Bijandipe ano trupo e Devlesere Lafija
1 Ano anglipe sasa o Logos, thaj o Logos sasa ano Devel, thaj o Logos sasa Devel. 2 Vov sasa ano anglipe ano Devel. 3 Sa maškaro leste ulo, thaj bi lesoro khanči ni ulo so ulo. 4 Ano leste sasa đivdipe, thaj o đivdipe sasa rošlipe e manušenge. 5 Thaj o rošlipe dičhilo ano raćipe thaj o raćipe ni lija le. 6 Sas o manuš bičhaldo e Devlestar, palo anav Jovan. 7 Akava avilo baš mothovmnase, te mothoj kotar rošlipe, kaj savore te paćan andar leste. 8 Vov na sine rošlipe, aj te mothoj kotar o rošlipe. 9 Sasa o rošlipe čačutno savo strefinela sakone manuše savo avel po them. 10 Ano them sasa, thaj o them maškaro leste ulo, thaj o them na penđarda le. 11 Pumarenge avilo, thaj lesere ni lije le. 12 A odolenge save lije le dija o baroderipe te oven čhave e Devlesere, odolenge save paćan ano anav lesoro; 13 Save ni bijandile kotar o rat, ni kotar o mangipe e trupesoro, ni kotar o mangipe e romesoro, aj kotar o Devel. 14 Thaj o Logos ulo trupo thaj arakhavdilo maškar amende, thaj dikhlam ašundipe lesoro, ašundipe sar Jekhebijando kotar o Dad, pherdo kovlipe thaj čačipe. 15 O Jovan mothovel lestar thaj del vika vaćerindoj: Akava si odova savestar vaćardem: savo pala mande avel anglal mande si, kaj anglal mande sasa. 16 Thaj kotar o pherdipe lesoro amen savore lijam, thaj kovlipe po kovlipe. 17 Kaj o Kanuni dija pe prekalo Mojsija, a o kovlipe thaj o čačipe ulo maškar o Isuso Hristo. 18 E Devle khonik na dikhlja nisar: Jekhunobijando Čhavo savo si ane angali e Dadesi, ov ole mothovđa.
Mothovdipe e Jovan Bolipesarutnesko
19 Thaj akava si mothovdipe e Jovanesoro kana bićhalđe e Judejura andar o Jerusalimo e rašajen thaj e levitonen te Phučen le: Ko sijan tu? 20 Thaj mothoda thaj ni phenđa na; thaj mothoda: Me najsem o Hristos. 21 Thaj phučle le: So akana? A san li tu o Ilija? Thaj phenđa: Najsem. A san li tu profeto? Thaj irisarda: Na. 22 A on lese phenđe: Ko sijan? Te o iripe da odolenđe save amen bićhalđe: So vaćere korkoro tutar? 23 Phenđa: Me sem krlo kućimasko ane drmina: Vortosaren o drom e Devljutnesoro, sar so phenđa o Isaija profeto. 24 A e bićhaldine sine e farisejendar. 25 Thaj phučle le thaj vaćerde lese: Sose, akana, bolisare kana tu najsan o Hristos, ni o Ilija, ni o profeto? 26 Irisarda lenđe o Jovan vaćerindoj: Me bolisarav panjesa, a maškar tumende terđola save tumen na đanen. 27 Odova si so avel pala mande, savo angla mande sine, savese me najsem paćivalo te putrav e aravlja pe urjavde lesere. 28 Akava ulo ane Vitanija pe okoja rig e Jordanosi kote o Jovan bolisarela. 29 A tajsa dive dikhlja o Jovan e Isuse kaj avel ke leste, thaj phenđa: Dikh, o Bakroro e Devlesoro savo lela upra peste e bezaha e themesere! 30 Akava si odova baš savo me phendem: Pala mande avel o manuš savo angla mande sine, kaj anglal mande sasa. 31 Thaj me le ni đangljem, aj te mothovel pe e Izrailjese, odolese avilem me te bolisarav panjesa. 32 Thaj mothovda o Jovan vaćerindoj: Dikljem e Đe kaj huljel sar golubo e badalestar thaj ačhilo pe leste. 33 Thaj me le ni đangljem, aj Odova savo bičhalda man te bolisarav panjesa ov mange phenđa: Pe kaste dikhe kaj huljol o Đi thaj ačhel pe leste adava si odova savo bolisarel Đesa Sumnalesa. 34 Thaj me dikhljem thaj mothovdem kaj si ov o Čhavo e Devlesoro.
Anglune sikljovne
35 Tajsa dive pale ačhela o Jovan thaj dujđene kotar e sikljovne lesere. 36 Thaj dićhindoj e Isuse kaj đal, phenđa: Dikh, Bakroro e Devlesoro! 37 Thaj šunde le solduj sikljovne kana vaćerda, thaj đele palo Isus. 38 A o Isus irindoj thaj dikhindoj len, kaj đana palo leste, phenđa lenge: So roden? A on lese phenđe: Ravi, so nakhavne gindolpe: sikamneja, kaj beše? 39 Phenđa lenge: Aven thaj dikhen! Thaj đele, thaj dikhlje kaj bešel; thaj aćhile ke leste odova dive. A sasa paše o dešoro časo. 40 A jekh kotar e solduj save ašunde e Jovanostar thaj đele palo leste sine o Andrej, phral e Simone Petrosoro. 41 Ov arakhlja majangle ple phrale e Simone, thaj phenđa lese: Arakhljam e Mesija, so nakhavne gindolpe: Hristos. 42 Thaj anda le e Isusese. Thaj o Isus dićhindoj pe leste phenđa: Tu sijan o Simon, čhavo e Joninosko; tu ka vičinetu Kifa, so gindolpe Petar. 43 Tajsa dive manglja o Isus te ikljol ane Galileja, thaj arakhlja e Filipe, thaj phenđa lese: Ava pala mande! 44 A o Filip sasa andar e Vitsaida, andar e diz e Andrejesiri thaj e Petrosiri. 45 O Filip arakhlja e Natanailo thaj phenđa lese: Arakhljam odole savese hramosarđa o Mojsije ano Kanuni thaj o Profetija: e Isuse, čhave e Josifesere, kotar o Nazaret. 46 Thaj phenđa lese o Natanailo: Andar o Nazareto šaj li te ovel diso lačhe? Phenđa lese o Filip: Ava thaj dikh! 47 A o Isus dikhlja e Natanailo kaj avel koro leste thaj phenđa lese: Ake čačuno Izrailjco ano saveste nane bižajipe. 48 Phenđa lese o Natanailo: Kotar penđare ma? Irisarda o Isus thaj phenđa lese: Anglal so akharda tut o Filip, dikhljem tut kana sijan telal e sumučilin. 49 Irisarda o Natanailo thaj phenđa lese: Ravi, tu san o Čhavo e Devlesoro, tu san thagar e Izrailjesoro. 50 Irisarda o Isus thaj phenđa lese: Odolese so phendem će kaj dikhljem tut telal e sumučilin, paća? Ka dikhe pobut akalestar. 51 Thaj phenđa lese: Čače, čače tumenđe phenav: oto akana ka dikhen o badali putardo thaj e phakalen e Devleseren sar ikljen thaj huljon ko Čhavo e Manušesko.
Bijav ane Kana
1 Thaj ano trito dive sasa bijav ane Kana e Galilejaki, thaj odothe sine e daj e Isusesiri. 2 A akhardo sasa vi o Isus thaj e sikljovne lesere ko bijav. 3 Thaj kana na aćili mol, phenđa e daj e Isusesiri lese: Naj len mol. 4 O Isus laće phenđa: So mange mandar, đuvlije? Panda ni avilo o časo mlo. 5 Phenđa e daj lesiri e kandinenge: So ka phenel tumenge čeren. 6 A odothe sine šov vasija kotar o bar panjese, čhute po adeti e judejengo thovipe, save astarena po duj ja po trin napija. 7 Phenđa lenge o Isus: Pheren e vasija panjesa. Thaj pherde len đi o ućipe. 8 Thaj phenđa lenge o Isus: Astaren akana thaj legaren e peharnikose. Thaj legarde. 9 A kana pilja o peharniko e mol savi ćerdili e panjestar, thaj ni đangla kotar si, a e kandine đangle save astarde o pani, akharda o peharniko e terne borjakere. 10 Thaj phenđa lese: Sakoj manuš majanglal e lačhi mol ikalel, a kana maćon, teg e bilaćhi; a tu ačavđan e lačhi mol đi akana. 11 Akalesa, ane Kana e Galilejosi, čerda o Isus anglipe semnosko, thaj sikada o ašundipe plo; thaj paćaje ano leste e sikljovne lesere. 12 Napal hulilo ano Kapernaum, ov thaj e daj lesiri thaj e phrala lesere thaj e sikljovne lesere, thaj odothe aćhile na but dive.
Tradipe e trgovcengo andar o hramo
13 Thaj paše sasa e Pasha e judejengi, thaj đelo o Isus ano Jerusalim. 14 Thaj arakhla ano hramo odolen save bićinen guruven thaj bakren thaj goluben, thaj so paruvnen e love kaj bešen. 15 Thaj ćerindoj čukno e dororendar, tradla sa andar o hramo, thaj e bakren thaj e guruven; a e paruvnenđe ćhorđa e love thaj peravđa e astalja. 16 Thaj phenđa odolenge kaj bićinena goluben: Legaren odova akatar! Ma čeren kotar o ćher mle Dadesoro, ćher bikimnasoro. 17 A e sikljovne lesere ande ki godi kaj si hramome: Putardipe aso ćher tiro xalja man. 18 E Judejura pale irisarde thaj phende lese: Savo amenge semno mothoveja kaj odova ćereja? 19 O Isus irisarda thaj phenđa lenge: Peraven akava hramo thaj trine divenge ka vazdav le. 20 A e Judejura phende: Saranda thaj šov berša vazdilo akava hramo, a tu trine divenge ka vazde le? 21 A ov vačerđa kotar o hramo ple truposoro. 22 Kana uštilo andar e mule, dije godi e sikljovne lesere kaj akava vačerđa, thaj paćaje e Lilese thaj e lafenge save phenđa o Isus. 23 A kana sasa ano Jerusalim kotar baro dive e Pasha, but đene paćaje ano anav lesoro, dićhindoj e semne lesere save kerda. 24 A korkoro o Isus ni paćavisarda pes olenge, kaj ov olen đangla savoren. 25 Thaj ni trubuja kaj lese khonik te mothovel kotar o manuš; kaj korkoro đangla so sasa ano manuš.
Vaćaripe e Nikodimosa
1 A sine manuš maškar e fariseja, po anav Nikodim, knezo e judejengo. 2 Ov avilo e Isusese raćasa thaj phenđa lese: Ravi, đana kaj san sikamno e Devlestar avilo; kaj khonik našti akala ćerimata te ćerel save tu ćereja te naj o Devel lesa. 3 Irisarda o Isus thaj phenđa lese: Čače, čače tuće vaćerav: te na ko ni bijandol upral, našti dikhel o Thagaripe e Devlesoro. 4 Phenđa lese o Nikodim: Sar šaj o manuš te bijandol kana si purano? E da li šaj po dujto drom te đerdini ano vođi ple dajako thaj te bijanđol? 5 Irisarda o Isus: Čače, čače tuće phenav: te na ko ni bijanđol panjesa thaj Đesa, našti te đerdini ano Thagaripe e Devlesoro. 6 So si bijando e trupostar, trupo si; a so si bijando e Đestar, đe si. 7 Ma čudipe so phendem će: trubul tumenge te bijanđoven upral. 8 O Đi phurdel kaj mangel, vi o krlo lesko ašune, a ni đane kotar avel thaj kotar đal: ađahar si sarsavo savo si bijando e Đestar. 9 Irisarda o Nikodim thaj phenđa lese: Sar šaj odova te ovel? 10 O Isus irisarđa thaj phenđa lese: Tu sijan sikamno e Izrailjeso, a odova li na đane? 11 Čače, čače tuće vaćerav kaj odova so đana vaćera thaj so dikhljam mothova, thaj o mothovdipe amaro na lena. 12 Kana tumenge vaćerdem odova so si phuvutno ta ni paćan, sar ka paćan te phendem tumenge odova so si badalesko? 13 Thaj khonik ni uklilo po badali sem Odova savo hulilo e badalestar, o Čhavo e Devlesoro savo si po badali. 14 Thaj sar so o Mojsije vazdla e sape ane drmina, ađahar trubul te vazdel pe o Čhavo e Manušesko, 15 Ta sarsavo savo paćal ano leste ni mudarđol, aj te ovele bimerutneso đivdipe, 16 Kaj o Devel ađahar kamlja o them kaj e Čhave ple Jekhebijande dija, kaj sarsavo savo paćal ano leste ni mudarđol, aj te ovele bimerutneso đivdipe. 17 Kaj ni bičhalda o Devel e Čhave ple po them te krisil e themese, aj kaj o them te ikalel pe maškaro leste. 18 Savo ano leste paćal ni krisil pe lese, a savo ni paćal ake si krisimo, kaj ni paćaja ano anav e Jekhebijande Čhave e Devlesere. 19 A akava si kris so o rošlipe avilo po them, a e manuša majbut kamle o raćipe nali o rošlipe; kaj lengere kotora sine đungale. 20 Kaj sarsavo savo kerel đungalipe mrzol o rošlipe thaj ni đal premalo o rošlipe, te na phućardon e kotora lesere, kaj si đungale. 21 A ko o čačipe kerel, đala premalo o rošlipe, te dićhon e kotora lesere – kaj si ano Devel kerde.
E Jovanesoro mothovdipe e Isusestar
22 Pale odova avilo o Isus thaj e sikljovne lesere ane judejengiri phuv, thaj odothe thanardilo lencar thaj bolela. 23 A vi o Jovan bolela ano Enon paše o Salimo, kaj odothe sine but pani; thaj avena ta bolena pe. 24 Kaj pana na sine o Jovan čhudino ano phandlipe. 25 Teg ulo ćingar maškar e sikljovne e Jovanosere thaj nesavo Judejco trujal o užaripe. 26 Thaj avile e Jovanose thaj vaćerde lese: Ravi, odova so sine tusa prekal o Jordano, baš savese tu mothovdan, eke bolela, thaj savore đana leste. 27 O Jovan irisarda thaj phenđa: Našti o manuš khanči te lel te na dindilo lese e badalestar. 28 Tumen mange korkore mothoven kaj phendem: Najsem me o Hristos me sem bičhaldo anglal leste. 29 Kas isi terni terno e borjako si, a o amal e ternese borjako ačhel thaj ašunel le, thaj lošalimasa lošalel pe krlese e borjakere ternese. Akaja, akana, lošalipa mli pherdini si. 30 Ov trubul te barjol, a me te tiknovav. 31 Savo upral avel upreder savorende si. Savo si e phuvjatar kotar e phuv si, thaj e phuvjatar vakerel; a savo avel e badalestar upreder savorende si; 32 Thaj so dikhlja thaj šunđa, odova mothovel; thaj o mothovdipe lesoro khonik na lel. 33 Ko lel o mothovdipe lesoro, čačavel kaj si o Devel čačuno. 34 Kaj kas o Devel bičhalda, odova e lafija e Devlesere vaćerel: kaj o Devel e Đese ni del pe mera. 35 Kaj o Dad čumidel e Čhave, thaj sa dija lese ano vast. 36 Ko paćal ano Čhavo, isile đivdipe bimerutno; a te si bikandino e Čhavese, ni ka dikhel đivdipe, aj e xoli e Devlesiri ačhel pe leste.
O Isus thaj e Samarjanka
1 Kana, akana, haćarda o Devljutno kaj e fariseja šunđe kaj o Isus pobut sikljovnen resel thaj bolinel kotar o Jovano – 2 Itakaj korkoro o Isus na bolela aj e sikljovne lesere, 3 Meklja e Judeja thaj gelo pale ane Galileja. 4 A trubuja lese te nakhel andar e Samarija. 5 Ađahar avilo ane diz e samarijengi akhardi Sihar, paše o gav savo dija o Jakov e Josifose, ple Čhavese. 6 A odori sine bunari e Jakovesoro. O Isus ćhindino e dromestar bešela ađahar po bunari; sasa trujal šovto časo. 7 Avili e đuvli andar e Samarija te pherel pani. Phenđa laće o Isus: De man te pijav. 8 Kaj e sikljovne lesere sine thaj gele ano foro te ćinen xape. 9 Phenđa lese e đuvli Samarjanka: Sar tu, savo san Judejco, rode mandar đuvljatar e Samarjankatar te pije? Kaj e Judeja ni amalisavon e Samarjanenca. 10 Irisarda o Isus thaj phenđa laće: Kana ka ma tu đane o dindipe e Devlesoro, thaj ko si odova savo tuće vakerel: de man te pijav, tu bi rodeja lestar thaj bi dela tuće pani đivdo. 11 Phenđa lese e đuvli: Devljutneja, ni tatoro naj tut, a o bunari si xor; kotar tuće akana pani đivdo? 12 Aj li san tu pobaro kotar o dad amaro o Jakov, savo dija amenđe akava bunari, thaj ov andar leste pilja thaj e čhave lese thaj e đivdinutna lese? 13 Irisarda o Isus thaj phenđa laće: Sakoj savo pijel kotar akava pani palem ka trošavol; 14 A savo pijel kotar o pani savo lese me ka dav ni ka trošavol đimeripaste, aj o pani savo ka dav lese ka ovel ano leste panjesi xajing savo phirel ano bimerutnesoro đivdipe. 15 Phenđa lese e đuvli: Devljutneja, de man odova pani te na trošavav thaj te na avav akari te pherav. 16 Phenđa laće o Isus: Đa, akhar e rome tire, thaj ava akari. 17 Irisarda e đuvli thaj phenđa: Nane ma rom. Phenđa laće o Isus: Lačhe phenđan: nane ma rom; 18 Kaj sine tut pandž roma, thaj akana kova isitu naj tuće rom; odova čače vaćerdan. 19 Phenđa lese e đuvli: Devljutneja, dikhav kaj san tu profeto. 20 E dada amare ruđina pe e Devlese pe plain akaja, a tumen phenen kaj si ano Jerusalim o than kaj trubul te ruđilpe. 21 Phenđa laće o Isus: Đuvlije, paća man kaj avel o časo kana ni ka ruđin tumen e Dadese ni pe plain akaja ni ano Jerusalim. 22 Tumen ruđin tumen odolese so ni đanen; a amen ruđi amen odolese so đana; kaj si o inkalipe e Judejendar. 23 Aj avel o časo, thaj eke akate si, kana ka e čačutne e devleseruđutne ka ruđinpe e Dadese ano đi thaj ano čačipe, kaj o Dad rodel kaj asavke aven odola save ruđinen pe lese. 24 O Devel si đi; thaj save lese ruđinape, ano đi thaj čačipe trubul te ruđinenpe. 25 Phenđa lese e đuvli: Đanav kaj avel o Mesija akhardo Hristos; kana ov avel, ka mothovel amenge sa. 26 Phenđa laće o Isus: Me sem – savo vaćarel tuja. 27 Thaj ane odova avile e sikljovne lesere, thaj čudisajle so e đuvljasa vaćarel, aj pa nijekh ni vaćerda: so rode, ja so vaćare laja? 28 A e đuvli mekla plo khoro thaj đeli ane diz thaj phenđa e manušenge: 29 Phiren te dikhen e manuše savo mange phenđa sa so ćerdem. Te naj ov o Hristos? 30 Iklile, akana, andar e diz thaj đele leste. 31 A ano maškarovakti ruđina le e sikljovne lesere vakerindoj: Ravi, xa! 32 A ov lenđe phenđa: Man isima hape te xav savese tumen ni đanen. 33 Teg e sikljovne vakerena maškar peste: Te olese nesavo na anel te xal? 34 O Isus lenge phenđa: O xape si mlo te čerav o kamipe Odolesko savo bičhalda man, thaj te kerav lesko kotor. 35 Ni phenena li tumen kaj si panda štar masek ta ka čhinel pes o điv? Eke, phenav tumenge: vazden e jakha tumare thaj dikhen e umala sar akana galbenin čhinimase. 36 Thaj savo čhinel lel počindi, thaj cidel bijanipe baš o đivdipe bimerutno, te lošalel pe khetane vi savo sijinel vi savo čhinel. 37 Kaj ane odova si čačuno lafi, kaj si aver savo sijinel, a o aver savo čhinel. 38 Me bićhaldem tumen te čhinen kaj tumen ni čerden; e avera čerde, a tumen ane lengo čeripe đerdinđen. 39 A andar e diz odoja but đene e Samarjanendar paćaje ano leste baš o lafi e đuvljako savi mothovđa: Phenđa mange sa so ćerdem. 40 Kana, teg, avile ke leste e Samarjanja, ruđisarde le te ačhol ke lende; thaj ačhilo odothe duj dive. 41 Thaj but lendar pobuter paćaje baš o lafi lesoro, 42 Ta e đuvljake vakerena: Akana ni paća maj ando tiro mothovipe, kaj korkore amen šunđam thaj đana kaj si akava čače Inkalutno e themesko, o Hristos.
Paćape e thagaresere manušesoro
43 A palo duj dive iklilo odothar, thaj gelo ane Galileja. 44 Kaj korkoro o Isus mothovda kaj o profeto ano plo bijando than najle pativ. 45 A kana avilo ane Galileja, ašuđarde le e Galilejcura, save dikhle sa so čerda ano Jerusalim ko Baro dive, kaj thaj on ale ko Baro dive. 46 O Isus palem avilo ane Kana e Galilejosi, kaj čerda o pani ane mol. Thaj sine nesavo thagaresoro manuš savesoro čhavo sine nasvalo ano Kapernaum. 47 Akava ašundoj kaj o Isus avilo andar e Judeja ane Galileja, đelo ke leste thaj ruđinela le te huljel thaj te sastarel lesere čhave; kaj sasa po meripe. 48 Phenđa lese, akana, o Isus: Te na dikhljen semne thaj prašukaripa, ni ka paćan. 49 Phenđa lese e thagaresoro manuš: Devljutneja, ava đikaj ni mulo o čhavoro mlo. 50 Phenđa lese o Isus: Đa, o čhavo tiro si đivdo. Thaj paćaja o manuš e lafija save lese phenđa o Isus thaj đelo. 51 A đikaj ov huljela, dikh, resle le e kandine lesere thaj mothovđe lese vakerindoj: O čhavoro tiro si đivdo. 52 Teg phučlja len baš o časo ane savo lese sine lačhe; thaj phende lese: Erati ano eftato časo meklja le e šilali. 53 Teg haljovđa o dad kaj odova sine ane odova časo ane savo lese phenđa o Isus: O Čhavo tiro si đivdo. Thaj paćaja ov thaj sa o ćher lesoro. 54 Akava si palem o dujto čeripe savo čerda o Isus avindoj andar e Judeja ane Galileja.
Sastaripe ane Banja Vitezda
1 Pale odova sine baro dive e judejengo, thaj iklilo o Isus ano Jerusalim. 2 A ano Jerusalim ke Bakrengere udara isi banja, savi palo jevreja akharel pe Vitezda, thaj isila pandž trijemora. 3 Ane lende pašljovena but đene nasvale, korore, langale, šukhe, save ađičerena kaj o pani te izdrarel pe. 4 Kaj o phakalo e Devljutnesko harnevaktune huljela thaj izdrarela o pani; thaj savo bi angluno khuvela kana izdrarel pe o pani, ka sastarelape, ma kotar savo nasvalipe si nasvalo. 5 A odothe sasa nesavo manuš savo trijana thaj ofto berša sasa nasvalo. 6 Kana dikhlja o Isus akale kaj pašljol, thaj haljovđa kaj si ake but berša nasvalo, phenđa lese: Mange li sasto te ove? 7 Irisarda lese o nasvalo: Devljutneja, najma manuš, te mekel man ane banja kana izdrarel pe o pani; a đikaj me avav, o aver huljel angleder mande. 8 Phenđa lese o Isus: Ušti, le o kreveto tiro thaj phir! 9 Thaj sigo sastilo o manuš, thaj lija o kreveto plo thaj phirda. A odova dive sine savato. 10 Teg vakerena e Judeja e sastarutnese: Savato si, naj tuće muklino te legare o kreveto. 11 Ov lenge irisarda: Savo kerda man sastesa ov mange phenđa: Le o kreveto tiro thaj phir. 12 A on le phučle: Ko si odova manuš savo tuće phenđa: Le o kreveto tiro thaj phir? 13 A o sastardo ni đangla ko si; kaj o Isus durilosa ando but seloro pe odova than. 14 Pala odova arakhlja le o Isus ano hramo thaj phenđa lese: Eke sastiljan, ma pale te kere bezeha, te na so pođungale ovel tuće. 15 O manuš đelo thaj mothoda e Judejenge kaj si o Isus odova savo le kerda sastesa. 16 Thaj odolese prastavena e Judeja e Isuse, thaj dikhena le te mudaren, kaj čerda odova ko savato. 17 A o Isus lenđe irisarda: O dad mlo đi akana čerda, vi me čerav. 18 Thaj odolese panda pobut rodena e Judeja le te mudaren, na numa so peravela o savato, aj sar so vi e Devle akharela ple Dadeja kerindoj jekhune e Devleja.
O Čhavo thaj o Dad
19 A o Isus irisarda thaj phenđa lenge: Čače, čače tumenge phenav: O Čhavo našti khanči te kerel korkoro pestar aj so dićhel kaj o Dad kerel; kaj so Ov kerel, odova jekhune kerel vi o Čhavo; 20 Kaj o Dad čumidel e Čhave, thaj sa lese mothovel so korkoro kerel; thaj ka mothovel lese pobare kotora kotar akala ta tumen te habisavon. 21 Kaj sar so o Dad vazdel e mulen thaj đivdinel, ađahar vi o Čhavo saven mangel đivdinel. 22 Kaj o Dad ni krisinel khanikase, aj sa o kris dija e Čhavese. 23 Kaj savore te paćivalin e Čhave sar so paćivalin e Dade. Ko ni paćavel e Čhave ni paćavel ni e Dade savo le bičhalda. 24 Čače, čače tumenđe phenav: Ko mlo lafi šunel thaj paćal Odolese savo man bičhalda, isile đivdipe bimerutno, thaj ni avel po kris, aj nakhlo andar o meripe ano đivdipe. 25 Čače, čače tumenđe phenav, kaj avel o časo, thaj eke mothovdilo, kana e mule ka šunen o krlo e Devlesere Ćhavesoro, thaj ašundoj le ka đivdinen. 26 Kaj sar so o Dad isile đivdipe ana peste, ađahar dija thaj e Čhavese te ovel le đivdipe ana peste; 27 Thaj dija le baroderipe thaj te krisinel, kaj si o Čhavo e Manušesko. 28 Ma habisavon odolese, kaj avel o časo ano savo ka savore save si ane limora ka šunen o krlo e Devlesere Ćhavesoro. 29 Thaj ka ikljoven odola save čerde lačhipe ano đivdisaripe e đivdimasoro, a odola save čerde đungalipe ano đivdisaripe e krisesko. 30 Me našti khanči te čerav korkoro mandar; Sar šunava ađahar krisiv, thaj o kris mlo si vortuno; kaj ni rodav mlo kamipe aj o kamipe e Dadesoro savo man bičhalda. 31 Te mothovdem me korkoro mandar, o mothovdipe mlo naj čačuno. 32 O dujto si savo mothovel baše mande; thaj đanav kaj si čačuno mothovdipe saveja mothovel baše mande. 33 Tumen bičhalden ko Jovano, thaj ov mothovđa baš o čačipe. 34 A me ni lav o mothovdipe e manušestar, aj akava vakerav kaj tumen te inkalen tumen. 35 Ov sine memeli savi thabjola thaj rošela; a tumen mangljen hari vakti te lošarenpe lesere rošimase. 36 Aj man isi mothovdipe pobaro e Jovanostar; kaj e kotora save dija man o Dad te kerav len, akala kotora save me kerav mothoven baše mande kaj o Dad bićhalđa man. 37 Thaj o Dad savo bićhalđa man thaj ov mothovđa baše mande. Nisar lesoro krlo ni šunđen, ni o muj lesoro na dikhljen. 38 Thaj o lafi lesoro nane tumen te thanarelpe ana tumende; odolese so tumen na paćan Odolese save Ov bičhalda. 39 Rodinen e Lila, kaj tumen gindinen kaj ane lende isitumen đivdipe bimerutno; a čače on mothovena mandar; 40 Thaj na mangen te aven ke mande te ovel tumen đivdipe. 41 Ašundipe e manušendar ni lav, 42 Aj tumen penđarav kaj kamlipe e Devlesoro najtumen ana tumende. 43 Me avilem ano anav mle Dadesoro thaj na lena ma; te aver avela ano anav plo, ole ka len. 44 Sar tumen šaj te paćan kana len ašundipe jekh avrestar, a o ašundipe savo si kotar o jekhuno Devel na roden? 45 Ma gindinen kaj tumen me ka krisiv e Dadese; isi savo tumen ka krisil, o Mojsije, ana saveste tumen paćan. 46 Kaj te paćana e Mojsije, ka ma paćan vi man; kaj ov hramosarda mandar. 47 A kana lesere Lilenge na paćana, sar ka paćan mle lafonenge?
O Isus parvarel pandž milje manuša
1 Pale odova đelo o Isus prekal e Galilejesoro, Tiverijadesoro derav. 2 Thaj palo leste đana bute selora, kaj dikhena lesere ćeripa save čerela pe nasvale. 3 A o Isus iklilo pe plain, thaj odothe bešlo ple sikljovnencar. 4 A sasa paše e Pasha, baro dive e judejengo. 5 Vazdindoj o Isus pe jakha, thaj dikhindoj kaj but selora avel premalo leste, phenđa e Filipese: Kotar te ćina maro akala te han? 6 A akava vačerđa zumavindoj le, kaj korkoro đanđa so ka ćerel. 7 Irisarda lese o Filip: Ni baš o dušel dinarja marese naj lenđe te ikljol, kaj sakoj lendar numa hari te lel. 8 Phenđa lese jekh kotar e sikljovne lesere, o Andrej, phral e Simone Petresoro: 9 Akate isi jekh terno savo isile pandž mare šođatar thaj duj maćhe. Aj so si odova pe edobor butipe? 10 A o Isus phenđa: Phenen e manušenge te bešen. A sasa ćar but pe odova than. Bešle, akana, e manuša po đindo trujal e pandž milje. 11 A o Isus lija e mare, thaj ašarindoj, ulavđa e sikljovnenge, a e sikljovne odolenge save sesa bešune; ađahar thaj kotar e maćhe kobor mangle. 12 A kana čalile, phenđa ple sikljovnenge: Čeden so aćhile e kotora, kaj khančik te na čhudel pe. 13 Thaj ćidle, thaj pherde dešuduj sevlja kotora kotar e pandž mare šođatar so ačhilo pale odola save xale. 14 Aj e manuša dićhindoj o čeripe save čerda o Isus vaćerena: Akava si čače Profeto savo trubul te avel po them. 15 A kana haljovđa o Isus kaj mangen te aven te astaren le thaj te čeren le thagare, ov gelo pale pe plain korkoro.
O Isus phirel po pani
16 Kana ta peli e rat, hulile e sikljovne lesere po derav, 17 Thaj dindoj ani barka lijepe prekal o derav ano Kapernaum. Thaj teg peli e rat, a o Isus na sine te avel ke lende. 18 A o derav vazdela pe kotar e bari balval. 19 Kana, akana, nakhavde trujal e biš thaj pandž ja trijanda stadija, dikhle e Isuse sar đal po derav thaj paše avel pe barka, ta teg darandile. 20 A ov lenge phenđa: Me sem; ma daran! 21 Thaj mangle te len le ane barka; thaj sigo e barka arakhadili pe phuv ani savi đana.
O Isus – maro đivdipesoro
22 Tajsa dive o seloro savo terdino kotar okoja rig e deravestar, dikhle kaj odothe na sine aver barkori numa okoja jekh ane savi dije e sikljovne lesere, thaj kaj na đerdinda o Isus ple sikljovnencar ane barkori aj numa e sikljovne lesere đele; 23 A e aver barkorja kotar e Tiverijada avile paše ko odova than kaj xale maro kana o Devljutno ašarisarda. 24 Kana, akana, dikhlja o seloro kaj o Isus na sine odothe, ni e sikljovne lesere, đerdinde thaj on ane barke, thaj avile ano Kapernaum rodindoj e Isuse. 25 Thaj arakhavindoj le pe okoja rig e deravesi, phenđe lese; Ravi, kana avilan akari? 26 O Isus lenge irisarda thaj phenđa: Čače, čače tumenđe phenav: na rodena ma so keripe dikhljen, aj so maro xaljen thaj ćaliljen. 27 Den zori na baš o xape savo nakhel, numa baš o habe savo ačhel baš o đivdipe bimerutno, savo ka del tumenđe o Čhavo e Manušesko, kaj akale mothovđa o Devel o Dad. 28 A on lese phenđe: So te ćera kaj te ćerasa kotora e Devlesere? 29 Irisarda o Isus thaj phenđa lenge: Akava si kotor e Devlesoro te paćan ane Odova save Ov bičhalda. 30 A on lese phenđe: Savo, akana, semno tu mothove te dikha thaj te paća tut? So tu ćere? 31 E dada amare xale mana ane drmina, sar kaj si hramome: Maro e badalestar dija lenge te han. 32 Teg lenge phenđa o Isus: Čače, čače tumenge phenav: ni dija tumenge o Mojsije o maro e badalestar aj o Dad mlo dela tumenge čačuno maro e badalestar; 33 Kaj o maro e Devlesoro si odova savo huljel kotar o badali thaj dela đivdipe e themese. 34 Teg lese phenđe: Devljutneja, de amenge sajekh odova maro! 35 A o Isus lenge phenđa: Me sem maro đivdipeso: savo mange avel ni ka bokhaljol, thaj savo ana mande paćal nisar ni ka trošavol. 36 Aj tumenge phendem: thaj dikhljen man, aj ni paćan. 37 Sa so del maje o Dad mange ka avel; thaj odole savo avel mange ni ka ikalav avrijal. 38 Kaj huliljem e badalestar na te čerav mlo kamipe, aj o kamipe e Dadesoro, savo bićhaldama. 39 A akava si kamipe e Dadesoro savo bićhaldama, kaj sa so dinđa man khanči odolestar te na našalav, numa odova te đivdinav ano paluno dive. 40 Akava si kamipe e Dadesoro savo bićhaldama, ta sarsavo savo dićhel e Čhave thaj paćal ane leste isile đivdipe bimerutno; thaj me ka đivdiniv le ano paluno dive. 41 Teg mrmisarde e Judejura pe leste so phenđa: Me sem maro savo hulilo e badalestar. 42 Thaj vaćerena: Naj li akava o Isus, čhavo e Josifesoro, savese amen đana e dade thaj e daja? Sar, akana, ov vakerel: Kotar o badali huliljem? 43 A o Isus lenge irisarda thaj phenđa: Ma mrmisaren maškar tumende. 44 Khoni našti te avel ke mande te na na crdel le o Dad savo bićhaldama; thaj me le ka đivdisarav ano paluno dive. 45 Ane Profetora si hramosardo: Thaj savore ka oven sikavde e Devlestar. Sarsavo savo šunel e Dadestar thaj sikljol, avel ke mande. 46 Na kaj ko dikhlja e Dade sem Odova savo si e Devlestar: ov dikhlja e Dade. 47 Čače, čače tumenđe phenav: Savo paćal ana mande isile đivdipe bimerutno. 48 Me sem maro e đivdipasoro. 49 E Dada tumare xale maro ane drmina, thaj mule. 50 Akava si maro savo huljel e badalestar: te savo lestar xal ni merel. 51 Me sem maro đivdo savo hulilo e badalestar; te xala ko kotar akava maro ka đivdinel bimerutne; thaj o maro savo me ka dav o trupo si mlo, savo ka dav baš o đivdipe e themesoro. 52 E Judeja ćingarena pe maškar peste vakerindoj: Sar šaj akava te del amenge o trupo plo te has? 53 A o Isus lenge phenđa: Čače, čače tumenđe phenav: te na haljen o trupo e Čhavese Manušesko thaj na pijen o rat lesoro, najtumen đivdipe ane tumende. 54 Savo hal mlo trupo thaj pijel mlo rat isile đivdipe bimerutno; thaj me ka đivdinav le ano paluno dive. 55 Kaj o trupo mlo si čačuno xape, a o rat si mlo čačuno pibe. 56 Savo xal mlo trupo thaj pijel mlo rat ana mande bešel thaj me ane leste. 57 Sar so man bičhalda o đivdo Dad, thaj sar me so đivdinav pašo mo Dad, thaj odova savo xala man vi ov ka đivdinel paše mande. 58 Akava si maro savo hulilo e badalestar: na sar so e dada tumare xale maro, thaj mule; savo xal o maro akava ka đivdini bimerutne. 59 Akava phenđa ane sinagoga kana sikavđa ano Kapernaum.
Lafija bimerutne đivdipesere
60 Teg but kotar sikljovne lesere, ašundoj odova, phenđe: Akava si zoralo vaćeripe. Ko šaj te šunela. 61 A o Isus, đanindoj ana peste kaj e sikljovne lesere mrmina ande odova, phenđa lenge: Aj tumen akava bezeharel? 62 A so te dikhljen e Čhave e Manušesere kaj đala upre kaj sine angleder? 63 O Đi si odova so đivdini, o trupo na mažutil khanči. E lafija save tumenge me vakerav đi si thaj đivdipe si. 64 Aj isi maškar tumende nesave save ni paćan. Kaj đangla o Isus kotar o anglipe save si odola so ni paćana, thaj ko ka del le muj. 65 Thaj vakerela: Odolese tumenge vakerdem kaj khonik našti te avel ke mande te na dindilo lese kotar o Dad mlo. 66 Kotar odova but kotar e sikljovne lesere đele palal, thaj maj ni đele oleja. 67 A o Isus phenđa e Dešudujorenge: Te na mangen vi tumen te đan? 68 Teg lese irisarda o Simon Petar: Devljutneja, kase te đa? Tut isi lafija e bimerutne đivdipase. 69 Thaj amen paćajam thaj penđardam kaj sijan tu o Hristos o Čhavo e Devlesoro e đivdesoro. 70 O Isus lenge irisarda: Na alosardem li me tumen dešudujoren? Thaj jekh kotar tumende si o beng. 71 A vakerela baš o Judo e Simonosoro e Iskariotesoro, kaj ov manglja le te del muj, thaj ako sine jekh kotar e Dešudujore.
Baro dive kotar senica. O Isus ano Jerusalim
1 Thaj pale odova phirđa o Isus pe Galileja; kaj pe Judeja ni manglja te phirel, adalese so rodle e Judeja te mudaren le. 2 Sine paše e judejengoro baro dive senica. 3 Teg lese phenđe e phrala lesere: Đa akatar thaj đa ane Judeja, kaj vi e sikljovne tire te dikhen e kotora tire save kere; 4 Kaj khonik na kerel khanči ano garavdipe, a korkoro rodel te ovel penđardo. Kana ađahar so kere, mothovtu e themese. 5 Kaj vi e phrala lesere ni paćana ano leste. 6 Teg lenđe phenđa o Isus: O vakti mlo panda na avilo, a o vakti tumaro sajekh si gatimo. 7 Našti o them te mrzinel tumen; a man mrzinel kaj me mothovav lestar kaj si e kotora lesere đungale. 8 Tumen đan pe akava Baro dive: me pana na ka đav pe akava Baro dive, kaj mlo vakti pana na pherdilo. 9 Vakerindoj lenđe akava, ačhilo ani Galileja. 10 A kana đele e phrala lesere, teg vi korkoro đelo ko Baro dive, na putarune, aj sar ano garavdipe. 11 A e Judeja le rodena kotar o Baro dive thaj vakerena: Kaj si odova? 12 Thaj sine kotar leste but čingara ano seloro: jekhune vakerena kaj si lačho, a e avera vakerena: na, aj xoxavel o seloro. 13 Aj khoni na vakerena putarune olestar kotar e dar e Judejendar. 14 A ake ane ekvaš e Bare divestar avilo o Isus ano hramo thaj sikavela. 15 Thaj čudinena pe e Judeja vakerindoj: Sar akava đanel o lila a na siklilo? 16 Teg lenge vakerda o Isus thaj phenđa: Mlo đanipe nane mlo, aj Odolesko savo man bićhaldama. 17 Te manglja ko o kamipe lesoro te ćerel, ka penđarel da li si akava đanipe e Devlestar, ja me korkoro mandar vakerav. 18 Savo vakerel korkoro pestar, plo ašundipe rodel; a ko rodel ašundipe Odolese savo le bičhalda, odova si čačuno thaj naj ano leste bihakaja. 19 Na li o Mojsije dija tumenge o Kanuni? Thaj khoni kotar tumendar ni ćerel o Kanuni. Sose roden te mudaren man? 20 Irisarda o seloro thaj phenđa: O đungalo đi si ane tute; ko rodel te mudarel tut? 21 Irisarda o Isus thaj phenđa lenge: Jekh kotor ćerdem, thaj savore prašukaren tumen odolese. 22 O Mojsije tumenge dinđa sunetipe, na so si odova kotar o Mojsije, aj kotar e dada, thaj ko savato sunetinena e manuše. 23 Te ko savato o manuš lela o sunetipe, te odoleja na phagelape pe o Kanuni e Mojsijasoro, sose pe mande holjaven so sorone manuše sastardem ko savato? 24 Ma krisinen po dićhipe, aj vortome kris krisinen.
Odova li si o Mesija?
25 Teg vakerena nesave kotar e Jerusalimljanija: Naj li odova save rodena te mudaren? 26 Thaj dikh, vakerel mukline thaj khanči lese ni phenen. Te čačutne na đangljarde amare šorutne kaj si ov čače o Hristos? 27 Aj akale đana kotar si; a o Hristos kana avel, khoni ni ka đanel kotar si. 28 Teg o Isus dija vika ano hramo siklindoj thaj vakerindoj: Thaj penđaren man thaj đanen kotar sem; thaj korkoro mandar ni aviljem, aj si čačuno Odova savo bićhaldama, save tumen ni đanen. 29 Me đanav le, kaj lestar sinjum, thaj Ov bićhaldama. 30 Teg rodle le te astaren, thaj khonik na ćuča pe leste po vast, kaj pana na alo o časo lesoro. 31 A kotar o seloro but đene paćaje ano leste, thaj vakerena: Kana ka avel o Hristos, aj pobuter li ćerimata ka ćerel kotar akava aj so čerda? 32 Ašunde e fariseja kaj o seloro lestar ađahar vakerel, thaj bićhalde e fariseja thaj e anglunerašaja e kandinen te astaren le. 33 Teg o Isus phenđa: Pana hari vakti sem tumenca, te đava Odolese savo bićhaldama. 34 Ka roden man thaj naj te arakhen ma; thaj kaj sem me tumen našti te aven. 35 A e Judeja vakerde maškar peste: Kotar akava mangel te đal, a kaj le amen ni ka arakha? Na gndil li te del ano ćhordaripe jelinoso thaj te sikavel e Jelinen? 36 So mandavel akava lafi savo phenđa: Ka roden man thaj ni ka arakhen; thaj kaj sem me tumen našti te aven? 37 A ano paluno dive e Bare divesesko ačhela o Isus thaj dija vika vakerindoj: Ko si trošalo neka avel ke mande thaj pijel! 38 Savo ana mande paćal, sar so o Lil phenđa, andar o vođi lesoro ka phiren e lenja đivde panjesere. 39 Aj akava phenđa kotar o Đi save trubuje te len odola save paćan ano anav lesoro, kaj o Đi Sumnalo panda na sine dindo, odolese so o Isus pana na sine ašundino.
Ulavdipe ano seloro
40 A but đene kotar o seloro ašundoj odova lafi, vakerena: Akava si čače Profeto. 41 Aver đene vakerena: Akava si o Hristos. A e avera vakerena: Aj ka o Hristos avela andar e Galileja? 42 Sar na phenđa o Lil kaj ka o Hristos avel kotar e kučin e Davidesiri thaj andar o gav Vitlejem kaj sasa o David? 43 Ađahar ulo ulavdipe ano seloro bašo leste. 44 A nesave kotar lende mangle te astaren le; aj khonik ni čhuta po vast pe leste.
Biamalipe e phurederutnengo thaj e farisejengo
45 Avile e kandine e anglunerašajenge thaj e farisejenge, thaj on lenge phenđe: Sose na anden le? 46 E kandine irisarde: Niti ked o manuš ađahar na vakerđa sar akava manuš. 47 Teg lenge irisarde e fariseja: Aj li vi tumen xoxavdiljen? 48 Paćaja li khoni ane leste kotar o šerutne ja kotar e fariseja? 49 Aj o seloro akava savo na đanel o Kanuni, armandindo si! 50 Phenđa lenge o Nikodim, savo lese avela raćasa thaj sasa jekh kotar lende; 51 E vaj li o Kanuni amaro krisinel e manušese đikaj les najanglal na ašunel thaj đanel so ćerel? 52 Irisarde lese thaj phenđe: Te naj san vi tu andar e Galileja? Phuč thaj dikh kaj o profeto andar e Galileja na avel. 53 Thaj gele sakoj ple kherese.
E đuvli astardili ano anglačumidipe
1 A o Isus đelo pe Maslinaki plain. 2 Thaj sabalje palem avilo ano hramo, thaj sa o seloro avena ke leste; thaj bešlo thaj sikavela len. 3 A e lilvarne thaj e fariseja ande e đuvlja astardi ano anglačumidipe, thaj čhutela ko maškar. 4 Thaj phende lese: Sikamneja, akaja đuvli si astardi ano anglačumidipe ko čeripe; 5 A o Mojsije amenđe ano Kanuni vaćerda kaj asavken te khuva barencar. Tu akana, so phene? 6 Akava phende zumavindoj le kaj te oven len baše sose te došaren le. A o Isus, telindoj tele, hramosarda najesa pe phuv. 7 A kana zorale phučle le, vortosajlo pe thaj phenđa lenge: Savo si maškar tumende bi bezehengo nek angluno čhudel bar pe late. 8 Ta pale telilo tele thaj hramosarda ki phuv. 9 A on ašundoj odova, thaj došardo kotar lengiri godi, ikljona jekh po jekh, anglindoj kotar o phurederutno đi o paluno; thaj ačhilo o Isus korkoro thaj e đuvli terdindoj ko maškar. 10 A kana o Isus vortosajlo, thaj na dićhindoj khanika đi korkore đuvlja, phenđa laće: Đuvlije, kaj si odola so došaren tut? Aj khoni ni krisinđatu? 11 A oj phenđa: Nisavo, Devljutneja. A o Isus laće phenđa: Ni me na krisinav tut; đa, thaj akanatar ma ker doš.
O Isus rošlipe e themesko
12 O Isus lenge pale phenđa, vakerindoj: Me sem rošlipe e themese; ko đal pala mande na ka phirel ano raćipe, aj ka ovel le rošlipe e đivdipeso. 13 Teg lese phende e fariseja: Tu korkoro baše tuće mothove; o mothovdipe tiro nane čačuno. 14 O Isus irisarda thaj phenđa lenge: Te me thaj mothovav baše korkoro mange, čačuno si o mothovdipe mlo, kaj đanav kotar avilem thaj kaj đav; a tumen ni đanen kotar avav thaj kaj đav. 15 Tumen krisinen po trupo, me ni krisinav khanikase. 16 Aj te me vi krisiv, o kriso si mlo čačuno, kaj najsem korkoro aj me thaj o Dad savo bićhaldama. 17 A thaj ano Kanuni tumaro ačhel hramome kaj o mothovdipe duje manušengo si čačuno. 18 Me sem odova savo mothovel baše pese, thaj mothovel baše mande o Dad savo bićhaldama. 19 Teg lese vakerde: Kaj si o Dad tiro? O Isus irisarda: Ni đanen ni man ni e Dade mle; kana bi đanen man, đanena bi thaj e Dade mle. 20 Akala lafija phenđa o Isus ki soba kana sikavđa ano hramo; thaj nijek ni astarda le, kaj pana ni avilo o časo lesoro.
Čarundipe e bipaćamne Judejenge
21 A o Isus lenge palem phenđa: Me đav, thaj ka roden man; thaj ka meren ano bezeh tumaro; kaj me đav tumen našti te aven. 22 Teg phenđe e Judeja: Te na ka mudarel pe korkoro, kaj vakerel: kuri me đav tumen našti te aven? 23 Thaj phenđa lenge: Tumen sijen telal, me sem upral; tumen sijen kotar akava them, me najsem kotar akava them. 24 Odolese tumenge vi phendem kaj ka meren ane bezeha tumare; kaj te na paćajen kaj Me sem, ka meren ane bezeha tumare. 25 Teg lese vakerde: Ko sijan tu? Thaj phenđa lenge o Isus: Anglipe, so tumenge thaj phenav. 26 But isi man tumendar te vakerav thaj krisiv; aj Odova savo bićhaldama čačuno si, thaj me vakerav ano them odova so šundem lestar. 27 Thaj ni haljovđe kaj lenge vakerel baš o Dad. 28 A o Isus lenge phenđa: Kana ka vazden e Čhave e Manušesere, teg ka đanen kaj Me sem, thaj kaj khanči korkoro mandar ni čerav; aj sar sikavđa man o Dad mlo ađahar vakerav. 29 Thaj Odova savo bićhaldama manca si. Ni meklja o Dad man korkoro; kaj me sajekh kerav so si lese lačhe.
E Hristosko čačipe thaj e Avraamose nevebijande
30 Kana ov akava vakerda, but đene paćaje ano leste. 31 Teg o Isus vakerda odole Judejenge save lese paćaje: Tumen te aćhiljen ano đanipe mlo, čače sijen mle sikljovne; 32 Thaj ka penđaren o čačipe, thaj o čačipe tumen ka mukljarel. 33 Irisarde lese: Amen sam kućina e Avraamose, thaj nisar khanikase ni robujisardam. Sar tu vakere: ka oven muklime? 34 O Isus lenge irisarda; Čače, čače tumenđe phenav kaj sarsavo kaj kerel bezeh robo si ano bezeh. 35 A o robo ni ačhel ano ćher saberšenca, o čhavo ačhel saberšenca. 36 Te tumen, akana, o Čhavo muklinel, čače ka oven muklime. 37 Đanav kaj sijen kućina e Avraamose; aj roden te mudaren man, kaj mlo lafi naj le than ana tumende. 38 Me vakerav so dikhljem kotar o Dad mlo, vi tumen, akana, čeren so dikhljen kotar o dad tumaro. 39 Irisarde thaj phende lese: O Dad amaro si o Avraam. O Isus lenge phenđa: Te oven čhave e Avraamosere, kerena bi kotora e Avraamosere. 40 A akana roden te mudaren man, manuše savo phenđa tumenge o čačipe, savo šundem kotar o Devel. Odova o Avraam ni čerda. 41 Tumen keren kotora tumare dadesere. Teg lese phenđe: Amen najsam bijande e lubnimastar; jekhe dade isiamen – e Devle. 42 A o Isus lenge phenđa: Kana bi o Devel ovela o dad tumaro, ka čumiden bi man; kaj me kotar o Devel ikliljem thaj aviljem; kaj ni aviljem korkoro mandar, kaj Ov bićhaldama. 43 Sose na haljoven o vakeripe mlo? Kaj našti te šunen o lafi mlo. 44 Tumenge si dad o beng, thaj e mangipa e dadese tumarese mangen te keren; ov sasa manušmudarutno kotar o anglipe, thaj ni terđol ano čačipe, kaj najle čačipe ano leste; kana vakerel xoxavipe, plo vakerel, kaj si ov xoxamno thaj dad xoxajimasko. 45 A mange ni paćan, kaj me vakerav o čačipe. 46 Savo man kotar tumende mahrisarda baš o bezeh? Te li o čačipe vakerav, sose man tumen ni paćan? 47 Odova savo si kotar o Devel, e lafija e Devlesere šunel; odolese tumen ni šunen, kaj nasijen kotar o Devel. 48 A e Judeja irisarde thaj phenđe lese: Ni phena li amen lačhe kaj sijan tu Samarjani, thaj kaj o đungalođi si ana tute? 49 O Isus irisarda: Ana mande đungalođi nane, aj paćivav mle Dade; a tumen man lađarena. 50 A me ni rodav o ašundipe mlo; isi Odova savo rodel thaj krisil. 51 Čače, čače tumenđe phenav: Ko ikerel o lafi mlo ni ka dikhel o meripe saberšencar. 52 Teg lese phende e Judeja: Akana đana kaj o đungalođi si ana tute. O Avraam mulo thaj e profetora, a tu vakere: ko ikerel o lafi mlo ni ka zumavel o meripe saberšencar. 53 Aj li san tu pobaro kotar o dad amaro o Avraamo, savo mulo? Vi e profetora mule. Ko tu korkoro ćeretu? 54 A o Isus irisarda: Te me ašundarav korkoro man, o ašundipe mlo si khanči. O Dad si mlo odova savo ašundarel man, baš savese tumen vakeren kaj si o Devel tumaro. 55 Thaj ni penđaren le, a me le đanav. Thaj te phendem kaj le ni đanav, ka ovav xoxamno sar tumen. Aj đanav le, thaj o lafi lesoro ikerav. 56 O Avraam, o dad tumaro, sasa manglo te dikhel o dive mlo; thaj dikhlja thaj lošalisajlo. 57 A e Judeja lese phenđe: Pana nane tut ni pinda berša, a e Avraame dikhljan? 58 A o Isus lenge phenđa: Čače, čače tumenđe phenav: anglal so o Avraam ulo, Me sem. 59 Teg leje o bara te frden pe leste; a o Isus garadilo, thaj iklistilo kotar o hramo thaj nakhlo maškaro lende thaj ađahar đelo.
Sastaripe e kororeso kotar o bijandipe
1 Thaj nakhlindoj dikhlja e korore manuše kotar o bijandipe. 2 Thaj phučle le e sikljovne lesere vakerindoj: Sikamneja, ko čerda bezeh, akava ja e bijande lesere, ta bijandilo kororo? 3 O Isus irisarda: Ni čerda bezeh ni ov ni e bijande lesere, aj te mothovđon e kotora e Devlese pe leste. 4 Mange trubul te čerav kotora Odolese savo bićhaldama, đikaj si dive. Avela e rat kana khonik našti te ćerel. 5 Đikaj sem ano them, rošlipe sem e themese. 6 Vakerindoj akava, čhungarda ki phuv thaj čerda čik e čhungarestar, thaj makhlja čikasa e jakha e kororese. 7 Thaj phenđa lese: Đa thov tut ane banja Siloamosi, so nakhavne mandil: bičhaldo. Ov đelo, akana, thaj thovdape, thaj avilo dikhindoj. 8 A e najpašune vi odola save dikhlesa le anglal kaj sine kororo vakerde: Naj li akava odova so bešela thaj mangela? 9 Jekhune vakerena kaj si ov, a e avera kaj si miazutno pe leste. Ov vakerela: Me sem. 10 Teg lese vakerena: Sar tuće phravdile o jakha? 11 Ov irisarda thaj phenđa: O manuš savo akharel pes Isus čerda čik, thaj makhlja e jakha mle, thaj phenđa mange: đa ane banja Siloamosi thaj thov tut. Thaj kana geljem thaj thodema, dikhljem. 12 Teg lese phenđe: Kaj si ov? Phenđa: Ni đanav. 13 Akana ole, e varekanutne korore, ingarde ke fariseja. 14 A sasa savato kana o Isus kerda e čik thaj phravđa lesere jakha. 15 A e fariseja ole pale napal phučle sar dikhlja. A ov lenge phenđa: Čik čhuta mange pe jakha, thaj thovdema thaj dikhav. 16 Teg vakerena nesave kotar e fariseja: Naj akava manuš kotar o Devel, kaj ni ikerel o savato. E avera vakerena: Sar šaj o manuš bezehalo asavke keripa te kerel? Thaj ulo phagipe maškaro lende. 17 Pale phende e kororese: So tu phene baš odova so phravđa e jakha tire? A ov phenđa: Profeto si. 18 Teg e Judejura ni paćaje baš lese kaj sasa kororo thaj dikhlja, đikaj ni akharde e bijanden odolesere so dikhlja. 19 Thaj phučle len vakerindoj: Aj li si akava o čhavo tumaro baše savese tumen phenen kaj bijandilo kororo? Sar, durim, akana dikhel? 20 A e bijande lesere irisarde lenge thaj phenđe: Đana kaj si akava o čhavo amaro, thaj kaj bijandilo kororo; 21 A sar akana dikhel ni đana, ja ko lese phravđa e jakha amen ni đana; korkoro ake barilo, Phučen ole, nek korkoro phenel baše peste. 22 Akava phenđe e bijande lesere kaj darandile e Judejendar; kaj e Judejura ake kerde lafi te ovel ćhinado kotar e sinagoga ko god ole mothoj bašo Hristos. 23 Odolese phenđe e bijande lesere: Barilo, ole Phučen. 24 Teg po dujto drom akharde e manuše savo sine kororo, thaj phenđe lese: De o ašundipe e Devlese, amen đana kaj si odova manuš bezehalo. 25 A ov irisarda thaj phenđa: Aj li si bezehalo, ni đanav; jekh đanav – kaj me sema kororo, thaj akana dikhav. 26 Teg lese pale phenđe: So tu ćerdan? Sar phravđa e jakha tire? 27 Irisarda lenge: Ake tumenđe phendem thaj ni šunđen. So pale mangen te šunen? Te na mangen vi tumen te oven e sikljovne lesere? 28 On ole mahrinde thaj phenđe: Tu sijan sikljavno lesoro, a amen sam sikljovne e Mojsijesere. 29 Amen đana kaj e Mojsijese vačerđa o Devel; a akale ni đana kotar si. 30 Irisarda o manuš thaj phenđa lenge: Ano odova vi si o biašuđaripe so tumen ni đanen kotar si, a ov phravđa e jakha mle. 31 A đana kaj o Devel ni ašunel e bezehalen; aj te ko e Devle paćavel thaj o kamipe lesoro kerel, odole šunel. 32 Oto sar si o them thaj o šelberšipe ni šundilo kaj khonik te phravel e jakha e bijande kororese. 33 Kana ov na bi ovela oto o Devel, na bi šaj khanči te ćerel. 34 Irisarde thaj phenđe lese: Tu bijandiljan sa ano bezeha, aj tu amen te sikave? Thaj čhudle le avrijal. 35 Šunđa o Isus kaj čhudle ole avrijal, ta arakhavindoj le phenđa lese: Paćasa li tu ano Čhavo e Devlesoro? 36 Ov irisarda thaj phenđa: A ko si ov, Devljutneja, te ano leste te paćav? 37 A o Isus lese phenđa: Thaj dikhljan le thaj odova savo vakerel tusa, odova si. 38 A ov phenđa: Paćav, Devljutneja! Thaj banđardilo lese. 39 Thaj phenđa o Isus: Baš o kriso me aviljem ano akava them, te dikhen save ni dikhen, thaj save dikhen te oven korore. 40 Thaj šunde akava nesave kotar e fariseja save sine lesa, thaj phende lese: Aj li si vi amen korore? 41 Phenđa lenge o Isus: Kana bi ovena korore, na bi ovela tumen bezeha; a akana phenena: dikha, ađahar tumaro bezeh ačhola.
Lačho čobano
1 Čače, čače tumenđe phenav: Ko na đerdini ko udara ano toro e bakrengo aj nakhela pe aver than, ov si čor thaj vošutno. 2 A savo đerdini ko udara čobano si e bakrengo. 3 Lese o udarutno phravela, thaj o bakre o krlo lesoro šunen, thaj ple bakren akharel ko anav, thaj ikalela len; 4 Thaj kana ple bakren ikalela, đala anglo lende, thaj e bakre đana palo leste, kaj penđaren o krlo lesko. 5 A palo avruno ni ka đan, aj ka našen kotar leste, kaj ni penđaren o krlo e avrunengo. 6 Akaja paramiči mothoda lenge o Isus, aj on ni haljovde so sasa odova so lenge vakerda. 7 Teg lenge pale phenđa o Isus: Čače, čače tumenđe phenav: me sem udar e bakrenge. 8 Savore save god avile angleder mandar čora si thaj vošutne; aj len o bakre na šunde. 9 Me sem udar; te ko đerdinđa andar mande ka inkalel pe, thaj ka đerdini thaj ka ikljol, thaj čaripe ka arakhel. 10 O čor ni avela baš aver aj te čorel thaj te čhinel thaj aravel. Me avilem te ovel len đivdipe thaj te ovel len ano butipe. 11 Me sem čobano lačho. O čobano lačho o đivdipe plo pašljarel e bakrenge. 12 A o počindo, savo nane čobano, savese e bakre naj lesere, dikhel e ruve kaj avel, thaj mekel e bakren, thaj našel; thaj o ruv astarel e bakren thaj tradel len. 13 A o počindo našel, kaj si počindo thaj ni hajil e bakrenge. 14 Me sem čobano lačho thaj penđarav mlen, thaj mle man penđaren. 15 Sar o Dad so penđarel man thaj me e Dade; thaj o đivdipe mlo pašljarav e bakrenge. 16 Vi aver bakre isi ma save naje kotar akava toro, thaj len mange trubul te anen, thaj ka šunen o krlo mlo, thaj ka oven jekh čidipe bakrengo thaj jekh čobano. 17 Odolese man o Dad čumidel, kaj me o đivdipe mlo pašljarav thaj pale ole te lav. 18 Khonik ole na lel mandar, aj me ole korkoro mandar pašljarav. Baroderipe isi man te pašljarav le thaj baroderipe isi man pale te lav ole. Akava vakeripe lijem kotar o Dad mlo. 19 Teg pale ulo čhinavdipe maškar e Judejura ando akala lafija. 20 A but đene lendar vakerena: Ano leste si o đungalođi, thaj nahudil. Sose le šunen? 21 E aver vakerena: Akala naje lafija nahudutnese. Sar šaj o đungalođi e kororenge jakha te phravel.
Jekhipe e Dadesko thaj e Ćhavesko
22 A sasa tegani Baro dive iripasko e hramosko ano Jerusalim, thaj sine jevend. 23 Thaj phirda o Isus ano hramo po tremo e Solomonesko. 24 Thaj e Judejura ole trujalisarde thaj vakerde lese: Đikote ka mučine e ođe amare? Te san tu o Hristos, phen amenđe phravindoj. 25 O Isus lenge irisarda: Vakerdem tumenđe aj ni paćan. E kotora save kerav me ano anav mle Dadesko, odola mothoven mandar, 26 Aj tumen ni paćan; kaj najsen kotar mle bakre, sar so tumenđe phendem. 27 E bakre mle šunen o krlo mlo, thaj me len penđarav, thaj pala mande đan. 28 Thaj me lenge dav o đivdipe bimerutno, thaj nisar naj te mudardon, thaj khonik olen na ka lel kotar mle vasta. 29 O Dad mlo savo len dija man najbaro si kotar sarijende; thaj khonik olen našti te lel kotar o vasta mle Dadese. 30 Me thaj o Dad jekh sam. 31 A e Judejura pale vazdle e bara te čhuden le. 32 O Isus lenge irisarda: But lačhe kotora mothovdem tumenđe kotar o Dad mlo, baše savenge kotar odola kotora čhuden man barencar? 33 Irisarde lese e Judejura vakerindoj: Ni čhuda tut barencar bašo lačhe kotorenge, aj baše mahrimase, so tu, manuš avuno, ćereatu Devel. 34 Irisarda lenge o Isus: Naj li hramome ano Kanuni tumaro: Me phendem devela sijen? 35 Kana len akharda devlenca, savenge o lafi e Devlesoro dindo, a o Lil našti te čhinavđol, 36 Sar tumen vakeren odolese save o Dad sumnalinđa thaj bičhalda po them: mahrine, odolese so phendem: me sem Čhavo e Devlesoro? 37 Te na ćerdem kotora mle Dadese, ma paćan man. 38 A te ćerdem, thaj man te na paćajen, e kotorenđe paćan, te penđaren thaj paćan kaj si o Dad ana mande thaj me ano leste. 39 Tegani pale rodle te astaren le; aj olendar crdisajlo kotar o vasta. 40 Thaj gelo pale prekal o Jordano po than kote o Jovan najanglal bolipesarda: thaj ačhilo odothe. 41 Thaj but đene avile ke leste thaj vakerena: O Jovan ni čerda nijekh čeripe, aj sa so phenđa o Jovan baš akalese čačipe sasa. 42 Thaj but đene paćaje ano leste odothe.
E Lazaresko đivdisaripe
1 Sasa nesavo nasvalo, o Lazar andar e Vitanija, andar o gav e Marijako thaj e Martako, e phenja lesere. 2 A e Marija, savakoro phral o Lazar sine nasvalo, sine odoja savi makhlja e Devljutne sungasa thaj khoslja e pre lesere ple balencar. 3 Tegani o phenja bićhalde ke leste vakerindoj: Devljutneja, ake dukhavdo odova save tu čumide. 4 A kana šunda o Isus, phenđa: Akava nasvalipe naj po meripe, aj po ašundipe e Devlesoro, kaj o Čhavo e Devlesoro te ašundol pe late. 5 A o Isus čumidla e Marta thaj e phenja lakara thaj e Lazare. 6 Ta kana šunda kaj si nasvalo, teg ačhilo duj dive ko than kaj sine. 7 Pale odova phenđa e sikljovnenge: Aj te đa pale ani Judeja. 8 Phende lese e sikljovne: Sikamneja, akana e Judejura rodle te čhuden tut barencar, ta sar pale đa odori? 9 O Isus irisarda: Naj li dešuduj časora ano dive? Ko divese đal ni lel naj, kaj dikhel o rošlipe akale themesko; 10 A ko đal raćate lel naj, kaj najle rošlipe ane leste. 11 Akava phenđa, thaj napal lenge vakerda: o Lazar, amal amaro, zasuta, aj đava le te džangavav. 12 Teg phende e sikljovne lesere: Devljutneja, te zasuča, ka uštel. 13 A o Isus lenge phenđa bašo meripe lesoro, on ta gndisarde kaj vakerel kotar sojbesoro suno. 14 Teg lenge o Isus phenđa phravde: o Lazar mulo. 15 Thaj avol mange lačhe paše tumende kaj najsema odori, te paćan; aj hajde leste. 16 Tegani o Toma, akhardo Dujoro, phenđa e avere sikljovnenge: Ajde thaj amen te mera oleja. 17 Kana avilo o Isus, arakhlja ole, a ov ake štar dive ano limori. 18 A e Vitanija sasa paše bašo Jerusalim trujal dešupanđ stadija. 19 Thaj but oto e Judejura sesa avile e Martaće thaj e Marijaće te kovljaren e dukh pala o phral lengoro. 20 Kana e Marta šunda kaj o Isus avel, iklistili anglo leste, a e Marija bešli ćhere. 21 Teg phenđa e Marta e Isusese: Devljutneja, te ove tu akate, ni bi merela o phral mlo. 22 Aj thaj akana đanav, ta sa so rode ano Devel, ka del tut o Devel. 23 Phenđa lake o Isus: Ka đivdisinel o phral tiro. 24 E Marta lese phenđa: Đanav kaj ka đivdisinel kotar o đivdisaripe ano paluno dive. 25 O Isus lake phenđa: Me sem đivdisaripe thaj đivdipe; savo paćal ana mande thaj te mulo, ka đivdinel. 26 Thaj sakoj savo đivdinel thaj paćal ana mande ni ka merel sajekh. Paćasa li akava? 27 Phenđa lese: Va, Devljutneja! Me paćav kaj san tu o Hristos Čhavo e Devlesoro savo avel ano them. 28 Thaj akava vakerindoj, đeli ta akharda garavdine e Marija, pla phenja, vakerindoj: O sikamno avilo thaj akharel tut. 29 Voj, sar ašunda, uštili sig thaj geli ke leste. 30 Kaj o Isus pana nasine te avel ano gav, aj sasa pe odova than kote le araklja e Marta. 31 A e Judejura, save sine lasa ano kher thaj kovljarena laći dukh, kana dikhle e Marija kaj sig uštili thaj iklistili, đele pale late vakerindoj kaj đal po limori te rovel odori. 32 A e Marija, sar avili kaj sine o Isus thaj dikhlja le, peli anglo pre lesere vakerindoj lese; Devljutneja, te ove tu akate, bi merela mlo phral. 33 Teg o Isus, kana dikhljala kaj rovel, thaj kaj roven e Judejura save avile lasa, izdrardilo ano đi thaj korkoro đungadilo, 34 Thaj phenđa: Kaj ćhuten le? Phende lese: Devljutneja, ava te dikhe. 35 E Isusese čalade e asva. 36 Teg e Judejura vakerde: Dikh, sar čumidlja le. 37 A nesave kotar lende phende: Naštine li akava savo phravđa e jakha e kororese te kerel kaj vi akava te na merel? 38 A o Isus pale izdrardilo ana peste, thaj avilo po limori. A odova sine pečina, thaj o bar pašljola pe late. 39 O Isus phenđa: Čiden o bar! Phenđa lese e Marta, phen e mulesiri: Devljutneja, eke khandel; kaj si štar dive ano limori. 40 Phenđa lake o Isus: Na li phendem tuke kaj te paćajan, ka dikhe o ašundipe e Devlesoro? 41 Tegani cidinde o bar kote pašlilo o mulo. A o Isus vazdinđa pe jakha upre, thaj phenđa: Dade, ašarisajvav tuće so šunđan man! 42 A me đanglem kaj sajekh ašunema; aj phendem bašo seloro savo akate ačhel, te paćan kaj tu bićhaldanma. 43 Thaj akava vakerindoj, dija vika bare krlesa: Lazare, ikljov avri! 44 Thaj iklilo o mulo vulime ko vasta thaj ko pre mulikane fašenca, thaj o muj lesoro poxtanosa phandino. O Isus lenge phenđa: Phraven le thaj meken neka đal.
O Sinedrion opipe e Isusestar
45 Teg but kotar e Judejura save avile e Marijake, dićhindoj so čerda o Isus, paćaje ano leste. 46 Nesave kotar lende gele e farisejenge thaj mothovde lenge so kerda o Isus. 47 Teg e anglunerašaja thaj e fariseja čedinde o Sinedrion, thaj vakerde: So te kera? Akava manuš kerel but kerimata. 48 Te mekljam le ađahar, savore ka paćan ano leste, ta ka aven e Rimljanja thaj ka len amendar vi e phuv thaj o seloro. 49 A jekh kotar lende, po anav Kajafa, savo okova berš sine anglunorašaj, phenđa lenge: Tumen ni đanen khanči; 50 Ni gndisaren kaj si baš amenđe najlaćhe kaj jekh manuš te merel bašo seloro, a na kaj sa o seloro te peravđol. 51 A akava ni phenđa korkoro pestar, aj avuno anglunorašaj okole beršestar, anglaphenda kaj o Isus ka merel bašo seloro; 52 Thaj na semo bašo seloro, aj vi e čhordarde čhavoren e Devlesere cidel ano jekh. 53 Kotar odova, varekaj, dive kerde lafi le te mudaren. 54 A o Isus ni phirda maj putarune maškar e Judejura, aj gelo odothar ano agor paše e drmina, ano foro akhardo Jefrem, thaj odothe beštino ple sikljovnencar. 55 A sasa paše e Pasha e judejengi, thaj but đene kotar e sa phuv gele ano Jerusalim angleder e Pasha te užarenpe. 56 Teg rodena e Isuse, thaj terdindoj ano hramo vakerena maškaro peste: So tumenđe kerdol pe, te na ka avel ko Baro dive? 57 A e anglunerašaja thaj e fariseja dinesa čhinavdipe, te đangla khoni kaj si, nek mothoj te astaren le.
Makhlipe ane Vitanija
O Mesija đerdinil ano Jerusalim
1 A o Isus pe šov dive angleder e Pasha avilo ane Vitanija, kaj sasa o Lazar savo mulo, save ov vazdinđa kotar o mule. 2 Odothe lese gatisarde raćako xape, thaj e Marta kandela, a o Lazar sasa jekh kotar odola so bešela lesa bašo astali. 3 A e Marija, lindoj e litra čače nardose kuć sungakoro, makhlja e pre e Isusese, thaj khoslja ple balencar e pre lesere; a o kher pherdilo sung kotar o šandipe. 4 Tegani phenđa jekh kotar e sikljovne lesere, o Juda e Simonoso e Iskariotoso, savo le mangla te del muj; 5 Sose akava šandipe ni bićindilo bašo trišel dinara thaj ni dindilo e čororenge? 6 A akava ni phenđa so lese ačhilo đi e čorore, thaj so sasa čor, thaj sinele kesa, thaj lelja so čhivelape ano late. 7 A o Isus phenđa: Mek ola! Oj odova ačhavđa bašo dive mle parunipnaso; 8 Kaj čororen sajekh isitumen tumencar, a man najtumen sajekh. 9 Dođande but đene o seloro kotar e Judeja kaj si odori thaj avile na numa e Isusese, aj vi te dikhen e Lazare save ov vazdinđa kotar mule. 10 A e anglunerašaja kerde lafi kaj vi e Lazare te mudaren. 11 Kaj but đene kotar e Judejura avena bašo leste thaj paćana ano Isus. 12 Tajsadive but seloro savo avilo ko Baro dive, ašundoj kaj o Isus avela ano Jerusalim, 13 Lije e krangore kotar e palma thaj iklistile lese ano malavdipe thaj dena vika: Osana! Baxtardino savo avel ano anav e Devljutnesko, o thagar e Izrailjesko! 14 A o Isus arakhadinoj e here bešlo pe leste, sar so si hramome: 15 Ma dara, čhaje Sionosi, ake o thagar tiro avela bešindoj ko her. 16 Aj akava na haljovđe anglune e sikljovne lesere; ta kana ašundilo o Isus, teg dije godi kaj akava sine bašo leste hramome, thaj kaj olese akava kerde. 17 A mothovda o seloro savo sine lesa kana e Lazare akharda andar o limori thaj vazdinđa le kotar mule. 18 Baše odova olese thaj iklistilo o seloro ano malavdipe, kaj ašunda so ov kerda akava keripe. 19 A e fariseja vakerde maškaro peste: Dikhen sar khanči ni ažutil. Eke, o them gelo palo leste.
Palune Isusesere lafija e selorese
20 A sesa vi nesave Jelinija maškar odola save avile te ruđinenpe e Devlese ko Baro dive. 21 On, varekaj, pašile e Filipese, savo sasa kotar Vitsaida e Galilejaki, thaj ruđisarda le vakerindoj: Rajo, manga te dikha e Isuse. 22 Avilo o Filip thaj mothoda e Andrejese, a palem o Andrej thaj o Filip mothode e Isusese. 23 A o Isus lenge irisarda vakerindoj: Avilo o časo te ašundelpe o Čhavo e Manušesko. 24 Čače, čače tumenđe phenav: te e kučin e đivesi perindoj pe phuv ni merel, teg jekh ačhola; aj te muli, bijanipe but anela. 25 Savo kamel o đivdipe plo ka xasarel le, a ko mrzinel o đivdipe plo pe akava them ka arakhel le bašo đivdipe bimerutno. 26 Ko mange kandel, pala mande nek đal, thaj kaj sem me, odothe vi o kandino mlo ka ovel; thaj ko mange kandel odolese ka del paćiv o Dad mlo. 27 Akana si ođi mlo izdardo, thaj so te phenav? Dade, ikal man kotar o časo akava; aj odolese avilem bašo časo akava. 28 Dade, ašundare o anav tiro! Tegani o krlo avilo badalestar: Thaj ašundarem, thaj palem ka ašundarav! 29 A o seloro savo terđola, kana odova šunda, vakerena kaj e grmavina grmisarda; a e aver vakerena: O Phakalo lese vakerda. 30 O Isus irisarda thaj phenđa: Akava krlo nasine baše mande aj baše tumende. 31 Akana si kris akale themese; akana o knezo akale themesko ka ovel frdimo avrijal. 32 Thaj kana me ka ovav vazdimo e phuvjatar sa ka vazdav pe mande. 33 A akava vakerda, mothovindoj sava merimasa ka merel. 34 O seloro lese irisarda: Amen ašundam kotar o Kanuni kaj o Hristos ačhel sajekh; thaj sar tu vakere kaj e Čhavese e Manušesere trubul te vazdelpe? Ko si odova Čhavo e Manušesko? 35 A o Isus lenge phenđa: Pana hari vakti si o rošlipe tumenca; đan đikaj rošlipe isitumen kaj tumen o raćipe te na astarel; a ko đal po raćipe ni đanel kuri đal. 36 Đikaj rošlipe isitumen paćan ano rošlipe, te oven čhave rošlipasere. Vakerindoj akava, o Isus gelo thaj garadape olendar.
E Jevreja ni paćan ano Isus
37 Kaj vi te kerda edobor keripa anglo lende, ni paćana ano leste; 38 Te pherdol o lafi e Isaijasoro o profeto savo phenđa: Devljutneja, ko paćaja ano vakeripe amaro? Thaj o vas e Devljutnesko kase phućardilo? 39 Odolese naštisarde te paćan, kaj pale phenđa o Isaija: 40 „Korarda e jakha lengere thaj barisarda e vile lengere, te na dikhen jačhencar ni vilesa te haljoven, thaj te na roden te sastarav len.” 41 Akava phenđa o Isaija kana dikhlja o ašundipe lesko thaj vakerdasa olestar. 42 Aj vi kotar e phurederutne but paćaje ano leste; no oto fariseja ni ačhena pe odova, te na oven čhudine kotar e sinagoga; 43 Kaj kamle pobut o ašundipe e manušesoro kotar o ašundipe e Devlesoro.
Tradipe po paćape
44 A o Isus dija vika thaj phenđa: Ko paćal ana mande, ni paćal ana mande, aj ane Odova savo bićhaldama. 45 Thaj ko dikhel man, dikhel Odole savo bićhaldama. 46 Me ano them avilem sar rošlipe, kaj sako ko paćal ana mande ni ačhel ano raćipe. 47 Thaj ko šunel mle lafija thaj ni paćal, me lese ni krisiv; kaj ni avilem te krisiv e themese, aj te inkalav o them. 48 Ko čhudel man, thaj ni lel e lafija mle, isile pese krisari: o lafi savo me vakerdem, odoja lese ka krisil ano paluno Dive 49 Kaj me ni vakerav korkoro mandar, aj o Dad mlo savo bićhaldama ov dija man vakeripe so te phenav thaj so te vakerav. 50 Thaj đanav kaj si o vakeripe lesoro đivdipe bimerutno. So neso, akana, me vakerav, ađahar vakerav sar vakerda mange o Dad.
O Isus thovel e pre e sikljovnenge
O Isus mothol pe okova so del muj
Anglalmothodipe e Petresere ćhudipeske
1 A anglal o Baro dive e Pasha, đanglindoj o Isus kaj avilo lesko časo te nakhel kotar akava them koro Dad, čumidindoj plen save si ano them, čumidla len đi o agor. 2 Thaj kana sine raćako xape, sar o beng ake čhuta ano vilo e Judase Simonose Iskariotose te del le muj, 3 Đanglindoj o Isus kaj lese o Dad sa dija ane vasta, thaj kaj kotar o Devel iklilo, thaj e Devlese đal. 4 Uštilo kotar e raćako xape thaj huljarda e uprune šeja, ta lija o khoslo thaj phandla pe lesa. 5 Pale odova čhorda pani ane thovimasi, thaj lija te thovel o pre e sikljovnengere thaj khosindoj e khoslesa saveja sine phandlo. 6 Teg avilo e Simone Petrese, a akava lese phenđa: Devljutneja, aj tu mle pre te thove? 7 Irisarda o Isus thaj phenđa lese: So me kerav, tu akana ni đane, aj pale odova ka haljove. 8 Phenđa lese o Petar: Nisar tu na ka thove mle pre. O Isus lese irisarda: Te na thovdem tut, najtu kotor mancar. 9 Phenđa lese o Simon Petar: Devljutneja, na numa e pre mle, aj vi e vasta thaj o šero. 10 Phenđa lese o Isus: O najardo najle trubupe so te thovel sem o pre, kaj si soro khoslo; vi tumen sen khosle, aj na savore. 11 Kaj đanela e avralćhutine ple, odolese phenđa: Najsen savore khosle. 12 A kana lenge thovda e pre, lija e šeja ple ta palem bešlo bašo astala thaj phenđa lenge: Đanen li so tumenge kerdem? 13 Tumen akharen man Sikamnesa thaj Devljutnesa, thaj čače vakeren, kaj me sem. 14 Kana tumenge, akana, thovdem e pre, me Devljutno thaj Sikamno, vi tumen sijen udžilime jekh avrenge te thoven o pre. 15 Kaj dijem tumen misal ta, sar so me kerdem tumenge, vi tumen keren. 16 Čače, čače tumenđe phenav: Naj o kandino pobaro kotar o barutno plo, ni naj o bičhaldo pobaro kotar odova savo le bičhalda. 17 Kana akava đanen, baxtarde sen te odova kerđen. 18 Ni vakerav sarijendar tumendar: me đanav saven alosardem; aj te pherel pe o Lil: Savo mancar xal maro, vazdel e patum pli pe mande. 19 Kotar akana tumenge vakerav anglal aj so ka ovel, va, kana ka ovel, paćan kaj Me sem. 20 Čače, čače tumenđe phenav: Savo lel odole save bičhalav, man lel; a ko lel man, lel Odole savo bićhaldama. 21 Vakerindoj akava o Isus haćarda đesa, thaj mothovda thaj phenđa: Čače, čače tumenđe phenav, jekh kotar tumende ka del ma muj. 22 Tegani e sikljovne dikhenape maškaro peste, thaj sine ano dujgođipe kastar vakerel. 23 A jekh kotar e sikljovne lesere, save o Isus čumidela, sine pašljardo pe angalin e Isusesiri. 24 Lese, akana, O Simon Petar dija semno te phučel ko bi odova ovel savestar vakerel. 25 A akava, pašljindoj pe kolin e Isusese, phenđa lese: Devljutneja, ko si odova? 26 O Isus irisarda: Odova si savese me, bolindoj e buka dav. Thaj bolindoj e buka, dija e Juda Simonose e Iskariotose. 27 Thaj pale buka teg đerdinđa ano leste e satana. Tegani lese phenđa o Isus: So kere, ker sigate. 28 A akava na haljovde khonik kotar odola so sine baši sofra sose lese phenđa. 29 A nesave gndisarde, avune kaj koro Juda sine e kesa, kaj lese o Isus phenđa: Ćin so amenge trubul bašo baro dive; ja te del bilo so e čororenge. 30 A ov lindoj e buka sigate iklistilo; a sine rat. 31 Kana ov iklistilo, o Isus phenđa: Akana ašundilo o Čhavo e Manušesko, thaj o Devel ašundilo ano leste. 32 Te o Devel ašundilo ano leste, vi o Devel le ka ašundel ana peste, thaj sigate le ka ašundel. 33 Ćhavoralen, pana sem hari tumencar; ka roden man, thaj sar so phendem e Judejenge kaj kuri me đav tumen našti te aven, odova vi tumenge akana vakerav. 34 Čhinavdipe nevo dav tumenge: te čumiden jeke avren, sar so me tumen ćumidljem, ta vi tumen te čumiden jeke avren. 35 Pe odova savore ka penđaren kaj sijen mle sikljovne te ulo tumen kamlipe maškaro tumende. 36 Phenđa lese o Simon Petar: Devljutneja, kuri đa? O Isus lese irisarda: Kuri me đav našti akana te đa pala mande, aj pale odova ka ave pala mande. 37 O Petar lese phenđa: Devljutneja, sose akana našti te avav pala tute? O đivdipe mlo ka pašljarav baše tuće. 38 Irisarda lese o Isus: O đivdipe li tiro ka pašljare baše mande? Čače, čače phenav tuke: o bašno ni ka đilabel đikaj mandar trin droma ni crdetu.
O Isus – drom, čačipe thaj đivdipe
1 Ma te zalil pe o vilo tumaro, paćan ano Devel, thaj ana mande paćan. 2 Ano kher mle Dadesoro khera si but. A te na ovel ađahar, sar ka phenav tumenđe: Đava tumenđe te laćharav o than. 3 Thaj te gelem thaj laćharav tumenđe o than, pale ka avav, thaj ka lav tumen ke mande ta kaj sem me, te oven vi tumen. 4 Thaj kuri me đava đanen, thaj o drom đanen. 5 Phenđa lese o Toma: Devljutneja, na đana kuri đa; thaj sar šaj te đana o drom? 6 O Isus lese phenđa: Me sem drom aj čačipe thaj đivdipe; khonik na avel e Dadese sem andar mande. 7 Kana bi man đanen vi e Dade mle bi đanen: thaj akanatar penđaren le, thaj dikhljen le. 8 Phenđa lese o Filip: Devljutneja, mothov amenge e Dade, thaj ka ovel amenge mamaj. 9 O Isus lese phenđa: Edobor sem vakti tumencar thaj ni penđardan ma, Filipe? Ko dikhlja man, dikhlja e Dade; ta sar tu vakere: Mothov amenge e Dade? 10 Sar ni paća kaj sem me ano Dad thaj o Dad ana mande? E lafija save tumenđe me vakerav ni vakerav korkoro mandar aj o Dad savo đivdini ana mande ov kerela o kotora. 11 Paćan man kaj sem me ano Dad thaj o Dad ana mande; te na li, baše korkore kotora paćan man. 12 Čače, čače tumenđe phenav: Ko paćal ana mande, kotora save me kerav thaj ov ka kerel, thaj pobare kotar akala ka kerel; kaj me đav e Dadese mlese. 13 Thaj sa so roden ano anav mlo, odova ka kerav, kaj te ašundol o Dad ano Čhavo. 14 Thaj te so roden ano anav mlo, me ka kerav.
Dindino lafi e Đi Sumnalesoro
15 Te man čumidljen, o čhinavdipe mlo ikeren. 16 Thaj me ka ruđisarav e Dade, thaj ka del tumenge avere Kovljarutne te đivdinel tumencar sajekh. 17 Đi Čačimasko, save o them naštil te lel, kaj ni dikhel le, ni na penđarel le; a tumen le penđaren, kaj tumencar đivdinel, thaj ana tumende ka ovel. 18 Na mekav tumen čorore; ka avav ke tumende. 19 Pana hari thaj o them maj naj te dikhel man, a tumen ka dikhen man, kaj me đivdinav, thaj tumen ka đivdinen. 20 Ane odova dive ka đanen tumen kaj sem me ano Dad mlo, thaj tumen ana mande, thaj me ana tumende. 21 Kas isi o čhinavdipe mlo thaj ikerel le, odova si savo man čumidel; a savo man čumidel, odole ka čumidel o Dad mlo; thaj me le ka čumidav thaj ka mothovama lese korkoro. 22 Phenđa lese o Juda, na Iskariotoso: Devljutneja, so si odova kaj ka mothovetu amenge, a na e themese? 23 Irisarda lese o Isus thaj phenđa: Te man nesavo čumidel, o lafi mlo ka ikerel, thaj o Dad mlo ka čumidel le; thaj lese ka ava thaj ano leste ka ova. 24 Ko man ni čumidel, e lafija mle ni ikerel; a lafi savo ašunen nane mlo aj e Dadesoro savo bićhaldama. 25 Akava tumenđe vakerdem đikaj bešljem tumencar. 26 A o Kovljarutno o Đi Sumnalo, save o Dad ka bičhalel ano anav mlo, Ov tumen ka sikavel bašo sa thaj ka del tumen godi pe sa so tumenđe vakerdem. 27 Šandipe tumenđe ačhavav, o Šandipe mlo dava tumenđe; na dava le tumenđe sar so o them dela. Ma te zalil o vilo tumaro thaj ma te daral. 28 Ašunden kaj tumenđe me phendem: Ka đav, thaj ka avav tumenđe. Kana bi čumidena ma, ka lošajvon bi so vakerdem: đav e Dadese; kaj o Dad mlo pobaro si mandar. 29 A akana tumenđe phendem, anglal so ka ovel, te paćan kana ka ovel. 30 Namangava pana but tumencar te vakerav, kaj avela o knezo akale themesko, thaj ana mande nane khančik. 31 Aj te đanel o them kaj čumidav e Dade, thaj sar so mange čhinavel o Dad, ađahar kerav. Ušten, hajden akatar!
Jekhipe e Isusesoro thaj lesere paćavnengoro
1 Me sem čačuno bućum, thaj o Dad mlo si moljari. 2 Sakoj kranga pe mande savo ni bijanel bijanipe čhinela ola; a sakoj savo bijanipe bijanel khosela ola kaj pobut bijanipe te bijanel. 3 Tumen sen ake khosle baše lafija save tumenge vakerdem. 4 Ačhen ana mande, thaj me ana tumende. Sar e drakhalin našti bijanipe te bijanel korkori pestar te na aćhili ko bućum, ađahar ni tumen ako ana mande na aćhoven. 5 Me sem bućum, a tumen drakhalin. Ko ačhela ana mande vi me ano leste, odova anel but bijanipe, kaj bi mlo naštin te keren khanči. 6 Ko ana mande ni ačhel, ka frdelpe pe avri sar e drakhalin, thaj ka šućarel pe, thaj ka kiden ola, thaj ani jag ka frden, thaj ka tharen. 7 Te aćhiljen ana mande thaj e lafija mle ana tumende ačhen, sa so mangen roden thaj ka ovel tumenge. 8 Akaleja ašundilo o Dad mlo kaj bijanipe but te anen, thaj ka oven mle sikljovne. 9 Sar so o Čhavo čumidel man, vi me čumidav tumen; aćhoven ano kamlipe mlo. 10 Te e čhinavipe mle ikerden, ka aćhoven ano kamlipe mlo, sar so me ikerdem o čhinavipe mle Dadesere thaj aćhovava ano kamlipe lesoro. 11 Akava tumenge phendem kaj o lošaripe mlo ana tumende ačhola thaj o lošaripe tumaro te pherel pe. 12 Akava si čhinavdipe mlo: te čumiden jeke avre sar so me tumen čumidav. 13 Kotar akava kamlipe khonik naje pobaro, kaj sar o đivdipe plo te pašljarel ple amalenđe. 14 Tumen sijen o amala mle te kerden so tumenđe me čhinavav. 15 Aj tumen ni akharav kandinenca, kaj o kandino ni đanel so kerel o barutno lesoro; aj tumen akhardem amalencar, kaj sa so šundem kotar o Dad mlo, mothovdem tumenđe. 16 Ni alosarden tumen man, aj me tumen alosardem thaj ćhutem tumen kaj tumen te đan thaj bijanipe te anen; thaj o bijanipe tumaro te ačhol, kaj sa so roden kotar o Dad ano anav mlo te del tumenđe. 17 Akava tumenđe čhinavav: te čumiden jeke avre.
Ritope e themesko
18 Ako tumen ritola o them, te đanen kaj man ritonđa anglal tumende. 19 Kana bi ovena kotar o them, o them bi plen čumidela, a sar nasijen kotar o them aj me tumen alosardem kotar o them, odolese tumen ritonela o them. 20 Phučen tumen baše lafija save tumenđe me phendem: naj o kandino pobaro kotar o barutno plo. Te man tradinđe, vi tumen ka traden; te mlo lafi ikerde, vi tumaro ka ikeren. 21 Aj sa akava tumenđe ka keren bašo anav mlo, kaj ni penđaren Odole savo bićhaldama. 22 Te na avava thaj vakerava lenge, na bi ovel len bezeha; a akana irisaripe najelen bašo bezeh plo. 23 Savo ritonel man thaj e Dade mle ritonel. 24 Te na kerava maškaro lende kotora save khonik aver ni kerda, ni bi oven len bezeha: a akana thaj dikhle, thaj ritonđe vi man thaj e Dade mle. 25 Aj te pherel pe o lafi hramosardo ano Kanuni lengoro: Ritonđema ni sose. 26 A kana avel o Kovljarutno, save tumenđe me ka bičhalav kotar o Dad, Đi Čačipesko, savo kotar o Dad iklilo, Ov ka mothovel baše mande. 27 A vi tumen ka mothoven, kaj sen kotar o anglipe mancar.
Kotor Đeso e Sumnaleso
1 Akava tumenge mothovdem te na zumaven tumen. 2 Ka traden tumen kotar e sinagoge; Aj avela o časo kana ka sarsavo ko tumen mudarel gndisarel kaj e Devlese o kandipe anela. 3 Thaj odova ka keren, kaj ni penđarde e Dade ni man. 4 Aj akava tumenđe mothovdem ta, kana ka avel o časo, te anan ki godi akava kaj tumenđe me mothovdem; a kotar o anglipe ni mothovdem tumenđe akava, kaj sijum tumencar. 5 A akana đav Okolese savo bićhaldama, thaj khonik tumendar ni phučel ma: kuri đa? 6 Aj odolese so tumenđe akava mothovdem, o dukhavipe pherđa o vilo tumaro. 7 Aj me tumenđe o čačipe vakerav: lačhe si tumenđe me te đav, te me na geljum, o Kovljarutno na ka avel ke tumende: aj te geljum, ka bičhalav le tumende. 8 Thaj kana Ov avel, ka mahril o them bašo bezeh, thaj baš vortope, vi baš o kris. 9 Bašo bezeh, akana, so ni paćan ana mande; 10 Bašo vortope, so đav mle Dadese, thaj maj man na ka dikhen; 11 A baš o kris, so si o knezo akale themesko krisime. 12 Pana isi man but te vakerav, aj akana našti te legaren. 13 A kana avel Ov, o Đi Čačimasko, ka andrisarel tumen ano sa čačipe; kaj ni ka vakerel pestar, aj ka vakerel odova so šunel, thaj ka mothovel tumenge odova so avel. 14 Ov man ka ašundarel, kaj mlestar ka lel, thaj ka mothovel tumenđe. 15 Sa so isi e Dade mlo si, odolese phendem kaj mlestar ka lel, thaj ka mothovel tumenđe.
O dukha ka irinenpe ano lošalipe
16 Pana hari, thaj ni ka dikhen ma, thaj pale hari thaj ka dikhen ma, kaj me đav e Dadese. 17 Teg nesave kotar e sikljovne lesere phende maškaro peste: So si odova so amenge vakerel: Pana hari, thaj ni ka dikhen ma, thaj pale hari, thaj ka dikhen ma; thaj: Me đav e Dadese? 18 Vakerena, akana: So si odova so phenel: hari? Ni đana so vakerel. 19 A o Isus haljovel kaj mangle le te Phučen, thaj lenge phenđa: Odolese li Phučen tumen maškaro tumende, so phendem: Pana hari, thaj ni ka dikhen ma, thaj pale hari thaj ka dikhen ma. 20 Čače, čače tumenge phenav kaj ka tumen roven thaj hincisaren, a o them ka lošarel pe; thaj vi tumen ka oven dukhavne, aj tumari dukh ka irinelpe po lošaripe. 21 E đuvli kana bijanel crdel pharipe, kaj avilo o časo lakoro; a kana bijanel e ćhavore, maj ni peren lake ane godi e dukha, bašo lošaripe so bijandilo o manuš ko them. 22 Thaj tumen, ađahar, isitumen akana dukh; aj tumen palem ka dikhav, thaj ka lošarel pe o vilo tumaro, thaj o lošaripe tumaro khonik na ka lel tumendar. 23 Thaj ane odova dive naj te Phučen ma khanči. Čače, čače tumenge phenav kaj sa so roden kotar o Dad ano anav mlo, ka del tumenge. 24 Đi akana ni rodinđen khanči ano anav mlo; roden thaj ka len, kaj o lošaripe tumaro te ovel pherdo. 25 Akava vakerdem tumenge ane paramiča; aj avel o časo kana tumenge na ka vakerav ane paramiča, aj tumenge phravde ka mothovav e Dadestar. 26 Ane odova dive ano anav mlo ka roden, thaj ni vakerav tumenge kaj me ka ruđisarav e Dade tumenge; 27 Kaj korkoro o Dad čumidel tumen, odolese so tumen čumidlen man, thaj paćajen kaj me kotar o Devel ikliljem. 28 Ikliljem kotar o Dad, thaj avilem po them; pale mekav o them, thaj đav e Dadese. 29 Phende lese e sikljovne lesere: Ake akana phravde vakere, thaj e paramiči nisavi ni vakere. 30 Akana đana kaj sa đane, thaj ni trubul ko te phučel tut. Pe odova paća kaj tu kotar o Devel ikliljan. 31 O Isus lenge irisarda: Akana li paćan? 32 Eke avel o časo, thaj ake vi avilo, te našena sakoj pe pli rig, a man korkoro meken; aj najsem korkoro, kaj si o Dad mancar. 33 Akava tumenge mothovdem, kaj ana mande šandipe te ovel tumen. Ano them ka avol tumen dukha; aj ma daran, me upralzurardem o them.
E Isusesi anglunorašajesi ruđipni
1 Akava vakerda o Isus, pa vazdinđa e jakha ple po badali thaj phenđa: Dade, avilo o časo, ašundare e Čhave tire, ta vi o Čhavo tiro te ašundarel tut; 2 Sar so lese dijan o baroderipe upral sakoj trupo, ta sa so lese dijan, ov dela lenge đivdipe bimerutno. 3 A akava si bimerutno đivdipe te penđaren tut jekhune čačune Devle thaj kas bićhaldan e Isuse Hristo. 4 Me ašundarem tut pe phuv; o kotor kerdem savo dijan man te kerav. 5 Thaj akana ašundar tu man, Dade, ane tute korkore, ašundimpnasa savo sine ma ana tute anglal no o them so kerdilo. 6 Vakerdem o anav tiro e manušenge saven dinđan man e themestar; tire sine pa dinđan len mange, thaj tiro lafi ikerde. 7 Akana haljovde kaj sa so dinđan man odova si tutar. 8 Kaj e lafija save dinđan man, dijem lenge; thaj on lije len, thaj penđarde čače kaj tutar ikliljem, thaj paćaje kaj tu bićhaldanma. 9 Me bašo olenge ruđiv ma, ni ruđiv ma baše themese, aj baše odola save man dinđan, kaj si tire. 10 Thaj sa soj mlo tiro si, thaj tiro mlo; thaj ašundilem me ano lende. 11 Thaj maj najsem ano them, a on si ano them, thaj me avav tuke. Dade sumnaleja, arakh len ano anav tiro, odolen save man dinđan, te oven jekh sar amen. 12 Đikaj sema lencar ano them, me len arakhljem ano anav tiro; odolen saven man dinđan arakhljum; thaj khonik olendar ni mudardilo sem o čhavo mudaripnaso, te pherel pe o Lil. 13 A akana avava tuke, thaj akava vakerav po them, te oven len lošaripe mlo pherdo ana peste. 14 Me lenge dijem o lafi tiro; thaj o them len ritonđa, kaj naje kotar o them, sar so ni me najsem e themestar. 15 Na ruđiv te le olen e themestar, aj len te arakhe e đungalestar. 16 E themestar naje, sar ni me so najsem e themestar. 17 Tire čačipnasa sumnalipesare olen: o lafi tiro si čačipe. 18 Sar so tu bićhaldanma ano them, thaj me olen bićhaldem ano them. 19 Me sumnalipesarav man baše lenge, kaj vi on te oven sumnalipesare čačimasa. 20 Ni ruđiv eke numa bašo lenge, aj vi baš odola save bašo lafijaa lengere paćaje ana mande; 21 Kaj savore jekh te oven, sar tu, Dade, so san ana mande thaj me ana tute, kaj thaj on anamende jekh te oven kaj o them te paćal kaj tu man bićhaldan. 22 Thaj o ašundipe savo dijan mange me dijem lenge, te oven jekh sar so sinjam amen jekh. 23 Me ano lende thaj tu ana mande, te oven federime ano jekh, thaj te penđarel o them kaj tu bićhaldanma thaj te čumide olen sar so man čumide. 24 Dade, mangav kaj vi odola save man dinđan te oven mancar kuri sem me, te dikhen o ašundipe mlo savo maje dinđan, kaj čumidljan ma anglal o sikadipe so ulo e themesko. 25 Dade čačuneja, o them tut na penđarda, a me penđardem tut, thaj akala penđarde kaj tu bićhaldanma. 26 Thaj me lenge vakerdem o anav tiro thaj ka vakerav kaj o kamlipe savesa čumidema ano lende te ovel, thaj me ano lende.
E Isuse astaren
1 Vakerindoj akava o Isus iklilo ple sikljovnencar prekali lenori Kedron, kote sine bašča, ane savi dija ov thaj e sikljovne lesere. 2 A thaj o Juda, o dindo mujalo lesoro, đanela odova than; kaj o Isus but droma kedelape odothe ple sikljovnencar. 3 Teg o Juda lija e četa, thaj kotar e anglunerašaja thaj fariseja e kandinen, thaj avilo odori umlalencar thaj memeljencar thaj bandukencar. 4 A o Isus đanglindoj sa so isi te kerelpe olese, iklilo thaj phenđa lenge: Kas roden? 5 Irisarde lese: E Isuse Nazarećano. O Isus lenge phenđa: Me sem. A olencar terdino thaj o Juda, o dindo mujalo lesoro. 6 A kana lenge phenđa: Me sem, čhutepe napalal thaj pele ki phuv. 7 Teg olen pale phučlja: Kas roden? A on vakerde: E Isuse Nazarećano. 8 Irisarda o Isus: Phendem tumenge kaj sem me. Te, akana, man roden, meken akalen mek đan. 9 Te pherel pe o lafi savo phenđa: Ni hasardem ni jekhe kotar odola saven maje dinđan. 10 A o Simon Petar sinele čhuri, ta crdlala thaj čalada e kandine e anglunerašajesere, thaj čhinda lesoro daxno kan. A e kandinesko anav sine Malho. 11 Teg phenđa o Isus e Petrose: Čhuv e čhuri ano pajari! E taxtaj savi dija man o Dad aj li te na pijav?
O Isus anglal o anglunorašaj
E Petrosoro čhudipe
12 Teg e četa thaj o čhinadutno thaj e kandine e judejeske astarde e Isuse thaj phandle le. 13 Thaj legarde le najanglal e Anake, kaj sine sastro e Kajafese, savo sine anglunorašaj odova berš. 14 A O Kajafa sine odova so dinđa phurederipe e Judejenge kaj si polačhe kaj jekh manuš te merel bašo seloro. 15 Palo Isus pak đala o Simon Petar thaj o aver sikljovno; a odova sikljovno sine penđardo e anglunerašajese, ta dija e Isusesa ane avlin e anglunerašajesi. 16 A o Petar terđola avrijal ke udara. Teg iklilo odova aver sikljovno, savo sine penđardo e anglunerašajese, thaj phenđa e udarkače thaj čhuta andre e Petre. 17 Teg e kandini udarka phenđa e Petrese: Te najsan thaj tu kotar e sikljovne akale manušese? Ov phenđa: Najsem. 18 A e kandine thaj e terne phabardesa jag thaj terđona ta tačona, kaj sine šudripe; a vi o Petar sine lencar, thaj terđola thaj tačola. 19 O Anglunorašaj phučlja e Isuse bašo sikljovne lesere thaj bašo džanipe lesoro. 20 O Isus lese irisarda: Me vakerdem phravde e themese; me sajekh sikavdem ane sinagoga thaj ano hramo, kote sajekh čedisalje e Judejura, thaj khanči ano garavdipe ni vakerdem. 21 So phuče man? Phuč odolen save ašunde so lenge vakerdem; eke, on đanen so me vakerdem. 22 A kana ov akava vakerda, jekh kotar e kandine savo terđola odothe čalada e Isuse palma pe čham thaj phenđa: Aj li ađahar irisare e anglunerašajese? 23 O Isus lese irisarda: Te đungalipe vakerdem, mothov kaj si đungalipe; te si lačhe, sose mare ma? 24 E Ana le bičhalda phandle e Kajafese e anglunerašajese. 25 A o Simon Petar terđola thaj tačola. Tegani lese phende: Te najsan vi tu kotar e sikljovne lesere? A ov crdlape thaj phenđa: Najsem. 26 Phenđa jekh kotar o kandino e anglunerašajesko, savo sine jeri odolese kolese o Petar čhinda o kan: Na dikhljem li me tut ane bašča oleja? 27 Teg o Petar pale crdlape; thaj sigo o bašno đilabda.
O Isus anglal o Pilat
Meripnasi anglakrisuni
28 E Isuse inđarde kotar o Kajafa ane krisuni. A sine sabalje, thaj on ni dije ane krisuni te na bi meljarena pe, aj te bi šaj te xan e Pasha. 29 Teg o Pilat iklilo ke lende avrijal thaj phenđa: Savo krisipe mothovena opipe akale manušestar? 30 Irisarde lese thaj phende: Kana ov ne bi ovela đungaloćherutno, ne bi mekale tuke. 31 A o Pilat lenge phenđa: Len le tumen thaj po kanuni tumaro krisin lese. A e Judejura lese phenđe: Amen ni troma khanika te mudara. 32 Te pherel pe o lafi e Isuseso savo phenđa, mothovindoj sava merimasa ka merel. 33 Tegani đerdinđa o Pilat pale ani krisuni, ta akharda e Isuse thaj phenđa lese: Tu li sijan thagar e judejengo? 34 Irisarda lese o Isus: Vakere li tu odova korkoro pestar, ja e aver đene phenđe tuke mandar? 35 O Pilat irisarda: Aj me li sem Judejco? O seloro tiro thaj e anglunerašaja dinde tut mange. So kerdan? 36 O Isus irisarda: O thagaripe mlo naj kotar akava them; kana bi ovela kotar akava them o thagaripe mlo, e kandine mle bi maren pe te na ovav dindo e Judejenge; aj o thagaripe mlo naje akatar. 37 Teg lese phenđa o Pilat: Akana, tu san thagar? O Isus irisarda: Tu vakerea kaj sem me thagar. Me sem baš odova bijando thaj baš odova avilem po them te mothovav o čačipe. Thaj sakoj savo si kotar o čačipe šunela o krlo mlo. 38 Phenđa lese o Pilat: So si o čačipe? Thaj akava vakerindoj, iklilo pale e Judejenge, thaj phenđa lenge: Me nijekh doš ni arakhav pe leste. 39 A ane tumende si adeti kaj tumenge jekhe te mekav ki Pasha. Mangen li, akana, te mekav tumenge e judejenge thagare? 40 Teg savore palem dije vika vakerindoj: Na akale, aj e Varava! A o Varavo sine vošutno.
1 Teg, akana, o Pilat lija e Isuse thaj dabarda le. 2 A e urumne khuvde khuvindo kotar e kare thaj čhute lese ko šero, thaj urjavde ole purpurno fostani, 3 Thaj vakerena: Sar sijan thagara e judejengo! Thaj čalavena le pe čhamlja. 4 O Pilat palem iklilo avrijal thaj phenđa lenge: Ake tumenge ikalava le avrijal, te đanen kaj pe leste ni arakhav nijekh doš. 5 A o Isus iklilo avri legarindoj o khuvdino kanralo thaj purpurno fostani. Thaj phenđa lenge o Pilat: Ake o manuš! 6 Kana le, akana, dikhle e anglunerašaja thaj e kandine, dije vika vakerindoj: Buhljaren le, buhljaren! O Pilat lenge phenđa: Len le tumen thaj buhljaren, kaj me ni arakhav pe leste doš. 7 Irisarde lese e Judejura: Amen isiamen kanuni thaj po kanuni amaro musaj te merel, kaj kerda pe Ćhavesa e Devleseja. 8 Kana, akana, o Pilat šunđa akava lafi, darandilo pobuter. 9 Thaj palem dija ane krisuni, thaj phenđa e Isusese: Kotar sijan tu? A o Isus lese ni dija iripe. 10 O Pilat lese teg phenđa: Aj mange li ni irisare? Na đane li tu kaj man isi baroderipe te inzarav tut thaj baroderipe isi man te mekav tut? 11 O Isus irisarda: Na bi ovelatu baroderipe nisavo upral mande kana tuke ne bi ovela upral dindo, odolese odova savo dija man tuke isile pobaro bezeh. 12 Kotar odova dikhlja o Pilat le te mekel. Aj e Judejura dena vika vakerindoj: Te mekljan akale, najsan amal e ćesarese. Sakoj savo pes thagaresa kerel opipeil pe e ćesarese. 13 O Pilat, akana, ašundoj akava lafi, ikalda e Isuse avrijal, thaj bešlo pe kriseski skamin, po than akhardo Litostroton, a judikane Gavata. 14 A sine paračuvi anglaraći e Pasha, trujal o šovto časo; thaj ov phenđa e Judejenge: Ake o thagar tumaro! 15 A on dije vika: Le, le inzaren le! O Pilat lenge phenđa: Sar e thagare tumare te inzarav? Irisarde e anglunerašaja: Naj amen thagar sem o ćesari. 16 Teg, dinđa le olende kaj te inzardol. A on lije e Isuse thaj ingardele.
Inzardipe
17 Thaj ingarindoj o trušul plo iklilo po than akhardo Šereso kokalo, a judikane Golgota. 18 Odothe le buhljarde, thaj olesa duje averen, pe jekh thaj pe aver rig, a e Isuse ko maškar. 19 O Pilat hramosarda vi o telalhramope, ta čhuta po trušul; a sine hramome: O Isus Nazarećano thagar e judejengo. 20 Thaj akava telalhramope drabarde but Judejura, kaj paše o foro sine o than kaj buhljarde e Isuse: thaj sasa hramome judejune, jeline thaj rimljane. 21 A e judejenge anglunerašaja vakerena e Pilatose: Ma hramosar: thagar e judejengo, aj kaj ov phenđa: me sem thagar e judejengo. 22 O Pilat irisarda: So hramosardem, hramosardem. 23 E urumne kana inzarde e Isuse, lije e fostanja lesere thaj kerde štar kotora, sarsavone urumnese po kotor, thaj e dolama: a e dolama na sine sivdi aj khuvdini kotar jekh. 24 Tegani phende maškaro peste: Te na pharavala, aj te čhuda batbuti baše laće kase ka perel. Te pherel pe o Lil savo vakerel: Ulavde e fostanja mle maškar peste, thaj baš e dolama mli čhudle barbuti. E urumne, akana, ađahar kerde. 25 A terđona ke Isusesko trušul e daj lesiri, thaj e phen lesere dajaki e Marija Kleopova, thaj e Marija Magdalina. 26 A o Isus dikhindoj e daja thaj e sikljovne save čumidela kaj terđola paše late, phenđa ple dajake: Đuvlije, eke će o čhavo! 27 Teg phenđa e sikljovnese: Ake ti daj! Thaj kotar odova časo lija la o sikljovno ke peste. 28 Pale odova, đanglindoj o Isus kaj si sa ćerdino, kaj sa pherdilo o Lil phenđa: Trošalo sem! 29 Terdino o vaso pherdo šut; a on pherde o sunđeri šut, ćhutindoj pe trska, pašarde lesere voštenge. 30 A kana o Isus zumavda o šut phenđa: Kerdilo pe! Thaj mekljarindoj o šero, muklja o đi. 31 A avune kaj sine paračuvi, te na bi o trupo ačhola po trušul ano savato, kaj sasa baro dive odova savato, e Judejura ruđisarde e Pilate kaj te phagen lenge e koča, ta len te huljaren. 32 Tegani avile e urumne, thaj e anglunese phagle e koča vi e averese so inzarde oleja; 33 A avindoj đi o Isus, kana dikhle kaj ake mulo, ni phagle lesere koča. 34 Aj jekh kotar e urumne posavda lese e pašavre buzasa; thaj sigo iklilo rat thaj pani. 35 Thaj odova savo dikhlja, mothovđa, thaj čačuno si o mothovdipe lesoro, thaj ov đanel kaj o čačipe vakerel, kaj vi tumen te paćan. 36 Kaj akava kerdilo kaj te pherdol o Lil: O kokalo lesoro naj te phagel pe. 37 Thaj palem aver Lil vakerel: Ka dikhen pe odova kas posavde.
E Isusesko praxope
38 A pale odova o Josif kotar e Arimateja, savo sine sikljovno e Isusesko, aj garandoj kotar e dar e Judejengi, ruđisarda e Pilate te lel o trupo e Isusesoro. Thaj dinđa o Pilat. Tegani avilo thaj lija o trupo e Isusesoro. 39 A avilo vi o Nikodim, savo angluno drom avilosa raćasa e Isusese, thaj anda hamime smirne thaj aloja trujal šel litre. 40 Teg lije o trupo e Isusosko, thaj paćarde le poxtanosa thaj sungencar, sar si o adeti ane Judejura te parunen. 41 A pe odova than, kaj sine inzardo sasa bašča, thaj ani bašča nevo limori, ane savo pana khonik nasine pašljardo. 42 Odothe, akana, kotar paračuvi e judejengi, kaj sine paše o limori, pašljarde e Isuse.
Đivdisaripe
1 A ano angluno dive e kurkesko avili e Marija Magdalina po limori rano, đikaj pana sine rat, thaj dikhlja kaj si o bar vazdimo e limorestar. 2 Tegani prastandili thaj avili e Simone Petrese thaj e avere sikljovnese save čumidela o Isus, thaj phenđa lenge: Lije e Devljutne kotar o limori, thaj ni đana kaj le pašljarde. 3 Teg iklilo o Petar thaj o aver sikljovno, thaj gele karing o limori. 4 Prastandile pa solduj khetane, thaj o aver sikljovno prastandilo posig kotar o Petar thaj reslo angluno po limori. 5 Thaj teljindoj, dikhlja o poxtan paćarimasko pašljardo, aj na đerdinda. 6 Teg reslo o Simon Petar palo leste thaj dija ano limori thaj dikhlja o poxtan paćarimasko pašljardo. 7 Thaj o khoslo savo sine ko šero lesoro, te na pašljol e poxtanosa paćarimase, aj ulavdine paćardo ko jekh than. 8 Teg, akana, dija vi o aver sikljovno, savo angluno avilo po limori, thaj dikhlja thaj paćaja; 9 Kaj pana ni đangle o Lil kaj Ov trubul te đivdisarel kotar o mule. 10 Tegani o sikljovne pale irisajle khere. 11 A e Marija terđola avrijal ko limori thaj rovela. Thaj kana rovda telili upral o limori. 12 Thaj dikhlja duj phakale ane parne fostanja kaj bešen, jekh upral o šero, a o aver tele o pre, kaj sine pašljardo o trupo e Isusesoro. 13 Thaj on lake phenđe: Đuvlije, so rove? Phenđa lenge: Odolese so lije e Devljutne mle, thaj ni đanav kaj ole pašljarde. 14 Thaj akava vakerindoj, irisarindoj palal thaj dikhlja e Isuse kaj terđol, thaj ni đanglindoj kaj si o Isus. 15 Phenđa lake o Isus: Đuvlije, so rove? Kas rode? Oj, gindindoj kaj si o baštinari, phenđa lese: Rajo, te inđardan le, phen mange kaj ole pašljardan, thaj me ka lav le. 16 O Isus lake phenđa: Marija! Oj, irisarindoj, phenđa lese: Ravuni, so ka phenel: Sikamneja! 17 Phenđa lake o Isus: Ma azbav man, kaj pana ni ikliljem mle Dadese; aj đa mle phralenge thaj phen lenge: Ukljarav e Dadese mlese thaj e Dadese tumarese, thaj e Devlese mlese thaj e Devlese tumarese. 18 A e Marija Magdalina geli thaj mothoda e sikavnenge kaj dikhlja e Devljutne thaj kaj olake akava phenđa.
E Isusesko mothovipe e sikljovnenge
O bipaćamno Toma
19 A kana sine rat odova angluno dive e kurkesko, thaj đikaj o udar sine phandle, kaj ćidenape e sikljovne lesere kotar e dar e Judejengi, avilo o Isus, thaj terdino ko maškar thaj phenđa lenge: Šandipe tumenge! 20 Thaj akava vakerindoj, mothovda lenge e vasta thaj e pašavre ple. Tegani e sikljovne lošarisajle dikhindoj e Devljutne. 21 A o Isus lenge phenđa pale: Šandipe tumenge! Sar so o Dad bićhaldama, vi me bičhalav tumen. 22 Thaj akava vakerindoj, phudinđa thaj phenđa lenge: Len o Đi Sumnalo! 23 Savenge jertisaren e bezeha, ka jertisavon lenge; thaj savenge ačhaven, ačhavde si. 24 A o Toma, akhardo Dujoro, jekh kotar e Dešudujore, na sine olencar kana avilo o Isus. 25 A e avera lese e sikljovne vakerena: Dikhljam e Devljutne. A ov lenge phenđa: Te na dikhljem pe vasta lesere ćhindipe kotar e karfina, thaj ni čhivav o naj mlo ane ćhinipa kotar e karfina, thaj ni čhivav o vast mlo ane pašavre lesere, ni ka paćav. 26 Thaj pale ofto dive pale sine andre e sikljovne lesere thaj o Toma lencar. Avilo o Isus kana sine o udara phandle, thaj terdino ko maškar thaj phenđa: Šandipe tumenge! 27 Teg phenđa e Tomase: Lunđar o naj tiro akari thaj dikh e vasta mle; thaj lunđar o vast tiro thaj čhuv ane pašavre mle, thaj ma ov bipaćamno aj ov paćamno. 28 Thaj irisarda o Toma thaj phenđa lese: Devljutno mlo thaj o Devel mlo! 29 Phenđa lese o Isus: Odolese so dikhljan man, paćajan; baxtarde si save ni dikhle a paćaje. 30 A thaj but avera keripna kerda o Isus anglal e sikljovne ple, save naj hramome ano lil akava. 31 A akala si hramome te paćan kaj o Isus si Hristos, Čhavo e Devlesoro, thaj kaj paćavindoj isitumen đivdipe ano anav lesoro.
E Isusesko mothovipe ane Galileja
1 Pale odova palem mothodape o Isus ple sikljovnenge ko derav e Tiverijadosko. A mothodape si ađahar: 2 Sine khetane o Simon Petar thaj o Toma, akhardo Dujoro, thaj o Natanailo kotar Kana e Galilejaki, thaj e čhave e Zevedejese, thaj avera dujore kotar e sikljovne lesere. 3 Phenđa lenge o Simon Petar: Đav te astarav mačhen. Phenđe lese: Ka ava vi amen tuja. Iklile thaj dije sigo ane barka, thaj odoja rat ni astarde khanči. 4 A kana ake mothodili e javin, terdindoj o Isus ki phuv, aj e sikljovne ni penđarde kaj si odova o Isus. 5 A o Isus lenge phenđa: Ćhavoralen, najtumen li so bašo xape? Irisarde lese: Najamen. 6 A ov lenge phenđa: Čhuden e safin pe daxni rig e barkaki, thaj ka arakhen. Teg čhudle, thaj eke naštisarde te ikalen la kotar e but maćhe. 7 Tegani odova sikljovno, save čumidela o Isus, phenđa e Petrese: Odova si o Devljutno! A o Simon Petar, kana šunda kaj si o Devljutno, vulisardape mantilesa, kaj sine nango, thaj ćhudlape ano derav. 8 A e avera sikljovne resle e barkorasa, kaj nasine dur kotar e phuv aj trujal e dušel kunja, crdindoj e safin mačhencar. 9 Sar so iklile pe phuv, dikhle e jag phabardi thaj pe late pašljardo mačho, thaj maro. 10 O Isus lenge phenđa: Anen e mačhendar so akana astarden. 11 A o Simon Petar dija thaj ikalda e safin pe phuv pherdi bare maćhe, šel thaj pindu trin; thaj kotar edobor butipe ni pharavdili e safin. 12 Phenđa lenge o Isus: Aven, te xan. A nijekh kotar e sikljovne ni tromaje te phučel le: Ko sijan tu? Đangljindoj kaj si o Devljutno. 13 Teg avilo o Isus, thaj lija o maro thaj dija lenge, ađahar thaj e maćhe. 14 Akava ake o trito drom mothovdilo o Isus ple sikljovnenge sar uštino kotar o mule. 15 A kana xale, phenđa o Isus e Simone Petrese: Simone e Jonesko, čumidema li pobut akalendar? Phenđa lese: Va, Devljutneja, tu đane kaj kamav tu. Phenđa lese: Ćarjar mle bakroren. 16 Phenđa lese palem po dujto drom: Simone e Jonesko, čumidema li? Phenđa lese: Va, Devljutneja, tu đane kaj tut kamav. Phenđa lese: Arak e bakren mlen. 17 Phenđa lese po trito drom: Simone e Jonesko, kamejama li? O Petar dukhavdilo so phenđa olese po trito drom: kamejama li? Thaj phenđa lese: Devljutneja, tu sa đane, tu đane kaj tut kamav. Phenđa lese o Isus: Ćarjar e bakren mlen. 18 Čače, čače tuke phenav: Kana sijan poterno, kustisardan tut korkoro thaj phirdan kuri mangljan; a kana phuranđove, ka phrave e vasta tire thaj e avera ka kustisarden tut thaj ka inđaren kuri ni mange. 19 A akava phenđa mothovindoj sava merimasa ka ašundisarel e Devle. Thaj vakerindoj akava, phenđa lese: Ava pale mande!
O kamlo sikljovno
20 A o Petar irisarindoj dikhlja kaj palo leste đala o sikljovno kas o Isus čumidlja, savo vi pe raćako xape pašlilo po kolin lesoro thaj phenđa: Devljutneja, ko si odova savo ka del tut muj? 21 Dikhindoj o Petar akale, phenđa e Isusese: Devljutneja, a so si akava? 22 O Isus lese phenđa: Te mangljem kaj ov te ačhol đikaj ni avav, so si tuke đi odova? Tu hajde pala mande. 23 Teg iklilo akava lafi maškaro phralja kaj odova sikljovno ni ka merel; aj o Isus lese ni phenđa kaj na ka merel, sar: Te mangljem kaj ov te ačhol đikaj ni avav, so si tuke đi odova? 24 Akava si odova sikljovno savo mothovel akalestar, thaj hramosarda akava, thaj đana kaj si čačuno o mothovdipe lesoro. 25 A isi thaj but aver so kerda o Isus, save kana bi redosa hramosarelape, ni ano korkoro them, gndiv, na bi resen e hramosarde lila. Amin.