Иисус Христослэн вордйськонэз

1 Со нуналъёсы быдэс дуннеысь калыкез гожъян сярысь Август кесарьлэн косонэз потэм. 2 Квириниялэн Сириен кивалтыса улон дыръяз, та нырысетӥез калыкез гожъян вылэм. 3 Ваньзы, котькудӥз аслаз городаз гожтӥськыны мынӥллям. 4 Галилеяысь Назарет карысь Иосиф но мынэм Иудеяе, Давидлэн Вифлеем шуон городаз. Уго со вылэм Давидлэн юртысьтыз, выжыысьтыз. 5 Со гожтӥськыны мынэм кышноеныз Марияен. Соку Мария секытэн вылэм. 6 Соос отын луон дыръя, Солы нуны вайыны дыр вуэм. 7 Ваем нырысетӥ Пизэ, кутэтэн бинялтэм Сое но турын тыронэ понэм, малы ке шуоно, кунокуаын соослы инты сюрымтэ. 8 Со шаерын пудо возьмасьёс уин бусыын пудо уллёзэс возьмаса пуко вылэм. 9 Шӧдтэк шорысь соослы Кузё-Инмарлэн кылчинэз возьматскем но Кузё-Инмарлэн пиштӥсь данлыкез соосты югдытэм. Соос вераны луонтэм кышкаллям. 10 Нош кылчин соослы шуэм: «Эн курдалэ; мон тӥледлы быдӟым шумпотон ивортӥсько, со вань адямиос понна луоз: 11 тӥ понна туннэ Давидлэн городаз Утись вордӥськиз, Со — Христос Кузё-Инмар. 12 Тани тӥледлы тодмет: турын тыронысь кутэтэн бинялтэм Нуныез тӥ шедьтоды». 13 Инмарез данъяса, кылчинэн валче лыдъянтэм трос ин кужымъёс шуак вуиллям но вазиськиллям: 14 «Дан вылӥсь Инмарлы, музъем вылын каньыллык, адямиослы ӟеч эрик». 15 Кылчинъёс соос дорысь Инме кошкем бере, пудо возьмасьёс ог-огзылы шуиллям: «Мыноме Вифлееме но учкоме, мар отын луиз, кудӥз сярысь асьмелы Кузё-Инмар ивортӥз». 16 Дыртыса вуиллям но соос Марияез но, Иосифез но, турын тыронын кыллись Нуныез но шедьтӥллям. 17 Адӟем беразы вераллям, мар ивортэмын вал соослы та Нуны сярысь. 18 Ваньзы кылзӥськем муртъёс пудо возьмасьёслэн верамзылы паймиллям. 19 Нош Мария вань та кылъёсты сюлмаз утьыса возем. 20 Пудо возьмасьёс ваньмыз понна, мае кылӥллям, мае адӟиллям, кызьы соослы верамын вал, Инмарез данъяса, ушъяса, асьсэ доры бертӥллям.