1

1 Saula thi hnung, Amalekhaihnea Davida hung inlawi tieng chun Ziklag khuoah ni hnih a châm a. 2 A ni thum ni chun Saula inkulnaa inthokin mi pakhat, silfèn inek neng nung le sama pilvut kai luoi hi Davida kuomah a hung a, bokkhupin chibai a bûk a. 3 Davida chun a kuomah, "Khaw laia inthoka hung am i na?"a ta, ama chun, "Israelhai inkulnaa inthoka hung tlân suok ka nih" a ta. 4 Davida chun, "Ieng tin am thil a um mi hril rawh khai" a ta. Ama chun, "Indonaah mihai chu an tlânsie a, tam tak an thi bok a. Saula le a naupa Jonathan khom an thi" a ta. 5 Chanchin hung hawntu tlangvàl kuoma chun Davidan, "Ieng tin am Saula le a naupa Jonathan hai an thi ti i hriet thei a?" a ta. 6 Tlangvàl chun, "Gilboa tlângah ka um ve a, Saula chu a fei innghaia um ka hmu a, sakor tawlailir le a chunga chuonghai chun an hung nangching têp ta a. 7 A ngha vel chun a mi hmu a, a mi hung ko a, kei chun "Ieng am ka thawpêk thei che?" tiin ka'n don a. 8 Ama chun, "Tu am i na?" a mi ti a, "Amalek mi ka nih" ka ta. 9 Ama chun, "Hung la, mi hung that raw leh; hi, thi hmun suolin ka um a, ka la dam ting bok si a" a ta. 10 "Chuongchun a bula chun ka ngîr a, chuonga inlet dêr tah chu a ni lei le a dam zo chuong ta naw ding ti ka hriet leiin ka that a, a lua lallukhum le a kuta a bânbun chu ka lâk a, i kuomah ka hung chawi a nih, pu" a ta. 11 Davida le a mihai chun an silfên an potthlèr a. 12 Kawlhnâma thi Saula le a naupa Jonathan hai, LALPA mihai le Israel sûngkuohai chu an sûn a, an ta a, zân tieng chen bu an nghei a. 13 Davida chun chanchin hung hawntu tlangvàl kuomah, "Khaw taka inthoka hung am i na?" a ta, ama chun, "Ram dang mi ka na, ka pa chu Amalek mi a nih" tiin a don a. 14 Davida chun a kuomah, "Ieng dinga Pathien hriek nâl sukbohmang dinga a chungah kut i thlâk ngam am a na?" a ta. 15 Chuongchun tlangvàl pakhat a ko a, "Va hnai la, va that rawh" a ta, a va sât hlum ta a. 16 Davida chun, "I thisen insuo maw chu nangma lu chung ngeiah um raw se, nangma bau ngeiin, 'LALPA hriek nàl chu ka that' i ti si a" a ta. 17 Davida chun Saula le a naupa Jonathan hai chu sûnin a ta a 18 a tap hla chu thal kâp hla ti a na, Juda mi po po inchûktir dingin thu a pêk a, chu thu chu Jasar Lekhabuah ziek a nih: 19 Aw Israel, i thuoitu ropuihai, I tlâng chungah fam khuo changin, Mihrânghai sam ang an zàl ie! 20 Gath khuohai chu hril naw ro, Askelon kotthlèrah puong naw ro; Filistin minuhaiin lo lawm palin, Sertan lo hrailèng lànuhaiin, Hlim zâi vawr pal rawi an tih. 21 Aw nangni Gilboa tlânghai, In chungah daidaw tla naw sien, Khuongruo sûr bok naw sien la, Loin thilhlân ding hrim hrim, Bu le bâl insuo naw raw se; Chu taka chun mi lien phaw, Muolpho takin an peihawn a, Saula phaw chun hriek nàl leChûl tlerh hrim a hlaw ta nawh. 22 Thathai thisena tlai lo le, Mi hrâthai thàu fa khop loin, Jonathan thal a lêt ngai naw a, Saula kawlhnâm a lêt ngai nawh. 23 Saula le Jonathan nun kha, A ditumin a va hang mawi ngei!An thi chenin an inkop zing; Muvànlai nèkin an tuonrang a, Sakeibaknei nêkin an hrât lem. 24 Nangni Israel naunuhai, Saula sûnin tà ta ro khai, Puon sendâng mawia thuomtu cheu, In silfênhai rangkachakaCheipêktu cheu a ni si. 25 Indoa hrât khawkhènghai, An hang tlu el chu a nâ maw!I tlâng sângah Jonathan chu, Fam changin a zâl tah ie. 26 Ka unaupa aw Jonathan, Ka va hang sûn ngei che de aw!Ka va hang ngaina ngei che de!I mi hmangai dàn kha a mak, Nghâknu hmangaina a khûm. 27 Mihrâng an hang tlu el chu, Râlthuom bo ang ei ni ie!

2

1 Chu hnunga chun Davidan LALPA a rawn a, "Judai ram khuo pakhata khin ka hang fe ding am a ni?" a ta, LALPA chun. "Hang fe rawh" a ta. Davida chun, "Khaw lai khuo am ka fe ding?" a ta, LALPA chun, "Hebron khuoah" a ta. 2 Chuongchun, Davida chun a nuhmeihai pahnih, Jezrel-a mi Ahinoam le Karmel-a Nabal nuhmei thisan Abigail hai chu thuoiin a hang fe a. 3 Davida chun a kuoma um a mihai chu an sûngkuo seng leh a thuoi bok a, Hebron le a sevel khuoa hai chun umhmun an khuor a. 4 Chun, Judai rama mihai chu Hebron-ah an fe a, Juda sûngkuohai chunga lal dingin Davida chu hriek an nàl a. Anni chun Saula phûmtuhai chu Jabes-Gilead mihai an ni thu Davida chu an hril bok a. 5 Davida chun Jabes-Gilead mihai kuomah mi a tir a, "In pu, Saula chungah lunginsietna suklanga in lo phùm leiin LALPA chun malsawm cheu raw se. 6 LALPA chun in chungah ngilneina le ringumna inlangtir sien la, hieng thil in lo thaw lei hin kei khomin inngilneina man chu rul ka ti cheu. 7 Tu hin hrât tak le huoisen takin um ro, in pu Saula chu a thi ta a, kei hi Juda pahnamhaiin an chunga lal ni dingin hriek an mi nàl tah bok a nih" tiin thu a thon a. 8 Chuong lai zing chun Nera naupa Abner, Saula kawmandar chun Saula naupa Isboset chu Mahanaim-ah a hung thuoi a, 9 Gilead hai, Asur (Aser) hai, Jezrel hai, Efraim hai le Israelhai po po chungah lalin a siem a. 10 Ro a rêl tan kum chun Saula naupa Isboset chu kum sawmli mi a ni a, kum hni sûng ro a rèl hman a. Juda sûngkuohai ruok chun Davida chu an zui lem a. 11 Juda chihai chunga Hebrona inthoka Davidan ro a rêl sûng chu kum sari le thla ruk a nih. 12 Nera naupa Abner le Saula naupa Isboset mihai chun Mahanaim mâksanin Gibeon-ah an fe a. 13 Zeruia naupa Joab le Davida mihai khom an inthok suok ve a, Gibeon tuikhurah an intuok a, pawl khat chu ràl khing tieng an um a, pawl dang chu tuikhur ràl khing tieng. 14 Abner chun Joab kuomah, "Tlangvàlhai inzât ve vein thlang suok inla, ei hmaa hin inbei raw hai se chu" a ta. 15 Chuongchun, Benjamin chia mi, Saula naupa Isboset mihai sawmpahni le Davida mihai sawmpahni chu an hung ngîr suok a. 16 Mani bitum seng lu-ah an inman a, an bitum seng nâkah kawlhnâmin an insun a, an tlu ruol ta vong a. Chuleichun hi hmun hminga hin Helkat Hazurima an inbûk a, chu chu Gibeon-a um a nih. 17 Chu ni chun an inbei nasa hle a, Abner rawihai chu Davida rawihai chun an intlawm a. 18 Chu inbeinaa chun Zeruia naupa hai pathum Joab hai, Abisai hai le Asahel hai chu an thang a. Asahel chu sazukpui ang ela ngal hrât a nih. 19 Asahel chun Abner chu voi tieng le chang tieng khom pêt dêr loin a hnot thlur ngat ngat a. 20 Chun, Abner chu a ngha kîr a, "Nang i ni maw Asahel?" a ta, ama chun "Ni chieng e" a ta. 21 Abner chun, " I voi tieng amanih chang tieng amanih mi pêtsan la, tlangvàl pakhat kha man la, a râlthuom kha lâkpêk rawh" a ta, sienkhom Asahel chun pêt nuom loin a hnot ngar ngar a. 22 Abner chun, "Mi hung hnot ta naw rawh. Ieng leiin am ka that ding che? Ieng tin am i u Joab hmel ka hmu ngam ta ding?" a ta. 23 Asahel chun a hnot lui pei tlat si leiin Abner chun a fei mong tiengin Asahel phinga chun a hnung tieng chen dawk pùrin a sun tlang a, chu hmuna chun a tlu a, a thi ta nghal a. Asahel thina hmun hung tlung taphot chu an ngîr chat pei a. 24 Joab le Abisai ruok chun Abner chu an hnot pei a, Gibeon thlalèr panna Gia sak tienga Ama muol an tlung chun nisa a tla ta a. 25 Benjamin thlahai chun Abner chu an hung pan khawm a, an intel khawm nawk a, tlâng sipa chun thanghmun an khaw a. 26 Abner chun Joab kuomah, "Kawlhnâmin ei insâm zing el ding am a ni? Hi hin a tawpah intheidana chauh naw chu ieng khom a'n tlun naw ding a nih ti i hriet naw am a ni? Ieng tik am i mihai hi an unauhai hnot ta lo dingin thu i pêk ding a na?" a ta. 27 Joab chun, "Pathien hringna sâlin ka hril hi, ieng khom hril loin um la chu ka mihaiin an unauhai chu zing khawvar chenin an hnot ding a nih" a ta. 28 Joab chun tawtawrawt a mût a, mihai chu an ngîr thup a, Israelhai chu an hnot zui ta nawh. 29 Chu zân chun Abner le a mihai chun Araba pal tlangin zân khawvar an fe a, Jordan vadung an kàn a, Bithron fe thlengin Mahanaim an tlung a. 30 Joab-in Abner a hnot khom chu a hung kîr a, mipui a hang ko khawm vong chun Davida rawihai sawm le pakuo le Asahel chu an kim ta naw a. 31 Davida rawihai ruok chun Benjamin mihai le Abner mihai chu zathum le sawmruk an that a. 32 Chuongchun, Asahel ruong chu an làk a, Bethlehema a pa thlànah an phûm a. Chun, Joab le a mihai chu zânkhuoa fein zing khawvarah Hebron an tlung a.

3

1 Saula sûnghai le Davida sûnghai chu sawt tak an indo a, Davida chu a hung hrât tiel tiel a, Saula sûnghai ruok chu an hung chau tiel tiel thung a. 2 Hebron khuoa Davida naupa pienghai po laia a hmasa tak chu Jezrela mi Ahinoam laka a hring Amnon a nih; 3 a pahnina Kileab chu Karmela Nabal nuhmei thisan Abigaila inthok a nih; a pathumna Absalom chu Gesur lal Talmai naunu Maka laka mi a nih; 4 a palina chu Adonija, Hagit laka mi a nih; a pangana chu Sefatia a na, Abitala laka mi a nih; 5 a parukna chu Ithream a na, Davida nuhmei Egla laka mi a nih. Chuonghai chu Davida naupahai, Hebrona pieng an nih. 6 Saula sûngkuohai le Davida sûngkuohai an indo sûngin Abner chu Saula sûngkuohai lakah a tlatlum hman hle a. 7 Saula chun hmei a nei a, ama chu Aia naunu Rizpa a nih. Chun, Isboset chun Abner kuomah, "Ieng dinga ka pa hmei i zàlpui am a na?" tiin a suosal a. 8 Isboset tong chun Abner chu a suklungsen hle a, "Judahai uicho ang mei meia i mi ngai a ni? Voisun chen hin i pa Saula sûnghai le a unauhai le a ruolhai chungah ringum takin ka um a, Davida kuta khom ka pêk naw che a ni kha. Chuong sa khom chun tu hin hi nuhmei laka suolah i mi'n tum hi. 9 Dan-a inthoka Beersheba chen Saula sûngkuoa inthoka ram chu lâkpêk a, 10 LALPAN Davida lalthungpha indin dinga inkhâm meua thu a lo tiem tah anga ka sukpuitling naw vai chun Pathienin Abner hi a law lawin law sien la, chu nêka nasa dai khom chun thaw raw se" a ta. 11 Isboset chun Abner chu a ti leiin a don ngam hrim hrim nawh. 12 Abner chun a aiin Davida kuomah mi a tir a, "Hi ram hi tu ta am a na? Ka kuomah thu thlung la, Israel ram po po i kuta hui lût vong dingin thangpui ka ti che" tiin thu a thon a. 13 Davida chun, "A tha, thu thlung ka tih. Amiruokchu, hi thil pakhat hi ka ngiet a, i hung pha leh, Saula naunu Mikal kha i hung thuoi naw chun ka hmèl hmu thei naw ti nih" a ta. 14 Chu zoah Davida chun Isboset kuomah, "Filistin mihai ser vun zakhata ka'n chawk sa ka nuhmei Mikal kha mi hung pe kîr rawh" tiin mi a tir a. 15 Isboset thupêkin Mikal chu a pasal Paltiel, Laish naupa kuoma inthokin an va thuoi a. 16 A pasal chun tap zing pumin Bahurim chen a hung zui a, Abnerin "Kîr ta rawh" a ti leiin a in tieng a kîr nawk ta a. 17 Abner chun Israel upahai chu a biek a, "Kha hma khan Davida chu in lalah in dit hlak a. 18 Tu hin in lalah siem ro. LALPA chun Davida kuomah, 'Ka siehlaw Davida kutin ka mi Israelhai chu Filistin mihai kuta inthok le an hmèlmahai po po kuta inthokin san suok ka tih' tiin thu a tiem a nih" a ta. 19 Abner bok chun Benjamin mihai hriet ngeiah chu thu chu a hril nawk a. Chu zoah Israel mihai le Benjamin sûngkuo po poin thaw dinga an dithai chu Davida hriet ngeia hril dingin Abner chu Hebron-ah a fe a. 20 Abner le a mi thuoi sawmhni ruolin Davida inhmupui dinga Hebron an hung tlung chun Davidan ruoi a buotsaipèk a. 21 Abner chun Davida kuomah, "Kîr nawk nghal ka ta, Israel mihai po poin i kuoma thu an thlung theina ding le i duthusam ang taka an chunga ro i rêl theina dingin, ka lalpa kuoma hung inkhawm dingin va huoihot tawl ka tih" a ta. Davida chun a'n fêtir a, thlamuong takin a kîr nawk ta a. 22 An fe charin mi rûna fe Davida mihai le Joab chu an hung tlung a, râllâk sum tam tak an hung hawn a. Abner ruok chu Hebrona Davida kuoma chun a lo um ta naw a, Davidan thlamuong takin a lo inkîrtir ta a. 23 Joab le a sipai thuoihai an hung tlung chun, "Nera naupa Abner chu lal kuomah a hung a, lal chun thlamuong takin a lo infêtir nawk tah" tiin Joab chu an lo hril a. 24 Chuongchun Joab chu lal kuomah a fe a, "I thil lo thaw hi iengtizie am a na? En ta, Abner chu i kuomah a hung a. Ieng leia i lo infêtir am a na? Tu hlak hin a fe dai ta bok si a! 25 Nera naupa Abner chu tu am a nih ti i hriet; dawha ding che le i chàng dàn iengkim chîk a, i thilthaw taphot hriet suok tuma hung a ni chu" a ta. 26 Davida kuoma inthoka Joab a hung suok chun Abner hnot dingin mi a tir nghal a, Sira tuikula inthokin an hung thuoi kîr nawk a, sienkhom chu chu Davidan a hriet ve nawh. 27 Abnerin Hebron a hung tlung chun Joab-in kul kotkhàra chun be ru dingin a thuoi hrang a, a unaupa Asahel thisen thungrulna dingin a phingah a sun a, a thi ta a. 28 Chu thu chu a hnung deuah Davidan a lo hriet chun, "Nera naupa Abner thisen insuona thua hin kei le ka ram chu LALPA hmaah kumkhuoin fihlim kan tih. 29 A thisen maw chu Joab lu chunga le a pa sûnghai po po chungah tla raw se. Joab sûnghai lai pânna huoisuol nei dâm, vun hri chi hrang hrang invoi dâm, funghrol ringsana khawsa dâm, kawlhnâma thi dâm le suongsama um bo naw raw hai se" a ta. 30 [Joab le a unaupa Abisai haiin Abner an that san chu Gibeon hmuna indonaah an unaupa Asahel a that lei a nih. ] 31 Davida chun a hlâng chu zuiin, Joab le a bula um mi po po kuomah, "In puonhai pot thlêr unla, saiip puon sil unla, Abner hi sûn ro" a ta. 32 Abner chu Hebron-a chun an phûm a. Abner thlàna chun rawlpui insuo meuin lal chu a tap a, mipui po po khom an tap a. 33 Lal chun Abner sùnna thu a'n sam a:Mi invêt thi ang elin, Abner chu a thi a ni maw? 34 I kut khuop a ni naw a, Keah kol i bun bok nawh. Mi rilohai hmaa míAn tlùk anga tlu i nih tiin. Chuongchun, mi po po chu an tap nawk a. 35 Chun, a lusùn lai chun iemani bêk fa dingin mi po poin Davida chu an hung ngên a. Davida ruok chun, "Nisa tlàk hmaa bei amani le thil dang ieng khom ka fâk hlek chun Pathienin a law lawin mi law sien la, chu nêka nasa khom chun mi thaw raw se" tiin a'n khàm a. 36 Chu chu mi po poin an hrietin an lawm hle a; lal thilthaw taphot chun mipuihai chu a suklawm a nih. 37 Chu nia inthoka chun Nera naupa Abner an thatna chungchangah lal chu a thang ve nawh ti mi po poin an hung hriet ta a. 38 Chun, lal chun a mihai kuomah, "Voisun hin Israelhai mi lien le mi ropui tak a thi ti in hriet naw maw? 39 Lala hriek nàl ni lang khom voisun hin kei chu ka la hrât tawk naw leiin Zeruia nauhai hi tuorhlaumin an pawng taluo a nih. Thil suol thawtu chu a suolzie ang peiin LALPAN thungrul raw se" a ta.

4

1 Saula naupa Isboset chun Hebrona Abner thi thu a lo hrietin a lungril a zâm êm êm a, Israel mihai po po khom an thlaphàng a. 2 Chun, Saula naupa chun mi rûntu pawla hotu pahni a nei a, an hming chu Baana le Rekab an nih. Anni chu Benjamin thla Beerot mi Rimon naupahai an nih (Beerot chu Benjamin rama ngai a nih. 3 Beerot mihai chu Gitaim-ah an tlàn a, tu chen hin chu taka chun an la um zing. ) 4 Chun, Saula naupa Jonathan chun naupa kebai a nei a. Jezreel-a inthoka Saula le Jonathan thi thu an lo hriet chun kum nga mi chauh a la ni a, a enkoltu chun a pom a, a tlànpui a, a'n hmaw taluona lamah a'n thlâk pal a, a ke a hung inbai pha ta a. A hming chu Mefiboset a nih. 5 Chun, Beerot mi Rimon naupa Rekab le Baana hai chu Isboset in panin an fe a, ni sat vànglai tak, a sùn chawl lai chun a in chu an tlung a. 6 Bu la ding ni awm takin in sûng ril tieng an lût a, a phingah an sun a, Rekab le a unaupa Baana chu an inrel hmang ta a. 7 A khuma a lo zâl lai chun a nih inah an lût chu. An sun hlum hnung chun a lu chu an lâk a, an chawi a, Araba pal tlangin zânkhuoin an fe a. 8 Hebrona chun Isboset lu chu Davida kuomah an hung chawi a, a kuomah, "Hi i hmèlma, i hringna la tumtu, Saula naupa Isboset lu chu a nih. LALPA chun ka lalpa phuba chu voisun hin Saula le a thlahai lakah a lâkpêk tah a nih" an ta. 9 Davida chun Berot mi Rimon naupa Rekab le a unaupa Baana kuoma chun, "Ka mangangna po poa mi sansuoktu LALPA hringna salin ka hril, 10 chanchin tha hung hawna inngaiin, 'Ngai ta, Saula chu a thi tah' tiin mi pakhatin a mi hung hril a, ama chu ka man a, Ziklag-ah ka that a; chu chu a chanchin tha hung intlun mana ka pêk a nih. 11 Mi fel, ama in sûng luma um, a khum laizawl ngeia mi suolin an that thisen man chu in lakah phut nawkzuolin, hi hnuoia inthok hin ka va hang sukbo chieng ding cheu de aw!" a ta. 12 Chuongchun, Davida chun a tlangvàlhai chu thu a pêk a, anni chu an that a, an kut le ke an tanpêk a, Hebrona dîl kama chun an khai a. Isboset lu ruok chu an làk a, Hebron-a Abner thlàna chun an phûm a.

5

1 Israel pahnamhai po po chu Hebron-ah Davida kuomah an hung a, a kuomah "Ngai ta, i thisen inzompuihai kan ni hi. 2 Kha hmaa kan chunga Saula an lal lai khom khan râl beinaa mi thuoitu tak chu nangma i ni hlak a, LALPA chun i kuomah, 'Ka mi Israelhai thuoi i ta, an lalah i um ding a nih' a ti che a ni kha" an ta. 3 Israel upahai po poin Hebron-ah Lal Davida kuom an hung tlung chun anni chu LALPA hmaah thu a lo thlungpui a, Davida chu an lal dingin Hebrona chun hriek an nâl a. 4 Lal a hung ni chun Davida chu kum sawmthum mi a ni ta a, kum sawmli ro a rêl a. 5 Hebrona inthokin Judai ramah kum sari le thla ruk a'n lal a, Jerusalema inthokin Israel ram po po le Judai ramah kum sawmthum le kum thum a'n lal bok a nih. 6 Chun, lal le a mihai chu Jerusalem hluotu Jebuhai do dingin an inthok suok a. Jebuhai chun Davida kuomah, "Hi taka hin lût naw top i tih, mitdel le kebaihai chauh khomin lo dang el an ti che" an ta. Anni chun an lungrilin, "Davida a lût thei teu awm naw êm el" an ti a nih. 7 Amiruokchu, Davida chun Zion kul chu a lâk miel a, chu chu Davida Khawpui chu a nih. 8 Chu ni chun Davidan a mihai kuomah "Nangni lai hin keima anga that nuom khopa Jebuhai theidatu in um ve am? Jebuhai hne ding chun tui hor kuoah lût inla, mitdel le kebaihai chu hlukhum ro" a ta. Chu lei tak chu annawm, 'Mitdel le kebaihai chu lal inah an lût ding a ni nawh' ti a ni ta zing hi. 9 Davida chun kul sûngah umhmun a khuor a, a hmingah Davida Khuo tiin a'n bùk a. A muol suo tienga kul thut dinga hnuoi an sung zawla inthoka tanin a vel tuokin khawpui a rem a. 10 Iengkim LALPA Pathienin a umpui leiin a hung ropui ta deu deu a. 11 Tura lal Hiram chun Davida kuomah mi a tir a, sidar thinghai a thon a, themthiemhai le lung ser thiemhai a tir bok a, Davida chu lal in a bawlpêk a. 12 LALPAN a mi Israelhai zàrin Israel mihai chungah lalin ama chu a suknghet a nih ti le a ram khom chu a chawisàng a nih ti Davidan a hriet a. 13 Hebron a suoksan hnungin Davida chun Jerusalemah nuhmei le hmei a nei belsa a, naupa le naunu khom a la nei sa a. 14 Chuong a nauhai chu Samua hai, Sobab hai, Nathan hai, Solomon hai, 15 Ibar hai, Elisua hai, Nefeg hai, Jafia hai, 16 Elisama hai, Eliada hai le Elifelet hai an nih. 17 Davida chu Israel mihai lal dingin hriek an nàl ti Filistinhaiin an hriet chun ama zong dingin burip takin an inthok tung a, Davidan chu chu a lo hrietin kulbingah a fe thlâk a. 18 Filistin mihai chu an hung tlung a, Refaim ruoma chun an inzar phei a. 19 Davida chun LALPA kuomah, "Fein Filistinhai chu ka bei di'm a ni? Anni chu ka kutah i pêk ding am a ni?" tiin a rawn a. LALPA chun, "Fe rawh, Filistinhai chu i kutah pe ngei ngei ka ti che" a ta. 20 Chuongchun, Davida chu Baal Perazim-ah a fe a, anni chu a hne a, "LALPAN ka hmèlmahai chu tuiting inthe ang elin ka hmaah a sukdar vong tah" a ta. Chuleiin, hi hmun hminga hin Baal Perazim a'n bùk a. 21 Chu taka chun Filistinhaiin an milemhai an tlânsan a, Davida le a mihai chun an làk a. 22 Filistin mihai chu an hung tung nawk a, Refaim ruoma chun an inzar nawk a. 23 Davida chun LALPA a rawn nawk a, ama chun, "Pan tung loin an hnung tieng inhuol la, thingtheihmi thing zawna khin hang bei rawh. 24 Thingtheihmi chunga ke pen ri thuop thuop i hriet charin inrang takin che nghal rawh, Filistin sipaihai do dingin i hmaah LALPA a fe tina a nih" a ta. 25 LALPA thupêk angin Davida chun a thaw a, Filistin mihai chu Gibeon-ab inthoka Gezer chenin a hne ta vong a.

6

1 Davida chun Israelhai laia a mi thlang thieu sîngthum a ko khawm nawk a. 2 Judai ram Baala khuoa inthoka Pathien Thuthlung Bawm, cherubhai chunga lalthungphaa inthung Iengkim LALPA hming an inputtir chu zu la dingin a kuoma mi um po po le chun Davida chu a'n thok suok a. 3 Pathien Bawm chu tlânga Abinadab ina inthok chun an lâk suok a, tawlailir tharah an sie a, Abinadab naupahai Uza le Ahio chun tawlailir thar chu an khal a. 4 Pathien Bawm chu tawlailir chungah an sie a, Ahio chu a hmaa chun a fe a. 5 Davida le Israel sûngkuo po pohai chun LALPA hmaah thil inri thei chi hrang hrang tingtang dâm, perkhuong dâm, khuongte dâm, tawtawrawt bi nei dâm le dârbenthek dâm tumin, theitawpin an lawm a. 6 Nakon hrizawl an tlung chun bawngchal chu a petek leiin Uza chun Pathien Bawm chu a kutin a zuk chel a. 7 LALPA lung chu Uza chungah a sen thut a, a thilthaw indik naw leiin chu taka chun Pathienin a sukhlum a, Pathien Bawm bula chun a thi ta a. 8 Uza chunga LALPA a tuong leiin Davida lung chu a sen hle a, chu hmun chu Perez Uza a'n bûk a, tu chen hin a la put ta zing a nih. 9 Chu ni chun Davidan LALPA chu a ti a, "Iengtin am LALPA Bawm chu ka kuom a hung tlung thei ta ding maw?" a ta. 10 Davida Khawpuia ama kuoma LALPA Bawm son lût chu a nuom ta naw a, Git mi Obed-Edom in tieng chun a sie ta lem a. 11 LALPA Bawm chu Git mi Obed-Edom ina chun thla thum a um a, Obed-Edom le a sûngkuohai po po chu LALPAN mal a sawm a. 12 Pathien Bawm leia Obed-Edom sûngkuohai le an thil nei iengkim LALPAN mal a sawm nasatzie lal Davida an hril chun a fe thlâk a, Pathien Bawm chu Obed-Edom ina inthokin Davida Khawpuia chun hlim takin a hung lâk tung a. 13 Chun, LALPA Bawm zawntuhaiin pên ruk an pèn chun bawngchal le bawng tuoi thauin a'n thawi a. 14 Davida chun puon zâi inhmia siem thiempu zakuo a hâk a, theitawpin LALPA hmaa chun a lâm a. 15 LALPA Bawm an lâk tung lai chun Davida le Israel mihai po po chu an khêk dur dur a, tawtawrawt an mût ruoi ruoi bok a. 16 Davida khuoa LALPA Bawm a lût lai chun Saula naunu Mikal chun tukvera inthokin a lo thlir a, LALPA hmaa Davida inchawma a lâm vel chu a hmu a, a lo inzàpui hle a. 17 Chuongchun, LALPA Bawm chu an lâk lût a, a siena dinga Davidan puon in a buotsai sûnga a hmun dinga chun an sie a, Davida chun LALPA hmaah pumraw thilhlân le inremna thilhlân a'n hlàn a. 18 Pumraw thilhlân le inremna inthawi a'n hlàn zo chun Iengkim LALPA hmingin mipuihai chu mal a sawm a. 19 Israel mipui po po chu a nuhmei a pasalin bei tlang khat, sa tlang khat le grèp em tawl bawr khat a pêk seng a. 20 Chuongchun mi po po chu mani in tieng an inlawi ta seng a, Davida khom a sûnghai malsawm dingin an lawi ve ta a. Hmuok dingin Saula naunu Mikal chu a hung suok a, "Voisuna Israel lal chu a va ropui ngei de, mi ho tak, inzak nachang hre lo, saruoka um ang elin a siehlaw nunghàkhai hmuah saruokin a um kha tie!" a lo ti a. 21 Davida chun Mikal kuomah, "I pa le a sûnghai po po nêka mi thlang a, LALPA mi Israelhai chunga lala mi ruottu LALPA hmaa lâm ka ni lem; LALPA hmaah lawm ding ka ni hrim annawm. 22 Hieng nêk hmana inzapuium hin la um ka tih, keima ngei khom inzàpui ka tih; amiruokchu, chuong siehlaw nunghàk i hrilhai chawimawi chun um ka tih" a ta. 23 Chuongchun, Saula naunu Mikal chun a thi chenin nau a nei nawh.

7

1 Lal chun a lal in a hluo hnung le a vêla a hmèlmahai po po laka LALPAN ralmuonga an umtir hnungin, 2 zawlnei Nathan kuomah, "Hi, kei chu sidar thinga bawl inah ka um a, sienkhom Pathien Bawm chu puon inah a la um zing si a" a ta. 3 Nathan chun lal kuomah, "I lungrila i ti ang tak chun thaw el rawh, i kuomah LALPA a um annawm" a ta. 4 Chu zân chun LALPA chun Nathan kuomah: 5 "Fe la, ka siehlaw Davida kuomah hieng hin hril rawh. 'LALPA chun hieng hin a tih: Nang hi ka umna ding in mi bawlpêktu ding chu i ni am a ni? 6 Israel thlahai Aigupta rama inthoka ka thuoi suoka inthoka tu chen hin inah ka um naw a, hmun hrang hrangah insonin puon inah ka um pei lem hlak. 7 Hmun hrang hranga ka fe kuolpui Israel thlahai le ka mi Israelhai enkoltu dinga ka ruot rorêltuhai kuoma khom, 'Iengti dana sidar thingin in in mi bawlpêk naw am a na?' tiin ka hril hlak amanih? 8 " Chuleiin, ka siehlaw Davida kuomah hieng hin hril rawh: Iengkim LALPA chun hieng hin a tih: I beram vèngna hmuna inthokin ka mi Israelhai chunga rorêltu dingin ka ko suok che a. 9 I fèna taphotah i kuomah ka um zing a, i hmaa hmèlma umhai ka hnepêk che a, tuhin hnuoia mi ropui takhai angin i hming ka sukropui ding a nih. 10 Ka mi Israelhai chu an um nghetna ding hmun pêng ka ta, tu sukbuoi ta lo dingin anni hmuna ngei chun anni chu phun ka tih. Tuta hma ang khan mi rilohaiin sukrimsi ta naw ni hai. 11 Ka mi Israelhai chunga rorêltu ka ruot hlim lai ang kha ni ta bok naw ni a, in hmèlmahai po po lakah inchawldamtir ka ti cheu. Kei LALPA hin in sûngkuo chu ka tungding ding a nih ti ka hril che. 12 I nihai a kin phaa i thlàtuhai kuoma i'n lawi ve pha chun nangma hung thlâktu ding che i rila ra ngei chu indin ka ta, a ram chu suknghet ka tih. 13 Ama chun ka hminga dingin in bawl a ta, a ram lalthungpha chu kumkhuoa dingin suknghet ka tih. 14 A pa nîng ka ta, ama chu ka naupa nîng a ta, thil suol a thaw chun pain hmol hmanga a naupa a thunun angin thunun ka tih. 15 Amiruokchu i hmaa ka hnawl Saula laka ka hmangaina ka lâk hmang ang khan ka hmangaina chu a lakah la kîr ngai naw ning. 16 I sûngkuo le i ram chu kumkhuoin suknghet ka ta, i lalthungpha khom kumkhuoin suknghet bok ka tih' " tiin. 17 Nathan chun inlârna thu po po chu a kip a kawiin Davida a hril a. 18 Chun, lal Davida chu LALPA puon inah a lût a, LALPA hmaah a thung a, a tongtai a: "Aw LALPA Pathien, kei hi tu am ka na, ka sûnghai khom ieng am an na, hieng chen chen i mi thuoi el hi? 19 Aw LALPA Pathien, chu khom chu i mithmuah huntawk la ti loin, i siehlaw thlahai chen khom suknghet i la tum ta pei a. Aw LALPA Pathien, hieng ang hi mihriem i thaw dàn pangngai khom a ni hrim am a ni? 20 Hieng bàk lawm lawm hi Davida hin i kuomah ieng am ngên sap ding a nei a? Aw LALPA Pathien, i siehlaw hi i hriet tlang vong si a. 21 I thu le i ditzawng angin hi thil ropui tak hi i thaw a, i siehlaw kuomah i'n hriettir a. 22 Aw LALPA Pathien, i va hang ropui ngei de aw! Kan hrieta chu nangma ang hi tu khom an um naw a, nang naw chu Pathien dang hrim an um nawh. 23 Aigupta rama inthoka an Pathienin a mihai ni dinga a san suok, thil mak le râpum tak tak thaw a, an hmaa hnam tinhai chu an pathien chopa a hnot suokpêk, khawvel pumpuia a hming a serna hnam, Israel hnam ang hi hnam dang tu am an um a? 24 Israelhai chu chatuona i mihai ni dingin i suknghet a, aw LALPA, nang chu an Pathien i hung ni tah. 25 "Chuongchun, aw LALPA Pathien, i siehlaw chungchàng thu le a sûnghai chungchàng thu chu i tiem tah ang khan kumkhuoa dingin suknghet la, i hril tah ang khan hlen rawh. 26 Chuongchun, mihaiin, 'Iengkim LALPA chu Israelhai Pathien a nih' ting an ta, i hming chu chatuonin ropui a ta, i siehlaw Davida sûngkuohai chu i hmaah suknghetin um an tih. 27 "Aw Iengkim LALPA, Israelhai Pathien, i siehlaw kuomah 'Sûngkuo indinpêk ka ti che' tiin i puong ta si leiin i siehlaw chun hi thu hi i kuomah a hung intlun ngam a nih. 28 Aw LALPA Pathien, nang chu Pathien i ni a, i thu chu innghatna tlâk a ni a, i siehlaw kuomah thil tha i tiem ta si a. 29 Chuleiin, i siehlaw sûnghai chu i hmaa kumkhuoa an um zing theina dingin lunginsiet takin malsawm rawh. Aw LALPA Pathien, i tiem tah angin, i siehlaw sûnghai hi i malsawmna zârin kumkhuoin malsawmin um ngei an tih" tiin.

8

1 Chu hnunga chun Davidan Filistin mihai chu a bei a, a hne a, a tukdol tawl a, Metheg Amahc chu an kuta inthokin a lâkpêk a. 2 Davida chun Moab mihai khom a hne a. Anni chu hnuoiah hrui khangin tlar thumin an inzâltir a, tlar hnia mi po an sukhlum a, tlar khata mi po an indamtir a. Chuongchun Moab mihai chu sie khuoah a siem a, sie an hung chawi hlak a. 3 Zoba lal, Rehob naupa Hadadezer chu Eufretis vadung hrûla a lalna tungding nawk dingin a fe a, ama chu Davidan a lo bei bok a. 4 Davida chun Hadadezer sakor tawlailir sângkhat, tawlailir khaltu sângsari le a sipai sînghni a manpèk a, an sakor laia zakhat ti chauh lo chu an zaper tha a satpêk vong a. 5 Damaskaa inthoka Aramd mihai, Zobaa lal Hadadezer san dinga hunghai chu Davidan sînghni le sânghni a lo that bok a. 6 Aramhai khawpui Damaskaa chun optu sipai a sie a, Aramhai chu Davida lalna hnuoiah an um a, a kuomah sie an hung chawi hlak a. Davida chu a fena taphotah LALPAN hnena a'n changtir pei a. 7 Davida chun Hadadezer ofisarhai rangkachak phaw po po chu a lâk khawm a, Jerusalemah a hung chawi a. 8 Chun, Hadadezer op khuo Beta (Teba) le Berot-haia inthokin dâr tam tak a hung hawn bok a. 9 Chun, Hamat lal Tou-ine Hadadezer sipaihai po po Davidan a hne tah ti a lo hriet a. 10 Ama leh khom lo indo tah hlak Hadadezer a hne leia chibai bûk le lawmpui dingin Tou chun a naupa Joram chu tangkaruo bêl dâm, rangkachak bêl dâm le dâr bêl dâm inchawitirin Davida kuomah a tir a. 11 Chuong thilpêkhai chu hnam dang lal a hnehaia inthoka a râllâk tangkaruo le rangkachakhai a'n hlàn hlak ang bokin Davida chun LALPA kuomah a'n hlàn a. 12 Chuong ang râllâk a'n hlàn tahai chu Suria mihai ta dâm, Moab mihai ta dâm, Amon thlahai ta dâm, Filistin mihai ta dâm, Amalek mihai ta dâm, Zoba lal Rehob naupa Hadadezer hai laka a râllâk dâm a nih. 13 Chi Ruoma Edom mihaif sîngkhat le sângriet thata a hung kîr hnung chun Davida hming chu a hung inthang ta hle a. 14 Edom ram hmun tinah optu sipai a sie a, Edom ram chu sie ramah a siem a. Davida chu a fena taphotah LALPAN hnena a'n changtir pei a. 15 Davida chun Israel ram po po a op a, mipuihai chungah ro indik tak le fel takin a rèl a. 16 Zeruia naupa Joab chu sipai lu takah a thang a; Alihud naupa Jehosafat chu chanchin ziektu a ni a; 17 Ahitub naupa Zadok le Abiathar naupa Abimelek hai chu thiempu an ni a; Seraia chu ziektu a ni a; 18 Jehoiada naupa Benaia chu Keret mihai le Pelet mihai hotu a ni a; Davida nauhai chu lal kuoma thurawn petu an nih.

9

1 Chun, Davida chun, "Jonathan 2 Saula sûnghai siehlaw pakhat, a hming chu Ziba a um a, ama chu Davida hmaa inlang dingin an ko a. Lal chun, "Nang hi Ziba chu i ni maw?" a ta, ama chun , "Ni e, kei i siehlaw hi" a ta. 3 Lal chun, "Pathien ditsakna ka'n entir theina dingin Saula sûngkuo laia mi a dam an la um am?" a ta. Ziba chun lal kuomah, "Pu um e, Jonathan naupa a la um a, sienkhom ke khing hnia inbai a nih" a ta. 4 Lal chun, "Khaw lai am a um?" a ta, Ziba chun, "Lo Debar khuoa Amiel naupa Makir inah a um" a ta. 5 Lal Davida chun ama chu Lo Debar-a Amiel naupa Makir ina inthok chun a va'n thuoitir a. 6 Saula naupa Jonathan naupa Mefiboset chu Davida kuomah a hung a, a hmaa chun inza takin a kûn a. Davida chun, "Mefiboset" a ta, ama chun, "I siehlaw hi ka um" a ta. 7 Davida chun, "Ti naw rawh, i pa zàrin ditsakna inentir ngei ngei ka ti che. I pu Saula ram po po inneitir nawk ka ti che a, ka dawkânah thlaithlèng i kîl rop ta ding a nih" a ta. 8 Mefiboset chu a kûn a, "I siehlaw hi ieng am a na, ui thi sa ang chauh keima ang i mi hang ngàisak nuom el chu?" a ta. 9 Chuongchun, lal chun Saula siehlaw Ziba chu a'n kotir a, a kuomah, "Saula thil po po le a sûngkuohai thil po po chu i pu naupa hi ka pêk vong a nih. 10 I pu naupa chun fâk a hmu theina dingin a ta dingin nang le i naupahai le i siehlawhaiin a lo inletpêk ro. I pu tupa Mefiboset chun ka dawkânah thlaithlèng ot zing tâng a tih" a ta. Ziba chu naupa sawmpanga le siehlaw sawmhni nei a ni tah. 11 Ziba chun lal kuomah, "Ka pu, lalin i siehlaw kuoma thaw dinga i pêk taphot chu i siehlaw hin thaw ngei ngei a tih" a ta. Chuongchun, Mefiboset chun lal naupahai angin lal dawkânah thlaithlèng a kîl ve ta a. 12 Chun, Mefiboset chun nau pasalte, a hming Mika a nei a, Ziba ina um po po chu Mefiboset siehlaw an nih. 13 Mefiboset chu Jerusalemah a um a, lal dawkànah thlaithlèng a kîl hlak a, ke khing hnia inbai a nih.

10

1 Chuong thil hnunga chun Amonhai lal a thi a, a naupa Hanun chun a lalna chu a hung hluo a. 2 Davida chun, "A pain a mi lunginsiet ang bokin Nahas naupa Hanun chu lunginsiet vèng ka tih" a ta, a pa a sûnpuina thu hril dingin a aiaw mi a tir a. 3 Amon thlahai ram an va tlung chun Amon milùnhai chun Hanun kuomah, "Davida hin i pa a'n zà leia sûnpuina thu hril dinga mi a hung tir ni i ring am a ni? A pei thlâk theina ding chea i khuo thlithlai ding le enthla dinga a mihai a hung tir a ni naw maw?" an ta. 4 Chuongchun, Davida mi hung tirhai chu Hanun chun a man a, an khâkhmul khing tieng chauh a vaw kolpêk a, an silfênhai chu an mongtam chena insingin a tanpêk a, a'n kîrtir ta a. 5 Chuonga an lo sukmuolpho thu Davida an hril chun a tuok dingin mi a tir a. Lal chun, "In khâkhmul inthang sei hma khat chu Jeriko-ah um zing unla, chu zoah hung chauh ro" tiin thu a'n cha a. 6 Davida hnàrah thil rimsie an lo inchang tah ti Amon mihaiin an hung hriet chun Beth Rehob le Zobaa inthokin Aram mihai sînghni, lal Maaka mihai sângkhat le Toba mihai sîngkhat le sânghni an incha khawm a, an ruoi a. 7 Davidan chu chu a hrietin Joab le a râldo thiem po po chu a tir a. 8 Amon mihai chu an hung suok a, an kul kotkhâr bula chun thanghmun an khaw a, Zoba le Rehobaa inthoka hung Aramhai le Maaka mihai ruok chu a hranin phûlah an um a. 9 Joab chun a hma tieng le a hnung tieng an hung bei ding ti a hriet a, Israel sipaihai laia a huoisen fàl thal mi iemani zât chu Aram mihai bei dingin a thlang suok a. 10 A dang po chu a unaupa Abisai inrawina hnuoiah Amon thlahai bei dingin a sie a. 11 Joab chun, "Aram mihai kan ngam naw chun mi hung san unla, Amon thlahai in ngam naw leh hung san kan ti cheu. 12 Hrât takin um unla, ei mihai le ei Pathien khawpuihai sanin huoisen takin bei ei tiu. LALPAN tha a ti ang peiin thaw raw se" a ta. 13 Chuongchun, Joab le a rawihai chun Aram mihai chu an bei a, an hmaa chun an tlânse dur dur a. 14 Amon thlahaiin Aram mihai an tlânsiet thu an hriet chun anni khom Abisai hmaa chun an tlânsie a, khuoa chun an lût a. Joab chun Amon thlahai chu Jerusalem tieng a kirsan ta a. 15 Chun, Aram mihaiin Israelhai an ngam nawh ti an hmu chun an inpun khawm nawk a. 16 Hadadezer chun Eufretis vadungpui khela um Aram mihai chu a va'n thuoitir a, chuonghai chu Hadadezer sipai kawmandar Sobak inrawina hnuoiah Helam-ah an fe a. 17 Chu thu Davida an hril chun Israel mihai po po a khawm a, Jordan an kàn a, Helamah an fe a. Aram mihai chun Davida do dingin thanghmun an lo khaw a, an lo bei a. 18 Sienkhom, Israelhai hmaa chun an tlânse a, Davida chun an tawlailir khaltu mi zasari bâkah kea lawn pawl sipai sîngthum a that a, an kawmandar Sobak khom a that a, chu taka chun a thi ta a. 19 Hadadezer hnuoia lalhaiin Israelhai an ngam nawh ti an hmu chun Israelhai chu inremna an siempui a, an kut hnuoiah an um ta a. Chuongchun, Aramhai chun Amon thlahai chu an thangpui nawk ngam ta nawh.

11

1 Thal lai, indoa lalhai an suok hlak huna chun Davidan a mihai le Israel sipaihai po po chu Joab rawiin a tir a, Amon mihai chu an va hne a, Raba khuo chu an inhuol a, Davida ruok chu Jerusalemah a um a. 2 Zân tieng voi khat chu ni nèma hin Davida chu a lal in chungah a'n vâk vel a, in chunga inthok chun nuhmei pakhat insil lai hi a hmu a, hmel tha a ti hle a. 3 Davida chun tu am a nih ti zong suok dingin mi a tir a. A mi tir chun, "Eliam naunu Bathsheba, Hit mi Uria nuhmei a nih" a ta. 4 Chu phing leh Davida chun mi a tir a, an hung thuoi a, a lo zàlpui a, (nuhmei inthieng nawnaa inthoka a'n sukthieng zo hlim a na), a in tieng a kîr nawk ta a. 5 Chun, nuhmei chu a hung inrai a, "Nau ka pai" tiin Davida chu a'n hriltir a. 6 Chun, Davida chun Joab kuomah, "Hit mi Uria kha ka kuomah hung tir rawh" tiin a'n cha a, Joab chun Uria chu Davida kuomah a tir a. 7 Uria a hung tlung chun Davidan Joab le sipaihai chu iem an chang a, indona iengtin am a fe pei ti thuhai a lo indon a. 8 Chun, David chun Uria kuomah, "I inah fe la, i ke va sawp rawh"g a ta. Uria chu lal ina inthok chun a suok a, lal chun thilpêk a thon zui nghal a. 9 Amiruokchu, Uria chu lal in kotkhâr bula chun a pu siehlawhai lai a riek a, a in tieng chun a fe nawh. 10 Uria chu a in tieng a'n lawi nawh ti Davida an hril chun Uria kuomah, "Hla taka inthoka hung i ni nawm am a ni? Iem a ta i in tieng inlawi loa i um?" a ta. 11 Uria chun Davida kuomah, "Pathien Bawm le Israelhai le Judahai chu bûkah an um a; ka hotupa Joab le ka pu mihai chu ramah an inkul a, kei ka inah inlawiin, faa dawnin, ka nuhmei kuomah ka zâl bik ding maw? I hringna le i thlarau hringna sâlin ka hril, chu chu thaw naw top ka tih" a ta. 12 Davida chun Uria kuomah, "Voisun khom hi takah la châm la, zîngah i fe chauh ding a nih" a ta, chu ni le a zîng chun Jerusalemah a la châm a. 13 Chun, Davida chun Uria chu a ko a, a hmaa chun fain a dawn a, a'n ruitir ta dèr a. Zân tieng chun a in tieng inlawi loin a pu siehlawhai lai riek dingin a suok ta a. 14 A zînga chun Davidan Joab ta ding lekhathon a ziek a, Uria chu a'n chawitir a. 15 Chu lekhathona chun Davidan, "Uria hi râl zuolna lai tak a hmatawngah inthangtir la, an lo that ngei dingin hnung intawlsan ro" tiin a ziek a. 16 Joab-in khuo a'n huol lai chun an râlhai tienga mi huoisen sen umna nia a hrieta chun Uria chu a'n thangtir a. 17 Khaw sûnga mihai chu Joab mihai do dingin an hung suok a, an bei a, Davida mihai ngei khom an thi a, Hit mi Uria khom chu a thi a. 18 Joab chun indo chanchin chu a kimin Davida kuomah a thon a. 19 A mi tir kuoma chun, "Indo chanchin i ripawt zo pha lal a lungsen thut a, 20 'Iengti dàna chuong anga hnaia chun in va bei am a na? Kula inthokin an lo kap ding cheu ti khom in hriet naw maw? 21 Jerubeset naupa Abimelek kha tuin am a that kha? Nuhmeiin bu rawtna lung sin kula inthokin a lu chungah a zuk thlâk a, Thebez-ah khan a thi a ni naw am a ni? Iengti dàna kul bul ela chun in fe am a na?" a ti chun, "I siehlaw Hit mi Uria khom a thi ve' ti rawh" tiin a hril a. 22 Chuongchun, a mi tir chu a fe a, a tlung chun Davida kuomah Joab-in hril dinga a ti po po chu a hril a. 23 A mi tir chun Davida kuomah, "Mihai chun an mi hung nor phei a, phula chun an mi hung bei a, keinin an khaw lûtna kotkhâr tlung rakin kan nor kîr a. 24 Thal kâptuhai chun i siehlawhai chu kula inthokin an lo kap a, lal siehlaw thenkhat an thi a, Hit mi Uria khom kha a thi ve a nih" a ta. 25 Davida chun zuolko kuomah, "Joab kuoma chun, 'Hi hin i lung sukhnuol naw raw se. Kawlhnàm chun a tu el khom a thlei naw a, nasa nawk zuolin khuo chu bei unla, sukse vong ro' tiin infui phur rawh" a ta. 26 Uria nuhmeiin a pasal thi thu a hriet chun a sûn a. 27 A sûn hun sûng a hung pêl chun Davidan a in tieng a'n thuoitir a, nuhmeiin a nei a, naupa a neipek a. Nisienlakhom, Davida thilthaw chun LALPA a suklawm nawh.

12

1 LALPA chun Davida kuomah Nathan a tir a. A hung chun a kuomah, "Khaw pakhata hin mi pahni an um a, pakhat chu mi hausa a na, pakhat chu mi rethei a nih. 2 Mi hausa chun beram ruol le bawng ruol a hau êm êm a. 3 Mi rethei ruok chun beram la chikte an chawk chauh chu a nei a, a vâi a, a nauhai leh a chawm tlei a, a fâk le dawn ang ang chu an intawm a, a ângsûngah a pom in a, a naunu ang hielin a cheibawl a. 4 Chun, mi hausa chun mikhuol a nei a, a beram ruol le bawng ruol laia mi chu thata thlaithlèng siempêk nêkin mi rethei beram la tuoi chu a lâkpêk a, a ina mikhuol hme ding chun a thatpêk a" a ta. 5 Chu mipa chunga chun Davida chu nasa takin a lung a sen a, Nathan kuomah, "LALPA hringna salin ka hril hi, chu thil thawtu chu thi tlâk a nih. 6 Hieng ang thil a thaw lei le lunginsietna a nei naw leiin a beram tuoi chu a lêt liin a rul ding a nih" a ta. 7 Nathan chun Davida kuomah, "Chu pa chu nang hi i nih. LALPA, Israelhai Pathien chun hieng hin a hril: 'Israelhai lal dingin hriek ka nàl che a, Saula kuta inthokin ka san suok che a. 8 I pu in le lohai ka pêk che a, a nuhmeihai chu i ângsùngah ka sie a. Israel sûnghai le Juda sûnghai khom ka pêk che a. Chuonghai chu a tlawm taluo i ti a ni chun a dang khom ka pek belsa ding che annawm. 9 Ieng dinga LALPA thu chu ngainêp a, a mithmuah thil tha lo i thaw am a na? Hit mi Uria chu kawlhnàmin i sukhlum a, a nuhmei i neipêk a. Amon mihai kawlhnàmin i that a nih. 10 I mi ngainêp a, Uria nuhmei chu i nuhmei dinga Uria i lâkpêk leiin tuta inthok hin i inah kawlhnàm inlêng tâng a tih' tiin. 11 "Hi hi LALPA thu chu a nih: 'Nangma sûngkuoa inthok ngeiin i chungah sietna hung intlungtir ka tih. I mithmua ngei i nuhmeihai chu lâkpêk ka ti che a, i tuolbawm kuomah pêng ka ta, i mithmua ngei sûn pachangah i nuhmeihai chu zâlpui a tih. 12 Nang chun a rûkin i thaw a, kei ruok chun Israelhai po po mithmua ngei sûn varah ka thaw ding a nih" a ta. 13 Davida chun Nathan kuomah, "LALPA lakah thil suol ka thaw a nih" a ta. Nathan chun, "LALPAN i suolna a lâk hmang ta a, thi naw ti nih. 14 Amiruokchu, hi thil i thaw hin Pathien hrilsietna remchâng tak LALPA hmèlmahai ta dingin i siempêk leiin, i laka pieng naupang chu thi ngei ngei a tih" a ta. Nathan chun a in tieng a fesan ta a. 15 In tieng Nathan a'n lawi hnung chun Uria nuhmeiin Davida a hringpèk naupa chunga chun LALPAN kut a thlâk a, a hung dam naw a. 16 Naupang ta dingin Davida chun a ngènpèk a. Bu a nghei a, a inah a lût a, zânkhuoin tuongah a zâl a. 17 A sûngkuoa upahai chun kei tho tumin an ngìr huol a, sienkhom a tho nuom naw a, an kuomah bu khom a fâk bok nawh. 18 A ni sarinaa chun naupang chu a thi a, Davida siehlawhai chun naupang thi thu Davida kuoma hril an rin a, "Ngai ta u, naupang dam lai hman khan a kuomah thu ei hril a, a ngàithlâk nuom naw a, tuhin naupang thi thu chu iengtin am ei hril ngam ta ding a na? Ama le ama iengtin amanih in thaw el a tih" an ta. 19 A siehlawhai inbiekrûk vel dâna inthokin Davida chun naupang chu a thi tah ti a hriet a, "Naupang chu a thi ta maw?" a ta, anni chun "A thi tah" an ta. 20 Chu phing leh Davida chu tuonga inthokin a tho a, a'n sil a, hriek a'n nàl a, a silfên a thlâk a, LALPA inah a fe a, Pathien chibai a bûk a, a in tieng a kîr nawk a, fâk ding a lam a, an hung thur a, a fâk a. 21 A siehlawhai chun a kuomah, "I thilthaw dàn hi iengtizie am a na? Naupang damnaw lai khan bu i nghei a, i tap a, sienkhom naupang a thi a, i tho a, bu dâm i fâk ta lem tlat si a!" an ta. 22 Ama chun, "Naupang damnaw lai khan bu ngheiin ka tap hrim kha. Ka lungrilin, 'LALPAN mi lunginsiet a ta, naupang chu a hung dam nawk el rawi mawh' ka ti lei a nih. 23 Tu ruok hin chu a thi ta a, ieng leiin am bu ka nghei ta ding? Ka ko kîr thei nawk ding am a ni? A kuomah kei chu la fêng ka ta, ama chu ka kuom tieng hung kîr ta naw nih" a ta. 24 Chun, Davida chun a nuhmei Bathsheba chu a thlamuon a, a kuomah a lût a, a zâlpui a, naupa a hring a, a hmingah Solomon a sak a, ama chu LALPAN a hmangai a. 25 LALPAN a hmangai leiin zawlnei Nathan kuomah a hminga Jedadia sakh dingin thu a pêk a. 26 Chuong lai chun Joab-in Amon thlahai khawpui Raba a rùn a, lal kul chu a lâk a. 27 Joab chun Davida kuomah mi a tir a, "Raba ka rùn a, an tui lâkna hmun ka lâk ta a. 28 Tu hin sipai dang po po hung khawm la, a khawpui hung inhuol inla, hung la rawh. Chuong naw chun keiin lâng ka ta, hming that hlaw hlau rawi ka tih" a ta. 29 Davida chun a mihai po po chu a khawm a, a'n inthok suok a, an va rùn a, an lâk ta a. 30 Amon thlahai milem biek Milkom an inkhumtir rangkachak lallukhum chu an lâk a, chu taka chun lunghlu khom a thang sa a, a rikzie chu kilogram sawmthum pali lai a nih. Chu chu Davida an inkhumtir a, khawpuia inthok chun râllâk sum tam tak an lâk bok a. 31 A khaw mipuihai chu an man a, thing àttu dâm, hnuoi inlettu dâm, thing phùrtu dâm le têklei siemtu dâmin a sor a. Chuong ang chun Amon thlahai khuo po poa chun Davidan a thaw a, a sipaihai po po leh Jerusalem tieng a kîr nawk ta a.

13

1 Chuong hun lai chun Davida naupa Amnon chun Tamar a ngaizawng a. Tamar chu Davida naupa Absalom farnu a na, nunghàk hmel tha tak a nih. 2 Amnon chu a farnu Tamar lei chun damnaw khopin a beidong a; ama hlak chu nunghàk thienglâm a ni si a, a chunga thil iemani hang thaw chu a ta dingin thil thei lo tlukin a'n lang a. 3 Amnon chun ruol pakhat a hming Jonadab a nei a, ama chu Davida unaupa Simea naupa a na, mi dawha nei tak a nih. 4 Ama chun Amnon kuomah, "Ieng leia nang lal naupa ni si, a ni têla i hmai a zûr tiel tiel am a na? A san i mi hril nuom naw maw?" a ta. Amnon chun, "Ka unaupa Absalom farnu Tamar ka ngaizawng lei a nih" a ta. 5 Jonadab chun, "Va zâl la, damnaw tehlem thaw rawh. I pain a hung en pha che leh a kuomah, 'Ka farnu Tamar kha hung thei sien, bei fâk ding mi hung pe sien la, ka mithmua ngei fâk ding mi siempèk sien, a kuta mi ngei chu lo fâng ka tih' ti rawh" a ta. 6 Chuongchun, Amnon chu a zâl a, a damnaw tehlem a. Lalin a hung en chun a kuomah, "Lunginsiet takin ka farnu Tamar hung sien la, ka hmua ngei hin bei inhnik tak siem sien la, a kuta mi ngei chu lo fâng ka tih" a ta. 7 Davida chun Tamar kuomah, "I tapa Amnon in tieng fe la, fâk ding va siempèk raw khai" tia hril dingin lal ina chun mi a tir a. 8 Tamar chu a tapa Amnon ina chun a fe a, ama chu a lo zâl zing a. Tamar chun bei phit a lâk a, a hmet a, Amnon hmua chun beipèr a siem a, a ur a. 9 A urna thlènga chun bei chu a va pêk a, sienkhom a fâk nuom naw a. Amnon chun, "Mi po po hin mi suoksan vong raw hai se" a ta, an suoksan ta vong a. 10 Amnon chun Tamar kuomah, "I kuta mi ngei ka fâk theina dingin fâk ding chu pindana hin hung la raw leh" a ta. Tamar chun a beipèr siemhai chu a tapa pindana chun a chawi lût a. 11 Infâktir dinga a kawl hnaia a va fe chun a lo man a, a kuomah, "Ka farnu, hung zàl ve rawh" a ta. 12 Tamar chun, "Ni lo e, ka tapa. Mi tilui naw rawh. Chuong ang thil chu Israel rama hin thaw ding a ni nawh. Hieng ang thil rilo hi thaw naw rawh. 13 Kei hi iem chang ka ta? Vântlâng hmaah iengtin am ka ngha ngam ta ding? Nang khom iem i ni ding? Israelhai laia mi rilo le mi suola ngai hung nîng i tih. Chuleiin, lal be lem la, i mi nei chu sêl chuong naw nih" a ta. 14 Amiruokchu, a thu a ngâithlâk nuom naw a, amanu nèkin a thá a hrât lem si leiin a suollui a. 15 Chu zoa chun Amnon chun Tamar chu theida taktein a theida nawk si a, a ngaizawng laia a ngaizawngna nêk daiin a theidana chu a sosang lem a. Amnon chun, "Tho la, fe hmang dai rawh" a ta. 16 Tamar chun, "Chuong el ding chu ni lo e, hienga indik lo taka i mi'n fètir tum hi ka chunga i thaw nêk khan a tha naw lem hman a nih" a ta. Amiruokchu a thu hril chu a ngâithlâk nuom chuong nawh. 17 Amnon chun ama rongbawltu siehlaw chu a ko a, "Hi nuhmei hi ka kuoma inthokin insuoktir la, kot kal tlat rawh" a ta. 18 A siehlaw chun a'n suoktir a, kot chu a sûng tieng a kal a. Ama chun korfuol mawi taka chei a hâk a, chu chu lal naunu, nunghàk thienglâmhaiin an hâk hlak hrim a nih. 19 Tamar chun a lu-ah vut a phul a, a hâk lai korfuol chei chu a pot thlêr a, a kutin a hmai a hup a, inring taka tap pumin a suok a. 20 A tapa Absolom chun a kuomah, "I tapa Amnon chun a tawkpoi che a ni maw? Ka farnu, to hram hram rawh, i tapa a ni si a. Tuor na taluo naw rawh" a ta. Chuongchun, Tamar chu a tapa Absalom inah mal takin a'n khum hmang ta dai a. 21 Nisienlakhom, lal Davidan chuong thil po po a hang hriet chun a lung a sen hle a. 22 Absalom ruok chun Amnon kuomah a sie a tha ieng khom a hril nuom nawh. A farnu a sukhmingsiet lei chun Absalom chun Amnon chu a theida hle a. 23 Kum hni a'n voi hnungin Absalom chun a beram hmul vawtuhai umna, Efraim-hai ramri bul, Baal Hazor-a chun lal nauhai po po a fiel a. 24 Absalom chu lal kuomah a fe a, "Ngai ta, i siehlaw hin beram hmul a'n vawtir a, lal le a siehlawhai khom i siehlaw thil lawmnaa chun an hung ve thei hràm naw ding maw?" a ta. 25 Lal chun, "Ni lo e, ka naupa, kan rêng chun ni lo e, sukrik taluo rawi kan ti che" a ta. Absalom chun a ngen raka chu a nuom chuong naw a, sienkhom mal a sawm a. 26 Absalom chun, "Chuonga i ti a ni si chun ka unaupa Amnon bêk hi chu hung hràm raw se" a ta. Lal chun, "Ieng leiin am a hung bîk ding?" a ta. 27 Absalom chun a ngèn tlat leiin Amnon le lal nau danghai chu a'n fetir a. 28 Absalom chun a siehlawhai kuomah, "Ngai ro, Amnonin uoiin a'n ruia a hlim lai tak, 'Amnon kha vaw hlum ro' ka ti pha leh that ro. Ti dêr naw ro. Thu ka pêk cheu a ni naw am a ni? Hrât tak le huoisen takin um ro" tiin a hril tawl diem a. 29 Chuong ang chun Absalom siehlawhai chun Amnon chungah an thaw a. Chun, lal nau danghai po chu an tho a, an sabengtung chunga seng an chuong a, an tlân hmang ta a. 30 Lampuia an la thang zing lai chun Davida kuomah, "Absalomin i naupahai po po a that a, pakhat khom hlà a nei nawh" tiin an hril a. 31 Lal chu a tho a, a silfènhai a pot thlèr a, tuongah a zâl a; a siehlawhai po po khomin an silfènhai pot thlèrin a bula chun an ngîr a. 32 Sienkhom Davida unaupa Simea naupa Jonadab chun, "Ka pu chun lal nau tlangvàl po po a that vong ti an hril hi ring naw raw se, Amnon chauh a nih a thi. A farnu Tamar a suolluia inthok khan hieng ang hin thaw a tum hrim a nih. 33 Chuleiin pu, lal chun lal naupahai po po an thi vong ti thuthang hi ring naw raw se, Amnon chauh a nih a thi chu" a ta. 34 Absalom ruok chu a tlân hmang a. Chuong lai chun lal vêngtu tlangvàl chu a hang ngha vêl a, a ngîrna thlang tieng tlâng pang lampuia mi tam tak hung thla chu a hmu a, lal kuoma chun a zu fe a, "Horanaim tieng tlâng panga mi tam tak hung thla ka hmu" tiin a hril a. 35 Jonadab chun lal kuomah, "En ta la, i siehlawin a hril ang char khan lal nauhai chu an hung tlung ta hi" a ta. 36 A hril zo charin lal nauhai chu an hung lût a, inring takin an tap a, lal khom chu a siehlawhai le chun lung na takin an tap a. 37 Absalom chu Gesur lal Amihud naupa Talmai kuoma chun a fe a. Davida chun a naupa chu ni tin a sùn a. 38 Gesura Absalom tlân hmang chu kum thum a va um a. 39 Lal chun Amnon pùr a do zo phing leh Absalom hmu a châk êm êm a.

14

1 Lalin Absalom a ngai êm êm 2 Chuongchun Tekoa khuoa um nuhmei var tak el chu va thuoi dingin mi a tir a, a kuomah an hung thuoi a. Nuhmei kuoma chun, "Mithi pûr do angin insiem la, lusûn thuom inbel la, ieng khom innàl naw la, nuhmei, ni tam tak mithi pûr do tah angin um rawh. 3 Chun, lal kuomah fe la, ka hril ang che hin va hril rawh" a ta, a hril ding thu chu Joab chun a'n bâ diem a. 4 Tekoa khuoa nuhmei chu lal kuomah a fe a, bawka hnuoi sikin inza takin chibai a bûk a, "Aw lalpa, mi thangpui rawh" a ta. 5 Lal chun, "Iem a na i harsatna?" a ta. Ama chun, "Hmeithai el ka ni a, ka pasal a thi ta a. 6 I bawinu hin naupa pahni a nei a, an pahni chun an lo fènaah an insuol a, theltu ding tu khom an um si naw a, pakhat chun pakhat lem chu a sukhlum a. 7 Tuhin an pahnam po poin i bawinu hi an do hron a, 'A unaupa thattu chu a unaupa a that leia kan that ve theina dingin mi hung pe suok rawh, rohluotu ding chu sukbohmang nghâl kan tih' tiin an mi nor a. Ka'n hnemna meiling nei sun an sukchimit chun, hi hnuoia hin thla nei lo le hming nei loin ka pasal an siem el ding a nih" a ta. 8 Lal chun nuhmei kuomah, "I in tieng kîr nawk ta la, i chungchang thua chun thupêk insuong ka tih" a ta. 9 Tekoa khuoa nuhmei chun, "Aw lalpa, bawsietna maw chu ka chunga le ka pa sûnghai chungah tla sien la, lal le a lalthungpha chun a maw phur naw raw se" a ta. 10 Lal chun, "Tu khomin ieng khom an hril chun, ama chu ka kuomah hung thuoi la, sukbuoi nawk ta naw ni che" a ta. 11 Ama chun, "Ka naupa hi an sukbohmang nawna dingin, thisen phuba la tumtuhai laka vêng him dingin lal chun LALPA Pathien kuomah dawvan mi kàipèk raw se" a ta. Lal chun, "LALPA hringna salin ka hril hi, i naupa chu a samzai pakhat khom hnuoia hin tla naw nih" a ta. 12 Nuhmei chun, "I siehlaw hin ka lalpa, lal kuoma hin thu bau khat chauh hang hril nawk hràm raw se aw" a ta. Lal chun, "Hril ta la" a ta. 13 Nuhmei chun, "An leh ieng leiin am Pathien mihai kal zawnga hieng anga lalin thil poi a thaw? A naupa tlân hmang hung kîr ding a phal si naw chun tuta a thu hril chun lal chu ama le ama thiemnaw changin a'n siem a ni naw maw? 14 Hnuoia tui sukbuok ta hnung rût nawk thei lo anga thi vong ding chu ei ni ngei a. Pathien khomin mithi ta hnung chu a hung thuoi kîr nawk ta ngai nawh. Amiruokchu, lal chun mi tlân hmang chu a hung thuoi kîr nawk thei annawm. 15 Chun, lalpa, ka pu kuoma thu hril dinga ka hung khom hi mihai ka ti lei a nih. Ka lungrilin, 'Lal kuomah hril phot ka ta, lal chun a bawinu hnina chu a lo inhlawtlingtir khiet el thei a. 16 Chun, ka thu mi ngaithlapêkin, LALPA ro mi pêk, kei le ka naupain hluo thei lo dinga mi sukbohmang tumtu lakah a mi san suok el rawi mawh' ka ti a. 17 Chuongchun, i bawinu ta ding hin ka lalpa, ka pu thu chu thlamuongum tak ni sien la, a sie a tha hmu fie thei dingin ka lalpa, ka pu chu Pathien vântirko ang a ni si a. LALPA Pathien chu i kuomah um raw se" a ta. 18 Lal chun nuhmei kuomah, "Thu ka'n don taphot che chu ka lakah ieng khom ip naw raw aw" a ta. Nuhmei chun, "Ka lalpa, ka pu chun hang hril sien tie" a ta. 19 Lal chun, "Hieng thua hin Joab-in thangna a nei hrim hrim am?" a ta. Nuhmei chun, "Ka lalpa, ka pu, i hringna salin ka hril, ka lalpa, ka puin a hril tah chu tu khomin chang tieng amanih voi tieng amanih pumpel thei naw ni hai; a nih, i siehlaw Joab chun a mi tir a, hieng thu po po hi ama mi'n bâ vong a nih. 20 Thil um dàn sukdanglam dingin i siehlaw Joab chun hieng thil hi a thaw a nih. Hi rama thil tlung po po hre fie vong thei dingin Pathien vântirko angin ka pu hi i var si a" a ta. 21 Chun, lal chun Joab kuomah, "A tha chu, thawng ka tih. Tlangvàl Absalom chu va thuoi kîr rawh" a ta. 22 Joab chun hmaia hnuoi sika bokkhupin chibai a bûk a, lal chu mal a sawm a, "Aw lalpa, ka pu, lalpa chun a siehlaw hnina chu a'n hlawtlingtir leiin voisun hin i siehlaw hin i mit ka tlung ti ka hriet tah" a ta. 23 Chuongchun, Joab chu a tho a, Gesur-a chun a fe a, Absalom chu Jerusalemah a hung thuoi a. 24 Lal chun, "Ama in tieng fe sien la, ka hmèl ruok chu hung hmu naw raw se" a ti leiin Absalom chun a in tieng a pan a, lal hmèl chu a hmu ta naw a. 25 Israel mihai po po lai Absalom anga hmèl thata inpâk hlaw tu khom an um naw a, a ke hmawra inthoka a lu sîp chenin soiselna ding hrim a um nawh. 26 A sam a tha êm leiin a rik a, a'n khâttawkin lu a vaw a, a vaw zâtin a sam chu a bûk a, lal bûkna hmanga bûkin kilogram hni a tling hlak. 27 Absalom chun naupa pathum le naunu hmèl tha tak el pakhat Tamar a nei a. 28 Absalom chu lal hmèl hmu loin kum hni zet Jerusalemah a um a. 29 Chun, lal kuoma tir dingin Joab a'n cha a, sienkhom a hung nuom naw a. An cha non a, a la hung chuong naw a. 30 Chu phing leh a siehlawhai kuomah, "Joab lo chu ka lo kawla um a na, barli a chîng a, va rawpêk vong ro" a ta, Absalom siehlawhai chun lo chu an va raw a. 31 Chuongchun, Joab chu a tho a, Absalom inah a fe a, "Ieng leiin am i siehlawhaiin ka lo an raw?" a ta. 32 Absalom chun, "Ngai rawh, ieng leiin am Gesura inthokin ka hung a na? Chu taka chun um zing lang ka ta dingin tha lem ding" tia lal kuoma hril dingin tir che ka nuom a, ka'n cha che a; chuleiin lal hmèl chu mi'n hmutir rawh, bawsiet ka nei chun mi sukhlum el raw se" a ta. 33 Chuongchun, Joab chu lal kuoma chun a fe a, chu thu chu a hril a. Lal chun Absalom chu a ko a, a fe a, a hmaah bawka hnuoi sikin a bokkhup a, lal chun Absalom chu a fawp a.

15

1 Chuong thil hnunga chun Absalomin ama hmang dingin tawlailir le a hnûktu sakorhai le a zuitu mi sawmnga a buotsai a. 2 Zîng inhma takin a tho a, khawpui lûtna kul kotkhâr bulah a ngîr a, lal kuoma thubuoi hril dinga hung taphot chu a lo ko a, "Khaw lai khuoa inthoka hung am i na?" a lo ti seng a. "I siehlaw hi Israel hnamhai laia mi ka ni ve" an ti pei a. 3 Chu zoah Absalom chun, "Ngai ta, i thu chu a'n dikin a tha ngei a, sienkhom a ngaituotu ding lalin a ruot si naw a ni hi tie!" a lo ti pei a. 4 Absalom bok chun, "Kei dâm hi rorêltuin a mi ruot chu ni sien, thubuoi le thupoi nei taphot chu ka kuomah hung an ta, indik takin ka lo rêlpêk el ding a ni vei leh" a ti zie bok a. 5 Chun, tu khom a hmaah kûna hung hnai taphot chu a kutin a lo ban a, a kuo a, a lo fawp pei a. 6 Lal kuoma thu intlun dinga hung taphot chuong anga a lo thaw pei leiin Absalom chun Israel mihai lungril a hîp ta hle a. 7 Chun, kum lii a hung invoi hnung chun Absalomin lal kuomah, "LALPA kuoma ka thu intiemkamna hlen dingin Hebron khuoah mi'n fetir rawh. 8 Suriaj ram Gesur-a i siehlaw a um lai khan, 'LALPAN Jerusalemah a mi thuoi kîr nawk chun Hebron-ah inthawina inhlàn ka tih' tiin a lo intiem ta si a" a ta. 9 Lal chun, "Thlamuong takin fe rawh" a ta, Hebrona chun a fe ta a. 10 Absalom chun, "Tawtawrawt ri in hriet charin, 'Absalom chu Hebronah lal a nih' ti ro" tia hril dingin Israel mihai po po lai a rûkin mi a tir a. 11 Jerusalema inthoka mi zahni a fielhai chun Absalom chu an zui a, anni chun thil chinchàng ieng khom an hriet ve nawh. 12 Absalomin inthawina a'n hlan lai chun Gilon mi Ahitofel, Davida khawnbawl chu a umna Gilo-a inthokin a'n cha a. A thil phierrûk chu hung hrât peiin a zuitu chu an hung pung ta tuol tuol a. 13 Chun, Davida kuomah mi a hung a, "Israel mihai lungril chu Absalom tieng a thle vong tah" tiin a hung hril a. 14 Davida chun Jerusalema a thoktuhai po po kuomah, "Tho unla, tlân suok ei tiu, Absalomin tu khom mi hlà naw nih. Inrang taka ei suok a ngai. Chuong naw chun mi hung nang hman dingin a suok nghal ring a um a, ei chungah sietna intlunin, kawlhnàmin a khaw phêk hin mi hung sâm rawi a tih" a ta. 15 Lal thoktuhai chun a kuomah, "I siehlawhai hin lalin a ti ang ang chu thaw dingin kan inpei zing a nih" an ta. 16 Chun, lal chu a suok a, a sûnghai po poin an zui a, lal in enkoltu dingin a hmeihai sawm a mâksan a. 17 Lal a hang suok chun mipuiin an zui a, iemani chena hlaa chun an chawl hri phot a. 18 A mihai po po le Keret mihai le Pelet mihai chun an fe pel a, Git mi zaruk ruol, Gath-a inthoka hung zuituhai chu lal hmaa chun an fe a. 19 Lal chun Git mi Itai kuomah, "Ieng leiin am nang hi i hung ve ding? Kîr nawk la, lal Absalom kuoma chun um rawh, nang chu mikhuol, ram dang mi châmbâng i ni hi. 20 Zani ta hung tlung chauh kha i na, voisun hin a suk a tunga mi zui dingin ka phût ve ding che am a ni? Kei ngei khomin ka fena ding chin hrim ka hriet nawh. Kîr nawk la, i mihai hi thuoi rawh. Lunginsietna le ringumna chu i chungah um raw se" a ta. 21 Sienkhom, Itai chun lal kuomah, "LALPA hringna le ka lal hringna sâlin ka hril hi, lal, ka pu hi i umna taphotah thi le thi, dam le dam, i siehlawin um zing a tih" a ta. 22 Davida chun Itai kuomah, "An leh, hma thuoi unla, fe pei ei tiu" a ta. Chuongchun, Git mi Itai le a mihai le sûngkuo an thuoihai chun hma tieng an pan pei a. 23 An liem lai chun a ram phêkin inring takin an ta a. Lal khomin Kidron vadung chu a kân a, thlalèr lam tieng panin mipui chun an zui a. 24 Thiempu Zadok khom anni lai a thang a, a kuoma fe ve Levihai po po chun Pathien Bawm an zawn a. Chun, Pathien Bawm chu an innghat a, thiempu Abiathar chun mipuiin khawpui an suoksan zo vong chenin inthawina a'n hlàn a. 25 Lal chun Zadok kuomah, "Pathien Bawm hi khawpui sûngah zawn kîr nawk ro, Pathien mit ka tlung chun mi thuoi kîr nawk a ta, Pathien Bawm le a umna chu mi'n hmutir nawk a tih. 26 Amiruokchu, 'Nangmaah lawmna hrim ka nei nawh' a ti ruok chun ka chungah a nuom ang anga thaw dingin ka'n pei zing a nih" a ta. 27 Chun, lalin thiempu Zadok kuoma bok chun, "Nang chu zawlnei i nih an naw maw? I naupa Ahimaaz le Abiathar naupa Jonathan hi thuoi la, thlamuong takin khawpui tieng kîr nawk ta ro. Nang le Abiatharin i naupa pahnihai hi thuoi ro. 28 Kei chu chanchin in mi hung inhriettir nawk hma po chu thlalera vadung kaia hin lo um ka tih" a ta. 29 Chuongchun, Zadok le Abiathar chun Pathien Bawm chu Jerusalemah an kîrpui nawk a, chu taka chun a um a. 30 Chuongchun, Davida chun tap malam pei pumin Oliv tlâng chu a pan tung a, a lu a'n khum a, ke lawngin a fe a. Ama le fe mipui po po khom chun lu an inkhum a, an tap malam pei a. 31 Chun, "Absalom thu phierrûkpuitu chu Ahitofel a nih" tiin Davida chu an hung hril a. Chuongchun, Davida chu a tongtai a, "Aw LALPA, Ahitofel thu phierpui chu invêtthlâkah inchangtir dingin ka ngèn che" a ta. 32 Davidan tlâng sîp, Pathien an biekna hmun a hang lawn kai chun Ark mi a hming Husai, a zakuo potthlèr chu hâka, a luah pilvut kai nung el chun a lo tuok a. 33 Davida chun a kuomah, "Ka kuomah i hung chun ka ta dingin phurrik nîng i tih. 34 Jerusalemah i kîr nawk ruok chun Absalom kuomah, 'Aw lalpa, i siehlaw nîng ka tih. Kha hma khan i pa siehlaw ka ni hlak a, tu hin chu i siehlaw ni lem tâng ka tih' ti la, Ahitofel thu phierpui po po sukhrûttu nîng i tih. 35 Chu taka chun i kuomah thiempu Zadok le Abiathar khom an um ve ding a na, lal ina thu suok i hriet po po chu anni kuomah i hril hlak ding annawm. 36 Ngai ta, an naupahai pahni, Zadok naupa Ahimaza le Abiathar naupa Jonathan hai khom an kuomah an um kha. I thil hriet taphot chu mi'n hriettir dingin anni chu i hung tir hlak ding a nih" a ta. 37 Chuongchun, Davida ruol tha Husai chu Absalomin Jerusalem a lût lai chun khawpuiah a hung lût ve ta a.

16

1 Davidan tlâng sîp a pel hnung hla rak loa chun Mefiboset siehlaw Ziba chun hmu tumin a lo nghâk a. Ama chun bei tluon zahni, grep bawr em tawl phêk zakhat, theichang em tawl phêk zakhat le uoiin pêng khat phur sabengtung iemani zât a thuoi a. 2 Lal chun Ziba kuomah, "Hieng hi ieng dinga i hung chawi am?" a ta. Ziba chun, "Sabengtunghai hi lal sûngkuohai chuongna ding a na, bei tluon le theihai hi tlangvàlhai fâk ding a na, uoiin hi thlalèra chau taphothai dawn ding a nih" a ta. 3 Davida chun, "An leh, i pu tupa kha teh khawla'm iem a chang ta a?" a ta. Ziba chun, "Jerusalemah a um; 'Voisun hin Israel sûngkuoin ka pu ram an mi pêkkîr nawk ding a nih' ti a beisei tlat an nawm" a ta. 4 Lal chun Ziba kuomah, "Mefiboset thil nei po po chu tu hin i ta a ni tah" a ta. Ziba chun, "Inza takin chibai ka bûk che, aw ka lalpa le ka pu, i mit tlunga um pei ka nuom" a ta. 5 Lal Davidan Bahurim a tlung chun Saula sûnghai laia mi, Gera naupa a hming Simei chu a hung suok a, tongsie a'n phur bor bor a. 6 A vêngtuhai chu voi le changah umhai sienkhom Davida le a thoktuhai chu lungtein a dêng a. 7 Simei chun tongsie inphurin, "Fe hmang dai rawh! Fe hmang dai rawh, nang thisen insuo hmang le mi rilopa! 8 A lalna i hlu suok Saula sûnghai thisen phuba chu LALPAN i chungah a hung bun lêt che a, LALPA chun ram chu i naupa Absalom kuomah a pêk tah a ni kha. Thisen insuo hmang mi i ni leiin i sietna i kei dok a ni khah" a ta. 9 Zeruia naupa Abisai chun lal kuomah, "Iengti dana hi ui thi sa hin ka lalpa hi tongsie a'n phur ngam am a na? Fêng ka ta, a lu va tan bong ka tih" a ta. 10 Sienkhom, lal chun, "Nangni Zeruia nauhai le kei hin inangna iem ei nei a? LALPAN, 'Davida saw tongsie inphur rawh' a ti leia a mi'n phur a lo ni lem chun, nang le keiin, 'Ieng leia hieng thil hi i thaw am a na?' ei ti thei ding am a ni?" a ta. 11 Chun, Davida bokin Abisai le a thoktuhai kuomah, "Ka naupa ngei ngei, ka taksa le thisen put ngei hmanin ka hringna lâk a tum chun, hi Benjaminpa lem hin chu nasa nawkzuola mi soisak a tum naw ding am a ni? Tosan ro, LALPAN thaw dinga a hril leia tongsie a mi'n phur a ni chu. 12 Voisuna tongsie a mi'n phur leia ka rinum tuor hi LALPAN hmung a ta, a tha tiengin a mi rul nawk lem el thei bok a nih" a ta. 13 Chuongchun, Davida le a mihai chu an fe pei a, ràl khing tlâng panga chun Simei khom chu a fe a, fe malamin tongsie a'n phur ngat ngat a, lungtein a dêng a, lung thil dàmin a thê bok a. 14 Lal le a kuoma umhai po po chun chau hnêpin Jordan an tlung a, chu taka chun an chawl hadam a. 15 Chuong lai chun Absalom le a zuitu Israel mihai chun Jerusalem an lût a, anni lai chun Ahitofel khom a thang a. 16 Chun, Davida ruolpa Ark mi Husai chu Absalom kuomah a fe a, "Lal chu dam sawt raw se, Lal chu dam sawt raw se" tiin chibai a bûk a 17 Absalom chun Husai kuomah, "Hieng ang hi a ni maw i ruolpa i lunginsiet dàn chu? Iengti dàna i ruolpa kuomah i fe ve naw?" a ta. 18 Husai chun Absalom kuomah, "Fe ve naw ning. LALPA le hieng mipuihai le Israel mihai po poin an thlang thu thuin um ka ta, a kuomah um lem ka tih. 19 Chu bakah, tu rong am a na ka bawl ding? A naupa rong chu ka bawl ding a ni naw am a ni? I pa rong ka bawl ang char khan i rong khom bawl ka tih" a ta. 20 Absalom chun Ahitofel kuomah, "Iengtin am ei thaw ta ding a na? Thurawn mi pe raw leh" a ta. 21 Ahitofel chun, "Lal in nghâktu dinga i pain hmei a mâksanhai hi zâlpui rawh. Chuongchun, Israel mihai po poin i lakah i pa hnàr a kîr ti hung hrieng an ta, i tienga thanghai kut sukhrât sot i tih" a ta. 22 Chuongchun, Absalom ta dingin in chunga chun puon in an kei a, Israelhai po po mithmua chun a pa hmeihai chu a zâlpui ta a. 23 Chuong lai chun Ahitofel thurawn pêk taphot chu Pathien thu ang hiela an ngai a nih. Chuong ang chun Davida le Absalom khomin Ahitofel thu chu an ngai ve a nih.

17

1 Chuong naw khom chu Ahitofel chun Absalom kuomah thurawn pein, "Mi sîngkhat le sânghni thlang suok ka ta, voizan hin Davida hnot dingin inthok suok ka tih. 2 A chàu lai le a hrât naw lai tak va nangching ka ta, va sukthlabâr ka ta, a kuoma mi um po po tlân hmang an ta, lal chu va that ka tih. 3 I mi zongpa a thi phot chun mipuihai chu tawk poi loin i kuomah hung thuoi kîr nawk el ka tih" a ta. 4 A thil phan chu Absalom le Israel upahai chun tha an ti tlâng a. 5 Sienkhom Absalom chun, "Ark mi Husai khom kha hung ko ro, iem a hril hang ngàithla vèng ei tih" a ta. 6 Husai a hung chun Absalomin, "Ahitofelin hi thurawn hi a mi pêk a. A rot ang hin ei thaw ding? I ngàidân hang hril ve ta" a ta. 7 Husai chun Absalom kuomah, "Tuta tuma Ahitofel thurawn pêk che hi chu a tha nawh. 8 I pa le a mihai hi i hriet a, mi râl hrâng, kolsen tak, phûla savom huoi, a tê lâkpêk ang el an nih. Chu bâkah i pa chu râl bei thiem a na, zânah a sipaihai lai riek teu naw nih. 9 Tu khom hin pûk amanih khaw lai amaniah inbîng a tih. In sipaihai a hung bei hmasa vai chun, a ri hre taphot hril ding chu, 'Absalom zuituhai an that teu' ti ni el a tih. 10 Chuong a ni chun, in sipai huoisen tak hai, sakeibaknei lungril ang put mihai meu khom an lungril zâm a ta, Israel mi po po hlak chun i pa chu sipai huoi tak a ni thu le a kuoma umhai chu sipai huoisen tak tak an nih ti an hriet vong si a. 11 "Ka thurawn pêk ve chu hi hi a nih: Dan-a inthoka Beersheba inkâra Israel mihai po po, tuipui kama tieu zât zeta tamhai chu khawm phot la, indonaah nangma ngeiin hma thuoi rawh. 12 Chuongchun, khaw lai hmuna khom ei tuok fûkna taphotah, hnuoia daidaw tla ang elin, a tuomin tuom khum ei ta, ama le a kuoma umhai po po chu tu khom hla hrim nei nawng ei tiu. 13 Chu el bâkah, khuoah a lût chun, Israel mi po poin hruihruol chawiin chu khuoa chun lût ei ta, a khaw pumin ieng hlek khom màksan lo khopin vadungah hnûk thla vong ei tih" a ta. 14 Chuongchun, Absalom le Israel mi po po chun, "Ark mi Husai remruot chu Ahitofel remruot nêkin a tha lem" an ti a. LALPA chun Absalom chungah sietna an tlun theina dingin Ahitofel thurawn tha tak chu a'n hnawltir a nih. 15 Chuongchun, Husai chun thiempu Zadok le Abiathar kuomah, "Chuong ang khang ang chun Ahitofelin Absalom le Israel upahai rem a ruotpui a, chun, keiin chuong ang khang ang chun rem ka ruotpui bok a. 16 Chuleiin, 'Voisun chu thlalèra vadung kaia dâm riek ta loin kân ngei ngei ro, chuong naw chun lal le a kuoma um po po chu sukbohmang hlau rawi an tih' tiin Davida va'n hriltir vat ro khai" a ta. 17 Jonathan le Ahimaz chu En Rogel-ah an um a. Khawpuia an hung lût tu khomin an hmu chu a tha si naw leiin, an kuomah siehlaw nunghàk tira va'n hriltira, anni chun Davida va hril sawng dingin rem an ruot a. 18 Amiruokchu, tlanglakte pakhatin anni chu a lo hmu a, Absalom a hril a. An pahni chun an tlân hmang nghal a, Bahurim-a mi pakhat, tuola tuikul nei inah an fe a, tuikula chun an lût a. 19 Nuhmei chun tuikul sinin a sìn khum a, a chunga chun bu a em a, tu khom hriet thei a ni nawh. 20 Absaloma siehlawhai chu ina nuhmei kuoma chun an fe a, "Ahimaaz le Jonathan hai kha khaw lai am an um?" tiin an indon a, ama chun "Vadung an kân tah" a ta, an va zong a, sienkhom an hmu zo naw a, Jerusalem tieng an kîr nawk ta a. 21 An liem phing leh tuikula inthokin an hung suok a, lal Davida chu an va hril a, a kuomah, "Suok unla, vadung kân inhmaw ro; hieng ang hin Ahitofel chun thu a phierrûk a nih" an ta. 22 Chuongchun, Davida le a mihai po po chu an suok a, Jordan vadung chu an kân a, khuo a hung var chun a kân lo pakhat khom an um ta nawh. 23 Ahitofel chun a remruot ang an zawm nawh ti a hrietin a sabengtung a buotsai a, a suok a, an khuo tieng a fe a, a sûnghai khawsak dàn ding a rêl fel vong a, a'n awk hlum a, a pa thlàna chun an phûm a. 24 Davida chun Mahanaim a va tlung a, Absalom le Israel mihai po po khomin Jordan chu an kân a. 25 Absalom chun Joab aiin Amasa chu sipai kawmandarah a sie a. Amasa pa chu Jether, Israel mi a na, a nuhmei chu Abigail a nih. Abigail chu Nahas naunu a na, a zuorpuinu chu Joab nu Zerui a nih. 26 Absalom zuitu Israel mihai chun Gilead ramah thanghmun an va khuor a. 27 Davidan Mahanaim a hung tlung chun Amon thlahai khuo Rabaa mi Nahas naupa Sobi le Lo Debara mi Amiel naupa Makir le Rogelima inthoka hung Gilead mi Barzilai hai chun, 28 "Mipuihai chu thlalerah phingtam dangchârin an chau zo tah" an ti leiin puonthuo dâm, thlêng dâm, maihùn dâm, pil bêl dâm, bu dâm, barli dâm, beiphit dâm, zeupuok dâm, bê dam, dailuo dâm, 29 bawngnene dâm, dahi dâm, beram dâm, bawngnene khal tlang dâm Davida le a mihai ta dingin an hung chawipêk a.

18

1 Davida chun a mihai chu a khawm a, sipai sâng chunga kawmandar le za chunga kawmandar ding a ruot a. 2 Davida chun a mihai chu a tir suok a, hmun thuma thea hmun khat chu Joab-in a'n rawi a, hmun thuma thea hmun khat chu Zeruia naupa Joab unaupa Abisai-in a'n rawi a, hmun thuma thea hmun khat dang chu Git mi Itai-in a'n rawi a. Lal chun mipuihai kuomah, "Keima ngeiin ka fepui ding cheu a nih" a ta. 3 Nisienlakhom, mipuihai chun, "Fe ve lo e khai. Keini hi chu tlân hmang khom ni inlang, mi ûksak rak naw ni hai. A chenve khom lo thi ta inlang, ieng rakah ngai bok naw ni hai. Nang ruok chu keini lêt sînga hlu lem i nih. Chuleiin, khawpuia inthoka i mi lo thangpui hi a tha lem" an ta. 4 Lal chun, "Tha in ti dàn ang tak chu thaw pei ka tih" a ta. Chuongchun, lal chu kul kotkhâr bula chun a ngîr a, mipui chu a za têl tèl le sâng têl tèlin an suok zut zut a. 5 Chun, lal chun Joab le Abisai le Itai hai kuomah, "Keima leiin tlangvàl Absalom chu indoi takin va thaw ro" tiin thu a pêk a. Absalom chungchang thua lalin thu a pêk chu mipui khomin an hriet seng a. 6 Chuongchun, sipaihai chu Israel mihai do dingin indona hmun tieng an pan a, an indona chu Efraim ram ngawpui a nih. 7 Chu taka chun Davida mihaiin Israel mihai chu an hne a, sînghni zet an that a. 8 Chuong lai ram phêka inbei chu an ni leiin kawlhnàma thi nêk hmanin ram ngawpuia thi chu an tam lem. 9 Absalomin Davida mihai a tuok thut chun a sabengtung chungah a chuong a, sabengtung chun saisuo thing buk hnuoiah a tlân lûtpui a, a lu chu thing kaua chun a'n tàng a, hnuoi tawk lo vân tawk loin a'n khai a, a sabengtung hlak chu a tlân pei a. 10 Tuin amanih a hmu a, Joab kuomah, "Ngai ta, saisuo buka Absalom inkhai lai ka hmu" tiin a hril a. 11 Joab chun a hriltu kuomah, "Hmu sia ieng leia sukhlum a, hnuoiah i kei thlâk naw? Chuongchun thaw la chu, tangka sawm le ka kawngchun hi ka pêk ding che a ni bah!" a ta. 12 Mi chun a don a, "Tangka sâng bûk khom mi pe ding ni la, lal naupa chungah kut thlâk naw ning. Kan hrieta ngei nang le Abisai le Itai kuomah, 'Keima leiin tlangvàl Absalom kha tu khomin tawk na naw raw se' tiin thu khom a pêk cheu a ni kha. 13 Lal lakah ieng khom thup thei a ni si naw leiin, a lakah ringum loa a naupa thatin ka hringna sukderthawng ta lang, ka lakah nang i'n thierfihlim nawk dai awm si a" a ta. 14 Joab chun, "I zâi nghâkin um zing thei naw ning" a ta, fei pathum a lâk a, saisuo buka intâng, dama la um zing Absalom lunga chun a sun a. 15 Joab râlthuom chawitu mi sawmin Absalom chu an hung inhuol a, an sun hlum ta a. 16 Chu phing leh Joab chun tawtawrawt a mût a, Israelhai hnottu mipui chu an hung kîr a, an hnot zui pei Joab-in a khap ta si a. 17 Chun, Absalom ruong chu an lâk a, ramngawa khur lien taka chun an dêng lût a, a chungah lung an dêng bum thùr a. Israelhai khom chu mani in tieng seng panin an tlân hmang ta vong a. 18 Absalom chun a dam laiin, "Nau pasal khom ka nei ve si naw leiin ka hming a thi nawna dingin" tiin Lal Ruomah dam lai lung a lo intieng khawm dêr ta a, a lung dêng bùm chu ama hming chawiin voisun chen hin 'Absalom hriet zingna lung bûm' ti a la ni zing. 19 Chun, Zadok naupa Ahimaaz chun, "LALPA chun a hmèlma kuta inthokin a san suok tah ti lal hril dingin tlân ka tih" a ta. 20 Joab chun, "Chu thu chu voisun ni khera nanga tlânpui ding a ni nawh. Ni dangah va hril de ti nih. Lal naupa chu a thi tah leiin voisun chu chanchin ieng khom va hril naw rawh" a ta. 21 Joab chun Kus mik kuomah, "Fe la, i thil hmu hi lal kuomah va hril raw leh" a ta. Kus mi chun Joab chu kûnin chibai a bûk a, a tlân ta nghal a. 22 Chun, Zadok naupa Ahimaz chun Joab kuomah, "Ieng khom hung tlung ding ni sien, Kus mi kha va hnot zui rêng rèng ka tih" a ta. Joab chun, "Ka naupa, lawmman hmuna chi chanchin hawn ding i nei si naw a, ieng leiin am i tlân ve ding?" a ta. 23 Ama chun, "Ieng khom ni sien, tlân ve ka nuom a nih" a ta. Chu phing leh Joab chun, "An leh, tlân ve el rawh"a ta. Ahimaaz chu phaizawl tieng lamah a tlân a, Kus mi chu a lekhêl a. 24 Chun, kul kotkhàr puo tieng le sûng tieng inkâra Davida a'n thung lai chun râlvêngtu chu kul bang sawng chunga chun a hang kai a. A hei ngha vel chun mi pakhat hung tlân nal nal a hmu a. 25 Râlvêngtu chun lal chu a zuk ko a, a thil hmu chu a zuk hril a. Lal chun, "Ama chaua hung a ni chun chanchin lawmum hawn ngei a tih" a ta, ama chun a hung pan hnai tiel tiel a. 26 Chu zo elah râlvêngtu chun mi dang hung tlân a hmu nawk a, kotkhàr vêngtu a zuk ko khêk a, "En ta, ama chaua hung tlàn mi dang ka hmu nawk" a ta. Lal chun, "Ama khomin chanchin lawmum hung hawn ngei a tih" a ta. 27 Râlvêngtu chun, "A hung tlàn hmasa lem saw Zadok naupa Ahimaz hoi ka ti kher el" a ta. Lal chun, "Ama chu mi tha a na, chanchin lawmum a hung hawn hlak a nih" a ta. 28 Chu zo ela chun Ahimaz chu a hung khêk a, lal kuoma chun "Iengkim a tha ie!" a ta. Lal hmaah hnuoi sikin a bokkhup a, a kuomah, "LALPA i Pathien chu chawimawiin um raw se. Lal, ka pu khingtu le a chunga kut thlâk tumtuhai chungah LALPAN hnena a'n changtir che" a ta. 29 Lal chun, "Tlangvàl Absalom a dam de maw?" tiin a'n don a. Ahimaz chun, "I siehlaw Joab-in kei i siehlaw a mi tir lai khan an buoi mur mur ka hmu a, sienkhom ieng chie am a nih ti ka hriet nawh" a ta. 30 Lal chun, "Ka sîra hin hung ngîr phot rawh" a ta, a sîra chun a va ngîr a. 31 Chuong lai chun Kus mi chu a hung tlung ve a, lal kuomah, "Lalpa, ka pu ta dingin chanchin lawmum ka hung intlun ie; i chunga helhai po po phuba chu voisun hin LALPAN a lâkpêk ta che a nih" a ta. 32 Lal chun, "Tlangvàl Absalom chu a dam de maw?" a ta. Kus mi chun, "Lalpa, ka pu hmèlmahai le i sietna zongtuhai po po chu, chu tlangvàl ang chun um vong raw hai se" a ta. 33 Chuongchun, lal chu a beidong hle a. Kul kotkhàr chunga a pindan tieng chun a kai tung a, a tap a, a fe malam chun, "Aw, ka naupa Absalom! Ka naupa, ka naupa Absalom, i aiin thi lem chu ni lang maw! Aw, Absalom, ka naupa, ka naupa!" tiin a ta a.

19

1 Chun, Joab kuomah, "Lalin Absalom a sùn a, a tap a tap el a nih" ti an hung hril a. 2 "Lalin a naupa lu a sûn" ti sipai po poin an lo hriet chun, chu nia an hnèna chu lu sûnna ni-ah a hung inchang ta lem a. 3 Indonaa tlân hmanghaiin inzak taka khuo an lût ang elin chu ni chun indoa fe hung kîrhai chun dei zotin khawpui an hung lût a. 4 Lal chun a hmai a hup a, "Aw ka naupa Absalom! Aw Absalom ka naupa, ka naupa!" tiin inring takin a tap a. 5 Chun, Joab chu lal inah a fe a, a kuomah, "Voisun hin nang le i naunu le naupahai le i nuhmeihai le i hmeihai hringna sansuoktu, i mihai po po i sukhmaimawk a nih. 6 A theidatu che i hmangai a, a hmangaituhai che i theida a. I kawmandarhai le i mi le sahai hi i ta dingin ieng khom an lo ni nawzie voisun hin i târ lang chieng hle a nih. Mi dang po thi hai sien khom Absalom a dam phot chun i hlim tho dingzie ka hmu tah. 7 Tu hin tho la, va suok la, i mihai va chokphur rawh. LALPA sâlin ka hril hi, i va fe suok naw chun voizân hin mi pakhat khom i kuoma um hmu ta naw ti nih. Chu chu i tleirawl laia inthoka tu chena i chunga vangduoina hung tlung po po laia a zuolkai tak nîng a tih" a ta. 8 Chuongchun, lal chu a tho a, kul kotkhâra chun a'n thung a, "Ngai ta u, lal chu kul kotkhârah a'n thung" tiin mihai an hril dar a, an rêngin lal hmaa chun an hung a. Israelhai ruok chu an in tieng seng an tlân kîr nawk ta a. 9 Hmun tinah Israel thlahai lai nasa takin an insêl a, "Lal chun ei hmèlmahai laka inthokin a mi sanhim a, ama chu Filistinhai kuta inthoka mi sansuoktu a nih. Sienkhom tu hin Absalom leiin a tlân hmang ta a. 10 Ei chunga lal dinga hriek ei nâl Absalom hlak chu indonaah a thi ta bok si a. Iengti leia lal ko kîr thu hi bau khat khom in hril puok naw am a na?" an ti sup sup a. 11 Lal Davida chun thiempu Zadok le Abiathar hai kuomah thu a thon a, "Juda upahai kuomah hieng hin hril ro: 'Israel mihaiin lal thuoi kîr ding thu an hril chun lal kuom a tlung ta si a, ieng dinga nangni hi a in tienga lal thuoi kîr ding thua a vuoicha taka thang in tum am a na? 12 Nangni hi ka unauhai, ka taksa le thisen inzompui ni bok si a, ieng leiin am lal thuoi kîr thuah a awisawt tak ni in tum?' tiin. 13 Chun, Amasa kuomah, "Ka thisen inzompui i ni naw am a ni? Tuta inthoka Joab aia ka sipai kawmandarah ka siem naw che a ni chun Pathienin a law law mi law sien la, chu nêka nasa khom chun mi thaw raw se' a tih va ti rawh" tiin mi a tir a. 14 Chu thu chun Judahai lungril a hne a, lungril hmunkhat an hung put ta a. Lal kuoma chun, "I mihai po po le khan hung kîr nawk ta ro" ti dingin mi an tir a. 15 Chuongchun, lal chu a hung kîr nawk a, Jordan vadung a hung tlung a. Lo hmuok a, lal chu Jordan vadunga thuoi kai dingin Judahai chu Gilgalah an hung a. 16 Bahurim khaw mi, Benjamin hnama mi Gera naupa Simei khom chu Juda mihai le chun Lal Davida hmuok dingin inhmaw takin a hung thla ve a. 17 Simei chun Benjamin mi sângkhat le Saula sûnghai siehlaw Ziba le a naupa sawm le panga le a siehlaw sawmhni a hung thuoi a, Jordan kama lal umna tieng chu inhmaw takin an pan a. 18 Lal sûngkuohai thuoi kai ding le lalin a ti ang ang thaw dingin râl khing tieng kaia chun an kài a. 19 Gera naupa Simeiin Jordan râl a kai chun lal hmaah a bokkhup a, a kuomah, "Ka lalpa chun thiem naw changah mi sie naw hram raw se. Ka lalpa, ka puin Jerusalem a suoksan nia i siehlaw thil thaw suol kha mi hre pêk zing loin, lal chun a lungrilah pai zing naw sien. 20 I siehlaw hin thil suol ka thaw ti ka hriet a, chuleiin voisun hin Josefa sûngkuo laia ka lalpa, ka pu hmuok dinga hung thla hmasa tak ka ni nghe nghe a nih" a ta. 21 Chun, Zeruia naupa Abisai chun, "LALPA hriek nâl tongsie inphurtu a ni leiin Simei hi sukhlum ding a ni naw am a ni?" a ta. 22 Davida chun, "Nangni Zeruia naupahai, nangni mi lo hrietpêk ding ieng am a um a? Voisun hin a mi dotuhai in ni naw am a ni? Voisun hin Israelhai laia mi hrim hrim sukhlum ding an ni am a ni? Voisun hin Israel mihai chunga lal ka ni hi ka hriet naw am a ni?" a ta. 23 Chun, lal chun, "Simei, thi naw top i tih" tiin a kuomah thu a'n khàm a. 24 Chun, Saula tupa Mefiboset khom chu lal hmuok dingin a hung thla ve a. Ama chun lal a fe suok nia inthoka him taka a hung kîr nawk ni chenin a kehai a tuoi nam naw a, a hner hmul a vaw naw a, a silfên khom a sawp bok nawh. 25 Jerusalema inthoka lal hmuok dinga a hung thla chun lalin, "Mefiboset, ka kuomah ieng dinga i hung ve naw?" a ta. 26 Ama chun, "Aw lalpa, ka pu, i siehlaw hi kebai ka ni leiin ka sabengtung chungah chuongin lal chu zui dinga inngai ka ni a, sienkhom ka siehlaw Zibain a mi hlêm a. 27 Ka lalpa, ka pu kuomah i siehlaw hi a hêk bok a, sienkhom ka pu hi Pathien vântirko ang a ni leiin tha i ti ang angin thaw rawh. 28 Ka pu Saula thlahai po po chu ka lalpa, ka pu hmaa hin sukhlum vong ding an ni lai zingin i siehlaw hi thlâithlèng i otpuihai lai i mi'n thangtir a. Chuleiin, lal kuoma hin thil dang phût ngam ziezàng ding awm ka la ni rop am a ni?" a ta. 29 Lal chun a kuomah "Hril tam iem a ngai a? Nang le Zibain ram chu insem dingin thu ka pêk cheu" a ta. 30 Mefiboset chun lal kuomah, "Amain nei vong raw se; lalpa, ka pu chu him takin a hung tlung ta si a" a ta. 31 Gilead mi Barzilai khom lal chu Jordan thuoi kaia a panna ding tienga inthla liem dingin Rogelama inthokin a hung thla a. 32 Barzilai chu upa tak, kum sawmriet mi zet a ni ta a. Mahanaim-a lal a um sùngin a fâk dinghai a lo tum a, mi neinung tak a nih. 33 Lal chun Barzilai kuomah, "Ka kuomah Jerusalem tieng hung kai ve la, ka chawm ding che annawm" a ta. 34 Barzilai chun lal kuomah, "Ieng chen am dam ding ka la ni a, Jerusalema lal kuoma ka hang fe vena ding chu? 35 Tu hin kum sawmriet ka ni ta a, a sie a tha thlier dukdak thei khom ka ni ta'm a ni? I siehlaw hin a fâk a dawn inhnik le inhnik naw khom ka hriet hrang ta'm a ni? Pasal le nuhmei hla sak khom hre thei am ka la ni? Ieng leiin am i siehlaw hi ka lalpa phurrik belsatuah ka thang ding a na? 36 I siehlaw hin lal ruola Jordan kai ve ka tum chauh a nih. Ieng dingin am lal chun chuong ang lawmin that man a mi rul kher ding? 37 Lunginsiet takin i siehlaw hi mi'n kîrtir nawk la, ka nu le pa thlân umna keini khuo ngeiah thi vêng ka tih. Amiruokchu, en ta i siehlaw Kimham hi, lalpa, ka pu kuomah fe ve sien, a chungah tha i ti ang peiin thaw raw khai" a ta. 38 Lal chun, "Kimham chu ka kuomah kai vêng a ta, tha i ti ang peiin a chungah thawng ka ta, thil ieng khom a mi hni taphot chu thawpêk pei ka tih" a ta. 39 Chuongchun, mi po po chun Jordan râl an kai a, chu zoah lal khom chu a kai ve a, Barzilai chu a fawp a, mal a sawm a, ama hmun tieng a kîr nawk ta a. 40 Lal chu Gilgalah a kai a, Kimham chu a kuomah a kai ve a. Juda sipaihai po po le Israel sipai a zâtve chun lal chu an thuoi a. 41 Sawt nawte hnunga chun Israel mi po po chu lal kuomah an fe a, a kuomah, "Iem a ta kan unau Judahai hin an pumbil bîk che a, lal le a sûnghai le Davida mihai po po khom Jordan ràlah an thuoi kai sa vong am a na?" an ta. 42 Chun, Juda mihai chun Israel mihai kuomah, "Lal chu kan inhnaipui a ni lei a nih. Ieng leia hi thila hin in lung a sen am a na? Lal thil nei hi ringa khawsa am kan ni? Keini ta dingin lal thil nei ieng am lâk kan nei ta hlak a?" an ta. 43 Israel mihai chun Juda mihai kuomah, "Lal laka kan chan hi chan sawm a na, chu bâkah Davida hi nangni nêka hauh thei lem dai kan nih. Ieng leia hmusit taka in mi thaw am a na? Lal thuoi kîr nawk thu hi a rot hmasa lemtu kan ni naw am a ni kha?" an ta. Juda mihai hlak chu Israel mihai nêka tong inrum lemah an thang a.

20

1 Chun, chu taka chun Benjamin hnama mi Bikri naupa a hming Seba, buoina siem ching mi a um a. Ama chun tawtawrawt a mût a, "Davida lakah chan ei nei dêr nawh, Jesai naupa lakah thangna ei nei ve nawh, aw Israel mihai, in in tieng inlawi vong ro" tiin a khêk a. 2 Chuongchun, Israel mihai po po chun Davida an zâmsan a, Bikri naupa seba chu an zui ta hum hum a. Juda mihai ruok chun Jordana inthoka Jerusalem chenin an lal chu an thlathlam nawh. 3 Davidan a lal in a tlung chun in enkol dinga a mâksan a hmei sawmhai chu a thuoi a, vêngtu hnuoiah a khum a, an fâk le dawn a tumpêk a, sienkhom a zâlpui ta naw a, hmeithai anga khawsain an thi chenin a khum hrang tawl tah a nih. 4 Chun, lal chun Amasa kuomah, "Juda mihai ko khawm la, ni thum sûngin nang leh hi taka hin hung inlang ro" a ta. 5 Amasa chu Judahai ko khawm dingin a fe a, sienkhom lalin hun a ruotpêk nêkin a thang sawt a. 6 Davida chun Abisai kuomah, "Bikri naupa Seba hin Absalom nêkin ei poi a tawk nasa lem ding a nih. Chuleiin, i pu mihai hi thuoi la, hnot ro khai; chuong naw chun kul nei khuoa dâm lût hman a ta, ei kuta inthokin suok hlauh rawi a tih" a ta. 7 Chuongchun Joab rawihai, Keret mihai, Pelet mihai le an mi hrâthai po po chu Abisai inrawina hnuoiah Bikri naupa Seba hnot dingin Jerusalema inthokin an inthok suok a. 8 Gibeon lungpui umna an va tlung chun Amasa-in anni chu a lo hmuok a. Chun, Joab chun a râlthuom a hâk a, a chungah kawlhnàm, a pâi chopin a kawngchunah a pai a, a hang lawn chun a kawlhnàm chu a pâia inthokin a hung indok a. 9 Joab chun Amasa kuomah, "Unaupa, i dam de maw?" a ta. Joab chun Amasa chu fawp dingin a kut chang tiengin a khâkhmulah a chel a. 10 Amasa chun Joab kawlhnâm chawi chu a lo ringhla naw a, Joab chun a phingah a sun a, a rîl a hung dawk thla pûr a, sun non ngai loin a thi ta nghal a. Chu zoah Joab le a unaupa Abisai chun Bikri naupa Seba chu an hnot a. 11 Chun, an bula ngîr Joab rawihai laia tlangvàl pakhat chun, "Joab tieng le Davida tienga thang taphot chun Joab zui pei ro" a ta. 12 Lam lailung takah ama thisena inbuol Amasa hmu taphot chu an chawl chat pei ti chu tlangvàl chun a hmu leiin a ruong chu lamliena inthokin phûlah a hnûk phei a, puon a'n khum a. 13 Lamliena inthoka Amasa ruong a son hnung chun Bikri naupa Seba hnot dingin mi po po chun Joab chu an zui ta a. 14 Seba chun Abel le Bet Maaka chena um Israel hnam tinhai ram chu a sir bakah Bikri mihai biel khom a sir a, chuongchun mihai chu an hung pung khawm a, ama chu an zui ta a. 15 Joab sipaihai chu an hung a, Seba chu Bet Maaka-ah an inhuol a. Kul bang hrulah a vêl tuokin hnuoi an dêng pawng a, kul chu sukchim tumin an sut bur bur a. 16 Khuoa inthok chun nuhmei var pakhat hi a hung khêk a, "Joab kha hung ko unla, a kuomah thu lo hril ka tih" a ta. 17 A kuom chu a va pan hnai a, nuhmei chun, "Joab i ni maw?" a ta, ama chun, "Ni e" a ta. Ama chun, "I bawinu thu hril hi ngaithla rawh" a ta, Joab chun, "Ka ngaithlâk annawm" a ta. 18 Nuhmei chun, "Tien lai chun, 'Abel khuoah thurawn va la rawh' an ti hlak a, chuong ang chun thu an sukthlûk hlak. 19 Keini hi Israel mihai laia inremna dit pawl le ringum pawl kan ni a, nang ruok chun Israelhai khaw hlun hi suksiet i tum a ni hi. LALPA ro chu ieng dinga sukram i tum am a na?" a ta. 20 Joab chun, "Chuong ang chu a ni awzawng nawh, sukram amanih suksiet amanih kan tum naw hrim hrim. 21 Chuong ang tieng chu a ni nawh. Efraim tlângrama mi Bikri naupa Seba chun lal dodalin, Davida lakah kut a lek a, ama chu mi pe suok unla, in khuo hi suoksan el kan tih" a ta. Chu nuhmei chun Joab kuomah, "Ngai ta, a lu chu kula hin hung dêng thlapêk kan ti che" a ta. 22 Chuongchun, nuhmei chun a varna hmangin mipui hai kuoma chun a fe a, Bikri naupa Seba lu chu an tan a, Joab umna tieng chun an dêng thlâk a. Chuongchun, tawtawrawt a mût a, mani in tieng seng panin khuoa inthok chun an suok dar ta a. Joab chu lal kuom tieng Jerusalemah a kîr nawk ta a. 23 Joab chu Israel sipai po po chunga hotu a na; Jehoiada naupa Benaia chu Kerethai le Pelethai hotu a na; 24 Adoniram chu sinthawa an sor luihai hotu a na; Ahilud naupa Jehosafat chu chanchin inchiktu le ziektu a na; 25 Seva chu ziektu a na; Zadok le Abiathar chu thiempu an na; 26 Jair mi Ira chu Davida thiempu a nih.

21

1 Davida inlal laiin a zawnin kum thum tam a tla a. Davida chun LALPA a rawn a, LALPA chun "Saula lei le a sûnghai thisen insuo lei a nih, Gibeon mihai an that si a" a ta. 2 Lal chun Gibeon mihai chu a ko a, a'n biekpui a. (Gibeon mihai chu Israel thlahai ni loin Amor mi la um sunhai an ni lem a, Israel thlahai chun anni chu hum dingin thu an lo inkhàm ta a, sienkhom Israelhai le Judahai ta dinga thahnem a ngai luotah Saula chun sukchimit a tum tawl a nih). 3 Davida chun Gibeon mihai kuomah, "Ieng am ka thawpêk thei ding cheu? LALPA rohai chu mal in sawm theina dingin ieng ang inremna am ka siempêk ding cheu a na?" a ta. 4 Gibeon mihai chun, "Saula le a sûnghaia inthok hin tangkaruo le rangkachak kan ngiet thei naw a, Israel mihai sukhlum theina kan nei bok nawh" an ta. Davida chun, "Ieng am ka thawpêk cheu in nuom a? a ta. 5 Anni chun lal kuomah, "Mi suksetu le Israel ram sûnga hrim hrim um lo dinga mi sukchimit tuma phiertu chu hieng hin thaw la, 6 a naupa pasarihai chu mi pe suok la, LALPA mi ruot Saula umna Gibea khuoah LALPA hmaah khai hlum kan tih" an ta. Lal chun, "Pêng ka ti cheu" a ta. 7 Davida le Saula naupa Jonathanin LALPA hmaa thu an lo intiemkam leiin lal chun Jonathan naupa Mefiboset hringna ruok chu a hla a. 8 Lal chun Aia naunu Rizpa-in naupa pahni Saula a hringpêk Armonia le Mefiboset hai le Meholat mi Barzilai naupa Adriel laka Saula naunu Mikal-in naupa panga a hringpêk hai chu a thuoi a, 9 Gibeon-hai kutah a pêk a, anni chun LALPA hmaah tlânga chun an khai hlum a. Chuongchun, an pasari chun hmun khatah an thi vong a, chu chu bu sîk hun, barli an sîk tan hun vel a nih. 10 Chun, Aia naunu Rizpa, Saula hmei chun saiip a lâk a, bu an sîk huna inthoka ruotui tlâk hun chenin an ruong inkhaina hmun lungpuia chun a umna dingin a zar a, an ruong chu ieng khomin tawk lo dingin sûnah vatehai lakah a vêng a, zânah ramsahai lakah. 11 Chun, Aia naunu Rizpa, Saula hmei thilthaw chu Davida an hril a. 12 Chuongchun, Davida chu a fe a, Jabes Gilead-a inthokin Saula le Jonathan ruro chu a hang inkhawm a (Filistin mihaiin Gilboa tlânga Saula an that hnungin an ruong chu Bet Shan kotthlèrah an khai a, chu taka inthok chun Jabes Gilead mihaiin a rûkin an hang lâk a nih). 13 Davida chun chutaka inthok chun Saula le Jonathan ruro chu a hung chawi a, chu hmuna an thathai po po ru, phum loa umhai chu a'n khawm vong bok a. 14 Saula ru le a nauhai ru chu Benjamin rama Zela khuoa a pa Kisa thlânah an phûm a, lalin thaw dinga a ti ang peiin an thaw a. Chu taka inthok chun a ram chungah Pathien a lungawi ta a. 15 Filistin mihai le Israel mihai chu an hung indo nawk a. Davida chu a mihai leh Filistinhai bei dingin a fe thlâk a, sienkhom a hung chau ta hle a. 16 Chun, Ishbi Benob, mi lien Rafa thlahai laia mi pakhat, a dâr fei hmor zum ringot khom kilogram thum le a chenvea rik chawi le kawlhnàm thar pai chun Davida that a tum a. 17 Nisienlakhom, Zeruia naupa Abisai chun a san a, Filistin mi chu a bei a, a that ta a. A mihai chun Davida kuomah, "Israelhai khawnvar a mit nawna dingin indonaa chu kan kuomah hung thla ve ta dêr naw ti nih" tiin a chungah an inkhàm a. 18 Chuong hun vel lai bok chun Gob khuoah Filistinhai leh an indo a, Husat mi Sibekai chun mi lien naupahai laia mi Safa, Rafa thlaa mi chu a that a. 19 Hmun danga Filistinhai le indonaah Jare Oregim naupa Elbanan, Bethlehem mi chun Goliat unaupal a that bok a, a fei ngul chu puonkhawngna themtlâng tiet a nih. 20 Chun, Gath khuoah indona a um nawk a, chu taka chun pa dung insâng tak el, a kut khing hni ve veah kutpàr paruk le a ke khing hniah kepàr paruk ve ve, a rênga sawmhni le pali nei hi a um a, ama khom chu mi lien laka pieng a nih. 21 Ama chun Israel mihai chu a va deusaw a, Davida unau Simei naupa Jonathan chun a lo that a. 22 Chuong mi palihai chu Gath khuoa mi lien Rafa laka pieng an na, Davida le a mihai kutah an thi ta vong a nih.

22

1 A hmèlmahai po po kuta inthok le Saula kuta inthoka LALPAN a san suok leiin Davida chun LALPA kuomah hi hla hi a sak a: 2 LALPA chu ka suonglungpui, Ka kulpui le sanhimtu, 3 Ka Pathien, ka suonglungpui, Ka'n bîkna hmun le ka phaw, Mi'n tlantu ki hrêu a nih. Ama chu ka kulpui nghet, Ka'n bîkna le ka himna, Pawngnèktuhai laka inthok, Mi san himtu chu a nih. 4 Inpâk tlàk LALPA ka ko a, Hmèlma lakah a mi humhim. 5 Thina tuifawnin a mi'n huol, Sietna tuiin a mi chim vel; 6 Thlân hruolhruiin a mi vèt a, Ka hmasuon thina châng a nih. 7 Lungzingin LALPA ka ko a, Ka Pathien thangpuina ka ngèn; A tempula inthokin a hriet, Ka tap riin a na a tlung. 8 Hnuoi inhnîngin a'n thin a, Tlâng thuthai chen an inhnìng a, A lungsen leia inhnîng a nih. 9 A hnârah meikhu a suok a, A baua chun kânghmang thei mei, Chokin a'n hlap puot puot a. 10 Vân kei kûrin a hung tum a, Sûm dum chungah a ngîr a, 11 Cherub chungah a chuong a, Thli chu thla zara hmangin, Hrât takin a hung vuong a. 12 Tuomtuah thim a hmang a, Sum tui pai inthim khup chu. 13 Ama vara inthok chun, Kawl a hung inphe zuoi zuoi. 14 LALPAN vânriel inrûmtirin, Chunghnungtak rawl a thangkhawk. 15 A thal chu a hang kâp a, Hmèlmahai an tlân dar a, Têk a'n tlâktir dum dum a, Anni chu a hne zo tah. 16 Aw LALPA, hnâr hnit meu a, I hang hrawk tawl takzet chun, Va tuonghai inlang rawtin, An hung kang zo ta vong a, Hnuoi thuthai khom a'n lang tah. 17 Chunga inthok mi zuk banin, A kutin a mi chel a, Li-a inthok a mi lâk suok; 18 Hmèlma hrât le doral hrânghai, Ka cho ruol lo kuta inthokin, A mi san suok tah a nih. 19 Siet tuok lai mi bei sienkhom, Mi santu chu LALPA a nih. 20 Hmun thawvengah a mi'n nghat a, Ka chungah a lawm leiin, A mi san suok tah a nih. 21 Ka'n dikna phuin lawmman, LALPAN a mi siempêk a, Ka kut a fai ang phuin, Ama chun a mi rul hlak. 22 LALPA ditzawng ka vong a, Pathien invâk hmangsanin, A kal zawng ka thaw ngai nawh. 23 Ka hmaah a dàn ka sie, A thu ka bawsiet ngai nawh. 24 A hmaa dem kai lo din, Suol lakah ka'n thier fihlim. 25 Ka'n dikna ang phu peiin, A mit hmuah poi ieng khom, Ka tawk ve ngai naw leiin, LALPAN lawmman a mi pêk. 26 Ringum lakah i ringum, Mi fel lakah i fel fai, 27 Thienghlim lakah i thienghlim, Mi kawi lakah i khir bok. 28 Inngaitlawmhai i san a, Meng sânghai i suktlawm hlak. 29 Ka khawnvar i nih, Aw LALPA, LALPA chun keimaa thim chu, A mi sukvarpêk hlak si. 30 I thang chun râl nêr ka ta, Ka Pathien zarin an kul, Lawn kaiin lapêk ka tih. 31 Pathien lampui a tha kim, LALPA thutiem a'n khêl nawh, A bêltu ta di'n phaw a nih. 32 LALPA naw Pathien tu am, Ei Pathien naw tu hrim am, Lungpui bêl tlâk an um a? 33 Hrâtna thaa mi'n thuom a, Ka lampui suktluongtu chu, Pathien hi a ni si a. 34 Sazuk zaper anga hrât, Zaper tha hrât mi pein, Hmun sâng lêrah him takin, A mi'n tlattir hlak si a. 35 Ka kut râl do a'n thiemtir, Dâr thalngul ka kuoi kûr thei. 36 Sandamna phawn mi pein, I kut changa mi chelin, I'n phà hnuoina lei chauin, Ropui ka hlaw phà hlak si. 37 Ka lam hraw i mi zaupêk, Ka sir a'n tlêu nawna din. 38 Ka hmèlmahai ka hnot khêl, Ka'n ram hma chun ka kîr nawh. 39 Ka vuok thluk tawl, an op song, Ka bulah an tlu thal phung. 40 Râldo hrât di'n mi'n thuomin, Ka râlhai ka ke bulah, I'n bokkhuptir tawl si a. 41 Ka râlhai i mi'n hnottir a, Ka hmèlmahai ka tukdol tah. 42 Santu koin an khêk chûl, Tu khom hlak an um si nawh; LALPA an ko, a don nawh. 43 Thli lên thei pilvut angin, Anni chu ka rawt nawi a, Kotthlèra chirhak angin, Ka sir sop tawl tah a nih. 44 Mihai lakah mi humin, Hnamhai luah i mi siem a, Ka hriet ngai lo hnam chen khom, Ka khuo le tui an hung ni tah. 45 Ka thu hrea zawm nghalin, Bokkhupin ram dang mihai, Ka hmaah an hung kûn a, 46 An lungril a zâm vong a, Kul a'nthok inthin pumin, An hung suok ta thâm thâm a. 47 LALPA chu a hring zing ie!Ka Lungpui chu inpâk ro!Ka Sandamtu Pathien chun, Chawimawina chu chang raw se. 48 Phuba lapêktu Pathien, Ka hnuoia hnamhai sietu, 49 Hmèlma laka mi humtu, Ka hmèlmahai chunga chun, Nangman i mi hlângkai a, Mi nunrawnghai laka chunNangin i mi san suok tah. 50 Chuleiin, hnam tin lai hin, LALPA i hming chawimawiin, I'n pâkna hla sak ka tih. 51 A lal chu hnèna ropui, Ama chun a'n changtir a, A hmangaina chuoi lo chu, A hriek nâl Davida leA suon le pàrhai chungah, Kumkhuo'n inlangtir a tih.

23

1 Hienghai hi lal Davida thuhril nuhnung tak chu a nih: Jesai naupa Davida, Chunghnungtakin a chawimawi, Jakob Pathienin hriek a nâl, Israelhai laia zâipu chun hieng hin a hril: 2 "LALPA Thlarau chun a thu, Keima hmangin a hung hril a, A thu chu ka leiah a um. 3 Israelhai Pathien chun a hril, Israelhai Lungpui ngei chun:'Mi chungah indik taka thaw a, Pathien ti puma ro rêl hlaktu chu, 4 Sûm um lo zîng khaw thieng a, Ni var mawi suok ang hi a na, Raw sûr zo khaw inthieng a, Thlai hung har sieu ang a nih. 5 "Ka sûngkuo hi Pathien lakah, Chuong ang chu a ni naw am a ni?Chatuonin thu mi thlungpuiin, Iengkim sukfelin a suknghet a. Mi sandamin ka duthusam, Tinrêng a mi pêk naw dim a ni? 6 Mi suolhai ruok chu hling angin, Hnawma peihawnin um an ta, Kuta lâk khawm thei an ni nawh; 7 Hling tawktu chun thir hriemhrei le Chem sei ngei a hmang lem a, A hmunah an raw hmang hlak". 8 Hienghai hi Davida sipai huoisen le hmingthanghai chu an nih: Takemon mi Jose-Basebet chu sipai hotu lien pathum laia a lu tak a nih. Ama hin tum khata inbeinaah a fei ringotin mi zariet a that. 9 Ama dottu chu Aho mi, Dodai naupa Eleazar a nih. Ni khat chu indo dingin Filistinhai an pung khawm a, an hung cho a, Israel mihai an fe hmang vong tum a ni si leiin Davida le sipai pathum chauin an lo bei a, chuonghai laia pakhat chu a nih. 10 Ama chu a tho a, a kut a kham taluo leia a kawlhnàm a hlàng thei ta naw chenin Filistinhai chu a that ngat ngat a, chu ni chun LALPAN nasa takin a ngampêk a; Israel sipaihai chu a hnungin râllâk sum inchu ding ringotin Eleazar kuoma chun an hung kir nawk a nih. 11 Chu dottu chu Harar mi Age naupa Sama a nih. Lehi khuoa dailuo bilah Filistinhai an pung khawm a, Israel mipuihai chu an tlânsie a. 12 Nisienlakhom, ama chu chu hmuna chun a ngîr a, a vêng tlat a, Filistinhai chu a that ngat ngat a, LALPAN nasa takin a'n ngamtir a. 13 Busik hun lai hin sipai huoisen sawmthum thlang suok laia pathum chu Davida kuomah Adulam pûkah an fe a, Filistin mihai chu Refaim Ruomah an inkul a. 14 Chuong lai chun Davida chu kulah a um a, Filistin sipai pawl khat chu Bethlehemah an inkul a. 15 Davida chun tui a châk êm êm el a, "Bethlehema tuikul tui, kul kotkhâr bula um kha dawn dinga mi chawipêk ding um hai sien la chu aw" a ti vong vong a. 16 Sipai huoisen pathumhai chun Filistin sipaihai riebûk chu tawn tlangin, kul kotkhàr bula um Bethlehem tuikula tui chu an hang chawi a, Davida kuomah an fepui a, sienkhom dawn loin LALPA ta dingin a bun thlâk ta lem a. 17 "Aw LALPA, hi hi chu thaw naw top ka tih; thi huoma fehai thisen chu ka dawn ding am a ni?" a ta, chu lei chun a dawn nuom naw a nih. Chuong thilhai chu mi huoisen pathumhai chun an thaw a nih. 18 Zeruia naupa Joab unaupa Abisai chu mi huoisen sawmthum laia hotu tak a nih. Ama chun a feiin mi zathum a bei a, a sunhlum vong a, anni sawmthum lai chun hming that a hlaw chungchuong a. 19 Anni sawmthumlai chun chawimawi a phu bîk hrim a ni naw am a ni? Amiruokchu, mi huoisen pathum an tihaii lai chun tiem sa a ni ve nawh. 20 Kabzeel mi huoisen naupa Jehoiada naupa Benaia, thil nasa tak tak thawtu chun Moab mi huoisen pahni a that a, chu zoah a fe thlâk a, vur tlàk hun lai hin pûka intom sakeibaknei a that nawk a. 21 Chun, Aigupta mi lien tak el a that bok a. Aigupta pa chun fei a chawi a, Benaia chun hmol chau chawiin a zu pan a, a fei chu a lâkpêk a, ama fei ngei chun Aigupta mi lien chu a sunhlum a. 22 Chuong ang thil chu Jehoiada naupa Benaia chun a thaw leiin mi huoisen sawmthumhai lai chun hming that a hlaw a. 23 Mi sawmthumhai nêk chun chawimawi chungchuong a ni hrim a, sienkhom mi huoisen tak pathumhai lai chu tiem sa a kai phâk ve nawh. Davidan ama vêngtuhai hotuah a sie a. 24 Mi huoisen sawmthum laia thanghai chu: Joab unaupa Asahel hai, Bethlehem khuoa mi Dado naupa Elhanan hai, 25 Harod mi Sama hai, Harod mi Elika hai, 26 Pal mi Helez hai, Teko mi Ikes naupa Ira hai, 27 Anathot mi Abiezer hai, Husat mi Mebunai hai, 28 Aho mi Zalmon hai, Netofat mi Maharai hai, 29 Netofat mi Baana naupa Heled hai, Benjamin mi Gilead-a inthoka hung Ribai naupa Ithai hai, 30 Pirathon mi Benaia hai, Gaash varuoma mi Hidai hai, 31 Arbat mi Abi-Albon hai, Barhum mi Azmavet hai, 32 Salbon mi Eliaba, Jasena nauhai laia mi Jonathan hai, 33 Harar mi Sama hai, Harar mi bok Sarar naupa Ahiam hai, 34 Maakat mi Ahasbai naupa Elifelet hai, Gilon mi Ahitofel naupa Eliam hai, 35 Karmel mi Hezro hai, Arba mi Parai hai, 36 Zoba khuoa mi Nathan naupa Igal hai, Gad mi Bania hai, Hagri (Hagadi) naupa hai, 37 Amon mi Zelek dàm, Zeruia naupa Joab râlthuom chawitu Beerot mi Naharai hai, 38 Jatir mi Ira le Gareb hai, Hit mi Uria hai an nih. Hienghai hi sipai huoisen hmingthang an na, an rêngin sawmthum le pasari an nih. 39 (A um nawh)

24

1 Chun, LALPA lungsenna chu Israelhai chungah a hung tuong nawk thut a. An chunga buoina intlungtir dingin Davida lungril a chok tho a, "Fe la, Israelhai le Juda mihai tiem vong rawh" a ta. 2 Chuongchun, lal chun Joab le sipai kawmandarhai kuomah, "Fe unla, Dan-a inthoka Beersheba chen inkâra Israel mi râl do thei chin ieng zât am an um ti ka hriet theina dingin va tiem vong ro" a ta. 3 Joab chun lal kuomah, "LALPA i Pathien chun i mipuihai a lêt zain sukpung sien la, chu chu lalin a mit ngeiin hmu hman raw se. Amiruokchu, ieng leiin am ka pu, lal hin hieng thil hi i thaw chàk a na?" a ta. 4 Joab le sipai kawmandarhai thu nêkin lal thu chu a hrât lem si leiin Israelhai tiem dingin lal chu an suoksan ta a. 5 Jordan ràl an kâi a, Gad-hai ram tieng panna, ruom lailunga khuo Aroer sim tieng chun an inkul a, Gad ram chu fe thlengin Jazer chen an fe a. 6 Chun, Gilead ram le Tahtim Hodshio bielah an fe nawk a, chu taka inthoka fe peiin Sidon vèla Dan Jan an tlung a. 7 Chun, Tura kul an va tlung a, Hiv-hai le Kanan mihai khuo po po an sir a, chu zoah Judai ram sim tieng Beersheba-ah an fe a. 8 Judai ram po po an fang suok hnung chun, thla kuo le ni sawmhni hnungah, Jerusalemah an hung kîr nawk a. 9 Joab chun mihriem an tiem zât chu lal kuomah a ripawt a, kawlhnàm chawia râl do thei chin Israel rama mi chu nuoi riet an ni a, Judai rama mi chu nuoi nga an nih. 10 A mihai a tiem zo hnungin Davida chun lungrila inthiemnawna nasa tak a hung nei ta a. LALPA kuomah "Ka thilthawa hin nasa takin ka suol a nih. Tuhin aw LALPA, i siehlaw thiemnaw changna hi la hmangpêk hrâm dingin ka ngên che. Thil invètthlâk tak ka lo thaw a nih" a ta. 11 A zînga chun Davida tho hmain LALPA thu chu Davida zawlnei, zawlnei Gad kuomah a hung tlung a: 12 "Fe la, hieng ang hin Davida hril rawh: 'Hi hi LALPA thu chu a nih: thil kong thum thlang ding ka pêk che laia mi hi i chunga tlung dingin pakhat thlang rawh' a tih" tiin. 13 Chuongchun, zawlnei Gad chu Davida kuomah a fe a, a hril a, "I rama hin kum sarip tàm intlâktir am, thla thum sûng i hmèlmahai hnot lènga um am, an naw leh i rama ni thum sûng hripui inlêngtir, a ieng am i thlang a? Tu hin inngaituo la, a mi tirtu kuoma ka hril ding thu tlûkna siem la, mi hril rawh" a ta. 14 Davida chun Gad kuomah, "Ka bei a va hang dong ngei de! LALPA kutah tlu lût phot ei tiu, zangaina a hau si a. Mihriem kuta chu mi pe lût naw hram rawh" a ta. 15 Chuongchun, chu tûka inthoka ni thum sûng chu Israel mihai chungah LALPAN hripui a'n lèngtir a, Dan le Beersheba inkârah mi sîngsari an thi a. 16 Chun, vântirkoin sukse dinga Jerusalem tieng bân a phar lai chun, an siet tuok ding laka chun LALPA lung a na em leiin kut a'n hnûkkîrtir a, mipuihai hremtu vântirko kuoma chun, "A hun tah! I kut kei kîr ta rawh" a ta. Chu lai chun LALPA vântirko chu Jebu mi Arauna hrizawla ngîr a nih. 17 Davidan mi sukhlumtu vântirko a hmu chun LALPA kuomah, "Thilsuol thawtu chu keima hi ka na, ka thaw indik naw a nih. Mi danghai hi chu beram ang mei mei an nih. Iem suol thaw an nei hrim a? I kut chu kei le ka sûnghai chunga hin thlâk lem rawh" a ta. 18 Chu ni chun zawlnei Gad chu Davida kuomah a fe a, "Fe tung la, Jebu mi Arauna hrizawlah LALPA ta dingin maichâm hang siem rawh" a ta. 19 Chuongchun, LALPAN Gad hmanga thu a pêk angin, Davida chu a fe tung a. 20 Chun, Arauna chu a ngha vel a, ama tieng pana hung lal le a mihai chu a hmu a, a suok a, a hmaah hnuoi sika bokkhupin lal chu chibai a bûk a, 21 Arauna chun, "Ieng leiin am ka lalpa, ka pu chu a siehlaw kuomah a hung el am an ta le? a ta. Davida chun, "Mipuihai laka hri a'n kieng theina dinga LALPA ta dinga maichâm siemna ding i hrizawl inchaw dinga hung ka nih" a ta. 22 Arauna chun Davida kuomah, "Ka pu, ka lal chun awm a ti ang ang chu la sien, inthawina chu inhlàn raw se. En ta, pumraw thilhlâna ding bawngchal le thing ti ding hrizawl dâp thingphêk le bawng ringkolhai khom a um annawm. 23 Aw lalpa, Arauna chun hieng po po hi lal a pêk vong a nih" a ta. Chun, Arauna bok chun lal kuomah, "LALPA i Pathien chun lo pom che raw se" a ta. 24 Sienkhom lal chun Arauna kuomah, "Ni lo e, a man pêk ngeiin ka'n chawk ding a nih. Ieng khom sèng loin LALPA ka Pathien hmaah pumraw thilhlân inhlàn naw top ka tih" a ta. Chuongchun, hrizawl le bawngchalhai chu tangkaruo shekel sawmnga pein Davida chun a'n chawk a. 25 Chu taka chun Davidan LALPA ta dingin maichâm a siem a, pumraw thilhlân le inremna thilhlân a'n hlàn a. Chuongchun, LALPA chu a ram chungah a lungawi a, Israel rama inthokin hri inlêng chu a'n kieng ta a.