1

1 Har o bolepen un i phub gar koi his, his o Lab koi. Kowa, kai hi o Lab, his pash o Debleste. Un job his o Dewel. 2 Job his pash o Debleste, har o bolepen un i phub gar koi his. 3 Khetne leha kras o Dewel o bolepen un i phub. Tchi hi koi, hoi gar leha kerdo was. 4 An leste his o djipen. Un ko djipen his i bari momeli i menshenge. 5 Koi momeli chatchella an i rat. Un i rat nai kras koi momeli gar win. 6 Koi was i mursh, ko was o Deblestar bitchedo. Leskro lab his Johanni. 7 Job was, te penell lo hakeneske, koon koi bari momeli hi, te patsenn halauter ap koi momeli. 8 Job his gar koi momeli. Job was, te penell lo, koon koi momeli hi. 9 Koi tchatchi momeli was ap i phub, te chatchell li hakeneske. 10 Kowa, kai hi o Lab, his ap i phub, un i phub was leha kerdo. Un i menshe ap i phub prindjran les gar. 11 Job was an peskro them, un leskre menshe lan les gar pre. 12 Halauter kolla, kai lan les pre un ap leste patsan, kolen das job i soor, te wenn jon o Debleskre tchawe. 13 Kowa wan le gar, har jon boldo wan. O newo djipen was gar dran o menshengro kamlepen. Na-a, o newo djipen lan le kokres o Deblestar. 14 Ko lab was i mensho, un djiwas pash mende. Un mer dikam leskro railepen un leskri soor, kai o Dewel peskro tchawes das. Kowa his pherdo latchepen un tchatchepen. 15 O Johanni rakras lestar, un das gole: "Job hi kowa, kolestar penom: Kowa, kai pal mande wella, hi pral mande. Job his glan mande koi." 16 Mer halauter lam pale un pale bud latchepen lestar, kai les jaake bud hi. 17 O Mose das men kol laba, kai penenna, har mer djiwas. O Jesus Kristo anas menge o Debleskro latchepen un tchatchepen. 18 Kek mensho dikas o Debles. O Debleskro tchawo kokres sikras men, koon o Dewel hi. Job hi jek o Debleha. 19 - 20 Har bitchran i pralstune bibolde dran o foro Jerusalem i rashajen un i Levitarjen pash o Johanneste, te putchenn le lestar: "Koon hal tu?" penas job glan i tsele menshende, kai kote tardo hi: "Tchatchepaha, me hom gar o Kristo." 21 "Koon hal tu?" kaman jon te djinell. "Hal tu o Elija?" putchan le lestar. "Na-a," penas lo, "kowa hom me gar!" "Hal tu o Debleskro rakepaskro, kolestar penlo was, te well job? putchan le lestar." "Na-a," penas job. 22 Jon penan ap leste: "Pen menge, koon tu hal, te penas mer kowa kolenge, kai bitchran men. Hoi peneh tu tchatchepaha, koon tu hal?" 23 Job penas: "Me hom kowa, kai dell gole an o mulo them: Lenn halauter krik, hoi o Debleske an o drom tchiddo hi. Jaake penas kowa o Debleskro rakepaskro, o Jesaja, glan i raha tsiro." 24 Kolla, kai wan pash o Johanneste, his i Farisarjendar bitchedo. 25 Jon putchan lestar: "Te hal tu gar o Kristo, witar gar o Elija, un witar gar ko Debleskro rakepaskro, kolestar penlo was, te well job, hoske thoweh tu i menshen an o pani o Debleske?" 26 Penas o Johanni lenge: "Me thowau len an o pani. Mashkral tumende hi jek, koles prindjrenn tumer gar. 27 Kowa well pal mande. Me hom gar mishto doha, te krap leskre tircha pre." 28 Har o Johanni kowa rakras, his job an o foro Betani ap i wawar rig o panjestar Jordan, kote, kai thowas lo i menshen an o pani. 29 Ap o wawar diwes dikas o Johanni, kai o Jesus pash leste wella. Un o Johanni penas: "Dikenn, kawa hi o Debleskro bakro, kai lell i menshengri doosh ap peste. 30 Kawa hi ko mursh, kai penom lestar: Pal mande wella i mursh, ko his pral mande. Job his koi, har me gar koi homs. 31 Me djinom gar, koon kowa hi. Me wom, te thowap i menshen an Israel an o pani, te sikrap nai len, koon job hi." 32 Un o Johanni penas: "Tchatchepaha, me dikom o Debleskro Ducho har i parno tchirklo, kai was dran o bolepen pral tele, un atchas ap leste. 33 Un me prindjrom les gar. Kowa, kai bitchras man, te thowap i menshen an o pani, kowa penas ap mande: Tu dikeh, har well o Debleskro Ducho ap i mursheste un atchell ap leste. Kowa hi ko mursh, kai dell i menshen o Debleskro Ducho. 34 Me dikom kowa halauter. Doleske nai penau me ninna: Kau mursh hi o Debleskro tchawo." 35 O wawar diwes his o Johanni pale koi tardo. Dui leskre malendar his pash leste. 36 Un har job dikas, kai o Jesus koi djal, penas lo: "Dikenn, kawa hi o Debleskro bakro!" 37 Har kol dui kowa shunan, djan le o Jesuseske palla. 38 Un o Jesus risras pes trujal, un dikas len. Un job putchas lendar: "Hoi rodenn tumer?" Penan jon: "Sikepaskro, kai chah un soweh tu?" 39 "Awenn un dikenn!" penas job. Koi djan kol dui leha, un dikan, kai job chala un sowella. His deeshenge. Un jon atchan ko diwes pash leste. 40 Jek kol dujendar, kai shunan, hoi o Johanni penas, un o Jesuseha djan, his o Andreas. Leskro phraal his o Simon Petro. 41 Kowa hatsas peskro phrales Simon, un penas ap leste: "Mer hatsam ko baro rajes, kolestar o Dewel penas, te well job." Kowa kharella ap grichtikes Kristo. 42 Un o Andreas anas peskro phrales pash o Jesuseste. Har o Jesus koles dikas, penas lo: "Tu hal o Simon, ko Johanneskro tchawo. Tu khareh kanna Kefas." Ko kharella baro bar. 43 O wawar diwes kamas o Jesus an o them Galilea te djal. Ap o drom tapras lo o Filipo, un penas ap leste: "Dja mantsa!" 44 O Filipo his dran o foro Betsaida. Ninna o Andreas un o Petro his dran ko foro. 45 O Filipo hatsas o Natanael un penas ap leste: "Mer hatsam koles, pral koleste o Mose an peskre lila tchinas. Ninna o Debleskre rakepangre tchinan pral leste. Job kharella Jesus un hi dran o foro Nazaret. Leskro dad hi o Josef." 46 Un o Natanael penas ap leste: "Dran Nazaret nai well tchi, hoi mishto hi." "Am un dik!" penas o Filipo. 47 Har o Jesus dikas, kai o Natanael was, penas job: "Dikenn, koi well i tchatcho Israelitari. Un kek chochepen hi an leste." 48 "Har nai djineh tu, koon me hom?" putchas o Natanael lestar. Penas o Jesus: "Har tu tel o faigetikro ruk hals, dikom me tut, glan ko tsiro, kai o Filipo das tut gole." 49 "Sikepaskro," penas o Natanael, "tu hal o Debleskro tchawo. Tu hal o baro rai pral Israel." 50 Penas o Jesus ap leste: "Me penom tuke: Me dikom tut tel ko ruk. Doleske patseh tu. Tu dikeh bareder koowa, har kawa. 51 Kowa hi tchatcho, hoi me tumenge penau: Tumer dikenn har o bolepen pre djala. Un o Debleskre bolepangre djan pral un wenn pale tele ap o Menshengro Tchaweste."

2

1 Pal dui diwessa kran le i bijab an o gab Kana an o them Galilea. O Jesuseskri dai his koi. 2 Kol bijabengre mangan o Jesuses ninna ap ko bijab te well peskre malentsa, un jaake his lo lentsa ninna ap ko bijab. 3 Har len kek mool buder his, penas o Jesuseskri dai ap peskro tchaweste: "Len hi buder kek mool." 4 "Romnija," penas o Jesus, "hoi me hunte krap, hi miro koowa un gar tiro koowa. O tsiro hi mange kanna gar koi." 5 Leskri dai penas ap i budepangre: "Krenn kowa, hoi job tumenge penella!" 6 An ko kheer his shob panjeskre khore dran bar. I bibolde hunte thowan pengre wasta kote, jaake har i biboldengro koowa hi. An hako khoro djas sheel-te-biish litarja dre. 7 O Jesus penas ap lende: "Tchorenn pani an kol khore!" Un jon kran len jaake pherdo, kai djas buder tchi dre. 8 Un job penas pale ap lende: "Lenn dran kol khore un anenn kowa o rajeske pral o pipen!" Un jon anan les pash leste. 9 O rai pral o pipen djinas gar, kai koi mool was. I budepangre kokres, kai tchoran o pani an kol khore, djinan kowa. Har job koi mool pijas, hoi pani his, das lo o pirnes pash peste gole, 10 un penas ap leste: "Hakeno dell i latchi mool glan i wawar mool. Un te hi le mato, dell lo len koi mool, kai gar jaake latcho hi. Tu rikral koi latchi mool pale." 11 Kowa his o ersto kopo, kai kras o Jesus i baro koowa an o Debleskri soor. Kowa kras lo an o gab Kana an o them Galilea. Kote sikras job peskro railepen un peskri soor. Un leskre mala patsan ap leste. 12 Pal kowa djas lo peskri daha, peskre phralentsa un peskre malentsa an o foro Kapernaum. Koi atchan le gar raha. 13 Glan kol biboldengre bare diwessa, kai kharenna Passa, djas o Jesus an o foro Jerusalem. 14 Koi dikas job an o Debleskro baro kheer i bikepangren, kai grumjen, bakren un parne tchirklen bikrenna. Un kolla, kai parenn i lowe trujal, his ninna koi. 15 Koi kras job dran shelle i tchupni, un tradas len lengre bakrentsa un grumjentsa dran o Debleskro baro kheer wi. Un kolenge, kai parenn i lowe trujal, witsras lo lengre lowe ap i phub. Un lengre stamja tchiwras lo trujal. 16 Ap kolende, kai bikrenn parne tchirklen, penas job: "Hidjenn len win un krenn dran miro dadeskro kheer kek bikepaskro kheer!" 17 Koi was o Jesuseskre malenge an o shero, hoi an o Debleskro lab tchindlo hi: Miro kamlepen tiro khereske chal man pre har i jag. 18 Kol pralstune bibolde putchan lestar: "Hawo baro koowa kreh tu menge an o Debleskri soor, te djinas mer, kai tut o tchatchepen hi, te kress kowa?" 19 Penas o Jesus ap lende: "Phagenn kau Debleskro kheer tele! Me krau an triin diwessa i newo kheer." 20 Penan jon: "An star-deesh-te-shob (46) bersha kran le o Debleskro baro kheer. Un tu kameh kowa te krell an triin diwessa?" 21 Har rakras o Jesus pral o Debleskro kheer, rakras lo pral peste kokres. 22 Pal i tsiro, har o Jesus i mulendar pre stas, wan leskre malenge kol laba pale an o shero, hoi o Jesus penas. Un jon patsan, kai kowa lauter tchatcho hi, hoi an o Debleskro lab tchindlo hi, un hoi o Jesus penas. 23 An kol bare diwessa, kai kharenna Passa, patsan bud menshe an o foro Jerusalem ap o Jesuseste, har dikan le ko baro koowa, hoi kras lo an o Debleskri soor. 24 O Jesus das kek patsepen ap lende. Job prindjras lauteren. 25 Job djinas, har i menshe hi. Leske hunte penell kek, hoi an o mensheskro dji hi.

3

1 Koi his i Farisari. Leskro lab his Nikodemus. Job his i pralstuno biboldo. 2 Kowa was an i rat pash o Jesuseste, un penas: "Rai, mer djinah, kai tu hal i sikepaskro. O Dewel bitchras tut pash mende. Kek nai krell kowa, hoi tu kreh an o Debleskri soor. Ap kowa dikah mer, kai hi o Dewel tuha." 3 Penas o Jesus ap leste: "Tchatchepaha, me penau tuke: Kowa, kai well gar o Deblestar newes boldo, nai djiwell gar leha khetne." 4 Putchas o Nikodemus lestar: "Har nai well jek pale newes boldo, te hi lo phuro? Nai djal lo pale an peskro dakro per, un well o duito kopo boldo?" 5 Penas o Jesus ap leste: "Tchatchepaha, me penau tuke: Te well jek gar newes boldo dran o pani un dran o Debleskro Ducho, nai djiwell lo gar khetne o Debleha. 6 Koon i menshestar boldo wella, hi i mensheskro tchawo. Koon dran o Debleskro Ducho boldo wella, hi i Debleskro tchawo. 7 Kre kek bare jaka, te penau tuke: Tumer hunte wenn o Deblestar newes boldo! 8 O sorelo ducho, hoi phurdell pral i phub, djal, kai kamell lo. Tu shuneh les. Kai job wella, un kai job djala, djineh tu gar. Jaake hi pash koleste, kai wella dran Debleskro Ducho boldo." 9 "Har djal kowa nai?" putchas o Nikodemus. 10 O Jesus putchas lestar: "Tu hal i sikepaskro an o them Israel un djineh kowa gar? 11 Tchatchepaha, me penau tuke: Mer rakrah pral kowa, hoi prindjrah. Hoi mer dikam, kowa penah mer nai ninna. Tumer patsenn gar, hoi mer tumenge penah. 12 Te rakrau pral i phubjakro koowa, un tumer patsenn man gar, har nai patsenn tumer man, te rakrau pral o Debleskro koowa? 13 Me, o Menshengro Tchawo kokres, nai penau, hoi an o bolepen hi. Me wom dran o bolepen. 14 Tu djineh, kai o Mose an o mulo them i sap ap i kasht pre bladas. Hakeno, koon dikas ap ko sap, atchas djido. Jaake hunte well o Menshengro Tchawo ap o kasht bladedo, 15 te lell hakeno, kai patsell ap leste, ko djipen, hoi gar pre-herella. 16 O Dewel kamas i menshen jaake bud, te das lo lenge peskro tchawes. Hakeno, koon patsell ap leste, djal gar nashedo. Job lell ko djipen, hoi gar pre-herella. 17 O Dewel bitchras peskro tchawes gar ap i phub, te anell job o Debleskri choli pral i menshende. Job was, te lell lo len dran o tchilatchepen un o merepen win. 18 Koon ap leste patsella, pral koleste well kek phagi wi-rakedo. Koon gar ap leste patsella, pral koleste hi i phagi wi-rakedo doleske, kai patsas lo gar ap o Debleskro tchaweste. 19 O Debleskri bari momeli was ap kai phub. Un kol menshe, kai krenn o tchilatchepen, kaman o tamlepen budeder har koi momeli. Doleske hi i phagi pral lende wi-rakedo. 20 Kolla, kai o tchilatcho koowa krenna, kamenna gar koi momeli. Jon atchenn penge an o tamlepen, jaake kai dikenn i wawar gar, hawo tchilatcho koowa jon krenna. 21 Koon o tchatchepen krella, kowa well pash i momeli. Ap koleste dikenn le, kai job djiwella, har o Dewel kamella." 22 Pal kowa djas o Jesus peskre malentsa an ko them Judea, un atchas i tsiro kote, un thowas i menshen an o pani. 23 Ninna o Johanni thowas i menshen an o pani pash o gab Ainon, hoi his pash o foro Salim tchiddo. Koi his bud pani. I menshe wan pash leste, un mukan pen lestar an o pani te thowell. 24 Ap ko tsiro his o Johanni gar stildo. 25 Jek diwes tchingras i biboldo kolentsa, kai djan o Johanneske palla, pral kowa, har kolla, kai pal o biboldengro tchatchepen pale-tchiddo hi, nai wenn pale erligo. 26 Un jon djan pash o Johanneste, un penan leske: "Sikepaskro, ko mursh, kai his pash tute ap o wawar panjeskri rig, pral koleste rakral, un bud menshe shunan kowa, kowa hi kate, un thowell i menshen an o pani. Un hakeno djal pash leste." 27 Koi penas o Johanni ap lende: "Kek nai lell tchomone, te das les o Dewel kowa gar. 28 Tumer halauter shunan, kai penom, kai hom me gar ko baro rai, kolestar o Dewel penas, te well job. O Dewel bitchras man glan koleste. 29 Koles, kai i pirni hi, ko hi ninna o pirno. Un o maal ko pirnestar, kai pashal tardo hi, un shunell o pirneskro gole, hi bachtelo pral kowa. Kai bacht hi man kanna. 30 Me hunte wap tikno un tikneder. Un job hunte well baro un bareder. 31 Kowa, kai was o Deblestar, hi o rai pral lauter. Kowa, kai well i phubjatar, rakrell pral kowa, hoi ap i phub djala. Kowa, kai was dran o bolepen, hi o rai pral halauter, 32 un rakrell nai pral kowa, hoi job dikas un shunas. Kek patsell leske. 33 Koon patsell ap leste, kowa sikrell jaake, kai halauter tchatcho hi, hoi o Dewel penella. 34 Koles, kai o Dewel pash mende bitchras, kowa rakrell o Debleskre laba. O Dewel dell an leste peskro tselo Debleskro Ducho, un rikrell tchi pale. 35 O dad kamell o tchawes, un das halauter an leskro wast. 36 Koon ap o tchaweste patsella, koles hi ko djipen, hoi gar pre-herella. Koon ap o tchaweste gar patsella, koles well ko tchatcho djipen gar. O Debleskri choli atchell pral leste."

4

1 I Farisarja shunan, kai bud menshe djan o Jesuseske palla. Jon shunan ninna, kai job thowas budeder menshe an o pani har o Johanni. 2 His gar o Jesus, kai thowas len an o pani. Kowa kran leskre mala. 3 Har o Jesus shunas, hoi pral leste rakedo was, djas lo dran o them Judea win, un kamas pale an o them Galilea te djal. 4 Job hunte djas pral o them Samaria, te well lo an o them Galilea. 5 Jaake was lo pash ko foro Sichar an o them Samaria. Ko foro his pash ko kotar phub tchiddo, hoi o Jakob peskro tchaweste Josef das. 6 Koi his o Jakobeskro pani. O Jesus was khino ap ko dur drom un beshas pes pash ko pani. His deesh-te-dujenge. 7 Koi was i djuwel pash ko pani, te lell li pani. Koja his i Samaritetsa. O Jesus penas ap late: "De man te pijell!" 8 Leskre mala his gar koi. Jon his an o foro, te ginenn le chapaske. 9 Koi djuwel penas ap leste: "Tu hal i biboldo. Me hom i Samaritetsa. Har nai mangeh tu mandar pani, te dap tut te pijell? I bibolde chan gar khetne i Samaritentsa." 10 Penas o Jesus ap late: "Te djinals tu, hoi o Dewel kamell tut te dell, un koon tutar ko pani mangella, mangals tu mandar, te dap tut o pani. Un me doms tut o pani, hoi dell o djipen." 11 "Romeha," penas koi djuwel, "tut hi tchi, kai leh ko pani nai win. Un ko pani hi tel an i phub. Kai kameh tu ko pani, hoi dell o djipen, te lell? 12 Hal tu bareder har o Jakob, maro kutch dad, kowa, kai hadas i phub kate win, te well kau pani win. Job un peskre tchawe un fiche pijan dran kau pani." 13 Penas o Jesus: "Hakeno, kai pijell kau pani, lell pale trush. 14 Koon ko pani pijella, hoi me les dau, kowa lell an peskro tselo djipen buder kek trush. Ko pani, hoi me les dau, hi djido un herell gar pre te nashell an leste, un dell les o djipen, hoi gar pre-herella." 15 "Romeha, de man ko pani!" penas koi djuwel, "te well man buder kek trush, te wap buder gar kai, te lap kau pani." 16 "Dja khere!" penas o Jesus, "de tiro romes gole, un am leha pale kai!" 17 "Man hi kek rom," penas koi djuwel. Penas o Jesus ap late: "Tiro hi tchatcho, te peneh tu: Man hi kek rom. 18 Pantch romma his tut. Un kowa, kai tut kanna hi, kowa hi gar tiro rom. Koi penal tu o tchatchepen." 19 Penas koi djuwel: "Romeha, me dikau, tu hal i Debleskro rakepaskro. 20 Mare phure mangan o Debles ap kai berga an. Tumer bibolde penenn menge: Halauter hunte mangenn o Debles an o foro Jerusalem an!" 21 Penas o Jesus: "Romnija, pats man, ko tsiro wella, kai mangenn tumer o Debles gar ap kai berga an, witar gar an o foro Jerusalem. 22 Tumer djinenn gar, kones tumer an-mangenna. Mer djinah, kones mer an-mangah. I biboldendar wella kowa, kai lell i menshen dran o tchilatchepen un o merepen win. 23 Ko tsiro wella, un hi kanna kai, koi della menshe, kai mangenn o dades an o tchatchepen an. Kal menshen hunte well o Debleskro Ducho. O dad rodell kolen, kai mangenn les jaake an. 24 O Dewel hi kek mensho, - job hi i ducho. Un kolla, kai mangenn les an, kolen hunte well o Debleskro Ducho. Kowa sikrell len, har te mangenn le les tchatchepaha an." 25 Penas i djuwel: "Me djinau, kai well ko baro rai, kolestar o Dewel penas, te well job, kai kharell ninna o Kristo. Te well job pash mende, penell lo menge halauter." 26 Penas o Jesus: "Me hom kowa. Tu rakreh leha." 27 Koi wan leskre mala pale dran o foro. Har jon dikan, kai job i djuwjaha rakras, kran le bare jaka. Kek putchas lestar: Hoi kameh tu latar? Un kek putchas lestar witar gar: Hoske rakreh tu laha? 28 Kanna mukas koi djuwel ko panjeskro khoro tardo un djas pale an ko foro un penas i menshenge: 29 "Awenn un dikenn! Me taprom i murshes, kowa djinas halauter pral mande. Nai hi job ko Kristo?" 30 Koi djan kol menshe dran o foro pash o Jesuseste, te dikenn le les. 31 Har i djuwel an o foro his, penan leskre mala ap leste: "Sikepaskro, cha tchomone!" 32 Penas o Jesus ap lende: "Man hi i chapen, kowa prindjrenn tumer gar." 33 Koi putchan leskre mala mashkral pende: "Anas leske jek tchomone chapaske?" 34 Penas o Jesus lenge: "Me djiwau kolestar, te krap, hoi o Dewel mandar kamella. Un leskri budi krau jaake raha, har job kamella. Doleske bitchras man lo ap i phub. 35 Tumer penenna: An star tchon anenn le o djob dre? Krenn tumare jaka pre, un dikenn tumen trujal: O tsiro hi kanna kai. Kanna well o djob dre anlo. 36 Kanna anenn i budepangre kolen khetne, kai lenn o djipen, hoi gar pre-herella. Un lengri budi well plaissedo. Jaake hi hake dui bachtelo: Kowa, kai o tikno djob an i phub witsras, un kowa, kai anell o djob dre. 37 Ko lab hi tchatcho: Jek witsrell o tikno djob an i phub. Un i wawar anell ko djob dre. 38 Me bitchrom tumen, te anenn tumer kote o djob dre, kai i wawar maran pen tele, te witsran le ko tikno djob an i phub. Un tumer nai anenn kanna o djob dre." 39 Bud kol menshendar dran o foro Sichar patsan ap o Jesuseste doleske, kai koi djuwel lenge penas: "Halauter, hoi me krom, penas job mange." 40 Har i Samaritarja pash o Jesuseste wan, mangan le les, te atchell lo i tsiro pash lende. Un job atchas dui diwessa pash lende. 41 Jaake shunan bud menshe, hoi job penas, un patsan ap leste. 42 Jon penan koi djuwjake: "Kanna patsah mer ap leste, un gar kokres, hoi tu menge lestar penal. Mer shunam les, un djinah kanna, kai job kowa hi, kai lell i menshen dran o tchilatchepen un o merepen win." 43 Pal kol dui diwessa djas o Jesus dureder un was an o them Galilea. 44 Job penas jek kopo: I Debleskro rakepaskro well gar sharedo kote, kai job khere hi. 45 Har job an o them Galilea was, lan kol menshe les kamles pre. Ap ko tsiro, har o Jesus an o foro Jerusalem his, his jon ninna kote un dikan lauter, hoi job kras an kol diwessa, kai Passa kharenna. Doleske lan le les kanna kamles pash pende pre. 46 Un o Jesus was pale an o gab Kana. Kowa his ko gab an o them Galilea, kai kras job i mool dran o pani. An o foro Kapernaum djiwas i pralstuno, kai budras o baro rajeske pral ko them. Koleskro tchawo his nasselo. 47 Har job shunas, kai o Jesus pale dran o them Judea an o them Galilea was, djas job pash leste, un mangas lestar: "Am tele an o foro Kapernaum! Un kre miro tchawes sasto, kai ap o merepen tchiddo hi!" 48 O Jesus penas ap leste: "Te dikenn tumer gar bud Debleskro koowa, kai kek mensho nai krella, patsenn tumer gar." 49 Ko pralstuno penas pale ap leste: "Miro rai, am tele! Miro tchawo merella." 50 "Dja khere," penas o Jesus, "tiro tchawo djiwella!" Ko mursh patsas kowa, hoi o Jesus leske penas un djas khere. 51 Job his gomme gar khere, koi wan leskre budepangre pash leste, un penan: "Tiro tchawo djiwella un hi sasto." 52 Koi putchas job lendar pal ko tsiro, kai o tchaweha feteder was. Koi penan le: "Taissar, har eftenge his, djas o nasslepen lestar." 53 Kanna djinas ko dad, kai kowa ko tsiro his, kai o Jesus ap leste penas: "Tiro tchawo djiwella." Un job patsas peskre tsele menshentsa ap o Jesuseste. 54 Kau duito baro koowa kras o Jesus an o Debleskri soor, har job dran o them Judea an o them Galilea was.

5

1 Pal kowa his i baro Debleskro diwes i biboldenge. Un o Jesus djas an o foro Jerusalem. 2 An o foro Jerusalem his i pani pash ko foreskro wudar, kai kharella bakrengro wudar. Ko pani kharella ap hebretikes Betesda. Kote his i thopaskro kheer, kai pantch bare iseme dren his, kai pre his. 3 - 4 Kote his bud nassele tchiddo: Sawe, kai dikenn nai gar, un sawe, kai nashenn nai gar, un bange. 5 Mashkral kolende his i mursh, kai his triin-deesh-te-ochta (38) bersha nasselo. 6 O Jesus dikas les koi tchiddo, un djinas, kai his job i raha tsiro nasselo. "Kameh tu sasto te well?" putchas lo lestar. 7 "Rai," penas ko nasselo, "man hi kek, kai anell man an kau pani, te well djipen dre un djal pre un tele. Un te kamau me an o pani dre te djal, hi i wawar sikeder glan mande an o pani." 8 Penas o Jesus ap leste: "Ste pre! Le tiro tchiben un dja!" 9 Har o Jesus kowa penas, was ko mursh sasto, las peskro tchiben un djas trujal. Ko diwes his i Debleskro diwes. 10 Dran kowa penan kol pralstune bibolde ap koleste, kai sasto was: "Kau diwes hi o Debleskro diwes. Kau diwes hidjess tu tiro tchiben gar!" 11 Penas job ap lende: "Kowa, kai kras man sasto, penas ap mande: Le tiro tchiben un dja!" 12 "Un koon hi ko mursh," putchan jon, "kai penas ap tute: Le tiro tchiben un dja?" 13 Kowa, kai sasto was, djinas les gar. O Jesus mukas ko thopaskro kheer, har dikas lo kol bud menshen koi. 14 Pal i tsiro tapras o Jesus ko murshes pale an o Debleskro baro kheer. "Tu hal kanna sasto," penas lo ap leste, "kre kek tchilatcho koowa buder, te well gar budeder ap tute har ko nasslepen!" 15 Koi djas ko mursh pash kol pralstune biboldende un penas: "Kowa his o Jesus, kai kras man sasto." 16 Pal kowa lan i bibolde o Jesuses palla. Jon his chojedo, te kras job i nasseles ap o Debleskro diwes sasto. 17 O Jesus penas lenge: "Miro dad budrell o tselo tsiro. Jaake krau me kowa ninna." 18 Doleske kaman kol bibolde gomme budeder, te marenn le les. O Jesus kras gar kokres i nasseles ap o Debleskro diwes sasto. Job penas ninna, kai o Dewel leskro dad hi, un kras pes jaake har o Dewel. 19 O Jesus penas ap lende: "Tchatchepaha, me penau tumenge: O tchawo nai krell tchi pestar. Job dikell, hoi o dad krella. Un kowa, hoi krell o dad, kowa krell ninna o tchawo. 20 O dad kamell o tchawes un sikrell leste halauter, hoi job krella. Ninna wawar bareder koowa sikrell lo leste, jaake kai krenn tumer bare jaka. 21 Har o dad i mulen pre djangrella, un dell len o newo djipen, jaake nai dell ninna o tchawo o newo djipen, kones job kamella. 22 O dad rakrell pral kekeste i phagi win. Kowa das lo an peskro tchaweskro wast, te well leskro tchawo o tchatchepaskro rai pral lauterende, 23 te sharenn le halauter o tchawes, jaake har sharenn le o dades. Koon o tchawes gar sharella, kowa sharella witar gar o dades, kai bitchras o tchawes. 24 Tchatchepaha, me penau tumenge: Koon miro lab shunella, un patsella ap koleste, kai man bitchras, koles hi ko djipen, hoi gar pre-herella. Pral leste well kek phagi wi-rakedo. Job mukas ko merepen pal peste, un djas an o djipen. 25 Tchatchepaha, me penau tumenge: Ko tsiro wella un hi kanna kai, kai i mule shunenn i gole o Debleskro tchawestar. Un kolla, kai shunenn, kai dell job gole, kolla djiwenna. 26 An o dadeste hi o djipen. Kowa das lo ninna peskro tchaweste, te well an leste ko djipen. 27 Job hi o Menshengro Tchawo. Un o Dewel das an leskro wast, te rakrell lo i phagi win pral i menshende. 28 Ma krenn bare jaka, te penau tumenge: Ko tsiro wella, kai i tsele mule shunenna, te kharell lo len. 29 Un jon wenna dran i mulengre khera win. Kolla, kai latcho koowa kran, wenn djides kerdo, te lenn le ko djipen, hoi gar pre-herella. Un kolla, kai tchilatcho koowa kran, wenn djides kerdo, te lenn le i phagi. 30 Mandar nai krau me tchi. Me rakrau o tchatchepen win, jaake har o Dewel mange penella. Kowa, hoi rakrau pral i mensheste win, hi tchatcho. Me krau gar, hoi me kamau. Me krau halauter, hoi kowa kamella, kai bitchras man." 31 "Me te penoms kokres pral mande win, wals kowa tchi moldo. 32 Man hi jek, kai penell tumenge, koon me hom. Kowa, hoi job penell pral mande, kowa hi tchatcho. 33 Tumer bitchran murshen pash o Johanneste, te shunenn lestar pral mande. Un job penas pral mande o tchatchepen. 34 Man hunte well kek mensho, kai penell pral mande win. Hi tumenge, kai rakrom pral kowa, hoi o Johanni pral mande penas, te patsenn tumer un wenn dran o tchilatchepen un o merepen win lino. 35 O Johanni his i momeli, kai chatchas. Un i tikno tsiro hans tumer bachtelo pral kowa, hoi job penas un kras. 36 Man hi tchomone, hoi penell tumenge feteder o tchatchepen pral mande win har o Johanni. Kowa hi ko koowa, hoi krau, kolestar o dad mange penas, te krap kowa. Kowa sikrella, kai o dad bitchras man. 37 Ninna miro dad, kai bitchras man, penas tumenge, koon me hom. Tumer shunan les gar, witar gar dikan les tumer. 38 Tumer patsenn gar an tumare djia, hoi job penas. Doleske patsenn tumer gar, kai me kowa hom, kones o Dewel bitchras. 39 Tumer rodenn o djipen an o Debleskro lab un patsenn, kai hatsenn kote ko djipen, hoi gar pre-herella. Un tchatchepaha, o Debleskro lab rakrell mandar. 40 Pash mande kamenn tumer gar te well, te lenn ko djipen, hoi gar pre-herella. 41 Hi mange tchi moldo, te wap sharedo i menshendar. 42 Me prindjrau tumen un djinau, kai hi gar o Debleskro kamlepen an tumende. 43 Miro dad bitchras man pash tumende. Tumer lan man gar pre. Te well i wawar, koles kek bitchras, koles lenn tumer pre. 44 Har nai patsenn tumer mange? Tumer rodenna, te well jek i wawarestar sharedo. Te wenn tumer o Deblestar sharedo, kowa hi tumenge tchi moldo. 45 Ma patsenn, kai me phukrau ap tumende pash miro dadeste. Koi hi i wawar, kai phukrell ap tumende: O Mose, kolestar patsenn tumer, kai hi lo ap tumari rig. 46 Tumer te patsenn tchatchepaha, hoi o Mose tumenge penas, patsans tumer ninna ap mande. Job tchinas pral mande. 47 Tumer te patsenn gar, hoi o Mose tchinas an peskre lila, har nai patsenn tumer, hoi me tumenge penau?"

6

1 Pal i tsiro djas o Jesus ap i wawar rig o baro panjestar Galilea. Ko pani kharella ninna Tiberias. 2 Bud bud menshe djan leske palla. Jon dikan, hawo baro koowa job an o Debleskri soor kras ap i nasslende. 3 Khetne peskre malentsa djas o Jesus ap i berga, un beshas pes lentsa tele. 4 His i tikno tsiro glan i biboldengre bare diwessa, kai kharenna Passa. 5 Har o Jesus dikas, kai bud bud menshe leske palla djan, putchas lo o Filipestar: "Kai nai ginah mer jaake bud mare, te well i tsele menshen chapaske?" 6 Job kamas te dikell, har leskro patsepen hi. Doleske putchas job lestar kowa. O Jesus djinas kokres, hoi job kamas te krell. 7 O Filipo penas: "Ninna te wals men dui-sheel rupene beme, wals kowa gar doha, te lell hakeno i tikno kotar maro." 8 Jek leskre malendar, o Andreas, ko phraal o Simon Petrestar, penas ap o Jesuseste: 9 "Kate hi i tchawo. Koles hi pantch mare un dui matche. Kowa hi tchi jaake bud menshenge." 10 O Jesus penas: "Penenn i menshenge, te beshenn pen le!" Koi his bud senlepen. Un jon beshan pen koi. Kolla his nai jaake pantch serja (5.000) mursha. 11 Un o Jesus las kol mare, parkras pes pash o Debleste un das len i menshende. Kowa kras lo ninna kol matchentsa. Un hakeno las jaake bud, har job kamas. 12 Har jon halauter tchalo his, penas job ap peskre malende: "Tchiwenn i tsele kotja khetne, hoi pral atchan, te djal kowa gar nashedo!" 13 Koi tchiwan leskre mala halauter khetne, hoi pral atchas kol marendar. Koi wan deesh-te-dui marengre gone pherdo kol pantch marendar. 14 Har kol menshe dikan, hoi o Jesus kras an o Debleskri soor, penan le: Kowa hi tchatchepaha ko Debleskro rakepaskro, kolestar penlo was, kai well lo ap kai phub. 15 O Jesus haiwas, kai kaman jon les te taprell, te krenn le les lengro baro rai. Doleske djas job dureder pral ap koi berga, te well lo peske kokres. 16 Har i rat was, djan leskre mala tele pash o pani, 17 djan an o panjeskro ulepaskro, un uleran wergal o pani, te wenn le an o foro Kapernaum. His rati, un o Jesus his gar pash lende. 18 Koi phurdas i baro sorelo ducho pral o pani. Un o pani was diwjo. 19 Har leskre mala pantch, shob kilometarja win ap o baro pani his, dikan le o Jesuses: Job djas ap o pani, un was pash o panjeskro ulepaskro. Un jon lan traash. 20 Job penas: "Me hom! Ma darenn!" 21 Koi kaman jon les an o panjeskro ulepaskro te lell. Ap jek kopo his le ap i wawar panjeskri rig, kote, kai jon kaman te djal. 22 O wawar diwes putchan pendar kol menshe, kai atchan ap i wawar panjeskri rig, kai o Jesus hi. Jon dikan, kai taissar jek panjeskro ulepaskro tchiddo his pash o pani, un kai leskre mala djan penge. Jon djinan, o Jesus his gar pash lende. 23 Koi wan wawar panjeskre ulepangre dran o foro Tiberias, un tchiwan pen kote, kai chans le ko maro, koleske o Jesus parkras pes pash o Debleste. 24 Har kol menshe haiwan, kai o Jesus buder gar koi hi, witar gar leskre mala, beshan pen jon an kol panjeskre ulepangre, uleran wergal o baro pani, un wan an o foro Kapernaum, te rodenn les le. 25 Kote hatsan le les, un putchan lestar: "Sikepaskro, kaana wal tu kate?" 26 Penas o Jesus: "Tchatchepaha, me penau tumenge: Tumer rodan man gar doleske, kai dikan i baro koowa, hoi krom an o Debleskri soor. Tumer chan ko maro, un wan tchalo. Doleske rodenn tumer man. 27 Ma djiwenn o chapaske, hoi paash djala! Djiwenn jaake, te lenn ko djipen, hoi gar pre-herella! O Menshengro Tchawo kokres nai dell tumen kowa. Jaake sikras o Dewel, kai kowa leskro tchawo hi." 28 Koi putchan jon lestar: "Hoi hunte kras mer? Hoi kamell o Dewel mendar?" 29 Penas o Jesus ap lende: "O Dewel kamella, te patsenn ap koleste, kai job bitchras." 30 Penan jon: "Kre menge i baro koowa an o Debleskri soor, te patsas mer ap tute! Sike men, hoi tu haiweh! 31 De men hako diwes maro te chal, jaake har mare phure menshe chan o Debleskro maro an o mulo them! Kowa hi tchindlo an o Debleskro lab: Job das len maro dran o bolepen chapaske." 32 Penas o Jesus: "Tchatchepaha, me penau tumenge: Hi gar o Mose, kai das tumen o maro dran o bolepen. Kowa hi miro dad, kai dell tumen ko tchatcho maro dran o bolepen. 33 O Debleskro maro hi kowa, kai was dran o bolepen, un dell i menshen o djipen." 34 "Rai," penan jon, "de men ko maro hako tsiro!" 35 O Jesus penas lenge: "Me hom ko maro, kai della ko djipen. Koon pash mande wella, koles hi buder kek bok. Un koon ap mande patsella, koles hi buder kek trush. 36 Hi jaake har me tumenge penom: Tumer dikan man, un kamenn gar ap mande te patsell. 37 Halauter kolla, kai dell man o dad, wenn pash mande. Un halauter kolla, kai wenn pash mande, kolen witsrau me gar win. 38 Me wom gar dran o bolepen te krap kowa, hoi me kamau. Me wom te krap, hoi kowa kamella, kai bitchras man. 39 Un o Dewel kamella, te nashrap me kekes kolendar, kai job man das. Job kamella, te krap len i mulendar djido ap o palstuno diwes. 40 Kowa kamell miro dad: Hakeno, koon o tchawes dikella, un ap leste patsella, lell o djipen, hoi gar pre-herella. Un me krau les i mulendar djido ap o palstuno diwes." 41 I bibolde his chojemen pral kowa, kai job penas: Me hom ko maro, hoi dran o bolepen tele was. 42 "Hi kowa gar o Jesus, ko Josefeskro tchawo?" penan jon. "Mer prindjrah leskro dades un leskri da. Har nai penell lo: Me wom dran o bolepen?" 43 Koi penas o Jesus ap lende: "Ma choirenn tumen pral kowa, hoi me tumenge penom! 44 Kek nai well pestar pash mande. O dad, kai bitchras man, hunte anell les pash mande. Un koon pash mande wella, koles krau me i mulendar djido ap o palstuno diwes. 45 An o Debleskro lab tchinan kol Debleskre rakepangre: O Dewel hi o sikepaskro halauterenge. Hakeno, koon ap o dadeste shunella un krell, hoi job kamella, well pash mande. 46 Kek dikas o dades. Kowa kokres, kai was o Deblestar, dikas les. 47 Tchatchepaha, me penau tumenge: Koon ap mande patsella, koles hi o djipen, hoi gar pre-herella. 48 Me hom ko maro, hoi dell tumen ko djipen. 49 Tumare phure chan ko maro, hoi o Dewel len das an o mulo them, un jon meran. 50 Me hom ko tchatcho maro, hoi dran o bolepen wella. Koon kowa chala, kowa merell gar. 51 Me hom ko maro, hoi dell o djipen, un hoi was dran o bolepen. Hakeno, koon chala kau maro, lell o djipen, hoi gar pre-herella. Un ko maro hi miro mass. Me dau les i menshenge, te lenn le ko djipen." 52 Kanna tchingran pen kol bibolde, un penan: "Har nai dell men ko mursh peskro mass te chal?" 53 Koi penas o Jesus ap lende: "Tchatchepaha, me penau tumenge: Te chan tumer gar o Menshengro Tchaweskro mass, un pijenn gar leskro rat, hi tumen gar o djipen, hoi gar pre-herella. 54 Koon chala miro mass, un pijell miro rat, lell o djipen, hoi gar pre-herella. Un me krau les i mulendar djido ap o palstuno diwes. 55 Miro mass hi o tchatcho chapen, un miro rat o tchatcho pipen. 56 Koon chala miro mass, un pijell miro rat, kowa atchella an mande, un me atchau an leste. 57 Jaake har o dad, kai bitchras man, hi djido, un das man o djipen, jaake dau me o djipen kolende, kai chan miro mass. 58 Kawa hi ko maro, hoi was dran o bolepen. Koon kau maro chala, lell o djipen, hoi gar pre-herella. Kawa hi i wawar maro har kowa, hoi tumare phure chan." 59 Kowa penas job an i biboldengri kangri, har job an ko foro Kapernaum lenge o Debleskro lab penas. 60 Har kolla, kai leha djan, kowa shunan, penan bud lendar: "Kowa hi kek shukar koowa, hoi job koi penella. Koon shunell kowa nai?" 61 Har o Jesus lendar haiwas, kai jon pen pral leste choirenna, penas lo ap lende: "Choirell tumen kowa? 62 Hoi krans tumer, te dikans tumer, te djal o Menshengro Tchawo pale an o bolepen? 63 O Debleskro Ducho hi kowa, kai dell o djipen. O mensheskri soor nai krell kowa gar. Mire laba, hoi me tumenge penom, wan dran o Debleskro Ducho. Doleske anenn le tumenge ko djipen. 64 Mashkral tumende hi menshe, kai patsenn gar." O Jesus djinas, koon kolla his, kai patsenn gar. Ninna djinas lo, koon ap leste phukrella. 65 Un job penas dureder: "Doleske penom me tumenge, kai kek nai well pestar pash mande. O dad kokres nai anell les pash mande." 66 Ap ko tsiro tsardan pen bud kolendar pale, kai leske palla djan, un djan buder gar leha. 67 Koi putchas o Jesus kol deesh-te-dujendar: "Kamenn tumer man ninna te mukell?" 68 "Rai, pash koneste djas mer?" penas o Simon Petro. "Tut hi laba, kai denn men o djipen, hoi gar pre-herella. 69 Mer patsah un djinah, tu weh o Deblestar. O Dewel bitchras tut." 70 O Jesus penas lenge: "Me rodom tumen deesh-te-dujen win. Un an jekeste tumendar hi o beng." 71 Job rakras o Judasestar, leskro dad hi o Simon Iskariot. O Judas his jek kol deesh-te-dujendar, kowa kai phukrella ap leste.

7

1 Pal kowa djas o Jesus an o them Galilea trujal. Job kamas gar an o them Judea te djal. I pralstune bibolde kote kaman les te marell. 2 - 3 I tikno tsiro glan kol biboldengre bare diwessa, hoi kharenna Sukkot, penan leskre phrala ap leste: "Ma atch an o them Galilea! Dja an o them Judea, te dikenn ninna tire mala, hawo baro koowa tu kreh! 4 Kek mensho khatrell pes, te kamell lo i menshen te sikrell, hoi job nai krella. Te kreh tu sawo baro koowa, palle muk kowa i tsele menshen te dikell!" 5 Leskre phrala patsan gar ap leste. Doleske rakran jon jaake. 6 Koi penas o Jesus ap lende: "O tsiro hi mange kanna gar kai, te djap kote. Tumer nai djan hako tsiro koi. 7 I menshe hi gar tchilatcho ap tumende. Ap mande hi le tchilatcho. Me penom lenge, kai kowa, hoi jon krenna, tchilatcho hi. 8 Djan tumer ap o festo! Me djau gar peha. O tsiro hi mange kanna gar kai." 9 Kowa penas job, un atchas an o them Galilea. 10 Har leskre phrala ap o festo his, djas job ninna tchorchanes koi. 11 Koi rodan les kol pralstune bibolde mashkral kolende, kai wan ap o festo, un putchan hakenestar: "Kai hi ko mursh?" 12 Ninna kol bud menshe, kai wan koi, rakran pral leste. His menshe mashkral lende, kai penan: "Job hi i latcho mursh." Wawar penan: "Na-a, job chochella i menshen." 13 I darjatar i pralstune biboldendar rakran le halauter tchorchanes pral leste. 14 Har ko festo paash trujal his, djas o Jesus an o Debleskro baro kheer, un penas i menshenge o Debleskro lab. 15 Koi kran i pralstune bibolde bare jaka, un penan: "Har nai djinell job jaake bud? Kek anas leske kowa pashal." 16 Penas o Jesus lenge: "Hoi me tumenge penau well gar mandar. Kowa well kolestar, kai bitchras man. 17 Koon kowa krella, hoi o Dewel kamella, kowa haiwella, kai mire laba o Deblestar wenna, un gar mandar. 18 Koon pral peste mishto rakrella, kowa kamella, te well job sharedo. Koon kamella, te well kowa sharedo, kai bitchras les, kowa hi tchatcho. Un an leste hi kek tchilatchepen. 19 O Mose das tumen i lila, kai tchindlo hi, har tumer hunte djiwenna. Kek tumendar djiwell jaake. Hoske kamenn tumer man te marell?" 20 "An tute hi i beng", penan kol tsele menshe. "Koon kamell tut te marell?" 21 Penas o Jesus: "Jek baro koowa krom me pash tumende an o foro Jerusalem. Un tumer han chojedo pral kowa. 22 Te hi tumare mursh tchawe ochta diwessa phuro, tchinenn tumer len ap o mass, ninna ap o Debleskro Diwes. O Mose penas tumenge, te krenn kowa. Un o Mose his gar kokres, kai penas tumenge kowa. Ninna tumare phure, kai djiwan glan leste, penan kowa un rikran pen koi pre. 23 Tumer tchinenn tumare tchawen ap o mass ap o Debleskro diwes, te well rikedo, hoi o Mose tchinas an peskre lila. Hoske han tumer jaake chojedo ap mande, kai krom i menshes tseles sasto ap o Debleskro diwes? 24 Tumer te penenn, kai i mensho i doosh ap peste anas, palle djan pal o tchatchepen un gar pal kowa, hoi dikenn tumare jakentsa!" 25 Koi penan kolla, kai hi dran o foro Jerusalem: "Hi kowa gar ko mursh, kai kaman le les te marell? 26 Kanna rakrell lo glan hakeneste. Un kek dell les trad. Dikan mare pralstune kanna dre, kai job ko baro rai hi, kolestar o Dewel penas, te well job? 27 Mer djinah, dran hawo foro ko mursh wella. Te well ko baro rai, kolestar o Dewel penas, te well job, djinell kek dran hawo foro job wella." 28 O Jesus, kai an o Debleskro baro kheer i menshenge o Debleskro lab penas, shunas kowa, un das gole: "Har nai prindjrenn tumer man, un djinenna, kai wom? Me wom gar mandar kokres! Tchatchepaha, koles, kai bitchras man, prindjrenn tumer gar! 29 Me prindjrau les! Me wom lestar! Un job bitchras man!" 30 Koi kaman jon les te taprell. Un kek nai hadas o wast ap leste. O tsiro his leske kanna gar koi, kai well job tapedo. 31 Bud kol menshendar patsan ap leste un penan: "Te well o baro rai, kolestar o Dewel penas, te well job, nai krell kowa bareder koowa, har kau mursh Jesus?" 32 I Farisarja shunan, hoi kol menshe pral o Jesuseste rakran. Un i Farisarja un i bare rashaja bitchran klisten, te taprenn le o Jesuses. 33 Koi penas o Jesus: "Me hom buder gar raha pash tumende. Me djau pash koleste, kai bitchras man. 34 Tumer rodenn man, un hatsenn man gar. Kote, kai me palle hom, nai wenn tumer gar." 35 "Kai kamell job te djal, kai hatsah mer les gar?" putchas jek i wawarestar. "Kamell job pash kol biboldende te djal, kai djiwenn an o grichtikro them, te penell lo kote i menshenge o Debleskro lab? 36 Har haiwas mer leskro rakepen: Tumer rodenn man, un hatsenn man gar un kote, kai me palle hom, koi nai wenn tumer gar?" 37 Ap ko pralstuno un shukeder diwes, was o Jesus pale glan kol tsele menshende, un das gole: "Kones trush hi, kowa te well pash mande un pijella! 38 Koon ap mande patsella, har o Debleskro lab penella, dran koleste well ko pani, kai dell o djipen." 39 Job penas kowa pral o Debleskro Ducho, hoi kolla lenna, kai ap leste patsenna. O Debleskro Ducho his gomme gar koi. Ap ko tsiro his o Jesus gomme gar pash o Debleste an o bolepen, te bitchras lo les ap lende. 40 Mashkral kolende, kai shunan ko rakepen, his menshe, kai penan: "Kau mursh hi tchatchepaha ko Debleskro rakepaskro, kolestar penlo was, te well job." 41 Wawar penan: "Kowa hi ko baro rai, kai well o Deblestar." Un wawar penan: "Well ko baro rai dran o them Galilea? Na-a! 42 O Debleskro lab penella, ko baro rai, kai well o Deblestar, kowa hi o Davideskre menshendar, un well an o foro Betlehem boldo har o David." 43 Kanna djinan i menshe gar, hoi tchatcho hi. Ko jek penas kawa, ko wawar penas kowa. 44 Mashkral lende his ninna sawe, kai kaman les te taprell. Un kek hadas peskro wast pal leste. 45 Har i kliste pale pash i bare rashaja un i Farisarja wan, putchan kolla lendar: "Hoske anenn les tumer gar peha?" 46 "Har kawa mursh rakras, shunam mer maro tselo djipen gar!" penan i kliste ap lende. 47 "Chochas lo tumen ninna?" putchan kol Farisarja. 48 "Patsell jek i pralstunendar un i Farisarjendar ap leste? Na-a! 49 Kol bud menshe djinenn gar, hoi an o Moseskre lila tchindlo hi. Jon hi praassedo!" 50 O Nikodemus, kai his ninna i Farisari, kowa kai was jek rati pash o Jesuseste, penas ap lende: 51 "Pal maro tchatchepen nai dah kekes i phagi, te shunam gar lestar, hoi job rakrell pral kowa win. Mer dah ninna kekes i phagi, te djinah gar, hoi job kras." 52 "Hal tu ninna dran o them Galilea?" putchan le lestar. "Tu te drawereh mishto an o Debleskre lila, palle dikeh, kai kek Debleskro rakepaskro wella dran o them Galilea." 53 Un hakeno djas khere.

8

1 O Jesus djas pash o djeteskri berga. 2 O wawar diwes taissarlake was job pale an o Debleskro baro kheer. Un i tsele menshe wan pash leste. Un job beshas pes tele, un penas lenge o Debleskro lab. 3 Koi wan i tchatchepangre un i Farisarja. Kolla anan i romedini romjat pash leste. Koja was tapedo koi pashal, har joi i wawar mursheha khetne his. Jon tchiwan lat mashkral i menshende, jaake, kai dikell lat nai hakeno. 4 Un jon penan ap o Jesuseste: "Sikepaskro, kai romni was tapedo, har joi i wawar mursheha khetne his. 5 An o Moseskre lila, kai tchindlo hi, har mer djiwas, penas o Mose menge, kai sawe djuwja hunte wenn mulo dino i barentsa. Hoi peneh tu pral kowa?" 6 Kowa putchan le lestar, te nai taprenn le les an leskre laba, jaake te nai anenn le i doosh ap leste pre. O Jesus tchiwas pes glan tele, un tchinas o gushteha an i phub. 7 Har jon lestar pale putchan, hadas job pes pre, un penas: "Koon kek tchilatcho koowa kras, mu well ko ersto, kai witsrell i bar ap late!" 8 Un pale tchiwas pes job glan tele, un tchinas pale an i phub. 9 Har jon kowa shunan, djan le penge, jek pal o wawar. I phureder djan sikeder lendar, har kol wawar. Job atchas kokres koi romjaha, kai kote tardo his. 10 Kanna hadas pes o Jesus pale pre, un putchas koi romjatar: "Hi kek koi, kai kamell, te less i phagi?" 11 "Na-a, miro rai, kek hi koi," penas koi romni. Penas o Jesus: "Jaake kamau me witar gar, te less i phagi. Dja khere, un ma aan buder kek doosh ap tute!" 12 Pale rakras o Jesus i menshentsa un penas: "Me hom koi momeli i menshenge. Koon mange palla djala, djal gar an o tamlepen. Me hom koi momeli, kai o djipen della." 13 Koi penan kol Farisarja ap leste: "Tu rakreh tutar kokres un peneh, koon tu hal. Doleske hi kowa tchi moldo, hoi tu rakreh." 14 Penas o Jesus: "Ninna te rakrau mandar kokres, hi kowa tchatcho, hoi penau. Me djinau, konestar me wom, un kai me djaua. Tumer djinenn gar, konestar me wom, witar gar, kai me djaua. 15 Tumer dikenn i menshes tumare jakentsa, un penenn: Kowa anas doosh ap peste! Me krau kowa gar. 16 Me te penau: Kowa anas i doosh ap peste! palle hi kowa tchatcho. Me krau kowa gar mandar kokres. Miro dad, kai bitchras man, hi pash mande. 17 Ninna an o Moseskre lila hi tchindlo: Te penenn dui pral jekeste win, jaake hi kowa tchatcho. 18 Me penau o tchatchepen pral mande, un miro dad, kai bitchras man, penell ninna o tchatchepen pral mande." 19 Putchan jon lestar: "Kai hi tiro dad?" Penas o Jesus: "Tumer prindjrenn man gar, witar gar miro dades. Te prindjrans tumer man, jaake prindjrans ninna miro dades." 20 Har job kawa penas, his job an o Debleskro baro kheer, kote, kai i pirja tardo his, kai i menshe lowe o Debleske dre tchiwan. Kote penas job i menshenge o Debleskro lab. Un kek tapras les. I tsiro his leske kanna gar koi. 21 Pale penas o Jesus ap lende: "Me djau mange. Tumer rodenn man, un tumer merenn an tumaro tchilatchepen. Kote, kai me djaua, nai wenn tumer gar." 22 Penan kol bibolde: "Hoi penell job koi: Kote, kai me djaua, nai wenn tumer gar? Kamell job pes te marell?" 23 Penas job ap lende: "Tumer han i phubjatar. Me hom dran o bolepen. Tumer han kai phubjatar. Me hom gar kai phubjatar. 24 Doleske penom tumenge: Tumer merenn an tumaro tchilatchepen. Tumer te patsenn gar, kai me kowa hom, koon me hom, palle merenn tumer an tumaro tchilatchepen." 25 "Pen menge, koon tu hal!" penan jon ap leste. Penas o Jesus: "Me penom tumenge kowa jaake bud kope. 26 Me nai penoms tumenge bud koowa, kai dikom o tchilatchepen ap tumende. Me krau kowa gar. Me penau i menshenge, hoi shunom kolestar, kai bitchras man. Un hoi job penella, hi tchatcho." 27 Jon haiwan gar, kai o Jesus o Deblestar, peskro dadestar, rakras. 28 Koi penas o Jesus ap lende: "Te hadan tumer o Menshengro Tchawes pral, palle djinenn tumer, koon me hom, un kai me tchi mandar kokres kraua. Hoi o dad mange penas, kowa penau me dureder. 29 Un kowa, kai bitchras man, hi pash mande. Job mukas man gar kokres. Me krau hako tsiro, hoi job kamella." 30 Har o Jesus kowa penas, patsan bud ap leste. 31 Ap kol biboldende, kai kanna ap leste patsan, penas lo: "Tumer te krenna, hoi me tumenge penau, palle han tumer tchatchepaha mire mala, kai mire laba pre lan. 32 Un tumer prindjrenna o tchatchepen. Un o tchatchepen krella, te han buder gar pandlo." 33 Penan jon: "Mer ham o Abrahameskre tchawe. Un an kek tsiro hams pandle budepangre. Har nai peneh tu menge, te atchenn buder gar pandlo?" 34 Penas o Jesus: "Tchatchepaha, me penau tumenge: Koon o tchilatchepen krella, hi pandlo ap o tchilatchepen. 35 I budepaskro atchell gar hako tsiro an peskro rajeskro kheer. O tchawo atchella jaake raha, har job djiwella. 36 Te krell o Debleskro tchawo, kai han buder gar pandlo, jaake han tchatchepaha buder gar pandlo. 37 Me djinau, kai han o Abrahameskre tchawe. Ninna te hi jaake, kamenn tumer man te marell. Kowa, hoi me tumenge penau, lenn tumer gar pre. Doleske kamenn tumer man te marell. 38 Me penau tumenge kowa, hoi pash miro dadeste dikom. Tumer krenna, hoi shunan tumaro dadestar." 39 Koi penan jon ap leste: "Maro dad hi o Abraham." Penas o Jesus: "Te wans tumer lestar, krans, hoi job kras. 40 Kanna, kai me tumenge ko tchatchepen penom, kai shunom o Deblestar, kamenn tumer man te marell. Kowa kras o Abraham gar. 41 Tumer krenn kowa, hoi tumaro dad ninna kras." Penan jon ap leste: "Mari dai hi kek lubni. Men hi jek dad. Kowa hi o Dewel." 42 "Te wals o Dewel tumaro dad", penas o Jesus, "kamans man tumer. Lestar wom me. Me wom gar mandar. Hi o Dewel, kai bitchras man. 43 Hoske haiwenn tumer miro rakepen gar? Tumaro dji hi pesso. Tumer shunenn nai miro lab gar. 44 Tumaro dad hi o beng. Un tumer krenna, hoi tumaro dad ninna kamella. Job hi jek, kai marell i menshen hako tsiro. Un job hi gar an o tchatchepen tardo. O tchatchepen hi gar an leste. Te rakrell job o chochepen, well kowa dran leste. Job hi i chocheno, un anas o chochepen ap kai phub. 45 Me penau o tchatchepen. Doleske patsenn tumer man gar. 46 Koon tumendar nai penella, kai me jek tchilatcho koowa krom? Me te penau o tchatchepen, hoske patsenn tumer man gar? 47 Koon o Deblestar wella, shunella ap kowa, hoi o Dewel penella. Tumer wenn gar lestar. Doleske shunenn tumer gar ap leskre laba." 48 "Hi maro gar tchatcho?" penan kol bibolde. "Tu hal i Samaritari un an tute hi o beng, jaake har mer les penam." 49 "Na-a," penas o Jesus, "an mande hi kek beng. Me sharau miro dades. Tumer kamenn man gar te sharell. 50 Me kamau gar, te sharenn man i menshe. Kowa hi o Dewel, kai kamella, te wap me sharedo. Job rakrell i phagi pral tumende wi. 51 Tchatchepaha, me penau tumenge: Te hi jek koi, kai krella, hoi me penom, kowa merell buder gar." 52 Koi penan jon: "Kanna djinah mer, kai hi an tute i beng. O Abraham meras, un o Debleskre rakepangre meran ninna. Un tu peneh: Te krell jek, hoi me kamau, kowa merell buder gar. 53 Hal tu budeder har maro dad Abraham, kai meras? Un kol Debleskre rakepangre meran ninna. Hal tu feteder har jon?" 54 Penas o Jesus: "Te sharoms me man, wals kowa tchi moldo. Miro dad hi kowa, kai sharell man. Kolestar penenn tumer: Job hi maro Dewel. 55 Tumer prindjrenn les gar. Me prindjrau les. Te penaus me, kai prindjrau les gar, woms i chocheno har tumer. Me prindjrau les un krau, hoi job penella. 56 O Abraham, tumaro dad, his bachtelo, har job dikas, kai me wau. Job dikas kau diwes, un his bachtelo." 57 Penan kol bibolde ap leste: "Tu hal kek pantch-desha bersha phuro un peneh, kai dikal o Abrahames." 58 Penas o Jesus ap lende: "Tchatchepaha, me penau tumenge: O Abraham his gomme gar boldo, koi homs me koi." 59 Koi hadan jon barra pre, te witsrenn le kolla ap leste. Un job khatras pes, un djas dran o Debleskro baro kheer win.

9

1 Ap o drom dikas o Jesus i murshes. Kowa was koreles boldo. 2 Un o Jesuseskre mala putchan o Jesusestar: "Sikepaskro, koon anas i doosh ap peste, te was kau mursh koreles boldo? Anas job i doosh ap peste? Anas leskro dad un leskri dai i doosh ap pende?" 3 "Kek lendar anas i doosh ap peste," penas o Jesus. "Job gar, leskro dad un leskri dai witar gar. Job hi korelo, te well o Debleskri bari soor ap leste diklo. 4 Jaake raha har diwes hi, kras mer, hoi o Dewel menge penas, kowa, kai bitchras man. I rati wella: Koi nai krell kek i budi. 5 Jaake raha, har me ap kai phub hom, jaake raha hom me koi momeli i menshenge." 6 Har job kowa penas, tchungras lo an i tchik, las kowa, un makas leske ap i jaka. 7 Un job penas ap leste: "Dja pash ko pani Siloam, un thob tut koi!" Siloam kharella: O Dewel bitchras man. Koi djas job un thowas pes kote. Har job pale was, dikas lo nai. 8 Kol menshe, kai pash leste djiwan, un wawar, kai djinan, kai job o mangepaskro his, penan: "Hi kowa gar ko mursh, kai kote beshdo his un mendar lowe mangas?" 9 His menshe koi, kai penan: "Kowa hi ko mursh." Wawar penan: "Na-a! Kowa dikell wi har job." Ko mursh penas: "Me hom kowa." 10 "Har well kowa, kai tu dikeh nai ap jek kopo?" putchan le lestar. 11 Penas job: "O mursh, kai kharell Jesus, makas mange tchomone ap i jaka, un penas: Dja pash ko pani Siloam, un thob tut koi! Me djom kote, un thowom man, un dikom nai." 12 "Kai hi job?" putchan le lestar. "Me djinau gar," penas job. 13 Un jon anan kol murshes pash i Farisarja. 14 His i Debleskro diwes, har o Jesus makas koi tchik ap leskre jaka, un kras, te dikell job. 15 Kanna putchan ninna i Farisarja kolestar, kai sasto was: "Har well kowa, kai dikeh nai ap jek kopo?" Un job penas lenge: "Job makas mange tchomone ap i jaka, me thowom man, un kanna nai dikau." 16 Kote his Farisarja, kai penan: "Kau mursh was gar o Deblestar. Job budrell ap o Debleskro diwes." Wawar penan: "Har nai krell i tchilatcho mursh sawo baro koowa?" Un mashkral lende djas o tchingepen. 17 Un pale putchan le kolestar, kai sasto was: "Hoi peneh tu lestar, kai job tire jaka pre kras? Hoi peneh tu, koon job hi?" "Job hi i Debleskro rakepaskro," penas lo. 18 Kol pralstune bibolde patsan gar, kai job nai dikas gar, un kanna dikell job nai. Doleske kharan le leskro dades un leskri da, 19 un putchan lendar: "Hi kawa tumaro tchawo, kai penenn lestar: Job was koreles boldo? Har well kowa, kai dikell job nai ap jek kopo?" 20 Leskro dad un leskri dai penan: "Mer djinah, kai kawa maro tchawo hi, kai koreles boldo was. 21 Har kowa djas, kai job nai dikell kanna, djinah mer gar. Un koon kras, kai job nai dikella, djinah witar gar. Putchenn lestar! Job hi phuro doha. Job nai penell tumenge halauter." 22 Len his daar kol pralstune biboldendar. Doleske rakran jon jaake. I pralstune bibolde kaman hakenes pale-tchiddo te krell, kai penella o Jesusestar: Job hi o baro rai, kolestar o Dewel penas, te well job. 23 Doleske penan o dad un i dai: "Job hi phuro doha. Putchenn lestar!" 24 Kol pralstune bibolde dan koles, kai korelo his, o duito kopo gole, un penan ap leste: "Pen kanna o tchatchepen glan o Debleste! Mer djinah, kai djal kau Jesus gar ap o Debleskro drom." 25 Koi penas job ap lende: "Djinau gar, te djal job ap o Debleskro drom, witar gar, te djal job gar ap o Debleskro drom. Jek djinau me: Me dikom nai gar. Kanna dikau me nai." 26 "Hoi kras job tuha?" kaman jon pale te djinell. "Har kras job tut sasto, kai dikeh nai?" 27 "Har kowa was, penom me tumenge," penas job, "haiwan tumer man gar? Hoske kamenn tumer kowa pale te shunell? Kamenn tumer, te well job ninna tumaro sikepaskro?" 28 Koi tchingran jon ap leste un penan: "Tiro sikepaskro hi lo. Maro sikepaskro hi o Mose. 29 Mer djinah, kai o Dewel o Moseha rakras. Konestar kawa wella, djinah mer gar." 30 Ko mursh penas ap lende: "Kowa haiwau me gar. Kau mursh kras, kai dikau nai. Un tumer djinenn gar, konestar job wella. 31 Mer halauter djinah, kai o Dewel ap kekeste shunella, kai djal gar ap leskro drom. O Dewel shunell ap koleste, kai darell lestar un djiwell jaake, har job kamella. 32 Jaake raha, har i phub tardo hi, shunas kek, kai i mensho jekes sasto kras, kai korelo boldo was. 33 Te wals kau mursh gar o Deblestar, nai krals job sawo koowa gar." 34 Koi penan jon ap leste: "Tu, kai boldo hal an o tchilatchepen, kameh kanna maro sikepaskro te well?" Un jon witsran les win. 35 O Jesus shunas, kai jon les win witsran. Un har job les hatsas, putchas lo lestar: "Patseh tu ap o Menshengro Tchaweste?" 36 Penas ko mursh: "Miro rai, koon hi kowa, te patsap ap leste?" 37 "Tu dikal les," penas o Jesus ap leste, "job hi kowa, kai rakrell tuha." 38 "Rai, me patsaua!" das job gole, un witsras pes glan leste tele. 39 Un o Jesus penas: "Me wom ap kai phub, te sikrap i menshen, koon i doosh ap peste anas, un koon kek doosh ap peste anas, jaake kai kolla, kai dikenn nai gar, dikenn nai. Un kolla, kai dikenn nai, kolende sikrau me, kai jon tchi dikenna." 40 Kowa shunan i Farisarja, kai his kote pashal tardo. Kolla putchan lestar: "Ham mer ninna korelo?" 41 Koi penas o Jesus ap lende: "Te hans korelo, wals tumen kek doosh. Tumer penenn: Mer dikah. Doleske atchell i doosh ap tumende."

10

1 "Tchatchepaha, me penau tumenge: Koon gar an o wudar dre djala, te well lo pash i bakrende, un well wawartchandes dre, kowa hi i tchorepaskro un i dre-phagepaskro. 2 O bakrengro djal an o wudar dre, te well lo pash lende. 3 Leske krell kowa o wudar pre, kai dell garda glan o wudar. Un leskre bakre shunenn leskro rakepen. Un job dell peskre bakren gole lengre labentsa, un anell len win. 4 Te hi leskre tsele bakre win, djal job glan lende. Un i bakre djan leske palla. Jon prindjrenn leskro rakepen. 5 Jekes, kai prindjrenn jon gar, koleske djan jon gar palla. Jon nashenn penge lestar. Jon prindjrenn gar leskro rakepen." 6 Kal laba penas o Jesus lenge. Jon haiwan gar, hoi job kamas lenge te penell. 7 Doleske penas o Jesus pale ap lende: "Tchatchepaha, me penau tumenge: Me hom o wudar i bakrenge. 8 Lauter kolla, kai wan glan mande, hi tchorepangre un dre-phagepangre. Doleske shunan kol bakre gar ap lende. 9 Me hom ko wudar. Te djal jek an kau wudar dre, kowa djal gar nashedo. Job djal dre un wi, un job hatsell shukar senlepen chapaske. 10 Ko tchorepaskro wella, te tchorell lo kol bakren, te marell lo len, un te chal lo len. Me wom, te dap len o djipen, budeder har doha. 11 Me hom o latcho bakrengro. O latcho bakrengro mukell peskro djipen i bakrenge. 12 Jek, kai lell lowe, te dell lo garda ap i bakrende, hi kek bakrengro. Kol bakre hi gar leskre. Te dikell kowa, kai i diwjo djuklo wella, nashell lo peske, un mukell kol bakren kokres. Un o diwjo djuklo perell pral kol bakrende, un tradell len jaake, kai jon buder gar khetne hi. 13 Ko mursheske hi kowa jek, hoi dran kol bakrende wella. 14 Me hom o latcho bakrengro un prindjrau, koon mire bakre hi. Jon prindjrenn man, 15 jaake har o dad man prindjrella, un me o dades prindjrau. Un me dau miro djipen i bakrenge. 16 Man hi ninna wawar bakre. Kolla hi kate gar khere. Kolen anap halauter kate. Jon shunenn ap miro rakepen, un me anau len khetne i wawarentsa. Un len hi jek bakrengro. 17 Me dau miro djipen, te lap les newes pale. Doleske kamell man miro dad. 18 Kek lell miro djipen mandar. Dran mande well kowa, kai dau miro djipen. Kowa hi an miro wast, te dap miro djipen. Un kowa hi an miro wast, te lap les pale. Jaake krau, hoi miro dad mange penas." 19 Har o Jesus kowa penas, tchingran pen kol bibolde pale pral kol laba. 20 Bud lendar penan: "I beng hi an leste un job hi dinelo. Ma shunenn ap leste!" 21 Wawar penan: "Te wals i beng an leste, nai rakrals job gar jaake. Nai krell i beng jekeske, kai dikell nai gar, i jaka sasto?" 22 His wend. Un i bibolde an o foro Jerusalem kran i baro chapen, te bistrenn le gar ko diwes, har o Debleskro baro kheer newes kerdo was. 23 O Jesus his an o Debleskro baro kheer, un djas an koi isema trujal, hoi kharella Salomoneskri isema. 24 Koi wan i pralstune bibolde trul leste un penan: "Har raha kameh tu menge gar te penell, koon tu hal? Tu te hal ko baro rai, kolestar o Dewel penas, te well job, jaake pen menge kowa an o mui!" 25 Penas o Jesus ap lende: "Koon me hom, penom tumenge. Tumer patsenn man gar. Halauter, hoi me krau an miro dadeskro lab, kowa hunte sikrell tumende, koon me hom. 26 Tumer han gar mire bakre. Doleske patsenn tumer man gar. 27 "Mire bakre shunenn ap miro rakepen. Un me prindjrau len. Un jon djan mange palla. 28 Un me dau len ko djipen, hoi gar pre-herella. Un jon djan gar nashedo. Un kek nai tsardell len dran miro wast win. 29 Miro dad, kai das len mande, hi bareder har halauter. Un kek nai tsardell len dran miro dadeskro wast win. 30 Me un o dad ham jek." 31 Koi hadan kol bibolde pale barra pre, te denn le les kol barentsa mulo. 32 O Jesus penas lenge: "Me krom bud latcho koowa. Miro dad penas mange, te krap kowa. Hoi hi ko latcho koowa, koleske kamenn man mulo te dell?" 33 Penan kol bibolde ap leste: "Ko latcho koowa, hoi tu kral, koleske kamah mer tut gar mulo te dell. Tu anal ladj ap o Debleste. Tu hal i mensho un kreh, har te wals o Dewel. Doleske kamah tut te marell." 34 Penas o Jesus: "An o Debleskro lab, ap koleste tumen rikrenna, kote hi tchindlo: Me, o Dewel penom: Tumer han debla. 35 Kolentsa, kai o Dewel rakras, ap kolende penas job debla. Un kowa, hoi an o Debleskro lab tchindlo hi, nai well gar krik lino. 36 Man hi o dadeskro wast. Un miro dad bitchras man ap kai phub. Me te penaua, kai hom o Debleskro tchawo, har nai penenna tumer ap mande: Tu kreh, har te wess o Dewel? 37 Te krau me gar, hoi o dad mange penas, hunte patsenn tumer man gar. 38 Te krau me, hoi o dad mange penas, patsenn ap kowa, hoi me krau! Jaake dikenn un prindjrenn tumer, kai o dad an mande hi un me an leste." 39 Koi kaman jon les pale te taprell. Job khatras pes lendar. 40 Un job djas pale ap i wawar rig o panjestar Jordan un atchas kote, kai o Johanni i menshen an o pani thowas. 41 Koi wan bud menshe pash leste un penan: "O Johanni kras kekes sasto. Halauter, hoi job pral kau mursheste penas, hi tchatcho." 42 Un kote wan bud patslo ap o Jesuseste.

11

1 Koi his jek nasselo tchiddo. Leskro lab his Lazaro. Job his dran ko gab Betani, kai ninna i Maria un lakri pheen Marta djiwan. 2 I Maria his koi djuwel, kai ko kutch djet ap o Jesuseskre pire tchoras. Un peskre balentsa khossas joi leskre pire. Kolakro phraal his o Lazaro. Kowa his nasselo. 3 Kol dui phenja bitchran menshen pash o Jesuseste, te penenn le leske: "Rai, koles, kai tu kameh, hi nasselo." 4 Har o Jesus kowa shunas, penas lo: "Kau nasslepen was gar ap leste, te merell lo. Job was nasselo, te dikenn tumer, hawi bari soor o Debles hi, un te well o Debleskro tchawo sharedo." 5 O Jesus kamas i Martat un lakri phenjat un o Lazares o djijestar. 6 Har job shunas, kai kowa nasselo his, atchas job dui diwessa koi, kai job his. 7 Pal kowa penas job ap peskre malende: "Awenn, mer djah pale an o them Judea!" 8 Penan leskre mala ap leste: "Sikepaskro, his gar raha, koi kaman tut i bibolde mulo te dell i barentsa. Un pash kolende kameh tu pale te djal?" 9 O Jesus penas: "An o diwes hi deesh-te-dui tsirja. Koon ap o diwes trujal nashella, kowa perell gar. Ap o diwes chatchell o kham. 10 An i rat chatchell o kham gar. Koon an i rat ap o drom hi, kowa perella." 11 Har o Jesus lenge kowa penas, penas lo: "Maro maal Lazaro sowas dre. Me djau koi, te djangrap les pre." 12 - 13 Kal labentsa penas o Jesus, kai o Lazaro meras. Jon haiwan kowa gar. Jon patsan, kai o Jesus penas, kai job sowella. "Rai," penan le ap leste, "te sowell lo, well lo pale sasto." 14 Kanna penas o Jesus lenge an o mui: "O Lazaro meras. 15 Doleske hom bachtelo tumenge, kai me gar koi homs, te patsenn nai tumer ap mande kanna. Awenn, mer djah kanna pash leste!" 16 Penas o Thomas, koles dan le ninna Didimo gole, ap leskre malende: "Awenn, mer djah ninna leha, te meras leha!" 17 Har o Jesus an o gab Betani was, shunas lo, kai o Lazaro star diwessa paskedo his. 18 O gab Betani his gar dur o forestar Jerusalem, nai well triin kilometarja. 19 Un bud bibolde his pash i Marta un pash i Maria, te rakrenn le lentsa, te hi i duk gar jaake baro pral lengro phraleskro merepen. 20 Har i Marta shunas, kai o Jesus wella, djas joi pash leste. I Maria atchas khere. 21 "Rai," penas i Marta ap o Jesuseste, "te wals tu kai, merals miro phraal gar. 22 Me djinau ninna, hoi tu o Deblestar mangeh, dell job tut." 23 Penas o Jesus ap late: "Tiro phraal stella pale i mulendar pre." 24 "Me djinau," penas li, "kai job i mulendar pre stella ap ko palstuno diwes, kai hake mule pre stenna." 25 Penas o Jesus ap late: "Me hom kowa, kai djangraulen pre dran o merepen un dau len djipen. Koon ap mande patsella, djiwella, ninna te merell job. 26 Koon djiwella un patsell ap mande, kowa merell buder gar. Patseh tu kowa?" 27 "Awa, rai," penas li, "me patsau, kai tu hal o Kristo, o Debleskro tchawo, kai was ap kai phub." 28 Un har joi kowa penas, djas joi pash peskri phenjate un penas tchorchanes ap late: "O sikepaskro hi koi un dell tut gole." 29 Har i Maria kowa shunas, stas joi sik pre un was pash leste. 30 O Jesus his gomme glan o gab, kai i Marta les tapras. 31 Kol bibolde, kai pash i Mariate an o kheer his, te rakrenn le latches laha, dikan, har joi sik pre stas un win nashas. Koi djan le lake palla. Jon patsan, joi djal pash o mulengro kheer, te rowell li koi. 32 Har i Maria koi was, kai o Jesus hi, tchiwras pes li glan leste tele un penas: "Rai, te wals tu koi, merals miro phraal gar." 33 Har o Jesus dikas, kai joi rowella un kol bibolde ninna, kai laha wan, djas kowa leske phares an o dji. Un leskro dji rowas. 34 Un job penas ap lende: "Kai hi job tchiddo?" Jon penan ap leste: "Rai, am un dik!" 35 Un o Jesus rowas. 36 "Dikenn," penan i bibolde, "job hunte kamas les o djijestar!" 37 Mashkral lende his menshe, kai penan: "Job kras ko murshes, kai dikas nai gar, sasto. Job nai krals ninna, te merals o Lazaro gar." 38 Kowa djas o Jesuseske pale phares an o dji. Un job was pash ko mulengro kheer, kai o Lazaro paskedo his. Glan ko mulengro kheer his i bar tchiddo. 39 "Lenn ko bar krik!" penas o Jesus. I Marta, koi pheen kolestar, kai meras, penas: "Rai, job khandella. Star diwessa hi lo mulo." 40 Penas o Jesus ap late: "Penom me tuke gar: Te patseh tu, dikeh tu o Debleskri bari soor?" 41 Koi uleran le ko bar ap i rig. Un o Jesus dikas pre, un penas: "Tata, me parkrau man, kai shunal man. 42 Me djinau, kai tu man hako tsiro shuneh. Me penau kawa kol bud menshenge, kai hi kai tardo, te dikenn le un te patsenn le, kai tu man bitchral." 43 Har job kowa penas, das lo soreles gole: "Lazaro, am wi!" 44 Un kowa, kai meras, was wi. Trul leskre herja un wasta his laintikre kotja pandlo. Ninna trul leskro mui his i diklo pandlo. Penas o Jesus ap lende: "Lenn kol kotja lestar lauter tele, un mukenn les te djal!" 45 Bud kol biboldendar, kai pash i Mariate wan, dikan kowa, hoi o Jesus kote kras, un jon patsan ap leste. 46 Mashkral lende his menshe, kai djan pash kol Farisarja, un penan lenge, hoi o Jesus kras. 47 Doleske wan kol bare rashaja un kol Farisarja i pralstune biboldentsa khetne, un penan: "Hoi kras mer? Job krell bud baro un sorelo koowa, hoi kek wawar nai krell. 48 Te mukah les mer jaake dureder te krell, patsell hakeno ap leste. Un kol Remarja wenna un lenn menge o tselo them un i menshen mendar krik." 49 Jek lendar his o Kajafas. Kowa his an ko bersh o baro rashai. Job penas: "Tumer djinenna tchi. 50 Tumer haiwenna gar, kai feteder hi, te merell jek mursh i menshenge, har te djan i tsele menshe nashedo." 51 O Kajafas penas kowa gar dran peste. An ko bersh his lo o baro rashai, un job penas glan-wi, kai o Jesus hunte merell i biboldenge, 52 un gar i biboldenge kokres. Job hunte merella ninna, te anell lo i tsele Debleskre tchawen khetne. 53 Kowa his ko diwes, kai wan le o ersto kopo khetne, te rodenn le i drom, har nai marenn jon les. 54 Doleske mukas pes o Jesus buder gar te dikell pash i biboldende. Job djas an ko foro, kai kharas Efraim. Kowa his pash o mulo them. Koi atchas job peskre malentsa. 55 His i tikno tsiro glan kol bare biboldengre diwessa, kai kharenna Passa. Dran ko tselo them wan i menshe an o foro Jerusalem, te thowenn pen le an o pani glan o Passa, jaake har i biboldengro koowa hi. 56 Jon halauter kaman o Jesuses te dikell, un rodan les. Har jon an o Debleskro baro kheer khetne his, putchas jek o wawarestar: "Hoi peneh tu? Well job ap o festo Passa?" 57 Kol bare rashaja un kol Farisarja penan, te djinell jek, kai job hi, hunte penell job les, te taprenn jon les nai.

12

1 Shob diwessa glan ko festo Passa was o Jesus pale an o foro Betani, kai o Lazaro djiwella. Koles kras o Jesus i mulendar djido. 2 Koi kran le leske i chapen. I Marta anas lenge ko chapen. O Lazaro his jek lendar, kai chas leha. 3 Un i Maria las i tushni, kai bud latcho un kutch djet dren hi, un tchoras kowa pral o Jesuseskre pire. Peskre balentsa khossas joi leskre pire. Un an o tselo kheer his o latcho sungepen o djetestar. 4 Jek leskre malendar, o Judas Iskariot, kowa, kai phukrella ap leste, penas: 5 "Hoske was ko djet gar bikedo un mer lams triin-sheel rupene beme? Un kol lowe nai dams i tchorwelende." 6 Job penas kowa gar, te krell lo i tchorwelenge latcho koowa. Job his i tchorepaskro. Kol tsele lowe, hoi i menshe lende dan, his pash leste. Un job las peske kol lowendar tchomone krik. 7 "Muk lat!" penas o Jesus. "Joi kras kowa, te makell li man dre ko diweske, kai wau paskedo. 8 I tchorwele hi hako tsiro pash tumende. Me hom buder gar raha pash tumende." 9 Bud bibolde shunan, kai o Jesus an o gab Betani hi, un wan koi. Jon wan gar, te dikenn le o Jesuses kokres. O Lazares kaman le ninna te dikell, koles, kai o Jesus i mulendar djides kras. 10 - 11 Jaake djan bud bibolde pash o Lazareste, un patsan ap o Jesuseste. Doleske rodan kol bare rashaja i drom, har nai marenn jon ninna o Lazares. 12 O wawar diwes shunan kol bud menshe, kai ap ko Passawan, kai o Jesus an o foro Jerusalem wella. 13 Koi lan le patria, kai phagan le tele, un djan dran o foro pash leste, un dan gole: "Sharas o Debles! Sharedo well kowa, koles o Dewel bitchras, o baro rai pral Israel!" 14 Un o Jesus hatsas i tarni esla, un beshas pes ap late, jaake har tardo hi an o Debleskro lab: 15 "Tumer menshe an o foro Jerusalem, ma darenn! Tumaro baro rai wella un hi beshdo ap i tarni esla." 16 Ap ko tsiro djinan o Jesuseskre mala gar, kai kowa lestar glan i raha tsiro penlo was. Har o Jesus an o Debleskro railepen djas, haiwan le, kai i menshe kran leha jaake, har pral leste tchindlo his. 17 Kol bud menshe, kai pashal his, har o Jesus o Lazares dran o mulengro kheer gole das, un i mulendar djides kras, penan kowa dureder. 18 Doleske nashan ninna jaake bud menshe pash leste. Jon kaman koles te dikell, kai ko baro Debleskro koowa kras. 19 Un i Farisarja rakran mashkral pende: "Tumer dikenna, kai wah jaake gar dureder. I tsele menshe nashenn leske palla." 20 Mashkral i biboldende, kai wan an o foro Jerusalem, te mangenn le o Debles an ap o festo Passa, his ninna menshe dran o grichtikro them. 21 Kolla wan pash o Filipo, kai dran o gab Betsaida an o them Galilea his. Un penan ap leste: "Rai, mer kamah o Jesuses te dikell." 22 Koi djas o Filipo pash o Andreas un penas leske kowa. Un o Andreas un o Filipo djan pash o Jesuseste un penan les leske. 23 O Jesus penas ap lende: "Ko tsiro hi kanna kai, kai o Dewel sikrell o Menshengro Tchaweskro railepen. 24 Tchatchepaha, me penau tumenge: Te well o djob gar an i phub un merell tele, anell lo nai kek newo djob. Te merell lo tele, anell job bud newo djob. 25 Koon peskro djipen kamella, kowa nashrell les. Koon peskro djipen ap kai phub gar kamella, kowa lell o djipen, hoi gar pre-herella. 26 Koon kamell mange koi te well, kowa hunte djal mantsa. Kote, kai me hom, hi ninna kowa, kai mange koi hi. Kowa, kai mange koi hi, well sharedo miro dadestar. 27 Man hi daar an miro dji. Hoi nai penap me? Tata, le mandar kowa krik, hoi ap mande wella? Na-a, me wom ap kai phub, te lap kowa ap mande, hoi kanna wella. 28 Tata kre, te sharell hakeno tiro lab!" Koi was i rakepen dran o bolepen un penas: "Me krom, kai well job sharedo. Un kowa krau me pale." 29 Bud menshe, kai koi pashal tardo hi un shunan kowa, penan: "O bolepen das gole." Wawar penan: "Kowa his i Debleskro bolepaskro, kai rakras leha." 30 Penas o Jesus: "Ko rakepen was tumenge rakedo, gar mange. 31 Kanna well i phagi pral i tseli phub wi-rakedo. Kanna witsrell o Dewel koles win, kai hi o rai pral kai phub. 32 Te hom pral I phub habedo, tsardau lauteren pash mande." 33 Kowa penas job, te sikrell lo, har job merella. 34 Koi penan i menshe ap leste: "Dran o Debleskro lab shunam, kai ko baro rai, kolestar o Dewel penas, te well job, atchell hako tsiro. Har nai peneh tu, kai o Menshengro Tchawo hunte well ap o trushel dino? Koon hi ko Menshengro Tchawo?" 35 Penas o Jesus ap lende: "Koi momeli hi gar buder raha pash tumende. Djan tumaro drom jaake raha, har koi momeli pash tumende hi, te well gar i rati pral tumende! Koon an i rati djala, djinell gar, kai job djala. 36 Patsenn ap koi momeli, jaake raha har tumen koi momeli hi! Palle wenn tumer menshe, kolen hi i momeli ap pengro drom un djiwenn gar an o tamlepen." Har o Jesus kowa ap lende penas, djas lo peske, un khatras pes lendar. 37 Ninna te kras job bud baro un sorelo koowa glan lende, kai kek mensho nai krella, patsan jon gar ap leste. 38 Jaake was kowa tchatcho, hoi o Jesaja, ko Debleskro rakepaskro, glan i raha tsiro penas: Rai, koon patsell men, hoi mer penah? Koon haiwella o Debleskri bari soor? 39 O Jesaja penas ninna glan-wi, hoske jon nai gar patsenna: 40 O Dewel kras, kai dikenn jon nai gar. Un lengro dji kras job pandlo. Kowa kras job, te dikenn jon nai tchi pengre jakentsa, un te djal tchi dre an lengro dji. Te nai mukenn le gar pengro tchilatcho drom un wenn pash o Debleste, te krell lo len sasto. 41 Glan i raha tsiro dikas o Jesaja o Jesuseskro railepen un rakras lestar. Doleske penas job kowa glan-wi. 42 Ninna bud kol pralstune biboldendar patsan ap leste. Un jon penan tchi i wawarenge, kai jon ninna ap o Jesuseste patsenna. Jon daran i Farisarjendar, te wenn le lendar gar pale-tchiddo kerdo. 43 Lenge his budeder moldo, te wenn jon sharedo i menshendar har o Deblestar. 44 Un o Jesus das soreles gole: "Koon ap mande patsella, kowa patsell gar ap mande kokres. Kowa patsell ninna ap koleste, kai bitchras man. 45 Un koon man dikella, kowa dikell koles, kai bitchras man. 46 Me hom koi bari momeli, hoi was ap kai phub. Hakeno, koon ap mande patsella, atchell gar an i rati. 47 Te shunell jek mire laba un krell gar, hoi me penom, hom gar me, kai rakrau i phagi pral koleste win. Me wom gar ap i phub, te dap i menshen i phagi. Me wom, te lap len dran o tchilatchepen un o merepen win. 48 Koon lell man gar pre, un kamell gar mire laba te shunell, kowa lell peskri phagi. Kol laba, hoi me rakrom, denn les i phagi ap ko diwes, kai o tchatchepen pral i tsele menshende wi-rakedo wella. 49 Kowa, hoi me penom, well gar mandar. O dad, kai bitchras man, penas mange, hoi me penap un rakrap. 50 Me djinau, leskro lab dell tumen o djipen, hoi gar pre-herella. Doleske rakrau me kowa jaake, har miro dad les mange penas."

13

1 His o diwes glan kol bare diwessa, kai kharenna Passa. O Jesus djinas, kai leskro tsiro was, te mukell lo i phub, te djal lo pale pash peskro dadeste. O tselo tsiro kamas lo kolen o djijestar, kai leskre his. Un job mukas gar tele, te kamell lo len. 2 Ap koi rati, har jon chan, das o beng o Judases an o dji, te phukrell lo ap leste. O Judaseskro dad his o Simon Iskariot. 3 O Jesus djinas, kai o Dewel, leskro dad, halauter an leskre wasta tchiwas, un kai job o Deblestar was, un kai job pale pash o Debleste djala. 4 Doleske stas job pre, riwas peskre pralstune ripja wi un pandas peske i damedira trujal. 5 Pal kowa tchoras job o pani an i piri, un thowas peskre malenge i pire. Un job las koi damedira, hoi job trul peste pandas, un khossas lengre pire. 6 Har job pash o Simon Petreste was, penas kowa ap leste: "Rai, thoweh tu mire pire?" 7 Penas o Jesus ap leste: "Hoi me kraua, haiweh tu kanna gar. Pal i tsiro haiweh tu kowa." 8 Penas o Petro ap leste: "An kek tsiro kamau me, te thowess mire pire!" "Te thowau tut gar," penas o Jesus, "hal tu gar miro." 9 "Rai," penas o Simon Petro, "thob mange gar i pire kokres! Thob mange ninna i wasta un o shero!" 10 Penas o Jesus ap leste: "Koon tseles thodo hi, hunte well buder gar thodo. Job hi djudjo. Leskre pire kokres hunte thowell lo. Tumer han djudjo, jek kokres hi gar djudjo." 11 O Jesus djinas, koon ap leste phukrella. Doleske penas job: "Jek kokres hi gar djudjo." 12 Har lengre pire thodo his, las o Jesus peskre pralstune ripja, beshas pes pale tele un penas ap lende: "Djinenn tumer, hoi me tumenge krom? 13 Tumer penenn ap mande: Sikepaskro un Rai. Un kowa hi tchatcho. Me hom kowa. 14 Te thowom me, tumaro rai un sikepaskro, tumare pire, jaake hunte thowenn tumer ninna tumenge i pire, jek o wawareske. 15 Me krom tumenge kowa glan, te krenn tumer kowa ninna, jek o wawareske. 16 Tchatchepaha, me penau tumenge: I budepaskro hi gar bareder har leskro rai. Un jek, kai was bitchedo hi gar bareder har kowa, kai les bitchras. 17 Tumer djinenn kowa kanna halauter. Te krenn tumer kowa, han bachtelo. 18 Kowa penau me gar tumendar halauterendar. Me djinau, kones me win rodom. Kowa hunte well jaake, har an o Debleskro lab tardo hi: Kowa, kai chal kanna o maro mantsa, stakrell pal mande. 19 Me penau tumenge kowa kanna, te patsenn tumer, te wella kowa. Ap ko tsiro djinenn tumer, kai me hom kowa, koon me hom. 20 Tchatchepaha, me penau tumenge: Koon jekes an peskro kheer lella, koles me bitchrom, kowa lell man an peskro kheer. Un koon man an peskro kheer lella, kowa lell koles an peskro kheer, kai bitchras man." 21 Har o Jesus kowa penas, dukas les kowa an o dji, un job penas: "Tchatchepaha, me penau tumenge: Jek tumendar phukrella ap mande." 22 Koi dikan leskre mala darenes jek ap o wawareste. Jon djinan gar, konestar job rakrella. 23 Jek lendar, koles, kai kamas o Jesus o djijestar, his pash leste beshdo. 24 Lestar mangas o Simon Petro te putchell lo o Jesusestar, koon kowa hi, kai phukrella ap leste. 25 Koi tchiwas pes kowa pale ap o Jesuseskro betch un putchas lestar: "Rai, koon mendar hi kowa?" 26 Penas o Jesus: "Me tchiwau i kotar maro an ko tcharo, un koneste me ko maro dau, kawa hi kowa, kai phukrella ap mande." Har job ko maro dran ko tcharo win las, das job kowa o Judases, koleskro dad hi o Simon Iskariot. 27 Har o Judas ko kotar maro las, was o beng an leste. "Hoi kameh te kress, kowa kre sik!" penas o Jesus ap leste. 28 Kek, kai koi pashal beshdo his, djinas, hoske job kowa leske penas. 29 Mashkral lende his kolla, kai haiwan, har te penals o Jesus ap leste, te ginell job tchomone dre, hoi len hunte well ap o festo. Kol wawar haiwan, har te penals o Jesus, te dell job tchomone i tchorwelende. O Judas his kowa, kai hidjas koi possita lengre lowentsa pash peste. 30 Har o Judas ko maro chas, djas lo sik win. His rati. 31 Har o Judas win djas, penas o Jesus: "Kanna well o Menshengro Tchaweskro railepen un leskri soor diklo. Un o Debleskro railepen un leskri soor well diklo ap leste. 32 Te was o Debleskro railepen un leskri soor ap leste diklo, dell o Dewel leste peskro railepen. Un ko tsiro hi kanna kai. 33 Tchowale, me hom gar buder raha pash tumende. Tumer rodenn man, un kowa, hoi me kol biboldenge penom, penau me kanna ninna tumenge: Kai me djau, nai djan tumer gar. 34 Kowa hi newo, hoi me tumenge kanna penau: Te kamell jek o wawares o djijestar, jaake har me kamau tumen o djijestar! 35 Ap kowa dikell hakeno, kai tumer mire mala han, te kamell jek o wawares o djijestar." 36 "Rai, kai djah tu?" putchas o Simon Petro lestar. Penas o Jesus ap leste: "Kote, kai me kanna djaua, nai djah tu gar peha. Pal i tsiro weh tu ninna koi." 37 "Rai, hoske nai wau me kanna gar tuha?" putchas o Petro lestar. "Me meroms tuke ninna." 38 "Tu kameh mange te merell?" putchas o Jesus lestar. "Tchatchepaha, me penau tuke: O bashno dell gar gole jaake raha, har tu man gar triin kope buchoste dal."

14

1 "Tumaro dji hunte trashell gar. Patsenn ap o Debleste un patsenn ap mande! 2 An miro dadeskro kheer hi bud iseme. Te wals kowa gar jaake, penoms me kowa gar. Me djau koi un dikau, te wenn kol iseme tumenge kerdo. 3 Un te krom halauter jaake, te nai tsardenn dre, wau me pale, un lau tumen pash mande, te wenn tumer kote, kai me hom. 4 Tumer djinenn ko drom, kai me djaua." 5 "Rai," penas o Thomas ap leste, "mer djinah gar, kai tu djah. Har nai djinah ko drom?" 6 "Me hom o drom, un o tchatchepen un o djipen," penas o Jesus. "Dell kek wawar drom pash o dadeste, har man. 7 Te prindjrans man, prindjrans ninna miro dades. Un kanna prindjrenn les tumer un dikan les." 8 "Rai," penas o Filipo ap leste, "sike mende o dades! Kowa hi menge doha." 9 "Jaake raha hom pash tumende un tu prindjreh man gar, Filipo?" penas o Jesus. "Koon man dikella, kowa dikell o dades. Har nai peneh tu: Sike mende o dades? 10 Patseh tu gar, kai me an o dadeste hom un o dad an mande hi? Hoi me tumenge penau, kowa well gar mandar. Na-a! O dad, kai an mande hi, krell kowa halauter. 11 Patsenn man, kai me an o dadeste hom, un kai o dad an mande hi. Te patsenn tumer kowa gar, palle patsenn ap kowa, hoi me krau! 12 Tchatchepaha, me penau tumenge: Koon ap mande patsella, krell ninna kowa, hoi me krau. Un job krell bareder koowa har me, kanna, kai djau me pash o dadeste. 13 Un hoi tumer an miro lab mangenna, kowa kamau me te krell tumenge. Kowa, hoi o tchawo krella, sikrell i menshende o Debleskro railepen un leskri soor. 14 Kowa, hoi tumer mangenn an miro lab, kamau me tumenge te krell." 15 "Te kamenn tumer man o djijestar, krenn tumer, hoi me tumenge penom. 16 Un me mangau o dadestar, te bitchrell job tumenge i rakepaskres, kai well ap tumari rig. Job djal buder gar krik tumendar. 17 Kowa hi o Debleskro Ducho, kai penell i menshenge o tchatchepen pral o Debleste. Kolla, kai patsenn gar ap o Debleste, nai lenn les gar. Jon dikenn les gar un prindjrenn les gar. Tumer prindjrenn les. Job atchell pash tumende, un hi an tumende. 18 Me mukau tumen gar kokres, har te well tumen kek dad. Me wau pash tumende. 19 An i tikno tsiro dikenn man i menshe ap kai phub buder gar. Tumer dikenn man. Me djiwau. Doleske djiwenn tumer ninna. 20 Ko diwes wella, kai tumer djinenna, kai me an miro dadeste hom, un tumer an mande han, un me an tumende hom. 21 Koon mire laba shunella un krell, hoi me penau, kowa kamell man tchatchepaha o djijestar. Un koon man kamella, koles kamell miro dad. Un me kamau les ninna o djijestar un me sikrau leste, koon me hom." 22 "Rai, hoske kameh tu mende te sikrell, koon tu hal, un gar i wawar menshende?" putchas lestar o Judas, kowa, kai his gar o Judas Iskariot. 23 Koi penas o Jesus ap leste: "Te kamell man jek o djijestar, kowa krell, hoi me penau. Koles kamell miro dad. Un mer wah pash leste un atchah pash leste. 24 Koon man gar kamella, kowa krell witar gar, hoi me penau. Un hoi me penau, well gar mandar. Kowa well miro dadestar, kai bitchras man. 25 Kau koowa penom me tumenge, jaake raha har me pash tumende homs. 26 Me te hom buder gar pash tumende, bitchrell o dad tumenge o rakepaskres, kai well ap tumari rig. Kowa hi o Debleskro Ducho. Un job penell tumenge halauter jaake, te nai haiwenn kowa mishto. Un job mukell tumenge halauter an o shero te well, hoi me tumenge penom. 27 Ninna te hom me gar pash tumende, atchell koi bacht, hoi me dom tumen, an tumare djia. Me dau tumen miri bacht. Koi bacht nai denn tumen gar i menshe ap kai phub. Ma trashenn! Ma awenn dareno! 28 Tumer shunan, hoi me penom: Me djau mange un wau pale pash tumende. Te kamans man o djijestar, wans tumer bachtelo, kai me pash o dadeste djau. Miro dad hi bareder har me. 29 Me penau tumenge kawa kanna, te patsenn tumer ap ko tsiro, kai kowa wella, kai kowa tchatcho hi, hoi me tumenge penom. 30 Man hi buder gar bud tsiro, te rakrap tumentsa. O beng, kai hi o rai pral kai phub, wella. Les hi kek soor pral mande. 31 Me krau, hoi miro dad mange penas, te dikenn i menshe ap kai phub, kai kamau les o djijestar. Stenn pre, te djas menge!"

15

1 "Me hom ko tchatcho drakengro ruk. Un miro dad hi ko hacho, kai budrella an koi baar, kai i drakengre ruka tardo hi. 2 Hako senelo kasht ap mande, hoi anell kek drake, tchinell job tele. Un ko kasht, hoi anell drake, krell job djudjo, te anell lo budeder drake. 3 Tumer han djudjo. Mire laba, hoi penom tumenge, kran tumen djudjo. 4 Atchenn an mande un me atchau an tumende! Te atchenn tumer gar an mande, well kek latcho koowa dran tumende, jaake har ko kasht nai anell dran peste kek drake. Job hunte atchell ap o ruk. 5 Me hom ko drakengro ruk. Un tumer han kol kashta. Koon atchell an mande un me an leste, dran koleste well bud latchepen. Tumer te han gar mantsa khetne, nai krenn tumer tchi. 6 Koon atchell gar an mande, kowa well win witsedo, har kol kashta, kai tele tchindlo hi. Jon wenn khetne rodedo un an i jag tchiddo, te chatchrenn le. 7 Te atchenn tumer an mande un krenn kowa, hoi me penom, palle nai mangenna mandar, hoi kamenna. Un kowa lenn tumer. 8 Te well bud latchepen dran tumende, well miro dad sharedo. Un tumer wenn mire mala. 9 Har miro dad man o djijestar kamella, jaake kamau me tumen ninna o djijestar. Atchenn an miro kamlepen! 10 Te krenn tumer kowa, hoi me tumenge penom, atchenn tumer an miro kamlepen jaake, har me kowa krau, hoi miro dad mange penas. Un me atchau an leskro kamlepen. 11 Kowa penom me tumenge, te well miri bacht an tumende jaake baro, har djal gar bareder. 12 Kowa kamau tumendar, te kamell jek o wawares o djijestar jaake har me tumen kamau o djijestar. 13 Kekes hi bareder kamlepen har kowa, kai merell peskre malenge. 14 Te krenn tumer, hoi me tumenge penom, han mire mala. 15 Tumer han mange buder gar budepangre. I budepaskro djinell gar, hoi leskro rai krella. Tumenge penom halauter, hoi shunom miro dadestar. Doleske han tumer kanna mire mala. 16 Tumer rodan man gar wi. Me rodom tumen wi, te djiwenn jaake, te well dran tumaro djipen latcho koowa, hoi atchella. Un o dad dell tumen halauter, hoi mangenn lestar an miro lab." 17 "Krenn, hoi me tumenge penau: Kamau, te kamell jek o wawares o djijestar! 18 Te kamenn tumen i menshe ap kai phub gar, ma bistrenn, kai jon kaman man witar gar. 19 Te hans tumer menshe kai phubjatar, palle kamans le tumen. Jon kamenn kolen, kai hi jaake har jon. Tumer han gar kolendar. Me rodom tumen dran lende wi. Doleske kamenn le tumen gar. 20 Rikrenn an tumaro shero, hoi me tumenge penom: I budepaskro hi gar bareder har leskro rai. Lan man jon palla, lenn jon tumen ninna palla. Te shunan jon ap kowa, hoi me lenge penom, shunenn jon ninna, hoi tumer lenge penenna. 21 Tumer han miro. Doleske hi jon tchilatcho ap tumende. Jon prindjrenn koles gar, kai bitchras man. 22 Te woms me gar pash lende, un penoms lenge gar halauter, lans le kek doosh ap pende. Kanna nai penenn jon gar: Mer djinam gar, kai kowa, hoi kram, tchilatcho hi. 23 Koon man gar kamella, kowa kamell witar gar miro dades. 24 Te kroms me gar glan lengre jaka ko baro koowa, hoi nai kek wawar kras, wals len kek doosh. Kanna dikan jon kowa. Un ninna te dikan le les, hi le tchilatcho ap mande un ap miro dadeste. 25 Jaake was kowa tchatcho, hoi an o Debleskro lab tchindlo hi: Jon hi tchilatcho ap mande, ninna te krom kek tchilatchepen ap lende. 26 "Te hom pash o dadeste, palle bitchrau tumenge o rakepaskres, kai wella ap tumari rig. Kowa hi o Debleskro Ducho. An leste hi o tchatchepen. Job wella o dadestar, un penell o tchatchepen pral mande. 27 Ninna tumer, kai hans o tselo tsiro pash mande, penenn i menshenge mandar, hoi tumer dikan un shunan."

16

1 "Kowa halauter penom me ap tumende, te denn tumer gar tumaro patsepen ap mande pre. 2 Jon krenn tumen pale-tchiddo. Un ko tsiro wella, kai denn jon tumen mulo un penenn: O Dewel kamas kowa jaake. 3 Jon prindjrenn o dades gar un man witar gar. Doleske krenn jon kowa. 4 Te well ko tsiro, hunte djinenn tumer, kai kowa jaake wella, har me les tumenge penom. Me penom tumenge kowa gar, har homs pash tumende. Kanna penau tumenge kowa. 5 Kanna djau me pash koleste, kai bitchras man. Un kek tumendar putchell mandar: Kai djah tu? 6 Kowa, hoi tumenge penom, dukell tumen an o dji. 7 Patsenn man: Hi mishto tumenge, te djap mange. Te djau me gar, nai well ko rakepaskro gar pash tumende, kai wella ap tumari rig. Me te djau mange, bitchrau les pash tumende. 8 Job te wella, palle krell job i menshenge i jaka pre pral lengri doosh, pral o Debleskro tchatchepen un pral o Debleskri choli, hoi wella pral kai phub. 9 Lengri doosh hi, kai patsenn le gar ap mande. 10 O Debleskro tchatchepen dikenn le ap kowa, kai me djau pash o dadeste, un tumer dikenn man buder gar. 11 Kai o Debleskri choli pral kai phub wella, dikenn le ap kowa, kai i phagi pral o rajeste pral kai phub wi-rakedo hi. 12 Me kamoms tumenge jaake bud te penell. Tumer haiwenn nai kowa kanna gar. 13 Te well o Debleskro Ducho, kai o tchatchepen an leste hi, sikrell lo tumende o tselo tchatchepen. Job rakrell gar dran peste. Hoi job shunella, kowa rakrell job. Un hoi wella, penell job tumenge glan-wi. 14 Job sharell man. Halauter, hoi job penell tumenge, well mandar. 15 Halauter, hoi o dades hi, hi ninna miro. Doleske nai penau me: Lauter, hoi job penell tumenge, well mandar. 16 Pal i tikno tsiro dikenn man buder gar. Un pale pal i tikno tsiro dikenn man tumer pale." 17 "Hoi penell lo," putchan leskre mala jek o wawarestar, "te penell lo ap mende: Pal i tikno tsiro dikenn man buder gar; un pale pal i tikno tsiro dikenn man tumer pale; un me djau pash o dadeste? 18 Hoi hi kowa, te penell lo: I tikno tsiro? Mer djinah gar, hoi job rakrella." 19 O Jesus haiwas lendar, kai kaman le lestar kowa te putchell, un job penas ap lende: "Kamenn tumer te djinell, hoi kowa hi, kai penom: Pal i tikno tsiro dikenn man buder gar; un pale pal i tikno tsiro dikenn man tumer? 20 Tchatchepaha, me penau tumenge: Well i tsiro, kai tumer rowenna, un denn i wasta pral o shero khetne. Un i menshe, kai gar ap mande patsenna, hi bachtelo. Ninna te rowell tumaro dji ap ko diwes, djinenn: Tumaro ropen well tumendar krik lino, un tumer wenna bachtelo. 21 I djuwel, kai lell i tarnepen, kolat hi duka. Te hi ko tarnepen koi, bistrell li kol duka. Jaake bari hi lakri bacht, kai joi las i tarnepen. 22 Kanna rowell tumaro dji. Un me penau tumenge kanna: Me wau pale pash tumende. Un tumer wenn bachtelo. Un koi bacht nai lell tumendar kek krik. 23 Ap ko diwes, putchenn tumer mandar tchi. Tchatchepaha, me penau tumenge: Te mangenn tumer miro dadestar tchomone an miro lab, kowa dell job tumen. 24 Bis kanna mangan tumer tchi an miro lab. Mangenn un job dell tumen, te well tumari bacht jaake bari, bareder djal gar! 25 Kowa penom me tumenge gar an o mui. O diwes wella, kai me rikrau buder tchi pale. Palle rakrau tumentsa miro dadestar jaake, kai haiwenna halauter. 26 Ap ko diwes mangenn tumer o dades an miro lab. Me penau gar, kai me mangau miro dades tumenge. 27 Miro dad kamell tumen ninna jaake har me kamau tumen. Tumer kamenn man o djijestar un patsenna, kai me o Deblestar wom. Doleske kamell tumen miro dad ninna o djijestar. 28 Me wom o dadestar, un wom ap kai phub. Un me mukau pale kai phub, un djau pash miro dadeste." 29 Koi penan leskre mala ap leste: "Kanna rakreh tu jaake, kai haiwah kowa. Tu rikreh buder tchi pale. 30 Kanna djinah mer, kai tu halauter djineh. Tu djineh glan-wi, hoi i menshe kamenn tutar te putchell. Doleske patsah mer, kai tu o Deblestar weh." 31 "Kanna patsenn tumer?" penas o Jesus. 32 "Dikenn, ko tsiro wella un hi koi, kai nashenn tumer halauter mandar. Hakeno djal pale khere. Un man mukenn tumer kokres. Ninna te mukenn man, hom me gar kokres. O dad hi pash mande. 33 Kowa lauter penom tumenge, te well tumen i bari bacht an o dji pral kowa, kai han mire. Kate ap kai phub hi tumen daar. Ma darenn! Me hom sorleder har halauter ap kai phub."

17

1 Pal kol laba dikas o Jesus pre an o bolepen un penas: "Tata, o tsiro hi kai. Sike, hawo railepen un hawi soor tu tiro tchaweste dal, te sikrell job ninna tiro railepen un tiri soor! 2 Tu dal les i soor pral i tsele menshende, te dell job lauteren, kai tu les dal, o djipen, hoi gar pre-herella. 3 Kowa hi ko djipen, hoi gar pre-herella: Te prindjrenn jon tut, kai tu hal o tchatcho Dewel, un te prindjrenn jon o Jesus Kristes, koles tu bitchral ap kai phub. 4 Me sikrom kol menshen tiro railepen un tiri soor ap i phub. Un me krom halauter, hoi tu mange penal. 5 Un kanna, tata, de man ko railepen un koi soor, hoi his man pash tute, har o bolepen un i phub gar koi his! 6 Tu dal menshen dran kai phub gole un dal len mande. Kolende sikrom, koon tu hal. Jon his tiro un tu dal len mande. Un jon rikran pen ap tiro lab. 7 Jon djinenna kanna, kai halauter, hoi tu man dal, tchatchepaha tutar well. 8 Hoi tu mange penal, penom me lenge dureder. Un jon lan mire laba pre un haiwan, kai me tchatchepaha tutar wom. Un jon patsan, kai tu man bitchral. 9 Kolenge mangau me. Me mangau gar kol wawar menshenge ap kai phub. Me mangau kolenge, kai tu man dal. Jon hi tire. 10 Halauter, hoi miro hi, hi ninna tiro. Un hoi tiro hi, hi ninna miro. Ap lende well miro railepen un miri soor diklo. 11 An i tikno tsiro hom buder gar ap kai phub. Me wau pash tute. Jon hi ap kai phub. Miro dad, tu hal o baro Dewel, rike len an tire wasta, te atchenn jon pash tute, te wenn jon jek, jaake har mer ham! 12 Jaake raha har me pash lende homs, dom garda ap lende an tiri soor, kai tu man dal. Me rikrom len, te djan jon gar krik tutar. Kek lendar djas nashedo. Jek kokres djas nashedo, jaake te was tchatcho, hoi lestar tchindlo was. 13 Kanna wau me pash tute. Kowa rakrau lauter jaake raha, har hom me ap kai phub, te well koi bacht an lengre djia jaake bari, bareder djal gar. 14 Me penom lenge tire laba. Jon hi gar kai phubjatar, jaake har me hom witar gar kai phubjatar. Doleske hi i menshe ap kai phub chojemen ap lende. 15 Me mangau tutar gar, te less len tu dran kai phub win. Me mangau tut, te rikress tu o benges lendar pale. 16 Jon hi gar kai phubjatar, jaake har me hom witar gar kai phubjatar. 17 Muk len tiro tchatchepen te dikell, te djiwenn le pengro tselo djipen tuke kokres! Tiro lab hi o tchatchepen. 18 Me bitchrau len pash i menshende, jaake har tu man pash i menshende bitchral. 19 Me dau tut miro tselo djipen. Kowa krau lenge, te wenn jon ninna tire an o tchatchepen. 20 Me mangau gar lenge kokres. Me mangau ninna kol menshenge, kai shunenna, hoi jon mandar penenna, un dran kowa ap mande patsenna. 21 Me mangau tutar, te wenn le halauter jek, jaake har tu, tata, an mande hal, un me an tute hom. Jaake te wenn jon jek an mende, te patsenn i menshe, kai tu man bitchral. 22 Me dom len ko railepen un koi soor, hoi tu man dal, te wenn jon jek, jaake har mer jek ham. 23 Me djiwau an lende. Un tu djiweh an mande. Jaake te wenn jon jek. Un i menshe dikenna, kai tu man bitchral, un kai tu len jaake kameh, har tu man kameh. 24 Tata, me kamau, te wenn kolla, kai tu man dal, pash mande, kote, kai me hom, te dikenn le miro railepen un miri soor, hoi tu man dal. Tu kamal man o djijestar, har o bolepen un i phub gar koi his. 25 Tata, tu hal an o tchatchepen tardo! I menshe ap kai phub prindjrenn tut gar. Me prindjrau tut. Un kalla haiwan, kai tu man bitchral. 26 Me sikrom lende, koon tu hal. Kowa krau me dureder, te well tiro kamlepen, hoi hi tut mange, ninna an lende. Jaake djiwau me an lende."

18

1 Har o Jesus kowa penas, djas job peskre malentsa wi. Un jon djan wergal ko pani, hoi kharella Kidron. Koi his i baar. Koi dre djas o Jesus peskre malentsa. 2 Kote his lo bud kope peskre malentsa. Doleske prindjras ninna o Judas, ko phukepaskro, koi baar. 3 Un o Judas djas kote. Leha wan kol lurde un kliste, kolen i bare rashaja un i Farisarja bitchran. Len his chare un kashta un hidjan momlia un jag. 4 O Jesus djinas halauter, hoi ap leste wella un djas wi pash lende un putchas lendar: "Kones rodenn tumer?" 5 "O Jesuses dran Nazaret," penan jon ap leste. "Me hom kowa!" penas o Jesus. O Judas, ko phukepaskro, his pash lende tardo. 6 Har o Jesus ap lende penas "Me hom kowa," djan jon i kotar pale un peran ap i phub. 7 Pale putchas o Jesus lendar: "Kones rodenn tumer?" "O Jesuses dran Nazaret," penan jon. 8 "Me penom tumenge, kai me kowa hom," penas o Jesus. "Te hom me kowa, koles tumer rodenna, palle mukenn kol wawaren te djal." 9 Kowa penas o Jesus, te well tchatcho, hoi job glan-wi penas: "Tata, me nashrom kekes kolendar, kai tu man dal." 10 O Simon Petro, koles his i charo pash peste. Job las peskro charo, un das jek klisteske o tchatcho kand tele. Kowa kharas Malcho un his i klisto, kai budras o baro rashajeske. 11 Koi penas o Jesus ap o Petreste: "Tchip tiro charo pale! Djap me gar ko drom, kai miro dad kamell, te djap les, ninna te wenn kote bare duka ap mande?" 12 Un i lurde pengro pralstuneha un i biboldengre kliste tapran o Jesuses un pandan les. 13 Un anan les pash o Hannas. Kowa his o dad o Kajafeskri romjatar. O Kajafas his an kau bersh baro rashai. 14 Job his kowa, kai penas i biboldenge: "Wals feteder menge, te merals jek i tsele menshenge." 15 O Petro un i wawar o Jesuseskre malendar djan o Jesuseske palla, har job an o kheer o baro rashajestar anlo was. O baro rashai prindjras ko wawar males. Doleske djas nai job o Jesuseha an ko kheer. 16 O Petro atchas win glan o wudar tardo. Koi was ko wawar pale, kowa, kai his o baro rashajestar prindjedo, un rakras koi djuwjaha, kai das garda glan o wudar, un las o Petres dre. 17 Koi djuwel, kai das glan o wudar garda, putchas o Petrestar: "Hal tu gar jek kol malendar ko murshestar koi?" "Na-a, me gar!" penas job. 18 Koi his budepangre un kliste tardo, kai kran i jag. Lenge his shila un jon tatsran pen. O Petro his ninna pash lende tardo, te tatsrell lo pes. 19 Kanna putchas o baro rashai o Jesuses win pral leskre malende un pral kowa, hoi job i menshenge penas. 20 O Jesus penas ap leste: "Me rakrom glan i tsele menshende jaake, kai hakeno kowa nai shunas. Hako tsiro rakrom an i biboldengri kangri un an o Debleskro baro kheer, kai i tsele bibolde khetne wan. Me penom tchi tchorchanes. 21 Hoske putcheh tu mandar? Putch kolendar, kai shunan man. Jon djinenna, hoi me penom!" 22 Har job kowa penas, das jek kol biboldengro klistendar, kai koi pashal tardo his, o Jesuses an o mui un penas: "Har nai rakreh tu jaake o baro rashajeha?" 23 Koi penas o Jesus ap leste: "Nai peneh tu, kai me tchilatcho koowa rakrom? Te penom me lauter, hoi tchatcho hi, hoske dal tu man?" 24 O Hannas anas les pandlo pash ko baro rashajeste Kajafas. 25 O Petro his koi tardo un tatsras pes. Koi penan le ap leste: "Hal tu gar jek leskre malendar?" Job das buchoste un penas: "Me hom kowa gar." 26 "Dikom me tut gar an i baar pash leste?" penas jek klisto, kai budrell ko baro rashajeske. Kau klisto his jek koleskre menshendar, koleske o Petro o kand tele das. 27 Pale das o Petro buchoste, un penas: "Me homs gar pash leste." Kanna das o bashno gole. 28 Kanna anan le o Jesuses dran o Kajafeskro kheer wi, un anan les an o baro kheer o themeskro rajestar, kai i Remari his. His taissarlake. I bibolde djan gar leha an ko baro kheer dre, te wenn le gar pale-tchiddo. Jon kaman te nai chan le ko chapen ap ko baro diwes, kai kharella Passa. 29 O themeskro rai, - leskro lab his Pilato - djas pash lende wi un putchas lendar: "Hawo tchilatcho koowa kras job?" 30 Jon penan ap leste: "Te wals kau mursh gar tchilatcho, anams les gar pash tute." 31 "Ake, lenn les un denn les tumer i phagi pal o biboldengro tchatchepen!" penas o Pilato ap lende. "Mer nai marah kekes pal o Remarjengro tchatchepen," penan kol bibolde. 32 Jaake was kowa tchatcho, hoi o Jesus pral peskro merepen glan-wi penas. 33 O Pilato djas pale an peskro kheer, un mukas o Jesuses dre te anell, un putchas lestar: "Hal tu o baro rai pral i biboldende?" 34 "Peneh tu kowa dran tute wi? Penan kowa tuke wawar mandar?" putchas o Jesus. 35 "Hom me i biboldo?" penas o Pilato. "Tire menshe un i bare rashaja dan tut an mire wasta. Hoi kral tu?" 36 Koi penas o Jesus: "Miro them un i menshe, kolengro rai me hom hi gar kai phubjatar. Te wals miro them kai phubjatar, un ninna i menshe, kolengro rai me hom, palle kurans pen mire budepangre i biboldentsa, te perap me gar an kolengre wasta. Me penau tuke: Miro them un mire menshe, kolengro rai me hom, hi gar kai phubjatar." 37 Putchas o Pilato lestar: "Hal tu tchatchepaha i baro rai?" Penas o Jesus: "Awa, hi jaake har tu penal. Me hom i baro rai. Me wom boldo ap kai phub, te penap o tchatchepen. Koon an o tchatchepen tardo hi, kowa shunell ap mande." 38 "Hoi hi o tchatchepen?" putchas o Pilato lestar. Un har job kowa penas, djas lo pale wi pash i biboldende un penas ap lende: "Me hatsau kek doosh ap leste. 39 Shunenn, pash tumende well hako bersh ap kol bare diwessa, kai kharenna Passa, i stildo dran o stilepen muklo. Kamenn tumer, te mukap o baro rajes pral i biboldende te djal?" 40 Jon dan pale gole: "Gar koles! Mer kamah, te mukess o Barabes dran o stilepen win!" Kowa his i marepaskro.

19

1 Koi las o Pilato o Jesuses, un mukas les i tchupnijaha te dell. 2 I lurde pandan subjengre kashta khetne un tchiwan len leske ap o shero jaake, har i baro rai hidjell shereskro sonakai ap peskro shero. Un jon tchiwan leske i loli rajeskri plashka trujal. 3 Un wan glan leste un penan: "Sharedo wess tu, baro rai pral i biboldende!" Un jon dan les an o mui. 4 Un pale djas o Pilato pash i biboldende win, un penas ap lende: "Me anau les pash tumende win, te dikenn tumer, kai hatsau kek doosh ap leste." 5 Un o Jesus was wi. Un ap leskro shero his i pandle subjengre kashta, un koi loli kutch plashka his ap leste. Un o Pilato penas ap lende: "Dikenn, hawo mensho hi lo!" 6 Har kol bare rashaja un kol kliste o Jesuses dikan, dan jon gole: "De les ap o trushel! De les ap o trushel!" "Lenn tumer les," penas o Pilato, "un denn les ap o trushel! Me hatsau kek doosh ap leste." 7 "Pal maro biboldengro tchatchepen hunte well lo mulo dino," penan i bibolde ap o Pilato. "Job penas, kai hi lo o Debleskro tchawo." 8 Har o Pilato kowa shunas, was i bari daar ap leste. 9 Job djas pale an peskro kheer un putchas o Jesusestar: "Kai weh tu?" O Jesus penas tchi koi pre. 10 Koi putchas o Pilato lestar: "Rakreh tu mantsa gar? Djineh tu gar, kai kowa an mire wasta hi, te mukap tut te djal. Un te dap tut ap o trushel, hi ninna an mire wasta?" 11 Penas o Jesus: "Tut wals kek soor pral mande, te dals tut o Dewel koja gar. Doleske hi koles, kai das man an tire wasta, bareder doosh har tut." 12 Koi kamas o Pilato o Jesuses mukell te djal. Kol bibolde dan gole: "Te mukeh tu koles te djal, hal tu kek maal o baro rajestar an o foro Rom! Hakeno, koon krell pes har te well job i baro rai, kowa hadell pes pral leste." 13 Har o Pilato kol laba shunas, anas job o Jesuses wi un beshas pes ap ko tchatchepaskro beshepaskro, hoi kharella Barengri Phub. Ap o biboldengro rakepen kharella kowa Gabbata. 14 His jaake deesh-te-dujenge, jek diwes glan kol bare diwessa, kai kharenna Passa. Un o Pilato penas ap kol biboldende: "Dikenn, kowa hi tumaro baro rai!" 15 Jon dan gole: "Mare les! Mare les, un de les ap o trushel!" Koi putchas o Pilato lendar: "Kamenn tumer te dap tumaro baro rajes ap o trushel?" "Men hi kek wawar rai har o baro rai an o foro Rom kokres," penan kol bare rashaja. 16 Kanna das job o Jesuses an lengre wasta, te denn le les ap o trushel. Un o Jesus was krik anlo. 17 Un job hidjas peskro trushel, un djas dran ko foro win ap ko kotar them, hoi kharella muleskro shero. Kowa kharella ap o biboldengro rakepen Golgata. 18 Kote dan le les ap o trushel, un dui wawar mursha ninna. Ko jekeskro trushel his tchatches lestar, ko wawareskro trushel his serwes lestar. Un o Jesus his mank lende. 19 O Pilato tchinas ap i kotar kasht: O Jesus dran Nazaret, o baro rai pral i biboldende. Ko kotar kasht was pral ap o trushel dino. 20 Kowa, hoi koi pre tchindlo hi, draweran bud bibolde. Ko kotar them, kai dan le o Jesuses ap o trushel, his gar dur o forestar tchiddo. Un kol laba his tchindlo ap hebretikes, lataintikes, un grichtikes. 21 Koi penan kol bare rashaja ap o Pilateste: "Ma tchin: O baro rai pral i biboldende! Tchin, kai job penas: Me hom o baro rai pral i biboldende!" 22 "Kowa atchell jaake, har me kowa tchinom!" penas o Pilato. 23 Kol lurde, kai o Jesuses ap o trushel dan, lan leskre ripja, un kran dran lende star kotja. Un hakeno las i kotar. Ko telstuno ripen his gar khetne sido. Kowa his an jek kotar. 24 Koi penan jon jek ap o wawareste: "Mer mukah ko ripen jaake, har kowa hi. Mer khelah, koon les lella." Jaake was kowa tchatcho, hoi an o Debleskro lab tchindlo hi: Hakeno las i kotar mire ripjendar. Un koon miro telstuno ripen lella, khelan jon win. Jaake kran i lurde. 25 Tel ko trushel, kai o Jesus pre dino his, his leskri dai un kolakri pheen tardo. Ninna i Maria, kolakro rom o Kleopas hi, un i Maria Magdalena his koi tardo. 26 Har o Jesus peskri dat dikas un pash late peskro males, koles, kai job o djijestar kamas, penas lo ap peskri date: "Romnija, dik, kowa hi kanna tiro tchawo!" 27 Ap peskro maleste penas lo: "Dik, koja hi kanna tiri dai!" Koi las ko maal lat pash peste an peskro kheer. 28 Pal kowa, har o Jesus djinas, kai job halauter kras, penas lo: "Man hi trush!" Kowa penas job, te well kowa tchatcho, hoi an o Debleskro lab glan-wi penlo was. 29 Koi his i khoro tardo. Kowa his pherdo shutli mool. Un jon lan tchomone har i kotar thann, kran les pherdo shutli mool, tchiwan kowa ap i baro kasht, hoi kharella Ysop, un rikran leske kowa glan o mui. 30 Har pijas o Jesus koi shutli mool, penas lo: "Me krom lauter, hoi hunte krom." Un job tchiwas peskro shero glan tele, un meras. 31 His o diwes glan o Debleskro diwes. Ko Debleskro diwes his i baro diwes. Doleske kaman i pralstune bibolde gar, te atchenn i mule ap ko Debleskro diwes ap o trushel. Un jon mangan o Pilatestar, te wenn i herja kolendar phagedo, kai ap o trushel dino wan, te merenn le sikeder. I bibolde kaman, te lenn le len sik tele. 32 Koi wan i lurde un phagan i herja kol dui wawarendar, kai kote ap i trushel dino wan. 33 Har jon pash o Jesuseste wan un dikan, kai job mulo hi, phagan jon leskre herja gar. 34 Jek kol lurdendar das les peskro chareha an i rig tchurje. Koi was pani un rat win. 35 Un kowa, kai dikas kowa halauter, penas i wawarenge, hoi job dikas. Un kowa, hoi job penas, hi tchatcho. Un job djinella, kai job o tchatchepen penella, te patsenn tumer ninna. 36 Kowa was halauter jaake, har an o Debleskro lab glan-wi penlo was: Kek kokalo was leske phagedo, 37 un ninna: Jon dikenn koles, kai dan le an i rig tchurje. 38 Pal kowa djas o Josef, kowa, kai dran o foro Arimatia his, pash o Pilateste, un mangas lestar, te dell job les o mulo Jesuses. O Josef patsas ap o Jesuseste tchorchanes i darjatar i pralstune biboldendar. Un o Pilato penas, kai job o Jesuses o trushelestar nai tele lella. Un jaake djas job pash o trushel, un las les tele. 39 Ninna o Nikodemus, kowa, kai was jek kopo an i rat pash o Jesuseste, was kote un anas jaake triin-deesh kilo kutch djet, kerdo dran Myrrhe un dran Aloe. 40 Un jon lan o mulo Jesuses un pandan les an laintikre kotja, kai tchiwan le ko kutch djet dre, hoi sungella mishto, jaake har i bibolde kowa krenna. 41 Kote, kai o Jesus ap o trushel dino was, his i baar. An koi baar his i newo mulengro kheer. Koi his kek mensho dre tchiddo. 42 Un har dikan le, kai ko mulengro kheer gar dur hi, tchiwan le kote o Jesuses dre. Len his kek tsiro. O Debleskro diwes wals sik.

20

1 Sik taissarlake, pal o Debleskro diwes, har gomme rati his, was i Maria Magdalena pash ko mulengro kheer, un dikas, kai ko bar buder gar glan o wudar hi. 2 Koi nashas joi pash o Simon Petreste un pash ko wawareste kol deesh-te-dujendar, koles, kai kamas o Jesus o djijestar, un penas ap lende: "Jon lan o rajes dran ko mulengro kheer win. Un mer djinah gar, kai jon les tchiwan." 3 Koi djas o Petro un ko wawar pash ko mulengro kheer. 4 Kol dui nashan khetne. Ko wawar nashas sikeder har o Petro. Jaake was job glan leste pash o mulengro kheer, 5 dikas koi dre, un dikas kol laintikre kotja kote tchiddo. Job djas gar dre. 6 Pal leste was o Simon Petro un djas an ko mulengro kheer dre, un dikas kol laintikre kotja kote tchiddo. 7 Ko diklo, kai trul o Jesuseskro shero pandlo his, his gar pash kol wawar laintikre kotja tchiddo. Kowa his khetne pandlo, un his kokres tchiddo. 8 Kanna djas ninna ko wawar o Jesuseskre malendar dre, kai glan leste pash ko mulengro kheer was. Un job dikas un patsas. 9 Jon haiwan gar, hoi an o Debleskro lab tardo hi, kai job hunte stella i mulendar pre. 10 Pal kowa djan kol dui pale khere. 11 I Maria his win glan o mulengro kheer tardo un rowas. Har joi jaake rowas, dikas li an o mulengro kheer dre. 12 Kote, kai o Jesus tchiddo his, dikas joi dui bolepangren an parne ripja beshdo. Ko jek his kote, kai leskro shero tchiddo his, un ko wawar, kai leskre herja his. 13 "Hoske roweh tu, romnija?" putchan kol bolepangre i Mariatar. "Jon lan miro rajes krik," penas li, "un me djinau gar, kai jon les tchiwan." 14 Un har joi kowa penas, risras pes li trujal, un dikas o Jesuses. Job his glan late tardo, un joi prindjras les gar. 15 Koi penas o Jesus ap late: "Romnija, hoske roweh tu? Kones rodeh tu?" I Maria patsas: Job hi kowa, kai budrell an i baar. Doleske penas li: "Romeha, te anal tu les krik, pen mange, kai tu les tchiwal, te djap koi, un lap les pale!" 16 "Maria!" penas o Jesus. Koi risras pes li trujal, un penas ap hebretikes: "Rabuni!" Kowa kharella Sikepaskro. 17 Penas o Jesus ap late: "Ma tape ap mande! Me djom gomme gar pash o dadeste pale. Dja pash mire phralende un pen lenge: Me djau pash miro dadeste un pash tumaro dadeste un pash miro Debleste un pash tumaro Debleste." 18 Koi djas i Maria Magdalena pash o Jesuseskre malende, un penas lenge: "Me dikom maro rajes!" Un joi penas lenge, hoi job lake penas. 19 Har rati his ap kau diwes, - kowa his i kurko, - his o Jesuseskre mala khetne. I darjatar kol biboldendar his lengro wudar klidedo. Ap jek kopo was o Jesus dre, un djas mashkral lende, un penas ap lende: "O Debleskri bacht tumentsa!" 20 Har job kowa penas, sikras job lende peskre wasta, un peskri rig. Koi wan o Jesuseskre mala bachtelo, kai dikan le pengro rajes. 21 Pale penas o Jesus ap lende: "O Debleskri bacht tumentsa! Har miro dad man bitchras, jaake bitchrau me tumen." 22 Un har job kowa penas, phurdas job ap lende, un penas: "Lenn o Debleskro Ducho! 23 Ap koneste tumer penenna: Tiri doosh hi krik lino, koleske well li krik lino. Un ap koneste tumer penenna: Tiri doosh atchell ap tute, ap koleste atchell li." 24 O Thomas, jek kol deesh-te-dujendar, koles dan le ninna Didimo gole, his gar koi pashal, har o Jesus pash lende was. 25 Ap leste penan i wawar kol deesh-te-dujendar: "Mer dikam maro rajes!" Job penas ap lende: "Te dikau me gar leskre wasta, kai saster dre dino was, un te tchiwau me gar miro gushto koi dre un miro wast an leskri rig, patsau me kowa gar." 26 Un pal ochta diwessa his o Jesuseskre mala pale khetne an ko kheer. Un o wudar his klidedo. Kau kopo his o Thomas pash lende. Ap jek kopo his o Jesus mashkral lende tardo, un penas: "O Debleskri bacht tumentsa!" 27 Pal kowa penas job ap o Thomas: "Tchip tiro gushto ap mire wasta, un tchip tiro wast an miri rig. Atch gar har jek, kai patsell gar. Pats kanna!" 28 Koi penas o Thomas ap leste: "Miro rai un miro Dewel!" 29 "Kanna, kai dikal man, patseh tu," penas o Jesus. "Bachtele hi kolla, kai patsenna, ninna te dikenn le man gar." 30 Bud wawar baro koowa kras o Jesus an o Debleskri soor glan peskre malende, kai gar an kau liil tchindlo hi. 31 Kawa was tchindlo, te patsenn tumer, kai o Jesus ko baro rai hi, kolestar o Dewel penas, te well job. Job hi o Debleskro tchawo. Un te patsenn ap leste, lenn tumer o tchatcho djipen lestar.

21

1 Pal kowa mukas pes o Jesus glan peskre malende pale te dikell, har jon pash o baro pani Tiberias his. Un kowa was jaake: 2 O Simon Petro un o Thomas, kowa, kai dan le les Didimo gole, un o Natanael dran o gab Kana an o them Galilea, un kol Zebedeskre tchawe un wawar dui o Jesuseskre malendar his koi khetne. 3 Un o Simon Petro penas ap lende: "Me djau te matchrell." "Mer kamah tuha te djal," penan kol wawar. Jon djan wi un djan an o panjeskro ulepaskro dre. Un koi rati tapran le tchi. 4 Sik taissarlake his o Jesus pash o pani tardo, un leskre mala prindjran les gar. 5 Un o Jesus putchas lendar: "Tapran tumer tchi?" "Na-a," penan le. 6 Penas o Jesus: "Witsrenn tumare matchengre gone tchatches win pash o panjeskro ulepaskro! Un tumer taprenna i matche." Koi witsran jon i matchengre gone win, un tapran jaake bud matche, kai tsardan le nai i matchengre gone buder gar dran o pani win. 7 Koi penas ko jek kol deesh-te-dujendar, koles o Jesus o djijestar kamas, ap o Petreste: "Kowa hi maro rai." Har o Simon Petro kowa shunas, riwas lo peskro pralstuno ripen an, hoi riwas lo win, un witsras pes an o pani, te well lo sikeder ap o them. 8 Kol wawar mala wan an ko panjeskro ulepaskro, un tsardan ko matchengro gono pal pende. Jon his gar dur o themestar, nai well sheel metarja. 9 Har jon dran o panjeskro ulepaskro djan, dikan le i jag. Koi his pekle matche pre. Maro his ninna koi. 10 Un o Jesus penas ap lende: "Anenn kol matchendar, kai tumer kanna tapran!" 11 Koi djas o Simon Petro pale an o pani dre, un tsardas ko matchengro gono ap o them. Koi his sheel-te-pantch-deesh-te-triin (153) bare matche dre. Ninna te his jaake bud matche koi dre, djas o matchengro gono gar paash. 12 "Awenn un chan!" penas o Jesus ap lende. Kek lendar putchas lestar: Koon hal tu? Halauter djinan, kai job lengro rai hi. 13 O Jesus was pash lende, las ko maro, un das les lende. Jaake kras job ninna kol matchentsa. 14 Kowa his o triinto kopo, kai mukas pes o Jesus glan peskre malende te dikell pal kowa, har job i mulendar djido was. 15 Pal o chapen penas o Jesus ap o Simon Petreste: "Simon, tu o Johanneskro tchawo, kameh tu man budeder har kal tsele wawar man kamenna?" "Awa, rai!" penas job ap leste. "Tu djineh, kai me kamau tut o djijestar." "De mire tikne bakren te chal!" penas o Jesus. 16 I duito kopo putchas o Jesus lestar: "Simon, tu, o Johanneskro tchawo, kameh tu man o djijestar?" "Awa, rai!" penas job. "Tu djineh, kai me kamau tut o djijestar." "De garda ap mire bakre!" penas o Jesus ap leste. 17 O Jesus putchas lestar o triinto kopo: "Simon, tu, o Johanneskro tchawo, kameh tu man o djijestar?" Koi was o Petreske ropaske pral kowa, kai job triin kope putchas: Kameh tu man o djijestar? Un job penas: "Rai, tu djineh halauter. Tu djineh, kai me tut kamau o djijestar." Penas o Jesus: "De mire bakren te chal! 18 Tchatchepaha, me penau tuke: Har tu tarno hals, pandal tu tiri dori kokres trul tiro ripen, un djal kote, kai tu kamal. Te wal tu phuro, rikreh tu tire wasta glan tute, un i wawar pandell tire wasta khetne, un anell tut kote, kai tu gar kameh te djal." 19 Jaake kamas o Jesus o Petreste te sikrell, har job merella un an peskro merepen o Debles bares un railes krella. Pal kowa penas o Jesus ap leste: "Am mantsa!" 20 O Petro risras pes trujal, un dikas koles kol deesh-te-dujendar, kai o Jesus les o djijestar kamas. Job his kowa, kai tchiwas pes ap o Jesuseskro betch an koi rati, har jon khetne chan, un putchas lestar: "Rai, koon mendar phukrella ap tute?" 21 Har o Petro koles dikas, putchas job o Jesusestar: "Rai, hoi well dran koleste?" 22 Penas o Jesus ap leste: "Te kamau me, te atchell job djido, bis te wau pale, palle hi kowa gar tiro koowa. Am tu mantsa!" 23 Jaake was mashkral kol patslende penlo: Kowa merella gar. O Jesus penas gar, kai kowa gar merella. Job penas: "Te kamau me, te atchell job djido, bis te wau pale, palle hi kowa gar tiro koowa!" 24 Kau maal o Jesusestar hi kowa, kai nai penell, kai kowa lauter tchatcho hi. Job dikas kowa un tchinas les an kau liil. Un mer djinah, kai kowa, hoi job penas, tchatcho hi. 25 Hi ninna bud wawar koowa, hoi o Jesus kras. Te wals kowa lauter an i lila tchindlo, jek pal o wawar, wals i phub gar baro doha kol tsele pesse lilenge, patsau me.