1

1 Васняяк ульнесь Вал, ды Валось ульнесь Пазонть марто, ды Валось ульнесь Паз. 2 Сон ульнесь васняяк Пазонть марто. 3 Весе теевсь Сонзэ вельде, Сонтемензэ эзь тееве мезеяк, мезесь ульнесь теезь. 4 Сонзэ эйсэ ульнесь эрямо, ды эрямось ульнесь ломантненень валдокс. 5 Валдось чоподасонть вандолды, ды чоподась эзизе вельтя сонзэ. 6 Ульнесь ломань, Пазонть кучовтозо, лемезэ Иоанн. 7 Сон сась яволявтомо, Валдодонть ёвтнеме. Кадык весе кармить кемеме Валдонтень сонзэ вельде. 8 Сонсь эзь ульне валдокс, ансяк кучозель се Валдодонть яволявтнеме. 9 Ульнесь алкуксонь Валдо, кона валдомгавты эрьва ломаненть, кона сы масторлангов. 10 Сон ульнесь масторлангсо, кона теевськак Сонзэ вельде, ансяк масторлангонь ломантне Сонзэ эзизь сода. 11 Сон сась Эсь ломаненстэнь, ансяк Эсензэтне Сонзэ эзизь васто седейсэст. 12 Сетненень, конат кармасть седейсэст вастомонзо, Сонзэ лемс кемицятненень, Сон макссь оля арамс Пазонь эйкакшокс, 13 эйкакшокс, конат чачсть Пазонть эйстэ, аволь ломань раськестэ, аволь ломань вийстэ, аволь мирдень мелень коряс. 14 Валось теевсь ломанекс, эрясь ютксонок, чанстте ды видечиде пешксе. Минь неинек Сонзэ инексчинзэ, се инексчинть, кона максозь Тензэ Тетянть пельде, кода вейкине Цёранстэнь. 15 Иоанн яволявтсь Сонзэ эйстэ истя сеерезь: «Те Се, конадо мон кортынь: мельган сыцясь мондень ине, эдь Сон ульнесь мондень икеле». 16 Сонзэ чанстень пешксечинть эйстэ весенень миненек максозь чанстямо лангс таго чанстямо. 17 Коесь максозель Моисей вельде, чанстесь ды видечись састь Иисус Христос вельде. 18 Пазонть эзизе нее кияк зярдояк. Сонзэ панжизе вейкине Цёразо, кона свал эри Тетянть марто. 19 Вана кода ёвтась-яволявтсь Иоанн, зярдо евреень прявтнэ кучсть Ерусалимстэ попт ды левинсетнень кевкстемензэ: «Кият тон?» 20 Сон яволявтсь ды апак сёпо ёвтась: «Мон аволь Пазонь кучовт Идиця». 21 Кевкстизь сонзэ: «Кият эно? Тон Илия?» Сон мерсь: «Аволь». «Се пазмарицясь?» Сон каршост мерсь: «Аволь». 22 Кевкстизь таго сонзэ: «Кият эно? Мезе кучицянок туртов ёвтатано, мезе тон ёвтат Эсеть эйстэ?» 23 Сон мерсь: «Мон “чаво модасо сеерицянь вайгелян: виделгавтынк Азоронть туртов кинть”, кода мерсь Исайя пазмарицясь». 24 Кучозтне ульнесть фарисейтнестэ. 25 Сынь кевкстизь сонзэ: «Мейс эно нававтат-лемдят, бути тон аволь Пазонь кучовт Идицят, аволь Илияткак, аволь се пазмарицяськак?» 26 Иоанн каршост мерсь: «Мон нававтан ведьсэ, ансяк тынк ютксо ашти Се, конань тынь а содасынк. 27 Сон мельган сыцясь, кона ульнесь мондень икелеяк, ды мон а маштован мик Сонзэ карсемастонзо кшна ведьметнень юкстицякскак». 28 Те тевесь ульнесь Вифаварасо, Иордан леенть тона чиресэ, косо нававтсь Иоанн. 29 Омбоце чистэнть неизе Иоанн сонзэ пелев молиця Иисусонь ды мерсь: «Ванодоя, Те Пазонь Вирезэсь, кона допрок сайсы масторлангонь пежетенть! 30 Сон Се, конадо мон меринь: “Мельган сы цёра, кона мондень ине, эдь Сон ульнесь мондень икеле”. 31 Мон а содылия Сонзэ, ансяк Израилентень Сонзэ невтемань-содавтомань кисэ мон сынь нававтомо ведьсэ». 32 Ды Иоанн кемекстынзе эсь валонзо, истя кортазь: «Мон неия Оймеялтонть, зярдо Сон гулька ладсо валгсь менельстэ ды аштесь велькссэнзэ; 33 мон а содылия Сонзэ. Ансяк кие монь кучимим ведьсэ нававтомо, мерсь тень: “Кинь лангс несак Оймеялтонть валгоманзо ды велькссэнзэ аштеманзо, Се кармияк нававтомо Иневанькс Оймеялтсо”. 34 Мон тень неия ды, кода неицязо, яволявтан: Те – Пазонть Цёразо». 35 Омбоце чистэ Иоанн кавто тонавтницянзо марто ульнесь тосо. 36 Иоанн неизе вакска ютыця Иисусонь ды мерсь: «Ванодоя, Те Пазонь Вирезэсь». 37 Неть валтнэнь марязь, кавонест тонавтницятне тусть Иисус мельга. 38 Иисус велявтсь ды неинзе сынст мельганзо ютамодо, кевкстинзе: «Мезе тенк эряви?» Сынь каршозонзо мерсть: «Равви, – лиякс меремс, тонавтыця, – косо Тон эрят?» 39 Сон кортась тенст: «Моледе мельган ды несынк». Шказо ульнесь чи куншкань нилешка част. Сынь мольсть ды неизь, косо Сон эри, ды ульнесть кедьсэнзэ чинь-чоп. 40 Вейкесь кавтотнень эйстэ, конат Иоаннонь пельде марясть Иисусто ды тусть Сонзэ мельга, ульнесь Андрей, Симон Петрань ялаксозо. 41 Сон сеске вешнизе Симон лелянзо ды мерсь тензэ: «Минь муинек Мессиянть», лиякс, Христосонть. 42 Андрей ветизе Симононь Иисуснэнь. Иисус, лангозонзо варштазь, мерсь: «Тон Симонат, Ионань цёразо; тонеть кармить мереме Кефа», лиякс “кев”, Петра. 43 Омбоце чистэнть Иисус сайсь мель молемс Галилеяв. Сон вастызе Филипень ды мерсь тензэ: «Мольть мельган». 44 Филип ульнесь Бетсаидасто, Андреень ды Петрань марто ве ошсто. 45 Филип муизе Натанаилэнь ды ёвтась тензэ: «Минь муинек Сень, конадо Койсэнть сёрмадсь Моисей ды конадо сёрмадсть пазмарицятнеяк, – Иисусонь, Иосифень цёранзо, кона Назаретстэ». 46 Натанаил мерсь тензэ: «Арази эрсекшни Назаретстэ мезеяк паро?» Филип мери тензэ: «Азё ды ванык». 47 Иисус неизе малазонзо сыця Натанаилэнь ды мерсь сонзэ эйстэ: «Вана алкуксонь израилень ломань, конань эйсэ арась манчема». 48 Натанаил мерсь Тензэ: «Косто Тон монь содасамак?» Иисус каршозонзо мерсь: «Филипень тердемадо икеле, зярдо ульнить инжир чувто ало, Мон неитинь». 49 Сестэ Натанаил мерсь Тензэ: «Равви! Тон – Пазонь Цёрат, Тон – Израилень Инязорат». 50 Иисус ёвтась сонензэ тень каршо: «Тон кемат сень кувалт, мекс Мон меринь теть: “Мон неитинь инжир чувто ало”. Седе ламо кармат нееме». 51 Ды поладынзе валонзо: «Алкукс, алкукс кортан тенк: те чистэнть саезь тынь карматадо нееме панжовозь менеленть ды Пазонь ангелтнэнь, конатне кармить кузнеме-валгонеме Ломантнень Цёрантень».

2

1 Колмоце чистэнть Галилеянь Кана ошсо тешкстасть урьвакстомачи. Иисусонь авазояк тосоль. 2 Тов тердезель Иисускак тонавтницянзо марто. 3 Лиссь истя: винась прядовсь каванямо шкастонть. Сестэ Иисусонь авазо мерсь Тензэ: «Сынст винаст арась». 4 Иисус каршонзо ёвтась: «Вай, авай! Мекс Монень мелявтомс теде? Монь шкам зярс эзь са». 5 Авазо мерсь важотненень: «Тееде сень, мезе Сон мери тенк». 6 Тосо ульнесть веднень кевень кото кедьгеть, конат эрявильть евреень ванськавтома коень-кирдань коряс, эрьвась кавто-колмо онксонь кельгемашкаль. 7 Иисус мерсь важотненень: «Пештинк кедьгетнень ведте». Сынь пештизь пряс. 8 Сестэ Сон мерсь тенст: «Ней амольдядо тосто ды кандодо каванямонь ветицянтень». Сынь истя тейстькак. 9 Ветицясь варчизе веденть, кона теевсь винакс. Сон эзь сода, косто те винась, содасть ансяк важотне, ведень амолицятне. Сестэ ветицясь тердизе урьвакстыця цёранть 10 ды мерсь тензэ: «Эрьва ломанесь васняяк максокшны седе паро вина, зярдо жо инжетне симевить, сестэ седе беряненть. Тон вана седе паро винанть ванстык те шкас». 11 Истя Иисус Галилеянь Кана ошсо теизе Эсензэ васенце тамашанзо-диванзо. Тень вельде Сон невтизе Эсь инексчинзэ, ды тонавтницянзо кармасть кемеме Тензэ. 12 Теде мейле Иисус тусь аванзо, братонзо ды тонавтницянзо марто Капернаум ошов. Тосо сынь эрясть зярыя чить. 13 Малавгалесь евреень Инечись, секс Иисус сась Ерусалимев. 14 Сон неи: Пазонь кудонь пирявксонть потсо микшнить букат, реветь ды гулькат, озадо аштить ярмаконь полавтницят. 15 Сон тейсь пиксстэ локшо ды весень панинзе Пазонь кудонь пирявксонть потсто: реветненьгак, букатненьгак, ярмаконь полавтницятнень ярмакост сравтнинзе, столест сявордтнинзе. 16 Гулькань микшницятненень мерсь: «Саинк весе тень тестэ! Тетянь кудонзо илядо тейне микшнема-рамсема кудокс». 17 Се шкане тонавтницянзо ледстизь, мезе сёрмадозель Пазонь пельде Сёрмадовкссонть: «Пиемась-паломась Тонь кудот кисэ сэви Эйсэнь». 18 Сестэ евреень прявтнэ кевкстизь Сонзэ: «Кие Теть максызе азорксчинть истя тейнемс? Кодамо тамашасо невтьсак тень миненек?» 19 Иисус тень каршо мерсь тенст: «Яжинк те Пазонь кудонть, Мон колмо чис одов сонзэ стявтса». 20 Еврейтне тень каршо мерсть: «Те Пазонь кудось теезель ниленьгемень кото иень перть, а вана Тон колмо чис арсят сонзэ стявтомс?» 21 Ансяк Пазонь кудось, конадо кортась Иисус, ульнесь Сонзэ рунгозо. 22 Зярдо Сон вельмесь кулозьстэ, тонавтницянзо мельс ледсь те кортамось, ды сынь кармасть кемеме Сёрмадовксонтень ды сенень, мезде кортась Иисус. 23 Зярдо Сон ульнесь Ерусалимсэ Инечинь ютавтомсто, ламот кармасть кемеме Тензэ, секс мекс сынь неизь Сонзэ теевть тамашатнень. 24 Ансяк Сонсь Иисус Эсь прянзо ломантненень эзизе панжо, эдь Сон сынст содылинзе весень. 25 Сонензэ эзь эрявкшно ёвтниця седе, мезе ули ломаненть эйсэ, эдь Сонсь содась, мезе ули эрьванть седейсэ.

3

1 Фарисейтнень ютксо ульнесь вейке ломань, лемезэль Никодим, евреень прявтнэстэ вейкесь. 2 Сон сась Иисуснэнь веть ды мерсь тензэ: «Равви! Минь содатано, Тон тонавтыця, кона сась Пазонть пельде; истят тамашат, кодат Тон тейнят, киненьгак а теевить, а улиндеряй мартонзо Пазось». 3 Иисус тень каршо мерсь тензэ: «Алкукс, алкукс кортан теть: кие а чачи верде, сенень а нееви Пазонь Инязорксчись». 4 Никодим мерсь Тензэ: «Кода сыре ломанесь одов чачови? Арази сон омбоцеде совави аванзо потс ды чачтови?» 5 Иисус каршонзо ёвтась: «Алкукс, алкукс кортан теть: кие а чачи веденть ды Оймеялтонть пельде, се а совави Пазонь Инязорксчинтень. 6 Ломаньстэ чачозесь – те ломань, Оймеялтсто чачозесь – те оймеялт. 7 Иля дивсе сенень, мезе Мон ёвтынь теть: верде тенк чачома. 8 Вармась пуви, кува мелезэ, увтонзояк марясак, ансяк а содат, косто сы ды ков туи: истя жо эрси эрьванть марто, кие чачозь Оймеялтонть эйстэ». 9 Никодим кевкстизе Сонзэ: «Кода истя те эрси?» 10 Иисус тень каршо ёвтась тензэ: «Тон Израилень тонавтыцясь, ды тень вана а чарькодьсак? 11 Алкукс, алкукс кортан теть: минь кортатано седе, мезде содатано, ёвтнетянояк седе, мезе неинек; ансяк тынь минек ёвтнеманок а сайтядо мельс. 12 Мон ёвтнян тенк мода лангонь тевтнеде, тынь а кемтядо. Арази кемезевтядо, карминдерян кортамо менеленсетнеде? 13 Кияк эзь кузекшне менельс, ансяк Се, кона менельстэ валгсь, менельсэ эриця Ломантнень Цёрась. 14 Кода Моисей кепедизе чаво модасо пижестэ теезь гуенть, истя жо кепедевема Ломантнень Цёрантеньгак сень кисэ, 15 эрьвась, кона кеми Сонзэ эйс, илязо ёма, мекевланк улезэ тензэ пингеде пингень эрямо. 16 Эдь Пазось истя вечкилизе масторлангонть, мик максызе Эсензэ вейкине тиринь Цёранзо тень кисэ: эрьвась, кона кеми Сонзэ эйс, илязо ёма, мекевланк улезэ тензэ пингеде пингень эрямо. 17 Эдь Пазось кучизе Эсь Цёранзо масторлангов аволь судонь тееме – кучизе вельдензэ масторлангонть идеме. 18 Сонзэ эйс кемицясь а карми улеме судязь, акемицясь вана уш судязь сень кис, мекс эзь кеме Пазонь вейкине Цёрантень. 19 Судось ашти вана мейсэ: валдось сась масторлангов, ялатеке чоподась ломантненень вечкевсь валдодонть пек, эдь сынст тевест ульнесть зыяновт. 20 Ды эрьвась, кона теи берянь, а вечксы валдонть ды а моли валдос, пели зыянов тевензэ лангс лисемадост. 21 Видечинь коряс теицясь моли валдос невтеме эсь тевензэ, конат теезь Пазонть коряс». 22 Теде мейле сась Иисус Эсь тонавтницянзо марто Иудеянь масторс, эрясь тосо мартост зярыя шка ды нававтсь-лемдсь. 23 Иоаннгак нававтсь Айнонсо, Салим маласо, тосо ведесь покшоль. Ломантне сыльть тензэ пряст нававтомо. 24 Иоанн зярс апаколь пекста тюрьмас. 25 Весть Иоаннонь тонавтницянзо ды еврейтнень ютксо лиссь пелькстамо ванськавтовома койтнеде-кирдатнеде. 26 Тонавтницятне сестэ састь Иоаннэнь ды мерсть тензэ: «Равви! Се, кона ульнесь мартот Иорданонь тона чиресэ ды конань эйстэ тон ёвтнить-яволявтнить, Сонсь ней нававты, ды весе молить Тензэ». 27 Иоанн мерсь каршост: «Мезеяк ломанентень эстензэ а саеви, а улиндеряй максозь тензэ менельстэ. 28 Тынь тынсь тень неицят-марицят, мезенть мон ёвтыя: мон аволь Пазонь кучовт Идиця, мон кучозян Сондензэ икеле. 29 Се урьвакстыцясь, кинь экшс чиясть тейтерь. Урьвакстыцянть ялгазо вакссонзо аштемстэ ды эйсэнзэ кунсоломсто эрьгелезь эрьгели, зярдо марясы урьвакстыцянть вайгелензэ. Монь кенярксоськак, кона ней топавтовсь, истямо жо. 30 Сонензэ касома, монень вишкалгадома». 31 «Се, кона сы верде, – весемеде покш улияк; мода лангонсесь – модань улияк, кортыяк мода лангонь тевтнеде. Се, кона менельстэ сы, – весемеде покш. 32 Мезе Сон несь ды марясь, седе ёвтни, ансяк кияк мельс а саи Сонзэ валонзо. 33 Се, кона Сонзэ валонзо эсь мельс сайсынзе, теньсэ кемекстасы Пазонть видечинзэ. 34 Эдь Се, конань кучизе Пазось, корты Пазонь валт, ды Пазось апак онкста максы Эсь Оймеялтонзо. 35 Тетясь вечксы Цёранзо ды весементь максызе Сонзэ кедьс. 36 Цёранть эйс кемицянть ули пингеде пингень эрямозо. Кие Цёранть а кунсолы, се а несы эрямонть, ды Пазонь кежесь ули лангсонзо».

4

1 - 2 Фарисейтненень пачкодсь куля, келя Иисус Иоанндо ламо мельга молицят пурны ды нававты, – куш Иисус Сонсь а нававтыль, нававтсть ансяк тонавтницянзо. Зярдо Иисус марясь теде, 3 Сон кадызе Иудеянть ды таго тусь Галилеяв. 4 Сонензэ эрявкшнось ютамс Самариянь трокс. 5 Вана Сон сась Самариянь Сикарь ошс, кона аштесь а васоло се умадонть, конань Яков таго-зярдо макснизе эсь цёранстэнь, Иосифнень. 6 Тосо ульнесь Яковонь лисьмазо. Иисус ки лангонь сиземадонть озась те лисьманть ваксс. Шкась ульнесь чинь куншка. 7 Самариянь вейке ава сась лисьманть лангс ведь мельга. Иисус пшкадсь тензэ: «Макст Монень симемс». 8 Тонавтницянзо те шкастонть тукшность ошов ярсамопелень рамамо. 9 Самариянь авась кевкстизе: «Кода Тон, еврей, монь, самариянь авань, кедьстэ симемс вешат?» Тевесь сеньсэ, Иудеянь ды Самариянь ломантне а вейсэньгалить. 10 Иисус тень каршо мерсь тензэ: «Содындерявлить Пазонь казнеденть ды седе, кие веши кедьстэть симемс, тон тонсь вешевлить кедьстэнзэ, ды Сон максоволь теть эрямонь максыця ведь». 11 Авась мери Тензэ: «Парочи! Тонеть амольдямскак а мейсэ, лисьмаськак сэрей. Косто жо Тонеть саеви эрямонь максыця ведесь? 12 Арази Тон минек Яков тетядонок покшат, кона максызе тенек те лисьманть, ды симиль ведтензэ сонськак, симильть эйкакшонзояк, ракшанзояк?» 13 Иисус мерсь сонензэ тень каршо: «Эрьванть, кона симнекшни те ведтенть, сень таго симемазо сы. 14 Кие сими ведтенть, конань Мон максса тензэ, сень пингеде пингес симемазо а сы. Ведесь, конань Мон максса тензэ, тееви эйсэнзэ пингеде пингень эрямос чудиця лисьмапрякс». 15 Авась мери Тензэ: «Парочи! Макст монень те ведтенть, симемам а сакшномга ды тезэнь ведь мельга а якамга». 16 Иисус мери тензэ: «Азё, тердик мирдеть ды садо тей». 17 Авась мерсь тень каршо: «Монь арась мирдем». Иисус мерсь тензэ: «Видестэ ёвтыть, тонь арась мирдеть. 18 Тонь ульнесть вете мирдеть, ды се, кона марто ней эрят, аволь мирдеть. Тень видестэ тон ёвтык». 19 Авась мери Тензэ: «Парочи! Неса, Тон пазмарицят. 20 Минек покштяноккак сюконякшныльть те пандонть лангсо. Тынь, еврейтне, кортатадо, келя миненек эряви сюконякшномс Пазонтень Ерусалимсэ». 21 Иисус мери тензэ: «Кемть Монень, ава, сы шка, зярдо аволь те пандонть лангсояк, аволь Ерусалимсэяк карматадо сюконякшномо Тетянтень. 22 Тынь, самариянсетне, а содатадо, кинень сюконякшнотадо. Минь, еврейтне, содатано, кинень сюконякшнотано, эдь масторлангонь идемась сы еврейтнень эйстэ. 23 Ялатеке сы шка, ды сон уш сась, зярдо алкуксонь сюконицят кармить Тетянтень сюконякшномо Оймеялтонь ды видечинь коряс. Истят сюконицят Тетясь вешнияк Эстензэ. 24 Пазось – Оймеялт, Тензэ сюконицятнененьгак Оймеялтонь ды видечинь коряс сюконякшнома». 25 Авась корты Тензэ: «Содан, курок сы Мессия, конадо мерить Христос, а вана зярдо Сон сы, ёвтнесы тенек весементь». 26 Иисус мери тензэ: «Те Мон, кона корты мартот». 27 Те шкане Иисусонь тонавтницянзо састь мекев ды дивазевсть ава марто Сонзэ кортнемантень. Ансяк кияк эзь кевксте: «Мезе Тонеть эряви пельдензэ?» эли: «Мезде кортат мартонзо?» 28 Сестэ авась кадызе ведень кандома кедьгензэ, мольсь ошов ды мерсь ломантненень: 29 «Азёдо, ванынк ломаненть, конась ёвтызе тень весементь, мезе мон теинь: паряк, Сон Пазонь кучовт Идиця?» 30 Сынь лиссть ошстонть ды тусть Сонензэ. 31 Се шкане тонавтницянзо энялдозь кортасть Тензэ: «Равви, мездеяк ярсак». 32 Сон мерсь тенст: «Монь ули истямо ярсамопелем, конань тынь а содасынк». 33 Сестэ тонавтницятне кармасть кортамо эсь ютковаст: «Паряк кияк кандсь Тензэ ярсамс?» 34 Иисус мери тенст: «Монь ярсамопелем – топавтомс Монь Кучицянть мелензэ, прядомс Сонзэ максовт тевенть. 35 Нать тынк арась истямо валмеревкс: “Видьсак ды ниле ковонь ютазь нусак”? Мон жо кортан тенк: панжинк сельменк ды варштадо паксятнень лангс, сынь ашолгадсть, кенерсть нуемс. 36 Нуицянтень уш ней пандови питне ды сон пурны урожай пингеде пингень эрямос. Секс видицяськак, нуицяськак вейсэ кенярдкшномо кармить. 37 Тень кувалма виде валмеревксэсь: “Вейкесь види, лиясь нуи”. 38 Мон тынк кучидизь сень нуеме, мезес тынь вий эзиде путо: лият важодсть, тынь пурнынк сынст урожаест». 39 Самариянь се ошстонть ламот кармасть кемеме Тензэ аванть валонзо кувалт, кона ёвтнесь-яволявтнесь: «Иисус ёвтызе монень весементь, мезе зярдо-бути мон теинь». 40 Секскак, зярдо састь Сонензэ самариянь ломанть, сынь энялдсть икелензэ зярскак улемс кедьсэст. Сон ульнесь тосо кавто чить. 41 Сестэ седеяк ламот кармасть кемеме Сонензэ валонзо кувалт 42 ды кортасть се авантень: «Ней аволь тонь валот кувалт кемтяно. Минсь маринек ды карминек содамо, те ломанесь – алкукс, масторлангонь Идиця, Христос». 43 Кавто чинь ютазь Иисус лиссь тосто ды тусь Галилеяв. 44 Иисус Сонсь ёвтась: пазмарицянть а ловить чачи масторсонзо. 45 Ялатеке, зярдо Сон сась Галилеяв, Галилеянь ломантне паро мельсэ вастызь Сонзэ: сынь неизь весементь, мезе Сон тейсь Ерусалимсэ Инечинь покшчистэнть, эдь сыньгак ульнесть тосо. 46 Истя Иисус таго сась Галилеянь Кана ошов, косо веденть теекшнизе винакс. Тосо ульнесь инязоронтень вейке важодиця, конань сэредиця цёразо Капернаумсоль. 47 Сон марясь Иудеясто Галилеяв Иисусонь самодо, мольсь Тензэ ды энялдсь икелензэ: «Сак Капернаумов ды шумбралгавтык цёрам, кона кулома лангсо». 48 Иисус мерсь тензэ: «Тынь, ломантне, зярдояк а карматадо кемеме, а неиндерятадо дивань тешкст ды тамашань тевть». 49 Инязоронь важодицясь мерсь Тензэ: «Азором! Сак, зярс эзь куло цёрам». 50 Иисус мерсь: «Азё, цёрат карми эрямо». Сон кемезевсь Иисусонь валтнэнень ды тусь. 51 Кудов молемстэ сонзэ вастызь важонзо, ёвтасть: «Цёрат шумбра». 52 Сон кевкстинзе сынст: «Кодамо шкасто вадрялгадсь ёжозо?» Сонензэ мерсть: «Исяк чинь куншкань васенце чассто псись кадызе сонзэ». 53 Тень кувалма тетясь чарькодсь: те ульнесь се часстонть, конастонть Иисус мерсь тензэ: «Цёрат карми эрямо». Ды кармась кемеме сонськак, весе кудосонзотнеяк. 54 Те омбоце дивань тешксэнть Иисус теизе сестэ, зярдо мекев сась Иудеясто Галилеяв.

5

1 Теде мейле ульнесь евреень покшчи, ды Иисус сась Ерусалимев. 2 Ерусалимсэ, Ревень ортатнень вакссо, ули экшелямо тарка, лемезэ евреекс Ветезда, конань перька ульнесть вете галереят. 3 Сынст эзга мадезь аштесть пек ламо сэредицят: сокорт, чаморт, катардыцят, конат учнесть веденть чарамонзо. 4 Азоронь ангел шкань-шкань валгиль экшелямо таркантень ды чаравтылизе веденть. Кие васенцекс совиль ведентень чаракавтомадо мейле, се пичкиль, кодамо ормасо аволь сэреде. 5 Тосо ульнесь ломань, кона сэредсь колоньгемень кавксо иеть. 6 Иисус сонзэ мадезь аштемстэ неезь ды содазь: сон сэреди уш ламо иень перть, кевкстизе сонзэ: «Ули мелеть пичкамс?» 7 Сэредицясь пшкадсь каршонзо: «Парочи, монь арась ломанем, кона валтовлимим экшелямо таркантень, кода ведесь чаракады. Ансяк зярдо мон пачкодян, лия уш валги мондень икеле». 8 Иисус мерсь тензэ: «Стяк, саить ацамот ды якак». 9 Сон сеске шумбралгадсь, саинзе ацамонзо ды тусь. Те ульнесь оймсема чистэ. 10 Секс евреень прявтнэ мерсть шумбралгадозентень: «Течи оймсема чи, Коесь а мери теть ацамонь кандтнемадо». 11 Сон ёвтась каршост: «Кие монь шумбралгавтымим, се тень мерськак: “Саить ацамот ды якак”». 12 Сонзэ кевкстизь: «Кие Сон истямось, кона мерсь теть: “Саить ацамот ды якак”?» 13 Шумбралгавтозесь сонськак эзь сода, кие Сон, эдь Иисус ёматотсь ломантнень юткс, конат ульнесть се таркасонть. 14 Мейле Иисус сонзэ вастызе Пазонь кудонь пирявкс потсо ды мерсь тензэ: «Вана, тон ней шумбрат. Седе тов иля совсе пежетьс, аволь лисе мартот мезеяк седе берянь». 15 Те ломанесь мольсь ды ёвтась евреень прявтнэнень: сонзэ шумбралгавтызе Иисус. 16 Еврейтне кармасть панеме Иисусонь ды вешнесть маштомс Сонзэ сень кисэ, мекс Сон тейнесь истят тевть оймсема чистэ. 17 Иисус кортась тенст: «Монь Тетям свал тевть тейни ды Монгак истя тейнян». 18 Сестэ еврейтне седеяк пек кармасть бажамо маштомс Иисусонь. Эдь Сон колсесь аволь ансяк оймсема чинть, мик Пазонтькак ёвтызе Эсензэ Тетякс ды истямо ладсо Эсь прянзо теизе Пазонть марто вейкетькс. 19 Тень каршо Иисус мерсь: «Алкукс, алкукс кортан тенк: Цёрантень Эсь пельдензэ мезеяк а тееви, а неиндерясы, мезе теи Тетязо. Мезенть тейсы Тетясь, сень Цёразояк тейсы. 20 Эдь Тетясь вечксы Цёранть ды невтни Тензэ весементь, мезе Сонсь теи. Сон невти Тензэ нетнедеяк покш тевть, истят, конатнень лангс тынь карматадо дивсеме. 21 Кода Тетясь вельмевтни кулозтнень ды максы тенст эрямо, истя Цёраськак максы эрямо, кинень ули мелезэ. 22 Эдь Тетясь судгак киненьгак а теи, весе судонть максызе Цёранстэнь сень кисэ: 23 кадык весе ловсызь Цёрантькак истя, кода ловить Тетянть. Кие а лови Цёранть, се а лови Тетянтькак, кона Сонзэ кучизе. 24 Алкукс, алкукс, кортан тенк: кие Монь валом кунсолы ды Монь Кучицянтень кеми, сенень ули пингеде пингень эрямо. Сонензэ судскак а сама – сон уш ютась куломасто эрямос. 25 Алкукс, алкукс, кортан тенк: сы шка, ды уш саськак, зярдо кулозтне марясызь Пазонь Цёранть вайгелензэ. Ды сетне, конат марясызь, вельмить. 26 Кода Тетянть Эсензэ эйсэ ули эрямо, истя жо Цёрасонзояк ули эрямо, конань максызе Тензэ Тетясь. 27 Ды Сон макссь Тензэ азорксчи теемс судгак, эдь Сон – Ломантнень Цёра. 28 Илядо дивсе тенень: сы шка, зярдо весе кулозтне марясызь Пазонь Цёранть вайгелензэ. 29 Сынь лисить калмосто: паронь теицятне вельмить эрямо, берянень теицятне – судонь кирдеме. 30 Монень мезеяк а тееви Эсь пельдень. Кода марян, истя судян, ды Монь судось виде, эдь Мон а вешнян Эсень мель – вешнян Монь кучиця Тетянть мелензэ». 31 «Ёвтниндерян Монсь Эсень ланга, Монь ёвтнемам ули аволь виде. 32 Ули лия, кона Монь эйстэ ёвтни, ды Мон содан, виде се ёвтнемась, конаньсэ Сон Мондень корты. 33 Тынь кучниде ломанть Иоаннэнь, ды сонгак ульнесь видечиденть ёвтницякс. 34 Ялатеке Монень а эрявить ломанень пельде ёвтнемат-кемекстамот, кортан тень ансяк идевеманк кисэ. 35 Иоанн ульнесь прок лампа, палыця ды вандолдыця, ды тынк ульнесь меленк зярскак кецнемс сонзэ валдосонзо. 36 Монь ули лия кемекстамом, кона Иоаннонь кемекстамодонть кемевикс: те тевтне, конатнень Тетям максынзе Тень топавтомс. Неть тевтне, конатнень Мон топавтан, сынсь ёвтнить Мондень кода Тетянь кучовтонзо эйстэ. 37 Мондень ёвтнесь Сонсь Тетямгак, кона кучимим. Тынь Сонзэ вайгелензэ зярдояк эзинк марсе, чаманзояк эзинк некшне. 38 Тынь истя жо а вансттадо Сонзэ валонзо эсенк седейсэ, эдь тынь а кемтядо Сенень, кинь Сон кучизе. 39 Тынь тонавтнетядо Пазонь пельде Сёрмадовкстнэнь, эдь тынь арсетядо сынст вельде пачкодемс пингеде пингень эрямос. Ансяк сыньгак ёвтнить Монь эйстэ. 40 Ялатеке тынк арась меленк самс Монень, кинь вельде максоволь тенк эрямо. 41 Монень а эряви шнамо ломанень пельде. 42 Мон тынк содатадызь: тынк седейсэнк Пазонтень вечкема арась. 43 Мон сынь Монь Тетянь лемсэ, тынь ялатеке а васттадо Монь. Сындеряй лия эсь лемсэнзэ, сень парсте вастсынк. 44 Кода кемезевтядо Монень, зярдо вейке вейкень пельде шнамот сайтядо, ансяк а вешнетядо се шнамонть, кона вейкине Пазонть пельде? 45 Илядо арсе седе: Мон карман чумондомонк Тетянть икеле. Ули тенк чумондыця, Моисей, конань лангс тынь умок нежедтядо. 46 Кемевлидеяк Моисейнень, сестэ кемевлиде Моненьгак, эдь сон сёрмадсь Мондень. 47 А кеминдерятадо сонзэ сёрмадомантень, кода сестэ кемезевтядо Монь валозон?»

6

1 Теде мейле Иисус тусь Галилеянь, лиякс Тивериадань, эрькенть томбалев. 2 Ламо ломанть тусть мельганзо, эдь сынь неизь тамашатнень, конатнень Сон тейнесь сэредицятнень шумбралгавтнезь. 3 Иисус кузсь пандо пряс ды тосо озась тонавтницянзо марто. 4 Малавгалесь евреень Инечинь шкась. 5 Зярдо Иисус кепединзе сельмензэ ды неинзе сонзэ пелев молиця ламо ломантнень, кевкстизе Филипень: «Косто сынст андомга рамамс тенек кши?» 6 Ансяк Сон ёвтызе тень Филипень варчавтнеманзо кисэ; эдь Сонсь уш содась, мезе карми тееме. 7 Филип тень каршо мерсь Иисуснэнь: «Бути эрьвантень ансяк аламнень-аламнень максомс, сестэ сыненст кавтосядт динаронь питнесэ кшиськак а саты». 8 Сестэ тонавтницянзо ютксто лиясь, Андрей, Симон Петрань ялаксозо, мерсь Тензэ: 9 «Тесэ вейке цёрынень улить шужонь вете кшинзэ ды кавто калнэнзэ. Ансяк зяронень те мезе?» 10 Иисус мерсь: «Ойсевтинк ломантнень». Се таркась ульнесь пек тикшев ды весе ойсесть тикшенть лангс. Тосо ульнесть цёра ломантнеде ветешка тёжат. 11 Иисус саинзе кшитнень ды, Пазонтень сюкпрянь ёвтазь, явшинзе тонавтницятненень, тонавтницятне явшесть озадотненень. Истя Сон явинзе калнэтненьгак, ды эрьвась сайсь кинь зяро мелезэ. 12 Кода пешкедсть, Иисус мерсь Эсензэ тонавтницятненень: «Пурнынк кадовикс сускомотнень, мезеяк илязо ёма». 13 Пурнызь ды пештясть кемгавтово куйметь сускомотнесэ, конат кадовсть шужонь вете кшитнестэ ярсыцятнеде мейле. 14 Сестэ ломантне, Иисусонь теевть тамашанть неезь, мерсть: «Те алкукс се пазмарицясь, конанень сама масторлангов». 15 Иисус кармась содамо ломантнень арсемадост: сынст ульнесь мелест самс, каподемс Сонзэ ды теемс инязорокс. Секс Сон таго тусь пандо пряв ськамонзо. 16 Зярдо сась чокшнесь, Иисусонь тонавтницянзо валгсть эрькенть чирес, 17 озасть венчес ды тусть эрькенть трокс Капернаумов. Уш чопотетсь, Иисус яла эзь сакшно ваксозост. 18 Пувась виев варма, эрькесь лымбакстнесь. 19 Зярдо сынь уйсть ветешка эли котошка вайгельбеть, сестэ неизь Иисусонь веденть ланга ютамсто ды венчест малас пачкодемстэ. Сынь тандадсть. 20 Сон мерсь тенст: «Те Мон, илядо пеле». 21 Тонавтницятне саиксэлизь Сонзэ венчес, ансяк венчесь сеске пачкодсь се чирентень, ков сынь уйсть. 22 Омбоце чистэнть ломантне, конат аштесть эрькенть те пеле, неизь: тосо ульнесь ансяк вейке венч, ков озасть Сонзэ тонавтницянзо, лия арасель. Иисус жо тонавтницянзо марто венчентень эзь ойсе, тонавтницятне тусть ськамост. 23 Те шкастонть састь Тивериадасто лия венчт се тарканть малас, косо Азорось ёвтась сюкпря Пазонтень ды косо кшиде андынзе ломантнень. 24 Зярдо ломантне неизь: арась тесэ Иисускак, тонавтницянзояк, сестэ сынь ойсесть венчкаст ды тусть Капернаумов Иисусонь вешнеме. 25 Зярдо муизь Иисусонь эрькенть тона пельде, кевкстизь Сонзэ: «Равви, зярдо Тон тезэнь сыть?» 26 Иисус мерсь каршост: «Алкукс, алкукс кортан тенк: тынь вешнетядо Монь аволь секс, мекс неиде тамашат, а вана секс, мекс ярсыде кшиде ды пешкедиде. 27 Правтодо аволь наксадыця-колиця ярсамопель мельга, мекевланк, се ярсамопеленть мельга, кона зярдояк а наксады ды кона максы пингеде пингень эрямо. Те ярсамопеленть кази тенк Ломантнень Цёрась, эдь Сонзэ лангс Тетя Пазось путызе эсь кемекстамо тешксэнзэ». 28 Сестэ сынь кевкстизь Сонзэ: «Мезе тенек теемс Пазонь тевтнень топавтомга?» 29 Иисус тень каршо мерсь тенст: «Кемеде Сенень, конань Сон кучизе. Те улияк Пазонь тев». 30 Тень лангс мерсть Тензэ: «Кодамо Тон теят дивань тешкс, конань неезь минь кемезевлинек Теть? Мезе Тон теят? 31 Минек покштянок ярсасть чаво модасо ярсамопельде, конанень мерсть манна. Тень эйстэ сёрмадозь истя: “Сон макссь тенст ярсамс кши менельстэ”». 32 Иисус мерсь тенст: «Алкукс, алкукс кортан тенк: аволь Моисей максызе тенк кшинть менельстэ – Монь Тетям максы тенк алкуксонь кши менельстэ. 33 Эдь Пазонь кшись се, кона валги менельстэ ды максы масторлангонтень эрямо». 34 Сынь мерсть Тензэ: «Парочи! Макснек тенек свал истямо кши». 35 Иисус мерсь тенст: «Мон – эрямонь кшиян. Монень сыцясь а вачоми, Монь эйс кемицянть симемазо а сы зярдояк. 36 Ансяк кода Мон уш кортынь тенк: тынь Монь неимизь ды ялатеке а кемтядо. 37 Весе, кинь максы Тень Тетясь, Монень сыть, ды Монень сыцянть зярдояк а паньса. 38 Эдь Мон валгинь менельстэ аволь Эсь мелень – Монь кучиця Тетянть мелензэ топавтомо. 39 А вана Монь кучиця Тетянть мелезэ истямо: сетнень эйстэ, конатнень Сон Монень максынзе, киньгак Тень а ёмавтомс, весень вельмевтемс меельце чистэнть. 40 Эдь Монь Кучицянть мелезэ се: эрьвантень, кона несы Цёранть ды кеми Сонзэ эйс, улевель пингеде пингень эрямо, ды Мон сонзэ вельмевтьса меельце чистэнть». 41 Еврейтне музгордсть лангозонзо сень кисэ, мекс Сон мерсь: «Мон се кшись, кона валгсь менельстэ». 42 Сынь кортасть: «Нать те аволь Иисус, Иосифень цёразо, конань тетянзояк, аванзояк минь содасынек? Кода эно ней Сон корты: “Мон валгинь менельстэ”?» 43 Иисус мерсь сыненст тень каршо: «Илядо музгорде эсь юткованк. 44 Кияк Монень а сави, а ветиндерясы Тетясь, кона Монь кучимим, ды Мон сонзэ вельмевтьса меельце чистэнть. 45 Пазмарицятнень вельде сёрмадозь: “Весемень тонавтсынзе Пазось”. Эрьвась, кие кунсолы Тетянь ды тонавтни пельдензэ, сы Монень. 46 Кияк Тетянть эзизе нее, Пазонть пельде Сыцядонть башка: ансяк Сон неизе Тетянть. 47 Алкукс, алкукс, кортан тенк: кие кеми Монь эйс, сенень ули пингеде пингень эрямо. 48 Мон эрямонь кшиян. 49 Тынк покштянк ярсасть маннадо чаво модасо, ялатеке кулсесть. 50 Кшись, кона валги менельстэ, истямо: эйстэнзэ ярсыцясь зярдояк а кулы. 51 Мон эрямонь кшись, кона валгсь менельстэ. Те кшиденть ярсыцясь карми эрямо пингеде пингес. Кшись, конань Мон максса – Монь рунгом. Ды Мон максса сонзэ масторлангонть эрямонзо кисэ». 52 Сестэ еврейтне пелькстазевсть эсь ютковаст: «Кода Сонензэ Эсь рунгозо максови миненек ярсамс?» 53 Иисус мерсь тенст: «Алкукс, алкукс кортан тенк: а карминдерятадо ярсамо Ломантнень Цёранть рунгодонзо ды симеме Сонзэ вердензэ, а ули эйсэнк эрямо. 54 Рунгодон ярсыцянтень ды вердень симицянтень максови пингеде пингень эрямо, ды Мон вельмевтьса сонзэ меельце чистэнть. 55 Эдь Монь рунгом – алкукс ярсамопель, ды Монь верем – алкукс симемапель. 56 Рунгодон ярсыцясь ды вердень симицясь эри-ашти Монь эйсэ, Монгак сонзэ эйсан. 57 Монь кучимим эриця Тетясь, ды кода Мон эрян Тетянть вельде, истя Мондень ярсыцяськак карми эрямо Монь вельде. 58 Те улияк кшись, кона валгсь менельстэ. Те аволь се манна кшись, конадо ярсасть тынк покштянк ды ялатеке кулсесть. А вана те кшиденть ярсыцясь карми эрямо пингеде пингес». 59 Теде кортась Иисус синагогасо тонавтомсто, Капернаумсо. 60 Тень марязь ламот Сонзэ тонавтницятнестэ кортасть: «Кодамо стака тонавтомась! Кинень сон саеви мельс-превс?» 61 Иисус, Эсь потмованзо содазь, мезе лангс музгордить тонавтницянзо, мерсь тенст: «Нать те кавтолдовты кемеманк? 62 Мезе жо ули сестэ, неиндерясынк Ломантнень Цёранть тов кепедевемстэ, косо Сон ульнесь икеле? 63 Эрицякс теи Пазонь Оймеялтось, ломанень виесь теньсэ а лезды. Валтнэ, конатнень Мон кортан тенк, оймеялт ды эрямо. 64 Ансяк улить тынк ютксо акемицяткак». Иисус уш икелев содыль, кить акемицятне, кие мисы Сонзэ. 65 Иисус мерсь: «Сень кисэ Мон кортыньгак тенк: кияк а сави Монень, а улиндеряй те максозь тензэ Монь Тетянь пельде». 66 Те шкастонть саезь, ламот Сонзэ мельга молицятнеде явсть эйстэнзэ ды уш эзть яка мартонзо. 67 Сестэ Иисус мерсь кемгавтовотненень: «Паряк тынккак меленк туемс Монь эйстэ?» 68 Симон Петра мерсь каршонзо: «Азором! Кинень эно миненек молемс? Тонь улить пингеде пингень эрямонь валот, 69 ды минь кемтяно ды содатано: Тон – Пазонь кучовт Идицят, эри Пазонть Цёразо». 70 Иисус мерсь тенст: «Мон Монсь кочкидизь тынк, кемгавтовотнень. Ялатеке вейкесь эйстэнк – идемевсь». 71 Те кортась Сон Иудадо, Симон Искариотонь цёрадонзо, кона ульнесь кемгавтовотнестэ вейкекс. Эдь сон арсесь миемс Иисусонь.

7

1 Теде мейле Иисус якась Галилеява, Сонзэ арасель мелезэ якамс Иудеява, эдь евреень прявтнэ вешнесть шка маштомс Сонзэ. 2 Малавгалесь евреень тарад латынень стявтнема покшчись. 3 Сестэ Сонзэ братонзо мерсть Тензэ: «Тонеть эряви туемс тестэ ды молемс Иудеяв, кадык Тонь тонавтницятнеяк несызь тевтнень, конатнень теят. 4 Кияк а тейни мезеяк салава, улиндеряй мелезэ теевемс содавиксэкс. Бути Тон тейнят истят тевть, невтик Эсь прят мирэнтень-масторонтень». 5 Эдь Сонзэ братонзояк эзть кеме Тензэ. 6 Тень каршо Иисус мерсь сыненст: «Монь шкам зярс эзь са, тыненк жо свал шка. 7 Тынк лангс масторлангонь ломантненень а сави кирдемс кеж, Монь вана а вечксамизь, мекс Мон сынст берянь тевтнеде яволявтнян. 8 Тынь азёдо те покшчинтень, Мон тов а молян, Монь шкам зярс эзь са». 9 Сон тень ёвтызе сыненст ды кадовсь Галилеяс. 10 Зярдо братонзо састь покшчинтень, сестэ Иисускак сась тов, ансяк аволь неявиксстэ, салава ладсо. 11 Евреень прявтнэ вешнесть Эйсэнзэ покшчинть ютавтомсто ды кортасть: «Косо Сон?» 12 Ламо тошксемат ульнесть Иисусонь кувалт ломантнень ютксо. Веенст кортасть: «Сон паро ломанесь», лият кортасть: «Аволь, Сон манчи ломантнень». 13 Теке марто кияк марямга эзь корта Эйстэнзэ, пельсть евреень прявтнэде. 14 Зярдо уш ульнесь покшчинь куншка, Иисус совась Пазонь кудос ды кармась тонавтомо. 15 Евреень прявтнэ дивсесть ды кевкстнесть: «Косто Сон апак тонавтне содасынзе Пазонь пельде Сёрмадовкстнэнь?» 16 Иисус каршост мерсь: «Монь тонавтомась аволь Монсень – Монь Кучицянть. 17 Кие бажи Сонзэ меленть топавтомс, се карми содамо те тонавтомадонть: Пазонть пельде сон, эли Мон Эсень пельде кортан. 18 Сонсь эсензэ пельде кортыцясь вешни шнамот эстензэ. Кие вешни шнамо Эсь Кучицянстэнь, се алкуксонь, арась авидечи Сонзэ эйсэ. 19 Арази Моисей эзь максо тенк Кой? Ансяк кияк эйстэнк Коенть коряс а теи. Мезень кисэ жо арсетядо Монь маштомс?» 20 Ломантне каршонзо мерсть: «Паряк, идемевсь Эйсэть? Кие арси Тонь маштомс?» 21 Иисус, Эсь валонзо поладозь, мерсь тенст: «Вейке тамаша Мон теинь оймсема чистэ, ды весе тынь дивсетядо. 22 Моисей макссь тенк цёрань киськепень керявтома, куш сон аволь Моисеень пельдеяк, сон ине покштятнень пельде. Ды тынь оймсема чистэяк тейнетядо керявтома цёра эйкакштнэнень. 23 Бути, Моисеень Коенть а коламга, цёра эйкакшось оймсема чистэяк керявтови, – монь лангс мейс ацирьгалетядо сень кисэ, мекс Мон весе ломаненть шумбралгавтыя оймсема чистэ? 24 Илядо судя лангс ванозь, судядо видечинь судсо». 25 Конат-конат ерусалименсетнестэ кортасть: «Арази Сон аволь се, конань вешнить маштомс? 26 Вана, Сон корты апак кекшне, ды мезеяк а мерить каршонзо. Паряк, прявтнэ кармасть содамо: Сон алкукс Пазонь кучовт Идиця? 27 Минь жо содасынек Сонзэ, костонь Сон. Зярдо сы Пазонь кучовт Идицясь, кияк а карми содамо, косто Сон сась». 28 Сестэ Иисус Пазонь кудосонть тонавтомсто марявиксстэ яволявтсь: «Вана, тынь содасамизь Монь, мик содатадо, костонян?! Мон сынь аволь Эсень пельде, Монь кучимим Се, кона алкуксонь. Ансяк тынь Сонзэ а содасынк. 29 Мон содаса Сонзэ, эдь Мон Сонзэ пельде, Сон кучимимгак Монь». 30 Сестэ ульнесь мелест кундамс Сонзэ, ансяк кияк эзь кепеде каршозонзо кедь, эдь яла эзь сакшно Сонзэ шказо. 31 Ломантнестэ ламот кемезевсть Сонензэ ды кортасть: «Зярдо сы Пазонь кучовт Идицясь, арази Сон теи седе ламо тамашат, зяро Те тейсь?» 32 Зярдо фарисейтне маризь ломантнень ютксо Иисусто истят кортамотнень, сестэ сынь ды попонь покштнэ кучсть Пазонь кудонь ванстыцят Сонзэ кундамо. 33 Иисус мерсь тенст: «А куватьс кадовсь улемс Монень тынк марто. Курок Мон туян Сенень, кие Монь кучимим. 34 Карматадо Монь вешнеме, а мусамизь. Косо улян Мон, тов тынь а савтадо». 35 Сестэ евреень прявтнэ кортасть эсь ютковаст: «Ков Сонзэ мелезэ туемс истя, натой миненек Сон а муевияк? Паряк, Сон арси туемс минек ломантненень, конат эрить гректнень ютксо, ды тонавтомс гректнень? 36 Мезде кортыть неть валтнэ, конатнень Сон ёвтынзе: “Карматадо Монь вешнеме, а мусамизь” ды “Косо улян Мон, тов тынь а савтадо”?» 37 Покшчинь меельце сехте ине чистэнть Иисус стясь ды марявиксстэ мерсь: «Кинь симемазо сась, се сазо Монень ды симезэ. 38 Кие кеми Монень, кода ёвтазь Пазонь пельде Сёрмадовкссонть, сень эйстэ кармить чудеме эрямо ведень лейть». 39 Тень Сон ёвтызе Оймеялтонть эйстэ, кона карми улеме максозь Сонензэ кемицятненень. Ансяк Иневанькс Оймеялтось сынст лангсо яла арасель, секс мекс Иисус яла эзь ульне кепедезь инексчис. 40 Неть валтнэнь марязь, ломантнестэ ламот мерсть: «Сон алкукс се пазмарицясь». 41 Омбонстнэ кортасть: «Те – Пазонь кучовт Идиця». Лият кортасть: «Галилеясто Пазонь кучовт Идицясь, нама, а сы! 42 Эли апаколь ёвта Пазонь пельде Сёрмадовкссо: Пазонь кучовт Идицясь сы Давид инязоронть раськестэ ды Вифлеем велестэ, секе таркастонть, косто ульнесь Давид?» 43 Истя лиссть Сонзэ кувалма ломантнень ютксо явновомат-пелькстамот. 44 Конатнень-конатнень ульнесь мелест кундамс Сонзэ, ансяк киненьгак эзь кепедеве лангозонзо кедь. 45 Зярдо Пазонь кудонь ванстыцятне састь мекев попонь покштнэнень ды фарисейтненень, сетне кевкстизь сынст: «Мекс эзинк ветя Сонзэ?» 46 Пазонь кудонь ванстыцятне каршост мерсть: «Зярдояк вейкеяк ломань эзь корта истя, кода Те ломанесь». 47 Фарисейтне мерсть тенст: «Арази тыньгак максынк прянк манямс? 48 Нать кияк прявтнэнь эли фарисейтнень эйстэ кемезевсь Сонзэ эйс? 49 А вана неть истяконь ломантне а содасызь Коенть: сынь весе сюдозь-эрдекстазь». 50 Никодим, фарисейтнестэ вейкесь, кона веть сакшнось Иисуснэнь, кевкстинзе сынст: 51 «Тееви-арась минек Коень коряс суд ломанентень, икелев Сонзэ апак кунсоло ды апак сода, мезе Сон тейсь?» 52 Тень каршо мерсть тензэ: «Тонгак, паряк, Галилеясто? Тонавтнек Пазонь пельде Сёрмадовкстнэнь ды несак: Галилеясто пазмариця а сы». 53 Весе сралесть эсь кудоваст.

8

1 Иисус жо тусь Ойумарькс пандо пряв. 2 Ашолгадома шкасто Сон таго сась Пазонь кудонь пирявксонть потс, ды весе ломантне мольсть Тензэ. Сон озась ды кармась тонавтомост. 3 Тесэ Койс тонавтыцятне ды фарисейтне ветясть Тензэ ава, кона кундазель ускурямсто, стявтызь сонзэ куншкас 4 ды мерсть Иисуснэнь: «Тонавтыця! Те авась кундазь ускурямсто. 5 Моисей Койсэнть кармавтсь тенек чавномс истятнэнь кевсэ, а вана Тон мезть мерят?» 6 Сынь кортасть тень Сонзэ снартнеманзо-варчавтнеманзо кисэ, мейсэяк кундамс Сонзэ ды чумондомс. Иисус жо комась ды сёрмадсь сурсонзо моданть лангс лангозост мелень апак яво. 7 Ансяк сынь ялатеке апак лотксе кевкстнесть Сонзэ. Сестэ Сон кепедизе прянзо ды мерсь тенст: «Кие эйстэнк пежеттеме, се васенцекс ёртозо лангозонзо кев». 8 Ды Сон таго, комадонь прят, сёрмадсь моданть лангс. 9 Сынь, тень марязь, ды оймеёжосост чумондозь, кармасть тукшномо вейке омбоце мельга, васенцекс тусть сехте сыретне. Кадовсь ансяк Иисус ды куншкас аравтозь авась. 10 Иисус кепедизе прянзо ды авадонть башка киньгак апак нее мерсь тензэ: «Ава, косо тонь чумондыцятне? Кияк тонь эзинзеть чумондо?» 11 Сон каршонзо мерсь: «Кияк, парочи!» Иисус мерсь тензэ: «Монгак тонь а чумондтан. Азё ды икелепелев пежетьс иля совсе». 12 Иисус таго кортась ломантненень: «Мон – масторлангонть валдозо. Кие моли Монь мельга, се а карми якамо чоподасо, сень карми улеме эрямонь валдозо». 13 Сестэ фарисейтне мерсть тензэ: «Тон Тонсь Эсеть эйстэ ёвтнят, секс Тонь валот а видеть». 14 Иисус тень каршо мерсь сыненст: «Бути Мон Монськак Эстедень ёвтнян, ялатеке Монь валон алкуксонь, эдь Мон содан, косто сынь ды ков Мон молян. Тынь жо а содатадо, косто Мон ды ков молян. 15 Тынь судонть тейтядо лангс ванозь. Мон суд а теян киненьгак. 16 Теиндерянгак Мон суд, Монь судом виде, эдь Мон аволь ськамон – Монь марто Тетям, Монь Кучицясь. 17 Тынк Коенть эйсэяк сёрмадозь: кавто ломаненть вейкетьстэ ёвтамось ловови видекс. 18 Мон Монсь яволявтнян Эсень эйстэ, ды яволявтни Монь эйстэ Тетямгак, Монь Кучицясь». 19 Сынь кевкстизь Сонзэ: «Косо тонь Тетят?» Иисус тень каршо мерсь: «Тынь а содасамизь Моньгак, Тетяньгак. Бути содавлимизь Монь, сестэ содавлинк Тетяньгак». 20 Неть валтнэнь кортась Иисус ярмаконь каямо горобиянть вакссо, Пазонь кудосо тонавтомсто, ды кияк Сонзэ эзизе кунда, секс мекс Сонзэ шказо яла эзь сакшно. 21 Иисус таго мерсь тенст: «Мон туян. Тынь карматадо Монь вешнеме, ансяк кулсетядо пежетенк потс. Ков Мон молян, тов тынь а савтадо». 22 Тесэ евреень прявтнэ кортасть: «Арази Сон Сонсь пурны Эсь прянзо маштомо, улема, секс корты: “Ков Мон молян, тов тынь а савтадо”?» 23 Сон мерсь тенст: «Тынь тестэ, модалангстонть, кона ало, Мон жо сынь верде. Тынь те масторлангонть эйстэ, Мон аволь те масторлангонть эйстэ. 24 Секс Мон мериньгак тенк: тынь кулсетядо пежетенк потс. А кеминдерятадо, Мон улян, кие Мон улян, кулсетядо пежетенк потс». 25 Сестэ кевкстизь Сонзэ: «Кият эно Тон?» Иисус мерсь тенст: «Мон – ушодома шкасто Улицясь, кода кортангак тенк. 26 Монь улить ламо кортамон ды судямо валон тынк эйстэ. Ансяк Монь Кучицясь виде, ды Мон, мезе маринь Сонзэ пельде, сень кортангак тыненк, масторлангонсетненень». 27 Сон кортась тенст менелень Тетянзо эйстэ, ансяк сынь эзизь чарькоде. 28 Сестэ Иисус мерсь тенст: «Кода кепедьсынк Ломантнень Цёранть, сестэ чарькодтядо, Мон улян, кие Мон улян, ды мезеяк а теян Эсень пельде, ансяк мезес Тетям тонавтымим, сень кортангак. 29 Монь Кучицясь мартон. Сон эзимим кадо ськамон, эдь Мон свал теян сень, мезе тукшны Сонзэ мельс». 30 Зярдо Иисус кортась тень, ламот кемезевсть Сонензэ. 31 Сестэ Иисус мерсь еврейтненень, конат кемезевсть Сонзэ эйс: «Кирдевиндерятадо Монь валсон, сестэ тынь алкукс Монь тонавтницян, 32 тынь чарькодьсынк видечинть, ды видечись тынк олякстомтадызь». 33 Сынь каршонзо мерсть: «Минь Авраамонь раськень-буень поладыцят, минь эзинек ульне урекс киненьгак зярдояк. Кода эно Тон кортат: минь ультяно оляксчисэ?» 34 Иисус мерсь тенст: «Алкукс, алкукс кортан тенк: эрьвась, кона пежетьс сови, пежетенть урезэ. 35 Ансяк уресь а эри кудосо пингезэнзэ; цёрась жо эри тосо пингезэнзэ. 36 Истя, ливтиндерятадызь Цёрась урексчистэ, алкукс олячисэ ультядо. 37 Содаса, тынь Авраамонь буень поладыцят. Ялатеке вешнетядо Монь маштоман, секс мекс Монь тонавтомам а превс а седейс а саеви тенк. 38 Мон кортан седе, мезе неинь Тетянь кедьсэ; тыньгак тейтядо сень, мезе неиде эсь тетянк кедьсэ». 39 Еврейтне мерсть Иисуснэнь тень каршо: «Минек тетянок – Авраам». Сон мерсь тенст: «Улевлидеяк Авраамонь эйкакшт, теевлиде Авраамонь тевть. 40 Ней вана саиде мель маштомс Монь, ломаненть, кона тыненк ёвтни видечи, се видечинть, конань Мон мария Пазонть пельде. Авраам истя эзь тейне. 41 Тынь тейнетядо эсь тетянк тевензэ». Тень лангс мерсть Сонензэ: «Минь аволь ускурявксонь чачовттано; минек вейке тетянок, Пазось». 42 Иисус мерсь тенст: «Улевельгак Пазось тынк тетянк, вечкевлимизь Монь, эдь Мон Пазонть пельде лисинь ды сынь. Мон аволь Эсень пельде сынь – Пазось кучимим Монь. 43 Мекс тынь а чарькодтядо, мезе Мон кортан тенк? Секс мекс тынк арась меленк кунсоломс Монь валон. 44 Тынь – тетяка левкст, Идемевсень эйкакшт, тынь бажатадо эсенк тетянть мелензэ топавтомо. Сон свал ульнесь ломань маштниця ды эзь кирдеве видечисэнть, эдь арась сонзэ эйсэ видечи. Зярдо кенгели, сон теке ведьсэ кал, эдь сон кенгелиця ды кенгелеманть тетязо. 45 Мон жо кортан видечи, секскак тынь а кемтядо Монень. 46 Арази киненьгак эйстэнк Мон чумондован пежетенть кисэ? Бути Мон кортан видечи, мекс тынь а кемтядо Монень? 47 Кие Пазонть пельде, се кунсолы Пазонь валтнэнь. Тынь аволь Пазонть пельде, секс а кунсолотадо». 48 Тень лангс еврейтне мерсть Иисуснэнь: «Арази минек валонок аволь видеть: Тон – самариянь ломанят ды Тонь эйсэ идемевсь?» 49 Иисус мерсь: «Монь эйсэ идемевсь арась. Мон Эсень Тетянть лован, ансяк тынь вана позорятадо Монь. 50 Мон а вешнян Эстень шнамо: ули Лия, кона вешни ды видестэ суди. 51 Алкукс, алкукс кортан тенк: кие топавтсы Монь валом, се а кулы пингеде пингес». 52 Еврейтне мерсть Тензэ: «Ней чарькодинек, Тонь эйсэ идемевсь. Авраамгак кулось, пазмарицятнеяк, а вана Тон кортат: “Кие топавтсы Монь валом, се а кулы пингеде пингес”. 53 Нать Тон седе ине Авраам тетядонок, кона кулось? Пазмарицятнеяк кулость. Тон жо мезекс Эсь прят ловат?» 54 Иисус каршост мерсь: «Бути Мон Монсь инелгавтневлия-шнавлия Эсь прям, те мезекскак аволь аште. Ней жо Монь инелгавтни Тетям, конань эйстэ тынь кортатадо, келя Сон тынк Пазонк. 55 Тынь а содасынк Сонзэ, Мон жо содаса. Мериндерян, а содаса, сестэ улян тынк кондямо кенгелицякс. Ансяк Мон содаса Сонзэ ды валонзояк топавтан. 56 Авраам тетянк кенярдкшнось сенень: сонензэ сави неемс Монь чинть. Сон неизе ды кецясь». 57 Тень лангс еврейтне мерсть Тензэ: «Тонеть арасть оштё ведьгемень иетькак, ды Тон неик Авраамонь?» 58 Иисус мерсь тенст: «Алкукс, алкукс кортан тенк: Авраамонь чачомадо икеле Мон уш ульнинь». 59 Сестэ сынь сайсть кевть ды ёртыксэлизь Сонзэ лангс. Ансяк Иисус лиссь Пазонь кудостонть, ютась ютковаст седе тов ды ёматотсь.

9

1 Ютамсто Иисус несь ломань, сокор чачома шкастонзо. 2 Тонавтницянзо кевкстизь Сонзэ: «Равви, мекс сон сокорсто чачсь? Кие совась пежетьс: сонсь эли тетянзо-аванзо?» 3 Иисус каршост мерсь: «Аволь сонзэ, аволь тетянзо-аванзо пежетнесэ тевесь. Сон чачсь сокорокс, сонзэ лангсо Пазонь тевтнень невтемаст кисэ. 4 Монень эряви теемс Монь Кучицянть тевензэ, зярс чи. Сы ве, сестэ киненьгак мезеяк а тееви. 5 Зярс Мон масторлангсан, Мон – масторлангонь ломантненень валдо». 6 Тень мерезь, Сон сельгсь мода лангс, сельгевксэнть эйстэ тейсь рудазнэ, те рудазнэсэнть ваднинзе сокоронть сельмензэ 7 ды мерсь тензэ: «Азё, шляк Силоам экшелямо таркасонть». – Силоам валонть смустезэ: кучовт. – Сон мольсь, шлясь ды сась мекев неицякс. 8 Шабратне ды сетне, конат сонзэ некшнизь икеле сокорокс, кевкстнесть вейкест-вейкест: «Те аволь се, кона озадо аштиль ды лезкске вешиль?» 9 Веенст кортасть: «Те сон». Лият: «Аволь, ансяк сонзэ ёнов молиця». Сонсь жо кортась: «Те мон». 10 Сестэ сынь кевкстнесть сонзэ: «Кода панжовсть тонь сельметь?» 11 Сон мерсь тень каршо: «Ломань, конанень мерить Иисус, тейсь рудазнэ, ваднинзе сельмень ды мерсь тень: “Азё Силоам экшелямо таркантень ды шляк”. Мон молинь, шлинь ды карминь нееме». 12 Сестэ кевкстизь сонзэ: «Косо Сон?» Сон каршост мерсь: «А содан». 13 Ветизь те икелень сокоронть фарисейтненень. 14 Се чись, зярдо Иисус теизе рудазнэнть ды панжинзе тензэ сельметнень, ульнесь оймсема чи. 15 Фарисейтнеяк кевкстизь, кода сон кармась нееме. Сон мерсь тенст: «Рудазнэ путсь Сон сельмень лангс, мон шлинь ды вана неян». 16 Сестэ фарисейтнень ютксто конат-конат кортасть: «Ломанесь, кона оймсема чи а лови, аволь Пазонть пельде». Лият кортасть: «Кода теевить пежетев ломаннень истят тамашат?» Ды ульнесть ютковаст явновомат-пелькстамот. 17 Таго мерить сокоронтень: «Тон мезть мерят Сондензэ, эдь Сон панжинзе сельметь?» Сон мерсь: «Те пазмариця». 18 Ялатеке евреень прявтнэ эзть кеме сенень, буто сон сокороль ды теевсь неицякс. Сестэ тердизь неицякс теевезенть тетянзо-аванзо 19 ды кевкстизь сынст: «Те тынк цёрась, конадо тынь кортатадо, келя, сон чачсь сокорсто? Кода эно ней сон неи?» 20 Тетянзо-аванзо мерсть тень каршо: «Минь содатано, те – цёранок, ды сон чачсь сокорсто. 21 Кода ней неи, а содатано, ды кие панжинзе сельмензэ, минь а содатано: сонськак уш покш, эсензэ кевкстинк, кадык сонсь эстедензэ ёвты». 22 Тетянзо-аванзо пельсть евреень прявтнэде, секс истя кортасть. Эдь еврейтне прасть истямо мельс: кие Иисусонь ловсы Пазонь кучовт Идицякс, сень допрок панемс синагогасто. 23 Секс тетянзо-аванзо мерстькак: «Сонсь уш покш, эсензэ кевкстинк». 24 Истя омбоцеде тердизь ломаненть, кона сокороль, ды мерсть тензэ: «Макст Пазонть икеле вал видестэ кортамодо. Минь содатано, Се Ломанесь пежетев». 25 Сон тень каршо мерсь тенст: «Пежетев, аволь пежетев Сон, а содан. Ансяк вейке содан: мон ульнинь сокор, ней вана неян». 26 Сестэ сонзэ таго кевкстизь: «Мезе тейсь Сон мартот? Кода панжинзе сельметь?» 27 Сон каршост мерсь: «Мон уш ёвтынь тенк, тынь эзиде кунсоло. Мейс эно таго саиде мель марямс тень? Паряк тынккак меленк теевемс Сонзэ тонавтницякс?» 28 Сынь покордызь сонзэ ды мерсть: «Тон – Те ломаненть тонавтницязо, минь жо Моисеень тонавтницянзо. 29 Минь содатано, Моисей марто кортась Пазось, тень жо а содасынеккак, костонь сон». 30 Ломанесь каршост мерсь: «Те дивавтыяк эйсэнь: тынь а содатадо, костонь Сон, ялатеке Сон панжинзе монь сельмень. 31 Ды минь содатано, пежетевтнень Пазось а кунсолы, ансяк кие Пазонть лови ды теи Сонзэ мелензэ кувалт, сень Пазось кунсолы. 32 Пингезэнзэ эзь марявкшно, кие панжоволь сокорсто чачозень сельметь. 33 Аволь улеяк Сон Пазонть пельде, мезеяк Тензэ истямо аволь тееве». 34 Сынь тень каршо мерсть тензэ: «Пежеть потсо тон весе чачить, ды вана терявтнят минек тонавтомо?» Ды панизь сонзэ тосто. 35 Зярдо Иисус марясь шумбралгавтозенть панемадо, Сон муизе ды мерсь тензэ: «Кемат-арась Пазонь Цёранть эйс?» 36 Сон каршонзо мерсь: «Кие Сон, парочи? Ёвтык монень, ды сестэ мон карман кемеме Тензэ». 37 Иисус мерсь тензэ: «Тон уш неик Сонзэ, Сон ней мартот корты». 38 «Кеман, Азором!» – мерсь сон ды сюконясь Тензэ. 39 Иисус мерсь: «Судонь кисэ Мон сынь те масторлангонтень: сокортнэ теевельть неицякс, а вана неицятне – сокорокс». 40 Тень марязь, кой-кить фарисейтнестэ, конат ульнесть мартонзо, мерсть Тензэ: «Нать миньгак сокортано?» 41 Иисус мерсь тенст: «Улевлидеяк сокорт, пежетенк авольть уле. Ней, зярдо тынь кортатадо, келя, нетядо, пежетесь кадови лангсонк».

10

1 «Алкукс, алкукс кортан тенк: кие сови ревень кардазс аволь ортава, эци лия таркава, се – салыця ды нельгиця. 2 Ортава совицясь – реветнень ваныцяст. 3 Сонензэ орта ванстыцяськак панжи, реветнеяк сонзэ вайгелензэ кунсолыть. Сон лемсэст эсь ревензэ терди ды сынст кардазсто ливти. 4 Зярдо ливтьсынзе эсь ревензэ, Сонсь юты икелест. Реветне молить мельганзо, эдь содасызь вайгелензэ. 5 Лия мельга сынь а молить, оргодить эйстэнзэ, эдь а содасызь лиянть вайгелензэ». 6 Иисус ёвтнизе тенст те валвелявксонть, ансяк сынь эзть чарькоде, мезде Сон кортась сыненст. 7 Истя Иисус таго мерсь тенст: «Алкукс, алкукс кортан тенк: Мон реветненень ортан. 8 Весе, кить сакшность Мондень икеле, салыцят ды нельгицят, ды реветне эзизь кунсоло сынст. 9 Мон ортан: кие сови Эзган – ванстови. Сон совияк, лисияк, луганаргак муи. 10 Салыцясь сакшны ансяк саламо, маштомо ды ёмавтомо. Мон сынь эрямонь максомо ды максомс сонзэ велькска, ланга чудицякс. 11 Мон паро ваныцян: паро ваныцясь эсь эрямонзо путы ревензэ кисэ. 12 Сиведезесь, кона аволь ваныця ды конань реветне аволь эсензэ, зярдо неи самсто верьгиз, кадсынзе реветнень ды оргоди. Верьгизэсь салсесынзе реветнень, сравтнесынзе. 13 Сиведезесь оргоди, эдь сон ансяк сиведезь, реветнень кисэ а мелявтыяк. 14 Мон паро ваныцян, Мон Эсенсетнень содасынь, Монсенсетнеяк Монь содасамизь, 15 истямо ладсо кода Тетясь Монь содасамам, ды Монгак содаса Тетянть. Мон эрямом путан реветнень кисэ. 16 Монь улить лияткак ревень, конат аволь те кардазонь, сетненьгак тень ветяма. Сыньгак кармить кунсоломо вайгелем, ды карми улеме вейке стада ды вейке ваныця. 17 Секс Тетясь Монь вечксамам, мекс Мон эрямом максан, мекев сонзэ саемга. 18 Киненьгак сон а нельгеви Монь кедьстэ, Мон Эсь мельсэнь сонзэ максан. Монь ули азорксчим сонзэ максомс ды ули азорксчим мекев сонзэ саемс. Те кармавтоманть максызе Монень Тетям». 19 Неть валтнэнь кувалма таго лиссть еврейтнень ютксо явновомат-пелькстамот. 20 Ламот эйстэст кортасть: «Идемевсь Эйсэнзэ, Сон превстэ лиссь. Мезть кунсолотадо Сонзэ?» 21 Лият кортасть: «Неть валтнэ аволь ломанень, конань эйсэ идемевсь. Арази идемевснень панжовить сокоронь сельметь?» 22 Сась телесь, ды Ерусалимсэ ульнесть Пазонь кудонь одс ванськавтомань покшчитне. 23 Иисус якась Пазонь кудонь пирявт потмова, Соломононь галереяванть. 24 Тесэ еврейтне промсть перьканзо ды кортасть Тензэ: «Кувать а кувать Тон кармат кирдеменек ачарькодемасо? Улиндерят Тон Пазонь кучовт Идиця, ёвтак тенек видьстэ». 25 Иисус мерсь тенст: «Мон ёвтнинь тенк, ансяк тынь а кемтядо. Тевтне, конатнень Мон теян Тетянь лемсэ, сынсь невтить, киян Мон. 26 Ялатеке тынь а кемтядо, секс мекс тынь аволь Монь стадань реветнестэ, кода Мон тенк меринь. 27 Монь реветне кунсолыть вайгелем, Монгак содасынь сынст, сыньгак молить Монь мельга. 28 Мон максан тенст пингеде пингень эрямо, ды сынь а ёмить пингеде пингес. Кияк сынст а саласынзе Монь кедьстэ. 29 Тетям, кона максынзе сынст Монень, весемеде покш. Сынь киненьгак а саевить Тетянь кедьстэ. 30 Мон ды Тетясь – вейкеттяно». 31 Сестэ еврейтне таго сайсть кедезэст кевть Сонзэ чавомс. 32 Иисус мерсь тенст: «Мон теинь тынк сельме икеле ламо паро тевть, конат Тетянь пельде. Кона тевенть кисэ арсетядо чавомс Монь кевсэ?» 33 Еврейтне мерсть Сонензэ тень каршо: «Аволь паро тевень кисэ меленек чавомс Тонь кевсэ – Пазонть лангсо нарьгамот-покордамот кисэ ды мейс Тон, ломань, Эсь прят теят Пазокс». 34 Иисус мерсь тенст: «Арази апак сёрмадо тынк Койсэнть: “Мон меринь: тынь пазтадо”? 35 Бути Пазось мерсь пазт сетненень, конатненень максозель Пазонь валось, – ды Пазонь пельде Сёрмадовксось корты ансяк видечи, – 36 мейс сестэ Монень, конань Тетясь алтызе Эстензэ ды кучизе масторлангов, тынь кортатадо: “Пазонть лангсо нарьгат”, зярдо Мон мерян: “Мон – Пазонь Цёран”? 37 Бути Мон а теян Тетянь тевензэ, илядо кеме Монень. 38 Теиндерян сынст, сестэ кемеде Монь тевтненень, бути Монень а кемтядо. Сестэ тынь чарькодьсынк ды карматадо кемеме: Тетясь Монь эйсэ, Монгак Тетянть эйсэ». 39 Сестэ таго арсесть кундамс Сонзэ, ансяк Иисус тусь кедест алдо. 40 Иисус таго тусь Иордан леень тона пелев, се таркантень, косо икеле нававтыль Иоанн, ды кадовсь тоско. 41 Ламот сакшность Иисуснэнь. Сынь кортасть: «Иоанн эзь тее кодамояк тамаша. Ансяк весемесь се, мезе ёвтась Сондензэ, видель». 42 Ды ламот тосо кемезевсть Иисуснэнь.

11

1 Сэредиль ве ломань, лемезэ Лазарь. Сон ульнесь Бетания велестэ, косо эрясь Мария Марта патянзо марто. 2 Мария, конань Лазарь ялаксозо сэредиль, ульнесь се, кона Азоронть ваднизе тантей чине ойсэ ды Сонзэ пильгензэ нардтнинзе эсь прячерьсэнзэ. 3 Сазортнэ пачтясть Иисуснэнь: «Азоро! Се, конань Тон вечксак, сэреди». 4 Тень марязь, Сон мерсь: «Те сэредемась аволь куломас – Пазонь шнамос. Тень вельде шнави-инелгавтови Пазонь Цёрась». 5 Иисус вечкилизе Мартань, сазоронзояк ды Лазареньгак. 6 Зярдо марясь Лазарень сэредемадо, сестэяк кавто чить кадновсь се таркасонть, косо ульнесь. 7 Мейле Иисус мерсь тонавтницянстэнь: «Мольтяно мекев Иудеяв». 8 Тонавтницятне мерсть Тензэ: «Равви, а умок еврейтне чавиксэлидизь кевсэ, ды Тон таго молят тов?» 9 Иисус ёвтась: «Эли аволь кемгавтово част чисэнть? Кие яки чить, се а пупордькшни, эдь сон несы те масторлангонть валдонзо. 10 Кие яки веть, се пупордькшни, сонзэ арась валдозо». 11 Тень ёвтазь, Сон поладсь: «Лазарь ялганок матедевсь, Мон молян сонзэ пувтамо». 12 Тонавтницянзо мерсть: «Азоро! Бути сон матедевсь, сестэ шумбралгады». 13 Иисус жо кортась куломадонзо, ансяк сынь арсесть, Сон корты удомас матедевемадо. 14 Сестэ Иисус ёвтась тенст видьстэ: «Лазарь кулось. 15 Ды кенярдкшнан кисэнк, мекс Мон араселинь тосо: ней тынь седе пек кемевезевтядо. Адядо эно сонензэ». 16 Сестэ Фома, конань ульнесь лия лемезэ Кавтаське, мерсь лия тонавтницятненень: «Мольтяно миньгак ды кулотано сонзэ марто!» 17 Зярдо Иисус сась, Лазарень уловозо уш ниле чить кода калмсоль. 18 Бетаниясь ульнесь Ерусалим маласо, колмошка вайгельбень туро, 19 ды Иудеясто ламот састь Мартанень ды Мариянень ды оймавтсть сынст ялаксост куломанзо кувалма. 20 Марта, кода марясь Иисусонь самодо, сыргась каршонзо, Мария кадовсь кудос. 21 Марта мерсь Иисуснэнь: «Азоро! Улиндерявлить Тон тесэ, аволь куло ялаксом. 22 Ансяк содан, мезе илязат веше Пазонть кедьстэ, Сон нейгак Теть максы». 23 Иисус мерсь тензэ: «Тонь ялаксот вельми». 24 Марта мерсь Тензэ: «Содан, вельми вельмемане, меельце чистэнть». 25 Иисус ёвтась тензэ: «Мон – вельмемась ды эрямось. Монь эйс кемицясь кулындеряйгак, ялатеке карми эрямо. 26 Эрьвась, кие эри ды кеми Монь эйс, а кулы пингеде пингес. Кемат-арась тенень?» 27 Сон мерсь Тензэ: «Эно, Азоро! Мон кеман: Тон Пазонь кучовт Идицят, Пазонь Цёра, конанень эрявсь самс масторлангов». 28 Тень мерезь, Марта мольсь, тердизе Мариянь, эсь сазоронзо, ды салава тензэ ёвтась: «Тонавтыцясь тесэ ды терди тонь». 29 Се, кода ансяк маризе тень, капшазь стясь ды тусь Сонензэ. 30 Иисус зярс эзь совакшно велентень, яла ульнесь се таркасонть, косо Сонзэ вастызе Марта. 31 Еврейтне, конат Мария марто кудосольть ды оймавтсть сонзэ, зярдо неизь, кода Мария капшазь стясь ды лиссь, сыргасть мельганзо. Сынь арсесть, сон тусь калмонть лангс авардеме. 32 Мария, кода сась тозонь, косоль Иисус, ды зярдо неизе Сонзэ, прась пильгезэнзэ ды мерсь Тензэ: «Азоро! Улиндерявлить Тон тесэ, аволь куло ялаксом». 33 Иисус, кода неизе сонзэ ды мартонзо сазь еврейтненьгак авардемадо, Сонськак ризнэзевсь, ды талнозевсь седеезэ, 34 ды кевкстинзе: «Козонь тынь путынк сонзэ?» «Адя ды Тонсь несак, Азоро», – мерсть сынь. 35 Иисусонь тусть сельведензэ. 36 Сестэ еврейтне кортасть эсь ютковаст: «Вантая, кода Сон вечкилизе сонзэ!» 37 Конат-конат эйстэст кортасть: «Арази Те, кона сокоронть сельмензэ панжинзе, Лазареньгак аволизе вансто куломадо?» 38 Иисус, таго Эськанзо ризнэзь, мольсь калмонть ваксс. Те ульнесь кевботмар, совамо таркасонзо путозель кев. 39 Иисус мерсь: «Саинк кевенть». Кулозенть патязо, Марта, мерсь Тензэ: «Азоро, тосо уш стака чине, эдь ниле чить, кода сон калмосо». 40 Иисус мерсь: «Арази эзинь мере Мон теть: кеминдерят, несак Пазонь инексчинть?» 41 Сестэ саизь кевенть калмонть лангсто, косо ульнесь кулозесь. Иисус варштась менельс ды мерсь: «Тетяй! Сюкпря Теть, Тон маримик Монь. 42 Мон содан, Тон свал Монь марясамак, ансяк ёвтыя тень ломантнень кисэ, конат аштить тесэ, кемевтемаст кисэ, те Тон кучимик Монь». 43 Тень мерезь, Сон серьгедсь верьга вайгельсэ: «Лазарь! Листь ушов!» 44 Кулозесь лиссь, кедьга-пильгева тапарязь калмамонь тапарямотнесэ, чамазояк сюлмазель пацясо. Иисус мерсь тенст: «Олякстомтынк сонзэ, кадык яки». 45 Сестэ еврейтнестэ ламот, конат састь Мариянь содавтомо, ды неизь, мезе тейсь Иисус, кармасть кемеме Тензэ. 46 А вана конат-конат эйстэст мольсть фарисейтненень ды ёвтасть тенст, мезе тейсь Иисус. 47 Сестэ попонь покштнэ ды фарисейтне пурнасть Инепромкс ды кортасть: «Мезе тенек теемс? Те ломанесь ламо тамашат тейни. 48 Бути кадсынек Сонзэ истяк, весе кармить кемеме Тензэ, ды сыть рименсетне, истожасызь Пазонь кудоноккак, раськенеккак». 49 Вейкесь эйстэст, Каиафа, кона ульнесь се иестэнть попонь прявтокс, мерсь тенст: «Тынь мезеяк а содатадо, 50 ды а чарькодтядояк: вейке ломанень куломась раськенть кисэ ули миненек седе паро весе раськенть куломадо». 51 Тень сон ёвтызе аволь эсь пельдензэ. Сон, кода те иень попонь прявт, икелев ёвтызе Иисусонь куломанзо раськенть кисэ, 52 ды аволь ансяк те раськенть кисэ, Пазонть весе сравтнезь эйкакшонзо вейс пурнамост кисэяк. 53 Те чистэнть саезь, сынь састь мельс маштомс Иисусонь. 54 Секс Иисус эзь якаяк еврейтнень сельме икельга. Сон тусь тосто чаво мода маласо таркантень, ошс, конань лемезэ Эфраим, ды тозонь кадовкшнось тонавтницянзо марто. 55 Малавгалесь евреень Инечись, ды ламот састь весе масторстонть Ерусалимев Инечиде икеле коень-кирдань коряс ванськавтовомо. 56 Сестэ сынь вешнесть Иисусонь, ды Пазонь кудонть пирявкс потсо аштемстэ кортасть эсь ютковаст: «Кода тынь арсетядо? Сы а сы Сон покшчив?» 57 Попонь покштнэ ды фарисейтне кармавтсть: кие карми содамо, косо Иисус, кадык яволявты, ды сестэ сынь кундасызь Сонзэ.

12

1 Инечиденть кото чиде икеле сась Иисус Бетанияв, косо эрясь Лазарь, конань Сон кулозьстэ вельмевтизе. 2 Тосо анокстасть Тензэ каванямо. Марта каванясь, Лазарь ульнесь Иисус марто озадотнень ютксо. 3 Мария сайсь фунт ванькс нардонь пек питней ой, ваднинзе Иисусонь пильгензэ ды нардтнинзе сынст эсь прячерьсэнзэ. Кудось пешкедсь оенть тантей чинесэ. 4 Сестэ Иисусонь тонавтницятнестэ вейкесь, Иуда, Симон Искариотонь цёразо, кона мейле миизе Сонзэ, мерсь: 5 «Мекс а миемаль те оенть колмосядт динардо ды ярмактнень а явшемальть пурныцянень?» 6 Ансяк тень меризе сон аволь секс, мекс мелявтсь пурныцятнень кисэ. Сон сонсь салыцяль: кедьсэнзэль ярмаконь кирдемкась, ды сон сайниль тосто ярмактнень эстензэяк. 7 Иисус мерсь: «Кадык аванть, сон ванстсь те оенть Монь калмамо чинтень. 8 Пурныцятне свал тынк марто, Мон жо аволь свал». 9 Еврейтнестэ ламот марясть, келя, Иисус Бетаниясо, ды састь тов аволь ансяк Иисусонь кисэ, Лазарень неемгаяк, конань Сон вельмевтизе кулозьстэ. 10 Попонь покштнэ сайсть мель Лазареньгак маштомс, 11 эдь сонзэ кувалма еврейтнестэ ламот явсть сынст эйстэ ды кармасть кемеме Иисуснэнь. 12 Омбоце чистэнть ламо ломанть, конат састь Инечив, марясть Иисусонь Ерусалимев ютамодонзо. 13 Сынь сайсть пальмань тарадт, лиссть Сонзэ каршо ды сеересть: «Осанна! Улезэ чанстязь-баславазь Азоронть лемсэ Сыцясь, Израилень Инязорось!» 14 Иисус мусь од осёл, озась лангозонзо, кода теде сёрмадозель: 15 «Иля пеле, Сион тейтерь! Вана, тонь Инязорот сы од осёл лангсо озадо». 16 Сонзэ тонавтницянзо васня тень эзизь чарькоде. Ансяк мейле, зярдо Иисус ульнесь кепедезь инексчис, ледсь мелезэст, те истя Сонзэ эйстэ ёвтазель Сёрмадовкссо, ды ломантне тень теизьгак Сонензэ. 17 Ламот, конат ульнесть Иисус марто, зярдо Сон тердизе Лазарень калмостонть ды вельмевтизе сонзэ кулозьстэ, ёвтнесть тень эйстэ. 18 Секскак истя Сонзэ вастызь ломантне. Сынь марясть Сонзэ теевть те тамашадонть. 19 Фарисейтне кортасть эсь ютковаст: «Нетядо, тевенек жо тунь а молить? Весе масторлангось моли Сонзэ мельга». 20 Сетнень ютксо, конат састь Ерусалимев покшчистэ озномо, ульнесть зярыя гректькак. 21 Сынь састь Филип ваксс, кона ульнесь Галилеянь Бетсаидасто, ды энялдозь кортасть: «Парочи, меленек неемс Иисусонь!» 22 Филип мольсь ды ёвтась теде Андрейнень; сестэ кавонест мольсть ды ёвтасть тень эйстэ Иисуснэнь. 23 Иисус каршост мерсь: «Пазонть шказо сась невтемс Ломантнень Цёранть алкуксонь инексчинзэ. 24 Алкукс, алкукс кортан тенк: а кулындеряй товзюронь видьмесь, кона прась модас, кадови ськамнензэ; кулындеряй, канды ламо видьметь. 25 Кие вечксы эсь эрямонзо, се ёмавтсы сонзэ. Кие те масторлангсонть эсь эрямонзо а вечксы, се сонзэ ванстсы пингеде пингень эрямонтень. 26 Кие Монень важоди, Монь мельга молезэ. Косо Мон, тосо Монь важомгак карми улеме, ды Тетямгак ловсы сень, кие Монень важоди. 27 Ней Монь седеем покш ризнэмасо: мезе Тень меремс? Тетяй, идемак те часстонть! Ансяк те часонть кисэ Мон сыньгак. 28 Тетяй! Инекс теик Эсь леметь». Сестэ каятотсь менельстэ вайгель: «Инекс теия, тагояк карман инекс теемензэ!» 29 Ломантне, конат тосо аштесть, маризь тень ды кортасть: «Те пурьгине», лиятне кортасть: «Ангел кортась мартонзо». 30 Иисус тень лангс мерсь: «Аволь Монь туртов ульнесь те вайгелесь – ломантнень туртов. 31 Ней судонь шка те масторлангонтень, ней те мирэнть-масторонть апаро прявтось панезь ули тестэ. 32 Зярдо Мон кепедезь улян моданть лангсто, весень тердьсынь-ветясынь Эстень». 33 Тень Сон кортась чарькодемань макснезь, кодамо куломасо Сон кулы. 34 Ломантне мерсть Иисуснэнь: «Минек Коенек тонавты, келя, Пазонь кучовт Идицясь эри-ашти певтеме. Кода эно Тон кортат: “Ломантнень Цёрантень кепедевема”? Кие те Ломантнень Цёрась?» 35 Сестэ Сон мерсь тенст: «Оштё аламошкас валдось мартонк. Якадо, зярс валдось ули, сестэ чоподась а копачатадызь тынк. Чоподава якицясь а соды, ков моли. 36 Зярс валдось мартонк, кемеде валдонтень, сестэ ультядо валдонтень эйкакшокс». Тень ёвтазь, Иисус тусь эйстэст ды ёматотсь. 37 Куш тейсь Сон ламо тамашат сынст сельме икеле, сынь ялатеке эзть кеме Сонензэ. 38 Истя топодсть Исайя пазмарицянть валонзо: «Азором! Кие кемезевсь сенень, мезе марясь минек пельде? Кинень Азорось невтизе Эсь виензэ?» 39 Сынь эзть кемезеве эсест вийсэ, кода теде лия таркасо кортаськак Исайя: 40 «Сон сокоргавтынзе сельмест, кевензавтынзе седеест, секс: иляст нее сельмесэст, иляст чарькоде седейсэст, иляст велявто Монень ды Мон илинь шумбралгавто сынст». 41 Исайя ёвтызе тень, зярдо сон неизе Иисусонь инексчинзэ ды кортась Сонзэ эйстэ. 42 Мезе лангскак апак вано, евреень прявтнэстэяк ламот кемезевсть Иисуснэнь, ансяк фарисейтнень икеле марямга теде эзть корта: пельсть синагогасто панемадост. 43 Пазонть пельде шнамодонть пек вечкевсь сыненст ломанень пельде шнамось. 44 Иисус верьга вайгельть кортась: «Монень кемицясь аволь ансяк Монень кеми – Монь Кучицянтеньгак; 45 Монь неицясь – неи Монь Кучицянтькак. 46 Мон валдо, кона сась масторлангс. Эрьвась, кона кеми Монь эйс, чоподас а кадови. 47 Кие марясынзе Монь валон ды а кеми, Мон суд а теян сонензэ. Мон сынь масторлангонть идеме, аволь масторлангонть судямо. 48 Кие поты Монь эйстэ ды а лови Монь валтнэнь, сень ули судиязо: валось, конань Мон ёвтыя, карми судямо сонзэ меельце чистэнть. 49 Эдь Мон кортан аволь Эсь пельдень, Тетясь, кона Монь кучимим, Сонсь макссь Тень кармавтовкс, мезе ёвтамс ды мезе кортамс. 50 Мон содан: Сонзэ кармавтовксось максы пингеде пингень эрямо. Секс, мезе Мон кортан, кортан истя, кода кармавтсь Тетям».

13

1 Ульнесь Инечиде икелень чи. Иисус содась: сась масторлангонь кадома, Тетянстэнь туема шказо. Сон вечкилинзе масторлангонь мельга молицянзо певтеме вечкемасо, ды тень Сон невтизе педе пес. 2 Иисус ды Сонзэ тонавтницянзо пурнавсть чокшнень ярсамос. Идемевсесь уш путызе Иудань, Симон Искариотонь цёранзо, седейс Иисусонь миема меленть. 3 Иисус содась: Тетясь весементь максызе Сонзэ кедьс, Сон Пазонть пельде сась ды ней Пазонтень моли. 4 Секс Сон стясь ярсамсто, каизе ланга оршамонзо, карксась нардамо пацясо. 5 Мейле каясь ведь шлямо кедьгес, кармась шлямо тонавтницятнень пильгест, нардтнемест нардамо пацясо, конаньсэ карксазель. 6 Зярдо Иисус пачкодсь Симон Петра ваксс, се кевкстизе Сонзэ: «Азоро! Нать Тонеть шлякшномс монь пильгень?» 7 Иисус тень каршо мерсь тензэ: «Ней тон а чарькодят, мезе Мон теян, чарькодьсак мейле». 8 Петра серьгедсь тень каршо: «Зярдояк Тон а шлясыть монь пильгень!» Иисус мерсь: «Бути Мон а шлятан тонь, сестэ тонь мезетькак Монь марто а ули вейсэнь». 9 Симон Петра мерсь Тензэ: «Азоро! Сестэ шлить аволь ансяк пильгень, кеденьгак ды прямгак». 10 Иисус мерсь: «Шлязентень эряви ансяк пильгензэ шлямс, эдь сон весе ванькс. Тынь ванькстадо, ансяк аволь весе». 11 Сон содылизе Эсь миицянзо, секс мерськак: «Аволь весе тынь ванькстадо». 12 Зярдо Иисус шлинзе пильгест ды оршинзе ланга оршамонзо, таго озась ярсамо ды кевкстинзе: «Чарькодтядо а чарькодтядо, мезе Мон тенк теинь? 13 Тынь мертядо Монень Тонавтыця ды Азоро, ды видестэ кортатадо, эдь Мон алкукскак Сон. 14 Истя, бути Мон, Азоронк ды Тонавтыцянк, шлинь пильгенк, тыненккак эряви шлякшномс пильгенк вейкенк-вейкенк туртов. 15 Мон максынь тенк невтевкс. Тыненккак эряви тейнемс сень, мезе Мон тыненк теинь. 16 Алкукс, алкукс кортан тенк: важось азородонзо а седе покш, кучозеськак а седе покш кучицянзо эйстэ. 17 Бути тынь тень содасынк, уцяскавт ультядо, зярдо карматадо истя тейнеме». 18 «Аволь весемеденк кортан: Мон содаса, кодат сеть ломантне, конатнень кочкинь. Ансяк Пазонь пельде Сёрмадовксонтень эряви топавтовомс: “Монь марто кшиде ярсыцясь кепедизе Монь лангс кочкарянзо”. 19 Ёвтнян тенк теде ней, топавтомадонзо икеле, зярдо топавтови, тынь кемевлиде: Мон улян, кие Мон улян. 20 Алкукс, алкукс кортан тенк: кие парсте васты Монь кучовтонть, се Моньгак парсте васты, ды кие васты Монь, се васты Монь Кучицянтькак». 21 Тень мерезь, Иисус седеень покш ризнэмасо яволявтсь: «Алкукс, алкукс кортан тенк, вейкесь эйстэнк мисамам». 22 Сестэ тонавтницятне кармасть ванкшномо вейке-вейкест лангс, апак чарькоде, киде Сон корты. 23 Сонзэ тонавтницятнестэ вейкесь, се, конань Иисус вечкилизе, озадоль Иисус вакссо. 24 Сонензэ Симон Петра аволдась, келя, тона кевкстевлизе, кие се, конадо Иисус корты. 25 Сон, Иисусонь мештес чиремезь, кевкстизе: «Азоро, кие те?» 26 Иисус мерсь каршонзо: «Се, кинень Мон максан кши сускомо, конань наваса ваканс». Мейле навизе кши сускомонть ды максызе Иуданень, Симон Искариотонь цёранстэнь. 27 Те сускомонть саемадо мейле совась Иудань эйс Сатанась. Сестэ Иисус мерсь тензэ: «Мезе арсить тееме, тейть седе курок». 28 Озадо аштицятнень эйстэ кияк эзь чарькоде, мейс Иисус истя мерсь тензэ. 29 Иудань кедьсэль ярмаконь кирдемкась, секс тонавтницятнестэ конат-конат арсесть: Иисус мерсь тензэ рамамс, мезе миненек эряви покшчинтень, эли максомс мезеяк кажовнень. 30 Иуда сэвизе кши сускомонть ды сеске жо лиссь. Ульнесь ве. 31 Зярдо Иуда лиссь, Иисус мерсь: «Ней невтеви Ломантнень Цёранть инексчизэ, Пазонть инексчизэяк невтеви Сонзэ эйсэ. 32 Зярдо Пазонть инексчизэ невтеви Сонзэ эйсэ, сестэ Пазоськак невтьсы Эсензэ эйсэ Цёранть инексчинзэ ды курок сонзэ невтьсы. 33 Эйдень, аволь кувать кадовсь Монень мартонк улемс. Карматадо Монь вешнеме, ды кода Мон икеле уш ёвтынь евреень прявтнэнень: ков Мон молян, тов тынь а савтадо, тыненккак истя жо кортан ней. 34 Мон максан тенк од кармавтовкс: вечкеде вейкенк-вейкенк эйсэ! Кода Мон тынк вечктядызь, истя тыньгак вечкеде вейкенк-вейкенк эйсэ. 35 Карминдерятадо вейкенк-вейкенк эйсэ вечкеме, тень кувалма весе кармить содамонк: тынь Монь тонавтницятадо». 36 Симон Петра кевкстизе Иисусонь: «Азоро, ков Тон молят?» Иисус каршонзо мерсь: «Ков Мон молян, тон ней тов а молеват мельган, мейле молят Монь мельга». 37 Петра мерсь Тензэ: «Азоро, мекс мон ней а молеван Тонь мельга? Мон эрямом путса Тонь кисэ». 38 Иисус тень каршо мерсь тензэ: «Эрямот Монь кисэ путсак? Алкукс, алкукс кортан теть: атякшось а кенери моразевемеяк, кода тон колмоксть прят каясак Монь эйстэ».

14

1 «Илязо талакале седеенк: кемеде Пазонтень, моненьгак кемеде. 2 Монь Тетянь кудосо эрямо таркатнеде ламо. Улевельгак а истя, Монь ёвтавлинь тенк: Мон молян тенк таркань анокстамо. 3 Кода молян, анокстаса тенк тарканть, сестэ таго сан ды сайтядызь Эстень. Косо Мон, тыненккак тосо улема. 4 Ков Мон молян, тынь содатадо, кинтькак тов содасынк». 5 Фома мерсь Тензэ: «Азоро, а содатано, ков молят. Кода эно тенек содави тов кись?» 6 Иисус мерсь тензэ: «Мон – ки, видечи ды эрямо. Кияк а сави Тетянтень лиякс, кода ансяк Монь вельде. 7 Бути содавлимизь Монь, сестэ содавлинк Монь Тетяньгак. Ней тынь уш содасынк Сонзэ ды неинк Сонзэ». 8 Филип мерсь Тензэ: «Азоро, невтик тенек Тетянть, ды саты минек туртов». 9 Иисус мерсь тензэ: «Зяро шка Мон тынк марто, ды тон Монь а содасамак, Филип? Кие неимим Монь – неизе Тетянть. Мекс эно тон кортат: “Невтик тенек Тетянть”? 10 Арази тон а кемат, Мон Тетянь эйсэ, Тетяськак Монь эйсэ? Валтнэнь, конатнень Мон кортан тенк, кортан аволь Эсень пельде – те Тетясь, кона Монь эйсэ, тевензэ теи. 11 Кемеде Монь валтнэнень: Мон Тетянь эйсэ, Тетяськак Монь эйсэ. Бути а кемтядо тенень валон кувалт, сестэ кемеде Монь тевень кувалт. 12 Алкукс, алкукс кортан тенк: Монь эйс кемицясь карми тееме сеть тевтнень, конатнень теян Мон. Ды сон теи нетнедеяк седе покш тевть, эдь Мон Тетянень велявтан. 13 Бути мезе вештядо Тетянть пельде Монь лемсэ, сень тейса: теньсэ невтеви Тетянть инексчизэ Цёранть вельде. 14 Бути мезе вештядо Монь лемсэ, Мон сень тейса». 15 «Бути вечксамизь Монь, сестэ карматадо кирдеме Монь кармавтовкстнэнь. 16 Мон энялдан Тетянть икеле, ды Сон максы тенк лия Лездыця, кона карми улеме тынк марто пингеде пингес. 17 Те – видечинь Оймеялтось, кона масторлангонь ламот ломантненень а саеви, эдь сынь а несызь Сонзэ, ды а содасызьгак. Тынь вана содасынк Сонзэ, эдь Сон тынк марто ды эйсэнк улияк. 18 Мон а кадтадызь урозокс; сан мекев тенк. 19 Оштё аламнешка, ды масторлангось Монь уш а несамам. Тынь вана Монь несамизь, эдь Мон эрян, секс тыньгак карматадо эрямо. 20 Се чистэнть тынь карматадо содамо: Мон Тетянь эйсэ, тынь Монь эйсэтядо, Монгак тынк эйсэ. 21 Кинь улить Монь кармавтовкстнэ, ды кие сынст кирди, се Монь вечксамам. Кие Монь вечксамам, сень карми вечкемензэ Монь Тетям. Монгак карман вечкемензэ ды панжса тензэ Эсь прям». 22 Иуда, аволь Искариотось, мери Тензэ: «Азоро, мезе те, Тонь мелеть Эсь прят панжомс ансяк миненек, аволь масторлангонь весе ломантненень?» 23 Тень каршо Иисус мерсь тензэ: «Кие Монь вечксамам, се карми тееме Монь тонавтоманть коряс. Тетям карми сонзэ вечкемензэ, ды минь сатано тензэ ды карматано эрямо мартонзо. 24 Кие Монь а вечксамам, се а теи Монь тонавтоманть коряс. Тонавтомась, конань тынь марятадо, Тетянть, кона кучимим Монь, аволь Монсень. 25 Весе тень Мон ёвтыя тенк, зярс тынк мартан. 26 Лездыцясь, Иневанькс Оймеялтось, конань Тетям кучсы Монь лемсэ, весемес тынк тонавттадызь. Сон ледстясы мелезэнк весементь, мезе Мон кортынь тенк. 27 Седейоймамо кадан тенк, Монсень седейоймамом максса тенк: аволь истя максан тенк, кода масторлангось максы. Илязо талакале тынк седеенк ды илязо тандале. 28 Тынь мариде, мезе Мон меринь тенк: “Туян эйстэнк ды мекев сан тенк”. Бути тынь вечкевлимизь Монь, тынь кенярдозевлиде, мекс Мон меринь, молян Тетянтень, эдь Тетям Мондень ине. 29 Вана Мон теде ёвтынь тенк ней, топавтомадонзо икеле. Сестэ тынь карматадо кемеме, зярдо те топавтови. 30 Аламошка тень кадовсь кортамс мартонк, эдь сы те мирэнть-масторонть апаро прявтось. Монь лангсо сонзэ виезэ арась. 31 Ансяк масторлангонтень эряви содамс: Мон вечкса Тетянть ды Мон весементь теянгак истя, кода кармавтсь Тень Тетям. Стядо, тутано тестэ».

15

1 «Мон – алкуксонь винаумарьксан, Монь Тетям – винаумарень пирязоро. 2 Монь лангсто эрьва тарадонть, кона винаумарть а канды, Сон керясы. Эрьванть, кона канды винаумарть, ванськавтсы, седе ламо умарень кандомга. 3 Тынь уш ванськавтозтядо валонть вельде, конань Мон ёвтыя тенк. 4 Эрядо-аштеде Монь эйсэ, Монгак эрян-аштян тынк эйсэ. Кода тарадонтень сонстензэ а раштавить винаумарть, а аштиндеряй винаумарькс лангсо, истя тыненккак эсь пельденк мезеяк а тееви, а аштиндерятадо Монь эйсэ. 5 Мон винаумарькс, тынь тарадт. Кие эри-ашти Монь эйсэ, ды кинь эйсэ Мон эрян-аштян, се рашты ламо винаумарть, эдь Монтемень тыненк мезеяк а тееви. 6 Кие а эри-ашти Монь эйсэ, се тарад ладсо ули ёртозь ве ёнов ды коськи. Истят тарадтнэнь пурныть, кайсить толс, ды сынь палыть. 7 Бути эрятадо-аштетядо Монь эйсэ ды Монь валонгак эрить-аштить тынк эйсэ, сестэ вешеде, мезе меленк, ды карми улеме тенк. 8 Тень вельде невтеви Тетянь инексчизэ, кандындерятадо ламо эмежть ды улиндерятадо Монь тонавтницякс. 9 Кода Тетясь Монь вечксамам, истя Монгак тынк вечктядызь. Эрядо-аштеде Монь вечкемасо. 10 Топавтындерясынк Монь кармавтовксон, карматадо эрямо-аштеме Монь вечкемасо, кода Монгак топавтан Тетянь кармавтовксонзо ды эрян-аштян Сонзэ вечкемасо. 11 Весемень тень Мон ёвтыя тенк сень кисэ: Монь кенярксось улевель тынк эйсэ ды кенярксось пряс пештевлидизь тынк. 12 Монь кармавтовксом истямо: вечкеде вейкенк-вейкенк эйсэ, кода Мон вечктядызь тынк. 13 Зярдо кияк путсы эрямонзо эсь ялганзо кисэ, теде покш вечкема арась. 14 Тынь Монь ялган сестэ, зярдо тейтядо сень, мезе Мон кармавтан тенк. 15 Мон ней уш а мерян тенк важот, эдь важось а соды, мезе теи азорозо. Мон мерян тенк ялгат, эдь Мон весементь ёвтыя тенк, мезе маринь Тетянь пельде. 16 Аволь тынь Монь кочкимизь, Мон тынк кочкидизь ды аравтыдизь молеме ды эмежень кандомо, истямо эмежень, кона зярдояк а ёми. Сестэ весе, мезе вештядо Тетянь пельде Монь лемсэ, Сон максы тенк. 17 Вана тень кармавтан тенк: вечкеде вейкенк-вейкенк эйсэ». 18 «Бути масторлангось тынк а вечктядызь, сестэ кирдеде мельсэнк, Монь тынденк икеле а вечкилимим. 19 Бути тынь улевлиде масторлангонть пельде, сестэ масторлангось вечкевлинзе эсензэтнень. Кода тынь аволь масторлангонть пельде, а вана Мон тынк кочкидизь масторлангсто, секс масторлангось а вечктядызь. 20 Мельсэнк кирдинк валонть, конань Мон ёвтыя тенк: важось азородонзо а седе покш. Бути Монь пансесть, кармить пансеме тынккак. Бути Монь валом кирдизь, тынк валонтькак кармить кирдемензэ. 21 Весе тень тейсызь тенк Монь лемем кисэ, эдь сынь а содасызь Монь Кучицянть. 22 Бути Мон аволинь са ды аволинь корта тенст, сестэ авольть уле сынст пежетест. Ней жо сыненст а каяви вал эсь пежетест кисэ. 23 Кие Монь а вечксамам, се Монь Тетяньгак а вечксы. 24 Бути Мон аволинь тее сынст ютксо тевть, кодат кияк лия эзь тейнекшне, сестэ аволь уле пежетест. Ней жо сынь неизь Монь тевеньгак ды эзть карма вечкеме Моньгак, Тетяньгак. 25 Тень эйсэ топавтови валось, кона сёрмадозель сынст Койсэнть: “Стяко Монь а вечкилимизь”. 26 Зярдо сы Лездыцясь, конань Мон кучса тенк Тетянь пельде, видечинь Оймеялтось, кона Тетянь пельде лиси, сестэ Сон карми яволявтнеме Мондень. 27 Тыньгак карматадо Мондень яволявтнеме: эдь тынь ушодома шкасто саезь ульниде Монь марто».

16

1 «Тень Мон ёвтыя тенк сень кисэ: мезеяк аволизе кавтолдовто кемеманк. 2 Тынк пантядызь синагогатнестэ. Сакшны мик шка, зярдо эрьвась, кона тынк эйсэ маштни, карми арсеме, теньсэ сон Пазонтень важоди. 3 Истя кармить тейнеме мартонк секс, мекс а содасамизь Тетяньгак, Моньгак. 4 Ды Мон тень тыненк икелев ёвтыя, зярдо сы се шкась, мелезэнк ледстявлинк, мезе Мон теде ёвтнилинь тенк». «Мон икеле эзинь кортакшно теде, эдь Мон ульнинь мартонк. 5 Ней вана молян Монь Кучицянтень, ды кияк эйстэнк а кевкстни Эйсэнь, ков молян. 6 Тень кувалма, мезе Мон ёвтынь тыненк, ризкстэ пештявсь тынк седеенк. 7 Ансяк Мон кортан тенк видечи: Монь туемась ули тыненк седе паро. А туиндерян Мон, сестэ Лездыцясь а сы тенк; бути туян, кучса Сонзэ тенк. 8 Зярдо жо Сон сы, сестэ невтьсынзе масторлангонь ломантненень, кода авидестэ сынь арсить пежетенть эйстэ, видечинть ды судонь тееманть эйстэ. 9 Пежетесь сеньсэ: сынь а кемить Монень. 10 Видечись невтеви сеньсэ: Мон молян Монь Тетянень, ды тынь уш а несамизь Монь. 11 Судось сеньсэ: те мирэнть-масторонть апаро прявтось судязь. 12 Монь ули лия ламо ёвтамом тенк, ансяк ней а саты тынк виенк чарькодемс сонзэ. 13 Кода сы видечинь Оймеялтось, сестэ Сон тонавттадызь весе видечинтень: эдь аволь Эсь пельдензэ карми кортамо, Сон карми кортамо, мезе мари, ды ёвтасы тенк сеньгак, мезе карми улеме. 14 Сон Монь инелгавтсамам-шнасамам, эдь Сон Монсенть эйстэ саи ды тыненк панжсы. 15 Весе, мезе ули Тетянь, се Монь. Секс Мон мериньгак: Оймеялтось Монсенть эйстэ саи ды тыненк панжсы». 16 «Курок тынь уш а несамизь Монь, – ды таго курок тынь несамизь Монь, эдь Мон молян Тетянтень». 17 Тесэ конат-конат Сонзэ тонавтницянзо эйстэ мерсть вейкест-вейкест туртов: «Мезе те истямось, зярдо Сон корты тенек: “Курок тынь а несамизь Монь, ды таго курок тынь несамизь Монь” ды: “Мон молян Тетянень”?» 18 Истя сынь кортнесть: «Мезе те истямось, зярдо Сон корты: “курок”? А содатано, мезде корты». 19 Иисус чарькодсь, мезде сынст мелест кевкстемс Сонзэ, ды мерсь тенст: «Теде а теде кевкстнетядо тынь вейкенк-вейкенк эйсэ, мекс Мон меринь: “Курок тынь а несамизь Монь, ды таго курок тынь несамизь Монь”? 20 Алкукс, алкукс кортан тенк: тынь карматадо авардеме ды лайшеме, масторлангонь ломантне жо кенярдозевить. Тынь карматадо ризнэме, ансяк тынк ризксэнк велявты кенярдомакс. 21 Авась кирди пиштемат-сэредькст, зярдо сы чачтома шказо. Зярдо чачтсы эйденть, сестэ сон кенярдомадонть стувтсынзе пиштематнень, эдь ломань чачсь масторлангс. 22 Истя тыньгак ней ризнэтядо. Ялатеке Мон тынк нетядызь таго, ды кенярдозеви седеенк, ды кенярдоманк киненьгак а нельгеви тынк кедьстэ. 23 Се чистэнть тынь а кевкстьсамизь Монь мездеяк. Алкукс, алкукс кортан тенк: мезе вештядо Тетянь пельде Монь лемсэ, максы тенк. 24 Течис тынь мезеяк эзиде веше Монь лемсэ. Вешеде ды Тетям максы тенк, ды тынь пештевтядо пряс кеняркссо». 25 «Те шкас Мон кортынь тенк валвелявкссо, ансяк сакшны шка, зярдо Мон а карман кортамо тенк валвелявкссо, видьстэ тенк ёвтан Тетядон. 26 Се чистэнть карматадо вешеме Сонзэ пельде Монь лемсэ, ды сестэ Мон уш а карман кортамо: Мон энялдан Тетянень тынк кисэ. 27 Эдь Сонсь Тетясь тынк вечктядызь секс, мекс тынь вечксамизь Монь ды кемтядо: Мон сынь Пазонть пельде. 28 Мон туинь Тетянть кедьстэ ды сынь масторлангов; ней таго кадса масторлангонть, молян Тетянтень». 29 Тонавтницянзо мерсть Тензэ: «Ней жо Тон видьстэ кортат, валвелявкс кодамояк а ёвтнят. 30 Ней чарькодтяно, Тон весементь икелевгак содасак, ломантнень кевкстнемаст Тонеть а эрявить. Тень коряс кемтяно: Тон сыть Пазонть пельде». 31 Иисус каршост мерсь: «Ней кемтядо? 32 Вана сакшны шка, ды сась уш, зярдо тынь сравтневтядо эрьвась эсь пелев, ды Монь кадсамизь ськамон. Ансяк Мон аволь ськамон, Монь марто Тетям. 33 Тень Мон ёвтыя тыненк сень кисэ: улезэ тенк Монь эйсэ седейоймамо. Масторлангсонть карматадо кирдеме пиштемат, ансяк уледе кеметь-виевть! Мон изния масторлангонть».

17

1 Неть валтнэде мейле Иисус кепединзе сельмензэ менельс ды мерсь: «Тетяй! Сась шкась: невтик Цёрать инексчинзэ, Цёраткак невтезэ Тонь инексчить. 2 Эдь Тон максыть Цёрать кедь алов весе ломантнень сень кисэ: максоволь Сон пингеде пингень эрямо весеменень, кинь Тон максыть Сонензэ. 3 Пингеде пингень эрямось – те содамс Тонь, вейкине алкуксонь Пазонть, ды Тонь кучовт Иисус Христосонь. 4 Мон невтия Тонь инексчить мода лангсо, прядыя тевенть, конань Тон максык Монень топавтомс. 5 Ней, Тетяй, Тонсеть вакссо таго максык Монень се инексчинть, кона Монь ульнесь Тонь кедьсэ менеленть-масторонть теемадонзо икеле. 6 Мон теия содавиксэкс Тонь леметь ломантненень, конатнень Тон Монень максыть масторлангстонть. Сынь ульнесть Тонь, ды Тон сынст максыть Монень, ды сынь кирдизь Тонь валот. 7 Ней сынь чарькодизь: весе, мезе Тон максыть Монень, Тонь пельде. 8 Валтнэнь, конатнень Тон максыть Монень, Мон максынь сыненст, ды сынь саизь. Сыненст чарькодевсь видестэ: те Мон сынь Тонь пельде; ды кармасть кемеме: те Тон кучимик Монь. 9 Мон сынст кисэ ознан: аволь масторлангонь весе ломантнень кисэ ознан, ансяк сетнень кисэ, конатнень Тон максыть Монень, эдь сынь Тонь. 10 Весе Монсетне – Тонь, Тонсетне – Монь, ды Монь инексчим невтеви сынст вельде. 11 Мон ней уш аволь масторлангсан, Мон Тонеть молян, сынь жо масторлангсот. Иневанькс Тетяй, ванстыть Эсь лемсэть сынст, конатнень Тон максыть Монень, сыненст вейкекс улемга, кода миньгак Тонь марто ультяно вейкекс. 12 Зярдо Мон ульнинь мартост масторлангсо, Мон ванстылинь Тонь лемсэть сетнень, конатнень Тон максыть Монень. Мон сынст ванстынь, ды кияк сынст эйстэ эзь ёма, ёмась ансяк се, конанень ёмамаль. Истя топавтовсь Сёрмадовксось. 13 Ней вана Тонеть молян. Ды Мон тень кортан, зярс яла масторлангсан: кадык Монь кенярксось пряс пештясынзе сынст. 14 Мон максыя тенст Тонь валот, ды масторлангонтень сынь кармасть улеме авечкевиксэкс. Эдь сынь аволь масторлангонть пельде, кода Монгак аволь масторлангонть пельде. 15 Мон ознан аволь масторлангсто сынст саемадо, ансяк Тон ванстовлить сынст зыянонть эйстэ. 16 Сынь аволь масторлангонть пельде, кода Монгак аволь масторлангонть пельде. 17 Алтыть сынст Эстеть Тонь видечинть вельде: Тонь валот – видечись. 18 Кода Тон Монь кучимик масторлангов, истя Монгак сынст кучинь масторлангов. 19 Сынст кисэ Мон алтан Эсь прям Тонеть секс: кадык сыньгак видечинть вельде кармить улеме алтазь Тонеть. 20 Аволь ансяк сынст кисэ ознан, ознан сетнень кисэяк, конат кармить кемеме Монень сынст валост кувалт. 21 Мон ознан: улест весе вейкекс. Кода Тон, Тетяй, Монь эйсат, ды Мон Тонь эйсан, истя сыньгак Минек эйсэ улест вейкекс, – кадык кемезеви масторлангось: те Тон кучимик Монь. 22 Инексчинть, конань Тон максык Монень, Мон максыя сыненст: сынст вейкекс улемга, кода миньгак ультяно вейкекс. 23 Зярдо Мон сынст эйсан, ды Тон Монь эйсат, сестэ сыньгак допрок улить вейкекс. Истя масторлангось карми содамо: те Тон кучимик Монь, ды Тонеть вечкевсть сынь, кода вечкевинь Мон. 24 Тетяй! Монь мелем: сетне, конатнень Тон максыть Монень, улевельть мартон тосо, косан Монгак. Кадык сынь несызь Монь инексчим, конань Тон максык Монень, секс мекс Тон вечксамак Монь уш се шкастонть саезь, зярдо менельтне-мастортнэ апакольть тее. 25 Видечинь Тетя! Масторлангось Тонь а содатанзат. Мон свал содылитинь Тонь, ды нетнеяк кармасть содамо: те Тон кучимик Монь. 26 Мон панжия тенст Тонь леметь, ды яла карман панжомонзо сень кисэ: кадык те вечкемась, конаньсэ Тон вечксамак, улезэ сынст эйсэяк ды Монгак улезан сынст эйсэ».

18

1 Тень мерезь, Иисус лиссь тонавтницянзо марто Кедрон чудикерьксэнть тона пелев, косо ульнесь ойумарькс пире. Иисус ды тонавтницянзо совасть пирентень. 2 Иуда, Сонзэ миицязо, те тарканть содылизе, эдь Иисус тонавтницянзо марто сеедьстэ тозонь пурнавкшность. 3 Иудаяк сась тов зярыя ушман ды Пазонь кудонь ванстыця марто, конатнень толнэк-мезнек ды кедьёнкснэк кучизь попонь покштнэ ды фарисейтне. 4 Иисус содась весемеденть, мезе карми улеме мартонзо, лиссь каршост ды кевкстинзе: «Кинь вешнетядо?» 5 Сынь мерсть Тензэ: «Назаретэнь Иисусонь». Иисус ёвтась тенст: «Те Мон». Сынст марто аштесь Иудаяк, Сонзэ миицязо. 6 Кода Иисус мерсь тенст: «Те Мон», – сынь потазевсть удалов ды пракшность мода лангс. 7 Сон таго кевкстинзе: «Кинь вешнетядо?» Сынь мерсть: «Назаретэнь Иисусонь». 8 Иисус каршост мерсь: «Мон ёвтынь тенк, те Мон. Бути тынь вешнетядо Монь, нолдынк лиятнень, кадык туить». 9 Истя топавтовсть Сонзэ валонзо: «Сетнень эйстэ, конатнень Тон максыть Монень, Мон киньгак эзинь ёмавто». 10 Симон Петра, конань ульнесь торозо, таргизе сонзэ, вачкодизе попонь прявтонь важонть ды керизе сонзэ вить пилензэ. Важонть лемезэль Малкос. 11 Иисус мерсь Петранень: «Тонгик торонть кундозонзо. Арази Монень Тетянь максовт пиштемань кеченть а симема?» 12 Сестэ ушмантнэ ды сынст прявтось, ды евреень Пазонь кудонь ванстыцятне саизь Иисусонь, сюлмсизь 13 ды ветизь Сонзэ васняяк Аннаснэнь. Аннас – Каиафань, се иень попонь прявтонть, ватазоль. 14 Те ульнесь се Каиафась, кона макссь еврейтненень превть: ули седе паро, бути вейке ломань кулы весе раськенть кисэ. 15 Иисус мельга мольсть Симон Петра ды оштё вейке тонавтниця. Те тонавтницянть попонь прявтось содылизе, ды секс сон совась Иисус марто попонь прявтонть пирявтонзо потс. 16 Петра жо аштесь ортатнень вакссо ушосо. Мейле те тонавтницясь, конань попонь прявтось содылизе, лиссь, кортась орта ванстыця важаванть марто ды совавтызе Петрань. 17 Тесэ важо авась мерсь Петранень: «Арази тон аволь Се Ломаненть тонавтницянзо ютксто?» Сон мерсь: «Аволь». 18 Якшамоль. Важотне ды Пазонь кудонь ванстыцятне кирвазтсть толбандя, аштесть вакссонзо ды эжнесть. Петраяк аштесь мартост ды эжнесь. 19 Попонь прявтось кевкстизе Иисусонь Сонзэ тонавтницятнеде ды тонавтомадонзо. 20 Иисус мерсь тензэ: «Мон свал кортынь ломантненень марямга. Мон свал тонавтынь синагогасо ды Пазонь кудосо, ков свал пурнавкшныть еврейтне, салава мезтькак эзинь корта. 21 Мезть Монь кевкстнят? Марицятнень кевкстить, мезть Мон кортынь тенст. Сынь жо содыть, мезть Мон кортынь». 22 Кода Иисус меризе тень, Пазонь кудонь ванстыцятнестэ вейкесь, кона аштесь маласо, вачкодизе Сонзэ чама ланга ды мерсь: «Истя Тон кортат попонь прявтонть каршо?» 23 Иисус ёвтась тензэ: «Бути Мон меринь беряньстэ, невтик, мезе берянесь. Бути валом виде, мекс тон чават Монь?» 24 Сестэ Аннас сюлмсезь кучизе Сонзэ Каиафа попонь прявтонтень. 25 Симон Петра жо яла аштесь толбандянть вакссо ды эжнесь. Тесэ кевкстизь сонзэ: «Арази аволь Сонзэ тонавтницятнестэ тонгак?» Сон каизе прянзо ды мерсь: «Аволь». 26 Попонь прявтонть важотнестэ вейкесь, сень роднязо-раськезэ, конань Петра керизе пилензэ, кевкстизе Петрань: «Арази аволь тонь неитинь Иисус марто ойумарькс пирестэ?» 27 Петра таго каизе прянзо, ды сеске моразевсь атякш. 28 Каиафань кедьстэ Иисусонь ветизь Пилатонь азоркудос. Ульнесь валске. Еврейтне эзть сова азоркудонтень сень кувалт: а прамс аваньксчис инечинь ярсамодонть икеле. 29 Пилат лиссь тенст ды кевкстинзе: «Мейсэ чумондтадо Те Ломаненть?» 30 Тень каршо сынь мерсть тензэ: «Аволь улеяк Сон зыянонь теиця, минь Сонзэ аволинек ветя теть». 31 Пилат мерсь тенст: «Саинк Сонзэ тынсь ды эсь Коенк коряс тееде Тензэ суд». Еврейтне ёвтасть каршонзо: «Миненек а мереви маштомс ломань». 32 Истя топодсть Иисусонь валонзо, конатнень Сон ёвтынзе, зярдо макснесь чарькодема, кодамо куломасо Сон кулы. 33 Сестэ Пилат таго совась азоркудос, тердизе Иисусонь ды кевкстизе Сонзэ: «Тон евреень Инязорат?» 34 Иисус мерсь тензэ: «Эсь пельдеть тон кортат тень, эли лият истя ёвтасть теть Мондень?» 35 Пилат мерсь каршонзо: «Арази мон евреян? Эсеть раськеть ды попонь покштнэ Тонь максыдизь монень. Мезе Тон теить?» 36 Иисус мерсь: «Монь инязорксчим аволь те масторлангонть пельде. Улевельгак Монь инязорксчим те масторлангонть пельде, сестэ Монь важотне стявольть тюреме Монь кисэ ды аволимизь максо Монь еврейтненень. Ансяк Монь инязорксчим аволь тестэ». 37 Сестэ Пилат кевкстизе Сонзэ: «Истя эно Тон Инязорат?» Иисус каршонзо мерсь: «Тон тонсь кортат, Мон Инязоран. Мон чачинь ды сынь масторлангов видечиденть ёвтнеме. Эрьвась, кие видечинть пельде, кунсолы Монь вайгелем». 38 Пилат кевкстизе: «Мезе видечись?» Тень ёвтазь, сон таго лиссь еврейтненень ды мерсь тенст: «Мон кодамояк чумо а мукшнан Сонзэ эйстэ. 39 Тынк ули коенк-кирданк, конань коряс эрьва Инечистэ мон нолдтнян тенк вейке пекстазь ломань. Ули меленк, нолдаса тенк евреень Инязоронть?» 40 Сестэ таго весе пижакадсть: «Аволь Сонзэ! Нолдык Вараввань!» Варавва жо ульнесь тюриця-нельгиця.

19

1 Сестэ Пилат мерсь саемс Иисусонь ды керямс локшосо. 2 Ушмантнэ прязонзо путсть пупиця куракшонь тарадсто кодазь каштаз ды лангозонзо оршавсть якстере оршамо. 3 Сынь сеересть: «Шумбра улезэ евреень Инязорось!» – ды вачкоесть чама ланга. 4 Пилат таго лиссь ды мерсь еврейтненень: «Вана ней мон Сонзэ ливтьса тыненк. Содадо: мон Сонзэ эйстэ кодамояк чумо а мукшнан». 5 Сестэ лиссь Иисус пупиця куракшонь каштазсо ды якстере оршамосо. Пилат мерсь тенст: «Ванодо, ломанесь!» 6 Кода Сонзэ неизь попонь покштнэ ды Пазонь кудонь ванстыцятне, кармасть пижнеме: «Вачкодик, вачкодик Сонзэ крёст лангс!» Пилат мерсь тенст: «Саинк Сонзэ тынсь ды вачкодинк, мон чумо Эйстэнзэ а мукшнан». 7 Еврейтне каршонзо ёвтасть: «Минек ули Коенек, ды Коенть коряс Сонензэ кулома, эдь Сон теизе Эсь прянзо Пазонь Цёракс». 8 Те валонть марязь, Пилат седеяк пелезевсь, 9 ды таго совась азоркудонтень, ды кевкстизе Иисусонь: «Костонят Тон?» Ансяк Иисус тень каршо чатьмонсь. 10 Пилат мерсь Тензэ: «Монь каршо чатьмонят? Тон содат а содат, монь ули азорксчим вачкодевтемс Тонь крёст лангс, ды монь ули азорксчим нолдамскак Тонь?» 11 Иисус тень каршо мерсь: «Тонь аволь уле Монь лангсо кодамояк азорксчить, бути аволь уле теть максозь те азорксчись верде. Тень кисэ седе ламо пежетесь сень лангсо, кие Монь максымим тонеть». 12 Тень марязь, Пилат терявтнесь нолдамс Иисусонь, ансяк еврейтне яла пижнесть: «Нолдындерясак Сонзэ, тон аволь ялга кесарентень. Эрьвась, кие эсь прянзо теи инязорокс, моли кесаренть каршо». 13 Неть валтнэнь марязь, Пилат ливтизе Иисусонь ушов ды озась судиянь эземс, таркантень, конадонть мерить Кевацавкс, евреекс Гаввата. 14 Те ульнесь Инечинь анокстамо чи, пеця, шказоль чинь куншка малав. Пилат мерсь еврейтненень: «Вана тынк Инязоронк!» 15 Ансяк сынь пижакадсть: «Саик, саик, вачкодик Сонзэ крёст лангс!» Пилат кевкстинзе: «Тынк Инязоронк вачкодевтьса?» Попонь покштнэ мерсть: «Минек арась инязоронок кесарде башка». 16 Сестэ Пилат, окойники, Иисусонь максызе тенст крёст лангс вачкодемс. Ушмантнэ саизь Иисусонь ды тусть мартонзо. 17 Иисус кандсь Эсь крёстонзо ды лиссь се таркантень, конадонть мерить Пря ловажань тарка, евреекс Голгофа. 18 Тесэ Сонзэ вачкодизь крёст лангс, мартонзо вачкодсть кавто лияткак, вейкесь – ве пеле ды омбось лия пеле, куншказост Иисусонь. 19 Пилат теевтсь сёрмалазгак, путовтызе крёстонть лангс. Тосо сёрмадозель: «Назаретэнь Иисус, евреень Инязоро». 20 Те сёрмалазонть ловность еврейтнестэ ламот, эдь таркась, косо вачкодезель Иисус, ошонть маласоль. Сёрмадовксось теезель колмо кельсэ: евреень, грекень ды латынень. 21 Евреень попонь покштнэ мерсть Пилатнэнь: «Иля сёрмадо: “Евреень Инязоро”. Сёрмадт: Те Ломанесь кортась: “Мон евреень Инязоро”». 22 Пилат мерсь: «Мезенть сёрмадыя, сень сёрмадыя». 23 Ушмантнэ, кода Иисусонь вачкодизь крёст лангс, саизь Сонзэ оршамопелензэ ды явизь нилев, эрьва ушманонтень пелькс. Сынь саизь хитононтькак, кона ульнесь ставкстомо, верде алов весе кодазь. 24 Ушмантнэ мерсть вейкест-вейкест туртов: «А карматано сезнемензэ, каясынек жеребейсэ, кинень саты». Истя топавтовсь Пазонь пельде Сёрмадовкссо ёвтазесь: «Явизь Монь оршамопелень эсь ютковаст, ды Монь оршамон каизь жеребейсэ». Истя тейстькак ушмантнэ. 25 Иисусонь крёстонзо вакссо аштесть Сонзэ авазо, аванзо сазорозо, Клеопань низэ Мария ды Магдалань Мария. 26 Иисус, кода неизе аванзо ды вакссонзо аштиця тонавтницянзо, конань Сон вечкилизе, мерсь аванстэнь: «Авай, те ней тонь цёрат». 27 Мейле Сон мерсь тонавтницянстэнь: «Вана тонь ават». Теде мейле те тонавтницясь саизе Иисусонь аванзо эрямо эстензэ кудов. 28 Иисус ней содась: весемесь уш топавтовсь. Сестэ лиссь истя, кода ёвтазель Сёрмадовкссонть. Сон мерсь: «Симемам пек сась». 29 Тесэ аштесь чапамо винадо пешксе кедьге. Ушмантнэ начтасть чапамо винасонть ведьпанго, пезнавтызь иссопонь тарад пес ды кепедизь Сонзэ турвас. 30 Зярдо Иисус варчизе чапамо винанть, мерсь: «Топавтовсь!» – нолдызе прянзо ды оймезэ лиссь. 31 Чись ульнесь пеця, оймсема чинтень анокстамо чи. Еврейтнень арасель мелест кадомс уловтнень крёст лангс оймсема чис, ды те оймсема чись ульнесь покшчи. Секс еврейтне энялдсть Пилатнэнь поркснемс вачкодезтнень пильге ловажаст ды валтнемс сынст крёст лангсто. 32 Сестэ састь ушмант, порксызь пильге ловажанзо вейкенть, мейле омбоцентькак, конат вачкодезельть Иисус марто. 33 Зярдо састь Иисус ваксс, сынь неизь, Сон ульнесь уш кулозь ды пильге ловажанзо эзизь порксаяк. 34 Ансяк вейкесь ушмантнэстэ сялгсо лазызе Сонзэ боканзо, ды сеске тосто тусь верь ды ведь. 35 Истя ёвтни се, кие тень неизе эсензэ сельмесэ, ды сонзэ валонзо видеть. Сон соды, видестэ корты, ды тыньгак кемевлиде. 36 Те теевсь Сёрмадовксонть топавтовоманзо кисэ: «Сонзэ ловажазо илязо порксаво». 37 Истя жо лия таркасояк Сёрмадовксось корты: «Кармить ваномо Сень лангс, конань лазызь». 38 Теде мейле Иосиф, Ариматея ошонь ломань, энялдсь Пилатнэнь Иисусонь уловонзо валтомадо. Иосиф ульнесь Иисусонь тонавтницязо, ансяк салавань, евреень прявтнэде пелеманть кувалма. Пилат мерсь. Иосиф мольсь ды саизе Иисусонь уловонть. 39 Сась Никодимгак, кона васенцеде сакшнось Иисуснэнь веть. Сон кандсь ней смирна марто алоень човорязь тантей чине ой, колоньгеменьшка литра. 40 Истя сынь саизь Иисусонь уловонть, тапаризь тантей чине марто коцтонь тапарямосо, кода свал калмсить еврейтне. 41 Се таркасонть, косо Сон вачкодезель крёст лангс, ульнесь сад пире, пиресэнть од калмо, козонь зярс кияк арасель калмазь. 42 Секс мекс ульнесь евреень пеця, оймсема чинь анокстамо чи, Иисусонь уловонзо путызь тозонь, эдь се калмось маласоль.

20

1 Недлячистэнть валске, чоподава, Магдалань Мария сась калмонть ваксс ды неизе: кевесь калмонтень совамо таркастонть сявордозь. 2 Чиезь сась сон Симон Петранень ды омбоце тонавтницянтень, конань Иисус вечкилизе, ды мерсь тенст: «Азоронть саизь калмосто, ды а содатано, ков Сонзэ путызь». 3 Сеске лиссь Петра ды омбоце тонавтницяськак ды тусть калмонть ваксс. 4 Сынь чийсть кавонест вейсэ, ансяк омбоце тонавтницясь чийсь Петрадо эрязасто ды сась калмонть ваксс васенцекс. 5 Сон комась ды неинзе тапарямо коцтнэнь, ансяк калмонтень эзь сова. 6 Мельганзо сась Симон Петра, сеске совась калмонтень, ваны – тосо ансяк тапарямо коцтт 7 ды калмамонь пацясь, кона Сонзэ прясоль. Ней пацясь ульнесь тапарямо коцтнэде башка таркасо, тапардазь. 8 Сестэ совась омбоце тонавтницяськак, кона сась калмонть ваксс васенцекс, неизе ды кемезевсь. 9 Сынь яла а чарькодилизь Пазонь пельде Сёрмадовкссо ёвтазенть: Иисуснэнь кулозьстэ вельмема. 10 Ды истя тонавтницятне велявтсть кудов. 11 Мария аштесь калмонть вакссо ды авардсь. Авардемстэ варштась калмонтень 12 ды несь ашосо оршазь кавто ангелт. Сынь озадольть тосо, ков путокшнызь Иисусонь уловонзо, вейкесь пря песэ, омбоцесь пильге песэ. 13 Сынь кевкстизь сонзэ: «Ава, мекс авардят?» Сон мерсь тенст: «Саизь монь Азором, ды а содан, ков Сонзэ путызь». 14 Тень мерезь, сон велявтсь удалов ды неизе стядо аштиця Иисусонь, ансяк эзизе сода Сонзэ. 15 Иисус кевкстизе: «Ава, мекс авардят? Кинь вешнят?» Мария арсесь, те сад пирень азорось, ды мерсь Тензэ: «Парочи, бути тон Сонзэ ливтик, ёвтак монень, козонь путык, мон Сонзэ сайса». 16 Иисус пшкадсь тензэ: «Мария!» Мария велявтсь ёнонзо ды серьгедсь Тензэ: «Раввуни!», смустезэ: “Тонавтыця!” 17 Иисус мерсь тензэ: «Иля токшеве Монь эйс, эдь Мон зярс эзинь кепедеве Монь Тетянень. Азё Монь тонавтницятненень ды ёвтак тенст: Мон кепедеван Монь Тетянень ды тынк Тетянтень, Монь Пазонтень ды тынк Пазонтень». 18 Магдалань Мария мольсь ды ёвтась тонавтницятненень: «Мон неия Азоронть». Ды сон ёвтнизе сыненст сень, мезе Азорось кортась тензэ. 19 Секе недлячистэнть, чокшне, Иисусонь тонавтницянзо пурнавсть вейсэ. Кудо кенкштне пекстазельть, секс мекс сынь пельсть еврейтнеде. Апак учо сась Иисус, арась куншказост ды мерсь тенст: «Седейоймамо тенк!» 20 Тень мерезь, Сон невтинзе тенст кедензэ, пильгензэ ды боканзо. Азоронть неемстэ тонавтницянзо кенярдозевсть. 21 Иисус мерсь тенст омбоцеде: «Седейоймамо тенк! Кода Тетясь Монь кучимим, истя Монгак тынк эйсэ кучан!» 22 Тень мерезь, пувась лангозост ды мерсь тенст: «Саинк Иневанькс Оймеялтонть. 23 Кинень нолдасынк-простясынк пежетнень, сенень нолдавить; кинень а нолдасынк, сень лангсо сынь кадовитькак». 24 Фома, кемгавтово тонавтницятнестэ вейкесь, конанень мерсть Кавтаське, арасель сынст марто, зярдо сакшнось Иисус. 25 Лия тонавтницятне ёвтасть тензэ: «Минь неинек Азоронть». Сон мерсь тенст: «Бути монсь а несынь Сонзэ кедьсэ эскень лазовкстнэнь, сурон а путсынь эскень лазовкстнэнень, кедем а путса боказонзо, мон а кеман». 26 Кавксо чиде мейле Иисусонь тонавтницянзо таго ульнесть вейсэ, Фомаяк сынст мартоль. Сась Иисус, зярдо кенкштне пекстазельть, арась куншказост ды мерсь: «Седейоймамо тенк!» 27 Мейле мерсь Фоманень: «Путык сурот тей ды ваныть Монь кедень; венстик кедеть ды путык боказон. Иля уле акемицякс, ульть кемицякс». 28 Фома тень каршо мерсь Тензэ: «Монь Азором ды монь Пазом!» 29 Иисус ёвтась тензэ: «Тон кармить кемеме, мекс Монь неимик. Уцяскавт сеть, конат кемить апак нее». 30 Иисус Эсь тонавтницянзо икеле тейсь ламо лия тамашаткак, конатнеде апак сёрмадо те книгасонть. 31 Весе мезе тесэ сёрмадозь, те тынк кемевтеманк кисэ: Иисус – те Пазонь кучовт Идиця, Пазонь Цёра, ды, Сонзэ эйс кемезь, тыненк ули максозь Сонзэ лемс эрямо.

21

1 Теде мейле Иисус таго невтизе прянзо тонавтницянстэнь Тивериадань эрькенть чиресэ. Лиссь те истя: 2 Ульнесть вейсэ Симон Петра, Фома, конанень мерсть Кавтаське, Галилеянь Кана ошсто Натанаил, Зеведеень цёратне ды оштё кавто лия тонавтницянзо. 3 Симон Петра корты тенст: «Молян калонь кундамо». Сынь мерсть каршонзо: «Миньгак мольтяно мартот». Сынь тусть ды сеске озасть венчес, ансяк се вестэнть мезеяк эзть кунда. 4 Зярдо сась валскесь, Иисус аштесь эрьке чиресэ, ансяк тонавтницятне эзизь сода Сонзэ. 5 Иисус кевкстинзе: «Цёрат, кода, ули-арась кодамояк ярсамопеленк?» Сынь мерсть Тензэ: «Арась». 6 Сон кармавтсь тенст: «Каинк алтыманть венченть вить пелев, ды кундатадо». Сынь каизь, ды алтымась эзь таргаво тенст ламо калтнэде. 7 Сестэ тонавтницясь, конань Иисус вечкилизе, мерсь Петранень: «Те Азорось!» Симон Петра, кода марясь, келя те Азорось, каизе ланганзо ланга оршамонзо, эдь сон малав штаполь, карксызе ды кирнявтсь эрькес. 8 Лия тонавтницятне уйсть мельганзо венчсэ, калдо пешксе алтыманть ускозь. Сынь эрьке чиренть эйстэ а васолольть, сядошка метрань тарка. 9 Зярдо сынь лиссть венчстэнть, несть сыремтезь толбандя, косо реставсь кал ды ульнесь кшияк. 10 Иисус мерсь тенст: «Кандодо калтнэде, конатнень ней кундынк». 11 Симон Петра совась венчентень, таргизе мода лангс алтыманть, кона пешксель покш калдо. Эйстэст ульнесть сядо ведьгемень колмо, ды вана истямо ламочидест эзь сезеве алтымась! 12 Иисус мерсь тенст: «Садо, ярсадо». Тонавтницятнень эйстэ кияк эзь смея Сонзэ кевкстемензэ: «Кият Тон?» Сынь содасть, те Азорось. 13 Иисус мольсь, сайсь кши ды явшизе тенст, истя жо калонтькак. 14 Те уш колмоцеде Иисус невтизе прянзо тонавтницянстэнь кулозьстэ вельмемадонзо мейле. 15 Ярсамодо мейле Иисус кевкстизе Симон Петрань: «Симон, Ионань цёразо, тон сынст коряс Монь седе пек вечксамак-а вечксамак?» Петра мерсь Тензэ: «Эно, Азорось! Тон содат, мон вечктян Тонь». Иисус мерсь тензэ: «Тряк-вант Монь вирезэнь». 16 Таго Иисус кевкстизе, омбоцеде: «Симон, Ионань цёразо, тон Монь вечксамак-а вечксамак?» Петра мерсь Тензэ: «Эно, Азоро! Тон содат, мон вечктян Тонь». Иисус мерсь тензэ: «Вант Монь ревень». 17 Иисус колмоцеде кевкстизе: «Симон, Ионань цёразо, тон Монь вечксамак-а вечксамак?» Петра нуваргадсь, мекс колмоцеде кевкстизе сонзэ: «Тон Монь вечксамак-а вечксамак?», ды мерсь Тензэ: «Азоро, Тон весементь содасак; Тон содат, мон вечктян Тонь». Иисус мерсь тензэ: «Тряк-вант Монь ревень. 18 Алкукс, алкукс кортан теть: зярдо тон ульнить од, сестэ каркснилить тонсь ды молилить, ков мелеть. Зярдо сыредят, сестэ венстьсыть кедеть, ды лия тонь карксатанзат ды ветятанзат, ков арась мелеть». 19 Тень Иисус ёвтызе чарькодевтемга, кодамо куломасо Петра канды шнамо Пазонтень. Тень ёвтазь, Иисус мерсь сонензэ: «Мольть Монь мельга». 20 Петра велявтсь, неизе мельганзо молиця тонавтницянть, конань Иисус вечкилизе ды кона чокшнень ярсамсто, Иисусонь мештес чиремезь, кевкстизе: «Азорось, кие Тонь митянзат?» 21 Сонзэ неезь, Петра пшкадсь Иисуснэнь: «Азоро! Сонензэ мезе ули?» 22 Иисус мерсь тензэ: «Бути улевельгак Монь мелем, сон эрицякс кадоволь Монь самозон, тонеть мезень тев? Тон мольть Монь мельга». 23 Ды срадсь те валось кемицятнень юткова, келя, те тонавтницясь а кулы. Ялатеке Иисус эзь мере Петранень, а кулы, ансяк ёвтась: «Бути улевельгак Монь мелем, сон эрицякс кадоволь Монь самозон, тонеть мезень тев?» 24 Вана те тонавтницясь тесэ ёвтнияк весе тень эйстэ, сёрмадызеяк тень, ды содатано: сонзэ валозо виде. 25 Ламо лияяк тейсь Иисус. Бути жо весемеде сёрмадомс педе пес, сестэ, арсян, сёрмадозь книгатне авольть кельге весе масторлангонтень. Аминь.