The New Testament of our Lord and Saviour Jesus Christ

Матта 1

1 Магьа Ибрагьимдин наслиан вуйи, Давудрин тухмиан вуйи Месигь Исайин ата-бабйир: 2 Ибрагьимдиз Исакь кІуру бай гъахьну, Исакьдиз Якьуб, Якьубдиз Ягьудана дугъан чвйир гъахьну; 3 Ягьудайиз Тамар кІуру хпирикан Перецна Зерагь гъахьну, Перецдиз Гьецрон, Гьецрондиз Арам гъахьну; 4 Арамдиз Амминадаб, Амминадабдиз Нецрон, Нецрондиз Салман гъахьну; 5 Салмандиз Рагьабдикан Воаз, Воаздиз Рутдикан Обед, Обеддиз Ессе гъахьну; 6 Ессейиз Ягьудия уьлкейин паччагь гъахьи Давуд гъахьну. Давудриз сифте Урияйихь хьади гъаши хпирикан Сулейман гъахьну; 7 Сулеймандиз Ригьаб, Ригьабдиз Абия, Абияйиз Аса гъахьну; 8 Асайиз Юсафат, Юсафатдиз Юрам, Юрамдиз Уззия гъахьну; 9 Уззияйиз Ятам, Ятамдиз Агьаз, Агьаздиз Гьизкия гъахьну; 10 Гьизкияйиз Манассей, Манассейиз Амон, Амондиз Яшия гъахьну; 11 Яшияйиз (жугьдар Вавилондиз адау девриъ) Ехония гъахьну; 12 Ехонияйиз (Вавилондиз адаъхъан) Шалтиэл, Шалтиэлиз Зеруббабел гъахьну; 13 Зеруббабелиз Абиуд, Абиуддиз Элияким, Элиякимдиз Азор гъахьну; 14 Азориз Садок, Садокдиз Агьим, Агьимдиз Элиуд гъахьну; 15 Элиуддиз Элизар, Элизариз Маттан, Маттандиз Якьуб гъахьну; 16 Якьубдиз, Месигь Иса гъапІу Мар’ямдин жилир Юсуф гъахьну. 17 Гьаму саягъниинди, Ибрагьимдилан гъадабгъну Давудриина гъяйиз йицІиюкьуб насил, Давудрилан гъадабгъну Вавилондиз адаайиз йицІиюкьуб насил ва Вавилондиз адаъхъан Исайиина гъяйизра йицІиюкьуб насил шула. 18 Месигь Иса гьамци бабкан гъахьну: Дугъан дада Мар’ям Юсуфдиз хъирснайи. Мар’ямдик швуваз гъягъяйиз Гирами Рюгьналан бицІир кади шулу. 19 Хъасин дугъан жилир гъахьи Юсуфдиз, учв гьялал кас вуди хьпаз лигну, Мар’ямдикан чІуру аваза ипуз даккунди, чан дирчу лишнар жиниди кьяляхъ апІуз ккун шулу. 20 Дугъу гьамциб хиял гъапІиган, нивкІукди дугъахьна Агъайин малайик дуфну, гьамци гъапну: «Давудгъярин бай Юсуф! Мар’ям хпирди гъадагъуз гучІ мапІан, фицики Дугъак кайи БицІир Гирами Рюгьналан ву. 21 Мар’ямди Бай апІиди ва Дугъ’ин Иса кІуру ччвур иливидива, фицики Дугъу Чан халкь гунгьарихьан уьрхиди». 22 Хъа вари гьаму ляхнар Агъайи Пайгъамбрин мелзналан гъапи исихъайи гафар кІулиз удучІвуз тамам духьнайидар ву: 23 «Магьа, шурак БицІир киршди, Бай апІиди ва Дугъ’ин Эммануил, яна „Ухьухъди Аллагь хъа“, кІуру ччвур иливиди». 24 НивкІ’ан хъиргиган, Юсуфди Агъайин малайикди гъаписи апІуру, дугъу Мар’ям хпирди гъадагъуру. 25 Амма Мар’ямди чан сарпи Бай апІайизкьан, Юсуф дугъахь гьучІври гъахьундар; хъа Бай гъашиган, Дугъ’ин Иса кІуру ччвур иливуру.

Матта 2

1 Иса Гьирод паччагьдин девриъ Ягьудия уьлкейиъ айи Вифлеем кІуру шагьриъ бабкан гъахьнийи. Магьа, Ерусалимдиз ригъгьудубчІвру терефнахъан аьяндрар гъюру. 2 Дурари гьерхру: «Ягьудияйин паччагь хьуз пну бабкан гъашир нашди? Дугъкан хабар туврайи хяд ригъгьудубчІвру терефнаъ кабхьну гъябкъюнчуз, ва Дугъаз икрам апІуз гъафунча». 3 Му гафар гъеерхьган, Гьирод паччагьдик ва Ерусалимдин агьалйирик гъалабулугъ кабхъру. 4 Думуган Гьиродди, жугьдарин вари аьхюну маллйир ва къанунчйир уч дапІну, дурарихьан, Месигь наан бабкан духьну ккунир вуйи, – пну, гьерхру. 5 – Ягьудияйин Вифлеем шагьриъ, – жаваб тувру дурари, – фицики Пайгъамбрин Китабдиъ дибикІна: 6 «Увура, Вифлеем, Ягьудия юрднан шагьрарин арайиъ сабдииндира бицІиб дарва, фицики ув’ан удучІвиди Йиз Израилин халкь уьрхру Аьхюр». 7 Думуган Гьиродди, дуфнайи аьяндрариз жиниди дих дапІну, дурарихьан хяд гьудубчІвру вахт гьерхну, дюзди аьгъю апІуру. 8 Ва, дурар Вифлеемдиз рякъюъ тІаъри, гьамци кІуру: «Душну БицІирин гьякьнаан вари уччвуди аьгъю апІинай. Хъа учвуз Думу гъидихъган, узузра хабар дебккай, узхьанна, душну, Дугъаз икрам апІуз шлуганси». 9 Паччагьдихъ хъебехъну, дурар рякъюъ учІвру. Ва магьа завун ригъгьудубчІвру терефнаъ чпиз гъябкъю хяд, тап БицІир айи йишв’ина дубшну дийибгъайизкьан, дурарин улихьди гъябгъюру. 10 Аьяндрар, хяд гъябкъган, кьадар адрубкьан шад гъахьнийи. 11 Ва хулаъ учІвган, дурариз БицІирна Дугъан дада Мар’ям рякъюру ва жил’ина ис духьну, Дугъаз икрам апІуру. Хъасин, чпин пешкешар адагъну, БицІириз тувру: гъизил, ладан кІуру ицци ниъ хъайи ягъ ва смирна кІуру багьалу дармансиб шейъ. 12 Ва Гьироддихьна кьяляхъ махъадаканай кІури нивкІукди дябкъну, аьяндрар жара рякъюъди чпин юрдариз гъягъюру. 13 Дурар гъушхъан, магьа Юсуфдиз нивкІукди малайикди дуфну кІуру: «Гъудужв, БицІирна Дугъан дада увухъди гъадагъну, Египетдиз гьергну гъарах ва узу увуз хабар апІайизкьан душваъ гъуз; фицики Гьироддиз, БицІир пуч апІбан бадали, Думу агуз ккунди а». 14 Юсуфра дишла, гьадму йишван гъудужвну, Исана Мар’ям гъадагъну, Египетдиз гъягъюру 15 ва, Гьирод кечмиш хьайизкьан, душваъ гъузру. Гьамци, Агъайи пайгъамбрин мелзналан: «Египетдиан Узу Йиз Бализ дих гъапІунза», гъапи гафар кІулиз удучІвуз кІури, гъабхьиб вуйи. 16 Ва думуган Гьирод, аьяндрари чаз кучІлар гъапІуб аьгъю дубхьну, хъюлу ацІнийи ва дугъу Вифлеемдиъна дидин аьтрафариъ айикьан кьюд йисазкьан вуйи вари жили веледар пуч апІуз чан эскрар гьаъру. Швнуд йисаъ айидар дийихну ккундуш, Гьиродди аьяндрари гъапибдиан аьгъю гъапІнийи. 17 Гьамци Еремия пайгъамбрин мелзналан дупнайи гьаму гафар кІулиз удучІвнийи: 18 «Рама шагьриъ гъал абхъна ишбан, ишларин зурба фигъан; Рахил ишура чан веледарихъ, дугъаз ккебехъуз ккунди адар, гьаз гъапиш дурар сарун имдар». 19 Хъа Гьирод кечмиш гъашихъан, Египетдиъ айи Юсуфдихьна нивкІукди Аллагьдин малайик гъюру 20 ва гьамци кІуру: «Гъудужв, БицІирна Дугъан дада гъадагъну, дурарра хъади Израилин ругариина гъарах, фицики БицІирин аьжал ккунидар гъийихну». 21 Юсуф гъудужву ва, БицІирна Мар’ям гъадагъну, Израилин ругариина хъадаку. 22 Ягьудияйиъ чан адаш Гьироддин ерина дугъан бай Архелайи паччагьвал апІурайиваликан гъеебхьган, Юсуфдиз дина гъягъюз гучІ гъабхьнийи. Амма хъасин чаз нивкІукди хабар дебккган, думу Галилейин ругариина гъягъюру. 23 Ва душваз дуфну, Назарет кІуру шагьриъ бин ккебгъну. Гьамци: «Месигьдиз Назарей ччвур тувди», – кІуру пайгъамбрарин гафарра кІулиз удучІвнийи.

Матта 3

1 Думу йигъари штуан апІру Ягь’я дуфну, Ягьудияйин чюллериъ аьгъювалар улупуз хъюгъру: 2 «Ичв гунгьар гардандиъ дидисну, уьмур дигиш апІинай, – кІуйи дугъу, – фицики Аллагьдин Паччагьлугъ багахь шула». 3 Гьадму Ягь’яйикан вуйиштІан Ишая пайгъамбри гьамци дупнайиб: «ИчІи чюлиъ дих атІабгура: Агъайиз рякъ ккабалгай. Дугъаз рякъяр-жилгъйир дишдар апІинай!» 4 Ягь’яйиин девейин хьайин палат алийи, юкьвнаан гъидкьин яркьу чІул идибтІнайи. Дугъан ипІру хураг елгнагарна чІурдин йиччв вуйи. 5 Гьадмуган дугъахьна Ерусалимдиан, вари Ягьудияйиан ва Ярдан нирин аьтрафарихъан гизаф халкь гъюйи. 6 Чпин гунгьариин швумал духьну, дурари чпин гунгьар гардандиъ дисуйи, ва Ягь’яйи дурар Ярдан нириъ штуан апІуйи. 7 Хъа чахьна хайлин фарисйирна саддукйир штуан апІуз гъюри дяркъну, Ягь’яйи дурариз кІуру: «БитІракан гъахьидар! Гъюз ккайи Аллагьдин хъюлхьан гьергуз шли улупунчвуз?! 8 Учву, ичв гунгьар гардандиъ дидисну, уьмур дигиш апІуз шлуси, ичв ляхнариинди улупай. 9 Ва: „Ич аба Ибрагьим вуйич“ кІуру гафар учвуз чІяаьн ву пну, миж микиванай, гьаз гъапиш учвуз кІуразаки, Аллагьдихьан гьаму гъванариканра Ибрагьимдиз веледар ктауз шулу. 10 Гьарин кьаблихъ магьа екІв гьязурди хъа: гъяни йимиш туври адру гьарсаб гьар алдабтІиди ва цІигъна гатІабхьиди. 11 Учву гунгьарихьан марцц хьпан лишан вуди, узу учву анжагъ штуан апІураза, амма йиз кьяляхъди Гъюрайир узутІанна Кьудратлур ву, узу Дугъан шаламар гъахузкьан лайикь дарза. Дугъу учву Гирами Рюгьнахьдина цІихьди цІийи алаидичву. 12 Дугъан хилиъ йирф хьибди, Дугъу дяхинна нахъв жара апІиди: дяхин Чан танхариъ абхьди, хъа нахъвар гьаммишан убгру цІигъ гъяхьну ургиди». 13 Гьадму вахтна Ягь’яйихьна штуан апІбан бадали Ярдан нирихъна Галилей уьлкейиан Иса гъюру. 14 Ягь’яйиз сифте му ляхникк кІул ккивуз даккунди гъабхьнийи: «Уву узу штуан апІуб лазим ву, хъа Уву узухьна гъюрава!» 15 Амма Исайи дугъаз жаваб вуди гъапи: «Гъит му ражну гьамци ибшри, фицики Аллагьди улупнайиб ухьу вари кІули гъабхуб лазим ву». Ва гьадмуган Ягь’я Иса штуан апІуз рази гъахьи. 16 Штуан гъапІубси, Иса ниркан кудучІвуру, магьа сабпну Дугъаз завар ачмиш гъаши, Дугъаз луфси ис шулайи Гирами Рюгь Чаина гъюри гъябкъю. 17 Ва зав’ан дих шулу: «Му Йиз масан Бай вуйиз, Узу Дугъ’ин гизаф рази вуза!»

Матта 4

1 Мидин кьяляхъ Гирами Рюгьну, Иса рякъ’ан адауз иблис чалишмиш хьуз кІури, Иса ичІи чюлиз гъухнийи. 2 Душваъ Думу ягъчІвур йигъанна ягъчІвур йишвандин арайиъ уьл дирипІри гъузну, аьхирки Исайиз гаш гъабхьнийи. 3 Думуган иблисди, Дугъахьна дуфну, Дугъаз гьамци кІуру: «Эгер Уву Аллагьдин Бай вуш, гьаму гъванарикан уьлер хьуз гъит». 4 Жаваб вуди Исайи гъапи: «Гирами китабариъ дибикІнаки: „Инсан ялгъуз уьл’инди ваъ, хъа Аллагьдин ушвниан удубчІвурайи гьарсаб гафниинди яшамиш хьиди“». 5 Думуган иблисди Иса гирами вуйи Ерусалим шагьриз хъади гъягъюру, Аллагьдин хулан вартІан ягълишв’ин дерккру 6 ва Дугъаз кІуру: «Эгер Уву Аллагьдин Бай вуш, гьамлин исина урс, фицики дибикІна: „Аллагьди Чан малайикариз Яв гъайгъушнаъ хьуз амур апІиди ва, Яв ликкьан гъвандихъ йивуз гъидритруганси, Уву чпин хилариина гъадагъиди“». 7 Исайи кІуру дугъаз: «Гирами китабарин жара йишваъ гьамцира дибикІна: „Яв Агъа Аллагь ахтармиш мапІан“». 8 Думуган иблисди Иса хъанара саб лап ягъал дагъдиина гъахуру, дилин Дугъаз дюн’яйин вари паччагьлугъар, дурарин ад улупуру 9 ва Дугъаз кІуру: «Эгер Уву, ис алахъну, узуз икрам гъапІиш, гьамрар вари Увуз тувдизавуз». 10 Думуган Исайи кІуру дугъаз: «Фана йибхь Узхьан, иблис! Гирами китабариъ дибикІна: „Яв Агъа Аллагьдиз икрам апІин ва сар ДугъазтІан гъуллугъ мапІан!“» 11 Думуган иблис Исайихьан гьудубчІвну гъябгъюру ва магьа малайикар, дуфну, Исайин гъайгъушнаъ дийигъуру. 12 Хъа Ягь’я дустагъ дапІнайиваликан гъеебхьиган, Иса Галилей уьлкейиз гъягъюру. 13 Думу, Назаретдиан удучІвну, Забулун ва Нафталим кІуру юрдарин аьтрафариъ айи Галилей гьюлин гъирагъдихъ хъайи Кафернагьумдиъ дергру. 14 Мици гьаддиз гъабхьнийики, Ишая пайгъамбрин мелзналан гьамци дупнайиб улубкьну ккундийи: 15 «Ярдан нирин гьюлихъинди терефнаъ айи Забулун юрд ва Нафталим юрд! Галилей уьлке, аллагьсузарин макан! 16 Мушваъ мучІувалиъ айи халкьдиз зурба акувал гъябкъну ва аьжалин сирникк ккайидариз нур удубчІвну!» 17 Думу вахтналанмина Исайи, аьгъювалар улупури, гьамци кІуз хъюгъру: «Ичв гунгьар гардандиъ дидисну, уьмур дигиш апІинай, фицики Аллагьдин Паччагьлугъ багахь дубхьна». 18 Иса Галилей гьюлхъантина гъягъюрайиган, Дугъаз чвйир вуйи кьюр кас гъяркънийи: Петри лакІам хъайи Симон ва дугъан чве Андрей. Дурар балугъчйир вуйи, ва думу вахтна дурари гьюликк чул ккипрайи. 19 «Узухъди гъачай, – кІуру Дугъу дурариз, – Узу учвкан инсанарин юкІвар дисру балугъчйир ктаурза». 20 Дурар гьадмусяаьт, чпин чулар дирчну, Гьадгъахъди гъягъюру. 21 Гьадлин тинаси гъушган, Исайиз хъанара жара кьюр чве рякъюру: Зеведейин бай Якьубна дугъан чве Югьан. Дурари чпин адаш Зеведейихъди люткейиъ чулар рас апІурайи. Исайи дураризра дих гъапІу 22 ва дурарра гьадмусяаьт, люткена чпин адаш гъитну, Исайихъди гъягъюру. 23 Исайи, вари Галилей уьлке вуйибси лицури, жугьдарин мистариъ аьгъювалар улупури, Аллагьдин Паччагьлугъдикан хабар туври, гьарсаб уьзрихьан халкь сагъ апІури гъахьну. 24 Дугъан ад вари Сирия вилаят вуйиси абхънийи, Исайихьна гьар жюрейин уьзрар кайидар хуз хъюгъру: жинар кайидар, гьарза шлудар, паралич кайидар, – ва Дугъу дурар сагъ апІуйи. 25 Галилей уьлкейиан, ЙицІубшагьриан, Ерусалимдиан, Ягьудияйиан ва Ярдандин аьтрафарихъан гъюри, гизаф халкь Дугъан кьяляхъди лицури гъахьну.

Матта 5

1 Уч духьнайи халкь дябкъну, Иса дагъдиина удучІвуру; ва, деъган, Дугъахьна Дугъан ученикар гъюру. 2 Дугъу дурариз гьамци аьгъювалар улупуз хъюгъру: 3 – Бахтаврар ву Аллагьдин улихь касиб вуйидар, фицики Аьршарин Паччагьлугъ гьадраринуб ву. 4 Бахтаврар ву дерд зигрудар, фицики дурар Аллагьди ккарциди. 5 Фурс ктрудар бахтаврар ву, фицики дурариз ирс вуди жил рубкьиди. 6 Агъайин гьякьвалихъ дахаргнайидар бахтаврар ву, фицики Аллагьди дурар тухъ апІиди. 7 Бахтаврар ву рягьимлудар, фицики дурарилан хил алдабгъиди. 8 Бахтаврар ву юкІв марццидар, фицики дурариз Аллагь рякъиди. 9 Ислягьвал гъабхрудар бахтаврар ву, фицики дурариз Аллагьдин веледар пиди. 10 Бахтаврар ву Аллагьдин гаф тамам апІурайиган утІуккурайидар, фицики Аьршарин Паччагьлугъ гьадраринуб ву. 11 Бахтаврар вучва учву, гьаз гъапиш, Йиз ученикар хьпаз лигну, учву беябур апІура, учвухъ хъергра ва учвлан футнийир апІура. 12 Гьаци беябур апІури гъахьну учву хьайиз гъахьи пайгъамбрарра. Рази йихьай ва шадвал ачмиш апІинай, фицики аьршариъ учвуз айи пешкеш зурбаб ву. 13 Учву жилин кьил вучва. Амма кьилан кьилзишин гъудубгиш, думу фти кьилзи апІиди? Думу сарун фтизкІа ярамиш шулдар: думу сарун, инсанарин ликариккан апІруси, гатІабхьиди. 14 Учву дюн’яйин акв вучва. Дагъдиин али шагьур дярябкъди гъубзидар. 15 Ва чирагъ кабхьиган, думу гъабран кІанакк ккидривур, хъа, диди хулаъ вардариз акв тувруганси, чан йишв’ин дивур. 16 Гъит гьаци ичв аквну инсанарин арайиъ акв туври, ичв ужудар ляхнар дурариз рякъруганси ва дурари Аьршарин ичв Адаш адлу апІбан бадали. 17 Хиял мапІанайки, Узу Къанун вая пайгъамбрар батІул апІуз Дуфнайир ву кІури. БатІул апІуз ваъ, хъа дурари кІурайиб кІулиз адабгъуз Дуфнайир вуза. 18 Фицики дюзди кІуразачвуз, гьелелиг заварна жилар имиди, дибикІнайиб вари тамам дархьикьан гагьди, Къанундиан гьич саб гьярфкьан, ясана саб цІаркьан дубгидар. 19 Гьаци вуйиган, му гафарикан фукІа тамам дарапІрур ва гьаци жара адмийирихьдира апІуз гъитрур Аьршарин Паччагьлугъдиъ вартІан бицІир вуди гьисаб апІиди. Хъа шли думу гафар тамам гъапІиш ва жара касарихьра гьаци апІуз гъитиш, думу Аьршарин Паччагьлугъдиъ вартІан зурба кас хьиди. 20 КІуразачвузки, эгер учву Аллагьдин табшуругъар къанунчйирина фарисйиритІан ужуди тамам дарапІди гъашиш, учву Аьршарин Паччагьлугъдиъ учІвидарчва. 21 Учвуз аьгъячвузки, ихь ата-бабйириз фу дупнаш: «Адми йивну миликІан; хъа шли гъакІиш, дугъу суддин улихь жаваб тувди». 22 Хъа Узу учвуз кІуразаки, шли чан багахьлу хъюлакк гъидисиш, думу чан суд апІбакк ккуркьди, ва шли чан гъардшиз «усал кас» гъапиш, думу Заан диванханайиъ чан суд апІбакк ккуркьди, хъа шли жарариз «ахмакь» гъапиш, думу жегьеннемдин цІигъ гъитбакк ккуркьди. 23 Гьаци вуйиган, эгер уву Аллагьдиз яв багъиш Аллагьдин Хулаз хури айиган, яв гъардшиз увкан гиран кайивал кІваин гъабхьиш, 24 гъурбан апІру йишвахь яв багъиш гъибтну, душну, сифте яв гъардшихъди мясляаьтар апІин, хъасин, дуфну, яв багъиш гъурбан апІин. 25 Эгер шлиз увухъди суд апІуз ккунди аш, шлукьан ухди, суддиз рякъюъ имиди, мясляаьтар апІин. Даршиш дугъу уву судьяйихьна, хъа судьяйи гъаравлихьна тувди ва дустагъдиъ итдиву. 26 Гьякьди кІуразавуз: аьхиримжи кепкиина гъяйиз яв вари бурж ктипайизкьан, душв’ан удучІвидарва. 27 Учвуз гъеебхьнийчвузки: «Кьяппавал мапІан», – кІури. 28 Хъа Узу учвуз кІуразаки: фуж жара дишагьлийихьинди тямягьниинди лигураш, дугъу сарун чан кІваъ дугъахъди кьяппавал гъапІну. 29 Эгерки яв арччулну ули уву гунгьихъна гъахураш, думу адабгъ ва гатІабхь тина, фицики бедендин саб гьендемдихьан шуб ужу вувуз, яв вари беден жегьеннемдиъ ипайиз. 30 Ва эгер яв арччул хили уву гунгьихъна гъахураш, хъадабтІ думу ва гатІабхь тина, фицики бедендин саб гьендемдихьан шуб ужу вувуз, яв вари беден жегьеннемдиъ ипайиз. 31 Дупна гьацира: «Эгер фуж чан хпирихьан жара шулаш, дугъу хпирихьна жара хьпан кагъаз туври». 32 Хъа Узу кІуразачвузки: шли, чан хпир, дугъу кьяппавал дарапІди, гьидитиш, дугъу думу хпир кьяппавалихъ хъаъра; ва шли гьидитнайир чаз дитиш, дугъура кьяппавал апІура. 33 Хъана, аьгъячвузки, ичв абйир-бабариз фу дупнаш: «Уву гъапІу ху чІур дарапІди, Агъайин улихь тамам апІин». 34 Хъа Узу кІуразачвузки: затра ху мапІанай: я аьршариинди, гьаз гъапиш аьршар Аллагьдин тахт ву; 35 я жилариинди, гьаз гъапиш жилар Аллагьдин ликарикк йишв ву; я Ерусалимдиинди, гьаз гъапиш думу Кьудратлу Паччагьдин шагьур ву; 36 ясана жвуван кІул’индира ху мапІанай, гьаз гъапиш гьич саб чІаркьан я кІару, я лизи апІуз хьибдарчвухьан. 37 Эгер увуз «ав» пуз ккунди аш, гьаци «ав» йип; «ваъ» пуз ккунди аш, гьаци «ваъ» йип. Хъа митІлан артухъ вуйиб иблисдихьан ву. 38 Учвуз гъеебхьунчвуз, дупна: «Уву шлинкІа ул идипиш, яв улра идипну ккун, ва уву шлинкІа силиб идипиш, яв силибра идипну ккун». 39 Хъа Узу кІуразачвузки: писвализ писвал мапІан. Яв арччул гарцІликкан бачІ ккадатуриз тмунубра ккив. 40 Ва фуж, увухъди суддиз удучІвну, яв кІанккан ккабхьру ккуртт ккидибтуз ккаш, дугъаз яв заълан алабхьру палатра тув. 41 Ва шли уву чахъди саб манзил гъягъюз мажбур апІуруш, дугъахъди кьюб манзилра гъарах. 42 Увкан тІалаб апІурайириз тув, ва увкан буржназ ккун апІурайирихьан маш магьадабгъан. 43 Учвуз гъеебхьунчвуз, дупна: «Багахь хьайир ккун апІин, хъа душман – даккун». 44 Хъа Узу кІуразачвузки: ичв душмнар ккун апІинай, ва ичв кьяляхъ хъахьнайидарихъанди ккарагай. 45 Мид’инди учву Аьршарин ичв Адашдин баяр хьидичва, гьаз гъапиш Дугъу гьам пис касар, гьамсана гъянидар Чан ригъдихъди тямин апІура ва мархьра гьам гьякьлудариина, гьамсана нягьякь вуйидариина гьапІра. 46 Фицики анжагъ учву ккунидартІан ккун апІдарш, учвуз фтин бадали пешкеш хьибди? Налук гъадабгъурайидарира гьаци апІурадаринхъа? 47 Хъа нагагь учву анжагъ ичв гъардшартІан тебрик апІури шулдаш, имбудари апІурайибтІан артухъ учву фу апІурачвахъа? Гьаци апІури шулдаринхъа аллагьсузарира? 48 Гьаци вуйиган, ичв Аьршарин Адашси, тамамлудар йихьай.

Матта 6

1 Лигай-гьа, учву апІру уж’вал варидарин улихь рябкъруганси мапІанай: даршиш Аьршарин ичв Адашдин терефнаан учвуз пешкеш хьибдар. 2 Гьаддиз, гьар фила-вушра учву касибариз уж’вал апІруган, кьюб маш гъяйидари чпин тярифар апІри дупну, мистариъна кючйириъ апІруганси, гьарйир мапІанай. Гьякьди кІуразачвуз, дурарихьна сарун чпин рубкьру пай вари дурубкьна. 3 Уву уж’вал апІруган, яв арччул хили гьапІраш, гагул хилиз аьгъю дарибшри. 4 Яв уж’вал жиниди ибшри. Жиниди апІурайибра рябкъру Яв Адашди думуган увуз пешкеш тувди. 5 Хъа учву ккарагруган, варидариз рякъри кІури, мистариъна кючйириъ ккарагуз ккуни кьюб маш гъяйидарси махьанай. Гьякьди кІуразачвуз, дурарихьна чпин рубкьруб гъурубкьну. 6 Уву ккарагруган, яв хулаъ учІв ва, раккин хъябкьну, душваъ шлизкІа дярякъру яв Адашдиз ккараг. Ва жиниди апІурайибра рябкъру яв Адашди увуз пешкеш тувди. 7 Ккарагруган, аллагьсузариси, артухъ гафар мапІанай. Дурари фикир апІураки, чпи гизаф гафар апІури гъахьиш, дурар ерхьиди. 8 Гьаци дурариз ухшар махьанай, фицики ичв Адашдиз учву ккарагайиз улихьна учвуз фу ккундушра аьгъя. 9 Гьаддиз гьамци ккарагай: «Я аьршариъ айи ич Адаш! Яв ччвур гирами ибшри. 10 Яв Паччагьлугъ улубкьри. Яв гаф аьршариъси жилиинра тамам ибшри. 11 Учуз лазим вуйи уьл гъийиз ча. 12 Учук кайи бурж учуз гьялал апІин, ва учура жарадарик кайи ич буржар дурариз гьялал апІурча. 13 Учу тямягьариъ мааан, писвалихьан уьрх». 14 Эгер учву инсанарилан хил алдабгъиш, Аьршарин ичв Адашдира учвлан хил алдабгъиди. 15 Хъа эгер учву инсанарилан хил алдадабгъиш, думуган ичв Адашдира ичв гунгьарилан хил алдабгъидар. 16 Учву ушв бисруган, кьюб маш гъяйидар фици пашманвалиъ кІул ипну лицураш, гьаци учвура машар пашман дапІну милицанай. Фицики дурари, чпи ушв бисурайиб улупуз кІури, чпин машар язухъ гъюру гьялнаъ дерккра. Гьякьди кІуразачвуз, дурарихьна рубкьруб дурубкьна. 17 Хъа уву кІуруш, ушв бисруган, кушар журх, машар жикІ, 18 уву ушв бисурайиб инсанариз ваъ, хъа дярякъди увухъ хъайи яв Адашдиз аьгъю шлуганси апІин. Гьадмуган жиниди апІурайиб вари рябкъюрайи яв Адашди пешкеш тувдивуз. 19 Жилиин девлет уч мапІанай, мушваъ думу сурарина мюркъю ипІуру ва угърийири, хулаъ учІвну, гьитІибкІуру. 20 Аьршариин девлет уч апІинай, душваъ думу сурарина мюркъю ипІидар ва, угърийири, архьну, гьитІибкІидар, 21 Гьаз гъапиш яв девлет наан аш, яв юкІвра гьадушваъ хьибди. 22 Бедендин чирагъ ул ву. Гьаддиз, эгер яв ул марцциди вуш, яв вари беденра акуди хьибди. 23 Хъа эгер яв улар чІур духьнаш, уву вари мучІушнаъ хьидива. Гьаци вуйиган, эгер увуъ айи акв мучІушин вуш, думуган мучІушин фициб шул! 24 Сарихьанра кьюр агъайиз сабси гъуллугъ апІуз шулдар, фицики дугъаз санур даккун, хъа тмунур ккун хьиди; вая сариз ужуди гъуллугъ апІиди, хъа тмунуриз – чІуруди. Аллагьдизра, девлетназра сатІиди гъуллугъ апІуз хьибдарчвухьан. 25 Гьаци вуйиган, кІуразачвуз: ичв гъян бадали фу ипІуруш, фу убхъуруш, ва ичв жан бадали фу алабхьуруш, гьаддин гъайгъушнаъ махьанай. Фицики уьмур – ипІрубтІан, хъа беден палаттІан заан ву. 26 Завуъ айи жакьвариз лигай: дурари я убзури, я ккадабцІури шулдар, я амбарханйириз тахил уч апІдар. Хъа Аьршарин ичв Адашди дурар тухъ апІура. Хъа учву дурартІан хайлин артухъ дарнучвахъа? 27 Хъа учвкан фуж фукьан хъюгъишра, шилхьан чан уьмур саб сяаьтназкьан ярхи апІуз шул? 28 Палатдин гьякьнаанра гьаз гъайгъу качвузхъа? Чюлиъ айи лизи кюкйир фици аьхю шулаш, лигай: дурари я зегьмет зигурадар, я парча убхурадар. 29 КІуразачвузки, Сулейман паччагьди чан лап ад айи вахтнара дурарихъ гьарсабдихъ хъайисдар палтар алахьури гъахьундар. 30 Хъа гъи ади, закур цІигъ убгурайи чюлин укІ Аллагьди гьаци уччвуди балгурайиган, Дугъу учв’ин дицитІан уччвуди палат алабхьидаринхъа, цІибтІан хътругърудар! 31 Гьаддиз, «учу фу ипІуйкІан», «фу убхъуйкІан» вая «фу алабхьуйкІан» кІури, гъайгъушнаъ махьанай. 32 Гьаз гъапиш гьамрар вари аллагьсузари агрудар ву, хъа учвуз гьамрар вари лазим вуйиб Аьршарин ичв Адашдиз аьгъя. 33 Сифтена-сифте учву Аллагьдин Паччагьлугъдихъ хъергай ва Дугъу кІурайиб вари тамам апІбахъ йихьай. Гьаци гъапІиш, имбуб вари Дугъу тувдичвуз. 34 Гьаци вуйиган, закурин йигъан гъайгъушнаъ махьанай, закурин йигъаз чан гъайгъушнар а. Гьарсаб йигъаз чан гъайгъушнар чІяаьн ву.

Матта 7

1 Жарадарин суд мапІанай, ичвра апІидар, 2 фицики учву жарадарин фициб суд гъапІиш, ичвра гьациб суд апІиди. Жарадарин тахсрар учву фициб уьлчмейиинди ерцураш, ичв тахсрарра гьациб уьлчмейиинди ерциди. 3 Увуз яв улиъ айи хамхар гьидрибгъди, яв гъардшин улиъ айи чІюрх фици рябкъюравуз? 4 Ваяки яв гъардшиз: «Яв улиъ айи чІюрх адабгъуза» – фици пидива, хъа яв улиъ хамхар ади? 5 Эй кьюб маш гъяйир! Сифте яв улиъ айи хамхар адабгъ, ва гьадмуган, яв гъардшин ул’ан чІюрх фици адабгъуруш, рябкъидивуз. 6 ФукІа гирамиб хуйириз миккипан, даршиш дурар, илдицну ув’ин алархьиди. Яв гавагьирар силарин улихьинди магатІахьан, даршиш силари дурар ликариккан апІиди. 7 Ча йипай – тувдичвуз; абгай – бихъидичвуз; раккник кучай – абццдичвуз. 8 Фицики гьарсар ча кІурайириз тувди; абгурайириз бихъиди; кучрайириз абццди. 9 Ичв арайиъ, уьл ча гъапиган, чан бализ гъван туврур айинхъа? 10 Вая балугъ ча гъапиган, битІ туврур айинхъа? 11 Гьаци вуйиган, учву пис адмийир вушра, учвхьан ичв веледариз ужуб тувуз удукьруган, аьршариин али Адашдихьан хъанара ужуди Чахьан ча кІурудариз багъишар тувуз хьибди. 12 Инсанар учвухъди фици духьну учвуз ккундуш, учвура дурарихъди гьаци йихьай. Фицики Къанундин ва Пайгъамбрарин Китабарин мяна гьамдиъ а. 13 Завариз арццнайи ккуру урнарианди учІвай. Фицики яркьу урнарна дабкІнайи рякъ аьжалихьна гъахрудар ву, ва гизафдар гьадлинтина гъягъюра. 14 Гьаз гъапиш ккудудубкІру уьмриз гъахру урнар ккурудар ву, дина гъябгъюрайи жилгъара читинуб ву. Ва цІидаризтІан думу бихъурадар. 15 Кьюб маш гъяйи пайгъамбрихьан ихтият йихьай. Учвухьна дурар марччлин гъидикь алди гъюра, айтІан кІуруш дурар вягьши жанаврар ву. 16 Дурар чпи туврайи бегьерниинди аьгъю хьидичвуз. Зазарилан тІумутІ вая пялкьярилан инжир уч апІуз шулин? 17 Гьарсаб гъяни гьари гъяни йимиш, хъа чІуру гьари чІуру йимиш хуру. 18 Гъяни гьархьан чІуру йимишар, я чІуру гьархьан гъяни йимишар тувуз шулдар. 19 Гъяни бегьер дархру гьарсаб гьар алдабтІну, цІигъ гъипри шулу. 20 Дурар йимишариз лигну аьгъю хьидичвуз. 21 Узуз «я Агъа, я Агъа» кІурур, фуж вушра, Аьршарин Паччагьлугъдиъ учІвидар, хъа зиин али Аьршарин Йиз Адашди гъапиб тамам апІрур учІвди. 22 Узуз думу йигъан гизафдари пиди: «Я Агъа! Я Агъа! Яв ччвурнахъан учу аьяндарвалар улупури гъахьундайин? Яв ччвурниинди учу инсанарикан жинар ктаури гъахьундайин? Яв ччвурнахъди учу гизаф аьламатнан ляхнар гъапІундаринхъа?» 23 Ва думуган дурариз жаваб тувдиза: «Узуз учву саб вахтнара аьгъюдар дарзуз. Узхьан дург йихьай учву, писвал апІурайидар!» 24 Гьамци, Узухъ хъебехъну, Йиз гафар тамам апІру гьарсар кас чан хулар гъвандин шибритІиин диврайи фагьумлу касдиз ухшар ву. 25 Мархьра гъубгъну, селлерра гъафну, микІарра хъивну ва гьамрар вари гьадму хулариина диш гъахьну, амма хулар гъадаргъундар, фицики дурар гъвандиин дивнайидар ву. 26 Хъа Йиз гьаму гафар ерхьури, дурар тамам дарапІрайи гьарсар кас чан хулар гъумриин диву фагьумсуз касдиз ухшар ву. 27 Мархь гъубгъну, селлер гъафну, микІар хъивну, вари гьамрар гьадму хулариина диш гъахьну, ва хулар гъадаргъну, хъа дурарин даргъувалра зурба хъухърумар хъайиб гъабхьну. 28 Исайи, вари гьаму гафар дупну, ккудубкІган, мушвахь хьайикьан халкь Дугъан улупбариин мюгьтал гъахьну, 29 фицики Исайи дурариз, къанунчйириси ваъ, хъа гьюкум хлиъ айириси аьгъювалар улупури гъахьну.

Матта 8

1 Иса дагъдилан улдучІвиган, Дугъан кьяляхъди аьхючІвеъ халкь гъюри гъахьну. 2 Магьа хамран аьзар кайи сари, дуфну, Исайиз икрам дапІну, гъапи: «Я Агъа! Увуз ккун гъабшиш, йиз хам марцц апІуз шулвухьан». 3 Исайи, хил гьачІабккну, дугъак кубкІну: – Ккундузуз, марцц йихь, – кІуру, ва дугъан хам дишлади марцц шулу. 4 Хъа Исайи дугъаз кІуру: – Лиг гьа, мидкан саризра макІан, хъа маллайихьна душну, жвув улуп, халкьдиз уву марцц хьпан шагьидвал вуди, Муса пайгъамбри дупнайиганси, гъурбан апІуз ужуб гъайибх. 5 Иса Кафернагьумдиъ учІвиган, Дугъахьна римлуйирин юзбаши дуфну, гьамци тІалаб апІуру: 6 – Я Агъа! Йиз гъуллугъчи, паралич уьзри хулаъ ахниъ итну, гизаф аьзабнакк кка. 7 Исайи дугъаз кІуру: – Узу дуфну думу сагъ апІидиза. 8 Юзбашийи жаваб вуди гъапи: – Я Агъа! Уву йиз хулаъ учІвбаз узу лайикь дарза, анжагъ Уву саб гаф йип, ва йиз гъуллугъчи сагъ хьиди. 9 Фицики узура жарарин хликк ккайир вуза, ва узуз мютІюгъ вуйи эскрарра азуз. Дурарикан сариз узу «гъарах» кІурза – думу гъягъюру, тмунуриз «гъач» кІурза – гъюру, йиз гъуллугъчийиз «гьамци апІин» кІурза, дугъу тамам апІуру. 10 Му гафар гъеерхьиган, Иса мюгьтал шулу, Дугъу Чан кьяляхъди гъюрайидариз кІуру: – Гьякьди кІуразачвузки, Израилиъра Аллагьдихъ гьамкьан хъугърайи кас гъяркъюндарзуз. 11 КІуразачвузки, гизафдар, ригъгьудубчІвруна алабхъру терефарихъан дуфну, Аьршарин Паччагьлугъдиъ ихь ата-бабйир вуйи Ибрагьимдин, Исакьдин ва Якьубдин гъвалахъ гъюн йивну дахьди. 12 Хъа Паччагьлугъдиз улупнайидар чІатинди мучІушназ утІурккиди: душваъ зурба ишубна суза хьибди. 13 Хъа Исайи юзбашийиз гъапи: – Гъарах, яв хъугънайивалиинди увуз хьибди. Дугъан гъуллугъчи гьадмусяаьт сагъ гъахьнийи. 14 Иса Петрин хулаз гъафиган, Дугъаз цІа алди дахънайи дугъан сижарбаб рякъюру. 15 Иса дугъан хилик куркІу, дугъ’ин али цІа улдубчІву, ва сижарбаб, гъудужвну, Дугъан гъайгъушнаъ учІву. 16 Хябяхъ гъабшиган, Исайихьна жинар кучІвнайи хайлин адмийир хъади гъафнийи. Дугъу Чан гафниинди дурарикан жинар ктаънийи ва вари иццрудар сагъ гъапІнийи. 17 Му ляхнар Ишая пайгъамбрин мелзналан дупнайи: «Дугъу ихь уьзрар Чаина гъадагъну ва ухьу сагъ гъапІну», – кІуру гафар кІулиз удучІвбаз гъашидар вуйи. 18 Чан гъваларихъ гизаф халкь уч духьнади дябкъну, Исайи ученикариз люткейиъди гьюлин тмуну гъирагъдихъна гъягъюз амур гъапІнийи. 19 Гьадмуган сар къанунчийи, дугъан багахьна дуфну, гъапнийи: – Мялим! Уву наана гъушишра, узу Увухъди гъидиза. 20 Исайи дугъаз кІуру: – Сулариз мугъарйир, завун ничхрариз мукьар а, хъа Инсаниятдин Бализ кІул дивну дахъру йишв адар. 21 Ученикарикан сари Исайиз гъапи: – Я Агъа! Узухьди сифте, душну, дукІнайи йиз адаш кивуз гъит. 22 Хъа Исайи дугъаз кІуру: – Узухъди гъач, хъа дийихнайидари чпин гъийихдар киври. 23 Иса люткейиъ эъган, Дугъан кьяляхъди ученикарра эънийи. 24 Саб дупну гьюл’ин гьациб тІурфан гъитІибккнийики, лепйири дурарин лютке ккапІуз саб цІибтІан имдайи. Хъа Иса даахнади гъахьнийи. 25 Думуган ученикари, дуфну, Иса хъиргну, Дугъаз кІуру: – Я Агъа! Ухьуз саб чара апІин, ихь аьжал багахь дубхьна. 26 Исайи дурариз гъапи: – Фицдар гучІбяхяр дарнучва, хътругърудар! Хъасин, гъудужвну, Дугъу микІлазна лепйириз яваш хьуз амур апІуру. Дурар лал шулу. Зурба архаинвал абхъру. 27 Дугъахъди хъайидари, мид’ин мюгьтал духьну, кІуйи: – Му мицир фуж вуйкІан – микІарра, гьюлра Чаз мютІюгъ шлур? 28 Иса гьюлин тмуну гъирагъдихъ хъайи Гадарин кІуру юрдназ гъафиган, Дугъан улихьна накьварин хьарар-дюрхъяриан кьюр жинар кайидар утІурччвуру. Дурар гьадмукьан вягьшидар вуйики, гьадму рякъюъди сарихьанра гъягъюз шули гъабхьундайи. 29 Ва сабпну дурари чІигъар апІуз хъюгъю: – Яв учухъди фу вуяв, Аллагьдин Бай?! Вахт хьайизра учуз жаза тувуз дуфнана? 30 Дурарихьан ярхладиси чІурдиин силарин аьхю лиж дарабгънайи. 31 Ва жинари Исайикан тІалаб апІуру: – Учу утІуккурайихъамина гьатму силариъ учІвузкьан гъит. 32 – Гъарахай, – гъапи Исайи. Дурарра, адмийириан удучІвну, силариъ учІвру. Гьадмусяаьт вари силар гъарзлансина гьюлизди урсру, ва вари штукк ккахьну йихуру. 33 Хъа силарин габнар жаргъну душну, шагьриъ гьаму чпиз гъябкъюбдикан: фици жинар кайидар сагъ гъапІнуш – варибдикан ктибтуру. 34 Гьадмуган шагьрин вари агьалйир Исайин улихьна удучІвуру ва, Думу гъяркъган, чпин юрдариан удучІвну гъарах кІури, миннатар апІуру.

Матта 9

1 Гьаддихъан Иса, люткейиъ эъну, тмуну гъирагъдихъ хъайи Чан шагьриз гъюру. 2 Ва магьа Дугъахьна, паралич дубхьну, сар ахниъ ахънайир хьади гъафи. Исайи, дурарин зурба хъугъвал дябкъну, паралич кайириз гъапи: – ЮкІв ижми апІин, Йиз бай! Яв гунгьарилан хил алдабгъураза. 3 Мушв’ин сакьюдар къанунчйири чиб-чпикди гъапи: «Мугъу Аллагьдиз къаршу гафар кІура». 4 Дурарин фикрар аьгъяди, Исайи гъапи: – Гьаз усал фикрар ичв юкІвариъ тІаърачва? 5 Фу рягьят ву: «Яв гунгьарилан хил алдабгъураза» пуб, вая «гъудужвну лиц» пуб? 6 Инсаниятдин Бализ жилиин гунгьарилан хил алдабгъуз гьюкум айиб учвуз аьгъю хьпан бадали, магьа лигай. Хъа Дугъу паралич кайириз: «Гъудужв кІуразавуз, гъадабгъну яв ахин, яв хулаз гъарах», – кІуру. 7 Ва думу, гъудужвну, чан хулаз гъягъюру. 8 Му гъябкъю халкь мюгьтал гъахьи, ва дурари адмийириз мициб гьюкум туву Аллагьдин тярифар апІуз хъюгъю. 9 Ва гьадлинтина гъягъюрайиган, Исайиз налукар уч апІрушвахь деънайи Матта кІуру сар кас рякъюру ва дугъаз кІуру: – Узухъди гъач. Маттара, гъудужвну, Дугъахъди гъягъюру. 10 Хъасин, Иса Дугъан хулаъ суфрайихъ гутайиз гъюн йивну дахънайиган, хайлин налукар уч апІрударна гунагькрар дуфну, Дугъахъди ва Дугъан ученикарихъди деъру. 11 Му аьгьвалат дябкъну, фарисйири Исайин ученикариз кІуру: – Ичв Мялимди налукар уч апІурайидарихъдина гунагькрарихъди гьаз ипІура? 12 Му гъеебхьган, Исайи гъапи: – Духтир сагъидариз ваъ, хъа аьзарлуйириз лазим ву. 13 Учву сабан «Гъурбан апІуб ваъ, хъа рягьим апІуб ккун апІураза», – кІуру гафарин мяна аннамиш апІинай. Узу марцци касар ваъ, хъа гунагькрар дюз рякъ’ина хуз Дуфнайир вуза. 14 Хъасин, Исайихьна дуфну, Ягь’яйин ученикари гьерхру: – Учуна фарисйири кми-кмиди ушвар дисури шулча, хъа Яв ученикари гьаз ушвар дисурадар? 15 Исайи дурариз кІуру: – Швушв хурайир чпихъди хъимбукьан гагьди, сумчрин хялар гьич пашман даршлуб аьгъданчвузхъа! Хъа дурарихьан швушв хурайир гужназ гъадагъру вахт гъибди, ари гьадмуган дурари ушвар дисиди. 16 Гьич сарира йирси палатдик цІийи цІил ктривур, фицики, цІийиди киву цІил кубчІвган, хъана аьхю урхъ адабхъди. 17 Таза чяхирра йирси иржариъ убзри шулдар. Дици гъапІиш, иржарикан урхъар ктахьиди: чяхирра удубзиди, иржарра пуч хьиди. Хъа таза чяхир цІийи иржариъ убзру аьдат ву, думуган чяхирра, иржарра сагъди гъузди. 18 Исайи гьамци кІурайи вахтна, Дугъахьна магьа сар гьяким дуфну, Дугъаз икрам дапІну, кІуру: – Гьамусяаьт йиз риш йикІру гьялнаъ айиз. Уву дуфну, дугъ’ин Яв хил иливиш, думу чІивиди гъузди. 19 Иса, гъудужвну, дугъахъди гъягъюру. Дурарихъди ученикарра гъягъюру. 20 Му вахтна йицІикьюд йисандин арайиъ ифи хъибтри шлу уьзур кайи сар дишагьлийи, кьялхъянди дуфну, Исайин ккурттдин канчІлик хил кучру. 21 Фицики дугъу чав-чакди гьамци фикир гъапІнийи: «Эгер узу Дугъан палатдик анжагъ хил кубкІиш, узу сагъ хьидиза». 22 Иса кьяляхъ илтІикІуру ва, думу дяркъну, кІуру: – Яв юкІв ижми апІин, Йиз риш! Яв хъугъували уву сагъ гъапІунву. Ва дишагьли сабпну сагъ гъахьнийи. 23 Хъасин Иса гьякимдин хулаз гъушу. Душваъ учІвган, саламдин мукьмар йивурайидар ва ишларин гъугъ ипнайидар дяркъну, Исайи гъапи: 24 – Гьамлин удучІвай; риш дукІнадар, хъа даахна. Дурар Дугъ’ин аьлхъюз хъюгъю. 25 Халкь удучІвган, Дугъу, риш айи хулаъ учІвну, дугъан хил гъибису, ва риш гъудужву. 26 Ва мидкан вари юрд вуйиси аваза гъарабгъу. 27 Иса гьадушв’ан гъягъюрайиган, «Ич язухъ апІина, я Давудгъярин Бай!» – кІури, Дугъан кьяляхъди кьюр кур кас гъюз хъюгъю. 28 Хъа думу хулаъ учІвган, кур вуйидар Дугъан багахьна гъафи. Исайи дурариз кІуру: «Узхьан учву сагъ апІуз шулу пну, хъугъранчва?» Дурари: «Ав, я Агъа!» – гъапи. 29 Гьадмуган Исайи, дурарин уларик хил кучну, гъапи: – Ичв хъугънайивализ гъилигси ибшричвуз. 30 Ва дурариз рябкъюз хъюгъю. Хъа Исайи дурариз ижмишнаан гъадагъа дебккру: – Лигай гьа, мидкан саризра аьгъю дарибшри. 31 Хъа дурари, кІуруш, чІатинди удучІвган, думу вари юрд вуйибси, Дугъан аваза рабгъуру. 32 Уларихь акв гьибшдар удучІвубси, магьа Дугъахьна жинар кучІвнайивалиан чІал дибиснайир хъади гъафи. 33 Жинар ктаубси, чІал дибиснайир улхуз хъюгъю. Ва: «Израилиъ мициб ляхин саб вахтнара гъабхьиб дар!» – кІури, халкь мюгьтал гъахьи. 34 Хъа фарисйири кІуйи: – Исайи жинар дурарин аьхюрихьан вуйи кьувватниинди ктаура. 35 Иса, жугьдарин мистариъ аьгъювалар улупури, Аллагьдин Паччагьлугъдикан Ужувлан хабар рабгъури ва гьар жюрейин уьзрарна иццрушнар кайидар сагъ апІури, шагьрарна гъулар вуйиси лицури гъахьну. 36 Халкьарин дестйир гъяркъган, Исайиз дурарин язухъ шулу, гьаз гъапиш дурар марччлихъан хътру марччарси, улдугну, кюмексузди айи. 37 Гьадмуган Чан ученикариз кІуру: – Иган гизаф а, хъа убгрудар цІиб. 38 Гьаддиз игнин Агъайиз, Чан игниз убгрудар гьаъ, кІури, ккарагай.

Матта 10

1 Мидин кьяляхъ саб ражари, Чан йицІикьюр ученикдиз Чахьна дих дапІну, инсанарикан жинар ктауз ва гьарсаб уьзур ва гьарсаб иццрушин сагъ апІуз кІури, Исайи дурариз жинарин зиин гьюкум тувру. 2 Магьа йицІикьюр ученикдин ччвурар: сарпир Петр кІури шлу Симон ва дугъан чве Андрей, Зеведейин бай Якьубна дугъан чве Югьан, 3 Филип ва Варфоломей, Фома ва налукар уч апІру Матта, Алфейин бай Якьуб ва Фадей, 4 Шимон Кананит ва кьандиси Иса масу туву Искариот лакІам хъайи Ягьуда. 5 Гьаму йицІикьюр кас Исайи, гьамциб насигьят тувну, гьаъру: – Жугьдар дарудар яшамиш шулайи йишвариз мягъянай ва Самарияйин саб шагьриъкьан муучІванай; 6 хъа улдугну чарвйирси айи Израил халкьдихьна гъарахай, 7 ва варишвариъ лицури, аьгъювалар улупури, Аьршарин Паччагьлугъ улубкьура кІури, хабар тувай. 8 Иццурайидар сагъ апІинай, гъийихдар чІиви апІинай, жузам кайидар марцц апІинай, жинар кучІвнайидарикан кадаай; чІанади гъадабгъуб, чІанади тувай. 9 Кьял’ан идибтІру чІулиъ ивну, жвувахьди гъизилин, арсран, ясана йифрин пул, я тавра, я кьюб жар палат, я ликариин алахьрудар, ясана чумакъ рякъюз магъадабгъанай. Фицики лихрур ипІрубдиз лайикьлу ву. 11 Учву фуну шагьриъ вая гъулаъ учІвишра, душваъ лайикьлу вуйи касдихь дергай ва, дилин удучІвну гъягъяйиз, гьадгъан хулаъ гъузай. 12 Хъа хулаъ учІвруган, хулан эйсийиз гьамци салам тувай: «Яв хулаъ мясляаьт ибшрияв». 13 Эгер думу хал лайикьлу вуш, душваъ мясляаьт убчІвди. Эгерки думу хал лайикьлу даршиш, ичв мясляаьт учвухьна кьяляхъ хътабкиди. 14 Хъа эгер шли учву кьабул дарапІиш ва учвухъ хъпебехъиш, дугъан хул’ан вая гьадму шагьриан удучІвурайиган, ичв ликарик кайи биширугра кмиди кадабхьай. 15 Гьякьди кІуразачвуз: гъиямат йигъан, Содомна Гоморра шагьрариз гьадму шагьризтІан ужу хьибди. 16 Магьа Узу учву жанаврарихьна гьаърайи марччарси гьаъраза: битІарси фагьумлудар ва луфарси аьмал кадрудар йихьай. 17 Адмийирихьан ихтият апІинай, фицики дурари учву судариз гъахиди ва чпин мистариъ урччвиди. 18 Ва, учву Йиз ученикар ву кІури, гьякимдрарихьна ва паччгьарихьна гъахиди, дураринна аллагьсузарин улихь Узкан шагьидвал апІбан бадали. 19 Учву гъидисган, учву фу ва фици кІуруш, дидин гъайгъушнаъ махьанай, фицики гьадму арайиъ, учву фу дупну ккундуш, учвуз дишлади ачмиш апІиди, 20 фицики думу учву ваъ, хъа учвуъ айи ичв Адашдин Рюгьну пиди. 21 Чвуччву чве йикІуз масу тувди, хъа адашди – бай. Веледари, абйир-бабариз къаршу удучІвну, дурар йихиди. 22 Йиз ученикар хьпаз лигну, учву варидариз даккун хьиди. Хъа шли аьхиризкьан аьгь гъапІиш, думу дюрхну хьиди. 23 Саб шагьриан учву утІуккруган, жара шагьриз жаргъай. Фицики дюзди кІуразачвуз: учву Израилин вари шагьрар-гъуларилан илдицну ккудубкІайиз, Инсаниятдин Бай гъиди. 24 Ученик чан мялимтІан заан дар, ва гьич сар гъуллугъчира чан агъатІан заан дар. 25 Ученик – чан мялимсир, хъа гъуллугъчи чан агъасир гъахьиш, рази духьну ккун. 26 Гьаци вуйиган, адмийихъан гучІ мапІанай: учв ачухъ даршлу гьич саб гьитІибкІуб адар ва ашкар даршлу гьич саб жиниб адар. 27 Узу учвуз мучІушнаъ кІурайиб аквнахь йипай, ва Узу ичв ибахъ гъапиб гъваълан атІабгну йипай. 28 Беден йибкІрударихьан гучІ мапІанай, фицики дурарихьан рюгь йикІуз шулдар; хъа ичв беденра дубкІну, жегьеннемдиъ ичв рюгьра пуч апІуз Удукьрурихьан гучІ апІинай. 29 Саб кепкихъ кьюб гъуланжакьв масу тувдаринхъа? Ичв Адашдиз даккунди дурарикан гьич сабра жил’ина абхъидар. 30 Ичв кІул’ин али чІарарра кмиди Дугъу гьисаб дапІна. 31 Гьаддиз гучІ мапІанай: гизаф гъуланжакьвартІан учву заан вучва. 32 Гьаддиз Узу адмийирин улихь кьабул гъапІу гьарсар кас Узура Йиз Адашдин улихь кьабул апІидиза. 33 Хъа шли Узу адмийирин улихь кьабул дарапІиш, думу Узура Йиз Адашдин улихь кьабул апІидарза. 34 Учву фикир мапІанайки, Узу жилиина мясляаьт хуз Дуфнайир ву кІури; Узу мясляаьт хьади ваъ, хъа дяви хьади Дуфнайир вуза. 35 Фицики Узу адашдихьан – бай, дадайихьан – риш, сижарихьан – швушв жара апІуз дуфназа. 36 Ичв хизандиъ айидар учвуз вартІан пис душмнар хьиди. 37 УзутІан чан адаш вая дада артухъ ккун гъапІур Узуз лайикьлу вуйир дар; ва УзутІан чан бай вая риш артухъ ккун гъапІур Узуз лайикьлу дар. 38 Хъа фуж, хач чан кьял’ин алди, Йиз кьяляхъди дарфиш, гьадмура Узуз лайикьлу дар. 39 Шли чан уьмур уьбхюз чарйир гъизигиш, дугъан думу дубгди, хъа Узу бадали чан уьмур пуч гъапІуриз ккудудубкІру уьмур хьибди. 40 Учву кьабул апІрури Узу кьабул апІура, хъа Узу кьабул апІрури Узу му дюн’яйиз Гьаур кьабул апІура. 41 Пайгъамбар, думу пайгъамбар хьпаз лигну, кьабул апІруриз пайгъамбризсиб пешкеш хьибди, ва дугъри кас, думу дугърир хьпаз лигну, кьабул апІруриз, дугъри касдиз туврубсиб пешкеш хьибди. 42 Хъа шли, Йиз ученик хьпаз лигну, гьаму бицІисдарикан сарнуриз саб кІифкьан мичІли шид тувиш, гьякьди кІуразачвуз, дугъаз чан пешкеш хьибди.

Матта 11

1 Чан йицІикьюр ученикдиз табшуругъар тувну ккудукІиган, Иса, дилин удучІвну, Галилей уьлкейин шагьрариз аьгъювалар улупуз гъягъюру. 2 Дустагъдиъ айи Ягь’яйи, Месигь Исайин ляхнарикан гъеебхьган, чан ученикарикан кьюр дугъаз гьамци пуз гьау: «Гъюз ккайи Месигь Уву вуна, даршиш жарариз ккилигуча?» 4 Исайи дурариз жаваб туву: – Учвуз рябкъюрайиб ва ебхьурайиб вари, душну, Ягь’яйиз кидибтай: 5 кур вуйидариз рябкъюра, ликудар лицура, хамран уьзур кайидарин хам марцц шула, кар вуйидариз ебхьура, гъачІидар чІиви шула ва касибариз Ужувлан хабар рабгъура. 6 Шли Уз’ина вуйи хъугъвал дубградарш, думу бахтавар ву. 7 Дурар гъушу вахтна Исайи халкьдиз Ягь’яйикан пуз хъюгъну: – Ягь’яйихьна ичІи чюлиз фтиз лигуз гъушнийчва? МикІлу тІубччвурайи чІеъдиз лигуз гъушнинчвахъа? 8 Шлиз лигуз гъушунчва дина? Багьа палтар али касдиз? Багьалу палтар алидар паччгьарин дараматариъ ади шулу. 9 Дици даш, шлиз лигуз гъушунчва учву? Пайгъамбриз лигуз? Ав, кІуразачвуз, пайгъамбартІан аьхюриз лигуз гъушунчва. 10 Гьадму Ягь’яйикан ву гьамци дибикІнайиб: «Магьа, Яв улихьди Узу Йиз кас гьаъраза: дугъу Яв улихь Яв рякъ ккабалгиди». 11 Дюзди кІуразачвуз: жиларин зиин дишагьлийикан гъахьидарик штуан апІру Ягь’ятІан зурба кас гъахьундар, хъа Аьршарин Паччагьлугъдиъ айидарикан варитІан бицІир думутІан зурба ву. 12 Штуан апІру Ягь’яйин вахтарихъанмина гьамусдиз Аьршарин Паччагьлугъ, саспидар дидиъ гужниинди учІвуз чалишмиш шулашра, мюгькамди артмиш шула. 13 Фицики Ягь’я гъяйиз вари пайгъамбрари ва Мусайин къанунди мидкан улихь ккимиди дупна. 14 Учвуз ккундуш, Гирами китабариъ дупнайиси, дуфну ккуни Ил’яс пайгъамбар Ягь’я ву. 15 Ебхьуз ибар кайидариз гъит ебхьри! 16 Хъа гьаму заманайин насил шлихь тевза? 17 Дурар, чиб-чпиз чІигъар апІури, раццариъ гьамци кІури деънайи бицІидариз ухшар ву: «Учу учвуз швутІрамар йивури гъахьунча, хъа учву ялхъвнаркьан гъапІундарчва; учу учвуз ишлар апІури гъахьунча, хъа учву ишузкьан гъишундарчва». 18 Ягь’я гъафну, дугъу ипІурдайи ва убхъурдайи, дурари дугъаз «Дугъаъ жин а» кІуйи. 19 Инсаниятдин Бай гъафну, Дугъу ипІуру ва убхъуру, ва дурари Дугъаз: «Лигай, магьа уьж ва пияниска, налукар гъюдюхрударинна гунагькрарин дуст», кІура. Аькьюллувал ляхнариинди улупну ккун. 20 Хъасин Исайи вартІан гизаф Чав аьламатар улупу шагьрариз тягьнийир йивуз хъюгънийи, гьаз гъапиш дурари чпин гунгьар гардандиъ гъидисундайи. 21 – Гьял пис хьибдияв, Хоразин! Гьял пис хьибдияв, Вифсайда! Учвуз Узу улупу гьяйбатар Тириз ва Сайдайиз гъяркънийиш, дурарин агьалйири ухдитІан, чпихъ яснан палтар хъахьну ва кІул’ин рюкъ алабхьну, тахсрар чпин гардандиъ дисидийи. 22 Амма кІуразачвузки: суддин йигъан учвузтІан Тиризна Сайдайиз рягьятди хьибди! 23 Хъа увура, Кафернагьум, аьршаризкьан за хьибдиза кІурайна? Ваъ, гурбагуриъ абхъдиву, фицики учвухь улупу аьламатнан ляхнар Узу Содомдиъ улупнийиш, думу гьамусра сагъ-саламатди гъубздийи. 24 Гьаддиз кІуразачвузки, гъиямат йигъан учвузтІан Содомдин агьалйириз рягьятди хьибди. 25 Хъасин Исайи гъапи: «Адаш, заваринна жиларин Агъа! Аьяндрарихьанна аькьюллударихьан гьитІибкІнайиб бицІи касариз ачухъ апІбаз Увуз чухсагъул! 26 Ав, Адаш, Увуз думу Яв ужувлан ният гьаци дубхьну ккундувуз. 27 Йиз Адашди Узуз вари тувну. Адашдилан гъайри, Бай фуж вуш, саризра аьгъдар, ва БализтІан гъайри, Адаш саризра аьгъдар. Хъа Бали шлиз ачмиш гъапІиш, гьадгъаз Адаш аьгъю хьиди. 28 Эргну хъадахънайидар вари Узухьна гъачай, ва Узу учвуз рягьятвал тувдиза. 29 Узу гъюдлир ва фурс ктрур вуза. Йиз табшуругъарин юрккагъ учв’ин иливай ва Узхъан вари дубгъай – архаинвал хьибдичвуз. 30 Гьаз гъапиш Узу учвухьна тувру юрккагъ – уж’вал ву, ва Узу учв’ин иливру гъагъра пучІуб ву».

Матта 12

1 Саб султ йигъан Иса дяхин дубзнайи хутІлиантина гъягъюру. Гаш дубхьнайи Дугъан ученикари, дяхнин кІулар улдутІну, китІишну, итІуз хъюгъру. 2 Му гъябкъю фарисйири Исайиз гъапи: – Магьа Яв ученикари султ йигъан Къанунди гъадагъа дапІнайи ляхин апІура. 3 Хъа Исайи дурариз кІуру: – Чазна чахъди хъайидариз гаш гъабхьи вахтна Давудри гьапІнуш, Гирами китабариан гъурхундарнучва? 4 Фици думу Аллагьдин хулаъ учІвнуш ва дугъуна дугъахъди хъайидари я чаз, я чан юлдшариз итІуз гъадагъа вуйи, хъа анжагъ маллйиризтІан итІуз ихтияр адру Аллагьдиз бахш дапІнайи уьлер фици гъитІнуш, гъурхундарнучва? 5 Ясана учву, Аллагьдин хулаъ маллйири султ йигъандин къайда чІур апІурашра, дурар тахсиркрар гьисаб дарапІбакан Къанундиъ гъурхундарнучва? 6 КІуразачвузки: мушвахь Аллагьдин халтІанра зиина Вуйир хьа. 7 Эгер учвуз: «Гъурбан апІуб ваъ, хъа рягьим апІуб ккундузуз», кІуру гафарин мяна аьгъяйиш, учву тахсир ктрудар тахсиркар ву, пидайчва, 8 фицики Инсаниятдин Бай султ йигъ’инра Агъа ву. 9 Хъасин Думу жугьдарин мистаз гъягъюру. 10 Душваъ хил деебццнайи сар кас айи. Исайик саб тахсир кипбан бадали, маллйири Дугъхьан гьерхру: – Мусайин Къанундиинди султ йигъан иццурайир сагъ апІуз хай шулин? 11 Исайи дурариз гьамци жаваб туву: – Учвкан сарира султ йигъан ичІаъ абхъу чан чарва ададабгъди гъибтрин? 12 Хъа чарватІан инсан гизаф багьа даринхъа? Гьаци вуйиган, султ йигъанра уж’вал апІуз хай шулу. 13 Хъасин Исайи хил деебццнайириз кІуру: – Яв хил гьачІабкк. Дугъу хил гьачІабккуру, ва гьадмусяаьт думу гьатмуну хилси сагъ шулу. 14 Душв’ан фарисйири, чІатинди удучІвну, Иса фици пуч апІуруш, йикьрар йитІуру. 15 Хъа Исайиз мидкан аьгъю шулу ва дишла удучІвну гъягъюру. Дугъан кьяляхъди гизафдар гъягъюру, ва Дугъу иццурайидар вари сагъ апІуру. 16 Ва Чакан шлизкІа жарадариз пуб гъадагъа апІуру. 17 Му вари мици, Аллагьди Ишая пайгъамбрин мелзналан гьамци гъапиб кІулиз удубчІвбан бадали гъабхьнийи: 18 «Магьа Узу кадагънайи Йиз Гъуллугъчи. Узуз Ккунир. Дугъ’ин Йиз юкІв рази ву. Дугъахьна Йиз Рюгьра гьаъраза. Ва Дугъу вари жугьуд дару халкьариз, гьякьвалин вахт улубкьна кІури, хабар тувди. 19 Думу я гьюжатназ удучІврур дар, я чІигъар апІрур дар, ва кючйириъ саризра Дугъан сес ебхьидар. 20 Дугъу, улубкьну ккуни гьякьвал гъалибвалихьна дархидикьан гагьди, дюбгъну кебхнайи чІеъ ктубтІидар ва хъудубгурайи гъахма ктІубшвидар. 21 Ва вари миллетари Дугъахъ йирфар хъирчну хьибди». 22 Дидин кьяляхъ Исайихьна, жинар кади, дярябкъру ва чІал дибиснайи сар кас хуру, Дугъу думу кас сагъ апІуру, гьаци думу чІалниинара гъюру ва дугъан улариз рябкъюзра хъюгъру. 23 Му ляхниин вари халкь аьжайиб шулу ва дурари гьамци кІуру: «Гьаяман гьаму Давудгъярин Бай вушул гьа?» 24 Хъа мидкан деебхьну, фарисйири кІуру: – Дугъу жинар жараси ваъ, хъа жинарин аьхюр вуйи Велзевулин кьувватниинди ктаура. 25 Амма Исайи, дурарин фикрар аьгъяди, гьамци гъапи: – Чан айитІ душманвал ади, пай гъабши гьарсаб паччагьлугъ ичІи шул, арайиъ душманвал айи я саб шагьур, я саб хизан гъудрубзур. 26 Эгер шейтІни шейтІан ктаураш, думу чав чаз къаршу дубхьна: дидин паччагьлугъ фици сагъди гъубздихъа? 27 Ва эгер Узу жинар Велзевулин кьувватну ктаураш, ичв адмийири дурар шлин кюмекниинди ктаура? Магьа гьамди учву гьякь дарувал улупура. 28 Дугъриданна, Узу жинар Гирами Рюгьниинди ктаураш, ичв арайиз Аллагьдин Паччагьлугъвал магьа хъубкьна. 29 Гьаци дарш сарихьанра, гуж кайирин хулаз дуфну, душв тІараш апІуз хьибдар – эгер эйси йитІну адарш; гъийитІган, хал тІараш апІуз шул. 30 Фуж Узухъди дарш, думу Узуз къаршу ву ва шли Узухъди уч апІурадаш, дугъу зяя апІура. 31 Гьаддиз кІуразачвуз: адмийирин гьарсаб гунгьилан ва Аллагьдиз къаршу гафналан хил алдабгъиди, хъа Гирами Рюгьназ къаршу гафналан хил алдабгъидар. 32 Эгер шли Инсаниятдин Бализ къаршуди чІуру гаф гъапиш, дугълан хил алдабгъиди, хъа шли Гирами Рюгьназ гъапиш, дугълан я гьамус, ясана гъюз имбу уьмриъ хил алдабгъидар. 33 Учву гьарра ва дидин йимишра гъяниб ву йипай, ясана гьарра ва дидин йимишра чІуруб ву йипай; гьар йимишдиз лигну аьгъю шулу. 34 Эй битІракан гъахьидар! Учвхьан, пис юкІвар ади, ужуб гаф пуз фици хьибдичвухьан?! Фицики инсандин мелз, чан юкІв фти абцІнаш, гьаддикан улхури шулу. 35 Ужур касди чан хазнайиан ужуб, хъа чІуру касди чан хазнайиан чІуруб адабгъуру. 36 КІуразачвузки, инсанари чпин гьарсаб гьавайи гафнан жаваб гъиямат йигъан тувди. 37 Фицики, яв гафариз дилигну, уву гьякь вая нягьякь апІиди. 38 Гьадмуган къанунчйириканна фарисйирикан бязидари Исайиз кІуру: – Мялим! Учуз уву АллагьдихьантІан даршлу саб аьламат улупну ккундучуз. 39 Хъа Исайи дурариз жаваб вуди гъапи: – Хътругъру ва аьрбатан гьамусдин адмийири аьламатнан лишнар улупуб ккун апІура, хъа дурариз, Юнус пайгъамбрин кІул’ина гъафи аьламатналан гъайри, жара аьламат рябкъидар. 40 Юнус пайгъамбар фици шубуд йигъанна шубуд йишван зурба балугъин фуниъ ади гъахьнуш, гьаци Инсаниятдин Байра шубуд йигъанна шубуд йишван жилин айитІ хьиди. 41 Гъиямат йигъан суд апІру вахтна Ниневия шагьрин агьалйир гьамусдин адмийирин гунгьарин шагьидарди гъудужвиди, фицики дурари Юнусди улупу аьгъюваларихъ хъебехъну, гунгьар гардандиъ гъидисну; хъа мушвахь ЮнустІанна зурба Вуйир хьа. 42 Гъиямат йигъан суд апІру вахтна кьиблайин паччагь-ханумди, гьамусдин адмийириз къаршу гъудужвну, дурар тахсиркар апІиди, фицики думу дюн’яйин тму кІулиан Сулеймандин фагьумлувалихъ хъпехъуз гъафнийи; хъа магьа мушвахь СулеймантІан зурба Вуйир хьа. 43 Чиркин рюгь, инсандиан удубчІвиган, шид адрушвариъ либцури, чаз архаинвал абгури шулу, дибрихъиган, 44 кІуру: «Узу утІубкку йиз хулаз хътабкидиза». Хътабкубдиз хал ичІиди, ичІибкнади ва марцц дапІнади рябкъюру. 45 Гьадмуган диди, дубшну, хъана ургубсан жин чахъди хуру, дурар дугъаъ учІвну яшамиш шулу, ва думу касдиз улихьдитІан гьамус артухъ пис шулу. Гьациб хьибди гьамусдин хътругъру адмийиризра. 46 Исайи халкьдиз гьаму гафар кІури имиди, магьа Исайин дадана чвйир дуфну, Дугъахъди гаф-чІал апІуз ккунди, чІат дугъужвнади шулу. 47 Ва сар шли-вуш Дугъаз кІуру: – Магьа Яв дадана чвйир, Увухъди гаф-чІал апІуз ккунди, чІат дийигъна. 48 Чаз гьамци гъапириз Исайи кІуру: – Йиз дада фуж ву ва Йиз чвйир фужар ву? 49 Хъа Чан ученикарихьинди хил гьачІабккну, кІуру: – Магьа Йиз дада ва Йиз чвйир, 50 фицики Аьршарин Йиз Адашдин гаф тамам апІрур Йиз чвера, чира, дадара вуйиз.

Матта 13

1 Гьадму йигъан хул’ан удучІву Иса Галилей гьюлихъна душну деъру. 2 Дугълан гизаф халкь илтІибшнийи, ва гьаддиз Думу люткейиъ эънийи, хъа халкь гьюлин гъирагъдихъ гъубзнийи. 3 Исайи дурариз, аьгъювалар улупури тахалусариинди гизафдарикан гъапнийи. Дугъу кІуру: – Сар нежбер тум убзуз удучІвуру. 4 Убзурайиган, гьацІар удрар рякъюхъ дахьру – дурар, жакьвар дуфну, удуру. 5 Сакьюдар удрар гъван ккайи, руг цІибтІан алдру йишв’ина дахьру, ва дурар ухди ктучІвуру, гьаз гъапиш ругдин гъат чІиллиб вуйи. 6 Ригъ гъапІган, дурар чурхуру, ва, ччивар зяифди хьпаз лигну, ерццуру. 7 ГьацІар удрар зазарин тумрягъ гъяхьру, ва аьхю гъахьи зазари дурар ккаъру. 8 Хъа садар удрар авадан ругдик кахьру, дурари бегьер хуру: фундари – варж, фундари – йирхьцІур, хъа фундари – сумчІур ражари артухъ. 9 Шлин ибариз ебхьураш, гъит ебхьри. 10 Багахь духьну, ученикари Дугъхьан гьерхру: – Уву халкьдиз тахалусариинди гьаз кІурава? 11 Дугъу дурариз жаваб вуди кІуру: – Гьаз гъапиш учвуз Аьршарин Паччагьлугъдин сирар аьгъю хьуб тувначвуз, хъа имбудариз тувнадар. 12 Фицики шлиз аш, дугъаз хъана тувди ва артухъра хьибди, хъа шлиз адарш, айибра тадабгъиди. 13 Гьаддиз дурариз тахалусариинди кІураза, дурариз, лигурашра, рябкъюрадар, хъпехъурашра, ебхьурадар ва гъаври ахърадар. 14 Ишая пайгъамбри магьа гьамци дупнайиб дурариин улубкьура: «Учвуз ебхьуз гъеебхьунчвуз, хъа гъавриъ ахъидарчву, учвуз рябкъюз гъябкъюнчвуз, хъа мучІуди гъуздичва. 15 Гьаз гъапиш му инсанарин юкІвар хъунти духьна. Дурарин ибариз читиндитІан ебхьури имдар. Дурариз, улар уьлчІюкьнамиди, фукІара рябкъидар. Гьаци дубхьнаки, дурариз рябкъюзра рябкъюри имдар. Ебхьузра ебхьури амдар, ва хъунти юкІвар гъавриъ ахърадар, ва, чпи сагъ апІбан бадали, Аллагьдихьинди илтІикІидар». 16 Учву, улариз рябкъюрайидар ва ибариз ебхьурайидар, бахтаврар вучва! 17 Фицики дюзди кІуразачвуз: гизаф пайгъамбраризна марцци касариз учвуз рябкъюрайиб рябкъюз ккундийи, хъа гъябкъюндар, ва учвуз ебхьурайиб ебхьуз ккундийи, хъа гъеебхьундар. 18 Магьа тум убзрурикан вуйи тахалусдин мяна: 19 Аьршарин Паччагьлугъдикан гаф гъеебхьиган, дидин гъаври даршулайи гьарсар касдихьна иблис гъюру ва дугъан кІваъ дубзнайиб гьитІибкІуру: рякъ’ина ахьу удрар магьа гьадму ву. 20 Гъван ккайи йишв’ина ахьу удрари, Аллагьдин гаф деебхьну, дишла шадди кьабул апІрур вуйиб улупура. 21 Хъа дугъакк ччив ккадар, гьаддиз думу цІиб вахтназтІан дар. Аллагьдин гаф себеб вуди чахъ хъергруган, ясана саб хатІа-бала гъядябхъруган, думу гьадму сяаьт гафнахьан гьудучІвуру. 22 Зазар-варжйиригъ дахьу удрари Аллагьдин гаф деебхьну, гьар йигъандин гъайгъушнари ва девлетназ вуйи нефсну ккагънайи кас улупура. Мицир касдиъ гафну бегьер тувдар. 23 Авадан ругдик кахьу удрари, Аллагьдин гаф деебхьну, дидин гъавриъ ахъру кас улупура. Ари гьадму варж, йирхьцІур, вая сумчІур ражари артухъ бегьер туврайи удрариз ухшар ву. 24 Исайи халкьдиз сабсана тахалус ктибтуру: – Аьршарин Паччагьлугъ магьа гьамдиз барабар ву: сар касди чан хутІлиъ марцци тум убзуру. 25 Адмийир даахнайиган, дугъан хайир даккни кас дуфну, дубзнайи хутІлиъ ачІлин тум дабгъуру. 26 Чар ктубчІвуру. Дяхни кІул апІуз хъюгъган, адмийириз душвягъ ачІалра ктубчІвури рябкъюру. 27 Ва хулан эйсийихьна дуфну, дугъан лукІари кІуру: «Учу яв хутІлиъ гъубзуб марцци тум вуйич, аьхир. Душваъ ачІал наънан арайиз гъафну?» 28 Дугъу дурариз кІуру: «Думу йиз хайир даккни касди гъапІуб ву». Хъа лукІари кІуру: «Увуз ккундуш, душну ачІал апІуча?» 29 Дугъу кІуру: «Ваъ, ачІал апІруган, дяхинра уьчІюбгъиди. 30 Иган хъубкьайиз, дяхнихъди ачІалра гъибтай. Иган хъубкьган, узу иган убгрудариз пидиза: сифте ачІал дапІну, цІигъ ургбан бадали, дурар гъварч-гъварчди йитІай, хъа дяхин йиз танхаризди уч апІинай». 31 Исайи дурариз хъана жара тахалус ктибтуру: – Аьршарин Паччагьлугъ магьа гьамдиз ухшар ву: сар касди бистниъ бицІи дил кивру. 32 Дил, учв варитІан бицІиб вушра, хъубкьган, думу, бистниъ варитІан аьхюб дубхьну, гьарси шулу, гьаци вуйиган дидигъна завун ничхрар гъюру ва дидин циркларигъ мукьар апІуру. 33 Исайи дурариз хъана жара тахалус ктибтуру: – Аьршарин Паччагьлугъ, дишагьлийи, гъадабгъну, шубуб сеъ хюйик капІну, хамир вари утуз гъибту дуниз ухшар ву. 34 Гьамрар вари Исайи халкьдиз, тахалусар хури, ктитури гъахьну, ва, тахалус дархиди, фукІара кІури гъахьундар. 35 Исайи тахалусариинди пуб пайгъамбрин мелзналан улдучІву гьаму гафар кІулиз удучІвбаз вуйи: «Узу улхруган, тахалусариинди улхидиза, ва дюн’я ккебгъхъанмина вуйи сирар тахалусариинди кдитидиза». 36 Хъасин уч духьнайи халкьдихьан гьудучІвну, Иса хулаз гъюру. Дугъан ученикарра Дугъахъди гъюру, ва хулаъ чпитІан амдру вахтна дурари Дугъкан тІалаб апІуру: – Учу хутІлиъ ктубчІву ачІликан вуйи тахалусдин гъаврикк ккаъ сарун. 37 Ва Дугъу жаваб вуди гъапи: – Марцци тум убзурайир Инсаниятдин Бай ву. 38 ХутІил дюн’я ву, марцци удрар Аллагьдин Паччагьлугъдиъ айи касар ву; хъа ачІал иблисдин баяр ву. 39 Дурар гъурзу душман иблис ву, иган убгувал гъиямат йигъ ву, хъа иган убгрудар малайикар ву. 40 Гьаци вуйиган, фици ачІал дапІну, укІ цІигъ убгуруш, гьаци хьибди аьхирзамандин вахт улубкьиган: 41 Инсаниятдин Бали Чан малайикар гьаъди, дурари Дугъан Паччагьлугъдиъ айи вари гунагькрарна къанунсуз ляхнар апІурайидар гъядягъну, уч апІиди 42 ва дурар жегьеннемдин цІигъна гатІахьиди; душваъ зурба ишуб, суза-фигъан абхъди. 43 Гьадму вахтна дугъри касари чпин Адашдин Паччагьлугъдиъ ригъдиси нур тувди. Ебхьуз ибар кайидариз гъит ебхьри. 44 Аьршарин Паччагьлугъ магьа гьамдиз барабар ву: сар касди, хутІлиъ жиликк хазна гъибихъган, думу чан айиси ккивру. Дугъу, кьадар адрукьан шад духьну, чаз айи-адруб вари масу тувну, гьадму хутІил чазди гъадабгъуру. 45 Аьршарин Паччагьлугъ магьа гьамдизра ухшар ву: Сар алверчийи багьалу гавагьирар агури шулу. 46 Саб ражари дугъаз уларин акв гъабхрубсиб успагьи гавагьир масу туври рябкъюру, ва дугъу, душну, чаз айи-адруб вари масу тувну, гьадму гавагьир гъадабгъуру. 47 Аьршарин Паччагьлугъ магьа гьамдизра ухшар ву: балугъчйири гьюликк чул ккипру ва гьар жюрейин балугъар дисуру. 48 Чул абцІган, думу гъирагъдихъна ктабгъуру, ва, дидин гъвалахъ деъну, ужудар гъюдюхну, чІурудар гатІахьуру. 49 Гьаци хьибди гъиямат йигъан: малайикар гъиди ва дурари дугъри касарихьан писдар жара апІиди, 50 ва дурар жегьеннемдин цІигъна гатІахьиди. Душваъ зурба ишуб, суза-фигъан абхъди. 51 Исайи дурарихьан гьерху: – Гьамдин варибдин гъавриъ ахъунчву? Дугъаз дурари: «Ав», – гъапи. 52 Исайи дурариз гъапи: – Гьаддиз Аьршарин Паччагьлугъ аьгъю гъапІу гьарсар къанунчи, чан сундхиан гьам цІийиб, гьамсана йирсиб адабгъурайи хулан эйсийиз ухшар ву. 53 Гьаму тахалусар кидитну ккудубкІган, Иса дилин гъушу. 54 Чан багъри шагьриз дуфну, дугъу жугьдарин мистаъ халкьдиз аьгъювалар улупуз хъюгъю. Вари мюгьтал духьнайи: – Мугъан мукьан фагьум ва кьувват наънан вуйкІан? – кІуйи дурари. – 55 Думу харатчийин Бай даринхъа? Дугъан дадайиз Мар’ям кІурдаринхъа, Дугъан чвйирра Якьуб, Юсуф, Симон ва Ягьуда даринхъа? 56 Дугъан чйирра вари ухьухъди хъадаринхъа? Дугъан му вари кьудрат наънан вуйкІан? 57 Дурариз Дугъахъ хъугъуз ккун гъабхьундайи. Исайи дурариз гъапи: – Гьюрмат адру пайгъамбар хьуб мумкин дар, хъа чан багъри шагьриъ ва хулаъ пайгъамбриз гьюрмат ади шулдар. 58 Исайи душваъ, дурарин хъугъвал адрувализ дилигну, улупуз ккайи гизаф аьламатар улупундайи.

Матта 14

1 Гьадму вахтари Галилей уьлкейин гьякимдар Гьироддиз Исайикан хабар шулу. 2 Дугъу чан гъуллугъчйириз кІуру: – Думу кас якьинди штуан апІру Ягь’я ву. Думу, гъачІихъан, чІиви духьна, гьаддиз дугъхьан гьацдар аьламатар улупузра шула. 3 Гьиродди гьаддиз гьамци фикир гъапІнийи: улихьнаси дугъу чан чве Филипдин хпир Иродиадайин кІуллан Ягь’я дидисну, зунжрарихъди йитІну, дустагъдиъ итнийи. 4 Ягь’яйи Гьироддиз, яв чвуччвун хпирихъди хьуз хай шулдар, гъапнийи. 5 Ва Гьироддиз Ягь’я йикІуз ккун гъабхьнийи, амма халкьдихьан гучІбу гъакІундайи, гьаз гъапиш халкьди Ягь’я пайгъамбар ву кІури гьисаб апІурайи. 6 Гьирод бабкан гъаши йигъан Иродиадайин шуру шадлугъназ дуфнайидарин улихь ялхъван гъапІнийи, ва Гьироддиз ялхъван кьабул гъабхьнийи. 7 Гьирод гьадмукьан рази гъахьнийики, дугъу шуру фу тІалаб гъапІишра, гьадму кІули адабгъуз ху гъапІнийи. 8 Шурура, чан дадайи алаъну, гьамци гъапнийи: – Гьамшвахь ва гьамусяаьт узуз ленгерийиъди штуан апІру Ягь’яйин кІул алдабтІну аьбкъин. 9 Паччагьди, учв фукьан пашман гъахьнушра, хяларин улихь ху апІбаз лигну, шуран улихьна Ягь’яйин кІул алдабтІну хуз буйругъ тувру. 10 Ва гьаъдари дустагъдиъ Ягь’яйин кІул алдабтІуру. 11 Дугъан кІул, дубхну, шурахьна тувру, шурура чан дадайихьна гъабхуру. 12 Хъасин Ягь’яйин ученикар дустагъдиз дуфну, дугъан беден гъадабгъну дубхну, накьвдик кивру, хъасин дурари, Исайихьна душну, гъабхьиси вари ктибтуру. 13 Му хабар гъеебхьу Иса, люткейиъ эъну, фужкІа адру саб халват йишваз хъапІну, гъягъюру, хъа мидкан хабар дубхьну, адмийир, чпин шагьрар гъитну, Дугъан кьяляхъди ликри гъягъюз хъюгъю. 14 Люткейиан удучІву Исайиз аьхючІвеъ халкь уч духьнади рябкъюру ва, дурарин язухъ дубхьну, Дугъу уьзрар кайидар сагъ апІуру. 15 Хябяхъ гъабшиган, Исайихьна дуфну, ученикари Дугъаз кІуру: – Му йишв касра адру йишв ву, вахтра сарун кьан дубхьна, халкьар деет, гъит дурари, багарихь хьайи гъулариз душну, чпиз ипІруб гъадабгъри. 16 Хъа Исайи дурариз кІуру: – Дурар наанакІа гъягъюб лазим дар, дурариз ипІруб учву тувай. 17 Ученикари Дугъаз гъапи: – Учухь мушваъ, хьуб уьлна кьюб балугътІан гъайри, фукІа хьадарчухь. 18 Исайи ученикариз, дурар Чахьна аькъин, кІуру. 19 Ва халкьдиз майдандиин деуб амур дапІну, гьадму хьуб уьлна кьюб балугъ гъадагъну, завузди дилигну, Аллагьдин ужувлакк ккахьри, дупну, уьлер гьудутІну, ученикарихьна тувру, хъа дурари халкьдиз тувру. 20 Вари халкьди ипІуру, тухъ шулу ва хъиригъу кьацІари йицІикьюб тавра ацІру. 21 Уьлна балугъ гъипІу жиларин кьадар хьуд агъзурихьнакьан вуйи. Дурарихьна хъана дишагьлийирина бицІидарира гъипІнийи. 22 Мидин кьяляхъ Исайи, Чав сабан халкь гьаъри имиди, Чан ученикариз люткейиъ эъну, Галилей гьюлин тмуну гъирагъдихъна сирнав апІуб амур апІуру. 23 Халкь алдабгъиган, Иса, ялгъузди ккарагбан бадали, дагъдиз удучІвуру ва хябяхъдизкьан сарди гьадушваъ гъузру. 24 Хъа лютке гьюлин гьацІкьяларизкьан дурубкьнайи ва думу лепйири зарбди ккалабкьурайи, гьаз гъапиш гъаншар микІ хъиврайи. 25 Ахсрар ккиврайи вахтна Иса гьюлилан ликар алдагъури люткейихьна гъюрайи. 26 Хъа ученикариз, Думу гьюл’инди гъюри дяркъну, гьаци гучІ гъабхьнийики, Думу гъарантуси гьугъужвну, дурариан гучІбан гьарйир адахьуру. 27 Ва гьадмусяаьт Исайи дурариз гъапи: – ЮкІв ижми апІинай, му Узу вуза, гучІ мапІанай. 28 Хъа Петри Дугъаз гъапи: – Я Агъа, эгер дугъриданра Уву вуш, узуз Увухьна штун зиинди гъюз амур апІин. 29 Дугъу гъапи: «Гъач». Ва люткейиан эдеъну, Петр штуинди гъягъюз хъюгъю ва, Исайихьна хъуркьрайиган, 30 гужал микІ хъивну гъябкъюрик гучІ кабхъру ва, ккахъуз хъюгърайири, чІигъар апІуру: – Я Агъа, узу ккахъуз мигъитана. 31 Исайи дишла, хил гьачІабккну, думу дисуру ва дугъаз кІуру: – Эй Уз’ин бегьем хъугъвал алдрур, уву гьаз шаклу гъахьунва? 32 Дурар люткейиъ учІвган, микІ яваш гъабхьи. 33 Хъа люткейиъ айидари, Дугъаз икрам дапІну, кІуру: «Дугъриданна Уву Аллагьдин Бай вува». 34 Дурар, сирнав апІури, Геннисаретдин ругарихьна гъюру. 35 Иса аьгъю духьну, душван агьалйири варишвариъ хабар дебккру ва Дугъахьна вари иццурайидар хуру. 36 Дурари Исайикан анжагъ Дугъан ккурттарин канчІарик куркІузкьан гъитуб тІалабар апІуйи. Вари Дугъак куркІрудар сагъ шуйи.

Матта 15

1 Мидин кьяляхъ Исайихьна Ерусалимдиан фарисйирна къанунчйир гъюру, дурари кІуру: 2 – Яв ученикари ихь абйирин аьдатар гьаз кІули гъахурадар? Дурари, уьл ипІруган, хилар жикІурадар! 3 Хьа Исайи дурариз жаваб вуди гъапи: – Учвура, ичв аьдатар уьрхбан бадали, Аллагьдин табшуругъар гьаз кІули гъахурадарчва? 4 Аллагьди табшурмиш гъапІундаринхъа, «адашдизна дадайиз гьюрмат апІинай» ва «адашдизна дадайиз люкьнар апІрур аьжализ лайикь ву», кІури. 5 Хъа учву фу кІури шулчва? Эгер сари чан дадайиз вая адашдиз «Узу увуз буржлу вуйиб Аллагьдиз бахш дапІназа», гъапиш, 6 дугъу сарун чан адашдизна дадайиз гьюрмат апІуб лазим дар, кІурачва. Гьамци кІури, Аллагьдин гаф тамам апІурадарчва. 7 Эй кьюб маш гъяйидар! Ишая пайгъамбри ичв гьякьнаан хуб ужуди дупна: 8 «Гьаму адмийири Узуз гьюрмат ушвниинди апІура, хъа дурарин юкІвар Узхьан ярхла ву. 9 Давди дурари Узуз икрам апІура, фицики дурари инсанарин аьдатар уьрхюз улупура». 10 Хъасин Исайи, халкьдиз дих дапІну, кІуру: – Узухъ хъебехъай ва аннамиш апІинай: 11 ушвниъ убчІврайибди ваъ, хъа ушвниан удубчІвурайибди инсан чиркин апІуру. 12 Кьандиси Исайиз багахь духьну, ученикари кІуру: – Фарисйириз Уву гъапибдикан гиран гъабшиб, аьгъяйвуз? 13 Исайи жаваб вуди гъапи: – Чав ктриву гьарсаб рук-кюл Аьршарин Йиз Адашди ччивариан уьчІюбгъиди. 14 Дурарикан фикир мапІанай. Дурар, улихь гьучІвну, курар хъади гъягъюрайи курар ву. Хъа кури кур хъади гъягъруган, дурар кьюридра ичІаъ ахьди. 15 Мидиз жаваб вуди Петри кІуру: – Учуз тахалусдин мяна ачухъ апІина. 16 Исайи гъапи: – Учвура гьамцдарин гъавриъ ахънаданчва? 17 Ушвниъ убчІвуб вари фуниз рубкьрувалин ва дилинтина чІатинди удубчІвну гъябгърувалин гьаз гъавриъ ахърадарчва? 18 Хъа ушвниан удубчІвурайиб кІваанмина гъюра, ва диди инсан чиркин апІура. 19 Фицики чІуру ниятар, йивбар-йихбар, кьяппавалар, аьрбатанвалар, икІ апІбар, кучІлар, футнйир – гьамрар вари кІваан удучІвурайидар ву. 20 Гьамцдари инсан чиркин апІуру, хъа дижрикІру хиларихьди уьл гъипІну кІури, инсан чиркин шлуб дар. 21 Хъасин дилин удучІву, Иса Тир ва Сидон шагьрарин аьтрафариз гъягъюру. 22 Магьа Хананей уьлкейиан вуйи сар дишагьлийи, ишури дуфну, Исайиз кІуру: – Я Агъа, Давудгъярин Бай, йиз язухъ апІина! Йиз риш, жинар кучІвну, аьхю балайикк кка. 23 Хъа Исайи дугъаз чІалкьан гъапундайи. Ученикари, багахь духьну, Исайикан ккун апІуру: – Думу дишагьли хъутІуркк, гьаз гъапиш дугъу ихь кьяляхъ чІигъ хъипна. 24 Дугъу жаваб вуди кІуру: – Узу анжагъ Израилин хъудургнайи чарвйирихьна Гьаънайир вуза. 25 Хъа дишагьлийи, дуфну, дугъаз икрам дапІну, кІуру: – Я Агъа, узуз кюмек апІин сарун. 26 Хъа Исайи гъапи: – Баяр-шубарихьан тадабгъну, уьл хуйириз ккипуз хай даршул. 27 Хъа дишагьлийи жаваб туву: – Дюзди кІурава, Агъа, хъа хуйирира чпин эйсийин суфрайилан ахьу уьлин урклар итІуру. 28 Гьадмуган Исайи дугъаз кІуру: – Эй дишагьли! Яв хъугъувал зурбаб вуяв. Гъит увуз ккуниганси ибшри. Ва дугъан риш гьадмусяаьт сагъ гъахьнийи. 29 Гьадлин гьудучІвну, Иса Галилей гьюлихьна гъюру ва, саб тепейиина за духьну, деъру. 30 Дугъахьна ликудар, дярябкърайидар, чІал дибиснайидар ва гизаф жара уьзрар кайидарра хъади аьхючІвеъ халкь уч шулу. Уьзурлуйир Дугъан багахь дитру, Дугъу дурар сагъ апІуру. 31 Ва гьаддиз, чІал дибиснайидар чІалниина дуфну, сакьатлудар сагъ духьну, ликудар рягьятди лицури ва кур духьнайидарин уларихь акв гьибшну гъябкъган, халкь мюгьтал гъахьнийи ва Израилин Аллагьдин адар апІуз хъюгънийи. 32 Хъасин Исайи, ученикариз дих дапІну, кІуру: – Узуз адмийир гьяйиф вузуз. Магьа, дурарин Узухъди хъади шубуд йигъ ву, хъа дурариз ипІруб адар. Мурар рякъюъ зяиф дархьбан бадали, фукІа-мукІа дирипІди, дурар деетидарза. 33 Ученикари Дугъаз кІуру: – Гьаму вари халкь тухъ апІрубкьан уьл му ичІи йишваъ наънан абгуча? 34 Исайи дурариз кІуру: – Учвухь швнуб уьл хьачвухь? Дурари кІуру: – Ургуб уьлна сакьюдар балугъар. 35 Исайи, халкьдикан жилиин деуб ккун дапІну, 36 гьаму ургуб уьлна балугъар гъадагъуру ва, Аллагьдиз чухсагъул кІури ккарагну, уьлер гьудутІну – ученикарихьна, хъа ученикари халкьдиз тувру. 37 ДипІну вари ацІру, хъа хъиригъу кьацІари ургуб тавра ацІру. 38 Уьлна балугъ гъипІу жиларин кьадар юкьуд агъзурихьнакьан вуйи, дурарихьна хъана дишагьлийирира, бицІидарира гъипІнийи. 39 Хъасин Иса, халкь деетну, Учв люткейиъ эъну, Магдала кІуру юрдназ гъафнийи.

Матта 16

1 Саб арайилан фарисйирина саддукйири, Исайин багахьна дуфну, думу ахтармиш апІуз ккунди, аьршариан чпиз саб аьламатнан лишан улупуб ккун апІуру. 2 Хьа Исайи дурариз жаваб вуди кІуру: – Ригъ алабхъурайиган, учву: „Закур ригъ апІиди, гьаз гъапиш зав уьруди а“, – кІуручва. 3 Хъа гьирин ухди: „Гъи селсиб мархь убгъиди, гьаз гъапиш зав уьруди а“, – кІуручва. Эй, кьюб маш гъяйидар! Завуз дилигну, гьава аьгъю апІуз шулчвухьан, хъа гьаму шулайи ляхнарин гъавриъ ахъуз шуладарчвухьан. 4 Хътругъру ва аьрбатан гьамусдин адмийири аьламатнан лишнар улупуб ккун апІура, хъа дурариз, Юнус пайгъамбрин кІул’ина гъафи аьламатналан гъайри, жара аьламат рябкъидар. Гьамци дупну, Иса дурарихьан гьудучІвну гъягъюру. 5 Дурар гьюлин тмуну гъирагъдихъна ктучІвиган, Дугъан ученикарин уьлер гъадагъуб кІваълан дубшнади гъабхьну. 6 Исайи дурариз кІуру: – Лигай-гьа, фарисйиринна саддукйирин дунихьан ихтият йихьай. 7 Ученикар: «Му учу уьлер гъададагъиган кІурайиб вуйкІан», – кІури, фикрик кахънийи. 8 Дурар фтикан улхураш аьгъяди, Исайи дурариз кІуру: – Уьлер гъадагъундарча кІури, гьаз фикрарик кахъначва, хъугъвал адрудар. 9 Учву гьамусра фтинкІа гъавриъ ахънаданчва? Хъа хьуд агъзур кас тухъ гъапІу хьуб уьлкан хъиригъу кьацІари швнуб тавра ацІнуш, кІваълан гъубшнийичв? 10 Ясана юкьуд агъзур касдигъна пай гъапІу ургуб уьлкан хъиригъу кьацІари швнуб тавра ацІнуш, учвуз гьархнайин? 11 Учву гьаз гъавриъ ахърадайкІан? Узу уьлкан улхурадарза, хъа фарисйиринна саддукйирин дунихьан ихтият йихьай! кІураза. 12 Гьадмуган, Дугъу дунихьан ваъ, хъа фарисйиринна саддукйирин кучІлин аьгъюваларихьан ихтият йихьай, кІурайивалин дурар гъаври ахънийи. 13 Хъа Филипдин Кесария кІуру шагьрихьна гъафиган, Исайи Чан ученикарихьан гьерху: – Адмийири Инсаниятдин Бай фуж ву, кІури, гьисаб апІура? 14 Дурари гьамци кІуру: – Садари Уву – штуан апІру Ягь’я ву, тмундари – Ил’яс ву, кІура, шубурпидари – Еремия вая жара пайгъамбрарикан сар ву, кІури, гьисаб апІура. 15 Хъа Исайи: – Хъа учву, Узу фуж ву кІури, гьисаб апІурачва? – пну, гьерхру. 16 Петри: – Уву Месигь, чІиви Аллагьдин Бай вува, – пну, жаваб тувру. 17 Гьадмуган Исайи дугъаз жаваб вуди гъапи: – Уву бахтавар вува, Юнусдин бай Симон, гьаз гъапиш увуз му, инсанари ваъ, хъа Аьршарин Йиз Адашди ачмиш гъапІунвуз. 18 Хъанара кІуразавузки, уву, гьацира Петр яна Гъарз вува ва гьаму гъарз’ин Узу Йиз хъугънайидарин бин ккабалгидиза, думу сарихьанра дабгъуз хьибдар, гьеле аьжалихьанна. 19 Узу увухьна Аьршарин Паччагьлугъдин ачар тувдиза, ва уву жилариин фу гъадагъа гъапІиш, аьршариин гьадму гъадагъа дапІну хьибди, ва уву жилариин фтиз ихтияр тувиш, аьршариинра гьаддиз ихтияр тувну хьибди. 20 Ва гьадмуган Исайи Чан ученикариз, Учв Месигь вуйиваликан гьич саризра дарпуб ижмишнаан гъадагъа апІуру. 21 Гьадму вахтналан хъюгъну, Исайи ученикариз Учв Ерусалимдиз душну ккуниваликан, душваъ аьхюдари, аьхюну маллйири, къанунчйири Учв гизаф аьзабарикк ккитруваликан ва Учв йивну йикІруваликан, шубудпи йигъан чІиви шлуваликан ктибтуз хъюгънийи. 22 Хъа Петри Иса гъирагъдиз гьадаъну, Дугъан гафар гьадатІуз хъюгъру: – Аллагьди Увуз рягьим апІри, я Агъа! Яв кІул’ин дицисдар кьазйир улулукьри. 23 Исайи, Петрихьинди илдицну, гъапи: – ГьудубчІв Узхьан, иблис! Уву Узу рякъ’ан адаурава, гьаз гъапиш яв фикрар адмийирин фикрар вуяв, хъа Аллагьдин ваъ. 24 Хъасин Исайи Чан ученикариз гъапи: – Шлиз Узухъди гъюз ккундуш, думу, чан тямягьяр дирчну, чан хач гъадабгъну, Узухъди гъюри. 25 Шлиз чан уьмур уьбхюз ккундуш, дугъан думу дубгди. Хъа шли Узу бадали чан уьмур пуч гъапІиш, дугъаз думу бихъиди. 26 Чан уьмур гъудубгу касдиз, вари дюн’я чаз гъабшишра, фу хайир ахъа? Чан уьмур кьяляхъ апІбан бадали, дугъу фициб кьимат тувди? 27 Фицики Инсаниятдин Бай Чан Адашдин аднаъди, Чан малайикарра хъади гъиди, ва гьадмуган гьарсар касдиз, чан ляхнариз лигну, кьимат тувди. 28 Дюзди кІуразачвуз: мушв’ин дийигънайидарикан сакьюдариз, чпин аьжал хъубкьайиз, Чан Паччагьлугъдиъ учІврайи Инсаниятдин Бай рякъиди.

Матта 17

1 Йирхьуд йигълан Исайи Петр, Якьуб ва дугъан чве Югьан гъадагъну, сарун жарар фужкІара хътарди, ягъли дагъдиина гъягъюру. 2 Хъа Иса дурарин улихь дигиш шулу: Дугъан маш рябкъюри-рябкъюри ригъси нурлу гъабхьнийи, хъа палтар – йифси лизи. 3 Дурарин улихьна Исайихъди гафар апІурайи Мусана Ил’яс ачмиш шулу. 4 Гьадмуган Петри Исайиз гъапи: – Я Агъа! Учуз мушвахь ужуди вучуз! Увуз ккундуш, мушвахь шубуб паж апІуча: саб Увуз, саб Мусайиз ва саб Ил’ясдиз. 5 Дугъу гьамци кІури имиди, зав’ан дурариина аку диф ис шулу, ва сабпну дифрагъян гьамциб сес гъюру: «Му Йиз масан Бай вуйиз. Узу Мугъ’ин гизаф рази вуза! Гьамгъахъ хъебехъай!» 6 Му сес гъеебхьу ученикариз яманди гучІ гъабхьнийи, ва дурар, икрам апІури, жил’ина ахьнийи. 7 Исайи, дурарихьна дуфну, хил кучну, кІуру: – Гъудужвай, гучІ мапІанай. 8 Хъа ученикариз, кІулар за дапІну гъилигган, Исайилан гъайри фужкІа гъяркъюндайи. 9 Хъа дурар дагъдилан гъюруган, Исайи дурариз ижмишнаан гъапи: – Инсаниятдин Бай, дукІну, чІиви хьайиз, гьаму учвуз гъябкъюбдикан саризра макІанай. 10 Хъа ученикари Исайихьан гьерхру: – Къанунчйири, сифте Ил’яс дуфну ккунду, гьаз кІура? 11 Исайи дурариз гьамци жаваб туву: – Дугъридан Ил’ясди, улихьмиди дуфну, вари ккабалгну ккунду; 12 Хъа кІуразачвузки, Ил’яс гъафну, амма инсанариз думу аьгъю гъахьундар, ва дугъкан дурари чпиз ккуниб гъапІну. Гьаци Инсаниятдин Бализра дурарин хиларилантина аьзабар хьиди. 13 Ва гьадмуган ученикар Иса штуан апІру Ягь’яйикан улхурайивалин гъаври ахънийи. 14 Дурар халкьдихьна гъафиган, сар касди, Исайихьна дуфну, Дугъан улихь кьамкьариина ис духьну, 15 кІуру: – Я Агъа! Йиз балин язухъ апІина! Думу гьарза шула ва читин аьзабарикк ккахъра, чІур шули, цІиъ ва штуъ урсрира шулу. 16 Узу думу Яв ученикарихьна хъади гъафунза, амма дурарихьан думу сагъ апІуз гъабхьундар. 17 – Эй хътругъру инсанар! – кІуру гьадмуган Исайи. – Узу учвухъди филадизкьан гъузди, кІурачва?! Узу учву филадиз аьгь апІуза?! Думу Узухьна аькъинай! 18 Исайи буйругъ тувну, жин утІубкку, ва бай гьадмусяаьтди сагъ шулу. 19 Хъасин ученикари сасарди, Исайихьна дуфну, Дугъхьан гьерхру: – Хъа учхьан думу утІубккуз гьаз гъабхьундайикІан? 20 Исайи дурариз гъапи: – Учву дериндиан хъугъну адрувалиан, фицики дюзди кІуразачвуз: эгер учвуъ саб бицІи дилсибкьан хъугъувал ади гъабхьиш, учву гьатму дагъдиз: «Гьамлин гьатинди гьудубчІв», гъапиш, думу тинди гьудубчІвур, ва учв’ан удудукьруб фукІа хьибдар. 22 Чпи Галилейиъ айи вахтна, Исайи ученикариз гъапи: – Инсаниятдин Бай багарихьди инсанарин хилиз тувди. 23 Дурари Думу йикІиди, ва шубудпи йигъан Думу чІиви хьиди. Дугъу гьаци гъапиган, ученикар гизаф пашман гъахьнийи. 24 Дурар Кафернагьумдиз гъафиган, Аллагьдин хулаз налук гъюдюбхюрайидари, дуфну, Петриз кІуру: – Ичв Мялимди Аллагьдин хулаз налук тувдаринхъа? 25 Петри: – Ав, тувру, – гъапи. Ва Петри хулаъ учІвну, чан ушв абццайизра, Исайи дугъаз суал туву: – Уву фици фикир апІурава, Симон Петр: гьаму дюн’яйин паччгьари шилхьан налукар гъадагъури шулу – чпин баярихьан, даршиш миди вуйи инсанарихьан? 26 Петри жаваб туву: – Миди вуйи инсанарихьан. Думуган Исайи дугъаз гъапи: – Гьаци вуйиган, дурарин баяр налукариккан азад ву. 27 Амма ухькантина дурар инжик дархьбан бадали, гьюлихъна душну, гъармах ккипну, сифте хъабхъу балугъ гъянзуйихъан хъадабгъ; ва дидин ушв абццган, душваъ лазим кьадар арсран пул бихъидивуз; думу балугъин ушвниан адабгъну, Узхъандина увхъанди вуйи налукнаанди дурарихьна тув.

Матта 18

1 Гьадму вахтна, Исайихьна дуфну, ученикари гьерху: – Аьршарин Паччагьлугъдиъ вартІан аьхюр фуж ву? 2 Исайи, сар бицІириз дих дапІну, думу дурарин кьялаъ дерккну, 3 кІуру: – Гьякь кІуразачвуз, учву ичв юкІвар дигиш дапІну, бицІи баярси дархьиш, Аьршарин Паччагьлугъдиъ учІвидарчва; 4 гьаци вуйиган, фуж гьаму бицІи байси мютІюгъ гъахьиш, гьадму Аьршарин Паччагьлугъдиъ аьхюрра ву. 5 Ва шли Узу бадали сар гьамцир бицІир кьабул гъапІиш, дугъу Узу кьабул апІура; 6 хъа шли Узухъ хъугънайи гьаму зяифдарикан саркьан рякъ’ан адаиш, дугъаз, чан гардандиъ рягънин ахал ипну, гьюлизди гатІахьуб ужу шлийи. 7 Тямягьлу дюн’яйиз бала хьибди. Нефс-тямягь адарди, дюн’я гъубзурдар, амма нефс-тямягь арайиз гъюбан тахсиркар аьхю балайикк ккахъди. 8 Эгер яв хили, вая яв ликри уву тямягьнахьна гъахури аш, думу хъадабтІну, ярхлаз гатІабхь: ккудудубкІру уьмриъ хил хътарди, вая лик ккадарди учІвуб ужу вувуз, жегьеннемдиъ ккудудубкІру цІигъ ургури хьайиз. 9 Яв ули уву тямягьнахьна гъахураш, думу адабгъну, ярхлаз гатІабхь: увуз, кьюб ул ади, жегьеннемдин цІигъ ургайиз, саб ул ади, ккудудубкІру уьмриъ учІвуб ужу вувуз. 10 Лигайгьа, бицІидар вара ул’ан миидитанай, фицики дугъриданра дурарин малайикар Аьршарин Йиз Адашдин машнахь шулу. 12 Фици фикир апІурачва? Варж марчч сивариъ айи кас, дурарикан саб гъудубгиш, урчІвцІурна урчІвуб гъитну, гъудубгу сабдихъ лицуз дурушди гъузрин? 13 Ва эгер думу гъибихъиш, дюзди кІуразачвузки, думу урчІвцІурна урчІвуб дудругдариинтІан, саб гьаддиин артухъди шад хьиди. 14 Гьаци ичв Аьршарин Адашдизра гьаму бицІидарикан саркьан дургну ккундар. 15 Эгер яв гъардши увуз къаршуди гунагь шлу ляхин гъапІиш, душну, сарна-сарди гаф-чІал дапІну, дугъаз чан тахсир кидибт. Эгер увухъ хъебехъиш, дугъкан увуз хъана гъардаш хьиди. 16 Эгерки дугъу чан тахсир кІул’ин дибрисиш, жвувахъди хъана сар вая кьюр кас хъади гъарах, гьадму шагьидари гьарсаб гаф тасдикь апІруганси. 17 Дурарихъра хъпебехъиш, мидкан хъугънайидариз йип; хъа хъугънайидарихъра хъпебехъиш, сарун думу аллагьсузсир, ясана налук гъюдюбхрурсир гьисаб апІин. 18 Дюзди кІуразачвуз: учву жилариин фу гъадагъа гъапиш, аьршариинра гьадму гъадагъа дапІну хьибди; ва учву жилариин фтиз ихтияр тувиш, аьршариинра гьаддиз ихтияр тувну хьибди. 19 Гьацира дугъриди кІуразачвузки, эгер жилиин учвкан кьюри сатІиди фукІа тІалаб гъапІиш, Аьршарин Йиз Адашди думу тамам апІиди. 20 Фицики кьюр вая шубур кас Йиз ччвурнахъ уч гъашиш, дурарин арайиъ Узу хьидиза. 21 Гьадмуган Петри, Исайихьна дуфну, гьерхру: – Я Агъа! Узуз къаршуди йиз гъардши гунгьар апІури гъашиш, швнубан дугълан хил алдабгъну ккунду? Ургубан? 22 Исайи дугъаз кІуру: – Увуз «ургубан» кІурадарза, хъа ургцІур ражари ургубан. 23 Гьаддиз Аьршарин Паччагьлугъ чан гъуллугъчйирихъди гьякь-гьисаб апІуз ккун гъабхьи паччагьдиз ухшар ву. 24 Паччагьди гьякь-гьисаб апІуз хъюгъиган, дугъахьна гизаф миллионариинди пул буржлу вуйи сар гъуллугъчи хъади гъюру. 25 Хъа дугъаз бурж кьяляхъ апІуз пул адарди хьпаз лигну паччагьди, думура, дугъан хпирра, веледарра ва дугъаз айи-адруб вари масу тувну, бурж ктипуз амур апІуру. 26 Гъуллугъчи дугъан ликарикк дахъну: «Я паччагь! СацІиб аьх апІин, хъасин вари бурж ктипидиза», кІури, ккарагуз хъюгъру. 27 Паччагьди, рягьим дапІну, дугъаз бурж гьялал дапІну, думу деетуру. 28 Амма думу гъуллугъчийи, дилин удучІвиган, чан юлдшарикан чаз варж динар пул буржлу вуйир дагну, думу дидисну: «Увук кайи йиз бурж ча», кІури, думу бугъмиш апІуз хъюгънийи. 29 Гьадмуган дугъан юлдаш, дугъан ликарикк ккархьну, «сацІиб сабур апІин, яв бурж туварза», кІури, ккарагуз хъюгъю. 30 Амма мугъаз мюгьлет тувуз ккун гъабхьундар ва, душну, бурж тувайизкьан, думу дустагъдиъ иту. 31 Му ляхин гъябкъю дугъан юлдшар гизаф мюгьтал ва пашман шулу ва, дуфну, паччагьдиз вари гъабши-гъабшиси ктибтуру. 32 Гьадмуган паччагьди гъуллугъчийиз дих дапІну, кІуру: «Эй угъраш лукІ! Уву миннат апІбаз лигну, увуз яв думу бурж гьялал гъапІнийза. 33 Узу увуз гьялал гъапІубси, увхьанра яв юлдшиз гьялал апІуз шулдайнухьанхъа?» 34 Хъял кубчІву паччагьди думу, вари бурж ктипайизкьан, аьзабар тувуз, жаллатІарихьна тувру. 35 Гьамци Аьршарин Йиз Адашдира, учвкан гьарури чан гунгьар кайи гъардшилан кІваантІан хил алдадабгъиш, учвузра гьаци апІиди.

Матта 19

1 Гьаму вари гафар дупну ккудукІхъан, Иса Галилей уьлкейиан удучІвну, Ярдан нирин тлихъан терефнаъ айи Ягьудияйин аьтрафариз гъягъюру. 2 Дугъан кьяляхъди гизаф инсанар гъюру, ва Дугъу душваъ гизафдар сагъ апІуру. 3 Хъасин Исайихьна фарисйир гъюру, дурари, Думу ахтармиш апІуз ккунди, гьерху: – Фициб себеб гъабхьишра, Къанундиинди жилириз хпир гьадауз ихтияр айин? 4 Дугъура дурариз жаваб вуди кІуру: – Инсанар халкь ГъапІури дурар сифтейиан жилирна хпир вуди халкь гъапІуб Гирами китабарик гъурхунданчвахъа? 5 Гьаддиз жилир, адашна дада гъитну, чан хпирик карсди ва дурар кьюрид саб беден хьиди. 6 Гьаци вуйиган, дурар сарун кьюб ваъ, хъа саб беден ву. Гьамци Аллагьди китІдар инсанди жара дапІну ккундар. 7 Фарисйири Дугъан жавабназ кІуру: – Дици вуш Муса пайгъамбри, жара хьпан кагъаз тувну, хпир гьадауз шулу, гьаз дупнахъа? 8 Исайи дурариз жаваб тувру: – Мусайи, ичв гъициркъу юкІвариз дилигну, учвуз ичв хпарихъди жара хьуз ихтияр тувну, хъа сифтейиан дици дайи. 9 Амма кІуразачвузки: кьяппавал себеб дарди шли чан хпир гьадаъну, жарар гъахиш, гьадгъу чав кьяппавал апІура. 10 Гьадмуган Исайин ученикари дугъаз кІуру: – Эгер гьамциб гьял вуш, зат хпир дархуб ужу ву. 11 Исайи дурариз гъапну: – Му гаф варидарихьан кьабул апІуз шулдар, думу чпиз удукьувал тувнайи жиларихьантІан кьабул апІуз даршул. 12 Гьацисдар жилар аки, садар бабкан шлуган эвлемиш хьуз даршлудар, садар адмийири хаси апІуру, хъа гьацдарра аки, Аллагьдиз гъуллугъ апІури гъузбан бадали, чиб эвлемиш даршули гъузру. Гъавриъ ахъуз шлур, гъит, гъавриъ ахъри. 13 Хъасин Исайихьна, хилар иливну, дурариз уж’вал ккун апІбан бадали бицІидар хуру, хъа ученикари дурар хътІурккури шулу. 14 Амма Исайи гъапи: – БицІидар узухьна гъюз гъитай, гъадагъа мапІанай, фицики Аьршарин Паччагьлугъ гьацдаринуб ву. 15 Исайи дурариин хилар иливну, хъасин Думу дилин удучІвну гъягъюру. 16 Саб ражари, сар живан дуфну, Исайихьан гьерху: – Я Мялим, узуз ккудудубкІру уьмур рубкьбан бадали, узу фициб ужуб ляхин дапІну ккунду? 17 Исайира дугъаз кІуру: – Узхьан ужувлакан гьаз гьерхрава? Ужур вуйир анжагъ сар АллагьтІан адар. Аллагьди увуз ккудудубкІру уьмур тувну ккундуш, Дугъу Мусайилантина тувнайи табшуругъар вари тамам апІин. 18 – Фу табшуругъар? – гьерхру Дугъхьан живанди. Исайи кІуру: – «Адми миликІан», «кьяппавал мапІан», «мигьитІибкІан», «кучІлин шагьидвал мапІан», 19 «Адашдизна дадайиз гьюрмат апІин» ва «яв багахь хьайир жвуваз жвувси ккун апІин». 20 Живанди Исайиз кІуру: – Узу гьамрар вари тамам апІураза, сарун фу ккими узуз? 21 Исайи дугъаз гъапи: – Эгер увуз гьуркІу кас хьуз ккундуш, душну, яв айи-адруб масу тув, гьадмуган аьршариъ яв девлет хьибдивуз. Хъасин Узухъди гъач. 22 Му гафар гъеерхьу живан пашманди гьудучІвну гъягъюру, гьаз гъапиш думу гизаф девлетлу вуйи. 23 Исайи мушв’ин Чан ученикариз гъапи: – Дюзди кІуразачвузки, девлетлуйиз Аьршарин Паччагьлугъдиъ учІвуз читинди алабхъиди. 24 Хъанара кІуразачвуз: девлетлуйиз Аьршарин Паччагьлугъдиъ учІвубтІан девейиз рубдин гъюн’ан удубчІвуз рягьят ву. 25 Му гафар деерхьну, мюгьтал гъаши ученикари Исайихьан гьерху: – Дици вуйиган, шилхьан учв уьрхюз хьиди? 26 Дурарихьинди дилигну, Исайи гъапи: – Инсанарихьан му удукьруб дар, хъа Аллагьдихьан удудукьруб адар. 27 Гьадмуган Петри жаваб вуди Дугъаз гъапи: – Магьа учу, вари гъибтну, Увухъди хъача: хъа учуз фу хьибди? 28 Исайира дурариз гьамци кІуру: – Дюзди кІуразачвуз: цІийи дюн’яйиъ, Инсаниятдин Бай Чан тахтниин деиган, Узухъди гъафи учвура йицІикьюб тахтниин деъну, Израилин йицІикьюб тухмин суд апІидичва. 29 Гьар шли Узу бадали чан хулар, вая чвйир, вая чйир, вая адаш, вая дада, вая чан веледар, вая хутлар дирчиш, дугъу гьадрар вари варж ражари артухъди гъадагъиди, ва дугъаз ккудудубкІру уьмур рубкьиди. 30 Му ражари гизаф сарпидар думуган ккудукІрудар хьиди, хъа ккудукІрудар – сарпидар.

Матта 20

1 Аьршарин Паччагьлугъ – гвачІин ухди чан тІумтІин багъдиъ лихуз нежбрар агуз удучІву эйсийиз ухшар ву. 2 Дугъу, йигъан саб динар пул тувбан йикьрар дапІну, дурар багъдиз лихуз гьаъру. 3 ГвачІнин урчІвуб шулади хул’ан удучІвуриз, ляхин дарди, дуфну майдандиин дийигънайи жара касар рякъюру. 4 Дугъу дураризра кІуру: – Учвура йиз тІумтІин багъдиз гъачай, учвузра ичв рубкьру гьякъи тувдиза. – Дурарра гъюру. 5 Хъанара лисунган ва лисхъан сяаьт шубубдихъанна, дугъу гьаци апІуру. 6 Хъа сяаьт хьубдихъан, жарадар дуфну дийигъну рякъюру. Дугъу дураризра гъапи: – Ярхи йигъди ляхин дарди гьаз дийигъначва? 7 Дурари дугъаз кІуру: – Учу сарира лихуз гъидисундарчу. Думуган дугъу дурариз кІуру: – Учвура йиз тІумтІин багъдиз гъарахай. 8 Хябяхъ гъабшиган, эйсийи чан мяишатдин гъулугъчийиз кІуру: – Нежбрариз дих дапІну, аьхиримжи вуди лихуз хъюгъдарилан ккебгъну, сарпидариина гъяйизкьан, дурариз чпин ляхнин гьякъи тув. 9 Хябяхъдихъна, сяаьт хьубари, лихуз хъюгъдариз са-саб динар пул тувру. 10 Садпидарди лихуз хъюгъдари, чпиз артухъди рубкьур дупну, фикир дапІнайи; амма дураризра, йикьрарнаъ айиганси, са-саб динар пултІан тувундайи. 11 Чпин гьякъи гъадабгъну, дурар эйсийиз чпин наразивал улупуз хъюгъю: 12 – Гьаму кьяляхъна гъафидар саб сяаьтнаътІан гъилихундар, хъа уву дурарна ярхи йигъди убцру ригъдикк гъилиху учу саб гъапІунва. 13 Эйсийи дурарикан сариз кІуру: – Я дуст кас! Узу увуз гиран ктапІурадарза; уву саб динар пулихъ лихуз рази гъахьундайна? 14 Яв рубкьруб гъадабгъну, гъарах, узуз кьанди лихуз хъюгъюризра увузкьануб тувуз ккундузуз. 15 Узуз йиз айибдикан узуз ккуниб апІуз ихтияр адаринхъа? Йиз мердвалиин уву гьаз бахил шулава? 16 Гьамци аьхиримжи вуйидарикан сарпидар, хъа сарпидарикан аьхиримжи вуйидар хьиди, фицики теклиф айидар гизаф ву, хъа кадагънайидар цІиб. 17 Ерусалимдиз гъягъру рякъюъ Исайи, Чан йицІикьюр ученик гъирагъдиз гьадаъну, дурариз гъапи: 18 – Магьа ухьу Ерусалимдиз гъягъюрахьа. Инсаниятдин Бай аьхю маллйиринна къанунчйирин хилиз тувди. Думу карсну йикІуз жаза гьадабтІиди. 19 Хъасин Думу аллагьсузарин хилиз, Дугъ’ина аьрвалар хуз, гъирмажарихьди Думу урччвуз ва дариз зигуз тувди. 20 Гьадму арайиъ Исайихьна, Чан баярра хъади, Зеведейин хпир гъафнийи ва, икрамнаъ ис духьну, дугъу фу-вуш тІалаб гъапІнийи. 21 Исайи дугъхьан, фу ккундуш гьерхиган, дугъу гьамци кІуру: – Гьаму йиз кьюр бализ Яв Паччагьлугъдиъ сар Яв арччул, тмунур гагул терефнаъ деуз гъита. 22 Исайира жаваб вуди гъапи: – Учву фу тІалаб апІураш, учвуз аьгъдарчвуз. Уз’ина гъюз ккайи аьзабар учвхьан аьх апІуз хьибдин? Дурари: «Ав, шулчухьан», – гъапнийи. 23 Исайи дурариз гъапи: – Дугъриданна, Узу кьабул апІуз ккайи аьзабар учвура аьх апІарчва, хъа Йиз арччулна гагул терефарихъинди дитувал Узлан асиллу дар: думу йишвар, Йиз Адашди шлиз улупнаш, гьадрариндар ву. 24 Му гафар гъеерхьиган, имбу йицІур ученикди гьадму кьюр чвуччвкан зарбди хъял апІуру. 25 Хъа Исайи, дурариз вардариз дих дапІну, кІуру: – Халкьарин гьякимари дурарин зиин агъавал апІурайивал ва аьхюдари дурарин зиин чпин гьюкум улупурайивал учвуз аьгъячвуз. 26 Хъа ичв арайиъ дици дарибшри: шлиз ичв арайиъ кІулинур хьуз ккундуш, гъит думу ичв гъайгъушнаъ ишри. 27 Шлиз ичв арайиъ сарпир хьуз ккундуш, гъит ичв лукІ ишри. 28 Гьаци Инсаниятдин Байра Чаз жарадари гъуллугъ апІбан бадали ваъ, хъа Чав гъуллугъ апІбан бадали ва гизафдарин гунгьарилан хил алдабгъуз кІури Чан уьмур тувбан бадали Дуфнайир ву. 29 Иса ва Дугъан ученикар Ерихондиан удучІвурайиган, дурарин кьяляхъди гизаф халкь гъюз хъюгъю. 30 Ва магьа рякъюхъ деънайи кьюр кури, чпин багхьантина Иса гъягъюрайивал аьгъю дубхьну, аьхю сесниинди гъапи: – Я Давудгъярин Бай! Ич язухъ апІина! 31 Халкьди дурариз ккебехъ кІуйи, аммаки дурари хъанара зарбди чІигъар апІуз хъюгъю: – Я Агъа, Давудгъярин Бай! Ич язухъ апІина! 32 Иса дугъужву ва, дурариз дих дапІну, гъапи: – Узкан фу ккундучвуз? 33 Дурари Исайиз кІуру: – Я Агъа, ич улар сагъ шлуси апІина. 34 Исайи, язухъ дапІну, дурарин уларик хил кучу, ва сабпну дурарин улариз рябкъюз хъюгъю, хъа дурарра Дугъахъди гъягъюру.

Матта 21

1 Дурар Ерусалимдиз багахь духьну, Елион дагъдиин али Вифания кІуру гъулахьна гъафиган, Исайи гьамциб буйругъ тувну, кьюр ученик гьаъру: 2 – Гьатму ичв гъаншариъ айи гъулаз гъарахай, душваъ, дибтІнайи дажи ва дидин гъудугъ рякъидичвуз; гьадрар, тудурчну, Узухьна аькъинай. 3 Ва нагагь учвуз шликІа фукІа гъапиш, дурар Агъайиз бакарди ву, Дугъу дурар дишлади кьяляхъ апІиди, йипай. 4 Му мици хьуб пайгъамбри дупнайи исихъайи гафар кІулиз удучІвбан бадали шулайи ляхнар вуйи: 5 «Ерусалим шагьриз йипайки, магьа, яв Паччагь, даждиин элеъну гъюра. Думу учвухьна гъудгъиинди, Фурс ктарди, гъиди». 6 Ученикари, душну, Исайи чпиз гъаписи гъапІу. 7 Дажина гъудугъ хъаъну гъахнийи, ва дурариин чпин палтар илирчнийи. Иса дурарин заълан элеънийи. 8 Халкьдикан гизафдари чпин палтар, хъа имбудари гьарарин цирклар-кюлерра рякъюкк ккирчуйи. 9 Исайин улихьдира, кьяляхъдира гъюрайи халкьди чІигъар апІури гъахьну: «Давудгъярин Бализ тяриф! Агъайин ччвурнахъ Гъюрайириз уж’вал ибшри! Аьршариз тяриф!» 10 Иса Ерусалимдиъ учІвиган, вари шагьур гьяракатназ гъафи; варди: «Му фуж вуйкІан?» кІури, гьерхуйи. 11 Хъа халкьдигъян: – Му Галилейин Назаретдиан вуйи Иса пайгъамбар ву, – кІури, жаваб тувнийи. 12 Иса Аллагьдин хулан гьяятдиз гъафи. Душваъ ариш-вериш апІурайидар вари утІукку, пул дигиш апІурайидарин устларна луфар масу туврайидарин кусрийир ккитІикІу. 13 Исайи дурариз гьамци кІурайи: – Йиз хулаз ккарагру хал пиди», кІури дибикІна, хъа учву дидкан тІарашчйирин мугъара дапІначва. 14 Хъасин Аллагьдин хулаз Исайихьна гизаф курарна ликудар хуру, ва Дугъу дурар сагъ апІуру. 15 Дугъу апІурайи аьламатнан ляхнар ва, «Давудгъярин Бализ тяриф!» кІури, чІигъар апІурайи баяр-шубар дяркъну, аьхюну маллйир, къанунчйир хъюлу ацІру. 16 Ва дурари Дугъаз кІуру: – Мурари фу кІураш, Увуз ебхьурануз? Исайира дурариз кІуру: – Ав, ебхьуразуз. Хъа учву Гирами китабарик: «Мухрихъ хъайидарин ва бицІидарин мелзналан Узуз тярифнан гафар пуз гъитдива», пну дибикІнайиб гъурхундарнучвахъа? 17 Дурар гьадушв’ин илмиди, Иса Вифания кІуру гъулаз гъушнийи ва душваъ йишв адапІнийи. 18 ГвачІнин шагьриз хъадакну гъюрайи Исайиз рякъюъ гаш шулу. 19 Ва, рякъюн гъвалахъ инжирин гьар дябкъну, Думу дидин багахьна гъушу, амма кІажарилан гъайри, дидигъ фукІа гъибихъундайи. Исайи, му гьариз сарун асуллагь бегьер дарибхрива, пну, амур гъапІнийи. Инжирин гьар сабпну гъеебццнийи. 20 Му аьгьвалат гъябкъю ученикар мюгьтал гъахьнийи: – Инжирин гьар мици сабпну фици гъеебццнийкІан? – гъапи дурари. 21 Исайи дурариз жаваб вуди гъапи: – Гьякь кІуразачвуз, эгер учвуз хъугъувал аш ва учву шаклу даршиш, му инжирин гьарин кІул’ина гъафиб гъубзри, учву гьатму дагъдиз: «Яв йишв’лан улдубчІвну, гьюлиъ убс», гъапиш, гьадмура тамам хьибди. 22 Хъугъувал ади учву ккарагури фу ккун гъапІиш, гьадму хьибдичвуз. 23 Хъасин Исайи, Аллагьдин хулан гьяятдиз дуфну, аьгъювалар улупурайиган, Дугъахьна аьхю маллйирна, къанунчйирна аьхюдар гъюру. Дурари гьерхру: – Уву му ляхнар фициб гьюкмиинди апІурава? Шли Увуз гьацдар ляхнар апІуз гьюкум тувну? 24 Исайи дурариз жаваб вуди гъапи: – Узура учвуз саб суал тувдиза. Эгер учву Узуз жаваб тувиш, Узура учвуз, мурар фициб гьюкмиинди апІураш, пидизачвуз. 25 Штуан апІру Ягь’яйиз штуан апІуз ихтияр шли тувну: Аллагьди, даршиш инсанари? Дурар, фикрарикк ккахъну, чиб-чпикди гьамци пуз хъюгъру: – Эгер ухьу «Аллагьдихьан» гъапиш, Дугъу ухьуз: «Дици вуш, дугъахъ гьаз хъугъундарчва?» пиди, 26 хъа «инсанарин терефнаан» пуз ухьуз халкьдихьан гучІ а, гьаз гъапиш халкьди, Ягь’я пайгъамбар ву кІури, гьисаб апІура. 27 Гьаддиз дурари Исайиз жаваб вуди гъапи: – Учуз аьгъдарчуз. Хъа Исайи дурариз гъапи: – Ари Узура, Йиз му ляхнар фициб гьюкмиинди апІураш, пидарзачвуз. 28 Учву фици фикир апІурачва? Сар касдиз кьюр бай айи. Думу касди, сарпирихьна дуфну, кІуру: – Жан бай! Душну, гъи ихь тІумтІин багъдиъ лих. 29 Думу, «Ккундарзуз!» – пну, жаваб тувну, хъасин, швумал духьну, лихуз гъягъюру. 30 Адашди, кьюрпи балихьна дуфну, дугъазра кІуру. – Ибшри, гъягъюрза, – жаваб туву му бали, амма думу гъушундайи. 31 Му кьюрикан адашдин тІалаб шли тамам гъапІну? Дурари кІуру: «Сарпири». Исайи дурариз кІуру: – Дугъриди кІуразачвуз: налук уч апІрударна чІуру аднан дишагьлийир учвутІан ухди Аллагьдин Паччагьлугъдиъ учІвди. 32 Фицики штуан апІру Ягь’я учвухьна дугъривалин рякъюъди гъафну. Учву дугъахъ хъугъундарчва, хъа налук уч апІрударна чІуру аднан дишагьлийир хъугъну. Учвуз гьамрар вари гъяркънушра, дугъахъ хъугъну, гунгьар гардандиъ гъидисундарчва. 33 Жара тахалусдихъра хъебехъай. Сар касди тІумтІин багъ ибтру ва дидлан арчил илтІибкІуру. Душваъ чяхир кчІюбкьру ичІ йибккуру ва паж апІуру хъасин, багъ тІумутІчйирихьна тувну, учв жара йишвариз гъягъюру. 34 Хъа тІумтІар хъуркьру вахт улубкьиган, дугъу, тІумтІин багъдикан чан бегьер хуз, лукІар тІумутІчйирихьна гьаъру. 35 ТІумутІчйири, дугъан гъуллугъчйир дидисну, дурарикан фуж урччвуру, фуж йивну йикІуру, шлиина гъван уьлюбхюру. 36 Эйсийи хъанара жара лукІар гьаъру, хъа дураризра гьаци гъапІнийи. 37 Аьхирки дугъу «белки дурариз дугъхьан нач шул», кІури, дурарихьна чан бай гьаъру. 38 Амма тІумутІчйири, эйсийин бай гъяркъиган, чиб-чпин арайиъ кІуру: «Му эйсийин ирсчи ву; гъачай думу йивну йикІухьа ва дугъан ирс ухьуз гъибтдихьа». 39 Думу дидисну, багъдиан адаъну, йивну йикІуру. 40 Ари гьамус багъдин эйси гъафиган, дугъу тІумутІчйирикан гьапІди? 41 Му пис касар дугъу тІанкь апІиди, хъа тІумтІин багъ вахтниинди чахьна бегьер рубкьру жара тІумутІчйирихьна арендайиз тувди. 42 Хъа Исайи, давам апІури, дурариз кІуру: – Учву Гирами китабариъ дидикІнайи гьаму гафар гъурхундарнучва: «Устйири гатІабхьу гъван мурччвануб гъабхьну. Му ухьуз гъябкъю аьламат Агъайи гъапІуб ву». 43 Гьаддиз кІуразачвуз, Аьршарин Паччагьлугъ учвхьан тадабгъиди ва думу лайикьлудариз тувди. 44 Хъа фуж гьадму гъвандиина ахъиш, думу парчйир хьиди; хъа шил’ина думу абхъиш, чархьиди. 45 Дугъан тахалусар гъеерхьу аьхюну маллйирна фарисйир Думу чпикан улхурайивалин гъавриъ ахъу. 46 Дурариз Думу дисуз ккун шулу, амма халкьдихьан гучІ шулу, гьаз гъапиш халкьди Думу пайгъамбар вуди гьисаб апІурайи.

Матта 22

1 Исайи хъанара дурар тахалусариинди гъаврикк ккауб давам гъапІнийи. 2 Аьршарин Паччагьлугъ сар гьамцир паччагьдиз ухшар ву. Сар паччагьди, гизафдариз сумчрик дупну, чан балин сумчрин мярака дюзмиш гъапІнийи. 3 Вахт улубкьган, дугъу чан лукІар хялариз теклиф апІуз гьау, амма дурариз гъюз ккун гъабхьундайи. 4 Дугъу хъанара дурарихьна чан жара лукІар гьаънийи: – Магьа, дюрхнайи жердар, якъар дурккну, хурагарра дапІну, вари гьязурди а, сумчрин демраз гъачай. 5 Садар, дугъан гафарихъ хъпебехъди, чпин хутІлариз, тмундар ариш-вериш апІуз гъушнийи. 6 Имбудари, дугъан лукІар дидисну, дурччвну йихуру. 7 Мидкан, пис хъял дуфну, паччагьди, чан кьушмар гьаъну, дурар тІанкь апІуру ва дурарин шагьрик цІа кипру. 8 Хъасин паччагьди чан лукІариз кІуру: – Сумчрин дем гьязурди а, хъа сумчриз теклиф дапІнайидар лайикьлу гъахьундар. 9 Гьаддиз, душну, кючйириъ алахькьандариз варидариз сумчрин демраз дих апІинай. 10 ЛукІарира, душну, кючйириъ чпиз алахькьандар вари: гьам ужудар, гьамсана харжидар хъади дуфну, сумчрин суфра хялари хъабцІру. 11 Хяларихьна удучІву паччагьдиз дураригъ сумчриз ярамиш дару палтар али сар кас рякъюру. 12 Паччагьди дугъаз кІуру: – Я дуст кас, сумчрин палтар алдарди увхьан мина гъюз фици гъабхьунвухьан? Дугъазра кІуруб гъибихъундайи. 13 Гьадмуган паччагьди лукІариз гъапнийи: – Му, ликар-хилар йитІну, чІатинди мучІушназ, ишуб, гьарай-суза, фигъан айишвазди гатІахьай. 14 Фицики теклиф дапІнайидар гизафдар ву, хъа кадагънайидар – цІиб. 15 Гьадмуган фарисйири, мушв’ан удучІвну, Исайи фукІа дюз даруб кІайиз ккеуз мясляаьт апІуру, 16 ва Дугъахьна, Гьироддин терефкрарра хъади, чпин ученикар гьаъру. Дурари Исайиз кІуру: – Я Мялим! Учуз Уву гьякьлу кас вуйивал ва инсанар Аллагьдин дугъри рякъюъ тІаърайивал аьгъячуз. Уву инсандин машназ, яна гъуллугъназ лигурдарва. 17 Гьаци вуйиган, учуз йип: Римдин паччагьдиз учу налук тувуз хай шулин, даш шулдарин? 18 Исайи, дурарин чІуру ниятар рякъюри, кІуру: – Кьюб маш гъяйидар, Узу гьаз ахтармиш апІурачва? 19 Учву налукди туврайи пул Узуз улупай. Дурари Дугъахьна саб манат хуру. 20 – Мидик шлин шикилна ччвур ка? – пну, гьерху Исайи дурарихьан. 21 – Римдин паччагьдин, – жаваб туву дурари. Гьадмуган Исайи дурариз кІуру: – Дици вуш, паччагьдинуб паччагьдиз, хъа Аллагьдинуб Аллагьдиз тувай. 22 Му гафар гъеерхьиган, дурар мюгьтал шулу ва Дугъхьан гьудучІвну гъягъюру. 23 Гьадму йигъан Дугъахьна гъачІидар чІиви шуб айиб дар кІурайи саддукйир гъюру, ва дурари Исайихьан гьерхру: 24 – Я Мялим! Муса пайгъамбри дупна: «Эгер фуж чаз велед даршиди гъачІиш, дугъан хпир дугъан чвуччвуз дитри ва чвуччвун тухум давам апІри». 25 Учу ургур чве вуйча, ва сарпир эвлемиш духьну, гъакІну ва, велед хътарди хьпаз лигну, хпир дугъан чвуччвуз дитру. 26 Гьамци кьюрпирра, шубурпирра, та-а-ап ургурпириина гъяйиз, вари йихуру. 27 Аьхирки гьадму хпирра йикІуру. 28 Гьаци гъабшиган, гъиямат йигъан вари чІиви шлуган, думу ургурикан фунурин хпир хьиди? Дурариз вардариз думу швуваз гъушнийи аьхир. 29 Исайи дурариз гьамциб жаваб апІуру: – Учву, я Гирами китабар, ясана Аллагьдин кьудрат аьгъдарди, улдугурачва. 30 ЧІиви гъахьиган, дурари я швушвар хурдар, я швуваз гъягъюрдар. Дурар аьршариъ айи малайикарси хьиди. 31 Хъа гъиямат йигъан гъийихдар чІиви хьувалин гьякьнаан Аллагьди учвуз гъапи гьаму гафар яраб учву гъурхундайкІан? 32 «Узу Ибрагьимдин Аллагь вуза, Исакьдин Аллагь вуза ва Якьубдин Аллагь вуза». Аллагь дийихнайидарин ваъ, хъа чІивидарин Аллагь ву. 33 Му гафар гъеерхьиган, халкь Исайин аьгъювалар улупбиин мюгьтал шуйи. 34 Исайи саддукйир фици чпин йишв’ин дитнуш, гъеебхьиган, фарисйирна саддукйир, сатІиди уч шулу. 35 Дурарикан сар къанунчийи, Исайи фу кІуруш кІури, Дугъхьан гьерхру: 36 – Мялим! Къанундиъ вартІан метлеблу табшуругъ фунуб ву? 37 Исайира дугъаз кІуру: – «Яв Агъа Аллагь, вари юкІв хъипну, вари рюгьнаан ва яв вари фагьмиан ккун апІин». 38 Му сабпи ва вартІан метлеблу табшуругъ ву. 39 Кьюбпибра гьаддиз барабар ву: «Яв багахь хьайир жвуваз жвувси ккун апІин». 40 Гьаму кьюб табшуругъдиин вари Къанун ва пайгъамбрарин БикІбар биналамиш духьна. 41 Саб йишв’ина уч духьнайи фарисйирихьан Исайи гьерху: 42 – Учву Месигьдин гьякьнаан фу фикир апІурачва? Думу шлин Бай ву? Фарисйири Дугъаз: – Давудгъярин Бай ву, – кІуру. 43 Исайи дурарихьан хъана гьерхру: – Дици вуйиган, Рюгьну ацІнайи Давудри Дугъаз Агъа фици кІура? Давудри дупнаки: 44 «Агъайи йиз Агъайиз гъапну: Узу Яв душмнар Яв ликарикк дахьайизкьан, Йиз арччул гъвалахъ деъ?» 45 Гьамци, Давудри Дугъаз Агъа кІурайиган, Думу дугъан Бай фици хьидихъа? 46 Сарихьанра Дугъаз жаваб тувуз гъабхьундар. Ва гьадму йигъланмина, Исайиз суалар тувуз кІури, Сарун сарира Исайихьан гьич сабдиканра гьерхуз кІубанвал гъапІундар.

Матта 23

1 Хъасин Исайи, халкьдихьна ва Чан ученикарихьна илдицну, гъапнийи: 2 – Мусайин Къанундин гъаврикк ккаъри, тахтниин къанунчйирна фарисйир деъна. 3 Гьаци вуйиган, гьадрари кІурубдихъ хъебехъай ва кІулиз адабгъай, хъа дурари апІурайиганси мапІанай, фицики дурари, фу ккун апІураш, кІура, хъа чпи гьаци апІурадар. 4 Читин къайдйир кІули гъахуз гъитри, дурари гъюнариин гъулайсуз гъагъар иливура, хъа дурар алишвлан ришвбан бадали чпи тІубкьан кучрадар. 5 Хъа дурари фукІа апІурашра, инсанариз рябкъри кІури апІурайиб ву. Гьамци дурари унтІланна хиллан илдижру Къанундиан гафар дидикІнайи чпин чІулар аьхю апІури шулу ва палтарин цІимцІлар ярхи апІури шулу. 6 Дурар мажлисар-демариъ ва мистариъ ужусдар йишвар дидисну деуз ккунидар ву. 7 Ва базар-майднариин чпи тебрик апІури ва адмийири чпиз «Мялим! Мялим!» кІури, дих апІури ккунидар ву. 8 Хъа учвуз гъит мялимар дарипри, фицики гьякь Мялим сар ву, хъа учву вари гъардшар вучва. 9 Ва жилариин саризра адаш макІанай, фицики учвуз сар Аьршарин АдаштІан адар. 10 Ва учвуз насигьятчйирра дарипри, фицики сар ву учвуз айи Насигьятчи, думура Месигь ву! 11 Учвкан варитІан заан вуйирикан, учвуз гъараваш ишри, 12 фицики, шли учв заанди дисури гъашиш, думу аскан апІиди, хъа шли учв асканди дисури гъашиш, гьадму заан хьиди. 13 Ичв гьял пис хьибди, кьюб маш гъяйи къанунчйирна фарисйир! Гьаз гъапиш адмийирин улихь Аьршарин Паччагьлугъдин раккар хъяркьрачва. Душваъ я учву учІврадарчва, я учІврайидар учІвуз гъитрадарчва. 15 Ичв гьял пис хьибди, къанунчйирна фарисйир, кьюб маш гъяйидар, гьаз гъапиш сар каскьан учвухъинди илтІикІбан бадали, учву гьюлериланна жиларилан илдицури шулучва; ва дицир кас гъидихъган, дугъкан учвутІан кьюб ражари бешбетер жегьеннемагьли апІуручва. 16 Ичв гьял пис хьибди, рякъ улупурайи курар. Учву: «Аллагьдин хул’инди ху гъапІну пну, баладар, – кІурачва, – хъа Аллагьдин хулаъ айи гъизилиинди ху гъапІур чав туву гаф тамам апІуз мажбур ву», – кІурачва. 17 Я курар ва ахмакьар! Фу заан ву: гъизил, дарш гьадму гъизил гирами апІурайи Аллагьдин хал? 18 Хъанара: «Шли Аллагьдиз багъишар апІру йишв’инди ху гъапІнуш, дугъаз, баладар, кІурачва, – хъа гьадина багъиш апІуз дубхнайибдиинди ху гъапІур чав туву гаф тамам апІуз мажбур ву», – кІурачва. 19 Эй кур духьнайидар! Фу заан ву: багъиш апІуз дубхнайиб, дарш думу гирами апІурайи марцци йишв? 20 Гьаци вуйиган, шли Аллагьдиз багъишар апІру йишв’инди ху апІураш, дугъу гьадушв’ин дивру варибдииндира ху апІура. 21 Аллагьдин хул’инди ху апІурайири, гьам Аллагьдин хул’инди, гьамсана душваъ яшамиш Шулайириинди ху апІура. 22 Зав’инди ху апІурайири Аллагьдин тахтниинди ва дид’ин Деънайириинди ху апІура. 23 Ичв гьял пис хьибди, къанунчйирна фарисйир, фицики учву, Къанунди дупнайибси, шюше, гьашв ва шивит укІарин йицІуб пайнакан саб пай туврачва, хъа Къанундиъ вартІан метлеблу вуйиб: гьякьлувал, рягьимлувал, хъугъвал – гьархрачва; сифте вуди гьамрар дапІну ккунду, хъа тмунубра дарапІди гъибтну ккундар. 24 Эй рякъ улупурайи курар! Учву хурагнак кабхъу мизмиз ктабгъурачва, хъа деве хътІюбкъюрачва. 25 Ичв гьял пис хьибди, кьюб маш гъяйи къанунчйирна фарисйир, гьаз гъапиш учву захна бушгъаб заълан марцц апІури шулучва, хъа дурарин айитІишв угъраш’валинна тямягькарвалин йимишари абцІри шулучва. 26 Эй кур фарисей! Сифте захранна бушгъабан айитІишв марцц апІин, дурарин чІатан терефра марцциб шлуганси. 27 Ичв пис гьял хьибди, кьюб маш гъяйи къанунчйирна фарисйир, фицики учву, уччвуди рякъюз кІури, чІатанди лизиди дарснайи, хъа айитІишв майтин кІурбарина жюрбежюр чиркишну ацІнайи накьварин гюмбтариз ухшар вучва. 28 Гьаци учвура, инсанариз заъланди дугъридарси улупури, айтІанди кучІляхваларина нягьякьвалари ацІначва. 29 Ичв гьял пис хьибди, кьюб маш гъяйи къанунчйир ва фарисйир! Учву, пайгъамбрариз ва жара марцци касариз гюмбтар диври, дурар кабалгурачва. 30 «Эгер учу ич ата-бабйирин девриъ яшамиш шули гъахьнийиш, учу дурарихъди пайгъамбрарин ифи удубзбаъ иштирак хьидайча», – кІурачва. 31 Гьаму гафариинди учву пайгъамбрар гъийихдарин веледар вуйивалин гьякьнаан ачухъди шагьидвал апІурачва. 32 Гьаци вуйиган, ичв абйирин тахсрар давам апІинай! 33 Эй битІар, битІран ифи айидар! Учву жегьеннемдин цІигъ гъитру жазайиккан фици гьергдичва? 34 Гьаддиз магьа Узу учвухьна пайгъамбрар, фагьумлуйир ва аьлимар гьаъраза. Учву дурарикан садар йивну йихидичва, хъа тмундар ичв мистариъ урччвидичва ва шагьриан шагьриз утІуккури хьидичва. 35 Гьякьлу Авелин ифдилан ккебгъну, Аллагьдиз багъишар туврушванна Аллагьдин хулан арайиъ учву йивну гъачІи Варахайин бай Закар’яйин ифдиина гъяйизкьан, жилариин нягьякьди удубзурайи вари ифдин тахсирра ичвуб хьибди. 36 Дюзди кІуразавуз: гьамусдин адмийириз гьаму варибдин жаза гьадабтІиди. 37 Эй, пайгъамбрар йивну йихру ва чахьна гьау илчйириин гъван уьлюбхру Ерусалим! Швнубан Узуз, пеъли чан хлинццариккна шюхъярси, яв халкь уч апІуз ккун гъабхьунзуз, хъа учву кІул ккивундарчва! 38 Лигай, магьа ичв хал ичІиди гъубзна. 39 Магьа кІуразачвуз: «Агъайин ччвурнахъ Гъюрайир ужувлакк ишри», кІури, учву дих дарапІкьан гагьди, Узу сарун рякъидарчвуз.

Матта 24

1 Иса Аллагьдин хул’ан удучІвиган, Дугъан ученикар, Дугъаз Аллагьдин хулан дараматар улупуз кІури, багахьна гъафи. 2 Исайи дурариз кІуру: – Гьамрар вари рякъюранчвуз? Дугъридан кІуразачвуз, мидин гъван гъвандиин гъубзидар, вари дабгъиди. 3 Иса Елион дагъдиин деънайиган, Дугъахьна ученикар гъюру ва жарадар алдру йишв’ин дурари Дугъхьан гьерхру: – Йип учуз, дици фила хьибди? Уву хъадакну гъюрувал ва гъиямат йигъ улубкьруб учуз фицдар лишнариинди аьгъю хьибди? 4 Исайи дурариз жаваб вуди кІуру: – Лигайгьа, шликІа учву алдатмиш дарапІбан бадали, ихтият йихьай. 5 Фицики гизафдар: «Узу Месигь вуза» кІури, Йиз ччвурнаккди гъиди ва гизаф халкьар алдатмиш апІиди. 6 Гьацира учвуз багахь ва ярхла дявйирикан ебхьидичвуз. Лигайгьа, гучІ мапІанай, фицики мурар духьну ккуни ляхнар ву, амма му сабан аьхир дар. 7 Фицики халкь халкьдиин, паччагьлугъ паччагьлугъдиин алархьиди. Гаш’валар ахьди, жюрбежюр йишвариъ жилар тІурччвиди. 8 Мурар вари бедбахтваларин, бицІир апІру аьзабарси, сифте кІулар ву. 9 Гьадмуган учвуз аьзабар тувди ва учву йивну йихиди; учву, Йиз ученикар хьпаз лигну, вари халкьариз даккун хьидичва. 10 Гьадмуган гизафдар хъугъвалихьан ярхла хьиди. Сари-сар масу тувуз хъюгъди, инсанарин арайиъ душманвал абхъди. 11 Хъасин хайлин кучІлин пайгъамбрар арайиз удучІвиди ва дурари гизафдар алдатмиш апІиди. 12 Къайдасузвалар гизаф артухъ хьпаз лигну, гизафдарин сар-сарихьна ккунивал цІиб хьибди. 13 Гьамрар вари шли аьхиризкьан аьх гъапІиш, гьадму дюрхну хьиди. 14 Гьарсаб миллетдиз ебхьруганси, Аьршарин Паччагьлугъдикан Ужувлан хабар вари дюн’яйиъ рабгъиди, гьадмуган гъиямат йигъ улубкьиди. 15 Гьамци Даниял пайгъамбри улихь ккимиди дупнайи Гирами йишваъ Аллагь гьясбикк ккадру алчагъвал учвуз гъябкъиган (урхурайир гъит гъавриъ ишри), 16 гьадмуган Ягьудия уьлкейиъ айидар дагълариз гьергри. 17 Фуж гьадму вахтна гъваин алди гъашиш, чан хулаъ айиб фукІа гъадабгъуз душвлан улдудучІври, 18 фуж хутІлиъ ади гъашиш, думу чан палтар гъадагъуз хулаз дурушри. 19 Гъагъдиъ айидаринна нанайихъ бицІидар хъайидарин гьадму йигъари гьял пис хьибди! 20 Гьамрар вари улукьну, учву гьергуз мажбур гъабхьи вахт я кьюрд, ясана султ йигъ дарибшри пну, ккарагай, 21 фицики гьадмуган дюн’я ккебгъхъанмина дарши ва сарун сабанра даршлусдар зурба бедбахтвалар хьиди. 22 Хъа гьадму йигъар Аллагьди кам гъапІундайиш, сар каскьан ккададархьрийи, амма Чав кадагънайидар бадали Дугъу гьадму йигъар кам апІиди. 23 Эгер учвуз думуган «Лиг, Месигь гьамшвахь хьа» вая «Гьатушвахь хьа» гъапиш, мухъугъанай, 24 фицики кучІлин месигьар ва кучІлин пайгъамбрар удучІвну, зурба аьламатнан лишнар улупуз хъюгъди. Дурар, чпихьан шулуш, гьелле Аллагьди кадагънайи касарра алдатмиш апІуз чалишмиш хьиди. 25 Магьа, Узу улихьмиди гъапунзачвуз. 26 Гьамци, нагагь учвуз «Магьа Думу ичІи чюлиъ а» гъапишра, дина мягъянай; «Магьа Думу хулариъ гьитІикІна» гъапишра, мухъугъанай. 27 Кьюркьлин цІа завун му кІулиан тму кІулиз фици крибчуруш, Инсаниятдин Байра гьаци гъиди. 28 Наан майит ади гъабшиш, гьадина люкьяр уч хьиди. 29 Хъа сабпну гьадму йигъарин кьяляхъ «Ригъ ктІубшвиди, вазли акв тувидар, завариан хядар ахьди, завар ккадаршвиди». 30 Гьадмуган зав’ина Инсаниятдин Балин лишан гъибди. Жилиин али вари халкьар ишиди, дурариз, Чан кьувват ва зурба гьяйбат хъади, дифариин алди гъюрайи Инсаниятдин Бай рякъиди. 31 Дугъура зурба сес апІру зурна хьади Чан малайикар гьаъди, дурари Дугъу ктагъу касар, жилин саб кІул’ан тмуну кІулиз гъяйизкьан, юкьбиб терефарихъанди уч апІиди. 32 Инжирин гьархъан мисал гъадабгъай: дидин кюлери кьюкьяр апІруган ва кІажар адашвруган, хьад багахь шулайивал аьгъю шулучвуз. 33 Гьаци учвузра, гьамрар вари гъяркъган, гьадму вахт, ичв раккнихъ хъайиси, багахь дубхьнайивал аьгъю йибхьай. 34 Гьякь кІуразачвуз: му вари улубкьайиз, гьамусдин насил гъубзди. 35 Заварна жилар ккадахьиди, хъа Йиз гафар дургидар. 36 Я аьршарин малайикариз, я Бализ – саризра йигъ ва сяаьт аьгъдар, хъа сар Адашдиз аьгъя. 37 Нюгьдин йигъари фици гъабхьнуш, Инсаниятдин Бай гъювалра гьаци хьибди: 38 жилиин шид улубчІвайиз улихьна Нюгь чан гимдиъ учІву йигъ’ина гъяйиз, вари фици ипІури-убхъури, швушвар хури, швуваз гъягъюри гъахьнуш 39 ва шид улубчІвайиз фици фтинкІа фикир ктарди гъахьнуш, Инсаниятдин Бай гъювалра гьаци хьибди. 40 Думу вахтна хутІлиъ кьюр нежбер лихури гъахьиш, дурарикан сарнур гъахиди, тмунур гъитди; 41 хилин рягъярихъ тахил рябгъюрайидар кьюр дишагьли гъахьиш, дурарикан сар гъадагъиди, тмунур гъитди. 42 Гьаци вуйиган, ул иливну мааханай, гьаз гъапиш ичв Агъа гъюру йигъ учвуз аьгъдарчвуз. 43 Учвуз аьгъю йибхьайки, хулан эйсийиз угъри гъюру вахт аьгъяйиш, думу даърахрийи ва чан хулаъ учІвуз гъидритрийи. 44 Гьаддиз учвура гьязурди гъузай, фицики учву ккилигури адру сяаьтна Инсаниятдин Бай гъиди. 45 Агъайин вартІан аькьюллу, вафалу гъараваш фунур ву? Дугъу имбу гъаравшариз ипІруб туврурди дурарин зиин гъуллугъчиди дерккур. 46 Хулаз гъафи агъайиз ляхин апІури гъяркъю гъуллугъчи бахтавар ву. 47 Гьякь кІуразачвузки, агъайи думу чан вари хал-йишван аьхюрди дерккди. 48 Хъа эгер думу гъуллугъчийи, чан кІваан: «Йиз агъа багаригьди гъидар» пну, 49 миди вуйи чавсдариз сабра дарди йивури гъахьиш, лутйирихъди ипІуз-убхъуз хъюгъиш, 50 агъа, думу ккилигури адру йигъан ва мялум дару сяаьтна хъуркьди 51 ва дугъу думу гъуллугъчи кьюб швур апІиди: дугъкан, кьюб маш гъяйидарикан апІруб апІиди, душваъ суза-фигъан, зурба ишуб абхъди.

Матта 25

1 Гьадмуган Аьршарин Паччагьлугъ, лампйир гъадагъну, йишвну жамран улихьна гъюрайи йицІур шураз ухшар хьибди. 2 Дурарикан хьур аькьюллудар ва хьур абдалдар гъахьну. 3 Абдал шубари, лампйир гъадагъну, дурарихъ хъубзруб гъадабгъундар. 4 Аькьюллудари лампйирихъди хъубзрубра гъадабгъуру. 5 Жамру кьан апІуради хьпаз лигну, дурар вари нивкІуз гъягъюру. 6 Хъа гьацІишваринган: «Магьа жам гъюра, улихьна удучІвай», – кІури, сесер утІурччвуру. 7 Вари шубар, гъудужвну, чпин лампйир акуди кархьуз хъюгъру. 8 Абдал шубари аькьюллудариз: «Ичв хъубзрубдикан учузра чавай, даршиш ич лампйир ктІушвура», – кІуру. 9 Хъа аькьюллудари: «Хъубзруб учузра, учвузра гьубкІидар. Масу туврайидарихьна душну, учвуз гъадабгъай», – кІуру. 10 Хъа дурар хъубзруб гъадабгъуз душну имиди, жам гъюру. Гьязурди айи шубар дугъахъди сумчрин демраз гъягъюру, ва сарун раккар хъяркьру. 11 Хъасин хъубзруб гъадабгъуз гъушу тмуну шубарира дуфну: «Я Агъа, я Агъа! Учуз раккин абцца», – кІуру. 12 Жамру дурариз жаваб вуди: «Дюзди кІуразачвуз, узуз учву зат аьгъюдаркьан дарзуз», – кІуру. 13 Гьаци вуйиган, мааханай, гьаз гъапиш я йигъ, я сяаьт аьгъдарчвуз. 14 Аьршарин Паччагьлугъ сар гьамцир касдихь тевуз шул: саб ражари ярхла уьлкйириз гъягъруган, дугъу чан гъуллугъчйириз дих дапІну, чан мяишатдиз лигуз табшурмиш гъапІнийи. 15 Дурарин удукьувалариз лигну, сарихьна хьуд агъзур, тмунурихьна кьюд агъзур, шубурпирихьна сад агъзур манат тувну, учв гъушнийи. 16 Хьуд агъзур манат гъибисури, дишлади думу ляхник кипру ва хьуд агъзурсана гъазанмиш апІуру. 17 Гьаци кьюд агъзур гъибисурира кьюд агъзурсан гъазанмиш гъапІнийи. 18 Хъа сад агъзур манат гъибисури, душну, жил деебккну, душвакк ккивну, пул жин гъапІну. 19 Саб хайлин вахтналан агъа гъюру ва дурарихьан арсран гьякь-гьисаб апІувал ккун апІуру. 20 Чахь хьуд агъзур манат гъибтури, пул дубхну, кІуру: – Агъа! Уву узухьна хьуд агъзур манат тувунва, магьа узу дурариинди хъана хьуд агъзурсан гъазанмиш гъапІунза. 21 Агъайи дугъаз кІуру: – Аферин увуз, ужур ва вафалу гъуллугъчи, бицІи ляхниъ узуз вафалу гъахьунва, аьхю ляхнар табшурмиш апІидизавуз; яв агъайин мяракайиз дуфну, дугъахъди шадвал апІин. 22 Гьаци кьюд агъзур манат гъибисурира, дуфну, кІуру: – Агъа! Уву узухьна кьюд агъзур манат тувунва, магьа дурарин кюмекниинди узу хъана кьюд агъзурсан гъазанмиш гъапІунза. 23 Агъайи дугъаз кІуру: – Увузра аферин, ужур ва вафалу гъуллугъчи, бицІи ляхниъ узуз вафалу гъахьунва, аьхю ляхин табшурмиш апІидизавуз; йиз мяракайиз дуфну, узухъди йиз шадвал пай апІин. 24 Хъасин сад агъзур манат хьайир дуфну, кІуру: – Агъа! Узуз уву учІру адми вуйиб аьгъяйзуз: дурубзру йишв’ан ккадабцІуз ва ктриву йишв’ан бегьер уч апІуз ккунир вува. 25 ГучІ кабхъури пул жиликк жин гъапІунза: магьа яв думу гъадабгъ. 26 Хъа агъайи дугъаз гьамци кІуру: – Эй жинжал ва темпел гъуллугъчи, увуз узу дурубзру йишв’ан ккадабцІрур ва ктриву йишв’ан бегьер уч апІрур вуйиб аьгъдайнуз? 27 Гьаддиз уву йиз пул ляхник кипну ккундийи, гъафири узу думу артухъ дубхьну гъадабгъидийза. 28 Гьаддиз тадабгъай мугъахь хьайи пул ва тувай йицІуд агъзур хьайирихьна. 29 Фицики гьарсар чаз айи касдиз хъанара тувди ва дугъан разу хьибди, хъа чаз адрурихьан айибра тадабгъиди. 30 Ва башаккадру гъуллугъчи чІатинди мучІушназ гатІахьай. Душваъ суза-фигъан, зурба ишуб хьибди. Хъасин Исайи кІуру: – Ебхьуз ибар кайидариз гьаму гафар ерхьри! 31 Инсаниятдин Бай Чан аднаъди малайикарра хъади гъафиган, Дугъу Чан адлувалин паччагьвал апІиди. 32 Дугъан улихь вари миллетар уч духьну хьиди, хъа Дугъу, марччлихъни марччар цІигьарихьан фици жара апІури шулуш, гьаци дурар сар-сарихьан жара апІиди: 33 марччар Чан арччул, цІигьар гагул терефнаъ дерккди. 34 Гьадмуган Паччагьди Чан арччул терефнаъ айидариз пиди: – Гъачай йиз адашдин ужувлакк ккахьнайидар, дюн’я ккебгъхъанмина учвуз гьязурди дебккнайи Аьршарин Паччагьлугъ ирсди кьабул апІинай. 35 Узуз гашди айзуз, учву Узуз уьл тувнийчва; Узу штухъ дахаргнайза, учву штухъди тухъ гъапІнийчва; Узу яд жви вуйза, учву Узу кьабул гъапІнийчва; 36 гъяцІалди айза, Уз’ин палат алабхьнийчва; иццури айза, учву Узуз гъилигнийчва; дустагъдиъ айза, Узухьна гъафнийчва. 37 Гьадмуган дугъри касари Дугъаз пиди: – Я Агъа! Уву учуз гашди дяркъну, Увуз фила уьл гьивнийихъа? Вая дахаргну ади, фила шид тувнийихъа? 38 Уву яд жви вуди, учу Уву фила кьабул гъапІнийихъа? Вая гъяцІалди дяркъну, учу Ув’ин фила палат алабхьнийихъа? 39 Уву кетІерццну ади, ясана дустагъдиъ ади дяркъну, учу Увухьна фила гъафнийихъа? 40 Ва Паччагь вуйи Инсаниятдин Бали дурариз жаваб вуди пиди: – Дюзди кІуразачвуз, учву гьаму Йиз бицІи гъардшарикан саризкьан гьаци гъапІнуш, гьадму учву Узуз гъапІу мисал ву. 41 Гьадмуган Дугъу чан гагул терефнахъ хъайидариз пиди: – Йиз улариккан дург духьну гъарахай, нянайикк ккайидар, иблисдиз ва дугъан хликк ккайидариз гьязур дапІнайи жегьеннемдин цІиз гъарахай. 42 Узуз гашди айзуз, учву Узуз уьл тувундайчва; Узу дахаргнайза, шид тувундайчва; 43 Узу яд жви вуди гъафиган, Узу кьабул гъапІундайчва; гъяцІалди айиган, Узухъ палат хъабхьундайчва; иццурайиган ва дустагъдиъ айиган, Узухьна гъафундайчва. 44 Гьадмуган дурарира Дугъаз жаваб вуди пиди: – Я Агъа! Увуз гашди вая дахаргну ади, гъураба вая гъяцІалди ади, кетІерццнади, вая дустагъдиъ ади дяркъну, учу Увуз гъуллугъ дарапІди фила гъитнухъа? 45 Гьадмуган Дугъу пиди: – Дюзди кІуразачвузки, учву гьаму Йиз бицІи гъардшарикан саризкьан гьаци гъапІундарш, Узузра гъапІундарчва. 46 Гьамци, нягьякьдар жегьеннемдин ккудудубкІру аьзабнаъ ахьди, хъа гьякьлудар ккудудубкІру уьмур хъапІри хьиди.

Матта 26

1 Вари гьаму гафар дупну ккудукІхъан, Исайи Чан ученикариз кІуру: 2 – Учвуз аьгъячвузки, кьюд йигълан Пасхайин машквар хьибди ва Инсаниятдин Бай хачриин дариз зигбан бадали душмнарин хилиз тувди. 3 Гьадму вахтна аьхю маллйирна аьхюдар Каяфа кІуру аьхюну маллайин гьяятдиъ уч духьнайи. 4 Дурари, аьмалдарвалиинди дидисну, Иса йикІуз йикьрар апІуру. 5 Амма дурари гьамци гъапнийи: – Анжагъ машквар йигъан ваъ, фицики халкьдик гъалабулугъ кабхъди. 6 Иса Вифанияйиъ хамран аьзар кади гъаши Шимондин хулаъ айи вахтна, 7 Дугъан багахьна, лизи ругдин бетисибдиъди багьа ягъра хьади, сар дишагьли гъюру. Дугъу гутдиз гъюн йивну илдигънайи Исайин кІул’ин ягъ улубзуру. 8 Му гъябкъю ученикарик, хъял кубчІвру. Дурари: – Гьамкьан ицци ниъ хъайи ягъ мугъу гьаз чІур гъапІу? 9 Му аьхю кьиматнахъ масу тувну, пул касибариз пай апІуз шулийда, – кІуйи. 10 Дурарин гъавриъ ахъу Исайи кІуру: – Дишагьлийиз нач шлуси гьаз кІурачва? Узу бадали дугъу ужуб ляхин апІура. 11 Касибар гьарган учвухъди хьиди, хъа Узу учвухъди гьарган хьидарза. 12 Гьаму ягъ Йиз кІулкан ктатбиинди дугъу Йиз беден накьвдик кивбан бадали гьязур апІура. 13 Гьякь кІуразачвуз: дюн’яйиъ му Ужувлан хабар наан рабгъури гъабшишра, думу кІваин апІиди ва дугъу гъапІубдикан ктибтиди. 14 Гьадмуган йицІикьюрикан сари – Искариот Ягьуда кІурури, аьхюну маллйирихьна душну, кІуру: 15 – Иса дисуз учвуз кюмек гъапІиш, узуз фу тувдичва? Дурари дугъаз, арсран сумчІур манат тувурча, гъапи. 16 Гьаддихъанмина дугъу Иса масу тувуз гъулай вахт абгури шулу. 17 ЛичІван лавшарин машквран садпи йигъан Исайихьна дуфну, Дугъан ученикари гьерхнийи: – Увуз пасхайин хураг учу наан гьязур дапІну ккундувуз? 18 Исайи дурариз кІуру: – Шагьриз сар фланурихьна гъарахай ва дугъаз йипай: «Мялимди гьерхра: „Узу пасхайин машквар Йиз ученикарра хъади яв хулаъ апІурза“». 19 Исайи гъаписи вари дапІну, ученикари пасхайин хураг гьязур гъапІнийи. 20 Хябяхъ гъабхьибси, Иса Чан йицІикьюр ученикдихъди гъюн йивну суфрайихъ деънийи. 21 Дурари ипІуз хъюгъиган, Дугъу кІуру: – Гьякь кІуразачвуз: учвкан сари Узу масу тувди. 22 Бегьем дерд дубхьну, гьарури Дугъаз пуз хъюгъю: – Я Агъа, думу узу дарза аьхир? 23 Дугъура жаваб вуди кІуру: – Узухъди саб гъабрак уьл кубсрайири Узу масу тувди. 24 Гьамци, Гирами китабариъ улупнайиганси, Инсаниятдин Бай масу тувди, амма шли Инсаниятдин Бай масу тувраш, дугъаз бала хьибди: думу касдиз, учв бабкан гъахьундайиш, ужу шуйи! 25 Иса душмнариз масу тувуз рази гъахьи Ягьудайи кІуру: – Думу узу дарза аьхир, Мялим? Исайи дугъаз кІуру: – Гьаци уву кІурава. 26 Дурари хураг ипІурайи вахтна, Исайи уьл гъадабгъуру, ужуб сяаьт ибшри дупну, думу гьудубтІуру ва, ученикарихьна туври, кІуру: – Ма гъадабгъай, ипІинай: му Йиз беден вуйиз. 27 Аллагьдиз чухсагъул дупну, зах гъадабгъуру ва, ученикарихьна тувну, кІуру: – Мид’ан варидари убхъай. 28 Му цІийи йикьрар йитІурайи ва гизафдарихъанди, гунгьарилан хил алдабгъбан бадали, удубзурайи Йиз ифи вуйиз. 29 КІуразачвузки, тІумтІарин му чяхир сарун, Йиз Адашдин Паччагьлугъдиъ учвухъди цІийи чяхир убхъайизкьан, убхъидарза. 30 Хъасин Аллагьдин тярифназ мяъли дапІну, дурар Елион дагъдиз удучІвуру. 31 Дагъдиина удучІвиган, Исайи ученикариз кІуру: – Учву варидари ахъли Узу гъитдичва, фицики Гирами китабариъ дибикІна: «Марччлихъан йикІидиза, ва лижраъ айи марччар даргъиди!» 32 Хъа Узу чІиви гъашиган, Узу Галилейиз гъягъидиза ва душваъ учвуз ккилигури хьидиза. 33 Хъа Петри Исайиз жаваб вуди гъапи: – Варидари Уву гъитишра, узу гьич саб вахтнара дици дарапІарза. 34 Исайи дугъаз гъапи: – Гьякь кІуразавуз, ахъли даттли уьъйир дапІну ккудубкІайиз, Узу шубубан «аьгъюр дарзуз» пидива. 35 Петри Дугъаз кІуру: – Узу Увухъди йикІуб алабхъурушра, Уву «аьгъюр дарзуз» пидарза. Имбу ученикарира гьамцдар гафар гъапнийи. 36 Хъасин Иса дурарихъди Гефсимания кІуру йишваз гъягъюру ва Дугъу чан ученикариз кІуру: – Учву гьамшвахь деай, хъа Узу душну гьатушвахь ккарагидиза. 37 Чахъди Петрна Зеведейин кьюрид баярра гъадагъу. ЮкІв лап пашман дубхьну, Дугъак сикинсузвал кабхъру. 38 Гьадмуган Исайи дурариз гъапи: – Йиз юкІв яман хажалатнаъ абхънайиз, гьамшвахь Узухъди гъузай, гъафил махьанай! 39 ЦІиб тинаси душну, машнахъди жил’ина ис духьну, Думу гьамци кІури, ккарагуз хъюгъру: – Я Аьршарин Адаш, эгер шулуш, му аьзаб Уз’ина дяргъруси апІина, вушра, Узуз ккуниси ваъ, хъа Увуз ккуниси ибшри. 40 Хъасин ученикарихьна гъафиган, лигуруш, дурар нивкІуз душнади рякъюру. Думуган Дугъу Петриз кІуру: – Саб сяаьтнаъкьан Узухъди даърахди гъузуз шуладарин учвхьан? 41 Гъафил махьанай. Тямягьвалариъ адрахъбан бадали, ккарагай. Рюгь кІубан ву, хъа беден – зяиф. 42 Хъана, гьудучІвну, Думу кьюбпи ражарира ккарагуру: – Я Адаш, эгер Узу му аьзабнаккан ккадауб мумкин дарш, Яв гаф тамам ибшри. 43 Кьяляхъ гъафириз, дурар хъана даахну рякъюру. Дурарин улар гъагъи духьнайи. 44 Дурар гъитну, хъана тинаси гьудучІвну, Исайи шубубпи ражари гьадму гафар кІури, Чан ккарагуб текрар гъапІнийи. 45 Хъасин ученикарихьна дуфну, дурариз кІуру: – Гьамусра даахну имичва, рягьятвал гъадабгъуранчва? Инсаниятдин Бай гунагькрарин хилиз тувру вахт магьа сарун хъубкьна. 46 Гъудужвай, гъягъюрхьа; лигайки, Узу масу туврайир багахь шула. 47 Дугъу гьеле гьамци кІури имиди магьа йицІикьюрикан сар Ягьуда дуфну хъуркьу. Дугъахъди, ханжларна маргъар хьади, аьхюну маллйирина аьхюдари гьаънайи адмийирин аьхю гъварчра хъайи. 48 Иса масу тувуз дуфнайи Ягьудайи дурариз гьамци дупнайи: салам тувруган, узу шлиз мак гъапІиш гьадму Иса ву, ари Гьадму дисай. 49 Дугъу, дишлади Исайихьна дуфну, гъапи: «Салам Увуз, Мялим!» – ва Дугъаз мак гъапІу. 50 Исайи дугъаз кІуру: – Яв апІуз ккайи ляхин апІин, дусткас. Дишла, алархьну, эскрари Иса дисуру. 51 Гьадму арайиъ Исайин ученикарикан сари, сабпну чан ханжал уьчІюбгъну, йивну, аьхю маллайин гъаравшин иб ктабтІуру. 52 Гьадмуган Исайи дугъаз кІуру: – Яв ханжал чан гъашариъ ив, фицики ханжал уьчІюбгъю гьарсар ханжалихьан йикІиди. 53 Ваяки Узу Йиз Адашдикан тІалаб гъапІиш, Дугъу Узуз гьамусяаьт малайикарин йицІикьюб кьушумтІан артухъ тутрувур, кІурана? 54 Даршиш, гьаму вари гьамци дубхьну ккунду, кІури, Гирами китабариъ дидикІнайидар фици кІулиз удучІвиди? 55 Хъасин Исайи халкьдиз кІуру: – Узу дисуз, гъачагъ дисурайиганси, ханжларна маргъар хьади дуфначва. Узу гьар йигъан Аллагьдин хулаъ аьгъювалар улупури деъну шуйза, хъа думуган Узу гъидисундайчва. 56 Вари гьаму ляхнар пайгъамбрарин Китабариъ дибикІнайиб кІули удубчІвуз шулайидар ву. Гьадмуган вари Дугъан ученикар, Иса гъитну, гьергнийи. 57 Иса гъидисдари Думу аьхюну малла Каяфайихьна гъухнийи, душваъра къанунчйирна аьхюдар уч духьнайи. 58 Петр ярхлаанси Исайихъди Каяфайин гьяятдихьнакьан гъафнийи ва, айитІинди учІвну, аьхир фициб шулуш лигуз кІури, Аллагьдин хулан эскрарихъди деънийи. 59 Аьхюну маллйири, аьхюдари ва вари Диванханайин миди вуйидари, Иса йикІбан къарар адабгъбан бадали, Дугъаз къаршуди кучІлин шагьидвалар агурайи. 60 КучІлин шагьидвал апІури, гизафдар уч гъахьнушра, дурариз лазим вуйи шагьидвалар гъидихъундайи. Аьхирки кьюр кас багахьнаси гъафи 61 ва дурари гъапи: – Мугъу кІурайи: Узхьан Аллагьдин хал рабгъуз ва шубуд йигъан думу цІийи кІултІан тикмиш апІуз шулзухьан. 62 Маллйирин аьхюри, гъудужвну, Исайиз гъапи: – Уву гьаз чІалкьан кІурадарва? Мурари апІурайи шагьидвал дюзиб вуйин? 63 Исайи чІалкьан гъапундайи. Маллйирин аьхюри гъудужвну Исайиз кІуру: – Узу Аллагьдин улихь Увкан дишди пуб тІалаб апІураза: Аллагьдин Бай Месигь Уву вуна? 64 Исайи дугъаз кІуру: – Уву гьаци кІурава. Дидланна гъайри, Узу кІуразачвуз: гьамусдихъантина Инсаниятдин Бай вари Удукьрурин арччулну гъвалахъ деъну ва дифариинди гъюри рякъидичвуз. 65 Гьадмуган маллйирин аьхюри, хъял улупури, чаин али палтар дячІяргъну, кІуру: – Мугъу Аллагь гьясбикк ккадру гафар кІура! Ухьуз сарун шагьидар гьаз ву? Магьа гьамусяаьт учвуз варидариз Мугъан Аллагь гьясбикк ккадру гафар гъеерхьунчвуз! 66 Учву фици фикир апІурачва? Дурарира жаваб вуди гъапи: – Думу тахсиркар ву ва аьжализ лайикь ву. 67 Гьадмуган садари Дугъан машнаъ тутйир атІу, гъурдар гъиву. Тмундари гарцІлариккан бачІар ккадату 68 ва «Увуз шли гъивнуш, йип ари, Уву Месигь вуш?» – кІури, кялхъри гъаши. 69 Хъа Петр чІат гьяятдиъ деънайи. Дугъахьна дуфну, сар гъараваш дишагьлийи кІуру: – Увура Галилейжви Исайихъ хъади гъахьунва. 70 Амма думу варидарин улихь инкар гъахьи: – Уву фу кІурашра, аьгъдарзуз. 71 Петр урнариан удучІвурайиган, думу сар жара гъараваш дишагьлийиз рякъюру, ва душваъ айидариз кІуру: – Гьаму кас Назаретдиан вуйи Исайихъ хъади гъахьну. 72 Ва дугъу хъанара: «Узуз думу Кас аьгъюркьан дарзуз», – пну, ху апІуру. 73 Саб арайилан гьамшварихь дийигънайидари, багахьнаси дуфну, Петриз кІуру: – Дугъриданна увура гьадрарикан сар вува, фицики яв улхбан нугъатнура гьаци вуйиб улупура. 74 Думуган Петр: – Узуз думу Кас гьич аьгъюркьан дарзуз, – кІури, хуйир апІуз хъюгънийи. 75 Гьаму арайиъ даттли уь-уь гъапІу. Петрин, Исайи гъапи: «Даттли уьъйир дапІну ккудубкІайиз, Узу шубубан „аьгъдарзуз“ пидива», – кІуру гафар кІваина гъюру. Ва гьадлин удучІву Петр, дерд дубхьну, зарбди гъишнийи.

Матта 27

1 ГвачІин улубкьиган, вари аьхю маллйирина аьхюдари, уч духьну, Иса йикІуз къарар адабгънийи. 2 Дугъан хилар-ликар йитІуз гъитну, Думу духну, Римди Ягьудияйиъ гьюкумдар вуди дерккнайи Понтий Пилатдин хилиз тувру. 3 Гьадмуган Иса масу туву Ягьудайи, Думу йикІуз ккайиб аьгъю дубхьну, чав гъапІубдиин швумал духьну, сумчІур арсран манат аьхюну маллйирихьна ва аьхюдарихьна кьяляхъ тувнийи. 4 Дугъу дурариз гъапнийи: – Тахсирсуз кас масу тувну, гунагь шлу ляхин гъапІунза. Дурарира гъапнийи: – Ич дидихъ фу хъа? Думу яв гъайгъу ву. 5 Ягьуда, арсар Аллагьдин хулаз гатІахьну, душну, чав учв ккирхну йикІуру. 6 Аьхюну маллйири, арсран пулар гъадагъну, гъапи: – Мурар Аллагьдин хулан хазнайиъ дивуз хай шулдар, фицики дурар ифдихъ туву кьимат ву. 7 Мясляаьт дапІну, яд агьалйир кивбан бадали, арсран пуларихъ, сар гъабар апІру устайин хутІил гъадабгънийи. 8 Гьаддиз гьадму хутІлиз гьамусра «Ифдин хутІил» кІури ими. 9 Гьамци Еремия пайгъамбрин мелзналан гъапи гьаму гафар кІулиз удучІвну: «Израилин халкьди Дугъан кьимат вуди дебкку сумчІур арсран манат гъибиснийи 10 ва, узуз Агъайи апІин гъапиганси, сар гъабар апІру устайин хутІлихъ тувнийи». 11 Иса гьюкумдрин улихь деркку, гьюкумдри Исайихьан гьерху: – Уву «жугьдарин Паччагь» вуна? Исайи гъапи: – Уву гьаци кІурава. 12 Маллйирина аьхюдари Исайик тахсрар кирчруган, Дугъу дурариз саб жавабра тувундайи. 13 Гьадмуган Пилатди Дугъаз кІуру: – Увуз къаршу вуди фукьан шагьидвалар апІураш, ебхьурадарнуз? 14 Исайи саб гафнииндикьан жавабра тувундайи, хъа гьюкумдар мид’ин гизаф мюгьтал гъахьнийи. 15 Пасхайин машкварган, гьюкумдри, халкьди тІалаб гъапІган, сар дидиснайир деетру аьдат ади гъабхьнийи. 16 Гьадму вахтна дустагъдиъ Варава кІуру вардин мелзниин али чІуру кас айи. 17 Вари уч гъашиган, Пилатди дурарихьан гьерхру: – Узу фуж деетну ккундучвуз: Варава, дарш Месигь ву кІурайи Иса? 18 Пилатдиз дурари Иса бахилвалиан масу тувнайиваликан аьгъяйи. 19 Пилат суд апІру йишв’ин деънайи вахтна, дугъан хпири дугъаз гьамци пуз гъуллугъчи гьаънийи: – Гьадму марцци Касдин суд апІбахьан ярхла йихь, гьаз гъапиш узуз сан Дугъкан гучІ ккапІру нивкІ гъябкъюнзуз. 20 Хъа маллйирина аьхюдари халкь, Варава ккадаъну, Иса пуч апІуб ккун апІинай, кІури, алауру. 21 Гьадмуган Пилатди гьерхру: – Гьамрарикан узу фуж деетну ккундучвуз? Дурари: «Варава», – гъапнийи. 22 Пилатди дурарихьан гьерхру: – Хъа Месигь ву кІурайи Исайикан гьапІза? Варидари: «Думу дариз зиг», – кІуру. 23 – Фу чІуруб гъапІнухъа Мугъу? – кІуру дурариз Пилатди. Амма дурари имбубсан артухъ чІигъар апІуйи: – Думу хачрак карс! 24 ФтикІа кюмек дарапІрайиб ва халкьдик гъалабулугъ кабхърайиб дябкъну, Пилатди, шид хуз гъитну, чан хилар дижикІну, кІуру: – Узу Му марцци Касдин ифи удубзбан тахсиркар дарза, учвуз ккуниси апІинай. 25 Дугъаз жаваб вуди вари халкьди гъапи: – Дугъан ифи уч’ин ва ич веледариин гъубзри. 26 Гьадмуган Пилатди дурарихьна Варава деетуру. Иса кІуруш, гъирмажарихьди дурччвну, хачрак карсуз эскрарин хилиз тувру. 27 Гьадмуган эскрари Иса гьюкумдрин гьяятдиз гъахуру, Дугълан вари эскрарин десте илтІибшуру. 28 Думу гъяцІал дапІну, Дугъ’ин аку-элвен халат алабхьуру. 29 Зазарикан тажсиб дапІну, Дугъан кІул’ин улубкІуру ва Дугъан арччул хилиъ маргъ ивру, хъа Дугъан улихь кьамкьариина ис духьну, «Яшамиш ишри жугьдарин Паччагь» кІури, бегьем кялхъюз хъюгъру. 30 Хъасин, тутйир алатІури, хил’ан маргъ уьчІюбгъну, Дугъан кІуллан йивуз хъюгънийи. 31 Исайиина бегьем аьрвалар хублан кьяляхъ, Дугъхъан халат хъидибтну, Дугъ’ин Чан палтар алахьуру ва хачрак карсуз гъахуру. 32 Шагьриан удучІвурайиган, дурариз Симон кІуру сар Киринеяжви алахъуру. Думу Иса дариз зигру хачсиб дарагъаж гъабхуз мажбур апІуру. 33 «Келле» мяна айи Голгофа кІуру йишв’ина гъафиган, 34 Дугъаз убхъуз сиб кипнайи чяхир тувру. Дугъаз, думу дадмиш дапІну, убхъуз ккун гъабхьундайи. 35 Иса дариз гъизигхъан, эскрари, тупут ипри, Дугъан палтар чпин арайиъ пай гъапІу. 36 Дурар Иса гъаравлиъ уьрхюри деъну, гъузу. 37 Исайин кІулихъ, Дугъан тахсир улупнайи гьамциб кьул кебху: «Му Иса, жугьдарин паччагь ву». 38 Исайихъди хъана кьюр гъачагъра – сар Дугъан арччул, тмунур гагул гъвалхъанди – дариз гъизигнийи. 39 Душвхьантина гьудучІвну гъягърудари Дугъаз люкьнар апІуйи, намуссуз кІуруганси кІулар тІурччвуйи ва кІуйи: – Эй Аллагьдин хал дабгърур ва шубуд йигъан диврур! Уву Аллагьдин Бай вуш, Уву уьрх ва хачракан кудучІв. 41 Гьаму саягъниинди аьхю маллйирира, къанунчйирихъдина аьхюдарихъди сатІиди Исайик кялхъри, кІуйи: 42 – Жарадар уьрхюйи, гьамус Чахьан Учв уьрхюз шуладар! Думу Израилин Паччагь дарин? Гъит гьамус хачракан кудучІври, ва гьадмуган Дугъахъ хъугъархьа! 43 Дугъу Аллагьдик миж кивнайи. «Узу Аллагьдин Бай вуза», – КІурайир, Думу, Аллагьдиз Гирамир вуш, Аллагьди уьрхри. 44 Гьацира Дугъахъди дариз дизигнайи гъачгъарра Дугъак кялхъюйи. 45 Лисунган вари жилар мучІушну ккаъру. Гьамци шубуб сяаьтнаъ гъубзнийи. 46 Хъа сяаьт шубубдихьна Исайи зарбди чІигъ апІуру: – Эли! Эли! Лама савахфани? – яна: «Я Адаш! Я Адаш! Уву Узу гьаз гъитунва?» 47 Душвахь хьайидарикан бязидариз му гафар ерхьуру ва кІуру: – Дугъу Ил’яс пайгъамбриз дих апІура. 48 Гьадмусяаьт дурарикан сар, жаргъну дуфну, бамбагсибдиин учІвру чяхир улубзну, думу маргълиинди, убхъуз кІури, Дугъан ушвнихьна гьачІабккуру. 49 Тмундари гъапи: – Гъит Думу Чан гьялнаъ, гьеле Думу уьрхюз Ил’яс гъюруш, лигурхьа. 50 Исайи хъанара зарбди чІигъ апІуру, ва Дугъу Чан жан тувру. 51 Сабпну Аллагьдин хулаъ гьебхнайи перде, зиълан исина дячІябгъну, кьюб швур шулу, жилар дутІурччвну, гъарзар-гъванар тІуркІуру. 52 Накьвар ачмиш духьну, гизаф марцци касар чІиви шулу. 53 Иса чІиви хьублан кьяляхъ, накьвариан удучІву марцци касар Ерусалимдиз гъафнийи ва душваъ дурар гизафдариз гъяркънийи. 54 Исайин гъаравлиъ айи юзбашийина дугъахъди хъайи эскрари, жилар тІурччвувал ва мушв’ин гъаши жара гьядисйир гъяркъиган, бегьем гучІ кабхъну, гъапи: – Му дугъриданра Аллагьдин Бай вуйиштІан. 55 Гьацира, Исайиз гъуллугъ апІуз кІури, Дугъахъди Галилейиан дуфнайи гизаф дишагьлийирра, ярхлаан лигури, дийигънайи. 56 Дурарин арайиъ Магдалайиан вуйи Мар’ям, Якьубдинна Юсуфдин дада вуйи Мар’ям ва Зеведейин хпирра айи. 57 Хябяхъ гъабшиган, Исайин ученик Аримафейиан вуйи Юсуф кІуру сар девлетлу кас гъюру. 58 Дугъу, Пилатдихьна дуфну, Исайин беден чахьна тувуб тІалаб гъапІу. Пилатдира Думу тувуз амур апІуру. 59 Юсуфди Исайин беден кадабгъну, думу марцци ирин кафнигъян гъидиржуру. 60 Хъасин гъарзариъ утІубкнайи чан хусуси таза накьвдиъ Дугъан беден ивнийи ва, душваз учІврушвахь аьхю гъван гьипну, гъушнийи. 61 Магдалайиан вуйи Мар’ямна тмуну Мар’ям накьвдин гъаншариъ деъну гъузру. 62 Хъайигъан – му султ йигъ вуйи – аьхюну маллйирина фарисйири, Пилатдихьна дуфну, 63 гьамци кІуру: – Ич аьхюр, гьадму КучІляхри, Чав чІивиди имиди: «Узу гъачІихъан шубуд йигълан чІиви хьидиза», – гъапиб кІваина гъафнийич. 64 Гьаци вуйиган, шубуд йигъ улдубчІвайиз, накьв ужуди уьбхюз амур апІин, даршиш Дугъан ученикари беден жин дапІну, хъасин халкьдиз: «Думу гъачІихъан чІиви гъахьну», – пиди, хъа му кучІал сабпибтІан писуб хьибди. 65 Пилатди дурариз гъапи: – Магьа учвуз гъаравлар, учвуз аьгъюганси накьв уьбхяй. 66 Дурарира, душну, гъаравлар дерккнийи. Дидихъ хъайи гъван мюгькам дапІну, дид’ин пичат алабснийи.

Матта 28

1 Султ йигъ улдубчІвну, гьяфтайин садпи, яна элгьет йигъан сигьрин ухди, Магдалайиан вуйи Мар’ямна тмуну Мар’ям Исайин накьвдиз лигуз гъюру. 2 Сабпну зарбди жилар тІурччвуру, фицики аьршариан Аллагьдин малайик гъюру ва, накьдихь гьипнайи гъван гьидипну, дид’ин деъру. 3 Дугъан рябкъюб кьюркьлин цІасиб, палат лизи йифсиб вуйи. 4 Дугъхьан гучІ гъабхьи гъаравларин жандиъ зиз абхънийи, дурар майтарси гъахьнийи. 5 Малайикди, чІалниина дуфну, дишагьлийириз гъапи: – ГучІ мапІанай, учву дариз гъизигу Иса агури дуфнайиб аьгъязуз. 6 Амма Думу мушваъ имдар. Думу, Чав гъапиганси, чІиви гъахьну. Багахь духьну, Думу дитну гъахьи йишваз лигай. 7 Тяди душну, Дугъан ученикариз йипай: «Иса гъачІир чІиви гъахьну. Думу учвутІан ухди Галилейиъ хьиди, душваъ Думу рякъидичвуз. Магьа, узу учвуз йиз кІуруб гъапунза». 8 Дурар дишлади накьвдихьан гьудучІвну, гучІ кабхъну ва кьадар адрукьан шадра духьну, ученикариз цІийи чІал апІуз, жаргъури гъушу. 9 Сабпну Иса Учв дурарин улихьна гьудучІвуру, салам тувру. Дурарра, Исайиз багахь духьну, Дугъан ликар хаблан дапІну, Дугъаз икрамнаъ дахьу. 10 Гьадмуган Исайи дурариз кІуру: – ГучІ мапІанай. Душну, Йиз гъардшариз, Галилейиз гъарахай, кІуру хабар тувай, душваъ дурариз Узу рякъиди. 11 Дишагьлийир рякъюъ имиди, гъаравларикан бязидари шагьриз дуфну, варибдикан аьхюну маллйириз ктибтнийи. 12 Мурарира, аьхюдарихъди сатІиди мясляаьт дапІну, эскрариз бегьемди пул тувру ва кІуру: 13 – Варидариз йипайки: «Йишвну, учу даахну имиди, Дугъан ученикар дуфну, Думу жин дапІну гъурхну». 14 Нагагь му хабар гьюкумдрихьна хъубкьиш, учу учвуз гаф дяргъруганси апІидича. 15 Дурари, пул гъадабгъну, чпиз гъапибси гъапІнийи. Хъа гьаму аваза жугьдарин арайиъ гъира дарабгъну ими. 16 Хъа йицІисар ученик Галилейиз Исайи гъарахай гъапи дагъдиина гъафнийи. 17 Думу гъяркъиган, дурар икрамнаъ дахьнийи, амма сакьюдар шаклу гъахьнийи. 18 Багахьна дуфну, Исайи дурариз гъапи: – Узуз завариин ва жилариин вари гьюкум тувназуз. 19 Гьаци вуйиган, душну, Адашдин, Балин ва Гирами Рюгьнан ччвурнахъан штуан апІури, вари миллетарикан Йиз ученикар апІинай. 20 Дурариз Узу учвуз табшурмиш гъапІкьандар вари кІули гъахуз улупай. Хъа Узу, гъиямат йигъ хьайизкьан, гьаммишан учвухъди хьидиза.

Марк 1

1 Аллагьдин Балкан, Иса Месигьдикан вуйи Ужувлан хабар гьамци ккебгъра. 2 Ишая пайгъамбрин китабдиъ дибикІна: «Магьа, Яв улихьди Узу Йиз дюн’яйиз кас гьаъраза. Дугъу Увуз рякъ гьязур апІиди. 3 ИчІи чюлиъ дих атІабгура, „Агъайиз рякъ ккабалгай. Дугъаз рякъяр-жилгъйир дишдар апІинай!“» 4 ИчІи чюлиъ, адмийир штуан апІури, гьар касди чан тахсрар гардандиъ дисбан, инсанар штуан апІбан ва гьамци чпин гунгьарилан хил алдабгъбан бадали, аьгъювалар рагъури, Ягь’я ачмиш шулу. 5 Дугъахьна вари Ягьудия жиларилан ва Ерусалимдиан халкьар гъюйи, чпин гунгьариин швумал духьну, дурари чпин гунгьар гардандиъ дисуйи, ва дугъу дурар Ярдан нириъ штуан апІуйи. 6 Ягь’яйиин девейин хьайин палат алийи ва юкьвнаан гъидкьин яркьу чІул идибтІнайи. Дугъу елгнагарна чІурдин йиччв ипІуйи. 7 Дугъу адмийириз кІуйи: «Йиз кьяляхъди узутІан Кьудратлур гъюра. Узу, ис алахъну, Дугъан шаламарин гъахмйир гъядарчузкьан лайикь дарза. 8 Узу учву штуан гъапІунзачву, хъа Дугъу учву Гирами Рюгьнахьди цІийи алаидичву». 9 Гьадму йигъари Галилей уьлкейин Назарет шагьриан Иса гъюру, Ягь’яйи Думу Ярдан нириъ штуан апІуру. 10 Иса штуан удучІвурайиган, аьршар гьатІарццну, Дугъаз Чаина Гирами Рюгь луфси ис шули рякъюру, 11 зав’ан дих шулу: «Уву Йиз масан Бай вува, Узу Ув’ин гизаф рази вуза!» 12 Ва гьадму сяаьт Рюгьну Исайиз ичІи чюлиз гъягъюз амур апІуру. 13 Иблисди ахтармиш апІури, Исайи ягъчІвур йигъ ичІи чюлиъ гьапІру. Думу чІурдин гьяйванатарин арайиъ яшамиш шулу, ва малайикар Исайин гъайгъушнаъ дийигъуру. 14 Ягь’я дустагъдиъ итбахъан, Ужувлан хабар рабгъури, Иса Галилей уьлкейиз гъягъюру. 15 Дугъу кІуйи: «Вахт улубкьна. Аллагьдин Паччагьлугъ багахь дубхьна! Ичв гунгьар гардандиъ дидисну, уьмур дигиш апІинай, Ужувлан хабарнахъ хъугъай!» 16 Иса Галилей гьюлхъантина гъягъюрайиган, Дугъаз гьюликк чулар ккирчрайи Симон ва дугъан чве Андрей рякъюру. Дурар балугъчйир вуйи. 17 Исайи дурариз кІуру: – Узухъди гъачай ва Узу учвкан инсанарин юкІвар дисру балугъчйир ктаурза. 18 Дурар, гьадмусяаьт чпин чулар дирчну, Гьадгъахъди гъягъюру. 19 СацІиб тина гъушган, Дугъаз Зеведейин бай Якьубна дугъан чве Югьан рякъюру. Дурари люткейиъ чулар рас апІурайи. 20 Дугъу дурариз дих апІуру, ва дурар, чпин адаш Зеведей ва дугъан балугъчйир люткейиъ гъитну, Гьадгъахъди гъягъюру. 21 Дурари Кафернагьум шагьриз рякъ бисуру. Султ йигъан Иса жугьдарин мистаз гъюру ва душваъ Дугъу адмийириз аьгъювалар улупуру. 22 Дурар Дугъан улупбариин мюгьтал духьнайи, фицики Исайи къанунчийириси ваъ, хъа гьюкум хлиъ айириси улупуйи. 23 Сабпну мистаз жин кайи адми гъюру, дугъу чІигъар апІуру: 24 – Учкан фу ккундувуз, Назаретдиан вуйи Иса? Учу пуч апІуз дуфнана? Узуз Уву аьгъязуз – Аллагьдин гьаънайи Гирамир! 25 Исайи жиндиз буйругъ тувру: – ХъючІюбкь ва дугъ’ан удубчІв! 26 Гьадмуган жин, думу дутІурччвну, чІветІ дапІну, дугъ’ан удубчІвуру. 27 Вари русвагь шулу, сари-сарихьан гьерхуз хъюгъру: «Мурар гьапІру цІийи аьгъювалар ву? Мугъу жинаризра кмиди амур апІураки, хъа дурар Мугъаз мютІюгъ шулира а». 28 Мугъкан аваза вари Галилей уьлке вуйибси рабгъуру. 29 Мист’ан удучІвган, Иса Якьубна Югьан хъади Симондинна Андрейин хулаз гъягъюру. 30 Симондин сижарбаб цІа алди дахънайи. Дугъкан Исайиз кІуру. 31 Иса багахьна дуфну, хил дибисну, дугъаз гъудужвуз кюмек апІуру. ЦІа дишла улдубчІвуру, ва дишагьли хяларин гъайгъушнаъ учІвру. 32 Хябяхъдихъна ригъ алабхъиган, Исайихьна вари иццрудар ва жинар кайидар хуру. 33 УрчІарихъна вари шагьур уч дубхьнайи. 34 Жюрбежюр уьзрари ккагънайи гизафдар сагъ гъапІнийи ва гизафдариан жинар утІурккнийи. Исайи жинариз Учв ашкар апІуб гъадагъа гъапІнийи, фицики дурариз, Думу фуж вуш, аьгъяйи. 35 Сигьринган, гьеле мучІуди имиди, Думу хул’ан удучІвну, архаин йишвахьна гъягъюру ва гьадушвахь ккарагуру. 36 Симонна Дугъахъди хъайидар Думу агуз гъягъюру 37 ва, гъидихъган, Дугъаз кІуру: – Варидари Уву агура. 38 – Гъачай багахь хьайи шагьрариз гъягъюрхьа, Узхьан душвариъра аьгъювалар улупуз шлуси. Узу гьаддиз дуфнайир вуза, – кІуру Исайи дурариз. 39 Гьамци Думу вари Галилей вуйибси, мистариъ аьгъювалар улупури ва жинар утІурккури, лицуру. 40 Хамран аьзар кайир Исайихьна дуфну, кьамкьарихъди Дугъан улихь дусну, кюмек ккун апІури, ккарагуз хъюгъру: – Эгер Увуз ккун гъабшиш, узу марцц апІуз шулвухьан. 41 Дугъан язухъ гъабхьи Исайи хил гьачІабккну, дугъак кубкІну, кІуру: – Ккундузуз, марцц йихь! 42 Хамран аьзар гьадму сяаьт дугълан улдубчІвуру ва марцц шулу. 43 Исайи, ижмиди гьамци дупну, думу гьаъру: – Лиг гьа, мидкан гьич саризра макІан, хъа маллайихьна душну, жвув улуп, халкьдиз уву марцц хьпан шагьидвал вуди, Муса пайгъамбри дупнайиганси, гъурбан апІуз ужуб гъайибх. 45 Хъа дугъу, душну, гьеле чаз макІан гъапнушра, варишвариъ чаин улубкьуб ктибтуру, гьаддиз Исайихьан сарун ашкарди шагьриз гъюз шули гъабхьундайи, Думу адмийир адрушвариъ гъузуйи. Гьадушваризра кмиди Дугъахьна варишвариан гъюйи.

Марк 2

1 Сакьюдар йигъарилан Иса Кафернагьумдиз кьяляхъ гъюру. Думу хулаъ а, кІури, хабар абхъру. 2 Дина гьадмукьан халкь уч шулуки, гьеле урчІарихъкьан йишв бихъури гъабхьундар. Дугъу дурариз аьгъювалар улупуйи. 3 Саб кьадар адмийир Дугъахьна гъюру, дурарикан юкьури паралич кайир хурайи. 4 Аммаки дурарихьан халкьдигъянмина Исайихьна рукьуз шуладайи. Гьадмуган дурари хулан гъваъ алдабгъну, паралич кайир дахънайи ахин Думу хьайи йишвахьинди ибхру. 5 Дурарин хъугъвал гъябкъю Исайи иццурайириз кІуру: – Йиз бай, яв гунгьарилан хил алдабгъураза! 6 Мушваъ сакьюдар къанунчйир деънайи. Дурари чиб-чпикди фикир гъапІу: 7 – Му Касди гьаз мици кІура? Думу Аллагьдиз къаршуди улхура! Сар Аллагьдилан гъайри сарун шлихьан гунгьарилан хил алдабгъуз шул? 8 Хъа Исайи, Чан Рюгьнахьди дишла дурарин кІван фикрар аьгъю дапІну, кІуру: – Гьаз дицдар фикрар ичв юкІвариъ тІаърачва? 9 Паралич кайириз фу пуб рягьятди ву: «Яв гунгьарилан хил алдабгъураза», даршиш: «Гъудужв, яв ахин гъадабгъ ва гъарах?» 10 Инсаниятдин Бализ жилиин гунгьарилан хил алдабгъуз гьюкум айиб учвуз аьгъю хьпан бадали, магьа лигай – пну, Дугъу паралич кайириз: 11 – Гъудужв кІуразавуз, гъадабгъну яв ахин, яв хулаз гъарах, – кІуру. 12 Думу дишла гъудужвуру ва, гъадабгъну чан ахин, варидарин улхьантина гьудучІвну гъягъюру. Халкьди, гучІбаан зегьле дубшну, Аллагьдин тярифар апІури, гьамци кІуру: – Учуз гьич зат мидиз ухшар аьламат гъябкъюб дарчуз! 13 Иса хъана гьюлихъна удучІвуру, вари халкь Дугъахьна гъюру, ва Дугъу дурариз аьгъювалар улупуру. 14 Саб йишвхьантина гъягъюрайиган, Дугъаз налукар уч апІрушв’ин деънайи Алфейин бай Левий кІуру кас рякъюру ва дугъаз кІуру: – Узухъди гъач! Думу, гъудужвну, Исайихъди гъягъюру. 15 Саб ражари Исайи Левийин хулаъ лисун апІурайи. Исайихъдина Чан ученикарихъди налукар уч апІрудари ва хъана гизаф гунагькрари уьл ипІурайи, дурар гьаци Исайихъди хъахънайидар гизаф вуйи. 16 Фарисйирикан вуйи къанунчйири, Думу гунагькрарихъди ва налукар уч апІрударихъди уьл ипІури дяркъну, Дугъан ученикариз кІуру: – Мугъу налукар уч апІрударихъдина гунагькрарихъди гьаз уьл ипІура? 17 Му гъеебхьган, Исайи кІуру: – Духтир сагъидариз ваъ, хъа аьзарлуйириз лазим ву. Узу марцци касар дюз рякъюз хуз дуфнайир дарза, хъа гунагькрар. 18 Гьадму вахтна Ягь’яйинна фарисйирин ученикари ушвар дисурайи. Сакьюдар адмийири Исайихьна дуфну, гьерхру: – Ягь’яйин ученикарина фарисйири ушвар дисури шулу, хъа Яв ученикари гьаз ушвар дисурадар? 19 Исайи дурариз кІуру: – Сумчрин хялари, швушв хурайир чпихъди хъимбукьан гагьди, ушвар дисдар! 20 Хъа дурарихьан швушв хурайир гужназ гъадагъру вахт гъибди, хъа гьадму йигъан дурари ушвар дисиди. 21 Гьич сарира йирси палатдик цІийи парчайикан кадабтІну цІил ктривур, даршиш цІилну, палатдиз зигури, урхъ хъана аьхю апІиди. 22 Гьич сарира таза чяхир йирси иржариъ удрубзур, даршиш таза чяхри иржар гьутІурччвиди, чяхирра удубзиди, иржарра пуч хьиди. Таза чяхир цІийи иржариъ убзру. 23 Султ йигъан Исайиз дяхин дубзнайи хутІлариантина гъягъюб алабхъуру. Гьадмуган Дугъан ученикари дяхнин кІулар улдутІуз хъюгъру. 24 Гьаци гъябкъю фарисйири Исайиз кІуру: – Лиг, гьаз мурари султ йигъан Къанунди гъадагъа дапІнайи ляхин апІура? 25 Дугъу дурариз жаваб туву: – Мегер учву, Давудри, чаз ва чахъди хъайидариз гаш гъабшиган, гьапІнуш Гирами китабариан гъурхундаринчва? 26 Авиафар кІуру аьхю маллайин девриъ думу Аллагьдин хулаъ учІвну, маллйирилан гъайри шликІа итІуз ихтияр адру, Аллагьдиз бахш дапІнайи уьлер гъадагъну итІбакан ва чахъ хъайидаризра тувбакан аьгъдаринчвуз? 27 Исайи давам апІуру: – Султ йигъ адмийиз дапІнайиб ву, хъа султ йигъаз адми – ваъ. 28 Гьаци вуйиган, Инсаниятдин Бай султ йигъ’инра Агъа ву.

Марк 3

1 Иса хъа ражарира мистаз гъюру. Душваъ хил деебццнайи сар кас айи. 2 Сакьюдар адмийири, чпиз рябкъюри сар фужкІа гьаму султ йигъан сагъ апІидайкІан, кІури, ва гьаддилантина тахсир кипуз, Исайихъ ул хъипнайи. 3 Дугъу хил дебццнайи касдиз кІуру: – Варидарин улихь дийигъ. 4 Хъа Исайи гьатмундариз кІуру: – Султ йигъан гьапІну ккунду: уж’вал ясана писвал? Уьмур уьбхну ккундин, дарш пуч дапІну? Хъа дурар ккебехъну гъузнийи. 5 Исайи хъял кади ул дурарилан илбицуру ва, дурарин инсафсуз юкІвар вуйивалин хажалат зигури, гьадму адмийиз кІуру: – Яв хил гьачІабкк. Дугъу хил гьачІабккуру, ва му хилра гьатмунубси сагъ шулу. 6 Хъа фарисйири, удучІвну, гьадму сяаьт Гьироддин терефкрарихъди, Иса фици пуч апІуруш, йикьрар йитІуру. 7 Иса Чан ученикарра хъади гьюлихъна гъюру. Дугъахъди гизаф кьадар халкьар Галилей ва Ягьудия уьлкйириан хъайи. 8 Дугъу гъапІкьандарикан деебхьну Ерусалимдиан, Идумея уьлкейиан, Ярдан нирин гьатмуну патариан, Тир ва Сидон шагьраринишвариан гъатар-гъатарди адмийир Дугъахьна ахмиш шуйи. 9 Гизаф халкь уч духьнайивализ дилигну, дурарикк Учв ккадрахъбан бадали, Дугъу Чан ученикариз лютке гьязурди гъитуб табшурмиш апІуру. 10 Дугъу гизафдар сагъ гъапІнийи, гьаддиз иццурайидар Гьадгъак кучузкьан шулуш кІури, Исайилан илтІишуйи. 11 Гьар ражари жинариз Думу рякърубкьан, дурар Дугъан улихь машнахъди икрамназ дахьуйи ва гьамци кІури чІигъар апІуйи: «Уву Аллагьдин Бай вува!» 12 Хъа Дугъу ижмишнаан дурариз, Учв фуж вуш, ашкар апІуб гъадагъа апІуйи. 13 Иса, Чав дих дапІну ктагъдарра, хъади дагъдиина улдучІвуру. 14 Дурар йицІикьюр кас вуйи, Дугъу дурариз Чан вакилар кІуйи. Дурар Дугъахъди гьаммишан духьну ккундийи. Дугъу дурар Ужувлан хабар рабгъуз гьаъди, 15 ва дурариз жинар утІурккуз шлу гьюкум тувди. 16 Магьа Дугъу ктагъу йицІикьюр: Симон (Дугъу мугъаз Петр кІуру ччвур тувнийи), 17 Зеведейин бай Якьуб ва Якьубдин чве Югьан (Дугъу мурариз «Воанергес», яна «Кьюркьлин цІин баяр» кІуру ччвур тувнийи), 18 Андрей, Филип, Варфоломей, Матта, Фома, Алфейин бай Якьуб, Фадей, Кананит кІуру лакІам хъайи Шимон, 19 ва хъасин Иса масу туву Искариот кІуру лакІам хъайи Ягьуда. 20 Мурар хулаз хътакуру. Хъана халкь уч шулу, Исана Чан ученикар ушв гьибтузкьан хъуркьнадайи. 21 Дугъан багахьлуйириз мидкан гъеебхьган, дурар дуфну, Иса гужназ мушв’ан хъади гъягъюз ккун шулу, фицики дурари, Думу абдал духьна, кІуйи. 22 Ерусалимдиан гъафи къанунчйири кІуйи: – Мугъаъ Велзевул убчІвна! Мугъу жинар дурарин аьхюрихьан вуйи кьувватниинди ктаура. 23 Гьадмуган Исайи дурариз Чахьнаси дих дапІну, тахалусариинди кІуру: – ШейтІнихьан шейтІан фици утІубккуз шулу? 24 Эгер паччагьлугъдин айитІ дявйир аш, дициб паччагьлугъ сагъди гъубзидар. 25 Эгер хизандин айитІ дявйир аш, дициб хизан сагъди гъубзидар. 26 Эгер шейтІан учв чаина гъедебгнуш, диди чав чахъди дяви гъубхнуш, дидхьан чан-учвди гъубзуз хьибдар – дидин аьхир хьибди. 27 Сарихьанра, гуж кайирин хулаз дуфну, душв тІараш апІуз хьибдар – эгер эйси йитІну адарш; гъийитІган, хал тІараш апІуз шул. 28 Гьякь кІуразачвуз: адмийири Аллагьдиз фициб къаршу гаф гъапишра, варибдилан хил алдабгъиди, 29 хъа Гирами Рюгьназ къаршу гаф гъапирилан гьич зат, саб вахтнара хил алдабгъидар, дугъан гунагь гьаммишандиз гъубзди! 30 Адмийири: «Мугъаъ жин убчІвна» кІурайиган, Исайи гьаци гъапнийи. 31 Хъасин Дугъан дадана чвйир гъюру; чІатинди дугъужвнамиди, дурари Дугъаз гъач пуз гьаъру. 32 Дугълан халкь илтІибшнайи, ва Дугъаз гъапнийи: – ЧІат, кючейиъ Яв дада, чвйир ва чйир дугъужвна, Уву гьерхра. 33 Исайи дурариз жаваб туву: – Йиз дадана чвйир фужар ву? – 34 Чалан илтІишнайидарилан ул илбицну, Дугъу кІуру: – Магьа Йиз дада ва чвйир! 35 Аллагьдин гаф тамам апІрур Йиз чвера, чира, дадара вуйиз.

Марк 4

1 Исайи хъана гьюлихъ аьгъювалар улупурайи. Дугълан гьадмукьан халкь илтІибшнайики, Думу люткейиъ эуз мажбур шулу, ва лютке гьюл’инаси цІиб хъапІру, хъа халкь гьюлихъ гъузру. 2 Исайи дурариз тахалусариинди гизафдарикан аьгъювалар тувуйи, ва Чан улупбариъ кІуйи: 3 – Хъебехъай: нежбер тум убзуз удучІвуру. 4 Убзурайиган, гьацІар удрар рякъюхъ дахьру – дурар, жакьвар дуфну, удуру. 5 Сакьюдар удрар гъван ккайи, руг цІибтІан алдру йишв’ин дахьру, ва дурар ухди ктучІвуру, гьаз гъапиш ругдин гъат чІиллиб вуйи. 6 Ригъ гъапІган, дурар чурхуру ва, ччивар зяифди хьпаз лигну, ерццуру. 7 ГьацІар удрар зазарин тумрягъ гъяхьру, аьхю гъахьи зазари дурар ккаъру, ва дяхни кІул апІдар. 8 Хъа жара удрар авадан ругдик кахьру, ктучІвуру, аьхю шулу ва сумчІур, йирхьцІур ва варж ражари артухъ бегьер тувру. 9 Хъасин Исайи гъапи: – Шлин ибариз ебхьураш, гъит ебхьри! 10 Чпи ялгъузди гъузиган, йицІикьюрид ученикарина Исайихъди хъайидари Дугъхьан, гьаз гьамци, тахалусариинди кІураш, гьерхру. 11 – Учвуз Аллагьдин Паччагьлугъдин сир аьгъю хьуб тувначвуз, – кІуру дурариз Исайи, – хъа аьгъдрудариз тахалусариинди кІура. 12 Фицики дурар лигури шулу, хъа рябкъюрдар, хъпехъури шулу, хъа гъавриъ ахъурдар. Жараси вуйиш, дурарихьан Аллагьдихьинди илтІикІуз шуйи ва дурарилан хил алдабгъидийи. 13 Хъа Дугъу дурариз кІуру: – Мегер учву гьаму тахалусдин гъавриъ ахъундарнучва? Хъа учву жара тахалусарин фици гъавриъ ахъдичва? 14 Убзрури Аллагьдин гаф убзуру. 15 ГьацІар адмийир рякъюхъинди дахьу удрариз барабар ву. Дурариз Аллагьдин гаф ебхьуру, ва гьадму сяаьт, иблис дуфну, дурарин кІваъ гъубзу гаф гьитІибкІуру. 16 ГьацІар адмийир гъван ккайи йишв’ина ахьу удрариз барабар ву. Дурари, гаф гъеебхьубси, дишла шадди кьабул апІуру. 17 Хъа дурарикк ччив ккадар, гьаддиз дурар цІиб вахтназтІан вуйидар дар. Аллагьдин гафналантина чпихъ хъергруган, ясана саб хатІа-бала гъядябхъруган, дурар гьадму сяаьт гафнахьан гьудучІвуру. 18 ГьацІар зазаригъ гъяхьу удрариз барабар ву. Мурар гаф ебхьрудар ву, 19 хъа гьар йигъандин гъайгъушнари, девлетнахъ хъергували ва жара тямягьари Аллагьдин гаф кІваълан гьапІуз гъитру, ва диди бегьер хури шулдар. 20 Хъа гьацІар авадан ругдик кахьу удрариз барабар ву. Мурар гаф ебхьрудар ва думу кьабул апІрудар ву, ва диди саспиган сумчІур ражари, саспиган йирхьцІур ражари, хъа саспиган варж ражари артухъ бегьер хури шулу. 21 Исайи хъана дурариз кІуру: – Чирагъ хулаз, дид’ин гъаб иливуз, ясана краватдикк ккивуз, хруб вуйин? Ваъ, думу чан йишв’ин дивру! 22 ЧІатинди удудубчІвди гъубзру фукІа жиниб адар ва фукІара гьитІибкІнайиб адар. 23 Шлик ибар каш, гъит ебхьри! 24 Хъа Дугъу гьамцира кІуру: – Учвуз ебхьурайибдиз фикир тувай. Фициб уьлчмейиинди учву ебцураш, гьацибдиинди учвузра ебциди ва артухъдира кади иливиди. 25 Шлиз аш, дугъаз хъана тувди, хъа шлиз адарш, айибра тадабгъиди. 26 Дугъу кІуру: – Аллагьдин Паччагьлугъ, думу фициб ву? Думу адмийи ругдиз тум гатІабхьувалсиб ву. 27 Йишвну адми ахуру, йигъ шулади гъудужвуру, хъа тум гьадму вахтна ктубчІвуру ва аьхю шулу – хъа думу фици аьхю шулаш, адмийизра аьгъдар. 28 Ругди чав-чалан бегьер хуру: сифте чар ктубчІвуру, хъа кІул апІуру, хъасин кІул удрарихьди абцІру. 29 Удар хъубкьиган, адми дишла дагьрихъан хъчІихуру, гьаз гъапиш иган хъубкьна. 30 Исайи хъана кІуру: – Аллагьдин Паччагьлугъ фтихь тевуз шул? Ясана фициб тахалусдиинди дидкан пуз шул? 31 Думу дюн’яйиин варитІан бицІи дилихь тевуз шул. 32 Хъа думу кивган, ктубчІвуру ва бистниъ айидарик варитІан аьхю шулу. Дид’ин гьацисдар аьхю кюлер илиршуруки, дурарин сирнарикк жакьварихьанра кмиди дусуз шулу. 33 Гьамцдар гизаф тахалусариинди Дугъу дурарихьан аннамиш апІуз шлукьан аьгъювалар улупуйи. 34 Тахалусариинди дарди Дугъу фукІара кІурдайи, хъа Учв Чан ученикарихъди гъузиган, дурариз вари ктибтуйи. 35 Гьадму йигъан хябяхъган, Дугъу дурариз кІуру: – Гъачай, гьюлин тмуну гъирагъдихъинди сирнав апІухьа. 36 Дурар, халкь гъитну, Исайихъди люткейиъ эъру. Дурарихъди жара люткйирра хъайи. 37 Гужал микІ утІубччвуру ва лепйир люткейикан йивури, думу шту абцІрайи. 38 Иса люткейин кьялхъян йишваъ, кІуликк гутара ккивну даахнайи. Люткейиъ айидари Думу хъиргру ва кІуру: – Мялим! Ухьу ккахьрайиваликан Увуз вижна ктарнуз дарш?! 39 Гьадмуган Думу гъудужвну, микІлаз сикин хьуз амур апІуру ва штуз кІуру: – Сикин йибхь! Мирибшван! 40 МикІ сикин шулу, ва архаинвал абхъру. – Гьаз гьамкьан гучІбяхяр вучва? – кІуру дурариз Исайи. – СацІибкьан хъугъвал адаринчвуз дарш? 41 Дурарик лап яман гучІ кабхъру, ва чиб-чпикна кІуру: – Му фуж ву, эгер микІра, гьюлра Мугъахъ хъпехъураш?

Марк 5

1 Дурари гьюлин тмуну гъирагъдихъна Герасин юрдназ сирнав апІуру. 2 Иса люткейиан удучІвубси, Дугъан гъаншаризди накьваригъ яшамиш шулайи жинар кайи адми утІурччвуру. 3 Думу сарихьанра дирккуз шуладайи – гьеле зунжрарииндикьан. 4 Дугъан хилар-ликар зунжрарихьди швнуб-сабан гъийитІнийи, аммаки дугъу зунжрар ва гьялкьйир кьатІар апІуйи – гьич сарихьанра думу дерккуз шулдайи. 5 Зат сикин дарди йигъ-йишв накьварин хьарар-дюрхъяригъ ва гъярар-тепйиригъ дугъу чІигъар апІуйи ва учв гъванарикан йивуйи. 6 Ярхлаан Иса гъяркъюбси, думу Дугъахьна жаргъну дуфну, икрам апІури, кьамкьариинди дахъру 7 ва аьхю дихниинди кІуру: – Яв узухъди фу вуяв, ВаритІанзаанур, Аллагьдин Бай Иса? Аллагьисан, Увуз миннат вуйиз: йиз зегьле мабхан! 8 Исайи: «УдубчІв гьаму адмийиан, чиркин рюгь!» – гъапиган, диди гьаци гъапнийи. 9 Хъа Исайи дугъхьан гьерхру: – Ччвур фуж вуяв? – Йиз ччвур кьушум вуйиз, гьаз гъапиш учу гизаф жинар вуча, – жаваб туву дугъу. 10 Жинар, му юрдариан чпи муутІурккан кІури, Исайиз миннат апІуз хъюгъру. 11 Хъа душвахь таблик силарин аьхю лиж дарабгънайи. 12 – Учхьан силариъ учІвуз шлуси, учу гьадраризди гъягъюз гъит, – кІури, жинари Исайикан тІалаб апІуру. 13 Дугъу ихтияр тувру. Ва адмийиан удучІву чиркин рюгьяр силариъ учІвру. Хъа силарин лиж гъарзарилансина гьюлизди убсру ва ккабхьру. Дурарин кьадар кьюд агъзурихьна вуйи. 14 Силарин габнари, жаргъну душну, шагьриъ ва гъирагъариъ айи гъулариъ, гъабхьибдикан ктибтуру. Агьлар, фу гъабхьнуш, лигуз гъюру. 15 Дурар Исайихьна гъюру ва, фу лигурва: кьушумкьан жинар кади гъашир, палтар алди, чан фикрихъ хъади деъна. Дурарик гучІ кабхъру. 16 Му аьламат гъябкъдари дурариз, жинар кайирикан ва силарикан фу гъабхьнуш, ктибтнийи. 17 Гьадмуган Исайикан дурари, чпин юрдариан удучІвну гъягъюб, ккун апІуру. 18 Иса люткейиъ эърайиган, чакан жинар ктІурккури учвра гъадагъуб ккун апІуру. 19 Хъа Дугъу ихтияр тувундайи. – Хулаз гъарах явдарихьна. Аллагьди фици яв язухъ гъизигнуш ва Дугъу увуз гъапІубдикан дурариз кидибт, – кІуру Исайи. 20 Думу гъягъюру ва ЙицІубшагьрин юрднан агьлариз Исайи чакан гьапІнуш, ктибтуру – вари аьламат гъахьнийи. 21 Исайи хъана гьамуну гъирагъдихъна сирнав гъапІиган, Дугълан аьхючІвеъ адмийир илтІишнийи. Иса гъирагъдихъ гъузнайи. 22 Дугъахьна жугьдарин мистан аьхюр, Ягьир кІурур, гъюру. Иса гъяркъюбси, думу Дугъан ликарикк икрамназ дахъру 23 ва, Дугъкан миннат апІури, кІуру: – Йиз риш йикІура. Миннат вуйиз, дуфну дугъ’ин хилар илив, думу сагъ хьиди, чІивиди гъузди. 24 Иса дугъахъди гъягъюру. Дугъахъди гизаф халкьра гъябгъюрайи ва юкьуб тереф Думу кьялаъ тІаънайи. 25 Дураригъди сар дишагьлира гъяйи. ЙицІикьюд йисандин арайиъ дугъан ифи хътабтІурадайи. 26 Фукьан хъюгънийишра, гьич сар духтрихьанра думу сагъ апІуз гъабхьундайи. Дугъу чаз айи-адруб вари харж гъапІнушра, дугъаз кюмек гъабхьундайи, хъа гьял айибтІан пис гъабхьнийи. 27 Дугъаз Исайикан гъеебхьиган, думу гужназ адмийиригъ гъючІву ва, Исайин кьялхъянди дуфну, Дугъан ккурттарик куркІу, 28 фицики дугъу фикир дапІнайи: «Эгер узу Мугъан ккурттарик саб тикисикьан куркІиш, сагъ хьидизу». 29 Гьадму сяаьт дугъан ифи хътабтІуру, ва дугъаз чан вари жан сагъ хьувал гьисс шулу. 30 Исайиз дишла Чаан кьувват удубчІвуб аьгъю шулу ва, халкьдихьинди илтІикІну, гьерхру: – Узук фуж куркІну? 31 – Рябкъюрадарнуз, учІукьну, халкьди Уву фици хъуржраш, хъа Увук фуж куркІну кІури, гьерхрира ава! – кІуру Дугъаз ученикари. 32 Хъа Дугъу ул алдатбиинди Чак куркІур агурайи. 33 ГучІ дубхьнайи ва гукІнишин кабхънайи дишагьлийи, чав гъапІубдин гъавриъ ахъну, халкьдигъян гъюдучІвну, икрам апІури, Исайин ликарикк ккархьну, вари вуйибси ктибтуру. 34 Дугъу дишагьлийиз кІуру: – Йиз риш, уву яв хъугъвали сагъ гъапІунву. Архаин духьну гъарах, ва сагъвалиъ хьидива. 35 Исайи му гафар кІурамиди, мистан аьхюр вуйи Ягьирин хул’ан адмийир дуфну кІуру: – Яв риш гъакІну. Мялим инжик мапІан! 36 Хъа Исайи дурарин гафариз фикир тутрувди, мистан аьхюриз кІуру: – ГучІ мапІан, анжагъ хъугъну гъуз! 37 Дугъу Петризна, Якьубдизна, Якьубдин чве ЮгьандизтІан ктарди, сарун саризра Чахъди гъюз ихтияр тувундайи. 38 Дурар мистан аьхюрин хулаъ учІвру. Исайиз, душваъ гъалабулугъ ади, яманди ишурайидар ва ишлар апІурайидар рякъюру. 39 – Учву гьаз дерд зигурачва, – кІуру учІву Исайи. – Риш дукІнадар, хъа даахна. 40 Дурар Дугъ’ин аьлхъюз хъюгъру. Хъа Дугъу дурар вари адауру. Чахъди Чан ученикарна шуран адашна дада гъадагъну, риш дитнайи хулаъ учІвру. 41 Шуран хил дибисну, Дугъу дугъаз кІуру: – Талифа, куми! (яна «Риш, увуз кІураза, гъудужв!») 42 Риш дишла гъудужвуру ва гъягъюз хъюгъру. Дугъан йицІикьюд йискьан вуйи. Вари гъах гъахьнийи. 43 Исайи мидкан саризра дарпуб ижмишнаан ккун апІуру ва, шураз ипІруб тувай, кІуру.

Марк 6

1 Душв’ан удучІву Иса Чан гъахи шагьриз гъягъюру. Дугъахъди Чан ученикарра хъайи. 2 Султ йигъан Исайи мистаъ аьгъювалар улупуз хъюгъру. Дугъахъ хъпехъурайи гизафдари, мюгьтал духьну, кІуйи: – Гьамгъан гьаму аьгъювалар наънан ву? Мугъаз мициб фагьум шли тувна? Гьамцдар аьламатнан ляхнар Гьамгъан хилариинди фици шула?! 3 Му харатчи уста, Мар’ямдин Бай, Якьубдин, Юсуфдин, Ягьудайин ва Симондин чве дарин? Мугъан чйир гьамшваъ, ихь арайиъ, адаринхъа? Гьаци вуйиган, дурариз Исайихъ хъугъуз ккунди адайи. 4 – Гьюрмат адру пайгъамбар хьуб мумкин дар, – кІуру Исайи, – хъа чан багъри шагьриъ ва хулаъ, жвуван багахьлуйиригъ ва хизандиъ пайгъамбриз гьюрмат ади шулдар. 5 Гьаддиз Дугъхьан душваъ, сакьюдар иццурайидариин хилар иливну сагъ гъапІдар ктарди, сану сабкьан аьламат улупуз гъабхьундайи. 6 Думу дурарин хътругърайивалиин мюгьтал духьнайи. Хъасин Думу гъул’ан-гъулаз гъягъюри, адмийириз аьгъювалар туври шулу. 7 Исайи Чахьна йицІикьюрид вакилариз дих дапІну, дурариз чиркин рюгьяр утІурккуз шлу гьюкум тувну, кью-кьюрди аьгъювалар улупуз гьаъру. 8 Дугъу дурариз, чумакъ ктарди, фукІара гъададабгъуз амур апІуру: я уьл, я тавра, я пул – 9 анжагъ чпин ликариин али шаламартІан. – Я гьич саб жара палатра магъадабгъанай, – кІуру Исайи дурариз. – 10 Учву фунуб гъулаъ кьабул гъапІиш, гьадму йишвариан гъягъяйизкьан, гьадушваъ гъузай. 11 Хъа учву фунуб йишваъ-вушра кьабул дарапІиш ва учвухъ хъпебехъиш, душв’ан удучІвну гъягърудари, ичв ликарик кайи бишируг кадабхьай. Гъит му дурариз чпиин улубкьрубдин улихьмиди дебккрайи лишан ибшри. 12 Дурар гъягъюру ва, адмийир чпин гунгьариин швумал хьпан бадали, дурариз аьгъювалар улупуру. 13 Дурари гизаф жинар утІурккуру ва, хифарин ччим ктатури, хайлин иццурайидар сагъ апІуру. 14 Чан нубатнаъ Исайикан Гьирод паччагьдиз ебхьуру, гьаз гъапиш Дугъан аваза варишвариъ атІабгуру. ГьацІари: «ДукІнайи штуан апІру Ягь’я чІиви гъахьну ва гьаддиз аьламатар улупура» – кІуйи. 15 Жарадари: «Думу Ил’яс ву» – кІуйи, хъа шубурпидари: «Думу кюгьне пайгъамбрарикан сарсир ву» – кІури тасдикь апІуйи. 16 Гьамци гъеебхьу Гьиродди: «Узу кІул алдабтІу Ягь’я чІиви гъахьну» – гъапнийи. 17 Гьиродди чав буйругъ тувну, Ягь’я дидисну, чан чве Филипдин хпир Иродиадайин кІуллан дустагъдиъ итру. Хъасин Гьиродди Иродиада чаз шивди дитнийи. 18 Фицики Ягь’яйи Гьироддиз: «Яв чвуччвун хпир увуз хай шулдар» – гъапнийи. 19 Гьамци гъапну кІури, Иродиадайи Ягь’яйиин хъял иливнийи ва дугъаз думу йикІуз ккун гъабхьнийи, амма шуладайи, 20 гьаз гъапиш Ягь’яйихьан Гьироддиз гучІуйи, фицики дугъаз думу гьякьлу ва гирами кас вуйивал аьгъяйи ва, гьаддиз, думу уьрхюрайи. Гьирод Ягь’яйин аьгъювалар улупбахъ, саспиган дурарикан учв инжик шулушра, иштагьниинди хъпехъуйи. 21 Ужуб дюшюш ккабхъру: Гьироддин бабкан гъахи йигъ улубкьну ва гьаддиз гюре гешт хъапІуз ханар-беглар, юзбашйир ва Галилей уьлкейин аьхюдар уч апІуру. 22 Думу шадлугъназ ялхъвнар апІуз Иродиадайин ришра гъюру. Дугъан ялхъван Гьироддиз ва хялариз гизаф бегелмиш шулу ва паччагьди шураз кІуру: – Узкан увуз фу ккундуш вари туварзавуз! – 23 Хъа паччагьди ху апІуру. – Фу ккун гъапІиш, вари тувурзавуз, гьеле йиз айи паччагьлугъдин гьацІ пай вушра. 24 Думу шуру душну дадайихьан гьерхру: – Фу ккун апІуза? – Штуан апІру Ягь’яйин кІул, – жаваб тувру Иродиадайи. 25 Шуру, паччагьдихьна душну: – Узуз штуан апІру Ягь’яйин кІул ленгерийиъди ккундузуз, думу узуз гьаму сяаьт ча! – кІуру. 26 Паччагь яманди пашман шулу, хъа чав хяларин улихь ху апІбаз лигну, дугъхьан, ккун гъапІуб тамам дарапІди гъибтуз гъабхьундайи. 27 Дугъу дишла эскер гьаъну, чахьна Ягь’яйин кІул хуз буйругъ тувру. Эскри дустагъдиъ Ягь’яйин кІул алдабтІуру, 28 ва ленгерийиъди кІул дубхну, шурахьна тувру, хъа дугъу – дадайихьна. 29 Мидкан аьгъю гъабхьи Ягь’яйин ученикари дугъан жандак гъадабгъуру ва кивру. 30 Вакилар Исайихьна хътакуру ва Дугъаз чпи гъапІдарикан ва туву аьгъюваларикан варибдикан ктибтуру. 31 Дугъу дурариз кІуру: – Хъа гьамус, адмийир адру фунуб-вушра йишваз гъягъидихьа, гьадушваъ ялгъузди гъузай ва сацІиб рягьятвал гъадабгъай. Гьаз гъапиш, дурар айишваъ гизаф халкь айи, дурариз гьеле уьл ипІузкьан мажал шуладайи. 32 Гьаддиз дурар люткейиъди халват йишваз гъушу. 33 Гьаци вушра гизафдариз дурар люткейиъди гъягъюри рякъюру, фужар вуш, аьгъю шулу, ва гьюлин гъирагъ вуйибси вари шагьриан адмийир хъергру ва вакилартІан ухди гъюру. 34 Люткейиан удучІву Исайиз аьхючІвеъ халкь рякъюру. Дугъаз дурарин язухъ шулу, гьаз гъапиш дурар марччлихъан хътру марччарси айи. Дугъу дурариз гизаф ляхнарикан ктибтуру. 35 Йигъар хябяхъ шулайи, ва Дугъан ученикари, багахьна дуфну, кІуру: 36 – Мушвайишв ичІи йишв ву, ва сарун йигъарра хябяхъ ву, мурар деет, гъит багахь гъулар-хулариз гъарахри, чпиз ипІруб гъадабгъри. 37 – Учву дурариз ипІруб тувай, – кІуру Исайи. – Гьамус учу, душну, дурариз уьл гъадабгъурайин? Ухьу вари саб вазли гъилихишра, гьациб пулихъ дурариз уьл гъадабгъну удудукьур! – кІуру вакилари. 38 – Учвухь фукьан уьл хьачвухь? – пну, гьерхру Исайи. – Гъарахай, лигай гьеле. Дурар лигуру ва кІуру: – Хьуб уьлна кьюб балугъ. 39 Гьадмуган Дугъу дурариз, халкь десте-дестеди чру укІ’ин дитай, кІуру. 40 Халкь хьу-хьуцІур ва варж-варж кас ади, жергйириъди деъру. 41 Исайи, хьуб уьлна кьюб балугъ гъадагъну, завузди дилигну, Аллагьдин ужувлакк ккахьри, дупну, уьлер гьудутІну, халкьдиз пай апІуз ученикарихьна тувру. Дугъу варидаригъна кьюб балугъра пай апІуру. 42 Вари халкьди ипІуру, тухъ шулу 43 ва балугъаринна уьлин хъригъу кьацІари йицІикьюб тавра ацІру. 44 Хъа вари гъипІдар хьуд агъзур кас вуйи. 45 Мидин кьяляхъ Исайи, Чав сабан халкь гьаъри имиди, Чан ученикариз люткейиъ эъну, гьатмуну гъирагъдихъ хъайи Вифсайда гъулаз сирнав апІуб амур апІуру. 46 Халкь деетну, Думу ккарагуз дагъдиз удучІвуру. 47 Хябяхъдин вахт дубхьнайиган, ученикар айи лютке гьюлин гьацІ кьялариъ айи, хъа Иса сарна-сарди гъирагъдихъ гъузнийи. 48 МикІлаз къаршуди сирнав апІбу кьувватнахъан душнайи ученикар дяркъну, Иса, акв алабхьуради, гьюлилантина дурарихьна гъягъюру. Думу дурарин люткейиз багахь шулайи. 49 Иса гьюлленмина гъюри гъяркъдариан, думу чпиз гьугъубжвурайи гъаранту вушул, пну, варидариан сабпну гьарай утІубччвуру, 50 гьаз гъапиш дурариз, Думу гъяркъюбси, гучІ гъабхьнийи. Хъа Иса дишла дурарихъди улхуз хъюгъру: – ЮкІв ижми апІинай, Узу вуза. ГучІ мапІанай! – 51 пну, дурарин люткейиъ учІвган, микІ яваш гъабхьи. Мици хьували дурар хъана артухъ гъах апІуру. 52 Уьлерихъди гъабхьи аьламатнан дурар гъавриъ ахъундайи, ва дурарин юкІвар курди гъузнийи. 53 Сирнав апІурайидар Геннисарет юрдназ гъюру. 54 Дурар люткейиан эдеубси, гъирагъдихъ хъайидариз Иса аьгъю шулу, 55 ва жаргъну душну, варишвариъ мидкан хабар ипру. Думу наан аш деебхьну, дурари гьадина ахнарииндира кмиди иццрудар хуйи. 56 Иса наанди гъушишра: гъулариз, шагьрариз, ятгъариина – варишвариъ иццурайидар духну дитуйи ва Дугъкан Чан ккурттарин канчІарик куркІузкьан гъитуб тІалабар апІуйи. Вари Дугъак куркІрудар сагъ шуйи.

Марк 7

1 Ерусалимдиан Исайихьна саб кьадар фарисйирна къанунчйир гъюру. 2 Дурариз ученикарикан сари дижрикІу хиларихьди ипІури гъябкънийи. 3 Хъа фарисйиринра, вари жугьдаринси, чпин абйириланмина гъубзнайи хъуршлихънакьан хилар дижрикІди уьлихъ дедреъру аьдат айи. 4 Базариан гъафидари сабан хилар дижрикІкьан гагьди уьл ипІдар. Гьамцдар хъана гизаф аьдатар дурари уьрхюйи, мисалназ, захар, гажнар ва йифрин гъаб-гъажагъ жикІбан аьдатар. 5 Фарисйирина къанунчйири Исайихьан гьерхру: – Яв ученикари абйирин аьдатар гьаз хъаърадар? Хилар дижрикІди уьл ипІура. 6 Хъа Дугъу дурариз жаваб тувру: – Гирами китабариъ Ишая пайгъамбри учвкан, кьюб маш гъяйидарикан, ужуди гъапну: «Гьаму адмийири Узуз гьюрмат ушвниинди апІура, хъа дурарин юкІвар Узхьан ярхла ву. 7 Давди дурари Узуз икрам апІура, фицики дурари инсанарин аьдатар уьрхюз улупура». 8 Учву адмийири ктагъу къайдйирихъан хъичІихначва, хъа Аллагьдин табшуругъар тина апІурачва. 9 Учву гьисаб апІурашалчва: ичв къайдйир тамам апІбан бадали Аллагьдин табшуругъар батІул апІуб фагьумлу ляхин вуйич, кІури! – давам апІуру Исайи. 10 – Магьа мисал. Мусайи гъапну: «Адашдизна дадайиз гьюрмат апІинай» ва «адашдизна дадайиз люкьнар апІрур аьжализ лайикь ву». 11 Хъа учву фу кІури шулчва? Эгер сари чан дадайиз вая адашдиз «Узу увуз буржлу вуйиб Аллагьдиз гъурбан гъапІунза», гъапиш, 12 дугъхьан сарун чан адашдизна дадайиз кюмек дарапІрира гъузуз шулу, кІурачва. 13 Гьамци учву Аллагьдин гаф ичв аьдатназ илтІибкІунчва ва наслариз гьаци ктибтурачва. Гьаму мисалназ ухшар гизаф чІуру ляхнар апІури шулучва. 14 Исайи, хъана Чахьна халкьдиз дих дапІну, кІуру: – Вари узухъ хъебехъай ва гъаври йихьай. 15 Инсандиъ чІатан убчІвру гьич сабдихьанра думу чиркин апІуз даршул. Инсандиан удубчІвруб – магьа думу чиркин апІруб. 17 Думу, халкь гъитну, хулаз гъафиган, ученикари Дугъхьан гьадму гафарин мяна ачухъ апІуб ккун апІуру. 18 Дугъу дурариз ктибтуру: – Учву гьамдин гъавриъ ахъраданчва? Инсандиъ чІатан убчІвру гьич сабдира думу чиркин дарапІрайивал рябкъюраданчвуз? 19 Фицики думу адмийин кІваз гъябгъюрадар, хъа – фуниз, ва хъасин удубчІвуру (Гьамдиинди Дугъу ипІруб вари марцциб вуйивал улупура). 20 Инсандиан удучІврудари, – кІуру Исайи, – думу чиркин апІуру. 21 «Самбал алдапІувалар», яна хил’ан адахъувалар, тІафалвалар, йивну йикІувалар, кьяппавалар, тямягькарвалар, угъраш’валар, инсафсузвалар, машнаъ ягь адрувалар, гъанихвал ва хъял, футна, фурс, ахмакьвалар – гьамрарихъна хру пис фикрар инсандин кІваан удучІвуру. 23 Гьаму вари писвалар инсандин айтІан удучІвуру ва дурари инсан чиркин апІуру. 24 Гьадму йишвар дирчну, Иса Тир юрднан жилариина гъягъюру. Душваъ Думу садар хулариъ дергру. Дугъаз мидкан гьич саризра аьгъю дубхьну ккундайи, аммаки гьитІибкІну гъибтуз гъабхьундайи. 25 Исайикан чиркин рюгь убчІвнайи сар шуран дадайиз аьгъю шулу. Думу дишла Дугъахьна гъюру ва ликарикк, икрам апІури, ккархьру. 26 Хъа думу дишагьли жугьуд дайи, думу Сирофиникияйин миллетдикан вуйи. Дугъу Исайикан чан шур’ан жин утІубккуб тІалаб апІурайи. 27 Исайи гъапи: – Сифте баяр-шубар ацІри. Дурарихьан тадабгъну, уьл хуйириз ккипуз хай даршул. 28 Хъа дишагьлийи кІуру: – Йиз Агъа, хуйирира баяр-шубари тадахьу уьлин урклар итІуру, аьхир. 29 – Яв гьамциб жавабназ лигну увхьан мясляаьтниинди хулаз гъягъюз шулвухьан. Яв шур’ан жин удубчІвну, – кІуру Исайи. 30 Фу лигурва, хулаз хътаку дишагьлийиз чан риш, сагъ духьну, ахниъ дахънади рякъюру ва жинра дугъ’ан удубчІвна. 31 Тир юрднан жиларилан кьяляхъ хътаку Иса Сидон ва ЙицІубшагьрин жилариланмина Галилей гьюлихъинди гъюру. 32 Дугъахьна кар ва цІибтІан улхуз даршлу сар кас хъади гъюру, дугъ’ин хилар иливуб ккун апІуру. 33 Исайи думу халкьдихьан гьадауру, дугъан ибариъ Чан тІубар урччвру, хъасин Чан тІубарик шуруш кабтІну, дугъан мелзнак кучру. 34 Хъа завузди дилигну, дериндиз ил хъадабгъну, кІуру: – Эффата! (яна «Арцц!») 35 Гьадму сяаьт дугъаз ебхьуз хъюгъру ва дибиснайи мелз либхуз хъюбгъну, дугъан чІал ачухъ шулу. 36 Исайи дурариз мидкан гьич саризра дарпуб ккун апІуру. Хъа Дугъу дарпуз гъадагъа апІбахъ, дурари артухъ рабгъуйи. 37 Адмийири, гизаф аьламат духьну, кІуйи: – Мугъу вари ужу апІуру. Мугъу гьеле кардариз ебхьузра гъитру, улхуз даршлудариз чІалра улупуру!

Марк 8

1 Гьадму йигъари хъана бегьем халкь уч шулу, хъа дурарихь ипІруб хьадайи. Исайи, ученикариз дих дапІну, кІуру: 2 – Узуз адмийирин язухъди вузуз. Магьа, дурарин Узухъди хъади шубуд йигъ ву, хъа дурариз ипІруб адар. 3 Эгер Узу дурар хулариз гашди гьаиш, рякъюъ зяиф хьиди, хъа гьацІар ярхлариан дуфнайидар даринхъа. 4 – Гьаму ичІи йишваъ варидариз гьубкІрубси уьл наънан апІуру? – жаваб апІуру ученикари. 5 Исайи дурарихьан гьерхру: – Учвухь швнуб уьл хьачвухь? – Ургуб уьл, – кІуру дурари. 6 Гьаци вуйиган, Дугъу халкьдикан жилиин деуб ккун апІуру. Ургуб уьл гъадагъну, Аллагьдиз чухсагъул кІури ккарагну, Дугъу уьл гьудубтІуру ва халкьдиз пай апІуз ученикарихьна тувру. Хъа дурарира пай апІуру. 7 Дурарихь сакьюдар балугъарра хьайи. Исайи дурариин чухсагъулин ккарагуб дапІну, гьадрарра пай апІуз тувру. 8 Адмийири гъипІу, дурар арцІу. Дидихьна хъиригъу кьацІари ургуб таврара ацІнийи. 9 Хъа дурар вари юкьуд агъзурихьнакьан вуйи. Исайи дурар чпин хулариз деетуру. 10 Хъа Учв, ученикарра хъади, дишла люткейиъ эъру ва Далманут юрднан жилариина сирнав апІуру. 11 Фарисйир гъюру ва Исайихъди гьюжатнаъ учІвру. Дурари Думу ахтармиш апІури, Дугъкан аьршариан лишан улупуб тІалаб апІуру. 12 Исайи, гъагъиди ил хъадабгъну, дурариз кІуру: – Гьаз му наслин адмийири лишан ккун апІура? Дюзди кІуразачвуз: му касариз лишан хьибдар. 13 Хъасин, дурар гъитну, Думу хъана люткейиъ эъру ва гьатмуну гъирагъдихъинди сирнав апІуру. 14 Ученикариз чпихьди люткейиз уьл гъадабгъуз кІваълан гьархнийи. Дурарихь саб уьлтІан хьтайи. 15 Дурарихъди сюгьбатнаъ айи Исайи ихтият хьуб ккун апІру: – Лигай-гьа, фарисйирин ва Гьироддин дунихьан ихтият йихьай. 16 Хъа дурари чиб-чпин арайиъ гъапи: «Мугъу мици, ухьухь уьл хьадруган, кІурайиб ву». 17 Дурар фтикан улхураш аьгъяди, Исайи кІуру: – Учву уьл хьтарчухь кІури, гьаз гъалабулугънаъ ахъначва? Мегер учву гьамусра гъаври ахънаданчва? Ва учвуъ фукІара убчІвнадарин? Ичв юкІвар гьамусра курди имийин? 18 Мегер учвуз, улар ади рябкъюраданчвуз, ибар кади ебхьураданчвуз? Мегер гъаври аданчва? 19 Узу хьуб уьл хьуд агъзуригъна пай гъапІиган, хъиригъу уьлерин швнуб тавра ацІунчва? – ЙицІикьюб, – жаваб тувру дурари. 20 – Хъа ургуб юкьуд агъзуригъна пай гъапІиган, швнуб тавра хъиригъу уьлерихьди ацІунчва? – Ургуб, – жаваб тувру дурари. 21 – Мегер учву гьамускьан гъаври ахъунданчву? – кІуру дурариз гьадмуган Исайи. 22 Дурар Вифсайда гъулаз гъюру. Исайихьна кур хуру ва дугъак куркІуб ккун апІуру. 23 Исайи курин хилхъан дибисну, гъул’ан адауру, ва дугъан улар Чан шурушнахьди кьяши дапІну, хилар кІул’ин иливну, гьерхру: – ФукІа рябкъюрануз? 24 Дугъу дилигну кІуру: – Рякъюразуз адмийир, рякъюразуз гьарарси гъягъюрайидар. 25 Гьадмуган хъана Исайи хилар дугъан уларихь гьивру, ва думу сагъ шулу, уччвуди рябкъюри шулу. 26 Хъа Исайи думу: – Лиг-гьа, му гъулазди удручІвди, ичв хулаз гъарах, – пну, гьаъру. 27 Иса мушв’ан, Чан ученикарра хъади, Филип паччагьдин Кесария юрднан гъулариз гъягъюру. Рякъюъ Дугъу ученикарихьан гьерхру: – Адмийири Узу фуж ву кІури, гьисаб апІура? 28 – Садари Уву штуан апІру Ягь’я ву, кІура, тмундари – Ил’яс, хъа шубудпидари – пайгъамбрарикан сар, – пну, жаваб тувру дурари. 29 – Хъа учву Узу фуж ву кІури, гьисаб апІурачва? – гьерхру Дугъу дурарихьан. – Уву Месигь вува, – жаваб тувру Петри. 30 Исайи дурариз Чакан гьич саризра дарпуб ккун апІуру. 31 Хъа Дугъу дурариз, Инсаниятдин Бал’ин гизаф аьзабар улукьиди, аьхюдари, маллйири ва къанунчйири Думу нигь апІиди ва йикІиди, хъа шубуд йигълан накьвдиан, чІиви духьну, удучІвиди, кІури, аьгъювалар улупуйи. 32 Дугъу мидкан дурариз ачухъди кІуйи. Хъа Петри Иса гъирагъдиз гьадаъну, Дугъан гафар гьадатІуз хъюгъру. 33 Хъа Дугъу, илдицну, ученикарихьинди лигури, Петрин гафар кьатІ апІуру. – ГьудубчІв Узхьан, иблис! Яв фикрар адмийирин фикрар вуяв, хъа Аллагьдин – ваъ! 34 Чахьна халкьдизна ученикариз дих дапІну, Исайи гъапи: – Шлиз Узухъди гъягъюз ккундуш, думу, чан тямягьяр дирчну, чан хач гъадабгъну, Узухъди гъюри. 35 Шлиз чан уьмур уьбхюз ккундуш, дугъан думу дубгди. Хъа шли Узу ва Ужувлан хабар бадали чан уьмур пуч гъапІиш, дугъу думу уьбхиди. 36 Фу мянфяаьт а адмийиз, уьмрихьан гъахьиган, вари дюн’я туври гъабшишра? 37 Чан уьмур кьяляхъ апІбан бадали, дугъу фициб кьимат тувди? 38 Гьаму гунагькар ва Аллагь аьгъдру халкьдин улихь шли Узхьан ва Йиз гафарихьан нач гъапІиш, дугъхьан Инсаниятдин Балира, Чан Адашдин аднаъди гирами малайикарихъди му жилиина гъафиган, нач апІиди.

Марк 9

1 Хъа Исайи кІуру – Гьякьди кІуразачвуз: мушв’ин дийигънайидарикан сакьюдариз чпин аьжал хъубкьайиз Аллагьдин Паччагьлугъ гьубкІну чан кьувватнаъ ади рябкъиди. 2 Йирхьуд йигълан Иса, Чахъди Петрна, Якьубна, Югьан гъадагъну, ягъли дагъдиина хъади гъягъюру. Душв’ин жара кас алдайи. Хъа Иса дурарин улихь дигиш шулу. 3 Дугъан палтар, улин нур гъабхури, кьадар адрубкьан лизи шулу – гъурччну пну, гьич сарихьан дици лизи апІуз даршлийи. 4 Дурарин улихьна Исайихъди гафар апІурайи Ил’ясна Муса ачмиш шулу. 5 Хъа Петри Исайихьинди илтІикІну кІуру: – Мялим! Учуз мушвахь ужуди вучуз! Гъач, шубуб паж апІуча: саб Увуз, саб Мусайиз ва саб Ил’ясдиз. 6 Петри мици, фу кІуруш ва гьапІруш аьгъдрури, гъапиб вуйи, фицики ученикариз яман гучІ дубхьнайи. 7 Гьадмуган диф арайиз гъюру ва диди дурар чан сирникк ккаъру, хъа дифрагъян сес шулу: «Му Йиз масан Бай вуйиз. Гьамгъахъ хъебехъай!» 8 Гьадму сяаьт дурар вари терефаризди лигуру, амма дурариз чпин багахь Исайилан гъайри фужкІа гъяркъюндайи. 9 Дурар дагъдилан гъюруган, Исайи Чан ученикарикан чпиз гъябкъюбдикан, Инсаниятдин Бай дукІну чІиви хьайиз, саризра даркІуб, ккун апІуру. 10 Дурари му гьядиса чпин арайиъ гъибтру, аммаки дурар чиб-чпигъ: «ЧІиви дархьикьан гагьди», – фу кІуру гафар вуйкІан, кІури, улхурайи. 11 Дурари Исайихьан гьерхру: – Къанунчйири сифте Ил’яс дуфну ккунду гьаз кІура? 12 Исайи дурариз жаваб тувру: – Ав, дугъридан, Ил’ясди, улихьмиди дуфну, вари ккабалгну ккунду. Хъа Гирами китабариъ Инсаниятдин Балкан Дугъ’ин гизаф аьзабар улуркьиди ва Думу ужуз апІиди кІури, гьаз дибикІна? 13 Хъа Узу учвуз кІуразачвуз: Ил’яс гъафну, ва дугъкан чпиз ккуниб гъапІну. Гьаци дибикІна Гирами китабариъра. 14 Дурариз, имбу ученикарихьна гъафиган, дурарилан халкь илтІишну, гьюжатар апІурайи къанунчйир рякъюру. 15 Гьадму сяаьт Иса гъяркъю халкь аьжайиб шулу ва, Думу тебрик апІури, Дугъахьна жаргъуру. 16 Исайи ученикарихьан гьерхру: – Фтин кІуллан мурарихъди гьюжатар апІурачва? 17 Халкьдигъян сар касди жаваб тувру: – Мялим! Увухьна йиз бай духназа. Дугъаъ чиркин рюгь а. Диди дугъахьди гафар апІуз гъитрадар. 18 Жин алабхъруган, думу жилиина гатІахьури шулу, кІвантІаригъна каф гъядапІуру ва, сппар илчІигури, жан дичІибгну дебккру. Узу яв ученикарихьан думу жин утІубккуб ккун гъапІунза, хъа дурарихьан гъабхьундар. 19 – Эй хътругъру инсанар! – кІуру гьадмуган Исайи. – Узу учвухъди филадизкьан гъузди кІурачва?! Узу учву филадиз аьгь апІуза?! Думу Узухьна аькъинай! 20 Бай Дугъахьна хуру. Жинди, Иса гъяркъюбси, бай жилиина гатІархьуз гъитру ва кІвантІаригъна каф гъютІубччвну, мина-тина диргъуз гъитру. 21 – Мици дубхьну мугъан гизаф вахт вуйин? – гьерхру Исайи дугъан адашдихьан. – БицІидихъанмина, – жаваб тувру дугъура. 22 – Гизаф ражари жиндиз думу пуч апІуз ккун гъабхьну: саспиган цІигъна гатІархьури, саспиган – штуз. Хъа эгер Увхьан фукІа-мукІа апІуз шулуш, ич язухъ зиг, кюмек апІин! 23 – Фу кІуру гаф ву «Эгер шулуш?!» – кІуру дугъаз Исайи. – Хъугъвал айирихьан вари шулу. 24 Балин адашди ишури кІуру: – Хъугъурза! Хъа узхьан хъугъуз шулдарш, кюмек апІин! 25 Халкь Чахьна гъюри дябкъну, Исайи чиркин рюгьназ буйругъ тувру: – Ебхьуз гъидритру ва чІал бисру жин, Узу увуз буйругъ тувраза: удубчІв дугъ’ан ва сану муубчІван! 26 Жин, балин жан яманди дутІубччвну, чІигъар апІури, удубчІвуру. Думу дукІнайирси дитнайи, ва гизафдари думу гъакІну кІуйи. 27 Хъа Исайи думу, хилхъан дидисну, заъру, ва бай гъудужвуру. 28 Иса хулаз гъафиган, Дугъахъди гъузу ученикари гьерхру: – Хъа учхьан думу утІубккуз гьаз гъабхьундайи? 29 – Мицдар жинар ккарагбииндитІан утІурккуз шлудар дар, – гъапи Исайи. 30 Душв’ан удучІвдар Галилей уьлкейиантина гъягъюру. Исайиз мидкан жарадариз аьгъю дубхьну ккундайи, 31 гьаз гъапиш Дугъаз Чан ученикариз аьгъювалар улупуз ккундийи. Дугъу дурариз гъапнийи: – Инсаниятдин Бай багарихьди инсанарин хилиз тувди ва йикІиди. Думу йикІиди, амма шубуд йигълан чІиви хьиди. 32 Дурар Исайи гъапибдин гъаври шуладайи, хъа Дугъхьан гьерхуз гучІуйи. 33 Дурар Кафернагьумдиз гъюру. Хулаъ айиган, Исайи ученикарихьан гьерхру: – Мина гъюрайиган, гьюжатар гьапІрудар вуйичв? 34 Дурар ккебехъну гъузу, гьаз гъапиш рякъюъ айиган дурари, чпикан гъуллугъниинди фуж аьхюр вуш, гьюжат гъитІибккнайи. 35 Иса деъру, Чахьна ЙицІикьюриддизра дих дапІну кІуру: – Шлиз учв сарпирди духьну ккундуш, гъит думу варитІан аьхиримжир ишри ва варидарин лукІ ишри. 36 Дугъу бицІир гъадагъну, дурарин кьялаъ дерккру ва, хабаъ тІаъну, ученикарихьинди кІуру: 37 – Шли Узу бадали гьамцдар бицІидарикан саркьан кьабул гъапІиш, дугъу Узу кьабул апІура. Хъа шли Узу кьабул гъапІиш, неинки Узу кьабул апІура, хъа гьацира – Узу Гьаурра. 38 – Мялим, – кІуру Дугъаз Югьанди, – учуз Яв ччвурниинди жинар утІурккурайи сар кас гъяркъюнчуз, ва учу дугъаз, ухьухъди хътруган, гъадагъа гъапІунча. 39 Исайи жаваб туву: – Машат мапІанай дугъаз. Шли Йиз ччвур дибисну, аьламат улупиш, думу Узкан чІуруди улхидар. 40 Фуж ухьуз къаршу дарш, думу ухьхъанди ву! 41 Шли учвуз, Месигьдин ученикар вуди хьпаз лигну, саб кІиф шид тувиш, хъугъай Узухъ, дугъаз чан пешкеш хьибди. 42 Хъа шли саркьан гьамцдар аьдатидарикан ва зяифдарикан хъугъувалихъан хътаиш, дугъаз чан гардандиъ рягънин ахал ипну, гьюлизди гатІархьнийиш, ужу шуйи. 43 Эгер яв хили уву тямягьнахьна гъахураш, хъадабтІ думу! Увуз саб хил хъади женнетдиъ учІвуб ужу ву, кьюб хил хъади зат ктІрубшвру цІа айи жегьеннемдиъ ахъайиз. 45 Эгер яв ликри уву тямягьнахьна гъахураш, ккадабтІ думу! Увуз саб лик ккади женнетдиъ учІвуб ужу ву, кьюб лик ккади жегьеннемдиъ ахъайиз. 47 Эгер яв ули уву тямягьнахьна гъахураш, адабгъ думу! Увуз саб ул ади Аллагьдин Паччагьлугъдиъ учІвуб ужу ву, кьюбиб уларра амиди жегьеннемдиъ ахъайиз. 48 Душваъ зат дийийигъди мялхъвяри итІури шулу ва ктІрубшвру цІигъ ургури шулу. 49 Гван кьилахьди тартиб апІруганси, гьарсар цІихьди марцц апІиди. 50 Кьил ужуб мутму ву. Хъа эгер кьилан кьилзишин гъудубгиш, фти думу кьилзи апІидичва. Учвук кьил кади йибхьай! Ва сар-сарихьди мясляаьтнаъ йихьай.

Марк 10

1 Му йишв’ан Иса Ягьудия юрдназ ва Ярдан нирин тмуну жилариина гъягъюру. Дугъахьна хъана халкьар гъюйи, Дугъу, гьарганси, дурариз аьгъювалар улупуйи. 2 Иса ахтармиш апІуз ккунди, фарисйир гъюру ва Дугъаз суал тувру: – Къанундиинди жилириз хпир адауз ихтияр айин? 3 – Хъа Мусайи фици табшурмиш гъапІунчвуз? – кІуру Исайи. 4 – Мусайи, жара хьпан кагъазра дибикІну, хпир адауз ихтияр тувну, – жаваб тувру дурари. 5 – Мусайи, ичв гъициркъу юкІвариз дилигну, гьаци гъапунчвуз, – кІуру Исайи. 6 Хъа дюн’я ккебгъхъанмина Аллагьди жилирна хпир халкь дапІна. 7 Гьаддиз жилир, чан адашна дада гъитну, чан хпирик карсди, 8 ва дурар кьюрид саб беден хьиди. Гьаци вуйиган, дурар сарун кьюб ваъ, хъа саб беден ву. 9 Гьамци Аллагьди китІдар инсанди жара дапІну ккундар 10 Хъасинси дурар хулаз гъафиган, ученикари Исайихьан хъана нюкгьикан гьерхру. 11 Дугъу жаваб туву: – Шли, чан хпир гьадаъну, жарар гъахиш, дугъу кьяппавал апІура. 12 Хъа эгер дишагьли, чан жилирихьан гьудучІвну, жарариз гъушиш, гьадму дишагьлийира кьяппавал апІура. 13 Исайихьна, Дугъу кІуллан карк алдатбан бадали, бицІидар хуру, хъа ученикари хуз гъитри гъахьундар. 14 Гьамци гъябкъю Исайик хъял кубчІвру ва Дугъу дурариз кІуру: – БицІидар узухьна гъюз гъитай, гъадагъа мапІанай. Аллагьдин Паччагьлугъ гьацдаринуб ву. 15 Гьякь кІуразачвуз: шли Аллагьдин Паччагьлугъ бицІириси кьабул дарапІиш, думу душваъ учІвидар. 16 Хъа Исайи бицІидар хабаъ тІаъну, дурариин хилар иливури, уж’вал ибшричвуз, кІуру. 17 Иса рякъюъ учІврайиган, сар касди, Дугъахьна жаргъури дуфну, икрам апІури, кьамкьариина дусну, гьерхру: – Я гъяни Мялим, узу женнетдиъ ахъбан бадали гьапІну ккунду? 18 – Гьаз Узуз гъянир кІурава? – кІуру Исайи. – Сар Аллагьдилан гъайри саркьан гъянир дар. 19 Увуз Дугъан табшуругъар аьгъявуз: адми миликІан, кьяппавал мапІан, мигьитІибкІан, кучІлин шагьидвал мапІан, алдатмиш мапІан, адашдизна дадайиз гьюрмат апІин. 20 – Мялим, узу дурар вари бицІидихъанмина тамам апІураза, – жаваб гъабхьи Исайиз. 21 Иса дугъахьинди лигуру ва дишла Дугъаз думу ккун шулу. Исайи кІуру: – Сабсана увуз гьубкІрадар: гъарах, увуз айиб вари масу тув ва пул касибариз пай апІин, гьадмуган аьршариъ яв девлет хьибдивуз. Хъасин Узухъди гъач. 22 Хъа думу му гафарикан пашман шулу ва гьудучІвну гъягъюру, гьаз гъапиш думу гизаф девлетлу вуйи. 23 Исайи, ул илбицну, ученикариз кІуру: – Девлетлуйириз фукьан читин дарин Аллагьдин Паччагьлугъдиъ учІвуз! 24 Дугъан гафариин ученикар аьжайиб духьнайи, хъа Исайи дурариз хъана гъапи: – Йиз веледар, фукьан читин дарин Аллагьдин Паччагьлугъдиъ учІвуз! 25 Девлетлуйиз Аьршарин Паччагьлугъдиъ учІвубтІан девейиз рубдин гъюн’ан удубчІвуз рягьят ву. 26 Дурар хъана артухъ аьжайиб гъаши ва сари-сариз гъапи: – Дици вуйиган, шилхьан учв уьрхюз хьиди? 27 Дурарихьинди дилигну, Исайи кІуру: – Инсанарихьан му удукьруб дар, хъа Аллагьдихьан удудукьруб адар. 28 Гьадмуган Петри пуз хъюгъру: – Хъа магьа, учу, вари гъибтну, Увухъди хъача. 29 – Гьякь кІуразачвуз, – кІуру Исайи, – Шли Узу ва Ужувлан хабар бадали чан хал, чвйир, чйир, дада, веледар, хутІлар гъитнуш, дугъаз му дюн’яйиин 30 варж ражари артухъ хулар, чвйир, чйир, дадйир, веледар, хутІлар, хъа гьацира жвувахъ хъчІирккувалар хьиди, хъа гъюз ккимбу уьмриъ – гьаргандин уьмур. 31 Аммаки, гьаму ражари гизаф сарпидар думуган аьхиримжидар хьиди, хъа аьхиримжидар – сарпидар. 32 Гьамус дурари Ерусалимдиз рякъ дибиснайи. Улихьди Иса гъягъюрайи. Исайихъди гъягъюрайи ученикарик гъалабулугъ кабхънийи, хъа дурарихъди хъайи имбудар гучІбу ккагънайи. Исайи, ЙицІикьюридра гъирагъдиз гьадаъну, Чаз фу шулуш, пуз хъюгъю: 33 – Магьа ухьу Ерусалимдиз гъягъюрахьа. Инсаниятдин Бай аьхю маллйиринна къанунчйирин хилиз тувди. Думу, карсну йикІуз жаза адабтІну, жугьуд дарударин хилиз тувди. 34 Хъа дурар Дугъак кялхъди, рихшанд апІиди, тутйир катІди, гъирмажарихьди урччвиди ва йикІиди. Аммаки шубуд йигълан Думу чІиви хьиди. 35 Зеведейин баяр Якьубна Югьан Исайиз багахь улучІвуру ва кІуру: – Мялим! Учу кІурайи тІалаб тамам апІина. 36 – Узу учвуз гьапІну ккундучвуз? – гьерхру Дугъу. 37 Дурари жаваб тувру: – Яв аднаъ Уву учІвган, учу Яв гъвалахъ деърубси апІин – сар арччул, тмунур гагул терефнаъ. 38 – Учву фу тІалаб апІураш, учвуз аьгъдарчвуз, – кІуру Исайи. – Уз’ина гъюз ккайи аьзабар учвхьан аьх апІуз хьибдин? Ясана, Узу марцц шлуганси, учвхьан шулин? 39 Дурари: «Ав, шулчухьан», – гъапнийи. Хъа Исайи дурариз гъапи: – Дугъриданна, Узу кьабул апІуз ккайи аьзабар учвура аьх апІарчва, 40 хъа Йиз арччулну ва гагулну терефарихъинди дитувал Узлан асиллу дар: думу йишвар, Йиз Адашди шлиз улупнаш, гьадрариндар ву. 41 Якьубдинна Югьандин гафар гъеерхьиган, имбу йицІбидарик хъял кубчІвру. 42 Хъа Исайи дурариз Чахьна дих дапІну кІуру: – Халкьарин гьякимарди гьисаб апІурайидари халкьарин зиин агъавал апІурайивал ва аьхюдари дурарин зиин чпин гьюкум улупурайивал учвуз аьгъячвуз. 43 Хъа ичв арайиъ дици дарибшри: шлиз ичв арайиъ кІулинур хьуз ккундуш, гъит думу ичв гъайгъушнаъ ишри, 44 ва шлиз ичв арайиъ сарпир хьуз ккундуш, дицирикан варидарин лукІ ишри. 45 Инсаниятдин Байра Чаз жарадари гъуллугъ апІбан бадали ваъ, хъа Чав гъуллугъ апІбан бадали ва, гизафдарин гунгьарилан хил алдабгъуз кІури, Чан уьмур тувбан бадали Дуфнайир ву. 46 Хъасин дурар Ерихон шагьриз гъюру. Иса Чан ученикар ва гизаф халкь хъади Ерихондиан удучІвурайиган, рякъюхъ, тувру садакьайиз ккилигури, кур вуйи касиб, Тимейин бай Вартимей деънайи. 47 Дугъу, душвхьантина Назарет шагьриан вуйи Иса гъягъюра кІури деебхьну, чІигъ апІуру: – Давудгъярин Бай Иса, йиз язухъ апІина! 48 Гизафдари дугъаз ккебехъ кІуйи, хъа кур вуйири айибтІан артухъ чІигъар апІуз хъюгъю: – Давудгъярин Бай, йиз язухъ апІина! 49 Иса хъугъужвуру ва Дугъу кІуру: – Мина гъач йипай дугъаз. Куриз дих апІуру: – Чкиди гъудужв, Исайи увуз Чахьна гъач кІура! 50 Вартимей, чуха хъидипну, гъедергуру ва Исайихьна жаргъуру. 51 – Узкан фу ккундувуз? – гьерхру Исайи. – Мялим, узуз рябкъюз ккундузуз! – жаваб тувру кури. 52 – Гъарах, яв хъугъвали уву гъюрхюнву, – кІуру Исайи. Дугъаз дишла рябкъюри шулу, ва думу Исайихъди гъягъюру.

Марк 11

1 Дурар Ерусалимдиз багахь шулайиган, Вифагия ва Вифания гъуларихьан ярхла дарди, Элион кІуру дагъдин багахь хьимиди, Исайи гьамци дупну, кьюр ученик гьаъру: 2 – Гьатму ихь гъаншариъ айи гъулаз гъарахай. Гъулаъ учІвайиз ярхла дарди, дибтІнайи жигьил дажи рябкъидичвуз. Дид’ин мегьел фужкІара элеундар. Тудубчну, думу гьамина аьбкъинай. 3 Хъа эгер учвхьан шли: «ГьапІрачва?» кІури гьерхиш, «Думу Агъайиз лазимди ву, Дугъу думу дишла кьяляхъ апІиди», йипай. 4 Дурар гъягъюру, ва кючейиъ урарин багахь дибтІнайи жигьил дажи рябкъюру. Думу тудубчуз хъюгъру. 5 Душвахь дийигънайи адмийири: «ГьапІрачва? Гъудугъ гьаз тудубчурачва?» – гъапи. 6 Хъа дурари чпиз Исайи гъаписи кІуру, ва дурариз ихтияр тувру. 7 Дурари дажи Исайихьна хуру. Дурари чпин палтар дид’ин иличуру, ва зиълан Иса элеуру. 8 Гизафдари чпин палтар, хъа имбудари хутІлиъ гьарарикан ктатІу кюлер Думу гъягъру рякъюкк ккирчуйи. 9 Улихьдира ва кьяляхъдира гъябгъюрайи халкьди гьарйир апІурайи: – Аллагьдиз тяриф! Агъайин ччвурнахъ Гъюрайириз уж’вал ибшри! 10 Ихь аба Давудрин улубкьурайи Паччагьлугъдиз уж’вал ибшри! Аьршариз тяриф! 11 Иса Ерусалимдиъ учІвру ва Аллагьдин хулаз гъягъюру. Варишварилан ул илбицну, хябяхъган кьанди, Думу, йицІикьюрид вакиларра хъади, Вифанияйиз хътакуру. 12 Хъайигъан, дурар Вифанияйиан удучІвган, Исайиз гаш хьувал гьибгъру. 13 Ярхлаъ инжирин гьар гъябкъю Думу, дидигъ йимишар гъяш лигуз кІури, багахьна гъягъюру, амма Дугъаз, гьаригъ фукІара гъибихъундайи, фицики инжирар хъуркьру вахт улубкьнадайи. 14 Гьадмуган Дугъу гьариз кІуру: – Сану гьич сарира сабанра яв йимишар диритІри! Мици кІури ученикаризра гъеебхьнийи. 15 Дурар Ерусалимдиз гъюру. Иса Аллагьдин хулан гьяятдиз гъафи, ва душваъ ариш-вериш апІурайидар утІуккуз хъюгъру. Дугъу пул дигиш апІурайидарин устлар, луфар масу туврайидарин кусрийир ккитІикІуру, 16 ва гьич сарира чан шей’ар Аллагьдин хул’антина гъахуз гъитдар. 17 Хъасин Исайи дурариз аьгъювалар улупуз хъюгъю. Дугъу кІуру: – Гирами китабариъ дибикІнадаринхъа: «Йиз хулаз вари миллетар ккарагру хал пиди». Хъа учву дидкан тІарашчйирин мугъара дапІначва! 18 Аьхюдаризна къанунчйириз гьамци кІури гъеебхьиган, Думу йикІуз, дурар саб чара абгуз хъюгъю. Дугъхьан дурариз гучІуйи, гьаз гъапиш вари халкь Дугъан аьгъюваларихъ аьхю иштагьниинди хъпехъуйи. 19 Хябяхъ гъабшиган, Иса ученикарра хъади, шагьриан удучІвну гъягъюру. 20 ГвачІинган инжирин гьарин багхьантина гъягъюрайидариз думу ччиварианзина тап кІакІаризкьан вари деебццну рябкъюру. 21 Петри, накь гъапиб кІваин дубхьну, Исайиз кІуру: – Мялим, лиг, Уву накь чаз люкьян гъапІу инжирин гьар гъеебццну! 22 Исайи дурариз жаваб туву: – Аллагьдихъ хъугъай! 23 Гьякь кІуразачвуз: эгер шли гьаму дагъдиз «Яв йишв’лан улдубчІвну, гьюлиъ убс!» гъапиш ва, кІваъ шаклу даршиди, хъугъиш, гьадмура тамам хьибди. 24 Гьаддиз Узу кІуразачвуз: учву ккарагури фу ккун гъапІиш, вари учвухьна рубкьрувалихъ хъугъай, рубкьидичвухьна ва думу ичв хьибди. 25 Аьршарин ичв Адашдихьан ичв гунгьарилан хил алдабгъуз шлуси, ккарагруган, шлик ичв хъял каш, гьадгъулан хил алдабгъай. 27 Дурар хъана Ерусалимдиз гъюру. Иса Аллагьдин хулан гьяятдиъ лицурайиган, Дугъахьна аьхю маллйирна, къанунчйирна, аьхюдар гъюру. 28 Дурари гьерхру: – Уву му ляхнар фициб гьюкмиинди апІурава? Шли Увуз гьациб гьюкум тувну? 29 Исайи дурариз кІуру: – Узу учвуз саб суал тувдиза. Жаваб тувай – Узура, мурар фициб гьюкмиинди апІураш, пидизачвуз. 30 Ягь’яйин штуан апІувал Аллагьдихьан вуйин, даршиш инсанарихьан? Гьан, жаваб тувай! 31 Дурар, фикрарикк ккахъну, чиб-чпикди гьамци пуз хъюгъру: «Эгер ухьу „аьршариан“ гъапиш, Дугъу: „Хъа учву дугъахъ гьаз хъугъундайчва?“ пну, гьерхди. 32 Хъа адмийирихьан гъапиш...» Дурариз халкьдихьан гучІуйи, гьаз гъапиш варидари Ягь’я дугъриданра пайгъамбар ву кІурайи. 33 Гьаддиз дурари гьамциб жаваб тувру: – Аьгъдарчуз. – Дици вуш, Узура учвуз, фициб гьюкмиинди гьамцдар апІураш, пидарзачвуз, – жаваб тувру Исайи.

Марк 12

1 Иса дурариз тахалус ктибтуз хъюгъру: – Сар касди тІумтІин багъ ибтру, арчил илтІибкІуру, ичІ ебккну, тІумтІар кчІюкьрушв ва паж апІуру. Хъасин багъ арендайиз тІумутІчйирихьна тувну, учв удучІвну жара йишвариз гъягъюру. 2 Вахт гъабхьиган, дугъу тІумутІчйирихьна чан пай тІумтІар хуз лукІ гьаъру. 3 Хъа дурари думу дисуру, урччвуру ва, фукІара тутрувди, утІуккуру. 4 ТІумтІин багъдин эйсийи сарсана лукІ гьаъру, аммаки мугъан кІул уьбгъюру ва, аьйиб алапІну, утІуккуру. 5 Сарсана гьаъру – му йивну, йикІуру. Хъана гизаф жарадарра гьаъру – садар урччвуйи, тмундар йивну гъядауйи. 6 Эйсийиз хъайина-хътру сар бай ади шулу. Ва аьхиримжи ражари дурарихьна «Йиз балхьан нач апІурда» пну, гьадму гьаъру. 7 Хъа тІумутІчйири чиб-чпин арайиъ гьамци кІуру: «Му эйсийин ирсчи ву. Гъачай, думу йивну йикІухьа, ва ирс ухьуз гъубзди!» 8 Дурари думу дисуру, йикІуру ва тІумтІин багъдиан гатІахьуру. 9 ТІумтІин багъдин эйсийи гьапІди? Думу хъадакну гъиди ва тІумутІчйир йихиди, хъа багъ жарадарихьна тувди. 10 Мегер учву Гирами китабариъ гъурхунданчва: «Устйири гатІабхьу гъван мурччвануб гъабхьну. 11 Му ухьуз гъябкъю аьламат Агъайи гъапІуб ву». 12 Жугьдарин аьхюдариз му тахалус чпиз къаршуди дупнайиваликан аьгъю шулу ва Иса дисуз ккун шулу, аммаки халкьдихьан гучІуйи. Гьаддиз дурар, Думу гъитну, гъягъюру. 13 Хъасин Исайихьна, Дугъу фукІа дюз даруб кІайиз ккеъбан бадали, сакьюдар фарисйирна Гьироддин терефкрар гьаъру. 14 Дурари дуфну кІуру: – Мялим, учуз аьгъячуз Уву гьякь кІурайиб, гьич сарихьанра гучІдарвуз, гьич саризра гучІар ккаурдарва, хъа дишди ва ачухъди Аллагьди кІурайиси яшамиш хьуз аьгъювалар улупурава. Йип гьеле, Рим паччагьдиз налук туврувал дюз вуйин, дарш дарин? Учу налук туврин, дарш тувурдарин? 15 Дурарин чІуру ниятарин гъаври айи Исайи кІуру: – Гьаз Узу ахтармиш апІурачва? Аьбкъинай Узухьна манат, лигуза дидиз. 16 Дурари хуру. Исайи дурарихьан гьерхру: – Мидик шлин шикилна ччвур ка? – Римдин паччагьдин, – жаваб тувру дурари. 17 Исайи кІуру: – Паччагьдинуб паччагьдиз, хъа Аллагьдинуб Аллагьдиз тувай. Дурар Дугъан жавабниин гъах гъаши. 18 Гьадму вахтна гъачІидар чІиви шлуб дар кІурайи саддукйири дуфну гьерхру. 19 – Мялим! Мусайи учуз, эгер хпир айи чве веледар даршиди гъачІиш, гьадгъан хпир тмуну чвуччву гъадагъну, чан чвуччвун тум арайиз дубхну ккунду, кІури дибикІна. 20 Ургур чве гъахьну. Сарпи чвуччву шив хуру, амма, веледар дархьиди, йикІуру. 21 Кьюрпи чвуччву дугъан хпир чаз дитру, ва мура, веледар дархьиди, йикІуру, шубурпирра – гьаци. 22 Ургрид чвйирикан гьич саризра веледар гъахьундар. Вардарилан кьяляхъ гьадму дишагьлира йикІуру. 23 Гъиямат йигъан вари чІиви шлуган, думу шлин хпир хьиди? Ургрид чвйиризра думу швуваз гъушнийи аьхир! 24 Исайи дурариз гьамциб жаваб апІуру: – Учву, я Гирами китабар, ясана Аллагьдин кьудрат аьгъдарди, улдугурачва. 25 Гъийихдар чІиви гъахьиган, дурари я швушвар хурдар, я швуваз гъягъюрдар. Дурар аьршариъ айи малайикарси хьиди. 26 Хъа гъийихдар чІиви хьуваликан кІури гъабшиш, учву Мусайин китабдиъ, Аллагьди фици убгурайи рукнаан дугъаз «Узу Ибрагьимдин Аллагь, Исакьдин Аллагь ва Якьубдин Аллагь вуза» кІури дибикІнайиб гъурхунданчва, дарш? 27 Аллагь дийихнайидарин ваъ, хъа чІивидарин Аллагь ву. Учву гизаф улдугурачва. 28 Гьюжат апІурайишвахь сар къанунчира хьайи. Исайи дурариз фукьан уччвуди жавабар тувраш, дугъаз гъеебхьнийи, ва думу, Дугъахьна дуфну, гьерхру: – Фуну табшуругъ варитІан заануб ву? 29 – ВаритІан заан вуйи табшуругъ, – кІуру Исайи. – «Хъебехъай, эй жугьдар! Ихь Агъа Аллагь – сар АгъатІан дар. 30 Яв Агъа Аллагь, вари юкІв хъипну, вари рюгьнаан, вари фагьмиан ва вари жвуван кьувватнаан ккун апІин». 31 Хъа магьа кьюбпиб: «Багахь хьайир увуз жвуваз жвувси ккун апІин». МурартІан аьхю табшуругъар сарун адар. 32 – Ужуди дупна, Мялим, – кІуру къанунчийи. – «Думу сар ву ва, Дугълан гъайри, сану гьич фужкІара адар», – кІури, гьякь гъапунва. 33 «Думу вари юкІв хъипну, вари фагьмиинди ва вари жвуван кьувватниинди» гьацира «багахь хьайир жвуваз жвувси ккун апІин» кІуру гафар, вари урккру ва ургру гъурбнартІан зиина ву. 34 Дугъу фагьумлуди жаваб тувувал дябкъну, Исайи дугъаз кІуру: – Уву Аллагьдин Паччагьлугъдихьан ярхла дарва. Гьамдихъан сарун сарира Исайихьан гьич сабдиканра гьерхуз кІубанвал гъапІундар. 35 Аллагьдин хулаъ халкьдиз аьгъювалар улупурайиган, Исайи кІуру: – Къанунчйирихьан, Месигь Давудгъярин Бай ву, пуз, фици удубкьуру? 36 Гирами Рюгьну ацІнайи чав Давудри гъапну, аьхир: «Агъайи йиз Агъайиз гъапну: „Узу Яв душмнар, духну, Яв ликарикк дахьайизкьан Йиз арччул гъвалахъ деъ“». 37 – Чав Давудри Дугъаз, Думу чан Агъа вуйиз, кІура. Гьаци вуйиган, Думу дугъан Бай фици хьидихъа? Гизаф халкь Дугъахъ аьхю иштагьниинди хъпехъурайи. 38 Дугъу халкьдиз Чан улупбариъ кІуйи: – Ярхи палтар алди лицру къанунчйирихьан ихтият йихьай. Дурариз, чпин тяриф апІури, халкьар уч шлушвариъ чпи тебрик апІури ккунду, 39 дурар мистариъ ва ипІру-убхърушвариъ варитІан гьюрматлу йишвариин деуз ккунидар ву. 40 Гьадрар ву дурар, ачІни хпарин мутму хътипІурайидар, хъа халкьдин уларихьан ярхи гъудгнар апІрудар. Гъиямат йигъан дурариз варитІан пис жаза ккилибгура! 41 Иса, садакьади пул ипру ишкІин багахь деъну, фици пул ипраш, лигурайи. Аьхю пай девлетлуйири гизаф пул ипуйи. 42 Хъа сар касиб ачІни хпир дуфну, душваъ кьюб кепек ирчру. 43 Гьадмуган Исайи, ученикариз Чахьна дих дапІну, кІуру: – Гьякь кІуразачвуз: гьаму касиб ачІни хпири варидаритІан артухъ пул ипну. 44 Пул ипдари варидари чпиз артухъди вуйиб ипну, хъа мугъу, гьамцир касибри, чаз ипІрубдихъ тувру айи-адруб вари ипну.

Марк 13

1 Иса Аллагьдин хул’ан удучІвурайиган, ученикарикан сари Дугъаз кІуру: – Мялим, лиг, фицдар гъванар, фукьан уччву дараматар дарин! 2 – Уву гьаму зурба дараматдиин гьяйран духьнана? – кІуру Исайи. – Мидин гъван-гъвандиин гъубзидар, вари дабгъиди. 3 Хъасинси, Думу Элион дагъдиин Аллагьдин хулаз гъаншарди деънайиган, ялгъузди гъузнайи Петрина, Якьубдина, Югьандина Андрейи Дугъхьан гьерхру: 4 – Йип учуз, дици фила хьибди? Думу дабгърубдикан учуз фици аьгъю хьибди? Фициб лишниинди аьгъю хьибди? 5 Исайи кІуру: – Лигайгьа, шликІа учву алдатмиш дарапІбан бадали, ихтият йихьай. 6 Фицики гизафдар: «Гьадму узу вуза» кІури, Йиз ччвурнаккди гъиди ва гизаф халкьар алдатмиш апІиди. 7 Учвуз багахь ва ярхла дявйирикан гъеебхьиш, гучІ мапІанай: гьаци дубхьну ккунди айиб ву, хъа гьаци хьувал сабан аьхир вуди хьибдар. 8 Халкь халкьдиин ва паччагьлугъ паччагьлугъдиин алархьиди, варишвариъ жилар тІурччвури хьиди, гаш абхъди. Мурар бедбахтваларин, бицІир апІругандин аьзабарси, сифте кІулар ву. 9 Ихтиятди гъузай, гьаз гъапиш мажлисариъ жазйир гьадатІидичвуз, мистариъ урччвидичву; Узкан шагьидвал апІбан бадали, Узлантина паччгьарин ва гьякимдрарин улихьна гъахидичву. 10 Хъа сабан аьхир гъяйиз вари миллетариз Ужувлан хабар деебхьну ккунду. 11 Учву суддиз гъухиган, фу кІуруш, дидин гъайгъушнаъ махьанай: гьадму сяаьт учвуз кІуруб, фу тувнади гъабшиш, гьадму йипай – учву кІури хьидичва, хъа Гирами Рюгьну ичв мелзниинди пиди. 12 Чвуччву чве йикІуз масу тувди, хъа адашди – бай. Веледари, абйир-бабариз къаршу удучІвну, дурар йихиди. 13 Йиз ученикар хьпаз лигну, учву варидариз даккун хьиди. Хъа шли аьхиризкьан аьгь гъапІиш, думу дюрхну хьиди. 14 Учвуз, Аллагь гьясбикк ккадру алчагъвал лайикь дарушваъ шули гъябкъиган (урхурайир, мидин мяна фу вуш, гъаври ахъну ккунду), Ягьудия уьлкейиъ айидар дагълариз гьергри. 15 Хъа фуж гъваин алди гъабшиш, улдудучІври ва чан хулаз фукІа гъадабгъуз дурушри. 16 Фуж хутІлиъ ади гъашиш, чан палтариз хулаз дурушри. 17 Гъагъдиъ айидаринна нанайихъ бицІидар хъайидарин гьадму йигъари гьял пис хьибди! 18 Мици кьюрдну дарибшри пну, ккарагай. 19 Гьадму йигъари гьациб бедбахтвал хьибдики, дициб Аллагьди дюн’я арайиз гъабхихъанмина гьамусдиз гъабхьундар, ва гьамдихъантинара хьибдар! 20 Ва эгер гьадму йигъар Агъайи кам гъапІундайиш, гьич фужкІара ккадархьидайи. Хъа Чан кадагънайидар бадали Дугъу гьадму йигъар кам гъапІну. 21 Эгер учвуз думуган «Лиг, Месигь гьамшвахь хьа», вая «Лиг, гьатушвахь хьа» гъапиш, мухъугъанай. 22 Гьаз гъапиш кучІлин месигьар ва кучІлин пайгъамбрар ачмиш хьиди. Эгер удукьуруш, гьеле кадагънайидарра чпихъинди илтІикІуз дурари аьламатнан лишнар ва аьжайиб ляхнар улупиди. 23 Гьаци вуйиган, ихтиятди гъузай. Узу учвуз вари улубкьруб улихь имиди гъапунзачвуз. 24 Хъа гьадму йигъари пис бедбахтваларин кьяляхъ «Ригъ ктІубшвиди, вазли акв тувидар, завариан 25 хядар ахьди ва завар ккадаршвиди». 26 Гьадмуган дифариинди зурба кьувват ва гьяйбат хъади Инсаниятдин Бай гъюри рякъиди. 27 Гьадмуган Дугъу, дюн’яйин юкьбиб терефарихъан жилин саб кІулхъан тап гьатмунуб кІулихъна кадагънайидар уч апІуз малайикар гьаъди. 28 Инжирин гьархъан мисал гъадабгъай: дидин кюлери кьюкьяр апІруган ва кІажар адашвруган, хьад багахь шулайивал аьгъю шулучвуз. 29 Гьаци учвузра, гьамрар гъяркъган, гьадму вахт, ичв раккнихъ хъайиси, багахь дубхьнайивал аьгъю апІинай. 30 Гьякь кІуразачвуз: му вари улубкьайиз гьамусдин насил гъубзди. 31 Заварна жилар ккадахьиди, хъа Йиз гафар дургидар! 32 Я аьршарин малайикариз, я Бализ – саризра йигъ ва сяаьт аьгъдар, хъа сар Адашдиз аьгъя. 33 Гьаци вуйиган, лигай, ккилигури ва гьязурди гъузай. Думу вахт фила улубкьуруш, учвуз аьгъдарчвуз. 34 Думу вахт, чан хал ва гьардиз рубкьру ляхин лукІариин гъибтну, хъа гъаравлиз «ул иливну маахан» дупну, гъушу хулан эйсийихь тевуз шулу. 35 Учвура ул иливну мааханай! Учвуз аьгъдарчвуз, аьхир, хулан эйси фила гъюруш: хябяхъган, гьацІишваринган, сяаьт сабди, даттари уьъйир апІруган, даршиш гьиринган. 36 Хабарсузди Думу хъадакну гъафиган, учву даахнади Дугъаз дярякъри-гьа! 37 Узу учвуз кІурайиб варидариз кІураза: ул иливну мааханай.

Марк 14

1 Кьюд йигълан Пасха ва ЛичІван лавшарин машкврар улукьурайи. Аьхю маллйирина къанунчйири Иса дидисну йикІуз чарйир агурайи. 2 «Хъа анжагъ машквар йигъан ваъ, – кІуйи дурари, – даршиш халкьдин арайиъ гъалабулугъ абхъди». 3 Думу Вифания гъулаъ хамран аьзар кади гъахьи Шимондин хулаъ гештнаъ айиган, душваъ, лизи ругдин бетисибдиъди, нард гьарин багьа марцци ягъ хьади, сар дишагьли учІвру, ва дугъу дидиъ айи ицци ниъ хъайи ягъ Исайин кІул’ин улубзуру. 4 Душваъ айи хяларикан сакьюдари наразиди чиб-чпикди гьамци кІуйи: 5 – Гьамкьан ицци ниъ хъайи ягъ мугъу гьаз чІур гъапІу? Гьаму ччим шубудварж динар пулихъ масу тувну, хъа гьадму пул касибариз пай апІуз шуйи, аьхир! Дурари дишагьлийиз люкьнар апІуз хъюгъю, 6 хъа Исайи кІуру: – Думу сикинди гъитай! Фу кІури учву дугъак кудукьначва? Узуз дугъу ужуб ляхин гъапІну! 7 Касибар гьарган учвухъди хьиди, ва учвхьан дурариз кюмекар апІуз хьибдичвухьан, хъа Узу учвухъди гьарган хьидарза. 8 Дугъу чахьан шлуб гъапІну: улихьмиди дугъу Йиз жан, ччим кадатну, накьвдиъ ивуз гьязур гъапІну. 9 Гьякь кІуразачвуз: дюн’яйиъ му Ужувлан хабар наан рабгъури гъабшишра, думу кІваин апІиди ва дугъу гъапІубдикан ктибтиди. 10 Гьадмуган ЙицІикьюрикан сар, Искариот лакІам хьайи Ягьуда, аьхюну маллйирихьна, Иса масу тувбан бадали, гъягъюру. 11 Ягьудайихъ хъпехъдар шад шулу ва, дици гъабшиш, пул тувуз гаф тувру. Гьаддихъан думу Иса масу тувуз гъулай вахт абгури шулу. 12 ЛичІван лавшарин машквран садпи йигъан, пасхайин ччил гъурбан апІруган, ученикари Исайихьан гьерхру: – Увуз пасхайин хураг учу наан гьязур дапІну ккундувуз? Йип, гьязур апІуз гъягъюча. 13 Гьадмуган Дугъу, гьамци дупну, кьюр ученик гьаъру: – Шагьриз гъарахай. Учвуз шид айи гажин гъабхурайи сар кас гьахъдичвуз, гьадгъан кьяляхъди гъарахай, 14 ва думу учІву хулан эйсийиз: «Мялимди гьерхра: „Узу ученикарихъди пасхайин хураг ипІру хал набши?“» йипай. 15 Дугъу учвуз ккабалгнайи, машквраз вари гьязурди айи, заан аьхю хал улупиди. Гьадушваъ ухьуз вари гьязур апІинай. 16 Ученикар гъягъюру. Шагьриз гъафидариз Исайи гъапибси вари шулу ва пасхайин хураг гьязур апІуру. 17 Хябяхъ гъабхьибси, йицІикьюридра хъади, Иса гъюру. 18 Дурари, суфрайихъ деъну, уьл ипІурайиган, Исайи кІуру: – Гьякь кІуразачвуз: учвкан сари, Узухъди ипІурайири, Узу масу тувди. 19 Дурар пашман шулу, ва гьарури гьерхуз хъюгъру: – Думу узу дарза аьхир? 20 Хъа дугъу дурариз жаваб тувру: – Думу йицІикьюрикан сар, Узухъди саб гъабрак уьл кубсрайир ву! 21 Гьамци Инсаниятдин Бай, Гирами китабариъ улупнайиганси, масу тувди, амма шли Инсаниятдин Бай масу тувраш, дугъаз бала хьибди – думу касдиз, учв бабкан гъахьундайиш, ужу шуйи! 22 Дурари хураг ипІурайи вахтна, Исайи уьл гъадабгъну, ужуб сяаьт ибшри дупну, думу гьудубтІуру ва, ученикарихьна туври, кІуру: – Ма гъадабгъай, му Йиз беден вуйиз. 23 Зах гъадабгъну, чухсагъулин ккарагуб дапІну, дурарихьна тувру. Хъа варидари дид’ан убхъуру. 24 Дугъу дурариз кІуру: – Му цІийи йикьрар йитІурайи ва гизафдарихъанди удубзурайи Йиз ифи вуйиз. 25 Гьякь кІуразачвуз: Узу сарун тІумтІарин му чяхир убхъидарза. Узу цІийи чяхир Аллагьдин Паччагьлугъдиъ убхъидиза. 26 Хъасин Аллагьдин тярифназ мяъли дапІну, дурар Елион дагъдиз удучІвуру. 27 Исайи дурариз кІуру: – Учву варидари Узлан хъугъвал алдабгъидичва, Гирами китабариъ дупнайиси: «Марччлихъан йикІидиза, ва марччар даргъиди». 28 Хъа Узу чІиви гъашиган, Узу Галилейиз гъягъидиза ва душваъ учвуз ккилигури хьидиза. 29 – Варидари хъугъвал алдабгъишра, узу алдабгъидарза! – кІуру Петри. 30 – Гьякь кІуразавуз, – кІуру дугъаз Исайи, – гъи, гьаму йишван, даттли кьюб ражари уьъйир апІайиз, шубуб ражари Узу аьгъюр дарзуз, пидива. 31 Хъа Петри айибтІан артухъ гьисс кади текрар апІуру: – Узуз Увухъди йикІуб алабхъурушра, Уву «аьгъюр дарзуз» пидарза! Имбударира гьамцдар гафар гъапнийи. 32 Мидхъан дурар Гефсимания кІуру йишваз гъюру, ва Исайи ученикариз кІуру: – Узу ккарагури имиди гьамшвахь деай. 33 Дугъу Чахъди Петрна, Якьубна Югьан гъадагъуру. Дугъан кІваъ дердна гъалабулугъ абхъру. 34 Исайи дурариз кІуру: – Йиз юкІв яман хажалатнаъ абхънайиз, гьамшвахь гъузай, гъафил махьанай! 35 Думу сацІиб тина гьудучІвуру, жилиина кьамкьарихъди ис духьну, му аьзаб, эгер шулуш, Чахьан гьадапІбан бадали, ккарагуз хъюгъру. 36 Дугъу кІуйи: – Авва! Адаш! Увхьан вари шулвухьан! Гьаму аьзабнаккан Узу ккадаъ! Аммаки Узуз ккунибси дарибшри, хъа – Увуз. 37 Хъасин ученикарихьна гъафиган, лигуруш, дурар нивкІуз душнади рякъюру. Дугъу Петриз кІуру: – Симон, уву даахнана? Саб сяаьтдикьан нивкІ дарди гъузуз гъабхьундарнухьан? 38 Гъафил махьанай. Учву тямягьвалариъ адрахъбан бадали ккарагай. Рюгь кІубан ву, хъа беден – зяиф! 39 Иса хъана гьудучІвуру ва гьацдар гафариинди хъана ккарагуру. 40 Кьяляхъ гъафириз, дурар хъана даахну рякъюру. Дурарин улар гъагъи духьнайи. Дурарихьан Дугъаз саб жавабра тувуз шуладайи. 41 Шубубпи ражарира Иса кьяляхъ гъюру, Дугъу кІуру: – Гьамусра даахну имичва, рягьятвал гъадабгъуранчва? ИкибаштІан! Вахт хътубкьну: магьа Инсаниятдин Бай гунагькрарин хилиз тувра. 42 Гъудужвай, гъачай гъягъюрхьа! Лигай, масу туврайир багахь хьа. 43 Дугъу гьамци кІайизра, ЙицІикьюрикан сар Ягьуда кказагуру, ва дугъахъди аьхю маллйирина, къанунчйирина, аьхюдари ханжларна маргъар хьади гьаънайи адмийирин гъварчра хъайи. 44 Иса масу тувуз дуфнайи Ягьудайи дурариз гьамци дупнайи: «Салам тувруган, узу шлиз мак гъапІиш, гьадму Иса ву, ари Гьадму дисай, ва дишла, дидисну, мюгькам гъаравликкди гъайихай». 45 Ягьуда диш дапІну Исайихьинди гъюру. – Мялим! – кІуру дугъу, ва Исайиз мак апІуру. 46 Гьадму сяаьт Иса дисуру ва гъаравлиъ уьрхюру. 47 Хъа багахь дугъужвнайи сар ученикди ханжал уьчІюбгъну, аьхю маллайин гъаравшин иб ктабтІуру. 48 Гьадмуган Исайи кІуру: – Учву Уз’ин ханжларна маргъар хьади алжагъуз Узу гъачагъ вуйин? 49 Гьар йигъан Узу учвухъди, аьгъювалар улупури, Аллагьдин хулаъ айза, ва учву Узу гъидисундайчва. Хъа гъит Гирами китабариъ дупнайиси ибшри! 50 Гьадмуган Думу сарди гъитну, ученикар вари гьергну гъягъюру. 51 Исайин терефкрарихъди хъади гъахьи сар жигьил, гъяцІли жандиин ирин чарч илипну, Иса дидисну гъахурайидарин кьяляхъди гъягъюру. Думу дурари дисуру, 52 амма думу, чарч дурарин хилиъ гъибтну, гъютІурччвну, гъяцІалди гьергну гъягъюру. 53 Иса аьхю маллйирихьна гъахуру. Душвахьна аьхю маллйирна, агъсакъларна къанунчйир уч духьнайи. 54 Хъа Петр ярхла-ярхлади дурарин кьяляхъди гъюру, аьхюну маллайин гьяятдизди учІвну, гъаравшарихъди учвра цІихъ мани апІуз деъру. 55 Аьхю маллйирина вари дурарин мажлисди Исайиз аьжал адабтІбан бадали Дугъаз къаршу шагьидвалар агурайи. 56 Гьеле кучІлин шагьидар гизаф удучІвнийишра, дурарин улупбар дюзди алахьурадайи. 57 Гьадмуган гьамцдар кучІлин шагьидвалар улупру касар дихъуру: 58 – Ич ибариинди гъеебхьунчуз, Мугъу: «Хилариинди гъапІу гьаму Аллагьдин хал дабгъурза ва шубуд йигъандин арайиъ, хилариинди дарди, жараб дивурза», – кІура. 59 Гьеле гьаму улупбаркьана дурарин дюзди алахьдайи. 60 Гьадмуган аьхюну маллайи, кьялазси дуфну, Исайихьан гьерхру: – Увуз къаршуди кІурайидариз гьаз жаваб туврадарва? 61 Амма Исайи, ккебехъну, жаваб туврадайи. Аьхюну маллайи хъана Дугъхьан гьерхру: – Уву Месигь вуна, ВаритІанзаанурин Бай? 62 – Ав, вуза, – жаваб тувру Исайи. – Ва учвуз, вари Удукьрурин арччул хилихъинди деъну, аьршарин дифариинди Инсаниятдин Бай гъюри рякъидичвуз. 63 Аьхюну маллайи, хъял кубчІвбаан чан ккурттар дячІяргъну, кІуру: – Ихь сарун шагьидар гьаз ву? 64 Аллагьдикан рихшанд апІури учвузра гъеебхьунчвуз! Ичв къарар фициб хьибди? – Тахсиркар ву, ва аьжал адабтІну ккунду, – кІуйи варидари. 65 Дурарикан бязидари Дугъак тутйир катІуйи, Дугъан маш илибкну, кІуллан йивуйи, хъа кІуйи: – Эй, Пайгъамбар! Увуз шли гъивнуш, йип гьеле! 66 Хъа гьадму вахтна Петр тинаси хьайи гьяятдиъ айи. Дина аьхюну маллайин гъараваш дишагьлийирикан сар гъюру. 67 Дугъаз цІихъ чаз мани апІурайи Петр рякъюру ва, дугъахьинди дикъатниинди дилигну, кІуру: – Хъа увура хъайва гьаму Назаретжви Исайихъди. 68 Амма Петри кІул’ин бисдар: – Узуз аьгъюб фукІара адарзуз, узу гъаври адарза, уву фтикан кІураш. – Думу чІатинди улихь гьяятдизди удучІву. Гьадмуган даттли уьуь гъапІу. 69 Гъараваш дишагьлийиз думу душваъ дяркъну, душваъ айи адмийириз хъана кІуру: – Гьаму гьадрарикан сар ву. 70 Петри хъана кІул’ин бисдар. СацІиб хъугъужвну, гьяятдиъ дугъужвнайидари Петриз кІуру: – Хъа уву дугъриданра гьадрарикан вува. Уву Галилейиан вува, аьхир. 71 Хъа Дугъу хуйир апІуйи: – Учву кІурайи Кас узуз аьгъюр дарзуз! 72 Гьадмуган кьюбпи ражнура даттли уьъйир апІуру. Петрин, Исайи гъапи гьаму гафар, кІваин шулу: «Даттли кьюб ражари уьъйир апІайиз, шубуб ражари Узу аьгъюр дарзуз пидива». Ва ишуру.

Марк 15

1 ГвачІнин ухди аьхю маллйир, агъсакълар, къанунчйир ва вари заан диванханайин членар мажлисдиз уч шулу ва къарар адабгъуру. Иса, хилар йитІну, духну, Пилатдин хилиз тувру. 2 Пилатди Дугъхьан гьерхру: – Уву «жугьдарин Паччагь» вуна? – Увура гьаци кІурадарна, – пну, жаваб тувру Исайи. 3 Аьхюну маллйири Дугъак гизаф тахсрар кирчуйи, 4 гьадмуган Пилатди Дугъхьан хъана гьерхру: – Уву гьаз жаваб туврадарва! Лиг, Увук фукьан тахсрар кирчраш. 5 Амма Исайи дугъазра фукІа гъапундайи, хъа Пилат мид’ин гизаф мюгьтал гъахьнийи. 6 Халкьдин тІалабназ лигну, Пасхайин машкварган дурари ккун гъапІу сар дидиснайир деетру аьдат ади гъабхьнийи. 7 Наразивалар ахьнайиган, адми йивну гъачІи, гъалабулугъ гъитІибккдарихъди дидиснайи сар Варава кІурурра дустагъдиъ айи. 8 Халкьди, Пилатдихьна дуфну, дугъкан муганайиз айи аьдат тамам апІуб ккун апІуру. 9 Пилатди дурариз гъапи: – Учвуз ккундуш «жугьдарин Паччагь» деетуза? 10 Пилатдиз аьхю маллйири Иса бахилвалиан масу тувнайиваликан аьгъяйи. 11 Хъа аьхю маллйири халкь, Варава деетбан бадали, Пилатдикан тІалаб апІуз алауру. 12 – Учву «жугьдарин Паччагь» кІурайирикан гьапІза? – кІуру хъана Пилатди. 13 – Думу хачрак карс! – кІури, чІигъар апІуру дурари. 14 – Фу чІуруб гъапІнухъа Мугъу? – кІуру дурариз Пилатди. Амма дурари имбубсан артухъ чІигъар апІуйи: – Думу хачрак карс! 15 Халкьдиз учв ужур хьузди, Пилатди Варава деетуру, хъа Иса гъирмажарихьди урччвуз гъитну, хачрак карсуз эскрарин хилиз тувру. 16 Гъаравлари Думу айитІ гьяятдизди, паччагьдин тахт шлушвазди гъахуру ва эскрарин дестейиз дих апІуру. 17 Дурари Дугъ’ин аку-элвен халат алабхьну, хъа кІул’ин зазарикан гъубху тажсиб улубкІуру, 18 ва Думу «тебрик» апІуз хъюгъру: «Яшамиш ишри „жугьдарин Паччагь“!» 19 Хъасин Дугъан кІуллан маргъар йивуйи, Дугъак тутйир катІуйи ва, Дугъан улихь кьамкьарихъди дусну, хътІерццури, икрам апІуйи. 20 Чпиз ккунибкьан Исайикан рихшанд дапІну, Дугъхъан халат хътибтуру ва хачрак карсуз гъахуру. 21 Думу дариз зигуз гъахуру. Сар багхьантина гъягъюрайирихьди (Думу гъул’ан гъюрайи Александринна Рауфдин адаш, Киринея кІурушв’ан вуйи Симон вуйи) Дугъан хач гъабхуз гъитру. 22 Думу Голгофа кІурушвахьна хуру (илтІибкІиган, душван ччвур «Келле» кІуру гаф ву). 23 Дугъаз фикрихъан хътаъру дармнар кайи чяхир убхъуз теклиф апІуйи, хъа Дугъу гъубхъундайи. 24 Думу хачрак карсру. Эскрари, чпиз гьардиз фунуб алабхъуруш, Дугъан палтар пай апІури, тупут ипру. 25 Иса дариз зигурайиган, гвачІин сяаьт урчІвуб вуйи. 26 «Жугьдарин Паччагь» ву кІури тахсир кипну, гьамци дибикІнайи кьул Дугъан кІулихъ кибхнайи. 27 Дугъахъди сатІиди кьюр гъачагъра дариз гъизигнийи: Дугъхьан сар – арччул, тмунур – гагул терефназди. 29 Душвхьантина гьудучІвну гъягърудари Дугъаз люкьнар апІуйи, намуссуз кІуруганси кІулар тІурччвуйи ва кІуйи: – Эй Аллагьдин хал дабгърур ва шубуд йигъан диврур! 30 Уву Жвуву Жвув уьрх, кудучІв хачракан! – 31 гьамци зивзивар кчІикьуйи Дугъкан къанунчйирра хъади аьхю маллйири. – Жарадар уьрхюйи, – кІуйи дурари, – хъа Чахьан Учв уьрхюз шуладар! 32 Месигь, Израилин Паччагь! Ич уларикк, гъит, учуз рякъюри, хачракан кудучІври – гьадмуган учу Дугъахъ хъугъдича! Гьеле Дугъахъди сатІиди дариз дизигнайидарра кмиди Дугъак кялхъюйи. 33 Лисхъантина тап сяаьт шуббаризкьан вари дюн’яйиин мучІушин алабхъуру. 34 Хъа сяаьт шубубди Исайи аьхю дихниинди гьарай апІуру: – Элахи, Элахи, лама шевактани? (яна «Йиз Аллагь, Йиз Аллагь! Гьаз Уву Узу гъитунва?») 35 Душван багахь дийигънайидарикан бязидари, Дугъан гафар гъеерхьиган, кІуйи: – Ебхьурайчвуз, Ил’ясдиз дих апІура! 36 Хъа сар кас, жаргъну дуфну, бамбагсибдиз сирке зигуз гъитну, маргълик кибтІну, Дугъаз убхъуз туври, кІуру: – Гьамус лигухьа, Му ктагъуз Ил’яс гъюруш – гъюрдарш. 37 Исайи, чІветІ дапІну, рюгь деебтуру. 38 Аллагьдин хулаъ, Гирамишвахь гьибхнайи чарч зиълансина кІаназкьан кьюб йишв’ина чІябгъюру. 39 Хачран багахь дийигънайи юзбашийиз, Исайилан фици ил алдабгънуш, рябкъюру ва кІуру: – Дугъриданна Му Кас Аллагьдин Бай вуйи. 40 Душвахь, ярхлаан лигури, сакьюдар дишагьлийирра хьайи. Дурарин арайиъ Магдалайиан вуйи Мар’ям, бицІирнур Якьубдинна Юсийин дада Мар’ям ва Саломея айи. 41 Иса Галилейиъ айиган, мурар Гьадгъахъди ва Гьадгъан гъайгъушнаъ шуйи. Дугъахъди Ерусалимдиз гъафи хъана жара дишагьлийирра мушвахь хьайи. 42 Сарун хябяхъ шулайи. Хъа му йигъ, султ йигъан улихь хьимбу жвуми йигъ вуди хьпаз дилигну, 43 жугьдарин заан диванханайиъ кьувват айи, гьацира Аллагьдин Паччагьлугъдиз ккилигурайи Аримафейиан вуйи Юсуфди, кІубанвал кади Пилатдихьна дуфну, Исайин беден чан ихтиярназ тІалаб апІуру. 44 Думу гьамкьан ухди йикІбиин Пилат мюгьтал духьнайи ва, юзбашийиз дих дапІну, Иса ухди дукІнаш, гьерхру. 45 Юзбашийикан гьаци вуйиб аьгъю дапІну, дугъу Юсуфдиз дубкІнайи беден гъадабгъуз ихтияр тувру. 46 Дугъу кафан гъадабгъну, беден кадабгъну, дидгъян гъибиржуру ва гъарзариъ утІубкнайи накьвдиъ ивну, душваз учІврушвахь гъван гьипру. 47 Хъа Магдалайиан вуйи Мар’ямна Юсийин дада Мар’ям, Думу наан кивраш, лигурайи.

Марк 16

1 Султ йигъ улдукьиган, Магдалайиан вуйи Якьубдин дада Мар’ямди ва Саломеяйи Исайин бедендикан ктатуз ицци ниъ хъайи ччимар гъадагъуру. 2 Гьяфтайин садпи йигъан, яна элгьетган, гвачІнин ухди, ригъдин сабпи нурарихьди, дурар накьвдихьна гъюру. 3 – Ухьуз накьвдихьан гъван шли гьадабгъиди, – кІуйи чиб-чпиз дурари, гьаз гъапиш душвахь гьипнайи гъван гизаф аьхюб вуйи. 4 Лигуруш, гъван гьидипна. 5 Накьвдиъ учІвдариз, арччул терефнаъ лизи палтар алди деънайи жигьил рякъюру ва сабпну гучІ шулу. 6 – ГучІ мапІанай! – кІуру дугъу дарариз. – Дариз гъизигу Назаретдиан вуйи Иса учву агурачва. Думу чІиви гъахьну, мушваъ имдар. Магьа Думу дитну гъахьи йишвра. 7 Сарун учву гъарахай, Дугъан ученикариз, иллагьки Петриз, Думу Галилейиъ дурариз ккилигура, йипай. 8 Дурар, накьвдиан удучІвдар, гучІбаан гьергну гъягъюру. Дурари гьич саризра фукІара гъапундайи – дурариз гучІуйи. 9 Гьяфтайин садпи йигъан гвачІинган чІиви гъахьи Иса сифте чаан ургуб жин утІукку Магдалайиан вуйи Мар’ямдиз ачмиш шулу. 10 Дугъу мидкан гъам зигурайи ва ишурайи ученикариз хабар дебккру. 11 Хъа дурар Думу чІиви духьнайивалихъ, му дишагьлийи чаз гъяркъюнзуз гъапнушра, хъугъундайи. 12 Мидхъан Думу жара суратнаъди дурарикан кьюриз, чпи шагьриан удубчІвурайи рякъюъ айиган, ачмиш гъахьнийи. 13 Дурар кьяляхъ хътакнийи ва мидкан имбударизра хабар дебккнийи. Амма дурар мурарихъра хъугъундайи. 14 Аьхирки, йицІисар ученик суфрайихъ деъну уьл ипІурайиган, Иса Учв ачмиш шулу ва, кІван курвализ ва хътругъувализ дилигну, Дугъу дурариз тягьна йивуру, гьаз гъапиш дурар Думу чІиви духьну гъяркъдарихъ хъугъундайи. 15 Дугъу дурариз кІуру: – Вари дюн’я вуйиси гъарахай ва Ужувлан хабар вари инсаниятдиз дебккай. 16 Шли, хъугъну, штуан апІувал кьабул гъапІиш, думу женнетдиъ ахъди, хъа фуж хътругъиш, думу жегьеннемдиъ итди. 17 Хъугъдарихьан аьламатар улупуз хьибди: дурарихьан Йиз ччвурниинди жинар утІурккуз хьиди, цІийи чІалариинди кІури хьиди. 18 Эгер битІ гъибисиш, ясана агъу гъубхъиш, дурариз саб зарарра хьибдар; иццрудариин хилар иливиди – ва дурар сагъ хьиди. 19 Гьамци дупну, Агъа Иса завариз за шулу ва Аллагьдин арччулну хилихъ деъру. 20 Хъа дурар гъягъюру ва варишвариъ Ужувлан хабар рабгъуру. Дурарин му ляхниз Агъайи кюмек апІуру, ва дурари улупру аьгъювалар аьжайиб лишнариинди мюгькам шуйи.

Лука 1

1 Ич арайиъ гъаши мялум вуйи гьядисйирин гьякьнаан гьамус гизафдари бикІуз хъюгъна. 2 Учузра дурар сифте кІулиан чпин улариинди гъяркъдари ва Аллагьдин Гафнан гъуллугъниин алидари гизафдар ктитну. 3 Узура, гьарсаб жигьат дикъатниинди сифтейиан аьхиризкьан ахтармиш апІбалан кьяляхъ, гьамрарикан увуз, гьюрматлу Феофил, хъайи-хъайиси дибикІну, ктибтуб лазим вуди фикир гъапІунза. 4 Миди увуз туву аьгъюваларин бин мюгькам апІиди. 5 Ягьудия уьлкейин паччагь Гьироддин девриъ душваъ Абияйирин «ражнаъ» гъуллугъ гъабхурайи Закар’я кІуру сар малла ва Гьарундин тухмиан вуйи Елисавета кІуру дугъан хпир ади гъахьну. 6 Дурар кьюридра, Аллагьдин вари табшуругъар ва къайдйир уьрхюри, Дугъан улихь дугъри агьлар вуди гъахьну. 7 Дурариз веледар адайи, гьаз гъапиш Елисавета бегьерсузур вуйи. Дурар кьюридра агьли яшнахъна хъуркьнайи. 8 Сабан, Закар’яйи Аллагьдиз чан гъуллугъ апІурайи вахтна (дугъахъди хъайи маллйирин раж, яна гъуллугънан нубат хъубкьнайи), 9 маллйирин арайиъ, аьдат вуйиганси, тупут ипиган, думу Аллагьдин хулаъ ицци ниъ хъайидар ургуз гъягъбакк ккуркьнийи. 10 Хъа Аллагьдин хулан гьяятдиъ халкь му вахтна ккарагурайи. 11 Гьадмуган Закар’яйиз ицци ниъ хъайидар ургурайишван арччул терефнаъ Аллагьдин малайик дийигъну рякъюру. 12 Думу гъяркъган, Закар’я чашмиш шулу ва дугъак яманди гучІ кабхъру. 13 Малайикди дугъаз гьамци кІуру: – ГучІ мапІан, Закар’я, яв ккарагувал деебхьна, ва яв хпир Елисаветайи увуз бай апІиди, дугъ’ин Ягь’я кІуру ччвур илив. 14 Увуз хуш’вална шадвал хьибди, ва гизафдар думу бабкан хьувалиин шад хьиди, 15 фицики думу Аллагьдин улихь, зурба касси, заан хьиди. Дугъу чяхир вая жара ички убхъидар. Думу чав бабкан гъахьи йигъхъанмина Аллагьдин Рюгьнахьди ацІнайир хьиди. 16 Дугъу Израилин баярикан гизафдар Аллагьдихьинди илтІикІиди. 17 Абйирин юкІвар веледарихьна илдицбан бадали, мютІюгъ дарудар марцци касарин фикрарихьна илтІикІбан бадали ва Агъа гъяйиз халкь гьязур апІбан бадали, думу Дугъан улихьди Ил’ясдин рюгьнаъди ва кьудратнаъди гъягъюри хьиди. 18 Закар’яйи Малайикдиз кІуру: – Му гьякь вуйиб узуз фици аьгъю хьибди, узу кьабир вуза, хъа йиз хпирра агьли яшариъ а? 19 Малайикди дугъаз гъапи: – Узу Аллагьдин улихь дийигънайи ва увухьна ужуб хабар тувуз гьаънайи Жабраил вуза. 20 Амма гьадму ляхин кІулиз удубчІвру йигъ гъяйиз, яв чІал бисиди ва увуз улхуз мумкинвал хьибдар. Гьаз гъапиш чарасуз кІулиз удучІвру му йиз гафарихъ хъугъундарва. 21 Му арайиъ чІат Закар’яйиз ккилигурайи халкь думу Аллагьдин хулаъ энгел духьнайивалиин мюгьталди айи. 22 Думу халкьдихьна удучІвиган, улхуз даршули гъузру ва дурариз, Закар’яйиз Аллагьдин хулаъ Малайик гъяркъюб, аьгъю шулу. Закар’яра, лал гъаширси, халкьдихъди хилин ишаратариинди улхуз хъюгъру. 23 Хъа Аллагьдин хулаъ гъуллугъ апІбан йигъар ккудукІиган, Закар’я чан хулаз хътакуру. 24 Гьадму йигъарилан кьяляхъ дугъан шив Елисавета, гъагъдиъ духьну, хьуб вазлин арайиъ чІатна удудучІвди, учв улупури гъахьундар. Дугъу гьамци кІуйи: 25 – Гьаму йигъари узухьинди илдицу Аллагьди инсанарин арайиъ уз’ин али бегьерсузвалин нянат алдабгъруганси гъапІну. 26 Хъа йирхьубпи ваз улубкьиган, Аллагьди Галилей уьлкейиъ айи Назарет кІуру шагьриз 27 Давудрин тухмиан вуйи Юсуф кІуру касдиз хъирснайи шурахьна Жабраил малайик гьаъру. Шуран ччвур Мар’ям вуйи. 28 Малайикди, риш айи хулаъ учІвну, гъапну: – Хайир ибшри, Аллагьди кадагънайи Дишагьли! Аллагь гьарган увухъди хъади хьиди! 29 Думу гъяркъиган, Мар’ям дугъан гафариин мюгьтал шулу ва, учв мици саламламиш апІувал фу вуйкІан кІури, фикрарик кахъру. 30 Хъа малайикди дугъаз гъапну: – ГучІ мапІан, Мар’ям, Аллагьди увуз уж’вал улупна: 31 магьа БицІир киршдивук ва Бай апІидива. Дугъ’ин Иса кІуру ччвур иливидива. 32 Думу зурба Кас хьиди, ва Дугъаз ВаритІанзаанурин Бай пиди. Агъа Аллагьди Дугъаз Чан аба Давудрин паччагьвалин тахт тувди. 33 Дугъу Якьубдин халкьдиин уьмурлугъди паччагьвал апІиди, ва Дугъан паччагьвалин аьхир хьибдар. 34 Мар’ямди малайикдиз кІуру: – Му ляхин хьуб фици мумкин вухъа, узу мегьел швуваз душнадарди? 35 Малайикди Дугъаз гъапи: – Аллагьдин Рюгь учІвди увуъ ва ВаритІанзаанури уву Чан кьувватнакк ккаъди, гьаддиз бабкан шулайи Гирамийиз Аллагьдин Бай пиди. 36 Магьа чаз бегьерсузур кІурайи яв багахьлу Елисаветара чан кьабишнаккди, бицІир кади гъагъдиъ ади, йирхьубпи ваз ву, 37 гьаз гъапиш Аллагьдин гьич саб гафра кьувватсузди гъубзурдар. 38 Мар’ямди: – Узу Аллагьдин лукІ вуза, уз’ин уву кІурайидар улуркьри, – кІуру. Хъа малайик Дугъхьан гьудучІвуру. 39 Гьадму йигъарикан сад йигъан Мар’ям, гьялаквал кади, Ягьудия уьлкейин дагълариъ айи саб шагьриз гъягъюру 40 ва, Закар’яйин хулаъ учІвну, Елисаветайиз салам тувру. 41 Мар’ямдин салам гъеебхьиган, Елисаветайин фуниъ бицІир гъиришву ва Елисавета Аллагьдин Рюгьнахьди ацІру. 42 Елисаветайи, зарбди чІигъ дапІну, гъапну: – Уву дишагьлийирин арайиъ бахтавар вува, ва яв фуниъ айи бегьерра бахтавар ву! 43 Узухьна йиз Агъайин дада гъювалин бахт узуз наънан гъафиб вуйкІан? 44 Яв салам туврайи сес йиз ибарихъна гъурубкьубси, йиз фуниъ айи бицІир шадди гьялак гъахьну. 45 Аллагьдихьан дупнайиб тамам шлувалихъ хъугънайир, хуш бахтавар вува. 46 Мар’ямди гьамци жаваб тувру: – Узу йиз кІваан Агъа заан апІураза. 47 Йиз рюгь узу гьарсабдихьан уьрхюрайи Аллагьдикан шад духьна. 48 Дугъу чан лукІран аьжуз гьялназ лигну рягьим гъапІну, гьамусдихъантина вари наслари узуз уж’вал алабхъу кас пиди, 49 Гьаз гъапиш Кьувватлури узуз зурба ляхин гъапІну, ва Дугъан ччвур гирами ву. 50 Чахьан гучІрудариз наслариан наслариз Дугъан уж’вал а. 51 Дугъу, Чан хиларин кьувват улупури, кІваъ дамагълу фикрар айидар гьубкьушвахъинди гъарагъну. 52 Кьудратлудар тахтарилан илдитну ва аьжузар заан гъапІну. 53 Дарвал айидар ужувлариинди рази гъапІну, хъа девлетлутІан девлетлу шулайидар фукІа адарди деетну. 54 Чан гъуллугъниин али Израилин халкьдиз кюмек гъапІну, Чав ихь абйириз гъапиганси, Ибрагьимдиз ва дугъан тухмиз гьаргандиз уж’вал апІуз тувнайи гаф кІваин уьбхюра. 56 Мар’ям Елисаветайихь шубуб вазлиъкьан гъузну, хъа чан хулаз хътакуру. 57 Елисаветайи, вахт улубкьиган, бицІир апІуру. 58 Агъайи рягьим дапІну думу за апІбакан гъуншйиризна майил-мадатдиз гъеебхьнийи ва дурар дугъахъди сабси шад гъахьнийи. 59 Миржидпи йигъан багахьлуйир бицІирин суннат апІуз гъюру ва дугъ’ин чан адашдин ччвур Закар’я иливуз ккун шулу. 60 Мид’ин балин дада рази даршиди, дугъаз Ягь’я кІурхьа, гъапну. 61 Хъа дугъаз: «Яв багахьлуйиригъ дициб ччвур алир фужкІа гъядар», кІуру. 62 Хъасин, бал’ин фициб ччвур иливуруш, хилин ишаратариинди Закар’яйихьан гьерхру. 63 Дугъу, чахьна чан кьул хуз гъитну, дидик гьамци бикІуру: «Дугъан ччвур Ягь’я хьибди». Хъа вари мюгьтал шулу. 64 Гьадму сяаьт дугъан ушвна мелз деебтнийи ва думу, Аллагьдин ад апІури, улхуз хъюгъру. 65 Дурарин гъуншйир-мирасарик гучІ кабхъру ва вари гьамрарикан бютюн дагълу Ягьудия уьлке вуйибси ктибтури гъахьну. 66 Мидкан гъеебхьдари, мурар чпин кІваъ уьрхюри, гьамци кІури гъахьну: – Аллагьдин хил али му балкан фуж шуйкІан? 67 Хъа балин адаш Закар’яйира, Аллагьдин Рюгьнахьди ацІнади, гьамци кІури, чан аьяндарвал улупуру: 68 – Израилин Аллагь вуйи Агъайиз чухсагъул! Дугъу, кюмекназ дуфну, Чан халкь азад гъапІну. 69 Дегьзаманайи гъахьи марцци пайгъамбрарин мелзналан мялум гъапІубси, Дугъу Чан лукІ вуйи Давудрин тухмиан Кьудратлур – ухьу гунгьарикан азад АпІрур – адаъну. 71 Дугъу ухьу вари ихь душмнарихьан ва ухьу даккнидарихьан уьрхюз гаф тувну. 72 Дугъу ихь абйириз уж’вал апІуз ва дурарихъди гъийитІу гирами вуйи йикьрар тамам апІуз гаф тувну. 73 Му йикьрар Аллагьди ихь аьхю аба Ибрагьимдиз ухьу душмнарихьан уьрхюз туву аьгьт ву: 74 Дурари ухьуз, гучІ дарди, ихь уьмрин кІулиан аьхиризкьан Дугъан улихь марцциди ва гьякьди гъуллугъ апІуз гъитди. 76 Хъа увуз, йиз бай, ВаритІанзаанурин пайгъамбар пиди, гьаз гъапиш уву Агъайин улихьди Дугъаз рякъяр ккабалгуз, 77 Дугъу халкь уьрхрувалин ва инсанарин гунгьарилан хил алдабгърувалин гьякьнаан халкь гъаврикк ккауз, 78 Аллагьдин зурба уж’вал ахсрарин Нурси ухь’ина дуфну, 79 МучІушнаъ ва аьжалин гъабгъу дяхъникк деънайидариз акв тувуз, ихь рякъяр мясляаьтниина хуз, гъидива. 80 БицІи Ягь’я, аьхю шули, рюгьниинди мюгькам хьуз хъюгъру. Думу, Израилин халкьдиз гъуллугъ апІуз гъяйизкьан, ичІи чюллериъ яшамиш шулу.

Лука 2

1 Думу йигъари Август кІуру Римдин паччагьдин чан вари ругариин али агьалйир гьисаб апІуз амур удубчІвуру. 2 Му Сирия вилаятдиъ Квиринийи паччагьвал апІурайи девриъ сабпи ражну гъабхурайи ляхин вуйи. 3 Гьаддиз вари, чпи дикІбан бадали, гьарур чан шагьриз гъушнийи. 4 Галилей уьлкейиъ айи Назарет шагьриан Ягьудия уьлкейиъ айи Давуд бабкан гъахьи Вифлеем кІуру шагьриз Юсуфра гъягъюру, фицики думу Давудгъярин тухмиан вуйи. 5 Думу чаз хъирснайи ва гъагъдиъ айи Мар’ямдихъди чпи дикІуз душнайир вуйи. 6 Дурар душваъ айиган, Мар’ямдин бицІир шлу вахт улубкьуру, 7 ва дугъу чан сарпи велед – Бай апІуру. Думу ччаппаригъян гъидиржну, аьхъиъ айи тІунаъ дитру, гьаз гъапиш дурариз хялар дергру хулариъ йишв ади гъибихъундайи. 8 Гьадму уьлкейиъ йишвну чюлиъ марччлихънар чпин сюрйирин гъаравлиъ айи. 9 Сабпну дурарин улихьна Агъайин малайик гъафнийи. Агъайин гьяйбатнан нурну дурар варишварихъанди аку гъапІнийи, ва дурарик гучІ кабхънийи. 10 Малайикди дурариз кІуру: – ГучІ мапІанай, узу учвуз вари халкь шад апІру ужуб хабар дубхназа: 11 гъи Давудрин шагьриъ учву гунгьариккан азад АпІрур, Агъа Месигь, бабкан гъахьну. 12 Магьа учвуз мидин лишанра: учвуз, ччаппаригъ гъидиржнади, тІунаъ БицІир дихъидичвуз. 13 Ва сабпну му малайикдин кьяляхъди гизаф кьадарнаъди жара малаикарра гъюру ва дурари, Аллагьдин ад апІури, гьамци кІуру: 14 – Аьршариин али Аллагьдин ад за ибшри, жилиин Аллагьдиз разивал хурайи инсанарин арайиъ ислягьвал ибшри! 15 Малайикар дурарихьан завариз удучІвиган, марччлихънари чиб-чпиз гьамци кІуру: – Вифлеемдиз душну, душваъ фу гъабхьнуш, Агъайи ухьуз фтин гьякьнаан хабар дебккнуш, лигухьа. 16 Тядивал кади гъафидариз Мар’ямна Юсуф ва тІунахъ хъайи БицІир рякъюру. 17 Дурар гъяркъиган, марччлихънари му БицІирин гьякьнаан чпиз малайикди гъапибдикан ктибтуру. 18 Мидкан гъеебхькьандар вари марччлихънари ктитдариин мюгьтал шулу. 19 Хъа Мар’ямди му вари гафар, саб-сабдиин иливури, чан кІваъ уьрхюру. 20 Марччлихънарра, чпиз малайикди гъапидар, чпин улариз рякъбаз лигну, Аллагь адлу апІури ва Дугъан тярифар апІури, кьяляхъ хътакуру. 21 Миржид йигълан БицІирин суннат апІру вахт улубкьиган, Дугъ’ин, Учв бабак киршайиз малайикди улупу, гьадму Иса кІуру ччвур иливуру. 22 Хъа, Мусайин къанундиз лигну, суннат марцц хьпан йигъар тамам гъашиган, Думу Агъайин улихь дерккбан бадали, Ерусалимдиз хуру. 23 Агъайин Къанундиъ улупнайиганси, «гьарсаб хизандиъ сарпи жили бай Агъайиз бахш апІуб лазим вуйи». 24 Ва, гьадму Къанундиъ дибикІнайиганси, «кьюб гъюд вая луфран чиркквар, гъурбан дапІну, урккуб лазим вуйи». 25 Думу деврин Ерусалимдиъ Симеон кІуру сар кас айи. Думу Израилиз Аллагьдихьан кюмек рубкьайиз ккилигурайи дугъри ва аьдалатлу адми вуйи. Дугъ’ин Аллагьдин Рюгь алийи. 26 Дугъаз Аллагьдин Рюгьну, Агъайи кадагънайи Месигь чаз рякъяйиз, аьжал хьибдарив пну, улупнайи. 27 Симеон Аллагьдин Рюгьнаккди Аллагьдин хулаз гъюру. Абйир-бабари БицІи Иса Къанундиъ улупнайиб апІуз гъахиган, 28 Симеонди, Иса хилариина гъадагъуру ва, Аллагьдин ад дапІну, кІуру: 29 – Я Гьюкумдар! Уву гъапиганси, гьамус узу, Яв лукІ, разивалиинди деет, 30 сарун, магьа вари халкьарин улихь Уву улупу, учу завалариккан уьрхюз дуфнайи Месигь Вуйир, аллагьсузар зигьимдихьна гъахру нур Вуйир ва Яв Израилин халкьдин адлувал Вуйир йиз улариз гъяркъниз. 33 Юсуфна Мар’ям БицІи Исайикан гъапидариин мюгьтал шулу. 34 Симеонди, дурариз уж’вал ккун дапІну, Мар’ямдиз гьамци кІуру: – Гьаму яв Бай Израилиъ гизафдар асккан хьпан, гьам заан хьпан себеб хьиди. Мугълантина гизаф улхбар хьиди. 35 Яв кІваантина яракь итІибгъиди ва гьаддиинди аьхючІвеъ юкІвариъ айи ниятар ачухъ хьиди. 36 Мушваъ гьацира Ашерин тухмиан вуйи, гизаф кьаби яшнаъ айи, чан жилирихъди ургуд йисантІан яшамиш дарши, Фануилин риш аьяндар Аннара айи. 37 Думу, миржцІурна юкьуд йисаъ айи ачІни гъари, йигъ-йишвди ушвар дисбииндина ккарагбиинди Аллагьдиз гъуллугъ апІури, Аллагьдин хулхьан гьудудучІври шуйи. 38 Аннайи, гьадму вахтна душвахьна дуфну, Аллагь адлу апІури, Ерусалим азад хьувализ ккилигурайикьандариз вардариз Исайин гьякьнаан ктитури гъахьну. 39 Вари ляхнар Агъайин Къанундиъ улупнайиси ккудукІиган, Юсуфна Мар’ям Галилей уьлкейиъ айи чпин Назарет шагьриз хътакуру. 40 Хъа БицІир аьхю шули, мюгькам шули, аьгъювалари ацІри, Дугъ’ин Аллагьдин уж’вал алди гъабхьну. 41 Исайин абйир-бабар гьар йисан Ерусалимдиз Пасхайин машквраз гъягъюри шуйи. 42 Исайин йицІикьюд йис тамам гъабшиган, дурар, чпин аьдат вуйиганси, Ерусалимдиз гьадму машквраз гъафну. 43 Машквран йигъар ккудукІну, кьяляхъ хътакру вахтна, живан Иса Ерусалимдиъ гъузру. Амма абйир-бабариз мидкан аьгъяди гъабхьундар. 44 Дурари, Иса жарадарихъди гъюрашул кІури, фикир апІуру. Хъа сад йигъандин рякъ ккадапІиган, дурари багахьлуйирин ва таниш вуйидарин арайиъ Иса агуз хъюгъру. 45 Хъа чпиз Иса дидрихъиган, Дугъахъ лицури Ерусалимдиз хътакуру. 46 Шубуд йигълан Думу, Аллагьдин хулаъ мялимарин арайиъ деъну, дурарихъ хъпехъури ва дурариз суалар туври рякъюру. 47 Исайихъ хъпехъурайидар вари Дугъан фагьумлувалиин ва Дугъан жавабариин мюгьтал духьнайи. 48 Душваъ Иса гъяркъиган, абйир-бабар мюгьтал гъахьи. Дадайи Дугъаз гъапну: – Я жан Бай! Уву учкан гьапІунва? Магьа узуна Яв адашди зурба хажалат кади Уву агури гъахьунча. 49 Исайи дурариз гъапи: – Узу гьаз агури гъахьунчва? Мегер учвуз узу йиз Адашдин ужагъдиъ духьну ккуниб аьгъданчвуз? 50 Амма дурар Дугъу гъапи гафарин гъаври ахъундайи. 51 Хъа Иса дурарихъди Назаретдиз гъюру ва мютІюгъ шулу. Дугъан дадайи вари гьаму ляхнар чан кІваъ уьрхюри шуйи. 52 Иса гьам фагьумлувалиъ, гьам яшнаъ улихьна гъягъюри гъахьну. Думу Аллагьдизра, инсанаризра ккунди гъузру.

Лука 3

1 Тиберий кІуру Римдин паччагьди паччагьвал апІури йицІихьудпи йис вуйиган, Ягьудия уьлкейиъ Понтий Пилатди аьхювал апІурайи девриъ, Гьирод – Галилей уьлкейин, дугъан чве Филип – Итурей уьлкейинна Трагьонит юрднан, хъа Лисаний – Абилей уьлкейин гьюкумдрар вуйиган, 2 Гьаннай ва Каяфа аьхюну маллйир вуди гъахьну. Гьадму йисан ичІи чюлиъ айи Закар’яйин бай Ягь’яйиз завариан Аллагьдин дих гъабхьнийи. 3 Гьаму дихнахъди Ягь’яйи, вари Ярдан нирин гъирагъар вуйиси лицури, гьар касди чан тахсрар гардандиъ дисбан, инсанар штуан апІбан ва гьамци чпин гунгьарилан хил алдабгъбан бадали, аьгъювалар рагъури гъахьну. 4 Му Ишая пайгъамбрин китабдиъ дибикІну айиси гъабхьну: – ИчІи чюлиъ дих атІабгура: «Агъайин рякъ ккабалгай, Дугъаз рякъяр-жилгъйир диш апІинай. 5 Гьарсаб гъяр ругди гъябцІиди, гьарсаб дагъна тепе – ис, кьяни йишвар – дюз, дюз дару рякъяр цІалцІам хьиди. 6 Гьарсар жан алириз Аллагьди Чав гунгьариккан азад апІувал рябкъиди». 7 Чахьна штуан апІуз гъафи халкьдиз Ягь’яйи кІуйи: – БитІракан гъахьидар! Гъюз ккайи Аллагьдин хъюлхьан гьергуз шли улупунчвуз? 8 Учву, ичв гунгьар гардандиъ дидисну, уьмур дигиш апІуз шлуси, ичв ляхнариинди улупай ва, «Ич аба Ибрагьим ву» кІури, фикиркьана мапІанай, гьаз гъапиш учвуз кІуразаки, Аллагьдихьан гьаму гъванариканра Ибрагьимдиз веледар ктауз шулу. 9 Гьарин кьаблихъ магьа екІв гьязурди хъа: гъяни йимиш туври адру гьарсаб гьар алдабтІиди ва цІигъна гатІабхьиди. 10 Хъа халкьди дугъхьан гьерхру: – Хъа учу гьапІну ккунду? 11 Ягь’яйи кІуру: – Кьюб гъат палат айири, сабнуб адруриз туври; шлиз ипІруб-убхъруб аш, гьадгъура гьаци пай апІри. 12 Налук уч апІрударира, чпи штуан апІбан бадали дуфну, дугъаз: «Я мялим! Учу гьапІча?» – кІури, гьерхру. 13 Ягь’яйи дураризра жаваб туву: – Учвуз улупнайибтІан артухъ налук мибисанай. 14 Эскрарира дугъхьан гьерхру: – Учу гьапІну ккунду? Хъа дугъу дураризра кІуру: – Сар касдизкьан гиран макадапІанай, футна мапІанай ва ичв дуллугъниин рази йихьай. 15 Халкь Месигьдиз ккилигуради, вардари: «Гьаяман, му Ягь’я Месигь даришри гьа?» – кІури, фикир апІурайиган, 16 Ягь’яйи дурариз вардариз жаваб туври гъахьну: – Узу учву штуан апІуразачву, амма йиз кьяляхъди узутІан Кьудратлур гъюра, узу Дугъан шаламарин гъахмйир гъядарчузкьан лайикь дарза. Дугъу Гирами Рюгьнахьдина цІихьди цІийи алаидичву. 17 Дугъан хилиъ йирф хьибди, Дугъу дяхинна нахъв жара апІиди: дяхин Чан танхариъ абхьди, хъа нахъвар хътрубгру цІигъ гъяхьну ургиди. 18 Ягь’яйи гьамци ва хъанара жара гафариинди халкьдиз ужуб хабар дебккри гъахьну. 19 Хъа Ягь’яйи гьякимдар Гьироддик, чан чвуччвун хпир Иродиада чаз дитбаз ва жара пис ляхнар апІбаз лигну, тахсир кипган, 20 Гьиродди чан чІуру ляхнар, думу дустагъдиъ итбиинди, гужал гъапІну. 21 Вари халкь штуан шулайиган, Исара Ягь’яйихьна гъафну. Штуан гъахьи Иса ккарагурайиган, зав атІабццуру, 22 ва Аллагьдин Рюгь луф жюрейиинди Исайиина ис шулу, хъа зав’ан дих шулу: – Уву Йиз масан Бай вува! Узу Ув’ин гизаф рази вуза! 23 Исайин, Аллагьдиз гъуллугъ апІуз хъюгъруган, сумчІур йис дубхьнайи. Халкьди фикир апІурайиганси, Думу Юсуфдин бай ву кІура. Юсуф Гьелийин бай, 24 Гьели Маттатдин бай, Маттат Левийин бай, Левий Мелкийин бай, Мелки Яннайин бай, Янна Юсуфдин бай, 25 Юсуф Маттайин бай, Матта Амосдин бай, Амос Нагьумдин бай, Нагьум Эслимдин бай, Эслим Наггайин бай, 26 Наггай Маатдин бай, Маат Маттайин бай, Матта Симеиндин бай, Симеин Ясегьдин бай, Ясегь Ядайин бай, 27 Яда Яанандин бай, Яанан Рисайин бай, Риса Зеруббабелин бай, Зеруббабел Шеалтиэлин бай, Шеалтиэл Нерийин бай, 28 Нери Мелкийин бай, Мелки Аддийин бай, Адди Косамдин бай, Косам Элмадамдин бай, Элмадам Эрин бай, 29 Эр Ешийин бай, Еши Элизарин бай, Элизар Яфимдин бай, Яфим Маттатдин бай, Маттат Левийин бай, 30 Левий Симеондин бай, Симеон Ягьудайин бай, Ягьуда Юсуфдин бай, Юсуф Янамдин бай, Янам Элиякимдин бай, 31 Элияким Мемайин бай, Мема Меннандин бай, Меннан Маттатдин бай, Маттат Натандин бай, Натан Давудрин бай, 32 Давуд Ессейин бай, Ессе Обеддин бай, Обед Воаздин бай, Воаз Салмандин бай, Салман Нецрондин бай, 33 Нецрон Амминадабдин бай, Амминадаб Арамдин бай, Арам Гьецрондин бай, Гьецрон Перецдин бай, Перец Ягьудайин бай, 34 Ягьуда Якьубдин бай, Якьуб Исакьдин бай, Исакь Ибрагьимдин бай, Ибрагьим Терагьдин бай, Терагь Нагьорин бай, 35 Нагьор Серукдин бай, Серук Реуйин бай, Реу Пелегдин бай, Пелег Эберин бай, Эбер Шелайин бай, 36 Шела Каинандин бай, Каинан Арфакшаддин бай, Арфакшад Симдин бай, Сим Нюгьдин бай, Нюгь Лемекдин бай, 37 Лемек Метушелагьдин бай, Метушелагь Янокдин бай, Янок Яреддин бай, Яред Магьалеелин бай, Магьалеел Кайнандин бай, 38 Кайнан Еношдин бай, Енош Шитдин бай, Шит Адамдин бай, Адам Аллагьдин бай вуди гъахьну.

Лука 4

1 Гирами Рюгьну ацІу Иса Ярдан нирхъан кьяляхъ хътакуру, ва Рюгьну Думу ичІи чюлиз гъахуру. 2 Душваъ иблис ягъчІвур йигъан Иса рякъ’ан адауз чалишмиш шулу. Исайи му йигъари фукІа дирипІди гъахьну, хъа гьадму йигъар улдучІвиган, аьхирки, Дугъаз яманди гаш шулу. 3 Хъа иблисди Исайиз гъапи: – Эгер Уву Аллагьдин Бай вуш, гьаму гъвандикан уьл хьуз гъит. 4 Исайи жаваб вуди гъапи: – Гирами китабариъ дибикІнаки: «Инсан ялгъуз уьл’инди яшамиш шуладар». 5 Иса ягъал йишв’ина адаъну, иблисди Дугъаз саб геренди вари дюн’яйин паччагьлугъар улупуру, 6 ва кІуру: – Вари гьаму паччагьлугъар ва дурарин гьяйбат Увуз тувдиза, фицики дурар йиз ихтиярназ тувна ва узхьан дурар узуз ккунириз тувуз шулзухьан. 7 Эгер Уву узуз икрам гъапІиш, гьадрар вари Явдар хьиди. 8 Исайи дугъаз жаваб туву: – Гирами китабариъ дибикІна: «Яв Агъа Аллагьдиз икрам апІин ва сар ДугъазтІан гъуллугъ мапІан». 9 Иблисди хъана Иса, Ерусалимдиз духну, Аллагьдин хулан вартІан ягълишв’ин дерккру ва кІуру: – Эгер Уву Аллагьдин Бай вуш, ари гьамлин исина урс, 10 фицики дибикІна: «Аллагьди Чан малайикариз, гъайгъушнаъ духьну Уву уьрх кІури, амур апІиди. 11 Ва Яв ликкьан гъвандихъ йивуз гъидритруганси, Уву чпин хилариина гъадагъиди». 12 Исайи дугъаз жаваб вуди гъапи: – Гьамцира дупна: «Яв Агъа Аллагь ахтармиш мапІан». 13 Иса рякъ’ан адаъру вари чарйир хътІарцциган, жара саб ужуб вахт ккабхъайиз, иблис Дугъхьан гьудучІвну гъушу. 14 Иса Аллагьдин Рюгьнан тясирнаккди Галилей уьлкейиз хътакуру ва Дугъан гьякьнаан бютюн уьлке вуйибси аваза рабгъуру. 15 Исайи мистариъ аьгъювалар улупуйи, ва вардари Думу адлу апІуйи. 16 Хъа Иса, Учв тербияламиш гъаши Назаретдиз дуфну, Чан аьдат вуйиси, султ йигъан мистаъ учІвру ва Гирами китаб урхуз гъудужвуру. 17 Гьадмуган Исайихьна Ишая пайгъамбрин китаб тувру. Дугъура китаб абццру ва гьамци дибикІнайишв’ин алахъуру: 18 – Агъайин Рюгь Уз’ин ал. Узуз Аллагьди касибариз Ужувлан хабар рабгъуз гьюкум тувнайиз ва Узу йисирариз азадвал хьади, курариз акв хьади ва гьацира зулум-зиллетнакк ккайидар азад апІуз ва 19 Аллагьдин рягьимнан вахт улубкьну, кІуру, хабар тувуз гьаъну. 20 Хъасин китаб ккибкну, мистан гъулугънаъ айирихьна тувну, Иса деъру. Хъа мистаъ айи вардарин улар Гьадгъуин алди гъахьну. 21 Исайи дурариз кІуру: – Учвуз гъеерхьу Гирами китабдиъ дидикІнайи гьаму гафар, магьа, гъи ичв улихь кІулиз удучІвна. 22 Исайин улихь варидари гьаци вуйивал улупу ва, Дугъан мелзналан гъюрайи кабалгру гафариин мюгьтал шули, дурари гьерхри гъахьну: – Му ихь Юсуфдин бай даринхъа? 23 Исайира дурариз гъапи: – Гьелбетки, учву Узуз, абйирин мисалик дупнайиганси, пидичва: «Эй духтир! Сифте Жвуву Жвув сагъ апІин!» «Уву Кафернагьумдиъ гъапІу аьламатнан ляхнарикан учуз деебхьначуз, гьамус гьадму ляхнар мушваъ, Яв абайин ватандиъра, апІин» пидичва. 24 Гьякьди кІуразачвуз, гьич сар пайгъамбарра чан абайин ватандиъ лайикьлуди кьабул апІури шулдар. 25 Дюзди кІуразачвуз: Израилиъ Ил’ясдин девриъ, шубуд йисанна йирхьуб вазлин арайиъ мархь адарди гъабхьи вахтна, гизаф ачІни дишагьлийир гъахьнийи, фицики вари жилиин аьхю гаш алабхънийи. 26 Хъа дурарикан гьич сарихьнакьан Ил’яс пайгъамбар гьаундайи. Думу ялгъуз Сайдайин багахь хьайи Сарепта кІуру шагьриз сар ачІни дишагьлийихьнатІан гьаундайи. 27 Гьацира Елисей пайгъамбрин девриъ хамран аьзар кабхьнайидарра гизаф айи, хъа Сирияйиан вуйи Найман кІуру сар касдикантІан ктарди, сариканра хам марцц гъабхьундайи. 28 Му гафар гъеерхьиган, мистаъ айидарик хъял кубчІвру 29 ва, гъудужвну, дурари Иса, гъарзарилан итбан бадали, утІурккну, шагьур али дагъдиина гъахуз хъюгъру. 30 Хъа Иса, рякъюъди дурарин кьялгъян гъюдучІвну, гъушнийи. 31 Хъа Галилейиъ айи Кафернагьум кІуру шагьриз дуфну, Исайи халкьдиз султ йигъари аьгъювалар улупури гъахьну. 32 Исайин улупбариин халкь мюгьтал шуйи, фицики Дугъан гафар гьюкум айидар вуйи. 33 Мистаъ жин кубчІвнайи сар кас айи, ва дугъ’ан диди зарбди чІигъ апІуру: 34 – Учухъ фу хъаяв, Назаретдиан вуйи Иса? Уву учу пуч апІуз дуфнана? Уву фуж вуш, аьгъязуз, Аллагьдин Гирамир! 35 Исайи, дидиз улхуз гъадагъа дапІну, гъапи: – ХъючІюбкь ва удубчІв дугъ’ан! Жин, думу кас мистан кьял’ин алдакну, дугъаз саб зарарра тутрувди, дугъ’ан удубчІвуру. 36 Му гъябкъю вардари, русвагь духьну, чиб-чпиз гьамци кІури гъахьну: – Мурар фу аьламатнан гафар ву: Дугъу, Чан гьюкмиинди ва кьувватниинди амур апІури, жинар ктаурада! 37 Юкьуб аьтраф вари йишвариъ Исайин аваза рабгъуру. 38 Мист’ан удучІвну, Думу Симондин хулаз гъушу. Симондин сижарбабак пис убцрушнан уьзур кайи ва Исайикан думу сагъ апІувал тІалаб гъапІнийи. 39 Дугъан зиина ял духьну, Исайи убцрушназ гъадагъа апІуру ва думу ктубчІвуру. Симондин сижарбаб, дишла ликриина гъудужвну, хяларин гъайгъушнаъ учІву. 40 Ригъ алабхъурайи вахтна, Исайин багахьна жюрбежюр иццрушнар кайидар хури гъахьну. Исайира, гьаруриин Чан хилар иливури, дурар сагъ апІури гъахьну. 41 Гизафдариан жинарра удучІвури гъахьну. Жинари: «Уву Аллагьдин Бай вува!» – кІури, чІигъар апІуйи. Хъа Дугъу Учв Месигь вуйибдикан жарадариз пуб дурариз гъадагъа апІури гъахьну, фицики дурариз, Думу Месигь вуйиб, аьгъяйи. 42 Хъайигъан гвачІин улубкьиган, хул’ан удучІвну, Иса халват йишваз гъягъюру, хъа халкьди Думу агури шулу. Хъасин Исайихьна дуфну, учхьан мягъян кІури, Дугъахъ ккарагури хъюгъру. 43 Амма Исайи дурариз гъапи: – Жара шагьраризра Аллагьдин Паччагьлувал гъюрайиваликан Ужувлан хабар рабгъуб лазим ву, гьаз гъапиш Узу гьаддин бадали Гьаънайир вуза. 44 Исайи Ягьудия уьлкейин мистариъ аьгъювалар улупувал давам апІури гъахьну.

Лука 5

1 Сабан, Аллагьдин гаф ебхьбан бадали, халкь Исайилан илтІишуру, хъа Думу Учв Геннисарет гьюлихъ дийигъну айиган, 2 Дугъаз гьюл’ин кьюб лютке рякъюру. Дурариан эдеу балугъчйири чулар марцц апІурайи. 3 Люткйирикан Симондинубдиъ учІвну, Исайи дугъхьан лютке гъирагъдихъан цІиб тинаси хъапІуб ккун гъапІну ва гьадлин, деъну, аьгъювалар улупуз хъюгъру. 4 Чан улхуб ккудубкІиган, Исайи Симондиз кІуру: – Яв лютке гьюлин кьялариз хъапІ, хъа яв чулра ккип. 5 Симонди Исайиз жаваб вуди гъапну: – Я Мялим! Ярхи йишвди чалишмиш духьну, учхьан фукІа бисуз гъабхьундарчухьан, амма Яв гафназ лигну чул ккипарза. 6 Хъа гьаци дапІну, дурари гьадмукьан балугъар гъидиснуки, гьеле чул чІябгъюзра цІибтІан имдайи. 7 Дурари тмуну люткейиъ айи юлдшаризра кюмекназ дих дапІну, дурарра дуфну кьюбиб люткйирра гьаци арцІруки, люткйир ккадрахьди саб нуфт гъубзнийи. 8 Му гъябкъиган, Петр кІуру лакІам хъайи Симонди, Исайин кьамкьариина ис духьну: «Я Агъа! Узхьан гьудучІв, гьаз гъапиш узу гунагькар вуза», гъапи. 9 Фицики Симон ва дугъахъ хъайидар, чпи гъидису аьхючІвеъ балугъариз лигну, русвагь гъахьнийи. 10 Хъа Симондин дустар вуйи Зеведейин баяр Якьубдикна Югьандик Симондиксиб пис гучІ кабхъру. Симондиз Исайи: «ГучІ мапІан, гьамусдихъантина инсанарин юкІвар дисидива», кІуру. 11 Хъасин кьюбиб люткйирра гъирагъдихъна кадагъну, вари душваъ гъибтну, дурар Исайин кьяляхъди гъягъюру. 12 Иса саб шагьриъ айиган, Дугъахьна хамран аьзар кабхьнайи сар кас гъюру. Иса гъяркъиган, жил’ина ккадакну, думу Дугъаз ккарагуру: – Я Агъа! Увуз ккун гъабшиш, узу марцц апІуз шулвухьан. 13 Исайи, хил гьачІабккну, дугъак кубкІну, кІуру: – Ккундузуз, марцц йихь! Ва дишлади дугъан хам аьзарнахьан марцц шулу. 14 Исайи дугъаз: мидкан саризра макІан, хъа маллайихьна душну, жвув улуп, халкьдиз уву марцц хьпан шагьидвал вуди, Муса пайгъамбри дупнайиганси, гъурбан апІуз ужуб гъайибх, кІури, табшурмиш гъапІу. 15 Амма гьаци вушра, Исайикан аваза гъарабгъу, ва Дугъахъ хъпехъуз, чпин уьзрар сагъ апІуз гизаф халкь гъюз хъюгъру. 16 Хъа Иса, фужкІа адру йишвариз гъягъюри, ккарагури шулу. 17 Сад йигъан Исайи аьгъювалар улупурайиган, Галилейна Ягьудия уьлкйириан ва гьацира Ерусалимдиан Дугъахьна дуфнайи фарисйирна къанунчйир деънайи. Дугъу аьзарлуйир Аллагьди туву кьувватниинди сагъ апІурайи, 18 ва магьа Дугъахьна ахниин алди паралич кайи сар кас хуз хъюгъю. Думу хулаз духну, Исайин улихь дитуз ккун гъабхьи. 19 Му кас гизаф илтІишнайи халкьдин арайигъян гъахуз йишв дибрихъди, хулан гъваина за дапІну, гъваъланди, ахниин илмиди, Исайин улихьна хулан кьял’ина ирхру. 20 Исайира, дурарин зурба хъугъвал рябкъюри, гьадму касдиз кІуру: – Эй инсан, яв гунгьарилан хил алдабгъураза. 21 Къанунчйирина фарисйири чиб-чпикди фикир гъапІу: – Аллагьдиз къаршуди улхурайир гьаму фуж ву? Сар Аллагьдилан гъайри, сарун шлихьан гунгьарилан хил алдабгъуз шулухъа? 22 Исайи, дурарин фикрарин гъаври ахъну, жаваб тувру: «Гьаз дицдар фикрар ичв юкІвариъ тІаърачва? 23 „Яв гунгьарилан хил алдабгъураза“ пуб рягьят вуйин, даршиш „гъудужвну лиц“ пуб? 24 Инсаниятдин Бализ жилиин гунгьарилан хил алдабгъуз гьюкум айиб учвуз аьгъю хьпан бадали, магьа лигай» – пну, Дугъу паралич кайириз: «Гъудужв кІуразавуз, гъадабгъну яв ахин, яв хулаз гъарах», – кІуру. 25 Думура дишла гъудужвну, учв дахънайи ахинра гъадабгъну, Аллагьдин адар апІури, чан хулаз гъягъюру. 26 Хъа вари мюгьтал шулу ва, Аллагьдин тярифар апІури, гучІбаан зегьле дубшну, гьамци кІури гъахьну: – Гъи аьжаб кереметнан ляхнар гъяркъюндарин ухьуз! 27 Мидхъан хул’ан удучІву Исайиз налук уч апІури деънайи Левий кІуру гъуллугъагьли рякъюру ва дугъаз Чахъди гъач кІуру. 28 Думура, чан кеспи гъибтну, Дугъан кьяляхъди, гъудужвну, гъягъюру. 29 Хъасин дугъу чан хулаъ Исайиз аьхю хялижв’вал апІуру. Душваъ аьхючІвеъ налукар уч апІрудар ва дурарихъди гутйириз гъюн йивну дахьнайи жара хяларра айи. 30 Аьлимарина фарисйири наразивал кади Исайин ученикариз: «Учву налукар уч апІрударихъдина гунагькрарихъди гьапІуз ипІури-убхъури шулчва?» – кІури гъахьну. 31 Исайи дурариз жаваб вуди гъапну: – Духтир сагъидариз ваъ, хъа аьзарлуйириз лазим ву. 32 Узу марцци касари ваъ, хъа гунагькрари, чпин гунгьар гардандиъ дидисну, уьмур дигиш апІбан бадали, дуфнайир вуза. 33 Дурари кІуруш Исайиз гъапи: – Гьаз Ягь’яйин ва гьацира фарисйирин ученикар кми-кмиди ушвар дисури ва ккарагури шулу, хъа Явдар чпиз ккун гъабши вахтна ипІури-убхъури гьаз шулу? 34 Исайи дурариз кІуру: – Швушв хурайирихъди хъайи сумчрин хяларихьди учвхьан ушвар дисуз гъитуз шулинхъа? 35 Хъа швушв хурайир гужназ гъадагъру вахт гъибди, ва гьадму йигъари ушварра дисиди. 36 Мидихъди сабси Дугъу саб тахалус ктибтуру: – Гьич сарира, цІийи палатдикан кадабтІну, йирси палатдик цІил ктривур, даршиш дугъу цІийи палатра чІябгъиди, хъа гьацира дидкан ктабтІу цІил йирсибдик балгидира дар. 37 Ва гьич сарира таза чяхир йирси иржариъ убзидар, фицики таза чяхри иржар гьутІурччвиди, учвра удубзиди ва иржарра пуч хьиди. 38 Гьаддиз таза чяхир цІийи иржариъ убзуб лазим ву. 39 Ва гьич саризра, кюгьне чяхир дубхъну, дишлади таза чяхир ккун хьидар, фицики «кюгьне чяхир ужу ву» – кІури шулу.

Лука 6

1 Султ йигъан Иса дяхин дубзнайи хутІлариан гъягъбакк ккуркьну, ва Дугъахъ хъайи ученикари, дяхнин кІулар ктутІури, хиларигъ ктІиршури, итІури шулу. 2 Фарисйирикан бязидари дурариз кІуру: – Учву султ йигъан Къанунди гъадагъа дапІнайи ляхин апІуранчва? 3 Исайи дурариз жаваб туву: – Мегер учвуз Давудри, чаз ва чахъ хъайидариз гаш гъабшиган, гьапІнуш, фици дугъу, Аллагьдин хулаъ учІвиган, маллйирилан гъайри шликІан итІуз ихтияр адру Аллагьдиз бахш дапІнайи уьлер гъадагъну гъитІнуш ва чахъди хъайидаризра тувнуш, Гирами китабариъ гъурхунданчва? 5 Хъасин гъапи: – Инсаниятдин Бай султ йигъ’инра Агъа ву. 6 Жара саб султ йигъан Иса мистаз гъягъбакк ва душваъ аьгъювалар тувбакк ккуркьру. Душваъ арччул хил деебццнайи сар кас ади шулу. 7 Къанунчйирна фарисйир, Исайик тахсир кипбан бадали, Дугъу султ йигъан думу сагъ апІидайкІан кІури, ул хъипнайи. 8 Амма Исайи, дурарин ниятар аьгъяди, хил дебццнайи касдиз кІуру: – Гъудужвну гъач, варидарин улихь дийигъ. Думу гъудужвну, улихьна гъюру. 9 Гьадмуган Исайи дурариз гъапи: – Узу учвхьан гьерхраза: султ йигъан фу апІуз ихтияр а? Уж’вал, даршиш писвал? Уьмур уьбхюз, дарш пуч апІуз? Дурар чІалкьан даркІури гъузру. 10 Вардарилан ул илбицну, Исайи гьадму касдиз кІуру: – Яв хил гьачІабкк. Дугъу гьаци гъапІумитІла, дугъан хил сагъ шулу. 11 Фарисйирна аьлимар хъюл’ан деллу шулу ва, чпин арайиъ улхури, Исайикан гьапІруш, аьжуз духьну гъузру. 12 Гьадму йигъари Иса, ккарагбан бадали, дагъдиз удучІвуру ва ярхи йишвди Аллагьдиз ккарагури шулу. 13 Йигъ улубкьиган, Чан ученикариз дих дапІну, дурарикан йицІикьюр кас ктагъуру ва дурариз Чан вакилар кІуру ччвур тувуру. 14 Дурар: Петр кІуру лакІам хъайи Симонна дугъан чве Андрей, Якьубна Югьанна, Филипна Варфоломей, 15 Маттана Фома, Алфейин Якьубна Зилот кІуру лакІам хъайи Шимон, 16 Якьубдин Ягьуда ва хъасин душман гъаши Искариот Ягьуда – гьамрар вуйи. 17 Иса, дурарихъди дагъдилан гъафир, дюз майдандиина гъюру. Дугъахъди аьхючІвеъ Чан ученикарра, вари Ягьудияйианна Ерусалимдиан, хъа гьацира гьюлин гъирагъдихъ хъайи Тир ва Сидон шагьрариан дуфну, 18 Исайихъ хъпехъуз ва чпи аьзарарихьан сагъ апІуз гъафидарра, гьацира жинари гъаркІ апІурайидарра хъади гъахьну. Хъа, дурар вари сагъ шулира гъахьну. 19 Вари халкьдиз Исайик кучуз ккунди гъабхьну, фицики Дугъхьан кьувват рабгъури ва диди вари сагъ апІури гъахьну. 20 Хъа Дугъу, Чан ученикарилан ул илбицури, гъапи: – Бахтаврар вучва, касиб вуйидар, фицики Аллагьдин Паччагьлугъ учвусдаринуб ву. 21 Бахтаврар вучва, му вахтари гашлудар, фицики тухъ хьидичва. Бахтаврар вучва, му вахтари ишурайидар, фицики аьлхъидичва. 22 Учву инсанариз даккун гъахьиган, учву дурари утІурккган ва беябур апІруган, ичв ччвур нянайикк ккипруган Инсаниятдин Бай бадали, бахтаврар вучва. 23 Гьадму йигъан рази йихьай ва шадвал ачмиш апІинай, фицики аьршариъ учвуз айи пешкеш зурба ву. Учву даккнидарин абйирира пайгъамбрарихъди гьаци апІури гъахьну. 24 Мураризси дарди, пис гьял хьибди ичв, девлетлуйир, фицики учвуз сарун ужувлар дяркъначвуз. 25 Пис гьял хьибди ичв, му вахтари уьлдюгъну гъярайидар, гьаз гъапиш гаш хьибдичвуз. Пис гьял хьибди ичв, му вахтари аьлхъюрайидар, фицики, гьяйиф дизигну, ишидичва. 26 Учвкан жарадар ужуди улхруганра, пис гьял хьибди ичв, фицики дурарин абйири кучІлин пайгъамбрариканра гьаци апІури гъахьну. 27 Хъа вари Узухъ хъебехънайидариз кІураза: ичв душмнар ккун апІинай, учву даккнидариз уж’вал апІинай. 28 Учву нянатлу апІурайидариз гьюрматлу гафар апІинай ва учвуз гиран ктапІрударихъанди ккарагай. 29 Яв саб гарцІликкан бачІ ккадатуриз тмунубра ккив ва яв зиълан палат илдибтруриз кІанакк ккайи ккурттра чаз гъадабгъуз манигъ’вал мапІан. 30 Увкан тІалаб апІурайириз тув ва явуб гъадабгъуриз «кьяляхъ ча» макІан. 31 Учвуз учвухъди адмийир фици духьну ккундуш, гьадрарихъди учвура гьаци йихьай. 32 Хъа эгер учву ккунидартІан учвуз ккундарш, мидкан фу чухсагъул ачвуз? Фицики гунагькраризра чиб ккунидар ккунди шулу. 33 Учвуз уж’вал апІрудариз учвура уж’вал апІураш, мидкан фу чухсагъул ачвуз? Фицики гунагькрарира гьаци апІуру. 34 Хъа эгер учву бурж кьяляхъ апІуз удукьрурихьна миж кади тувраш, мидкан фу чухсагъул ачвуз? Фицики гунагькрарира чпи буржназ тувкьануб кьяляхъ гъадабгъуз ният ади туври шулу. 35 Хъа учву ичв душмнар ккун апІинай, ужувлар апІинай, кьяляхъ бисуб миж ктарди, буржназра тувай, ва учвуз зурба пешкеш хьибди, ва учву ВаритІанзаанурин баяр хьидичва. Фицики чпиз гъапІу уж’вал аьгъю даршлударизра, пис касаризра Аллагь гъянир ву. 36 Гьаци учвура, ичв Адашси, мани юкІвар ади йихьай. 37 Жарарин диван мапІанай, Аллагьди ичвра апІидар; жарар тахсир мапІанай, учвура тахсир апІидар. Хил алдабгъай, учвланра алдабгъиди. 38 Хил ачухъ апІинай, учвузра тувди: убжнайи ва кІакІ алди абцІнайи уьлчмейиинди ичв танхлиъ абхьди, фицики учву фициб уьлчмейиинди ебцураш, учвузра гьацибдиинди ебциди. 39 Дурариз Исайи тахалусарра ктитуру: – Курихьан кур хъади гъягъюз шулинхъа? Дурар кьюридра ичІаъ ахьидаринхъа? 40 Ученик чан мялимтІан заан дар, амма зегьмет зигури, дубгъури гъабхьиш, гьарсар чан мялимдихъ хъуркьди. 41 Увуз яв чвуччвун улиъ айи чІюрх гьаз рябкъюрвуз, яв улиъ айи хамхар дярябкърайи вахтна? 42 Ваяки яв гъардшиз: «Яв улиъ айи чІюрх адабгъуза», – фици пидива, увуз яв улиъ айи хамхар дярябкърайиган? Эй, кьюб маш гъяйир! Сифте яв улиъ айи хамхар адабгъ, хъа гьадмуган увуз, яв гъардшин ул’ан чІюрх фици адабгъуруш, рябкъидивуз. 43 Гъяни гьари чІуру бегьер, чІуру гьари гъяни бегьер хурдар, 44 фицики гьарсаб гьар чан йимишдиз лигну аьгъю шулу. Гьаддиз зазарилан инжир, чІуру хутарилан тІумутІ уч апІури шулдар. 45 Ужур касди чан кІван хазнайиан ужуб, хъа чІурури чан кІван хазнайиан чІуруб адабгъуру, фицики инсандин мелз, дугъан юкІв фти абцІнаш, гьаддикан улхури шулу. 46 Учву Узуз: «Я Агъа, я Агъа!» гьаз кІуручва, Узу учвуз гъапиб дарапІрайиган? 47 Узухьна дуфну, Узухъ хъебехъну, Йиз гафар тамам апІру гьарсар кас шлиз ухшар вуш, кІарзачвуз: 48 Думу, хулар дивруган, жил дериндиз дирибккну, шибритІар гъвандиин диву касдиз ухшар ву, фицики, селлер дуфну, шид улубчІвиган, думу хулар ришвуз гъахьундар, гьаз гъапиш дурар гъвандиин дивнайидар вуди гъахьну. 49 Хъа Йиз гафар ерхьури, дурар тамам дарапІрайи кас шибритІар ккадру хулар диву касдиз ухшар ву, фицики шид улубчІвиган, дурар дишлади ахьну, дармадагъин хьиди.

Лука 7

1 Чахъ хъебехънайидариз пуз ккайи гафар ккудукІиган, Иса Кафернагьумдиъ учІвру. 2 Римдин юзбашийин чаз ккуни сар гъуллугъчи кетІерццну йикІру гьялнаъ ади шулу. 3 Исайикан хабар дубхьну, юзбашийи, чан гъуллугъчи сагъ апІбан бадали, Думу хъади гъюз жугьдарин агъсакълар гьаъру. 4 Дурари, Исайихьна дуфну, Дугъкан ижмиди миннат апІуру: – Му юзбаши Уву кюмек апІбаз лайикьлу кас ву, 5 фицики думу кас ич халкь гизаф ккунир ву ва дугъу учуз ккарагру хал тикмиш гъапІну. 6 Иса дурарихъди гъягъюру. Думу юзбашийин хуларихьна хъуркьради, юзбашийи Исайихьна гьамци пуз чан дустар гьаъру: – Инжиг махьан, Агъа, гьаз гъапиш Уву йиз хулаъ учІвбаз узу лайикь дарза. 7 Гьаддиз узу Увухьна гъюзкьан жвув лайикьлур вуди гьисаб гъапІундарза. Анжагъ Уву саб гаф йип, ва йиз гъуллугъчи сагъ хьиди. 8 Фицики узура жарарин хликк ккайир вуза, ва узуз мютІюгъ вуйи эскрарра азуз. Дурарикан сариз узу «гъарах» кІурза – думу гъягъюру, тмунуриз «гъач» кІурза – гъюру, йиз гъуллугъчийиз «гьамци апІин» кІурза, дугъу тамам апІуру. 9 Му гафар гъеерхьиган, Иса дугъ’ин мюгьтал шулу ва, илдицну, Чан кьяляхъ хъайи халкьдиз кІуру: – КІуразачвузки, Израилиъра Аллагьдихъ гьамкьан хъугърайи кас гъяркъюндарзуз. 10 Юзбашийи гьаъдариз, чпи дугъан хулаз хъадакну гъафиган, кетІерццнайи гъуллугъчи сагъ духьнади рякъюру. 11 Дидхъантина Иса Наин кІуру шагьриз гъушу. Дугъахъди Чан ученикар ва аьхючІвеъ халкьра гъягъюри гъахьну. 12 Хъа Иса шагьрин урнарихьна багахь гъашиган, сар ачІни хпирин айина-адру бай дукІну, дугъан майит накьваригъна гъабхуз адабгъури шулу, ва майтихъ хайлин халкьра хъайи. 13 Агъайиз, балин дада гъяркъиган, язухъ шулу ва дугъаз, мишан, кІуру. 14 Хъа багахьна дуфну, Исайи мягьражарик хил катру, майит гъабхурайидар дийигъуру ва Дугъу кІуру: «Живан! Увуз кІураза, гъудужв!» 15 ДукІнайир за духьну деъру ва улхуз хъюгъру, хъа Исайи думу дадайихьна тувру. 16 Мушв’ин вардарик пис гучІ кабхъну, Аллагьдин адар апІури, гьамци кІури гъахьну: – Ихь арайиз зурба пайгъамбар адахъна, ва Аллагь Чан халкьдин гъайгъушнаъ а. 17 Исайикан гьамциб фикир вари Ягьудия вилаятдиъ ва аьтрафарихъ хъайи миди вуйи юрдариъ рабгъуру. 18 Хъа Ягь’яйиз чан ученикари гьамрар варидарикан ктитуру. 19 Ягь’яйи, чан ученикарикан кьюриз дих дапІну, дурар Агъа Исайихьна гьамци гьерхуз гьаъру: «Гъюз ккайи Месигь Уву вуна, даршиш жарариз ккилигуча?» 20 Дурари, Исайихьна дуфну, кІуру: – Штуан апІру Ягь’яйи учу Увухьна гьерхуз гьаъна: «Гъюз ккайи Месигь Уву вуна, даршиш жарариз ккилигуча?» 21 Му вахтназ Исайи аьзарарикканна иццрушнариккан гизафдар ккадаъну, жинар кадаъну, аьхючІвеъ кур вуйидариз акв улупну айи. 22 Гьаддиз Исайи дурариз жаваб вуди кІуру: – Душну Ягь’яйиз, учвуз гъяркъдар ва гъеерхьдар кидитай: кур вуйидариз рябкъюра, ликудар лицура, хамран уьзур кайидарин хам марцц шула, кар вуйидариз ебхьура, гъачІидар чІиви шула ва касибариз Ужувлан хабар рабгъура. 23 Шли Уз’ина вуйи хъугъвал дубградарш, думу бахтавар ву. 24 Ягь’яйи гьаъдар гъушхъан, Исайи Ягь’яйикан халкьдиз гьамци кІуру: – ИчІи чюлиз фтиз лигуз гъушнийчва? МикІлу тІубччвурайи чІеъдиз лигуз гъушнийчвахъа? 25 Шлиз лигуз гъушунчва дина? Багьа палтар али касдиз? Хъа дамагънан палтар алахьрудар ва чпиз ккуниси яшамиш шлудар паччгьарин дараматариъ а. 26 Шлиз лигуз гъушунчва учву? Пайгъамбриз лигуз? Ав, кІуразачвуз, пайгъамбартІан аьхюриз лигуз гъушунчва. 27 Гьадму Ягь’яйикан ву гьамци дибикІнайиб: «Магьа, Яв улихьди Узу Йиз кас гьаъраза: дугъу Яв улихь Яв рякъ ккабалгиди». 28 КІуразачвуз: дишагьлийири бабкан гъахидаригъ Ягь’ятІан зурба кас гъядар; хъа Аллагьдин Паччагьлугъдиъ айидарикан варитІан бицІир думутІан зурба ву. 29 Дугъахъ хъпехъурайи вари халкьди ва налук гъюдюбхрударра кмиди, Ягь’яйин штуан апІувалиинди цІийи духьну, Аллагь гьякь вуйиб гардандиъ гъибису. 30 Хъа фарисйирна къанунчйир, Аллагьдихьан чпиз вуйи ният гьясбикк дарапІри, Ягь’яйихь штуан гъахьундар. 31 – Гьаму наслин адмийир шлихь тевза ва дурар шлиз ухшар ву? – пну, гьерху Исайи. – 32 Дурар, чиб-чпиз чІигъар апІури, раццариъ гьамци кІури деънайи бицІидариз ухшар ву: «Учу учвуз швутІрамар йивури гъахьунча, хъа учву ялхъвнаркьан гъапІундарчва; учу учвуз ишлар апІури гъахьунча, хъа учву ишузкьан гъишундарчва». 33 Штуан апІру Ягь’я гъафну ва дугъу я уьл ипІури, ясана чяхир убхъури гъахьундар. Хъа учву: «Дугъаъ жин а», кІурачва. 34 Инсаниятдин Бай гъафну, Дугъу ипІуру ва убхъуру, ва дурари Дугъаз: «Лигай, магьа уьж ва пияниска, налукар гъюдюхрударинна гунагькрарин дуст», кІурачва. 35 Аькьюллувал вари аькьюллудари улупну ккун. 36 Фарисйирикан сари Исайикан чан хулаз уьл ипІуз гъюб теклиф апІуру. Фарисейин хулаз гъушу Иса гъюн йивну дахъру. 37 Хъа магьа, гьаму шагьриан вуйи сар гунагькар дишагьлийи, Думу фарисейин хулаъ гъюн йивну дахънайиб аьгъю дубхьну, лизи ругдин гажниъди аьтрин ниъ хъайи ягъсиб хуру ва, 38 Исайин ликарихъ дийигъну ишури, Дугъан ликар нивгъарихъди кьяши апІури ва чан кушарихъди марцц апІури, Дугъан ликариз макар апІури, гьадму ягъ ктатури шулу. 39 Му ляхин гъябкъиган, теклиф дапІну, Иса хулаз хъади гъафи фарисейи чав-чакди фикир апІуру: – Эгер Думу дугъриданра пайгъамбар вуйиш, Чак хилар катрайи дишагьли фуж вуш, Дугъаз аьгъю шлийи. Думу гунагькар даринхъа! 40 Фарисейихьинди илдицну, Исайи дугъаз гъапи: – Я Симон! Увуз кІуру саб гаф айиз. Дугъу: «Йип, Мялим!» – гъапи. 41 Исайи кІуру: – Сар пул буржназ туврурихъ кьюр буржлу кас шулу. Дурарикан сар хьудварж динар-пул буржлу вуйи, тмунур – хьцІур. 42 Хъа дурарихъ кьяляхъ тувуз пул хътарди хьпаз лигну, дугъу кьюриддизра буржар гьялал апІуру. Йип ари, гьадму жви гьадрарикан фунуриз артухъди ккун шул? 43 Симонди жаваб тувру: – Аьхю бурж кайириз вушул, пну, фикир апІураза. Исайи дугъаз: «Ари дюзди фагьум гъапІунва» кІуру. 44 Хъа дишагьлийихьинди илдицну, Симондиз гъапи: – Гьаму дишагьли рякъюрануз? Узу яв хулаз гъафунза, уву Узуз ликар жикІуз шид тувундарва; хъа дугъу Йиз ликар чан нивгъариинди гъижикІнийиз, чан кушарихьди марцц гъапІнийиз. 45 Уву Узуз мак гъапІундарва, хъа дугъу, Узу гъафихъантина Йиз ликариз сикин дарди макар апІура. 46 Уву Йиз кІулкан ягъ ктатундарва, хъа дугъу Йиз ликарикан ягъ ктатну. 47 Магьа гьаддиз кІуразавуз: чан гизаф ккун хьували дугъан аьхючІвеъ гунгьарилан хил алдабгъурайиб улупура. Хъа шлиз цІибди багъишламиш’вал тувруш, дугъан ккунивалра цІибтІан дар. 48 Дишагьлийиз Исайи кІуру: – Яв гунгьарилан хил алдабгъна. 49 Хъа дугъан багахь гъюн йивну дахънайидари чиб-чпикди пуз хъюгъю: – Му фуж ву гунгьариланра хил алдабгъуз? 50 Исайи, кІуруш, дишагьлийиз гъапи: – Яв хъугъували уву гъюрхну, архаин духьну гъарах.

Лука 8

1 Дидхъантина Иса, шагьрариъна гъулариъ, Аллагьдин Паччагьлугъдикан Ужувлан хабар рабгъури, Чан йицІикьюр ученикарра хъади, лицури гъахьну. 2 Дурарихъди жинарихьан гъюрхю ва уьзрар сагъ гъапІу бязи дишагьлийир: чаан ургуб жин удучІву Магдалайиан вуйи Мар’ям, 3 Гьироддин мулкар идара апІурайи Хуздин хпир Югьанна, Сусанна, гьацира чпиз айи-адрубдиинди Дугъан гъайгъу зигурайи жара дишагьлийирра хъади гъахьну. 4 АьхючІвеъ халкь уч гъашиган ва вари шагьрариан агьалйир Дугъахьна гъафиган, Исайи тахалусдиинди пуз хъюгъру: 5 – Сар нежбер тум убзуз удучІвуру. Убзурайиган, гьацІар удрар рякъюхъ дахьру, малари ликариккан апІуру ва жакьвари удуру. 6 Сакьюдар гъван ккайи ругдиин дахьру ва ктучІвиган ерццуру, гьаз гъапиш дурариз ламушин адарди гъабхьну. 7 Сакьюдар удрар зазаригъ гъяхьру ва удрартІан зарбди ктучІву зазари дурар ккаъру. 8 Хъа сакьюдар авадан ругдик кахьру, ктучІвиган дурари варжбан артухъ бегьер тувру. Гьамци дупну, Исайи гужал дихниинди гъапи: – Шлин ибариз ебхьураш, гъит ебхьри! 9 Ученикари Дугъхьан гьерхуз хъюгъну: – Му тахалусдин мяна фу ву? 10 Дугъу гъапи: – Учвуз Аллагьдин Паччагьлугъдин сирар аьгъю хьуб тувначвуз, хъа имбудариз му тахалусариътІан аьгъю хьуб тувнадар. Гьаци вуйиган, лигурашра, дурариз рябкъюрадар ва, ебхьурашра, дурари аннамиш апІурадар. 11 Му тахалусдин мяна магьа: тумар – Аллагьдин гаф ву. 12 Рякъ’ина тадахьдар – мурар, чпиз Аллагьдин гаф ебхьурайи, амма чпихьна хъасин иблис дуфну, дурар ебхьурайи гафнахъ хътругъри ва гьаци уьрхювал гъазанмиш дарибшри пну, дурарин кІваан иблисди гьадму гаф гъабхурайи касар ву. 13 Хъа гъванариина ахьдар – мурар, Аллагьдин гаф гъеебхьиган, думу шадди кьабул апІрудар, хъа чпихъ мюгькам ччивар хътарди хьпаз лигну, бязи вахтари хъугърудар, хъа читин гъабшиган, хътругърудар ву. 14 Хъа зазаригъ гъяхьдар – мурар Аллагьдин гафнахъ хъпехърудар, амма гъайгъушнари, девлетну ва гешт хъапІбу йисир дапІну, Аллагьдин гафнахьан гьудучІврудар ва, гьаддиз, бегьер дархрудар ву. 15 Хъа авадан ругдиина ахьдар – мурар, Аллагьдин гаф гъеебхьиган, му чпин марцци кІваъ уьбхрудар ва сабур апІбиинди бегьер туврудар ву. 16 Исайи хъанара давам апІуру: – Сарира, чирагъ кабхьну, дид’ин гъаб иливдар вая кроватьдикк ккивдар. Дугъу думу, хулаъ учІврайидариз акв шлуси, чан йишв’ин дивру. 17 Фицики ашкар даршлу жиниб фукІара адар ва, мялум даршиди, арайиз ададабхъру гьич саб сир адар. 18 Гьаци вуйиган, учву Узухъ дикъатниинди хъебехъай: шлиз аш, дугъаз хъана тувди; хъа шлиз адарш, айибдихьна хьибдизуз кІурубра тадабгъиди. 19 Исайихьна дадана чвйир гъюру ва дурар, халкь гизаф ади хьпаз лигну, Дугъахьна багахь хьуз даршули айи. 20 Хъа Исайиз: «Яв дадана чвйир, Уву рякъюз ккунди, чІат дийигъна», – кІури, хабар тувру. 21 Дугъу дурариз жаваб вуди кІуру: – Йиз дадана чвйир, Аллагьдин гафнахъ хъпехърудар ва думу тамам апІрудар вуйиз. 22 Сад йигъан Дугъу, Чан ученикарра хъади люткейиъ эъну, дурариз гъапи: – Гьюлин тмуну гъирагъдихъна сирнав апІидихьа. Дурар люткейиъди гъушу. 23 Сирнав апІурайиган, Иса нивкІуз гъягъюру. Гьюл’ина гужал тІурфан утІубччвну, лепйири лютке ккапІуз хъюгъру, ва дурар хатІалу гьялнаъ ахьру. 24 Дурар, Исайихьна дуфну, Думу нивкІ’ан хъиргну кІуру: – Мялим! Мялим! Батмиш шулахьу! Хъа Дугъу, гъудужвну микІлаз ва штун лепйириз гъадагъа апІуру, ва дурар лал шулу, архаинвал абхъру. 25 Гьадмуган Исайи дурариз гъапну: – Хъугъ’вал набшдичв? Дурари, гучІ кабхъну ва мюгьтал духьну, чиб-чпиз кІури гъахьну: – Му фуж вуйкІан, микІаризра, штузра амур апІрур, ва дурар Мугъаз мютІюгъра шула? 26 Хъа дурари Галилей уьлкейин гъаншариъ айи Герасин юрдназ сирнав апІуру. 27 Иса гъирагъдихъна ктучІвиган, Дугъахьна ухдихъанмина жинар кайи сар кас гъюру. Думу, учв шагьриан вушра, палтар алалахьди, хулаъ ваъ, хъа накьварин хьарар-дюрхъяригъ яшамиш шулайир вуйи. 28 Жин гагь-гагьнак кубчІвруган, дугъан хилар-ликар зунжрарихьди ва гьялкьйирихьди йитІуйи, амма дерккуз даршули, дурар кьатІар апІуйи, жинди думу аьсси апІуйи, хъа чІурариз гьергуйи. Исайи чиркин рюгьназ, мугъ’ан удубчІв пну, амур апІуру. Иса гъяркъиган, дугъ’ан чІигъ утІубччвуру ва, Дугъан улихьна ккадакну, зарбди кІуру: – Яв узухъди фу вуяв, ВаритІанзаан Аллагьдин Бай Иса? Миннат вуйиз, йиз зегьле мабхан! 30 Исайи дугъхьан гьерхру: – Ччвур фуж вуяв? Дугъура: «Кьушум вуйиз» – кІуру, гьаз гъапиш дугъак гизаф жинар кучІвнади гъабхьну. 31 Хъа жинари Исайикан чпи гурбагуриз гьадрауб тІалаб апІуру. 32 Мушвхьан ярхла дарди дагъдик силарин аьхю лиж карабгънайи, ва жинари чпиз гьадрариъ учІвуз ихтияр тувуб тІалаб апІуру. Исайи дурариз ихтияр тувру. 33 Адмийиан удучІву жинар силариъ учІвру, ва силарин лиж гъарзарилан гьюлиъ убсру ва ккабхъру. 34 Му ляхин гъябкъю силарбнари, жаргъну душну, шагьриъ ва гъулариъ гьамдикан халкьдиз ктибту. 35 Хъа му гьякьикьи гъабши ляхниз лигуз халкь Исайихьна гъюру. Жинар ктучІву кас Исайин ликарихъ деънади, палатра алди ва чан фикрихъ хъади гъяркъиган, дурарик гучІ кабхъру. 36 Му аьламат гъябкъдари дурариз, жинар кайир фици сагъ гъахьнуш, ктибту. 37 Хъа Герасин юрднан вари халкьди Исайикан чпихьан гьудучІвну гъягъювал ккун апІуру, фицики дурарик зурба гучІ кабхънайи. Исара, люткейиъ эъну, кьяляхъ хътаку. 38 Чакан жинар ктучІву касди учвра гъадагъуб Исайикан тІалаб гъапІнийи. Амма Исайи думу гьамци дупну гьадауру: 39 – Яв хулаз хъадакну, Аллагьди увуз фу гъапІнуш, кидибт. Дугъура душну, Исайи чакан гьапІнуш, шагьур вуйибси ктибтуру. 40 Иса кьяляхъ хътакиган, халкьди думу тебрик апІуру, фицики вари Дугъаз ккилигурайи. 41 Ва магьа жугьдарин мистан аьхюр вуйи Ягьир кІуру сар кас дуфну, Исайин ликарикк дахъну, Дугъаз чан хулаз гъюб тІалаб апІуру, 42 гьаз гъапиш дугъахъ йикІру гьялнаъ айи йицІикьюд йисаъкьан айи риш хъайи. Иса дина гъягъру вахтна халкь, Дугълан илтІишну, кьяляхъди гъюри гъахьну. 43 Му арайиъ, йицІикьюд йисан ифи хътадабтІрайи, духтрариз вари чан айи-адруб харж дапІну, сарихьанра сагъ апІуз дархьи сар дишагьлийи, 44 кьялхъянди дуфну, Исайин палатдин гъирагъдик хил кубкІру ва дишлади дугъан ифи хътабтІуру. 45 Хъа Исайи гьерхру: – Узук фуж куркІну? Вари инкар шулайиган, Петри кІуру: – Я Мялим! Халкьди уву кьялаъ тІаъна ва хъуржра. 46 Хъа Исайи гъапи: – Фуж-вуш Узук куркІну, Уз’ан кьувват удубчІвуб гьисс гъапІунза. 47 Дишагьлийиз чахьан гьитІикІуз даршлуб дябкъну, гукІунди багахь духьну, Исайин ликарикк ккархьну, чав Дугъак гьаз куркІнуш ва фици учв дишла сагъ гъахьнуш, вари халкьдин улихь мялум гъапІу. 48 Исайи дишагьлийиз гъапи: – Йиз риш! Яв хъугъували уву сагъ гъапІунву; архаин духьну, гъарах. 49 Исайи гьамци кІури имиди, жугьдарин мистан аьхюрин хул’ан дуфну, сар касди дугъаз кІуру: – Яв риш гъакІну, сарун Мялим инжик мапІан. 50 Хъа Исайи, гьаму гафар деерхьну, дугъаз кІуру: – ГучІ мапІан, анжагъ хъугъ, яв риш ккадархьиди. 51 Дурарин хулаз хъуркьган, Исайи Петризна, Югьандизна Якьубдиз ва гьацира шуран адашдизна дадайизтІан хулаъ учІвуз ихтияр тувундайи. 52 Вари гъачІи шурахъ ишури ва ишлар апІури айи. Хъа Исайи дурариз гъапи: – Мишанай, думу дукІнадар, хъа даахна. 53 Хъа халкь, думу дукІнайиб аьгъяди, Исайиин аьлхъюри гъахьну. 54 Дугъу, кІуруш, вари хул’ан утІурккну, шуран хил дибисну, кІуру: – Я риш! Гъудужв! 55 Ва шуран рюгь кьяляхъ хътабкуру, думу дишлади гъудужвуру. Исайи, шураз ипІруб тувай, кІуру. 56 Шуран абйир-бабар мюгьтал шулу. Исайи му ляхникан шлизкІа даркІуб амур апІуру.

Лука 9

1 Чан йицІикьюр ученикдиз дих дапІну, Исайи дурариз, вари жинарин зиин гьюкум ва уьзрар сагъ апІбан бадали, кьувват тувру. 2 Дугъу дурар Аллагьдин Паччагьлугъдикан хабар рабгъуз ва иццрудар сагъ апІуз гьаъру. 3 Исайи дурариз кІуру: «Рякъюз фукІа магъадабгъанай: я чамах, я тавра, я уьл, я пул, ва кьюб жар палатра хьади дарибшри. 4 Фуну хулаъ учІвишра, гьадушваъ дергай ва гьадлин рякъюъ учІвай. 5 Хъа эгер учву наанкІа кьабул дарапІиш, думу шагьриан удучІвруган, ичв ликарик кайи бишируг гьадрарихьинди кадабхьай. Гъит му дурариз чпиин улубкьрубдин улихьмиди дебккрайи лишан ибшри». 6 Аллагьдин Паччагьлугъдикан Ужувлан хабар рабгъури ва аьзарлуйир сагъ апІури, дурар гъулариъ лицуз рякъюъ учІву. 7 Исайи апІурайи гьаму вари ляхнарикан гьякимдар Гьироддиз ебхьуру. Думу мюгьтал шули гъахьну, гьаз гъапиш садари му гъачІихъан чІиви гъаши Ягь’я ву кІури, 8 тмундари, Ил’яс пайгъамбар гъафну кІури, имбударира дегьзаманйирин пайгъамбрарикан сар чІиви гъахьну кІури, аваза ипнийи. 9 Хъа Гьиродди кІури гъахьну: – Ягь’яйин кІул узу алдабтІунза, хъа узуз Мугъкан гьамкьан ебхьурайи му Кас фуж вуйкІан? Гьаддиз Гьиродди Иса рякъюз чарйир зигурайи. 10 Хъадакну гъафи вакилари, чпи фу гъапІнуш, Исайиз ктибтуру. Хъасин Иса, вакиларра гъадагъну, Вифсайда кІуру шагьриз гъягъюру. 11 Амма мидкан хабар гъабхьи халкь Исайин кьяляхъ хъахъру. Дугъура, кьабул дапІну, дурариз Аллагьдин Паччагьлугъдикан сюгьбат гъабхуру, хъа сагъ духьну ккунидар уьзрарихьан марцц апІуру. 12 Йигъ хябяхъ хьуз хъюбгъю. ЙицІикьюриддира Исайин багахьна дуфну, кІуру: – Халкь деет, гъит багахь хьайи гъулариъ ва ятгъариъ йишв адапІри ва ипІруб абгри, гьаз гъапиш ухьу фукІа адрушваъ ахьа. 13 Исайи: «Дурариз ипІруб учву тувай», – кІуру. Ученикарира: «Учухь хьуб уьлна кьюб балугътІан хьадарчухь, гьамус учу, душну, му халкьдиз ипІруб гъадабгъну ккундинхъа?» – кІуру. 14 Дурар хьуд агъзур касдихьнакьан вуйи. Исайи дурариз: «Дурар дестйириъ хьу-хьуцІуркьан ади дитай», – гъапи. 15 Ученикари гьаци дапІну дурар дитру. 16 Исайи, хьуб уьлна кьюб балугъ гъадагъну, завузди дилигну, Аллагьдин ужувлакк ккахьри, дупну, гьудутІну, ученикарихьна халкьдиз пай апІуз тувру. 17 Вари халкьди ипІуру, тухъ шулу ва хъиригъу кьацІари йицІикьюб тавра ацІру. 18 Сабан, Чан ученикарра хъади, саб халват йишваъ ккарагурайиган, Исайи дурарихьан гьерхру: – Халкьди, Узу фуж ву пну, гьисаб апІура? 19 Дурари жаваб вуди кІуру: – Садари Уву штуан апІру Ягь’я, тмундари Ил’яс, шубурпидари кюгьне пайгъамбрарикан сар чІиви гъахьну кІури, гьисаб апІура. 20 Исайи дурарихьан хъана гьерхру: – Хъа учву, Узу фуж ву кІури, гьисаб апІурачва? Петри жаваб тувру: – Аллагьдин Месигь ву кІури. 21 Хъа Дугъу, мидкан гьич саризра дарпуб ижмишнаан гъадагъа дапІну, 22 хъа давам апІуру: – Инсаниятдин Бал’ин гизаф аьзабар улукьиди, аьхюдари, маллйири ва къанунчйири Думу нигь апІиди ва йикІиди, хъа шубудпи йигъан чІиви хьиди. 23 Вардарихьинди илдицну, Исайи кІуру: – Шлиз Узухъди гъягъюз ккундуш, думу чан тямягьяр дирчну, гьар йигъандин хач гъадабгъну Узухъди гъюри. 24 Фицики, шлиз чан уьмур уьбхюз ккундуш, дугъан думу дубгди, хъа шли чан уьмур Узу бадали пуч гъапІиш, дугъу думу уьбхиди. 25 Чав учв пуч, ясана чав чаз зарар гъапІхъантина, вари дюн’я чаз гъабшишра, инсандиз фу хайир ахъа? 26 Шли Узхьан ва Йиз гафарихьан нач гъапІиш, Адашдин, Чан ва марцци малайикарин гьяйбатлувалиъди гъафиган, дугъхьан Инсаниятдин Балира нач апІиди. 27 Гьякьди кІуразачвуз: мушв’ин дийигънайидарикан сакьюдариз, чпин аьжал хъубкьайиз, Аллагьдин Паччагьлугъ рябкъиди. 28 Гьаму гафар дупну миржид йигъланси Иса Петр, Югьан ва Якьуб хъади дагъдиина ккарагуз удучІвуру. 29 Ккарагурайиган, Исайин машнан рябкъювал дигиш шулу ва Дугъан палтарра лизи шулу, вацІрацІар апІури, нур туври шулу. 30 Ва магьа, Дугъахъди кьюр жвуву сюгьбат апІура: мурар Муса ва Ил’яс вуйи. 31 Гьяйбатлу аднаъди дуфнайидари, Ерусалимдиъ улубкьру Исайин аьжаликан улхури айи. 32 Петрна дугъахъ хъайидар му арайиъ нивкІуз душнайи, хъа нивкІ’ан хъиргиган, дурариз Исайин гьяйбатлувал ва Дугъан багахь хьайи гьадму кьюр кас рякъюру. 33 Дурар Исайихьан гьудучІвурайиган, Петри, чав фу кІурашра аьгъдарди, Исайиз кІуру: – Я Мялим! Учуз мушвахь ужуди вучуз! Гъач учу шубуб паж апІуча: саб Увуз, саб Мусайиз ва саб Ил’ясдиз (Петриз, чав фу кІураш, аьгъдайи). 34 Дугъу гьаци кІурайи вахтна, диф арайиз гъюру ва дурар ккаъру. Дурар дифру ккаъган, ученикарик гучІ кабхъру. 35 Хъа дифрагъян сес шулу: – Му Йиз кадагънайи Бай вуйиз, Гьамгъахъ хъебехъай! 36 Му сеснахъан, Иса сарди гъузру. Ученикар гьадму йигъари чпиз гъябкъюбдикан саризра чІалкьан дарпиди гъузнийи. 37 Хъайигъан дурар дагъдилан улдучІвган, Иса гизаф халкьди къаршуламиш апІуру. 38 Сабпну халкьдин арайигъян сари гьарай гъапІну: – Мялим! Миннат вуйиз Увуз, дуфну йиз бализ лига, узухъ хъайир думу сар вуйиз! 39 Жинди думу чІюркьюри шулу, хъа сабпну чІигъар утІурччвуру ва чІиргуру, ушвниан каф утІубччвуру, хъасин, бегьемди аьзабар тувбалан кьяляхъ, цІиб яваш шулу. 40 Узу Яв ученикарикан думу ктІубккуб тІалаб гъапІнийза, хъа дурарихьан гъабхьундар. 41 Исайи жаваб тувру: – Агь хътругъру ва аьрбатан дубхьнайи насил! Узу филадиз учвухъди хьиди ва учву аьх апІури гъузди! Хъади гъач мина яв бай. 42 Исайихьна гъюрайиган, бай жинди ккитІикІуру ва чІиргуру. Исайи чиркин рюгьназ буйругъ тувру ва жигьил, сагъ дапІну, чан адашдихьна тувру. 43 Вари Аллагьдин кьудратниин мюгьтал шуйи. Исайи гъапІкьандариин вари мюгьталди имиди, Дугъу Чан ученикариз кІуру: 44 – Гьаму гафар ужуди ичв кІваин гъитай: Инсаниятдин Бай багарихьди инсанарин хилиз тувди. 45 Амма дурар му гафарин гъаври ахъундар ва дурарин мяна ученикарихьан гьебкнади гъабхьну, гьаддиз дурари думу аннамиш гъапІундайи. Хъа мидкан Исайихьан гьерхуз дурариз гучІуйи. 46 Хъасин ученикарин арайиъ, дурарикан аьхюр фуж вуйкІан кІури, гьюжат абхъру. 47 Исайи, дурарин юкІвариъ айиб аьгъяди, сар бицІир гъадагъну, думу Чан улихь дерккру, 48 ва ученикариз Дугъу гьамци кІуру: – Шли му бицІир Йиз ччвурнахъ кьабул гъапІиш, гьадгъу Узу кьабул апІура. Хъа шли Узу кьабул гъапІиш, гьадгъу Узу Гьаур кьабул апІура, фицики учвкан вартІан цІиб вуйир фуж вуш, гьадму зурба ву. 49 Гьадмуган Югьанди гьерхру: – Мялим! Учуз Яв ччвурнахъан жинар ктаурайи сар кас гъяркъюнчуз ва дугъаз гъадагъа гъапІунча, гьаз гъапиш думу ухьухъди лицури шлур дар. 50 Исайи дугъаз кІуру: – Гъадагъа мапІанай, фицики фуж учвуз къаршу дарш, думу учвхъанди ву. 51 Иса жиларилан аьршариз гъадагъру йигъар багахь гъахьиган, Дугъаз Ерусалимдиз гъягъюз ккун шулу. 52 Ва Дугъу Чан улихьди чархачйир гьаъру. Дурарра душну, Думу гъюбаз гьязурвал апІбан бадали, Самария уьлкейиъ айи саб гъулаъ учІвру. 53 Амма душваъ Иса кьабул гъапІундайи, гьаз гъапиш дурариз Думу Ерусалимдиз гъягъюрайир вуйиб аьгъю гъабхьнийи. 54 Му ляхин дябкъну, Дугъан ученикар вуйи Якьубдина Югьанди кІуру: – Я Агъа! Учу, завариан цІа убгъ, дупну, диди дурар тІанкь дапІну ккундунуз? 55 Хъа Дугъу, дурарихьинди илдицну, гъадагъа апІуру. 56 Хъасин дурар саб жара шагьриз гъягъюру. 57 Дурар рякъюъ айиган сари Исайиз: – Уву наана гъушишра, узу Увухъди гъидиза, – кІуру. 58 Исайи дугъаз гъапи: – Сулариз – мугъарйир, завун ничхрариз мукьар а, хъа Инсаниятдин Бализ кІул дивну дахъру йишв адар. 59 Хъа сар жарариз Исайи: «Узухъди гъач!» – кІуру. Хъа дугъу: «Агъа! Узухьди сифте, душну, дукІнайи йиз адаш кивуз гъит», – кІуру. 60 Хъа Исайи дугъаз гъапи: – Гъит дийихнайидари чпин гъийихдар киври, хъа уву душну Аллагьдин Паччагьлугъдикан Ужувлан хабар рабгъ. 61 Хъана сари гъапи: – Узура Увухъди гъягъидиза, Агъа, амма сифте, душну, йиз хуландариз баркаллагь пуз гъит. 62 Исайи дугъазра гьамци гъапи: – Дурциин чан хил иливхъан, кьяляхъинди илдицру кас Аллагьдин Паччагьлугъдиз ярамиш дар.

Лука 10

1 Мидхъан Исайи ургцІурна кьюр жара ученикарра ктагъну ва кью-кьюрди, Чан улихьди, Учв гъягъюз ккайи гьарсаб шагьриз вая гъулаз гьаъру. 2 Дурариз гьамци кІуру: – Иган гизаф а, хъа убгрудар цІиб; гьаддиз игнин Агъайиз, Чан игниз убгрудар гьаъ кІури, ккарагай. 3 Гъарахай! Узу учву жанавраригъна агълижарси гьаъразачву. 4 Жвувахьди я пул, я тавра, я шаламар магъадагъанай ва саризра рякъюъ салам мутуванай. 5 Фуну хулаъ учІвишра, сифте: «Му хулаз мясляаьт ибшри!» йипай. 6 Ва эгер гьадму хулаъ мясляаьтчи кас аш, дугъаз учвухъди мясляаьт хьибди, хъа нагагь адарш, мясляаьт учвухьна кьяляхъ гъибди. 7 Дергу хулаъ гъузай, дурариз айибдикан ипІинай-убхъай, фицики лихруриз чан гьякъи лайикь ву. Хул’ан хулаз удучІвури махьанай. 8 Фунуб вушра шагьриз гъафиш ва учву кьабул гъапІиш, учвуз гьивуб ипІинай. 9 Душваъ айи аьзарлуйир сагъ апІинай ва дурариз: «Учвухьна Аллагьдин Паччагьлугъ багахь дубхьна», йипай. 10 Эгерки саб шагьриз дуфну, учву кьабул дарапІиш, кючейиз удучІвну йипай: 11 «Ичв шагьриъ учук кабсу биширугра ичв ликариина ктІубччвурача, хъа аьгъю йибхьайки, учвухьна Аллагьдин Паччагьлугъ багахь дубхьна». 12 Узу учвуз кІуразаки, гъиямат йигъан Содомдиз гьадму шагьризтІан ужу хьибди. 13 Гьял пис хьибдияв, Хоразин! Гьял пис хьибдияв, Вифсайда! Учвуз Узу улупу гьяйбатар Тириз ва Сайдайиз гъяркънийиш, дурарин агьалйири ухдитІан, чпихъ яснан палтар ва кІул’ин рюкъ алди деъну, тахсрар чпин гардандиъ дисидийи. 14 Гьаци вушра, суд апІруган, учвузтІан Тиризна Сайдайиз рягьятди хьибди. 15 Хъа увура, Кафернагьум, аьршаризкьан за хьибдиза кІурайна? Ваъ, гурбагуриъ абхъдиву! 16 Учвухъ хъпехъурайир Узухъ хъпехъура, ва учвхьан маш гьадабгъурайири Узхьан маш гьадабгъура. Хъа Узхьан маш гьадабгъурайири Узу му дюн’яйиз Гьаурихьан маш гьадабгъура. 17 Исайи гьаънайи ургцІурна кьюр ученикди, шадди кьяляхъ хъадакну, кІуру: – Агъа! Яв ччвурнахъди учуз жинарра кимиди мютІюгъ шуйи. 18 Исайи дурариз гъапи: – Узуз зав’ан кьюркьлин цІаси абхъу иблис гъябкъюнзуз. 19 БитІариин, аькьрабариин ва вари душманвалин кьувватариин алархьуз Узу гьюкум тувразачвуз ва учвуз фтикІа зарар тувидар. 20 Аммаки жинар учвуз мютІюгъ шула кІури, мид’ин шад махьанай; хъа гьаддиин шад йихьайки, ичв ччвурар сарун аьршарик дидикІна. 21 Гьадму сяаьтна Иса Аллагьдин Рюгьналан шадвали ацІру ва кІуру: – Адаш, заваринна жиларин Агъа! Аьяндрарихьанна аькьюллударихьан гьитІибкІнайиб бицІи касариз ачухъ апІбаз Увуз чухсагъул! Ав, Адаш, Увуз думу Яв ужувлан ният гьаци дубхьну ккундувуз. 22 Йиз Адашди вари тувунзуз. Бай фуж вуш, АдашдизтІан гъайри саризра аьгъдар, Адаш фуж вуш, БализтІан гъайри саризра аьгъдар. Ва Бали Адаш шлиз ачмиш гъапІиш, гьадгъаз аьгъю хьибди. 23 Анжагъ ученикариз вуди, Исайи дурарихьинди илдицну кІуру: – Учвуз рябкъюрайиб рябкъюрайи улар хушбахтаврар ву! 24 Фицики кІуразачвуз: гизаф пайгъамбраризна паччгьариз учвуз рябкъюрайиб рябкъюз ккундийи, хъа гъябкъюндар, учвуз ебхьурайиб ебхьуз ккундийи, хъа гъеебхьундар. 25 Магьа сар къанунчийи гъудужвну, Иса ахтармиш апІури, гьерхру: – Мялим! КкудудубкІру уьмур рубкьуз узу гьапІну ккунду? 26 Исайи дугъхьан гьерхру: – Къанундиъ фу дибикІна? Дидиъ фу урхури шулва? 27 Дугъу гъапи: – Яв Агъа Аллагь, вари юкІв хъипну, вари рюгьнаан, вари кьувватнаан, вари фагьмиан ккун апІин ва яв багахь хьайир жвуваз жвувси ккун апІин. 28 Исайи дугъаз кІуру: – Дюзди жаваб тувунва; гьаци апІин ва яшамиш хьидива. 29 Хъа дугъу, учв дюз алауз ккунди, Исайиз кІуру: – Хъа йиз багахь хьайир фуж ву? 30 Мидиз Исайи гъапи: – Сар кас Ерусалимдиан Ерихондиз гъягъюри гъахьну ва, гъачгъарин хилиъ ахъру, дурар, дугъан палтар илдитну, думу дурччвну, йикІру гьялнаъ итну, гьудучІвну гъягъюру. 31 Чан ляхин ади, гьадму рякъюъди сар малла гъягъюри гъахьну ва, гьадму кас гъяркънушра, гьудучІвну гъушну. 32 Гьаци Левитра, гьадушвхьантина, дидригъди, гьудучІвну гъягъюру. 33 Самария уьлкейиан вуйи сар кас, гьадлинтина даждиинди гъягъюрайир, дугъ’ин алахъуру ва, дугъаз думу дяркъну, дугъан язухъ шулу. 34 Хъасин багахьна дуфну, ччимна чяхир улубзури, дугъан зийнар илитІну, чан даждиин илитну, хялар дергрушваз духну, дугъан гъайгъу гъизигну. 35 Хъайигъан гъягъюрайири, хялар дергрушван эйсийихьна кьюб динар пул тувну, дугъаз кІуру: «Мугъан гъайгъу зиг, хъа пул артухъди харж гъабхьиш, хъадакну гъюрури туварзаяв». 36 Гьаму шубур касдикан гъачгъарин хилиъ ахъуриз вартІан багахь гъашир фуж ву кІури, фикир апІурава? 37 Къанунчийи: – Гьелбетда, дугъаз уж’вал гъапІур, – гъапи. Исайи: – Гъарах ва увура гьаци апІури йихь, – кІуру. 38 Сабан Чан ученикарихъди рякъюъ айи Иса саб гъулаз гъюру; мушваъ сар Марфа кІуру дишагьлийи Думу чан хулаъ кьабул апІуру. 39 Дугъаз Мар’ям кІуру чи айи; думу, Исайин ликарихъ деъну, Дугъан гафарихъ хъпехъури гъахьну. 40 Марфайи, ужуб хураг апІбан гъайгъушнаъ ади, Исайин багахьна дуфну гъапи: – Я Агъа! Йиз чуччу узу сарди гъитну Увуз вижна ктарнуз? Узуз кюмек апІин йипа дугъаз. 41 Исайи дугъаз жаваб вуди гъапи: – Гьей Марфа, Марфа! Уву гизаф ляхнарин гъайгъушнаъ ади гъяжяргъюрава. 42 Хъа лазим вуйиб анжагъ саб ву. Хъа Мар’ямди сарихьанра тадабгъуз даршлу ужувлан пай кадабгъна.

Лука 11

1 Сабан Иса саб йишваъ ккарагурайи. Ккарагбахъан, Дугъан ученикарикан сари Дугъаз гъапну: – Агъа! Ягь’яйи чан ученикариз ккарагуз фици улупнуш, учузра ккарагуз улупа. 2 Дугъу дурариз гъапи: – Ккарагруган, йипай: Я ич Адаш! Яв ччвур гирами ибшри; Яв Паччагьлугъ улубкьри; 3 Гьарсаб йигъаз учуз лазим вуйи уьл ча; 4 Ич гунгьариланра хил алдабгъ, учура гьарсар учуз буржлурилан хил алдабгъури шулча; хъа учу тямягьариъ мааан. 5 Хъана Исайи дурариз кІуру: – Пухьаки, учвкан сари, чаз дуст ади, гьацІишваринган дугъахьна дуфну, дугъаз кІуру: «Я дуст! Узуз шубуб уьл буржназ ча, 6 рякъюъ айи йиз сар дуст хулаз дуфнайиз, ва узуз дугъаз гьивуз ужуб фукІа адарзуз». 7 Хъа дугъу хулан айтІан увуз жаваб тувди: «Узу бизар мапІан, раккнар сарун хъяркьназа ва йиз баярра узухъди ахникк дахьна; узхьан гъудужвну, увуз уьлер тувуз шулдарзухьан». 8 Хъана кІарзачвуз, дугъу увуз ичв дуствалин гьюрматнаан уьл тутрувишра, хъа эгер чахъан уву тувайизкьан хътадакруб аьгъю гъабхьиш, гъудужвну, ккун гъапІу кьадар уьлер тувдивуз. 9 Узу кІуразачвуз: ча йипай – тувдичвуз; абгай – бихъидичвуз; раккник кучай – абццдичвуз. 10 Гьарсар ча кІурайириз тувди; абгурайириз бихъиди; кучрайириз абццди. 11 Уву фицир адаш вува, бали балугъ ча гъапиган, дугъаз балугъин ерина битІ туврур? 12 Ясана, мурта ча гъапиган, дугъаз аькьраб туврур? 13 Гьаци вуйиган, учву пис адмийир вушра, ичв веледариз ужуб тувуз удукьруган, аьршариин али Адашдихьан, хъанара ужуди, Чахьан ча кІурудариз Аллагьдин Рюгь тувуз хьибди. 14 Саб ражари Исайи чІал дибиснайирикан жин ктапІу ва думу улхуз хъюгъю, халкьра мид’ин мюгьтал гъахьи. 15 Дурарикан бязидари кІури гъахьну: – Дугъу жинар жинарин аьхюр Велзевулин кьувватниинди ктаура. 16 Хъа тмундари, Иса ахтармиш апІури, Дугъкан аьршариан саб аьламатнан лишан ккун апІури гъахьну. 17 Хъа Дугъу, дурарин ниятар аьгъяди, кІуру: – Чан айитІ душманвал ади, пай гъабши гьарсаб паччагьлугъ ичІи шул ва душманвал ади жара гъабши хизанра ккадабхъур. 18 Эгерки иблисра чан айитІ чахъди дявдиъ гъабшиш, дидин паччагьлугъ фици сагъди гъубздихъа? Хъа учву, Узу Велзевулин кьувватну жинар ктаура, кІурачва. 19 Эгер Узу Велзевулин кьувватну жинар ктаураш, хъа ичв терефкрари дурар шлин кьувватну ктаура? Гьаддиз дурар учвуз диванчйир ишри. 20 Эгерки Узу жинар Аллагьдихьан гъюрайи кьувватну ктаураш, икибаштІан, учвуз Аллагьдин Паччагьлугъ хъубкьна. 21 Кьувватлури, хилиъ яракь ади, чан хал уьбхюрайиган, дугъан мутмуйиз хатІавал адар. 22 Хъа дугъ’ина думутІанра гужлир алархьиган ва дугъ’ин гъалиб гъашиган, гьадмуган дугъан, учв уьрхюрза кІури миж кайи вари яракьра чаз гъадабгъиди ва тадабгъубра пай апІиди. 23 Фуж Узухъди дарш, гьадму Узуз къаршу ву ва, шли Узухъди уч апІурадарш, гьадгъу зяя апІура. 24 Чиркин рюгь, инсандиан удубчІвиган, шид адрушвариъ либцури, чаз архайинвал абгури шулу, дибрихъиган, кІуру: «Узу утІубкку йиз хулаз хътабкидиза». 25 Хътабкубдиз хал ичІибкнади ва марцц дапІнади рябкъюру. 26 Гьадмуган диди, дубшну, хъана ургубсан жин хуру, дурар дугъаъ учІвну яшамиш шулу, ва думу касдиз улихьдитІан гьамус артухъ пис шулу. 27 Исайи гьамци кІурайиган, сар дишагьлийи халкьдигъян яманди Дугъаз кІуру: – Уву дюн’яйиз гъахи ва аьхю гъапІу дишагьли хушбахтавар ву! 28 Хъа Исайи дугъаз кІуру: – Аллагьдин гаф ебхьурайидар ва тамам апІрудар хъана артухъ хушбахтаврар ву! 29 Хъа халкь гизаф уч гъашиган, Исайи пуз хъюгъру: – Му хътругъру насил ву; дурар заварин аьламатариз ккилигура, хъа Юнусдин аьламатналан гъайри дурариз жара аьламат рябкъидар. 30 Юнус Ниневияйин агьалйириз фици аьламат вуди гъахьнуш, гьаци Инсаниятдин Байра му наслиз аьламат вуди хьиди. 31 Гъиямат йигъан суд апІру вахтна кьиблайин паччагь-ханум гьамусдин адмийириз къаршу гъудужвну, дурар тахсиркар апІиди, фицики думу дюн’яйин тму кІулиан Сулеймандин фагьумлувалихъ хъпехъуз гъафнийи; хъа магьа мушвахь СулеймантІан зурба Вуйир хьа. 32 Гъиямат йигъан Ниневияйин агьалйир му наслин адмийирин дивандиз дуфну, дурарин тахсрар ачухъ апІиди, фицики Юнусди улупу аьгъювалариинди дурари чпин гунгьар гардандиъ гъидисну. Хъа магьа мушвахь ЮнустІан аьхюр Вуйир хьа! 33 Сарира, чирагъ кабхьну, жини йишвахь дивдар, я дид’ин гъаб иливдар, хъа, хулаъ учІврайидариз акв шлуси, чан йишв’ин дивру. 34 Бедендин чирагъ ул ву, гьаци вуйиган, эгер яв ул марцциди вуш, яв вари беденра акуди хьибди. Хъа эгер яв ул чІуруб вуш, яв беденра мучІуб хьибди. 35 Гьаци вуйиган, лиг гьа: увуъ айи акв мучІушин вуди дарибшри! 36 Эгер яв беден вари акуб вуш ва дидик сабкьан мучІу пай ктарш, вари гьаци аку хьибдики, хиял апІин, чирагъди уву чан нурниинди аку дапІна. 37 Исайи гьаци кІурайиган, сар фарисейи Дугъаз чан хулаз лисундин хураг ипІуз теклиф апІуру. Иса, дугъахьна дуфну, гъюн йивну, дахъру. 38 Фарисей, Исайи, уьл ипІайиз, чан хилар дижрикІиган, мюгьтал шулу. 39 Агъайи дугъаз кІуру: – Учву, фарисйири, ичв рюкьчарин чІатан тереф марцц апІури шулчва, хъа ичв айитІишв угъраш’валихьдина аьмалдарвалихьди абцІну шуличв. 40 Эй фагьумсузар! ЧІатан тереф яратмиш ГъапІури айитІишвра яратмиш гъапІундаринхъа? 41 Ужуб гьадму вуки, учвуз айибдикан садакьа тувай, гьадмуган ичв вари ляхнар марццидар хьиди. 42 Ичв пис гьял хьибди, фарисйир, фицики учву шюшеукІарилан, кІашнишарилан ва миди вуйи мейвйирилан йицІубдик саб пай туврачва, хъа гьякьлувалин ва Аллагьдин масанвалин гъайгъушнаъ адарчва. Учву гьамунубси, тмунубра дапІну ккунду. 43 Ичв пис гьял хьибди, фарисйир, фицики учву жугьдарин мистариъ гьюрматлу йишвар дисуз ва мажлисариъ жвуван тярифар ерхьуз ккунидар вучва. 44 Ичв пис гьял хьибди, фицики учву, чпин зиълан инсанар лицури ва мидкан чпиз хабар адру, жиликк ккайи накьварсдар вучва. 45 Мидиз жаваб вуди къанунчйирикан сари Дугъаз гъапи: – Мялим! Гьамци кІури, уву учузра гиран ктапІурава. 46 Хъа Исайи кІуру: – Учвухъра, къанунчйир, бала хъабхъди, фицики инсанариин гъахуз даршлу гъагъар илирчурачва, хъа дурар гъахбан бадали, учву ичв саб тІубкьан кучрадарчва. 47 Пис гьял хьибди ичв, фицики учву, ичв абйири гъийиху пайгъамбрариз гюмбтар диврачва. 48 Гьамдиинди ичв абйири гъапІу чІуру ляхнарин гьякьнаан шагьидвал апІурачва ва дурарихъди рази шулачва, фицики гьадрари пайгъамбрар гъийихну. Хъа учву дурариз гюмбтар диврачва. 49 Гьаддиз Аллагьдин аьяндарвалиинди гьамци кІура: «Дурарихьна пайгъамбрарна вакилар гьаъдиза, хъа дурарикан садар йивну йихиди, хъа тмундар утІурккиди». 50 Ва гьаму насликан дюн’я яратмиш гъапІхъамина гъийиху вари пайгъамбрарин удубзу ифи кадабгъри. 51 Авелин ифдилан гъадабгъну, Аллагьдин хулаъ айи гъурбан гъапІдар урккру йишванна Гирами йишван арайиъ удубзу, Закар’яйин ифдиина гъяйизкьан, кадабгъри. Ав, кІуразачвуз, гьаму насликан ктабгъиди. 52 Пис гьял хьибди ичв, къанунчйир, фицики учву аьгъюваларин ачар бисуз дибисначва, амма я учву учІвундарчва, ясана учІврудар гъитрадарчва. 53 Иса гьудучІвурайиган, къанунчйирна фарисйир Исайиз, хъючІюркьну, багахь шуз хъюгъру. Дугъкан чпин аьхючІвеъ суалариз жаваб тувуб ккун апІури, 54 дурариз, Исайи туву жавабариъ Дугъак тахсир кипуз шлу гафар агуз ният ади гъабхьну.

Лука 12

1 Му арайиъ, агъзрариинди халкь уч духьну, сари-сар хъуржуз хъюгъиган, Исайи сифте Чан ученикариз кІуру: – Ихтият йихьай фарисйирин дунихьан. Думу кьюб маш гъяйивал ву. 2 Учв ачухъ даршлу гьич саб гьитІибкІуб адар ва ашкар даршлу гьич саб жиниб адар. 3 Гьаддиз учву мучІушнаъ гъапиб аквнахь ебхьиди ва хулан айитІ ибахъна гъапиб гъваълан атІабгну пиди. 4 Учвуз, Йиз дустариз, кІураза: беден йибкІрударихьан гучІ мапІанай, фицики дурарихьан сарун артухъ фукІа апІуз шулдар. 5 Хъа шлихьан гучІ дапІну ккундуш, кІурзачвуз: гъачІиган, жегьеннемдиъ Итрурихьан гучІ апІинай. Ав, кІуразачвузки, Гьадгъухьан гучІ апІури йихьай. 6 Кьюб кепкихъ хьуб гъуланжакьв масу тувдаринхъа? Гьадрарикан сабкьан Аллагьди кІваълан гьаънадар. 7 Ичв кІул’ин али чІарарра кмиди Дугъу гьисаб дапІна. Гьаци вуйиган, гучІ мапІанай: гизаф гъуланжакьвартІан учву заан вучва. 8 КІуразачвузки, адмйирин улихь Узу кьабул гъапІу гьарсар кас Инсаниятдин Бали Аллагьдин малайикарин улихь кьабул апІиди. 9 Хъа шли адмйирин улихь Узу кьабул дарапІиш, думу Аллагьдин малайикарин улихь кьабул апІидарза. 10 Инсаниятдин Бализ къаршу гаф гъапиш, дугълан хил алдабгъиди, хъа шли Аллагьдин Рюгьнакан чІуру гаф гъапиш, дугълан хил алдабгъидар. 11 Хъа учву мистариз гьякимаринна гьюкумдрарин улихьна хъади гъахи вахтна, фици ва фициб жаваб тувруш, вая фу кІуруш, дидин гъайгъушнаъ махьанай. 12 Аллагьдин Рюгьну, учву фу дупну ккундуш, учвуз гьадму гьялатнаъ аьгъю апІиди. 13 Халкьдин кьялгъян сари Дугъаз гъапи: – Я Мялим! Йиз чвуччвуз, адашдилан учуз гъурубкьу ирс узухъди пай апІин, йипа. 14 Исайи гьадму касдиз гъапи: – Ичв диван апІуз вая пай апІуз Узу шли дерккну? 15 Мидихъди сабси Дугъу дурариз гъапи: – Лигай гьа, тямягькрар махьанай, фицики инсандин уьмур дугъан девлетналан асиллу дар. 16 Хъа Исайи дурариз тахалус ктибтуру: – Сар девлетлу касдин хутІлиъ ужуб бегьер битмиш дубхьнади шулу. 17 Дугъу чав-чакди гьамци фикир апІуру: «Узу гьапІру? Узуз йиз ризкьар ахьрушв адарзуз, аьхир. 18 Гьамци апІидиза: йиз амбарханйир дарагъну, аьхюдар дивдиза ва гьадина вари йиз рузи ва вари йиз девлет уч апІидиза. 19 Хъа йиз кІваз пидиза: эй йиз юкІв, увуз гизаф йисариз аьхючІвеъ девлет уч дапІназа: архаин йибхь, ипІин, убхъ, шад йибхь». 20 Хъа Аллагьди дугъаз кІуру: «Эй ахмакь! Ахъли яв юкІв увхьан гъадабгъиди: уву гьязур гъапІуб шлиз ккабхъдийкІан?» 21 Шли чаз девлетар уч апІураш, гьадгъаз гьаци хьибди. Думу Аллагьдин улихь девлетлу шулдар. 22 Чан ученикариз Исайи гъапи: – Гьаддиз учвуз кІуразаки, ичв гъян бадали фу ипІуруш ва ичв жан бадали фу алабхьуруш, гьаддин гъайгъушнаъ махьанай. 23 Фицики гъян хурагтІан, хъа жан палаттІан заан ву. 24 Къяркърариз лигай: дурари я убзури, я ккадабцІури шулдар, дурариз я хулар, я амбарханйир адар. Аллагьди дурариз ипІруб тувра. Хъа учву ничхрартІан хайлин артухъ дарнучвахъа? 25 Учвкан сарихьанра, жвуван гъайгъу зигури, гьич саб хъуршлииндикьана жан ягъал апІуз шулин? 26 Гьаци вуйиган, эгер учвхьан лап цІиб вуйибра апІуз удукьурдаш, имбунубдин гьякьнаан фу гъайгъу зигидичвахъа? 27 Лизи кюкйир фици аьхю шулаш, лигай: дурари я зегьмет зигурадар, я парча убхурадар. Хъа, кІуразачвуз, Сулейман паччагьди чан лап ад айи вахтнара дурарихъ гьарсабдихъ хъайисдар палтар алахьури гъахьундар. 28 Эгер гъи чюлиъ ади, закур цІигъ убгурайи укІ Аллагьди гьаци уччвуди балгурайиган, Дугъу учв’ин дицитІан уччвуди палат алабхьидаринхъа, цІибтІан хътругърудар! 29 Гьаци вуйиган, учву ипІрубдихъна убхърубдихъ милицанай ва инжик махьанай. 30 Гьаз гъапиш вари гьамрар му дюн’яйин аллагьсузари агури шулу; хъа ичв Адашдиз учвузра дурар лазим вуйиб аьгъя. 31 Аллагьдин Паччагьлугъ абгури йихьай. Гьаци гъапІиш, имбуб вари Дугъу тувдичвуз. 32 ГучІ мапІанай, бицІи лиж! Фицики ичв Адашди учвуз Чан Паччагьлугъ тувуз ужуб кьаст дапІна. 33 Ичв мулкар масу туври, садакьади пай апІинай. Жвуваз аьршариъ угъри удручІвру, йирси даршлу ужагъ, камк ктрабхьру ва хътІатІабццру хазна гьязур апІинай. 34 Фицики, ичв девлет наан аш, ичв юкІвра гьадушваъ хьибди. 35 Гьарсабдиз гьязур вуди йихьай: юкь’ан чІулар идитІну ишри ва чирагъар кархьну ишри. 36 Агъа сумчриан дуфну, хъумп гъапІубси, дугъаз раккнар арццуз ккилигурайи гъуллугъчйириз ухшар хьидичва. 37 Агъайиз, хулаз хътакиган, даахнадарди гъяркъю лукІар хушбахтаврар ву; гьякьди кІуразачвузки, дугъу, чан юкь’ан идибтІну, дурар дитди ва, гьарурихьна гъюри, чавра дурариз гъуллугъ апІиди. 38 Ва думу гьацІишваринган гъафишра, гьириккна гъафишра, гьязур гьялнаъ гъидихъу лукІар хушбахтаврар ву. 39 Учвуз аьгъю йибхьайки, хулан эйсийиз угъри гъюру вахт аьгъяш, думу чан хулаъ учІвуз гъитдар. 40 Учвура гьязурди гъузай, фицики учву ккилигури адру сяаьтна Инсаниятдин Бай гъиди. 41 Гьадмуган Петри Дугъхьан гьерху: – Я Агъа! Му тахалус учуз кІурана, даршиш вардариз? 42 Агъайи кІуруки: – Вафалу ва аькьюллу гъуллугъчи фуж ву? Агъайи чан лукІариз вахтниинди хураг пай апІбан бадали аьхюрди дерккур. 43 Хулаз гъафи агъайиз ляхин апІури гъяркъю гъуллугъчи бахтавар ву. 44 Гьякь кІуразачвузки, агъайи думу чан вари хал-йишван аьхюрди дерккди. 45 Эгерки гъуллугъчийи чан кІваан: «Йиз агъа багаригьди гъидар» пну, гъаравшариз йивуз, ипІуз-убхъуз ва пиянвалар апІуз хъюгъиш, 46 агъа, думу ккилигури адру йигъан ва мялум дару сяаьтна хъуркьди ва думу гъуллугъчи кьюб швур апІиди: дугъкан чаз мютІюгъсузариз апІруб апІиди. 47 Чаз агъайин кьаст аьгъяди, дугъу гъаписи дарапІу лукІ гизаф урччвиди. 48 Хъа чаз аьгъдарди жазайиз лайикьлу ляхин гъапІур цІибди урччвиди. Гизаф тувнайи гьарсарикан ккунра гизаф апІиди, ва шлин ихтиярнаъ гизаф ивнаш, гьадгъахьди йишв’инара гизаф хуз гъитди. 49 Узу жил’ина цІа кчІибгуз Гъафир вуза ва гьаци ккунди азузки, думу сарун гьамустІанра кабхъну! 50 Узу аьзабарикк ккуркьну ккунду ва гьаму кІулиз удубчІвайиз инжик вуза! 51 Узу жилиина мясляаьт тувуз дуфна кІури, фикир апІуранчва? Ваъ, кІуразачвуз. Узу сар-сарихьан жара апІуз дуфнайир вуза. 52 Фицики гьамусдихъантина саб хулаъ айи хьур кас жара хьуз хъюгъди, шубур кьюриз къаршу ва кьюр шубуриз къаршу вуди; 53 адаш бализ, бай адашдиз къаршу хьиди, дада шураз, риш дадайиз къаршу хьиди; сижарбаб швушваз, швушв сижарбабаз къаршу хьиди. 54 Халкьдизра Исайи гъапи: – Ригъалабхъру терефнахъан гъюрайи диф гъябкъиган, дишлади: «мархь убгъиди» кІурчва, ва гьаци шулу. 55 Кьиблайин микІ хъивиган, «гизаф мани хьибди» кІурчва, ва гьацира шулу. 56 Эй кьюб маш гъяйидар! Учву, жилин ва завун лишнари фу улупураш, гъудубгъунчва, хъа му вахтарин лишнарин мяна гьаз аьгъю шуладарчвуз? 57 Гьаз учвхьан жвуван фикриинди, фу дапІну ккундуш, аьгъю апІуз шуладарчвухьан? 58 Уву яв гьюжаткрихъди аьхюрихьна гъягъяйиз, рякъюъ имиди дугъахъди мясляаьт апІуз чалишмиш йихь. Гьаци даршиш, дугъу уву суддиз гъахиди, судди уву жаллатІрихьна тувди, хъа жаллатІри уву дустагъдиъ итди. 59 Хъа кІуразавуз: аьхиримжи кепкиина гъяйиз, яв вари бурж ктипайизкьан, душв’ан удучІвидарва.

Лука 13

1 Гьадму арайиъ сакьюдари, гьадина дуфну, Аллагьдиз икрам апІурайиган, Пилатди Галилей уьлкейин гъийиху агьларикан, Исайиз кІуру. 2 Исайи дурариз ктибтуру: – Дурариз мициб инсафсуз жаза тувуз, дурар миди вуйи Галилей уьлкейин агьлартІан артухъди гунагькрар ву, пну, фикир апІуранчвахъа? 3 Ваъ, кІуразачвуз: эгер учву ичв гунгьар гардандиъ дидрисиш, тахсрар апІури гъашиш, учвура вари гьаци йихидичву. 4 Ясана учву, Силамдин чІвурд абхъиган, гъийиху йицІимиржир кас Ерусалимдин миди вуйи агьлартІан артухъди тахсиркрар ву кІури, гьисаб апІуранчва? 5 Ваъ, кІуразачвуз: эгер учву ичв гунгьар гардандиъ дидрисди, тахсрар апІури гъашиш, учвура вари гьаци йихидичву. 6 Хъа Исайи гьамциб тахалус ктибтуру: – Сари чан багъдиъ инжирин гьар кивнади гъабхьну. Сабан, думу гьаригъ йимишар гъяш лигуз гъюру, амма гъядарди рябкъюру. 7 Дугъу багъбанчийиз кІуру: «Магьа, шубуд кІуру йисан мина йимишар гъяш лигуз гъюраза ва гъядарди шула; думу алдабтІ, диди давди йишв бисура». 8 Хъа багъбанчийи дугъаз: «Эй агъа! Гьаму йисансана гъибт, узу, дидин кьаблихъишв дирибккну, пейин хъабхьдиза. 9 Диди бегьер хуруш лигухьа, нагагь дархиш, гъюру йисан думу алдабтІархьа». 10 Султ йигъан Исайи саб жугьдарин мистаъ аьгъювалар улупурайи. 11 Душваъ йицІимиржид йисан уьзрин жин кайи сар дишагьли айи. Думу, дацІаркну, беден хъцІабкуз даршули гъахьну. 12 Исайи, думу дяркъну, дих апІуру ва дугъаз кІуру: – Дишагьли! Уву яв уьзрихьан азад шулава. 13 Хъа Исайи дугъ’ин хилар иливуру, дишагьли дишлади хъцІакуру ва Аллагьдин ад за апІуз хъюгъру. 14 Мистан аьхюри гьадмуган, Исайи султ йигъан адми сагъ гъапІну кІури, хъял кубчІвну, халкьдиз кІуру: – Му ляхин апІуз йирхьуд йигъ а, гьаддиз сагъ апІбан бадали султ йигъан ваъ, хъа миди вуйи йирхьуд йигъари гъачай. 15 Агъайи дугъаз жаваб вуди гъапи: – Эй кьюб маш гъяйидар! Ухькан гьарури султ йигъан чан йиц вая дажи, тІунхъан хъудубчну, шид тувуз хъапІри шулдаринхъа? 16 Хъа магьа йицІимиржид йисан иблисди йитІнайи му Ибрагьимдин риш султ йигъан азад апІуз хай шулдаринхъа? 17 Исайи гьамци кІуруган, Дугъаз къаршу удучІвнайи вардариз нач шулу, ва вари халкь Исайин адлу ляхнариин шад гъахьнийи. 18 Дугъу хъана гъапи: – Аллагьдин Паччагьлугъ фтихъна гъубшуб ву ва думу фтихь тевза? 19 Думу, инсанди бистниъ киву дилиз ухшар ву: ктубчІвиган, дидкан бегьем гьар шулу ва завун ничхрари дидин циркларигъ мукьар апІуру. 20 Исайи хъанара гъапи: – Аллагьдин Паччагьлугъ сарун фтихь тевза? 21 Думу дишагьлийи гъадабгъну, шубуб сеъ хюйик капІну, хамир вари утуз гъибту дуниз ухшар ву. 22 Хъасин, гьамци аьгъювалар улупури, шагьриан шагьриз, гъул’ан гъулаз гъягъюри, Иса Ерусалимдиз рякъюъ учІвру. 23 Рякъюъ сари Дугъхьан гьерхру: – Я Агъа! Яраб уьрхрюдар цІибтІан хьидайкІан? Исайи дугъаз кІуру: 24 – Ккуру урнариантина учІвуз гьялак йихьай, фицики гизафдариз учІвуз ккунди, хъа учІвуз хьибдар. 25 Гьадмуган эйсийи, гъудужвну, урчІар хъяркьди, хъа учву чІатан гьамци кІури урчІарик кучри гъуздичва: «Я Агъа! Учуз урчІар арццава». Хъа Дугъу учвуз пиди: «Учву фужар ва наънан вушра, аьгъдарзуз». 26 Гьадмуган пидичва: «Учу Яв улихь ипІури-убхъури гъахьунча ва кючйириъ Уву учуз аьгъювалар улупуйва». 27 Хъа Дугъу пиди: «Учву фужар ва наънан вушра, аьгъдарзуз; Узхьан дург йихьай, вари нягьякьвалар апІрудар!» 28 Учвуз Ибрагьим, Исакь, Якьуб ва вари пайгъамбрар Аллагьдин Паччагьлугъдиъ гъяркъиган, хъа учву дилин утІурккруган, зурба ишубна суза зигидичва. 29 Хъа ригъгьудубчІвруна алабхъру, кафарина кьибла терефарихъанди дуфнайидар Аллагьдин Паччагьлугъдиъ гъюн йивну дахьди. 30 Ва магьа, аьхиримжидар сарпидарди, сарпидар аьхиримжидарди хьиди. 31 Думу йигъан фарисйирикан бязидари, дуфну, Исайиз гъапи: – УдучІвну, гьамлин гъарах, дарш Гьироддиз Уву йикІуз ккунди а. 32 Дугъу дурариз гъапи: – Душну, гьадму аьмалдар сулаз йипай: магьа гъира, закурра Исайи инсанарикан жинар ктаиди ва инсанар сагъ апІиди, хъа саритІ Чан ляхин ккудубкІиди. 33 Дупну ккундуки, Узуз гъина, закурна саритІтІан лицуз вахт имдарзуз, фицики пайгъамбрар, ЕрусалимдиътІан дарди, жара йишваъ йикІбакк ккуркьри шулдар. 34 Эй, пайгъамбрар йивну йихру ва чахьна гьау илчйириин гъван уьлюбхру Ерусалим! Швнубан Узуз, пеъли чан хлинццариккна шюхъярси, яв халкь уч апІуз ккун гъабхьунзуз, хъа учву кІул ккивундарчва! 35 Лигай, магьа ичв хал ичІиди гъубзна. Магьа кІуразачвуз: «Агъайин ччвурнахъ Гъюрайир ужувлакк ишри», кІури, учву дих дарапІкьан гагьди, Узу сарун рякъидарчвуз.

Лука 14

1 Саб султ йигъан Иса фарисйирин гьякимарикан сарин хулаз уьл ипІуз гъюбакк ккуркьру; хъа, Дугъу гьапІруш, дурари ул хъипнийи. 2 Исайин улихь хамракк шид уч шлу аьзар кайи сар кас деънайи. 3 Мициб дюшюшназ лигну, Исайи къанунчйирихьанна фарисйирихьан гьерхру: – Султ йигъан духтирвал апІуз хай шулин? 4 Дурар ккебехъну гъузру. Дугъу му аьзарлу дидисну, сагъ дапІну, хулаз деетуру. 5 Мидихъди сабси Дугъу гъапи: – Нагагь учвкан сарин бай вая йиц фуриъ абхъиш, дугъу, султ йигъ вушра, думу дишлади адабгъидаринхъа? 6 Дурарихьан Исайиз жаваб тувуз гъабхьундар. 7 Дих дапІнайидари ужудар йишвар ктагъуради дябкъну, Исайи дурариз тахалус ктибтуру: 8 – Сари увуз сумчриз гъюб теклиф гъапІиган, ужуб йишв’ин медеан, гьаз гъапиш гъач дупнайидарикан фужкІа увутІан артухъур вуди гъабшиш, 9 хъа увузна дугъаз теклиф гъапІури, увухьна дуфну: «Мушв гьадгъан йишв ву», кІуруси дарибшри, даршиш думуган, начра дубхьну, харжи йишв’ин деуз мажбур хьидива. 10 Саки увуз гъач дупнайиган, дуфну харжи йишв’ин деъ, увуз гъач гъапири, увухьна дуфну: «Дуст кас! Минаси кудучІв» кІуруганси. Гьадмуган увуз увухъди деънайидарин улихь артухъ гьюрмат хьибди. 11 Фицики, шли чав учв за апІури гъашиш, гьадму асккан хьиди, хъа учв аскканди дисрур заан хьиди. 12 Хъа хулан эйсийизра Исайи кІуру: – Лисундин вая хябяхъдин хураг апІруган, я яв дустариз, я яв чвйириз, я яв мирасариз, ясана девлетлу гъуншйириз гъач макІан, дурари, увузра гъач дупну, уву гьивуб увухьна хътадабкруганси. 13 Хъа шадвал апІру вахтна аьжузариз, шикастариз, ликудариз, курдариз дих апІин. 14 Ва уву бахтавар хьидива, фицики дурарихьан чпиз гьивуб увуз кьяляхъ апІуз хьибдар, хъа явра, дугъридар чІиви гъашиган, гьисабнаъ хьибдияв. 15 Му гафар гъеерхьиган, Исайин гъвалахъ деънайидарикан сари кІуру: – Аллагьдин Паччагьлугъдиъ уьл ипІрур хушбахтавар ву! 16 Исайи дугъаз гьамци кІуру: – Сар касди, аьхю шадвал дюзмиш дапІну, гизафдариз гъач гъапну 17 ва, хябяхъ гъабшиган, чан лукІ хялариз: «Гъачай, гьарсаб гьязур духьна» пуз, гьаъру. 18 Хъа вардари, гаф саб дапІнайиганси, кІулар ккадагъуз хъюгъну. Сарпири дугъаз гъапну: «Узу жил гъадабгъназа ва узу, дина душну, дидиз дилигну ккунду, ккун апІурза узлан хил алдабгъуб». 19 Тмунури гъапну: «Узу хьуд жут йицар гъадагъназа ва узу дурариз лигуз душну ккунду, узлан хил алдабгъуб ккун апІурза». 20 Шубурпири: «Узу багарихьди эвлемиш духьнамиза ва гьаддиз гъюз шулдарзухьан» кІуру. 21 Хъа хъадакну гъафи гьадму лукІру чан агъайиз гьамрар вари ктитну. Гьадмуган хъял кубчІву хулан эйсийи чан лукІраз гъапну: «Гъарах, шагьрин кючйиригъян дагну, тяди мина аьжузар, шикастдар, ликудар ва курдар хъади гъач». 22 ЛукІрура, душну гьаци дапІну, кІуру: «Агъа, яв буйругъ тамам гъапІунза, вушра саб хъана йишв ими». 23 Агъайи лукІраз гъапну: «Душну, кючйириан хъана хъади гъач, йиз хулан суфра хъабцІруси апІин. 24 КІуразавуз: гьадму улихьна дих дапІнайидарикан сарикьан йиз хураг ипІидар». 25 Сабан Исайихъди хайлин халкь гъюради гъабхьну ва Дугъу, дурарихьинди илдицну, гъапи: 26 – Эгер сар кас Узухьна, чан адашна дада, хпирна веледар, чвйирна чйир, гьацира чан хусуси уьмур нигь дапІну дарфиш, дугъкан Йиз ученик хьидар. 27 Чан хач кьял’ин алдрурихьан, ва Узухъди дяргърюрихьан Йиз ученик хьуз хьибдар. 28 Учвкан фунури, хулар дивуз ккунди, сифте деъну, дидиз удучІвру харжар гьисаб дарапІди, думу дивну ккудубкІбан бадали фйир лазим вуш гьисабназ гъададагъиш, 29 ва шибритІар ирчну, хулар ккудукІуз дархьиш, мици гъяркъдар вари дугъ’ин гьамци кІури аьлхъидарин: 30 «Гьаму касдихьан, хулар дивуз хъюгъну, ккудуркІуз гъабхьундар?» 31 Ясана фуну паччагьди, чахъ йицІуд агъзур эскер хъади, жара паччагьдиина дяви апІуз гъягъруган, чаина гъюрайи къад агъзур эскер айи кьушмихъди дяви апІуз удукьидиш, улихьмиди деъну, везирарихъди мясляаьт дарапІди гъитур? 32 Ясана, гьадму кьушум ярхлаъ имиди, дугъу дяви дарапІбан бадали йикьрар апІуз вакилар гьаидарин? 33 Гьамци учвкан гьарурихьан, чаз вари айибдихьан гьудудучІвиш, Йиз ученик хьуз хьидар. 34 Кьил ужуб мутму ву; хъа эгер кьилан кьилзишин гъудубгиш, думу фти кьилзи апІиди? 35 Думу я ругдиз, я пейиндиз ярамиш дар; думу тина гатІабхьур. Шлин ибариз ебхьураш, гъит ебхьри!

Лука 15

1 Исайихьна, Дугъахъ хъпехъбан бадали, вари налук гъюдюбхрудар ва гунагькрар гъюри гъахьну. 2 Фарисйирина аьлимари, Дугъу гунагькрар кьабул апІура ва дурарихъди уьл ипІури шула кІури, наразивал улупури гъахьну. 3 Гьадмуган Исайи дурариз гьамциб тахалус ктибтуру: 4 – Учвкан, чаз варж марчч ади, дурарикан саб гъудубгиган, урчІвцІурна урчІвуб чюлиъ гъитну, гъудубгуб бихъайизкьан дарабгрур фуж шул? 5 Хъа дибихъну, думу гъюнариина шадди за апІидарин? 6 Ва хулаз дуфну, дустарна гъуншйир уч дапІну, дурариз «Узухъди шадвал апІинай, гъудубгу чарва гъибихъунзуз», – пидарин? 7 КІуразачвузки, гьамци аьршариъра чан тахсрар гардандиъ гъидису гунагькрикан, урчІвцІурна урчІвур гунгьар ктарзук кІурайи марцци касарикантІан, артухъ шад хьиди. 8 Ясана фуну дишагьлийи, чаз йицІуб арсран кепек ади, дурарикан саб гъудубгиган, чирагъ кабхьну, хал ичІибкури, думу бихъайизкьан дарабгди гъибтур? 9 Хъа му гъибихъган, чан дуст хпар ва гъуншйир уч дапІну, дугъу: «Узухъди шад йихьай, узуз гъудубгу арсран кепек гъибихъунзуз» дарпиди гъитрин? 10 Гьамци Аллагьдин малайикарра чан тахсрар гардандиъ гъидису сар гунагькриканра шад хьиди. 11 Исайи хъана кІуру: – Сар касдиз кьюр бай ади гъахьну. 12 Дурарикан бицІинури адашдиз гъапну: «Я адаш! Ихь девлетнан узуз рубкьру пай ча». Адашдира баяриз девлет пай апІуру. 13 Сакьюдар йигъарилан бицІину чве, чаз ккубкьуб вари уч дапІну, ярхла юрдариз гъягъюру ва, душвариъ кефниинди яшамиш шули, чаз айи девлет вари хътипІуру. 14 Хъа вари хътипІган, гьадму юрдариъ зурбади гаш абхъру, ва думу дарвалиъ ахъру. 15 Думу гьадму юрднан сар агьалийихь яшамиш хьпакк ккуркьру. Эйсийира думу чан силар уьрхюз чюллериз гьаъру. 16 Думу силари ипІурайи бужвам дипІнура чан фун абцІуз рази вуди шуйи, амма гьадмура дугъаз туври шулдайи. 17 Чан фагьмихъна гъафиган, дугъу гьамци гъапну: «Йиз адашдин хул’ин лихурайидариз фукьан булди уьл ади шуйи, хъа узу мушваъ гашу йикІури азу! 18 Душну йиз адашдиз пидиза: „Я адаш, узу, аьршариз ва увуз къаршу духьну, гунагьвалар гъапІунза. 19 Ва сарун яв бай ву пуз лайикьлур дарза. Узу увухъ лихурайидарин жергейиз кьабул апІин“». 20 Гьамци дупну, думу чан адашдихьна хътакуру. Думу ярхлаъ имиди дяркъну, адашдиз дугъан язухъ шулу ва, жаргъну душну, дугъан гардандиъ архьру ва макар апІуру. 21 Бали дугъаз кІуруки: «Я адаш! Узу, аьршариз ва увуз къаршу духьну, гунагьвалар гъапІунза ва сарун яв бай ву пуз лайикьлу дарза». 22 Хъа адашди чан лукІариз кІуру: «Ужубсиб палат дубхну дугъахъ хъабхьай, хилихъ тІубланра хъапІай ва ликариинра алахьай. 23 Хъасин гваназ дюбхнайи кІари дубхну, убккай. ИпІури ва убхъури шадвал апІидихьа. 24 Фицики му йиз бай дукІну айи ва чІиви гъахьну, дудургну айи ва гъидихъну». Гьамци вари шадвал апІуз хъюгъну. 25 Аьхюну бай думуган хутІлиъ ади гъахьну. ХутІлиан гъюрайириз, хуларихьна багахь гъашиган, ялхъвнин мукьмар ерхьуру. 26 Дугъу гъаравшарикан сарихьан гьерхру: «Му фу хабар ву?» 27 Дугъура мугъаз: «Яв чве дуфна; яв адашди, думу сагъ-саламатди хътакбан сагълугънаан ганаз дюбхнайи кІари дубккна» кІуру. 28 Аьхюну чве, хъял дуфну, хулаъ учІвуз даккунди гъахьну. Адашди, удучІвну, дугъаз хулаз дих апІуру. 29 Хъа дугъу адашдиз жаваб вуди кІуру: «Магьа швнуд йисан увуз гъуллугъ апІури аза ва сабанра яв гаф ликрикк ккивундарза. Хъа уву узуз йиз дустарихъди шадвал апІуз мегьел саб мудуркьан тувундарва. 30 Хъа чан пай улдугнайидарихъди дипІну, яв гьамуну бай гъафиган, уву дугъаз дюбхнайи кІари гъубккунва». 31 Адашди дугъаз кІуру: «Я жан бай! Уву гьарган узухъди хъава ва вари йизуб явуб ву, 32 хъа яв му чве дукІну айи ва чІиви гъахьну, дудургну айи, гъидихъну, ва гьаддиин шад хьуб ва гешт хъапІуб лазим вуйи».

Лука 16

1 Хъа Исайи Чан ученикариз кІуруки: – Сар девлетлуйиз чан мяишат идара апІру сар кас ади гъахьну. Гьадгъу эйсийин мяишат зяя апІура кІури, аьрза гъюру. 2 Эйсийи дугъаз дих дапІну гъапи: «Увкан узуз ерхьурайи аьрзйир гьапІрудар ву? Яв идара апІбан ляхнарин гьякь-гьисаб ча, фицики сарун увхьан мяишат идара апІуз шулдарвухьан». 3 Гьадмуган мяишатдин идарачийи чав-чакна кІуру: «Узу гьапІну ккун? Йиз агъайи хулан мяишат идара апІувал узхьан тадабгъиди: жил йибккуз узхьан удубкьидар, шликанкІа пул тІалаб апІуз начди вузуз. 4 Йиз ляхнихьан гьадаиган, узу жарадарин хулариъ кьабул апІру ужуб аьмал аьгъязуз». 5 Хъа чан агъайин буржар кайидариз жа-жаради чахьна дих апІури, дугъу сарпирихьан гьерхну: «Уву йиз агъайиз фукьан буржлу вува?» 6 Дугъу: «Варж бети ччимдин» кІуру. Хъа дугъаз идарачийи: «Ма яв расписка» ва тядиди «хьуцІур бети бикІ» кІуру. 7 Хъасин тмунурихьан гьерхру: «Хъа уву фукьан буржлу вува?» Дугъу: «Варж шишал дяхнин» кІуру. Дугъазра кІуру: «Ма яв распискара ва „миржцІур шишал“ бикІ». 8 Хъасин эйсийи, чан нягьякь идарачийи аькьюллу ляхин гъапІну кІури, дугъан тяриф апІуру. Фицики гьамусдин деврин адмийир аквнахьна чалишмиш шулайидартІан чпин хайирнан гъаврикк ккайидар ву. 9 Хъа гьаддиз Узу кІуразачвуз: учвуз жил’ин тувнайи девлетниинди жарадариз хайир тувай. Фицики му дюн’яйин девлетар тІанкь гъапиган, учву Агъайин гьаргандин хулариъ кьабул апІидичву. 10 ЦІиб вуйибдиъ дугъри кас – аьхюбдиъра дугъри ву, хъа цІиб вуйибдиъ угъри – аьхюбдиъра угъри ву. 11 Гьаци вуйиган, эгер учв’ина жилариин али девлет аманат апІуз шулдарш, хъа аьршариин али хазна шли учв’инна аманат апІиди? 12 Ва эгер учву жарарин девлетнаъ угъри гъахьнуш, учвуз ичвуб шли тувди? 13 Гьич сар гъуллугъчийихьанра кьюр агъайиз гъуллугъ сабси апІуз шулдар, фицики дугъаз санур даккун, хъа тмунур ккун хьиди, вая сариз ужуди гъуллугъ апІиди, хъа тмунуриз – чІуруди. Аллагьдизра девлетназра сатІиди гъуллугъ апІуз хьибдарчвухьан. 14 Пул ккуни фарисйир, гьаму гафарихъ хъпехъури, Исайиин аьлхъюри гъаши. 15 Дугъу дурариз гъапи: – Учву инсанарин улихь гьякьлудар вуди улупурачва, хъа Аллагьдиз ичв юкІвар аьгъя, фицики инсанариз фу заан вуш, Аллагьдиз думу алчагъвал ву. 16 Ягь’я гъяйизкьан къанун ва пайгъамбрар ади гъахьну. Хъа Ягь’я гъафихъанмина Аллагьдин Паччагьлугъдикан Ужувлан хабар рабгъура ва гьарсар дидиъ гужниинди учІвуз чалишмиш шула. 17 Амма къанундин саб цІаркьанра дубгайиз, заварна жилар ухди дармадагъин шул. 18 Чан хпир гьадаурайири ва жарар хурайири кьяппавал апІура. Хъа гьарсар жилирихьан гьудучІву хпир хурайирира кьяппавал апІура. 19 Сар кас девлетлу вуди, багьа вуйи палтар алахьури, гьар йигъан гешт хъапІри гъахьну. 20 Хъа гьацира Лазар кІуру, чан хамриин хац алабхьнайи, дугъан урнарихъ дахъри шлу касибра гъахьну. 21 Думу девлетлуйин суфрайихъан хътахьру кьацІар вушра итІуз рази вуйи, ва хуйири, дуфну, дугъан хацариз мелз йивури гъахьну. 22 Касиб гъачІиган, малайикари думу Ибрагьимдин багахьна гъахуру. Девлетлура йикІуру, ва думура кивру. 23 Жегьеннемдиъ аьзабар зигури ади, дугъу улар за гъапІиган, дугъаз ярхлаъ Ибрагьимна дугъан гъвалахъ деънайи Лазар рякъюру. 24 Ва дугъ’ан гьарай утІубччвуру: «Я Ибрагьим аба! Йиз язухъ апІин; Лазар узухьна гьаъ. Дугъу чан тІубан кІакІ штук кубсну, йиз мелз кьяши апІри, узу му жегьеннемдин цІин аьзабнакк кказа». 25 Хъа Ибрагьимди дугъаз кІуру: «Йиз бай! КІваин апІинки, сарун увуз яв уьмриъ рубкьру уж’вал гъурубкьунвуз, хъа Лазариз писвалтІан фукІа гъябкъюндар. Гьамус дугъаз мушваъ гешт ккабхъна, хъа уву аьзабнакк ккава. 26 Хъа дитІланра гъайри, явна ич арайиъ гьациб зурба деринар айихьки, милин увухьна гъюз ккунидарихьан ва дилин гьамина гъюз ккунидарихьан дилан улдучІвуз хьибдар». 27 Гьадмуган девлетлуйи гъапи: «Я аба! Увкан Лазар йиз адашдин хулаз гьауб ккун апІурза. 28 Узухъ хьур чве хъазухъ: гъит Лазари, гьадму йиз чвера гьаму аьзабнан йишваз дяргъруси, гьадрарихь чаз гъябкъюбдикан шагьидвал апІри». 29 Ибрагьимди дугъаз гъапи: «Дурариз Мусайин ва жара пайгъамбрарин китабар а; гъит гьадрарихъ хъебехъри». 30 Хъа девлетлуйи кІуру: «Ваъ, Ибрагьим аба! Белки, магьа гъачІидарикан сар, дурарихьна дуфну, ктибтиш, дурари гунгьар гардандиъ дисиди ва тахсрар апІидар». 31 Гьадмуган Ибрагьимди дугъаз кІуру: «Эгер дурар Мусайихъ ва пайгъамбрарихъ хъпехъурадаш, дурар, фуж гъачІидаригъян чІиви гъахьишра, хътругъур».

Лука 17

1 Исайи чан ученикариз кІуру: – Инсан гунагьвалиъ тІаъру тямягьяр чарасуз гъиди. Аммаки тямягьяр шлиланмина гъюруш, гьадгъан гьял пис хьибди. 2 Думу касдиз, тямягьвал кипну, зяифдарикан саркьан рякъ’ан адаайиз, чан гардандиъ рягънин ахал ипну, учв гьюлиз гатІахьнийиш, ужу шлийи. 3 Уягъди гъузай. Эгерки яв чвуччву увуз къаршу гунагьвал апІураш, мапІан йип дугъаз, ва эгер тахсир гардандиъ гъибисиш, дугълан хил алдабгъ. 4 Сад йигъан увуз къаршу вуди ургуб ражари гунагь ляхин дапІну, ва ургубан швумал вуза гъапиш, дугълан хил алдабгъ. 5 Ученикари Исайиз кІуру: – Ич хъугърувал артухъ апІина, Агъа! 6 Агъайи дурариз кІуру: – Эгер учвуъ бицІи дилсибкьан хъугъувал аш ва учву инжирин гьариз: «КудубчІвну гьюлиъ убс» гъапнийиш, думу учвухъ хъпехъидийи. 7 Чаз хутІил хъапІру вая маларихъ гъягъру лукІ ади, думу чюлиан гъафиган, дугъаз: «Гьяракат апІин, суфрайихъ деъ» шли кІуру? 8 Дугъаз аьксина вуди: «Узуз хябяхъдин хураг гьязур апІин ва, юкьв’ан идибтІну, узу ипІури ва убхъури имиди, узуз гъуллугъ апІин, хъасин уву ипІин ва убхъ», пидаринхъа? 9 Му лукІру чан буйругъ тамам гъапІну пну, дугъаз аферин пидинхъа? Пидар пну, фикир апІураза. 10 Гьаци учвура, учвуз буйругъ дапІнайи ляхнар тамам гъапІиган, йипай: «Учу фтинкІа ккадру лукІар вуча, гьаз гъапиш учу буржлу вуйиб гъапІунча». 11 Ерусалимдиз гъюрайи Иса Самария уьлкейинна Галилей уьлкейин арайиъ айи 12 саб гъулаъ учІврайиган, Дугъаз цІиб ярхласи дийигъну, хамран аьзар кайи йицІур кас алахъуру. 13 Дурари аьхю сесниинди кІуру: – Я Мялим Иса! Ич язухъ апІинава! 14 Дурар дяркъну, Исайи дурариз кІуру: – Душну учву маллйириз улупай. Дурар, гъягъюри имиди, уьзрихьан марцц шулу. 15 Дурарикан сар, учв сагъ гъашиб дябкъну, Аллагьдин ад за апІури, кьяляхъ хътакуру 16 ва, Исайин ликарикк дахъну, дугъу Исайиз чухсагъул кІуру. Му Самария уьлкейин агьали вуйи. 17 Гьадмуган Исайи гьерхру: – Учву йицІридра сагъ гъахьундайинхъа? Имбуну урчІвур нашди? 18 Дурарра гьаз, сар гъураба самариялу ктарди, Аллагьдиз чухсагъул пуз кьяляхъ хътакундар? 19 Хъа мугъаз гъапи: – Гъудужвну гъарах, яв хъугъували уву гъюрхну. 20 Фарисйири, Аллагьдин Паччагьлугъ фила улубкьиди, кІури, гьерхиган, Исайи дурариз жаваб тувру: – Аллагьдин Паччагьлугъ рябкъруси гъибдар. 21 Ва сарира пидарки: «думу дуфну магьа гьамшваъ а», вая «магьа гьатшваъ а», фицики Аллагьдин Паччагьлугъ ичв арайиъ а. 22 Гьацира Исайи ученикаризра кІуру: – Гьацдар йигъар гъидики, сад йигъанкьан Инсаниятдин Бай учуз рякъюз ккунийкІан пидичва, амма рякъидарчвуз. 23 Ва учвуз «гьатмагьа гьатушвахь», вая «магьа, гьамушвахь хьа» гъапишра, мягъянай ва мехъерганай: 24 фицики кьюркьлин цІаси, завун саб кІулихъ крибчубди фици завун тмуну кІулиз нур тувруш, гьаци хьиди Инсаниятдин Байра Чан йигъан. 25 Хъа гъи Думу гизаф аьзабар ккюргъбакк ва гьамусдин наслари нигь апІбакк ккуркьди. 26 Нюгьдин йигъари фици гъабхьнуш, Инсаниятдин Балин вахтарира гьаци хьибди: 27 Нюгь гимийиъ эу йигъ’ина гъяйиз, вари халкь ипІури-убхъури, швушвар хури, швуваз гъягъюри гъахьну, хъа вари дюн’яйиин шид улубчІвиган, дурар вари пуч шулу. 28 Лутдин вахтарира гьаци гъабхьнийи: вари халкь, гъайгъусузди, ипІури-убхъури, ариш-вериш апІури, тум убзури, хулар тикмиш апІури гъахьну; 29 хъа Лут Содомдиан удучІву йигъан завариан цІинна гугуртин мархь гъубгънийи ва вари тІанкь гъапІнийи. 30 Инсаниятдин Бай гъафи йигъанра гьаци хьибди. 31 Думу йигъан фуж гъваин алди гъашиш, хъа мутму – хулаъ, дурар гъадагъуз хулаз дурушри, фуж хутІлиъ ади гъашиш, думура дурушри. 32 Лутдин хпир кІваин апІинай. 33 Фуж чан уьмур уьбхюз хъюгъиш, думу дугъу пуч апІиди, хъа шли думу пуч гъапІиш, гьадгъу думу чІиви апІиди. 34 КІуразачвуз: думу йишван саб аьхникк кьюр хьиди, дурарикан сар гъадагъиди, хъа тмунур гъитди. 35 Кьюр хпир ахларихъ хъаш, дурарикан сар гъадагъиди, тмунур гъитди. 37 Хъа гьадмуган ученикари Исайихьан гьерхру: – Мици наан хьибди, Агъа? Дугъу дурариз гъапи: – Майит наан аш, гьадина люкьярра уч хьиди.

Лука 18

1 Хъасин Исайи ученикариз, чпи гьарган ккарагури ва юкІв дар дарапІди духьну ккун кІури, дурариз саб тахалус ктибтуру: 2 – Саб шагьриъ Аллагьдихьан гучІ ва инсанарихьан нач адру диванбеги ади гъахьну. 3 Гьадму шагьриъ сар ачІни дишагьли ади ва дугъу, диванбегийихьна гъюри, учв душмнихьан уьрх, кІури гъахьну. 4 Амма диванбегийи хайлин вахтна дугъаз иб дириври гъахьну. Хъа аьхирки дугъу чав-чакди кІуру: узуз я Аллагьдихьан гучІударшра, я адмийирихьан нач кадаршра, 5 гьаму ачІни дишагьлийи узу сикинди гъидритди хьпаз лигну, гьарган гъюри, узу инжик дарапІбан бадали, думу уьрхидиза. 6 Агъайи хъа кІуру: – Ебхьуранчвуз, гьякьсуз диванбегийи фу кІураш? 7 Аллагьди уьрхидаринхъа, Чаз йигъ-йишвди ккарагурайи, Чав ктагъдар, гьеле дурар уьрхюз кьан апІурушра? 8 КІуразачвузки, Дугъу дишлади дурар уьрхюз кюмек тувди. Амма Инсаниятдин Бализ, жил’ина гъафиган, хъугъувал бихъуйкІан яраб? 9 Исайи гьацира чпин дугъривалиин шак алдарди, имбудар асккан апІурайидаризра гьамциб тахалус хуру: 10 – Кьюр кас Аллагьдин хулаъ ккарагуз учІвну: сар – фарисей, тмунурра – налукар гъадагърур. 11 Фарисейи, ккарагруган, чакна гьамци кІуру: «Я Аллагь! Увуз чухсагъул кІураза, узу миди вуйи пис инсанарсир, тІарашчйирсир, алдатмиш апІрударсир, кьяппйирсир вая гьаму налукар уч апІрурсир дарапІбаз. 12 Гьяфтайиъ кьюб ражари ушв бисури шулза, вари гъазанмиш гъапІубдин йицІубпи пай тувраза». 13 Налукар гъадагърурихьан, ярхласи дийигъну, завузди улар за апІузкьана гъабхундайи, хъа чан мухур убччвури, кІури гъахьну: «Я Аллагь! Язухъ апІина йиз, гунагькрин!» 14 КІуразачвуз, думу чан хулаз фарисейтІан артухъди марцц духьну гъушну, фицики чав учв заан апІурайи гьарсар кас асккан апІиди ва чав учв аскканди дисурайир заан хьиди. 15 Исайихьна, дурарилан хил алдатри кІури, набалугъ бицІидарра хури шуйи; ученикари, кІуруш, му гъябкъиган, гъадагъа апІуру. 16 Хъа Исайи, бицІидариз чахьна дих дапІну, кІуру: – БицІидар узухьна гъюз гъитай, гъадагъа мапІанай, Аллагьдин Паччагьлугъ гьацдаринуб ву. 17 Гьякь кІуразачвуз, Аллагьдин Паччагьлугъ бицІириси кьабул дарапІур дидиъ учІвидар. 18 Гьюкумдрарикан сари Исайихьан гьерхру: – Я гъяни Мялим! КкудудубкІру уьмур рубкьбан бадали, узу фу дапІну ккунду? 19 Исайи дугъаз гъапи: – Гьаз Узуз гъянир кІурава? Сар Аллагьдилан гъайри саркьан гъянир дар. 20 Хъа гьамцдар Аллагьдин табшуругъар аьгъявузки: «кьяппавал мапІан», «адми миликІан», «мигьитІибкІан», «кучІлин шагьидвал мапІан», «адашдизна дадайиз гьюрмат апІин». 21 Дугъу жаваб туву: – Вари гьамрар йиз жигьил вахтарихъанмина тамам апІураза. 22 Гьаму деебхьну, Исайи дугъаз гъапи: – Сабсан увуз гьубкІрадар: увуз айи-адру девлет масу тувну, касибариз пай апІин, гьадмуган аьршариъ увуз девлет хьибдивуз. Хъасин Узухъди гъач. 23 Му гафар гъеерхьиган, му кас пашман шулу, гьаз гъапиш думу гизаф девлетлу вуйи. 24 Дугъан пашманвал гъябкъю Исайи кІуру: – Девлетлуйириз фукьан читин дарин Аллагьдин Паччагьлугъдиъ учІвуз! 25 Девлетлуйиз Аьршарин Паччагьлугъдиъ учІвубтІан, девейиз рубдин гъюн’ан удубчІвуб рягьят ву. 26 Му гафар гъеерхьдари гьерхру: – Шилхьан учв уьрхюз хьиди? 27 Исайи кІуру: – Инсанарихьан даршлуб Аллагьдихьан шулу. 28 Петри Дугъаз кІуруки: – Магьа учу, вари учуз айиб гъибтну, Увухъди хъачаки. 29 Исайи дурариз кІуру: – Дугъриди кІуразачвуз: Аллагьдин Паччагьлугъ бадали чан хал вая шив, ваяки чвйирна чйир, ясана абйир-бабар ва веледар дирчну, фуж Узухъди гъафиш, 30 гьадгъаз му вахтари мурартІан швнубсабан артухъ хьибди ва гъюзимбу вахтарира ккудудубкІру уьмур хьибди. 31 Хъа йицІикьюр Чан ученикар гъирагъдиз гьадаъну, дурариз кІуру: – Магьа ухьу Ерусалимдиз гъягъюрахьа ва Инсаниятдин Балкан пайгъамбрарилантина дибикІнайиб вари тамам хьибди: 32 «Ав, Думу аллагьсузарин хилиз тувди, Дугъ’ина аьрвалар хиди, Думу алчагъ апІиди, Дугъ’ин тутйир алатІиди. 33 Думу гъирмажарихьди урччвиди ва, аьхирки, йикІиди, хъа шубудпи йигъан Думу чІиви хьиди». 34 Амма ученикар фтинкІа гъаври ахъундайи; му гафарин сир дурарихьна гъурубкьундайи ва дурарихьан Исайи гъапиб аннамиш апІуз шуладайи. 35 Иса Ерихон шагьрихьна гъюрайиган, сар кур кас, садакьа ккун апІури, рякъюхъ деънайи. 36 Дугъу, чан гъвалхъантина халкь гъягъюрайиб деебхьну, гьерхру: – Му фу хабар ву? 37 Дугъаз: «Назаретдиан вуйи Иса гъюра», – гъапнийи. 38 Гьадмуган дугъу чІигъ апІуру: – Я Давудгъярин Бай Иса! Йиз язухъ апІина! 39 Улихьди гъягъюрайидари куриз ккебехъ кІуйи, амма дугъу айибтІан артухъ чІигъ гъапІу: – Давудгъярин Бай! Йиз язухъ апІин! 40 Исайи, хъугъужвну, думу Чахьна хуз амур апІуру. Ва думу гъафиган, дугъхьан гьерхру: 41 – Узкан фу ккундувуз? Дугъу кІуру: – Агъа! Узуз рябкъюз ккундузуз. 42 Исайи дугъаз гъапи: «Рябкъ! Яв хъугъвали уву гъюрхну». 43 Дугъаз дишлади рябкъюри шулу, ва думу, Аллагьдин ад за апІури, Исайихъди гъушу. Вари халкьди, му дябкъну, Аллагьдин тяриф апІури гъаши.

Лука 19

1 Хъасин Иса, Ерихондиъ учІвну, шагьриантина гъягъюри гъахьну. 2 Душваъ налук гъюдюбхрударин аьхюр вуйи Заккай кІуру сар девлетлу кас айи. 3 Дугъаз Иса рякъюз ва фицир вуш лигуз ккун гъабхьи, амма халкьдигъян рякъюз шуладайи, фицики Заккай жандкин исчІлир вуйи. 4 Хъа улихьинди жаргъну, Иса рякъбан бадали, Заккай инжирин гьаригъ гъючІвру, гьаз гъапиш Иса гьадушвхьантина душну ккунди айи. 5 Исайиз, душвахьна гъафиган, Заккай рякъюру ва кІуру: – Заккай! Чикиди гъюдучІв, фицики гъи Узу яв хулаъ хялижв духьну ккунду. 6 Дугъу, дишлади гъюдучІвну, Иса чан хулаъ шадвалиинди кьабул апІуру. 7 Му гъябкъю халкьдик гъал кабхъру ва, Иса гунагькар касдихь дергну кІури, наразиди улхури гъахьну. 8 Заккайи Агъайиз кІуруки: – Агъа! Йиз девлетнан гьацІ узу касибариз тувдиза ва, эгер узу шлихьан артухъ гъадабгънуш, юкьуб ражари артухъ тувдиза. 9 Исайи дугъаз гъапи: – Гъи му хулазра уьрхювал гъафну, фицики мура Ибрагьимдин насликан ву. 10 Инсаниятдин Бай пуч шулайидар агуз ва ккадагъуз дуфнайир ву. 11 Гьамдихъ хъпехъурайидариз Исайи сабсана тахалус ктибтуру, фицики, Думу Ерусалимдиз багахь духьнайиган, гизафдари, лап багарихьди Аллагьдин Паччагьлугъ улубкьиди пну, фикир апІурайи. 12 Гьаци вуйиган Исайи кІуру: – Заан тухмиан вуйи сар кас, учв паччагьвализ тяйин апІбан кьяляхъ хътакуз кІури, ярхла уьлкейиз гъягъюру. 13 Рякъюъ учІвайиз, дугъу чан йицІур гъуллугъчийиз дих дапІну, гьардихьна йицІуб гъизилин манат тувру ва кІуру: «Узу хътакайиз, му пул ляхник кипай». 14 Хъа му юрднан агьалйириз думу ккунир дайи, ва дугъан кьяляхъди учв гъягърушваз адмийир гьаъру: «Дугъу ич паччагьвал дапІну ккундарчуз» пуз. 15 Мидизра дилигди, паччагьди тяйин дапІну хътакиган, чав пул туву гъуллугъчйириз, шли фу гъазанмиш гъапІнуш аьгъю апІбахъди, чахьна дих апІуру. 16 Сарпири дуфну кІуру: – Агъа, яв саб гъизилин манатди йицІуб гъизилин манат гъазанж гъабхну. 17 Агъайи дугъаз гъапну: – Аферин увуз, ужур гъуллугъчи! Уву бицІи ляхниъ дугъри хьувализ яв хилиз йицІуб шагьур гъадагъ. 18 Кьюрпири дуфну кІуру: – Агъа, яв саб гъизилин пули хьуб гъизилин манат гъазанж гъабхну. 19 Мугъазра кІуру: – Увухьнара идара апІуз хьуб шагьур тувраза. 20 Шубурпири дуфну кІуру: – Агъа, магьа яв гъизилин манат: ягълухъигъ гъивну гъюбхюнза. 21 Фицики узуз увхьан гучІ гъабхьнийзуз, гьаз гъапиш уву инсафсуз адми вува: жвуву дидривуб гъадабгърур ва жвуву дурубзуб ккадабцІрур. 22 Паччагьди дугъаз гъапну: – Узу яв гафариинди яв диван апІидиза, аьмалдар лукІ! Увуз узу инсафсуз адми вуйиб, жвуву дидривуб гъадабгърур ва жвуву дурубзуб ккадабцІрур вуйиб аьгъяди, 23 уву йиз пул, узуз гъазанж гъюруганси, гьаз ишлетмиш гъапІундарва? 24 Ва чан улихь дийигънайидариз кІуру: – Дугъахь хьайи пул дибисну, йицІуб гъизилин пул хьайириз тувай. 25 Хъа дурари паччагьдиз кІуру: – Я агъа, дугъахь йицІуб гъизилин манат гьацира хьа. 26 – КІуразачвуз, гьарсар айириз хъана тувну хьибди, хъа адрурихьан айибра тадабгъиди. 27 Хъа узу чпин паччагь духьну даккни, йиз душмнар гьамина аькъинай ва йиз улихь урччвай. 28 Гьамци дупну, рякъ давам апІури, Иса Ерусалимдиз багахь шулайи. 29 Елион дагъдихь, Вифагия ва Вифания гъуларихьна багахь шулайиган, Дугъу Чан кьюр ученик, гьамци дупну, дина гьаъру: 30 – Гьатму гъаншариъ айи гъулаз гъарахай, душваъ учІвиган, мегьел сар каскьан элелеу, дибтІнайи гъудугъ бихъидичвуз. Думу тудубчну гьамина аьбкъинай. 31 Нагагь шликІа: «Му гьаз тудубчурачва?» пну, гьерхиш, дугъаз гьамци йипай: «Думу Агъайиз бакарди ву». 32 Гьаъдар гъушу ва, Исайи гъаписи, дурариз гъудугъ бихъуру. 33 Дурари гъудугъ тудубчурайиган, дидин эйсийи дурарихьан гьерхру: – Гъудугъ гьаз тудубчурачва? 34 Дурари жаваб тувру: – Думу Агъайиз бакарди ву. 35 Думу Исайихьна хуру. Даждиин чпин палтар илирчну, хъасин Иса дид’ин илитуру. 36 Иса гъягъруган, халкьди рякъюкк чпин палтар ккирчуйи. 37 Хъа Думу Елион дагъдин канчІлихъна гъурукьиган, вари Дугъан ученикари шадвалиан, чпиз гъяркъю вари аьламатарин сагълугънаан, зарб сесниинди Аллагьдин тяриф апІуз хъюгъру: 38 – Агъайин ччвурнахъди гъюрайи Паччагьдиз уж’вал ишри! Завариин мясляаьт, аьршариъ ад ибшри! 39 Халкьдин арайигъян бязи фарисйири Исайиз кІуру: – Мялим! Яв ученикариз гъадагъа апІин. 40 Хъа Дугъу дурариз жаваб вуди кІуру: – КІуразачвузки, нагагь дурар ккебехъиш, гъванар улхиди. 41 Хъа Ерусалимдиз багахь гъашиган, дидиз лигури, Иса гъишу. 42 Хъа кІуру: – Хуб ужу шлийи, эгер увуз мясляаьт шли хураш, гьамус аьгъю гъабхьнийиш! Амма му яв уларихьан гьамусяаьт гьебкна. 43 Ув’ин гьацдар йигъар улуркьидики, яв душмнари увлан барйир илтІикІиди, кьялаъ тІапІди ва варишварихъанди ув’ина гьюжум апІиди. 44 Ва яв веледарихъди уву ккидипиди, яв гъван гъвандиин гъибтидар, фицики увухьна Аллагь гъафи йигъ аьгъю гъабхьундарвуз. 45 Хъасин Аллагьдин хулаъ учІвну, Дугъу душваъ шей’ар масу туврайидарна гъадагъурайидар, гьамци кІури, утІурккуру: 46 – Гирами китабариъ дибикІна: «Йиз хал ккарагру хал хьибди», хъа учву дидкан тІарашчйирин мугъара дапІначва. 47 Хъа гьаддихъантина Исайи Аллагьдин хулаъ гьар йигъан аьгъювалар улупури гъахьну. Жугьдарин аьхюну маллйирина, аьлимарина халкьдин улихь хьайидари Думу йикІуз чара абгури шулу. 48 Хъа бихъури гъабхундар, гьаз гъапиш халкь, Дугъхьан гьудудучІври, Дугъахъ хъпехъури шуйи.

Лука 20

1 Гьадму сад йигъан, Исайи Аллагьдин хулан гьяятдиъ Ужувлан хабарнакан аьгъювалар улупурайи вахтна, агъсакъларра хъади Дугъахьна жугьдарин аьхюну маллйирна аьлимар дуфну, 2 Дугъаз кІуру: – Учуз, Уву му ляхнар фициб гьюкмиинди апІураш, Увуз мициб гьюкум шли тувнаш, йип. 3 Исайи дурариз жаваб вуди кІуру: – Узура учвуз саб суал тувдиза, йипай Узуз: 4 Ягь’яйин штуан апІувал аьршариан вуйин, даршиш инсанарихьан? 5 Дурари, фикрарикк ккахъну, чиб-чпикди гьамци пуз хъюгъру: – Эгер ухьу «аьршариан» гъапиш, Дугъу пиди: «Учву дугъахъ гьаз хъугъундарчва?» 6 Хъа эгер «инсанарихьан» гъапиш, гьадмуган вари халкьди ухь’ина гъван уьлюбхиди, гьаз гъапиш халкь, Ягь’я пайгъамбар ву кІури, хъугъна. 7 Гьаддиз дурари: «Наънан вуш аьгъдарчуз» гъапнийи. 8 Исайи дураризра гъапи: – Узура пидарзачвуз, фициб гьюкмиинди му апІураш. 9 Хъасин халкьдихьинди илдицну, Дугъу гьамциб тахалус ктибтуру: – Сар касди тІумтІин багъ ибтру, ва тІумутІчйирихьна арендайиз тувру ва учв хайлин вахтназ удучІвну гъягъюру. 10 Вахт гъабхьиган, дугъу тІумутІчйирихьна чан пай тІумтІар хуз лукІ гьаъру, амма дурари лукІ дурччвну, фукІара тутрувди утІуккуру. 11 Хъана жара лукІ гьаъру, ва думура дурччвну, сюгмиш дапІну, фукІа хьтарди хътауру. 12 Хъана шубурпирра гьаъру, дурари думура дурччвну, зийнар дапІну, хътІурккуру. 13 Гьадмуган тІумтІин багъдин эйсийи гъапну: «Узу гьапІну ккунду? Йиз масан бай гьаъдиза, белки, думу дяркъну, дурариз нач шул». 14 Хъа думу гъяркъиган, тІумутІчйири чпин арайиъ гьамци фикир апІуру: «Му эйсийин ирсчи ву, гъачай думу йивну йикІухьа, ирс ухьуз гъубзди». 15 Думу, багъдиан адаъну, йикІуру. Багъдин эйсийи дурарикан гьапІди? 16 Учв дуфну, му тІумутІчйир йихиди ва багъ жарадарихьна тувди. Му гъеебхьдари кІуруки: – Дициб ляхин саб вахтнара дарибшри! 17 Хъа Исайи, дурарилан ул илбицну, гьерху: – Хъа му дибикІнайибдин мяна фу ву: «Устйири гатІабхьу гъван мурччвануб гъабхьну?» 18 Гьадму гъвандиина ахъу гьарсар парчйир хьиди, хъа думу гъван шил’ина абхъиш, чархьиди. 19 Жугьдарин аьхюну маллйирна аьлимар Исайи ктибту тахалус чпикан вуйибдин гъаври ахъру. Дурари гьадмуган, Иса йикІбан бадали, саб багьна абгури гъахьну, хъа халкьдихьан гучІуйи. 20 Хъасин Дугъ’ин ул алди гъитру, Дугъахъ футнакрар хъитру. Дурари, чпи зиълан дугъриди улупури, Дугъу гъапи гафарикан багьна дапІну, хъасин Иса гьюкумдарин хилиз тувбан бадали, чарйир агуз хъюгъру. 21 Сабан дурари Исайихьан гьерхру: – Мялим! Учуз Уву гьякь кІурайиб ва аьгъювалар улупурайиб, гьич сарин машназ дилигди инсанар Аллагьдин дугъри рякъюъ тІаърайиб аьгъячуз. 22 Учуз йип: Учу Римдин паччагьдиз налук тувуз хай шулин, дарш шулдарин? 23 Исайи дурарин аьмалдарвалин гъаври ахъну, гъапи: 24 – Узуз пул улупай: мидик шлин шикилна ччвур ка? Дурари: «Рим паччагьдин» – пну, жаваб тувру. 25 Дугъу дурариз кІуру: – Гьаци вуйиган, паччагьдинуб паччагьдиз, хъа Аллагьдинуб Аллагьдиз тувай. 26 Гьамци халкьдин улихь, Исайин гафариъ гьякьсузвал абгуз даршиди, Дугъан жавабниин мюгьтал духьну, дурар ккебехъу. 27 Гьадму вахтна гъачІидар чІиви шлуб дар кІурайи саддукйирикан сакьюдари дуфну гьерхру: 28 – Мялим! Мусайи учуз, эгер хпир айи чве веледар даршиди гъачІиш, гьадгъан хпир тмуну чвуччву гъадагъну, чан чвуччвун тум арайиз дубхьну ккунду, кІури дибикІна. 29 Ургур чве гъахьну: сарпир, хпир духну, велед даршиди гъакІну. 30 Гьадму хпир кьюрпи чвуччву чаз дитну, хъа гьадмура велед даршиди гъакІну. 31 Думу хпир шубурпири, хъасин – вари ургрид чвйирира чпиз дитри, велед даршиди, вари чвйир гъийихну. 32 Аьхирки гьадму дишагьлира гъакІну. 33 Гьаци вуйиган, гъиямат йигъан вари чІиви шлуган, думу шлин хпир хьиди? Ургрид чвйиризра думу швуваз гъушнийи аьхир! 34 Исайи дурариз жаваб вуди гъапи: – Гьамус яшамиш шулайи гьаму аьсрин веледари швушвар хура ва швуваз гъягъюра. 35 Хъа ккудудубкІру уьмриз гъачІихъан чІиви хьуз лайикь вуйидари душваъ я швушвар хурдар, я швуваз гъягъюрдар. 36 Дурарихьан сарун йикІузра хьидар, фицики дурар малайикарси ву. Хъа дурар чІиви хьувалиинди Аллагьдин веледар ву. 37 Хъа гъийихдар чІиви хьуб дугъридан гьякь вуйивал Мусайира улупураки: учв зазран рукнахь хьайиган Агъайиз «Ибрагьимдин Аллагь, Исакьдин Аллагь ва Якьубдин Аллагь» гъапнийики. 38 Аллагь дийихнайидарин ваъ, хъа чІивидарин Аллагь ву, фицики дугъандар вари чІивидар ву. 39 Мидиз аьлимарикан бязидари гъапну: – Мялим! Уву дурариз ужуди гъапунва. 40 Сарун сарира Исайихьан гьич сабдиканра гьерхуз кІубанвал гъапІундар. 41 Хъа Исайи дурариз кІуру: – Гьаз Месигь Давудгъярин Бай ву кІура? 42 Чав Давудри Мяълийирин китабдиъ кІура: «Аллагьди йиз Агъайиз гъапну: Узу Яв душмнар, духну, Яв ликарикк дахьайизкьан, Йиз арччул гъвалахъ деъ». 44 Давудри Дугъаз Агъа кІура, гьаци вуйиган Думу дугъан Бай фици хьидихъа? 45 Вари халкь хъпехъурайиган, Исайи Чан ученикариз кІуру: 46 – Ярхи палтар алди лицру къанунчйирихьан ихтият йихьай. Дурариз чпин тяриф апІури, халкьар уч шлушвариъ чпи тебрик апІури ккунду, мистариъ ва ипІру-убхърушвариъ варитІан гьюрматлу йишвариин деуз ккунидар ву. Дурари ачІни хпарин хулар тадагъну хътитІуру, кьюб маш гъяди гъудгнар апІуру. Дурариз варитІан яман жаза хьибди.

Лука 21

1 Кьяляхъ илдициган, Исайиз Аллагьдин хулан хазнайиъ садакьйир иврайи девлетлуйир рякъюру. 2 Дугъаз гьацира кьюб шигьи дирчу сар касиб ачІни хпирра рякъюру. 3 Гьадмуган Исайи кІуру: – Гьякьди кІуразачвуз, гьаму ачІни дишагьлийи вардаритІан гизаф дивну, 4 Фицики миди вуйидари садакьйир уьлдюгънайивалиан артухъ вуйибдикан дивну, хъа дугъу чан касибвалиан чаз айи-адруб вари дивну. 5 Ученикарикан сакьюдари: «Аллагьдин хал фукьан уччву гъванарихьди ва багъишарихьди фукьан ужуди дабалгнадаринхъа!» гъапиган, Исайи гьамци кІуру: 6 – Гьацдар йигъар гъидики, учвуз рябкъюрайишваъ гъван гъвандиин гъубзидар, вари даргъиди. 7 Хъа Дугъхьан гьерхру: – Я Мялим! Дици фила хьибди? Мици шлу вахт фициб лишниинди аьгъю хьибди? 8 Исайи гъапи: – Учву алдатмиш апІуз мигъитанай, фицики гизафдар Йиз ччвурнаккди, «Месигь вуза» кІури, вая «Месигь гъюру вахт улубкьна» кІури, гъиди. Вара-вара дурарихъди мягъянай. 9 Учвуз дявйириканна гъалабулугъарикан гъеебхьиган, гучІ мапІанай, фицики дурар вари улихь хьуз ккайи ляхнар ву, хъа му сабан аьхир дар. 10 Хъана Исайи ученикариз гъапи: – Халкь халкьдиин ва паччагьлугъ паччагьлугъдиин алархьиди. 11 Жюрбежюр йишвариъ зурбади жилар тІурччвиди, гаш’вал ва уьзрар ахьди, завариан гучІ шлу гьядисйир хьиди ва зурба аьламатнан лишнар гъиди. 12 Вари гьамрар хьайиз, учву дисбан бадали, ичв кьяляхъ хъергди. Узу себеб духьну, мажлисариъ ичв диван апІиди, учву дустгъариъ итди, паччгьаринна гьюкумдрарин улихь учвухь жаваб тувуз гъитди. 13 Учву Йиз шагьидар хьидичва. 14 Гьаци вуйиган, Узхъанди учву фициб жаваб тувруш, дидкан улихьмиди фикир мапІанай, 15 фицики учвуз къаршу дийигъуз вая учву батІул апІуз гьич сарихьанра даршлуси гафар ва акьюллувал Узу тувдизачвуз. 16 Гьацира абйир-бабари, чвйирина мирасари ва дустари учву масу тувди, учвкан саспидар йивну йихиди. 17 Йиз ученикар хьпаз лигну, учву варидариз даккун хьиди. 18 Хъа ичв кІуллан гьич саб чІаркьан алдабхъидар. 19 Ичв сабур апІувалиинди ичв рюгь-юкІв уьрхидичва. 20 Ерусалим кьушмари кьялаъ тІапІну гъябкъиган, аьгъю йибхьайки, думу ккадабхъуз багахь дубхьна. 21 Гьадмуган Ягьудия уьлкейиъ айидар дагълариз гьергри, фуж шагьриъ ади гъашиш, дид’ан удучІври, хъа фуж шагьрин аьтрафарихъ хъади гъашиш, дидиъ удручІври. 22 Гьаз гъапиш му йигъар жаза гьадабтІру йигъар хьиди ва вари дибикІнайиб гьадмуган тамам хьибди. 23 Гъагъдиъ айидаринна нанайихъ бицІидар хъайидарин гьадму йигъари гьял пис хьибди! Аллагьдин хъял гьаму халкьдиин алабхъиди. 24 Гизафдар ханжлин мурзнахьан йихиди ва гизафдар жара халкьарин йисирвалиъ хьиди. Хъа Ерусалим жара халкьари, чпин деврар ккудукІайиз, ликриккан апІури хьибди. 25 Хъа ригъдиин, вазлиин ва хядариин аьламатнан лишнар хьиди. Жилиин гьюлерин сесерихьан ва ирикьуваларихьан халкьариз аьжузвал ва гъалабулугъ хьибди. 26 Инсанар гучІбаан ва дюн’яйиина гъюз ккайи бедбахтвалариз ккилигувалиан зяйиф хьиди, гьаз гъапиш завар ккадаршвиди. 27 Хъа гьадмуган дурариз кьувват ва зурба гьяйбат хъади дифриинди гъюрайи Инсаниятдин Бай рякъиди. 28 Гьамрар вари кІулиз удучІвуз хъюгъиган, гучІ мапІанай ва ичв кІулар за апІинай, фицики гьадмуган учву азад апІру вахт хъубкьра. 29 Хъасин Исайи дурариз тахалус ктибтуру: – Инжирин ва миди вуйи вари гьарариз лигай: 30 дурари кІаж адабшвурайиган, учвуз, му дябкъну, хьад багахь шулайиб аьгъю шулучвуз. 31 Гьаци учвузра, гьамрар гъяркъган, Аллагьдин Паччагьлугъ багахь дубхьнайивал аьгъю апІинай. 32 Гьякь кІуразачвуз: му вари улубкьайиз гьамусдин насил гъубзди. 33 Заварна жилар ккадахьиди, хъа Йиз гафар дургидар. 34 Учв’ин гьадму йигъ хабарсузди улулубкьбан бадали, убхъбиинди, ичкивалиинди ва яшайишдин гъайгъушнариинди ичв юкІвар тямягьвалиъ адрахьбаз ихтият йихьай, 35 фицики му жилиин яшамиш шулайи вардариин якьинди улубкьиди. 36 Гьаци вуйиган гьарсаб вахтна уягъди гъузай, гъюзимбу вари завалариккан ккадархьруси, ккарагури йихьай ва Инсаниятдин Балин улихь дийигъуз шлуганси гъузай. 37 Йигъар Исайи Аллагьдин хулаъ аьгъювалар улупури, хъа йишвар, кІуруш, дилин удучІвури, Елион дагъдиин адауйи. 38 Вари халкь гвачІнин Аллагьдин хулаз Исайихъ хъпехъуз гъюри гъахьну.

Лука 22

1 ЛичІван лавшар итІру Пасха кІуру машквар багахь шулайи. 2 Аьхю маллйирина къанунчйири Иса йикІуз чарйир агурайи, аммаки дурариз халкьдихьан гучІурайи. 3 Хъа Исайин йицІикьюр ученикдикан сариъ, Искариот лакІам хъайи Ягьудайиъ, иблис убчІвру. 4 Думу аьхю маллйирихьна ва гъаравларин аьхюдарихьна, Иса фици дурарин хилиз тувруш, йикьрар апІуз гъягъюру. 5 Дурар, шад духьну, дугъаз пул тувуз рази шулу. 6 Ягьудайи гаф тувру: халкь алдру йишваъ Иса дурарин хилиз тувуз гъулай вахт абгури шулу. 7 Лавшарин йигъ улубкьуру, ва гьадмуган Пасхайин ччил, гъурбан дапІну, дубккну ккундийи. 8 Исайи Петрна Югьан: «Душну ухьуз пасхайин хураг гьязур апІинай», – дупну, гьаъру. 9 Дурари Дугъхьан гьерхру: – Учу наан гьязур дапІну ккундувуз? 10 Дугъу дурариз кІуру: – Учву шагьриъ учІвиган, шид айи гажин гъабхурайи сар кас гьахъдичвуз. Гьадгъан кьяляхъди душну, гьадму учІву хулаъ учІвай, 11 ва хулан эйсийиз йипай: «Мялимди гьерхра: „Узу ученикарихъди пасхайин хураг ипІру хал набши?“» 12 Дугъу, учвуз ккабалгнайи заан аьхю хал улупиди; хураг гьадушваъ гьязур апІинай. 13 Дурар гъушу, ва чпиз гъаписи дибихъну, пасхайин хураг гьязур гъапІу. 14 Хъа вахт гъабшиган, Чан вакиларра хъади, Иса, гъюн йивну, суфрайихъ деънийи. 15 Исайи дурариз кІуру: – Узу аьзабнакк ккуркьайиз, учвухъди гьаму пасхайин хураг ипІуз гизаф юкІв хъайиз. 16 КІуразачвузки, сарун му пасхайин хураг, Аллагьдин Паччагьлугъдиъ гьязур дархьикьан гагьди, ипІидарза. 17 Зах гъадабгъну, Аллагьдиз чухсагъул дупну, Исайи кІуру: – Гьаму бисай ва ичв арайиъ пай апІинай, 18 кІуразачвуз: Узу сарун тІумтІарин му чяхир убхъидарза. Узу цІийи чяхир Аллагьдин Паччагьлугъдиъ убхъидиза. 19 Хъасин уьл гъадабгъну, Аллагьдиз чухсагъул дупну, думу гьудубтІуру ва, дурарихьна тувну, кІуру: – Му учвхъанди туврайи Йиз жан ву. Узу кІваин алаури, гьамци апІинай. 20 Ари гьамци, хябяхъдин хураг ипІбахъан, Исайи хъанара, зах дибисну, кІуру: – Му зах учвхъанди удубзурайи Йиз ифдиинди йитІурайи цІийи йикьрар вуйиз. 21 Хъа магьа Узу масу тувуз ккайир Узухъди саб суфрайихъ деъна. 22 Инсаниятдин Бай Чаз улупнайиганси гъягъюра, вушра Думу масу туврайи касдин гьял пис хьибди! 23 Ученикари чиб-чпихьан, гьамци апІуз ккайир ухькан фуж ву, кІури, гьерхру. 24 Дурарин арайиъ, чпикан фуж аьхюр вуш, гьюжатра абхънийи. 25 Исайи дурариз гъапи: – Паччгьари чпин халкьариин агъавал апІура, хъа халкьди, чпи хилиъ дючІюркьнайидариз: «халкьдиз уж’вал апІрудар» кІура. 26 Учву дицдар дарчва: учвкан фуж аьхюр вуш, варитІан бицІи гъуллугъчиси йихь ва, гьюкумдарвал апІрур гъаравашси йихь. 27 Фицики, фуж зиина ву: суфрайихъ гъюн йивну дахънайир, дарш дугъаз гъуллугъ апІурайир? Суфрайихъ дахънайир зиина даринхъа? Хъа Узу ичв арайиъ суфрайихъ гъуллугъ апІурайирси аза. 28 Учву гьарган Йиз вари дарвалариъ Узухъди гъахьунчва. 29 Узуз Йиз Адашди Паччагьвал фици табшурмиш гьапІнуш, гьаци Узура учвуз Паччагьвал табшурмиш апІураза. 30 Йиз Паччагьлугъдиъ Йиз суфрайихъ ипІури-убхъидичва ва, тахтниин деъну, Израилин йицІикьюб тухмин суд апІидичва. 31 Симон, я Симон! Магьа иблисдиз учву, сифккан дапІнайи дяхинна харукси, ужур-харжир жара дапІну ккунди а. 32 Хъа Узу, яв хъугъвал дурубгри пну, ккарагунза. Узухьна хътакиган, уву яв чвйирин хъугъувал мюгькам апІин. 33 Дугъу Исайиз жаваб туву: – Я Агъа! Увухъди узу дустагъдизра, аьжалназра гъягъюз гьязур вуза. 34 Хъа Исайи дугъаз гъапи: – КІуразавуз, Петр, гъи даттли уьъйир дапІну ккудубкІайиз, Узу шубубан аьгъюр дарзуз пидива. 35 Исайи давам апІуру: – Узу учву я пул, я тавра, я шаламар хьадарди гьаъруган, учвуз фукІа гьудрубкІуб гъабхьунчвуз? Дурари: «Ваъ» пну, жаваб тувру. 36 Исайи дурариз гъапи: – Хъа гьамус, шлиз пул аш, гьадму гъадабгъри, гьаци – таврара, хъа шлиз адарш, чан палтар масу тувну, ханжал гъадабгъри. 37 КІуразачвузки, Уз’ин гьамци дибикІнайибра улубкьиди: «къанунсузарикан вуди гьисаб апІиди». Гьацира Узкан фу дибикІнаш, дурар вари тамам хьиди, ва магьа аьхирихънара гъюра. 38 Дурари гъапи: – Я Агъа! Лиг, магьа мушваъ кьюб ханжал а. Исайи дурариз: «ЧІяаьн ву» кІуру. 39 Хъа хул’ан удучІвну, Иса, Чан аьдат вуйиганси, Елион дагъдиина гъягъюру. Дугъан кьяляхъди ученикарра гъушнийи. 40 Йишв’ина гъафиган, Исайи дурариз гъапи: – Тямягьвалариъ адрахьбан бадали ккарагай. 41 Хъа Учвра, душвхьан хил хъапІну гатІабхьру кІекІлин манзилиъ кьамкьариина ис духьну, гьамци ккарагуз хъюгъру: 42 – Адаш! Эгер Увуз ккундуш, Узхьан гьаму аьзабнан зах гьадабгъ! Вушра Йиз ният ваъ, хъа Явуб гъит ибшри. 45 Ккарагбахъан ученикарихьна гъафиган, Исайиз дурар хажалатнаан даахнади рякъюру. 46 Ва дурариз кІуру: – Гьаз даахначва? Гъудужвну, тямягьвалариъ адрахьбан бадали ккарагай. 47 Дугъу гьамци кІури имиди, адмийирин саб аьхю гъварч гъюру. Дурарин улихь йицІикьюр ученикдикан сар Ягьуда хьади шулу. Думу Исайиз мак апІуз Дугъаз багахь гъахьи. 48 Исайи дугъаз кІуру: – Ягьуда! Мак апІбиинди Инсаниятдин Бай масу тувранахъа? 49 Исайихъ хъайидариз, му гьял наанди илтІибкІураш дябкъну, Дугъаз кІуру: – Агъа! Ханжал йивидикІан? 50 Дурарикан сари жугьдарин аьхю маллайин гъаравшиз йивну, арччул иб ктабтІуру. 51 Гьадмуган Исайи гъапи: «Гъибтай, чІяаьн ву!» ва лукІран ибак хил кучну, думу сагъ апІуру. 52 Учв дисуз дуфнайи жугьдарин аьхюну маллйириз, Аллагьдин хулан гъаравларин аьхюдариз ва агъсакълариз Исайи гъапи: – Узу дисбан бадали, учву, гъачгъиинаси, ханжларна маргъар хьади удучІвначва! 53 Узу учвухъди гьар йигъан Аллагьдин хулаъ шуйза, учву Уз’ина хил за гъапІундайчва. Хъа гьамус, мучІушну гьюкум апІурайи вахт ичв вахт ву. 54 Иса, дидисну, жугьдарин аьхюну маллайин хулаз хуру. Петр ярхла-ярхлади дугъан кьяляхъди гъягъюру. 55 Гьяятдиъ уч духьнайидар, цІа алапІну, вари сатІиди деиган, Петрра дурарин арайиъ деъру. 56 Сар гъараваш дишагьлийи, думу цІихъ деънади дяркъну, дугъаз уччвуйи дилигну, гъапи: – Гьамура Исайихъ хъайидарикан ву. 57 Амма Петри: «Узуз Думу аьгъюр дарзуз» дупну, кІул ккадабгъуру. 58 Саб бицІи арайилан, Петр дяркъну, дугъаз сар жарарира: «Увура гьадрарикан вува», – кІуру. Петр, му касдизра: «Ваъ, дарза» пну, инкар шулу. 59 Саб сяаьткьан вахт улдубчІвиган, хъана сари ижмишнаан кІуру: – Якьин гьамура Исайихъ хъайир ву, фицики му Галилей уьлкейиан ву. 60 Хъа Петри думу касдиз кІуру: – Уву фу кІурашра, аьгъдарзуз. Дугъу му гафар кІури имиди, даттли уьъйир гъапІу. 61 Гьадмуган Агъа, илдицну, Петрихьинди гъилигу, ва Петрин Агъайи чаз гъапи гьаму гафар кІваина гъюру: «Гъи даттли уьъйир дапІну ккудубкІайиз, шубубан Узу аьгъюр дарзуз пидива!» 62 Гьадмуган Петр, гьяятдиан удучІвну, дердлуди гъишу. 63 Иса дидиснайи адмийир, Дугъ’ин аьлхъюри, Дугъаз йивури гъахьну. 64 Дугъан улар гьеркри: «Увуз шли гъивнуш, йипа, эгер Уву пайгъамбар вуш!» кІури, йивури гъахьну. 65 Гьацира Исайиз хъанара жара аьрвалар апІури гъахьну. 66 Хъайигъан гвачІинган агъсакълар, жугьдарин аьхю маллйир ва къанунчйир уч духьну, Иса заан диванханайиз гъахуру. 67 Дугъхьан гьерхру: – Эгер Уву Месигь вуш, йип учуз? Дугъу дурариз кІуру: – Узу учвуз гъапишра, хъугъидарчва; 68 Хъа Узу учвуз суал тувишра, Узуз жаваб тувидарчва; 69 Гьамусдихъантина Инсаниятдин Бай кьудратлу Аллагьдин арччул гъвалахъ деъди. 70 Хъа вардари Дугъаз кІуру: – Яна Уву Аллагьдин Бай вува, сарун? Исайи дурариз жаваб тувру: – Учву кІурайиси ву. 71 Дурари кІуруки: – Ухьуз сарун фициб шагьидвал лазим вухъа, фицики му гафар ухьуз Мугъан Чан мелзналан гъеерхьунхьуз!

Лука 23

1 Хъасин дурари, гъудужвну, Иса Пилатдихьна гъуху 2 ва Дугъак гьамцдар тахсрар кирчуз хъюгъю: – Мугъу, Чаз Месигь, паччагь кІури, халкь рякъ’ан адаура, Римдин паччагьдиз налук тувуб дюз дар кІури, гьисаб апІура. 3 Пилатди Исайихьан гьерхру: – Уву «жугьдарин Паччагь» вуна? Исайи жаваб вуди дугъаз кІуру: – Уву гьаци ву кІурава. 4 Пилатди жугьдарин аьхюну маллйириз ва халкьдиз гъапи: – Узуз Гьаму Касдик саб тахсирра бихъурадарзуз. 5 Амма дурари гужниинди алаурайи: – Дугъу Галилей уьлкейилан ккебгъну гьамина гъяйиз, вари Ягьудия уьлке вуйибси, аьгъювалар улупури, халкьарин арайиъ наразивал ипра. 6 Галилейикан деебхьну, Пилатди гьерху: – Му Галилейин агьали вуйинхъа? 7 Хъа Иса Гьироддин вилаятдиан вуйиб аьгъю гъабшиган, Пилатди Иса гьадму йигъари Ерусалимдиъ айи Гьироддихьна гьаъру. 8 Иса гъяркъиган, Гьирод гизаф шад шулу. Дугъаз ухдитІан Думу рякъюз ккунди айи, гьаз гъапиш дугъаз Исайикан гизафдар деерхьнайи ва Дугъкан саб аьламат рябкъюз миж кади айир вуйи. 9 Гьиродди Исайиз гизаф суалар туври гъахьну, амма Дугъу саб жавабра тувундар. 10 Жугьдарин аьхюну маллйирина аьлимари, гъудужвну, гужниинди Иса тахсиркар апІурайи. 11 Гьиродна чан эскрар, Дугъ’ина аьрвалар хури, кялхъру. Исайиин паччгьаринсдар палтар алахьну, Пилатдихьна кьяляхъ гьаъру. 12 Ва гьадму йигъан Гьиродна Пилат дустар шулу; улихьди дурар чиб-чпихъди душманвалиъ ади гъахьнийи. 13 Пилатди, аьхюну маллйиризна гьюкумдрариз ва халкьдиз дих дапІну, 14 гъапи: – Учву гьаму Кас, халкь рякъ’ан адаурайирси гьисаб дапІну, узухьна гъахунчва. Хъа магьа, ичв улихь ахтармиш дапІну, узуз гьаму Касдик учву кІуру саб тахсирра гъибихъундарзуз. 15 Ва Гьироддизра гъибихъундар, узу Му дугъахьна гьаунза ва Мугъак йикІбаз лайикьлу вуйи саб тахсирра дибихънадар. 16 Гьаддиз, жаза тувну, Му деетидиза. 18 Гьадмуган вардари сабси чІигъар апІуз хъюгъру: – Дугъаз аьжал, хъа учухьна Варава деет. 19 Варава, шагьриъ гъалабулугъ ипбаз ва адми йивну йикІбаз лигну, дустагъдиъ итнайир вуйи. 20 Пилатди хъанара, Иса деетуз ккунди, чан сес за апІуру, 21 хъа дурари: «Хачрак карс, хачрак карс Думу!» – кІури, чІигъар апІуйи. 22 Пилатди шубубпи ражари гьерхру: – Исайи фу чІурувал дапІнахъа? Узуз Мугъак йикІбаз лайикьлу вуйи саб тахсирра гъябкъюндарзуз, гьаци вуйиган, Мугъаз саб бицІи жаза тувну, деетидиза. 23 Амма мушв’ин уч духьнайидари зарбди чІигъар апІури, Иса хачрак карсуб ккун апІурайи, ва дурарин чІигъар гъалиб шулу. 24 Пилатди гьадрари кІуруси апІуз гьял апІуру: 25 Шагьриъ гъалабулугъ ипбазна адми йикІбаз лигну дустагъдиъ итнайи Варав деетуру, хъа Иса дурарин ихтиярназ тувру. 26 Иса гъахуз хъюгъиган, рякъюъ чан хутІлиан гъюрайи сар Симон кІуру Киринеяйин агьали гьахъру. Дурари, Иса карсру хач дугъан кьял’ин иливну, думу гъабхуз гъитру. 27 Исайин кьяляхъди гизаф адмийир ва Дугъахъ зарбди ишурайи дишагьлийир гъягъюру. 28 Исайи, дурарихьинди илтІикІну, гъапи: – Ерусалимдин дишагьлийир! Узухъ мишанай, хъа учвухъ ва ичв веледарихъ ишай. 29 Гьамци кІуру йигъар гъюра: «велед даршлудар, бицІир дархьидар ва нана тутрувдар хушбахтаврар ву!» 30 Гьадмуган дагълариз: «уч’ина ахьай», хъа тепйириз: «учу элеркай» пуз хъюгъдичва, 31 адмийири ужур касдиз гьамцдар чІуру ляхнар апІурайган, дурари чІуру касариз фицдар ляхнар апІуйкІан? 32 Исайихъди сатІиди дариз зигбан бадали, кьюр гъачагъра хурайи. 33 «Келле» кІурушв’ина гъафиган, Иса ва гъачгъар, сар Исайин арччул, тмунур – гагул терефназди хачарик карсру. 34 Хъа му арайиъ эскрари, тупут ипри, Дугъан палтар пай апІурайи. 35 Халкь лигури дийигънайи. Дурарин гьякимдрар Дугъ’ин аьлхъюрайи: – Жарадар уьрхюри гъахьну, гъит Чав Учв уьрхри, эгер Думу Аллагьди кадагънайи Месигь вуш. 36 Эскрарира, Исайиз люкьнар апІури, Дугъан багахьна гъюри, кІвантІарихьна сирке хуйи 37 ва гьамци кІуйи: «Эгер Уву жугьдарин паччагь вуш, Яв Уву уьрх». 38 Дугъан кІулихъ «Му жугьдарин паччагь ву» дибикІнайиб кебхнийи. 39 Исайихъди дариз дизигнайи гъачгъарикан сари Дугъаз чІуру гафар апІурайи: – Эгер Уву Месигь вуш, Увура, учура уьрх. 40 Тмунури чан юлдшиз кІуру: – Увуз Аллагьдихьан гучІ шуладарнуз, увузра гьациб жаза тувнайиган? 41 Ухьуз гьякьди жаза тувна, гьаз гъапиш ухьуз ихь тахсрариз лайикь вуйиб гъурубкьунхьуз, хъа Мугъу саб чІуру ляхинра гъапІундар. 42 Хъа Исайиз кІуру: – Уву Яв Паччагьлугъдиз гъафиган, узу кІваин апІина, Иса! 43 Исайи дугъаз гъапи: – Гьякьди кІуразавуз, гъи Узухъди женнетдиъ хьидива. 44 Лисундин вахт вуйи. Сабпну вари уьлкейиин сяаьт шубубдизкьан мучІушин улубчІвнийи. 45 Ригъдин акв хътабтІу ва Аллагьдин хулаъ Гирамишвахь гьибхнайи чарч гьацІкьял’ансина гъячІябгъю. 46 Исайи зарбди гьарай гъапІу: – Адаш! Йиз рюгь Яв ихтиярназ тувраза. Ва гьамци дупну, Дугъан нефес хътубтІу. 47 Гьаму гъябкъю эскрарин юзбашийи, Аллагьдин ад за дапІну, гъапи: – Дугъриданна, гьаму Кас марццир вуйиштІан! 48 Гьаму тамашайиз лигуз уч духьнайидар, душвахь гъабшиб дябкъну, чпин мухрар убччвури, алдагъуру. 49 Иса аьгъюкьандар вари ва Дугъахъди гъахьи Галилей уьлкейианмина гъафи дишагьлийир, ярхлаанси дийигъну, мидиз лигурайи. 50 Гьадму арайиъ Юсуф кІуру сар гъяни ва гьякьлу вуйи, заан диванханайин иштиракчи, 51 дидин къарарихъди рази дарши кас гъюру. Думу Аллагьдин Паччагьвализ ккилигурайи Ягьудия уьлкейин Аримафей кІуру шагьриан вуйи. 52 Пилатдихьна душну, дугъу Исайин беден чахьна тувуб тІалаб гъапІнийи. 53 Дугъу Исайин беден хачракан кадабгъну, иригъян гъибиржну, гъарзуъ дапІнайи ва гьелелиг фужкІа кивнадру накьвдиъ ивру. 54 Жвуми йигъ вуйи, султ йигъ улубкьуз багахь шулайи. 55 Исайихъди Галилей уьлкейиан гъафи дишагьлийирра, накьвдихьна дуфну, Исайин беден фици ивнаш, лигуру. 56 Хъасин хулариз хътаку, дурари ицци ниъ хъайи аьтрарна ягъар гьязур гъапІу, хъа султ йигъан, Къанундиъ улупнайиганси, дурар фаракьат гъахьи.

Лука 24

1 Чпи гьязур дапІнайи аьтрин ниъ хъайи ягъарра хьади, элгьет йигъан, ахсрарихъди, гьадму дишагьлийир хъана накьвдихьна гъягъюру. 2 Хъа дурариз майит айи хьарахь гьипнайи гъван гьидипнади рябкъюру, 3 накьвдизди учІвиган, дурариз Агъа Исайин беден гъибихъундар. 4 Дурари, мид’ин мюгьтал духьну, фикрар апІури имиди, сабпну дурарин улихьна вацІрацІар апІру палтар али кьюр жви ачмиш шулу. 5 Дурари гучІбаан ис алахъдариз кІуру: – Учву чІивир гъачІидарин арайиъ гьаз агурачва? 6 Думу мушваъ адар. Думу чІиви гъахьну. Дугъу, гьеле Галилей уьлкейиъ имиди фици гъапнийиш, кІваин апІинай: 7 «Инсаниятдин Бай гунагькрарин хилиз тувди, дариз зигиди, хъа шубудпи йигъан чІиви хьиди». 8 Гьадмуган Исайин му гафар дурарин кІваина гъафи. 9 Кьяляхъ хътаку дишагьлийири (мурарин арайиъ Магдалайиан вуйи Мар’ям, Югьанна, Якьубдин дада Мар’ям ва дурарихъди хъади гъаши жарадарра айи) мидкан йицІисар ученикдиз ва миди вуйидариз хабар дебккру. 11 Ученикари, му гафар ичІидарси гьисаб дапІну, дурарихъ хъугъундайи. 12 Хъа Петр гъудужвну, жаргъну накьвдихьна гъушу ва душваъ ис алахъну гъилигуриз кафнартІан гъяркъюндар ва, мид’ин мюгьтал духьну, кьяляхъ хътаку. 13 Гьадму йигъан ученикарикан кьюр Ерусалимдихьан кьюб сяаьтнан рякъюн манзилнаъ айи Эммаус кІуру гъулаз гъягъюрайи. 14 Дурарра Исайиин улукьу гьядисйирикан улхурайи. 15 Чиб-чпихъди улхури фикрар апІурайи вахтна, багахь духьну, Исара дурарихъди гъягъюз хъюгъю. 16 Чпин улар йитІнайиси, дурариз Иса аьгъю гъахьундар. 17 Дугъу дурарихьан гьерху: – Учву, рякъди фтикан улхурачва? Дурар пашманди дийигъу. 18 Дурарикан Клеоп кІуру сари Дугъаз жаваб туву: – Му йигъари Ерусалимдиъ гъабшиб душваз гъафидарикан сар Уву вува аьгъдрур, дарин! 19 Исайи дурариз гъапи: – Фтикан? Дурари Исайиз кІуру: – Аллагьдин ва вари халкьдин улихь, ляхнариъ ва гафнаъ кьувватлу пайгъамбар вуйи Назаретдин Исайикан. 20 Думу жугьдарин маллйирина гьюкумдрари тахсиркар дапІну, хачрак карсну дариз зигуз гъитну. 21 Хъа учу, Думу Израилин халкь азад АпІрур ву кІури, умуд апІурайча, хъа гьамус, магьа шубуд йигъ ву гьамциб гьядиса дубхьну. 22 Хъа гъи ич дишагьлийирикан сакьюдари учу мюгьтал гъапІну: дурар гвачІнин ухди Исайин накьвдихьна гъушиган, 23 дурариз Дугъан беден гъибихъундар ва хъадакну гъафидари, Думу чІиви гъахьну кІури, хабар дебккрайи, гьадина гъафи малайикарра гъяркъюнчуз кІури, ктибтура. 24 Ичдарикан сакьюдар накьвдихьна гъушиган, дураризра гьадму дишагьлийириз гъяркъдар гъяркъну, амма Дугъан беден гъябкъюндар. 25 Гьадмуган Исайи дурариз гъапи: – Агь, пайгъамбрари гъапидарихъ хътругъру ахмакьар ва кІван кагьалсузар! 26 Месигьди гьацдар аьзабар гъизигхъантІан, Думу Чан гьяйбатнаъ учІвидар, дупнадаринхъа? 27 Хъасин Исайи, Мусайилан ккебгъну, вари пайгъамбрари Чакан Гирами китабариъ дидикІнайидарин гьякьнаан дурар гъаври тІаъру. 28 Дурар чпи гъягъюрайи гъулаз багахь гъашиган, Исайи Чаз дилинтина гъягъюз ккунди айиганси улупури гъахьну. 29 Хъа дурари Дугъаз гъапи: – Учухъди дерг, йигъ хябяхъ шула. Исара гьадму гъулаъ дурарихъди гъузру. 30 Дурарихъди суфрайихъ гъюн йивну деънайиган, Исайи, уьл гъадабгъну, Аллагьдиз баркаллагь дупну, гьудубтІуру ва дурариз пай апІуру. 31 Гьадмуган дурарин улар ачмиш шулу ва дурариз Думу Иса вуйиб аьгъю шулу, хъа Думу дурарин улариккан дургру. 32 Хъа дурари чпи-чпиз кІуру: – Дугъу рякъюъди ухьухъди улхруган ва Гирами китабариъ дибикІнайибдин гъаврикк ккаъруган, ихь юкІвар ургури гъахьундайинхъа? 33 Гьадму сяаьт гъудужвну, дурар Ерусалимдиз хътакуру ва йицІисар вакиларна имбудар сатІиди ади дихъуру. 34 Дурари: «Агъа дугъриданра чІиви гъахьну ва Симондиз ачмиш гъахьну», кІурайи. 35 Хъа мурарира, рякъюъ чпиин улуркьдар ва, уьл гьудубтІруган, чпиз Думу фици аьгъю гъахьнуш, ктитуру. 36 Мурар мидкан улхури имиди, Иса Учв дурарин арайиъ ачмиш шулу ва Дугъу: «Учвуз мясляаьт ибшри!» кІуру. 37 Дурари, аьжайиб духьну ва гучІ кабхъну, чпиз рюгь рябкъюра пну, хиял гъапІу. 38 Хъа Исайи дурариз гъапи: – Гьаз аьжайиб духьначва ва дицдар хиялар ичв юкІвариъ гьаз учІвра? 39 Йиз хиларизна ликариз лигай: Му Узу вуза, хил кучри ва лигури Узу ахтармиш апІинай, рюгь жан хъайиб ва кІурбар айиб шулдар. 40 Гьамци дупну, Исайи дурариз чан хилар ва ликар улупуру. 41 Хъа дурар шадвалиан мегьел хътругъри ва мюгьтал шули айиган, Дугъу дурариз гъапи: – Мушваъ фициб-вушра ипІруб аничв? 42 Дурари Исайихьна гъубжу балугъин пай гьачІабккуру. 43 Исайи, дурариз рябкъюри, ипІуру 44 ва кІуру: – Узу учвухъди хъимиди, учвуз гъаписи, Узкан Мусайин къанундиъ, Пайгъамбрарин китабдиъ ва гьацира Мяълийирин китабдиъ дибикІнайиси, Йиз кІул’ина гъюз ккайидар вари тамам духьну ккундийи. 45 Гьадмуган Дугъу Гирами китабариъ дибикІнайибдин гъаври ахъбан бадали, дурарин фагьум ачмиш апІуру. 46 Хъасин дурариз гъапи: – Гирами китабариъ дибикІнаки, Месигь аьзабарикк ккуркьди ва, дукІну, шубудпи йигъан чІиви хьиди 47 ва, вардари чпин гунгьар гардандиъ дисруси, Аллагьди чпилан хил алдабгъруси, Ерусалимдилан ккебгъну варишвариъ Йиз ччвурнахъан Ужувлан хабар рабгъиди. 48 Магьа гьаци хьузра гъабшибдин учву шагьидар вучва. 49 Хъа Узу Йиз Адашди учвуз тувурза дупнайиб гьамус тувдизачвуз. Учву, аьршариан учвухьна кьувват рубкьайиз, Ерусалим шагьриъ гъузай. 50 Хъасин Исайи дурар шагьриан адаъну, Вифанияйихьнакьан хъади гъюру ва, Чан хилар за дапІну, дурариз ужувлар ккун апІуру. 51 Дурариз ужувлар ккун апІури айи арайиъ, Иса, ученикарихьан гьудучІвури, завуз за шулу. 52 Дурари, жилиина ахьну, Дугъаз икрам апІуру, хъасин зурба шадвалиинди Ерусалимдиз хътакуру 53 ва, гьаммишан Аллагьдин ад за апІури, Аллагьдин хулаъ гъузру.

Югьан 1

1 Сифте Гаф айи, Гаф Аллагьдихь хьайи, Гаф Аллагь вуйи. 2 Думу сифте Аллагьдихь хьайи. 3 Вари Гьадгъуланмина гъабхьну ва, Думу дарди, арайиз дуфнайибдик, фукІара арайиз гъафундар. 4 Уьмур Гьадгъаъ а, ва гьадму уьмур инсаниятдиз акв ву. 5 Аквну мучІушнаъ акв тувру ва мучІушнахьан акв ккабгъуз шулдар. 6 Аллагьди Ягь’я кІуру ччвур али адми гьаъру. 7 Думу Акв улупуз, Акв Месигь вуди, Гьадгъулантина вари хъугъбан бадали, гьаур вуйи. 8 Думу учв Акв дайи, амма Аквнан гьякьнаан шагьидвал апІуз гьаънайир вуйи. 9 Гьякьикьи Аквну му дюн’яйиз гъюру гьарсар касдиз аьгъювалар тувру. 10 Думу, Чав арайиз гъабхи му дюн’яйиз гъафну, хъа му дюн’яйиндариз Думу кьабул гъахьундар. 11 Думу жвувандарихьна гъафну, хъа жвувандари Думу гьясбикк гъапІундар. 12 Учв кьабул гъапІдариз ва Чан ччвур дибисну хъугъдариз Дугъу дурар Аллагьдин веледар хьувал багъиш гъапІну. 13 Дурар инсанарин ниятариинди, ясана адмийириз ккун гъабшиган бабкан шлудар дар. Думу веледар Аллагьдихьан ву. 14 Гаф Инсандиз илтІикІуру ва ухьухъди яшамиш шулу. Ухьуз Дугъан Аллагьвалин зурбавал ва кьувват гъябкъюнхьуз, масанвали ва гьякьвали ацІнайидар – Дугъаз дурар, Адашдихъ хъайи сар Бай вуди хьпаз гъурукьну. 15 Дугъкан адмийириз Ягь’яйи хабар дебккру: «Магьа Думу узу учвуз кІурайир: „Думу, йиз кьяляхъди Гъюрайир, узутІан заан ву, гьаз гъапиш Думу узу хьайиз айир ву“». 16 Дугъан абцІнайи ужувлиинди ухьуз ужувлахъди уж’вал гъабхьунхьуз. 17 Аллагьди ухьуз Къанун Мусайилантина тувну, хъа ужувларна гьякьвал Месигь Исайиланмина гъафидар ву. 18 Зат саризра Аллагь гъяркъюндар, Думу ухьуз анжагъ Аллагьди, хъайина-хътру сар Бали, гьарган Чан Адашдихъди хъайири, ачмиш гъапІну. 19 Магьа Ягь’яйин шагьидвал. Жугьдари Ягь’яйихьан, уву фуж вува, кІури, гьерхуз Ерусалимдиан чпин маллйир ва левитар гьаиган, 20 Ягь’яйи дурариз ачухъди жаваб тувру: «Месигь Узу дарза». 21 – Хъа дици вуш, уву фуж вува? – гьерхру дурари. Уву Ил’яс вуна? – Ваъ. – Уву пайгъамбар вуна? – Ваъ. 22 – Хъа уву фуж вува? – давам апІуру гьерхувал дурари. – Учу гьаъдариз учу жаваб тувну ккунду. Уву фуж вуди гьисаб апІурава? 23 – Узу, Ишая пайгъамбри гъапиганси: «„Агъайиз рякъ диш апІинай!“ кІури, ичІи чюлиъ атІабгу дих вуза». 24 Гьадмуган фарисйири гьаънайидари 25 Ягь’яйихьан гьерхру: «Хъа уву я Месигь, я Ил’яс, ясана пайгъамбар даруган, уву халкь гьаз штуан апІурава?» 26 – Узу учву штуан апІураза, – кІури, Ягь’яйи дурариз жаваб тувру, – хъа ичв арайиъ Адми а. Думу учвуз аьгъдарчвуз. 27 Думу узутІан кьанди гъюрашра, узу Дугъан шаламарин гъахмйир гъядарчузкьан лайикь дарза. 28 Му вари Ягь’яйи халкь штуан апІури гъаши Ярдан нирин тмуну гъирагъдихъ хъайи Вифания кІурушваъ гъабхьнийи. 29 Хъайигъан Ягь’яйиз чахьинди гъюрайи Иса рякъюру ва кІуру: «Магьа, дюн’яйин гунгьар Чаина гъадагъуз ккайи Аллагьдин Агълиж гъюра. 30 Думу узу Чакан: „Думу йиз кьяляхъди Гъюрайир узутІан заан ву, гьаз гъапиш Думу узу шайиз Айир ву“, – Гъапир ву. 31 Думу фуж вуш, узузра аьгъдайзуз, амма узу, Месигь Израилиз аьгъю ишри пну, халкь штуан апІуз дуфнайир вуза». 32 Ягь’яйи гьацира гъапи: «Узузра Думу Месигь вуйиб аьгъдайзуз, хъа штуан апІуз узу Гьаури гъапунзуз: 33 „Шлиина-вуш Гирами Рюгь ис шули рякъидивуз ва Гьадгъуин гъузди. Ари Гьадмунур хьиди Гирами Рюгьнахьди адмийир цІийи Алаърур“. Узуз гьаци рябкъюзра гъябкъюнзуз: Гирами Рюгь луф жюрейиинди Гьадгъуина аьршариан гъафнийи. 34 Магьа узу адмийирин улихь шагьидвал апІураза: Ари Гьадму ву Аллагьдин Бай». 35 Хъайигъанра Ягь’я, чан кьюр ученикра хъади, гьадушв’ин алди шулу. 36 Багхьантина гъярайи Иса дяркъну, Ягь’яйи кІуру: – Лигай, магьа Аллагьдин Агълиж! 37 Дугъан му гафар гъеерхьу ученикар Исайин кьяляхъди гъягъюру. 38 Иса кьяляхъинди илтІикІуру ва, дурар дяркъну, гьерхру: – Фу ккундучвуз? – Я Рабби! (Му илтІибкІиган «Мялим» кІуру гаф ву.) Уву наан яшамиш шулава? – пну гьерхру дурари Исайихьан. 39 – Узухъди гъачай, ва учвуз рябкъидичвуз, – гъапи Исайи. Дурар Исайихъди гъягъюру. Думу яшамиш шулайишв дябкъну, дурар хябяхъдиз Гьадгъахь гъузру. Сяаьт юкьбарихьна вуйи. 40 Ягь’яйин гафарихъ хъебехъну Исайихъди гъушу кьюрикан сариз Андрей кІуйи, думу, чаз Петр кІури шлу Симондин чве вуйи. 41 Дугъу, гьадму сяаьт чан чве Симон дагну, дугъаз кІуру: – Учуз Месигь гъидихъунчуз! (Му илтІибкІиган «Христос» – «Аллагьдихьан вуйир» кІуру гаф ву.) 42 Андрейи думу Исайихьна хъади гъюру. Иса дугъаз дикъатлуди лигуру ва кІуру: – Уву Югьаннайин бай Симон вува. Увуз Кифа, яна Петр кІуру хьиди. (Жугьуд чІалниинди «Кифа» ва грек чІалниинди «Петрос» «Гъван» кІуру гаф ву.) 43 Хъайигъан Исайи Галилей уьлкейиз гъягъюз кьаст апІуру. Дугъаз Филип алахъуру: – Узухъди гъач! – кІуру дугъаз Исайи. 44 Филипра Вифсайдайиан – Андрейинна Петрин гъахи шагьриан – вуйи. 45 Филипди Нафанаил агуру ва кІуру: – Учуз, Мусайи чан Къанундиъ шликан дибикІнаш ва пайгъамбрарира шликан дибикІнаш, Гьадму гъидихъунчуз. Думу Назарет шагьриан Юсуфдин бай Иса ву. 46 – Назаретдиан? Назаретдиан фукІа ужуб удубчІвур кІурана? – наразиди кІуру Нафанаили. – Гъач гъягъюхьа, ва уву лигара, – кІуру дугъаз Филипди. 47 Чахьна гъюрайи Нафанаил гъяркъиган, Исайи дугъкан гьамци кІуру: – Магьа, затра кучІал ва цІарувал ктру, чан дугъри израилжви. 48 – Увуз узу наънан аьгъявуз? – гьерхру Нафанаили. – Узкан увуз Филипди ктибтайиз улихьна Узуз уву инжирин гьарикк гъяркъюнзуз, – пну, жаваб туву дугъаз Исайи. 49 – Агъа! Уву Аллагьдин Бай вува – Израилин Паччагь! – гьевесниинди гъапи Нафанаили. 50 – Уву Узухъ гьаддиз хъугъунва, Узуз уву инжирин гьарикк гъяркъюнзуз гъапну кІури? Хъа увуз мутІан бегьем артухъ аьламатар рякъидивуз. 51 – Исайи давам апІуру: – Гьякьлу вуйи гьякь кІуразачвуз: учвуз завар гьатІарццури ва Аллагьдин малайикар Инсаниятдин Бал’ина ис-за фици шулуш, рякъидичвуз.

Югьан 2

1 Кьюд йигълан Галилей уьлкейин Кана шагьриъ сумчир шулу. Душваъ Исайин дадара айи. 2 Сумчриз Исайиз ва Дугъан ученикаризра теклиф вуйи. 3 Хялари вари чяхир гъубхъиган, Исайин дадайи Дугъаз кІуру: – Мурарин чяхир имдар. 4 – Уву гьаз кІурава Узуз дици? – жаваб тувру дугъаз Исайи. – Йиз вахт мегьел улубкьнадар. 5 – Дугъу фици гъапиш, гьаци апІинай, – гъапи Исайин дадайи кюмекчйириз. 6 Гьадушвахь жугьдари чпин диндихъди жикІувалариз ишлетмиш апІури шлу йирхьуб гъвандин латар хьайи, дурарикан гьарубдиъ кьюб-шубуб гаргун шид гъябгъюйи. 7 – Латар штухьди ацІай, – кІуру Исайи кюмекчйириз. Дурарира латар даргариккнакьан штухьди ацІру. 8 – Гьамус сацІиб шид удубзну, мярака кІули гъабхрурихьна гъайибхай, – гъапи Исайи. 9 Мярака кІули гъабхрури чяхриз илтІибкІнайи штук ниъ капІру. Дугъаз чяхир гьапІруб-вуш аьгъдайи, хъа кюмекчйириз аьгъяйи. 10 Мярака гъабхрури, жамраз дих дапІну, кІуру: – Адмийири хялариз сифте ужуб чяхир гьивру, хъасин вари пиян гъашиган, чІуруб хуру. Хъа уву ужубсиб чяхир гьамусдиз гьаз гъибтнава? 11 Му Исайи Галилей уьлкейиъ айи Канайиъ улупу аьламатарикан сабпи аьламат вуйи. Гьамдиинди Дугъу Чан зурбавал улупнийи ва Дугъан ученикар Дугъахъ хъугънийи. 12 Гьамдихъан Иса Кафернагьум шагьриз гъягъюру. Дугъахъди Чан дада, чвйир ва ученикарра хъайи. Дурарин душваъ сякьюдар йигъар шулу. 13 Жугьдарин Пасхайин машквар багахь шулайиган, Иса Ерусалим шагьриз гъягъюру. 14 Душваъ Аллагьдин хулан гьяятдиъ учІвиган, Дугъаз малар, марччар ва луфар масу туврайидар ва пулар гьюдюхрударра рякъюру. 15 Исайи, тІурнарикан гъирмаж дапІну, дурар вари гьадушв’ан чпин малар-марччарра хьади утІурккуру, пул гьюдюхрударин пулар даргъуру ва устлар ккитІикІуру. 16 Дугъу луфар масу туврайидариз гъапи: – Мурар милин дургин апІинай! Йиз Адашдин хал базариз миилтІибкІанай! 17 Гьаму вари гъабхьиган, Исайин ученикарин Гирами китабарик дидикІнайи гьамцдар гафар кІваина гъюру: «Яв Хулахьна вуйи ккунивали Узу цІаси ургиди». 18 Мушв’ин жугьдарин гьюкумдрар гъедергуру. – Увуз гьамцдар апІуз ихтияр айивал фициб аьламатниинди улупидива? – гьерхру дурари. 19 – Му Аллагьдиз ккарагру хал учву дабгъай, хъа Узу думу шубуд йигъан айитІ дивурза, – дурариз жаваб вуди гъапи Исайи. 20 – Му Аллагьдин хал диври инсанар ягъчІвурна йирхьуд йисан гъилихну, хъа Уву шубуд йигъан дивдина?! – гъапи жугьдари. 21 Исайи Аллагьдин хулкан улхурайиб Чан бедендикан кІурайивал вуйи. 22 Иса, дукІну, шубудпи йигъан чІиви гъашиган, Дугъу гьамдикан дупнайи гафар Дугъан ученикарин кІваина гъафнийи, ва дурар Гирами китабарихъ ва Исайихъ хъугънийи. 23 Иса Ерусалимдиъ Пасхайин машквраъ айи вахтна, Дугъу улупу аьламатар дяркъну, гизафдар Дугъахъ хъугънийи. 24 Хъа Учв, Иса, саринна ихтибарнаъ учІвдайи, гьаз гъапиш Дугъаз инсанар ужуди аьгъяйи. 25 Исайиз адмийирин хасиятарикан шли-вуш ктитувал лазим дайи, фицики Дугъаз гьарсар касдин кІваъ айиб аьгъяйи.

Югьан 3

1 Фарисйирин арайиъ жугьдарин гьякимарикан сар Никодим кІурур айи. 2 Йишвну Исайихьна дуфну, дугъу кІуру: – Мялим! Учуз уву Аллагьдихьан дуфнайи Мялим вуйиб аьгъячуз, фицики Уву апІрусдар аьламатар, эгер Аллагь Увухъди хътайиш, сарихьанра апІуз даршлийи. 3 Исайи дугъаз жаваб вуди кІуру: – Гьякьлу вуйи гьякь кІуразавуз: анжагъ учв цІийикІултІан бабкан гъаширихьантІан Аллагьдин Паччагьлугъдиъ учІвуз хьибдар. 4 – Аьхю адмийихьан хъана бабкан хьуз фици шулухъа? Думу, сабансана чан дадайин фуниъ учІвну, хъана бабкан даршулда? – кІуру Дугъаз Никодимди. 5 Исайи дугъаз жаваб туву: – Гьякьлу вуйи гьякь кІуразавуз: фуж штуан ва Гирами Рюгьнахьан цІийикІултІан бабкан дархьиш, дицирихьан Аллагьдин Паччагьлугъдиъ учІвуз хьибдар. 6 Бедендикан бабкан шлуб беден ву. Анжагъ Гирами Рюгьнакан рюгьтІан бабкан шулдар. 7 Узу увуз: учву цІийикІултІан бабкан духьну ккунду, гъапну кІури, мюгьтал махьанай. 8 МикІ ккунишвахъинди хъивру. Увуз дидин сес ебхьурувуз, хъа думу наанди ва наънан хъивраш, аьгъю шулдарвуз. Гирами Рюгьнакан бабкан гъаширра, ари гьаци ву. 9 – Дици фици хьуз мумкин ву? – пну, гьерху Никодимди. 10 – Уву Израилин мялим вуди, гьамцдар шей’арикан аьгъдарнуз? – жаваб тувру дугъаз Исайи. – 11 Гьякьлу вуйи гьякь кІуразавуз: Учу кІурача Учуз аьгъюбдиан ва шагьидвал апІурача гъябкъюбдикан. Хъа учву Учу шагьидвал апІурайибдихъ хъугърадарчва. 12 Эгер Узу учвуз му дюн’яйинубдикан кІурайиган учву хъугърадарш, хъа аьршаринубдикан гъапиш, фици хъугъдичвахъа? 13 Гьич саркьана аьршариз за гъахьундар, гьадушв’ан жилиина ГъафиртІан – Инсаниятдин БайтІан гъайри. 14 ИчІи чюлиъ Мусайи фици битІ ягъалди гакІвлик кибтІну дебккнуш, гьаци Инсаниятдин Байра хамхрик карсну хьиди, 15 Дугъахъ хъугъу гьарсариз зат ккудудубкІру уьмур хьпан бадали. 16 Аллагьдиз дюн’я гьаци ккун гъабхьнуки, Дугъу Чан айи-адру сар багъри Бай, Дугъахъ хъугъну, гьарсар кас дукІну даришри, хъа зат ккудудубкІру уьмур ибшри пну, гьаъну гъурбан гъапІну. 17 Аллагъди Чан Бай дюн’яйиз, дидин диван апІуз ваъ, хъа Гьадгъулантина дюн’я дюбхну хьуз гьаъну. 18 Дугъахъ хъугънайирин диван апІидар, хъа фуж Дугъахъ хъугъундарш, сарун диван гъапІу мисал ву, гьаз гъапиш думу Аллагьдин багъри Балихъ хъугъундар. 19 Диван апІувал гьаддиъ аки, дюн’яйиз акв гъафну, хъа адмийириз аквтІан мучІушин артухъди ккун гъабхьну, гьаз гъапиш дурарин ляхнарра чІурудар ву. 20 Фицики чІуруб апІурайи гьарсар касдиз акв даккун шулу ва, чан чІуру ляхнар ашкар даришри пну, думу аквнахьна гъягъюрдар. 21 Хъа гьякьвалиинди апІрур, чан ляхнар ашкарди хьуз, аквнахьна гъягъюру, гьаз гъапиш дугъан дурар Аллагьдиъди дапІнайидар ву. 22 Мидхъантина Иса, Чан ученикарра хъади, Ягьудия уьлкейин ругариина гъюру ва, душваъ гьадрарихъди яшамиш шули, дурар штуан апІури гъахьну. 23 Гьадму вахтна Ягь’яра Салим кІурушвахь хьайи Энондиъ адмийир штуан апІури шулу, гьаз гъапиш душваъ шид гизаф айи ва дина штуан хьуз хайлин халкь гъюри гъахьну. 24 Му Ягь’я дустагъдиъ итайиз гъабхьиб вуйи. 25 Гьадмуган Ягь’яйин ученикарикан сакьюдари жугьдарихъди штуан хьпан гьякьнаан гьюжат ккебгъру, 26 ва дурари Ягь’яйихьна дуфну гьерхру: – Мялим, кІваинди иминуз, увухъди Ярдан нирин тмуну гъирагъдихъ гьуркьу, уву Чакан ктибту Гьадму Кас? Магьа, Дугъу адмийир штуан апІура ва Дугъахьна вари гъюра! 27 – Адмийихьан анжагъ чаз аьршариан улупубтІан апІуз даршул, – пну, жаваб тувру Ягь’яйи. – 28 Узу учвуз: „Узу Месигь дарза, хъа узу Аллагьди Дугъаз рякъ ккабалгуз гьаънайир вуза“, – гъапибдин шагьидар вучва. 29 Швушв анжагъ швушв хурайириз ву, хъа дугъахъ хъебехъну, дугъу гъапиб апІурайир швушв хурайирин дуст ву. Швушв хурайирин дих кубкІиган, шад шулу: узура гьаци шадвали ацІназу. 30 Фицики Дугъан ад машгьур ва аьхю дубхьну ккунду, хъа йизуб – цІиб шула ва аьхирихъна гъюра. 31 Аьршариан Гъафир гьаму дюн’яйиин алидартІан зина ву, хъа му дюн’яйиин алидар гьаму дюн’яйиндартІан дар, ва дурар му дюн’яйин ляхнарикантІан улхурира шулдар. Аьршариан Гъафир варитІан заан ву. 32 Дугъу Чаз гъеебхьубдикан ва гъябкъюбдикан кІура, аммаки адмийири Дугъан шагьидвал кьабул апІурадар. 33 Дугъан гафар кьабул апІурайир гьякь Аллагь вуйивалихъ хъугъра. 34 Фицики Аллагьди Гьаънайир Аллагьдин гафариинди улхура, гьаз гъапиш Аллагьди Дугъаз бегьем Гирами Рюгь тувна. 35 Адашдиз Чан Бай масанди ву ва гьаддиз варибдиин гьюкум Дугъан хилиз тувна. 36 Аллагьдин Балихъ хъугънайириз зат ккудудубкІру уьмур хьибди, хъа Дугъахъ хътругъуриз дициб уьмур рябкъидар ва дицириин гьаммишандиз Аллагьдин хъял хьибди.

Югьан 4

1 Фарисйириз Ягь’яйизтІан Исайиз артухъди ученикар ва штуан хьуз гъюрудар айибдикан аьгъю шулу. Гьякьикьатдиъ адмийир Исайи Чав ваъ, хъа Дугъан ученикари штуан апІури гъахьну. Мидкан аьгъю гъабшиган, Ягьудия уьлке гъибтну, Агъа хъана Галилей уьлкейиз гъягъюру. 4 Дугъан рякъ Самария юрднаантина вуйи. 5 Ва магьа Иса Самарияйиъ айи Сихар кІуру шагьриз гъюру. Думу шагьур Якьубди чан Юсуф кІуру бализ бахиш гъапІу хутІлин багахь хьайи. 6 Душваъ Якьубдин гъуйи айи. Рякъюъ эргу Иса гьадму гъуйдихъ деъру. Вахт лисухьна вуйи. 7 Дина штуз Самарияйиан сар дишагьли гъюру. – Узуз убхъруб чава, – кІуру дугъаз Исайи. 8 Дугъан ученикар шагьриз ипІруб гъадабгъуз душнайи. 9 – Уву, жугьудри узхьан, Самарияйиан вуйирихьан, убхъуз ужуб фици ча кІурава? – гьерху Дугъхьан жаваб вуди дишагьлийи. Фицики жугьдар самариялуйирихъди албагну адайи. 10 Исайи жаваб туву: – Эгер увуз, Аллагьди адмийириз фу тувруш, аьгъяйиш ва, «Узуз убхъруб чава» КІурайир Фуж вуш, аьгъяйиш, уву Узхьан шид ккун апІидийва ва Узу увуз чІиви шид тувдийза. 11 – Я аьхю кас! – кІуру Дугъаз дишагьлийи, – Увухь гьич бедрекьан хьадарвухь, хъа гъуйи деринуб ву. Хъа Уву дициб шид наънан гъадабгъидийва? 12 Уву учуз му гъуйи туву ва дид’ан чавра, чан баярина мал-къарайира шид убхъури гъаши ич аба ЯкьубтІан заанур вунахъа? 13 Исайи жаваб тувру: – Му шид убхъру гьарсар касдиз цІиб арайилан хъанара убхъуз ккун хьибди. 14 Хъа узу шид тувну гъубхъур сану гьич зат харгидар. Гьаз гъапиш Узу дугъаз туву шид зат ккудудубкІру уьмур тувру яшайишдин булагъдиз илтІибкІиди. 15 – Я аьхю кас! – кІуру Дугъаз дишагьлийи, – Узуз сарун затра шид ккун даршлуганси ва мина дидиз дяргъруганси гьадму шид чава! 16 Душну яв жилирра гьамина хъади гъач, – кІуру Исайи. 17 – Узухъ жилир хътарзухъ, – гъапи дишагьлийи. – Уву, жилир хътарзухъ кІури, дюзди гъапива, – кІуру Исайи дугъаз. – 18 Фицики уву хьуб ражари швувахь гъахьунва, хъа гьамусяаьтди увухъ хъайир яв жилир дар. Уву дюз гъапунва. 19 – Я аьхю кас! – кІуру Дугъаз дишагьлийи, – Уву пайгъамбар вуди рякъюразуз. 20 Ич абйир гьатму дагъдиина икрамназ гъюри гъахьну, хъа учву, жугьдари, кІурачва, икрам апІуз анжагъ ЕрусалимдизтІан душну ккундар. 21 Исайи дугъаз кІуру: – Хъугъ Узухъ, дишагьли, гьамус учву я му дагъдиин, я Ерусалимдиъ ихь Адашдиз икрам апІидарчва – гьациб вахт улубкьура. 22 Учвуз, самариялуйириз, учву фтиз икрам апІурашра, аьгъдарчвуз. Хъа учуз, жугьдариз, учу фтиз икрам апІураш, аьгъячуз, фицики уьрхювал жугьдарихьанмина гъибди. 23 Хъа гьациб вахт улубкьидики, ва думу улубкьузра улубкьна, халис икрам апІрудари Адашдиз рюгьнииндина гьякьвалиинди икрам апІиди. Ихь Адашди, иллагьки, гьамцдар икрам апІрудар агура. 24 Аллагь Рюгь ву ва гьаддиз Дугъаз икрам апІрудари рюгьнииндина гьякьвалиинди Дугъаз икрам дапІну ккунду. 25 – Месигь дуфну ккуниваликан узуз аьгъязуз, – гъапи дишагьлийи. – Думу гъафиган, Дугъу учуз варибдикан ктибтиди. 26 – Гьадму уву кІурайи Адми увухъди улхура. Узу вуза Месигь, – кІуру Исайи. 27 Гьадму арайиъ Исайин ученикар гъюру ва, Дугъу дишагьлийихъди гафар апІури дябкъну, дурар мюгьтал шулу. Амма сарира Дугъхьан, фу ккунди аш, вая дугъахъди гафар гьаз апІураш, гьерхундайи. 28 Дишагьлийи чан шид айи гвар гъибтну, шагьриз хъадакну, адмийириз кІуру: 29 – Узухъди гъачай ва узу йиз уьмриъ гъапІу вари ляхнарикан ктиту Касдиз лигай. Мумкин ву Думу Месигь хьузра? 30 Дурар шагьриан удучІвну, Гьадгъахьна гъягъюру. 31 Хъа му вахтна ученикари Исайикан: – Я Мялим, фукІа ипІина, – кІури, тІалаб апІурайи. 32 – Узухь гьациб хураг хьазухьки! Дидкан учвуз аьгъю хьузра аьгъдарчвуз, – гъапи Дугъу. 33 Гьадмуган ученикари чиб-чпихьан гьерхру: «Белки Дугъаз ипІруб шликІа гъабхнушул-гьа?» 34 Исайи дурариз кІуру: – Йиз хураг Узу Гьаурин ният тамам апІуб ва Дугъан ляхин ккудубкІуб вуйиз. 35 ХутІил убзури, учву кІури шулчва: «Юкьуб вазсана – ва иганра хъубкьди». Хъа магьа Узу учвуз кІураза: улар арццай ва хутІлариз лигай – дурар ургуз хъуркьна. 36 Убгурайири гьамустІанра чан гьякъи гъадабгъура ва зат ккудудубкІру уьмриз бегьер уч апІура, гъубзурра ва гъубгурра – кьюридра сабси шад хьпан бадали. 37 «Сари убзуру, тмунури ккадабцІуру» кІуру мисал гьамци вуйиган гьякь ву. 38 Узу гьаъразачву, учву убгбан бадали, учву зегьмет дизригушваз. Жарадари зегьмет гъизигну, хъа учву дурарин зегьметнан бегьер уч апІурачва. 39 Му шагьриан вуйи самариялуйирикан гизафдар Исайихъ хъугъру, фицики му дишагьлийи Дугъкан дурариз дупнайи: «Дугъу йиз уьмриъ узу гъапІу вари ляхнарикан ктибтунзуз». 40 Самариялуйири, Исайихьна дуфну, Думу чпихь гъузуб тІалаб апІуру. Ва Думу дурарихъди кьюд йигъан гъузру. 41 Исайи дурариз гъапІу ктитбариинди Дугъахъ хъанара гизафдар хъугънийи. 42 Дурари думу дишагьлийиз кІуру: «Сифте учу Исайихъ яв гафариз дилигну хъугъунча. Хъа гьамус Дугъахъ учу ич-уч’инди хъебехъну хъугърача, ва аьгъячуз: Думу дугъриданра дюн’я уьрхру Месигь ву». 43 Кьюд йигълан Иса, дилин удучІвну, Галилей уьлкейиз гъягъюру, 44 фицики Дугъу Чав мидиз улихьна гъапнийи: «чан ватандиъ пайгъамбрин гьюрмат даршул». 45 Галилейиз гъафиган, душван агьлари Иса хуш’валиинди кьабул апІуру, гьаз гъапиш Ерусалимдиз Пасхайин машквраз гъушиган, дурариз Дугъу гъапІкьандар вари дяркънайи, фицики дурарра гьадму машквраъ айи. 46 Иса хъана Чав шид чяхриз илтІибкІу Кана кІуру Галилей уьлкейин шагьриз гъягъюру. Гьадму вахтна Кафернагьум шагьриъ паччагьдин гьякимдрарикан сар яшамиш шулайи ва дугъан бай яманди иццурайи. 47 Иса Ягьудия уьлкейиан Галилейиз дуфнайибдикан деебхьну, думу Дугъахьна гъюру ва, чан йикІру гьялнаъ айи бай сагъ апІуз Кафернагьумдиз гъач, кІури, Исайиз миннатар апІуру. 48 – Учвкан саркьан, аьламатар ва аьжайиб лишнар дярякъкьан гагьди, хъугъуз ккайидар дарчва! – гъапи дугъаз Исайи. 49 – Я аьхю кас! Йиз бай йикІайиз гъача! – кІури, паччагьдин гьякимдар Дугъаз хъана ккарагуру. 50 – Хулаз гъарах, яв бай яшамиш шули гъузди, – кІуру Исайира. Ва му адми Исайин гафарихъ хъугъру ва рякъюъ учІвру. 51 Рякъюъ дугъаз чан гъуллугъчйир алахьуру ва дурари дугъаз: «Яв бай сагъ гъахьну», кІуру. 52 Дугъу дурарихьан: «Бализ филаси рягьят гъабхьну?» – пну, гьерхру. «Накь лисхъан дугълан убцрушин алдабхьну», – гъапи дурари. 53 Мушв’ин балин адашдиз, чан бай Исайи: «Яв бай яшамиш шули гъузди», гъапи вахтна сагъ гъашиб аьгъю шулу, ва дугъан вари хуландар Исайихъ хъугънийи. 54 Му Ягьудияйиан Галилейиз гъафихъан Исайи улупу кьюбпи аьламат вуйи.

Югьан 5

1 Дидхъан саб цІиб вахтналан жугьдарин машквар улубкьуру ва Иса Ерусалимдиз гъягъюру. 2 Ерусалимдиъ Марччарин латар кІурушвахь, жугьуд чІалниинди «Вифезда» (Рягьимлувалин хал) кІуру саб кахъру гьямам хьайи. Дидихьна элеркнайи гъвандин мурхьлар ккудукьнайи хьуб дегьлиз гъюрайи. 3 Гьадму хьубиб дегьлизарра ацІну фалиж кайидар ва майифдар ади шуйи. Дурар, фила шид ккибикьуз хъюгъруш, гьаддиз ккилигури шуйи. 4 Фицики Аллагьдин малайикди бязи вахтари, гъюри, шид ккибикьуйи ва, шид ккибикьхъан сифте вуди фуж учІвиш, гьадму, чак фициб уьзур кашра, сагъ шули гъахьну. 5 Мушваъ сумчІурна миржид йисан иццурайи сар кас айи. 6 Исайиз думу дахънади дяркъну ва хайлин вахтна иццурайиб аьгъяди, дугъхьан гьерхру: – Сагъ хьуз ккундунуз? 7 – Йиз аьхюр, – жаваб туву иццурайири, – ккун даршулин. Аммаки, шид ккибикьубси, штук кучІвуз узуз кюмек апІру адми шуладар. Хъа узу кучІвуз хъюгъиган, узутІан ухди душвак жарар кучІвнади шула. 8 – Гъудужвну, яв ахинра гъадабгъну, гъарах, – кІуру дугъаз Исайи. 9 Ва думу дишлади сагъ духьну, чан ахинра гъадабгъну, гъягъюру. Думу султ йигъ вуйи. 10 Гьаддиз жугьдарин гьюкумдрари сагъ гъаши касдиз кІуру: – Гъи султ йигъ ву, гьаддиз Къанундиинди ахин гъабхуз ихтияр адар! 11 – Узу сагъ гъапІури: «Ахин гъадабгъну гъарах», гъапунзуз, – гъапи дугъу. 12 – Хъа фуж ву думу Адми, увуз: «Ахин гъадабгъну, гъарах», гъапир? – гьерхру дурари. 13 Сагъ духьнайириз, Думу фуж вуш, аьгъдайи, фицики гьадушваъ аьхючІвеъ халкь ади, Иса гьадраригъ рякъюри имдайи. 14 Хъасин Исайи, гьадму кас Чаз Аллагьдин хулаъ алахъиган, дугъаз гъапи: – Магьа лиг, уву сагъ гъахьунва, сарун гунагь ляхнар мапІан, даршиш митІан артухъ пис гьял хьибдияв. 15 Му касди гьамус душну, учв сагъ гъапІур Иса ву, кІури, жугьдарин гьюкумдрариз хабар дебккру. 16 Жугьдарин гьюкумдрар, Исайи му ляхин султ йигъан гъапІну кІури, Дугъахъ хъергуз хъюгъру. 17 Хъа Исайи дурариз жаваб тувру: – Йиз Адаш гьарган лихури шулу, Узура лихураза. 18 Жугьдарин гьюкумдрари Иса, неинки Дугъу султ йигъандин къайда гъючІюбгъну кІури, хъа гьацира, Аллагьдин Бай вуза, кІури, Учв Аллагьдихъди барабар апІурайиган, айибтІан артухъ Думу йивну йикІуз чпин кьаст ижми апІуру. 19 Исайи дурариз кІуруки: – Гьякьлу вуйи гьякь кІуразачвуз: сабан Чан Адашди гьапІраш дярябкъкьан гагьди, Балхьан Чан-Чаинди фукІара апІуз шулдар. Адашди гьапІраш, Балира гьадму апІура. 20 Адашдиз Бай ккунду, ва Дугъу Чав апІурайидар вари Бализ улупура. Дугъу Бализ бегьем артухъ улупиди ва учву мегьел мюгьтал хьуз ккимичва. 21 Адашди гъачІидар чІиви апІруси ва дурариз уьмур тувруси, гьаци Балира Чаз ккунириз уьмур тувди. 22 Адашди саринра суд апІурадар; 23 варидари, фици Адашдин гьюрмат уьбхюраш, гьаци Балинна гьюрмат уьбхбан бадали Дугъу вари суд апІру гьюкум Балихьна тувна. Шли Балин гьюрмат уьбхюрадарш, гьадгъу Думу гьау Адашдинра гьюрмат уьбхюрадар. 24 Гьякьлу вуйи гьякь кІуразачвуз: шлиз Йиз Гаф ебхьураш ва фуж Узу Гьаурихъ хъугъраш, гьацири зат ккудудубкІру уьмур гъазанмиш дапІна, дицир суддин улихь дийигъидар. Дицир гьамустІанра, дукІну хьувалихьан, гьаргандин уьмриъ учІвна. 25 Гьякьлу вуйи гьякь кІуразачвуз: вахт улубкьура – сану улубкьнура ву! – дийихнайидариз Аллагьдин Балин дих ебхьиди, ва гъеебхьдар гьаргандин уьмрихьна чІиви хьиди. 26 Фици Адаш уьмрин булагъ вуш, гьаци Байра Дугъу уьмрин булагъ гъапІну. 27 Ва Дугъу Бализ суд апІру гьюкумра тувна, фицики Думу Инсаниятдин Бай ву. 28 Учву мид’ин мюгьтал махьанай, вари накьварик кайидариз Аллагьдин Балин сес ебхьру вахт улубкьура ва накьвариан удучІвиди. 29 Фужари уж’вал гъапІнуш, дурар яшайишдиз чІиви духьну удучІвиди; фужари писвал гъапІнуш, дицдар чпин суд апІбан бадали удучІвиди. 30 Узхьан Йиз хусуси гьюкмиинди фукІа апІуз шулдарзухьан. Узу кІураза Узуз Аллагьдихьан ебхьурайиси ва Йиз суд дишуб ву, фицики Узу Узуз ккуниб апІурадарза, хъа Узу Гьауриз ккуниб апІураза. 31 Эгер Узу Узкан адмийириз ктибтури гъашиш, дурар Узухъ хътругъубра мумкин ву. 32 Аммаки Узкан ктибтру жара Шагьид а, ва Узуз аьгъязуз, Дугъу Узкан ктибтурайиб гьякь вуйивал. 33 Учву Ягь’яйихьна адмийир гьаунчва, ва дугъура вари гьамрар гьякь вуйиб тасдикь гъапІну. 34 Хъа Узу адмийирин шагьидвалилан асиллу дарза: Узу му вари, учву уьрхбан бадали кІураза. 35 Ягь’я убгури акв туврайи чирагъсир вуйи, ва учву дугъан акв шадвалиинди цІиб вахтназтІан кьабул гъапІундарчва. 36 Амма Узуз, Йиз гьякьнаан Ягь’яйи гъапивалтІан хъанара мюгькам шагьидвал азуз, фицики, Адашди Узуз апІин дупну, Узу апІурайи ляхнари, Узу Адашди гьаур вуйиб тасдикь апІура. 37 Гьаци Узу гьау Адашдира Узкан шагьидвал апІура. Хъа учвуз Дугъан дих затра гъеебхьундарчвуз, ва учвуз Думу затра гъяркъюндарчвуз. 38 Ва учву ичв кІваъ Дугъан Гаф уьбхюрадарчва, фицики Дугъу гьау Узухъ хъугърадарчва. 39 Учву Гирами китабар дурхну ахтармиш апІурачва, фицики дурариан гьаргандин уьмур гъазанмиш апІуз шулу кІури, фикир апІурачва, хъа Гирами китабариъ Узкан дибикІна. 40 Гьаци вушра, зат ккудудубкІру уьмур учвуз хьпан бадали, учвуз Узухьна гъюз ккунди адарчвуз. 41 Узуз инсанарин тярифар лазим дарзуз. 42 Хъа Узуз учву аьгъюдар вузуз ва учвуъ учвуз Аллагьдихьна вуйи масанвал адрувалра аьгъязуз. 43 Узу Йиз Адашдин ччвур бадали учвухьна дуфназа, хъа учву Узу кьабул апІурадарчва, хъа эгерки сар жара фуж-вуш, чан чаинди чан тярифар апІури учвухьна гъафиш, кьабулра апІурчва. 44 Учву сар-сарин тярифар апІури, сар Аллагьдихьан вуйи тярифарихъ хъергну даршлуган, учву Узу фици кьабул апІидичва? 45 Узу Адашдин улихь учву тахсир апІур, кІури, фикир мапІанай. Учву тахсиркрар апІрур Муса хьиди, фицики учву гьадгъуин умудлу вучва! 46 Эгер учву дугъридан Мусайихъ хъугърайиш, Узухъра хъугърийчва, гьаз гъапиш дугъу Узкан дибикІна. 47 Хъа эгер учву дугъу гъидикІдарихъ хъугъри адарш, Йиз гафарихъ фици хъугъдичвахъа?

Югьан 6

1 Гьамдихъан Иса Галилей гьюлин тмуну гъирагъдихъ хъайи Тивериад шагьрин аьтрафарихъна гъягъюру. 2 Исайихъди гизаф халкьра гъюри гъахьну, гьаз гъапиш дурариз Дугъу аьзарлуйириз гъапІу аьламатар дяркънайи. 3 Хъа Иса, дагъдиина за духьну, Чан ученикарин кьялаъ деъру. 4 Жугьдарин Пасхайин машквар багахь шулайи. 5 Исайи, улар за гъапІиган, Чахьна хайлин халкь гъюради дябкъну, Филипдиз кІуру: – Мурариз ипІуз ухьу гьамкьан уьлер наънан гъадагъухьайкІан? 6 Исайи му, Филип ахтармиш апІузди гъапиб вуйи, фицики Дугъаз гьапІруш улихьмиди аьгъяйи. 7 – Дурариз варидариз уьлин саб кьацІкьан ккубкьбан бадали, уьл гъадабгъуз кьюдварж динар пулра гьудрубкІур, – жаваб туву Филипди. 8 Исайин жара ученик Петрин чве Андрейи кІуру: 9 – Мушваъ сар балихь хьуб мухан уьлна кьюб балугъ хьа, хъа гьамукьан халкьдиз дурарикан фу шулухъа? 10 – Дурарихьди деуз гъитай, – гъапи Исайи. Думу йишв’ин гизаф укІ алийи ва дурар гьадушв’ин деъру. Дурарин кьадар хьуд агъзуртІан артухъ вуйи. 11 Исайи Аллагьдиз баркаллагь дупну, уьлер гьудутІну, деънайидариз тувру. Ва балугъарра гьаци дапІну, гьардиз чаз ккунибкьан тувру. 12 Адмийир ацІбалан кьяляхъ, Исайи ученикариз кІуру: – Зяя дархьбан бадали, хъригъу кьацІар уч апІинай. 13 Дурари ипІуз хъюгъруган, хьуб уьл вуди, гьадрарихъан хъригъу кьацІар уч гъапІиган, йицІикьюб тавра шулу. 14 Исайи гъапІу му аьламат гъябкъиган, адмийири пуз хъюгъю: – Му Кас якьинди дюн’яйиз дуфну ккуни Гьадму Пайгъамбар ву! – 15 Адмийири Чакан гужниинди чпин паччагь апІуз ккунди айиб аьгъяди, Иса хъана, ялгъузди гъузбан бадали, дагълариз гъягъюру. 16 Хябяхъ шулади, Исайин ученикар гьюлихъна ктучІвуру. 17 МучІура шулайи, хъа Иса дурарихьна мегьел гъюри адайи. Дурар, люткейиъ эъну, гьюлин тмуну гъирагъдихъ хъайи Кафернагьумдиз рякъюъ учІвру. 18 Гужал микІ хъивну, гьюлиин лепйир ягъал-ягъал хьуз хъюгъру. 19 Гъирагъдихъан хьуб-йирхьуб километр манзилназ сирнав гъапІган, дурариз гьюлин лепйириланмина люткейихьна ликри гъюрайи Иса рякъюру ва гизаф гучІ шулу. 20 – Му Узу вуза, гучІ мапІанай! – кІуру Исайи. 21 Дурариз Думу люткейиъ итуз ккун гъабхьнийи, аммаки, фу лигурва, дурар чпи гъярайи гъирагъдихъна хъуркьнади шулу. 22 Хъайигъан гьюлин тлихъан гъирагъдихъ гъузу халкьдин гьюлин гъирагъдихъ саб люткетІан хътарди хьуб ва дидиъра ученикар эъну гъушуб, хъа Иса, кІуруш, дидиъ эдреуб кІваин шулу. 23 Гьадмуган Тиверияйиан гъафи сякьюдар люткйир, Агъайи баркаллагь дупну, халкьди уьл гъипІу йишвахьна гъюру. 24 Мушваъ я Иса, я Дугъан ученикар адруб гъябкъиган, дурари люткейиъди, Иса агури, Кафернагьумдиз сирнав апІуру. 25 Иса гьюлин тмуну гъирагъдихъ дагну, Дугъаз дурари кІуру: – Мялим! Уву мина фила гъафунва? 26 Исайи дурарин суалназ кІуру: – Гьякьлу вуйи гьякь кІуразачвуз: Йиз аьламатнан лишнарин учву гъавриъ а кІури, Узу агурадарчва, хъа Узу туву уьли учву тухъ апІбаз лигну агурачва! 27 Ухди пуч шлу му дюн’яйин хураг бадали ваъ, хъа гьаргандин уьмур тувру ва зат пуч даршлу хураг бадали чалишмиш йихьай. Гьациб уьмур учвуз Инсаниятдин Бали тувра, фицики ихь Адаш Аллагьди Инсаниятдин Бай Чан кьудратниинди, печать йивну, лишанламиш дапІна. 28 – Аллагьдиз хуш шлу ляхин апІбан бадали, учу гьапІну ккун? – пну, гьерху дурари. 29 Исайи жаваб туву: – Магьа Аллагьдиз ккуниб: Дугъу Гьаурихъ хъугъай. 30 – Уву Дугъу Гьаур вуш, учу Увухъ хъугъбан бадали, Уву учуз фициб аьламат улупидива? – гьерхру дурари. – Уву гьапІдива? 31 Ич ата-бабйири ичІи чюлиъ манна ипІуйи. Мидкан Гирами китабариъра гьамци дибикІна: «Дугъу дурариз ипІуз уьл аьршариан гьапІну». 32 Исайи жаваб туву: – Гьякьлу вуйи гьякь кІуразачвуз: учвуз аьршариан уьл гьапІур Муса дар. Учвуз гьякь уьл аьршариан туврайир Йиз Адаш ву. 33 Фицики Аллагьдин уьл – аьршариан дуфну, му дюн’яйиз уьмур бахиш апІурайи Гьадму Кас ву. 34 – Я ич аьхюр, – кІуру дурари, – учуз гьациб уьл гьамусдихъантина гьаргандиз чава! 35 Исайи дурариз кІуру: – Узу вуза уьмур хурайи уьл. Фуж узухьна гъюруш, затра гашди гъузидар. Узухъ хъугънайир гьич затра харгидар. 36 Хъа Узу учвуз улихьнасира дупнайзачвуз, учвуз Узу рякъюрачвуз кІури, хъа учву хъугъри гъахьундарчва. 37 Йиз Адашди Уз’ина аманат гъапІу гьарсар кас Узухьна гъиди ва, Узухьна гъафир, Узу гьич затра хътІурккидарза. 38 Фицики Узу аьршариан, Узуз ккуниб апІуз ваъ, хъа Узу Гьаурин ният тамам апІуз дуфнайир вуза. 39 Хъа магьа Узу Гьаурин ният – Чав Уз’ина аманат гъапІдарикан гьич саркьан Узу дургуз гъидритуб, хъа гъияматдин йигъан дурар вари уьмрихьна кьяляхъ апІуб. 40 Даршуз магьа Йиз Адашдиз ккундайиб: Чан Бай рякъруриз ва Дугъахъ хъугъру гьарсар касдиз гьаргандин уьмур хьуб. Узу думу гъиямат йигъан гьаргандин уьмрихьна хътаидиза. 41 Исайи: «Узу уьл вуза, аьршариан дуфнайи», – гъапну, кІури, жугьдарик иц кабхъру. 42 – Му Юсуфдин бай Иса даринхъа? – кІуйи дурари. – Ухьуз Мугъан адашна дада аьгъдарди айинхъа? Гьаз Мугъу мици: аьршариан гъафир Вуза, кІурахъа? 43 – Иц макабхъанай, – кІуру дурариз Исайи, – 44 Узухьна, Узу гьау Адашди гъюз гъидритиш, сарихьанра гъюз хьибдар, хъа гъафир, Узу гъиямат йигъан учв уьмрихьна хътаидиза. 45 Пайгъамбрарин Гирами китабарик дибикІна: «Аллагьди дурариз варидариз улупиди». Гьарсар Адашдихъ хъпехъур ва Гьадгъухъан аьгъю гъапІур Узухьна гъюру. 46 Анжагъ Аллагьдихьан ГъафиризтІан гъайри, гьеле гьич саризра Адаш гъяркъюндар. 47 Гьякьлу вуйи гьякь кІуразачвуз: фуж хъугъраш, гьадгъу гьаргандин уьмур гъазанмиш дапІна. 48 Узу уьмрин уьл вуза. 49 Ичв ата-бабйири ичІи чюлиъ чпиз Аллагьди гьапІу манна ипІури гъахьну ва имбударси дурарра гъийихну. 50 Хъа аьршариан гъафи Уьл дициб дар: шли Думу гъипІиш, дицир затра йикІидар. 51 Узу вуза аьршариан гъафи чІиви уьл. Шли думу Уьл гъипІиш, гьадму зат ккудудубкІрубкьан яшамиш хьиди. Узу туврайи уьл – му йиз беден вуйиз. Узу думу, дюн’яйин уьмур бадали, тувраза. 52 Гьадмуган жугьдари: – Дугъхьан ухьуз ипІуз Чан беден фици тувуз хьибди?! – кІуйи, ва дурарин арайиъ яман гьюжат абхъру. 53 Исайи дурариз жаваб тувру: – Гьякьлу вуйи гьякь кІуразачвуз: эгер учву Инсаниятдин Балин беден дирипІиш ва Дугъан ифи дурубхъиш, учвуз уьмур рубкьидар. 54 Йиз беден ипІруриз ва Йиз ифи убхъруриз гьаргандин уьмур хьибди, ва Узу дицир гъиямат йигъан уьмрихьна чІиви апІидиза. 55 Йиз беден – магьа гьякьди вуйи хураг, Йиз ифи гьякьди вуйи убхъруб ву. 56 Шли Йиз беден ипІураш ва Йиз ифи убхъураш, гьадму Узуъ яшамиш хьиди, хъа Узу дугъаъ яшамиш хьидиза. 57 Узу гьау чІиви Адашдиантина Узу фици яшамиш шулаш, гьаци Йиз беден ипІурайидарра Уз’антина яшамиш хьиди. 58 Аьршариан гъафи Уьл магьа гьамциб ву. Хъа думу ичІи чюлиъ ичв ата-бабйири гъипІу завариан гъафи маннасиб дар – хъасин, гьар чан аьжалниинди, дурарра гъийихнийи. Хъа шли аьршариан вуйи гьаму Уьл ипІураш, гьадгъу зат ккудудубкІру уьмур хъапІди. 59 Гьамци аьгъювалар улупуйи Исайи Кафернагьумдин жугьдарин мистаъ. 60 Дугъан ученикарикан гизафдари, му гафар гъеерхьиган, кІури гъахьну: – Мурар фу аьжайиб гафар ву? Мурар шлихьан аннамиш апІуз шул! 61 Хъа Исайи, Чан ученикар нарази вуйиб аьгъяди, дурариз гъапи: – Йиз гафари учвук гучІ капІрайин? 62 Хъа учву, Инсаниятдин Бай Учв наънан гъафнуш, гьадина за шули рякъруган гьапІдичва? 63 Беден фукІа дар, анжагъ Рюгь ву уьмур хурайир. Узу учвуз кІурайи гафариъ уьмрин Рюгь а. 64 Аммаки ичв арайиъ хътругърударра а. ИкибаштІан, Исайиз гьеле дюн’я ккебгъайиз аьгъяйи: фужар Чахъ хъугъдайиш ва Учв шли масу тувуйиш. 65 Дугъу давам апІуру: – Гьаддиз учвуз гъапнийза Узу: анжагъ шлиз Адашди улупнаш, гьадму Узухьна гъиди. 66 Гьаддихъан Исайин ученикарикан гизафдар Дугъхъан хътакнийи ва Дугъахъди шули гъахьундайи. 67 Гьадмуган Исайи Чан йицІикьюрид ученикарихьан гьерхру: – Белки учвузра Узхъан хътакуз ккунди ашулчвуз? 68 – Агъа, – жаваб туву Симон Петри, – учу шлихьна гъягъидихъа? Зат ккудудубкІру уьмур тувру гафар Увухь хьавухь. 69 Гьамус учу хъугърача ва аьгъячуз, Уву Аллагьдин Гирамир вуйиб. 70 – Узу дайкІана учву йицІикьюридра ктагъур? – гъапи дугъаз жаваб вуди Исайи. – Хъа учвкан сар иблис ву. 71 Исайи му Искариотдиан вуйи Симондин бай Ягьудайикан кІурайиб вуйи. Дугъу, учв йицІикьюрикан сар вуйири, хъасин Иса масу тувнийи.

Югьан 7

1 Дидхъантина Иса Галилей уьлкейиъ лицури гъахьну, гьаз гъапиш Дугъаз Ягьудия уьлкейиз гъягъюз ккунди адайи, фицики душваъ Думу жугьдарикан бязидариз йикІуз ккунди айи. 2 Гьадму вахтна жугьдарин Пажарин машквар багахь шулайи. 3 Ва гьаддиз Исайин чвйири дугъаз кІуру: – Уву мушв’ан, Уву апІурайи ляхнар Яв ученикаризра рякъруси, Ягьудия уьлкейиз машквраз гъарах. 4 Сарира чан гьунарар жиниди апІури шулдар. Гьарсариз ккунду чибкан адмийириз аьгъю дубхьну. Хъа Уву гьацисдар гьунарар апІураваки, гъит Увкан вари дюн’яйиз аьгъю ибшри! 5 Дугъан чвйиркьан Дугъахъ хъугъри гъахьундар. 6 Исайи дурариз кІуру: – Йиз вахт мегьел гъафундар, хъа ичв фуну вахтна вушра хай шуличв. 7 Му дюн’яйихьан учву даккун апІуз хьибдар, хъа Узу даккунди ву, фицики Узу дидин вари ляхнар писдар, гунагьвалиндар ву, кІураза. 8 Хъа машквраз учву гъарахай. Узу думу машквраз гъягъидарза, Йиз вахт мегьел улубкьнадар. 9 Гьамци дупну, Иса Галилей уьлкейиъ гъузру. 10 Саки Чан чвйир машквраз гъушхъан, Исара жиниди гьадина гъягъюру. 11 Жугьдарин гьякимари машквран вахтна Иса агуйи. «Наан а гьадму Адми?» – гьерхуйи дурари. 12 Дугъкан халкьдин арайиъ гизаф гьюжатар ахьнайи: садари, Думу ужур ву, хъа тмундари, Дугъу халкь алдатмиш апІура, кІуйи. 13 Амма гьюкумдрарихьан гучІбу, Дугъкан ачухъди сарира кІурдайи. 14 Иса Аллагьдин хулан гьяятдиз дуфну, аьгъювалар улупуз хъюгъган, машквран гьацІ вахт дубшнайи. 15 Жугьдар мид’ин мюгьтал духьнайи. – Мугъаз наънан гьамкьан аьгъяйкІан? – кІуйи дурари. – Дугъу наанкІа дурхнадар, аьхир. 16 Исайи гъапи: – Йиз аьгъювалар Йиздар дар, хъа Узу Гьауриндар ву. 17 Шлиз Дугъан ният тамам апІуз ккундуш, гьацириз гьаму аьгъюваларикан аьгъю хьибди, дурар Аллагьдихьан вуш, даршиш Узу Йиз Узкан кІурайидар вуш. 18 Шли чан-чахьан кІураш, гьацири чаз хусуси ад гъазанмиш апІура. Хъа шли чав гьауриз ад гъазанмиш апІураш, гьацири дугъриди кІура, ва дугъан кІваъ кучІал адар. 19 Учвуз Къанун Мусайи тувну, гьаци даринхъа? Гьаци вушра, учвкан сарира Къанун тамам апІурадар. Узу фтин бадали йикІуз ккундучвуз? 20 – Уву амрихъан душнава! – жаваб туву гъварч духьнайидари. – Шлиз Уву йикІуз ккунди а? 21 Исайи дурариз жаваб вуди гъапи: – Узу саб аьламат улупайизра, учву вари мюгьтал духьначва. 22 Мусайи учвуз суннат апІин гъапну, дугъридан, думу Мусайихьан дар, хъа ата-бабйириланмина дуфнайиб ву, ва учву султ йигъанра кмиди суннат апІури шулчва. 23 Мусайин Къанун дючІрюбгъбан бадали, учву султ йигъанра адмийин суннат апІураш, Узу султ йигъан адми сагъ гъапІну кІури, Уз’ин хъял гьаз иливначва? 24 Зиълан лишнариинди суд мапІанай, суд апІинай дугъри вуйи суддиинди! 25 Ерусалимдиан вуйи бязи агьлари кІуйи: – Му ихь гьякимари йикІуз ккайи Адми даринхъа? 26 Лигайчва, Дугъу ачухъди аьгъювалар улупура ва сарира Дугъаз фукІара кІурадар. Мумкин ву, гьякимариз Думу дугъриданра Месигь вуйиб аьгъю гъабхьнушул? 27 Амма ухьуз, Гьадму Кас наънан вуш, аьгъяхьуз. Хъа Месигь гъафиган, саризра аьгъю хьидар, Думу наънан вуш. 28 Ва гьадмуган, Аллагьдин хулаъ аьгъювалар улупурайиган, Исайи аьхю сесниинди гъапи: – Узура аьгъячвуз, Узу наънан вушра, аьгъячвуз. Гьаци вушра Узу Узхьан гъафир дарза. Шли Узу гьаънуш, Гьадгъахъ хъугъуз хай шулу, аммаки Думу учвуз аьгъдарчвуз. 29 Хъа Думу Узуз аьгъязуз, фицики Узу Гьадгъухьан гъафир вуза ва Узу Гьадгъу гьаъну. 30 Гьадмуган дурариз Думу дисуз ккун шулу, амма сарира Дугъак кучундар, гьаз гъапиш Дугъан сяаьт дуфнадайи. 31 Халкьдикан гизафдар Дугъахъ хъугънийи ва дурари кІуйи: «Месигь гъафиган, Дугъхьан Гьаму КасдихьантІан артухъ аьламатар улупуз шулинхъа?» 32 Исайикан халкьдин арайиъ гьамцдар гафар-чІалар деерхьну, фарисйирина жугьдарин аьхюну маллйири Думу дисуз Аллагьдин хулан гъаравлар гьаъру. 33 Гьадму вахтна Исайи халкьдиз кІурайи: – СацІибсана Узу учвухъди гъуздиза, хъасин Узу мина Гьаурихьна хътакидиза. 34 Узухъ лицури хьидичва, хъа дихъидарчвуз, гьаз гъапиш учвхьан Узу наан шулуш, гьадина гъюз хьибдарчвухьан. 35 Жугьдари чпин арайиъ кІури гъахьну: – Думу, ухьхьан агуз даршлуси, наана гъягъюз ккайкІан? Белки Дугъаз, Грек уьлкейин шагьрариз душну, дурарин арайиъ яшамиш шулайи ихь агьалйириз вая грекариз аьгъювалар улупуз ккунди ашул гьа? 36 Дугъу ухьуз: «Узу агури хьидичва, хъа дихъидарчвуз», ва «Узу наан шулуш, гьадина гъюз хьибдарчвухьан», – гъапи гафариинди Мугъаз фу пуз ккунди айкІан? 37 Машкврин аьхиримжи, вартІан машгьур йигъан Исайи, гъудужвну, аьхю дихниинди кІуру: – Фуж дахаргнаш, гъит гьадму Узухьна гъюри! 38 Ва фуж Узухъ хъугъраш, гъит гьадгъу убхъри! БикІбариъ кІура: «Дугъан кІваан чІиви штарин нирар ахмиш хьиди». 39 Исайи гьамци Гирами Рюгьнакан гъапнийи. Думу Исайихъ хъугънайидариз рукьиди. Думу вахтназ Гирами Рюгь мегьел тувну адайи, гьаз гъапиш Иса сабан Аллагьдин аднаъ ахънадайи. 40 Му гафар гъеерхьиган, халкьдин арайиан сякьюдари кІуру: – Му дугъриданра Пайгъамбар ву. Хъа жарадари кІуйи: – Му Месигь ву! 41 – Галилей уьлкейиан Месигь гъюб мумкин вуйинхъа? – къаршуди кІуйи дурариз. – 42 Гирами китабариъ, Месигь Давудрин насликан ва Давуд бабкан гъахьи Вифлеем шагьриъ Думу бабкан хьиди, кІура. 43 Гьамци Исайин гьякьнаан халкьдин арайиъ гьюжат абхънийи. 44 Дурарикан бязидариз Иса дисуз ккун гъабхьнийи, аммаки сарира Дугъ’ина хил за гъапІундайи. 45 Хъа Иса дисуз гьау Аллагьдин хулан гъаравлар жугьдарин аьхюну маллйирихьна ва фарисйирихьна кьяляхъ хътакнийи. – Думу гьаз дидисну гъахундарчва? – гьерху дурари гьаъдарихьан. 46 – Гьадму Касдиси мегьел гьич сарира саб вахтнара кІури гъахьундар! – жаваб тувнийи гъаравлари. 47 – Гьаяман, Дугъу учвура алдатмиш гъапІуншалчву гьа? – гъапи дурариз фарисйири. – 48 Гьюкумдрарикан Дугъахъ гьич фужкІа хъугънинхъа? Ясана фарисйирикан фужкІа? 49 Дугъахъ хъугърудар Къанун аьгъдру авамар ву ва дурар Аллагьдин нянайикк ккайидар ву! 50 Хъа дурарин арайиъ улихьна вахтари Исайихьна гъафи Никодим кІуру кас айи, ва дугъу дурариз гъапи: 51 – Ихь Къанунди ихтияр туврайинхъа, сабан адмийихъ хъпебехъди ва дугъу ву тахсир гъапІнуш аьгъю дарапІди, дугъан суд апІуз? 52 – Гьаяман, увура Галилей уьлкейиан вушала гьа? – гъапи дурари. – Уву Гирами бикІбар аьгъю апІин ва яв уву гъавриъ ахъдива Галилей уьлкейиъ гьич сар пайгъамбарра бабкан дархьуб. 53 Ва дурар алдагъну хъасин хулариз гъягъюру.

Югьан 8

1 Хъа, Иса Елион дагъдиина гъягъюру. 2 ГвачІнин ухди Думу хъана Аллагьдин хулаъ ачмиш шулу. Дугъан багахь халкь уч хьуз хъюгъру ва Исайи, деъну, аьгъювалар улупуру. 3 Гьадму вахтна Къанундин мялимарина фарисйири Исайихьна, кьяппавал апІури гъидису дишагьли хуру ва думу халкьдин улихь дерккну, 4 дурари Исайиз кІуру: – Мялим! Гьаму дишагьли кьяппавал апІурайи вахтна дидиснайир ву. Му чан жилирихъди дарди, жарарихъди хъайи. 5 Мусайи чан Къанундиъ мицисдариин гъван уьлюбх дупна. Хъа Уву фу кІурава? 6 Му, Иса ахтармиш апІбан ва Дугъак тахсир кипбан бадали, саб багьна абгуз ккунди гьерхрайиб вуйи. Амма Исайи, ис алахъну, дурариз саб фикирра тутрувди, тІуб’инди жилиин фу-вуш бикІури гъахьну. 7 Исайи Чахьан гьерхри хътадакрайиган, кІул за дапІну, дурариз кІуру: – Учвкан шли затра гунагь гъапІундарш, гъит гьадгъу сарпирди му дишагьлийиина гъван гатІабхьри! 8 Ва хъана, Чан кІул ис дапІну, жилиин бикІувал давам апІуру. 9 Му гафар гъеерхьиган, аьхюдарилан хъюгъну, душв’ин алидар са-сарди гьудучІвну гъягъюру ва аьхириъ Исана гьадму дишагьли гъузру. 10 КІул за дапІну, Исайи дугъхьан гьерхру: – Эй дишагьли, увук тахсир кипрайидар наши? Уву сарикьан тахсиркар гъапІундарин? 11 – Сарикьанра, йиз аьхю кас, – пну, жаваб туву дугъу. – Узура уву тахсир апІурадарза; гъарах ва сану гунагь ляхнар мапІан, – гъапи Исайи. 12 Кьандиси халкьдихъди Иса хъана улхуру: – Узу му дюн’яйиз акв вуза. Фуж Узухъди гъахьиш, дицир мучІушнаъ улдугну хьидар, дицирихъди уьмрин акв хьибди. 13 – Уву Яв Увкан шагьидвал апІурава, – кІуру фарисйири. – Яв шагьидвал гьякьюб дар. 14 Исайи жаваб тувру: – Эгена Узу Йиз Узкан шагьидвал апІури удучІвураш, Йиз гафарихъ хъугъуз хай шулу, фицики Узуз аьгъязуз Узу наънан гъафнуш ва наана гъягъюраш. Хъа учвуз, Узу наънан гъафнуш ва наана гъягъюраш, аьгъдарчвуз. 15 Учву сар-сарин, инсанарин уьлчмейиинди суд апІурачва, хъа Узу саринра суд апІурадарза. 16 Эгерки Узу ичв суд апІуйишра, Йиз суд гьякьюб хьибдийи, фицики Узу сар дарза, Узухъди Узу гьау Адашра хъазухъ. 17 Хъа ичв Къанундиъра, кьюр касдин шагьидвалихъ хъугъуз хай шул, кІури дибикІнавучв. 18 Учу кьюр шагьид вуча: Узу ва Узу гьау Адаш. 19 – Хъа Яв Адаш наан аяв? – гьерху дурари. – Учвуз я Узу, я Йиз Адаш аьгъдарчвуз, – гъапи Исайи. – Эгер учвуз Узу аьгъяйиш, Йиз Адашра аьгъю шуйчвуз. 20 Му гафариинди Исайи, Аллагьдин хулан гьяятдиъ, садакьйир иврушван гъвалахъ дийигъну, аьгъювалар улупури, гъапнийи. Гьаци вушра Думу сарира гъидисундайи, гьаз гъапиш Дугъан сяаьт сабан улубкьнадайи. 21 Ва хъана Исайи гъапнийи: – Багарихьди Узу гъягъюраза. Учву Узу агуз хъюгъдичва, аммаки ичв гунгьариъди йихидичву. Узу гъушушваз, учвхьан гъюз хьибдар. 22 – «Узу гъушушваз учвхьан гъюз хьибдар», – гъапиган, Мугъан фу кІуру гаф вуйкІан? – кІурайи жугьдари чиб-чпигъ. – Дугъаз Учв йикІуз ккундайкІан дарш? 23 Исайи гъапи: – Учву исккан вуйи дюн’яйиан вучва, хъа Узу заълан вуза. Учву гьаму дюн’яйиан вучва, хъа Узу му дюн’яйиан дарза. 24 Узу учвуз гъапунзачвуз: «Гунгьариъди йихидичву!» Узу Гьарганур Аллагь вуйибдихъ эгер учву хътругъиш, учву вари гунгьариъди йихидичву! 25 – Гьаци вуйиган Уву Фуж вува? – гьерхру дурари. – Узу учвуз гьарган бинайиан кІурайи Гьадмунур вуза, – жаваб туву Исайи. – 26 Учвкан, Узхьан гизафдар пуз ва ичв суд апІуз шуйзухьан. Амма Узу, гьаму дюн’яйиз Узу Гьаурихьан фу гъеебхьнуш, анжагъ гьадму кІураза, хъа Узу Гьаур гьякьлу ву. 27 Дугъу Чан Адашдикан кІурайибдин дурар гъавриъ ахъундайи. 28 Исайи давам гъапІу: – Учву Инсаниятдин Бай за гъапІиган, гьадмуган аьгъю хьибдичвуз, Узу Гьарганур вуйиб, ва Узу Йиз Узлан фукІара дарапІруб: Узу анжагъ Адашди улупуб кІураза. 29 Хъа Узу Гьаур Узухьди хьа – Дугъу Узу сарди гъитнадар, фицики Узу гьарган Дугъаз ккуниб апІураза. 30 Гьаму гафарилантина Дугъахъ гизафдар хъугънийи. 31 Хъасин Исайи Чахъ хъугънайи жугьдариз гъапи: – Эгер учву Йиз Гаф учвуъ гъюбхиш, гьякьикьи Йиз ученикар хьидичва, 32 гьадмуган учвуз гьякьвал аьгъю хьибдичвуз ва диди учву азад апІиди. 33 – Учу Ибрагьимдин наслар вуча ва саб вахтнара саризра лукІар гъашидар дарча! – гъапнийи дурари. – «Азад хьидичва» кІуруган, гьамдиинди Увуз фу пуз ккунди авуз? 34 Исайи дурариз жаваб туву: – Гьякьлу вуйи гьякь кІуразачвуз: гьарсар шли гунагь апІураш, гунагьвалин лукІ ву. 35 ЛукІ гьарган (девлетуйин) хизандиъ яшамиш шули гъузидар, хъа бай душваъ яшамиш гьарган хьиди. 36 Фила учвуз Бали азадвал тувиш, анжагъ гьадмуган учву азад адмийир хьидичва. 37 Учву Ибрагьимдин тум вуйиб Узуз аьгъязуз, гьаци вушра учвуз Узу йикІуз ккундачвуз, фицики Йиз Гаф учвуъ убчІвнадар. 38 Учвуз Йиз Адашдихь гъябкъюбдикан кІуразачвуз, хъа учву учвуз ичв адашдикан гъеебхьуб тамам апІурачва. 39 – Ич адаш – Ибрагьим! – жаваб туву дурари. Исайи дурариз кІуру: – Эгена учву Ибрагьимдин чан гьякь баяр вуйиш, учву Ибрагьимдиси апІрийчва. 40 Хъа учвуз Узу йикІуз ккундачвуз. Чаз Аллагьдикан деебхьнайи гьякьвал учвуз улупурайи Гьадму Адми йикІуз ккундачвуз! Гьамци гъапІнийинхъа Ибрагьимди?! 41 Ваъ, учву ичв адашдиси апІурачва! – Учу Къанундиинди вуйи баяр вуча! – наразивалиъ ахъу дурар. – Ич сар адаш вуйич – Аллагь! 42 Исайи дурариз жаваб туву: – Эгер ичв адаш Аллагь вуйиш, учвуз Узу ккунди хьидийчвуз, фицики Узу Аллагьдихьан гъафир вуза ва Гьадгъахьна гъягъюраза. Узу Узхьан дуфнадарзаки – Гьадгъу Узу гьаъну. 43 Учву Йиз Гаф кьабул апІурадарчва? 44 Ичв адаш иблис ву, ва учву ичв адашдин интІи тІулар тамам апІуз шад вучва. Хъа думу гьарган адмийир пуч апІрур ву, ва дугъаз гьякьвал душман ву, гьаз гъапиш дугъаъ гьякьвал адар. Дугъу кучІал апІурайиган, кучІал дугъан багъри чІал ву, гьаз гъапиш думу кучІлях ву ва кучІларин адаш ву. 45 Хъа Узу учвуз гьякь кІуруган, учву Узухъ хъугърадарчва. 46 Учвкан шлихьан Узу, гунагьвал апІурава, кІури, дисуз шул? Ва эгер Узу учвуз гьякь кІураш, гьаз учву Узухъ хъугърадарчва? 47 Фуж Аллагьдинур вуш, гьадму Аллагьдин гафарихъ хъпехъура. Учву Аллагьдин даруган, гьаддиз учву Узухъ хъпехъурадарчва. 48 – Дюзди кІура учухь: Уву самариялужви вува ва амрихъан душнайир вува, – гъапи Дугъаз жугьдари. 49 Исайи жаваб туву: – Узу амрихъан душнадарза: Узу Йиз Адашдин гьюрмат уьбхюраза, хъа учву Узу нянайиз хурачва. 50 Узу Узуз аднахъ хъергнайир дарза, Жарар а – Гьадмунур ву хъергнайир ва суд АпІрур. 51 Гьякьлу вуйи гьякь кІуразачвуз: шли Йиз Гаф чаъ гъюбхиш, аьсрариъ гьацириз аьжал рябкъидар. 52 – Магьа учуз гьамус якьинтІан аьгъю гъабхьунчуз, Уву амрихъан душнайир вуйиб, – жаваб туву дурари. – Ибрагьим гъакІну, пайгъамбрарра гъийихну. Хъа Уву: «Шли Йиз Гаф чаъ гъюбхиш, аьсрариъ гьацириз аьжал рябкъидар!» кІурава. 53 Дугъриданна дукІнайи ич аба ИбрагьимтІан Уву артухъур вуна? Ясана – гъийиху пайгъамбрартІан? Хъа Уву Фуж вуди гьисаб апІурава? 54 Исайи жаваб туву: – Эгер Узу Йиз ад апІураш, Йиз ад фукІара дар. Хъа Узу Йиз Адашди адлу апІура – учву ичв Аллагь вуйич КІурайири. 55 Учвуз Думу гьич саб вахтнара аьгъюр дайчвуз, хъа Узуз Думу аьгъязуз. Эгер Узуз Думу аьгъюр дарзуз, гъапнийиш, Узура учвусир кучІлях вуди гъахьнухьидийи. Хъа Узуз Думу аьгъязуз ва Узу Дугъан гафниин алза. 56 Ичв аба Ибрагьим Узу дюн’яйиз гъюру йигъ рябкъидиз пну, шадвали ацІру. Дугъаз му йигъ гъябкъну ва шадра гъахьну. 57 – Яв сабан хьуцІур йискьан дубхьнадарив, хъа Увуз Ибрагьим гъяркъюнвуз?! – чІигъар апІуз хъюгъю жугьдари. 58 Исайи жаваб туву: – Гьякьлу вуйи гьякь кІуразачвуз: Ибрагьим хьайиз Узу Айир ва Вуйир вуза. 59 Гьадмуган дурар, Исайиз йивуз, гъванарихъан хъчІихуру. Саки Иса гьитІикІуру ва гьадрарин кьялгъянтина Аллагьдин хул’ан удучІвуру.

Югьан 9

1 Рякъди гъягъюрайи Исайиз, бабкан гъашихъанмина кур вуйи сар кас рякъюру. 2 – Мялим, му гьаз кур вуди бабкан гъахьну? – гьерхру Дугъхьан ученикари. – Шли гунагь гъапІну: мугъу чав, даршиш мугъан абйир-бабари? 3 – Я мугъу, ясана мугъан абйир-бабари гунагь ляхин гъапІундар, – жаваб туву Исайи. – Мугъан курвал гьаддиз вуки, Аллагьдин кьувват гьаддиинди улупбан бадали. 4 Сабан йигъ имиди ухьу Гьадгъан, Узу Гьаурин ляхнар дапІну ккунду. Гьамус йишв хьибди, гьадмуган сарихьанра лихуз хьибдар. 5 Сабан Узу дюн’яйиъ имиди, Узу дюн’яйиз акв вуза. 6 Гьамци дупну, Исайи жил’ина туту гатІабхьну, шурш ругдик кибикьну, гьадму батІур, кур вуйирин уларикан ктатуру 7 ва кІуру: – Душну Силам (му «гьаънайир» кІуру гаф ву) дагрик яв маш жибкІ. Думу гъягъюру, жикІуру ва, рябкъюз хъюгъну, хътакуру. 8 Думу садакьа ккун апІури дяркънайи дугъан гъуншйири ва жара адмийири кІури гъахьну: – Фици? Му гьаму адми, садакьа ккун апІури деънайир даринхъа? 9 – Ав, му гьадму ву, – жаваб тувуйи садари. – Ваъ, думу гьаци, гьадгъахъна гъушур ву, – кІуйи жарадари. – Му гьякьди узу вуза, – гъапнийи чав гьадму адмийи. 10 – Хъа увуз фици рябкъюри гъабхьунвуз? – гьерху дурари. 11 – Иса ччвур али сар адмийи йиз уларикан батІур кадатну, «Душну Силам дагрик яв маш жибкІ», гъапунзуз. Узу гъушунза, гъижибкІунза ва рябкъюз хъюгъюнзуз, – жаваб туву дугъу. 12 – Наши Думу? – гьерху дурари. – Аьгъдарзуз, – гъапи сагъ гъашири. 13 Гьадму адми, улихьнаси кур вуйир, фарисйирихьна хъади гъюру. 14 Хъа Исайи курин улар сагъ гъапІу йигъ султ йигъ вуйи. 15 Фарисйирира дугъхьан, дугъан улар фици сагъ гъахьнуш, гьерхру. – Дугъу йиз уларикан батІур ктатну, узу машар гъижикІунза ва гьамус рябкъюразуз, – жаваб туву дугъу. 16 – Думу Адми Аллагьдихьан хьуз мумкин дар, гьаз гъапиш Дугъу султ йигъандин аьдат уьбхюрадар, – кІури, гьадмуган аьрз гъапІу фарисйирикан садари. – Гунагькар касдихьан мицдар аьламатар апІуз шулинхъа? – кІуйи тмундари. Ва гьамци, фарисйирин арайиъ гьюжат абхъру. 17 Курди гъаширихьан хъана гьерхру: – Уву кІурава, Дугъу увуз рябкъювал тувну. Яв хиялиан Думу Фуж ву? – Пайгъамбар, – жаваб туву дугъу. 18 Жугьдарин агъсакълариз адми кур вуди хьувалихъ ва дугъахьна рябкъювал кьяляхъ гъювалихъ гьапІнура хъугъуз ккунди адайи. Гьаддиз рябкъюз хъюгъюрин абйир-бабариз дих дапІну гьерхру: 19 – Му ичв бай вуйин? Учву кІурачва, думу кур вуди бабкан гъахьну. Хъа фици дугъаз гьамус рябкъюра? 20 – Учуз му ич бай вуйиб аьгъячуз ва кур вуди бабкан гъахьибра аьгъячуз, – жаваб туву абйир-бабари. – 21 Хъа гьамус дугъаз фици рябкъюраш ва шли дугъаз рябкъювал тувнуш, гьамунуб учуз аьгъдарчуз. Чахьан гьерхай. Думу аьхюр ву, чахьан ктибтуз шулуки. 22 Абйир-бабари, жугьдарин гьякимарихьан чпиз гучІруган, гьамциб жаваб тувнийи. Фицики дурари, Иса Месигь ву кІури хъугърур гьарсар мистхьан ярхла апІуз кьарар адабгънайи. 23 Гьаддиз дугъан абйир-бабари: «Сарун думу аьхюр ву, чахьан гьерхай», – гъапнийи. 24 Ва магьа кьюбпи ражарира, кур вуди гъаши адмийиз дих дапІну, дугъаз кІуру: – ГьякьтІан пидарза дупну, ху апІин! Учуз аьгъячуз Гьадму Кас гунагькар вуйиб. 25 – Узуз Думу гунагькар вуйин-дарин аьгъдарзуз, – жаваб туву дугъу. – Саб аьгъязуз: узу кур вуйза, хъа гьамус рябкъюразуз. 26 – Дугъу увкан гьапІну? – хъана гьерху дурари. – Дугъу яв улар фици арццну? 27 – Узу учвуз гъапунзачвуз, хъа учвуз хъпехъуз ккун гъабхьундарчвуз, – жаваб туву дугъу. – Учвуз сабансана хъпехъуз ккунди айчвуз? Гьаяман, учвузра Дугъан ученикар хьуз ккундашалчвуз-гьа? 28 – Дугъан ученик уву вува-гьа, – кІури хъжагъуру дурар дугъаз. – Хъа учу Мусайин ученикар вуча. 29 Учуз Аллагь Мусайихъди гъулхуб аьгъячуз, хъа Думу наънан гъядяхъюр вушра, аьгъдарчуз. 30 – Мюгьтал шлу ляхин вуки, учвуз Думу наънан вуш аьгъдарди хьуб, хъа Дугъу узуз рябкъювал тувунзуз, – жаваб вуди гъапи думу адмийи. 31 – Хъа ухьуз аьгъяхьуз Аллагь гунагькрарихъ хъпебехъруб, хъа анжагъ гьадрарихъди хъа Думу: Чав ккун гъапІдарихъди ва Чан ниятар тамам апІрударихъди. 32 Дюн’я ккебгъхъанмина гъеебхьуб дархьуз, сар шли-вуш бабкан шлугантІан кур вуйириз рябкъювал тувуб. 33 Эгер Думу Аллагьдихьан гъафир дайиш, Дугъхьан фукІара мициб апІуз хьибдайи! 34 – Уву, вари гунгьариъди бабкан гъашири, гьамус учуз улупурана! – кІури, вари дугъ’ина алжагъуру ва думу утІурккуру. 35 Исайиз думу утІурккуваликан аьгъю шулу ва, дагну, гьерхру: – Уву Инсаниятдин Балихъ хъугърана? 36 – Йиз аьхюр, йип Думу Фуж вуш, узу Дугъахъ хъугъдиза, – гъапи дугъу. 37 – Увуз Думу гъяркъюнвуз ва магьа Дугъахъди гафарра апІурава, – кІуру дугъаз Исайи. 38 – Хъугъурза, Агъа! – дупну, думу Дугъан улихь, кьамкьариина ис духьну, икрам апІуру. 39 Исайи гъапи: – Узу му дюн’яйиз дярябкърайидариз рябкъри дупну, хъа рябкъюрайидар кур хьпан бадали, суд апІуз дуфнайир вуза. 40 Исайин багахь дугъужвнайи фарисйири Дугъаз кІуру: – Саки Уву учура кур вуйидар гьисаб апІурадарва аьхир? 41 Исайи жаваб туву: – Эгер учву кур вуйидар вуйиш, учву апІурайи гунгьариъ ичв тахсир адархьидийи; хъа учву кІурачва: «учуз рябкъюрачуз», гьаддиз ичв гунагь учв’ин гъубзра.

Югьан 10

1 – Гьякьлу вуйи гьякь кІуразачвуз: фуж марччаринишваъ урчІариан дарди, фици-вуш жараси учІвруш, думу тІафал ва тІарашчи ву. 2 Хъа фуж урчІарианди учІврур, гьадму марччарин лижан габан ву. 3 Гъаравли дугъаз урар арццру. Марччар дугъан дихнахъ хъпехъуру. Дугъу чан марччариз ччвурариинди кІуру ва чІатинди адауру. 4 Дугъу чандар вари адаъган, думу дурарин улихьди гъягъюру, хъа марччар дугъан кьяляхъди гъюру, гьаз гъапиш дурариз дугъан дих аьгъя. 5 Жарадарихъди дурар гъягъидар, дурар дугъхьан гьергди, гьаз гъапиш дурариз жарарин дих таниш дар. 6 Исайи дурариз гьаму тахалус ктибтуру, хъа Дугъу чпиз фтикан гъапнуш, фарисйир гъавриъ ахъундайи. 7 Исайи давам апІуру: – Гьякьлу вуйи гьякь кІуразачвуз: марччариз урчІар – Узу вуза. 8 Вари Узу гъяйиз гъафидар тІафлар ва тІарашчйир вуйи. Саки марччар дурарихъ хъпехъундар. 9 УрчІар – Узу вуза. Фуж Уз’антина учІвиш, дюрхну хьиди. Гьацир УрчІаризди учІвди ва дилинтина удучІвиди, гьацириз чаз ипІруб алишв бихъиди. 10 Хъа тІафал саб апІуз гъюри шулу: гьитІибкІбан бадали, йибкІбан ва пуч апІбан бадали. Узу гъафунза гьацдариз уьмур хьади, варибдиъ – абцІу уьмур. 11 Узу гъяни Габан вуза. Дицир ужур габни марччар бадали чан уьмур тувру. 12 Хъа гъирагъдилан дуфнайир – думу габан дар, дицириз марччар жарадар ву – жанавар лижахьна багахь шулайиб гъябкъюбси, марччара гатІахьуру ва гьергрира ву. Жанаври дурар дисуру ва чІяргъюру. 13 Дицир габан дар, хъа гъирагъдилан, гьякъи тувну, хъитнайир ву; дицир марччарин гъайгъушнаъ шулдар. 14 Узу ужур Габан вуза: Узуз Йиз марччар аьгъязуз ва Узура Йиз марччариз аьгъя. 15 Адашдиз Узу фици аьгъяш, гьаци Узуз Адашра аьгъязуз. Узу Йиз уьмур марччарихъанди тувдиза. 16 Узуз жара марччарра азуз, гьаму марччаринишв’ан дарудар. Узу гьадрара хъади дуфну ккунду, Йиз дихнахъ дурар хъпехъиди, гьадмуган саб лиж хьибди ва сар Габан хьиди! 17 Узу Адашдиз гьаддиз ккундуки, Узу уьмур туврайиган, тазакІултІан думу гъадабгъуз. 18 Йиз уьмур сарира дадабгъидар, Узу Йиз хушниинди думу тувраза. Думу тувуб Йиз ихтиярнаъ, думу, кьяляхъ гъадабгъубра Йиз ихтияриаъ айиз. Думу гьаци Узуз Йиз Адашди улупунзуз. 19 Хъана гьаму гафари жугьдарин арайиъ гьюжатар ирчру. 20 Дурарикан гизафдари кІуйи: – Думу амрихъан душна ва гьарзади улхура. Дугъахъ гьаз хъпехъурачва? 21 – Му улхбар жинар кайириндар дар, – кІури, къаршу удучІвуйи тмундар. – Жинар кайирихьан кур вуйириз рябкъювал тувуз шулинхъа? 22 Кьюрд улубкьуру. Ерусалимдиъ Аллагьдин хал таза апІбан машквар вуйи. 23 Иса Аллагьдин хулан гьяятдиъ Сулейман пайгъамбрин айвандихъ лицурайи. 24 Жугьдари, Дугълан илтІикІну, Дугъхьан гьерхру: – Уву фукьан вахтназ ич сабур ахтармиш апІури гъузуз ккава? Йип учуз дюзди, Уву Месигь вуна? 25 – Узу учвуз гъапунзачвуз, хъа учву Узухъ хъугърадарчва. Узу Йиз Адашдин ччвурнахъан апІурайи ляхнар – магьа Узкан шагьидвал апІурайидар. 26 Амма учву Узухъ хъугърадарчва, фицики учву Йиз марччарикан дарчва. 27 Йиз марччариз Йиз дих ебхьуру ва Узуз дурар аьгъязуз, дурар Узухъди гъюру. 28 Узу тувдиза дурариз гьаргандин уьмур, дурар аьсрариъра йихдар, дурар Узхьан сарира гьитІикІдар. 29 Йиз Адаш варидартІан зурба ву. Гьаддиз дурар Йиз Адашдихьан сарихьанра дадагъуз хьибдар, 30 хъа Узуна Йиз Адаш сар вуча. 31 Жугьдар хъана Исайиз йивуз гъванарихъан хъчІихуру. 32 – Йиз Адашдихьан Узу учвуз гизаф ужудар ляхнар улупунзачвуз, – гъапи Исайи. – Гьадрарикан фунубдин гьякьнаан Узуз йивуз ккунди ачвуз? 33 – Учуз, Уву ужудар ляхнар гъапІну кІури, йивуз ккунди адарчуз, хъа Аллагьдикан рихшанд апІурайиган. Уву вуйир адми, хъа Увкан Аллагь апІурава. 34 Исайи жаваб туву: – Ичв Къанундиъ дибикІнадаринхъа: «Узу гъапунза: учву аллагьар вучва?» кІури. Хъа гьякь дибикІна. 35 Эгер Аллагьди Чан Гаф шлихьна гьапІнаш, Дугъу дурариз аллгьар кІура. 36 «Узу Аллагьдин Бай вуза», гъапну кІури, фици учвхьан Узуз пуз шулчвухьан: «уву рихшанд апІурава», кІури. Шлиз кІурачва гьаци? Узуз? Адашди гирами дапІну, гьаму дюн’яйиз гьаънайириз?! 37 Эгер Узу Йиз Адашди апІурайи ляхнар апІурадарш, гьадмуган Узухъ мухъугъанай! 38 Хъа эгер Узу дурар апІураш, учвхьан Узухъ хътругъуз шулчвухьан, саки Йиз ляхнарихъкьан хъугъай! Гьадмуган, учвуз аьгъю хьибдичвуз ва: Узуъ – Йиз Адаш, хъа Узу – Дугъаъ айибдин гъавриъ хьидичва. 39 Гьадмуган дурариз Иса хъана дисуз ккун шулу, амма Думу дурарин хиларигъян гъютІурччвуру. 40 Хъасин Иса, Ярдан нирихъ Ягь’яйи улихьди штуан апІури гъаши йишвариз гъягъюру ва душваъ саб кьадар вахтна гъузру. 41 Дугъахьна гизаф адмийир гъюйи. «Ягь’яйи саб аьламатра улупундайи, – кІуйи дурари, – хъа Исайикан гъапидар вари гьякь ву». 42 Ва гьадушваъ гизафдар Дугъахъ хъугънийи.

Югьан 11

1 Сар адми иццру шулу. Дугъаз Лазар кІуйи. Думу Мар’ямна чан чи Марфа яшамиш шулайи Вифания гъул’ан вуйи. 2 Мар’ям, Агъайин ликарикан ягъ ктатури, дурар чан кушарихьди кжикури гъаши дишагьли вуйи. Ари Мар’ямдин чве Лазар иццру гъахьнийи. 3 Чйири Исайихьна гьамци кІури хабар дебккуз гьаънийи: «Агъа, гьадмунур, Увуз ккунирнур, кетІерццна». 4 Гьаддикан аьгъю дубхьну, Исайи кІуру: – Му иццрушин аьжалихьна дар, думу Аллагьдин ад бадали ва гьаддилантина Аллагьдин Бали Чан адлувал улупбан бадали, вуйиб ву. 5 Исайиз Марфа, дугъан чи Мар’ям ва Лазар ккунидар вуйи. 6 Гьаци, Лазар иццурайибдикан гъеебхьнушра, Иса кьюд йигъансана Учв айишваъ гъузру. 7 Хъасин Дугъу Чан ученикариз кІуру: – Гъачай, Ягьудия уьлкейиз кьяляхъ гъягъюрхьа. 8 – Я Мялим! – кІуру Дугъаз ученикари, – жугьдариз Ув’ин гъван уьлюбхну, улихьнаси йикІуз ккунди айи, хъа Уву хъана дина гъягъюрана? 9 Исайи дурариз гъапи: – Йигъаъ йицІикьюб сяаьт адаринхъа? Фуж йигъну гъяруш, дицир хъарсну алдакидар, фицики гьадгъаз му дюн’яйин акв рябкъюра. 10 Хъа эгер дицир йишвну гъяруш, хъарсну алдакиди, гьаз гъапиш акв ади шулдар. 11 Гьамци дупну, Исайи давам апІуру: – Ихь дуст Лазар гъаахну. Узу думу хъиргуз гъяраза. 12 – Агъа, сарун думу нивкІуз душнаш, сагъ хьиди, – кІуру Дугъаз ученикари. 13 Исайиз гьамдиинди Лазар дукІнайиваликан пуз ккунди айи, хъа дурари, думу аьдати нивкІуз душна кІури, фикир дапІнайи. 14 Гьадмуган Исайи дурариз ачухъди кІуру: – Лазар гъакІну. 15 Хъа учву бадали Узу гьадушваъ адарди хьуб’ин шад вуза. Гьаци дубхьнайиган, учву хъугъдичва. Сарун гъачай гьадгъахьна гъягъюрхьа! 16 «КІвятІях» кІуру лакІам хъайи Фомайи чан юлдшариз кІуру: – Гъачай, Мялимдихъди сатІиди ухьура йихурухьа! 17 Дина гъафи Исайиз, Лазар дукІну накьвдиъ ади юкьуд йигъ вуйиб аьгъю шулу. 18 Вифания Ерусалимдихьан шубуб километртІан манзилнаъ адайи, 19 ва дина гьадрарихъди Марфайихьнана Мар’ямдихьна чвуччвун дердер зигуз гизаф жугьдар дуфнайи. 20 Иса гъюрайибдикан гъеебхьубси, Марфа дишлади Дугъан улихьна гъягъюру, хъа Мар’ям хулаъ имийи. 21 – Агъа, эгер Уву мушваъ айиш, йиз чве йикІидайи! – гъапи Марфайи Исайиз. – 22 Саки узуз аьгъязуз, хъа гьамус вушра, Уву Аллагьдикан фу ккун гъапІишра, Дугъу Увуз тувди. 23 – Яв чве хъана гъудужвиди, – гъапи дугъаз Исайи. 24 – Гъиямат йигъан вари чІиви шлуган, думура гъудужвруб аьгъязуз, – жаваб туву Марфайи. 25 Исайи гъапи: – Узу вуза чІиви хьувал ва уьмур. Фуж Узухъ хъугъраш, гьеле гъачІишра, яшамиш хьиди. 26 Хъа гьарсар, яшамиш шулади Узухъ хъугънайир аьсрариъра йикІидар. Уву гьамдихъ хъугъурна? 27 – Ав, Агъа, – жаваб туврайи дугъу, – узу хъугъурза: гьаму дюн’яйиз гъюз ккади айи ва, магьа дуфнайи Месигь, Аллагьдин Бай, Уву вува. 28 Гьамци дупну, Марфайи, Мар’ямдиз жиниди дих дапІну, кІуру: – Мялим гьамшваъ а, Дугъу увуз дих апІура. 29 Му гафар гъеерхьубси, Мар’ям гъудужвну, Дугъахьна гъягъюру. 30 Иса мегьел гъулаъ учІвнадайи ва Учв Марфайи къаршуламиш гъапІушв’ин илмийи. 31 Мар’ямдихъди хулаъ ади ва думу ккарцури гъаши жугьдар, Мар’ям тяди кади гъудужвну чІатна удучІвуб дябкъну, думу накьвдихъна ишуз гъягъюра, кІури, хиял дапІну, дурарра дугъан кьяляхъди гъягъюру. 32 Хъа Мар’ям, Иса хьайишвахьна дуфну, Думу гъяркъюбси Дугъан ликарикк ккархьру ва кІуру: – Я Агъа, эгер Уву мушваъ айиш, йиз чве йикІидайи. 33 Мар’ям ва дугъахъди гъафи жугьдар дердлуди ишури дябкъну, кІван деринаризкьан Чазра язухъ дубхьнайи Исайи гьерху: 34 – Думу наан кивначва? – Гъач учу улупидича, – гъапи дурари. 35 Иса ишуру. 36 – Лигайчва, фици Мугъаз думу ккундуш! – гъапи жугьдари чпин арайиъ. 37 – Мугъу кур вуйириз рябкъювал тувну, – гъапи шли-вуш дураригъян сари, – Белки Дугъхьан Лазарра чІиви шлуси апІуз шул? 38 Иса хъана артухъ пашманвалиинди накьвдихьна гъюру. Накьв дюрхъсиб вуйи. Душвазди учІврушвахь гъван гьипнайи. 39 – Гъван гьадабгъай! – кІуру Исайи. – Агъа, душваъ майтин ниъ абхънашул, фицики думу кивхъан юкьуд йигъ улдубчІвна, – кІуру Дугъаз дукІнайирин чи Марфайи. 40 Исайи дугъаз кІуру: – Узу увуз гъапундайин: «Эгер уву хъугъри гъузиш, Аллагьдин гьунар рябкъидивуз», – кІури? 41 Гъван гьадабгъуру. Исайи улар зина заъру ва кІуру: – Адаш, Увуз баркаллагь кІураза, Увуз Узу ерхьбаз. 42 Увуз Узу гьарган ерхьурайиб аьгъязуз. Гьамушв’ин али халкь Узу Уву гьаънайибдихъ хъугъри пну, ачухъди кІурайиб вуйиз! 43 Ва гьамци дупну, Исайи зарбди дих гъапІу: – Лазар, удучІв! 44 Хилар-ликар кафнаригъян гъидиржнайи, машниинра ирин чарч илипнайи Лазар накьвдиан удучІвуру. – Думу гъюдурчай, гъит гъарахри! – гъапи дурариз Исайи. 45 Мар’ямдихьна гъафи ва Исайи гъапІуб гъябкъю жугьдарикан гизафдар Дугъахъ хъугънийи. 46 Хъа дурарикан, фарисйирихьна душну, Исайи гъапІубдикан ктибтрударра гъидихънийи. 47 Жугьдарин аьхюну маллйирна фарисйир чпин собрандиз уч гъаши: – Ухьу гьапІну ккунду? – кІуйи дурари. – Му касди гизаф аьламатар улупура. 48 Эгер Думу мици гъитиш, вари Гьадгъахъ хъугъди ва римлуйир гъафиган, дурари ихь гьюкуматра ва ихь халкьра терг апІиди. 49 Каяфа кІуру ва гьадму йисан жугьдарин маллйирин аьхюр вуди кадагънайи дурарикан сари кІуру: 50 – Учву сабдинра гъавриъ ахърадарчва! Я кас, учвуз гьаз аьгъдарчвуз: учвуз ужу хьибди, эгер вари халкьдихъанди сар адми гъачІиш, вари жугьдар йихайиз? 51 Мурар Каяфайин хусуси гафар дайи: гьадму йисан думу жугьдарин маллйирин аьхюрра вуди, дугъу пайгъамбриси гъапнийи, Иса халкьдихъанди йикІиди кІури, 52 ва неинки гьаму халкьдихъанди, хъа гьацира вари дюн’я вуйибси дарагънайи Аллагьдин веледар сабвалихъна хпан бадалира. 53 Гьадму йигъхъан дурари Иса фици пуч апІуруш, фикир апІуз хъюгъру. 54 Гьаддиз Иса жугьдарин арайиъ ашкарди лицури гъахьундар, ва гьадлин Думу, ичІи чюлин гъирагъдихъ хъайи Ефраим кІуру шагьриз душну, гьадушваъ Чан ученикарихъди гъузру. 55 Жугьдарин Пасхайин машквар багахь шулайи. Уьлкейин варишвариан, чпи машквар хьайиз улихьна гунгьарихьан марцц апІбан бадали, гьациб аьдат тамам апІуз гизафдар Ерусалимдиз дуфнайи. 56 Дурари, Иса агури, Аллагьдин хулаз уч духьну, чиб-чпигъ кІуйи: «Фици хиял апІурачва? Думу Пасхайин машквраз гъюрдайкІана?» 57 Аьхюну маллйирина фарисйири Иса дисбан бадали, гьар шлиз Думу айишв аьгъю гъабхьири гьаддикан чпиз хабар дебккуб буйругъ тувру.

Югьан 12

1 Пасхайин машквар ккебгъуз йирхьуд йигъ ккимиди, Иса Чав чІиви гъапІу Лазар яшамиш шулайи Вифанияйиз гъюру. 2 Дурари Дугъан сагълугънаан хураг гьязур апІуру. Марфа суфрайихъ Исайин гъайгъушнаъ айи. Суфрайихъ хъайидарихъди Исайин багахь Лазарра деънайи. 3 Мар’ямди, нард гьарин гизаф багьа вуйи марцци ягъ дубхну, Исайин ликарикан ктатуру ва Дугъан ликар чан кушарихьди кжикуру. Вари хал аьтринсиб ицци ниърахьди абцІру. 4 Исайин ученикарикан сари, хъасин Агъа масу туврури, Искариотдиан вуйи Симондин бай Ягьудайи кІуру: 5 – Гьаму ягъ, шубудварж арсран пулихъ масу тувну, пул касибариз пай апІуз гьаз шулдайихъа? 6 Дугъу мици, касибарин гъаннаъ ади ваъ, хъа учв тІафал вуди хьпаз лигну гъапиб вуйи, гьаз гъапиш дугъахь уртахъ вуйи пулин мажник хьайи ва саспиган, чан тямягьяр гьуркІуз, гьадму пуликан харж апІуйи. 7 Гьадмуган Исайи кІуру: – Думу сикинди гъитай! Дугъу му ягъ Узу накьвдик кивру йигъаз гьязур дапІнайиб ву. 8 Касибар гьарган учвухъди хьиди, хъа Узу учвухъди гьарган хьидарза. 9 Жугьдарикан гизафдариз Иса душваъ айиб аьгъю дубхьну, Дугъу чІиви гъапІу Лазаризра лигуз кади, дурар Исайихьна гъюру. 10 Гьадмуган маллйирин аьхюдари Лазарра йикІбан къарар адабгънайи, 11 гьаз гъапиш гьадгъулантина, кавхйирна маллйир гъитну, гизаф жугьдар Исайихъ хъугънийи. 12 Хъайигъан машквраз гъафи халкь, Иса Ерусалимдиз гъюруб деебхьну, 13 хурмайин гьарин кюлерра хьади, Исайин улихьна, гьамцдар чІигъар апІури, удубчІвуру: Агъайин ччвурнахъ гъюрайи Израилин Паччагьдиз уж’вал ибшри! 14 Иса, саб гъудугъ дибихъну, гьаддиин элеуру, фицики Гирами китабариъ дибикІна: 15 «ГучІ мапІан, Сиондин риш! Лиг, яв Паччагь увухьна жигьил даждиинди гъиди». 16 Исайин ученикар сифте мидин гъавриъ ахъундайи, хъа кьанди Иса Аллагьдин аднаъ гъашиган, Иса гьамци гъюваликан Гирами китабариъ дибикІнайиб дурарин кІваина гъафнийи, ва гьаци дурари Думу къаршуламишра гъапІнийи. 17 Лазар чІиви апІруган, Исайихъди хъайидари дидин гьякьнаан варидариз ктибтури гъахьну, 18 гьаддиз халкьди Иса гьамци тебрик апІури къаршуламиш гъапІнийи, гьаз гъапиш варидариз гьадму аьламат улупур Думу вуйибдикан деебхьнайи. 19 Хъа фарисйири чиб-чпиз кІуйи: – Рябкъюранчвуз, фукІа-мукІа апІуз ухьу кьувватсуз ву. Вари Гьадгъахъди гъягъюра! 20 Аллагьдиз икрам апІуз машквраз гъафидарин арайиъ грекарра айи. 21 Дурари, Галилей уьлкейиъ айи Вифсайдайиан вуйи Филип кІуру касдихьна дуфну, гьамци кІури саб тІалаб апІуру: – Я ич аьхюр, учуз Иса рякъюз ккунди ачуз. 22 Филипди душну Андрейиз, хъа дурар кьюридра Исайихьна душну, Дугъаз мидкан ктибтуру. 23 Исайи гъапи: – Аллагьдин аднаъ шлу Инсаниятдин Балин сяаьт улубкьну! 24 Гьякьлу вуйи гьякь кІуразачвуз: сабан дяхнин удар жил’ина абхъну дарчІиш, думу гьаци сабди гъубзди, хъа гъабчІиш, диди бегьем мягьсул хибди. 25 Шлиз чан уьмур багьади вуш, гьацири думу пуч апІура, хъа шлиз гьаму дюн’яйиин чан уьмур даккунди вуш, гьацири думу ккудудубкІру уьмриз уьбхюра. 26 Фуж Йиз гъуллугънаъ аш, гъит гьацир Йиз шилнаъди гъюри! Ва Узу наан аш, гьадушваъ Йиз гъуллугъчира хьиди. Фуж Йиз гъуллугънаъ аш, гьацир Йиз Адашди за апІиди. 27 Гьамус Йиз юкІв гъалабну абцІна! Фу пну ккунду Узу? ПидикІан: «Я Адаш! Узу гьаму гьялнаккан уьрх!» Саки Узу му дюн’яйиз гьаддиз дуфназа – гьаму гьял бадали! Адлу апІин Яв ччвур, Адаш! 28 Гьадму арайиъ завариан дих атІабгуру: – Адлу гъапІунза ва хъана адлу апІидиза! 29 Гьадушвахъ дугъужнайи халкь думу дихнахъ хъпехъурайи. Садари, завар гъарахну кІурайи; тмундари, Дугъахъди малайик гъулхну, кІуйи. 30 Исайи дурариз жаваб вуди кІуру: – Му дих Узуз вуйиб дайи, хъа думу халкь бадали вуйи! 31 Му дюн’яйин суд апІру вахт, магьа, хъубкьнура ву. Гьамус му дюн’яйин гьякимдар (иблис) тина утІуккну хьиди! 32 Хъа Узу жилилан за гъахьиган, Узу варидарихьди Узухьинди иб тувуз гъитдиза. 33 Гьаму гафариинди Дугъу дурариз, Учв фициб аьжалиинди йикІуруш, улупнийи. 34 – Учуз Гирами китабариан Месигь гьарган учухъди шлуваликан аьгъячуз, – гъапи халкьди. – Увхьан фици пуз шулвухьан, Инсаниятдин Бай завариз зигиди, кІури? Ва фуж ву, Думу Инсаниятдин Бай? 35 Исайи дурариз кІуру: – СацІиб вахтнаътІан акв учвухъди гъубзидар. Гьаци вуйиган, Учву мучІушну ккадраъбан бадали, сабан акуди имиди, гъарахай. Фицики фуж мучІушнаъди гъяраш, гьацириз учв наанди илтІикІнашра, аьгъдар. 36 Хъа сабан учвуз аку апІурамиди, аку аквнахъ хъугъай ва аквнан веледар хьидичва! Гьаму гафар дупну, Иса гъягъюру ва дурарихьан жин шулу. 37 Дугъу дурарин улихь гьамкьан аьламатар гъапІнушра, аммаки дурар, дидизра дилигди, Дугъахъ хъугъдайи. 38 Гьамци Ишая пайгъамбри дупнайи гафар тамам духьну ккундийи. Дугъу гъапнийи: «Учхьан гъеебхьубдихъ фуж хъугъну, Агъа? Шлиз ачухъ гъабхьнухъа Агъайин кьудрат?» 39 Ва гьаддиз дурар хъугъуз удукьрудар дайи, хъана Ишаяйи кІуруганси: 40 «Аллагьди дурарин улар кур гъапІнийи, дурарин фикир хъунти гъапІнийи, гьаци вуйиган, улар ади дярябкърудар ва фикирниинди гъавриъ адрахърудар. Гьаци ккундарш, Узухьинди илтІикІрийи, ва Узу дурар сагъ апІидийза». 41 Ишаяйи му гафар, чаз улихьмиди Исайин адлувал гъябкъиган, гъапидар вуйи. 42 Агъсакъларин арайиъра кмиди Исайихъ хъугънайидар цІиб адайи, хъа дурари дидкан, фарисйири чпи мистариан утІруккбан бадали, ачухъди кІурдайи. 43 Адмийирин тярифар дурариз Аллагьдин адлувалтІан зина вуйи. 44 Исайи аьхю дихниинди гъапи: – Фуж Узухъ хъугъраш, гьацир Узухъ хъугърадар, хъа Узу Гьаурихъ хъугъра. 45 Шлиз Узу рякъюраш, гьацириз Узу Гьаур рякъюра. 46 Узу акв вуза ва Узухъ хъугъру гьарсар мучІушнаъ гъудрузбан бадали дюн’яйиз дуфназа. 47 Эгер шлиз Йиз гафар деерхьну, дурар тамам дарапІиш, Узу гьацирин суд апІидиза, гьаз гъапиш Узу дюн’яйиз суд апІуз ваъ, хъа думу уьбхюз дуфнайир вуза. 48 Узу шли нигь апІураш ва Йиз Гаф кьабул апІуз даккнириз, гьамустІанра судья а: Узу дупнайи Гаф – магьа судья, гъиямат йигъан суд апІрур! 49 Фицики Узу Йиз Узхьан гъапиб дариз – му Узу гьау Адашдин, Узуз вуйи амур ву, фу кІуруш ва фици кІуруш. 50 Узуз аьгъязуз: Дугъан амур – му зат ккудудубкІру уьмур ву. Узу анжагъ Узуз Адашди йип гъапиб кІураза.

Югьан 13

1 Жугьдарин Пасхайин машквар багахь шулайи. Исайиз, Чав му дюн’я дипну, Адашдихьна хътакру вахт улубкьнайиб аьгъяйи. Му дюн’яйиъ Чандар вуйидар Дугъаз ккундийи, ва гьамус Дугъу дурарихьна вуйи Чан масанвалин кьувват улупуз гьял гъапІнийи. 2 Иблисди Искариотдиан вуйи Симондин бай Ягьудайин кІваъ Иса масу тувбан ният гьамустІанра ивнайи. 3 Хябяхъдин уьл ипІру вахтна Исайи, Адашди вари Чан хилиъ ивнайиб аьгъяди ва Учв Аллагьдихьан дуфнайиб, Аллагьдихьна хътакурайиб аьгъяди, 4 гъудужвну, Чан зиълан палат илдибтуру ва, дастамал гъадабгъну, Чан кьял’ан идибтІуру. 5 Хъасин легниъ шид убзну, Иса ученикарин ликар жикІуз хъюгъру ва кьял’ан идибтІнайи дастамлихьди кжикуру. 6 Гьамци Иса Петрихьнакьан хъуркьру. Ва Петри Дугъаз кІуру: – Я Агъа! Увуз йиз ликар жикІуз ккунди айвуз?! 7 – Узу гьапІраш, уву сабан гъавриъ адарва, – жаваб туву Исайи. – Кьанди аннамиш апІидива. 8 – Йиз ликар жикІуб?! Гьич хьибдар! – кІуру Петри. – Эгер Узу дижрикІиш, сарун уву Йизур дарва! – гъапи Исайи. 9 – Агъа! Дици вуш, неинки ликар, гьацира – хилар, кІулра! – гьевеслуди кІуру Петри. 10 – Вари жан дижибкІнайидарин анжагъ ликар жикІубтІан лазим дар, дицир марцциди ву аьхир. Учвура марцциди вучва. Аммаки учвкан вари марццидар дар, – гъапи Исайи. 11 Исайиз Учв масу туврур аьгъяйи, гьаддиз Дугъу: «Учвкан вари марццидар дар», гъапнийи. 12 Хъа дурарин ликар гъижикІган, алабхьну палат, хъана гъюн йивну суфрайихъ дахъиган, Дугъу кІуру: – Узу учвуз гьапІнуш, гьаддин гъавриъ гъахьунчва? 13 Учву Узуз «Агъа», «Мялим» кІуручва ва гьякьди кІурира ачва, гьаз гъапиш Узу якьинди гьадму хьузра вуза. 14 Гьаци вуйиган, эгер Узу – Агъайи ва Мялимди – ичв ликар гъижикІнуш, учвура чиб-чпин ликар жикІури ккунду. 15 Узу гъапІиганси, гьаци учвура апІбан бадали, Узу учвуз мисал улупунза. 16 Гьякьлу вуйи гьякь кІуразачвуз: гъуллугъчи чан аьхюртІан артухъ дар ва Гьаънайирра Учв ГьауртІан артухъ дар. 17 Ва гьамус учвуз му аьгъю дубхьнайиган, эгер гьаци апІури гъашиш, бахтаврар хьидичва. 18 Узу учвкан варидарикан кІурадарза: Узуз аьгъязуз Узу кадагънайидар. Саки Гирами китабариъ дидикІнайи му гафар кІулиз удучІври: «Узухъди уьл гъипІур Узуз къаршу удучІвну». 19 Му хьайиз, мидиз улихьна Узу учвуз кІураза. Гьаци вуйиган, му ляхин улубкьиган, учву Узу Гьадму – Гьарган Айир – вуйибдихъ хъугъдичва. 20 Гьякьлу вуйи гьякь кІуразачвуз: Узу Гьаърайир шли кьабул апІураш, гьацири Узу кьабул апІура, хъа шли Узу кьабул апІураш, гьацири Узу му дюн’яйиз Гьаур кьабул апІура. 21 Гьамци дупну, Иса яман гъалабулугъназ гъюру. – Гьякьлу вуйи гьякь кІуразачвузки, – гъапи Дугъу, – учвкан сари Узу масу тувди. 22 Думуган ученикар, Думу шликан улхурайкІан кІури, гъавриъ адарди, сар-сарихьинди лигури гъузру. 23 Исайин юкІв али ученикарикан сар Чан гъвалахъ гъюн йивну дахънайи. 24 Симон Петри дугъаз, Мялим шликан улхураш Дугъхьан гьерх кІури, ишарат апІуру. 25 Ва ученик Исайихьнаси хъиркІну, гьерхру: – Я Агъа! Думу фуж ву? 26 – Узу уьл кубсну шлихьна тувиш, гьадму ву, – гъапи Исайи. Дугъу уьлин кьацІ гъабраъ хурагнак кубсну, Искариотдиан вуйи Симондин бай Ягьудайихьна тувру. 27 Гьаму кьацІ хилиз гъадабгъубси Ягьудайиъ шейтІан убчІвру. – Яв апІуз ккайиб ухди апІин, – кІуру дугъаз Исайи. 28 Суфрайихъ хъайидар саркьан, Исайи дици гьаз гъапнуш, гъавриъ ахъундайи. 29 Хъа Ягьудайихь чпин уртахъ пул хьайиган, дурарикан сякьюдари: Исайи дугъаз: «ухьуз машквраз фукІа гъадабгъ» вая «касибариз фукІа тув», кІурайиси фикир апІуру. 30 Уьл гъибису Ягьуда дишла хул’ан удучІвуру. Йишв вуйи. 31 Думу удучІвиган Исайи гъапи: – Магьа гьамус Инсаниятдин Бализ Чан ад гъабхьну. Дугъан ад – Аллагьдин ад ву. 32 Эгер Дугъан ад Аллагьдин ад вуш, Аллагьдира Думу Чан адназ гъадагъиди ва зат хъугъужвидар. 33 Эй Йиз лижан веледар! Узуз учвухъди хьуз дицикьан вахт имдар. Учву Узу агури хьидичва – му жарадариз гъапиб Узу учвузра кІураза: «Узу гъярушваз учвхьан гъюз хьибдар». 34 Узу учвуз цІийи табшуругъ тувраза: сари-сар ккун апІинай, Узу учву ккун гъапІиганси, гьаци учвура сари-сар ккун апІинай. 35 Эгер ичв арайиъ масанвал ади гъабшиш, Учву Йиз ученикар вуйиб вардариз аьгъю хьибди. 36 – Агъа, Уву наана гъягъюрава? – гьерху Дугъхьан Симон Петрийи. – Узу гъягъюрайишваз сабан увхьан Узухъди гъюз хьибдарвухьан, – жаваб туву Исайи. – Хъа хъасин гъидива. 37 – Я Агъа! – кІуру Петри. – Узхьан Увухъди гьамус гъюз гьаз шулдар? Увхъанди йикІузра узу гьязур вуза! 38 Исайи гъапи: – Узхъанди йикІузра?! Гьякьлу вуйи гьякь кІуразавуз: даттли уьъйир дапІну ккудубкІайиз, шубуб ражари Узу аьгъюр дарзуз пидива!

Югьан 14

1 Исайи варидариз кади кІуру: – Гъит ичв юкІвариан шаклувалар удучІври! Учву Аллагьдихъ хъугърачва, гьаци Узухъра хъугъай! 2 Йиз Адашдин ужагъдиъ гизаф хулар а. Эгер гьаци дайиш, Узу учвуз мидкан пидайза. Узу учвуз душваъ йишв гьязур апІуз гъягъюраза. 3 Узу гъушиган, учвуз йишв гьязур апІидиза. Узу наан шулуш, учвура гьадушваъ хьпан бадали, Узу хътакидиза ва учву Узухьна гъахидиза. 4 Хъа Узу наана гъягъюраш, дина рякъ учвуз аьгъячвуз. 5 – Агъа, Уву наана гъягъюраш, учуз аьгъдарчуз, – кІурайи Фомайи. – Гьаддиз учуз дина рякъ наънан аьгъю шул? 6 Исайи жаваб туву: – Узу вуза Рякъ, Узу вуза Гьякь ва Уьмур. Анжагъ УзхьанминатІан Адашдихьна гъягъюз шулдар. 7 Эгер учвуз Узу аьгъяш, Адашра аьгъячвуз. Гьамусдихъантина учвуз Думу аьгъячвуз ва гъяркънура вучвуз! 8 – Я Агъа! – кІуру Филипди. – Учуз Адаш улуп ва сарун учуз фукІара лазим дарчуз. 9 – Узу учвухъди гьамкьан вахтна хъади, увуз Узу гьамусра аьгъю гъахьундарнуз, Филип? – жаваб туву Исайи. – Шлиз Узу гъяркънуш, гьадгъаз Адашра гъяркъну. Уву фици: «учуз Адаш улуп», кІурава? 10 – Узу Адашдиъ, Адаш Узуъ айибдихъ уву хъугърадарна? Узу учвуз кІурайи гафар Узхьан кІурайидар дариз, хъа дурар кІурайир Узуъ айи Адаш ву, Чан ляхнар апІурайи. 11 Узухъ хъугъай: Узу – Адашдиъ, ва Йиз Адаш Узуъ а. Узухъ хъугъдарш, Узу апІурайи ляхнарихъкьана хъугъай. 12 Гьякьлу вуйи гьякь кІуразачвуз: фуж Узухъ хъугъраш, гьацири Узу апІурайи ляхнар апІиди ва УзутІан артухъдира кади апІиди, фицики Узу Адашдихьна гъягъюраза. 13 Йиз ччвур дибисну учву ккун гъапІуб вари Узу тамам апІидиза, ва Адашди Чан ад Чан Бал’антина улупиди. 14 Эгер учву Йиз ччвурназ дих гъапІиш ва фу ккун гъапІишра, Узу тамам апІидиза. 15 Эгер учвуз Узу ккундуш, Узу учвуз фу табшурмиш гъапІнуш, гьадму тамам апІинай. 16 Узу Адашдикан ккун апІидиза ва Дугъу учвухьна жарар – Хъюгърур гьаъди. Думу аьсрариз учвухъди гъузди. 17 Думу Хъюгърур – Гьякьвалин Рюгь ву. Му дюн’яйихьан Думу кьабул апІуз хьидар, гьаз гъапиш Думу рякърур дар ва аьгъюр дар. Анжагъ учвуз аьгъячвуз Думу, Думу учвухъди хъа ва учвуъ а. 18 Узу учву йитимарди гъитидарзачву, хъана учвухьна хътакидиза. 19 СацІиб вахтналан дюн’яйиз Узу сарун рякъидар, хъа учвуз Узу рякъюри хьидичвуз: гьаз гъапиш Узу яшамиш шулаза ва учвура яшамиш хьидичва. 20 Ва гьадму йигъан учвуз аьгъю хьибдичвуз, Узу Йиз Адашдиъ шулайиб, учву – Узуъ, хъа Узу – учвуъ. 21 Шли Узхьан вуйи табшуругъар тамам апІураш, гьадму ву Узу ккунир. Шлиз Узу ккундуш, Йиз Адашра гьадгъу ккун апІиди. Гьацир Узузра ккун хьидизуз ва гьацирин улихь ачмиш шули хьидиза. 22 – Я Агъа! – кІуру Искариотдиан дару Ягьудайи, – Уву, имбуну дюн’яйиз ктарди, учуз фици ачмиш хьидива? 23 Исайи жаваб туву: – Шлиз Узу ккундуш, гьадгъу Йиз Гаф уьбхиди. Ва гьадмуган дицир Йиз Адашдизра ккун хьиди, гьадмуган Узуна Думу сатІиди гьацирихьна гъидича ва гьадгъаъ яшамиш хьидича. 24 Шлиз Узу ккундарш, Йиз гафар уьрхидар. Учвуз ебхьурайи Гаф Йизуб дариз аьхир, хъа Узу гьау Адашдинуб ву. 25 Узу учвуз му гьеле учвухъди хъамидитІан гъапунза. 26 Узу бадали Адашди учвуз гьаърайи Хъюгърури – Гирами Рюгьну учвуз вариб улупиди ва Узу учвуз гъапиб вари кІваин апІидичвуз. 27 «Мясляаьт ибшри!» – Узу кІуразачвуз гъярайири. Узу учвуз Йиз мясляаьт тувразачвуз. Узу учвуз, инсанари туврубсиб мясляаьт туврадарзачвуз. Ичв кІваан дердер адаай! ГучІ мапІанай! 28 Узу учвуз «гъягъюраза» гъапиб учвуз гъеебхьунчвуз, ва: «Узу учвухьна хътакидиза», гъапнура вуза. Эгер учвуз Узу ккундийиш, Узу Адашдихьна гъярайибдиин учву шад хьидийчва, фицики Йиз Адаш УзутІан артухъ ву. 29 Узу гьамус гьаму вари улубкьайиз улихьна вари гъапунза, ва гьадмуган, гьаму улубкьиган, учву Узухъ хъугъдичва! 30 Сарун Узхьан учвухъди артухъ гафар апІуз хьибдарзухьан: сарун му дюн’яйин гьякимдар багахь духьна. Йиз зиин дугъаз гьюкум адар. 31 Аммаки му дюн’яйиз аьгъю дубхьну ккунду: Узуз Йиз Адаш ккундайиб. Магьа гьаддиз Дугъу Узуз гъапиб вари тамам апІураза. Гъудужвай, гъягъюрхьа гьамушв’ан!

Югьан 15

1 Узу халис тІумтІин шир вуза, хъа Йиз Адаш тІумутІчи ву. 2 Уз’ин али бегьер дархру гьарсаб кюл Дугъу ктабтІуру, хъа бегьер хруб, диди хъанара артухъди бегьер хпан бадали, марцц апІуру. 3 Узу учвуз улупу Гафналантина учву сарун марццидар вучва. 4 Узу учвуъ шлуганси, учву Узуъ йихьай. Кюлихьан чав-чаланди бегьер хуз шулдар, думу ширнан пай вуди ккунду. Гьаци учвура Узуъ духьну ккунду. 5 Узу – шир, хъа учву – кюлер. Анжагъ гьадмунури, Узу чаъ айиганси, фуж Узуъ аш, бегьем бегьер хури шулу. Узу хътарш, учвхьан фукІа апІуз шулдар. 6 Хъа фуж Узуъ адарш, дурар, багъдиан гатІахьну, ерццурайи кюлерси ву; дурар уч апІиди, цІигъна гатІахьиди ва ургиди. 7 Хъа эгер Узу учвуъ ва Йиз гафар учвуъ аш, учвуз фу ккундуш, гьадму тІалаб апІинай, учвуз вари тувди! 8 Йиз Адашдин ад бадали аьхю бегьер хибдичва ва Йиз ученикар хьидичвкан. 9 Узу Адашди фици ккун гъапІнуш, гьаци Узура учву ккун гъапІунза. Йиз масанвалиинди яшамиш йихьай! 10 Эгер Узу учвуз табшурмиш гъапІуб учву тамам апІури гъашиш, Йиз масанвалиъ яшамиш хьидичва. Гьаци Узура гъапІунза: Узуз Йиз Адашди табшурмиш гъапІуб Узу тамам гъапІунза ва Адашдин масанвалиъди яшамиш шулаза. 11 Узу учвуз му гьаддиз гъапунза: Йиз шадвал ичвуб хьпан бадали, учву кьикьнягъди ацІну шлуси. 12 Магьа Йиз учвуз вуйи табшуругъ: Узу учву ккун гъапІиганси, сари-сар ккун апІинай. 13 Дустарихъанди уьмур тувубтІан артухъ масанвал дюн’яйиъ адар. 14 Эгер Узу учвуз табшурмиш гъапІуб учву тамам апІуруш, учву Узуз дустар вучва. 15 Сарун Узу учвуз Йиз гъуллугъчйир пну дих дарапІарза – гъуллугъчийиз чан аьхюри гьапІраш аьгъдар аьхир. Узу учвуз Йиз дустар пну дих апІураза. Йиз Адашдихьан аьгъю гъапІуб, Узу учвуз вари ктибтунза. 16 Узу ктагъур учву дарчва, гьаму Узу вуза учву ктагъур, гьаму Узу вуза учву дюн’яйиз улупнайир, ва бегьер туврудар (учву вучва) – варитІан ужуб бегьер. Ва гьадмуган Йиз Адашди учвуз, учву ккун гъапІуб, вари тувди. 17 Магьа Узу учвуз табшурмиш апІурайиб: сари-сар ккун апІинай. 18 Эгер учву дюн’яйиз даккунди вуш, учвутІан Узу ухди даккун гъашиб аьгъю йибхьай. 19 Учву му дюн’яйиндар вуди ккундийи, диди учву чандарси ккун апІидийи. Хъа учву му дюн’яйиндар даруган, гьаддиз учву дюн’яйиз даккунди ву (яна, Узу учву кадагъну му дюн’яйихьан жара гъапІунзачву). 20 КІваин апІинай, Узу учвуз гъапундайин: «гъуллугъчи чан аьхюртІан артухъ дар?» Эгер Узу утІуккуйиш, учвура утІурккури хьиди. Эгер Йиз гафар тамам апІуйиш, ичвра тамам апІури хьиди. 21 Амма гьамрар вари учву Йиздар вуйиган апІиди, гьаз гъапиш дурариз Узу Гьаур аьгъдар. 22 Эгер Узу дюн’яйиз гъафундайиш ва дурарихъди гъулхундайиш, дурар тахсиркрар хьидайи. Хъа гьамус дурарин чпи гьякь вуча кІурайивализ бин имдар. 23 Шлиз Узу даккунди вуш, гьацириз Йиз Адашра ккундар. 24 Эгер сарихьанра апІуз даршлу ляхнар Узу гъапІундайиш, гьадмуган дурар тахсиркрар хьидайи. Хъа гьамус дурариз Узу гъапІдар вари гъяркъну, ва гьаци вушра дурариз Узура, Йиз Адашра даккунди ву. 25 Саки гьаци дубхьну ккундийи, дурарихь хьайи Къанундиъ дибикІнайи «Саб багьнара адарди Узу даккунди ву» кІуруб тамам хьпан бадали. 26 Саки учвухьна Хъюгърур гъафиган, яна Адашдихьан гъюрайи Гьякьнан Рюгь, Узу учвухьна Адашдихьан гьаъдиза – ва Думу Йиз шагьид хьиди. 27 Ва учвура Йиз шагьидар вучва, фицики садпи йигъланмина Узухъди хъачва.

Югьан 16

1 Учву хъугъвалихъан хътадахъбан бадали, Узу учвуз гьамрар гъапунзачвуз. 2 Учву мистариан утІурккури хьиди. Гьациб вахт гъибдики, учву йикІрудари, чпи гьаци апІбиинди, Аллагьдин гъуллугънаъ ача кІури, фикир апІиди. 3 Дурари дици гьаддиз апІидики, гьаз гъапиш дурариз я Узу, я Йиз Адаш аьгъдар. 4 Хъа Узу учвуз гьамрар, вахт улубкьиган, Узу дурарикан ктитуб ичв кІваина гъюбан бадали, гъапунзачвуз. Сифте ражари дидкан учвуз гъапундайза, гьаз гъапиш учвухъди хъайза. 5 Хъа гьамус Узу Гьаурихьна гъяраза. Учвкан сарикьан: «Уву наана гъягъюрава?» – пну гьерхрадарчва, 6 гьаз гъапиш Узу учвуз вари ктибтиган, ичв юкІвар пашман духьнайичв. 7 Хъа Узу гьякь кІуразачвуз: учвуз уж’вал бадали гъяраза. Эгер Узу дурушиш, Хъюгърур учвухьна гъидар. Хъа Узу гъушиш, Думу учвухьна гьаъдиза. 8 Дугъу, гъафиган, дюн’яйин агьлариз дурар гунагьвалин, дугъривалин ва Аллагьдин суддин дюзди гъавриъ адрувал улупиди. 9 Узухъ хътругъруган, дурар гунагьвалин дюзди гъавриъ адар. 10 Узухьинди даруган, дурар дугъривалин дюзди гъавриъ адар, гьаци вуйиган, Узу Адашдихьна гъяраза, ва учвуз Узу сарун рякъидарчвуз. 11 Гьаму дюн’яйин гьюкумдариин гьамустІанра гъалиб духьнашра, дурар Аллагьдин суддин дюзди гъавриъ адар. 12 Узхьан учвуз хъана гизафдарикан пуз шуйзухьан, аммаки учвхьан дурарин гьаму ражари сабан гъавриъ ахъуз хьибдарчвухьан. 13 Учвухьна Гьякьвалин Рюгь гъафиган, Дугъу учву дюз рякъди гъахиди, рюгьнан метлеб – гьубкІну вуйи гьякьвал ву, фицики Дугъу кІурайиб Чахьан дар. Дугъу анжагъ Чаз гъеебхьубдикан пиди, Дугъу учвуз гъюз ккимбубдикан хабар дебккди. 14 Дугъу Узу адлу апІиди, гьаз гъапиш Дугъу, Узхьан гъадабгъну, думу учвуз ачухъ апІиди. 15 Вари Адашдиз айиб Йизуб ву. Магьа гьаддиз Узу: „Дугъу, Узхьан гъадабгъну, учвуз тувди“, гъапунза. 16 Багарихьди Узу сарун рякъидарчвуз, цІиб вахтналан хъана рякъидичвуз. 17 Ученикарикан сакьюдари чиб-чпигъ кІури гъахьну: – Мугъан фикирнаъ фу ади мици кІурайкІан? Мугъу кІура: «Багарихьди Узу учвуз сарун рякъидарчвуз, хъа сацІиб вахтналан хъана рякъидичвуз». Ва гьамцира кІура: «Гьаз гъапиш Узу Адашдихьна гъяраза». 18 Хъа мидин фици гъавриъ ахъди – «багарихьди?» Му фтикан улхураш, ухьу гъавриъ адархьа. 19 Исайиз аьгъяйи, дурариз Чахьан фтикан гьерхуз ккунди айиш ва гьаддиз Чав кІуру: – Учву чиб-чпихьан гьерхрачва, Узу Йиз хиялнаъ фу ади мици: «багарихьди» ва «учвуз Узу сарун рякъидарчвуз, хъа цІиб вахтналан хъана рякъидичвуз» – кІурайкІан кІури? 20 Гьякьлу вуйи гьякь кІуразачвуз: ишидичва ва дердер зигидичва, хъа миди вуйи дюн’я шад хьибди. Учву пашман хьидичва, амма ичв пашманвал шадвализ хьибди. 21 БицІир апІурайи дишагьли аьзабнакк шулу, фицики дугъан сяаьт улубкьна, хъа бицІир гъапІуриз аьзабар гьархру – дюн’яйиз цІийи инсан хьуб’ин думу шад шулу. 22 Гьаци учвура гьамус пашман вучва, саки учву Узуз хъанара рякъиди ва гьадмуган ичв юкІвар шадвали ацІди, му ичв шадвал сарихьанра дадабгъуз хьибдар. 23 Ва гьадму йигъан учву Уз’хьан сабдиканра гьерхидарчва. Гьякьлу вуйи гьякь кІуразачвуз: Йиз ччвур дибисну, учву Йиз Адашдихьан фу тІалаб гъапІишра, Дугъу тувдичвуз. 24 Учву мегьел фукІара Йиз ччвурнахъан тІалаб гъапІундарчва. Гьамус тІалаб апІинай – хьибдичвуз, ва учву шадвалихьди ацІдичву! 25 Мугагьназ Узу учвуз тахалусариинди кІури гъахьунза, хъа гьамус Узу учвуз, тахалусариинди дарди, Адашдикан ачухъди дупну ккуни вахт улубкьура. 26 Гьадму йигъан учву, Йиз ччвур дибисну, Дугъкан тІалабар апІидичва. Узу кІуразачвуз, учвхъанди Адашдиз ккарагидиза, дупну. 27 Ичв Узухьна вуйи ккунивализ дилигну ва Узу Аллагьдихьан дуфна кІури ичв хъугънайивализ дилигну, Адашдиз Чаз учву ккунду. 28 Узу му дюн’яйиз Адашдихьан гъафунза ва гьамус, дюн’я дипну, Дугъахьна хътакураза. 29 – Ари гьамус Уву, тахалусариинди дарди, ачухъди кІурава, – гъапи Дугъаз ученикари. – 30 Увуз вари аьгъюбдин учу гьамус гъавриъ ахъунча. Увхьан гьерхайизра кмиди Уву жавабар туврава. Магьа гьаддиз Уву Аллагьдихьан дуфнайибдихъ хъугърача. 31 – Аьхирки хъугъунчва? – гъапи жаваб вуди дурариз Исайи. – 32 Хъебехъай, Узу сарди гъитну, учву вари хулариз гьергру сяаьт улубкьура. Амма Узу сар дарза, гьаз гъапиш Узухъ Йиз Адаш хъазухъ. 33 Узу му гафар, Узуъ учву мясляаьт абгри пну, гъапидар вуйиз. Му дюн’яйиъ учвуз дердер алахьидичвуз, аммаки миж макадабтІанай: Узу му дюн’яйиин гъалиб гъахьунза.

Югьан 17

1 Му гафар гъапиган, Исайи завузди кІул за апІру ва кІуру: – Я Адаш! Йиз сяаьт улубкьну. Яв Бай адлу апІин, Яв Бали Уву адлу апІбан бадали. 2 Вари яшамиш шлубдин зиин Уву Дугъаз гьюкум тувунва. Уву Дугъахьна гьаъдариз гьаци Гьадгъура гьаргандин уьмур тувди. 3 Хъа гьаргандин уьмур – му Уву, сар вуйи, гьякьлу вуйи Аллагь, ва Уву гьау Иса Месигь аьгъю апІувал ву. 4 Узуз Уву табшурмиш гъапІу ляхин тамам дапІну, Узу Уву жилиин адлу гъапІунзаву. 5 Ва гьамус, дюн’я ккебгъайиз улихьна, Узу Увухъди хъайиган, Узуз фици ад айиш, гьациб адниинди Узу адлу апІин, эй Адаш. 6 Уву, му дюн’яйиан адагъну, Узухьна туву адмийириз Яв ччвур ачмиш гъапІунза. Думу адмийир, Явдар вуйидар, Уву Узуз тувунва. Дурари Яв Гаф гъюбхну. 7 Гьамус дурар, Уву Узуз тувуб вари Явуб вуйивалин, аьхирки, гъавриъ ахъну. 8 Уву Узухьди гьау гафар, Узу дурарихьна тувунза ва дурар дурари кьабул гъапІну. Узу Увхьан дуфнайивалин дурар якьинтІан гъавриъ ахъну ва Уву Узу гьаувалихъ хъугъну. 9 Узу гьадрарин гьякьнаан ккарагураза: Узу вари дюн’яйихъанди ккарагурадарза, хъа Уву Узухьна тувдарихъандитІан, гьаз гъапиш дурар Явдар ву, 10 фицики вари Узуз айиб Явуб ву, ва вари Увуз айиб Йизуб ву. Гьадрариантина Узу Йиз ад улупунза. 11 Узу сарун му дюн’яйиъ гъузрадарза, Узу Увухьна хътакураза, хъа дурар му дюн’яйиъ гъузра. Эй гирами Йиз Адаш! Яв ччвурнан кьувватниинди – Уву Узуз тувунва гьадму ччвур – дурар уьрх, Увуна Узу сар вуйиганси, дурарра сарси хьпан бадали. 12 Яв ччвурнан кьувватниинди – Уву Узуз тувунва гьадму ччвур – чпихъди хъайи вахтна Узу уьрхюри гъахьунза дурар. Узу гъюрхюнза дурар: аьжалихьна улупнайи сартІан гъайри фужкІара гъакІундар, гьамци Гирами бикІбарин Гаф тамам дубхьну ккундийи. 13 Хъа Узу гьамус Увухьна гъюраза. Узу сабан жилиин илмиза, му вари Узу гьаддиз кІураза, Йиз абцІну вуйи шадвал Узухъди дурарира пай апІбан бадали. 14 Узу Яв Гаф дурариз улупунза, гьаддиз му дюн’яйи дурар даккун гъапІну, гьаз гъапиш дурар му дюн’яйиан даруган, Узу му дюн’яйиан даруганси. 15 Узу Увкан дурар му дюн’яйилан гъадагъуб ккун апІурадарза, Узу ккун апІураза, дурар писвалихьан уьрхюб. 16 Узу му дюн’яйиан даруганси, дурар му дюн’яйиан дар. 17 Гьякьвалин кьувватниинди дурар Яв гъуллугъниина жалб апІин, Гьякьвал – му Яв Гаф ву. 18 Уву Узу дюн’яйиз фици гьаънуш, Узура дурар му дюн’яйиз гьаунза. 19 Гьадрар бадали, Узу Увуз дугъриданра дурар Явдар хьпахъди бахш гъахьунза. 20 Анжагъ Узу гьадрарихъандитІан ккарагурадарза, гьадрари гъапи Узкан вуйи гафналантина Узухъ хъугънайидарихъандира ккарагураза. 21 Гъит дурар вари саб хилди ишри, Уву Узуъ фици шулаш, хъа Узу Увуъ фици шулаш, гъит гьадрар Ухьуъ ишри. Ва гъит дюн’яйиз Узу Уву гьаънайивал аьгъю ибшри. 22 Уву Узуз туву ад Узу дурариз тувунза, Увуна Узу сар вуйиси, дурарра саб хилди хьпан бадали. 23 Узу дурариъ шулаза ва Уву Узуъ шулава. Гъит дурарра ижмиди сабхилди гъузри! Ва гъит дюн’яйиз аьгъю ибшри Узу Уву гьаувал ва, Увуз Узу ккуниганси, Увуз дурарра ккунивал. 24 Я Адаш! Узуз ккундузуз, Уву Узуз тувдар Узу шлушваъ Узухъди духьну. Гъит дурариз Уву Узуз туву Йиз ад рябкъри. Фицики дюн’я арайиз хайиз Уву Узу ккун гъапІунва. 25 Эй гьякьлу вуйи Йиз Адаш! Дюн’яйи Уву аьгъю гъапІундар, Узуз Уву аьгъязуз, хъасин Узу Уву гьауб дурариз аьгъю гъабхьну. 26 Увуз Узу ккуни масанвал гьадрариъра, Узу гьадрариъ фици аш, гьаци хьпан бадали, Узу дурариз Яв ччвур ачмиш гъапІунза ва апІидира вуза.

Югьан 18

1 Гьамци ккарагбалан кьяляхъ, Иса, Чан ученикарра хъади, Кедрон кІуру дерейиантина багъдиъ айи йишваз гъягъюру. Дурар сатІиди багъдиъ учІву. 2 Иса масу тувуз ккуни Ягьудайиз му йишв аьгъюб вуйи – Исана ученикар дина кми-кмиди уч шуйи. 3 Ва магьа, римлуйирин эскрарин десте ва гьацира жугьдарин маллйирин аьхюдарина фарисйири гьау Аллагьдин хулан гъаравларра хъади, Ягьуда мина гъюру. Дурар вари яракъламиш духьнайи: дурарихь цІа кайи гакІвларна фанисар хьайи. 4 Исайи, Чаин улубкьруб аьгъяди, дурарин улихьна удучІвну гьерхру: – Учву фуж агурачва? 5 – Назаретдиан вуйи Иса, – жаваб туву дурари. – Гьадму Узу вуза, – кІуру Дугъу. Масу туврайи Ягьудара гьадрарихъди хъайи. 6 Исайи: «Гьадму Узу вуза» гъапибси, дурар кьяляхъ шулу ва жил’ина ахьру. 7 – Учву фуж агурачва? – хъанара гьерхру дурарихьан Исайи. – Назаретдиан вуйи Иса, – кІуру дурари. 8 – Узу учвуз гъапунзачвузки: Гьадму Узу вуза, – гъапи Исайи. – Эгер учвуз Узу лазим вуш, гьаму адмийир деетай. 9 Исайи гьаци гъапнийи, гьаз гъапиш Чав дупнайи гьаму гафар: «Уву Узуз тувдарикан, Узу фужкІара пуч гъапІундарза», кІурудар тамам духьну ккундийи. 10 Гьадмуган ханжал хьайи Петри, думу уьчІюбгъну, маллйирин аьхюрин гъаравшиз йивну, дугъан иб ктабтІуру. Гъаравшиз Малх кІуйи. 11 – Ханжал чан халариъ ив! – гъапи Исайи Петриз. – Му аьзабарин зах Узуз Адашди тувунзуз. Мегер Узхьан думу дурубхъди гъибтуз шулин? 12 Гьадмуган Аллагьдин хулан гъаравлари Иса дисуру ва йитІуру. 13 Сифте Думу гьадму йисан маллйирин аьхюр вуйи Каяфайин язна Гьаннайихьна хуру. 14 Эгер вари халкьдин ерина сар адми гъачІиш ужу шул, дупну, жугьдариз насигьят тувур гьадму Каяфа вуйи. 15 Симон Петрна сарсан ученик Исайин кьяляхъди гъушнийи. Му ученик, маллйирин аьхюрихъди танишур вуйи ва думу Исайихъди кавхайин гьяятдиъ учІвнийи. 16 Хъа Петр урарин чІатинди гъузру. Хъасин гьадму кавхайиз таниш ученик удучІвну, урарихъ хъайи гъараваш шурахъди дулхну, Петрра гьяятдизди аъру. 17 Ва гьамшвахь му шуру Петриз кІуру: – Хъа уву, гъаписи даршул, гьатму адмийин ученик дарна? – Ваъ, – пну жаваб туву Петри. 18 Аьхъюди вуйи. Гъаравшари ва гъараваш дишагьлийири, алапІрушвахь цІа алапІну, мани апІуз хъюгъю. Петрра дурарин багахь дугъужвнайи ва мани апІурайи. 19 Кавхйири Исайихьан Дугъан ученикарикан ва Дугъу улупурайи аьгъюваларикан гьерхрайи. 20 – Узу варидарин улихь ачухъди гъапунза, – жаваб туву Исайи. – Вари жугьдар гъюру мистаъ Узу гьарган аьгъювалар улупури гъахьунза. Узу фукІара гьитІибкІну, жиниди улупундарза. 21 Гьаци вуйиган, Узхьан гьаз гьерхрачва? Узу фтикан гъапнуш, ебхьурайидарихьан гьерхай. Дурариз аьгъя, Узу фу гъапнуш. 22 Дугъу гьамци гъапиган, багахь дийигънайи гъаравларикан сари Исайин машнягъян йивуру ва кІуру: – Фици гафар апІурава кавхайихъди?! 23 – Эгер Узу фу-вуш жараси гъапнуш, йип Узу фтин дюз дарш, – гъапи Исайи. – Хъа эгер гьякь кІураш, гьаз Узуз йивурава? 24 Гьадмуган Гьаннайи, Иса йитІну имиди, маллйирин аьхюр вуйи Каяфайихьна гьаъру. 25 Хъа Симон Петр чаз мани апІури дугъужвнамийи. – Ич хиялиан, увура Дугъан ученикарикан вуйва? – гьерхру дугъхьан. – Ваъ, – жаваб туву Петри. 26 – Уву дайнахъа узуз багъдиъ Дугъахъди гъяркъюр? – гьерхру Петри иб кдабтІу гъуллугъчийин багахьлуйи. 27 Петри хъана дарза кІуру, ва гьадму сяаьт даттли уьъйир апІуру. 28 Гьирин ухди Иса, Каяфайин хул’ан адаъну, Римдин гьюкумдарин дараматариз хуру. Жугьдар, чпи чиркин духьну, Пасхайин машквар апІуз хьибдар кІури, дараматдиъ учІвундайи. 29 Гьаддиз гьякимдар Пилат учв дурарихьна удучІвуру. – Учву узухьна духнайи му Кас фтин тахсир апІурачва? – гьерху дугъу. 30 – Эгер Думу тахсиркар дайиш, учу Думу Увухьна суд апІуз дархрийча, – жаваб туву дурари. 31 – Думу учвухьна гъадагъай ва ичв закондиинди суд апІинай, – гъапи Пилатди. – Учуз фужкІара аьжализ тувуз ихтияр адарчуз, – гъапи дурари. 32 Гьамци гъабхьнийи, гьаз гъапиш Исайи, Чав улихьмиди Учв фициб аьжалиинди йикІуруш, гъапи гафар тамам духьну ккундийи. 33 Пилат дараматдиз хътакуру ва, Исайизра дих дапІну, гьерхру: – Уву «жугьдарин Паччагь» вуна? 34 – Гьаци уву кІурана, даршиш думу увуз Узкан жарадари гъапиб вуйин? – гьерху Исайи. 35 – Узу жугьуд вуйинхъа? – хътІурччву Пилат. – Гьаму Яв ватанагьлийири ва кавхйири Уву узухьна тувну. Уву гьациб фу гъапунва? 36 – Йиз Паччагьлувал му дюн’яйиан дар. Эгер Йиз Паччагьлувал гьаму дюн’яйиан вуйиш, Йиз гъуллугъчйири, Узу жугьдарин хилиъ адрахъбан бадали, чпихьан шлуб апІидийи. Ваъ, Йиз Паччагьлувал мушв’ан дариз, – гъапи Исайи. 37 – Гьаци вуйиган, фици-вушра Уву Паччагь вуна? – гьерху гьадмуган Пилатди. – Узу паччагь ву, уву кІурава. Узу гьаддиз бабкан гъахьунза ва гьаддиз дюн’яйиз гъафунза: гьякьвал улупбан бадали. Шлиз ккундуш гьякьвал, гьарсариз Йиз дих ебхьура, – гъапи Исайи. 38 – Хъа гьякьвал фу ву? – гьерху Пилатди. Ва гьамци дупну, думу хъана жугьдарихьна удучІву. – Узуз му Касдик гьич саб тахсирра бихъурадарзуз, – гъапи дугъу. 39 – Учвуз гьациб аьдат ачвуз: Пасхайин машквраз дидиснайидарикан сар деетуб. Узу учвуз дидиснайидарикан сар Пасхайиз деетурза. «Жугьдарин Паччагь» деетурза, ккундунучвуз? 40 – Думу ваъ! Варава деет! – хъана дурари чІигъар апІуз хъюгъю. Варава гъачагъ вуйи.

Югьан 19

1 Гьадмуган Пилатди, Иса хъади душну, Думу урччвуз гъитру. 2 Эскрарира, зазарикан таж дапІну, Дугъан кІул’ин улубкІуру ва гъюнарихъ аку-уьру халат хъипру. 3 Дурар Дугъахьна гъюйи ва кІуйи: – Яшамиш ишри «жугьдарин Паччагь!» – ва гьамци кІури, Дугъан машнягъян йивуйи. 4 Хъана Пилат удучІвуру. – Мугъак узуз гьич саб тахсирра бихъурадарзуз, учвуз аьгъю хьпан бадали, магьа узу Думу ичв улихьна адаураза, – гъапи Пилатди. 5 Ва гьадмуган, зазарикан гъапІу таж ва аку-элвен халат хъади, дурарихьна Иса удучІвуру. – Магьа Думу Адми! – гъапи дурариз Пилатди. 6 Хъа кавхйирина гъаравлари, Иса гъяркъюбси, чІигъар апІуру: – Хачриина Думу! Хачриина! – Думу учву гъадагъну, дариз зигай! – кІуру дурариз Пилатди. – Узуз Мугъак саб тахсирра бихъурадарзуз. 7 – Учуз закон ачуз, – гъапи жугьдари, – закондиинди Думу дукІну ккунду, гьаз гъапиш Дугъу, Учв Аллагьдин Бай вуза, гъапну. 8 Му гафар гъеерхьиган, Пилатдиз хъана артухъди гучІ шулу. 9 Думу хъана дараматдиз хътакуру ва Исайихьан гьерхру: – Уву наънан вува? Амма Исайи фукІара гъапундар. 10 – Гафар апІуз ккундарнуз? – кІуру Пилатди гьадмуган. – Увуз аьгъдарнузхъа, Уву деетувал йиз гьюкмиъ айиб ва Уву хачриин дариз зигувалра йиз гьюкмиъ айиб? 11 Исайи жаваб туву: – Йиз зиин яв гьич саб гьюкумра даршлийи, эгер увуз думу зиълан тувнадайиш. Ва гьаддиз Узу яв хилиз масу тувурин гунагь хъана зурбабуб ву. 12 Гьаму гафарин кьяляхъ Пилат Иса азад апІуз чарйир агбахъ шулу. Хъа жугьдари чІигъар апІуру: – Эгер уву Думу деетиш, уву Цезар-паччагьдин дуст дарва! Фуж учв паччагь вуза кІурайир, думу Цезар-паччагьдиз къаршу гъедергурайир ву! 13 Гьамцдар гафар гъеерхьу Пилат, Исара адаъну, суд апІрушв’ин деъру. Думу йишваз «Гъвандин тахт» кІуру, жугьуд чІалниинди: «Гаввафа». 14 Му ляхнар Пасхайин машквар ккебгъайиз улихьна, жвуми йигъан лисунган шулайидар вуйи. – Лигай, магьа ичв паччагь! – гъапи Пилатди. 15 – ЖвартІ апІин Думу! ЖвартІ! Хачриина! – гьарйир гъапІу дурари. – Гьаци вуйин? Ичв паччагь узу дариз зигну ккундунчвуз? – кІуру Пилатди. Цезарилан гъайри, учуз жара паччагь адарчуз! – жаваб туву дурари. 16 Ва гьадмуган Пилатди, аьхирки, Иса дариз зигбан бадали жугьдарихьна тувру. Эскрарира, Иса дидисну, хъади гъахуру. 17 Дугъу «УнтІаъ» (жугьуд чІалниинди «Голгофа») кІуру йишвахьнакьан Чаинди Чав карсру хачра дубхну ккундийи. 18 Гьадушв’ин Думу кьумарихьди хачрак карсру, хъа Дугъахъди кьюрсана – сар арччул, гьатмунурсана гагул терефнахъанди карсру, хъа Иса – дурарин кьялаъ. 19 Пилатди хачрак дибикІнайи табличкара кебхуз буйругъ тувру. Душвак дибикІнайи: «Назаретдиан вуйи Иса, жугьдарин паччагь». 20 Му бикІуб гизаф жугьдари гъурхнийи, Иса дариз дизигнайишв шагьрихьан ярхлаъ адайи: ва душвак жугьуд, латин ва грек чІалариинди дибикІнура айи. Жугьдарин кавхйири Пилатдиз гъапи: 21 – «Жугьдарин паччагь» кІури мибикІан. «Гьаму адмийи учв жугьдарин паччагь вуза кІура», – пну, бикІ. 22 – Узу, фу дибикІнаш, дибикІназа, – жаваб туву Пилатди. 23 Иса дариз гъизигхъан, эскрари, Дугъан халат гъадабгъну, юкьубишваз пай апІуру – гьарсар эскриз саб. Дурари Исайин балахунра (кІанккан алабхьру ккуртт) гъадабгъуру. Думу гъибирхушв ктарди заълансина дубхнайиб вуйи. 24 – Му чІябгъидархьа, шлиз удубчІвуруш, тупут ипиш ужу шул, – гъапи дурари чиб-чпин арайиъ. Гьамци, Гирами китабариъ дидикІнайи му гафар тамам гъахьнийи: «Йиз палтар дурари чпин арайиъ пай гъапІнийи, Узу алабхьнайибдин тупут ипнийи». Чан гьаци эскрари апІузра гъапІнийи. 25 Иса керхнайи хачран багахь Дугъан дада, дадайин чи, Клеопдин шив Мар’ям ва Магдалайиан вуйи Мар’ям дийигънайи. 26 Чан дада ва душвахь хьайи Чан юкІв али сар ученик дяркъну, Исайи дадайиз кІуру: – Дишагьли, магьа яв бай. – 27 Хъасин ученикдизра кІуру: – Магьа яв дада. Гьаддихъанмина ученикди Исайин дада чахьна гъадагъуру. 28 Исайи, вари ляхнар Гирами китабариъ дидикІнайиси духьнайиб аьгъяди, кІуру: – Дахаргназу! 29 Душвахь чяхрин сиркейихьди абцІнайи гажин хьайи. Иссоп рукнан кюлигъ чяхрин сирке дизибгнайи мачалкасиб гъивну, эскрари Дугъан кІвантІарихьна хуру. 30 Исайи, сиркейикан дубхъну, кІуру: – Тамам гъабхьну! Ва, кІул кибхну, Дугъу рюгь туву (Аллагьдиз). 31 Му жвуми йигъан гъабхьиб вуйи, ва жугьдарин гьякимариз дариз дизигнайидарин майтар султ йигъаз хачарик керхну гъитуз ккунди адайи, фицики гьаму султ йигъан дурарин аьхю вуйи Пасхайин машквар ккебгърайи. Гьаддиз дурари Пилатдикан, керхнайидарин ликар дюргъну, дурар хачракан ктагъуб тІалаб гъапІнийи. 32 Гьадмуган эскрар дуфну, Исайихъди дариз гъизигдарикан сарпирин ликар уьргъюру, хъасин – кьюрпирин. 33 Хъа Исайихьна гъафиган, лигуруш, Думу дукІнайи, ва гьаддиз Дугъан ликар дюрюргъди гъитру. 34 ДукІну ашра, эскрарикан сари Дугъан гъвалаъ жида убччвру, ва дишла ифина шид удубчІвуру. 35 Му вари чан хусуси улариинди гъябкъю адмийи, учвура хъугъбан бадали ктибтура. Дугъан шагьидвал гьякьлуб ву, чав гьякь кІурайивал дугъаз аьгъя. 36 Гьамци Гирами китабариъ дибикІнайибра тамам гъабхьнийи: «Дугъан гьич саб кІурабра дюбгъну хьибдар». 37 Гирами китабарин жара йишваъра кІура: «Шлиъ жида убччвнуш, Гьадгъаз лигури хьиди». 38 Мидин кьяляхъ, жугьдарин гьякимарихьан гучІури жиниди, Исайин ученик гъаши Аримафеяйиан вуйи Юсуф кІурури Пилатдикан, Исайин беден ктабгъуз ихтияр тІалаб апІуру. Пилатди ихтияр тувиган, дугъу, душну, беден хачракан ктабгъуру. 39 Мина, саб фулан йишвну жиниди Исайихьна гафар апІуз гъафи девлету кас Никодимра гъюру. Дугъу варж литр ицци ниъ хъайи ягъарна, мирра рукнанна алоэ укІан кибикьнайи ччим хуру. 40 Жугьдарин накьвдик кивруган, аьдат вуйиси, дурари Исайин беден гьадму ягъар дизигнайи ирин кафнигъян гъибиржуру. 41 Иса дариз гъизигу йишвахь багъ хьайи, хъа багъдиъ саркьан мегьел кивнадру накьв айи. 42 Султ йигъан улихь хьайи йигъ вуди хьпаз ва накьв багахь хьайивализ дилигну, душваъ Иса кивру.

Югьан 20

1 Гьяфтайин садпи йигъан гвачІнин ухди, мучІуди имиди, Магдалайиан вуйи Мар’ям накьвдихьна гъюру ва, дугъаз накьвдин айитІинди учІврушвахь гьипнайи гъван гьидипнади рябкъюру. 2 Думу жаргъури дуфну, Симон Петризна ва Исайин ккунди гъаши жара ученикдиз кІуру: – Агъа накьвдиан гъурхну, аьгъдарчуз наана гъурхнуш. 3 Петрна гьадму ученик накьвдихьна жаргъуру. 4 Дурар кьюридра ккажагъуру, хъа ПетртІан тмуну ученик зарбди жаргъуйи, ва думу накьвдихьна сарпирди хъуркьру. 5 Думу ис алахъну лигуру, фу лигурва: душваъ (майит диврушв’ин) кафнартІан адар, амма думу накьвдин айитІ учІвундайи. 6 Дугъахьна Симон Петрра хъуркьру. Думу накьвдиъ учІвру – душваъ дугъаз дипнайи кафан ва 7 Исайин кІул илибтІнайи чІулар рякъюру. Му чІулар кафнихьан тина йишвахь дидиржну дирчнайи. 8 Сифте накьвдихьна хъуркьу тму ученикра айитІна учІвру. Мурар гъяркъиган, думура хъугъру. 9 Аммаки дурар сабан Гирами китабариъ дибикІнайибдин гъавриъ адайи. Хъа дурариъ, Иса чІиви хьиди, кІури дибикІна. 10 Ученикар хулаз хътакуру. 11 Хъа Мар’ям чІатинди дугъужвнайи ва ишурайи. Ва, ишурамиди, ис алахъну, накьвдизди лигуру, 12 дугъаз, Исайин беден алди гъабши йишв’ин лизи ккурттар али кьюр малайик рякъюру: сар кІулихъ жвурнахъинди, тмунур ликар гъашишвахъинди деънайи. 13 – Эй дишагьли, гьаз ишурава? – гьерху малайикари. – Йиз Агъа гъурхну, хъа наана вуш, аьгъдарзуз, – жаваб туву дугъу. 14 Гьаму гафар кІурамиди Мар’ям кьяляхъинди илтІикІуру, фу лигурва: чан улихь Иса дийигъна. Аммаки думу му Иса вуйибдин гъавриъ ахъундайи. 15 – Эй дишагьли, гьаз ишурава? – кІуру дугъаз Исайи. – Фуж агурава? Мар’ямди, му багъбанчи вушул пну хиял дапІну, Дугъаз кІуру: – Йиз аьхюр, эгер уву Думу гьашв’ан адагъну гъурхнуш, йип узукна, наан дитнуш, узу Думу гъадагъурза. 16 – Мар’ям! – кІуру Исайи. Мар’ям илдицуру. – Раввуни! (Жугьуд чІалниинди: «Мялим»), – пну, чІигъ апІуру Мар’ямди. 17 – Узук мукучан! – кІуру дугъаз Исайи. – Узу сабан Йиз Адашдихьна хъадакнадарза. Уву, душну, Йиз чвйириз: «Узу Йиз Адашдихьна ва ичв Адашдихьна, Йиз ва ичв Аллагьдихьна хътакураза», кІура, йип. 18 Магдалайиан вуйи Мар’ям ученикарихьна гъюру ва дурариз кІуру: – Узуз Агъа гъяркъюнзуз! Ва дугъу чаз Исайи гъапиб кІуру. 19 Гьяфтайин гьадму садпи йигъан хябяхъган Исайин ученикар, жугьдарин гьякимдрарихьан гучІбу раккнарра хъяркьну, саб хулаъ уч духьнайи. Мушваъ Иса учІвру ва дурарин арайиъ дугъужвуру: – Мясляаьт учвуз! – гъапи Дугъу. 20 Дугъу Чан хиларна гъвал улупуру. Агъа гъяркъю ученикар шад шулу. 21 – Мясляаьт учвуз! – текрар апІуру Дугъу. – Адашди Узу фици гьаънуш, гьаци Узу учвура гьаъраза. 22 Гьамци дупну, Дугъу дурариин уф илитуру ва кІуру: – Гирами Рюгь кьабул апІинай! 23 Учву шлин гунгьарилан хил алдабгъиш, гьадгъан алдабгъну хьибди, хъа шлиин гъитиш, гьадрариин гунагь гъубзди. 24 „КІвятІях“ кІуру лакІам хъайи йицІикьюрикан Фома кІуру сар, Иса ачмиш шлуган, дурарихъди хътайи. 25 – Учуз Агъа гъяркъюнчуз! – кІуру дугъаз тмуну ученикари. – Дугъан хилариин кьумари гъиту урхъар дярякъди, дурариъ узу йиз тІуб удрубччвди ва йиз хил Дугъан гъвал’ан жидайи идипу зийниъ идривди, мидихъ хътругъарза! – жаваб туву дугъу. 26 Саб гьяфтайилан Исайин ученикар хъанара уч шулу. Му ражари дурарихъди Фомара хъайи. Раккнар хъяркьнашра, хулаъ Иса учІвру ва, дурарин кьялаъ дийигъну, кІуру: – Мясляаьт учвуз! 27 Хъасин Фомайиз кІуру: – ТІуб гьачІабкк! Магьа Йиз хилар. Хил гьачІабкк ва гъвалак зийниъ убччв! КІвахъни махьан, аммаки хъугъ! 28 – Йиз Агъа ва йиз Аллагь! – гьарайниинди гъапи Фомайи. 29 – Уву хъугъунва, гьаз гъапиш Узу гъяркъюнвуз? Аммаки хушбахтаврар ву гьадрар, Узу дярякъди, хъугъдар! – кІуру дугъаз Исайи. 30 Исайи дурарин улихь гьаму китабдиъ дидикІну адру хъана гизаф аьламатарра улупну. 31 Аммаки гьаму вари дибикІнайиб, учву Иса Месигь вуйибдихъ, Думу Аллагьдин Бай вуйибдихъ хъугъри пну ва Дугъахъ хъугъбиинди учвуз зат ккудудубкІру уьмур хьпан бадали дибикІнайиб ву.

Югьан 21

1 Хъасин Тивериад гьюлин гъирагъдихъ Иса Чан ученикариз хъана ачмиш шулу. Думу магьа гьамци гъабшиб ву. 2 Симон Петр, КІвятІях кІуру лакІам али Фома, Галилей уьлкейиъ айи Кана шагьриан вуйи Нафанаил, Зеведейин кьюрид баяр ва Исайин кьюр жара ученикар – вари сатІиди уч шулу. 3 – Узу балугъар дисуз гъяраза, – кІуру дурариз Симон Петри. – Учура увухъди гъюрча, – кІуру имбударира. Дурар душну люткейиъ эъру, аммаки думу йишван дурари фукІара гъибисундайи. 4 Хъа аку хьуз хъюбгъиган, гъирагъдихъ Иса дугъужвнайи. Саки му Иса вуйибдин ученикар гъавриъ ахънадайи. 5 – Дустар, лисуз фукІа-мукІа гъибисунчва? – гьерхру дурарихьан Исайи. – Ваъ, – жаваб туву дурари. 6 – Чул люткейин арччулну гъвалхъанди ккипай, ва дисидичва, – кІуру Дугъу. Дурари чул ккипру – гизаф балугъар ади хьпаз, дурарихьан чул ккадабгъуз шуладайи. 7 – Му Агъа ву! – кІуру Петриз Исайин юкІв али сар ученикди. Му Агъа ву пну гъеебхьубси, Петр чан гъяцІли жандиин али плащдин канчІар зина ккаъну, йитІну, штузди урсру. 8 Хъа тмуну ученикар, балугъари абцІнайи чулра хъчІюбхюри, люткейиъди гъирагъдихъна гъюру. Гъирагъдихъна ярхла дайи – варж метркьан. 9 Гъирагъдихъна ктучІвиган, дурариз кархьнайи аржлар рякъюру, дурариин балугъ илипнайи ва гъвалахъ уьлра хъайи. 10 – Учву гъидистарикан сякьюбсана балугъ акъинай, – кІуру дурариз Исайи. 11 Симон Петри, люткейихьна душну, чІатху балугъарихьди абцІнайи чул хъчІюбхюру. Дидиъ варжна хьуцІурна шубуб балугъ айи. Ва гьамкьан гизаф балугъар ади гъахьнушра, чул гъячІябгъюндайи. 12 – Деай гьириндин уьл ипІуз, – кІуру дурариз Исайи. Ученикарикан сарира Дугъхьан, Думу фуж вуш, гьерхундайи. Думу Агъа вуйиб дурар дишла гъавриъ ахънийи. 13 Исайи дуфну, гъадабгъну уьл, дурариз пай апІуру, ва балугъра пай апІуру. 14 Гьаму Иса, дукІну чІиви гъахьихъанмина, Чан ученикариз ачмиш шули шубубпи раж вуйи. 15 Дурари гьирин уьл ипІбалан кьяляхъ, Исайи Симон Петриз кІуру: – Я Югьаннайин бай Симон, увуз Узу гьамраризтІан гизаф ккундунуз? – Ав, Агъа, узуз Уву ккуниб Увузра аьгъявуз, – жаваб туву Петри. – Йиз ччилар уьрх, – кІуру Исайи. 16 Кьюбпи ражарира Исайи Петрихьан гьерхру: – Я Югьаннайин бай Симон, увуз Узу ккундунуз? – Ав, Агъа, узуз Уву ккуниб Увузра аьгъявуз, – жаваб туву Петри. – Йиз марччарин гъайгъу зиг. 17 Ва шубубпи ражарира Исайи дугъаз кІуру: – Я Югьаннайин бай Симон, увуз Узу ккундунуз? Дугъу, Учв ккундунуз кІури шубубпи ражнура гьерхиган, Петриз иццру апІуру. – Я Агъа, Увуз вари аьгъявуз, – кІуру дугъу Исайиз. – Узуз Уву ккуниб Увуз аьгъявуз. – Йиз марччар уьрх, – кІуру Исайи. – 18 Гьякьлу вуйи гьякь кІуразавуз: уву жигьилди айиган, яв чІул уву идибтІну, увуз ккунишваз гъягъюйва. Хъа кьаби гъашиган, хилар гьатІарццидива, жарари яв чІул идибтІиди ва увуз даккнишваз хъади гъахидиву. 19 Гьаму гафариинди Исайи, Петри фициб аьжалиинди Аллагь адлу апІуруш, думу учв гъавриъ ахъбан бадали, дугъаз чаз гъапнийи. Ва гьадму гафарихъан Петриз кІуру: – Узухъди гъач! 20 Петр кьяляхъинди илдицуру ва дугъаз Исайин юкІв али ученик рякъюру. Дугъу хябяхъдин уьл ипІурайи вахтна Исайихьнаси гьачІарккну: «Агъа, Уву шли масу тувди?» – кІури гьерху гьадму ученик вуйи. 21 Ва думура чпихъди гъюрайиб дяркъну, Петри Исайихьан гьерхру: – Я Агъа, хъа мугъкан фу хьибди? 22 – Узуз думу, Узу хъадакну гъяйизкьан, яшамиш шули гъузну ккунди шул. Хъа яв фу хъаяв дугъахъ? – жаваб туву Дугъу. – Уву Узухъди гъач! 23 Магьа гьаддиз гъардшарин арайиъ, думу ученик йикІрур дар, кІуру хабар арабгънийи. Аммаки Исайи, думу йикІидар кІури гъапундайи. Дугъу анжагъ: «Узуз думу, Узу хъадакну гъяйизкьан, яшамиш шули гъузну ккунди шул. Хъа яв фу хъаяв дугъахъ?» – гьамцитІан гъапундайи. 24 Думу гьадмуну ученик вуйи, гьаму вариб ктибтур ва гьаму вари гъибикІур. Ва ухьуз аьгъяхьуз, дугъан шагьидвал гьякьлуб вуйиб. 25 Исайи хъанара гизаф жара ляхнарра гъапІну. Эгер дурар вари хъайи-хъайиси дикІури гъашиш, вари дюн’яйиъра гьадмукьан кьадар китабариз йишв гьудрубкІрийи.

Ляхнар 1

1 Йиз сабпи китабдиъ, Феофил, узу Исайи гъапІу вари ляхнар ва улупу аьгъювалар ктитунза, 2 Дугъан уьмур, Дугъу Чан ученикарикан ктагъу вакилариз Гирами Рюгьналантина насигьятар тувну, Учв аьршариз удучІвайиз, лап эвелиан хъюгъну улупунза. 3 Учв дукІну чІиви гъахьихъантинара, Иса швнубсабан дурарин улихьна гъюри гъахьну ва Дугъу, Учв чІиви хьувал усбат апІури, хайлин шагьидвалар улупну. Учв чІиви гъахьихъантина ягъчІвур йигъандин арайиъ Чан вакилариз ачмиш шули, Дугъу дурариз Аллагьдин Паччагьлугъдикан ктибтури гъахьну. 4 Саб ражари, вакиларихъди уьлихъ хъайи вахтна, Исайи дурариз амур апІуру: – Ерусалим мидипанай, хъа Адашди тувурза гъапибдиз ккилигури гъузай, фицики Дугъу, учвуз Узкан гъеебхьубси, гьамци дупна: 5 «Ягь’яйи инсанар штуан апІури гъахьну, хъа учву багарихьди Гирами Рюгьниинди цІийи алаидичву». 6 Хъасин дурар вари сабишв’ина уч гъашиган, вакилари Исайихьан гьерхнийи: – Я Агъа! Уву гьамус Израилиз паччагьлугъвал дебккрадарнахъа? 7 Исайи дурариз жаваб тувру: – Адашди Чан гьюкмиъ тІаънайи вахтарна муддатар аьгъю хьувал ичв ляхин дар. 8 Гирами Рюгь учв’ина гъафиган, кьувватну ацІдичву ва Йиз шагьидар, сифте Ерусалимдиъ хъа вари Ягьудияна Самария уьлкйириъ, ва гьацира тап дюн’яйин тмуну кІулизкьан, хьидичва. 9 Гьамци дупну, Иса, дурариз рякъюри, аьршариз за гъахьну ва дифру Думу дурарихьан ккеркру. 10 Дурар дикъатниинди завариз лигури имиди, дурарин улихьна лизи ккурттар али кьюр жви ачмиш шулу. 11 Дурари гъапну: «Галилей уьлкейин агьалйир! Завариз лигури, мушв’ин гьаз дийигъначва? Учвуз, Думу фици аьршариз за гъахьнуш, гъяркъюнчвуз. Ва гьадму Иса, учвуз аьршариз за шули гъяркъиганси, кьяляхъра гъиди». 12 Хъасин вакилар шагьрихьан саб километр манзилиъ айи Елион дагъдилан Ерусалимдиз хътаркуру. 13 Чпи дергнайишваз дуфну, дурар заан хулаз удучІвуру. Душваъ Петр, Югьан, Якьубна Андрей, Филипна Фома, Варфолемейна Матта, Алфейин бай Якьуб, Женгчи кІуру лакІам хъайи Симон ва Якьубдин бай Ягьуда айи. 14 Дурар вари сатІиди ккарагурайи. Дурарихъди Исайин дада Мар’ям, Дугъан чвйир ва гьацира сакьюр дишагьлйир хъайи. 15 Сакьюд йигълан Исайихъ хъугънайидар сабишв’ина уч шулу (душваъ вари варжна къар касдихьнакьан айи). Петри, ученикарин арайиъ дийигъну, кІуру: 16 – Эй йиз гъардшар! Гирами китабариъ Гирами Рюгьну Давудрин мелзналан дупнайиб улубкьну ккунду: ухьухъди зегьмет дизигнайи, ухькан сар вуйи Ягьудайи, Иса дисуз ккеънайидар хъади гъиди, дибикІна. ( 18 Ягьудайи Иса масу тувну гъибису пулихъ хутІил гъадабгъну. Думу душв’ин кІулихъди алдакну гъакІну ва дугъан айитІишвар чІатна адахьну. 19 Му ляхин Ерусалимдиъ яшамиш шулайидариз варидариз аьгъю шулу ва му хутІлиз жугьуд чІалниинди Акелдама кІуру, яна «Ифдин хутІил»). 20 Мяълийирин китабдиъ мидин гьякьнаан гьамци дибикІна: «Дугъан жил ичІи ибшри, душв’ин фужкІа яшамиш даришри». Ва хъанара: «Дугъан йишв жара касди бисри». 21 Гьаддиз ухьу Иса чІиви хьувалин шагьид гъаши сар жара кас кадагъну ккунду. Думура, Ягь’яйи адмийир штуан апІуз хъюгъю вахтналан ккебгъну, Иса, ухьухъди хъади гъаши вахтра кади, тап аьршариз удучІвайизкьан, гьарган ухьухъди гъашир духьну ккунду. 23 Хъа дурари кьюр кас улупуру: Варсава вая Юст кІури шлу Юсуф ва Матта. 24 Хъасин вакилари ккарагури гъапнийи: – Я Агъа, Увуз гьар касдин кІваъ айиб аьгъявуз. Гьаму кьюрикан Уву фуж ктагъуруш, 25 яна учв гъягъюз лайикь гъахьи йишваз гъушу Ягьуда гьадахъу вакилвал шли гъабхуруш, учуз улуп. 26 Хъа дурари тупут ипу, ва Аллагьдин амриинди думу Маттайиз удубчІву. Гьамци Маттайикан, миди вуйи йицІисариканси, Исайин вакил шулу.

Ляхнар 2

1 ХьуцІдарин машквраз вари Исайин вакилар сабишв’ина уч гъахьнийи. 2 Сабпну завариан тІурфансиб микІлан сес шулу ва вакилар айи хал абцІру. 3 Дурарин улихьна цІин мелзарстар гъядахьну, жара шули, гьаруриина саб алабхъуру. 4 Хъа вари Гирами Рюгьнахъди ацІру, ва жара чІалариинди улхуз хъюгъру, фицики гьаци хьувал дурариз Гирами Рюгьну бахш гъапІнийи. 5 Гьадму вахтна Ерусалимдиъ дюн’яйин жюрбежюр юрдариан вуйи динагьли жугьдар яшамиш шулайи. 6 Гьадму сес гъабшиган, дурар уч шулу ва гизаф мюгьтал шулу, гьаз гъапиш вакиларикан гьарсар дурариз чан чІалниинди улхурайиси гьибгърайи. 7 Вари гьяйран ва аьламат духьнайи: – Мегер гьаму улхурайи касар вари Галилейин агьалйир вуйин? – кІури, чиб-чпин арайиъ гьерхрайи. – 8 Дици вуш, ухьуз дурар ихь бабан чІалариинди улхурайиси гьаз гьибгърайкІан? 9 Ихь арайиъ Парфияйин, Мидияйин, Эламдин ва Месопотамияйин, Ягьудияйин, Каппадокияйин, Понтайин ва Асияйин агьалйирра айихь, 10 Фригияйинна Памфилияйин, Египетдин ва Киринеяйиз багахь юрдариан ва Римдин агьалйирра, 11 гьацира Критдин, Аравияйин агьалйирра, жугьдарра, дин кьабул гъапІу аллагьсузарра айихь – вушра ухьуз варидариз Аллагьдин зурба ляхнарикан дурари ихь багъри чІалариинди ктитурайиганси ебхьурахьуз. 12 Гьамци вари гьяйран духьнайи ва, дубхьнайибдин гъавриъ адрахъди, «Му фу ляхин вуйкІан?» кІури, чиб-чпигъ гьерхрайи. 13 Хъа бязидари кялхъбахъди: «Дурари гизаф чяхир дубхънайи гьял ву», – кІурайи. 14 Гьадмуган Петри, йицІисаридра хъади гъудужвну, халкьдихьинди илдицну, кІуру: – Эй жугьдар ва Ерусалимдиъ яшамиш шулайи вари агьалйир! Узу учву му ляхнин гъаври тІаъдиза. Йиз гафарихъ дикъатлуди хъебехъай! 15 Учву фикир апІурайиси, учу пиянди адарча, фицики гьеле гвачІниндин сяаьт урчІвубтІан дар. 16 Хъа учву гъурхуб Яил пайгъамбрилантина дибикІнайиб ву: 17 «Гьаци хьибди аьхиримжи йигъари, – кІура Аллагьди, – Узу Йиз Рюгь вари инсанариина улурзидиза. Ичв баярина шубари аьяндар гафар пиди ва ичв живанариз аьламатнан рякъбар рякъиди, хъа ичв кьабидариз фагьумлу нивкІар рякъиди. 18 Ав, гьадму йигъари Узу Йиз Рюгь Йиз лукІариина: гьам жилариина, гьамсана хпариина улурзидиза, ва дурарира хьуз ккайиб улихьмиди кІури хьиди. 19 Узу завариин ва жилариин гьамцдар аьламатнан лишнар: ифи, цІа ва кумран дифар – улупидиза. 20 Ригъ – мучІу, хъа ваз ифиси уьру хьибди, Агъайин зурба ва адлу йигъ улубкьайиз. 21 Агъайин ччвур дибисну ккарагу гьарсар кас уьрхиди». 22 Эй Израилин агьалйир! Гьаму йиз гафарихъ хъебехъай: Назаретдиан вуйи Исайихь Аллагьдин гьюкум хьайи. Аллагьди Чан гьюкум Гьадгъуантина гъапІу аьламатнан, аьжайиб ва зурба ляхнариинди улупну. Му учвузра аьгъячвуз, фицики гьадму ляхнар ичв улихь гъашидар ву. 23 Аллагьди улупнайиганси Тувнайир учву, кьумариинди хачрак карсну, къанунсузарин хилариинди гъакІунчва. 24 Хъа Аллагьди, аьжалин кьюкьяр дармадагъин дапІну, Думу чІиви гъапІну, фицики Думу аьжалихьан дерккуз гъабхьундайи. 25 Фицики Давудри Исайикан гьамци кІура: «Узуз Агъа гьарган йиз улихь хьади рякъюразуз. Дугъу, йиз арччул хилихъ дийигъну, узу уьрхюрайи. 26 Мид’ин йиз юкІв шад гъабхьну, йиз мелзну гьарган Яв тяриф апІура. Йиз беденра кмиди архаинвалиъ а, ва узу умуд ктабтІурадарза, 27 фицики Уву йиз рюгь жегьеннемдиъ гъидрибтарва ва Яв Марцци Кас накьвдиъ утІуз гъитидарва. 28 Уву узуз уьмрин рякъ ачухъ гъапІунва, Уву йиз улихь хьайивали узу шадвали ацІди». 29 Эй йиз чвйир! Узхьан учвуз ихь абйирин аба Давудрин гьякьнаан саб шак адарди пуз шулзухьан: думу гъакІну ва думу киву накьв гъийин йигъазкьан имихьухь. 30 Учв пайгъамбар вуди хьпаз дилигну, дугъаз, учв али тахтниина чан насларикан сар дитуз Аллагьди аьгьт дапІнайиваликан аьгъяйи. 31 Дугъаз Месигь гъачІихъан чІиви шлубдиканра аьгъяди гъабхьну, фицики дугъу гьамци кІура: «Месигь гъийихдарин паччагьлугъдиъра гъитдар, ва Дугъан беденра накьвдиъ убтІидар». 32 Аллагьди гьадму Иса чІиви гъапІну, ва учу вари мидин шагьидар вуча. 33 Гьамус Думу аьршариин Аллагьдин арччул хилихъ деъна. Дугъу Адашдихьан тувурза дупнайи Гирами Рюгь кьабул гъапІну ва Гьадму, учвуз рябкъюрайиси ва ебхьурайиси, уч’ин улурзну. 34 Давуд аьршариз за гъапІундаршра, дугъу гьамци дупна: «Агъайи йиз Агъайиз гъапну: 35 „Сабан Узу Яв душмнар Яв ликарикк дахьайизкьан, Йиз арччул хилихъ деъ“». 36 Гьаци вуйиган, аьгъю йибхьайки, эй Израилин халкь, Исайикан Аллагьди Агъа ва Месигь гъапІну, хъа учву Думу кьумариинди хачрак карсунчва! 37 Му гафар гъеерхьиган, дурарин лап кІваз тясир гъапІнийи ва Петризна миди вуйи вакилариз дурари гьамци гъапнийи: – Хъа учу гьамус гьапІча, гъардшар? 38 Петри дурариз кІуруки: – Ичв гунгьар гардандиъ дидисну, уьмур дигиш апІинай. Ва ичв гунгьарилан хил алдабгъбан бадали, гьарсар кас Месигь Исайин ччвурнахъан штуан йихьай: гьадмуган учвуз Гирами Рюгь пешкеш хьиди. 39 Му, учвузси, ичв веледаризра, сабан Аллагьдихьан ярхла вуйидаризра, Агъа Аллагьди, Чахьна дих дапІнайидаризра кади, тувнайи гаф ву. 40 Петри «аьрбатанди яшамиш шулайидарихьан ихтият йихьай» кІури ва хъана жара гизаф гафариинди дурариз ихтият хьуз дих апІури гъахьну. 41 Дугъан гафар кьабул гъапІдар штуан гъахьнийи; хъа гьадму йигъан хъугънайидарин кьадар шубуд агъзур кас шулу. 42 Дурари, гьаммишан вакиларин аьгъюваларихъ хъпехъури, чпин арайиъ сюгьбатар гъахури, сатІиди ипІури ва ккарагури, чпин вахт адапІури шуйи. 43 Аллагьдихьан варидариз гучІуйи, ва Аллагьди вакиларилантина дурариз аьхючІвеъ аьламатар ва аьжайиб лишнар улупнийи. 44 Хъугънайидар вари сатІиди гъузнайи, ва вариб дурарин уртахъди вуйи. 45 Дурари чпин мал-мулк масу туври ва дарвал кайидариз пай апІури гъахьну. 46 Дурар гьар йигъан Аллагьдин хулаз уч шуйи ва уьлра кмиди чпин хулариъ сатІиди ипІуйи, сари-сариз разивалиинди хураг гьиври, шадди яшамиш шуйи. 47 Гьацира дурари, Аллагьдин тяриф апІури, вари халкь чпихъди ужуди хьуб’ин шадвал хъапІри гъахьну. Ва гьар йигъан, Аллагьдихъ хъугънайидарихьна, гунгьариккан азад гъаши касар артухъ шуйи.

Ляхнар 3

1 Сабан Петрна Югьан лисхъан, сяаьт шубуб шулайиган, ккарагуз Аллагьдин хулаз гъягъюрайи. 2 Дурариз учв бабкан гъашихъанмина ликар ккурсуз даршлу сар ликур рякъюру. Думу, чан дустари хури, гьар йигъан Аллагьдин хулан «Уччву урнарихъ» кІурушвахь дитри шуйи. Дугъу дина гъюрудариз садакьа ча кІури шуйи. 3 Дугъу, Аллагьдин хулан урнарихьна гъафи Петрна Югьан дяркъну, дурариз садакьа ча кІуру. 4 Дурар дугъаз дикъатниинди лигуру ва Петри кІуру: – Учухьинди лиг. 5 Думура, чаз фукІа тувур кІури, дурарихьинди лигуру. 6 Амма Петри дугъаз гъапи: – Узухь арс, ясана гъизил хьтарзухь, хъа узуз айиб тувдизавуз: Назаретдиан вуйи Месигь Исайин гьюкмиинди кІураза: гъудужвну гъарах! 7 Гьамци дупну, Петри, дугъан арччулну хил дибисну, дугъаз за хьуз кюмек апІуру. 8 Гьадмуган ликурин ликар мюгькам шулу ва думу гъедергну лицуз хъюгъру. Хъасин думу, ергури ва Аллагьдин тярифар апІури, дурарихъди Аллагьдин хулаъ учІвру. 9 Варидариз думу, фици Аллагьдин тярифар апІури гъягъюраш, рякъюру ва 10 думу, садакьа ча кІури, «Уччву урнарихъ» деъну шлу ликур вуйиб аьгъю шулу. Дугъан ликар сагъ хьувалиин адмийир русвагь духьнайи. 11 Гьадму ликар сагъ гъаши кас Петрихьанна Югьандихьан гьудудучІври гъахьнийи, хъа гьаму арайиъ мюгьтал духьнайи вари халкь Сулеймандин айван кІурушвахь дурарихьна уч хьуз хъюгъру. 12 Му гьял дябкъну, Петри кІуру: – Израилин агьалйир, мид’ин гьаз аьламат духьначва? Гьаз учву учуз, му касдин ликар ич кьувватниинди ва ужувлиинди сагъ дапІнайиси, лигурачва? 13 Му Аллагьди гъапІуб ву: Ибрагьимдин, Исакьдин ва Якьубдин Аллагьди, ихь абйирин Аллагьди Чан Гъараваш Иса адлу гъапІну. Хъа учву Думу йикІуз гъитунчва ва, Пилатдиз Думу азад апІуз ккун гъабшиган, Думу нигь гъапІунчва. 14 Марцци ва Гьякьлу вуйи Кас нигь дапІну, адми гъачІи гъачагъ азад апІувал тІалаб гъапІунчва. 15 Учву уьмур Туврайир гъакІунчва. Ари Гьадму Аллагьди, гъачІихъан, чІиви гъапІну, ва учу мидин шагьидар вуча. 16 Му кас Исайин кьувватниинди сагъ духьнайир ву, фицики учу Исайин кьувватнахъ хъугънача. Учвуз гьаму кас аьгъячвуз ва Исайихьан вуйи хъугъували думу сагъ апІувал магьа гъябкъюнчвуз! 17 Амма узуз аьгъязузки, йиз чвйир, му ляхнар ичв аьхюдаризси учвузра аьгъдарди хьувалиан гъапІдар вуйичв. 18 Аллагьди чан пайгъамбрарин мелзналан Месигьдин аьзабарикан улихьмиди гъапну ва гьаци гъапІнура ву. 19 Гьаци вуйиган, ичв тахсрар гардандиъ дисай ва, ичв гунгьарилан хил алдабгъбан бадали, Агъайихьинди илтІикай. 20 Гьадмуган Агъайи учвуз шадвалар тувиди ва учвухьна гьязур духьнайи Иса Месигь гьаъди. 21 Думу аьршариин Аллагьди Чан марцци пайгъамбрарин мелзналан дупнайи вари ляхнар тамам апІайизкьан гъузди. 22 Фицики Муса пайгъамбри дупна: «Ичв Аллагь вуйи Агъайи ичв чвйирин арайиан, узуси, Пайгъамбар адаиди. Дугъу учвуз фу гъапишра, тамам апІинай. 23 Ва гьадму Пайгъамбрихъ хъпебехъу гьарсар кас Аллагьдин халкьдин арайиан адаиди ва терг апІиди». 24 Ав, Шамуил пайгъамбрилан ккебгъну, дугъхъанмина гъахьи вари пайгъамбрари гьамцдар йигъар улуркьбакан улихьмиди кІури гъахьну. 25 Пайгъамбрари улихьмиди дупнайи йикьрар, Аллагьди ичв абйирихъди гъийитІдар, учвуз дурукьна. Аллагьди Ибрагьимдиз гъапнуки: «Яв тумралантина дюн’яйин вари инсанариз ужувлар хьиди». 26 Аллагьди сифте учвухьна, ичв чІуру рякъяриан адаъну, учвуз ужувлар хьпан бадали, Чав чІиви гъапІу Чан Гъараваш Иса гьаъна.

Ляхнар 4

1 Петрна Югьан халкьдихъди улхурайи вахтна, дурарин багахьна маллйир, Аллагьдин хулан гъаравларин аьхюдарна саддукйир гъафнийи. 2 Петрина Югьанди халкьдиз Исайилантина гъачІидар чІиви хьуваликан аьгъювалар улупура кІури, дурариз гизаф хъял кайи. 3 Дурари, Петрна Югьан дидисну, сарун хябяхъ хьпаз лигну, гвачІиндизкьан гъаравликкди уьрхюру. 4 Аьгъювалар гъеерхьдарикан гизафдар хъугънийи. Дурарин кьадар хьуд агъзурихьнакьан вуйи. 5 Хъайигъан гьякимар, агъсакълар ва аьлимар Ерусалимдиъ уч шулу. 6 Душваъ аьхюну малла Гьаннай, гьацира Каяфа, Югьан, Александр ва жугьдарин аьхюну маллайин тухмиан вуйи жарадарра айи. 7 Дурари, Петрна Югьан хъади духну, дурарихьан гьерхну: – Фициб кьувватниинди вая фуну ччвурнахъан учву гьамци гъапІунчва? 8 Гьадмуган, Гирами Рюгьнахьди ацІну, Петри дурариз кІуру: – Эй халкьдин гьякимдрарна Израилин кавхйир! 9 Эгер учву аьжуз адмийиз уж’вал гъапІну кІури ва, думу фици сагъ гъахьнуш, пуб гъи учкан жаваб тІалаб апІураш, 10 учвуз варидариз ва вари Израилин халкьдиз аьгъю ибшри, му, учву дариз гъизигу ва Аллагьди чІиви гъапІу Назаретдиан вуйи Месигь Исайин гьунарниинди думу ичв улихь сагъ духьну, дийигъна. 11 Думу, устйири нигь дапІну ва хъасин мурччван кІулин гъван гъаши, Гъван ву. 12 Фицики заварин кІанакк инсанариз тувнайидарикан, ухьуз уьрхювал тувру, сарун жара ччвур ккадар. 13 Жугьдарин гьякимдрариз Петринна Югьандин дирбаш’вал дябкъну, дурар гъурхдар дару ва аьдати адмийир вуйивалин гъаври ахъну, гьаддиин мюгьтал духьнайи. Дурар Исайихъди гъахьидар вуйиб аьгъю гъабхьнийи. 14 Исайин вакиларин гъвалахъ сагъ дапІнайи адми дийигънайиган, сарун артухъ дурарихьан гаф пуз гъабхьундайи. 15 Петризна Югьандиз диванханайиан удучІвуз буйругъ тувну, гьякимдрари чпин арайиъ мясляаьт апІуру: 16 – Ухьу мурарикан гьапІхьа, фицики Ерусалимдиъ яшамиш шулайи гьарсар касдиз му аьхю аьламат гьадрари гъапІуб ачухъди аьгъя, ва ухьхьан му гъапІундар пуз шулдар. 17 Амма му аваза хъанара ярхлаз дарабгъбан бадали, Исайикан гьич сарихъдира дулухуз дурариз гъадагъа апІидихьа. 18 Ва дурариз дих дапІну, Исайикан сарун саризра фукІа дарпуб ва аьгъювалар улулупуб гъадагъа апІуру. 19 Хъа Петрина Югьанди дурариз жаваб тувру: – Учву саб фикир апІинай: Аллагьдин улихь АллагьдихътІан учвухъ артухъ хъпехъуб дугъри вуйинхъа? 20 Учхьан учуз гъябкъюбдиканна гъеебхьубдикан дарпиди гъитуз шулдарчухьан. 21 Дурар, хъана гучІар ккаъну, деетну. Гьаз гъапиш дурариз жаза тувуз гьякимарихьан багьна абгуз гъабхьундайи, фицики гъабхьибдиз лигну, вари халкьди Аллагьдин ад апІурайи. 22 Сагъ гъаши касдин ягъчІвур йистІан артухъ вуйи. 23 Деету Петрина Югьанди, чпиндарихьна дуфну, аьхюну маллйирина кавхйири чпиз фу гъапнуш, ктибтуру. 24 Мурар деерхьну, заварихьинди илдицну, Аллагьдиз варидари кІуру: – Я Гьякимдар Аллагь, Уву зав, жил, гьюл ва дюн’яйиъ айи гьарсаб яратмиш гъапІунва! 25 Ич аба ва Яв лукІ Давудрин мелзниинди Гирами Рюгьналанмина Уву гъапунва: «Гьаз жара миллетар гьяясуз шулу? Гьаз дурариъ кІулиз удудучІвру ниятар а? 26 Дюн’яйин паччгьар ва гьякимдрар дяви апІуз гьязур духьна, Агъайиз ва Дугъан Месигьдиз къаршу вуди сабишв’ина уч духьна». 27 Фицики дугъриданра мурар вари, Гьиродна Понтий Пилат Израил халкьдихъди ва жара миллетарихъди гьаму шагьриъ Уву Месигьди ктагъу Яв Гирами Гъаравашдиз къаршу вуди уч гъахьну. 28 Чпин ляхнар кІулиз адагъуз уч гъашидариинди Яв кьастниинди ва гьюкмиинди улупнайи ляхнар кІулиз удучІвну. 29 Гьамус Уву лиг, Агъа, учуз гучІар ккаъри, дурари фйир кІураш, Яв лукІариз Яв гаф гучІ дарди пуз кюмек апІин. 30 Аьзарлуйир сагъ апІури, аьламатар ва аьжайиб лишнар улупури, Яв Гирами Гъараваш Исайин ччвурнахъди Яв кьувват улуп. 31 Ккарагбахъан, дурар али йишв тІубччвуру ва дурар Гирами Рюгьнахъди ацІру. Гьаддиз дурари Аллагьдин Гаф аьшкьниинди пуз хъюгънийи. 32 Вари хъугънайидар саб юкІвси ва саб жанси гъахьнийи. Дурарикан сарира чаз айи мал-мутмуйиз, йизуб ву, кІурдайи, хъа вариб дурарин уртахъуб вуйи. 33 Вакилари зурба кьувватниинди Агъа Иса чІиви хьуваликан шагьидвал апІури гъахьну. Дурариин Аллагьдин уж’вал алди гъабхьну. 34 Дурарин арайиъ дарвал кайидар адайи, фицики мулкар вая хулар-йишвар айидари, дурар масу туври, пул хури шуйи. 35 Хъа пул вакиларихьна тувуйи, ва дурари, шлиз фтин дарвал каш, гьубкІбан бадали пай апІуйи. 36 Месела, Киприъ бабкан гъаши сар левит Юсуфди (вакилари дугъаз Варнав кІуйи, яна «Ккарцрур») 37 чан хутІил масу тувну, дидихъ гъадабгъу пул дубхну, вакиларихьна тувнийи.

Ляхнар 5

1 Ананай кІуру сар касдина дугъан шив Сапфирайи чпин мулк масу тувру. 2 Хъасин гъадабгъу пуликан, хпиризра аьгъяди, саб пай гьитІибкІуру ва имбуб дубхну вакиларихьна тувру. 3 Гьадмуган Петри дугъаз кІуру: – Ананай, гьаз яв кІван аьхювал апІуз иблисдихьди гъитунва, гьаз, Гирами Рюгьназ кучІал дапІну, жилихъ туву пуликан гьитІибкІунва? 4 Масу тувайиз думу жил явуб дайинхъа? Ва гъадабгъу пулра яв ихтиярнаъ адайинхъа? Мициб ляхин фици фикриз гъафнияв?! Уву адмийириз ваъ, хъа Аллагьдиз кучІал гъапІунва. 5 Гьаму гафар гъеерхьу Ананай алдакуру ва алишв’ин йикІуру. Хъа дуфну жигьилари, думу кивуз гьязур апІуру, хъасин кивуз адагъуру. Ва мидкан гъеебхьдарин гучІбаан зегьле гъябгъюру. 7 Мина шубуб сяаьтналан гъабшибдикан хабар адру Ананайин шив гъюру. 8 Петри дугъхьан гьерхру: – Йип узуз, учву хутІил гьаму кьиматнахъ масу тувинчвахъа? Дугъу: «Ав, гьадмукьандиз тувунча» пну, жаваб тувру. 9 Гьадмуган Петри дугъаз кІуру: – Учв’ан Агъайин Рюгь ахтармиш апІуз фици удубкьунчвуан?! Гьатмагьа яв жилир кивдар, кьяляхъ хъадакну, урчІарихъна дуфна. Дурари яв майитра гъабхиди. 10 Му дишагьли сабпну Петрин ликариккинди алдакуру ва йикІуру. Хулаъ учІву жигьилариз думура дукІну рякъюру ва, духну, жилирин гъвалахъ кивру. 11 Вари хъугънайидарик ва мидкан гъеебхьдарик зарбди гучІ кабхънийи. 12 Вакилари халкьдин арайиъ гизаф аьламатарна аьжайиб лишнар гъапІнийи. Дурар гьарган вари сатІиди Сулеймандин айвандихъ хъади шуйи. 13 Жарадарикан гьич сарихьанна вакиларин багахь хьуз шули гъабхьундар. Халкьди дурарин ад апІуйи. 14 Агъайихъ хъугънайи халкьдин – гьам жиларин, гьам дишагьлийирин – кьадар артухътІан артухъ шулайи. 15 Аьзарлуйирра кмиди, кючейиз адагъуйи, ахнар-леъфариин дитуйи, дилинтина гъягъруган, Петрин сиринкьан кубкІри кІури. Фицики дурар сагъ хьпан бадали гьадмура чІяаьн шул пну, дурари миж кивуйи. 16 Ерусалимдин аьтрафарихъ хъайи шагьрариан аьзарлуйир ва жинар кучІвнайидар хури, инсанарин аьхю дестйир гъюз хъюгъюйи, ва вари сагъ шулира гъахьну. 17 Гьадмуган маллйирин аьхюр ва дугъахъ хъайи саддукйир гъанихвалиан тІуркІури гъахьну ва 18 дурари вакилар, дидисну, жямяаьтлугъ дустагъдиъ итру. 19 Хъа Агъайин Малайикди, йишвну дустагъдин урчІар арццру ва, дурар адаъну, кІуру: 20 – Душну Аллагьдин хулаъ халкьдиз цІийи уьмрикан вари кидибтай. 21 Му гафар деерхьну, дурар акв мялум шулайи вахтна Аллагьдин хулаъ учІвру ва халкьдиз аьгъювалар улупуз хъюгъру. Маллйирин аьхюри ва дугъахъди хъайидари, вари диванбегйирна Израилин сихларин вари кавхйир суддиз уч апІуру, хъасин суддин гъаравлар дустагъдиз вакилар хуз гьаъру. 22 Вакилар хуз гъафидариз дустагъдиъ фужкІара дихъурдар ва, хъадакну, гъафидари кІуру: 23 – Учуз дустагъ мюгькамди хъябкьну ва гъаравларра урчІарихъ дийигънади гъяркъюнчуз, амма раккнар арцциган, учуз душваъ касра гъидихъундарчуз. 24 Му гафар гъеерхьиган, аьхюну маллйир ва Аллагьдин хулан гъаравларин аьхюр, му фу хабар вуйкІан кІури, мюгьтал духьну гъузнийи. 25 Хъасин сари дуфну кІуру: – Учву дустагъдиъ иту адмийир Аллагьдин хулаъ а ва халкьдиз дурари аьгъювалар улупура! 26 Гьадмуган гъаравларин аьхюри, чан эскрарихъди душну, вакилар хъади гъюру. Вакилариз гуж апІуз эскрариз гучІуйи, фицики халкьди дурариин гъван уьлюбхюб мумкин вуйи. 27 Дурари вакилар диванбегйирин улихь дерккру. Гьадмуган маллйирин аьхюри дурарихьан гьерхру: 28 – Учу учвуз Гьадму Касдин гьякьнаан аьгъювалар улупуб ижмишнаан къадагъа гъапІундайинхъа? Хъа магьа, учву Ерусалим вуйиси Дугъкан аьгъювалар рагъурачва ва Думу йикІбан тахсир уч’ин илипуз ккунди ачвуз. 29 Петри ва вакилари жаваб тувру: – Учу адмийиризтІан Аллагьдиз артухъди мютІюгъ духьну ккунду. 30 Учву Иса, дариз дизигну, гъакІунчва, амма ихь абйирин Аллагьди Думу, гъачІихъан, чІиви гъапІну. 31 Аллагьди, Израилин халкьди чпин тахсрар гардандиъ дидисну гунгьарилан хил алдабгъуз гъитбан бадали, Иса Чан арччул хилихъна Аьхюрди ва ухьу Уьрхрюрди за гъапІну. 32 Мидин шагьидар Чаз мютІюгъ шлудариз Аллагьди тувнайи Гирами Рюгь ва учу вуча. 33 Му гафар гъеерхьиган, диванбегйирик яманди хъял кубчІвру, ва дурариз вакилар йихуз ккун шулу. 34 Къанунчийизси гьюрмат айи, диванбегйирикан Гамалиил кІуру сар фарисейи, али йишвлан за духьну, вакилар саб геренди суддиан адауз буйругъ тувру. 35 Хъасин дугъу кІуру: – Израилин агьалйир! Учву мурарикан гьапІруш, ужуди фикир апІинай! 36 Ичв кІваин илмиш, сацІиб улихьнаси, учв зурба кас вуза кІури, Февда кІурур гъядяхънийи ва юкьудваржкьан адми дугъахъди гъахьнийи. Хъа думу йивну гъакІнийи, дугъан терефкрар гъадаргънийи ва жвартІ гъахьнийи. 37 Дугъан кьяляхъ, агьалйир гьисаб апІру вахтна, Галилейиан Ягьуда гъядяхъну, дугъура чахъди хайлин халкь жалб гъапІну. Думура йивну гъакІну, хъа дугъахъди гъушдарра вари гьубкьушвахъинди гъарагъну. 38 Гьаддиз лигну, гьамус кІуразачвуз: гьадму касарихьан гьудучІвай ва дурар сикинди гъитай. Фицики эгер му ляхин инсанарин терефнаан вуйиб вуш, думу кІулиз удубчІвидар. 39 Хъа эгер Аллагьдин терефнаан шулайиб вуш, учвхьан думу дебккузра хьибдарчвухьан, учву Аллагьдиз къаршудира хьуз мумкин ву. 40 Диванбегари дугъан насигьят кьабул апІуру. Хъасин вакилариз дих дапІну, дурар дурччвну, сарун Исайикан аьгъювалар улупуз гъадагъа дапІну, деетуру. 41 Вакилар кІуруш, чпи Иса себеб вуди жазайикк ккуркьуз лайикьлу хьуб’ин шад духьну, суддиан удучІвну гъягъюру. 42 Гьар йигъан Аллагьдин хулаъ ва адмийирин хулариъ халкьдиз Иса Месигьдикан аьгъювалар улупури, дурари Ужувлан хабар рабгъуру.

Ляхнар 6

1 Вакиларин терефкрар артухъ хьпахъ, бинайиан грек чІал’инди улхурайи жугьдари Ерусалимдин жугьдарикан аьрзар апІуз хъюгъру. Дурари, гьар йигъан Ерусалимдин жугьдари кюмек пай апІру вахтна, Ерусалимдиан дару ачІни хпариз фикир туври шулдар, кІуйи. 2 Гьадмуган йицІикьюр вакили, вари ученикариз дих дапІну, кІуру: – Учу Аллагьдин гаф гъибтну, кюмек пай апІуб ужу дар. 3 Гьаци вуйиган, гъардшар, ичв арайиан ухьуз аьгъюдар, Гирами Рюгьну ва фагьумлували ацІнайи ургур кас кадагъай. Дурар гьадму гъуллугъниин дерккдихьа. 4 Хъа учу ккарагури ва Ужувлан хабар рабгъури хьидича. 5 Му теклифниин вари рази шулу. Дурари хъугъвали ва Гирами Рюгьну ацІнайи Стефан кІуру кас, гьацира Филип, Прохор, Никанор, Тимон, Пармен ва улихьди аллагьсуз вуди гъаши Антиохияйиан вуйи Николай ктагъуру. 6 Мурар вакиларин улихь дерккнийи ва, Аллагьдиз ккарагну, дурариин хилар иливнийи. 7 Гьамци Аллагьдин гаф рабгъури, Ерусалимдиъ хъугънайидарин кьадар артухъ шулайи, маллйириканра гизафдар Аллагьдихъ хъугъри гъахьнийи. 8 Хъугъвалиъ ва кьувватнаъ айи Стефанди халкьдин арайиъ зурба вуйи аьламатар ва аьжайиб лишнар улупуйи. 9 Киринеяйиан, Александрияйиан, Киликияйиан, Асияйиан вуйидар ва Азадлуйирин мистан терефкрар Стефандихъди гьюжатнаъ учІвру. 10 Амма дурарихьан Стефандин фагьумлувал ва дугъак кайи Гирами Рюгь ккагъуз гъабхьундар. 11 Гьаддиз дурари пул тувну бязи адмийир: «Учуз, дугъу фици Муса пайгъамбризна Аллагьдиз люкьнар апІурайиш, гъеебхьунчуз» кІури, пуз алауру. 12 Дурари гьамци халкьдик, тухмарин кавхйирик ва аьлимарик гъалабулугъ кипру ва, алархьну дидисну, Стефан аьхю суддиз хуру. 13 Душваз кучІлин шагьидарра хъади гъюру, ва дурари кІуру: – Му касди сикин дарди Аллагьдин хулаз ва Къанундиз люкьнар апІура. 14 Учуз дугъу, Назаретдиан вуйи Исайи Аллагьдин хал дабгъиди ва Мусайи ухьуз тувнайи аьдатар гьюдюхиди кІури, гъеебхьунчуз. 15 Суддиъ деънайидари Стефандин машналан ул алдабгъурадайи, фицики дурариз дугъан маш малайикдин машси рябкъюрайи.

Ляхнар 7

1 Гьадмуган жугьдарин аьхюну маллайи гьерхру: – Му гафар гьякь вуйин? 2 Стефанди жаваб тувру: – Хъебехъай, чвйир ва абйир! Ихь аба Ибрагьимдиз, гьеле чав Харрандиъ бин апІайиз улихьна, яна учв Месопотамияйиъ яшамиш шулайи девриъ, кьудратлу Аллагь ачмиш гъахьну 3 ва гьамци гъапну: «Яв багъри юрд ва яв багахьлуйир гъитну, Узу улупу уьлкейиз гъарах». 4 Ибрагьимдира, халдеялуйирин уьлке дипну, Харрандиъ бин гъапІну. Дугъан адаш кечмиш гъашихъан, Аллагьди Ибрагьим гьамусяаьтди учву яшамиш шулайи уьлкейиз гъюз гъитну. 5 Аллагьди дугъаз ирс вуди жилин саб чІукІкьан тувундар, амма думуган Ибрагьимдиз веледар адайишра, гележегдиъ дугъазна дугъан веледариз жил тувуз гаф тувру. 6 Аллагьди дугъаз гъапну: «Яв веледар яд ругариина гъафи гъурабйир хьиди ва дурар юкьудварж йисан лукІарди аьзабнакк ва зулмикк ккади гъузди. 7 Дурар лукІариз илтІикІу халкьдин узу диван апІидиза, ва дурари, гьадму юрд дипну, гьамина дуфну, гьаму ругдиин Узуз икрам апІиди». 8 Аллагьди, Ибрагьимдихъди йикьрар йибтІбан лишан вуди, суннат апІбан аьдат дугъаз багъиш гъапІну. Гьаддиз лигну, Ибрагьимдикан Исакьдин адаш гъашиган, дугъу миржидпи йигъан Исакьдин суннат гъапІну. Исакьдикан Якьубдин адаш гъашиган, дугъура гьаци Якьубдин суннат гъапІну, дидхъантина Якьубди чан баяринна суннат гъапІну, хъа дурарикан гележегдиъ йицІикьюб сихлин ата-бабйир гъахьну. 9 Дурари, чпин чве Юсуфдиин бахил духьну, думу Египет уьлкейиз йисирвализ масу тувру. Хъа думу Аллагьдин кІваин илмиди гъахьну. 10 Аллагьди думу вари завалариккан уьрхюру, дугъаз зурба фагьумлувал ва Египетдин паччагь дугъахьна ужуди янашмиш хьувал тувру. Паччагьди дугъкан вари Египетдин ва чан хусуси хулан гьякимдар гъапІнийи. 11 Египетдиъна Ханаан юрднаъ гаш’вал абхъру, ва вари агьалйир зурба аьзабарикк ккуркьру. Ихь абйириз ипІруб дибрихъри гъабхьну. 12 Египетдиъ уьл а, кІури деебхьну, Якьубди дина ихь абйир гьаънийи. Му дурари Египетдиз гъапІу сабпи сиягьят вуйи. 13 Дурар гьадина кьюбпи ражари гъушиган, Юсуф чан чвйириз ачмиш шулу, ва Египетдин паччагьдиз Юсуфдин тухум аьгъю шулу. 14 Хъа Юсуфди чан адаш ва вари багахьлуйир хъади гъюз адми гьаъру. Дурар вари ургцІурна хьур кас вуйи. 15 Якьуб Египетдиз гъюру ва ихь абйир душваъ чпин аьжал хъубкьайиз яшамиш шулу. 16 ГъачІихъан, дурарин майтар багъри юрднаъ айи Сихем кІуру шагьриз духну, Ибрагьимди Хаморин баярихьан арсрахъ гъадабгъу накьвдиъ ивру. 17 Аллагьди Ибрагьимдиз тувнайи гаф тамам апІру вахт багахь хьубахъ, Египетдиъ айи жугьдарин кьадар гъюблан-гъюбаз артухъ шули гъабхьну. 18 Аьхириъ Египетдин тахтниина, Юсуф аьгъдру жара паччагь гъафнийи. 19 Дугъу ихь халкь аьмал кади ишлетмиш гъапІну ва ихь абйириз гужар тувну. Дурарин бицІидар, пуч хьубан бадали, чІурариз гатІахьуз мажбур апІури гъахьну. 20 Гьадму вахтна Муса бабкан шулу. Думу Аллагьдиз кьабул шлу бай гъахьну. Думу шубуб вазли чан адашдин хулаъ дадайин мухрихъ шулу, 21 хъа думу гатІахьиган, паччагьдин шуру гъадагъуру ва чахь, чан байси, тербияламиш апІуру. 22 Мусайиз Египетлуйирин гьадмугандин илмар аьгъю гъахьну. Думу улхбариъ дилавар, ляхнариъ бажаранлу кас вуди гъахьну. 23 Мусайин ягъчІвур йис гъабхьиган, гъардашлугъ жугьдариин улукьуз дугъан кІваз гъюру. 24 Чан гъардшарикан сарик Египетдин агьали кялхъради ва дугъаз йивуради дяркъну, дугъхъанди духьну, Мусайи египетлу йивну йикІуру. 25 Мусайи, чан халкьдиз чалантина Аллагьди азадвал гьапІрайивалин дурар гъаври ахъуршул пну, фикир гъапІнийи, амма дурар гъаври ахъундайи. 26 Хъайигъан дугъаз хабарсузди чиб-чпик кархьнайи кьюр жугьуд рякъюру ва дугъаз дурар, гьамци кІури, мясляаьтнахъна хуз ккун шулу: «Эй инсанар, учву гъардшар вучва, гьаз учву сари-сариз гиран ктапІурачва?» 27 Амма чан багахьлуйиз гиран ктапІурайири, Мусайиз хъизигну, кІуру: «Уву ич аьхюрди ва диванбегиди шли дерккунву? 28 Накь Египетлуси, узура йивну йикІуз ккунди ануз?» 29 Му гафар гъеерхьиган, Муса Египетдиан гьергну, Мадиам юрднаъ гъурабайиси чаз бин ккебгъру. Душваъ дугъаз кьюр байра шулу. 30 ЯгъчІвур йис улдучІвхъан, ичІи чюлиъ Синай дагъдиин дугъаз чан улихь убгурайи зазун рукчин ялавнягъ малайик рякъюру. 31 Му гъяркъю Муса мюгьтал шулу. Хъа ужуди тамаши апІбан бадали рукчиз багахь хьуз хъюгъиган, дугъаз Агъа Аллагьдин сес ебхьуру: 32 «Узу яв абйирин Аллагь, Ибрагьимдин Аллагь, Исакьдин Аллагь ва Якьубдин Аллагь вуза!» ГучІбаан гукІни духьнайи Муса рукчиз лигуз даршули гъахьну. 33 Гьадмуган Агъайи дугъаз кІуру: «Яв ликарилан илдит, фицики уву дийигънайишв Аллагьдиз гирами жил ву. 34 Узуз Египетдиъ Йиз халкьдиз зулмар апІуради рябкъюразуз, дурарин сузйирин агьузар ерхьуразуз ва дурар азад апІуз жилиина кудучІвназа. Гьаци вуйиган, Узу уву хъана Египетдиз гьаъразаву». 35 «Уву ич аьхюрди ва диванбегиди шли дерккну» пну, жугьдари нигь гъапІур гьадму Муса ву. Убгурайи зазун рукчигъ Аллагьдин малайик гъяркъю, Аллагьди малайикдилантина жугьдарин гьякимдарди ва азад апІрурди гьаурра гьадму Муса ву. 36 ЯгъчІвур йисан Египет жилариин Уьру гьюлихъ ва ичІи чюлиъ аьламатар ва аьжайиб лишнар улупури, дурар Египетдиан адаурра гьадму Муса ву. 37 Израилин баяриз: «Ичв Агъа Аллагьди учвухьна ичв чвйирин арайиан, узуси, Пайгъамбар гьаъди» гъапирра гьадму Муса ву. 38 ИчІи чюлиъ уч гъашиган, Израилин халкьдихъ хъайир, чахъди Синай дагъдиин малайик гъулхур, чІиви гафар кьабул гъапІур, дурар ухьухьна рукьуз гъитур, ихь абйирихъди хъади гъаширра гьадму Муса ву. 39 Ихь абйириз дугъахъ хъебехъну хьуз ккун гъабхьундар, думу нигь дапІну, Египетдиз хътакуз ккун гъабхьну. 40 Дурари Гьарундиз гъапну: «Ухьу дина хъади гъягъюз ухьуз идолар кадаъ, фицики ухьу Египетдиан адау Мусайихъди фу гъабхьнуш, аьгъдархьуз». 41 Гьадмуган дурари идол вуди кІарисиб кадапІну, дидиз гъурбнар хури ва чпи гъапІубдикан шадлугъар апІури гъахьну. 42 Аллагьди дурарихьан маш гьадабгъуру, ва дурари завун идолариз гъурбнар хури икрамар апІуру. Пайгъамбрарин Китабдиъ гьамци дибикІнайиси гъабхьну: «Израилин халкь! ЯгъчІвур йисан ичІи чюлиъ урккру ва ургру гъурбнар учву Узуз хури гъахьунчвахъа? 43 Ваъ, учву икрам апІбан бадали, учвухьди Молохдин чадур, ичв Ремфан-идолин хяд, ичв ктау идолар гъахури гъахьунчва. Гьаддиз лигну, Узу учву Вавилон сяргьятарилан тина гьаъдиза». 44 Ихь абйири, ичІи чюлиъ лицурайи вахтна, йикьрарнан гирами Чадур гъабхури гъахьну. Думу Чадур Мусайи, Аллагьди чаз улупу чешнейиинди гъапІну. 45 Ихь абйири Гъисайин хиликкди чпин абйирилан гъурубкьу гьадму чадур гъабхури гъахьну. Дурари, Аллагьди улихьди жара халкьар ултІуркку жил гъибисну. Гьамци Давудрин йигъар улукьайиз гъабхьнийи. 46 Давуд Аллагьдиз ккунир гъахьну. Думу, Якьубдин Аллагьдиз хал дивбан бадали, ккарагну. 47 Хъа Агъайиз хал Сулейманди дивру. 48 Анжагъ ВаритІанзаанур хилариинди диву дараматариъ яшамиш шлур дар, фицики, пайгъамбри дупнайиганси: 49 «Аьршар Йиз тахт вуйиз, хъа жил – Йиз ликарин кІан. Фициб хал Узуз дивуз шулчвухьан? – кІура Агъайи, – Ясана Йиз эргвал йивру йишв наан а? 50 Му вари Узу яратмиш гъапІуб даринхъа?» 51 Эй, Аллагьдиз юкІвар бахш апІуз ва Дугъахъ хъпехъуз даккни фурсачйир! Учву гьарган Гирами Рюгьназ къаршу удучІвурачва, учву ичв абйирсдар вучва. 52 Ичв абйири пайгъамбрарикан фуж утІурккундар? Дурари Гьякьлур гъюваликан улихьмиди хабар гъапІу пайгъамбрарра гъийихну, гьамус гьадму Гьякьлур учву масу тувну гъакІунчва! 53 Аллагьдин малайикари учвуз туву Къанундиз мютІюгъ гъахьундарчва. 54 Му гафарихъ хъпехъурайи жугьдарин гьякимдрари хъюлу ургури, силбари жакьракьар апІурайи. 55 Гирами Рюгьнахъди ацІнайи Стефан завузди лигуру, ва дугъаз Аллагьдин гьяйбатна Дугъан арччулну хилихъ дийигънайи Иса рякъюру. 56 Дугъу кІуру: – Магьа, узуз атІарццнайи аьршарна Аллагьдин арччул терефнаъ Инсаниятдин Бай рякъюразуз. 57 Гьякимдрари чІигъар апІури, чпин ибариъ тІубар урччву. Хъасин дугъ’ин алархьу. 58 Дурари, Стефан шагьрин гъирагъдихъна духну, дугъ’ин гъван уьлюбхюз хъюгъру. КучІлин шагьидари Саул кІуру сар жигьилихь чпин палтар уьрхюз гъитнийи. 59 Дурари Стефандиин гъван уьлюбхнайиган, Стефанди ккарагури гъапи: – Я Агъа Иса! Йиз рюгь кьабул апІин! 60 Хъасин кьамкьариина ис духьну, зарбди чІигъ апІуру: – Я Агъа! Дурарин гьаму гунгьилан хил алдабгъ! Гьамци дупну, дугъан нефес улдубтІуру.

Ляхнар 8

1 Стефан йикІбиин Саул рази гъахьнийи. Гьадму йигъан Ерусалимдиъ айи хъугънайидарихъ зурбади хъергбар ккергънийи ва дурар, вакилар ктарди, вари Ягьудия ва Самария уьлкйир вуйиси гъарагънийи. 2 Стефандиз вафалу вуйидари, дугъ’ин ишлар дапІну, думу накьвдик кивнийи. 3 Хъа Саули, хъугънайидар терг апІуз ккунди, гьардин хулариъ учІври, жилар, хпар дисури, дустагъдиъ итуйи. 4 Чпин йишвариан утІурккну, гьар йишвариъ гъадаргъу хъугънайидари Ужувлан хабар рабгъуйи. 5 Гьаци, Филип Самария кІуру шагьриз гъюру ва Месигьдикан аьгъювалар улупуру. 6 Дугъан гафар деерхьну, дугъу гъапІу аьламатар дяркъну, халкьди сабхилди Филипди гъапиб аннамиш апІуз хъюгъру. 7 Гьаз гъапиш, дугъу гизафдариан чІигъар апІурайи жинар адаъну ва аьхючІвеъ паралич кайидар, ликудар сагъ гъапІну. 8 Ва гьадму шагьриъ зурба шадвал абхънийи. 9 Самарияйиъ улихьдира сюгьюрчивалар апІру ва мид’инди вари мюгьтал апІру сар Симон кІуру кас айи. Дугъу учв зурба касси улупуйи. 10 Дугъахъ хъпехъу варидари кІури шуйи: – Му касдиъ «Зурба Кьувват» кІуру аллагьдин кьудрат а. 11 Дугъу хайлин вахтна инсанар чан сюгьриинди гьяйран апІруган, дугъахъ хъугъри шуйи. 12 Хъа халкьар Аллагьдин Паччагьлугъдикан ва Месигь Исайикан аьгъювалар улупурайи Филипдихъ хъпехъуз хъюгъиган, жилар ва хпар штуан шулу. 13 Гьадму Симонра хъугънийи ва, штуан духьну, гьарган Филипдихъди шули гъахьну. Дугъу улупурайи аьламатар ва аьжайиб лишнар рякъюри, думу учвра гьяйран шуйи. 14 Самарияйин агьалйири Аллагьдин Гаф кьабул гъапІну, кІури гъеебхьу Ерусалимдиъ айи вакилари, дурарихьна Петрна Югьан гьаъру. 15 Дурар, дина дуфну, тазади хъугънайидари Гирами Рюгь кьабул апІри пну, ккарагуру. 16 Фицики дурар Агъа Исайин ччвурнахъди штуан духьнашра, Гирами Рюгь дурарикан сарира кьабул дапІнадайи. 17 Гьадмуган Петрина Югьанди дурариин хилар иливуру ва Гирами Рюгь кьабул апІуру. 18 Вакилари хилар иливиган, дурари Гирами Рюгь кьабул гъапІуб дябкъну, Симонди вакилариз пул теклиф апІури, 19 кІуру: – Узу шлиин хил иливишра, дугъу Гирами Рюгь кьабул апІруси, узузра гьациб гьюкум чавайчва. 20 Петри дугъаз кІуру: – Яв пул кІулик кубкІрияв, гьаз гъапиш уву Аллагьдин багъиш пулихъ гъадабгъуз ният гъапІунва. 21 Ич ляхнарин иштиракчи хьуз лайикь дарва, фицики яв юкІв Аллагьдин улихь дугъри дар. 22 Гьаддиз яв чІуру ният гардандиъ бис, дидлан хил алдабгъбан бадали Аллагьдиз ккараг, белки, Дугъу увлан хил алдабгъур. 23 Гьаз гъапиш рякъюразузки, яв жан кьутІкьли бахилвалихьди абцІна ва уву гьякьсузвали йисир дапІнаву. 24 Гьадмуган Симонди жаваб туву: – Учву гъапибдикан фукІара уз’ин улулубкьбан бадали, Агъайиз ккарагай. 25 Петрна Югьан, Исайикан шагьидвал дапІну ва Агъайин гаф аьгъювалиинди улупну, Ерусалимдиз хътакуру. Гъюру рякъюъди дурари Самария уьлкейин гъуларикан гизафдариъ Исайикан Ужувлан хабар рабгъуру. 26 Агъайин малайикди Филипдиз кІуру: – Гьязур духьну, кьиблайихъинди, Ерусалимдиан Газа кІурушваз ичІи чюлиантина гъябгъюрайи рякъюхъна гъарах. 27 Филип, гьязур духьну, гъягъюру. Дугъаз рякъюъ Эфиопияйин, Кандакия ччвур али паччагь дишагьлийин девлет уьбхру, бегларикан вуйи эфиоп хасижви алахъуру. Думу Ерусалимдиз икрам апІуз душну хътакурайир вуйи. Дугъу, фургъниъ деъну, Ишая пайгъамбрин китаб урхурайи. 29 Гьадмуган Гирами Рюгьну Филипдиз кІуру: – Фургънихьна душну, гьаддихъди гъуз. 30 Дидихьна гъушиган, Филипди, дугъу Ишая пайгъамбрин китаб урхури деебхьну, гьерхру: – Урхурайибдин гъаври ахърана? 31 – Узу фици гъаври ахъзахъа? Узу шликІа гъаври тІаърайинхъа? – жаваб тувру дугъу ва Филипдиз фургъниз чан гъвалахъна теклиф апІуру. 32 Дугъу Гирами китабариан гьамцдар гафар урхурайи: – Думу убккуз гъабхурайи марччси вуйи ва ултІубкъурайи марччлихънин улихь сессуз агълижиси Дугъу Чан ушв абццундайи. 33 Думу инсан вуди гьисаб апІурдайи. Думу гьякь вуйи диван апІбахьан мягьрум апІури гъахьну. Фуж Дугъан заманайиндарин ниятарин гъаври ахъди? Фицики дюн’яйиин Дугъан уьмур кьатІ гъапІну. 34 Хасижвуву Филипдихьан гьерхру: – Узу увкан пуб ккун апІураза: мушваъ пайгъамбри шликан кІура – чакан, даршиш жарарикан? 35 Гьадмуган Филипди, мушваъ Исайикан кІура, дупну, Гирами китабдин гьадму йишвлан ккебгъну, Ужувлан хабар ктибтуз хъюгъру. 36 Рякъ давам апІури, дурар штухъна гъюру ва хасижвуву Филипдихьан гьерхру: – Магьа шидра: узуз штуан хьуз фти машат апІидихъа? 38 Дугъу фургъун дебккуз буйругъ тувру, кьюридра штуъ учІвру ва Филипди думу штуан апІуру. 39 Хъа штуан удучІвган, Агъайин Рюгьну Филип гьадагъуру, хасижвуваз думу сарун гъяркъюндайи ва дугъу шадди рякъ давам апІуру. 40 Филип, кІуруш, Аштод шагьриъ ади шулу. Дугъу, шагьриан шагьриз гъягъюри, Къайсарияйиз гъяйизкьан, Ужувлан хабар рабгъури гъахьну.

Ляхнар 9

1 Му арайиъ Саул, Агъайин ученикариз гучІар ккаъри, дурар йихуз ккунди хъергнайи. Думу жугьдарин маллйирин аьхюрихьна гъягъюру. 2 Дугъхьан Саули Дамаскдиъ айи жугьдарин мистариз вуйи кагъаз бисуру. Диди душваъ, жилар вушра, хпар вушра, Исайин терефкрар алахьиган, дурар дидисну, йитІну, Ерусалимдиз хуз ихтияр тувуйи. 3 Думу Дамаскдиз багахь шулайиган, сабпну завариан аквну ккаъру. 4 Думу жил’ина алдакуру ва чаз кІурайи сес ебхьуру: – Саул, Саул! Уву Узухъ гьаз хъергнава? 5 Дугъу: «Агъа, Уву фуж вува?» – пну гьерхиган, Агъайи жаваб тувру: – Узу уву хъергнайи Иса вуза. 6 Гъудужвну, шагьриз гъарах ва уву душваъ, фу дапІну ккундуш, пидивуз. 7 Дугъахъ хъайи адмийирин мюгьталвалиан чІал гъибиснийи, фицики дурариз, сес ебхьурашра, фужкІа рякъюрадайи. 8 Жилилан за гъахьи Саулиз, улар арцциган, фукІара рябкъюри гъабхьундар. Думу дугъахъ хъайидари, хилхъан дидисну, Дамаскдиз хъади гъюру. 9 Думу шубуд йигъан дярякъри, дирипІри ва дурубхъри гъахьнийи. 10 Дамаскдиъ Ананай кІуру Исайин ученик айи. Агъайи дугъаз аьжайиб рякъбиинди гъапнийи: – Я Ананай! Дугъу: – Гьай Агъа! – пну, жаваб тувру. 11 Агъайи дугъаз кІуру: – Гъудужвну, «Диш кюче» кІуру кючейиз гъарах ва Ягьудайин хулаъ Тарсдиан вуйи Саул кІуру кас гьерх, думу гьамусяаьт ккарагура. 12 Дугъаз аьжайиб рякъбиинди, дугъан улар сагъ апІуз дуфну, дугъ’ин хил иливури Ананай кІуру кас рякъюру. 13 Ананайи жаваб тувру: – Я Агъа! Гьадму касди Ерусалимдиъ Яв халкьдиз гъапІу чІуру ляхнарикан гизаф деебхьназуз. 14 Гьаминара думу, жугьдарин аьхюну маллйири гьаъну, Увухъ хъугънайидар вари дисуз дуфнайир ву. 15 Хъа Агъайи дугъаз кІуру: – Гъарах, фицики паччгьарин, жугьдарин ва жара халкьарин арайиъ Йиз ччвур адлу апІуз думу кас Узу кадагъунза. 16 Узу дугъаз, Йиз ччвурнахъди фукьан аьзаб дизигну ккундуш, улупидиза. 17 Ананайи, душну, гьадму хулаъ Саулиин хил иливну, дугъаз кІуру: – Саул чве, мина гъюру рякъюъ увуз гъяркъю Агъа Исайи узу, яв улар сагъ апІбан ва Гирами Рюгьну ацІбан бадали, гьаъназу. 18 Гьамци гъапибси, дугъан уларилан ханцІ алдабхъиганси шулу ва дугъаз рябкъюз хъюбгъру, хъасин думу штуан шулу. 19 Хъа дугъу уьл ипІуру ва дугъахьна кьувват гъюру. 20 Дугъан Дамаскдиъ ученикарихъди садшвнуд йигъ шулу, хъасин дугъу Иса Аллагьдин бай вуйиваликан, жугьдарин мистариз гъягъюри, аьгъювалар улупури гъахьну. 21 Дугъан гафар гъеерхькьандар вари мюгьтал шуйи ва кІуйи: – Му кас Ерусалимдиъ Исайиз ккарагурайидар вари терг апІурайи гьадму Саул дайинхъа? Думу мина, дурар дидисну, жугьдарин маллйирин аьхюдарихьна гъахуз дуфнайир дайинхъа? 22 Хъа Саулин кьувват артухътІан-артухъ шулайи ва дугъу, Иса Месигь вуйивал тасдикь апІури, Дамаскдиъ яшамиш шулайи жугьдар русвагь апІурайи. 23 Хайлин йигъар улдучІвхъан, жугьдари думу йикІуз йикьрар апІуру. 24 Дурар йигъ-йишвди шагьрин урнарихъ дугъаз ккеъну шуйи, аммаки Саулиз дурарин кьастнакан аьгъю шулу. 25 Ученикари, йишвну дуфну, думу жагваъди шагьрин цаллансина чІатинди эрхру. 26 Саул Ерусалимдиз гъафиган, дугъаз Исайин ученикарик ктикьуз ккун шулу, амма дурариз дугъхьан гучІури гъахьну, фицики дурар, му Исайин ученик ву пну, дугъахъ хъугъри адайи. 27 Гьадмуган Варнавди думу вакиларихьна хуру ва дурариз, Саулиз Агъа фици гъяркънуш, Агъайи дугъаз фу гъапнуш, Саули Дамаскдиъ фици дирбашди Исайикан аьгъювалар улупнуш, ктибтуру. 28 Дидхъантина Саул дурарихъди гъузру ва Ерусалимдиъ, азадди лицури, Агъа Исайикан ачухъди аьгъювалар улупури шулу. 29 Думу грек чІалниинди улхру жугьдарихъди гьюжатариъ шулу, хъа дурари думу йикІуз кьаст апІуру. 30 Гъардшариз мидкан аьгъю дубхьну, думу, Къайсарияйиз духну, гьадушв’ан багъри Тарсдиз рякъюъ аъру. 31 Гьамци вари Ягьудия, Галилей ва Самария уьлкйир вуйиси хъугънайидар саламат ва хъугъувалиъ мюгькам шули гъахьну. Агъайихьан гучІ’вал хьади ва Гирами Рюгьну кюмек апІури, вакиларин ученикарин кьадар артмиш шули гъабхьну. 32 Шагьриан шагьриз гъягъюри, Петр Лидда кІуру шагьриъ айи хъугънайидариин улукьуру. 33 Душваъ дугъаз Эней кІуру, ришвуз даршули, миржид йисан ахниъ ахънайи сар кас дихъуру. 34 Петр дугъаз кІуру: – Эней! Месигь Исайи уву сагъ апІура. Яв ахниккан гъудужв! Энейра дишла гъудужвуру. 35 Лиддайиъ ва Сарондиъ айидариз варидариз му рябкъюру ва дурар Агъайихъ хъугъру. 36 Яффайиъ Тавифа (грек чІалниинди Доркас, яна «Жейран») кІуру сар хъугънайи дишагьли айи. Дугъу, ужувлар апІури, касибариз садакьйир тувуйи. 37 Гьадму йигъари думу кетІерццну йикІуру. Думу, дижикІну, зиин хулаъ гъитру. 38 Хъа Лидда Яффайихьан ярхлаъ дархьбаз лигну, Петр Лиддайиъ айиваликан деебхьну, ученикари дугъахьна: «Кьан дарапІди гъач», – кІури, кьюр кас гьаъру. 39 Петр, гьязур духьну, дурарихъди гъюру. Петр гъафиган, думу зиин хулазди гъахуру ва ачІни хпар ишури дугъан гъаншариз гъюру. Дурари чпиз Тавифайи гъидирху ккурттар улупуру. 40 Петри дурар хул’ан адауру ва, кьамкьариина ис духьну, ккарагуз хъюгъру. Хъасин гъачІирихьинди илдицну, кІуру: – Тавифа, гъудужв! Дишагьлийи улар арццру ва, Петр дяркъну, за духьну деъру. 41 Хил гьачІабккну, Петр дугъаз гъудужвуз кюмек апІуру. Хъасин вари хъугънайидариз ва ачІни хпариз дих дапІну, дурариз чІиви духьнайир улупуру. 42 Мидкан вари Яффайиз аьгъю шулу, ва гизафдар Агъайихъ хъугъру. 43 Хъа Петр дидхъантина хайлин йигъари Яффайиъ гъидкьарин уста Симондихь гъузнийи.

Ляхнар 10

1 Къайсарияйиъ Корнилий кІуру сар кас яшамиш шули гъахьну. Думу Италияйин кьушмарин юзбаши вуйи. 2 Думу, чан вари хизанси, Аллагьдихьан гучІури шлур ва Аллагьдиз вафалу жви вуйи. Дугъу жумартвалиинди касибариз садакьа тувуйи ва гьаммишан Аллагьдиз ккарагуйи. 3 Аьжайиб рябкъбиинди йигъну, сяаьт шубуб шулайи арайиъ, дугъаз Аллагьдин малайик чан улихьна дуфну ачухъди рякъюру. Малайикдира дугъаз: «Корнилий!» – пну, дих апІуру. 4 Дугъу, гучІра дубхьну, малайикдихьинди дилигну: «Фу кІурава, Агъа?» – пну, гьерхру. Малайикди дугъаз жаваб тувру: – Яв ккарагбар ва яв садакьйир Аллагьди кІваин гъюрхну. 5 Гьамус, Яффайиз гьаъну, Петр кІурайи Симондиз дих апІуз гъит. 6 Думу гьюлихъ хал хъайи гъидкьарин уста Симондихь дергна. 7 Малайик гьудучІвиган, Корнилийи чан кьюр гъаравшиз ва Аллагьдин рякъюъ айи сар эскриз дих апІуру 8 ва, дурариз гъабшибдикан кидибтну, дурар Яффайиз гьаъру. 9 Хъайигъан лисун шули, дурар шагьриз багахь шулайи вахтна, Петр ккарагуз гъваин улучІвуру. 10 Дугъаз гаш шулу ва дугъу уьл ипІуз кьатІъ апІуру. Хураг гьязур апІури имиди, думу аьжайиб гьялназ гъюру. 11 Дугъаз, аьршар атІарццну, юкьбиб пІипІарихъанна шли-вуш дибиснайиси аьхю суфрасиб саб шейъ жилиина ис шули рябкъюру. 12 Дид’ин гьар жюрейин жилилан гъягъру гьяйванатар, битІар-чурчлар ва завун ничхрар алди рякъюрайи. 13 Петрихьна сес шулу: – Гъудужвну, дурккну итІин, Петр! – кІури. 14 Петри: – Дициб дарапІарза, Агъа, гьаз гъапиш саб вахтнара чІуру ва марцц дару мутму гъипІур дарза, – жаваб тувру. 15 Дугъаз думу сесну кьюбпи ражари кІуру: – Аллагьди марцц гъапІуб марцц даруб вуди гьисаб мапІан. 16 Гьамци шубуб ражари текрар шулу, хъасин дишла вари хъана завариз зигуру. 17 Петри, гъябкъюбдин мянайикан фагьум апІури имиди, Корнилийи гьау адмийир, Симондин хулар гьерхри, дугъан урнарихьна дуфну дийигъуру. 18 Дурари зарбди гьерхру: – Петр кІуру Симон гьаму хулариъ дергнайин? 19 Петри гъябкъюбдикан фагьум апІури имиди, Рюгьну дугъаз кІуру: – Узухъ хъебехъ, уву шубур касди агура. 20 Гъудужв, улдучІв ва, саб фикирра кадарди, дурарихъди гъарах, фицики дурар Узу гьаъназа. 21 Петри, улдучІвну, гьадму касариз кІуру: – Учву агурайир узу вуза. Учву гьаз дуфнайидар вучва? 22 Дурари жаваб тувру: – Учу юзбаши Корнилийи, вари жугьдари гьюрмат апІурайи гьякьлу ва Аллагьдихьан гучІру касди, гьаунчу. Марцци малайикди дугъаз, увуз чан хулаз дих апІуз ва яв гафарихъ хъпехъуз, амур дапІна. 23 Хулаз теклиф дапІну, Петри дурар хялижв апІуру. Хъайигъан рякъ’ин духьну, Петр дурарихъди гъягъюру, ва Яффайиан сакьюдар гъардшарра дугъахъди хъахьру. 24 Хъайигъан думу Къайсарияйиз хъуркьру. Корнилий, чан майиларна багахьлу дустар уч дапІну, дурариз ккилигурайи. 25 Петр хулаъ учІвруган, улихьна удучІву Корнилийи, дугъан ликарикк дахъну, икрам апІуру. 26 – Гъудужв! Узу анжагъ увусир инсан вуза – кІури, Петри думу за апІуру. 27 Дугъахъди сюгьбат апІури, Петр хулаъ учІвиган, дугъаз душваъ аьхючІвеъ халкь уч духьну рякъюру. 28 Петри дурариз кІуру: – Учвуз аьгъячвузки, жугьудриз жара миллетдиндарихъди ттикІуб вая дурариин улуркьуб гъадагъа вуйивал. Аммаки Аллагьди узуз гьич сар адмикьана кифир, ясана марцци дарур вуйиб гьисаб дарапІуб табшурмиш гъапІунзуз. 29 Гьаддиз лигну, узуз теклиф гъапІумитІла, чІалкьан дарпиди мина гъафунза. Гьаци вуйиган, учвхьан гьерхраза: узуз гьаз дих дапІначва? 30 Гьадмуган Корнилийи кІуру: – Юкьуд йигъ мидиз улихьна, лисхъан сяаьт шубуб шули, гьаму вахтна, узу йиз хулаъ ккарагурайза. Сабпну йиз улихь аку палтар али сар кас ачмиш гъахьну 31 ва дугъу узуз гьамци гъапну: «Корнилий, яв ккарагувал аьршариз деебхьна ва уву касибариз туву садакьйир Аллагьди кІваин дюрхна. 32 Гьаци вуйиган, Яффайиз Петр кІуру Симон хъади гъюз адми гьаъ, думу гьюлихъ яшамиш шулайи гъидкьарин уста Симондин хулаъ хялижвди дергна». 33 Узура дишлади увухьна гьаунза, ва гъюб ужу гъапІунва. Гьамус ухьу вари Аллагьдин улихь дийигънахьа, ва Агъайи увуз йип гъапибдихъ хъпехъуз учу гьязур вуча. 34 Гьадмуган Петр дурариз кІуру: – Дугъриданна аьгъю гъабшизуз, Аллагь адмийирин машназ дилигрур вуйиб. 35 Дугъу Чахьан гучІрур ва гьякь вуйир, фуну миллетдин адмийир вушра, кьабул апІура. 36 Дугъу Месигь Исайин мелзналантина Израилин халкьдиз мясляаьтнан ужуб хабарнакан гаф гьапІну. Думу варидарин Агъа ву. 37 Улихьнаси Ягьудияйиъ гъаши гьядисйирикан, Ягь’яйи Галилейиъ улупу штуан апІувалихъан ккергъу гьядисйирикан аьгъячвуз. 38 Гирами Рюгь ва кьувват туву, Аллагьди Месигь гъапІу Назаретлу Исайикан аьгъячвуз. Аллагь гьарган Исайихъди гъахьну ва Иса варишвариъ ужувлар апІури ва иблисдин гьюкмикк ккайикьандар вари сагъ апІури, лицури гъахьну. 39 Учу Дугъу Ерусалимдиъ ва вари жугьдарин уьлкейиъ гъапІкьан ляхнарин шагьидар вуча. Думу, гакІвлин хачрак кьумарихьди карсну, гъакІну. 40 Хъа дукІну шубудпи йигъан Аллагьди Думу чІиви гъапІну, ва Думу инсанарихьна ачмиш шуйи. 41 Анжагъ Думу варидариз ваъ, хъа Аллагьди улихьмиди ктагъу шагьидариз, яна Думу чІиви гъашихъан, Дугъахъди ипІури-убхъури гъаши учузтІан, улупну, ачухъ гъапІундар. 42 Аллагьди чІивидарин ва гъийихдарин зиин Диванбеги вуди дерккнайир гьадму Кас вуйиваликан инсанариз аьгъювалар улупуз ва дидин шагьидвал апІуз учуз амур гъапІну. 43 Вари пайгъамбрари, Дугъахъ хъугъу гьарсарин гунгьарилан Дугъан ччвурнахъан хил алдабгъиди кІури, Дугъкан шагьидвал апІури гъахьну. 44 Петр улхури имиди, дугъахъ хъпехъурайидариина Гирами Рюгь гъюру. 45 Петрихъди гъафи суннат дапІнайи хъугънайидар, Аллагьди Чан Гирами Рюгь жугьуд дарударизра тувбиин мюгьтал духьнайи. 46 Фицики дурариз гьадрари фици, жара чІалариинди улхури, Аллагьдин аьхювалин тяриф апІураш, ебхьурайи. Гьадмуган Петри кІуру: 47 – Мурариз ухьузси Гирами Рюгь багъиш гъабхьну. Гьаддиз штухъди штуан хьуз дурариз шлихьан гъадагъа апІуз шул? 48 Ва дугъу дурар Месигь Исайин ччвурнахъан штуан хьуз гъитру. Хъасин дурарира Петрикан чпихъди сакьюдар йигъари гъузуб тІалаб апІуру.

Ляхнар 11

1 Вари Ягьудия уьлке вуйиси Исайин вакилариз ва гъардшариз, жугьуд дарударира Аллагьдин Гаф кьабул гъапІну кІури, ебхьуру. 2 Ва Петр Ерусалимдиз гъафиган, жугьдари дугъаз тягьнйир гъивнийи: 3 – Уву суннат дапІну адрударин хулариз гъягъюри ва дурарихъди уьлихъ деъри гъахьунва! 4 Гьадмуган Петри вари гъаши ляхнар хъайи-хъайиси ктитуз хъюгъру: 5 – Яффа шагьриъ, ккарагурайи вахтна, аьжайиб рябкъбиинди юкьуб пІипІнахъан дибиснайиси саб аьхю суфрасиб аьршариан йиз улихьинди ибхри гъябкъюнзуз. 6 Узуз дид’ин жилилан гъягъру гьяйванатар, нахшрар, битІар-чурчлар ва завун ничхрар гъяркъзуз. 7 Хъасин гьамцдар гафар кІурайи сес гъеебхьунзуз: «Петр! Гъудужвну, дурккну итІин!» 8 Хъа узу жаваб тувза: «Затра дициб дарапІарза, Агъа, фицики гьич саб вахтнара чІуру ва марцциб дару мутму гъипІур дарза». 9 Сесну зав’ан кьюбпи ражари гъапизуз: «Аллагьди марцц гъапІуб марцциб даруб вуди гьисаб мапІан». 10 Гьамци шубуб ражари гъабхьнийи, ва хъана вари аьршариз гъизигнийи. 11 Му арайиъ дишлади узу дергнайи хуларихьна Къайсарияйиан узухьна гьаънайи шубур кас гъафнийи. 12 Ва Гирами Рюгьну узуз, шаклу даршиди, гьадрарихъди гъягъюз амур гъапІнийи. Узухъди гьаму йирхьрид гъардшарра гъафну. Учу Корнилийин хулаз гъафунча. 13 Дугъура учуз, чаз фици марцци малайик гъяркънуш ва малайикди фу гъапнуш, ктибтнийчуз: «Яффайиъ айи Петр кІуру Симон хъади гъюз адмийир гьаъ. 14 Дугъу увуз уву ва вари яв хизан уьрхру гафар пидивуз», – кІури. 15 Узу улхуз хъюгъиган, сифте ухь’инси, дурариина Гирами Рюгь гъафнийи. 16 Ва йиз кІваина думуган Агъайи гъапи гафар гъафнийиз: «Ягь’яйи инсанар штуан гъапІну, хъа учву Агъайи Гирами Рюгьнахьди цІийи апІидичву». 17 Гьаци вуйиган, эгер Аллагьди, Агъа вуйи Месигь Исайихъ хъугъу ухьузси, жугьуд дарударизра Гирами Рюгь багъиш гъапІнуш, Аллагьдиз машат апІуз узу фуж вухъа? 18 Му гафар гъеерхьиган, дурари гьерхбар дерккру. – Рябкъюрайиганси, Аллагьди жугьуд дарударизра цІийи уьмур бадали чпин тахсрар гардандиъ дисуз ихтияр тувну, – кІури, дурари Аллагьдин ад апІуру. 19 Хъа Стефандин вахтари, зулмар дапІну, утІуркку хъугънайидар, жугьдаризтІан дарди Ужувлан хабар рабгъури, Финикия, Кипр ва Антиохияйихънакьан хъуркьнийи. 20 Хъа Киприан ва Киринеяйиан вуйи хъугънайидарикан сакьюдари, Антиохияйиз дуфну, жугьуд дарударихъдира сюгьбатар апІури, Агъа Исайикан Ужувлан хабар улупури гъахьнийи. 21 Дурарихъди Агъайин кьудрат хъайи ва гьаддиз гизафдар, хъугъну, Агъайихьинди илтІикІнийи. 22 Мидкан аваза Ерусалимдин хъугънайидарихьна рубкьуру ва дурари Антиохияйиз Варнав гьаъру. 23 Аллагьди му адмийириз уж’вал дапІну дябкъну, дина гъафи Варнав шад шулу, ва Аллагьдиз кІваантІан вафалу хьувалиъ дугъу дурар ижми гъапІнийи. 24 Фицики думу Гирами Рюгьну ва хъугъвали ацІнайи кас вуйи. Натижайиъ лап гизаф халкь Агъайин терефкрар шулу. 25 Хъасин Варнав Тарсдиз Саул агуз гъягъюру 26 ва, дагну, Антиохияйиз кьяляхъ хъади гъюру. Душваъ дурар сад йисан гъузнийи ва, хъугънайидар уч шлушваз Варнавна Саул гъюри, дурариз аьгъювалар улупури шуйи. Гьаддихъанмина гьадму Антиохияйиъ Исайин ученикариз сифте вуди «христианар», Яна «Месигьдин терефкрар» пуз хъюгъну. 27 Гьадму вахтна Ерусалимдиан Антиохияйиз пайгъамбрар гъюру. 28 Дурарикан, Гирами Рюгьну гьевесламиш дапІнайи сар Агав кІурури, вари дюн’яйиъ зурба гаш’вал абхъди кІури, хабар дебккнийи, ва гьаци Клавдийи паччагьвал апІурайиган гъабхьнура вуйи. 29 Думуган Исайин ученикари, гьарури чаан удукьрубкьан, Ягьудия уьлкейиъ айи чпин гъардшариз кюмек апІуз кьатІъ гъапІнийи. 30 Дурари, кюмек уч дапІну, Варнавдихьди ва Саулихьди хъугънайидарин аьхюдарихьна хътапІнийи.

Ляхнар 12

1 Гьадму вахтари паччагь Гьирод хъугънайидарикан сакьюдарихъ хъергуз хъюгъру. 2 Дугъу буйругъ тувну, Югьандин чве Якьуб ханжлихъди йивну йикІуру. 3 Хъа му ляхин жугьдариз хушди дябкъну, Петрра дисуру. Му Лавшарин машкварган гъабшиб вуйи. 4 Петр дидисну, дустагъдиъ итру ва ю-юкьурди эскрар айи юкьуб дестейиз думу, нубатар апІури, гъаравликк уьрхюз буйругъ тувру, фицики дугъу Пасхайин машкврахъан Петр халкьдин улихьна диван апІбан бадали адагъуз ният дапІнайи. 5 Петр дустагъдиъ ул алдадабгъри уьрхюрайи, хъа хъугънайидар дугъхъанди Аллагьдиз ккарагурайи. 6 Гьиродди думу халкьдихьна адауз ккайи йигъ хьайиз йишвну, Петр, кьюр эскрин арайиъ зунжрарихьди дитІнайир, даахнайи. Хъа дустагъ урнарихъ хъайи гъаравлари уьбхюрайи. 7 Сабпну дустагъдиз Агъайин малайик гъюру ва душвайишв аквну абцІру. Петрик хил кучну, «Ухди гъудужв!» – пну, малайикди думу хъиргру. Ва дугъан хилариин али зунжрар алдахьуру. 8 Хъа малайикди Петриз кІуру: – Юкьв’ан идибтІ ва ликариин алахь. Петри гьаци гъапІиган, малайикди кІуру: – Чуха хъипну, узухъди гъач. 9 Малайикди апІурайи му ляхнар, гьякьикьатдиъ дарди, аьжайиб рябкъбиинди шулайидарси гьигъри, Петр дугъан кьяляхъди удучІвуру. 10 Сабпи ва кьюбпи жергейин гъаравларихьан гьудучІвну, дурар шагьриз гъягъру урнарихьна гъюру. Хъа чиб-чпилан арццу урнариан дурар удучІвуру. Саб кючейиан удучІвиган, малайик сабпну дургру ва Петр сарди гъузру. 11 Чан фикрихъна гъафи Петри кІуру: – Гьамус дугъриданра, Агъайи, Чан малайик гьаъну, узу Гьироддин хилккан ва жугьдари уз’ина хуз ккайи вари бала-кьазйириккан уьрхюб гъябкъюнзуз. 12 Му аьгьвалат аннамиш дапІну, Петр Маркра кІуру Югьандин дада Мар’ямдин хуларихьна гъюру. Душваъ хайлин халкь уч духьну, ккарагурайи. 13 Петр урнарик кучиган, Рода кІуру гъараваш риш удучІвуру ва дугъу, думу фуж вуш, гьерхру. 14 Хъа Петрин сес аьгъю дубхьну, шадвалиан урнар арццуз гьархну, думу хулаъ архьру, ва, урнарихъ Петр дийигъна пну, хабар тувру. 15 Дугъаз: «Уву яв фикирнахъ хъана?» – кІуру, амма шуру чан гафар гьякь вуйиб хъана тасдикь апІуру. Дурари шураз: «Думу Петрин рюгь вушул», – кІуру. 16 Петри урнар урччвуб давам апІури шулу ва, урнар арццну, чпиз Петр гъяркъиган, вари мюгьтал шулу. 17 Хили ишара дапІну, дурариз ккебехъ дупну, Петри, учв Агъайи дустагъдиан фици адаънуш, ктибтуру, хъа кІуру: «Мидкан Якьубдиз ва миди вуйи гъардшариз кидибтай». Хъасин дилин думу жара йишваз гъягъюру. 18 Йигъ улубкьуради, эскрарин арайиъ, Петр нашдикІан кІури, аьхю гъалмагъал абхъру. 19 Гьиродди Петр агури гъахьну, амма дугъаз думу гъидихъундар, ва дугъу, эскрарихьан силис гъадабгъну, дурар дариз зигуз буйругъ тувру. Хъасин Гьирод Ягьудия уьлкейиан Къайсарияйиз гъягъюру ва саб кьадар вахтна гьадушваъ гъузру. 20 Гьироддиз Тирин ва Сайдайин агьалйирикан гизаф хъял кайи. Дурари Гьироддин дахъру хулан гъуллугъчи Власт чпин терефназди илтІикІну, дугъан кюмекниинди вари паччагьдихьна дуфну, дугъкан мясляаьт гъитуб ккун апІуру, гьаз гъапиш дурарин уьлке Гьироддин вилаятдикан итІру сурсатариинди асиллу вуйи. 21 Гюрюшмиш шуз улупнайи йигъан Гьирод, паччагьвалин палтар алди, тахтниин деъру ва халкьдихъди улхуз хъюгъру. 22 Халкьди дугъаз: «Му инсандин ваъ, хъа Аллагьдин сес ву!» – кІури, чІигъар апІури гъахьну. 23 Хъа Гьиродди му гафар лайикь вуйидарси кьабул апІуру, амма Аллагьдин ад гъапІундар. Мидиз лигну Аллагьдин малайикди дугъаз йивуру, йикІуру ва думу мялхъвяри хътитІуру. 24 Аллагьдин Гаф рабгъури, хъугънайидарин кьадар артухъ шулайи. 25 Варнавна Саул, Ерусалимдиъ чпиз туву табшуругъ тамам дапІну, чпихъди Марк кІуру Югьан хъади, Антиохияйиз хътакуру.

Ляхнар 13

1 Антиохияйин хъугънайидаригъ гьамцдар пайгъамбрар ва мялимар гъяйи: Варнав, КІаруч кІуру Симеон, Киринеяйиан вуйи Луций, юкьур паччагьдикан сар Гьироддихъди сатІиди тербияламиш гъапІу Манаил ва Саул. 2 Дурари Агъайиз гъуллугъ апІури, ушвар дидиснайи вахтна, Гирами Рюгьну кІуру: – Узуз Варнавна Саул жара апІинай, гьаз гъапиш дурари Узу чпиз пуз ккайиб тамам апІиди. 3 Дурари ушвар дидисну, ккарагну, Варнавдиинна Саулиин хилар иливну, деетуру. 4 Гирами Рюгьну гьаъну, дурар Селевкияйиз гъюру, хъа душв’ан Киприина сирнав апІуру. 5 Саламиндиз дуфну, дурари жугьдарин мистариъ Аллагьдин Гаф рабгъуру. Дурарихъди кюмек апІури, Югьаннара хъайи. 6 Вари Кипр вуйибси душну, тму кІулихъ хъайи Пафосдиз гъурукьган, дурариз Варисус (Елима) кІуру сар жугьуд сюгьюрчи – кучІлин пайгъамбар, гьахъру. 7 Думу Кипр вилаятдин аьхюр вуйи фагьумлу кас Сергий Павелин гъуллугъчи вуйи. Сергий Павели, Варнавна Саул хъади гъюз гъитну, дурарикан Аллагьдин Гаф ктибтуб ккун апІуру. 8 Хъа Елимайи (ччвурнан мяна «сюгьюрчи» ву) гьар жюрейин манигъвалар апІури, Сергий Павел хъугъувалихьан ярхла апІуз чарйир зигуйи. 9 Гьадмуган учвра Павел вуйи Саули, Гирами Рюгьнахьди ацІну, дугъахьинди ижмиди дилигну, 10 кІуру: – Агь хаинвалина писвали абцІнайи иблисдин бай, дугъривалин душман! Уву Агъайин диш рякъяр цІаркувал фила ккутІдива? 11 Узухъ хъебехъ! Гьамус Агъайи магьа ув’ин хил иливна, кур духьну, саб вахт хьайиз, ригъ рябкъидарвуз. Сабпну дугъан улариин дерин мучІушин улубчІвуру ва думу, учв хъади гъярур агури, минди-тинди илтІикІури, лицуру. 12 Му гьядиса дябкъну, Агъайин аьгъювалариин аьламат духьну, Сергий Павел хъугъру. 13 Павел ва дугъахъди хъайидар, Пафосдиан сирнав гъапІдар, Памфилияйиъ айи Пергия шагьриз гъюру, хъа Югьан дурарихьан жара духьну, Ерусалимдиз хътакуру. 14 Пергияйиантина дурари чпин рякъ давам апІури, Писидияйин Антиохияйиз гъюру. Султ йигъан дурар, жугьдарин мистаз дуфну, душваъ деъру. 15 Мусайин къанун ва пайгъамбрарин китабар урхбалан кьяляхъ, мистан аьхюдари дурарихьна гьамци пуз гьаъру: – Гъардшар, эгер ичв халкьдиз тувру насигьят аш, йипай. 16 Гьадмуган гъудужвну, хил за дапІну, Павели кІуру: – Израилин халкь ва Аллагьдихьан гучІрудар, хъебехъай! 17 Израилин халкьдин Аллагьди ихь абйир ктагъну ва Дугъу ихь халкь, дурар гьеле Египетдиъ гъурабйирди имиди, заан гъапІну ва Чан кьудратлу хил’инди гьадму ругарилан алдаъну. 18 Ва ягъчІвур йисандин арайиъ ичІи чюлиъ дурарин тІулар аьх апІури гъахьну. 19 Хъасин Ханаан вилаятдиъ ургуб халкь тІанкь дапІну, Дугъу израиллуйириз гьадрарин жил ирс вуди тувну. 20 Му ляхнар вари 450 йисандин арайиъ гъашидар ву. Хъасин Дугъу дурариз Шамуил пайгъамбриина гъяйизкьан, халкьдин аьхюдарди судйир тувнийи. 21 Хъасин дурари паччагь ккун гъапІнийи, ва Аллагьди Вениаминдин тухмиан паччагьди Кишдин бай Саул тувнийи. Дугъу ягъчІвур йисан паччагьвал гъапІнийи. 22 Саул ултІуккну, Аллагьди Давуд паччагьди дерккну. Дугъкан дугъу гьамци шагьидвал гъапІну: «Ессейин бай Давуд Йиз кІваз хуш гъахьнийиз. Узу амур гъапІкьандар вари дугъу тамам апІиди». 23 Ари Давудрин насларикан, Чав гаф тувиганси, халкь Уьрхрур – Иса, Израилиз бахш гъапІну. 24 Иса гъяйиз улихьна Ягь’яйи Израилин халкьдиз, чпин тахсрар гардандиъ дидисну, штуан апІбан аьгъювалар улупнийи. 25 Аьршариан табшурмиш дапІнайиб тамам апІури, Ягь’яйи гъапнийи: «Узу фуж вуди гьисаб апІурачва? Узу Месигь дарза, Думу йиз кьяляхъди гъиди. Узу Дугъан шаламарин гъахмйир гъядарчузкьан лайикьур дарза». 26 Эй йиз гъардшар, Ибрагьимдин наслин веледар ва Аллагьдихьан гучІрудар! Му, ухьу уьрхбан бадали, дапІнайи гаф вуйи. 27 Ерусалимдин агьалйири ва дурарин аьхюдари, Иса уьрхювал Туврур вушул пну, кьабул гъапІундайи ва Думу жазайикк ккитнийи. Гьамци дурари пайгъамбрари гьар султ йигъан кІурайи гафар тамам гъапІнийи. 28 Дурариз Иса йикІбан бадали тахсир гъибихъундаршра, Пилатдикан Думу йикІуб тІалаб гъапІнийи. 29 Вари Гирами китабариъ Исайикан дибикІнайиси дурарин тамам гъабшиган, Дугъан беден, дарикан кадабгъну, накьвдиъ ивнийи. 30 Аммаки Аллагьди Думу чІиви гъапІнийи. 31 Хайлин йигъари Чахъди Галилейиан Ерусалимдиз гъафидариз Думу ачмиш шули гъахьнийи. Хъа гьамус дурар халкьдин улихь Дугъан шагьидар ву. 32 Аллагьди ихь абйириз тувнайи гаф ухьуз, дурарин баяриз, Иса чІиви апІбиинди тамам апІбакан Ужувлан хабар учвуз деебтурача. 33 Мидкан Гирами китабарин кьюбпи шиъриъ дибикІна: «Уву Йиз Бай вува, гьамус Узу Яв Адаш гъахьунза». 34 Иса гъачІихъан, дутІну, ругдиз илтІитІикІбан бадали, Аллагьди Думу чІиви гъапІну, ва мидкан гьамци дупна: «Узу Давудриз гаф туву гирами ва шаксуз ужувлар учвуз тувдиза». 35 Фицики Мяълийирин китабдин жара йишваъ Аллагьди дупна: «Уву Яв Гирамир ругдиз илтІикІуз гъидритара». 36 Чан вахтна Давуд Аллагьдин гъуллугънаъ духьну, кечмиш гъахьну, думу чан абйирин накьваригъ кивну ва ругдиз илтІикІну. 37 Хъа Аллагьди гъачІихъан чІиви гъапІу гьадму Кас ругдиз илтІикІундар. 38 Ва гьаддиз, гъардшар, учвуз аьгъю йибхьайки, ичв гунгьарилан хил алдабгъувал Исайилантина дебккначвуз. 39 Мусайин къанундиинди учву гьякьлу апІуз даршлуган, варибдиъ гьарсар хъугънайир Исайилантина гьякьлу апІиди. 40 Гьаддиз, пайгъамбрари дупнайи исихъайи гафар учв’ин улулуркьбан бадали, ихтият йихьай: 41 «Хъебехъайчва, шаклу шулайидар, мюгьтал йихьай ва дург йихьай, фицики Узу ичв йигъари учву хътругърусиб ляхин апІидиза. Учву дидихъ, шликІа гъаври аишра, хъугъидарчва». 42 Варнавна Павел мист’ан удучІвурайиган, дурари хъа султ йигъанна гьамдикан ктибтуб ккун апІуру. 43 Алдагъиган, жугьдарин ва жара миллетдин хъугънайидарикан гизафдар Павелинна Варнавдин кьяляхъди гъягъюру. Мурари халкьдихъди сюгьбатар гъахури, дурар Аллагьдин гьякь рякъюъ гъузуб ижми апІуру. 44 Гъюру султ йигъан шагьрин, сакьюдар ктарди, вари агьалйир Аллагьдин гафнахъ хъпехъуз уч гъахьнийи. 45 Гизаф халкь гъябкъиган, жугьдар хъюлу ацІну, Павели кІурайи гафариз къаршу удучІвуз ва дугъаз люкьнар апІуз хъюгъру. 46 Гьадмуган Павелина Варнавди дурариз дирбашди кІуру: – ЖарадаризтІан сифте учвуз Аллагьдин Гаф улупну ккундийи. Хъа думу кьабул дарапІбиинди гьаргандин уьмрихьан ичв учву мягьрум апІураш, учу гьамус жугьуд дарударихьинди илдицидича. 47 Агъайи гьамци табшурмиш гъапІунчуз: «Уву вари дюн’я уьбхбан бадали, Узу Увкан жара миллетариз чирагъ гъапІунза». 48 Му гафар гъеерхьиган, жугьуд дарудар шад гъаши ва дурари Агъайин гафнан тяриф апІуз хъюгъю; ва гьаргандин уьмриз кадагънайидар хъугънийи. 49 Гьамци вари вилаятдиъ Агъайин Гаф рабгъурайи. 50 Хъа жугьдарин маллйири дурариин диндихъ хъайи гьюрматлу дишагьлийир ва шагьрин кІулиъ айи адмийир алауру. Дурар Павелихъна Варнавдихъ хъергру ва дурар шагьриан утІурккуру. 51 Павелна Варнав, чпин ликарик кайи бишируг гьадму адмийириина кутІубччвну, Иконияйиз гъягъюру. 52 Вари ученикар гьаммишан шадвали ва Гирами Рюгьну ацІну шулу.

Ляхнар 14

1 Иконияйиъ Павелна Варнав, аьдат вуйиси, жугьдарин мистаз гъюру ва дурари душваъ ижмивалиинди аьгъювалар улупуру. Жугьдарикан ва жара миллетарикан гизафдар Исайихъ хъугънийи. 2 Хъа хътругъу жугьдари, Варнавдизна Павелиз къаршу вуди, жугьуд дарударик хъял капІру. 3 Вушра, Варнавна Павел, душваъ кьаназ гъузну, Агъайикан дирбашди аьгъювалар улупури гъахьну. Агъайи дурарин хиларилантина Чан ужувлан шагьидвал вуди хайлин аьламатар ва аьжайиб лишнар улупури гъахьну. 4 Шагьрин агьалйир кьюб дестейиз пай гъахьнийи: садар жугьдарихъанди, тмундар Исайин вакиларихъанди. 5 Жугьуд дарударинна жугьдарин аьхюдари Павелна Варнав, гъван уьлюбхну, урччвуз кьаст гъапІиган, 6 вакилар, мидкан хабар дубхьну, Ликаонияйин шагьрар вуйи Листра, Дервия ва дурарин аьтрафарихъинди гъушнийи. 7 Дурари душвариъра Ужувлан хабар рабгъури гъахьну. 8 Листрайиъ, ликарик паралич кади, бабкан гъахьихъанмина сабанна дилицу кас айи. 9 Му кас Павелин гафарихъ хъпехъурайи. Павел дугъахьинди гъилигнийи. Дугъаъ сагъ хьуз хъугъвал айивал Павелиз гъябкънийи 10 ва зарбди гъапнийи: – Ликриина гъудужв! Думу гъедергну лицуз хъюгъру. 11 Гьадмуган, Павели гъапІуб гъябкъиган, адмийири ликаон чІалниинди чІигъ апІуру: – Ухьухьна инсанарин суратнаъди аллагьар дуфна. 12 Дурари Варнавдиз Зевс, хъа Павелиз Гермес кІурайи, фицики дурарикан гизафси улхрур Павел вуйи. 13 Шагьрин гъирагъдихъ Зевсдиз икрам апІру мист хъайи. Му мистан гъуллугъчийи, кюкйирин кунцІарна йицар хьади, шагьрин урнарихъна йицар хъаъну гъюру. Дугъазра халкьдихъди, Павелизна Варнавдиз икрам апІбан лишан вуди, йицар дурккну гъурбан апІуз ккунди айи. 14 Мидкан гъеебхьу Варнавна Павел, хъюл’ан чпин палтар дячІяргъну, чІигъар апІури, халкьдихьна жаргъуру: 15 – Эй инсанар, учву гьапІрачва? Учу аллагьар дарча! Учу учвусдар инсанар вуча! Учу учвухьна, учву идоларихьан маш гьибицну, завар-жилар, гьюлер ва дурариъ айикьандар вари яратмиш гъапІу чІиви Аллагьдихьинди илтІикІбан бадали, учвухьна Исайикан Ужувлан хабар хьади дуфнайидар вуча. 16 Улихьди Аллагьди, ужувлар апІури, Чакан учвуз гьаммишан кІваин апІури гъахьнушра, Дугъу гьарсаб халкьдиз чан рякъ дибисну гъягъюз ихтияр туври гъахьну. Дугъу, учвуз ужуб бегьер тувуз, мархьар гьаъри гъахьну. Дугъу учвуз ипІуз ужуб тувра ва ичв юкІвар шадвали ацІра. 18 Вари гьамцдар гафар гъапнушра, Павелихьанна Варнавдихьан йицар гъурбан апІбахьан халкь саб гужа-гуждитІан дерккуз удукьундайи. 19 Вакилари Ужувлан хабар рабгъурайиган, Антиохияйианна Иконияйиан жугьдар дуфну, халкь дурариз гьамци кІури къаршу адауру: – Вакилари учвуз фукІара гьякьлуб кІурадар, хъа вари дурарин кучІлар ву. Мурарира, гъван уьлюбхну, Павел йивну дитру ва, думу гъакІуншул пну, хъчІюхюри, шагьрин гъирагъдихъ духну дитру. 20 Ученикар дугълан илтІишган, Павел гъудужвуру ва шагьриз гъягъюру. Хъайигъан думу, Варнавра хъади, Дервияйиз гъягъюру. 21 Гьаму шагьриъ дурари, аьгъювалар улупури, чпиз хайлин ученикар гъазанмиш апІуру. Хъасин дурар Листрайиз, Иконияйиз ва Антиохияйиз хътакуру. 22 Душвариъ дурари чпин ученикарин юкІвар хъугъвалиъ ижми хьпан бадали, дурар гьевеслу апІуйи. Дурари гьамци кІуйи: – Ухьуз Аллагьдин Паччагьлугъдиъ учІвайиз гизаф аьзабар алахьиди. 23 Хъасин хъугънайидарин гьарсаб жямяаьтдиъ аьхюр ктагъбалан кьяляхъ, Павелина Варнавди, ккарагну ва ушвар дидисну, чпи хъугънайи Аллагьдиина дурар аманат апІуру. 24 Писидияйиантина душну, дурар Памфилияйиз гъюру 25 ва Пергдиъ аьгъювалар улупуру. Хъасин дурар Атталияйиз ктучІвуру. 26 Хъа дилин дурар Аллагьдин амриинди чпи гъапІу ляхнар апІуз гьау Антиохияйиз сирнав апІуру. 27 Дина дуфну, вари хъугънайидар уч дапІну, дурари Аллагьди чпиз гъапІу вари ляхнарикан ва Агъайи жугьуд дарударизра хъугъувалихьна раккар арццбакан ктибтуру. 28 Хъа дурар душваъ чпин ученикарихъди кьаназ гъузнийи.

Ляхнар 15

1 СабцІиб вахтналан Антиохияйиз Ягьудияйиан гьапІрудар-вуш гъафи адмийири гъардшариз кІуйи: «Эгер учву Мусайин аьдатниинди суннат дарапІиш, уьрхюз хьибдарчвухьан». 2 Павелна Варнав дурарихъди рази гъахьундар, ва мидин кІуллан дурарин арайиъ ярхи гьюжат абхъру. Гьадмуган Павелна Варнав ва сакьюдар жарадар му месэла бадали Ерусалимдиз вакиларихьна ва хъугънайидарин аьхюдарихьна гьаъру. 3 Гьамци хъугънайидари дурар рякъюъ аънийи. Финикияйианна Самарияйиантина гъягъюрайиган, дурари, фици жугьуд дарудар хъугъувалихъна гъафнуш, ктитури гъахьну, ва мид’ин гъардшар шад шуйи. 4 Ерусалимдиз хъуркьиган, дурар хъугънайидарин аьхюдари шадвалиинди кьабул апІуру. Павелина Варнавди Аллагьди чпиинди гъапІдарикан варибдикан ктибтуру. 5 Фарисйирин тереф дибиснайи сакьюдар хъугънайидари гъудужвну кІуру: – Жугьуд дарударин суннат апІуб лазим ву ва дурариз Мусайин Къанун уьбхюз табшурмиш дапІну ккунду. 6 Вакиларна хъугънайидарин аьхюдар му месэла гьял апІбан бадали уч шулу. 7 Гизаф улхбалан кьяляхъ Петр гъудужвну кІуру: – Гъардшар! Учвуз аьгъячвузки, Аллагьди сифте кІул’ан ухькан узу ктагъну ва жугьуд дарудариз йиз мелзналантина Ужувлан хабар ебхьруси ва хъугъвалихъна гъюруси гъапІну. 8 Инсанарин юкІвар аьгъю Аллагьди, дурариз ухьузси Гирами Рюгь багъиш дапІну, дурар кьабул апІувал улупну. 9 Дугъу, хъугъувалиинди дурарин юкІвар марцц дапІну, ихьна дурарин арайиъ саб фаркьвалла гъибтундар. 10 Гьаци вуйиган, Исайин ученикариин я ухьхьан, я ихь абйирихьан гъабхуз дарши гъагъ иливури, гьаз учву Аллагь ахтармиш апІурачва? 11 Хъа Агъа Исайин ужувлиинди гьадрарси ухьура уьрхрувалихъ хъугъурхьа. 12 Уч духьнайидар вари ккебехъуру. Варнавдина Павели чпилантина Аллагьди жугьуд дарударин арайиъ улупу аьламатариканна аьжайиб лишнарикан ктитуру ва ккебехънайидар хъебехъури гъузру. 13 Дурарин улхуб ккудубкІиган, Якьуб улхуз хъюгъру: – Гъардшар, узухъ хъебехъай! 14 Сифтейиан жугьуд дарудар чан халкь вуди кьабул дапІну, Аллагьди дурариз фици уж’вал гъапІнуш, Симонди ухьуз ктибтунхьуз. 15 Гьамдихъди пайгъамбрарин гафарра, дидикІнайиси, дюзди гъюра: 16 «Агъайи, гьаму арайиз Хурайири кІура: „Хъасин Узу хътакидиза, ва ккадабхънайи Давудгъярин хал, дидин харабйир за дапІну, цІийи алаъну, жугьуд дарударра кади, Йиз ччвурнахъ хъугърайидарси вари инсаният Агъайихьна гъюз гьялак хьпан бадали, тазатІан арайиз хибдиза“. Дюн’я ккебгъхъанмина му аьгъюб вуйи». 19 Гьаддиз узу Аллагьдихьинди илдицу жугьуд дарудариин ухьу читинвалар илилирчуб лазим вуди гьисаб апІураза. 20 Ухьу дурариз, идолариз гъурбан дапІнайи хураг мипІанай, кьяппавалар мапІанай, бугъмиш дубхьну гъабчІибдин йикк мипІанай ва ифи мубхъанай кІури, кагъаз дибикІну ккунду. 21 Фицики дегьзаманайин насларихъанмина гьарсаб шагьриъ Мусайин къанундикан улупрудар ва гьар султ йигъан мистариъ Къанун урхури шлу адмийир а. 22 Хъасин вакиларина аьхюдари, вари хъугънайидарихъди мясляаьт дапІну, чпин арайиан саршвнур гъардаш кадагъну, дурар Павелихъдина Варнавдихъди Антиохияйиз гьауб кьатІъ апІуру. Дурари гъардшарин арайиъ гьюрмат айи Сила ва Варсава кІуру Ягьуда ктагъуру, 23 ва дурарихьди гьамциб кагъаз хътапІуру: – Вакиларина хъугънайидарин аьхюдари, ичв гъардшари Антиохияйиъ, Сирияйиъ ва Киликияйиъ айи жугьуд дару гъардшариз саламар гьаъра. 24 Ич арайиан гъушу бязидари, ич терефнаан чпиз гьич саб табшурмиш апІувалра адарди, учвухьна дуфну, чпин гафариинди ичв арайиъ гъалабулугъ ипбакан хабрар деерхьначуз. 25 Учу варидарин разивалиинди сакьюр кас кадагъну, ич юкІв али Варнавдихъдина Павелихъди учвухьна гьауз кьатІъ гъапІунча. 26 Му касари ихь Агъа Месигь Исайин ччвурнахъ чпин уьмур гьяйиф гъапІундар. 27 Гьацира учвухьна Ягьудана Сила гьаърача, дурари учвуз учу гъибикІуб гафарииндира пиди. 28 Фицики Гирами Рюгьназ ва учуз учву вартІан метлеблу саб ляхнихъантІан хътауз ккунди адарчуз: 29 идолариз гъурбан дапІнайи хураг мипІанай, ифи мубхъанай, кьяппавалар мапІанай, бугъмиш дапІну гъабчІибдин йикк мипІанай. Гьамрар вари тамам апІури гъашиш, ужу хьибдичвуз. Сарун сагъ-саламатди гъузай. 30 Гьамци гьау вакилари, Антиохияйиз дуфну, хъугънайидар уч дапІну, дурарихьна кагъаз тувру. 31 Дурари му кагъаз урхуру ва кюмекнан хабриин шад шулу. 32 Ягьудана Сила, чпи пайгъамбрарра вуди хьпаз дилигну, хъугъувалиин ижми хьуз дурариз кюмек апІури, дурарин улихь кьаназ гъулхнийи. 33 Душваъ сацІиб гъузхъан, Ягьудайизна Силайиз ягъурлувал ккун дапІну, дурар гьаъдарихьна кьяляхъ гъягъюз гъитру. 35 Хъа Павелна Варнав Антиохияйиъ гъузру. Гизаф жарадарихъди дурари, душваъ аьгъювалар улупури, Агъайин гафнан Ужувлан хабар рабгъуру. 36 СацІиб вахтналан Павели Варнавдиз кІуру: – Гъач хъана ухьу, Агъайин Гаф гъарабгъу гьарсаб шагьриъ айи ихь гъардшариин улуркьну, дурар фици яшамиш шулаш, лигухьа. 37 Варнавдиз Марк кІуру Югьанра чахъди гъадагъуз ккун шулу. 38 Амма Павели, Памфилияйиъ чпихъан хътаку ва аьхиризкьан чпин ляхниъ иштирак дарши Марк кІуру Югьан хъади дурушиш ужу шул, пну, фикир апІуру. 39 Гьамци дурарин арайиъ гьюжат абхъру ва гьаци Павелна Варнав чиб-чпихьан жара шулу. Варнавди, Маркра гъадагъну, Киприз сирнав апІуру. 40 Павели, кІуруш, Сила ктагъуру. Гъардшари думу, Агъайиина аманат дапІну, рякъюъ тІаъру. 41 Думу, гъардшарин хъугъувал мюгькам апІури, Сирияйиъ ва Киликияйиъ лицури гъахьну.

Ляхнар 16

1 Дилин Павел Дервияйиз, хъасин Листрайиз гъюру. Душваъ Тимофей кІуру сар ученик айи. Дугъан дада хъугънайи жугьуд дишагьли вуйи, хъа адаш грек вуйи. 2 Листрайиъ ва Иконияйиъ айи гъардшар дугъкан ужуди улхури шуйи. 3 Павелиз Тимофей чахъди рякъюъ учІвну ккунди айи. Гьаддиз дугъу Тимофейин суннат гъапІнийи. Мид’инди Павелиз душваъ айи жугьдариз хуш шлуб апІуз ккунди айи, фицики дурариз варидариз Тимофейин адаш грек вуйиб аьгъяйи. 4 Ва дурари, шагьрариан шагьрариз гъягъюри, хъугъвалиина гъафидариз Ерусалимдиъ вакилари ва хъугънайидарин аьхюдари адагъу къарар, дурар тамам апІруганси, ктитури гъахьну. 5 Гьамци хъугънайидар хъугъувалиъ мюгькам шули ва дурарин кьадар йигълан-йигъаз артухъ шули гъахьну. 6 Павел ва дугъахъди хъайидар Фригияна Галатия уьлкйириантина гъягъюру, амма Гирами Рюгьну дурарихьди Асия уьлкейиъ аьгъювалар улупуз гъитундар. 7 Мисия уьлкейин сяргьятарихъна дуфну, дурариз Вифания юрдназ гъягъюз ккун шулу, амма Гирами Рюгьну дурариз манигъвал апІуру. 8 Гьамци, Мисияйиъ удручІвди, дурар Троада шагьриз гъюру. 9 Йишвну Павелиз Македония уьлкейин касди, чан улихь дийигъну аьжайиб саягъниинди: – Македонияйиз дуфну, учуз кюмек апІин, – кІури, миннат апІуради рябкъюру. 10 Му гъябкъюбси, учу дишлади Македонияйиз гъягъюз кьатІъ гъапІунча, фицики Аллагьди дурариз Ужувлан хабар гъайибхай кІура, пну, фикир гъапІунча. 11 Троадайиан гимийиъди рякъюъ учІвну, дилин сифте Самофракия островдиина, хъайигъан Неапол шагьриз гъафунча. 12 Дилинра учу Римдиан гъафидар яшамиш шулайи Македонияйин сабпи пайнан Филипия шагьриз гъафича, ва душваъ садшвнуд йигъ гъабхьнийич. 13 Султ йигъан шагьриан нирихъна удучІвнийча. Душвахъ, аьдат вуйиси, гъудгнар апІру хал хъайи. Гьадина уч духьнайи дишагьлийирихъди деъну, сюгьбатар апІурайча. 14 Душваъ Фиатир шагьриан вуйи багьа уьру парчайин алвер апІру Лидия кІуру сар дишагьлира айи. Думу гьякь вуйи Аллагьдихъ хъугънайир вуйи. Павелихъ хъпехъурайи вахтна, Агъайи дугъан юкІв ачмиш апІуру, ва думу Павелин гафарихъ хъугънийи. 15 Думу ва дугъан вари хуландар штуан гъахьихъан, дугъу учкан тІалаб апІуру: – Эгер учву узу дугъриданра Агъайихъ хъугънайир вуди гьисаб апІураш, йиз хулаъ яшамиш йихьай. Учура рази гъашича. 16 Саб ражари учу гъудгнар апІру хулаз гъягъюрайиган, фал китуз шлу жин кайи ва фал китбиинди эйсйириз зурба хайир хурайи лукІ риш алахъунчуз. 17 Павелинна ич кьяляхъди гъюри, дугъу, гьамци кІури, чІигъар апІури гъахьну: – Му касар ВаритІанзаану Аллагьдин гъуллугъчйир ву! Дурари ухьуз уьрхивалихьна рякъ улупура! 18 Гьамци думу шуру гизаф йигъари кІури гъахьну. Павелихьан аьх апІуз дархьиди, шурахьинди илдицну, дугъак кайи фалин жиндиз кІуру: – Месигь Исайин ччвурнахъан увуз амур апІураза: дугъ’ан удубчІв! Думу жинра дишлади шур’ан удубчІвуру. 19 Хъа дугъан эйсйириз чпин хайир хътабтІурайиб дябкъну, дурари, Павелна Сила дидисну, гужниинди базар али майдандиина гьякимарихьна гъахуру. 20 Дурарихьна гъахидари кІуру: – Му касар жугьдар ву ва дурари ихь шагьриъ гъалабулугъ ипра. 21 Дурари ухьу, римлуйири, кьабул вая тамам апІуз лайикь дару аьдатар рагъура. 22 Халкьра Павелизна Силайиз къаршу шулу. Хъа гьякимари дурар, палтар илдитну, маргълихьди урччвуз буйругъ тувру. 23 Дурар, гизаф дурччвну, дустагъдиъ итру, хъа дустагъчийиз дурар ижмишнаан гъаравликк уьрхюз буйругъ тувру. 24 Мициб буйругъ гъадабгъу дустагъчийира дурар дустагъдиъ айи вартІан айитІ дустагъдиъ уржру ва дурарин ликар урхъар айи ацІу кьулиъ ивну рукьарихьди йитІуру. 25 ГьацІишвар багахь шулади, Павелина Силайи, ккарагури, Аллагьдин адназ мяълийир апІурайи. Дустагъдиъ айи дидиснайидар дурарихъ хъпехъурайи. 26 Гьаму арайиъ сабпну жилар гьаци зарбди гъутІурччвнийики, саки дустагъдин шибритІарра ришвруси. Гьадму сяаьт вари раккнарра арццру ва вари дидиснайидариин али рукьарра алдахьуру. 27 НивкІ’ан хъиргу дустагъдин гъаравулиз, вари раккнар арццнади дябкъну, ханжал уьчІюбгъну учв йикІуз ккун шулу, фицики дугъу, дидиснайидар гьергну пну, хиял гъапІнийи. 28 Хъа Павели: «Уву увуз хатІа мапІан, учу вари гьамшваъ имича», – пну, зарбди чІигъ апІуру. 29 Гъаравли, акв апІруб хуз гъитну, Павелна Сила айи йишвазди архьру ва, гучІбаан гукІни духьну, думу дурарин улихь жил’ин дахъру. 30 Хъасин гъаравулчийи, дурар чІатна адаъну, кІуру: – Эй йиз худйир, узу уьрхбан бадали гьапІну ккунду? 31 Дурари дугъаз жаваб туву: – Агъа вуйи Месигь Исайихъ хъугъ, Аллагьди уву ва яв хуландар уьрхиди. 32 Хъасин дурари гъаравулчийиз ва дугъан хулаъ айидариз варидариз Агъайин Гафнакан аьгъювалар улупуру. 33 Гъаравулчийи, дурар чан хулаз гъахи йишван, дурарин зийнар жикІуру, хъасин дишлади думу ва дугъан хуландар штуан шулу. 34 Чан хулаз гъахи Павелизна Силайиз дугъу хураг гьивнийи, хъа дугъу ва дугъан хуландари Аллагьдихъ хъугъбиин шадвал апІури шулу. 35 ГвачІин улубкьиган, шагьрин гьякимари: – Дустагъ дапІнайидар деетай, – пну, дустагъдиз чпин чархачйир гьаъру. 36 Дустагъдин гъаравулчийи мидкан Павелиз кІуру: – Гьякимари, узухьна учву деетри пну, адмийир гьаъна. Гьаци вуйиган, гьамус архаинвалиинди удучІвну гъарахай. 37 Амма Павели дурариз кІуру: – Учу суд дарапІди, Римдин ватандашар вуйибдизра дилигди, вари халкьдин улихь дурччвну, дустагъдиъ итнийи. Хъа гьамус жиниди деетурайин? Ваъ. Гъит чпи гъюри, чпи учу адаъри. 38 Чархачйири му гафар, гьякимарикна гъапиган, Павелна Сила Римдин ватандашар вуйиб гъеебхьиган, гьякимариз гучІ шулу. 39 Гьаддиз дурари, дуфну, Павелинна Силайин улихь чпилан хил алдабгъувал ккун апІуру ва, дустагъдиан адаъну, дурарикан шагьриан удучІвну гъягъюб тІалаб апІуру. 40 Дурар, дустагъдиан удучІвдар, Лидияйин хулаз гъюру. Душваъ гъардшарихъди дяркъну, дурарин юкІвар аьшкьлу дапІну, шагьриан рякъюъ учІвру.

Ляхнар 17

1 Амфипол ва Аполлония кІуру шагьрариантина душну, Павелна Сила жугьдарин мист айи Фессалоникайиз гъюру. 2 Павел, дина дуфну, чан аьдатниинди шубуд султ йигъан жугьдарихъди БикІбарикан улхуру. 3 Дугъу, Месигь сифте дукІну, хъасин чІиви духьну ккунийи кІури, мидкан гъаврикк ккаъри ва му усбат апІури гъахьну. Дугъу кІуру: – Гьадму Месигь узу учвуз улупурайи Иса ву. 4 Дурарикан сакьюдар Аллагь кІваъ уьрхру грекар ва хайлин адлу дишагьлийир хъугънийи ва Павелинна Силайин терефназ гъафнийи. 5 Хъа хъугъну адру жугьдари, хъюл’ан базариин али алчагъ адмийир уч дапІну, гъварч шулу ва вари шагьрик гъал кипру. Халкьдин улихьна адаъбан бадали, дурари, Ясондин хулаз дуфну, Павелна Сила агуру. 6 Дурар душваъ дидрихъди, Ясонна жара гъардшар шагьрин гьякимарихьна гъахуру. Халкьди гьамцдар чІигъар апІурайи: – Вари дюн’яйиъ гъалабулугъ ипнайи гьаму касар гьамус гьаминара дуфна, – 7 хъа Ясонди дурар чан хулаъ кьабул гъапІну. – Дурар, Римдин паччагьтІан хъана жара сар Иса паччагь а кІури, Римдин паччагьдин гьюкмиз къаршу удучІвура. 8 Мициб хабарну халкьдик ва шагьрин гьякимарик гъалабулугъ кипру. 9 Дурари Ясон ва имбу хъугънайидар, чпи азад апІбан бадали, пул тувуз мажбур апІуру, ва хъасин дурар деетуру. 10 Гъардшари гьадму йишван дишла Павелна Сила Верия кІуру шагьриз гьаъру. Дина гъафибси, дурар жугьдарин мистаз гъягъюру. 11 Мушван адмийир ФессалоникайиндартІан фикирлудар вуйи: дурари Агъайин Гаф лап аьшкьниинди кьабул гъапІнийи. Павелина Силайи кІурайиб гьякь вуш аьгъю апІбан бадали, гьар йигъан БикІбар ахтармиш апІури гъахьнийи. 12 Натижайиъ жугьдарикан гизафдар, хъа гьацира хайлин грекар ва адлу дишагьлийирна жилар хъугъувалиина гъафнийи. 13 Фессалоникайин жугьдар, Павели Верияйиъра Аллагьдин Гаф рабгъурайиваликан аьгъю дубхьну, гьадина дуфну, халкьдик гъалабулугъ кипуз ва дугъ’ин алауз хъюгъру. 14 Гьадмуган гъардшари тяди Павел гьюлин гъирагъдихъна гьаъру, хъа Силана Тимофей гьадушваъ гъузру. 15 Павелихъди гъушдари думу Афинайизкьан гьаъру. Дилин хътакурайидарихь Силайизна Тимофейиз «Шлубкьан ухди узухьна гъачай», – кІури, Павели дибикІнайи кагъаз хьайи. 16 Силайизна Тимофейиз ккилигурайи Павелин рюгь убгури гъабхьну, гьаз гъапиш дугъаз шагьур идолари абцІну гъябкънийи. 17 Мидкан дугъу мистаъ жугьдарихъдина Аллагь кІваъ айи грекарихъди ва гьар йигъан базар – майдандиин алахьурайидарихъди сюгьбатар апІури гъахьну. 18 Сакьюдар эпикурчйир ва стоикар вуйи философар дугъахъди гьюжатнаъ учІвру. Дурарикан сакьюдари: «Му лягълягъиз фу пуз ккунди айкІан?», тмундари: «Думу, рякъру гьялариан, яд аллагьарикан улупурайир вуйкІан?» – кІури шуйи. Дурари мици гьаддиз кІурайи, гьаз гъапиш Павели Исайикан ва Думу чІиви хьуваликан Ужувлан хабар рабгъурайи. 19 Дурари Павел Ареопаг тепейиин уч шлу мажлисназ духну, дугъхьан гьерхру: – Уву рагъурайи гьадму аьгъювалар фу вуш, учуз аьгъю апІуз хай даршулин? 20 Фицики ич ибарихъна саб аьжайиб хабар гъюра; гьаддиз учуз, му фу вуш, аьгъю дубхьну ккунди ачуз. 21 Афинайин агьалйирин ва душваъ яшамиш шулайи гъурабйирин пише чпин вахт, сюгьбатар апІури вая гьар жюрейин цІийишнар гьял апІури, адапІувал вуйи. 22 Павели, Ареопаг мажлисдин улихь дийигъну, гъапнийи: – Афинайин агьалйир! Рябкъюразузки, учву гизаф идолар кьабул апІурачва, 23 фицики узу шагьриантина гъягъюрайиган ва ичв гирами йишвариз лигурайиган, «Мялум дару аллагьдиз» кІури дибикІнайи гъурбан апІру йишвра гъябкъюнзуз. Магьа учву, Учв фуж вушра аьгъдарди, икрам апІурайи Аллагь, узу учвуз ачмиш апІурайи Гьадму Аллагь ву. 24 Дюн’я ва дидиъ айикьандар вари яратмиш гъапІу Гьадму Аллагь заваринна жиларин Агъа хьпаз лигну, Думу инсанарин хилариинди гъапІу дараматариъ яшамиш шуладар. 25 Дугъаз инсанарин хилариинди апІурайи кюмек ккундар, гьаз гъапиш Дугъаз гьич фтинкІа игьтияж адар. Дугъу чав инсанариз гьарсаб тувра: уьмурра, нефесра ва гьаци вари миди вуйи ужувларра. 26 Аллагьди сифте сар кас, хъа дугълантина дюн’яйин вари инсаният арайиз гъабхну. Дурар яшамиш шлу вахтар ва йишвар улупну. 27 Аллагьдин метлеб халкьари Учв агуб вуйи. Мумкин ву, дурар Дугъахьна рукьузра, дурари Думу агузра. Думу ухькан гьарурин багахь хьа. 28 Фицики ухьу Гьадгъуинди яшамиш шули, лицури ва нефес хътабгъури ахьа. Ичв шаирарикан сасдари гъаписи: «Ухьу Дугъан веледар вухьа». 29 Гьаци вуйиган, ухьу Аллагьдин веледар вуди, Аллагь гъизилиз, арсраз вая гъвандиз, инсандин устадвалиинди ва хиялниинди яратмиш дапІнайи суратназ ухшар ву пну, фикир дапІну ккундар. 30 Аллагьди ихь аьгъдруваларин вахт ихь тахсир вуди гьисаб апІурадар, хъа гьамус Дугъу варишвариъ вари адмийириз чпин тахсрар гардандиъ дисуб амур апІура. 31 Фицики Дугъу вари дюн’яйин гьякьди суд апІру йигъ улупна. Чав улупнайи Инсанди гьадму суд апІиди. Аллагьди, Думу, гъачІихъан, чІиви дапІну, варидариз шагьидвал тувну. 32 ГъачІихъан чІиви хьубкан деебхьну, дурарикан бязидар: «Мидкан хъа ражари ктибтара» пну, кялхъюз хъюгъру. 33 Гьаци вуйиган, Павел дурарихьан гьудучІвну гъягъюру. 34 Хъа сакьюдари, дугъахъ хъугъну, дугъан тереф бисуру. Дурарин арайиъ Дионисий кІуру Ареопаг мажлисдин иштиракчи, Дамар кІуру дишагьли ва хъана жарадарра айи.

Ляхнар 18

1 Дидхъан Павел, Афинайиан удучІвну, Коринфдиз гъюру. 2 Душваъ дугъаз Понт юрднаан вуйи Акила кІуру сар жугьуд дихъуру. Думу чан шив Прискилайихъди Италияйиан удучІвну дуфнайир вуйи, фицики Римдин паччагь Клавдийи вари жугьдариз Римдиан удучІвну гъягъюз буйругъ дебккнайи. Павел дурариин улуркьуз гъафнийи. 3 Дурари чадрар дирхурайиб, яна Павели чав улихьди апІури гъаши кеспи апІурайиб, аьгъю гъабшиган, дурарихъди гъузну, лихуз хъюгъру. 4 Гьар султ йигъан дугъу мистаъ, жугьдарна грекар хъугъувалиина хури, аьгъювалар улупури гъахьну. 5 Силана Тимофей Македонияйиан гъафиган, Павели чан вари вахт жугьдариз Иса Месигь вуйивал улупбаз харж апІури гъахьну. 6 Дурари, мид’ин рази даршули, дугъаз люкьнар апІури гъахьну, хъа дугъу чан ликарик кайи бишируг гьадму адмийириина кутІубччвну, гъапи: – Учву ичв уьмрин тахсиркрар хьидичва. Ичв кІул’ина гъюрубдин узу жаваб тувидарза. Гьамус узу жугьуд дарударихьна гъягъюраза. 7 Хъа думу удучІвну, мистан гъвалахъ хъайи, Аллагь кІваъ уьрхюрайи Юст кІуру касдин хулаз гъюру. 8 Мистан аьхюр вуйи Криспдира, чан вари хизандихъди, Агъайиина хъугъувал гъабхнийи. Гьацира Павелихъ хъпехъу коринфлуйирикан гизафдари, хъугъувалиина дуфну, чпи штуан апІуз гъитру. 9 Сад йишван Агъайи аьжайиб рябкъбаъ Павелиз гъапну: – ГучІ мапІан! Адмийирихъди улхбар давам апІин ва меккебехъан. 10 Фицики Узу увухъди хъаза ва гьич сарихьанра увуз писвал апІуз хьибдар, гьаз гъапиш му шагьриъ Йиз адмийир гизаф айиз. 11 Павел душваъ, агьалйириз Аллагьдин Гаф улупури, йисна гьацІаъ гъузру. 12 Гьадму вахтна Ахая уьлкейин гьякимдар Галлион вуйи. Магьа жугьдар сатІиди Павелиин алархьуру ва думу суддиз хуру. Дурари гьамци кІуйи: 13 – Гьаму касди адмийириз, Къанундин къайдйирихъди дарди, Аллагьдиз икрам апІуз улупура. 14 Павели ушв абццайизра, Галлионди жугьдариз кІуру: – Эгер саб чІуру ляхин вая хатІа дубхьнайиш, узуз учвухъ, жугьдарихъ, хъпехъуз себеб шуйзуз. 15 Хъа ляхин ялгъуз гъапи гафариъна, ччвурариъна, ичв къанунариъ аш, му месэла учву гьял апІинай. Узуз му ляхнин диванбеги хьуз ккундарзуз. 16 Гьамци дупну, дугъу дурар диванханайиан утІурккуру. 17 Варидари, мистан аьхюну малла Сосфен дидисну, думу диванханайин улихь урччвуз хъюгъру, хъа мидкан Галлиондиз гьич вижнара ктайи. 18 Коринфдиъ хъана хайлин йигъари гъузу Павели, гъардшар душваъ гъитну, Акилана Прискилла хъади Сирияйиз сирнав апІуру. Кенхерея портнаъ Павели, чав Аллагьдиз Гаф тувиганси, чан кІул алдапІуру. 19 Дурар Эфесдиз гъафиган, Павели Прискилана Акила душваъ гъитну, учв жугьдарихъди сюгьбатар апІбан бадали, мистаз гъюру. 20 Дурари дугъкан чпихъди шлубкьан кьаназ гъузуб тІалаб апІуру, хъа Павел рази гъахьундайи. 21 УдучІвну гъягъруган, «Эгер Аллагьди амур гъапІиш, узу учвухьна хъадакну гъидиза», – пну, Павел Эфесдиан, баркаллагь дупну, гъягъюру. 22 Къайсарияйиъ гимийиан эдеъну, думу Ерусалимдиз рякъюъ учІвру ва, дина гъафири, душван хъугънайидар тебрик апІуру, хъасин Антиохияйиз гъягъюру. 23 Душваъ сацІиб вахтна гъузбалан кьяляхъ, дугъу чан рякъ давам апІуру ва, Галатияйиъна Фригияйиъ шагьриан шагьриз гъягъюри, душвариъ вари ученикарин хъугъувал мюгькам апІури гъахьну. 24 Душваъ Аполлос кІуру Александрия шагьриан вуйи БикІбарин гъаври айи ва ушвниъ ужуб чІал айи жугьуджви айи. Думу сабан Эфесдиз гъафнийи. 25 Думу Агъайин рякъярин гьякьнаан гъаврикк ккайи кас вуйи. Анжагъ Ягь’яйи штуан апІбакантІан деебхьнадашра, дугъу Исайин гьякьнаан аьшкьлуди ва дюзди аьгъювалар улупури шуйи. 26 Мидкан дугъу мистаъ дирбашди улхуз хъюгъру. Хъа Прискилайина Акилайи, дугъан гафар гъеерхьиган, думу чпин хулаз духну, Аллагьдин рякъюн гьякьнаан хъанара дишди гъаврикк ккаъру. 27 Хъа дугъаз Ахаяйиз гъягъюз ккун гъабшиган, гъардшари, дугъаз ягъур ибшри дупну, душван ученикариз, думу кьабул апІри, пну, кагъазра бикІуру. Аполлос дина гъафиган, Аллагьдин ужувналан хъугъдариз дугъу аьхю кюмекар апІуру. 28 Иса Месигь вуйивал БикІбариинди улупури, дугъу вари халкьдин улихь жугьдар дюз дарувал ужуди улупуйи.

Ляхнар 19

1 Аполлос Коринфдиъ айи вахтна Павел, жюрбежюр йишвариантина душну, Эфесдиз ктахъуру. Душваъ дугъаз сакьюдар ученикар алахьуру. 2 Дугъу дурарихьан гьерхру: – Хъугъувалиина гъафиган, учву Гирами Рюгь кьабул гъапІунчва? Дурари дугъаз: – Учуз Гирами Рюгьнакан гьич гъеебхьнукьан дарчуз, – пну, жаваб тувру. 3 Павели дурариз: – Учву шлин штуан апІувал кьабул гъапІунчва? – пну, гьерхру. Дурари: – Ягь’яйин штуан апІувал, – пну, жаваб тувру. 4 Павели кІуру: – Ягь’яйин штуан апІувал тахсрар гардандиъ дисбан бадали апІурайиб вуйи. Дугъу инсанариз чан кьяляхъди Гъюз Ккайирихъ, яна Исайихъ, хъугъуз дих апІури гъахьну. 5 Ягь’яйин ученикариз мидкан гъеебхьиган, дурар Агъа Исайин ччвурнахъан штуан шулу. 6 Хъа Павели дурариин хилар иливиган, дурариина Гирами Рюгь гъафнийи ва дурар, жа-жара чІалариинди улхури, пайгъамбарвалин гафар пуз хъюгъру. 7 Дурар вари йицІикьюр касдихьнакьан вуйи. 8 Павели, мистаз гъягъюри, шубуб вазлин арайиъ, жугьдарихъди сюгьбатар гъахури, Аллагьдин Паччагьлугъ айивал тасдикь апІури, хъуркьувалиинди аьгъювалар улупуйи. 9 Хъа дурарикан сакьюдар хъугъбаккан кІул ккадабгъури, халкьдин улихь Агъайин рякъярикан чІуруди улхури гъахьну. Гьаддиз Павел дурарихьан гьудучІвну гъюру ва, чахъди ученикар гъадагъну, Тиран кІуру касдин мектебдиъ гьар йигъан сюгьбатар гъахуру. 10 Гьамци кьюд йис гъябгъюру ва вари жугьдаризна Асияйиъ яшамиш шулайи грекариз Агъа Исайин Ужувлан хабарнакан гъеебхьнийи. 11 Аллагьди Павелин хилариинди гизаф аьламатар улупури гъахьну, 12 гьаддиз дугъан хил кубкІу ягълухъар, ккурттарра кмиди, аьзарлуйир сагъ апІбан бадали, ишлетмиш апІуйи ва дурар сагъра шуйи. Дурариан гьацира жинарра удучІвуйи. 13 Шагьриан шагьриз гъягъюри, жинар утІурккурайи бязи жугьдарин сюгьюрчйирра кмиди, жинар кайидариз гьамци кІури, Исайин ччвур бисуз чалишмиш шули гъахьну: – Увуз Чан гаф Павели улупурайи Исайин ччвурниинди амур апІураза: удубчІв гьаму касдиан. 14 Мурар жугьдарин аьхюну малла Скевайин ургур бай вуйи. 15 Хъа сабан жинди дурариз: – Иса аьгъюр вузуз, Павелра аьгъязуз, хъа учву фужар вучва? – кІуру. 16 Ва гьадмуган жин кайи гьадму кас дурариин алархьуру ва дугъу дурар урччвуру. Дурариин али палтар гъячІяргънийи, ва дурар гьадму хул’ан гъяцІалди ва зийнар духьну утІурччвнийи. 17 Хъа мидкан Эфесдиъ яшамиш шулайи вари жугьдаризна грекариз аьгъю шулу, ва дурарик гучІ кабхъру, ва Агъа Исайин ччвурназ хъанара артухъ гьюрмат апІуз хъюгъру. 18 Хъугъувалиина гъафидарикан гизафдари, Павелихьна дуфну, чпи гъапІу гунагь ляхнар ачухъ апІуйи ва гардандиъ дисуйи. 19 Хъа сюгьюрчйир-фалчйирикан гизафдари, чпин китабар уч дапІну, варидарин улихь ургуру. Гъургдарин кьимат гьисаб гъапІиган, 50 агъзур арсран манатдихьна удубчІвнийи. 20 Гьамци Агъайин Гаф яркьуди рабгъуйи ва кьувватнаъ убчІвуйи. 21 Вари гьаму гьядисйир гъашихъан, Павели Македонияйиан ва Ахаяйиантина Ерусалимдиз гъягъюз кьатІъ гъапІнийи. Дугъу: «Душваъ сабцІиб вахтназ гъузну, хъасин узу Римра дябкъну ккунду», – гъапнийи. 22 Чан кюмекчйирикан кьюр кас – Тимофейна Эраст – Македонияйиз гьаъну, думу саб кьадар вахтназ Асияйиъ гъузнийи. 23 Гьадму вахтна Агъайин Гафназ гизафдар къаршу гъудужвнийи. 24 Эфесдиъ Димитрий кІуру сар арсран уста яшамиш шулайи. Дугъу арсракан Артемида-аллагьдин бицІи хулар дапІну масу тувуйи. Му кеспи кайи устйири аьхю пулар гъазанмиш апІури шуйи. 25 Димитрийи дурарна жара кеспйир кайи устйир уч дапІну, дурариз кІуру: – Эй дустар, учвуз аьгъячвузки, ихь кеспийи ухьуз ужуб хайир хура. 26 Мидихъди сабси учвуз рябкъюрачвузки ва ебхьурачвузки, гьадму Павел кІурури, инсандин хилариинди гъапІдар аллагьар дар, кІури, неинки Эфесдиъ, хъа вари Асияйиъ айи адмийир рякъ’ан адаура ва инсанар гьаддихъ хъугъуз гъитра. 27 Хъа миди ухь’ина бала хура, неинки ихь пише зат имдарди ккадабхъбиинди, хъа гьацира зурба вуйи Артемида-идолин дараматдин саб жюрейинна мяна гъубзидар. Вари Асияйи ва вари дюн’яйи икрам апІурайи Артемидайин адлувал дубгди. 28 Му гафар гъеерхьиган, хъюлу ацІну, дурари: «Эфесдин Артемида зурба ву!» – кІури, чІигъар апІуз хъюгъру. 29 Шагьриъра бегьем гъалабулугъ абхъру. Павелин юлдшар Гай ва Аристарх кІуру кьюр Македонияйин агьалйирра хъади, тамашйир улупрушвахьна вари гъажаргънийи. 30 Павелиз, душваз дуфну, уч духьнайи халкьдин улихьна удучІвуз ккун гъабхьнийи, хъа ученикари гъитундайи. 31 Дугъан дустар вуйи му вилаятдин сакьюдар гьякимдрари, дина дурушуб тІалаб апІури, дугъахьна адмийир гьаънийи. 32 Му арайиъ уч духьнайидари, саб къайда адарди, гьарури саб кІури, чІигъар апІуйи. Дурарикан гизафдариз, чпи гьаз уч духьнаш, аьгъдайи. 33 Сакьюдари вари тахсрар сар Александр кІуру касдиин алаънийи, ва жугьдари думу улихьна удучІвуз гъитнийи. Хилин ишара дапІну, дугъаз халкь аьгьвалатнан гъаврикк ккауз ккун гъабши. 34 Хъа думу жугьуд вуйивал аьгъю гъабшиган, варидари сабхилди чІигъар гъапІнийи: «Эфесдин Артемида зурба ву!» ва му гафар текрар апІури дурарин кьюб сяаьткьан гъабхьнийи. 35 Шагьрин къайдйир дерккрури, халкь сикин дапІну, кІуру: – Эфесдин агьалйир! Эфес зурба вуйи Артемидайин дарамат ва зав’ан абхъу гирами гъван уьрхюрайи шагьур вуйивал шлиз аьгъдар? 36 Му ляхин шаксуз вуйиган, учву архаин духьну ккун, апІру ляхин фагьумсузди апІуз хай даршул. 37 Хъа учву мина дараматдин фукІа жин дарапІдар ва ихь Артемида-аллагьдиз чІуру гафар дарпидар духначва. 38 Эгер Димитрийинна дугъахъ хъайи устйирин дурарихьна аьрз аш, мидиз ухьухь диванханйирна диванбегйир ахьуз: гъит дурари сар-сариина гьадина аьрз апІри. 39 Эгер дурарихьан жара гьерхруб аш, думу аьдати саягъниинди мажлисди гьял апІиди. 40 Даршиш гъи гъабшибдин кІуллан гъалабулугъ гъитІибккну, ухьу тахсиркрар апІбан хатІавал а. Мициб гъалабулугъ ипбан бадали саб багьнара адархьуз. 41 Гьамци дупну, дугъу халкь алдагъуз гъитру.

Ляхнар 20

1 Гъалмагълар яваш гъашиган, Павел, ученикариз дих дапІну, дурариз кюмекнан гафар ва баркаллагь дупну, Македонияйиз рякъюъ учІвру. 2 Македонияйин ругарилан гъягъруган, дугъу хъугънайидариз хайлин кюмекнан гафар гъапнийи. Хъасин думу Грецияйиз гъюру. 3 Душваъ думу шубуб вазли гъузру. Думу душв’ан Сирияйиз сирнав апІуз гьязур шулайи арайиъ, жугьдариз думу йикІуз ккун шулу. Гьаддиз Сирияйиз Македонияйиантина гъягъюз дугъу кьатІъ апІуру. 4 Дугъахъди Верияйиан вуйи Пирин бай Сосипатр, Фессалоникайиан вуйи Аристархна Секунд, Дервияйиан вуйи Гай, Тимофей ва Асияйиан вуйи Тихикна Трофим хъади шулу. 5 Дурар, улихьди душну, учуз Троадайиъ ккилигури гъузру. 6 Хъа учу Пасхайин Лавшарин машквран йигъарихъан Филипияйиан гимийиъди гъушнийча ва хьуд йигълан дурарихъди Троадайиъ сатІи гъахьнийча. Душваъра саб гьяфтайиъ имича. 7 Элгьет йигъан, ученикар уьл ипІуз уч гъашиган, Павели дурарихъди сюгьбатар гъахуйи. Хъайигъан гимийиъди рякъюъ учІвуз ният ади, думу дурарихъди гьацІишваризкьан сюгьбат давам апІури гъузру. 8 Учу деънайи зиин хулаъ гизаф чирагъар кархьнайи. 9 Павели аьгъювалар улупури имиди, улдаригъ деънайи Евтих кІуру живан дерин нивкІуз гъягъюру. Ва, нивкІуъ айир, шубубпи мертебайиансина ахъру. Хъа думу за гъапІиган, лигуруш, дукІнайи. 10 Павели, исина кудучІвну, дугъаз дилигну, хабахъна гъадагъуру ва кІуру: «Пашман махьанай, дугъ’ин жан илмиди», – кІуру. 11 Хъа думу, зиина удучІвну, уьл гьудубтІну, дипІну, лап кьаназ, гвачІиндизкьан учухъди сюгьбатнаъ шулу. Хъасин думу удучІвну гъягъюру. 12 Гьадму вахтна жигьил бай хулаз чІивиди хуру, ва мид’ин вари гизаф рази гъахьнийи. 13 Учу улихьди гимийиъди, Павел дидиъ итузра ккади, Асс шагьриз сирнав гъапІунча. Дугъаз Ассдиз яягъди гъягъюз ккунди, дугъу гьациб буйругъ тувнийчуз. 14 Думу учуз Ассдиъ алахъиган, думура гимийиъ итну, Митилена шагьриз гъафунча. 15 Хъайигъан, дилин сирнав апІури, Хиос островдихьан ярхла дарди гими дебккча. Хъайигъан Сомос островдиинра улуркьну, сад йигълан Милит шагьриз гъафича. 16 Асияйиъ энгел дархьбан бадали, Павели Эфесдиз дурушуз кьаст апІуру, гьаз гъапиш думу Ерусалимдиз, эгер удукьуруш, ХьуцІударин машквар улубкьайиз хъуркьуз гьялакди вуйи. 17 Милитдиан дугъу, Эфесдин хъугънайидарин аьхюдар гъюри пну, дина адми гьаъру. 18 Хъа гъафиган, дурариз кІуру: – Узу Асияйиз гъафи йигъхъанмина вари вахтна учвухъди хъайивал аьгъячвуз. 19 Жугьдари уз’ина гъахи писвалариз дилигди, узу, дамагъар ктарди ва уларилан нивгъ рубзури, Агъайиз гъуллугъ апІури гъахьунза. 20 Узу вари халкьдин улихь ва ичв хулариъ уж’вал хру варибдикан учвуз аьгъювалар улупури гъахьунза. 21 Жугьдаризна грекариз узу Аллагьдин улихь тахсрар гардандиъ дисувалин ва ихь Агъа Исайихъ хъугъвалин жавабдарвалиинди шагьидвал гъапІунза. 22 Хъа гьамус, Гирами Рюгьнан амриз мютІюгъ шули, узу Ерусалимдиз душну ккунду. Хъа душваъ йиз кІул’ина фу гъюрушра, аьгъдарзуз. 23 Ялгъуз саб аьгъязуз, Ерусалимдиъ узуз аьзабарна дустгъар ккилигура, Гирами Рюгьну дидкан узуз гьар шагьриъ хабар тувра. 24 Хъа узу бадали йиз уьмур гьяйиф дарзуз, йиз метлеб узу Агъа Исайихьан кьабул гъапІу гъуллугъ тамам апІуб ва жавабдарвалиинди инсанарин улихь Аллагьдихьан вуйи багъиш’валикан Ужувлан хабарнан шагьидвал апІуб вуйиз. 25 Ва хъана аьгъязуз, узу ичв арайиъ Аьршарин Паччагьлугъдикан аьгъювалар улупури, сарун рякъидарчвуз. 26 Гьацира учвуз гъи кІураза, учвкан фуж пуч гъашиш, дидин тахсиркар узу хьидарза, 27 фицики узу, учвхьан гьич фукІара гьитІитІибкІди, Аллагьдин ниятарикан аьгъювалар улупури гъахьунза. 28 Ичв ва вари хъугънайидарин гъанаъ йихьай. Исайи Чан ифдиинди гъазанмиш дапІну, Аллагьдихъ хъугънайидарин ва учв’ина Гирами Рюгьну аманат гъапІдарин гъайгъу зигай. 29 Узуз аьгъязуз, узу учвхьан гъушиган, яман жанаврар дуфну, дурари сюрйириз инсаф апІидар. 30 Ичв арайиъра гьацдар адмийир хьидики, дурари, ученикар чпихъинди илтІикІуз, нягьякьвалихъинди улхиди. 31 Гьаддиз ихтиятди гъузай. Узу шубуд йисан йишвди-йигъди, уларилан нивгъ рубзури, ккарагури, учвуз мидкан аьгъювалар улупури гъахьунза. Му вари кІваин гъибтай. 32 Гьамус, гъардшар, учву Аллагьдиина ва Дугъан хайирнан Гафниина аманат апІуразачву. Дугъхьан учву хъугъувалиин мюгькам апІуз ва Чан ужувлакк ккайидарихъди учвузра ирс тувуз удукьуру. 33 Узу учвухъди хъайиган, саринна я арс, я гъизил, я багьа палат ккун гъапІундарза. 34 Учвуз ужуди аьгъячвуз, йиз ва узухъди хъайидарин игьтияжар гьуркІуз гьаму йиз хилар кюмек гъахьнийиз. 35 Уз’ан удукьруси учвуз улупунза, узуси зегьмет зигури, саилариз кюмек апІури, учвура духьну ккунду. Агъа Исайин гафар кІваин апІинай, фицики Дугъу Чав дупна: «ГъадабгъубтІан тувуб хушбахтаварвал ву». 36 Гьамци дупну, думу, кьамкьариина ис духьну, варидарихъди ккарагуру. 37 Варидари, ишури, дугълан хабар алдагъури, макар апІуйи, 38 фицики дурар гизаф пашман духьнайи, иллагьки дугъан: «Сарун узу учвуз рякъидарчвуз», кІуру гафариин. Хъасин дурари думу гимийихьна рякъюъ тІаънийи.

Ляхнар 21

1 Дурарихьан жара духьну, учу гимийиъди дишди Кос, хъайигъан Родос кІуру островариина, хъа дилин Патара шагьриз гъафнийча. 2 Финикияйиз гъябгъру гими дабгну, дидиъ эъну, рякъюъ учІвча. 3 Киприн кафари терефнахъантина душну, учу Сирияйиз гъафича ва Тир шагьриъ дергча, фицики душваъ гимийиан гъагъар адагъну ккундийи. 4 Душваъ учуз ученикар гъидихъчуз ва дурарихъди саб гьяфта адапІча. Гирами Рюгьнан амриинди дурари Павелиз, Ерусалимдиз мягъян, кІури гъахьну. 5 Ич душваъ шлу вахт ккудубкІиган, учу дилин удучІвну, ич рякъ давам гъапІча. Ученикари, чпин хпарна веледар хъади, учу шагьриантина рякъюъ тІаънийи, хъа гьюлин гъирагъдихъна гъафиган, учу кьамкьариина ис духьну, ккарагнийча. 6 Дурарикан гьарурихъди, баркаллагь дупну, учу гимийиз за гъашича, хъа дурар чпин хулариз хътаку. 7 Учу, рякъ давам апІури, Тириан Птолемаида шагьриз гъафича ва душваъ гъардшар тебрик дапІну гъафи йигъ гьадрарихъди адапІча. 8 Хъайигъан рякъюъ учІвну, учу Къайсарияйиз гъафича ва Ерусалимди кадагънайи ургур гъардшикан сар вуйи Ужувлан хабар рабгъру Филипдин хулаъ дергча. 9 Дугъаз швуваз душну адру, пайгъамбарвалин гафар кайи юкьур риш айи. 10 Учу душваъ сакьюдар йигъар адаъхъан, дина Ягьудияйиан Агав кІуру пайгъамбар гъафнийи. 11 Учухьна дуфну, дугъу, Павелин чІул гъадабгъну, дидихъди чан ликарна хилар йитІну, гъапнийи: – Гирами Рюгьну гьамци дупна: «Ерусалимдин жугьдари му чІулин эйси магьа гьамци йитІиди ва аллагьсузарин хилиз тувди». 12 Му гафар гъеерхьиган, учу ва душваъ айи адмийир вари Павелиз, Ерусалимдиз мягъян кІури, ккарагуз хъюгъча. 13 Гьадмуган Павели жаваб тувру: – Учву гьапІрачва? Гьаз, ишури, йиз юкІв дар апІурачва? Узу, йитІуб гъубзри, хъа гьацира Агъа Исайин ччвурнахъ Ерусалимдиъ йикІузра гьязур вуза. 14 Думу, учу кІурайибдихъинди илтІикІуз дархьиган, «Гъит Агъайин амур ибшри», – пну, гъитча. 15 Гьадму йигъарихъан гьязур духьну Ерусалимдиз гъушча. 16 Къайсарияйиан сакьюдар ученикарра учухъди гъафнийи. Дурари учу ухдихъанмина ученик вуйи кипржви Мнасондихьна хъади гъафнийи. Учу гьадгъахь дергча. 17 Ерусалимдиз гъафиган, гъардшари учу хушниинди кьабул гъапІнийи. 18 Хъайигъан Павел учухъди Якьубдин хулаз гъафнийи. Душваъ вари хъугънайидарин аьхюдар уч духьнайи. 19 Павели, дурариз салам тувну, жугьуд дарударин арайиъ Аллагьди чан хилариинди гъапІу вари ляхнарикан хъайи-хъайиси ктибтуру. 20 Мидкан гъеебхьиган, дурари Аллагьдин ад апІуру ва Павелиз кІуру: – Гъардаш, увуз хъугъувалиина дуфнайи швнуд-сад агъзур жугьуд гъяркъюнвуз, амма дурар вари Къанун уьбхбан ижми терефкрарди ими. 21 Уву жугьуд дарударин арайиъ айи вари жугьдариз, дурари ихь аьдатар дюрюхри, веледарин суннат дарапІри, Мусайин къанунар кІули дурухри пну, аьгъювалар тувра, кІури, дурариз увкан деебхьна. 22 Гьаци вуйиган ухьу гьапІхьа. Дурариз, икибаштІан, уву гъюбкан ебхьиди. 23 Гьаддиз учу кІуруб апІин: ич арайиъ Аллагьдиз ху дапІнайи юкьур кас а. 24 Дурарихъди душну, марцц хьпан аьдат тамам апІин. Дурарихьан чпин кІулар ултІукъуз шлуганси, дурари гъапІу харжарин пул уву тув. Гьадмуган варидариз увкан кІурайиб гьякь дарувал ва увура къанундиз мютІюгъ шулайивал аьгъю хьибди. 25 Хъугъувалиина гъафи жугьуд дарударикан гъулхиш, дурариз учу, идолариз гъурбан гъапІу йикк, бугъмишди гъабкІибдин йикк дирипІри, ифи дурубхъри ва кьяппавал дарапІри пну, кагъаз хътапІунча. 26 Гьамци хъайигъан Павели, гьаму касар чахъди хъади душну, марцц хьпан аьдат тамам апІуру. Хъасин, марцц хьпан йигъар фила ккудуркІуруш ва дурарикан гьарурихъанди гъурбнар фила апІуруш, аьгъю апІбан бадали, Аллагьдин хулаз гъюру. 27 Аьдатниинди дерккнайи ургуд йигъ улдубчІвиган, Асияйиан вуйи жугьдариз думу Аллагьдин хулаъ ади рякъюру. Дурари халкьдик гъалабулугъ кипру ва, гьамци чІигъар апІури, думу дисуру: 28 – Израилин агьалйир! Кюмекназ гъачай! Му жви инсанар къанундиз, ихь халкьдиз ва ихь Аллагьдин хулаз къаршу вуди дих апІурайи кас ву. Мидихьна мугъу, Аллагьдин хулаз грекарра хъади дуфну, ихь гирами йишв чиркин гъапІну. 29 Дурариз, улихь йигъари шагьриъ дугъахъ Эфесдиан вуйи Трофим хъади гъяркъган, Павели думура Аллагьдин хулаз хъади дуфнайиси гьибгънайи. 30 Шагьриъ гъалабулугъ абхъру, варишварихъанди адмийир, жаргъури дуфну, уч хьуз хъюгъру. Дурари Павел, дидисну, гужназ Аллагьдин хул’ан адагъуру ва дишла раккнар хъяркьру. 31 Дурариз Павел йикІуз ккун гъабхьиган, кьушмарин аьхюрихьна, вари Ерусалимдик гъал кабхъна пну, хабар гъябгъюру. 32 Дугъу, эскрарна юзбашйир гъадагъну, гьадина гьяракат апІуру. Аьхюрна эскрар гъяркъиган, дурари Павел урччвувал дебккру. 33 Гьадмуган аьхюри, дуфну, думу дидисну, кьюриз думу зунжрари йитІуз буйругъ тувру ва гьерхру: – Му фуж ву? Мугъу фу гъапІну? 34 Халкьдин арайиан сари саб, тмунури саб кІури, чІигъар апІурайи. Дурарин гъугънагъян гъаври ахъуз даршиган, аьхюри Павел эскрарин йишваз гъахуз гъитру. 35 Павел умбрарихьна гъахиган, эскрари гьадлантина думу хилариинди гъахуру, гьаз гъапиш халкьдин гъварчну думу парчйир апІуб мумкин вуйи. 36 Дурари, дугъахъ хъергну: – Думу йивну йикІай! – кІури, чІигъар апІурайи. 37 Эскрари чав гьадрарин йишваъ аърайиган, Павели кьушмарин аьхюрихьан гьерхру: – Увхьан гьерхуз хай шулин? Дугъу жаваб тувру: – Увуз грек чІал аьгъявузки! 38 Дици вуш, багарихьди гъалабулугъ гъитІибккну, ичІи чюлиз юкьуд агъзур гъачгъар адау Египетжви уву вуна? 39 Хъа Павели жаваб тувру: – Узу Киликияйиан вуйи жугьуд вуза, аьгъю Тарс шагьрин ватандаш вуза. Увкан миннат вуйиз, узухь халкьдихъди улхуз гъит. 40 Гьадмуган дугъу ихтияр тувру. Павелира, умбриина за духьну, халкьдиз хилин ишара апІуру. Хъа вари яваш гъашиган, думу жугьуд чІалниинди улхуз хъюгъру.

Ляхнар 22

1 «Гъардшарна абйир, гьамус узу тахсиркар дарувалихъ хъебехъай». 2 Павел чпихъди жугьуд чІалниинди улхуради деебхьну, дурар хъанара яваш шулу. Гьадмуган дугъу кІуру: 3 – Узу Киликияйиъ айи Тарсдиъ бабкан гъахьи жугьуд вуза, хъа узу мушваъ, гьаму шагьриъ тербияламиш гъашир вуза. Йиз мялим Гамалиили узу ихь абйирин къанунар дишди уьрхрурси тербияламиш гъапІну. Учву гъи фици вуш, узура гьаци кІваантІан Аллагьдин гъуллугъниин алди гъахьнийза. 4 Агъайин рякъюъди гъягъюрайидар йихури, жилар ва дишагьлийир дисури, дустагъ апІури гъахьнийза. 5 Мидкан аьхюну маллйирихьан ва кавхйирин мажлисдихьан шагьидвал апІуз шулу. Дамаскдиъ айи жугьуд дустариз вуйи кагъаз узухьна гьадрари тувунзухьна. Узура, душван хъугънайидар, рукьари йитІну, Ерусалимдиз духну, жаза гьадабтІуз, гьадина гъушунза. 6 Хъа рякъюъ, Дамаскдиз багахь шулайиган, лисун шулайи арайиъ саб дупну завариан узу зурба вуйи аквну ккаунзу. 7 Узу жил’ина алдакза, ва узуз гьамци кІурайи дих гъеебхьзуз: «Эй Саул! Саул! Уву Узухъ гьаз хъергнава?» 8 Узу гьерхза: «Уву фуж вува, Агъа?» Дугъу узуз жаваб туву: «Узу уву хъергнайи Назаретдиан вуйи Иса вуза». 9 Узухъди хъайидариз акв гъябкънийи, хъа узухъди улхурайи дих дурари аннамиш гъапІундайи. 10 Гьадмуган узу гъапунза: «Узу гьапІну ккунду, Агъа?» Агъайи узуз гъапунзуз: «Гъудужвну, Дамаскдиз гъарах, хъа душваъ, уву фу дапІну ккундуш, пидивуз». 11 Узуз фукІа дярябкъди гъабшизуз, фицики зурба аквну кур гъапІнийзу. Гьаддиз узухъди хъайидари, йиз хил дибисну, Дамаскдиз гъахнийзу. 12 Ва магьа, Аллагь кІваин али ва къанунариз мютІюгълу, чакан вари жугьдар ужуди улхру Ананай кІуру касди, 13 узухьна дуфну, гъапизуз: «Саул гъардаш! Рябкъюри йихь!» Гьамци гъапибси, узуз думу гъяркъзуз. 14 Хъа дугъу узуз гъапизузки: «Ихь абйирин Аллагьди Чан ният увуз аьгъю хьпан бадали, Гьякьлур рякъбан бадали ва Дугъан мелзналан дих ебхьбан бадали уву кадагъна. 15 Уву вари инсанарин улихь увуз гъябкъюбдинна гъеебхьубдин шагьид хьидива. 16 Гьаци вуйиган, уву фтиз ккилигурава? Гъудужвну, штуан йихь, Агъа Исайихъ хъугъувалиинди яв гунгьарихьан марцц йихь». 17 Узу Ерусалимдиз хътакиган, Аллагьдин хулаъ ккарагурайи вахтна, узуз аьжайибди саб гъябкъзуз. 18 Узуз гьамци кІурайи Иса гъяркъзуз: «Тяди Ерусалимдиан гъарах, фицики дурари Йиз гьякьнаан вуйи яв шагьидвал кьабул апІидар». 19 Узу Дугъаз гъапиза: «Я Агъа, дурариз, узу фици Увухъ хъугърайи адмийир дустагъ апІури, урччвури гъахьнуш, аьгъя. 20 Яв шагьид Стефандин ифи удубзруганра, думу ляхниин рази духьну, дугъаз йивурайидарин палтар уьрхюри, гъаравлиъ гъахьунза». 21 Гьадмуган Агъайи узуз гъапи: «Гъарах, Узу уву ярхлариз, жугьуд дарударихьна гьаъразаву». 22 Гьамусдиз дурар Павелихъ хъпехъури айи, хъа му гафар гъеерхьиган, чІигъар апІуз хъюгъру: – Думу йивну йикІай! Думу дюн’яйиин яшамиш хьуз лайикь дар! 23 Дурари, чІигъар апІури, чпин палтар хътитури, завуз бишируг гатІабхьуйи. Гьамци дурари чпин хъял улупуйи. 24 Кьушмарин аьхюри Павел, эскрарин йишваз духну, дугъкан дицдар чІигъар гьаз апІураш, аьгъю апІбан бадали, гъирмажи урччвуз буйругъ тувру. 25 Хъа Павел урччвбан бадали йитІурайиган, дугъу гьадушвахь хьайи юзбашийихьан гьерхру: – Суд дарапІди, Римдин ватандаш урччвуз ихтияр анчвуз? 26 Му гафар гъеерхьиган, юзбашийи, кьушмарин аьхюрихьна душну, кІуру: «Уву гьапІрава? Му кас Римдин ватандаш ву!» 27 Кьушмарин аьхюри, Павелихьна дуфну, гьерхру: – Йипа, уву дугъридан Римдин ватандаш вуна? – Ав, – пну, жаваб туву Павели. 28 Кьушмарин аьхюри гьадмуган: – Узу гьаму ватандаш’вал аьхю пуларихъ гъадабгъунза, – гъапи. Хъа Павели кІуруки: – Хъа узу гьадму ватандаш вуди бабкан гъахьунза. 29 Павелихьан силис гъадабгъуз ккайидар дугъхьан дишлади гьудучІву. Чав Римдин ватандаш зунжрари йитІувал аьгъю гъабшиган, кьушмарин аьхюризра гучІ гъабхьнийи. 30 Хъайигъан кьушмарин аьхюри, жугьдари Павелик фу тахсир кипраш, якьинди аьгъю апІбан бадали, аьхюну маллйиризна вари аьхю суддиз уч хьуз буйругъ тувру. Павелилан зунжрар алдагъну, думу дурарин улихь дерккру.

Ляхнар 23

1 Аьхю суддиъ айи диванбегйириз дилигну, Павели кІуру: – Йиз гъардшар! Гъийин йигъ’инакьан узу Аллагьдин улихь намусниинди яшамиш гъахьунза. 2 Му гафар гъеерхьиган, маллйирин аьхюр Ананайи, гъваларихъ хъайидариз, Павелин мучІмучІихъан тувай пну, буйругъ тувру. 3 Хъа Павели дугъаз кІуру: – Увузра Аллагьди йивидивуз, дабснайи цал! Мушв’ин Къанундиинди йиз диван апІуз деънайир вува, хъа уву, Къанун чІюбгъюри, узуз йивуз алаурава. 4 Дугъан гъваларихъ хъайидари Павелиз гъапи: – Аьхюну маллайиз гьацдар гафар кІурава? 5 Павели: – Гъардшар! Узуз думу аьхюну малла вуйиваликан аьгъдайзуз. Фицики дибикІна: «Яв халкьдин гьюкумдриз пис гафар мапІан». 6 Павелиз душваъ уч духьнайидарикан садар саддукйир, тмундар фарисйир вуйиб аьгъю гъабшиган, дугъу зарбди кІуру: – Гъардшар! Узу фарисейин бай фарисей вуза! Хъа суддиз узу, гъачІидар чІиви хьпак йиз умуд ка кІури, духназу. 7 Дугъу гьамци гъапиган, фарисйиринна саддукйирин арайиъ гьюжат абхъру ва дурар кьюб йишваз пай шулу. 8 Фицики саддукйири я гъачІир чІиви хьувал, я малайикар, я рюгьяр айидар дар, хъа фарисйири гьадрар вари айидар ву, кІури шуйи. 9 Варидари чІигъар апІуз хъюгънийи, хъа фарисйирикан сакьюдар аьлимари, гьамци кІури, гьюжат апІуз хъюгъру: «Учуз му касдик саб чІуру фикирра бихъурадарчуз. Белки рюгь, ясана малайик дугъахъди гъулхнушул?» 10 Гьюжатар артухъ шулайиган, дурари Павел парчйир дарапІри пну, кьушмарин аьхюри, эскрариз, душну, думу дураригъян гъядягъну, эскрарин йишваз гъахуз буйругъ тувру. 11 Хъайишван Агъайи, Павелин улихьна ачмиш духьну, кІуру: – ГучІ мапІан, Павел, фицики уву Узкан Ерусалимдиъ фици шагьидвал гъапІнуш, Римдиъра гьаци шагьидвал апІидива. 12 Йигъ улубкьуради, жугьдари чпин арайиъ Павел дарчІикьан гагьди, дирипІри ва дурубхъри гъузуз ху апІуру. 13 Ху гъапІдарин кьадар ягъчІвур кастІан артухъ вуйи. 14 Дурари, аьхюну маллйирин ва кавхйирин багахьна душну, гьамци кІуру: – Учу, Павел йивну йикІайиз, дирипІри ва дурубхъри гъузарча пну, ху дапІнача. 15 Гьаци вуйиган, учву ва аьхю судди, думу ичв улихьна хруси, кьушмарин аьхюрикан, Павелин месэла хъана айибтІан гьякьлуди ахтармиш апІуз ккундучуз кІури, тІалаб апІинай. Хъа учу думу мина гъюру рякъюъ йикІуз ккеъдича. 16 Гьаму кьастнакан Павелин худлиз ебхьуру. Дугъу, эскрарин йишваз дуфну, дидкан Павелиз хабар апІуру. 17 Гьадмуган Павели, юзбашйирикан сариз, чахьна дих дапІну, кІуру: – Гьаму живан кьушмарин аьхюрихьна гъайих, мугъаз аьхюрикна кІуру саб хабар аьгъя. 18 Дугъура, живан кьушмарин аьхюрихьна духну, кІуру: – Дустагъдиъ айи Павели, узуз чахьна дих дапІну, гьаму живан увухьна гъахуз тІалаб гъапІну, гьаз гъапиш мугъаз увуз фу-вуш пуз ккунди а. 19 Кьушмарин аьхюри, живандин хил дибисну, гъирагъдиз гьадаъну, гьерхру: – Увуз фу пуз ккунди авуз? 20 Дугъу жаваб туву: – Жугьдариз, дугъан месэла хъана айибтІан гьякьлуди ахтармиш апІуз ккундучуз кІури, увкан закур Павел аьхю суддиз хувал ккун апІуз йикьрар дапІна. 21 Дурарихъ мехъебехъан, гьаз гъапиш дугъаз ягъчІвур касдилан зиина адмийир ккеъна. Дурари, думу дарчІикьан гагьди, дирипІуз ва дурубхъуз ху дапІна. Дурар гьамус, гьаци апІуз, яв разивализ ккилигура. 22 Кьушмарин аьхюрира: – Уву узуз ктибтубдикан саризкьан макІан – пну, живан деетуру. 23 Хъасин дугъу, чан кьюр юзбашийиз дих дапІну, кІуру: – Къайсарияйиз гъягъюз кьюдварж эскер, ургцІур гьяйвнарин эскрар, кьюдварж ярхи жидйир хьайи эскрар хябяхъдин сяаьт урчІвубдиз гьязур апІинай. 24 Гьацира, Павел гьякимдар Феликсдихьна гъахбан бадали, гьяйвнарра гьязур апІинай. 25 Хъа дугъу гьамцдар гафар кайи кагъаз гъибикІнийи: 26 – Яв аьхювал гьякимдар Феликс! Узу, Клавдий Лисийи, увуз саламар хътаураза. 27 Гьаму кас жугьдари дидисну йикІуз цІибтІан имдайи, хъа узу, думу Римдин ватандаш вуйиб аьгъю дубхьну, думу гъюрхюнза. 28 Думу тахсиркар апІбан себеб аьгъю апІуз ккунди, узу думу суддиз гъахунза. 29 Лигуруш, дугъак кирчрайи вари тахсрар дурарин чпин хусуси къанунарихъди аьлакьалудар вуйи, хъа думу йикІуз вая дустагъ апІуз лайикь вуйи саб тахсирра дугъак ктар. 30 Хъа му касдиз къаршу вуди чІуру кьастар дапІнайиваликан узуз гъапиган, узу думу дишлади увухьна хътаунза ва думу тахсир апІурайидариз чпин дугъак кирчрайи багьнийир яв улихь ачухъ апІуз буйругъра тувунза. Сагъ ишриву! 31 Эскрарира, дугъан буйругъ тамам дапІну, Павел гьадму йигъан хябяхъдиз Антипатридайиз гъахуру. 32 Хъайигъан гьяйвнарин эскрар, Павелра хъади, Къайсарияйиз рякъюъ учІвру, хъа миди вуйи эскрар чпин йишваз хътакуру. 33 Къайсарияйиз гъафиси, Павелихъ хъайи гъаравлари кагъаз гьюкумдрихьна гъабхуру ва Павел дугъан хилиз тувру. 34 Хъа Феликсди, кагъаз дурхну, Павел фуну юрднаан вуш, гьерхру. Думу Киликияйиан вуйиб аьгъю гъабшиган, 35 Феликсди Павелиз кІуру: – Узу увухъ, уву тахсиркар апІурайидар гъафиган, хъпехъидиза. Ва Павел Гьироддин дараматдиъ гъаравликкди уьрхюз буйругъ тувру.

Ляхнар 24

1 Хьуд йигълан, сакьюдар кавхйир ва Тертулл кІуру аьрзачи хъади, аьхюну малла Ананай гъюру ва гьюкумдрин улихь Павелиз къаршу вуди дугъан тахсрар ктухуру. 2 Чаз дих гъапІиган, Тертулли, Павел тахсирламиш апІури, гьамци кІуру: 3 – Аьхю вуйи Феликс, гизаф вахтнан мясляаьт ва халкьдин ужуб дуланажагъ айивалиинди учу увуз буржлу вуча ва му учу разивалиинди кьабул апІурача. 4 Хъа уву артухъ инжик дарапІбан бадали, увуз хас вуйи сабурлувалиинди ич жикъи вуйи аьрзайихъ хъпехъуб ккун апІурача. 5 Фицики учу му кас мясляаьт чІюбгърур, вари дюн’яйиъ жугьдарин арайиъ гъалабулугъар гъитІирккурайир ва назаретлу кучІлин диндин кІул вуйивал ачухъ гъапІунча. 6 МитІланра гъайри, дугъаз Аллагьдин хал чиркин апІуз ккун гъабхьну, хъа учу думу гъидисунча. 8 Дугъхьан силис гъадабгъну, учу дугъак кирчрайи тахсрар увхьан аьгъю апІуз хьибдивухьан. 9 Вари жугьдари, мурар вари гьякьяр ву кІури, Тертуллин гафар тасдикь апІуру. 10 Гьякимдари, ишара дапІну, чаз улхуз ихтияр тувиган, Павели кІуру: – Уву гизаф йисари гьаму халкьдин гьякимвал апІурайивал аьгъяди, узу шадвалиинди узук кирчрайи тахсрар дюз дарувал улупидиза. 11 Увхьан ахтармиш апІуз шулвухьанки, узу Ерусалимдиз икрам апІуз гъафи вахтнахъанмина йицІикьюд йигътІан артухъ гъабхьундар. 12 Гьаму вахтнан айитІ узу Аллагьдин хулаъ шлихъдикІа я гьюжатар апІури, я мистаъ, я шагьрин жара йишваъ халкьдик гъал кипри гъяркъю кас адар. 13 Ва гьамусра дурарихьан чпи узук кирчрайи тахсрар тасдикь апІуз шули адар. 14 Хъа узу гардандиъ бисуразаки, дурари кучІал дин вуди гьисаб апІурайи БикІубдин бинайиин алди йиз абйирин Аллагьдиз гъуллугъ апІураза. Узу Къанундиъ улупнайи гьарсабдихъ ва Пайгъамбрарин китабариъ дидикІнайидарихъ хъугъраза. 15 Ва, дураринси, йизра Аллагьди гьам гьякьлу, гьамсана гьякьсуз касар, гъачІихъан, чІиви апІбак умуд кайиз. 16 Гьаддиз Аллагьдин ва инсанарин улихь йиз намус марцци хьпан бадали, узхьан шлукьан чарйир зигураза. 17 Гизаф йисар улдучІвхъан, узу, йиз халкьдин арайиъ садакьа ва гъурбнар апІуз Ерусалимдиз хъадакну гъафунза. 18 Дупну ккундуки, узу марцц апІру аьдатра тамам апІури, дурариз Аллагьдин хулаъ гъяркъюнзу. Узу халкьдик гъалабулугъ кипри гъахьундарза. 19 Мушваъ, эгер узуз къаршуди кІуруб аш, Асияйиан вуйи жугьдарра яв улихьна дуфну ккундийи. 20 Ясана гьамусяаьт мушваъ айидари, узу Ерусалимдиъ аьхю суддин улихь дерккиган, узук фицдар тахсрар кирчнуш, гъит йипри. 21 Дурарихьан пуз шлуб ялгъуз гьамутІан дар: дурарин кьялаъ дийигъну, узу: «Узу гъачІидар чІиви хьпахъ хъугъра кІури, гъи учву йиз диван апІурачва», – пну, чІигъ гъапІунза. 22 Гьадмуган Агъайин рякъ ужуди аьгъю Феликсди, диван апІувал дебккну, гьамци гъапи: – Узу яв ляхниз кьушмарин аьхюр Лисий гъафи вахтна лигидиза. 23 Дугъу юзбашийиз Павелиин ул алди гъитуб ва саризра дугъахьна гъюз ва дугъан ярар-дустариз дугъан гъайгъушнаъ хьуз гъадагъа дарапІуб буйругъ тувру. 24 Сакьюдар йигъарилан Феликс, чан жугьуд шив Друзиллара хъади дуфну, Павел хуз гъитну, Месигь Исайин хъугъваликан вуйи дугъан улхбарихъ хъпехъуру. 25 Хъа Павел гьякьваликан, сабурлуваликан ва аьхирзамандихъан шлу дивандикан улхуз хъюгъиган, Феликсдиз гучІ шулу ва кІуру: «Гьелелиг гъарах. Хъа вахт гъабшиган, дих апІидизавуз». 26 Павели чав деетузди пул тувур, кІури, Феликсдин миж кайи. Гьаддиз дугъу кми-кмиди Павелиз чахьна дих апІури ва дугъахъди сюгьбатар гъахури гъахьну. 27 Кьюд йис улдучІвхъан, Феликсдин йишв’ин Порций Фест дерккнийи. Жугьдар рази ктаури, Феликсди Павел дустагъдиъ итнийи.

Ляхнар 25

1 Фест гьякимдар духьну шубуд йигълан, думу Къайсарияйиан Ерусалимдиз гъягъюру. 2 Аьхюну маллйири ва жугьдарин садпи агьлари дугъан улихь Павелин тахсрар ктухуру. 3 Дурари, гьамци гъапІиш, ужу хьибди, кІури, Павел Ерусалимдиз гьауб Фестдикан тІалаб апІуру, фицики дурариз думу рякъюъ йикІуз ккунди айи. 4 Фестди дурариз, Павел Къайсарияйиъ мюгькамди уьрхюра ва багарихьди учв дина гъягъюрза, кІури, жаваб тувру. 5 – Гъит ичв аьхюдарикан сакьюдар узухъди гъюри, – гъапи дугъу, – ва думу касдик тахсир каш, гьадушваъ тахсиркар апІри. 6 Фест дурарихъди ургуд-йицІуд йигъан гъузру. Къайсарияйиз хътакиган, Фестди, диванбегийин йишв’ин деъну, Павел дина хуз буйругъ тувру. 7 Хъа думу гъахиган, Ерусалимдиан гъафи жугьдари, Павел кьялаъ тІаъну, дугъак гизаф аьхю тахсрар кирчру, амма дурарихьан мурар усбат апІуз гъахьундар. 8 Павели: «Узу жугьдарин къанундиз, Аллагьдин хулаз, я Римдин паччагьдиз къаршу ляхин гъапІундарза», – кІури, учв дурарихьан уьрхюри гъахьну. 9 Хъа Фест жугьдар рази апІуз чалишмиш шули гъахьну ва гьаддиз Павелиз гьамциб суал тувру: – Увуз, Ерусалимдиз душну, гьадушваъ, увук кирчрайи тахсрариз лигну, узу яв диван дапІну ккундунуз? 10 Павели жаваб тувру: – Узу гьамусяаьт йиз диван дапІну ккуни Римдин паччагьдин дивандин улихь дийигъназа. Узу жугьдариз саб чІуру ляхинра гъапІундарза, му увуз лап ужуди аьгъявуз. 11 Эгер узу гьякь дарш ва йикІбаз лайикь вуйи ляхин гъапІнуш, узу дидккан кІул ккадабгъури адарза. Хъа гьаму касари, йиз тахсир адарди, узук тахсрар кирчраш, узу шлихьанкІа дурарин хилиз тувуз хьибдар. Узу йиз диван Римдин паччагьди апІуб ккун апІураза. 12 Мажлисдихъди мясляаьт дапІну, Фестди жаваб туву: – Уву яв диван Римдин паччагьди апІуб ккун гъапІунва, гьаддиз Римдин паччагьдихьна гъягъидива. 13 Сакьюдар йигъарилан паччагь Агриппа, Вереникара хъади, Фест тебрик апІбан бадали, Къайсарияйиз гъюру. 14 Дурари душваъ адау сакьюдар йигъарин арайиъ Фестди паччагьдиз Павелин месэлайикан, гьамци кІури, ктибтуру: – Мушваъ Феликсди дустагъ дапІну гъитнайи сар кас а. 15 Узу Ерусалимдиъ айиган, дугъак тахсрар кирчри, жугьдарин аьхюну маллйирина кавхйири дугъан диван апІуб тІалаб гъапІнийи. 16 Хъа узу, тахсир илипурайириз, тахсрар кирчрайидарихьди машна-машди дяркъну, учв уьрхюз мумкинвал тутрувди, думу аьжализ тувуб римлуйирин аьдат дар, гъапунза. 17 Гьаддиз, гьадму жугьдар мина гъафиган, узу ляхин кьаназ илдидипди, хъайигъан диванбегийин йишв’ин деъну, гьадму кас дина хуз буйругъ тувунза. 18 Думу тахсирламиш апІурайидар гъудужвну гъулхиган, дурарихьан узу ккилигурайи гьич саб тахсирра пуз гъабхьундар. 19 Дурари дугъахъди чпин диндикан ва гьапІрур-вуш сар дукІнайи Исайикан гьюжатар апІури гъахьну. Павели, думу чІивир ву, кІурира тасдикь апІурайи. 20 Му ляхниз фици лигуруш аьгъдарди, узу Павелихьан, Ерусалимдиз душну, гьадушваъ яв диван дапІну ккундунуз, пну, гьерхунза. 21 Хъа Павели чан месэла Римдин паччагь Августди гьял апІуб тІалаб апІбаз лигну, узуз думу Римдин паччагьдихьна гьауз мумкинвал хьайиз, Къайсарияйиъ гъаравликк гъитуз буйругъ тувунза. 22 Агриппайи Фестдиз: «Узузра гьадму касдихъ хъпехъуз ккунди азуз», – гъапиган, Фестди: «Закур уву дугъахъ хъпехъидива», – пну, жаваб тувру. 23 Хъайигъан, Агриппана Вереника гизаф дамахлуди дуфну, кьушмарин аьхюдарихъдина шагьрин адлу агьалйирихъди диванханайиъ учІвиган, Фестди Павел хуз буйругъ тувру. 24 Хъасин Фестди кІуру: – Агриппа паччагь ва вари мушваъ айи агьлар! Учвуз Ерусалимдиъ ва гьамушваъ чакан вари жугьдарин жямяаьтди аьрзар апІурайи гьаму кас рякъюрачвуз. Дурари, му кас яшамиш духьну ккундар, кІури, чІигъар апІури гъахьну. 25 Хъа узу, думу йивну йикІуз лайикьлу вуйи гьич саб тахсир ктар, кІури, гьисаб апІураза. Хъа дугъу чан диван Римдин паччагьди апІуб тІалаб гъапІиган, узу думу дугъахьна гьауб кьатІъ гъапІунза. 26 Хъа узу Римдин паччагьдиз якьинди фу бикІурушра аьгъдруган, гьаддиз думу ичв варидарин улихьна, иллагьки, паччагь Агриппа, яв улихьна хуб буйругъ тувунза. Учву дугъан ляхин ахтармиш апІбалан кьяляхъ, узу Римдин паччагьдиз му ляхникан фу бикІуруш ачухъ шул. 27 Фицики дустагъ дапІнайи касдин тахсир фтиъ аш, улулупди, гьауб фагьумсуз ляхинси гьибгъразуз.

Ляхнар 26

1 Гьадмуган Агриппайи Павелиз кІуру: – Гьамус увхьан улхуз шулвухьан. Павелира, чан хил за дапІну, чан тахсир адруваликан пуз хъюгъру: 2 – Агриппа паччагь! Жугьдари узук кирчрайи вари тахсрарихьан яв улихь жвув уьрхюб аьхю бахт вуди гьисаб апІураза. 3 Фицики уву жугьдарин вари аьдатарихъди ва гьюжат али месэлйирихъди таниш вува. Гьаддиз увкан узухъ сабурниинди хъпехъуб тІалаб апІурза. 4 Вари жугьдариз, фици узу жигьил вахтнахъанмина йиз халкьдин арайиъ, хъасин Ерусалимдиъ яшамиш шули гъахьнуш, аьгъя. 5 Дурариз узу ухдихъанмина аьгъя ва, чпиз ккун гъабхьиш, дурарихьан узу фарисей вуди хьуваликан ва ихь диндиз тялукь вуйи ижми саягънан уьмур хъапІри хьуваликан шагьидвал апІуз шулу. 6 Гьамус узу, Аллагьди ихь абйириз туву гафнак умуд кивбаз лигну, 7 йигъ-йишвди Аллагьдиз гъуллугъ апІури, ич йицІикьюб тухми думу гаф тамам хьпак умуд кивбаз лигну, суддин улихь дийигъназа. Магьа гьаму умудназ лигну, Агриппа паччагь, жугьдари узу тахсиркар апІура. 8 Уву, Аллагьдихьан гъачІидар чІиви апІуз хьуб мумкин дарубси гьисаб апІурана? 9 Сифтейиан узура, Назаретдиан вуйи Исайин гафназ къаршу вуйи гизаф ляхнар апІуб лазим ву, кІури, гьисаб апІуйза. 10 Узу гьадрар вари Ерусалимдиъ апІурийза. Мидкан аьхюну маллйирихьан гьюкум гъадабгъну, аьхючІвеъ Исайихъ хъугърайидар дустагъдиъ ирчунза. Хъа Исайин ученикар йивну йихру вахтна, узу мид’ин рази шуйза. 11 Узу дурар вари мистариъ, дурарихьди чпин хъугъувал батІул апІуз гъитуз чалишмиш шули, жаза туври гъахьнийза. Дурарихьна йиз даккнишин гьадмукьан гъатиб вуйики, узу дурарихъ хъергуз жара шагьраризра кмиди гъягъюйза. 12 Гьациб кьаст ади узу сабан, аьхюну маллйирин гьюкум ва табшуругъар хьади, Дамаскдиз гъушнийза. 13 Лисун шулайи вахтна, узу рякъюъ айиган, ригъдинтІан гужли аквну, завариан гъюри, узуна узухъ хъайидар ккаънийи. 14 Учу вари жил’ина алдакчу, ва узуз узухъди жугьуд чІалниинди улхурайи гьамциб дих гъеебхьзуз: «Эй Саул, Саул! Уву Узухъ гьаз хъергнава? Аллагьдиз къаршу гъудужвну, жвуваз писвал апІурава». 15 Хъа узу: «Уву фуж вува, Агъа?» – пну, гьерхза. Ва Агъайи узуз жаваб туву: «Узу уву хъергнайи Иса вуза. 16 Ликриина гъудужв. Гьеле увуз гъябкъюб гъубзри, хъа Узу увуз улупуз ккимбубдинра шагьид шлу, Йиз гъуллугъчиди дерккуз увухьна ачухъ духьназа. 17 Узу уву яв халкьдихьан уьрхидиза ва жугьуд дарударихьна гьаъдизаву. Хъа дурарихьанра увуз зарар тувуз хьибдар. 18 Уву дурарин улар арццну, дурар мучІушнахьан аквнахьна, иблисдин гьюкмиккан Аллагьдихьна хидива. Дурарихьан гьамци чпин гунгьарилан хил алдабгъувал ва Узухъ хъугъбиинди Аллагьдин терефназ гъафидарин арайиъ чпиз йишв гъазанмиш апІуз хьибди». 19 Гьаци вуйиган, паччагь Агриппа, узхьан аьршарин амрихъ хъпебехъди гъузуз гъабхьундарзухьан. 20 Хъа Дамаскдиъ, гьацира Ерусалимдиъ ва вари уьлкейиъ, хъасин жугьуд дарударин арайиъра, дурари, чпин тахсрар гардандиъ дидисну, Аллагьдихьинди илдицбан бадали ва чпин ляхнариинди му тасдикь апІбан бадали, аьгъювалар улупуз хъюгъюнза. 21 Гьамдин кІуллан жугьдариз, узу Аллагьдин хулаъ айи вахтна, дидисну йикІуз ккун гъабхьну. 22 Хъа Аллагьди узуз, гъийин йигъазкьан кюмек апІура. Дугъан кюмекниинди узу гъи, бицІидариз ва аьхюдариз шагьидвал апІури, пайгъамбрари ва Мусайи гьаци хьибди гъапибдилан гъайри, фукІара жара артухъуб гъапундарза. 23 Месигь йикІиди ва гъийихдарикан сарпирди, гъачІихъан, чІиви хьиди, ва Дугъу гьам жугьдариз, гьамсана жара халкьариз акв хибди. 24 Павел учв уьрхюз улхури имиди, Фестди зарб сесниинди: – Павел, уву деллур вува! Аьхю зигьимлували уву аькьвлиан адаънаву! – кІуру. 25 – Узу деллур дарза, гизаф гьюрматлу Фест, – жаваб туву Павели. – Узу кІурайиб гьякьлуб ва фагьумлуб вуйиз. 26 Паччагь Агриппайиз мидкан аьгъя ва узу дугъахъди ачухъди кІураза. Узу фикир апІуразаки, дугъу йиз вари гафариз фикир тутрувди гъидрибтур, фицики мурар вари гизафдариз рякъюри гъашидар ву. 27 Паччагь Агриппа! Уву пайгъамбрарихъ хъугъурна? Уву хъугърайиб аьгъязуз. 28 Гьадмуган Агриппайи Павелиз кІуру: – Уву, узу гьамци рягьятди Исайихъ хъугърур хьуз шул кІури, фикир апІурана? 29 – Рягьятди вуш вая читинди вуш, му метлеблу дар, – жаваб туву Павели. – Неинки уву, хъа гъи узухъ хъпехъурайидар вари узусдар хьузди, амма зунжрар алдарди, Аллагьдиз ккарагураза. 30 Гьадмуган паччагь, гьякимдар Фест, Вереника ва дурарихъди деънайидар вари гъудужвуру. 31 Диванханайиан удучІвну, чпи-чпихъди гьамци улхуру: – Му касди йикІбаз вая дустагъ апІбаз лайикьлу вуйи саб чІуру ляхинра дапІнадар. 32 Агриппайи Фестдиз гъапи: – Му кас, эгер дугъу Римдин паччагьдин улихь жаваб тувуз ккун дапІнадайиш, азад апІузра шуйи.

Ляхнар 27

1 Учу гимийиъди Италияйиз сирнав апІбанди гъашиган, Павелна сакьюдар жара дидиснайидар Римдин паччагьдин кьушмариан вуйи Юлий кІуру юзбашийихьна тувнийи. 2 Учу Адрамития шагьриъ, Асияйин гъирагъарихъна гъябгъюрайи гимийиъ эъну, рякъюъ учІвча. Учухъди Фессалоникайиан вуйи македонжви Аристархра хъайи. 3 Хъайигъан учу Сайдайиъ гимийиан эдеъча, ва Юлийи, Павелиз чан дустарихьна гъягъюз ихтияр тувну, ужуб ляхин гъапІну. Дустарра дугъан гъайгъушнаъ шулу. 4 Сайдайиан удучІвну, Киприхьан кьиблайихъинди сирнав гъапІча, гьаз гъапиш учу микІлаз къаршуди гъягъюри гъахьнийча. 5 Киликияйинна Памфилияйин гъирагъарихъантина сирнав дапІну, Ликия уьлкейин Мира кІуру шагьриз гъафича. 6 Душваъ юзбашийи, Италияйиз гъябгъюрайи Александрияйиан вуйи гими дабгну, учу дидиъ иту. 7 Учу гьюлилан явашди садшвнуд йигъан гъягъюри гъашича. МикІ ич гъаншаризди хъивнади хьпаз лигну, учу гуж-балайиинди Книд шагьриз хъуркьча. Ва, улихь гъягъюрайи терефназди гими хъапІуз даршиди, Салмона кІакІнахьан ярхла даршули, Крит островдихъан кьибла терефназди гъушча. 8 Гуж-балайиинди учу Ласея шагьрихьан ярхла дарди, Гимйир дийигъру „ХатІасуз“ кІурушвахьна гъафича. 9 Гизаф вахт зяя гъабхьнийи, ва сарун гими хъапІуб хатІалу дубхьнайи, фицики думугандиз жугьдарин ушварин йигъар улдучІвнийи. 10 Павели дурариз гъапнийи: «Узухъ хъебехъай! Узуз рябкъюразузки, ихь сирнав бедбахтвалихъна гъюрайиб. Гимийиъ айи гъагъра, гимира пуч хьиди, хъа ухьура йихуб мумкин ву». 11 Хъа юзбаши, Павелихъ хъпебехъди, гими хъапІрурихъна дидин эйсийихъ хъпехъну. 12 Гимйир дийигъру „ХатІасуз“ кІурушв кьюрд адапІуз хай даруб вуди хьпаз лигну, гизафдари, душваъ дедребккди гимйир дийигъру Финик кІурушваз рукьуз чалишмиш хьпан ва душваъ кьюрд адапІбан бадали, сирнав апІуз кьаст гъапІнийи. Финик Критдиин али кьибла-ригъалабхъру ва кафари-ригъалабхъру микІариз къаршу йишв вуйи. 13 Кьиблайихъанди пучІу микІ хъивиган, му чпиз ккуниси гъабхьну кІури, фикир дапІну, гимичйири, гими дебккру гъагъи гъармах за дапІну, Критдин гъирагъдихьантина сирнав апІуру. 14 Хъа саб бицІи арайилан островдилан «кафари-ригъгьудубчІвру» кІуру кьувватлу микІ утІубччвуру. 15 Гимийихьан микІлаз къаршу гъябгъюз шуладайи. Гьаддиз учу гагь му, гагь тму терефназ гатІахьури гъахьну. 16 Учу Клавда кІуру саб бицІи островдин гъвалхъан гатІахьчу ва саб гуж-балайиинди гимийихъ хъайи лютке кибтІну мюгькам гъапІча. 17 Думу гимийиина за дапІну, гимийин кІанкканмина тІилар ккадагъну, кибтІну, мюгькам гъапІча. Сирт кІуру гъумран гъирагъдин багахь исчІли йишв’ин гими алабсур кІури, гучІури, аьхюну елкан ис гъапІнийи. Хъана гими микІлу гъабхуз хъюбгънийи. 18 Хъайигъан микІ гужалди хъивган, гимийиан гъагъар гатІахьуз хъюгъю. 19 Хъа шубудпи йигъан дурари гьюлиз гимийин алатарра кмиди гатІахьу. 20 Гизаф йигъари я ригъ, я хядар дярякъри гъахьнийи. Хъа зурба тІурфан ккудудубкІрайиган, учу ккадархьур кІуру умуд марцциди ктабтІнийич. 21 Сарикьан фукІа дирипІри хайлин йигъар вуйи. Гьадмуган Павели гъудужвну гъапи: – Эй инсанар, учву узухъ хъебехъну ккундийи ва Критдиан удучІвну ккундайи. Гьаци гъапІнийиш, му балйир ва зарарар хьидайи. 22 Хъа узу учвуз ичв юкІвар ижми апІуз дих апІураза, гьаз гъапиш учвкан сар касра йикІидар, анжагъ гими пуч хьибди. 23 Фицики сан узуз, узу Чанур вуйи ва узу Чаз гъуллугъ апІурайи Аллагьдин малайикди гьамци гъапунзуз: 24 «ГучІ мапІан, Павел. Уву Римдин паччагьдин улихь дийигъну ккунду ва, гьаддиз, Аллагьди увухъди гимийиъ айидар вари сагъ-саламатди уьрхюз гаф тувра». 25 Гьаци вуйиган, гучІ мапІанай, дустар, фицики узу Аллагьдихъ ва узуз гъапидар вари кІулиз удучІвбахъ хъугъраза. 26 Ухьу саб островдиина гатІахьиди. 27 ЙицІиюкьудпи йишв улубкьиган, микІлу учу Адриатик гьюлилан гъахурайчу. ГьацІишвар шулайи вахтна гимичйириз багарихь жил хьайивал гьугъубжвнийи. 28 Гьюлин деринвал гъеебциган, думу ягъчІвур метрйихьнакьан вуди гъабхьнийи. СабцІиб вахтналан хъана гъеебциган, деринвал гьамус сумчІур метрйихьнакьан дубхьнайи. 29 Гими гъарзариин алабсуз гучІури, гимичйири гимийин кьяляхъ йишвлан юкьуб гъагъи гъармах ккирчну, хъа йигъ ухди улубкьри пну, ккарагуз хъюгънийи. 30 Гимичйири, гимийиан гьергуз ккунди, гъагъи гъармахар гимийин улихь йишвлан ирчру аьмлар апІури, гьюл’ина лютке илипуру. 31 Хъа Павели юзбашийизна эскрариз гъапи: – Эгер дурар гимийиъ гъудрузиш, учву ккадархьидарчву. 32 Гьаци гъапиган, эскрари люткейин тІилар кьатІар апІуру ва думу гьюлиъ абхъру. 33 Йигъ хьайиз улихьна Павели, гьамци кІури, варидарихьди уьл ипІуз гъитру: – Ихь ккадархьбаз ккилигури гъи йицІиюкьудпи йигъ вуйихь, хъа учву вари гьаму йигъари фукІа дипІнадарчва. 34 Гьаддиз учвкан фукІа-мукІа ипІуб ккун апІураза, му ичв уьмур уьбхбаз кюмек хьибди. Учву, кІуллан саб чІаркьан алдадабхъди, сагъ-саламатди гъуздичва. 35 Гьамци дупну, дугъу уьл гъадабгъну, варидарин улихь Аллагьдиз чухсагъул дупну, кудубтІну, ипІуз хъюгъру. 36 Варидарик юкІв кубчІвну, дурарира уьл ипІуз хъюгъру. 37 Гимийиъ вари 276 кас айи. 38 Варидари тухъ хьайиз дипІну, учу, тахил гьюлиъ абхьри, гими артухъ вуйи гъагънахьан азад апІуз хъюгъча. 39 ГвачІин улубкьиган, гимичйириз гъум хъайи гъирагъ рябкъюру. Му жил фунуб вуш аьгъю гъабхьундаршра, дурариз гими душвахь, эгер шулуш, дебккуз ккун шулу. 40 Гъармахарихъ хъайи тІилар хъудутІну ва рулар дудурчну, улхьан елкар дурари микІ хъайи терефназди гьатІабццну, гими гъирагъдихьна хъапІру. 41 Хъа гими ичІ адру йишваъ гъумриин алабсубси, дидин хъюхъ гъумраъ абсру ва рибшвузкьан даршули гъубзу, хъа кьяляхъ йишв лепйирин кьувватниинди уьбгъюз хъюбгъру. 42 Эскрариз сифте, дидиснайидарикан сарихьанкьан гьергуз дархьбан бадали, дурар вари йивну йихуз ккун шулу. 43 Хъа юзбашийи, Павелин уьмур уьбхбан бадали, дурариз ихтияр тувундар. Дугъу сирнав апІуз шлудариз, сифте гимийиан гьюлиъ урсну, гъирагъдихъна ктучІвуз буйругъ тувру. 44 Хъа имбудариз дугъу тахтйириинди вая фукІа-мукІа уьлюбхрубдиинди гъирагъдихъна ктучІвуз гъитру. Гьамциб саягъниинди вари сагъ-саламатди гъирагъдихъна ктучІвнийи.

Ляхнар 28

1 Гъирагъдихъна кудучІвну, хатІасуз аьгьвалат арайиз гъафиган, учуз му остров Мальта вуйиб аьгъю гъабшичуз. 2 Душван агьалйири учу кьадарсуз ужуди кьабул гъапІнийчу. Мархь дубгъну, гьавйир мичІал хьпаз лигну, дурари, аьхю цІа алапІну, учуз цІихъна дих гъапІнийи. 3 Павели саб хаб цІирцІар гъварч дапІну, дурар цІиин алахьуз хъюгъиган, цІихьан гьебграйи битІ дугъан хилккан ккичІибхуру. 4 Дугъан хиликк ккебхнайи битІ дябкъну, душван агьалйири чпин арайиъ гьамци гъапнийи: – Гьаму кас, саб шакра адарди, адми гъачІир ву, фицики думу гьюлиъ талаф гъахьундаршра, Аллагьдин судди думу чІивиди гъитрадар. 5 Хъа Павели битІ, чан хил дутІубччвну, цІигъ гъипу ва дугъаз фукІа зиян гъабхьундайи. 6 Дурар, Павелин хил аьбг