1 Кутсконаз ик Кыл вал. Кыл Инмар дорын вал. Кыл Инмар вал. 2 Со кутсконаз ик Инмар дорын вал. 3 Мар кылдыны кутскиз, ваньмыз Со пыр кылдыны кутскиз, Сотэк номыр но кылдыны ӧз кутскы. 4 Со бордын улон, улон адямиослэн югытсы луэ. 5 Югыт пеймытын пиштыса улэ, пеймыт сое ӝокатыны уг быгаты. 6 Инмарлэн лэзем адямиез вал: солэн нимыз Иоанн. 7 Со пыр ваньмыз мед оскозы шуыса, со шара ивортыны лыктӥз, Югыт сярысь ивортыны. 8 Со Югыт ӧй вал, но со Югыт сярысь шара ивортыны ыстэмын вал. 9 Вал зэмос Югыт, Кудӥз дуннее лыктэ но котькудзэ адямиез югдытэ. 10 Дуннеын вал, дунне Со пыр кылдыны кутскиз, дунне Сое ӧз тодма. 11 Аслазъёс доры лыктӥз, но аслазъёсыз Сое кулэ ӧз каре. 12 Нош ваньмыз, кинъёс Сое кабыл басьтӥзы, Солэн нимызлы оскисьёслы, Инмар нылпиос луыны кужым сётӥз. 13 Соос вирлэсь ӧвӧл, мугорлэн кулэ каремезлэсь ӧвӧл, пиосмуртлэн кулэ каремезлэсь ӧвӧл, – соос Инмарлэсь вордӥськизы. 14 Кыл мугоро луиз, дэлетэн но зэмлыкен тыр луыса, милемын валче улӥз. Ми Солэсь пиштӥсь данлыксэ адӟимы, Атайлэсь огназ вордӥськем Пиезлэсь пиштӥсь данлыксэ. 15 Иоанн Со сярысь шара ивортӥз но бадӟым куараен вераз: «Таиз Со вал, Кудӥз сярысь мон шуи: ”Мон бӧрсьы Лыктӥсь мынам азям луиз, малы ке шуоно мынэсьтым азьло вал”». 16 Солэн тыр луэмысьтыз, ми ваньнамы дэлет вылэ дэлет басьтӥмы. 17 Закон Моисей пыр сётэмын, нош дэлет но зэмлык Иисус Христос пыр луэмын. 18 Инмарез нокин но, ноку но ӧз адӟы; Атаезлэн пушказ улыса, одӥгназ гинэ вордӥськем Пи, Со возьматӥз-тодытӥз. 19 Иудейёс Иерусалимысь священникъёсты, левитъёсты Иоаннлэсь «кин тон?» шуыса юаны ыстэм бере Иоанн шара ивортӥз. 20 Со ялӥз, ӧз палэнтӥськы, «мон Христос ӧвӧл» шуыса ялӥз. 21 Но солэсь юазы: «Мар бен? Тон Илия-а?» Со шуиз: «Ӧвӧл». – «Пророк?» Со шуиз: «Ӧвӧл». 22 Солы шуизы: «Кин-о бен тон? Милемыз ыстӥсьёслы ответ сётон понна мар вералод тон ас сярысьтыд?» 23 Со шуиз: «Мон кыр дуннеын кеськисьлэн куараез: ”Кузё-Инмарлы сюресэз шонертэлэ”, кызьы Исаия пророк вераз». 24 Ыстэм муртъёс фарисейёс пӧлысь вал, 25 солэсь юазы: «Христос но, Илия но, пророк но тон ӧвӧл ке, малы тон пылатӥськод?» 26 Иоанн соослы ответ сётыса шуиз: «Мон вуын пылатӥсько; но тӥ пӧлын сылэ Со, Кудзэ тӥ уд тодӥське. 27 Со мон бӧрсьы Лыктӥсь, но Со мынам азьпалам луиз. Солэн пыдкутчанэзлэсь езэ пертчыны но мон ярамон адями ӧвӧл». 28 Та вераськон ортчиз Иоаннлэн пылатон интыяз, Иордан вӧзысь Вифавараын. 29 Мукетаз нуналэ Иоанн, ас дораз лыктӥсь Иисусэз адӟыса, шуиз: «Тани Инмарлэн Ыжпиез, Со Ас вылаз дуннелэсь сьӧлыксэ басьтэ. 30 Та – Со, Кудӥз сярысь мон верай: ”Мон бӧрсьы Пимурт лыктэ. Со мынам азьпалам луиз, малы ке шуоно Со мынэсьтым азьвыл вал”. 31 Мон Сое ӧй тоды; Со Израильлы тодмо мед луоз шуыса, мон вуын пылатыны лыктӥ». 32 Иоанн шара ивортӥз: «Духлэсь Инмысь дыдык выллем васькемзэ адӟи, Со Со вылын улӥз. 33 Мон Сое ӧй тоды; нош монэ вуын пылатыны Ыстӥсь мыным шуиз: ”Кин вылэ Духлэсь васькемзэ но Со вылын улэмзэ адӟид ке, Со ик луэ Святой Духен Пылатӥсь”. 34 Мон адӟи но, Та Инмар Пи луэ шуыса, шара ивортӥ». 35 Мукет нуналэ Иоанн нош ик отын аслаз кык дышетскисьёсыныз сылӥз. 36 Тапалтӥ ортчись Иисусэз адӟыса шуиз: «Тани Инмарлэн Ыжпиез». 37 Солэсь та кылъёссэ кылыса, кыкез но дышетскисьёсыз Иисус сьӧры кошкизы. 38 Иисус берытскиз но, лыктӥсьёсты адӟыса, соослы шуиз: «Мар тӥледлы кулэ?» Соос Солы шуизы: «Равви, – кудӥз ”дышетӥсь” шуэм луэ, – кытын улӥськод?» 39 Соослы шуиз: «Ойдолэ, адӟоды». Соос мынӥзы, адӟизы, кытын Со улэ, со нуналэз Со дорын ортчытӥзы. Ог дас час котыр вал. 40 Иоаннлэсь Иисус сярысь верамзэ кылэмъёс но Со сьӧры кык ӵошен мынӥсьёс пӧлысь одӥгез Симон Петрлэн Андрей выныз вал. 41 Ваньмызлэсь азьло со аслэсьтыз Симон агайзэ утчаса шедьтӥз но солы вераз: «Ми Мессияез шедьтӥмы, кудӥз ”Христос” шуэм луэ». 42 Сое Иисус доры вайиз. Иисус со шоры учкыса шуиз: «Тон – Симон, Ионалэн пиез; тон Кифа шуыса нимаськод, кудӥз ”из” (Петр) шуэм луэ». 43 Мукетаз нунал Иисус Галилеяе мыноно кариськиз. Филиппез шедьтэм бераз солы шуиз: «Мон сьӧры мын». 44 Филипп Вифсаидаысь вал, Андреен но Петрен одӥг городысь. 45 Филипп Нафанаилэз шедьтэм бераз солы шуиз: «Ми шедьтӥмы Сое, Кин сярысь Моисей законын но пророкъёс гожъязы – Назаретысь Иосифлэсь пизэ, Иисусэз». 46 Нош Нафанаил солы шуиз: «Назаретысь мар ке но ӟечез луыны быгатоз-а?» Филипп солы шуиз: «Мын но учкы». 47 Со доры лыктӥсь Нафанаилэз адӟыса, Иисус со сярысь шуиз: «Тани зэмос Израиль адями, солэн кескич сямыз ӧвӧл». 48 Нафанаил Солы шуиз: «Кызьы Тон монэ тодӥськод?» Иисус солы ответ сётыса шуиз: «Тонэ Филипп ӧтемлэсь азьло ик смоквапу улысен Мон тонэ адӟи». 49 Нафанаил Солы ответ сётӥз: «Равви! Тон – Инмар Пи, Тон – Израильлэн Эксэез». 50 Иисус солы ответ сётыса шуиз: «Тон соин оскиськод, малы ке шуоно Мон тыныд шуи: ”Мон тонэ смоквапу улысь адӟи”; талэсь бадӟымзэ адӟод». 51 Иисус солы шуиз: «Зэм ик, зэм ик тӥледлы верасько: табере Инлэсь усьтӥськемзэ но Адями Пи доры лэзиськись, ӝутӥськись Инмар Кылчинъёсты адӟоды».
1 Куинетӥ нуналаз Галилеяысь Кана карын сюан вал. Иисуслэн Анаез но отын вал. 2 Сюанэ Иисус но, Солэн дышетскисьёсыз но ӧтемын вал. 3 Виназы тырмымтэысь, Иисуслэн Анаез Солы шуиз: «Виназы ӧвӧл ни». 4 Иисус солы шуиз: «Кышномурт! Мыным но, Тыныд но маке шат? Ӧз на вуы Мынам часэ». 5 Анаез медоослы шуиз: «Со тӥледлы мар вераз ке, сое лэсьтэ». 6 Иудейёслы чылкытатӥськон сямзэс ортчытон понна татын излэсь лэсьтэм куать ву тыронзы вал, отчы кык яке куинь мера ву тэре вал. 7 Иисус соослы шуиз: «Ву тыронъёсты вуэн тырмытэ». Йылозяз соосты тырмытӥзы. 8 Соослы шуиз: «Табере омыртыса сюанлэн тӧроезлы нуэ». Нуизы. 9 Виналы пӧрмем вуэз тӧро веръям бере, – нош со уг тоды вал, кытысь та вина, ву омыръясь медоос гинэ тодо вал, – соку тӧро эмеспиез ӧтиз 10 но солы шуиз: «Котькудӥз адями нырысь ӟеч виназэ удэ, нош куке кудӟо, соку лябзэ; нош тон ӟеч винадэ татчыозь воземед». 11 Тазьы Галилеяын Кана карысен Иисус паймымон ужъёсызлы кутскон сётӥз, Аслэсьтыз пиштӥсь данлыксэ возьматӥз; дышетскисьёсыз Солы оскизы. 12 Та бере Со Капернауме лыктӥз, Соин ӵош Анаез но, братъёсыз но, дышетскисьёсыз но; отын кӧня ке но нунал улӥзы. 13 Матэ вуэ вал иудейёслэн Пасха праздниксы; Иисус Иерусалиме лыктӥз. 14 Адӟиз, кызьы храмын ошъёсты, ыжъёсты, дыдыкъёсты вузаса уло, отын коньдон вошъясьёс пукизы. 15 Гозыосты сюло пуныса, ваньзэс храмысь улляса поттӥз, озьы ик ыжъёсты но ошъёсты, коньдон вошъясьёслэсь уксёзэс пазьгиз, ӝӧкъёссэс кымалляз; 16 дыдык вузасьёслы шуиз: «Тае татысь басьтэ, Атаелэсь корказэ вузкарон корка эн каре». 17 Соку дышетскисьёсыз тодазы вайизы тазьы гожтӥськемез: «Тынад коркаед понна тыршон Мынам пушкам тылын ӝуа». 18 Та пумысен, Иисуслы ответ сётыса, иудейёс шуизы: «Тазьы лэсьтыны эрик ваньдэ кыӵе тодметэн Тон милемлы возьматод?» 19 Иисус соослы ответ сётыса шуиз: «Куашкатэ та храмез, нош Мон куинь нунал куспын сое ӝуто». 20 Та пумысен иудейёс шуизы: «Та храм ньыльдон куать ар ӵоже лэсьтӥськиз, нош Тон сое куинь нунал куспын ӝутод?» 21 Нош Со Ас Мугорызлэн храмез сярысь вера вылэм. 22 Со кулэмысь улӟыса султэм бере дышетскисьёсыз тодазы вайизы Солэсь тае верамзэ. Священной Гожтэмлы но, Иисуслэн верам кылызлы но оскизы. 23 Пасха дыръя Иерусалимын тросэз, Солэсь паймымон ужъёс лэсьтэмзэ адӟыса, Солы оскизы. 24 Нош Ачиз Иисус соослы оскыны ӧз сётӥськы, малы ке шуоно соосты ваньзэс тодэ вал. 25 Муртлэсь мурт сярысь шара ивортэмзэ кулэ ӧз кары; уго Ачиз тодэ вал мар вань адямилэн пушказ.
1 Фарисейёс пӧлын иудейёслэн Никодим нимо одӥг кузёйырзы вал. 2 Со уйин Иисус доры лыктыса шуиз: «Равви! Ми тодӥськомы, Тон Инмар дорысь лыктэм Дышетӥсь луиськод шуыса. Уго таӵе паймымон ужъёсты, кудъёссэ Тон лэсьтӥськод, нокин но лэсьтыны уг быгаты, соин ӵош Инмар ӧз ке луы». 3 Иисус солы ответ сётыса шуиз: «Зэм ик, зэм ик тыныд верасько: кин вылӥысен ӧз ке вордӥськы, Инмар Эксэйлыкез адӟыны уз быгаты». 4 Никодим Солы шуиз: «Пересь луыса но, кызьы адями быгатэ выльысен вордӥськыны? Оло, быгатэ со анаезлэн пушказ выльысен пырыны но вордӥськыны?» 5 Иисус ответ сётӥз: «Зэм ик, зэм ик тыныд верасько: кин вулэсь но Духлэсь ӧз ке вордӥськы, со уг быгаты Инмар Эксэйлыке пырыны. 6 Лулмугорлэсь вордӥськемез лулмугор луэ, нош Духлэсь вордӥськемез дух луэ. 7 Эн паймы Мынам тыныд верамелы: тӥ вылӥысен вордӥськыны кулэ. 8 Тӧл пельтэ отын, кытын потэ пельтэмез, куаразэ но солэсь кылӥськод, нош кытысь лыктэмзэ но кытчы мынэмзэ уд тодӥськы: озьы ик луэ котькудӥзлэн Духлэсь вордӥськемезлэн». 9 Солы ответ сётыса, Никодим шуиз: «Кызьы озьы луыны быгатоз?» 10 Иисус, ответ сётыса, солы шуиз: «Тон – Израильлэн дышетӥсез, тае-а уд тодӥськы? 11 Зэм ик, зэм ик тыныд верасько: ми вераськомы со сярысь, мае тодӥськомы, но шара ивортӥськомы со сярысь, мае адӟимы, нош тӥ милесьтым ивортэммес кулэ уд кариське. 12 Мон тӥледлы музъем вылысез сярысь верай, но тӥ уд оскиське, кызьы оскоды, Инмысез сярысь тӥледлы верай ке? 13 Инмын улӥсь, Инмысь васькем Адями Пи сяна, Инме нокин но ӧз туба. 14 Кызьы кыр дуннеысен Моисей кыез ӝутӥз, озьы ик ӝутӥськемын луыны кулэ Адями Пи но. 15 Нокин но Солы оскись мурт медаз быры, солэн быронтэм улонэз мед луоз. 16 Инмар сокем дуннеез яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса. 17 Уго Инмар Аслэсьтыз Пизэ дуннее дуннеез судить карыны ӧз лэзьы. Со пыр дунне мед утиськоз шуыса, Сое дунне вылэ лэзиз. 18 Солы оскись мурт судэ уг сюры, нош оскымтэ мурт судэ сюремын ни, малы ке шуоно Инмарлэн огназ вордӥськем Пиезлы ӧз оскы. 19 Судлэн таӵе пуштросэз луэ: дунне вылэ югыт лыктӥз; нош адямиос югытэз сярысь юнгес пеймытэз яратӥзы, малы ке шуоно соослэн ужъёссы уродэсь вал. 20 Котькудӥз но уродзэ лэсьтӥсь югытэз адӟонтэм каре но, солэн ужъёсыз шарае медаз потэ шуыса, югыт доры уг мыны, малы ке шуоно солэн ужъёсыз уродэсь. 21 Нош зэмлыкъя улӥсь мурт, солэн ужъёсыз шара мед адӟиськозы шуыса, югыт пала мынэ, малы ке шуоно соос Инмарлэн эрикезъя лэсьтэмын». 22 Та бере Иисус Аслаз дышетскисьёсыныз Иудея музъеме лыктӥз. Соосын валче отын Со улӥз, пылатӥз. 23 Нош Иоанн со дыре Салим вӧзысь Енонын пылатӥз, – отын трос вуэз вал; отчы мыныса пылатӥськизы. 24 Иоанн пытсэтэ ворсамын ӧй на вал уго. 25 Соку Иоаннлэн дышетскисьёсыз но иудейёс куспын чылкытатӥськон ласянь ченгешон потӥз; 26 Иоанн доры лыктыса, солы шуизы: «Равви! Со, Кудӥз тонэн огазьын Иордан вӧзын вал, Кудӥз сярысь тон шара ивортӥд, тани Со но пылатэ, вань калык Со доры мынэ». 27 Иоанн ответ сётыса шуиз: «Инмысен ӧз ке сётӥськы, адямилэн номыр но ас вылаз басьтэмез уг луы. 28 Тӥ асьтэос мынам адӟисьёсы, куке мон шуи: ”Мон Христос ӧвӧл, но мон Солэн азьпалаз ыстэмын”. 29 Кинлэн ичименез вань, со эмеспи; нош эмеспилэн сое кылзӥськыса сылӥсь эшез, эмеспилэсь куаразэ кылыса, туж шумпотэ: тани таиз мынам шумпотонэ быдэсмиз. 30 Солы будыны кулэ, нош мыным – покчиёмыны. 31 Вылӥысен лыктӥсь ваньмызлэсь вылӥ луэ; нош музъемлэсез музъемлэсь ик вань, музъемлэсь луэм кадь ик вера но. Инмысь Лыктӥсь ваньмызлэсь вылӥ луэ. 32 Мае Со адӟиз но кылӥз, со сярысь ик шара ивортэ, нош нокин но Солэсь ивортэмзэ кулэ уг кары. 33 Солэсь ивортэмзэ кабыл басьтэм мурт таин юнматэ, Инмар зэмлык луэ шуыса. 34 Инмарлэн Ыстэмез, Инмар кылъёсты вера; уго Инмар Духез мертаса уг сёты. 35 Атай Пизэ яратэ, ваньзэ Солэн кияз сётӥз. 36 Пилы оскись муртлэн быронтэм улонэз вань, нош Пилы оскисьтэм мурт улонэз уз адӟы. Инмарлэн вожпотонэз со вылын улэ».
1 Куке Иисус тодӥз фарисейёс доры вуэм вераськонэз, Со, пе, Иоанн сярысь тросгес дышетскисьёсты котыраз люка но пылатэ, – 2 Иисус Ачиз ӧз ке но пылатылы, Солэн дышетскисьёсыз пылатӥзы, – 3 Иудеяысь кошкыса, нош ик Галилеяе мынӥз. 4 Солы ортчоно вал Самария пыр. 5 Озьы Со Самарияысь Сӥхарь шуон каре вуиз, Иаковлэн Иосиф пиезлы сётэм ана музъемезлэн матаз; 6 отын Иаковлэн гудӟемез вал. Сюрес вылын жадьыса, Иисус гудӟем дуре пуксиз; ог куать час котыр вал. 7 Самарияысь кышномурт ву омыртыны лыктӥз. Иисус солы шуиз: «Вай Мыным юыны». 8 Дышетскисьёсыз сиён басьтыны городэ кошкемын вал. 9 Самария кышномурт Солы шуиз: «Иудей луыса вылысь кызьы Тон мынэсьтым, Самария кышномуртлэсь, юыны куриськод? Иудейёс Самария калыкен кусып уг возё ук». 10 Иисус солы ответ сётыса шуиз: «Инмар кузьымез тон тодысалыд ке, но Кин тыныд вера: ”Вай Мыным юыны”, тон ачид Солэсь курысалыд, нош Со тыныд улэп ву сётысал». 11 Кышномурт Солы шуиз: «Кузё! Тыныд омыртыны но номырин, нош гудӟем мур: кытысь бен Тынад улэп вуэд? 12 Оло, Тон та гудӟемез милемлы сётӥсь Иаков атаймылэсь бадӟымгес, отысь со ачиз но, солэн нылпиосыз но, пудоез но юизы?» 13 Иисус солы ответ сётыса шуиз: «Котькинлэн но та вуэз юись муртлэн нош ик сюэз куасьмоз. 14 Нош кин Мынэсьтым сётэм вуме юиз ке, солэн ноку но сюэз уз ни куасьмы; Мынам солы сётэм вуэ со пушкын ошмеслы пӧрмоз, солэн вуэз быронтэм улонэ бызе». 15 Кышномурт Солы шуиз: «Кузё! Вай мыным со вуэз, сюэ но медаз ни куасьмы, ву омыръяны но татчы медам ни ветлы». 16 Иисус солы шуиз: «Мын, кузпалдэ ӧть но татчы лыкты». 17 Кышномурт ответ сётыса шуиз: «Мынам кузпалы ӧвӧл». Иисус солы шуиз: «Зэм тон верад, кузпалыд ӧвӧл шуыса; 18 уго тынад вить картэд вал, нош али кудӥз вань, со тыныд карт ӧвӧл; тае тон шонер верад». 19 Кышномурт Солы шуиз: «Кузё! Адӟисько: Тон пророк. 20 Милям атайёсмы та гурезьын йыбыртъязы, нош тӥ йыбыртъяны ярано инты Иерусалимын луэ шуиськоды». 21 Иисус солы шуиз: «Оскы мыным: вуэ дыр, – та гурезьын но, Иерусалимын но Атайлы уд йыбыртъялэ. 22 Тӥ уд тодӥське кинлы йыбыртъямдэс, нош ми тодӥськомы кинлы йыбыртъяммес, уго утиськон иудейёс бордысь. 23 Но вуоз дыр, вуэмын но ни, – зэмос йыбыртъясьёс духен но зэмлыкен Атайлы йыбыртъялозы, уго сыӵе йыбыртъясьёсты Атай Аслыз утча: 24 Инмар – со дух. Солы йыбыртъясьёс духен но зэмлыкен йыбыртъяны кулэ». 25 Кышномурт Солы шуиз: «Тодӥсько, Мессия, мукет сямен вераса, Христос, лыктоз шуыса. Со лыктӥз ке, соку ваньзэ милемлы ивортоз». 26 Иисус солы шуиз: «Мон со – тонэн Вераськись». 27 Со дыре дышетскисьёсыз вуизы но Иисуслэн кышномуртэн вераськемезлы паймизы. Но одӥгзы но ӧз шуэ: «Мар Тыныд солэсь кулэ?» яке: «Мар сярысь соин вераськиськод?» 28 Соку кышномурт ву нуллонзэ кельтӥз но, городэ мыныса, адямиослы вераз: 29 «Мынэлэ, учкелэ Адямиез, Кудӥз мыным ваньзэ вераз, мар мон лэсьтӥ. Со Христос ӧвӧл меда?» 30 Соос городысь потӥзы но Со доры мынӥзы. 31 Со куспын дышетскисьёсыз Сое «Равви! Си!» шуыса куризы. 32 Нош Иисус соослы шуиз: «Мынам вань сиёнэ, кудзэ тӥ уд тодӥське». 33 Соин сэрен дышетскисьёсыз куспазы вераськизы: «Оло, Солы кин ке но сиён вайиз-а?» 34 Иисус соослы шуиз: «Мынам сиёнэ – Монэ Ыстӥсьлэсь эриксэ карон но Солэсь ужзэ быдэстон. 35 Эшшо ньыль толэзь, собере аран дыр вуоз шуыса, тӥ уд вераське-а? Нош Мон тӥледлы верасько: асьтэлэсь синъёстэс ӝутэ но ю бусы шоры учке: кыӵе со тӧдьы луэм, араны вуэм ини. 36 Арась мурт ужам дунзэ басьтэ но быронтэм улонэ емыш бича, озьыен, кизись но, арась но валче шумпотозы. 37 ”Одӥгез кизе, нош мукетыз ара” шуыса веран кыл шонер луэ. 38 Мар бордын тӥ ӧд тырше, сое араны Мон тӥледыз ыстӥ. Мукетъёс тыршизы, нош тӥ соослэн ужаменызы пайда басьтӥськоды». 39 Кышномуртлэн тазьы шара ивортэм бераз: «Со вераз мыным ваньзэ, мае мон лэсьтӥ», та городысь трос Самария муртъёс Солы оскыны кутскизы. 40 Соин ик Самария муртъёс, Иисус доры лыктыса, Сое куризы, соос дорын мед улоз шуыса. Отын Со кык нунал улӥз. 41 Со вераськем бере эшшо но трос мурт оскыны кутскиз, 42 нош со кышномуртлы шуизы: «Табере тынад кылыдъя гинэ ум оскиське, уго асьмеос кылӥмы но тодӥмы, Со дуннелэн зэмос Утисез, Христос шуыса». 43 Кык нунал ортчыса, Со отысь кошкиз, Галилеяе мынӥз. 44 Иисус шара ивортӥз, аслаз вордскем музъемаз пророклэн сӥез-санэз уг луы шуыса. 45 Галилеяе вуэм бераз, праздник дыръя Солэсь Иерусалимын вань лэсьтэмзэ адӟыса, – уго соос но празднике ветлӥзы, – Галилея муртъёс Сое ӟеч пумитазы. 46 Озьы, Иисус нош ик Галилеяысь Кана каре вуиз, кытын вуэз виналы пӧрмытӥз вал. Капернаумын вал эксэй юртысь одӥгез кузёйыр, солэн пиез висе вал. 47 Иудеяысь Галилеяе Иисуслэсь лыктэмзэ кылӥз но, Со доры мыныса, дораз лыктыны но пизэ бурмытыны куриз. Со кулоно кадь ик вылэм ини. 48 Иисус солы шуиз: «Паймымон ужъёсты, тодметъёсты ӧд ке адӟе, тӥ уд оске». 49 Эксэй юртысь кузёйыр Солы шуиз: «Кузёе! Пие кулымтэ на дыръя лыкты». 50 Иисус солы шуиз: «Мын, тынад пиед бурмемын ни». Иисуслэн верам кылызлы оскыса, Со кошкиз. 51 Сюрес вылысен сое медоосыз пумитаса шуизы: «Тынад пиед бурмемын». 52 Соослэсь со юаз: «Кӧняетӥ часын солы капчигес луиз?» Солы шуизы: «Толон сизьыметӥ часын солэн пӧськылез быриз». 53 Татысен атаез тодӥз: та Иисуслэн ”тынад пиед бурмемын ни” шуэм часэз вал. Озьы ачиз но, солэн быдэс юртэз но оскыны кутскиз. 54 Тазэ кыкетӥзэ паймымон ужзэ Иисус Иудеяысь Галилеяе берытскем бераз лэсьтӥз.
1 Та бере иудейёслэн праздниксы вал. Иисус Иерусалиме лыктӥз. 2 Иерусалимын Ыжкапка дорын еврей сямен Вифезда шуыса нимаськись пылатскон инты вал, солэн липем вить пыран-потанэз вал. 3 Отын туж трос висисьёс, синтэмъёс, чутъёс, куасьмемъёс вулэсь вырӟемзэ возьмаса улӥзы. 4 Кузё-Инмарлэн Кылчинэз, дырын-дырын пылатскон интые васькыса, вуэз бугыръяськытылӥз. Ву бугыръяськем бере кин нырысь ик отчы пыре, со бурме, котькыӵе висёнэн висе ке но вал. 5 Татын куамын тямыс ар ӵоже висись адями вал. 6 Иисус сое кылльыкуз адӟиз но кема дыр ӵоже кыллемзэ тодэм бераз солы шуиз: «Йӧнамед потэ-а?» 7 Висись мурт Солы ответ сётӥз: «Бен, Кузёе; но, ву бугыръяськыны кутскыку, монэ вуэ лэзись муртэ мынам ӧвӧл. Мон вуыку, мукетыз мынэсьтым азьлогес пыре ини». 8 Иисус солы шуиз: «Султы, аслэсьтыд валестэ басьты но ветлы». 9 Со соку ик йӧназ, валессэ басьтӥз но ветлыны кутскиз. Нош та суббота нуналэ вал. 10 Соин иудейёс бурмем муртлы шуизы: «Туннэ суббота, валестэ басьтыны тыныд уг яра». 11 Соослы со ответ сётӥз: «Кин монэ бурмытӥз, Со мыным шуиз: ”Басьты аслэсьтыд валестэ но ветлы”». 12 Солэсь юазы: «Кин Со Адями, Кудӥз тыныд шуиз: ”Басьты аслэсьтыд валестэ но ветлы”?» 13 Бурмытэм мурт уг тоды вал, кин Со; уго Иисус со интые учырам калык пӧлы ватӥськиз. 14 Собере Иисус сое храмысен пумитаса шуиз: «Тани, тон йӧнад; талэсь уродэзгес тонэн медаз ни луы шуыса, эн ни сьӧлыка». 15 Та адями мынӥз но иудейёслы ялӥз, сое Иисус бурмытӥз шуыса. 16 Иудейёс Иисусэз улляны кутскизы; Сое виыны утчазы, таӵе ужъёсты Со суббота нуналэ лэсьтӥз шуыса. 17 Нош Иисус соослы вераз: «Мынам Атае туннэ нуналозь ужа, Мон но ужасько». 18 Суббота нуналэз сӧремез понна гинэ ӧвӧл, нош сое виыны иудейёс уката но золгес утчазы Инмарез Аслаз Атаез шуэмез, Ассэ Инмарен огкадь каремез понна. 19 Та пумысен Иисус шуиз: «Зэм ик, зэм ик тӥледлы верасько: Пилэн Ас тодэмъяз номыр но каремез уг луы, ӧз ке адӟы, мар каре Атаез. Мар Со каре, сое озьы ик Пи но каре. 20 Уго Атай Пизэ яратэ, ваньзэ, мае Ачиз лэсьтэ, Солы возьматэ. Солы талэсь бадӟымесьгес ужъёс возьматоз на, озьыен, паймоды ай. 21 Кызьы Атай кулэмъёсты улӟытъя но луло карылэ, озьы ик Пи но, кинэ луло каремез потэ, сое луло каре. 22 Атай нокинэ судить но уг кары, нош быдэсак судэз Пиезлы сётӥз, 23 кызьы Атаез сӥлы каро, озьы ик Пиез но ваньмыз сӥлы мед карозы шуыса. Кин Пиез сӥлы уг кары, со Сое ыстӥсь Атаез но сӥлы уг кары. 24 Зэм ик, зэм ик тӥледлы верасько: Мынэсьтым кылме кылзӥськись но Монэ Ыстӥсьлы оскись муртлэн быронтэм улонэз вань, судэ но уз сюры, со кулонысь улонэ выжемын. 25 Зэм ик, зэм ик тӥледлы верасько: дыр вуэ, вуэмын но ни, кулэмъёс Инмар Пилэсь куаразэ кылозы, нош кылӥзы ке, улӟозы. 26 Кызьы Атайлэн Ас бордаз улонэз вань, озьы ик Пилы но Ас бордаз улон возьыны сётӥз. 27 Солы судить карыны но кужым сётӥз, малы ке шуоно Со – Адями Пи. 28 Эн паймелэ талы: уго дыр вуэ, куке ваньмыз шайгуосын кыллисьёс Инмар Пилэсь куаразэ кылозы; 29 соку ӟеч уж лэсьтӥсьёс быронтэм улонэ пырыны улӟозы, нош урод уж лэсьтӥсьёс янгыше сюронлы улӟозы. 30 Ас тодэмъям Мынам номыр но лэсьтэме уг луы. Кызьы кылӥсько, озьы ик судить карисько. Мынам судэ шонер, Аслэсьтым эрикме уг утчаськы, Монэ ыстэм Атаелэсь эриксэ утчасько. 31 Мон Ас сярысьтым Ачим шара ивортӥсько ке, соку Мынам ивортэме зэм уг луы. 32 Вань мукетыз Мон сярысь шара ивортӥсь; Мон тодӥсько, Мон сярысь Солэн ивортэмез зэм луэ шуыса. 33 Тӥ Иоанн доры ысъяды, со зэмлык сярысь шара ивортӥз. 34 Адямиослэн ивортонзылы ёрмыса уг улӥськы, нош тае тӥ мед утиськоды шуыса верасько. 35 Иоанн ӝуась, пиштӥсь сюсьтыл вал; нош тӥ солэн югытаз ӧжытак шумпотыны турттӥськоды вал. 36 Иоаннлэн сярысь, Мынам ивортонэ бадӟымгес: уго Атаелэн Мыным быдэстыны сётэм ужъёсыз, самой та ужъёс, кудъёссэ Мон лэсьтӥсько, Монэ Атай ыстӥз шуыса, Мон сярысь шара иворто. 37 Монэ ыстӥсь Атай Ачиз Мон сярысь шара ивортӥз. Нош тӥляд Солэсь куаразэ ноку но кылэмды ӧвӧл, ымнырзэ но адӟемды ӧвӧл, 38 тӥляд пушкады Солэн кылыз но уг улы, малы ке шуоно тӥ уд оскиське Солэн ыстэм Муртэзлы. 39 Эскере Гожтэмъёсты: тӥ уго соос пыр малпаськоды быронтэм улон басьтыны, нош соос Мон сярысь шара иворто. 40 Улон басьтон понна Мон доры тӥляд лыктэмды уг поты. 41 Адямиослэсь данъямзэс кулэ уг кариськы. 42 Нош тӥледыз тодӥсько: тӥляд пушкады Инмарез яратонды ӧвӧл. 43 Мон Атаелэн нимыныз лыктӥ но, тӥ Монэ кулэ уд кариське; нош кин ке аслаз нимыныз лыктӥз ке, сое кабыл басьтоды. 44 Кызьы тӥ оскыны быгатоды, куке ог-огдэс данъямез яратӥськоды, нош Инмар дорысь данлыкез басьтыны уд сюлмаськиське? 45 Эн малпалэ, Мон тӥледыз Атае азьын янгыше уськыто шуыса: тӥледыз янгыше уськытӥсь Моисей вань, кудӥз вылэ тӥ оскиськыса улӥськоды. 46 Тӥ Моисейлы оскысалды ке, Мыным но оскысалды, со уго Мон сярысь гожъяз. 47 Солэн гожъямъёсызлы но уд оскиське бере, кызьы Мынам кылъёсылы оскоды?»
1 Та бере Иисус Галилей, мукет нимыз Тивериада, зарезьлэн мукет палаз мынӥз. 2 Со бӧрсьы трос калык мынӥз, уго Солэсь висисьёсын паймымон ужъёс лэсьтэмзэ адӟизы. 3 Иисус, гурезе тубыса, отын Аслаз дышетскисьёсыныз огазьын пукиз. 4 Матэ вуэ вал ни Пасха, иудейёслэн праздниксы. 5 Иисус учкиз но, Со доры лыктӥсь трос калыкез адӟыса, Филипплы шуиз: «Таосты сюдыны кытысь нянь басьтомы?» 6 Нош та кылъёсты Со Филиппез эскерон понна вераз; уго мар лэсьтыны ӧдъямзэ Ачиз тодэ вал. 7 Филипп Солы ответ сётӥз: «Котькудӥзлы пичи ке но кусок шедён понна кык сю динарий тыр нянь соослы тырмыт уз луы». 8 Дышетскисьёсыз пӧлысь одӥгез, Симон Петрлэн Андрей выныз, Солы шуиз: 9 «Татын одӥг пияшлэн вить йыды нянез но кык чорыгез вань, но мар со тамында калык понна?» 10 Иисус шуиз: «Косэлэ соосты пуксьылыны». Та интыын нап турынэз вал. Озьы, ог вить сюрс мында калык пуксиз. 11 Иисус нянь басьтӥз но, тау карыса, дышетскисьёсызлы сётъяз, нош дышетскисьёсыз – пукисьёслы; озьы ик чорыгез но – кинлы кӧня кулэ. 12 Кӧтсы тырем бере дышетскисьёсызлы шуиз: «Номыр но арам медаз луы, бичалэ кылем юдэсъёсты». 13 Сиськемъёс бере вить йыды няньлэсь кылем юдэсъёссэ бичаса, дас кык кудыез тырмытӥзы. 14 Соку Иисуслэсь паймымон уж лэсьтэмзэ адӟем адямиос шуизы: «Зэмзэ ик, Та Со Пророк, Кудӥз дунне вылэ лыктыны кулэ». 15 Лыктыса шуак кутыны но эксэй карыны турттэмзэс тодэм бераз Иисус нош ик огназ гурезе кошкиз. 16 Ӝыт вуэм бере Солэн дышетскисьёсыз зарезь дуре васькизы. 17 Пыже пырыса, зарезь тупала Капернауме кошкизы. Ӝомыт усиз ини, нош Иисус соос доры ялан уг лыкты. 18 Кужмо тӧл пельтӥз, зарезь бугыръяськиз. 19 Уяса ог кызь вить яке куамын стадия ортчем беразы соос зарезь вылтӥ пыж доры матэ лыктӥсь Иисусэз адӟыса кышкатскизы. 20 Иисус соослы шуиз: «Мон со, эн кышкалэ». 21 Сое соос пыжазы басьтыны туртто вал; мыноно интыязы вуыса, пыжзы ярдуре дугдӥз. 22 Зарезьлэн огпалаз сылӥсь калык мукет нуналаз адӟиз: отын одӥг пыж сяна, кудаз Солэн дышетскисьёсыз пыризы, мукетыз ӧвӧл; Иисус Аслаз дышетскисьёсыныз пыже ӧз пыры, нош Солэн дышетскисьёсыз асьсэ понназы гинэ кошкизы шуыса. 23 Тивериадаысь мукет пыжъёс но Кузё-Инмарен бакель карыса нянь сием интылы матэ вуизы. 24 Иисус но, Солэн дышетскисьёсыз но татын ӧвӧл шуыса адӟемзы бере адямиос пыжъёсазы пуксизы но, Иисусэз утчаса, Капернауме вуизы. 25 Зарезь тупаласен Сое шедьтэм беразы Солы шуизы: «Равви! Ку Тон татчы вуид?» 26 Соослы ответ сётыса, Иисус шуиз: «Зэм ик, зэм ик тӥледлы верасько: паймымон ужъёсыз адӟемды понна Монэ уд утчаське, нянь сиемды но кӧтты тыр луэм понна утчаськоды. 27 Сисьмыса быроно сиён сярысь эн сюлмаське, быронтэм улонлэн сиёнэз сярысь сюлмаське, кудзэ тӥледлы Адями Пи сётоз; уго Со вылэ Аслэсьтыз печатьсэ понӥз Атай, Инмар». 28 Солы шуизы: «Инмар ужез лэсьтон понна милемлы ма кароно?» 29 Иисус соослы ответ сётыса шуиз: «Тӥ мед оскоды Солы, Кинэ Со ыстӥз – та Инмар уж». 30 Та ласянь Солы шуизы: «Ми мед адӟомы но Тыныд мед оскомы шуыса, кыӵе тодмет Тон возьматод? Мар Тон кариськод? 31 Милям атайёсмы кыр дуннеын манна сииллям, кызьы гожтэмын: ”Соослы сиыны Инмысь нянь сётӥз”». 32 Нош Иисус соослы шуиз: «Зэм ик, зэм ик тӥледлы верасько: Инмысь нянь тӥледлы Моисей ӧз сёты, Мынам Атае Инмысь тӥледлы зэмос нянь сётэ. 33 Уго Инмар нянь луэ Со, Кудӥз инмысь ваське но дуннелы улон сётэ». 34 Та пумысен Солы шуизы: «Кузё! Котьку но милемлы сыӵе нянь сёт». 35 Нош Иисус соослы шуиз: «Мон луисько улонлэн нянез; Мон доры лыктӥсь муртлэн кӧтыз уз сюма, Мыным оскись муртлэн сюэз ноку но уз куасьмы. 36 Нош Мон тӥледлы верай: Тӥ Монэ адӟиды, но уд оскиське. 37 Ваньмыз, кинъёсты Мыным Атае сётэ, Мон доры лыктозы, Мон доры лыктӥсь муртэ улляса уг лэзьы. 38 Аслэсьтым эрикме быдэсъяны инмысь Мон ӧй васькы уго, Монэ ыстӥсь Атаелэсь эриксэ быдэсъяны васьки. 39 Монэ ыстӥсь Атаелэн эрикез таӵе луэ: ваньзэ, кинэ Со Мыным сётӥз, со пӧлысь нокудзэ но медам быдты, ваньзэ соосты берпум нуналэ мед улӟытом. 40 Монэ Ыстӥсьлэн эрикез таӵе луэ: котькудӥзлэн, Пиез адӟисьлэн но Солы оскисьлэн, быронтэм улонэз мед луоз; берпум нуналэ Мон сое улӟытыса султыто». 41 «Мон Инмысь васькем нянь» шуэмез понна иудейёс Солы пумитъяськыны кутскыса 42 шуизы: «Та Иосифлэн пиез Иисус ӧвӧл-а, Солэсь атайзэ но, Анайзэ но ми тодӥськомы? Кызьы нош Со вера: ”Мон Инмысь васьки”?» 43 Иисус соослы ответ сётыса шуиз: «Куспады ӟургетыса, лекъяськыса эн улэ. 44 Нокинлэн но Мон доры лыктэмез уз луы, Монэ ыстӥсь Атае сое Мон доры ӧз ке вайы. Нош Мон берпум нуналэ сое улӟытыса султыто. 45 Пророкъёслэн гожтэмын: ”Ваньмыз Инмарен дышетэмын луозы”. Котькудӥз но Атаелэсь кылэм но дышетскем мурт Мон доры лыктэ. 46 Но со уг возьматы, кин ке но Атаез адӟиз шуыса: Инмар дорысь Лыктӥсь гинэ Атаез адӟиз. 47 Зэм ик, зэм ик тӥледлы верасько: Мыным оскисьлэн быронтэм улонэз вань. 48 Мон – улонлэн нянез. 49 Тӥляд атайёсты кыр дуннеын манна сиизы но кулӥзы. 50 Инмысь васькись нянь сыӵе луэ: сое сиись мурт уз кулы. 51 Мон – Инмысь васькем улэп нянь: та нянез сиись мурт бырытэк улоз. Нош Мынам сётэм няне, со луэ Мынам Мугоры, сое Мон дуннелэн улонэз понна сёто». 52 Соку иудейёс куспазы ченгешыны кутскыса шуизы: «Кызьы Со Аслэсьтыз Мугорзэ асьмелы сиыны сётоз?» 53 Нош Иисус соослы шуиз: «Зэм ик, зэм ик тӥледлы верасько: Адями Пилэсь Мугорзэ ӧд ке сие, Солэсь Вирзэ ӧд ке юэ, тӥ пушкын улон уз луы. 54 Мынэсьтым Мугорме сиисьлэн, Мынэсьтым Вирме юисьлэн быронтэм улонэз вань, берпум нуналэ Мон сое улӟытыса султыто. 55 Уго Мынам Мугоры зэм ик сиён луэ, Мынам Виры зэм ик юон луэ. 56 Мынэсьтым Мугорме сиись, Мынэсьтым Вирме юись Мон бордын улэ, Мон но со бордын. 57 Кызьы Монэ улэп Атай ыстӥз, Мон но Атаен улӥсько, озьы ик Монэ сиись но Монэн улоз. 58 Таиз та Инмысь васькемез нянь. Кызьы тӥляд атайёсты манна сиизы но кулӥзы, озьы уз луы, та нянез сиись пумтэм вапуме улоз». 59 Тае Со Капернаумысь сӥнагогаын дышетыкуз вераз. 60 Тае кылыса, тросэз Солэн дышетскисьёсыз вераськизы: «Кыӵе паймоно кадесь кылъёс! Кин тае кылзыны быгатоз?» 61 Нош Иисус, дышетскисьёсызлэсь та пумысен ӟургетэмзэс шӧдыса, соослы шуиз: «Таин-а тӥляд визьды сынаське? 62 Мар нош луоз, адӟиды ке Адями Пилэсь кытын азьвыл вал отчы ӝутскемзэ? 63 Дух улэп каре, лулмугор ӧжыт но пайда уг кары. Мынам тӥледлы верам кылъёсы дух но улон луо. 64 Нош тӥ пӧлын вань оскисьтэмъёс но». Уго Иисус кутсконысеныз ик тодӥз, кинъёс луо оскисьтэмъёс, кин Сое кутыса сётоз. 65 Иисус шуиз: «Со понна ик уго Мон тӥледлы вералляй: Атаеным сётэмын ӧз ке луы, нокинлэн но Мон доры лыктэмез уз луы». 66 Та дырысен кутскыса, тросэз дышетскисьёсыз Со дорысь кошкизы но Соин огазьын ӧз ветлылэ ини. 67 Соку Иисус дас кыкназылы шуиз: «Тӥ но палэнскыны уд турттӥське-а?» 68 Солы ответ сётыса, Симон Петр шуиз: «Кузё-Инмаре! Кин доры милемлы мыноно? Тынад быронтэм улонлэн кылъёсыз вань. 69 Ми оскимы но тодӥмы, Тон – Христос, Улэп Инмарлэн Пиез шуыса». 70 Иисус соослы ответ сётӥз: «Дас кыкнадэс Мон ӧй-а бырйы? Нош тӥ пӧлысь одӥгез диавол». 71 Тае Со Искариот Симон пи Иуда сярысь вераз, со уго, дас кык пӧлысь одӥгез, Сое вузаса сётоно мурт вал.
1 Та бере Иисус Галилеяетӥ ветлӥз, Иудеяетӥ ветлэмез ӧз поты, малы ке шуоно иудейёс Сое виыны турттыса утчазы. 2 Иудейёслэн Тылыс Пуктон праздниксы матэ вуэ вал. 3 Соку братъёсыз Солы шуизы: «Татысь пот но Иудеяе мын, Тынэсьтыд лэсьтэм ужъёстэ дышетскисьёсыд но мед адӟозы. 4 Кин ассэ тодмо карыны тырше, номыре но лушкемен уг лэсьты; Тон сыӵе ужъёс лэсьтӥськод ке, Астэ дуннелы возьматы». 5 Солэн братъёсыз но Солы уг оско вал. 6 Та пумысен Иисус соослы шуиз: «Мынам дыры ӧз на вуы, нош тӥледлы котькыӵе дыр тупа. 7 Тӥледыз дунне адӟемпотостэм карыны уг быгаты, нош Монэ адӟемпотостэм каре, малы ке шуоно Мон шара ивортӥсько, солэн ужъёсыз уродэсь шуыса. 8 Тӥ та празднике мынэ, нош Мон та празднике уг на мыны, уго Мынам дыры ӧз на вуы». 9 Тае соослы вераз но Ачиз Галилеяе кылиз. 10 Нош братъёсыз кошкем бере Со но празднике мынӥз, шара ӧз, ватскыса сямен мынӥз. 11 Иудейёс Сое праздникысен утчаса шуизы: «Кытын Со?» 12 Калык пӧлын Со сярысь трос пумо вераськонъёс вал: одӥгъёсыз «Со лякыт» шуыса веразы, нош мукетъёсыз шуизы: «Ӧвӧл, Со калыкез сура-пожа». 13 Иудейёслэсь кышкаменызы, нокин но Со сярысь шара ӧз вера. 14 Нош праздниклэн шор вадесаз ини Иисус храме пырыса дышетӥз. 15 Иудейёс паймыса вераськизы: «Дышетскытэк кызьы Со Гожтэмъёсты тодэ?» 16 Соослы ответ сётыса, Иисус шуиз: «Мынам дышетонэ – Мынам ӧвӧл, Монэ Ыстӥсьлэн со. 17 Кин Инмарлэсь эриксэ быдэсъяны турттэ, со та дышетон сярысь тодоз, – Инмарлэсь-а со яке Мон Аслэсьтым Ачим-а верасько. 18 Аслэсьтыз ачиз верась аслыз дан утча; нош кин Сое Ыстӥсьлы дан утча, Со зэмлыко, Со бордын ӧрекчаськон ӧвӧл. 19 Моисей тӥледлы закон ӧз сёты-а? Нош одӥг мурт но тӥ пӧлысь законэз уг быдэсъя. Мар понна Монэ виыны утчаськоды?» 20 Ответ сётыса, калык шуиз: «Тон пушкын пери ӧвӧл-а? Кин Тонэ виыны утча?» 21 Веранзэ азьланьтыса, Иисус соослы шуиз: «Одӥг уж Мон лэсьтӥ но, ваньды тӥ паймиськоды. 22 Моисей тӥледлы вандӥськон сётӥз, – но со сям атайёслэсь, Моисейлэсь ӧвӧл, – нош тӥ суббота нуналэ но адямилэсь вандӥськоды. 23 Моисейлэн законэз сӧриськемын медаз луы шуыса, адямилы суббота нуналэ но вандӥськон сямез ортчытӥськоды ке, суббота нуналэ Мон адямиез быдэсак бурмытэм поннам-а Мон вылэ йыркуръяськиськоды? 24 Вылтусъя судить эн каре, шонерлыко судэн судить каре». 25 Куд-ог Иерусалим муртъёс шуизы: «Та Со ӧвӧл-а, Кудзэ виыны утчало? 26 Тани Со шара вера, нош Солы номыр но уг шуо: кузёйыръёсмылы тодмо ӧз луы меда, Со зэмзэ но Христос шуыса? 27 Ми Сое тодӥськомы, кытысь Со; нош Христос лыктӥз ке, нокин но уз тоды, кытысь Со». 28 Соку Иисус храмын куаразэ бадӟыматыса, дышетыса вераз: «Тодӥськоды Монэ, тодӥськоды, кытысь Мон; Мон Ас тодэмъям ӧй лыкты, Монэ Ыстӥсь вань, но Сое тӥ уд тодӥське. 29 Мон Сое тодӥсько, малы ке шуоно Мон Со дорысь, Со Монэ ыстӥз». 30 Сое кутыны утчазы, но нокин но Со вылэ кизэ ӧз ӝуты, уго Солэн часэз вуымтэ на вал. 31 Нош калык пӧлысь тросэз Солы оскизы, соос шуизы: «Христос лыктӥз ке, оло, Таиз сярысь тросгес паймымон ужъёс лэсьтоз-а?» 32 Калык пӧлын Со сярысь сыӵе вераськонъёсты фарисейёс кылӥзы. Фарисейёс но архиерейёс Сое кутыны вылысь медоосты ыстӥзы. 33 Нош Иисус соослы шуиз: «Кема ик Мыным тӥледын валче улоно ӧвӧл ни, Монэ Ыстӥсь доры мыно. 34 Монэ утчалоды, но уд шедьтэ; кытын Мон луо, тӥляд отчы лыктэмды уз луы». 35 Та ласянь иудейёс куспазы вераськизы: «Кытчы Со мыныны медэ, нокызьы но, пе, ми Сое ум шедьтэ? Уг ӧдъя-а Со эллинъёс пӧлын пазьгиськыса улӥсьёс доры мыныны но эллинъёсты дышетыны? 36 Мае возьмато Солэн та верам кылъёсыз: ”Монэ утчалоды но уд шедьтэ; кытын Мон луо, тӥляд отчы лыктэмды уз луы”?» 37 Праздниклэн берпуметӥ быдӟым нуналаз Иисус сылӥз но бадӟым куараен вераз: «Кинлэн сюэз куасьме, Мон доры лыкты но ю; 38 кызьы шуэмын Священной Гожтэмын: ”Кин Мыным оске, солэн пушкысьтыз улэп вуэн шуръёс бызёзы”». 39 Тае Со Дух сярысь вераз, Кудзэ Солы оскисьёс басьтыны быгатозы. Соос вылын Святой Дух ӧй вал на, – со виын Иисус данэ поттэмын ӧй вал на уго. 40 Тросэз калык пӧлысь та кылъёсты кылыса шуизы: «Со зэмзэ но пророк». 41 Мукетъёсыз шуизы: «Та – Христос». Нош мукетъёсыз шуизы: «Галилеяысь Христос лыктоз шат? 42 Священной Гожтэмын верамын ӧвӧл-а, Христос Давидлэн кидыс бордысьтыз лыктоз, Вифлеемысь, пичи городысь, кытын вордскиз Давид?» 43 Озьы калык пӧлын Со пумысен ченгешон потӥз. 44 Соос пӧлысь куд-огъёсыз Иисусэз кутыны медо вал; но нокин но Со вылэ кизэ ӧз ӝуты. 45 Медоос архиерейёс но фарисейёс доры берытскизы, таослы соос шуизы: «Малы тӥ Сое ӧд вае?» 46 Медоос ответ сётӥзы: «Адями ноку но тазьы ӧз на вера, кызьы та Адями». 47 Фарисейёс соослы шуизы: «Оло, тӥ но визь сынаськонэ усиды ке шат? 48 Кузёйыръёс яке фарисейёс пӧлысь кин ке но Солы оскыны кутскиз-а? 49 Нош та, законэз валасьтэм калык, каргамын». 50 Соос пӧлысь одӥгез, Никодим, уйин Со доры ветлӥсь, соослы шуиз: 51 «Асьмелэн законмы адямиез судить каре-а, нырысь ик сое уг ке кылзо, уг ке тодо солэсь ма каремзэ?» 52 Та пумысен солы шуизы: «Тон но Галилеяысь ӧвӧл-а? Чакла но адӟы: Галилеяысь пророк уг лыкты». 53 Собере ваньзы доразы кошкизы.
1 Иисус Елеон гурезе мынӥз. 2 Ӵукна нош ик храме лыктӥз, вань калык Со доры люкаськиз. Со пуксьыса соосты дышетыса улӥз. 3 Книга тодӥсьёс но фарисейёс Иисус доры азон сьӧлык лэсьтыкуз кутэм кышномуртэз вайизы но, люкаськем калыклэн шораз султытыса, 4 Солы шуизы: «Дышетӥсь! Та кышномурт, азон сьӧлык лэсьтыкуз, кутэмын; 5 нош Моисей законын таӵеосты, изэн лэзьяса, виылыны косэмын: Тон мар шуод?» 6 Сое янгыше уськытон понна, Солэсь визьзэ сынаса, тае веразы. Нош Иисус мыкырскыса, соос шоры учкытэк, музъем вылэ чиньыеныз гожъяз. 7 Нош соос ялан юалляськизы на, соин ик Со шонерскыса соослы шуиз: «Тӥ пӧлысь кин сьӧлыктэм, нырысь ик со шоры изэн лэзь». 8 Нош ик улэ мыкырскыса, музъем вылэ гожъяса улӥз. 9 Тае кылыса но возьытлыксы ӵушканы кутскемен, соос, бадӟымъёсыз бордысен кутскыса берпумъёсыз дорозь, огзы бере огзы кошкылыны кутскизы. Иисус одӥгназ кылиз; Солэн азяз кышномурт сылӥз. 10 Иисус шонертӥськыса учкиз но, кышномуртэз сяна, нокинэ ӧз адӟы; собере со кышномуртлы шуиз: «Кышномурт! Кытын тынад янгыше уськытӥсьёсыд? Нокин но тонэ судить ӧз кары-а?» 11 Со ответ сётӥз: «Нокин но, Кузёе!» Иисус солы шуиз: «Мон но тонэ судить уг кариськы; мын но азьланяз эн ни сьӧлыка». 12 Иисус нош ик калыкен вераськыны кутскиз, соослы шуиз: «Мон дуннелы югыт; Мон сьӧры мынӥсь пеймытын уз ветлы, со бордын улонлэн югытэз луоз». 13 Соку Солы фарисейёс шуизы: «Тон Ачид сярысь Ачид шара ивортӥськод, Тынад ивортэмед зэм ӧвӧл». 14 Соослы ответ сётыса, Иисус шуиз: «Мон Ачим сярысь Ачим шара ивортӥсько ке но, Мынам ивортэме зэм, малы ке шуоно Мон тодӥсько кытысь лыктэмме но, кытчы мынэмме но. Нош тӥ уд тодӥське, кытысь Мон, кытчы мынӥсько. 15 Тӥ лулмугоръя судить кариськоды, Мон нокинэ но судить уг кариськы. 16 Мон судить карисько ке но, Мынам судэ зэм, малы ке шуоно Мон одӥгнам ӧвӧл, Монэн ӵош Монэ ыстӥсь Атае. 17 Тӥляд законады но гожтэмын ук, кык муртлэн шара ивортэмез зэм луэ шуыса. 18 Мон Ас сярысьтым Ачим шара ивортӥсько, Мон сярысь шара ивортэ на Монэ ыстӥсь Атае но». 19 Соку Солы шуизы: «Кытын Тынад Атаед?» Иисус ответ сётӥз: «Тӥ Монэ но, Мынэсьтым Атайме но уд тодӥське; тӥ Монэ тодысалды ке, Мынэсьтым Атайме но тодысалды». 20 Та кылъёсты Иисус, храмын дышетыкуз, ваньбур тырон дорысен вераз. Нокин но Сое ӧз кырмы, уго Солэн часэз вуымтэ на вал. 21 Иисус нош ик соослы шуиз: «Мон кошкисько, Монэ утчалоды, сьӧлыкъёсты пӧлын кулоды. Кытчы Мон мынӥсько, отчы тӥ лыктыны уд быгатэ». 22 Соку иудейёс вераськизы: «”Кытчы Мон мынӥсько, отчы тӥ лыктыны уд быгатӥське” шуэ ке, оло, Ассэ Ачиз быдтыны медэ-а?» 23 Соослы Со шуиз: «Тӥ улӥ дуннеысь, Мон вылӥысьтыз; тӥ та дуннеысь, Мон та дуннеысь ӧвӧл. 24 Соин ик Мон тӥледлы шуи: ”Тӥ сьӧлыкъёсты пӧлын кулоды”, та Мон луисько шуыса ӧд ке оске, соку асьтэлэн сьӧлыкъёсты пӧлын кулоды». 25 Соку Солы шуизы: «Кин бен Тон?» Иисус соослы шуиз: «Кызьы тӥледлы верасько, кутсконысеныз ик Луись. 26 Трос Мынам тӥ сярысь веранэ, судить каронэ; нош Монэ Ыстӥсь зэм луэ, мар Мон Солэсь кылӥ, сое ик дуннелы верасько». 27 Ӧз валалэ, соослы Со Атай сярысь вера шуыса. 28 Озьы, Иисус соослы шуиз: «Куке Адями Пиез ӝутӥды, соку тододы, та – Мон шуыса. Ачим тодэмъя номыре но уг кариськы, нош кызьы Монэ Атае дышетӥз, озьы ик верасько. 29 Монэ Ыстӥсь Монэн луэ. Атае Монэ огнаме ӧз кельты, Мон уго котьку но сое лэсьтӥсько, мар Солы ярано». 30 Со тае вераку, тросэз Солы оскыны кутскизы. 31 Соку Иисус оскыны кутскем иудейёслы вераз: «Мынам кылыя улӥды ке, тӥ зэмзэ но Мынам дышетскисьёсы луоды, 32 зэмлыкез тододы, нош зэмлык тӥледыз эрико кароз». 33 Солы ответ сётӥзы: «Ми – Авраамлэн кидысэз, ноку но нокинлэн но ляльчиосыз ӧй вал; кызьы озьы Тон вераськод: ”Эрикоесь луоды”?» 34 Иисус соослы ответ сётӥз: «Зэм ик, зэм ик тӥледлы верасько: котькудӥз сьӧлык лэсьтӥсь сьӧлыклэн ляльчиез луэ. 35 Ляльчи пумтэм дауръёс ӵоже кузё дорын уг улы: пи пумтэм дауръёс ӵоже улэ. 36 Озьыен, Пи тӥледыз мозмытӥз ке, соку зэм ик эрико луоды. 37 Тодӥсько, тӥ Авраамлэн кидысэз шуыса; озьы ке но Монэ виыны утчаськоды, малы ке шуоно Мынам кылы тӥ пушкы уг тэры. 38 Мон верасько сое, мае Мон Атае дорысен адӟи; нош тӥ лэсьтӥськоды сое, мае асьтэлэн атайды дорысен адӟиды». 39 Солы ответ сётыса шуизы: «Милям атаймы – Авраам». Иисус соослы шуиз: «Тӥ Авраамлэн нылпиосыз луысалды ке, Авраамлэсь ужъёссэ лэсьтысалды. 40 Нош табере Монэ, Инмар бордысь кылэм зэмлыкез тӥледлы верась Адямиез, виыны утчаськоды: Авраам тазьы ӧз лэсьтылы. 41 Тӥ асьтэлэн атайдылэсь ужъёссэ лэсьтӥськоды». Та пумысен Солы шуизы: «Ми азыса улон пыр вордӥськемын ӧвӧл; одӥг Атаймы вань – Инмар». 42 Иисус соослы шуиз: «Тӥляд Атайды Инмар ке луысал, тӥ Монэ яратысалды, малы ке шуоно Мон Инмар дорысь потӥ но лыктӥ. Мон Ачим тодэмъя ӧй лыкты, Со Монэ ыстӥз. 43 Малы тӥ Мынэсьтым верамме уд валаське? Малы ке шуоно уд быгатӥське Мынэсьтым кылме кылыны. 44 Тӥляд атайды диавол, тӥ асьтэлэн атайдылэсь кулэ каремъёссэ быдэсъяны турттӥськоды. Со кутсконысеныз ик адями виись вал. Со зэмлыкын сылыны ӧз быгаты, уго со бордын зэмлык ӧвӧл. Ӧрекчаськыкуз со аслэсьтыззэ вера, со уго ӧрекчаськись, ӧрекчаськонлэн атаез. 45 Мон зэмлыкез верасько, нош тӥ Мыным уд оскиське. 46 Кин тӥ пӧлысь Монэ, ӧрекчаськисько шуыса, шарае поттоз? Зэмлыкез ке Мон верасько, малы бен тӥ Мыным уд оскиське? 47 Кин Инмарлэсь, со Инмар кылэз кылзӥське. Тӥ Инмарлэсь ӧвӧл, соин ик Инмар кылэз уд кылзӥське». 48 Та пумысен иудейёс, ответ сётыса, Солы шуизы: «Ми шонер ум вераське-а, Тон Самария мурт, Тон пушкын пери вань шуыса?» 49 Иисус ответ сётӥз: «Мон пушкын пери ӧвӧл. Мон Аслэсьтым Атайме сӥлы карисько, нош тӥ Монэ сӥтэм-сантэм кариськоды. 50 Мон Аслэсьтым данме уг утчаськы: Утчась но Судить карись вань. 51 Зэм ик, зэм ик тӥледлы верасько: ”Кин Мынэсьтым кылме быдэсъялоз, со ноку но кулонэз уз адӟы”». 52 Иудейёс Солы шуизы: «Табере ми тодӥмы, Тон пушкын пери вань шуыса. Авраам кулӥз, пророкъёс но, нош Тон шуиськод: ”Кин Мынэсьтым кылме быдэсъялоз, со кулонэз ноку но уз адӟы”. 53 Оло, Тон милям Авраам атаймылэсь, кудӥз кулӥз, бадӟымгес? Пророкъёс но кулӥзы: Тон Астэ кин кариськод?» 54 Иисус ответ сётӥз: «Мон Асме Ачим данъясько ке, соку Мынам данэ номырлы но ярантэм: Монэ Атае данъя, Со сярысь тӥ ”Со милям Инмармы” шуиськоды. 55 Тӥ Сое ӧд тодэ, нош Мон Сое тодӥсько. Нош шуи ке ”Сое уг тодӥськы”, соку Мон тӥ выллем ик ӧрекчи луисько. Но Мон Сое тодӥсько, Солэсь кылзэ но быдэсъясько. 56 Тӥляд Атайды Авраам Мынэсьтым нуналме адӟо шуыса шумпотэмын вал: адӟиз но шумпотӥз». 57 Та пумысен иудейёс Солы шуизы: «Тыныд витьтон арес но ӧвӧл, нош Тон Авраамез адӟид?» 58 Иисус соослы шуиз: «Зэм ик, зэм ик тӥледлы верасько: Авраам вордскемлэсь азьло Мон вал ини». 59 Соку Со вылэ зӥртон вылысь изъёс кутӥзы; нош Иисус ватӥськиз, соослэн шортӥзы ортчыса, храмысь потыса кошкиз.
1 Кошкыкуз вордскем дырысеныз синтэм муртэ адӟиз. 2 Солэн дышетскисьёсыз Солэсь юазы: «Равви! Синтэм вордскемез понна кин сьӧлыкам, со-а яке анай-атайёсыз-а?» 3 Иисус ответ сётӥз: «Со но ӧз, анай-атайёсыз но ӧз сьӧлыкалэ, но та со понна: Инмарлэн ужъёсыз со вылын мед адскозы. 4 Нунал вань дыръя Монэ Ыстӥсьлэсь ужъёссэ Мон лэсьтыны кулэ; уй ке вуэ, соку нокин но номыр но лэсьтыны уг быгаты. 5 Мон дуннеын дыръям Мон дуннелы югыт луисько». 6 Тае вераса, Со музъем вылэ сялӟиз, дыльдыеныз наштан лэсьтӥз, наштанэныз синтэм муртлэсь синъёссэ зыраз, 7 собере шуиз: «Сӥлоам пылатскон интые, кудӥз ”ыстэм” шуэм луэ, мыныса мисьтӥськы». Со мыныса мисьтӥськиз но адӟыны быгатӥсь луыса вуиз. 8 Бускельёсыз но сое синтэмен азьвыл адӟем муртъёс вераськизы: «Кураськыса пукись мурт ӧвӧл-а та?» 9 Куд-огъёсыз шуизы: «Та со», нош мукетъёсыз: «Солы кельше». Со мурт шуиз: «Мон со». 10 Соку солэсь юазы: «Кызьы тынад синъёсыд усьтӥськизы?» 11 Со ответ сётыса шуиз: «Иисус шуон Адями наштан лэсьтӥз, синъёсме зыраз но мыным шуиз: ”Сӥлоам пылатскон интые мыныса мисьтӥськы”. Мон мынӥ, мисьтӥськи но адӟыны кутски». 12 Соку солы шуизы: «Кытын Со?» Со ответ сётӥз: «Уг тодӥськы». 13 Тае, азьвыл синтэмез, фарисейёс доры нуизы. 14 Нош Иисус солы наштан лэсьтыса синъёссэ усьтон нуналэ суббота вал. 15 Озьы ик солэсь «кызьы адӟись луид» шуыса, фарисейёс но юазы. Соослы со шуиз: «Со мынам синъёсам наштан понӥз, мон мисьтӥськи но адӟисько ини». 16 Соку фарисейёс пӧлысь куд-огез шуизы: «Та Адями Инмарлэсь ӧвӧл, малы ке шуоно субботаез уг утьы». Мукетъёсыз шуизы: «Кызьы сьӧлыко адями таӵе паймымон ужъёс лэсьтыны быгатоз?» Соос куспын ченгешон вал. 17 Нош ик синтэмлы шуизы: «Тон Со сярысь мар вералод, Со тынэсьтыд синъёстэ усьтӥз ук?» Со шуиз: «Пророк Со». 18 Адӟыны кутскисьлэсь анай-атайёссэ вайытэк, иудейёс ӧз оске, со синтэм вал но адӟыны кутскиз шуыса. 19 Анай-атайёсызлэсь юазы: «Та-а тӥляд пиды, со сярысь-а синтэм вордскиз шуиськоды? Нош кызьы со табере адӟе ини?» 20 Анай-атайёсыз соослы ответ сётыса шуизы: «Ми тодӥськомы, та милям пимы, со синтэм вордскиз. 21 Нош кызьы со табере адӟе, ум тодӥське, кин солэсь синъёссэ усьтэм, ум тодӥське: со ачиз быдэ вуэм мурт ини, аслэсьтыз юалэ. Ачиз сярысь ачиз мед вералоз». 22 Тазьы ответ сётылӥзы солэн анай-атайёсыз, соос уго иудейёслэсь кышказы; иудейёс огкылысь вераськизы вал ини: кин Сое, Христос шуыса, оскыса вераз ке, со муртэ сӥнагога бордысь люкыса палэнтыны. 23 Соин ик анай-атайёсыз шуизы: «Со быдэ вуэм мурт ини, аслэсьтыз юалэ». 24 Озьы, синтэм вылэм муртэ кыкетӥ ползэ ӧтьыса, солы шуизы: «Зэмзэ верасько шуыса, Инмарез данъя; ми тодӥськомы, Со Адями сьӧлыко шуыса». 25 Со соослы ответ сётыса шуиз: «Сьӧлыко-а Со, ӧвӧл-а, – уг тодӥськы, одӥгзэ тодӥсько: мон синтэм вал, нош табере адӟисько». 26 Солэсь нош ик юазы: «Мар Со тонэн кариз? Кызьы Со тынэсьтыд синъёстэ усьтӥз?» 27 Соослы ответ сётӥз: «Мон тӥледлы верай ини, нош тӥ ӧд кылзӥське. Ма сярысь эшшо кылэмды потэ на? Оло нош тӥляд но Солэн дышетскисьёсыз луэмды потэ?» 28 Нош соос сое пыкылыса шуизы: «Тон Солэн дышетскисез, нош ми Моисейлэн дышетскисьёсыз. 29 Ми тодӥськомы, Моисеен Инмар вераськиз шуыса, нош Тае ум тодӥське, кытысь Со». 30 Синмыз усьтӥськем адями соослы ответ сётыса шуиз: «Со ик паймымон но: тӥ уд тодӥське, кытысь Со, нош Со мынэсьтым синъёсме усьтӥз. 31 Ми тодӥськомы: сьӧлыкоосты Инмар уг кылзы, нош кин Инмарез сӥлы каре но Солэсь эриксэ быдэсъя, сое кылзэ. 32 Синтэм вордскем муртлэсь синзэ усьтон – дауръёслэн кутсконысенызы кылылэмын ӧвӧл. 33 Со Инмар бордысь ӧй ке луысал, номыр но лэсьтыны ӧй быгатысал». 34 Солы ответ сётыса шуизы: «Быдэсак сьӧлык пӧлын тон вордскемын, но тон ик-а милемыз дышетӥськод?» Сое педло улляса лэзизы. 35 Сое улляса лэземзэс Иисус кылӥз но, со пиез шедьтыса, солы шуиз: «Тон Инмар Пилы оскиськод-а?» 36 Со ответ сётыса шуиз: «Кузёе, нош кин Со, мон Солы мед оском?» 37 Иисус солы шуиз: «Адӟид ни тон Сое, Со ик тонэн вераське но». 38 Соку со пи шуиз: «Оскисько, Кузё-Инмаре!» но Иисуслы йыбырттӥз. 39 Иисус шуиз: «Адӟисьтэмъёс мед адӟозы, нош адӟисьёс адӟисьтэм мед луозы шуыса, судэн Мон та дуннее лыктӥ». 40 Соин ӵош луэм фарисейёс пӧлысь куд-огез, тае кылыса, Солы шуизы: «Оло, ми но синтэмесь-а?» 41 Иисус соослы шуиз: «Синтэмесь ке тӥ луысалды, тӥляд вылады сьӧлык ӧй луысал; нош тӥ ”адӟиськом” шуиськоды бере, тӥ вылэ сьӧлык кылёз».
1 «Зэм ик, зэм ик тӥледлы верасько: кин ыж возён азбаре ӧсэтӥ уг пыры, мукет азьтӥ со кечырскыса пыре ке, со лушкаськись, талась-виылӥсь. 2 Нош ӧсэтӥ пырись со ыжъёслэн возьмасьсы луэ: 3 Ӧс дорын возьмаськись солы усьтэ но, ыжъёс солэн куараезлэсь кылзӥсько, аслэсьтыз ыжъёссэ со, нимынызы ӧтьыса, кыре поттэ. 4 Ыжъёссэ поттэм бере соослэн азязы мынэ; нош ыжъёс со бӧрсьын мыно, уго солэсь куаразэ тодмало. 5 Мурт сьӧры уг мыно, со дорысь ворттыса кошко, малы ке шуоно муртлэсь куаразэ уг тодмало». 6 Та мадёнэз Иисус соослы вераз. Нош соос ӧз валалэ, мар Со соослы вераз. 7 Нош ик Иисус соослы вераз: «Зэм ик, зэм ик тӥледлы верасько: Мон ыжъёслы ӧс. 8 Ваньмыз, Мынэсьтым азьвыл лыктылэмъёс, лушкаськисьёс но талась-виылӥсьёс; ыжъёс соослэсь ӧз кылзӥське. 9 Мон – ӧс: кин Мон пыр пыроз, со утиськоз, пыроз но, потоз но, ыж возьман инты но шедьтоз. 10 Нош лушкаськись лыктэ ке, лыктэ лушканы, виыны, быдтыны. Улон вайыны, улонзы мултэсэн мед луоз шуыса, Мон со понна лыктӥ. 11 Мон ӟеч ыж возьмась: ӟеч ыж возьмась ыжъёсыз понна аслэсьтыз улонзэ понэ. 12 Нош медъяськем мурт, кудӥз понна ыжъёс аслаз уг луо, со ыж возьмась ӧвӧл: адӟе лыктӥсь кионэз но ыжъёссэ кельтыса пегӟе, нош кион ыжъёсты лушкаса нуэ, пазьгиськытэ соосты. 13 Медъяськем мурт пегӟе, малы ке шуоно со медъяськем мурт, ыжъёс понна уг сюлмаськы. 14 Мон – ӟеч ыж возьмась, Аслэсьтымъёссэ тодӥсько, Асламъёсыз но Монэ тодо. 15 Кызьы Монэ Атае тодэ, озьы ик Мон Атайме тодӥсько но Аслэсьтым улонме ыжъёс понна сётӥсько. 16 Вань на Мынам мукет ыжъёсы но, кудъёсыз та азбарысь ӧвӧл, соосты но Мыным вайыны кулэ: соос но Мынэсьтым куараме кылозы, – соку луоз одӥг уллё, одӥг Возьмась. 17 Монэ Атае соин яратэ: Мон Аслэсьтым улонме сётӥсько нош ик сое басьтон понна. 18 Нокин но сое Мынэсьтым уг тала, Мон Ачим сое сётӥсько: сое сётыны эрике вань, берен басьтыны но эрике вань; та курон-косонэз Мон Аслам Атае киысь басьтӥ». 19 Та кылъёс пумысен иудейёс куспын нош ик ченгешон потӥз. 20 Тросэз соос пӧлысь шуизы: «Со перияськемын, соин со визьтэмъяське; мар Сое кылзӥськоды?» 21 Мукетъёсыз шуизы: «Та кылъёс перияськем муртлэн ӧвӧл; быгатоз-а пери синтэмъёслэсь синзэс усьтыны?» 22 Соку Иерусалимысь храмез чылкытатон праздник вуиз, толалтэ вал. 23 Иисус храмтӥ, Соломонлэн Бӧльмыетӥз, ветлӥз. 24 Сое иудейёс котыртӥзы но Солы шуизы: «Кема-а Тон милемыз паймытыса возёд на? Христос ке Тон, милемлы шонерак вера». 25 Иисус соослы ответ сётӥз: «Мон тӥледлы верай, нош тӥ уд оскиське; ужъёс, кудъёссэ Мон Аслам Атаелэн нимыныз лэсьтӥсько, соос Мон сярысь шара иворто. 26 Нош тӥ уд оскиське, кызьы Мон тӥледлы верай, тӥ Мынам ыжъёсы пӧлысь ӧвӧл уго. 27 Мынам ыжъёсы Мынэсьтым куараме кылзӥсько, Мон соосты тодӥсько, соос Мон сьӧры мыно. 28 Мон соослы быронтэм улон сётӥсько, соос ноку но уз быре, нокин но соосты Мынам киулысьтым уз лушка. 29 Мынам Атае, Кудӥз Мыным соосты сётӥз, ваньмызлэсь быдӟым, нокин но соосты Мынам Атаелэн киулысьтыз лушканы уз быгаты: 30 Мон Атаен – одӥг». 31 Иудейёс Сое виён вылысь нош ик изъёс кутылӥзы. 32 Иисус соослы ответ сётӥз: «Аслам Атаелэсь трос ӟеч ужъёссэ Мон тӥледлы возьматӥ. Соос пӧлысь кудӥз понна Монэ, изэн зӥръяса, виыны медӥськоды?» 33 Иудейёс Солы ответ сётыса шуизы: «Ӟеч уж понна изэн зӥръяса Тонэ виыны ум медӥське, нош Инмарез сантэмамед но адями луэм вылысьтыд Астэ Ачид Инмар каремед понна со ужез лэсьтыны медӥськомы». 34 Иисус соослы ответ сётӥз: «Тӥляд законады гожтэмын ӧвӧл-а ”Мон шуи: тӥ инмаръёс”? 35 Кинъёслы Инмар кыл вуэм, соосты Со ”инмаръёс” шуыса нимам ке, – Священной Гожтэм сӧриськыны уз быгаты. 36 Солы-а, Дун-Сьӧлыктэмлы, Кудзэ Атай, ӟечлы сӥзьыса, дуннее ыстӥз, тӥ шуиськоды: ”Инмарез сантэмаськод”, малы ке шуоно Мон шуи: ”Мон Инмар Пи”? 37 Атаелэсь ужъёссэ уг ке лэсьтӥськы, эн оскелэ Мыным, 38 нош лэсьтӥсько ке, Мыным уд оскиське ке, оске Мынам ужъёсылы, мед тододы но оскоды, Мон пушкын Атае, нош Мон Со пушкын шуыса». 39 Соку нош ик Сое кутыны утчазы; нош Со соослэн киулысьтызы палэнтӥськиз. 40 Нош ик Иордан сьӧры, кытын азьвыл Иоанн пылатыса улӥз, со интые мыныса, отчы кылиз. 41 Тросэз Со доры лыктыса шуизы: «Иоанн нокыӵе но паймымон ужъёс ӧз лэсьты, но ваньмыз, мае Со сярысь Иоанн вераз, зэм вылэм». 42 Отысен тросэз Солы оскыны кутскизы.
1 Висе вал Вифания гуртысь Лазарь, – со гуртын уло вал солэн Марияен Марфа апаен-сузэръёсыз. 2 Мария – самой со, кин Кузё-Инмарез миро вӧйын зыраз, Солэсь пыдъёссэ йырсиеныз ӵушиз; солэн Лазарь братэз висе вал. 3 Сузэръёс Иисуслы вераны ыстӥзы: «Кузё-Инмар! Тани, Тон кинэ яратӥськод, висе». 4 Тае кылыса, Иисус шуиз: «Та висён кулонлы ӧвӧл, со Инмарез данъян понна, со пыр Инмар Пи данэ потоз». 5 Нош Иисус яратэ вал Марфаез но, солэсь сузэрзэ но, Лазарез но. 6 Со висе шуыса кылэм бераз со интыяз эшшо кык нунал улӥз на. 7 Та бере дышетскисьёсызлы шуиз: «Нош ик Иудеяе мыноме». 8 Дышетскисьёсыз Солы шуизы: «Равви! Кемаласен-а ини Тонэ иудейёс изэн зӥръяса виыны медо вал, Тон нош ик отчы мынӥськод?» 9 Иисус ответ сётӥз: «Нуналын дас кык час ӧвӧл-а? Кин нуназе ветлэ, со уг канжаськылы, малы ке шуоно та дуннелэсь югытсэ адӟе. 10 Нош кин уйин ветлэ, со канжаськылэ, малы ке шуоно со дорын югыт ӧвӧл». 11 Тае верам бераз соослы шуиз: «Асьмелэн эшмы Лазарь умме усиз, Мон сое сайкатыны мынӥсько». 12 Дышетскисьёсыз шуизы: «Кузё-Инмар! Умме усем ке, бурмоз ай». 13 Иисус солэн кулонэз сярысь вераз; нош соос малпазы, Со огшоры изён сярысь вера шуыса. 14 Соку Иисус соослы шонерак вераз: «Лазарь кулӥз. 15 Мон тӥ понна шумпотӥсько: Мон отын ӧй вал, табере тӥ мед оскоды; нош али со доры мыноме». 16 Соку Кыкто шуон Фома дышетскисьёслы шуиз: «Мыноме, асьмеос но Соин валче куломе». 17 Лыктыса Иисус тодӥз, со ньыль нунал шайгуын ини шуыса. 18 Вифания Иерусалимлы матын, ог куинь иськемын вал. 19 Иудейёс пӧлысь тросэз Марфаен Мария доры братсы понна соосты буйгатыны лыктӥзы. 20 Иисус лыктэ шуыса кылӥз но, Марфа Солэн пумитаз потӥз, нош Мария корказ кылиз. 21 Соку Марфа Иисуслы шуиз: «Кузё-Инмаре! Тон татын луысалыд ке, мынам братэ ӧй кулысал. 22 Но али но тодӥсько: Тон Инмарлэсь мае ке курид ке, Инмар Тыныд сётоз». 23 Иисус солы шуиз: «Тынад братэд улӟыса султоз». 24 Марфа Солы шуиз: «Тодӥсько, берпум нуналэ, улӟыса султон дыръя, улӟыса султоз шуыса». 25 Иисус солы шуиз: «Мон – улӟыса султон но улон; Мыным оскись кулӥз ке но, улоз. 26 Котькудӥз ик улӥсь но Мыным оскись мурт ноку но уз кулы. Талы оскиськод-а?» 27 Со Солы шуиз: «Бен, Кузё-Инмаре! Мон оскисько, Тон Инмар Пи Христос шуыса, Кудӥз кулэ вал дуннее лыктыны». 28 Тае верам бераз мынӥз но аслэсьтыз сузэрзэ Марияез лушкемен ӧтьыса шуиз: «Дышетӥсь татын, тонэ ӧте». 29 Кылэм бераз ик ӝогак султӥз но Со доры мынӥз. 30 Иисус гуртэ уг на пыры вал, Марфалэн пумитам интыяз ик сылэ вал. 31 Коркан Марияез буйгатыса улэм иудейёс адӟизы, кызьы Мария ӝогак султыса потӥз. Соос со бӧрсьы мынӥзы, малпазы, со шайгу дуре бӧрдыны мынӥз шуыса. 32 Нош Мария Иисус доры лыктӥз, Сое адӟем бераз пыдесъяськыса шуиз: «Кузё-Инмаре! Тон татын луысалыд ке, мынам братэ ӧй кулысал». 33 Иисус солэсь но соин ӵош лыктэм иудейёслэсь бӧрдыса улэмзэс адӟыса, Ачиз но ӝоже усиз, пушкыз тырыса шуиз: 34 «Кытчы тӥ сое понӥды?» Солы шуизы: «Кузё-Инмар! Мын но учкы». 35 Иисуслэн синкылиосыз потӥзы. 36 Соку иудейёс вераськизы: «Учкы ай, макем Со сое яратэ вылэм!» 37 Соос пӧлысь куд-огез шуизы: «Та – синтэмлэсь синзэ усьтӥсь, Лазарь но медаз кулы вал шуыса, лэсьтыны ӧз быгаты-а?» 38 Иисус, нош ик пушкыз тырыса, шайгу доры лыктӥз. Со пещера вал, со азьын из кыллиз. 39 Иисус шуиз: «Басьтэлэ изэз». Кулэм муртлэн сузэрез Марфа Солы шуиз: «Кузё-Инмаре! Зыныз потэ ини, ньыль нунал уго ини, кызьы со шайгуын кылле». 40 Иисус солы шуиз: «Ӧй вера-а Мон тыныд, оскид ке, Инмарлэсь пиштӥсь данлыксэ адӟод шуыса?» 41 Кулэм мурт кыллён пещера азьысь изэз кымалтӥзы. Иисус, синъёссэ инме ӝутыса, шуиз: «Атае! Монэ кылэмед понна Тыныд тау карисько. 42 Мон тодӥсько, Тон Монэ котьку но кылод шуыса; нош тае верай татын сылӥсь калык понна, мед оскозы, Тон Монэ ыстӥд шуыса». 43 Тае верам бераз Со бадӟым куараен вазиськиз: «Лазарь! Пот отысь». 44 Кулэм мурт потӥз, китӥз но, пыдтӥз но кулэм мурт ватон шобырен бинямын, ымнырыз кышетэн думемын вал. Иисус соослы шуиз: «Пертчылэ сое, мед мыноз». 45 Соку Мария доры лыктэм иудейёс пӧлысь тросэз, Иисуслэсь мар лэсьтэмзэ адӟыса, Солы оскыны кутскизы. 46 Нош соос пӧлысь куд-огез фарисейёс доры мыныса веразы, мар лэсьтӥз Иисус. 47 Соку архиерейёс фарисейёсын ӵош кенеш люкаса шуизы: «Асьмелы мар кароно? Та Адями трос паймымон ужъёс лэсьтэ. 48 Сое озьы гинэ кельтӥмы ке, ваньмыз Солы оскыны кутскозы, – соку Рим адямиос лыктозы но интымес но, калыкмес но киултозы». 49 Нош соос пӧлысь одӥгез, Каиафа, со арлы архиерей луэм мурт, соослы шуиз: «Тӥ номыр но уд тодӥське, 50 уд но малпаське, быдэс калык бырытозь, асьмелы умойгес луоз, адямиос понна одӥг мурт кулӥз ке». 51 Со ас малпанзэ ӧз вера, но со арлы архиерей луэменыз Инмарлэн сётэм дэлетэныз азьпалзэ тодытыса вераз, Иисус калыкез утён понна кулоз шуыса. 52 Калык понна гинэ ӧвӧл, пазьгиськем Инмар нылпиосты но огазе люкан понна Со кулоз. 53 Та нуналысен Сое виыны кариськизы. 54 Соин ик Иисус иудейёс пӧлтӥ шара ӧз ветлы ини. Со отысь кыр дунне вӧзысь шаере кошкиз, Ефраим шуон городэ. Отын Со Аслаз дышетскисьёсыныз улӥз. 55 Матэ вуиз ини иудейёслэн Пасхазы. Пасха азьын чылкытатскон понна тросэз Иерусалиме лыктӥзы. 56 Соос Иисусэз утчазы, храмын сылыкузы, ог-огзылы шуизы: «Кызьы тӥ малпаськоды? Уз лыкты-а Со празднике?» 57 Архиерейёс фарисейёсын ӵош косон сётӥзы: Солэсь кытын луонзэ кин ке тодӥз ке, мед ялоз – Сое кутыны луон вылысь.
1 Пасхалэсь куать нунал азьло Иисус Вифание лыктӥз, отын Солэн кулэмысь улӟытыса султытэм муртэз Лазарь улӥз. 2 Солы отын ӝытан дасязы. Марфа юрттӥськыса улӥз, нош Лазарь Соин валче куноос пӧлын пукиз. 3 Мария, фунт мында нардлэсь чылкыт дуно мирозэ басьтыса, Иисуслэсь пыдзэ зыраз. Солэсь пыдъёссэ йырсиосыныз ӵушылӥз; быдэс корка пушказы миролэн ческыт зыныз лӧсъяськиз. 4 Соку Искариот Симон пи Иуда, Солэн дышетскисьёсыз пӧлысь одӥгез, Сое вузаса сётоно мурт, шуиз: 5 «Малы та мироез куинь сю динариен вузантэмез но кураськисьёслы сётъянтэмез вал?» 6 Тае со кураськисьёс сярысь сюлмаськеменыз ӧз вера, уго со ачиз лушкаськись вал: солэн бордаз коньдон ящикез вал, – нуллӥз, мар отчы лэзьылӥзы. 7 Нош Иисус шуиз: «Кельтэ сое; Монэ ватон нуналлы со тае возиз. 8 Кураськисьёс ялан тӥ котырын уго, нош Мон ялан тӥледын огазьын ӧвӧл». 9 Иудейёс пӧлысь тросэз тодӥзы, Со отын шуыса, но Иисусэз адӟон понна гинэ ӧвӧл, кулэмысь улӟытыса султытэм Лазарез но адӟон понна лыктӥзы. 10 Архиерейёс Лазарез но виыны вераськизы, 11 уго иудейёс пӧлысь тросэз соин сэрен лыктӥзы но Иисуслы оскыны кутскизы. 12 Мукет нуналаз празднике лыктэм трос адямиос Иисус Иерусалиме лыктэ шуыса кылӥзы но, 13 пальма вайёс кутыса, Солэн пумитаз потыса черекъязы: «Осанна! Кузё-Инмарлэн нимыз понна лыктӥсь Израильлэн Эксэез дано!» 14 Нош Иисус, пинал ишакез шедьтыса, со вылэ пуксиз, кызьы гожтэмын: 15 «Сӥон ныл, эн кышка! Тани тынад Эксэед, ишакпи вылэ пуксьыса, лыктоз». 16 Солэн дышетскисьёсыз нырысь тае ӧз валалэ, нош Иисус данэ потэм бере, соку Со сярысь тазьы гожтӥськемын вал шуыса, но мар Солы лэсьтӥзы, тодазы вайизы. 17 Соин огазьын луэм калык шара ивортӥз, Со Лазарез шайгуысь ӧтьыса поттӥз, сое кулэмысь улӟытыса султытӥз шуыса. 18 Солэсь та паймымон ужез лэсьтэмзэ кылыса уго, калык Сое тазьы пумитаз. 19 Нош фарисейёс куспазы вераськизы: «Адӟиськоды-а, номыр но карыса уд вуиське? Быдэс дунне Со сьӧры мынэ». 20 Праздник дыръя йыбырттыны лыктэмъёс пӧлын кӧня ке эллинъёс но вал. 21 Галилеяысь, Вифсаида карысь потэм Филипп доры лыктыса, соос тазьы шуыса куризы: «Кузё! Милям Иисусэз адӟеммы потэ». 22 Филипп мынӥз но Андрейлы вераз, нош собере Андреен Филипп Иисуслы веразы. 23 Иисус соослы ответ сётыса шуиз: «Адями Пилы данэ потыны час вуиз. 24 Зэм ик, зэм ик тӥледлы верасько: чабей кидыс му вылэ усьыса ӧз ке кулы, соку огназ кыле; нош кулэ ке, соку трос емыш вае. 25 Аслэсьтыз лулзэ яратӥсь мурт быдтоз сое; нош та дуннеын аслэсьтыз лулзэ адӟемпотостэм карись мурт быронтэм улонлы сое утёз. 26 Кин Мыным ужа, Мон сьӧры мед мыноз; кытын Мон, отын ик Мынам медое но луоз; кин Мыным ужа, сое Мынам Атае сӥлы кароз. 27 Табере Мынам лулы бугырскиз; мар Мыным верано? Атае! Мозмыты Монэ та часлэсь! Но Мон та час понна ик лыктӥ уго. 28 Атае! Аслэсьтыд нимдэ данъя». Соку Инмысь куара вуиз: «Данъяй ни, но эшшо но данъяло на». 29 Татын сылӥсьёс но та куараез кылэм калык шуизы: «Та гудыри». Нош мукетъёсыз шуизы: «Солы Кылчин вераз». 30 Та пумысен Иисус шуиз: «Та куара Мон понна ӧй вал, калык понна вал. 31 Туннэ та дуннелы суд вуиз; табере та дуннелэн эксэез педло пала улляса лэземын луоз. 32 Нош куке Мон музъем вылысь ӝутэмын луо, ваньзэс Ас бордам кыско». 33 Тае Со кыӵе кулонэн кулонзэ мед тодозы шуыса вераз. 34 Калык Солы ответ сётӥз: «Ми законысь кылӥмы, Христос пумтэм дауръёс улэ шуыса; нош Тон малы Адями Пилы ӝутӥськемын луыны кулэ шуыса вераськод? Кин Со Адями Пи?» 35 Соку Иисус соослы шуиз: «Эшшо ӧжыт дырлы тӥ бордын югыт вань на; тӥледыз пеймыт медаз ӝокаты шуыса, ветлэ югыт вань на дыръя; пеймытын ветлӥсь уг тоды уго кытчы мынэмзэ. 36 Югыт тӥледын дыръя югытлы оскелэ, югытлэн нылпиосыз мед луоды». Тае верам бераз Иисус кошкиз, соослэсь ватӥськиз. 37 Соос азьын сыӵе трос паймымон ужъёс лэсьтӥз, нош соос Солы ӧз оске. 38 Исаия пророклэн верам кылыз мед быдэсмоз: «Кузё-Инмаре! Милям верам кылмылы кин оскиз? Кузё-Инмарлэн кужымез кинлы усьтӥськиз?» 39 Малы соос оскыны ӧз быгатэ, со пумысен эшшо Исаия вераз вал: 40 «Та калык синъёссэс адӟисьтэм кариз, сюлэмзэс измытӥз; синмынызы медаз адӟе, сюлмынызы медаз валалэ, Мон мед бурмытом шуыса, Мон пала уз но берытске». 41 Исаия тае вераз Солэсь пиштӥсь данлыксэ адӟем бераз; тае со Иисус сярысь вераз. 42 Кузёйыръёс пӧлысь но тросэз Солы оскыны кутскизы, но фарисейёсын сэрен, сӥнагогалэсь люкемын медаз луэ шуыса, оскемзэс ватыса возизы. 43 Инмар дорысь потӥсь данэз сярысь, адямиослэсь данъямзэс юнгес яратӥзы уго. 44 Нош Иисус бадӟым куаразэ поттыса шуиз: «Мыным оскись Мыным уг оскы, со Монэ Ыстӥсьлы оске. 45 Монэ адӟись, Монэ Ыстӥсез адӟе. 46 Мон – югыт сётӥсь, – нокин но Мыным оскись пеймытэ медаз кыльы шуыса, дуннее лыктӥ. 47 Кин Мынэсьтым кылъёсме кылӥз но ӧз ке оскы, Мон сое судить уг кариськы: уго Мон дуннеез судить карыны ӧй лыкты, дуннеез утьыны Мон лыктӥ. 48 Монэ кулэтэм карись но Мынэсьтым кылъёсме кабыл басьтӥсьтэмлэн аслаз судьяез вань: Мынам верам кылы берпум нуналэ сое судить кароз. 49 Уго Мон Аслэсьтым ӧй вера, – Монэ ыстэм Атае, Со Мыным курон-косон сётӥз, мар шуыны но, мар вераны но. 50 Мон тодӥсько, Солэн курон-косонэз быронтэм улон луэ шуыса. Озьыен, Мон мар верасько, верасько сое, мае Мыным Атае вераны косӥз».
1 Пасха праздник азьын Иисус, дуннеысь Атаез доры кошкон часэзлэсь вуэмзэ тодыса, та дуннеысь Аслэсьтызъёссэ яратыса, пумозяз соосты яратэмзэ уж вылын возьматӥз. 2 Ӝытан дыръя, куке диавол Искариот Симон пи Иудалы Сое кутыса сётонэз сюлмаз понэм вылэм ини, 3 Иисус, Атаезлэсь Солы ваньзэ кияз сётэмзэ, Аслэсьтыз Инмар дорысь потэмзэ но Инмар доры кошкемзэ но тодыса, 4 ӝытанысен султӥз, дӥсянзэ кылиз но, ӵушкон басьтыса, куссэ думиз. 5 Собере мисьтӥськонэ ву лэзиз но дышетскисьёсызлэсь пыдъёссэс миськыны, куссэ думем ӵушконэн ӵушылыны кутскиз. 6 Симон Петр доры лыктӥз, нош Петр Солы шуиз: «Кузё-Инмаре! Тон-а мынэсьтым пыдъёсме миськод?» 7 Иисус солы ответ сётыса шуиз: «Мар Мон лэсьтӥсько, али тон уд тодӥськы, нош берло валалод». 8 Петр Солы шуиз: «Даурад но пыдъёсме уд миськы». Иисус солы ответ сётӥз: «Ӧй ке миськы, озьыен, тынад Монэн артэ интыед ӧвӧл». 9 Симон Петр Солы шуиз: «Кузё-Инмаре! Пыдъёсме гинэ ӧвӧл, суйёсме но, йырме но миськы». 10 Иисус солы шуиз: «Чылкыт муртлэсь пыдзэ гинэ миськыны кулэ, уго солэн мугорыз чылкыт; тӥ чылкытэсь, но ваньды ӧвӧл». 11 Со тодэ вал Аслэсьтыз вузаса сётӥсьсэ, соин ик шуиз: «Ваньды ик тӥ чылкыт ӧвӧл». 12 Пыдъёссэс миськем бераз дӥсяськиз но, нош ик Ас интыяз лыктыса, соослы шуиз: «Тодӥськоды-а, мар Мон тӥледлы лэсьтӥ? 13 Тӥ Монэ Дышетӥсь, Кузё-Инмар шуыса нимаськоды, – шонер вераськоды, зэмзэ но, Мон со. 14 Озьыен, Мон, Кузё-Инмар, Дышетӥсь, тӥлесьтыд пыддэс миськи ке, тӥ но ог-огдылэсь пыддэс миськыны кулэ: 15 Мон тӥледлы адӟем карон возьматӥ, Мон мар тӥледлы кари, тӥ но сое ик мед кароды шуыса. 16 Зэм ик, зэм ик тӥледлы верасько: ляльчи ас кузёезлэсь бадӟым ӧвӧл, ыстэм мурт но сое ыстӥсьлэсь бадӟым ӧвӧл. 17 Тае тодӥськоды ке, сое быдэсъяськоды ке, тӥ шудоесь. 18 Ваньды сярысь уг вераськы: Мон тодӥсько, кудъёссэ бырйи. Нош Священной Гожтэмысь веран мед быдэсмоз: ”Монэн валче нянь сиись Мон вылэ пыдтышсэ ӝутӥз”. 19 Али, со быдэсмемлэсь азьвыл, тӥледлы верасько: со быдэсмем бере Со – Мон шуыса, тӥ мед оскоды. 20 Зэм ик, зэм ик тӥледлы верасько: Мынэсьтым лэзем муртме кабыл басьтӥсь – Монэ кабыл басьтэ; нош Монэ кабыл басьтӥсь мурт Монэ Ыстӥсез кабыл басьтэ». 21 Иисус тае вераз но, духеныз бугырскыса, шара ивортӥз: «Зэм ик, зэм ик тӥледлы верасько: тӥ пӧлысь одӥгез Монэ вузаса сётоз». 22 Кин сярысь Солэсь верамзэ валатэк, дышетскисьёсыз соку огзы шоры огзы учкылӥзы. 23 Иисуслэн одӥгез, яратоноез дышетскисез, Солэн вӧзаз пукиз. 24 Симон Петр солы тодмет лэсьтыса шуиз: ”Юа, кин со, кин сярысь Со вера?” 25 Со, Иисуслэн гадь вылаз мыкыртӥськыса, Солы шуиз: «Кузё-Инмаре! Кин со?» 26 Иисус ответ сётӥз: «Кинлы Мон та нянь тӥялтэтэз веттыса сёто, со ачиз». Тӥялтэтсэ веттыса, Искариот Симон пи Иудалы сётӥз. 27 Та тӥялтэт бере Иуда пушкы шайтан пыриз. Соку Иисус солы шуиз: «Мар лэсьтӥськод ке, лэсьты ӝоггес». 28 Марлы тае Иисус солы верам, сиськисьёс пӧлысь нокин но ӧз вала. 29 Иудалэн кияз коньдон ящик возиське бере, куд-огъёсыз Иисус сое праздниклы асьмелы мар кулэ басьтыны яке кураськисьёслы мар ке но сётыны косэ, дыр, шуыса малпаллям. 30 Иуда, со тӥялтэтэз басьтыса, соку ик отысь потӥз. Уй вал ини. 31 Иуда потэм бере Иисус шуиз: «Туннэ Адями Пи данэ потӥз, Со пыр Инмар данэ потӥз. 32 Со пыр Инмар данэ потӥз ке, Инмар но Сое Ачиз пыр данэ поттоз, ӝоген Сое данэ поттоз. 33 Нылпиос! Мыным тӥледын валче кема улоно ӧвӧл ни. Монэ утчалоды, кызьы Мон иудейёслы верай ни: ”кытчы Мон мынӥсько, тӥляд отчы лыктэмды уз луы”, али но тӥледлы озьы ик верасько. 34 Тӥледлы выль курон-косон сётӥсько: огдэс огды яратэ; кызьы Мон тӥледыз яратӥ, озьы ик тӥ но огдэс огды мед яратоды. 35 Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы». 36 Симон Петр Солы шуиз: «Кузё-Инмаре! Кытчы Тон мынӥськод?» Иисус солы ответ сётӥз: «Кытчы Мон мынӥсько, тынад али Мон сьӧры мынэмед уг луы, нош бӧрысь Мон сьӧры мынод». 37 Петр Солы шуиз: «Кузё-Инмаре! Малы али мынам Тон сьӧры мынэме уг луы? Тон понна мон аслэсьтым лулме сёто». 38 Иисус солы ответ сётӥз: «Аслэсьтыд лулдэ Мон понна сётод? Зэм ик, зэм ик тыныд верасько: атас чортытозь, куинь пол Мон бордысь куштӥськод».
1 «Тӥляд сюлэмды ӝоже медаз усьы; Инмарлы оскыса, Мыным оскыса улэ. 2 Мынам Атаелэн юртаз трос улон интыез; озьы ке ӧй луысал, Мон тӥледлы шуысал: ”Мон тӥледлы инты дасяны мынӥсько”. 3 Нош мыныса тӥледлы инты дасяй ке, берен лыкто но тӥледыз Ас дорам басьто, – кытын Мон, тӥ но отын мед луоды. 4 Нош Мон кытчы мынӥсько, тӥ тодӥськоды, сюресэз но тодӥськоды». 5 Фома Солы шуиз: «Кузё-Инмаре! Ум тодӥське, кытчы мынӥськод, сюресэз но кызьы тодыны быгатӥськомы?» 6 Иисус солы шуиз: «Мон – сюрес но, зэмлык но, улон но; Мон пыр сяна нокин но Атай доры уг лыкты. 7 Тӥ Монэ тодысалды ке, Мынэсьтым Атайме но тодысалды; та дырысен Сое тодӥськоды, Сое адӟиды но». 8 Филипп Солы шуиз: «Кузё-Инмаре! Милемлы Атаез возьматы, со милемлы тырмысал». 9 Иисус солы шуиз: «Сомында дыр ӵоже ни Мон тӥледын, нош тон Монэ уд тодӥськы-а, Филипп? Монэ адӟись мурт Атаез адӟиз. Кызьы тон озьы шуиськод: ”Милемлы Атаез возьматы?” 10 Тон уд оскиськы шат, Мон Атай бордын, нош Атай Мон бордын шуыса? Тӥледлы та верам кылъёсме Мон Ас бордысьтым уг вераськы; Мон бордын улӥсь Атай, Со ужъёсыз лэсьтэ. 11 Оске Мыным, Мон Атай бордын, нош Атай Мон бордын шуыса. Озьы ке ӧвӧл, ужъёсыя Мыным оске. 12 Зэм ик, зэм ик тӥледлы верасько: ужъёсты, кудъёссэ Мон лэсьтӥсько, Мыным оскись мурт но со ужъёсты лэсьтоз, соослэсь но бадӟымзэгес ужъёсты лэсьтоз, малы ке шуоно Мон Аслам Атае доры мынӥсько. 13 Мынам нимыным Атайлэсь мар гинэ уд куре, ваньзэ сое быдэсто. Озьы, Пи пыр Атай данэ мед потоз. 14 Мынам нимыным мар гинэ уд куре, ваньзэ Мон быдэсто. 15 Монэ яратӥськоды ке, Мынэсьтым курон-косонъёсме быдэсъялэ. 16 Мон Атаелэсь куро но, тӥледлы мукет Буйгатӥсез сётоз, Со пумтэм дауръёс ӵоже тӥледын валче улоз, – 17 Зэмлыклэсь Духсэ, Кудзэ дунне кабыл басьтыны уг быгаты, малы ке шуоно Сое уг адӟы, Сое уг но тоды; нош тӥ Сое тодӥськоды, уго Со тӥледын улэ, тӥ бордын ик улоз но. 18 Мон тӥледыз сирота уг кельты, тӥ доры лыкто. 19 Кема ик ӧвӧл ни, дунне Монэ уз ни адӟы, нош тӥ Монэ адӟоды, уго Мон улӥсько, тӥ но улоды. 20 Со нуналэ тӥ тододы, Мон Аслам Атае бордын, тӥ Мон бордын, Мон тӥ бордын шуыса. 21 Кин Мынэсьтым курон-косонъёсме кабыл басьтэ но соосты быдэсъя ке, со Монэ яратэ. Нош кин Монэ яратэ, сое Мынам Атае но яратоз. Мон сое ярато но солы Ачим возьматско». 22 Искариот луисьтэмез Иуда Солы шуиз: «Кузё-Инмаре! Мар та, дуннелы ӧвӧл, милемлы Тон Астэ возьматыны медӥськод?» 23 Иисус солы ответ сётыса шуиз: «Кин Монэ яратэ, со Мынэсьтым кылме быдэсъя; сое Мынам Атае яратоз. Ми со доры лыктомы но со доры улыны интыяськомы. 24 Монэ яратӥсьтэм мурт Мынэсьтым кылме уг быдэсъя. Кыл, кудзэ тӥ кылӥськоды, Мынам ӧвӧл, со Монэ ыстӥсь Атаелэн. 25 Тае Мон тӥледлы валче улыкум верай. 26 Нош Буйгатӥсь, Святой Дух, Кудзэ Атай Мынам нимыным ыстоз, тӥледыз котьмарлы но дышетоз. Мае Мон тӥледлы верай, ваньзэ тодады вайытоз. 27 Тӥледлы каньыллык кельтӥсько, Аслэсьтым каньыллыкме тӥледлы сётӥсько: Мон тӥледлы озьы уг сётӥськы, кызьы дунне сётэ. Тӥляд сюлэмды ӝоже медаз усьы, медаз но курда. 28 Тӥ кылӥды, мар Мон тӥледлы верай: ”Тӥ дорысь кошкисько, но тӥ доры лыкто”. Тӥ Монэ яратысалды ке, тӥ шумпотысалды Мынам верамелы: ”Мынӥсько Атае доры”; Мынам Атае Мынэсьтым быдӟымгес уго. 29 Быдэсмемезлэсь азьвыл ик тае Мон тӥледлы верай: та быдэсмиз ке, тӥ мед оскоды. 30 Кема ӧвӧл ни Мыным тӥледын вераськыны, уго та дуннелэн эксэез лыктэ. Но солэн Монэн кузёяськыны кужымез ӧвӧл. 31 Дунне мед тодоз, Мон Атайме яратӥсько шуыса, кызьы куриз-косӥз Монэ Атае, озьы ик лэсьтӥсько: султэлэ, татысь кошкоме».
1 «Мон – зэмос Виноградпуд, нош Мынам Атае – Виноград Будэтӥсь. 2 Мынэсьтым котькудзэ емыш сётӥсьтэм вайме Со ӵогыса куштэ; эшшо но тросгес емыш мед сётоз шуыса, котькуд емыш вайись ваез Со сузя-вандылэ. 3 Тӥ кыл пыр сузямын ини, кудзэ Мон тӥледлы тодытӥ. 4 Мон бордын улэлэ, нош Мон тӥ бордын уло. Кызьы улвай пуд бордын ӧз ке улы, ас понназ аслаз емыш ваемез уз луы, тӥ но озьы ик, Мон бордын ӧд ке улэ. 5 Мон – Пуд, тӥ – вайёсыз; кин Монэн улэ, Мон но со бордын улӥсько, со трос емыш вае; Монтэк номыр но лэсьтэмды уг луы уго. 6 Кин ке Мон бордын ӧз улы, со улвай кадь ик педло куштэмын луоз, отын со куасьмоз; нош сыӵе вайёсты бичало но тыл пӧлы куштыса суто. 7 Мон бордын улӥды ке, Мынам кылъёсы тӥ бордын улӥзы ке, соку тӥ, мае куремды потэ, курелэ, – тӥледлы сётэмын луоз. 8 Тӥ трос емыш вайиды ке, Мынам дышетскисьёсы луиды ке, соин Мынам Атае данъямын луоз. 9 Кызьы Монэ Атае яратӥз, Мон но озьы ик тӥледыз яратӥ; Мынам яратонэным улэлэ. 10 Мынэсьтым курон-косонъёсме быдэсъяды ке, Мынам яратонам улоды. Уго Мон но Аслам Атаелэсь курон-косонъёссэ быдэсъяй но соин ик Солэн яратоназ улӥсько. 11 Тае Мон тӥледлы соин верай: Мынам шумпотонэ тӥ бордын мед улоз, тӥляд шумпотонды пачыласа мед улоз. 12 Яратэлэ огдэс огды, кызьы Мон тӥледыз яратӥ, – та луэ Мынам курон-косонэ. 13 Кин аслэсьтыз лулзэ аслаз эшъёсыз понна сётӥз ке, солэсь но бадӟымез яратон ӧвӧл ни. 14 Мынэсьтым курон-косонъёсме быдэсъяськоды ке, тӥ Мынам эшъёсы луиськоды. 15 Мон тӥледыз ляльчи шуыса уг ни нимаськы, уго ляльчи уг тоды, мар лэсьтэ солэн кузёез. Мон тӥледыз эшъёс шуыса нимай, малы ке шуоно тӥледлы ваньзэ верай, мае Аслам Атаелэсь кылӥ-тодӥ. 16 Тӥ Монэ ӧд быръе, Мон тӥледыз бырйи: тӥ мед мыноды но емыш мед ваёды, тӥляд емышты бырисьтэм мед луоз. Соку Мынам нимыным мае гинэ Атаелэсь уд куре, Со тӥледлы ваньзэ сётоз. 17 Тани таӵе Мынам тӥледлы курон-косонэ: яратэлэ огдэс огды. 18 Дунне тӥледыз адӟемпотостэм каре ке, тодэлэ: тӥлесьтыд азьло Монэ адӟемпотостэм кариз. 19 Тӥ та дуннелэн адямиосыз луысалды ке, дунне тӥледыз аслэсьтыззэ кадь яратысал. Тӥ дуннелэн ӧвӧл бере, нош Мон тӥледыз дуннеысь бырйи, соин ик дунне тӥледыз адӟемпотостэм каре. 20 Тодады возе Мынэсьтым тӥледлы верам кылме: ляльчи аслаз кузёезлэсь бадӟым ӧвӧл. Монэ уллязы бере, тӥледыз но уллялозы; Мынэсьтым кылме санэ понӥзы ке, тӥлесьтыдзэ но санэ понозы. 21 Ваньзэ тае тӥледлы Мынам нимылы луыса лэсьтозы, малы ке шуоно соос Монэ Ыстӥсез уг тодо. 22 Мон ӧй ке лыктысал но соослы ӧй ке верасал, соку соослэн сьӧлыксы ӧй луысал; нош табере соослэн сьӧлыкенызы шонере потэмзы уг ни луы. 23 Монэ адӟемпотостэм карись Мынэсьтым Атайме но адӟемпотостэм каре. 24 Соос пӧлын Мон ӧй ке лэсьтысал сыӵе ужъёсты, кудъёссэ нокин но мукетыз Мон дырозь ӧз лэсьты, сьӧлыксы ӧй луысал; нош табере соос Мынэсьтым вань ужъёсме адӟизы, озьы ке но Монэ но, Мынэсьтым Атайме но адӟемпотостэм каризы. 25 Соослэн законазы гожтэм кыл: ”Монэ чик мугтэк, юнме шорысь синазькыль каризы” мед быдэсмоз. 26 Нош Буйгатӥсь лыктэм бере, Кудзэ Мон тӥледлы Атае дорысь ысто, Атай дорысь потӥсь Зэмлыклэн Духез – Со Мон сярысь шара ивортоз. 27 Тӥ но Мон сярысь шара ивортоды, малы ке шуоно кутсконысеныз ик тӥ Монэн огазьын вал».
1 «Тае Мон тӥледлы визь сынаськонэ медад сюре шуыса верай. 2 Тӥледыз сӥнагогаосысь уллялозы. Вуэ сыӵе дыр, куке котькудӥз тӥледыз виылӥсь мурт со Инмарлы служить каре шуыса малпалоз. 3 Тазьы лэсьтозы соин: Атаез но, Монэ но ӧз тодэ уго. 4 Мон тае тӥледлы соин верай, куке со дыр вуиз, тодады мед ваёды, Мон со сярысь тӥледлы верай вал шуыса. Тае кутсконаз ӧй вера соин, – Мон тӥледын валче вал. 5 Табере Монэ Ыстӥсь доры мынӥсько, нош тӥ пӧлысь нокин но Мынэсьтым уг юа: ”Кытчы мынӥськод?” 6 Тае Мон верай но, куректонэн пачылмиз тӥляд сюлэмды. 7 Но Мон тӥледлы зэмзэ верасько: Мон мынӥ ке, тӥледлы умойгес луоз. Мон ӧй ке мыны, Буйгатӥсь тӥ доры уз лыкты уго, нош мынӥ ке, Сое тӥ доры ысто. 8 Со лыктӥз ке, дуннелы сьӧлык сярысь, шонерлык сярысь, суд сярысь шара вералоз. 9 Сьӧлыксы сярысь вералоз, уго Мыным уг оско. 10 Шонерлык сярысь вералоз, малы ке шуоно Мон Атае доры мынӥсько, табере Монэ уд ни адӟе. 11 Суд сярысь вералоз, уго та дуннелэн эксэез судэ сётэмын. 12 Трос на тӥледлы веранэ, нош тӥ ваньзэ тае али тэрытыны уд быгатӥське. 13 Нош Зэмлыклэн Духез лыктэм бере соку тӥледыз Со котькыӵе но зэмлыклы дышетоз. Со Аслэсьтыз уз вера, вералоз, мае кылӥз, азьпал адӟон сярысь тӥледлы ивортоз. 14 Со Монэ данэ поттоз, малы ке шуоно Мон дорысь басьтоз но тӥледлы ивортоз. 15 Ваньмыз, маиз Атаелэн вань, – со Мынам. Соин Мон верай: Мон дорысь басьтоз но тӥледлы ивортоз. 16 Ӝоген тӥ Монэ уд ни адӟе, нош ӧжыт улыса, нош ик Монэ адӟоды; Мон Атай доры мынӥсько». 17 Соку дышетскисьёсыз ог-огзылы шуизы: «Мар Со асьмелы вера: ”Ӝоген Монэ уд адӟе, нош ӧжыт улыса, нош ик Монэ адӟоды”, ”Мон Атай доры мынӥсько”?» 18 Озьы, соос шуизы: «Мар Со вера: ”Ӝоген”? Ум валаське мар верамзэ». 19 Солэсь юаны ӧдъямзэс шӧдыса, Иисус соослы шуиз: «Ог-огдылэсь уд юаське-а Мынэсьтым верамме: ”Ӝоген Монэ уд ни адӟе, нош ӧжыт улыса, нош ик Монэ адӟоды”? 20 Зэм ик, зэм ик тӥледлы верасько: тӥ бӧрдоды, викышъялоды, нош дунне шумпотоз. Тӥ ӝоже усёды, нош тӥляд ӝожомонды шумпотонлы луоз. 21 Нылпи вайыкуз, кышномурт курадӟоно луэ, малы ке шуоно солэн часэз вуиз. Нош нылпи ваем бераз шумпотэменыз курадӟемзэ тодаз уг ни вайы, малы ке шуоно дунне вылэ адями вордӥськиз. 22 Озьы ик тӥляд но али ӝожомон дырды; но Мон тӥледыз нош ик адӟо. Соку тӥляд сюлэмды шумпотоз, тӥлесьтыд шумпотондэс нокин но уз ни басьты. 23 Со нуналэ тӥ Мынэсьтым номыр сярысь но уд юалэ. Зэм ик, зэм ик тӥледлы верасько: Мынам нимыным мае гинэ Атайлэсь уд куре, тӥледлы сётоз. 24 Та нуналозь Мынам нимыным тӥ номыр но ӧд на куре; тӥляд шумпотонды тырмыт луон понна курелэ, басьтоды. 25 Та дырозь Мон тӥледлы мадёнъёс пыр верай; но вуоз дыр, куке мадёнъёс пыр тӥледлы уг ни вера, шонерак Атай сярысь иворто. 26 Со нуналэ Мынам нимыным курыны быгатоды. Тӥледлы верасько: соку тӥ понна Атайлэсь куроно уг луы. 27 Уго Ачиз Атай тӥледыз яратэ, малы ке шуоно тӥ Монэ яратӥды но Мон Инмар бордысь потӥ шуыса оскиды. 28 Мон, Атай дорысь потыса, дуннее лыктӥ; табере нош ик дуннеез кельтӥсько но Атай доры мынӥсько». 29 Дышетскисьёсыз Иисуслы шуизы: «Тани Тон табере шонерак вераськод, нокыӵе но мадёнъёсын уд ни вераськы. 30 Табере ми адӟиськомы, Тон ваньзэ тодӥськод, Тыныд кулэ ӧвӧл ни, кин ке но Тынэсьтыд мед юалоз шуыса; соин ик оскиськомы, Тон Инмар бордысь потӥд шуыса». 31 Иисус соослы ответ сётӥз: «Табере оскиськоды-а? 32 Тани, час вуэ, вуиз но ини, – тӥ ваньды пӧртэм палъёсы пазьгиськоды, Монэ огнаме кельтоды. Нош Мон огнам ӧвӧл, – Монэн ӵош Атай. 33 Мон тӥледлы тае верай, Мон бордын каньыллыкты мед луоз шуыса. Дунне вылын куректон-кайгуды луоз, но юнматске: Мон дуннеез ворми».
1 Та кылъёс бере Иисус синъёссэ Ин пала ӝутыса шуиз: «Атае! Часэ вуиз: Аслэсьтыд Пидэ данэ потты. Тынад Пиед но Тонэ данэ мед поттоз, 2 Тон Солы котькыӵе лулмугорез Солэн киулаз сётӥд ук. Ваньмызлы, мар Тон Солы сётӥд, Со быронтэм улон мед сётоз. 3 Та быронтэм улон луэ: соос мед тодозы Тонэ, одӥг гинэ зэм Инмарез, но Тонэн ыстэм Иисус Христосэз. 4 Мон Тонэ музъем вылысен дано кари, Тынэсьтыд Мыным лэсьтыны сётэм уждэ быдэстӥ. 5 Атай, Тон Монэ табере Ас данэныд данъя, кудӥз дунне кылдэмлэсь азьвыл ик Мынам Тонэн огазьын дыръям вал. 6 Тынэсьтыд нимдэ Мон адямиослы усьтӥ, соосты Тон дуннеысь Мыным сётӥд. Соос Тынадъёс вал, но Тон соосты Мыным сётӥд. Соос Тынэсьтыд кылдэ утизы. 7 Ваньзэ, мае Тон Мыным сётӥд, ваньмыз со Тынад луэ шуыса, табере соос тодӥзы. 8 Уго Тынэсьтыд Мыным сётэм кылъёстэ Мон соослы сётӥ, нош соос соосты кабыл басьтӥзы. Зэм ик валазы, Мон Тон дорысь потӥ но Тон Монэ ыстӥд шуыса, оскизы. 9 Мон соос понна вӧсяськисько: дунне сярысь уг вӧсяськиськы, но соос понна гинэ, кудъёссэ Тон Мыным сётӥд – соос Тынадъёс уго. 10 Ваньмыз, маи Мынам вань, со Тынад луэ, Тынад маид вань – со Мынам. Мон соос пыр данэ потӥ. 11 Мон дуннеын ӧвӧл ни, соос дуннеын на, нош Мон Тон доры мынӥсько. Святой Атае! Аслад нимыныд уть Мынам киулам сётэм муртъёсты, – соос но Асьмеос кадь ик одӥг огъя мед луозы. 12 Соосын дунне вылын огазьын улон дыръям Тынад нимыныд Мон соосты, Тынэсьтыд Мыным сётэм муртъёстэ, утьыса вози. Мон соосты ути, быронлэн пиез сяна, соос пӧлысь нокудзы но ӧз быре. Священной Гожтэмын верам тазьы быдэсмыны кулэ вал. 13 Табере Мон Тон доры мынӥсько но тае али дуннеын улӥсьёслы верасько, соослэн но бордазы Мынам тыр шумпотонэ мед улоз шуыса. 14 Тынэсьтыд кылдэ Мон соослы верай, нош дунне соосты адӟемпотостэм кариз, уго соос но, Мон кадь ик, таизлэн дуннелэн адямиосыз ӧвӧл. 15 Соосты дуннеысь мед басьтод шуыса, Мон уг вӧсяськиськы, соосты уродлэсь мед утёд шуыса, Мон вӧсяськисько. 16 Соос таизлэн дуннелэн адямиосыз ӧвӧл, кызьы Мон но дуннелэн ӧвӧл. 17 Аслад зэмлыкеныд соосты дун-чылкыт кар: Тынад кылыд – зэмлык. 18 Кызьы Тон Монэ дуннее ыстӥд, Мон но соосты дуннее ыстӥ. 19 Соос но зэмлыкен дун-сьӧлыктэм каремын мед луозы шуыса, соос понна Мон Асме сётӥсько. 20 Соос понна гинэ уг вӧсяськиськы, Мыным вань оскисьёс понна вӧсяськисько, кудъёсыз соослэн кылзы пыр оскыны кутскизы. 21 Ваньмыз одӥг-огъя мед луозы, кызьы Тон, Атае, Мон бордын, Мон Тон бордын, соос но Асьме бордын одӥг-огъя мед луозы, – дунне мед оскоз, Тон Монэ ыстӥд шуыса. 22 Тынэсьтыд Мыным сётэм данлыктэ Мон соослы сётӥ: одӥг-огъя мед луозы, кызьы Асьмеос одӥг-огъя луиськомы. 23 Мон соос бордын, Тон Мон бордын; одӥг-огъя кариськемын мед луозы; дунне мед тодоз, Тон Монэ ыстӥд но соосты, Монэ кадь ик, яратӥд шуыса. 24 Атае! Мынам потэ, Тынад Мыным сётэмъёсыд, кытын Мон, соос но отын Монэн валче мед луозы вал шуыса. Тынэсьтыд Мыным сётэм пиштӥсь данлыкез мед адӟозы, дунне кылдэмлэсь азьвыл ик Тон Монэ яратӥд уго. 25 Шонер улӥсь Атае! Дунне Тонэ ӧз тоды, нош Мон Тонэ тодӥ; таос но, Тон Монэ ыстӥд шуыса, тодӥзы. 26 Мон соослы Тынэсьтыд нимдэ тодмо кари, эшшо но тодмогес каро на. Тынад Монэ яратонэд соос бордын но мед улоз, нош Мон соос бордын уло».
1 Тае верам бераз Иисус Аслаз дышетскисьёсыныз ӵош Кедрон ӧр сьӧры выжиз. Отын сад вал, отчы Со дышетскисьёсыныз ӵош пыриз. 2 Та интыез тодэ вал Сое вузаса сётӥсь Иуда но, ӵем дыръя Иисус Аслаз дышетскисьёсыныз отчы люкаськылӥз уго. 3 Озьы, Иуда, солдат отрядэз но архиерейёслэсь, фарисейёслэсь медооссэс басьтыса, отчы фонарьёсын, ӝуась сэрегпумъёсын, ожмаськон тӥрлыкен лыктӥз. 4 Ваньзэ Соин мар луонэз тодыса, Иисус потыса соослы шуиз: «Кинэ утчаськоды?» 5 Солы шуизы: «Иисус Назореез». Иисус соослы шуиз: «Мон со». Соосын огазьын Сое вузаса сётӥсь Иуда но сылӥз. 6 «Мон со» шуэм бераз соос, берлань чигнаса, музъем вылэ уськытскизы. 7 Нош ик соослэсь юаз: «Кинэ утчаськоды?» Соос шуизы: «Иисус Назореез». 8 Иисус шуиз: «Мон тӥледлы верай ни, Мон со шуыса. Монэ утчаськоды ке, та адямиосты лэзе, мед мынозы». 9 Мед быдэсмоз Солэн верам кылыз: «Соос пӧлысь, кудзэс Тон Мыным сётӥд, Мон нокинэ но ӧй быдты». 10 Симон Петрлэн мечез вал. Со, мечсэ поттыса, архиерейлэн ляльчиезлэсь бур пельзэ шуккыса уськытӥз; со ляльчилэн нимыз Малх вал. 11 Нош Иисус Петрлы шуиз: «Мечтэ меч тыронад пон; оло, Атаелэсь Мыным сётэм чашазэ Мон медам юы-а?» 12 Соку солдатъёс, сюрс солдатэн кивалтӥсь, иудей медоос Иисусэз кутыса думылӥзы. 13 Собере Сое нырысь ик Анна доры нуизы; со Каиафалэн варматаез вал, Каиафа со аре архиерейын пукиз. 14 Та вал самой со Каиафа, кудӥз иудейёслы визь-кенеш сётӥз, вань калык понна одӥг адями кулӥз ке, умойгес луоз шуыса. 15 Иисус бӧрсьын Симон Петрен ӵош мукетыз дышетскись мынӥз. Таиз дышетскись архиерейлы тодмо вал, со Иисусэн валче архиерейлэн азбараз пыриз. 16 Петр педлон, ӧс сьӧрын сылӥз. Собере мукетыз, архиерейлы тодмо дышетскись, потыса ӧс возьмась кышномуртлы вераз но Петрез ас сьӧраз пыртӥз. 17 Соку ӧс возьмась ляльчи кышно Петрлы шуиз: «Тон но Та Адямилэн дышетскисез ӧвӧл-а?» Со шуиз: «Ӧвӧл». 18 Кезьыт луэмысь, со вакыт ляльчиос но медоос тылскизы но шунскыса сылӥзы. Петр но соосын огазьын шунскыса сылӥз. 19 Архиерей Иисуслэсь дышетскисьёсыз сярысь, Солэн дышетонэз сярысь юаз. 20 Иисус солы ответ сётӥз: «Мон дуннелы шара верай. Мон котьку но сӥнагогаын, храмын дышетӥ, кытчы котьку но иудейёс люкасько, номыре но лушкемен ӧй вералля. 21 Мар Монэ юаськод? Юа кылзӥсьёслэсь, мар Мон соослы верай. Тӥни, соос тодо, мар Мон верай». 22 Иисус тае верам бере одӥгез матаз сылӥсь медо Иисуслэн бамаз шуккыса шуиз: «Тазьы-а Тон архиерейлы ответ сётӥськод?» 23 Иисус солы шуиз: «Мон уродзэ верай ке, шонерак вера, мар уродзэ Мон верай; нош умойзэ ке верай, малы Монэ жугиськод?» 24 Анна, Сое думылытыса, Каиафа архиерей доры келяз. 25 Симон Петр шунтӥськыса сылӥз. Соку солы шуизы: «Солэн дышетскисьёсыз пӧлысь ик тон но ӧвӧл-а?» Со куштӥськыса шуиз: «Ӧвӧл». 26 Архиерейлэн ляльчиосыз пӧлысь одӥгез, Петрлэн пельзэ ӵогыса уськытэм муртэзлэн ӵыжы-выжыез, шуиз: «Мон тонэ садысен Соин ӵош ӧй адӟы-а?» 27 Петр нош ик куштӥськиз. Со куспын ик атас чортӥз. 28 Каиафа дорысен Иисусэз претория шуон интые нуизы. Ӵукна вал. Пасха ыжпиез сиыны саптаськонтэм вылысь соос преторие ӧз пыре. 29 Пилат соос доры потыса шуиз: «Та Адямиез маин тӥ янгыше уськытӥськоды?» 30 Солы ответ сётыса, соос шуизы: «Со урод мурт ӧй ке луысал, ми Сое тон кие кутыса ӧй сётысалмы». 31 Пилат соослы шуиз: «Басьтэлэ тӥ Сое но асьтэлэн закондыя судить каре». Иудейёс солы шуизы: «Милемлы нокинэ но виыны лэземын ӧвӧл». 32 Мед быдэсмоз Иисуслэн кылыз, кудзэ Со, кыӵе кулонэн кулонзэ мед тодозы шуыса, вераз. 33 Соку Пилат нош ик преторие пыриз но, Иисусэз ӧтьыса, Солы шуиз: «Тон иудейёслэн Эксэйзы-а?» 34 Иисус солы ответ сётӥз: «Тае тон аслэсьтыд-а вераськод яке мукетъёсыз-а тыныд Мон сярысь веразы?» 35 Пилат ответ сётӥз: «Мон иудей шат? Тынад калыкед но архиерейёс Тонэ мыным кутыса сётӥзы. Мар Тон лэсьтӥд?» 36 Иисус ответ сётӥз: «Мынам Эксэйлыке та дуннелэсь ӧвӧл. Мынам Эксэйлыке та дуннелэсь луысал ке, Мынам ужась-тыршисьёсы Монэ иудейёслы сётонтэм вылысь нюръяськысалзы. Нош Мынам Эксэйлыке татысь ӧвӧл». 37 Пилат Солы шуиз: «Озьыен, Тон Эксэй?» Иисус ответ сётӥз: «Тон ук Монэ Эксэй шуиськод. Зэмлык сярысь шара ивортыны Мон вордӥськи, со понна ик дуннее лыктӥ. Котькудӥз зэмлык бордын возиськись Мынэсьтым куараме кылзӥське». 38 Пилат Солэсь юаз: «Мар со зэмлык?» Тае верам бераз Пилат, нош ик иудейёс доры потыса, шуиз: «Мон Солэсь нокыӵе но янгышсэ уг шедьтӥськы. 39 Пасха понна пытсэтысь одӥгзэ мон тӥледлы мед лэзём шуыса, вань ук тӥляд сыӵе сямды. Яралоз-а тӥледлы, иудейёслэсь Эксэйзэс лэзи ке?» 40 Соку нош ик ваньзы черекъяны кутскизы, шуизы: «Сое эн лэзь, Варавваез лэзь!». Нош Варавва йырвандӥсь мурт вал.
1 Соку Пилат Иисусэз поттыса жугыны косӥз. 2 Тёрнпулэсь йыркерттэт пуныса, солдатъёс Солэн йыр вылаз изьыязы. Нап-горд басмалэсь шобыр дӥсязы 3 но шуизы: «Шумпот, иудейёслэн Эксэйзы!» Солэн бамаз тышказы. 4 Пилат, нош ик потыса, соослы шуиз: «Тани мон Сое тӥ доры поттӥсько, но тодэ: мон Солэсь нокыӵе но янгышсэ уг шедьтӥськы». 5 Соку Иисус тёрнпу йыркерттэтэн, нап-горд басмалэсь вурем дӥсянэн калык азе потӥз. Пилат соослы шуиз: «Тани, та Адями!» 6 Нош архиерейёс, медоос Сое адӟыса черекъяны кутскизы: «Кортӵога, кортӵога Сое!» Пилат соослы шуиз: «Тӥ Сое басьтэ но кортӵогалэ, мон Солэсь янгышсэ уг шедьтӥськы». 7 Иудейёс солы ответ сётыса шуизы: «Милям вань законмы, нош милям законмыя Со кулыны кулэ, малы ке шуоно со Ассэ Инмар Пи шуэ». 8 Та кылэз кылыса, Пилат зол кышкатскиз. 9 Нош ик преторие пыриз но Иисуслы шуиз: «Кытысь Тон?» Иисус солы ответ ӧз сёты. 10 Пилат Солы шуиз: «Мыным-а ответ уд сётӥськы? Уд тодӥськы шат, Тонэ кортӵоганы мынам вань кужыме, Тонэ лэзьыны но вань кужыме?» 11 Иисус ответ сётӥз: «Вылысен тыныд сётэмын ӧй ке луысал, Мон вылын тынад нокыӵе но кужымед ӧй луысал. Соин ик сьӧлык тросгес со вылын, кин Монэ тыныд вузаса сётӥз». 12 Та дырысен Пилат Сое лэзьыны амал утчаз. Нош иудейёс черекъязы: «Сое лэзид ке, тон кесарьлы эш ӧвӧл. Котькин но ассэ эксэй карись кесарьлы тушмон луэ». 13 Та кылэз кылэм бераз Пилат Иисусэз педло поттӥз но ачиз Лифостротон, нош еврей сямен Гаввафа шуыса нимаськись, суд лэсьтон интые пуксиз. 14 Соку Пасха азьысь пятница вал, куатетӥ час. Пилат иудейёслы шуиз: «Тани – тӥляд Эксэйды!» 15 Нош соос черекъяны кутскизы: «Басьты, ну, кортӵога Сое!» Пилат соослы шуиз: «Тӥлесьтыд Эксэйдэс-а кортӵогалом?» Архиерейёс ответ сётӥзы: «Кесарь сяна, милям мукет эксэймы ӧвӧл». 16 Соку Пилат Сое кортӵоганы сётӥз. Иисусэз кутыса нуизы. 17 Аслэсьтыз кироссэ нуыса, Со «Кымес», еврей сямен Голгофа, шуон интые потӥз. 18 Отын Сое кортӵогазы. Соин огазьын мыд-мыд палаз эшшо кыксэ кортӵогазы, нош Иисусэз – шораз. 19 Пилат пул вылэ гожтыса кирос вылэ шуккиз. Гожтэмын вал: «Иисус Назорей, иудейёслэн Эксэйзы». 20 Та пул вылэ гожтэмез иудейёс пӧлысь тросэз лыдӟизы, уго Иисусэз кортӵогам инты городлы кыдёкын ӧй вал. Гожтэмын вал еврей сямен, грек сямен, рим сямен. 21 Нош иудей архиерейёс Пилатлы шуизы: «Эн гожты ”иудейёслэн Эксэйзы”, гожты озьы, кызьы Со шуиз: ”Мон – иудейёслэн Эксэйзы”». 22 Пилат ответ сётӥз: «Мар мон гожтӥ, сое гожтӥ». 23 Иисусэз кортӵогамзы бере солдатъёс Солэсь дӥськутсэ басьтӥзы но ньыль кесэглы люкизы. Котькуд солдатлы люкет сюриз, хитон дӥсьсэ но. Хитонэз вурыстэм, быдэс куэмын вал. 24 Озьы, огзылы огзы шуизы: «Ум кесе сое, пус чӧлтоме, кинлы сюроз», – мед быдэсмоз Священной Гожтэмысь веран: «Мынэсьтым дӥсянме куспазы люкылӥзы, дӥськутэ пумысен пус чӧлтӥзы». Солдатъёс озьы ик каризы. 25 Иисуслэн кирос выжыяз сылӥзы Солэн Анаез но Анаезлэн сузэрез Клеопа кышно Мария, озьы ик Магдалина Мария. 26 Анайзэ но татын сылӥсь яратоно дышетскисьсэ адӟыса, Иисус Анаезлы шуиз: «Анай! Тани Тынад пиед». 27 Собере дышетскисезлы шуиз: «Тани тынад Анаед!» Та дырысен дышетскись Сое дораз басьтӥз. 28 Та бере Иисус, ваньмыз быдэсмиз ини шуыса тодэмез бере, Священной Гожтэмысь веран мед быдэсмоз, «Сюэ куасьме» – шуиз. 29 Татын сылэ вал уксусэн тырмытэм сосуд. Губкаез уксусэн пыӵатыса, иссоп турын вылэ поныса, Солэн ымдураз вайизы. 30 Уксусэз веръям бераз Иисус шуиз: «Быдэсмиз!» Но йырзэ мыкыртӥз, лулзэ сётӥз (Инмар кие). 31 Пятница вылэмысь субботалы мугоръёсты кирос борды кельтонтэм понна (уго таиз суббота быдӟым нунал вал) иудейёс Пилатлэсь куризы, пыдъюмылъёссэс пыргытыса, соосты кирос бордысь басьтыны. 32 Озьы, солдатъёс лыктыса, нырысезлэсь пыдъюмылъёссэ пыргытӥзы, мукетызлэсь но Соин ӵош кортӵогаськемлэсь. 33 Нош Иисус доры лыктыса адӟизы, Со кулэмын ни, соин ик Солэсь пыдъюмылъёссэ ӧз пыргытэ. 34 Солдатъёс пӧлысь одӥгез Солэн урдлы висказ шибодыен бышкалтӥз но, соку ик вирен ву вияны кутскиз. 35 Адӟись мурт тае шара ивортӥз, солэн ивортэмез зэм. Тӥ но мед оскоды, со зэмлыкез вера шуыса. 36 Священной Гожтэмын веран быдэсмиз: «Одӥг лыэз но Солэн медаз пырды». 37 Мукет интыын но Священной Гожтэм вера: «Кинэ бышкалтӥзы – Со шоры учкозы». 38 Та бере Аримафеяысь Иосиф, – со иудейёслэсь кышкаменыз Иисуслэн лушкем дышетскисез вал, – со Пилатлэсь куриз Иисуслэсь Мугорзэ басьтыны, Пилат лэзиз. Со мынӥз но Иисуслэсь Мугорзэ басьтӥз. 39 Озьы ик Никодим но лыктӥз. Со Иисус доры уйёсы ветлэ вал; ог сю фунт пала смирнаен алойлэсь сурет вайиз. 40 Озьы, Иисуслэсь Мугорзэ басьтӥзы но, иудейёслэн ватон сямзыя, ческыт зыно вӧйёсын зыраса, дэраен бинязы. 41 Сое кортӵогам интыын сад вал, нош садын выль шайгу, отчы нокин но ватэмын ӧй на вал. 42 Иудейёслэн пятницазы понна но шайгуэз матын вылэмысь Иисусэз отчы понӥзы.
1 Арнялэн нырысетӥ нуналаз вазь ик, эшшо пеймыт на вал, Магдалина Мария шайгу доры лыктыса адӟиз: шайгу бордысь из палэнтэмын. 2 Со Симон Петр доры бызьыса лыктӥз, собере мукетыз дышетскись доры вуиз, кудзэ Иисус яратэ вал. Соослы шуиз: «Шайгуысь Кузё-Инмарез нуиллям, ум тодӥське, кытчы Сое понӥллям». 3 Соку ик Петр мукет дышетскисен ӵош шайгу доры мынӥзы. 4 Соос кыксы но ӵош бызьыса мынӥзы; мукетыз дышетскись, Петр сярысь, ӝоггес бызиз, со шайгу доры нырысь вуиз. 5 Со мыкыртӥськыса учкиз но отын кыллись Сое биням дэраез адӟиз; но шайгулэн пушказ ӧз пыры. 6 Со бӧрсьы Симон Петр вуиз, шайгуэ пыриз но отын кыллись биням дэразэс адӟиз. 7 Солэн йыр вылаз понэм шобретэз биням дэраосын огазьын ӧй вал, нимысьтыз биняса, мукет азьын кыллиз. 8 Соку пыриз мукетыз, нырысь ик шайгу доры вуись дышетскись, со адӟиз но оскиз. 9 Соос уго ялан уг на тодо вал, Священной Гожтэмъя Солы кулэмысь улӟыса султоно луоз шуыса. 10 Собере дышетскисьёсыз нош ик асьсэ доры берытскизы. 11 Нош Мария шайгу дорын бӧрдыса сылӥз. Бӧрдыкуз шайгуэ мыкыртӥськыса учкиз но 12 кык Кылчинъёсты адӟиз: тӧдьы дӥськутэн, одӥгез йыр дораз, нош мукетыз пыд выжыяз пукиз, – Иисуслэн Мугорызлэн кыллем бервылаз. 13 Но соос солы шуизы: «Кышномурт! Малы тон бӧрдӥськод?» Соослы Мария шуиз: «Кузё-Инмарме нуиллям, но уг тодӥськы, кытчы Сое понӥллям». 14 Тае вераса, со берланяз учкиз но сылӥсь Иисусэз адӟиз; но ӧз тодма, со Иисус шуыса. 15 Иисус солы шуиз: «Кышномурт! Малы тон бӧрдӥськод? Кинэ утчаськод?» Та сад будэтӥсь, дыр, шуыса Мария малпаз но Солы шуиз: «Кузё! Тон Сое поттӥд ке, вера мыным, кытчы тон Сое понӥд, мон Сое басьто». 16 Иисус солы шуиз: «Мария!» Со берыктӥськыса Солы шуиз: «Раввуни!» – кудӥз «Дышетӥсь» шуэм луэ. 17 Иисус солы шуиз: «Мон борды эн йӧтӥськы, Мон уго Атае доры ӧй на ӝутскы. Мынам братъёсы доры мын но соослы вера: Аслам Атае доры, тӥляд Атайды доры, Аслам Инмаре доры, тӥляд Инмарды доры, ӝутскисько». 18 Магдалина Мария мыныса дышетскисьёслы ивортӥз, Кузё-Инмарез адӟи шуыса но мар солы Иисус вераз. 19 Та вал арнялэн нырысетӥ нуналаз ӝытазе. Иудейёслэсь кышкаменызы сэрен Солэн дышетскисьёсызлэн люкаськон корказылэн ӧсъёсыз тунгонамын вал; Иисус лыктӥз но, шоразы султыса, соослы шуиз: «Ваньдылы каньыл мед луоз!» 20 Тае вераз но Аслэсьтыз киоссэ (но пыдъёссэ), урдлыоссэ возьматӥз. Кузё-Инмарез адӟыса, дышетскисьёсыз шумпотӥзы. 21 Иисус соослы кыкетӥ ползэ вераз на: «Ваньдылы каньыл мед луоз! Кызьы Монэ Атае ыстӥз, Мон но тӥледыз ыстӥсько». 22 Тае вераса пельтӥз но соослы шуиз: «Святой Духез басьтэлэ: 23 кинлэсь сьӧлыкъёссэ куштоды, солэн куштӥськоз; кинлэсь уд куштэ, солэн сьӧлыкъёсыз кылёзы». 24 Нош Фома, дас кык пӧлысь одӥгез, Кыкто шуыса нимаськись, Иисус лыктыку, соосын ӵош ӧй вал. 25 Мукетъёсыз дышетскисьёс солы шуизы: «Ми Кузё-Инмарез адӟимы». Соку Фома соослы шуиз: «Солэн киысьтыз кортӵог бервыл яраоссэ ӧй ке адӟы, кортӵог бервыл яраяз чиньыме ӧй ке поны, Солэн урдлыосаз киме ӧй ке поны, уг оскы». 26 Тямыс нунал ортчыса, Солэн дышетскисьёсыз нош ик коркан вал. Фома но соосын ик. Ӧсъёс тунгонамын дыръя Иисус лыктыса шоразы султӥз но шуиз: «Ваньдылы каньыл мед луоз!» 27 Собере Фомалы шуиз: «Вай татчы чиньыдэ, учкы Мынэсьтым киосме; вай кидэ, пон Мынам урдлыосам; оскисьтэм эн лу, оскись лу». 28 Фома Солы ответ сётыса шуиз: «Мынам Кузё-Инмаре, мынам Инмаре!» 29 Иисус Солы шуиз: «Тон Монэ адӟид но соин ик оскид: адӟытэк оскисьёс шудоесь». 30 Аслаз дышетскисьёсыз азьын Иисус трос мукет паймымон ужъёс лэсьтӥз, кудъёсыз сярысь та книгаын гожтэмын ӧвӧл. 31 Таиз гожтэмын со понна: тӥ мед оскоды, Иисус – со Христос, Инмарлэн Пиез луэ шуыса. Солы оскыса, Солэн нимыз понна пумтэм улонды мед луоз.
1 Та бере Иисус дышетскисьёсызлы Тивериада зарезь дурысен нош ик возьматскиз. Тани Со кызьы возьматскиз: 2 огазьын вал Симон Петр но Кыкто шуон Фома, Галилеяысь Кана карысь Нафанаил, Зеведей пиос но Солэн дышетскисьёсыз пӧлысь мукетъёсыз кыкез. 3 Симон Петр соослы шуиз: «Чорыг кутылыны мынӥсько». Солы шуизы: «Ми но тонэн ӵош мыномы». Мынӥзы но пыже пырыса пуксизы. Но со уе номыр но ӧз кутэ. 4 Ӵукна ӟардыку, Иисус ярдурын сылӥз; нош дышетскисьёсыз, со Иисус шуыса, ӧз тодмалэ. 5 Иисус соослы шуиз: «Пиналъёс! Вань-а тӥляд кыӵе ке но сиёнды?» Соос Солы шуизы: «Ӧвӧл». 6 Иисус соослы шуиз: «Калтондэс пыждылэн бурпалаз чӧлтэ но кутоды». Чӧлтӥзы но туж трос чорыг сюремен сэрен калтонзэс поттэмзы ик ӧз луы ни. 7 Соку Иисуслэн яратон дышетскисез Петрлы шуиз: «Та – Кузё-Инмар». Нош Симон Петр та Кузё-Инмар шуыса кылэм бераз дӥськутэныз шобырскиз но зарезе тэтчиз – со уго гольык вал. 8 Нош мукетъёсыз дышетскисьёс пыжен лыктӥзы, – музъем дурозь кыдёкын ик ӧй вал, ог кык сю гырпум кемын, – чорыген калтонзэс гыж кыскыса вайизы. 9 Музъем вылэ потэм беразы тылӝуэз, со вылын кыллись чорыгез но нянез адӟизы. 10 Иисус соослы шуиз: «Ваелэ али кутэм чорыгдэс». 11 Симон Петр мыныса музъем вылэ бадӟымесь чорыгъёсын тырмытэм калтонэз поттӥз, сю витьтон куинь чорыгез вал. Таӵе трос чорыген тырмыса но калтон ӧз кесиськы. 12 Иисус соослы шуиз: «Лыктэлэ, нуназе карелэ». Талэсь Кузё-Инмар луэмзэ тодыса, дышетскисьёсыз пӧлысь нокудзы но, «Кин Тон?» шуыса, Солэсь юаны ӧз дӥсьтэ. 13 Иисус лыктыса нянь басьтӥз но соослы сётъяз, озьы ик чорыг но сётъяз. 14 Кулэмысь улӟыса султэм бераз Иисуслэн Аслаз дышетскисьёсызлы возьматскемез таиз куинетӥ полэз вал ини. 15 Нуназе карыкузы, Иисус Симон Петрлы шуиз: «Иона пи Симон! Соос сярысь тон Монэ золгес яратӥськод-а?» Петр Солы шуиз: «Бен, Кузё-Инмаре! Тон тодӥськод, мон Тонэ яратӥсько шуыса». Иисус солы шуиз: «Мынэсьтым ыжпиосме возьма». 16 Эшшо кыкетӥ ползэ солы шуиз на: «Иона пи Симон! Тон Монэ яратӥськод-а?» Петр Солы шуиз: «Бен, Кузё-Инмаре! Тон тодӥськод, мон Тонэ яратӥсько шуыса». Иисус солы шуиз: «Мынэсьтым ыжъёсме возьма». 17 Куинетӥ ползэ солы шуиз: «Иона пи Симон! Тон Монэ яратӥськод-а?» Сое куинетӥ ползэ «Тон Монэ яратӥськод-а» шуыса юамысь Петр, ӝоже усьыса, Солы шуиз: «Кузё-Инмаре! Тон ваньзэ тодӥськод; Тон тодӥськод, мон Тонэ яратӥсько шуыса». Иисус солы шуиз: «Мынэсьтым ыжъёсме возьма. 18 Зэм ик, зэм ик тыныд верасько: куке тон егит на вал, кустэ ачид думиськод но, кытчы мынэмед потэ, отчы мынӥськод вал; нош пересьмид ке, кидэ ӝутод, мукет мурт тынэсьтыд кустэ думоз но, кытчы мынэмед уг поты, отчы нуоз». 19 Иисус тае тодытыса вераз, кыӵе кулон пыр Петр Инмарез дано кароз. Тае вераз но солы шуиз: «Мон бӧрсьы мын». 20 Петр берзэ учкиз но со сьӧры лыктӥсь дышетскисез адӟиз, кудзэ Иисус яратэ вал, кудӥз ӝытанысен Солэн гадь бордаз мыкыртӥськыса шуиз: «Кузё-Инмаре! Кин Тонэ кутыса сётоз?» 21 Сое адӟыса, Петр Иисуслы шуиз: «Кузё-Инмаре! Нош соин мар луоз?» 22 Иисус солы шуиз: «Мон лыктытозь, со мед улоз – Мынам озьы кареме потэ ке, тыныд маиз? Тон Мон бӧрсьы мын». 23 Та дышетскись уз кулы шуыса, агай-вынъёс пӧлы кыл вӧлмиз. Но Иисус солы «уз кулы» ӧз шуы, Со шуиз: «Мынам потэ ке, Мон лыктытозь, со мед улоз, тыныд маиз?» 24 Та дышетскись та сярысь шара ивортэ, со тае гожтӥз. Солэн ивортэмез зэм шуыса тодӥськомы. 25 Трос мукетсэ но Иисус лэсьтӥз: со сярысь пыр-поч гожтоно ке, малпасько, быдэс дунне вылэ но со гожтэм книгаосты тэрытыны ӧй луысал. Аминь.