачымöс. Ме нинöм ог вöч Ассянь, Ме висьтала сöмын сiйö, мыйö велöдiс Менö Батьöй. 29 Менö Мöдöдысьöй Мекöд. Батьöй эз коль Менö öтнамöс, öд Ме ставсö вöча Сылöн кöсйöм серти». 30 Тайö висьталöмсö кывзiгöн унаöн эскисны Исуслы. 31 Сэки Исус шуис Сылы эскысь юдейяслы: «Менам кывъяс серти кö оланныд, тi збыльысь Менам велöдчысьяс. 32 Тi тöдмаланныд збыльсö, и збыльыс мездас тiянöс». 33 Найö вочавидзисны: «Ми Öвраамсянь чужысьяс, некор эгö вöлöй кесйöг туйынöсь. Сiдзкö, мыйла Тэ шуан, мый ми мездмам?» 34 Исус вочавидзис: «Веськыда, веськыда висьтала тiянлы: мыжсö вöчысь – мыжыслöн кесйöг. 35 Кесйöг оз вермы кольччыны керкаас пыр кежлö, а пиыс олö сэнi помтöг. 36 Пиыс кö мездас тiянöс, тi збыльысь мездманныд. 37 Ме тöда: тi Öвраамсянь чужысьяс, но кöсъянныд вины Менö, öд тiян сьöлöмö оз тöрны Менам кывъясöй. 38 Ме висьтала сы йылысь, мый аддзылi Аслам Бать ордысь. А тi вöчанныд сы серти, мый аддзылiнныд асланыд бать ордысь». 39 Найö вочавидзисны: «Миян батьным Öвраам». Исус шуис налы: «Тi кö Öвраамлöн ныв-пи, вöчинныд эськö Öвраам ног. 40 Ме висьталi тiянлы Енсянь кывлöм збыльсö, а тi кöсъянныд вины Менö. Öвраам тадзи эз вöчлы. 41 Тi вöчанныд батьныд ног». Юдейяс шуисны Исуслы: «Ми абу чуркаяс. Миян эм öти Бать, тайö Ен». 42 Исус шуис: «Енмыс кö тiянлы Бать, Ме эськö муса вöлi тiянлы, öд Ме Енсянь локтi. Ме эг Ассянь лок, Енмыс мöдöдiс Менö. 43 Мыйла тi онö гöгöрвоöй Менсьым висьталöмöс? Тi онö гöгöрвоöй, öд онö сибöдöй Менсьым кывъясöс. 44 Омöльыс – тiян батьныд. Тi ставсö кöсъянныд вöчны сы моз. Сiйö водзысяньыс вöлi морт виысь. Збыльсьыс сiйö ылын, збыльыс сы пытшкын абу. Кор сiйö ылöдлö, висьталö ассяньыс, öд сiйö ылöдчысь, ылöгыслöн бать. 45 Тi онö эскöй Меным, öд Ме збыльсö висьтала. 46 Кодi тiян пиысь вермас мыждыны Менö лёк вöчöмысь? Ме кö збыльсö висьтала, мыйла онö эскöй Меным? 47 Кодi Енсянь, сiйö кывзö Енлысь кывъяссö. А тi онö кывзöй, öд тi абу Енсянь». 48 Юдейяс шуисны Исуслы: «Ми веськыда висьталам: Тэ Самарияысь, Тэ пытшкын пеж лов». 49 Исус вочавидзис: «Ме пытшкын пеж лолыс абу. Ме бурö пукта Ассьым Батьöс, но тi Менö омöльтанныд. 50 Ме ог корсь Аслым ошкöмсö. Эм Сiйö, кодi сетас Меным ошкöмсö. Сiйö – веськыда Мыждысьыс. 51 Веськыда, веськыда висьтала тiянлы: Менам кывъяс серти олысь некор оз кув». 52 Юдейяс шуисны Исуслы: «Öнi ми тöдам, мый Тэ пытшкын пеж лов. Öвраам кулiс, пророкъяс кулiсны, а Тэ шуан: "Менам кывъяс серти олысь некор оз кув". 53 Тэ öмöй Öвраам батьным дорысь ыджыдджык? Сiйö кулiс, пророкъяс тшöтш кулiсны. Тэ нö Асьтö код туйö пуктан?» 54 Исус вочавидзис: «Ме кö ошка Ачымöс, Менам ошкöмöй нинöм дон оз сулав. Менö ошкö Менам Батьöй, код йылысь тi шуанныд, мый Сiйö тiян Ен. 55 Тi онö тöдöй Сiйöс, а Ме тöда Сiйöс. Ме кö шуа, мый ог тöд Сiйöс, сэки лоа тiян кодь пöръясьысьöн. Но Ме тöда Сiйöс да ола Сылöн кывъясыс серти. 56 Тiян Öвраам батьныд нимкодьпырысь виччысис Менсьым локтан лунöс. Сiйö аддзис тайö лунсö да ёна нимкодясис». 57 Юдейяс шуисны Исуслы: «Тэ аддзылiн Öвраамöс? Тэныд öд ветымын арöсыс на абу». 58 Исус шуис налы: «Веськыда, веськыда висьтала тiянлы: Öвраам чужтöдз на Ме вöлi». 59 Сэки найö босьтiсны изъяс да кöсйисны лыйлыны Исусöс, но Исус саймовтчöмöн петiс крамсьыс да мунiс сэтысь.
1 Мунiгмозыс Исус аддзис чужöмсяньыс синтöм мортöс. 2 Велöдчысьяс юалiсны Исуслысь: «Велöдысь, кодлöн мыж вöсна сiйö синтöмöн чужöма? Ачыс-ö сiйö мыжа, бать-мамыс-ö?» 3 Исус вочавидзис: «Сiйö абу мыжа, бать-мамыс тшöтш абу мыжаöсь. Сiйö синтöм, медым сы пыр петкöдчасны Енлöн уджъясыс. 4 Öнi, лунъюгыднас, Меным колö вöчны Менö Мöдöдысьлысь уджъяссö. Пуксяс вой, сэки некод оз вермы уджавны. 5 Му вылын олiгöн Ме йöзыслы югыдыс». 6 Тайöс шуöм бöрын Исус сьöлыштiс муас, сьöлыштöмсьыс вöчис ляти да синтöм мортлысь синсö мавтiс лятинас. 7 Сэсся шуис: «Мун да мыссьы Силоам ва йöртöдын». Силоам нимыс, вуджöдны кö: мöдöдöма. Синтöм морт мунiс, мыссис да кутiс аддзыны. 8 Сыкöд орччöн олысьяс да сiйöс синтöмöн аддзылысьяс шензисны: «Абу-ö тайö сiйö мортыс, кодi пукалiс да сьöм корис?» 9 Öтияс шуалiсны: «Тайö дзик сiйö мортыс», мöдъяс шуалiсны: «Абу, тайö сöмын сы вылö мунö». Ачыс сiйö висьталiс: «Тайö ме». 10 Сэки юалiсны сылысь: «Кыдзи нö тэ аддзыны кутiн?» 11 Сiйö вочавидзис: «Исус нима морт вöчис ляти, мавтiс сiйöн менсьым синмöс да шуис: "Мун да мыссьы Силоам ва йöртöдын". Ме мунi да мысси, öнi аддза». 12 Сэки юалiсны сылысь: «Кöнi тэнö Бурдöдысьыд?» Мöдыс вочавидзис: «Ог тöд». 13 Мортöс, кодi водзынджык эз аддзы, нуöдiсны фарисейяс дiнö. 14 Тайö вöлi шойччан лунö, кор Исус вöчис ляти да бурдöдiс синтöмöс. 15 Фарисейяс тшöтш юалiсны синтöм мортлысь, кыдзи сiйö кутiс аддзыны. Сiйö вочавидзис: «Исус пуктiс син вылам ляти, сэсся ме мысси да кутi аддзыны». 16 Сэки фарисейяс пöвстысь кодсюрö шуисны: «Тайö Бурдöдысьыс абу Енсянь, öд Сiйö торкö тшöктöмсö – уджалö шойччан лунö». Мукöдыс сёрнитiсны: «Вермас öмöй мыжа морт вöчны татшöм шензьöданаторъяссö?» Тадзи лыбис на костын вен. 17 Синтöм мортлысь бара юалiсны: «Тэ шуан, мый Сiйö бурдöдiс тэнсьыд синтö? Кодi Сiйö тэ ногöн?» Морт вочавидзис: «Пророк». 18 Юдейяслöн веськöдлысьяс эз эскыны, мый тайö мортыс вöлi синтöм да пондiс аддзыны. Сэки найö корисны сылысь бать-мамсö 19 да юалiсны налысь: «Тайö тiян пиныд? Тi шуанныд, сiйö пö чужöмсяньыс синтöм. Кыдзи нö сiйö аддзö öнi?» 20 Бать-мамыс вочавидзисны: «Ми тöдам: тайö миян пиным. Сiйö чужис синтöмöн, 21 но кыдзи кутiс аддзыны да кодi бурдöдiс сiйöс, тайöс ми огö тöдöй. Юалöй сылысь, öд сiйö тыр арлыда нин, вермас ачыс вочавидзны». 22 Бать-мамыс шуисны тадзи, öд найö полiсны юдейяслöн веськöдлысьясысь. Веськöдлысьяс водзджык нин сёрнитчисны, мый быдöнöс, кодi Исусöс пуктö Кристос туйö, вöтласны синагогаысь. 23 Та вöсна бать-мамыс шуисны: «Юалöй сылысь, öд сiйö тыр арлыда нин». 24 Сэсся мöдысь корисны сiйö мортсö, кодi вöлi синтöм, да шуисны сылы: «Кöсйысь Ен водзын, мый збыльсö висьталан. Ми тöдам: тэнö Бурдöдысьыс – мыжа морт». 25 Сiйö вочавидзис: «Мыжа-ö Сiйö, ме ог тöд. Но öтитор тöда: ме вöлi синтöм, а öнi аддза». 26 Сылысь выльысь юалiсны: «Мый Сiйö вöчис тэныд? Кыдзи Сiйö бурдöдiс тэнö?» 27 Мортыс вочавидзис: «Ме тiянлы висьталi нин, сöмын тi энö кывзöй. Мый нöшта кöсъянныд кывны месянь? Гашкö, тi тшöтш кöсъянныд лоны Сылöн велöдчысьясöн?» 28 Юдейяслöн веськöдлысьяс кутiсны видны тайö мортсö да шуисны сылы: «Тэ Сылöн велöдчысь, а ми – Мöисейлöн. 29 Ми тöдам, мый Ачыс Енмыс сёрнитiс Мöисейкöд. А кытысь тайö Мортыс, ми огö тöдöй». 30 Бурдöм морт вочавидзис: «Тайö ёна шензьöдö! Сiйö бурдöдiс менсьым синмöс, а тi онö тöдöй, кытысь Сiйö. 31 Ми тöдам, мый Ен оз кывзы мыжаясöс. Но кодi бурö пуктö Енсö да олö Сылöн кöсйöм серти, Енмыс кывзö сiйöс. 32 Му пуксьöмсяньыс эз на вöв татшöмыс, мый чужöмсяньыс синтöмöс кодкö бурдöдiс. 33 Менö Бурдöдысьыс кö эз вöв Енсянь, нинöм эськö вöчны эз вермы». 34 Сылы вочавидзисны: «Тэ дзоньнас мыж пытшкын чужöмыд, а лысьтан миянöс велöдны!» Сэсся вöтлiсны сiйöс. 35 Исус кывлiс бурдöдöм мортöс вöтлöм йылысь, корсис сiйöс да шуис: «Эскан-ö тэ Ен Пилы?» 36 Мöдыс вочавидзис: «Господьöй, кодi нö Сiйö? Висьтав, медым ме верми эскыны». 37 Исус шуис: «Тэ аддзылiн Сiйöс, Сiйö сёрнитö тэкöд». 38 Бурдöм мортыс шуис: «Эска, Господьöй!» Сэсся копыртчылiс Сылы. 39 Исус шуис: «Ме локтi муюгыдас мыждыны, медым синтöмъяс аддзисны да аддзысьяс синтöммисны». 40 Тайöс кылöм бöрын öткымын фарисей, кодъяс вöлiны Исус дiнын, юалiсны Сылысь: «Гашкö, ми тшöтш синтöмöсь да?» 41 Исус вочавидзис: «Вöлiнныд кö тi синтöмöсь, сэки эськö энö мыжмöй. Но тi шуанныд, аддзам пö. Сiдзкö, мыжныд ас выланыд кольö».
1 «Веськыда, веськыда висьтала тiянлы: кодi пырö ыж йöрö оз öдзöсöд, а мöдлатi, сiйö – гусясьысь да лёк вöчысь. 2 Öдзöсöд пырысьыс – ыж видзысь, 3 сылы йöр видзысь восьтö öдзöссö. Ыжъяс кывзöны ыж видзысьлысь гöлöс шысö. Сiйö чуксалö ыжъяссö нимъяснас да петкöдö найöс йöр ортсыö. 4 Ыжъяссö лэдзалöм бöрын сiйö мунö водзвыланыс. Ыжъясыс локтöны бöрсяньыс, öд найö тöдöны сылысь гöлöс шысö. 5 А тöдтöм бöрся ыжъяс оз мунны. Найö пышйöны сыысь, öд найö оз тöдны сылысь гöлöс шысö». 6 Исус висьталiс фарисейяслы тайö велöданвисьтсö, сöмын найö эз гöгöрвоны, мый йылысь сёрнитiс Исус. 7 Сэки Исус водзö висьталiс налы: «Веськыда, веськыда висьтала тiянлы: Ме – ыжъяслы öдзöсыс. 8 Меöдз волысьяс – ставныс гусясьысьяс да лёк вöчысьяс. Ыжъяс эз кывзыны найöс. 9 Ме – öдзöсыс. Меöд пырысьыс мездмас. Сiйö пырас, петас да йирсянiн аддзас. 10 Гусясьысь локтö сöмын гусявны, вины да бырöдны. А Ме локтi сетны олöм, тырвыйö олöм. 11 Ме – ыжъяслы бур видзысь. Бур видзысь сетö ассьыс олöмсö ыжъясыс вöсна. 12 Меда морт оз ассьыс ыжъяссö видз. Кор аддзö локтысь кöинöс, сiйö эновтö ыжъяссö да пышйö. Сэки кöин косявлö ыжъяссö, да найö разалöны. 13 Меда морт пышйö, öд сiйöс сöмын медалöма, сылы веськодь, мый лоö ыжъясыскöд. 14 Ме – ыжъяслы бур видзысь. Ассьым ыжъясöс Ме тöда, и Менам ыжъясöй тöдöны Менö. 15 Кыдзи Батьöй тöдö Менö, сiдзи Ме тöда Батьöс. Ассьым олöмöс Ме сета ыжъясöй вöсна. 16 Тайö йöрас кындзи Менам эмöсь мукöд ыжъяс, Меным тшöтш колö вайöдны найöс. Найö кыласны Менсьым гöлöс шыöс, сэки лоас öти чукöр да öти видзысь. 17 Батьöйлы Ме муса, öд Ме сета Ассьым олöмöс, медым бöр босьтны сiйöс. 18 Менсьым олöмöс некод оз вермы мырддьыны, Ме Ачым сета сiйöс. Ме верма сетны сiйöс, и верма бöр босьтны. Тадзи тшöктiс вöчны Менам Батьöй». 19 Тайö кывъясысь юдейяс венö воисны. 20 Унаöн на пöвстысь шуалiсны: «Сiйöс пеж лов кутöма, Сiйö йöйталö. Мыйла Сiйöс кывзанныд?» 21 Мукöдыс шуалiсны: «Пеж лолöн кутöм морт оз вермы тадзи сёрнитны. Вермас öмöй пеж лов синтöмъясöс бурдöдны?» 22 Вöлi тöв. Ерусалимын вöлi гажöдчан кад – крам вежöдöмсö казьтылöм. 23 Исус ветлöдлiс крамдорса Соломон йöрöд. 24 Сэки юдейяс кытшалiсны Исусöс да шуисны: «Тэ дыр на кутан миянöс бöбйöдлыны? Тэ кö Кристос, веськыда висьтав миянлы». 25 Исус вочавидзис: «Ме висьталi нин тiянлы, но тi онö эскöй. Менам уджъясöй, кодъясöс Ме вöча Бать нимсянь, висьталöны Ме йылысь. 26 Но тi онö эскöй, öд тi абу Менам ыжъяс. Тайöс Ме висьтавлi нин тiянлы. 27 Менам ыжъясöй кывзöны Менсьым гöлöс шыöс, и найöс Ме тöда. Найö локтöны Ме бöрся. 28 Ме сета налы помтöм олöм, и найö некор оз бырны. Некод оз мырддьы найöс Менам киысь. 29 Менам Батьöй, кодi сетiс Меным найöс, ставсьыс медыджыд. Некод оз вермы мырддьыны найöс Менам Батьлöн киысь. 30 Ме да Бать – ми öти». 31 Сэки юдейяс босьтiсны изъяс, медым лыйлыны Исусöс. 32 Сiйö шуис налы: «Батьлöн тшöктöм серти уна бур удж Ме вöчи тiян пöвстын. Кутшöм уджысь нö кöсъянныд изъявны Менö?» 33 Юдейяс вочавидзисны: «Огö бур уджысь Тэнö изъялöй, изъялам Енмöс омöльтöмысь. Тэ морт, а Енмö пуксян». 34 Исус вочавидзис: «Абу-ö гижöма тiян Индöдын, мый "Ме шуи: тi – енъяс"? 35 Гижöдыс оз вежсьы. Енмыс кö шуис енъясöн найöс, кодъяслы сетiс Ассьыс Кывсö, 36 сiдзкö, мыйла тi шуанныд Менö Енмöс омöльтысьöн, Ме кö шуа ачымöс Ен Пиöн? Öд Менö Батьöй вежöдiс да мöдöдiс муюгыдас. 37 Ме кö ог вöч Батьлысь уджъяссö, энö эскöй Меным. 38 А вöча кö, эскöй кöть Менам уджъясö, Меным онö эскöй да. Сэки тi тöдмаланныд да эсканныд, мый Батьöй Ме пытшкын, а Ме – Сы пытшкын». 39 Сэки юдейяс бара кöсйисны кутны Исусöс, но Сiйö эз сетчы налы. 40 Исус бара вуджис Йöрдан ю мöдлапöлö, кöнi Иоан пыртлiс йöзсö, да кольччис сэтчö. 41 Сы дiнö локтiс уна йöз. Найö шуалiсны: Иоан шензьöданаторсö эз вöчлы, но ставыс, мый Иоан висьтавлiс тайö Мортыс йылысь – тайö збыль. 42 Сэнi унаöн эскисны Исуслы.
1 Вифания сиктын олiс Лазар нима морт, сiйö висис. Сэнi олiсны тшöтш Лазарлöн Марья да Марпа чойясыс. 2 Буретш тайö Марьяыс бöрынджык мавтас Господьöс чöскыд дука выйöн да чышкалас Сылысь коксö аслас юрсиöн. Висьысь Лазар вöлi Марьялöн вокыс. 3 Чойяс мöдöдiсны мортöс висьтавны Исуслы: «Господьöй, Тэнад муса ёртыд висьö». 4 Тайöс кылöм бöрын Исус шуис: «Тайö висьöмыс абу кулöм вылö, но Енмöс ошкöм вылö. Та пыр воссяс Ен Пилöн дзирдлуныс». 5 Лазар, Марпа да сылöн чойыс вöлiны мусаöсь Исуслы. 6 Кор Исус тöдмалiс Лазарлöн висьöм йылысь, Сiйö кольччылiс на кык лун кежлö сэтчö, кöнi вöлi. 7 Сэсся шуис велöдчысьясыслы: «Бöр мунамöй Юдеяö». 8 Велöдчысьясыс шуисны Исуслы: «Велöдысь, Юдея муын сöмын на кöсйисны вины Тэнö изъясöн, а Тэ бара нин мунан сэтчö?» 9 Исус вочавидзис: «Лунын öмöй абу дас кык час? Луннас ветлысь оз крукась, öд сiйö аддзö тайö мувывса югыдсö. 10 Войнас ветлысь крукасьö, öд сылöн югыдыс абу». 11 Тайöс шуöм бöрын Исус содтiс: «Миян Лазар ёртным унмовсьöма. Ме муна сiйöс садьмöдны». 12 Велöдчысьясыс шуисны Сылы: «Господьöй, унмовсьöма кö, бурдас». 13 Исус сёрнитiс Лазарлöн кулöм йылысь, а велöдчысьясыс мöвпалiсны, мый Исус сёрнитö узьöм йылысь. 14 Сэки Исус веськыда шуис налы: «Лазар кулöма. 15 Ме нимкодяся тiян вöсна, мый эг вöв сэнi, öд öнi тi понданныд эскыны. Локтöй, мунамöй сы дiнö». 16 Сэки Фома, кодöс шуисны Двöйнипöлöн, шуис мукöд велöдчысьыслы: «Мунам да Сыкöд öтлаын кулам». 17 Локтöм бöрас Исуслы висьталiсны, Лазарöс пö нёль лун сайын нин дзебисны. 18 Вифания сикт вöлi Ерусалимсянь матын, кык-куим верст ылнаын. 19 Уна йöз вöлi локтöмаöсь Марпа да Марья ордö, медым пальöдны кулöм вок вöснаыс налысь шогсö. 20 Марпа кылiс Исуслöн локтöм йылысь да петiс Сылы воча. Марья пукалiс гортас. 21 Марпа шуис Исуслы: «Господьöй, вöлiн кö Тэ танi, менам вокöй эськö эз кув. 22 Но весиг öнi тöда: мый коран Енмыслысь, Сiйö сетас Тэныд». 23 Исус вочавидзис: «Ловзяс тэнад вокыд». 24 Марпа шуис Сылы: «Тöда, сiйö ловзяс медбöръя лунö, кор ловзясны кулöмаяс». 25 Исус шуис: «Ме – Ловзьöдысьыс да Олöмыс. Меным эскысь весиг кулöм бöрас кутас овны. 26 Быдöн, кодi олiгас эскö Меным, некор оз кув. Эскан-ö таö?» 27 Марпа шуис: «Эска, Господьöй! Ме эска, мый Тэ – Кристос, Ен Пи, кодлы колö вöлi локны муюгыдас». 28 Тайöс шуöм бöрын Марпа мунiс Марья чойыс дiнö да гусьöн висьталiс сылы: «Велöдысьным танi, тэнö корö». 29 Тайöс кылöм мысти Марья дзик пыр чеччис да мунiс Исус дiнö. 30 Исус абу на вöлi пырöма сиктас. Сiйö вöлi сэнi, кöнi паныдасис Марпакöд. 31 Йöзыс, кодъяс вöлiны Марьякöд керкаын да пальöдiсны сылысь шогсö, аддзисны Марьялысь тэрмасьöмöн мöдöдчöмсö да петiсны сы бöрся. Найö чайтiсны, мый сiйö мунö дзебанiнö бöрдны. 32 Кор Марья локтiс Исус дiнö да аддзис Сiйöс, уськöдчис Сы водзö да шуис: «Господьöй, вöлiн кö Тэ танi, вокöй эськö эз кув». 33 Марьялысь да сыкöд локтысь йöзлысь бöрдöмсö аддзöмысь Исуслöн сьöлöмыс нормис. Сiйö сьöкыда ышловзис 34 да юалiс: «Кытчö тi пуктiнныд сiйöс?» Сылы вочавидзисны: «Господьöй, лок видзöдлы». 35 Исуслöн синваыс петiс. 36 Сэки йöзыс сёрнитiсны: «Видзöдлöй, кутшöм муса вöлöм Сылы Лазарыс». 37 Öткымынöн шуисны: «Сiйö бурдöдiс синтöмöс. Эз öмöй Сiйö вермы видзны Лазарöс кулöмысь?» 38 Исус локтiс дзебанiнас нормöм сьöлöмöн. Дзебанiныс вöлi кырта горсйын, а пыранiнсö вöлi тупкöма изйöн. 39 Исус шуис: «Вештöй изсö». Марпа, кулöм мортлöн чойыс, шуис: «Господьöй, сiйö дуксьöма нин, öд нёльöд лун нин дзебанiнын». 40 Исус шуис Марпалы: «Эг öмöй тэныд шулы, мый эскан кö, аддзан Енлысь дзирдлунсö?» 41 Сэки вештiсны изсö дзебанiнысь, кöнi куйлiс кулöм Лазар. Енэжö видзöдлöмöн Исус шуис: «Батьöй, Ме аттьöала Тэнö, мый кылiн Менö. 42 Ме тöда: Тэ пыр кылан Менö. Тайöс Ме шуи танi сулалысь йöзыс вöсна, медым найö эскисны, мый Тэ Менö мöдöдiн». 43 Тайöс шуöм бöрын Исус гораа шыасис: «Лазар, пет сэтысь!» 44 Кулöм Лазар петiс. Сылысь ки-коксö вöлi гартлöма дзебан дöраясöн, чужöмсö гартыштöма чышъянöн. Исус шуис: «Разьöй дöраяссö, мед мунас». 45 Унаöн, кодъяс волiсны Марья дiнö да аддзылiсны, мый Исус вöчис, пондiсны эскыны Исуслы. 46 Мукöдыс мунiсны фарисейяс дiнö да висьталiсны налы, мый Исус вöчис. 47 Аркирейяс да фарисейяс чукöртiсны веськöдлан котыр да сёрнитiсны: «Мый миянлы вöчны? Тайö Мортыс уна шензьöданатор вöчö. 48 Лэдзам кö Сылы водзö тадзи вöчны, ставныс кутасны эскыны Сылы. Сэки локтасны римсаяс да бырöдасны миянлысь вежаиннымöс да войтырнымöс». 49 Каиаф нима морт, кодi сiйö вонас аркиреялiс, шуис налы: «Тi нинöм онö вежöртöй. 50 Тi öмöй онö гöгöрвоöй, мый миянлы лоö бурджык, öти морт кö кулас войтыр вöсна, дзоньнас войтырыс бырöм дорысь». 51 Тайö кывъяссö сiйö шуис эз ассяньыс. Тайö вонас сiйö аркиреялiс, та вöсна водзвыв висьталiс, мый Исус кулас войтырыс вöсна. 52 Кулас оз сöмын тайö войтырыс вöсна, но медым öтлаö чукöртны Енлысь разалöм ныв-писö. 53 Тайö лунсяньыс найö шуисны вины Исусöс. 54 Та вöсна Исус эз нин ветлы восьсöн Юдея муöд. Сiйö мунiс сэтысь овтöминланьö, Ефраим карö, да кольччис сэтчö велöдчысьясыскöд. 55 Матыстчис юдейяслöн Ыджыд лун. Сиктъясысь унаöн локтiсны Ерусалимö, медым сöстöммöдчыны Ыджыд лун водзвылын. 56 Найö корсисны Исусöс, крамын сулалiганыс сёрнитiсны öта-мöдныскöд: «Кыдзи тi чайтанныд, локтас оз Сiйö татчö Ыджыд лун кежлö?» 57 Аркирейяс да фарисейяс водзвыв тшöктiсны йöзыслы: аддзас кö кодкö Исусöс, мед юöртас та йылысь, медым кутны Исусöс.
1 Ыджыд лунысь квайт лун водзджык Исус воис Вифания сиктö, кöнi олiс Лазар. Буретш сiйöс Исус ловзьöдiс. 2 Сэнi Исуслы лöсьöдiсны рытъя сёян. Марпа кесъялiс. Исускöд сёйысьяс пöвстын вöлi и Лазар. 3 Марья босьтiс литра джын зэв дона нард вый да мавтiс Исуслысь коксö, сэсся чышкалiс найöс юрсинас. Керкаас öвтiс чöскыд дукöн. 4 Велöдчысьяс пöвстын вöлi Иуда, Симон-Искариотлöн пиыс, кодi сэсся вузалас Исусöс. Сiйö шуис: 5 «Мыйла тайö выйсö эз вузавны куимсё динарысь? Сьöмсö эськö позис сетавны гöльяслы». 6 Дерт, Иуда эз тöждысь гöльяс вöсна. Сiйö шуис тадзи, ачыс вöлi гусясьысь да. Сы ордын вöлi öтувъя сьöм куд, кытысь сiйö босьтлывлiс аслыс. 7 Исус шуис: «Öвсьöй сыысь! Сiйö видзис тайö выйсö Менö дзебигкежлö. 8 Гöльяс пыр лоасны тiянкöд, а Ме ог пыр ло». 9 Йöзыс унаöн тöдмалiсны Исуслöн Вифания сиктö воöм йылысь. Найö локтiсны сэтчö эз сöмын Исус понда, но медым аддзывны тшöтш Лазарöс, кодöс Исус ловзьöдiс кулöмысь. 10 Аркирейяс шуисны вины тшöтш Лазарöс. 11 Öд Лазар вöсна йöзыс унаöн öтдортчисны наысь да кутiсны эскыны Исуслы. 12 Мöд луннас гажöдчанiнö чукöртчöм йöз кылiсны, мый Исус локтö Ерусалимö. 13 Пальма росъяс босьтöмöн найö петiсны Исуслы воча да горзiсны: – Осанна! Бурсиöма Господь нимöн Локтысьöс, Израиль Öксыöс! 14 Исус аддзис том осёлöс да пуксис сы вылö. Öд тадзи гижöма: 15 – Эн пов, Сион ныв! Видзöд, Öксыыд локтö осёл чань вылын пукалöмöн. 16 Сэки велöдчысьясыс эз на гöгöрвоны тайöс. Но Исуслöн дзирдлуныс воссьöм бöрын налы уси тöд выланыс, мый тадзи вöлi гижöма Сы йылысь, и тадзи найö паныдалiсны Сiйöс. 17 Найö, кодъяс вöлiны Исускöд, кор Сiйö чукöстiс Лазарöс дзебанiнысь да ловзьöдiс сiйöс, висьталiсны йöзыслы 18 тайö шензьöданатор йывсьыс. Та вöсна йöзыс чукöрöн петiсны Исуслы воча. 19 Фарисейяс сёрнитiсны ас костаныс: «Аддзанныд-ö, ми нинöм огö вермöй вöчны. Став йöзыс мунöны Сы бöрся». 20 Гажöдчан кад дырйи Енлы юрбитны локтiс тшöтш кымынкö грек. 21 Найö матыстчисны Филип дiнö, кодi вöлi Галилеяса Випсаидаысь, да корисны: «Ыджыдöй, ми кöсъям аддзывны Исусöс». 22 Филип мунiс да висьталiс та йылысь Öндрейлы. Сэсся Öндрей Филипкöд висьталiсны та йылысь Исуслы. 23 Исус шуис налы: «Воис кад – воссьыны Морт Пилöн дзирдлунлы. 24 Веськыда, веськыда висьтала тiянлы: шобдi тусь кö муö усьöм бöрас оз кув, сэки öтнас кольö. Кулас кö, уна тусь ваяс. 25 Тэныд кö муса олöмыд, воштан сiйöс. Мустöмтан кö ассьыд олöмтö тайö муюгыдас, видзан сiйöс помтöм олöмö. 26 Меным кесъялысь мед локтö Ме бöрся. Кöнi Ме лоа, сэнi тшöтш лоö Менам кесъялысьöй. И Меным кесъялысьöс Батьöй бурö пуктас. 27 Öнi Менам сьöлöмöй ёна майшасьö. Мый Меным шуны? Батьöй, мезды Менö тайö кадсьыс! Но дзик тайö кад кежлас Ме локтi. 28 Батьöй, восьт Аслад нимлысь дзирдлунсö!» Сэки енэжсянь кылiс гöлöс шы: «Ме восьтi нин да нöшта на восьта». 29 Сэнi сулалысь йöзыс тайöс кылöм бöрын шуалiсны: «Тайö гым». Мöдъяс шуалiсны: «Андел Сыкöд сёрнитiс». 30 Исус шуис: «Тайö висьталöмыс эз вöв Меным, а тiянлы. 31 Öнi тайö муюгыдсö лоö мыждöма. Öнi тайö муюгыдас ыджыдалысьсö лоö вöтлöма. 32 Му вылысь Менö кыпöдöм бöрын Ме ставнысö Ас дiнö сибöда». 33 Тайö висьталöмнас Сiйö гöгöрвоöдiс, кутшöм ногöн Сiйö кулас. 34 Йöзыс шуисны Сылы: «Ми тöдам Индöдысь, мый Кристос помтöг олö. Сiдзкö, мыйла Тэ шуан, Морт Пиöс пö кыпöдасны? Кодi сiйö Морт Пиыс?» 35 Сэки Исус шуис налы: «Этшаник кад югыдыс лоас на тiянкöд. Сiдзкö, ветлöй югыдыс дырйи, медым пемыдыс эз пöдты тiянöс. Öд пемыдас ветлысь оз тöд, кытчö мунö. 36 Кытчöдз югыдыс тiянкöд, эскöй югыдыслы. Сэки лоанныд югыдыслöн ныв-пиöн». Тайöс висьталöм бöрын Исус ылыстчис на дiнысь да саялiс. 37 Сы мында шензьöданатор Исус вöчис йöзыс водзын, но найö эз эскыны Сылы. 38 Тадзи инiсны Исай пророклöн кывъясыс: – Господьöй, кодi эскис миянсянь кывлöмас? Кодлы петкöдчис Господьлöн вына киыс? 39 Найö эз вермыны эскыны, кыдзи висьтавлiс на йылысь Исай: 40 – Енмыс тупкис налысь синнысö, чорзьöдiс налысь сьöлöмнысö, медым эз аддзыны синнаныс, эз гöгöрвоны сьöлöмнаныс да эз бергöдчыны Мелань, медым Ме бурдöдi найöс. 41 Исай шуис тайö кывъяссö Исуслысь дзирдлунсö аддзылiгас, да висьталiс Сы йылысь. 42 Веськöдлысьяс пöвстысь унаöн эскисны Исуслы. Сöмын фарисейясысь полöмнысла найö эз лысьтны висьтавны та йылысь веськыда, медым эз вöтлыны найöс синагогаысь. 43 Öд Енлöн ошкöм дорысь налы мусаджык вöлi йöзлöн ошкöмыс. 44 Исус гораа шыасис: «Меным эскысь оз Меным эскы, а Менö Мöдöдысьлы. 45 Менö аддзысь аддзö Менö Мöдöдысьöс. 46 Ме – югыдыс. Ме локтi му вылö, медым Меным эскысь эз коль пемыдас. 47 Менсьым кывъясöс кылысь кö оз эскы, Ме сiйöс ог мыжды. Ме öд локтi муюгыдсö мездыны, а эг мыждыны. 48 Кодi оз сибöд Менö да оз босьт Менсьым кывъясöс, сылöн эм аслас мыждысь: Менам висьталöм кывйöй медбöръя лунö мыждас сiйöс. 49 Ме висьталi эг Ассянь. Менö мöдöдысь Батьöй Ачыс велöдiс Менö, мый шуны да юöртны. 50 Ме тöда: Сылöн тшöктöмыс вайö помтöм олöм. Сiдзкö, Менам висьталöмöй – Батьлöн шуöм серти висьталöм».
1 Тайö вöлi Ыджыд лун водзвылын. Исус тöдiс, мый Сылы воис кад мунны тайö муюгыдсьыс Батьыс дiнö. Исуслы вöлi мусаöсь найö, кодъяс эскисны Сылы, Сiйö помöдз петкöдлiс налы Ассьыс муслунсö. 2 Рытнас найö чукöртчисны сёйны. Омöльыс вöлi ышöдöма нин Иудаöс, Симон-Искариот пиöс, вузавны Исусöс. 3 Исус тöдiс, мый Батьыс ставсö сетiс Сы киö, и мый Сiйö локтiс Енсянь да бöр Сы дiнö мунö. 4 Сёйигас Исус чеччис, пöрччис вылыс паськöмсö да вöнясис ки чышкöдöн. 5 Кисьтiс дозйö ва да кутiс мыськавны велöдчысьяслысь кокнысö, а вöнялöм чышкöднас чышкалiс найöс. 6 Исус матыстчис Симон-Петыр дiнö. Петыр шуис: «Господьöй, Тэ-ö менсьым кокöс мыськан?» 7 Исус вочавидзис: «Тэ öнi он на гöгöрво, мый Ме вöча, но бöрынджык гöгöрвоан». 8 Петыр шуис Сылы: «Некор он мыськав менсьым кокöс!» Исус воча шуис: «Ог кö мыськав тэнö, он ло Мекöд». 9 Симон-Петыр шуис Сылы: «Господьöй, мыськы тшöтш менсьым киöс да юрöс, эн сöмын кокöс!» 10 Исус вочавидзис: «Мыськалöмалысь колö мыськавны сöмын коксö, öд дзоньнассö сiйö сöстöм нин. Тi сöстöмöсь нин, сöмын абу ставныд». 11 Исус тöдiс, кодi Сiйöс вузалас, та вöсна шуис, абу пö ставныд сöстöмöсь. 12 Налысь кокнысö мыськалöм бöрын Исус пасьтасис да бара пуксис сёйны. Сiйö шуис велöдчысьясыслы: «Гöгöрвоанныд-ö, мый Ме öнi вöчи? 13 Тi шуанныд Менö Велöдысьöн да Господьöн. Тi веськыда шуанныд, Ме буретш сiйö. 14 Ме кö, тiян Господь да Велöдысь, мыськалi тiянлысь кокнытö, сiдзкö, тiянлы тшöтш колö мыськавны öта-мöдныдлысь кокнытö. 15 Тадзи Ме вöчи, медым тi вöчинныд Ме моз. 16 Веськыда, веськыда висьтала тiянлы: кесйöг абу ыджыдджык аслас ыджыдысь, да мöдöдöм морт абу ыджыдджык сiйöс мöдöдысьысь. 17 Тайöс кö тöданныд да та серти оланныд, тi шудаöсь. 18 Ме ог висьтав ставныд йылысь, öд Ассьым бöрйöмаясöс Ме тöда. Но Гижöдыслы колö инны: "Мекöд сёйысьыс мунас Меным паныд". 19 Ме водзвыв висьтала тайöс, медым лоöм бöрас тi эскинныд, мый Ме збыльысь Сiйö, кодöн шуа Ачымöс. 20 Веськыда, веськыда висьтала тiянлы: кодi сибöдö Месянь мöдöдöмаöс, сiйö сибöдö Менö. А Менö сибöдысь сибöдö Менö Мöдöдысьöс». 21 Тайöс висьталöм бöрын Исуслöн нормис сьöлöмыс. Сiйö шуис: «Веськыда, веськыда висьтала тiянлы: тiян пиысь öти вузалас Менö». 22 Сэки велöдчысьясыс видзöдлiсны öта-мöдныс вылö. Найö эз гöгöрвоны, код йылысь Сiйö сёрнитö. 23 Велöдчысьяс пиысь öти, кодi вöлi муса Исуслы, нёровтчöмöн пукалiс Исус бердын. 24 Симон-Петыр довкнитiс сылы, юав пö Исуслысь, код йылысь Сiйö сёрнитö. 25 Исуслы морöс бердас топöдчöмöн велöдчысьыс шуис: «Господьöй, кодi нö сiйö?» 26 Исус вочавидзис: «Сiйö мортыслы Ме сета кöтöдöм нянь тор». Исус кöтöдiс нянь тор да сетiс сiйöс Симон-Искариот Иудалы. 27 Тайö нянь тор бöрас Иуда пытшкö пырис сöтана. Исус шуис Иудалы: «Мый кöсъян вöчны, вöч öдйöджык». 28 Сёйысьяс пöвстысь некод эз гöгöрво, мыйла Исус шуис тадзи. 29 Кодсюрö чайтiсны, мый Исус тшöктiс ньöбны коланаторсö Ыджыд лун кежлö либö сетны мыйкö гöльяслы. Öд сьöм кудйыс вöлi Иуда ордын. 30 Нянь торсö босьтöм бöрын Иуда дзик пыр петiс ывлаö. Вöлi вой. 31 Иудалöн петöм бöрын Исус шуис: «Öнi воссис Морт Пилöн дзирдлуныс, а Пиыс пыр воссис Енлöн дзирдлуныс. 32 Енлöн дзирдлуныс кö воссис Пиыс пыр, сэки Енмыс Ас пытшкас восьтас Пиыслысь дзирдлунсö. Тайö лоö регыд нин. 33 Челядь, Меным этша нин колис овны тiянкöд, сэсся кутанныд корсьны Менö. Öнi висьтала тiянлы сiйö, мый коркö висьтавлi мукöдыслы: кытчö Ме муна, сэтчö тi онö вермöй локнысö. 34 Выль тшöктöм сета тiянлы: радейтöй öта-мöднытö! Кыдзи Ме радейта тiянöс, сiдзи тi радейтöй öта-мöднытö. 35 Радейтанныд кö öта-мöднытö, сэки быдöн аддзас, мый тi – Менам велöдчысьяс». 36 Симон-Петыр юалiс: «Господьöй, кытчö Тэ мунан?» Исус вочавидзис: «Кытчö Ме муна, сэтчö тэ öнi он вермы муннысö. Локтан Ме бöрся бöрынджык». 37 Петыр шуис: «Господьöй, мыйла öнi ог вермы Тэ бöрся муннысö? Ме ассьым олöмöс сета Тэ вöсна!» 38 Исус вочавидзис: «Тэ шуан, мый ассьыд олöмтö сетан Ме вöсна. Веськыда, веськыда висьтала тэныд: петук чукöсттöдз на тэ куимысь соссян Меысь».
1 «Мед оз майшась тiян сьöлöмныд. Эскöй Енлы да эскöй Меным. 2 Менам Бать керкаын вежöсыс уна. Эз кö вöв сiдзи, Ме эськö эг шу: муна дасьтыны тiянлы оланiн. 3 Ме дасьта оланiн да бöр локта босьтны тiянöс Ас дiнö, медым тi вöлiнныд Мекöд. 4 Тi тöданныд, кытчö Ме муна, туйсö тшöтш тöданныд». 5 Фома шуис Сылы: «Господьöй, ми огö тöдöй, кытчö Тэ мунан. Кыдзи нö ми вермам туйсö тöдны?» 6 Исус шуис сылы: «Ме – туйыс, збыльыс да олöмыс. Бать дiнö позьö локны сöмын Ме пыр, мöд туйыс абу. 7 Тi кö тöданныд Менö, тöданныд тшöтш Менсьым Батьöс. Öнi тi тöданныд Сiйöс, весиг аддзылiнныд Сiйöс». 8 Филип шуис Сылы: «Господьöй, петкöдлы миянлы Батьтö. Унджыксö ми огö кöсйöй». 9 Исус вочавидзис: «Он öмöй тöд Менö, Филип, Ме öд сы дыра нин ола тiянкöд? Менö аддзылысь и Батьöс аддзылiс. Мыйла тэ шуан, петкöдлы пö миянлы Батьтö? 10 Ме – Бать пытшкын, а Бать – Ме пытшкын. Эскан-ö таö? Сiйö кывъяссö, мый висьтала тiянлы, ог Ассянь висьтав. Тайö Ме пытшкын олысь Батьöй вöчö уджъяссö. 11 Эскöй Менам кывъясö: Ме – Бать пытшкын, а Бать – Ме пытшкын. Онö кö эскöй таö, эскöй Меным уджъясöй серти. 12 Веськыда, веськыда висьтала тiянлы: Меным эскысь кутас вöчны Ме кодь жö уджъяс, весиг наысь ыджыдджыкöс на, öд Ме муна Батьöй дiнö. 13 Мый коранныд Батьлысь Менам нимöн, сiйöс Ме вöча, медым Батьлöн дзирдлуныс воссис Пиыс пыр. 14 Мый коранныд Менам нимöн, сiйöс Ме вöча». 15 «Ме кö муса тiянлы, олöй Менам тшöктöмъяс серти. 16 Ме кора Батьлысь, и Бать сетас тiянлы мöд Дорйысьöс. Сiйö пыр лоас тiянкöд. 17 Тайö Дорйысьыс – Збыльыслöн Лолыс. Муюгыдыс оз аддзы да оз тöд Сiйöс, та вöсна оз вермы сибöдны. Тi тöданныд Сiйöс, öд Сiйö тiянкöд да тiян пытшкын. 18 Öтнанытö ог коль тiянöс, Ме бöр локта тiян дiнö. 19 Регыд муюгыдыс оз нин аддзы Менö, а тi кутанныд аддзыны Менö. Ме ола, та вöсна тi тшöтш кутанныд овны. 20 Сiйö лунö тi тöдмаланныд, мый Ме – Бать пытшкын, тi – Ме пытшкынöсь, а Ме – тiян пытшкын. 21 Кодi видзö сьöлöмас Менсьым тшöктöмъясöс да олö на серти, сiйö радейтö Менö. Кодi Менö радейтö, сiйöс Менам Батьöй радейтö. Ме сiйöс тшöтш радейта да восся сылы». 22 Мöд Иуда, абу Искариот, шуис Исуслы: «Господьöй, мыйла Тэ кöсъян воссьыны миянлы, а он муюгыдыслы?» 23 Исус вочавидзис: «Кодi радейтö Менö, сiйö олö Менам кывъяс серти. Менам Батьöй радейтö сiйöс. Ми локтам Батькöд да овмöдчам сы дiнö. 24 Кодi оз радейт Менö, сiйö оз ов Менам кывъяс серти. Сiйö кывъясыс, мый тi кыланныд, абу Месянь, найö – Менö мöдöдысь Батьсянь. 25 Тайöс висьталi тiянлы, кор Ме öні тiянкöд на. 26 Менам Батьöй мöдöдас Менам ним кузя Дорйысьöс – Вежа Лолöс. Сiйö велöдас тiянöс быдторйö да казьтыштас тiянлы ставсö, мый Ме висьтавлi тiянлы. 27 Лöньлун коля тiянлы. Ассьым лöньлунöс сета тiянлы, сiйö абу муюгыдыслöн лöньлун кодь. Энö майшасьöй да энö полöй. 28 Тi öд кывлiнныд Менсьым кывъясöс: "Ме муна да бöр локта тiян дiнö". Ме кö муса тiянлы, тi эськö нимкодясинныд Бать дiнö Менам мунöмысь, öд Батьöй Меысь ыджыдджык. 29 Ме водзвыв висьтала тайöс, медым лоöм бöрас тi эскинныд Меным. 30 Ог нин уна сёрнит тiянкöд, öд тайö муюгыдас ыджыдалысьыс локтö нин. Ме вылын сiйö ыджыдавны оз вермы. 31 Но медым муюгыдыс тöдiс, мый Бать Меным муса, ставсö вöча Батьлöн тшöктöм серти. Чеччöй, мунамöй татысь».
1 «Ме – збыль виноград пуыс, Менам Батьöй – виноград быдтысьыс. 2 Вотöс вайтöм увъяссö Сiйö кералö, а вотöс вайысь увсö Сiйö весалö, медым вайис унджык вотöс на. 3 Тi сöстöмöсь нин, öд Менам кывъясöй весалiсны тiянöс. 4 Лоöй Ме пытшкын, и Ме лоа тiян пытшкын. Увйыс кö абу йитчöма пуыскöд, ачыс сiйö оз вермы вайны вотöссö. Тi тшöтш онö вермöй вайны вотöссö, онö кö лоöй Ме пытшкын. 5 Ме – пуыс, тi – увъясыс. Кодi олö Ме пытшкын, а Ме сы пытшкын, сiйö вайö уна вотöс. Öд Метöг тi нинöм онö вермöй вöчнысö. 6 Кодi оз ло Ме пытшкын, увйöс моз сiйöс шыбитасны ортсö. А косьмöм увъяссö чукöртöны да шыбитöны биö. 7 Лоанныд кö Ме пытшкын, да Менам кывъясöй кö лоöны тiян пытшкын, сэки корöй, мый кöсъянныд, и лоас тiянлы. 8 Тi кö ваянныд уна вотöс да лоанныд Менам велöдчысьясöн, сэки воссяс Батьлöн дзирдлуныс. 9 Батьлы Ме ёна муса, тi Меным тшöтш ёна мусаöсь. Сiдзкö, олöй Менам муслун пытшкын. 10 Ме ставсö вöча Батьлöн тшöктöм серти да ола Сылöн муслун пытшкын. Тi кö вöчанныд Менам тшöктöм серти, сэки тшöтш кутанныд овны Менам муслун пытшкын. 11 Тайöс Ме висьталi тiянлы, медым Менам нимкодьлунöй вуджис тiянлы да тыртiс сьöлöмнытö. 12 Менам тшöктöмöй татшöм: радейтöй öта-мöднытö, кыдзи Ме радейта тiянöс. 13 Мортыс кö сетас олöмсö ёртыс вöсна, таысь ыджыдджык муслуныс абу. 14 Оланныд кö Менам тшöктöм серти, тi – Менам ёртъяс. 15 Ме ог нин шу тiянöс кесйöгъясöн. Öд кесйöг оз тöд, мый ыджыдыс вöчö. Ме шуа тiянöс ёртъясöн, öд Ме висьталi тiянлы ставсö, мый кывлi Батьсянь. 16 Энö тi Менö бöрйöй. Ме бöрйи тiянöс да мöдöдi, медым вайинныд бырлытöм вотöс. Тадзи кö вöчанныд, Батьöй сетас тiянлы ставсö, мый коранныд Сылысь Менам нимöн. 17 Ме тшöкта тiянлы: радейтöй öта-мöднытö». 18 «Муюгыдыс кö мустöмтö тiянöс, тöдöй: тiянысь водзджык на сiйö мустöмтiс Менö. 19 Тi кö вöлiнныд муюгыдсьыс, сэки эськö мусаöсь вöлiнныд муюгыдыслы. Но тi абу муюгыдсьыс, öд Ме бöрйи тiянöс сэтысь, сiйöн муюгыдыс мустöмтö тiянöс. 20 Кутöй тöд выланыд Менсьым кывъясöс: кесйöг абу ыджыдджык аслас ыджыдысь. Менö кö вöтлiсны, вöтласны тшöтш тiянöс. Менсьым кывъясöс кö кывзiсны, кывзасны тшöтш тiянлысь. 21 Ставсö тайöс найö вöчасны Менам ним вöсна, öд найö оз тöдны Менö Мöдöдысьöс. 22 Эг кö Ме лок да сёрнит накöд, найö эськö эз вöвны мыжаöсь. Öнi найö оз вермыны шуны, мый абу мыжаöсь. 23 Менö мустöмтысь Менсьым Батьöс тшöтш мустöмтö. 24 Ме кö эг вöч налöн син водзын сiйö уджъяссö, кодъясöс некод эз вöчлы, сэки эськö найö эз вöвны мыжаöсь. Öнi найö аддзылiсны Менсьым уджъясöс, но Менö да Менсьым Батьöс мустöмтöны. 25 Тадзи инö налöн Индöдын гижöмаыс: "Мустöмтöны Менö весьшöрö". 26 Ме мöдöда тiянлы Батьсянь Дорйысьöс, Сiйö – Збыльыслöн Лолыс. Сiйö локтас Батьсянь да висьталас Ме йылысь. 27 Тi тшöтш кутанныд висьтавны Ме йылысь, öд тi водзысяньыс Мекöд».
1 «Тайöс висьталi тiянлы, медым ті энö эновтчöй эскöмысь. 2 Тiянöс вöтласны синагогаысь. Весиг воас сэтшöм кад, кор тiянöс виысьяс кутасны чайтны, мый татшöм ногöн найö кесъялöны Енмыслы. 3 Найö вöчасны тадзи, öд Батьöс да Менö найö оз тöдны. 4 Тайöс Ме висьталi тiянлы, медым сiйö кадыс воигöн тi тöд выланыд уськöдiнныд Менсьым кывъясöс. Водзынсö тайöс эг висьтавлы тiянлы, öд Ме вöлi тiянкöд». 5 «Öнi муна Менö Мöдöдысь дiнö. Но некод тiян пиысь оз юав Менсьым, кытчö Ме муна. 6 Öд Менам висьталöмысь тiян сьöлöмныд тырис шогöн. 7 Ме висьтала тiянлы збыльсö: бурджык лоö, Ме кö муна. Öд ог кö мун, сэки Дорйысь оз лок тiян дiнö, а муна кö, мöдöда Сiйöс тiян дiнö. 8 Дорйысьыс локтас да эрдöдас муюгыдыслысь ылалöмсö – Сiйö висьталас налы мыж йылысь, веськыдлун йылысь да мыждöм йылысь. 9 Мыжыс сыын, мый оз эскыны Меным. 10 Веськыдлуныс сыын, мый Ме муна Батьöй дiнö да тi онö нин аддзöй Менö. 11 Мыждöмыс сыын, мый тайö муюгыдас ыджыдалысьсö мыждöма нин. 12 Унатор на верма висьтавны тiянлы, но öнi тi онö вермöй ставсö тöрöдны. 13 Збыльыслöн Лолыс локтас да велöдас тiянöс збыляс. Сiйö оз Ассяньыс кут висьтавны, а висьталас кывлöмсö да юöртас тiянлы водзö лоанасö. 14 Сiйö нимöдас Менö, öд Месянь кывлöмсö тiянлы юöртас. 15 Ставыс, мый Батьлöн, тшöтш Менам. Сiйöн Ме шуи, мый Месянь кывлöмсö тiянлы юöртас». 16 «Регыд тi онö аддзöй Менö, сэсся регыд бара аддзанныд Менö, öд Ме муна Бать дiнö». 17 Велöдчысьяс пиысь кодсюрö сёрнитiсны öта-мöдныскöд: «Мыйла Сiйö шуö: "Регыд тi онö аддзöй Менö, сэсся регыд бара аддзанныд Менö?" Мыйла Сiйö висьталö, Ме пö муна Бать дiнö?» 18 Найö шензисны: «Кыдзи гöгöрвоны Сылысь кывъяссö, кор шуö, регыд пö? Ми огö гöгöрвоöй Сылысь висьталöмсö». 19 Исус тöдiс, мый йылысь велöдчысьясыс кöсйöны юавны Сылысь, да шуис налы: «Сы йылысь-ö тi сёрнитанныд öта-мöдныдкöд, мый Ме кöсйи висьтавны тайö кывъяснас: "Регыд тi онö аддзöй Менö, сэсся регыд бара аддзанныд Менö"? 20 Веськыда, веськыда висьтала тiянлы: тi кутанныд сыркъялöмöн бöрдны, а муюгыдыс кутас нимкодясьны. Тi шогö усянныд, но тiян шогныд бергöдчас нимкодьлунö. 21 Кага вайысь ань шогсьö, кор воас кад чужтыны. Но чужтöм бöрас сылöн шогыс вунö нимкодьысла, öд муюгыдас морт чужис. 22 Öнi тi тшöтш шогсянныд, но Ме бара аддзыся тiянкöд. Сэки тiян сьöлöмныд тырас нимкодьлунöн, и тiянлысь нимкодьлунтö некод оз мырддьы. 23 Сiйö лунö тi нинöм нин онö юалöй Менсьым. Веськыда, веськыда висьтала тiянлы: Бать сетас тiянлы ставсö, мый коранныд Сылысь Менам нимöн. 24 Öнöдз тi нинöм энö корлöй Менам нимöн. Корöй, и лоö сетöма тiянлы. Сэки тiян нимкодьлунныд лоö помтöм-дортöм. 25 Ме висьтавлi тiянлы велöданвисьтъясöн. Но воас кад, кор ог нин кут тадзи сёрнитны. Сэки веськыда висьтала тiянлы Бать йылысь. 26 Сiйö лунö тi асьныд кутанныд корны Батьлысь Менам нимöн. Меным абу нин колана кевмысьны Батьлы тiян вöсна. 27 Тi асьныд мусаöсь Батьлы, öд тi радейтанныд Менö да эсканныд, мый Ме локтi Енсянь. 28 Ме локтi муюгыдас Бать дiнсянь. Öнi Ме коля муюгыдсö да бöр муна Бать дiнö». 29 Велöдчысьясыс шуисны Исуслы: «Öнi Тэ веськыда висьталан, он нин сёрнит велöданвисьтъясöн. 30 Öнi ми аддзам, мый Тэ тöдан ставсö. Миян юавтöдз на Тэ тöдан нин, мый вочавидзны. Та вöсна эскам: Тэ локтiн Енсянь». 31 Исус шуис: «Öнi тi эсканныд? 32 Воас кад да воис нин, кор тi ставныд разаланныд, Менö öтнамöс колянныд. Но Ме абу öтнам, öд Мекöд Батьöй. 33 Тайöс висьталi тiянлы, медым тiян вöлi лöньлун Ме пытшкын. Муюгыдас лоö сьöкыд тiянлы, но энö полöй, öд Ме верми муюгыдсö».
1 Тайöс висьталöм бöрын Исус видзöдлiс енэжас да шуис: «Батьöй, воис кад восьтны Пиыдлысь дзирдлунсö, медым Пиыд вермис восьтны Тэнсьыд дзирдлунтö. 2 Тэ индiн Питö ыджыдавны быдöн вылын. Сiйö сетас помтöм олöм быдöнлы, кодöс Тэ сетiн Сылы. 3 Помтöм олöмыс – тайö тöдны Тэнö, öти збыль Енмöс, да Тэöн мöдöдöм Исус Кристосöс. 4 Му вылас олiгöн Ме восьтi Тэнсьыд дзирдлунтö да вöчи Меным сетöм уджтö. 5 Батьöй, öнi сет Меным сiйö жö дзирдлунсö, кутшöм вöлi Менам дзирдлунöй му пуксьытöдзыс на, кор Ме вöлi Тэкöд. 6 Ме восьтi Тэнсьыд нимтö йöзыслы, кодъясöс Тэ сетiн Меным муюгыдсьыс. Найö – Тэнадöсь, Тэ Меным сетiн найöс. Найö видзисны Тэнсьыд Кывтö. 7 Öнi найö гöгöрвоöны: ставыс, мый Тэ сетiн Меным, тайö – Тэсянь. 8 Ме висьталi налы Тэнсьыд кывъястö. Найö сибöдiсны тайö кывъяссö да збыльысь тöдöны, мый Ме Тэсянь локтi. Найö эскöны, мый Тэ Менö мöдöдiн. 9 Ме кевмыся на вöсна. Ог став йöзыс вöсна кевмысь, кевмыся сöмын Меным сетöмаясыд вöсна, öд найö Тэнадöсь. 10 Ставыс, мый Менам, сiйö Тэнад, а мый Тэнад – сiйö Менам. Менам дзирдлунöй воссяс на пыр. 11 Ме абу нин муюгыдас, но найö муюгыдасöсь на. Ме Тэ дiнö локта. Вежа Батьöй, видз Меным сетöмаясöс Аслад нимöн, медым найö вöлiны Миян моз öтвыв. 12 Накöд муюгыдас олiгöн Ме видзи найöс, Меным сетöмаясöс, Тэнад нимöн. Ме видзи найöс, да некод эз вош на пиысь сы кындзи, кодлы колö вöлi вошнысö. Тадзи инiс Гижöдыс. 13 Öнi локта Тэ дiнö. Ме висьтала тайöс муюгыдас олiгöн на, медым Менам нимкодьлунöй тыртiс налысь сьöлöмнысö. 14 Ме висьталi налы Тэнсьыд кывтö. Муюгыдыс мустöмтö найöс, öд найö Ме моз абу тайö муюгыдсьыс. 15 Ог кевмы босьтны найöс муюгыдсьыс, кевма видзны найöс омöльысь. 16 Найö Ме моз абу тайö муюгыдсьыс. 17 Вежöд найöс збыльыд пыр. Збыльыс – тайö Тэнад кывйыд. 18 Тэ мöдöдiн Менö муюгыдас. Тэ моз жö Ме мöдöдi найöс муюгыдас. 19 На вöсна Ме сета Тэныд Ачымöс, медым збыльыс вежöдiс найöс. 20 Кевмыся ог сöмын на вöсна, кевмыся тшöтш мукöдыс вöсна, кодъяс эскöны Меным налöн висьталöм пыр. 21 Кевмыся, мед найö ставныс лоасны öтвыв. Кыдзи Тэ, Батьöй, Ме пытшкын, а Ме – Тэ пытшкын, тадзи мед найö лоасны öтвыв Миян пытшкын. Сэки муюгыдыс эскас, мый Тэ Менö мöдöдiн. 22 Меным сетöм дзирдлунтö Ме сетi тшöтш налы, медым найö вöлiны Миян моз öтвыв. 23 Ме кö на пытшкын, а Тэ – Ме пытшкын, сэки найö ставныс лоасны öтвыв. Тадзи муюгыдыс тöдмалас, мый Тэ Менö мöдöдiн, и найö мусаöсь Тэныд, кыдзи Ме муса Тэныд. 24 Батьöй, Ме кöсъя, медым Меным сетöмаясыд лоасны сэнi, кöнi Ме лоа, да аддзасны Менсьым дзирдлунöс, кодöс Тэ сетiн Меным. Öд Ме муса вöлi Тэныд му пуксьытöдзыс на. 25 Веськыда вöчысь Батьöй, муюгыдыс оз тöд Тэнö, а Ме тöда Тэнö. Öнi Тэнад сетöмаясыд тшöтш тöдöны, мый Тэ Менö мöдöдiн. 26 Ме велöдi найöс тöдны Тэнсьыд нимтö да нöшта на велöда, медым Ме вöлi на пытшкын, да медым на пытшкын вöлi сэтшöм муслун, кутшöм Тэнад муслуныд Ме дiнö».
1 Тайöс шуöм бöрын Исус мунiс велöдчысьясыскöд Кедрон ю сайö да пырис накöд сад йöрö. 2 Найö унаысь чукöртчылiсны сэтчö, сiйöн тайö йöрсö тöдiс тшöтш Иуда, Исусöс вузалысь. 3 Иуда вайöдiс сэтчö шыпуртаясöс да крам видзысьясöс, кодъясöс мöдöдiсны аркирейяс да фарисейяс. Найö локтiсны пöнаръясöн, биясöн да шыпуртъясöн. 4 Исус тöдiс нин, мый лоö Сыкöд, да воча петiс налы. Сiйö юалiс: «Кодöс тi корсянныд?» 5 Сылы вочавидзисны: «Назаретса Исусöс». Исус шуис: «Тайö Ме». Накöд орччöн сулалiс тшöтш Иуда, Исусöс вузалысь. 6 Кор Исус шуис: «Тайö Ме», шыпуртаяс бöрыньтчисны да усисны муас. 7 Исус бара юалiс: «Кодöс тi корсянныд?» Найö вочавидзисны: «Назаретса Исусöс». 8 Исус шуис налы: «Ме висьталi нин тiянлы, тайö Ме. Менö кö корсянныд, лэдзöй мукöдсö мунны». 9 Исус шуис тадзи, медым инiсны Сылöн кывъясыс: «Меным сетöмаясысь весиг öтикöс эг вошты». 10 Симон-Петырлöн вöлi шыпурт. Сiйö кыскис шыпуртсö да керыштiс аркирей кесйöглысь веськыд пельсö. Кесйöглöн нимыс вöлi Малк. 11 Исус шуис Петырлы: «Бöр пукты шыпурттö пуртöсас. Ог öмöй Ме ю сiйö чашасö, кодöс сетiс Меным Батьöй?» 12 Сэки шыпуртаяс, налöн веськöдлысьыс да крам видзысьяс босьтiсны Исусöс. Сiйöс кöрталöмöн 13 нуöдiсны медводз Аннас дiнö, Каиаф гöтырлöн бать дiнö. Сiйö вонас Каиаф аркиреялiс. 14 Буретш сiйö шулiс юдейяслöн веськöдлысьяслы, бурджык пö öти мортлы кувны войтырыс вöсна. 15 Симон-Петыр да нöшта öти велöдчысь мунiсны Исус бöрся. Аркирейлы тöдса вöлi тайö велöдчысьыс, та вöсна сiйö пырис Исускöд аркирей йöр пытшкö. 16 Петыр сулалiс йöр ортсыас, дзиръя дорас. Аркирейлы тöдса велöдчысьыс петiс, сёрнитыштiс дзиръя восьталысь анькöд да вайöдiс Петырöс йöр пытшкас. 17 Сэки аньыс юалiс Петырлысь: «Абу-ö тэ тшöтш тайö Мортыслöн велöдчысь?» Петыр шуис: «Абу». 18 Кöдзыд вöлi, та вöсна кесйöгъяс да крам видзысьяс пестiсны бипур да сы гöгöр сулалöмöн шонтысисны. Петыр тшöтш сулалiс накöд да шонтысис. 19 Аркирей юалiс Исуслысь Сылöн велöдöмыс да велöдчысьясыс йылысь. 20 Исус вочавидзис: «Ме ставсö висьтавлi восьсöн. Ме велöдi йöзсö синагогаясын да крамын, кöнi найö пыр чукöртчывлöны. Ме нинöм эг висьтавлы гусьöн. 21 Мыйла тэ Менсьым юасян? Юав Менö кывзысьяслысь, мый Ме висьтавлi налы. Найö тöдöны Менсьым висьтавлöмöс». 22 Кор Исус шуис тайöс, орччöн сулалысь видзысьыс кучкис Сылы чужöмас да шуис: «Тадзи тэ сёрнитан аркирейкöд?» 23 Исус вочавидзис: «Шуи кö мыйкö лёка, висьтав, мый лёксö шуи. Шуи кö веськыда, мыйла Менö нöйтан?» 24 Исусöс кöртавлöмöн Аннас мöдöдiс Сiйöс Каиаф аркирей дiнö. 25 Симон-Петыр сулалiс бипур дорын да шонтысис. Сылысь юалiсны: «Абу-ö тэ тшöтш Сылöн велöдчысь?» Сiйö соссис: «Абу». 26 Сэнi вöлi аркирейлöн кесйöг. Тайö кесйöгыс вöлi рöдвуж сылы, кодлысь пельсö Петыр керыштiс. Сiйö юалiс Петырлысь: «Эн-ö тэ вöв Сыкöд тшöтш сад йöрас?» 27 Петыр бара соссис. Дзик пыр кылiс петуклöн чукöстöм. 28 Асывводзнас Каиафсянь Исусöс нуöдiсны римса юралысьлöн керкаö. Юдейяслöн веськöдлысьяс эз пырны керка пытшкас, медым эз пежасьны да вермисны сёйны Ыджыд лунся сёян. 29 Пилат петiс на дiнö да шуис: «Мыйысь тi мыжаланныд тайö Мортсö?» 30 Найö вочавидзисны: «Эз кö вöв Сiйö лёк вöчысь, ми эськö эгö вайöдöй Сiйöс тэ дiнö». 31 Пилат шуис налы: «Босьтöй Сiйöс да мыждöй асланыд Индöд серти». Юдейяслöн веськöдлысьяс шуисны сылы: «Миянлы оз позь мыждыны мортöс кулöм вылö». 32 Тадзи инiсны Исуслöн кывъясыс, кутшöм ногöн Сiйö кулас. 33 Пилат бара пырис керкаö, корис ас дiнас Исусöс да юалiс: «Тэ-ö юдейяслöн Öксыыс?» 34 Исус воча шуис: «Ачыд-ö тэ тадзи мöвпалан, либö мукöдыс тадзи шуöны Ме йылысь?» 35 Пилат шуис: «Ме öд абу юдей. Тэнад войтырыд да аркирейяс сетiсны Тэнö менам киö. Мый Тэ вöчин?» 36 Исус вочавидзис: «Менам Юралöмöй абу тайö муюгыдсьыс. Вöлi кö тадзи, Менам кесъялысьясöй эськö тышкасисны Ме вöсна, медым эг шед веськöдлысьяслöн киö. Но Менам Юралöмöй абу татысь». 37 Пилат шуис Сылы: «Сiдзкö, Тэ Öксы?» Исус вочавидзис: «Тэ ачыд шуан, мый Ме Öксы. Ме чужи да локтi муюгыдас, медым висьтавны збыль йывсьыс. Кодi збыльыслöн, сiйö кывзö Менсьым кывъясöс». 38 Пилат юалiс: «Мый сiйö збыльыс?» Тайöс шуöм бöрын Пилат петiс юдейяс дiнö да шуис налы: «Ме некутшöм мыж Сылысь ог аддзы. 39 Тiян кöсйöм серти Ыджыд лун водзвылын быд во ме лэдза дзескыдiнысь öти мортöс. Кöсъянныд-ö, медым ме лэдзи тiянлы юдейяслысь Öксысö?» 40 Сэки ставныс горöдiсны: «Эн Сiйöс, а Варавваöс лэдз!» Варавва вöлi лёк вöчысь.
1 Сэки Пилат тшöктiс чорыда нöйтны Исусöс. 2 Шыпуртаяс пуктiсны Исуслы юрас лежнöгысь кыöм юркытш, пасьтöдiсны Сiйöс пемыдгöрд паськöмö 3 да шуалiсны: «Мед олас юдейяслöн Öксы!» Сэсся кучкалiсны чужöмас. 4 Пилат бара петiс йöзыс дiнö да шуис: «Ме петкöда Сiйöс тiян дiнö, медым тöдiнныд: ме некутшöм мыж Сылысь ог аддзы». 5 Исус петiс пемыдгöрд паськöма, юр вылас вöлi лежнöгысь юркытш. Пилат шуис йöзыслы: «Со, тайö Мортыс». 6 Исусöс аддзигöн аркирейяс да крам видзысьяс горöдiсны: «Тувъяв! Тувъяв Сiйöс!» Пилат шуис налы: «Тi асьныд босьтöй да тувъялöй Сiйöс. Ме некутшöм мыж Сылысь ог аддзы». 7 Найö вочавидзисны: «Миян эм Индöд. Индöдным серти Сылы колö кувны, öд Асьсö Сiйö Ен Пиöн шуö». 8 Тайöс кылöм мысти Пилат ёнджыка на повзис. 9 Сiйö пырис керкаас да юалiс Исуслысь: «Тэ кытысь?» Исус сылы нинöм эз вочавидз. 10 Пилат шуис: «Он кöсйы сёрнитны мекöд? Он öмöй Тэ тöд, мый ме верма тувъявны Тэнö, верма и мездыны?» 11 Исус вочавидзис: «Тэ эськö нинöм эн вермы вöчны Мекöд, эз кö вöв сетöма тэныд вылiсянь. Та вöсна Менö вузалысь ёнджыка на мыжа». 12 Та бöрти Пилат ёнджыка на кöсйис лэдзны Исусöс, но юдейяс горзiсны: «Сiйöс кö лэдзан, кесарлы тэ абу ёрт. Öд кодi пуктö асьсö öксыö, сiйö паныд мунö кесарлы». 13 Тайöс кылöм бöрын Пилат петкöдiс Исусöс ывлаö, ачыс пуксис мыждан пуклöсö, кодi сулалiс Изэрд вылын. Юдейяс тайö Изэрдсö шуисны Гаввафаöн. 14 Тайö вöлi Ыджыд лунлы паныд, лун шöрнас. Пилат шуис юдейяслы: «Со, тiян Öксыныд!» 15 Найö горöдiсны: «Босьт, тувъяв Сiйöс!» Пилат юалiс: «Тiянлысь Öксытö тувъяла?» Аркирейяс вочавидзисны: «Кесарысь кындзи миян öксыыс абу». 16 Сэки Пилат сетiс Исусöс тувъявны крестö. Исусöс нуöдiсны сэтысь. 17 Крестсö нуигтыр Исус кайис Юр лы нима керöсö, юдейяс тайö керöссö шуисны Голгопаöн. 18 Сэнi Сiйöс тувъялiсны крестö. Сыкöд орччöн öтар-мöдарсяньыс тувъялiсны кык мортöс, а шöракостаныс – Исусöс. 19 Пöвтор вылö Пилат тшöктiс гижны: «Назаретса Исус, юдейяслöн Öксы». Гижöдсö öшöдiсны крестас. 20 Тайö гижöдсö унаöн лыддисны, öд Исусöс тувъяланiныс вöлi карсянь матын. Гижöдсö вöлi гижöма еврей, грек да латин кывйöн. 21 Аркирейяс шуисны Пилатлы: «Эн гиж: "Юдейяслöн Öксы". Гиж, мый Сiйö шулiс: "Ме – юдейяслöн Öксы"». 22 Пилат вочавидзис: «Мый гижи, сiйöс гижöма нин». 23 Исусöс тувъялöм бöрын шыпуртаяс босьтiсны Сылысь паськöмсö да юкисны нёль пельö, быдöнлы вичмис öти тор. Босьтiсны тшöтш дöрöмсö. Дöрöмыс вöлi вурыстöм, дзоньнас кыöма. 24 Найö шуисны öта-мöдныслы: «Огö косявлöй дöрöмсö, вай пудъясям, кодлы сiйö вичмас». Тадзи инiс Гижöдыс: – Юкисны ас костаныс Менсьым паськöмöс, пудъясисны Менам дöрöм вöсна. Тадзи вöчисны шыпуртаяс. 25 Крест дорын сулалiсны Исуслöн мамыс, мамыслöн чойыс, Клопаслöн Марья нима гöтырыс да Магдала Марья. 26 Сэнi сулалысь мамсö да муса велöдчысьсö аддзигöн Исус шуис мамыслы: «Аньöй, тайö тэнад пиыд». 27 Сэсся шуис велöдчысьыслы: «Тайö тэнад мамыд». Сэксянь тайö велöдчысьыс босьтiс Марияöс ас дiнас. 28 Исус тöдiс, мый ставсö нин вöчöма. Сiйö шуис: «Горшöй косьмö». Тадзи инiс Гижöдыс. 29 Сэнi сулалiс шома вина тыра доз. Шыпуртаяс кöтöдiсны винаöн губка, сэсся иссоп бедь помö сатшкöмöн матыстiсны сiйöс Исуслы вомдорас. 30 Винасö видлöм бöрын Исус шуис: «Ставсö вöчöма!» Сэсся нёровтiс юрсö да лэдзис ловсö. 31 Ставыс тайö вöлi Ыджыд лунлы паныд лунö. Юдейяслöн веськöдлысьяс эз кöсйыны, медым шойясыс колисны крестын öшавны шойччан лун кежлö, öд матыстчис Ыджыд лун. Та вöсна корисны Пилатöс, медым тшöктiс чегъявны тувъялöмаяслысь кокчöр лыяссö да лэдзны найöс крест вылысь. 32 Шыпуртаяс локтiсны да чегъялiсны Исускöд орччöн тувъялöмаяслысь кокчöр лыяссö. 33 Исус дiнö матыстчöм бöрын найö аддзисны, мый Сiйö кулöма нин. Та вöсна кокчöр лыяссö Сылысь эз чегъявны. 34 Шыпуртаяс пиысь öти бытшкис Исуслы шынас ордлы костас, сэтысь чепöсйис вир да ва. 35 Тайöс аддзылысь висьталö та йылысь, медым тi эскинныд. Öд сылöн висьталöмыс веськыд. Сiйö тöдö, мый висьталö збыльсö. 36 Ставыс артмис Гижöдыс серти: «Сылысь лысö оз ло чегъялöма». 37 Мöдлаын тшöтш гижöма: «Кутасны видзöдны Сы вылö, кодöс бытшкасны». 38 Аримафея карысь Öсип вöлi Исуслöн гуся велöдчысь, öд сiйö полiс юдейяслöн веськöдлысьясысь. Сiйö мунiс Пилат дiнö да корис Исуслысь шойсö. Пилат тшöктiс босьтны. Öсип мунiс да босьтiс Исуслысь шойсö. 39 Сэтчö локтiс тшöтш Никодим, кодi водзынджык волiс Исус дiнö войнас. Сiйö вайис комын кило кымын смирнаысь да алоэысь вöчöм мавтас. 40 Найö босьтiсны Исуслысь шойсö да гартыштiсны сiйöс дзебан дöраö, кодöс вöлi кöтöдöма чöскыд дука мавтасöн. Тадзи дзеблiсны юдейяс кулöмаясöс. 41 Исусöс тувъяланiнсянь матын вöлi сад йöр, сэнi вöлi выль дзебанiн. Сэтчö некодöс на эз дзеблыны. 42 Матыстчис юдейяслöн шойччан лун, та вöсна Исуслысь шойсö пуктiсны тайö дзебанiнас, öд дзебанiныс вöлi матын.
1 Шойччан лун бöрын асъя рöмыдас Магдала Марья локтiс дзебанiнö. Сiйö аддзис: изсö вöлi вештöма пыранiнсьыс. 2 Сэки котöртiс Симон-Петыр дiнö да мöд велöдчысь дiнö, кодi вöлi муса Исуслы, да шуис налы: «Господьтö нуöмаöсь дзебанiнсьыс, но огö тöдöй, кытчö Сiйöс пуктöмаöсь». 3 Петыр мöд велöдчыськöд мöдöдчисны дзебанiнас. 4 Найö кыкнанныс котöртiсны. Мöд велöдчысьыс котöртiс Петырысь тэрыбджыка да водзджык воис дзебанiн дорас. 5 Сiйö копыртчис да аддзис дзебан дöраяссö, но пытшкас эз пыр. 6 Сы бöрся локтiс Симон-Петыр, пырис дзебанiнас да аддзис сэтысь дзебан дöраяссö. 7 Юрсö гартыштан чышъянсö вöлi тубыртöма, да куйлiс мöдлаын, дöраясысь торйöн. 8 Дзебанiнас пырис тшöтш мöд велöдчысьыс, кодi водзджык воис. Сiйö аддзис тайöс да эскис. 9 Öд найö эз на гöгöрвоны Гижöдсьыс, мый Исус ловзяс. 10 Сэсся велöдчысьяс бöр мунiсны гортаныс. 11 Марья бöрдiгтыр сулалiс дзебанiн дорас. Бöрдiгмозыс сiйö копыртчöмöн видзöдлiс дзебанiн пытшкас 12 да аддзис сэтысь еджыд паськöма кык анделöс. Öтиыс пукалiс шой вöвлöминас юрладорас, а мöдыс – кокладорас. 13 Найö юалiсны: «Аньöй, мыйла тэ бöрдан?» Марья вочавидзис: «Нуöмаöсь менсьым Господьöс, и ог тöд, кытчö Сiйöс пуктöмаöсь». 14 Тайöс шуöм бöрын Марья бергöдчис бöрланьыс да аддзис сулалысь Исусöс, сöмын эз тöд Сiйöс. 15 Исус юалiс: «Аньöй, мыйла тэ бöрдан? Кодöс корсян?» Марья чайтiс, мый сыкöд сёрнитö сад йöрын уджалысь, да шуис сылы: «Ыджыдöй, тэ кö петкöдiн Сiйöс, висьтав, кытчö пуктiн. Ме босьта Сiйöс». 16 Исус шуис: «Марья!» Марья бергöдчис да шуис: «Раввуни!» Тайö лоö: «Велöдысьöй!» 17 Исус шуис сылы: «Эн инмöдчы Ме дiнö, Ме öд эг на кыпöдчы Батьöй дiнö. Мун Менам вокъяс дiнö да висьтав налы: Ме кыпöдча Аслам Батьöй да тiян Батьныд дiнö, Аслам Енмöй да тiян Енныд дiнö». 18 Магдала Марья мунiс да юöртiс велöдчысьяслы, мый аддзылiс Господьöс, да висьталiс налы Исуслысь кывъяссö. 19 Шойччан лун бöрын рытнас велöдчысьяс чукöртчисны öтлаö. Найö полiсны юдейяслöн веськöдлысьясысь да йигналiсны öдзöсъяссö. Виччысьтöг локтiс Исус, сувтiс на шöрö да шуис: «Лöнь олöм тiянлы!» 20 Тайöс шуöм бöрын Сiйö петкöдлiс налы Ассьыс кисö да ордлыяссö. Господьöс аддзигöн велöдчысьяс долыдмисны. 21 Исус шуис налы мöдысь: «Лöнь олöм тiянлы! Кыдзи Бать мöдöдiс Менö, сiдзи Ме мöдöда тiянöс». 22 Тайöс шуöм бöрын Сiйö пöльыштiс налань да шуис: «Сибöдöй Вежа Лолöс. 23 Кодлысь мыжъяссö прöститанныд, сiйöс лоö прöститöма. Кодлысь онö прöститöй, сы вылö мыжыс коляс». 24 Исус волiгöн дас кыксьыс öти, Двöйнипöв Фома, эз вöв накöд. 25 Мукöд велöдчысьыс висьталiсны сылы: «Ми аддзылiм Господьöс». Фома воча шуис: «Ог кö аддзыв кисьыс кöрттув дойяссö да ог пуктыв сэтчö чуньöс, да ог кö пуктыв ассьым киöс сылы ордлыас, ог эскы». 26 Вежон мысти велöдчысьясыс бара вöлiны керкаынöсь, Фома тшöтш вöлi накöд. Öдзöсъясыс вöлiны йиганаöсь. Исус сувтiс на шöрö да шуис: «Лöнь олöм тiянлы!» 27 Сэсся шуис Фомалы: «Нюжöдлы чуньтö да видзöдлы Менсьым киöс. Нюжöдлы китö да пуктыв Менам ордлыö. Эн ло эскытöмöн, но ло эскысьöн». 28 Фома вочавидзис: «Господьöй, менам Енмöй!» 29 Исус шуис сылы: «Тэ эскан, Менö аддзылiн да. Шудаöсь найö, кодъяс оз аддзыны, но эскöны!» 30 Исус вöчис велöдчысьясыс дырйи уна мукöд шензьöданатор. На йылысь абу гижöма тайö небöгас. 31 Тайöс гижöма, медым тi эскинныд, мый Исус эм Кристос, Ен Пи. Эсканныд кö, Сылöн нимыс пыр тiянлы вичмас олöм.
1 Та бöрти Исус петкöдчис велöдчысьясыслы Тиверия ты дорын. Сiйö петкöдчис тадзи. 2 Симон-Петыр, Двöйнипöв Фома, Галилеяса Канаысь Нафанаил, Зеведейлöн пияныс да нöшта кык велöдчысь вöлiны öтлаынöсь. 3 Симон-Петыр шуис: «Ме муна чери кыйны». Сылы шуисны: «Ми тшöтш тэкöд мунам». Найö дзик пыр пуксисны пыжö да петiсны ва вылö. Сiйö войнас налы нинöм эз шед. 4 Водз асывнас Исус сулалiс вадорас. Велöдчысьясыс эз тöдны Сiйöс. 5 Исус юалiс налысь: «Ёртъясöй, шедiс-ö тiянлы чериныд?» Найö шуисны: «Эз». 6 Исус шуис: «Чöвтöй тывнытö пыж веськыдладорас, сэки шедас». Найö чöвтiсны. Чериыс шедiс сэтшöм уна, весиг васьыс тывсö эз вермыны кыскыны. 7 Сэки велöдчысьыс, кодi вöлi муса Исуслы, шуис Петырлы: «Тайö Господь». Симон-Петыр сэки вöлi пöрччысьöма. Кор кылiс, мый тайö Господь, сiйö öдйö пасьтасис да чеччыштiс ваас. 8 Мукöд велöдчысьыс локтiсны пыжнас да кыскисны чери тыра тывсö. Найö вöлiны матынöсь вадорсяньыс, воськов кыксё сайын. 9 Вадорас матыстчöм бöрын öгыръяс вылысь аддзисны чери, орччöн вöлi нянь. 10 Исус шуис налы: «Вайыштöй кыйöм черинытö». 11 Симон-Петыр мунiс да кыскис му вылас тывсö. Сэнi тырыс вöлi гырысь чери. Чериыс вöлi сё ветымын куим, но тывйыс эз косяссьы. 12 Исус шуис налы: «Локтöй, сёйöй». Велöдчысьясыс эз лысьтны юавны Сылысь: «Кодi Тэ?» Найö тöдiсны, мый Сiйö Господь. 13 Исус локтiс, босьтiс нянь да сетiс сiйöс велöдчысьясыслы, сетiс тшöтш черисö. 14 Тайö вöлi коймöдысь нин, кор Исус петкöдчис Аслас велöдчысьяслы ловзьöм бöрас. 15 Сёйöм бöраныс Исус шуис Симон-Петырлы: «Симон, Ионалöн пи, мусаджык-ö Ме тэныд налы дорысь?» Петыр шуис Сылы: «Мусаджык, Господьöй! Тэ тöдан, мый Тэ меным муса». Исус шуис сылы: «Йирсьöд Менсьым баляясöс». 16 Сэсся мöдысь юалiс Петырлысь: «Симон, Ионалöн пи, муса-ö Ме тэныд?» Петыр шуис Сылы: «Муса, Господьöй. Тэ тöдан, мый Тэ меным муса». Исус шуис сылы: «Видз Менсьым ыжъясöс». 17 Сэсся коймöдысь юалiс: «Симон, Ионалöн пи, муса-ö Ме тэныд?» Петыр шогö усис, мый Исус коймöдысь юалiс сылысь: «Муса-ö Ме тэныд?» Сiйö вочавидзис: «Господьöй, Тэ ставсö тöдан. Тэ тöдан, мый Тэ меным муса». Исус шуис сылы: «Йирсьöд Менсьым ыжъясöс. 18 Веськыда, веськыда висьтала тэныд: том дырйиыд тэ ачыд вöнясьлiн да ветлiн, кытчö кöсйин. Пöрысьмöм бöрад нюжöдан китö, сэки мöд тэнö вöньöдас да нуöдас, кытчö он кöсйы». 19 Тайöс висьталöмнас Исус сетiс тöдны, кутшöм ногöн ковмас кувны Петырлы да нимöдны Енмöс. Сэсся шуис Петырлы: «Лок Ме бöрся». 20 Петыр бергöдчис бöрланьыс да аддзис: на бöрся локтiс сiйö велöдчысьыс, кодi вöлi муса Исуслы. Рытъя сёйигöн Исуслы морöс бердас топöдчöмöн буретш сiйö юавлiс: «Господьöй, кодi нö Тэнö вузалас?» 21 Сiйöс аддзигöн Петыр юалiс Исуслысь: «Господьöй, а сiйöс мый виччысьö?» 22 Исус шуис Петырлы: «Ме кö кöсъя, медым сiйö олiс Менам локтöдз, мый тэ майшасян та вöсна? Тэ лок Ме бöрся». 23 Та вöсна эскысьяс пöвстын паськалiс сёрни, мый тайö велöдчысьыс оз кув. Исус эз шу Петырлы, мый тайö велöдчысьыс оз кув. Сiйö шуис сöмын: «Ме кö кöсъя, медым сiйö олiс Менам локтöдз, мый тэ майшасян та вöсна?» 24 Буретш сiйö велöдчысьыс висьталö та йылысь да гижис тайöс. Ми тöдам, мый сылöн висьталöмыс веськыд. 25 Уна мукöдтор на вöчис Исус. Но гижны кö та йылысь ставсö, сэки, ме чайта, муюгыдас эськö эз тöр та мында небöгыс. Аминь.
1 Воддза небöгас, дона Феофил, ме гижи тэныд ставсö, мый Исус вöчис да мыйö велöдiс водзысяньыс 2 сiйö лунöдзыс, кор кыпöдчис енэжö. Кыпöдчытöдзыс на Сiйö Вежа Ловсянь сетiс Аслас бöрйöм апостолъяслы тшöктöмъяс. 3 Сьöкыда кулöм бöрас Сiйö уна эскöданторйöн петкöдлiс налы, мый Сiйö ловзис. Нелямын лун чöж Сiйö петкöдчывлiс да висьтавлiс Енлöн Юралöм йылысь. 4 Апостолъяскöд öтлаын сёйигöн Исус шуис: «Ерусалимысь энö мунöй. Виччысьöй Батьлысь кöсйысьöмасö, мый йылысь Ме висьтавлi тiянлы. 5 Иоан пыртiс ваöн, но кымынкö лун мысти тiянöс лоö пыртöма Вежа Лолöн». 6 Чукöртчöмаяс юалiсны Исуслысь: «Господьöй, он-ö тайö кадö Тэ бöр сувтöд Израильлы юралöмсö?» 7 Сiйö вочавидзис: «Абу тiян мог тöдны кадъяс йылысь, Бать индö кадъяссö. 8 Но кор лэччас тiян вылö Вежа Лов, тiянлы лоö сетöма вын. Сэки понданныд висьтавлыны Ме йылысь Ерусалимын, став Юдеяын, Самарияын да став му пасьталаыс». 9 Тайöс висьталöм бöрын налöн син водзын Исус кыпöдчис енэжö, да кымöрыс вевттис Сiйöс. 10 Найö синнысö эз лэдзлыны енэжысь, пыр видзöдiсны Сылысь ылыстчöмсö. Виччысьтöг на водзö сувтiсны еджыд паськöма кык морт. 11 Найö шуисны: «Галилея войтыр, мый тi сулаланныд да видзöданныд енэжас? Тi асланыд синмöн аддзылiнныд Исуслысь енэжö кыпöдчöмсö, тадзикöн Сiйö бöр локтас». 12 Сэсся найö бöр мунiсны Ерусалимö Олив керöсысь, тайö керöсыс вöлi верст ылнаын Ерусалимсянь. 13 Локтöм бöраныс найö пырисны керкаö да кольччисны сэнi вылыс судтаас. Тайö вöлiны: Петыр, Яков, Иоан, Öндрей, Филип, Фома, Варфоломей, Матвей, Алфей Яков, Симон Зилот да Яков Иуда. 14 Найö ставныс аньяскöд, Исуслöн вокъяскöд да Сылöн Мария мамыскöд öти сьöлöмöн дугдывтöг кевмысисны. 15 Сiйö лунъясö чукöртчис сё кызь гöгöр велöдчысь. На шöрö сувтöмöн Петыр шуис: 16 «Вокъясöй, Гижöдыслы колö вöлi инны. Öд Давид пыр на Вежа Лов висьтавлiс Иуда йылысь, кодi вайöдiс Исус дiнö Сiйöс босьтысьясöс. 17 Иуда вöлi миян пиысь öти, сiйöс миянöс моз тшöтш вöлi бöрйöма кесъявны. 18 Лёк уджсьыс босьтöм сьöм вылас сiйö ньöбис му. Сэнi лёк ногöн уси, кынöмыс потi, весиг гырк пытшкöсыс ортсö петiс. 19 Та йылысь тöдмалiс став Ерусалимыс. Та вöсна муыслы сетiсны Акелдама ним, мый лоö: вир му. 20 Псалом небöгын гижöма: "Сылöн оланiныс мед кушмас, мед оз ло сэнi олысьыс". Нöшта гижöма: "Сылысь кесъялöмсö мед босьтас мöд". 21 Та вöсна миянлы колö бöрйыны öтиöс на пиысь, кодъяс вöлiны миянкöд да Господь Исускöд 22 Иоанлöн пыртöмсянь Исуслöн енэжö кыпöдчытöдзыс. Мед тайö мортыс сэсся миянкöд тшöтш висьталас Исуслöн ловзьöм йылысь». 23 Сэки вöзйисны кыкöс: Öсип-Варсаваöс, кодöс шуисны Юстöн, да Матфийöс. 24 Кевмысиганыс шуисны: «Господьöй, Тэ быдöнлысь тöдан сьöлöм. Инды тайö кык пытшсьыс Ассьыд бöрйöматö, 25 медым сiйö тшöтш кесъялiс да вöчис апостоллысь уджсö, öд Иуда кежис таысь да мунiс сэтчö, кöнi сылы колö лонысö». 26 Сэсся пудъясисны на вöсна. Пудйыс уси Матфийлы, сiйöс и индiсны дас кыкöд апостолнас.
1 Воис Ветымынöд лун. Найö ставныс вöлiны öтлаынöсь да öти сьöлöмаöсь. 2 Виччысьтöг енэжсянь кылiс ыджыд тöвнырлöн кодь шы. Шыыс тыртiс ставнас керкасö, кöнi найö пукалiсны. 3 Найö аддзисны ыпъялысь би кывъяс. Тайö би кывъясыс торъялiсны да лэччисны быдöн вылö. 4 Сэки ставныс найö тырисны Вежа Лолöн да пондiсны сёрнитны мукöд кывъяс вылын, кыдзи Лов сетiс налы висьтавнысö. 5 Тайö кадö Ерусалимын вöлiны му пасьталаысь воöм вежавидзысь юдейяс. 6 Тайö шыыс вылö чукöртчис уна йöз. Найöс шемöс босьтiс, öд быдöн кылiс ас кыв вылас сёрни. 7 Ставныс шензьöмöн шензисны да ас костаныс шуалiсны: «Абу-ö сёрнитысьясыс ставныс Галилеяысьöсь? 8 Быдöн тай нö ми кылам ас чужан кывнымöс? 9 Ми öд уналаысь воим: Парфияысь, Мидияысь, Еламысь, Месопотамияысь, Юдеяысь, Каппадокияысь, Понтысь, Асияысь, 10 Фригияысь, Памфилияысь, Египетысь, Римысь да Ливияса Киринея бердысь. Кодсюрö миян пöвстысь чужöмсяньныс юдейяс, а кодсюрö юдей эскöмö бергöдчöмаяс. 11 Нöшта эмöсь танi Критысь да Аравияысь локтысьяс. Быдöн тай нö ми асланым кыв вылын Енлöн ыджыд уджъяс йылысь кылам». 12 Ставныс шензисны да шöйöвошöмöн öта-мöдныслысь юасисны: «Мый нö тайö?» 13 А мукöдыс сералiсны, юмов винаысь пö коддзöмаöсь. 14 Петыр дас öтиыскöд сувтöмöн гораа шыасис: «Юдей войтыр да Ерусалимын мукöд олысьяс! Кывзöй менö да тöд выланыд босьтöй менсьым висьталöмöс. 15 Найö абу юöмаöсь, кыдзи тi чайтанныд, öд кадыс öкмыс час асыв. 16 Та йылысь Иоиль пророк на висьтавлiс: 17 – Бöръя лунъясö, – висьталö Ен, – кисьта Ассьым Лолöс быд морт вылö. Тiян пиянныд да нывъясныд пондасны пророкавны, зонъясныд кутасны аддзывны Енсянь петкöдчылöмъяс, а олöмаяс пондасны вöтавны збыльмана вöтъяс. 18 Сiйö лунъясö кисьта Ассьым Лолöс Аслам кесйöгъяс да кесйöг аньяс вылö, найö пондасны пророкавны. 19 Енэжсянь петкöдла шензьöданаторъяс, му вылын – индысьпасъяс: вир, би да тшын. 20 Шондiыс пемдас, тöлысьыс вирöн ойдас Господьлöн ыджыд да югыд луныс вотöдз. 21 И быдöн, кодi шыасяс Господь нимö, мездмас. 22 Израиль войтыр, кывзöй! Назаретса Исусöс сувтöдiс тiянлы Ачыс Енмыс. Сiйö петкöдлiс тайöс тiянлы шензьöданаторъясöн да индысьпасъясöн, кодъясöс вöчис тiян пöвстын Исус пыр. Тайöс тi асьныд тöданныд. 23 Енлöн шуöм серти Сiйöс вöлi сетöма тiян киö. Индöдтöг олысьяс киöн тi Сiйöс тувъялiнныд-виинныд. 24 Но Енмыс ловзьöдiс Сiйöс да мездiс кулöмыслöн вын улысь, öд кулöмыс эз вермы Сiйöс кутны. 25 Давид висьтавлiс Сы йылысь: – Господь быд кадö менам син водзын, Сiйö менам веськыдладорын, медым ме эг лигышмун. 26 Та вöсна сьöлöмöйлы долыд, кывйöй нимкодясьö, да менам вир-яйöй шойччö лача кутöмас. 27 Öд Тэ он коль менсьым лолöс адö, он сет Аслад вежалы аддзывны сiсьмöмсö. 28 Тэ петкöдлiн меным олöмыслысь туйсö, Аслад чужöмбан водзын Тэ тыртан менö нимкодьлунöн. 29 Вокъясöй! Кöсъя веськыда висьтавны тiянлы Давид айным йылысь. Сiйö кулiс да сiйöс гуалiсны, сылöн гуыс öнiя лунöдз на эм миян. 30 Давид вöлi пророкöн. Енмыс сылы кыв сетöмöн кöсйысис, мый пуксьöдас Давидлöн юралан пуклöсö сысянь чужысьöс – Кристосöс. Давид тöдiс тайöс, 31 öд сiйö сэки нин аддзис Кристослысь ловзьöмсö. Та йылысь сiйö висьталiс, мый Кристослöн лолыс оз коль адö да Сылöн шойыс оз аддзыв сiсьмöмсö. 32 Дзик тайö Исусöс Енмыс ловзьöдiс, и ми ставным тайöс аддзылiм. 33 Енмыс кыпöдiс Сiйöс да пуксьöдiс веськыдладорас. Батьсяньыс Сiйö босьтiс кöсйысьöм Вежа Лолöс да кисьтiс миян вылö, кыдзи тi öнi аддзанныд да кыланныд. 34 Давид эз кыпöдчы енэжас, сiйö сöмын висьталiс: – Господь шуис менам Господьлы: "Пукав Менам веськыдладорын, 35 кытчöдз ог пукты Тэнад кок улö Тэныд паныд мунысьясöс". 36 Бура тöдöй ставныд, Израиль войтыр: Ен пуктiс Господьöн да Кристосöн тайö Исусöс, кодöс тi тувъялiнныд». 37 Петырлöн кывъясыс вöрзьöдiсны йöзыслысь сьöлöмсö. Найö шуисны Петырлы да мукöд апостолъяслы: «Вокъяс, мый миянлы вöчнысö?» 38 Петыр шуис налы: «Бергöдчöй мыжъяссьыныд да пыртчöй Исус Кристос нимöн, медым Ен прöститас мыжъяснытö. Сэки Ен сетас тiянлы Вежа Лолöс. 39 Öд тайöс кöсйысьöма тiянлы, тiян ныв-пилы да став ылiсаыслы – дзик быдöнлы, кодöс корас Господь, миян Ен». 40 Тадзи унатор на Петыр висьталiс да ышöдöмöн шуалiс: «Мездысьöй тайö нэмса тшыксьöм йöзысь, мед эз су тiянöс мыждöмыс». 41 Унаöн долыдпырысь сибöдiсны сьöлöманыс Петырлысь кывъяссö да пыртчисны. Сiйö лунö öтувтчис эскысьяс дiнö куим сюрс гöгöр морт. 42 Эскысьяс став сьöлöмнас кутчысисны апостолъяслöн велöдöмö. Найö пыр öтлаын чукöртчывлiсны, чегисны нянь да кевмысисны. 43 Йöз пöвстын паськалiс полöм. Енмыс уна шензьöданатор да индысьпас петкöдлiс апостолъяс пыр Ерусалимын. 44 Эскысьяс олiсны öти сьöлöмöн, налöн ставыс вöлi öтувъя. 45 Найö вузавлiсны ассьыныс овмöс-эмбурнысö да сьöмсö юклiсны быдöнлы колана мында. 46 Быд лун найö öти сьöлöмöн чукöртчывлiсны крамö, а гортаныс чегисны нянь, сёйисны нимкодьпырысь да восьса сьöлöмöн. 47 Найö ставсьыс ошкисны Енмöс. Йöзыс найöс бурö пуктiсны, а Господь быд лун содтiс Вичкоö мездмöмаясöс.
1 Öтчыд кевмысян кадö куим часын Петыр да Иоан мунiсны крамö. 2 Сэнi вöлi чужöмсяньыс коктöм морт. Сiйöс быд лун вайлiсны крамö да пуксьöдлiсны сiдз шусяна "Мича öдзöс" дорö, медым сiйö корис пырысьяслысь. 3 Сiйö аддзис Петыр да Иоанлысь крамö пырöмсö да пондiс корны налысь. 4 Петыр да Иоан сюся видзöдлiсны сы вылö, сэсся Петыр шуис: «Видзöдлы миян вылö». 5 Сiйö синсö лэптiс на вылö да виччысис, оз-ö сетны мыйкö. 6 Петыр шуис: «Эзысь-зарни менам абу, но мый эм, сета тэныд. Назаретса Исус Кристос нимöн чеччы да ветлöдлы». 7 Петыр босьтiс сiйöс веськыд киöдыс да лэптiс. Дзик пыр вынсялiсны сылöн кокъясыс да пидзöсъясыс. 8 Сiйö чеччыштiгмоз сувтiс да кутiс ветлöдлыны, сэсся пырис накöд крамö. Сэнi чеччалöмöн ветлöдлiс да ошкис Енмöс. 9 Став йöзыс аддзылiсны сылысь ветлöдлöмсö да Енмöс ошкöмсö. 10 Йöзыс тöдiсны сiйöс, мый тайö сiйö корысьыс, кодi пукавлiс крамын "Мича öдзöс" дорын. Тайö лоöмторйыс ёна шензьöдiс йöзсö, да найöс полöм босьтiс. 11 Бурдысь эз вешйыв Петыр да Иоан дiнысь. Йöзыс шензигтыр чукöртчисны на дiнö Соломон йöрö. 12 Петыр аддзис тайöс да шуис йöзыслы: «Израиль войтыр, мый тi шензьöмöн видзöданныд миян вылö? Чайтанныд, ми ас вынöн тайöс вöчим да миян вежавидзöм понда сiйö ветлöдлö? 13 Öвраамлöн, Исааклöн да Яковлöн Ен, миян батьяслöн Ен, восьтiс Исус Пиыслысь дзирдлунсö. Тi вузалiнныд да соссинныд Исусысь Пилат водзын, Пилат öд кöсйис лэдзны Сiйöс. 14 Тi соссинныд Вежаысь да Веськыда Олысьысь, коринныд лэдзны морт виысьöс. 15 Тi олöм Сетысьöс виинныд, но Енмыс ловзьöдiс Сiйöс. Тайöс ми аддзылiм да висьталам та йылысь. 16 Исуслöн нимыс да Сылöн нимö эскöмыс ёнмöдiс тайö мортсö, кодöс тi öнi аддзанныд да бура тöданныд. Исус сетiс сылы эскöм, и тайö эскöмыс бурдöдiс сiйöс тiян син водзын. 17 Ме тöда, вокъяс, тi асланыд веськöдлысьяс моз вöчинныд тайöс гöгöрвотöг. 18 Енмыс водзвыв висьталiс Аслас пророкъяс пыр Кристослöн сьöкыд нуöмыс йылысь. И тайö инiс. 19 Бергöдчöй мыжъяссьыныд Енлань, медым Сiйö вештас тiянлысь мыжъяснытö. 20 Сэки Господь сетас тiянлы ловнытö выльмöдан кад, да мöдöдас тiянлы водзвыв бöрйöм Исус Кристосöс. 21 Енмыс босьтiс Сiйöс енэжас, и Сiйö лоö сэнi, кытчöдз ставсö оз ло лöсьöдöма воддза мозыс. Та йылысь важысянь Енмыс висьтавлiс Аслас вежа пророкъяс пыр. 22 Мöисей шулöма батьяслы: "Господь, тiян Ен, менö моз сувтöдас асланыд вокъяс пöвстысь Пророкöс. Кывзысьöй Сылысь быдторйын, мый шуас. 23 Кодi оз кывзысь тайö Пророкыслысь, сiйöс бырöдасны Ас войтырыс пöвстысь". 24 Самуил да сы бöрти став мукöд пророкыс тшöтш водзвыв висьтавлiсны тайö лунъясыс йылысь. 25 Тi пророкъяслöн ныв-пи, тiянлы вуджö йитöдыс, кодöс Ен кöрталiс тiян батьяскöд, кор шуис Öвраамлы: "Тэсянь чужысь пыр вуджас бурсиöмыс му вылын быд войтырлы". 26 Ен ловзьöдiс Ассьыс Писö, Исусöс, да мöдöдiс Сiйöс медводз тiян дiнö, медым лёксьыс бергöдчöм бöраныд бурсины тiянöс».
1 Кор Петыр да Иоан сёрнитiсны йöзыскöд, на дiнö матыстчисны попъяс, крам видзысьяслöн веськöдлысьыс да саддукейяс. 2 Найö скöралiсны, мый апостолъяс велöдöны йöзсö да висьтавлöны, Исус пö ловзис, и кулöмаяс пö тшöтш ловзясны. 3 Сэки найö босьтiсны Петырöс да Иоанöс да йöртiсны асылöдзыс дзескыдiнö, öд вöлi рыт нин. 4 А кывзысьяс пöвстысь унаöн эскисны да вокъяслöн лыдыс содiс вит сюрсöдз. 5 Мöд луннас чукöртчисны Ерусалимö юдейяслöн веськöдлысьяс, пöрысьяс да Индöдö велöдысьяс. 6 Сэнi вöлiны тшöтш Аннас аркирей, Каиаф, Иоан, Öльöксандр да аркирей рöдвужысь мукöдъяс. 7 Найö сувтöдiсны апостолъясöс шöрас да юалiсны: «Кутшöм вынöн да код нимöн тi тайöс вöчинныд?» 8 Сэки Петыр, кодi вöлi тырöма Вежа Лолöн, шуис налы: «Войтырлöн веськöдлысьяс да Израильлöн пöрысьяс! 9 Миянлысь кö талун тi коранныд воча кыв, мый ми бурдöдiм висьысь мортöс да сылы бур вöчим, 10 кывзöй да тöдöй, тi да став Израиль войтыр: ми вöчим тайöс Назаретса Исус Кристос нимöн. Бурсö вöчим Исуслöн вын отсöгöн, и тайö мортыс сулалö тiян водзын дзоньвидза. Тi тувъялiнныд Сiйöс крестö, но Енмыс ловзьöдiс. 11 Сiйö – из, кодöс тi, керка лэптысьяс, шыбитiнныд. Но тайö изйыс лоис пельöс изйöн. И абу мöд Мездысьыс, 12 да абу сетöма йöзлы енэж улас мöд нимсö, код пыр миянлы позьö мездмыны». 13 Кор йöзыс аддзисны Петыр да Иоанлысь повтöмлунсö да казялiсны, мый найö велöдчытöм йöз, ёна шензисны. Гöгöрвоисны, мый найö вöлöмаöсь Исускöд. 14 Но накöд сулалысь бурдöм мортöс аддзигöн нинöм паныд шуны эз вермыны. 15 Сэсся тшöктiсны петавны найöс, асьныс пондiсны сёрнитны ас костаныс: 16 «Мый кутам вöчны тайö йöзыскöд? Öд став Ерусалимыс тöдö налысь шензьöданатор вöчöмсö, ми огö вермöй соссьыны таысь. 17 Медым юöрыс водзö эз паськав войтырным пöвстын, чорыда öлöдам найöс, медым эз висьтавлыны Исус йылысь». 18 Сэсся бöр корисны апостолъясöс да тшöктiсны, мед дугдасны висьтавлыны да велöдны Исус йылысь. 19 Петыр да Иоан воча шуисны налы: «Мöвпыштлöй асьныд, бур-ö тайö Ен водзын, ми кö Енмöс дорысь ёнджыка кутам кывзыны тiянöс. 20 Ми огö вермöй чöв овны сы йылысь, мый аддзылiм да кывлiм». 21 Чорыда чирыштöм бöрын веськöдлан котыр лэдзис апостолъясöс. Йöз вöснаыс эз вермыны мыждыны найöс, öд ставныс ошкисны Енмöс тайö лоöмторсьыс. 22 Шензяна ногöн бурдöм мортлы вöлi нелямын сайö арöс. 23 Дзескыдiнысь петöм бöрын Петыр да Иоан мунiсны вокъясныс дiнö. Сэнi найö висьталiсны аркирейяслöн да пöрысьяслöн öлöдöм йылысь. 24 Найöс кывзöм бöрын ставныс öтвылысь шыасисны Ен дiнö: «Енмöй, Ыджыдöй, Тэ вöчин енэжсö и мусö, васö да ставсö, мый сэнi эм! 25 Миян Давид батьным пыр, Тэнад кесъялысь пыр, Тэ Вежа Ловнад шуин: – Мыйысь скöралöны ентöдтöмъяс, мыйла мöвпалöны ковтöмторсö войтыръяс? 26 Юралысьяс öтувтчöны, мувывса öксыяс сувтöны Господьлы да Сылöн Кристослы паныд. 27 Тайö карас Ирöд да Понтий Пилат збыльысь öтувтчисны ентöдтöмъяскöд да Израиль войтыркöд, сувтiсны Тэнад Мавтыштöмалы, Тэнад вежа Исус Пиыдлы паныд. 28 Найö олöмö пöртiсны Тэнсьыд водзвыв шуöмтö да вына лöсьöдöмтö. 29 Öнi, Господьöй, видзöдлы налöн повзьöдлöм вылö, отсав Аслад кесйöгъяслы повтöг висьтавны Тэнсьыд кывтö. 30 Нюжöд китö, медым висьысьяс Тэнад вежа Исус Пи нимöн бурдасны, шензьöданаторъяс да индысьпасъяс тыдовтчасны». 31 Кевмысьöм бöрас чукöртчанiнын муыс вöрзис. Ставныс тырины Вежа Лолöн да повтöг пондiсны висьтавны Енлысь Кывсö. 32 Эскысьяс ставныс вöлiны öти лолаöсь да öти сьöлöмаöсь. Некод ассьыс эмбурсö эз лыддьы асласöн, ставыс налöн вöлi öтувъя. 33 Апостолъяс ыджыд вынöн висьтавлiсны Господь Исус Кристослöн ловзьöм йылысь. Енлöн ыджыд буралöмыс вöлi ставныс вылын. 34 Налы ставыс вöлi тырмана. Кодлöн вöлi керка, видз-му, найö вузалiсны, да сьöмсö вайисны 35 апостолъяслы, а найö быдöнлы юклiсны тырмымöн. 36 Ёсей, Кипрын чужлöм левит, кодöс апостолъяс шуисны Варнава нимöн, мый лоö: бурöдысь, 37 тшöтш вузалiс ассьыс видз-мусö да вайис сьöмсö апостолъяслы.
1 Ананий нима морт Сапфира гöтырыскöд вузалiс овмöссö. 2 Босьтöм сьöмсьыс Ананий мыйтакö торйöдiс аслыс, гöтырыс тшöтш тöдiс та йылысь. Коляссö Ананий вайис апостолъяслы. 3 Петыр шуис сылы: «Ананий, мыйла тэ лэдзин сöтанаыслы ыджыдавны сьöлöмад? Вузалöм муыдлысь донсö дзебöмнад тэ пöръялiн Вежа Лолöс. 4 Эз öмöй ас киад вöв овмöсыд да босьтöм сьöмыд? Мыйла тэ лэдзин тайö лёк уджсö сьöлöмад? Тэ эн мортöс пöръяв, тэ пöръялiн Енмöс». 5 Тайöс кылöм бöрын Ананий усис да сылöн лолыс петiс. Та йылысь кывлысьясöс ставнысö ыджыд полöм босьтiс. 6 Том йöз пасьтöдiсны Ананийöс дзебан паськöмöн, сэсся петкöдiсны да гуалiсны сiйöс. 7 Час куим мысти локтiс Ананийлöн гöтырыс, дерт, лоöмтор йывсьыс сiйö нинöм эз тöд. 8 Петыр юалiс сылысь: «Висьтав меным, та донысь-ö мутö вузалiнныд?» Сiйö шуис: «Та донысь». 9 Петыр шуис: «Мыйла нö сёрнитчöмныд пöрйöдлыны Господьлысь Ловсö? Кылан-ö öдзöс сайысь кок шыяссö? Тэнсьыд верöстö гуалысьяс локтöны, öнi тэнö тшöтш петкöдасны». 10 Дзик пыр Сапфира усис Петыр кок дорö да сылöн лолыс петiс. Пырысьяс аддзисны сiйöс кулöмаöн, сэки петкöдiсны да гуалiсны сiйöс верöсыскöд орччöн. 11 Ыджыд полöм босьтiс став эскысьясöс да быдöнöс, кодi та йылысь кывлiс. 12 Уна шензьöданатор индысьпасъясöн вöчисны апостолъяс йöз пöвстын. Эскысьяс öти сьöлöмöн чукöртчывлiсны Соломон йöрö. 13 Йöзыс полiсны öтувтчыны накöд, но ошкисны найöс. 14 Тадзи Господьлы эскысьяслöн лыдыс пыр содiс, на пöвстын вöлiны айулов и аньяс. 15 Йöзыс петкöдлiсны висьысьясöс вольпасьнас ывлаö да водтöдавлiсны туй бокö, медым мунiгас Петырлöн вуджöрыс веськалiс на вылö. 16 Уна йöз волiс Ерусалимö матiгöгöр каръясысь. Найö вайöдлiсны висьысьясöс да пеж лолöн кутöмаясöс. И ставныс найö бурдiсны. 17 Аркирейлöн да сы дор сулалысь саддукейяслöн чужис ыджыд лöглун апостолъяс дiнö. 18 Найö босьтiсны апостолъясöс да йöртiсны дзескыдiнö. 19 Войнас Господьлöн андел восьтiс дзескыдiнысь öдзöсъяссö да петкöдiс найöс сэтысь. Сiйö шуис налы: 20 «Мунöй крамö да висьталöй йöзыслы тайö выль олöм йывсьыс ставсö». 21 Апостолъяс кывзысисны да асывводзнас мунiсны крамö, сэнi пондiсны велöдны. Сiйö кадас аркирей аслас йöзкöд корис веськöдлан котыр да Израиль войтырлысь пöрысьясöс, сэсся найö тшöктiсны вайöдны дзескыдiнысь апостолъясöс. 22 Дзескыдiнö воöм мысти мöдöдöмаяс эз аддзыны найöс. Найö бöр локтiсны да юöртiсны: 23 «Ми асланым синмöм аддзылiм, дзескыдiнсö вöлi бура йигналöма, и öдзöс водзас сулалiсны видзысьяс. Но кор ми восьтiм, некодöс эгö аддзöй сэтысь». 24 Тайöс кылöмысь крам видзысьяслöн веськöдлысь да аркирейяс шай-паймунiсны, кыдзи пö тайö вермис лоны. 25 Сэки локтiс öти морт да висьталiс, дзескыдiнö йöртöмаясыд пö крамынöсь, йöзсö велöдöны. 26 Крам видзысьяслöн веськöдлысь мунiс аслас йöзкöд да вайöдiс апостолъясöс. Но найöс эз вöрöдны, йöзсьыс полiсны, öд найöс асьнысö вермисны изъявны. 27 Апостолъясöс вайöдiсны да сувтöдiсны веськöдлан котыр водзö. Аркирей юалiс налысь: 28 «Ми öмöй эгö чорыда öлöдлöй тiянöс тайö нимнас велöдöмысь? Став Ерусалимсö шызьöдiнныд асланыд велöдöмöн, нöшта миянöс мыжданныд сiйö Мортсö виöмысь». 29 Петыр да мукöд апостолъяс вочавидзисны: «Мортыслы ёнджыка колö кывзыны Енмöс, а оз мортöс. 30 Миян батьяслöн Ен ловзьöдiс Исусöс, кодöс тi öшöдiнныд пу вылö да виинныд. 31 Ен пуксьöдiс Сiйöс Аслас веськыдладорö Юрнуöдысьöн да Мездысьöн, медым Израиль вермис бергöдчыны мыжъяссьыс да босьтны прöститöмсö. 32 Ми тöдам тайöс, та вöсна и висьталам. Висьталö та йылысь тшöтш Вежа Лов, кодöс Енмыс сетö Сылысь кывзысьысьяслы». 33 Тайöс кылöм бöрын став веськöдлан котырыс пузис скöрысла, найö дасьöсь вöлiны вины апостолъясöс. 34 Сэки сувтiс веськöдлан котырысь Гамалиил нима фарисей, Индöдö велöдысь, кодöс пыдди пуктiсны став йöзыс. Сiйö тшöктiс кад кежлö петкöдны сэтысь апостолъясöс. 35 Сэсся шуис веськöдлан котырлы: «Израиль войтыр! Энö тэрмасьöй тайö йöзыскöд мыйкö вöчны. 36 Та водзвылын, эз на ёна важöн, кыпöдчылiс Февдас, асьсö сiйö зэв ыджыдöн лыддис. Сы бöрся мунiс нёльсё гöгöр морт. Но сiйöс виöм бöрын сы бöрся мунысьяс ставныс разалiсны-вошисны. 37 Та бöрти вöлi йöз лыд пасъялöм, буретш сэки кыпöдчис Галилеяысь Иуда. Ас бöрсяыс сiйö бура уна йöзöс кыскис. Но сiйö кулiс, и сы бöрся мунысьяс ставныс разалiсны. 38 Öнi кöсъя шуны тiянлы: öвсьöй тайö йöзсьыс, лэдзöй найöс. Мортсянь кö тайö уджыс, сiйö киссяс, 39 а Енсянь кö, тi онö вермöй кисьтнысö. Видзчысьöй, мед энö лоöй Енлы паныд мунысьясöн». 40 Веськöдлан котыр кывзысис Гамалииллысь. Сэки корисны апостолъясöс да чорыда öлöдiсны, медым эз висьтавлыны Исус йылысь, сэсся нöйтöм бöрын лэдзисны найöс. 41 Веськöдлан котыр дорысь апостолъяс мунiсны долыдпырысь, öд Господь Исуслöн ним вöсна найö шогмисны увтыртöм туйö. 42 Быд лун крамын да гортъясаныс найö велöдiсны да висьтавлiсны Исус Кристос йылысь Бур Юöр.
1 Велöдчысьяслöн лыдыс лунысь-лун содiс. Грек кывйöн сёрнитысь юдейяс пондiсны шуасьны сэтчöс олысь юдейяс вылö, мыйла пö быдлунъя коланатор юклiгöн öтдортанныд миянлысь дöваясöс. 2 Сэки дас кык апостол корисны став велöдчысьсö да шуисны налы: «Миянлы абу бур кольны Енлысь Кывсö да сёян-юан вöсна тöждысьны. 3 Та вöсна, вокъяс, бöрйöй ас пöвстсьыныд сизим мортöс, кодъяс мывкыдаöсь да тырöмаöсь Вежа Лолöн. Найöс пуктам тайö уджсö вöчны. 4 Асьным ми водзö пондам кевмысьны да висьтавлыны Енлысь Кывсö». 5 Тайö вöзйöмыс ставныслы воис сьöлöм вылас. Бöрйисны Степанöс, сiйö вöлi зумыд эскöма да тырöма Вежа Лолöн. Нöшта бöрйисны Филипöс, Прокорöс, Никанорöс, Тимонöс, Парменöс да Антиокияысь Николайöс, кодi вöлi бергöдчöма юдей эскöмö. 6 Найöс сувтöдiсны апостолъяс водзö. Апостолъяс на вылö кинысö пуктылöмöн кевмысисны на вöсна. 7 Енлöн Кывйыс паськалiс да велöдчысьяслöн лыдыс Ерусалимын ёна содiс, весиг попъяс унаöн кутiсны эскыны. 8 Степан вöлi тырöма Енсянь вынöн да эскöмöн, сiйö вöчис йöз пöвстын ыджыд шензьöданаторъяс. 9 Киринеяысь да Александрияысь сiдз шусяна вöвлöм кесйöгъяслöн синагогаысь кодсюрö, нöшта Киликияысь да Асияысь кодсюрö панiсны вен Степанкöд. 10 Степан сёрнитiс ыджыд мывкыдлунöн да Лов вынöн, та вöсна эз вермыны венны сiйöс. 11 Сэки найö кодсюрööс ыззьöдiсны висьтавны, мый сiйö лёка сёрнитö Мöисей да Ен йылысь, мый найö тайöс асьныс кывлiсны. 12 Тадзи найö кыпöдiсны йöзсö, пöрысьясöс да Индöдö велöдысьясöс Степанлы паныд. Сэсся босьтiсны сiйöс да вайöдiсны веськöдлан котыр водзö. 13 Сэтчö корисны ылöгвисьталысьясöс. Найö шуисны: «Тайö мортыс век омöльтö миянлысь вежаинöс да Индöдöс. 14 Ми асьным кывлiм, кыдзи сiйö шулiс, Назаретса Исус пö жугöдас тайö вежаинсö да вежас Мöисейöн важысянь лöсьöдöм оласногсö». 15 Веськöдлан котырын пукалысьяс синсö вештывтöг видзöдiсны Степан вылö, сылöн чужöмыс вöлi анделлöн кодь.
1 Сэки аркирей юалiс: «Тайö тадз?» 2 Степан шуис: «Вокъясöй да батьясöй, кывзöй! Дзирдлуныслöн Ен петкöдчылiс Öвраам батьнымлы Месопотамияын, Харранö мунтöдзыс на. 3 Ен шуис сылы: "Коль ассьыд чужан мутö, ассьыд рöдвужтö да бать керкатö. Ме инда тэныд му – сэтчö мун". 4 Сэки Öвраам петiс Калдея муысь да овмöдчис Харранö. Батьыс кулöм бöрын Ен вайöдiс сэтысь Öвраамöс тайö муас, кöнi тi öнi оланныд. 5 Енмыс эз сет Öвраамлы татысь весиг кок пыдöс пасьта му. Но кор Öвраам вöлi ныв-питöм на, Енмыс кöсйысис сетны сылы да сысянь чужысьяслы мусö. 6 Ен шуис сылы: "Тэсянь чужысьяс овмöдчасны йöз муö. Найöс пондасны видзны кесйöг туйын да дзескöдны нёльсё во чöж. 7 Но Ме мыжда сiйö войтырсö, кодi нартитö найöс. Та бöрти найö петасны сэтысь да пондасны кесъявны Меным тайö муас". 8 Ен кöрталiс Öвраамкöд йитöд, кодöс вынсьöдiс вундыштчöмöн. Öвраамлöн чужис Исаак, кöкъямысöд луннас Öвраам вундыштiс сiйöс. Исаак вундыштiс Яковöс, а Яков вундыштiс ассьыс дас кыкнан писö, миянлысь айяснымöс. 9 Найö вежалiсны Öсиплы, та вöсна вузалiсны сiйöс Египетö. Но Енмыс вöлi сыкöд 10 да дорйис сiйöс быд сьöкыдыс дырйи. Енмыс сетiс сылы ыджыд мывкыдлун, та вöсна сiйö сьöлöм вылас воис фараонлы, египетса öксылы. Фараон весиг пуктiс сiйöс веськöдлыны Египетöн да аслас став овмöсöн. 11 Тшыгъялöм да ыджыд шог сэки суис став Египетсö да Ханаан мусö. Миян батьяслы нинöм вöлi сёйнысö. 12 Кор Яков кылiс, мый Египетын эм нянь, мöдöдiс сэтчö миянлысь батьяснымöс. Тайö вöлi налöн Египетö медводдза ветлöм. 13 Мöдысь ветлiганыс Öсип восьтiс асьсö вокъясыслы. Тадзи фараон тöдмалiс Öсиплысь рöдвужсö. 14 Öсип мöдöдiс корны ассьыс Яков батьсö да став рöдвужсö, ставнас вöлi сизимдас вит морт. 15 Тадзи Яков вуджис Египетö, сэнi сiйö кулiс, батьясным тшöтш сэнi кулiсны. 16 Сэсся вайисны найöс Сикемö да гуалiсны. Гусö Öвраам ньöблöма эзысь вылö Сикемын олысь Еммор пиянлысь. 17 Египетын войтырным öтарö содiс. Матысмис сiйö кадыс, мый йылысь Енмыс кыв сетöмöн кöсйысьлiс Öвраамлы. 18 Сэки юралысьö пуксис выль öксы, кодi Öсип йылысь нинöм эз тöд. 19 Сiйö наяна пöрйöдлiс миянлысь войтырнымöс, дзескöдiс батьяснымöс, тшöктiс налы эновтны ассьыныс пузчужöм кагаяссö, медым найö эз кольны ловйöн. 20 Сiйö кадö чужис Мöисей. Ен син водзын сiйö вöлi зэв мича. Куим тöлысь чöж сiйöс быдтiсны бать керкаас. 21 Кор вöлi кольöма Мöисейöс, фараонлöн нылыс босьтiс сiйöс да быдтiс пи пыдди. 22 Мöисейöс велöдiсны египетса став мывкыдлунö, сiйö вöлi вына сёрнинас да уджъяснас. 23 Нелямын арöс тыригас Мöисейлöн чужис кöсйöм видлыны ассьыс войтырсö, Израиль пиянöс. 24 Кор Мöисей аддзис, мый öтиöс на пиысь чорыда нöйтöны, уськöдчис дорйыны да водзöс перйöм могысь виис египетсаöс. 25 Мöисей чайтiс, вокъясыс гöгöрвоасны, мый Енмыс кöсйö мездыны найöс сы пыр, но найö тайöс эз гöгöрвоны. 26 Мöд луннас Мöисей аддзис: кык израильса öта-мöдныскöд тышкасьöны. Мöисей кöсйис, медым найö бурасисны да шуис налы: "Кывзöй, тi öд вокъяс. Мыйла нö öта-мöднытö увтыртанныд?" 27 Тышсö панысь тойыштiс Мöисейöс да шуис: "Кодi тэнö пуктiс миян вылын ыджыдалысьнас да мыждысьнас? 28 Гашкö, тöрытъя египетсаöс моз тэ тшöтш кöсъян вины менö?" 29 Тайö шуöмсьыс Мöисей пышйис Египетысь да овмöдчис Мадиам муö, сэнi сылöн чужис кык пи. 30 Нелямын во мысти овтöминын, Синай керöс дорын, öзъялысь лежнöг пытшкын петкöдчис Мöисейлы Господьлöн андел. 31 Аддзöмторйыс шемöсмöдiс Мöисейöс. Лежнöг дорö матыстчигöн сiйö кылiс Господьлысь гöлöс шысö: 32 "Ме тэнад батьяслöн Ен, Öвраамлöн Ен, Исааклöн Ен да Яковлöн Ен". Мöисейöс тiралöм босьтiс, сiйö эз лысьт весиг видзöдлынысö. 33 Господь шуис сылы: "Пöрччы кöмтö, öд муыс, кöнi тэ сулалан, вежа. 34 Ме аддза Аслам войтырлысь Египетын сьöкыдалöмсö да кыла налысь ойзöмсö. Ме лэччи мездыны найöс. Öнi мун, Ме мöдöда тэнö Египетö". 35 Ен мöдöдiс Мöисейöс, но Израиль пиян öтдортiсны сiйöс, шуисны, кодi пö тэнö пуктiс ыджыдалысьнас да мыждысьнас. Енмыс пуктiс сiйöс ыджыдалысьнас да мездысьнас. Вöчис тайöс андел пыр, кодi петкöдчис сылы лежнöг пытшкын. 36 Мöисей петкöдiс найöс Египетысь. Уна шензьöданатор да индысьпас сiйö вöчис Египет муын, Гöрд саридзын да нелямын во чöж овтöминын. 37 Öд буретш Мöисей висьтавлiс Израиль пиянлы: "Господь, тiян Ен, менö моз сувтöдас тiянлы асланыд вокъяс пöвстысь Пророкöс. Кывзöй Сiйöс". 38 Öд Мöисей, кодi вöлi овтöминын миян батьяскöд да кодкöд сёрнитiс андел Синай керöсын, босьтiс Енсянь ловъя кывъяссö, медым висьтавны миянлы. 39 Но миян батьяс эз кöсйыны кывзынысö, öтдортiсны сiйöс да сьöлöмнысö бöр бергöдiсны Египетлань. 40 Ааронлы шуисны: "Вöч миянлы енъясöс, кодъяс мунасны миян водзвылын. Ми огö тöдöй, мый лои Мöисейкöд, миянöс Египетысь петкöдысьнымкöд". 41 Сэки найö вöчисны öшпиöс, вайисны тайö идолыслы вись да нимкодясисны киöн вöчöмторныс водзын. 42 Енмыс бергöдчис на дiнысь да эновтiс найöс юрбитны тöлысь-кодзувъяслы. Та йылысь гижöма пророкъяслöн небöгын: – Израиль войтыр! Нелямын во чöжнас вайлiнныд-ö тi Меным овтöминас начкöм пемöсъясöс да мукöд висьяс? 43 Тi новлöдлiнныд Молоклысь чомсö да Ремфан енлысь кодзувсö. Ас киöн вöчинныд тайö серпасъяссö да юрбитiнныд налы. Та вöсна Ме вöтла тiянöс Вавилонысь на ылöджык. 44 Овтöминын миян батьяслöн вöлi Висьталан скиния. Ен петкöдлiс Мöисейлы скиниялысь серпассö да тшöктiс вöчны дзик жö сiдзи. 45 Миян батьяс колисны скиниясö асланыс пиянлы. Сэсся Исус Навинкöд найö пыртiсны сiйöс йöз муö. Ачыс Енмыс вöтлiс сэтчöс олысьяссö. Скинияыс вöлi сэнi Давид лунъясöдз. 46 Давид воис Енлы сьöлöм вылас. Сiйö кевмысис, медым вермис вöчны Яковлöн Енлы оланiн. 47 Но Енлы керкасö лэптiс Соломон. 48 А Медвылысса оз ов киöн вöчöм крамын. Пророк висьталö: 49 – Енэжыс Менам пукаланiн, муыс Менам кокув. Кутшöм керка тi вöчанныд Меным? Кöнi лöсьöданныд Меным шойччанiнсö? – шуö Господь. 50 Эг-ö Аслам киöн Ме вöч тайöс ставсö? 51 Асныралысьяс, тiян сьöлöмныд оз тöд Енсö да тiян пельныд оз кыв Сiйöс! Асланыд батьяс моз тi пыр паныд мунанныд Вежа Ловлы. 52 Эз вöв пророк, кодöс эськö эз вöтлыны тiян батьяс. Найö виисны пророкъясöс, кодъяс висьталiсны Веськыда Олысьлöн локтöм йылысь. Тайö Веськыда Олысьсö тi вузалiнныд да виинныд. 53 Анделъяс вайисны тiянлы Индöдсö, но тi энö олöй сы серти». 54 Тайöс кывзiгöн веськöдлан котырö чукöртчöмаяс пузисны скöрысла, пондiсны пиньнысö йирны. 55 Вежа Лолöн тырöм Степан видзöдлiс енэжö. Сiйö аддзис Енлысь дзирдлунсö да Сы веськыдладорын сулалысь Исусöс. 56 Степан шуис: «Ме аддза восьса енэж да Ен веськыдладорын сулалысь Морт Пиöс». 57 Сэки чукöртчысьяс пельнысö тупкöмöн лёк горшöн пондiсны равзыны, ставныс уськöдчисны Степан вылö. 58 Сэсся петкöдiсны сiйöс кар сайö да пондiсны изъявны. Изъялысьяс пукталiсны вылыс паськöмнысö Савл нима том мортлöн кок дорö. 59 Изъялiгöн Степан кевмысис: «Исусöй, Господьöй, босьт менсьым лолöс». 60 Сэсся пидзöс вылас усьöмöн гораа горöдiс: «Господьöй, эн мыжды найöс таысь». Тайöс шуöм бöрын Степанлöн лолыс петiс.
1 Степанöс виöмсö Савл лыддис буртор вöчöмöн. Сiйö лунсянь Ерусалимын ёна кутiсны вöтлыны эскысьясöс. Апостолъясысь кындзи ставныс найö разöдчисны Юдея да Самария пасьтала. 2 Вежавидзысь йöз гуалiсны Степанöс, ыджыд бöрдöмöн колльöдiсны сiйöс. 3 Савл жö зiлис бырöдны эскысьясöс, ветлiс керкаысь керкаö да мырдысьöн йöрталiс айуловöс да аньясöс дзескыдiнö. 4 Разöдчöм эскысьяс ветлöдлiсны да висьтавлiсны Бур Юöр. 5 Самарияын Филип локтiс öти карö да сэнi висьтавлiс Кристос йылысь. 6 Кор йöзыс кылiсны Филиплысь висьталöмсö, да аддзисны шензьöданаторъяс вöчöмсö, пондiсны сюся кывзыны сiйöс. 7 Уна пытшкысь лёкысь горзöмöн петiсны пеж ловъяс, унаöн вöрзьöдчыны вермытöмъяс да чотысьяс бурдiсны. 8 Став карыс ёна нимкодясис. 9 Тайö карас олiс Симон нима морт. Аслас туналöмöн сiйö шензьöдлiс Самарияын олысьясöс. Асьсö сiйö ыджыд мортö пуктiс. 10 Быдöн ичöтсянь гырысьöдз сюся кывзiс сiйöс, сы йылысь шуисны: «Сiйö – Енлöн ыджыд выныс». 11 Йöзыс кывзiсны сiйöс, öд дыр кад чöж сiйö шензьöдiс найöс тунасьöмнас. 12 Но кор кылiсны Енлöн Юралöм йылысь да Исус Кристос йылысь Бур Юöр, эскисны Филиплы, сэсся айулов да аньяс ставныс пыртчисны. 13 Ачыс Симон тшöтш эскис. Пыртчöм бöрас сiйö эз вешйыв Филип дiнысь, ёна шензис ыджыд вынöн вöчöм шензьöданаторъяс вылö. 14 Ерусалимын апостолъяс кор кылiсны, мый Самарияын сибöдöмаöсь Енлысь Кывсö, мöдöдiсны сэтчö Петырöс да Иоанöс. 15 Самарияö воöм бöрын найö кевмысисны, медым эскысьяс сибöдасны Вежа Лолöс. 16 На вылö абу на вöлi лэччöма Вежа Лолыс, найöс сöмын пыртöма вöлi Господь Исус нимöн. 17 Апостолъяс пуктылiсны на вылö кинысö, сэки Вежа Лов лэччис на вылö. 18 Симон аддзис, мый апостолъяслöн ки пуктылöм пыр эскысьяс тырöны Вежа Лолöн, сэки вайис апостолъяслы сьöм 19 да шуис: «Сетöй меным татшöм вынсö, медым менам ки пуктылöм пыр тшöтш тырисны Вежа Лолöн». 20 Петыр шуис сылы: «Тэнад эзысьыд мед сiсьмас тэкöд тшöтш. Тэ мöвпыштiн ньöбны Енмыслысь козинсö! 21 Тэныд весиг гыж ыджда пай оз вичмы таысь, öд тэнад сьöлöмыд абу веськыд Ен водзас. 22 Бергöдчы аслад лёк вöчöмысь да кевмысь Енлы, гашкö, Сiйö прöститас тэнсьыд лёк мöвптö. 23 Ме аддза, тэ курыд сöптöн тырöмыд, лёкыс кöрталöма тэнö». 24 Симон воча шуис: «Кевмысьöй ме вöсна Господьлы, медым эз су менö тiян шуöмныд». 25 Господь йылысь да Сылысь велöдöмсö висьталöм бöрын апостолъяс бöр мунiсны Ерусалимö. Мунiгмозыс висьтавлiсны Евангелльö Самария сиктъясын. 26 Господьлöн андел шуис Филиплы: «Лун шöр кадö чеччы да мун Ерусалимысь Газаö мунан эновтöм туй вылö». 27 Филип чеччис да петiс туйö. Сiйö кадас сэтi мунiс эфиопияса ыджыд чина морт, евнук, кодi вöлi эфиопияса кандакиялöн – öксы-аньлöн – став овмöснас веськöдлысьöн. Сiйö вöлi волöма Ерусалимö юрбитны. 28 Öнi бöр мунiс гортланьыс. Евнук пукалiс тарантасын да лыддис Исай пророклысь гижöд. 29 Вежа Лов шуис Филиплы: «Матыстчы тарантас дорас да мун орччöн». 30 Филип котöрöн матыстчис да кылiс, тарантасын пукалысь лыддис Исай пророклысь гижöд. Филип юалiс: «Гöгöрвоан-ö, мый лыддян?» 31 Мöдыс шуис: «Кыдзи нö верма гöгöрвонысö, гöгöрвоöдысьыс кö абу?» Сiйö корис Филипöс пуксьыны орччöн. 32 Гижöдсьыс сiйö лыддис татшöм кывъяс: – Сiйöс вайöдiсны начкыны ыжöс моз. Шы лэдзлытöм баля моз Сiйö эз восьтлы шырысь водзын Ассьыс вомсö. 33 Сiйöс вöлi увтыртöма, да мыждöма абу веськыд ёрд водзын. Кодi висьталас Сысянь водзö чужысьяс йылысь, мувывса олöмсö кö Сылысь орöдасны? 34 Евнук шуис Филиплы: «Висьтав, код йылысь пророкыс шуöма тайöс? Ас йывсьыс али мöд йылысь?» 35 Сэки Филип тайö гижöдсяньыс пондiс висьтавны сылы Исус йылысь Бур Юöрсö. 36 Сэккостi найö воисны вадорö, евнук шуис: «Со ваыс. Мый менö кутö пыртчöмысь?» 37 Филип шуис сылы: «Став сьöлöмсяньыд кö эскан, позьö». Евнук вочавидзис: «Эска, мый Исус Кристос – Ен Пи». 38 Сэсся тшöктiс сувтöдны тарантассö да найö кыкнанныс пырисны ваö. Филип пыртiс сiйöс. 39 Ваысь петöм бöрын Вежа Лов лэччис евнук вылö. А Господьлöн андел босьтiс Филипöс, и евнук эз нин аддзы сiйöс. Евнук долыдпырысь мунiс водзö аслас туйöд. 40 Бöрынджык Филипöс аддзисны Азот карын. Кесарияö мунiгöн сiйö быд карын висьтавлiс Бур Юöр.
1 Савл скöрысла пыр на пуис Господьлöн велöдчысьяс вылö, зiлис бырöдны найöс. Сiйö локтiс аркирей дiнö 2 да корис сысянь эскöдан гижöд Дамаск синагогаясö, медым Исус велöдöмö кутчысьысь айуловöс да аньясöс позис кöртавны да вайöдны Ерусалимö. 3 Дамаскö матыстчигöн туй вылас Савлöс виччысьтöг кытшалiс енэжсяньыс югыд. 4 Сiйö уси муас да кылiс гöлöс шы: «Савл, Савл, мыйла вöтлан Менö?» 5 Сiйö юалiс: «Кодi Тэ, Господьöй?» Господь шуис сылы: «Ме – Исус, кодöс тэ вöтлан. Сьöкыд тэныд мунны ёсь зорлы паныд». 6 Савлöс полöм босьтiс, тiралöмöн сiйö юалiс: «Господьöй, мый кöсъян, мед ме вöчи?» Господь шуис сылы: «Чеччы да мун карас. Сэнi висьталасны, мый тэныд колö вöчнысö». 7 Савлкöд öтлаын локтысьяс шöйöвошöмöн сулалiсны: найö кылiсны сёрни, а висьталысьсö эз аддзыны. 8 Савл чеччис муысь, восьтiс синсö, но нинöм эз аддзы. Киöдыс кутöмöн сiйöс вайöдiсны Дамаскö. 9 Куим лун чöж сiйö нинöм эз аддзы да олiс сёйтöг-ютöг. 10 Дамаскын олiс Ананий нима велöдчысь. Господь петкöдчис сылы да шуис: «Ананий!» Сiйö вочавидзис: «Танi ме, Господьöй». 11 Господь шуис сылы: «Чеччы да мун Веськыд нима туй вылö. Юав Иуда керкаысь Тарсын чужлöм Савл нима мортöс. Öнi сiйö кевмысьö. 12 Сiйö аддзылiс Енсянь петкöдчылöм, мый Ананий нима морт локтас, пуктылас сы вылö кисö, да сiйö кутас аддзыны». 13 Ананий вочавидзис: «Господьöй, ме унасянь кывлi тайö мортыс йылысь, мыйта лёк сiйö вöчис Тэнад вежа войтырлы Ерусалимын. 14 Сылöн эм аркирейяссянь гижöд, та вöсна вермас босьтны быдöнöс, кодi шыасьö Тэнад нимö». 15 Господь шуис: «Мун. Ме бöрйи сiйöс кесъявны Меным, юöртны Менсьым нимöс мукöд войтырлы да öксыяслы, тшöтш Израиль войтырлы. 16 Ме петкöдла сылы, мыйта сьöкыд ковмас нуны сылы Менам ним вöсна». 17 Ананий мунiс, пырис Иуда керкаö да Савл вылö кисö пуктöмöн шуис: «Савл вокöй! Менö мöдöдiс тэ дiнö Господь Исус, кодi петкöдчис тэныд туй вылын. Сiйö мöдöдiс менö, медым тэ бара кутiн аддзыны да тырин Вежа Лолöн». 18 Пырысь-пыр Савл синъясысь быттьö чери сьöм усис, да сiйö пондiс аддзыны. Сэсся дзик пыр чеччис да пыртчис. 19 Та бöрын сёйыштiс да ёнмис. Кымынкö лун Савл олiс Дамаскын велöдчысьяскöд. 20 Савл дзик пыр пондiс юöртны-висьтавны синагогаясын, мый Исус – сiйö Ен Пи. 21 Кывзысьяс ёна шензисны: «Эз-ö тайö мортыс бырöдав Ерусалимын Исус нимö шыасьысьясöс? Эз-ö сiйö лок татчö, медым босьтны найöс да нуöдны аркирейяс водзö?» 22 Савл лунысь-лун висьталiс вынаджыка да эскöдiс, мый Исус – сiйö Кристос. Тайöн весьöпöртiс Дамаскын олысь юдейясöс. 23 Кад мысти юдейяс сёрнитчисны вины Савлöс. 24 Тайö кывсис Савллы. Юдейяс лун и вой кыйöдчисны карса дзиръя дорын, медым вины сiйöс. 25 Войнас велöдчысьяс пуксьöдiсны Савлöс ыджыд чуманö да лэдзисны карса стен бердöд. 26 Ерусалимö воöм бöрын Савл зiлис öтувтчыны велöдчысьяскöд. Но найö ставныс полiсны сыысь, эз эскыны, мый сiйö тшöтш велöдчысь. 27 Сэки Варнава отсалiс Савллы, вайöдiс сiйöс апостолъяс дiнö да висьталiс налы, мый Савл аддзылöма Господьöс, да Господь сёрнитöма сыкöд. Нöшта висьталiс, кыдзи Савл Дамаскын повтöг юöртöма Исус йылысь. 28 Та бöрти Савл олiс да ветлöдлiс накöд Ерусалимын да повтöг висьтавлiс Господь Исус йылысь. 29 Сiйö сёрнитлiс грек кывйöн сёрнитысь юдейяскöд да вензьывлiс накöд, а найö пыр кöсйисны вины сiйöс. 30 Тайöс тöдмалöм бöрын вокъяс нуöдiсны Савлöс Кесарияö, сэсянь мöдöдiсны Тарсö. 31 Став Юдея, Галилея да Самария пасьтала вичкояс олiсны лöня. Найö олiсны Господьысь полöмöн да лунысь-лун ёнмисны. Вежа Лов ышöдöм улын вичкоясын эскысьяслöн лыдыс содiс. 32 Вичкояс кытшовтiгöн Петыр локтiс Лиддаын олысь вежа войтыр дiнö. 33 Сэтысь сiйö аддзис Эней нима мортöс, кодi кöкъямыс во нин куйлöма чеччывтöг. 34 Петыр шуис сылы: «Эней, Исус Кристос бурдöдö тэнö. Чеччы да лöсьöд вольпасьтö». Сiйö дзик пыр чеччис. 35 Лиддаын да Саронын олысьяс ставныс аддзылiсны тайöс да бергöдчисны Господьлань. 36 Иоппияын олiс Тавита ань, сылöн нимыс лоö: серна. Сiйö тшöтш вöлi велöдчысьяс лыдын. Уна бур сiйö вöчис йöзыслы, отсасис гöльяслы. 37 Сiйö лунъясö Тавита висьмис да кулiс. Сiйöс мыськалiсны да пуктiсны вылыс вежöсас. 38 Велöдчысьяс кор кылiсны, мый Петыр Лиддаын, Иоппияысь неылын, мöдöдiсны кык мортöс корны Петырöс, мед сiйö дзик пыр локтас на дiнö. 39 Петыр чеччис да локтiс накöд. Воöм мыстиыс Петырöс нуöдiсны вылыс вежöсас. Дöваяс кытшалiсны сiйöс да бöрдöмсорöн петкöдлiсны Тавита киöн вурöм дöрöм-паськöмъяс. 40 Петыр тшöктiс петны ставныслы, ачыс пидзöс вылас сувтöмöн кутiс кевмысьны. Сэсся шойланьыс бергöдчöмöн шуис: «Тавита, чеччы!» Тавита восьтiс синсö, видзöдлiс Петыр вылö да пуксис. 41 Петыр мыччис сылы кисö да отсалiс чеччыны. Сэсся корис дöваясöс да мукöд эскысьясöс, да сувтöдiс на водзö ловъя Тавиваöс. 42 Та йылысь кывсис став Иоппия пасьтала, и унаöн сэки эскисны Господьлы. 43 Петыр дыркодь на олiс Иоппияын кучик вöчысь Симон ордын.
1 Кесарияын олiс Корнилий нима морт. Сiйö веськöдлiс италияса сё шыпурта чукöрöн. 2 Сiйö вöлi вежавидзысь морт, ачыс да сылöн гортсаыс олiсны Енмысь полöмöн, сiйö отсасис гöль юдейяслы да пыр кевмысис Енлы. 3 Луннас куим часын сiйö вемöсöн аддзис Енлысь анделöс, кодi пырис сы дiнö да шыасис: «Корнилий!» 4 Повзигтыр андел вылö видзöдöмöн Корнилий шуис: «Мый, Ыджыдöй?» Андел шуис сылы: «Енмыс кылöма тэнсьыд кевмысьöмтö да аддзöма гöльяслы отсасьöмтö. 5 Дзик пыр мöдöд йöзтö Иоппияö Симонла, кодöс шуöны Петырöн. 6 Öнi сiйö кучик вöчысь Симон ордын, сылöн керкаыс сулалö саридз дорас. Сiйö висьталас тэныд юöр, код пыр мездман тэ и став тэнад гортсаыд». 7 Андел мунöм бöрын Корнилий корис ассьыс кык кесйöгсö да вежавидзöмöн олысь шыпуртаöс. 8 Висьталiс налы ставсö да мöдöдiс Иоппияö. 9 Мöд луннас найö вöлi матыстчöны карланьыс. Буретш сэки, лун шöр кадö, Петыр кайис керка вылас кевмысьны. 10 Петырлöн кынöмыс кутiс сюмавны, сiйö кöсйис сёйны. Кор сёянсö дасьтiсны на, Петыр быттьö ас садьсьыс петiс 11 да аддзис: восьса енэжсяньыс сы дiнö лэччис паськыд дöра сяма. Нёльнан пельöсöдыс кутöмöн сiйöс лэдзисны му вылö. 12 Сэнi вöлiны мувывса быдпöлöс нёль кока пемöсъяс, веглясьысьяс да енэжвыв лэбачьяс. 13 Сэки Петыр кылiс гöлöс шы: «Чеччы, Петыр, начкы да сёй». 14 Петыр шуис: «Ог, Господьöй. Ме некор эг сёйлы нинöм шогмытöмсö да пежсö». 15 Сэсся бара кылiс: «Енмыс мый весалöма, эн лыддьы сiйöс пежöн». 16 Тадзи вöлi куимысь, сэсся дöрасö бöр кыпöдiсны енэжас. 17 Петыр шöйöвошöмöн мöвпалiс, мый эськö лоö тайö аддзывлöмторйыс. Сiйö кадас Корнилийлöн мöдöдöмаяс Симонлысь керкасö аддзöм бöрын сувтiсны потшöс дорас 18 да гораа юалiсны: «Танi-ö Симоныс, кодöс шуöны Петырöн?» 19 Кор Петыр мöвпалiс на аддзывлöм йывсьыс, Лов шуис сылы: «Тэнö корсьöны куимöн. 20 Лэччы да майшасьтöг мун накöд, öд найöс Ме мöдöдi». 21 Петыр лэччис воöмаяс дiнö да шуис: «Ме сiйö мортыс, кодöс тi корсянныд. Мый могöн локтiнныд?» 22 Найö висьталiсны: «Миянöс мöдöдiс Корнилий, сёöн веськöдлысьным. Сiйö веськыда олысь да Енмысь полысь морт, юдей войтыр пыдди пуктö сiйöс. Вежа андел тшöктöма сылы корны тэнö гортас, мед кывзыны тэнсьыд висьталöмтö». 23 Петыр корис найöс керкаас, вердiс-юкталiс, сэсся мöд луннас петiс накöд туйö. Сыкöд тшöтш мунiсны Иоппияысь кодсюрö вокъяс. 24 Лун мысти воисны Кесарияö. Корнилий виччысис найöс. Сiйö вöлi корöма ассьыс рöдвужсö да матысса ёртъяссö. 25 Пыриганыс Корнилий воча петiс Петырлы да копыртчылöмöн уськöдчис сы водзö. 26 Петыр сiйöс лэптiгмоз шуис: «Чеччы, ме öд морт жö». 27 Сэсся сыкöд сёрнитiгтырйи пырис керкаö да аддзис керка тыр йöзöс. 28 Петыр шуис налы: «Тi тöданныд, мый юдейяслы оз позь öтувтчыны да волысьны мукöд войтыркöд. Но Ен меным петкöдлiс, мед ме некодöс эг пукты шогмытöмö да пеж туйö. 29 Та вöсна ме кывшутöг локтi тiян дiнö. Кöсъя тöдны, мый могöн тi коринныд менö?» 30 Корнилий висьталiс: «Куим лун сайын дзик тайö кадас куим часын ме видзалöмöн кевмыси гортын. Сэки сувтiс ме водзö дзирдалан паськöма морт 31 да шуис, Корнилий, Енмыс пö кылöма тэнсьыд кевмысьöмтö да аддзöма гöльяслы отсасьöмтö. 32 Мöдöд пö йöзтö Иоппияö корны Симонöс, кодöс шуöны Петырöн. Öнi пö сiйö кучик вöчысь Симон керкаын, а керкаыс пö саридз дорас. Сiйö пö локтас да висьталас тэныд ставсö. 33 Сэки ме дзик пыр мöдöдi тэ дiнö ассьым йöзöс. Тэ бура вöчин, мый локтiн. Ми ставным öнi Ен водзынöсь да дасьöсь кывзыны ставсö, мый Енмыс тшöктiс висьтавны тэныд». 34 Петыр шуис: «Ме збыльысь öнi гöгöрвоа, мый Енмыслы став йöзыс öткодьöсь. 35 Быд войтыр пöвстысь Сiйö сибöдö найöс, кодъяс олöны веськыда да Сыысь полöмöн. 36 Сiйö мöдöдiс Израиль войтырлы Ассьыс кывсö, лöньлун йылысь Бур Юöрсö, кодöс вайис Исус Кристос. Сiйö ставныслы Господь. 37 Тi тöданныд, мый вöлi Галилеяын, сэсся став Юдея пасьтала сiйö пыртчöм бöрын, мый йылысь висьтавлiс Иоан. 38 Ен мавтыштiс Назаретса Исусöс Вежа Лолöн да вынöн. Исус быдлатi ветлöдлiс, уна бур вöчис йöзыслы, бурдöдалiс да мездiс йöзсö омöльыслöн киысь. Енмыс вöлi Сыкöд. 39 Ми асланым синмöн аддзылiм ставсö, мый Сiйö вöчис Юдея муын да Ерусалимын. Сiйöс пу вылö öшöдöмöн виисны. 40 Но Енмыс ловзьöдiс Сiйöс коймöд луннас да сетiс Сылы петкöдчывны, 41 но эз став йöзыслы, а миянлы, кодъясöс Енмыс водзысяньыс бöрйис висьтавны та йылысь. Сiйö тшöктiс миянлы, кодъяс öтлаын сёйим-юим Сыкöд ловзьöм бöрас, 42 юöртны йöзыслы да висьтавны, мый Ен пуктiс Сiйöс ловъяяслы да кулöмаяслы Мыждысьöн. 43 Сы йылысь став пророкыс висьталö, мый быдöнлысь, кодi эскö Сылы, лоö прöститöма мыжъяссö Сы нимöн». 44 Петырлöн сёрнитiгöн Вежа Лов лэччис ставныс вылö, кодъяс сэнi кывзiсны. 45 Петыркöд локтöм эскысь юдейяс чуймисны, мый Вежа Ловсö сетöма тшöтш ентöдтöмъяслы. 46 Öд асланыс пельöн найö кылiсны ентöдтöмъяслысь мукöд кывъяс вылын сёрнитöмсö да Енмöс ошкöмсö. Сэки Петыр шуис: 47 «Вермас-ö кодкö кутны найöс пыртчöмысь, налы кö миянлы моз тшöтш сетöма Вежа Ловсö?» 48 Сэсся Петыр тшöктiс налы пыртчыны Исус Кристос нимöн. А найö корисны Петырöс олыштны на ордын нöшта кымынкö лун.
1 Апостолъяслы да мукöд вокъяслы Юдеяын кывсис, мый ентöдтöмъяс сибöдöмаöсь Енлысь Кывсö. 2 Кор Петыр локтiс Ерусалимö, вундыштчöмаяс вомалiсны сiйöс, 3 шуисны: «Тэ ветлöмыд вундыштчытöмъяс дiнö да весиг öтлаын сёйöмыд накöд». 4 Сэки Петыр пондiс висьтавны налы ставсö сьöрсьöн-бöрсьöн: 5 «Ме вöлi Иоппия карын. Сэнi кевмысигöн быттьö ас садьысь петi да аддзи Енсянь петкöдчылöм: енэжсяньыс лэччис паськыд дöра сяма, нёльнан пельöсöдыс кутöмöн сiйöс лэдзисны ме водзö. 6 Ме видзöдлi да аддзи сэтысь мувывса нёль кока пемöсъясöс, веглясьысьясöс да енэжвыв лэбачьясöс. 7 Сэки ме кылi гöлöс шы: "Чеччы, Петыр, начкы да сёй". 8 Ме шуи: "Ог, Господьöй. Ме некор эг босьтлы вомö нинöм шогмытöмсö да пежсö". 9 Сэсся енэжсяньыс ме бара кылi: "Енмыс мый весалöма, эн лыддьы сiйöс пежöн". 10 Тадзи вöлi куимысь, сэсся ставсö бöр кыпöдiсны енэжас. 11 Буретш сiйö каднас куим морт сувтiсны керка дорö, кöнi ме вöлi. Найöс вöлöмкö Кесариясянь мöдöдöмаöсь ме дiнö. 12 Лов шуис меным, мед ме майшасьтöг мунi накöд. Мекöд тшöтш мунiсны тайö квайт вокыс. Кор ми локтiм сiйö мортыс ордö, 13 сiйö висьталiс миянлы, мый аддзылöма анделöс. Андел сувтöма керка шöрас да шуöма сылы, мöдöд пö йöзтö Иоппияö Симонла, кодöс шуöны Петырöн. 14 Сiйö пö висьталас тэныд юöр, код пыр мездман тэ да став тэнад гортсаыд. 15 И кор ме кутi сёрнитны, на вылö лэччис Вежа Лов, кыдзи водзынсö миян вылö. 16 Сэки тöд вылö меным уси Господьлöн шуöмыс: "Иоан пыртiс ваöн, но тiянöс лоö пыртöма Вежа Лолöн". 17 Енмыс кö миянлы моз и налы сетiс тайö козинсö, кор найö эскисны Господь Исус Кристослы, сiдзкö, кодi ме сэтшöмыс, медым паныд сувтны Енмыслы?» 18 Тайöс кылöм бöрын найö лöнисны да ошкисны Енмöс шуалöмöн: «Тыдалö, Енмыс ентöдтöмъяслы тшöтш сетöма бергöдчыны мыжъяссьыс, мед и налöн вöлi олöм». 19 Степанöс виöм бöрын дзескöдöм вöсна разалöмаяс мунiсны Финикияöдз, Кипрöдз да Антиокияöдз. Енлысь Кывсö юдейяслы кындзи найö некодлы эз висьтавлыны. 20 На пöвстын тшöтш вöлiны Кипрысь да Киринеяысь кодсюрö. Антиокияö локтöм бöраныс найö висьтавлiсны грекъяслы Господь Исус йылысь Бур Юöр. 21 Господь вöлi накöд, та вöсна унаöн эскисны да бергöдчисны Господь дiнö. 22 Та йылысь кывсис Ерусалимын эскысьяслы. Сэки найö мöдöдiсны Антиокияö Варнаваöс. 23 Воöм бöрас Варнава аддзис, мый сэнi Енлöн буралöмыс да ёна нимкодясис. Сiйö ышöдiс быдöнöс кутчысьны став сьöлöмнас Господьö. 24 Варнава вöлi бур морт, сiйö вöлi тырöма Вежа Лолöн да эскöмöн. Унаöн сэки бергöдчисны Господь дiнö. 25 Сэсся Варнава мунiс Тарсö корсьны Савлöс и аддзöм бöрас локтiс сыкöд Антиокияö. 26 Во чöж найö чукöртчывлiсны сэнi эскысьяскöд да велöдiсны бура уна йöзöс. Антиокияын велöдчысьясöс медводдзаысь шуисны Кристос войтырöн. 27 Сiйö лунъясö Антиокияö локтiсны Ерусалимысь пророкъяс. 28 На пиысь Агав нима пророк Ловсянь водзвыв висьталiс, ыджыд тшыгъялöм пö лоö став му пасьтала. Клавдий кесар дырйи тадзи и лои. 29 Велöдчысьяс шуисны отсавны Юдеяын олысь вокъяслы, кодi мыйта вермас. 30 Тадзи и вöчисны: Варнавакöд да Савлкöд мöдöдiсны вичкоса юрнуöдысьяслы сьöм.
1 Тайö кадö Ирöд öксы пондiс ёна дзескöдны вичкоысь кодсюрööс. 2 Сiйö тшöктiс вины Иоанлысь Яков воксö. 3 Ирöд аддзис, мый тайö сьöлöм вылас воис юдейяслы, сэки тшöктiс босьтны тшöтш Петырöс. Сэки буретш пасйисны Шомтöм нянь сёян лунъяс. 4 Петырöс босьтiсны да пуксьöдiсны дзескыдiнö. Шыпуртаяслы тшöктiсны видзны сiйöс нёльöн-нёльöн да нёльысь вежласьöмöн. Ирöд шуис Ыджыд лун бöрын петкöдны сiйöс йöз водзö. 5 Петырöс видзисны дзескыдiнын, а вичко дугдывтöг кевмысис сы вöсна Енлы. 6 Петкöдан лунлы паныда войö Петыр узис кык шыпурта костын. Сiйöс вöлi дорöма кык чептöн, нöшта дзескыдiн öдзöс дорын сулалiсны видзысьяс. 7 Виччысьтöг Господьлöн андел сувтiс сы водзö и гöгöр югдiс. Петырлы инмöдчиг андел садьмöдiс сiйöс да шуис: «Чеччы öдйöджык». Петырлöн киыс дзик пыр мынiс чепъясысь. 8 Андел шуис: «Вöняв костö да кöмась». Петыр кывзысис. Сэсся андел шуис: «Пасьтав вылыс паськöмтö да лок ме бöрся». 9 Петыр мунiс андел бöрся, но чайтiс, мый ставыс тайö абу збыль, а сöмын Енсянь петкöдчылöм. 10 Воддза да мöд видзысьяс дiнтi мунöм бöрын найö воисны карсьыс петан кöрт öдзöс дорö. Öдзöсыс ачыс воссис, да найö петiсны. Туй вывтi мунiгöн андел виччысьтöг вошис. 11 Сэки Петыр воис ас садяс да шуис: «Öнi ме збыльысь тöда, мый Господь мöдöдiс Ассьыс анделсö, мед мездыны менö Ирöд киысь да юдей войтырлöн лöсьöдöм лёкторъясысь». 12 Тайöс гöгöрвоöм бöрын Петыр мöдöдчис Иоанлöн Марья мамыс ордö. Тайö Иоансö шуисны Маркöн. Сэнi вель унаöн вöлi чукöртчöмаöсь кевмысьны. 13 Петыр игöдчис öдзöсас. Рода нима кесйöг ань петiс восьтнысö. 14 Петырлысь гöлöссö кылöм бöрын сiйö нимкодьысла весиг вунöдiс восьтны öдзöссö, котöрöн бöр пырис да висьталiс, öдзöс саяс пö Петыр сулалö. 15 Ставныс шуисны: «Ас вежöрад-ö тэ?» Но сiйö пыр ассьыс долис. Сэки найö шуисны: «Гашкö, тайö Петырлöн анделыс?». 16 А Петыр пыр на игöдчис. Кор восьтiсны да аддзисны сiйöс, ёна чуймисны. 17 Петыр сетiс кинас пас, медым ланьтiсны ставныс. Сэки висьталiс налы, кыдзи Господь петкöдiс сiйöс дзескыдiнысь. Сэсся шуис: «Юöртöй та йылысь Яковлы да мукöд вокъяслы». Та бöрын петiс на дiнысь да мунiс мöдлаö. 18 Асывнас Петырлöн вошöмысь шыпуртаяс ёна шызисны. 19 Ирöд корсис Петырöс, но ставыс вöлi весьшöрö. Видзысьясöс юасьöм бöрын сiйö тшöктiс вины найöс. Сэсся Ирöд мунiс Юдеяысь Кесарияö да кольччис сэтчö. 20 Ирöд вöлi скöрмöма Тирын да Сидонын олысьяс вылö. Найö öтвыв сёрнитчöмöн локтiсны Ирöд дiнö бурасьöм могысь, öд öксылöн муыс вердiс найöс. Найö эскöдiсны Властöс, öксы керкаöн веськöдлысьöс, мед сувтас на дор. 21 Индöм лунö Ирöд пасьталiс öксы паськöм, пуксис юралан пуклöсö да пондiс сёрнитны. 22 Йöзыс гораа шуалiсны, тайö пö Ен сёрнитö, оз морт. 23 Сэки Господьлöн андел чорыда дойдiс Ирöдöс, öд Енлы пыдди сiйö аслыс босьтiс ошкöмсö. Сiйöс ловъявывсьыс сёйисны номыръяс. 24 А Енлöн Кывйыс ёна паськалiс. 25 Варнава да Савл вайöм сьöмсö сетiсны вичколы, сэсся бöр мунiсны Ерусалимысь Антиокияö. Аскöдныс найö босьтiсны тшöтш Иоанöс, кодöс шуисны Маркöн.
1 Антиокия вичкоын вöлiны кодсюрö пророкъяс да велöдысьяс: Варнава, Симеон, кодöс шуисны Нигерöн, Киринеяысь Луций, Манаил, сiйö тшöтш быдмылöма Ирöд öксыкöд, да Савл. 2 Кор найö видзалöмöн кесъялiсны Господьлы, Вежа Лов шуис: «Торйöдöй Меным Варнаваöс да Савлöс, Ме кори найöс торъя удж вöчны». 3 Сэсся видзалöм да кевмысьöм бöрын найö пуктылiсны кинысö на вылö да мöдöдiсны найöс. 4 Тадзи Варнава да Савл, Вежа Лолöн мöдöдöмаяс, локтiсны Селевкияö. Сэсянь кывтiсны Кипрö. 5 Сэтчö воöм бöрын Саламинö сувтлiганыс висьтавлiсны Енлысь Кывсö синагогаясын. Накöд тшöтш вöлi Иоан, кодi отсасис налы. 6 Дiсö кытшовтiгöн воисны Пафö, сэнi налы паныдасис Варисус нима сэтчöс тун да ылöгпророк, ачыс сiйö вöлi юдей. 7 Сiйö олiс дiöн веськöдлысь Сергий Павел ордын. Веськöдлысьыс вöлi сюсь вежöра морт. Сiйö кöсйис кывны Енлысь Кывсö, та вöсна корис Варнаваöс да Савлöс ас ордас. 8 Елим тун – тадзи Варисусöс нимтiсны грек кывйöн – паныд сувтiс локтысьяслы. Сiйö эз кöсйы, мед дiöн веськöдлысьыс эскис. 9 Савл, мöд ногöн Павел, Вежа Лолöн тырöмöн веськыда сылы синмас видзöдöмöн шуис: 10 «Тэ, омöльыслöн пи, быд бурыслы паныд мунысь, тырöмыд быдпöлöс лёкнас да пöръясьöмнас. Чайтан, и водзö верман пöръясьöмнад чукльöдлыны Господьлысь веськыд туйсö? 11 Господьлöн киыс öнi тэ вылын: тэ синтöмман да индöм кадöдз он кут аддзыны шондi югöрсö». Дзик пыр сылöн синмыс пемдiс. Сiйö пондiс бергавны öтарö-мöдарö, корсьны нуöдысьöс. 12 Дiöн веськöдлысь кор аддзис тайö лоöмторсö, шензис Господьлöн велöдöмысь да кутiс эскыны. 13 Пафысь Павел мукöдыскöд тшöтш кывтiс Памфилияö, Пергия карö. Сэнi Иоан колис найöс да бöр косiс Ерусалимö. 14 А найö Пергиясянь мунiсны Писидияса Антиокия карö. Шойччан лунö найö пырисны синагогаö да пуксисны. 15 Индöд да пророк гижöдъяс лыддьöм бöрын синагогаса юралысьяс ыстiсны кодсюрööс юавны, эм-ö вокъяслöн ышöдана кыв йöзыслы. Эм кö, мед висьталасны. 16 Сэки Павел сувтiс, сетiс кинас пас да шуис: «Израиль войтыр да Енмысь полысьяс, кывзöй: 17 Израиль войтырлöн Ен бöрйис миянлысь батьяснымöс, рöдмöдiс тайö войтырсö Египет муын да вына кинас петкöдiс найöс сэтысь. 18 Нелямын во чöж Сiйö вердiс найöс овтöминын. 19 Сэсся бырöдiс Ханаан муысь сизим пöлöс войтырöс да налысь муяссö юклiс миян батьяслы. 20 Ставыс тайö кыссис матö нёльсё ветымын во. Та бöрти сетiс налы ёрдысьясöс Самуил пророкöдз. 21 Сэсся найö корисны öксыöс, сэки Енмыс сетiс налы Саулöс, Вениамин чужанкотырысь Кислысь писö. Сiйö веськöдлiс нелямын во чöж. 22 Саулöс вештöм бöрын сувтöдiс налы öксыöн Давидöс. Сы йылысь шуöма: "Ме аддзи Давидöс, Ессейлысь писö, сiйö Меным сьöлöм серти. Сiйö пöртас олöмö Менсьым став кöсйöмöс". 23 Сылöн кöйдыссянь Ен сетiс Израильлы кöсйысьöм Мездысьöс, Исусöс. 24 Сылöн локтöм водзвылын Иоан юöртiс став Израиль войтырлы, мед бергöдчасны мыжъяссьыныс да пыртчасны. 25 Олан туй помасигас Иоан висьтавлiс: "Ме абу сiйö, код туйö тi менö пуктанныд. Сiйö локтö ме бöрся, и ме ог шогмы пöрччöдны Сылысь кöмсö". 26 Вокъясöй, Öвраам пиянöй да Енмысь полысьяс! Тiянлы мöдöдöма тайö мездан кывсö. 27 Ерусалимын олысьяс да налöн веськöдлысьяс эз тöдны Сiйöс, босьтiсны да мыждiсны. Тадзи инiсны пророкъяслöн кывъяс, кодъясöс лыддьöны быд шойччан лунö. 28 Налы эз сюр мыжыс, мед вины Сiйöс. Сэки корисны Пилатöс, мед сiйö тшöктас винысö. 29 Найö вöчисны ставсö, мый гижöма Сы йылысь. Сэсся лэдзисны Сiйöс крест вывсьыс да пуктiсны дзебанiнö. 30 Но Енмыс ловзьöдiс Сiйöс. 31 Уна лун чöж Сiйö петкöдчывлiс налы, кодъяс Сыкöд тшöтш локтiсны Галилеясянь Ерусалимöдз. Öнi найö висьтавлöны Сы йылысь Израиль войтырлы. 32 Ми висьталам тiянлы Бур Юöр, мый батьяслы сетöм кöсйысьöмсö Ен пöртiс олöмö миянлы, налöн ныв-пилы, Исусöс ловзьöдöм пыр. 33 Мöд псаломын гижöма: – Тэ Менам Пи, Ме öнi чужтi Тэнö. 34 Енмыс ловзьöдiс Исусöс, и Сiйö оз нин бöр бергöдчы сiсьмöмас. Шуöма: – Ме пöрта олöманыд Давидлы сетöм вежа да вежсьывтöм кöсйысьöмöс. 35 Мöдлаын шуöма: – Тэ аслад Вежалы он сет аддзывны сiсьмöмсö. 36 Давид аслас кадö пöртiс олöмас Енлысь кöсйöмсö. Сэсся сiйö кулiс, да сiйöс гуалiсны батьяскöд орччöн. Давидным аддзылiс сiсьмöмсö, 37 а Сiйö, кодöс Ен ловзьöдiс, эз аддзыв сiсьмöмсö. 38 Тöдöй, вокъяс: Исус пыр Енмыс юöртö тiянлы, мый прöститöма тiянлысь мыжъяснытö. 39 Сы пыр быд эскысь лоö веськыдöн да мездмас ставсьыс, мыйысь эз вермы мездмыны Мöисейлöн Индöд пыр. 40 Видзчысьöй, медым эз су тiянöс пророкъяслöн шуöмыс: 41 – Видзöдöй, сералысьяс, да шензьöй, тiянöс лоö бырöдöма! Тiян лунъясö Ме вöча сэтшöмтор, та йылысь кö висьталасны тiянлы, тi онö эскöй». 42 Синагогаысь петiгöн ентöдтöмъяс корисны Павелöс да Варнаваöс нöшта висьтавны та йылысь локтан шойччан лунö. 43 Синагогаысь разöдчигöн юдейяс да юдей эскöмö бергöдчысьяс пиысь унаöн мунiсны Павел да Варнава бöрся. Апостолъяс сёрнитiсны накöд да ышöдiсны, медым кутчысясны Енлöн буралöмас. 44 Локтан шойччан лунö пöшти став карыс чукöртчис кывзыны Енлысь Кывсö. 45 Кор юдейяс аддзисны уна йöзöс, тырины лöглунöн. Найö пондiсны паныд шуасьны да омöльтны Павеллысь велöдöмсö. 46 Сэки Павел да Варнава повтöг шуисны: «Медводз тiянлы шуöма кывны Енлысь Кывсö. Но тi кö онö сибöдöй тайöс да лыддянныд асьнытö шогмытöмöн, мед пырны помтöм олöмö, ми мунам ентöдтöмъяс дiнö. 47 Тадзи Ачыс Господь висьтавлiс: – Ме сувтöдi Тэнö ентöдтöмъяслы югыдöн, став му пасьтала олысьяслы Мездысьöн». 48 Тайöс кылöм бöрын ентöдтöмъяс пондiсны нимкодясьны да ошкыны Господьöс Сылöн Кывйысь. Эскисны ставныс, кодъяслы шуöма пырны помтöм олöмö. 49 Господьлöн кывйыс паськалiс сэтчöс му пасьтала. 50 Юдейяс жö паныд ыззьöдiсны Енсьыс полысь да пыдди пуктана аньясöс да карöн веськöдлысьясöс. Найö пондiсны дзескöдны Павелöс да Варнаваöс, сэсся вöтлiсны асланыс муысь. 51 Апостолъяс пыркöдiсны коксьыныс буссö сэнi да мунiсны Иконияö. 52 Антиокияын жö велöдчысьяс тырины нимкодьлунöн да Вежа Лолöн.
1 Иконияын Павел да Варнава мунiсны синагогаö да висьталiсны сэнi Енлысь Кывсö. Юдейяс да грекъяс пиысь сэки унаöн эскисны. 2 Юдейяс, кодъяс эз эскыны, паныд кыпöдiсны ентöдтöмъясöс, кöдзисны налы сьöлöманыс скöралöм вокъяс вылö. 3 Вокъяс дыркодь олiсны сэнi да повтöг висьтавлiсны Господь йылысь. Господь вöчис на пыр шензьöданаторъяс да петкöдлiс индысьпасъяс, тайöн вынсьöдiс Аслас буралöм йылысь висьталöмсö. 4 Йöзыс карас юксисны кык пельö: öтияс вöлiны юдейяс дор, мöдъяс – апостолъяс дор. 5 Ентöдтöмъяс да юдейяс асланыс веськöдлысьяскöд шуисны уськöдчыны Павел да Варнава вылö да изъявны найöс. 6 Та йылысь тöдмалöм бöрын апостолъяс пышйисны Ликаонияö. Сэнi Листра да Дервия каръясын, тшöтш матiгöгöрас, 7 висьтавлiсны Бур Юöр. 8 Листраын олiс кокнас висьысь морт, чужöмсяньыс сiйö абу на сувтлöма кок вылас. 9 Сiйö пукалiс да кывзiс Павеллысь висьталöмсö. Павел видзöдлiс сы вылö да аддзис, мый сылöн эм эскöм бурднысö. 10 Сэки Павел гораа шуис: «Господь Исус Кристос нимöн шуа тэныд: "Сувт кок вылад!"» Сiйö дзик пыр чеччыштiс да пондiс ветлöдлыны. 11 Тайöс аддзöм бöрын йöзыс асланыс Ликаония кыв вылын пондiсны гораа шуавны, енъяс пö морт кодьöн лэччисны миян дiнö. 12 Варнаваöс шуисны Зевсöн, а Павелöс Гермесöн, öд ёнджыкасö сiйö сёрнитiс. 13 Зевс енлы налöн юрбитанiныс сулалiс карö пыранiнас. Сэки Зевслöн тун вайис сикöтшъяс да вайöдiс дзиръя дорö öшъясöс, кöсйис йöзыскöд öтлаын вись вайны апостолъяслы. 14 Тайöс кылöм бöрын апостолъяс, Варнава да Павел, косялiсны паськöмнысö да котöрöн уськöдчисны йöз чукöр пытшкö, пондiсны гораа шуавны: 15 «Мый тi вöчанныд? Ми öд тiян кодь жö мортъяс. Ми вайим Бур Юöр тiянлы, медым тi бергöдчинныд ковтöм енъяссьыныд ловъя Ен дiнö, кодi вöчис енэжсö, мусö, васö да ставсö, мый сэнi эм. 16 Воддза кадъясö Сiйö быд войтырлы лэдзис ветлыны асланыс туйясöд. 17 Но бур вöчöмнас Сiйö век казьтывлiс да казьтывлö Ас йывсьыс: ыстö миянлы енэжсяньыс зэр, сетö ас кадö вотöс-быдтас, пöткöдö миянöс да гажöдö миянлысь сьöлöм». 18 Тадзи висьталöмнас найö öдва öлöдiсны йöзсö налы вись вайöмысь да мöдöдiсны гортаныс. Павел да Варнава кольччисны Листраö да велöдiсны сэнi йöзсö. 19 Антиокияысь да Иконияысь локтiсны сэтчö кодсюрö юдейяс. Кор апостолъяс повтöг бурвисьтавлiсны, юдейяс эскöдiсны йöзсö, мед найö ылыстчасны апостолъясысь. Юдейяс шуисны: «Налöн висьталöмныс абу збыль, найö сöмын пöръясьöны». Тадзи найö кыпöдiсны йöзсö апостолъяслы паныд, йöзыс изъялiсны Павелöс да кыскисны кар саяс, чайтiсны, мый кулöма нин. 20 Но кор велöдчысьяс чукöртчисны Павел гöгöр, сiйö чеччис да бöр локтiс карас. Сэсся мöд луннас Варнавакöд Павел мунiс Дервияö. 21 Дервияын Павел да Варнава висьтавлiсны Евангелльö став карыслы, бура уна велöдчысь сэнi лои. Сэсся бöрсö локтiсны Листра, Икония да Антиокия пыр. 22 Сэнi найö ёнмöдiсны сэтчöс велöдчысьясöс да тшöктiсны зумыда кутчысьны эскöмас. Казьтыштiсны, мый уна сьöкыд пыр ковмас мунны, мед пырны Енлöн Юраланiнö. 23 Быд вичкоын ки пуктылöмöн индiсны юрнуöдысьясöс. Сэсся кевмысьöм да видзалöм бöрын сетiсны эскысьясöс Господь киö, кодлы найö и эскисны. 24 Сэсся Писидия пыр мунiсны Памфилияö. 25 Сэнi Пергия карын Господьлысь кывсö висьталöм бöрын мунiсны Атталияö. 26 Сэсянь кывтiсны Антиокияö, öд буретш танi найöс вöлi сетöма Енлöн буралан киö, мед вöчны Енлысь уджсö, кодöс помöдз вайöдiсны. 27 Воöм бöраныс найö чукöртiсны эскысьясöс да висьталiсны ставсö, мый вöчис на пыр Енмыс, да кыдзи Сiйö восьтiс ентöдтöмъяслы эскöмас öдзöссö. 28 Сэсся дыркодь на олiсны найö сэтчöс велöдчысьяскöд.
1 Юдеяысь локтысьясысь кодсюрö велöдiсны вокъясöс, онö кö пö вундыштчöй Мöисей Индöд серти, онö мездмöй. 2 Павел да Варнава паныд сувтiсны налы да дыр вензисны накöд. Сэки шуисны мöдöдны Павелöс, Варнаваöс да ас йöзсьыс кодсюрööс апостолъяс да юрнуöдысьяс дiнö Ерусалимö, медым тайö сёрнинас воны öти кывйö. 3 Вичкосянь мöдöдöмаяс, Финикиятi да Самариятi мунiгöн, висьтавлiсны Ен дiнö ентöдтöмъяслöн бергöдчöм йылысь. Тайö юöрсö кылöмысь сэтчöс вокъяс ставныс ёна нимкодясисны. 4 Ерусалимын апостолъяс да юрнуöдысьяс став вичконас сибöдiсны воöмаясöс. Локтысьяс висьталiсны ставсö, мый вöчис на пыр Енмыс. 5 Сэки кодсюрö эскысьяс, кодъяс кутчысисны фарисейяслöн велöдöмö, шуисны, мый ентöдтöмъяслы колö вундыштчыны да овны Мöисей Индöд серти. 6 Сэки апостолъяс юрнуöдысьяскöд чукöртчисны, медым сёрнитны та йылысь. 7 Дыр вензьöм бöрын Петыр сувтiс да шуис налы: «Вокъяс, тi тöданныд, мый Енмыс водзысяньыс бöрйис менö миян пöвстысь, медым менам вомсянь ентöдтöмъяс кылiсны Евангелльöсö да эскисны. 8 Сьöлöмтöдысь Ен сетiс налы миянлы моз Вежа Ловсö, тайöн петкöдлiс, мый Сiйö сибöдö найöс. 9 Сылöн син водзын миян да на костын абу некутшöм торъялöм, эскöм понданыс Сiйö весалiс налысь сьöлöмнысö. 10 Мыйла нö тi öнi дöзмöданныд Енсö, кöсъянныд сийöсавны велöдчысьясöс? Тайö сийöссö миян батьяс дай ми эгö вермöй новлöдлынысö. 11 Но ми эскам: Господь Исус Кристослöн буралöмсянь ми мездмам на моз». 12 Сэсся ставныс ланьтöмöн кывзiсны Варнаваöс да Павелöс. А найö висьталiсны, кыдзи Енмыс ентöдтöмъяс пöвстын вöчис на пыр шензьöданаторъяс да петкöдлiс индысьпасъяс. 13 Налöн сёрнитöм бöрын шыасис Яков: «Вокъяс, кывзöй менö. 14 Симон висьталiс миянлы, мый Енмыс медводдзаысь бергöдiс чужöмбансö ентöдтöмъяслань, медым на пöвстысь торйöдны Аслыс войтырöс. 15 Тадзи висьталöны тшöтш пророклöн кывъясыс, öд гижöма: 16 – Сэсся Ме бöр бергöдча да выльысь сувтöда Давидлысь киссьöм керкасö. Жугласьöмасö лöсьöда, да выльпöв сiйöс лэпта. 17 Сэки кутасны корсьны Господьöс мукöд йöз да быд войтыр, кодöс Ме шуа Асламöн. Тадзи висьталö Господь, ставсö тайöс Вöчысь. 18 Нэмъяс пуксьытöдзыс на Сiйö тöдiс став Ассьыс уджъяссö. 19 Та вöсна ме чайта, оз ков сьöктöдны Енлань бергöдчöм ентöдтöмъясöс. 20 Сöмын колö гижны налы, медым видзасны асьнысö идоллы вайöм пеж сёянысь, кырсалöмысь, джагалöм пемöс яй сёйöмысь да вир юöмысь, нöшта, мед оз вöчны мукöдыслы сiйö, мый оз кöсйыны аслыныс. 21 Мöисейлысь Индöдсö öд важысянь висьталöны быд карын да быд шойччан лунö лыддьöны синагогаын». 22 Сэки апостолъяс да юрнуöдысьяс став вичкоыскöд шуисны бöрйыны ас пöвстсьыныс вокъясöс да мöдöдны найöс Павелкöд да Варнавакöд Антиокияö. Бöрйисны пыдди пуктана вокъясöс: Иудаöс, кодöс шуисны Варсаваöн, да Силаöс. 23 Накöд ыстiсны татшöм гижöд: «Ми, апостолъяс, юрнуöдысьяс да вокъяс, чолöмалам тiянöс, Антиокияын, Сирияын да Киликияын ентöдтöмъясысь бергöдчöм вокъясöс. 24 Ми кывлiм, мый кодсюрö миян йöз шöйöвоштöны тiянöс асланыс велöдöмöн, шуöны, колö пö вундыштчыны да кутчысьны Индöдö. Тадзи велöднысö ми эгö тшöктылöй налы. 25 Та вöсна ми öтвылысь бöрйим да шуим мöдöдны тiян дiнö миян муса Варнавакöд да Павелкöд кодсюрööс. 26 Павел да Варнава вокъяс дасьöсь олöмнысö сетны миян Господь Исус Кристос вöсна. 27 Накöд ми мöдöдам Иудаöс да Силаöс, найö ставсö висьталасны. 28 Вежа Лов да ми тшöтш огö кöсйöй сьöктöдны тiянöс, тшöктам вöчны сöмын коланасö. Ми корам: 29 видзöй асьнытö идоллы вайöм сёянысь, вир юöмысь, джагалöм пемöс яй сёйöмысь да кырсалöмысь, и нöшта: энö вöчöй мукöдлы сiйö, мый онö кöсйöй аслыныд. Тайö тшöктöмъяс сертиыс кö оланныд, бур лоас. Олöй бура!» 30 Мöдöдöмаяс мунiсны Антиокияö. Сэнi чукöртiсны эскысьясöс да сетiсны гижöднысö. 31 Лыддьöм бöраныс эскысьяс ёна долыдмисны нимкодь юöрысь. 32 Иуда да Сила вöлiны пророкъясöн, найö ёна ышöдiсны да ёнмöдiсны вокъясöс. 33 Мыйтакö кад олыштöм бöрын вокъяс бöр мöдöдiсны найöс лöнь сьöлöмöн апостолъяс дiнö. 34 Но Сила шуис кольччывны на сэтчö, сэки Иуда öтнас мунiс Ерусалимö. 35 Павел да Варнава олiсны Антиокияын, велöдiсны да мукöдыскöд тшöтш юöртiсны Господьлысь кывсö. 36 Кутшöмкö кад мысти Павел шуис Варнавалы: «Мунам выльысь кытшовтам сiйö каръяссö, кöнi ми висьтавлiм Господьлысь кывсö, тöдмалам, кыдзи олöны миян вокъяс». 37 Варнава кöсйис босьтны аскöдыс Иоанöс, кодöс шуисны Маркöн. 38 Но Павел паныд сувтiс, öд Марк коркö эновтiс найöс Памфилияын, эз мун накöд водзö öтвылысь вöчны уджсö, мый вылö найöс вöлi мöдöдöма. 39 Павел да Варнава весиг вензьöмöдз воисны да тадзикöн торйöдчисны. Варнава босьтiс аскöдыс Маркöс да кывтiс сыкöд Кипрö. 40 А вокъяс сетiсны Павелöс Енлöн буралан киö. Сiйö босьтiс аскöдыс Силаöс да мунiс 41 Сирия да Киликия муясö. Сэнi ветлöдлiс да ёнмöдiс вичкояс.
1 Павел воис Дервияöдз, сэсся и Листраöдз. Сэнi олiс Тимофей нима велöдчысь. Мамыс сылöн вöлi юдей, эскысь ань, батьыс вöлi грек. 2 Листраын да Иконияын вокъяс бура сёрнитiсны Тимофей йылысь. 3 Павел шуис босьтны Тимофейöс аскöдыс да вундыштiс сiйöс сэтчöс юдейяс понда, öд найö тöдiсны, мый Тимофейлöн батьыс грек. 4 Каръястi ветлiгöн найö висьтавлiсны эскысьяслы апостолъяслысь да юрнуöдысьяслысь Ерусалимын шуöм тшöктöмъяссö да тшöктiсны овны на серти. 5 Вичкояс ёнмисны эскöмас, эскысьяслöн лыдыс лунысь-лун содiс. 6 Асияын Вежа Лов эз сет налы висьтавны Кывсö, та вöсна найö мунiсны Мисияö Фригия да Галатия муяс пыр. 7 Мисиясянь найö кöсйисны мунны Вифинияö, но Вежа Лов эз лэдз. 8 Сэки Мисия пыр найö мунiсны Троадаö. 9 Войнас Павел аддзылас Енсянь петкöдчылöм: македонияса морт сулалö сы водзын да корö, лок пö Македонияö да отсав миянлы. 10 Тайö петкöдчылöм бöрас ми дзик пыр шуим мунны сэтчö. Ми гöгöрвоим: Господьным корö миянöс висьтавны сэнi Бур Юöр. 11 Троадаысь ми кывтiм веськыда Самофракияö, мöд луннас Неапольö, 12 сэсянь мунiм Филипö. Македониялöн сэтчöс юкöнын тайö медводдза кар, сэтчö коркö овмöдчылöмаöсь Римысь локтысьяс. Сэнi ми вöлiм кымынкö лун. 13 Шойччан лунö ми петiм кар саяс да лэччим ю дорö, буретш сэтчö чукöртчывлiсны кевмысьны. Ми пуксим сэтчö локтысь аньяс дорö да пондiм сёрнитны накöд. 14 Сэнi вöлi Фиатираысь пурпур дöраöн вузасьысь Лидия нима ань, сiйö олiс Енсьыс полöмöн. Господь восьтiс сылысь сьöлöмсö сибöдны Павеллысь кывъяссö, 15 да сiйö став гортсаыскöд пыртчис. Сэсся шуис миянлы: «Тi кö лыддянныд менö Господьлы эскысьöн, пырöй менам керкаö да олöй ме ордын». Сiйö корöмöн корис миянöс ас дорас. 16 Öтчыд кевмысьны мунiганым паныдасис миянлы öти кесйöг ань, код пытшкын вöлi тунасян лов. Туналöмнас сiйö уна сьöм вайис аслас ыджыдъяслы. 17 Тайö аньыс вöтчис Павел да миян бöрся да горзöмöн шуалiс: «Тайö йöзыс Медвылысса Енлöн кесйöгъяс. Найö юöртöны миянлы, кыдзи мездмынысö». 18 Тадзи сiйö вöчис уна лун чöж. Павел скöрмис таысь, сэсся ань дiнö бергöдчöмöн шуис тунасян ловлы: «Тшöкта тэныд Исус Кристос нимöн, пет сы пытшкысь». И сiйö дзик пыр петiс. 19 Кесйöг аньлöн ыджыдъяс аддзисны, мый воштiсны озырмöдчанторнысö, сэки босьтiсны Павелöс да Силаöс да нуöдiсны йöзаинö юралысьяс водзö. 20 Вайöдiсны юралысьяс дiнö да пондiсны мыжавны: «Тайö юдей йöзыс шызьöдöны карнымöс, 21 велöдöны йöзсö овны мöд ног. Но миянлы, римса войтырлы, оз позь на ног овнысö». 22 Сэки йöзыс накöд тшöтш сувтiсны Павеллы да Силалы паныд. Юралысьяс тшöктiсны кучкавны найöс бедьясöн. Сэки нетшыштiсны на вылысь паськöмнысö да 23 бура дыр кучкалöм бöрын шыбитiсны найöс дзескыдiнö. Видзысьлы тшöктiсны, мед синсö оз лэдзлы на вылысь. 24 Пуксьöдöмаясöс видзысь йöртiс найöс медпыдiас да топöдiс кокъяснысö тшемилö костö. 25 Вой шöр кадö Павел да Сила сьылiсны да кевмысисны Енлы. Мукöд пукалысьяс кывзiсны найöс. 26 Тöдлытöг лои ыджыд му вöрöм, дзескыдiнлöн подулыс вöрзис, öдзöсъяс воссисны, пукалысьяслöн ки-коксьыныс кöртöдъяс разьсисны. 27 Пуксьöдöмаясöс видзысь садьмис да аддзис, мый öдзöсъяс восьсаöсь. Сэки перйис шыпуртсö да кöсйис вины асьсö, чайтiс, мый пышйöмаöсь ставныс. 28 Павел горöдiс: «Нинöм эн вöч аскöдыд! Ми ставным танöсь». 29 Видзысь корис би, котöрöн пырис Павел да Сила дiнö да тiралöмöн уськöдчис на водзö. 30 Сэсся петкöдiс найöс ортсö да шуис: «Бур йöзöй, мый меным вöчны, мед мездмыны?» 31 Найö воча шуисны: «Эскы Господь Исус Кристослы, сэки мездман тэ да став тэнад гортсаыд». 32 Сэсся вокъяс висьталiсны сылы да сылöн гортсаыслы Господьлысь кывъяссö. 33 Сiйö войнас видзысь петкöдiс вокъясöс дзескыдiнысь да мыськалiс налысь дойяссö, сэсся гортсаыскöд дзик пыр пыртчис. 34 Сэсся вайöдiс найöс гортас да лöсьöдiс налы пызан. Аслас гортсакöд сiйö долыда нимкодясис, мый эскис Енлы. 35 Асывнас юралысьяс мöдöдiсны отсасьысьяснысö висьтавны, мед лэдзасны пуксьöдöмаясöс дзескыдiнысь. 36 Видзысь висьталiс та йылысь Павеллы: «Юралысьяс тшöктiсны лэдзны тiянöс. Верманныд петны да мунны лöня». 37 Павел шуис юралысьяслöн отсасьысьяслы: «Миянöс, римса йöзöс, найö мыждытöг став йöз водзас нöйтiсны да шыбитiсны дзескыдiнö, а öнi кöсйöны гусьöн лэдзны! Огö петöй. Мед асьныс локтасны да петкöдасны миянöс татысь». 38 Мöдöдöмаяс висьталiсны Павеллысь кывъяссö юралысьяслы. Юралысьяс повзисны, кор кылiсны, мый найö римсаяс. 39 Сэсся локтiсны да корисны налысь прöща, а дзескыдiнысь петкöдiгöн корисны найöс эновтны карнысö. 40 Дзескыдiнысь петöм бöрын Павел да Сила мунiсны Лидия ордö, сэнi аддзысисны вокъяскöд. Найöс ышöдöм бöрын мунiсны карсьыс.
1 Павел да Сила мунiсны Амфиполь да Аполония пыр Фессалоникаö. Сэнi вöлi юдейяслöн синагога. 2 Павел, кыдзи и век, мунiс сэтчö да куим шойччан лун дорвыв сёрнитiс йöзыскöд. Вежа Гижöдъяс вылö подуласьöмöн 3 гöгöрвоöдiс да эскöдiс найöс, мый Кристослы колö вöлi сьöкыдсö нуны да ловзьыны. Павел шуис: «Тайö Кристосыс – Исус, Сы йылысь ме и висьтала тiянлы». 4 Кодсюрö на пиысь эскисны да öтувтчисны Павелкöд да Силакöд. Эскисны тшöтш Енсьыс полысь грекъяс пиысь да тöдчана аньяс пиысь унаöн. 5 А юдейяс, кодъяс эз эскыны, тырины лöглунöн. Найö босьтiсны аскöдныс изэрд вылын весьшöрö бовъялысь айуловöс, чукöртiсны уна йöзöс да пондiсны шызьöдны карсö. Сэсся локтiсны Ясон керкаö, корсисны сэтысь Павелöс да Силаöс, мед петкöдны найöс йöз водзö, 6 но эз аддзыны. Сэки босьтiсны Ясонöс, нöшта кодсюрö вокъясöс да вайöдiсны карöн веськöдлысьяс дiнö. Налы горзiгтыр висьталiсны: «Тайö йöзыс, став муюгыдсö гудыртысьясыс, миянöдз воисны. 7 Ясон овмöдöма найöс ас ордас. Найö ставныс торкалöны кесарлысь тшöктöмъяссö, öксынас шуöны мöдöс – Исусöс». 8 Тайöс кылöмысь йöзыс да карöн веськöдлысьяс шöйöвошисны. 9 Сэсся Ясонлы да мукöд вокъяслы тшöктiсны вештысьны лэдзöмсьыс, сöмын та бöрын лэдзисны. 10 Вокъяс сiйö жö войнас мöдöдiсны Павелöс да Силаöс Верияö. Сэтчö воöм мысти Павел да Сила мунiсны синагогаö. 11 Фессалоникасаяс дорысь татчöс юдейяс вöлiны восьса сьöлöмаöсь. Найö сибöдiсны Кывсö став сьöлöмнас, быд лун лыддьысисны, видзöдiсны Гижöдъясысь, збыльысь-ö ставыс тадз. 12 На пиысь унаöн бергöдчисны эскöмас, эскисны тшöтш грек войтырса айулов да пыдди пуктана аньяс пиысь унаöн. 13 Кор Фессалоникаын юдейяс кылiсны, мый Павел Верияын висьтавлö Енлысь Кывсö, локтiсны сэтчö да пондiсны шызьöдны сэтчöс йöзсö. 14 Сэки вокъяс дзик пыр ыстiсны Павелöс саридз дорö, а Сила да Тимофей кольччисны карас. 15 Вокъяс колльöдiсны Павелöс Афинöдз да бöр бергöдчисны. Павел корис найöс висьтавны, мед Сила да Тимофей кыдз позьö öдйöджык локтасны сы дiнö. 16 Павел виччысис вокъясöс Афинын. Тайö карыс вöлi тырöма идолъясöн. Кор Павел аддзис тайöс, сiйö ловнас пузис. 17 Синагогаын Павел ёна сёрнитiс юдейяскöд да Енсьыс полысь мукöд войтыркöд. Быд лун сiйö сёрнитiс йöзыскöд ывла вылын. 18 Кодсюрö философъяс, эпикура да стоика велöдöмö кутчысьысьяс, вензисны Павелкöд. Öтияс шуалiсны, сiйö пö нинöм абусö сöрö! Мöдъяс шуалiсны, кутшöмкö пö тöдтöм енъяс йылысь висьталö. Павел жö висьталiс налы Исус йылысь да кулöмысь ловзьöм йылысь. 19 Сэки босьтiсны да вайöдiсны Павелöс Ареопагö. Сэнi пондiсны юасьны: «Вермам-ö ми тöдны, мыйсяма выль велöдöм тэ висьталан? 20 Мыйкö тешкодьтор тэ тэчан миян пельясö. Кöсъям тöдны, мый тайö». 21 Афинын олысьяс да сэтчö локтысь йöз каднысö ёнджыка коллявлiсны сёрнитöмъясöн, ёна радейтiсны кывзыны мыйкö выльтор. 22 Павел сувтiс Ареопаг шöрö да шуис: «Афинса войтыр! Став сертиыс ме аддза, мый тi ёна юрбитысь йöз. 23 Ветлöдлiгöн ме видзöдалi тiянлысь юрбитанiнъястö да аддзи "тöдтöм енлы" гижöда висьпуктанiн. Буретш тайö тöдтöм Ен йывсьыс, кодлы тi юрбитанныд, ме и висьтала. 24 Муюгыдсö да ставсö вöчысь Ен, енэжыслöн да муыслöн Господь, оз ов киöн вöчöм крамъясын. 25 Сылы оз ков мортсянь отсöг, Сылöн ставыс эм. Сiйö Ачыс сетö быдöнлы олöм, ловшы да ставсö. 26 Öти вирсянь Сiйö вöчис став мувывса йöзсö да овмöдiс найöс му пасьтала, торйöдiс налы муяс да индiс налысь олан кадъяс, 27 мед найö корсисны Енсö, гашкö, кималасöн корсьöмöн аддзасны Сiйöс, öд Сiйö абу ылын миянысь быдöнысь. 28 Сыöн ми олам, Сысянь лолалам да Сы улын ветлам. Тiян гижысьяс кодсюрö весиг шулöмаöсь: "Ми ставным Сысянь чужысьяс". 29 Ми кö Енсянь чужысьяс, миянлы оз ков öткодявны Енсö зарни, эзысь либö изйысь вöчöмторъяскöд, мый мöвпыштöма ачыс мортыс да вöчöма аслас кужысь киясöн. 30 Енмыс дыр кад чöж терпитiс йöзлысь гöгöрвотöмлунсö. Öнi Сiйö тшöктö быдлаын да быдöнлы бергöдчыны мыжъяссьыс. 31 Öд Сiйö индiс лун, кор пондас веськыда мыждыны став муюгыдсö водзвыв индöм Морт пыр, да вынсьöдiс Ассьыс шуöмсö быдöнлы тöдмöн, кор ловзьöдiс Сiйöс». 32 Кулöмысь ловзьöм йылысь кылöм бöрын öтияс пондiсны серавны, мöдъяс шуисны, та йылысь пö коркö мöдысь тэнö кывзам. 33 Сэки Павел мунiс на дiнысь. 34 Кодсюрö эскисны да öтувтчисны Павелкöд. Тайö вöлiны Ареопагысь Дионисий, Дамарь нима ань да мукöдъяс.
1 Сэсся Афинысь Павел мунiс Коринфö. 2 Сэнi паныдасис Акил нима юдейкöд, кодi чужлöма Понтын, да сылöн Прискилла гöтырыскöд. Найö регыд на вöлi локтöмаöсь Италияысь, сы вöсна мый Клавдий кесар тшöктöма став юдейыслы эновтны Рим. Павел мунiс на ордö 3 да кольччис сэтчö, мед тшöтш уджавны накöд, öд сiйö на моз жö вурис дöрачомъяс. 4 Быд шойччан лунö Павел сёрнитiс синагогаын, ышöдiс юдейясöс да грекъясöс эскыны. 5 Кор Сила да Тимофей локтiсны Македонияысь, Павел ловнас кылiс, мый колö висьтавны юдейяслы, мый Исус – сiйö Кристос. 6 Юдейяс сувтiсны Павеллы паныд, пондiсны омöльтны сiйöс. Сэки Павел паськöмсö пыркнитöмöн шуис: «Тiян вирныд ас выланыд кольö, а ме сöстöм. Öнi ме муна ентöдтöмъяс дiнö». 7 Сэсся Павел мунiс Юст ордö, сiйö вöлi Енсьыс полысь морт. Сылöн керкаыс сулалiс синагогакöд орччöн. 8 Синагогаса юралысь Крисп став гортсаыскöд эскис Господьлы. Нöшта унаöн на Коринфын Павелöс кывзöм бöрын тшöтш эскисны да пыртчисны. 9 Войнас Господь петкöдчис Павеллы да шуис: «Эн пов, водзö висьтав. 10 Ме тэкöд, тэныд некод оз вöч лёксö. Тайö карас Менам уна йöз». 11 Павел кольччис сэтчö во да джын кежлö, велöдiс да висьталiс йöзыслы Енлысь Кывсö. 12 Кор Акайяын пуксис веськöдлыны Галлион, юдейяс сёрнитчисны босьтны Павелöс. Найö вайöдiсны Павелöс ёрдö. 13 Сэнi шуисны, тайö мортыс пö велöдö йöзсö юрбитны Енлы оз Индöд сертиным. 14 Павел кöсйис шыасьны, но сэки Галлион шуис юдейяслы: «Юдейяс! Вöлi кö сёрниыс кутшöмкö лёктор вöчöм йылысь, ме эськö тiянöс кывзi. 15 А кор тi вензянныд кывъяс, нимъяс да асланыд Индöд йылысь, ме танi абу ёрдысь. Асьныд сёрнитчöй». 16 Сэсся вöтлiс найöс ёрдысь. 17 Сэки грекъяс ставныс уськöдчисны синагогаса юралысь Сосфен вылö да ёрд водзын чорыда нöйтiсны сiйöс, а Галлион весигтö эз видзöдлы на вылö. 18 Павел бура дыр на олiс Коринфын. Сэсся вокъяскöд колльöдчöм бöрын кывтiс Прискилла да Акилкöд Сирияö. Кенкреяын сiйö шырис юрсö, öд сылöн вöлi Ен водзын кöсйысьöм. 19 Ефесö воöм бöрын Павел янсöдчис Акилкöд да Прискиллакöд. Ачыс мунiс синагогаö да сёрнитiс сэнi юдейяскöд. 20 Найö корисны Павелöс олыштны на ордын дырджык на, но сiйö эз кöсйысь. 21 Колльöдчигас Павел шуис: «Меным быть колö лоны Ерусалимын гажöдчан лунъяс дырйи. Но Ен кö сетас, ме бара на вола тiян дiнö». Павел кывтiс Ефесысь 22 Кесарияö, сэсянь мунiс Ерусалимö да аддзысьлiс сэнi эскысьяскöд, а сэсся нин мунiс Антиокияö. 23 Сэнi олыштöм бöрын бара петiс туйö, кытшовтiс Галатия да Фригия муяс, ёнмöдiс сэнi велöдчысьясöс. 24 Ефесö сэки локтiс Аполос нима юдей, ачыс чужлöма Александрияын. Аполос кужис мичаа сёрнитны да зэв бура тöдiс Гижöдъяс. 25 Сiйö сибöдiс "Господь туй" йылысь велöдöмсö да сьöлöмсяньыс висьтавлiс-велöдiс Господь йылысь ставсö веськыда. Но ачыс тöдiс сöмын Иоанлысь пыртöмсö. 26 Сiйö повтöг сёрнитiс синагогаын. Акил да Прискилла сiйöс кывзöм бöрын корисны ас ордас да стöчджыка висьталiсны сылы Господьлöн туй йылысь. 27 Кор Аполос мöдöдчис мунны Акайяö, вокъяс ышöдiсны сiйöс да гижисны сэтчöс велöдчысьяслы, медым сибöдасны сiйöс. Акайяын Аполос Ен буралöмсянь ёна отсалiс эскысьяслы. 28 Став йöз водзас сiйö кужис венны юдейясöс. Гижöдъяс вылö мыджсьöмöн эскöдiс найöс, мый Исус – сiйö Кристос.
1 Кор Аполос вöлi Коринфын на, Павел вуджис керöсвыв муяс пыр да локтiс Ефесö. Сэтысь аддзис кодсюрö велöдчысьясöс 2 да юалiс налысь: «Сибöдiнныд-ö тi Вежа Лолöс эскöм бöраныд?» Найö шуисны: «Ми весиг эгö на кывлöй Вежа Лов йылысь». 3 Павел юалiс налысь: «Кутшöм пыртчöмöн нö тi пыртчинныд?» Найö вочавидзисны: «Иоан пыртчöмöн». 4 Павел шуис: «Иоан пыртiс найöс, кодъяс бергöдчисны мыжъяссьыныс, да висьталiс, медым эскасны сы бöрся Локтысьлы, Исус Кристослы». 5 Тайöс кылöм бöрын найö пыртчисны Господь Исус нимöн. 6 Кор Павел пуктiс кисö на вылö, сэки лэччис на вылö Вежа Лов. Найö пондiсны сёрнитны мукöд кывъяс вылын да пророкавны. 7 Ставныс найö вöлiны морт дас кык. 8 Куим тöлысь чöж Павел ветлöдлiс синагогаö да повтöг сёрнитiс сэнi, эскöдöмöн висьтавлiс Енлöн Юралöм йылысь. 9 Но эскöм пыдди кодсюрö чорзьöдчисны да став йöз водзас омöльтiсны "Господь туй" йылысь велöдöмсö. Сэки Павел эновтiс тайö йöзсö да велöдчысьясыскöд мунiс на дорысь. Тайö кадсяньыс сiйö быд лун сёрнитiс-велöдiс Тиранлöн велöданiнын. 10 Кык во чöж Павел велöдiс сэнi. Тадзи Асияын став олысьыс, юдейяс и грекъяс, кылiсны Господь Исус йылысь бурвисьталöмсö. 11 Павел пыр Енмыс вöчис уна шензьöданатор. 12 Павеллысь юр чышъянсö да мукöд паськöмсö пуктывлiсны висьысьяс вылö, и найö дзик пыр бурдлiсны да пеж ловъяс петалiсны на пытшкысь. 13 Весиг ветлысь-мунысь юдей тунъяс пиысь кодсюрö пондiсны вöтлавны пеж ловъясöс Господь Исус нимöн. Шуалiсны: «Пет! Тшöктам Исус нимöн, кодöс висьталö Павел». 14 Тадзи тшöтш вöчисны юдейяслöн Скева аркирейлöн сизимнан пиыс. 15 Но пеж лов воча шуис: «Исусöс бура тöда, Павелöс тшöтш тöда, а тi кодъяс?» 16 Сэсся пеж лолöн кутöм морт уськöдчис на вылö ыджыд вынöн да вирöдз чашйис найöс. Дзик пасьтöгныс налы ковмис пышйыны сiйö керкасьыс. 17 Та йылысь тöдмалiсны Ефесын ставныс, юдейяс и грекъяс. Ыджыд полöм босьтiс ставнысö, найö пондiсны ошкыны Господь Исуслысь нимсö. 18 Унаöн эскöм бöраныс волiсны да висьтасисны асланыс лёк уджъясысь. 19 Тшыкöдчысьяс пиысь унаöн вайисны небöгъяснысö да став йöз водзас сотiсны. Небöгъяслöн доныс, артыштiсны да, ветымын сюрс эзысь лои. 20 Тадзи ыджыд вынöн паськалiс да зумыда вужъясис Господьлöн кывйыс. 21 Тайö лоöмторъяс бöрын Павел кылiс ловнас, мый сылы колö мунны Македония да Акайя пыр Ерусалимö. Сэсся шуис Ерусалим бöрын ветлыны Римö. 22 Тимофейöс да Ерастöс, ассьыс отсасьысьясöс, сiйö мöдöдiс Македонияö, ачыс кольччылiс на Асияö. 23 Сiйö кадö "Господь туй" йылысь велöдöм понда ыджыд зык кыптiс. 24 Ефесын олiс эзысьöн вöчасьысь Димитрий. Сiйö вöчалiс эзысьысь Артемида крам серпаса киöн вöчöмторъяс да аслас уджалысьяслы бура мынтысис. 25 Сiйö чукöртiс ассьыс уджалысьяссö, корис нöшта мукöд вöчасьысьясöс да шуис: «Ёртъяс, тi тöданныд, мый тайö уджыс вайö миянлы уна сьöм. 26 Тi асьныд аддзанныд да кыланныд, мый вöчö тайö Павелыс. Сiйö висьтавлö, киöн вöчöмторъясыд пö абу енъяс, и уна йöзöс нин эскöдiс Ефесын да став Асияын. 27 Мыйкö колö вöчны миянлы. Артемида енлысь крамсö кö кутасны нинöм туйö пуктыны, миян уджным лоас ковтöм. Миян ыджыд енным, кодöс ыдждöдлö став Асия да став муюгыдыс, вермас воштыны нималöмсö». 28 Тайöс кылöм бöрын чукöртчысьяс тырины скöрлунöн да пондiсны горзыны: «Ефесса Артемида – медыджыдыс!» 29 Карыс ставнас шызис. Йöзыс котöртiсны ывлавыв театрö да вайöдiсны сэтчö македонияса Гайöс да Аристаркöс, Павелкöд локтысьясöс. 30 Павел тшöтш кöсйис мунны сэтчö, но велöдчысьяс эз лэдзны сiйöс. 31 Весиг асияса веськöдлысьясысь кодсюрö, Павеллöн ёртъясыс, мöдöдiсны висьтавны, мед сiйö весиг оз петкöдчыв сэнi. 32 Чукöртчöм йöз ставныс вöлi ёна шызьöмаöсь: öтияс горзiсны öтитор, мöдъяс – мöдтор. Унджыкыс весиг эз тöд, мыйла и локтiсны. 33 Сэнi вöлiны тшöтш юдейяс. Найö мырдöн тшöктiсны Öльöксандрлы петны йöз водзö. Öльöксандр сетiс кинас пас, мед ланьтасны, да кöсйис нин сёрнитны. 34 Но кор йöзыс тöдмалiсны, мый сiйö юдей, öти вомöн горöдiсны да кык час чöж öтарö горзiсны: «Ефесса Артемида – медыджыдыс!» 35 Йöзсö öлöдöм бöрын карса кывкутысь шыасис: «Ефесса войтыр! Быдöн тöдö, мый Ефес кар видзö-дöзьöритö ыджыд Артемида енлысь крамсö да енэжсянь усьöм сылысь изсерпассö. 36 Таысь некод оз вермы соссьыны. Та вöсна лöньöй, энö лоöй юртöм петукъяс кодьöсь! 37 Мыйла тайö кыксö вайöдiнныд? Найö эз гусясьны Артемида крамын, эз омöльтны тiянлысь ентö. 38 Димитрийлöн да сылöн вöчасьысьяслöн кö эм норасьöм кодкö вылö, мед шыасясны ёрдö да веськöдлысьяс дiнö, мед на водзын норасясны öта-мöдныс вылö. 39 Тiян кö эм кутшöмкö мöд помка, сэки чукöртасны йöзöс да видлаласны миян индöд серти. 40 Тайö шызьöмсö лэптöмысь миянöс ставнымöс öнi вермасны мыждыны. Миянлы весиг нинöмöн дорйысьнысö, öд помкаыс некутшöм абу». Сёрнитöм бöрас карса кывкутысь тшöктiс разöдчыны йöзыслы.
1 Шызьöм помасьöм бöрын Павел чукöртiс велöдчысьяссö да ышöдiс найöс. Сэсся кольöдчöм бöрын мöдöдчис Македонияö. 2 Мунiгас быдлаын ышöдiс-ёнмöдiс эскысьясöс. Сэсся локтiс Грецияö 3 да олiс сэнi куим тöлысь. Павел кöсйö нин вöлi кывтны Сирияö, но кор тöдмалiс, мый юдейяс сёрнитчöмаöсь вины сiйöс, бöрсö шуис мунны Македония пыр. 4 Асияöдз Павелöс колльöдiсны Верияысь Пирлöн Сосипатр пиыс, Фессалоникаысь Аристарк да Секунд, Дервияысь Гай, Тимофей да Асияысь Тихик Трöпимкöд. 5 Найö водзджык мунiсны Троадаö да виччысисны миянöс сэнi. 6 Ми Шомтöм нянь сёян лунъяс бöрын петiм Филип карысь да вит лунöн воöдчим на дiнö Троадаö. Сэнi олiм вежон чöж. 7 Вежонса медводдза лунö сэтчöс велöдчысьяс чукöртчисны нянь чегны. Павеллы аскинас колö вöлi петны туйö, та вöсна сiйö дыркодь сёрнитiс накöд. Сёрниыс нюжалiс вой шöрöдз. 8 Вылi судтаас, кöнi ми пукалiм, бура уна би öзйис. 9 Öшинь вылас пукалiс Евтик нима том морт. Павеллöн дыр сёрнитöмысь сiйö чорыда унмовсис да ун йывсьыс усис коймöд судтасяньыс. Муысь лэптiгöн аддзисны, мый сiйö кулöма. 10 Павел лэччис, водiс том морт вылö, шымыртiс сiйöс да шуис: «Энö шогсьöй, лолыс сылöн абу петöма». 11 Сэсся Павел бöр кайис вылi судтаас. Нянь чегöм бöрын сiйö сёйыштiс да бура дыр на, югдытöдзыс, сёрнитiс велöдчысьяскöд, сэсся мунiс. 12 А том мортöс ёна нимкодясьöмöн колльöдiсны гортас дзоньвидзаöн. 13 Сэсся ми пуксим корабль вылö да кывтiм Ассö, медым босьтны сэтысь Павелöс. Сiйö ачыс тадзи тшöктiс, шуис, мый локтас сэтчö подöн. 14 Ассын аддзысьöм бöрын ми босьтiм Павелöс да кывтiм Митилинаö. 15 Сэсянь мöдöдчим бара водзö. Лун мысти ми кывтiм нин Киос дiнтi. Сэсся мöд луннас ми вуджим Самосö, кысянь мунiм Трогилияö. Нöшта лун мысти воим Милитö. 16 Ми кывтiм Ефесö сувтлытöг, тадзи Павел шуис, мед Асияын эз ковмы воштыны кадсö. Сiйö ёна тэрмасис, мед эськö Ветымынöд лун кежлö воöдчыны Ерусалимö. 17 Милитсянь Павел ыстiс юöр, мед корны Ефесысь вичкоса юрнуöдысьясöс. 18 Ефесысь воöмаяслы сiйö шуис: «Тi асьныд тöданныд, медводдза лунсяньыс Асияö воöмсянь ме пыр вöлi тiянкöд. 19 Ме кесъялi Господьлы рам сьöлöмöн да синва сорöн, кор ёна сьöкыдалi юдейяссянь. 20 Йöз водзын да тiян гортъясын велöдiгöн ме висьталi тiянлы став коланасö. 21 Висьталi юдейяслы и грекъяслы, мед бергöдчасны мыжъяссьыныс Ен дiнö да эскасны миян Господь Исус Кристослы. 22 Öнi Лов нуöдöм серти ме муна Ерусалимö. Мый менö виччысьö сэнi, ме ог тöд. 23 Тöда сöмын, Вежа Лов быд карын эскöдö, мый дзескыдiн да сьöкыдлунъяс виччысьöны менö. 24 Ме нинöм вылö ог видзöд, меным олöмöй абу дона. Сöмын кöсъя долыд сьöлöмöн помöдз мунны лöсьöдöм туйöдыс да помавны кесъялöмöс, Господь Исуслысь тшöктöмсö – висьтавны Енлöн буралöм йылысь Евангелльöсö. 25 Öнi ме тöда: тi, кодъяс пöвстын ме олi да висьтавлi Енлöн Юралöм йылысь, онö нин аддзылöй менсьым чужöмöс. 26 Та вöсна талун шуа тiянлы: кодкö вошас кö туй вывсьыс, ме абу мыжа. 27 Ме öд ланьтлытöг висьтавлi тiянлы Енлысь став кöсйöмсö. 28 Тöждысьöй ас вöснаныд да став чукöрыс вöсна. Öд Вежа Лов пуктiс тiянöс, мед видзны Господь Енлысь Вичкосö. На вöсна Сiйö мынтысис Аслас Вирöн. 29 Ме тöда: менам мунöм бöрын пырасны тiян пöвстö горш кöинъяс да пондасны усьласьны чукöрныд вылö. 30 Весиг тiян пöвстысь петасны йöз, кодъяс пондасны мöдарö велöдны да кыскыны ас бöрсяыс велöдчысьясöс. 31 Та вöсна лоöй дасьöсь да энö вунöдöй, кыдзи ме куим во чöж лун и вой синва сорöн дугдывтöг велöдi быдöнöс тiянöс. 32 Öнi, вокъяс, коля тiянöс Енкöд да Сылöн буралан кывйыскöд. Тайö кывйыс вермö ёнмöдны тiянöс да сетны тiянлы кöсйысьöмасö, мый вичмас став вежа войтырлы. 33 Ме некодсянь эг виччысь эзысь-зарни либö кöм-пась. 34 Тi асьныд тöданныд: ме ас киясöн уджалi, медым аслам да тшöтш ёртъяслöн вöлi став коланаыс. 35 Ме быдторйын петкöдлi тiянлы, мый татшöм ногöн – уджалöмöн да Господь Исуслысь кывъяссö тöд вылын кутöмöн – колö тöждысьны вынтöмъяс вöсна. Сiйö Ачыс шулiс: "Босьтöм дорысь бурджык сетны"». 36 Тайöс шуöм бöрын Павел сувтiс пидзöс вылас да ставныскöд кевмысис. 37 Ставныс кутiсны бöрдны да Павеллы сьылi вылас уськöдчöмöн окавны сiйöс. 38 Торъя нин шогсисны Павеллöн шуöм кывъясысь, мый найö оз нин аддзывны сiйöс. Сэсся колльöдiсны Павелöс корабль вылö.
1 Янсöдчöм бöрын ми веськыда кывтiм Косö, мöд луннас Родосö, сэсся Патараö. 2 Сэнi ми аддзим Финикияö мунысь корабль, пуксим сы вылö да кывтiм водзö. 3 Ми кывтiм Кипр дiнтi, сiйö коли шуйгавылас. Сэсся воим Сирияö да сувтiм Тирö, кöнi колö вöлi ректыны корабльсö. 4 Сэнi ми корсим велöдчысьясöс да олiм на дiнын вежон. Найö Вежа Ловсянь ышöдöмöн висьталiсны Павеллы, медым сiйö эз мун Ерусалимö. 5 Вежон мысти ми бара петiм туйö. Ставныс гöтыръясныскöд да челядьныскöд колльöдiсны миянöс кар сайöдзыс. Сэнi вадорас ми сувтiм пидзöсъяс вылö да кевмысим. 6 Янсöдчöм бöрын ми сöлiм корабль вылö, а колльöдысьяс мунiсны гортаныс. 7 Тирсянь ми кывтiм Птолемаидаö, танi помасис миян кывтöмным. Сэнi аддзысим вокъяскöд да кольччим на ордö öти лун кежлö. 8 Аскинас ми, Павелкöд ветлысьяс, мунiм сыкöд Кесарияö. Сэнi пырим буръюöртысь Филип ордö да кольччим сэтчö. Филипöс вöлi бöрйöма Ерусалимын сизим отсасьысь лыдö. 9 Сылöн вöлi нёль ныв, ставныс найö пророкалiсны. 10 Уна лун ми вöлiм на дiнын. Сiйö кадö локтiс Юдеяысь Агав нима пророк. 11 Кор сiйö пырис миян дiнö, босьтiс Павеллысь тасмасö да кöрталiс ассьыс ки-коксö, сэсся шуис: «Тадзи висьталö Вежа Лов: тайö тасма новлысьсö юдейяс тадзи жö кöрталасны Ерусалимын да сетасны ентöдтöмъяс киö». 12 Тайöс кылöм бöрын сэтчöс эскысьяскöд ми ставным корим, медым Павел эз мун Ерусалимö. 13 Павел воча шуис: «Мый тi бöрданныд, менсьым сьöлöмöс дойдаланныд? Ме дась лоны кöрталöмаöн, весиг дась кувны Ерусалимын Господь Исус ним вöсна». 14 Павелöс кутны ми эгö вермöй, сэки лöнь сьöлöмöн шуим: «Мед лоас Господьлöн кöсйöм серти». 15 Та бöрын ми лöсьöдчим туйö да мöдöдчим Ерусалимö. 16 Колльöдiгмоз миянкöд тшöтш мунiсны Кесарияысь кодсюрö велöдчысьяс. Найö вайöдiсны миянöс кипрса Мнасон дiнö, медым сувтны сы ордö. Мнасон важысянь нин вöлi велöдчысьяс лыдын. 17 Кор ми воим Ерусалимö, вокъяс нимкодя сибöдiсны миянöс. 18 Аскинас ми Павелкöд мунiм Яков дiнö, кытчö локтiсны тшöтш вичкоса юрнуöдысьяс. 19 Найöс чолöмалöм бöрын Павел сьöрсьöн-бöрсьöн висьтавлiс ставсö, мый Енмыс вöчис ентöдтöмъяс пöвстын сылöн кесъялöм пыр. 20 Павелöс кывзöм бöрын юрнуöдысьяс ошкисны Енмöс, сэсся шуисны: «Тöдан, вокöй, юдейяс дас сюрсъясöн бергöдчисны эскöмас, и ставныс найö кутчысьöны Индöдö. 21 Тэ йылысь найö кывлöмаöсь, тэ пö ентöдтöмъяс пöвстын олысь юдейясöс велöдан эновтчыны Мöисей Индöдысь, öлöдан найöс пияннысö вундыштöмысь да батьяслöн оласногö кутчысьöмысь. 22 Мый нö кутам вöчны? Збыльысь öд йöзыд чукöртчасны, кор тöдмаласны тэнсьыд локтöмтö. 23 Вöч, кыдзи ми шуам. Миян пöвстын эм нёль морт, кодъяс кыв сетöмаöсь Ен водзын. 24 Босьт найöс аскöдыд да сöстöммöдчы накöд. Мынтысь на вöсна, мед шырасны юрнысö. Сэки ставныс тöдмаласны, мый тэ кутчысян Индöдö, да тэ йылысь кывлöмторйыс абу збыль. 25 А эскöмö бергöдчöм ентöдтöмъяслы ми гижлiм, мед видзасны асьнысö идоллы вайöм сёянысь, вир юöмысь, джагалöм пемöс яй сёйöмысь да кырсалöмысь. Мукöд тшöктöмас налы оз ков кутчысьны». 26 Сэки Павел босьтiс аскöдыс тайö йöзсö да мöд луннас сöстöммöдчис накöд. Сэсся мунiс крамö да висьталiс, кор помасясны налöн сöстöммöдчан лунъясыс да кор лоö вайöма быдöн вöсна вись. 27 Сизимöд луннас, сöстöммöдчöм помасигöн Асияысь воöм юдейяс аддзисны Павелöс крамысь. Найö шызьöдiсны став йöзсö да Павелöс босьтiгöн 28 горзiсны: «Израиль войтыр, отсалöй босьтны тайö мортсö! Сiйö быдлаын велöдö-сёрнитö миян войтырлы паныд, Индöдлы паныд да тайö вежаиныслы паныд. Весиг грекъясöс вайöдöма татчö, пежалö вежаинсö». 29 Та водзвылын найö аддзылöмаöсь карсьыс Павелöс Ефесысь воöм Трöпимкöд. Найö чайтiсны, мый Павел сыкöд локтiс крамö. 30 Став карыс шызис, йöзыс локтöмöн локтiс. Павелöс босьтiсны да кыскисны крамсьыс ортсö, öдзöсъяссö дзик пыр йигналiсны. 31 Павелöс кöсйисны нин вины, но буретш сэки сюрсöн веськöдлысьлы кывсис, мый став Ерусалимыс шызьöма. 32 Сiйö дзик пыр босьтiс аскöдыс шыпуртаясöс, сёöн веськöдлысьясöс да тэрмасьöмöн локтiс чукöртчöминö. Кор йöзыс аддзисны сюрсöн веськöдлысьöс шыпуртаяскöд, дугдiсны нöйтны Павелöс. 33 Сюрсöн веськöдлысь матыстчис Павел дiнö, сэсся тшöктiс босьтны сiйöс да дорны чепъясöн. Ачыс юасис, кодi сiйö да мый сiйö вöчис. 34 Öтияс öтитор горзiсны, мöдъяс – мöдтор. Йöзлöн горзöмысь сюрсöн веськöдлысь нинöм эз гöгöрво, та вöсна тшöктiс нуöдны Павелöс изкарö. 35 Содйöд кайигöн йöзлöн дзескöдöм вöсна шыпуртаяслы ковмис нуны Павелöс ки выланыс. 36 Йöзыс вöтчисны на бöрся да горзiсны: «Вины сiйöс!» 37 Изкарö пыригöн Павел шуис сюрсöн веськöдлысьлы: «Позьö-ö меным сёрнитны тэкöд?» Мöдыс шуис: «Тэ грек кыв тöдан? 38 Абу-ö тэ сiйö египетсаыс, неважöн тай зык лэптiс да петкöдiс овтöминö нёль сюрс лёк вöчысьöс?» 39 Павел шуис: «Ме юдей, Киликияын нималана Тарс карысь. Кора, лэдз меным кыв шуны йöзыслы». 40 Павеллы лэдзисны сёрнитны. Павел сулалiс сод вылас, кисö лэптылöмöн корис лöньны. Кор йöзыс ланьтiсны, сiйö пондiс сёрнитны накöд еврей кыв вылын:
1 «Вокъясöй да батьясöй, кывзöй! Ачымöс дорйöм могысь ме кöсъя мыйкö шуны тiянлы». 2 Кор найö кылiсны Павеллысь еврей кыв вылын шыасьöмсö, чöв ланьтiсны. Павел шуис: 3 «Ме ачым юдей, чужи Киликияын Тарс карын, но быдми тайö карас. Гамалиил дорын менö велöдiсны батьяслöн Индöдö да тiян моз ме чорыда сулалi Ен дор. 4 Ме весиг виавмöн вöтлывлi "Господь туйöд" мунысьясöс, айуловöс да аньясöс кöртавлöмöн пуксьöдавлi дзескыдiнö. 5 Та йылысь вермас висьтавны ачыс аркирей пöрысьяскöд. Насянь менам вöлi гижöд Дамаскын олысь вокъяслы. Тайö гижöднас ме мунi сэтчö, медым кутавны Исуслы эскысьясöс да вайöдны найöс Ерусалимö мыждыны. 6 Дамаскö воигöн лун шöр кадö виччысьтöг енэжсяньыс кытшалiс менö югыд. 7 Ме уси муас да кылi шыасьöм: "Савл, Савл, мыйла вöтлан Менö?" 8 Ме юалi: "Кодi Тэ, Господьöй?" Сiйö шуис меным: "Ме Назаретса Исус, кодöс тэ вöтлан". 9 Мекöд локтысьяс кор аддзöмаöсь югыдсö, ёна повзьöмаöсь, а ме дiнö шыасьöмсö найö абу кывлöмаöсь. 10 Ме шуи: "Господьöй, мый Тэ шуан меным вöчны?" Господь шуис: "Чеччы да мун Дамаскö, сэнi висьталасны, мый тэныд вöчнысö". 11 Дзирдалана югыдсьыс менам синмöй пемдiс. Та вöсна мекöд локтысьяс киöд кутöмöн нуöдiсны менö Дамаскö. 12 Сэнi ме дiнö локтiс Ананий нима вежавидзысь да Индöд серти олысь морт. Дамаскын олысь юдейяс пыдди пуктiсны сiйöс. 13 Ме дiнö матыстчöмöн сiйö шуис: "Савл вок! Мед аддзас тэнад синмыд!" И ме дзик пыр аддзи сiйöс. 14 Сiйö шуис меным: "Миян батьяслöн Ен бöрйöма тэнö, медым тэ тöдiн Сылысь кöсйöмсö, аддзин Веськыда Олысьсö да кылiн Сы вомсянь шуöмсö. 15 Та вöсна тэ кутан юöртны Сы йылысь став йöзыслы, висьталан, мый тэ аддзылiн да кывлiн. 16 А öнi эн нюжмась, чеччы да пыртчы. Господь нимö шыасьöмöн лэдз мыськавны ассьыд мыжъястö". 17 Сэсся ме бöр локтi Ерусалимö. Крамын кевмысигöн ме быттьö ас садьысь петi 18 да аддзи Господьöс. Сiйö шуис, тэрмасьöмöн пö пет Ерусалимысь, танi пö оз сибöдны Ме йылысь тэнсьыд висьталöмтö. 19 Ме шуи: "Господьöй, найö öд тöдöны, мый ме ветлöдлi синагогаысь синагогаö, пуксьöдавлi Тэныд эскысьясöс дзескыдiнö да чорыда нöйтлi найöс. 20 Тэ йылысь висьталысь Степанöс виигöн ме ачым вöлi сэнi, видзи виысьяслысь паськöмсö да лыдди виöмсö бурторйöн". 21 Господь шуис меным: "Мун, Ме мöдöда тэнö ылö ентöдтöмъяс дiнö"». 22 Тайö кывъясöдз кывзiсны Павелöс, сэсся пондiсны горзыны: «Татшöмсö колö бырöдны му вывсьыс! Сiйöс оз позь ловйöн кольны!» 23 Йöзыс öтарö горзiсны, шенасисны паськöмнаныс да коялiсны кок увсьыныс буссö вывлань. 24 Сэки сюрсöн веськöдлысь тшöктiс пыртны Павелöс изкарö да нöйтны орсöн. Сэнi кöсйис тöдмавны, мыйысь юдейяс татшöмасö горзöны сы вылö. 25 Кор Павелöс кöртавлiсны тасмаясöн, сiйö шуис сёöн веськöдлысьлы: «Тiянлы öмöй позьö мыждытöгыс нöйтны римса мортöс?» 26 Тайöс кылöм бöрын сёöн веськöдлысь матыстчис сюрсöн веськöдлысь дiнö да шуис: «Тэ збыльысь кöсъян нöйтны тайö мортсö? Сiйö öд римса». 27 Сюрсöн веськöдлысь матыстчис Павел дiнö да юалiс: «Висьтав, тэ римса?» Павел вочавидзис: «Да». 28 Веськöдлысь содтiс: «Ме ыджыд дон мынтi, мед лоны римсаöн». Павел шуис сылы: «А ме чужи нин римсаöн». 29 Сэки нöйтысьяс дзик пыр вешйисны Павел дiнысь. А сюрсöн веськöдлысь кор тöдмалiс, мый Павел римса, ёна повзис, мый кöртавлiс римсаöс. 30 Сюрсöн веськöдлысь кöсйис збыльысь тöдмавны, мыйысь юдейяс мыжалöны Павелöс. Та вöсна аскинас тшöктiс разьны Павеллысь кöртöдъяссö да чукöртны аркирейясöс да став веськöдлан котырсö. Сэсся петкöдiс Павелöс на водзö.
1 Павел сюся видзöдлiс веськöдлан котыр вылö да шуис: «Вокъяс! Тайö лунöдзыс ме пыр олi Ен водзын сöстöм сьöлöмöн». 2 Сэки Ананий нима аркирей тшöктiс Павел дiнын сулалысьöс кучкыны сылы вомас. 3 Павел шуис сылы: «Тэнö Енмыс пондас нöйтны, еджыдöн мавтöм стен! Тэ пуксин мыждыны менö Индöд серти, но ачыд Индöдыслы паныд мунан, тшöктан нöйтны менö». 4 Сэнi сулалысьяс шуисны Павеллы: «Енлысь аркирейöс лёкöдан?» 5 Павел воча шуис: «Ме эг тöд, вокъяс, мый сiйö аркирей. Дерт, гижöма: "Эн лёкöд ас войтырлысь юралысьöс"». 6 Веськöдлан котырын вöлiны саддукейяс да фарисейяс. Тайöс казялöм бöрын Павел гораа шыасис: «Вокъяс! Ме ачым фарисей, фарисейлöн пи. Менö мыждöны, кулöмысь ловзьöмö эска да». 7 Тайöс кылöм бöрын фарисейяс да саддукейяс вензьыны пондiсны, тадзи чукöртчöмаяс юксисны кык пельö. 8 Öд саддукейяс шуöны, мый ловзьöмыс абу, весиг анделъяс и ловъяс абуöсь, а фарисейяс шуöны, ставыс пö тайö эм. 9 Вензьысьяс лёкысь горзыны пондiсны. Сэки фарисейяс лыдысь Индöдö велöдысьяс сувтiсны да шуисны: «Тайö мортыслысь ми нинöм лёксö огö аддзöй. Гашкö, збыльысь сыкöд сёрнитiс Лов либö андел. Вайö, огö пондöй паныд мунны Енмыслы». 10 Но вензьöмыс öтарö öддзис, сюрсöн веськöдлысь весиг повзис, мый косявласны Павелöс. Та вöсна тшöктiс шыпуртаяслы босьтны Павелöс веськöдлан котыр водзысь да нуöдны изкарö. 11 Сiйö войнас Господь сувтiс Павел водзö да шуис: «Эн пов, Павел. Öнi тэ Ерусалимын висьталiн Ме йылысь, тадзи тэныд ковмас висьтавны тшöтш Римын». 12 Асывнас юдейяс пöвстысь кодсюрö ас костаныс сёрнитчöмöн сетiсны кыв, мый Павелöс витöдз оз кутны сёйны ни юны. 13 Тадзи шуисны вöчны нелямын сайö морт. 14 Найö локтiсны аркирейяс да пöрысьяс дiнö да шуисны: «Ми кыв сетiм Ен водзын: Павелöс витöдз воманым дзик нинöм огö босьтöй. 15 Öнi тiянлы веськöдлан котыркöд колö юöртны сюрсöн веськöдлысьлы, медым сiйö аски вайöдас Павелöс тiян дiнö. Шуöй, мый тi кöсъянныд бурджыка тöдмавны, мыйысь сiйöс мыжалöны. А ми вайöдiгас виям Павелöс». 16 Та йылысь кывлiс Павел чойлöн пиыс. Сiйö мунiс изкарö, пырис Павел дорö да ставсö висьталiс. 17 Сэки Павел корис сёöн веськöдлысьöс да шуис: «Тайö том мортсö колö нуöдны сюрсöн веськöдлысь дiнö, сiйö мыйкö кöсйö висьтавны сылы». 18 Сёöн веськöдлысь вайöдiс том мортöс сюрсöн веськöдлысь дiнö да шуис: «Миянын пукалысь Павел корис вайöдны тайö том мортсö тэ дiнö, сiйö кöсйö мыйкö висьтавны». 19 Сюрсöн веськöдлысь босьтiс том мортöс киöдыс, сэсся бокö вешйöмöн юалiс сылысь: «Мый тэ кöсъян висьтавны?» 20 Сiйö шуис: «Юдейяс сёрнитчöмаöсь корны тэнö, медым тэ аски вайöдiн Павелöс веськöдлан котыр водзö. Найö ылöдласны, кöсъям пö бурджыка тöдмавны, мыйысь Павелыс мыжа. 21 Тэ найöс эн кывзы. На чукöрысь нелямын сайö морт кыйöдöмöн лöсьöдчöны вины Павелöс. Найö кыв сетöмаöсь, мый сiйöс витöдз оз кутны сёйны ни юны. Найö öнi дасьöсь нин, виччысьöны сöмын тэнсьыд шуöмтö». 22 Сюрсöн веськöдлысь лэдзис том мортöс да öлöдiс: «Некодлы эн висьтав, мый тэ меным юöртiн тайöс». 23 Сюрсöн веськöдлысь корис сёöн веськöдлысьясысь кыкöс да шуис: «Дасьтöй кыксё пода шыпуртаöс, сизимдас верзьöмаöс да кыксё шы новлöдлысьöс. Öкмыс час рытын лоöй дасьöсь мöдöдчыны Кесарияö. 24 Павеллы тшöтш дасьтöй вöвъяссö да лючки-бура вайöдöй сiйöс Феликс юралысь дiнö». 25 Сюрсöн веськöдлысь мöдöдiс накöд татшöм гижöд: 26 «Пыдди пуктана Феликс юралысьöс чолöмалö Клавдий Лисий. 27 Юöрта: тайö мортсö босьтiсны юдейяс да кöсйисны вины сiйöс. Кор ме тöдмалi, мый сiйö римса, мунi шыпуртаяскöд да мырдди сiйöс на киысь. 28 Нöшта кöсйи тöдмавны, мыйысь сiйöс мыжалöны. Тайö могнас нуöдi сiйöс налöн веськöдлан котыр водзö. 29 Тöдмалi да, вöлöмкö, мыжалöны сiйöс асланыс Индöд понда вензяна видзöдласъясысь. Ме ог аддзы сылысь мыжсö, мыйысь эськö колö сiйöс пуксьöдны дзескыдiнö да вины. 30 Сэсся кывсис меöдз, мый юдейяс кыйöдöмöн лöсьöдчöны вины тайö мортсö. Та вöсна дзик пыр мöдöдi сiйöс тэ дiнö. Мыжалысьяслы тшöктi тэ водзын висьтавны, мыйысь найö мыжалöны сiйöс. Ло дзоньвидза!» 31 Тшöктöм серти шыпуртаяс босьтiсны Павелöс да нуöдiсны войнас Антипатридаö. 32 Асьныс мöд луннас бöр локтiсны изкарö, а Павелöс верзьöмаяскöд мöдöдiсны водзö. 33 Кесарияö воысьяс вайöдiсны Павелöс сэтчöс юралысь дiнö да сетiсны сылы гижöдсö. 34 Сiйöс лыддьöм бöрын юралысь юалiс Павеллысь, кытысь сiйö. Кор тöдмалiс, мый Павел Киликияысь, 35 шуис: «Кор локтасны тэнö мыжалысьяс, сэки кывза тэнö». Сэсся тшöктiс нуöдны Павелöс Ирöдлöн дзескыдiнö.
1 Вит лун мысти локтiсны Ананий аркирей да пöрысьяс. Накöд тшöтш локтiс Тертул нима налöн дорйысь. Локтысьяс асланыс мыжалöмъясöн шыöдчисны юралысь дiнö. 2 Павелöс вайöдöм бöрын Тертул сувтiс мыжавны: 3 «Пыдди пуктана Феликс! Быд кадö да быдлаын ми бур ногöн казьтылам тэнö. Ми уджйöзаöсь тэныд миян лöньлуна олöмысь, тэнад тöждысьöмысь да войтырлысь олöмсö бурмöдöмысь. 4 Ог кöсйы ёна сьöктöдны тэнö, кора сöмын лоны бур сьöлöмаöн да дженьыдика кывзыштны миянöс. 5 Ми аддзылiм: тайö мортыс пежалö гöгöр да став му пасьтала шызьöдö юдей войтырöс. Сiйö назаретса велöдöмö кутчысьысьяслöн веськöдлысь. 6 Сiйö кöсйис пежавны крамнымöс, таысь ми и босьтiм сiйöс да кöсйим мыждыны Индöдным серти. 7 Но локтiс сюрсöн веськöдлысь Лисий шыпуртаяскöд да мырддьöмöн-мырддис сiйöс миян киысь, сэсся мöдöдiс тэ дiнö. 8 Тшöтш миянлы, сiйöс мыжалысьяслы, тшöктiс локны татчö. Тэ верман ачыд бура тöдмавны ставсö, мыйысь ми мыжалам сiйöс». 9 Юдейяс сэнi тшöтш шуисны, дзик тадзи пö ставыс вöлi. 10 Кор Феликс сетiс кыв Павеллы, Павел воча шуис: «Ме тöда, тэ уна во чöж нин веськыда мыждан тайö муын олысьясöс. Та вöсна меным кокньыд танi дорйысьнысö. 11 Тэ верман ачыд тöдмавны, мый дас кык лун сайын ме локтi Ерусалимö, мед юрбитны Енлы. 12 Найö эз вермыны аддзывнысö, мед ме крамын вензи, синагогаын либö карын шызьöдi йöзсö, 13 та вöсна оз вермыны подулавны ассьыныс мыжалöмъяссö. 14 Но веськыда висьтала тэныд: ме кутчыся тайö велöдöмас, мый найö шуöны пöръясьöмöн, тадзи кесъяла миян батьяслöн Енлы. Ме эска ставас, мый гижöма Индöдын да пророк гижöдъясын. 15 Танi пукалысь юдейяс моз ме тшöтш лача кута Ен вылö, эска, мый лоö ловзьöмыс, ловзясны веськыда олысьяс и лёк нога олысьяс. Менö мыжалысьяс öд тшöтш тайöс виччысьöны. 16 Ме век зiля овны Ен водзын да йöз водзын сöстöм сьöлöмöн. 17 Уна во бöрын ме локтi Ерусалимö, медым ас войтырлы сетны чукöртöм сьöм да вайны Енлы вись. 18 Менö аддзылiсны крамысь сöстöммöдчöм бöрын. Йöз чукöрыс да шызьöмыс сэнi матö эз вöв. 19 Сэнi вöлiны Асияысь кодсюрö юдейяс. Налы эськö колö вöлi сувтны тэ водзö да мыжавны менö, дерт, вöлi кö мыйысь? 20 Тайö йöзыс мед асьныс висьталасны, кутшöм мыж найö аддзисны менсьым, кор ме сулалi веськöдлан котыр водзын. 21 Ме сэнi шуи налы: "Тi талун мыжаланныд менö сыысь, мый ме эска кулöмаяслöн ловзьöмö". Гашкö, тайö шуöмсьыс ме мыжми на водзын». 22 Феликс бура тöдiс "Господь туй" йылысь велöдöмсö. Ставсö кывзöм бöрын сёрнисö тупкис да шуис: «Кор сюрсöн веськöдлысь Лисий локтас, сэки шуа бöръя кывсö». 23 Сёöн веськöдлысьлы тшöктiс нуöдны Павелöс дзескыдiнö да видзны сiйöс дзескöдтöг, лэдзны ёртъясыслы видлавны сiйöс да тöждысьны сы вöсна. 24 Кымынкö лун мысти Феликс локтiс Друзилла гöтырыскöд. Сылöн гöтырыс вöлi юдей войтырысь. Феликс тшöктiс вайöдны Павелöс, медым кывзыны Исус Кристослы эскöм йылысь. 25 Но кор Павел висьталiс веськыда олöм, асьтö кутöм да локтана мыждöм йылысь, Феликсöс полöм босьтiс. Сiйö шуис: «Öнi мун. Кад кö лоö, корла на». 26 Сiйö виччысис Павелсянь, гашкö, сетас сьöм, мед лэдзасны сiйöс. Та вöсна тшöкыда корлывлiс Павелöс да сёрнитлiс сыкöд. 27 Кык во мысти Феликс пыдди юралысьö пуксис Порций Фест. И медым шогмыны юдейяслы, Феликс колис Павелöс дзескыдiнö.
1 Юралысьö пуксьöмсянь куим лун мысти Фест мунiс Кесарияысь Ерусалимö. 2 Сэнi аркирей да юдейяслöн веськöдлысьяс норасисны Павел вылö 3 да корисны, мед Фест вöчас налы буртор: тшöктас вайöдны Павелöс Ерусалимö. Ас костаныс найö сёрнитчисны, мый кыйöдасны Павелöс да вайöдiгас виасны. 4 Фест вочавидзис: «Павелöс видзöны Кесарияын, ме ачым сэтчö регыд муна. 5 Тiян пиысь тöдчанаджыкъясыс мед мунасны мекöд. Сiйö мортыс сайын кö збыльысь мыйкö эм, мед мыжаласны». 6 Лун кöкъямыс-дас мысти Фест бöр мунiс Кесарияö. Мöд луннас пуксис ёрдö да тшöктiс вайöдны Павелöс. 7 Кор сiйöс вайöдiсны, Ерусалимысь воöм юдейяс Павелöс кытшалöмöн пондiсны чорыда мыжавны сiйöс унаторйысь, но подулавнысö эз вермыны. 8 Павел асьсö дорйöм могысь шуис: «Ме некутшöм мыж эг вöч юдей Индöдлы, крамлы да кесарлы паныд». 9 Мед бурöн кольны юдейяс водзын, Фест шуис Павеллы: «Кöсъян-ö мунны Ерусалимö, мед сэнi менам ёрд водзö сувтны?» 10 Павел шуис: «Ме сулала кесар ёрд водзын, танi колö менö мыждынысö. Юдейяслы ме нинöм лёксö эг вöч, тэ ачыд тайöс бура тöдан. 11 Но ме кö мыжа вимöн, ме дась кувны. Абу кö мыжа, мыйысь тайö йöзыс мыжалöны менö, сiдзкö, некод оз вермы сетны менö налы. Ме кора кесарлысь мыждöм». 12 Сэки аслас отсасьысьяскöд сёрнитчöм бöрын Фест шуис: «Тэ корин кесарлысь мыждöм, сiдзкö, сувтан кесар водзö». 13 Кымынкö лун мысти локтiсны Кесарияö Агриппа öксы да Вереника, мед чолöмавны Фестöс. 14 Найö олiсны сы ордын уна кодь лун. Сэки Фест висьталiс öксылы Павел йылысь: «Танi пукалö морт, сiйöс Феликс кольöма дзескыдiнö. 15 Ерусалимö ветлiгöн юдейяслöн аркирейяс да пöрысьяс норасисны меным сы вылö, корисны мыждыны сiйöс. 16 Ме шуи налы, мый римсаяс оз сетны вины мортöс, кытчöдз сiйöс оз сувтöдны мыжалысьяс водзö, медым мортыс вермис паныд дорйысьны. 17 Кор найö локтiсны татчö, ме дзик пыр мöд луннас пукси ёрдö да тшöктi вайöдны тайö мортсö. 18 Мыжалысьяс сувтiсны гöгöрыс. Ме виччыси, гашкö, кутшöмкö лёкторйысь пондасны мыжавны, но тайöс ме эг кыв насянь. 19 Найö вензисны асланыс эскöм кузя да кутшöмкö кувлöм Исус понда. Но Павеллöн висьталöм серти, Сiйö ловъя. 20 Та кузя ме эг вермы некодарö нинöм шуны. Та вöсна юалi Павеллысь, оз-ö сiйö кöсйы мунны Ерусалимö, медым сэнi сувтны ёрд водзö. 21 Но Павел корис, мед сiйöс нуöдасны кесар дiнö. Сэтчö нуöдтöдз ме тшöктi видзны сiйöс дзескыдiнын». 22 Агриппа шуис Фестлы: «Ме тшöтш кöсъя кывзыштны тайö мортсö». «Аски кывзыштан», – вочавидзис Фест. 23 Аскинас Агриппа да Вереника локтiсны мичаа вöччöмöн. Найö пырисны чукöртчанiнö сюрсöн веськöдлысьяскöд да карса тöдчана йöзкöд. Фест тшöктiс вайöдны Павелöс, 24 сэсся шыасис: «Агриппа öксы да ставныд локтысьяс! Тi асьныд аддзанныд тайö мортсö. Ерусалимын да танi юдейяс норасисны меным сы вылö, öти вомöн горзiсны, колö пö вины сiйöс. 25 Но ме эг аддзи мыжсö, мыйысь эськö позис вины сiйöс. Сылöн корöм серти ме шуи мöдöдны сiйöс кесар дiнö. 26 Меным весиг нинöм гижнысö ыджыднымлы, та вöсна вайöдi сiйöс тiян водзö. Торйöн нин, Агриппа öксы, тэ водзö, медым тэнад донъялöм бöрын вöлi, мый гижнысö. 27 Ме чайта, мывкыдтöг лоö вöчöма, мöдöдам кö пуксьöдöм мортöс мыжсö индытöг».
1 Агриппа шуис Павеллы: «Тэ верман сёрнитны ас кузяыд». Павел кисö лэптылöм бöрын заводитiс дорйысяна сёрнисö: 2 «Агриппа öксы! Ме шуда, мый талун верма дорйысьны тэ водзын юдейяслöн став мыжалöмысь. 3 Тэ öд бура тöдан юдей войтырлысь оласногсö да налысь вензяна видзöдлассö. Та вöсна кора тэнö терпитöмöн кывзыштны менö. 4 Менсьым олöмöс тöдö став юдейыс, öд ме том кадсянь олi ас войтыр пöвстын Ерусалимын. 5 Найö важысянь тöдöны менö. Ме вöлi кутчысьöма фарисейяслöн чорыд велöдöмö да оласногö. Та йылысь, кöсъясны кö, асьныс вермасны висьтавны. 6 Öнi ме сулала ёрд водзын, сы вöсна мый кута лача кöсйысьöмас, кодöс Енмыс сетiс миян батьяслы. 7 Тайö кöсйысьöмыслысь збыльмöмсö лача кутöмöн виччысьöны миян войтырлöн дас кыкнан чужанкотырыс, лун и вой юрбитöны Енлы. Та вылö лача кутöмысь и мыжалöны менö юдейяс, Агриппа öксы. 8 Мыйла тi онö эскöй, мый Енмыс вермö ловзьöдны кулöмаясöс? 9 Ме ачым коркö быдногыс паныд мунi Назаретса Исус нимлы. Чайтi, тадзи и колö. 10 Тадзи вöчлi Ерусалимын: ме босьтi аркирейяссянь гижöд да вежа войтырöс унаöс пуксьöдалi дзескыдiнö, ме вöлi найöс виöм дор. 11 Ме унаысь чорыда нöйтлi найöс синагогаясын, медым найö омöльтiсны Исусöс. Ме вöлi тырöма скöрлунöн, вöтлыси на бöрся весиг мукöд каръясöдз. 12 Та могöн аркирейяс нимсянь ме мунi Дамаскö. 13 Лун шöр кадö, кор ме вöлi туйын на, аддзи, öксыöй, енэжсяньыс лэччис югыд, сiйö вöлi шондi югöрысь на яр. Тайö югыдыс кытшалiс менö да мекöд мунысьясöс 14 да ставным ми усим муас. Сэки ме кылi еврей кыв вылын ме дiнö шыасьöм: "Савл, Савл, мыйла вöтлан Менö? Сьöкыд тэныд мунны ёсь зорлы паныд". 15 Ме юалi: "Кодi Тэ, Господьöй?" Сiйö шуис: "Ме – Исус, кодöс тэ вöтлан. 16 Öнi чеччы да сувт кок вылад. Ме петкöдчи тэныд, мед тэ кесъялiн Меным да висьталiн, мый тэ аддзылiн да мый на Ме восьта тэныд. 17 Ме видза тэнö аслад войтырысь да ентöдтöмъясысь, кодъяс дiнö öнi мöдöда тэнö, 18 мед восьтны налысь синсö да бергöдны найöс пемыдсьыс югыдö, сöтана кипод улысь Ен дiнö, медым Меным эскöмöн найö босьтасны мыжъясысь прöститöмсö да вежа войтырлы Енсянь вичмöдöмасö". 19 Та вöсна, Агриппа öксы, ме эг кут паныд мунны енэжсянь петкöдчылöмлы. 20 Медводз Дамаскын да Ерусалимын, сэсся став Юдея му пасьтала, сэсся нин ентöдтöмъяслы висьтавлi, мед бергöдчасны мыжъяссьыныс Енлань да олöмнас петкöдласны тайöс. 21 Таысь юдейяс и босьтiсны менö крамын да кöсйисны вины. 22 Но Енмыс пыр на отсалiс меным тайö лунöдзыс, та вöсна ме öнöдз сулала да висьтала быдöнлы: прöстöй и чина йöзлы. Висьтала сöмын сiйö, мый йылысь водзвыв висьтавлiсны Мöисей да пророкъяс. Найö висьталiсны, 23 мый Кристос сьöкыда кулас и лоас медводдза Ловзьысьöн, медым восьтны югыдсö юдей войтырлы да ентöдтöмъяслы». 24 Кор Павел тадзи дорйысис, Фест гораа шуис: «Тэ дзикöдз йöймöмыд, Павел! Ыджыд тöдöмлуныд вöсна вежöртö воштöмыд». 25 Павел шуис: «Ме эг йöймы, пыдди пуктана Фест. Ме бур мывкыдсянь висьтала збыльсö. 26 Та йылысь бура тöдö ачыс öксы, та вöсна ме восьсöн сёрнита сы водзын. Эска, тайö сылы абу гусятор, öд ставыс тайö эз гусьöн вöчсьы, кöнкö пельöс сайын. 27 Эскан-ö, Агриппа öксы, пророкъяслы? Тöда, мый эскан». 28 Агриппа шуис Павеллы: «Зэв тай öдйö кöсъян вöчны менö Кристослы эскысьöн». 29 «Öдйö ли, ог ли», – шуис Павел, – «но кевма Енлы, мед тэ да ставныс танi менö кывзысьяс лоинныд ме кодьöсь, сöмын тайö чепъястöгыс». 30 Кор Павел помалiс сёрнисö, öксы чеччис, сы бöрся тшöтш чеччисны Фест юралысь, Вереника да мукöдыс. 31 Мунiганыс найö сёрнитiсны ас костаныс: «Тайö мортыс абу мыжа, мед вины сiйöс либö видзны дзескыдiнын». 32 Агриппа шуис Фестлы: «Позьö эськö вöлi лэдзны сiйöс, эз кö кор кесарлысь мыждöмсö».
1 Кор шуöма вöлi кывтны Италияö, Павелöс да мукöд пукалысьясöс сетiсны кесар полкын Юлий нима сёöн веськöдлысьлы. 2 Ми сöлiм Адрамитияысь кывтысь корабль вылö, сiйö лöсьöдчис кывтны Асия муястi. Миянкöд тшöтш вöлi Фессалоникаысь македонияса Аристарк. 3 Мöд луннас ми сувтiм Сидонö. Юлий вöлi бур сьöлöма Павел дiнö, лэдзис сылы ветлыны ёртъяс дiнас да босьтны став коланаторсö туйö. 4 Сидонысь петöм бöрын паныда тöлыс вöсна миянлы ковмис кывтны Кипрö. 5 Киликия да Памфилиятi кывтiгöн ми вуджим саридзсö да воим Ликияö, Мира карö. 6 Сэнi сёöн веськöдлысь аддзис Александрияысь Италияö кывтысь корабль да пуксьöдiс миянöс сы вылö. 7 Ми кывтiм ньöжйö уна лун чöж, öдва воим Книд карöдз. Паныда тöлыс эз лэдз кывтны водзö, та вöсна Салмонатi кытшовтöмöн пондiм кывтны Крит пöлöн. 8 Вадор пöлöныс кывтöмöн ми сьöкыдпырысь воöдчим сiдз шусяна "Бур Сувтанiнö". Тасянь матын вöлi Ласея кар. 9 Уна кад ми сэнi воштiм, весиг Видзалан лун нин коли бöрö, и татшöм тöланас водзö кывтны эз позь. Сэки Павел шыасис: 10 «Войтырöй, ме аддза, водзö кывтны лоас вывтi сьöкыд, вермам воштыны груз тыра корабльнымöс, весиг ассьыным олöмнымöс». 11 Но сёöн веськöдлысь Павеллы дорысь ёнджыка эскис корабльвывса ыджыдыслы да корабль нуöдысьлы. 12 Тöвйыны тайö сувтанiнас эз позь, та вöсна унаöн шуисны кывтны татысь, кыдзкö воöдчыны Финик карöдз да тöвйыны сэнi. Тайö критса öзыныс видзöдiс рытыв-лунвывлань да рытыв-войвывлань. 13 Пöльыштiс лун тöв. Чайтiсны, мый кывтöмыс артмас, та вöсна мöдöдчисны Крит пöлöн. 14 Регыд мысти асыв-войвывсянь кыпöдчис ыджыд тöвныр, сiйö пöльтiс дi вывсянь. 15 Корабль эз вермы водзсасьны тöвныркöд. Тöвныр нетшыштiс да пондiс новлöдлыны корабльнымöс гыяс вывтi. 16 Клавда дi весьттi кывтiгöн ми кыдзкö вермим видзны корабльлысь пыжсö. 17 Пыжсö лэптiсны корабль вылö, а корабльсö кöртавлiсны гезъясöн. Тöвдöрасö лэдзисны, полiсны, мед оз шыбит миянöс ляпкыдiнö. Тадзи ёна на новлöдлiс миянöс. 18 Тöвнырлöн ланьтöмыс эз на тыдав, та вöсна мöд луннас пондiсны ректыны корабльсö саридзö. 19 Коймöд луннас шыблалiм корабль вылысь весиг став кöрта кöлуйсö. 20 Уна лун чöж эз петкöдчыв шондi да эз тыдавны кодзувъяс, тöвнырлöн помыс эз тыдав. Миян воши став лача ловйöн кольны. 21 Ми дыр кад олiм сёйтöг. Сэки Павел сувтiс на шöрö да шуис: «Войтырöй, колö вöлi кывзыны менö да эз ков петны Критысь, сэки эськö эз су тiянöс тайö сьöкыдыс да лёкторйыс. 22 А öнi кора, энö шогсьöй. Тiян пиысь весиг öти ловъя лов оз вош, сöмын корабльнымöс воштам. 23 Тайö войнас петкöдчылiс меным андел, сiйöс мöдöдiс Ен, кодлы ме сетi ачымöс да кодлы ме кесъяла. 24 Андел шуис: "Эн пов, Павел. Тэныд ковмас на сувтны кесар водзö. Тэ вöсна Енмыс тшöтш видзас тэкöд кывтысьясöс". 25 Энö шогсьöй, войтыр. Ме эска Енмыслы да тöда, анделлöн шуöмыс инас. 26 Миянöс шыбитас кутшöмкö дi вылö». 27 Дас нёль лун нин миянöс новлöдлiс Адрия саридзтi. Вой шöр гöгöрын корабльвывса уджалысьяс казялiсны, мый кутшöмкö му дiнö матыстчам. 28 Видлiсны джудждасö да, кызь сыв джужда лои. Муныштöм бöрын бара видлiсны, дас вит сывйöдз вöлi ляпкалöма. 29 Полiсны изъяинö тшукöмысь. Та вöсна лэдзисны бöжладорсяньыс нёль якöр да ёна кевмисны, мед эськö югдытöдзыс вермисны кутчысьны. 30 Но корабльвывса уджалысьяс шуисны пышйыны. Пондiсны лэдзны корабль вылысь пыжсö саридзö, быттьö нöшта кöсйöны чöвтны якöръяс нырладорсяньыс. 31 Сэки Павел шуис сёöн веськöдлысьлы да шыпуртаяслы: «Найö кö оз лоны корабль вылас, тi онö кольöй ловйöн». 32 Сэки шыпуртаяс керыштiсны пыжлысь гезъяссö да пыжыс уси саридзö. 33 Асъядорыс Павел тшöктiс ставныслы сёйыштны: «Тi дас нёль лун нин майшасьöмныдла нинöм энö сёйлöй. 34 Колö сёйыштны, мед ловйöн колинныд. Тiян пиысь некодлöн весиг юрси сi оз усь юр вывсьыныд». 35 Тайöс шуöм бöрын босьтiс нянь, ставныслöн син водзын Енмöс аттьöалöмöн чегис да пондiс сёйны. 36 Ставныс долыдмисны да тшöтш пондiсны сёйны. 37 Корабль вылас ми вöлiм кыксё сизимдас квайт морт. 38 Пöттöдзныс сёйöм бöрын пондiсны шыблавны саридзö шобдi мешöкъяснысö, мед кокньöдны корабльсö. 39 Кор дзикöдз югдiс, тыдовтчис алькöса куръя, муыс вöлi тöдтöм. Шуисны пырны куръяас. 40 Якöръяссö орйöдлiсны да вöйтiсны саридзö, личöдiсны веськöдлан пелысъяслысь гезъяссö да тöв ньылыдыс зэвтiсны ичöт тöвдöра. Тадзи ми сетчим вадорланьыс. 41 Сэсся веськалiм ляпкыдiнö да корабльным сибдiс. Нырнас сатшис да некодарö эз вöр, а бöжыс гыяслöн лёкысь швачкöдöмысь пондiс чуктавны-жугласьны. 42 Шыпуртаяс кöсйисны нин вины пукалысьясöс, медым вартчиганыс некод эз пышйы. 43 Но медым видзны Павеллысь олöмсö сёöн веськöдлысь öлöдiс шыпуртаясöс тайö уджсьыс. Сiйö медводз тшöктiс шыбитчыны ваö вартчыны кужысьяслы да уйны вадорас. 44 Мукöдыслы тшöктiс воöдчыны пöвъяс отсöгöн либö кодлы мый сюрас корабль вывсьыс. Тадзи ставныс петiсны му вылö.
1 Ваысь петöм бöрын тöдмалiсны, вöлöмакö, Мальта дi. 2 Сэтчöс олысьяс бура сибöдiсны миянöс. Найö пестiсны бипур да корисны миянöс шонтысьны зэрысь-кöдзыдысь. 3 Павел чукöртiс росъяс да пуктiс бипур вылö. Сэки жара сотчысь биысь чепöсйис змей да шашаритчис Павеллы киас. 4 Сэтчöс олысьяс аддзисны Павел ки вылысь öшалысь змейöс да шуалiсны öта-мöдныслы: «Тыдалö, сiйö морт виысь, вöйöмысь кö мездмöм бöрын Водзöсперйысьыс кöсйö босьтны сылысь олöмсö». 5 Но Павел кисö пыркнитöмöн шыбитiс змейöс биö да сылы некутшöм лёк эз ло. 6 Йöзыс чайтiсны, мый Павеллöн киыс пыктас либö сiйö шойöн усяс му вылас. Дыркодь виччысисны, мый лоö. Но кор аддзисны, мый сыкöд нинöм лёкыс эз ло, вежисны мöвпнысö да шуалiсны, сiйö пö ен. 7 Сэнi матын вöлi дiöн веськöдлысь Публийлöн оланiныс. Сiйö нимкодьпырысь сибöдiс миянöс ас ордас да куим лун чöж бура вердiс-юкталiс. 8 Сiйö кадас Публийлöн батьыс куйлiс биа висьöмöн да кынöм висьöмöн. Павел пырис сы дiнö, кевмысис да сы вылö кисö пуктылöмöн бурдöдiс сiйöс. 9 Тайö лоöмторйыс бöрын дi вылысь тшöтш мукöд висьысьяс пондiсны локны, и ставныс бурдiсны. 10 Найö быдногыс аттьöалiсны миянöс, мунiганым весиг сетiсны миянлы став коланаторсö. 11 Куим тöлысь мысти Диоскур нима александрияса корабль вылын ми мöдöдчим водзö. Тайö корабльыс тöвйис дi вылын. 12 Ми воим Сиракузаö, сэнi олiм куим лун. 13 Сэтысь кывтöм бöрын воим Ригияö. Лун мысти петiс лун тöв, и мöд луннас нин ми воим Путеолö. 14 Сэтысь ми аддзим вокъясöс, найö корисны миянöс олыштны на ордын вежон. Та бöрын сэсся мунiм Римö. 15 Сэнi вокъяс кывлöмаöсь миян локтöм йылысь. Найö воча локтiсны миянлы, öтияс Аппия вузасянiнöдз, мöдъяс – "Куим шойччан керка" нима сиктöдз. Найöс аддзöм бöрын Павел долыдмис да аттьöалiс Енмöс. 16 Римö воöм мысти сёöн веськöдлысь сетiс пукалысьясöс тышкайöзöн веськöдлысьлы. А Павеллы лэдзисны овны торйöн сiйöс видзысь шыпуртакöд. 17 Куим лун мысти Павел корис юдейяслысь веськöдлысьясöс. Кор найö чукöртчисны, Павел шыасис на дiнö: «Вокъяс, ме нинöм эг вöч ас войтырлы паныдсö да эг торк батьяслысь оласногсö. Но менö пуксьöдiсны Ерусалимын дзескыдiнö да сетiсны римсаяслы. 18 Найö кывзiсны менö да эз аддзыны мыжсö, мед позис вины менö. Кöсйисны весиг лэдзны, 19 но юдейяс паныд сувтiсны талы. Та вöсна меным ковмис корны кесарлысь мыждöм. Дерт, эг сы вöсна, медым мыжавны мыйыськö ассьым войтырöс. 20 Та понда ме и кöсйи аддзöдчывны да сёрнитыштны тiянкöд, öд ме пукала сiйö Мортыс вöсна, код вылö Израиль кутö лачасö». 21 Юдейяслöн веськöдлысьяс шуисны: «Миянлы нинöм эз гижлыны Юдеясянь, весиг вокъяс волiганыс нинöм эз юöртны да нинöм лёксö эз висьтавлыны тэ йылысь. 22 Ми кöсъям кывны, мый тэ ачыд мöвпалан. Ми тöдам, мый тайö велöдöмыслы быдлаын паныд сувтöны». 23 Урчитöм лунö локтiс Павел ордö зэв уна йöз. Павел асывсяньыс рытöдзыс висьтавлiс налы Енлöн Юралöм йылысь. Мöисей Индöд да пророк гижöдъяс вылö мыджсьöмöн эскöдiс найöс Исус йылысь. 24 Öтияс эскисны, мöдъяс эз эскыны. 25 Тадзи найö ас костаныс эз вермыны воны öти кывйö. Муналiгас Павел шуис налы татшöм кывъяс: «Бура шулöма Вежа Лов миян батьяслы Исай пророк пыр: 26 – Мун да висьтав тайö войтырыслы: Пельнаныд кутанныд кывзыны да онö гöгöрвоöй, синнаныд кутанныд видзöдны да онö аддзöй. 27 Чорзьöма тайö войтырыслöн сьöлöмыс, сьöкыд пеляöсь, куньса синмаöсь. Аддзынысö оз зiльны, кывзынысö оз кöсйыны, сьöлöмнаныс оз гöгöрвоны. Мелань бергöдчынысö оз кöсйыны, медым Ме бурдöдi найöс. 28 Тöдöй, Ен мöдöдöма мездмöмсö ентöдтöмъяслы, найö и кыласны». 29 Тайöс кылöм бöрын юдейяс мунiсны ас костаныс ёна вензьöмöн. 30 Аслас нянь-сов вылын Павел олiс сэнi кык во чöж да сибöдлiс ас дорас быдöнöс. 31 Сiйö повтöг да восьсöн висьтавлiс волысьяслы Енлöн Юралöм йылысь да велöдiс Господь Исус Кристос йылысь.
1 Гижö Павел, Исус Кристослöн кесйöг, Енмöн корöм апостол. Менö бöрйöма висьтавлыны Енлысь Бур Юöрсö. 2 Тайö Юöрыс йылысь Енмыс важысянь кöсйысьöма Аслас пророкъяс пыр вежа Гижöдъясын. 3 Бур Юöрас висьтавсьö Сылöн Пи йылысь, кодi чужис мортöн да вöлi Давид чужанвужйысь. 4 Кулöмысь ловзьöмнас Сiйö воссис Вына Ен Пиöн да Ловсянь вежаöн. Сiйö – Исус Кристос, миян Господь. 5 Сы пыр ми босьтiм бурсетöмсö: апостолавны Кристос ним вöсна, медым вайöдны быд кыла войтырöс эскöмас да Енлы кывзысьöмас. 6 Тайö войтыр лыдö пыранныд тшöтш тi, Исус Кристосöн корöмаяс. 7 Ставныдлы, Римын олысьяслы, буралöм да лöнь олöм Ен Батьнымсянь да Господь Исус Кристоссянь. Енмыслы тi мусаöсь, тi Сылöн корöм вежа войтыр. 8 Медводз, Исус Кристос нимöн аттьöала Енмöс ставсьыныд, öд тiян эскöм йылысь висьталöны став му пасьталаыс. 9 Енмыс аддзö, мый ме став сьöлöмöн кесъяла Сылы, висьтала Пиыс йылысь Бур Юöр да пыр казьтывла тiянöс кевмысигъясöн. 10 Быдпöрйö кевма Енлы, медым коркö верми волыны тiян дiнö, но тайö мед Сылöн кöсйöм серти вöлi. 11 Ёна кöсъя аддзöдчывны тiянкöд да юксьыштны Ловсянь бурсетöмöн, медым ёнмöдны тiянöс. 12 Тадзи ми ышöдам öта-мöдöс эскöмнаным: ме – тiянöс, а тi – менö. 13 Вокъяс, тöдöй: ме унаысь лöсьöдчывлi волыны тiян дiнö, но пыр кутшöмкö мытшöдъяс паныдасьöны. Мукöд войтыр пöвстын моз тшöтш тiянын ме кöсъя аддзыны бурвисьталöмлысь вотöссö. 14 Ме уджйöза грекъяслы и варваръяслы, вежöраяслы и вежöртöмъяслы. 15 Ёна кöсъя висьтавны Бур Юöрсö тшöтш тiянлы, Римын олысьяслы. 16 Ме ог яндысь висьтавлыны Кристослысь Бур Юöрсö, öд сiйö Енлöн выныс, мездö быд эскысьöс: медводз юдейясöс, сэсся грекъясöс. 17 Бур Юöрыс восьтö Енлысь веськыдлунсö эскöмсянь да эскöм пыр. Гижöма: «Веськыда олысь эскöмнас пондас овны». 18 Йöзлöн Ентöг олöм да лёк вöчöм вылö лэччö енэжсянь Енлöн скöрлуныс, öд найö лёк вöчöмнас пöдтöны збыльсö. 19 Найö тöдöны Ен йылысь тöдны позянасö, öд тайöс налы Енмыс восьтiс. 20 Му пуксьöмсяньыс Енлöн став вöчöмторйысь позьö аддзыны тыдавтöмсö: Енлысь помтöм вынсö да Сылысь енмалунсö. Та вöсна налы дорйысьнысö нинöмöн. 21 Но Енсö тöдiгöн найö эз пуктыны Сiйöс Ен туйö да эз аттьöавны Сiйöс, мöвпалiсны ковтöмсö да налöн вежöрыс пемдiс. 22 Асьнысö мывкыдаöн шуигöн вежöртöмъясö пöрины. 23 Пыр олысь Енмöс нимöдöм пыдди пондiсны юрбитны быранаыслы: морт, лэбач, пемöс да веглясьысь сяма вöчöмторъяслы. 24 Та вöсна Енмыс колис найöс асланыс лёкколöмö. Ыштöмнаныс найö пежалiсны ассьыныс вир-яйсö, 25 Енлысь збыльсö бергöдiсны пöръясьöмö, юрбитiсны вöчöмторъяслы, а эз Ставсöвöчысьлы. Ошкöм Сылы нэмъяс чöж! Аминь. 26 Та вöсна Ен эновтiс найöс янöдана ыштöмас. Найö пондiсны овны мöдарö: нывбаба пондiс узьлыны нывбабакöд, 27 айулов эновтчис нывбабакöд узьлöмысь, öзйис лёкколöмöн öта-мöд дiнас да пондiс вöчны быдпöлöс зывöксö. Асланыс ылалöмысь найö босьтöны нин лöсялана водзöссö. 28 Найö эз лыддьыны коланаöн тöдны Енсö, та вöсна Ен колис найöс торксьöм вежöрас вöчны ковтöмторсö. 29 Найö тырöмаöсь быдпöлöс ылöгнас да лёкнас. Кырсалöны, горшасьöны, лöгалöны, вежалöны, виöны, вензьöны, пöръясьöны да лёксьöны. 30 Найö лёк сёрниаöсь, удтысьöны, Енсö мустöмтöны, мукöдöс дöзмöдöны, асьнысö вылö пуктöны да ошйысьöны. Найö зiльöсь лёксö вöчны, бать-мамныслысь оз кывзысьны, 31 найö мывкыдтöмöсь, кывсö оз кутны, оз бурасьны, кын сьöлöмаöсь да чорыдöсь. 32 Найö тöдöны Енлысь веськыда мыждöмсö, мый татшöмтор вöчысьöс виччысьö кулöм. Но та вылö видзöдтöг найö вöчöны лёксö, весиг ошкöны тадзи вöчысьясöс.
1 Тöд, мортöй, мöдöс мыждiгöн тэныд оз сюр дорйысян кывйыд. Мöдöс мыждöмнад ачыд мыжман, öд ачыд тшöтш сы моз вöчан. 2 Ми тöдам, мый Енмыс веськыда мыждö тадзи вöчысьясöс. 3 Мортöй, тэ чайтан, тадзи вöчысьöс мыждöмнад пышъян Енлöн мыждöмысь? Ачыд öд сiйö жö вöчан. 4 Гашкö, тэ нинöм туйö пуктан Енлысь ыджыд бурлунсö, мелiлунсö да терпитöмсö? Он öмöй гöгöрво, мый Енлöн бурлуныс вайöдö тэнö мыжъяссьыд бергöдчöмö. 5 Но чорыд сьöлöмыд вöсна тэ он кöсйы бергöдчыны мыжъяссьыд, тадзи ас вылад чукöртан Енлысь скöрлунсö. Сiйö киссяс тэ вылö Скöралан лунö Енмыслöн веськыда мыждiгöн. 6 Сэки Енмыс быдöнлы мынтас уджыс серти. 7 Помтöм олöм налы, кодъяс бур вöчöмнас мудзлытöг корсьöны бырлытöмсö, дзирдлунсö да нимöдöмсö. 8 Асьсö сöмын радейтысьясöс да збыляс пыдди ылöгас сетчысьясöс виччысьö чорыд скöрлун. 9 Ыджыд шог да сьöкыдалöм быдöнлы, кодi вöчö лёксö: медводз юдейлы, сэсся греклы. 10 Мöдарö, дзирдлун, нимöдöм да лöньлун быдöнлы, кодi вöчö бурсö: медводз юдейлы, сэсся греклы. 11 Енмыс оз видзöд чужöм вылö. 12 Мыжсö кö вöчöма Индöдсö тöдтöг, Индöдтöгыс и бырöдасны. Вöчöма кö мыжсö Индöдсö тöдöмöн, Индöд сертиыс и мыждасны. 13 Ен водзын веськыдöсь абу Индöдсö кывлысьяс, а сы серти олысьяс. 14 Мукöд войтырлöн Индöдыс абу, но Индöд нога вöчöмыс тыдалö налöн оласногысь. Найö асьныс аслыныс индöдыс. 15 Тайö петкöдлö, мый Индöдсö гижöма налöн сьöлöмас. Буретш та йылысь и висьталö налöн сьöлöмыс да мöвпъясыс, найö либö мыждöны, либö дорйöны найöс. 16 Но воас лун, кор Исус Кристос пыр Ен кутас мыждыны мортлысь гусяторъяссö. Та йылысь ме висьтавлi нин буръюöртiгöн. 17 Со, тэ шусян юдейöн, кутчысян Индöдас да ошйысян Енмöн. 18 Индöдсьыс тэ тöдмалiн Сылысь кöсйöмсö да велöдчин торйöдны медбурсö. 19 Индöдас гижöм збыльсö тöдöмнад тэ лыддян асьтö синтöмъясöс нуöдысьöн, пемыдас олысьяслы югыдöн, вежöртöмъясöс туйдöдысьöн да гöгöрвотöмъясöс велöдысьöн. 21 Мöдöс велöдан, а асьтö он велöд? 22 Тэ висьталан: «Гусясьны оз позь», ачыд гусясян. Шуан: «Гозъя олöмтö эн пежав», ачыд пежалан. Идолъясöс мустöмтан, ачыд налысь крамсö куштан. 23 Ошйысян Индöднас, ачыд сiйöс торкалöмнад Енсö нинöмö пуктан. 24 Гижöма: «Тiян вöсна ентöдтöмъяс омöльтöны Енлысь нимсö». 25 Вундыштчöмыд бур, олан кö Индöдыс серти. Он кö ов Индöдыс серти, сэки тэнад вундыштчöмыд нинöм. 26 Вундыштчытöм кö олö Индöд сертиыс, оз-ö сiйöс лыддьыны вундыштчöмаöн? 27 Индöд серти олысь, кодi абу вундыштчöма, кутас мыждыны тэнö, вундыштчöмаöс да Индöд тöдысьöс, öд тэ торкалан Индöдсö. 28 Юдейыд абу сiйö, кодi чужöма юдейöн, да вундыштчöмыд абу яй вылад вундыштöм пас. 29 Юдейыд сiйö, кодi сьöлöмнас юдей. Вундыштöм пассö пуктöма сылы сьöлöмас абу Индöд серти, сiйöс Лов пуктöма. Татшöмыслы ошкöмыс лоö Енсянь, а оз мортсянь.
1 Мый бурыс, тэ кö юдей? Мый сетö вундыштчöмыс? 2 Унатор сетö, да быд боксянь бур. Медводз, налы вöлi сетöма Ен Кывсö. 3 На пöвстысь кö кодсюрö эз эскыны, налöн эскытöмысь öмöй бырö Енлöн эсканлуныс? 4 Дерт, оз. Енмыс эскана, а мортыс пöръясьысь. Гижöма: – Шуöмыд Тэнад веськыд, Аслад ёрд вылын Тэ верман. 5 Миян лёк вöчöм кö восьтö Енлысь веськыдлунсö, сэки мый миянлы шуны? Енмыс öмöй абу веськыд, кисьтö кö миян вылö Ассьыс скöрлунсö? Тадзи мортыс мöвпалö. 6 Дерт, тайö абу тадз. Енмыс кö оз ло веськыд, вермас-ö Сiйö мыждыны муюгыдсö? 7 Менам ылалöмысь кö тыдовтчö Енлöн збыльыс да Сiйöс ошкöмыс содö, сiдзкö, мыйла менö мыждынысö мыжаöс моз? 8 Гашкö, пондам вöчны лёксö, мед вöлi бур? Кодсюрö омöльтöны миянöс да шуöны, мый ми тадзи велöдам. Татшöмъяссö виччысьö веськыда мыждöм. 9 Сiдзкö, ми, юдейяс, бурджыкöсь öмöй мыйöнкö? Нинöмöн абу. Ме водзынджык нин висьтавлi: юдейяс, кöть грекъяс – ставныс мыжыслöн кипод улынöсь. 10 Гижöма: – Веськыда олысьыс весиг öти абу, 11 абу гöгöрвоысьыс, некод оз корсь Енсö. 12 Ставныс кежöмаöсь, öтитöг шогмытöмöсь, бурсö вöчысьыс весиг абу. 13 Горшныс налöн восьса гу, кыв вылас налöн сöмын пöръясьöм, льöб выланыс змей яд. 14 Вомныс курдöма ёрччöмысь, 15 кокныс тэрыб вир кисьтны, 16 ветлан туйыс налöн – бырöдöм да пикö воштöм. 17 Найö оз тöдны бурасян туйсö, 18 налöн абу Енсьыс полöмыс. 19 Ми тöдам, мый Индöдыс висьталö Индöд улын олысьяслы. Та вöсна некод оз вермы мыйкö паныд шуны, öд став муюгыдыс Ен мыждöм улын. 20 Индöд серти уджъяс некодöс оз вöчны Ен водзас веськыдöн. Индöдыс сöмын восьтö мыжсö. 21 Öнi Индöд вылö видзöдтöг воссис Енлöн веськыдлуныс. Та йылысь висьталö Индöдыс да пророк гижöдъяс. 22 Исус Кристослы эскöм пыр сетöма веськыдлунсö быд эскысьлы, Енмыс некодöс оз торйöд. 23 Öд ставныс мыжмисны да олöны Ен дзирдлунтöг. 24 Но Сылöн буралöмсянь, дон мынтытöг найö лоöны веськыдöн, öд Исус Кристос став пыддиыс вештысис. 25 Енмыс сетiс Кристосöс бурасян вись пыдди, Сылöн Вирыс мездö быдöнöс эскöм пырыс. Терпитöмнас Ен петкöдлiс Ассьыс веськыдлунсö: прöститiс йöзлысь важся мыжъяссö. Öнi Енмыс петкöдлö Ассьыс веськыдлунсö сыын, мый Сiйö Ачыс веськыд да вöчö веськыдöн Исуслы эскысьясöс. 27 Сюрас-ö миян ошйысянторйыс? Оз. Сiйöс бырöдöма. Мыйöн? Индöд серти уджъясöн? Абу. Эскöмöн. 28 Ми аддзам, мый мортсö веськыднас вöчö эскöмыс, а оз Индöд серти уджъясыс. 29 Енмыс öмöй сöмын юдейяслöн Ен, абу-ö тшöтш мукöд войтырлöн? Дерт, тшöтш мукöд войтырлöн. 30 Енмыс öти. Сiйö вундыштчöмаöс и вундыштчытöмöс вöчö веськыдöн эскöм пырыс. 31 Сiдзкö, мый артмö? Эскöмнаным ми бырöдам Индöдсö? Огö. Мöдарö, вынсьöдам.
1 Мый шуам Öвраам батьным йылысь? Мый сiйö босьтiс олiгас на? 2 Öвраамöс кö вöлi шуöма веськыдöн уджъясыс серти, сэки сiйö вермис тайöн ошйысьны, сöмын эз Ен водзын. 3 Гижöдас мый висьталöма? «Öвраам эскис Енлы, та вöсна Енмыс шуис сiйöс веськыдöн». 4 Уджалысьлы öд удждонсö оз козьнавны, а уджсьыс мынтöны. 5 Мортыс кö уджъястöг эскö Енмыслы, кодi Ентöг олысьöс вöчö веськыдöн, сэки сылысь эскöмсö Енмыс лыддьö веськыдлунöн. 6 Тадзи Давид лыддьö шудаöн сiйöс, кодöс уджъястöгыс Енмыс шуö веськыдöн: 7 – Шудаöсь найö, кодъяслысь вунöдöма став лёк вöчöмсö да вевттьöма мыжъяссö. 8 Шуда сiйö, кодлы Господь оз казьтышт мыжсö. 9 Шудаöн шуöмыс сöмын вундыштчöмаяслы али вундыштчытöмъяслы тшöтш лöсялö? Ми висьталам: «Öвраамöс вöлi шуöма веськыдöн эскöм вöснаыс». 10 Кор шуöма? Вундыштчытöдзыс либö вундыштчöм бöрас? Вундыштчытöдзыс. 11 Вундыштöм пасыс Öвраамлы висьталiс, мый сiйö вундыштчытöдзыс на эскис, та вöсна лои веськыдöн. Тадзи Öвраам лои батьöн став вундыштчытöм эскысьыслы, медым и найö эскöм пырыс вермисны лоны веськыдöн. 12 Сiйö бать тшöтш вундыштчöмаяслы, кодъяс эз сöмын вундыштчыны, но Öвраам батьным моз ветлöны эскöмыслöн туйöд, кытi ветлiс сiйö вундыштчытöдзыс на. 13 Ен кöсйысис сетны Öвраамлы да сысянь чужысьяслы муюгыдсö. Кöсйысис сылы эз Индöд серти олöм вöснаыс, но эскöм вöснаыс сiйö лои веськыдöн да. 14 Кöсйысьöмасö кö позис босьтны сöмын Индöд отсöгöн, сэки эскöмыс ковтöм да кöсйысьöмыс вынтöм. 15 А Индöдсö торкалöмысь лэччö Енлöн скöрлун. Эз кö вöв Индöдыс, эз вöв и Индöдсö торкалöмыс. 16 Кöсйысьöмыс подуласьö эскöм вылö, медым сiйö вöлi бурсетöмöн. Тадзи кöсйысьöмыс вына Öвраамсянь став чужысьыслы, абу сöмын Индöд улын олысьяслы, но и Öвраам моз эскысьяслы. Öвраам – ставнымлы бать. 17 Гижöма: «Ме пуктi тэнö уна войтырлы батьöн». Сiйö Ен водзын миянлы бать. Öвраам эскис Енлы, кулöмаöс Ловзьöдысьлы да вöвлытöмторсö олöмö Пöртысьлы. 18 Öвраамлöн эз нин вöв некутшöм лача, но сiйö эскис, мый лоас уна войтырлы на батьöн, да та дырйи эз вошты лачасö. Шуöма вöлi: «Унасьыс унаöн тэсянь чужасны!» 19 Öвраам эз лигышмун эскöмас, мед кöть и матö сё арöсалöн вир-яйыс ёна нин вöлi пöрысьмöма, и Сарра гöтырыслöн гырк пытшкöсыс вöлi нин шоймöма. 20 Öвраам эз вошты эскöмсö, но падъявтöг эскис Енлöн кöсйысьöмö да ошкис Енмöс. Эскöмыс ёнмöдiс сiйöс. 21 Öвраам зумыда эскис, мый Енмыс вына пöртны олöмö Ассьыс кöсйысьöмсö. 22 Та вöсна сiйöс шуöма веськыдöн. 23 "Сiйöс шуöма веськыдöн" кывъяссö гижöма абу сöмын Öвраам йылысь, 24 тшöтш миян йылысь. Ен шуас веськыда олысьясöн тшöтш миянöс, эскам кö Сылы, Исус Господьнымöс Ловзьöдысьлы. 25 Енмыс сетiс миян мыжъяс вöсна Кристосöс да ловзьöдiс Сiйöс, медым ми вöлiм веськыдöсь.
1 Тадзи, эскöмным вöсна миянöс шуöма веськыдöн да Исус Кристос Господьным пыр миян эм Енкöд бурасьöм. 2 Эскöмным пыр Кристос восьтiс миянлы Ен буралöмö öдзöссö. Буралöмас олiгöн ми лача кутöмöн нимкодясям, öд лоам Енлöн дзирдлунас. 3 Сьöкыдсö нуигöн тшöтш нимкодясям, öд тöдам: сьöкыдсö нуöмыс чужтö зумыдлун, 4 зумыдлуныс – сьöкыдсö венöм, сьöкыдсö венöмыс – лача. 5 А лачаыс миян абу весьшöрö, öд Ен сетiс миянлы Вежа Ловсö да Сы пыр кисьтiс сьöлöманым Ассьыс муслунсö. 6 Кор на ми вöлiм жебöсь, индöм кадö Кристос кулiс ми коддьöм Ентöг олысьяс вöсна. 7 Öдвакö, кодкö сетас олöмсö веськыда вöчысь вöсна. Гашкö, бурсö вöчысь вöсна и вермас на сетны олöмсö. 8 Но кор ми олiм мыжас на, Кристос кулiс миян вöсна. Тайöн Енмыс петкöдлiс миян дiнö Ассьыс муслунсö. 9 Öнi Кристослöн Вирыс пыр миянöс шуöма веськыдöн, сiдзкö, дерт нин, Кристос пыр ми мынам локтана скöрлунысь. 10 Ми кö, Енмыслы коркöя паныд мунысьяс, бурасим Сыкöд Пиыслöн кулöм пыр, дерт нин, öнi ми, бурасьöмаяс, мездмам Кристослöн олöм пыр. 11 Но тайö абу на ставыс. Ми нимкодясям нöшта Енмöн, öд Исус Кристос Господьным пыр миян эм Енкöд бурасьöм. 12 Öти морт пыр муюгыдас пырис мыжыс, мыжнас – кулöмыс. Тадзи кулöмыс вуджис быд морт вылö, öд ставныс мыжмисны. 13 Дерт, Индöдсö сеттöдз мыжыс вöлi нин муюгыдас, но Индöдтöгыс мыж вöчöмыс оз лыддьыссьы мыжöн. 14 Кулöмыс ыджыдалiс Адамсянь Мöисейöдз. Ыджыдалiс весиг на вылын, кодъяс эз вöчны Адам моз мыжсö. Адам вöлi Локтысьыслöн пертас. 15 Бурсетöмыс öд абу мыж вöчöмыс кодь. Öти мортлöн мыжыс кö вайис ставныслы кулöм, дерт нин, öти морт пыр, Исус Кристос пыр, дзик ставныслы да уна пöвстöн вичмас Енлöн буралöмыс да бурсетöмыс. 16 Бурсетöмсö оз позь öткодявны öтилöн мыж вöчöмкöд. Öд öтилöн мыж вöчöм вöсна локтiс мыждöм, а уналöн мыж вöчöм вöсна сетöма буралöм. Буралöмыс вöчö мортсö веськыдöн. 17 Öтилöн мыж вöчöм вöсна кö пондiс ыджыдавны кулöм, сэки, дерт нин, öти морт пыр, Исус Кристос пыр, Енсянь ыджыд буралöмсö да веськыдлунсö босьтысьяс пондасны ыджыдавны олöмас. 18 Öтилöн мыж вöчöм вöсна кö мыждöма став мувывса йöзсö, тадзи öтилöн веськыда вöчöм вöсна став йöзсö шуöма веськыдöн да сетöма налы олöм. 19 Öтилöн кывзысьтöм вöсна кö ставöн лоисны мыжаöсь, тадзи öтилöн кывзысьöм вöсна ставöн лоасны веськыдöсь. 20 Индöдсö сетöма, медым петкöдлыны, кутшöм уна мыж вöчöмыс. Кöнi мыж вöчöмыс уна, сэнi ёнджыка на петкöдчö буралöмыс. 21 Кыдзи мыжыс ыджыдалiс да кыскис кулöмас, тадзи буралöмыс тшöтш пондас ыджыдавны веськыдлуннас да вайöдас миянöс Исус Кристос Господьным пыр помтöм олöмас.
1 Мый нö шуам? Пондам-ö водзö овны мыжас, медым буралöмыс содiс? Дерт, огö. 2 Ми кулiм мыжыслы, позьö öмöй водзö овны мыжас? 3 Онö öмöй тöдöй, мый ми ставным пыртчиганым йитчим Кристоскöд да Сылöн кулöмкöд? 4 Пыртчöмнаным ми кулiм Кристоскöд да миянöс вöлi гуалöма Сыкöд. Но Батьыслöн дзирдлунöн Кристосöс вöлi ловзьöдöма, та вöсна, ми тшöтш вермам овны выль олöмöн. 5 Ми кö йитчим Сылöн кулöмкöд, сiдзкö, йитчам тшöтш Сылöн ловзьöмкöд. 6 Ми тöдам: миянлысь важ мортсö тувъялöма Кристоскöд, медым тайö мыжа вир-яйыс эз нин ыджыдав, и ми эгö нин вöлöй мыжыслöн кипод улынöсь. 7 Öд кодi кулiс, сiйö мынiс мыжыслöн кипод улысь. 8 Ми кö кулiм Кристоскöд, эскам, мый пондам и овны Сыкöд. 9 Ми тöдам: ловзьöм бöрас Кристос оз нин кув, öд кулöмыс Сы вылын оз нин ыджыдав. 10 Сiйö кулiс мыжыслы öтчыдысь да пыр кежлö. Öнi Сiйö ловъя да олö Енмыслы. 11 Тадзи тi, миян Господь Исус Кристос пытшкын олысьяс, лыддьöй асьнытö мыжыслы кулöмаöн, а Енмыслы ловъяöн. 12 Энö лэдзöй мыжсö ыджыдавны тiян кулана вир-яйын да ыштöдны тiянöс аслас лёк кöсйöмъясöн. 13 Вир-яйныдлысь весиг öти юкöн энö сетöй мыжыслы лёксö вöчöм вылö. Öнi тi – кулöмысь ловзьöмаяс. Сiдзкö, сетöй асьнытö да вир-яйныдлысь быд юкöн Енмыслы, мед вöчны веськыд уджъяс. 14 Мыжыс оз вермы ыджыдавны тiян вылын, öд тi буралöм улынöсь, абу Индöд улынöсь. 15 Мый артмö? Ми кö абу Индöд улынöсь, а буралöм улынöсь, пондам-ö вöчны лёксö? Огö. 16 Тi öмöй онö тöдöй: кодлы тi сетанныд асьнытö кесъявны, сылöн тi и кесйöгъяс. Кывзысянныд кö мыжыслысь – куланныд, Енмыслысь кö кывзысянныд – веськыдöн лоанныд. 17 Ошкöм Енлы, öд коркö тi вöлiнныд мыжыслöн кесйöгъяс, öнi кывзысьöмöн став сьöлöмнад кутчысянныд тiянлы висьталöм велöдöмас. 18 Мыжысь мынöм бöраныд тi лоинныд веськыдлуныслöн кесйöгъяс. 19 Ме сёрнита тiянкöд быдлунъя олöмсьыс босьтöм кывъясöн, медым тi верминныд гöгöрвоны менö. Водзын кö тi вир-яйныдлысь быд юкöн сетiнныд пежыслы вöчны лёк уджъяс, öнi быд юкöн сетöй веськыдлуныслы вöчны вежа уджъяс. 20 Мыжыслы кесъялiганыд тi энö вермöй кесъявны веськыдлуныслы. 21 Кутшöм вотöс тi сэки чукöртiнныд? Öнi сыысь весиг аслыныд яндзим, öд сiйö вайö кулöм. 22 Тi мынiнныд мыжсьыс, öнi тi Енлöн кесйöгъяс. Тiян вотöсныд – вежалун, и тайö вайöдас тiянöс помтöм олöмö. 23 Мыжыс öд мынтысьö кулöмöн, а Енмыс – помтöм олöмöн миян Мездысь Исус Кристос пыр.
1 Вокъяс, висьтала тiянлы, Индöдсö тöдысьяслы. Тi бура тöданныд, мый Индöдыс вына морт вылын ловъя дырйиыс. 2 Верöс сайö петöм аньöс Индöдыс кöрталö ловья верöсыскöд. Верöсыс кö кулö, сiйö мынö кöрталан Индöдсьыс. 3 Ловъя верöс дырйиыс кö петас мöд сайö, лоö гозъя олöмсö пежалысьöн. Верöсыс кö кулö, сiйö мынö гозъя олöм индöдсьыс. Сэки петас кö мöд сайö, оз ло гозъя олöмсö пежалысьöн. 4 Тадзи тшöтш тiянкöд, вокъясöй: Кристос вир-яйö йитчöмнаныд тi кулiнныд Индöдыслы да лоинныд Мöдыслöн, кулöмаясысь Ловзьысьыслöн, медым вайны Енлы вотöс. 5 Тшыкöм вир-яйын олiганым лёк кöсйöмыс ыджыдалiс миян пытшкын Индöдыс отсöгöн, сэки ми вайим вотöс кулöмыслы. 6 Öнi ми кулiм Индöдыслы, мынiм сылöн став кöртöдысь. Ми кесъялам Енмыслы выль ногöн, Лов серти, а огö важ мозыс, Индöдлöн шыпас серти. 7 Мый шуам татчö? Индöдыс öмöй мыжыс? Дерт, абу. Индöдыс восьтiс меным мыжсö. Индöдыс кö эз висьтав: «Эн ышты», ме эськö эг и гöгöрволы ыштöмсö. 8 Тадзи мыжыс Индöдысь тшöктöмсö босьтöмöн кыпöдiс ме пытшкын быдпöлöс ыштöмсö. Мыжыс öд Индöдтöгыс кулöма. 9 Водзынсö ме олi Индöдсö тöдтöг, но Индöдысь тшöктöмсö кор кылi, сэки мыжыс ловзис, 10 а ме кулi. Тадзи олöмсö сетысь Индöдыс вайис меным кулöм. 11 Индöдлöн тшöктöмыс пыр мыжыс кежöдiс менö да виис сы отсöгöн. 12 Но Индöдыс вежа, тшöктöмыс тшöтш вежа, веськыд да бур. 13 Сiдзкö, бурыс вайис меным кулöмсö? Эз. Мыжыс вайис. Сiйö веськöдiс бурсö, мед вины менö. Тадзи мыжыс восьтiс ачыс асьсö, и тшöктöмыс пыр ми аддзим мыжсö лёксьыс-лёкöн. 14 Ми тöдам: Индöдыс Ловсянь, а менö, тшыкöм вир-яйын олысьöс, вузалöма мыжыслы. 15 Ачым ог гöгöрво, мый вöча: кöсъянасö ог вöч, а мустöмсö вöча. 16 Вöча кö сiйö, мый ог кöсйы, сэки гöгöрвоа, мый Индöдыс бур вылö. 17 Збыльвылас, ог ме тайöс вöч, но ме пытшкын олысь мыжыс вöчö. 18 Тöда, мый ме пытшкын, менам тшыкöм вир-яйын, бурыс абу. Бурсö вöчны кöсйöмыс эм, но сiйö оз артмы. 19 Бурсö кöсъя да, ог вöч, лёксö ог кöсйы да, вöча. 20 Ме кö вöча кöсйытöмсö, сiдзкö, сiйöс ог нин ме вöч, но ме пытшкын олысь мыжыс вöчö. 21 Казяла ас пытшкысь татшöм индöд: кöсъя кö вöчны бурсö, менам артмö лёкыс. 22 Менам пытшкöсса мортыс нимкодьпырысь сибöдö Енлысь Индöдсö, 23 но вир-яйысь ме аддза мöдпöлöс индöд. Сiйö паныд сувтö пытшкöсса индöдлы да кöрталö менö вир-яйын олысь мыжыслöн индöдöн. 24 Коньöр ме морт! Кодi мездас менö тайö кулана вир-яйсьыс? 25 Аттьöала Енмöс миян Господь Исус Кристосысь! Тадзи менам пытшкöсса мортыс кывзысьö Ен Индöдлысь, а тшыкöм вир-яйыс – мыжыслöн индöдлысь.
1 Сiдзкö, öнi абу некутшöм мыждöм Исус Кристос пытшкын олысьяслы, кодъяс олöны Лов серти, а оз вир-яй серти. 2 Öд Ловлöн индöдыс, кодi сетö олöм Исус Кристос пытшкын, мездiс менö мыжыслöн да кулöмыслöн индöдысь. 3 Ен вöчис сiйö, мый эз вöв вермана Индöдыслы, öд мортлöн тшыкöм вир-яй вöсна Индöдыс вöлi вынтöм. Миян мыжъяс вöсна Енмыс мöдöдiс Ассьыс Писö мыжа морт кодьöн. Тадзи морт вир-яйын Сiйö мыждiс мортлысь мыжсö, 4 медым Индöдас висьталöм веськыдлуныс збыльмис миян пытшкын, кодъясöн веськöдлö Лолыс, а оз вир-яйыс. 5 Вир-яй серти олысьлöн – тшыкöм мöвпъяс, а Лов серти олысьлöн – Ловсянь мöвпъяс. 6 Вир-яйсянь мöвпалöмыд вайö кулöм, а Ловсянь мöвпалöмыд сетö олöм да лöньлун. 7 Вир-яйсянь мöвпалöмыд эм Енлы паныд мунöм. Татшöм мортыс оз сетчы Ен Индöдлы, да и оз вермы. 8 Вир-яй серти олысьяс Енмыслы оз шогмыны. 9 Тiян пытшкын кö збыльысь олö Енлöн Лолыс, сiдзкö, тi Лов веськöдлöм улынöсь, абу вир-яйлöн ыджыдалöм улынöсь. Код пытшкын абу Кристослöн Лолыс, сiйö абу Сылöн. 10 Кристос кö тiян пытшкын, сэки ловныд олö веськыдлуныс вöсна, кöть вир-яйныд кулöма мыжыс вöсна. 11 Тiян пытшкын кö олö Енлöн Лолыс, кодi ловзьöдiс Исусöс кулöмысь, сiдзкö, Кристосöс Ловзьöдысь ловзьöдас тшöтш тiянлысь кулана вир-яйтö сiйö Ловнас, кодi олö тiян пытшкын. 12 Вокъяс, сiдзкö, ми абу уджйöзаöсь тшыкöм вир-яйлы, и миянлы оз ков овны сы ног. 13 Оланныд кö вир-яй серти, куланныд, а Ен Лолöн кö вианныд тшыкöм уджъяснытö, понданныд овны. 14 Кодъясöс нуöдö Енлöн Лолыс, найö Енлöн ныв-пи. 15 Тi öд энö сибöдöй нартитысь лолöс, медым бара овны полöм улын, мöдарö, тi сибöдiнныд тiянöс ныв-пиö босьтысь Лолöс. Тайö Лолöн ми шыасям: «Авва, Батьöй!» 16 Ачыс Лолыс висьталö миян ловлы, мый ми Енлöн ныв-пи. 17 Ми кö Енмыслöн ныв-пи, сiдзкö, Кристоскöд босьтам Енсянь вичмöдöмасö. Сыкöд öтвыв кö сьöкыдсö нуам, öтвыв Сыкöд и дзирдлунас лоам. 18 Ме тадзи мöвпала: öнiя сьöкыд нуöмсö кö öткодявны сiйö дзирдлуныскöд, мый воссяс миянлы, тайö сьöкыд нуöмыс нинöм оз сулав. 19 Енлöн став вöчöмторйыс ёна виччысьö Ен ныв-пилысь воссьöмсö. 20 Öд став вöчöмторйыс эз ас кöсйöмсяньыс веськав сiсьмöм-бырöм улö. Тадзи вöлi шуöма Енмыслöн. Сiдзкö, эм лача, мый став вöчöмторйыс мынас сiсьмана-бырана кутöдысь да воас Ен ныв-пилöн мездлунö да дзирдлунö. 22 Ми тöдам: став вöчöмторйыс öнöдз на сьöкыда ружтö-ойзö кага вайöм дырйи моз. 23 Да оз сöмын найö, тшöтш ми, кодъяслöн эм Енсянь Лолыс, тайö медводдза сетöмторйыс, ружтöмöн-ойзöмöн виччысям Енлöн ныв-пиöн лоöмсö, вир-яйнымöс мездöмсö. 24 Дерт, ми мездмöмаöсь нин лача кутöмным пыр. Но лачаыд кö збыльмöма, сэки сiйö абу нин лача. Кутöны öмöй лачасö аддзана-лоöма вылас? 25 Ми кö лача кутам аддзытöм вылас, сэки виччысям терпитöмöн. 26 Жеблун дырйиным Лолыс отсалö миянлы. Ми весиг огö тöдöй мый йылысь да кыдзи колö кевмысьнысö. Сэки Ачыс Лолыс ышлолалöмöн кывъяс шутöг кевмысьö миян вöсна. 27 Енмыс ставсö аддзö миян сьöлöмысь да тöдö Лолыслысь мöвпъяссö. Öд Енлöн кöсйöм серти Лолыс корö-кевмö вежа войтыр вöсна. 28 Ми тöдам, мый Енсö радейтысьяслы, Сылöн шуöм сертиыс корöмаяслы, Сiйö ставсö бергöдö бур вылö. 29 Сiдзкö, кодъясöс Енмыс водзысяньыс тöдiс, найöс и лöсьöдiс лоны Аслас Пи кодьöн, медым Пиыс вöлi медводдза чужысьöн уна вок пöвстын. 30 Кодъясöс Сiйö водзысяньыс лöсьöдiс, найöс и корис, кодъясöс корис, найöс и вöчис веськыдöн, кодъясöс вöчис веськыдöн, найöс и мичмöдiс Аслас дзирдлунöн. 31 Мый та вылö шуам? Енмыс кö миян дор, кодi миянлы паныд? 32 Öд Енмыс Ассьыс Писö эз жалит, а сетiс Сiйöс ставным вöсна. Сыкöд тшöтш оз öмöй сет миянлы и став мукöдторсö? 33 Кодi вермас мыжавны Енлысь бöрйöмаяссö? Сöмын Енмыс. Но Сiйö шуö миянöс веськыдöн. 34 Кодi вермас мыждыны найöс? Сöмын Кристос. Но Сiйö кулiс, ловзис да öнi Ен веськыдладорын кевмысьö миян вöсна. 35 Мый вермас торйöдны миянöс Енлöн муслунысь? Гашкö, шог, дзескöдöм, вöтлöм? Гашкö, тшыгъялöм, кöм-пасьтöг кольöм? Гашкö, неминуча суöм, шыпуртысь кулöм? 36 Гижöма: «Тэ вöсна быд лун миянöс виöны, лыддьöны начкыны дасьтöм ыжъясöн». 37 Но став тайö сьöкыдлун дырйиыс миянöс Радейтысь сетö миянлы тырвыйö вермöм. 38 Ме тöда: кулöмыс ни олöмыс, анделъяс ни енэжвыв юралысьяс да вынъяс, öнiяыс ни локтанаыс, 39 пыдтаыс ни судтаыс, – некутшöм вöчöмтор оз вермы торйöдны миянöс Ен муслунысь, мый восьтöма миянлы Исус Кристос Господьным пыр.
1 Кристос водзын шуа: ме висьтала збыльсö, сьöлöмöй Вежа Ловкöд оз сетны меным пöръявны. 2 Менам сьöлöмöй ёна шогсьö да дугдывтöг бöрдö ас войтырса вокъясöй вöсна. Ме весиг дась лоны на вöсна ёрöмаöн, Кристосысь торйöдöмаöн. 4 Израиль войтырöс öд шуöма Ен пиянöн, восьтöма налы Ен дзирдлунсö, кöрталöма накöд йитöдъяс, сетöма налы Индöд, сувтöдöма найöс Енлы кесъявны, налы уна кöсйысьöма, 5 и налöн эмöсь батьяс. Тайö войтырысь петiс Кристос, Сiйö чужис морт кодьöн. Сiйö став вылас медыджыд Ен. Ошкöм Сылы нэмъяс чöж! Аминь. 6 Енмыслöн кывйыс эз вожав. Öд абу став израильсаыс Израильлöн, 7 Öвраамсянь чужысьяс абу ставныс Öвраамлöн ныв-пи. Вöлi шуöма: «Исааксянь чужысьясöс шуасны тэнад ныв-пиöн». 8 Сiдзкö, Енлöн ныв-пиыс абу мортсянь, но Ен кöсйысьöмсянь чужысьяс. 9 А кöсйысьöмыс вöлi татшöм: «Дзик тайö кадас бöр локта, да Сарралöн чужас пи». 10 Тадзи вöлi тшöтш Ревеккакöд. Сiйö сьöктiс Исаак батьнымсянь кык пиöн. 11 Пияныслöн чужтöдз на, бурсö-лёксö налöн вöчтöдз на, Енмыс шуис Ревеккалы: «Ыджыдджыкыс пондас кесъявны ичöтджыкыслы». Енмыс тайöн петкöдлiс, мый бöрйöмыс Сы сайын. Сiйö бöрйö оз мортлöн уджъяс серти, но Аслас лöсьöдöм да корöм сертиыс. 13 Гижöма: «Яков Меным муса, а Исавöс Ме мустöмтi». 14 Мый шуам? Енмыс оз веськыда вöч? Дзик веськыда. 15 Мöисейлы Енмыс шуö: «Код дiнö кö лоа бур сьöлöма, код дiнö кö небзьöда сьöлöмöс». 16 Тадзи ставыс Енлöн буралöм сайын, абу мортлöн кöсйöм-зiльöм сайын. 17 Гижöдас шуöма фараонлы: «Ме пуктi тэнö, мед петкöдлыны тэ вылын Ассьым вынöс, медым Менсьым нимöс тöдiсны став му пасьталаыс». 18 Тадзи Енмыс код дiнö кö бур сьöлöма, а кодöс кö Сiйö чорзьöдö. 19 Гашкö, тэ юалан: «Мыйысь нö Енмыс, сiдзкö, мыжалö? Вермас-ö кодкö паныд сувтны Енмыслöн кöсйöмлы?» 20 Мортöй, кодi тэ сэтшöмыс, мый Енкöд вензян? Вöчöмторйыс öмöй вермас шуны вöчысьыслы: «Мыйла тэ менö татшöмнас вöчин?» 21 Гырнич вöчалысь абу öмöй вына сёй вылас? Оз-ö сiйö öти лятисьыс вермы вöчны быд лунö вöдитчан и торъя лунъясö вöдитчан доз? 22 Тадзи Енмыс кöсйö петкöдлыны Ассьыс скöрлунсö да вынсö. Ыджыд терпитöмыс вöсна Сiйö видзö на бырöдны шуöм "скöрлуныслысь дозъяссö", 23 медым петкöдлыны Ассьыс помасьлытöм дзирдлунсö "буралöмыслöн дозъяс" вылын, кодъясöс дасьтöма дзирдавны. 24 "Буралöмыслöн дозъясыс" – тайö ми, öд Ен корис миянöс. Корис эз сöмын юдейясöс, но тшöтш мукöд войтырöс. 25 Осия небöгын Сiйö висьталö: – Кодъяс эз вöвны Менам войтырöн, шуа Асламöн, мустöмöс шуа мусаöн. 26 Кöнi шуöма вöлi: «Тi абу Менам войтыр», сэнi шуасны найöс ловъя Енлöн ныв-пиöн. 27 Израиль йылысь Исай тадзи висьталö: – Израиль войтырлöн лыдыс кö лоас весигтö саридздор лыа мында, мездмас сöмын колясыс. 28 Регыд Господь эштöдас му вылын веськыда вöчöмсö, Ассьыс шуöмсö пöртас олöмö. 29 Исай водзвыв висьтавлiс: – Господь Саваоф кö эз коль миянлы чужан кöйдыссö, ми эськö бырим Содом моз да вöлiм Гомора кодьöсь. 30 Сiдзкö, мый артмö? Мукöд войтыр эз корсьлыны веськыдлунсö, да босьтiсны сiйöс. Найö босьтiсны веськыдлунсö эскöмныс пыр. 31 Израиль, мöдарö, Индöд отсöгöн корсис веськыдлунсö, да тайö эз ло сылы. 32 Мыйла? Веськыдлунсö сiйö зiлис шедöдны Индöд серти уджъяснас, эз эскöмнас. Тадзи сiйö изйö крукасис. 33 Та йылысь гижöма: – Ме пукта Сионö из, унаöн сэтчö крукасясны да унаöн сы вылö усясны. Но Сылы эскысь оз янав.
1 Вокъяс, ме сьöлöмсянь кора да кевмыся Енлы Израильлöн мездмöм вöсна. 2 Ме тöда: налöн сьöлöмыс öзъялö Енмыслы, но налы оз тырмы гöгöрвоöмлуныс. 3 Найö оз гöгöрвоны Енмыслысь веськыдлунсö да зiльöны сувтöдны ассьыныс веськыдлун. Та вöсна найö эз сетчыны Ен веськыдлунлы. 4 Кристос – Индöдыслöн пом. Сiдзкö, быдöн, кодi эскö Сылы, лоö веськыдöн. 5 Индöд серти веськыдлун йылысь Мöисей гижö: «Индöд серти олысь Индöднас пондас овны». 6 Эскöмсянь веськыдлуныс висьталö: «Эн мöвпав сьöлöмад: "Кодi каяс енэжö?"» – мед лэччöдны Кристосöс. 7 «Либö: "Кодi лэччас пыдöстöминö?"» – мед кыпöдны Кристосöс кулöмысь. 8 Гижöдыс мый висьталö? – Матын тэныд кывйыс, тэнад вомын да тэнад сьöлöмын. Тайö эскöмыслöн кыв, мый йылысь ми висьталам. 9 Öд вомнад кö висьталан Исусöс Господьöн да сьöлöмнад кö эскан, мый Енмыс ловзьöдiс Сiйöс кулöмысь, мездман. 10 Сьöлöмнад эскöмыд вöчö веськыдöн, вомнад висьталöмыд – мездö. 11 Гижöдыс висьталö: «Сылы эскысь оз янав». 12 Юдейяс да грекъяс костын торъялöмыс абу. Быдöнлöн öти Господь. Сiйö лышкыда сетö быдöнлы, кодi шыасьö Сы дiнö. 13 Öд быдöн, кодi шыасяс Господь нимö, мездмас. 14 Кыдзи нö шыасясны Господь дiнö, оз кö эскыны Сылы? Кыдзи нö эскасны, эз кö кывлыны Сы йылысь? Кыдзи нö кывласны, абу кö висьталысьыс? 15 Кыдзи нö висьталасны, абу кö мöдöдöма висьтавнысö? Гижöма: «Майбырöсь кокъясыс лöнь олöм да бур юöр вайысьлöн». 16 Но эз ставныс кывзыны Бур Юöрсö. Исай шуö: «Господьöй, кодi нö эскис миян висьталöмö?» 17 Эскöмыс öд кылöмсянь, а кылöмыс Ен Кывсянь. 18 Юала: «Найö öмöй эз кывлыны?» Кывлiсны, дерт. – Став му пасьталаыс кылiс налöн висьталöм шыыс, став му пельöсöдзыс воис налöн кывйыс. 19 Нöшта юала: «Израиль öмöй эз гöгöрво?» Öд Мöисей пыр на Енмыс шулiс: – Ме кыпöда тiян пытшкын вежалöм сiйö войтыр дiнö, кодöс оз позь шуны войтырöн. Дöзмöда тiянöс вежöртöм йöз пыр. 20 Исай повтöг висьталö Енлысь шуöмсö: – Менö аддзисны найö, кодъяс эз корсьлыны Менö, восьтi Ачымöс налы, кодъяс эз юасьлыны Ме йылысь. 21 Израиль йылысь Енмыс тадзи шуö: – Ме лунтыр сулалi кывзысьтöм да асныра войтырлы киöс нюжöдöмöн.
1 Юала: «Енмыс öмöй эновтiс Ассьыс йöзсö?» Дерт, эз. Ме ачым израильса, Öвраам чужанвужйысь, Вениамин чужанкотырысь. 2 Енмыс эз эновт Ассьыс водзвыв бöрйöм войтырсö. Онö öмöй тöдöй, мый висьталöма Гижöдас Илля йылысь? Сiйö норасьö Енлы Израиль вылö: 3 «Господьöй, Тэнсьыд пророкъястö виисны, висьпуктанiнъястö жугöдiсны. Ме öтнамöн коли, тшöтш менам олöм вылö ыштöны». 4 Мый сылы Енмыс воча шуö? «Ме коли Аслым сизим сюрс мортöс. Найö эз пидзöсчанясьны Ваал водзö». 5 Тадзи и öнi: Енмыс буралöмыс кузя видзöма коляссö, Ассьыс бöрйöмаясöс. 6 Бöрйöма буралöмыс вöсна, абу мортлöн уджъяс серти. Бöрйöма кö вöлi уджъяс серти, сэки эськö буралöмыс эз вöв буралöмöн. 7 Сiдзкö, мый артмö? Израиль эз аддзы, мый корсис, сöмын бöрйöмаяс аддзисны. Мукöдыс чорзьöдчисны, 8 öд гижöма: – Енмыс сетiс налы чорзьöм лов. Налöн синныс куньса, пельныс тупкыса, и öнöдз на тадз. 9 Давид висьталö: – Мед чöсмасян пызанныс лоö налы тывйö дзугсьöмöн, налькйö шедöмöн, изйö крукасьöмöн. Тайö лоö налы водзöс пыдди. 10 Синмыс налöн мед бердас, аддзыны оз кут, сюрса лыыс мед кусыньтчас пыр кежлö. 11 Сiдзкö, юала: «Найö öмöй усьмöныс крукасисны?» Эз. Налöн крукасьöмыс вайис мездмöм мукöд войтырлы. Та вöсна на пытшкын кыптiс мукöд войтыр дiнö вежалöм. 12 Налöн крукасьöмыс кö вайис озырлун муюгыдыслы да Енсьыс кежöмыс кö озырмöдiс мукöд войтырöс, сэки мыйта озырлун ваяс став Израильлöн Ен дiнö бергöдчöмыс? 13 Тiянлы, мукöд войтырлы, висьтала: менö сувтöдöма апостолавны тiянлы, и ме ошйыся аслам кесъялöмöн. 14 Гашкö, верма кыпöдны ас войтыр пытшкын веж петöмсö да отсавны мездмыны кодсюрöлы. 15 Найöс öдтортöмыс кö вайис бурасьöм муюгыдыслы, сэки мый ваяс найöс сибöдöмыс? Оз-ö кулöмысь ловзьöм? 16 Медводдза пöжасыс кö вежа, сiдзкö, кöтасыс ставнас вежа. Пулöн вужйыс кö вежа, вожъясыс тшöтш вежаöсь. 17 Быдтöм вый пуысь кö öткымын вож чегисны, а тэнö, вöрса вый пу вожöс, йитiсны чегöминас, да тэ мукöд вожыскöд öти вужсянь кутiн босьтны быдман вынсö, 18 сэки эн ошйысь мукöд вожыс водзын. А кöсъян кö ошйысьны, тöд: он тэ кут вужсö, а вужйыс – тэнö. 19 Гашкö, тэ шуан: «Менö йитöм могысь вожъяссö чегисны». 20 Тайö тадз. Найöс чегисны эскытöмысла, а тэ кутчысян эскöмнад. Асьтö вылö эн пукты, но полöмпырысь ов. 21 Енмыс кö эз жалит быдтöм вый пулысь вожъяссö, жалитас-ö тэнö? 22 Тöд: Енмыс бур сьöлöма, но вермö лоны и чорыдöн. Чорыд усьöмаяс дiнö, бур сьöлöма тэ дiнö, сöмын кутчысян кö Сылöн бурлунö. Он кö, тэнö тшöтш керыштасны. 23 Юдейяс кö оз кольччыны эскытöмлунас, найöс лоö йитöма. Енмыс вына бöр йитны найöс. 24 Тэнö öд керыштöма вöлi вöрса пуысь да йитöма быдтöм пуыс дiнö. А быдтöм пу вожлы ёна кокньыдджык бöр йитчыны мам пуыс дiнö. 25 Вокъяс, мед тi энö мöвпалöй ас мывкыдсяньныд, висьтала тiянлы тайö гусяторсö: Израиль войтырысь сöмын кутшöмкö юкöн чорзьöдчис. Налöн чорзьöдчöмыс кыссяс сэтчöдз, кытчöдз оз мездмы мукöд войтырыс колана лыдöдз. 26 Сэки став Израиль мездмас. Öд гижöма: – Сионсянь локтас Мездысь, Сiйö бырöдас Яков чужанвужйысь Ентöг олöмсö. 27 Ме босьта налысь мыжъяссö, тайö лоö Менам йитöд накöд. 28 Найö эз сибöдны Бур Юöрсö, Енлы паныд мунiсны. Тайö лои тiян вöсна. Но найö бöрйöм войтыр, и Енмыс радейтö найöс батьясныс вöсна. 29 Енмыс Ассьыс корöмаяссö оз вунöд, Сiйö бöр оз босьт сетöмасö. 30 Коркö тi, мукöд войтыр, энö кывзысьöй Енмыслысь, но Израильлöн кывзысьтöмлун вöсна Енмыс вöлi бур сьöлöма тiян дiнö. 31 Öнi найö оз кывзысьны, медым тiян дiнö моз Сiйö вöлi бур сьöлöма тшöтш на дiнö. 32 Енмыс ставнысö кöрталiс кывзысьтöмлуннас, медым ставныс дiнö лоны бур сьöлöмаöн. 33 Енлöн озырлуныс пыдöстöм, Сылöн мывкыдлуныс да тöдöмлуныс шымыртны вермытöм. Шуöм кывйыс вежöрö тöрöдтöм, туйыс Сылöн туявтöм! 34 Кодi вермас тöдны Господьлысь мöвпъяссö? Кодi вермас Сiйöс туйдöдны? 35 Кодлы Сiйö уджйöза, медым мынтысьны? 36 Öд ставыс Сысянь, Сы пыр да Сылы. Ошкöм Сылы нэмъяс чöж! Аминь.
1 Вокъяс, Енлöн ыджыд буралöмыс вöсна кора тiянöс: сетöй асьнытö Енлы ловъя, вежа да шогмана вись пыдди. Тайö лоö бур мывкыда кесъялöм Енмыслы. 2 Энö вужъясьöй тайö мувывса оласногас. Лэдзöй Енмыслы вежны тiянöс, выльмöдны вежöрнытö, медым тöдны тiянлы Сылысь кöсйöмсö: мый колана, шогмана да тыр-бур. 3 Енсянь меным бурсетöм вöсна висьтала тiянлы быдöнлы: энö мöвпалöй ас йывсьыныд вывтi, коланасьыс унджык, но мöвпалöй ышнясьтöг, Енмöн сетöм эскöм сертиныд. 4 Кыдзи öти вир-яйлöн эм уна юкöн, и быд юкöн вöчö ассьыс удж, 5 тадзи Кристос пытшкын ставным ми öтлаынсö – öти вир-яй, а торйöнсö – öта-мöдлы юкöн. 6 Енмыс Аслас буралöмнас быдöнлы миянлы сетöма торъя бурсетöм: пророкавны кö – пророкав эскöм сертиыд, 7 кесъявны кö – кесъяв, велöдны кö – велöд, 8 ышöдны кö – ышöд, сетны кö – сет сьöлöмсяньыд, веськöдлыны кö – веськöдлы тöждысьöмöн, бур вöчны кö – вöч долыд сьöлöмöн. 9 Радейтöй восьса сьöлöмöн, ылыстчöй лёксьыс да кутчысьöй бурас. 10 Радейтöй öта-мöднытö чой-вокöс моз, пуктöй öта-мöднытö ассьыд вылöджык. 11 Тöждысиганыд энö дышмöй, ловнад öзъялöй, Енмыслы кесъялöй. 12 Лачанытö кутöй нимкодьпырысь, шогъястö нуöй терпитöмöн, дугдывтöг кевмысьöй. 13 Вежа войтырлы отсалöй абутöмлун дырйиныс, сибöдöй ветлысь-мунысьясöс, 14 бурсиöй тiянöс вöтлысьясöс, бурсиöй найöс, а энö ёрöй. 15 Нимкодясьысьяскöд нимкодясьöй, бöрдысьяскöд бöрдöй. 16 Ас костаныд лоöй öти сьöлöмаöсь, энö лыддьöй асьнытö бурджыкöн, коньöръясöс энö öтдортöй да сюсьö энö пуксьöй. 17 Лёк вöчöмысь лёкöн энö мынтысьöй, йöзыс водзын ставсö зiльöй вöчны веськыда. 18 Верманныд кö, олöй лöня ставныскöд. 19 Мусаяс, энö перйöй водзöс ас вöснаныд, сетöй тайöс вöчны Енлöн скöрлунлы. Öд гижöма: «Ме мынтыся, Ме перъя водзöссö», – висьталö Господь. 20 «Тэныд паныд мунысь кö тшыгъялö, верд сiйöс, горшыс кö косьмö, юктав сiйöс. Тадзи тэ чукöртан сылы юр вылас биа öгыръяс». 21 Эн сет лёкыслы вермыны тэнö, но вермы лёксö бурнас.
1 Быдöн мед кывзысьö аслас юралысьыслысь, öд юралöмсö Ен лöсьöдöма, и юралысьсö тшöтш Ен пуктöма. 2 Юралысьлы паныд сувтысь паныд сувтö Енмыслöн лöсьöдöмлы. Тадзи вöчысь кöлалö ас вылас мыждöм. 3 Юралысьясысь полöны лёктор вöчигöн, а оз бурсö вöчигöн. Кöсъян кö наысь повтöг овны, вöч веськыда, сэки лоö насянь ошкöмыс. 4 Юралысь – сiйö Енлöн кесйöг, сiйöс пуктöма тэныд бур вылö. Вöчан кö лёксö, пов! Оз öд весьшöрö сiйö новлöдлы шыпурт. Сiйö Енлöн кесйöг, вермö чорыда дойдны лёк вöчысьöс. 5 Сiдзкö, кутам кывзысьны юралысьяслысь огö мыждöмысь полöм вöсна, но сьöлöмным висьталöм серти. 6 Тайö уджыс налöн Енлы кесъялöм, та вöсна тi мынтанныд налы вотсö. 7 Сiдзкö, сетöй быдöнлы коланасö: кодлы вот сетны – сылы вот сетöй, кодлы руга – сылы руга, кодысь колö повны – сыысь полöй, кодöс колö пыдди пуктыны – сiйöс пыдди пуктöй. 8 Энö кольöй некодлы уджйöзаöн, öта-мöдтö радейтöм кындзи. Öд мöдöс радейтöмнад тэ тырвыйö пöртан олöмö Индöдсö. 9 Тайö тшöктöмъяссö: «Гозъя олöмтö эн пежав», «Эн ви», «Эн гусясь», «Эн пöръясь», «Эн ышты» да став мукöд тшöктöмсö шымыртöма öти тшöктöмö: «Радейт матыссатö асьтö моз». 10 Муслуныс оз вай лёксö матыссаыдлы. Муслуныс – тайö Индöдсö тырвыйö олöмö пöртöм. 11 Тадзи вöчöй, тi öд тöданныд, мый воис нин кад садьмыны миянлы. Мездмöмыс öнi ёна нин матын сэкъя дорысь, кор ми сöмын на пондiм эскыны. 12 Войыс кольö, луныс матыстчö. Сiдзкö, шыбитам пемыдыслысь уджъяссö да пасьтасям югыдыслöн вермасянторйö. 13 Лунъюгыдын моз пондам овны бур ногöн. Огö сетчöй гажöдчöмö да кодалöмö, гозъя олöм пежалöмö да лэдзчысьöм оласногö, вензьöмö да вежалöмö. 14 Мед тiян паськöмöн лоö Исус Кристос Господьным. Вир-яйныд вöсна тöждысьöмсö энö бергöдöй сылысь лёк кöсйöмсö могмöдöмö.
1 Жеб эскысьöс сибöдöй, энö вензьöй, сылöн видзöдласыс кö торъялö. 2 Öти эскö, мый позьö сёйны быдтор, а мöдыс, жеб эскысьыс, сёйö сöмын быдмöг. 3 Быдтор сёйысь, эн увтырт быдмöг сёйысьöс, и тэ, быдмöг сёйысь, эн мыжав быдтор сёйысьöс. Енмыс öд кыкнаннытö сибöдö. 4 Кодi тэ сэтшöмыс, мый йöз кесйöгöс мыжалан? Сулалö-ö, усьöма-ö сiйö, сылöн Ыджыдыс тöдö. Сiйö кутас сулавны, öд Енмыс вына сувтöдны сiйöс. 5 Кодкö торйöдö лунъяс, а кодлыкö став луныс öткодь. Быдöн вöч аслад гöгöрвоöмлун серти. 6 Лунъяс торйöдысь – Господь понда найöс торйöдö, кодi оз торйöд – Господь понда оз торйöд. Быдтор сёйысь – Господь понда сёйö да Енсö аттьöалö, кодi оз сёй быдторсö – Господь понда оз сёй да тшöтш Енсö аттьöалö. 7 Öд некод миян пиысь оз ов да оз кув ас пондаыс. 8 Та вöсна, олам кö – Енлы олам, кулам кö – Енлы кулам. Ловъяöсь-ö, кулöмаöсь-ö – ми Енмыслöн. 9 Кристос öд кулiс, ловзис да олö, медым ыджыдавны кулöмаяс да ловъяяс вылын. 10 Мый тэ мыжалан воктö? Мыйла нинöм туйö пуктан сiйöс? Ставным öд сувтам Кристослöн ёрд водзö. 11 Гижöма: – Ме ловъя, висьталö Господь, – Ме водзö пидзöсчанясяс быд морт, да быд вомсянь кыптас ошкöм Енлы. 12 Тадзи быдöн ас вöснаыс кывкутас Ен водзын. 13 Водзö огö кутöй мыжавны öта-мöдöс. Мöдарö, видзöдöй, мед эськö энö крукöдöй да уськöдöй вокнытö. 14 Ме бура тöда да эска Господь Исуслы, мый, збыльвылас, нинöм абу пежа. Сöмын сылы лоö пежа, кодi лыддьö мыйкö пежаöн. 15 Тэ кö шогö уськöдан воктö сёян вöсна, сiдзкö, тэ он вöч мусапырысь. Эн жугöд сiйöс аслад сёянöн, öд сы вöсна кулiс Кристос. 16 Энö лэдзöй серамвыв лэптыны сiйö, мый тi лыддянныд бурöн. 17 Öд Енлöн Юралöмыс абу сёйöм да юöм, тайö Вежа Ловсянь веськыдлун, лöньлун да нимкодьлун. 18 Кристослы тадзи кесъялысь шогмана Енмыслы да пыдди пуктана йöзöн. 19 Зiлямöй овны лöня öта-мöдöс ёнмöдöмöн. 20 Сёян вöсна эн жугöд Енлысь уджсö. Ставыс сöстöм, но мортыслы лёк, крукöдö кö аслас сёянöн мöдсö. 21 Бурджык, он кö сёй яй, он ю вина, он вöч нинöм сэтшöмсö, мыйö вокыд крукасьö да усьö. 22 Тэнад эм эскöм? Видз сiйöс сьöлöмад Ен водзын. Шуда сiйö, кодi оз мыжав асьсö сыысь, мый бöрйö. 23 Майшасьöмöн сёйысь мыжмö, öд сiйö эскытöг вöчö. А эскытöг вöчöмыд эм мыж. 24 Ошкöм Сылы, кодi сетö тiянлы зумыда кутчысьны меöн висьталöм Бур Юöрö, Исус Кристослöн велöдöмö. Сэнi висьталöма важысянь дзебöм гусяторсö. 25 Тайö Бур Юöрсö öнi восьтöма пророк гижöдъяс пыр да помтöг олысь Енлöн тшöктöмыс серти висьталöма быд кыла войтырлы, медым вайöдны найöс кывзысьöмас да эскöмас. 26 Дзик öти ыджыд мывкыда Енлы ошкöмыс Исус Кристос пыр нэмъяс чöж! Аминь.
1 Миянлы, вынаяслы, колö лоны бур сьöлöмаöн вынтöмъяс дiнö налöн вермытöмлун дырйи, оз ков мöвпавны куш ас йывсьыным. 2 Быдöнлы колö мöвпавны матыссалы бур вöчöм йылысь, сiйöс ёнмöдöм могысь. 3 Öд Кристос эз Ас йывсьыс мöвпав. Гижöма: «Тэнö омöльтысьяслöн лёкöдöмыс уси Ме вылö». 4 Став воддза гижöдсö вöлi гижöма миянöс велöдöм да бурöдöм могысь, медым Гижöд пырыс ми вермим ёнмыны да зумыд лача кутны. 5 Бурöдöмсö да зумыдлунсö сетысь Ен мед сетас тiянлы öти сьöлöм. Öд Исус Кристос велöдö, 6 мед тi öти лолöн да öти вомöн ошкинныд Енсö, миян Господь Исус Кристослысь Батьсö. 7 Сiдзкö, сибöдöй öта-мöднытö Кристос сибыдлунöн, медым ошкыссис Енмыс. 8 Ме тадзи гöгöрвоа: Исус Кристос локтiс кесъявны юдейяслы, медым збыльмöдны батьяслы кöсйысьöмсö да петкöдлыны, мый Енмыс кутö Ассьыс кывсö. 9 Кристос локтiс кесъявны тшöтш мукöд войтырлы, мед и найö вермисны ошкыны Енсö на дiнö буралöмысь. Та йылысь гижöма: – Таысь ме кута нимöдны Тэнö мукöд войтыр пöвстын, понда сьылöмъясöн ошкыны Тэнсьыд нимтö. 10 Нöшта гижöма: – Нимкодясьöй, мукöд войтыр, Сылöн войтыркöд! 11 И нöшта на: – Ошкöй Господьöс, быд кыла войтыр! Нимöдöй Сiйöс, став мувывса йöз! 12 Исай висьталö: – Ессей вужсянь петас вож. Сiйö кутас веськöдлыны быд войтырöн, найö Сы вылö лача кутны пондасны. 13 Лачасö сетысь Ен мед тыртас тiянöс нимкодьлунöн да лöньлунöн эскöманыд, медым Вежа Лов вынöн тi зумыда сулалiнныд лача кутöмас. 14 Вокъяс, ме тöда, тiян бурлуныс да тöдöмлуныс тырвыйö, тi верманныд туйдöдны öта-мöднытö. 15 Но тiянлы казьтыштöм могысь ме мыйсюрö гижи повтöг. Тадзи вöчи, öд Енмыс Аслас буралöмнас корис менö 16 кесъявны Исус Кристослы ентöдтöмъяс пöвстын. Менö сувтöдöма вöчны вежа удж: висьтавны Енлысь Бур Юöрсö да вайны ентöдтöмъясöс Ен водзö шогмана да Вежа Лолöн вежöдöм вись пыдди. 17 Исус Кристос пытшкын ме верма ошйысьны Енлы кесъялöмöн. 18 Лысьта висьтавны сöмын сы йылысь, мый Кристос вöчис ме пыр, медым вайöдны ентöдтöмъясöс Енлысь кывзысьöмас. Сiйö вöчис тайöс Енмыслöн Лов вынöн менам сёрниöй да уджöй пыр, индысьпасъяс да шензьöданаторъяс пыр. Ерусалимсянь да водзö ме паськöдi Кристос йылысь Бур Юöрсö, весиг Иллирикöдз вои. 20 Мед эз ло вöчöма мукöдлöн подув вылын, ме зiли висьтавны Бур Юöрсö сэнi, кöнi Кристос нимсö эз на кывлыны. 21 Та йылысь гижöма: – Кодъяслы эз висьтавлыны Сы йылысь, найö аддзасны, кодъяс эз на кывлыны, найö тöдмаласны. 22 Тайö уджыс унаысь кутiс менö тiян дiнö волöмысь. 23 Öнi менам помалöма танi уджсö. Гашкö, уна вося кöсйöмöй волыны тiян дiнö сэсся збыльмас. 24 Испанияö мунiгöн пырала тiян дiнö. Ёна кöсъя аддзысьлыны тiянкöд, медым кöть этшаник вермим öтлаын нимкодьясьыштны. Лача кута, мый сэсся отсаланныд меным водзö туйö петны. 25 Öнi ме мöдöдча Ерусалимö кесъявны вежа войтырлы. 26 Македонияса да акайяса эскысьяс шуисны сетны кутшöмсюрö отсöг ерусалимса гöль эскысьяслы. 27 Тадзи шуисны вöчны, öд найö уджйöзаöсь юдейяслы: юдейяс пыр налы вичмис енэжвывса бурсиöмыс. Сiдзкö, налы тшöтш колö отсавны вежа войтырлы налöн быдлунъя олöмын. 28 Тайö отсöгсö нуöм бöрын вöлисти муна Испанияö. Сэтчö мунiгмоз кежала тiян дiнö. 29 Ме тöда: ме локта тiян дiнö Кристос Бур Юöрсянь тыр бурсиöмöн. 30 Вокъяс, миян Господь Исус Кристос нимöн да Вежа Ловсянь муслунöн кора тiянöс: öтвывтчöй менам тышъясö да кевмысьöй ме вöсна Енмыслы, 31 медым эг веськав Юдеяын эскытöмъяс киö, да вайöм отсöгыс мед шогмас ерусалимса вежа войтырлы. 32 Ен кö сетас, нимкодьпырысь локта тiян дiнö да шойччышта тiян ордын. 33 Лöньлунсö сетысь Ен ставныдкöд тiянкöд. Аминь.
1 Ме тöдмöда тiянöс Фива чойкöд. Сiйö Кенкреяын вичкоса отсасьысь. 2 Сибöдöй сiйöс Господь нимсянь, кыдзи лöсялö вежа войтырлы, ковмас кö, отсыштöй сылы. Ачыс сiйö уналы отсалiс, тшöтш меным. 3 Висьталöй чолöм Прискиллалы да Акиллы. Найö мекöд öтвыв кесъялöны Исус Кристослы. 4 Найö вöлiны дасьöсь олöмнысö сетны ме вöсна. Да ог сöмын öтнам ме аттьöав найöс, тшöтш мукöд войтырса вичкояс. 5 Чолöм тшöтш на ордын чукöртчысь эскысьяслы. Чолöм менам муса Епенетлы, Акайяын сiйö медводз эскис Кристослы. 6 Чолöм Мариамлы, сiйö уна уджалiс-отсасис миянлы. 7 Чолöм менам ас войтырсалы: Андрониклы да Юниялы, накöд ме пукавлi дзескыдiнын. Найö пыдди пуктана йöз апостолъяс пöвстын, и найö меысь водз эскисны Кристослы. 8 Чолöм Амплийлы, сiйö менам муса вок. 9 Чолöм Урбанлы, сiйö миян моз тшöтш кесъялö Кристослы. Чолöм муса Стакий ёртлы. 10 Чолöм Апелеслы. Сiйö Кристос вöсна уна сьöкыд пыр мунiс. Чолöм Аристовуллöн гортсалы. 11 Чолöм менам Иродион рöдвужлы. Висьталöй чолöм Наркислöн гортсаяс пиысь налы, кодъяс эскöны Господьлы. 12 Чолöм тшöтш мöдöда Енлысь уджсö вöчысьяслы: Трифеналы да Трифосалы. Чолöм муса Персида чойлы, сiйö ёна уджалiс Господьлы. 13 Чолöм Руфослы, Господьöн бöрйöмалы, да сылöн мамыслы, öд сiйö меным тшöтш мам кодь. 14 Чолöм Асинкритлы, Флегонтлы, Ермлы, Патровлы, Ермийлы да накöд уджалысь вокъяслы. 15 Чолöм Филологлы да Юлиялы, Нирейлы да сылöн чойыслы, Олимпанлы да накöд сэнi став вежа войтырлы. 16 Чолöмалöй öта-мöднытö вежа окыштöмöн. Кристослöн быд вичкосянь тiянлы чолöм. 17 Вокъяс, кора тiянöс, видзчысьöй наысь, кодъяс пыртöны вичкоад вензьöмъяс, да кежöдöны эскöмсьыс. Ылыстчöй татшöмъяссьыс. 18 Татшöм йöзыс кесъялöны оз Исус Кристос Господьнымлы, но асланыс рушкулы. Мича сёрнинас найö кокньыда ылöдлöны восьса сьöлöмаясöс. 19 Тiян кывзысяна олöмныд быдöнлы бура тöдса. Таысь меным нимкодь. Кöсъя, мед эськö тi вöлiнныд тэрыбöсь бурыс вылö, но ньöжмыдöсь лёкыс вылö. 20 Лöньлунсö сетысь Ен регыд песовтас сöтанасö тiян кокъяс улö. Миян Господь Исус Кристослöн буралöмыс тiянкöд. Аминь. 21 Тiянлы ыстöны чолöм менам Тимофей уджъёртöй да ас войтырысь Луций, Ясон да Сосипатр вокъяс. 22 Чолöмала тiянöс тшöтш ме, Тертий, тайö гижöдсö гижысь. 23 Чолöм Гайсянь. Сiйö сибöдö ас ордас став эскысьсö, тшöтш и менö. Тiянлы ыстöны чолöм Кварт вок да карса сьöм видзысь Ераст. 24 Миян Господь Исус Кристослöн буралöмыс ставныдкöд тiянкöд. Аминь.
1 Гижö Павел, Енлöн корöм-кöсйöм серти Исус Кристослöн апостол. Сосфен воккöд 2 ми чолöмалам тiянöс, коринфса Ен вичкоöс. Исус Кристос пыр Енмыс вежöдiс тiянöс да корис лоны Аслас вежа войтырöн. Ми чолöмалам быдöнöс, кодi быдлаын миян моз шыасьö Исус Кристос Господьным нимö. 3 Буралöм да лöнь олöм тiянлы миян Ен Батьсянь да Господь Исус Кристоссянь. 4 Быд кадö ошка ассьым Енмöс тiян дiнö Сылöн буралöмысь. Тайö буралöмсö Сiйö петкöдлiс Исус Кристос пыр. 5 Сы пыр Енмыс озырмöдiс тiянöс быдторнас, тi кужанныд бура сёрнитны, тiян эм быдпöлöс тöдöмлун. 6 Кристос йылысь висьталöмыс зумыда вужъясис тiян сьöлöмö, 7 та вöсна миян Господь Исус Кристослысь локтöмсö виччысигöн тi озырöсь быдпöлöс бурсетöмнас. 8 Енмыс ёнмöдас тiянöс зумыда сулавны помöдз, медым миян Господь Исус Кристослöн лунö тi вöлiнныд сöстöмöсь. 9 Енмыс эскана, Сiйö корис öтувтчыны тiянöс Аслас Пиыскöд – миян Господь Исус Кристоскöд. 10 Вокъяс, кора тiянöс миян Господь Исус Кристос нимöн: ас костаныд энö юксьöй, олöй öти мöвпъясöн, öти видзöдласöн да öти могöн. 11 Вокъяс, Клоялöн гортсасянь ме кывлi, тi пö вензянныд öта-мöдныдкöд. 12 Ме сёрнита сы йылысь, мый тi быдöн ас йывсьыныд шуанныд: «Ме – Павеллöн», «ме – Аполослöн», «ме – Кифалöн», а «ме – Кристослöн». 13 Гашкö, Кристосöс вöлi юклöма? Гашкö, Павелöс вöлi тувъялöма тiян вöсна? Гашкö, Павел нимöн тi пыртчинныд? 14 Ошка Енмöс, Крисп да Гай кындзи некодöс эг пырт тiян пиысь. 15 Сiдзкö, некод оз вермы шуны, мый ме пыртi кодöскö аслам нимöн. 16 Нöшта Степанöс пыртi да сылысь гортсасö, сэсся пыртi-ö кодöскö – ог тöд. 17 Öд Кристос мöдöдiс менö эз пыртны, а висьтавлыны Ассьыс Бур Юöрсö. Тайö Юöрсö ме висьтала ог мывкыд кывъясöн, медым Кристослöн крестыс эз вошты ассьыс вынсö. 18 Öд вошöмаяслы крест йылысь висьталöмыс – йöйталöм, а миянлы, мездмöмаяслы – Енлöн выныс. 19 Гижöма: «Мывкыда йöзлысь мывкыдлунсö бырöда, вежöра йöзлысь вежöрлунсö öтдорта». 20 Кодi нö мывкыда йöзыс? Кодi велöдчöмаыс? Кодi нö тайö му вылас вежöра йöзыс? Эз-ö тайö мувывса мывкыдлунсö Енмыс йöйталöмö бергöд? 21 Енмыс Ассьыс мывкыдлунсö петкöдлiс мувывса йöзлы, но йöзыс асланыс мывкыдлунöн Енсö эз гöгöрвоны. Сэки Енмыс мöвпыштiс мездыны найöс, кодъяс эскöны миян висьталöмлы. Тайö висьталöмсö йöзыс шуöны йöйталöмöн. 22 Юдейяс корöны вöчны шензьöданаторъяс, грекъяс – петкöдлыны мывкыдлун, 23 а ми висьталам тувъялöм Кристос йылысь. Юдейяс крукасьöны тайö висьталöмас, а грекъяс лыддьöны тайöс йöйталöмöн. 24 Но Енлöн корöмаяслы, юдейяслы да грекъяслы, Кристос – Енлöн выныс да мывкыдлуныс. 25 Öд Енлöн "мывкыдтöмлуныс" ёна ыджыдджык морт мывкыдысь, да Енлöн "жеблуныс" ёна вынаджык морт вынысь. 26 Вокъяс, видзöдлöй ас выланыд, кутшöмöсь тi, Енлöн корöмаяс. Морт видзöдлас серти этша тiян пöвстын мывкыдаыс, этша юралысьыс да бур рöдысь петысьыс. 27 Но Енмыс бöрйис тайö муюгыдсьыс мывкыдтöмсö, медым янöдны мывкыдасö, бöрйис жебсö, медым янöдны вынасö, 28 бöрйис тайö муюгыдсьыс медся шогмытöмсö, коньöрсö да увтыртöмсö, медым нинöм туйö пуктыны нималанасö, 29 медым Ен водзын некод эз ошйысь аснас. 30 Енмыс йитiс тiянöс Исус Кристоскöд, кодi лои миянлы мывкыдлуннас. Сы пыр Енмыс мездiс миянöс, вöчис веськыдöн да вежа войтырöн. 31 Öд гижöма: «Ошйысьысь мед ошйысьö Господьöн».
1 Вокъяс, кор ме волi тiян дiнö висьтавны Енсянь юöр, сэки сёрнитi тiянкöд эг мича да мывкыд кывъясöн. 2 Ме мöвпыштi, мый тiянын олiгöн кöсъя тöдны сöмын Исус Кристосöс – тувъялöм Кристосöс. 3 Тiян дiнö ме локтi жебöн да полысьöн, сьöлöмöй ёна тiралiс. 4 Ме висьтавлi тiянлы да сёрнитi тiянкöд эг аслам мывкыдлунсянь, эг эскöдан кывъясöн, но менам кывъясын вöлi Ловлöн выныс. 5 Ме сёрнитi тадзи, медым тiян эскöмныд подуласис Енлöн вын вылö, а эз мортлöн мывкыдлун вылö. 6 Мывкыдлун йылысь ми висьталам зумыда эскысьяслы. Ми висьталам огö тайö муюгыдас олысьяслöн да юралысьяслöн мывкыдлун йылысь, öд тайö юралысьяссö лоö бырöдöма. 7 Ми висьталам Енлöн гуся мывкыдлуныс йылысь, кодöс быдöнысь вöлi дзебöма. Но олöм пуксьытöдзыс на Енмыс вöлi мöвпыштöма, мый Сылöн мывкыдлуныс ваяс миянлы дзирдлун. 8 Тайö муюгыдас юралысьяс пöвстысь некод эз тöд Енлöн мывкыдлуныс йылысь. Тöдiсны кö, найö эськö эз тувъявны дзирдлуна Господьöс. 9 Öд гижöма: – Эз аддзывлы син, эз кывлы пель, весиг юрас мортлы эз волы, мый Енмыс дасьтöма Сiйöс радейтысьяслы. 10 Енмыс восьтiс тайöс миянлы Аслас Ловнас, öд Лолыс ставсö тöдö. Сiйö тöдö Енлысь став пыдта-судтасö. 11 Вермас-ö кодкö тöдны мортлысь мöвпъяссö сылöн лолыс кындзи? Тадзи Енлысь мöвпъяссö некод оз тöд Енлöн Лолыс кындзи. 12 Ми сибöдiм эгö тайö муюгыдсалысь ловсö, а Енлысь Ловсö, медым вермим тöдны Енлысь сетöмторъяссö. 13 Ми висьталам та йылысь огö асланым мывкыдлунсянь, огö ас кывъясöн, а Вежа Ловсянь сетöм кывъясöн. Ловсянь висьталöмсö ми гöгöрвоöдам Лов отсöгöн. 14 Морт пытшкас кö абу Енлöн Лолыс, сiйö оз вермы сибöдны Ловсянь висьталöмсö да лыддьö тайöс йöйталöмöн. Мортыс оз вермы гöгöрвоны висьталöмсö, öд тайöс позьö донъявны сöмын Енлöн Лолыс отсöгöн. 15 Морт пытшкас кö эм Енлöн Лолыс, татшöм мортыс вермö донъявны быдтор, а сiйöс донъявны некод оз вермы. 16 – Кодi гöгöрвоас Господьлысь мывкыдсö? Кодi вермас туйдöдны Сiйöс? Но миян пытшкын Кристослöн мывкыдыс.
1 Вокъяс, ме эг вермы сёрнитны тiянкöд Лов серти олысьяскöд моз. Ме сёрнитi тiянкöд вир-яй серти олысьяскöд моз, öд тi быттьö век на кагаяс Кристослы эскöмын. 2 Ме вердi тiянöс йöлöн, а эг чорыд сёянöн, öд тi энö на вермöй сёйны чорыдсö. Тi öнöдз онö вермöй сёйны сiйöс, 3 öд тi вир-яй серти на оланныд. Тiян костын пыр на овлö вежалöм, вензьöм да юксьöм. Сiдзкö, тi вир-яй серти на оланныд, тi пыр на тайö муюгыдсаыс кодьöсь. 4 Öти шуö: «Ме – Павеллöн», мöд шуö: «ме – Аполослöн». Тадзи кö сёрнитанныд, сiдзкö, тi дзик на тайö муюгыдсаыс кодьöсь. 5 Кодi нö Павелыс? Кодi Аполосыс? Найö сöмын кесъялысьяс, кодъяс пыр тi эскинныд Кристослы. На пиысь быдöн Господьсянь сетöм удж вöчис. 6 Ме кöдзи, Аполос киськалiс, а быдтiс Енмыс. 7 Сiдзкö, кöдзысьыс да киськалысьыс нинöм, öд быдтысьыс – Енмыс. 8 Кöдзысьыс да киськалысьыс öти удж вöчöны, но быдöн на пиысь удждонсö уджыс серти босьтас. 9 Ми – Енкöд öтвыв уджалысьяс, а тi – Сылöн кöдзöм муыс, Сылöн тэчасыс. 10 Енлöн бурсетöмыс вöсна ме лои бур тэчысьöн да пуктi подувсö, а мöд лэптö сы вылö. Но быдöн мед видзöдö аслас удж бöрся. 11 Подувсö пуктöма нин, тайö – Исус Кристос. Тайö подулыс кындзи мöд подув некод оз вермы пуктыны. 12 Тайö подув вылас мортыс вермö лэптыны тэчассö зарниысь, эзысьысь, дона изйысь, пуысь, турунысь либö идзасысь, 13 но уджыс быдöнлöн ас кадö тыдовтчас. Тайöс Мыждан луныс петкöдлас, öд сiйö биöн локтас. Сэки биыс быдöнлысь уджсö тöдмалас. 14 Кодлöн вöчöмторйыс кутас зумыда сулавны, сiйö ассьыс удждонсö босьтас. 15 А сотчас кö, сэки удждонсö воштас. Дерт, асьсö сiйöс лоö мездöма, быттьö биысь перъясны. 16 Тi öмöй онö тöдöй: тi – Енлöн оланiн, Енлöн Лолыс олö тiян пытшкын. 17 Кодi жугöдас Енлысь оланiнсö, Енмыс сiйöс асьсö жугöдас. Öд тi – Енлöн оланiн, а Енлöн оланiныс вежа. 18 Асьнытö энö ылöдлöй. Тайö муюгыдас кö лыддьö кодкö асьсö мывкыдаöн, медводз сiйö мед лоö мывкыдтöмöн. Сэки сiйö збыльысь лоö мывкыда. 19 Öд Ен син водзын тайö му вылас олысьяслöн мывкыдлуныс – йöйталöм. Гижöма: «Енмыс кыйö мывкыдаясöс асланыс наянлунö». 20 Нöшта гижöма: – Господь тöдö мывкыда йöзлысь мöвпъяссö, налöн мöвпъясыс ковтöмöсь. 21 Сiдзкö, некод мед оз ошйысь мортöн, öд ставыс тiян: 22 Павел-ö, Аполос-ö, Кифа-ö, муюгыдыс-ö, олöмыс-ö, кулöмыс-ö, öнiяыс-ö, локтанаыс-ö – ставыс тайö тiян. 23 Тi – Кристослöн, а Кристос – Енлöн.
1 Сiдзкö, лыддьöй миянöс Кристослы кесъялысьясöн, кодъяс кывкутöны Енлöн гусяторъяс вöсна. 2 Сöмын татшöм кывкутысьяслы колö лоны эсканаöн. 3 Дерт, меным дзик веськодь, тi-ö менö мыжданныд, йöзыс-ö. Ме весиг ачым ачымöс ог мыжды. 4 Сьöлöмöй оз мыжды менö, но тайö оз на висьтав менам веськыдлун йылысь. Öд менö мыждысьыс – Господь. 5 Та вöсна Господь локтöдз, кадысь водз, некодöс энö мыждöй. Сiйö югдöдас пемыдас дзебöмасö да восьтас мортлысь мöвпъяссö. Сэки быдöнлы вичмас Енсянь ошкöмыс. 6 Вокъяс, ставсö тайöс ме серпасалöмöн висьталi тiянлы ас йылысь да Аполос йылысь, медым миян вылö видзöдöмöн тi велöдчинныд гöгöрвоны тайö кывъяссö: «Кутчысьöй Гижöдас». Сэки тi онö кутöй ышнясьны, öтиöс вылö кыпöдны, а мöдöс увтыртны. 7 Тэ öмöй бурджык мукöдсьыс? Енлöн сетöмыс кындзи тэнад öмöй эм мыйкö аслад? Абу кö, сiдзкö, мыйла ошйысян, мый ставыс тэнад. 8 Тiян ставыс эм, тi ёна нин озырминныд. Öнi тi – öксыяс, а ми – некод. Дерт, ме ёна кöсъя, медым тi збыльысь вöлiнныд öксыясöн. Сэки эськö тiянкöд öтвыв вермим öксыавны! 9 Но ме чайта, Енмыс пуктiс миянöс, апостолъясöс, медбöръя лыдас, быттьö кулöм вылö мыждöмаясöс. Öд муюгыдас быд олысьлы – анделъяслы и йöзыслы – ми лоим видзöданторйöн. 10 Кристос вöсна ми йöйöсь, а тi Кристос пытшкын мывкыдаöсь. Ми жебöсь, а тi вынаöсь. Миянöс лёкöдöны, а тiянöс ошкöны. 11 Ми öнöдз сёйтöг-ютöг олам да лёкиник паськöмöн ветлам. Миянöс нöйтöны, ми пыр туйынöсь. 12 Кок йылысь усьтöдз уджалам, ас ки помысь кынöмпöт перъям. Миянöс лёкöдöны, а ми бурсиам, миянöс вöтлöны, а ми терпитам. 13 Миянöс омöльтöны, а ми бур ногöн сёрнитам. Тайö му вылас олысьяслы ми ёг пыдди, найö öнöдз лыддьöны миянöс шыбласöн. 14 Гижа тайöс тiянöс туйдöдöм могысь, а ог янöдöм могысь, öд тi менам муса ныв-пи. 15 Дерт, тiян вермас лоны Кристос йылысь уна сюрс велöдысь, но батьыс сöмын öти, öд Бур Юöрсö тiянлы ме висьтавлi. Тадзи чужтi тiянöс Исус Кристослы эскысьясöн. 16 Сiдзкö, кора тiянöс: видзöдöй ме вылö, öд ме видзöда Кристос вылö. 17 Ме мöдöдi тiян дiнö Тимофейöс. Господь пытшкын сiйö менам муса пи да эскана кесъялысь. Сiйö казьтыштас тiянлы Кристоскöд менам öтувъя олöм йылысь. Та йылысь ме велöда быдлаын, быд вичкоын. 18 Öткымынöн тiян пиысь кутiсны вывтiасьны, чайтöны, мый ог лок тiян дiнö. 19 Но Енмыс кö сетас, регыд локта да тöдмала тайö йöзыслысь вынсö, ог кут налöн сёрни вылö видзöдны. 20 Öд Енлöн Юралöмыс абу кывъясын, а вынын. 21 Сiдзкö, мыйöн локны тiян дiнö: беддьöн али рам сьöлöмöн да муслунöн? Мый бöръянныд?
1 Ме кывлi, öткымынöн пö тiян пöвстысь кырсалöны, и сiдзи, мый татшöмыс оз овлы весиг ентöдтöмъяс пöвстын. Кодкö пö тiян пиысь узьлö весиг батьыслöн гöтырыскöд. 2 Оз öмöй тiянлы ков шогсьыны та вöсна да вöтлыны ас дорсьыныд тайö мортсö? А тi пыр на ышнясянныд. 3 Дерт, вир-яйöн ме абу тiянкöд, но ловнам тiянкöд. Ме быттьö ачым вöлi тiянкöд да мöвпыштi, мый вöчны тайö мортыскöд. 4 Кор тi чукöртчанныд миян Господь Исус Кристос нимöн, ловнам лоа тiянкöд, миян Господь Исус Кристослöн выныс тшöтш лоö тiянкöд. 5 Сэки тайö мортсö сетöй сöтана киö вир-яйсö жугöдöм вылö, мед лолыс сылöн мездмас миян Господь Исус Кристослöн лунö. 6 Тiянлы нинöмöн ошйысьнысö! Тi öмöй онö тöдöй, мый этшаник няньшом шоммöдö дзоньнас кöтассö. 7 Сiдзкö, весалöй ас пытшсьыныд няньшомнытö, медым лоинныд выль кöтасöн. Дерт, тiян пытшкын шоммöданторйыс абу нин, öд Кристосöс, Ыджыд лунся Балянымöс, вайöма нин вись пыдди миян вöсна. 8 Сiдзкö, огö кутöй пасйыны Ыджыд лунсö важ няньшомöн: лёклунöн да наянлунöн. Кутам пасйыны сiйöс шомтöм няньöн: сöстöмлунöн да збыльöн. 9 Водзынджык ме тiянлы гижлi нин: энö кутöй некутшöм йитöд кырсалысьяскöд. 10 Ме ог сёрнит тайö мувывса кырсалысьяс, горшасьысьяс, гусясьысьяс да идоллы юрбитысьяс йылысь. Сэки эськö ковмис эновтны тiянлы тайö муюгыдсö. 11 Но ме сёрнита сэтшöм морт йылысь, кодi шуö асьсö эскысьöн, но ачыс кырсалö, горшасьö, суклясьö, гусясьö, кодалö да идоллы юрбитö – татшöмыскöд энö кутöй некутшöм йитöд. Весиг энö сёйöй сыкöд öтлаын! 12 Меным öмöй мыждыны вичкоысь ортсысасö? Енмыс найöс мыждас! А вичкосаöс – тiянлы мыждыны. «Вöтлöй ас дiнсьыныд лёк оласногаöс».
1 Тi кö мыйыськö вензянныд öта-мöдныдкöд, сэки кыдзи лысьтанныд шыасьны мувывса мыждысьяс дiнö? Оз öмöй вежа войтыр дiнö ков шыасьны? 2 Тi öмöй онö тöдöй, мый вежа войтыр кутас мыждыны муюгыдсасö? Кутанныд кö мыждыны муюгыдсасö, мыйла тайö ичöтикторъясыс кузя онö вермöй öти кывйö воны? 3 Тi öмöй онö тöдöй: ми весиг анделъясöс кутам мыждыны? Сiдзкö, дерт нин, быдлунъя могъяс кузя вермам öти кывйö воны. 4 Кор тi вензянныд öта-мöдныдкöд быдлунъя могъяс йылысь, сэки тi шыасянныд на дiнö, кодъяс абу вичкосаяс. 5 Шуа тайöс тiянöс янöдöм могысь. Оз öмöй тiян пöвстысь сюр мывкыда морт, кодi эськö бурöдiс эскысьясöс öта-мöдныскöд? 6 Мöдарö, тi öта-мöднытö мыжданныд да шыасянныд та могысь эскытöмъяс дiнö! 7 Тi кö мыжданныд öта-мöднытö, тайöн сöмын янöданныд асьнытö. Оз-ö бурджык ло, кутасны кö вöчны тiянлы лёксö да мырддявны тiянлысь? 8 Но тi асьныд лёка вöчанныд да мырддяланныд мукöдлысь, весиг эскысьяслысь. 9 Тi öмöй онö тöдöй, мый лёксö вöчысьяслы оз вичмы Енлöн Юраланiныс. Энö ылöдлöй асьнытö! Öд кырсалысьлы, идоллы юрбитысьлы, гозъя олöм пежалысьлы, пеж оласногалы, öта-мöдныскöд узьлысь айуловлы, 10 гусясьысьлы, горшасьысьлы, кодалысьлы, суклясьысьлы да мырддялысьлы – некодлы оз вичмы Енлöн Юраланiныс. 11 Кодсюрö тiян пöвстысь тшöтш вöлiнныд татшöмöсь. Но миян Господь Исус Кристос нимöн да Ен Лов вынöн тi лоинныд сöстöмöсь, вежаöсь да веськыдöсь. 12 «Меным ставсö позьö», но абу ставыс бур вылö. «Меным ставсö позьö», но ме ог лэдз, медым мыйкö ыджыдалiс ме вылын. 13 Сёяныс – кынöмлы, а кынöмыс – сёянлы. Но Енмыс бырöдас öтисö и мöдсö. Вир-яйыс абу кырсалöм вылö, сiйö – Господьлы, а Господь – вир-яйлы. 14 Енмыс ловзьöдiс Господьöс, Аслас вынöн Енмыс ловзьöдас тшöтш миянöс. 15 Тi öмöй онö тöдöй, мый тiян вир-яйныд – Кристос вир-яйлöн юкöн? Сiдзкö, верма öмöй Кристослысь юкöнсö кырсалысь анькöд йитны? Ен мед видзас! 16 Тi öд тöданныд, мый кырсалысь анькöд öтувтчысь лоö сыкöд öти вир-яйöн. Гижöма: «Кыкыс лоöны öти вир-яйöн». 17 А Господькöд öтувтчысь лоö Сыкöд öти лола. 18 Сiдзкö, энö кырсалöй! Мукöд мыжсö вöчысь оз аслас вир-яйлы паныд вöч, а кырсалысь аслас вир-яйлы паныд мыж вöчö. 19 Тi öмöй онö тöдöй, мый тiян вир-яйныд – Вежа Ловлöн крамыс, Сiйö олö тiян пытшкын. Тайö Ловсö Енмыс сетiс тiянлы, öнi тi абу нин асланыдöсь. 20 Енмыс ньöбис тiянöс ыджыд дон вылö. Сiдзкö, ошкöй Енсö вир-яйнад и ловнад, öд ставыс Сылöн.
1 Тi меным гижлiнныд да юалiнныд гöтрасьöм йылысь. Та вылö вочавидза тадзи: дерт, тайö бур, мортыс кö оз гöтрась, 2 но медым некод эз кырсав, быд мортлöн мед лоö аслас гöтыр да быд аньлöн – аслас верöс. 3 Вольпасьын верöс сет асьтö гöтырлы, а гöтыр сет асьтö верöслы. 4 Абу гöтыр аслас вир-яй вылын ыджыдыс, а верöс. Абу верöс аслас вир-яй вылын ыджыдыс, а гöтыр. 5 Энö ылыстчöй öта-мöдсьыныд, а ылыстчанныд кö, вöчöй тайöс сёрнитчöмöн, сöмын кутшöмкö кад кежлö, медым ёнджыка на верминныд видзавны да кевмысьны. Сэсся бöр öтлаын лоöй, медым сöтана эз ыштöд тiянöс кутчысьтöм вöснаныд. 6 Дерт, тайö абу тшöктöм, но тi верманныд тадзи вöчны. 7 Ме кöсйи эськö, медым быдöн олiс ме моз. Но Енмыс быдöнлы вичмöдö торъя бурсетöм: öтилы – сэтшöмöс, мöдлы – татшöмöс. 8 Гöтыртöмъяслы да дöваяслы тадзи висьтала: бурджык тiянлы ме моз öткöн овны, 9 но онö кö вермöй кутны асьнытö, гöтрасьöй либö верöс сайö петöй. Öд бурджык гöтрасьны либö верöс сайö петны, медым лёкколöмыс эз ыджыдав тiян вылын. 10 Гозйöн олысьяслы тадзи висьтала: гöтыр мед оз юксьы аслас верöскöд. Тайö абу менам тшöктöм, а Господьлöн. 11 А юксяс кö, мед öтнасöн олö либö бöр бурасьö верöсыскöд. Верöс мед тшöтш оз юксьы аслас гöтыркöд. 12 Мукöдыслы висьтала ме, оз Господь: кутшöмкö эскысьлöн кö гöтырыс оз эскы, но кöсйö овны верöсыскöд, тайö эскысьыс мед оз юксьы аслас гöтыркöд. 13 Тайöс висьтала тшöтш эскысь аньлы: сылöн верöсыс кö оз эскы, но кöсйö овны сыкöд, тайö аньыс мед оз юксьы аслас верöскöд. 14 Тадзи эскысь гöтырыс пыр Енмыс вежöдö эскытöм верöссö, и мöдарö, эскысь верöсыс пыр вежöдö эскытöм гöтырсö. Эз кö вöв тадзи, тiян ныв-пиныд эськö вöлiны пежöсь, но öнi найö вежаöсь. 15 Эскытöм верöс либö эскытöм гöтыр кö кöсйö юксьыны, мед юксьö. Сэки эскысь верöсöс либö эскысь гöтырöс нинöм оз кут, öд Енмыс тшöктiс овны миянлы лöня. 16 Гöтыр, тэ öмöй верман тöдны, мый мездан ассьыд верöстö, а тэ, верöс, ассьыд гöтыртö? 17 Быдöн тiян пиысь мед олö Енлöн шуöм серти да лоö сэтшöмöн, кутшöмöн вöлi Господьлöн коригас. Тадзи ме велöда быд вичкоын. 18 Енлöн коригас кö вöлi вундыштöма кодöскö, сiйö мед оз дзеб тайöс. Эз кö вöв вундыштöма – мед оз вундыштчы. 19 Вундыштöмыс нинöм, и вундыштчытöмыс нинöм, но медшöр могыс – овны Енлöн тшöктöм серти. 20 Быдöн мед лоö сэтшöмöн, кутшöмöн вöлi Енлöн коригас. 21 Енлöн коригас кö вöлiн кесйöгöн, эн майшась, но позьö кö мездмыны, бурджыксö бöрйи. 22 Öд Господьлöн коригас кö мортыс кесйöгöн вöлi, öнi сiйö Господьлöн мездлуна морт. А мездлуна кö вöлi, öнi сiйö Кристослöн кесйöг. 23 Енмыс ньöбис тiянöс ыджыд дон вылö, сiдзкö, энö лоöй мортлöн кесйöгöн. 24 Вокъяс, быдöн лоöй Ен водзын сэтшöмöн, кутшöмöн вöлiнныд Енлöн коригас. 25 Öнi висьтала верöс сайö мунтöмъяслы. Тайö абу Господьлöн тшöктöм, ме висьтала ассьым видзöдласöс. Öд Господьлöн буралöмыс кузя меным позьö эскыны. 26 Ме чайта, тайö сьöкыд кадас мортлы бурджык öткöн кольччыны. 27 Тэ кö гöтыра – эн юксьы. Гöтыртöм кö – эн гöтрась. 28 Дерт, гöтрасян кö, он мыжмы. Ныв кö петас верöс сайö, тшöтш оз ло мыжа. Но гозъя олöмас виччысьö тiянöс уна сьöкыдлун, да таысь кöсъя видзны тiянöс. 29 Вокъяс, кöсъя шуны тiянлы, мый кадыс коли этша нин. Та вöсна гöтыра морт мед олö гöтыртöм моз, 30 бöрдысь – бöрдтöм моз, гажöдчысь – гажöдчытöм моз, а ньöбасьысь – быттьö нинöм эз ньöб. 31 Тайö мувывса озырлуннас вöдитчысь мед олö сiдзи, быттьö сылöн нинöм абу. Öд став тайö мувывсаыс регыд бырас. 32 Кöсъя, медым тi нинöм вöсна энö тöждысьöй. Гöтыртöм морт тöждысьö Господьлöн уджъяс вöсна, медым Господьлы шогмыны, 33 а гöтыра морт тöждысьö быдлунъя могъяс вöсна, медым гöтырыслы шогмыны. Верöс сайö петöм да верöстöм ань öта-мöдсьыс тшöтш торъялöны. 34 Верöстöм ань тöждысьö Господьлöн уджъяс вöсна, медым вир-яйнас да ловнас Сы водзын вежаöн лоны. А верöс сайö петöм ань тöждысьö быдлунъя могъяс вöсна, медым верöсыслы шогмыны. 35 Ме висьтала тайöс тiянлы бур вылö. Ме ог кöсйы тiянöс нинöмöн сьöктöдны. Кöсъя, медым тi олiнныд шогмана ногöн да некытчö ылавтöг сьöлöмсяньныд кесъялiнныд Господьлы. 36 Шуам, мортыслöн эм гöтырпу. Сiйö оз гöтрась сы вылö, но асьсö кутны оз вермы, да лыддьö тайöс лёкторйöн, сiйö мед ас кöсйöм сертиыс вöчö, мед гöтрасьö, тайö абу мыж. 37 Но мортыс кö зумыда кутö ассьыс кывсö – вермö кутны асьсö да шуис овны гöтрасьтöг, сiйö бура вöчö. 38 Та вöсна, мортыс кö гöтрасьö – бура вöчö, а оз кö – нöшта на бурджыка. 39 Индöд серти гöтыр кöртасьöма верöсыскöд, кытчöдз верöсыс ловъя. Кулö кö верöсыс, гöтыр вермö петны верöс сайö, код сайö кöсйö, сöмын верöсыс мед Господьлы эскис. 40 Но бурджык лоö, оз кö пет верöс сайö. Чайта, Енлöн Лолыс эм и ме пытшкын, сiйöн тадзи шуа.
1 Öнi кöсъя сёрнитыштны идоллы вайöм сёян йылысь. Дерт, ми быдöн тöдам та йылысь. Но тöдöмлуныс вайöдö ышнясьöмöдз, а муслуныс ёнмöдö. 2 Мортыс кö чайтö, мый сiйö тöдö мыйкö, збыльвылас сiйö нинöм на оз тöд. 3 Но Енмыс кö муса мортыслы, Енмыс сiйöс тöдö. 4 Öнi висьтышта идоллы вайöм сёян йылысь. Ми тöдам, мый идолыс збыльвылас абу, эм сöмын öти Ен. 5 Дерт, енэжас да му вылас эмöсь сiдз шусяна "енъяс". Öд татшöм "енмыс" да "ыджыдалысьыс" зэв уна, 6 но миян эм сöмын öти Ен Бать. Сiйö сетö олöм быдöнлы, Сылы ми олам. Миян эм сöмын öти Господь – Исус Кристос. Сы пыр вöчöма ставсö, и Сы пыр сетöма миянлы олöм. 7 Но оз быдöн тöд та йылысь. Öткымынöн вöлiны ёна велалöмаöсь сёйны идоллы вайöм яй. Та вöсна öнi, яй сёйигöн, найö лыддьöны сiйöс идоллы вайöм сёянöн, и налöн сьöлöмыс мыждö найöс, öд найö жебöсь на. 8 Но сёяныс оз матыст миянöс Ен дiнö. Öд ми кö огö сёйöй – нинöм огö воштöй, а сёям кö – тайö нинöм оз содты миянлы. 9 Дерт, тi верманныд сёйны ставсö, но видзчысьöй, медым энö лоöй крукöдöн жеб эскысьяслы. 10 Öд жеб эскысь кö аддзас, мый тэ тöдöмöн сёян идоллы вайöм сёян, сэки сiйö тшöтш кутас сёйны татшöм сёянсö, весиг сылöн сьöлöмыс кö мыждö сiйöс. 11 И тэнад тöдöмлун вöсна вошас тайö жеб эскысьыс, тэнад вокыд, код вöсна кулiс Кристос. 12 Тадзи тi дойданныд жеб вокныдлысь сьöлöмсö да вöчанныд мыж сылы паныд. Сiдзкö, тi вöчанныд мыж Кристослы паныд. 13 Та вöсна менам сёянöй кö уськöдö вокöс, ме некор ог кут сёйны яй, медым менам вокöй эз усь.
1 Ме öмöй абу апостол? Ме öмöй кöртасьöма мыйöнкö? Ме öмöй эг аддзыв Исус Кристосöс, миянлысь Господьöс? Тi – Господь пытшкынöсь. Тайö öмöй абу менам уджлöн вотöсыс? 2 Гашкö, мукöдыслы ме абу апостол, но тiянлы апостол. Тi – Господь пытшкынöсь, и тайö висьталö, мый ме збыльысь апостол. 3 Менö мыждысьяс водзын ме тадзи дорйыся. 4 Гашкö, миянлы оз позь сёйны-юнысö? 5 Гашкö, миянлы оз позь босьтны аскöд эскысь гöтырöс? Öд тадзи вöчöны мукöд апостолыс: Господьлöн вокъяс да Кифа. 6 Гашкö, сöмын меным да Варнавалы колö уджавнысö, медым аслыным кынöмпöт перйыны? 7 Шыпурта морт öмöй ас тшöт весьтас олö? Виноград быдтысь öмöй оз виноград вотöссö сёй? Пемöс видзысь öмöй оз пемöслысь йöвсö ю? 8 Тадзи мöвпалöны оз сöмын йöзыс, тадзи висьталö тшöтш Индöдыс. 9 Мöисейлöн Индöдас гижöма: «Вартысь öшлысь вомсö эн тупкы». Енмыс öмöй öш вöсна тöждысьö? 10 Абу öмöй тайöс миянлы висьталöма? Öд миянлы гижöма: «Гöрысь да вартысь уджалöны лачаöн, медым босьтны ассьыныс пай». 11 Ми кöдзам тiян сьöлöмö Ловсянь кöйдыс. Гашкö, тiянлы вывтi сьöкыд, вичмöданныд кö миянлы быдлунъя олöм вылö? 12 Öд мукöдыслы кö тi вичмöданныд, сiдзкö, ми ёнджыка на вермам та вылö лача кутны. Но ми нинöм эгö корлöй тiянлысь. Мöдарö, ми нуам став сьöкыдсö, медым эгö вöлöй крукöдöн Кристослöн Бур Юöрлы. 13 Тi öд тöданныд, мый крамын кесъялысьяс пöткöдöны асьнысö крамö вайöмторйöн, а висьпуктанiнын кесъялысьяс босьтöны аслыныс пай висьпуктанiнö вайöмторйысь. 14 Евангелльö висьталысьяслы Господь тшöтш тадзи тшöктiс вöчны: пöткöдчыны Бур Юöр висьталöм помысь. 15 Но ме некор тадзи эг вöчлы. Ме гижа та йылысь ог аслым мыйкö босьтöм могысь, öд бурджык кувны тадзи вöчöм дорысь! Но тайöн ошйысьöмысь некод оз вермы дугöдны менö. 16 Ме кö висьтавла Бур Юöр, меным нинöмöн ошйысьнысö, öд тайöс меным Енмыс тшöктiс вöчны. Курыд шог меным, ог кö висьтавлы сiйöс! 17 Ме кö висьтавла Бур Юöрсö ас кöсйöм серти, сэки меным удждон лоö. Ог кö ас кöсйöм серти, сэки индöм удж вöча. 18 Сiдзкö, кутшöм менам удждонöй? Удждонöй менам – висьтавлыны Кристос йылысь Бур Юöрсö дон босьттöг. Дерт, ме верма Бур Юöр висьтавлöмысь дон босьтны, но ог кöсйы тадзи вöчны. 19 Ме некодлы абу кесйöг, но лои кесйöгöн быдöнлы, медым унджык йöзöс вайöдны Кристос дiнö. 20 Юдейяскöд ме кутi ачымöс юдей моз, медым вайöдны найöс Кристос дiнö. Индöд серти олысьяскöд кутi ачымöс на моз, медым вайöдны найöс Кристос дiнö. 21 Индöдтöг олысьяскöд кутi ачымöс тшöтш на моз, медым вайöдны найöс Кристос дiнö. Дерт, ме абу Индöдтöг олысь, öд ме ола Кристослöн индöд серти. 22 Жеб эскысьяскöд кутi ачымöс тшöтш на моз, медым вайöдны найöс Кристос дiнö. Ме вöчи став позянасö, медым эськö кымынкö мортöс верми мездыны. 23 Ставсö тайöс вöча Евангелльö вöсна, мед меным тшöтш вичмис сылöн бурсиöмыс. 24 Тi öмöй онö тöдöй, мый панласигöн котöртöны унаöн, но тырдоныс вичмö сöмын öтилы. Сiдзкö, котöртöй, медым тайö тырдоныс вичмис тiянлы. 25 Быд панласьысь ёна зiльö да кутö асьсö киас, медым котöртöм бöрас сылы вичмис юркытш. Но тайö юркытшыс сiсьмана. Ми кутам асьнымöс киын, медым миянлы вичмис сiсьмытöм юркытш. 26 Та вöсна некытчö кежтöг котöрта помöдз да тышкася ог весьшöрö, менам быд вартöм веськалö коланаинö. 27 Ме топöда ассьым вир-яйöс да тшöкта сiйöс кывзысьны, медым мукöдлы Бур Юöр висьтавлiгöн ачым вöлi шогманаöн.
1 Вокъяс, кöсъя казьтыштны тiянлы, мый миян батьяс ставныс ветлiсны кымöр улын да вуджисны саридз вомöн. 2 Найö ставныс пыртчисны кымöрын да саридзын да лоисны Мöисей бöрся мунысьясöн. 3 Найö ставныс пöткöдчисны öти сёянöн – Ловсянь сёянöн, 4 ставныс юисны öти ва – Ловсянь ва. Öд найö юисны Ловсянь сетöм изйысь, кодi ветлöдлiс накöд. Тайö изйыс вöлi Кристос. 5 Но унджыкыс на пиысь эз шогмыны Енмыслы да кулiсны овтöминын. 6 Ставыс тайö велöдö миянöс, медым миян сьöлöмын эз вöв кöсйöм – на моз вöчны лёксö. 7 Энö юрбитöй идолъяслы, кыдзи вöчисны кодсюрö миян батьяс пöвстысь. Гижöдыс висьталö: «Йöзыс сёйисны-юисны, сэсся кутiсны ворсны». 8 Энö кырсалöй, кыдзи вöчисны кодсюрö миян батьяс пöвстысь. Сэки öти лунö кулiс на пиысь кызь куим сюрс морт. 9 Энö дöзмöдöй Кристосöс, кыдзи дöзмöдiсны кодсюрö миян батьяс пöвстысь, сэсся найö кулiсны змейяс помысь. 10 Энö шуасьöй, кыдзи шуасисны кодсюрö миян батьяс пöвстысь. Сэсся Андел-Бырöдысь виис найöс. 11 Ставыс тайö вöлi накöд, медым öлöдны йöзсö. Тайöс гижöма, медым велöдны миянöс, бöръя кадас олысьясöс. 12 Сiдзкö, чайтан кö, мый зумыда сулалан – видзчысь усьöмысь. 13 Тiянöс кö суис сьöкыдлун, тайö быд морткöд вермö лоны. Но Енмыс эскана, Сiйö оз сет сьöкыдсö вынысь унджык нуны. Мöдарö, сьöкыдлун дырйи Сiйö индас тiянлы петан туй, да тi венанныд сьöкыдсö. 14 Сiдзкö, мусаяс, энö юрбитöй идолъяслы. 15 Ме сёрнита тiянкöд мывкыда йöзкöд моз. Öнi тi асьныд мöвпалöй, мый йылысь висьтала тiянлы. 16 Ми бурсиам чашасö да чегъялам няньсö. Оз-ö тайö чашаыс йит миянöс Кристос Виркöд? Оз-ö тайö няньыс йит миянöс Кристос Вир-яйкöд? 17 Няньыс öти. Ми тшöтш öти вир-яй, öд ми ставным тайö öти няньсö сёям, кöть ми унаöн. 18 Видзöдлöй Израиль войтыр вылö: найö сёйöны крамö вайöм вись. Тадзи вöчигöн оз-ö найö висьпуктанiнкöд öтувтчыны? 19 Сiдзкö, мый кöсъя шуны тайöн? Гашкö, идолыс либö идоллы вайöм висьыс мыйöнкö тöдчана? 20 Абу! Кор ентöдтöмъяс вайöны вись, найö вайöны пеж ловъяслы, а оз Енлы. Но ме ог кöсйы, медым тi öтувтчинныд пеж ловъяскöд. 21 Тi онö вермöй öтпырйö юны Господьлöн чашаысь да пеж ловъяслöн чашаысь. Тi онö вермöй öтпырйö сёйны Господькöд да пеж ловъяскöд. 22 Гашкö, Господьöс кöсъям дöзмöдны? Ми öмöй вынаджыкöсь Сыысь? 23 «Меным ставсö позьö», но абу ставыс бур вылö. «Меным ставсö позьö», но оз ставыс велöд бур вылö. 24 Энö тöждысьöй сöмын ас вöснаныд, быдöн тöждысьöй вöчны бурсö мöд мортлы. 25 Тi кö ньöбанныд вузасьысьлысь яй, сёйöй сiйöс повтöг. Нинöм энö юасьöй, медым тiян сьöлöмныд эз мыжды тiянöс. 26 Öд муыс, и ставыс, мый эм сы вылын – Господьлöн. 27 Эскытöмъяс пиысь кö кодкö корас тiянöс, да тi мунанныд сы ордö, сёйöй сэнi ставсö. Нинöм энö юасьöй сёяныс йылысь, медым тiян сьöлöмныд эз мыжды тiянöс. 28 Но висьталасны кö тiянлы: «Тайö сёянсö вöлi вайöма идоллы вись пыдди», сэки энö сёйöй тайö сёянсö висьталысьыс вöсна, медым сылöн сьöлöмыс эз мыжды сiйöс. Öд муыс, и ставыс, мый эм сы вылын – Господьлöн. 29 Ме сёрнита ог тiян, а мöд мортлöн сьöлöм мыждöм йылысь. Ме нинöмöн абу кöртасьöма, сiдзкö, мöд мортлöн сьöлöмыс оз вермы мыждыны менö. 30 Ме кö аттьöала Енсö, сiдзкö, мыйла менö мыждынысö, öд ме аттьöала Енсö сёянысь? 31 Та вöсна сёянныд-ö, юанныд-ö али нöшта мыйкö вöчанныд – ставсö вöчöй Енмöс ошкöм могысь. 32 Энö лоöй крукöдöн некодлы: ни юдейяслы, ни грекъяслы, ни Енлöн Вичколы. 33 Олöй ме моз, öд ме быдторйын зiля шогмыны быдöнлы. Ме ог тöждысь ас вöсна, а тöждыся мукöдыс вöсна, мед найö мездмисны.
1 Видзöдöй ме вылö, öд ме видзöда Кристос вылö. 2 Вокъяс, ошка тiянöс, öд тi нинöм абу вунöдöмныд менам висьтавлöмысь. Тi ставсö вöчанныд менам велöдöм серти. 3 Кöсъя, мед тi тöдiнныд, мый быд верöслы юрыс – Кристос, гöтырлы юрыс – верöс, а Кристослы юрыс – Ен. 4 Айлов кö кевмысьö либö пророкалö юрсö вевттьöмöн, сiйö ассьыс юрсö янöдö. 5 Ань кö кевмысьö либö пророкалö юрсö вевттьытöг, сiйö тшöтш ассьыс юрсö янöдö. Öд сiйö нинöмöн оз торъяв куш юра аньысь. 6 Та вöсна ань кö оз вевттьы ассьыс юрсö, мед шырсьö. А яндзим кö сылы лоны шырöмаöн либö куш юраöн, мед вевттьысьö. 7 Айловлы оз ков вевттьыны юрсö. Öд сiйö Енлöн пертасыс. Сiйö Енмыслы ошкöм вайö, а гöтыр – верöслы. 8 Эз айлов артмы аньсянь, но ань – айловсянь. 9 Абу айловöс вöчöма аньлы, но аньöс – айловлы. 10 Та вöсна аньлы колö вевттьыны юрсö. Тайö лоö пасöн, мый сы вылын эм ыджыдалан вын, медым тöдiсны та йылысь анделъяс. 11 Но Господь пытшкын айлов оз вермы лоны аньтöг, и ань – айловтöг. 12 Öд ань артмис айловсянь, айлов чужö аньсянь, но ставыс Енсянь. 13 Асьныд мöвпыштлöй, бур-ö тайö, ань кö кевмысьö Енмыслы юрсö вевттьытöг? 14 Оз öмöй олöмыс петкöдлы, мый айловöс кузь юрсиыс янöдö, 15 а аньöс – мичмöдö. Öд юрсисö аньлы сетöма вевттьöд пыдди. 16 Кöсйö кö кодкö вензьыны та йылысь, сылы тадзи шуа: ни миянын, ни Енлöн мукöд вичкоясын мöд нога велöдöмыс абу. 17 Таысь кындзи нöшта шуа тiянлы: меным нинöмысь тiянöс ошкынысö, öд тiян чукöртчöмныд бурыс дорысь унджык лёксö вайö. 18 Öти-кö, ме кывлi, мый вичкоö чукöртчигöн тiян костын овлöны вензьöмъяс. Ме мыйтакö эска татчö. 19 Дерт, тiян костын коланаöсь торъя мöвпалöмъясыс, медым тöдмавны, кодi тiян пиысь шогмана Енмыслы. 20 Но кор тi чукöртчанныд öтвыв сёйны, тайöс оз позь шуны Господьлöн рытйöмöн. 21 Öд быдöн тiян пиысь тэрмасьö сёйны ассьыс сёянсö. Тадзи кодкö тшыгйöн кольö, а кодкö коддзöма нин. 22 Тi öмöй онö вермöй гортаныд сёйны-юнысö? Мыйла нö нинöм туйö пуктанныд Енлысь Вичкосö да увтыртанныд гöльясöс? Мый меным шуны тiянлы? Гашкö, ошкыны тiянöс? Ог кут! 23 Ме висьтавлi нин тiянлы, мый Ачыс Господь меным висьталiс. Господь Исус, Сiйöс вузалан войö, босьтiс нянь, 24 Енмöс аттьöалöмöн чегис няньсö да шуис: «Босьтöй, сёйöй, тайö Менам Яй, чегъялöма тiян вöсна. Вöчöй тайöс Менö казьтывлöм могысь». 25 Сёйöм бöрас босьтiс тшöтш чаша да шуис: «Тайö чашаыс – Выль Йитöд, кöрталöма Менам Вирöн. Быдпöрйö, тайö чашасьыс юигöн, казьтывлöй Менö». 26 Тадзи быдпöрйö, сёянныд-ö тайö няньсö, юанныд-ö тайö чашасьыс, тi висьтавланныд Господьлöн кулöм йылысь, кытчöдз оз лок Сiйö. 27 Сiдзкö, кодi шогмытöма сёйö Господьлысь няньсö да юö Сылöн чашаысь, сiйö Господьлöн Яйлы да Вирлы паныд мыж вöчö. 28 Та вöсна, быдöн мед асьсö тöдмалö, сэсся сёйö тайö няньсö да юö тайö чашасьыс. 29 Öд мортыс кö сёйö да юö шогмытöма, Господьлöн Вир-яй йылысь мöвпавтöг, тайöс сiйö вöчö асьсö мыждöм вылö. 30 Та вöсна унаöн тiян пöвстысь жебöсь, унаöн висьöны да унаöн нин кулiсны. 31 Ми кö водзвыв тöдмалам асьнымöс, сэки Господь оз кут мыждыны миянöс. 32 А мыждö кö, миянöс бур вылö велöдö, медым тайö муюгыдсаыскöд öтвыв эгö веськалöй мыждöм улö. 33 Та вöсна вокъяс, кор тi чукöртчанныд сёйны, виччысьöй öта-мöднытö. 34 А тшыг кö кодкö, мед гортас сёйö, сэки тiян чукöртчöмныд оз ло мыждöм вылö. Мукöдторсö висьтала тiянö локтöм бöрын.
1 Вокъяс, кöсъя, мед тi тöдiнныд Ловсянь сетöмторъяс йылысь. 2 Кор тi вöлiнныд ентöдтöмъясöн на, тiянöс ёна кыскис сёрниттöм идолъяс дiнö. Тi асьныд тöданныд та йылысь. 3 Та вöсна висьтала тiянлы: морт пытшкас кö эм Енлöн Лолыс, сiйö некор оз кут ёрны Исусöс. И мöдарö, некод оз вермы шуны Исусöс Господьöн, абу кö сы пытшкын Вежа Лов. 4 Сетöмторйыс унапöлöс, но Лолыс öти. 5 Кесъялöмыс унапöлöс, но Господь öти. 6 Вöчанногыс унапöлöс, но быдöн пытшкын ставсö вöчö öти Ен. 7 Сiйö сетö Ловлы быдöн пыр петкöдчыны ас ногыс, öта-мöдлы бур вылö. 8 Öтилы Лолыс сетö мывкыд кывъяс, мöдлы – тöдöмлун, мед юксьыны мукöдкöд, 9 кодлыкö Лолыс сетö эскöм, кодлыкö – сямлун бурдöдны. 10 Мукöдыслы Лолыс сетö вын вöчны шензьöданаторъяс, кодлыкö – пророкавны, кодлыкö – сямлун тöдмавны быдпöлöс ловсö. Мукöдыслы Лолыс сетö сямлун сёрнитны мукöд кывъяс вылын, а кодлыкö – гöгöрвоöдны тайö сёрнисö. 11 Ставсö тайöс вöчö öти Лов. Ас кöсйöм сертиыс Сiйö быдöнлы торйöн юклö тайö сетöмторъяссö. 12 Босьтны кö мортлысь вир-яйсö, сiйö артмöма уна юкöнысь, но öтвылысь найö артмöдöны öти вир-яй. Тайöс позьö шуны тшöтш Кристос йылысь. 13 Öд ми: юдейяс и грекъяс, кесйöгъяс и мездлуна йöз – ставным пыртчим öти Лов отсöгöн öти вир-яйö, ставным юим öти Ловсянь. 14 Мортлöн вир-яйыс артмöма уна юкöнысь, абу öтиысь. 15 Шуас кö кок: «Ме абу ки, сiдзкö, ме абу вир-яйлöн юкöн». Сiйö öмöй абу тайö вир-яйлöн юкöныс? 16 Шуас кö пель: «Ме абу син, сiдзкö, ме абу вир-яйлöн юкöн». Сiйö öмöй абу тайö вир-яйлöн юкöныс? 17 Вир-яйлöн кö эм сöмын син, сэки мыйöн кутас кывзыны? Вир-яйлöн кö эм сöмын пель, сэки мыйöн кутас исавны? 18 Но Енмыс Ас кöсйöм сертиыс быд юкöн пуктiс вир-яяс коланаинö. 19 Öд быд юкöн кö вöлi сöмын öтипöлöс, сэки эськö вир-яйыс эз артмы. 20 Та вöсна юкöныс уна, а вир-яйыс öти. 21 Син оз вермы шуны килы: «Тэ меным ковтöм». Юр оз вермы шуны коклы: «Тэ меным ковтöм». 22 Мöдарö, вир-яйлöн жебджык юкöнъясыс ёнджыка на коланаöсь. 23 Вир-яйлысь öткымын юкöнсö ми огö ёна донъялöй, но найöс бура вевттям. 24 Ми зiлям бура вевттьыны миянöс янöдысь юкöнъяссö, а мичаджык юкöныслы вевттьöдыс абу колана. Но Енмыс вир-яйсö тадзи лöсьöдöма: Сiйö ёнджыка на донъялö сiйö юкöнсö, кодöс ми огö ёна донъялöй, 25 медым вир-яй пытшкын эз вöвны вензьöмъяс. Сэки быд юкöн кутас öтмоза тöждысьны öта-мöд вöснаыс. 26 Та вöсна, сьöкыдалö кö вир-яйлöн öти юкöн, сыкöд тшöтш сьöкыдалö мукöд юкöныс. Но ошкöны кö вир-яйлысь öти юкöн, сыкöд тшöтш нимкодясьö мукöд юкöныс. 27 Öтвылысь тi лоанныд Кристослöн вир-яйöн, а торйöнсö – Сылöн юкöнъясöн. 28 Вичкоын Енмыс медводз сувтöдiс апостолъясöс, сэсся пророкъясöс, сэсся велöдысьясöс. Мукöдыслы Енмыс сетiс вын вöчны шензьöданаторъяс, мукöдыслы – сямлун бурдöдны, кодлыкö – отсасьны йöзыслы, кодлыкö – веськöдлыны, а кодлыкö – сёрнитны мукöд кывъяс вылын. 29 Гашкö, ми быдöн апостол? Гашкö, быдöн пророк либö велöдысь? Гашкö, быдöн вöчам шензьöданаторъяс? 30 Гашкö, быдöн вермам бурдöдны? Гашкö, быдöн сёрнитам мукöд кывъяс вылын да вермам сiйöс гöгöрвоöдны? 31 Сiдзкö, зiльöй босьтны Ловсянь медбур сетöмторсö. Öнi ме петкöдла тiянлы медбур туйсö.
1 Ме кö сёрнита морт кывйöн, весиг анделъяслöн кывйöн, а муслуныс кö ме пытшкын абу, сiдзкö, ме троньгысь ыргöн да брунгысь жыннян. 2 Ме кö пророкала да тöда став гусяторсö, менам кö эм быдпöлöс тöдöмлун да зумыд эскöм, верма весиг керöсъяс вештавны, а муслуныс кö ме пытшкын абу, сiдзкö, ме нинöм. 3 Ме кö разöда став ассьым эмбурöс да сета ассьым вир-яйöс сотны, а муслуныс кö ме пытшкын абу, тайö меным нинöм оз сет. 4 Муслуныс дыр терпитö, мелi сьöлöма, оз вежав, оз ошйысь, оз вылö кыпöдчы, 5 оз вöч шогмытöма, аслыс нинöм оз курав, оз дöзмы, оз казьтыв лёксö, 6 оз нимкодясь лёкыслы, нимкодясьö збыльыслы. 7 Муслуныс ставсö вевттьö, быд кадö эскö да лача кутö, ставсö венö. 8 Муслуныс некор оз бырлы. Пророкъяс дугдасны висьтавлыны, йöзыс дугдасны сёрнитны мукöд кывъяс вылын, и тöдöмлуныс бырö, 9 öд миян тöдöмлуныс абу тырвыйö, пророкалöмыс тшöтш абу тырвыйö. 10 Но тырвыйöлуныс воас да, сэки ставыс, мый абу тырвыйö, бырас. 11 Ичöт дырйи ме сёрнитi, вежöртi да мöвпалi кага моз. А верстямми да, коли ассьым кага оласногöс. 12 Öнi ми аддзам Енсö ылöсас, чусмöм рöмпöштанысь моз, а бöрыннас воча синмöн аддзысям Енмыскöд. Öнi сöмын мыйтакö тöда Енмыс йылысь, а бöрыннас кута тырвыйö тöдны Сы йылысь, кыдзи Енмыс тырвыйö тöдö ме йылысь. 13 Öнi кольö куимтор: эскöм, лача да муслун. Но муслуныс на пиысь медыджыд.
1 Зiльöй кутчысьны муслунас, тöждысьöй босьтны Ловсянь сетöмторъяссö, торйöн нин, медым верминныд пророкавны. 2 Кодi сёрнитö мукöд кывъяс вылын, сiйö сёрнитö Енмыскöд, а оз йöзкöд. Сiйöс некод оз гöгöрво, öд сiйö висьтавлö гусяторсö Лов вынöн. 3 А пророкалысь висьтавлö йöзыслы. Сiйö ёнмöдö, ышöдö да бурöдö найöс. 4 Мукöд кывъяс вылын сёрнитысь ёнмöдö сöмын асьсö, а пророкалысь ёнмöдö вичкосö. 5 Ме кöсъя, медым тi быдöн сёрнитiнныд мукöд кывъяс вылын. Но вöлi эськö бурджык, тi кö пророкалiнныд. Öд пророкалысь ыджыдджык мукöд кывъяс вылын сёрнитысь дорысь. Но мукöд кывъяс вылын сёрнитысь кö вермö гöгöрвоöдны ассьыс висьталöмсö, и тайö ёнмöдö вичкосö, сэки сiйö оз ло ичöтджык пророкалысь дорысь. 6 Вокъяс, ме кö локта тiян дiнö да кута сёрнитны мукöд кывъяс вылын, но ог вай тiянлы Енсянь восьтöм да тöдöмлун, ог пророкав да велöд тiянöс, – тайö нинöм оз сет тiянлы. 7 Шуам, босьтны кö ворсанторъяс: пöлян либö арфа, да налöн ворсiгöн кö кылö öткодь шы, сэки вермам-ö тöдмавны, мыйöн ворсöны? 8 А труба кö сетö гöгöрвотöм шы, сэки кодi дасьтысяс тыш кежлö? 9 Тадзи артмö тшöтш тiянкöд: тi кö кутанныд сёрнитны гöгöрвотöм кывйöн, сэки кодi гöгöрвоас тiянöс? Тiян сёрниныд лоö весьшöрö. 10 Му вылас сёрнитöны унапöлöс кывйöн, но быд кыв позьö гöгöрвоны. 11 А ме кö ог гöгöрво сёрнитысьлысь висьталöмсö, сэки ме сылы локтысь морт кодь, сiйö меным тшöтш. 12 Тi ёна кöсъянныд босьтны Ловсянь сетöмторъяс, сiдзкö, тöждысьöй унджык босьтны сетöмторсö, медым найö ёнмöдiсны вичко. 13 Та вöсна мукöд кывъяс вылын сёрнитысьлы колö кевмысьны, медым сiйö вермис гöгöрвоöдны ассьыс висьталöмсö. 14 Öд ме кö кевмыся мукöд кывйöн, сэки кевмысьö сöмын лолöй, а вежöрöй нинöм оз гöгöрво. 15 Сiдзкö, мый меным вöчны? Кута кевмысьны лолöн, кута кевмысьны тшöтш вежöрöн. Кута сьывны лолöн, кута сьывны тшöтш вежöрöн. 16 Тэ кö кутан ошкыны Енсö сöмын ловнад, сэки орччöн сулалысь морт гöгöрвотöгыс вермас öмöй шуны "аминь" тэнад ошкöм вылö? Öд сiйö оз гöгöрво тэнсьыд висьталöмтö. 17 Гашкö, тэ бура ошкан, но мöд мортлы тайö нинöм оз сет. 18 Ошка Енмöс, ме быдöн дорысь на ёнджыка сёрнита мукöд кывъяс вылын. 19 Но мукöдсö туйдöдöм могысь бурджык лоö, шуа кö вичкоын вит гöгöрвоана кыв уна сюрс гöгöрвотöм кыв дорысь. 20 Вокъяс, энö мöвпалöй челядь моз, мöвпалöй верстьö моз. Но лёксö вöчны лоöй кага кодьöсь. 21 Индöдас гижöма: – Кута сёрнитны тайö войтырыскöд мукöд кывъяс вылын, кута висьтавны налы локтысь йöз вомöн, но весиг сэки найö оз кывзыны Менö. Тадзи висьталö Господь. 22 Сiдзкö, мукöд кывъяс вылын сёрнитöмыс – тайö эскытöмъяслы пас, абу эскысьяслы. А пророкалöмыс – эскысьяслы пас, абу эскытöмъяслы. 23 Тi кö ставныд öтвыв чукöртчанныд вичкоö, да быдöн кутас сёрнитны мукöд кывъяс вылын, и сэтчö пырасны тöдтöм йöз да эскытöмъяс, сэки найö шуасны, тi пö йöйталанныд. 24 Но тi кö быдöн пророкаланныд, да пырас тiян дiнö эскытöм либö тöдтöм морт, сэки Енмыс быдöн пыр янöдас да мыждас сiйöс, 25 сэки сылöн гуся мöвпъясыс воссясны. Тайö мортыс кымынь уськöдчöмöн копыртчылас Енлы да шуас: «Енмыс збыльысь тiянкöд!» 26 Вокъяс, мый нöшта шуны тiянлы? Öтлаö чукöртчигöн быдöн тiян пиысь вермö вöчны мыйкö: кодкö сьылö, кодкö велöдö, кодлöнкö эм Енсянь восьтöм, кодкö сёрнитö мукöд кывъяс вылын, кодкö гöгöрвоöдö сiйöс. Но ставыс мед лоö вичко ёнмöдöм могысь. 27 Эмöсь кö тiян пöвстын мукöд кывъяс вылын сёрнитысьяс, мед сёрнитöны кыкöн либö уна вылö куимöн. Найö мед сёрнитöны сьöрсьöн-бöрсьöн, а кодкö мед гöгöрвоöдö налысь сёрнисö. 28 Абу кö гöгöрвоöдысьыс, сiдзкö, вичкоын мукöд кывъяс вылын мед оз сёрнитны, а сёрнитöны ас кежас да Енмыскöд. 29 Пророкъяс пиысь мед тшöтш висьтавлöны кыкöн либö куимöн, а мукöдыс мед донъялöны налысь висьталöмсö. 30 Пукалысьяс пöвстысь кö кодлыкö лоö Енсянь восьтöм, сэки воддза висьталысьыс мед дугдас сёрнитнысö. 31 Тi быдöн верманныд пророкавны сьöрсьöн-бöрсьöн, медым быдöнöс мыйöкö велöдны-ышöдны. 32 Пророкъяс вермöны веськöдлыны Ловсянь сетöм сёрнинас. 33 Öд Енмыс абу торкалысь Ен, Сiйö – лöньлунсö сетысь Ен. Ен войтырлöн вичкоясын тадзи лöсьöдöма: 34 вичкоö чукöртчигöн аньясныд мед чöла пукалöны, налы оз позь сёрнитны. Öд Индöдыс велöдö найöс кывзысьны. 35 Найö кö кöсйöны тöдмавны мыйкö, та йылысь мед юалöны гортаныс асланыс верöслысь. Öд аньяслы абу лöсьыд вичкоын сёрнитны. 36 Гашкö, чайтанныд, Енлöн Кывйыс тiянсянь петiс? Гашкö, сöмын тiянöдз воис? 37 Кодi лыддьö асьсö пророкöн либö Лов серти олысьöн, сiйö мед тöдö, мый тайö велöдöмыс – Енлöн тшöктöм. 38 Кодi оз кöсйы гöгöрвоны тайöс, мед оз гöгöрво. 39 Вокъяс, тöждысьöй, медым тi верминныд пророкавны, но энö öлöдöй мукöд кывъяс вылын сёрнитöмысь. 40 Öд ставсö колö вöчны бура да колана ногöн.
1 Вокъяс, öнi казьтышта тiянлы Евангелльö йылысь, кодöс висьтавлi нин тiянлы. Тi сибöдiнныд сiйöс да зумыда кутчысянныд сэтчö. 2 Тайö Евангелльöыс пыр тi мездманныд, кутанныд кö зумыда кутчысьны менам висьтавлöмö. Онö кö, тiян эскöмныд весьшöрö. 3 Ме висьтавлi тiянлы медколанаторсö, мый ачым босьтi сьöлöмö: Гижöдыс серти Кристос кулiс миян мыжъяс вöсна. 4 Сiйöс вöлi гуалöма, но коймöд луннас Енмыс ловзьöдiс Сiйöс. Тадзи висьталöма Гижöдас. 5 Сiйö петкöдчис Кифалы, сэсся дас кык велöдчысьыслы, 6 сэсся öтпырйö петкöдчис витсёысь унджык воклы. На пиысь унджыкыс ловъяöсь на, öткымынöн мöдар югыдас нин вуджисны. 7 Та бöрти Исус петкöдчис Яковлы, сэсся став апостолыслы. 8 Медбöрти петкöдчис меным, апостолъяс пиысь медiчöтыслы. 9 Öд на пöвстын ме медшогмытöмыс. Ме ог шогмы весиг шусьыны апостолöн, Енлысь Вичкосö вöтлi да. 10 Но Енлöн буралöмыс вöсна ме сэтшöм, кутшöм эм. Сылöн буралöмыс ме дiнö эз вöв весьшöрö, öд ме уджалi мукöд апостол дорысь ёнджыка на. Дерт, ме эг ачым уджав, а ме пытшкын олысь Енлöн буралöмыс уджалiс. 11 Та вöсна оз ков торйöдны, кодi висьтавлö тiянлы юöрсö: ме либö найö, öд ми быдöн öти юöр висьтавлам. И тайö юöрас тi эскинныд. 12 Ми висьтавлам ловзьöм Кристос йылысь. Сiдзкö, мыйла тiян пиысь öткымынöн шуöны, кулöмаяс пö оз ловзьыны? 13 Öд кулöмаяс кö оз ловзьыны, сiдзкö, Кристос тшöтш эз ловзьы. 14 Кристос кö эз ловзьы, сiдзкö, миян висьтавлöмыс весьшöрö, и тiян эскöмныд тшöтш весьшöрö. 15 Сiдзкö, ми лоам Ен йылысь ылöгсö висьталысьясöн, öд ми висьтавлам, мый Енмыс ловзьöдiс Кристосöс. Но тi кö шуанныд, кулöмаяс пö оз ловзьыны, сiдзкö, Енмыс эз ловзьöд Кристосöс. 16 Öд кулöмаяс кö оз ловзьыны, сiдзкö, Кристос тшöтш эз ловзьы. 17 Но Кристос кö эз ловзьы, сiдзкö, тi эсканныд весьшöрö, и тiян мыжъясныд пыр на тiян вылын. 18 Сiдзкö, Кристослы эскысьяс, кодъяс кулiсны нин, пыр кежлö вошисны. 19 Ми кö Кристос вылö лача кутам сöмын тайö мувывса олöмас, сiдзкö, ми став йöзсьыс на коньöрöсь. 20 Но Кристос ловзис кулöмысь, Сiйö медводдзаöн ловзис кулöмаяс пöвстысь. 21 Кулöмыс мортсянь лоис, кулöмысь ловзьöмыс тшöтш мортсянь лоис. 22 Адамсянь лоис став йöзлы кулöмыс, Кристоссянь лоö став йöзлы ловзьöмыс. 23 Но быдöн ас кадö ловзяс: медводз ловзис Кристос, сэсся Сылöн локтiгас ловзясны Кристослöн войтырыс. 24 Кор Кристос бырöдас быдпöлöс ыджыдалысьясöс, веськöдлысьясöс да вынаясöс, сэки Ассьыс ыджыдалан вынсö сетас Ен Батьыслы. Та бöрти лоö пом. 25 Öд Енмыс шуис ыджыдавны Кристослы сэтчöдз, кытчöдз Енмыс оз пукты Сы кок улö став паныд мунысьсö. 26 Медбöръя паныд мунысьыс – кулöм, и сiйöс лоö бырöдöма. 27 Öд «Енмыс ставсö пуктiс Сы кок улö». Кöть шуöма "ставсö пуктiс", но Ачыс Енмыс оз пыр тайö "став" лыдас. Öд Ачыс Сiйö ставсö пуктiс Кристос кок улö. 28 Кор Енмыс ставсö сетас Кристос кипод улö, сэки Ачыс Пиыс сетас Ассьыс ыджыдалан вынсö Енмыслы, кодi ставсö пуктiс Сы кок улö. Тадзи Енмыс кутас ыджыдавны быдöн вылын да быдлаын. 29 Мыйла йöзыс кулöмаяс пыдди пыртчöны? Öд кулöмаяс кö оз ловзьыны, сiдзкö, мыйла на пыдди пыртчынысö? 30 Сiдзкö, мыйла быд кадö ми паныдасям кулöмыскöд? 31 Вокъяс, ме быд лун кулан выйын – тайö збыль, кыдзи збыль и сiйö, мый ме ошйыся тiянöн Исус Кристос Господьным водзын. 32 Ме кö мöвпалi тайö мувывса йöзыс моз, Ефес карын эськö эг кут тышкасьны зверъяскöд, öд тайö меным нинöм оз сет. Кулöмаяс кö оз ловзьыны, сiдзкö, «кутам сёйны-юны, öд аски кулам!» 33 Видзчысьöй, мед некод оз ылöдлы тiянöс! «Öд лёк оласногаяс тшыкöдöны бур оласногаöс». 34 Пальöдчöй да олöй бур ногöн, дугдöй вöчны мыжсö! Öд öткымынöн тiян пöвстысь оз тöдны Енсö, ме шуа тайöс тiянöс янöдöм могысь. 35 Кодкö вермас юавны: кыдзи нö ловзяс кулöм мортыс? Кутшöм лоö сылöн вир-яйыс? 36 Вежöртöмöй! Кöйдысыс кö оз кув, сэки нинöм оз ловзьы. 37 Кöдзигад тэ он асьсö быдтассö кöдз, а сöмын кöйдыссö. Тайö вермас лоны шобдiлöн либö кутшöмкö мöд быдмöглöн кöйдыс. 38 Сэсся Енмыс Ас кöсйöм сертиыс сетö тайö кöйдысыслы аслыспöлöс паськöм. Быдпöлöс кöйдыслы Сiйö сетö аслыспöлöс паськöм. 39 Быд ловъя олысьлöн аслыспöлöс вир-яй. Шуам, мортлöн вир-яйыс торъялö пемöсысь, черилöн – лэбачысь. 40 Эмöсь енэжвывсаторъяс, эмöсь и мувывсаторъяс, но налöн вир-яйыс торъялö öта-мöдсьыныс. Енэжвывсалöн дзирдлуныс öтипöлöс, а мувывсалöн – мöдпöлöс. 41 Шондi öти ногöн дзирдалö, тöлысь да кодзувъяс – мöд ногöн, но быд кодзув ас ногыс дзирдалö. 42 Тадзи артмö тшöтш кулöмаяслöн ловзигöн: гуавсьö сiсьмана вир-яй, ловзьö сiсьмытöм. 43 Гуавсьö мисьтöм вир-яй, ловзьö дзирдалана, гуавсьö жеб вир-яй, ловзьö вына вир-яй. 44 Гуавсьö мувывса вир-яй, ловзьö енэжвывса. Эм кö мувывса вир-яй, эм и енэжвывса. 45 Гижöдыс висьталö: «Медводдза мортыс, Адам, лоис ловъя олысьöн», а мöд Адамыс лоис олöмсö сетысь Лолöн. 46 Медводдза олысьыс вöлi мувывса, эз енэжвывса, сэсся енэжвывсаыс локтiс. 47 Медводдза мортыс вöлi мувывса, сiйöс вöлi муысь вöчöма. Мöд мортыс – Господь, кодi локтiс енэжсянь. 48 Сiдзкö, мувывса олысьяс öткодьöсь муысь вöчöмторйыскöд. А енэжвывса олысьяс öткодьöсь енэжсянь Локтысьыскöд. 49 Öнi ми öткодьöсь муысь вöчöмторйыскöд, коркö лоам öткодьöсь енэжсянь Локтысьыскöд. 50 Вокъяс, кöсъя висьтавны тiянлы, мый тайö мувывса вир-яйлы оз вичмы Енлöн Юраланiныс, öд тайö вир-яйыс сiсьмана. 51 Висьтала тiянлы гусятор: ми огö ставным кулöй, но ставным вежсям. 52 Тайö лоö зэв öдйö, син лапнитiгкостi, трубалöн бöръя букöстiгöн. Труба букöстас, и кулöмаяс ловзясны сiсьмытöмöн, а ми – вежсям. 53 Öд тайö сiсьмана вир-яйлы колö вежсьыны сiсьмытöмö, да кулана вир-яйлы – кувлытöмö. 54 Кор тайö сiсьмана вир-яйыс вежсяс сiсьмытöмö да кулана вир-яйыс – кувлытöмö, сэки инасны Гижöдысь кывъясыс: – Кулöмсö бырöдöма, вермöма пыр кежлö! 55 Кулöм, кöнi тэнад чушканыд? Ад, кöнi тэнад вермöмыд? 56 Кулöмыслöн чушканыс – мыж, а вынсö мыжыслы сетö Индöд. 57 Ошкöм Енлы! Миян Господь Исус Кристос пыр Сiйö сетö миянлы вермöм! 58 Муса вокъяс, сулалöй зумыда да вöрзьывтöг. Быд кадö кесъялöй Господьлы сьöлöмсяньныд. Тöдöй, мый тi кесъяланныд Господьлы онö весьшöрö.
1 Öнi сёрнитышта вежа войтырлы сьöм чукöртöм йылысь. Та йылысь ме висьтавлi нин галатияса вичкоясын. Сiдзкö, вöчöй менам висьталöм серти: 2 вежонса медводдза лунö быдöн торйöдöй сьöмнытö мыйта верманныд да видзöй сiйöс ас орданыд. Сэки менам локтiгкежлö тiян лоö чукöртöма нин. 3 Бöрйöй ас пöвстсьыныд некымын мортöс. Кор воа тiянö, сета налы эскöдан гижöд да мöдöда найöс Ерусалимö, медым нуны сэтчö чукöртöм сьöмнытö. 4 Ковмас кö аслым сэтчö муннысö, накöд тшöтш муна. 5 Македония кытшовтöм бöрын локта тiян дiнö, öд ме бöрсö кöсъя локны Македония пыр. 6 Гашкö, мыйтакö олышта тiян дiнын, гашкö, тöвъя весиг. Сэсся водзö менö мöдöданныд. 7 Ме ог кöсйы аддзöдчывны тiянкöд сöмын мунiгмоз. Ен кö сетас, кöсъя дырджык олыштны тiян дiнын. 8 Ефес карö ме кольчча Ветымынöд лунöдз. 9 Öд Енмыс меным паськыда восьтiс öдзöсъяс уджавны. Дерт, паныд мунысьыс уна жö. 10 Локтас кö тiян дiнö Тимофей, тöждысьöй сы вöсна, медым сылы нинöмысь эз ковмы майшасьны, öд сiйö ме моз кесъялö Господьлы. 11 Энö увтыртöй сiйöс! Отсалöй сылы лöнь сьöлöмöн бöр локны ме дiнö. Танi мукöд вокъяскöд ме виччыся сiйöс. 12 Ме ёна кори Аполос вокöс, медым вокъяскöд тшöтш мунiс тiян дiнö, но öнi оз на кöсйы. Вермыны кутас да, локтас. 13 Лоöй дасьöсь да зумыда эскöй! Лоöй вынаöсь да повтöмöсь! 14 Ставсö вöчöй мусапырысь! 15 Вокъяс, тi тöданныд, мый Степан да сылöн гортсаыс лоины Акайяын медводдза эскысьясöн. Найö сетiсны асьнысö кесъявны вежа войтырлы. Кора тiянöс: 16 кывзысьöй налысь, тшöтш накöд öтвыв уджалысьяслысь да кесъялысьяслысь. 17 Степан, Фортунат да Акаик воисны татчö. Меным зэв нимкодь таысь, öд найö öнi тiян пыдди. 18 Найö кыпöдiсны менсьым лолöс, тшöтш тiянлысь. Вылö пуктöй татшöм йöзсö! 19 Тiянлы ыстöны чолöм асияса вичкояс. Господь нимöн сьöлöмсяньныс чолöмалöны тiянöс Акил, Прискилла да на ордö чукöртчысьяс. 20 Тiянлы ыстöны чолöм став вокъяс. Чолöмалöй öта-мöднытö вежа окыштöмöн! 21 Ме, Павел, аслам киöн гижа тiянлы чолöмöс. 22 Кодi оз радейт Господь Исус Кристосöс, сiйöс лоö ёрöма. Маран-афа. 23 Миян Господь Исус Кристослöн буралöмыс тiянкöд. 24 Менам муслунöй ставныдкöд, кодъяс Исус Кристос пытшкынöсь. Аминь.
1 Гижö Павел, Ен кöсйöм серти Исус Кристослöн апостол. Тимофей воккöд ми чолöмалам тiянöс, коринфса вичкоöс, да Акайя пасьтала став вежа войтырöс. 2 Буралöм да лöнь олöм тiянлы Ен Батьнымсянь да миян Господь Исус Кристоссянь. 3 Ошкöм Енлы, миян Господь Исус Кристослöн Батьлы. Сiйö – бур сьöлöма Бать да быдторйын бурöдысь Ен! 4 Сiйö бурöдö миянöс быд шог дырйи, медым ми тшöтш вермим бурöдны шогö усьöмаясöс Енсянь бурöдöмöн. 5 Ми уна нуам Кристослысь сьöкыдсö, но та дырйи ми уна и босьтам Кристоссянь бурöдöмсö. 6 Ми кö сьöкыдалам – тiянöс бурöдöм да мездмöм вылö. А мездмöмныд лоö тырвыйö сэки, кор миян моз венанныд сьöкыдлунсö. 7 Та вöсна ми кутам тiян вылö зумыд лача. Енмыс кö бурöдö миянöс – тiянлы тшöтш вичмö бурöдöмыс да мездмöмыс. Ми тöдам, тi кö миян моз нуанныд сьöкыдсö, сiдзкö, миянлы моз тiянлы тшöтш вичмас бурöдöмыс. 8 Вокъяс, ми кöсъям, мед тi тöдiнныд, кутшöм сьöкыдлунъяс суисны миянöс Асияын. Миянлы вöлi сэтшöм сьöкыд, эгö чайтöй весиг ловйöн кольны. 9 Асьнымöс лыддим нин кулöмаясöн, эз вöв некутшöм лача ас выланым, сöмын Ен вылö, кулöмаясöс Ловзьöдысь вылö. 10 Сiйö видзис миянöс кулöмысь да водзö на видзас. Тi кö отсаланныд миянлы кевмысьöмъяснаныд, ми лача кутам, мый Енмыс нöшта на видзас. Сэки унаöн кутасны ошкыны Енсö миян дiнö буралöмысь. 12 Ми ошйысям, мый тайö муюгыдас олысьяскöд, торйöн нин тiянкöд, вöлiм восьсаöсь да веськыдöсь, олiм Енлысь кывзысьöмöн. Та вöсна миян сьöлöмным оз мыжды миянöс. Ми öд эгö асланым мывкыд серти олöй, миянöн веськöдлiс Енлöн буралöмыс. 13 Ми гижам тiянлы сöмын сiйö, мый лыддянныд да гöгöрвоанныд. Кута лача, тi понданныд тырвыйö гöгöрвоны миянöс. 14 Дерт, тi мыйтакö öнi гöгöрвоанныд нин миянöс. Сiдзкö, миян Господь Исус Кристослöн лунö ми вермам öтмоза ошйысьны öта-мöдöн. 15 Татчö зумыда эскöмöн ме водзынджык нин кöсйи волыны тiян дiнö, медым Енлöн буралöмыс кыкысь вичмис тiянлы. 16 Ме öд кöсйи кежавны тiян дiнö Македонияö мунiгöн, тшöтш бöрсö локтiгöн. Сэсся тi эськö водзö мöдöдiнныд менö Юдеяö. 17 Гашкö, тадзи мöвпалiгöн ме кокньыд мывкыда вöлi? Гашкö, чайтанныд, тайö кöсйöмыс менам ассянь вöлi? Гашкö, менам öтпырйö артмö "сiдз" и "абу сiдз"? 18 Ен тöдö, мый тайö збыль: ме некор эг шулы öтпырйö "сiдз" и "абу сiдз". 19 Силуанкöд да Тимофейкöд ми висьтавлiм тiянлы Ен Пи йылысь – Исус Кристос йылысь. Сiйö некор эз шулы öтпырйö "сiдз" и "абу сiдз". Сы пытшкын ставыс вöлi "сiдз". 20 Енлöн став кöсйысьöмыс збыльмис Исус Кристос пыр. Та вöсна Енмöс ошкöмöн ми шуам Сылы Исус Кристос пыр "Аминь". 21 Енмыс, кодi топыда йитö миянöс да тiянöс Кристос пытшкын, мавтыштiс миянöс: 22 Сiйö пасйис миянöс да мöдöдiс миян пытшкö Ассьыс Ловсö, кодi эскöдö миянöс, мый Енлöн став кöсйысьöмыс збыльмас. 23 Ме висьтала тайöс Ен водзын: сöмын тiянöс жалитöм вöсна ме öнöдз эг волы Коринфö. 24 Ми огö кöсйöй веськöдлыны тiян эскöмöн, сöмын кöсъям отсавны тiянлы, мед тi верминныд нимкодясьны. Öд ми тöдам, мый тiян эскöмныд зумыд.
1 Ме ог кöсйы бара шогöдны тiянöс. Та вöсна шуи аслым, мый öнi ог на лок тiян дiнö. 2 Öд ме кö шогöда тiянöс, кодi менö гажöдас? Оз-ö сiйö, кодöс ме шогöдi. 3 Дзик та йылысь ме гижлi тiянлы, медым тiянö воа да, меным эз ковмы шогсьыны сiйö йöзыс вöсна, код вöсна колö нимкодясьны. Öд ме тöда, меным кö нимкодь, долыд тшöтш ставныдлы тiянлы. 4 Воддза гижöдсö ме гижи тiянлы ёна шогсьöмöн, сьöлöм дойöн да кыз синваöн. Ме гижи сiйöс эг тiянöс шогöдöм понда, но медым тi гöгöрвоинныд, кутшöм тi мусаöсь меным. 5 Кодкö шогöдiс кö менö, сiйö эз сöмын менö шогöд. Содтавтöг шуа, сiйö шогöдiс мыйтакö тшöтш ставнытö тiянöс. 6 Сэтшöмыслы тырмана нин тiянсянь мыждöмыс. 7 Бурджык, тi кö прöститанныд да бурöданныд сiйöс, медым ёна шогсьöмысла дзикöдз эз нюкыртчы. 8 Та вöсна кора тiянöс: петкöдлöй сы дiнö ассьыныд муслунтö. 9 Сiйö гижöдсö ме гижлi тiянлы, медым тöдмавны, быдторйын-ö тi кывзысянныд. 10 Тi кö прöститанныд кодöскö, ме тшöтш. Ме öд прöстита сiйöс Кристос водзын, эм кö мыйысь прöститнысö. Ме вöча тайöс тiян вöсна, 11 медым сöтана эз ылöдлы миянöс, ми öд тöдам сылысь наян мöвпъяссö. 12 Кор локтi Троада карö висьтавлыны Кристос йылысь Бур Юöрсö, Господь восьтiс меным öдзöс сэнi уджавны. 13 Но сьöлöмöй ёна майшасис, Тит вокöс сэтысь эг аддзы да. Сэки ме янсöдчи сэтчöс йöзкöд да мöдöдчи Македонияö. 14 Ошкöм Енлы! Кристос пыр Сiйö быд кадö сетö миянлы вермöм да миян пыр быдлаын паськöдö Кристос йылысь чöскыд дука тöдöмлунсö. 15 Енмыслы ми – Кристослöн чöскыд дука öвтанторъяс. Тайö дуксö тöдöны мездмöмаяс и вошöмаяс. 16 Öтияслы тайö дукыс вайö кулöм, а мöдъяслы – олöм. Но кодi шогмас та вылö? 17 Мукöдыс моз ми огö висьтавлöй Енлысь Кывсö дон вылö. Ми висьтавлам сiйöс Ен водзын веськыда, öд ми – Кристослöн кесъялысьяс да Енсянь мöдöдöмаяс.
1 Гашкö, миянлы выльысь тöдмасьны тiянкöд? Гашкö, мукöдыслы моз миянлы тшöтш колö вайны тiянлы эскöдан гижöдсö? Гашкö, асьныд сiйöс сетанныд? 2 Миян эскöдан гижöдыс – тi. Тайö гижöдсö гижöма миян сьöлöмö, сiйöс тöдöны да лыддьöны став йöзыс. 3 Быдöнлы тыдалана, мый тi – Кристослöн гижöдыс. Сiйöс гижöма Ен Лолöн, абу чернилаöн, гижöма морт сьöлöмö, абу шыльöдöм из вылö. Татшöм гижöднас тi лоинныд миян кесъялöм пыр. 4 Татшöм зумыд лача ми кутам Ен вылö Кристос пыр. 5 Ми лыддям, мый асьным ми нинöм вылö огö туйöй, нинöм огö сяммöй вöчнысö, но Енмыс сетö миянлы сямлунсö. 6 Сiйö сетiс миянлы сямлун кесъявны Выль Йитöдлы, кöнi веськöдлö Лов, а оз шыпаса Индöд. Öд шыпаса Индöдыс вайö кулöм, а Лолыс сетö олöм. 7 Индöдсö вöлi гижöма шыльöдöм из вылö. Тайö Индöдсö Мöисейлы сетiгöн Енмыслöн дзирдлуныс сэтшöма югдöдiс Мöисейлысь чужöмсö, мый Израиль войтыр весиг эз вермыны видзöдны сы вылö. Но тайö дзирдлуныс вöлi сöмын регыдъя. Сiдзкö, кулöмö вайöдысь Индöдлы кесъялöмыс кö вöлi сэтшöм дзирдалана, 8 сэки кымын пöв дзирдаланаджык Ловлы кесъялöмыс? 9 Мыждана Индöдлы кесъялöмыс кö вöлi дзирдалана, сэки кымын пöв дзирдаланаджык веськыдлуныслы кесъялöмыс. 10 Та вöсна öнiя дзирдлуныс вевттьö воддзасö. 11 Сiдзкö, воддзаыс, быранаыс кö вöлi сэтшöм дзирдалана, сэки кымын пöв дзирдаланаджык öнiяыс, бырлытöмыс! 12 Та вылö лача кутöмöн ми сёрнитам повтöг. 13 Ми огö вöчöй Мöисей моз. Сiйö тупкылiс ассьыс чужöмсö вевттьöдöн, медым Израиль войтыр эз аддзы дзирдлуныслысь бырöмсö. 14 Налöн пемдöма вежöрныс. Важ Йитöд йылысь Гижöдсö лыддигöн на вылын öнöдз куйлö тайö вевттьöдыс, öд сiйöс вештö сöмын Кристос. 15 Мöисейлысь Индöдсö лыддигöн вевттьöдыс öнöдз на куйлö сьöлöм выланыс. 16 Но мортыс кö бергöдчö Господь дiнö, сэки вевттьöдыс босьтсьö. 17 Господь эм Лов. Кöнi Господьлöн Лолыс, сэнi мездлун. 18 Ми ставным чужöмнымöс вевттьытöг видзöдам Господьлöн дзирдлун вылö да рöмпöштанысь моз аддзам Сылысь дзирдлунсö. Сы вылö видзöдöмöн ми лунысь-лун вежсям да кутам дзирдавны Сы моз жö. Татшöмнас вöчö миянöс Господьлöн Лолыс.
1 Аслас буралöмыс кузя Енмыс сетiс миянлы тайö кесъялöмсö, та вöсна ми огö öшöдöй юрнымöс. 2 Ми огö вöчöй гусясö да янöданасö, огö ылöдчöй, Енлысь Кывсö висьтавлам торкавтöг. Ми восьсöн висьталам збыльсö да быдöнлы сетам донъявны асьнымöс Ен водзын. 3 Кодлыкö тупкыса кö миян буръюöртöмыс, сiйö тупкыса вошöмаяслы. 4 Найö оз эскыны, öд тайö муюгыдас ыджыдалысь омöльыс пемдöдöма налысь вежöрсö, мед найö эз аддзыны Бур Юöрлысь югыдсö, кодi восьтö Кристослысь дзирдлунсö, а Кристос – Енлöн пертасыс. 5 Ми огö ас йылысь висьтавлöй, а висьтавлам Исус Кристос йылысь, мый Сiйö – Господь. Сiйö мöдöдiс миянöс кесъявны тiянлы. 6 Енмыс, кодi тшöктiс пемыдас öзйыны югыдыслы, югдöдiс миянлысь сьöлöмнымöс, медым ми вермим аддзыны Енлысь дзирдлунсö Исус Кристос чужöмбанысь. 7 Тайö озырлунсö ми новлöдлам ас пытшканым, кыдзи сёй дозъясын, медым петкöдлыны, мый тайö ыджыдсьыс-ыджыд выныс Енмыслöн, а абу миян. 8 Миянöс быд боксянь топöдöны, но йöршитны оз вермыны. Ми шöйöвошлам, но лачанымöс огö воштöй. 9 Миянöс вöтлöны, но Енмыс оз эновт миянöс. Миянöс омöльтöны, но бырöдны оз вермыны. 10 Асланым вир-яйын ми пыр новлöдлам Господь Исуслысь кулöмсö, медым миян вир-яйын тыдовтчис тшöтш Сылöн олöмыс. 11 Ми ловъяöсь, но быд кадö кулан выйынöсь Исус вöсна, медым миян кулана вир-яйын тыдовтчис Сылöн олöмыс. 12 Тадзи кулöмыс вöчö ассьыс уджсö миян пытшкын, а олöмыс – тiянын. 13 Гижöдыс висьталö: «Ме эски, та вöсна и висьталi». Миян пытшкын тайö жö эскан лолыс. Ми тшöтш эскам, та вöсна и висьталам. 14 Ми тöдам, мый Господь Исусöс Ловзьöдысь Исус пыр ловзьöдас тшöтш миянöс да сувтöдас тiянкöд Ас водзас. 15 Став сьöкыдсö ми нуам тiян вöсна, медым Енлöн буралöмыс содiс да вичмис уналы на. Сэки унаöн кутасны аттьöавны да ошкыны Енсö. 16 Та вöсна ми огö öшöдöй юрнымöс. Кöть миян ортсысаыс, вир-яйным, сiсьмö, но пытшкöссаыс лунысь-лун выльмö. 17 Миян сьöкыдалöмыс кокньыд, сöмын регыдъя, но таысь вичмас миянлы помтöм-дортöм да бырлытöм дзирдлун. 18 Ми видзöдам тыдавтöмыс вылö, огö тыдаланаыс вылö. Öд тыдавтöмыс бырлытöм, а тыдаланаыс бырана.
1 Ми тöдам: тайö мувывса чомйыс, миян вир-яйным, кö киссяс, Енмыс сетас миянлы енэжас оланiн – киöн вöчтöмöс, бырлытöмöс. 2 Öнi ми сьöкыда ышлолалам, öд ёна кöсъям овмöдчыны енэжвыв оланiнö 3 да пасьтавны выльсö. Сэки ми огö лоöй пасьтöмöсь. 4 Тайö вир-яй чомъяс олiгöн ми сьöкыда ышлолалам, öд огö кöсйöй пöрччысьны, но кöсъям пасьтавны выльсö, медым олöмыс вевттис куланасö. 5 Дзик та вылö Енмыс дасьтiс миянöс да сетiс миянлы Ассьыс Ловсö. Тайö Лолыс эскöдö миянöс, мый Енлöн став кöсйысьöмыс збыльмас. 6 Сiйöн ми пыр повтöмöсь, кöть тöдам, мый тайö вир-яяс олiгöн ми ылынöсь Господьысь. 7 Öд ми олам эскöмöн, огö аддзананас. 8 Та вöсна ми збыльысь повтöмöсь! Ми кöсъям öдйöджык петны тайö вир-яйсьыс да овмöдчыны гортö, Господь дiнö. 9 Та вöсна, олам-ö Сы дiнын али огö на, сьöлöмсянь зiлям шогмыны Господьлы. 10 Öд миянлы быдöнлы ковмас сувтны Кристослöн ёрд водзö. Сэки быдöнöс лоö мыждöма уджъясыс серти: бурсö али лёксö мортыс вöчис вир-яйын олiгас. 11 Ми тöдам, мый сэтшöм Господьысь полöмыс, та вöсна зiлям эскöдны тшöтш мукöдсö. Енмыслы ми восьсаöсь, чайтам, тiян сьöлöмлы тшöтш восьсаöсь. 12 Ми огö кöсйöй выльысь петкöдлыны асьнымöс тiян водзын, сöмын сетам тiянлы позянлун ошйысьны миянöн, мед тi верминныд вочавидзны налы, кодi ошйысьö мыйöнкö ортсысанас, а оз пытшкöссанас. 13 Ми кö ас вежöрынöсь – тайö тiянлы, абу кö – Енмыслы. 14 Миянöн веськöдлö Кристослöн муслуныс, сiйöн тадзи мöвпалам, мый öти кö кулiс ставныс вöсна, сiдзкö, ставныс кулiсны. 15 Кристос кулiс ставныс понда, медым олысьяс эз нин ас вöснаныс овны, но олiсны на понда Кулысь да Ловзьысь вöсна. 16 Öнiсянь ми некодöс огö донъялöй морт видзöдлас серти. Водзын кö Кристосöс донъялiм морт видзöдлас серти, öнi огö. 17 Сiдзкö, кодi Кристос пытшкын – сiйö выль олысь. Важыс кольöма, öнi ставыс выль. 18 Ставыс Енсянь. Исус Кристос пыр Енмыс бурöдiс миянöс Аскöдыс да мöдöдiс миянöс висьтавлыны бурасьöмыс йылысь. 19 Исус Кристос пыр Енмыс бурöдiс Аскöдыс став йöзсö да оз нин лыддьы найöс мыжаöн. Енмыс сетiс миянлы бурасьöмыс йылысь кывсö. 20 Сiдзкö, ми – Кристослöн мöдöдöмаяс, и Ачыс Енмыс шыасьö миян пыр йöзыс дiнö. Кристос нимöн ми корам: бурасьöй Енмыскöд! 21 Кристослöн эз вöв некутшöм мыж, но Енмыс пуктiс Сы вылö миянлысь мыжъяснымöс, медым Сы пыр ми лоим Ен водзын веськыдöн.
1 Ми, Енкöд öтвыв уджалысьяс, корам тiянöс: сибöдöй Енлысь буралöмсö, мед сiйö эз ло весьшöрö. 2 Öд Енмыс висьталö: – Ме кылi тэнö бур кадö, отсалi тэныд мездман лунö. Со öнi бур кадыс, со öнi мездман луныс. 3 Ми некодлы огö сетöй помка шуасьны миян вылö, медым эз ло лёкöдöма кесъялöмнымöс. 4 Мöдарö, ми быдторйын петкöдлам асьнымöс Енлöн кесъялысьясöн: ми нуам сьöкыдсö, шогсö, дзескöдöмсö. Ми зумыдöсь, 5 кор миянöс нöйтöны, пуксьöдöны дзескыдiнö, вöтлöны, кор ми уджалам ныр вылö усьтöдз, видзалам, коллялам узьтöм войяс. 6 Ми олам сöстöма. Миян эм тöдöмлун, терпитöм, бурлун. Миянöн веськöдлö Вежа Лов да сьöлöмсянь муслун. 7 Ми висьталам збыльсö, ставсö вöчам Ен вынöн. Миян вермасянторным – веськыдлун. Сiйöн вермасям и водзсасям. 8 Ми дасьöсь сибöдны ошкöмсö и янöдöмсö, нимöдöмсö и лёкöдöмсö. Миянöс лыддьöны пöръясьысьясöн, но ми веськыда сёрнитам. 9 Ми огö нималöй, но миянöс ставныс тöдöны. Миянöс лыддьöны кулöмаясöн, но ми ловъяöсь. Миянöс нöйтöны, но огö кулöй. 10 Миянöс шогö вöйтöны, а ми пыр нимкодясям. Ми гöльöсь, но унаöс озырмöдам. Миян нинöм абу, но ставыс эм. 11 Коринфсаяс, ми сёрнитам тiянкöд веськыда, миян сьöлöмным восьса тiянлы. 12 Ми восьтiм тiянлы сьöлöмнымöс, но тiян сьöлöмныд тупкыса миянлы. 13 Ме шуа тiянлы аслам ныв-пилы моз: воча восьтöй сьöлöмнытö миянлы. 14 Энö сюйöй юрнытö öти сийöс улö эскытöмъяскöд. Вермас öмöй йитны мыйкö веськыдлунсö лёкыскöд? Эм-ö öткодьлуныс югыдыслöн пемыдыскöд? 15 Вермас öмöй воны öти кывйö Кристос Велиаркöд? Мый вермас йитны эскысьöс эскытöмкöд? 16 Вермасны öмöй сулавны идолъяс Енлöн крамын? Öд тi – ловъя Енлöн крамыс. Енмыс шуö: – Овмöдча на пытшкö да понда ветлыны накöд. Ме лоа налöн Енмöн, а найö – Менам войтырöн. 17 Сiдзкö: – Петöй на пöвстысь да ылыстчöй наысь, – висьталö Господь. – Энö инмöдчöй пежас, сэки Ме сибöда тiянöс. 18 Ме лоа тiянлы Батьöн, а тi – Меным ныв-пиöн, – висьталö Господь, Ставсöкутысь.
1 Мусаяс, со мыйта кöсйысьöм Енмыс сетöма миянлы! Сiдзкö, весалам ассьыным вир-яйнымöс да ловнымöс став пежсьыс. Кутам овны Енсьыс полöмöн, Сылöн вежалуныс мед тырвыйö лоö миян пытшкын! 2 Восьтöй миянлы сьöлöмнытö, öд ми некодöс эгö дöзмöдöй, некодлы лёксö эгö вöчöй, некод помысь эгö озырмöдчöй. 3 Тайöс висьтала ог тiянöс мыждöм могысь. Öд водзынджык тiянлы шулi нин: тi миян сьöлöмынöсь, ми дасьöсь овны и кувны тiянкöд öтвылысь. 4 Ме ёна эска тiянлы да ошйыся тiянöн. Шогъяс вылö видзöдтöг ме ёна нимкодяся, öд тi ёна бурöданныд менö. 5 Македонияö воöм бöрын миян эз вöв некутшöм шойччöг. Миянлы быд боксянь вöлi сьöкыд: ортсысянь – усьласисны, а пытшкöсаным вöлi полöм. 6 Но Енмыс, ловнас усьöмаясöс Ышöдысь, ышöдiс миянöс Тит воöмöн, 7 и эз сöмын тайöн. Миян ловным кыпалiс тшöтш сыысь, мый тi ышöдöмныд Титöс. Сiйö висьталiс миянлы, тi пö ёна гажтöмтчанныд меысь, ёна шогсянныд да доръянныд менö. Таысь меным нöшта на нимкодь лои. 8 Дерт, менам сьöлöмöй нормылiс, мый аслам гижöдöн шогö уськöдi тiянöс. Но öнi ог нин шогсьы, öд ме аддза, мый гижöдыс шогöдлiс тiянöс сöмын кад кежлö. 9 Ме нимкодяся ог тiян шогö усьлöм понда, а нимкодяся сы понда, мый тiян шогсьöмныд бергöдiс тiянöс мыжъяссьыныд. Тайö шогсьöмыс вöлi Ен кöсйöм серти, сiдзкö, нинöм лёксö ми эгö вöчöй тiянлы. 10 Öд Ен кöсйöм серти шогсьöмыс бергöдö мыжъясысь, а тасянь – мездмöмыс. Сiдзкö, та йылысь жалитны оз ков! А мувывса шогъясыс вайöдöны кулöмöдз. 11 Видзöдлöй, мый вайис тiянлы Ен кöсйöм серти шогсьöмыс: кутшöма тi зiлянныд петкöдлыны ассьыныд мыжтöмлуннытö, дöзманныд лёк вöчысь вылö да поланныд лёк вöчöмысь! Кутшöма тi гажтöмтчанныд миянысь, ловнаныд ыпъяланныд да кöсъянныд мыждыны лёк вöчысьöс! Тi быд боксянь петкöдлiнныд ассьыныд сöстöмлуннытö. 12 Ме гижи тiянлы эг сы вöсна, кодi вöчис лёксö либö кодлы вöчисны лёксö, а гижи тiянлы, медым тi гöгöрвоинныд Ен водзын, кутшöма ми тöждысям тiян вöсна. 13 Сiдзкö, тiян долыдлунныд долыдмöдiс и миянöс. Но нöшта на долыд лоис Титлöн нимкодясьöмысь, öд сылöн сьöлöмыс оз нин майшась тiян вöсна. 14 Ме ошйысьлi Тит водзын тiянöн, да меным абу яндзим таысь. Ми ставсö висьтавлiм тiянлы веськыда, и Тит водзын миян ошйысьöмным тшöтш вöлi веськыд. 15 Öнi, тiянöс казьтылiгöн, сылöн сьöлöмас ёнджыка на содö тiян дiнö муслуныс, öд тi ёна кывзысьöмныд сылысь, полöмöн да пыдди пуктöмöн сибöдöмныд сiйöс. 16 Меным нимкодь, мый быдторйын верма тiян вылö лача кутны.
1 Вокъяс, ми кöсъям, мед тi тöдiнныд Енлысь ыджыд буралöмсö македонияса вичкояс дiнö. 2 Налы ёна сьöкыд, но та вылö видзöдтöг найö ёна нимкодясьöны. Найö вывтi гöльöсь, но та дырйи найö зэв лышкыдöсь. 3 Ме тöда: найö сетöны мыйтöм вермöны, весиг верманасьыс унджык на. 4 Найö ёна корисны миянöс босьтны насянь сетöмторсö, медым отсавны вежа войтырлы. 5 Найö сетiсны ёна унджык миян виччысьöм дорысь. Ен кöсйöм серти найö сиисны асьнысö медводз Господьлы, сэсся миянлы. 6 Та вöсна ми корим Титöс водзö вöчны тайö бур уджсö тiян пöвстын да вайöдны сiйöс помöдз. 7 Тi озырöсь быдторнас: эскöмöн, сёрнитны кужöмöн, тöдöмлунöн, зiльöмöн, миян дiнö муслунöн. Сiдзкö, лоöй лышкыдöсь тшöтш отсöг сетiгöн. 8 Тайö абу тшöктöм. Ме висьтала тiянлы мукöдыслöн зiльöм йылысь, медым тöдмавны, сьöлöмсянь-ö тi радейтанныд йöзсö. 9 Тi тöданныд миян Господь Исус Кристослысь буралöмсö. Сiйö вöлi озыр, но гöльмис тiян вöсна, медым Аслас гöльлунöн озырмöдны тiянöс. 10 Ме туйдöда тiянöс, öд тайö тiянлы бур вылö. Тi кольöм воö нин кутiнныд вöчны тайö уджсö, и вöчинныд сiйöс окотапырысь. 11 Тi ёна кöсйинныд вöчны тайö уджсö, сiдзкö, вöчöй сiйöс позянлун сертиныд да вайöдöй сiйöс помöдзыс! 12 Мортыс кö сетö сьöлöмсяньыс, сылысь сетöмторсö донъялöны эмлуныс серти, а оз абутöмлуныс серти. 13 Ме ог кöсйы сьöктöдны тiянöс, медым мукöдыслы вöлi кокньыдджык, но кöсъя, медым быдöнлы вöлi öтмоза. 14 Öнi тiян озырлунныд вевттяс налысь тырмытöмсö, а мöдысь налöн озырлунныс вевттяс тiянлысь тырмытöмсö. Тадзи быдöнлы лоö öтмоза. 15 Гижöдыс висьталö: Уна чукöртысьлöн эз вöв вывтiыс, этша чукöртысьлöн эз вöв тырмытöмыс. 16 Ошкöм Енлы! Сiйö пуктöма Тит сьöлöмö тiян вöсна ме кодь жö тöждысьöм. 17 Тит мунö тiян дiнö оз сöмын менам корöм вöсна. Сiйö ёна тöждысьö тiян вöсна, та понда сiйö мунö ас кöсйöм сертиыс. 18 Сыкöд ми мöдöдам нöшта öти вокöс. Быд вичко ёна ошкö сiйöс Бур Юöр висьтавлöмысь. 19 Вичкояс бöрйисны тайö воксö ветлыны миянкöд, медым чукöртны сетöмтор. Тайö уджсö ми вöчам Господьöс ошкöм могысь. Тайöн петкöдлам, мый ми дасьöсь отсасьны тiян моз. 20 Ми огö кöсйöй, медым тайö уна сетöмторсö чукöртiгöн кодкö шуасис миян вылö. 21 Ми ставсö зiлям вöчны веськыда огö сöмын Господь водзын, тшöтш йöзыс водзын. 22 Тит да тайö вокыскöд ми мöдöдам нöшта öтиöс. Ассьыс зiльöмсö сiйö петкöдлiс унаысь да унаторйын. Сiйö кутö тiян вылö ыджыд лача, та вöсна öнi ёнджыка на зiльö отсасьны тiянлы. 23 Шуны кö Тит йылысь, сiйö – менам уджъёрт, сыкöд öтвыв ми кесъялам тiянлы. Мукöд вокъяссö мöдöдiсны вичкояс. Налöн олöмыс вайö Кристослы ошкöм. 24 Сiдзкö, петкöдлöй на дiнö ассьыныд муслунтö. Сэки быд вичко аддзас, мый ми ошйысям тiянöн огö весьшöрö.
1 Чайта, меным оз ков гижны тiянлы, мед отсасинныд вежа войтырлы. 2 Ме тöда тiянлысь зiльöмтö. Македонияса водзын ме ошйыси, мый тi, акайяса, дасьöсь сетны отсöг кольöм восянь нин. Тiян сьöлöмсянь тöждысьöмныд унаöс ышöдiс та вылö. 3 Ме мöдöда тiян дiнö вокъясöс, медым тiянöн ошйысьöмöй эз ло весьшöрö. Ме тiянлы шулi нин: лоöй дасьöсь. 4 Öд мекöд тшöтш локтасны кö Македонияысь эскысьяс, а тi абу на дасьöсь, миянлы юр яндзим лоö, ог нин шу тiян йылысь. Ми öд ёна ошйысим тiянöн. 5 Та вöсна лыдди коланаöн водзвыв мöдöдны тiян дiнö вокъясöс, медым чукöртны кöсйысьöм сетöмторнытö. Сэки тайö лоö ас кадö дасьтöм да сьöлöмсянь сетöмтор, а оз мырдöн перйöмтор. 6 Тöдöй: этша кöдзысь – этша вундас, уна кöдзысь – уна вундас. 7 Быдöн сетöй сьöлöм тшöктöм сертиныд: энö мырдöн, энö шогпырысь. Öд долыда сетысь муса Енмыслы. 8 Енмыс вына озырмöдны тiянöс быдпöлöс сетöмторнас, медым быд кадö да быдторйын тiян вöлi став коланаыс, да нöшта на верминныд вöчны быдпöлöс бур уджсö. 9 Гижöдыс висьталö: – Сiйö лышкыда сеталiс гöльяслы, Сылöн веськыда вöчöмыс некор оз вун. 10 Кöдзысьлы кöйдыссö Сетысьыс да няньöн Пöткöдысьыс сетö кöйдыссö тшöтш тiянлы. Сiйö быдтö тiянлысь пуктастö да уна пöв содтö тiян веськыда олöмлысь вотöссö, 11 медым тi вöлiнныд озырöсь быдторнас да верминныд лышкыда юксьыны быдöнкöд. Сэки йöзыс кутасны аттьöавны Енсö миян отсöгысь. 12 Ми отсалам вежа войтырлы огö сöмын налöн гöльлун вöсна. Ми отсалам, медым унаöн аттьöалiсны Енсö. 13 Тiянлысь бур вöчöмнытö аддзигöн вежа войтыр кутас ошкыны Енсö, öд тi кывзысьöмöн оланныд Кристослöн Евангелльö серти, мый висьтавланныд. Найö ошкöны Енсö, öд тi лышкыда юксянныд накöд, тшöтш мукöдыскöд. 14 Найö кевмысьöны тiян вöсна да ёна кöсйöны аддзысьлыны тiянкöд, öд тiян пытшкын сы ыджда Енлöн буралöмыс. 15 Ошкöм Енлы шуны вермытöм сетöмторсьыс!
1 Öткымынöн ме йылысь шуöны, мый миян дiнын сiйö рам, а ылын кö – чорыд. Но ме, Павел, шыася тiян дiнö Кристос бурлунöн да мелiлунöн. 2 Кора тiянöс: кывзöй менö, мед тiянö локтiгöн меным эз ковмы чорзьöдчыны. Дерт, öткымынкöд ковмас чорыда сёрнитны, öд найö шуöны, мый ми олам тайö муюгыдсаыс моз. 3 Кöть ми олам тайö муюгыдас, но вермасям огö муюгыдсаыс моз. 4 Миян вермасянторным абу мортсянь, а Енсянь, сыын эм Енлöн выныс. Ми жугöдам сiйöн чорыд мытшöдъяс, ковтöм мöвпъяс, 5 да став кыпöдчöмсö, мый паныд сувтö Енсö тöдмалöмлы. Ми топöдам быдпöлöс мöвпъяс, медым найö кывзысисны Кристослысь. 6 Ми дасьöсь мыждыны быдпöлöс кывзысьтöмлунысь, но сöмын сэки, кор тi асьныд кутанныд тырвыйö кывзысьны. 7 Видзöдлöй ас выланыд: кодi зумыда эскö, мый сiйö Кристослöн, мед тöдö: ми тшöтш Кристослöн. 8 Меным оз ло яндзим, кута кö ошйысьны миянлы сетöм ыджыдалан вынöн. Öд Господь сетiс тайö вынсö тiянöс ёнмöдöм вылö, а эз жугöдöм вылö. 9 Ме ог кöсйы, мед тi мöвпалiнныд, быттьö аслам гижöдъясöн повзьöдла тiянöс. 10 Öд кодсюрö шуöны: «Гижöдъясас сiйö чорыд да вына, а миян дiнын – жеб, да сёрниыс сылöн вынтöм». 11 Татшöмыс мед тöдö: кутшöмöсь ми гижöдын, сэтшöмöсь и тiян дiнын. 12 Ми огö лысьтöй орччöдны асьнымöс либö öткодявны асьнымöс вывтiасьысьяскöд. Öд найö видзöдöны сöмын ас выланыс да донъялöны асьнысö ас сертиныс. Тадзи вöчигöн найö петкöдлöны ассьыныс мывкыдтöмлунсö. 13 Ми огö ошйысьöй этш тöдтöг. Ошйысям сöмын сiйöн, мый Енмыс шуис вöчны миянлы. Сiйö тшöктiс уджавны тшöтш тiян пöвстын. 14 Ми огö торкалöй Енлысь шуöмсö. Ми кö эськö эгö локтöй тiян дiнö, артмис торкалöм, но ми локтiм тiян дiнö Кристослöн Бур Юöрнас. 15 Ми огö ошйысьöй этш тöдтöг, огö ошйысьöй мукöдлöн уджъясöн, но лача кутам, кор тiян эскöмныд ёнмас, сэки миян уджыс ёнджыка на паськалас тiян пöвстын. 16 Сэки ми водзö мунам висьтавлыны Евангелльöсö, огö кутöй мукöдлöн уджъясöн ошйысьны. 17 Öд шуöма: «Ошйысьысь мед ошйысьö Господьöн!» 18 Шогмана абу сiйö, кодi асьсö ошкö, а кодöс ошкö Господь.
1 Кора тiянöс, терпитыштöй менсьым мывкыдтöмлунöс. Чайта, тi терпитыштанныд менö, 2 öд ме тöждыся тiян вöсна Енлöн тöждысьöмöн. Ме кöсйыси сетны тiянöс дзик öти верöспулы – Кристослы. Кöсъя, мед тi сувтiнныд Сы водзö сöстöм нылöн. 3 Коркö змей наяна ылöдлiс Еваöс. Ме пола, мый тi сы моз жö ылаланныд да воштанныд ассьыныд восьса йитöднытö Кристоскöд. 4 Öд тiян дiнö кö локтас кодкö да кутас висьтавлыны мöд Исус йылысь, код йылысь ми эгö висьтавлöй, либö мöд лов йылысь, кодöс тi энö сибöдлöй, либö мöдпöлöс бур юöр, кодöс энö босьтлöй, сэки тi кокньыда терпитанныд сiйöс. 5 Чайта, ме нинöмöн абу лёкджык тайö "ыджыд апостолъясысь". 6 Гашкö, ме ог сяммы мичаа сёрнитны, но тöдöмлунöй менам тырмымöн. Тайöс ме петкöдлi тiянлы унаысь да уна ногöн. 7 Медым тiянöс вылö пуктыны, ме улö пуктi ачымöс. Гашкö, ме мыжа таысь, мый Енлысь Евангелльöсö висьтавлi тiянлы дон босьттöг? 8 Мед кесъявны тiянлы, мукöд вичкояслысь ме босьтлi сьöм, позьö шуны, куштылi найöс. Кöть меным эз вöв ставыс тырмана, тiянын олiгöн ме некодöс эг сьöктöдлы. 9 Öд став коланаторсö меным сетiсны Македонияысь локтöм вокъяс. Ме некор эг сьöктöдлы, и ог кут сьöктöдны тiянöс. 10 Ме пытшкын Кристослöн збыльыс. Та вöсна верма шуны, мый менсьым ошйысьöмöс став Акайя пасьтала некод оз вермы мырддьынысö. 11 Мыйла ог кöсйы сьöктöдны тiянöс? Гашкö, чайтанныд, ог радейт тiянöс? Енмыс тöдö, тi меным мусаöсь! Но кыдзи вöча öнi, сiдзи и водзö кута вöчны. 12 Ме ог сет некутшöм помка налы, кодъяс ошйысьöны, мый найö кесъялöны Енмыслы миян мозс. 13 Тайö ылöгапостолъясыс сöмын пöръясьöны, шуöны асьнысö Кристослöн апостолъясöн. 14 Но тайö абу шензьöданатор, öд ачыс сöтана петкöдлö асьсö югыдыслöн анделöн. 15 Сiдзкö, нинöмла шензьынысö, сылöн кесйöгъясыс кö петкöдлöны асьнысö веськыда вöчысьясöн. Но налöн помыс лоö уджныс серти. 16 Нöшта висьтала тiянлы: энö лыддьöй менö йöйöн. А лыддянныд кö, сибöдöй менö татшöмнас, мед ме верми на мыйтакö ошйысьны. 17 Дерт, тайö абу Енсянь, но ме кута ошйысьны тiян водзын мывкыдтöм морт моз. 18 Тайö муюгыдас олысьяс унаöн ошйысьöны, сiдзкö, ме тшöтш ошйыся. 19 Öд тi, мывкыда йöз, кокньыда терпитанныд мывкыдтöмъясöс. 20 Тi терпитанныд, кор кесйöдлöны тiянöс, мырддялöны да куралöны тiянлысь, ыджыдалöны тiян вылын да кучкалöны чужöманыд. 21 Меным зэв яндзим, эгö лысьтöй тадзи вöчнысö да. Кодкö лысьтö кö ошйысьны мыйöнкö, шуа мывкыдтöм морт моз: ме тшöтш ошйыся. 22 Найö юдейяс? Ме тшöтш. Израиль войтыр? Ме тшöтш. Öвраамсянь чужысьяс? Ме тшöтш. 23 Кристослöн кесъялысьяс? Гашкö, менö лыддянныд дзик йöйöн, но висьтала тiянлы: ме кесъялi Кристослы наысь ёнджыка на. Уджалi ныр вылö усьтöдз, менö ёна нöйтлiсны, на дорысь унджыкысь вöлi дзескыдiнын, унаысь кулан выйын. 24 Юдейяс вит пöрйö нöйтлiсны менö орсöн комын öкмысысь вартöмöн, 25 римсаяс куимысь кучкавлiсны беддьöн, öтчыдысь изъялiсны. Куимысь веськавлi корабль вöйигöн, лун да вой вöлi саридзын. 26 Ме пыр туйын. Менö унаысь сулiсны виччысьтöмторъяс ю вылын, каръясын, овтöминъясын, саридз вылын. Меным унаысь ковмис видзчысьны лёк вöчысьясысь, ас йöзысь, мукöд войтырысь да ылöгвокъясысь. 27 Ме сьöкыда уджавлi, кок йылысь усьтöдз, тшöкыда коллявлi узьтöм войяс, овлi сёйтöг-ютöг, унаысь видзавлi да пасьтöг кынмавлi. 28 Став тайö сьöкыдлунъясыс кындзи меным быд лун лоö сибöдны ас дiнö уна йöзöс, тöждысьны быд вичко вöсна. 29 Лигышмунöма кö кодкö, ме тшöтш. Усьöма кö кодкö, менам сьöлöмöй ёна висьö сы вöсна. 30 Колана кö меным ошйысьны мыйöнкö, кута ошйысьны аслам жеблунöн. 31 Енмыс, миян Господь Исус Кристослöн Бать, тöдö: ме ог пöръясь. Ошкöм Сылы нэмъяс чöж! 32 Дамаск карын Арета öксылöн му юкöнöн веськöдлысь тшöктiс видзны карсьыс став петанiнсö, медым кутны менö, но ыджыд чуманын менö лэдзисны öшиньöд стен бердöдыс. Тадзи ме мынi сы киысь.
1 Тайö, дерт, нинöм оз содты меным, но ме водзö кута ошйысьны. Öнi ме висьтала Господьсянь восьтöм-аддзылöм йылысь. 2 Тöда öти мортöс, Кристослы эскысьöс, кодöс дас нёль во сайын вöлi кыпöдöма коймöд енэжас. Вир-яйын-ö вöлi сiйö, лолын-ö, ме ог тöд, Ен тöдö. 3 Ме тöда: тайö мортсö вöлi кыпöдöма райö. Сэнi сiйö кывлöма шуны вермытöм кывъяс, тайöс оз позь висьтавнысö. Вир-яйын-ö вöлi сiйö, лолын-ö, ме ог тöд, Ен тöдö. 5 Татшöм мортнас кута ошйысьны, но ог аснам. А ошйыся кö, сöмын аслам вынтöмлунöн. 6 Дерт, ме ог ло мывкыдтöмöн, кута кö ошйысьны, ме öд збыльсö висьтала. Но ме ог кут ошйысьны, медым кодкö эз мöвпав ме йылысь унджык сыысь, мый аддзö ме пытшкысь либö кылö месянь. 7 Медым тайö ыджыд восьтöмъясысь эг вылö кыпöдчы, менам вир-яйö сетöма чушкысьöс – сöтаналысь анделсö. Сiйö дойдалö менö, оз сет вылö кыпöдчынысö. 8 Ме куимысь кори Господьöс, медым мездiс сыысь, 9 но Сiйö шуис: «Тырмана тэныд Менам буралöмöй, öд Менам вынöй медъёна тыдовтчö вынтöмлун дырйи». Та вöсна нимкодьпырысь ошйыся аслам вынтöмлунöн, медым Кристослöн выныс тыдалiс ме пыр. 10 Ме нимкодяся вынтöмлун дырйи, менö лёкöдiгöн, дзескöдiгöн, вöтлiгöн да Кристос вöсна сьöкыдсö нуигöн. Öд кор ме вынтöм, сэки ён! 11 Тiян водзын ошйысигöн ме вöлi мывкыдтöм морт кодь, тi öд асьныд менö вайöдiнныд та выйöдзыс. Дерт, ме нинöм кодь, но тiянлы аслыныд колö вöлi ошкыны менö, ме öд нинöмöн абу лёкджык "ыджыд апостолъясысь". 12 Ме мудзлытöг вöчи тiян водзын индысьпасъяс, шензьöданаторъяс да ыджыд уджъяс. Ставыс тайö петкöдлö, мый ме збыльысь апостол. 13 Мый тiянлы оз тырмы? Öд мукöд вичколы моз ме сетi тiянлы ставсö. Гашкö, сöмын эг сьöктöд тiянöс? Энö мыждöй менö таысь. 14 Öнi коймöдысь нин мöдöдча тiян дiнö, но ме ог кöсйы сьöктöдны тiянöс. Меным öд тiянсянь нинöм оз ков, тi асьныд меным коланаöсь. Оз ныв-пиыс чукöртны эмбурсö бать-мамыслы, а мöдарö, бать-мамыс – ныв-пиыслы. 15 Тiян вöсна ме нимкодьпырысь сета ассьым ставсö, весиг ачымöс. Тi менö омöля радейтанныд, гашкö, тiянöс вывтi ёна радейта да? 16 Ме некор эг сьöктöдлi тiянöс, тайö тадзи. Гашкö, тi лыддянныд менö пöръясьысьöн да наян мортöн? 17 Гашкö, ме аслым мыйкö курыштi тiян дiнö мöдöдöмаяс пыр? 18 Ме кори Титöс мунны тiян дiнö, сыкöд тшöтш мöдöдi öти вокöс. Гашкö, Тит мыйкö аслыс курыштiс? Ми öмöй сыкöд абу öти лолаöсь? Эг öмöй öти туй талялöй? 19 Гашкö, чайтанныд, ми дорйысям тiян водзын? Огö! Ми сёрнитам Ен водзын кыдзи Кристослы кесъялысьяс. Мусаяс, ми ставсö тайöс висьталам тiянöс ёнмöдöм могысь. 20 Ме пола, мый тiянö воа да, аддза тiянöс сэтшöмöн, кутшöмöн ог кöсйы аддзынысö. Сiдзкö, тi тшöтш аддзанныд менö сэтшöмöн, кутшöмöн онö кöсйöй аддзынысö! Ме пола аддзыны тiян костысь зыксьöм, вежалöм, скöралöм, асьтö радейтöм, удтысьöм, суклясьöм, вылö кыпöдчöм да кывзысьтöмлун. 21 Ме ог кöсйы, медым тiянö выльысь локтiгöн Енмыс янöдiс менö тiян понда. Сэки меным ковмас бöрдны уна мыж вöчысь вöсна, кодъяс öнöдз на эз бергöдчыны пеж вöчöмысь, кырсалöмысь да лэдзчысьöм оласногысь.
1 Ме коймöдысь нин мöдöдча тiян дiнö. Гижöдыс висьталö: «Ставсö колö подулавны кык либö куим мортлöн висьталöмöн». 2 Водзынсö волiгöн ме öлöдлi нин мыжсö вöчысьясöс. Öнi, кор тiянысь ылын, нöшта на гижа налы, тшöтш мукöдыслы: выльысь локтiгöн ог жалит тiянöс! 3 Тi кöсъянныд тöдны, збыльысь-ö Кристос сёрнитö ме пыр. Сiйö абу вынтöм тiян водзын, Ассьыс вынсö Сiйö петкöдлö тiян пöвстын. 4 Крестö тувъялiгöн Сiйö вöлi вынтöм, öнi Ен вынöн Сiйö ловъя. Ми Кристос пытшкынöсь, сiдзкö, ми тшöтш вынтöмöсь, но Сыкöд олам Ен вынöн, медым кесъявны тiянлы. 5 Тöдмалöй асьнытö, эм-ö тiян эскöмныд? Видзöдлöй сьöлöманыд! Тi öмöй онö тöдöй, мый Исус Кристос тiян пытшкын! Абу кö тадз, сiдзкö, тi абу найö, кодъясöн колö лоны тiянлы. 6 Но ме чайта, мый тi тöданныд: ми найö, кодъясöн колö лоны миянлы. 7 Ми кевмам Енлы, медым тi энö вöчöй некутшöм лёктор. Ми огö кевмöй сы могысь, медым петкöдлыны асьнымöс сэтшöмöн, кутшöмöн колö лонысö, но кевмам, медым тi вöчинныд бурсö весиг сэки, ми кö абу сэтшöмöсь, кутшöмöн колö лоны миянлы. 8 Ми нинöм огö вермöй вöчны збыльыслы паныд, ми сулалам збыльыс дор. 9 Ми нимкодясям, тi кö вынаöсь, а ми вынтöмöсь. Дзик та вöсна кевмысям, мед тi быдторйын вежсинныд бурланьыс. 10 Ставсö тайöс водзвыв гижа, мед тiянö воа да, эз ковмы петкöдлыны тiянлы ассьым чорыдлунöс да ыджыдалан вынöс. Öд Енмыс сетiс тайö вынсö тiянöс ёнмöдöм вылö, а эз жугöдöм вылö. 11 Вокъяс, нöшта висьтала тiянлы: нимкодясьöй, вежсьöй бурланьыс, сибöдöй меньсьым ышöдана кывъясöс, олöй лöня да öти сьöлöмöн. Сэки муслунсö да лöньлунсö сетысь Ен лоас тiянкöд. 12 Чолöмалöй öта-мöднытö вежа окыштöмöн. Тiянлы ыстö чолöм став вежа войтырыс! 13 Миян Господь Исус Кристослöн буралöмыс, Ен Батьлöн муслуныс да Вежа Ловлöн öтувтöмыс ставныдкöд тiянкöд. Аминь.
1 Гижö Павел, Исус Кристосöн да Сiйöс ловзьöдысь Ен Батьöн пуктöм апостол. Эз морт менö пукты, да абу йöзлöн кöсйöм серти тайö. 2 Вокъяскöд ми ставöн чолöмалам галатияса вичкояс. 3 Буралöм да лöнь олöм тiянлы Ен Батьсянь да миян Господь Исус Кристоссянь. 4 Ен Батьнымлöн кöсйöмыс серти Кристос сетiс Асьсö миян мыжъяс вöсна, медым мездыны миянöс лёкнас тырöм муюгыдсьыс. 5 Ошкöм Сылы нэмъяс чöж! Аминь. 6 Ме шензя: тi сэтшöм öдйö кежинныд Сыысь, кодi Кристослöн буралöмнас корис тiянöс. Кутшöм тэрыба тi сибöданныд мöдпöлöс юöрсö. 7 Збыльвылас кö, мöд бур юöрыс абу, эмöсь сöмын тiянöс шöйöвоштысьяс. Найö зiльöны мöдарö бергöдны Кристос йылысь Бур Юöрсö. 8 Но весиг кö ми либö енэжсянь андел пондам висьтавны мöд нога, огö сiйö Бур Юöрсö, мый водзынсö тiянлы висьтавлiм – мед лоö ёрöма! 9 Водзынсö ми шулiм нин, öнi нöшта шуа: пондас кö кодкö висьтавны оз сiйö Бур Юöрсö, мый тi миянсянь сибöдiнныд, мед лоö ёрöма сiйöс! 10 Йöзсянь-ö, Енсянь-ö виччыся ме ошкöмсö? Йöзлы öмöй зiля шогмынысö? Ме кö зiли шогмыны йöзлы, сэки эськö эг вöв Кристослöн кесйöг. 11 Вокъяс, тöдöй: меöн висьталöм Евангелльöыс абу мортсянь. 12 Эг мортсянь ме сiйöс босьт, эз морт менö велöд, но ачыс Исус Кристос восьтiс меным сiйöс. 13 Тi, дерт, кывлiнныд, мый водзынсö ме юдей эскöм дор вöлi, ёна вöтлi Енлысь Вичкосö да зiли бырöдны сiйöс. 14 Юдей эскöмын ме пановтi тшöтшъяясöс, ме вöлi чорыда кутчысьöма батьяслöн шуöмö. 15 Но Енмыс менö мам кынöмсянь нин бöрйöма да Аслас буралöмнас корöма. 16 Сiйö восьтiс меным Ассьыс Писö, медым ме висьтавлi Сы йылысь Бур Юöрсö ентöдтöмъяслы. Сэки ме эг кут корсьны мортсянь туйдöдöм, 17 весиг эг мун Ерусалимö меöдз на пуктöм апостолъяс дiнö. Ме мунi Аравияö, сэсянь бöр локтi Дамаскö. 18 Сöмын куим во мысти ветлi Ерусалимö тöдмасьны Петыркöд, кык вежон олi сы ордын. 19 Мукöд апостолсö ме эг аддзыв Господьлысь Яков воксö кындзи. 20 Ен водзын шуа: мый гижа тiянлы, ставыс збыль. 21 Сэсся ме мунi Сирия да Киликия муясö. 22 Юдеяын Кристослöн вичкояс менö весиг эз на аддзывны. 23 Сöмын кывлöмаöсь ме йылысь, миянöс пö вöтлысь, эскöмсö бырöдысь öнi ачыс ышöдö эскыны. 24 Найö аттьöалiсны да ошкисны Енсö меысь.
1 Дас нёль во мысти Варнавакöд ме бара ветлi Ерусалимö, аскöд тшöтш босьтi Титöс. 2 Мунi сэтчö Енлöн восьтöмыс серти. Сэнi ме сёрнитi вичкоса пыдди пуктана йöзкöд да тöдмöдi найöс ентöдтöмъяслы висьталöм Бур Юöрöн, мед кывны, мый ог весьшöрö уджав. 3 Весиг мекöд локтысь Титöс, кöть сiйö грек войтырысь, найö эз тшöктыны вундыштчыны. 4 Тайöс ёна кöсйисны ылöгвокъяс. Найö сибöдчисны миян дiнö кыйöдчысьяс моз, мед тöдмавны, мыйсяма мездлун миян эм Исус Кристоссянь. Найö зiлисны бöр сюйны миянöс Индöд улö. 5 Но ми весиг öти здук кежлö эгö сетчылöй налы, медым Бур Юöрлöн збыльыс коли торкавтöг тiянын. 6 Вичкоса пыдди пуктана йöз – налöн нималöм-тöдчанлун вылö ме ог видзöд, Ен водзын ми ставным öткодьöсь – эз лыддьыны коланаöн мыйкö содтыны меöн висьталöм Бур Юöр дiнö. 7 Найö аддзисны, мый менö Петырöс моз Енмыс сувтöдöма буръюöртнысö: Петырöс – юдейяслы, менö – мукöд войтырлы. 8 Енмыс Петырлы сетiс вын апостолавны юдейяс пöвстын, меным – мукöд войтыр пöвстын. 9 Яков, Петыр да Иоан, кодъясöс лыддисны зумыд сюръяясöн, гöгöрвоисны, мый менö Енмыс корöма. Сэки миянлы Варнавакöд кинысö сетiсны, медым вöчны öтувъя удж. Сёрнитчим, мый найö мунасны юдейяс дiнö, ми – мукöд войтыр дiнö. 10 Сöмын найö корисны, медым ми эгö вунöдöй ерусалимса гöль эскысьясöс. Ме пыр зiля тöждысьны на вöсна. 11 Петырлöн Антиокияö волiгас ме став дырйиыс паныд сувтi сылы, öд сiйö эз веськыда ов. 12 Яковсянь мöдöдöмаяс вотöдз Петыр öтлаын сёйис мукöд войтырсакöд, а Яковлöн йöз локтöм бöрын сiйö пондiс сайласьны да öтдортчыны. Öд сiйö полiс вундыштчöм дор сулалысьясысь. 13 Сы моз тшöтш вöчисны мукöд юдейяс, весиг Варнава вöлi ылалöма на моз. 14 Ме аддзи, мый найö оз овны Евангелльöлöн збыльыс серти. Сэки ставныс дырйи шуи Петырлы: «Тэ, юдей, ачыд кö олан мукöд войтыр моз, а он юдей ног, мыйла мукöд войтырсö тшöктан кутчысьны юдей оласногö?» 15 Ми чужöмсяньным юдейяс, абу мыжа ентöдтöмъяс. 16 Ми тöдам, мый мортсö веськыднас вöчö Исус Кристослы эскöм, а оз Индöд серти уджъясыс. Ми эским Исус Кристослы, медым вöлiм веськыдöсь Кристослы эскöмöн, а эгö Индöд серти уджъясöн. Öд Индöд серти уджъяс некодöс оз вöчны Ен водзас веськыдöн. 17 Кристослöн веськыдлунö нырччиганым кö ми мыжмам Индöдыс водзын, сiдзкö, Кристос öмöй мыжаыс? Абу! 18 Ме кö выльысь лöсьöда мый жугöдлi, ме, сiдзкö, Индöд торкысь. 19 Мед овны Енкöд, Индöдыс пыр ме кулi Индöдыслы. Менö тувъялöма Кристоскöд. 20 Öнi ог нин ме ов, но ме пытшкын олö Кристос. Ме кö ола тайö вир-яяс на, ола Ен Пилы эскöмöн. Сiйö сетiс Асьсö ме вöсна, öд ме Сылы муса. 21 Енлысь буралöмсö ме ог öтдорт. Öд веськыдлунсö кö вермим босьтны Индöдыс пыр, сiдзкö, Кристос весьшöрö кулiс.
1 Тi, галатиясаяс, дзикöдз вежöртö воштöмныд! Кодi тiянлысь синнытö пöртiс, медым энö кывзысьöй збыльыслысь? Öд тiян син водзын, позьö шуны, вöлi тувъялöма Исус Кристосöс. 2 Öтитор кöсъя юавны: Индöд серти уджъясöн али кывлöм Бур Юöрö эскöмöн тi сибöдiнныд Вежа Ловсö? 3 Сы выйöдз-ö тi вежöртöмöсь? Лов вынöн панiнныд, ас вынöн помаланныд? 4 Тi öмöй весьшöрö нуинныд сы мында сьöкыдсö? Дерт, энö весьшöрö. 5 Енмыс öмöй Индöд серти уджъясныд вöсна сетö Вежа Ловсö да вöчö тiян пöвстын шензьöданаторъяссö? Оз öмöй кывлöм Бур Юöрö эскöмныд вöсна? 6 Öвраам эскис Енлы, та вöсна Енмыс шуис сiйöс веськыдöн. 7 Тöдöй: эскысьяс – найö Öвраамлöн ныв-пи. 8 Гижöдас водзвыв висьталöма, мый эскöмныс вöсна Ен шуас веськыдöн быд войтырöс. Медводз Öвраамлы вöлi юöртöма: «Тэ пыр вуджас бурсиöмыс быд войтырлы». 9 Тадзи эскысь Öвраамкöд бурсиöма быд эскысьöс. 10 А Индöдö кутчысьысьяс ёрöм улынöсь. Öд гижöма: «Ёрöма быдöнöс, кодi оз ов став тшöктöмыс серти, мый гижöма Индöд небöгö». 11 Индöд пыр мортыс оз ло веськыднас Ен водзын – тайö гöгöрвоана. Öд «веськыда олысь эскöмнас пондас овны». 12 Индöдыс оз подулась эскöм вылö. Гижöма: «Индöд серти олысь Индöднас пондас овны». 13 Кристос ньöбис миянöс Индöдыслöн ёрöм улысь. Сiйöс лои ёрöма миян пыдди. Öд гижöма: «Ёрöма быдöнöс, кодi öшалö пу вылын». 14 Тадзи лои, медым Öвраамлы кöсйысьöм бурсиöмыс вуджис быд войтырлы Исус Кристос пыр, да медым кöсйысьöм Ловсö ми сибöдiм эскöмöн. 15 Вокъяс, весигтö олöмас тадзи: мортыс кö кольö ас бöрсяыс вынсьöдöм кöсйысян гижöд, сэки некод оз вермы торкны гижöмасö да мыйкö содтыны сэтчö. 16 Кöсйысьöмсö вöлi сетöма Öвраамлы да сысянь чужысьлы. Абу шуöма "чужысьяслы", шуöма "тэсянь чужысьлы". Тайö шуöма Кристос йылысь. 17 Ме кöсъя шуны: нёльсё комын во бöрын петöм Индöдыс оз вермы бокö вештыны Кристос йылысь Енлысь кöсйысьöмсö да бырöдны сiйöс. 18 Индöд пыр кö вуджö вичмöдöмаыс, сэки сiйö оз ло кöсйысьöм пыр. Öвраамлы Енмыс сетiс вичмöдöмасö кöсйысьöм пыр. 19 Мыйла, сiдзкö, колö Индöдыс? Сiйöс сетöма вöлi бöрынджык йöзыслöн мыж вöчöм вöсна, да сiйö вöлi вына кöсйысьöм серти чужысьлöн локтöдз. Индöдсö сетöма анделъяс пыр да шöракостас сулалысьлöн киöн. 20 Но öти дырйи шöракостас сулалысьыс оз овлы, а Енмыс – öти. 21 Индöдыс öмöй паныд Ен кöсйысьöмлы? Абу! Индöдыс кö вермис сетны олöм, сэки веськыдлунсö эськö босьтiм Индöдыс пыр. 22 Гижöдыс йöртiс ставнысö мыж улас. Та вöсна кöсйысьöмасö эскысьяс вермасны босьтны Исус Кристослы эскöм пыр. 23 Эскан кадыс вотöдз ми вöлiм Индöдлöн синъялöм улынöсь, вöлiм кöртöдынöсь эскöм воссьытöдзыс. 24 Тадзи Индöдыс быдтiс-видзис миянöс Кристос локтöдз, медым эскöмным пыр ми лоим веськыдöсь. 25 Кор воис эскан кадыс, ми мынiм видзысьлöн синъялöмысь. 26 Исус Кристослы эскöм пыр тi ставныд – Енлöн ныв-пи. 27 Тi пыртчинныд Кристосö, сiдзкö, тiян паськöмöн лои Кристос. 28 Юдей-ö, грек-ö, кесйöг-ö, мездлуна морт-ö, айлов-ö, ань-ö – Исус Кристос пытшкын торъялöмыс абу. 29 Тi кö Кристослöн, сiдзкö, Öвраамсянь чужысьяс да кöсйысьöмасö босьтысьяс.
1 Нöшта висьтала: пиыс, кодлы вуджö бать овмöсыс, ичöт арлыднас нинöмöн оз торъяв кесйöгысь, кöть сiйö став вылас нин ыджыд. 2 Батьыслöн урчитöм кадöдз керканас веськöдлöны мукöдъяс, ачыс пиыс кага видзысь киын. 3 Кодыр ми вöлiм кага кодьöсь, вöлiм муюгыд вынъяслöн кабыр улынöсь. 4 Кор воис урчитöм кадыс, Енмыс мöдöдiс Ассьыс Писö, кодöс ань чужтiс. Ен Пи олiс Индöд улын, 5 медым ньöбны Индöд улын олысьясöс, босьтны миянöс ныв-пи пыдди. 6 Öнi тi Енмыслöн ныв-пи. Та вöсна Ен сетiс сьöлöманыд Пиыслысь Ловсö. Тайö Лолыс шыасьö: «Авва, Батьöй!» 7 Сiдзкö, тi абу нин кесйöгъяс, тi – ныв-пи. Ныв-пи кö, сiдзкö, Исус Кристос пыр Енсянь вичмöдöмасö босьтысьяс. 8 Кор тi энö на тöдöй Енсö, вöлiнныд мукöд енъяслöн кипод улынöсь. Збыльвылас, найö абу енъяс. 9 Но öнi тi тöданныд Енсö, бурджык шуны, Енмыс тöдö тiянöс. Сiдзкö, мыйла тi бöр бергöдчанныд муюгыдса ковтöм жеб вынъяс дiнö да важ мозыс бара кöртасянныд сэтчö? 10 Кутчысянныд торъя лунъясö, тöлысьясö, воясö да кадъясö. 11 Пола тiян вöсна, весьшöрö, буракö, менам мырсьöма-уджалöма. 12 Вокъяс, кора тiянöс, лоöй ме кодь, öд ме тiян кодь жö. Тi менö нинöмöн энö дöзмöдöй. 13 Тöданныд, мый тiян дiнö волiгöн ме висьми, но тайö сетiс позянлун медводдзаысь висьтавны тiянлы Бур Юöрсö. 14 Висьöмöй вылö видзöдтöг тi сибöдiнныд менö, энö кедзовтöй да энö эновтöй. Сибöдiнныд Ен анделöс моз, Исус Кристосöс моз. 15 Кутшöм шудаöсь тi сэки вöлiнныд. А öнi мый лои? Тiян йылысь верма шуны: позис кö, тi ассьыныд синтö эськö перйинныд да сетiнныд меным. 16 Збыльсö висьталöм вöсна ме öмöй тiянлы паныд мунысьöн лои? 17 Кодсюрö оз бур могысь тöждысьны тiян вöсна. Найö кöсйöны янсöдны миянöс, медым тi тöждысинныд на вöсна. 18 Тöждысьöмыд бур, вöчанныд кö тайöс пыр, онö сöмын ме дырйи. 19 Челядь, меным бара лоö сьöкыда чужтыны тiянöс, кытчöдз Кристос оз тыдовтчы тiян олöмын. 20 Кöсйи эськö öнi лоны тiян дiнын, мед тöдны, кутшöм ногöн сёрнитны тiянкöд. Ме ог гöгöрво тiянöс! 21 Висьталöй меным, Индöд улын овны кöсйысьяс, гöгöрвоанныд-ö тi, мый висьталö Индöдыс? 22 Сэнi гижöма, мый Öвраамлöн вöлi кык пи: öтисö чужтiс кесйöгыс, мöдсö – гöтырыс. 23 Кесйöглöн пиыс чужис морт кöсйöмсянь, гöтырыслöн – Енлöн кöсйысьöм серти. 24 Тайö висьталö кык йитöд йылысь. Öти йитöдсö вöлi кöрталöма Синай керöсын – тайö Агар, сылöн ныв-пиыс кесйöгъяс. 25 Агарыс индö Аравияын Синай керöс вылö да лöсялö öнiя Ерусалимлы. Сiйö аслас челядькöд кесйöг туйын. 26 Енэжвыв Ерусалимыс – мездлуна кар, сiйö миян ставнымлöн мам. 27 Гижöма: – Нимкодясь, сьöктыны вермытöм да кага вайлытöм! Гораа нимкодясь, долыда гажöдчы, чужтан дойсö тöдлытöм! Öд эновтöмаыслöн ныв-пиыс ёна уна, унджык верöсыскöд олысьлöн дорысь. 28 Вокъяс, ми Исаак моз кöсйысьöм серти чужысь ныв-пи. 29 Сэки вир-яй кöсйöмсянь чужысьыс вöтлiс Ловсянь чужысьсö. Тадзи тшöтш öнi. 30 Гижöдыс мый висьталö? Вöтлы кесйöг мамсö пиыскöд, медым кесйöг пиыслы тшöтш эз вудж гöтыр пилы кольöм овмöсыс. 31 Вокъяс, ми абу кесйöглöн ныв-пи, ми – гöтырыслöн.
1 Кристос мездiс миянöс. Сідзкö, зумыда сулалöй сетöм мездлунас да энö бара пырöй сийöс улö. 2 Ме, Павел, шуа тiянлы: вундыштчанныд кö, Кристос тiянлы абу колана. 3 Нöшта шуа: вундыштчöмалы колö овны Индöдлöн став тшöктöмыс серти. 4 Тi корсинныд веськыдлунсö Индöдö кутчысьöмöн да колинныд Кристостöг, вешйинныд буралöмсьыс бокö. 5 Но миянлы эскöмным пыр Енлöн Лолыс сетiс лача воöдчыны веськыдлунас. 6 Тэ кö Исус Кристос пытшкын, вундыштчöмыд-ö, абу-ö вундыштчöмыд, тайö нинöм оз сет. Колана сöмын муслуна эскöм. 7 Тi бура мунiнныд. Кодi нö падмöдiс тiянöс збыльыслысь кывзысьöмысь? 8 Тайö абу Сысянь, кодi корис тiянöс. 9 Этшаник няньшом шоммöдö дзоньнас кöтассö. 10 Господь вылö лача кутöмöн эска, мый онö кутöй мöвпавны мöд ног. Тiянöс падмöдысьясöс Енмыс мыждас. 11 Вокъяс, ме кö öнi важ мозыс на сулалi вундыштчöм дор, менö нинöмысь вöлi вöтлынысö. Сэки эськö крестыс некодлы эз ло мытшöдöн. 12 Тiянöс падмöдысьяс, колö кö, мед кодзасны асьнысö! 13 Вокъяс, тiянöс корöма мездлунас. Сöмын мездлунсö энö бергöдöй вир-яйлысь кöсйöмсö могмöдöмö, но мусапырысь кесъялöй öта-мöдныдлы. 14 Öд став Индöдсö шымыртöма öти шуöмö: «Радейт матыссатö асьтö моз». 15 Тi кö йиранныд-пуранныд öта-мöднытö, видзчысьöй, мед öта-мöдтö дзикöдз энö бырöдöй. 16 Висьтала тiянлы: олöй Лов серти, сэки вир-яйлысь кöсйöмсö онö могмöдöй. 17 Öд вир-яй кöсйö, мый Лов оз кöсйы, а Лов кöсйö, мый вир-яй оз кöсйы. Найö паныд сувтöны öта-мöдныслы. Та вöсна тi онö вермöй вöчны кöсъянасö. 18 Тiянöн кö Лов веськöдлö, сiдзкö, тi абу Индöдыс улынöсь. 19 Вир-яйлöн уджыс тöдса: гозъя олöм пежалöм, кырсалöм, пеж вöчöм, лэдзчысьöм оласног, 20 идоллы юрбитöм, тшыкöдчöм, лöгалöм, пинясьöм, вежöгтöм, скöралöм, асьтö радейтöм, юксьöм, ылöгвелöдöм, 21 вежалöм, виöм, кодалöм-гажöдчöм да мукöд шогмытöмтор на. Водзынсö висьтавлi нин, öнi нöшта висьтала: татшöмторсö вöчысьлы Енлöн Юраланiныс оз вичмы. 22 Ловлöн вотöсыс – муслун, нимкодьлун, лöньлун, терпитöм, мелiлун, бурлун, эскöм, 23 рамлун, асьтö кутöм. Таысь Индöдыс оз мыжды. 24 Кодъяс Кристослöн, найö тувъялiсны вир-яйсö став сылöн лёк кöсйöмнас. 25 Олам кö Лов серти, Ловлысь кöсйöмсö вöчам. 26 Огö пондöй вывтiасьны, öта-мöдöс дöзмöдны да öта-мöдлы вежавны.
1 Вокъяс, кодкö кö мыжмас, тi, Лов серти олысьяс, веськöдöй сэтшöмсö рам сьöлöмöн. Видзöдöй ас бöрсяныд, мед асьныд энö шедöй ылöгас. 2 Нуöй öта-мöдныдлысь сьöкыдсö, тадзи пöртанныд олöмö Кристослысь тшöктöмсö. 3 Ас йывсьыс вывтiа мöвпалысь, кодi збыльвылас нинöм, ылöдлö ачыс асьсö. 4 Видзöдлы аслад уджъяс вылö, сэки мукöд водзын кыпöдчытöг верман донъявны асьтö. 5 Öд быдöн нуö ассьыс нöб. 6 Ен Кывйöн туйдöдöмаыс мед юксяс быд бурнас туйдöдысьыскöд. 7 Асьнытö энö ылöдлöй – Енмыс серам туйын оз ло. Мортыд мый кöдзас, сiйöс и вундас. 8 Кöдзас кö вир-яяс, вундас сысянь кулöм. Лолас кö кöдзас, вундас Ловсянь помтöм олöм. 9 Бурсö вöчигöн огö сетчöй мудзöмас, öд ас кадö вундам, огö кö лэдзöй кинымöс. 10 Эм кö на позянлун, вöчамöй бурсö быдöнлы, торъя нин эскысь чой-воклы. 11 Гижа тiянлы аслам киöн, тi аддзанныд менсьым гырысь шыпасъяссö. 12 Найö, кодъяс кöсйöны шогмыны йöзлы, тшöктöны тiянöс вундыштчыны сöмын сы могысь, медым найöс эз вöтлыны Кристос крест вöсна. 13 Öд вундыштчöмаяс асьныс оз овны Индöд сертиыс. Тiян вундыштчöмныд налы сöмын помка ошйысьны. 14 Ме ог кöсйы ошйысьны нинöмöн, сöмын миян Господь Исус Кристослöн крестöн. Сэнi тувъялöма муюгыдсö меным да менö – муюгыдыслы. 15 Тэ кö Исус Кристос пытшкын, вундыштчöмыд-ö, абу-ö вундыштчöмыд, тайö нинöм оз сет. Колö, мед тэ выль морт вöлiн. 16 Буралöм да лöньлун тайöс тöд выланыс кутысьяслы да Енлöн Израильлы. 17 Водзö энö сьöктöдöй менö, öд вир-яйын ме нуа Господь Исуслысь дойяссö. 18 Вокъяс, миян Господь Исус Кристослöн буралöмыс тiянкöд. Аминь.
1 Гижö Павел, Ен кöсйöм серти Исус Кристослöн апостол. Чолöмала тiянöс, Ефес карын олысьясöс, Исус Кристослы эскысь вежа войтырöс. 2 Буралöм да лöнь олöм тiянлы Ен Батьнымсянь да миян Господь Исус Кристоссянь. 3 Ошкöм Енлы, миян Господь Исус Кристослöн Батьлы! Сiйö бурсиöма миянöс Кристос пыр Ловсянь быдпöлöс бурсиöмнас, мый эм енэжас. 4 Сiйö бöрйöма миянöс Кристос пытшкын му пуксьытöдзыс на, медым вöлiм Сы водзын вежаöсь да сöстöмöсь. Ми ёна мусаöсь Енмыслы. 5 Та вöсна, Исус Кристос пыр Енмыс водзвыв шуис босьтны миянöс Аслыс ныв-пи пыдди. Татшöм Енмыслöн бур кöсйöмыс. 6 Сiдзкö, ошкамöй Енсö дзирдлуна буралöмсьыс, кодöс Сiйö козьналiс миянлы Аслас муса Пиыс пыр. 7 Кристос ньöбис миянöс Вирыс вылö да прöститiс мыжъяснымöс. Сэтшöм ыджыд Енмыслöн буралöмыс! 8 Енмыс лышкыда козьналiс миянлы мывкыдлунсö да гöгöрвоöмлунсö. 9 Бур кöсйöмыс вöсна Сiйö восьтiс миянлы Ассьыс гусяторсö – водзвыв мöвпыштöмсö. Тайö гусяторсö Сiйö восьтiс миянлы Кристос пыр, 10 медым колана кадö öтувтны став енэжвывсасö да мувывсасö Кристос веськöдлöм улö. 11 Кристос пыр ми лоим Ен войтырöн, тадзи водзвыв вöлi мöвпыштöма Енмыслöн. Öд Сiйö ставсö вöчö Ас кöсйöм сертиыс. 12 Енмыс бöрйис миянöс, Кристос вылö медводдзаясöн лача кутысьясöс, медым миян олöм пыр ошкыссис Сылöн дзирдлуныс. 13 Кор тi кылiнныд збыльсö, тiянöс мездöм йылысь Бур Юöрсö, тi тшöтш кутiнныд эскыны Кристослы. Сэки Енмыс пасйис тiянöс кöсйысьöм Вежа Лолöн. 14 Тайö Лолыс эскöдö миянöс, мый миянлы вичмас Енлöн кöсйысьöмыс, кор Сiйö дзикöдз мездас Ассьыс йöзсö. Сiдзкö, ошкам Енсö Сылöн дзирдлунысь! 15 Ме кывлi, мый тi эсканныд Господь Исуслы да радейтанныд став вежа войтырсö. 16 Та вöсна дугдывтöг аттьöала Енсö тiянысь да казьтывла тiянöс аслам кевмысьöмъясын. 17 Ме кора, мед миян Господь Исус Кристослöн Ен, дзирдлуныслöн Бать, сетас тiянлы мывкыдлуныслысь да восьтöмыслысь Ловсö, медым тi верминныд тöдны Сiйöс. 18 Сiйö мед югдöдас тiянлысь сьöлöмнытö, медым тi гöгöрвоинныд, кутшöм лачаö Сiйö корöма тiянöс, кутшöм ыджыд озырлун вичмö вежа войтырлы, 19 да кутшöм ыджыд Сылöн вермана выныс, кодi уджалö миян пытшкын, Сылы эскысьясын! Тайö жö вынсö 20 Енмыс петкöдлiс Кристос пыр, кор ловзьöдiс Сiйöс кулöмысь да пуксьöдiс енэжас, Ас веськыдладорас, 21 медся вылö: быдпöлöс юралысь-веськöдлысьясысь, вынаяс-ыджыдалысьясысь да быд нимысь тайö нэмас и локтанаас. 22 Енмыс ставсö пуктiс Кристос кок улö да индiс Сiйöс медыджыдöн, Вичколы юрöн. 23 Вичкоыс – Кристослöн Вир-яйыс да Сылöн тырвыйöлуныс, Сiйö тыртö Аснас ставсö.
1 Енмыс ловзьöдiс тiянöс, мыжъясныд да лёк вöчöмныд вöсна кулöмаясöс. 2 Öд водзынсö тi олiнныд тайö муюгыдсаыс моз, енэж улас ыджыдалысь антуслысь кывзысьöмöн. Тайö пеж лолыс öнöдз на веськöдлö кывзысьтöмъясöн. 3 Коркö ми ставным вöлiм на кодьöсь: олiм шогмытöма, вир-яйлöн кöсйöм серти. Татшöм оласногысь миянöс мукöдсö моз виччысис Енлöн скöрлуныс. 4 Но буралöмнас озыр Ен петкöдлiс Ассьыс ыджыд муслунсö миян дiнö. 5 Миянöс, лёк вöчöм вöсна кулöмаясöс, Сiйö ловзьöдiс Кристоскöд тшöтш. Сылöн буралöмыс мездiс тiянöс. 6 Сiйö ловзьöдiс миянöс Исус Кристоскöд да пуксьöдiс Сыкöд енэжас, 7 медым локтан нэмъясö олысьяслы петкöдлыны Исус Кристос пыр миян дiнö Ассьыс помтöм-дортöм буралöмсö да бурлунсö. 8 Öд Енмыслöн буралöмыс мездiс тiянöс эскöмныд пыр. Мездмöмыс абу тiянсянь, сiйö Енсянь козин. 9 Бур вöчöмыд оз мезды, медым некод эз ошйысь тайöн. 10 Ми – Енлöн вöчöмторъяс. Сiйö öтувтöма миянöс Исус Кристоскöд, медым ми вöчим бур уджъяс, кодъясöс Енмыс водзвыв нин вöлi дасьтöма миянлы. 11 Кутöй тöд выланыд, мый тi чужöмсяньныд вöлiнныд ентöдтöмъясöн да вундыштчытöмъясöн. Тадзи нимтылiсны тiянöс юдейяс, вундыштчöмаяс, кодъясöс вöлi морт вундыштö. 12 Сэки тi олiнныд Кристостöг, энö вöлöй Израиль войтырöн. Енма-тiа костын йитöдыс эз вöв, тiянлы эз вичмыв Сылöн кöсйысьöмыс, тi олiнныд тайö муюгыдас Енсö тöдтöг да лачатöг. 13 Коркö тi вöлiнныд ылынöсь Енсьыс, öнi тi – Кристоскöд олысьяс. Сылöн Вирыс матыстiс тiянöс Ен дiнас. 14 Кристос – миянлы бурасян йитöдыс. Сiйö öтувтiс юдейясöс да мукöд войтырöс öти войтырö да жугöдiс шöракостсьыс мытшöдсö, 15 тадзи Аслас Вир-яйнас бырöдiс на костысь лёксьöмсö. Сiйö пуктiс пом Индöдлы да сэтчö пырысь быд тшöктöмлы да велöдöмлы, медым юдейясöс да мукöд войтырöс бурöдны öта-мöдныскöд. Сiйö йитiс найöс Аскöдыс да вöчис наысь öти выль олысьöс. 16 Крест вылын кувлöмнас Сiйö бырöдiс лёксьöмсö. Тадзи öти вир-яйын Кристос бурöдiс Енмыскöд кыкнан войтырсö. 17 Сiйö локтiс юöртны бурасьöм йылысь тiянлы, кодъяс вöлiнныд ылынöсь Енсьыс, и налы, кодъяс матынöсь Ен дiнас. 18 Та вöсна ми быдöн, юдейяс да мукöд войтыр, Кристос пыр вермам локны Бать дiнö, öд миянöс ставнымöс йитö öти Лов. 19 Сiдзкö, тi абу нин бокысаяс да кыськö локтысьяс, тi – ас йöз вежа войтырлы да ныв-пи Енмыслы. 20 Тiянöс сувтöдöма сiйö подув вылас, мый пуктiсны апостолъяс да пророкъяс. Тайö тэчасас пельöс изйыс – Ачыс Исус Кристос. 21 Сiйö йитö Аснас став тэчассö, тадзи тэчасыс кыптö да лоö Господьлöн вежа крамöн. 22 Тi – Кристос пытшкынöсь. Сiдзкö, Ен Лов отсöгöн тi тшöтш лоанныд Енмыслы оланiнöн.
1 Та вöсна ме, Павел, Исус Кристослöн кесъялысь, пукала дзескыдiнын тiян вöсна, мукöд войтыр вöсна. 2 Дерт, тi кывлiнныд нин, мый буралöмыс кузя Енмыс сетiс меным удж – кесъявны тiянлы. 3 Восьтöмыс пыр Енмыс сетiс меным тöдны Ассьыс гусяторсö. Та йылысь ме вылынджык дженьыдика гижи нин. 4 Тайö гижöдсö лыддигöн тi верманныд тöдмавны, кутшöм бура ме гöгöрвоа Кристослысь гусяторсö. 5 Водзын олысьяс эз тöдлыны тайö гусяторйыс йылысь. Öнi Вежа Лов восьтiс сiйöс Кристослöн апостолъяслы да пророкъяслы. 6 Тайö гусяторйыс татшöм: мукöд войтыр юдейяс моз тшöтш босьтасны Енсянь вичмöдöмасö, öд Бур Юöр кылöм бöрын найö öтувтчисны Исус Кристоскöд. Сiдзкö, найö – öти вир-яйлöн юкöнъяс, налы тшöтш вичмö Енлöн кöсйысьöмыс. 7 Енлöн бурсетöмыс да выныс отсöгöн ме лои тайö Бур Юöрыслы кесъялысьöн. 8 Меным, став вежа войтыр пиысь медся тöдчытöмыслы, уси шуд висьтавлыны мукöд войтырлы Кристослöн помтöм-дортöм озырлун йылысь Бур Юöрсö 9 да восьтны быдöнлы Енмыслысь водзвыв мöвпыштöм гусяторсö. Енмыс, кодi вöчис ставсö Исус Кристос пыр, видзис тайö гусяторсö Ас пытшкас нэмъяс пуксьытöдзыс на, 10 медым Вичкоыс пыр öнi петкöдлыны енэжвывса ыджыдалысь-веськöдлысьяслы Ассьыс уна ногöн петкöдчысь мывкыдлунсö. 11 Тадзи нэмъяс пуксьытöдз на лöсьöдöм-мöвпыштöмсö Енмыс пöртiс олöмö миян Господь Исус Кристос пыр. 12 Ми – Кристос пытшкынöсь, Сылы эскöм пыр ми повтöг-майшасьтöг вермам локны Ен дiнö. 13 Вокъяс, кора тiянöс: энö öшöдöй юрнытö, кор ме сьöкыдала тiян вöсна. Öд та пыр вичмö тiянлы ошкöмыс. 14 Ме сувта пидзöс вылö, миян Господь Исус Кристослöн Бать водзö. 15 Сiйö сетö ним быд чужанкотырлы енэжас и му вылас. 16 Ме кора, мед дзирдлуннас озыр Ен Аслас Ловнас да выннас ёнмöдас тiянлысь пытшкöсса морттö, 17 да эскöмныд пыр Кристос овмöдчас тiян сьöлöмö. 18 Ме кевма, медым муслуныс вужъясяс тiян сьöлöмö да лоас тiянлы подулöн. Сэки став вежа войтыркöд öтвыв верманныд шымыртны Кристос муслунлысь кузьта-пасьтасö, пыдта-судтасö, 19 да гöгöрвоны Сылысь вежöрö тöртöм муслунсö. Сэки тiян пытшкын лоö Енлöн став тыр-бурыс. 20 Ошкöм Енлы! Аслас вынöн, кодi уджалö миян пытшкын, Сiйö вöчö ёна унджык миян корöмъяс да мöвпалöмъяс дорысь. 21 Ошкöм Сылы Вичкоын, кодi Исус Кристос пытшкын, быд кадö олысь йöзсянь нэмъяс чöж. Аминь.
1 Ме, Господьлы кесъялöм вöсна дзескыдiнын пукалысь, кора тiянöс: олöй сiдзи, кыдзи колö овны Енлöн корöмаяслы. 2 Пыр лоöй мелiöсь, рамöсь, терпитöмöн да мусапырысь бурö пуктöй öта-мöднытö. 3 Зiльöй видзны Ловсянь сетöм öтувъялуннытö да тiянöс йитысь лöньлуннытö. 4 Вир-яйыс öти, Лолыс öти, лачаыс, кытчö тiянöс корöма, тшöтш öти. 5 Господьыс öти, эскöмыс öти, и пыртчöмыс öти. 6 Енмыс öти, Сiйö быдöнлы Бать. Сiйö веськöдлö ставнас, уджалö ставыс пыр да олö ставным пытшкын. 7 Кристос Ас кöсйöм сертиыс миянлы быдöнлы лышкыда козьналiс бурсетöмсö. 8 Öд Гижöдыс висьталö: – Сiйö кыпöдчис вылiсьыс-вылö, босьтiс Аскöдыс кöрталöмаясöс, йöзлы сеталiс козинъяс. 9 Мый лоö "кыпöдчöмыс"? Оз-ö сiйö, мый водзынджык Сiйö лэччылiс му пыдöсöдзыс. 10 А лэччылiс кö, сiдзкö, кыпöдчис став енэжсьыс вылö, медым тыртны Аснас ставсö. 11 Öтиясöс Сiйö сувтöдiс апостолъясöн, мöдъясöс – пророкъясöн, коймöдъясöс – буръюöртысьясöн, нёльöдъясöс – вичкоса веськöдлысьясöн, витöдъясöс – велöдысьясöн, 12 медым дасьтыны вежа войтырöс кесъявны да сöвмöдны Кристослысь Вир-яйсö. 13 Сэки ми ставным воам öти эскöмö, кутам тöдны Ен Пиöс, быдмам да воöдчам Кристослöн тыр арлыдöдз да Сылöн тырвыйöлунöдз. 14 Сiдзкö, миянлы оз нин ков ылавны кагаяс моз быдпöлöс тöвйыв велöдöмö. Öд татшöм велöдöмыс петö наян да ылöдчысь йöзсянь. 15 Мöдарö, збыляс да муслунас кутчысьöмöн, кутам пыр быдмыны да воöдчыны Кристосöдз, öд Сiйö – юрыс. 16 Сiйö йитö вир-яйлысь став юкöнсö öтиö, тадзи артмö öти вир-яй. Юкöнъясыс топыда йитчöмаöсь öта-мöдныскöд, и быд юкöн вöчö ассьыс удж. Тадзи муслуныс отсöгöн ставнас вир-яйыс быдмö-сöвмö. 17 Та вöсна, ме ёна кора тiянöс Господь нимöн: водзö энö нин олöй ентöдтöмъяс моз. Налöн мöвпъясыс ковтöмöсь, 18 вежöрныс пемдöма, найö ылынöсь Ен нога олöмсьыс, öд налöн чорзьöма сьöлöмныс, да Енсö найö оз тöдны. 19 Найö воштöмаöсь яндзимнысö, лэдзчысьöмаöсь олöмсьыс да быдпöлöс пежсö вöчöны пöтлытöг. 20 Но тiянöс эз тадзи велöдны Кристос йылысь, медым тi олiнныд татшöм ногöн. 21 Тi кывлiнныд Сы йылысь, тiянöс велöдiсны сiйö збыльыс серти, мый эм Исусын. 22 Тiянöс велöдiсны: эновтöй важ оласногтö да ыштана лёк кöсйöмъястö, öд найö тшыкöдöны тiянöс. 23 Выльмöдчöй ловнаныд да вежöрнаныд. 24 Вежсьöй Ен нога выль мортö, кутчысьöй збыляс, веськыдлунас да вежалунас. 25 Сiдзкö, дугдöй пöръясьнытö да сёрнитöй öта-мöдныдкöд веськыда, öд ми – öта-мöдлы юкöнъяс. 26 Скöралiганыд энö мыжмöй: бурасьöй öта-мöдныдкöд шондi пуксьытöдзыс на. 27 Энö сетöй омöльыслы кутчысянiн. 28 Гусясьысь – водзö эн гусясь. Бурджык, уджав да вöч аслад киöн коланасö, медым вермин чуктöдны сэтысь корысьяслы. 29 Некутшöм пеж кыв мед оз пет тiян вомысь, а сöмын бурыс. Öд тайö ёнмöдö йöзыслысь эскöмсö да вайö налы нимкодьлун. 30 Энö шогöдöй Ен Вежа Лолöс, кодöн пасйöма тiянöс мездана лун кежлö. 31 Пыр кежлö öвсьöй дöзмöмысь, лёксьöм-скöралöмысь, зыксьöм-суклясьöмысь да быдсяма лёк вöчöмысь. 32 Öта-мöдныд дiнö лоöй бур сьöлöмаöсь да мелiöсь. Енмыс Кристос пыр прöститiс тiянöс, сiдзкö, тi тшöтш прöститöй öта-мöднытö.
1 Тi – Енлöн муса ныв-пи, сiдзкö, олöй Сы вылö видзöдöмöн. 2 Кристослы ми мусаöсь, тi тшöтш лоöй мусаöсь öта-мöдныдлы. Кристос сетiс Ассьыс олöмсö миян вöсна да вайис Асьсö Енлы чöскыд дука вись пыдди. 3 Тi – вежа войтыр. Сiдзкö, некутшöм кырсалöм, пеж оласног да горшасьöм мед эз вöв тiян пöвстын. Весиг энö сёрнитöй та йылысь! 4 Ковтöм сёрнияс, пеж кывъяс да мисьтöм шмоньяс мед эз петны тiян вомысь. Мöдарö, аттьöалöй Енсö! 5 Тöдöй, мый ни öти кырсалысьлы, пеж оласногалы да горшасьысьлы, кодi копрасьö озырлунлы Енмыслы пыдди, – Кристослöн да Енлöн Юраланiныс оз вичмы. 6 Некод мед оз ылöдлы тiянöс ковтöм сёрниясöн, öд таысь кывзысьтöмъясöс суас Енлöн скöрлуныс. 7 Татшöмъясыскöд энö öтувтчöй! 8 Коркö тi вöлiнныд пемыдöн, öнi тi Господь пытшкынöсь да лоинныд югыднас. Сiдзкö, олöй югыдыслöн ныв-пи моз. 9 Öд Ловлöн вотöсыс – бурлун, веськыдлун да збыльлун. 10 Зiльöй тöдмавны Енмыслы шогманасö. 11 Энö öтувтчöй пемыдас олысьяслöн ковтöм уджъясö, мöдарö, янöдöй найöс. 12 Öд яндзим весиг висьтавнысö налöн гуся уджъяс йылысь. 13 Но югыдас став гусяыс тыдовтчö, öд югыдыс ставсö восьтö. 14 Сiйöн и шуöма: – Садьмы, узьысь, ловзьы кулöмысь, и тэнö югдöдас Кристос. 15 Сiдзкö, сюся видзöдöй ас бöрсяныд: олöй мывкыдаяс моз, а энö вежöртöмъяс моз. 16 Энö коллялöй каднытö весьшöрö, öд тайö лунъясыс тырöмаöсь лёкнас. 17 Энö лоöй мывкыдтöмöн, а тöдмалöй Енлысь кöсйöмсö. 18 Энö коддзöдчöй винаöн, öд тасянь овлö олöмас лэдзчысьöмыс. Мöдарö, сетöй Ловлы тыртны асьнытö. 19 Сьылöй öтвылысь псаломъяс, Енмöс ошкана сьыланкывъяс да бурсьылöмъяс. Сьылöй Господьлы да ошкöй Сiйöс став сьöлöмсяньныд. 20 Быд кадö ставсьыс аттьöалöй Ен Батьöс миян Господь Исус Кристос нимöн. 21 Енсьыс полöмöн кывзьысьöй öта-мöдныдлысь. 22 Гöтыръяс, кывзьысьöй асланыд верöсъяслысь Господьлысь моз. 23 Öд гöтырлы юрыс – верöс, кыдзи Вичколы юрыс – Кристос. Вичколы – Сiйö Мездысь, а Вичкоыс – Сылöн вир-яйыс. 24 Кыдзи Вичкоыс кывзысьö Кристослысь, сiдзи гöтыръяс быдторйын кывзысьöй асланыд верöсъяслысь. 25 Верöсъяс, радейтöй ассьыныд гöтыртö, кыдзи Кристос радейтö Вичкосö. Öд Кристос сетiс Ассьыс олöмсö Вичкоыс вöсна, 26 медым вежöдны сiйöс. Сiйö сöстöммöдiс Вичкосö ваöн да кывнас, 27 медым сувтöдны сiйöс Ас водзас быд боксянь мичаöн: сöстöмöн, вежаöн, медым сылöн эз вöв некутшöм няйттор, чукыр да тырмытöмтор. 28 Верöсъяс, радейтöй ассьыныд гöтырнытö вир-яйтö моз, öд гöтырсö радейтысь – асьсö радейтö. 29 Некод оз мустöмт ассьыс вир-яйсö, мöдарö, шонтö-пöткöдö сiйöс, кыдзи Господь тöждысьö Аслас Вичкоыс вöсна. 30 Öд ми – Сы вир-яйлöн юкöнъяс. 31 Гижöдыс висьталö: «Та вöсна морт кольö бать-мамсö да öтлаасьö гöтырыскöд, и тайö кыкыс лоöны öти вир-яйöн». 32 Тайö – ыджыд гусятор. Ме висьтала тайöс Кристос да Вичко йылысь. 33 Сiдзкö, быдöн мед радейтö гöтырсö асьсö моз, а гöтыр мед пыдди пуктö верöссö.
1 Челядь, кывзысьöй бать-мамныдлысь Господь вöсна, öд тайö лоö веськыд Сы водзын. 2 «Пыдди пукты ассьыд бать-мамтö» – тайö медводдза тшöктöм, кытчö пырö татшöм кöсйысьöм: 3 «сэки ставыс тэнад лоö бур да олöмыд кузь нэма». 4 Батьяс, энö дöзмöдöй ассьыныд челядьтö, но быдтöй-велöдöй найöс Господьлöн кöсйöм серти. 5 Кесйöгъяс, кывзысьöй асланыд мувывса ыджыдъяслысь Кристослысь моз. Кесъялöй налы восьса сьöлöмöн, полiгтырйи да пыдди пуктöмöн. 6 Энö вöчöй тадзи асьнытö йöз водзын ошкöм-петкöдлöм могысь, но Кристослöн кесйöгъяс моз кывзысьöй Енмыслысь став сьöлöмсяньныд. 7 Кесъялöй налы нимкодьпырысь Господьлы моз, а энö йöзлы моз. 8 Тöдöй, мый быдöн, кесйöг кöть мездлуна морт, босьтас Господьсянь удждонсö бур вöчöмыс серти. 9 Ыджыдъяс, тi тшöтш бура кутöй асьнытö асланыд кесйöгъяскöд: энö лоöй чорыдöсь накöд. Тöдöй, мый тiян вылын, и на вылын öти Ыджыдыс енэжас. Сiйö оз видзöд морт чужöм вылö. 10 Нöшта вокъясöй, ёнмöдöй асьнытö Господькöд öтувъя олöмас Сылöн вермана выннас. 11 Пасьталöй Енсянь став вермасянторсö. Сэки тi верманныд сувтны омöльыслöн наяна лёк вöчöмъяслы паныд. 12 Öд миян тышыс абу мортлы паныд, ми тышкасям енэжувса юралысь-ыджыдалысь пеж ловъяскöд да тайö мувывса пемыд олöмнас веськöдлысь ловъяскöд. 13 Та вöсна, босьтöй Енсянь став вермасянторсö. Сэки тышкасиганыд верманныд водзсасьны лёкыслы паныд да петанныд вермысьясöн. 14 Сулалöй зумыда! Вöнясьöй збыльнас да пасьтасьöй веськыдлуныслöн кöрт кышöдö. 15 Кöмкотасьöй да лоöй дасьöсь висьтавлыны лöньлун йылысь Бур Юöрсö. 16 Та кындзи, топыда кутöй кианыд эскöмлысь сайöдсö, кодöн тi верманныд кусöдны омöльлысь став донöдöм ньöвъяссö. 17 Нöшта босьтöй юр вевттьöд пыдди мездмöмсö да Ловлысь шыпуртсö – Енлысь Кывсö. 18 Вöчöй тайöс кевмöмъясöн да корöмъясöн, быд кадö кевмысьöй Лов нуöдöм улын. Лоöй дасьöсь да зiльöй дугдывтöг кевмысьны став вежа войтыр вöсна. 19 Кевмысьöй тшöтш ме вöсна, медым сёрнитiгöн Енмыс сетiс меным колана кывъяс повтöг висьтавлыны Бур Юöрлысь гусяторсö. 20 Енмыс мöдöдiс менö висьтавлыны Бур Юöрсö, та понда öнi дзескыдiнын. Кевмысьöй ме вöсна, медым висьтавлi сiйöс повтöг да колана ногöн. 21 Медым тi тöдiнныд менам олöм-вылöм йылысь, ставсö тiянлы висьталас Тихик. Сiйö – менам муса вок, Господьлöн эскана кесъялысь. 22 Ме мöдöда сiйöс тiян дiнö, медым висьталас миян олöм йылысь да ышöдас тiянöс. 23 Вокъяс, сиа тiянлы лöнь олöм, муслун да эскöм Ен Батьсянь да Господь Исус Кристоссянь. 24 Енлöн буралöмыс быдöнкöд, кодi радейтö миян Господь Исус Кристосöс бырлытöм муслунöн. Аминь.
1 Павел да Тимофей, Исус Кристослöн кесйöгъяс, чолöмалöны Филип карын олысь да Исус Кристослы эскысь став вежа войтырöс, вичкоса веськöдлысьясöс да отсасьысьясöс. 2 Буралöм да лöнь олöм тiянлы Ен Батьнымсянь да Господь Исус Кристоссянь. 3 Тiян йылысь казьтывлiгöн быдпöрйö аттьöала ассьым Енмöс 4 да нимкодьпырысь кевмыся ставныд вöсна. 5 Öд тi медводдза лунсяньыс да öнöдз на отсаланныд меным паськöдны Бур Юöрсö. 6 Енмыс панöма нин бур уджсö тiян пытшкын, и ме эска, мый Исус Кристослöн локтан лунöдз Сiйö вайöдас уджсö помöдз. 7 Дерт, меным тадзи и колö мöвпавны тiян йылысь, öд тi менам сьöлöмынöсь. Пукала-ö ме дзескыдiнын, доръя-ö Бур Юöрсö али висьтавла сiйöс эскöдöмöн, тi ставныд мекöд öтвыв босьтанныд Енсянь бурсетöмсö. 8 Ен тöдö, ме ёна радейта тiянöс Исус Кристослöн муслунöн. 9 Ме кевмыся, мед тiян муслунныд ёнджыка на содас да сетас тiянлы быдпöлöс тöдöмлунсö да мывкыдлунсö, 10 медым верминныд тöдмавны медбурсö. Сэки Кристослöн лунö тi лоанныд сöстöмöсь да мыжтöмöсь 11 да кутанныд вайны веськыда олöмыслысь вотöссö Енсö ошкöм да аттьöалöм могысь. Тайö уджсö кутас вöчны тiян пытшкын Исус Кристос. 12 Вокъяс, кöсъя, мед тi тöдiнныд, мый мекöд лоöмторъясыс ёнджыка на отсалiсны меным висьтавлыны Бур Юöрсö. 13 Кристос вöсна ме öнi дзескыдiнын. Та йылысь тöдöны ставныс: кесарлысь керка видзысьяс, тшöтш мукöдыс. 14 Унджыксö вокъяс пиысь ышöдiс менам дзескыдiнын пукалöмöй, да найö ёнджыка на повтöг кутiсны висьтавлыны Ен Кывсö. 15 Кодсюрö висьтавлöны Кристос йылысь вежалöмныс понда, мед вензьыны миянкöд, а мукöдыс висьтавлöны сьöлöмсяньныс. 16 Кодсюрö висьтавлöны Кристос йылысь оз сьöлöмсяньныс, а асьнысö петкöдлöм могысь. Тадзи найö кöсйöны сьöктöдны менö дзескыдiнын пукалiгöн. 17 Мукöдыс висьтавлöны муслунныс вöсна, öд найö тöдöны, мый Енмыс сувтöдiс менö дорйыны Сылысь Бур Юöрсö. 18 Наянпырысь-ö, восьса сьöлöмöн-ö найö висьтавлöны Кристос йылысь, меным веськодь. Мед сöмын висьтавласны-а! Ме и таысь нимкодяся да водзö кута нимкодясьны, 19 öд ме тöда, мый тiян кевмысьöмъясныд да Исус Кристослöн Лолыс отсаласны меным мездмыны. 20 Лача кута, мый меным нинöмысь лоö яндысьнысö, но воддза мозыс лоа повтöмöн да кута водзö вайны Кристослы ошкöмсö аслам вир-яйын олöмöн али кулöмöн. 21 Öд менам олöмöй – Кристос, а кулöмöй – вермöм. 22 Кута кö водзö вир-яйын овны, унатор на верма вöчны. Мый бöрйыны – ог тöд. 23 Кöсъя öтисö и мöдсö: кöсъя öдйöджык мунны тайö муюгыдсьыс да лоны Кристоскöд, öд тайö ёна бурджык, 24 но олышта кö на тайö му вылас, тiянлы бурджык. 25 Ме зумыда эска таö, та вöсна тöда: ме кольчча на му вылас да лоа ставныдкöд, ёнмöда тiянлысь эскöмнытö, медым сы пыр верминныд нимкодясьны. 26 Сэки, тiян дiнö выльысь локтiгöн, Исус Кристос пытшкын тi верманныд ёнджыка на ошйысьны меöн. 27 Сöмын олöй шогмана ногöн, Кристослöн Евангелльöыс серти. Ме ог тöд, верма-ö локны тiян дiнö али ог вермы, аддза-ö тiянöс али ог аддзы, но кöсъя кывны, мый тi оланныд öти лолöн да öтвылысь тышкасянныд Бур Юöр да эскöм вöсна. 28 Энö полöй тiянлы паныд мунысьясысь, öд тiян повтöмлунныд – налы пас кулöм вылö, а тiянлы – мездмöм вылö. Ставыс тайö Енсянь. 29 Öд Енмыс сетiс тiянлы эз сöмын Кристослы эскыны, тшöтш Сы понда сьöкыдсö нуны 30 да ме моз вермасьны. Тi аддзылiнныд, кыдзи ме водзынсö вермаси да öнöдз на вермася. Тайöс тi тöданныд.
1 Кристоскöд олöмыс кö ышöдö тiянöс, Сылöн муслуныс кö бурöдö тiянöс, Енлöн Лолыс кö öтвывтö тiянöс, да тi кö мелiöсь да бур сьöлöмаöсь öта-мöдныд дiнö, 2 сiдзкö, отсалöй меным ёнждыка на нимкодясьны: радейтöй öта-мöднытö öтмоза, олöй öти сьöлöмöн да öти мöвпъясöн, тiян костын мед лоö öтувъялун. 3 Нинöм энö вöчöй асьнытö петкöдлöм могысь да вылö кыпöдчöм могысь. Быдöн мед рам сьöлöмöн пуктö мöдсö ассьыс вылöджык 4 да тöждысьö оз сöмын ас вöснаыс, тшöтш мукöдыс вöсна. 5 Мöвпалöй да вöчöй Исус Кристос моз. 6 Сiйö вöлi дзик Енмыс кодь, но эз кутчысь тайö öткодьлунас. 7 Асьсö Сiйö увтыртiс да кесйöг туйö пуктiс. Чужис морт кодьöн да морт вир-яйын олiс. 8 Асьсö Сiйö улö пуктiс да кывзысис весиг кувтöдзыс, крест вылын кувтöдзыс. 9 Та вöсна Енмыс кыпöдiс Сiйöс ставсьыс медвылö да сетiс Сылы ним – став нимсьыс медыджыдöс, 10 медым Исус ним водзын копыртчис енэжас, му вылас да му пыдöсас быд олысь, 11 да Ен Батьöс ошкöм могысь быд морт шуис: «Исус Кристос эм Господь». 12 Мусаяс, кор ме вöлi тiян дiнын, тi пыр кывзысинныд менсьым. Сiдзкö, öнi, кор абу тiянкöд, ёнджыка на кывзысьöй да тöждысьöй асланыд мездмöм вöсна полöмöн да тiралöмöн. 13 Öд Ачыс Енмыс уджалö тiян пытшкын, медым тi кöсйинныд вöчны да вöчинныд Сылöн бур кöсйöмыс серти. 14 Ставсö вöчöй шуасьтöг да зыксьытöг, 15 медым тi вöлiнныд Енлöн сöстöм, мыжтöм да пежасьтöм челядьöн. Сэки тайö тшыксьöм да пежасьöм йöз пöвстас тi лоанныд дзирдалысь кодзувъяс кодьöсь. 16 Кутчысьöй Олöмыслöн Кывйö, сэки Кристослöн лунö ме верма ошйысьны, мый эг весьшöрö уджав да мырсьы тiян пöвстын. 17 Весиг ковмас кö кисьтны ассьым вирöс да вайны ачымöс вись пыдди тiян эскöмныд вöсна, тiянкöд öтвыв кута нимкодясьны. 18 Сiдзкö, тi тшöтш нимкодясьöй, мекöд öтвыв нимкодясьöй. 19 Господь Исус вылö лача кутöмöн чайта регыдъя кадö мöдöдны тiян дiнö Тимофейöс. Сiйö висьталас меным тiян олöм-вылöм йылысь да ёнмöдас менö. 20 Тимофей сьöлöмсяньыс тöждысьö тiян вöсна, мöдыс сы кодьыс абу. 21 Öд ставныс сöмын ас вöснаныс тöждысьöны, оз Исус Кристослы кесъялöм вöсна. 22 Тi тöданныд Тимофейлысь зiльöмсö. Бур Юöр висьтавлiгöн сiйö отсасис меным пи моз. 23 Лача кута дзик пыр мöдöдны сiйöс тiян дiнö, кор тöдмала, мый лоö мекöд водзö. 24 Эска Господьлы, мый регыд ме тшöтш локта тiян дiнö. 25 Но медводз лыддя коланаöн мöдöдны тiян дiнö Епафродит вокöс, мекöд öтвыв уджалысьöс да отсасьысьöс. Тi мöдöдлiнныд сiйöс, медым сетны меным колана отсöг. 26 Сiйö ёна гажтöмтчö тiян вöсна да шогсьö, мый тi тöданныд сылöн висьöм йылысь. 27 Епафродит ёна висис да вöлi кулан выйын, но Енмыс вöлi бур сьöлöма сы дiнö, и эз сöмын сы дiнö, тшöтш ме дiнö, медым менам шогöй эз сод. 28 Та вöсна öдйöджык мöдöда сiйöс тiян дiнö, медым бара верминныд аддзысьны сыкöд да нимкодясьны. Сэки ме этшаджык кута шогсьыны. 29 Сибöдöй Епарфодитöс нимкодьпырысь, öд сiйö кесъялö Господьлы. Татшöм йöзсö вылö донъялöй. 30 Кристослы кесъялiгöн сiйö öдва эз кув, öдва эз вошты ассьыс олöмсö да отсасис меным, кор тi энö вермöй отсасьнысö.
1 Нöшта вокъясöй, нимкодясьöй Господь пытшкын! Та йылысь меным абу сьöкыд казьтывлыны тiянлы, öд тайö видзас тiянöс лёкысь. 2 Видзчысьöй "понъясысь", öд тайö лёк вöчысьясыс тшöктöны вундыштчыны. 3 Збыль вундыштчöмаясыс – тайö ми, öд ми кесъялам Енлы Сылöн Лов нуöдöм улын. Ми ошйысям Исус Кристосöн, огö ас выланым лача кутöй, 4 кöть ме эськö верми ас вылö лача кутны. Кодкö мöвпалö кö ас вылас лача кутны, мукöд дорсьыс ме ёнджыка на верма тадзи вöчны. 5 Öд менö вундыштöма кöкъямысöд лунö, петi Израиль войтырысь, Вениамин чужанкотырысь. Бать-мамöй – юдейяс, Индöд серти ме – фарисей. 6 Ен вöсна тöждысьöмöй петкöдчис сыын, мый вöтлi Енлысь Вичкосö. Индöд серти ме вöлi веськыдöн да мыжтöмöн. 7 Водзынсö ставсö тайöс лыдди медколанаöн, öнi Кристос вöсна лыддя нинöмöн. 8 Ставсö тайöс пукта нинöм туйö, öд Исус Кристосöс, ассьым Господьöс, тöдöм дорысь нинöм абу ыджыдджыкыс. Кристос вöсна эновтi ставсö, ставсö лыддя ёгöн, медым ме озырми Кристосöн 9 да лои Сы пытшкын веськыдöн эг Индöд серти уджъясöй вöсна, а Кристослы эскöм вöсна. Öд веськыдлунсö Енмыс сетö мортлы сöмын Кристослы эскöм пыр. 10 Кöсъя тöдны Кристосöс да Сiйöс ловзьöдысь вынсö, кöсъя тшöтш юкны Сылысь сьöкыдалöмсö да кувны Сы моз, 11 медым верми ловзьыны кулöмысь. 12 Ме ог шу, мый вои нин тыр-бурас, но зiля воны тыр-бурас, öд татчö менö корис Исус Кристос. 13 Вокъяс, ме ог шу, мый вои нин тыр-бурас, но важсö вунöдöмöн зiля мунны водзö 14 да воны помöдз, мед босьтны тырдонсö – енэжвывса олöм, кытчö Енмыс корöма миянöс Исус Кристос пыр. 15 Сiдзкö, кодi миян пиысь лыддьö асьсö тыр-бурас воысьöн, сiйö мед мöвпалö миян моз. А мöвпаланныд кö мöд ногöн, Енмыс восьтас тайöс тiянлы. 16 Но мыйöдз воим нин, кутам водзö тадзи мöвпавны да овны. 17 Вокъяс, видзöдöй ме вылö да велöдчöй овны на моз, кодъяс олöны миян моз. 18 Öд Кристослöн крестлы унаöн паныд мунöны. Та йылысь висьтавлi нин тiянлы, öнi нöшта на синва сорöн казьтышта. 19 Налöн помыс – кулöм, налöн енмыс – рушкуныс, найö ошйысьöны асланыс янöдан уджъясöн. Найö мöвпалöны сöмын мувывсаыс йылысь. 20 Но миян оланiнным енэжас. Сэсянь виччысям Мездысьöс – миян Господь Исус Кристосöс. 21 Енмыс сетiс Сылы вын веськöдлыны ставнас. Тайö выннас Кристос вежас миянлысь кулана вир-яйнымöс да сетас миян вир-яйлы Ассьыс дзирдлунсö.
1 Муса вокъясöй, ме ёна гажтöмтча тiянысь. Тi – менам нимкодьлунöй да ошйысян юркытшöй. Мусаяс, зумыда кутчысьöй Господькöд öтувъя олöмас! 2 Кора Еводияöс да Синтикияöс: воöй öти кывйö, öд тi Господьлöн. 3 Кора тэнö, менам збыль уджъёртöй: отсав тайö аньясыслы. Кор ме висьтавлi Бур Юöрсö, найö пыр вöлiны мекöд, кыдзи и Климент да мукöд уджалысьяс, кодъяслысь нимъяссö гижöма Олöмыслöн небöгö. 4 Дугдывтöг нимкодясьöй Господь пытшкын! Нöшта шуа: нимкодясьöй! 5 Тiян рамлунныд мед тыдалас быдöнлы. Господь матын нин. 6 Нинöм вöсна энö майшасьöй. Енсö аттьöалöмöн да Сылы кевмысьöмöн вайöй Сы водзö став ассьыныд корöм-кöсйöмнытö. 7 Сэки вежöрö тöртöм Енлöн лöньлуныс видзас тiянлысь сьöлöмнытö да мöвпъяснытö Исус Кристос пытшкын. 8 Вокъяс, нöшта кора тiянöс: мöвпалöй сöмын збыльыс, шогманаыс, веськыдыс, сöстöмыс, бурыс, мичаыс, ошканаыс да нимкодьыс йылысь. 9 Вöчöй сiйö, мый тi кывлiнныд, мыйö велöдчинныд, мый тöдмалiнныд да месянь босьтiнныд. Сэки лöньлуныслöн Ен лоö тiянкöд. 10 Господь водзын ме ёна нимкодяся, öд тi бара кутiнныд тöждысьны ме вöсна. Дерт, тi век кöсйинныд тöждысьны ме вöсна, но водзынсö тiян эз вöв позянлуныс. 11 Висьтала тайöс ог сы понда, быттьö меным мыйкö оз тырмы, öд ме велалi овны сiйöн, мый эм. 12 Кужа овны гöля, кужа овны и лышкыда. Ставсö видлi да тöдлi: пöтлунсö и тшыглунсö, лышкыда олöмсö и гöльлунсö. 13 Ставсö верма менö ёнмöдысь Исус Кристоскöд! 14 Дерт, тi бура вöчинныд, мый тi юкинныд менсьым сьöкыдлунöс. 15 Филипса эскысьяс, тi öд тöданныд, мый Македонияысь мунöм бöрын, Бур Юöрсö висьтавлыны заводитiгöн, весиг öти вичко эз отсав меным сьöмöн. Сöмын тi отсалiнныд. 16 Весиг Фессалоникаö гоз-мöдысь мöдöдлiнныд меным олöм вылö. 17 Дерт, ме ог виччысь тiянсянь сетöмторсö, сöмын кöсъя, медым тiян сетöмторныд уна пöвстöн бöр бергöдчис тiянлы. 18 Епафродит сетiс тiянлысь мöдöдöмторнытö, öнi ставыс эм. Эм став коланаыс, весиг коланасьыс унджык на. Тiян сетöмторныд – Енлы шогмана чöскыд дука вись, Сылы сьöлöм сертиыс. 19 Менам Енмöй мед сетас тiянлы Исус Кристос пыр Аслас дзирдлуна озырлунысь став коланаторсö. 20 Ен Батьнымлы ошкöм нэмъяс чöж! Аминь. 21 Чолöмалöй Исус Кристослы став эскысьсö. Мекöд олысь вокъяс ыстöны тiянлы чолöм. 22 Нöшта ыстöны чолöм став вежа войтырыс, торъя нин, кесар керкаысь кесйöгъяс. 23 Господь Исус Кристослöн буралöмыс ставныдкöд тiянкöд. Аминь.
1 Гижö Павел, Ен кöсйöм серти Исус Кристослöн апостол. Тимофей воккöд 2 ми чолöмалам колосса вежа войтырöс, Исус Кристослы эскысь вокъясöс. 3 Буралöм да лöнь олöм тiянлы Ен Батьнымсянь да Господь Исус Кристоссянь. Тiян вöсна кевмысигъясöн ми пыр аттьöалам Енмöс, миян Господь Исус Кристослысь Батьсö. 4 Ми кывлiм Кристослы тiян эскöм йылысь да став вежа войтыр дiнö муслунныд йылысь. 5 Тайö тiян эм, öд тi оланныд енэжас дасьтöмаыс вылö лачаöн. Лача йывсьыс тi кывлiнныд нин, кор тiянöдз воис Бур Юöрлöн збыль кывйыс. 6 Тайö кывйыс паськалö став му пасьталаыс да вайö вотöс. Öнi сiйö паськалö да вайö вотöссö тшöтш тiян пöвстын. Бур Юöрсö кылöм бöрын тi збыльысь гöгöрвоинныд Енлысь буралöмсö. 7 Тi кылiнныд тайöс миян муса Епафрас уджъёртсянь, кодi уджалö тiян пöвстын. Сiйö – Кристослöн эскана кесъялысь. 8 Епафрас висьталiс миянлы Ловсянь чужöм муслунныд йылысь. 9 Ставсö тайöс кылöмсянь ми дугдывтöг кевмысям тiян вöсна. Кевмам, медым тiян вöлi Ловсянь мывкыдлун да гöгöрвоöм, медым тi бура тöдiнныд Енлысь кöсйöмсö. 10 Кевмысям, мед эськö тiян олöмын ошкыссис Господь, медым тi быдторйын шогминныд Сылы, бурсö вöчöмöн вайинныд вотöс да быдминныд Енсö тöдмалöмас. 11 Енмыс мед ёнмöдас да вынсьöдас тiянöс дзирдлуна выннас, медым тi быдторйын вöлiнныд зумыдöсь да терпитöмöн нуинныд быдпöлöс сьöкыдсö. 12 Долыда ошкöй Ен Батьöс, öд Сiйö вöчис миянöс шогманаясöн, медым ми тшöтш вермим босьтны Югыдiнас вежа войтырлы вичмöдöмасö. 13 Сiйö мездiс миянöс пемыдыслöн вын улысь да пыртiс муса Пиыслöн Юраланiнö. 14 Öд Пиыслöн Вирöн миянöс мездöма да мыжъяснымöс прöститöма. 15 Сiйö тыдавтöм Енмыслöн пертас, чужöма став вöчöмторсьыс медводз. 16 Сы пыр вöчöма став енэжвывсасö да мувывсасö, аддзанасö да аддзытöмсö: юралöм-ö, ыджыдалöм-ö, веськöдлöм-ö, вынъяс-ö, – ставсö вöчöма Сы пыр да Сылы. 17 Сiйö ставсьыс Медводдзаыс, Сы вылын кутчысьö ставыс. 18 Сiйö вир-яйыслöн, Вичколöн, Юрыс. Сiйö эм Панасыс. Сiйö кулöмаясысь медводдза Ловзьысь, медым быдторйын лоны медводдзаöн. 19 Тадзи Енмыс лöсьöдiс, медым Пиыс пытшкын олiс став тыр-бурыс, 20 медым Сы пыр сетны бурасьöм, да Сылöн крествывса Вирнас бурöдны Аскöдыс мувывсасö да енэжвывсасö. 21 Коркö тi вöлiнныд Енмыслы паныд мунысьяс, лёк вöчöмныд вöсна Сыысь ылынöсь. 22 Öнi Сiйö бурöдiс тiянöс Аскöдыс Кристос Вир-яйын, Сылöн кулöмыс пыр, медым сувтöдны тiянöс Ас водзас вежаöн, сöстöмöн да мыжтöмöн. 23 Сöмын тiянлы колö вöрзьывтöг сулавны эскöмас да зумыда кутны лача Бур Юöрас. Бур Юöрсö тi кывлiнныд, сiйöс юöртöма енэж улын став олысьыслы. Ме, Павел, лои тайö Бур Юöрыслы кесъяслысьöн. 24 Öнi ме нимкодяся тiян вöсна сьöкыдалiгöн. Кристослöн Вир-яйыс вöсна, Сылöн Вичко вöсна, аслам вир-яйын сьöкыдсö нуигöн ме тырта Кристос шогъяслысь лыдсö. 25 Енмыс пуктiс менö кесъявны вичкоыслы, сетiс меным удж: тырвыйö юöртны тiянлы Ен Кывсö. 26 Сылöн Кывйыс нэмсö вöлi мувывса чужысьяслы гусяторйöн, öнi сiйöс восьтöма Сылöн вежа войтырлы. 27 Енмыс кöсйис, мед найö тöдiсны, кутшöм ыджыд озырлун вайö тайö гусяторйыс быд войтырлы. Гусяторйыс – тайö Кристос тiян пытшкын, локтана дзирдлуныс вылö лачаныд. 28 Сы йылысь ми висьтавлам быдöнлы, велöдам-туйдöдам став мывкыдлунöн, медым сувтöдны быдöнöс Ен водзö Кристос пытшкын сöвмöмаясöн. 29 Та могысь ме уджала да вермася ме пытшкын олысь Кристос вынöн.
1 Кöсъя, мед тi тöдiнныд, кутшöм ыджыд тыш мунö менам тiян вöсна да лаодикияса вöсна, тшöтш на вöсна, кодъяс менö весиг эз на аддзывны. 2 Ме вермася, медым налöн муслунöн öтувтöм сьöлöманыс вöлi повтöмлун, медым найö вöлiны озырöсь тырвыйö тöдöмлунöн. Сэки найö вермасны гöгöрвоны Ен Батьлысь гусяторсö – Кристосöс. 3 Сы пытшкын мывкыдлуныслöн да тöдöмлуныслöн став озырлуныс. 4 Висьтала тайöс, медым некод эз кежöд тiянöс аслас эскöдана сёрниöн. 5 Кöть ме вир-яйöн абу тiянкöд, но лолöн тiянкöд. Меным зэв нимкодь аддзыны, мый тi оланныд öти сьöлöмöн да зумыда эсканныд Кристослы. 6 Тi кö сибöдiнныд Господь Исус Кристосöс, сiдзкö, олöй Сы пытшкын. 7 Быдмöй-сöвмöй Сы пытшкö вужъясьöмöн, ёнмöй эскöмас, кыдзи тiянöс велöдöма. Сьöлöмныд мед век вöлi тыр аттьöалöмнас. 8 Видзчысьöй, мед кодкö эз тывйышт тiянöс мувывса мывкыдлуннас да ылöг сёрнинас. Найö подуласьöны мортлöн велöдöм вылö да муюгыд вынъяс вылö, а оз Кристос вылö. 9 Кристосын, Сылöн морт вир-яйын, тыдовтчис Енлöн став тырвыйöлуныс. 10 Кристос пытшкын тiян тшöтш эм тырвыйöлуныс. Сiйö быд ыджыдалысьлы да быдпöлöс вынъяслы Юр. 11 Сы пытшкын тiянöс вундыштöма, но вундыштöма абу морт киöн. Кристослöн вундыштöмыс мездiс тiянöс мыжа тшыкöм вир-яйысь. 12 Пыртчиганыд тiянöс гуалöма Кристоскöд, да Сiйöс Ловзьöдысьыслöн вынö эскöмныд пыр тiянöс ловзьöдöма Сыкöд. 13 Тiянöс, вундыштчытöмныд да мыжъясныд вöсна кулöмаясöс, Енмыс ловзьöдiс Кристоскöд. Сiйö прöститiс миянлысь став лёк вöчöмнымöс, 14 вуштыштiс мыжалан гижöдсö став тшöктöмъяснас, кодъяс сьöктöдiсны миянöс, бырöдiс сiйöс крестö тувъялöмöн. 15 Сiйö песовтiс ыджыдалысьясöс да вынаясöс, шыбитiс найöс яналöмас да вермис Кристос пыр. 16 Сiдзкö, некод мед оз мыжав тiянöс сёян-юанысь, вежа лунъясысь, тöлысь чужöм пасйöмысь да шойччан лунö кутчысьöмысь, 17 öд ставыс тайö сöмын локтанаыслöн вуджöр, а збыльыс – Кристос. 18 Некод мед оз ылöд тiянöс аслас рамлунöн, анделъяслы юрбитöмöн да ылöг аддзылöмъяснас ошйысьöмöн. Морт вежöрнаныс мöвпалiгöн найö вылö пуктöны асьнысö. 19 Тайö йöзыс абу йитчöмаöсь Юрыскöд. Юрыс öд веськöдлö став вир-яйнас, кöнi быд юкöн йитöма-тэчöма сöн-лутш отсöгöн. Тадзи вир-яйыс быдмö-сöвмö Ен ногöн. 20 Тi кö кулiнныд Кристоскöд, мынiнныд муюгыд вынъясысь, сiдзкö, мыйла мувывсаяс моз кутчысянныд тайö шуöмъясас: 21 "эн инмöдчы", "эн сёй", "эн вöрзьöд"? 22 Тайö сöмын мортсянь тшöктöм-велöдöм, шуöма быранаторъяс йылысь. 23 Ылöг вежавидзöмнас, рамлуннас, вир-яйсö тшыгйöдöмнас найö петкöдлöны асьнысö мывкыдаöн. Но тайö оз отсав вермыны вир-яйлысь колöм-кöсйöмсö.
1 Тi кö ловзинныд Кристоскöд, корсьöй енэжвывсасö. Öд енэжас, Ен веськыдладорын, пукалö Кристос. 2 Мöвпалöй енэжвывсаыс йылысь, а энö мувывсаыс йылысь. 3 Тi öд кулiнныд, да тiянлысь олöмнытö дзебöма Кристоскöд Ен пытшкö. 4 Тiян олöмыс – Кристос. Кор Сiйö локтас, Сыкöд тшöтш и тi тыдовтчанныд Сылöн дзирдлунас. 5 Та вöсна бырöдöй ас пытшсьыныд мувывсасö: кырсалöм, пеж оласног, лёкколöм, лёк вылö ыштöм, горшасьöм – ставыс тайö идоллы юрбитöм. 6 Таысь кывзысьтöм йöз вылö лэччö Енлöн скöрлуныс. 7 Коркö тi асьныд татшöмöсь вöлiнныд да тадзи олiнныд. 8 Öнi шыбитöй ставсö тайöс: скöралöм, лёксьöм, лöгалöм, омöльтöм, пеж сёрни. 9 Энö пöръясьöй, тi öд пöрччинныд важ мортсö став сылöн уджнас 10 да пасьтасинныд выль мортö, кодi выльмö Ставсöвöчысьöс тöдмалöмнас да лоö Сы кодь. 11 Грек-ö, юдей-ö, вундыштчöма-ö, абу-ö вундыштчöма, варвар-ö, скиф-ö, кесйöг-ö, мездлуна морт-ö – торъялöмыс абу. Ставыс да ставас Кристос. 12 Сiдзкö, лоöй бур сьöлöмаöсь, мелiöсь, авъяöсь да рамöсь, терпитöй öта-мöднытö. Тi öд Енлöн бöрйöмаяс, вежаяс да Сылöн мусаяс. 13 Дöзмытöг сибöдöй öта-мöднытö. Эм кö код вылö норасьöм, прöститöй сiйöс. Кристос öд тiянöс прöститiс, тi тшöтш Сы моз прöститöй. 14 Медыджыдтор – кутчысьöй муслунас, öд муслуныс ставсö йитö да вайöдö тыр-бурöдз. 15 Тiян сьöлöмын мед ыджыдалас Енлöн лöньлуныс, кытчö корöма тiянöс, тi öд öти вир-яйынöсь. Быд кадö ошкöй Енмöс. 16 Кристослöн кывйыс мед озыра овмöдчас тiян пытшкö. Велöдöй-туйдöдöй öта-мöднытö став мывкыдлуннас. Господьöс аттьöалöмöн сьöлöмсяньныд сьылöй псаломъяс, ошкана сьыланкывъяс да бурсьылöмъяс. 17 Кывйöн-ö, уджöн-ö мыйкö вöчанныд, ставсö вöчöй Господь Исус Кристос нимöн да ошкöй Сы пыр Ен Батьöс. 18 Гöтыръяс, кывзысьöй верöсныдлысь, öд тадзи лöсялö вöчны Господь войтырлы. 19 Верöсъяс, радейтöй гöтырнытö, энö лоöй накöд чорыдöсь. 20 Челядь, быдторйын кывзысьöй бать-мамныдлысь, öд Господьлы нимкодь таысь. 21 Батьяс, энö дöзмöдöй ныв-пинытö, медым найö эз жугыльмыны. 22 Кесйöгъяс, быдторйын кывзысьöй асланыд мувывса ыджыдъяслысь. Кесъялöй налы восьса сьöлöмöн да Енмысь полöмöн, а энö йöз водзын асьнытö петкöдлöм могысь. 23 Ставсö вöчöй сьöлöмсяньныд Господьлы моз, энö мортлы моз. 24 Тöдöй, тiянлы вичмас Господьсянь тырдон, öд тi кесъяланныд Кристослы, асланыд Господьлы. 25 А лёксö вöчысь аслас уджъяс серти босьтас, öд Енмыс оз видзöд морт чужöм вылö.
1 Ыджыдъяс, лоöй веськыдöсь кесйöгныдкöд, быдöнöс сибöдöй öтмоза. Тöдöй, енэжас тiян вылын тшöтш эм Ыджыдыс. 2 Дугдывтöг кевмысьöй. Вöчöй тайöс садьмöдчöмöн да Енмöс аттьöалöмöн. 3 Кевмысьöй тшöтш миян вöсна, Енмыс мед восьтас миянлы öдзöсъяс висьтавны Кристос йылысь гусяторсö. Дзик та вöсна ме и пукала дзескыдiнын. 4 Кевмысьöй, медым ме верми восьтны гусяторсö да колана ногöн висьтавны сiйöс. 5 Лоöй мывкыдаöсь эскытöмъяскöд, эм кö позянлун, сёрнитöй накöд быд кадö. 6 Сёрнитöй бур сьöлöмöн, сёрниныд мед век вöлi солыштöма, сэки быдöнлы кужанныд вочавидзны колана ногöн. 7 Ме йылысь ставсö тiянлы висьталас муса Тихик вок, миян уджъёртным, сiйö – Господьлöн эскана кесъялысь. 8 Мöдöда сiйöс тiян дiнö, медым тöдмавны олöм-вылöмныд йылысь, нöшта ышöдны тiянöс. 9 Сыкöд тшöтш мöдöда миян муса да эскана Öнисим вокöс, сiйö öд тiянысь петiс. Найö висьталасны ставсö, мый миян вöчсьö танi. 10 Чолöм тiянлы Аристарксянь, сiйö мекöд öтлаын пукалö дзескыдiнын. Чолöм ыстö тшöтш Варнавалöн Марк нима воча вокыс. Тiянлы ме гижлi сы йылысь, мися, локтас кö, сибöдöй сiйöс. 11 Чолöм Исуссянь, кодöс нимтöны Юстöн. Вундыштчöмаяс пиысь сöмын найö мекöд уджалöны Енлöн Юралöм вöсна. Найö ёна отсасьöны меным. 12 Чолöм ыстö тiян Епафрас, Исус Кристослöн кесйöг. Кевмысигас сiйö пыр тышын тiян вöсна, мед эськö тi век сулалiнныд зумыда да быдторйын тöдiнныд Енлысь кöсйöмсö. 13 Висьтала тiянлы, сiйö ёна уджалö-шогсьö тiян вöсна, тшöтш лаодикияса да иерапольса вöсна. 14 Чолöм ыстöны миян дона бурдöдысь Лука да Димас. 15 Чолöм висьталöй лаодикияса вокъяслы, тшöтш Нимфалы да сы ордын чукöртчысь эскысьяслы. 16 Тайö гижöдсö лыддьöм бöраныд тöждысьöй, медым Лаодикия вичкоын сiйöс тшöтш лыддясны. А тi лыддьöй Лаодикияö мöдöдöм гижöдсö. 17 Аркиплы висьталöй, мед бура уджалас да помöдз вайöдас Енсянь сетöм уджсö. 18 Ме, Павел, аслам киöн гижа тiянлы чолöмöс. Тöд выланыд кутöй менсьым дзескыдiнын пукалöмöс. Енлöн буралöмыс ставныдкöд тiянкöд. Аминь.
1 Павел, Силуан да Тимофей чолöмалöны тiянöс, Ен Батьлысь да Господь Исус Кристослысь фессалоникаса вичкоöс. Буралöм да лöнь олöм тiянлы Ен Батьнымсянь да Господь Исус Кристоссянь. 2 Быд кадö ошкам Енмöс тiянысь быдöнысь да казьтывлам тiянöс кевмысигъяс дырйи. 3 Ен Батьным водзын ми век казьтывлам тiянöс, öд тiян эскöмныд петкöдчис уджъясын, а муслунныд – сьöлöмсянь вöчöмъясын, тi кутанныд зумыд лача миян Господь Исус Кристос вылö. 4 Вокъяс, тi мусаöсь Енмыслы. Ми тöдам, Сiйö бöрйис тiянöс. 5 Ми висьтавлiм тiянлы Бур Юöрсö ыджыд эскöмлунöн. Висьтавлiм эгö сöмын кывйöн, сiйö воссис тшöтш Вежа Лов вынсянь вöчöмторъясын. Тi бура тöданныд, кыдзи ми кутiм асьнымöс тiянын олiгöн да отсасим тiянлы. 6 Уна сьöкыдлун вылö видзöдтöг тi сибöдiнныд Бур Юöрсö Вежа Ловсянь нимкодьлунöн да кутiнныд вöчны миян моз да Господь моз. 7 Тадзи тi лоинныд Македонияын да Акайяын став эскысьыслы бурсö петкöдлысьясöн. 8 Ен Кывсö тi паськöдiнныд энö сöмын Македонияын да Акайяын, тiян эскöм йылысь тöдöны быдлаын. Сiдзкö, та йылысь миянлы абу нин колана висьтавлыны. 9 Миянлы быдлаын висьтавлöны, кыдзи тi сибöдiнныд миянöс, бергöдчинныд идолъясысь да кутiнныд кесъявны збыль да ловъя Енлы. 10 Тi кутiнныд виччысьны енэжсянь Енлысь Писö – Исусöс, кодöс Енмыс ловзьöдiс кулöмысь. Сiйö мездас миянöс локтана скöрлунысь.
1 Вокъяс, тi асьныд тöданныд, мый ми волiм тiян дiнö эгö весьшöрö. 2 Тi тöданныд, мый таысь водзджык Филип карын ми уна сьöкыд нуим, миянöс ёна лёкöдiсны да нöйтiсны. Но та вылö видзöдтöг, Ен отсöгöн, восьсöн да повтöг висьтавлiм тiянлы Сылысь Бур Юöрсö. 3 Öд миян велöдöмын эз вöвны наян да пеж мöвпъяс, ми некодöс эгö кöсйöй ылöдлыны. 4 Енмыс водзвыв тöдмалiс миянöс да лыддис шогманаясöн висьтавлыны Сылысь Бур Юöрсö, та вöсна и висьтавлам. Ми зiлям шогмыны Енмыслы, а огö йöзыслы, öд Сiйö тöдö миянлысь сьöлöмнымöс. 5 Ми некор эгö сёрнитлöй мавтан кывъясöн, тi тöданныд тайöс. Нинöм эгö вöчöй горшасьöмöн, Ен тöдö. 6 Ми эгö виччысьöй ошкöмсö йöзсянь, тiянсянь либö мукöдсянь. 7 Ми, Кристослöн апостолъяс, вермим эськö локны тiян дiнö юрнымöс чатöртöмöн, но ми вöлiм мелiöсь тiянкöд да тöждысим тiян вöсна, кыдзи мам тöждысьö аслас кагаыс вöсна. 8 Ми ёна радейтам тiянöс, та вöсна вöлiм дасьöсь юксьыны тiянкöд Енлöн Бур Юöрнас, весиг сетны ассьыным олöмнымöс. Öд тi сэтшöм мусаöсь миянлы! 9 Вокъяс, тi тöданныд, Енлысь Бур Юöрсö висьтавлiгöн ми уджалiм кок йылысь усьтöдз. Мырсим лун и вой, öд тiян пöвстысь некодöс эгö кöсйöй сьöктöднысö. 10 Тi тöданныд, и Енмыс тöдö, мый тiян дiнын, эскысьяс пöвстын олiгöн, ми ставсö вöчим веськыда да вежавидзöмöн, миянöс нинöмысь вöлi мыждынысö. 11 Тiянлы быдöнлы ми вöлiм бать пыдди, тi асьныд тайöс тöданныд. 12 Ми туйдöдiм-ышöдiм тiянöс да корим овны Ен ногöн. Öд Енмыс корис тiянöс Аслас Юраланiнö да дзирдлунö. 13 Дугдывтöг ошкам Енмöс, öд миян висьталöм бöрын тi сибöдiнныд Енлысь Кывсö сьöлöманыд. Тi сибöдiнныд сiйöс энö мортлысь висьталöмсö моз, а Енлысь Кывсö моз. Тайö збыльысь Енлöн Кыв, сiйö вына тiян пытшкын, эскысьясын. 14 Вокъяс, мый вöлi Юдеяын Исус Кристослы эскысь Ен вичкояскöд, тайö лои тшöтш тiянкöд. Найö уна сьöкыд нуисны юдейяссянь, а тi – ас войтырсянь. 15 Господь Исусöс да Сылысь пророкъяссö юдейяс виисны, а миянöс вöтлiсны. Найö дöзмöдöны Енсö да став йöзыслы паныд мунöны. 16 Найö оз лэдзны миянлы бурвисьтавлыны мукöд войтырлы, медым найö мездмисны. Тадзи найö содтöны ассьыныс мыжъяссö. Но Енлöн скöрлуныс суис нин найöс. 17 Вокъяс, ми янсавлiм тiянкöд дженьыдик кад кежлö, но сьöлöмöн пыр вöлiм тiянкöд. Ми ёна гажтöмтчим тiянысь да ёнджыка на кöсйим аддзысьлыны тiянкöд. 18 Ми ёна кöсйим волыны тiян дiнö. Ме, Павел, эг öтчыдысь мöдöдчыв тiян дiнö, но сöтана тупкис туйнымöс. 19 Миян Господь Исус Кристос локтiгöн ог öмöй тiянöн кутöй ошйысьны Сы водзын? Абу-ö тi миян лачаыс, нимкодьлуныс да ошйысян юркытшыс? 20 Öд тi – миян ошйысянторйыс да нимкодьлуныс.
1 Миянлы вöлi вывтi сьöкыд тiянкöд янсалöмысь. Та вöсна ми шуим, мый асьным кольччам Афин карö, 2 а Тимофей вокнымöс мöдöдам тiян дiнö. Сiйö миянкöд öтвыв кесъялö Енмыслы да отсалö висьтавлыны Кристослысь Бур Юöрсö. Ми мöдöдiм сiйöс тiян дiнö, медым ышöдны тiянöс да ёнмöдны эскöмнытö, 3 медым сьöкыдсö нуигöн тiян пöвстысь некод эз усь. Öд тi асьныд тöданныд, мый миянлы ковмас нуны сьöкыдсö. 4 Тiянö волiгöн ми висьтавлiм нин, мый ковмас нуны сьöкыдсö. Тi тöданныд: дзик тадзи и лоис. 5 Та вöсна, водзö эг нин вермы виччысьнысö да мöдöдi тiян дiнö Тимофейöс, медым тöдмавны тiян эскöмныд йылысь, эз-ö ылöдлы тiянöс омöльыс, эз-ö ло весьшöрö миян уджным. 6 Тимофей сöмын на воис тiян дiнысь да вайис тiян эскöмныд да муслунныд йылысь нимкодь юöр, тi пö век бур ногöн казьтывланныд миянöс да миян моз ёна кöсъянныд аддзысьлыны миянкöд. 7 Та вöсна, вокъяс, став тайö сьöкыдсö нуигöн да миянöс вöтлiгöн тiян эскöмныд ышöдiс миянöс. 8 Öнi миян сьöлöмын лöнь, öд тi зумыда кутчысянныд Господь дiнö. 9 Ми ёна аттьöалам Енсö тiянысь, öд тi сетанныд миянлы позянлун ёна нимкодясьны Ен водзын. 10 Ми лун и вой сьöлöмсянь кевмысям, медым аддзысьлыны тiянкöд да сетны тiян эскöмлы тырмытöмсö. 11 Ачыс Енмыс, миян Бать, да миян Господь Исус Кристос мед веськöдасны миянлысь туйнымöс тiян дiнö. 12 Господь мед уна пöв содтас öта-мöдныд дiнö да став йöзыс дiнö муслуннытö. Тiян муслунныд мед лоö сэтшöм жö вына, кутшöм вына тiян дiнö миян муслунным. 13 Господь мед ёнмöдас сьöлöмнытö, медым тi вöлiнныд вежаöсь да сöстöмöсь Ен Батьным водзын, кор миян Господь Исус Кристос локтас став Аслас вежа войтыркöд. Аминь.
1 Вокъяс, тiянлы висьтавлiм нин, медым олiнныд Ен водзын шогмана ногöн. Дерт, тi дзик тадзи и оланныд. Но Исус Кристос нимöн ышöдам да корам тiянöс: олöй нöшта на бурджыка. 2 Тi öд тöданныд, кутшöм тшöктöмъяс ми сетiм тiянлы Господь Исуссянь. 3 Енмыс кöсйö, медым тi вöлiнныд вежаöсь да видзинныд асьнытö кырсалöмысь. 4 Тiян пиысь быдöн мед видзö ассьыс вир-яйсö вежаöн да шогмана ногöн, 5 медым ентöдтöмъяс моз некод оз сетчы ыпъялан лёкколöмас, öд Енсö найö оз тöдны. 6 Эскысь мед оз вöч лёксö мöд эскысьлы, оз ылöдлы сiйöс, öд Господь мыждас таысь. Та йылысь висьтавлiм нин тiянлы да öлöдлiм тiянöс. 7 Öд Енмыс корис миянöс овны вежа оласногöн, а эз пеж оласногöн. 8 Сiдзкö, тайö тшöктöмсö öтдортысь оз мортöс öтдорт, а Енсö, кодi сетiс миянлы Ассьыс Вежа Ловсö. 9 Эскысьяс дiнö муслун йылысь абу колана гижны тiянлы, öд Ачыс Енмыс велöдiс тiянöс радейтны öта-мöднытö. 10 Тi збыльысь радейтанныд Македония пасьтала став эскысьсö. Вокъяс, корам тiянöс: радейтöй öта-мöднытö нöшта на ёнджыка. 11 Зiльöй овны лöня. Быдöн мед вöчö ассьыс удж, ас ки помысь шедöдö олöм вылас. Тадзи ми велöдлiм тiянöс. 12 Сэки эскытöмъяс тшöтш кутасны пыдди пуктыны тiянöс, тiян ставыс лоö тырмымöн. 13 Вокъяс, кöсъя, мед тi тöдiнныд, мый лоö кулöмаяскöд. Сэки эскытöмъяс моз онö кутöй шогсьыны кулöмаяс йылысь, öд эскытöмъяслöн лачаныс абу. 14 Ми кö эскам, мый Исус кулiс и ловзис, сiдзкö, Исускöд Енмыс вайöдас Ас дiнас тшöтш найöс, кодi эскис Исуслы, но кулiс нин. 15 Öнi висьталам тiянлы Господьлысь кывъяссö: ми, кодъяс ловъяöсь на Господь локтöдз, огö пановтöй кулöмаясöс. 16 Кор кылас чукöстöм шы, кор шыасяс архангел да кылас Енлöн труба шыыс, Ачыс Господь лэччас енэжсяньыс. Сэки медводз ловзясны кулöмаяс, кодъяс эскисны Кристослы. 17 Сэсся миянöс, ловъяясöс, накöд тшöтш лоö кыпöдöма кымöръяс вылын сынöдас, медым аддзысьны сэнi Господькöд. Тадзи пыр лоам Господькöд. 18 Сiдзкö, ышöдöй öта-мöднытö тайö кывъяснас.
1 Вокъяс, урчитöм кад йывсьыс абу колана гижны тiянлы. 2 Тi öд асьныд бура тöданныд, мый Господьлöн луныс войся гусясьысь моз воас. 3 Кор йöзыс кутасны шуавны: «Гöгöр лöнь, повнысö нинöмысь», сэки тöдлытöг суас найöс кулöм, кыдзи тöдлытöг суö кага чужтысьöс дой. Сэки некод оз вермы пышйынысö. 4 Вокъяс, тi онö пемыдас олöй. Сiдзкö, сiйö луныс оз лок тiян дiнö гусясьысь моз тöдлытöг. 5 Öд быдöн тi – луныслöн да югыдыслöн ныв-пи. Ми абу пемыдыслöн, абу войыслöн ныв-пи. 6 Сiдзкö, мукöдыс моз огö кутöй узьны. Садьмöдчам да кутам овны садь вежöрöн. 7 Öд узьысьяс войнас узьöны, да юысьяс войнас кодалöны. 8 Ми – луныслöн ныв-пи. Сiдзкö, кутам овны садь вежöрöн. Пасьталам ас выланым муслуныслысь да эскöмыслысь кöрт кышöдсö, а юр вевттьöд пыдди босьтам мездмöм вылö лачасö. 9 Öд Енмыс бöрйис миянöс эз сы могысь, медым Сылöн скöрлуныс суис миянöс, но сы могысь, медым Исус Кристос Господьным пыр ми босьтiм мездмöмсö. 10 Кристос кулiс миян вöсна, медым ми, ловъяöсь али кулöмаöсь, олiм Сыкöд. 11 Сiдзкö, öнiя моз водзö ышöдöй да ёнмöдöй öта-мöднытö. 12 Вокъяс, корам тiянöс: пыдди пуктöй тiян пöвстын уджалысьясöс, Господькöд öтувъя олöмас тiянöс туйдöдысьясöс да тiянöн веськöдлысьясöс. 13 Вылö пуктöй татшöм йöзсö, радейтöй найöс налöн уджысь. Ас костаныд олöй лöня. 14 Вокъяс, корам тiянöс: дышъясöс туйдöдöй, полысьясöс ышöдöй, жебъясöс кутыштöй, быдöнöс терпитöй. 15 Видзчысьöй, мед некод лёксьыс эз мынтысь лёкöн. Мöдарö, зiльöй вöчны бурсö öта-мöдныдлы да став йöзыслы. 16 Пыр нимкодясьöй. 17 Дугдывтöг кевмысьöй. 18 Ставсьыс аттьöалöй Енсö, öд татшöмъясöн Енмыс кöсйö аддзыны тiянöс, Исус Кристослы эскысьясöс. 19 Ловлысь ыпъялöмсö энö кусöдöй. 20 Пророкъяслысь висьталöмсö энö öтдортöй. 21 Ставсö тöдмалöй, бурас кутчысьöй. 22 Ылыстчöй быдпöлöс лёксьыс. 23 Лöньлуныслöн Ен мед Ачыс тырвыйö вежöдас тiянöс да видзас тiянлысь ловнытö, олöмнытö да вир-яйнытö сöстöмöн миян Господь Исус Кристос локтiгкежлö. 24 Сiйö, кодi корис тiянöс, эскана. Сiдзкö, вöчас шуöм сертиыс. 25 Вокъяс, кевмысьöй миян вöсна. 26 Став вокъясöс чолöмалöй вежа окыштöмöн. 27 Кора тiянöс Господь нимöн: лыддьöй тайö гижöдсö став вежа вокъяслы. 28 Миян Господь Исус Кристослöн буралöмыс тiянкöд. Аминь.
1 Павел, Силуан да Тимофей чолöмалöны тiянöс, миян Ен Батьлысь да Господь Исус Кристослысь фессалоникаса вичкоöс. 2 Буралöм да лöнь олöм тiянлы Ен Батьнымсянь да Господь Исус Кристоссянь! 3 Вокъяс, миянлы век колö ошкыны Енсö тiянысь, öд тiян эскöмныд лунысь-лун ёнмö да öта-мöд костаныд муслунныд ёнджыка на содö. 4 Та вöсна ми ошйысям тiянöн Ен вичкоясын, öд быдпöлöс сьöкыдсö нуигöн да тiянöс вöтлiгöн тi зумыда эсканныд. 5 Енмыс лыддьö тiянöс шогманаясöн пырны Аслас Юраланiнö, öд дзик та понда тi нуанныд сьöкыдсö. Таын тыдалö Енлöн веськыдлуныс. 6 Енмыс веськыда вöчö: тiянöс дзескöдысьяслы Сiйö мынтысьö дзескöдöмöн. 7 А тiянлы да миянлы, сьöкыдсö нуысьяслы, Енмыс сетас шойччöг, кор Господь Исус Аслас вына анделъяскöд лэччас енэжсянь 8 ыпъялан би пытшкын да мыждас найöс, кодъяс оз тöдны Енсö да оз кывзыны миян Господь Исус Кристослысь Бур Юöрсö. 9 Найöс лоö мыждöма пыр кежлö кулöм вылö, торйöдöма Господьысь, Сылöн дзирдлунысь да вынысь. 10 Тайö лоö сiйö лунö, кор Господь локтас. Сэки Сылöн став вежа войтырыс кутас ошкыны Господьöс да став эскысьыс кутас шензьыны Сы вылö. Тi тшöтш лоанныд на лыдын, öд тi эскинныд миян висьталöмö. 11 Та вöсна, дугдывтöг кевмысям тiян вöсна, медым Енным лыддяс тiянöс шогманаясöн лоны Аслас корöмаяс лыдын, медым Аслас вынöн Сiйö ёнмöдас тiянлысь бур кöсйöмнытö да эскöмныд пыр отсалас помöдз вайöдны бур уджъяснытö. 12 Сэки миян Господь Исус Кристослöн нимыс ошкыссяс тiян пыр, а тi – Сы пыр, миян Ен да Господь Исус Кристослöн буралöмыс кузя.
1 Öнi гижам тiянлы миян Господь Исус Кристослöн локтöм йылысь да Сы дiнö миян чукöртчöм йылысь. Вокъяс, корам тiянöс: 2 энö майшасьöй некутшöм гижöдысь либö кодлöнкö сёрниысь, быттьö сiйö Ловсянь висьталö, мый Кристослöн луныс воис нин. Энö полöй, весиг висьталасны кö тiянлы, мый тайöс ми гижим. 3 Энö сетöй асьнытö ылöдлыны некодлы, öд сiйö луныс воас сöмын сэки, кор йöзыс кежасны Енсьыс. Сэки локтас мыжыслöн морт, кулöмыслöн пи, 4 Енлы паныд мунысь. Сiйö пуктас асьсö ставсьыс вылö, мый йöзыс Енмöн лыддьöны да шуöны вежаöн. Сiйö пуксяс Енлöн крамö быттьö Ен да кутас шуны асьсö Енмöн. 5 Тiянö волiгöн ме висьтавлi нин та йылысь, тi öмöй вунöдiнныд? 6 Öнi тi тöданныд, мый кутö паныд мунысьöс кадысь водз воссьöмысь. 7 Ен Индöдлы паныд мунысь вöчö нин ассьыс гуся уджъяссö. Кор лоö босьтöма сылöн туй вылысь сiйöс кутысьöс, 8 сэки паныд мунысь воссяс. Но Господь Исус локтiгас виас сiйöс Аслас лолыштöмнас да бырöдас сiйöс Аслас дзирдлуннас. 9 Паныд мунысьыс локтас сöтанасянь. Ыджыд вынöн сiйö кутас петкöдлыны индысьпасъяс да вöчны ылöг шензьöданаторъяс. 10 Сiйö быдногыс кутас ылöдлыны найöс, кодъяс мунöны кулöмас. Öд найö мустöмтiсны мездана збыльсö. 11 Та вöсна Енмыс лэдзас ылöдлыны найöс, медым найö эскисны ылöгыслы. 12 Тадзи лоö мыждöма быдöнöс, кодi радейтö ылöгсö да оз эскы збыльыслы. 13 Вокъяс, миянлы дугдывтöг колö ошкыны Енсö тiянысь. Тi ёна мусаöсь Господьлы, öд Енмыс водзысяньыс бöрйис тiянöс мездмöм вылö. Тайö мездмöмсö Сiйö сетö тiянлы Ловлöн вежöдöмыс пыр да збыльыслы эскöмныд пыр. 14 Ми висьтавлiм тiянлы Бур Юöрсö, код пыр Енмыс корис тiянöс мездмöмас, мед миян Господь Исус Кристослöн дзирдлуныс вичмис тiянлы. 15 Сiдзкö, вокъяс, зумыда сулалöй да кутчысьöй сэтчö, мыйö велöдiм тiянöс да мый гижим тiянлы. 16 Ен Батьнымлы ми ёна мусаöсь. Буралöмыс вöсна Сiйö сетiс миянлы пыр кежлö бурöдöм да зумыд лача. Ачыс Исус Кристос Господьным да Ен Батьным 17 мед бурöдасны тiянлысь сьöлöмнытö да ышöдасны тiянöс бур уджъяс вылö да бур сёрни вылö.
1 Вокъяс, медбöрти корам тiянöс: кевмысьöй миян вöсна, мед Господьлöн Кывйыс öдйö паськалас, медым йöзыс тiян моз сибöдасны сiйöс пыдди пуктöмöн. 2 Нöшта кевмысьöй, мед Ен видзас миянöс шогмытöм да лёк йöзысь, öд оз быдöн эскы. 3 Но Господь эскана, Сiйö ёнмöдас тiянöс да видзас омöльысь. 4 Господь эскöдö миянöс, мый тi вöчанныд нин миян тшöктöм серти да водзö на сiдзи кутанныд вöчны. 5 Ачыс Господь мед веськöдас тiянлысь сьöлöмнытö Енлöн муслунас да Кристослöн зумыдлунас. 6 Вокъяс, миян Господь Исус Кристос нимöн тшöктам тiянлы: ылыстчöй эскысь вокысь, кодi весь олö да оз ов миян велöдöм серти. 7 Тi öд асьныд тöданныд, мый тiянлы колö овны миян моз. Тiян дiнын ми весь эгö олöй, 8 некодлысь дась нянь эгö сёйöй. Лун и вой пöсь петтöдз уджалiм, öд некодöс тiян пöвстысь эгö кöсйöй сьöктöднысö. 9 Дерт, ми вермим весь овны, но тадзи эгö вöчöй. Ми кöсйим, мед тi видзöдiнныд миян вылö да олiнныд миян моз. 10 Öд тiянö волiгöн ми шулiм нин: «Кодi оз кöсйы уджавны, сiйö мед оз сёй». 11 Миянлы кывсис, тiян пöвстысь пö öткымынöн весьшöрö кадсö коллялöны. Найö оз уджавны да нырсö быдлаö сюйöны. 12 Татшöм йöзсö миян Господь Исус Кристос нимöн корам да ышöдам: уджалöй рам сьöлöмöн да ас ки помысь шедöдöй аслыныд кынöмпöттö. 13 Вокъяс, бурсö вöчигöн энö лигышмунöй. 14 Кодi оз вöч тайö гижöдас висьталöм серти, сiйöс кутöй тöд выланыд. Татшöм мортыскöд энö кутöй некутшöм йитöд. Тадзи тi янöданныд сiйöс. 15 Сöмын энö лыддьöй сiйöс паныд мунысьöн, а туйдöдöй сiйöс вокöс моз. 16 Ачыс Господь, лöньлунсö Сетысь, мед быд кадö да быдторйын сетас тiянлы лöньлунсö. Господь мед лоас ставныдкöд тiянкöд! 17 Ме, Павел, аслам киöн гижа тiянлы чолöмöс, кодi лоö пасöн, мый гижöдыс месянь. Ме гижа тадзи быд гижöдын: 18 миян Господь Исус Кристослöн буралöмыс ставныдкöд тiянкöд. Аминь.
1 Гижö Павел, Исус Кристослöн апостол. Миянöс мездысь Ен да Господь Исус Кристос, код вылö ми кутам лача, индiсны менö апостолöн. 2 Тимофей, эскöмыд вöсна тэ меным збыльысь пи кодь. Бурсетöм, буралöм да лöнь олöм тэныд Ен Батьнымсянь да миян Господь Исус Кристоссянь. 3 Македонияö мöдöдчигöн ме кори тэнö олыштны Ефесын кодсюрööс öлöдöм могысь, медым найö эз велöдны ылöгас, 4 эз кутчысьны мойдъясö да дугдiсны корсьысьны, кодi кутшöм чужанвужйысь петiс. Öд тасянь сöмын вензьöм артмö Енлы кесъялöм пыдди. Енмыслы позьö кесъявны сöмын эскöмöн. 5 Миян öлöдöмлöн медшöр могыс – радейтöм. Сiйö петö сöстöм да мыжтöм сьöлöмсянь да восьса сьöлöмöн эскöмсянь. 6 Кодсюрö кежисны таысь да сетчисны ковтöм сёрниясö. 7 Найö пуктöны асьнысö Индöдö велöдысьясö, но асьныс оз гöгöрвоны, мый висьталöны да мыйö велöдöны. 8 Ми тöдам: Индöдыс бур, вöдитчыны кö сыöн бур ногöн. 9 Гöгöрвоам, мый Индöдсö лöсьöдöма абу веськыда олысьлы, а сiйöс торкалысьлы да кывзысьтöмлы, Ентöг олысьлы да мыж вöчысьлы, эскытöмлы да Енмöс омöльтысьлы, бать-мам вылö ки лэптысьлы да морт виысьлы, 10 кырсалысьлы да öта-мöдыскöд узьлысь айуловлы, мортöн вузасьысьлы, пöръясьысьлы, ылöгвисьталысьлы да быдöнлы, кодi паныд мунö веськыд велöдöмлы. 11 Öд тадзи висьталö ошкана Енлöн дзирдлун йылысь Бур Юöрыс, и тайö Юöрсö висьтавлыны Енмыс мöдöдiс менö. 12 Ме аттьöала миянлысь Господь Исус Кристосöс, öд Сiйö ёнмöдiс менö да лыддис менö шогманаöн кесъявны Сылы. 13 Водзынсö ме омöльтi Кристосöс, вöтлi-дзескöдi Сылы эскысьясöс да лёк вöчи налы. Но Кристос вöлi бур сьöлöма ме дiнö, öд тадзисö ме вöчи гöгöрвотöмла да эскытöмла. 14 Миян Господь озыра тыртiс менö Аслас буралöмнас. Исус Кристос пыр Сiйö сетiс меным эскöм да муслун. 15 Мый öнi висьтала тiянлы – тайö эскана, сiйöс шогмö сибöдны сьöлöманыд. Исус Кристос локтiс муюгыдас, медым мездыны мыжаясöс, и на пиысь ме медся мыжаыс. 16 Енмыс вöлi бур сьöлöма ме дiнö. Öд ме пыр, медся мыжаыслöн олöм пыр, Исус Кристос петкöдлiс Ассьыс терпитöмсö налы, кодъяс эскасны Сылы да босьтасны помтöм олöмсö. 17 Енмыс пыр олысь, Сiйö ыджыдалö помтöг. Ыджыд мывкыда тыдавтöм öти Енлы ошкöм-нимöдöмыс нэмъяс чöж. Аминь. 18 Тимофей, муса пиöй, кутчысь пророкъяслöн тэ йылысь висьталöмас да вермась бур тышкасьысь моз. 19 Видз эскöмтö да ов сiдзи, мед сьöлöмыд эз мыжды тэнö. Öд кодсюрö вунöдiсны тайöс, и налöн эскöмыс пасьмунiс. 20 Татшöмöсь Именей Öльöксанкöд. Найöс ме сетi сöтана киö, медым дугдiсны омöльтны Енсö.
1 Медводз кора тiянöс: кевмысьöй Енмыслы, шыасьöй Сы дiнö корöм-кевмöмöн да аттьöалöмöн став йöзыс вöсна. 2 Кевмысьöй юралысьяс да ыджыдалысьяс вöсна, медым ми олiм лöня да зыксьытöг, вежавидзöмöн да шогмана ногöн. 3 Öд тайö бур да шогмö Енмыслы, миян Мездысьлы. 4 Сiйö кöсйö, медым став йöзыс мездмисны да тöдiсны збыльсö. 5 Енмыс öти. Ен да морт костын сулалысьыс тшöтш öти: Морт, Исус Кристос. 6 Сiйö сетiс Асьсö, медым ньöбны став йöзсö. Тайö петкöдлö, мый мездана кадыс воис нин. 7 Енмыс сувтöдiс менö, медым юöртны та йылысь. Кристос водзын ме збыльысь висьтала, ог пöръясь: менö индöма апостолöн да ентöдтöмъясöс збыляс-эскöмас велöдысьöн. 8 Ме кöсъя, медым айулов быдлаын кевмысисны кинысö кыпöдöмöн, сöстöм сьöлöмöн, лöгавтöг да майшасьтöг. 9 Кöсъя, медым аньяс пасьтасисны лючки-бура, мичмöдiсны асьнысö рамлунöн да вежавидзöмöн, а эз юрсинысö баситöмöн, зарни-жемчуг öшлöмöн да дона паськöмöн. 10 Найö мед мичмöдасны асьнысö бур уджъясöн. Тадзи колö вöчны Ен водзын вежавидзысь аньяслы. 11 Аньяс мед чöла да кывзысьöмöн велöдчасны. 12 Аньлы ог лэдз велöдны айловöс либö ыджыдавны сы вылын, ань мед чöв олö. 13 Öд водзджык вöлi вöчöма Адамöс, сэсся Еваöс. 14 Эз Адам ылав, но ань ыштöмыс вöсна ылалiс да мыж вöчис. 15 Но ань мездмас кага чужтöм пыр, кутчысяс кö эскöмас, муслунас, вежавидзöмас да бур оласногас.
1 Тайö збыль: кодi кöсйö вичкоöн веськöдлыны, сiйö бур удж кöсйö вöчны. 2 Вичкоöн веськöдлыны вермö сöстöм оласнога, öти гöтыра, садь да сюсь вежöра, бур оласнога морт. Ветлысь-мунысьöс сибöдö, кужö велöдны, 3 оз ю, оз тышкась, аслыс оз курав, рам сьöлöма, оз пинясь, сьöм вылö оз горшась, 4 бура веськöдлö аслас гортнас. Сылöн ныв-пиыс кывзысьöны сылысь да пыдди пуктöны сiйöс. 5 Öд сiйö кö оз сяммы веськöдлыны гортнас, вермас-ö тöждысьны Енлöн Вичкоыс вöсна? 6 Вичкоса веськöдлысьнас оз вермы лоны морт, кодi сöмын на бергöдчис Ен дiнö. Öд сiйö вермас вылö кыпöдчыны да омöльыс моз веськалас мыждöм улö. 7 Зэв колана, медым вичкоысь öтдор мукöдыс тшöтш пыдди пуктiсны сiйöс. Сэки лёк сёрниыс сы йылысь оз паськав, да сiйö оз шед омöльлöн налькйö. 8 Вичкоса отсасьысьяс мед лоасны мывкыдаöсь, сёрнитасны веськыда, оз кодавны, аслыныс оз куравны, 9 кутчысясны эскöмлöн гусяторйö да видзасны сьöлöмнысö сöстöмöн. 10 Найöс колö водзвыв тöдмавны, сэсся, шогманаöсь кö, мед кесъялöны. 11 Аньяс мед тшöтш лоасны мывкыдаöсь, садь вежöраöсь, быдторйын эсканаöсь да оз суклясьны. 12 Вичкоса отсасьысь мед вöлi öти гöтыра, бура веськöдлiс гортнас да ныв-пинас. 13 Öд бура кесъялысьöс вылö донъяласны, сiйö кутас повтöг висьтавлыны Исус Кристослы эскöм йылысь. 14 Лача кута, мый регыд локта тэ дiнö. Гижа тайöс, 15 медым, падма кö, тэ тöдiн, кыдзи кутны асьтö Ен керкаын, ловъя Енлöн Вичкоын. Öд Вичкоыс – збыльыслöн сюръяыс да подулыс. 16 Кывшутöг, миян эскöмлöн гусяторйыс ыджыд: Енмыс восьтiс Асьсö вир-яйын, Лолыс петкöдлiс Сылысь веськыдлунсö, Сiйöс аддзылiсны анделъяс, Сы йылысь юöртiсны мукöд войтырлы, Сылы эскисны муюгыдас, Сiйö кыпöдчис дзирдлунас.
1 Лов веськыда висьталö, мый бöръя кадас кодсюрö кежасны эскöмысь. Найö пондасны кывзыны ылöдчысь ловъясöс да кутчысясны пеж ловъяслöн велöдöмö. 2 Татшöм велöдöмыс петö пöръясьысьяссянь, кык бана шаньгаяссянь, кодъяс воштöмаöсь яндзимнысö. 3 Найö оз лэдзны гöтрасьны да сёйны сiйö, мый Енмыс вöчис. Но Енмыс вöчис сёянсö, медым эскысьяс, збыльсö тöдысьяс, сёйисны сiйöс Енсö аттьöалöмöн. 4 Öд Енмыслöн став вöчöмторйыс бур. Сёян кö аттьöалöмöн, сэки нинöмысь повнысö. 5 Öд кевмысьöм да Енлöн Кывйыс вежöдöны сiйöс. 6 Туйдöд тадзи вокъястö, сэки тэ лоан Исус Кристослöн бур кесъялысьöн. Öд тэ пöткöдан асьтö эскöмлöн кывъясöн да бур велöдöмöн, мый серти олан. 7 Ылöг да ковтöм мойдъясысь ылыстчы, велöдчы овны вежавидзöмöн. 8 Öд вир-яйтö ёнмöдöмысь бурыс этша, а вежавидзана олöмысь – уна. Сiйö сетö лача öнiя да локтана олöм вылö. 9 Тайö висьталöмыс эскана, сiйöс шогмö сибöдны сьöлöмад. 10 Ми ёна мырсям да нуам лёкöдöмсö, öд лачанымöс кутам ловъя Ен вылö. Сiйö – быдöнлы Мездысь, торйöн нин эскысьяслы. 11 Туйдöд-велöд татчö. 12 Некод мед оз увтырт тэнö томлун вöснаыд. Тэнад сёрниыд, оласногыд, муслуныд, сьöлöмыд, эскöмыд да сöстöмлуныд мед лоö шогмана, мед эскысьяс вермисны овны тэ моз. 13 Менам локтöдз лыддьы Енлысь Кывсö да туйдöд-велöд йöзсö. 14 Видз Енсянь сетöмторсö, кодöс вöлi сетöма тэныд пророклöн висьталöмыс пыр вичкоса юрнуöдысьяслöн ки пуктылiгöн. 15 Тöждысь та вöсна, ставсö вöч сьöлöмсяньыд, сэки быдöн аддзас тэнсьыд вермöмтö. 16 Видзöд ас бöрсяыд: кыдзи олан да мыйö велöдан. Вöч тайöс дугдывтöг, öд тадзи вöчигöн тэ асьтö мездан, тшöтш тэнö кывзысьясöс.
1 Пöрысьясöс чорыда эн öлöд, туйдöд найöс батьтö моз, томджыкъясöс – воктö моз. 2 Олöма аньясöс туйдöд мамтö моз, томджыкъясöс велöд сöстöм сьöлöмöн чойтö моз. 3 Тöждысь öткöн олысь дöваяс вöсна. 4 Эм кö дöвалöн ныв-пи либö налöн ныв-пи, найö мед вежавидзöмöн тöждысясны гортсаыс вöсна да бурöн мынтысясны бать-мамыслы да пöль-пöчыслы. Öд тайö шогмö Енмыслы. 5 Дзик öткöн олысь дöва лача кутö Ен вылö да лун и вой кевмысьö Енмыслы. 6 А лышкыда олысь – ловъявывсьыс кулöма. 7 Туйдöд тадзи дöваясöс, медым найö олiсны сöстöма. 8 Кодi оз тöждысь матыссаыс вöсна, торйöн нин гортсаыс вöсна, сiйö эновтöма эскöмсö да эскытöм дорысь лёкджык на. 9 Дöва лыдö позьö пыртны сöмын квайтымын арöсаöс да сыысь ыджыдджык арлыда аньöс, вöлöма кö сiйö öтчыдысь верöс сайын, 10 да тöдöны сiйöс бур уджъясыс серти: бур ногöн быдтöма-велöдöма ныв-писö, сибöдöма ветлысь-мунысьöс, мыськалöма вежа войтырлысь кокнысö, отсалöма сьöкыдалысьяслы да вöчöма быд бурсö. 11 Томджыкъясöс эн пырт дöваяс лыдö. Кор найö сетчöны ыштöмас, сэки ылыстчöны Кристосысь да тэрмасьöны петны верöс сайö. 12 Найö мыжмöны, öд найö öтдортчöны эскöмысь. 13 Керкаысь керкаö ветлiгöн найö весьшöрö кад коллялöны, суклясьöны, быдлаö сюйсьöны да паськöдöны ковтöм сёрнияс. 14 Та вöсна кöсъя, медым том дöваяс петiсны верöс сайö, кага чужтiсны да тöждысисны гортныс вöсна. Сэки найö оз сетны помкасö паныд мунысьяслы омöльтны эскысьясöс. 15 Öд кодсюрö кежисны веськыд туй вывсьыс да мунöны сöтана бöрся. 16 Эскысьлöн кö матыссаяс пöвстас эм дöва, сылы колö тöждысьны дöваыс вöсна, оз ков Вичкосö сьöктöдны. Сэки Вичкоыс вермас тöждысьны збыль дöваяс вöсна. 17 Вичкоса юрнуöдысьясöс, кодъяс бура уджалöны, колö вылö донъявны, торйöн нин Ен Кыв висьталысьясöс да велöдысьясöс. Налы колö бура мынтысьны. 18 Öд Гижöдыс висьталö: «Вартысь öшлысь вомсö эн тупкы» и «Уджалысьлы колö мынтыны уджыс серти». 19 Вичкоса юрнуöдысьöс кö мыждöны мыйыськö, тайö мыждöмсö эн кывзы, оз кö сiйöс вынсьöдны кык-куим аддзылысь-висьталысь. 20 Мыж вöчысьöс янöд ставныс водзын, медым мукöдыс тшöтш полiсны мыжсö вöчны. 21 Кора тэнö Ен водзын, Господь Исус Кристос водзын да бöрйöм анделъяс водзын: кутчысь тайö туйдöдöмъясас. Нинöм эн вöч ассяньыд, чужöм вылö видзöдöмöн. 22 Эн тэрмась ки пуктывны кодкö вылö, медым эн мыжмы сылöн мыж вöчöм вöсна. Видз асьтö сöстöма. 23 Гырк висьöмыд да тшöкыда нёрпалöмыд вöсна ваысь öтдор юышт тшöтш винатор. 24 Öтияслöн мыжыс тыдалö, и найöс мыждöны нин. Мöдъяслöн мыжыс воссяс бöрыннас. 25 Бур уджъясыд тшöтш тыдалöны, а оз на кö, бöрыннас воссясны.
1 Сийöсувса кесйöгъяс, быдторйын пыдди пуктöй ыджыдъяснытö, медым эз вöв лёкöдöма Енлысь нимсö да Сылысь велöдöмсö. 2 Кесйöглöн ыджыдыс кö эскысь, и эскöм сертиныс найö вокъяс, кесйöг мед оз пукты ыджыдсö нинöм туйö. Мöдарö, мед ёнджыка на кесъялö ыджыдыслы, öд сiйö кесъялö муса эскысь мортлы. Тадзи велöд-туйдöд. 3 Кодi велöдö мöдторйö да оз кутчысь миян Господь Исус Кристослöн веськыд кывъясас да велöдöмас, мый вайöдö вежавидзана оласногö, 4 татшöм мортыс вылö пуктö асьсö да нинöм оз гöгöрво. Сiйö пыр кöсйö вензьыны да зыксьыны. А тасянь артмö вежалöм, пинясьöм, лёкöдöм, гусьöн мыждöм 5 да помтöм вензьöм на костын, кодъяслöн пемдöма вежöрыс. Найö кежöмаöсь збыльсьыс да вежавидзана оласногыс пыр кöсйöны озырмыны сьöмöн. Татшöмъяссьыс ылыстчы. 6 Вежавидзöмыс збыльысь озырмöдö найöс, кодъяс олöны нинöм вылö шуасьтöг. 7 Öд ми нинöм эгö вайöй тайö муюгыдас, и нинöм огö нуöй татысь. 8 Эм кö сёян-юан да кöм-пась, сiдзкö, тырмöдчам таöн. 9 Озырмыны кöсйысьяс сетчöны ыштöмас да шедöны налькйö, сетчöны быдпöлöс мывкыдтöмлунас да лёк кöсйöмас, кодъяс бырöдöны йöзсö да вайöдöны найöс кулöмö. 10 Öд став лёкыслöн вужйыс – сьöм радейтöм. Сьöм бöрся вöтлысигöн кодсюрö кежисны эскöмысь да кöлалiсны ас выланыс уна шог. 11 Но тэ, Ен мортöй, ылыстчы таысь. Кутчысь веськыдлунас, вежавидзана оласногас, эскöмас, муслунас, зумыдлунас да рамлунас. 12 Зумыда вермась эскöмыд вöсна, кутчысь помтöм олöмас, кытчö Енмыс корис тэнö. Öд уна йöз водзын тэ восьсöн висьтасин аслад эскöм йылысь. 13 Ставыслы олöм сетысь Ен водзын да Исус Кристос водзын, кодi восьсöн висьталiс збыльсö Понтий Пилатлы, ме кора тэнö: 14 миян Господь Исус Кристос локтöдз ставсö вöч менам тшöктöм серти, сöстöма да веськыда. 15 Кристослысь локтöмсö ас кадö восьтас миянлы ошкана Ен. Сiйö – öти вына Веськöдлысь, öксыяслöн Öксы, ыджыдъяслöн Ыджыдыс. 16 Сiйö öтнас кувлытöм, олö югыдас, кытчö матыстчыны он вермы. Морт Сiйöс эз аддзыв, и аддзыны оз вермы. Сiйöс нимöдöмыс, Сылöн ыджыдалöмыс помтöм. Аминь. 17 Тайö нэмас озыра олысьясöс велöд, медым найö эз вылö кыпöдчыны, эз кутны лачанысö бырана озырлун вылö, а ловъя Ен вылö. Öд Сiйö лышкыда сетö миянлы ставсö, медым ми вермим овны нимкодясьöмöн. 18 Велöд озыръясöс, медым вöчисны бурсö, озырмисны бур уджъясöн, вöлiны лышкыдöсь да юксисны мукöдкöд. 19 Тадзи вöчигöн найö чукöртöны аслыныс озырлун – зумыд подув локтанаыслы, медым налы вичмис помтöм олöм. 20 Тимофей, видз тэныд сетöмасö. Эн кывзы йöзыслысь ковтöм сёрнияс да вензьöмъяс, кодъяс петöны ылöг тöдöмлунсянь. 21 Öд кодсюрö кутчысисны татшöм тöдöмлунас да кежисны эскöмысь. Енлöн буралöмыс тэкöд. Аминь.
1 Гижö Павел, Ен кöсйöм серти Исус Кристослöн апостол. Менö мöдöдöма висьтавны кöсйысьöм пыр сетöм олöм йылысь. Тайö олöмыс Исус Кристос пытшкын. 2 Бурсетöм, буралöм да лöнь олöм тэныд, муса Тимофей пиöй, Ен Батьсянь да миян Господь Исус Кристоссянь. 3 Лун и вой аслам кевмысьöмъясын ме пыр казьтывла тэнö да ошка Енмöс, ме кесъяла Сылы батьясным моз сöстöм сьöлöмöн. 4 Тэнад синваыд оз вунлы менам. Та вöсна ёна кöсъя аддзöдчывны тэкöд, медым тырны нимкодьлунöн. 5 Казьтывла тэнсьыд сьöлöмсянь эскöмтö. Тадзи эскылiсны тэнад Лоида пöчыд да Евника мамыд. Тöда, тэ тшöтш на моз эскан. 6 Та вöсна, казьтышта тэныд: эн кусöд Енсянь сетöмторлысь бисö. Тайö сетöмторсö тэ сибöдiн менам ки пуктылöм пыр. 7 Енмыс öд сетiс миянлы эз полöмыслысь лов, а выныслысь, муслуныслысь да бур мывкыдыслысь лов. 8 Сiдзкö, эн яндысь висьтавлыны Господьным йылысь. Эн яндысь и меысь, Кристос вöсна дзескыдiнö йöртöмаысь. Мöдарö, Ен вынöн тэ тшöтш ну Бур Юöр вöсна сьöкыдсö. 9 Енмыс öд мездiс миянöс да корис вежа олöмас эз миян уджъясным вöсна, а Аслас шуöмыс да буралöмыс вöсна, кодöс Сiйö сетöма миянлы олöм пуксьытöдзыс на Исус Кристос пытшкын. 10 Öнi миян Мездысь Исус Кристослöн локтöмыс восьтiс буралöмсö. Кристос бырöдiс кулöмсö да Бур Юöр пыр восьтiс олöмсö да бырлытöмсö. 11 Та вылö менö и пуктöма, медым висьтавлыны Бур Юöрсö, апостолавны да велöдны мукöд войтырöс. 12 Дзик та вöсна ме öнi сьöкыдсö нуа да ог яндысь таысь, öд ме тöда, кодлы ме эска. Тöда, Сiйö вына видзны меным сетöмасö Аслас локтан лунöдз. 13 Кутчысь месянь кывлöм веськыд велöдöмас Исус Кристоссянь босьтöм эскöмнад да муслуннад. 14 Видз тэныд сетöм бурсö Вежа Лов отсöгöн, кодi олö сьöлöманым. 15 Тэ тöдан, Асияын ставныс эновтiсны менö, весиг Фигел Ермогенкöд. 16 Господь мед лоас бур сьöлöма Öнисифорлöн гортса дiнö, öд сiйö унаысь ышöдлiс менö да эз яндысьлы менам пукалöмысь. 17 Римö волiгас сiйö быдлаысь корсис менö да аддзис. 18 Мед Господь лоас бур сьöлöма сы дiнö Аслас локтан лунö. Мыйтöм сiйö отсасис меным Ефесын, тэ бурджыка тöдан.
1 Ёнмöдчы, муса пиöй, Исус Кристослöн буралöмнас. 2 Ставсö, мый тэ кывлiн месянь уна йöз дырйи, юксьы эскана йöзкöд, кодъяс сяммасны велöдны мукöдöс. 3 Исус Кристослöн бур тышкасьысь моз ло дась нуны сьöкыдсö. 4 Шыпурта морт кольö быдлунъя тöждъяссö, медым шогмыны веськöдлысьыслы. 5 Панласьысь кö торкас ордйысянногсö, сылы оз шед вермысьлöн нимыс. 6 Быдтасысь пайсö медводз босьтö сьöкыд удж вöчысь. 7 Вежöрт, мый висьтала. Господь мед отсалас тэныд ставсö гöгöрвоны. 8 Кут тöд вылад Исус Кристосöс, Давид вужйысь Чужысьöс да кулöмысь Ловзьысьöс. Тадзи висьталö меöн юöртöм Бур Юöрыс. 9 Тайö юöр вöснаыс ме и нуа сьöкыдсö. Менö дорисны лёк вöчысьöс моз, но Енлысь Кывсö абу дорöма. 10 Та вöсна ме муна став сьöкыд пырыс. Вöча тайöс Енлöн бöрйöмаяс вöсна, медым найö тшöтш босьтiсны Исус Кристоссянь мездмöмсö да помасьлытöм дзирдлунсö. 11 Тайö кывйыс эскана: – Ми кö кулiм Сыкöд, Сыкöд пондам овны. 12 Мунам кö сьöкыдыс пыр, Сыкöд пондам ыджыдавны. Соссям кö Сыысь, Сiйö соссяс миянысь. 13 Ми кö эновтам Сiйöс, Сiйö оз эновт миянöс, öд Ачыс Ассьыс соссьыны оз вермы. 14 Казьтыв тайöс да Господь водзын öлöд кывъяс понда венö пырöмысь. Öд тайö бурсö оз вай, сöмын виö кывзысьясöс. 15 Тöждысь шогмыны Енлы, аслад уджысь эн яндысь, збыльсö висьтав веськыда. 16 Ковтöм сёрниысь ылыстчы, öд татшöмъясыс лунысь-лун пондасны ёнджыка сетчыны Ентöг олöмас. 17 Налöн велöдöмыс рак висьöм моз паськалö. Именей да Филит тшöтш на лыдынöсь. 18 Найö кежисны збыльсьыс, висьталöны, ловзьöмыс пö вöлi нин. Татшöм сёрнинас найö жугöдöны кодсюрöлысь эскöмсö. 19 Но Енмöн пуктöм подулыс вöрзьывтöм. Сэтчö пасйöма: «Господь тöдö Ассьыс йöзсö», нöшта пасйöма: «Господьлысь нимсö висьталысь мед эновтчас лёксьыс». 20 Ыджыд керкаад абу сöмын зарни да эзысь дозъяс, эмöсь и пу да сёй дозъяс. Öтияснас вöдитчöны торъя лунъясö, мöдъяснас – быд лун. 21 Кодi весалöма асьсö став пежсьыс, сiйö зарни да эзысь доз кодь: вежа, ыджыдыслы ёна колана да бур уджъяс вылö шогмана. 22 Ылыстчы томдырся ыштöмъясысь. Ен дiнö сьöлöмсяньыс шыасьысьяскöд кутчысь веськыдлунас, эскöмас, муслунас да лöньлунас. 23 Ковтöм да мывкыдтöм вензьöмъясысь ылыстчы. Тöд, тайö вайöдö зыксьöмöдз. 24 Господьлöн кесйöг оз вензьы, мöдарö, сiйö быдöнкöд мелi, кужö велöдны да оз дöзмы. 25 Сiйö рам сьöлöмöн туйдöдö паныд мунысьясöс, гашкö, Енмыс сетас налы позянлун бергöдчыны мыжъяссьыныс да тöдмавны збыльсö. 26 Сэки найö казяласны да мынасны омöльыслöн налькйысь, öд омöльыс кыйöма найöс, медым веськöдлыны.
1 Тöд, бöръя лунъясö пуксяс сьöкыд кад. 2 Йöзыс пондасны радейтны сöмын асьнысö, ыштыны сьöм вылö, пондасны ошйысьны, асьнысö вылö пуктыны, Енсö омöльтны, бать-мамсö оз кутны кывзыны. Найö öдйö вунöдöны бурсö, эскытöмöсь, 3 чорыд сьöлöмаöсь, оз бурасьны, суклясьöны, асьнысö оз кутны, скöрöсь, бурсö мустöмтöны, 4 öта-мöдсö вузалöны, этшсö оз тöдны да тшапöсь. Енмыс дорысь налы мусаджык лышкыда олöмыс. 5 Ортсысяньыс видзöдны кö, найö кутчысьöны вежавидзöмö, но, збыльвылас, найö оз эскыны Енмыслöн вынö. Татшöмъяссьыс ылыстчы. 6 Кодсюрö на пöвстысь наяна пырöны керкаясö да кыскöны асланьыс коньöр аньясöс, кодъяс оз вермыны мынтöдчыны асланыс мыжъясысь да кокньыда сетчöны асланыс кöсйöмъясö. 7 Найö öтарö велöдчöны, но збыльыс налы оз пуксьы вежöрас. 8 Кыдзи коркö Янний да Ямврий паныд сувтiсны Мöисейлы, öнi тайö йöзыс паныд сувтöны збыльыслы. Налöн вежöрыс торксьöма да эскöмыс абу шогмана. 9 Но найö оз кутны дыр нимавны, Мöисейлы паныд сувтысьяслöн моз налöн йöйталöмыс тыдовтчас. 10 Тэ став сьöлöмнад йитчин менам велöдöмö, менам олöмö да менам могъясö. Мекöд тшöтш тэ эскин, терпитiн, радейтiн да зумыда сулалiн, 11 кор менö суисны Антиокияын, Иконияын да Листраын вöтлöмъяс да сьöкыдлунъяс. Ме мунi сэки ыджыд вöтлöмъяс пыр, и Господь ставсьыс менö мездiс. 12 Быдöнöс, кодi кöсйö овны вежа олöмöн Исус Кристос пытшкын, пондасны вöтлыны. 13 А лёк да пöръясьысь йöзлöн лёк вöчöмыс кутас содны. Найö унаöс ылöдасны, асьныс тшöтш ылаласны. 14 А тэ зумыда кутчысь сэтчö, мыйö тэнö велöдöма да мыйö тэ эскин. Тэ öд тöдан, кодi велöдiс тэнö. 15 Тэ ичöтсяньыд тöдан вежа Гижöдъяс. Гижöдыс сетö мывкыдлун, медым Исус Кристослы эскöмöн тэ вермин мездмыны. 16 Ставнас Гижöдыс Ен Ловсянь да вайö сöмын бур. Сiйö велöдö, янöдö, вежö да туйдöдö веськыд олöмас, 17 медым Енлöн морт вöлi тыр-бур да вöлi дась вöчны быдпöлöс бур уджсö.
1 Ен водзын да Господь Исус Кристос водзын, кодi кутас мыждыны ловъяясöс да кулöмаясöс, Сылысь локтöмсö да Юралöмсö тöд вылын кутöмöн кора тэнö: 2 ло дась висьтавны Енлысь Кывсö лöсялан и лöсявтöм кадö. Бур велöдысь моз терпитöмöн янöд, öлöд да туйдöд. 3 Öд воас кад, веськыд велöдöмсö оз пондыны кывзыны. Бöръясны аслыныс сьöлöм сертиыс велöдысьясöс, медым найöс кывзыны. 4 Пельнысö тупкасны збыльыслы да бергöдчасны мойдъяслань. 5 Но мед тэнад вежöрыд лоö ясыд быдторйын, сьöкыд нуигъясад кутчысь, висьтавлы Бур Юöрсö да кесъяв помöдз. 6 Öнi ме Ен водзö вайöм вись кодь, воис кад меным мунны. 7 Ме бура вермаси, помöдзыс котöртi, эскöмöс видзи. 8 Öнi менö виччысьö веськыдлуныслöн юркытш. Веськыда мыждысь Господь Аслас лунö сетас сiйöс меным да быдöнлы, кодi став сьöлöмнас виччысьö Сылысь локтöмсö. 9 Тэрмась локны ме дiнö регыдъя кадö. 10 Димас колис менö да мунiс Фессалоникаö. Сылы тайö мувывса олöмыс мусаджык вöлöма. Крискент мунiс Галатияö, Тит – Далматияö, öтнас Лука мекöд. 11 Босьт аскöдыд Маркöс, сiйö бур отсасьысь менам уджын. 12 Тихикöс ме мöдöдi Ефесö. 13 Локтiгад вай менсьым кышанöс, сiйöс ме коли Троадö Карп ордö. Босьт нöшта менсьым небöгъясöс, торйöн нин кучик вылö гижöмасö. 14 Уна лёк меным вöчис кузнеч Öльöксан. Господь Ачыс мед перъяс сылысь водзöссö став уджсьыс. 15 Видзчысь сыысь. Сiйö ёна паныд мунiс миян велöдöмлы. 16 Ёрдын медводдза дорйысигöн некод эз сувт ме дор, ставныс эновтiсны менö. Мед оз ло лыддьöма тайöс налы мыжöн. 17 Ачыс Господь вöлi ме дор. Сiйö ёнмöдiс менö, медым ме верми тырвыйö буръюöртны, медым став кыла войтырыс кылiсны тайö Бур Юöрсö. Господь мездiс менö весиг лев вомысь. 18 Тöда, Сiйö видзас менö став лёксьыс, мездас да вайöдас Аслас енэжвыв Юраланiнö. Ошкöм Сылы нэмъяс чöж! Аминь. 19 Висьтав чолöм Прискиллалы да Акиллы, тшöтш Öнисифорлöн гортсалы. 20 Ераст кольччис Коринфö, Трöпимöс ме кольöдi Милитö, висьмис да. 21 Вермöдчы локны тöлöдзыс. Тэныд ыстöны чолöм Еввул, Пуд, Лин, Клавдия да став вокъяс. 22 Господь Исус Кристос тэкöд. Енлöн буралöмыс тiянкöд. Аминь.
1 Гижö Павел, Енлöн кесйöг да Исус Кристослöн апостол. Менö мöдöдöма, мед отсавны Енлöн бöрйöмаяслы эскыны да тöдны збыльсö, медым эськö найö вермисны овны вежавидзöмöн 2 да помтöм олöм вылö лачаöн. Помтöм олöмсö Ен кöсйысис му пуксьытöдзыс на, и Ассьыс кывсö Сiйö оз веж. 3 Ас кадö Сiйö сетiс тöдны кывсö бурвисьталöм пыр, та вылö менö и сувтöдiс. Тайö вöлi Ен Мездысьнымлöн тшöктöм. 4 Чолöмала тэнö, Тит. Öтувъя эскöманым тэ меным збыльысь пи кодь. Бурсетöм, буралöм да лöнь олöм тэныд Ен Батьсянь да миян Мездысь Исус Кристос Господьсянь. 5 Ме коли тэнö Критö, мед тэ эштöдiн сэнi помавтöмторсö да быд карын индiн вичкоса юрнуöдысьясöс, кыдзи тай ме тэныд тшöктылi. 6 Юрнуöдысь мед вöлi бур оласнога, öти гöтыра, ныв-пиыс мед эскисны, быдторйын кывзысисны да лэдзчысьöмöн эз овны, на йылысь мед эз кыв лёк сёрни. 7 Вичкоса веськöдлысьöн вермö лоны сöмын бур оласнога морт, öд сылы сетöма вöчны Енлысь удж. Мед сiйö эз вöв асныра, эз вöв дöзмысь, эз ю, эз усьлась мукöд вылö, аслыс эз курав, 8 ветлысь-мунысьöс мед сибöдiс, бурсö радейтiс, вöлi сюсь вежöра, быдторйын веськыд, вежавидзысь да кужис асьсö кутны. 9 Сiйö мед вöлi зумыда кутчысьöма велöдöмыслöн збыль кывъясö, кужис веськыд велöдöмнас туйдöдны мукöдöс да вермис янöдны паныд мунысьöс. 10 Öд унаöн аснырасьöны, ковтöмсö сёрнитöны да мукöдсö пöрйöдлöны, и унджыкыс найö вундыштчöмаяс пöвстысь. 11 Татшöмъясыслысь колö тупкыны вомсö. Яндысьтöм горшлунныс вöсна найö асланыс велöдöмöн шöйöвоштöны дзонь керкаяс, мыйö оз ков велöдöны. 12 Налöн асланыс гижысьыс весиг шулöма: – Критсаяс – пöръясьысьяс, скöр понъяс, горш кöинъяс да дыш руньöяс. 13 Веськыда шуöма. Та вöсна чорыда янöд татшöм йöзсö, медым налöн эскöмыс вöлi веськыд. 14 Найö мед оз кывзыны юдейяслысь мойдъяссö да йöзлысь ас лöсьöдöм тшöктöмъяссö. Татшöм йöзыс öд кежöмаöсь збыльсьыс. 15 Сöстöмлы ставыс сöстöм, а пежасьöмалы да эскытöмлы нинöм абу сöстöм. Налöн пежасьöма вежöрыс, весиг сьöлöмыс. 16 Найö шуöны, тöдам пö Енсö, но уджыс налöн мöдтор йылысь висьталö. Найö мустöмöсь, кывзысьтöмöсь и бурсö вöчны оз сяммыны.
1 Тэ висьтавлы веськыд велöдöмыслы лöсяланасö. 2 Олöма айуловöс велöд лоны авъяöн, садь да сюсь вежöраöн. Мед найö топыда кутчысясны эскöмас, муслунас да зумыдлунас. 3 Олöма аньяс мед оласны вежавидзöмöн, оз суклясьны, вина оз юны, туйдöдасны томджыкъясöс бурас, 4 велöдасны найöс радейтны верöснысö да ныв-писö, 5 медым эськö том аньяс вöлiны сюсь вежöраöсь, сöстöм сьöлöмаöсь, шаньöсь, мед тöждысясны гортныс вöсна да кывзысясны верöсныслысь. Сэки Ен Кывсö оз ло омöльтöма. 6 Зонъясöс тшöтш велöд лоны сюсь вежöраöн. 7 Вöч быд бурсö, мед мукöдыс тэ вылö видзöдöмöн тшöтш велаласны татчö. Велöд сöстöм сьöлöмöн, вежавидзöмöн да Кывсö торкавтöг. 8 Сёрнит веськыда да тырвыйö эскöд, медым паныд мунысь яналас да оз вермы шуны миян йылысь нинöм лёксö. 9 Кесйöгъяс мед быдторйын кывзысясны асланыс ыджыдныслысь, зiлясны кывшутöг шогмыны сылы. 10 Мед оз гусясьны, мöдарö, быдторйын мед петкöдласны, мый налы позьö тырвыйö эскыны. Сэки на пыр пыдди пуктöма лоö Ен Мездысьнымлысь велöдöмсö. 11 Енмыс петкöдлiс Ассьыс буралöмсö, медым став йöзсö мездыны. 12 Буралöмыс велöдö миянöс, мед ми эновтчим Ентöг олöмсьыс да быдпöлöс мувывса ыштöмсьыс, вöлiм сюсь вежöраöсь тайö нэмас, олiм веськыда да вежавидзöмöн, 13 виччысим вына Енлысь да миян Мездысь Исус Кристослысь дзирдлуна воссьöмсö да шуда лачанымлысь збыльмöмсö. 14 Кристос сетiс Асьсö миян вöсна, медым мездыны миянöс быд лёксьыс, сöстöммöдны миянöс да торйöдны Аслыс войтырöс, кодi сьöлöмсяньыс пондас вöчны бурсö. 15 Тадзи велöд, ышöд да янöд тэныд сетöм вынöн. Эн сет асьтö некодлы увтыртны.
1 Казьтыв эскысьяслы, медым кывзысясны юралысьяслысь да пуктöм йöзлысь, пыдди пуктасны налысь веськöдлöмсö да лоасны дасьöсь вöчны быд бурсö. 2 Мед оз омöльтны некодöс, зыкö оз пырны, лоасны шаньöсь да быдöнкöд рамöсь. 3 Ми öд асьным коркö вöлiм вежöртöмöсь да кывзысьтöмöсь, вошöмаöсь олöмас, сетчöмаöсь ыштöмас да быдпöлöс ковтöм гажöдчöмас. Олiм лёк пытшкас, вежалiм, вöлiм мустöмöсь, да мукöдсö тшöтш мустöмтiм. 4 Но Ен Мездысьным петкöдлiс миян дiнö Ассьыс бурлунсö да муслунсö. 5 Сiйö мездiс миянöс. Мездiс эз веськыд уджъясным серти, но Аслас буралöмыс вöсна. Ен мыськалiс миянöс да сетiс миянлы выльысь чужны. Сiйö выльмöдiс миянöс Вежа Ловнас. 6 Исус Кристос Мездысьным пыр Сiйö лышкыда кисьтiс миян пытшкö Вежа Ловсö, 7 медым Сылöн буралöмсянь ми лоим веськыдöсь да миянлы вичмис помтöм олöм. Тайö и эм миян лачаным. 8 Тайö кывъясыс эсканаöсь. Ме кöсъя, мед тэ тöдчöдöмöн пыр казьтылiн тайöс, медым Енлы эскысьяс тöждысисны бурсö вöчны. Тайö бур да йöзыслы колана. 9 Тöлктöм вензяна сёрниысь, ордпу да Индöд кузя зыксьöм-пинясьöмысь ылыстчы. Ставыс тайö ковтöмтор да весьшöрö. 10 Ылöгас кежöдысьöс öтчыд да мöдысь öлöдöм бöрын эновт. 11 Тöд, татшöм мортыс тшыкöма, мыж вöчöмнас сiйö ачыс асьсö мыждöм улас сюйö. 12 Артемöс либö Тихикöс кор мöдöда тэ дiнö, тэрмась волыны ме дiнö Никопольö. Сэнi тай шуи тöвйынысö. 13 Отсав петны туйö оланпас тöдысь Зинейлы да Аполослы, медым налы ставыс вöлi судзсяна-тырмана. 14 Миян эскысьяс мед тшöтш велöдчасны бурсö вöчны, сетны колана отсöг, сэки найö вотöстöг оз кольны. 15 Чолöм тэныд ыстöны танi ставныс. Висьтав чолöм миянöс радейтысь эскысь чой-воклы. Енлöн буралöмыс ставныдкöд тiянкöд. Аминь.
1 Гижö Павел. Исус Кристос вöсна ме пукала дзескыдiнын. Тимофей воккöд ми чолöмалам муса Филимон уджъёртнымöс. 2 Чолöмалам дона Апфия чойöс да миянкöд öтвыв вермасьысь Аркип ёртöс да сы ордын чукöртчысь эскысьясöс. 3 Буралöм да лöнь олöм тiянлы Ен Батьнымсянь да Господь Исус Кристоссянь. 4 Кевмысигам пыр казьтывла тэнö да аттьöала Енмöс. 5 Ме кывлi Исус Господьлы тэнад эскöм йылысь да став вежа войтыр дiнö муслуныд йылысь. 6 Кевмыся, медым миян öтувъя эскöмным отсалас тэныд тöдны быд бурсö, кодöс сетöма тiянлы Исус Кристос пытшкын. 7 Вокöй, тэнад муслуныд ёна долыдмöдö да ышöдö миянöс, öд тэ лöньöдан вежа войтырлысь сьöлöмсö. 8 Ме, дерт, верма Кристос нимöн тшöктыны тэныд вöчны коланасö, 9 но муслунöй вöсна шыася тэ дiнö корöмöн. Ме, пöрысь Павел, Исус Кристос вöсна пукалысь, 10 кора тэнö Öнисим пиöй вöсна. Сiйöс ме чужтi танi дзескыдiнын. 11 Коркö сiйö ковтöм вöлi тэныд, öнi ёна колана тэныд да меным. 12 Ме бöр мöдöда сiйöс тэ дiнö. Сибöд сiйöс сьöлöм бердысь чуктöдöмторйöс моз. 13 Кöсйи сiйöс кольöдны ас дiнö, мед тэ пыдди отсасьыштас меным Бур Юöр вöсна пукалiгöн. 14 Но тэнад шутöг нинöм ог кöсйы вöчны, мед эськö тэ бурсö вöчин ас кöсйöмöн, а эн мырдöн. 15 Гашкö, и колö вöлi сылы кад кежлö тэкöд янсöдчывнысö, медым сэсся тэ сибöдiн сiйöс пыр кежлö. 16 Сибöдiн эн нин кесйöгöс моз, но кесйöгысь донаджыкöс – муса вокöс моз. Меным сiйö ёна муса. Но тэныд сiйö, кыдзи ас морт да нöшта Господьсянь вок, ёна мусаджык на. 17 Тэ кö шуан менö аслад вокöн, сибöд сiйöс менö моз. 18 Тэнö кö сiйö мыйöнкö дойдiс-дöзмöдiс либö уджйöза тэныд, öшöд ставсö ме вылö. 19 Ме, Павел, аслам киöн пасъя: «Ме мынтыся». Шуны кö, тэ ачыд став олöмнад меным уджйöза. 20 Вокöй, Господь нимсянь вöч меным тайö бурторсö, лöньöд менсьым сьöлöмöс Господь вöсна. 21 Ме эска, тэ кывзысян, та вöсна и гижа. Тöда, тэ вöчан унджык на менам корöм дорысь. 22 Нöшта кора, корсьлы меным оланiн. Лача кута, тiян кевмысьöм отсöгöн Енмыс бöр вайöдас менö тiян дiнö. 23 Чолöм Епафрассянь, сiйö мекöд пукалö Кристос вöсна. 24 Марк, Аристарк, Димас да Лука, менам уджъёртъяс, тшöтш ыстöны чолöм. 25 Миян Господь Исус Кристослöн буралöмыс тiянкöд. Аминь.
1 Енмыс важысянь унаысь да уна ногöн шыасьлiс миян батьяс дiнö пророкъяс пыр. 2 Тайö бöръя кадас Сiйö шыасьлiс миян дiнö Пиыс пыр. Енмыс сетiс Сылы ставсö, Сы пыр вöчис ентыкöласö. 3 Пиыс – Енлöн яръюгыд дзирдлуныс, Сылöн пертасыс. Сiйö ставсö кутö Аслас вына кывнас. Аслас Вирнас Сiйö мыськалiс миянлысь мыжъяснымöс, пуксис Вына Енлöн веськыдладорö енэжас 4 да лои анделъясысь вылынджык на. Сылöн нимыс ёна тöдчанаджык налöн нимысь. 5 Öд ни öти анделлы Енмыс эз шулы: – Тэ – Менам Пи, талун Ме лои Тэнад Батьöн. Ни öти андел йылысь Енмыс эз шулы: – Ме лоа Сылöн Батьöн, Сiйö – Менам Пиöн. 6 Муюгыдас Ассьыс медводдза Чужысьсö пыртiгöн Енмыс шуö: – Копыртчылöй Сылы ставныд, Енлöн анделъяс. 7 Анделъяс йылысь Енмыс висьталö: – Ассьыс анделъяссö Енмыс вöчö тöвнырöн, Ассьыс кесъялысьяссö – ыпъялан биöн. 8 Пиыс йылысь Енмыс тадзи висьталö: – Енмöй, Тэнад юралан пуклöсыд нэмъяс чöж. Тэнад веськöдлан беддьыд – веськыдлун. 9 Веськыдлуныс Тэныд муса, а лёксö Тэ мустöмтан. Та вöсна, Енмöй, Тэнад Енмыд мавтыштiс Тэнö нимкодьлунöн мукöд дорысь ёнджыка на. 10 Нöшта Енмыс шуö: – Господьöй, медводз Тэ вöчин мусö, енэжыс тшöтш Тэнад вöчöмтор, 11 найö бырасны, а Тэ помтöг олан. Ставыс тайö паськöм моз важмас. 12 Кöлуйöс моз Тэ гартыштан найöс, да найö вежсясны, а Тэ некор он вежсьы. Тэнад олан лунъяслы помыс оз ло. 13 Некутшöм анделлы Енмыс эз шулы: – Пукав Менам веськыдладорын, кытчöдз ог пукты Тэнад кок улö Тэныд паныд мунысьясöс. 14 Анделъяс – тайö кесъялысь ловъяс. Енмыс мöдöдö найöс кесъявны налы, кодъяслы вичмас мездмöмыс.
1 Та вöсна, миянлы ёнджыка на колö кутчысьны кывлöмаыс дiнö, медым эгö ылалöй. 2 Öд анделъяс пыр висьталöм юöрыс кö вöлi вына, да быд кывзысьтöмлунысь да лёк вöчöмысь кö мыждылiсны веськыда, 3 сiдзкö, мынам-ö ми мыждöмсьыс, кутам кö нинöм туйö пуктыны тайö ыджыдторсö – мездмöмсö? Тайö мездмöмыс йылысь медводз висьталiс Господь, сэсся Сысянь кылысьяс эскöдiсны миянöс, мый тайö висьталöмыс збыль. 4 Тайö висьталöмсö Енмыс ёнмöдiс тадзи: висьталысьяс пыр Сiйö петкöдлiс индысьпасъяс, вöчис шензьöданаторъяс да быдпöлöс ыджыд уджъяс, Ас кöсйöм сертиыс Сiйö юклiс Вежа Ловсянь сетöмторъяс. 5 Енмыс эз сет анделъяслы веськöдлыны локтана муюгыднас, мый йылысь ми сёрнитам. 6 Кодкö гижлöма та йылысь: – Мортыс – кодi сэтшöмыс, мый Тэ казьтывлан сiйöс? Мортлöн пиыс – кодi сэтшöмыс, мый Тэ тöждысян сы вöсна? 7 Сöмын дженьыд кад кежлö Тэ пуктiн мортсö анделъяс дорысь улöджык, мичмöдiн сiйöс дзирдлунöн да нимöдöмöн, сувтöдiн сiйöс веськöдлыны Аслад вöчöмторнад. 8 Тэ ставсö пуктiн сы кок улö! Енмыс ставсö сетiс морт кипод улö, сылы нинöм эз коль сеттöмыс. Дерт, öнi оз на тыдав, мый ставсö нин сетöма морт кипод улö. 9 Но ми аддзам Исусöс, кодöс дженьыд кад кежлö вöлi улöджык пуктöма анделъяс дорысь. Енлöн буралöмыс вöсна Сiйö кулiс став йöзыс понда. Тайö сьöкыда кулöм вöснаыс Исусöс öнi мичмöдöма дзирдлунöн да нимöдöмöн. 10 Енмыс, Ставсöвöчысь да Ставсöкутысь, уна ныв-пиöс кöсйö вайöдны Аслас дзирдлунö. Та вöсна Исуслы, мездмöмас Нуöдысьлы, Енмыс лэдзис нуны сьöкыдсö, медым Сы пыр помöдз вайöдны Ассьыс мöвпыштöмсö. 11 Вежöдысьыс да вежа войтырыс – öти Батьсянь. Та вöсна Исус оз яндысь шуны вежа войтырöс Аслас вокъясöн. 12 Сiйö шуö: – Ме висьтала Тэ йылысь Аслам вокъяслы, нимöда Тэнö вичко водзын. 13 Нöшта шуö: – Ме кута лача Ен вылö, да содтö: – Со, Ме да ныв-пи, кодъясöс сетiс Меным Ен. 14 Тайö ныв-пиыслöн эм вир-яй. Та вöсна Кристос тшöтш лоис на кодьöн, медым кувлöмнас бырöдны омöльöс, кулöмыс вылын ыджыдалысьöс, 15 да мездыны кулöмысь полысьясöс. Öд став олöм чöжныс найö вöлiны полöмыслöн кöртöд улынöсь. 16 Кристос тöждысьö Öвраамсянь чужысьяс вöсна, а оз анделъяс вöсна. 17 Кристослы ковмис лоны морт кодьöн, Аслас вокъяс кодьöн, медым лоны Сылы бур сьöлöма да Енлысь кывзысьысь Аркирейöн, да медым босьтны Ас вылас йöзлысь мыжъяссö. 18 Кристос Ачыс нуис сьöкыдсö да ыштöдöмсö, та вöсна вермö отсавны ыштöдöмаяслы.
1 Вокъяс, ме шыася тiян дiнö, вежа войтыр да Енлöн корöмаяс дiнö: видзöдöй Исус Кристос вылö. Сiйö – Енсянь Локтысь, Аркирей, Сылы ми эскам. 2 Енмыс сувтöдiс Сiйöс Аркирейöн. Сiйö кесъялiс Енмыслы кывзысьöмöн, кыдзи Мöисей «быд кадö кывзысьöмöн кесъялiс Ен керкаын». 3 Керка вöчысьсö ёнджыка ошкöны керкасö дорысь. Тадзи Исусöс ёнджыка шогмö ошкыны Мöисейöс дорысь. 4 Быд керкалöн эм аслас вöчысь, но Ставсöвöчысьыс – Ен. 5 Мöисей «кывзысьöмöн кесъялiс Ен керкаын», но сiйö вöлi сöмын кесъялысь. Аслас олöмнас сiйö водзвыв петкöдлiс, мый Енмыс кöсйис висьтавны бöрынджык. 6 Ен керкаын Пиыс – Кристос, Сiйö кывкутöмöн веськöдлö ставнас Ен керканас. Ен керкаыс – тайö ми, лоам кö повтöмöсь да помöдз кутам зумыда кутчысьны лачаас, мыйöн ошйысям. 7 Вежа Лов висьталö: – Талун, Енлысь гöлöс шысö кылiгöн, 8 энö чорзьöдöй сьöлöмнытö, кыдзи тi вöчинныд овтöминын: кыпöдчинныд Меным паныд да дöзмöдiнныд Менö. 9 Сэнi тiян батьясныд нелямын во чöж аддзылiсны Менсьым уджъясöс, да ыштöдiсны-дöзмöдiсны Менö. 10 Сэки Ме дöзми на вылö да шуи: «Найö пыр ылалöмаöсь», Менам туйöд оз ветлыны. 11 Та вöсна Ме дöзми на вылö да сетi кыв: «Найö оз пырны Менам шойччанiнö». 12 Вокъяс, видзчысьöй, тiян пиысь мед некод эз вöв эскытöмöн, эз ов лёк мöвпъясöн, медым энö кежöй ловъя Енсьыс. 13 Быд лун ышöдöй öта-мöднытö, кытчöдз позьö на шуны "талун", мед тiян пиысь некодлöн эз чорзьы сьöлöмыс мыжлöн ылöдлöм вöсна. 14 Ми кö водзысяньыс моз помöдз кутам эскыны зумыда, сэки миянлы тшöтш вичмас Кристослöн озырлуныс. 15 Та йылысь шуöма: – Талун, Енлысь гöлöс шысö кылiгöн, энö чорзьöдöй сьöлöмнытö, кыдзи тi вöчинныд Меным паныд сувтiгöн. 16 Öд Енлысь гöлöс шысö кылысьяс пиысь кодсюрö паныд сувтiсны Енмыслы, но эз ставныс, кодъяс петiсны Мöисейкöд Египетысь. 17 Код вылö нö Енмыс скöралiс нелямын во чöжсö? Эз-ö мыж вöчысьяс вылö, кодъяслöн лыясыс колины овтöминö? 18 Кодлы нö Енмыс кыв сетiс, мый найö оз пырны Сылöн шойччанiнö? Эз-ö кывзысьтöмъяслы? 19 Ми аддзам, мый эскытöм вöснаныс найö эз пырны Ен шойччанiнö.
1 Енлöн кöсйысьöмыс, мый ми вермам пырны Сылöн шойччанiнö, öнöдз на вына. Сiдзкö, кутам тöждысьны, мед тiян пиысь некод эз сёрмы пырны Ен шойччанiнö. 2 Египетысь петысьяслы вöлi висьталöма Бур Юöрсö миянлы моз, но тайö нинöм эз сет налы, öд найö эз эскыны тайö юöрыслы да эз сибöдны сiйöс сьöлöманыс. 3 Ми эским тайö юöрыслы, сiдзкö, пырам Ен шойччанiнö. Тайö шойччанiн йывсьыс шуöма: – Ме скöрми тайö йöзыс вылö да сетi кыв: «Найö оз пырны Менам шойччанiнö». Енмыс шуис тадзи, кöть муюгыдсö вöчöм бöрын Сылöн дасьтöма нин вöлi шойччанiнсö. 4 Öд сизимöд лун йывсьыс Гижöдыс тадзи висьталö: «Сизимöд луннас Енмыс шойччис став Аслас уджъясысь». 5 Но вылынджыксö вöлi шуöма нин: «Найö оз пырны Менам шойччанiнö». 6 Но кодсюрö пырасны на Ен шойччанiнö. А найö, кодъяслы медводз вöлi висьталöма Ен шойччанiн йывсьыс, эз пырны сэтчö кывзысьтöмлун вöснаныс. 7 Та вöсна Енмыс индiс торъя лун – "талун", öд уна во мысти Давид казьтыштiс Енлысь водзынджык шуöм кывъяссö: – Талун, Енлысь гöлöс шысö кылiгöн, энö чорзьöдöй сьöлöмнытö. 8 Исус Навин кö вермис сетны шойччöг Египетысь петысьяслы, Енмыс эськö эз нин казьтыв кутшöмкö мöд шойччöг йылысь. 9 Сiдзкö, Ен войтырлöн шойччöгыс водзын на. 10 Öд мортыс кö пырöма нин Ен шойччанiнö, сiйö Енмыс моз шойччö аслас уджъясысь. 11 Сiдзкö, кутам зiльны пырны Ен шойччанiнö, медым тайö кывзысьтöм йöзыс моз эгö кольöй Ен шойччанiнö пыртöг. 12 Енлöн Кывйыс ловъя да вына. Сiйö ёсьджык на кыкнанладорсяньыс лэчтöм шыпуртысь. Сiйö пыдöдз мöрччö, торйöдö мортлысь ловсö да олöмсö, лысö да вемсö, восьтö мортлысь сьöлöмпытшса мöвпъяссö да кöсйöмсö. 13 Енсьыс некод оз дзебсьы, Сылы ставыс восьса, ставыс тыдалана. Сылы ставсьыс сетам воча кыв. 14 Миян эм ыджыд Аркирей – Исус, Енлöн Пи, кодi мунiс став енэжыс пыр. Сiдзкö, зумыда кутчысям эскöмас. 15 Миян эм Аркирей, кодi бура гöгöрвоö миянöс жеблун дырйи. Миянöс моз Сiйöс быдторйын вöлi ыштöдöма, но мыжсö Сiйö эз вöчлы. 16 Та вöсна ми повтöг матыстчам бур сьöлöма Енлöн юралан пуклöс дiнö, медым колана кадö босьтны Енсянь буралöмсö да бурсетöмсö отсöг вылö.
1 Быд аркирейöс бöрйöны йöз пöвстысь да сувтöдöны кесъявны Енлы, медым вайны висьяс да сетöмторъяс йöзлöн мыжъяс вöсна. 2 Татшöм аркирейыс вермö гöгöрвоны мывкыдтöмъясöс да ылалöмаясöс, öд ачыс сiйö на кодь жö вынтöм. 3 Та вöсна сылы колö вайны вись оз сöмын йöзлöн мыжъяс вöсна, тшöтш аслас мыжъяс вöсна. 4 Морт оз вермы ачыс асьсö индыны аркирейöн, тайöс вермö вöчны сöмын Ен. Сiйö сувтöдiс Ааронöс аркирейöн. 5 Тадзи и Кристос: эз Ачыс Асьсö сувтöд тайö ошкана уджыс вылö – лоны Аркирейöн. Енмыс индiс Сiйöс да шуис Сылы: – Тэ – Менам Пи, талун Ме лои Тэнад Батьöн. 6 Мöдлаын Енмыс нöшта висьталö: – Мелкиседек моз Тэ пыр кежлö Аркирей. 7 Му вылын олiгöн Исус кыз синваöн да гораа бöрдöмöн корис-кевмысис Сылы, кодi вермис мездыны Сiйöс кулöмысь. Ен кылiс Сылысь кевмöмсö, öд Исус кывзысис Сылысь. 8 Исус – Енлöн Пи, но сьöкыдсö нуигöн Сiйö велöдчис кывзысьны. 9 Сiйö помöдз вайöдiс Енлысь мöвпыштöмсö да пыр кежлö лои мездмöмсö Сетысьöн быдöнлы, кодi кывзысьö Сылысь. 10 Мелкиседекöс моз Енмыс индiс Исусöс Аркирейöн. 11 Та йылысь эськö уна на позьö висьтавны, но сьöкыд висьтавнысö, öд тi онö кöсйöй кывзынысö. 12 Видзöдлыны кö кадыс вылö, тiянлы важöн нин колö лоны велöдысьясöн, но миянлы выльысь лоö висьтавны тiянлы Енлысь Кывсö водзысяньыс. Тiянöс пыр на колö вердны йöлöн, а оз чорыд сёянöн. 13 Öд йöлöн пöткöдчысь – кага на, сiйö оз на гöгöрво веськыдлун йылысь велöдöмсö. 14 Но тыр арлыдаяслы колö пöткöдчыны чорыд сёянöн, öд найö вермöны нин торйöдны бурсö да лёксö.
1 Сiдзкö, огö кольччöй Кристослöн велöдöмын медводдза воськовъясас, но кутам быдмыны-верстяммыны тыр арлыдаöдз. Миянлы абу нин колана выльысь велöдны тiянöс лёк уджъясысь бергöдчöм да Енлы эскöм йылысь, 2 пыртчöм да ки пуктылöм йылысь, кулöмысь ловзьöм да пыр кежлö мыждöм йылысь. 3 Ен кö сетас, мунам водзö. 4 Найö, кодъяс тöдлiсны нин Бур Юöрлысь югыдсö, босьтiсны Енсянь сетöмторсö, сибöдiсны сьöлöмас Вежа Лолöс, 5 тöдмалiсны Ен Кывлысь бурсö да аддзылiсны локтана нэмлысь вынсö, 6 а сэсся бöр кежисны Кристосысь – татшöм йöзсö он нин вермы бергöдны Ен дiнö. Öд найö выльысь тувъялöны Ен Пиöс да пуктöны Сiйöс серам туйö. 7 Зэрöн унаысь кöтöдлöм му кö вайö му вöдитысьлы бур быдтас – Енмыс тайö мусö бурсиö. 8 Муыс кö быдтö сöмын йöн да ёг турун – татшöм муыс шогмытöм, сiйöс лоö ёрöма да сотöма. 9 Мусаяс, кöть ми тадзи шуам, но лача кутам, мый тi – бур муыс, тi кутчысянныд мездмöмас. 10 Енмыс – веськыд, Сiйö оз вунöд тiянлысь уджъяснытö да Сылöн нимыс дiнö муслуннытö. Öд тайö муслунсö тi петкöдлiнныд вежа войтырлы кесъялiгöн. 11 Ми кöсъям, медым тi помöдз тадзи вöчинныд, сэки тiян лачаныд збыльмас. 12 Энö дышöдчöй, но лоöй на кодьöсь, кодъяс эскöмöн да терпитöмöн босьтöны Енсянь кöсйысьöмасö. 13 Öвраамлы кöсйысигöн Енмыс Аслас нимöн кöсйысис, öд Сылöн нимысь ыджыдджыкыс абу. 14 Енмыс кöсйысис: «Ме тэнö озыра бурсиа да сета тэныд уна чужысьöс». 15 Тадзи Öвраам терпитöмыс пыр босьтiс Енсянь кöсйысьöмасö. 16 Кыв сетiгöн йöзыс кöсйысьöны мыйöнкö ас дорсьыс ыджыдджыкöн. Тайö кыв сетöмыс вынсьöдö налысь шуöмсö да пуктö пом став вензьöмлы. 17 Та вöсна Ассьыс кöсйысьöмсö Енмыс вынсьöдiс кыв сетöмöн, медым Сысянь кöсйысьöмсö босьтысьяслы бурджыка петкöдлыны, мый Сылöн мöвпъясыс вежсьывлытöмöсь. 18 Тайö кыкторйыс: Енлöн кöсйысьöмыс да кыв сетöмыс – вежсьывлытöмöсь, öд Енмыс оз вермы ылöдлыны. Тайö кыкторйыс ышöдö миянöс да отсалö кутчысьны сетöм лачаас. 19 Миян олöмын тайö лачаыс зумыд якöр кодь, сiйö видзö миянöс да отсалö пырны миянлы крамын öшалысь дöра сайö, Вежасьыс-вежаинö. 20 Миянысь водзджык сэтчö пырис Исус да восьтiс миянлы туй. Мелкиседек моз Сiйö пыр кежлö лоис Аркирейöн.
1 Мелкиседек вöлi Салим карса öксы да Медвылысса Енлöн Аркирей. Сiйö бурсиис Öвраамöс сыкöд паныдасигöн, кор Öвраам локтö вöлi öксыясöс вермöм бöрын. 2 Öвраам торйöдiс Мелкиседеклы тышын шедöдöмысь дасöд юкöнсö. Мелкиседек нимлöн вежöртасыс – «веськыдлуныслöн öксы». Сiйö вöлi Салим карса öксы, та вöсна нöшта сiйöс шуöны «лöньлуныслöн öксы». 3 Мелкиседеклöн эз вöв бать-мамыс, эз вöв чужанвужйыс. Сiйö эз чужлы ни эз кувлы. Ен Пи моз сiйö пыр кежлö Аркирей. 4 Аддзанныд, кутшöм сiйö ыджыд! Öд ачыс Öвраам, миян айным, сетiс сылы дасöд юкöнсö, тышын шедöдöмысь медбурсö. 5 Левий чужанвужйысь бöрйöм попъяслы Индöд серти колö вöлi босьтны йöзлöн эмбурысь дасöд юкöнсö. Тайö юкöнсö найö босьтлiсны асланыс вокъяслысь, Öвраамсянь чужысьяслысь. 6 Мелкиседек эз вöв Левий чужанвужйысь, но сiйö босьтiс Öвраамсянь дасöд юкöнсö. Сiйö бурсиис Öвраамöс, кодлöн вöлi нин Енсянь кöсйысьöмыс. 7 Кывшутöг, тайö тадзи: ыджыдджык бурсиö ичöтджыкöс. 8 Дасöд юкöн босьтысь попъяс кулöны, а Мелкиседек йылысь гижöма, мый Сiйö ловъя. 9 Позьö шуны, мый ачыс Левий, дасöд юкöнсö босьтысь, Öвраам пыр сетiс дасöд юкöнсö Мелкиседеклы. 10 Öд Öвраамлöн Мелкиседеккöд паныдасигöн Левий вöлi нин Öвраам айыс пытшкын. 11 Левий чужанвужйысь попъяслöн кесъялöм йылысь вöлi гижöма Индöдас. Тайö попъяслöн кесъялöм пыр кö вöлi позьö воны тыр-бурас, сэки эськö эз вöв колана локны мöд Аркирейлы, кодi Мелкиседек кодь, абу Аарон кодь. 12 Попъяслöн кесъяланногыс кö вежсьö, сiдзкö, Индöдсö тшöтш колö вежны. 13 Но Сiйö, код йылысь танi висьталöма, вöлi мöд чужанкотырысь. На пиысь некод эз кесъявлы висьпуктанiн дорын. 14 Ми тöдам, мый миян Господь петiс Иуда чужанкотырысь. Но Мöисей нинöм эз висьтав тайö чужанкотыр йывсьыс, мый сэтысь петасны попъяс. 15 Тайö бурджыка на лои гöгöрвоана, кор локтiс мöд Аркирей, Мелкиседек кодь. 16 Сiйö лоис Аркирейöн эз морт чужанвужйысь, эз Индöд тшöктöм серти, Сiйö лоис Аркирейöн помтöм олöмлöн вынсянь. 17 Öд Гижöдыс висьталö Сы йылысь: – Мелкиседек моз Тэ пыр кежлö Аркирей. 18 Тадзи воддза тшöктöмсö вынтöмлуныс да ковтöмлуныс вöсна лои бырöдöма. 19 Öд Индöдыс нинöм эз вермы вайöдны тыр-бурöдз. Та вöсна, миянлы сетöма лача, кодi ёна бурджык Индöдыс дорысь. Тайö лачаыс отсöгöн ми матыстчам Ен дiнö. 20 Тайö лачасö вöлi вынсьöдöма Енлöн кыв сетöмöн. 21 Левий чужанвужйысь попъясöс сувтöдiгöн эз вöв некутшöм кыв сетöм, а Исусöс Аркирейöн сувтöдiгöн Енмыс кыв сетiс. Сiйö шуис: – Господь кыв сетiс да оз веж сiйöс. Мелкиседек моз Тэ пыр кежлö Аркирей. 22 Тайö кывъясыс висьталöны, кутшöм вына сiйö йитöдыс, кодöс кöрталöма Исус пыр. 23 Водзынсö вöлi уна поп, öд кулöм вöснаныс найö эз вермыны дыр кесъявны. 24 Но Исус – Помтöг Олысь, Сiйö пыр кежлö Аркирей. 25 Та вöсна Сiйö быд кадö вермö мездыны Сы пыр Ен дiнö локтысьясöс. Сiйö – Помтöг Олысь, Сiйö пыр кевмысьö на вöсна. 26 Дзик татшöм аркирей колö миянлы: вежа, сöстöм да мыжтöм, кодöс торйöдöма мыжа йöзысь да кыпöдöма енэжсьыс вылöджык на. 27 Мукöд аркирейлы моз Сылы абу колана быд лун вись вайны медводз аслас мыжъяс вöсна, сэсся йöзлöн мыжъяс вöсна. Öд Сiйö вайис нин Асьсö вись пыдди öтчыдысь да пыр кежлö. 28 Индöд серти аркирейöн вермис лоны морт, кодлöн эмöсь тырмытöмторъяс. Но Индöдыс бöрын Енмыс сетiс кыв да сувтöдiс Аркирейöн Писö. Сiйö – тыр-бур Аркирей пыр кежлö.
1 Миян висьталöмлöн медшöр мöвпыс татшöм: миян эм Аркирей, кодi пукалö енэжын, Вына Енлöн пуклöс веськыдладорын 2 да кесъялö енэжвывса вежаинын, Енлöн збыль скинияын. Тайö скиниясö сувтöдiс Господь, а эз морт. 3 Быд аркирейöс сувтöдöны сы могысь, медым вайны вись да сетöмтор Енмыслы. Сiдзкö, миян Аркирейлы, Исуслы, тшöтш колö вöлi вись вайны Енмыслы. 4 Сiйö кö кольччис му вылас, сэки эськö эз вöв аркирейöн, öд танi эмöсь нин Индöд серти вись вайысьяс. 5 Найö кесъялöны крамын, кодöс вöчöма енэжвывсаöс моз. Крамыс – енэжвывса скиниялöн вуджöрыс, сылöн серпасыс. Та вöсна, мувывса скиниясö вöчтöдз на Енмыс висьталiс Мöисейлы: «Видзöд да ставсö вöч дзик сiдзи, кыдзи петкöдлi тэныд керöс вылын». 6 Мукöд аркирейлы дорысь Исуслы вöлi сетöма ёна бурджык кесъялöм. Сiйö йитöдыс, кодöс кöрталöма Исус пыр, тшöтш ёна бурджык, öд тайö йитöдыс подуласьö бурджык кöсйысьöм вылö. 7 Воддза йитöдыс кö вöлi тырвыйö бур, сэки эськö мöд йитöдыс эз ковмы. 8 Но Енмыс аддзис йöзлысь кывзысьтöмлунсö, та вöсна шуис налы: – Со, матысмöны лунъяс, кор Ме кöртала Израиль да Иуда войтыркöд выль йитöд, – висьталö Господь. 9 Тайö йитöдыс абу сэтшöм, кутшöмöс Ме кöрталi налöн батьяскöд, кор петкöдi найöс Египет муысь киöдныс кутöмöн. Найö торкисны Мекöд йитöдсö, та вöсна Ме бергöдчи наысь, – висьталö Господь. 10 Сiйö лунъяс бöрас Ме кöртала Израиль войтыркöд татшöм йитöд: пукта Ассьым Индöдöс налöн вежöрö да гижа налöн сьöлöмö. Ме лоа налы Енмöн, а найö – Менам войтырöн, – висьталö Господь. 11 Сэки некод оз кут велöдны матыссасö, вокыс оз понды велöдны воксö: «Тöдмав Господьöс!» Öд быдöн, ичöтсянь ыджыдöдз, пондас тöдны Менö. 12 Ме прöстита налысь мыжъяссö, некор ог казьтыв налысь лёк вöчöмсö. 13 Тайö йитöдсö Енмыс шуис Выль Йитöдöн. Тадзи Енмыс петкöдлiс, мый воддза йитöдыс важмис. А ставыс, мый важмöма да ковтöм, регыд бырö.
1 Важ Йитöдас вöлi сетöма Енлы кесъялöм да мувывса скиния йылысь индöдъяс. 2 Мувывса скиниясö вöлi вöчöма тадзи: скиния воддза вежöсас вöлi бикок, пызан да сы вылын Енлы вайöм няньяс. Тайö вежöсыс шусис "Вежаин". 3 Скиниялысь мöд вежöссö вöлi торйöдöма öшöдöм дöраöн. Тайö вежöсыс шусис "Вежасьыс-вежаин". 4 Сэнi вöлiны зарниöн эжöм тшынöдчан пызан да Йитöдлöн куд. Тайö кудсö вöлi быд боксянь эжöма зарниöн. Куд пытшкас вöлiны манна тыра зарни доз, Ааронлöн дзоридзалысь бедь да Йитöдлöн изпöвъяс. 5 Куд вевт вылас сулалiсны херувимъяс, Ен дзирдлуна анделъяс. Налöн бордъясыс вевттисны куд вевтсö – мыж лэдзанiнсö. Но унасö та йылысь öнi огö кутöй сёрнитны. 6 Тадзи вöлi лöсьöдöма скиниясö. Скиния воддза вежöсас быд лун пыравлiсны попъяс кесъявны Енлы. 7 Мöд вежöсас сöмын öтчыдысь вонас пырлiс аркирей. Аскöдыс сiйö вайлiс вир аслас мыжъяс вöсна да йöзлöн тöдтöг вöчöм мыжъяс вöсна. 8 Тайöн Вежа Лов петкöдлö, мый кытчöдз сулалö скиниялöн воддза вежöсыс, Вежасьыс-вежаинö туйыс тупкыса на. 9 Ставыс тайö висьталö талунъя лун йылысь, мый Енлы вайöм вись да сетöмтор оз вермы тырвыйö сöстöммöдны йöзлысь сьöлöмсö. 10 Öд став тайö вайöмторйыс вöлi йитчöма сöмын вир-яйкöд: сёян-юанкöд да мыссьöмкöд. Татшöм кесъялöмсö Енмыс лöсьöдiс сöмын кад кежлö, выль кесъяланногсö лöсьöдтöдз. 11 Кор локтiс Кристос, бурсö Вайысь Аркирей, Сiйö кутiс кесъявны ёна бурджык да ыджыдджык скинияын, кодöс вöчöма абу киöн, абу мувывса ног. 12 Кристос пырис Вежасьыс-вежаинö эз кöза вирöн, эз öшпи вирöн, а Аслас Вирöн. Тадзи Сiйö öтчыдысь да пыр кежлö мездiс миянöс мыжъясысь. 13 Öшпи вирöн, кöза вирöн да сотöм куканьлöн пöимöн кö резлiсны пежасьöмаясöс, медым сöстöммöдны налысь вир-яйсö, 14 сiдзкö, кымын пöв ёнджыка сöстöммöдö Кристослöн Вирыс! Вежа Лов вынöн Кристос вайис Асьсö Енлы сöстöм вись пыдди. Та вöсна Сылöн Вирыс мыськалö миянлысь сьöлöмнымöс кулöмö вайöдысь лёк вöчöмъясысь, медым ми вермим кесъявны збыль да ловъя Енлы. 15 Сiйöн Кристос лои Енма-морта костын Выль Йитöд Кöрталысьöн. Аслас кулöмöн Кристос мездiс йöзсö воддза йитöд дырйи вöчöм мыжъясысь, медым Енлöн корöмаяслы пыр кежлö вичмис Енсянь кöсйысьöмыс. 16 Мортыс кö кольö ас бöрсяыс кöсйысян гижöд, сiйö лоö вына сöмын мортыслöн кулöм бöрын. 17 Öд мортыс кö ловъя на, гижöдыс вынтöм. Сiйö лоö вына сöмын мортыслöн кулöм бöрын. 18 Та вöсна воддза йитöдсö вöлi вынсьöдöма вирöн. 19 Мöисей висьталiс йöзыслы Индöдысь став тшöктöмсö. Сэсся босьтiс öшпиянлысь да кöзаяслысь ваöн соралöм вир, югыдгöрд вурун, иссоп бедь да резiс тайöн медводз Индöд небöгсö, сэсся став йöзсö. 20 Сiйö шуис: «Тайö вирыс – йитöдлöн вир, Енмыс тшöктiс видзны тайö йитöдсö». 21 Сэсся Мöисей резiс вирнас тшöтш скиниясö да став кесъялан кöлуй-дозмуксö. 22 Индöд серти ставыс сöстöммö сöмын вирöн, вир кисьттöг оз вермы лоны мыжсö прöститöмыс. 23 Сiдзкö, мувывсасö, кодöс вöчöма енэжвывсаöс моз, колö вöлi сöстöммöдны татшöм ногöн. А енэжвывсаыслы колана бурджык вись. 24 Öд Кристос пырис эз киöн вöчöм скинияö, кодöс вöлi вöчöма збыль скиния серти. Сiйö пырис дзик енэжас, медым сувтны Ен водзö миян пыдди да дорйыны миянöс. 25 Сiйö пырис енэжас эз сы могысь, медым выльысь вайны Асьсö вись пыдди. Öд тадзи вöчö аркирей: сiйö воысь-во пырö Вежасьыс-вежаинö пемöс вирöн. 26 Кристос кö вöчис тадзи, му пуксьöмсяньыс эськö унаысь нин ковмылiс Сылы кувны. Но бöръя кадö Сiйö сöмын öтчыдысь вайис Асьсö вись пыдди мыж бырöдöм могысь. 27 Мортыслы шуöма кувны öтчыдысь, сэсся лоö мыждöм. 28 Тадзи Кристос öтчыдысь вайис Асьсö вись пыдди, медым бырöдны мыжсö став йöзыслысь. Мöдысь Сiйö локтас оз мыж бырöдöм могысь, а медым мездыны найöс, кодъяс виччысьöны Сiйöс.
1 Индöдыс – сöмын локтана бурыслöн вуджöрыс, абу ачыс бурыс. Та вöсна Индöдыс некор оз вермы вöчны тыр-бурöн Ен водзö локтысьясöс, кодъяс воысь-во вайöны öтипöлöс вись. 2 Индöдыс кö вермис вöчны найöс тыр-бурöн, найö эськö дугдiсны вайны висьсö. Öд висьсö öтчыдысь вайöмнас найö эськö сöстöммисны пыр кежлö, да налöн сьöлöмыс эз мыжды найöс. 3 Но быд во вайöм висьыс казьтывлö мыж йылысь. 4 Öд öшпилöн да кöзалöн вирыс оз вермы бырöдны мортлысь мыжъяссö. 5 Та вöсна муюгыдас локтiгöн Кристос шуö: – Вись да ваянтор Тэныд оз ков, Тэ дасьтiн Меным вир-яй. 6 Сотöм пемöс да мыж вöсна вись абу шогмана Тэныд. 7 Сэки Ме шуи: «Со, Ме локтi, Енмöй, збыльмöдны Тэнсьыд кöсйöмтö. Тадзи водзысяньыс вöлi висьталöма Ме йылысь небöгас». 8 Висьсö вайöны Индöд серти, но Кристос шуö: «Вись да ваянтор, сотöм пемöс да мыж вöсна вись Тэныд оз ков, тайö абу шогмана Тэныд». 9 Сэсся содтö: «Со, Ме локтi, Енмöй, збыльмöдны Тэнсьыд кöсйöмтö». Тадзи Кристос бырöдiс воддзасö – вись вайöмсö, да вежис сiйöс мöдöн – Ен кöсйöмöн. 10 Ен кöсйöм серти ми лоим вежаöсь, öд Кристос вайис Ассьыс вир-яйсö вись пыдди öтчыдысь да пыр кежлö. 11 Крамын кесъялiгöн попъяс быд лун вайöны öтипöлöс вись. Но тайö висьыс оз вермы бырöдны мортлысь мыжъяссö. 12 Кристос вайис мыж вöсна висьсö öтчыдысь да пуксис Ен веськыдладорö пыр кежлö. 13 Öнi Сiйö виччысьö сiйö кадсö, кор Енмыс пуктас Сы кок улö паныд мунысьяссö. 14 Висьсö öтчыдысь вайöмнас Кристос вöчис вежа войтырöс тыр-бурöн пыр кежлö. 15 Та йылысь висьталö миянлы Вежа Лов: 16 – Сiйö лунъяс бöрас Ме кöртала накöд татшöм йитöд, – висьталö Господь. Ассьым Индöдöс Ме пукта налöн сьöлöмö, да гижа налöн вежöрö. 17 Налысь мыжъяссö да лёк вöчöмсö водзö ог нин казьтыв. 18 Сiдзкö, мыжъяссö кö прöститöма, сэки висьсö вайны оз нин ков. 19 Вокъяс, Исус Кристослöн Вирöн ми вермам повтöг пырны Вежасьыс-вежаинö, öд Сiйö восьтiс миянлы выль туй, олöмас нуöдысь туй. 20 Тайö туйыс вайöдö миянöс Вежасьыс-вежаинö öшöдöм дöра пыр – Кристослöн вир-яйыс пыр. 21 Миян эм ыджыд Аркирей, Сiйö кывкутöмöн веськöдлö ставнас Ен керканас. 22 Сiдзкö, локтам Ен водзö восьса сьöлöмöн да зумыд эскöмöн, öд миян сьöлöмным сöстöм да мыжтöм, миянлысь вир-яйнымöс мыськалöма сöстöм ваöн. 23 Ми висьталам, мый миян эм лача. Сiдзкö, зумыда кутчысям тайö лачаас, öд миянлы Кöсйысьысьыс эскана. 24 Кутам тöждысьны öта-мöдным вöсна, ышöдны öта-мöдöс муслун да бур уджъяс вылö. 25 Кодсюрö дугöдчöмаöсь öтвыв чукöртчöмысь, но ми тадзи огö вöчöй. Мöдарö, кутам ёнджыка на ышöдны öта-мöднымöс, öд Господьлöн луныс матын нин. 26 Ми кö тöдам збыльсö, но тöдöмöн мыж вöчам, сэки некутшöм вись оз вешты миянлысь мыжнымöс. 27 Сöмын ыджыд полöмöн ковмас виччысьны мыждöмсö да яр бисö, кодi бырöдас Енлы паныд мунысьясöс. 28 Мöисейлысь Индöдсö торкысьöс кö кык либö куим мортлöн висьталöм серти нем жалиттöг мыждылiсны кулöм вылö, 29 сiдзкö, кымын пöв чорыдджыка лоö мыждöма сiйöс, кодi талялö Енлысь Писö, оз лыддьы вежаöн Енкöд йитысь да эскысьöс вежöдысь Вирсö, да нöшта лёкöдö Ловсö, кодi восьтö Енлысь буралöмсö. 30 Ми тöдам тайö кывъяссö Шуысьöс: – Ме – водзöс Перйысьыс, Ме мынтыся ставсьыс, – шуö Господь. Нöшта содтö: – Господь кутас мыждыны Ассьыс войтырсö. 31 Ёна повзьöдлö веськавны ловъя Енлöн киö! 32 Видзöдлöй бöрвыланыд: Бур Юöрлысь югыдсö тöдмалöм бöрын тi верминныд мунны уна сьöкыд да тыш пыр. 33 Тiянöс вöтлiгöн-лёкöдiгöн тi унаысь вöлiнныд серам туйынöсь. Тiян моз сьöкыдсö нуысьяскöд тi вöлiнныд орччöн. 34 Кор ме пукалi дзескыдiнын, тi нуинныд сьöкыдсö мекöд öтвыв. Тiянлысь эмбуртö мырддялiгöн тi нимкодясинныд, öд тi тöдiнныд, мый енэжас тiян эм ёна бурджык да бырлытöм эмбур. 35 Сiдзкö, лоöй повтöмöсь! Öд таысь тiянлы вичмас ыджыд тырдон. 36 Тiянлы колö зумыдлун, медым верминныд збыльмöдны Енлысь тшöктöмсö да босьтны Сысянь кöсйысьöмасö. 37 Öд гижöма: – Регыд, вывтi регыд, и Локтысьыс нюжмасьтöг воас. 38 Веськыда олысь эскöмнас кутас овны, а кежас кö Меысь, Меным сiйö оз шогмы. 39 Но ми абу на пöвстысь, кодi Енсьыс кежö да кулö. Ми на пöвстысь, кодi эскö да босьтö мездмöмсö.
1 Эскöмыс – виччысянторлöн збыльмöм да аддзытöмсö аддзöм. 2 Миян батьяс эскисны, та вöсна найö шогмисны Енлы. 3 Эскöмöн ми гöгöрвоам, мый ентыкöлаыс артмöма Ен Кывйöн. Тадзи аддзытöмсьыс лои аддзанаыс. 4 Эскöмöн Авель вайис Енлы бурджык вись Каин дорысь. Авельлöн эскöм вöсна Енмыс сибöдiс сылысь висьсö да лыддис сiйöс веськыдöн. Эскöмнас Авель весиг кулöм бöрас сёрнитö. 5 Эскöмыс вöсна Енокöс вöлi кыпöдöма енэжас кулöмсö тöдлытöг: «Сiйö эз ло, öд Енмыс кыпöдiс сiйöс енэжас». Кыпöдтöдзыс на Еноклы вöлi шуöма, мый «сiйö шогмана Енмыслы». 6 Эскытöгыд Енмыслы он шогмы. Öд Ен дiнö локтысьлы колö эскыны, мый Енмыс эм, да Сiйöс корсьысьлы Енмыс сетö тырдон. 7 Эскöмыс вöсна Нойлы вöлi водзвыв сетöма тöдны аддзытöмсö. Сiйö кывзысис Енмыслысь да вöчис ковчег, медым мездыны ассьыс гортсасö. Эскöмнас сiйö мыждiс муюгыдсö, эскöмыс вöсна сылы вичмис Енсянь веськыдлун. 8 Эскöмыс вöсна Öвраам кывзысис Енмыслысь да мунiс кöсйысьöм муö. Сiйö эз тöд, кытчö мунö, но мунiс. 9 Эскöмöн Öвраам овмöдчис кöсйысьöм муö да локтысь моз олiс сэнi чомъясын. Сы моз олiсны чомъясын Исаак да Яков, кодъяслы тшöтш вöлi сетöма Енлысь кöсйысьöмсö. 10 Öвраам виччысис зумыд подула кар, кодöс Серпасалысьыс да Вöчысьыс – Ачыс Енмыс. 11 Сарра эз вермы вайны кага, но эскöмыс вöсна сiйö пондiс нöбасьны, да ыджыд арлыдыс вылö видзöдтöг чужтiс кага. Öд сiйö тöдiс, мый сылы Кöсйысьысьыс – эскана. 12 Та вöсна öти мортсянь, Öвраамсянь, кодi вöлi пöрысь нин, чужис сы мында олысь. Тайö лыдсö позьö öткодявны лыдтöм-тшöттöм енэжвывса кодзувъяскöд да саридздорса лыакöд. 13 Став тайö йöзыс эз удитны босьтны Енсянь кöсйысьöмасö, но найö помöдз видзисны эскöмсö. Найö сöмын ылiсянь аддзылiсны Енсянь кöсйысьöмасö да нимкодясисны сыöн. Ас йывсьыныс найö шуалiсны, ми пö тайö му вылас ветлысь-мунысьяс. 14 Тадзи шуöмнас найö петкöдлiсны, мый корсьöны чужан мунысö. 15 Найö кö мöвпалiсны чужан муныс йылысь, кытысь петiсны, эськö бöр на вермисны бергöдчыны сэтчö. 16 Но найö кöсйисны овмöдчыны бурджык чужан муö – енэжö. Та вöсна Енмыс оз яндысь шуны Асьсö налöн Енмöн, öд Сiйö дасьтiс налы кар. 17 Эскöмöн Öвраам вайис вись пыдди Исаакöс, кор Енмыс кöсйис тöдмавны сылысь эскöмсö. Öвраам дась вöлi сетны вись пыдди ассьыс öтка писö, кодöс Енмыс сылы кöсйысьлiс. 18 Исаак йылысь вöлi шуöма: «Исааксянь паськалас тэнад чужанвужйыд». 19 Öвраам эскис, мый Енмыс вына ловзьöдны весиг кулöмысь. Дзик тадзи и артмис. Исаакöс вöлi бöр сетöма Öвраамлы, быттьö сiйö ловзис кулöмысь. 20 Эскöмöн Исаак бурсиис Яковöс да Исавöс водзö олöмас. 21 Эскöмöн Яков бурсиис кулiгас Öсиплысь пиянсö да бедь вылас мыджсьöмöн копыртчылiс Енмыслы. 22 Эскöмöн Öсип кулöм водзвылас висьталiс пияныслы Израиль войтырлöн Египетысь петöм йылысь да тшöктiс петкöдны налы ассьыс лыяссö. 23 Эскöмöн Мöисейлöн бать-мамыс дзеблалiсны сiйöс чужöм бöрас куим тöлысь чöж. Найö аддзисны, мый кагаыс зэв мича, да эз повзьыны весиг öксылöн тшöктöмысь. 24 Эскöмöн Мöисей быдмöм бöрас дугдiс шуны асьсö фараон нывлöн пиöн. 25 Сiйö лыддис, мый бурджык Ен войтыркöд нуны сьöкыдсö, дженьыдик кадся мыжа олöм дорысь. 26 Кристос вöсна лёкöдöмсö Мöисей лыддис ыджыдджык озырлунöн египетса став озырлун дорысь. Öд сiйö тöдiс, мый сылы лоö сетöма тырдон. 27 Эскöмöн Мöисей петiс Египетысь, эз повзьы öксылöн скöрлунысь. Сiйö вöлi зумыд, öд видзöдiс Тыдавтöмыс вылö. 28 Эскöмöн Мöисей тшöктiс пасйыны Израиль войтырлы Ыджыд лун да мавтыштны öдзöс куричьяссö вирöн, медым Андел-Бырöдысь эз ви Израиль войтырлысь медводдза чужысьяссö. 29 Эскöмöн Израиль войтыр вуджис Гöрд саридз вомöн. Найö мунiсны сэтi косiнтi моз. Египетсаяс тшöтш на моз кöсйисны вуджны, но ставныс вöйисны. 30 Эскöм пыр киссисны Ерикон карса стенъяс сiйöс сизим лун кытшовтöм бöрын. 31 Эскöмыс вöсна Раав, кырсалысь ань, эз кув эскытöмъяскöд öтвыв, öд сiйö бур сьöлöмöн сибöдiс израильса кыйöдчысьясöс. 32 Мый нöшта содтыны татчö? Кадыс меным оз тырмы висьтавны Гедеон, Варак, Самсон, Еффай, Давид, Самуил да мукöд пророк йылысь. 33 Эскöмöн найö тышкасьöм бöрын босьтiсны йöз муяс, ставсö вöчисны веськыда, сибöдiсны Енсянь кöсйысьöмасö, лöньöдiсны левъясöс, 34 кусöдiсны яр би, видзисны асьнысö шыпуртысь, вынтöммиганыс найö ёнмылiсны, тышын вöлiны вынаöсь, йöз муысь воысь тышкасьысьясöс бöр вöтлiсны асланыс муысь, 35 öткымын аньлысь матыссасö ловзьöдiсны кулöмысь. Тайö йöз пöвстысь мукöдсö вöлi дойдалöма кувтöдзыс, öд найö эз кöсйыны босьтны мортсянь вöзйöм мездлунсö, но кöсйисны босьтны бурджыксö – ловзьöмсö. 36 На пиысь мукöдсö нöйтiсны орсöн, лёкöдiсны, да чептöн дорöмöн видзисны дзескыдiнын. 37 Мукöдсö изъялiсны, быдногыс дойдалiсны, пилитiсны шöрипöв да виисны шыпуртöн. Найö ветлiсны кöза да ыж ку паськöмöн, пыкисны гöльлун, найöс нöйтiсны да вöтлiсны. 38 Муюгыдыс эз сулав тайö йöзыс дон, кодъяслы ковмис овны овтöминын да керöсын, кырта горсйын да му потасын. 39 Эскöмныс вöсна став тайö йöзыс вöлiны шогманаöсь Енмыслы, но некод на пиысь эз босьт Енлысь кöсйысьöмасö, 40 öд Енмыс дасьтöма миянлы ёна бурджыктор. Та вöсна найö сöмын миянкöд öтвыв воасны тыр-бурас.
1 Тi аддзанныд: миян гöгöр сы мында эскöм йылысь висьталысьыс! Сiдзкö, эновтам ставсö, мый сьöктöдö миянöс, да мыжсö, мый крукöдö миянöс. Кутам помöдз зумыда котöртны миянлы индöм туйöд 2 да видзöдны Исус вылö. Сiйö – миянлы эскöмсö Сетысьыс да тырвыйö эскöмас Вайöдысьыс. Локтана нимкодьлун понда Сiйö нуис крест вылын дойсö, нинöм туйö пуктiс лёкöдöмсö да пуксис Ен пуклöс веськыдладорö. 3 Сiдзкö, мöвпалöй Сы йылысь, кодi нуис сы мында лёкöдöм мыжа йöзсянь, медым энö жебмöй да ловнаныд энö усьöй. 4 Тi энö на вирöдз тышкасьöй мыжыслы паныд. 5 Тi дзикöдз вунöдöмныд Енсянь ышöдöмсö, öд Сiйö ышöдö тiянöс пиянöс моз: – Пиöй менам! Господьсянь чирыштöмсö эн увтырт, тэнö янöдiгöн ловнад эн усь. 6 Кодi Енмыслы муса, сiйöс чирыштö, кодöс пи туйö пуктö, сiйöс нöйтö. 7 Тi кö сибöданныд Енсянь чирыштöмсö, сiдзкö, Енмыс лыддьö тiянöс Аслас пиянöн. Сюрас-ö сэтшöм пи, кодöс эськö батьыс эз чирыштлы? 8 Тiянöс кö эз чирыштлыны мукöд челядьöс моз, сiдзкö, тi бокысаяс, абу ас ныв-пи. 9 Мувывса батьяс миянöс ставнымöс чирыштлiсны, но ми пыдди пуктiм найöс. Сiдзкö, кымын пöв ёнджыка на колö кывзысьны енэжвыв Батьлысь, медым вермим овны? 10 Мувывса батьяс чирыштлiсны миянöс ас кöсйöм сертиныс регыдик кад кежлö, а Енмыс чирыштö миянöс бур вылö, медым вöлiм Сы кодь вежаöсь. 11 Дерт, быдпöлöс чирыштöм вайö шогсьöм, а оз нимкодьлун. Но бöрыннас татшöм чирыштöмыс вайö мортлы бур вотöс: лöньлун да веськыдлун. 12 Сiдзкö, ёнмöдöй лигышмунöм кинытö да жебмöм кокнытö! 13 Ветлöй шыльыд туйöд, медым чотысь кокныд эз музгыльтчы, а бурдiс. 14 Тöждысьöй быдöнкöд овны лöня, лоöй вежаöсь, öд вежалунтöг некод оз аддзы Господьöс. 15 Видзчысьöй, мед тiян пöвстысь некод эз вошты Енлысь буралöмсö. Некутшöм курыд вуж мед оз вужъясь тiян пöвстö, оз вай тiянлы лёксö да оз пежав некодöс. 16 Тiян пöвстын мед оз ло ни öти кырсалысь да Исав моз Енсьыс кежысь. Öти шыд тасьтi вылö сiйö вежис ассьыс медводдза чужысьлысь нимсö. 17 Тi öд тöданныд, мый бöрыннас Исав ёна корис батьсяньыс бурсиöмсö, но сылысь корöмсö вöлi öтдортöма. Исав бöрдöмöн корис та йылысь, но эз нин вермы вежны батьыслысь мöвпъяссö. 18 Тi матыстчинныд энö мувывса ыпъялысь керöс дiнö, паныдасинныд энö бушковкöд да сап пемыдыскöд, 19 локтiнныд энö труба шы улö да гора сёрни шы улö. Тайö шысö кылöм бöрын йöзыс корисны Енсö, медым дугдiс накöд сёрнитны. 20 Öд найö эз вермыны кывзыны татшöм тшöктöмсö: «Весиг пемöс кö инмöдчас тайö керöсас, сiйöс лоö виöма изъясöн либö ньöвйöн». 21 Тайö аддзывлöмторйыс вöлi сэтшöм повзьöдана, весиг ачыс Мöисей шуис: «Менö дзöрöдö полöмöйла». 22 Мöдарö, тi матыстчинныд Сион керöс дiнö да ловъя Енлöн карыс, енэжвыв Ерусалим, дiнö. Тi локтiнныд лыдтöм-тшöттöм анделъяс дiнö 23 да гажöдчысь йöз чукöр дiнö. Найö – Енлöн медводдза чужысьяс, налысь нимъяссö гижöма енэжас. Тi матыстчинныд став йöзсö мыждысь Ен дiнö да тыр-бурас воöм веськыда олысьяслöн ловъяс дiнö. 24 Тi матыстчинныд Выль Йитöдсö Кöрталысь Исус дiнö да Сылöн сöстöммöдысь Вир дiнö. Сылöн Вирыс бурджыксö висьталö Авельлöн вирыс дорысь. 25 Видзчысьöй, медым энö бергöдчöй тiянлы Висьталысьысь! Енмыс сёрнитiс му вылас Израиль войтыркöд, но найö бергöдчисны Енсьыс. Та вöсна найöс вöлi мыждöма. Сiдзкö, миянöс ёнджыка на лоö мыждöма, огö кö кывзöй енэжсянь Висьталысьöс. 26 Сэки Енлöн гора сёрниыс вöрзьöдлiс мусö, но öнi Сiйö кöсйысис: – Нöшта öтчыдысь вöрзьöда мусö, ог сöмын мусö, вöрзьöда тшöтш енэжсö. 27 "Нöшта öтчыдысь" шуöмыс висьталö, мый став вöчöмторсьыс вöрзянаыс бырас, коляс сöмын вöрзьывтöмыс. 28 Миянлы сетöма вöрзьывтöм Юраланiн. Сiдзкö, аттьöалам Енсö да кесъялам Сылы шогмана ногöн, Сыысь полöмöн да вежавидзöмöн. 29 Öд миян Енным – ставсö сотысь би.
1 Тiян костын мед пыр лоö муслун. 2 Энö вунöдöй сибöдны ветлысь-мунысьясöс. Öд тадзи вöчигöн öткымынöн сибöдiсны анделъясöс, весиг асьныс та йылысь эз тöдны. 3 Тöждысьöй дзескыдiнын пукалысьяс вöсна, быттьö тi на моз пукаланныд дзескыдiнын. Энö вунöдöй найöс, кодъясöс нöйтöны, тi öд асьныд тöданныд, мый сэтшöм дойыс. 4 Гозъя олöмныд мед быдöнлöн лоö сöстöм, да вольпасьныд пежасьтöм. Öд кырсалысьöс да гозъя олöм пежалысьöс мыждас Ен. 5 Сьöм вылö энö горшасьöй, тырмöдöй сiйö, мый эм. Öд Ачыс Енмыс шуис: – Ог коль тэнö, ог эновт тэнö. 6 Та вöсна, ми повтöг шуам: – Господь – менам отсöгыс, меным нинöмысь повнысö. Мый вöчас меным морт? 7 Энö вунöдöй ассьыныд веськöдлысьяснытö, öд найö висьтавлiсны тiянлы Ен Кывсö. Видзöдöй налöн олöм пом вылö да эскöй на моз. 8 Исус Кристос тöрыт, талун да нэмъяс чöж Сiйö жö. 9 Энö лэдзöй кежöдны асьнытö быдпöлöс ылöгвелöдöмас. Бурджык, тi кö ёнмöданныд сьöлöмнытö Енлöн буралöмöн, а онö сёян-юан йылысь велöдöмöн. Öд татшöм велöдöмыс сы серти олысьяслы нинöм бурсö оз сет. 10 Миян эм сэтшöм висьпуктанiн, кытчö вайöм висьсö оз позь сёйны скинияын кесъялысьяслы. 11 Пемöсъяслысь вирсö аркирей пыртö Вежасьыс-вежаинö, тайö вирыс эм йöзлöн мыжъяс вöсна вайöм вись. А пемöсъяслысь шойсö сотöны кар ортсыас. 12 Исус тшöтш кулiс кар ортсыас, медым Аслас Вирöн вежöдны йöзсö. 13 Сiдзкö, петам Исус дiнö кар ортсыас да Сы моз нуам лёкöдöмсö. 14 Öд пыр кежлö олöм вылö миянлы абу танi карыс, ми виччысям выль кар. 15 Сiдзкö, Исус пыр кутам дугдывтöг вайны Енлы аттьöалана вись, асланым вомöн кутам ошкыны Сылысь нимсö. 16 Энö вунöдöй вöчны бурсö, юксьöй сiйöн, мый эм. Öд татшöм висьыс шогмана Енмыслы. 17 Кывзысьöй вичкоса веськöдлысьяслысь, кывзöй найöс, öд найö дугдывтöг тöждысьöны тiян вöсна. Налы ковмас вочавидзны Ен водзын тiян вöсна. Кывзысьöй налысь, медым тайö уджсö найö вöчисны долыдпырысь, а эз ышлолалöмöн. Öд таысь тiянлы бурыс оз ло. 18 Кевмысьöй миян вöсна. Ми тöдам, мый миян сьöлöмным оз мыжды миянöс, öд ми ставсö кöсъям вöчны веськыда. 19 Торйöн кора кевмысьны, медым ме öдйöджык бöр верми локны тiян дiнö. 20 Лöньлунсö сетысь Ен бырлытöм йитöдлöн Вирöн ловзьöдiс кулöмысь миян Господь Исус Кристосöс, ыжъяслысь вына Видзысьсö. 21 Енмыс мед дасьтас тiянöс быдпöлöс бур удж вылö, медым збыльмöдны Ассьыс кöсйöмсö, да Исус Кристос пыр мед вöчас тiян пытшкын Аслыс шогманасö. Енлы ошкöм нэмъяс чöж! Аминь. 22 Вокъяс, кора тiянöс: терпитöмöн сибöдöй менсьым ышöдана кывъясöс, öд ме гижи тiянлы дженьыдика. 23 Кöсъя, мед тi тöдiнныд: Тимофей вокным петöма дзескыдiнысь. Регыд кö воас, сыкöд öтвыв локтам тiян дiнö. 24 Висьталöй чолöм вичкоса веськöдлысьяслы да став вежа войтырлы. Тiянлы ыстöны чолöм италияса эскысьяс. 25 Енлöн буралöмыс ставныдкöд тiянкöд. Аминь.
1 Гижö Яков, Енлöн да Господь Исус Кристослöн кесйöг. Чолöмала дас кык чужанкотырöс, кодъяс разалöмаöсь став му пасьталаыс. 2 Вокъяс, долыда нимкодясьöй, кор тiянлы ковмас нуны быдпöлöс сьöкыдсö. 3 Тi öд тöданныд: эскöмöн кö нуанныд сьöкыдсö, тi лоанныд зумыдöсь. 4 А зумыдлуныс мед вайöдас ассьыс уджсö тiян пытшкын помöдз, медым тi вöлiнныд дзоньнас тыр-бурöсь, да тiян эз вöв некутшöм тырмытöмтор. 5 Тiян пиысь кö кодлыкö оз тырмы мывкыдлуныс, мед корö Енмыслысь, и сылы лоö сетöма. Öд Енмыс быдöнлы сетö лышкыда да шуасьтöг. 6 Сöмын корöй эскöмöн да майшасьтöг. Öд майшасьысь морт – саридзвывса гы кодь, кодöс кыпöдö тöвнырыс да новлöдлö öтарö-мöдарö. 7 Мортыс кö кык ногöн мöвпалö öтитор йывсьыс, сiйö нинöм оз вöч зумыдпырысь. Татшöм мортыс мед оз чайт босьтны мыйкö Енсяньыс. 9 Гöль вок мед ошйысьö вылö пуктöмнас. 10 Озыр вок мед ошйысьö улö пуктöмнас, öд сiйö турунвывса дзоридз моз бырас. 11 Шондi петас, пöжас да косьтас турунсö. Дзоридзыс сылöн усьö и мичлуныс бырö. Дзик тадзи кусö озыр мортлöн мырсян-пессян олöмыс. 12 Шуда сiйö, кодi вермö венны ыштöдöмсö, öд та бöрти сылы лоö сетöма Олöмыслысь юркытш. Тайö юркытшсö Господь кöсйысис сетны Сiйöс радейтысьяслы. 13 Ыштöдöм дырйи некод мед оз шу: «Енмыс менö ыштöдö». Öд лёк вылас Енсö некод оз вермы ыштöдны, и Ачыс Енмыс некодöс оз ыштöд. 14 Но быд мортöс ыштöдö сылöн лёк кöсйöмыс, öд сiйö ылöдлö мортсö да кыскö сiйöс лёкас. 15 Лёк кöсйöмыс содö-быдмö да чужтö мыж, а вöчöм мыжыс чужтö кулöм. 16 Муса вокъяс, некодлы энö сетöй асьнытö ылöдлыны. 17 Быдпöлöс бурсетöмыс да тыр-бур козиныс воö вылiсянь, югыдыслöн Батьсянь. Сiйö некор оз вежсьыв, Сылöн югыдыс некор оз кус. 18 Ас кöсйöм сертиыс Сiйö чужтiс миянöс Збыльыслöн Кывнас, медым Сылöн вöчöмторъясысь ми вöлiм медводдзаясöн. 19 Муса вокъяс, быдöн мед лоö тэрыб кывзыны, но ньöжмыд сёрнитны да скöрмыны. 20 Öд мортлöн скöралöмыс оз вай Ен нога веськыд олöмсö. 21 Та вöсна эновтчöй быдпöлöс пежсьыс да лёк вöчöмысь, рам сьöлöмöн сибöдöй тiянлы висьталöм Кывсö, öд сiйö вына мездыны тiянлысь ловнытö. 22 Энö лоöй сöмын кывзысьясöн, но Кывйыс серти олысьясöн. Öд куш кывзöмнад сöмын ылöдланныд асьнытö. 23 Кодi кылö Енлысь Кывсö, но оз ов сы серти, сiйö рöмпöштанö чужöмсö видзöдысь кодь. 24 Сiйö видзöдлас ас вылас, а вешйöм бöрас дзик пыр вунöдас чужöмсö. 25 Но кодi видзöдö мездлунсö сетысь тыр-бур Индöд вылö да олö сы серти, сiйöс лоö бурсиöма уджъясыс пыр. Öд сiйö оз вунöд кывлöмасö, но олö сы серти. 26 Кодкö тiян пиысь кö лыддьö асьсö вежавидзысьöн, но быдлаö вомсö восьтö, сiйö ылöдлö асьсö. Татшöм мортыслöн вежавидзöмыс нинöм оз сулав. 27 Мортыс кö тöждысьö батьтöм-мамтöм челядь вöсна да дöваяс вöсна налöн сьöкыд нуигöн, да видзö асьсö тайö мувывса пежсьыс, – тайö эм Ен Бать водзын сöстöм да пежасьтöм вежавидзöм.
1 Вокъяс, тi эсканныд Исус Кристослы, миян дзирдлуна Господьлы. Сiдзкö, энö торйöдöй йöзсö чужöм вылö видзöдöмöн. 2 Шуам, тiян чукöртчанiнö пырас озыр паськöма, зарни чунькытша морт, пырас тшöтш омöлик паськöма гöль морт, 3 и озыр паськöмыс вылö видзöдöмöн тi шуанныд сылы: «Пуксьы татчö, танi бурджык местаыс», а гöль мортлы шуанныд: «Тэ сэтчö сувт» либö «Татчö пуксьы, менам кок дорö». 4 Но тадзи вöчигöн тi юкланныд йöзсö бурджык да лёкджык вылö да лоанныд лёк нога мыждысьясöн. 5 Кывзöй, муса вокъяс! Енмыс бöрйис тайö муюгыдсьыс гöльясöс, медым озырмöдны найöс эскöмöн да вичмöдны налы Юраланiнсö, кодöс Енмыс кöсйысис сетны Сiйöс радейтысьяслы. 6 Но тi увтыртанныд гöльясöс. Оз öмöй озыръяс дзескöдны тiянöс да кыскыны тiянöс ёрдö? 7 Оз öмöй озыръяс лёкöдны бур нимнытö, кодöс сетöма тiянлы? 8 Тi кö збыльысь оланныд Гижöдыслöн медыджыд Индöд серти: «Радейт матыссатö асьтö моз», – бура вöчанныд. 9 Но тi кö торйöданныд йöзсö чужöм вылö видзöдöмöн, сэки мыж вöчанныд, тiянöс мыждасны Индöдсö торкалысьöс моз. 10 Кодi олö Индöдыс серти, но торкö Индöдсьыс кöть öти тшöктöм, сiйö лоö дзоньнас Индöдсö торкалысьöн. 11 Кодi шуис: «Гозъя олöмтö эн пежав», Сiйö тшöтш шуис: «Эн ви». Та вöсна, гозъя олöмтö кö он пежав, но виан кодöскö, – лоан Индöдсö торкалысьöн. 12 Сiдзкö, олöй да сёрнитöй на моз, кодъясöс кутасны мыждыны мездлунсö сетысь индöд серти. 13 Öд бурсьöлöмлун ёна ыджыдджык мыждöм дорысь. Но кодi оз ло бур сьöлöма мöд дiнö, сiйöс лоö мыждöма бур сьöлöмтöг. 14 Вокъяс, кодi шуö «ме эска», а уджъясыс сылöн абуöсь, мый нö таысь бурыс? Вермас-ö татшöм эскöмыс мездыны сiйöс? 15 Шуам, кутшöмкö чойлöн либö воклöн кö абу колана паськöмыс, весиг лун кежлö сёяныс, 16 а тiян пиысь кодкö шуас сылы: «Мун лöнь сьöлöмöн, шонтысь да пöткöдчы», но ачыс оз сет сылы коланаторсö олöм вылö, мый таысь бурыс? 17 Тайöс позьö шуны тшöтш эскöм йылысь: мортыслöн уджъясыс кö абуöсь, сылöн эскöмыс кулöма. 18 Дерт, кодкö вермас шуны: «Öтилöн эм эскöм, а мöдлöн – уджъяс». Сылы тадзи вочавидза: «Петкöдлы ассьыд эскöмтö уджъястöгыд, а ме петкöдла ассьым эскöмöс уджъясын». 19 Тэ эскан: Енмыс öти, тэ бура вöчан. Весиг пеж ловъяс тадзи эскöны да тiралöны полöмнысла. 20 Но кöсъян-ö тöдны, мывкыдтöм мортöй, мый уджъястöм эскöмыд – кулöм эскöм. 21 Миян батьным, Öвраам, вайис Исаакöс, ассьыс писö, висьпуктанiнö. Эз-ö тадзи вöчигöн сiйö ло Ен водзын веськыдöн? 22 Тэ аддзан, мый сылöн эскöмыс вöлi йитчöма уджъяскöд, а уджыс пыр сылöн эскöмыс лои тыр-бурöн. 23 Тадзи инiсны Гижöдысь кывъясыс: «Öвраам эскис Енлы, та вöсна Енмыс шуис сiйöс веськыдöн». Та вöсна сiйöс шуöма Енлöн ёртöн. 24 Тi аддзанныд, мый мортыс лоö веськыдöн оз сöмын эскöмыс пыр, но и уджъясыс пыр. 25 Тадзи вöлi тшöтш Раавкöд, кырсалысь анькöд. Сiйö сибöдiс гортас израильса кыйöдчысьясöс да отсалiс налы пышйыны мöд туйöд. Тайö бур вöчöмыс вöсна Енмыс лыддис сiйöс веськыдöн. 26 Кыдзи вир-яйыс ловтöг кулöма, тадзи эскöмыс уджъястöг кулöма.
1 Вокъяс, энö унаöн зiльöй лоны велöдысьясöн. Тi öд тöданныд, мый миянöс, велöдысьясöс, кутасны чорыдджыка на мыждыны мукöдыс дорысь. 2 Ми ставным унаторйын мыжмам. Кодi оз мыжмы сёрнинас, сiйö тыр-бур морт да вермö дзоньнас кутны ассьыс вир-яйсö. 3 Ми кöртвомалам вöлöс, медым сiйö кывзысис миянлысь. Тадзи ми веськöдлам сылöн став вир-яйнас. 4 Босьтны кö корабльяс, найö сэтшöм ыджыдöсь, найöс новлöдлö ыджыд тöвныр, но ичöтик руль отсöгöн бöжалысьыс веськöдлö корабльнас кытчö кöсйö. 5 Тадзи артмö и кывнымкöд: миян вир-яйын кывным – ичöтик юкöн, но сiйö вермö ошйысьны ыджыд уджъясöн. Ичöтик би вермö бырöдны уна вöр! 6 Миян кывным – тайö би. Миян вир-яйын сiйö – лёк чукöртанiн, сiйö пежалö дзоньнас вир-яйнымöс. Ад бисянь öзйöмöн сiйö сотö миянлысь став олöмнымöс. 7 Мортыс вермö лöньöдны быдпöлöс олысьöс: пемöсöс, лэбачöс, нюглясьысьöс да саридзын уялысьöс. Мортыс найöс лöньöдöма нин, 8 а кывсö лöньöдны некод оз вермы. Лёкыс вöсна кывсö лöньöдны он вермы, сiйö тырöма виана ядöн. 9 Кывйöн ми ошкам Ен Батьöс, кывйöн и ёрам Ен нога вöчöм мортöс. 10 Öти вомысь петö ошкöм и ёрöм. Вокъяс, тадзи оз вермы лоны! 11 Вермас öмöй öти визувтанiнысь петны юмов да курыд ва? 12 Вокъяс, инжир пу оз вермы вайны выя вотöс, либö виноград пу – инжир вотöс. Öти визувтанiнысь оз вермы петны сола да юмов ва. 13 Эм-ö тiян пöвстын мывкыда да сюсь вежöра морт? Эм кö, сiйö мед петкöдлас ассьыс мывкыдлунсö рам сьöлöмыс да бур оласногыс пыр. 14 Но тiян сьöлöмын кö эм курыд вежалöм да асьтö радейтöм, сiдзкö, энö ошйысьöй да асланыд ылöгöн энö вевттьöй збыльсö. 15 Öд татшöм мывкыдыс – абу вылiсянь сетöм мывкыд, сiйö – мувывса, мортсянь да пеж ловъяссянь. 16 Кöнi вежалöм да сöмын асьтö радейтöм, сэнi кывзысьтöмлун да быдпöлöс лёкыс. 17 Но вылiсянь сетöм мывкыдлуныс – медвойдöр сöстöм, сэсся лöнь, рам, кывзысьысь, тырöма буралöмöн да бур уджъясöн. Сiйö оз торйöд мортсö чужöм вылö видзöдöмöн, сiйö ставсö вöчö сьöлöмсяньыс. 18 Лöньлунсö вайысьяс кöдзöны лöньлунлысь кöйдыс, а тайö кöйдысыс вайö веськыда олöмыслысь вотöс.
1 Кытысь артмö тiян пöвстын лёксьöмыс да вензьöмыс? Оз-ö чужны найö тiян ыштöмъяссянь, кодъяс дугдывтöг ыпъялöны-тышкасьöны тiян вир-яйын? 2 Тi ыштанныд мый вылö кö, но нинöм онö босьтöй. Тi виаланныд да вежаланныд, но тiянлы нинöм оз вичмы. Тi вензянныд да лёксянныд, но тiян нинöм абу, öд тi онö корöй. 3 А коранныд кö, тiянлы оз ло сетöма, öд тi онö бур вылö корöй. Тi кöсъянныд могмöдны сöмын ассьыныд ыштöмтö. 4 Енсö эновтысьяс, тi öмöй онö тöдöй, мый мувывсакöд öтувтчысь – Енлы паныд мунö? Сiдзкö, кодi кöсйö öтувтчыны мувывсакöд, сiйö Енлы паныд мунö. 5 Гашкö, тi чайтанныд, мый Гижöдыс весьшöрö висьталö: «вежöгтöмöн радейтö лолыс, кодi олö миян пытшкын». 6 Но Енлöн буралöмыс миян дiнö ёна ыджыдджык. Öд Гижöдыс висьталö: – Вылö кыпöдчысьяслы Енмыс паныд мунö, а рамъяс дiнö Сiйö буралö. 7 Сiдзкö, сетчöй Енмыслы, паныд сувтöй омöльыслы, и сiйö пышъяс тiян дiнысь. 8 Матыстчöй Ен дiнас, и Сiйö матыстчас тiян дiнö. Мыськöй кинытö, мыж вöчысьяс! Кык бана шаньгаяс, сöстöммöдöй сьöлöмнытö! 9 Шогсьöй, сыркъялöй да бöрдöй! Тiян серамныд мед пöрас бöрдöмö, а гажöдчöмныд – шогсьöмö. 10 Раммöдчöй Господь водзын, и Сiйö кыпöдас тiянöс. 11 Вокъяс, энö лёкöдöй öта-мöднытö! Лёкöдö кö кодкö либö мыждö ассьыс воксö, сiйö паныд мунö Индöдыслы да мыждö Индöдсö. Но тэ кö мыждан Индöдсö, сiдзкö, тэ абу Индöд серти олысь, а мыждысь. 12 Но Индöдсö Сетысьыс да Мыждысьыс – öти. Сiйö вермö мездыны и бырöдны. А тэ кодi сэтшöмыс, медым мöдсö мыждыны? 13 Öнi висьтала тiянлы, тадзи шуысьяслы: «Талун-аски ми мöдöдчам сэтшöмтö карö да олам сэнi во чöж. Сэнi кутам вузасьны да озырмöдчыны». 14 Но тi весиг онö тöдöй, мый ваяс тiянлы аскиа луныс. Öд тiян олöмныд ру кодь, петкöдчылас дженьыдик кад кежлö, а сэсся бырас. 15 Бурджык тайö кывъясыс пыдди шуны тiянлы: «Шогмана кö Господьлы да ловъяöсь лоам, вöчам сiйö либö тайö». 16 А тi сöмын вылö кыпöдчанныд да ошйысянныд аснаныд. Но став тайö ошйысьöмыс – лёктор. 17 Сiдзкö, кодi тöдö, мый колö бурсö вöчны, но оз вöч, сiйö мыжмö.
1 Öнi висьтала тiянлы, озыръяс: сыркъялöмöн бöрдöй ыджыд шогъясысь, кодъяс суасны тiянöс. 2 Тiян озырлунныд сiсьмöма, паськöмнытö воз сёйöма. 3 Тiян зарниныд да эзысьныд сiмöма. Тайö сiмыс кутас висьтавны тiян мыжлун йылысь. Сiйö би моз сотас тiянлысь вир-яйнытö. Тайö бöръя кадас тi чукöртiнныд аслыныд озырлунсö. 4 Со, кылö горзöмыс тiян му вылын уджалысьяслöн, кодъяслы тi энö мынтысьöй. Öнi найö гораа горзöны, и налöн горзöмыс воис Господь Саваоф пельясöдз. 5 Тi олiнныд тайö му вылас лышкыда да быдторнас чöсмасинныд. Тi тшöгöдiнныд асьнытö, кыдзи пемöсъясöс тшöгöдöны весиг начкысян лунö. 6 Тi мыждiнныд да виинныд веськыда олысьöс, сiйö оз нин водзсась тiянлы. 7 Вокъяс, терпитöмöн виччысьöй Господьлысь локтöмсö. Видзöдлöй, кутшöм терпитöмöн виччысьö му вöдитысь, медым босьтны мулысь дона быдтассö. Сiйö виччысьö арся да тувсов зэръяс. 8 Тi тшöтш дыр терпитöй да лоöй зумыдöсь, öд Господьлöн локтöмыс матын нин. 9 Вокъяс, энö мыжалöй öта-мöднытö, медым Енмыс эз мыжды тiянöс. Öд Мыждысьыс сулалö нин öдзöс дорын. 10 Вокъяс, видзöдöй пророкъяс вылö, кодъяс сёрнитiсны Господь нимсянь. Найö терпитöмöн нуисны сьöкыдсö. 11 Ми лыддям шудаöн найöс, кодъяс зумыда сулалiсны помöдз. Тi, дерт, кывлiнныд Иовлöн зумыдлун йылысь да тöданныд, мый Господь дасьтiс сылы. Öд Господь мелi да бур сьöлöма. 12 Вокъясöй, медвойдöр кора тiянöс, энö кöсйысьöй ни енэжöн, ни муöн, ни мукöдторйöн. Тiян "да"-ныд мед лоö сöмын "да", тiян "ог"-ныд мед лоö сöмын "ог". Сэки тiянöс оз мыждыны. 13 Тiян пиысь кö кодкö сьöкыдалö, мед кевмысьö. Нимкодясьö кö, мед сьылö Енмöс ошкана сьыланкывъяс. 14 Висьö кö кодкö, мед корö вичкоса юрнуöдысьясöс. Найö мавтыштасны висьысьöс выйöн Господь нимсянь да кевмысясны сы вöсна. 15 Сэки эскöмöн кевмысьöмыс отсалас висьысьлы, и Господь бурдöдас сiйöс. А вöчис кö сiйö мыжъяс, сылысь мыжъяссö лоö прöститöма. 16 Висьталöй öта-мöд водзаныд ассьыныд мыжъястö да кевмысьöй öта-мöд вöснаныд, медым бурдiнныд. Öд веськыда олысьлöн кевмысьöмыс вына, сiйö вермö вöчны унатор! 17 Илля вöлi миян кодь морт. Сiйö сьöлöмсяньыс кевмысис, медым эз зэр, и му вылас эз вöв зэрыс куим во да джын. 18 Сэсся бара кевмысис, и енэжсяньыс киссис зэр. Сэки муыс сетiс быдтас. 19 Вокъяс, тiян пиысь кö кодкö кежас збыльсьыс, а мöд морт бöр бергöдас сiйöс збыляс, 20 тöдöй, мый мыжа мортöс ылöг туй вылысь бергöдысь мездö сiйöс кулöмысь да вевттьö сылысь уна мыж.
1 Гижö Петыр, Исус Кристослöн апостол. Чолöмала йöз муын олысьясöс, Понтö, Галатияö, Каппадокияö, Асияö да Вифинияö разалöм войтырöс. Ен Бать водзысяньыс бöрйöма да вежöдöма тiянöс Аслас Ловнас, медым тi кывзысинныд Исус Кристослысь да сöстöмминныд Сылöн Вирнас. Буралöмыс да лöньлуныс мед содас тiянлы! 3 Ошкöм Енлы, миян Господь Исус Кристослöн Батьлы. Ыджыд буралöмыс вöсна Исус Кристосöс ловзьöдöм пыр Енмыс сетiс миянлы выль олöм. Та вöсна ми кутам ловъя лача 4 босьтны сöстöм, сiсьмытöм да бырлытöм озырлун, кодöс видзöма тiянлы енэжын. 5 Эскöмныд пыр Енлöн выныс видзö тiянöс мездмöм вылö, и тайö мездмöмыс воссяс бöръя кадас. 6 Сiдзкö, нимкодясьöй, весиг ковмас кö öнi шогсьыштны быдпöлöс сьöкыд нуöмысь. 7 Зарниыс тöдмавсьö биöн. Тiян эскöмныд, кодi бырана зарниысь донаджык, тöдмавсьö сьöкыдлунъяс дырйи, медым Исус Кристос локтiгöн вичмис тiянлы ошкöм, нимöдöм да дзирдлун. 8 Кристосöс тi энö аддзылöй, но Сiйö муса тiянлы. Тi онö на аддзöй Сiйöс, но эсканныд Сылы. Тiян сьöлöмныд тырöма ыджыдсьыс-ыджыд нимкодьлунöн, та йылысь он вермы весиг висьтавнысö. 9 Öд эскöмныдлöн медшöр могыс – воöдчыны мездмöмас. 10 Пророкъяс пыдiсянь тöдмалiсны-туялiсны тайö мездмöмсö. Найö водзвыв висьтавлiсны тiянлы дасьтöм буралöм йылысь. 11 Найö кöсйисны тöдмавны, кутшöм кад вылö да мый вылö индiс на пытшкын олысь Кристослöн Лолыс, кор Сiйö водзвыв висьтавлiс Кристослöн сьöкыдалöмыс да Сiйöс виччысьысь дзирдлуныс йылысь. 12 Енмыс восьтiс пророкъяслы, мый тайöс юöртiгöн найö кесъялiсны миянлы, а эз аслыныс. Öнi тайöс юöртiсны найö, кодъяс висьталiсны тiянлы Бур Юöрсö енэжсянь мöдöдöм Вежа Лов вынöн. Весиг анделъяс кöсйöны тöдны тайö гусяторсö. 13 Сiдзкö, лоöй дасьöсь да олöй садь вежöрöн. Кутöй зумыд лача Енлöн буралöм вылö, кодi вичмас тiянлы Исус Кристос локтiгöн. 14 Лоöй кывзысьысь челядь кодьöн. Збыльсö тöдтöдз тiянöн веськöдлiсны асланыд кöсйöмъясныд, но öнi энö лэдзöй налы веськöдлыны аснаныд. 15 Тiянöс Корысьыс вежа. Сы моз лоöй вежаöсь быдторйын. 16 Гижöма: «Лоöй вежаöсь, öд Ме вежа». 17 Тi кö шуанныд Батьöн Сiйöс, кодi чужöм вылö видзöдтöг мыждö быдöнöс уджъясыс серти, сiдзкö, олöй тайö му вылас Енсьыс полöмöн. 18 Тi öд тöданныд, мый тiянöс ньöбöма абу бырана эзысь да зарни вылö, медым мездыны тiянöс весьшöрö олöмысь, кодi вуджис тiянлы батьяссяньныд. 19 Тiянöс ньöбöма Кристослöн дона Вир вылö. Сiйö вöлi тыр-бур да сöстöм Баля. 20 Енмыс бöрйис Сiйöс му пуксьытöдзыс на да мöдöдiс тiян вöсна бöръя кадас. 21 Сы пыр тi эсканныд Енмыслы, кодi ловзьöдiс Сiйöс да сетiс Сылы дзирдлунсö, медым тi эскинныд да кутiнныд лача Енмыс вылö. 22 Лов отсöгöн збыльыслысь кывзысьöмöн тi сöстöмминныд, медым восьса сьöлöмöн верминныд радейтны мукöд эскысьöс. Сiдзкö, сьöлöмсяньныд радейтöй öта-мöднытö. 23 Тi выльысь чужинныд энö сiсьмана кöйдыссянь, а сiсьмытöмсянь – Енлöн ловъя да бырлытöм Кывсянь. 24 Гижöдыс висьталö: – Мортыс – турун кодь, сылöн мичлуныс – дзоридз кодь. Турун косьмö, дзоридз усьö, 25 а Господьлöн Кывйыс помтöг олö. Тайö Кывйыс – Бур Юöр, кодöс висьталöма тiянлы.
1 Öвсьöй быдсяма лёк вöчöмысь, ылöдчöмысь, вежалöмысь, суклясьöмысь да энö лоöй кык бана шаньгаясöн. 2 Зiльöй пöткöдчыны Ен Кывйöн, кыдзи пузчужöм кагаяс пöткöдчöны йöлöн, медым сы отсöгöн быдминныд да лоинныд мездмöмаöсь. 3 Тi öд тöданныд: Господь бур сьöлöма. 4 Сiйö – ловъя из, Енмыслы зэв дона. Йöзыс Сiйöс öтдортiсны, но Енмыс бöрйис Сiйöс. Локтöй Сы дiнö 5 да вайöй асьнытö ловъя из пыдди, медым Ен вöчас тiянысь Аслас Ловлы оланiн. Сэки лоанныд вежа кесъялысьясöн да кутанныд вайны Ловсянь вись, кодi шогмана Енмыслы Исус Кристос пыр. 6 Гижöдыс висьталö: – Сионö Ме пукта пельöс из. Сiйö – дона из, кодöс Ме бöрйи. Сылы эскысь оз янав. 7 Сiдзкö, тiянлы, эскысьяслы, Сiйö дона из. А эскытöмъяслы – тайö изйыс, кодöс шыбитiсны керка лэптысьяс, лоис пельöс изйöн. 8 Тайö изъяс найö крукасьöны да усьöны. Найö крукасьöны, öд Ен Кывйыслысь оз кывзысьны. Тадзи налы шуöма лоны. 9 Но тi – бöрйöм йöз, Öксылöн вежа кесъялысьяс. Тi – вежа войтыр, Енлöн йöз. Сiйö бöрйис тiянöс, медым висьтавлiнныд Сылöн тыр-бурыс йылысь. Енмыс корис тiянöс пемыдсьыс Аслас шензьöдана югыдö. 10 Водзынсö тi энö вöлöй Ен войтырöн, öнi тi – Ен войтыр. Водзынсö олiнныд Енлöн бурсетöмтöг, öнi тi босьтiнныд сiйöс. 11 Мусаяс, тайö му вылас тi ветлысь-мунысьяс кодьöсь. Ёна кора тiянöс: энö кывзысьöй асланыд вир-яйлöн лёк кöсйöмъяслысь, öд найö тышкасьöны тiян ловкöд. 12 Ентöдтöмъяс пöвстын олöй бур ногöн. Сэки найö, кодъяс лёкöдöны тiянöс лёк вöчысьясöс моз, аддзасны бур вöчöмнытö да ошкасны Енсö Сылöн локтiгас. 13 Господьöс пыдди пуктöмöн кывзысьöй мортöн индöм быдпöлöс веськöдлысьяслысь: öксылысь, öд сiйö став вылас ыджыдыс, 14 юралысьяслысь, öд öксы найöс пуктöма мыждыны лёк вöчысьясöс да ошкыны бур вöчысьясöс. 15 Енмыс кöсйö, медым тi бур вöчöмнаныд тупкинныд мывкыдтöм йöзлысь вомсö. 16 Тiянлы сетöма мездлун, сöмын мездлунныд мед оз ло вевттьöдöн лёк вöчöмныдлы, но олöй Енлöн кесйöгъяс моз. 17 Быдöнöс пыдди пуктöй, вокъясöс радейтöй, Енсьыс полöй, öксыöс бурö пуктöй. 18 Кесйöгъяс, Енсьыс полöмöн кывзысьöй асланыд ыджыдъяслысь. Кывзысьöй энö сöмын буръяслысь да рамъяслысь, а тшöтш скöръяслысь. 19 Мортыс кö кутö тöд вылас Енлысь кöсйöмсö да нуö сьöкыдсö лёксö вöчтöг – тайö шогмана Енмыслы. 20 Тiянöс кö нöйтöны мыж вöчöмысь да терпитанныд тайöс, сэки мыйысь тiянöс ошкынысö? Но тi кö сьöкыдаланныд бурсö вöчигöн да терпитанныд тайöс – тайö шогмана Енмыслы. 21 Дзик та вылö тiянöс корöма, öд Кристос нуис сьöкыдсö тiян вöсна. Тадзи Сiйö петкöдлiс, медым тi олiнныд Сы моз. 22 – Мыжсö Сiйö эз вöчлы, Сiйö некор эз пöръясьлы. 23 Сiйöс лёкöдiгöн Сiйö воча эз лёкöд. Сьöкыдсö нуигöн эз кöсйысь мынтысьны лёк вöчöмöн, а ставсö сетiс веськыда Мыждысьлы. 24 Миянлысь мыжъяснымöс Аслас вир-яйын Сiйö кыпöдiс крест вылö, медым ми дугдiм вöчны мыжсö да олiм веськыда. Сылöн дойясöн тi бурдiнныд. 25 Тi вöлiнныд вошöм ыжъяс кодьöсь, но öнi бергöдчинныд тiянöс Видзысь да тiян вöсна Тöждысьысь дiнö.
1 Гöтыръяс, кывзысьöй асланыд верöсъяслысь. Сэки верöсъяс, кодъяс оз эскыны Енлöн Кывлы, тiян олöм вылö видзöдöмöн висьтавтöг-велöдтöг кутасны эскыны. 2 Öд найö аддзасны тiянлысь сöстöм да Енсьыс полана оласногнытö. 3 Энö тöждысьöй мичмöдны асьнытö ортсысанас: юрсинытö баситöмöн, зарни öшлöмöн да дона паськöмöн. 4 Тiян мичлунныд мед лоö пытшкöсса: рам да лöнь сьöлöм. Тайö мичлуныс бырлытöм, сiйö дона Енмыслы. 5 Тадзи асланыс верöсъяслысь кывзысьöмöн важöн мичмöдлiсны асьнысö вежа аньяс, Ен вылö лача кутысьяс. 6 Сарра кывзысис Öвраамлысь да шуис сiйöс аслас ыджыдöн. Тi кö вöчанныд бурсö нинöмысь повтöг, сiдзкö, тi – Сарралöн нывъяс. 7 Верöсъяс, пыдди пуктöй ассьыныд гöтыръястö, олöй накöд бур мывкыдöн. Дерт, найö тiян дорысь жебджыкöсь, но налы тшöтш вичмö Енсянь буралöмыс да олöмыс. Тадзи кö вöчанныд, кевмысиганыд оз ло мытшöдыс. 8 Медбöрти кöсъя шуны тiянлы: олöй öти сьöлöмöн да öти лолöн, радейтöй öта-мöднытö, лоöй мелiöсь да рамöсь. 9 Лёк вöчöмысь энö мынтысьöй лёкöн да омöльтöмысь омöльтöмöн. Мöдарö, бурсиöй, öд тi тöданныд, мый та вылö корöма тiянöс. Сэки тiянлы вичмас бурсиöмыс. 10 – Кодлы муса олöмыс, кодi кöсйö аддзыны шуда лунъяс, сiйö мед видзас ассьыс кывсö лёк сёрниысь да вомсö ылöдчöмысь, 11 мед ылыстчас лёксьыс да вöчас бурсö, корсяс лöньлунсö да кутчысяс сэтчö. 12 Öд Господь видзöдö веськыда вöчысьяс вылö да кылö налысь кевмöмсö, а лёк вöчысьяслы Господь паныд мунö, медым бырöдны найöс му вывсьыс. 13 Кодi вöчас тiянлы лёксö, тi кö сьöлöмсяньныд вöчанныд бурсö? 14 Тi кö нуанныд сьöкыдсö веськыда олöм вöснаныд, сiдзкö, тi шудаöсь. Энö полöй некодысь да энö майшасьöй нинöмысь. 15 Господь Енмöс медвылö пуктöй сьöлöманыд. Юалас кö кодкö лачаныд йылысь, пыр лоöй дасьöсь вочавидзны сылы. Вочавидзöй рам сьöлöмöн да Енсьыс полöмöн. 16 Олöй сiдзи, мед сьöлöмныд эз мыжды тiянöс. Сэки найö, кодъяс лёкöдöны тiянöс лёк вöчысьясöс моз Кристоскöд бур нога олöмысь, яналасны асланыс кывъясысь. 17 Енмыс кö кöсйö, мед ми нуим сьöкыдсö, бурджык сьöкыдавны бур вöчöмысь лёк вöчöм дорысь. 18 Кристос öтчыдысь нуис сьöкыдсö миян мыжъяс вöсна, медым вайöдны миянöс Ен дiнö. Сiйö, веськыда олысь, кулiс лёк нога олысьяс вöсна. Сылысь вир-яйсö вöлi виöма, но ловсö вöлi ловзьöдöма. 19 Ловнас Сiйö мунiс пемыдiнын олысь ловъяс дiнö да висьталiс налы юöрсö. 20 Тайö ловъясыс эз кывзысьны Енмыслысь, но Сiйö дыр виччысис налысь кывзысьöмсö Нойлöн ковчег вöчигдырйи. Сэнi этшаöн, сöмын кöкъямыс морт, мездмисны ва пыр. 21 Тайö лоöмторйыс индö миян пыртчöм вылö, сы пыр ми мездмам Исус Кристослöн ловзьöм вöсна. Пыртчöмыс – абу вир-яй вылысь няйт мыськöм, но Ен водзын сöстöм сьöлöмöн кöсйысьöм. 22 Кристос кыпöдчис енэжас да пуксис Ен веськыдладорö, Кристослысь кывзысьöны анделъяс, енэжвыв ыджыдалысьяс да вынъяс.
1 Кристос вир-яйнас нуис сьöкыдсö миян вöсна. Сiдзкö, тi тшöтш лоöй дасьöсь нуны сьöкыдсö, медым коляс кадсö тайö му вылас олiнныд Ен кöсйöм серти, энö нин асланыд кöсйöм серти. Öд вир-яйнас сьöкыдалысь ылыстчö мыж вöчöмысь. 3 Водзынсö тi вöчинныд ентöдтöмъяс моз: олiнныд лэдзчысьöмöн да лёк кöсйöмныд серти, кырсалiнныд, кодалiнныд-гажöдчинныд да юрбитiнныд зывöк идолъяслы. Тырмас нин тадзи овнытö. 4 Öнi ентöдтöмъяс шензьöны, öд тi онö нин олöй на моз лэдзчысьöмöн. Та вöсна найö лёкöдöны тiянöс. 5 Но налы ковмас вочавидзны Сылы, кодi регыд кутас мыждыны ловъяясöс да кулöмаясöс. 6 Дзик та могысь вöлi висьталöма Бур Юöрсö тшöтш кулöмаяслы. Дерт, вир-яйнас найöс лоö мыждöма став йöзсö моз. Но Бур Юöрсö налы вöлi висьталöма, медым ловнас найö олiсны Ен ногöн. 7 Регыд ставыслы воас пом. Сiдзкö, олöй бур мывкыдöн да садь вежöрöн, медым верминныд кевмысьны. 8 Сьöлöмсяньныд радейтöй öта-мöднытö, öд муслуныс вевттьö уна мыж. 9 Сибöдöй öта-мöднытö шуасьтöг. 10 Енмыслöн сетöмторйыс унапöлöс. Сiйö быдöнлы козьналiс сетöмторсö, медым тi кесъялiнныд öта-мöдныдлы. Сiдзкö, бур ногöн вöдитчöй Енсянь сетöмторнас. 11 Кодi висьталö, мед висьталö Енсянь. Кодi кесъялö, мед кесъялö Ен вынöн. Сэки быдторйын лоö ошкöмыс Енлы Исус Кристос пыр. Сылы ошкöмыс, Сылöн ыджыдалöмыс нэмъяс чöж. Аминь. 12 Мусаяс, тiянлы кö паныдасьöны топöдан сьöкыдлунъяс, тайö мед оз шензьöд тiянöс. Öд сьöкыдлуныс паныдасьö, медым тöдмавны тiянöс. 13 Мöдарö, нимкодясьöй, öд тi тшöтш нуанныд Кристослысь сьöкыдсö. Сэки Кристослöн дзирдлуныс воссигöн тi кутанныд ёна нимкодясьны. 14 Тiянöс кö лёкöдöны Кристос ним вöсна, тi шудаöсь. Öд Енлöн дзирдлуна Лолыс тiянкöд. Йöзыс омöльтöны Сiйöс, а тi ошканныд. 15 Сöмын тiян пиысь некод мед оз сьöкыдав морт виöмысь либö гусясьöмысь, лёк вöчöмысь либö суклясьöмысь. 16 Но сьöкыдалö кö кодкö Кристослы эскöмысь, мед оз яндысь. Мöдарö, мед ошкö Енсö таысь. 17 Мыждан кадыс матын нин. Медводз Енмыс кутас мыждыны Ассьыс войтырсö. Сiдзкö, медводз кö кутас мыждыны миянöс, сэки мый виччысьö найöс, кодъяс оз кывзысьны Енлöн Евангелльöлысь? 18 – Веськыда олысь кö öдва мездмö, мый виччысьö Ентöг олысьöс да мыжаöс? 19 Сiдзкö, Ен кöсйöм серти сьöкыдсö нуысьяс, сетöй асьнытö дзоньнас эскана Ставсöвöчысьлы да водзö вöчöй бурсö.
1 Öнi ме шыася вичкоса юрнуöдысьяс дiнö, öд ачым ме тшöтш вичкоса юрнуöдысь. Ме аддзылi Кристослысь сьöкыдалöмсö, да меным тшöтш вичмас дзирдлуныс, кодi воссяс Сылöн локтiгас. Ме ёна кора тiянöс: 2 видзöй тiянлы сетöм Енлысь йöз чукöрсö. Тöждысьöй на вöсна нимкодьпырысь да Енлы шогмана ногöн, энö мырдöнпырысь. Вöчöй тайöс сьöлöмсяньныд, а энö аслыныд мыйкö куралöм могысь. 3 Энö ыджыдалöй Енлöн йöз чукöр вылын, но асланыд оласногöн петкöдлöй налы, кыдзи колö овны. 4 Медыджыд Видзысьыс локтас да козьналас тiянлы дзирдалан юркытш, кодi оз сiсьмы. 5 Томджыкъяс, кывзысьöй вичкоса юрнуöдысьяслысь. Ставныд кывзысьöй öта-мöдныдлысь да лоöй рам сьöлöмаöсь. Öд вылö кыпöдчысьяслы Енмыс паныд мунö, а рамъяс дiнö Сiйö буралö. 6 Сiдзкö, сетчöй Енлöн вына кипод улö, и ас кадö Сiйö кыпöдас тiянöс. 7 Ассьыныд став тöжд-могтö вайöй Сылы, öд Сiйö тöждысьö тiян вöсна. 8 Олöй садь вежöрöн да пыр лоöй дасьöсь. Öд тiянлы паныд мунысьыс, омöльыс, ветлö равзысь лев моз да корсьысьö, кодöс эськö ньылыштны. 9 Сувтöй сылы паныд зумыд эскöмöн. Тöдöй, мый став му пасьталаыс вокъясныд тшöтш тiян моз нуöны сьöкыдсö. 10 Тiянлы этша нин колис сьöкыдавны. Та бöрти буралöмнас озыр Ен, кодi корис тiянöс Исус Кристос пыр Аслас бырлытöм дзирдлунö, мед ёнмöдас да зумыдмöдас тiянöс да вöчас тыр-буръясöн. 11 Сылы ошкöмыс, Сылöн ыджыдалöмыс нэмъяс чöж. Аминь. 12 Силуан отсöгöн ме гижи тiянлы тайö дженьыдик гижöдсö. Сiйöс ме лыддя эскана вокöн. Кöсъя эскöдны да ышöдны тiянöс: кутчысьöй Енлöн збыль буралöмас, кодöс сетöма тiянлы. 13 Тiянöс чолöмалö вавилонса вичко. Енмыс бöрйöма сiйöс тiянöс моз. Тiянöс чолöмалö тшöтш Марк пиöй. 14 Чолöмалöй öта-мöднытö мусапырысь окыштöмöн. Лöнь олöм ставныдлы, кодъяс Исус Кристос пытшкынöсь. Аминь.
1 Гижö Симон-Петыр, Исус Кристослöн кесйöг да апостол. Чолöмала тiянöс, миян моз сьöлöманыд эскöмсö босьтысьясöс. Тайö донаторсö ми босьтiм Исус Кристослöн, миян Ен Мездысьнымлöн веськыдлун вöсна. 2 Буралöмыс да лöньлуныс мед содас тiянлы Енмöс да Исус Кристос Господьнымöс тöдмалiгöн. 3 Ми тöдмалiм Сiйöс, кодi корис миянöс Аслас дзирдлунö да тыр-бурö. Сылöн Ен вынсянь сетöма миянлы став коланасö, медым ми олiм вежавидзöмöн. 4 Миянлы сетöма зэв дона да ыджыд кöсйысьöмъяс, медым на отсöгöн тi верминныд ылыстчыны мувывса пежалана ыштöмъясысь, да медым тiян пытшкын вöлi енмалуныс. 5 Та могысь зiльöй петкöдлыны эскöманыд бур вöчöм, бур вöчöманыд – тöдöмлун, 6 тöдöмлунаныд – асьтö кутöм, асьтö кутöманыд – зумыдлун, зумыдлунаныд – вежавидзöм, 7 вежавидзöманыд – воктö радейтöм, воктö радейтöманыд – муслун. 8 Тайö кö тiян эм да содö, сiдзкö, Исус Кристос Господьнымöс тiян тöдмалöмныд оз ло весьшöрö да тi онö кольöй вотöстöг. 9 Кодлöн тайö абу, сiйö синтöм, нинöм оз аддзы, сiйö вунöдöма, мый сiйöс мыськалöма важ мыжъяссьыс. 10 Вокъяс, тiянöс корöма-бöрйöма. Сiдзкö, тöждысьöй, мед тайö лунысь-лун зумыдмас тiян пытшкын. Тадзи вöчиганыд некор онö крукасьöй. 11 Сэки тi восьса öдзöсöд верманныд пырны миян Мездысь Господь Исус Кристослöн помтöм Юраланiнö. 12 Та вöсна ме быдпöрйö кута казьтывны тiянлы та йылысь, кöть эськö тi тöданныд да зумыда сулаланныд тiянлы висьталöм збыляс. 13 Тайö вир-яй чомъяс олiгöн ме лыддя коланаöн садьмöдны тiянöс аслам казьтылöмъясöн. 14 Тöда, меным регыд ковмас кольны чомйöс. Тайöс восьтiс меным Исус Кристос Господьным. 15 Кута тöждысьны, медым менам мунöм бöрын ставсö тайöс пыр кутiнныд тöд выланыд. 16 Ми висьталiм тiянлы миян Господь Исус Кристослöн выныс да локтöмыс йылысь. Тайö абу кутшöмкö лöсьöдöм мойд, ми öд асланым синмöн аддзылiм Сылысь ыджыд вынсö. 17 Ен Батьыс сетiс Сылы нимöдöмсö да дзирдлунсö, кор Вылысса дзирдлунсяньыс кылiс гöлöс шы: «Тайö Менам муса Пиöй, Ме нимкодяся Сыöн». 18 Тайö шуöмсö ми кылiм енэжсянь, кор вöлiм Исускöд вежа керöсын. 19 Нöшта на, миян эм пророкъяслöн веськыд кыв. Тi бура вöчанныд, кутчысянныд кö тайö кывъяс, öд сiйö кыдзи пемыдiнын öзйысь би. Сiйö югдöдас лунъюгыд пуксьытöдзыс да сьöлöманыд асъя кодзув мыччысьтöдзыс. 20 Тöдöй, пророк гижöдсö ачыс мортыс оз вермы гöгöрвоöдны. 21 Öд пророк юöрсö некор абу вöлi висьталöма мортлöн кöсйöмсянь. Сiйöс висьтавлiсны Вежа Лов ышöдöмсянь Енлöн вежа йöз.
1 Израиль войтыр пöвстын вöлiны ылöгпророкъяс, тадзи тiян пöвстын тшöтш лоасны ылöгвелöдысьяс. Найö ваясны тiянлы бырöдан ылöгвелöдöмъяс, весиг соссясны Ыджыдысь, кодi ньöбис найöс. Тадзи найö кöлаласны ас выланыс виччысьтöм бырöдöмсö. 2 Унаöн на вылö видзöдöмöн пондасны овны лэдзчысьöм оласногöн. Татшöмъясыс вöсна збыль туйыс лоö серам туйын. 3 Медым курыштны мыйкö аслыныс, найö тывйыштасны тiянöс мудер сёрнинаныс. Но налы мыждöмыс важöн нин дась, найöс бырöдöмыс матын нин. 4 Енмыс мыжö усьöм анделъясöс эз видз, шыбитiс найöс пемыд адö да дорис Мыждан лунöдз. 5 Эз видз Сiйö и Ентöг олысьясöн тырöм воддза муюгыдсö – бырöдiс ыджыд ваöн. Колис ловъяöн сöмын кöкъямысöс, öтиыс на пиысь вöлi веськыдлун йылысь юöртысь Ной. 6 Ен мыждiс Содом да Гомора каръяс, биöн бырöдiс пöимöдз. Тайöн петкöдлiс, мый жö виччысьö водзö Ентöг олысьясöс. 7 Но веськыда олысь Лотöс Енмыс мездiс. Лот ёна сьöкыдалiс Ентöг олысьяслöн лэдзчысьöм оласногысь. 8 Быд лун тайö веськыда олысьыслöн лолыс горзiс сы гöгöр олысь йöзлысь лёк вöчöмсö аддзöмысь-кылöмысь. 9 Господь тöдö, кыдзи мездыны вежавидзысьöс сьöкыдалöмсьыс, а лёк вöчысьöс Сiйö видзö, мед чорыда мыждыны сiйöс Мыждан лунö. 10 Торъя нин тайö инмö вир-яйлöн лёкколöмнас пежасьöмаяслы да Енлысь Юралöмсö мустöмтысьяслы. Найö яндысьтöмöсь, асныраöсь да оз повны лёкöдны енэжвывса вынъясöс. 11 Анделъяс ёна вынаджыкöсь да ёнджыкöсь на дорысь, но найö оз мыжавны да оз лёкöдны татшöмъяссö Ен водзын. 12 Тайö йöзыс асьныс оз гöгöрвоны, кодöс лёкöдöны. Найö вöрын шöйтысь вежöртöм пемöсъяс кодьöсь, кодъясöс лöсьöдöма кыйöм-виöм вылö. Пемöсъясöс моз найöс и лоö бырöдöма. 13 Лёк вöчöмсьыныс найö босьтасны водзöс. Найö радейтöны гажöдчыны лунъюгыднас, яндысьтöг пукалöны тiянкöд öти пызан сайын да пöръясьöмнас пежалöны ставсö. Тайö налöн чöсмасянторйыс. 14 Налöн синныс пыр öзъялö нывбабаяс вылö, найö оз пöтлыны мыжсö вöчöмсьыс, ылöдлöны жеб эскысьясöс. Сьöлöмныс налöн тырöма горшлунöн, найö ёрöмыслöн пиян. 15 Найö кежисны веськыд туйсьыс да ылалiсны. Найö мунöны Восорлöн Валаам пиыс кок туйöд, кодлы лёк ногöн шедöдны озырлунсö вöлi сьöлöм сертиыс. 16 Но сiйöс янöдöма вöлi лёктор вöчöмсьыс: осёл, кывтöм пемöс, шыасис морт моз да öлöдiс пророкöс йöйталöмсьыс. 17 Тайö ылöгвелöдысьясыс косьмöм юкмöс да тöвнырöн новлöдлан кымöръяс кодьöсь. Татшöмъясыслы век кежлö дасьтöма сап сьöд пемыдiн. 18 Тшап да ковтöм сёрнинаныс найö öзтöны вир-яйлысь лёкколöмсö да зiльöны кыскыны лэдзчысьöм оласногö найöс, кодъяс муртса на мынöмаöсь ылалöмаясысь. 19 Ылöгвелöдысьяс кöсйысьöны сетны налы мездлун, кöть асьныс найö пежыслöн кесйöгъяс. Öд кодi мортсö вермöма, сылöн сiйö и кесйöг. 20 Мездысь Исус Кристос Господьнымöс тöдмалöм бöрын кö мувывса пежсьыс ылыстчысьяс бара бергöдчöны важас, да лёкыс кö вермö найöс, сэки татшöмъясыслы воддза дорсьыс ёна лёкджык лоö. 21 Бурджык эськö вöлi, найö кö эз тöдлыны веськыдлуныслысь туйсö. Öд найö тöдiсны тайöс, но бöр бергöдчисны налы сетöм вежа тшöктöмысь. 22 Татшöмъясыслы бура лöсялö тайö шусьöгыс: «Пон бергöдчö аслас вос дорö», да нöшта: «Мыськöм порсь бöр мунö туплясьны няйтö».
1 Донаясöй, тайö менам мöд гижöд нин тiянлы. Кыкнан гижöдас аслам казьтылöмъясöн зiли ышöдны тiянöс мöвпавны сöстöма. 2 Кутöй тöд выланыд вежа пророкьяслысь важысянь шуöмсö да Мездысь Господьлысь апостолъяс пыр сетöм тшöктöмсö. 3 Тöдöй, бöръя кадö локтасны тiянöс серам туйö пуктысьяс, асланыс лёк кöсйöмö сетчöмаяс. 4 Найö пондасны шуны: «Кöнi нö сiйö Локтысьыс, кодi кöсйысьлiс тай? Öд миян батьяс кулiсны нин, но ставыс коли важ мозыс: му пуксьöмсяньыс нинöм эз вежсьы». 5 Тадзи мöвпалысьяс быттьö оз тöдны, мый Ен Кывйöн артмöдöма енэжсö да мусö, вöчöма ваысь да ва отсöгöн, 6 и сэкся муюгыдсö вöлi бырöдöма ваöн. 7 Öнiя енэжсö да мусö сiйö жö Кывйыс кутö да видзö биöн бырöдöм вылö. Тайö лоö Мыждан лунö, кор Ентöг олысьясöс лоö бырöдöма. 8 Мусаясöй, кутöй тöд выланыд: Господьлöн öти луныс сюрс во кодь, сюрс воыс – öти лун кодь. 9 Кодсюрö чайтöны, мый Господьным нюжмасьö олöмö пöртны кöсйысьöмсö, но Сiйö оз нюжмась, а терпитö миянöс. Сiйö оз кöсйы, мед кодкö вошис, но кöсйö, мед быдöн бергöдчис мыжъяссьыс. 10 Господьлöн луныс воас виччысьтöг, войся гусясьысь моз. Сэки енэжыс ыджыд шыöн бырас, став ентыкöлаыс ыпъялана биысь киссяс, а муыс да ставыс, мый сы вылын, сотчас. 11 Ставыс кö тадзи киссяс, сэки кутшöм вежаöн да веськыдöн колö лоны тiянлы. 12 Тi öд ёна кöсъянныд да виччысянныд, мед öдйöджык нин воас Енлöн луныс. Сiйö лунö енэжыс ыпъялан биысь сотчас да киссяс, доналöм ентыкöлаыс сылас. 13 Но Енлöн кöсйысьöмыс серти ми виччысям выль енэж да выль му, кöнi кутас ыджыдавны веськыдлун. 14 Сiдзкö, мусаясöй, тайöс виччысиганыд тöждысьöй, медым сувтны Ен водзö сöстöмöн да мыжтöмöн, мед тiян сьöлöмын вöлi лöньлун. 15 Енлысь терпитöмсö лыддьöй аслыныд мездмöмöн. Та йылысь гижлiс тiянлы Ен вежöра дона Павел вокным. 16 Татшöмторъяссö сiйö висьталö быд гижöдын. Мыйсюрö сэтысь сьöкыд гöгöрвонысö. Та вöсна унаöн ичöт мывкыднысла да жеб эскöмнысла сылысь гижöдъяссö мукöд Гижöдсö моз бергöдöны мöдарö. Тадзи кöлалöны ас выланыс бырöдöмсö. 17 Та вöсна, мусаясöй, водзвыв тайöс тöдöмöн видзчысьöй, медым энö шедöй Ентöг олысьяслöн ылöдöмö да энö усьöй зумыд подув вывсьыс. 18 Быдмöй буралöмас да миян Мездысь Исус Кристос Господьнымöс тöдмалöмас. Сылы ошкöмыс öнi да нэмъяс чöж. Аминь.
1 Ми висьталам сы йылысь, мый вöлi водзысяньыс, мый кывлiм, мый аддзылiм ас синмöн, мый видзöдалiм да мый видлалiм ас киöн – ми висьталам олöмыслöн Кыв йылысь. 2 Олöмыс петкöдчис, да ми аддзылiм Сiйöс. Öнi висьталам Сы йылысь, юöртам тiянлы помтöм Олöмыс йылысь. Сiйö вöлi Батьыскöд, öнi Сiйöс восьтöма миянлы. 3 Аддзывлöм-кывлöмыс йылысь висьталам тiянлы, мед эськö тi вöлiнныд миянкöд öтув. А ми öтувъяöсь Батьыскöд да Сылöн Исус Кристос Пиыскöд. 4 Ми гижам та йылысь, медым тi верминныд тырвыйö нимкодясьны. 5 Енмыс эм югыд, Сы пытшкын пемыдыс абу. Тайö юöрсö ми кывлiм Ен Писянь, öнi юöртам сiйöс тiянлы. 6 Шуам кö: "Ми öтув Сыкöд", а асьным ветлам пемыдас, сiдзкö, пöръясям да огö олöй збыльыс серти. 7 Сы моз кö югыдас ветлам, сэки миян эм öта-мöдкöд öтувтчöм, сэки Исус Кристос Ен Пилöн Вирыс сöстöммöдö миянöс быдпöлöс мыжысь. 8 Шуам кö: "Миян мыжыс абу", ми пöрйöдлам асьнымöс, и збыльыс абу миян пытшкын. 9 Ми кö висьталам мыжнымöс, сэки веськыд да эскана Ен прöститö миянлысь мыжсö да весалö миянöс быд лёкысь. 10 Шуам кö: "Ми эгö вöчöй мыжсö", петкöдлам Енсö пöръясьысьöн, да Сылöн кывйыс оз ов миян пытшкын.
1 Менам челядь! Гижа тайöс тiянлы, медым тi энö вöчöй мыжсö. А мыжмас кö кодкö, тöдöй: Бать водзын миян эм веськыд Дорйысь – Исус Кристос. 2 Сiйö – миян мыжъясысь вештысян вись, и абу сöмын миян, а став муюгыдыслöн мыжъясысь. 3 Олам кö Сылöн тшöктöмъяс серти, тайöн петкöдлам, мый ми тöдам Сiйöс. 4 Кодi шуö: "Ме тöда Сiйöс", но тшöктöмъяссö Сылысь торкö, сiйö пöръясьö, да сы пытшкын збыльыс абу. 5 Кодi олö Сылöн Кывйыс серти, сы пытшкын збыльысь Енлöн муслуныс воöма тыр-бурöдз. Та серти тöдам, мый ми Сы пытшкынöсь. 6 Кодi шуö: "Ме Сы пытшкын", сылы колö овны Сы моз. 7 Мусаяс, гижа тiянлы ог выль, а важ тшöктöм. Сiйöс тi тöданныд водзысяньыс нин. Тайö кывсö, важ тшöктöмсö, тi кывлiнныд водзынджык нин. 8 Збыльвылас, ме гижа выль тшöктöм. Сiйö збыльмö Кристос пытшкын да тiян пытшкын, öд пемыдыс вешйö, а збыль югыдыс югдöдö нин. 9 Кодi шуö: "Ме ветла югыдас", а воксö ассьыс мустöмтö, сiйö пемыдас на. 10 Воксö радейтысь ветлö югыдас, да сы пытшкын крукöдыс абу. 11 Воксö мустöмтысь ветлö пемыдас, сiйö оз тöд, кытчö мунö, öд пемыдыс тупкöма сылысь синсö. 12 Челядь, тiянлы гижа, öд Кристос ним вöсна прöститöма мыжнытö. 13 Батьяс, тiянлы гижа, öд тi тöданныд Водзысянь Олысьсö. Том войтыр, тiянлы гижа, öд тi верминныд омöльсö. Челядь, тiянлы гижа, öд тi тöданныд Ен Батьöс. 14 Гижи тiянлы, батьяс, öд тi Водзысянь Олысьсö тöданныд. Гижи тiянлы, том войтыр, öд тi ёнöсь, Енлöн Кывйыс олö тiян пытшкын да тi верминныд омöльсö. 15 Энö радейтöй муюгыдсö да мый сэнi эм. Кодлы муса муюгыдыс, сылы Батьыс абу муса. 16 Öд тайö муюгыдас ыджыдалö вир-яйлöн кöсйöм, синъяслы колöм да ыкшаасьöм. Тайö абу Батьсянь, ставыс тайö муюгыдыслöн. 17 Муюгыдыс став аслас колöм-кöсйöмнас бырас, а Ен кöсйöм серти олысь пондас овны помтöг. 18 Челядь, öнi бöръя кад. Тi кывлiнныд, антикрист пö локтас. Öнi уна антикрист нин петкöдчис. Та серти тöдам, мый бöръя кад пуксис. 19 Найö петiсны миян пöвстысь, но найö эз вöвны миянкöд öтув. Вöлiны кö миянкöд öтув, кольччисны эськö миянкöд. Но налöн петöмыс висьталö, мый найö абу миянкöд. 20 А тiянöс мавтыштöма Вежаыс, да тi тöданныд ставсö. 21 Ме гижа тiянлы ог сы вöсна, мый тi онö тöдöй збыльсö, мöдарö, тi сiйöс тöданныд да. Тi öд тöданныд: збыльсяньыс ылöгыс оз лок. 22 Кодi нö ылöдчысьыс? Абу-ö сiйö, кодi шуö, Исус пö абу Кристос. Татшöмыс антикрист. Сiйö соссьö Батьсьыс да Письыс. 23 Кодi соссьö Письыс, сылöн абу и Батьыс. Кодi сибöдö Писö, сылöн и Батьыс эм. 24 Сiдзкö, мый тi кывлiнныд водзысяньыс, сiйö мед олас тiян пытшкын. Тайö кö лоö тiян пытшкын, сэки Пиыс да Батьыс пытшкын лоанныд. 25 Сiйö кöсйысис сетны миянлы помтöм олöм. 26 Вылынджык ме гижи тiянöс ылöдысьяс йылысь. 27 Но тiян эм Вежасянь мавтыштöм. Та вöсна абу колана, мед кодкö велöдiс тiянöс. Öд мавтыштöмыс велöдö тiянöс быдторйö, висьталö збыльсö да оз пöръясь. Сiдзкö, олöй велöдöм сертиыс. 28 Челядь, лоöй Сы пытшкынöсь, медым Сылöн локтiгöн ми вöлiм повтöмöсь, мед эз вöв яндзим миянлы сувтны Сы водзö. 29 Тi кö тöданныд, мый Сiйö веськыд, тöдöй: веськыда вöчысь Сысянь чужöма.
1 Видзöдöй, кутшöм мусаöсь ми Батьлы: Сiйö сетiс миянлы шусьыны да лоны Енлöн ныв-пиöн. Муюгыдсаыс оз тöд миянöс, Сiйöс оз тöд да. 2 Мусаясöй, öнi ми Енлöн ныв-пи. Кодöн лоам, тайö эз на воссьы. Тöдам сöмын, кор воссяс, лоам Сы кодьöсь, öд сэки аддзам Сiйöс сэтшöмöн, кутшöм Сiйö эм. 3 Сы вылö татшöм лача кутысь сöстöммöдö асьсö, мед лоны Сы кодь сöстöмöн. 4 Мыжсö вöчысь мунö Индöдлы паныд, öд мыжыс – тайö Индöдлы паныд мунöм. 5 Тi тöданныд, мый Кристос локтiс босьтны миянлысь мыжъяс. Сы пытшкын мыжыс абу. 6 Сы пытшкын олысь мыжсö оз вöч, а мыжсö вöчысь эз аддзыв да оз тöд Сiйöс. 7 Челядь, энö сетöй ылöдны тiянöс некодлы. Веськыда вöчысь – сiйö Кристос кодь веськыд. 8 А мыжсö вöчысь – омöльсянь, öд омöльыс водзысянь мыжсö вöчö. Та вöсна Ен Пи и локтiс, мед жугöдны омöльыслысь уджъяссö. 9 Енсянь чужысь мыжсö оз вöч, сы пытшкö бур кöйдыс вужъясьöма. Татшöмыс мыжсö вöчны оз вермы, öд сiйö Енсянь чужöма. 10 Кодi оз веськыда вöч, да кодi мустöмтö воксö, сiйö абу Енсянь. Та серти тöдмалам Енлысь ныв-писö да омöльлысь йылöмсö. 11 Миянлы колö радейтны öта-мöдöс. Тайö юöрсö тi кывлiнныд водзысяньыс. 12 Огö лоöй Каин кодьöсь, öд сiйö вöлi омöльсяньыс, да виис ассьыс воксö. Мыйла виис? Каинлöн уджъясыс вöлiны лёкöсь, а вокыслöн – веськыдöсь. 13 Энö шензьöй, вокъясöй, муюгыдсаыс кö мустöмтö тiянöс. 14 Ми тöдам: ми вуджим кулöмсьыс олöмö, öд радейтам вокъяснымöс. Кодi оз радейт воксö – кольö кулöмас. 15 Воксö мустöмтысь – сiйö морт виысь. Тi тöданныд, мый морт виысь пытшкын помтöм олöмыс абу. 16 А муслунсö ми тöдмалiм сы серти, мый Кристос сетiс Ассьыс олöмсö миян вöсна. Сiдзкö, миянлы тшöтш колö сетны олöмнымöс вокъясным вöсна. 17 Мортыс кö вокыслысь гöльлунсö аддзигöн чорзьöдö сьöлöмсö да оз отсав сылы, кöть сылöн аслас ставыс эм, вермас-ö татшöм морт пытшкас лоны Енлöн муслуныс? 18 Челядьöй, кутам радейтны öта-мöднымöс огö кывъясöн да сёрниöн, но збыль сертиыс да уджъясöн. 19 Та серти тöдмалам, мый ми збыльыслöн. Сьöлöм кö мыждö миянöс, ми вермам лöньöдны сьöлöмнымöс Ен водзын. Енмыс öд ыджыдджык миян сьöлöмысь, Сiйö ставсö тöдö. 21 Мусаясöй, сьöлöмным кö оз мыжды миянöс, ми вермам повтöг локны Ен водзö. 22 Сэки мый корам, босьтам Сысянь, öд олам Сылöн тшöктöмъяс серти да вöчам Сылы шогманасö. 23 А Сiйö тшöктiс, медым ми эским Сылöн Пилы, Исус Кристослы, да тшöктöмыс серти радейтiм öта-мöдöс. 24 Кодi кутчысьö Сылöн тшöктöмъясö, сiйö олö Кристос пытшкын, а Кристос – сы пытшкын. А мый Сiйö миян пытшкын, тöдам Ловсяньыс, кодöс Сiйö сетiс миянлы.
1 Мусаясöй, энö эскöй быд ловлы, тöдмалöй, Енсянь-ö сiйö. Öд уна ылöгпророк öнi муюгыдас. 2 Енсянь-ö лолыс, тöдмаланныд тадзи: висьталö кö лолыс, мый Исус Кристос локтiс вир-яйын, сiйö Енсянь. 3 Оз кö висьтав, мый Исус Кристос локтiс вир-яйын, сiйö абу Енсянь, сiйö антикристсянь. Тайö – антикристлöн лолыс, код йылысь тi кывлiнныд, мый сiйö локтас, и öнi сiйö муюгыдас нин. 4 Челядь, тi Енсянь. Тi верминныд ылöгпророкъясöс, öд тiян пытшкын Олысьыс ёна ыджыдджык муюгыдсасьыс. 5 Найö муюгыдсьыс, та вöсна и сёрнитöны муюгыдсаыс моз, и муюгыдыс кывзö найöс. 6 А ми Енсянь. Енсö тöдысь кывзö миянöс, а кодi абу Енсянь, сiйö оз кывзы миянöс. Та серти тöдмалам збыльыслысь ловсö да ылöгыслысь ловсö. 7 Мусаясöй, кутам радейтны öта-мöднымöс, öд муслуныс Енсянь. Кодi радейтö, сiйö Енсянь чужöма да тöдö Енсö. 8 Кодi оз радейт, сiйö оз тöд Енсö, öд Енмыс эм муслун. 9 Енмыс мöдöдiс тайö муюгыдас Ассьыс öтка Писö, медым Сы пыр сетны миянлы олöм. Тадзи Сiйö петкöдлiс миян дiнö Ассьыс муслунсö. 10 Муслуныс абу сыын, мый Енмыс вöлi муса миянлы, но – сыын, мый ми вöлiм мусаöсь Сылы. Сiйö сетiс Ассьыс Писö вись пыдди, мед вештысьны миян мыжъясысь. 11 Мусаясöй, Енмыс кö татшöма радейтiс миянöс, миянлы тшöтш колö радейтны öта-мöдöс. 12 Енсö некод некор эз аддзыв. Öта-мöдöс кö радейтам, сiдзкö, Енмыс миян пытшкын да Сылöн муслуныс тыр-бурöдз воис сьöлöманым. 13 Ен сетiс миянлы Ассьыс Ловсö. Та серти тöдам, мый ми Сы пытшкынöсь, а Сiйö миян пытшкын. 14 Батьыс мöдöдiс Писö мездыны муюгыдсö. Ми ас синмöн аддзылiм тайöс, и öнi висьталам та йылысь. 15 Кодi шуö Исусöс Ен Пиöн, Енмыс сы пытшкын, а сiйö Ен пытшкын. 16 Ми тöдмалiм Енлысь миян дiнö муслунсö да эским Сылöн муслунас. Енмыс эм муслун. Кодi олö муслун пытшкас, сiйö Ен пытшкын, а Енмыс сы пытшкын. 17 Сiдзкö, муслуныс тыр-бурöдз воöма миян пытшкын. Та вöсна вермам повтöг сувтны Мыждан лунö, öд ми тайö муюгыдас Кристос кодьöсь. 18 Муслунас абу полöмыс, öд тыр-бур муслуныс вöтлö полöмсö. Полöмас олö мыждöм, та вöсна полысьлöн муслуныс абу на тыр-бур. 19 Кутамöй радейтны Енмöс, öд медводз Сiйö радейтiс миянöс. 20 Кодi шуö: "Ме Енсö радейта", а воксö ассьыс мустöмтö, сiйö пöръясьö. Оз кö радейт воксö, кодöс аддзö, вермас-ö радейтны Енсö, кодöс оз аддзы? 21 Миян эм Енсянь тшöктöм: «Енмöс радейтысь, радейт тшöтш воктö ассьыд».
1 Эскам кö, мый Исус – сiйö Кристос, ми Енсянь чужöмаöсь. Муса кö миянлы Чужтысьыс, муса и Сысянь чужысьыс. 2 Радейтам кö Енсö да олам Сылöн тшöктöмъяс серти, та серти тöдам, мый ми Ен челядьöс тшöтш радейтам. 3 Тшöктöмъяс серти олöмыс – тайö Енсö радейтöм, а Сылöн тшöктöмъясыс абу сьöкыдöсь. 4 Öд Енсянь чужысь вермö муюгыдсö. Тайö вермöмыс – миян эскöм, кодöн муюгыдсö вермöма. 5 Кодi нö вермö муюгыдсö? Сiйö, кодi эскö, мый Исус – Енлöн Пи. 6 Исус Кристос локтiс ваöн, вирöн да Лолöн, эз сöмын ваöн, но ваöн да вирöн. Та йылысь Лов висьталö, öд Лолыс эм збыльыс. 7 Енэжас эм куим висьталысь: Бать, Кыв да Вежа Лов. Тайö куимыс öти. 8 Му вылас тшöтш куим висьталысь: Лов, ва да вир. Тайö куимыс висьталö öтитор йылысь. 9 Ми сибöдам мортлысь висьталöмсö, но Енлöн висьталöмыс ёна ыджыдджык, öд сiйöс Ачыс Енмыс висьталö. Сiйö висьталö Аслас Пи йылысь. 10 Кодi эскö Ен Пилы, сылöн сьöлöмас эм тайö висьталöмыс. Кодi оз эскы Енмыслы, пуктö Сiйöс пöръясьысь туйö, öд тайö мортыс оз эскы Пи йывсьыс Енлöн висьталöмыслы. 11 А висьталöмыс татшöм: Ен сетöма миянлы помтöм олöм, и тайö олöмыс Пиыс пытшкын. 12 Кодлöн эм Пиыс, сылöн эм олöмыс. Кодлöн абу Ен Пиыс, сылöн олöмыс абу. 13 Тайöс гижи тiянлы, Ен Пи нимö эскысьяслы, мед тi тöдiнныд, мый Ен Пилы эскöмныд вöсна тiян эм помтöм олöм. 14 Ми вермам повтöг локны Ен водзö, ми öд тöдам: корöмным кö лöсялö Сылöн кöсйöмлы, Сiйö кылö миянöс. 15 А тöдам кö, мый Сiйö кылö миянлысь быд корöм, тöдам тшöтш, мый Сiйö сетас корöмасö. 16 Кор аддзан, мый вокыд мыжö усьöма, но мыжыс оз вайöд кулöмö, кевмысь сы вöсна. Ен сетас сылы олöм, дерт, мыжыс кö оз кулöмö вайöд. Эм кулöмö вайöдысь мыж, но ме ог кор кевмысьны татшöм мыжсö вöчысь вöсна. 17 Быд лёк вöчöм эм мыж, но оз став мыжыс вайöд кулöмö. 18 Ми тöдам: Енсянь чужысьяс мыжсö оз вöчны. Енсянь чужысь видзö асьсö, да омöльыс оз вермы инмöдчыны сы дiнö. 19 Тöдам, мый ми Енсянь, а став муюгыдыс омöльыслöн кипод улын. 20 Нöшта тöдам, мый Ен Пи локтiс да сетiс миянлы мывкыдлун, мед ми тöдiм збыль Енсö. И ми олам тайö збыльыс пытшкын, Исус Кристос Пиыс пытшкын. Сiйö эм збыль Енмыс да помтöм олöмыс. 21 Челядь, видзöй асьнытö идолъясысь. Аминь.
1 Ме, пöрысь морт, гижа Енмöн бöрйöм аньлы да сылöн челядьлы. Тi меным збыльысь мусаöсь. Мусаöсь абу сöмын меным, но быдöнлы, кодi тöдö збыльсö. 2 Тi меным мусаöсь збыльыс вöсна, öд сiйö олö миян пытшкын да лоö миянкöд нэмъяс чöж. 3 Бурсетöм, буралöм да лöнь олöм тiянлы, збыляс да муслунас кутчысьысьяслы, Ен Батьсянь да Господь Исус Кристоссянь – Батьыслöн Писянь. 4 Меным лои зэв нимкодь, кор аддзи, мый тэнад челядь пиысь кодсюрö ветлöны збыляс, Батьлöн тшöктöмыс серти. 5 Öнi менам татшöм корöм, дона аньöй, медым ми радейтiм öта-мöднымöс. Тайö тшöктöмыс абу выль, сiйö миян водзысяньыс нин вöлi. 6 Радейтны, сiдзкö, овны Ен тшöктöмъяс серти. Дзик тайö тшöктöмсö тi кывлiнныд водзысяньыс, сы серти и колö овны. 7 Öнi муюгыдас уна ылöдысьыс. Найö оз эскыны, мый Исус Кристос локтiс вир-яйын. Татшöм мортыс – ылöдысь да антикрист. 8 Видзöдöй ас бöрсяныд, медым ми эгö воштöй сiйö, мый вöсна миян уджалöма, мед эськö ми вермим босьтны удждонсö дзоньнас. 9 Кодi торкö Кристослысь велöдöмсö да оз кутчысь сэтчö, сыкöд Енмыс абу. Кодi кутчысьö Кристослöн велöдöмас, сыкöд Батьыс и Пиыс. 10 Тiян дiнö локтысь кö вайö мöд велöдöм, энö сибöдöй сiйöс керка помад, весиг энö чолöмасьöй сыкöд. 11 Сыкöд чолöмасьысь öтувтчö сылöн лёк уджъясö. 12 Унатор на эм гижнысö тiянлы, но öнi ог кут ставсö гижны кабала вылö чернилаöн. Чайта, артмас волыны тiян дiнö да воча пуксьöмöн сёрнитны, медым тi верминныд тырвыйö нимкодясьны. 13 Чолöм тэныд ыстöны бöрйöм чойыдлöн челядьыс. Аминь.
1 Ме, пöрысь морт, гижа муса Гайлы. Сiйö меным збыльысь муса. 2 Муса вокöй, ме тöда: ловнад тэ ён. Кевмыся, мед вир-яйнад тшöтш вöлiн ён, да ставыс тэнад вöлi бур. 3 Меным лои зэв нимкодь, кор вокъяс локтiсны да висьталiсны, тэ пö кутчысян збыляс да олан сы серти. 4 Меным вывтi нимкодь кывны, мый менам челядь ветлöны збыляс. 5 Муса вокöй, вокъяс да локтысьяс вöсна тэнад тöждысьöмыд петкöдлö, мый тэ эскана морт. 6 Вичко водзын вокъяс висьталiсны тэнад муслун йылысь. Бур лоö, тэ кö Енмыслы колана ногöн дасьтан да мöдöдан найöс. 7 Найö Кристос ним вöсна петiсны туяс, нинöм эз босьтны ентöдтöмъяслысь. 8 Миянлы колö сибöдны татшöмъяссö, öд тадзи вöчигöн ми накöд öтвыв кесъялам збыльыслы. 9 Ме гижлi вичкоас, но сэнi асьсö ыджыдö пуктысь Диотреф оз кывзы миянöс. 10 Та вöсна, кор ме локта, казьтышта сылы уджъясыс йылысь: сiйö öд паськöдö миян йылысь лёк сёрни. Но тайö этша на, сiйö вокъясöс оз сибöд, тшöтш мукöдыслы оз лэдз тайöс вöчны. А сибöдны кöсйысьясöс весиг вöтлö вичкосьыс. 11 Муса вокöй, видзöд бурсö вöчысь вылö, а эн лёксö вöчысь вылö. Бурсö вöчысь – сiйö Енсянь, лёксö вöчысь эз аддзыв Енсö. 12 Димитрий йылысь ставныс бура сёрнитöны. Сы йылысь ачыс збыльыс висьталö, ми тшöтш тадзи висьталам. Тэ öд тöдан: миян висьталöмыс збыль. 13 Унатор на эм гижнысö, но чернилаа перööн öнi ог кут тайöс вöчнысö. 14 Чайта, регыд аддзысьлам тэкöд да воча пуксьöмöн сёрнитам. 15 Лöнь олöм тэныд. Чолöм ыстöны ёртъясыд. Висьтав чолöм миян ёртъяслы быдöнлы торйöн. Аминь.
1 Гижö Иуда, Исус Кристослöн кесйöг, Яковлöн вок. Чолöмала тiянöс, Енмöн корöмаясöс. Ен Бать вежöдiс тiянöс, да Исус Кристос видзö тiянöс. 2 Буралöм, лöньлун да муслун мед уна пöвстöн содас тiянлы. 3 Мусаяс, ме ёна кöсйи гижны тiянлы миян öтувъя мездмöм йылысь, но лыдди коланаöн водзджык туйдöдны тiянöс, медым тi вöлiнныд дасьöсь дорйыны ассьыныд эскöмнытö. Тайö эскöмсö Енмыс сетiс вежа войтырлы öтчыд да пыр кежлö. 4 Тiян пöвстö наяна сюйсисны Ентöг олысьяс. Татшöм йöзыслы важöн нин дасьтöма мыждöмсö. Миян Енлысь буралöмсö найö бергöдöны лэдзчысьöм оласногö. Найö соссьöны öти Ен Ыджыдысь да миян Господь Исус Кристосысь. 5 Тi, дерт, та йылысь тöданныд нин, но кöсъя казьтыштны тiянлы: Енмыс мездiс Ассьыс войтырсö Египет муысь, но бöрыннас на пöвстысь бырöдiс эскытöмъясöс. 6 Анделъясöс, кодъяс эз донъявны Енсянь сетöм ыджыдалан вынсö да эновтiсны енэжвывса оланiнсö, Енмыс помтöг видзö сап пемыдас чепъясын ыджыд Мыждан лун кежлö. 7 Тадзи лои тшöтш Содомын, Гомораын да на гöгöр каръясын олысьяскöд. Тайö анделъясыс моз найö кырсалiсны да сетчисны зывöк оласногö, та вöсна тайö олысьяссö вöлi сотöма куслытöм биын. Тайö висьталö миянлы Енлöн мыждöм йылысь. 8 Дзик тадзи лоö тайö Ентöг олысьясыскöд. Найö ылöдлöны тiянöс асланыс вöтъясöн, пежалöны ассьыныс вир-яйнысö, нинöм туйö пуктöны юралысьясöс да лёкöдöны енэжвывса юралысь-веськöдлысьясöс. 9 Кор Микаил архангел вензис омöлькöд Мöисей шой йылысь, сiйö эз лысьт лёкöдны-мыждыны омöльöс. Сöмын шуис: «Господь мед öлöдас тэнö». 10 Тайö йöзыс лёкöдöны сiйö, мый асьныс оз гöгöрвоны, а мый вежöртöм пемöсъяс моз кылöны асланыс вир-яйын, сiйö кыскö найöс бырöдöмö. 11 Курыд шог налы! Найö мунöны Каин туйöд, горшасьöны сьöм вылö, Валаам моз ылалöмаöсь. Корей моз найö паныд мунöны, та вöсна Корейöс моз найöс лоö бырöдöма. 12 Чукöртчиганыд татшöм йöзыс овлöны тiянлы крукöдöн. Кор тi мусапырысь чукöртчанныд öтвыв сёйны, найö яндысьтöг тшöгöдöны асьнысö да тöждысьöны сöмын ас вöснаныс. Найö – тöвнырöн новлöдлан ватöм кымöръяс, вотöс вайтöм арся пуяс, вужнас нетшыштöмаяс, кык пöв кулöмаяс. 13 Найö – саридзвывса гыяс, кодъяс лёкысь быгзьöны асланыс янöдан уджъясöн. Найö – ылалöм кодзувъяс, кодъяслы век кежлö дасьтöма сап пемыдсö. 14 Тайö йöзыс йылысь водзвыв висьтавлiс Енок, Адамсянь сизимöд чужанвужйысь петысь: «Со, локтö Господь Аслас лыдтöм-тшöттöм вежа анделъяскöд, 15 медым мыждыны став йöзсö. Сiйö мыждö став Ентöг олысьяссö налöн лёк уджьясысь да янöдö мыж вöчысьясöс, кодъяс шуасисны Ен вылö лёкöдан кывъясöн». 16 Тайö йöзыс век шуасьöны да элясьöны. Найö кывзысьöны асланыс лёк кöсйöмлысь, паныд мунöны Ен Индöдлы да олöны лёк нога. Найö тшапа сёрнитöны да ошкöны мукöдсö, медым аслыныс мыйкö курыштны. 17 Но тi, мусаяс, энö вунöдöй миян Господь Исус Кристослöн апостолъяслысь водзвыв висьталöмсö. 18 Найö шулiсны тiянлы, мый бöръя кадас лоöны сэтшöм йöз, кодъяс быдтор вылын сералöны да олöны асланыс лёк кöсйöмлысь кывзысьöмöн. 19 Татшöм йöзыс вайöны тiян костö юксьöм. Найö олöны вир-яй сертиныс, Енлöн Лолыс на пытшкын абу. 20 Но тi, мусаяс, ёнмöдöй асьнытö вежа эскöмнаныд, кевмысьöй Вежа Лов нуöдöм улын. 21 Видзöй асьнытö Ен муслунас. Виччысьöй сiйö кадсö, кор миян Господь Исус Кристос Аслас буралöмнас вайöдас миянöс помтöм олöмö. 22 Öтияс дiнö лоöй бур сьöлöмаöсь, сюся видзöдöмöн, 23 а мукöдсö мездöй повзьöдлöмöн, перйöй найöс би пытшсьыс. Янöдöй найöс повзьöдлöмöн, зывöктöй весиг паськöмнысö, кодi пежасьöма налöн вир-яйысь. 24 Енмыс вына видзны тiянöс усьöмысь да вайöдны тiянöс Аслас дзирдлунö нимкодясьысь да сöстöм войтырöн. 25 Ыджыд мывкыда öти Енмыс мездiс миянöс Исус Кристос Господьным пыр. Сылы ошкöм-нимöдöмыс, Сылöн выныс-ыджыдалöмыс му пуксьытöдз, öнi да нэмъяс чöж. Аминь.
1 Тайö гижöдыс – Исус Кристослы Енсянь восьтöм. Енмыс восьтiс тайöс, медым петкöдлыны Аслас кесйöгъяслы, мый колö лоны регыдъя кадö. Кристос мöдöдiс Ассьыс анделсö, медым висьтавны тайöс Аслас кесйöглы – Иоанлы. 2 Öнi Иоан аслас висьталöмöн эскöдö Енлысь Кывсö, Исус Кристослысь висьталöмсö да ставсö, мый аддзылiс. 3 Шуда сiйö, кодi лыддьö да кывзö тайö водзвыв висьталöмыслысь кывъяссö да олö на серти. Öд кадыс матын нин. 4 Иоан чолöмалö асияса сизим вичкоöс: буралöм да лöнь олöм тiянлы Сысянь, Кодi эм, вöлi да локтас, тшöтш Сылöн пуклöс водзын олысь сизим ловсянь 5 да Исус Кристоссянь. Сiйö – эскана Висьталысь, Сiйö медводдзаöн ловзис кулöмысь да юралö мувывса öксыяс вылын. Сылы ми ёна мусаöсь. Аслас Вирöн Сiйö мыськалiс миянöс мыжъясысь, 6 пуктiс миянöс öксыясö да вежа кесъялысьясö Енмыслы, Аслас Батьлы. Сылы ошкöмыс, Сылöн ыджыдалöмыс нэмъяс чöж! Аминь. 7 – Со, Сiйö локтö кымöръяс вылын, Сiйöс аддзас быд син. Сiйöс аддзасны тшöтш найö, кодъяс бытшкисны Сiйöс. Сэки Сы водзын ырзöмöн бöрддзас мувывса быд кыла войтыр. Тайö тадзи! Аминь. 8 «Ме – Альфа и Омега, Панасыс и Помыс», – шуö Господь. Сiйö эм, вöлi и локтас, Сiйö – Ставсöкутысьыс. 9 Ме, Иоан, тiян вокныд, тiянкöд öтвыв нуа сьöкыдсö. Тiянлы моз меным тшöтш вичмö Енлöн Юралöмыс да Исус Кристоссянь зумыдлуныс. Ен Кыв вöсна да Исус Кристос йылысь висьталöм вöсна ме вöлi Патмос дi вылын. 10 Господьлöн лунö ме вöлi тырöма Лолöн. Сэки мыш сайсянь ме кылi гора шы, тайö вöлi труба шы кодь. Сiйö шуис: «Ме – Альфа и Омега, Медводдзаыс и Медбöръяыс. 11 Сiйö, мый аддзан, гиж да мöдöд асияса вичкоясö: Ефесö, Смирнаö, Пергамö, Фиатираö, Сардисö, Филадельфияö да Лаодикияö». 12 Ме бергöдчи видзöдлыны мекöд сёрнитысь вылö да аддзи сизим зарни бикок. 13 Сизим бикок пöвстас быттьö Морт Пи сулалiс. Сiйö вöлi кузь паськöма да морöс весьтöдыс вöлi вöнясьöма зарни вöньöн. 14 Сылöн юрыс да юрсиыс вöлiны дзик еджыдöсь, быттьö еджыд вурун, быттьö лым, а синъясыс ыпъялiсны би моз. 15 Сылöн кокъясыс дзирдалiсны пачын донöдöм ыргöн моз, а гöлöс шыыс Сылöн вöлi бузгысь ва шы кодь. 16 Веськыд киас Сiйö кутiс сизим кодзув, а Сылöн вомысь петiс кыкнанладорсяньыс лэчтöм ёсь шыпурт. Сылöн чужöмыс дзирдалiс яръюгыд шондi моз. 17 Сiйöс аддзöм бöрын ме уси Сы кок улö да вöлi кулöм морт кодь. Но Сiйö пуктiс ме вылö веськыд кисö да шуис: «Эн пов, Ме – Медводдзаыс и Медбöръяыс. 18 Ме ловъя. Ме вöлi кулöма, но öнi ловъя нэмъяс чöж. Аминь. Менам киын адысь да кулöмысь восьтаныс. 19 Сiдзкö, гиж, мый аддзылiн, мый эм да мый лоö бöрыннас. 20 Тэ аддзылiн сизим кодзув, кодъяс вöлiны Менам веськыд киын, да сизим зарни бикок. Налöн гусяторйыс татшöм: сизим кодзулыс – тайö сизим вичколöн анделъяс, а сизим бикокыс, кодъясöс тэ аддзылiн, – тайö сизим вичко».
1 «Ефес вичкоса анделлы тадзи гиж: – Со мый висьталö Сiйö, кодi кутö веськыд киас сизим кодзув да ветлöдлö сизим зарни бикок пöвстöд. 2 Ме тöда тэнсьыд уджъястö, мырсьöмтö да зумыдлунтö. Тöда, тэ он терпит лёк йöзöс. Тэ тöдмалiн найöс, кодъяс нимтöны асьнысö апостолъясöн, но збыльвылас найö абу апостолъяс. Тэ аддзин, мый найö – пöръясьысьяс. 3 Тэ уна нуин сьöкыдсö, но сулалан зумыда. Менам ним вöсна тэ ёна уджалiн, но эн лигышмун. 4 Но тэныд паныд кöсъя шуны со мый: тэ эновтiн ассьыд медводдза муслунтö. 5 Сiдзкö, мöвпышт, кысянь тэ усин, бергöдчы да вöч ассьыд медводдза уджъястö. Он кö бергöдчы, регыд локта тэ дiнö да вешта тэнсьыд бикоктö места вывсьыс. 6 Но öтитор тэ вöчан бура: тэ мустöмтан николаитъяслысь уджъяссö. Налысь уджъяссö Ме тшöтш мустöмта. 7 Кодлöн эм пель, мед кылö, мый Лов висьталö вичкояслы. Вермысьлы Ме сета сёйны вотöс Олöмыслöн пуысь, кодi сулалö Енлöн рай шöрын». 8 «Смирна вичкоса анделлы тадзи гиж: – Со мый висьталö тiянлы Медводдзаыс и Медбöръяыс, кодi вöлi кулöма, но öнi ловъя. 9 Ме тöда тэнсьыд уджъястö, сьöкыдалöмтö да гöльлунтö, но тэ – озыр! Тöда, кыдзи тэнö лёкöдöны асьнысö юдейöн шуысьяс, но найö абу юдейяс, найö – сöтана йöз чукöр. 10 Некутшöм локтана сьöкыдысь эн пов. Öткымынöс тiян пиысь омöльыс йöршитас дзескыдiнö, медым тöдмавны тiянöс. Сэки дас лун чöж тi кутанныд сьöкыдавны. Но тэ помöдзыс ло эскана, и Ме сета тэныд Олöмыслысь юркытш! 11 Кодлöн эм пель, мед кылö, мый Лов висьталö вичкояслы. Вермысьлы мöд кулöмыс нинöм оз вöч». 12 «Пергам вичкоса анделлы тадзи гиж: – Со мый висьталö тiянлы Сiйö, кодлöн эм кыкнанладорсяньыс лэчтöм ёсь шыпурт. 13 Ме тöда тэнсьыд уджъястö. Тэ олан сэнi, кöнi сöтаналöн юралан пуклöсыс, но тэ зумыда кутчысян Менам нимö. Тэ эн соссьы Меным эскöмысь весиг сэки, кор тiянын, сöтана оланiнын, виисны Антипаöс – Менсьым эскана висьталысьöс. 14 Но Менам эм мыйсюрö тэныд паныд: тiян пöвстын эмöсь найö, кодъяс кутчысьöны Валаамлöн велöдöмö. Сiйö велöдiс Валакöс кежöдны Израиль войтырöс ылöгас, медым найö сёйисны идоллы вайöм сёян да кырсалiсны. 15 Тiян пöвстын эмöсь тшöтш найö, кодъяс кутчысьöны николаитъяслöн велöдöмö. Татшöм велöдöмсö Ме мустöмта. 16 Бергöдчы таысь! Он кö бергöдчы, регыд локта тэ дiнö да тышкася накöд Менам вомысь петысь шыпуртöн. 17 Кодлöн эм пель, мед кылö, мый Лов висьталö вичкояслы. Вермысьлы Ме сета сёйны дзебöм манна, сета сылы еджыд из, код вылын лоö гижöма вермысьлысь выль нимсö. Тайö нимсö кутас тöдны сöмын тайö изсö босьтысьыс». 18 «Фиатира вичкоса анделлы тадзи гиж: – Со мый висьталö Ен Пи, кодлöн синъясыс ыпъялöны би моз, а кокъясыс дзирдалöны донöдöм ыргöн моз. 19 Ме тöда тэнсьыд уджъястö, муслунтö, кесъялöмтö, эскöмтö да зумыдлунтö. Тöда, мый воддзаыс дорысь тэ öнi ёнджыка на уджалан. 20 Но Менам эм мыйсюрö тэныд паныд: тэ лэдзан Езавель аньлы, асьсö пророкöн шуысьлы, велöдны да кежöдны ылöгас Менсьым кесйöгъясöс. Тайö аньыс велöдö найöс кырсавны да сёйны идоллы вайöм сёян. 21 Ме сетi сылы кад бергöдчыны кырсалöмсьыс, но сiйö эз бергöдчы. 22 Со, ме топöда сiйöс сьöкыд висьöмöн, а сыкöд кырсалысьяслы ме мöдöда уна сьöкыдлун, оз кö найö бергöдчыны асланыс уджъясысь. 23 Езавельлöн челядьлы Ме мöдöда кулöм. Сэки быд вичко кутас тöдны, мый Ме – сьöлöм пытшкöс да мöвпъяс Тöдысь, Ме быдöнлы мынтыся уджъясныд серти. 24 Тiянлы да фиатираса мукöд олысьяслы, кодъяс эз сетчыны Езавельлöн велöдöмö да эз пырöдчыны сiдз шусяна "сöтаналöн гуся велöдöмö", висьтала со мый: ме ог сьöктöд тiянöс мукöд тшöктöмъясöн. 25 Шуа сöмын: видзöй Менам локтöдз сiйö, мый тiян эм нин. 26 Вермысьлы, кодi помöдз вöчас Менам тшöктöм серти, Ме сета вын ыджыдавны быд войтыр вылын. 27 Сiйö кутас видзны найöс кöрт беддьöн да сёй дозъясöс моз сiйö жуглас найöс торпыригöдз сiйö жö выннас, кутшöм вын Меным сетiс Батьöй. 28 Вермысьлы Ме сета асъя кодзув. 29 Кодлöн эм пель, мед кылö, мый Лов висьталö вичкояслы».
1 «Сардис вичкоса анделлы тадзи гиж: – Со мый висьталö Сiйö, кодлöн эм Енлöн сизим лолыс да сизим кодзув. Ме тöда тэнсьыд уджъястö. Тэнö лыддьöны ловъяöн, но тэ кулöмыд. 2 Садьмöдчы да ёнмöд сiйö, мый тэнад эм, но мый кулан выйын нин. Ме öд аддза, мый тэнад уджъясыд Менам Ен водзын абу тыр-бурöсь. 3 Эн вунöд сiйö, мый кывлiн да сибöдiн. Видз сiйöс сьöлöмад да бергöдчы мыжъяссьыд! Он кö садьмöдчы, локта тэ дiнö гусясьысь моз тöдлытöг. Тэ весиг он тöдлы, кутшöм кадö локта тэ дiнö. 4 Дерт, Сардис карын тэнад эм кымынкö морт, кодъяс видзисны ассьыныс паськöмнысö пежасьöмысь. Найö кутасны ветлыны Мекöд еджыд паськöмаöсь, öд найö шогмöны та вылö. 5 Вермысь пасьтасяс еджыд паськöмö, и сылысь нимсö ог вушты Олöмыслöн небöгысь. Аслам Бать водзын да Енлöн анделъяс водзын Ме висьтала, мый сiйö – Менам. 6 Кодлöн эм пель, мед кылö, мый Лов висьталö вичкояслы». 7 «Филадельфия вичкоса анделлы тадзи гиж: – Со мый висьталö Вежаыс да Збыльыс, код ордын Давидлöн восьтаныс. Сiйö восьтö, и некод оз вермы тупкыны. Сiйö тупкö, и некод оз вермы восьтны. Сiйö висьталö: 8 "Ме тöда тэнсьыд уджъястö. Со, Ме восьтi тэ водзын öдзöс, и некод оз вермы тупкыны сiйöс. Дерт, тэ жеб, но видзин Менсьым кывъясöс да эн соссьы Менам нимысь. 9 Со, Ме сета тэныд сöтана йöз чукöрысь найöс, кодъяс шуöны асьнысö юдейясöн, но найö абу юдейяс, а пöръясьысьяс. Ме вöча тадзи: найö локтасны да уськöдчасны тэнад кок улö. Сэки тöдмаласны, мый тэ – Меным муса. 10 Ме тшöктi тэныд зумыда сулавны, и тэ видзин Менсьым тшöктöмöс. Та вöсна видза тэнö локтана сьöкыд кадас. Тайö кадыс лоö став му пасьталаыс, медым тöдмавны мувывса олысьясöс. 11 Регыд Ме локта. Бура видз сiйö, мый тэнад эм, медым некод эз мырддьы тэнсьыд юркытштö. 12 Вермысьöс Ме сувтöда зумыд сюръя пыдди Менам Енлöн крамын, сiйö пыр лоас сэнi. Ме гижа сы вылö Менам Енлысь нимсö, Ассьым выль нимöс да Менам Ен карлысь нимсö. Тайö карыс – выль Ерусалим, кодi лэччас енэжсяньыс, Менам Енсянь". 13 Кодлöн эм пель, мед кылö, мый Лов висьталö вичкояслы». 14 «Лаодикия вичкоса анделлы тадзи гиж: – Со мый висьталö Аминь, эскана да збыль Висьталысь, Енлöн став вöчöмторлы Подулыс. 15 Ме тöда тэнсьыд уджъястö. Тэ абу пöсь ни абу кöдзыд. Вöлiн кö эськö пöсьöн либö кöдзыдöн! 16 Но тэ абу пöсь ни абу кöдзыд, тэ муртса дэбыд. Та вöсна быликта тэнö Аслам вомысь. 17 Тэ шуан: "Ме озыр. Ме ёна нин озырми, менам ставыс эм". Но тэ öмöй он гöгöрво, мый тэ – коньöрсьыс-коньöр, шудтöм, гöль, синтöм да пасьтöм. 18 Ме туйдöда тэнö. Ньöб Менсьым зарни, биын весалöмаöс, да озырмы. Ньöб Менсьым еджыд паськöм, медым вермин вевттьысьны, медым эз тыдав тэнö янöдан пасьтöм вир-яйыд. Ньöб Менсьым мавтантор да мавт сiйöн синтö, медым аддзин. 19 Кодi муса Меным, сiйöс ме янöда-чирышта. Сiдзкö, сьöлöмсяньыд зiль бергöдчыны мыжъяссьыд! 20 Со, Ме сулала öдзöс дорад да игöдча. Кодi кылас Менсьым гöлöс шыöс да восьтас Меным, пыра сы ордö да кутам öтвыв сёйны. 21 Ме лои Вермысьöн да пукси Аслам Батькöд орччöн Сылöн пуклöсö. Сiдзкö, вермысьöс ме тшöтш пуксьöда Аскöд орччöн Менам пуклöсö. 22 Кодлöн эм пель, мед кылö, мый Лов висьталö вичкояслы».
1 Сэсся ме видзöдлi енэжас да аддзи сэтысь восьса öдзöс. Сэсянь ме кылi гöлöс шы, сiйö вöлi труба шы кодь. Тайö гöлöс шысö ме водзынджык кывлi нин. Сiйö шуис меным: «Кыпöдчы татчö! Ме петкöдла тэныд, мый лоö та бöрти». 2 Дзик пыр ме тыри Лолöн да аддзи енэжсьыс пуклöс да сы вылын Пукалысьöс. 3 Сылöн чужöмыс дзирдалiс дона изъяс моз, яшма да сердолик моз. А пуклöс весьтас югъялiс изумруд рöма öшкамöшка. 4 Пуклöс гöгöрыс вöлi нöшта на кызь нёль пуклöс. Сэнi пукалiсны кызь нёль пöрысь. Найö вöлiны еджыд паськöмаöсь, а юр выланыс вöлiны зарни юркытшъяс. 5 Пуклöс дiнас чардалiс-гымалiс, да кылiсны гора шыяс. Пуклöс водзас öзйис сизим би, тайö Енлöн сизим лолыс. 6 Пуклöс водзас вöлi стеклöысь саридз, сiйö югъялiс крусталь моз. Пуклöс водзас да сы гöгöрыс вöлi нёль енэжвыв олысь. Водзладорсяньыс да бöрладорсяньыс найö дзоньнас вöлi тырöмаöсь синъясöн. 7 Öтиыс на пиысь вöлi лев кодь, мöдыс – öшпи кодь, коймöдыс вöлi быттьö морт чужöма, а нёльöдыс вöлi лэбысь кутш кодь. 8 Быдöн на пиысь вöлi квайт бордъя, а налöн борд ортсыыс да пытшкöсыс вöлi тырöмаöсь синъясöн. Лун и вой найö дугдывтöг шуалöны: – Вежа, вежа, вежа Господь Ен, Ставсöкутысь, Кодi вöлi, эм и локтас! 9 Кор енэжвыв олысьяс ошкöны-нимöдöны да аттьöалöны пуклöс вылын Пукалысьöс, Помтöг Олысьöс, 10 сэки кызь нёль пöрысьыс уськöдчöны пуклöс вылын Пукалысь водзö да копыртчылöны Помтöг Олысьлы. Ассьыныс юркытшсö пуклöс водзö пуктöмöн найö шуалöны: 11 – Господьöй! Тэ шогман сибöдны ошкöм-нимöдöмсö да вынсö, öд Тэ вöчин ставсö. Тэнад кöсйöм серти вöчöма ставсö, да ставыс олö.
1 Юралан пуклöс вылын Пукалысьлöн веськыд киысь ме аддзи гартöм гижöд. Сэтчö вöлi гижöма öтарсяньыс и мöдарсяньыс, да пуктöма сы вылö сизим печать. 2 Нöшта ме аддзи вына анделöс, сiйö гораа юалiс: «Кодi шогмас разьны тайö гартöм гижöдсö да жугöдны печатьяссö?» 3 Но енэжас, му вылас да му пыдöсас некод эз вермы разьны тайö гижöдсö либö видзöдлыны сэтчö. 4 Ме ёна бöрдi, öд некод эз сюр шогманаыс разьны тайö гижöдсö либö видзöдлыны сэтчö. 5 Сэки пöрысьяс пиысь öти шуис меным: «Эн бöрд! Со, Лев, Иуда чужанкотырысь, Давид чужанвужйысь! Сiйö – Вермысь, Сiйö разяс тайö гижöдсö да жугöдас сизимнан печатьсö». 6 Сэсся ме видзöдлi да аддзи Баляöс. Сiйö сулалiс юралан пуклöс водзын, нёль енэжвыв олысь да пöрысьяс шöрын. Балясö вöлi быттьö начкöма. Сылöн вöлi сизим сюр да сизим син. Сизим синмыс – тайö Енлöн сизим лолыс, кодъясöс мöдöдöма став му пасьталаыс. 7 Баляыс матыстчис пуклöс вылын Пукалысь дiнö да босьтiс Сылöн веськыд киысь гартöм гижöдсö. 8 Гижöдсö босьтöм бöрын нёль енэжвыв олысьыс да кызь нёль пöрысьыс уськöдчисны Баля водзö. Быдöн на пиысь киас кутiс арфа да ладан тыра зарни доз. Ладан тшыныс – тайö вежа войтырлöн кевмысьöмъясыс. 9 Найö сьылiсны выль сьыланкыв: – Тэ шогман босьтны гартöм гижöдсö да жугöдны печатьсö, öд Тэнö вöлi начкöма. Вирыд вылö Тэ ньöбин миянöс Енмыслы быд чужанвужйысь да чужанкотырысь, быд кыла йöз пытшкысь да войтырысь. 10 Тэ пуктiн миянöс öксыясö да вежа кесъялысьясö миян Енлы. Ми кутам ыджыдавны му вылас. 11 Ме видзöдлi да кылi уна анделлысь гöлöс шысö. Найö кытшалiсны Енлысь пуклöссö, нёль енэжвыв олысьöс да пöрысьясöс. Анделъяслöн лыдыс вöлi лыдтöм-тшöттöм – сё миллионъясöн. 12 Найö гораа шуалiсны: – Начкöм Баляыс шогмана сибöдны вынсö, озырлунсö, мывкыдлунсö, ёнлунсö, ошкöм-нимöдöмсö да дзирдлунсö! 13 Ме кылi, мый став олысьыс енэжас, му вылас, му пыдöсас да саридзас шуалiсны: – Юралан пуклöс вылын Пукалысьлы да Балялы ошкöм-нимöдöмыс, дзирдлуныс да ыджыдалöмыс нэмъяс чöж! 14 Сэки енэжвыв нёль олысьыс шуисны: «Аминь!» А кызь нёль пöрысьыс уськöдчисны да копыртчылiсны Помтöг Олысьлы.
1 Ме аддзи: Баля жугöдiс сизим печать пиысь медводдзасö. Сэсся ме кылi гым кодь гора шы: «Лок да видзöд!» Тайöс шуис нёль енэжвыв олысь пöвстысь öтиыс. 2 Ме видзöдлi да аддзи еджыд вöлöс, а сы вылын верзьöма пукалiс. Сылöн киас вöлi ньöввуж, сылы вöлi сетöма юркытш. Сiйö мунiс вермысь моз, да бара на вöлi дась вермыны. 3 Кор Баля жугöдiс мöд печатьсö, ме кылi мöд енэжвыв олысьлысь шуöмсö: «Лок да видзöд!» 4 Сэки петiс мöд вöв, сiйö вöлi би гöрд рöма. Сы вылын пукалысьлы вöлi сетöма вын – босьтны му вылысь лöньлунсö, медым йöзыс виалiсны öта-мöднысö. Сылы вöлi сетöма ыджыд шыпурт. 5 Кор Баля жугöдiс коймöд печатьсö, ме кылi коймöд енэжвыв олысьлысь шуöмсö: «Лок да видзöд!» Ме видзöдлi да аддзи сьöд вöлöс. Сы вылын пукалысьлöн киас вöлi вески. 6 Сэсся нёль енэжвыв олысь шöрысь ме кылi кодлыськö гöлöс шысö. Сiйö шуис: «Öти хиникс шобдiысь – öти динар. Куим хиникс идйысь – тшöтш сы мында. Но выйсö да винасö эн тшыкöд!» 7 Кор Баля жугöдiс нёльöд печатьсö, ме кылi нёльöд олысьлысь шуöмсö: «Лок да видзöд!» 8 Ме видзöдлi да аддзи быгалöм рöма вöлöс да сы вылын пукалысьöс, кодлöн нимыс – Кулöм. Сы бöрся вöтчис ачыс Адыс. Налы вöлi сетöма ыджыдалан вын мулöн нёльöд юкöныс вылын: виавны йöзсö шыпуртöн да тшыгйöдöмöн, кулан висьöмъясöн да зверъяс отсöгöн. 9 Кор Баля жугöдiс витöд печатьсö, висьпуктанiн улысь ме аддзи ловъяссö налысь, кодъясöс вöлi виöма Ен Кыв вöсна да Ен йылысь висьталöм вöсна. 10 Найö гораа горöдiсны: «Вежа да збыль Ыджыдöй! Кор нин Тэ мыждан мувывса олысьясöс да перъян налысь водзöссö миян вир вöсна?» 11 Сэки быдöнлы налы сетiсны еджыд паськöм да тшöктiсны на виччысьыштны, кытчöдз оз тыр на моз виöмаяслöн лыдыс – налöн вокъяслöн да öтвыв уджалысьяслöн лыдыс. 12 Кор Баля жугöдiс квайтöд печатьсö, ме аддзи: муыс кутiс ёна вöрны, шондiыс пемдiс да лои сьöд дöра кодь, а тöлысьыс лои вир гöрд рöма. 13 Енэжсьыс кодзувъясыс усины му вылö инжир вотöс моз, кор найö гылалöны пу вывсьыс ён тöвнырысь. 14 Енэжыс гартыштчис тубрасö да саялiс, а керöсъяс да дiяс вешйисны асланыс местаысь. 15 Мувывса öксыяс, юралысьяс, озыръяс, тышкайöзöн веськöдлысьяс, ыджыдалысьяс, кесйöгъяс да мездлуна йöз, – ставныс дзебсисны кырта горсъясö да керöс потасъясö. 16 Керöсъяслы да кырталы найö шуалiсны: «Усьöй миян вылö да дзебöй миянöс юралан пуклöс вылын Пукалысьлöн синъясысь да Балялöн скöрлунысь! 17 Öд Сылöн ыджыд Скöралан луныс воис нин. Кодi вермас Сылы паныд сувтны?»
1 Та бöрти ме аддзи нёль анделöс. Найö сулалiсны мулöн нёльнан пельöсас да кутiсны мулысь нёльнан тöвнырсö, медым тöлыс эз пöльт му вылö, саридз вылö да некутшöм пу вылö. 2 Сэсся ме аддзи нöшта öти анделöс. Сiйö кыпöдчис асыввывсянь, а киас кутiс ловъя Енлысь пас пуктансö. Сiйö гораа шыасис нёль андел дiнö, кодъяслы вöлi сетöма вын вöчны лёксö мулы да саридзлы. Андел шуис: 3 «Энö вöчöй лёксö мулы, саридзлы да пуяслы, кытчöдз огö пуктöй плешканыс пас миян Енлöн кесйöгъяслы». 4 Сэсся ме кылi пасйöмаяслысь лыдсö. Тайö лыдыс вöлi сё нелямын нёль сюрс морт. Найö вöлiны Израиль войтырлöн быд чужанкотырысь: 5 Иуда чужанкотырысь – дас кык сюрс морт, Рувим чужанкотырысь – дас кык сюрс, Гад чужанкотырысь – дас кык сюрс, 6 Асир чужанкотырысь – дас кык сюрс, Неффалим чужанкотырысь – дас кык сюрс, Манассей чужанкотырысь – дас кык сюрс, 7 Симеон чужанкотырысь – дас кык сюрс, Левий чужанкотырысь – дас кык сюрс, Иссакар чужанкотырысь – дас кык сюрс, 8 Завулон чужанкотырысь – дас кык сюрс, Öсип чужанкотырысь – дас кык сюрс да Вениамин чужанкотырысь – дас кык сюрс морт. 9 Сэсся ме видзöдлi да аддзи: юралан пуклöс водзын да Баля водзын сулалiс лыдтöм-тшöттöм йöз чукöр. Найö вöлiны быд чужанвужйысь да чужанкотырысь, быд кыла йöз пытшкысь да войтырысь. Найö вöлiны еджыд паськöмаöсь, а кианыс кутiсны пальма росъяс 10 да гораа горзiсны: – Мездмöмыс – миян Енсянь – юралан пуклöс вылын Пукалысьсянь да Балясянь! 11 Сэки став анделыс, кодъяс кытшалiсны юралан пуклöссö, пöрысьясöс да нёль енэжвыв олысьсö, кымынь уськöдчисны пуклöс водзö да копыртчылiсны Енмыслы. 12 Найö шуалiсны: – Аминь! Дзирдлуныс да мывкыдлуныс, выныс да ёнлуныс, ошкöм-нимöдöмыс да аттьöалöмыс миян Енлы нэмъяс чöж! Аминь. 13 Сэки пöрысьяс пöвстысь öти юалiс менсьым: «Тайö еджыд паськöмаясыс – найö кодъяс? Кытысь найö локтiсны?» 14 «Ыджыдöй, тэ ачыд тöдан», – вочавидзи ме. Сэки сiйö шуис меным: – Тайö йöзыс мунiсны уна сьöкыд пыр. Найö мыськисны ассьыныс паськöмсö Баля Вирöн, да налöн паськöмыс лои еджыд. 15 Та вöсна найö сулалöны Ен пуклöс водзын да лун и вой кесъялöны Енмыслы Сылöн крамын. Пуклöс вылын Пукалысьыс пыр лоö накöд да видзö найöс. 16 Найö оз нин кутны тшыгъявны, налöн оз косьмы горшыс, найöс оз пöж шондiыс да оз сот гожйыс. 17 Öд Баляыс, пуклöс водзын Сулалысьыс, кутас видзны найöс, Сiйö вайöдас найöс ловъя ва визувтанiнö, да Енмыс чышкас налысь став синвасö.
1 Кор Баля жугöдiс сизимöд печатьсö, енэжас час джын мында кежлö лои чöв-лöнь. 2 Ме аддзи Ен водзын сулалысь сизим анделöс, налы вöлi сетöма сизим труба. 3 Сэсся матыстчис нöшта öти андел да сувтiс тшынöдчан пызан водзö. Киас сiйö кутiс зарни тшынöдчан доз. Сылы вöлi сетöма уна ладан, медым тшынöдны сiйöс став вежа войтырлöн кевмысьöмъяснас зарни тшынöдчан пызан вылын, кодi сулалiс юралан пуклöс водзын. 4 Сэки андел киысь кыптiс Енмыслы вежа войтырлöн кевмысьöмъяснас ладан тшын. 5 Сэсся андел босьтiс тшынöдчан доз, пуктiс сэтчö висьпуктанiнысь бисö да шыбитiс сiйöс му вылö. Сэнi кылiсны гора шыяс, чардалiс-гымалiс, да муыс вöрис. 6 Сэки сизимнан анделыс, кодъяслöн вöлi сизим труба, дасьтысисны трубитны. 7 Кор трубитiс медводдза анделыс, му вылö киссис вир сора биа шер. Сэки сотчис пуяслöн коймöд юкöныс да став веж туруныс. 8 Кор трубитiс мöд анделыс, быттьö ыджыд сотчысь керöс уси саридзас, да саридзлöн коймöд юкöныс пöри вирö. 9 Сэки саридзын олысьяслöн коймöд юкöныс кулiс, да корабльяслöн коймöд юкöныс вöйис. 10 Кор трубитiс коймöд анделыс, енэжсьыс уси ыджыд кодзув, кодi ыпъялiс яръюгыд би моз. Сiйö уси юяслöн коймöд юкöныс вылö да ва петанiнъясö. 11 Тайö кодзулыслöн нимыс Курыд турун. Ваыслöн коймöд юкöныс лои зэв курыд, та вöсна уна йöз кулiсны. 12 Кор трубитiс нёльöд анделыс, шондiлöн, тöлысьлöн да кодзувъяслöн коймöд юкöныс кусiс, налöн коймöд юкöныс пемдiс. Та вöсна луныслöн да войыслöн коймöд юкöныс вöлi пемыд. 13 Сэсся ме аддзи енэж шöрöдыс лэбысь анделöс. Сiйö гораа горзiс: «Шог, шог, шог тiянлы, мувывса олысьяслы, мукöд куим анделлöн трубитöмысь, öд найö регыд нин пондасны трубитны!»
1 Кор трубитiс витöд анделыс, ме аддзи: енэжсянь му вылö усис кодзув. Сылы вöлi сетöма пыдöстöминысь восьтансö. 2 Кор сiйö восьтiс пыдöстöминсö, сэтысь ыджыд пачысь моз пуркнитiс тшын. Тайö тшынсьыс пемдiс шондiыс и сынöдыс. 3 Тшын пытшсьыс петiс му вылö саранча чукöр. Налы вöлi сетöма мувывса скорпионъяслöн кодь вын. 4 Налы вöлi шуöма, медым эз вöчны неткутшöм лёктор турунлы, быдмöглы либö пулы, сöмын йöзыслы, кодъяслöн плешкас абу Енлöн пасыс. 5 Саранчаяслы вöлi шуöма, медым найö эз виавны йöзöс, сöмын мучитiсны найöс вит тöлысь чöж. Налысь мучитöмсö позьö öткодявны скорпионлöн чушкöмкöд. 6 Сiйö лунъясö йöзыс кутасны корсьны кулöмсö, но оз аддзыны сiйöс, кöсъясны кувны, но кулöмыс пышъяс наысь. 7 Саранчаясыс вöлiны тышö петысь вöвъяс кодьöсь. Юр выланыс налöн вöлi зарни юркытш сяма, а чужöмыс налöн вöлi мортлöн кодь. 8 Налöн вöлi аньлöн кодь юрси, а налöн пиньясыс вöлiны левлöн пиньяс кодьöсь. 9 На вылын вöлi кышöд, быттьö кöртысь дорöма. Налöн бордъясыс швачкисны сэтшöм гораа, быттьö зэв уна телегаа вöв чукöр котöртiс тышö. 10 Налöн бöжъясыс вöлiны скорпионлöн кодьöсь, а бöжъясас вöлiны чушканъяс. Налöн вöлi вын вöчны йöзыслы лёксö вит тöлысь чöж. 11 Налöн öксынас вöлi пыдöстöминысь андел. Сылöн нимыс еврей ногöн лоö Авадон, а грек ногöн – Аполион. 12 Öти шог мунiс, сы бöрся нöшта кык шог локтö. 13 Кор трубитiс квайтöд анделыс, ме кылi гöлöс шы. Сiйö кылiс зарни висьпуктанiнлöн нёль сюрсянь. Тайö висьпуктанiныс сулалiс Ен водзын. 14 Тайö гöлöс шыыс шуис квайтöд анделыслы, кодлöн вöлi труба: «Мезды нёльнан анделсö, кодъясöс кöрталöма ыджыд Евфрат ю дорö». 15 Сэки нёльнан анделсö вöлi мездöма. Найöс вöлi дасьтöма тайö часыс, луныс, тöлысьыс да воыс кежлö, медым вины йöзыслысь коймöд юкöнсö. 16 Тайö анделъясыслöн вöлi кыксё миллион тышка морт вöвъяснас. Тайö лыдсö ме ачым кывлi. 17 Тайö вöвъяссö да тышкайöзсö ме аддзылi вемöсöн. Найö вöлiны татшöмöсь: верзьöмаяс вылын вöлiны би гöрд, пемыдлöз да кольквиж рöма кöрт кышöдъяс. Вöвъяслöн юрныс вöлi левъяслöн юр кодьöсь, налöн вомысь петiс би, тшын да сера. 18 Тайö куим бырöданторсьыс: биысь, тшынысь да сераысь, кодъяс петiсны вöвъяслöн вомысь, кулiс йöзлöн коймöд юкöныс. 19 Вöвъяслöн выныс вöлi налöн вомас да бöжас. Налöн бöжъясыс вöлiны змей кодьöсь, öд бöжъясыс вöлiны юраöсь. Тайö юрнас найö чушкисны. 20 Мукöд йöзыс, кодъяс колины ловйöн тайö бырöданторъяссьыс, эз бергöдчыны асланыс лёк уджъясысь. Найö важ мозыс копрасисны мутияслы да зарниысь, эзысьысь, ыргöнысь, изйысь да пуысь вöчöм идолъяслы, кодъяс оз вермыны аддзыны, кывны ни ветлыны. 21 Найö эз бергöдчыны морт виöмысь, тшыкöдчöмысь, кырсалöмысь да гусясьöмысь.
1 Ме аддзи нöшта öти вына анделöс, кодi лэччис енэжсяньыс. Сiйöс кытшалiс кымöрыс, сы юр весьтын вöлi öшкамöшка. Сылöн чужöмыс вöлi шондi кодь, а кокъясыс вöлiны биа сюръяяс кодьöсь. 2 Киас сiйö кутiс неыджыд восьса гижöд. Веськыд кокнас сiйö сувтiс саридз вылö, а шуйганас – му вылö, 3 сэсся горöдiс ыджыд шыöн, быттьö лев равöстiс. Сылöн горöдöм бöрын сизим гым кутiсны гораа сёрнитны. 4 Сизим гым сёрнитöм бöрын ме кöсйи гижны налысь сёрнисö, но енэжсяньыс ме кылi гöлöс шы. Сiйö шуис меным: «Сизим гымлысь сёрнисö эн гиж, дзеб сiйöс». 5 Сэки андел, кодöс ме аддзылi саридз да му вылын öтпырйö сулалысьöн, лэптiс веськыд кисö енэжланьыс 6 да кöсйысис Помтöг Олысьöн, кодi вöчис енэжсö да сэнi олысьясöс, мусö да сы вылын олысьясöс, саридзсö да сы пытшкын олысьясöс. Сiйö сетiс кыв: «Кадыс оз нин ло. 7 Но сiйö лунö, кор кылас сизимöд анделлöн трубитöм шыыс, сэки збыльмас Енлöн гуся мöвпыштöмыс, мый йылысь Енмыс водзвыв висьталiс пророкъяслы – Аслас кесйöгъяслы». 8 Сэсся енэжсяньыс бара кылiс гöлöс шы, кодöс ме кывлi нин. Сiйö шуис меным: «Мун андел дiнö, кодi сулалö саридз да му вылын, да босьт сылöн киысь восьса гижöдсö». 9 Ме матыстчи андел дiнö да кори сылысь гижöдсö. Сiйö шуис меным: «Босьт да сёй тайö гижöдсö. Сiйö лоö юмов ма кодь вом пытшкад, но гырк пытшкад лоö курыд». 10 Андел киысь ме босьтi гижöдсö да сёйи. Менам вомын сiйö вöлi юмов ма кодь. Но бöрыннас менам гырк пытшкöй ёна курдiс сыысь. 11 Сэсся андел шуис меным: «Тэныд бара на ковмас водзвыв висьтавлыны, мый лоö уна войтыркöд да чужанкотыркöд, уна йöзкöд да öксыяскöд».
1 Меным сетiсны кузь мурталан бедь да шуисны: «Мун да муртав Енлысь крамсö, висьпуктанiнсö да лыддьы крамас юрбитысьяслысь лыдсö. 2 Крамлысь ортсы йöрсö эн муртав, сiйöс оз ков муртавны, öд сiйöс сетöма ентöдтöмъяслы. Найö кутасны талявны вежа карсö нелямын кык тöлысь чöж. 3 Ме мöдöда Ассьым кык висьталысьöс. Чорыд дукöсö пасьтасьöмöн найö кутасны пророкавны сюрс кыксё квайтымын лун чöж». 4 Тайö висьталысьясыс – кык выя пу да кык бикок, кодъяс сулалöны став мунас веськöдлысь Ен водзын. 5 Кодкö кöсъяс кö налы лёк вöчны, на вомысь петас би да ньылыштас налы паныд мунысьясöс. Тадзи быдöнöс, налы лёк вöчысьясöс, лоö бырöдöма. 6 Налöн эм вын тупкыны енэжсö, медым налöн висьтавлiгöн эз зэр. Налöн эм вын пöртны васö вирö да тшыкöдны мусö быдпöлöс бырöданторнас, кор сöмын кöсъясны. 7 Кор найö дугдасны висьтавлыны, сэки пыдöстöминысь петас звер да кутас тышкасьны накöд. Зверыс вермас найöс да виас. 8 Налöн шойясыс кутасны куйлыны ыджыд карлöн туй вылас. Тайö карсö позьö öткодявны Содомкöд да Египеткöд, öд тайö карас вöлi тувъялöма налысь Господьöс. 9 Быд кыла йöз пытшкысь да войтырысь, быд чужанвужйысь да чужанкотырысь унаöн кутасны видзöдны налöн шойяс вылö куим лун да джын, но оз лэдзны гуавны найöс. 10 Мувывса йöзыс кутасны нимкодясьны да гажöдчыны, весиг козьналасны öта-мöдныслы козинъяс, öд тайö кык висьталысьыс ёна мучитiсны найöс. 11 Но куим лун да джын мысти Енмыс пöльыштiс тайö кык висьталысьыс пытшкö олöмыслысь ловсö, да найö чеччисны. Сэки на вылö видзöдысьяс ёна повзисны. 12 Висьталысьяс кылiсны енэжсяньыс гора шы. Сiйö шуис налы: «Кыпöдчöй татчö!» Сэки найö кыпöдчисны енэжас кымöр вылын, а налы паныд мунысьяс видзöдiсны на вылö. 13 Дзик пыр муыс кутiс ёна вöрны, да карыслöн дасöд юкöныс киссис. Му вöригас кулiс сизим сюрс морт, а мукöдыс ёна повзисны да ошкисны енэжвывса Енмöс. 14 Мöд шогыс помасис, но матысмö нин коймöд шог. 15 Сизимöд анделыс трубитiс, и енэжас кылiсны гора шыяс. Найö шуалiсны: – Став муюгыдыс лои миян Господьлöн да Сылöн Мавтыштöмалöн юраланiнöн. Сiйö кутас юравны нэмъяс чöж! 16 Сэки кызь нёль пöрысьыс, кодъяс пукалiсны Ен водзын юралан пуклöсъяс вылын, кымынь уськöдчöмöн копыртчылiсны Енмыслы. 17 Найö шуалiсны: – Господьöй Енмöй, Ставсöкутысьöй! Ми аттьöалам Тэнö. Тэ эм, вöлiн и лоан! Тэ босьтiн ыджыдалан вынсö Аслад киö, кутiн веськöдлыны ставнас. 18 Ентöдтöмъяс ёна скöралiсны, но öнi воис Тэнад скöрлуныд. Воис кад мыждыны кулöмаясöс да сетны тырдон Тэнад кесйöгъяслы – пророкъяслы да вежа войтырлы, да Тэнад нимысь полысьяслы – ичöтъяслы и гырысьяслы. Воис кад бырöдны найöс, кодъяс тшыкöдiсны мусö. 19 Енэжас воссис Енлöн крамыс, и сэтысь тыдовтчис Йитöдлöн куд. Сэки кутiс чардавны-гымавны, кылiсны гора шыяс, муыс кутiс вöрны, да киссис гырысь шер.
1 Сэсся енэжсьыс ме аддзи ыджыд индысьпас. Ань вöлi гартыштчöма шондiöн. Сылöн кок улас вöлi тöлысь, а юр вылас – дас кык кодзулысь юркытш. 2 Сiйö вöлi кынöма, да ёна горзiс чужтан дойсьыс. 3 Сэсся енэжас лои мöд индысьпас. Ме аддзи би гöрд рöма ыджыд гундырöс. Сiйö вöлi сизим юра да дас сюра, а быд юр вылын вöлi юркытш. 4 Бöжнас сiйö чышкыштiс енэжсьыс кодзувъяслысь коймöд юкöнсö да шыбитiс найöс му вылö. Сэсся гундыр сувтiс чужтысь аньлы воча, медым чужтöм бöрас сёйны сылысь пузчужöм кагасö. 5 Ань чужтiс пиöс, тайö кагаыс кутас веськöдлыны кöрт беддьöн став йöзнас. Аньлысь кагасö вöлi кыпöдöма Ен дiнö, Сылöн юралан пуклöс дiнö. 6 Ачыс аньыс пышйис овтöминö. Сэнi Енмыс дасьтöма вöлi оланiн, медым вердны тайö аньсö сюрс кыксё квайтымын лун чöж. 7 Сэсся енэжас пансис тыш. Микаил аслас анделъяскöд тышкасис гундырлы паныд, а гундыр аслас анделъяскöд – налы паныд. 8 Но гундырöс вöлi вермöма, и сылы да сылöн анделъяслы эз ло местаыс енэжас. 9 Ыджыд гундырöс, важ змейöс, вöлi шыбитöма му вылö. Сылöн нимыс – омöль да сöтана. Сiйö ылöдлö муюгыдас став олысьсö. Сыкöд тшöтш вöлi шыбитöма му вылас сылысь анделъяссö. 10 Сэки ме кылi енэжсянь гора шы: – Öнi воис мездмöмыс, выныс, миян Енлöн юралöмыс да Сылöн Мавтыштöмалöн ыджыдалöмыс. Öд енэжсьыс шыбитöма мыждысьöс. Лун и вой сiйö мыждiс вокъяснымöс миян Ен водзын. 11 Миян вокъяс вермисны мыждысьöс Балялöн Вирöн да збыльсö висьталöмöн. Найö дасьöсь вöлi сетны ассьыныс олöмнысö да эз повны кулöмысь. 12 Сiдзкö, енэжыс да став сэнi олысьыс, нимкодясьöй! Но курыд шог тiянлы, му вылын да саридзын олысьяслы, öд тiян дiнö лэччис омöльыс! Сiйö тырöма ыджыд скöрлунöн, öд сiйö тöдö, мый сылöн кадыс этша нин. 13 Кор гундыр аддзис, мый сiйöс шыбитöма му вылö, сiйö кутiс вöтлысьны пи чужтысь ань бöрся. 14 Аньлы вöлi сетöма ыджыд кутшлысь кык борд, медым сiйö лэбзис змейысь овтöминö, сылы дасьтöминö. Сэнi кутасны вердны сiйöс куим во да джын. 15 Аньöс вöтöдiгöн змей быликтiс аслас вомысь ю мында ва, медым кылöдны аньöс, 16 но муыс отсалiс аньлы. Муыс воссис да ньылыштiс гундыр вомысь петöм юсö. 17 Гундыр ёна скöрмис ань вылö да мунiс тышкасьны сылöн мукöд челядькöд, кодъяс олöны Ен тшöктöм серти да кутчысьöны Исус Кристослöн висьталöмö.
1 Сэсся ме сувтi саридз дорö да аддзи саридзысь петöм зверöс. Сiйö вöлi сизим юра да дас сюра. Быд сюрын вöлi öти юркытш, а юръясас вöлi гижалöма Енмöс лёкöдана нимъяс. 2 Зверыс, кодöс ме аддзылi, вöлi леопард кодь. Сылöн кокъясыс вöлiны ошлöн кодьöсь, а вомыс – левлöн кодь. Гундыр сетiс сылы ассьыс вынйöрсö, юралан пуклöссö да ыджыдалан вынсö. 3 Ме аддзи: зверлöн öти юрыс вöлi кувмöн доймöма, но тайö кулан дойыс бурдiс. Став мувывса йöзыс таысь ёна шензисны да вöтчисны звер бöрся. Найö копыртчылiсны гундырлы, кодi сетiс зверлы ыджыдалан вынсö. 4 Сэсся найö копыртчылiсны зверлы да шуалiсны: – Кодöс позьö öткодявны тайö зверыскöд? Кодi вермас тышкасьны сыкöд? 5 Зверлы вöлi сетöма позянлун тшапа сёрнитны да омöльтны Енмöс лёкöдана кывъясöн. Сылы вöлi сетöма вын вöчны тадзи нелямын кык тöлысь чöж. 6 Сiйö паськöдiс вомсö да кутiс лёкöдны Енмöс, Сылысь нимсö, оланiнсö да енэжвыв олысьясöс. 7 Сылы вöлi сетöма вын тышкасьны вежа войтыркöд да вермыны найöс. Сылöн вöлi вын ыджыдавны быдпöлöс чужанвуж да чужанкотыр вылын, быд кыла йöз да быд войтыр вылын. 8 Сылы копыртчыласны мувывса став йöзыс, кодъяслысь нимсö му пуксьöмсяньыс абу гижöма начкöм Балялöн небöгö – Олöмыслöн небöгö. 9 Кодлöн эм пель, мед кылö тайö кывъяссö: 10 Кодi мöд мортсö дзескыдiнö пуксьöдас, ачыс сэтчö веськалас. Кодi шыпуртöн виас, ачыс шыпуртсянь кулас. Татшöм кадас вежа войтырлы колö зумыдлун да эскöм. 11 Сэсся ме аддзи мöд зверöс, кодi петiс му пытшкысь. Сылöн вöлi балялöн кодь кык сюр, но сёрнитiс сiйö гундыр моз. 12 Сiйö ставсö вöчö воддза зверыслöн син водзын, сылöн ыджыдалан выннас. Став мусö да сэнi олысьясöс сiйö тшöктö копрасьны воддза зверыслы, кодлöн бурдiс кулан дойыс. 13 Сiйö вöчö ыджыд шензьöданаторъяс: йöз син водзын сiйö енэжсяньыс уськöдö би му вылö. 14 Став шензьöданаторсö сiйö вöчö воддза зверыслöн син водзын. Тайö шензьöданаторъяснас сiйö ылöдлö мувывса йöзсö. Сiйö тшöктö йöзыслы вöчны воддза зверыслысь серпассö. Тайö зверсö вöлi дойдöма шыпуртöн, но сiйö ловзис. 15 Мöд зверыслы вöлi сетöма вын: ловзьöдны воддза зверыслысь серпассö, медым тайö серпасыс сёрнитiс да тшöктiс виавны быдöнöс, кодi оз копыртчыв тайö серпасыслы. 16 Сiйö тшöктö быдöнлы – ичöтлы и гырысьлы, озырлы и гöльлы, мездлуна мортлы и кесйöглы – пуктыны пас налöн веськыд киас либö плешкас. 17 Сэки некод оз вермы ньöбны ни вузавны, оз кö ло сылöн тайö пасыс: зверлöн нимыс либö сы нимлöн лыдпасыс. 18 Танi колö мывкыдлун. Кодлöн эм вежöр, сiйö мед гöгöрвоö звер нимлысь лыдпассö, öд тайö мортлöн лыдпасыс. Тайö лыдпасыс – квайтсё квайтымын квайт.
1 Сэсся ме видзöдлi да аддзи: Сион керöс вылын сулалiсны Баля да Сыкöд орччöн сё нелямын нёль сюрс морт. Налöн плешканыс вöлi гижöма Сылöн Батьлысь нимсö. 2 Ме кылi енэжсяньыс шы. Сiйö вöлi уна валöн бузгысь шы кодь да чорыд гым шы кодь. Сiйö юргис, быттьö арфаöн ворсiсны. 3 Тайö йöзыс сьылiсны выль сьыланкыв юралан пуклöс водзын, нёль енэжвыв олысь да пöрысьяс водзын. Тайö сьыланкывсö некод эз куж сьывнысö. Сiйöс сьылiсны сöмын сё нелямын нёль сюрс морт, кодъясöс ньöбöма му вывсьыс. 4 Тайö йöзыс эз пежавны асьнысö аньяскöд узьлöмöн, найö сöстöмöсь. Найö мунöны Баля бöрся быдлаö, кытчö Сiйö мунö. Найöс ньöбöма мувывса йöз пöвстысь, найö – медводдза вайöмтор Енмыслы да Балялы. 5 Налöн вомысь некор эз петлыны пöръясян кывъяс, Ен пуклöс водзын найö мыжтöмöсь. 6 Сэсся ме аддзи нöшта öти анделöс, кодi лэбис енэж шöрöдыс. Сылöн вöлi помасьлытöм Евангелльö, медым висьтавлыны сiйöс мувывса олысьяслы: быд чужанвужлы да чужанкотырлы, быд кыла йöзлы да войтырлы. 7 Сiйö гораа шуалiс: «Полöй Енсьыс да ошкöй Сiйöс! Öд воис Сылöн Мыждан луныс. Копыртчылöй Сылы, кодi вöчис енэжсö да мусö, саридзсö да ва петанiнъяссö!» 8 Воддза анделыс бöрся лэбис мöд андел да горзiс: «Киссис, киссис Вавилон, ыджыд кар, öд сылöн кырсалöм понда став йöзыслы ковмис юны Ен скöрлуна вина». 9 Кык андел бöрся лэбис нöшта öти андел. Сiйö гораа шуалiс: «Кодi копыртчылас зверлы да сылöн серпаслы да сетас пуктыны зверлысь пассö плешкас либö ки вылас, 10 сiйö кутас юны Ен скöрлуна вина, соравтöм вина, кодöс сулöдöма Ен скöрлуна чашаын. Сiйö кутас мучитчыны биын да сотчысь сераын вежа анделъяс водзын да Баля водзын. 11 Найöс мучитан билöн тшыныс кутас кыпöдчыны нэмъяс чöж. Найö, кодъяс копыртчыласны зверлы да сылöн серпаслы да сетасны пасйыны асьнысö сылöн нимöн, оз кутны тöдны шойччöгсö лунын ни войын. 12 Сiдзкö, вежа войтырлы – Ен тшöктöм серти олысьяслы да Исуслы эскысьяслы – колö лоны зумыдöн». 13 Сэсся ме кылi енэжсянь гöлöс шы. Сiйö шуис меным: «Гиж тайöс: "Шудаöсь найö, кодъяс öнiсянь куласны Господьлы эскöмöн. Тайö тадзи, – шуö Лов. Найö кутасны шойччыны асланыс сьöкыд уджъясысь, öд налöн уджъясыс мунöны на бöрся"». 14 Ме видзöдлi да аддзи еджыд кымöр, а сы вылын кодкö Морт Пи кодь пукалiс. Сылöн юр вылас вöлi зарни юркытш, а киас – лэчыд чарла. 15 Сэсся крамсьыс петiс öти андел да гораа горöдiс кымöр вылын Пукалысьлы: «Босьт ассьыд чарлатö да вунды, öд вундан кадыс воис нин. Му вылын кöдзасыс воöма». 16 Кымöр вылын Пукалысь шыбитiс ассьыс чарласö му вылö, и кöдзасыс лои вундöма. 17 Енэжвыв крамысь петiс мöд андел, сылöн тшöтш вöлi лэчыд чарла. 18 Сэсся висьпуктанiнсянь петiс нöшта öти андел, сылöн вöлi вын би вылын. Сiйö гораа горöдiс лэчыд чарлаа анделлы: «Босьт лэчыд чарлатö да вунды му вылысь виноград розъяссö, öд сылöн вотöсыс кисьмöма нин». 19 Андел шыбитiс ассьыс чарласö му вылö да вундiс му вылысь виноград розъяссö. Сiйö шыбитiс найöс ыджыд гуö, Ен скöрлуна пычкан гуö. 20 Виноград вотöссö вöлi талялöма кар ортсыас, пычкан гуын. Сэтысь вирыс петiс ортсö да визувтiс сюрс квайтсё стадий ылнаöдз, а джуджтаыс сылöн вöлi вöв домöдз.
1 Сэсся енэжсьыс ме нöшта на аддзи шензьöдана да ыджыд индысьпас. Ме аддзи сизим анделöс, кодъяслöн вöлi бöръя сизим бырöданторйыс. Тайö бырöданторъяснас помасис Енлöн скöрлуныс. 2 Ме аддзи саридз, сiйö вöлi стеклö кодь да пöртмасис биöн. Стеклö саридз дорас сулалiсны найö, кодъяс тышкасисны зверкöд, сылöн серпасыскöд да сы нимлöн лыдпасыскöд да петiсны вермысьясöн. Найö кутiсны кианыс Енлысь арфаяссö 3 да сьылiсны Ен кесйöг Мöисейлысь да Балялысь сьыланкывсö: – Господьöй Енмöй, Ставсöкутысьöй! Тэнад уджъясыд ыджыдöсь да шензьöданаöсь, Тэнад туйясыд веськыдöсь да збыльöсь! Тэ – Öксыыс вежа войтырлы! 4 Господьöй, сюрас-ö сэтшöм морт, кодi оз повзьы Тэысь да оз ошкы Тэнсьыд нимтö? Öд Тэ öтнадöн – вежаыс! Быд войтырысь локтасны да копыртчыласны Тэныд, öд воссис Тэнад веськыда мыждöмыд! 5 Сэсся ме видзöдлi да аддзи: енэжас воссис крам – Енлöн скинияыс. 6 Крамысь петiсны сизим андел, кодъяслöн вöлi сизим бырöданторйыс. Найö вöлi пасьтасьöмаöсь сöстöм да лым еджыд шабдi паськöмö, а морöс весьтöдыс вöлi вöнясьöмаöсь зарни вöньöн. 7 Нёль енэжвыв олысь пöвстысь öтиыс сетiс сизим анделлы сизим зарни чаша. Тайö чашаяссö вöлi тыртöма Помтöг Олысь Енлöн скöрлунöн. 8 Енлöн дзирдлунысь да Сылöн вынысь крамыс тырис тшынöн. Крамас некод эз вермы пырнысö, кытчöдз эз помась сизим анделлöн сизим бырöданторйöн удж вöчöмыс.
1 Сэсся крамсьыс ме кылi гора гöлöс шы. Сiйö шуис сизим анделлы: «Мунöй да кисьтöй Ен скöрлуна сизим чашасö му вылö». 2 Медводдза анделыс петiс да кисьтiс ассьыс чашасö му вылö. Сэки найö, кодъяс новлöдлiсны зверлысь пассö да копрасисны сылöн серпаслы, вевттьысисны чорыд орзьöм дойясöн. 3 Мöд анделыс кисьтiс ассьыс чашасö саридзö. Сэки саридзыс лои кулöм мортлöн вирыс кодь, да саридзын став олысьыс кулiс. 4 Коймöд анделыс кисьтiс ассьыс чашасö юясö да ва петанiнъясö, и ваыс пöри вирö. 5 Сэсся ме кылi ваяслöн анделлысь шуöмсö: – Господьöй, Тэ вöлiн и эм, Тэ веськыд да вежа, Тэ öд веськыда мыждан! 6 Йöзыс кисьтiсны вежа войтырлысь да пророкъяслысь вирсö, та вöсна Тэ юктöдан найöс вирöн. Тэ мынтысян налы уджъясныс серти! 7 Ме кылi висьпуктанiнсянь мöд гöлöс шы. Сiйö шуис: – Господьöй Енмöй, Ставсöкутысьöй, Тэнад мыждöмыд збыль да веськыд! 8 Нёльöд анделыс кисьтiс ассьыс чашасö шондi вылö, и шондiыслы вöлi сетöма вын сотны йöзсö биöн. 9 Ёна пöжöмысла йöзыс сотчисны да лёкöдiсны Енлысь нимсö, öд Сiйö веськöдлiс тайö бырöданторъяснас. Но йöзыс эз бергöдчыны Енлань да эз ошкыны Сiйöс. 10 Витöд анделыс кисьтiс ассьыс чашасö зверлöн юралан пуклöс вылö, и зверлöн юраланiнын лои пемыд. Чорыд дойяссьыс йöзыс курччалiсны ассьыныс кывсö 11 да лёкöдiсны енэжвыв Енмöс тайö дойяссьыс да мучитчöмсьыс, но асланыс лёк уджъясысь эз бергöдчыны. 12 Квайтöд анделыс кисьтiс ассьыс чашасö ыджыд Евфрат юö, и ваыс сэтысь косьмис. Тадзи вöлi дасьтöма туйсö асыввывсянь локтысь öксыяслы. 13 Сэсся ме аддзи: гундыр вомысь, звер вомысь да ылöгпророк вомысь петiсны куим пеж лов, найö вöлiны жаба кодьöсь. 14 Тайö – мутияслöн ловъясыс, кодъяс вöчисны шензьöданаторъяс. Найö мунiсны мувывса став öксыыс дiнö, медым чукöртны найöс Ставсöкутысь Енлöн ыджыд лунся тыш вылö. 15 «Со, Ме локта гусясьысь моз. Шуда сiйö, кодi оз узь да видзö ассьыс паськöмсö, медым эз коль пасьтöг да некод эз янöд сiйöс». 16 Пеж ловъяс чукöртiсны мувывса öксыясöс öти местаö. Тайö местаыс шусьö еврей ногöн Армагеддон. 17 Сизимöд анделыс кисьтiс ассьыс чашасö сынöдас. Сэки енэжвыв крамысь, юралан пуклöс дiнысь, кылiс гора гöлöс шы: «Ставсö вöчöма!» 18 Сэсся кутiс чардавны-гымавны, кылiсны гора шыяс, да муыс кутiс ёна вöрны. Олöм пуксьöмсяньыс та ыджда му вöрöмыс некор на эз вöвлы! 19 Сэки Вавилон, ыджыд кар, киссис куим пельö, и мукöд войтырлöн каръясыс тшöтш киссисны. Енмыс ставсö кутiс тöд вылас тайö ыджыд карыс йылысь да сетiс сылы юны вина чашасö, кодi вöлi тырöма Сылöн скöрлунöн. 20 Став дiыс вошис, а керöсъяс бырисны. 21 Йöзыс вылö енэжсянь киссис зэв гырысь, комын кило сьöкта шер. Йöзыс лёкöдiсны Енсö тайö шерсьыс, öд тайö бырöданторйыс вайис налы уна сьöкыдлун.
1 Ме дiнö матыстчис андел. Сiйö вöлi на пöвстысь, кодъяслöн вöлi сизим чаша. Сiйö шуис меным: «Лок татчö, ме петкöдла тэныд, кутшöм мыждöм виччысьö уна вадорын пукалысь аньöс, кодi ёна кырсалiс. 2 Мувывса öксыяс кырсалiсны сыкöд, а мувывса олысьяс винаысь моз коддзисны сылöн кырсалöмысь». 3 Сэсся ме вöлi тырöма Лолöн, и андел вайöдiс менö овтöминö. Сэтысь ме аддзи аньöс, кодi пукалiс чим гöрд рöма звер вылын. Сылöн вöлi сизим юр да дас сюр. Тайö зверсö вöлi дзоньнас гижалöма Енмöс лёкöдана кывъясöн. 4 Аньыс вöлi пасьтасьöма пурпур рöма да чим гöрд рöма паськöмö. Сы вылын югъялiсны зарниысь, дона изъясысь да жемчугысь мичмöданторъяс. Киас сiйö кутiс зарни доз, кодi вöлi тырöма сылöн кырсалöмысь зывöкнас да пежнас. 5 Плешкас сылöн вöлi гижöма гуся вежöртаса ним: «Ыджыд Вавилон – мувывса став зывöкыслöн да кырсалысьяслöн мам». 6 Ме аддзи: аньыс вöлi коддзöма вежа войтырлöн да Исус йылысь висьталысьяслöн вир юöмысь. Сiйöс аддзöм бöрын ме ёна шензи. 7 Андел шуис меным: «Мый тэ шензян? Ме висьтала тэныд гусятор тайö аньыс йылысь да сiйöс новлöдлысь зверыс йылысь, кодлöн эм сизим юр да дас сюр. 8 Зверыс, кодöс тэ аддзылiн, коркö вöлi, но öнi абу. Сiйö петас пыдöстöминысь, но сiйöс лоö бырöдöма. Сэки мувывса олысьяс, кодъяслысь нимсö му пуксьöмсяньыс абу гижöма Олöмыслöн небöгö, зверсö аддзигöн кутасны шензьыны. Öд сiйö вöлi, но öнi абу, и бара лоас. 9 Танi колö гöгöрвоöмлун да мывкыдлун. Сизим юрыс – тайö сизим мыльк, кодъяс вылын пукалö аньыс. 10 Сизим юрыс индöны сизим öксы вылö: витыс на пиысь кулiсны нин, öтиыс веськöдлö, а бöръяыс эз на лок. Кор сiйö локтас, оз кут дыр веськöдлыны. 11 Зверыс, кодi вöлi, но öнi абу, – кöкъямысöд öксы, сiйö тшöтш тайö сизим öксыыс пöвстысь, сiйöс лоö бырöдöма. 12 Дас сюрыс, кодöс тэ аддзылiн, – тайö дас öксы. Налы абу на сетöма ыджыдалан вынсö, но зверыскöд тшöтш налы лоö сетöма ыджыдалан вынсö сöмын недыр кад кежлö. 13 Налöн ставныслöн öти мог, та вöсна став ассьыныс вынйöрсö да ыджыдалан вынсö найö сетасны зверыслы. 14 Найö кутасны тышкасьны Балякöд, но Баля вермас найöс. Öд Сiйö – ыджыдъяслöн Ыджыдыс да öксыяслöн Öксыыс. Сыкöд тшöтш лоöны Сылöн корöмаясыс, бöрйöмаясыс да эскана йöз». 15 Сэсся андел шуис меным: «Ваыс, кодöс тэ аддзылiн да кöнi пукалö кырсалысь аньыс, – тайö мувывса йöз да быдпöлöс войтыр, быд чужанкотыр да быд кыла йöз. 16 Зверыслöн дас сюрыс, кодъясöс тэ аддзылiн, мустöмтасны кырсалысь аньöс. Найö мырддясны сылысь ставсö да пöрччöдасны сы вылысь став паськöмсö, сёясны сылысь вир-яйсö да сотасны би пытшкын. 17 Öд Енмыс пуктiс налöн сьöлöмö, мед вöчны Сылöн кöсйöм серти да öти кывйö воöмöн сетны зверыслы ассьыныс ыджыдалан вынсö сэтчöдз, кытчöдз оз инны Енлöн кывъясыс. 18 Аньыс, кодöс тэ аддзылiн, – тайö ыджыд кар, сiйö ыджыдалö мувывса став öксыяс вылын».
1 Сэсся ме аддзи: енэжсянь лэччис нöшта öти андел. Сылöн вöлi ыджыд вын, и муыс ставнас югдiс сылöн дзирдлунысь. 2 Андел зэв гораа горöдiс: – Киссис, киссис ыджыд Вавилон! Сiйö лоис оланiнöн мутияслы да быдпöлöс пеж лолыслы, лоис позйöн быдпöлöс пеж да зывöк лэбачыслы. Аслас кырсалöм вöсна сiйö юктöдiс став йöзсö Ен скöрлуна винаöн. 3 Мувывса öксыяс кырсалiсны сыкöд, а вузасьысьяс озырмисны сылöн лышкыдлунысь. 4 Сэсся ме кылi енэжысь мöд гöлöс шы. Сiйö шуис: – Войтырöй Менам, петöй тайö карсьыс, медым энö öтувтчöй сылöн мыж вöчöмас, медым сiйöс моз эз су тiянöс бырöданторйыс. 5 Öд сылöн мыжъясыс кыптiсны енэжöдзыс. Енмыс кутö тöд вылас став сылысь лёк вöчöмсö. 6 Мынтысьöй сылы сiйöн жö, мыйöн мынтысис тiянлы. Мынтысьöй сылöн уджъясысь кык пöв унджык на. Сылöн чашаö, кытысь сiйö юкталiс тiянöс, дасьтöй сылы винасö кык пöв курыдджыкöс на. 7 Мöдöдöй сылы шогсö да мучитчöмсö сы мында, мыйта сiйö курыштiс аслыс озырлунсö да ошкöмсö. Öд сiйö ошйысьö ас йывсьыс: «Ме пукала юралан пуклöс вылын öксы-ань моз. Ме абу дöва, ме некор ог тöдлы шогсö!» 8 Та вöсна, став бырöданторйыс: кулöмыс, шогыс да тшыгъялöмыс суас сiйöс öти лунö. Сiйöс сотасны биын, öд Господь Ен, сiйöс Мыждысьыс, – вына! 9 Кор мувывса öксыяс аддзасны сылысь сотчöмсö да тшынсö, кутасны сыркъялöмöн бöрдны сы вöсна. Öд найö кырсалiсны да лышкыда гажöдчисны сыкöд. 10 Найö повзясны сылöн мучитчöмысь да ылыстчасны сыысь и кутасны шуавны: – Шог, шог тэныд Вавилон, ыджыд да вына кар! Öти здукöн суис тэнö мыждöмыс! 11 Став му пасьтала вузасьысьяс кутасны бöрдны да шогсьыны сы понда, öд налысь вузöссö некод оз кут босьтны. 12 Оз босьтны налысь зарнисö, эзысьсö, дона изъяс да жемчугъяс, шабдi да шöвк дöраяс, пурпур да чим гöрд рöма дöраяс. Оз босьтны налысь чöскыд дука пуяс, слöн лыысь, дона пуысь, ыргöнысь, кöртысь да мраморысь вöчöмторъяс. 13 Некод оз босьт налысь корица, ладан, чöскыд дука вый да миро, вина да вый, пызь да шобдi, ыжъясöс, мöсъясöс да вöвъясöс, телегаяс, кесйöгъясöс да мукöд йöзсö. 14 – Став тэнад сьöлöм бурмöданторйыд быри, став тэнад озырлуныд да мичлуныд воши, тайö тэнад некор нин оз ло. 15 Найö, кодъяс вузасисны тайöн ставнас да озырмисны сы помысь, ёна повзясны Вавилон карлöн мучитчöмысь да ылыстчасны сыысь. Найö кутасны бöрдны да шогсьыны: 16 – Шог, шог тэныд, ыджыд кар! Тэ вöлi пасьтасьöмыд шабдi дöраö, пурпур да чим гöрд рöма паськöмö. Тэнö вöлi мичмöдöма зарниöн, дона изъясöн да жемчугöн! 17 Но став тайö озырлуныс öти здукöн быри! Сэки саридз вылын кывтысьяс, корабльöн веськöдлысьяс, налы отсасьысьяс да вузасьысьяс – ставныс ылыстчисны тайö карсьыс. 18 Найö видзöдiсны сотчысь карлöн тшыныс вылö да горзiсны: «Позяс öмöй öткодявны тайö ыджыд карсö кутшöмкö мöд каркöд?» 19 Найö коялiсны юрсö пöимöн, бöрдiсны да шогсисны: – Шог, шог тэныд, ыджыд кар! Аслад озырлунöн тэ озырмöдiн ставнысö, саридз вылын кывтысьясöс. Öти здукöн тэ воштiн ставсö! 20 – Нимкодясь, енэжыс! Нимкодясьöй, вежа апостолъяс да пророкъяс! Енмыс мыждiс тайö карсö тiянлы лёк вöчöмысь. 21 Сэсся вына андел босьтiс изки кодь ыджыд из да шыбитiс сiйöс саридзас. Сiйö шуис: – Дзик тадзи лоö шыбитöма Вавилонöс, ыджыд карöс, сiйö вошас пыр кежлö! 22 Тэнад туй вылын некор оз кут кывны сьылöм шы, пöлян да труба шы, некод оз кут ворсны арфаöн. Некор оз кут уджавны танi киподтуя морт, некор оз кут кывны танi изки шы. 23 Некор оз кут öзйыны танi би, некор оз кут кывны верöспулöн да гöтырпулöн гöлöс шыныс! Тэнад вузасьысьяс ыджыдалiсны тайö му вылас. Аслад тшыкöдчöмöн тэ кыскин став йöзсö ылöгас. 24 Тайö карас вöлi кисьтöма вирсö пророкъяслысь, вежа войтырлысь, да став йöзыслысь, кодъясöс вöлi виöма му вылас.
1 Та бöрти ме кылi енэжсьыс гора шы, быттьö ыджыд йöз чукöр ызгiс-сёрнитiс. Найö шуалiсны: – Аллилуйя! Мездмöмыс, дзирдлуныс, нималöмыс да выныс – миян Господьлöн. 2 Сылöн мыждöмыс збыль да веськыд. Енмыс мыждiс ыджыд карöс, кырсалысь аньöс, öд сiйö пежалiс ставнас мусö аслас пеж оласногöн. Енмыс перйис водзöссö тайö аньыслысь Аслас кесйöгъяслöн вирысь. 3 Сэки бара шуалiсны: – Аллилуйя! Сылöн тшыныс кутас кыпöдчыны нэмъяс чöж! 4 Та бöрти кызь нёль пöрысьыс да нёльнан енэжвыв олысьыс кымынь уськöдчöмöн копыртчылiсны юралан пуклöс вылын пукалысь Енлы да шуисны: – Аминь! Аллилуйя! 5 Сэсся Ен пуклöссянь кылiс гöлöс шы: – Ошкöй миян Енмöс ставныд: Сылöн кесйöгъяс да Сыысь полысьяс, ичöтъяс и гырысьяс! 6 Сэсся ме кылi шы, быттьö ыджыд йöз чукöр ызгiс-сёрнитiс, быттьö уна шор бузгис-визувтiс, быттьö чорыда гымалiс. Найö шуалiсны: – Аллилуйя! Господь, Ставсöкутысь Ен, öнi лоис Юралысьöн! 7 Кутам нимкодясьны да гажöдчыны, кутам ошкыны Енмöс! Öд Баля öнi гöтрасьö, Сылöн гöтырпуыс дась нин: 8 сiйö пасьтасьöма сöстöм да югъялан шабдi паськöмö. Шабдi паськöмыс – тайö вежа войтырлöн веськыд уджъясыс. 9 Сэсся андел шуис меным: «Гиж: "Шудаöсь найö, кодъясöс корöма Балялöн кöлысь вылö!"» Сэсся содтiс: «Тайö Енлöн збыль кывъясыс». 10 Ме уськöдчи андел кок дорö, медым копыртчывны сылы, но сiйö шуис меным: «Эн вöч тайöс! Öд ме кесъяла Енмыслы, кыдзи тэ да тэнад вокъясыд, кодъяс висьтавлöны Исус йылысь. Енмыслы копыртчыв! Öд Исус йылысь висьталысьяс сёрнитöны пророкалан Ловсянь». 11 Енэжыс воссис менам син водзын, и сэтысь ме аддзи еджыд вöлöс да сы вылын Пукалысьöс. Сылöн нимыс Эскана да Збыль, Сiйö тышкасьö да мыждö веськыда. 12 Сылöн синъясыс ыпъялiсны биöн, а юр вылас вöлi уна юркытш. Пукалысь вылö вöлi гижöма Сылысь нимсö, и тайö нимсö Сыысь кындзи некод эз тöд. 13 Сы вылын вöлi вирöсь паськöм, и нимыс Сылöн – Ен Кыв. 14 Сы бöрся еджыд вöвъяс вылын мунiсны енэжвывса тышка котыръяс, найö вöлi пасьтасьöмаöсь еджыд да сöстöм шабдi паськöмö. 15 Вöв вылын Пукалысьлöн вомысь петiс ёсь шыпурт, медым сiйöн бытшкыны мувывса йöзöс. Сiйö кутас веськöдлыны наöн кöрт беддьöн да пычкас Ставсöкутысь Енлысь скöрлуна винасö пычкан гуын. 16 Сылöн паськöмас да лядьвейас гижöма ним: "Öксыяслöн Öксы, ыджыдъяслöн Ыджыд". 17 Сэсся ме аддзи шондi вылын сулалысь анделöс. Сiйö гораа горöдiс став лэбачыслы, кодъяс лэбисны енэж шöрöдыс: «Локтöй-чукöртчöй Енлöн ыджыд гаж вылö! 18 Тi кутанныд сёйны шойяссö öксыяслысь, тышкайöзöн веськöдлысьяслысь, юралысьяслысь, вöвъяслысь, верзьöмаяслысь да став йöзыслысь: мездлуна йöзлысь и кесйöгъяслысь, ичöтлысь и гырысьлысь». 19 Сэсся ме аддзи зверöс, мувывса öксыясöс да налысь тышка котыръяссö. Найö вöлi чукöртчöмаöсь, медым тышкасьны вöв вылын Пукалыськöд да Сылöн тышка котырыскöд. 20 Зверöс да ылöгпророкöс вöлi кутöма. Ылöгпророкыс вöчлiс шензьöданаторъяс звер нимсянь. Тадзи сiйö ылöдлiс найöс, кодъяс сетiсны пуктыны аслыныс зверлысь пассö, и найöс, кодъяс копрасисны сылöн серпаслы. Зверöс да ылöгпророкöс – кыкнаннысö ловйöн вöлi шыбитöма биöн да сераöн сотчысь тыö, 21 а мукöдсö вöлi виöма шыпуртöн. Тайö шыпуртыс петiс вöв вылын Пукалысьлöн вомысь. И став лэбачыс сэсся пöткöдчисны виöмаяслöн шойясöн.
1 Ме аддзи анделöс, кодi лэччис енэжсянь. Киас сiйö кутiс пыдöстöминысь восьтансö да ыджыд чеп. 2 Сiйö тшапнитiс гундырöс, важ змейöс, да дорис сiйöс сюрс во кежлö. Тайö гундырыс – омöль да сöтана. 3 Андел шыбитiс сiйöс пыдöстöминö да йигналiс сэтчö. А петанiнас пуктiс печать, медым гундыр эз пет да эз ылöдлы йöзсö, кытчöдз оз помась сюрс воыс. Та бöрти сiйöс лоö лэдзöма дженьыд кад кежлö. 4 Сэсся ме аддзи юралан пуклöсъяс. Сэнi пукалысьяслы вöлi сетöма мыждан вын. Ме аддзи ловъяссö налысь, кодъяслысь юрсö керыштiсны Исус йылысь висьталöм вöсна да Ен Кыв вöсна. Найö эз копыртчывны зверлы да сылöн серпаслы, эз сетны пуктыны зверлысь пассö плешканыс да кианыс. Найö ловзисны да юралiсны Кристоскöд сюрс во чöж. 5 А мукöд кулöмаясыс эз ловзьыны, кытчöдз эз помась сюрс воыс. Тайö – кулöмаясöс медводдза ловзьöдöм. 6 Шудаöсь да вежаöсь найö, кодъяс ловзясны медводдза ловзьöдiгöн. Мöд кулöмыслöн выныс оз нин ло на вылын. Найö лоöны Енлöн да Кристослöн вежа кесъялысьясöн, найö кутасны ыджыдавны Кристоскöд сюрс во чöж. 7 Сюрс во помасьöм бöрын сöтанаöс лоö лэдзöма аслас пыдöстöминысь. Сiйö мунас мулöн нёльнан пельöсас ылöдлыны йöзöс, Гог да Магог войтырöс, да чукöртны найöс тыш вылö. Налöн лыдыс лоö саридздорса лыа мында. 8 Найö паськöдчасны став му пасьтала да кытшаласны вежа войтырлысь оланiнсö да Енлысь муса карсö. 9 Но енэжсяньыс, Енсянь, усяс би да бырöдас найöс. 10 Сэки омöльöс, кодi ылöдлiс найöс, лоö шыбитöма биöн да сераöн сотчысь тыö. Сэтчö вöлi шыбитöма тшöтш зверöс да ылöгпророкöс. Найö кутасны мучитчыны лун и вой, нэмъяс чöж. 11 Сэсся ме аддзи ыджыд да еджыд юралан пуклöс да сы вылын Пукалысьöс. Енэжыс да муыс пышйисны Сылöн син водзысь, налы некытчö вöлi дзебсьынысö. 12 Ме аддзи кулöмаясöс: гырысьясöс да ичöтъясöс, найö сулалiсны Ен водзын. Сэнi вöлiны восьса небöгъяс. Сэсся восьтiсны нöшта öти небöг – Олöмыслысь небöг. Кулöмаясöс мыждiсны налöн уджъясныс серти, мый вöлi гижöма небöгъясас. 13 Сэки саридзыс, кулöмыс да адыс сетiсны ассьыныс кулöмаяссö, и быдöнöс найöс вöлi мыждöма уджъясныс серти. 14 Кулöмсö да адсö вöлi шыбитöма биа тыö. Тайö мöд кулöм. 15 Быдöнöс, кодлысь нимсö эз вöв гижöма Олöмыслöн небöгö, вöлi шыбитöма биа тыö.
1 Сэсся ме аддзи выль енэж да выль му. Медводдза енэжыс да муыс бырины, и саридзыс эз нин вöв. 2 Ме, Иоан, аддзи вежа кар – выль Ерусалим. Сiйö лэччис енэжсяньыс, Енсянь. Сiйöс вöлi мичмöдöма, быттьö гöтырпуöс верöспуыслы. 3 Ме кылi енэжсянь гора шы. Сiйö шуис: – Со, мувывса йöз пöвстын Енлöн оланiн! Енмыс кутас овны накöд, найö лоöны Сылöн войтырöн. Ачыс Енмыс лоас накöд, да лоö налöн Енмöн, 4 Сiйö чышкас налысь став синвасö. Кулöмыс оз нин ло, оз ло шогсьöм, бöрдöм ни висьöм, öд важыс кольöма. 5 Юралан пуклöс вылын Пукалысь шуис: «Видзöд, Ме ставсö вöча выльöс!» Сэсся содтiс: «Гиж тайöс, öд тайö кывъясыс веськыдöсь да збыльöсь». 6 Сiйö шуис меным: «Ставсö вöчöма! Ме – Альфа и Омега, Панасыс и Помыс. Кодлöн косьмö горшыс, сiйöс дон босьттöг юктöда ваöн, кодi петö ловъя ва визувтанiнысь. 7 Вермысьльы Ме сета тайöс ставсö. Ме лоа сылы Енмöн, а сiйö – Меным пиöн. 8 Полысьясöс, эскытöмъясöс, зывöк оласногаясöс, морт виысьясöс, кырсалысьясöс, тшыкöдчысьясöс, идоллы юрбитысьясöс да став ылöдчысьсö лоö шыбитöма биöн да сераöн сотчысь тыö. Тайö мöд кулöм». 9 Ме дiнö матыстчис андел. Сiйö вöлi сизим андел пöвстысь, кодъяслöн вöлi сизим чаша сизим бöръя бырöданторнас. Андел шуис меным: «Лок татчö, ме петкöдла тэныд Балялысь гöтырпусö, кодi лоас Сылы гöтырöн!» 10 Ме вöлi тырöма Лолöн, и андел вайöдiс менö ыджыд да джуджыд керöс вылö да петкöдлiс меным ыджыд кар – вежа Ерусалим, кодi лэччис енэжсяньыс, Енсянь. 11 Сiйö югъялiс Ен дзирдлунöн да дзирдалiс дона из моз, югъялысь яшма моз. 12 Карсö кытшалiс кыз да джуджыд стен. Сэнi вöлi дас кык дзиръя, на дорын сулалiсны дас кык андел. Дзиръяяс вылас вöлi гижöма израильса дас кык чужанкотырлысь нимъяссö. 13 Куим дзиръяыс видзöдiсны асыввылö, куимыс – войвылö, куимыс – лунвылö да куимыс – рытыввылö. 14 Карыслöн стеныс подуласис дас кык из вылö, а изъяс вылас вöлi гижöма Балялöн дас кык апостоллысь нимъяссö. 15 Мекöд сёрнитысь анделлöн вöлi зарни бедь, медым муртавны карсö, сылысь дзиръяяссö да стенсö. 16 Карыс вöлi нёль пельöса, сылöн кузьтаыс да пасьтаыс вöлi öткодь. Андел мурталiс карсö бедьнас, и карлöн кузьтаыс лои дас кык сюрс стадий. А карыслöн судта-пасьтаыс вöлi öткодь карыслöн кузьтакöд. 17 Сэсся андел мурталiс карлысь стенсö, кыдзи мувывса йöз мурталöны, да стенлöн джуджтаыс лои сё нелямын нёль гырддза. 18 Карлысь стенсö вöлi вöчöма яшмаысь, а асьсö карсö – сöстöм зарниысь, сiйö югъялiс стеклö моз. 19 Стеныслысь подув изъяссö вöлi мичмöдöма быдпöлöс дона изъясöн. Медводдза подув изйыс вöлi яшмаысь, мöдыс – сапфирысь, коймöдыс – халцедонысь, нёльöдыс – изумрудысь, 20 витöдыс – сардониксысь, квайтöдыс – сердоликысь, сизимöдыс – хризолитысь, кöкъямысöдыс – бериллысь, öкмысöдыс – топазысь, дасöдыс – хризопразысь, дас öтиöдыс – гиацинтысь, дас кыкöдыс – аметистысь. 21 Дас кыкнан дзиръясö вöлi вöчöма дас кык жемчугысь, быд дзиръя – öти жемчугысь. Карыслöн паськыд туйыс вöлi сöстöм зарниысь, сiйö югъялiс стеклö моз. 22 Крамсö тайö карсьыс ме эг аддзыв, öд крамыс сэнi – Ставсöкутысь Господь Ен да Баля. 23 Карыслы оз ков шондi ни тöлысь югзьöдöм вылö, öд Енлöн дзирдлуныс югзьöдö сiйöс, а Баля – сылöн биыс. 24 Быд кыла войтырысь мездмöмаяс кутасны овны сылöн югыдас. Мувывса öксыяс ваясны тайö карас ассьыныс ошйысянторсö да нимöданторсö. 25 Карыслöн дзиръяясыс лоöны пыр восьсаöсь, öд войыс сэнi оз ло. 26 Сэтчö быд войтырысь лоö вайöма ошйысянторсö да нимöданторсö. 27 Нинöм пежыс оз пыр тайö карас, некутшöм пöръясьысь да зывöксö вöчысь оз пыр сэтчö! Сэтчö пырасны сöмын найö, кодъяслысь нимсö гижöма Балялöн небöгö – Олöмыслöн небöгö.
1 Сэсся андел петкöдлiс меным ю, сэнi визувтiс сöстöм ловъя ва. Сiйö вöлi крусталь кодь югыд. Ваыс петiс Енлöн да Балялöн юралан пуклöссянь. 2 Карлöн паськыд туй шöрас, ю öтар-мöдар бокас, быдмис Олöмыслöн пу, кодi вайö вотöссö быд тöлысь, вонас – дас кыкысь. Сылöн коръясыс бурдöдöны йöзöс. 3 Нинöм ёрöмаыс оз ло тайö карас. Сэнi лоö Енлöн да Балялöн юралан пуклöсыс, и Сылöн кесйöгъясыс кутасны кесъявны Сылы. 4 Найö аддзасны Енлысь чужöмбансö, да Сылысь нимсö гижасны налöн плешканыс. 5 Войыс сэнi оз ло. Налы оз нин ков бисянь либö шондiсянь югыдыс, öд налöн югзьöдысьнас лоас Господь Ен. Найö кутасны ыджыдавны нэмъяс чöж. 6 Андел шуис меным: «Тайö кывъясыс веськыдöсь да збыльöсь. Вежа пророкъяслöн Господь Ен мöдöдiс Ассьыс анделсö, медым петкöдлыны Аслас кесйöгъяслы, мый колö лоны регыдъя кадö». 7 «Со, Ме регыд локта! Шуда сiйö, кодi олö тайö небöгас водзвыв висьталöмыс серти!» 8 Ме, Иоан, ставсö тайöс кывлi да аддзылi. А кывлöм да аддзылöм бöрас ме уськöдчи муас, медым копыртчывны анделлы, кодi петкöдлiс меным ставсö тайöс. 9 Но андел шуис меным: «Эн вöч тайöс, öд ме кесъяла Енмыслы тэ моз да тэнад вокъясыд – пророкъяс моз, да на моз, кодъяс олöны тайö небöгас гижöм серти. Енмыслы копыртчыв!» 10 Сэсся содтiс: «Эн тупкы печатьöн тайö небöгас водзвыв висьталöмасö, öд кадыс матын нин». 11 Лёксö вöчысь мед водзö вöчас лёксö, пеж оласнога мед водзö на вöчас пежсö, веськыда олысь мед водзö вöчас веськыда, а вежа морт мед водзö на вежаммас. 12 «Со, Ме регыд локта да вая Аскöд удждон, медым быдöнлы мынтысьны сылöн уджъясыс серти. 13 Ме – Альфа и Омега, Панасыс и Помыс, Медводдзаыс и Медбöръяыс». 14 Шудаöсь найö, кодъяс олöны Енлöн тшöктöм серти, öд Енмыс сетас налы пöткöдчыны Олöмыслöн пуысь да пырны тайö карас дзиръяöдыс. 15 А понъяс, тшыкöдчысьяс, кырсалысьяс, мортвиысьяс, идоллы юрбитысьяс, ылöгсö радейтысьяс да пöръясьысьяс колясны кар ортсыас. 16 «Ме, Исус, мöдöдi Ассьым анделöс висьтавны тайöс тiянлы вичкоясын. Ме – Давид чужанвужйысь да чужанкотырысь, Ме – асъя югыд кодзулыс». 17 Лов да гöтырпу шуöны: «Лок!» Тайöс кылысь мед тшöтш шуö: «Лок!» Кодлöн косьмö горшыс, мед локтö! Кодi кöсйö юны, мед босьтö ловъя васö дон мынтытöг. 18 Ме эскöда быдöнöс, кодi кылö тайö небöгсьыс водзвыв висьталöмасö: кодi содтас мыйкö тайö кывъясыс дiнö, Енмыс мöдöдас сылы бырöданторъяс, мый йылысь гижöма тайö небöгас. 19 Кодi чинтас мыйкö тайö небöгас водзвыв висьталöмсьыс, Енмыс босьтас сылысь пайсö Олöмыслöн небöгысь, вежа карысь да сыысь, мый йылысь гижöма тайö небöгас. 20 Тайö кывъяссö Висьталысьыс шуö: «Ме регыд локта, тайö тадзи!» Аминь. Лок, Господьöй Исусöй! 21 Миян Господь Исус Кристослöн буралöмыс ставныдкöд тiянкöд! Аминь.