Ingush Gospel Recording

Gospel of Luke

Jesus Story

Luke 2

Luke 2 1 Цу деношка Август цIи йолча паччахьа амар арадаьлар, Рим паччахьалкхе мел дола адам дIаязде аьнна. 2 Сири областа Куйриос доал деча юкъа, адамаш юхьанцахьа дIаяздеш дарцу хана. 3 Цудухьа хIара вар ше ваьннача шахьаре вахар дIаязвала. 4 Юсуп а вахар Галилай мехкара Назарт шахьарера ЯхIуд мехка, Дауд паччахь ваьча Байтлахам шахьаре, хIана аьлча из Дауда цIийх ваьнна вар. 5 Из шийн йиха ягIаш йолча, хIаьта берах йолча Маремаца дIаязвала водаш вар. 6 Уж Байтлахаме болаш дезалхо дунен чу валара йола ха тIакхаьчар. 7 Марема кIаьнк вир, ший хьалхара дезалхо. Цо из дIа а хьоарчаваь шоаш чу болчу доахан хьайчу виллар, хIана аьлча царна цIагIа моттиг кхаьча яцар. 8 Цу мехка, ара бийсана, шоай доахан лорадеш Іуй бар. 9 ЦІаьхха царна духьал Даьла Малейк Іоэттар, Везача Даьлера долча нурца уж сийрда а боахаш. ЧІоагІа кхера белар Іуй. 10 Малейко аьлар царга: «Кхера малелаш! Со шуга деррига адам доаккхий деш бола Хоза кхаъ бахьаш денад! 11 Тахан Дауда — шахьаре ваьв шу кIалхьардоахаргдар, Дала лаьрххIа, белгалваь вола Аьла. 12 Из шоана вовзаргва укх белгалонах: дIа а хьоарчадаь бер корадергда шоана хьайчу». 13 ЦІаьхха Малейка улув сиглара дукха малейкаш дессар. Цар, Далла хоастам а беш, йохар: 14 «Сигаленашкахъ Далла хоастам ба! Дуненчу Даъла раьза волча адамашта машар ба!» 15 Малейкаш сигал хьалдаьлча, Іуша шоайла аьлар: «Байтлахаме а даха, цига фу хиннад хьажа деза вай, вайга Дала байтар фу хоам ба». 16 Уж цига сихонца бахар. Царна корабир Марем а, Юсуп а, хьайчу уллаш бер а. 17 Бер бIарга дайча цар дийцар цунах шоашка бена хиннача хоамах лаьца. 18 Массавар а, ладувхаш мел хиннар, цецваьннавар Іуша дувцачох. 19 Бакъда Марема шийна мел хезар ший дагахь лоаттадора. 20 Іуй юха бийрзар, Далла хоастам а беш, хIана аьлча царна хезар а дейнар а малейко аьннача бесса хилар.

Ingush

The Lord's Prayer

English

All

Our Visitors